﻿ማዝሙርያ.
56.
ዛማረቱዋ ካፖ የጸቴዳ፥ ፕልስጼማ አሳቱ አ ጋተ ግያ ካታማን ኦሞዴዳ ዎደ፥ ዳዊታ ማዝሙርያ። ሃኮ ሳን ዎላ ቦላን ኡቴዳ ዶጎማትስ ጌተቲደ ሱሱልያን የጸቴዳ ማዝሙርያ። አቤት ጾሳዉ፥ አሳቱ ታና የደርስያ ድራዉነ ጋላሳ ኡባንካ ታ ሞርከቱ ታና ኡንኤꬄዳ ድራዉ፥ ታዉ ቃረታ። 
ታ ሞርከቱ ጋላሳ ኡባን ታና የደርሲኖ፤ ጮራቱ ኦቶሩዋን ታና ኡንኤꬂኖ። 
ታን ያዬዳ ዎደ፥ ኔናን አማነታይ። 
ታን ጾሳን አማነታይ፤ ታን አ ቃላ ጋላትያ ጾሳን አማነታይነ ያይከ። አሳይ ታና አያ ኦꬃኔ? 
ጋላሳ ኡባን ታ ሞርከቱ፥ ታዉ መቱዋ መꬊኖ፤ ኡንቱንቱ ኡባ ገደ ታዉ ኢታባ ቆፒኖ። 
ኡንቱንቱ ታ ቦላ ማቀቲኖ፤ ኩኩሊደ ዎቺኖነ ታ ኦግያ ናጊኖ፤ ታና ዎꬋናዉ ኮዪኖ። 
ኡንቱንቱ ኢታተꬃ ድራዉ፥ ኡንቱንታ የዶፓ፤ ነ ሀንቁዋን ሄ አሳቱዋ ዝቂ ኦꬃ። 
ኔን ታን ቶይላካቶዋ ፓይዳዳ። ታን ዎይሳ አፎꬃ ጉሳድታንቶ፥ ኔን ኤራሳ። ኡንቱንቱ ነ ማዝጎብያን ደእክኖ? 
ታን ኔና ጼስያ ዎደ፥ ታ ሞርከቱ ጉየ ስማና። ጾሳይ ታ ባጋ ግድያዋ ታን ኤራይ። 
ታን አ ቃላ ጋላትያ ጾሳይ፥ ታን አ ቃላ ጋላትያ መꬍና ጎዳ፥ 
ታን ሄ ጾሳን አማነታይ፤ ያይከ። አሳይ ታና አይ ኦꬃኔ? 
አቤት ጾሳዉ፥ ታን፥ ነዉ ሺቀቴዳዋ ኦꬃና፤ ሄዋ ጋላታ ያርሹዋ ታን ነዉ እማና። 
አያዉ ጎፐ፥ ኔን ታና ሀይቁዋፐ፥ ታ ገድያ ኩንደꬃፐ አሻዳ። ሄዋ ድራዉ፥ እ ፓጻ ደእያዋንቱ ቦላን ፖእስያ ፖኡዋን ጾሳ ስንꬃን ታን ሀመታይ። 
