﻿ማዝሙርያ.
50.
አሳፋ ማዛሙርያ ዎልቃማ ጾሳይ፥ መꬍና ጎዳይ ሃሳዬ። አዋይ ዶልያሳፐ ዉልያሳ ጋካናዉ ሳኣን ደእያ አሳ ጼሴ። 
ፑላይ ኩመንꬃ ሎአ ግድያ ጽዮነፐ ጾሳይ ፖኤ። 
ኑ ጾሳይ ያና፤ ጮኡ ጌና። ኤጽያ ታማይ አ ስንꬃና፤ ዎልቃማ ጎቲ አ ዩሹዋና። 
ጾሳይ ባረ አሳ ፕርዲደ፥ ሳሎቱዋነ ሳኣ ጼሴ። 
“ያርሹዋ ያርሽያዋን፥ ታናና ጫቀቴዳ ጾሳ አሳቱዋ፥ ታኮ ሺሽተ” ያጌዳ። 
ጾሳይ ፕርድያዋ ግድያ ድራዉ፥ ሳሎቱ አ ጽሎተꬃ ኦዲኖ። 
“ታ አሳዉ፥ ስሳ! ታን ነዉ ኦዳይ። እስራኤልያ አሳዉ፥ ታን ነ ቦላ ማርካታይ። ታን ጾሳ፥ ነ ጾሳ። 
ነ ያርሹዋ ድራዉነ ኔን ኡባ ገደ ሺሽያ ጹግያ ያርሹዋ ድራዉ፥ ታን ኔና ሴርከ። 
ሄዋዳንካ፥ ነ ድርሳፐ ኮሩማቱዋ፥ ዎይ ነ ስኩዋፐ ዴሻቱዋ አካናዉ ኮይከ። 
አያዉ ጎፐ፥ ዎራን ደእያ ዶአቱ ኡባቱ ታዋንታ፤ ሻኡ ደርያ ቦላን ደእያ መሄቱካ ታዋንታ። 
ታን ꬎቃ ደርያን ደእያ ካፎቱዋ ኡባ ኤራይ፤ ደምባን ደእያ መተꬃቱ ታዋንታ። 
ታና ኮሽንቶነ፥ ታን ነዉ ኦድከ: አያዉ ጎፐ፥ ሳአይነ ሳኣን ኩሜዳዌ ኡባይ ታዋ። 
ታን ኮሩማቱዋ አሹዋ ማይታ? ዎይ ዴሻቱዋ ሱꬃ ኡሻይታ? 
ሄዋ ድራዉ፥ ጾሳዉ፥ ኔን እምያ ያርሹ ጋላታ ግዶ፤ ኡባፐ ꬎቂያ ጾሳዉ ነ ቃንገꬃ ጋꬃ። 
ያታደ፥ መቱዋ ጋላስ ታና ጼሳ። ታን ኔና አሻና፤ ኔንካ ታና ቦንቻና” ያጌ። 
ሽን ጾሳይ ኢታ አሳ ሀዋዳን ያጌ፤ ታ ህግያ ኔን ዛራ ዛራደ አያዉ ኦዳይ? ዎይ ታ ጫቁዋ ነ ዶናን አያዉ ሃሳያይ? 
ኔን ታ ትምርትያ እጻዳ፤ ታ ቃላካ ሀይꬃ ቦላና አꬃዳ። 
ኔን ካይሱዋ በኤዳ ዎደ፥ አናና ዳቦታዳ፤ ሻርሙጽያዋንቱ ማባራን ገላዳ። 
ኔን ነ ዶና ኢታባ ሃሳያናዉ ብላ የዳሳ። ነ እንጻርሳይካ ዎርዱዋ ሃሳያ ሜዘቴዳ። 
ነ ኡቴዳሳን ነ እሻ ኢሳደ ሃሳያዳ፤ ነ አት ናኣ ዝግራሳ። 
ኔን ሀዋ ኡባ ኦꬅያ ዎደ፥ ታን ጮኡ ጌዳ ድራዉ፥ ታናካ ነ ማላ ጋደ ቆፓዳ። ሽን ሀእ ታን ኔና ሴራይነ ነ ባላ ነ ስንꬃን ፓይዳይ። 
“ህንተኖ፥ ጾሳ ዶግያዋንቶ፥ ሀዋ አኬክተ። ሄዌ ꬋዮፐ፥ ታን ህንተና መንሬꬃና፤ ሄ ዎደ ህንተና አሽያዌ ባዋ። 
ታዉ ጋላታ እምያ አሳይ ታና ቦንቼ። ባረ ኦግያ ሱርስያ አሳ ታን ጾሳ አቶተꬃ በሳና” ያጌ። 
