﻿John Wenazhıı.
8.
Sahzǫ̀ą eyı enı̨htł'èyeè wedaàdzeh łǫ̀hdı̨ t'à wheɂǫǫ sìı nàyı̨ı̨zhì ekò hazǫǫ̀ yak'e geèhkw'ee sìı tanı sadzeè ts'ǫ̀ gıxè t'asagodı-le agòjà. 
Eyı tł'axǫǫ̀ yak'eet'ı̨į̀ łǫ̀hdı̨ Nǫ̀htsı̨ nadąą̀ nàgeèhza gìgaat'ı̨. Dechı̨shì łǫ̀hdı̨ gıghǫ̀zha. 
Yak'eet'ı̨į̀ eyıì-le ı̨łè sǫǫ̀mbaekwo kw'àyį̀ą k'ehtı̨ xè sǫǫ̀mbaekwo ladà ts'ǫ̀ èhtła. Dzèh-łekǫǫ dèk'ǫ̀ǫ łǫ kw'àyį̀ą yìı adlà. Eyı sìı Nǫ̀htsı̨ wets'ǫ dǫ degaı ayìı gha yagehtıı sìı wexè sǫǫ̀mbaekwo ladà k'e Nǫ̀htsı̨ ts'ǫ̀ yek'eehk'ǫ̀. Eyı ladà daèhchı̨cho wenadąą̀ wheɂǫ hǫt'e. 
Yak'eet'ı̨į̀ wılà gots'ǫ dzèh weloò, Nǫ̀htsı̨ wets'ǫ dǫ yagehtıı xè ı̨dòo Nǫ̀htsı̨ wenadąą̀ ts'ǫ̀ ajà. 
Eyı tł'axǫǫ̀ yak'eet'ı̨į̀ eyı sǫǫ̀mbaekwo kw'à neyıìchı gà sǫǫ̀mbaekwo ladà k'e gots'ǫ kǫ̀ dèk'ǫ̀ǫ yeyìı ayı̨į̀là, eyıts'ǫ dıı nèk'e ts'ǫ̀ xàyeèhtł'ı. Eyı hayı̨į̀là ts'ıhɂǫ̀ eèzhıı, hòtł'ò agodı, kǫ̀ naìtł'ı̨ eyıts'ǫ dèè hòtł'ò nàèhdǫ. 
Eyı tł'axǫǫ̀ yak'eet'ı̨į̀ łǫ̀hdı̨ dechı̨shì łǫ̀hdı̨ geehdı ha sınìgı̨ı̨de. 
Yak'eet'ı̨į̀ t'akwełǫ̀ǫ̀ whedaa sìı edets'ǫ dechı̨shì yeèhdı ekò, kǫ̀, ı̨lı eyıts'ǫ edoò ełeta dèè k'e ts'ǫ̀ hodàètł'ı. Dèè tanı k'aɂį̀ı̨ ts'ǫ̀ wek'enık'ǫ, wexètłǫ ts'ı k'enık'ǫ eyıts'ǫ tł'oh hazǫǫ̀ wek'enık'ǫ. 
Yak'eet'ı̨į̀ nàke t'à whedaa sìı edets'ǫ dechı̨shì yeèhdı ekò shìh nechàa dèk'ǫ̀ǫ xè tį̀ts'eèhk'a wègoèht'į̀. Tıcho tanı k'aɂį̀ı̨ ts'ǫ̀ edoò whelı̨. 
Tı yìı t'asìı nàdèe sìı hazǫǫ̀ tanı k'aɂį̀ı̨ ts'ǫ̀ ełaàgı̨ı̨dè eyıts'ǫ wexètłǫ elàcho wedıhòłı̨. 
Yak'eet'ı̨į̀ taı t'à whedaa sìı edets'ǫ dechı̨shì yeèhdı. Yat'a ts'ǫ whǫ̀ nechàa dechı̨-dèk'ǫ̀ǫ lanıı hodàdeèwò. Deh nechàa hazǫǫ̀ eyıts'ǫ dehtsoa hazǫǫ̀ tanı k'aɂį̀ı̨ ts'ǫ̀ k'e nàekw'o. 
Eyı whǫ̀ “Nàèdıłı̨ı̨” wìyeh hǫt'e. Tı hazǫǫ̀ gǫ̀hłı̨ı̨ sìı tanı k'aɂį̀ı̨ ts'ǫ̀ tı nàèdıłı̨ı̨ whelı̨ t'à dǫ łǫ ełaı̨dè. 
Yak'eet'ı̨į̀ dı̨ t'à whedaa sìı edets'ǫ dechı̨shì yeèhdı. Sadeè, adzęzah, eyıts'ǫ whǫ̀ hazǫǫ̀ tanı k'aɂį̀ı̨ ts'ǫ̀ gıxèɂeèhdı t'à tanı k'aɂį̀ı̨ ts'ǫ̀ gıxè togoòtł'ò agòjà. Dzę eyıts'ǫ to dı̨ sadzeè haı̨wa ts'ǫ̀ togoòtł'ò agòjà. 
Eyı tł'axǫǫ̀ det'ǫcho yat'a k'et'a wègaat'ı̨. Hòtł'ò ezeh xè hadı, “Hoìla ha, hoìla ha, hoìla nechàa agode ha. Įłaà yak'eet'ı̨į̀ taı dechı̨shì geehdı ha t'à dıı nèk'e dǫ hazǫǫ̀ sıì gıxè hoìla agode ha!” hadıì ezeh. 
