﻿ኢዮባ ማጻፋ.
1.
ኡጻ ግያ ቢታን ኢዮባ ግያ እት ብታኒ ደኤ፤ እ ቶሺ ባይናነ ሱረ አሳ፤ ጾሳዉ ያዪደ፥ ኢታባፐካ ሃኬዳ አሳ። 
አዉ ላፑን አቱማ ናናቱነ ሄዙ ማጫ ናናቱ የለቴድኖ። 
ማጹዋ ግዶፐ፥ አዉ ላፑን ሻኡ ዶርሳቱ፥ ሄዙ ሻኡ ጋሎቱ፥ እቼሹ ጼቱ ዋꬃ ቦራቱ፥ እቼሹ ጼቱ ማጫ ሀረቱነ ሎይꬅ ዳሮ ቆማቱ ደኢኖ። አዋይ ዶልያ ባጋና ደእያ አሳ ኡባፐ እ አꬌዳ ዱረ አሳ። 
አ አቱማ ናናቱ ባረንቱ ሶን ባረንቱ ሶን፥ ካል ካል ግብራ ጊግሲደ፥ ባረንቱ ሄዙ ምቼቱዋ ባረንቱና ማናዉነ ኡሻናዉ ጼሲኖ። 
ግብራ ጋላሳቱ ፖለቴዳ ዎደ፥ ኢዮብ ዎንታ ጉራና ደንዲደ፥ ባረ ናናቱዋ እቱዋ እቱዋ ሱንꬃን ጹግያ ያርሹዋ ያርሼ። እ ሄዋ ኦꬅያዌ፥ “ታ ናናቱ ባረንቱ ዎዛናን ጾሳ ሸቂደ፥ ናጋራ ኦꬄድኖንቶነ” ጊደ ህርጌዳ ድራሳ። እ ኡንቱንታ ጌሻናዉ ሄዋ ኡባ ገደ ኦꬄ። 
እት ጋላስ ጾሳ ኪታንቻቱ መꬍና ጎዳ ስንꬃን ቤታናዉ ዬድኖ፤ ሴጻናይካ ቃይ ኡንቱንቱና ዬዳ። 
መꬍና ጎዳይ ሴጻና፥ “ላ ኔን ሀቃፐ ያድ?” ያጌዳ። ሴጻናይ መꬍና ጎዳዉ፥ “ታን ሳኣን ኡባን ያነ ሃነ ዩይያሳፐነ ስመረትያሳፐ ያድ” ያጊደ ዛሬዳ። 
መꬍና ጎዳይ ሴጻና፥ “ያትና፥ ታ ቆማ ኢዮባ አኬካደ በኣድ? ሳኣ ቦላን አ ማላትያ ቶሺ ባይናነ ሱረ አሳይ ሙለካ ባዋ። እ ጾሳዉ ያይያ፥ ኢታባፐካ ሃኬዳ አሳ” ያጌዳ። 
ሴጻናይ፥ “ቱሙ ኢዮብ ነዉ ጮ ያዪ? 
አነ አ ሶ አሳነ አዉ ደእያዋ ኡባ ኔን ድራደ ናጋበይኪ? እ ኦꬅያ ኦሱዋ ኡባ ኔን አንጄዳ ድራዉ፥ አ መህያ ዉዲ ቢታ ኡባ ቦላን ዳሬዳ። 
ሽን ኔን ነ ኩሽያ የዳደ፥ አዉ ደእያ ማጹዋ ኡባ ሾጫንቶ፥ እ ኔና ቱሙ ነ ስንꬃን ሸቃና” ያጌዳ። 
መꬍና ጎዳይ ሴጻና፥ “ኤኖ፥ አዉ ደእያባይ ኡባይ ነ ኩሽያና። ሽን ኔን አ ቦቾፓ” ያጌዳ። ሄዋፐ ጉይያን፥ ሴጻናይ መꬍና ጎዳ ስንꬃፐ ከሲደ ቤዳ። 
እት ጋላስ ኢዮባ አቱማ ናናቱነ ማጫ ናናቱ ባረንቱ ባይራ እሻ ሶን ሚደነ ዎይንያ ኤሳ ኡሺደ ደኢኖ። 
ያትሽን እት ብታኒ ኢዮባኮ ዪደ፥ “ኑን ቦራቱዋ ዋጺደ ጎሽሽን፥ ሀረቱካ ኑ ማታን ማታ ሚደ ደእሺና፥ 
ሳባ ቢታ አሳቱ አኬከናን ዪደ፥ ኦላ ከሴድኖ፤ ያቲደ ኡባካ አክ ቤድኖ። ቃይ ቆማቱዋካ ቃራ ማሻን ቡሳኬድኖ። ያትና፥ ታ ጻላላይ አታደ፥ ሀ ሀኔዳዋ ነዉ ኦዳናዉ ያድ” ያጌዳ። 
እ ብሮ ሃሳይሽን፥ ሀራ ብታኒ ዪደ፥ “ጾሳ ታማይ ሳሉዋፐ ዎꬊደ፥ ዶርሳቱዋነ ዶርሳቱዋ ሄምያዋንታ ሜዳ። ያትና፥ ታ ጻላላይ አታደ፥ ሀ ሀኔዳዋ ነዉ ኦዳናዉ ያድ” ያጌዳ። 
እ ብሮ ሃሳይሽን፥ ሀራ ብታኒ ዪደ፥ “ካላዳዌቱዋ ቢታፐ ሄዙ ጩጉዋን ሻከቴዳ ፓናቱ ዪደ፥ ኑና ኦሊደ፥ ጋሉዋ ኡባ አክ ቤድኖ፤ ቆማቱዋካ ቃራ ማሻን ቡሳኬድኖ። ያትና፥ ታ ጻላላይ አታደ፥ ሀ ሀኔዳዋ ነዉ ኦዳናዉ ያድ” ያጌዳ። 
እ ብሮ ሃሳይሽን፥ ሀራ ብታኒ ዪደ፥ “ነ አቱማ ናናቱነ ማጫ ናናቱ ባረንቱ ባይራ እሻ ሶን ሚደነ ዎይንያ ኤሳ ኡሺደ ደእሺና፥ 
ዎልቃማ ጎቲ አኬከናን ባዙዋፐ ደንዲደ፥ ጎልያ ኡባና ሾጬዳ። ጎሊ ኡንቱንቱ ቦላ ኩንድና፥ ናናቱ ሀይቄድኖ። ያትና፥ ታ ጻላላይ አታደ፥ ሀ ሀኔዳዋ ነዉ ኦዳናዉ ያድ” ያጌዳ። 
ሄዋፐ ጉይያን፥ ኢዮብ ደንዲደ፥ ካዮ ባረ ማዩዋ ፔꬊደ፤ ባረ ሁጲያካ ሜደቴዳ። ቢታን ጉፋኒደ ጾሳዉ ጎይኒደ፥ 
ሀዋዳን ያጌዳ፤ “ታን ታ አት ኡሉዋፐ ካሎ የለታድ፤ ሀይቂያ ዎደካ ታን አካደ ብያባይ ባዋ። መꬍና ጎዳይ እሜዳ፤ መꬍና ጎዳይ ዛሪደ አኬዳ። መꬍና ጎዳ ሱንꬃይ ጋላተቶ” ያጌዳ። 
ሀ ኡባንካ ኢዮብ ናጋራ ኦꬅቤና፤ ጾሳ አማሳልቤና። 
