﻿ማዝሙርያ.
38.
ዳዊታ ሀሳይስያዋ ማዛሙርያ አቤት መꬍና ጎዳዉ፥ ነ ሀንቁዋን ታና ሴሮፓ፤ ነ ይሉዋን ታና ሙሮፓ። 
ነ ዎንዳፍያ ፖꬃይ ታና ጫድ ድጌድኖ፤ ነ ኩሺካ ታና ናቂ ኦይቄዳ። 
ኔን ላንጬዳ ድራዉ፥ ታ ቦላይ ፓጻ ግደና፤ ታ ናጋራ ድራዉ፥ ታ አሳተꬃይ ሳራ ግደና። 
ታ ኢታተꬃይ ድኡዋዳን ታና ሙኬዳ፤ ደንደና ዎልቃማ ቶኩዋዳን ታዉ ዴጼዳ። 
ታን ናጋራ ኦꬄዳ ኤያተꬃ ድራዉ፥ ታ ማዱꬃይ ጊሻ ኦይቂደ ጽንቄዳ። 
ታን ሆካድነ ቁናድ። ጋላሳ ኩመንꬃ ዬካደ ፔሻድ። 
ታ አሹዋ ምሹ ጹጌ፤ ታ ቦላይ ፓጻ ግደና። 
ታን ዳቡራድነ ንፕ ጋድ፤ ታ ዎዛናይ ድድቅያ ድራዉ ኦላይ። 
አቤት ጾሳዉ፥ ታ አሙ ኡባይ ነዉ ኤረቴ፤ ታን ኦልያዌ ኔፐ ጌምቤና። 
ታ ዎዛና አይፍያን ድድቄ፤ ታ ዎልቃይ እጽና፤ ታ አይፊካ ጼላ እጼዳ። 
ታ ማይꬃ ድራዉ፥ ታ ሾሮቱካ ታ ላገቱካ ሃኩዋን ኤቄድኖ። ታ ዳቦቱካ ታፐ ሃኬድኖ። 
ታና ዎꬋናዉ ኮይያዋንቱ፥ ባረንቱ ጲርያ ታዉ የጊኖ። ታና ቆሀናዉ ኮይያዋንቱ፥ “ኤቃሻ፤ ኑን ኔና ደማና” ያጊደ፥ ማንዲኖነ ጋላሳ ኩመንꬃ ታ ቦላ ያኢኖ። 
ሄ ዎደ ታን ቱለ አሳ ማላ፥ ስስከ፤ ታን ዱደ አሳ ማላ፥ ዶናነ ፖክከ። 
ኤ፥ ታን ስሰናነ ዶናይ ዛረና አሳ ማላ። 
ሽን አቤት መꬍና ጎዳዉ፥ ታን ኔናን ህዶታ ኦꬃይ። አቤት መꬍና ጎዳዉ፥ ታ ጾሳዉ፥ ኔን ታዉ ዛሩዋ እማና። 
ታን ጾሳ፥ “ታ ገዲ ꬉበትና፥ ኡንቱንቱ፥ ‘አዉ ሀሹ’ ጋናዳንነ ታ ቦላ ጬቀታናዳን ኦꬆፓ” ያጋይ። 
ታን ኩንዳና ሀናይ፤ ታ ሳኩካ ታና የደናን እጼዳ። 
ታን ታ ኢታ ኦሱዋ ፓጻይ፤ ታን ታ ናጋራ ጋሱዋን ካዮታይ። 
ታ ሞርከቱ ጎባነ ዎልቃማ፤ ታና ጮ እጽያዋንቱ ጮራ። 
ታን ሎኦባ ኦꬅና፥ ታዉ ኢታ ዛርያ አሳቱ፥ ታን ሎኦባ ካልያ ድራዉ፥ ታና ኤቀቲኖ። 
አቤት መꬍና ጎዳዉ፥ ታና የጎፓ። አቤት ታ ጾሳዉ፥ ታፐ ኔን ሃኮፓ። 
አቤት መꬍና ጎዳዉ፥ ታና አሽያዎ፥ ታና ማዳናዉ ኤሌላ። 
