﻿आमोस.
6.
विखू तेनु पोर जे सियोन मा सुके रोवे, आरु तेनु पोर जे सामरियान बोयड़ा पोर बिहये विगुर रोवे, चे जे वारु मुलुकोम नावसादया छे, जिन्दरे जुळ इसराएलोन घोरानो आवे 
कलने सोहोरम जाईन देखु, आरु वां गोथा होमात नावोन मोटला सोहोर मा जावु; ओळी पोलिस्तीयान गोत सोहोर मा जावु। काय ये मुलुक तुमरा दुय मुलुक गोथा वारु छे? काय हेन्दरी काकोड़ तुमरी काकोड़ गोथी मोटी छे? 
तुमु भुन्डला दाहड़ाक छेटा कोर देये, आरु लड़ायीन गादी क धोड़े ली आवतेला। 
तुमु हातिन दातोन खाटला पोर लुटु, आरु आपना आपना आथरुन पोर पाय नांबा कोरीन सुवु, आरु वारु गोंहोवता गाडरा आरु जोबरा आरेग्‌ला वाछड़ा काजे खाय। 
तुमु झुनगा पुठी गीते गावु आरु दाऊद जोसा भाति भातिन वाजान आवाज निकावु; 
आरु कोटेवराम गोथो मोन्‍द पीयु, आरु वारु वारु तेल लागाड़ता होय, पुन युसुफ पोर आवनेवावी पिड़ान वाराम सोमवीन नी घाबरायतेला! 
ओतरान कोरीन चे हेमी देसोम गोथा निकाय देसे, आरु जे पाये खोळवीन सुवता होता, हेन्दरो सुक जातो रोवसे। 
परमेश्वर योहोवा आपसीत् आन खाईन कोवलु छे, जिना पोर याकुब घाड़ाय कोरे, तेरेसी हांव कुहराय, आरु हेरा किला सी सीगी कोरो; आरु हांव इना सोहोर काजे तेनु आखा भेळ जो हेरेम छे, वेरीन होकोम कोर दिस। 
कोदाम काहना घोरोम दोस ओदमी वाचला रोवे, तेवी चे मोर जासे। 
जोत्यार कुदान काकु, जु तेरु धोपाड़नेवावु होय, हेरा धोड़ काजे घोरोम गोथो निकावने जुगु हुचेलसे, आरु जो घोरोन खुनाम रोवे तिना सी कोवसे, काय तारे जुळ कुदु ओळी छे? तोत्यार हुयो कोवसे, कुदु नी: “तोत्यार हुयो कोवसे” हुग रोव! हामुक योहोवान नाव नी लेनो जुवे। 
काहाकि योहोवान हुकुम सी मोटलो घोर भुकरा भुकरा होय जासे, आरु नानला घोरोम चिसाड़ा होयसे। 
काय घुल्‌ला चाफरिया पोर दोवड़े? काय कुदु ओसा जागा मा बुल्यो काजे जुपे जां तुमु मानसे नियाव काजे जोहोर मा, आरु नियावोन फोळ कोड़वा फोळ मा बोदली नाखलु छे? 
तुमु ओसी चिजोन कोरता खुस्सी होयु जी रिकामी छे; आरु कोवु, हामु आपनात् हेमोत सी ताकोत सी कोरनेम सोहोर काजे जितला छे। 
ओतरान कोरता सेनाओन परमेश्वर यहोवान यो बुल छे, ए इसराएलोन घोराना, देख, हांव तुमरे विरुद् एक ओसो मुलुक उबो कोरीस, जो होमातोन घाटी गोथो लीन ओराबान नोदी लोगुन तुमुक वेला पाड़से। 
