﻿2 Corınth.
5.
Dıı nèk'e ts'eedaa sìı whaà-lea gots'ǫ̀ nı̨hbàa yìı nàts'edè lanì hǫt'e. Eyı nı̨hbàa wedıhołè nı̨dè yak'e welǫ whìle ts'ǫ̀ gogha kǫ̀ gòɂǫ hǫt'e. Eyı sìı dǫlà t'à hòèlı̨ nıìle, Nǫ̀htsı̨ godawheɂǫǫ̀ ayį̀į̀là wek'èts'eezǫ hǫt'e. 
Hanìkò ı̨łaà dıı nèk'e ts'eeda et'ıì godzeè etse, yak'e gokǫ̀ yìı nàts'edè ha ts'ı̨ı̨wǫ t'à. 
Gokǫ̀ yìı nàts'edè nı̨dè goht'ǫ yìı ts'eèhkw'e lanì ha, hanì-ı̨dè ı̨ht'edę gògaat'ı̨ ha-le. 
Įłaà dıı nèk'e nı̨hbàa yìı ts'eeda et'ıì godzeè etse xè dats'ı̨ı̨ɂa hǫt'e. Etets'eèt'ı̨ ha ts'ı̨ı̨wǫ-le, hanìkò yak'e gokǫ̀ yìı nàts'edè ha ts'ı̨ı̨wǫ. Gozhį̀į̀ ełaàwıı sìı gozhį̀į̀ welǫ whìle ts'ǫ̀ eda ts'ǫ̀ łatats'eedè ha ts'ı̨ı̨wǫ. 
Nǫ̀htsı̨ sìı goxè hanì hòɂǫ gha gòhtsı̨ ı̨lè, eyıt'à Yedàyeh Nezı̨ı̨ gots'ǫ̀ ayį̀į̀là, eyı wet'à gogha nadąą̀ sǫǫ̀mba nìı̨ɂǫ lanì, eyı weghàà ı̨daà ayìı gogha whelaa sìı hotıì goghǫ̀t'à gha ayį̀į̀là. 
Eyıt'à gozhį̀į̀ t'à ı̨łaà ts'eeda et'ıì gots'ǫ̀ K'àowo wets'ǫ̀ nıwà ts'eèhkw'e hotıì godzeè t'à wek'èts'eezǫ hǫt'e. 
Ayìı gogha ehkw'ı-ahodıı sìı k'ę̀ę̀ ts'eeda hǫt'e, ayìı gogha wègaat'ı̨ı̨ sìı k'ę̀ę̀ ts'eeda nıìle. 
Eyı sìı hotıì godzeè t'à gogha ehkw'ı-ahodı hǫt'e. Gozhį̀į̀ wets'ǫǫ̀ nàts'edèe gà gots'ǫ̀ K'àowo wexè ats'ı̨ı̨t'ee sìı, eyı denahk'e gogha nezı̨ hǫt'e. 
Eyıt'à gozhį̀į̀ yìı ts'eedaa, gozhį̀į̀ yìı ts'eeda-le, ehk'ę̀ę̀ gots'ǫ̀ K'àowo wınà hots'ehtsı̨ ha ts'ı̨ı̨wǫ hǫt'e. 
Ehkw'ı anaxèehsı̨, goxı̨ hazǫǫ̀ Zezì-Krı wenadąą̀ nìts'edè gà gosınìyaehtı ha hǫt'e. Dǫ hazǫǫ̀ ı̨łaà edezhį̀į̀ yìı geeda et'ıì ayìı hogehtsı̨ k'èxa gıghàhòt'à ha. Ehkw'ı gı̨ı̨dà, hanì-le-ı̨dè ehkw'ı gı̨ı̨dà-le k'èxa goghàhòɂà ha. 
Eyıt'à dànì gots'ǫ̀ K'àowo wek'èats'ı̨ı̨t'e ha wek'èts'eezǫ t'à, dǫ ładı̨į̀ agede ha gıghǫdats'eehnè ha hots'eèhdzà. Dànì ts'eedaa sìı Nǫ̀htsı̨ wegha hotıì nezı̨į̀ wègaat'ı̨ hǫt'e, eyıts'ǫ naxı̨ sı naxınì gha hotıì nezı̨į̀ wègaat'ı̨ nı̨dè dehwhǫ. 
Haehsı̨ t'à naxıts'ǫ̀ edeghǫ xàdahots'edì ats'edı nıìle, hanìkò naxı̨ goghǫ xàhoahdì gha gots'ede. Hanì-ı̨dè, dǫ dànì gìgaat'ı̨ ghǫ xàhogedì hanìkò gıdzeè yìı dàgǫ̀ht'e ts'ǫnegı̨ı̨ɂà-le sìı gıts'ǫ̀ goahde ha dìì-le agode ha. 
Ezhı̨ne k'ę̀ę̀ k'ehots'eɂa nı̨dè Nǫ̀htsı̨ wegha hadets'į̀į̀là hǫt'e; gots'ı̨ı̨zǫ k'ę̀ę̀ k'ehots'eɂa nı̨dè naxıgha ats'et'ı̨ hǫt'e. 
Zezì-Krı goghǫneètǫ t'à hanì wegha eghàlats'eeda ha ts'ı̨ı̨wǫ. Dǫ ı̨łè dǫ hazǫǫ̀ gha ełaı̨wo, eyıt'à dǫ hazǫǫ̀ ełaı̨dè hǫt'e, eyı gogha ehkw'ı-ahodı t'à ats'et'ı̨. 
Ededı̨ sìı dǫ hazǫǫ̀ gha ełaı̨wo t'à, dǫ geedaa sìı edegha geeda ha nıìle hanìkò amìı gogha ełaı̨woo eyıts'ǫ gogha naìdàa sìı wegha geeda ha hǫt'e. 
Eyıt'à jǫ gots'ǫ ı̨daà dıı nèè gots'ǫ dǫ gınàowoò k'ę̀ę̀ dǫ wı̨ı̨zìı gısınìyats'ehtı ha nıìle. Įnę̀ę sìı Zezì-Krı hanì wesınìyats'ı̨ı̨htı ı̨lè, hanìkò dıì sìı hats'et'ı̨-le ats'ejà. 
Eyıt'à dǫ Zezì-Krı xè edaa sìı dǫgòò ìhłè hǫt'e. Wenàowoò zǫą sìı wedę adlà, wenàowogòò wetł'axǫǫ̀ ajà. 
Eyı hazǫǫ̀ sìı Nǫ̀htsı̨ ayehɂı̨ hǫt'e. Ededı̨ sìı Zezì-Krı wet'ǫ̀ǫ̀ wexè ts'èwhı̨į̀ ts'eedaà agǫ̀ǫ̀là, eyıts'ǫ godı nezı̨ı̨ dǫ ts'ǫ̀ hats'edı gha, la goghàı̨ɂǫ hǫt'e. 
Nǫ̀htsı̨ sìı Zezì-Krı wet'ǫ̀ǫ̀ dıı nèk'e dǫ edexè ts'èwhı̨į̀ geedaà agǫ̀ǫ̀là, eyıt'à gıhołı̨į̀ k'èxa gosınìyaehtı nıìle. Nǫ̀htsı̨ dànì dǫ edexè ts'èwhı̨į̀ geedaà agohɂı̨ı̨ sìı weghǫ dǫ ts'ǫ̀ hats'edı ha goghàhòı̨ɂǫ hǫt'e. 
Eyıt'à goxı̨ sìı Zezì-Krı wegha dǫ ts'ǫ̀ gots'edee ats'ı̨ı̨t'e. Goxı̨ got'à Nǫ̀htsı̨ naxıts'ǫ̀ gode lanì hǫt'e. Zezì-Krı wedahxà naxıghǫnàdats'eetì: Nǫ̀htsı̨ wexè ts'èwhı̨į̀ aahda, naxèts'edı. 
Zezì wehołı̨į̀ whìle sìı Nǫ̀htsı̨ gogha hołı̨ı̨ wek'e whelaà ayį̀į̀là, hanì-ı̨dè Zezì wet'ǫ̀ǫ̀ Nǫ̀htsı̨ ehkw'ı ts'eedaà agole ha. 
