﻿ማዝሙርያ.
66.
ዛማረቱዋ ካፖ የጸቴዳ ሳባ፥ ማዛሙርያ ሳኣን አሳ ኡባዉ፥ ህንተ ቃላ ꬎቂሲደ፥ ናሸቻን ጾሳ ጋላትተ። 
“ጾሳ ሱንꬃይ ቦንቼቶ!” ጊደ የጽተ፤ ቦንቾ ጋላታ አዉ እምተ። 
ጾሳዉ ሀዋዳን ያግተ፤ “ነ ኦሶቱ ዋን ማላልስያዋንቴ! ነ ዎልቃይ ዳሬዳ ድራዉ፥ ነ ሞርከቱ ያሻዉ ነ ስንꬃን ኮኮሪኖ። 
ሳኣን ደእያ ኡባቱ ነዉ ጎይኒኖ፤ ኔና ሳቢኖ፤ ነ ሱንꬃዉ ጋላታ የጺኖ” ያግተ። 
ሃይተ፤ ጾሳይ ኦꬄዳዋ በእተ፤ እ አሳ ግዶን ማላልስያ ኦሱዋ ኦꬄዳ። 
እ አባ ሃꬃ ሻኬዳ፤ ቃይ በን ኑ አዎቱ ዮርዳኖሳ ሻፋ፥ ባረንቱ ገድያን ሀመቲደ፥ መላ ቢታን ፕኔድኖ። ሄዋን እ ኦꬄዳባን ኑን ናሸቴዶ። 
እ ባረ ዎልቃን መꬍናዉ ሞዴ። ካዉተꬃቱዋ ባረ አይፍያን ጼሌ፤ ሄዋ ድራዉ፥ ማካልያዋንቱ አ ቦላ ደንዶፕኖ። 
አሳቶ፥ ኑ ጾሳ ጋላትተ፤ ህንተ አ ጋላትያ ጋላታይ ስሰቶ። 
እ ኑና ፓጻ ዎꬄዳ፤ ኑን ኩንደናዳን ናጌዳ። 
አቤት ጾሳዉ፥ ኔን ኑና ፓጫዳ፤ ብራ ጌሻናዉ ታማን ፓጭያዋዳን፥ ኑና ጌሻዳ። 
ኔን ኑና ጲርያን ገልሳዳ። ኑ ዞኩዋንካ ዴጾባ ቶሳዳ። 
ሞርከቱ ኑ ሁጲያን ቶጋናዳን ኦꬃዳ። ኑን ሃꬃ ግዱዋናነ ታማ ግዱዋና አꬌዶ፤ ሽን ሀእ ኑና እሻልያ ሳ አሃዳ። 
ታን ጹግያ ያርሹዋና ነ ጎልያ ገላደ፥ ታ ቃንግያ ነዉ ጋꬃና። 
ታን መቶቴዳ ዎደ፥ ታ ዶናን ሺቀቴዳ ቃንግያ፥ ታ እንጻርሳፐ ከሴዳዋ፥ ታን ጋꬃና። 
ታን ነዉ ጹጊደ ያርሽያ፥ ዶርሳ ኦርገቱዋ ሺሻና። ኮሩማ ቦራቱዋነ ዴሻ ኦርገቱዋ ነዉ ያርሻና፤ ሄ ያርሾቱዋ ጩዋይ ሳሉዋ ጋካና። 
ህንተኖ፥ ጾሳዉ ያይያዋንቶ፥ ኡባቱ ሃ ዪደ፥ ስስተ። ጾሳይ ታዉ ኦꬄዳዋ ታን ህንተዉ ኦዳና። 
ታ ቃላ ꬎቁ ኦꬃደ ታን ጾሳ ዎሳድ፤ ታ እንጻርሳን አዉ ጋላታ ሺሻድ። 
ታን ታ ዎዛናን ናጋራ ገንꬄደንቶ፥ ጎዳይ ታና ስሰና። 
ሽን ጾሳይ ቱሙዋፐ ታና ስሴዳ፤ ታ ዎሳካ ሀይዜዳ። 
ጾሳይ ታ ዎሳ እጽቤና ድራዉ፥ ቃይ አገና ባረ ሲቁዋ ታዉ ድግቤና ድራዉ፥ ጋላቴቶ። 
