﻿लैव्यव्यवस्था.
25.
योहोवा भोगवान मुसा काजे सिनाय बोयड़ा पोर कोयु, 
तु इसराएली मानसो काजे कोवजी; तु तेनु काजे ओसु कोवजी: जोत्यार तुमु तेना मुलुक मा जासु जो हांव तुमुक आप रोयु, तोत्यार तेना मुलुकोन जागु वी योहोवा भोगवान जुगु आराम कोरसे। 
तुमु छव साल तक तुमरो खेत वेरीया करजो, आरू छवु साल आपसी आपसी खेतीन वाड़ी न छाटी छाटीन खेतन फसल एखटी करीया करजो। 
पुन सातवा सालोम खेतीक वी बेसको आराम जोड़से: योहोवा भोगवानोन आरामोन साल। तुमु तेने साल नी ते आपसा खेतेम वेरू आरू नी आपसा ओंगुरोन वाड़ी मा काटनो कोरजु। 
जो काहिन तुमरा काटला खेतोन आपसुत् उगे तिनाक झुन काटता, आरू नी चुटला ओंगुरोन वेलाम गोथा तुड़जु; काहकि इना जागा जुगु बेसकु आरामोन साल होयसे। 
पुन खेती आपना आरामोन सालो मा तुमरी, तुमरा चाखरीया, दाहाड़क्या आरू तुमरा विच मा रोहवने वावा पारका मानसो जुगु खानो जोड़्या कोरसे। 
आरू तुमरा मुलकोन जतरा बी जनवार हय हेनको वाटे खाणो बी धरतीन आखी मेर मा रयीन रोयसे। 
तुमु सात आरामोन साल मोतलोब सात गुना सात वोरीस गिनजु, सात आरामोन सालोन यो टेम चावीस ने नोव सालोन रोवसे। 
तोत्यार तुमु सातवा मोहनान दोसवे दाहड़े आखा जागा पोर मटलाबुलन भिरा फुकजु। पोसतावान दाहड़े तुमत आपसा मुलुकोन आखा जागा पोर मोटला फेपारीया फुकजु। 
आरू तुमु पोचास साल काजे चुखलु मानजु, आरू मुलुकोन आखा रोवन्या काजे छुटकारान पोरचार कोरजु, यो जुबली वाळो साल कोवायसे। इने साल आखा मानसे आपसा बासोन धोन पोछा हात कोरसे। आखा मानसे आपसा घोरलीयान जा पोछा जात रोवसे। 
तुमरे जुगु पोचासवु साल जुबली वावु साल होयसे। तुमु तेन साल बेरता झनी, आरू जो काहीन आपसुत उगसे, तिनाक झुन कटता, आरू जे ओंगुर नी चुटाया तेनु ओंगुरोन वेलाक झुन तुड़ता; 
काहाकि चु जुबली वावु साल होयसे। चु तुमरे जुगु चुखलु साल कोवायसे। जो खेतोम उगसे, तुमु चोत् खाजु। 
इना जुबली वावा साल मा आखा मानसे आपसा बासोन धोन काजे पोछा हात कोरसे। 
कोदाम तुमु आपना काहना मुलकोन भाइस क काहिन वेचसु एने तेरा हातोम रोइन काहिन लेसु, ती एक दिसरा पोर आंधारो झुन कोरता। 
पेहेला जुबली वावा सालोन ओवतेन जोतरा साल वीते तेर ओनसारे गिनिन तुमु आपसा मुलुक वावा भास्यो एने बोहोनस्या जुळ मुले लेजु; मेरोन वाचाला सालोन गिनतीन ओनसारे चे तुमुक वेचसे। 
कोदाम जादा साल वाचे, ती तुमु भाव बोड़ावजु; पुन कोदाम कोम साल वाचला होय, ती भाव कोम कोरजु; काहाकि जो हुये वेचे, चो मेरोन गिनतिन ओनसारे वेचे। 
तुमु एक दिसरा पोर कुहराय झुन कोरता पुन आपसा भोगवानोन बिक मानजु; काहकि हांव तुमरू योहोवा भोगवान छे। 
तुमु मारी रिती काजे मानजु, आरू मारा नेम कायदा पोर सोमजी जानीन चालजु; काहकि ओसो कोरने सी तुमु तिना मुलुक मा विगुर बिहये वोसला रोवसु। 
धोरती तुमुक मेर पाकाड़ीन आपसे, आरू तुमु पेट भोरीन खाया कोरसु, आरू तिना मुलुक मा बेफिकरिया वोस रोवसु। 
आरू कोदाम तुमु कोवु कि सातवा सालोम हामु काय खासु, नी ते हामु वेरजे नी आपना खेतोन मेर काजे एकठी कोरसु? 
ती जान लेवु की हांव तुमुक छोटवा सालोम ओसी बोरकोत आपीस, कि धोरतीन मेर तीन वोरीस लोगुन काम आवसे। 
तुमु आठवा सालोन मेर जोत्यार लोगुन नी पाके ती लोगुन तुमु जुनली मेरोम गोथा खाता रोवसु। 
जागा काजे जोलोम जुगु नी वेचाये, काहकि जागा मारी छे; आरू हेरेम तुमु पारका आरू बाहारला कोवायसु। 
बाखुन तुमु आपसा वाटान आखा मुलुकोन जागाक छुड़वने देजु। 
कोदाम तुमरू कुदु भाय बोन्यु गोरब्यु होयीन आपसी जागामा गोथु थुड़ोक वेच देये, ती तेरा घोराना मा गोथु जो आखा गोथो धोड़े होय चु आवीन आपसा भायबोन्यान वेचलु वाटु छुड़वी लेय। 
कोदाम कुदु मानुसो जुगु कुदु छुड़ावनेवावो नी होय, आरू तेर जु ओतरो धोन होय कि आपसुत् आपसा वाटाक छुड़वी ली सोके, 
ती चु एइना सालोन ओनसारे गिन लेय, जिने साल होयु तिनाक वेचलु, तेर हिसाबे तिनाक दाम आपसे। तोत्यार तेरो धोन पोछो तेरोत् होय जासे। 
कोदाम तेरे जुव आपसो वाटु पोछु छुड़ेवने जुगु धोन नी होय, ती जागु लेनेवावान हातोम जुबली वावे साल लोगुन रोवसे। जुबली वावा साल मा जागु आपसुत् छुट जासे आरू वेचने वावान पोछु होकम होय जासे। 
ओळी कोदाम कुदु मानुस मोटला भितड़ा वावा सोहरोम रोवने जुगु घोर वेचे, ती चु वेचनेन ओळतेन साल भोर मा तिनाक छुड़वी कोरे, कोवे ती आखु साल भोरीन तिना मानुस काजे छुड़ोवनेन होक रोवसे। 
पुन कोदाम साल भोरीन नी छुटे, ती चो घोर जो मोटला भितड़ा वावा सोहरोम छे मुले लेने जुगु बोनलो रोवे, आरू पीढ़ी-पीढ़ी लोगुन तेरात् ओवलियाद जुगु बोनलो रोवे, आरू जुबली वावा सालोम वी नी छुटे। 
पुन विगुर मोटला भितड़ा वावा गांवोम वावा घोर ते देसोन खेतो जोसा गिनाये; जिन्दरो छुड़ेवनो वी होय सोके, आरू चे जुबली वावा साल मा छुट जासे। 
ओळी वी लेवी मानसोन आपसा वाटान सोहरोन जे घोरे छे तेनुक लेवी मानसो जोत्यार मोरजी पोड़े तोत्यार छुड़वी लेय। 
आरू कोदाम लेवी मानुस आपसु वाटु नी छुड़वे, ती चो वेचलो घोर जे हेरा वाटान सोहोरोम जुबली वावा सालोम छुट जाय; काहकि इसरारली मानसोन इचमा लेवी मानसोन वाटु हेन्दरा सोहरोम चे घोरूत् छे। 
पुन तिन्दरा गावोन च्यारू मेर ढुरोक चारनेन जागु नी वेचाये; काहकि चु जोलोम जुगु तेन्दरु वाटु कोवाये। 
कोदाम तारू भाय बोन्यु गोरीब होय जाय, आरू तेरे पोर तुसेक गीन आवे ओसो होय, ती तु तिनाक सोमावजी; चु पारका एने वाट चाला जोसु रोवे। 
तेरे जुळ इयाज एने वोदु पोस्या झुन लेये; भोगवानोन बिक मानजी; जेरेसी तारू भाय बोन्यु तारे पुठी जिवतु रोय सोके। 
तिनाक इयाजता रूप्या झुन आपे, आरू नी काय खानेन सोमान नोफु कोमायने कोरीन आपे। 
हांव तुमरू योहोवा भोगवान छे; हांव तुमुक कोनान मुलुक आपने जुगु आरू तुमरू भोगवान रोवीस ओस कोरीन तुमुक मिसर मुलुक गोथु निकाव लावलु छे। 
कोदाम तारू भायबोन्यु तारे ओगोव गोरब्यु होयीन आपसा काजे तारा हातोम वेच देय, ती तेरेसी पावोर जोसु काम झुन कोरावतु। 
चु तार पुठी दाहड़क्यु एने वाट चालु जोसु रोवे, आरू जुबली वावा साल लोगुन पुठी रोवी चाखरी कोरतु रोवे; 
तोत्यार चु बाळ-बच्चा भेळ तारेनचा गोथु जात रोवे, आरू आपसा घोरल्या मा आरू आपसा बासोन वाटा मा पोछु जात रोवे। 
काहकि चे मारा पावरीया छे, जेनुक हांव मिसर मुलुक गोथु निकाय लावलु छे; एरकरीन चे दासन रीतीये नी वेचनो। 
तेर पोर ओनाड़ु बोनीन होक झुन कोरतु; आपसा भोगवानोन बिक मानतु रोवजी। 
तारा जे पावोर-पावेरनिया होय चे तुमरा च्यारू मेरोन जातिम गोथा रोवे, आरू पावरीया आरू पावेरनिया तेनुम गोथा मुले लेजु। 
जे वाट चाला तुमरे इचमा पारका बोनीन रोवसे, तेनुम गोथा आरू तेन्दरा घोरानाम गोथा वी जे तुमरे आड़े धोड़े होय, आरू तुमरा मुलुक मा पोयदा होया होय, तेनुम गोथा पावोर आरू पावेरनिया मुले लेजु; आरू चे तुमरोत् धोन कोवायसे। 
तुमु आपसा पुर्याक वी जे तुमरे ओळतेन होयसे तिन्दरा हकोम कोर सोकु, आरू त्या हेनको वाटो कहवायसे; हेनुम गोथा तुमु जलोम आपसे जुगु पावोर लिया कोरजु, पुन तुमरा भायबोन्या जे इसराएली होय हेनु पोर तुमरो होक ओनाड़ा बनीन झुन कोरता। 
कोदाम तुमरे पुठी रोवने वावु पारकु एने वाट चाला मा मातभोर होय जाय, आरू तेरे ओगोव तारू भाइस गोरीब होयीन आपसा काजे तारे ओगोव पारकु एने वाट चसलु एने आपसी ओवलियाद काजे वेज देय, 
ती तेरे वेचायनेन ओळतेन चु ओळी पोछु छुट सोके; तेरा भास्यो मा गोथु कुदु वी छुड़वी सोके, 
तेरू काकु, कुदु भाईस, आरू तेरा घोराना मा कुदु वी जु तेरे साते वावु छे छुड़वी सोके; निन्ते कोदाम चु मातभोर होय जाय, ती आपसाक वी छुड़वी सोके। 
चु आपसाक मुले लेनेवावा पुठी आपसा वेचायनेन साल गोथु जुबली वावा साल लोगुन हिसाब कोरे, आरू तेरा वेचायनेन किमोत जोतरा सालोन गिनतीन ओनसारे होय, मोतलोब जु दाम दाहाड़क्यान दाहड़ान जोसु रोवसे। 
कोदाम जुबली वावु साल आवने घोना साल रोवे, ती जोतरा रूप्यान चु वेचायलु होतु, तेरेम गोथु चु आपसाक छुड़ोवनेन दाम तोतरा सालोन ओनसारे आप देय। 
कोदाम जुबली वावु साल आवने थुड़ाक साल रोया होय, ते वी आपसा मालीक पुठी हिसाब कोरीन आपसा छुड़ावने दाम तोतरात् सालोन ओनसारे आप देय। 
चु आपसा मालीक पुठी तेना दाहाड़क्या जोसु रोवे जोसु वोरीसदाय दाहाड़की नोक्खी कोरली होय; आरू तेरू मालीक तेरे पोर तार ओगोव वातड़ु बोनीन होक नी कोरनो जुवे। 
आरू कोदाम चु इनु रिती सी नी छुटे, ती चु जुबली वावा सालोम आपसा बाळ-बच्चा भेळ छुट जाय। 
काहकि इसराएली मारात् चाखरीया छे; चे मिसर मुलुक गोथा मारात् निकावला चाखरीया छे; हांव तुमरू योहोवा भोगवान छे। 
