﻿ማዝሙርያ.
44.
ዛማረቱዋ ካፖ የጸቴዳ፥ ቆረ ናናቱዋ አኬካ ግንጹዋ አቤት ጾሳዉ፥ አꬌዳ ዎድያን፥ ኔን ኦꬄዳዋ ኑን ኑ ሀይꬃን ስሴዶ፥ ኑ አዎቱዋ ዎድያንካ ነ ኦꬄዳዋ ኑዉ ኦዴድኖ። 
ካዉተꬃቱዋ ኔን ነ ኩሽያን ላጋደ ከሳዳ፤ ኑ አዎቱዋ ኡንቱንቱ ቢታን ቶካናዉ፤ ሀራ ካዉተꬃቱዋ ሙራዳ፤ ሽን ነ አሳቱዋ አሳዳ። 
ኡንቱንቱ ባረንቱ ማሻን ኦሊደ፥ ሄ ቢታ ከስበይክኖ፤ ኡንቱንቱ ባረንቱ ኩሽያ ምኖተꬃን ጾንበይክኖ። ሽን ኔን ኡንቱንታ ሲቄዳ ድራዉ፥ ኡንቱንቱ ነ ኡሸቻ ኩሽያ፥ ነ ቀስያነ ነ ስንꬃ ፖኡዋ ዎልቃን ጾኔድኖ። 
ያቆባ አሳዉ ጾኑዋ አዛዝያ፥ ታ ካቲነ ታ ጾሳይ ኔና። 
ኔናን ግዲደ፥ ኑ ሞርከቱዋ ኑን ሱግ ኦላና፤ ነ ሱንꬃን ኑ ኤቀትያዋንታ ኑን የꬋና። 
ታን ታ ቶራን አማነትከ፤ ታ ማሻይካ ታና አሸና። 
ሽን ኔን ኑና ኑ ሞርከቱዋፐ አሻዳ፤ ቃይ ኑና እጽያዋንታ ኔን ካዉሻዳ። 
ኑን ኡባ ዎደ ጾሳን ጬቀቴቶ፤ ነ ሱንꬃዉ መꬍናዉ ጋላታ እማና። 
ሽን ሀእ ኔን ኑና አጋዳ፤ ካዉሻዳ፤ ኑ ቶራ አሳና እትፐ ኦላ ባካ። 
ኑ ሞርከቱዋ ስንꬃፐ ኑና ባቃትሳዳ፤ ኑ ኤቀትያዋንቱ ኑባ ቦንቄድኖ። 
ኔን ኑና ዶርሳቱዋዳን ሹካዉ አꬃደ እማዳ፤ ቃይ ካዉተꬃቱዋ ግዶን ኑና ላላዳ። 
ኔን ነ አሳ ህራይሱዋን ዛልኣዳ፤ አያ ዎꬍያነ ደማበይካ። 
ኔን ኑና ኑ ሾሮቱ ቦርያዋ፥ ቃይ ኑ ሄራን ደእያዋንቱ ቅሊጭያዋነ ሚጭያዋ ኦꬃዳ። 
ኔን ኑና ካዉተꬃቱዋ ግዶን ቶሳ ከሳዳ፤ ኑና ኡንቱንቱ ባረንቱ ሁጲያ ቃꬅ ቃꬅ ቅꬍያዋ ኦꬃዳ። 
ታን ጋላሳ ኩመንꬃን ቶሸታድ። ታ ሶምእያ ዬላይ ካሜዳ። 
ታና ሸቂያዋንቱነ ቦርያዋንቱ ጋሱዋን፥ ታና ሞርክያዋንቱነ ማንድያዋንቱ ጋሱዋና። 
ኑን ኔና ዶግቤናዋ ግዶፐካ፥ ዎይ ነ ጫቁዋ መንꬅቤናዋ ግዶፐካ፥ ሀዌ ኡባይ ኑ ቦላ ሀኔዳ። 
ኑ ዎዛናይ ኔፐ ጉየ ስምቤና፤ ኑ ገዲ ነ ኦግያፐ ጋጻ ከስቤና። 
ሽን ኔን ኑና መንሬꬃደ ዶኣ ግዶን የጋዳ፤ ꬍጵ ጎ ꬉማን ካማዳ። 
ኑ ጾሳ ሱንꬃ ኑን ዶጌደንቶ፥ ሀራ ጾሳ ዎሳናዉ ኑን ኑ ኩሽያ ምጬደንቶ፥ 
ዎዛናን ጌሜዳ ጹራ ጾሳይ ኤርያ ድራዉ፥ እ ሀዋ ብዲደ ደመኔ? 
ሽን ነ ድራዉ፥ ጋላሳ ኡባን ኑና ዎꬊኖ፤ ሹካናዉ አፍያ ዶርሳዳን ፓይደቴዶ። 
አቤት መꬍና ጎዳዉ፥ ደንዳ! አያዉ ገምእሻይ? ቤጎታ! መꬍናዉ ኑና አጎፓ። 
ነ ሶምኡዋ ኑፐ አያዉ ገንꬃይ? ኑ ቆሁዋነ ኑ ኡንኣ አያዉ ዶጋይ? 
ኑን ባናን ዱገ ኦለቴዶ፤ ኑ አሳተꬃይካ ቢታና ኦይቀቴዳ። 
አቤት ጾሳዉ፥ ደንዳ! ኑና ማዳ! አገና ነ ሲቁዋ ድራዉ፥ ኑና ዎዛ። 
