﻿निरगमन.
20.
तव परमेश्वर न ये आखो बुल कोयो: 
“हांव तारु परमेश्वर योहोवा छे, जो तुसे गुलामीन घोर यानी मिसर देश सी निकाळीन लावलु छे। 
“तु मेसे छुड़ीन दिसरा क परमेश्वर कोरिन झुणी मानजी। 
“तु आपसा लिय काय मुर्ती खुँदिन झुणी बोनवे, नी कुदान जनारक मुर्ति आरु चीज बोनावजी, जो वादळा मा, एने कळी पोर, एने कळीन नेचो जळ मां छे। 
तु ओसो वान्दे झुणी, आरु नी हेनको विनता कोरजी; काहकी हांव तारु परमेश्वर योहोवा जळन राखने वाळु परमेश्वर छे, आरु जुळ मार सी घाड़ाय कोरे, हेका पुर्या, पोता, आरु परपोतो क वी डाहडानक वी डोन आप्या कोरो, 
आरु जो म्हार सी मोंग राखे आरु मारा हुकुम क माने, हेनु हजारु पीढ़ीया पोर गीन कोरिया कोरो। 
“तु आपसा परमेश्वर क नाव उदुड़ नी लेनो; काहकी जो योहोवा क नाव उदुड़ लेये चो ओको वीन गुनाकु नी कोहायसे। 
“तु आरामोन दाहड़ा क चुखो मानने क लिय फोम राखजी। 
छोळ दाहड़ा लोगुन तु काम कोरीया कोर आपसो काम-काज कोर; 
बाखुन सातवो दाहड़ो तारा परमेश्वर योहोवा क लिय आरामोन दाहड़ो छे। हेरेमा नी ते तु कोहने वि रीते क काम-काज कोरजी, आरु नी तारा पुर्या, नी तारी पुराय, नी तारा दास, नी तारी दासी, नी तारा ढुरे, नी काई पारकाओ जो तारा झोपला क धोड़े होय। 
काहकी छोव दाहड़ा मा योहोवा न वादळा, आरु कळी, आरु दोरया, आरु जो काई हेरेम छे, आखो बोनायो, आरु सातवे दाहड़े आराम कोर्‌यो; ओस कोरीन योहोवा न आरामोन दाहड़ा क बोरकोत आप्यो आरु ओको चुखलो कोयो। 
“तु आपसा बाबा आरु आपसी आयान आदर कोरजी, जेरेसी जे देश तारा परमेश्वर योहोवा तुखेक आपे छे हेरेम तु घोना दाहड़ा लौगुन रोय सोके। 
“तु खुन झुणी कोरे। 
“तु व्यभिचार झुणी कोरे। 
“तु चूरी झुणी कोरे। 
“तु कुदान विरुद्ध झुटु गोवा नी देजी। 
“तु कुदान घोर क लालच झुणी कोरजी; नीते कुदान बायोर क लालच कोरजु, आरु नी कुदा क दास-दासी एने बुईल-गोदड़ा क, नी कुदा क काई चिजो क लालच कोरजु।” 
आखा मानसे वादळो गाजनो आरु विजवी आरु नरसिंगा क बुल सोमळीन, आरु धुवाड़ा क उठतो हुवे बोयड़ा क देखता रोया, आरु देख क, कापता जाईन छेटा उबा होय गोया; 
आरु हुये मुसा सी कोहने लाग्या, “तुत आमरे सी वात कोर, ती ते हामु सोमळी सोकसु; बाखुन परमेश्वर आमरे सी वात नी कोरे, ओसो नी होय की हामु मोर जाजे।” 
मुसा न मानसो सी कोयो, “मा बीहयु; काहकी परमेश्वर इकालिय आयो छे की तुमरी पारोख कोरे, आरु ओको बीक तुमरा मोन मा बोनलो रोहे की तुमु पाप नी कोरु।” 
आरु त्या लोगहन छेटा उबा रोया पुन मुसा उना घोना आंधारा धोड़े गुयो जां परमेश्वर हुतो। 
तव योहोवा न मुसा सी कोयो, तु इसराएलियो को म्हार ये बुले सोमवाड़: तुमु लोगहन आपसा देख्या की हांव तुमरे पुठी वादळा सी वात कोरलो छे। 
म्हार विगुर आराधना क देवता जुगु आपसा लिय सोना चाँदीन भगवान झुणी बोनावता। 
मारे जुगु धुळान क एक वेदी बोनावीन, आरु आपसा गाडरा-बुकड़ा आरु गाय-बुल्यो क होमबली आरु मेलबलि क हेर पोर चोढ़ावजु; होर जागाम जाँ हांव आपसा नाव क फोम कोरावो चाँ चाँ हांव आवीन तुमुक बोरकोत आपीस। 
आरु कदाम तुमु मारे लिय दोगड़ा क वेदी बोनावु, ती तराशे हुया दोगड़ा सी नी बोनावजु; काहकी जाँ तुमु न हेर पोर आपसो होतीयार लागाड़े चाँ तुमु हेनाक विटवी देसु। 
आरु मारी वेदी पोर पान्छ्या सी कोदी नी चोड़नो, काहिय ओसो नि होय कि तारो डिल हेर पोर नांगो देखा पोड़े। 
