﻿ማዝሙርያ.
33.
ህንተኖ፥ ጽሎቶ መꬍና ጎዳዉ ናሸቻን የጽተ፤ ሱረ አሳቱ አ ጋላታናዉ በሴ። 
ማስንቁዋ ዲጺደ፥ መꬍና ጎዳ ጋላትተ፤ ታሙ ባቀꬃን ዋጸቴዳ ዲꬃካ አዉ ዲጽተ። 
ኦራꬃ የꬃ የጽተ፤ ሎይꬅ ዲጺደ፥ ቃላ ꬎቂሲደ የጽተ። 
መꬍና ጎዳ ቃላይ ሱርያ፤ እ ኦꬅያ ኦሱዋ ኡባይ አማነትያዋ። 
መꬍና ጎዳይ ጽሎተꬃነ ቱሙ ፕርዳ ዶሴ፤ አገና አ ሲቁ ሳኣ ኩሜዳ። 
መꬍና ጎዳ ቃላን ሳሎቱ መቴድኖ። አ ዶናፐ ከስያ ሸምፑዋን ኡንቱንቱን ደእያ መታቱካ ኦሰቴድኖ። 
ዎልቃማ አባ ሃꬃ እ እትሳን ኤልሴዳ፤ ሄ ጪሞ ሃꬃ ምንጃ ሳን ዜሬዳ። 
ሳኣ ኡባይ መꬍና ጎዳ ያዮ፤ ሳኣን ደእያ አሳይ ኡባይ አ ቦንቾ። 
አያዉ ጎፐ፥ እ ሃሳይና ሀኔዳ፤ እ አዛዝና፥ ምኒደ ኤቄዳ። 
መꬍና ጎዳ ኤረና ካዉተꬃቱዋ ዞረታ ጾሳይ ላሌ፤ ኡንቱንቱ ሀልቹዋካ መላ ከሴ። 
መꬍና ጎዳ ሀልቹ መꬍናዉ ኤቂደ ደኤ፤ አ ዎዛና ቆፋይካ የለታ ኡባ ጋካናዉ ደኤ። 
ጾሳይ መꬍና ጎዳ ግዴዳ ካዉተꬃይ፥ እ ባረሳ ኦꬂደ ዶሬዳ አሳይ አንጀቴዳዋ። 
መꬍና ጎዳይ ሳሉዋና ዱገ ጼሊደ፥ አሳ ኡባ በኤ። 
ጾሳይ ባረ ደኢያሳፐ ሳኣን ደእያ ኡባ ጼሌ። 
እ ኡንቱንቱ ኡባ ዎዛና መꬌዳ፤ ኡንቱንቱ ኦꬅያዋ ኡባ ኤሬ። 
ካቲ ባረ ዎታዳራ ጮራተꬃን አተና፤ ኦላንቻይ ባረ ዎልቃ ምኖተꬃን ከስ አከና። 
ኦላ ፓራይ ጾንሳና ጊደ ናግያዌ መላ፤ እ ባረ ዎልቃ ምኖተꬃን አሻናዉ ዳንዳየና። 
መꬍና ጎዳ አይፈቱ አዉ ያይያነ አገና አ ሲቁዋን ህዶታ ኦꬅያ አሳቱዋ ቦላና። 
ሄዌነ፥ ኡንቱንታ ሀይቁዋፐ አሻናሳነ ኮሻ ዎድያን ፓጻ ዎꬃናሳ። 
ኑን መꬍና ጎዳን ህዶታ ኦꬄቶ፤ እ ኑና ማድያዋነ ኑ ጎንዳልያ። 
ኑን አ ጌሻ ሱንꬃን አማነትያ ድራዉ፥ ኑ ዎዛናይ አን ናሸቴ። 
አቤት መꬍና ጎዳዉ፥ ኑን ኔናን ህዶታ ኦꬅያዋዳን፥ አገና ነ ሲቁ ኑናና ግዶ። 
