﻿Matthew.
25.
“Ekìıyeè k'e nı̨dè Nǫ̀htsı̨ Wenàowoò k'ę̀ę̀ dıı lagode ha: T'eekoa hoònǫ tłeèk'ǫ̀ǫ xè xàgeède gà mǫ̀ht'a dǫzhìı honìda ha sìı k'enageèhɂı̨. 
T'eekoa sı̨làı sìı gogı̨ı̨zǫ-le eyıts'ǫ sı̨làı sìı gogı̨ı̨zǫ. 
T'eekoa gogı̨ı̨zǫ-le sìı tłeèk'ǫ̀ǫ edexè k'egele, hanìkò tłeh deɂǫ̀ǫ̀ k'egele-le. 
Ekò t'eekoa gogı̨ı̨zǫǫ sìı tłeèk'ǫ̀ǫ eyıts'ǫ tłeh deɂǫ̀ǫ̀ edexè k'egele. 
Eyı dǫ honìda ha sìı whaà gık'eènaèhɂı̨ ts'ıhɂǫ̀, begeèxı̨į̀ agejà t'à geète. 
“Totanı nìı̨ɂǫ ekò dǫ whezeh, hadı: ‘Dǫ honìda ha sìı nììtła ha nìkw'o! Jǫ weda łą̀ą nìahdè!’ hadı. 
“Ekòet'ıì t'eekoa hazǫǫ̀ ts'ıgı̨ı̨dè, edets'ǫ tłeèk'ǫ̀ǫ nezı̨į̀ dèk'ǫ̀ agı̨į̀là. 
T'eekoa gogı̨ı̨zǫ-le sìı t'eekoa gogı̨ı̨zǫǫ ts'ǫ̀ hagedı, ‘Gots'ǫ tłeèk'ǫ̀ǫ nadaakwe t'à, tłeh mǫ̀hdaa goghàahdı,’ gògedı. 
“Hanìkò t'eekoa gogı̨ı̨zǫǫ sìı gots'ǫ̀ hagedı, ‘Į̀le, hats'ele ha dìì, hazǫǫ̀ gogha tłeh deghàà ade ha-le. Edegha tłeh dǫ ghǫ nàahdì,’ gògedı. 
“Tłeh nàgeehdì ha ekǫ geède gıtł'axǫǫ̀ dǫ honìda ha sìı eyı nììtła. T'eekoa ts'atà gıdageèhkw'ee sìı nàsı̨ hołè ha eyı dǫ xè kǫ̀ goyageède gà enìgį̀ı̨hgè. 
“Sìghaı̨waà tł'axǫǫ̀ t'eekoa gogı̨ı̨zǫ-le sìı eyı nègı̨ı̨de, hagedı, ‘K'àowo! K'àowo! Gots'ǫ̀ enìxàı̨chı!’ gedı. 
“Hanìkò gots'ǫ̀ hadı, ‘Ehkw'ı aehsı̨, naxık'èehsǫ-le,’ gòhdı. 
“Eyıt'à edexoahdı! Ayìı dzęę̀ k'e eyıts'ǫ ayìı sadzeè k'e hagode ha sìı wek'èahsǫ nıìle,” Zezì hadıì goxè godo. 
Zezì hadı, “Nǫ̀htsı̨ Wenàowoò k'ę̀ę̀ dıı hanì hòɂǫ ha: Dǫ ahxee ı̨łè t'asį̀ı̨ gǫǫwà ts'ǫ̀ kǫ̀taetła kwe dǫ hazǫǫ̀ yegha eghàlaìdèe sìı gokayaı̨htı gà t'asìı hazǫǫ̀ wets'ǫ sìı ts'ǫ̀ k'ahogedè agǫ̀ǫ̀là. 
Sı̨làı-lemì satsǫ̀ą dekwoo edecheekeè ı̨łè ghàı̨la, k'achı̨ nàke-lemì satsǫ̀ą dekwoo edecheekeè ı̨łè ghàı̨la eyıts'ǫ k'achı̨, ı̨łè-lemì satsǫ̀ą dekwoo edecheekeè ı̨łè ghàı̨la. Dànì nezı̨į̀ eghàlageeda k'ę̀ę̀ satsǫ̀ą dekwoo gotaàwhela. Eyı tł'axǫǫ̀ nıwà kǫ̀taèhtła. 
Wecheekeè sı̨làı-lemì satsǫ̀ą dekwoo weghǫ̀zhaa sìı ekòet'ıì eyı sǫǫ̀mba t'à eghàlaı̨dà. Yet'à sı̨làı-lemì satsǫ̀ą dekwoo deɂǫ̀atłǫ whehtsı̨. 
Eyı xèht'eè wecheekeè nàke-lemì satsǫ̀ą dekwoo weghǫ̀zhaa sìı yet'à nàke-lemì satsǫ̀ą dekwoo deɂǫ̀atłǫ whehtsı̨. 
Hanìkò wecheekeè ı̨łè-lemì satsǫ̀ą dekwoo weghǫ̀zhaa sìı dèè yìı gǫǫ̀ɂà ayį̀į̀là gà edets'ǫ̀ k'àowo wesǫǫ̀mbaà wek'èhodìı ha dèè goyìı yı̨ı̨wa. 
“Whaà hoòwo tł'axǫǫ̀ eyı dǫ gıts'ǫ̀ k'àowo nǫ̀ǫtła t'à wesǫǫ̀mbaà dàgı̨ı̨laa sìı yeghǫ dagoehke. 
Wecheekeè sı̨làı-lemì satsǫ̀ą dekwoo weghǫ̀zhaa sìı wexètłǫ sı̨làı-lemì yèhtsı̨ı̨ sìı hazǫǫ̀ edets'ǫ̀ k'àowo gà nèyı̨ı̨wa, hayèhdı, ‘Sets'ǫ̀ k'àowo, sı̨làı-lemì satsǫ̀ą dekwoo t'à eghàlaıhdà asèneelà ı̨lè. Jǫ weghàı̨da, eyı wet'à k'achı̨ sı̨làı-lemì whıhtsı̨,’ yèhdı. 
“Wets'ǫ̀ k'àowo hayèhdı, ‘Secheekeè nezı̨ı̨ anet'e, nezı̨į̀ eghàlaneedà! T'asìı łǫ-lea t'à nezı̨į̀ eghàlaneedà k'èxa t'asìı łǫ gha k'àı̨woò anehłe ha. Sexè nınà welè!’ yèhdı. 
“Wecheekeè nàke-lemì satsǫ̀ą dekwoo weghǫ̀zhaa sìı ededı̨ sı edets'ǫ̀ k'àowo ts'ǫ̀ èhtła, hayèhdı, ‘Sets'ǫ̀ k'àowo, nàke-lemì satsǫ̀ą dekwoo t'à eghàlaıhdà asèneelà. Jǫ weghàı̨da, eyı wet'à k'achı̨ nàke-lemì whıhtsı̨,’ yèhdı. 
“Wets'ǫ̀ k'àowo yets'ǫ̀ hadı, ‘Secheekeè nezı̨ı̨ anet'e, nezı̨į̀ eghàlaneedà! T'asìı łǫ-lea nezı̨į̀ weghàlaneedà k'èxa t'asìı łǫ gha k'àı̨woò anehłe ha. Sexè nınà welè!’ yèhdı. 
“Eyı tł'axǫǫ̀ wecheekeè ı̨łè-lemì satsǫ̀ą dekwoo weghǫ̀zhaa sìı edets'ǫ̀ k'àowo ts'ǫ̀ èhtła, hayèhdı, ‘K'àowo, dǫ dìì anet'e nek'èehsǫ. T'asìı dehshe gha t'asìı dèè k'e nèneela-le kò, wets'ǫ t'asìı dèhshǫǫ sìı į̀hchı. 
Nets'àehjı̨ t'à dèè goyìı nesǫǫ̀mbaà nàehɂı̨. Jǫ nesǫǫ̀mbaà hazǫǫ̀ whela,’ yèhdı. 
“Wets'ǫ̀ k'àowo hayèhdı, ‘Secheekeè łı̨nı̨ı̨ anet'e xè gots'ı̨ı̨dì. Dǫ dìì aht'e sek'èı̨zǫ. T'asìı dehshe gha t'asìı nèehła-le kò wets'ǫ t'asìı dèè k'e dèhshǫǫ sìı ìhchì. 
Dǫ dìì aht'e sek'èı̨zǫ nı̨dè dànìghǫ sesǫǫ̀mbaà, sǫǫ̀mba-dehshee-kǫ̀ nèneela-le nǫǫ̀? Hanì-ı̨dè jǫ anahjà nı̨dè sesǫǫ̀mbaà eyıts'ǫ sǫǫ̀mba wetaekw'ıı sìı ełexè naìhchı ha ı̨lè,’ yèhdı. 
“Eyıt'à k'àowo edecheekeè eyıì-le gots'ǫ̀ hadı, ‘Wesǫǫ̀mbaà weghǫ nìahwha. Secheekeè hoònǫ-lemì satsǫ̀ą dekwoo wets'ǫ sìı weghàahłe,’ gòhdı. 
Amìı t'asìı wets'ǫ sìı t'asìı deɂǫ̀atłǫ weghàzhe ha hǫt'e, hanì-ı̨dè t'asìı deɂǫ̀atłǫ wets'ǫ ade ha. Hanìkò amìı t'asìı wets'ǫ-le sìı t'asìı łǫ-lea wets'ǫ kò weghǫ ìchı ha hǫt'e. 
Eyı secheekeè wet'àaɂà-le sìı togoòtł'ò gòɂǫǫ ts'ǫ̀ xàweahxà. Ekǫ dǫ getse xè gıgha hoìla ha,’ k'àowo gòhdı,” Zezì hadıì goxè godo. 
Zezì hadı, “Dǫ-wet'àaɂàa-deè enıìyah t'à nàtso xè nììtła nı̨dè, wets'ǫ yak'eet'ı̨į̀ gıxè at'ı̨ ha, eyıts'ǫ yak'e gots'ǫ k'àowocho elı̨ xè ededaèhchı̨cho k'e wheda ha. 
Dıı nèk'e dǫ hazǫǫ̀ xàɂaa wenadąą̀ łą̀ą ełègehdè ha. Sahzǫ̀ą eyıts'ǫ ejıe łats'ıgewa lanì dǫ hazǫǫ̀ łats'ıgòwa ha. 
Sahzǫ̀ą hazǫǫ̀ nàgòts'ehnèe nègòwa ha eyıts'ǫ ejıe hazǫǫ̀ gots'ı̨hts'ǫ nègòwa ha. 
“Eyı tł'axǫǫ̀-ı̨dè k'àowocho dǫ nàgòts'ehnèe nàgeèhzaa sìı gots'ǫ̀ dıı hadı ha, ‘Jǫ aahdè, Setà naxıxè sìghà anıwǫ hǫt'e. Dıı nèè hòèlı̨ gots'ǫ Nǫ̀htsı̨ Wenàowoò k'ę̀ę̀ hòɂǫǫ naxıda sınìhòt'ǫǫ sìı ts'ǫ̀ goyaahdè. 
Bò ghaehwhı ekò t'asìı ghǫ shèhtı̨ seghàahdì ı̨lè. Tı ghaehwhı ekò tı seghàahdì ı̨lè. Naxıkǫ̀ta xàhtǫ ehłı̨ ekò naxıkǫ̀ ts'ǫ̀ asèahłà ı̨lè. 
Goht'ǫ sets'ǫ-le ekò goht'ǫ seghàahła ı̨lè. Eyaehłı̨ ekò sek'èahdì ı̨lè. Eyıts'ǫ dǫ-danìı̨laa-kǫ̀ whıhda ekò sets'àwhaahde ı̨lè,’ hagòhdı ha. 
“Dǫ ehkw'ı geedaa sìı gıts'ǫ̀ dıı hadı ha, ‘Gots'ǫ̀ K'àowo, dàht'e bò ghaı̨wı̨ t'à newàts'ı̨ı̨dì nǫǫ̀? Dàht'e tı ghaı̨wı̨ t'à tı neghàts'ı̨ı̨dì nǫǫ̀? 
Dàht'e gokǫ̀ta xàhtǫ nelı̨ t'à gokǫ̀ ts'ǫ̀ anets'į̀į̀là nǫǫ̀? Dàht'e goht'ǫ nets'ǫ-le t'à goht'ǫ neghàts'ı̨ı̨là nǫǫ̀? 
Dàht'e eyanelı̨ nets'aɂı̨ nǫǫ̀? Eyıts'ǫ dàht'e dǫ-danìı̨laa-kǫ̀ wheęda t'à nets'àts'ede nǫǫ̀?’ hagedı ha. 
“K'àowocho hagòhdı ha, ‘Ehkw'ı anaxèehsı̨, sechı dek'aɂį̀ elı̨ı̨ sìı wegha ayìı dàahłàa sìı sı̨ segha haahłà hǫt'e,’ gòhdı ha. 
“Eyı tł'axǫǫ̀-ı̨dè k'àowocho dǫ gots'ı̨hts'ǫ nàgeèhzaa sìı gots'ǫ̀ hadı ha, ‘Sets'ǫǫ̀ naahdè, naxıxè hoìla hòɂǫ ha hǫt'e. Welǫ whìle ts'ǫ̀ kǫ̀ dèk'ǫ̀ǫ wehłı̨ı̨ eyıts'ǫ weyak'eet'ı̨į̀ gıdagòɂǫǫ sìı ts'ǫ̀ aahde. 
Segha ayìı dàahłà k'èxa naxıts'ǫ̀ hagode ha. Bò ghaehwhı ekò t'asìı weghǫ shèhtı̨ seghàahdì-le ı̨lè. Tı ghaehwhı ekò t'asìı ts'edǫ seghàahdì-le ı̨lè. 
Naxıkǫ̀ta xàhtǫ ehłı̨ ekò naxıkǫ̀ ts'ǫ̀ asèahłà-le ı̨lè. Goht'ǫ sets'ǫ-le ekò goht'ǫ seghàahła-le ı̨lè. Eyaehłı̨ ekò eyıts'ǫ dǫ-danìı̨laa-kǫ̀ whıhda ekò sets'àwhaahde-le ı̨lè,’ gòhdı ha. 
“Ededı̨ sı gıts'ǫ̀ hagedı ha, ‘Gots'ǫ̀ K'àowo, dàht'e bò eyıts'ǫ tı ghaı̨wı̨ nets'aɂı̨ nǫǫ̀? Dàht'e gokǫ̀ta xàhtǫ nelı̨ nǫǫ̀, dàht'e goht'ǫ nets'ǫ-le nǫǫ̀, dàht'e eyanelı̨ eyıts'ǫ nedaàtǫ nǫǫ̀? Eyıts'ǫ dàht'e seè nets'àts'ı̨ı̨dì-le nǫǫ̀?’ gıìhdı ha. 
“K'àowocho hagòhdı ha, ‘Ehkw'ı anaxèehsı̨, dıı dek'aɂį̀ gı̨ı̨lı̨ı̨ nàgòts'ehnèe nàgeèhzaa sìı gıgha t'asìı haahłà-le nı̨dè sı̨ segha t'asìı haahłà-le hǫt'e,’ gòhdı ha. 
“Eyı dǫ gots'ı̨hts'ǫ nàgeèhzaa sìı welǫ whìle ts'ǫ̀ dagı̨ı̨ɂa ha, hanìkò amìı ehkw'ı edaa sìı welǫ whìle ts'ǫ̀ eda ha,” Zezì hadıì goxè godo. 
