﻿ማዝሙርያ.
28.
ዳዊታ ማዛሙርያ አቤት መꬍና ጎዳዉ፥ ታ ዛላዉ፥ ታን ኔና ጼሳይ፤ ታን ኔና ጼስና፥ ታዉ ስሳ እጾፓ። ነ ጮኡ ጎፐ፥ ታን ዱፉዋ ቤዳ አሳቱዋ ማላ ግዳይ። 
“ማዶ” ጋደ ታን ኔና ጼስያ ዎደነ ነ ኡባፐ ጌሻ ዱንካንያኮ ዛራደ፥ ታ ኩሽያ ምጭያ ዎደ፥ ኔን ታ ዋትዋቱዋ ስሳ። 
ኢታ ኦꬅያ ኢታ አሳቱዋና ታና ጋꬃደ ኦይቆፓ፤ ሄዋንቱ ባረንቱ ዎዛናን ኮባባ ቆፕ ኡቲደ፥ ባረንቱ ዶናን ባረንቱ ሾሩዋና ሳሮባ ሃሳይያዋንታ። 
ኡንቱንቱ ኦሱዋዳንነ ኡንቱንቱ ኦሱዋ ኢታተꬃዳን፥ ኡንቱንቶ ጭጋ፤ ኡንቱንቱ ኩሺ ኦꬄዳባዉ ኡንቱንቶ ዛራ። ኡንቱንቶ በስያ ኢታ ኡንቱንቶ ዛራ። 
ኡንቱንቱ ጾሳ ኦሱዋነ አ ኩሺ መꬌዳዋ ዶሰናን እጼዳ ድራዉ፥ ጾሳይ ኡንቱንታ ኮላና፤ ዛሪደ ኡንቱንታ ኡባካ ኬጸና። 
ታ ዋትዋቱዋ ስሴዳ ድራዉ፥ መꬍና ጎዳይ ጋላተቶ። 
መꬍና ጎዳይ ታዉ ዎልቃነ ጎንዳለ፤ ታ ዎዛናይ አን አማነቴ፤ ሄዋን ታን ማደታድ። ሄዋ ድራዉ፥ ታ ዎዛናይ አን ናሸቴ፤ ታን የꬃን አ ሳባና። 
መꬍና ጎዳይ ባረ አሳዉ ዎልቃ፤ እ ባረ ኦኬዳ ካትያ አሽያ ሚጻ። 
ጾሳዉ፥ ነ አሳ አሻ፤ ነዉ ግድያዋንታ አንጃ። ኡንቱንታ ሄምያዌ ኔና ግዳ፤ ኔን ኡንቱንታ መꬍናዉካ ቶካ። 
