﻿ማዝሙርያ.
63.
ይሁዳ ባዙዋን ደእያ ዎደ ዳዊታ ማዛሙርያ አቤት ጾሳዉ፥ ኔን ታ ጾሳ፤ ታ ዎዛናይ ኔና ላሞቴ፤ ታ አሹካ ኔና አሞቴ። መል ዛኤዳ፥ ሃꬅ ባይና ቢታዳን ታ ኩመንꬃ አሳተꬃይ ኔና ሳመቴ። 
ታን ኔና ጌሻ ሳኣን በኣድ፤ ነ ዎልቃካ ነ ቦንቹዋካ ታን በኣድ። 
አገና ነ ሲቁ ደኡዋፐ ሎእያ ድራዉ፥ ታ እንጻርሳይ ኔና ቦንቻና። 
ታ ደኡዋ ላይꬃን ታን ኔና ጋላታና፤ ነ ሱንꬃን ታ ኩሽያ ፑደ ምጫና። 
አሳይ ሎኦ ቁማ ካልያዋዳን፥ ታ ሸምፓታ ኔናን ካላና። ታን ታ እንጻርሳን ናሸቻ የꬃን ኔና ጋላታና። 
ታን ታ ግሱዋን ኔና ሀሳያይ፤ ቃማ ኡባን ነባ ቆፓይ፤ 
አያዉ ጎፐ፥ ኔን ታና ማዴዳዋ። ታን ነ ቀፍያ ኩዋን ኡታደ፥ ናሸቻዉ የጻይ። 
ታን ነ ማታ ሺቃ ኡታይ፤ ነ ኡሸቻ ኩሺ ታና ኦይቂደ ናጌ። 
ሽን ታና ዎꬋና ኮይያዋንቱ፥ ቢታ ጋርሳ ጪሞ ሳኣን ሞገታና። 
ኡንቱንቱ ማሻዉ አꬊደ እመታና፤ ኡንቱንቱ ባባርቂያ ካተ ግዳና። 
ሽን ካቲ ጾሳን ናሸታና። ጾሳ ሱንꬃን ጫቂያ ኡባይ አ ጋላታና፤ ሽን ዎርዱዋ ሃሳይያዋንቱ ዶናይ ጎርደታና። 
