﻿Isaya.
18.
Shauri ya tsi iriyo na mapha gavumago, tsi iriyo ngʼambo ya myuho ya Kushi, 
inayohuma ajumbe kutsupira muho Naili kuhumira madau ga nyasi. Phiyani mwi ajumbe enye mairo, kpwa atu are na a ngozi laini, atu anaoogophewa phephi na kure. Atu a taifa ra mkpwotse rinaroturya ambaro tsiiye ikaganywa ni myuho. 
Mwimwi mosi msagalao duniani, lolani bendera iunulwapho hiko myangoni na gunda richipigbwa phundzani! 
Mana Mwenyezi Mlungu akaniamba hivi: “Mino ndanyamala zii nlole kula kpwangu makaloni dza dzoho wakati wa dzuwa ngerengere, dza guro ritandavyo usiku wakati wa minga ya mavuno. 
Mana kabila ya mavuno, bada ya kukala maruwa gakaricha kubumula hadi wakati zabibu zikaandza kuphera, andakpwedza akate panda zitsephulavyo na phanga ra kutsatsurira na akate panda zisizo matunda. 
Vyosi hivyo vindarichirwa nyama a mapha hiko myangoni na nyama anjina a tsakani. Nyama asiru a mapha andarya wakati wa kazikazi, na minga ya mnyevu, nyama a tsakani andarya.” 
Ela wakati hinyo atu are enye ngozi laini, atu anaoogophewa phephi na kure. Atu a taifa ra nguvu rinaroshinda ambaro tsiiye ikaganywa ni myuho, andamrehera zawadi Mwenyezi Mlungu, Mlungu wa majeshi. Zawadi hizo andazireha mwango wa Sayuni, phatu anaphoabudiwa Mwenyezi Mlungu, Mlungu wa majeshi. 
