﻿ማዝሙርያ.
16.
ዳዊታ ዎሳ አቤት ጾሳዉ፥ ታን ኔኮ ባቃቴዳ ድራዉ፥ ታና ናጋ። 
ታን መꬍና ጎዳዉ፥ “ኔን ታ ጎዳ፤ ኔፐ አትን፥ ሀራ ሎኡ ታዉ ባዋ” ያጋይ። 
ሳኣን ደእያ ጌሻቱ አይ ማላ ጋላተቴድኖ! ታ ናሸቻይ ኡባይ ኡንቱንቱና እትፐ ግድያዋ። 
ዎርዶ ጾሳቱዋ ካልያዋንቱ ባረንቱ ቦላ መቱዋ ዳርሲኖ። ሽን ታን ኡንቱንቱ ዎርዶ ጾሳቶ ያርሽከ፤ ታን ኡንቱንቱ ሱንꬃ ጼስከ። 
ታ መꬍና ጎዳዉ፥ ታ ደኡዋ ላታይነ ጹአይ ኔና፤ ታና ኮሽያ ኡባ ኔን ታዉ እማሳ። ታ ደኡዋ ሳማይ ኔና። 
ኔን ታዉ ዋꬌዳ ሳማይ አይ ኬሻ ሎኤ! ኤ ታ ላታይ ቱሙዋፐ ሎአ! 
ታና ዞርያ መꬍና ጎዳ ጋላታይ፤ ብላሄካ ታ ዎዛናይ ታና ሴሬ። 
ታን ኡባ ገደ መꬍና ጎዳ ታፐ ስንꬃያይ እ ታፐ ኡሸቻ ባጋና ደእያ ድራዉ፥ ታን ህርግከ። 
ሄዋ ድራዉ፥ ታ ዎዛናይ ናሸቴ፤ ታ ሸምፑካ ሀሹ ጌ። ታ ቦላይካ ህርግ ባይናን ደኤ። 
ታና ስኦልያዉ አꬃደ እማካ፤ ኔን ነ ጌሻ ሙስሳካ። 
ኔን ታና ደኡዋ ኦግያ በሳሳ። ታን ነ ማታን ደእና፥ ታ ናሸቻይ ፖለቴ፤ ነ ኡሸቻ ባጋና እንጂ መꬍናዉ ደኤ። 
