﻿2 Corınth.
9.
Nǫ̀htsı̨ wets'ǫ dǫ dànì gıts'àts'ı̨ı̨dìı sìı weghǫ naxıts'ǫ̀ eehtł'è-le kò. 
Dǫ degaı gıts'àahdı ha hòtł'ò aahwhǫ hǫt'e wek'èehsǫ. Macedonıa nèk'e Nǫ̀htsı̨ cheekeè nàgedèe sìı naxıghǫ gıts'ǫ̀ xàdahohdì ı̨lè. Įdìı xok'e naxı̨ Achaıa nèk'e nàahdèe sìı sǫǫ̀mba t'à dǫ degaı ts'àahdı ha dahwhǫ hǫt'e gèehsı̨ ı̨lè. Naxınà hanì eghàlaahda t'à Macedonıa got'ı̨į̀ ededı̨ sı sǫǫ̀mba ełègį̀ı̨la. 
K'ètł'ǫ̀ naxıghǫ xàdahohdì ha-le t'à dıı dǫ taı naxıts'ǫ̀ gııhɂà hǫt'e. Hanì-ı̨dè eyı sǫǫ̀mba nàwhahtsı̨ı̨ sìı ts'atà gıtł'aahłe ha, wheahła gèehsı̨ ı̨lè t'à. 
Macedonıa got'ı̨į̀ sexè naxıts'àgede ha sìı gıgha sǫǫ̀mba ts'atà wheahła-le nı̨dè goxı̨ naxıghǫ xàdahots'edì ı̨lèe sìı naxıghǫ į̀į̀zhats'ı̨ı̨lı̨į̀ ats'ede ha, eyıts'ǫ naxı̨ sı edeghǫ į̀į̀zhaahłı̨į̀ aahde ha. 
Eyı hagode ch'à eyı dǫ taı gonakweè naxıts'àgede nı̨dè denahk'e nezı̨ ha dehwhǫ. Naxıdzeè t'à sǫǫ̀mba dǫ ghàahłe ha dahdı ı̨lèe sìı t'à naxıts'àgedı ha. Hanì-ı̨dè naxıdzeè t'à sǫǫ̀mba gıghàahłe ha, eyıts'ǫ naxınì k'èch'a aahłe ha-le. 
Dıı hats'edıı hotıì wenaahdì: Amìı t'asìı dehshee łǫ-lea dèè goyìı yelee sìı t'asìı dehshee łǫ-lea nàhtsį̀ ha, hanìkò amìı wet'à t'asìı dehshee łǫ dèè goyìı yelee sìı t'asìı dehshee łǫ nàhtsį̀ ha. 
Dǫ ededzeè t'à dàtłǫ sǫǫ̀mba dǫ ghàyele ha nıwǫǫ sìı k'ę̀ę̀ dǫ ghàyele ha hǫt'e. Edınì k'èch'a hanì-le-ı̨dè dǫ hayèhdı t'à t'asìı dǫ ghàyııɂà-le. Goınà xè t'asìı dǫ ghàts'ele nı̨dè Nǫ̀htsı̨ wınà hots'ehtsı̨ hǫt'e. 
Nǫ̀htsı̨ sìı t'asìı hazǫǫ̀ wet'à nezı̨į̀ aahda ha deɂǫ̀ǫ̀ naxıghàyele ha wegha dìì nıìle. Hanì-ı̨dè t'aats'ǫǫ̀ t'asìı hazǫǫ̀ wet'à-aaht'ı̨ ha sìı naxıts'ǫ ha, eyıts'ǫ t'aats'ǫǫ̀ wet'à nezı̨į̀ dǫ ts'àahdı ha. 
Dıı hanì dek'eèhtł'è k'ę̀ę̀: “T'asìı nezı̨ı̨ dǫ-teèt'ı̨ı̨ ghàı̨la hǫt'e. Ehkw'ı nàhohwhoo sìı welǫ whìle ts'ǫ̀ wheɂǫ ha,” dek'eèhtł'è. 
Nǫ̀htsı̨ ededı̨ sìı wet'à t'asìı dehshee dǫ ghàyele hǫt'e, eyıts'ǫ łèt'è dǫ ghàyele hǫt'e. Eyıt'à t'asìı hazǫǫ̀ wet'à ts'eedaa sìı denahk'e naxıghàyele ha, eyı wet'à denahk'e ehkw'ı eghàlaahda anaxele ha. 
Nǫ̀htsı̨ t'asìı hazǫǫ̀ deɂǫ̀ǫ̀ naxıghàyele ha, hanì-ı̨dè t'aats'ǫǫ̀ naxıdzeè t'à dǫ ts'àahdı ha dìì-le. Eyıts'ǫ goxı̨ got'ǫ̀ǫ̀ naxıdzeè t'à dǫ ts'àahdı t'à dǫ łǫ Nǫ̀htsı̨ ts'ǫ̀ masì gedı ha. 
Eyı hanì eghàlaahdàa sìı Nǫ̀htsı̨ wets'ǫ dǫ t'asìı gıt'à edaa zǫ gıghàahłe nıìle, hanìkò eyı haahłà t'à dǫ łǫ masì gı̨ı̨wǫ xè deɂǫ̀ǫ̀ Nǫ̀htsı̨ ghàsǫgeedı hǫt'e. 
Hanì dǫ ts'àahdı t'à dǫ naxık'ègeezǫ agèahłà hǫt'e. Zezì-Krı wegodıì nezı̨ı̨ naxıgha ehkw'ı-ahodıı k'ę̀ę̀ aahda t'à dǫ Nǫ̀htsı̨ ghàsǫgeedı ha, eyıts'ǫ dànì naxıdzeè t'à t'asìı dǫ ghàahłe, eyıts'ǫ dǫ hazǫǫ̀ gıts'àahdı t'à Nǫ̀htsı̨ ghàsǫgeedı ha hǫt'e. 
Eyıt'à naxıgha yagehtı nı̨dè Nǫ̀htsı̨ naxıts'ǫ̀ deɂǫ̀ǫ̀ wesǫnıwǫ t'à hanì nezı̨į̀ eghàlaahda anaxį̀į̀là ghǫ masì gı̨ı̨wǫ xè ededzeè t'à naxıgha yagehtı ha hǫt'e. 
Nǫ̀htsı̨ masì wets'ı̨ı̨hwhǫ ha hǫt'e! Ayìı goghàyı̨ı̨ɂǫǫ sìı sıì weghǫ enıìyah t'à wegha yatı whìle hǫt'e! 
