﻿उत्पत्ति.
10.
नुह क पुर्या शेम, हाम, आरु येपेत हुता; हेरा पुर्या जळ–प्रलय क वाद मा पोयदा होयली; हेन्दरी ओवलियाद छे। 
येपेत क पुर्य : गोमेर, मागोग, मादे, यावान, तुबल, मेशेक, आरु तिरास हुए। 
गोमेर क पुर्य: अशकनज, रीपत, आरु तोगर्मा हुए। 
आरु यावान क ओवलियाद मा एलिशा, आरु तर्शीश, आरु कित्ति, आरु दोदानी लोग हुए। 
इनरी ओवलियाद अन्यजातियान क द्वीपों क देशोम मा ओसा वाटाय गोया की दिसरी त् बुली, कुलें आरु जाति क अनसारे आंगे आंगेय् होय गोया। 
हाम क पुर्या: कुश, मिसर, फुत आरु कनान हुया 
आरु कुश क पुर्या सबा, हवीला, सबता, रामा, आरु सबुतका हुया। आरु रामा क पुर्या शबा, आरु ददान हुया। 
कुश क ओवलियाद मा निम्रोद वी हुयो; कोळी पोर पेहलु ताकोतवाळु जीकन्यु हुयु। 
हीयु योहोवा की निंगा मा ताकोतवाळु शिकार खेलनेवाळु रोयु, इना सी यी कहावत चाल्ली छे; “निम्रोद क जोसो योहोवा की निमगा मा ताकोतवाळु शिकार खेलनेवाळो।” 
हेरा राज्य क शुरु शिनार देश मा बेबीलोन, एरेख, अक्कद आरु कलने से हुयो। 
हेना देश सी हुयो निकोळीन अश्शुर क गयो, आरु नीनवे, रहोबोतिर आरु कालह क, 
आरु नीनवे आरु कालह क वीच जो रेसेन छे, तेनाक वी वसाड़ीयो; मोटलो नोगोर योत छे। 
मिसर क ओवलियाद मा लुदी, अनामी, लहाबी, नप्तुही, 
आरु पत्रुसी, कसलुहि आरु कप्तोरी मानुस हुया, कसलुहीयो मा सी ते पलिश्ती मानुस निकोळ्या। 
कनान क ओवलियाद मा ओको मोटलो पुर्य सीदोन, तब हित्त, 
यबुसी, एमोरी, गिर्गाशी, 
हिव्वी, अर्की, सीनी, 
अर्वदी, समारी, आरु हमाती मानुस वी हुया; ओळतेन कनानी क कुल वी फेल गया; 
आरु कनानियो क सिंयो सीदोन सी लीन गरार क वाट क होईन अज्जा लोगुन आरु ओळतेन सदोम आरु अमोरा, गमोरा, आरु अदमा आरु सबोयीम क वाट सी होईन लाशा लोगुन होयी। 
हाम क ओवलियाद मा येत हुया, आरु ये भाति भातीन कुले, बुली, देशों आरु जाती क अनसारे आंगे आंगेय् हुय गोया। 
शेम, चू आखी एबेर ओवलियाद क खास मानुस होयु, आरु जु येपेत क मोटलो भाईष् हुतो, ओको बी पुर्‌यो हुयो। 
शेम क पुर्य: एलाम, अश्शुर, अर्पक्षद, लुद सीरिया आरु अराम हुया। 
अराम क पुर्य: ऊस हुल, गेतेर आरु मश हुया। 
आरु अर्पक्षद न शेलह क, आरु शेलह न एबेर क जोन्मो दिदा। 
आरु एबेर क दुय पुर्य पोयदा हुया, एक क नाव पेलेग ओतरान कोरता राख्या की तीनु दाहड़ा मा कोळी वाटाय गोयली, आरु ओका भाईष् क नाव योक्तान हुतो। 
आरु योक्तान न अल्मोदाद, शेलेप, हसर्मावेत, येरह, 
यदोरवाम, ऊजाल, दिक्ला, 
ओबाल, अबीमाएल, शबा, 
ओपीर, हवीला आरु योबाब क जोन्मो दिदा: येत आखो योक्तान क पुर्य हुया। 
इनदरो रोयने क जागो मेशा सी लागाड़ीन सपारा, जो उगेवनो मे एक बोयड़ो छे, तेने वाट्ये लोगुन हुयो। 
शेम क पुर्य येत हुया: आरु ये भाति भातीन कुले, बुली, देशों आरु जातीयां क अनसारे आंगे आंगेय् होय गुया। 
नुह क पोर्या क घोराने योत छे: आरु ओकी जाति क ओनसारे ओकी ओवलियाद यित छे; आरु जळ–प्रलय क वाद कोळी भोरीन जाती एनु मा होईन वाटाय गोय। 
