﻿Mark.
3.
Sìghaı̨waà tł'axǫǫ̀ Zezì k'achı̨ ełègehdèe-kǫ̀ goyaèhtła. Dǫ ı̨łè wılà ełeènııtsoo, eyı wheda. 
Dǫ mǫ̀hdaa Zezì k'e nìdahogeeɂà ha gı̨ı̨wǫ t'à hotıì gıxoehdı, asį̀į̀ Nǫ̀htsı̨ Dzęę̀ k'e dǫ k'aàt'ıì ale ha sǫnı gı̨ı̨wǫ. 
Hanìkò Zezì dǫ wılà ełeènııtsoo ts'ǫ̀ hadı, “Dǫ hazǫǫ̀ gınadąą̀ nàąwo,” yèhdı. 
Eyı tł'axǫǫ̀ Zezì dǫ gıts'ǫ̀ xànegı̨ı̨ɂaa sìı gots'ǫ̀ hadı, “Nǫ̀htsı̨ Dzęę̀ k'e ayìı wets'àet'ǫ-le? Dǫ ts'ǫ̀ nezı̨į̀ eghàlats'eedaa, hanì-le-ı̨dè dǫ ts'ǫ̀ hoìla ghàlats'eedaa? Dǫ edaxàts'elee hanì-le-ı̨dè dǫ ełaàts'ehwhıı?” gòhdı. Hanìkò Zezì ts'ǫ̀ t'asagedı-le. 
Zezì dǫ hazǫǫ̀ yemǫǫ̀ nàgeèhzaa sìı gots'ǫ̀ wek'èch'a xè hotıì goghàeda. Sıì gıkwì nàtso t'à wegha dìì. Eyı tł'axǫǫ̀ dǫ wılà ełeènııtsoo sìı ts'ǫ̀ hadı, “Nılà daį̀chı,” yèhdı. Edılà daìchì ts'ǫ̀et'ıì wılà k'aàt'ıì anajà. 
Pharısee gı̨ı̨lı̨ı̨ sìı ekòet'ıì xàgeède, Herodıan gı̨ı̨lı̨ı̨ xè łą̀ą nègı̨ı̨de. Dànì Zezì ełaàgıìhwhı ha sìı dǫ naàhtǫ gıghǫ goı̨de. 
Zezì ekǫ gots'ǫǫ̀ naèhtła, edecheekeè xè tabàa ts'ǫ̀ ajà. Galılee nèk'e gots'ǫ dǫ łǫ Zezì k'èè geède. 
Zezì enıìyah łǫ hòèhtsı̨ ghǫ gıìkw'o t'à dǫ łǫ ekǫ nègı̨ı̨de. Judea nèk'e hazǫǫ̀, Jerusalem gots'ǫ, Idumea nèk'e ts'ǫ, deh Jordan wetadà kǫ̀ta gòlaa gots'ǫ, kǫ̀ta Tyre eyıts'ǫ Sıdon wemǫǫ̀ kǫ̀ta gòlaa gots'ǫ, dǫ łǫ Zezì ts'ǫ̀ geède. 
Sıì deɂǫ̀ǫ̀ dǫ łǫ Zezì ts'ǫ̀ ełegeehtsı t'à Zezì edecheekeè gots'ǫ̀ hadı, “Elà nechà-lea weyìı whıhdaa gha ts'atà whetǫ aahłe,” gòhdı. 
Zezì dǫ łǫ k'aàt'ıì agǫǫ̀là t'à dǫ eyaelı̨ı̨ hazǫǫ̀ Zezì xèlageedı ha gı̨ı̨wǫ t'à wets'ǫ̀ ełegeehtsı. 
Įnìłı̨ı̨ Zezì geɂį̀ nı̨dè wegà nagetł'ì gà hòtł'ò gezeh, hagedı, “Nı̨ sìı Nǫ̀htsı̨ Weza anet'e,” gedıì yagìzeh. 
Hanìkò Zezì yatı nàtsoo t'à gots'ǫ̀ hadı, “Amìı aht'ee sìı dǫ ts'ǫ̀ haahdı-le,” gòhdı. 
Zezì shìhka dekıìtła, dǫ gòį̀hchìı sìı gokayaı̨htı t'à gıts'ǫ̀ nìı̨de. 
Dǫzhìı hoònǫ-daats'ǫ̀-nàke gòį̀hchì, wecheekeèdeè gı̨ı̨lı̨ ha agǫ̀ǫ̀là. Gıxè aget'ı̨ ha eyıts'ǫ Nǫ̀htsı̨ Wenàowoò ghǫ dǫ hoghàgogeehtǫ gha dǫ ts'ǫ̀ agole ha gòį̀hchì. 
Eyıts'ǫ wıızì dahxà ı̨nìłı̨ı̨ xàdegeezhı ha goghàhòı̨ɂǫ. 
Dǫ hoònǫ-daats'ǫ̀-nàke gòį̀hchìı sìı dıı hagìyeh: Sımon (Zezì “Peter” yèhdı), 
eyıts'ǫ Zebedee weza James eyıts'ǫ wechı John, (Zezì eyı dǫ nàke Boanerges gòhdıì goızı; “eezhı ts'ǫ dǫ” gedıì-agedı), 
eyıts'ǫ Andrew, Phılıp, Bartholomew, Matthew, Thomas, Alphaeus weza James, Thadıyus, Sımon (“dǫ edenèè ghǫneètǫǫ” wìyeh), 
eyıts'ǫ Zhıdàà-Iscarıyot, ededı̨ sìı Zezì k'aodèe gotł'aàyį̀ı̨htı̨ hǫt'e. 
Zezì ı̨łèhkǫ̀ goyaèhtła, hanìkò k'achı̨ sıì dǫ łǫ gık'èè goyaède t'à Zezì eyıts'ǫ wecheekeè shègezhe ha kò dìì. 
Wèot'ı̨ wegodıì ghǫ gıìkw'o ekò ekǫ ts'ǫ̀ geède. “Ezhı̨ne whelı̨,” gedı nageehchı ha hogeèhdzà. 
Nǫ̀htsı̨-yatıì-k'ègedìı-dǫǫ̀ Jerusalem gots'ǫ eyı nègı̨ı̨dee sìı hagedı, “Wehłı̨ı̨ wets'ǫ̀-èlı̨. Įnìłı̨ı̨ gha k'àowo dahxà ı̨nìłı̨ı̨ xàdeezhıì at'ı̨,” gedı. 
Eyıt'à Zezì Nǫ̀htsı̨-yatıì-k'ègedìı-dǫǫ̀ gokayaı̨htı gà godı t'à goxè godoò hadı, “Wehłı̨ı̨ sìı ayìıha ı̨nìłı̨ı̨ xàgodeezhı nıwǫ welì? 
K'àowocho wenèk'e dǫ ełets'ǫ̀ xànıgı̨ı̨ɂa nı̨dè k'àowocho wenèè weghǫ wedıhołè ha hǫt'e. 
Eyıts'ǫ ı̨łèhkǫ̀ goyìı dǫ ełek'èch'a geeda nı̨dè dǫ gıxè hoìla agode ha. 
Eyıt'à wehłı̨ı̨ edek'èch'a at'ı̨ nı̨dè ededıhohtsı̨ ha hǫt'e. 
Eyıts'ǫ dıı hats'edı ghǫ nànıahdè: dǫ nàtsoo t'akwełǫ̀ǫ̀ dawets'eèzà lenǫsıı wekǫ̀ enìxàts'eezhì gà wets'ǫ t'asìı ts'eeɂį̀ ha dìì. Dawets'eèzà tł'axǫǫ̀ nı̨dè zǫ wekǫ̀ gots'ǫ t'asìı ts'eeɂį̀ ha dìì-le. 
Ehkw'ı anaxèehsı̨, hołı̨ı̨ hazǫǫ̀ eyıts'ǫ Nǫ̀htsı̨ k'èch'a gots'edee sìı dǫ ghǫ nahoezhe ha hǫt'e. 
Hanìkò Yedàyeh Nezı̨ı̨ k'èch'a gogede nı̨dè eyı gıghǫ nahoezhe ha nıìle. Eyı hołı̨ı̨ sìı welǫ whìle ts'ǫ̀ gık'e wheɂǫ ha hǫt'e,” gòhdı. 
“Įnìłı̨ı̨ wets'ǫ̀-èlı̨,” gıìhdı ts'ıhɂǫ̀, Zezì hadıì gots'ǫ̀ xàyaı̨htı. 
Ekìıyeè k'e Zezì wemǫ eyıts'ǫ wechıke eyı nègı̨ı̨de. Mǫ̀ht'a nàgeèhza ts'ǫ dǫ ı̨łè wets'ǫ̀ goyageèhɂà, gots'ǫ̀ xàetłaà ayele ha. 
Dǫ Zezì wemǫǫ̀ geèhkw'ee sìı hagedı, “Nemǫ eyıts'ǫ nechı mǫ̀ht'a nàgeèhza, negeɂį̀ ha gı̨ı̨wǫ,” gıìhdı. 
Zezì gots'ǫ̀ hadı, “Amìı semǫ ne? Amìı sechı agı̨ı̨t'e?” gòhdı. 
Dǫ yemǫǫ̀ geèhkw'ee sìı goghàeda, hadı, “Dıı sìı semǫ eyıts'ǫ sechı agı̨ı̨t'e! 
Amìı Nǫ̀htsı̨-Gotà k'èagı̨ı̨t'ee sìı sechı, sedè eyıts'ǫ semǫ agı̨ı̨t'e,” Zezì gòhdı. 
