﻿ማዝሙርያ.
35.
ዳዊታ ማዝሙርያ አቤት መꬍና ጎዳዉ፥ ታናና ኤቀትያዋንቱና ኔን ኤቀታ፤ ታናና ኦለትያዋንቱና ኔን ኦለታ። 
ጎንዳልያነ ሀራ ኦላ ሚሻ ኦይቃደ፥ ታና ማዳናዉ ደንዳ። 
ታና የደርስያዋንቱ ቦላን ነ ቶራነ ማሻ ደንꬃ። ታና፥ “ታን ኔና አሽያዋ” ያጋ። 
ታ ሸምፑዋ ዎꬋናዉ ኮይያዋንቱ፥ ዬላትኖነ ካዉሽኖ፤ ታ ቦላ ኢታባ ማቀትያዋንቱ ካዉሺደ ጉየ ስምኖ። 
መꬍና ጎዳ ኪታንቻይ ኡንቱንታ የደርስያ ዎደ፥ ኡንቱንቱ ጫርኩዋ ስንꬃን ደእያ ሱላዳን ሀንኖ። 
መꬍና ጎዳ ኪታንቻይ፥ ኡንቱንታ ደቻና ሀንያ ዎደ፥ ኡንቱንቱ ኦጊ ꬉማነ ሀልꬃ ግዶ። 
ጮ ታና ኦይቃናዉ ባረንቱ ጲርያ ዎꬄድኖ፤ ቃይካ ጮ ታና ኩንድሳናዉ ኦላ ቦኬድኖ። 
ኤረናን ደእሺና፥ ኡንቱንቱ ቦላን ባሻይ ፑቱ ጎ። ኡንቱንቱ ዎꬄዳ ጲሪ ኡንቱንታ ኦይቆ፤ ኡንቱንቱ ባሻ ኦላን ኩንድኖ። 
ሄ ዎደ ታን መꬍና ጎዳን ናሸታና፤ እ አሼዳ ድራዉ፥ ታን ናሸቻ ኖጩ ጋና። 
ታ ኩመንꬃ አሳተꬃይ ኔና፥ “አቤት መꬍና ጎዳዉ፥ ነ ማል ኦኔ? ህዬሳ ዎልቃማ ኩሽያፐ ዎꬃ አካሳ። ህዬሳነ መቶታንቻ ቦንቂ ምያዋንቱ ኩሽያፐ አሻሳ” ያጋና። 
ዎርዱዋ ማርካትያዋንቱ ታ ቦላ ደንዲኖ። ታን ኤረናባን ታና ሞቲኖ። 
ታን ሎኡዋ ኦꬄዳዋ ኩሽያ ኢታ ዛሪኖ፤ ያትና፥ ታን ታረካ አታድ። 
ሽን ታን ኡንቱንቱ ሀርጌዳ ዎደ፥ ማቃ ማያድ፤ ታ አሳተꬃ ጾማን ዳቡርሳድ። ታ ዎሳይ ዛሩዋ ደመናን አቴዳ። 
ታ ሁጲያ ዝቂ ኦꬃደ፥ ታ ዳቦ፥ ዎይ ታ እሻዉ ዬክያዋዳን ዬካድ። እት አሳይ ባረ አትዉ ካዮትያዋዳን ታ ሁጲያ ኦይቃደ፥ ዬካደ ሀመታድ። 
ሽን ኡንቱንቱ ታን ꬉበቴዳዋን ናሸቲደ፥ ታ ቦላ ሺቄድኖ። ታን ኤረና ጋሱዋን ታና ዋꬊደ፥ አጉዋ እጼድኖ። 
ኢታ አሳይ ቅሊጭያዋዳን ኡንቱንቱ ታና ቅሊጪኖ፤ ኡንቱንቱ ይሎቲደ፥ ባረንቱ አቻ ጋርጬድኖ። 
አቤት ጾሳዉ፥ ኔን አዉደ ጋካናዉ ጮኡ ጋደ ጼላይ? ኡንቱንቱ ኢታ ኦሱዋፐ ታና አሻ፤ ሀ ጋሞቱዋ ማላ አሳቱዋፐ ታ አልኦ ሸምፑዋ አሻ። 
ሄ ዎደ ግታ ሺቁዋን ታን ነዉ ጋላታ እማና፤ ጮራ አሳ ሺቁዋን ታን ኔና ሳባና። 
ጋሱ ባይናን ታና ሞርክያዋንቱ ናሸቶፕኖ፤ ታና ጮ እጽያዋንቱ ታ ቦላ ስምኤቶፕኖ። 
ኡንቱንቱ ሳሮባ ሃሳይያዋ አጊደ፥ ቢታን ጮኡ ጊደ ደእያ አሳቱዋ ቦላን ዎርዱዋ መꬊደ ሃሳዪኖ። 
ኡንቱንቱ ባረንቱ እንጻርሳ ታ ቦላ ቃራዪደ፥ “ኤ፥ ኤ፥ ኔን ኦꬄዳዋ ኑን ኑ አይፍያን በኤዶ” ያጊኖ። 
አቤት መꬍና ጎዳዉ፥ ኔን ሀዋ በኣደ፤ ጮኡ ጎፓ። አቤት ጾሳዉ፥ ኔን ታፐ ሃኮፓ። 
አቤት ታ ጎዳዉ፥ ታ ጾሳዉ፥ ታ ድራዉ ደንዳ፤ ቤጎታ ታ ዶና ግዳደ ሞተታ። 
አቤት መꬍና ጎዳዉ፥ ታ ጾሳዉ፥ ነ ጽሎተꬃን ታና ሻትንꬃ፤ ታ ሞርከቱዋ ናሸቾፓ። 
ኡንቱንቱ ባረንቶ፥ “ሀሹ፥ ሀሹ፥ ኑን ኑ ዎዛናን አሞቴዳዋ ጋꬄዶ። ኑን አ ምቴዶ” ጋናዳን ኦꬆፓ። 
ታ ዋይያን ናሸትያዋንቱ ኡባይ ዬላትኖነ ካዉሽኖ። ታ ቦላን ኦቶረትያዋንቱ ዬላነ ካዉሻ ማይኖ። 
ታን ሻትምያዋ ዶስያዋንቱ ናሸቲደ፥ “ሀሹ!” ጊኖ። ኡንቱንቱ ኡባ ገደ፥ “ባረ ቆማ ሳሮተꬃን ናሸትያ መꬍና ጎዳይ ግታቶ” ያግኖ። 
ጋላሳ ኩመንꬃን ታ እንጻርሳይ፥ ነ ጽሎተꬃባነ ነ ጋላታባ ኦዳና። 
