﻿ኢዮባ.
15.
ሄዋፐ ተማና ቢታፐ ዬዳ ኤልፋዝ ሀዋዳን ያጊደ ዛሬዳ፤ 
“አꬌዳ ኤራንቻ አሳይ ጫርኩዋዳን ኦይቀተናዋ ሃሳዪ? ዎይ ቆህያ ቆፋን ባረ ኡሉዋ ኩንꬃናዉ በሲ? 
ፓና ቃላን ዎይ ማደና ቃላን ሞቱዋ ሞተቲ? 
ሄዋ ግዶፐ፥ ኔን ጾሳዉ ያይያዋ አጋዳ፤ ሀራቱካ ጾሳዉ ጎይነናዳን ድጋሳ። 
ነ ኢታተꬃይ ነ ሃሳያን ኤረቴ፤ ሽን ነ ጭንጫ ሃሳያን ካማናዉ ባጸታሳ። 
ነ ቦላ ፕርድያዌ ነ ዶናፐ አትና፥ ታና ግድከ፤ ነ እንጻርሳይ ነ ቦላ ማርካቴ። 
“ኮይሮ አሳፐ ስንꬃ የለቴዳዌ ኔኔ? ዎይ ኔን ደረቱ መታናፐ ካሰ የለታዲ? 
ኔን ጾሳ ጹራ ሺቁዋ ስሳዲ? ዎይ አꬌዳ ኤራተꬃ ነ ጻላላይ ኤርያዋ ነዉ ማላቲ? 
ኑን ኤረናዋ ኔን ኤርያዌ አዬ? ኑዉ ገለናን አጊደ፥ ነዉ ገሌዳዌ አዬ? 
ነ አዉዋፐ ባይራትያ አሳቱ፥ ጭሚደ ፑሉሜዳ አሳቱ ኑ ግዶን ደኢኖ። 
“ጾሳይ ነዉ እሜዳ ምንꬁነ ኑን ነዉ አሽከተꬃን ሃሳዬዳ ቃላይ ጉጼዴ? 
ነ ዎዛናይ ኔና አያዉ ዎራ አፊ? ነ አይፊካ አያዉ ጼላ ደረቂ? 
ያታደ ኔን ጾሳ ቦላ ሀንቀታዳ፤ ሄዋ ማላ ቃላካ ነ ዶናፐ ከሳዳ። 
አሳይ ጾሳ ስንꬃን ጌሻ ግዳናዉ ዳንዳዪ? ዎይ ማጫ አሳፐ የለቴዳ አሳይ ጽሉዋ ግዳናዉ ዳንዳዪ? 
በአ፥ ጾሳይ ባረ ኪታንቻቱዋንካ አማነተና፤ ሀራይ አቶ ሳሎቱካ አ ስንꬃን ጌሻ ግድክኖ። 
ሽን ሀ ሸነይያነ ቱኔዳ አሳይ፥ ናጋራካ ሃꬃዳን ጋንያ አሳይ ዋን አማነታኔ! 
“ኢዮባ፥ አነ ስሳ! ነዉ ኦዳና፤ ታን በኤዳዋ ኡባ ነዉ ኦዳና። 
አꬌዳ ኤራንቻ አሳቱ ባረንቱ ማይዛ አዎቱዋፐ ደሜዳ ኤራተꬃ ገንናን ታና ታማርሴድኖ። 
ሀ ቢታይ ኡንቱንቱ ጻላላዉ እመቴዳ፤ ሀራ ቢታ አሳይ ኡንቱንቱ ዎዛና ጾሳፐ ዎራ ዛርቤና። 
“አሳ ኡቁኒደ ደእያ ኢታ አሳይ፥ ባረ ደኡዋ ላይꬃ ኡባን ቱግ አፐ ሻከተና። 
ኡባ ገደ ዳጋንꬅያ ኮሻይ አ ሀይꬃን ስሰቴ፤ እ ሳሮ ደአይ ጊሽና፥ ፓንጋቱ አ ቦላ ያና። 
ꬉማፐ ከስ አካናዋ እ አማነና፤ እ ማሻዉ ካጨቴዳ። 
አ አሃይ አንኮ ቁማ ግዳናዋ፤ ባረዉ ꬉማ ጋላሳይ ማታቴዳዋ እ ኤሬ። 
መቱነ ቱጋይ አ ያሽሳና፤ ኦላዉ ከሴዳ ካትያዳን አ ዳጋንꬃና። 
አያዉ ጎፐ፥ እ ባረ ኩሽያ ጾሳ ቦላ ደንꬄዳ፤ ኡባ ዳንዳይያ ጾሳ ቦላካ ጻሌዳ። 
ምኖነ ኦርዶ ጎንዳልያ ኦይቂደ፥ ጾሳ ቦላ ማካሌዳ። 
“አ ሶምኢ ሞꬌዳ ድራዉ፥ አ ጼሳይካ ቦቦርጬዳ ድራዉ፥ 
እ ላቲደ ደእያ ካታማቱካ ኦላን ላለቴዳ ድራዉነ እ ደእያ ጎላቱካ ኦንነ ደኤና ኦና ግዴዳ ድራዉ፥ 
እ ባረ ዱረተꬃን ዳሮ ጋምኤና፤ አ አቁካ አናና ጋምኤና፤ ቢታ ቦላንካ አከና። 
“ꬉማፐ እ ከስ አከና፤ አ ታሸቱዋ ላጩ መልሳና፤ አ ጪሻካ ጾሳ ጫርኩ ፕት ꬋይሳና። 
ባረካ ባረና ጭሚደ፥ ሀዳባን አማነቶፓ። እ አካናባይካ ሀዳባ። 
ዎዲ ጋከናን ሹልያነ መል ስሚደ፥ ላኤንꬆ አጫናዉ ዳንዳየና ምꬃ ማላ እ ግዳናዋ። 
ቴረናን ዉርጩዋና ቆቆፈትያ ዎይንያ ማላነ ጪሻይ ቆቆፈትያ ዎጋራ ማላ እ ግዳናዋ። 
ጾሳዉ ያየና አሳቶ ዛሪ ꬋያና፤ ማታይያን ኬጸቴዳ ጎልያካ ታማይ ማና። 
ኡንቱንቱ መቱዋ ሻሃሪደ፥ ኢታባ የሊኖ፤ ኡንቱንቱ ዎዛናንካ ጭሙ ኩም ኡቴዳ” ያጌዳ። 
