﻿Yontu.
136.
Ɩ́ sɑ Tɑcɑɑ, mpi tɔ, ɩ kɛ́ kʋpɑŋ kɛ́. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩ́ sɛɛ Ɩsɔ wei ɩ kəlɑ tɩɩŋ tənɑ tɔ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩ́ sɛɛ Tɑcɑɑ wei ɩ kəlɑ tɑ́ cɑɑnɑɑ tənɑ tɔ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩ tike ɩ lɑkənɑ kɔkɔlɔ nyəmnɑɑ sɔsɔɔm. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ lɑpənɑ ɩsɔtɔnʋɣʋ nɑ nyəm. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ pɔnɑ tɛtʋ kɛ lʋm tɔɔ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ lɑpənɑ ɩsɔtʋlʋŋɑsɩ sɔsɔɔnsɩ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩ lɑpɑ ilim sɩ pə tɔɣɔ kɑwulɑɣɑ kɛ ilim tɑɑ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ lɑpənɑ ɩsɔtʋ nɑ ɩsɔtʋlʋŋɑsɩ sɩ sɩ́ tɔɣɔ kɑwulɑɣɑ kɛ ɑhoo. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ kʋnɑ Icipiti ɑpɑlʋpiyɑ kɑncɑɑlɑɣɑ kʋlʋlɑsɩ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ ləsənɑ Ɩsɛɣɛlɩ nyə́mɑ kɛ Icipiti nyə́mɑ hɛkʋ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩ tomɑ sɔsɔɔnɑ kɛ ɩ hʋlɑɑ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ fɑɣɑnɑ teŋku kʋsɛɛm kɛ cɑlɩ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩ lɑpɑ nɑ Ɩsɛɣɛlɩ nyə́mɑ tɔ teŋku ɩnɩ ɩ hɛkʋ tɑɑ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ təŋsənɑ Icipiti wulɑʋ nɑ ɩ yoolɑɑ kɛ lʋm. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ tiikinɑ ɩ yəlɑɑ kɛ wʋlɑɣɑ tɛtʋ tɑɑ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ yoonnɑ ɑwulɑɑ sɔsɑɑ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ kʋnɑ ɑwulɑɑ toŋ nyə́mɑ. Mpi tɔ, ɩ kʋpɑntʋ wɛ tɑm tɔɔ kɛ́. 
Amolii nyə́mɑ wulɑʋ Sihoŋ kɛ ɩ kʋwɑ. Mpi tɔ, ɩ kʋpɑntʋ wɛ tɑm tɔɔ kɛ́. 
Nɑ ɩ́ kʋ tɔtɔɣɔ Pɑsɑŋ wulɑʋ Oki. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩlɛnɑ ɩ́ cɛlɑ Ɩsɛɣɛlɩ nyə́mɑ kɛ ɑwulɑɑ mpɛ pɑ tɛtʋ. Mpi tɔ, ɩ kʋpɑntʋ wɛ tɑm tɔɔ kɛ́. 
Nɑ tə́ pəsɩ ɩ təmlɛ nyə́mɑ kpɑncoou. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩ tɑ sɔɔ tɑ́ tɔɔ kɛ́ sɑɑ wei pɑ fɛlɑɣɑɑ-tʋɣʋ nɔɔhɛɛ tɔ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ yɑpənɑ-tʋɣʋ tɑ́ ŋmɑkəllɑɑ niŋ tɑɑ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩnɩ ɩ hɑɑnɑ kʋŋmɑŋmɑm tənɑɣɑ tɔɣɔnɑɣɑ. Mpi tɔ, ɩ kʋpɑntʋ wɛ tɑm tɔɔ kɛ́. 
Ɩ́ sɑ ɩsɔtɑɑ Ɩsɔ, Mpi tɔ, ɩ kʋpɑntʋ wɛ tɑm tɔɔ kɛ́. 
