﻿लैव्यव्यवस्था.
24.
ओळी योहोवा मूसा सी कोयू, 
इसराएली मानसो काजे यो हुकुम आप कि मारेन्चा विजावो कोरने कोरीन कुट सी निकोवलो जेतुन झाड़कान वारलो तेल लीन आवजू कि दिव एक पोट्यू धोपतू रोवे। 
हारून तिनाक, मिलाप वावा तम्बू मा, पोरदान खोयड़े सान्तु गोथु सोन्दारे लोगुन पोरबु ओगोच एक सारकु सोजावीन राखसे। यी तुमरी पीढ़ी जुगु जोलोम रिती कोवाये। 
हुयो चुखला सोनान भीतड़ा पोर योहोवा ओगोव दिवु एक पोट्यु सोजावीन राखसे। 
“तुमु मेदा काजे कुसनीन तेरा बारे रूटा बोनावजु। एक एक रूटु दुय किलान बोननो जुवे। 
तुमु रूटाक दुय चोव मा योहोवा ओगोव चुखला सोनाना पाटला पोर मेकजु। एक चोव मा छोव रूटा मेकजु। 
तुमु आखी चोव मा चुखलो लोबान पुठी मेकजु जेरेसी चे रूटा भेळ फोम देवाड़े वावी चिज बोनिन योहोवा काजे आगठा मा चोहोड़ जाय तोसे। 
हारून आखा आरामोन दाहड़े इसराएली मानसो ओगे गोथु वायदान रुपोमा योहोवा ओगोव एक सारका नोवला रूटा चोवेन चोव मेक्या कोरसे। 
ये रूटा हारून आरू हेरा पुर्यान होयसे। चे तिनुक चुखला जागाम खासे; काहकि योहोवा काजे आगठा मा चोड़ावली बादा मा गोथो यो हेन्दरू बेस चुखलु वाटु छे। इना पोर हेन्दरो होक छे।” 
एक वार काहनी इसराएली बायरोन पुर्यु तेरू बास मिसर देस मा रोवने वावु होतु, इसराएली मानसोन इचमा गोयु। चा पोड़ाव मा चु होतु एने एक इसराएली मानसे आपसात् लोड़ायने लाग्या। 
इसराएली बायरोन पुर्यु योहोवा भोगवानोव नावोक भुन्डा बुले कोयु आरू वायकेड़ा उड़ायु। मानसे तिनाक मुसान चा लाया। तेरी आयस्युन नाव सलोमित होतो, जे दान घोरानान दिबरीन पुराय होती। 
चे मानसे इसराएली बायोरोन पुर्याक तेने टेमे लोगुन कुंडवाड़ाम राख्या जोत्यार लोगुन योहोवा भोगवानोन बुल तिनाक वारू रीते पोतु नी होय जाय। 
योहोवा मुसा काजे कोयु, 
तुमु मनख्या तेना वायकेड़ा उड़ावने वावान पोड़ाव मा गोथा खोयड़े लीयावु; आरू जोतरा मानसे वायकेड़ा उड़ातेला सोमया होय चे आखा आपना आपना हात हेरा मुनका पोर मेकु, तोत्यार आखा मोन्डळीन मानसे तिनाक दोगड़ाटने लाग्या। 
तु इसराएली मानसो काजे यो वी कोवजी: जु मानुस आपसा भोगवान काजे भुन्डा बुल बुलसे, चु आपसा पापोन भार आपसुत छेलसे। 
भोगवानोन नावोन वायकेड़ा उड़ावसे तिनाक मोतोन डोन जोड़से। आखा मोन्डळीन मानसे तिनाक दोगड़ाटसे। जोत्यार कुदु मानुस चु गांवल्यु होत तेने पारकु होय, योहोवा भोगवानोन वायकेड़ा उड़ावसे तिनाक मोतोन डोन जोड़से। 
जु मानुस कुदा मानसोक मार देये तिनाक मोतोन डोन जोड़से। 
ढुरोक मारने वावु मानुस तेरी नुकसानी आपसु झेलसे तेना ढुरोन बोदलाम ढुर आपे। 
कोदाम कुदु मानुस आपसा काहना गांवल्या भास्योन एने बोहोनस्यान चोट लागाड़े ती हेरे पुठी वी तोसोत् होयसे; 
चोटोन बोदलाम चोट, डुवान बोदलाम डुवु, दातोन बोदलाम दात। जोसु चु दिसरा मनुसन नुकसानी कोरे, तोसोत् तेरे पुठी होयसे। 
ढुरोक मारने वावा मनुसन नुकसानी चु झेलसे; पुन मानसोक मारने वावा मानसोक मोतोन डोन जोड़से। 
पारका एने गांवल्या मानसो जुगु एकुत नियोवोन कायदु होयसे; काहकि हांव योहोवा, तुमु भोगवान छे। 
मुसा इसराएली मानसो काजे यी वात कोयु। चे भोगवानोन वायकेड़ा उड़ान्याक खोयड़े ली गोया। चां चे तिनाक दोगड़ाटीन मार नाख्या। ओस कोरीन जोसु योहोवा भोगवान मुसा काजे हुकुम आपलु होतु तोसात् इसराएली कोर्या। 
