﻿ናህምያ ማጻፋ.
1.
ሀካልያ ናኣ ናህምያ ቃላይ ሀዋ። አርጸክስስ ፓርሰ ቢታን ካዉቶደፐ ላታማንꬆ ላይꬃን፥ ክስሌዋ ጌተትያ አግናን፥ ታን ናህሚ ዋና ካታማ ግዴዳ ሱሳን ደአይ። 
ታ እሻቱዋፐ እቱ፥ ሀናና ጎሳይ ሀራ አሳቱዋና እትፐ ግዲደ፥ ይሁዳፐ ታኮ ዬዳ፤ ታን ኦሞዱዋ ብቤናዋንቱባነ የሩሳላመባ ኡንቱንታ ኦቻድ። 
ኡንቱንቱ ዛሪደ፥ “ኦሞዱዋን ብቤናዋንቱነ ደኡዋን ደእያዋንቱ ዎልቃማ መቱዋንነ ዬላ ግዶን ደኢኖ። የሩሳላመ ግምቢያ ድርሳይ ኮለቴዳ፤ ቃይ ግምቢያ ድርሳ ፐንገቱካ ታማን ጹገቴድኖ” ያጌድኖ። 
ታን ሀዋ ኡባ ስሴዳ ዎደ ኡታደ ዬካድ። ዳሮ ጋላሳ ካዮታ ጾማደ፥ ሳሉዋ ጾሳ፥ ሀዋዳን ያጋደ ዎሳድ፤ 
“መꬍና ጎዳዉ፥ ሳሉዋ ጾሳዉ፥ ዎልቃማዉነ ቦንቼቴዳ ጾሳዉ፥ ዶስያዋንቶነ ነ አዛዙዋ ናግያዋንቶ ነ አገና ሲቁዋ ጫቁዋ ናግያ ጾሳዉ፥ 
ታን ነ ቆማይ ቃይ ነ ቆማቱዋ ግዴዳ እስራኤልያ አሳ ድራዉ ቃማነ ጋላስ ኔና ዎስያ ዎሳ ነ ሀይꬃይ ስሶ፤ ነ አይፊካ ዱገ ታኮ ጼሎ። ኑን እስራኤልያ አሳይ ኦꬄዳ ናጋራ ኡባ ነዉ ፓጻይ፤ ቱሙካ ታንነ ታ ማይዛ አዎቱ ኔና ናቄዶ። 
ኑን ነ ቦላን ሎይꬅ ኢታ ናጋራ ኦꬄዶ፤ ኔን ነ ቆማ ሙሴ ባጋና ኑ እሜዳ አዛዙዋ፥ ዎጋነ ህግያ ናግበይኮ። 
ነ ቆማ ሙሴዉ ኔን ሀዋዳን ያጋደ ኦዴዳ ቃላ ሀያና ቆፓ፤ ‘ህንተኖ፥ እስራኤልያ አሳቶ፥ ህንተንቱ ታዉ አማነተናን እጾፐ፥ ታን ህንተንታ አይሁዳ ግደና ቢታቱዋን ላላና። 
ሽን ህንተንቱ ታኮ ስሚደ፥ ታ አዛዙዋ ናጎፐ፥ ህንተንቱ ሀራይ አቶ ሳኣ ጋጻ ጋካናዉ ላለትንቶካ፥ ታን ህንተንቱ ታዉ ጎይናና ማላ፥ ታን ታ ሱንꬃዉ ዶሬዳ ሳአዉ ዛራደ ሺሻና’ ጌዳዋ ቆፓ። 
“ሀዋንቱ ኔን ነ ዎልቃማ ዎልቃንነ ነ ምኖ ቀስያን ዎዛ አኬዳ ነ ቆማቱዋነ ነ አሳቱዋ። 
አቤት መታ ጎዳዉ፥ ታን ነ ቆማይ ዎስያ ዎሳነ ኔና ቦንቻናዉ ዶስያ፥ ነ ቆማቱዋ ዎሳ ነ ሀይꬃይ ስሶ። ታን ነ ቆማይ ሀቼ ኦꬃናዉ ኮዬዳባይ ታዉ ኡሸቻናዳን፥ ካትያ ዎዛና ሹግሳደ ታና ማዳ” ያጋድ። ታን ሄ ዎደ ካትያዉ ኤሳ ትግያዋ። 
