﻿ማዝሙርያ.
21.
ዛማረቱዋ ካፖ የጸቴዳ፥ ዳዊታ ማዝሙርያ አቤት መꬍና ጎዳዉ፥ ካቲ ነ ምኖተꬃን ሀሹ ጌ፤ ኔን እሜዳ ጾኑዋን እ አያ ናሸቲ! 
ኔን አ ዎዛና አሙዋ አዉ እማዳ፤ ቃይ እ ኔና ባረ እንጻርሳን ኦቼዳዋ ድጋባካ። 
ኔን ሎኦ አንጁዋን አ ሞካሳ፤ ጌሻ ዎርቃ ካላቻ አ ሁጲያን ዎꬃሳ። 
ኔን ደኡዋ አዉ እማናዳን ኔና ዎሴዳ፤ አዉ ጮራ ላይꬃነ አዱሳ ደኡዋ እማዳ። 
ኔን ጾኑዋ እሜዳ ድራዉ፥ አ ቦንቹ ዳሬ፤ ግታተꬃነ አንጋ አዉ እማዳ። 
ኔን አዉ መꬍና አንጁዋ እማሳ፤ ኔን እትፐ ደእያዋን አ ናሸቻሳ። 
ካቲ መꬍና ጎዳን አማነቴ። ኡባፐ ꬎቂያ ጾሳ ሎኦተꬃ ድራዉ፥ እ ቃጸና። 
ነ ኩሺ ነ ሞርከቱዋ ኡባ ኩቱታና፤ ነ ኡሸቻይ ኔና እጽያዋንታ ደማና። 
ኔን ቆንጭያ ዎደ፥ ኡንቱንታ ጮጭያ ታማዳን ጹጋና። መꬍና ጎዳይ ባረ ሀንቁዋ ሱሉዋን ኡንቱንታ ምታና፤ አ ታማይካ ኡንቱንታ ም ꬋይሳና። 
ኔን ኡንቱንቱ ናናቱዋ ቢታፐ፥ ኡንቱንቱ ዘረꬃካ አሳ ግዶፐ ꬋይሳና። 
ነ ሞርከቱ ነ ቦላ ሺቅኖነ ኢታባ ማቀቲኖ፤ ሽን ፖልክኖ። 
አያዉ ጎፐ፥ ኔን ኡንቱንታ ነ ዎንዳፍያ ፖꬃን ዱካናዉ ባብሳና፤ ባብሳደ ጉየ ዛራደ ባቃትሳና። 
አቤት መꬍና ጎዳዉ፥ ነ ምኖተꬃን ꬎቁ ꬎቁ ጋ፤ ነ ዎልቃ ድራዉ ነዉ ጋላታ ማዝሙርያ የጼቶ። 
