﻿ሀኔዳባ ኦድያ ላኤንꬆ ማጻፋ.
1.
ዳዊታ ናአይ ካቲ ሶሎሞነ ባረ ካዉተꬃ ምንሴዳ። መꬍና ጎዳይ አ ጾሳይ አናና ግዲደ፥ አ ሎይꬅ ግታዬዳ። 
ሶሎሞነ እስራኤልያ ኡባ፥ ሻኣ ካፓቱዋ፥ ጼቱዋ ካፓቱዋ፥ ዳናቱዋ፥ እስራኤልያ አሳ ካለꬅያ ኡባቱዋነ ጎልያ አሳቱዋ ካፓቱዋ ጼሲደ ሺሼዳ። 
ሄዋፐ ጉይያን፥ ሶሎሞንነ ሺቄዳ አሳይ ኡባይ ጋባኦናን ደእያ ጎይንያ ꬎቃ ሳኣ ቤድኖ፤ አያዉ ጎፐ፥ መꬍና ጎዳ ቆማይ ሙሴ መላ ቢታን መꬎ ጾሳ ዱንካኒ ያን ደኤዳ። 
ካሰ ዳዊተ ጾሳ ታቦታዉ የሩሳላመን ዱንካንያ ጊግሴዳ፥ ጾሳ ታቦታ ቅርያት-ይኣሪማ ካታማፐ ሄ ጊግስ ዎꬄዳ ሳአዉ አህ ዎꬄዳ። 
ሁራ ናኣ ኡራ ናአይ ባጻልኤል ናሃስያ ብራታፐ ኦꬄዳ ያርሽያ ሳአይ ጋባኦናን መꬍና ጎዳ ዱንካንያ ስንꬃን ደኤ። ሶሎሞንነ ሄ ሺቄዳ አሳይ ጾሳ ሄዋን ኮዬድኖ። 
ሶሎሞነ መꬍና ጎዳ ዱንካንያ ስንꬃን ደእያ ናሃስያፐ ኦሰቴዳ ያርሽያ ሳኮ፥ ጾሳ ስንꬃ ቢደ፥ እት ሻአ ጹግያ ያርሹዋ ያርሼዳ። 
ሄ ጋላሳ ቃማ ጾሳይ ሶሎሞናዉ ቆንጪደ፥ “ታን ነዉ አያ እማናዉ ኮያይ?” ያጌዳ። 
ሶሎሞነ ጾሳ፥ “ኔን ታ አዉዋ ዳዊታ አገና ዎልቃማ ሲቁዋን ሲቃደ፤ ያታደ ታና አ ኮታን ካተያዳ። 
ሀእካ አቤት መꬍና ጎዳዉ፥ ጾሳዉ፥ ኔን ታ አዉዋ ዳዊታዉ ካሰ ጌዳ ቃላይ ፖለቶ። ኔን ታና ሳኣን ደእያ ባናዳን ጮራቴዳ አሳ ቦላ ካተዬዳ ድራዉ፥ 
ታን ሀ አሳ ካለꬃናዉ ኔን ታዉ አꬌዳ ኤራተꬃነ አኬካ እማ። ሄዌ ꬋዮፐ፥ ሀ ነ ዎልቃማ አሳ ኦን አይሳናዉ ዳንዳዪ?” ያጌዳ። 
ጾሳይ ሶሎሞና ሀዋዳን ያጌዳ፤ “ኔን ዱረ ግዳናዉ፥ ዎይ አቁዋ ደማናዉ፥ ዎይ ቦንቼታናዉ፥ ዎይ ነ ሞርከቱ ሀይቃናዉ፥ ዎይ ነዉ ላይꬃይ አዱቃናዉ ኦቼናን አጋደ፥ ታን ኔና ካተዬዳ ታ አሳ አይስያ አꬌዳ ኤራተꬃነ አኬካ ኦቼዳ ድራዉ፥ 
ታን ነዉ አꬌዳ ኤራተꬃነ አኬካ እማና። ቃይ ኔፐ ካሰ ደኤዳ ካተቶ ዎይ ኔፐ ጉይያን ያና ካተቶካ ባይና ዱረታ፥ አቁዋነ ቦንቹዋ ታን ነዉ እማና” ያጌዳ። 
ሄዋፐ ጉይያን፥ ሶሎሞነ ጾሳ ዱንካኒ ጋባኦናን ደእያ፥ ጎይንያ ꬎቃ ሳፐ ስሚደ፥ የሩሳላመ ቤዳ፤ እስራኤልያ ቦላ ካተቴዳ። 
ሶሎሞነ ፓራ ጋረቱዋነ ፓራቱዋ ሺሼዳ። አዉ እት ሻአነ ኦይዱ ጼቱ ፓራ ጋረቱነ ታማነ ላኡ ሻአ ፓራቱ ደኢኖ። እ ኡንቱንቱ ፓራ ጋረቱዋ ካታማቱዋንነ ባረናና የሩሳላመን ዎꬄዳ። 
ካቲ ዎርቃይነ ብራይ የሩሳላመን ሹቻዳን ኬለታናዳን፥ ዝጋይካ ጋꬋን ድጭያ ኤꬃዳን ጮራታናዳን ኦꬄዳ። 
ሶሎሞነ ፓራቱ ግብጼፐነ ቃዌ ጌተትያ ጋድያፐ ዬድኖ። ካትያ ዛልአንቻቱ ኡንቱንታ ቃዌፐ ሻሉዋን ሻሚደ አሂኖ። 
ኡንቱንቱ እት እት ፓራ ጋርያ ኡሱፑን ጼቱ ጻጋራ ብራን፥ እት እት ፓራ እት ጼታነ እሻታሙ ጻጋራ ብራን ግብጼፐ ሻሚደ አሂኖ፤ ሂተቱዋ ካተቱዋ ኡባቶነ ሶርያ ካተቶ ዛልኢኖ። 
