﻿Dànì Kèhoį̀wo.
35.
Eyı tł'axǫǫ̀ Nǫ̀htsı̨ Jacob ts'ǫ̀ gode, “Bethel gòyeh ts'ǫ̀ anaąde, eyı nàądè, eyıts'ǫ ekǫ Nǫ̀htsı̨ ts'ǫ̀ t'asìı k'eek'ǫ̀ gha t'à kwe ełeka whela t'à kwe-ladà nehtsı̨. Nı̨ı̨de Esau ch'à kwı̨èhsa ekò Nǫ̀htsı̨ nets'ǫ̀ wègoèht'į̀ ı̨lèe sìı eyı aht'e,” yèhdı. 
Eyıt'à Jacob edèot'ı̨ eyıts'ǫ dǫ gıxè nàdèe sìı ts'ǫ̀ hadı, “Eładı̨ ts'ǫ nǫ̀htsı̨ą xàwhahshaa sìı ɂǫ̀ahdè gà edek'enaahtse eyıts'ǫ naxıgoht'ǫǫ̀ ładı̨į̀ aahłe. 
Eyı tł'axǫǫ̀-ı̨dè Bethel gòyeh ts'ǫ̀ ts'ııdè, ekǫ Nǫ̀htsı̨ gha kwe-ladà ehtsı̨ ha. Sexè hoìla nàhòwo ekò Nǫ̀htsı̨ ekǫ seèhkw'ǫ ı̨lè eyıts'ǫ edı̨į̀ sek'eèhoowoo sìı sexè aet'į̀ hǫt'e,” gòhdı. 
Eyıt'à eładı̨ ts'ǫ nǫ̀htsı̨ą hòèlı̨ı̨ hazǫǫ̀ Jacob ghàgı̨ı̨wa eyıts'ǫ godzeèbàa k'e whelaa sìı gıghàı̨wa. Jacob, hazǫǫ̀ neyı̨į̀wa gà Shekem nèk'e ts'ıcho gà dèè goyìı yı̨ı̨wa. 
Eyı tł'axǫǫ̀ nageèhde. Gımǫǫ̀ kǫ̀ta gòlaa gots'ǫ dǫ hazǫǫ̀ sıì Nǫ̀htsı̨ ts'àgeejı̨į̀ agejà t'à dǫ wı̨ı̨zìı godegeèzhì-le. 
Jacob eyıts'ǫ dǫ hazǫǫ̀ gıxè aget'ı̨ı̨ sìı Kanan nèk'e Luz gòyeh (dıì Bethel gòyeh) sìı nègı̨ı̨de. 
Ekǫ kwe ełeka whela t'à kwe-ladà whehtsı̨. Edı̨ı̨de Esau ch'à kwı̨èhsa ekò, ekǫ Nǫ̀htsı̨ wets'ǫ̀ wègoèht'į̀ ı̨lè t'à eyı gòɂǫǫ sìı El-Bethel gòyeh ayį̀į̀là. 
Rebekah nechà-lea ekò ts'èko Deborah yek'èdìı ı̨lèe sìı ełaı̨wo t'à Bethel gòyeh ts'ǫ̀ nıwà-le ts'ıcho gà wekw'ǫǫ̀ whetǫ. Eyıt'à eyı dèè Alon-Bakut gòyeh agį̀į̀là. 
Jacob, Padan-Aram nèk'e gots'ǫ Bethel ts'ǫ̀ nǫ̀ǫtła ekò k'achı̨ Nǫ̀htsı̨ wets'ǫ̀ wègoèht'į̀ eyıts'ǫ yatı nezı̨ı̨ t'à yek'eèyaı̨htı. 
Nǫ̀htsı̨ yets'ǫ̀ hadı, “Jacob nìyeh kò, jǫ gots'ǫ Jacob nìyeh ha-le. Israel nìyeh ha,” yèhdı. Eyıt'à Israel wìyeh ayį̀į̀là. 
Eyıts'ǫ Nǫ̀htsı̨ yets'ǫ̀ hadı, “Nǫ̀htsı̨ t'asìı wegha dìì-le aht'e. Chekoa łǫ nets'ǫ welè. Nets'ıhɂǫ̀ǫ-dǫǫ̀ gots'ǫ dǫ xàgeèɂaa łǫ gǫ̀hłı̨ ha, eyıts'ǫ k'àowocho łǫ nets'ǫ xàhohwhı ha. 
Netseè Abraham eyıts'ǫ netà Isaac, dèè gıghàehɂǫǫ sìı nı̨ sı neghàehɂà ha, eyıts'ǫ netł'axǫǫ̀ nets'ıhɂǫ̀ǫ-dǫǫ̀ sı gıghàehɂà ha,” Nǫ̀htsı̨ yèhdı. 
Ekǫ Nǫ̀htsı̨ yets'ǫ̀ goı̨de tł'axǫǫ̀ wènagoèt'į̀-le. 
Jacob, ekǫ Nǫ̀htsı̨ yets'ǫ̀ goı̨dee sìı eyı kwe nàı̨ɂaà ayį̀į̀là. Jìetì eyıts'ǫ tłeh łekǫǫ yek'e łaèhtł'ı, (eyıt'à eyı gòɂǫǫ sìı Nǫ̀htsı̨ gha degaı k'è gòɂǫǫ̀ ayį̀į̀là). 
Jacob ekǫ Nǫ̀htsı̨ yets'ǫ̀ goı̨dee sìı Bethel gòyeh ayį̀į̀là. 
Eyı tł'axǫǫ̀ Bethel gots'ǫ nageèhde. Įłaà kǫ̀ta Efrat ts'ǫ̀ gıadè ekò Jacob wets'èkeè Rachel weza gǫ̀hłı̨ ha nìkw'o, hanìkò chekoa k'è hòtł'ò eyawhelı̨. 
Chekoa wegǫ̀hłı̨ t'à Rachel sıì hòtł'ò eyaelı̨ ekò ts'èko yek'èdìı sìı yets'ǫ hadı, “K'achı̨ dǫzhìa nets'ǫ t'à nedzeè nàtsoò anele,” yèhdı. 
Hanìkò eładaawe t'à nǫǫde ejì ekò k'e Ben-Onı wìyeh ayį̀į̀là. Hanìkò wetà, Benjamın wìyeh ayį̀į̀là. 
Rachel ełaı̨wo ekò kǫ̀ta Efrat (dıì Bethlehem gòyeh) ts'ǫ̀ goòɂàa ekǫ wekw'ǫǫ̀ nègı̨į̀tǫ. 
Jacob, wets'èkeè wekw'ǫǫ̀ whetǫǫ k'e kwe nàı̨ɂaà ayį̀į̀là. Dıı dzęę̀ ts'ǫ̀ eyı Rachel wekw'ǫǫ̀ whetǫǫ wenahodì gha ayį̀į̀là. 
Israel (Jacob) edèot'ı̨ xè k'achı̨ naèhtła. Mıdal-Eder gòyeh wete ts'ǫ̀ edenı̨hbàa nàı̨hgè. 
Israel eyı nèk'e nàgedè ekò weza ǫhdaà Ruben edetà wets'ǫ ts'èko Bılah t'àı̨tè. Wetà yeghǫ ıìkw'o. Jacob, weza hoònǫ-daats'ǫ̀-nàke gòı̨lè: 
Leah weza ek'ètaı gòı̨lè: Jacob weza ǫhdaà Ruben, Sımeyon, Levı, Judah, Isakar, eyıts'ǫ Zebulun. 
Rachel weza nàke gòı̨lè: Joseph eyıts'ǫ Benjamın. 
Bılah, ts'èko Rachel gha eghàlaedaa sìı weza nàke gòı̨lè: Dan eyıts'ǫ Naftalı. 
Zılpah, ts'èko Leah gha eghàlaedaa sìı weza nàke gòı̨lè: Gad eyıts'ǫ Asher. Jacob weza hageètłǫǫ Padan-Aram nèk'e gıgǫ̀hłı̨. 
Jacob, edetà Isaac ts'ǫ̀ anajà. Mamer nèk'e, kǫ̀ta Kırat-Arba (dıì Hebron gòyeh) ts'ǫ̀ nıwà-le, ekǫ wetseè Abraham eyıts'ǫ wetà Isaac nàgı̨ı̨dèe sìı ts'ǫ̀ anajà. 
Jacob wetà Isaac ı̨łèakw'eènǫ-daats'ǫ̀-ek'èdı̨ènǫ (180) xo ts'ǫ̀ ı̨ı̨dà. 
Eyı tł'axǫǫ̀ nǫǫde xàèhjı gà ełaı̨wo, eyıts'ǫ wecho gots'ǫ̀ ajà. Sıì eneèko whelı̨ı̨ ts'ǫ̀ ı̨ı̨dà. Weza Esau eyıts'ǫ Jacob wekw'ǫǫ̀ nègı̨į̀tǫ. 
