MAT 1:1 Yesu 'ö Atanna ‑ya ‑ya Mɛdhamɛ 'ka bha‑ "bhɛma ‑nu 'tɔ ‑bhiëë ꞊nɛ: 'Mɛ 'wo ‑gban Ablaamö bha 'ö dho 'ö zun‑ 'ka Davi ‑bha, 'ö go Davi ‑bha 'ö dho 'ö zun Yesu ‑bha. ‑A ‑mɛ "gblʋ̈gblʋ̈ ‑wo ꞊plɛ, wo ꞊në‑ 'wo Ablaamö waa‑ Davi ‑a ‑nu 'ka.
MAT 1:2 Ablaamö bha ꞊në Izaakö kpɔ, 'yö Izaakö ‑yö Zakɔbö kpɔ, 'yö Zakɔbö ‑dɩ 'pö 'ö Zuda waa‑ ö dheebhang ‑nu ‑a ‑nu kpɔ.
MAT 1:3 ꞊Dhɛ 'ö Zuda ꞊ya Fadhɛzö waa‑ Zedha ‑a ‑nu kpɔ, ‑a ‑nu dhe 'wo‑ ‑dhɛ Tama bha‑ "dhiʋ̈, 'yö Fadhɛzö ‑dɩ 'pö 'ö Eslɔɔmö kpɔ, 'yö Eslɔɔmö ‑yö Adhamö kpɔ,
MAT 1:4 'yö Adhamö ‑yö Abinadabö kpɔ, 'yö Abinadabö ‑yö Naasɔn kpɔ, 'yö Naasɔn ‑yö Samɔ kpɔ,
MAT 1:5 'yö Samɔ ‑yö Boazö kpɔ Dhaabö "dhiʋ̈, 'yö Boazö ‑yö Obɛdö kpɔ, 'yö 'wo‑ ‑bha dhe ‑dhɛ 'pö Dhutö. Obɛdö bha ꞊në Izai kpɔ,
MAT 1:6 'yö Izai ‑zë 'ö gun ‑na ‑gblüdë Davi 'kpɔ. ꞊Dhɛ 'ö ꞊ya kë "dhʋ̈, 'yö Davi ‑yö Sadhomɔ kpɔ, Sadhomɔ bha ꞊në‑ dhe ‑yö gun Udhi ‑bha dhebhɔ 'ka "kɛɛ 'yö Davi ‑ya bho‑ ‑gɔ.
MAT 1:7 'Yö Sadhomɔ ‑yö Dhoboamö kpɔ, 'yö 'wo Dhoboamö gbö ‑dhɛ Abia, 'yö 'wo Abia gbö ‑dhɛ Aza.
MAT 1:8 Aza ‑bha gbö ꞊nɛ 'wo‑ ‑dhɛ 'pö Zozafa, 'yö 'wo Zozafa gbö ‑dhɛ Zolamö, 'yö 'wo Zolamö gbö ‑dhɛ Ozia,
MAT 1:9 Ozia bha ꞊në Zoatamö kpɔ, 'yö Zoatamö ‑yö Akazö kpɔ, 'yö Akazö ‑yö Ezekiasö kpɔ,
MAT 1:10 'yö 'wo Ezekiasö gbö ‑dhɛ 'pö Manase, 'yö Manase ‑yö Amɔ kpɔ, 'yö Amɔ ‑yö Zozia kpɔ.
MAT 1:11 Zozia bha 'yö Zekonia waa‑ ö dheebhang ‑nu ‑a ‑nu kpɔ "tʋ̈ng 'wo Izraɛdhö ‑mɛ ‑nu kun‑ 'ka 'wo dho‑ ‑nu 'ka ꞊dhuëngdhɛ 'gü Babidhɔnö bha‑ 'ka.
MAT 1:12 ꞊Dhɛ 'ö Izraɛdhö ‑mɛ ‑nu ꞊wa 'go Babidhɔnö ꞊wa nu, 'yö Zekonia ‑yö Sadhasiɛdhö kpɔ, 'yö Sadhasiɛdhö ‑yö Zodhobabɛdhö kpɔ.
MAT 1:13 'Yö Zodhobabɛdhö ‑yö Abiudö kpɔ, 'yö Abiudö ‑yö Edhiakimö kpɔ, 'yö Edhiakimö ‑yö Azɔɔ kpɔ,
MAT 1:14 'yö Azɔɔ ‑yö Sadɔkö kpɔ, 'yö Sadɔkö ‑yö Asimö kpɔ, 'yö Asimö ‑yö Edhiudö kpɔ,
MAT 1:15 Edhiudö bha 'yö Edheazaa kpɔ, 'yö Edheazaa ‑yö Matan kpɔ, Matan bha ꞊në Zakɔbö kpɔ,
MAT 1:16 'yö Zakɔbö ‑yö Zosɛfu 'ö ‑kë Madhi 'ö Yesu 'wo‑ ‑dhɛ Atanna ‑bha ‑Yamɛ bha‑ kpɔ bha‑ ‑bha gɔn 'ka bha‑ kpɔ.
MAT 1:17 Yesu "bhɛma ‑nu 'ö go Ablaamö ‑bha 'ö dho 'ö zun Davi ‑bha ‑wo mɛ ‑kaɔng do ga ‑yiisiö, 'yö 'mɛ 'wo go Davi ‑bha 'wo dho 'wo zun "tʋ̈ng 'wo Izraɛdhö ‑mɛ ‑nu kun‑ 'ka, 'wo dho Babidhɔnö ‑a ‑bha bha 'wo ‑kaɔng do ga ‑yiisiö 'pö, 'yö 'mɛ 'wo go 'pö "tʋ̈ng 'dhɛ bha‑ ‑bha 'wo nu 'wo zun‑ 'ka Atanna ‑bha ‑Yamɛ bhɔ "tʋ̈ng ‑bha 'pö 'wo ‑kaɔng do ga ‑yiisiö.
MAT 1:18 ‑Kɔ 'ö Yesu Klisi ‑yö bhɔ‑ 'ka ‑kaa ‑ga 'ö ya: Madhi 'ö ‑kë Yesu 'kpɔdhe 'ka bha ‑yö ‑gun Zosɛfu dhɔɔbhaa ‑mɛ 'ka. ‑Wo ‑to ‑dhɔ bha ꞊në‑ 'gü kö 'wii ‑da ꞊kö wo 'ko ꞊keng‑ "ɛɛn kö Madhi 'yii ‑da ꞊kö Zosɛfu ‑gɔ 'kɔɔdhö kö ‑yö kë‑ ‑bha dhe 'ka, 'yö Madhi ‑yö 'gu sü Atanna ‑bha 'Nii‑ "slʋ̈ʋ̈slʋ̈ ‑bha 'gügbɩɩdhɛ ‑kɔ 'ka.
MAT 1:19 ꞊Dhɛ 'ö ‑kë ꞊dhɛ Zosɛfu 'ö ‑kë Madhi dhɔɔbhaamɛ 'ka bha ‑yö ‑gun "klʋsëmɛ 'ka, 'ö 'yaa gun‑ "piʋ̈ ꞊dhɛ 'ö Madhi "pëng ‑pɛn bha, 'yö‑ ‑ya ö zuë" "piʋ̈ ꞊dhɛ waa‑ Madhi 'wo "kan ‑bin 'gü 'gu 'ö‑ sü "dhʋ̈ bha‑ ‑wɔn 'gü.
MAT 1:20 ꞊Dhɛ 'ö ö ‑zʋ 'gɔn sië 'wɔn bha‑ 'gü "dhʋ̈, 'yö kwa Dëmɛ ‑bha "kië do ‑yö ö ‑dɩ ‑zɔn ‑dhɛ kö ‑yö yi zë sië 'yö‑ pö‑ ‑dhɛ: «Zosɛfu, Davi suu 'gü ‑në, "sika 'ya 'dho ‑da i 'gü Madhi ‑sü i ‑bha dhe 'ka ‑sü ‑wɔn 'gü, ‑a ‑gɛn ‑mü ꞊dhɛ 'gu 'ö‑ sü bha‑ ‑dɩ 'gü "slë 'yaa ‑mü, "kɛɛ Atanna ‑bha 'Nii‑ ‑bha 'gügbɩɩdhɛ ꞊në‑ ‑kë 'yö 'gbiödhe 'ka bha.
MAT 1:21 'Në 'ö dho‑ 'kpɔ bha 'nëgɔɔn ‑mü. ꞊Yaa‑ 'kpɔ, 'i‑ ‑dhɛ Yesu, (꞊Waa‑ pö "dhʋ̈ kö ‑wa ‑pö ‹Mɛdhamɛ›). ‑A ‑gɛn ‑mü ꞊dhɛ 'në bha ꞊në dho ö ‑bha "sɛgümɛ ‑nu ‑gɔ ‑ta 'dhɔ ‑a ‑nu ‑bha 'wɔn yaa ‑gɔ.»
MAT 1:22 'Wɔn ‑nu 'wo "dhʋ̈ bha ‑wo ‑kë "dhʋ̈ kö 'pë 'ö kwa Dëmɛ Atanna ‑yö bɔ‑ 'ka ö ‑wʋdhiʋ̈loomɛ ‑ta 'ö‑ pö yi 'bha 'ka bha ꞊në‑ ‑nu 'gü ‑wɔn ‑yö kë. ‑A ‑gɛn ‑mü ꞊dhɛ ‑yö ‑bɛn zë ‑sü 'ka ꞊dhɛ:
MAT 1:23 (Ka ‑dho "kan ka ‑ta kö) 'nëdhebhɔ do 'ö 'yii ‑zuö gɔɔn‑ ‑bha do ꞊ya 'gu 'sü kö ꞊ya 'nëgɔɔn do 'kpɔ, ‑a 'në bha ‑wo ‑dho ‑a ‑dhɛ Maniɛ.» (꞊Waa‑ pö "dhʋ̈ kö ‑wa pö ‹Atanna ‑yö kwa "piʋ̈›.)
MAT 1:24 ꞊Dhɛ 'ö Zosɛfu ꞊ya ‑bö, 'yö‑ ‑kë ꞊dhɛ ‑kɔ 'ö Atanna ‑bha "kië ‑ya pö‑ 'ka‑ ‑dhɛ bha‑ 'dhö, 'yö Madhi sü dhe 'ka,
MAT 1:25 "kɛɛ ‑a ‑nu ‑bha sɛɛ" 'yii kë do 'ö dho 'ö zun‑ 'ka Madhi 'në 'kpɔ ‑yi ‑bha. ꞊Dhɛ 'ö ꞊yaa‑ 'kpɔ, 'yö Zosɛfu ‑ya 'tɔ kpɔ, 'yö 'wo‑ ‑dhɛ Yesu.
MAT 2:1 Yesu ‑yö ‑bhɔ Zude ‑pö do 'bha 'wo‑ ‑dhɛ Betedhɛmö bha ꞊në‑ 'gü Edhodö ‑bha ‑gblüdëdhɛ "tʋ̈ng 'gü. ꞊Dhɛ 'ö ꞊ya bhɔ, 'yö 'wɔndɔmɛ ‑nu 'wo "susëngga ‑nu ‑bho 'koo ‑dɔ bha 'wo go "sɛgɔ 'bha 'ö 'yënng‑ ‑wo ‑zian 'ka ‑a 'gü bha 'wo nu 'wo ꞊loo Zedhizadhɛmö.
MAT 2:2 'Yö 'wo mɛ ‑nu dhɛɛ" kpɔ 'wo‑ pö: «'Në 'ö dho kë Zuifö ‑nu ‑bha ‑gblüdë 'ka 'ö bhɔ yö bha ‑yö 'mɛ? Yi‑ ‑bha "susëngga ‑yö kö ꞊ya ‑wo "yɛa‑ yi ‑gɔ "sɛ 'gü 'yënng‑ ‑wo ‑zian 'ka 'yö 'yi nu kö 'yi‑ ‑dhɔkë.»
MAT 2:3 ꞊Dhɛ 'ö ‑gblüdë Edhodö ꞊ya 'wɔn bha‑ ma, 'yö "sika 'dhö ‑da waa‑ Zedhizadhɛmö ‑mɛ ‑nu ꞊gban "pɛpɛ 'gü (kö ‑yö ö ‑zʋ 'gɔn sië ꞊dhɛ ‑gblüdë ‑dee 'dhɛ 'ö bhɔ bha yöö ö ‑bha mɛdhɛ kɔɔ‑ ö 'ka).
MAT 2:4 'Yö 'wo "saabhomɛ ‑gɔmɛ ‑nu waa‑ Zuifö ‑nu ‑bha 'tɔnggɔmɛ ‑nu 'wo‑ ‑gɔ "sɛ bha‑ 'gü ‑a ‑nu ꞊gban "pɛpɛ ꞊loo 'ko ‑ta, 'yö‑ ‑nu dhɛɛ" kpɔ 'ö‑ pö: «‑Dhɛ ‑mɛɛ ꞊në Atanna ‑bha ‑Yamɛ dho bhɔ‑ ‑bha 'wo‑ pö 'kpa 'ö 'ka‑ dɔ?»
MAT 2:5 'Yö 'wo‑ pö‑ ‑dhɛ: «‑Wa ‑dhɛ ‑dhɛ Betedhɛmö, ‑a ‑dhɛ ‑yö Zude ‑sɛ 'gü.» ‑A ‑gɛn ‑mü ꞊dhɛ Atanna ‑wʋdhiʋ̈loomɛ ‑ya ‑ya Atanna ‑bha 'sëëdhɛ 'gü 'ö‑ pö:
MAT 2:6 «Betedhɛmö ‑pö 'i Zude ‑sɛ 'gü, bhi ‑zë 'bhii kë 'pödhɛ 'tɔbhɔsü ‑nu 'wo Zude ‑sɛ 'gü ‑a ‑bhaasü ‑sü 'ka, ‑a ‑gɛn ‑mü ꞊dhɛ ‑gblüdë do‑ ‑dho 'go i 'gü, 'ö zun ma Izraɛdhö ‑sɛgümɛ ‑nu ‑dhɛ "dhiʋ̈ ꞊dhɛ ‑kɔ 'ö ‑tuʋ̈ ‑maakëmɛ ‑yö zun‑ 'ka ‑tuʋ̈ ‑nu ‑dhɛ "dhiʋ̈ bha‑ 'dhö.»
MAT 2:7 ꞊Dhɛ 'ö ꞊ya kë "dhʋ̈, 'yö Edhodö ‑yö 'wɔndɔmɛ ‑nu bha‑ ‑nu ‑dhɛ ‑bin 'gü, 'yö‑ ‑nu dhɛɛ" kpɔ "tʋ̈ng ꞊dede 'ö "susëngga bha 'ö ‑wo 'ka ‑a ‑nu ‑dhɛ "yɛa‑ ‑a 'ka.
MAT 2:8 ꞊Dhɛ 'ö ꞊ya kë "dhʋ̈, 'yö ö ‑wʋ kpɔ‑ ‑nu ‑bha 'ö‑ pö: «‑Ka 'dho Betedhɛmö kö 'ka 'në bha‑ ‑dhɛ mɔɔ‑ ‑së 'ka. ꞊Ya kë ꞊dhɛ 'ka‑ ‑dhɛ yö kö 'ka nu 'ka‑ pö n ‑dhɛ kö mang ‑dɩ 'pö 'a 'dho‑ ‑dhɔkë ‑dhɛ 'gü.»
MAT 2:9 ꞊Dhɛ 'ö ‑gblüdë ꞊ya ö ‑wʋ 'kpɔ‑ ‑nu ‑bha ꞊dhɛ ‑kɔ bha‑ 'dhö, 'yö 'wo dho. ‑A ‑nu 'dho ‑sü 'ka, 'yö 'wo "susëngga 'wo‑ yö wo ‑gɔ "sɛ 'gü 'yënng‑ ‑wo ‑zian 'ka bha‑ yö 'zü ‑deewo kö ꞊ya zun‑ ‑nu ‑dhɛ "dhiʋ̈,
MAT 2:10 ꞊Dhɛ 'ö "susëngga bha ꞊ya 'dho ꞊ya ꞊loo 'kɔ 'ö Yesu "blë ‑dee ‑yö gun‑ 'gü bha‑ ‑dhɛta "dhʋ̈ng 'gü, 'yö ö bo "ta 'sü ‑sü 'ka, 'yö‑ 'gü ‑wɔn ‑yö ‑dhi ‑a ‑nu ‑dhɛ ꞊dedewo.
MAT 2:11 'Yö 'wo dho 'wo ‑da 'kɔ bha‑ 'gü, 'yö 'wo Madhi waa‑ ö gbö Yesu ‑a ‑nu yö, 'yö 'wo zun 'në bha‑ ‑dhɛ wo kpiö 'gü 'yö 'wo 'tɔ ꞊loo‑ ‑bha 'yö 'wo woo‑ ꞊naɔ ꞊kwɛɛ‑ ‑nu "dhi ‑pʋ, 'yö 'wo "sënng ‑nu waa‑ pë 'bha ‑nu 'ö ꞊waa‑ "gʋ̈ 'ö‑ ꞊fii 'dhö ‑kë ‑së ꞊dhɛ ‑dhasiklɔɔ "yi ꞊fii 'dhö 'wo‑ ‑dhɛ ansansö bha waa‑ "yi ꞊fii ‑së bha 'wo‑ ‑dhɛ 'pö 'miidhö bha‑ ꞊gbaɔ ‑a ‑nu ‑gɔ. (Pë ‑nu 'wo "dhʋ̈ bha‑ ‑nu sɔng 'ö 'dhö ‑ma 'yaa‑ wo‑ ‑bha).
MAT 2:12 ꞊Dhɛ 'ö ꞊ya kë "dhʋ̈, 'yö Atanna ‑ya pö 'wɔndɔmɛ ‑nu bha‑ ‑nu ‑dhɛ "yɛɛn ‑wʋ 'gü ꞊dhɛ ‑a ‑nu yee kë ‑sü 'ka 'wa 'dho bɔ Edhodö ‑zian 'ka, "kɛɛ ‑wo bɔ zian "wɛɛ 'ka kö ‑wo 'dho wo ‑gɔ "sɛ 'gü. 'Yö 'wo bɔ zian "wɛɛ 'ka 'wo dho.
MAT 2:13 ꞊Dhɛ 'ö 'wɔndɔmɛ ‑nu bha ꞊wa 'dho, 'yö Atanna ‑bha "kië do ‑yö ö ‑dɩ ‑zɔn Zosɛfu ‑dhɛ kö ‑yö yi zë sië, 'yö‑ pö‑ ‑dhɛ: «Zosɛfu, ‑bhö "wlü kö 'i 'në waa‑ ö dhe bha‑ ‑nu 'sü kö 'ka 'dho ka ‑gblɛn 'kpɔ Ezitö ‑sɛ 'gü kö ‑yö 'dho ‑yö zun‑ 'ka ‑dhɛkpaɔyi 'a dho‑ pö‑ 'ka i ‑dhɛ ꞊dhɛ 'ka ka yee kë 'ka nu‑ 'ka i ‑gɔ "sɛ 'gü yö bha‑ ‑bha. ‑A ‑gɛn ‑mü ꞊dhɛ Edhodö ‑dho 'në ya‑ mɔɔ‑ kö 'ö‑ zë.»
MAT 2:14 'Yö Zosɛfu ‑yö ꞊wlü 'yö 'në waa‑ ö dhe bha‑ ‑nu sü gbeng, 'yö dho‑ ‑nu 'ka Ezitö ‑sɛ 'gü.
MAT 2:15 'Yö 'wo to 'mü 'ö dho 'ö zun‑ 'ka Edhodö ga ‑yi ‑bha. 'Wɔn ‑nu bha ‑wo ‑kë "dhʋ̈ kö 'pë 'ö kwa Dëmɛ ‑ya pö 'ö bɔ‑ 'ka ö ‑wʋdhiʋ̈loomɛ ‑ta bha‑ 'gü ‑wɔn ꞊në ‑yö kë ꞊dhɛ: «'Ma n Gbö ‑dhɛ 'nu kö ‑yö 'go Ezitö ‑sɛ 'gü ‑yö nu.»
MAT 2:16 ꞊Dhɛ 'ö Edhodö ꞊yaa‑ 'wɔn dɔ ꞊dhɛ 'wɔndɔmɛ ‑nu bha ꞊wa 'kpɔ ö 'ka, 'yö bhlɔɔ ‑yö ma‑ 'gü ꞊dedewo, 'yö‑ pö ö ‑bha "sɔdha ‑nu ‑dhɛ ‑wo 'dho kö ‑wo 'nëgɔɔn "pɛpɛ 'kö‑ ‑kwɛ ꞊ya ꞊mɔɔ ꞊plɛ ‑bha, "ɛɛn ‑a mɛ 'dhɛ ‑zian 'ö‑ ‑nu ‑bha ꞊plɛ ‑naa "dhiʋ̈ 'yii pa ꞊kö, 'ö 'wo Betedhɛmö ‑dhɛ waa‑ ö ‑züzü ‑dhɛ ‑nu 'gü bha‑ ꞊gban zë, (kë "dhʋ̈ kö 'në bha 'ya 'dho dha ö ‑gɔ). ‑A kë 'ö‑ wo "dhʋ̈ bha ‑ya dhʋng ‑sü ‑sü "tʋ̈ng 'ö 'wɔndɔmɛ ‑nu bha 'wo‑ ꞊kpaɔ‑ 'ka bha ꞊në‑ ‑bha.
MAT 2:17 'Pë 'ö Atanna ‑wʋdhiʋ̈loomɛ Zedhemi ‑ya pö yi 'bha 'ka bha‑ 'gü ‑wɔn ‑yö ‑kë ‑kɔ bha ꞊në‑ 'gü, ‑a ‑gɛn ‑mü ꞊dhɛ
MAT 2:18 Zedhemi ‑ya ‑pö 'ö‑ pö: «꞊Wa mɛ "gblawʋ ma Dhama ‑pö 'gü, "gbʋ ꞊gbang 'ö ‑dɔn bho ‑wʋ 'dhö‑ "piʋ̈ yö ‑mü, Dhasɛdhö suu 'gü ‑në ‑nu ‑bha dhong ‑nu ꞊në 'wo wo bhang ‑nu ‑gbʋ bɔ sië, 'yö 'waa "wɩ‑ ‑bha kö ‑wa ‑nu ‑dhɛa ga bha, ‑a ‑gɛn ‑mü ꞊dhɛ ‑a ‑nu bhang ‑nu bha ꞊wa ga.»
MAT 2:19 ꞊Dhɛ 'ö Edhodö ꞊ya ga, 'yö Atanna ‑bha "kië do 'bha ‑yö dhiang zë 'zü Zosɛfu ‑dhɛ Ezitö ‑sɛ 'gü kö ‑yö yi zë sië
MAT 2:20 'yö‑ pö‑ ‑dhɛ: «‑Bhö "wlü kö 'i 'në waa‑ ö dhe bha‑ ‑nu 'sü 'zü ‑deewo kö 'ka ka yee kë 'ka 'dho Izraɛdhö ‑sɛ 'gü, ‑a ‑gɛn ‑mü ꞊dhɛ 'mɛ 'wo gun‑ "piʋ̈ ꞊dhɛ 'wo 'në bha‑ zë bha ꞊wa ga.»
MAT 2:21 'Yö Zosɛfu ‑yö ꞊wlü, 'yö 'në waa‑ ö dhe bha‑ ‑nu sü, 'yö 'wo wo yee ‑kë 'wo dho Izraɛdhö ‑sɛ 'gü.
MAT 2:22 "Kɛɛ ꞊dhɛ 'ö ꞊yaa‑ ma 'zü ꞊dhɛ Asedhausö ꞊ya ‑ya ö dë Edhodö "gblʋʋ 'gü ‑gblüdëdhɛ 'gü Zude ‑sɛ bha‑ 'gü, 'yö ‑ya "sɛ ‑gɔ bha‑ 'gü ‑sü "suʋ̈ ‑ya ‑kë, ꞊dhɛ 'ö ‑kɔ 'ö dho‑ kë‑ 'ka Atanna ꞊yaa‑ ‑zɔn 'zü‑ ‑dhɛ "yɛɛn ‑wʋ 'gü,
MAT 2:23 'yö dho Gadhidhe ‑sɛ 'gü, 'yö ‑ya ‑a 'pö‑ 'kpii‑ do 'wo‑ ‑dhɛ Nazadhɛtö bha‑ 'gü kë "dhʋ̈ kö 'pë 'ö Atanna ‑wʋdhiʋ̈loomɛ ‑nu ‑wa pö ꞊dhɛ «‑wo ‑dho ‑a ‑dhɛ Nazadhɛtö mi» bha‑ 'gü ‑wɔn ‑yö kë.
MAT 3:1 ‑A "tʋ̈ng 'ö "dhʋ̈ bha‑ 'gü, 'yö mɛ do 'bha 'wo‑ ‑dhɛ Zan Mɛzumɛ bha 'ö nu "tʋngtadhɛ 'dhɛ 'ö Zude ‑sɛ 'gü bha‑ 'gü, 'yö ‑ya Atanna ‑bha ‑dhɛa "dhiʋ̈ bho ‑sü ‑bha mü
MAT 3:2 'ö‑ pö: «‑Ka ka kwaa‑ ka kë ‑sɔng yaya ‑nu ‑zü kö 'ka ka zuë" slëë‑ Atanna "piʋ̈, ‑a ‑gɛn ‑mü ꞊dhɛ ‑a ‑bha ‑gblüdëdhɛ ꞊ya ꞊yɔɔn ka "sɔɔ!»
MAT 3:3 Zan bha ꞊në Atanna ‑wʋdhiʋ̈loomɛ Ezai ‑yö 'wɔn 'ö ‑gban ‑bha ‑a ‑dhiang zë yi 'bha 'ka 'ö‑ pö: «'Mɛ 'ö "gbla sië "tʋng ‑ta bha ‑ya pö: ‑Ka kwa Dëmɛ ‑bɔ ‑ta ‑zian baa‑ kö ‑a ‑ta ‑dhɛ ‑yö wɔ ‑tɛkpɛ ‑tɛkpɛdhö, kö 'ka‑ dɔ ꞊zinng 'gü!»
MAT 3:4 Zan bha‑ ‑dasɔ ‑yö ‑gun ‑yɔɔnmɛa kaa‑ ꞊në‑ 'ka, 'yö kwi "pɛn ‑ya ö ‑gɔ sɔ ‑ta, 'yö ‑kpaa waa‑ "zɔyɔn ‑nu ‑bhö. (‑A ‑gɛn ‑mü ꞊dhɛ Atanna ‑wʋdhiʋ̈loomɛ ‑nu 'wo gun ‑tosɛa kë sië "tʋng ‑ta "tʋ̈ng bha‑ 'gü ‑a ‑nu ‑bhöpë waa‑ ‑nu sɔ ‑da ‑kɔ ꞊në gun bha.)
MAT 3:5 'Yö Zedhizadhɛmö ‑mɛ ‑nu waa‑ 'mɛ 'wo Zude ‑sɛ "pɛpɛ ꞊gban 'gü waa‑ mɛ 'dhɛ 'wo bɔ "yiga 'kpii‑ 'wo‑ ‑dhɛ Zuudɛn bha‑ "pɛan "piʋ̈, ‑a ‑nu ꞊gban "pɛpɛ 'wo nu‑ "piʋ̈ mü.
MAT 3:6 'Yö 'wo wo kë ‑sɔng yaya ꞊gban pö‑ ‑dhɛ mɛ ꞊gban "yaan mü, 'yö Zan ‑ya ‑nu ‑go 'wɔn yaa 'gü ‑zu bho Zuudɛn ꞊bhaa.
MAT 3:7 ꞊Dhɛ 'ö Zan ꞊ya Fadhiziɛn ‑nu waa‑ Sadusiɛn ‑nu yö kö ‑wo nu sië ö "piʋ̈ 'gbɛ kö 'ö‑ ‑nu "zu, ("kɛɛ kö ‑ya 'wɔn dɔ ꞊dhɛ 'waa‑ "piʋ̈ ꞊dhɛ 'wo wo kwaa‑ wo kë ‑sɔng yaya ‑nu ‑zë ‑zü) 'yö‑ pö‑ ‑nu ‑dhɛ: «"Gblʋ̈ʋ̈dhɛgblɛɛnmɛ ‑nu 'ö 'ka ꞊dhɛ ꞊bhʋ̈ʋ̈ 'dhö ya, 'dee‑ pö ka ‑dhɛ ꞊dhɛ ka ‑mɔɔ ‑bha 'ka dha Atanna ‑bha ‑mawɔnsiödhe yi 'ö nu sië bha‑ ‑gɔ?»
MAT 3:8 ꞊Dhɛ 'ö ‑kë ꞊dhɛ 'ka ka zuë" slëë‑ Atanna "piʋ̈, "ta ‑kɔ ‑së 'ö dho‑ ‑zɔn ꞊dhɛ 'ka ka zuë" slëë‑ Atanna "piʋ̈ ꞊dedewo tɛan‑ 'ka, 'ka "gla bha ꞊në, ‑kaa kë!
MAT 3:9 'Ka 'dho‑ pö ka ‑dɩ ‑dhɛ ꞊dhɛ: «Ablaamö suu ‑mü yi 'ka, (ö "dhʋ̈ kö Atanna 'yii 'dho za dɔ ka ‑bha)», ‑a ‑gɛn ‑mü ꞊dhɛ Atanna ‑mɔɔ ‑bha 'ö ‑gwë ‑nu ya‑ ‑nu ‑gla Ablaamö suu 'gü ‑në ‑nu 'gü!
MAT 3:10 ꞊Dua ‑yö wɔ ‑sü 'ka "dhü gɛnngdhö ‑a bɔ ‑yan ‑ta. "Dhü 'ö 'yii bhɛ ‑së dɔ, ‑wo ‑dho ‑a "kan 'wo‑ ‑gʋ̈.»
MAT 3:11 'Yö Zan ‑ya pö 'zü ꞊dhɛ: «Ma ‑zë ‑a ka ‑zu "yi ꞊në‑ 'ka, kö ‑ya ‑zɔn ꞊dhɛ 'ka ka zuë" slëë‑, "kɛɛ mɛ do 'bha ‑dho nu n zian‑ ‑ta bha, yö ‑zë ‑yö ‑dho ka pa‑ ‑bha 'Nii‑ "slʋ̈ʋ̈slʋ̈ waa‑ pɛng ꞊në‑ 'ka. Yö ‑zë ꞊bhlëë ‑yö 'kpii‑ 'ö ‑ziö n ‑ta, ‑a ‑gɛn 'gü ‑sabha ‑zian fië‑ ‑dhö n 'ka.
MAT 3:12 ‑A ‑bha 'dhaa‑ ‑ya ‑gɔ kö ‑yö ö ‑bha mɛ ‑nu ‑piö 'gü ꞊dhɛ ‑mlü 'dhö, kö ‑ya ga ꞊loo "bhutu 'gü, kö ‑ya "kɛa ‑nu waa‑ ꞊flee ‑nu ‑zë "gʋ̈ pɛng 'ö 'yaa "dhuu ‑a 'gü.
MAT 3:13 ꞊Dhɛ 'ö ꞊ya kë "dhʋ̈, 'yö Yesu ‑yö go Gadhidhe ‑sɛ 'gü, 'yö nu "yiga 'wo‑ ‑dhɛ Zuudɛn bha‑ ꞊bhaa Zan "piʋ̈ kö ‑yö ö "zu.
MAT 3:14 "Kɛɛ Zan yii‑ "wɩ‑ ‑bha, 'yö‑ ‑yɔ bɔ‑ ‑gɔ 'yö‑ pö‑ ‑dhɛ: «Ma 'kö ma ‑zë maa nu i "piʋ̈ kö 'i n "zu kö 'a kë "slʋ̈ʋ̈slʋ̈ bha 'yö bhi ꞊në 'i nu n "piʋ̈ ‑ee?
MAT 3:15 "Kɛɛ 'yö Yesu ‑ya pö‑ ‑dhɛ 'ö‑ pö: «‑Bhö "wɩ‑ ‑bha kö ‑yö kë "dhʋ̈ ꞊kö "tʋ̈ng ya‑ 'gü, ‑a ‑gɛn ‑mü ꞊dhɛ ‑a ‑dhɛa ‑bha ‑dhɛ 'a‑ kë ꞊dhɛ ‑kɔ 'ö Atanna ‑ya pö‑ 'ka ꞊në‑ 'dhö.» 'Yö Zan ‑yö ‑wɩ ‑bha.
MAT 3:16 ꞊Dhɛ 'ö Yesu 'dhö 'go sië "yi ꞊bhaa (kö Zan ꞊ya bo‑ "zu ‑sü 'ka), 'ö dho ‑dhɛ ‑ga kö dhang‑ "dhi ꞊ya "pʋ ‑a wëëdhö kö Atanna ‑bha 'Nii‑ ‑yö 'go sië dhang‑ 'gü 'ö ꞊lɔɔ‑ ‑ta ꞊dhɛ ‑tong 'dhö,
MAT 3:17 'yö‑ "tʋ 'dhö ‑da 'zü ‑wʋ do 'bha 'gü kö ‑yö "wɩ sië dhang‑ 'gü 'ö‑ pö: «N Gbö doseng 'ö n ‑gɔ 'yö dɔ bha‑ ‑dhɔ 'ö n kë ‑a "sinma 'yaa 'dhö.»
MAT 4:1 ꞊Dhɛ 'ö ꞊ya kë "dhʋ̈ 'yö Atanna ‑bha 'Nii‑ ‑yö zun Yesu ‑dhɛ "dhiʋ̈ 'yö dho‑ 'ka "tʋng ‑ta kö Sɔtraan ‑ya 'gü dan.
MAT 4:2 'Yö ‑ziö 'ö dho mü. ꞊Dhɛ 'ö ꞊ya 'sunng‑ 'ma ‑dhɛkpaɔyi ‑kaɔng ‑yiisiö 'ka 'yënng‑ 'gü waa‑ gbeng 'gü, 'yö din‑ ‑ya kun.
MAT 4:3 'Yö Sɔtraan ‑yö ꞊yɔɔn‑ "sɔɔ 'yö‑ pö‑ ‑dhɛ: «꞊Ya kë ꞊dhɛ 'i Atanna Gbö 'ka ꞊dedewo tɛan‑ 'ka, ‑bhö dhiang zë ‑gwë ‑nu ya‑ ‑nu ‑dhɛ kö ‑wo "gla ‑bhöpë 'gü kö 'i‑ ‑bhö!»
MAT 4:4 'Yö Yesu ‑ya ‑yɔ bɔ‑ ‑gɔ 'ö‑ pö: «‑Abin, ‑a ‑gɛn ‑mü ꞊dhɛ ‑yö ‑bɛn zë ‑sü 'ka Atanna ‑bha 'sëëdhɛ 'gü ꞊dhɛ: ‹‑Bhöpë yöö do 'aa mü 'ö mɛ ‑bha ‑tosɛa ‑kë ‑bha ‑pë 'ka, mɛ‑ mɔɔ‑ ‑bha 'ö mɛ ‑yö ‑tosɛa ‑kë 'pö ‑wʋ "pɛpɛ 'ö go Atanna "dhi ‑a ‑bha.›
MAT 4:5 ꞊Dhɛ 'ö ꞊yaa‑ pö‑ ‑dhɛ "dhʋ̈, 'yö‑ sü 'zü ‑deewo 'ö dho‑ 'ka 'pödhɛ "slʋ̈ʋ̈slʋ̈ 'wo‑ Zedhizadhɛmö ‑dhɛ ‑kë bha‑ 'gü, 'yö‑ dɔ Atanna ‑dhɔkëgükɔ 'ö mü bha‑ ‑ta "dhʋ̈ng 'gü,
MAT 4:6 'yö‑ pö‑ ‑dhɛ 'zü ‑deewo 'ö‑ pö: «꞊Ya kë ꞊dhɛ 'i Atanna Gbö 'ka ꞊dedewo, ‑bhö dɔ yö kö 'i kwaa‑ i ‑dɩ ‑zü "sia‑ ꞊kö 'dhɛ ꞊ee! ‑A ‑gɛn ‑mü ꞊dhɛ ‑yö ‑bɛn zë ‑sü 'ka Atanna ‑wʋ 'gü ꞊dhɛ: ‹Atanna ‑dho ö ‑bha "kië ‑nu bɔ 'ö 'wo ‑kɔ kpɔ i ‑gɔ kö i ‑gɛn "dhiʋ̈ 'ya 'dho ‑zuö ‑gwë ‑bha.›
MAT 4:7 'Yö Yesu ‑ya pö 'pö‑ ‑dhɛ 'zü 'ö‑ pö: «‑Abin, ‑a ‑gɛn ‑mü ꞊dhɛ ‑yö ‑bɛn zë ‑sü 'ka 'pö Atanna ‑gɔ 'sëëdhɛ 'gü ꞊dhɛ: ‹'Bha 'dho i Dëmɛ 'ö i ‑bha Atanna 'ka bha‑ 'gü dan!›
MAT 4:8 ꞊Dhɛ 'ö ꞊waa‑ pö wo 'ko ‑dhɛ "dhʋ̈, 'yö Sɔtraan ‑yö Yesu sü 'zü ‑dee wo 'ö dho‑ 'ka ‑tɔn ꞊gblɛɛn do ꞊gbin‑, 'yö "sɛ "pɛpɛ 'ö "kpʋng ꞊taa ‑a ꞊gban ‑zɔn ‑dhɛ waa‑ ‑nu ‑bha ‑sëdhɛ ‑nu 'dhö
MAT 4:9 'yö‑ pö‑ ‑dhɛ: «‑Bhö ‑dhɛ ‑ga, ꞊ya kë ꞊dhɛ 'bha zun n ‑dhɛ kpiö 'gü, kö 'i n ‑dhɔkë, a ‑dho pë "pɛpɛ bha‑ ꞊gban nu i ‑dhɛ kö 'i ‑ya ‑gɔ "dhiʋ̈.»
MAT 4:10 'Yö Yesu ‑ya pö‑ ‑dhɛ: «Sɔtraan, ‑bhö ziö 'i 'go bha, ‑a ‑gɛn ‑mü ꞊dhɛ ‑yö ‑bɛn zë ‑sü 'ka Atanna ‑bha 'sëëdhɛ 'gü ꞊dhɛ: ‹I ‑dho i Dëmɛ, i ‑bha Atanna yöö do ꞊në‑ ‑dhɔkë, 'bhii 'dho pë "wɛɛ 'bha ‑dhɔkë yö ‑zë zian 'gü›.
MAT 4:11 ꞊Dhɛ 'ö ꞊yaa‑ pö "dhʋ̈, 'yö Sɔtraan ‑yö ö ꞊kwaa‑ ‑zü ꞊kö ‑a 'dhɛ bha‑ 'gü 'yö dho. 'Yö Atanna ‑bha "kië ‑nu 'wo nu‑ "sɔɔ mü 'yö 'wo zun‑ 'gü ‑ziö wo ‑sü ‑bha.
MAT 4:12 ꞊Dhɛ 'ö Yesu ꞊yaa‑ ma ꞊dhɛ ꞊wa Zan ‑da ‑kaso 'gü, 'yö dho Gadhidhe ‑sɛ 'gü.
MAT 4:13 "Kɛɛ 'yii "wɩ‑ ‑bha kö ‑yö ‑ya Nazadhɛtö ‑pö 'ö "klʋ bho‑ 'gü bha‑ 'gü, 'yö dho 'yö ‑ya Kapɛɛnaɔmö ‑pö 'ö ‑ya ‑sü 'ka "yitagbɛa 'ö Gadhidhe, Zabidhɔng ‑sɛ waa‑ Nɛfutali ‑sɛ ‑a ‑nu 'gü bha‑ 'gü.
MAT 4:14 ‑A ‑kë 'ö‑ wo "dhʋ̈ bha ꞊në ‑kë ‑wʋ 'ö Atanna ‑wʋdhiʋ̈loomɛ Ezai ‑ya pö yi 'bha 'ka bha‑ 'gü ‑wɔn kë ‑kɔ 'ka; ‑a ‑gɛn ‑mü ꞊dhɛ Ezai ‑ya ‑pö yi 'bha 'ka 'ö‑ pö:
MAT 4:15 «Zabidhɔng ‑sɛ waa‑ Nɛfutali ‑sɛ 'ö 'ka ꞊wee ‑yi "pɛan "piʋ̈ Zuudɛn ꞊taama, 'ö 'kaa Zuifö 'ka, a‑ ‑pö ka ‑dhɛ ꞊dhɛ:
MAT 4:16 'mɛ 'wo ‑tosɛa kë sië ‑dhɛtiidhɛ 'gü ('ö 'waa Atanna dɔ) bha, ‑dhɛpuudhɛ ‑dho 'sɔ‑ ‑nu ‑ta ('ö 'wo‑ dɔ)! 'Ö 'mɛ 'wo ‑tosɛa kë sië ‑dhɛ 'ö ga dhɔng ꞊ya ‑dhɛ tröö‑ ‑ta ('waa Atanna dɔ ‑sü ‑wɔn 'gü) bha, 'wo ‑dhɛpuudhɛ yö ('ö 'wo‑ dɔ).»
MAT 4:17 Yesu ‑yö ö ‑bha 'wɔn ‑taɔng ‑së pö ‑sü 'zü ‑bho "tʋ̈ng bha ꞊në‑ 'gü 'yö‑ pö: «‑Ka ka zuë" slëë‑ Atanna "piʋ̈, ‑a ‑gɛn ‑mü ꞊dhɛ ‑a ‑bha ‑gblüdëdhɛ ꞊ya ꞊tëng ka ‑ta!»
MAT 4:18 ꞊Dhɛ 'ö ꞊ya kë "dhʋ̈ 'yö Yesu ‑yö ‑kpan 'nëglɔɔn ‑nu ꞊plɛ 'wo ‑kë dheebhangzë ‑nu 'ka, 'wo ‑kë "nuuzuömɛ 'ka, 'ö 'wo‑ mɛ do ‑dhɛ Simɔ 'wo‑ 'tɔ ꞊ya ‑ta ‑dhɛ Piɛdhö bha waa‑ dheebhang Andre, ‑a ‑nu ‑bha kö ‑wo woo‑ "nuu ‑zuö sië "yi ‑ta "gbɛa 'ö Gadhidhe bha‑ ꞊bhaa, kö yöö ‑dɩ 'pö ‑yö "ta 'sü sië "yi bha‑ "kpʋng "dhiʋ̈.
MAT 4:19 'Yö‑ pö‑ ‑nu ‑dhɛ: «‑Ka nu 'kwa 'dho! A ‑dho ka kë "nuu ‑zuö mɛ ‑gɔ ‑mɛ 'ka kö 'ka nu‑ ‑nu 'ka n ‑dhɛ!»
MAT 4:20 ꞊Dhɛ 'ö ꞊waa‑ ma "dhʋ̈, ‑wo ‑to ‑dhɛ do bha‑ 'gü 'wo wo ꞊kwaa woo‑ "nuu ‑nu bha‑ ‑nu ‑zü 'wo ‑ziö ꞊keng‑.
MAT 4:21 ꞊Dhɛ 'ö ꞊ya ꞊yɔɔn ö "dhiʋ̈ 'zü 'dɛdɛ, 'yö ‑kpan 'zü dheebhangzë ‑nu ꞊plɛ 'wo‑ mɛ do ‑dhɛ Zakö 'wo‑ mɛ do ‑dhɛ Zan, 'wo ‑kë Zebede gbö ‑nu 'ka 'pö bha‑ ‑nu ‑bha waa‑ ‑nu dë 'dhö kö ‑wo "kplagɔnë 'gü kö ‑wo woo‑ "nuu ‑nu pë kë sië, 'yö‑ ‑nu ‑dhɛ 'pö.
MAT 4:22 ‑Wo ‑to ‑dhɛ do bha‑ 'gü 'pö 'wo wo dë oo, ‑a "yitagɔ oo, (‑a "nuu ‑nu oo), ‑a ꞊gban "pɛpɛ to, 'yö 'wo ‑ziö Yesu ꞊keng‑.
MAT 4:23 Yesu ‑gun ziö sië ‑kɔ bha ꞊në‑ 'gü Gadhidhe ‑sɛ ꞊gban "pɛpɛ 'gü Zuifö ‑nu ‑bha ‑yakwëëkëgükɔ ‑nu 'gü mɛ ‑nu ꞊klang ‑kë Atanna ‑wʋ 'ka ‑sü ‑nu waa‑ 'wɔn ‑taɔng ‑së 'ö ‑gban Atanna ‑bha ‑gblüdëdhɛ ‑bha bha‑ ‑dhiang zë ‑sü 'ka. 'Yö "yua suu ꞊gban "pɛpɛ bho mɛ ‑nu bha, 'yö ꞊niɔɔmɛ ꞊gban "pɛpɛ ꞊niɔɔdhɛ ‑nu bho‑ ‑nu ‑bha 'pö.
MAT 4:24 'Yö‑ 'tɔ 'dhö ‑ya bhɔ ‑sü ‑bha Siidhi ‑sɛ 'gü ‑dhɛ ꞊gban "pɛpɛ 'gü, 'yö "yua suu "ʋʋ suu 'ö 'mɛ 'kö‑ ‑nu ‑bha "sɛ bha‑ 'gü 'ö sëë ‑zë bho sië, 'yö 'wo ‑ya nu ‑sü ‑bha ‑a ‑nu 'ka ‑a ‑dhɛ. "Yina yaa 'dhö 'mɛ ‑nu 'ö‑ ‑nu 'gü waa‑ glɔɔdhɛmɛ ‑nu waa‑ ‑gɛnloomɛ ‑nu, 'yö‑ ‑nu ꞊gban ‑kë "klʋ̈ʋ̈klʋ̈.
MAT 4:25 'Yö mɛ "dhaa ‑yö ‑ya ‑klëën ‑zü ‑sü ‑bha, 'mɛ 'wo go Gadhidhe oo, 'wo go 'pö‑ "gblʋ̈gblʋ̈ ‑kaɔng do 'wo "sɛ 'ö‑ 'gü bha‑ 'gü oo, 'mɛ 'wo go Zedhizadhɛmö ‑dhɛ waa‑ Zude ‑dhɛ ‑nu 'gü oo, mɛ 'dhɛ 'wo go "sɛ "pɛan 'dhɛ 'ö Zuudɛn ꞊taama bha‑ 'gü, 'yö 'wo ‑ya ziö ‑sü ‑bha ‑a ꞊keng‑.
MAT 5:1 ꞊Dhɛ 'ö Yesu ꞊ya mɛ "bhɩɩ‑ "dhaa bha‑ yö kö ꞊wa ꞊klëën ö ‑zü ꞊dhɛ ‑kɔ bha‑ 'dhö, 'yö ‑da ‑tɔn 'në 'bha bha‑ ꞊gbin‑ 'yö 'yaanu. 'Yö‑ ‑bha ꞊klangdhiʋ̈ ‑nu 'wo ‑da 'pö‑ ꞊keng‑ mü.
MAT 5:2 'Yö ‑ya dhiang zë ‑sü ‑bha ‑a ‑nu ‑dhɛ 'ö‑ pö:
MAT 5:3 «'Mɛ 'wo‑ 'wɔn dɔ wo zuë" "piʋ̈ ꞊dhɛ 'waa pë 'bha 'ka Atanna wëëdhö bha‑ ‑nu ‑bha ‑së; ‑a ‑gɛn ‑mü ꞊dhɛ ‑a ‑bha ‑gblüdëdhɛ bha ‑ya wo ꞊në‑ ‑nu ‑bha 'ka.
MAT 5:4 'Mɛ 'wo "gbʋ bɔ sië "tʋ̈ng ya‑ 'gü ‑a ‑nu ‑bha ‑së, ‑a ‑gɛn ‑mü ꞊dhɛ Atanna ‑dho ‑a ‑nu ‑dhɛa ga.
MAT 5:5 'Mɛ 'ö 'wɔn 'yaa ‑siö ‑nu ‑dhɛ bha‑ ‑nu ‑bha ‑së, ‑a ‑gɛn ‑mü ꞊dhɛ Atanna ‑dho "sɛ nu‑ ‑nu ‑dhɛ yi do 'ka ꞊dhɛ ‑kɔ 'ö‑ "plüün bho‑ 'ka bha‑ 'dhö.
MAT 5:6 'Mɛ 'ö Atanna dhɔɔbhaa kë ‑sü ‑dhɔ ‑ya ‑nu ‑kë 'böbödhö 'ö 'wo ‑ya ‑a zuën ‑ta bha‑ ‑nu ‑bha ‑së, ‑a ‑gɛn ‑mü ꞊dhɛ ‑yö ‑dho ‑a ‑kë "dhʋ̈ ‑sü ‑faan nu‑ ‑nu ‑dhɛ.
MAT 5:7 'Mɛ 'ö mɛ ‑wëë ‑ya ‑nu ‑kë ‑a ‑nu ‑bha ‑së, ‑a ‑gɛn ‑mü ꞊dhɛ Atanna ‑dho ‑a ‑nu ‑wëëdhɛ yö 'pö.
MAT 5:8 'Mɛ 'ö‑ ‑nu zuëpiʋ̈dhɛ 'dhö "puu ‑a ‑nu ‑bha ‑së, ‑a ‑gɛn ‑mü ꞊dhɛ ‑wo ‑dho Atanna yö.
MAT 5:9 'Mɛ 'wo mɛ ‑nu ‑kɔ wü 'koo ‑a ‑nu ‑bha ‑së, ‑a ‑gɛn ‑mü ꞊dhɛ Atanna ‑dho ‑a ‑nu ‑dhɛ ö bhang ‑nu.
MAT 5:10 Mɛ 'wo‑ ‑nu ‑wëëdhɛ bho sië Atanna dhɔɔbhaa kë ‑sü ‑wɔn 'gü ‑a ‑nu ‑bha ‑së, ‑a ‑gɛn ‑mü ꞊dhɛ ‑a ‑bha ‑gblüdëdhɛ ‑ya wo ꞊në‑ ‑nu ‑bha 'ka.
MAT 5:11 ꞊Wa "si bho ka ‑gɔ kö ‑wo ka ‑wëë ‑kë ꞊gban "pɛpɛ suu wo, kö ‑wo ꞊sua ‑nu ‑ya ka ‑bha, kö ‑wo dhiang yaa ꞊gban suu 'do 'do zë ka ‑bha ka ‑bha ‑kë n ‑bha 'ka ‑sü ‑wɔn 'gü kö ka ‑bha ꞊ya kë ‑së,
MAT 5:12 ka ꞊nii ‑yö ‑da kö 'ka ka "dhia bho, ‑a ‑gɛn ‑mü ꞊dhɛ ‑a ꞊trɔɔn 'kpii‑ ‑yö ‑ya ‑sü 'ka ka ‑gɔ dhang‑ 'gü. ‑Kɔ 'wo Atanna ‑wʋdhiʋ̈loomɛ ‑nu 'wo gun ka "dhiʋ̈ ‑a ‑nu ‑wëëdhɛ bho‑ 'ka yi 'bha 'ka 'yö bha.»
MAT 5:13 'Yö‑ pö: «Ka ꞊në 'ka ꞊dhɛ "kpʋngtaadhɛ ‑bha ꞊wee 'dhö, "kɛɛ ꞊wee ‑zë ꞊ya kë 'ɔtɔɔ, ‑më ꞊në 'wo dho‑ ‑da ‑bha 'zü ‑deewo kö ‑yö kë "nɛɛnɛɛ? ꞊Ya kë "dhʋ̈ kö‑ ‑zun "dhiʋ̈ ‑bhlɔɔ 'yaa 'dhö 'zü, kö ꞊ya 'to ‑wɛnng "kpɛnng ‑pë ꞊në‑ 'ka kö ‑wo taa‑ ‑ta.
MAT 5:14 Ka ꞊në 'ka "kpʋngtaadhɛ ‑bha ‑dhɛpuudhɛ 'ka, "ɛɛn 'pödhɛ 'ö ‑ya ‑sü 'ka ‑tɔn ꞊gbin‑ ‑a ‑dhɛ ‑yö ‑dhɛng ‑ee?
MAT 5:15 'Sa 'waa ‑dhangbha dɔ 'pö 'waa‑ ‑da gbɔ ‑zë ꞊wlöö, "kɛɛ ‑wa ‑dɔ pë 'bha ꞊në‑ ‑ta 'yö ‑dhɛ ‑pʋ mɛ "pɛpɛ 'wo 'kɔɔdhö ‑a ‑nu ‑ta.
MAT 5:16 ꞊Dhɛ 'ö ‑kë ꞊dhɛ ka ꞊në 'ka "kpʋngtaadhɛ ‑bha ‑dhangbha 'ka 'pö bha, ‑a ‑dhɛa ‑bha ꞊dhɛ ka 'bhü ‑yö "flʋ̈ kö mɛ ꞊gban ‑wa yö. Ka 'bhü 'ö dho bhɔ 'ö mɛ ꞊gban ‑wa yö bha yö ‑mü 'wɔn ‑sɛsɛngbɔ ‑nu 'ka dho‑ kë bha ꞊në‑ 'ka, yö ꞊në ꞊waa‑ yö, 'yö 'wo dho ka Dë Atanna 'ö ‑ya ‑sü 'ka dhang‑ 'gü bha‑ 'tɔ bhɔ‑ ‑bha.»
MAT 5:17 'Yö‑ pö: «'Ya 'dho kë ka 'gü ꞊dhɛ a ‑nu kö 'tɔng‑ ‑nu 'ö Moizö ‑ya ‑bɛn zë bha waa‑ ‑wʋ ‑nu 'ö Atanna ‑wʋdhiʋ̈loomɛ ‑nu ‑wa pö yi 'bha 'ka 'ö‑ ‑gɔ 'sëëdhɛ 'gü bha 'a‑ 'bha bho "gblʋʋ, "kɛɛ a ‑nu kö 'a‑ 'gü ‑wɔn ꞊në‑ kë.
MAT 5:18 A‑ ‑pö ka ‑dhɛ tɛan‑ ꞊dede 'ka ꞊dhɛ: "Sɛ waa‑ dhang‑ ‑zë 'wo ‑tun ꞊kö, 'tɔng‑ ‑nu bha‑ ga do 'yii 'dho 'go "gblʋʋ, aa" ꞊ni ‑a ꞊blün 'në ‑zian 'yii dho 'sü‑ ‑bha 'ö dho 'ö zun‑ 'ka pë "pɛpɛ ꞊gban "dhiʋ̈toyi ‑bha.
MAT 5:19 Yö ꞊në‑ ‑wɔn 'gü 'yö mɛ "ʋʋ mɛ 'ö dho 'tɔng‑ bha‑ 'dɛdɛ 'në 'bha ‑zian bho, 'ö dho 'ö‑ ‑kɔ ‑zɔn mɛ "wɛɛ ‑nu ‑dhɛ, ‑a ‑mɛ ꞊në dho 'to mɛ ꞊gban "pɛpɛ 'dɛdɛ ‑sü 'ka Atanna ‑bha ‑gblüdëdhɛ 'ö dho 'go dhang‑ 'gü bha‑ kë ‑yi 'ka. "Kɛɛ 'mɛ 'kö 'tɔng‑ bha‑ kun, 'ö‑ ꞊bhlëë ‑ya, 'ö‑ ‑kɔ ‑zɔn 'pö mɛ "wɛɛ ‑nu ‑dhɛ, ‑yö ‑dho ‑duɛ 'kpii‑ ꞊slɔɔ ‑gblüdëdhɛ bha‑ 'gü.
MAT 5:20 A‑ ‑pö ka ‑dhɛ tɛan‑ ꞊dede 'ka ꞊dhɛ: Ka ‑bha Atanna dhɔɔbhaawɔn kë ‑sü 'yii ziö Zuifö ‑nu ‑bha 'tɔnggɔmɛ ‑nu waa‑ Fadhiziɛn ‑nu ‑bha ‑ta, 'kii 'dho ‑da Atanna ‑bha ‑gblüdëdhɛ bha‑ 'gü.»
MAT 5:21 'Yö‑ pö: «Ka‑ ‑ma ꞊dhɛ ‑wo ka‑ ‑pö ka "bhɛma ‑nu ‑dhɛ yi 'bha 'ka ꞊dhɛ: Mɛ 'bha 'ya 'dho mɛ zë, mɛ 'ö ya mɛ zë kö ꞊ya za ‑ya ö ‑dɩ ‑bha. ‑Wo 'dho‑ 'ka 'pödë ‑nu ‑dhɛ kö ‑wo za dɔ‑ ‑bha,
MAT 5:22 "kɛɛ ma ‑zë a‑ ‑pö ka ‑dhɛ: Mɛ "ʋʋ mɛ 'ö yaa‑ ö ‑siö ‑dhɛ ‑wɔn ‑yö ö "tɛado "piʋ̈ kö dhɛɛ" 'kpɔ ‑ya ‑mɛ ‑bha, kö ‑wo ‑dho 'dho‑ 'ka 'pödë ‑nu ‑kuu "dhiʋ̈ kö ‑wo za dɔ‑ ‑bha. Mɛ 'ö yaa‑ ‑pö ö "tɛado ‑dhɛ "yaaki 'yaa i ‑bha, ‑wo ‑dho 'dho‑ ‑mɛ 'ka ‑kwɛazë ‑nu ‑kuu "dhiʋ̈. Mɛ 'ö yaa ö "tɛado ‑dhɛ slaamɛ, kö pɛng 'ö ꞊geebɔɔ bha ‑dho 'gü ‑mɛ do 'bha ꞊në bha.
MAT 5:23 ꞊Ya kë ꞊dhɛ 'bha 'dho "saa‑ bho Atanna "dhiʋ̈ ‑a ‑bha "saabhodhɛ 'gü, kö 'i 'to mü kö i ‑zʋ ‑yö ‑bö ꞊dhɛ 'wɔn 'bha ‑yö i dheebhang 'bha ‑zʋ "piʋ̈ i ‑bha,
MAT 5:24 ‑bhö i ‑bha "saapë 'to ‑dhɛ bha‑ 'gü kö 'i 'dho bhɛa" i dheebhang bha‑ ‑dhɛ kö i gun ‑na nu 'i "saa‑ bha‑ bho Atanna "dhiʋ̈.
MAT 5:25 ꞊Ya kë ꞊dhɛ mɛ 'bha ꞊ya i ‑da zadɔmɛ ‑nu ‑dhɛ, 'ka 'dho sië ka "kwëë ‑a ‑nu ‑kuu "dhiʋ̈ kö 'ka ziö‑ ‑gɛn 'gü, ‑bhö ‑a "slë mɔɔ‑ kö 'ka ꞊mɔɔ‑ 'gü kö ka ‑tun zian ‑ta. Kö 'ya 'dho i ‑da "sɔdha ‑nu ꞊kwɛɛ‑ 'ö 'wo i ‑da ‑kaso 'gü.
MAT 5:26 A‑ ‑pö i ‑dhɛ tɛan‑ ꞊dede 'ka ꞊dhɛ i ‑dho 'to ‑kaso bha‑ 'gü "dhʋ̈ 'ö dho 'ö zun‑ 'ka mɛ 'ö‑ ‑bha 'wɔn 'dhö i ‑bha bha‑ ‑bha ‑suganë 'ö i ‑gɔ ‑a ‑kpɛa nu ‑yi ‑bha.»
MAT 5:27 'Yö‑ pö: «Ka‑ ‑ma 'zü ꞊dhɛ mɛ 'bha 'ya 'dho ‑zua zë,
MAT 5:28 "kɛɛ ma ‑zë a‑ ‑pö ka ‑dhɛ ꞊dhɛ mɛ "ʋʋ mɛ 'i mɛ ‑nu ‑bha dhe yö, 'ö i zuë" ‑yö bhɔ‑ ‑bha kö 'bha ‑da "piʋ̈ i zuë" 'gü ꞊yën ꞊naa bha.
MAT 5:29 ‑A ‑kë "dhʋ̈ ‑sü bha‑ 'gü, ꞊ya kë ꞊dhɛ i ‑kɔ ‑së 'gü "yanga ꞊ya kë i ‑pö 'wɔn yaa 'gü ‑pë 'ka, ‑bhö ‑a bho "kɛa 'gü kö 'i‑ ‑zuö i 'ka ꞊gblɛɛn, ("tʋ̈ng 'ö 'yii i ‑da 'ka ꞊kö 'wɔn yaa 'gü bha‑ 'ka); ‑a ‑gɛn ‑mü ꞊dhɛ i daɔ do ‑go i ‑bha ‑sü kö 'i dha ‑a fië‑ ‑dhö i daɔ ꞊gban ‑to i ‑bha ‑sü 'ö 'i dho ꞊geebɔɔ ‑pɛng 'gü ‑a ‑bha.
MAT 5:30 ꞊Ya kë 'zü ꞊dhɛ i ‑kɔ ‑së 'gü ‑gbe ꞊në ꞊ya kë i ‑pö 'wɔn yaa 'gü ‑pë 'ka, ‑bhö ‑a "kplü bho kö 'i‑ ‑zuö i 'ka ꞊gblɛɛn, ("tʋ̈ng 'ö 'yii i ‑da 'ka ꞊kö 'wɔn yaa 'gü bha‑ 'ka); ‑a ‑gɛn ‑mü ꞊dhɛ i daɔ do ‑kan i ‑bha ‑sü 'ö 'i dha ‑a fië‑ ‑dhö i ‑dhü ‑todhʋ̈sü 'ö dho ꞊geebɔɔ ‑pɛng 'gü ‑a ‑bha.»
MAT 5:31 'Yö‑ pö: «Ka‑ ‑ma 'pö ꞊dhɛ mɛ 'ö dho ö ‑bha dhebhɔ bho "bü, ‑ya ‑bho "bü 'sëëdhɛ kë kö ‑ya ꞊nëng‑ ‑bha,
MAT 5:32 "kɛɛ ma ‑zë a‑ ‑pö ka ‑dhɛ ꞊dhɛ mɛ "ʋʋ mɛ 'ö‑ ‑bha dhebhɔ 'yii‑ to ‑zë wo kö ‑yö dho ‑zua zë ‑dhɛ 'gü, ꞊yaa‑ bho "bü 'wɔn "wɛɛ 'bha ‑zë 'gü kö ‑a dhebhɔ bha ‑yö gwaan‑ "wɛɛ 'kpɔ, kö‑ ‑bha gɔn bha ꞊në‑ "yan dɔ ‑gɛan. 'Sa mɛ "ʋʋ mɛ 'i dhe ‑bho "bü ‑sü sü, kö ‑da ꞊në 'i‑ wo mɛ ‑nu ‑bha dhe "piʋ̈ bha.»
MAT 5:33 'Yö‑ pö: «Ka‑ ‑ma 'zü ꞊dhɛ ‑wo ka‑ ‑pö ka "bhɛma ‑nu ‑dhɛ yi 'bha 'ka ꞊dhɛ mɛ 'bha 'ya 'dho ‑sö ‑bhö 'ö 'yaa‑ 'gü ‑wɔn kë, ꞊dhɛ mɛ ꞊ya ‑sö ‑bhö 'wɔn suu "ʋʋ suu 'ö‑ 'gü kwa Dëmɛ ‑dhɛ, ‑a ‑mɛ ‑ya 'gü ‑wɔn kë gbonggbongdhö,
MAT 5:34 "kɛɛ ma ‑zë a‑ ‑pö ka ‑dhɛ ꞊dhɛ 'ka 'dho ‑sö ‑zian ꞊në‑ ‑bhö tongtongdhö. 'Ka 'dho‑ ‑bhö dhang‑ 'gü ‑dhɛ 'tɔ 'gü, ‑a ‑gɛn ‑mü ꞊dhɛ Atanna ‑bha ‑gblüdëdhɛ ‑gbloo ‑mü.
MAT 5:35 "Ɛɛn 'ka 'dho‑ ‑bhö "kpʋngtaadhɛ 'tɔ 'gü, ‑a ‑gɛn ‑mü ꞊dhɛ Atanna ‑gɛndɔdhɛ ‑mü. 'Ka 'dho‑ ‑bhö 'zü Zedhizadhɛmö ‑dhɛ 'tɔ 'gü, ‑a ‑gɛn ‑mü ꞊dhɛ ‑gblüdë 'kpii‑ ‑bha 'pödhɛ ‑mü.
MAT 5:36 'Ka 'dho‑ ‑bhö 'pö ka ‑dɩ 'tɔ 'gü, ‑a ‑gɛn ‑mü ꞊dhɛ 'kaa ꞊mɔɔ‑ ‑bha kö 'ka ka ‑gɔdhɛ ga do ‑zian "flʋ̈ "ɛɛn kö 'ka‑ trö ka ‑dɩ ‑dhɛ.
MAT 5:37 "Kɛɛ kaa‑ ꞊iin ‑yö kë ꞊iin 'ka, ‑a 'dhɛ 'ka‑ pö 'zü 'aa bhoo, ‑ka 'to 'aa bhoo ‑ta, ‑a ‑gɛn ‑mü ꞊dhɛ ‑a 'dhɛ 'kö 'ka‑ ‑da ‑ta ‑a 'dhɛ bha‑ zian‑ ‑ta bha ‑yö ‑go Sɔtraan ꞊në‑ "piʋ̈.»
MAT 5:38 'Yö‑ pö: «‑Wa ‑pö 'zü ka "bhɛma ‑nu ‑dhɛ yi 'bha 'ka ꞊dhɛ: ‹'Mɛ ꞊ya mɛ "yan 'wü ‑wa "yan 'wü 'pö, 'mɛ ꞊ya mɛ "sɔnga do "yɛ ‑wa ‑bha "yɛ 'pö›
MAT 5:39 "kɛɛ ma ‑zë a‑ ‑pö ka ‑dhɛ ꞊dhɛ: 'Ka 'dho ka ‑dɩ bhlɔɔ bho mɛ 'ö 'wɔn yaa ‑kë ka 'ka ‑a ‑gɔ. Mɛ 'ö ka "tʋ ‑ma ka ‑kɔ ‑së 'gü, ‑ka ka ꞊kwaa 'gü "tʋ slëë‑ ‑mɛ ‑ta kö ‑ya ‑ma 'pö.
MAT 5:40 Mɛ ꞊ya ka ‑da zadɔmɛ ‑nu ‑dhɛ kö ‑wo kaa‑ "bhɛɛ 'sü ka ‑gɔ ka ‑san ‑bha, ‑ka kaa‑ ꞊gbauu‑ dɔ‑ ‑mɛ ‑gɔ.
MAT 5:41 ꞊Ya kë ꞊dhɛ 'mɛ 'ö ‑ziö ka ‑gɔ ꞊ya ‑kpan ka ‑bha zian ‑ta kö ‑yö faan wɔ ka ‑ta kö ‑yö ꞊kwɛɛ 'gbiin‑ ‑ya ka ꞊gbin‑ kö ‑ya pö 'ka ziö ‑tɔn do ‑ta, ‑ka ziö ‑tɔn ꞊plɛ ‑ta.
MAT 5:42 Mɛ 'ö pë ‑gbadhɛ ka ‑gɔ, ‑kaa nu‑ ‑mɛ ‑dhɛ, mɛ 'ö nu pë "siëng 'sü ka ‑gɔ, 'ka 'dho ‑kɔ ‑mɛ ‑dhɛ ‑a ‑pë ‑ta.»
MAT 5:43 'Yö‑ pö: «꞊Ya 'go yö ‑zë 'gü, ‑wo ka‑ ‑pö ka "bhɛma ‑nu ‑dhɛ 'pö ꞊dhɛ ka këyɔɔ ‑nu ‑dhɔ ‑yö ka kë kö ka 'yaɔ‑ ‑nu ‑zë ‑a ‑nu ‑san ‑yö ka kë.
MAT 5:44 "Kɛɛ ma ‑zë a‑ ‑pö ka ‑dhɛ ꞊dhɛ ka 'yaɔ‑ ‑nu ‑dhɔ ‑yö ka kë kö 'mɛ 'wo ka ‑wëëdhɛ bho sië 'ka bhɛa" Atanna ‑dhɛ ‑a ‑nu ‑wɔn 'gü.
MAT 5:45 'Ka yö ꞊në‑ kë "dhʋ̈ kö 'ka bhɔ ka Dë 'ö ‑ya ‑sü 'ka dhang‑ 'gü bha‑ ‑bha. ‑A ‑gɛn ‑mü ꞊dhɛ ‑yö ö ‑bha 'yënng‑ ‑wo 'wɔnyaakëmɛ ‑nu ‑dhɛ ꞊dhɛ ‑kɔ do 'ö‑ ‑wo 'ka 'wɔnsëkëmɛ ‑nu ‑dhɛ bha ꞊në‑ 'dhö, 'yö dha ban 'zü ö 'wɔnsëkëmɛ ‑nu ‑dhɛ ꞊dhɛ 'wɔnyaakëmɛ 'dhö 'pö.
MAT 5:46 ‑Ya kë ꞊dhɛ 'mɛ 'ö ka ‑dhɔ 'dhö‑ ‑nu ‑kë ꞊në‑ ‑nu ‑dhɔ ꞊ya ka kë doseng kö ‑më ‑wɔn ꞊në dho kë mɛ 'kɔn ‑wɔn 'ka ka ‑bha ‑kë Atanna ‑bha mɛ 'ka ‑sü "gblʋʋ "piʋ̈, 'yö Atanna dho ka ꞊trɔɔn ‑da ‑a ‑wɔn 'gü. 'Niisɔngkunmɛ ‑nu ('wo mɛ ‑nu ‑ta ꞊në‑ ‑bhö bha) ‑wa ‑kë 'pö ꞊dhɛ ‑kɔ 'dhɛ 'kö bha‑ 'dhö bhoo!
MAT 5:47 ꞊Ya kë 'zü ꞊dhɛ 'ka ka dheebhang ‑nu ‑dɩ ‑slɔɔ ꞊në‑ ‑nu ꞊tua bho doseng kö "dhabhliwɔn ‑mɛɛ ꞊në 'ka‑ ‑kë 'wɔn bha‑ 'gü, mɛ 'waa Atanna dɔ ‑wa kë 'pö "dhʋ̈!
MAT 5:48 Pö 'yaa ka Dë Atanna 'ö ‑ya ‑sü 'ka dhang‑ 'gü bha‑ ‑bha ‑kɔ do 'ö‑ 'gü bha, pö 'ya 'dho kë ka ‑bha 'pö‑ ‑kɔ 'gü.»
MAT 6:1 ꞊Dhɛ 'ö ꞊yaa‑ pö "dhʋ̈, 'yö go mü 'zü 'ö‑ pö: «‑Kaa kë ‑së kö ka ‑bha 'wɔn ‑së kë ‑sü 'ya 'dho kë ꞊dhɛ pë ‑yaan kë ‑sü 'dhö. ꞊Ya kë ꞊dhɛ 'ka‑ kë "dhʋ̈ kö 'kii 'dho ka ꞊trɔɔn yö ka Dë 'ö ‑ya ‑sü 'ka dhang‑ 'gü bha‑ "piʋ̈.
MAT 6:2 ‑A ‑wɔn 'gü 'bha‑ pö bhii 'wëëga ꞊gbaɔ ‑wëëmɛ ‑gɔ, ‑bhö ‑a kë ‑suɛɛdhö kö mɛ "yan 'ya 'dho ꞊loo i ‑ta ꞊dhɛ ‑kɔ 'ö ꞊naɔyaankëmɛ ‑nu 'wo‑ kë‑ 'ka Zuifö ‑nu ‑bha ‑yakwëëkëgükɔ ‑nu 'gü, "ɛɛn ‑kpinng ‑ta ‑dhɛ ‑nu 'gü ("kɛɛ kö ‑a ‑nu "ta ‑kɔ ‑zë 'bha 'yaa ‑së) bha‑ 'dhö. ‑A ‑gɛn ‑mü ꞊dhɛ 'mɛ 'kö 'wo bha ‑wa ‑kë "dhʋ̈ kö ‑wo wo 'tɔ ꞊në‑ bhɔ. A‑ ‑pö ka ‑dhɛ tɛan‑ ꞊dede 'ka ꞊dhɛ wo ‑zë ꞊wa wo ꞊trɔɔn ꞊slɔɔ 'nu (mɛ "bhɩɩ‑ ‑nu ‑bha ‑a ‑nu 'tɔ bhɔ ‑sü bha‑ 'ka ꞊naa bha).
MAT 6:3 "Kɛɛ bhi ‑zë 'bha‑ pö 'i 'wëëga nu ‑wëëmɛ ‑dhɛ ‑a "slë mɔɔ‑ kö mɛ ‑zian 'ö dɔ ‑sü 'ka i "sɔɔ 'ya 'dho 'wɔn ꞊slɔɔ‑ 'gü!
MAT 6:4 Kë "dhʋ̈ kö gbaɔ‑ 'i‑ wo bha ‑yö 'to ‑bin 'gü kö i Dë 'ö 'wɔn 'bha 'yaa ‑bin ‑bha bha ‑yö i ꞊trɔɔn nu.»
MAT 6:5 'Yö go mü 'zü 'ö‑ pö: «'Ka bhɛa" sië Atanna ‑dhɛ 'ka 'dho‑ kë ꞊dhɛ mɛ ‑yaankëmɛ ‑nu 'dhö; ‑a ‑gɛn ‑mü ꞊dhɛ wo ꞊në ꞊wa dɔ ‑kpinng ‑ta ‑dhɛ ‑nu waa‑ Zuifö ‑nu ‑bha ‑yakwëëkëgükɔ ‑nu 'gü ‑dhɛ ‑nu 'gü, 'yö 'wo ꞊bhɛa kö mɛ ‑nu "yan ‑yö ꞊mɔɔ wo "dhiʋ̈ ꞊dhɛ Atanna ‑dhɔkëmɛ ‑mü wo 'ka. A‑ ‑pö ka ‑dhɛ tɛan‑ ꞊dede 'ka ꞊dhɛ 'mɛ 'wo "dhʋ̈ bha ꞊wa wo ꞊trɔɔn ꞊slɔɔ ‑ya bo.
MAT 6:6 "Kɛɛ bhi ‑zë 'bha‑ pö bhii bhɛa" Atanna ‑dhɛ, ‑bhö ‑da i ‑gɔ 'kɔɔdhö kö 'i "kwɛɛ ta i ‑ta kö 'i bhɛa"‑ ‑dhɛ. ꞊Ya kë "dhʋ̈ i Dë 'ö 'wɔn 'bha 'yaa ‑bin ‑bha 'ö i "piʋ̈ ‑bin 'gü mü bha ‑yö ‑dho i ꞊trɔɔn nu; ‑a ‑gɛn ‑mü ꞊dhɛ ‑a "yan ‑yö i ‑bha.
MAT 6:7 ꞊Ya 'go yö ‑zë 'gü, 'ka bhɛa" sië Atanna ‑dhɛ, 'ka 'dho‑ wo ‑dhɛ do 'gü kplɔnkplɔndhö ꞊dhɛ mɛ‑ pë wo ‑dhɔkëpë ‑nu ‑dhɛ mɛ 'waa Atanna dɔ ꞊në 'ö ‑kë ‑nu 'gü ꞊dhɛ ‑bhɛa ‑dhɛ do 'gü kplɔnkplɔndhö ‑sü ꞊në ꞊ya kë "dhʋ̈ 'yö mɛ ‑wʋ ma, 'yö‑ ‑yɔ ‑bɔ mɛ ‑gɔ.
MAT 6:8 ‑Abin! Ka ‑zë 'ka 'dho ka ‑bha kë "dhʋ̈, ‑a ‑gɛn ‑mü ꞊dhɛ "sanni 'ka pë ‑gbadhɛ, pë 'ö ka ‑mawɔn 'dhö‑ ‑bha, ka Dë 'ö ‑ya ‑sü 'ka dhang‑ 'gü bha ‑ya ‑dɔ 'kpakpadhö.
MAT 6:9 ‑A ‑kë "dhʋ̈ ‑sü bha‑ 'gü 'ka‑ pö 'ka bhɛa" Atanna ‑dhɛ ‑kaa pö: Yi Dë Atanna 'i ‑ya ‑sü 'ka dhang‑ ‑nu 'gü, i 'tɔ 'ö "slʋ̈ʋ̈slʋ̈ bha ‑yö bhɔ ‑dhɛ ꞊gban "pɛpɛ 'gü.
MAT 6:10 I ‑bha ‑gblüdëdhɛ ‑yö nu, i dhɔɔbhaawɔn ꞊në ‑yö kë "kpʋng ꞊taa ꞊dhɛ ‑kɔ 'ö‑ 'ka dhang‑ 'gü ‑a 'dhö.
MAT 6:11 ‑Bhöpë 'ö ꞊mɔɔ yi ‑bha ꞊dɛɛ, ‑bhö ‑a nu yi ‑dhɛ.
MAT 6:12 ‑Bhö yi ‑kë ‑sɔng yaya ‑nu ‑mawɔn 'to ꞊dhɛ ‑kɔ 'yi 'mɛ 'wo 'wɔn yaa ‑kë 'pö yi 'ka ‑a ‑nu ‑mawɔn to‑ 'ka 'pö ‑a 'dhö.
MAT 6:13 'Bha 'dho kwaa‑ yi ‑zü 'ö 'yi dho 'wɔn yaa kë ‑zian ‑ta, "kɛɛ ‑bhö yi dha Sɔtraan ‑gɔ; ‑a ‑gɛn ‑mü ꞊dhɛ ‑gblüdëdhɛ, 'gügbɩɩdhɛ waa‑ 'tɔbhɔdhe ‑wo bhi ꞊në i ‑gɔ 'ö‑ zübhoyi 'yaa 'dhö, 'ö‑ "dhiʋ̈todhɛ 'yaa 'dhö. Kö ‑yö kë "dhʋ̈ bha 'aa ‑yö kë!
MAT 6:14 ꞊Ya kë ꞊dhɛ 'wɔn yaa 'ö mɛ ‑nu ‑wa ‑kë ka 'ka, 'ka‑ ‑nu ‑mawɔn 'to, ka Dë 'ö dhang‑ 'gü ‑yö ‑dho ka ‑bha 'wɔn yaa ‑nu ‑mawɔn 'to 'pö.
MAT 6:15 "Kɛɛ ꞊ya kë ꞊dhɛ 'kii‑ ‑nu ‑bha 'wɔn yaa ‑nu ‑mawɔn 'to ‑zë wo, kaa ‑dɩ 'pö 'yii dho ka ‑mawɔn 'to.»
MAT 6:16 'Yö‑ pö: «꞊Ya kë ꞊dhɛ 'ka 'sunng‑ 'ma sië kö 'ka bhɛa" Atanna ‑dhɛ, 'ka 'dho ka wë 'gü ‑siö ꞊dhɛ ‑kɔ 'ö ‑dɩ ‑to mɛ ‑nu "yënngmɛ ‑nu 'wo‑ kë‑ 'ka ‑a 'dhö! 'Ö 'wo wo wë 'gü ‑siö kö mɛ ꞊gban "pɛpɛ ‑wa 'wɔn dɔ ꞊dhɛ ‑wo 'sunng‑ 'ma sië. A‑ ‑pö ka ‑dhɛ tɛan‑ ꞊dede 'ka ꞊dhɛ: 'Mɛ 'wo bha ꞊wa wo ꞊trɔɔn ꞊slɔɔ "pɛpɛdhö ꞊naa bha.
MAT 6:17 "Kɛɛ bhi ‑zë, a‑ ‑pö i ‑dhɛ ꞊dhɛ i 'sunng‑ 'ma sië, ‑bhö i wëë' "zu "pɛpɛdhö kö 'i i ‑gɔ 'gü ‑piö ‑së 'ka
MAT 6:18 kö mɛ 'bha 'ya 'dho‑ 'wɔn dɔ ꞊dhɛ i 'sunng‑ ma sië; i Dë doseng 'ö 'wɔn 'bha 'yaa ‑bin ‑bha, 'ö i "piʋ̈ mü bha ꞊në dho‑ 'wɔn dɔ, 'yö 'wɔn ‑nu 'i‑ kë sië bha‑ ‑gɔ "yɔɔ dɔ i ‑gɔ.»
MAT 6:19 'Yö dhiang zë‑ ‑nu ‑dhɛ 'ö‑ pö: «'Ka 'dho kaa‑ ꞊naɔ ‑nu ‑duɛ bho "kpʋngtaadhɛ 'ö pë see‑ ‑pë waa‑ "kɔɔ ‑nu 'wo‑ ‑bha, 'ö ꞊kwaanmɛ ‑nu 'wo 'kpong ‑nu wü faandhɛ bha, 'wo pë ꞊kwaan‑ ‑bha ya‑ 'gü.
MAT 6:20 "Kɛɛ ‑ka ka ‑bha ꞊naɔ ‑nu ‑duɛ bho dhang‑ 'gü ‑dhɛ, 'ö pë see‑ ‑pë bha waa‑ "kɔɔ ‑nu 'waa‑ ‑bha, "ɛɛn 'ö ꞊kwaanmɛ ‑nu 'waa 'kpong 'wü‑ ‑bha kö ‑wo pë ꞊kwaan bha ꞊në‑ 'gü!
MAT 6:21 ‑A ‑gɛn ‑mü ꞊dhɛ ‑dhɛ 'ö i ‑bha ꞊naɔ 'dhö‑ ‑bha, 'yö i zuë" 'dhö ‑kë ‑bha 'pö.»
MAT 6:22 'Yö go mü 'ö‑ pö: «Mɛ "yanga ꞊në ꞊dhɛ mɛ kwi ‑bha ‑dhɛpuudhɛ 'dhö. ꞊Ya kë ꞊dhɛ mɛ "yanga 'dhö ö 'flëë‑ 'gü kö pë 'bha ‑pë 'bha 'yaa‑ ‑bha, kö i kwi ꞊gban "pɛpɛ ‑yö "puu 'pö.
MAT 6:23 "Kɛɛ ꞊ya kë ꞊dhɛ i "yanga ‑zë ‑a ‑dhɛ ꞊ya ‑ya ‑bha 'yaa ‑dhɛ yö sië 'zü, kö i kwi ‑dɩ 'pö ꞊ya ‑da ‑dhɛ tii 'gü ꞊naa bha. ꞊Ya kë ꞊dhɛ 'pë 'ö dho i gba ‑dhɛpuudhɛ 'ka, ꞊ya kë ‑dhɛtiidhɛ 'ka, kö ‑dhɛtiidhɛ bha ‑yö ‑dho kë ‑ziisü.»
MAT 6:24 'Yö Yesu ‑yö dho dhiang 'ka ö "dhiʋ̈ 'ö‑ pö: «Mɛ do 'yaa ꞊mɔɔ‑ ‑bha kö ‑yö yë kë mɛ ꞊plɛ "piʋ̈. ‑A mɛ do ‑dhɔ ‑dho ‑a kë, 'ö‑ mɛ do ‑san ‑ya ‑kë "wɛ gbonggbongdhö. ‑Yö ‑dho ‑kplü mɛ do ‑bha 'ö ‑kan mɛ 'dhɛ 'ö 'dhö‑ ‑bha, ‑kɔ do bha‑ 'gü, 'kii 'dho ꞊mɔɔ‑ ‑bha 'pö kö 'ka ka ‑dɩ nu Atanna waa‑ ꞊naɔ ‑a ‑nu ‑dhɛ "kwëë.
MAT 6:25 'Yö‑ pö: «'Wɔn 'ö‑ ‑wɔn 'gü 'yö 'a‑ pö ka ‑dhɛ ꞊dhɛ: 'Ka 'dho ‑ya pë ‑nu 'ka dho‑ ‑bhö "ɛɛn 'ö 'ka dho‑ mü kö 'ka ‑tosɛa kë‑ ‑ta, "ɛɛn sɔ ‑nu 'ka dho‑ ‑da bha‑ 'bha ‑wɔn zuën ‑ta bha 'yö bha; ‑a ‑gɛn ‑mü ꞊dhɛ ‑tosɛa kë ‑sü ‑wɔn ‑yö "gbɩɩ‑ 'ö‑ ‑ziö ‑bhöpë ‑wɔn ‑ta, "ɛɛn 'zü mɛ kwi ‑wɔn ‑yö "gbɩɩ‑ 'ö ‑ziö sɔ ‑wɔn ‑zë ‑ta, "ɛɛn ꞊sua ‑mü ‑ee?
MAT 6:26 ‑Maa ‑nu 'wo ziö sië dhang‑ 'gü bha ‑kaa ‑nu ‑ga! 'Waa pë ta kö woo‑ ‑a "kan kö ‑wa ‑kɔ dɔ, "kɛɛ ka Dë 'ö ‑ya ‑sü 'ka dhang‑ 'gü bha ‑ya ‑nu "dhiʋ̈ ‑gba. "Ɛɛn ‑a ‑ga 'ka‑ wo bha ‑maanë ‑nu ‑zë ‑a ‑nu ‑wɔn ‑yö "gbɩɩ‑ 'ö ‑ziö ka ‑zë ka ‑ta ‑ee?
MAT 6:27 De ‑mü 'ka ka kpö 'gü 'yö ꞊mɔɔ‑ ‑bha 'ö ö ‑dɩ ‑bha ‑tosɛa ‑dhɛkpaɔyi do ‑zian ‑da 'gü ö ‑dɩ ‑dhɛ ‑a ‑bha ‑ya ö ‑dɩ ‑wɔn zuën ‑ta ‑sü 'gü?
MAT 6:28 ‑Më ꞊në ‑kë 'sa 'yö 'ka ‑ya ka ‑dasɔ ‑nu ‑wɔn zuën ‑ta? ‑Kɔ 'ö blëë ‑nu 'wo "bin ‑ya sië‑ 'ka "bü bha ‑kaa ‑ga kö 'ka‑ 'suan‑ bho! 'Waa yë 'bha kë "ɛɛn 'waa sɔ bɔ.
MAT 6:29 "Kɛɛ 'sa a‑ ‑pö ka ‑dhɛ tɛan‑ 'ka ꞊dhɛ ‑gblüdë 'bha 'ö gun Izraɛdhö ‑sɛ 'gü yi 'bha 'ka 'wo‑ Sadhomɔ ‑kë bha‑ ‑bha ‑gblüdëdhɛ ꞊gban waa‑ ‑bha ‑bha, 'yii sɔ suu 'ö‑ "yan 'dhö ‑së ꞊dhɛ blëë ‑nu bha‑ do 'dhö bha‑ ‑da tongtongdhö.
MAT 6:30 "Bü ‑blëë "wɛɛwɛɛ dhe ‑nu 'ö ꞊wa "bin ‑ya ꞊dɛɛ 'ö dhia" kö ꞊wa "kpɛa 'kpɔ 'wo dho‑ ‑nu "kan 'wo‑ ‑gʋ̈ bha Atanna ꞊ya wo ‑zë ‑a ‑nu dhi "sinma ‑sinma wo "dhʋ̈ bha ‑oo, 'yö ka ‑zë ꞊wɛ? ‑Më ꞊në ‑kë 'yö 'yaa sɔ ‑da ka ‑bha ("kɛɛ kö ka ‑zë ka ꞊bhlëësü wo ‑zë ‑a ‑nu ‑bha)? 'Dhang 'ö kaa‑ bho Atanna "dhiʋ̈ 'kpakpadhö bha 'yö ‑kë!
MAT 6:31 A‑ ‑pö ka ‑dhɛ "sika 'ya 'dho kë ka 'gü ka ‑bhöpë ‑wɔn 'gü; "sika 'ya 'dho kë ka 'gü ka müpë ‑nu "ɛɛn ka ‑dasɔ ‑nu ‑wɔn 'gü,
MAT 6:32 'mɛ 'waa Atanna dɔ ꞊në 'wo pë ‑nu bha‑ ‑nu ꞊mɔɔ‑ ‑kpɛawo, "kɛɛ ka Dë 'ö ‑ya ‑sü 'ka dhang‑ 'gü ‑ya 'wɔn ‑dɔ ꞊dhɛ ka ‑mawɔn ‑ya ‑bha.
MAT 6:33 'Pë 'ö 'ka dho‑ ꞊mɔɔ‑ ‑blɛɛsü yö ‑mü Atanna ‑bha ‑gblüdëdhɛ waa‑ ‑a dhɔɔbhaawɔn ‑nu kë ‑sü ꞊në‑ 'ka kö pë 'dhɛ 'wo to yöö ꞊dede ‑ya nu ka ‑dhɛ ‑a taa 'ka.
MAT 6:34 ‑A ‑kë "dhʋ̈ ‑sü bha‑ 'gü, 'ka 'dho ‑ya ‑dhɛ 'ö dho ꞊kpaɔ dhia" ‑a ‑wɔn zuën ‑ta, ‑a ‑gɛn ‑mü ꞊dhɛ ‑dhɛkpaɔyi "pɛpɛ ꞊gban ‑bha 'gü ‑wɔn ‑yö 'do 'do. ‑Dhɛ 'dhɛ ꞊ya ꞊kpaɔ 'yö‑ ‑bha 'gü sëëbhodhe 'ö ꞊mɔɔ‑ ‑bha 'yö ‑kë 'pö‑ 'gü.
MAT 7:1 'Yö‑ pö: «'Ka 'dho za dɔ mɛ 'bha ‑bha, kö Atanna ‑dɩ 'pö 'ya 'dho za dɔ ka ‑bha.
MAT 7:2 ‑A ‑gɛn ‑mü ꞊dhɛ ‑yö ‑dho za dɔ ka ‑bha ꞊dhɛ ‑kɔ 'ö kaa ‑dɩ 'pö 'ka‑ dɔ‑ 'ka mɛ ‑nu ‑bha bha ꞊në‑ 'dhö; 'ka mɛ ‑nu ‑bha dɔ ‑mawɔn yaa ‑dhɛ ‑bha, ‑yö ‑dho ka ‑bha dɔ ‑mawɔn yaa ‑dhɛ ‑bha 'pö.
MAT 7:3 ‑Më ꞊në ‑kë 'yö "yɛ ‑bi 'ö ‑da i "tɛado "yan ‑bha 'yö 'i yö ‑zë yö, 'yö 'bhaa "dhü ‑blün kö bhi ‑zë i "yan ‑bha bha‑ yö.
MAT 7:4 I ‑dho pö i dheebhang ‑dhɛ ‑kɔ kë ꞊dhɛ ꞊dhɛ ‹‑bhö dɔ kö 'a "yɛ ‑bi bho i "yënng› kö bhi ‑zë "dhü ‑blün ‑yö i "yënng?
MAT 7:5 ꞊Flümɛ, ‑bhö "dhü ‑blün bho ꞊kö i "yan ‑bha ‑blɛɛsü kö i ‑dhɛ yö kö 'i gun ‑na "yɛ ‑bi bho i dheebhang "yan ‑bha 'pö!»
MAT 7:6 'Yö go mü 'ö‑ pö: «'Ka 'dho 'pë 'ö ꞊bhlëësü ‑a nu 'gbɛn‑ ‑nu ‑dhɛ, 'ö 'wo ꞊slëë ka ‑bha 'wo ka kun. 'Ka 'dho ka ‑bha pë ꞊bhlëësü ‑nu ‑zuö ‑bhɔ ‑nu ‑dhɛ kö 'wa 'dho taa‑ ‑ta.»
MAT 7:7 'Yö go mü 'zü 'ö‑ pö: «‑Ka pë ‑gbadhɛ, ka ‑dho ‑a ꞊slɔɔ! ‑Ka pë mɔɔ‑, ka ‑dho ‑a yö! ‑Ka "kwɛɛ ‑ta ‑ma, ‑wo ‑dho "kwɛɛ "pʋ ka ‑gɔ.
MAT 7:8 ‑A ‑gɛn ‑mü ꞊dhɛ mɛ 'ö pë ‑gbadhɛ 'yö‑ ꞊slɔɔ, 'mɛ 'ö pë ꞊mɔɔ 'pö 'yö‑ yö, 'yö 'wo "kwɛɛ ‑pʋ 'mɛ 'ö "kwɛɛ ‑ta ‑ma ‑a ‑gɔ 'pö.
MAT 7:9 Mɛ 'bha ‑yö ‑dhö ka kpö 'gü 'ö‑ ‑bha 'në ꞊ya 'bluu‑ ‑gbadhɛ ‑gɔ, 'yö ‑gwë kpö nu‑ ‑dhɛ ‑ee?
MAT 7:10 "Ɛɛn mɛ 'bha‑ ‑dhö ka kpö 'gü 'yö‑ ‑bha 'në ꞊ya 'yuʋ̈‑ ‑gbadhɛ ‑gɔ, 'yö ‑mlɛɛ "yaandhe nu‑ ‑dhɛ ‑ee?
MAT 7:11 ꞊Ya kë "dhʋ̈ ka 'ö ka ‑zë ka këwɔn 'dhö 'ya‑ bha, 'ka dɔ pë ‑së ‑nu ka ‑bha 'në ‑nu ‑dhɛ ‑dhɛ 'ka ꞊dhɛ ‑kɔ bha‑ 'dhö, ‑më ꞊në ‑kë 'yö ka Dë 'ö ‑ya ‑sü 'ka dhang‑ 'gü bha 'yaa pë ‑së nu 'mɛ 'wo‑ ‑gbadhɛ ‑gɔ ‑a ‑nu ‑dhɛ 'pö?
MAT 7:12 ꞊Ya 'go mü pë "pɛpɛ 'ka‑ "piʋ̈ ꞊dhɛ mɛ ‑nu ‑wa kë ka ‑dhɛ bha, ‑kaa kë‑ ‑nu ‑dhɛ 'pö, ‑a ‑gɛn ‑mü ꞊dhɛ 'pë 'ö Moizö ‑bha 'tɔng‑ waa‑ Atanna ‑wʋdhiʋ̈loomɛ ‑nu ‑bha 'sëëdhɛ 'wo‑ pö bha 'yö bha.»
MAT 7:13 'Yö go mü 'ö‑ pö: «‑Kë Atanna ‑bha mɛ 'ka ‑sü bha‑ ‑dhɛ ‑yö 'ya‑ ꞊dhɛ 'kɔ 'ö‑ "dhi 'dhö "sɔɔsɔɔ, ‑da ‑a 'gü ‑sü 'dhö, "kɛɛ bɔdhɛ 'ö 'dhö 'yö bha, kö 'ka kë‑ ‑bha 'ka! ‑A ‑gɛn ‑mü ꞊dhɛ ꞊geebɔɔ ‑pɛng 'gü ‑zian bha‑ ‑sɔ ‑dhɛ ‑yö "gbɛa, 'yö‑ ‑tadhɛ 'dhö ‑basü 'ka "pɛpɛdhö, 'yö 'mɛ 'wo bɔ mü ꞊në 'wo 'gbɛ.
MAT 7:14 'Yö zian 'dhɛ kö dho ꞊sii 'ö 'yaa yën ‑a këdhɛ 'gü bha 'ö "sɔɔsɔɔ, 'yö ‑bɔ ‑ta ‑dhɛ 'dhö "gbɩɩ‑ ꞊dedewo, 'yö mɛ 'wo bɔ‑ ‑ta 'waa 'gbɛ.»
MAT 7:15 'Yö‑ pö: «‑Ka ka ‑dɩ 'kun ‑së Atanna ‑wʋdhiʋ̈loomɛ ꞊flüsü ‑nu ‑gɔ! 'Wɔn 'ö‑ ‑wɔn 'gü, 'yö 'a‑ pö "dhʋ̈ bha‑ ‑gɛn ‑mü ꞊dhɛ: ‑Wo ‑dho nu ka "piʋ̈ kö ꞊wa wo tɔng 'ka ꞊dhɛ "bhlaanë 'dhö, "kɛɛ kö 'gba ‑dɔ ka ‑bha kö 'wo ka 'gü see‑ ‑wɔn ꞊në‑ ‑nu 'gü ꞊dhɛ gwee ‑nu 'dhö.
MAT 7:16 "Kɛɛ ka ‑dho ‑a ‑nu dɔ 'kpakpadhö ‑a ‑nu këwɔn ‑nu ꞊në‑ ‑bha; ‑a ‑gɛn ‑mü ꞊dhɛ ‑a ‑nu këwɔn 'yaa ‑së
MAT 7:17 ‑A 'klɔɔ‑ ‑mü ꞊dhɛ "dhü 'ö "dhü ‑së 'ka ‑a bhɛ din ‑yö ‑kë ‑së; ‑a 'dhɛ 'yaa ‑së 'pö, ‑a bhɛ din 'yaa dhi.
MAT 7:18 "Dhü 'ö ‑së ‑a bhɛ ‑zë din 'yaa ‑siö, ‑a 'dhɛ 'ö 'ya‑ 'pö, ‑a bhɛ din 'yaa dhi.
MAT 7:19 ‑A ‑kë "dhʋ̈ ‑sü 'gü, "dhü 'ö 'yaa bhɛ ‑së dɔ, ‑a "kan ꞊në 'wo dho‑ wo 'yö 'wo‑ ‑zuö pɛng 'gü.
MAT 7:20 'Wo "dhü ‑së dɔ‑ bhɛ ‑bha ‑kɔ do 'ö‑ 'gü bha, ka ‑dho Atanna ‑wʋdhiʋ̈loomɛ ꞊flüsü ‑nu bha‑ ‑nu dɔ ‑kɔ do bha ꞊në‑ 'gü 'pö.»
MAT 7:21 'Yö go mü 'zü 'ö‑ pö: «Mɛ "pɛpɛ 'wo n ‑dhɛ sië ‹n Dëmɛ, n Dëmɛ› bha, ‑a ‑nu ꞊gban 'wii 'dho ‑da Atanna ‑bha ‑gblüdëdhɛ 'gü kö 'yii kë mɛ 'kö n Dë 'ö ‑ya ‑sü 'ka dhang‑ 'gü bha‑ dhɔɔbhaawɔn ‑kë ‑a 'ka.
MAT 7:22 Atanna ‑bha za ‑dɔ mɛ ‑bha yi bha ꞊ya ꞊loo, mɛ 'gbɛ‑ ‑dho pö n ‑dhɛ: ‹N Dëmɛ, n Dëmɛ, yi Atanna ‑wʋ "dhiʋ̈ ꞊loo i 'tɔ 'gü, 'ö 'yi "yina yaa ‑nu kë mɛ ‑nu 'gü i 'tɔ 'gü, 'ö 'yi "dhabhliwɔn 'gbɛ ꞊dede ‑kë i 'tɔ 'gü›
MAT 7:23 "kɛɛ ‑a ‑dho pö‑ ‑nu ‑dhɛ: 'Maa ka dɔ tongtongdhö, ‑a ‑gɛn ‑mü ꞊dhɛ ka ‑to 'wɔn yaa kë ‑sü ‑bha ‑kpɛawo, ‑ka bhɔ n ‑dhɛ taa‑!»
MAT 7:24 'Yö go mü 'zü 'ö‑ pö: «"Kɛɛ mɛ "ʋʋ mɛ 'ö ö "tʋ to 'wɔn ‑nu 'a go sië‑ pö bha‑ ‑bha, 'ö‑ 'gü ‑wɔn ‑nu ‑kë kö‑ ‑mɛ ‑yö ꞊dhɛ 'wɔndɔmɛ do 'ö ö ‑bha 'kɔ dɔ ‑gwë ‑ta ꞊në‑ 'dhö.
MAT 7:25 ꞊Dhɛ 'ö ꞊ya ö ‑bha 'kɔ bha‑ ‑dɔ ‑gwë 'saa‑ "dhiʋ̈ ꞊ya ö bo, 'yö dha ‑yö ban, 'yö "yi ‑yö pa, 'yö "tɛɛ "gbɩɩ‑ ‑nu 'wo ‑ziö, "kɛɛ 'yö 'kɔ bha 'yii 'wü, ‑a ‑gɛn ‑mü ꞊dhɛ kö‑ ‑gɛn ‑yö ‑gban ‑sü 'ka ‑gwë ‑ta.
MAT 7:26 "Kɛɛ mɛ "ʋʋ mɛ 'ö 'wɔn 'ka 'go sië‑ ma bha‑ ma, 'ö 'yaa‑ 'gü ‑ta 'sü, kö‑ ‑mɛ ‑yö ꞊dhɛ ‑tamamɛ 'ö 'yaa ö ‑zʋ 'gɔn 'ö dho 'ö 'kɔ dɔ "yɛɛn ‑ta ꞊në‑ 'dhö.
MAT 7:27 ꞊Dhɛ 'ö ꞊ya 'kɔ dɔ, 'yö dha ‑yö ban, 'yö "yi ‑yö pa, 'yö "tɛɛ "gbɩɩ‑ ‑nu 'wo ‑ziö, 'yö 'kɔ bha 'ö wü, 'yö‑ ꞊gban ‑yö ꞊see dee" wo "pɛɛpɛdhö.»
MAT 7:28 ꞊Dhɛ 'ö Yesu ꞊ya ö bo dhiang ‑nu bha‑ ‑nu zë ‑sü 'ka ꞊dhɛ ‑kɔ bha‑ 'dhö, 'yö‑ ‑bha mɛ draan‑ ‑kɔ bha‑ 'wɔn ‑yö mɛ 'wo gun mü bha‑ ‑nu ꞊gban "pɛpɛ kɔn;
MAT 7:29 ‑a ‑gɛn ‑mü ꞊dhɛ ‑a ‑bha mɛ draan‑ ‑kɔ bha ‑yö ‑gun bho sië Zuifö ‑nu ‑bha 'tɔnggɔmɛ ‑nu ‑bha "piʋ̈, 'ö mɛ ꞊draan ‑wʋgbiindhɛ 'ka.»
MAT 8:1 ꞊Dhɛ 'ö Yesu ꞊ya 'go ‑tɔn ꞊gbin‑, 'yö mɛ kpö 'gbɛ 'wo ‑ziö ꞊keng‑.
MAT 8:2 'Wo dho ‑dhɛ ‑ga kö ꞊weemɛ do ꞊ya ꞊yɔɔn‑ "sɔɔ kö ꞊ya zun ö kpiö 'gü‑ ‑dhɛ, kö ꞊yaa‑ pö: «N Dëmɛ, a‑ 'wɔn ‑dɔ ꞊dhɛ i ‑mɔɔ ‑bha 'i n ‑kë "klʋ̈ʋ̈klʋ̈, "kɛɛ kö i ‑dho "wɩ‑ ‑bha ꞊tɔn n ‑gɔ ‑ee?»
MAT 8:3 'Yö Yesu ‑yö ö ‑gbe 'gü ‑pʋ 'yö‑ zun‑ ‑bha 'yö‑ pö: «'Ma "wɩ‑ ‑bha, ‑bhö kë "klʋ̈ʋ̈klʋ̈!» ‑Yö ‑to ‑dhɛ do bha‑ 'gü, 'ö‑ ‑bha ꞊wee ‑yua ‑yö go‑ ‑bha 'yö kë "klʋ̈ʋ̈klʋ̈.
MAT 8:4 ꞊Dhɛ 'ö ꞊ya kë "dhʋ̈, 'yö Yesu ‑ya pö‑ ‑dhɛ: «‑Bhö i "tʋ 'to ‑së 'ka, 'bha 'dho 'wɔn ya‑ ‑gɛn do mɛ 'bha ‑dhɛ, "kɛɛ ‑bhö 'dho 'i i ‑dɩ ‑zɔn "saabhomɛ ꞊në‑ ‑dhɛ kö ‑kɔ 'dhɛ 'i‑ ‑bha ꞊dɛɛ bha ‑ya yö! ꞊Ya 'go mü kö 'i "saa‑ bho Atanna "dhiʋ̈ ꞊dhɛ ‑kɔ 'ö Moizö ‑ya ‑zɔn 'ka ‑a 'dhö kö mɛ ꞊gban ‑wa 'wɔn dɔ ꞊dhɛ 'bha kë "klʋ̈ʋ̈klʋ̈.»
MAT 8:5 ꞊Dhɛ 'ö Yesu 'dhö ‑da sië Kapɛɛnaɔmö ‑pö 'gü, 'yö Wlɔmö ‑mɛ ‑nu ‑bha "sɔdha këng do ‑gɔdhiʋ̈mɛ do ‑yö nu‑ "piʋ̈, 'yö "ta bhoo ‑da ‑dhɛ
MAT 8:6 'ö‑ pö: «N Dëmɛ, ‑bhö "ta n ‑dhɛ, ma gwëëmi do ‑yö "yua "dhiʋ̈ sië ‑ziisü, ‑a ‑dhɛ ꞊gban "pɛpɛ ꞊ya ga‑ ‑bha, ‑yö wɔ sië 'kɔɔdhö.»
MAT 8:7 'Yö Yesu ‑ya pö‑ ‑dhɛ: «A ‑dho 'dho 'a ‑wo i ‑gɔ 'kɔɔdhö kö 'a‑ dha.»
MAT 8:8 "Kɛɛ 'yö "sɔdha ‑gɔmɛ bha 'ö‑ pö‑ ‑dhɛ 'ö‑ pö: «N ꞊kɔɔnmɛ, a ꞊dhɛ ‑më 'dhö 'yö 'i‑ "piʋ̈ kö 'i ‑da n ‑gɔ 'kɔɔdhö, a‑ 'wɔn ‑dɔ ꞊dhɛ ‑wʋ dosengseng ‑ya 'go i "dhi 'bha‑ pö, ma gwëëmi bha‑ ‑dho kë "klʋ̈ʋ̈klʋ̈;
MAT 8:9 ‑a ‑gɛn ‑mü ꞊dhɛ ma 'ö n ‑gɔdhiʋ̈mɛ ‑nu 'wo 'dhö 'pö ya, mang ‑dɩ 'pö n ‑kɔwlöömɛ ‑nu ‑wo ‑dhö 'ö 'ma‑ pö mɛ do ‑dhɛ: ‹‑Bhö 'dho ‑dhɛ 'ö ꞊ni‑ 'gü!› 'ö dho 'ö 'ma‑ pö‑ mɛ 'bha ‑dhɛ: ‹‑Bhö nu!› 'ö nu, 'ö 'ma‑ pö ma gwëëmi do ‑dhɛ: ‹‑Bhö ‑a kë ꞊ni!› 'ö‑ ‑kë. ("Sanni n ‑bha ‑zë ‑yö kë "dhʋ̈ bha ‑oo, 'yö bhi ‑zë ꞊wɛ?)»
MAT 8:10 ꞊Dhɛ 'ö Yesu ꞊yaa‑ ‑wʋ ma ꞊dhɛ ‑kɔ bha‑ 'dhö, 'yö‑ "dhia ‑yö ma‑ 'gü, 'yö‑ pö 'mɛ 'wo gun‑ ꞊keng‑ bha‑ ‑nu ‑dhɛ: «‑Ka ‑dhɛ ‑ga, a‑ ‑pö ka ‑dhɛ tɛan‑ ꞊dede 'ka ꞊dhɛ 'dhang ‑bho n "dhiʋ̈ ‑kɔ suu ya, 'mii‑ yö mɛ 'bha ‑gɔ Izraɛdhö ‑sɛ ‑zian ya‑ 'gü do kö maa ‑dhɛ "wɛɛ ꞊në‑ pö!»
MAT 8:11 "Kɛɛ a‑ ‑pö ka ‑dhɛ ꞊dhɛ mɛ 'gbɛ ꞊dede ‑dho 'go 'yënng‑ ‑wo ‑zian 'ka, 'wo go 'yënng‑ ‑pö ‑zian 'ka 'wo pë ‑bhö wo 'kwëë‑ waa‑ Ablaamö ‑nu, Izaakö ‑nu waa‑ Zakɔbö ‑nu 'dhö Atanna ‑bha ‑gblüdëdhɛkëdhɛ 'ö dhang‑ 'gü bha‑ 'gü.
MAT 8:12 'Yö 'mɛ 'kö‑ ‑dhɛ gun‑ ‑bha ‑dhɛ ‑wo ‑da Atanna ‑bha ‑gblüdëdhɛkëdhɛ bha‑ 'gü bha 'wo‑ ‑nu ‑zuö "kpɛnng ‑dhɛtiidhɛ 'gü, ('yö 'wo ꞊saan mü,) 'yö 'wo "gbʋ bɔ kö ‑wo wo "sɔn "dhiʋ̈ ‑bhö sië klöklödhö.»
MAT 8:13 ꞊Dhɛ 'ö Yesu ꞊ya dhiang bha‑ zë‑ ‑nu ‑dhɛ "dhʋ̈, 'yö‑ pö "sɔdha ‑gɔmɛ bha‑ ‑dhɛ: «‑Bhö 'dho i ‑gɔ 'kɔɔdhö, ‑yö ‑dho kë i ‑dhɛ ꞊dhɛ ‑kɔ 'i ‑zʋ yö‑ 'ka n ‑dhɛ bha‑ 'dhö!» ‑A "tʋ̈ng ꞊dede 'wo‑ pö sië‑ 'ka "dhʋ̈ bha, 'yö "sɔdha ‑gɔmɛ ‑bha gwëëmi bha 'ö ‑kë 'ka "klʋ̈ʋ̈klʋ̈.
MAT 8:14 ꞊Dhɛ 'ö ꞊ya kë "dhʋ̈, 'yö Yesu waa‑ ‑bha ꞊klang ‑nu 'wo dho Piɛdhö ‑gɔ 'kɔɔdhö. 'Yö ‑kpan Piɛdhö ‑bha dhebhɔ dhe ‑bha kö "nɛnɛ ꞊ya nu‑ ‑ta kö ‑yö 'waanu ‑sü 'ka‑ 'ka "wɛ tɔnklɔɔndhö.
MAT 8:15 'Yö ö ‑kɔ pa‑ ‑kɔ 'ka. ‑Yö ‑to ‑dhɛ do bha‑ 'gü 'ö "nɛnɛ ‑yö ‑kan 'gü, 'yö ꞊wlü 'ö‑ ‑nu "dhiʋ̈ ‑ziö wo.
MAT 8:16 ꞊Dhɛ 'ö yɛan" "piʋ̈ ꞊ya ꞊loo, 'yö 'wo nu mɛ 'gbɛ 'ö "yina yaa ‑nu 'wo‑ ‑nu 'gü ‑a ‑nu 'ka Yesu ‑dhɛ. 'Yö "yina yaa ‑nu bha‑ ‑nu ‑kë ö ‑wʋ 'ka, 'yö "yuëdhi "pɛpɛ 'wo gun 'mü ‑a ‑nu ‑kë "klʋ̈ʋ̈klʋ̈ 'pö.
MAT 8:17 ‑Wʋ 'ö Atanna ‑wʋdhiʋ̈loomɛ Ezai ‑ya pö yi 'bha 'ka bha‑ 'gü ‑wɔn ‑yö ‑kë ‑kɔ bha ꞊në‑ 'gü ꞊dhɛ: «‑Yö yi ꞊niɔɔdhɛ ‑nu ‑bho yi ‑bha, 'ö yi ‑bha "yua ‑nu ‑kwɛɛ bho yi ‑ta.»
MAT 8:18 ꞊Dhɛ 'ö Yesu ꞊ya 'mɛ 'wo ꞊klëën‑ ‑zü bha‑ ‑nu ‑ta ‑ga, 'yö‑ pö‑ ‑bha ꞊klang ‑nu ‑dhɛ ꞊dhɛ ‑wo "yi "kan kö ‑wo bɔ "yi ꞊taama.
MAT 8:19 'Yö Zuifö ‑nu ‑bha 'tɔnggɔmɛ do ‑yö ꞊yɔɔn‑ "sɔɔ 'yö‑ pö‑ ‑dhɛ: «N Dëmɛ, ‑dhɛ "pɛpɛ 'i dho 'dho‑ 'gü, a ‑dho 'dho i ꞊keng‑.»
MAT 8:20 'Yö Yesu ‑ya ‑yɔ bɔ‑ ‑gɔ 'ö‑ pö: «"Sakpadë ‑nu ‑wɔ 'gü ‑yɛ ‑yö ‑dhö, 'ö ‑maa ‑nu ‑dɩ 'pö 'wo 'kɔ ‑nu dɔ 'wo ‑wɔ 'gü, "kɛɛ mang Mɛgbömɛ ‑zë ‑dhɛ ‑zian 'a dho n "tɛɛ pa‑ 'gü 'yaa 'dhö.
MAT 8:21 ‑Wo ‑to ‑dhɛ do bha‑ 'gü, 'yö‑ ‑bha ꞊klang ‑nu bha‑ mɛ do ‑ya pö‑ ‑dhɛ: «N Dëmɛ, ‑bhö dɔ "gbɩɩ‑ bhɛa" ꞊në 'a‑ wo i ‑dhɛ kö 'i i ‑kɔ bho n 'gü ꞊kö kö 'a 'dho, kö n dë ꞊ya ga 'ma‑ ‑wɛɛ bho kö 'a nu 'a 'to i ꞊keng‑ ‑dhe!»
MAT 8:22 'Yö Yesu ‑ya ‑yɔ bɔ‑ ‑gɔ 'ö‑ pö: «Bhi ‑zë ‑bhö nu kö 'kwa 'dho! ‑Bhö kwaa‑ 'mɛ Atanna ‑ya ‑nu ‑sü ꞊dhɛ mɛ ꞊gee 'dhö bha‑ ‑nu ‑zü kö ‑wo wo 'ko ‑nu ‑wɛɛ bho.»
MAT 8:23 ꞊Dhɛ 'ö Yesu ꞊ya bo‑ ‑pö "dhʋ̈ ‑sü 'ka, 'yö ‑da "yitagɔ 'gü waa‑ ‑bha ꞊klangdhiʋ̈ ‑nu 'dhö.
MAT 8:24 'Wo dho "kan wo ‑ta kö "tɛɛ "gbɩɩ‑ ꞊ya ‑ya ziö ‑sü ‑bha, kö "yitagɔ ꞊ya ‑ya ꞊bang "bang kë ‑sü ‑bha, kö "yi ‑yö ‑ma sië‑ ‑bha "gbɩɩ‑ 'ka, kö "yi kpö ‑nu ‑wo "wlü sië ‑dhɛ ꞊gban "pɛpɛ 'gü, 'ö‑ 'bha ‑nu 'wo ‑pö ‑nu wo "yitagɔ 'gü ‑dhɛ ‑nu 'gü, "kɛɛ kö Yesu ‑zë ‑yö yi ꞊në‑ zë sië.
MAT 8:25 'Yö‑ ‑bha ꞊klang ‑nu 'wo ꞊yɔɔn‑ "sɔɔ 'wo pa‑ ‑bha, 'yö 'wo‑ pö‑ ‑dhɛ: «Yi Dëmɛ, ‑bhö kwa dha ‑dhe, ga ꞊ya dun kwa ‑ta ꞊zɔɔ ‑wa!»
MAT 8:26 'Yö Yesu ‑ya pö‑ ‑nu ‑dhɛ: «‑Më ꞊në ‑kë 'yö 'ka ‑suʋ̈ "gbɩɩ‑ "dhʋ̈? Ka 'dhang bho ‑sü ꞊në 'yaa n "dhiʋ̈ 'kpakpadhö ‑ee?» ꞊Dhɛ 'ö ꞊yaa‑ pö "dhʋ̈, 'yö ꞊wlü 'yö ꞊gbla "tɛɛ 'ö gun ziö sië bha waa‑ "yi 'ö gun ꞊bang "bang kë sië 'pö bha‑ ‑nu ‑ta, 'yö ‑dhɛta ‑yö dɔ dingdhö.
MAT 8:27 'Yö‑ 'wɔn ‑yö mɛ ꞊gban kɔn, 'yö 'wo ‑ya pö ‑sü ‑bha: «De suu ꞊në ꞊ni ꞊zɔɔ 'yö "tɛɛ ‑nu waa‑ "yi ‑nu ꞊gban 'wo‑ ‑wʋ ma ꞊ni ‑oo?»
MAT 8:28 ꞊Dhɛ 'ö Yesu ꞊ya "yi "kan ꞊ya bɔ "yi ꞊taama Gadadha ‑mɛ ‑nu ‑gɔ "sɛ 'gü ‑zian "piʋ̈, 'yö gɔɔn‑ ‑nu ꞊plɛ 'wo go mɛ ‑wɛɛbhodhɛ 'bha bha‑ 'gü 'wo nu‑ "dhiʋ̈ ‑gɔ. Mɛ ꞊plɛ 'wo "dhʋ̈ bha "yina yaa ‑yö ‑gun ‑nu 'gü, ‑a ‑nu "kɛɛkë ‑kɔ yaa bha‑ ‑wɔn 'gü kö zian 'ö bɔ ‑dhɛ bha‑ 'gü ꞊ya "kan, kö mɛ 'bha 'yaa bɔ mü 'zü.
MAT 8:29 'Yö 'wo ‑ya "gbla ‑sü ‑bha 'wo‑ pö: «Atanna Gbö, i ‑bha ‑më ‑wɔn ꞊në yi ‑bha! "Ɛɛn ‑yö i "piʋ̈ ꞊dhɛ 'i 'wɔn wɔ yi ‑ta kö‑ "tʋ̈ng 'yii ꞊loo ꞊kö ‑ee?
MAT 8:30 "Tʋ̈ng 'wo‑ pö sië‑ 'ka "dhʋ̈ bha kö ‑bhɔ ‑kplü 'kpii‑ do ‑yö bhɔ sië‑ ‑nu "sɔɔ ‑dhɛ 'bha 'gü mü.
MAT 8:31 'Yö "yina ‑nu bha 'wo ‑ya bhɛa" ‑sü ‑bha Yesu ‑dhɛ 'wo‑ pö: «꞊Ya kë ꞊dhɛ 'i dho yi "piʋ̈ ‑zë kë 'mɛ 'wo ya‑ ‑nu 'gü kö ‑bhö dɔ "gbɩɩ‑ bhɛa" ꞊në 'yi‑ wo i ‑dhɛ kö 'i yi bɔ ‑bhɔ ‑kluu ya‑ 'gü!»
MAT 8:32 'Yö Yesu ‑ya pö‑ ‑nu ‑dhɛ: «'Ma "wɩ‑ ‑bha, ‑ka 'dho!» 'Yö "yina yaa ‑nu bha 'wo 'go gɔɔn‑ ‑nu ꞊plɛ bha‑ ‑nu 'gü, 'yö 'wo ‑sɔ ‑bhɔ ‑kluu bha‑ 'gü. 'Yö ‑bhɔ ‑nu bha 'wo ‑sɔ ‑bɛang 'sü ‑sü ‑bha goo ‑bha ‑dhɛ bha‑ 'gü, 'yö 'wo dho 'wo ꞊wɛnng "yi ꞊bhaa 'yö "yi ‑ya ‑nu ꞊gban zë dee" wo "pɛpɛdhö.
MAT 8:33 ꞊Dhɛ 'ö ꞊ya kë "dhʋ̈, 'yö ‑bhɔ ‑kpluu bha‑ ‑gɔdhiʋ̈mɛ ‑nu 'wo ‑ziö ‑bɛang 'ka 'wo dho 'wo ‑wo 'pödhö. 'Yö 'wo ‑ya 'wɔn bha‑ ‑gɛn dɔ ‑sü ‑bha mɛ ‑nu ‑dhɛ waa‑ 'wɔn 'dhɛ 'ö ‑gban mɛ ꞊plɛ 'ö "yina yaa ‑yö gun‑ ‑nu 'gü bha‑ ‑nu ‑bha bha‑ 'dhö 'pö.
MAT 8:34 ꞊Dhɛ 'ö ꞊ya kë "dhʋ̈, 'yö mɛ "pɛpɛ 'wo 'pö‑ bha‑ 'gü bha 'wo kpö dɔ 'wo dho dɔ Yesu ‑gɔ zian‑. ꞊Dhɛ 'wo ‑kpan ‑bha, 'yö 'wo ꞊bhɛa‑ ‑dhɛ kö ‑yö 'dho ‑yö 'go wo ‑gɔ "sɛ bha‑ 'gü.
MAT 9:1 ꞊Dhɛ 'wo‑ pö Yesu ‑dhɛ "dhʋ̈, 'yö ‑da "yitagɔ 'gü 'yö "yi bha‑ ‑kan 'zü ‑deewo 'yö dho ö ‑gɔ 'pödhö Kapɛɛnaɔmö.
MAT 9:2 'Yö 'wo nu‑ ‑dhɛ ‑gɛnloomɛ do 'ö wɔ ‑sü 'ka "gbang ‑ta ‑a 'ka. ꞊Dhɛ 'ö Yesu ꞊yaa‑ 'wɔn dɔ ꞊dhɛ mɛ 'wo bha ‑zʋ ‑yö ö ‑dhɛ ‑sü ‑ya ‑nu ‑gɔ, 'yö‑ pö ‑gɛnloomɛ bha‑ ‑dhɛ: «‑Bhö i ‑zʋ ‑gban, n "taɔngdë, 'ma i ‑bha 'wɔn yaa ‑nu ‑mawɔn 'to!»
MAT 9:3 'Yö Zuifö ‑nu ‑bha 'tɔnggɔmɛ 'bha ‑nu 'wo ‑ya ‑a pö ‑sü ‑bha wo zuë" "piʋ̈ ꞊dhɛ: «'Mɛ 'ö ya ꞊ya ‑da Atanna "dhiʋ̈!»
MAT 9:4 ꞊Dhɛ 'ö ‑kë 'pö ꞊dhɛ Yesu ‑ya ‑nu ‑zʋgɔngüwɔn ‑nu bha‑ ‑dɔ bha 'yö‑ pö‑ ‑nu ‑dhɛ: «‑Më ꞊në ‑kë 'yö ‑zʋgɔndhe suu bha 'ö ‑da ka zuë" "piʋ̈?
MAT 9:5 ‑A pö ‑sü 'ö "trüünyuamɛ ‑dhɛ ꞊dhɛ ‹‑bhö "wlü kö 'i i ‑wɔtapë 'sü 'kii ziö› waa‑ pö ‑sü 'ö‑ ‑dhɛ ꞊dhɛ ‹'bɔn ꞊ya 'go i ‑bha» ‑a ‑mɛɛ ꞊në "gbɩɩ‑?›
MAT 9:6 "Kɛɛ ‑a kë 'a‑ wo bha a‑ ‑kë "dhʋ̈ kö 'ka‑ 'wɔn ꞊në‑ dɔ ꞊dhɛ mang Mɛgbömɛ n ‑kɔ ‑yö ‑mɔɔ ‑bha kö 'a mɛ ‑bha 'wɔn yaa ‑nu ‑mawɔn 'to "kpʋng ya‑ ꞊taa.» ꞊Dhɛ 'ö ꞊ya kë "dhʋ̈, 'yö Yesu ‑ya pö "trüünyuamɛ bha‑ ‑dhɛ: «‑Bhö "wlü kö 'i i ‑wɔtapë 'sü 'i 'dho i ‑gɔ 'kɔɔdhö!»
MAT 9:7 'Yö gɔndënë bha 'ö ꞊wlü, 'yö ö ‑wɔtapë sü 'yö ‑ziö.
MAT 9:8 ꞊Dhɛ 'ö mɛ "dhaa 'wo gun ‑dhɛ bha‑ 'gü bha‑ ‑nu "yan ꞊ya ‑da 'wɔn bha‑ ‑dhɛ 'gü, 'yö "suʋ̈ 'dhö ‑da ‑nu 'gü 'yö 'wo ‑ya Atanna 'tɔ bhɔ ‑sü ‑bha 'wɔn suu ‑nu bha‑ kë ‑faan 'ö‑ nu mɛbhɩɩdhe ‑dhɛ bha‑ ‑wɔn 'gü.
MAT 9:9 ꞊Dhɛ 'ö ꞊ya kë "dhʋ̈, 'yö Yesu ‑yö ziö 'ö dho. ‑A 'dho ‑sü 'ka 'yö ‑kpan gɔndë do 'wo‑ ‑dhɛ Matiö ‑a ‑bha kö ‑yö ‑ya sië 'nii‑ sɔng ‑bho 'gü ‑kɔ 'gü 'yö‑ pö‑ ‑dhɛ: «‑Bhö nu kö 'i ‑da n ꞊keng‑!» 'Yö Matiö ‑yö ꞊wlü 'yö ‑ziö ꞊keng‑.
MAT 9:10 Yi do 'ka kö Yesu ‑yö pë ‑bhö sië Matiö bha‑ ‑gɔ 'kɔɔdhö, 'yö 'niisɔngkunmɛ ‑nu 'gbɛ waa‑ 'mɛ 'ö‑ ‑nu 'tɔ ꞊ya zë ‑a ‑nu këwɔn yaa ‑nu ‑wɔn 'gü bha, 'wo nu 'wo wo ‑yɛa kun Yesu waa‑ ‑bha ꞊klang ‑nu ‑a ‑nu kpö 'gü pë ‑bhö ‑dhɛ 'gü mü.
MAT 9:11 ꞊Dhɛ 'ö Fadhiziɛn ‑nu 'wo‑ ‑dhɛ yö "dhʋ̈ 'yö 'wo‑ pö‑ ‑bha ꞊klang ‑nu ‑dhɛ: «‑Më ꞊në ‑kë 'yö ka ‑gɔmɛ waa‑ 'niisɔngkunmɛ, ꞊flümɛ ‑nu bha waa‑ 'mɛ 'ö‑ ‑nu 'tɔ ꞊ya zë ‑a ‑nu kë ‑sɔng ‑nu ‑wɔn 'gü bha 'wo pë ‑bhö sië wo "kwëë?»
MAT 9:12 ꞊Dhɛ 'ö Yesu ꞊yaa‑ ‑nu ‑wʋ bha‑ ma, 'yö‑ pö‑ ‑nu ‑dhɛ: «'Mɛ 'ö "yua 'yaa‑ ‑nu ‑bha bha, ‑a ‑nu ‑mawɔn 'yaa zun ‑dhɔtrɔɔ ‑bha, "kɛɛ 'mɛ 'ö‑ ‑nu 'gü 'yaa ‑së bha ꞊në 'wo ‑dhɔtrɔɔ ꞊mɔɔ;
MAT 9:13 ‑a ‑gɛn ‑mü ꞊dhɛ 'pë 'ö ‑bɛn zë ‑sü 'ka Atanna ‑wʋ 'sëëdhɛ 'gü ‑ya ‑pö: ‹'Mɛ 'ö mɛ ‑nu ‑wëë ‑ga 'yö‑ ‑dhɔ ‑yö n ‑kë, "kɛɛ "saapë ‑nu ‑zë "dhia 'yaa n 'gü 'gbɛ.› ‑Ka 'dho kö 'ka ‑wʋ bha‑ 'klɔɔ‑ mɔɔ‑! "Kɛɛ ma ‑zë 'mii nu 'mɛ 'wo‑ pö wo ‑dɩ ‑dhɛ ꞊dhɛ pö 'aa wo ‑bha wo ‑zë ‑a ‑nu ‑dhɛ ‑dhɛ 'gü, a ‑nu kö 'a 'wɔnyaakëmɛ ‑nu ꞊në‑ ‑nu ‑dhɛ kö ‑wo wo bo 'wɔn yaa kë ‑sü 'ka.
MAT 9:14 ꞊Dhɛ 'ö ꞊ya kë "dhʋ̈, 'yö Zan Mɛzumɛ ‑bha ꞊klang ‑nu 'wo nu 'wo ꞊yɔɔn Yesu "sɔɔ, 'yö 'wo‑ dhɛɛ" kpɔ 'wo‑ pö: «‑Yö ‑kë mü ꞊dhɛ 'yö yaa‑ Fadhiziɛn ‑nu ‑zë 'yi 'sunng‑ ma ‑kpɛawo (꞊dhɛ ‑kɔ 'ö Atanna ‑wʋ ‑ya pö‑ 'ka ‑a 'dhö), 'yö i ‑bha ꞊klang ‑nu ‑zë 'waa‑ 'ma?»
MAT 9:15 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Mɛ 'wo‑ ‑nu ‑dhɛ dhe 'sü troo kë ‑dhɛ 'gü ‑a ‑dhɛ 'yaa‑ ‑bha ꞊dhɛ ‑wo wo wë 'gü ‑siö "tʋ̈ng 'ö dhesügɔn 'dhö‑ 'ka‑ ‑nu "piʋ̈ bha‑ 'ka (‑a ‑gɛn ‑mü ꞊dhɛ kö‑ ‑nu ꞊nii ‑yö ‑da sië), "kɛɛ ‑a "tʋ̈ng ‑yö nu sië 'ö 'wo dho dhesügɔn 'sü‑ 'ka‑ ‑nu ‑gɔ; ‑a "tʋ̈ng bha ꞊në 'wo dho 'sunng‑ 'ma‑ 'ka (‑a ‑gɛn ‑mü ꞊dhɛ kö zuëdhiʋ̈tɛɛ ꞊ya ‑ya ‑nu ‑bha).
MAT 9:16 ‑A ‑gɛn ‑mü ꞊dhɛ mɛ 'bha 'yaa sɔ "kplü ‑dee ꞊nëng sɔ zii ‑bha kö ‑ya ‑wɔ. ꞊Ya kë "dhʋ̈ ‑a sɔ "pɛn ‑dee bha ‑ya zii bha‑ ‑gan 'ö‑ "pɛ ‑dhɛ ‑da "dhiʋ̈.
MAT 9:17 "Ɛɛn 'waa we ‑kiansü ‑da puu" zii 'gü, ‑a puu" ‑yö ‑wü 'ö‑ we ‑yö ꞊wɛnng 'yö ‑kë pë see‑ ‑sü 'ka.
MAT 9:18 Yesu ‑yö ‑to dhiang ‑zë ‑a ‑nu ‑dhɛ ‑dhɛ 'gü, 'yö Zuifö ‑nu ‑gɔmɛ do ‑yö nu 'yö zun ö kpiö 'gü ‑a ‑kuu "dhiʋ̈ 'yö‑ pö‑ ‑dhɛ: «N Dëmɛ, n 'dhu ꞊ya ga ‑dede ya‑ 'gü ‑wa! ‑Bhö "ta n ‑dhɛ kö 'i i ‑kɔ 'pa‑ 'ka kö ‑yö ‑bö ‑dhe!»
MAT 9:19 'Yö Yesu waa‑ ö ‑bha ꞊klang ‑nu 'wo ‑ziö ꞊keng‑.
MAT 9:20 ꞊Dhɛ 'wo 'dho sië 'yö dhebhɔ do 'ö ꞊yɔɔn yën ‑yua ‑yö zun‑ ‑bha 'ö‑ ‑kwɛ ꞊ya kë ‑kaɔng do ga ꞊plɛ bha 'ö bɔ Yesu ꞊kee‑ ‑ta 'yö ö ‑kɔ pa‑ ‑bha ‑sɔ "zɔ 'ka.
MAT 9:21 ‑A kë 'ö‑ wo "dhʋ̈ bha‑ ‑gɛn ‑mü ꞊dhɛ ‑yö ö ‑zʋ ‑gɔn ꞊dhɛ: «'Ya ꞊mɔɔ‑ ‑bha kö ö ‑kɔ ‑zian ‑yö 'pa‑ ‑bha sɔ "zɔ 'ka kö‑ ‑bha "yua ya ꞊ya bo ꞊naa bha.»
MAT 9:22 ꞊Dhɛ 'ö ꞊ya ö ‑kɔ "yɛ‑ ‑bha sɔ "zɔ ‑bha ꞊dhɛ ‑kɔ bha‑ 'dhö, 'yö Yesu ‑yö ꞊slëë ö 'gü. ꞊Dhɛ 'ö‑ yö, 'yö‑ pö‑ ‑dhɛ: «i ‑zʋ ‑gban, n "tɛado, i ‑bha ‑zʋ ‑yö n ‑dhɛ ‑sü ꞊ya i dha!» ꞊Dhɛ 'ö Yesu ꞊yaa‑ pö "dhʋ̈, dhebhɔnë bha ‑yö ‑to ‑dhɛ do bha‑ 'gü 'yö‑ ‑bha "yua ‑yö bo.
MAT 9:23 ꞊Dhɛ 'ö ꞊ya kë "dhʋ̈, 'yö Yesu ‑yö dho 'yö ꞊loo Zuifö ‑nu ‑gɔmɛ bha‑ ‑gɔ 'kɔɔdhö kö "truupiömɛ ‑nu waa‑ mɛ "wɛɛwɛɛ ‑nu ‑wo "gbʋ bɔ sië, 'ö 'wo ꞊gbang dɔ‑ 'ka yuudhö kö ‑wo ‑gblagbla ‑nu bho sië. 'Yö Yesu ‑ya pö‑ ‑nu ‑dhɛ:
MAT 9:24 «‑Ka 'go, ‑ka zun "kpɛnng! 'Në ya 'yii ga, ‑yö yi ꞊në‑ zë!» 'Yö 'wo ꞊wɛɛ dɔ‑ ‑bha.
MAT 9:25 ꞊Dhɛ 'ö ꞊wa 'mɛ 'wo bha‑ ꞊gban zun "kpɛnng, 'yö Yesu ‑yö ‑da 'kɔdhi bha‑ 'gü, 'yö 'nëdhebhɔ bha‑ ‑bö, 'yö‑ kun‑ ‑kɔ ‑bha 'yö‑ ꞊wlü.
MAT 9:26 'Yö 'wɔn bha‑ ‑taɔng ‑yö sɔ "sɛ bha‑ 'gü ‑dhɛ ꞊gban "pɛpɛ 'gü.
MAT 9:27 ꞊Dhɛ 'ö Yesu ꞊ya 'go ‑dhɛ bha‑ 'gü 'ö dho sië ö "dhiʋ̈, 'ö ziö sië ‑dhɛ 'bha bha‑ 'gü, 'yö "yan ꞊wlümɛ ꞊plɛ 'wo ‑ziö ꞊keng‑ "gbla ‑sü 'ka kö ‑wa pö sië: «(Yi "bhɛma) Davi Gbö, ‑bhö yi ‑wëë ‑ga ‑dhe!»
MAT 9:28 ꞊Dhɛ 'ö ꞊ya 'dho ꞊ya ‑da 'kɔɔdhö, 'yö "yanwlümɛ ꞊plɛ bha 'wo ꞊yɔɔn‑ "sɔɔ, 'yö Yesu ‑ya ‑nu dhɛɛ" kpɔ 'ö‑ pö: «Ka 'dhang ‑bho "dhiʋ̈ ꞊dhɛ a ‑mɔɔ ‑bha 'a ka ‑kë "klʋ̈ʋ̈klʋ̈ ‑ee?» 'Yö 'wo‑ pö‑ ‑dhɛ: «꞊Iin! Yi Dëmɛ, 'yi 'dhang ‑bho "dhiʋ̈.»
MAT 9:29 ꞊Dhɛ 'ö ꞊ya kë "dhʋ̈ 'yö Yesu ‑yö ö ‑kɔ pa‑ ‑nu "yan 'ka 'yö‑ pö: «Kö ‑yö kë 'sa ka ‑dhɛ ꞊dhɛ ‑kɔ 'ka ka ‑zʋ yö‑ 'ka n ‑dhɛ bha‑ 'dhö!»
MAT 9:30 'Yö mɛ ꞊plɛ bha‑ ‑nu "yan ‑yö ‑dhɛ yö. 'Yö Yesu ‑yö ‑dhio dɔ‑ ‑nu ‑ta glɔglɔdhö 'ö‑ pö: «‑Ka ka "tʋ 'to ‑së 'ka, 'wɔn ya mɛ 'bha 'ya dho‑ ma!»
MAT 9:31 "Kɛɛ ꞊dhɛ 'ö ꞊wa zun "kpɛnng, 'yö 'wo to 'wo zun‑ ‑dhiang ‑zë "sɛgɔ "pɛan 'dhɛ bha‑ 'gü ‑sü ‑bha ‑dhɛ ꞊gban "pɛpɛ 'gü.
MAT 9:32 ꞊Dhɛ 'ö ꞊ya 'go ‑dhɛ 'dhɛ bha‑ 'gü 'ö 'dho sië, 'yö 'wo nu‑ ‑dhɛ gɔndënë do 'ö "yina yaa 'dhö‑ 'gü ‑a 'ka. Gɔndënë 'ö "dhʋ̈ bha ‑yö ‑gun "bhʋbhʋ 'ka.
MAT 9:33 ꞊Dhɛ 'ö Yesu ꞊ya "yina yaa bha‑ kë 'ö ꞊ya 'dho, 'yö gɔndënë bha 'ö ‑ya dhiang zë ‑sü ‑bha. 'Yö 'wɔn bha‑ 'wɔn ‑yö mɛ kpö 'gbɛ 'wo gun mü bha‑ ‑nu kɔn 'yö 'wo‑ pö: «'Wɔn 'dhɛ 'kö‑ suu 'dhö ya 'yii‑ ‑dhɛ yö Izraɛdhö ‑sɛ ya‑ 'gü do ‑wa!»
MAT 9:34 "Kɛɛ kö Fadhiziɛn ‑nu ‑zë ‑wa pö sië Sɔtraan ꞊në 'gügbɩɩdhɛ suu bha‑ ‑nu Yesu ‑dhɛ 'yö "yina yaa ‑nu kë sië‑ 'ka mɛ 'gü bha.»
MAT 9:35 Yesu ‑yö ‑gun ziö sië 'pö‑ ‑nu ‑bhiëë ‑ta 'dɔɔɔndhö kö ‑yö 'dho sië Zuifö ‑nu ‑bha ‑yakwëëkëgükɔ ‑nu 'gü 'ö dhiang zë mɛ ‑nu ‑dhɛ, naɔ ‑së 'ö ‑gban Atanna ‑bha ‑gblüdëdhɛ ‑bha ‑a pö ‑sü 'ka kö ‑yö "yuëdhi suu ꞊gban "pɛpɛ ‑bha "yua ‑nu bho sië‑ ‑nu ‑bha, 'ö ꞊niɔɔmɛ ‑nu suu ꞊gban "pɛpɛ ‑kë "klʋ̈ʋ̈klʋ̈ 'pö.
MAT 9:36 'Yö ‑wëë 'dhö ‑ya ‑da ‑ta ‑sü ‑bha mɛ kpö 'gbɛ 'ö‑ ‑nu yö sië bha‑ ‑nu ‑wɔn 'gü, ‑a ‑gɛn ‑mü ꞊dhɛ kö‑ ‑nu 'gü ꞊ya ga, kö faan 'yaa‑ ‑nu 'gü 'zü, kö ꞊wa kë ꞊dhɛ "bhlaa ‑nu 'ö‑ ‑nu ‑maakëmɛ 'yaa 'dhö 'ö ꞊wa ‑pɛn ‑a 'dhö.
MAT 9:37 'Wɔn 'ö‑ ‑wɔn 'gü 'yö Yesu ‑ya pö ö ‑bha ꞊klang ‑nu ‑dhɛ ꞊dhɛ: «‑Bɔ Atanna 'ka ‑dhɔ 'dhö 'mɛ 'ö‑ ‑nu ‑bha ‑wo 'gbɛ ꞊dedewo, "kɛɛ 'ö ꞊dhɛ ‑mlü "kan ‑sü 'dhö, kö‑ "kanmɛ ꞊në 'yaa 'dhö bha 'yö bha.
MAT 9:38 'Yö‑ pö ꞊dhɛ 'ö "dhʋ̈ kö ‑ka bhɛa" Atanna ‑dhɛ kö 'ö ꞊dhɛ ‑mlü "kan ‑sü 'dhö kö ‑yö mɛ bɔ kö ‑wa "kan!»
MAT 10:1 'Ö go mü 'yö Yesu ‑yö ö ‑bha ꞊klang ‑nu ‑kaɔng do ga ꞊plɛ bha‑ ‑nu ‑dhɛ, 'yö 'gügbɩɩdhɛ ‑nu ‑nu ‑dhɛ kö ‑wo "yina yaa ‑nu kë‑ 'ka mɛ ‑nu 'gü, kö‑ ‑nu ‑kɔ ‑yö ziö‑ 'ka "yua suu ꞊gban "pɛpɛ ‑gɔ, waa‑ ꞊niɔɔ ‑kɔ suu ꞊gban 'dhö.
MAT 10:2 Yesu ‑bha bɔmɛ ‑nu 'wo "dhʋ̈ bha‑ ‑nu 'tɔ ꞊nɛ: ‑A mɛ ‑blɛɛsü ꞊nɛ 'wo‑ ‑dhɛ Simɔ 'yö 'wo‑ ‑tɔ ‑ya ‑ta ‑dhɛ Piɛdhö, 'yö‑ dheebhang Andre, 'yö Zakö waa‑ ö dheebhang Zan 'wo kë Zebede gbö ‑nu 'ka.
MAT 10:3 'Yö Fidhipö, Batedhemi, Toma, Matiö 'ö ‑kë 'niisɔngkunmɛ 'ka, 'yö Zakö 'ö ‑kë 'pö Adhöfe gbö 'ka, 'yö Tade,
MAT 10:4 'yö Simɔ 'ö ‑kë "sɛtakozëmɛ 'ka waa‑ Zuda Isikadhiɔtö 'ö Yesu ‑da ö 'yaɔ‑ ‑nu ꞊kwɛɛ‑ bha.
MAT 10:5 Yesu ‑bha bɔmɛ ‑nu ‑kaɔng do ga ꞊plɛ bha‑ ‑nu 'tɔ ꞊në bha: 'Mɛ 'wo bha ꞊në Yesu ‑ya ‑nu bɔ 'yö ö ‑wʋ kpɔ‑ ‑nu ‑bha 'ö‑ pö: Izraɛdhö ‑mɛ ‑nu 'ö ꞊wa 'go Atanna ‑bha zian ‑ta ꞊wa kë ꞊dhɛ "bhlaa ‑nu 'ö‑ ‑nu ‑gɔdhiʋ̈mɛ 'yaa 'dhö, 'ö ꞊wa ꞊dhɛng ‑a ‑nu 'dhö bha ꞊në ‑ka 'dho‑ ‑nu ‑zian 'ka, 'ka 'dho 'dho 'mɛ 'waa Izraɛdhö ‑mɛ ‑nu 'ka bha‑ ‑nu ‑zian 'ka, 'ka 'dho ‑da Samadhi ‑pö ‑nu 'bha ‑zian yaan‑ ‑bha.
MAT 10:7 ‑Ka ‑da zian ‑gloo "piʋ̈ ‑dhɛ ‑nu 'gü kö 'ka Atanna ‑wʋ pö‑ ‑nu ‑dhɛ 'ka‑ pö: «Atanna ‑bha ‑gblüdëdhɛ bha ꞊ya dun ka ‑ta!
MAT 10:8 'Ka 'dho ‑ka "yua ‑nu bho mɛ ‑nu ‑bha kö 'ka 'mɛ ꞊wa ga ‑a ‑nu ‑bö kö 'ka ꞊wee ‑yua bho mɛ ‑nu ‑bha, kö 'ka "yina yaa ‑nu kë 'ka‑ ‑nu bho mɛ 'gü! 'Gügbɩɩdhɛ 'ö Atanna ‑ya nu ka ‑dhɛ kö 'ka pë ‑nu bha‑ ‑nu kë‑ 'ka bha ‑ya ‑gbaɔ ka ‑gɔ "wɛɛwɛɛ. Kaa ‑dɩ 'pö, ‑ka 'wɔn ‑së ‑nu bha‑ kë mɛ ‑nu ‑dhɛ "wɛɛwɛɛ.
MAT 10:9 'Ka dho "sënng waa‑ 'wëë‑ ‑da ka ‑ta (‑a ‑gɛn ‑mü ꞊dhɛ 'pë ka ‑mawɔn ‑yö zun‑ ‑bha ‑wo ‑dho ‑a nu ka ‑dhɛ).
MAT 10:10 ꞊Ya 'go mü 'zü, 'ka 'dho "ta ‑kpɔ 'ka glɛɛ" 'kun ka ‑kɔ "piʋ̈, 'ka 'dho "bhɛɛ ꞊plɛ ‑naa 'sü, ‑sabha 'ya 'dho kë ka ‑gɔ, "ɛɛn "dhü 'ya 'dho kë ka ‑kɔ "piʋ̈! ‑A ‑gɛn ‑mü ꞊dhɛ ‑a ‑dhɛa ‑bha ꞊dhɛ 'mɛ 'ö yë kë sië, 'ö‑ kë sië 'mɛ 'ö‑ ‑dhɛ bha ‑ya gba ‑bhöpë 'ka.
MAT 10:11 ꞊Ya kë ꞊dhɛ 'ka ‑da 'pö‑ "gblʋ̈gblʋ̈ ‑nu 'gü, "ɛɛn 'pö‑ 'sɛɛnnë ‑nu 'gü, 'mɛ 'ö dho ‑kɔ ‑ya ka ‑dhɛng ‑bha, ‑kaa mɛ mɔɔ‑ kö 'ka 'dho‑ ‑gɔ 'kɔɔdhö 'ka 'to mü ‑yö 'dho ‑yö zun‑ 'ka ka ‑bha ‑go 'pö‑ bha‑ 'gü ‑yi ‑bha.
MAT 10:12 'Kɔ "pɛpɛ 'ö 'ka dho ‑da 'gü, ‑kaa pö‑ 'gü ‑mɛ ‑nu ‑dhɛ: «Zuëwaanusü ‑yö kë ka ‑gɔ!
MAT 10:13 ꞊Ya kë ꞊dhɛ 'kɔ bha‑ 'gü ‑mɛ ‑nu ꞊wa ka ‑dhɛng bun, kö ka ‑bha zuëwaanu 'dhuë‑ 'ka‑ ‑kë ‑nu ‑bha bha ‑yö ‑dho ‑nu 'kun‑. "Kɛɛ ꞊ya kë ꞊dhɛ 'wii ka ‑dhɛng 'kun, 'dhuë‑ bha 'yii 'dho‑ ‑nu 'kun‑ ‑yö ‑dho ö yee kë 'ö nu ka "piʋ̈.
MAT 10:14 ꞊Ya kë ꞊dhɛ 'ka ‑da 'pö‑ 'bha 'gü, "ɛɛn 'ö 'kɔ ‑zian ꞊në‑ 'ka 'ö 'wii "wɩ‑ ‑bha kö ‑wo ka ‑dhɛng 'kun, "ɛɛn kö ‑wo wo "tʋ ‑to ka ‑wʋ ‑bha, ‑ka 'go mü kö 'ka ka ‑gɛn ‑bha ‑ma kö "sɛ 'ö dɔ ka ‑gɛn ‑bha 'pö‑ bha‑ 'gü bha ‑yö 'go ka ‑gɛn ‑bha (kö‑ ‑nu ‑bha "dhang bha ‑yö dɔ‑ ‑nu ‑ta).
MAT 10:15 A‑ ‑pö ka ‑dhɛ tɛan‑ ꞊dede 'ka ꞊dhɛ: Zadɔyi 'ka 'wɔn 'ö ‑wɔ Sodɔmö waa‑ Gomɔɔ ‑mɛ ‑nu ‑ta, ‑yö ‑dho kë 'dɛdɛ 'pödhɛ bha‑ 'gü ‑mɛ ‑nu ‑bha ‑bha.»
MAT 10:16 'Yö Yesu ‑yö dhiang zë‑ ‑nu ‑dhɛ 'ö‑ pö: «‑Ka ka "tʋ 'to! Ka bɔ 'a‑ wo sië bha a ka ‑bɔ ꞊dhɛ "bhlaanë 'wo‑ bɔ laa ‑nu kpö 'gü ꞊në‑ 'dhö. ‑A ‑kë "dhʋ̈ ‑sü bha‑ 'gü, ‑ka kë ‑glengsü kö ka "gblʋ̈ʋ̈dhɛ ‑yö kë "puu!
MAT 10:17 Kö 'ka ka ‑zʋ kë ka ‑dɩ 'gü mɛ "bhɩɩ‑ ‑nu ‑gɔ, ‑a ‑gɛn ‑mü ꞊dhɛ ‑wo ‑dho 'dho ka 'ka zadɔgükɔ ‑nu 'gü, 'ö 'wo ka ‑ma ‑nu wo ꞊klangga 'ka Zuifö ‑nu ‑bha ‑yakwëëkëgükɔ ‑nu 'gü.
MAT 10:18 'Ö 'wo dho ka 'ka mɛ ‑gɔdhiʋ̈mɛ ‑nu waa‑ ‑gblüdë ‑nu ‑kuu "dhiʋ̈ ‑dhɛ ‑nu 'gü n ‑wɔn 'gü kë "dhʋ̈ kö 'ka "sɛɛdhɛ kë n ‑bha ‑a ‑nu ‑dhɛ, "ɛɛn 'mɛ 'waa Zuifö 'ka ‑a ‑nu ‑dhɛ.
MAT 10:19 "Kɛɛ ꞊wa ka 'kun ꞊wa 'dho ka 'ka zadɔgükɔ ‑nu 'gü (n ‑wɔn 'gü), 'ka 'dho ‑ya dhiang ‑nu 'ka dho‑ zë, "ɛɛn ‑kɔ ‑nu 'ka dho‑ zë‑ 'ka ‑a zuën ‑ta. ‑A "tʋ̈ng ꞊dede bha‑ 'ka, ‑wʋ ‑nu 'ö 'ka dho‑ pö ‑wo ‑dho dɔ ka "dhi.
MAT 10:20 ‑Wʋ ‑nu 'wo "dhʋ̈ bha 'wii 'dho kë ‑wʋ 'ö go ka ‑dɩ 'gü ‑a 'ka, "kɛɛ Atanna 'ö ka Dë 'ka bha‑ ‑bha 'Nii‑ "slʋ̈ʋ̈slʋ̈ bha ꞊në dho bɔ ka 'gü 'ö dhiang zë.
MAT 10:21 Dheebhangzë ‑nu ‑dho wo 'ko ‑da mɛ ‑nu ꞊kwɛɛ 'wo‑ ‑nu zë. 'Në dë ‑nu ‑dɩ 'pö ‑wo ‑dho woo‑ 'në ‑nu kë ‑kɔ do bha‑ 'gü. 'Ö 'në ‑nu ‑dɩ 'pö 'wo dɔ wo dë ‑nu ‑gɔ, 'ö 'wo‑ ‑nu ‑da 'pö mɛ ꞊kwɛɛ‑ 'wo‑ ‑nu zë.
MAT 10:22 Ka ‑san ‑dho mɛ ꞊gban "pɛpɛ kë n ‑wɔn 'gü, "kɛɛ 'mɛ 'ö dho‑ 'kun "gbɩɩ‑ 'ö dho 'ö zun‑ 'ka ‑a "dhiʋ̈todhɛ ‑bha, ‑yö ‑dho dha.
MAT 10:23 ꞊Ya kë ꞊dhɛ ꞊wa 'wɔn wɔ ka ‑ta 'pö‑ 'kpii‑ do 'gü, ‑ka ꞊dua 'ka 'dho ‑a 'bha 'gü kö 'ka 'dho‑ 'ka "dhiʋ̈ ‑kpɛawo! A‑ ‑pö ka ‑dhɛ tɛan‑ 'ka ꞊dhɛ 'kii 'dho ka bo ‑ziö Izraɛdhö ‑pö ꞊gban 'gü ‑sü 'ka kö mang Mɛgbömɛ 'mii nu ꞊kö.
MAT 10:24 ‑A pö 'a‑ wo ka ‑dhɛ "dhʋ̈ bha‑ 'klɔɔ‑ ‑mü ꞊dhɛ ꞊klangdhiʋ̈ 'në 'bha 'yaa 'kpii‑ kö ‑yö ziö‑ 'ka ö ‑gɔmɛ ‑zë ‑ta, "ɛɛn 'zü yëkëmɛ 'bha 'yaa 'kpii‑ kö ‑yö ziö‑ 'ka ö ‑gɔmɛ ‑zë ‑ta.
MAT 10:25 "Kɛɛ ‑a ‑dhɛa ‑bha ꞊dhɛ ꞊klangdhiʋ̈ 'në ‑yö kë ꞊dhɛ ö ‑gɔmɛ ꞊në‑ 'dhö, kö yëkëmɛ ‑dɩ 'pö ‑yö kë ꞊dhɛ ö dëmɛ 'dhö. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ma 'ö ma ‑zë 'a 'kɔ dëmɛ 'ka bha ꞊wa n ‑dhɛ Bɛɛzebidhö, 'yö ka 'kö 'ka 'kɔgünë ‑nu 'ka ꞊wɛ? (꞊Waa‑ pö Bɛɛzebidhö kö ‑wa ‑pö Sɔtraan.)
MAT 10:26 'Yö go mü 'ö‑ pö: «'Ka 'dho "suʋ̈ mɛbhɩɩdhe ‑gɔ! Pë "pɛpɛ 'wo ‑bin ‑sü 'ka ‑wo ‑dho ‑wo zang ‑ta.
MAT 10:27 Pë ‑nu 'a‑ pö sië ka ‑dhɛ ‑dhɛtiidhɛ 'gü ya, ‑kaa ‑nu pö ‑dhɛbongdhɛ 'gü, "ɛɛn 'wɔn ‑nu 'a‑ pö sië ka ‑dhɛ ꞊plɛ 'gü ya, ‑kaa pö "gbɩɩ‑ 'ka "dhɛɛdhɛ ‑nu 'gü!
MAT 10:28 'Ka 'dho "suʋ̈ 'mɛ 'wo ꞊mɔɔ‑ ‑bha 'wo ka zë, "kɛɛ 'ö 'waa ꞊mɔɔ‑ ‑bha kö ‑wo ka 'nii‑ ‑zë zë bha‑ ‑nu ‑gɔ! "Kɛɛ ‑ka "suʋ̈ Atanna 'kö‑ ‑kɔ ‑yö ꞊mɔɔ‑ ‑bha kö ‑yö ka zë kö ‑yö 'dho ‑yö ka 'nii‑ ‑nu ꞊gban zë kö ‑ya ‑zuö ꞊geebɔɔ pɛng 'gü bha ꞊në‑ ‑gɔ!
MAT 10:29 Ka‑ 'wɔn ‑dɔ ꞊dhɛ ‑wo ‑mɔɔ ‑bha kö ‑wo zöng ꞊plɛ "dhɔɔ dɔ ‑suga do ‑bha, (‑a ‑nu ꞊bhlëë 'yaa 'dhö ‑sü ‑wɔn 'gü), "kɛɛ 'sa kö‑ do 'yaa ‑pö "sia‑ "wɛɛwɛɛ kö ka Dë Atanna 'yii "wɩ‑ ‑bha. ꞊Ya kë "dhʋ̈ 'yö ka ‑zë ꞊wɛ?
MAT 10:30 Ka ‑zë ka wun "dhɛ ‑zian 'ö ka ‑gɔ ‑bha bha ‑yö dhong ‑sü 'ka 'ö‑ "dhi 'dhö ka dë bha‑ "yaan.
MAT 10:31 'Wɔn 'ö‑ ‑wɔn 'gü, 'yö 'a‑ pö "suʋ̈ 'ya 'dho ka kë, ka ‑wɔn ‑yö "gbɩɩ‑ 'ö ziö zöng ‑nu ‑ta bha 'yö bha.»
MAT 10:32 'Yö‑ pö: «Mɛ "ʋʋ mɛ 'ö dho‑ pö mɛ ꞊gban "pɛpɛ wëëdhö ꞊dhɛ 'ö n ‑bha 'ka, mang ‑dɩ 'pö a ‑dho pö n Dë 'ö ‑ya ‑sü 'ka dhang‑ ‑nu 'gü bha‑ wëëdhö (yi do 'ka) ꞊dhɛ ‑yö n ‑bha 'ka 'pö.
MAT 10:33 "Kɛɛ 'mɛ 'ö dho‑ pö mɛ ‑nu wëëdhö ꞊dhɛ 'yaa n dɔ, mang ‑dɩ 'pö a ‑dho pö‑ ‑mɛ ‑bha n Dë 'ö ‑ya ‑sü 'ka dhang‑ ‑nu 'gü, ‑a wëëdhö ꞊dhɛ 'maa‑ dɔ.»
MAT 10:34 ꞊Dhɛ 'ö ꞊yaa‑ pö "dhʋ̈, 'yö ‑ya mü 'zü 'ö‑ pö: «'Ya 'dho kë ka 'gü ꞊dhɛ ‑dhi 'ko ‑dhɛ ‑sü ꞊në 'a nu‑ 'ka "kpʋngtaamɛ ‑nu ‑dhɛ. 'Mii nu ‑dhi 'ko ‑dhɛ ‑sü 'ka, a ‑nu ‑siödhe ꞊në‑ 'ka.
MAT 10:35 ‑A ‑gɛn ‑mü ꞊dhɛ a ‑nu kö 'a 'gügblüdhe ꞊në‑ ‑da 'nëgɔɔn waa‑ dë ‑a ‑nu ꞊zinng 'gü, 'nëdhebhɔ waa‑ dhe ‑a ‑nu ꞊zinng 'gü, "ɛɛn gbö ‑bha dhebhɔ waa‑ gɔndhe ‑a ‑nu ꞊zinng 'gü.
MAT 10:36 'Kɔ do 'gü ‑mɛ ‑nu ‑dho ‑siö wo 'ko ‑dhɛ n ‑wɔn 'gü.
MAT 10:37 'Mɛ 'ö‑ dë waa‑ dhe ‑nu ‑dhɔ dho‑ kë kö ‑yö ziö‑ 'ka n ‑ta, kö 'yaa n ꞊bhlëëgümɛ 'ka; 'mɛ 'ö‑ gbö "ɛɛn ‑a 'dhu ‑dhɔ ‑ya ‑kë 'ö ‑ziö 'ka n ‑ta kö 'yaa n ꞊bhlëëgümɛ 'ka.
MAT 10:38 'Mɛ 'wɔn ‑kun mɛ ‑bha ‑sü 'ö ꞊dhɛ n ‑dɔ ‑bha "dhü bha‑ 'dhö bha 'yii kë‑ ‑gɔ kö ‑ya bun ö ‑bha ‑tosɛa 'gü kö ‑yö ziö‑ 'ka n ꞊keng‑ kö 'yaa n ꞊bhlëëgümɛ 'ka, kö ‑a ‑dhɛ 'yaa‑ ‑bha kö ‑yö kë ma mɛ 'ka.
MAT 10:39 'Mɛ 'ö dho‑ pö 'ö ö ‑dɩ dha, ‑a ‑mɛ ‑gɔ ‑dho 'to‑ 'gü, "kɛɛ 'mɛ 'ö dho "wɩ‑ ‑bha kö ö ‑gɔ 'to n ‑wɔn 'gü, ‑a ‑mɛ ‑dho dha.
MAT 10:40 ꞊Dhɛ 'ö ꞊yaa‑ pö "dhʋ̈, 'yö go mü 'zü 'ö‑ pö: «'Mɛ 'ö ꞊ya 'ö ‑kɔ ‑ya ka ‑dhɛng ‑bha, kö ꞊ya ö ‑kɔ ‑ya n ‑dhɛng ‑bha. Mɛ 'ö ꞊ya ö ‑kɔ ‑ya n ‑dhɛng ‑bha 'pö, kö n Dë Atanna 'ö n bɔ bha ꞊ya ö ‑kɔ ‑ya ‑a ‑dhɛng ‑bha.
MAT 10:41 'Mɛ 'ö Atanna ‑wʋdhiʋ̈loomɛ ‑dhɛng bun ‑a ‑bha ‑kë Atanna ‑wʋdhiʋ̈loomɛ 'ka ‑sü ‑wɔn 'gü, ꞊trɔɔn 'ö dho‑ ‑nu ö ‑wʋdhiʋ̈loomɛ ‑dhɛ bha, ‑yö ‑dho ‑a ‑mɛ ‑bha nu 'pö. 'Mɛ 'ö dho 'mɛ 'ö pö 'aa‑ ‑bha ‑a ‑dhɛng bun ‑a ‑bha ‑kë mɛ "slʋ̈ʋ̈slʋ̈ 'ka ‑sü ‑wɔn 'gü, ꞊trɔɔn 'ö Atanna dho‑ nu 'mɛ 'ö "dhʋ̈ bha‑ ‑dhɛ bha, ‑yö ‑dho ‑a ‑mɛ ‑bha nu 'pö.
MAT 10:42 'Yö‑ pö a‑ ‑pö ka ‑dhɛ tɛan‑ ꞊dede 'ka ꞊dhɛ: Mɛ "ʋʋ mɛ 'ö "yi ‑sɛa ‑kɔɔ do ‑zian nu mɛ ‑dhɛ, ‑a ‑mɛ ‑bha ‑kë ma ꞊klangdhiʋ̈ 'ka ‑sü ‑wɔn 'gü, n Dë Atanna ‑dho ‑a ‑mɛ ꞊trɔɔn nu, 'yii 'dho 'to‑ 'gü tongtongdhö.
MAT 11:1 ꞊Dhɛ 'ö Yesu ꞊ya ö bo ö ‑bha mɛ draan‑ ‑wʋ ‑zɔn ‑sü 'ka ö ‑bha ꞊klang ‑nu ‑kaɔng do ga ꞊plɛ bha‑ ‑nu ‑dhɛ ꞊dhɛ ‑kɔ bha‑ 'dhö, 'yö go ‑dhɛ bha‑ 'gü 'ö dho mɛ draan‑ ‑sü waa‑ Atanna ‑wʋ pö ‑sü 'ka 'pö‑ ‑nu 'gü "sɛ bha‑ ‑ta.
MAT 11:2 ‑A "tʋ̈ng bha‑ 'ka kö Zan Mɛzumɛ ‑yö ‑kaso 'gü, 'yö yë 'ö Klisi 'dhö‑ kë sië bha‑ ‑wɔn ma. ꞊Dhɛ 'ö ꞊ya kë "dhʋ̈, 'yö ö ‑bha ꞊klang ‑nu 'bha bɔ
MAT 11:3 kö ‑wo Yesu dhɛɛ" 'kpɔ ꞊dhɛ: «'Mɛ 'wo‑ dɔ ꞊dhɛ ‑yö ‑dho nu bha yö ‑mü ‑a 'ka ‑ee "ɛɛn wo ‑tun ꞊kö ‑ya mɛ "wɛɛ 'bha‑ ‑gɔ 'zü ‑ee?»
MAT 11:4 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «‑Ka 'dho kö 'pë 'ka‑ ma "ɛɛn 'ö ka "yan dɔ‑ 'gü bha 'ka‑ ‑gɛn dɔ Zan ‑dhɛ
MAT 11:5 ꞊dhɛ "yënngtiimɛ ‑nu ‑wo ‑dhɛ yö sië, ‑ta 'bebedhö ‑mɛ ‑nu ‑wo "ta sië ‑së 'ka, ꞊weeyuamɛ ‑nu 'ö‑ ‑nu kwi ꞊ya see‑ 'nu ‑blɛɛsü bha, ‑wo kë sië "klʋ̈ʋ̈klʋ̈, 'ö "tʋwlümɛ ‑nu 'wo 'wɔn ma sië, gamɛ ‑nu ‑dɩ 'pö ‑wo ‑bö sië 'wo go ga 'gü, 'ö 'wɔn ‑taɔng ‑së 'dhö pö sië ‑wëëmɛ ‑nu ‑dhɛ.
MAT 11:6 ꞊Dhɛ 'ö "dhʋ̈ mɛ "ʋʋ mɛ 'ö‑ 'gü 'yii ga ‑zʋ ‑yö Atanna ‑dhɛ ‑sü 'ka kö‑ ‑mɛ ‑bha ‑së!
MAT 11:7 ꞊Dhɛ 'ö Zan ‑bha ꞊klang ‑nu bha ꞊wa 'dho, 'yö Yesu ‑yö 'wɔn 'ö ‑gban Zan ‑bha ‑a pö ‑sü zü bho mɛ kpö 'wo gun 'mü bha‑ ‑nu ‑dhɛ 'ö‑ pö: «'Dho 'ka‑ wo "tʋng ‑ta bha, ka ‑dho ‑më ꞊në‑ ‑ga ‑dhɛ 'gü? ‑Kaadhüga 'ö "tɛɛ ‑ya ‑vin ꞊në 'ka dho‑ ‑ga ‑dhɛ 'gü ‑ee?
MAT 11:8 "Ɛɛn 'mɛ 'wo ‑gblüdëdhɛ ‑sɔ ‑da ‑sü 'ka ‑ee? ‑Abin! ‑A ‑gɛn ‑mü ꞊dhɛ mɛ 'dhɛ 'kö 'wo "dhʋ̈ bha ‑wo ‑gblüdëdhɛ ‑kɔ ‑nu ꞊në‑ 'gü.
MAT 11:9 "Kɛɛ ka ‑dho 'sa ‑më ꞊në‑ kë mü yö ‑zë 'gü? "Ɛɛn ka ‑dho Atanna ‑wʋdhiʋ̈loomɛ do bha ꞊në‑ ‑ga ‑dhɛ 'gü ‑ee? A‑ ‑pö ka ‑dhɛ ꞊ma ꞊iin, Atanna ‑wʋdhiʋ̈loomɛ ‑mü, yö ‑zë ‑a "dhiʋ̈ ‑zian ‑yö ‑ziö Atanna ‑wʋdhiʋ̈loomɛ ‑kpɛa ‑ta.
MAT 11:10 ‑A ‑gɛn ‑mü ꞊dhɛ Atanna ‑ya ‑pö ö ‑bha 'sëëdhɛ 'gü yö ꞊në‑ ‑bu 'gü 'ö‑ pö: ‹‑Dhɛ ‑ga, 'ma ma bɔmɛ do bɔ i "dhiʋ̈ kö ‑yö i ‑bha zian ‑glootadhɛ ‑pë kë.›
MAT 11:11 A‑ ‑pö ka ‑dhɛ tɛan‑ ꞊dede 'ka ꞊dhɛ mɛ "ʋʋ mɛ 'wo zun bhɔ ‑sü ‑bha "kpʋng ꞊taa yi 'bha 'ka 'ö nu 'ö zun‑ 'ka ꞊dɛɛ ‑bha bha, ‑a mɛ 'bha 'ö dho kë 'kpii‑ kö ‑yö ‑ziö Zan Mɛzumɛ ‑ta 'yaa 'dhö, "kɛɛ 'sa Atanna 'dhö ö ‑bha ‑gblüdëdhɛ bha‑ ‑ta "pʋ ‑sü 'ka 'mɛ 'ö‑ ‑nu ‑dhɛ ꞊dɛɛ bha‑ mɛ 'dɛdɛ ‑sü ‑zian 'ö‑ 'gü ‑a ꞊bhlëë ‑yö 'kpii‑ Zan ‑zë ‑bha.
MAT 11:12 'Ö go "tʋ̈ng 'ö Zan Mɛzumɛ ‑yö Atanna ‑wʋ pö‑ 'ka bha ‑bha, 'ö dho 'ö zun‑ 'ka ꞊dɛɛ ‑bha, Atanna ‑bha ‑gblüdëdhɛ bha‑ ‑wɔn ꞊ya kë ꞊dhɛ ‑gblü ꞊në‑ 'dhö, ‑a ‑kun "gbɩɩ‑ ‑mɛ ‑nu ꞊në 'wo‑ ꞊slɔɔ sië.
MAT 11:13 Atanna ‑wʋdhiʋ̈loomɛ ‑nu "pɛpɛ ꞊gban waa‑ Moizö 'dhö 'tɔng‑ 'ö‑ ‑bɛn zë kwa ‑dhɛ bha ‑wo 'wɔn 'ö ‑gban ‑a ‑bha ‑gblüdëdhɛ bha‑ ‑bha bha ꞊në‑ ‑dhiang zë 'ö nu 'ö zun‑ 'ka Zan Mɛzumɛ ‑bha yi ‑bha.
MAT 11:14 ꞊Ya kë ꞊dhɛ 'ka‑ "piʋ̈ ꞊dhɛ 'ka 'dhang bho n "dhiʋ̈ kö a‑ ‑pö ka ‑dhɛ ꞊dhɛ: Zan bha ꞊në Edhi 'wo‑ nu ‑wɔn ‑dhiang zë Atanna ‑bha 'sëëdhɛ 'gü bha‑ 'ka.
MAT 11:15 ꞊Ya kë ꞊dhɛ 'wɔn 'gü ma ‑tʋ 'dhö ka ‑gɔ ‑bha, ‑kaa "pʋ ‑së 'ka kö 'ka‑ ma!
MAT 11:16 'Yö go mü 'ö‑ pö "kɛɛ kö 'mɛ 'wo ꞊dɛɛ ‑yën ya‑ 'gü ya, a ‑dho ‑a ‑nu ‑zɔn 'ka ‑zɔn ‑më ꞊në‑ 'ka ‑ee? ‑Wo ‑kë ꞊dhɛ 'në 'sɛɛnnë ‑nu 'wo ‑ya ‑sü 'ka "dhɛɛ 'kpii‑ 'gü 'wo‑ pö sië wo 'ko ‑nu ‑dhɛ:
MAT 11:17 «'Ya "tan bho kö 'ka nu yi ‑wʋ ‑bha "kɛɛ 'kii‑ ‑yɔ bɔ. "Ɛɛn 'ya gata ‑gbʋ bɔ kö 'ka nu yi ‑wʋ ‑bha, "kɛɛ ‑wëë 'yii bɔ ka ‑ta bha ꞊në‑ ‑nu 'dhö.»
MAT 11:18 Pë 'ö ‑kë 'yö 'a 'mɛ 'wo ꞊dɛɛ ‑a ‑nu ‑bha ‑tosɛa ‑zɔn 'në 'sɛɛnnë ‑nu 'wo troo kë sië "dhɛɛ 'kpii‑ 'gü ‑a ‑nu 'ka bha, ‑a ‑gɛn ‑mü ꞊dhɛ: Zan 'dhö nu 'yaa gun ‑bhöpë ꞊dede ‑bhö sië "ɛɛn 'yaa gun we mü sië 'yö 'wo‑ pö‑ ‑bha ꞊dhɛ: «"Yina yaa ‑ya 'gü!»
MAT 11:19 ꞊Dhɛ 'ö mang Mɛgbömɛ 'ma nu 'zü, 'ö 'ma pë ‑bhö 'ö 'ma we mü ꞊dhɛ mɛ "wɛɛ ꞊gban 'dhö, 'yö 'wo‑ pö: «Mɛ bha we mü ‑dudu waa‑ pë ‑bhö ‑dudu ‑mü. ꞊Ya 'go mü 'zü waa‑ 'niisɔngkunmɛ ‑nu waa‑ 'wɔnyaakëmɛ ‑nu ꞊në 'wo ꞊nëng 'kwëë‑!» "Kɛɛ a‑ ‑pö ka ‑dhɛ ꞊dhɛ Atanna ‑bha 'wɔndɔdhe ‑yö ö ‑dɩ ‑zɔn mɛ "bhɩɩ‑ ‑nu ‑dhɛ ‑dhɛ bha ꞊në‑ 'gü ꞊dhɛ Zan ‑yö ‑gun Atanna ‑bha zian ꞊në‑ ‑zɔn sië mɛ "bhɩɩ‑ ‑nu ‑dhɛ tɛan‑ 'ka.»
MAT 11:20 ꞊Dhɛ 'ö ꞊ya kë "dhʋ̈ 'yö Yesu ‑yö zun ‑wëëwʋ ‑kpɔ 'pö‑ ‑nu 'ö "dhabhliwɔn 'gbɛ ‑kë 'gü bha‑ ‑nu 'gü ‑mɛ ‑nu ‑bha, wo zuë" slëë‑ 'ö 'wii‑ wo Atanna "piʋ̈ bha‑ ‑wɔn 'gü 'ö‑ pö:
MAT 11:21 «"Eke! Kodhazɛn ‑mɛ ‑nu, ka ‑bha ‑yö ‑wëësü, Bɛsaida ‑mɛ ‑nu, ka ‑bha ‑yö ‑wëësü; ‑a ‑gɛn ‑mü ꞊dhɛ "dhabhliwɔn "gblʋ̈gblʋ̈ ‑nu 'a‑ ‑kë ka ‑gɔ 'pö‑ ‑nu 'gü bha a‑ ‑kë Tii‑ ‑dhɛ waa‑ Sidɔn ‑dhɛ ‑nu ('ö‑ 'gü ‑mɛ ‑nu gun bhɔkɔyaamɛ ꞊në‑ 'ka yi 'bha 'ka bha ꞊në‑ 'gü 'nu, kö ꞊wa wo zuë" slëë‑ Atanna "piʋ̈ ‑a yi ꞊ya ꞊gwëë. Kö ꞊wa bhɔɔ sɔ ‑da wo ‑bha 'nu ꞊wa "yʋʋ dɔ wo ‑ta kö ‑wa ‑zɔn ꞊dhɛ ‑yö wo "piʋ̈ ꞊dhɛ 'wo wo bo 'wɔn yaa kë ‑sü 'ka kö 'wo wo zuë" slëë‑ Atanna "piʋ̈.
MAT 11:22 Yö ꞊në‑ ‑wɔn 'gü 'yö 'a‑ pö ka ‑dhɛ ꞊dhɛ: Zadɔyi 'ka, 'wɔn 'ö dho wɔ Tii ‑mɛ ‑nu waa‑ Sidɔn ‑mɛ ‑nu ‑ta, ‑yö ‑dho kë ꞊zɔngsü ka ‑bha ‑bha.
MAT 11:23 Kapɛɛnaɔmö ‑mɛ ‑nu, kaa ‑dɩ 'pö, ‑yö ka "piʋ̈ 'ka kpɛa‑ kö ka ‑gɔ ‑yö zun dhang‑ ‑bha ‑ee? Ka ‑dho 'dho ‑zian ꞊në‑ wo "sia‑ 'ö 'ka dho 'ka ‑sɔ 'ka ꞊geebɔɔ ‑pɛng 'gü. ‑A ‑gɛn ‑mü ꞊dhɛ "dhabhliwɔn ‑nu 'ö ‑kë ka ꞊plöö bha, ꞊ya kë ꞊dhɛ ‑yö ‑kë 'nu Sodɔmö ‑pö 'gü, (kö ‑wo ‑dho wo kwaa‑ wo këwɔn yaa ‑nu ‑zü 'ö 'wo wo zuë" ꞊slëë Atanna "piʋ̈,) kö Sodɔmö ‑pö ‑tun 'nu ꞊dɛɛ.
MAT 11:24 (Ka ‑zë ka n ‑wʋ ‑ma, "kɛɛ 'kaa ka kwaa‑ ka kë ‑sɔng yaya ‑nu ‑zü kö 'ka ka zuë" slëë‑ Atanna "piʋ̈) 'wɔn 'ö‑ ‑wɔn 'gü 'yö 'a‑ pö ka ‑dhɛ ꞊dhɛ zadɔyi 'ka, 'wɔn 'ö ‑wɔ Sodɔmö ‑dhɛta ‑yö ‑dho kë 'dɛdɛ ka ‑bha ‑bha bha 'yö bha.»
MAT 11:25 ‑A "tʋ̈ng do bha ꞊në‑ 'gü 'yö Yesu ‑ya pö: «'A, n Dë, bhi 'ö 'i "sɛ waa‑ dhang‑ ‑nu ‑mɛ 'ka bha a i nuɛ" bho ꞊dedewo 'pë 'ö ‑gblɛn 'kpɔ ‑sü 'ka ‑glengmɛ ‑nu waa‑ 'wɔndɔmɛ ‑nu ‑gɔ ‑a ‑zɔn 'i‑ wo ('mɛ 'ö pë draan‑ ‑dhɔ ‑ya ‑nu ‑kë ꞊dhɛ 'në 'sɛɛnnë ‑nu 'dhö) ‑a ‑nu ‑dhɛ bha‑ ‑wɔn 'gü.
MAT 11:26 ꞊iin, n Dë, a i nuɛ" ‑bho, ‑a ‑gɛn ‑mü ꞊dhɛ ‑yö ‑kë "dhʋ̈ kö ‑kɔ 'i‑ ‑ya 'ka i zuë" "piʋ̈ bha 'i‑ kë yö ꞊në‑ ‑kɔ ‑bha.»
MAT 11:27 'Yö Yesu ‑ya pö 'zü ö ‑bha ꞊klang ‑nu ‑dhɛ 'ö‑ pö: «N Dë ꞊ya pë ꞊gban "pɛpɛ dɔ n ‑kɔ 'ka. Mɛ 'bha 'yaa mang Atanna gbö ‑mɛ n dɔ kö 'yii kë n Dë 'ka, "ɛɛn mɛ 'bha 'yaa n Dë dɔ kö 'yii kë mang Atanna gbö ‑mɛ "ɛɛn 'zü 'mɛ 'ö n "piʋ̈ 'a‑ ‑zɔn ‑nu ‑dhɛ ‑a ‑nu 'ka.
MAT 11:28 ‑A ‑wɔn 'gü mɛ "pɛpɛ 'ö ꞊kwɛɛ 'gbiin‑ 'dhö ka ‑ta, 'ö ka 'gü ꞊ya ga ‑a 'sü ‑sü 'ka, ‑ka nu n "piʋ̈ kö 'a "tɛɛpasü nu ka ‑dhɛ.
MAT 11:29 ‑Ka ꞊nëng ma 'tɔng‑ ‑bha kö 'ka ka kwaa‑ ka ‑dɩ ‑zü n ‑gɔ, kö 'a ka draan‑ 'wɔn dɔ ‑sü ‑bha; ‑a ‑gɛn ‑mü ꞊dhɛ ma ‑zë ma 'wɔn‑ ‑së, 'ö n zuë" 'dhö ‑sɛa; ꞊ya kë "dhʋ̈ ka ‑dho ‑ya ka ‑dɩ 'flëë‑ 'gü.
MAT 11:30 ‑A ‑gɛn ‑mü ꞊dhɛ 'tɔng‑ ‑nu 'a dho nu ka ‑dhɛ kö 'ka‑ 'kun bha‑ ‑nu 'kundhɛ 'yaa "gbɩɩ‑, ꞊ya 'go yö ‑zë 'gü ꞊kwɛɛ‑ 'dhɛ 'a dho‑ nu ka ‑dhɛ bha 'pö ‑yö 'fʋ̈ʋ̈‑.»
MAT 12:1 ꞊Dhɛ 'ö "tʋ̈ng 'bha ꞊ya ziö, 'yö Yesu 'dhö gun ziö sië ‑mlü suu 'wo 'bluu‑ ‑kë 'ka 'wo‑ ble ‑kë bha‑ ‑bhlaa ‑nu 'gü Zuifö ‑nu ꞊glooyi 'ka kö din‑ ‑ya ‑bha ꞊klang ‑nu kë sië, 'yö 'wo zun ‑mlü bha‑ ‑kpaa 'bha ‑wo 'gü ‑sü ‑bha 'wo‑ "flɩɩ‑ bho 'wo‑ ‑bhö.
MAT 12:2 ꞊Dhɛ 'ö Fadhiziɛn ‑nu 'wo‑ ‑nu yö, 'yö 'wo‑ pö Yesu ‑dhɛ: «‑Bhö ‑dhɛ ‑ga bha, pë 'ö kwa ‑bha 'tɔng‑ ‑ya pö 'kwa 'dho‑ kë ꞊glooyi 'ka bha‑ ‑ga 'ö i ‑bha ꞊klang ‑nu 'wo‑ kë sië ya!»
MAT 12:3 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Kii 'wɔn 'ö Davi ‑ya kë yi 'bha 'ka waa‑ ö ꞊keng‑ ‑mɛ ‑nu 'dhö kö din‑ ꞊yaa‑ ‑nu 'kun 'ö ‑bɛn zë ‑sü 'ka bha‑ ‑wʋ pö do ‑ee?
MAT 12:4 ‑Da 'ö‑ wo Atanna ‑gɔ 'kɔɔdhö waa‑ ö ꞊keng‑ ‑mɛ ‑nu 'dhö, ('ö 'wo 'bluu‑ 'wo Atanna ‑dhɔkë 'ka bha‑) sü 'wo‑ ‑bhö, "kɛɛ kö‑ ‑dhɛ 'yaa‑ ‑bha kö ‑wa ‑bhö bha, 'kii‑ ma ‑ee? ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kwa ‑bha 'tɔng‑ ‑ya ‑pö "saa‑ ‑bho Atanna ‑dhɛ ‑mɛ ‑nu ‑dɩ ‑slɔɔ ꞊në 'wo‑ ‑bhö ‑mɛ 'ka.
MAT 12:5 "Ɛɛn 'zü, 'kii‑ ‑wʋ pö Moizö ‑bha 'tɔng‑ 'sëëdhɛ 'gü do ꞊dhɛ kwa ‑bha ꞊glooyi 'ka "saa‑ ‑bho Atanna ‑dhɛ ‑mɛ ‑nu 'ö yë 'dhö‑ ‑nu ꞊kwɛɛ‑ Atanna ‑dhɔkëgükɔ 'gü, 'waa 'tɔng‑ 'ö ‑gban ꞊glooyi ‑bha bha‑ 'kun, "kɛɛ Atanna 'yaa‑ ‑nu 'kun tëë 'ka ‑ee?
MAT 12:6 A‑ ‑pö ka ‑dhɛ tɛan‑ ꞊dede 'ka ꞊dhɛ: Pë do 'bha ‑yö ‑dhɛ ya‑ 'gü 'ö ꞊bhlëësü 'ö ‑ziö Atanna ‑dhɔkëgükɔ ‑ta.
MAT 12:7 ꞊Ya kë ꞊dhɛ pë 'ö ‑bɛn zë ‑sü 'ka, ka‑ 'gü ‑ma 'nu kö 'mɛ 'ö 'wɔn 'bha 'yaa‑ ‑nu ‑bha bha, 'kii 'dho za dɔ‑ ‑nu ‑bha. ‑A ‑gɛn ‑mü ꞊dhɛ ‑yö ‑bɛn zë ‑sü 'ka ꞊dhɛ mɛ ‑wëë ‑bha ka kë ‑sü ꞊në‑ "dhia 'dhö n 'gü, "kɛɛ "saa‑ ‑bho wü 'ka n ‑dhɛ ‑sü ‑zë ‑a "dhia 'yaa n 'gü 'gbɛ.
MAT 12:8 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ mang Mɛgbömɛ ꞊në ma ꞊glooyi 'dhö 'dhö. (‑A ‑kë "dhʋ̈ ‑sü bha‑ 'gü kö 'wɔn 'ö ma ꞊klang ‑nu ‑wa ‑kë bha 'yaa 'wɔn yaa 'ka.)»
MAT 12:9 ꞊Dhɛ 'ö ꞊ya kë "dhʋ̈, 'yö Yesu ‑yö go ‑dhɛ 'dhɛ bha‑ 'gü 'yö dho Zuifö ‑nu ‑bha ‑yakwëëkëgükɔ do 'gü.
MAT 12:10 Gɔndë do 'ö‑ ‑kɔ do‑ gun ga ‑sü 'ka‑ ‑bha ‑yö ‑gun ‑dhɛ bha‑ 'gü, 'yö 'mɛ 'wo gun mü bha 'wo Yesu dhɛɛ" kpɔ 'wo‑ pö: «‑A ‑dhɛa ‑bha kö ‑wo mɛ kë "klʋ̈ʋ̈klʋ̈ ꞊glooyi 'ka "wɛ ‑ee?» ‑Wo Yesu dhɛɛ" ‑kpɔ "dhʋ̈ kö ‑wa ‑gɛn ꞊në‑ mɔɔ‑.
MAT 12:11 'Yö‑ ‑ya ‑yɔ bɔ‑ ‑nu ‑gɔ 'ö‑ pö: «De ‑mü 'ka ka kpö 'gü 'yö‑ ‑bha "bhlaanë dosengseng 'ö‑ ‑gɔ, ꞊ya ‑pö ‑klɔng 'gü ꞊glooyi 'ka 'yö dho‑ 'to mü?
MAT 12:12 ‑A ‑wɔn 'gü a‑ ‑pö ka ‑dhɛ ꞊dhɛ mɛbhɩɩdhe "yaandhe ‑wɔn ‑zë 'waa waa‑ "bhlaanë ‑wɔn ‑a ‑nu ‑ya 'ko "dhiʋ̈. ꞊Ya kë "dhʋ̈ kö 'wɔn ‑së ‑zë ‑wo ‑mɔɔ ‑bha 'wo‑ ‑kë ꞊glooyi 'ka.»
MAT 12:13 ꞊Dhɛ 'ö ꞊ya kë "dhʋ̈ 'yö Yesu ‑ya pö gɔndënë ‑gbe ‑ga ‑bha ‑sü bha‑ ‑dhɛ: «‑Bhö i ‑gbe 'gü "pʋ!» 'Yö‑ ‑pʋ, 'yö ‑kë ‑a ‑gbe do bha‑ bo ‑sü 'ka 'yö ‑kë ꞊dhɛ‑ do 'dhɛ to ‑a 'dhö.
MAT 12:14 ꞊Dhɛ 'kö ꞊ya bo‑ kë ‑sü 'ka "dhʋ̈, Fadhiziɛn ‑nu 'wo gun mü bha ‑wo zun ꞊në‑ wo "kpɛnng, 'yö 'wo Yesu zë ‑wɔn ‑yakwëë ‑kë.
MAT 12:15 ꞊Dhɛ 'ö ꞊yaa‑ ma ꞊dhɛ ‑wo ö zë ‑wɔn ‑ya 'kwëë‑ kë sië, 'yö go ‑dhɛ bha‑ 'gü. ‑A 'dho ‑sü 'ka mɛ kpö 'gbɛ ‑wo ‑gun ꞊keng‑. 'Yö "yuëdhi "pɛpɛ 'wo gun 'mɛ 'wo bha‑ ‑nu kpö 'gü, 'yö‑ ‑nu ‑kë "klʋ̈ʋ̈klʋ̈.
MAT 12:16 "Kɛɛ 'yö ‑dhio dɔ‑ ‑nu ‑ta glɔɔglɔdhö 'ö‑ pö 'wa 'dho ö ‑kë Atanna Gbö 'ka ‑wɔn pö mɛ 'bha ‑dhɛ.
MAT 12:17 Kë "dhʋ̈ kö ‑wʋ 'ö Atanna ‑wʋdhiʋ̈loomɛ Ezai ‑ya pö yi 'bha 'ka bha‑ 'gü ‑wɔn ‑yö kë; ‑a ‑gɛn ‑mü ꞊dhɛ Ezai ‑yö ka‑ ‑pö 'ö‑ pö:
MAT 12:18 Atanna ‑ya ‑pö: Ma yëkëmɛ 'a‑ ‑ya 'yö ya, Yö ꞊në‑ ‑dhɔ ‑yö n ‑kë, 'yö 'a n ‑gɔ ‑wɔn ꞊gban "kplëng bho ‑sü 'ka i ‑bha. Yö ꞊në 'a ‑dho ma 'Nii‑ "slʋ̈ʋ̈slʋ̈ ‑ya 'gü kö ‑yö 'wɔn 'ö pö 'aa‑ ‑bha ‑a kë ‑sü ‑dhiang zë "kpʋngtaamɛ ‑nu ‑dhɛ.
MAT 12:19 Waa‑ mɛ 'bha 'wii 'dho ‑dɔn bho, "ɛɛn 'yii 'dho "gbla mɛ 'bha ‑ta, "ɛɛn mɛ 'bha ‑mɛ 'bha 'yii 'dho‑ yö kö ‑yö "plüün bho sië 'ö ꞊ziö‑ 'ka ‑kpinng "piʋ̈.
MAT 12:20 ‑Kaadhüga 'dhɛ 'ö ꞊klɔngsü 'ka 'yii 'dho‑ ‑kpɛa "yɛ do, "ɛɛn pɛng kpuu' 'dhɛ 'ö‑ "gbiën 'në 'bha ‑zë 'ö ‑tun kö bhɔ, 'yii 'dho‑ ‑kpɛa "dhuu do. ‑Yö ‑dho 'to‑ ‑kë "dhʋ̈ ‑sü ‑bha 'ö to‑ 'ka "dhʋ̈, 'ö zun‑ 'ka Atanna ‑bha tɛanwɔn ‑to ‑bha ‑yi ‑bha,
MAT 12:21 'ö "sɛ "wɛɛ ꞊gban 'wo wo ‑zʋ yö‑ ‑dhɛ 'yö 'wo "yan to‑ ‑gɔ.» ('Pë 'ö ‑kë 'yö Yesu gun‑ pö sië 'wa 'dho ö dɔ ‑kɔ pö mɛ 'bha ‑dhɛ bha 'yö bha.)
MAT 12:22 ꞊Dhɛ 'ö ꞊ya bo ‑kë ‑sü 'ka "dhʋ̈, 'yö 'wo nu "yanwlümɛ do 'ö "bhʋbhʋ 'ka ‑a 'ka Yesu ‑dhɛ. 'Mɛ 'ö bha‑ kë "dhʋ̈ ‑gɛn ‑mü ꞊dhɛ kö "yina yaa ‑ya 'gü. ꞊Dhɛ 'ö ꞊ya kë "dhʋ̈, 'yö Yesu ‑yö gɔndënë bha‑ ‑kë "klʋ̈ʋ̈klʋ̈, 'yö dhiang zë, 'yö ‑dhɛ yö.
MAT 12:23 ꞊Dhɛ 'ö ꞊ya kë "dhʋ̈ 'yö mɛ kpö 'wo gun 'mü bha‑ 'wɔn ‑ya ‑nu kɔn 'yö 'wo‑ pö: «Kö ‑yö ‑dho kë Davi suu 'gü ‑në 'ö 'kwa ‑ya ‑gɔ bha‑ 'ka 'sa.»
MAT 12:24 "Kɛɛ ꞊dhɛ 'ö Fadhiziɛn ‑nu ‑wa ‑nu ‑wʋ bha‑ ma "dhʋ̈ 'yö 'wo‑ pö: «'Mɛ bha ‑yö "yina yaa ‑nu bha‑ ‑nu ‑kë "dhʋ̈ "yina ‑nu ‑bha ‑gblüdë 'wo‑ Bɛɛzebidhö ‑kë bha ꞊në‑ faan 'ka.»
MAT 12:25 "Kɛɛ ꞊dhɛ 'ö ‑kë ꞊dhɛ Yesu ‑ya ‑nu ‑zʋgɔngüwɔn ‑nu bha‑ ‑dɔ bha, 'yö‑ ‑yɔ bɔ‑ ‑nu ‑gɔ 'ö‑ pö: «‑Yö kë ka "yaan ꞊dhɛ "sɛ "ʋʋ "sɛ 'ö‑ 'gü ‑mɛ ‑nu ꞊wa ‑ya 'ko ‑zë wo "kwëë ‑sü ‑bha kö "sɛ 'dhɛ 'kö bha ꞊ya 'wü ꞊naa bha. "Ɛɛn 'pödhɛ suu "ʋʋ suu "ɛɛn 'kɔdhi suu "ʋʋ suu 'ö‑ 'gü ‑mɛ ‑nu 'wo 'ko zë sië wo "kwëë kö ꞊ya 'wü ꞊naa bha.
MAT 12:26 ‑Kɔ do bha‑ 'gü, ꞊ya kë ꞊dhɛ 'ka‑ pö Sɔtraan ꞊në "yina yaa ‑nu 'wo bɔ‑ 'ka bha‑ ‑nu kë sië bha kö 'yii ‑gblü gɔɔn ö ‑dɩ 'ka ꞊naa bha ‑ee? Kö‑ ‑bha ‑gblüdëdhɛ 'yii "pɛ ‑ee? ꞊Ya kë "dhʋ̈ ‑a ‑bha ‑gblüdëdhɛ ‑dho ꞊gwëë ‑kɔ ‑kë ꞊dhɛ?
MAT 12:27 ꞊Ya kë 'zü ꞊dhɛ ma ‑zë 'ma "yina yaa kë Bɛɛzebidhö faan 'ka bha ‑oo, 'yö ka ‑bha ꞊klang ‑nu ‑zë ꞊wɛ? ‑Wo wo ‑bha ‑kë de ꞊në‑ faan 'ka? Yö ꞊në‑ ‑wɔn 'gü 'yö 'a‑ pö ka ‑dhɛ ꞊dhɛ ka ‑bha ꞊klang ‑nu bha ꞊në 'wo dho ka zë za 'ka ‑dhɛ 'bha ꞊kpaɔ ‑yi ‑bha (Atanna wëëdhö, ‑a ‑gɛn ‑mü ꞊dhɛ 'wii wo ‑bha bha‑ kë mɛ "wɛɛ 'bha faan 'ka kö 'yii kë Atanna ‑zë 'ka).
MAT 12:28 "Kɛɛ ‑kaa 'wɔn dɔ ꞊dhɛ a "yina yaa ‑nu ‑kë Atanna ‑bha 'Nii‑ ꞊në‑ faan 'ka, ‑Kaa 'wɔn dɔ 'pö ꞊dhɛ ꞊ya kë "dhʋ̈ kö‑ ‑bha ‑gblüdëdhɛ yöö yö‑ ‑bha ꞊në‑ wo, 'yö‑ "zɔ ꞊ya ‑wo ka ‑ta bha.
MAT 12:29 "Ɛɛn ‑yö ka 'gü ꞊dhɛ mɛ 'bha ‑kɔ ‑mɔɔ ‑bha 'ö ‑da ‑kɛgbaan 'bha ‑gɔ 'kɔɔdhö 'ö ‑ya ‑bha ꞊kwɛɛ‑ ‑nu ‑wlösü ‑bha kö 'yii‑ ‑lö ‑zë wo ꞊kö ‑blɛɛsü ‑ee? "Fɔn kö ꞊ya ‑kɛgbaan bha‑ ‑lö, 'yö‑ ‑kɔ gun ‑na ꞊mɔɔ‑ ‑bha kö ‑ya ‑bha ꞊kwɛɛ‑ ‑nu ‑wlö.
MAT 12:30 ‑A ‑kë "dhʋ̈ ‑sü bha‑ 'gü a‑ ‑pö ka ‑dhɛ ꞊dhɛ: 'Mɛ 'ö 'yii bɔ n 'ka kö ‑yö ‑nu n ‑gɔ. 'Sa 'mɛ 'yii mɛ mɔɔ‑ ‑zë wo ꞊dhɛ n 'dhö kö ‑yö nu‑ 'ka kö 'yi‑ ꞊loo 'ko ‑ta, kö mɛ ‑kan n ‑bha ‑mɛ ‑mü.
MAT 12:31 Yö ꞊në‑ ‑wɔn 'gü 'yö 'a‑ pö ka ‑dhɛ ꞊dhɛ: 'Mɛ 'ö Atanna ‑bha 'fang bho, (꞊ya bhɛa"‑ ‑dhɛ) ‑yö ‑dho ‑a ‑mawɔn 'to, 'mɛ 'ö 'wɔn yaa ‑kë, (꞊ya bhɛa"‑ ‑dhɛ) ‑yö ‑dho ‑a ‑mɛ ‑mawɔn 'to, "kɛɛ 'mɛ 'ö dho Atanna ‑bha 'Nii‑ ‑zë ‑bha 'fang bho, 'yii 'dho‑ ‑mɛ ‑mawɔn 'to tongtongdhö.
MAT 12:32 Mɛ "ʋʋ mɛ 'ö dho mang Mɛgbömɛ n ‑bha 'fang bho, Atanna ‑dho ‑a ‑mɛ ‑mawɔn 'to, "kɛɛ mɛ "ʋʋ mɛ 'ö Atanna ‑bha 'Nii‑ "slʋ̈ʋ̈slʋ̈ ‑bha 'fang bho, 'yii 'dho‑ ‑mɛ ‑mawɔn 'to ꞊dɛɛ, 'yii 'dho‑ 'to dhia".»
MAT 12:33 'Yö go mü 'zü 'ö‑ pö: «'Bha "dhü ‑së ta 'yö bhɛ ‑së ‑ya, 'bha "dhü yaa ta ‑yö bhɛ yaa ꞊në‑ ‑ya. "Dhü 'ö ‑së ‑wa ‑dɔ ‑a bhɛ ꞊në‑ ‑bha.
MAT 12:34 ‑Mawɔnyaamɛ ‑nu, ka ‑dho dhiang ‑së zë ‑kɔ ‑kë ꞊dhɛ kö ka suu 'yaa ‑së. ‑A ‑gɛn ‑mü ꞊dhɛ 'pë 'ö mɛ zuë" "piʋ̈, 'yö ‑wo mɛ "dhi ‑ta.
MAT 12:35 'Mɛ 'ö‑ "klʋ 'dhö ‑së, 'ö‑ këwɔn 'dhö ‑së 'yö 'wɔn ‑së ‑yö ‑kë ‑mɛ zuë" "piʋ̈, 'yö dhiang ‑së zë. ‑Mawɔnyaamɛ ‑dɩ 'pö, ‑a zuëpiʋ̈dhɛ ‑yö kë pa ‑sü 'ka 'wɔn yaa ꞊në‑ 'ka. ꞊Ya kë 'pö "dhʋ̈ pë 'ö‑ "dhi ‑ya pö‑ ꞊gbaan ‑kë pë yaa ꞊në‑ 'ka.
MAT 12:36 A‑ ‑pö ka ‑dhɛ ꞊dhɛ: ‑Dhɛkpaɔyi 'ö Atanna dho za dɔ‑ 'ka mɛ "bhɩɩ‑ ‑bha bha, "wlaa‑ ‑dhiang "pɛpɛ 'wo‑ zë, ‑wo ‑dho ziö‑ ꞊gban 'gü ‑a wëëdhö.
MAT 12:37 ‑A ‑gɛn ‑mü ꞊dhɛ i zë ‑dhiang ‑nu 'wo "kpʋng ꞊taa yö bha ꞊në 'wo dho za dɔ i ‑bha. 'Bha‑ ‑së zë i ‑dho dha, 'bha‑ yaa zë, Atanna ‑dho 'wɔn bho i 'gü.
MAT 12:38 'Ö go‑ 'dhɛ bha‑ 'gü, 'yö Zuifö ‑nu ‑bha 'tɔnggɔmɛ ‑nu 'bha ‑nu waa‑ Fadhiziɛn ‑nu 'bha ‑nu 'wo‑ pö Yesu ‑dhɛ 'wo‑ pö: «Yi Dëmɛ, ‑yö yi "piʋ̈ ꞊dhɛ 'i "dhabhliwɔn do 'bha kë kö yi "yan ‑yö ‑da ‑dhɛ 'gü (kö ‑ya ‑zɔn yi ‑dhɛ ꞊dhɛ Atanna ꞊në i bɔ ꞊dedewo tɛan‑ 'ka)!»
MAT 12:39 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Wɔnyaakëmɛ ‑nu 'wo ꞊dɛɛ ‑yën ya‑ 'gü, 'ö 'waa 'to ‑kplü ‑sü 'ka Atanna ‑bha bha ‑wa "piʋ̈ ꞊dhɛ 'a "dhabhliwɔn do kë kö 'wo‑ ‑dhɛ yö, "kɛɛ "dhabhliwɔn ‑dee 'bha 'yii 'dho kë kö ‑yö kë ‑a ‑nu ‑bha 'wɔn 'suan‑ ‑bho ‑bha pë 'ka kö 'yii kë ‑a 'dhɛ 'kö ‑kë Atanna ‑wʋdhiʋ̈loomɛ Zonasö 'ka yi 'bha 'ka bha‑ 'ka.
MAT 12:40 ‑Kɔ do 'ö Zonasö ‑yö ‑dhɛkpaɔyi ‑yaaga waa‑ gbeng 'gü ‑yaaga ‑kë 'ka 'yuʋ̈‑ 'kpii‑ do "gblʋ̈ʋ̈‑ yi 'bha 'ka bha, mang Mɛgbömɛ a ‑dho ‑dhɛkpaɔyi ‑yaaga waa‑ gbeng 'gü ‑yaaga kë 'pö ‑kɔ do bha‑ 'gü "sɛɛdhö.
MAT 12:41 Atanna ‑bha za bha‑ dɔ ‑yi 'ka, a‑ ‑pö ka ‑dhɛ ꞊dhɛ Ninivö ‑mɛ ‑nu ‑dho "wlü Atanna ‑kuu "dhiʋ̈ 'wo 'mɛ 'ka ꞊dɛɛ ka zë za 'ka, ‑a ‑gɛn ‑mü ꞊dhɛ ꞊dhɛ 'ö Zonasö ‑yö dho 'ö Atanna ‑wʋ pö Ninivö ‑mɛ ‑nu ‑dhɛ, ‑wo kë wo kwaa‑ wo këwɔn yaya ‑nu ‑zü, 'ö 'wo wo zuë" ꞊slëë‑ "piʋ̈, "kɛɛ ka ‑zë mɛ 'dhɛ 'kö‑ ‑duɛ 'dhö 'kpii‑ 'ö ‑ziö Zonasö ‑bha ‑ta, 'ö ka kpö 'gü ꞊dɛɛ bha ꞊ya Atanna ‑wʋ pö ka ‑dhɛ, 'kaa "wɩ‑ ‑bha kö 'ka ka zuë" slëë‑ Atanna "piʋ̈.
MAT 12:42 ‑Gblüdëdhe 'ö go "sɛgɔ 'wo‑ Seba ‑sɛ ‑kë bha‑ 'gü bha ‑yö ‑dho "wlü 'pö 'ö 'mɛ 'ka ꞊dɛɛ bha ka zë za 'ka zadɔyi bha‑ 'ka. ‑A ‑gɛn ‑mü ꞊dhɛ ‑yö kë ‑go ö ‑gɔ "sɛgɔ ꞊gblɛɛn bha‑ 'gü, 'ö nu 'ö "tʋ to Sadhomɔ ‑bha dhiang ‑nu 'ö gun‑ zë sië 'wɔndɔdhe ‑bha bha‑ ‑bha. 'Sa a‑ ‑pö ka ‑dhɛ ꞊dhɛ 'mɛ 'ö‑ ‑duɛ 'dhö 'kpii‑ 'ö ‑ziö Sadhomɔ ‑bha ‑ta, ‑yö ka kpö 'gü yö, "kɛɛ 'kaa ka "tʋ 'to‑ ‑wʋ ‑bha.»
MAT 12:43 'Yö Yesu ‑yö dhiang zë 'zü 'ö‑ pö: «꞊Ya kë ꞊dhɛ "yina yaa ꞊ya 'go mɛ 'gü, 'yö dho "tʋng ‑ta ö ‑yɛa mɔɔ‑, "kɛɛ 'yii‑ ‑dhɛ yö 'yö‑ pö ö ‑dɩ ꞊dhɛ:
MAT 12:44 ‹‑Ka 'go 'a n yee kë 'a 'dho ‑dhɛ 'a go‑ 'gü bha‑ 'gü.› ꞊Ya ö yee kë yö ‑zë 'gü kö ‑yö nu kö mɛ 'bha 'yaa‑ ꞊yëë "dhiʋ̈ ‑kɔ bha‑ 'gü, "kɛɛ kö ‑a ‑dhɛ ‑yö ‑gblö ‑sü 'ka, kö pë ‑sɛngbɔ ‑nu 'wo 'kɔɔ ‑dhɛ ‑dhi waa‑ ‑nu dɔ 'kɔɔdhö 'mü,
MAT 12:45 'yö ö yee ‑dee 'bha ‑kë 'yö dho ‑a mɛ 'dhɛ 'wo ‑nɛnɛsü 'wo ‑ziö yö ‑zë ‑ta bha‑ ‑nu "saɔplɛ mɔɔ‑ ‑dhɛ 'gü 'yö‑ ‑nu ‑dhɛ 'yö 'wo nu 'wo ‑ya mü. ꞊Ya bo kë ‑sü 'ka "dhʋ̈ 'yö‑ ‑mɛ 'dhö ‑kë ‑wëësü 'ö ‑ziö 'ka ‑blɛɛsü ‑bha ‑ta. ꞊Dɛɛ ‑mɛ ‑nu 'wo 'wɔn yaa kë ‑zian ‑ta bha‑ ‑nu ‑bha ‑dho kë ‑kɔ do bha ꞊në‑ 'gü.
MAT 12:46 Yesu ‑yö ‑to dhiang zë ‑dhɛ 'gü mɛ kpö bha‑ ‑nu ‑dhɛ, 'yö‑ dhe waa‑ dheebhang ‑nu 'wo nu. ‑Yö ‑gun ‑nu "piʋ̈ ꞊dhɛ 'wo dhiang zë‑ ‑dhɛ, "kɛɛ kö ‑wo dɔ sië 'kɔdhi "dhiʋ̈ "kpɛnng.
MAT 12:47 'Yö mɛ "wɛɛ do 'bha ‑ya pö Yesu ‑dhɛ 'ö‑ pö: «‑Bhö ‑dhɛ ‑ga, i dhe waa‑ i 'zlaabɔ ‑nu ꞊wa nu, ‑wo dɔ sië i ‑gɔ "kpɛnngdhö, ‑ya ‑nu "piʋ̈ ꞊dhɛ 'wo dhiang 'bha zë i ‑dhɛ.»
MAT 12:48 'Yö Yesu ‑ya ‑yɔ bɔ 'mɛ 'ö dhiang "dhiʋ̈ ꞊loo‑ ‑bha bha‑ ‑gɔ 'ö‑ pö: «N dhe ꞊në de 'ka? "Ɛɛn n dheebhang ‑nu ꞊në 'wo 'mɛ?»
MAT 12:49 ꞊Dhɛ 'ö ꞊yaa‑ pö "dhʋ̈, 'yö ö ‑kɔ ‑zɔn ö ‑bha ꞊klang ‑nu 'ka 'ö‑ pö: «‑Bhö ‑dhɛ ‑ga, n dhe waa‑ n dheebhang ‑nu ‑ga 'wo ya!
MAT 12:50 ‑A ‑gɛn ‑mü ꞊dhɛ 'mɛ 'ö n Dë 'ö ‑ya ‑sü 'ka dhang‑ ‑nu 'gü bha‑ ‑dhidhɛwɔn ‑kë bha kö‑ ‑mɛ ꞊në n dheebhang dhebhɔ, "ɛɛn n dheebhang gɔɔn‑ "ɛɛn n dhe ‑nu ꞊gban 'ka.
MAT 13:1 ‑A yi 'ö "dhʋ̈ bha‑ 'ka 'yö Yesu ‑yö go 'kɔɔdhö 'yö dho 'yö ‑ya "yitagbɛa bha‑ "kpʋng "dhiʋ̈ kö 'ö mɛ ‑nu ꞊klang kë.
MAT 13:2 'Yö mɛbhɩɩdhe ‑yö bho "dhuu 'yö 'wo ꞊klëën‑ ‑zü. ꞊Dhɛ 'ö ‑gɛnziödhɛ 'bha 'yaa 'dhö 'zü mɛbhɩɩdhe ‑gɔ, 'yö ‑da "yitagɔ 'gü 'yö ‑ya mü. 'Yö 'mɛ 'wo bha 'wo to "yi "kpʋng "dhiʋ̈,
MAT 13:3 'yö zun 'wɔn 'gbɛ 'klɔɔ‑ ‑pö ‑nu ‑dhɛ "gwënng 'gü ‑sü ‑bha 'ö‑ pö: «Yi do 'ka 'yö mɛ do 'bha ‑yö ꞊wlü 'yö dho pë ta ‑dhɛ 'gü ö ‑gɔ 'bhlaa.
MAT 13:4 ꞊Dhɛ 'ö ꞊ya zun 'pë 'ö dho‑ ta bha‑ ga ꞊wɛnng ‑sü ‑bha, 'yö‑ ga 'bha ‑nu 'wo ꞊wɛnng zian ‑gloo ‑ta ('yö 'wii 'dho "sɛɛdhö), 'yö ‑maa ‑nu 'wo nu 'wo‑ ‑bhö.
MAT 13:5 'Yö‑ ga 'bha ‑nu 'wo ‑pö ‑gwë 'saa‑ 'ö "sɛ 'yaa‑ ‑ta 'gbɛ ‑a "dhiʋ̈, 'yö 'wo to 'wo bhɔ, ‑a ‑gɛn ‑mü ꞊dhɛ "sɛ 'ö waa‑ ‑gwë ‑nu ‑a ‑nu ꞊zinng 'gü 'yaa 'gbɛ.
MAT 13:6 ꞊Dhɛ 'ö 'yënng‑ ꞊ya ‑ya 'bhü ‑sü ‑bha, 'yö‑ "plüün ꞊gban "pɛpɛ ‑yö ga, ‑a yun 'dho ‑dhɛ 'ö 'yaa gun bha‑ ‑wɔn 'gü.
MAT 13:7 'Yö‑ ga 'bha ‑nu 'wo ‑pö "glɛɛn ‑kpɔɔ 'gü. ꞊Dhɛ 'ö ꞊wa bhɔ, 'yö ‑kpɔɔ ‑yö ‑da ‑nu ‑ta 'yö‑ zë.
MAT 13:8 "Kɛɛ 'yö‑ ga 'bha ‑nu 'wo ‑pö "sɛ ‑së 'gü, 'yö 'wo ‑da ꞊nii 'gü 'yö 'wo dho 'wo ‑wo 'gü, 'yö‑ 'bha ‑nu ga ‑yö ‑kë ö ‑kpaa ‑bha këng do, 'yö‑ ‑kpaa 'bha ‑nu bha ga‑ ‑kë ‑kaɔng "saɔdo, 'yö‑ 'bha ‑nu ‑bha ‑yö ‑kë ‑kaɔng ‑yaaga.»
MAT 13:9 ꞊Dhɛ 'ö ꞊ya bo‑ ‑pö "dhʋ̈ ‑sü 'ka 'yö‑ pö‑ ‑nu ‑dhɛ: «'Mɛ 'i 'wɔn 'gü ma ‑mɛ 'ka, kö a‑ zë i ‑dhɛ, (‑bhö i "tʋ 'to ‑së 'ka 'kii‑ 'gü ma).»
MAT 13:10 Yö ꞊në‑ ‑wɔn 'gü 'yö‑ ‑bha ꞊klangdhiʋ̈ ‑nu ‑wo ‑yɔɔn "sɔɔ, 'yö 'wo‑ dhɛɛ" kpɔ 'wo‑ pö: «‑Më ꞊në ‑kë 'yö 'i dhiang ꞊gban "pɛpɛ zë‑ ‑nu ‑dhɛ "gwënng ꞊në‑ 'gü ya?»
MAT 13:11 'Yö‑ ‑yɔ bɔ‑ ‑nu ‑gɔ 'ö‑ pö: «‑A kë 'a‑ wo "dhʋ̈ bha‑ ‑gɛn ‑mü ꞊dhɛ 'wɔn 'ö ‑gban Atanna ‑bha ‑gblüdëdhɛ ‑bha bha, ꞊ya "dhɛ bho‑ ‑ta ka ‑zë ka ‑dhɛ. "Kɛɛ 'yaa‑ ‑ta "pʋ ‑sü 'ka wo ‑zë ‑a ‑nu ‑dhɛ.
MAT 13:12 ‑A ‑gɛn ‑mü ꞊dhɛ 'mɛ 'ö pë 'dhö‑ ‑gɔ 'ö‑ ‑ziö 'gü ‑ziö ꞊në 'wo dho‑ taa kë, 'yö‑ ‑bha ‑yö ‑kë 'gbɛ "kɛɛ 'mɛ 'kö pë 'bhaa‑ ‑gɔ ‑a 'dɛdɛ 'në 'dhɛ yaa‑ ‑kë ‑gɔ, "kɛɛ 'ö 'yaa‑ ‑ziö 'gü ‑zë ziö bha ‑wo ‑dho ‑a 'sü ‑zian ꞊në‑ wo‑ ‑mɛ ‑gɔ.
MAT 13:13 'Wɔn 'ö‑ ‑wɔn 'gü 'yö 'a dhiang zë‑ ‑nu ‑dhɛ "gwënng 'gü bha yö bha; ‑a ‑gɛn ‑mü ꞊dhɛ 'wɔn ‑nu 'ö‑ ‑nu "yan 'dhö dɔ‑ 'gü bha 'waa‑ yö. 'Wɔn 'wo‑ ma ‑nu wo bha 'waa‑ 'klɔɔ‑ dɔ.
MAT 13:14 "Kɛɛ ‑yö ‑kë "dhʋ̈ kö 'pë 'ö Atanna ‑wʋdhiʋ̈loomɛ Ezai ‑ya pö yi 'bha 'ka bha ꞊në‑ 'gü ‑wɔn ‑yö kë. ‑A ‑gɛn ‑mü ꞊dhɛ Ezai ‑yö dhiang ‑zë ‑a ‑nu ‑dhɛ yi 'bha 'ka 'ö‑ pö: ‹Ka "tʋ‑ ‑dho 'wɔn ma, "kɛɛ 'kii 'dho‑ 'klɔɔ‑ dɔ, ka ‑dho ‑dhɛ ‑ga 'kpakpadhö, "kɛɛ 'kii 'dho ‑dhɛ yö.
MAT 13:15 ‑A ‑gɛn ‑mü ꞊dhɛ "sɛ ya‑ 'gü ‑mɛ ‑nu zuë" ꞊ya kë "glɔɔglɔ, ꞊wa wo "tʋ ta kö 'wa 'dho 'wɔn 'bha ma, ꞊wa wo "yan ta kö 'wa 'dho ‑dhɛ yö, kë "dhʋ̈ kö 'wa 'dho 'wɔn 'gü ma 'ö 'wo wo zuë" ꞊slëë n "piʋ̈ 'ö 'a‑ ‑nu dha.›
MAT 13:16 "Kɛɛ ka ‑zë ka ‑bha ‑së, ‑a ‑gɛn ‑mü ꞊dhɛ ka "yan ‑yö ‑dhɛ ‑yö 'ö ka "tʋ ‑yö 'wɔn ma.
MAT 13:17 A‑ ‑pö ka ‑dhɛ tɛan‑ ꞊dede 'ka ꞊dhɛ Atanna ‑wʋdhiʋ̈loomɛ 'gbɛ ꞊dede zuë" ‑gun ‑bha waa‑ dhɔɔbhaawɔn këmɛ ‑nu 'dhö, ꞊dhɛ wo "yan ‑yö dɔ 'wɔn 'ka‑ ‑dhɛ yö sië ꞊dɛɛ ya‑ 'gü kö 'wɔn ‑nu 'ka‑ ma sië ya 'wo‑ ma 'pö, "kɛɛ 'wii‑ ‑dhɛ yö "ɛɛn 'wii‑ ma.»
MAT 13:18 'Yö‑ pö: «‑A ‑wɔn 'gü ka ‑zë ‑ka ka "tʋ 'to "gwënng 'a‑ ‑da 'ö ‑gban pëtamɛ ‑bha bha‑ 'klɔɔ‑ ‑bha.
MAT 13:19 'Mɛ 'ö Atanna ‑bha ‑gblüdëdhɛ bha‑ ‑dhiang ma 'ö ‑ziö ‑mɛ "tʋ 'gü ‑gɛn 'ka 'ö 'yaa‑ 'gü ma bha kö‑ mɛ ꞊në ꞊dhɛ zian ‑gloo ‑ta ‑dhɛ 'ö ‑mlüga ‑yö ‑pö 'gü bha‑ 'dhö. "Yina yaa ꞊ya nu 'yö Atanna ‑wʋ 'dhɛ 'ö‑ ‑da ‑mɛ zuë" "piʋ̈ bha‑ bho 'mü ꞊dhɛ ‑kɔ do 'ö ‑maa ‑nu 'wo ‑mlüga 'ö ꞊wɛnng zian ‑gloo "piʋ̈ bha‑ ‑bhö 'ka bha‑ 'dhö.
MAT 13:20 Mɛ 'dhɛ 'ö‑ ‑nu ‑bha ‑yö bhɔ ‑mlüga 'dhɛ 'ö ꞊wɛnng ‑gwë 'saa‑ "dhiʋ̈ bha‑ ‑bha bha wo ꞊në ꞊wa Atanna ‑wʋ ma ‑dhɛ 'ö‑ 'gü, 'yö 'wo to 'mü 'wo ‑wɩ ‑bha "yɩɩ 'ka,
MAT 13:21 "kɛɛ 'waa wo kwaa‑ ‑zü kö‑ yun ‑yö ziö‑ ‑nu 'gü, 'yö 'wɔn "gbɩɩ‑ ꞊ya ‑da ‑nu ‑ta Atanna ‑wʋ 'wo‑ ma bha‑ ‑wɔn 'gü, 'yö 'wo wo ‑kɔ ‑kan "dhiʋ̈.
MAT 13:22 'Yö‑ mɛ 'bha ‑nu ‑dɩ 'pö 'wo ‑kë ꞊dhɛ "glɛɛn ‑kpɔɔ 'ö tapë ga ‑yö ‑pö 'gü bha‑ 'dhö. 'Yö ꞊wa Atanna ‑wʋ ma 'wo 'dhang bho‑ "dhiʋ̈, "kɛɛ 'yö 'waa ‑ya yö ‑zë ‑wɔn zuën ‑ta. 'Yö ‑zʋ ‑gɔn "kpʋng ꞊taa ‑wɔn ‑nu 'ka ‑sü waa‑ ꞊naɔ ‑dhɔ ‑nu 'wo‑ ‑nu ‑gɔ 'gü ꞊see, 'yö‑ ‑nu ꞊trɔɔn 'yaa kë Atanna ‑bha.
MAT 13:23 "Kɛɛ 'yö‑ mɛ 'bha ‑nu ‑dɩ 'pö ‑a ‑nu ‑bha ‑yö ‑kë ꞊dhɛ ‑mlüga 'dhɛ 'ö ‑pö "sɛ ‑së 'gü bha‑ 'dhö. 'Yö ꞊wa Atanna ‑wʋ ma 'yö 'wo 'dhang bho‑ "dhiʋ̈, 'yö 'wo ꞊trɔɔn ‑kë ‑dhɛ 'yö‑ ‑nu ꞊trɔɔn ‑yö ‑wɔ zian ꞊gban 'ka ꞊dhɛ tapë 'dhɛ 'ö‑ ‑kpaaga do ga ‑yö ‑kë këng do "ɛɛn ‑kaɔng "saɔdo "ɛɛn ‑kaɔng ‑yaaga bha‑ 'dhö.»
MAT 13:24 ꞊Dhɛ 'ö ꞊yaa‑ pö "dhʋ̈, 'yö go mü 'ö "gwënng ‑dee 'bha ‑da ‑nu ‑dhɛ 'ö‑ pö: «Atanna ‑bha ‑gblüdëdhɛ bha‑ "sinma ‑yö ‑kë ꞊dhɛ mɛ do 'bha 'ö ö ‑bha ‑bhöpë ta ‑a 'dhö.
MAT 13:25 ꞊Dhɛ 'ö ꞊ya ‑bhöpë ta ö ‑gɔ ‑dhɛ bha‑ 'gü 'ö gbeng ꞊ya ꞊loo kö mɛ ꞊gbaan yi zë, 'yö‑ 'yaɔ‑ ‑yö nu 'yö blëë yaa ga ‑pɛn ‑a ‑gɔ 'bhlaadhɛ bha‑ 'gü 'yö‑ to 'yö ‑ziö.
MAT 13:26 ꞊Dhɛ 'ö tapë bha ꞊ya bhɔ 'ö ꞊ya ‑ya ‑wo 'gü ‑sü ‑bha, 'yö blëë bha yöö ‑dɩ 'pö 'ö ‑ya ‑da ‑sü ‑bha.
MAT 13:27 'Yö 'bhlaadhɛ bha‑ dëmɛ ‑bha yëkëmɛ ‑nu 'wo nu 'wo‑ pö‑ ‑dhɛ: «Yi dëmɛ, gun 'kwa‑ wo ya, ‑bhöpë ‑dɩ ‑slɔɔ 'aa mü 'i‑ bɔ i ‑bha ‑dhɛ ya 'gü 'nu ya "wɛ ‑ee? 'Yö blëë yaa 'kö ya ‑yö go 'mɛ 'yö bhɔ‑ 'gü "dhʋ̈?»
MAT 13:28 'Yö‑ ‑yɔ bɔ‑ ‑nu ‑gɔ 'ö‑ pö: «N 'yaɔ‑ ꞊në bhɔ bha.» 'Yö 'wo‑ ‑slëë ‑ta ‑kë 'pö‑ ‑gɔ 'wo‑ pö: ꞊Dhɛ 'ö "dhʋ̈ 'sa kö ‑bhö dɔ kö 'yi 'dho kö 'yi‑ 'gü bho kö 'yi‑ blëë yaa ‑nu bha‑ ꞊gban ‑wo "pɛɛpɛdhö ‑dhe.»
MAT 13:29 "Kɛɛ 'yö‑ pö‑ ‑nu ‑dhɛ: «‑Abin, ‑kaa 'to "dhʋ̈ "sɛnngdhö, ‑a ‑gɛn ‑mü ꞊dhɛ 'ka‑ pö 'ka‑ 'gü bho "tʋ̈ng ya‑ 'gü, ka ‑dho ‑bhöpë ‑gɔ ꞊nëng blëë ‑gɔ ‑bha 'ka‑ ‑wo 'ka.
MAT 13:30 "Kɛɛ ‑ka ka kwaa‑ ‑nu ‑zü kö ‑wo kpɛa‑ wo "kwëë kö tapë bha‑ "kan "tʋ̈ng ‑yö ꞊loo! ꞊Ya kë ꞊dhɛ ‑a "tʋ̈ng ꞊ya ꞊loo, 'yö 'a‑ pö‑ "kanmɛ ‑nu ‑dhɛ: «‑Ka blëë yaa ‑nu ‑wo ꞊kö kö 'ka‑ ‑nu ‑be kë, kö 'ka‑ ‑nu "gʋ̈! Kö 'ka ‑bhöpë ‑zë 'dhu n ‑gɔ ꞊gbaandhö.»
MAT 13:31 ꞊Dhɛ 'ö ꞊ya kë "dhʋ̈ 'yö "gwënng do 'bha ‑da 'zü‑ ‑nu ‑dhɛ 'ö‑ pö: «'Wɔn ‑taɔng ‑së 'ö ‑gban Atanna ‑bha ‑gblüdëdhɛ ‑bha bha ‑yö ‑bhɔ "dhü 'wo‑ seneve ‑kë bha‑ ga ꞊në‑ ‑bha. "Dhüga bha ꞊në mɛ do ‑ya sü yi do 'ka 'yö‑ ta ö ‑gɔ 'bhlaa.
MAT 13:32 Yö ꞊në tapë 'kö 'wo‑ ta ‑a ga ꞊gban "pɛpɛ suu 'dɛdɛ ‑sü 'ka, "kɛɛ ꞊ya kpɛa‑ ‑yö ‑ziö tapë ‑zë ꞊gban "pɛpɛ ‑ta, 'ö ꞊ya dɔ 'mü kö ‑maa ‑nu ‑wo wo 'kɔ ‑nu dɔ sië‑ kwɛɛ" ‑nu 'gü.»
MAT 13:33 'Yö "gwënng "wɛɛ 'bha ‑da 'zü‑ ‑nu ‑dhɛ 'ö‑ pö: «'Wɔn ‑taɔng ‑së 'ö ‑gban Atanna ‑bha ‑gblüdëdhɛ ‑bha bha ‑yö ‑kë ꞊dhɛ "sɛkɛ 'wo‑ ‑da 'bluubi ‑bha ꞊sië bha ꞊në‑ 'dhö. ꞊Waa‑ ‑bi 'në 'bha 'sü kö ‑wa ‑da 'bluubi 'gbɛ "piʋ̈ kö ‑wa "yi bho 'yö ‑da, 'yö‑ ‑bʋ̈ʋ̈ ‑yö 'pë 'wo‑ ‑ma 'gü bha‑ pa.»
MAT 13:34 Yesu ‑yö dhiang "pɛpɛ bha‑ ꞊gban ‑zë mɛ kpö bha‑ ‑nu ‑dhɛ "gwënng ꞊në‑ 'gü, 'yii‑ 'bha zë‑ ‑nu ‑dhɛ "wɛɛwɛɛ.
MAT 13:35 Kë "dhʋ̈ kö 'pë 'ö Atanna ‑wʋdhiʋ̈loomɛ do 'bha ‑ya pö yi 'bha 'ka bha‑ 'gü ‑wɔn ‑yö kë: «꞊Dhɛ a ‑dho dhiang zë‑ ‑nu ‑dhɛ "gwënng ꞊në‑ 'gü kö pë ‑nu 'wo ‑bin ‑sü 'ka 'ö go‑ 'ka "kpʋngtaadhɛ kë ‑yi ‑bha 'ö nu 'ö zun‑ 'ka ꞊dɛɛ ‑bha bha 'a‑ ‑ta "pʋ‑ ‑nu ‑dhɛ.»
MAT 13:36 ꞊Dhɛ 'ö ꞊ya kë "dhʋ̈ 'yö Yesu ‑yö ‑kan mɛ kpö bha‑ ‑nu ‑bha 'yö dho 'kɔɔdhö. ꞊Dhɛ 'ö ꞊wa 'dho ꞊wa ‑wo 'kɔɔdhö 'yö‑ ‑bha ꞊klang ‑nu 'wo ꞊yɔɔn‑ "sɔɔ 'yö 'wo‑ pö‑ ‑dhɛ: «"Gwënng 'i ‑da ꞊diö 'ö ‑gban blëë yaa 'ö gɔndë 'yaɔ‑ ‑ya ta‑ ‑gɔ 'bhlaa bha‑ ‑bha bha‑ 'klɔɔ‑ pö yi ‑dhɛ!»
MAT 13:37 'Yö Yesu ‑ya pö‑ ‑nu ‑dhɛ 'ö‑ pö: «Mang Mɛgbömɛ ma ꞊në 'a ‑bhöpë bha‑ tamɛ 'ka.
MAT 13:38 "Kpʋngtaadhɛ ꞊në ꞊dhɛ 'bhlaadhɛ 'a tapë bha ta‑ 'gü bha‑ 'dhö, 'yö mɛ ꞊wa kë Atanna ‑bha ‑gblüdëdhɛ 'gü ‑mɛ ‑nu 'ka bha 'wo ꞊dhɛ 'pö ꞊dhɛ tapë bha‑ 'dhö, 'yö 'mɛ 'wo Sɔtraan ‑bha ‑gɔ 'gü bha 'wo ꞊dhɛ 'pö ꞊dhɛ blëë yaa bha‑ 'dhö.
MAT 13:39 'Yö‑ 'yaɔ‑ 'ö blëë yaa bha‑ ta "dhʋ̈ bha, 'yö ‑kë ‑a Sɔtraan ꞊dede bha‑ 'ka, ‑a ‑bhöpë "kan "tʋ̈ng bha yö ‑mü "kpʋngtaadhɛ yën "tʋ̈ng ꞊në‑ 'ka. Atanna ‑bha "kië ‑nu bha 'pö ꞊në 'wo ‑bhöpë bha‑ "kanmɛ ‑nu 'ka.
MAT 13:40 "Kpʋngtaadhɛ "dhiʋ̈toyi 'ka ‑kɔ do 'wo blëë yaa bha ‑wo 'ka 'wo‑ ‑zuö pɛng 'gü bha ‑yö ‑dho kë 'pö "dhʋ̈.
MAT 13:41 ‑A 'yi bha‑ 'ka, mang Mɛgbömɛ a ‑dho Atanna ‑bha "kië ‑nu 'wo ‑ya ‑sü 'ka ma ‑ya 'gü bha‑ ‑nu bɔ 'ö 'wo 'mɛ 'wo mɛ ‑nu ‑pö sië 'wɔn yaa 'gü bha waa‑ 'wɔnyaakëmɛ ‑nu "pɛpɛ ꞊gban bho ma ‑gblüdëdhɛkëdhɛ 'gü,
MAT 13:42 'ö 'wo‑ ‑nu ‑zuö pɛng 'gü, ‑wo ‑dho ‑wëë ‑gbʋ bɔ ‑dhɛ bha ꞊në‑ 'gü 'yö 'wo wo "sɔn zun‑ 'ka 'ko "dhiʋ̈ "kʋ̈ükʋ̈üdhö.
MAT 13:43 "Kɛɛ mɛ 'dhɛ 'kö 'wo to Atanna dhɔɔbhaa ‑zian ‑ta bha, ‑a ‑nu 'bhü ‑dho bhɔ ꞊dhɛ 'yënng‑ 'bhü 'dhö bhɔ ꞊sië ‑kɔ 'ö‑ 'gü bha‑ 'dhö ‑a ‑nu Dë ‑bha ‑gblüdëdhɛkëdhɛ bha‑ 'gü.» 'Yö‑ pö‑ ‑nu ‑dhɛ: «'Wɔn 'gü ma ‑tʋ 'dhö 'mɛ 'ö i ‑gɔ ‑bha kö yö ꞊në 'a‑ pö bha (i "tʋ 'to‑ ‑bha ‑së 'ka 'kii‑ 'gü ma).»
MAT 13:44 'Yö go mü 'ö‑ pö: «‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑bha ‑gblüdëdhɛ bha ‑yö ꞊dhɛ ꞊naɔ 'ö ‑bin ‑sü 'ka 'bhlaadhɛ do 'bha 'gü ꞊në‑ 'dhö. 'Mɛ ꞊yaa‑ yö, 'yaa ö "dhi ‑wo ‑ta mɛ 'bha ‑dhɛ, "kɛɛ ‑a ‑dhi ‑dhɛ ‑kɔ yaa bha‑ ‑wɔn 'gü, ‑yö 'dho ꞊në wo 'yö ö ꞊slɔɔpë ꞊gban "pɛpɛ "dhɔɔ dɔ 'yö nu 'yö 'bhlaadhɛ bha‑ dhɔ.»
MAT 13:45 'Yö‑ pö: «‑A ‑gɛn ‑mü 'zü ꞊dhɛ Atanna ‑bha ‑gblüdëdhɛ bha ‑yö ꞊dhɛ ‑zlɔɔ ꞊bhlëësü "dhɔɔdɔmɛ 'ö‑ mɔɔ‑ sië ꞊në‑ 'dhö. ꞊Yaa‑ 'dhɛ 'ö‑ sɔng 'dhö "gbɩɩ‑ ‑a yö,
MAT 13:46 'yö dho 'yö ö ꞊kwɛngpë ꞊gban "dhɔɔ dɔ 'yö nu 'yö‑ dhɔ.»
MAT 13:47 'Yö‑ pö: «‑A pö 'a‑ wo "dhʋ̈ bha‑ ‑gɛn 'bha ‑mü 'zü ꞊dhɛ Atanna ‑bha ‑gblüdëdhɛ bha ‑yö ꞊dhɛ "nuu 'wo‑ ‑zuö "yi ꞊gblü 'kpii‑ ‑ta 'ö 'yuʋ̈‑ ꞊gban "pɛpɛ suu 'do 'do sü bha ꞊në‑ 'dhö.
MAT 13:48 ꞊Ya kë ꞊dhɛ ꞊waa‑ ‑zuö bha‑ wo "dhʋ̈ ꞊ya pa, 'yö‑ "nuuzuömɛ ‑nu 'wo‑ ‑gan 'wo dho‑ 'ka "kpʋng ꞊taa 'yö 'wo‑ ‑zë 'gü ‑kë, 'yö‑ 'dhɛ 'ö‑ ‑zun "dhiʋ̈ ‑bhlɔɔ 'yaa 'dhö bha 'wo‑ ꞊wɛnng "yi ꞊bhaa.
MAT 13:49 ‑Yö ‑dho kë ‑kɔ do bha ꞊në‑ 'gü "kpʋngtaadhɛ yën ‑yi 'ka. Atanna ‑bha "kië ‑nu ‑dho nu 'ö 'wo 'wɔnsëkëmɛ ‑nu waa‑ 'wɔnyaakëmɛ ‑nu ‑kan 'kwëë‑.
MAT 13:50 'Yö 'wo 'wɔnyaakëmɛ ‑nu ‑da pɛng 'gü. ‑Dhɛ bha ꞊në 'wo dho ‑wëë ‑gbʋ bɔ‑ 'gü 'ö‑ ‑nu "sɔn ‑yö zun‑ 'ka 'ko "dhiʋ̈ "kʋ̈ükʋ̈üdhö.»
MAT 13:51 'Yö Yesu ‑ya ‑nu dhɛɛ" kpɔ 'ö‑ pö: «'Ka‑ 'gü ma 'kpakpadhö ‑ee? 'Yö 'wo‑ pö: «꞊Iin, 'ya‑ 'gü ma.»
MAT 13:52 'Yö‑ pö 'zü‑ ‑nu ‑dhɛ ‑deewo ꞊dhɛ: «‑A ‑kë "dhʋ̈ ‑sü 'gü, 'tɔnggɔmɛ "pɛpɛ 'wo 'wɔn 'ö ‑gban Atanna ‑bha ‑gblüdëdhɛ ‑bha bha‑ dɔ 'kpakpadhö bha, ‑wo ꞊dhɛ ꞊naɔmɛ do 'ö pë ‑dee waa‑ pë zizi ‑nu sü ö ‑bha ꞊naɔ 'gü 'ö‑ 'gü ꞊gblü mɛ ‑nu ‑ta ꞊në‑ 'dhö.»
MAT 13:53 ꞊Dhɛ 'ö Yesu ꞊ya ö bo "gwënng ‑nu bha‑ ‑nu 'klɔɔ‑ ‑pö ‑nu ‑dhɛ ‑sü 'ka, 'yö go ‑dhɛ 'dhɛ bha‑ 'gü,
MAT 13:54 'yö dho 'pödhɛ 'dhɛ 'ö 'nëdhɛ ‑kë 'gü bha‑ 'gü, 'yö dho Zuifö ‑nu ‑bha ‑yakwëëkëgükɔ 'gü 'yö ‑ya mɛ draan‑ ‑sü ‑bha mü. 'Yö‑ 'wɔn ‑yö mɛ "pɛpɛ 'wo gun 'mü ‑a ‑nu ꞊gban kɔn, 'yö 'wo ‑ya pö ‑sü ‑bha: «'Wɔndɔdhe suu 'kö ya ‑yö ‑go ‑a 'ka 'mɛ? "Dhabhliwɔn ‑nu 'ö‑ kë sië ya ‑ya ‑nu ‑draan 'mɛ?»
MAT 13:55 "Ɛɛn "dhüyënmɛ gbö (do "wɛ 'ö mɛ ꞊gban 'kwa‑ dɔ) ya 'yaa ‑mü ‑ee? "Ɛɛn Madhi gbö ya 'yaa kë ꞊ni ‑ee? "Ɛɛn ‑a 'zlaabɔ ‑nu 'waa ‑mü Zakö, Zosɛfu, Simɔ waa‑ Zudë ‑nu 'ka ‑ee?
MAT 13:56 "Ɛɛn ‑a 'zlaa‑ dhong ‑nu 'waa mü 'wo kwa "piʋ̈ ‑dhɛ ya‑ 'gü ya ‑ee? 'Wɔn "gblʋ̈gblʋ̈ ‑nu 'ö‑ kë sië ya ‑yö ‑go kë ‑faan 'ka 'mɛ 'sa?»
MAT 13:57 ‑A ‑kë "dhʋ̈ ‑sü ‑wɔn 'gü 'wii 'dhang bho Yesu "dhiʋ̈. Yesu ‑ya ‑pö yö ꞊në‑ ‑wɔn 'gü ‑a ‑nu ‑dhɛ 'ö‑ pö: «‑Wo Atanna ‑wʋdhiʋ̈loomɛ ꞊bhlëë ‑ya 'pödhɛ "wɛɛ ꞊gban 'gü, "kɛɛ 'waa‑ ꞊bhlëë ‑ya ‑a ‑dɩ ‑gɔ 'pödhɛ waa‑ ‑dɩ ‑gɔ 'kɔɔdhɛ ꞊në‑ 'gü tongtongdhö.»
MAT 13:58 'Mɛ 'wo bha‑ ‑nu ‑bha gɔɔgbɩɩdhɛ 'ö 'dhang ‑bho Yesu "dhiʋ̈ ‑sü 'yaa gun‑ ‑nu ‑gɔ bha‑ ‑wɔn 'gü 'yii "dhabhliwɔn 'gbɛ 'bha kë mü.
MAT 14:1 ‑A "tʋ̈ng bha‑ 'gü kö Edhodö ꞊në ‑gblüdë 'ka Gadhidhe ‑sɛ 'gü, 'yö Yesu ‑wɔn ma.
MAT 14:2 'Yö‑ pö ö ‑bha gwëëzë ‑nu ‑dhɛ ꞊dhɛ Zan Mɛzumɛ ꞊në ꞊ya 'go ga 'gü 'ö ꞊ya ‑bö. Yö ꞊në‑ ‑wɔn 'gü 'yö "sɩ 'dhö‑ ‑dhɛ 'yö "dhabhliwɔn ‑nu kë sië bha.
MAT 14:3 ‑A pö 'ö‑ wo "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö ꞊yaa‑ pö 'nu ö ‑bha gwëëzë ‑nu bha‑ ‑nu ‑dhɛ ꞊dhɛ ‑wo Zan kun kö ‑wa ‑da ‑kaso 'gü. Kö ꞊waa‑ 'kun ꞊waa‑ ‑lö ꞊waa‑ ‑da ‑kaso 'gü. 'Ö gun "dhʋ̈ kö Edhodö ꞊ya ö dheebhang Fidhipö ‑bha dhebhɔ 'wo‑ ‑dhɛ Edhodiadö bha‑ 'sü‑ ‑gɔ.
MAT 14:4 Kö Zan ꞊yaa‑ pö‑ ‑dhɛ ꞊dhɛ 'yaa ‑së kö ‑a dheebhang ‑bha dhebhɔ ‑zë ‑yö ‑ya ‑gɔ.
MAT 14:5 Kö ‑a pö 'ö Zan ‑ya wo "dhʋ̈ bha ꞊ya ꞊sië Edhodö ‑dhɛ kö ‑ya "piʋ̈ ꞊dhɛ 'ö‑ zë, "kɛɛ kö ‑yö "suʋ̈ sië Zuifö ‑nu ‑gɔ, ‑a ‑gɛn ‑mü ꞊dhɛ kö ‑a ‑nu ꞊gban "pɛpɛ ‑wo Zan ‑dɔ Atanna ‑wʋdhiʋ̈loomɛ 'ka.
MAT 14:6 "Kɛɛ ꞊dhɛ 'ö Edhodö bhɔ "tʋ̈ng bha‑ trookëyi ꞊ya ꞊loo, 'ö Edhodiadö 'dhu 'dhö "tan kë sië 'mɛ 'wo nu troo ‑ta bha‑ ‑nu ‑kuu "dhiʋ̈, 'yö ‑dhi Edhodö ‑dhɛ yaa 'gü yaa wo.
MAT 14:7 'Yö ‑sö ‑bhö 'në bha‑ ‑dhɛ 'ö‑ pö: «Pë "ʋʋ pë 'ö dho‑ ‑wɔn pö ö ‑dhɛ ö ‑dho ‑a nu‑ ‑dhɛ.
MAT 14:8 'Ö "dhʋ̈ bha kö 'në bha‑ dhe ꞊ya ‑wʋ 'kpɔ‑ ‑bha kö ꞊yaa‑ pö ‑yö Zan Mɛzumɛ ‑gɔ ꞊në ‑wɔn pö. 'Yö 'në bha 'ö dɔ ö dhe ‑wʋ bha‑ ‑ta 'yö‑ pö Edhodö ‑dhɛ ‑yö Zan ‑gɔ ‑ya 'tɛa‑ do 'gü kö ‑yö ö gba‑ 'ka.
MAT 14:9 ‑A pö 'ö 'në bha ‑ya wo "dhʋ̈ bha 'yii dhi ‑gblüdë Edhodö ‑dhɛ, "kɛɛ ꞊dhɛ 'ö ‑kë ꞊dhɛ ꞊ya "plüün bho 'mɛ 'ö‑ ‑nu ‑dhɛ troo ‑ta bha‑ ‑nu wëëdhö 'ö ꞊ya ‑sö ‑nu ꞊gban ‑bhö bha‑ ‑wɔn 'gü, 'yö‑ pö ö ‑bha gwëë" ‑nu ‑dhɛ ꞊dhɛ ‑wo 'dho kö ‑wo nu Zan Mɛzumɛ ‑gɔ 'ka‑ ‑dhɛ.
MAT 14:10 'Yö mɛ do bɔ kö ‑yö 'dho Zan ‑gɔ "kan ‑dhɛ 'gü ‑kaso 'kɔ 'gü.
MAT 14:11 'Yö 'mɛ bha 'ö dho 'yö Zan ‑gɔ ‑kan 'yö ‑da 'tɛa‑ do 'gü 'yö nu‑ 'ka 'nëdhiëngnë bha‑ ‑dhɛ, 'yö dho‑ 'ka ö dhe ‑dhɛ.
MAT 14:12 'Yö Zan ‑bha ꞊klangdhiʋ̈ ‑nu 'wo nu 'wo‑ ꞊gee sü 'wo dho‑ 'ka 'wo‑ bun bho, 'yö 'wo dho 'wo ‑ziö ‑gɛn 'gü Yesu ‑dhɛ.
MAT 14:13 ꞊Dhɛ 'ö Yesu ꞊ya 'wɔn bha‑ ma, 'yö ‑da "kplagɔnë 'gü ö do 'ka 'yö dho ‑dhɛ "dhiʋ̈ ꞊nëng ‑dhɛ 'bha 'gü. "Kɛɛ ꞊dhɛ 'ö mɛ kpö 'gbɛ ꞊waa‑ 'wɔn ‑dɔ, 'yö 'wo go 'pö‑ ‑nu 'gü 'wo ‑ta wo ‑gɛn ‑ta "yi "piʋ̈ "yɛɛdhö 'wo dho‑ "gblʋʋ ꞊keng‑.
MAT 14:14 Yesu ‑bha ‑go "kplagɔnë 'gü ‑sü kö ‑yö zun "sia‑ kö mɛ "dhaa ‑yö ꞊klëën ‑sü 'ka ‑dhɛ bha‑ 'gü, 'yö‑ ‑nu ‑wëë ‑ya ‑kë, 'yö "yuëdhi ‑nu "pɛpɛ 'wo gun‑ ‑nu kpö 'gü mü bha‑ ‑nu ‑kë "klʋ̈ʋ̈klʋ̈.
MAT 14:15 ꞊Dhɛ 'ö dhɔng ꞊ya ‑da, 'yö‑ ‑bha ꞊klang ‑nu 'wo ꞊yɔɔn‑ "sɔɔ 'wo‑ pö‑ ‑dhɛ: «"Bin ꞊ya 'ma ꞊ya bo, "kɛɛ 'sa ‑dhɛ 'kwa‑ ‑bha ya ‑dhɛ "dhiʋ̈ ꞊nëng ‑dhɛ ‑mü, ‑bhöpë 'bha 'yaa ꞊slɔɔ mü, ꞊dhɛ 'ö "dhʋ̈ ‑bhö ‑a pö 'mɛ 'wo ya‑ ‑nu ‑dhɛ ‑wo 'dho 'pö‑ ‑nu 'gü kö ‑wo woo‑ ‑bhöpë ‑nu mɔɔ‑!»
MAT 14:16 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Aa bhoo, ‑a ‑dhɛ 'yaa‑ ‑bha kö ‑wo 'dho "dhʋ̈, ka ꞊në ‑kaa ‑nu gba ‑bhöpë 'ka!»
MAT 14:17 "Kɛɛ 'yö 'wo‑ ‑yɔ bɔ‑ ‑gɔ 'wo‑ pö: «‑Bhöpë 'kö ꞊ya 'to yi ‑gɔ yö ꞊ya 'to 'bluu‑ bhɛ "sɔɔdhu waa‑ 'yuʋ̈‑ ꞊plɛ.»
MAT 14:18 'Yö‑ pö‑ ‑nu ‑dhɛ: «‑Ka nu‑ 'ka n ‑dhɛ yö!»
MAT 14:19 ꞊Dhɛ 'ö ꞊ya kë "dhʋ̈ 'yö‑ pö 'mɛ 'wo bha‑ ‑nu ‑dhɛ ‑wo ‑ya 'kpaa‑ ‑ta. ꞊Dhɛ 'ö‑ ‑nu ꞊gban "pɛpɛ ꞊wa 'yaanu, 'yö ö ‑kɔ ‑da 'bluu‑ bhɛ "sɔɔdhu waa‑ 'yuʋ̈‑ ꞊plɛ bha‑ 'gü, 'yö ö "yan "dhiʋ̈ ꞊wlü dhang‑ 'gü 'yö ꞊bhɛa Atanna ‑dhɛ 'yö‑ nuɛ" bho 'yö‑ "kplükplü bho 'yö‑ nu ö ‑bha ꞊klang ‑nu ‑dhɛ, 'yö 'wo‑ 'gü ‑gblü 'mɛ 'wo bha‑ ‑nu ‑ta.
MAT 14:20 'Yö 'mɛ 'wo bha 'wo pë ‑bhö 'wo kën, 'yö ‑bhöpë 'bha ‑yö to, 'yö‑ 'dhɛ 'ö to bha 'wo‑ ꞊loo 'ko ‑ta, 'yö ‑kë 'bluu‑ "kplü töö ‑yan ‑kaɔng do ga ꞊plɛ 'ka.
MAT 14:21 'Mɛ 'ö Yesu ‑ya ‑nu "dhi gba "dhʋ̈ bha‑ gɔɔn‑ ‑nu ‑dɩ ‑slɔɔ kö 'wii 'në ‑nu waa‑ dhong ‑nu dhʋng, ‑wo ‑mɔɔ mɛ "gblü "sɔɔdhu ‑nu ‑bha.»
MAT 14:22 ‑A ‑nu ‑bö pë ‑bhö ‑sü 'ka ‑sü oo, 'yö Yesu ‑yö to 'ö‑ pö ö ‑bha ꞊klang ‑nu ‑dhɛ ‑wo ‑da "kplagɔnë 'gü "vaandhö kö ‑wo "yi "kan, "sanni ö ‑bo ‑wʋ ‑kpɔ 'mɛ bha‑ ‑nu ‑bha ‑sü kö ‑wo dho wo ‑gɔ 'pö‑ ‑nu 'gü ‑sü ꞊zinng 'gü.
MAT 14:23 ꞊Dhɛ 'ö ꞊ya bo ö ‑wʋ ‑kpɔ mɛ kpö bha‑ ‑nu ‑bha ‑sü 'ka, 'yö ‑da ‑tɔn 'në 'bha bha‑ ꞊gbin‑ kö ‑yö bhɛa" Atanna ‑dhɛ 'mü. ‑Yö ‑to ‑tɔn ꞊gbin‑ mü ö do 'ka 'yö "bin ‑yö ma.
MAT 14:24 "Tʋ̈ng 'ö kë sië‑ 'ka "dhʋ̈ bha kö‑ ‑bha ꞊klang ‑nu ‑zë ꞊wa ‑gɛn ‑yan kpö "ta sü "yi ‑ta, "kɛɛ kö "tɛɛ "gbɩɩ‑ ‑yö ziö sië, 'ö go‑ ‑nu 'dho ‑zian 'ka, kö "yi ‑yö ꞊bang "bang kë sië 'ö "yi kpö ‑nu 'wo ‑ma "yitagɔ bha‑ ‑bha.
MAT 14:25 ꞊Dhɛ 'ö ‑dhɛkpaɔ "dhiʋ̈ ꞊ya ꞊loo, 'wo dho ‑dhɛ ‑ga kö Yesu ‑yö "ta sië "yi ‑ta "wɛ tuaa ꞊tuaa tuaadhö 'ö nu‑ ‑nu ‑zian 'ka.
MAT 14:26 "Kɛɛ ꞊dhɛ 'wo wo "yan ‑kpan ‑bha kö ‑yö nu sië ꞊dhɛ ‑kɔ bha‑ 'dhö "yi ‑ta, 'yö "suʋ̈ 'dhö ‑da ‑nu 'gü, 'yö 'wo ‑ya "gbla ‑sü ‑bha 'wo‑ pö: «Mɛ ‑zii ‑mü!» 'Yö 'wo ‑ya "ta bhoo ‑da ‑sü ‑bha.
MAT 14:27 "Kɛɛ 'yö Yesu ‑yö to 'ö‑ pö‑ ‑nu ‑dhɛ: «‑Ka ka zuë" kë ‑sɛa, 'ka 'dho "suʋ̈, ma ‑mü!»
MAT 14:28 'Yö Piɛdhö ‑ya pö‑ ‑dhɛ: «N Dëmɛ, ꞊ya kë i 'ka ꞊dedewo tɛan‑ 'ka kö ‑bhö dɔ kö mang ‑dɩ 'pö 'a "ta "yi ‑ta ꞊dhɛ i 'dhö kö 'a nu i ‑dhɛ 'gü!»
MAT 14:29 'Yö Yesu ‑ya pö‑ ‑dhɛ: «‑Bhö nu!» 'Yö Piɛdhö ‑yö go "yitagɔ 'gü 'yö ‑da "yi ‑ta 'yö gun 'dho sië Yesu "piʋ̈.
MAT 14:30 "Kɛɛ 'ö 'dho sië "dhʋ̈ kö "tɛɛ ‑yö ziö sië "gbɩɩ‑ 'ka "dhʋ̈ ‑kpɛawo, 'yö "suʋ̈ 'dhö ‑da Piɛdhö 'gü, 'yö ‑ya 'pö ‑dho "yi ꞊wlöö ‑sü ‑bha, "kɛɛ 'yö ꞊gbla 'ö‑ pö: «N Dëmɛ, ‑bhö n dha!»
MAT 14:31 'Yö to 'yö Yesu ‑yö ö ‑gbe 'gü ‑pʋ ‑a "tʋ̈ng 'ka 'yö‑ sën‑ ‑kɔ ‑bha 'yö‑ pö‑ ‑dhɛ: «"Eke, i ‑bha ‑zʋ ‑yö n ‑dhɛ ‑sü ‑yö 'dɛdɛ ꞊tɔn ‑kɛɛ, Piɛdhö! ‑Më ꞊në ‑kë 'yö 'i 'zëë‑ 'zë ‑kë?»
MAT 14:32 ꞊Dhɛ 'ö‑ ‑nu ꞊gban ꞊plɛ ꞊wa ‑da "yitagɔ 'gü, 'yö "tɛɛ ‑yö bo ziö ‑sü 'ka.
MAT 14:33 'Yö‑ ‑bha ꞊klang ‑nu 'dhɛ 'wo to "yitagɔ 'gü 'wo zun‑ ‑dhɛ wo kpiö 'gü 'wo‑ pö: «'Aa, yi Dëmɛ, Atanna Gbö ‑mü i 'ka ꞊dedewo tɛan‑ 'ka!»
MAT 14:34 ꞊Dhɛ 'ö ꞊wa "yi bha‑ "kan ꞊wa zun "sia‑ Zenezadhe ‑sɛ 'gü,
MAT 14:35 'mɛ 'wo "pɛan bha‑ "piʋ̈ ‑wo ‑to ‑mü 'wo Yesu dɔ, 'yö 'wo ‑ya ‑a nu ‑wɔn ‑dhɛa "dhiʋ̈ bho ‑sü ‑bha "sɛ 'gü ‑dhɛ ꞊gban 'gü 'yö 'wo nu woo‑ "yuëdhi ‑nu 'ka‑ ‑dhɛ.
MAT 14:36 'Yö 'wo ꞊bhɛa‑ ‑dhɛ kö "yuëdhi ‑nu bha ‑wo wo ‑kɔ "fiëfiëdë ‑zë 'pa‑ ‑bha ‑sɔ "zɔ 'ka (kë "dhʋ̈ kö ‑wo dha). 'Yö 'mɛ 'wo wo ‑kɔ pa‑ ‑dasɔ "zɔ 'ka "dhʋ̈ bha‑ ꞊gban "pɛpɛ 'wo ‑kë "klʋ̈ʋ̈klʋ̈.
MAT 15:1 ꞊Dhɛ 'ö ꞊ya kë "dhʋ̈ 'yö Fadhiziɛn ‑nu waa‑ Zuifö ‑nu ‑bha 'tɔnggɔmɛ ‑nu 'wo go Zedhizadhɛmö 'wo nu Yesu "piʋ̈, 'yö 'wo‑ dhɛɛ" kpɔ 'wo‑ pö:
MAT 15:2 «‑Më ꞊në ‑kë 'yö 'wluu‑ 'ö kwa "bhɛma ‑nu ‑wa ‑ya bha, i ‑bha ꞊klang ‑nu 'waa‑ ‑yaki ‑ya? ‑A ‑gɛn ‑mü ꞊dhɛ ꞊waa‑ pö 'wo pë ‑bhö 'waa wo ‑kɔ "zu ꞊dhɛ ‑kɔ 'kwa‑ ‑kë 'ka kwa wɔ ‑kɔ 'gü ‑a 'dhö.»
MAT 15:3 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «Kaa ‑dɩ 'pö ꞊wɛ, ‑më ꞊në ‑kë 'yö 'kaa Atanna ‑bha 'tɔng‑ ‑nu ‑yaki ‑ya ka ‑bha 'wluu‑ ‑nu 'wɔn 'gü?
MAT 15:4 ‑A ‑gɛn ‑mü ꞊dhɛ Atanna ‑ya ‑pö 'ö‑ pö: ‹‑Bhö i dë waa‑ i dhe ‑a ‑nu ꞊bhlëë ‑ya› ꞊ya 'go mü 'zü: ‹'Mɛ 'ö ꞊ya dhiang yaa zë ö 'kpɔmɛ ‑nu ‑bha ‑wa ‑mɛ zë.›
MAT 15:5 "Kɛɛ 'yö ka ‑zë 'ka mɛ ‑nu ꞊draan 'ka‑ pö: ‹'Në ꞊yaa‑ pö ö dë waa‑ ö dhe ‑a ‑nu ‑dhɛ ꞊dhɛ: 'Pë 'ö gun n "piʋ̈ ꞊dhɛ 'a ka ‑ta 'kun‑ 'ka bha 'ma‑ ‑ya Atanna ‑bha 'ka› kö‑ ‑mɛ ‑ya ‑kë ‑së ꞊naa bha, kö‑ 'kpɔmɛ ‑nu ‑bha tëë 'yaa‑ ‑bha.
MAT 15:6 'Sa 'ka‑ kë "dhʋ̈ kö ka Atanna ‑wʋ 'ma ꞊në 'wo sië ‑zukplü ‑bha kaa‑ 'wluu‑ ‑nu ‑wɔn 'gü bha.
MAT 15:7 ꞊Flümɛ ‑nu! ꞊Ya kë "dhʋ̈ kö tɛanwɔn ‑gun Ezai "piʋ̈ Atanna ‑wʋ 'ö‑ pö ka ‑dhɛ yi 'bha 'ka 'ö‑ pö ꞊dhɛ:
MAT 15:8 ‹Atanna ‑ya ‑pö: "Sɛ ya‑ 'gü ‑mɛ ‑nu 'wo ya ‑wo n ‑dhiang zë wo ‑bɛn "dhiʋ̈ "wɛɛwɛɛ, n ‑dhɔ 'yaa‑ ‑nu zuë" ‑zë ‑bha,
MAT 15:9 ‑a ‑wɔn 'gü n ‑dhɔ 'wo‑ ‑kë bha ‑wa ‑kë "wɛɛwɛɛ; ‑a ‑gɛn ‑mü ꞊dhɛ ‑wo mɛ ‑nu ‑draan 'wluu‑ ‑nu 'wo go mɛ "bhɩɩ‑ ‑nu 'gü bha ꞊në‑ 'ka ꞊dhɛ 'pë 'ö go ma ꞊në n 'gü ‑a 'dhö» bha‑ 'gü.›»
MAT 15:10 ꞊Dhɛ 'ö Yesu ꞊ya ö bo‑ ‑pö ‑nu ‑dhɛ "dhʋ̈ ‑sü 'ka, 'yö mɛ kpö 'wo gun 'mü bha‑ ‑nu ‑dhɛ 'yö‑ pö‑ ‑nu ‑dhɛ: «‑Ka ka "tʋ 'to kö dhiang 'ö maa zë bha 'ka‑ 'gü ma ‑së 'ka!»
MAT 15:11 'Yö‑ pö‑ ‑nu ‑dhɛ: «'Pë 'ö ‑da mɛ "dhi 'gü yö ‑zë 'yaa mɛ kë ‑dhiisü Atanna wëëdhö, "kɛɛ 'pë 'ö go mɛ "dhi bha ꞊në mɛ ‑kë ‑dhiisü.»
MAT 15:12 ꞊Dhɛ 'ö ꞊yaa‑ pö "dhʋ̈, 'yö‑ ‑bha ꞊klang ‑nu 'wo ꞊yɔɔn‑ "sɔɔ 'yö 'wo‑ pö‑ ‑dhɛ: «'Bhaa‑ 'wɔn ꞊në‑ dɔ ꞊dhɛ ‑wʋ ‑nu 'i‑ pö sië bha ‑yö "yɛ sië Fadhiziɛn ‑nu ‑bha ‑ee?»
MAT 15:13 'Yö‑ ‑yɔ bɔ‑ ‑nu ‑gɔ 'ö‑ pö: «Pë "pɛpɛ 'dhɛ 'kö ‑kë ꞊dhɛ n Dë 'ö ‑ya ‑sü 'ka dhang‑ 'gü 'yii‑ ta, ‑a ꞊gban "pɛpɛ ‑dho bho "sɛɛ.
MAT 15:14 ‑Kaa ‑nu 'to "dhʋ̈. "Yanwlümɛ ‑nu ꞊në 'wo zian bho sië "yanwlümɛ ‑nu 'ka bha! "Kɛɛ "yanwlümɛ ‑zë ꞊ya zian bho "yanwlümɛ 'ka, ꞊wa 'dho ‑a ‑naa ‑mü ‑a ‑nu ‑pö ‑gblüga 'gü ‑sü 'ka.»
MAT 15:15 ꞊Dhɛ ꞊yaa‑ pö "dhʋ̈, 'yö Piɛdhö ‑ya pö‑ ‑dhɛ 'ö‑ pö: «‑Bhö "gwënng 'i‑ ‑da bha‑ ‑ta "pʋ yi ‑dhɛ!»
MAT 15:16 'Yö Yesu ‑ya pö: «Kaa ‑dɩ 'pö 'kii 'wɔn 'gü ma ꞊në wo ꞊kö ‑ee?
MAT 15:17 "Ɛɛn 'kaa‑ 'wɔn ꞊në‑ dɔ ꞊dhɛ pë 'kö mɛ ‑ya ‑bhö bha yö ‑zë ‑yö ‑bɔ mɛ "gblʋ̈ʋ̈‑ 'ö ‑wo zang ‑ta,
MAT 15:18 "kɛɛ ‑wʋ 'ö go mɛ zuë" 'gü 'ö bɔ mɛ "dhi bha ꞊në mɛ ‑kë ‑dhiisü Atanna wëëdhö ‑ee? A‑ ‑pö ka ‑dhɛ ꞊dhɛ mɛ ‑wʋ bha ꞊në mɛ ‑dhii kun Atanna wëëdhö.
MAT 15:19 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑dhɛ 'ö mɛ zuë" "piʋ̈ bha ꞊në ‑zʋgɔndhe yaya ‑nu 'wo go‑ 'gü, 'yö 'wo‑ ‑mɛ zü ꞊yɔɔn mɛ zë ‑sü ‑nu oo, ‑da dhe "piʋ̈ ‑sü "ɛɛn ‑ziö mɛ ‑nu ‑bha gɔn ꞊keng‑ ‑sü ‑nu oo, ‑zua zë ‑sü ‑nu oo, ꞊kwaan bho ‑sü ‑nu, ꞊sua kë ‑sü ‑nu waa‑ mɛ ‑nu ‑dhiang yaa zë ‑sü ‑nu ‑bha.
MAT 15:20 Pë ‑nu 'wo mɛ ‑dhii kun ꞊në 'wo bha, "kɛɛ pë ‑bhö ‑sü 'kö kö 'wii wo ‑kɔ "zu ꞊dhɛ ‑kɔ 'ö kwa "bhɛma ‑nu ‑wa 'wluu‑ ‑ya 'ka ‑a 'dhö bha yö ‑zë 'yaa mɛ ‑dhii 'kun.»
MAT 15:21 ꞊Dhɛ 'ö ꞊ya kë "dhʋ̈ 'yö Yesu ‑yö go ‑dhɛ bha‑ 'gü 'yö dho Tii ‑pö waa‑ Sidɔn ‑pö ‑nu 'gü waa‑ ‑bha ꞊klang ‑nu 'dhö.
MAT 15:22 ꞊Dhɛ 'ö ꞊wa ꞊loo mü, 'yö dhebhɔnë do 'bha 'ö 'yaa Zuifö 'ka 'ö go Kanaa ‑sɛ 'gü 'ö ‑ya ‑sü 'ka "sɛ bha‑ 'gü bha 'ö nu "gbla ‑sü 'ka "gbʋ 'ka Yesu "piʋ̈ 'ö‑ pö: «N Dëmɛ, Davi Gbö, ‑bhö "ta n ‑dhɛ n ‑wëë ‑bha ‑dhe! "Yina yaa 'ö n 'dhu 'gü ya ‑ya ‑wëë ‑dhɛ wo sië "gbɩɩ‑ ‑wa!»
MAT 15:23 "Kɛɛ 'yö Yesu 'yii‑ ‑yɔ bɔ, 'yö‑ ‑bha ꞊klang ‑nu 'wo ꞊yɔɔn‑ "sɔɔ 'wo‑ pö‑ ‑dhɛ: «‑Bhö dhebhɔnë ya‑ "piʋ̈ kë kö ‑yö ziö, ‑a ‑wʋ ꞊ya kë ‑fɛɛsü "gbla 'ö‑ wo sië 'ö ‑ziö 'ka kwa ꞊keng‑ bha‑ ‑wɔn 'gü.»
MAT 15:24 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «‑Ka ‑dhɛ ‑ga, Atanna ‑yö n ‑bɔ 'mɛ 'wo ꞊dhɛ "bhlaa ‑tuʋ̈ ‑nu 'ö ꞊wa ꞊dhɛng ‑a 'dhö Izraɛdhö ‑sɛ ya‑ 'gü bha ꞊në‑ ‑nu ‑dhɛ.»
MAT 15:25 "Kɛɛ 'yö dhebhɔnë bha 'ö nu 'ö zun ö kpiö 'gü Yesu ꞊wlöö 'ö‑ pö: «N Dëmɛ, ‑bhö "ta ꞊në wo n ‑dhɛ ‑wa!»
MAT 15:26 'Yö Yesu ‑ya pö‑ ‑dhɛ: «‑A ‑dhɛ 'yaa‑ ‑bha kö ‑wo 'në ‑nu ‑bhöpë 'sü ‑wa nu 'gbɛn‑ ‑nu ‑dhɛ.»
MAT 15:27 "Kɛɛ 'yö dhebhɔnë bha 'ö‑ ‑yɔ bɔ 'pö Yesu ‑gɔ 'ö‑ pö: «‑Yö "dhʋ̈ tɛan‑ 'ka, n Dëmɛ, "kɛɛ ‑a ꞊blün 'dhɛ 'kö kɔn 'gbɛn‑ ‑mɛ ‑nu ‑kɔ 'ka 'ö ꞊wɛnng 'gbɛn‑ ‑nu ‑wa yö ‑zë ‑bhö.»
MAT 15:28 'Yö Yesu ‑ya pö‑ ‑dhɛ: «'Aa dhebhɔ 'i ya! i 'dhang bho Atanna "dhiʋ̈ ꞊dedewo ‑kɛɛ! ‑Bhö 'dho, ‑yö ‑dho kë i ‑dhɛ ꞊dhɛ ‑kɔ 'i‑ ꞊mɔɔ‑ 'ka bha‑ 'dhö!» ‑A "tʋ̈ng ꞊dede bha‑ 'gü, 'yö‑ 'dhu 'dhö ‑kë "klʋ̈ʋ̈klʋ̈.
MAT 15:29 ꞊Dhɛ 'ö ꞊ya kë "dhʋ̈ 'yö Yesu ‑yö go bha 'zü 'yö dho "yitagbɛa 'ö Gadhidhe ‑dhɛ "sɔɔ bha‑ "kpʋng "dhiʋ̈, 'yö ‑da ‑tɔn do ꞊gbin‑ 'yö ‑ya mü.
MAT 15:30 'Yö ‑mɛ 'gbɛ ‑ta ‑gbɛ 'wo nu‑ "piʋ̈ woo‑ ‑ta 'bebedhö ‑mɛ ‑nu oo, "yanwlümɛ ‑nu oo, ꞊niɔɔmɛ ‑nu oo, "bhʋbhʋ ‑nu waa‑ "yuëdhi 'gbɛ ꞊dede 'ka, 'yö‑ ‑nu ꞊gban "pɛpɛ dha.
MAT 15:31 ꞊Dhɛ 'ö 'mɛ 'wo bha ꞊waa‑ ‑dhɛ yö kö "bhʋbhʋ ‑nu ‑wo "wɩ sië 'ö ꞊niɔɔmɛ ‑nu 'wo ‑kë "klʋ̈ʋ̈klʋ̈ 'ö ‑ta 'bebedhö ‑mɛ ‑nu 'wo dɔ ꞊zinng 'gü, 'ö "yanwlümɛ ‑nu 'wo ‑dhɛ yö, 'yö‑ 'wɔn ‑ya ‑nu kɔn ꞊dedewo, 'yö 'wo ‑ya Izraɛdhö ‑mɛ ‑nu ‑bha Atanna 'tɔ bhɔ ‑sü ‑bha.
MAT 15:32 ꞊Dhɛ 'ö ꞊ya kë "dhʋ̈ 'yö Yesu ‑yö ö ‑bha ꞊klang ‑nu ‑dhɛ 'yö‑ pö‑ ‑nu ‑dhɛ 'ö‑ pö: «‑Ka ‑dhɛ ‑ga! 'Mɛ 'wo ya‑ ‑nu ‑wëë ‑yö n kë sië, ‑a ‑gɛn ‑mü ꞊dhɛ 'wo ‑da n ꞊keng‑ ‑a ‑dhɛkpaɔyi ‑yaaga ‑naa ꞊në "kɛɛ kö ‑bhöpë 'bha 'yaa‑ ‑nu ‑gɔ, "kɛɛ 'yaa n "piʋ̈ 'pö ꞊dhɛ 'a ‑wʋ 'kpɔ‑ ‑nu ‑bha kö 'wii pë 'bha ‑bhö, ‑a ‑gɛn ‑mü ꞊dhɛ ‑a ‑nu faan ‑ya yën, kë "dhʋ̈ kö "yiyaadhe 'ya 'dho‑ ‑nu bho 'ö 'wo ‑pö zian‑ kö ‑wo 'dho sië.»
MAT 15:33 'Yö‑ ‑bha ꞊klang ‑nu 'wo‑ ‑yɔ bɔ‑ ‑gɔ 'wo‑ pö: «Mɛ ‑tu "tu 'wo ya ‑dhɛ ‑mɛɛ ꞊në 'kwa dho‑ ‑nu ‑bhöpë ꞊slɔɔ‑ ‑bha "tʋngtadhɛ ya‑ 'gü ꞊zɔɔ?»
MAT 15:34 'Yö Yesu ‑ya ‑nu dhɛɛ" kpɔ 'ö‑ pö: «'Bluu‑ bhɛ ꞊dhɛ ꞊në ka ‑gɔ?» 'Yö 'wo‑ pö‑ ‑dhɛ: «'Bluu‑ bhɛ "saɔplɛ waa‑ 'yuʋ̈‑ 'nësɛnsɛnnë 'bha ꞊në yi ‑gɔ.»
MAT 15:35 ꞊Dhɛ 'wo‑ pö "dhʋ̈ 'yö‑ pö mɛ kpö bha‑ ‑nu ‑dhɛ ‑wo ‑ya "sia‑ 'dɔɔɔndhö.
MAT 15:36 'Yö 'bluu‑ bhɛ "saɔplɛ waa‑ 'yuʋ̈‑ 'në ‑nu bha‑ ‑nu sü 'yö Atanna nuɛ" bho‑ ‑wɔn 'gü 'yö‑ ‑nu "kplükplü bho, 'yö‑ nu ö ‑bha ꞊klang ‑nu ‑dhɛ 'yö 'wo‑ 'gü ‑gblü 'mɛ 'wo bha‑ ‑nu ‑ta.
MAT 15:37 'Yö‑ ‑nu ꞊gban 'wo pë ‑bhö 'wo kën. 'Yö‑ ‑kpɛa ‑yö to, 'yö‑ ‑bha ꞊klang ‑nu 'wo dho 'yö 'wo‑ "kplükplü ‑nu 'wo to ‑a ‑nu ꞊loo 'ko ‑ta, 'yö kë töö ‑yan "saɔplɛ 'ka.
MAT 15:38 'Mɛ 'wo 'bluu‑ ‑bhö "dhʋ̈ bha‑ gɔɔn‑ ‑nu ‑dɩ ‑slɔɔ ‑kpaa 'kwëë‑ ‑sü kö 'wii dhong ‑nu waa‑ 'në ‑nu ‑a ‑nu dhʋng, 'yö 'wo ‑kë mɛ "gblü ‑yiisiö.
MAT 15:39 ꞊Dhɛ 'ö ꞊wa 'wo bo pë ‑bhö ‑sü 'ka "dhʋ̈, 'yö ö ‑wʋ kpɔ‑ ‑nu ‑bha, 'yö yöö ‑dɩ 'pö 'ö ‑da "kplagɔnë 'gü 'yö dho Magadan ‑sɛ 'gü.
MAT 16:1 Yi do 'ka 'yö Fadhiziɛn ‑nu waa‑ Sadusiɛn ‑nu 'wo nu Yesu "piʋ̈ ‑a 'gü dan ‑dhɛ 'gü, 'yö 'wo‑ pö‑ ‑dhɛ ꞊dhɛ ‑yö "dhabhliwɔn do kë wo "yaan kö ‑ya ‑zɔn wo ‑dhɛ ꞊dhɛ Atanna ꞊në‑ bɔ ꞊dedewo tɛan‑ 'ka.
MAT 16:2 "Kɛɛ 'yö Yesu ‑ya ‑yɔ bɔ‑ ‑nu ‑gɔ 'ö‑ pö: «꞊Ya kë ꞊dhɛ 'yënng‑ ‑gɔ ꞊ya bhɔ ‑pö ‑dhɛ ‑bha kö dhang‑ ‑bha ‑dhɛ ‑yö ‑gblö ‑sü 'ka 'kaa‑ pö ꞊dhɛ ‑dhɛ ‑dho ꞊kpaɔ ‑së 'ka dhia" ‑ee?
MAT 16:3 "Ɛɛn 'zü ‑dhɛ ꞊ya ꞊kpaɔ kö dhang‑ ‑bha ‑dhɛ ‑yö 'gbiin‑, 'kaa‑ pö dha‑ ‑dho ban ꞊dɛɛ ‑ee? 'Wɔn ‑nu 'kö 'wo bha ka ‑kɔ ‑mɔɔ wo ‑zë ‑a ‑nu 'suan‑ bho ‑sü ‑bha dhang‑ 'gü ꞊dhɛ ‑kɔ bha‑ 'dhö, "kɛɛ 'wɔn 'suan‑ ‑bho ‑bha ‑wɔn ‑nu 'kö 'wo kë sië ꞊dɛɛ ‑yën ya‑ 'gü ya 'kaa ꞊mɔɔ yö ‑zë 'suan‑ bho ‑sü ‑bha ‑oo?
MAT 16:4 Suu yaa ‑mɛ ‑nu 'wo ꞊dɛɛ ‑yën ya‑ 'gü 'ö 'waa 'to wo ‑wʋ ‑ta Atanna ‑dhɛ bha ‑ya ‑nu "piʋ̈ ꞊dhɛ 'wo "dhabhliwɔn ‑dhɛ yö, "kɛɛ 'wii 'dho "dhabhliwɔn "wɛɛ 'bha ‑dhɛ yö kö 'yii kë‑ suu 'ö ‑kë Zonasö 'ka yi 'bha 'ka bha‑ 'ka.» ꞊Dhɛ 'ö ꞊yaa‑ pö "dhʋ̈, 'yö‑ ‑nu to 'mü 'ö ‑ziö.
MAT 16:5 Yesu waa‑ ö ‑bha ꞊klang ‑nu 'dho ‑sü 'ka kö ‑wo "yi "kan ‑wo 'dho "yi ꞊taama, ‑a ‑bha ꞊klang ‑nu ‑zʋ ‑yö ‑bhɔ 'bluu‑ 'sü ‑wɔn 'ka. ꞊Dhɛ 'ö ꞊wa "yi "kan ꞊wa bɔ "yi ꞊taama,
MAT 16:6 'yö Yesu ‑ya pö‑ ‑nu ‑dhɛ: «‑Ka ka ‑dɩ 'kun "sɛkɛ 'ö Fadhiziɛn ‑nu waa‑ Sadusiɛn ‑nu ‑gɔ bha‑ ‑gɔ!»
MAT 16:7 'Yö‑ ‑bha ꞊klang ‑nu 'wo ‑ya zaɔkpadhe ‑da ‑sü ‑bha ꞊dhɛ: «‑Yö kë 'ö‑ wo ꞊dhɛ 'kwii 'bluu‑ 'sü bha 'yö ‑kë 'yö‑ pö sië "dhʋ̈ bha.»
MAT 16:8 ꞊Dhɛ 'ö Yesu ꞊yaa‑ 'wɔn dɔ ꞊dhɛ ‑wo zaɔdhe ‑da sië wo "kwëë 'yö‑ pö‑ ‑nu ‑dhɛ: «‑Më ꞊në ‑kë 'yö 'ka ‑ya 'bluu‑ 'sü ‑sü zuën ‑ta? Ka ‑bha 'dhang ‑bho n "dhiʋ̈ ‑sü ‑yö 'dɛdɛ ‑kɛɛ!
MAT 16:9 "Ɛɛn 'wɔn 'gü ꞊dede ꞊në 'kii ma ꞊kö "dhʋ̈ bha ‑ee? "Ɛɛn ka ‑zʋ ꞊në ꞊ya 'to ꞊ya bhɔ 'bluu‑ bhɛ "sɔɔdhu 'a‑ 'gü ‑gblü mɛ "gblü "sɔɔdhu ‑ta 'ö‑ töö ‑yan ‑kpɛa ‑yö to bha‑ ‑wɔn 'ka "dhʋ̈ bha ‑ee?
MAT 16:10 "Ɛɛn 'zü 'bluu‑ bhɛ "saɔplɛ 'a‑ 'gü ‑gblü mɛ "gblü ‑yiisiö ‑ta 'ö‑ töö ‑yan ‑kpɛa ‑yö to bha ka ‑zʋ ꞊në ꞊ya 'to ꞊ya bhɔ‑ ‑wɔn 'ka "dhʋ̈ bha ‑ee?
MAT 16:11 "Ɛɛn ‑yö kë ‑kɔ ‑kë ꞊dhɛ 'yö 'ka ka ‑zʋ gɔn ꞊dhɛ a ‑wɩ 'bluu‑ ꞊dede ꞊në‑ 'ka? A‑ ‑pö ka ‑dhɛ ꞊dhɛ 'ka ka ‑dɩ 'kun Fadhiziɛn ‑nu waa‑ Sadusiɛn ‑nu ‑bha ꞊gɔng bha‑ ‑gɔ.»
MAT 16:12 ꞊Dhɛ 'ö ꞊yaa‑ pö "dhʋ̈, 'yö 'wo‑ 'wɔn dɔ ꞊dhɛ 'yii "wɩ "sɛkɛ ꞊dede 'wo‑ ‑da 'bluu‑ ‑bha bha‑ 'ka, "kɛɛ ‑yö ‑wɩ Fadhiziɛn ‑nu waa‑ Sadusiɛn ‑nu ‑bha mɛ draan‑ ‑kɔ ꞊në‑ 'ka.
MAT 16:13 ꞊Dhɛ 'ö Yesu ꞊ya 'dho ꞊ya ꞊loo "sɛgɔ 'ö Fidhipö ‑bha Sezadhe ‑dhɛ ‑züzü bha‑ 'gü, 'yö ö ‑bha ꞊klang ‑nu dhɛɛ" kpɔ 'ö‑ pö: «Ka‑ ‑ma mɛ ‑nu ‑ta ꞊dhɛ de suu ꞊në mang Mɛgbömɛ n 'ka?»
MAT 16:14 'Yö 'wo‑ ‑yɔ bɔ‑ ‑gɔ 'wo‑ pö: «Mɛ 'bha ‑nu ‑wa ‑pö i ‑bha ꞊dhɛ Zan Mɛzumɛ ‑mü i 'ka, 'ö mɛ 'bha ‑nu ‑wa pö (Atanna ‑wʋdhiʋ̈loomɛ) Edhi 'ö gun yi 'bha 'ka bha yö ‑mü i 'ka, 'ö mɛ 'bha ‑nu ‑dɩ 'pö 'wo‑ pö ‑a mɛ 'dhɛ 'wo‑ Zedhemi ‑kë bha yö ‑mü i 'ka, kö mɛ 'bha ‑nu ‑wa pö sië 'zü Atanna ‑wʋdhiʋ̈loomɛ "wɛɛ 'bha ‑mü i 'ka.»
MAT 16:15 'Yö Yesu ‑ya pö‑ ‑nu ‑dhɛ 'ö‑ pö: «'Yö ka ‑zë ꞊wɛ, ka ka ‑bha ‑pö ꞊dhɛ?»
MAT 16:16 'Yö Simɔ Piɛdhö ‑ya pö‑ ‑dhɛ 'ö‑ pö: Atanna ‑bha ‑Yamɛ 'ö‑ bɔ yö ‑mü i 'ka! Atanna "yaandhe Gbö ‑mü i 'ka!»
MAT 16:17 ꞊Dhɛ 'ö ꞊yaa‑ pö "dhʋ̈, 'yö Yesu ‑ya pö‑ ‑dhɛ: «Simɔ, Zan gbö, i ‑bha ‑së! ‑A ‑gɛn ‑mü ꞊dhɛ tɛanwɔn 'dhɛ 'kö 'i‑ pö bha 'yii 'go mɛbhɩɩdhe 'gü, n Dë Atanna 'ö ‑ya ‑sü 'ka dhang‑ 'gü bha ꞊në‑ ‑zɔn i ‑dhɛ.
MAT 16:18 ‑A ‑kë "dhʋ̈ ‑sü bha‑ 'gü mang ‑dɩ 'pö a‑ ‑pö i ‑dhɛ ꞊dhɛ ‑wo i ‑dhɛ Piɛdhö (꞊waa‑ pö "dhʋ̈ kö ‑wa ‑pö ‑gwë). ‑Gwë 'i‑ suu 'ka bha, bhi ꞊në 'i dho kë ꞊dhɛ ‑gwë 'wo 'kɔ "kpan ‑ya ‑ta bha n ‑bha 'dhö, (bhi ꞊në 'i dho Atanna ‑bha mɛ ‑nu ‑loo 'ko ‑ta ‑sü bha‑ zü bho), 'mɛ 'wo "dhʋ̈ bha ga ‑kɔ 'yii 'dho ꞊mɔɔ‑ ‑nu ‑bha.
MAT 16:19 A ‑dho Atanna ‑bha ‑gblüdëdhɛ ‑dhaklɩ nu i ‑dhɛ, kö 'bha‑ "dhiʋ̈ ta mɛ "ʋʋ 'mɛ 'ö‑ ‑gɔ "kpʋng ꞊taa yö kö ‑yö kë ta ‑sü 'ka‑ ‑mɛ ‑gɔ dhang‑ 'gü, "ɛɛn kö 'bha‑ "pʋ 'pö mɛ "ʋʋ 'mɛ 'ö‑ ‑gɔ "kpʋng ꞊taa yö kö ‑yö kë "pʋ ‑sü 'ka‑ ‑mɛ ‑gɔ dhang‑ 'gü.»
MAT 16:20 ꞊Dhɛ 'ö ꞊ya kë "dhʋ̈ 'yö Yesu ‑yö ‑dhio dɔ‑ ‑nu ‑ta glɔɔglɔdhö ꞊dhɛ 'wa 'dho‑ pö mɛ 'bha ‑dhɛ ꞊dhɛ Atanna ‑bha ‑Yamɛ 'ö‑ bɔ yö ‑mü ö 'ka.
MAT 16:21 ꞊Dhɛ 'ö ꞊yaa‑ pö‑ ‑nu ‑dhɛ "dhʋ̈, 'ö sü‑ 'yi bha ‑bha 'ö dho‑ 'ka "dhiʋ̈, 'yö zun ö ‑dɩ ‑wɔn ‑ta "pʋ ‑sü ‑bha ö ‑bha ꞊klang ‑nu ‑dhɛ 'ö‑ pö: «N ‑dho Zedhizadhɛmö ‑wɔn ‑yö ‑dhö kö ‑kwɛagbö ‑nu waa‑ "saabhomɛ ‑nu ‑gɔmɛ ‑nu waa‑ Zuifö ‑nu ‑bha 'tɔnggɔmɛ ‑nu ‑wo n ‑wëëdhɛ ꞊dede bho. ‑Wo ‑dho n zë 'ö 'a‑ bo ‑a ‑dhɛkpaɔyi ‑yaaga ‑naa 'ka.»
MAT 16:22 ꞊Dhɛ 'ö ꞊yaa‑ pö "dhʋ̈, 'yö Piɛdhö ‑ya sü ꞊plɛ 'gü, 'yö ‑ya ‑dɔn ‑bho 'ka ‑sü ‑bha. 'Ö‑ pö: «'Aa n Dëmɛ, ‑më ‑dhiang ꞊në 'i‑ zë "dhʋ̈, ‑a 'dhɛ 'kö bha Atanna ‑ya dɔ i 'ka ꞊gblɛɛn.»
MAT 16:23 "Kɛɛ 'yö Yesu ‑yö ꞊slëë ö 'gü, 'ö‑ pö Piɛdhö ‑dhɛ: «‑Bhö bhɔ n 'ka taa‑ ꞊gblɛɛn, Sɔtraan! ‑Yö i "piʋ̈ ꞊dhɛ 'i n ‑da Atanna "dhiʋ̈, ‑a ‑gɛn ‑mü ꞊dhɛ kɛng ka ‑zʋgɔngüwɔn 'yaa do, i i ‑zʋ ‑gɔn ꞊dhɛ mɛ "bhɩɩ‑ ‑nu 'dhö.
MAT 16:24 ꞊Dhɛ 'ö ꞊ya kë "dhʋ̈ 'yö Yesu ‑ya pö ö ‑bha ꞊klang ‑nu ‑dhɛ 'ö‑ pö: «'Ö mɛ "ʋʋ mɛ 'ö‑ "piʋ̈ ꞊dhɛ 'ö ziö n ꞊keng‑, ‑a ‑mɛ ‑yö bo ‑ya ö ‑dɩ ‑wɔn zuën ‑ta ‑sü 'ka kö ‑yö sëëbhodhe 'ö n ‑wɔn "glʋʋ "piʋ̈ 'ö ꞊dhɛ ‑a ‑mɛ ‑dɔ ‑bha "dhü 'dhö bha‑ 'sü kö ‑yö ziö‑ 'ka n ꞊keng‑.
MAT 16:25 ‑A ‑gɛn ‑mü ꞊dhɛ 'mɛ 'ö‑ "piʋ̈ 'ö ö ‑dɩ dha ‑a ‑mɛ ‑gɔ ‑dho 'to‑ 'gü, "kɛɛ 'mɛ 'ö‑ ‑gɔ ‑yö to n ‑wɔn ‑bha, ‑a mɛ ‑dho dha.
MAT 16:26 "Ɛɛn ꞊ya kë ꞊dhɛ mɛ 'bha "kpʋngtaapë ꞊gban "pɛpɛ suu ꞊slɔɔ "kɛɛ kö i 'nii‑ ‑zë ‑yö ꞊dhɛng Atanna "piʋ̈ bha ‑oo, kö‑ ꞊trɔɔn ‑mü ‑më 'ka? "Ɛɛn ‑më ꞊në mɛ‑ dho ꞊mɔɔ‑ ‑bha kö ‑ya nu Atanna ‑dhɛ ö 'nii‑ ‑gɔtadhɔpë 'ka.
MAT 16:27 ‑Ka ‑dhɛ ‑ga, mang Mɛgbömɛ ‑a ‑dho nu n Dë ‑bha 'tɔbhɔdhe bha‑ 'gü yaa‑ ma "kië ‑nu ‑dhö, 'yö 'a 'mɛ 'dhɛ "dhʋ̈ ‑a ꞊saa bho ‑a ‑tosɛa kë ‑kɔ ‑bha.
MAT 16:28 A‑ ‑pö ka ‑dhɛ tɛan‑ ꞊dede 'ka ꞊dhɛ 'mɛ 'wo ‑dhɛ ya‑ 'gü ‑a mɛ 'gbɛ 'wii 'dho ga kö 'wii mang Mɛgbömɛ ma ‑gblüdëdhɛ nu ‑dhɛ yö.
MAT 17:1 ꞊Dhɛ 'ö ‑dhɛkpaɔyi "saɔdo ꞊ya ziö, 'yö Yesu ‑yö Piɛdhö 'dhö, Zakö waa‑ Zan 'ö ‑kë Zakö dheebhang 'ka bha‑ ‑nu ‑dhɛ 'yö 'wo dho ‑tɔn ꞊gblɛɛn do ꞊gbin‑.
MAT 17:2 'Yö‑ ‑gla ‑a ‑nu "yaan mü, 'yö‑ wëëdhɛ 'gü 'dhö ‑ya 'bhü ‑sü ‑bha ꞊dhɛ 'yënng‑ 'dhö, 'yö‑ ‑bha ‑sɔ 'bhü 'dhö ‑ya bhɔ ‑sü ‑bha 'yö ‑dhɛ ‑pʋ ‑a ‑zü.
MAT 17:3 'Yö‑ ‑bha ꞊klangdhiʋ̈ ‑nu ‑yaaga bha 'wo wo "yan ‑kpan Moizö waa‑ Edhi ‑a ‑nu ‑bha (kö ꞊wa 'go dhang‑ 'gü ꞊wa nu) kö waa‑ Yesu ‑nu ‑wo dhiang zë sië wo 'ko ‑dhɛ.
MAT 17:4 'Yö Piɛdhö ‑ya pö Yesu ‑dhɛ 'ö‑ pö: «N Dëmɛ, 'kwa ‑ya yö ‑yö ‑dho kë ‑së "dhɛ! ‑Bhö dɔ 'sa kö 'a sɔ 'kɔ 'në ‑nu ‑yaaga dɔ 'yö kö‑ do‑ kë i ‑bha 'ka, kö‑ do‑ kë Moizö ‑bha 'ka, kö‑ do 'dhɛ 'ö to ‑yö kë Edhi ‑bha 'ka ‑dhe!
MAT 17:5 Piɛdhö ‑yö ‑to dhiang bha‑ zë ‑dhɛ 'gü, 'yö "dhuu kpö "yan bhɔ ‑sü 'bha ‑yö nu 'yö sɔ‑ ‑nu ‑ta, 'yö ‑wʋ do ‑yö bɔ "dhuu kpö bha‑ 'gü 'ö‑ pö: «N Gbö (do 'ö n ‑gɔ) 'yö ya ‑a ‑dhɔ ‑yö n ‑kë ꞊dedewo, 'a n ‑gɔ ‑wɔn "pɛpɛ ꞊gban ꞊loo ‑sü 'ka yö ꞊në‑ ꞊kwɛɛ‑. ꞊Ya 'pë 'ö‑ pö ka ‑dhɛ ‑kaa kë.»
MAT 17:6 ꞊Dhɛ 'wo ‑wʋ bha‑ ma, 'yö "suʋ̈ 'dhö ‑da ‑nu 'gü 'yö 'wo zun wo kpiö 'gü 'yö 'wo wo ‑gɔ "gblëënu Yesu ‑dhɛ.
MAT 17:7 'Yö Yesu ‑yö ꞊yɔɔn‑ ‑nu "sɔɔ, 'yö ö ‑kɔ ‑yɛ ‑a ‑nu ‑bha 'ö‑ pö: «‑Ka "wlü, "suʋ̈ 'ya 'dho ka kë!»
MAT 17:8 'Wo dho wo "yan "dhiʋ̈ "wlü kö Yesu yöö do ꞊në ꞊ya 'to mü.
MAT 17:9 ꞊Dhɛ 'ö ꞊wa zun ‑tɔn lɔɔ‑ ‑sü ‑bha, 'yö Yesu ‑yö ‑dhio dɔ‑ ‑nu ‑ta glɔglɔdhö 'ö‑ pö: «'Wɔn ka "yan 'dhö ‑da 'gü bha, 'ma 'dho‑ ma ka "dhi tongtongdhö kö ka‑ ‑gɛn dɔ sië mɛ 'bha ‑dhɛ "dhɛ! ‑Yö 'to ka zuë" "piʋ̈ ‑yö 'to‑ ka "dhʋ̈ ‑yö zun‑ 'ka mang Mɛgbömɛ n ‑bö ‑yi ‑bha.»
MAT 17:10 ꞊Dhɛ 'ö ꞊yaa‑ pö "dhʋ̈, 'yö‑ ‑bha ꞊klang ‑nu 'wo‑ dhɛɛ" kpɔ 'wo‑ pö: «"Kɛɛ ‑a pö 'ö kwa ‑bha 'tɔnggɔmɛ ‑nu ‑wa wo 'sa ꞊dhɛ Edhi ‑dho nu ꞊kö ‑blɛɛsü, 'yö Atanna ‑bha ‑Yamɛ ‑yö gun ‑na nu ya‑ ‑gɛn ‑mü ‑më 'ka?»
MAT 17:11 'Yö‑ ‑yɔ bɔ‑ ‑nu ‑gɔ 'ö‑ pö: «‑A pö 'wo‑ wo "dhʋ̈ bha tɛan‑ ‑mü, ‑a ‑gɛn ‑mü ꞊dhɛ Edhi ‑dho nu kö ‑yö Atanna ‑wɔn ꞊gban ‑ya ‑yɛa 'gü ‑deewo ("pɛpɛdhö, 'yö ‑a ‑bha ‑Yamɛ gun ‑na nu).
MAT 17:12 "Kɛɛ a‑ ‑pö ka ‑dhɛ ꞊dhɛ Edhi ꞊ya nu 'nu, "kɛɛ 'wii wo "tʋ këwɔn ‑bha 'wɔn 'ö ‑dhi ‑nu ‑dhɛ ꞊në 'wo‑ ‑wɔ ‑ta. ‑Kɔ do 'wo Edhi ‑wëëdhɛ bho‑ 'ka bha ꞊në 'wo dho mang Mɛgbömɛ n ‑wëëdhɛ bho‑ 'ka 'pö.
MAT 17:13 ꞊Dhɛ 'ö Yesu ꞊yaa‑ pö "dhʋ̈, 'yö‑ 'wɔn to 'ö ‑da ‑bha ꞊klang ‑nu "yaan ꞊dhɛ ‑yö "wɩ sië Zan Mɛzumɛ ꞊në‑ 'ka bha.
MAT 17:14 ꞊Dhɛ 'ö ꞊wa nu ꞊wa ꞊loo ‑dhɛ 'wo mɛ "dhaa to‑ ‑bha bha‑ 'gü, 'yö gɔndë do 'bha bha 'ö ꞊yɔɔn Yesu "sɔɔ, 'yö zun ö kpiö 'gü‑ ‑dhɛ.
MAT 17:15 'Yö‑ pö: «N Dëmɛ, ‑bhö n gbö ya‑ ‑wëë ‑ga ‑dhe. Glɔɔ "dhɛ ‑yua 'ö‑ 'gü ya ‑ya ‑wëë ‑kë wo sië "gbɩɩ‑ ‑wa. (‑A "su yaa ꞊ya bhɔ,) ‑ya ‑pö pɛng "dhiʋ̈ ‑dhɛ ‑nu waa‑ "yi ꞊bhaa ‑dhɛ ‑nu 'gü "kwëë klö klö ꞊dedewo.
MAT 17:16 A kë ‑nu 'nu‑ 'ka i ‑bha ꞊klang ‑nu ꞊në‑ ‑nu ‑dhɛ kö ‑wa dha n ‑dhɛ, "kɛɛ 'wii ꞊mɔɔ‑ ‑bha.»
MAT 17:17 ꞊Dhɛ 'ö 'mɛ bha ꞊ya bo‑ ‑pö "dhʋ̈ ‑sü 'ka, 'yö Yesu ‑ya pö ö ‑bha ꞊klang ‑nu ‑dhɛ 'ö‑ pö: «Gɔɔgbɩɩmɛ ‑nu, suuyaamɛ ‑nu 'ka ya! ‑Dhɛkpaɔyi ꞊dhɛ ꞊në 'a dho 'sü 'zü ‑deewo kö 'a‑ kë ka "piʋ̈? "Ɛɛn a ‑dho ka ‑kwɛɛ bun 'zü ‑dhɛkpaɔyi ꞊dhɛ ꞊në 'ka ‑deewo kö 'ka gun ‑na 'wɔn 'gü ma kö 'ka 'dhang bho n "dhiʋ̈? 'Yö‑ pö ‑ka nu n ‑dhɛ 'në bha‑ 'ka!»
MAT 17:18 ꞊Dhɛ 'wo nu‑ 'ka, 'yö ꞊gbla "yina yaa 'ö gun‑ bha‑ 'gü bha‑ ‑ta. ‑Yö ‑to ‑dhɛ do bha‑ 'gü 'ö go‑ 'gü 'yö ‑kë "klʋ̈ʋ̈klʋ̈.
MAT 17:19 ꞊Dhɛ 'ö ꞊ya kë "dhʋ̈ 'yö‑ ‑bha ꞊klang ‑nu bha 'wo‑ ‑dhɛ ‑dɩ ‑wɔn "dhiʋ̈ 'yö 'wo‑ dhɛɛ" kpɔ 'wo‑ pö: «Yi ‑kɔ 'ö 'yii ꞊mɔɔ "yina yaa 'dhɛ ya‑ ‑bha bha‑ ‑gɛn ‑mü ‑më 'ka?»
MAT 17:20 'Yö‑ ‑yɔ bɔ‑ ‑nu ‑gɔ 'ö‑ pö: «‑A ‑gɛn ‑mü ꞊dhɛ 'kaa 'dhang ꞊në‑ bho Atanna "dhiʋ̈. A‑ ‑pö ka ‑dhɛ tɛan‑ ꞊dede 'ka ꞊dhɛ: ꞊Ya kë ꞊dhɛ ka ‑bha ‑zʋ ‑yö Atanna ‑dhɛ ‑sü ꞊blünga ꞊ya kë ꞊dhɛ kplɔɔ" ga ‑zian ꞊në‑ 'dhö, ka ‑dho ꞊mɔɔ‑ ‑bha 'ka‑ pö ‑tɔn ‑dhɛ: ‹‑Bhö 'go i "gblʋʋ bha‑ 'gü 'i 'dho ‑dhɛ ya‑ 'gü!› 'ö ‑kë ꞊dhɛ ‑kɔ bha‑ 'dhö. Ka ‑fiëbhawɔn 'yii dho kë.»
MAT 17:21 ["Kɛɛ "yina yaa suu 'dhɛ 'kö bha‑ ‑kë mɛ 'gü ‑sü ‑faan ‑yö ‑slɔɔ ‑bhɛa Atanna ‑dhɛ ‑sü waa‑ 'sunng‑ 'ma ‑sü ꞊në‑ 'gü.]
MAT 17:22 ꞊Dhɛ 'ö yi do 'ka kö waa‑ ‑bha ꞊klang "dhiʋ̈ ‑nu ꞊gban "pɛpɛ ‑wo ‑dhɛ do 'gü Gadhidhe ‑sɛ 'gü, 'yö Yesu ‑ya pö‑ ‑nu ‑dhɛ 'zü 'ö‑ pö: «‑Wo ‑dho mang Mɛgbömɛ n "dhiʋ̈ dɔ mɛ "bhɩɩ‑ ‑nu ‑dhɛ
MAT 17:23 'ö 'wo n zë. "Kɛɛ ‑a ‑dhɛkpaɔyi ‑yaaga ‑naa bha, a ‑dho ‑bö 'ka.» ꞊Dhɛ 'ö ꞊yaa‑ pö "dhʋ̈, 'yö ‑wëë ‑yö bɔ‑ ‑bha ꞊klang ‑nu bha‑ ‑nu ‑ta ꞊dedewo.
MAT 17:24 ꞊Dhɛ 'ö Yesu waa‑ ö ‑bha ꞊klang ‑nu ꞊wa 'dho ꞊wa ꞊loo Kapɛɛnaɔmö ‑pö 'gü, 'yö Atanna ‑dhɔkëgükɔ 'niisɔngkunmɛ ‑nu 'wo ꞊yɔɔn Piɛdhö "sɔɔ 'yö 'wo‑ dhɛɛ" kpɔ 'wo‑ pö: «Ka ‑gɔmɛ ‑yö Atanna ‑dhɔkëgükɔ 'nii‑ sɔng ‑bho "wɛ ‑ee?»
MAT 17:25 'Yö Piɛdhö ‑ya pö: «꞊Iin, ‑ya ‑bho.» ꞊Dhɛ 'ö Piɛdhö ꞊yaa‑ pö "dhʋ̈, 'ö ‑da sië 'kɔɔdhö, Yesu ꞊në dhiang zë‑ ‑dhɛ ‑blɛblɛsü 'ö‑ pö: «Simɔ, 'nii‑ sɔng bho ‑sü ‑nu waa‑ pë bho ‑sü ‑nu 'ö "kpʋng ꞊taa ‑gblüdë ‑nu ‑dhɛ bha i i ‑bha ‑pö 'gü ꞊dhɛ? ‑A ‑dhɛa ‑bha kö de ‑nu ꞊në ‑wa bho, ‑a ‑nu gbö ‑nu ‑ee, "ɛɛn mɛ "wɛɛ ‑nu ‑ee?»
MAT 17:26 'Yö Piɛdhö ‑ya pö: «‑A ‑dhɛ 'yaa‑ ‑bha kö ‑gblüdë gbö ‑nu ‑zë ‑wa bho.» 'Yö Yesu ‑ya ‑yɔ bɔ Piɛdhö ‑gɔ 'ö‑ pö: «‑Yö "dhʋ̈ tɛan‑ 'ka, ‑a ‑dhɛ 'yaa‑ ‑bha kö ‑gblüdë gbö ‑nu ‑zë ‑wa bho (꞊ya kë "dhʋ̈ kö‑ ‑dhɛ 'yaa‑ ‑bha ꞊dhɛ 'a‑ ‑bho 'pö).»
MAT 17:27 "Kɛɛ yö ꞊në‑ ꞊gban 'gü, 'kwa 'dho 'mɛ 'wo ya‑ ‑nu ‑siödhɛwɔn kë, ꞊dhɛ 'ö "dhʋ̈, ‑bhö 'dho "yi "kpʋng "dhiʋ̈ kö 'i piʋ̈" ‑da, 'yuʋ̈‑ ‑blɛɛsü 'ö bhaa‑ ‑sü bha 'i‑ "dhi "pʋ kö 'i ‑dhɛ ‑ga ‑a "dhiëng 'gü, i ‑dho "tanmaga do 'ö ꞊mɔɔ kwɛng koo‑ 'nii‑ sɔng ‑bha ‑a yö 'mü kö 'i‑ 'sü 'i nu‑ 'ka kö 'i koo 'nii‑ sɔng bho‑ 'ka ‑a ‑nu ‑dhɛ.
MAT 18:1 Yesu ‑bha ꞊klang ‑nu ‑wo ‑yɔɔn "sɔɔ ‑a "tʋ̈ng ꞊dede bha ꞊në‑ 'gü 'yö 'wo‑ dhɛɛ" kpɔ 'wo‑ pö: «'Mɛ 'yi i ꞊keng‑ ya de ꞊në ‑duɛ 'dhö 'kpii‑ Atanna ‑bha ‑gblüdëdhɛkëdhɛ 'ö dhang‑ 'gü bha‑ 'gü, yi Dëmɛ?»
MAT 18:2 ꞊Dhɛ 'ö ꞊waa‑ dhɛɛ" bha‑ 'kpɔ "dhʋ̈, 'yö Yesu ‑yö 'në 'në 'dɛdɛ 'në do ‑dhɛ, 'yö‑ dɔ‑ ‑nu wëëdhö 'yö‑ pö:
MAT 18:3 «‑Ka ‑dhɛ ‑ga, a‑ ‑pö ka ‑dhɛ tɛan‑ ꞊dede 'ka ꞊dhɛ kö 'kii ka zuë" slëë‑ kö 'ka "wɩ 'wɔn ‑bha ꞊dhɛ 'në 'sɛnsɛn 'në ‑nu 'dhö 'kii 'dho ka ‑duɛ ‑zian ꞊slɔɔ Atanna ‑bha ‑gblüdëdhɛpö 'ö dhang‑ 'gü bha‑ 'gü.
MAT 18:4 ‑A ‑gɛn ‑mü ꞊dhɛ 'mɛ 'ö‑ ‑duɛ 'dhö 'kpii‑ Atanna ‑bha ‑gblüdëdhɛ bha‑ 'gü, yö ‑mü 'mɛ 'ö‑ "tʋ 'yaa kë ö ‑dɩ ‑wɔn ‑bha ꞊dhɛ 'në 'ö ya‑ 'dhö bha ꞊në‑ 'ka.
MAT 18:5 'Mɛ 'ö dho 'në ‑nu 'ö‑ ‑nu suu 'dhö ya‑ ‑nu ‑dhɛng bun n ‑wɔn 'gü, kö ‑yö ma ꞊në n ‑dhɛng bun bha.»
MAT 18:6 'Yö‑ pö: «Mɛ "ʋʋ 'mɛ 'ö dho kë 'në ‑nu 'wo 'dhang bho n "dhiʋ̈ "dhʋ̈ bha‑ mɛ do ‑zian ‑pö 'wɔn yaa 'gü ‑mɛ 'ka, ‑a fië‑ ‑to kö ‑wo ‑gwë kpö 'gbiin‑ do dun‑ ‑mɛ bhɔ ‑bha kö ꞊wa ‑zuö 'ka ꞊weeyi ꞊bhaa kö ‑ya zë ('wɔn 'ö Atanna dho‑ wɔ‑ ‑ta bha‑ ‑bha).
MAT 18:7 "Kpʋngtaamɛ ‑nu ‑bha ‑yö ‑wëësü, ‑a ‑gɛn ‑mü ꞊dhɛ 'wɔn ‑nu 'wo dho mɛ ‑nu ‑da 'wɔn yaa kë ‑sü 'gü "dhʋ̈ bha ‑wo ‑dhö. ‑A ‑wɔn 'gü ‑wo ‑dho 'to kë ‑sü ‑bha ‑kpɛawo, "kɛɛ 'mɛ 'kö dho kë ‑a kë ‑mɛ 'ka bha ꞊në‑ ‑mɛ ‑bha 'dhö ‑wëësü!
MAT 18:8 ꞊Ya kë ꞊dhɛ i ‑kɔ waa‑ i ‑gɛn ꞊wa kë i ‑da 'wɔn yaa 'gü ‑pë 'ka, ‑bhö ‑a ‑nu "kan i ‑bha kö 'i‑ ‑nu ‑zuö ‑dhɛ ꞊gblɛɛn 'gü ("tʋ̈ng 'ö 'bhii‑ kë ꞊kö bha‑ 'ka). ‑A ‑gɛn ‑mü ꞊dhɛ ‑da i ‑kɔ waa‑ i ‑gɛn "kplü 'ka ‑sü 'ö Atanna ‑bha ‑gblüdëdhɛkëdhɛ 'gü, ‑a fië‑ ‑dhö i ‑kɔ waa‑ i ‑gɛn ꞊gban ‑to i ‑bha ‑sü 'ö 'wo i ‑zuö 'ka pɛng 'ö 'yaa "dhuu ‑a 'gü ‑sü ‑ta.
MAT 18:9 ꞊Ya kë ꞊dhɛ i "yanga do ꞊ya kë i ‑da 'wɔn yaa 'gü ‑pë 'ka, ‑bhö ‑a bho 'mü kö 'i‑ ‑zuö ‑dhɛ ꞊gblɛɛn 'gü ("tʋ̈ng 'ö 'bhii‑ kë ꞊kö bha‑ 'ka), ‑a ‑gɛn ‑mü ꞊dhɛ i ‑da Atanna ‑bha ‑gblüdëdhɛkëdhɛ 'gü ‑sü 'ö i "yanga do 'ka, ‑a fië‑ ‑dhö 'ö ‑ziö 'ka i "yanga ꞊gban ꞊plɛ ‑to mü ‑sü 'ö 'wo i ‑zuö 'ka pɛng 'ö 'yaa "dhuu ‑a 'gü ‑sü ‑ta.»
MAT 18:10 'Yö go mü 'ö‑ pö: «‑Ka ka ‑dɩ 'kun 'në ‑nu 'wo ya‑ mɛ do ‑zian ‑zë "dhiisü ‑bha! ‑A ‑gɛn ‑mü ꞊dhɛ 'a‑ pö ka ‑dhɛ tɛan‑ ꞊dede 'ka ꞊dhɛ: Atanna ‑bha "kië ‑nu 'wo dhang‑ 'gü ꞊në 'wo "yan ‑to ‑nu ‑bha ‑mɛ ‑nu 'ka, 'yö 'wo dɔ ‑sü 'ka n Dë 'ö dhang‑ 'gü ‑a wëëdhö "tʋ̈ng ꞊gban 'gü (kö ‑wa ‑nu ‑bha za dɔ).
MAT 18:11 [‑A ‑gɛn ‑mü ꞊dhɛ mang Mɛgbömɛ a ‑nu 'mɛ 'wo ꞊dhɛng ‑sü 'ka ꞊në‑ ‑nu dha ‑dhɛ 'gü.]
MAT 18:12 "Ɛɛn ꞊ya kë ꞊dhɛ "bhlaa këng do ꞊ya kë mɛ do ‑gɔ kö ‑a do ‑yö ꞊dhɛng, 'yii 'dho‑ ‑kaɔng "sueisiö ga "sueisiö ‑kpɛa 'ö to‑ 'to ‑tɔn ꞊gbin‑ 'ö dho ‑a 'dhɛ 'ö ꞊dhɛng bha‑ mɔɔ‑ ‑dhɛ 'gü ‑ee? "Ɛɛn 'yaa "dhʋ̈ ‑ee?
MAT 18:13 A‑ ‑pö ka ‑dhɛ tɛan‑ ꞊dede 'ka ꞊dhɛ: ꞊Yaa‑ yö, ‑a zuë" ꞊nii ‑yö ‑da "bhlaa doseng bha‑ yö ‑wɔn 'gü, 'ö ‑ziö 'ka ‑a ‑kaɔng "sueisiö ga "sueisiö 'ö 'wii ꞊dhɛng bha‑ ‑ta.
MAT 18:14 Ka Dë 'ö ‑ya ‑sü 'ka dhang‑ ‑nu 'gü bha, 'yaa‑ "piʋ̈ ꞊dhɛ 'mɛ 'wo (bɔ ö 'ka 'wo) ꞊dhɛ 'në ‑nu ya 'dhö bha‑ mɛ doseng ‑zian ‑yö ꞊dhɛng ‑kɔ do bha ꞊në‑ 'gü.»
MAT 18:15 'Yö go mü 'zü 'ö‑ pö: ꞊Ya kë ꞊dhɛ i dheebhang ꞊ya 'wɔn yaa kë, ‑bhö 'dho‑ "piʋ̈ kö 'pë 'ö‑ ‑kë 'ö 'ya‑ bha 'i‑ ‑zɔn ‑dhɛ, "kɛɛ 'ka kë 'mü ꞊plɛ. ꞊Ya kë ꞊dhɛ ꞊ya "wɩ i ‑wʋ ‑bha kö 'bha‑ dha ꞊naa bha.
MAT 18:16 ꞊Ya kë 'zü ꞊dhɛ 'yii "wɩ i ‑wʋ ‑bha, ‑bhö 'dho 'i mɛ do "ɛɛn mɛ ꞊plɛ ‑dhɛ kö ‑wo ꞊nëng i ‑bha kö 'ka 'dho mü. Kë "dhʋ̈ kö pë "ʋʋ pë 'ö 'ka dho‑ pö 'mü bha kö 'ka‑ pö mɛ ꞊plɛ "ɛɛn mɛ ‑yaaga "yaan kö ‑wo kë ka "sɛɛ‑ 'ka ꞊dhɛ ‑kɔ 'ö Atanna ‑wʋ ‑ya pö‑ 'ka‑ 'dhö.
MAT 18:17 ꞊Ya kë 'zü ꞊dhɛ 'yii "wɩ mɛ ‑yaaga bha ka ‑wʋ ‑bha, ‑bhö Atanna ‑bha mɛ ‑nu ꞊loo 'ko ‑ta kö 'i‑ ‑da ‑nu ‑dhɛ. ꞊Ya kë ꞊dhɛ 'yii ö "tʋ 'to mɛ 'wo bha‑ ‑nu ‑wʋ ‑bha tongtongdhö, ‑bhö ‑a ‑ga ꞊taamasü 'gü ꞊dhɛ 'mɛ 'yaa Atanna dɔ ꞊në‑ 'dhö.»
MAT 18:18 'Yö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: Mɛ "ʋʋ mɛ 'ö ka dho‑ 'tɔng‑ ‑ya ‑ta Atanna ‑bha zian ‑ta "kpʋng ꞊taa yö, 'tɔng‑ ‑dho kë‑ ‑mɛ ‑ta dhang‑ 'gü. "Ɛɛn mɛ "ʋʋ mɛ 'ka dho‑ ‑mawɔn 'to "kpʋng ꞊taa yö, Atanna ‑dho ‑a ‑mɛ ‑mawɔn 'to dhang‑ 'gü.
MAT 18:19 A‑ ‑pö ka ‑dhɛ 'pö ꞊dhɛ: Kö mɛ ꞊plɛ ‑wʋ ‑yö kë 'wɔn 'gü do ka kpö 'gü "kpʋng ꞊taa yö, kö ‑wo bhɛa" n Dë Atanna ‑dhɛ pë "ʋʋ pë 'kö‑ ‑wɔn 'gü, yö 'ö ‑ya ‑sü 'ka dhang‑ ‑nu 'gü bha, ‑yö ‑dho ‑a nu‑ ‑nu ‑dhɛ.
MAT 18:20 ‑A ‑gɛn ‑mü ꞊dhɛ ‑dhɛ 'ö mɛ ꞊plɛ "ɛɛn mɛ ‑yaaga 'wo ‑ya ‑sü 'ka wo kpö 'ka‑ ‑bha n 'tɔ 'gü, kö a‑ ‑nu kpö 'gü.
MAT 18:21 ꞊Dhɛ 'ö Yesu ꞊yaa‑ pö "dhʋ̈, 'yö Piɛdhö ‑yö ꞊yɔɔn‑ "sɔɔ 'ö‑ dhɛɛ" kpɔ 'ö‑ pö: «N Dëmɛ, n dheebhang 'ö 'wɔn yaa ‑kë n 'ka ‑kpɛawo, a ‑dho ‑a ‑bha 'wɔn yaa ‑mawɔn 'to ‑gɛn ‑yan 'ka ꞊dhɛ? "Ɛɛn 'a‑ kë "dhʋ̈ ‑gɛn ‑yan 'ka "saɔplɛ ‑ee?»
MAT 18:22 'Yö Yesu ‑ya pö‑ ‑dhɛ 'ö‑ pö: «‑Abin! 'Mii‑ pö i ‑dhɛ ‑gɛn ‑yan 'ka "saɔplɛ, "kɛɛ ‑gɛn ‑yan ‑kaɔng "saɔplɛ ‑gaɔ "saɔplɛ.
MAT 18:23 (꞊Ya kë "dhʋ̈ kö‑ "dhiʋ̈todhɛ 'yaa 'dhö ꞊naa bha.) Yö ꞊në‑ ‑wɔn 'gü, 'yö 'a dho‑ pö ka ‑dhɛ ꞊dhɛ: Atanna ‑bha ‑gblüdëdhɛ bha ‑yö ‑bhɔ ‑gblüdë do 'bha ‑bha 'wɔn ‑bha. ‑Gblüdë 'bha bha ꞊në‑ pö ö ‑bha gwëëzë ‑nu ‑dhɛ yi do 'ka ꞊dhɛ: «Ma ꞊naɔ "pɛpɛ 'ö ka ‑gɔ bha, ‑ka nu‑ 'ka kö 'kwa‑ dhʋng!»
MAT 18:24 ꞊Dhɛ 'ö ꞊wa nu ꞊naɔ bha‑ 'ka, 'ö ꞊wa zun‑ dhʋng ‑sü ‑bha ‑së 'ka, 'yö 'wo ‑wo mɛ do 'ö‑ ‑bha 'wëë‑ "gblü këng drun "pɔ ‑yö gun‑ ‑bha bha‑ 'ka, 'yö 'wo nu‑ 'ka‑ ‑dhɛ.
MAT 18:25 'Ö gun "dhʋ̈ kö gɔndënë bha pë "ʋʋ pë 'bha 'yaa‑ ‑gɔ kö ‑yö "pɔ bha‑ bho‑ 'ka. ꞊Dhɛ 'ö ꞊ya kë "dhʋ̈, 'yö‑ dëmɛ ‑ya pö‑ 'dhö, ‑a ‑bha dhebhɔ 'dhö, ‑a ‑bha 'në ‑nu 'dhö, ‑wa nu 'go ꞊dhuëng 'ka waa‑ ꞊slɔɔpë ꞊gban 'dhö kö ö ‑bha 'wëëga bha ‑yö ꞊slɔɔ.
MAT 18:26 ꞊Dhɛ 'ö ꞊yaa‑ pö "dhʋ̈, 'yö‑ ‑bha gwëëmi bha 'ö zun ö kpiö 'gü‑ ‑dhɛ 'yö ꞊bhɛa 'ö‑ pö: «N Dëmɛ, ‑bhö i zuë" kë ‑sɛa n "piʋ̈ kö 'a i ‑bha "pɔ pë bha‑ mɔɔ‑ ‑dhe!»
MAT 18:27 ꞊Dhɛ ꞊yaa‑ pö "dhʋ̈, 'yö‑ ‑wëë 'dhö ‑gblüdë bha‑ ‑kë 'yö‑ pö‑ ‑dhɛ: «'Ma i ‑mawɔn 'to, ‑bhö 'dho!»
MAT 18:28 ꞊Dhɛ 'ö gɔndënë 'ö ‑gblüdë ‑ya ‑mawɔn 'to bha ꞊ya zun "kpɛnng, 'yö ‑kpan ö yëkëyɔɔ 'ö wɛng 'wo yë ‑kë ‑gblüdë do bha‑ "piʋ̈, "kɛɛ 'ö yö ‑zë ‑a ‑bha 'wëë‑ këng ꞊plɛ ‑nu "sinma "pɔ 'dhö‑ ‑bha bha‑ ‑bha. 'Yö sa‑ ‑ta, 'yö kun bhɛa" kpɛnngkpɛnngdhö 'yö‑ pö‑ ‑dhɛ: «‑Bhö ma 'wëëga bha‑ nu!»
MAT 18:29 'Yö‑ yëkëyɔɔ bha 'ö zun‑ ‑dhɛ kpiö 'gü, 'yö ꞊bhɛa 'ö‑ pö: «‑Bhö dɔ "gbɩɩ‑ kö 'i i zuë" kë ‑sɛa n "piʋ̈ kö 'a i bha "pɔ pë 'ö bha‑ mɔɔ‑!»
MAT 18:30 "Kɛɛ 'yö yö ‑zë 'yii "wɩ‑ ‑bha, 'yö‑ kun 'ö‑ ‑da ‑kaso 'gü 'yö dho ö zun‑ 'ka ‑a ‑bha "pɔ bha‑ ꞊gban bho ‑sü ‑bha.
MAT 18:31 ꞊Dhɛ 'ö‑ "tɛabɔ ‑nu 'wo 'wɔn bha‑ ‑dhɛ yö, 'yö ‑wëë ‑yö bɔ‑ ‑nu ‑ta ꞊dedewo, 'yö 'wo dho 'wo ‑ziö 'gü wo ‑gɔmɛ ‑dhɛ.
MAT 18:32 ꞊Dhɛ 'ö‑ ‑nu ‑gɔmɛ ‑yö 'wɔn bha‑ ma, 'yö ö ‑bha gwëëmi bha‑ ‑dhɛ 'yö‑ pö‑ ‑dhɛ: «Gwëë" "klʋ yaasü! Bhɛa" ꞊në 'i‑ wo n ‑dhɛ ma 'wëëga 'ö i ‑bha bha‑ ‑wɔn 'gü 'yö 'a‑ ꞊gbaɔ i ‑gɔ.
MAT 18:33 ꞊Ya kë "dhʋ̈ ‑a ‑dhɛa bha 'nu kö i "tɛado bha‑ ‑wëë ‑yö i kë 'pö ꞊dhɛ ‑kɔ 'ö i ‑wëë ‑yö n ‑kë 'ka bha‑ 'dhö, "kɛɛ 'yö 'bhii yö ‑zë kë.»
MAT 18:34 'Wɔn bha‑ ‑siö ‑gɔmɛ bha‑ ‑bha ‑kɔ yaa bha‑ ‑wɔn 'gü, 'yö‑ kun 'pö 'ö‑ ‑da ‑kaso 'gü kö ‑wa ‑wëë ‑kë wo ꞊dedewo ‑yö 'dho ‑yö zun‑ 'ka ‑a ‑bha "pɔ bha‑ ꞊gban bho ‑sü ‑bha.
MAT 18:35 'Yö Yesu ‑ya pö ö ‑bha ꞊klang ‑nu ‑dhɛ: «꞊Ya kë ꞊dhɛ 'mɛ 'ka "dhʋ̈ 'do 'do 'ka 'kii ka dheebhang ‑mawɔn 'to ka zuë" ꞊gban 'ka, n Dë 'ö ‑ya ‑sü 'ka dhang‑ ‑nu 'gü, ‑yö ‑dho ka kë ‑kɔ do bha ꞊në‑ 'gü.
MAT 19:1 ꞊Dhɛ 'ö Yesu ꞊ya bo ‑a ‑nu ꞊klang kë ‑sü 'ka 'wɔn ‑nu bha‑ 'ka, 'yö go Gadhidhe ‑sɛ 'gü 'yö dho Zude ‑sɛ "pɛan 'dhɛ 'ö bɔ "yi 'wo‑ Zuudɛn ‑kë bha‑ ꞊taama bha‑ 'gü.
MAT 19:2 Mɛ kpö 'gbɛ ꞊dede ‑wo ‑dho 'zü‑ ꞊keng‑ mü 'ö‑ ‑nu dha ‑a ‑nu ‑bha "yua ‑nu ‑gɔ.
MAT 19:3 ‑Dhɛ bha ꞊në Fadhiziɛn ‑nu ga 'bha 'wo nu Yesu ‑gɛn mɔɔ‑ ‑dhɛ 'gü mü, 'yö 'wo‑ dhɛɛ" kpɔ 'wo‑ pö: «'Mɛ i ‑bha dhebhɔ ꞊ya i ‑siödhɛwɔn kë bha ‑oo, 'kö 'zü 'ö ‑kë 'wɔn suu "ʋʋ suu 'ö‑ 'ka, ‑yö ‑së kö‑ ‑mɛ ‑ya ‑bha dhebhɔ bha‑ bho "bü ‑ee?
MAT 19:4 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Pë 'ö ‑bɛn zë ‑sü 'ka Atanna ‑wʋ 'gü 'kaa‑ dɔ ꞊në wo ‑ee? ‹‑A zübhoyi 'ka Atanna ‑yö gɔɔn‑ waa‑ dhebhɔ ꞊në‑ ‑nu ‑da.›
MAT 19:5 'Yö go mü 'ö‑ pö: ‹‑A ‑kë "dhʋ̈ ‑sü 'gü, gɔɔn‑ ‑dho "kan ö dë waa‑ ö dhe ‑a ‑nu ‑bha, 'yö waa‑ ‑bha dhebhɔ 'wo ‑tosɛa ‑kë, 'yö wɛng 'wo ‑kë pë do 'ka.›
MAT 19:6 ꞊Ya kë "dhʋ̈ kö dhe waa‑ gɔn 'wo bha 'waa mɛ ꞊plɛ 'ka 'zü, kö ꞊wa kë pë do ꞊në‑ 'ka. ‑A ‑kë "dhʋ̈ ‑sü 'gü kö 'pë 'ö Atanna ꞊yaa‑ ꞊nëng 'kwëë‑ bha, mɛ 'bha 'ya 'dho‑ pö 'ö‑ "kan 'kwëë‑.»
MAT 19:7 'Yö Fadhiziɛn ‑nu ‑wa dhɛɛ" kpɔ 'zü 'wo‑ pö: «‑Yö ‑kë 'sa ꞊dhɛ 'yö Moizö ‑zë 'ö‑ pö mɛ "ʋʋ mɛ 'ö ꞊yaa‑ pö 'ö dhe bho "bü, ‑a ‑mɛ ‑ya ‑bho "bü 'sëëdhɛ kë kö ‑ya ꞊nëng‑ ‑bha?»
MAT 19:8 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «Kaa‑ gɔɔgbɩɩdhɛ bha ꞊në‑ ‑kë 'yö Moizö ‑ya pö "dhʋ̈, "kɛɛ 'yaa gun "dhʋ̈ ‑blɛɛsü.
MAT 19:9 A‑ ‑pö ka ‑dhɛ ꞊dhɛ: Mɛ "ʋʋ mɛ 'ö ö ‑bha dhebhɔ bho "bü, kö‑ ‑gɛn 'yii kë‑ ‑zuazëwɔn ‑zë 'ka, kö ‑yö 'dho ‑yö dhe "wɛɛ 'sü, kö‑ ‑mɛ ‑yö ‑da ꞊në wo mɛ ‑nu ‑bha dhe "piʋ̈ bha.»
MAT 19:10 'Yö‑ ‑bha ꞊klang ‑nu 'wo ꞊yɔɔn‑ "sɔɔ 'wo‑ pö‑ ‑dhɛ: «꞊Ya kë "dhʋ̈ yö ‑zë 'gü kö ‑to ‑kiɛgbaɔ 'ka ‑sü fië‑ ‑dhö 'sa ‑dhe.»
MAT 19:11 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «‑Wʋ 'dhɛ 'kö 'a go‑ pö bha mɛ ꞊gban 'wii 'dho yö ‑zë 'gü ma, kö 'yii kë mɛ 'dhɛ 'kö Atanna ‑ya 'gü ma ‑sü nu‑ ‑nu ‑dhɛ ‑a ‑nu 'ka.
MAT 19:12 'Wɔn ‑gɛn 'gbɛ ‑yö ‑dhö 'ö mɛ 'gbɛ 'waa ꞊mɔɔ‑ ‑bha kö ‑wo dhe 'sü‑ ‑wɔn 'gü. Mɛ 'bha ‑nu ‑wo ‑bhɔ wo ‑bha 'ka, 'ö mɛ 'bha ‑nu ‑dɩ 'pö mɛ "bhɩɩ‑ ‑nu ꞊në 'wo‑ ‑nu ‑kë "dhʋ̈. 'Yö‑ mɛ 'bha ‑nu ‑dɩ 'pö, ‑a ‑nu ‑to ‑kɛgbaɔ 'ka ‑wɔn ‑gɛn 'dhö ‑gban Atanna ‑bha ‑gblüdëdhɛ ‑wɔn ‑bha. Kë "dhʋ̈ kö 'wo‑ ‑bha yë kë woo‑ ‑tosɛa ꞊gban 'ka. 'Ma‑ pö "dhʋ̈, ‑a 'gü ma ‑mɛ ‑ya ma!»
MAT 19:13 ꞊Dhɛ 'ö ꞊yaa‑ pö "dhʋ̈, 'yö mɛ ‑nu ‑wo nu 'në 'sɛɛnnë ‑nu 'ka‑ ‑dhɛ kö ‑yö ö ‑kɔ kpa ‑a ‑nu ‑ta kö ‑yö bhɛa" Atanna ‑dhɛ ‑a ‑nu ‑wɔn 'gü, "kɛɛ 'yö‑ ‑bha ꞊klang ‑nu 'wo ‑ya ‑ya 'mɛ 'wo bha‑ ‑nu "yan 'gü ‑sü ‑bha.
MAT 19:14 'Yö Yesu ‑ya pö‑ ‑nu ‑dhɛ: «‑Ka ka kwaa‑ 'nësɛɛnnë ‑nu ‑zü kö ‑wo nu n "piʋ̈ 'ka 'dho ‑a ‑nu "piʋ̈ kë, ‑a ‑gɛn ‑mü ꞊dhɛ Atanna ‑bha ‑gblüdëdhɛ ‑yö 'mɛ 'wo bhɔ 'në ‑nu ya‑ ‑nu ‑bha ꞊në‑ ‑nu ‑bha 'ka.»
MAT 19:15 'Yö ö ‑kɔ ‑ya ‑nu ꞊gbin‑, 'yö 'dhuë‑ ‑kë ‑nu ‑bha 'yö ‑ziö.
MAT 19:16 ꞊Dhɛ 'ö dho 'ö ꞊loo ‑dhɛ 'bha bha‑ 'gü, 'yö 'nëglɔɔnnë do 'bha bha 'ö nu‑ "piʋ̈ 'yö‑ dhɛɛ" kpɔ 'ö‑ pö: «N Dëmɛ, ‑më ‑wɔn ‑së ꞊në 'ma‑ kë 'yö 'a dho ꞊sii 'ö 'yaa yën ‑a ꞊slɔɔ?»
MAT 19:17 'Yö Yesu ‑ya pö‑ ‑dhɛ 'ö‑ pö: «I n dhɛɛ" ‑kpɔ 'wɔn 'ö ‑gban 'wɔn ‑së ‑bha ‑a ‑wɔn 'ka ‑më ‑wɔn 'gü? Atanna yöö do ꞊në‑ këwɔn 'dhö ‑së. ꞊Ya kë ꞊dhɛ ꞊sii 'ö 'yaa yën bha‑ ‑dhɔ ꞊ya kë i ‑bha kö ‑bhö i 'gü dɔ "gbɩɩ‑ kö 'i Atanna ‑bha 'tɔng‑ ‑nu ꞊në‑ ꞊bhlëë ‑ya!»
MAT 19:18 'Yö‑ pö Yesu ‑dhɛ 'ö‑ pö: «'Tɔng‑ ‑mɛɛ?» 'Yö Yesu ‑ya ‑yɔ bɔ‑ ‑gɔ 'ö‑ pö: «'Tɔng‑ 'ö‑ pö ꞊dhɛ: ‹'Bha 'dho mɛ zë, 'bha 'dho ‑da mɛ ‑nu ‑bha dhe "piʋ̈, 'bha 'dho ꞊kwaan bho, 'bha 'dho ꞊sua ‑ya mɛ 'bha ‑bha,
MAT 19:19 ‑bhö i dë waa‑ i dhe‑ ‑nu ‑ya ꞊bhlëë 'gü, i këyɔɔ ‑dhɔ ‑yö i kë ꞊dhɛ i ‑dɩ 'dhö bha‑ yö.›»
MAT 19:20 'Yö 'nëglɔɔnnë bha 'ö‑ pö Yesu ‑dhɛ: «'Tɔng‑ 'dhɛ 'kö bha 'ma‑ ꞊gban 'kun, ‑a ‑mɛɛ ꞊në ꞊ya 'to?»
MAT 19:21 'Yö Yesu ‑ya pö‑ ‑dhɛ: «'Bha‑ pö‑ "dhiʋ̈ ‑yö pa Atanna wëëdhö, ‑bhö 'dho kö pë "pɛpɛ 'ö i ‑gɔ 'i‑ ꞊gban 'go, kö 'i‑ sɔng bha‑ ꞊gbaɔ "flɛɛmɛ ‑nu ‑gɔ kö 'i nu 'i ‑da n ꞊keng‑. 'Bha‑ kë "dhʋ̈ i ‑dho ꞊naɔ 'dhɛ 'ö dhang‑ 'gü ‑a ꞊slɔɔ.»
MAT 19:22 "Kɛɛ ꞊dhɛ 'ö 'nëglɔɔnnë bha 'ö ‑wʋ ‑nu bha‑ ma, 'yö ö wë 'gü ‑siö, 'yö ‑ziö 'ö dho, ‑a ‑gɛn ‑mü ꞊dhɛ ꞊naɔ‑ ‑gun ‑gɔ ꞊dedewo, (‑a ‑wɔn 'gü, 'yaa gun‑ "piʋ̈ ꞊dhɛ 'ö ö ‑kɔ bho‑ 'gü).
MAT 19:23 ꞊Dhɛ 'ö ꞊ya 'dho, 'yö Yesu ‑ya pö ö ‑bha ꞊klang ‑nu ‑dhɛ 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: ꞊Naɔmɛ ‑nu ‑bha ‑da Atanna ‑bha ‑gblüdëdhɛ 'gü ‑dhɛ ‑dho kë "gbɩɩ‑.
MAT 19:24 'Ö 'a‑ pö 'zü ka ‑dhɛ ꞊dhɛ: ‑Yɔɔnmɛa ‑bha bɔ ‑sɛdha ‑yɛ 'ka ‑dhɛ ‑yö 'ya‑, "kɛɛ ꞊naɔmɛ ‑nu ‑bha ‑da Atanna ‑bha ‑gblüdëdhɛ 'gü ‑sü ‑yö "gbɩɩ‑ 'ö ‑ziö ‑yɔɔnmɛa ‑bha ‑ziö ‑sɛdha ‑yɛ 'ka ‑sü ‑ta.»
MAT 19:25 ꞊Dhɛ 'ö‑ ‑bha ꞊klangdhiʋ̈ ‑nu 'wo ‑wʋ bha‑ ma, 'yö‑ 'wɔn ‑ya ‑nu kɔn ꞊dedewo 'yö 'wo‑ pö‑ ‑dhɛ: «꞊Ya kë "dhʋ̈ yö ‑zë 'gü 'sa kö 'dee dho dha?»
MAT 19:26 'Yö Yesu ‑ya ‑nu ‑ga "sɛnngdhö, 'yö‑ pö: «Mɛ "bhɩɩ‑ ‑zë ‑kɔ 'yaa ꞊mɔɔ‑ ‑bha, "kɛɛ Atanna ‑zë ‑fiëbhawɔn 'yaa 'dhö.»
MAT 19:27 'Yö Piɛdhö ‑ya pö Yesu ‑dhɛ 'ö‑ pö: «'Yö 'mɛ 'kö yi ‑zë 'ya yii‑ pë ꞊gban ‑pë ꞊gban 'to, 'ö 'ya ‑da i ꞊keng‑ 'sa ya ꞊wɛ, ‑më ꞊në dho kë yi ‑zë yi ‑dhɛ?»
MAT 19:28 'Yö Yesu ‑ya pö‑ ‑nu ‑dhɛ 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ mang Mɛgbömɛ 'a dho ‑ya ma ‑gblüdëdhɛ ‑gbloo ꞊bhlëësü bha‑ 'gü "kpʋngtaadhɛ ‑dee bha‑ 'gü ‑dhɛkpaɔyi 'ö‑ 'ka, mɛ ‑kaɔng do ga ꞊plɛ 'ka ‑ziö n ꞊keng‑ bha, kaa ‑dɩ 'pö ka ‑dho ‑ya ‑gblüdëdhɛ ‑gbloo ‑nu ‑ta kö 'ka za dɔ Izraɛdhö "sɛgɔ ‑kaɔng do ga ꞊plɛ bha‑ 'gü ‑mɛ ‑nu ‑bha yi 'ö bha ꞊në‑ 'ka.
MAT 19:29 ꞊Ya 'go mü mɛ "pɛpɛ 'wo dho woo‑ 'kɔ ‑nu waa‑ wo dheebhang gɔɔn‑ ‑nu waa‑ dhong ‑nu, wo dë ‑nu, wo dhe ‑nu waa‑ woo‑ dhebhɔ ‑nu, woo‑ 'në ‑nu "ɛɛn woo‑ 'bhlaa‑ ‑nu 'to n ‑wɔn 'gü, ‑wo ‑dho ‑a "dhiʋ̈ ‑ziö ‑ta ꞊slɔɔ, 'ö 'wo dho 'wo ꞊sii 'ö 'yaa yën bha‑ ꞊slɔɔ.
MAT 19:30 "Kɛɛ 'mɛ 'wo mɛ ‑blɛɛsü ‑nu 'ka "tʋ̈ng ya‑ 'gü bha, ‑a mɛ 'gbɛ ‑dhɛ ‑dho 'to ꞊taama, 'ö 'mɛ 'wo ꞊taama 'pö "tʋ̈ng ya‑ 'gü bha‑ mɛ 'gbɛ 'wo bɔ "dhiʋ̈.»
MAT 20:1 'Yö Yesu ‑ya pö: «‑A pö 'a‑ wo "dhʋ̈ bha‑ ‑gɛn ‑mü ꞊dhɛ Atanna ‑bha ‑gblüdëdhɛ ‑yö ꞊dhɛ gɔndë do 'ö yëkëmɛ ‑da ö ‑gɔ 'bhlaa‑ kö ‑ya ꞊saa bho ꞊në‑ 'dhö. Gɔndënë bha ‑dhɛkpaɔ tii 'gü yi do 'ka 'yö dho mɛ mɔɔ‑ ‑dhɛ 'gü kö ‑wo yë kë ö ‑gɔ ‑drɔɔ ‑dhü ‑bhlaa 'gü.
MAT 20:2 'Yö 'wo ꞊mɔɔ‑ ꞊saa "dhi 'gü ‑suga do ‑dhɛkpaɔyi do, 'yö‑ ‑nu bɔ yë kë ‑dhɛ 'gü.
MAT 20:3 ꞊Dhɛ 'ö 'yënng‑ "tɛɛ ꞊ya ‑wo ‑së 'ka, 'yö dho 'zü mɛ 'bha mɔɔ‑ ‑dhɛ 'gü. 'Yö dho 'yö ‑kpan mɛ kpö 'bha ‑bha kö ‑wo dɔ sië "dhɛɛdhö kö yë 'yaa‑ ‑nu ‑gɔ
MAT 20:4 'yö‑ pö‑ ‑nu ‑dhɛ: Kaa ‑dɩ 'pö ‑ka 'dho n ‑gɔ ‑drɔɔdhɛ 'gü kö 'ka yë kë 'mü, a ‑dho ka ꞊saa bho‑ bho ‑kɔ 'ka.»
MAT 20:5 ꞊Dhɛ 'ö‑ pö‑ ‑nu ‑dhɛ "dhʋ̈, 'yö 'mɛ 'wo bha 'pö 'wo ‑ziö 'wo dho. ꞊Dhɛ 'ö 'yënng‑ ‑ya ‑mɛ ‑gɔ ꞊zinng 'gü "tʋ̈ng bha ꞊ya ꞊loo, 'yö ‑drɔɔ ‑bhlaa dëmɛ bha 'ö dho 'zü mɛ 'bha mɔɔ‑ ‑dhɛ 'gü, 'yö 'dho 'bha wo kö 'yënng‑ ꞊ya 'kpɔ mɛ ‑gɔ 'ka, 'yö ‑kpan 'zü mɛ 'bha ‑nu ‑bha, 'yö ‑wʋ do bha‑ pö‑ ‑nu ‑dhɛ 'yö 'wo dho 'pö.
MAT 20:6 ꞊Dhɛ 'ö 'yënng‑ ‑gɔ ꞊ya ‑ya ‑tɔn ‑ta, 'yö dho 'bha wo 'yö ‑kpan mɛ kpö 'bha ‑bha 'zü kö ‑wo dɔ sië "dhɛɛdhɛ bha‑ 'gü, 'yö‑ ‑nu dhɛɛ" kpɔ 'ö‑ pö: «‑Më ‑wɔn 'ö mü 'yö 'ka dɔ ‑dhɛ ya‑ 'gü "wɛɛwɛɛ 'yö 'kii yë 'bha kë ꞊dɛɛ?»
MAT 20:7 'Yö 'wo‑ ‑yɔ bɔ‑ ‑gɔ 'wo‑ pö: «'Mɛ 'ö dho yi 'sü ꞊në‑ ‑mɛ 'yaa 'dhö ‑wa!» 'Yö‑ pö‑ ‑nu ‑dhɛ: «꞊Dhɛ 'ö "dhʋ̈ kö ‑ka 'dho kö 'ka yë kë n ‑gɔ ‑drɔɔ ‑bhlaa 'gü!» 'Yö 'wo dho 'pö.
MAT 20:8 ꞊Dhɛ 'ö "bin ꞊ya 'ma, 'yö 'bhlaadë ‑ya pö ö ‑kɔdhiʋ̈mɛ ‑dhɛ 'ö‑ pö: «‑Bhö yëkëmɛ ‑nu bha‑ ‑nu ‑dhɛ 'kii‑ ‑nu ꞊saa bho, "kɛɛ ‑a zü bho 'mɛ 'wo nu ꞊taama bha ꞊në‑ ‑nu ‑ta kö 'i‑ "dhiʋ̈ ta 'mɛ 'wo nu ‑blɛɛsü bha‑ ‑nu ‑ta!»
MAT 20:9 ꞊Dhɛ 'ö ꞊yaa‑ pö "dhʋ̈, 'yö 'mɛ 'wo nu yë "dhiʋ̈ kö 'yënng‑ ‑gɔ ꞊ya ‑ya ‑tɔn ‑ta bha 'wo nu 'yö 'wo‑ ‑nu ꞊saa bho ‑suga 'do 'do 'ka.
MAT 20:10 'Yö 'mɛ 'ö woo ‑dɩ 'pö, 'wo ‑da yë 'gü ‑blɛɛsü bha 'wo nu. ‑Yö ‑kë ‑nu 'gü ꞊dhɛ ‑a ‑nu ‑bha ‑dho ziö 'mɛ 'wo nu ꞊taama bha‑ ‑nu ‑bha ‑ta, "kɛɛ 'yö 'wo ‑suga 'do 'do ‑gblü ‑a ‑nu ‑ta 'pö.
MAT 20:11 ꞊Dhɛ 'wo ‑suga 'do 'do bha‑ sü 'yö 'wo ‑ya ‑dɔn bho ‑sü ‑bha wo yun 'gü ‑drɔɔdhɛ dëmɛ bha‑ 'ka
MAT 20:12 'wo‑ pö: «'Mɛ 'wo ‑da yë 'gü kö "bin ꞊ya ma ya, i‑ ‑nu ꞊saa ‑bho 'pö ꞊dhɛ 'mɛ yi ‑zë 'yi yë ‑kë 'yënng‑ 'ka 'yi ꞊gloo ‑bha yö yi 'dhö ꞊dhɛ?»
MAT 20:13 'Yö‑ ‑yɔ bɔ mɛ do ‑gɔ 'ö‑ pö: «N "taɔngdë, 'mii "kpënng‑ kë ka ‑gɔ ‑wa, "ɛɛn 'kwii ꞊mɔɔ ‑suga do ꞊në ‑wɔn 'gü, 'yö 'ka gun ‑na yë zü bho ‑ee?»
MAT 20:14 ꞊Dhɛ 'ö "dhʋ̈, ‑ka kaa‑ 'dho wo ka ꞊saa bha‑ 'ka, mɛ 'dhɛ 'wo nu ꞊taama bha‑ ‑nu ꞊saa ‑bho "dhʋ̈ ‑wɔn ‑yö ‑ga ma ꞊në n 'gü 'yö 'a‑ bho "dhʋ̈.
MAT 20:15 "Ɛɛn n ‑dɩ ‑bha ꞊naɔ 'yaa ‑mü, pë 'ö ‑dhi n ‑dhɛ 'maa ꞊mɔɔ‑ ‑bha 'kaa‑ ‑kë 'ka ‑ee? "Ɛɛn n "klʋ ‑kë ‑së ‑wɔn ꞊në ‑siö ka ‑dhɛ ‑ee?»
MAT 20:16 'Yö Yesu ‑ya pö: «'Pë 'ö ‑kë 'yö 'a‑ pö ka ‑dhɛ ꞊dhɛ (Atanna ‑bha 'wɔn kë ‑kɔ waa‑ mɛ "bhɩɩ‑ ‑bha 'waa do, ‑a ‑wɔn 'gü) 'mɛ 'ö nu ‑blɛɛsü waa‑ 'mɛ 'ö nu ꞊taama ‑a ‑nu ꞊saa‑ ‑dho kë do bha 'yö bha.»
MAT 20:17 'Ö gun kö Yesu ‑yö 'dho sië Zedhizadhɛmö, waa‑ ö ‑bha ꞊klang ‑nu 'yö mɛ ‑kaɔng do ga ꞊plɛ bha‑ ‑nu ‑dhɛ ꞊plɛ 'gü "ta ‑zian bha‑ ‑ta 'yö‑ pö‑ ‑nu ‑dhɛ:
MAT 20:18 «‑Ka ‑dhɛ ‑ga, 'dho do 'kwa‑ wo sië Zedhizadhɛmö ya, ‑wo ‑dho mang Mɛgbömɛ n ꞊gbaɔ "saabhomɛ ‑nu ‑gɔmɛ ‑nu waa‑ Zuifö ‑nu ‑bha 'tɔnggɔmɛ ‑nu ‑gɔ 'ö 'wo n zë za 'ka,
MAT 20:19 'yö 'wo n ‑dɔ 'mɛ 'waa Zuifö 'ka‑ ‑nu ‑gɔ, 'yö 'wo ꞊wɛɛ dɔ n ‑bha, 'yö 'wo n ‑ma ‑sabhlü 'ka, 'yö 'wo n dɔ "dhü ‑bha 'yö 'a ga 'yö‑ ‑dhɛkpaɔyi ‑yaaga ‑naa 'ka 'a ‑bö.
MAT 20:20 ꞊Dhɛ 'ö go yö ‑zë 'gü, 'yö Zebede ‑bha dhebhɔ ‑yö ꞊yɔɔn Yesu "sɔɔ 'waa‑ ö gbö ‑nu 'wo gun‑ ꞊keng‑ ‑a ‑bha ꞊klangdhiʋ̈ 'ka bha‑ ‑nu 'dhö 'yö zun ö kpiö 'gü‑ ‑dhɛ ‑bhɛa ‑dhɛ kian 'ka.
MAT 20:21 'Yö Yesu ‑yö to 'ö‑ dhɛɛ" kpɔ 'ö‑ pö: «‑Yö i "piʋ̈ ꞊dhɛ 'a kë i ‑dhɛ ꞊dhɛ? 'Yö dhebhɔ bha 'ö‑ pö: «‑Bhö dɔ "gbɩɩ‑, n dëmɛ, kö n gbö ‑nu ꞊plɛ ya, ‑duɛ 'ö i "piʋ̈ dhang‑ 'gü bha‑ ꞊bhlëësü ꞊dede 'ö‑ 'gü bha 'i‑ nu‑ ‑nu ‑dhɛ i ‑bha ‑gblüdëdhɛ ‑yö ‑bha ‑yi 'ka ‑dhe!»
MAT 20:22 'Yö Yesu ‑ya ‑yɔ bɔ 'ö‑ pö: «Pë ‑nu 'ka‑ pö sië bha 'kaa‑ 'klɔɔ‑ dɔ. "Ɛɛn 'wɔn "gbɩɩ‑ 'ö maa‑ "yi mü ya ka ‑mɔɔ ‑bha 'ka‑ mü ‑ee?» 'Yö 'wo‑ pö‑ ‑dhɛ: «꞊Iin, yi ‑mɔɔ ‑bha 'yi‑ mü.»
MAT 20:23 'Yö‑ pö 'zü‑ ‑nu ‑dhɛ: «‑Yö "dhʋ̈ ‑zë wo tɛan‑ 'ka ꞊dhɛ 'wɔn "gbɩɩ‑ do 'ö maa‑ "yi mü bha ka ‑dho ka ‑bha mü, "kɛɛ ‑a 'dhɛ 'kö ‑gban ‑duɛ 'ö n "piʋ̈ dhang‑ 'gü ‑a ‑blɛɛsü ‑sü ‑wɔn ‑zë ‑bha bha, ma ‑zë 'maa‑ ‑nu mɛ ‑dhɛ ‑mɛ 'ka, ‑a ‑gɛn ‑mü ꞊dhɛ ‑yɛa ‑nu 'wo "dhʋ̈ bha 'mɛ 'ö n Dë ‑ya ‑ya ‑a ‑nu ‑gɔ ‑ya wo ꞊në‑ ‑nu ‑bha 'ka.» (Yö ꞊në‑ ‑nu ‑a ‑nu ‑dhɛ ‑mɛ 'ka).
MAT 20:24 ꞊Dhɛ 'ö‑ ‑bha ꞊klang ‑nu bha‑ mɛ ‑kaɔng do 'wo to 'wo 'wɔn bha‑ ma, 'yö ‑siö ‑nu ‑dhɛ mɛ ꞊plɛ 'dhɛ 'wo bha‑ ‑nu kwi ‑bha.
MAT 20:25 'Yö Yesu ‑ya pö‑ ‑nu ‑dhɛ: «Ka‑ 'wɔn ‑dɔ 'kpakpadhö ꞊dhɛ "sɛgɔdhiʋ̈mɛ ‑nu ‑wo ‑gbaɔn woo‑ "sɛgümɛ ‑nu ‑ta, 'ö faanmɛ ‑nu 'wo faan ‑dhɛ ‑wo mɛ ‑nu ‑ta.
MAT 20:26 "Kɛɛ ‑a ‑dhɛ 'yaa‑ ‑bha kö ka ‑zë ka ‑bha ‑yö kë "dhʋ̈. Ka ‑zë ka ‑bha 'ka 'mɛ 'ö‑ "piʋ̈ ꞊dhɛ 'ö kë mɛ ꞊bhlëësü ꞊dede 'ka Atanna 'gü bha‑ ‑dhɛa ‑bha kö‑ ‑mɛ ꞊në ‑yö kë ka "dhiʋ̈ ‑ziö wo ‑mɛ 'ka.
MAT 20:27 'Mɛ 'ö‑ "piʋ̈ 'zü ꞊dhɛ ö ‑duɛ kë 'kpii‑ (Atanna "piʋ̈), ‑a ‑dhɛa ‑bha kö‑ ‑mɛ ꞊në ‑yö kë kaa‑ ꞊dhuëng 'ka.
MAT 20:28 'Wɔn 'ö‑ ‑wɔn 'gü 'yö mang Mɛgbömɛ 'mii nu kö ‑wo ma ‑zë n "dhiʋ̈ ‑ziö wo, "kɛɛ 'yö 'a ‑nu kö ma ꞊në 'a mɛ "bhɩɩ‑ ‑nu "dhiʋ̈ ‑ziö wo kö 'a n ‑dɩ nu ‑a ‑nu dha ‑wɔn 'gü bha 'yö bha.»
MAT 20:29 ‑A ‑nu 'dho ‑sü 'ka, ꞊dhɛ 'ö ꞊wa 'go Zedhiko, mɛ 'gbɛ ꞊dede ‑wo ‑ziö 'zü Yesu ꞊keng‑.
MAT 20:30 "Yanwlümɛ ꞊plɛ ‑wo ‑gun ‑ya ‑sü 'ka zian "gʋ̈ng "piʋ̈ ‑dhɛ 'bha 'gü mü. ꞊Dhɛ 'ö ꞊waa‑ ma ꞊dhɛ Yesu ‑yö ziö sië, 'yö 'wo ‑ya "gbla ‑sü ‑bha 'wo‑ pö: «Yi Dëmɛ, Davi Gbö, ‑bhö "ta yi ‑dhɛ ‑dhe!»
MAT 20:31 'Yö mɛ kpö 'wo gun Yesu ꞊keng‑ bha 'wo ‑ya "gbla ‑sü ‑bha ‑a ‑nu ‑ta 'wo‑ pö ‑wo wo "dhi ta. "Kɛɛ 'yö 'wo wo ‑wʋ "dhiʋ̈ ꞊wlü 'pö "gbɩɩ‑ 'ka 'wo‑ pö: «Yi Dëmɛ, Davi Gbö, ‑bhö "ta yi ‑dhɛ!»
MAT 20:32 'Yö Yesu ‑yö 'daɔnnu, 'yö‑ ‑nu ‑dhɛ, 'yö‑ ‑nu dhɛɛ" kpɔ 'ö‑ pö: «Ka‑ ‑pö 'a‑ kë ka ‑dhɛ ꞊dhɛ?»
MAT 20:33 'Yö 'wo‑ pö: «Yi Dëmɛ, ‑bhö yi "yan "dhiʋ̈ "pʋ!»
MAT 20:34 ꞊Dhɛ 'ö ꞊waa‑ pö "dhʋ̈ 'yö ‑wëë ‑yö bɔ Yesu ‑ta, 'yö ö ‑kɔ ‑yɛ ‑a ‑nu "yan ‑bha, ‑wo ‑to ‑dhɛ do bha‑ 'gü 'ö‑ ‑nu "yan "dhiʋ̈ ‑yö ‑pʋ 'yö 'wo ‑dhɛ yö, 'yö 'wo ‑ziö Yesu ꞊keng‑.
MAT 21:1 ꞊Dhɛ 'ö ꞊wa 'dho ꞊wa ꞊yɔɔn Zedhizadhɛmö ‑dhɛ "sɔɔ, 'yö 'wo bɔ 'pödhɛ 'wo‑ ‑dhɛ Bɛtöfaze 'ö Odhivie ‑tɔn "pɛan "piʋ̈ bha‑ 'gü. ꞊Dhɛ 'ö ꞊wa ꞊loo 'pö‑ bha‑ "saan "dhiʋ̈, 'yö Yesu ‑yö ö ‑bha ꞊klang ‑nu ꞊plɛ bɔ, 'yö ö ‑wʋ kpɔ‑ ‑nu ‑bha 'ö‑ pö:
MAT 21:2 «‑Ka 'dho 'pödhɛ 'ö ‑ya ka "dhiʋ̈ bha‑ 'gü, 'ka 'dho ka ‑dho ‑kpan ꞊soofëng ‑dhee do waa‑ ö 'në ‑a ‑nu ‑bha kö ‑wo ‑kplü ‑sü 'ka, kö 'ka‑ ‑nu "pʋ 'ka nu‑ ‑nu 'ka n ‑dhɛ!
MAT 21:3 ꞊Ya kë ꞊dhɛ ꞊wa ka dhɛɛ" 'kpɔ ‑kaa pö‑ ‑mɛ ‑dhɛ: ‹Yi Dëmɛ ‑mawɔn ‑ya ‑bha›. Ka‑ pö "dhʋ̈ ‑yö ‑dho 'to ‑dhɛ do bha‑ 'gü 'ö ö ‑kɔ bho ka 'gü 'ö 'ka nu‑ nu 'ka n ‑dhɛ yö!
MAT 21:4 'Pë 'ö Atanna ‑wʋdhiʋ̈loomɛ ‑ya pö 'ö‑ pö ꞊dhɛ: ‹Siɔn ‑mɛ ‑nu, ‑ka ‑dhɛ ‑ga, kaa‑ ‑gblüdë ‑yö nu sië ka "piʋ̈, ‑a ‑bha ‑gblüdëdhɛ ‑yö dhɔng ‑sü, ‑yö ‑ya ‑sü 'ka ꞊soofëng do ‑ta, "kɛɛ ꞊soofëng 'në "gbɔng ‑zian 'ö ‑tun ö dhe ꞊keng‑ ꞊në 'ö ‑ya ‑sü 'ka‑ ‑ta› bha‑ 'gü ‑wɔn ‑yö ‑kë ‑kɔ bha ꞊në‑ 'gü.
MAT 21:6 'Yö ꞊klang ‑nu ꞊plɛ bha 'wo dho, 'yö 'wo‑ ‑kë ꞊dhɛ ‑kɔ 'ö Yesu ‑ya pö‑ 'ka‑ ‑nu ‑dhɛ bha‑ 'dhö.
MAT 21:7 'Yö 'wo nu ꞊soofëng ‑dhee waa‑ ö 'në bha‑ ‑nu 'ka Yesu ‑dhɛ. 'Yö 'wo woo‑ sɔ ‑nu kpɔ‑ ‑nu ‑ta, 'yö Yesu ‑yö ‑ya ꞊soofëng 'në bha‑ ‑ta.
MAT 21:8 ꞊Dhɛ 'ö ꞊ya kë "dhʋ̈, 'yö mɛ kpö 'gbɛ bha 'wo ‑ya wo ‑bha ‑sɔ ‑nu 'kpɔ ‑sü ‑bha zian ‑ta. 'Yö mɛ 'bha ‑nu ‑dɩ 'pö 'wo "dhü kwɛɛ" ‑nu ‑kan 'wo‑ ‑nu ꞊loo ‑zian ‑ta ‑dhɛ ꞊gban 'gü (‑a "dhiama kian 'ka).
MAT 21:9 'Mɛ 'wo bha‑ ‑nu kpö 'bha‑ ‑gun Yesu "dhiʋ̈, 'yö‑ 'bha ‑yö gun‑ ꞊taama, kö ‑wo 'dho sië "gɛɛ kë ‑sü 'ka‑ ‑zü, 'ö 'wo ‑bhabhoo kun‑ ‑ta 'wo‑ pö: «"Sookwedhi, ‑bha ‑bha ‑bha, Davi Gbö 'tɔ ‑yö bhɔɔɔɔ! 'Mɛ 'ö nu kwa Dëmɛ 'tɔ 'gü bha‑ 'tɔ ‑yö bhɔɔɔ, ‑yö ‑bhɔ "kpʋng ꞊taa! ‑Yö bhɔ "dhʋ̈ dhang‑ "güüü!
MAT 21:10 Yesu ‑bha ‑da Zedhizadhɛmö ‑sü 'gü, ‑a ‑ting ‑yö ‑da 'ö 'wo ‑ya wo 'ko ‑nu dhɛɛ" 'kpɔ ‑sü ‑bha 'wo‑ pö: «Dee ya!»
MAT 21:11 ꞊Waa‑ pö "dhʋ̈, 'yö mɛ "dhaa 'wo gun‑ ꞊keng‑ bha ꞊waa‑ pö: «Atanna ‑wʋdhiʋ̈loomɛ 'wo‑ ‑dhɛ Yesu, 'ö go Nazadhɛtö Gadhidhe ‑sɛ 'gü bha yö ‑mü.»
MAT 21:12 'Yö Yesu ‑yö dho 'yö ‑da Atanna ‑dhɔkëgükɔ 'ö 'plöö mü bha‑ 'gü. 'Yö 'mɛ 'wo gun "dhɔɔ dɔ sië oo, 'mɛ 'wo gun pë 'dhɔ sië oo, 'yö ‑ya ‑a ‑nu kë ‑sü ‑bha, 'yö ‑ya 'mɛ 'wo nu 'wëë‑ fië bho ‑dhɛ 'gü 'wëë‑ 'dhɛ 'ö Atanna ‑dhɔkëgükɔ 'gü mü bha‑ ‑bha bha‑ ‑nu ‑bha 'kpongpaa ‑nu 'wo gun 'wëë‑ fië bho sië‑ ‑ta bha‑ ‑nu "dhiʋ̈ ‑zuö ‑sü ‑bha, waa‑ 'mɛ 'wo gun ‑tong ‑nu "dhɔɔ dɔ sië mü (kö ‑wo "saa‑ bho‑ 'ka bha‑) ‑nu ‑ya ‑ta ‑gbloo ‑nu 'dhö.
MAT 21:13 ꞊Dhɛ 'ö ꞊ya ö bo 'yö‑ pö‑ ‑nu ‑dhɛ 'ö‑ pö: «‑Yö ‑bɛn zë ‑sü 'ka Atanna ‑bha 'sëëdhɛ 'gü ꞊dhɛ: ‹‑Wo ‑dho ma 'kɔ ‑dhɛ ‑bhɛa Atanna ‑dhɛ 'gü ‑kɔ› "kɛɛ ka ‑zë 'ka‑ kë ꞊kwaanmɛ ‑nu ‑ya 'gü ‑yɛ 'ka.»
MAT 21:14 ꞊Dhɛ 'ö ꞊ya kë "dhʋ̈, 'yö "yanwlümɛ ‑nu waa‑ ‑gɛnloomɛ ‑nu 'wo nu Yesu "piʋ̈ Atanna ‑dhɔkëgükɔ 'gü mü, 'yö‑ ‑nu dha ‑a ‑nu ‑bha "yua ‑nu ‑gɔ.
MAT 21:15 Yesu 'dhö gun 'wɔn ‑sɛsɛngbɔ ‑nu bha‑ ‑nu kë sië "dhʋ̈ kö 'në 'sɛɛnnë ‑nu ‑wo ‑zlöö bho sië‑ ‑zü Atanna ‑dhɔkëgükɔ 'gü 'wo‑ pö: «‑A 'tɔ ‑yö bhɔ! Davi Gbö 'tɔ ‑yö bhɔ! ꞊Dhɛ 'ö "saabhomɛ ‑nu ‑gɔmɛ ‑nu waa‑ Zuifö ‑nu ‑gɔmɛ ‑nu 'wo‑ ‑dhɛ yö "dhʋ̈, 'yö ‑siö ‑nu ‑dhɛ.
MAT 21:16 'Yö 'wo‑ pö Yesu ‑dhɛ 'wo‑ pö: «"Gbla ‑kɔ suu 'wo‑ kë sië ya i‑ ‑dhɛ ‑yö ‑ee?» 'Yö Yesu ‑ya pö: «꞊Iin, a‑ ‑ma "kɛɛ 'yaa ‑bɛn zë ‑sü 'ka Atanna ‑gɔ 'sëëdhɛ 'gü ꞊dhɛ: ‹I 'tɔ bhɔ ‑sü ‑dho 'go 'në 'sɛɛnnë ‑nu "dhi 'gü, waa‑ 'në "blë ‑dee ‑nu 'dhö ‑ee?› "Ɛɛn 'kii‑ ‑wʋ pö do ‑ee?»
MAT 21:17 ꞊Dhɛ 'ö ꞊ya kë "dhʋ̈, 'yö go 'pödhɛ bha‑ 'gü 'yö dho Betani 'yö ‑wɔ mü.
MAT 21:18 ꞊Dhɛ 'ö gun ö yee kë sië kö ‑yö 'dho Zedhizadhɛmö ‑a ‑tadhɛkpaɔta dhia" "piʋ̈, 'yö din‑ ‑ya kun zian ‑ta.
MAT 21:19 'Yö dho 'ö ‑kpan figö ‑dhü do ‑bha zian 'ka, 'yö ꞊yɔɔn‑ "sɔɔ kö‑ ‑kpʋ 'bha 'dhö mü kö 'ö‑ bho 'ö‑ ‑bhö, "kɛɛ 'yö 'yii pë 'bha yö‑ 'gü, 'yö‑ "dhɛ ‑dɩ ‑slɔɔ ꞊në yö mü, (‑a ‑gɛn ‑mü ꞊dhɛ 'ö gun "dhʋ̈ kö figö ‑pë kë "tʋ̈ng 'yii ꞊loo ꞊kö), ‑yö "dhang ‑da figö ‑dhü bha‑ ‑bha yö ꞊në‑ ‑wɔn 'gü 'ö‑ pö: «I bhɛ 'ya 'dho ‑ya i 'gü 'zü tongtongdhö!» Figö ‑dhü bha ‑yö ‑to ‑dhɛ do bha‑ 'gü 'ö ga.
MAT 21:20 ꞊Dhɛ 'ö‑ ‑bha ꞊klang ‑nu bha 'wo‑ ‑dhɛ yö "dhʋ̈, 'yö‑ 'wɔn ‑ya ‑nu kɔn ꞊dedewo 'yö 'wo‑ pö Yesu ‑dhɛ: «‑Yö kë ‑kɔ ‑kë ꞊dhɛ 'yö figö ‑dhü 'kö ya 'ö ga 'gü klöö‑ ‑bha "dhʋ̈?»
MAT 21:21 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: ꞊Ya kë ꞊dhɛ kö ‑zʋ ‑yö Atanna ‑dhɛ ‑sü ‑yö kë ka ‑gɔ kö 'kömüdhe 'yii kë‑ "piʋ̈, 'wɔn 'a‑ ‑kë figö ‑dhü bha‑ 'ka bha, ka ‑dho ‑a kë 'ö ka ‑ya mü 'ka‑ pö ‑tɔn ‑zian ‑dhɛ: ‹‑Bhö 'go i "gblʋʋ bha‑ 'gü kö 'i dho ‑pö ꞊weeyi ꞊bhaa!› 'ö ‑kë "dhʋ̈ ka ‑wʋ "dhiʋ̈.
MAT 21:22 ꞊Ya kë ꞊dhɛ 'ka ka ‑zʋ yö Atanna ‑dhɛ, pë "pɛpɛ 'ka dho‑ ‑gbadhɛ ‑a ‑gɔ ka ‑bha bhɛa" ‑sü 'gü, ‑yö ‑dho ‑a kë ka ‑dhɛ.»
MAT 21:23 ꞊Dhɛ 'ö ꞊wa 'dho "dhʋ̈ ꞊wa ꞊loo Zedhizadhɛmö, 'yö Yesu ‑yö ‑da 'zü ‑deewo Atanna ‑dhɔkëgükɔ 'gü, 'yö ‑ya mɛ draan‑ ‑sü ‑bha mü. 'Yö "saabhomɛ ‑nu ‑gɔmɛ ‑nu waa‑ ‑kwɛagbö ‑nu 'wo "sɛ 'gü, 'wo nu 'yö 'wo‑ pö‑ ‑dhɛ: «'Wɔn ‑nu 'i‑ ‑kë ‑nu wo ya, i‑ ‑kë de ꞊në‑ ‑bha kë 'gü? "Ɛɛn de ꞊në‑ pö 'i‑ kë "dhʋ̈?»
MAT 21:24 'Yö Yesu ‑ya ‑yɔ bɔ 'pö‑ ‑nu ‑gɔ 'ö‑ pö: «A ‑dho ka dhɛɛ" do 'kpɔ 'pö, ꞊ya kë ꞊dhɛ 'ka‑ ‑yɔ bɔ n ‑gɔ kö mang ‑dɩ 'pö 'a 'wɔn ‑nu bha‑ kë 'mɛ 'ö‑ ‑bha kë 'gü kö 'a‑ ‑mɛ pö ka ‑dhɛ.
MAT 21:25 De ꞊në Zan bɔ kö ‑yö mɛ "zu? Atanna ‑ee, "ɛɛn mɛ "bhɩɩ‑ ‑nu ‑ee?» ꞊Dhɛ 'ö ꞊yaa‑ pö "dhʋ̈, 'yö 'wo ‑ya ‑a ‑pö wo 'ko ‑dhɛ ‑sü ‑bha 'wo‑ pö: «꞊Ya kë ꞊dhɛ 'kwa‑ pö‑ ‑dhɛ ꞊dhɛ Atanna ‑mü, ‑yö ‑dho kwa dhɛɛ" 'kpɔ 'zü 'ö‑ pö: ‹"Kɛɛ ‑yö ‑kë ‑mü ꞊dhɛ 'yö 'kii 'dhang bho ‑wʋ 'ö‑ pö n ‑bu 'gü bha‑ "dhiʋ̈?›.
MAT 21:26 'Kwii kë‑ pö "dhʋ̈ 'zü 'kwa‑ pö: ‹Mɛ "bhɩɩ‑ ‑nu ‑mü› 'kwa ‑kpla "sɛgümɛ ‑nu ‑gɔ, ‑a ‑gɛn ‑mü ꞊dhɛ mɛ ꞊gban "pɛpɛ ‑wa 'wɔn ‑dɔ ꞊dhɛ Atanna ‑wʋdhiʋ̈loomɛ ꞊në gun Zan 'ka.»
MAT 21:27 ꞊Dhɛ 'ö ꞊ya kë "dhʋ̈, 'yö 'wo‑ ‑yɔ bɔ Yesu ‑gɔ 'wo‑ pö: «'Yaa‑ ‑mɛ dɔ.» 'Yö Yesu ‑ya pö‑ ‑nu ‑dhɛ 'pö 'ö‑ pö: «‑Ɛɛ, kö mang ‑dɩ 'pö 'mii 'dho n ‑bha ‑gɛn pö ka ‑dhɛ.»
MAT 21:28 ꞊Dhɛ 'ö Yesu ꞊ya ö bo‑ ‑pö ‑nu ‑dhɛ "dhʋ̈ ‑sü 'ka, 'yö‑ pö: «"Gwënng 'ö maa ‑da bha, 'ka ka ‑bha 'sü‑ 'gü!» 'Yö‑ pö: «Gɔndënë do 'bha bha‑ gbö ‑nu ‑wo ‑gun ꞊plɛ. Yi do 'ka 'yö‑ pö‑ mɛ ‑blɛɛsü ‑dhɛ: «Gɔnnë, ‑bhö 'dho ꞊dɛɛ ‑zë 'gü n ‑gɔ 'bhlaa‑ kö 'i yë kë 'mü!»
MAT 21:29 'Yö 'në bha 'ö‑ pö ö dë ‑dhɛ: «N dë, 'mii 'dho 'dho.» "Kɛɛ ꞊dhɛ 'ö ꞊yaa‑ pö "dhʋ̈, 'ö ꞊ya ö "tɛɛ 'në 'bha 'pa 'ö ꞊ya ö ‑zʋ 'gɔn, 'yö ‑ziö 'yö dho mü.
MAT 21:30 ‑A mɛ 'dhɛ 'ö to bha 'yö‑ dë ‑ya pö 'pö‑ ‑dhɛ ꞊dhɛ ‑kɔ do 'ö‑ pö‑ 'ka mɛ ‑blɛɛsü ‑dhɛ bha‑ 'dhö. 'Yö yö ‑zë 'ö‑ pö: «‑A ꞊oo, n dë, 'bha‑ pö "dhʋ̈ 'ma‑ ma.» "Kɛɛ 'yö 'yii 'dho.
MAT 21:31 ꞊Ya kë "dhʋ̈ kö mɛ ꞊plɛ bha‑ de ‑sü 'pö kë ö dë ‑wʋ ‑ya ꞊bhlëë 'gü?» 'Yö 'wo‑ pö‑ ‑dhɛ: «‑A mɛ ‑blɛɛsü.» 'Yö Yesu ‑ya pö‑ ‑nu ‑dhɛ 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: ꞊Flümɛ ‑nu 'wo ‑kë 'niisɔngkunmɛ ‑nu 'ka bha waa‑ ‑zuadhe ‑nu ‑wo ‑dho ‑da Atanna ‑gɔ ‑gblüdëdhɛ 'gü ka "dhiʋ̈.
MAT 21:32 ‑A ‑gɛn ‑mü ꞊dhɛ Zan kë ‑nu 'ö zian 'ö‑ du 'yaa ‑bha ‑a ‑zɔn ka ‑dhɛ, "kɛɛ 'kii 'dhang bho‑ ‑wʋ "dhiʋ̈, "kɛɛ 'sa 'niisɔngkunmɛ ‑nu 'kö 'wo bha waa‑ ‑zuadhe ‑nu ‑zë ‑wo kë 'dhang bho‑ ‑wʋ "dhiʋ̈, 'ö‑ ‑kë "dhʋ̈ ‑sü ꞊gban waa‑ ‑bha ‑bha, ka zuë" 'yii slëë‑ tongtongdhö kö 'ka 'dhang bho‑ ‑wʋ "dhiʋ̈.»
MAT 21:33 ꞊Dhɛ 'ö ꞊ya kë "dhʋ̈ 'yö Yesu ‑ya pö 'zü‑ ‑nu ‑dhɛ ‑deewo 'ö‑ pö: «‑Ka ka "tʋ 'to "gwënng 'ö maa‑ ‑da bha‑ ‑bha!» 'Yö‑ pö: «Gɔndënë do ꞊në gun, 'yö ‑drɔɔ ‑bhlaa ‑yö gun‑ ‑gɔ. 'Yö‑ ‑zü ꞊klëën, 'yö ‑drɔɔ "yi ‑bho 'gü ‑yɛ do pɔn, 'yö dho 'yö 'kɔ 'në do dɔ kö ‑yö ‑nu kë ‑dhɛ bha‑ ‑maa ‑kë ꞊wlöö ‑kɔ 'ka. 'Yö ö ‑bha 'bhlaadhɛ bha‑ ‑da buzan 'gü, 'yö dho "ta 'gü.
MAT 21:34 ꞊Dhɛ 'ö‑ ‑ga ꞊dhɛ ‑drɔɔ ga bho "tʋ̈ng ꞊ya ꞊loo, 'yö ö ‑bha gwëëzë ‑nu bɔ kö buzankëmɛ ‑nu bha ‑wo ö ‑bha 'ö ꞊slɔɔ ‑a dɔ‑ ‑nu ‑gɔ kö ‑wo nu‑ 'ka ö ‑dhɛ.
MAT 21:35 "Kɛɛ 'yö 'mɛ 'wo bha 'wo gwëëzë ‑nu bha‑ ‑nu kun 'yö 'wo‑ mɛ do ‑ma tëëtëëdhö, 'yö 'wo‑ mɛ do zë, 'yö 'wo‑ mɛ ‑yaaga ‑naa ‑zuö ‑gwë 'ka 'yö to‑ "dhiʋ̈ 'ö ga 'pö.
MAT 21:36 'Yö 'bhlaa dëmɛ ‑yö dɔ 'zü 'yö‑ mɛ 'bha bɔ, 'yö mɛ 'dhɛ 'wo bha 'wo ‑kë 'gbɛ 'ö ‑ziö 'mɛ 'wo gun ‑blɛɛsü ‑a ‑nu ‑ta, "kɛɛ 'yö buzankëmɛ ‑nu bha 'wo‑ ‑nu ‑kë 'zü ꞊dhɛ ‑kɔ do 'wo mɛ ‑blɛɛsü ‑nu ‑kë 'ka bha‑ 'dhö.
MAT 21:37 ꞊Dhɛ 'ö ꞊ya kë "dhʋ̈, 'yö 'bhlaa‑ dëmɛ bha 'ö ö ‑zʋ gɔn ꞊dhɛ ‑yö kë 'ö‑ wo gwëëzë ‑nu 'ka 'yö ‑kë. 'Yö ö gbö bɔ.
MAT 21:38 "Kɛɛ ꞊dhɛ 'ö buzankëmɛ ‑nu bha 'wo‑ gbö bha‑ yö, 'yö 'wo‑ pö wo 'ko ‑dhɛ 'wo‑ pö: «'Mɛ 'ö yöö kë 'bhlaa‑ ya‑ ‑mɛ 'ka yiplɛɛbha 'yö bha, ‑ka kwaa‑ 'kun 'kwa‑ zë kö ‑dhɛ bha ‑yö 'to kwa ‑gɔ!»
MAT 21:39 'Yö 'wo‑ kun 'yö 'wo‑ sü 'wo go‑ 'ka ‑drɔɔ ‑bhlaa 'gü, 'yö 'wo‑ zë.
MAT 21:40 'Yö Yesu ‑yö 'mɛ 'wo "tʋ 'to sië‑ ‑wʋ ‑bha bha‑ ‑nu dhɛɛ" kpɔ 'ö‑ pö: «Ka ka ‑zʋ ‑gɔn ꞊dhɛ 'bhlaadhɛ bha‑ ‑mɛ bha ꞊ya nu, ‑yö ‑dho buzankëmɛ ‑nu bha‑ ‑nu kë ꞊dhɛ?»
MAT 21:41 'Yö 'wo‑ ‑yɔ bɔ‑ ‑gɔ 'wo‑ pö: «Mɛ ‑mawɔn yaa ‑nu bha ‑yö ‑dho ‑a ‑nu 'kun ꞊në‑ wo 'ö‑ ‑nu zë, ‑a ‑nu ‑wëë 'yii 'dho‑ kë, 'yö ö ‑bha ‑dhɛ bha‑ sü 'ö ‑dɔ mɛ "wɛɛ ‑nu 'ö ꞊waa‑ ‑yë kë 'wo dho‑ ‑bha nu‑ ‑dhɛ ‑a ‑nu "tʋ̈ng ‑bha bha‑ ‑nu ‑dhɛ.»
MAT 21:42 'Yö Yesu ‑ya pö‑ ‑nu ‑dhɛ 'ö‑ pö: «Pë 'ö ‑bɛn zë ‑sü 'ka Atanna ‑wʋ 'gü ꞊dhɛ: ‹‑Gwë 'ö 'kɔdɔmɛ ‑nu 'wo wo ꞊kwaa‑ ‑zü bha ꞊në, kë ‑kë 'kɔ "kpan ‑ya ‑ta ‑gwë 'ka› bha 'kii‑ ma do ‑ee? "Ɛɛn 'yaa ‑bɛn zë ‑sü 'ka "dhʋ̈ ‑ee? ‹Kë 'ö‑ wo "dhʋ̈ bha ‑yö ‑go kwa Dëmɛ ꞊në‑ 'gü, ‑yö "dhabhliwɔn 'ka kwa ‑zë kwa "yan 'gü.›»
MAT 21:43 'Yö‑ pö‑ ‑nu ‑dhɛ 'zü 'ö‑ pö: «Yö ꞊në ‑wɔn 'gü 'yö 'a‑ pö ka ‑dhɛ ꞊dhɛ: Atanna ‑dho ö ‑bha ‑gblüdëdhɛ bha‑ 'sü (Zuifö ‑nu) ka ‑gɔ 'ö‑ nu mɛ "wɛɛ ‑nu 'wo ꞊mɔɔ‑ ‑bha 'wo‑ ꞊trɔɔn ‑së ‑kë ‑a ‑dhɛ bha‑ ‑nu ‑dhɛ.
MAT 21:44 ‑A ‑gɛn ‑mü ꞊dhɛ ‑gwë 'ö 'kɔdɔmɛ ‑nu ‑wo wo ꞊kwaa‑ ‑zü "dhʋ̈ bha 'mɛ 'ö dho ‑pö ‑ta, ‑a ‑mɛ ‑dho "yɛ, 'sa yö ‑zë yaa‑ ‑pö 'mɛ 'ö‑ ‑ta ‑a ‑mɛ ‑dho ‑bʋ̈ʋ̈ bho.»
MAT 21:45 Yesu 'dhö "gwënng ‑nu 'ö ‑da "dhʋ̈ bha ꞊dhɛ 'ö "saabhomɛ ‑nu ‑gɔmɛ ‑nu waa‑ Fadhiziɛn ‑nu 'wo‑ ma, ‑wo kë‑ 'wɔn ‑dɔ ꞊dhɛ ‑yö ‑wɩ wo ꞊në wo 'ka.
MAT 21:46 'Yö 'wo ‑ya ‑a "slë mɔɔ‑ ‑sü ‑bha kö 'wo‑ 'kun, "kɛɛ kö ‑wo "suʋ̈ sië mɛ kpö bha‑ ‑nu ‑gɔ, ‑a ‑gɛn ‑mü ꞊dhɛ kö wo ‑zë ‑wo Yesu 'sü sië ꞊dhɛ Atanna ‑wʋdhiʋ̈loomɛ ꞊në‑ 'dhö.
MAT 22:1 ꞊Dhɛ 'ö ꞊ya kë "dhʋ̈ 'yö Yesu ‑yö dhiang 'bha zë 'zü "tʋ ‑to ö ‑wʋ ‑bha ‑mɛ ‑nu ‑dhɛ 'ö‑ pö:
MAT 22:2 «Atanna ‑bha ‑gblüdëdhɛ bha‑ ꞊tɛni ‑kë ꞊dhɛ ‑gblüdë do 'ö ö gbö ‑bha dhe 'sü ‑sü troo yi kpɔ ꞊në‑ 'dhö.
MAT 22:3 ꞊Dhɛ 'ö troo bha‑ yi ꞊ya ꞊loo, 'yö ö ‑bha gwëëzë ‑nu bɔ 'mɛ 'ö‑ ‑nu ‑dhɛ troo bha‑ ‑ta bha‑ ‑nu ‑dhɛ ‑dhɛ 'gü, "kɛɛ 'yö 'mɛ 'ö‑ ‑nu ‑dhɛ bha 'wo ‑kɔ.
MAT 22:4 'Yö ‑ya mü 'zü 'ö mɛ 'bha bɔ 'yö‑ pö‑ ‑nu ‑dhɛ: «‑Ka 'dho 'ka‑ pö‑ 'mɛ 'a‑ ‑nu ‑dhɛ bha‑ ‑nu ‑dhɛ ꞊dhɛ ‑bhöpë ꞊gbaan ma, 'ma ma ‑du ‑nu waa‑ ma ‑tuʋ̈ "wɛɛ ‑nu 'ö ꞊wa "yɔn kë ‑a ꞊gban zë, ‑a ‑gbɔ ꞊ya 'go pɛng ‑ta, ‑wo nu kö 'kwa dhe dɔ ‑pë bha‑ ‑bhö.»
MAT 22:5 "Kɛɛ 'yö 'mɛ 'ö‑ ‑nu ‑dhɛ bha 'wii wo "tʋ kë ‑a ‑bha ꞊dhiɔwʋ bha‑ ‑bha, 'yö 'wo dho wo ‑mawɔn ‑nu kë ‑dhɛ 'gü. ‑A mɛ 'bha ꞊ya "wlü 'yö dho ö ‑gɔ 'bhlaa‑, 'yö‑ mɛ 'bha ‑yö ꞊wlü 'yö dho ö ‑bha "dhɔɔ dɔ ‑zian 'ka.
MAT 22:6 'Yö‑ mɛ 'bha ‑nu ‑dɩ 'pö 'wo gwëëzë ‑nu bha‑ ‑nu kun 'wo‑ ‑nu ‑wëëdhɛ bho 'yö 'wo‑ ‑nu zë.
MAT 22:7 ‑A kë 'wo‑ wo "dhʋ̈ bha, 'pu 'ö‑ wo ‑gblüdë bha‑ ‑bha ‑a ‑naa 'yii kë. 'Yö ö bha "sɔdha ‑nu bɔ 'yö 'wo dho 'wo mɛzëmɛ ‑nu bha‑ ‑nu zë, 'yö 'wo‑ ‑nu ‑bha 'pö‑ ‑nu ‑gʋ̈.
MAT 22:8 ꞊Dhɛ 'ö go mü, 'yö‑ pö ö ‑bha gwëëzë ‑nu ‑dhɛ ꞊dhɛ: «‑Dhɔkëpë ya ꞊ya ma, "kɛɛ mɛ ‑blɛɛsü ‑nu 'a‑ ‑nu ‑dhɛ bha 'waa gun‑ ꞊bhlëë 'gü ‑mɛ 'ka.
MAT 22:9 ꞊Dhɛ 'ö "dhʋ̈, ‑ka 'dho zian ‑gloo ‑ta ‑dhɛ ‑nu 'gü 'dɔɔndhö, kö mɛ "pɛpɛ 'ka dho ‑kpan ‑a ‑nu ‑bha kö 'ka‑ ‑nu ‑dhɛ!»
MAT 22:10 ꞊Dhɛ 'ö ꞊yaa‑ pö "dhʋ̈, 'yö‑ ‑bha gwëëzë ‑nu bha 'wo dho zian ‑gloo ‑ta ‑dhɛ ‑nu 'gü 'yö 'wo 'wɔnsëkëmɛ ‑nu oo, 'wɔnyaakëmɛ ‑nu oo, mɛ "pɛpɛ kö 'wo ‑kpan ‑bha, 'yö 'wo‑ ‑nu ‑dhɛ, 'yö ‑dhɔkëdhe ‑kë 'gü ‑kɔ bha 'ö pa.
MAT 22:11 ꞊Dhɛ 'ö mɛ ꞊ya 'kɔ pa ꞊dhɛ ‑kɔ bha‑ 'dhö, 'yö ‑gblüdë ‑yö nu kö 'ö ö "yan ‑kpan 'mɛ 'wo nu ö ‑bha ꞊dhiɔwʋ ‑bha bha‑ ‑nu ‑bha. ꞊Dhɛ 'ö ꞊ya ‑da 'kɔɔdhö, 'yö ö "yan ‑kpan gɔndë do 'bha ‑bha mü kö ‑dhɔkëdhe bha‑ ‑ta ‑sɔ ('ö‑ ‑pë ‑kë ‑a ‑yan ‑ta kö 'ö‑ ꞊gbaɔ 'mɛ 'wo dho ‑da 'kɔ bha‑ 'gü ‑a ‑nu ‑gɔ ꞊dhɛ ‑kɔ 'wo‑ ‑kë 'ka wo wɔ ‑kɔ 'gü ‑a 'dhö 'ö 'yaa 'mɛ 'ö‑ ‑gɔ 'yaa ‑da ‑dhɔkëdhɛ ‑kë 'gü ‑kɔ 'gü bha) 'yaa‑ ‑bha,
MAT 22:12 'yö‑ dhɛɛ" kpɔ 'ö‑ pö: «N "taɔngdë, i ‑da 'kɔ ya‑ 'gü ‑kɔ ‑kë ꞊dhɛ kö ‑dhɔkëdhe ‑ta ‑sɔ 'kö ya 'yaa i ‑bha? "Kɛɛ dhɛɛ" kpɔ 'ö bha‑ ‑yɔ 'yii‑ ꞊slɔɔ 'mɛ bha‑ ‑gɔ.
MAT 22:13 'Yö ‑gblüdë ‑ya pö ö ‑bha gwëëzë ‑nu ‑dhɛ 'ö‑ pö: «‑Kaa 'kun 'ka‑ ‑kɔ waa‑ ‑gɛn ‑nu ‑lö kpɛnngkpɛnngdhö kö 'ka‑ ‑zuö ‑dhɛtiidhɛ 'gü "kpɛnngdhö kö ‑yö ‑wëë ‑gbʋ bɔ kö ‑yö ö "sɔn "dhiʋ̈ ‑bhö 'ka klöklödhö.
MAT 22:14 ꞊Dhɛ 'ö Yesu ꞊yaa‑ pö "dhʋ̈, 'yö ö ‑wʋ "zɔ dɔ 'ö‑ pö: «‑A pö 'a‑ wo "dhʋ̈ bha‑ ‑gɛn ‑mü ꞊dhɛ mɛ 'ö Atanna ‑ya ‑nu ‑dhɛ kö ‑wo ‑ya ö ‑bha ‑ya 'gü bha ‑wo 'gbɛ "dhʋ̈ tɛan‑ 'ka, "kɛɛ mɛ 'dhɛ 'wo dho kë ‑a dhɔɔbhaamɛ ꞊dede 'ka 'ö 'wo dho 'to‑ ‑bha 'to 'gü ꞊në 'waa 'gbɛ.
MAT 22:15 ꞊Dhɛ 'ö Yesu ꞊ya bo‑ ‑pö "dhʋ̈ ‑sü 'ka, 'yö Fadhiziɛn ‑nu 'wo zun ‑a "slë mɔɔ‑ ‑sü ‑bha kö 'wo‑ 'kun ‑a ‑dɩ ‑wʋ ‑bha, 'yö 'wo‑ ‑ya 'kwëë‑ ‑kë.
MAT 22:16 'Yö 'wo woo‑ ꞊klangdhiʋ̈ ‑nu 'bha ‑nu waa‑ Edhodö ‑bha mɛ 'bha ‑nu bɔ Yesu "piʋ̈, 'yö 'wo‑ dhɛɛ" kpɔ 'wo‑ pö: «Yi Dëmɛ, yi‑ 'wɔn ‑dɔ ꞊dhɛ i tɛanwɔn ꞊në‑ pö, 'ö 'i mɛ ꞊klang ‑nu ‑kë tɛanwɔn 'ö zian 'ö dho Atanna "piʋ̈ ꞊në‑ ‑zɔn mɛ ‑dhɛ ‑a 'ka, 'bhaa "suʋ̈ mɛ "bhɩɩ‑ ‑nu ‑gɔ, ‑a ‑gɛn ‑mü ꞊dhɛ 'bhaa ‑kpla mɛ 'bha ‑gɔ ‑a ‑bha kë ‑tiandhö ‑sü ‑bha.
MAT 22:17 ‑A ‑kë "dhʋ̈ ‑sü bha‑ 'gü, 'nii‑ sɔng 'yi‑ bho sië Wlɔmö ‑mɛ ‑nu ‑bha ‑gblüdë 'kpii‑ ‑dhɛ ya ‑yö këwɔn 'ka, "ɛɛn 'yaa këwɔn 'ka? i ‑bha 'ö 'i i ‑zʋ gɔn‑ 'ka ‑a pö yi ‑dhɛ!»
MAT 22:18 "Kɛɛ 'ö gun "dhʋ̈ kö Yesu ‑ya ‑nu zuëpiʋ̈wɔn ‑dɔ, 'yö‑ ‑yɔ bɔ‑ ‑nu ‑gɔ 'ö‑ pö: «꞊Flümɛ ‑nu 'ka ya, 'wɔn 'ö ka ‑zʋ "piʋ̈ 'yaa kë "dhʋ̈, n 'gü ꞊në 'ka nu‑ dan.»
MAT 22:19 'Yö‑ pö: «‑Ka 'wëëga 'wo 'nii‑ sɔng bho‑ 'ka bha‑ do ‑zɔn n ‑dhɛ!» 'Yö 'wo "tanmaga do nu‑ ‑dhɛ.
MAT 22:20 'Yö‑ ‑nu dhɛɛ" kpɔ 'ö‑ pö: «De ꞊në‑ ‑gɔ "blɛɛn‑ waa‑ ‑a 'tɔ 'wo 'wëëga ya‑ ‑ta ya?» 'Yö 'wo‑ pö‑ ‑dhɛ:
MAT 22:21 «Wlɔmö ‑mɛ ‑nu ‑bha ‑gblüdë 'kpii‑ ‑mü.» 'Yö‑ pö‑ ‑nu ‑dhɛ 'ö‑ pö: «Kö ‑ka 'pë 'ö‑ ‑bha 'ka ‑a nu‑ ‑dhɛ kö 'ka‑ 'dhɛ 'ö Atanna ‑bha 'ka ‑a nu Atanna ‑dhɛ!»
MAT 22:22 ꞊Dhɛ 'ö 'mɛ 'wo bha 'wo dhiang ‑yɔ 'ö Yesu ‑ya bɔ bha‑ ma, 'yö‑ 'wɔn ‑ya ‑nu kɔn 'yö 'wo‑ to 'mü 'wo ‑ziö.
MAT 22:23 ‑A yi do bha‑ 'ka 'yö 'mɛ 'wo ‑kë 'pö Sadusiɛn ‑nu 'ka 'ö 'wo‑ pö 'mɛ ꞊ya ga 'yaa ‑bö 'zü bha 'yö‑ mɛ ga 'bha 'wo nu Yesu "piʋ̈ 'wo‑ dhɛɛ" kpɔ 'wo‑ pö:
MAT 22:24 «Yi Dëmɛ, Moizö ‑ya ‑pö yi 'bha 'ka ꞊dhɛ ꞊ya kë ꞊dhɛ mɛ 'bha ꞊ya ga kö 'në 'yaa‑ ‑mɛ ‑gɔ, ‑a ‑dhɛa ‑bha kö‑ ‑mɛ 'zlaa‑ ‑ya ‑mɛ ‑bha dhebhɔ bha‑ 'sü kö wɛng ‑wo 'në 'kpɔ ‑a ꞊dhoo 'ö ga bha‑ ‑bha 'kpɔ 'gü kö ‑yö kë‑ ꞊dhoo bha‑ 'tɔ 'ka.
MAT 22:25 "Kɛɛ 'sa dheebhangzë ‑nu "saɔplɛ 'bha ‑wo ‑gun yi kpö 'gü yi 'bha 'ka, 'yö‑ mɛ 'kpiisü ‑yö dhe sü 'yö dho 'ö ga kö 'wii 'në 'bha 'kpɔ. ꞊Dhɛ 'ö ‑kë ꞊dhɛ 'wii 'në 'kpɔ bha 'yö‑ ‑bha dhebhɔ bha 'ö ‑ya ‑a 'zlaa‑ ‑gɔ.
MAT 22:26 ‑A mɛ ꞊plɛ ‑naa bha 'zü waa‑ dhebhɔ bha 'wii 'në 'kpɔ 'yö ga, 'yö‑ mɛ ‑yaaga ‑naa ‑bha 'dhö ‑kë 'pö "dhʋ̈ 'yö 'wo dho‑ 'ka "dhʋ̈ "dhʋ̈ "dhʋ̈, 'yö dho 'ö zun‑ mɛ "saɔplɛ ‑naa ‑bha, 'yö ga kö 'wii 'në 'kpɔ do.
MAT 22:27 ꞊Dhɛ 'ö‑ ‑nu ꞊gban ꞊wa ga, 'yö dhebhɔnë bha yöö ‑dɩ 'pö 'ö ga.
MAT 22:28 ꞊Ya kë "dhʋ̈, yi 'ö 'mɛ ꞊wa ga 'wo dho ‑bö 'ka bha ꞊ya ꞊loo bha ‑oo, ‑a dhebhɔ bha‑ ‑dho kë mɛ "saɔplɛ bha‑ de ‑sü ꞊në‑ ‑bha dhebhɔ 'ka kpɛnngdhö? Dhɛɛ" 'yi‑ kpɔ "dhʋ̈ bha‑ ‑gɛn ‑mü ꞊dhɛ ‑a ‑nu ꞊gban ‑wo kë‑ ‑sü dhe 'ka!»
MAT 22:29 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Ka ka ‑dɩ ‑pö, ‑a ‑gɛn ‑mü ꞊dhɛ 'kaa 'pë 'ö ‑bɛn zë ‑sü 'ka Atanna ‑bha 'sëëdhɛ 'gü bha‑ dɔ. ꞊Ya 'go mü 'zü 'kaa Atanna ‑bha 'gügbɩɩdhɛ dɔ.
MAT 22:30 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ ꞊wa ga ‑a ‑nu ‑bö ‑yi bha‑ 'ka, dhe 'sü ‑wɔn 'yii 'dho kë, "ɛɛn gwaan‑ 'kpɔ ‑wɔn 'yii 'dho kë, mɛ ꞊gban‑ ‑dho ‑tosɛa kë ꞊dhɛ Atanna ‑bha "kië ‑nu 'wo dhang‑ 'gü bha ꞊në‑ 'dhö.
MAT 22:31 ‑A 'dhɛ 'ö ‑gban 'mɛ ꞊wa ga ‑a ‑nu ‑bö ‑sü ‑bha 'pö bha, 'pë 'ö Atanna ‑ya pö ka ‑dhɛ ‑a ‑bu 'gü 'kii‑ ma ꞊në wo do ‑ee?
MAT 22:32 Atanna ‑ya ‑pö: ‹Ma ꞊në 'a Ablaamö ‑bha Atanna 'ka, 'a Izaakö ‑bha Atanna 'ka, 'yö 'a Zakɔbö ‑bha Atanna 'ka.› A‑ ‑pö ka ‑dhɛ ꞊dhɛ ꞊ya kë 'nu ꞊dhɛ 'mɛ ꞊ya ga kö ꞊ya ga 'yaa ‑bö 'zü, kö ‑a pö 'ö Atanna ‑ya wo "dhʋ̈ bha‑ ‑gɛn 'yaa 'dhö, "kɛɛ ‑yö kë ka "yaan ꞊dhɛ mɛ 'yaa ga kö mɛ‑ 'to‑ 'gü, 'mɛ ꞊wa ga bha ‑wo "yaan, 'wɔn 'ö‑ ‑wɔn 'gü 'ö‑ ‑nu 'tɔ pö ö ‑bha bha 'yö bha, ('yaa "dhʋ̈ 'nu kö ‑yö ‑dho ‑a pö ma ꞊në 'a gun‑ ‑nu ‑bha Atanna 'ka).
MAT 22:33 'Wɔn bha‑ ‑yɔ 'ö Yesu ‑ya bɔ "dhʋ̈ bha, 'mɛ 'wo‑ ma ‑wo ‑gun kpö 'ka, "kɛɛ ‑a 'wɔn ꞊në‑ ‑nu kɔn ‑zianwo.
MAT 22:34 ꞊Dhɛ 'ö Fadhiziɛn ‑nu waa‑ ma ꞊dhɛ dhiang ‑yɔ 'ö Yesu ‑ya bɔ Sadusiɛn ‑nu ‑gɔ bha yaa‑ ‑nu "dhi ta ꞊wa 'dho, 'yö 'wo ꞊loo 'ko ‑ta.
MAT 22:35 'Yö‑ ‑nu ‑bha mɛ do 'ö kë Atanna ‑bha 'sëëdhɛ dɔ mɛ 'kpii‑ 'ka, 'yö Yesu dhɛɛ" kpɔ ‑a 'gü dan kian 'ka 'ö‑ pö:
MAT 22:36 «N Dëmɛ, Atanna ‑bha 'tɔng‑ ‑nu 'wo‑ ‑gɔ 'sëëdhɛ 'gü bha‑ ‑mɛɛ ‑sü ꞊dede ꞊në‑ ꞊bhlëësü 'ka?»
MAT 22:37 ꞊Dhɛ 'ö ꞊yaa‑ pö "dhʋ̈ 'yö Yesu ‑ya ‑yɔ bɔ‑ ‑gɔ 'ö‑ pö: «'Tɔng‑ ‑nu bha‑ ꞊bhlëësü ꞊dede 'ö‑ 'gü yö ‑mü ꞊dhɛ: ‑A ‑dhɛa ‑bha kö i Dëmɛ i ‑bha Atanna bha a‑ ‑dhɔ ‑yö i kë 'böbödhö, kö 'i‑ ‑wɔn 'kun i 'nii‑ 'ka klöklödhö, kö‑ ‑dhɔ bha ꞊në ‑yö kë i ‑zʋgɔngüwɔn ꞊gban "pɛpɛ ‑gɛn ‑gban ‑dhɛ 'ka bha‑ 'ka.
MAT 22:38 Atanna ‑bha 'tɔng‑ ‑nu bha‑ 'dhɛ 'ö‑ ‑wɔn 'dhö "gbɩɩ‑ 'ö ‑ziö ‑a ꞊gban "pɛpɛ ‑ta 'yö bha.
MAT 22:39 ‑A ꞊plɛ ‑naa 'ö dɔ‑ 'dhɛ bha‑ "piʋ̈, "kɛɛ 'ö wɛng 'wo do yö ‑mü ꞊dhɛ: I këyɔɔ ‑dhɔ ‑yö i kë ꞊dhɛ ‑kɔ 'ö i ‑dɩ ‑dhɔ ‑yö i ‑dɩ kë‑ 'ka bha‑ 'dhö.
MAT 22:40 ‑Wʋ ꞊plɛ bha ꞊në Moizö ‑bha 'sëëdhɛ ꞊gban "pɛpɛ waa‑ Atanna ‑wʋdhiʋ̈loomɛ ‑nu ‑bha ꞊gban zü ‑gban 'gü 'ka.
MAT 22:41 'Ö gun kö Fadhiziɛn ‑nu ꞊wa ꞊loo 'ko ‑ta, 'yö Yesu ‑yö dhɛɛ" 'kpɔ do ‑kë ‑nu ‑gɔ 'ö‑ pö:
MAT 22:42 «Ka ka ‑zʋ ‑gɔn Atanna bha ‑Yamɛ bha‑ ‑wɔn 'gü ‑kɔ kë ꞊dhɛ? Ka ka ‑zʋ ‑gɔn ꞊dhɛ ‑yö ‑dho 'go de ꞊në‑ suu 'gü?»
MAT 22:43 'Yö 'wo‑ ‑yɔ bɔ‑ ‑gɔ 'wo‑ pö: «‑Yö ‑dho 'go Davi ꞊në‑ suu 'gü.» 'Yö Yesu ‑ya pö‑ ‑nu ‑dhɛ: "Kɛɛ ‑yö ‑kë ‑mü ꞊dhɛ 'sa 'yö Davi ‑zë 'ö‑ ‑dhɛ Atanna ‑bha 'Nii‑ "slʋ̈ʋ̈slʋ̈ ‑kɔ 'ka, n Dëmɛ? ‑A ‑gɛn ‑mü ꞊dhɛ Davi ‑ya ‑pö yö ꞊në‑ ‑bu 'gü yi 'bha 'ka 'ö‑ pö:
MAT 22:44 ‹Atanna ‑ya ‑pö n Dëmɛ ‑dhɛ: ‑Bhö ‑ya ‑yɛa ꞊bhlëësü ya‑ 'gü ‑yö 'dho‑ 'ka "dhʋ̈ ‑yö zun‑ 'ka yi 'a dho i 'yaɔ‑ ‑nu ‑da 'ka i ‑gɛn ꞊wlöö bha‑ ‑bha!›
MAT 22:45 ‑A ‑kë "dhʋ̈ ‑sü 'gü 'mɛ 'kö Davi ‑zë 'ö‑ ‑dhɛ ö Dëmɛ, ‑yö ‑mɔɔ ‑bha 'ö ‑kë yö ‑zë bhaanë 'ka ‑kɔ ‑kë ꞊dhɛ?
MAT 22:46 Dhɛɛ" 'kpɔ 'ö Yesu ‑ya wo "dhʋ̈ bha‑ ‑yɔ 'yii ꞊slɔɔ mɛ do ‑zian ‑gɔ 'mɛ bha‑ ‑nu kpö 'gü kö ‑ya bɔ‑ ‑gɔ. ‑A ‑kë "dhʋ̈ ‑sü bha‑ 'gü, 'ö sü yi 'dhɛ 'kö bha‑ ‑bha 'ö dho‑ 'ka "dhiʋ̈, ‑a ‑nu 'bha 'wii‑ dhɛɛ" 'kpɔ 'zü.
MAT 23:1 ꞊Dhɛ 'ö ꞊ya kë "dhʋ̈ 'yö Yesu ‑yö zun dhiang ‑zë ö ‑bha ꞊klang ‑nu ‑dhɛ ‑sü ‑bha waa‑ mɛ kpö 'wo gun mü bha‑ ‑nu 'dhö 'ö‑ pö:
MAT 23:2 «Zuifö ‑nu ‑bha 'tɔnggɔmɛ ‑nu waa‑ Fadhiziɛn ‑nu ‑wo dɔ sië Moizö ‑duɛ ꞊në‑ 'gü bha kö ‑wa ‑bha 'tɔng‑ ‑zɔn ka ‑dhɛ.
MAT 23:3 ꞊Dhɛ 'ö "dhʋ̈ pë "pɛpɛ 'wo dho‑ pö ka ‑dhɛ ‑kaa kë! "Kɛɛ kɛng‑ ‑nu ka "ta ‑kɔ ‑zë 'ya 'dho kë do, ‑a ‑gɛn ‑mü ꞊dhɛ ‑wo mɛ ‑nu ꞊klang ‑kë 'ka "kɛɛ wo ‑zë 'waa‑ kë.
MAT 23:4 Wo ‑zë ‑a ‑nu ‑bha 'tɔng‑ ‑zɔn ‑sü bha ‑yö ‑kë ꞊dhɛ ꞊kwɛɛ 'gbiin‑ dhu ‑sü kö ‑wa ‑ya mɛ ꞊gbin‑ bha ꞊në‑ 'dhö. ‑Wo mɛ ‑nu dɔ ꞊në‑ bho‑ 'ka, "kɛɛ 'waa "wɩ‑ ‑bha kö wo ‑zë ‑wo wo kɔngga do ‑zian ‑ya ‑bha.
MAT 23:5 ‑Wo wo ‑bha 'wɔn ꞊gban ‑wɔn ꞊gban ‑kë kö mɛ "bhɩɩ‑ ‑nu ꞊në ‑wa ‑nu yö. Yö ꞊në‑ ‑wɔn 'gü 'yö 'wo Atanna ‑wʋ "kplükplü ‑nu ‑bɛn zë 'sëëdhɛ ‑ta, 'yö 'wo‑ ‑da wü kwi "gbɛagbɛa ‑nu 'gü, 'yö 'wo‑ ‑ya wo ‑kpong "dhiʋ̈ ‑dhɛ ‑nu waa‑ wo ‑gbe ‑bha ‑dhɛ ‑nu 'gü, 'yö‑ ‑nu ‑bha ꞊gbauu‑ ‑nu "sɛɛ 'dhö ‑kë ꞊gblɛɛngblɛɛn.
MAT 23:6 'Yö 'wo ‑yɛa ꞊bhlëësü ‑nu ꞊në‑ ꞊mɔɔ ‑dhɔkëdhe ‑ta ‑dhɛ ‑nu 'gü, 'yö 'wo ‑yɛa ‑sɛsɛngbɔ ‑nu ꞊në‑ ꞊mɔɔ kö 'wo ‑ya 'gü Zuifö ‑nu ‑bha ‑yakwëëkëgükɔ ‑nu 'gü,
MAT 23:7 'yö‑ ‑nu "piʋ̈ ꞊dhɛ ‑wo wo ꞊në wo ꞊bhlëë ‑ya "tʋ̈ng ꞊gban "pɛpɛ 'gü "dhɛɛdhɛ ‑nu 'gü kö mɛ ꞊gban "pɛpɛ ‑wo wo ‑dhɛ ‹n Dëmɛ› bha,
MAT 23:8 "kɛɛ ka ‑zë 'ka 'dho "wɩ‑ ‑bha 'wo ka ‑dhɛ wo Dëmɛ, ‑a ‑gɛn ‑mü ꞊dhɛ dheebhangzë ‑nu ‑mü mɛ ꞊gban ka 'ka. ꞊Ya 'go mü 'zü ka Dëmɛ 'ö 'dhö ‑yö dosengseng.
MAT 23:9 Mɛ 'bha 'ya dho‑ pö 'ka ö ‑dhɛ "kpʋng ꞊taa yö ka dë ‑a ꞊bhlëë ‑ya ‑wɔn 'gü 'ö 'ka ‑wɩ ‑bha, ‑a ‑gɛn ‑mü ꞊dhɛ ka Dë ‑yö doseng, yö ꞊në dhang‑ 'gü.
MAT 23:10 'Ka 'dho "wɩ‑ ‑bha 'zü 'wo ka ‑dhɛ wo dëmɛ, ‑a ‑gɛn ‑mü ꞊dhɛ ka Dëmɛ ‑yö doseng, yö ‑mü Atanna ‑bha ‑Yamɛ bha ꞊në‑ 'ka.
MAT 23:11 'Mɛ 'ö‑ "piʋ̈ ꞊dhɛ 'ö ‑duɛ 'kpii‑ ꞊slɔɔ ka kpö 'gü, ‑a ‑dhɛa ‑bha kö‑ ‑mɛ ꞊në ‑yö kë yë ‑kë ka ‑dhɛ ‑mɛ 'ka.
MAT 23:12 ‑A ‑gɛn ‑mü ꞊dhɛ 'mɛ 'ö dho‑ pö 'ö ö ‑dɩ fië‑ bho ö "tɛabɔ ‑nu ‑bha, Atanna ‑dho ‑a ‑mɛ ‑da ‑a "tɛabɔ ‑nu ꞊wlöö. "Kɛɛ 'mɛ 'ö dho "wɩ‑ ‑bha kö ‑yö ö ‑dɩ ‑da ö "tɛabɔ ‑nu ꞊gban ꞊wlöö bha, Atanna ‑dho ‑a ‑mɛ gba ‑duɛ 'kpii‑ 'ka.
MAT 23:13 ꞊Dhɛ 'ö ꞊ya kë "dhʋ̈ 'yö Yesu ‑ya pö Zuifö ‑nu ‑bha 'tɔnggɔmɛ ‑nu waa‑ Fadhiziɛn ‑nu ‑dhɛ 'ö‑ pö: «'Tɔnggɔmɛ ‑nu kaa‑ Fadhiziɛn ‑nu, ka ‑bha ‑yö ‑wëësü, ꞊flümɛ ‑nu! ‑A ‑gɛn ‑mü ꞊dhɛ ka Atanna ‑bha ‑gblüdëdhɛ "dhiʋ̈ ꞊në‑ ta mɛ ‑nu ‑gɔ. Kaa ꞊dede 'kaa "wɩ‑ ‑bha kö ‑yö kë kaa‑ ‑gblüdë 'ka, "kɛɛ 'sa 'kaa "wɩ‑ ‑bha kö‑ ‑dhɔ 'dhö 'mɛ 'kö‑ ‑nu ‑bha ‑yö kë‑ ‑nu ‑bha ‑gblüdë 'ka.
MAT 23:14 ['Tɔnggɔmɛ ‑nu kaa‑ Fadhiziɛn ‑nu, ka ‑bha ‑yö ‑wëësü, ꞊flümɛ ‑nu, ‑a ‑gɛn ‑mü ꞊dhɛ ka ꞊në 'ka ꞊gɛandhe ‑nu ‑tabhö ‑sü ‑gɔ ‑bha, "kɛɛ 'ka 'go mü 'sa 'yö 'ka ‑bhɛa Atanna ‑dhɛ ‑kɔ 'gü ꞊gblɛɛngblɛɛn ‑nu bha‑ ‑kë, kë "dhʋ̈ kö ‑wo ka yö 'dhang ‑bho "dhiʋ̈ ‑mɛ ‑nu 'ka. Yö ꞊në‑ ‑wɔn 'gü, 'yö 'wɔn 'ö Atanna dho‑ wɔ ka ‑ta 'yö dho kë ‑ziisü.]
MAT 23:15 Ka ‑bha ‑yö ‑wëësü, 'tɔnggɔmɛ ‑nu kaa‑ Fadhiziɛn ‑nu, "gblʋ̈ʋ̈dhɛtiimɛ ‑nu, ‑a ‑gɛn ‑mü ꞊dhɛ ka "ta ‑kpɔ "kpʋngtaadhɛ ꞊gban "pɛpɛ 'gü, "ɛɛn ꞊weeyi ‑ta ‑dhɛ ‑nu 'gü kö 'mɛ 'yaa Zuifö 'ka, "kɛɛ 'ö‑ "piʋ̈ ꞊dhɛ 'ö ‑da Zuifö ‑nu ‑bha ‑bhɛa Atanna ‑dhɛ ‑kɔ 'gü bha 'ka‑ yö, kö 'ka‑ kë ‑dho pɛng ‑kaso 'ö ꞊geebɔɔ ‑a 'gü ‑mɛ 'ka, 'yö 'ka‑ ‑kë 'yö‑ ‑mɛ ‑bha ‑kë pë yaa 'ka ‑sü "dhiʋ̈ ‑yö ‑ziö ka ‑bha ‑zë ‑ta ‑gɛn ‑yan 'ka ꞊dhɛ pë ꞊plɛ 'dhö.
MAT 23:16 Zian ‑bho mɛ 'ka ‑mɛ "yan 'wü ‑sü ‑nu, ka ‑bha ‑yö ‑wëësü! ‑A ‑gɛn ‑mü ꞊dhɛ ka‑ ‑pö ꞊dhɛ: Mɛ ꞊ya ‑sö ‑bhö Atanna ‑dhɔkëgükɔ 'tɔ 'gü kö ‑sö ‑bhö ‑sü 'yaa "dhʋ̈, "kɛɛ 'mɛ 'ö ‑sö ‑bhö "sënng 'ö‑ ‑dhɔkëgükɔ 'gü bha ꞊në‑ 'tɔ 'gü kö ꞊ya ‑sö ‑bhö ꞊dedewo.»
MAT 23:17 ‑Gɔgütiimɛ ‑nu, "yanwlümɛ ‑nu! Pë ꞊plɛ bha‑ ‑mɛɛ ꞊në‑ ꞊bhlëë 'dhö 'kpii‑? ‑A "sënng bha "ɛɛn ‑a Atanna ‑dhɔkëgükɔ 'kö‑ "sënng ‑kë "slʋ̈ʋ̈slʋ̈ bha‑ yö ‑mü ‑ee?
MAT 23:18 'Ka 'go mü 'zü, 'yö 'ka‑ pö ꞊dhɛ: 'Mɛ 'ö ‑sö ‑bhö "saa‑ ‑bho ‑ta ‑pë 'tɔ 'gü kö 'yii ‑sö ‑bhö. "Kɛɛ 'mɛ 'ö‑ ‑bhö "saapë 'ö "saabhotapë ‑ta bha ꞊në‑ 'tɔ 'gü kö ꞊ya ‑sö ꞊dede ‑bhö.
MAT 23:19 ‑Gɔgütiimɛ ‑nu! Pë ꞊plɛ bha‑ ‑mɛɛ ꞊në ꞊bhlëësü? "Saabhodhɛ ‑ee ɛɛn "saapë ‑ee? 'Sa "saabhodhɛ ꞊në "saapë ‑kë ꞊bhlëësü.
MAT 23:20 A‑ ‑pö ka ‑dhɛ ꞊dhɛ mɛ 'ö ‑sö ‑bhö "saabhodhɛ 'tɔ 'gü kö ‑ya ‑bhö "saapë ‑nu ꞊gban ꞊në‑ 'tɔ 'gü bha.
MAT 23:21 'Mɛ 'ö ‑sö ‑bhö 'zü Atanna ‑dhɔkëgükɔ 'tɔ 'gü, kö ‑ya ‑bhö Atanna 'ö‑ 'kɔɔdhö ‑mü bha ꞊në‑ ꞊gban 'tɔ 'gü bha.
MAT 23:22 'Mɛ 'ö ‑sö ‑bhö dhang‑ 'tɔ 'gü kö ‑ya ‑bhö Atanna ‑bha ‑gblüdëdhɛ ‑gblooa‑ yö 'ö‑ ‑yɛa 'dhö ‑mü bha ꞊në‑ ‑nu 'tɔ 'gü bha.
MAT 23:23 Fadhiziɛn ‑nu kaa‑ 'tɔnggɔmɛ ‑nu, ka ‑bha ‑yö ‑wëësü, ꞊flümɛ ‑nu! ‑A ‑gɛn ‑mü ꞊dhɛ pë ‑nu ‑zian 'ö‑ ‑zun "dhiʋ̈ ‑bhlɔɔ 'yaa 'dhö ꞊dhɛ kpiëng ‑nu, "dhʋngbhɛɛ ‑nu, "ɛɛn siɔnng" ga ‑nu 'dhö bha ka wo ‑zë ꞊gban "pɛpɛ 'nii‑ ‑bho Atanna ‑dhɛ, "kɛɛ 'yö 'ka ka ‑ta yö mɛ draan‑ ‑wʋ 'kö‑ ‑wɔn 'dhö "gbɩɩ‑, 'ö ‑kë Atanna ‑bha 'tɔng‑ 'ka ꞊dhɛ, ‑kë kpengdhö ‑sü ‑nu oo, "klʋsëdhɛ ‑nu oo, ‑to ‑wʋ ‑ta ‑sü ‑nu 'dhö bha wo ‑zë ‑a ‑nu ‑bha, "kɛɛ 'sa kö yö ꞊në kë ‑pë 'ka ‑blɛɛsü 'yö‑ ‑kpɛa ‑yö gun ‑na dɔ‑ "piʋ̈.
MAT 23:24 Zian ‑bho mɛ 'ka ‑mɛ "yan 'wü ‑sü ‑nu! Ka 'ö 'ka ka mü ‑we ‑ziö ‑pee 'gü kë "dhʋ̈ kö ꞊flanflannë ‑zian 'ya 'dho 'to‑ ꞊bhaa 'ö 'ka‑ mü‑ 'ka bha, "kɛɛ 'sa ka pë "gblʋ̈gblʋ̈ ‑zë ‑mëng!
MAT 23:25 Ka ‑bha ‑yö ‑wëësü, 'tɔnggɔmɛ ‑nu, Fadhiziɛn ‑nu, ꞊flümɛ ‑nu! ‑A ‑gɛn ‑mü ꞊dhɛ ka ꞊dhɛ 'mɛ 'ö "yitakɔɔ ‑nu waa‑ pë ‑bhö 'gü ‑tɛa ‑nu kwi ‑bha ‑dhɛ ‑zë ‑zu, "kɛɛ 'ö‑ 'gü ‑zian ‑zë to "dhʋ̈ ꞊në‑ 'dhö. (Ka 'wɔn 'në sɛɛnnë ‑nu 'kö bha‑ ‑kë ꞊dhɛ ‑kɔ bha‑ 'dhö kë "dhʋ̈ kö 'ka bhɔ mɛ ‑nu 'gü Atanna ꞊bhlëëyamɛ ‑nu ‑bha "kɛɛ kö) ka 'kɔɔ ‑zian ‑zë ‑yö pa ‑sü 'ka kaa‑ ꞊kwaanpë ‑nu waa‑ pë yaya ‑nu 'ö ka zuë" ‑yö bhɔ‑ ‑bha bha ꞊në‑ 'ka.
MAT 23:26 Fadhiziɛn ‑nu, "yanwlümɛ ‑nu! ‑Ka kaa‑ pë ‑bhö 'gü ‑tɛa ‑nu 'gü ‑dhɛ "zu ꞊kö ‑blɛɛsü kö 'ka gun ‑na ‑bha ‑dhɛ "zu kö ‑yö kë "puu!
MAT 23:27 Ka ‑bha ‑yö ‑wëësü, Fadhiziɛn ‑nu kaa‑ 'tɔnggɔmɛ ‑nu, "gblʋ̈ʋ̈dhɛtiimɛ ‑nu! ‑A ‑gɛn ‑mü ꞊dhɛ ka ‑bhɔ bun ö ꞊wa "yɔɔ "puu ‑da ‑bha ꞊në‑ ‑bha. 'Bha‑ kwi ‑bha ‑dhɛ yö i‑ pö pë ‑së ‑zë 'bha ꞊nɛ, "kɛɛ kö‑ 'gü ‑zian ‑zë ‑yö pa ‑sü 'ka mɛ ga zlɔɔ" waa‑ pë "busü ‑dɩ ‑slɔɔ ꞊në‑ 'ka.
MAT 23:28 ‑Kɔ do bha ꞊në 'ka‑ ‑bha, ꞊wa ka ‑ga ka kwi ‑bha ka ‑bhɔ mɛ ‑nu 'gü 'mɛ 'ö pö 'aa‑ ‑bha ‑a ‑bha, "kɛɛ ka "gblʋ̈ʋ̈dhɛ ‑zë ‑yö pa ‑sü 'ka "kpënng‑ ‑kë mɛ ‑nu ‑gɔ ‑sü waa‑ 'wɔn yaa "wɛɛ 'gbɛ ꞊në‑ 'ka.»
MAT 23:29 'Yö go mü 'ö‑ pö: «Ka ‑bha ‑yö ‑wëësü, 'tɔnggɔmɛ ‑nu kaa‑ Fadhiziɛn ‑nu, "gblʋ̈ʋ̈dhɛtiimɛ ‑nu! ‑A ‑gɛn ‑mü ꞊dhɛ ka Atanna ‑wʋdhiʋ̈loomɛ ‑nu bun ‑nu ‑pë ‑kë ‑së 'ka, 'ö 'ka 'mɛ 'ö pö 'aa‑ ‑nu ‑bha ‑tosɛa ‑bha 'pö ꞊dhɛ ‑a ‑nu 'dhö bha‑ ‑nu bun ‑pë ‑kë ‑së 'ka.
MAT 23:30 'Ö 'ka‑ pö ꞊dhɛ: ‹꞊Ya kë 'nu ꞊dhɛ yi ‑tosɛa ‑kë yi "bhɛma ‑nu ‑bha "tʋ̈ng 'gü kö yi ‑wʋ 'yii 'dho kë‑ ‑nu ‑bha "piʋ̈ Atanna ‑wʋdhiʋ̈loomɛ ‑nu zë ‑wɔn 'gü.›
MAT 23:31 ꞊Ya kë "dhʋ̈ kö kaa ꞊dede ka‑ 'wɔn ‑dɔ ꞊dhɛ 'mɛ 'wo Atanna ‑wʋdhiʋ̈loomɛ ‑nu zë bha‑ ‑nu 'gü ‑në ‑nu ‑mü ka 'ka.
MAT 23:32 ꞊Dhɛ 'ö "dhʋ̈ kö ‑ka ka 'gü dɔ "gbɩɩ‑ kö yë 'ö ka "bhɛma ‑nu ‑wa zü bho bha 'ka‑ "dhiʋ̈ ‑ya!
MAT 23:33 ꞊Flümɛ ‑nu 'ka ya! ꞊Ya kë "dhʋ̈ ka ‑dho dha ‑kɔ kë ꞊dhɛ ‑wëëdhɛ bhodhe 'ö ꞊geebɔɔ pɛng 'gü bha‑ ‑gɔ?
MAT 23:34 ꞊Dhɛ 'ö "dhʋ̈ ‑ka ka "tʋ to, a ‑dho Atanna ‑wʋdhiʋ̈loomɛ ‑nu bɔ ka ‑dhɛ waa‑ mɛ ꞊kpaɔsü ‑nu waa‑ 'wɔndɔmɛ ‑nu 'dhö. Ka ‑dho mɛ 'bha ‑nu zë 'ö 'ka‑ mɛ 'bha ‑nu dɔ "dhü ‑bha 'ö 'ka dho 'ka‑ mɛ 'bha ‑nu ‑ma ‑nu wo ꞊klangga 'ka kaa‑ ‑yakwëëkëgükɔ ‑nu 'gü 'ö 'ka‑ ‑nu ‑wëëdhɛ bho 'pö‑ ‑nu 'gü 'ka ‑ziö 'ka.
MAT 23:35 Kë "dhʋ̈ kö Atanna ‑bha mɛ ‑nu 'wo‑ ‑nu zë "wlaa‑ 'gü "wɛɛwɛɛ 'wo ‑bhɔ 'ka yi 'bha 'ka 'ö‑ zü ‑yö bho Abɛdhö 'ö pö 'aa gun‑ ‑bha bha‑ ‑ta 'ö dho 'ö zun‑ 'ka Zakadhi 'ö ‑kë Badhasi gbö 'ka 'ö 'ka‑ zë Atanna ‑dhɔkëgükɔ 'gü, "saabhodhɛ waa‑ Atanna ‑dhɔkëdhɛ ꞊dede ‑a ‑nu ꞊zinng 'gü bha‑ ‑bha bha‑ "dhang ‑yö ka ꞊në ka 'kun.
MAT 23:36 A‑ ‑pö ka ‑dhɛ tɛan‑ ꞊dede 'ka ꞊dhɛ: 'Mɛ 'wo‑ ‑nu zë 'dɔɔndhö "dhʋ̈ bha‑ 'gü ‑wɔn ‑dho nu 'mɛ 'wo "tʋ̈ng ya‑ 'gü ya ꞊në‑ ‑nu ‑ta.»
MAT 23:37 'Yö Yesu ‑ya pö: «Zedhizadhɛmö ‑mɛ ‑nu, Zedhizadhɛmö ‑mɛ ‑nu, ka 'ö 'ka Atanna ‑wʋdhiʋ̈loomɛ ‑nu zë sië 'ö 'ka‑ mɛ 'bha ‑nu ‑zuö sië ‑gwë 'ka 'ka‑ ‑nu zë‑ 'ka bha, 'ma‑ "slë mɔɔ‑ ‑kɔ ꞊gban ‑kɔ ꞊gban 'gü kö 'a ka ꞊loo 'ko ‑ta ꞊dhɛ ‑kɔ 'ö ‑tɔ ‑dhee ‑yö ö 'në ‑nu ꞊loo‑ 'ka ö gban ꞊wlöö bha‑ 'dhö, "kɛɛ 'kii‑ ‑yɔ bɔ n ‑gɔ!
MAT 23:38 ‑Ka ‑dhɛ ‑ga, a ‑dho n kwaa‑ ka ‑wɔn ‑zü 'ö ka ‑yɛabhaadhɛ ‑yö to "fië.
MAT 23:39 ‑Ka ‑dhɛ ‑ga! A‑ pö ka ‑dhɛ ꞊dhɛ 'ö sü "tʋ̈ng ya‑ ‑bha 'ö dho 'ö zun‑ 'ka "tʋ̈ng 'ka dho‑ pö‑ 'ka ꞊dhɛ 'dhuë‑ ‑yö 'to 'mɛ 'ö dho nu kwa Dëmɛ 'tɔ 'gü bha‑ ‑ta bha‑ ‑bha, 'kii 'dho n yö 'zü.
MAT 24:1 ꞊Dhɛ 'ö Yesu ‑ya ö bo dhiang ‑nu bha‑ ‑nu zë ‑sü 'ka, 'yö go Atanna ‑dhɔkëgükɔ bha‑ 'gü 'yö dho. ꞊Dhɛ 'ö 'dho sië 'yö‑ ‑bha ꞊klang ‑nu 'wo ꞊yɔɔn‑ "sɔɔ, 'yö 'wo‑ pö‑ ‑dhɛ 'wo‑ pö: «Yi Dëmɛ, Atanna ‑dhɔkëgükɔ ya i "yan ‑ya ‑bha "wɛ ‑ee? ‑A dhi ‑kɔ bha‑ ‑ga bha!»
MAT 24:2 "Kɛɛ ꞊dhɛ ꞊waa‑ pö "dhʋ̈, 'yö‑ ‑yɔ bɔ‑ ‑nu ‑gɔ 'ö‑ pö: «Ka "yan ‑yö pë ‑nu bha‑ ‑nu ‑bha ‑ee? ‑Ka ‑dhɛ ‑ga! A‑ ‑pö ka ‑dhɛ tɛan‑ ꞊dede 'ka ꞊dhɛ: 'Kɔ 'ka‑ ‑ga sië bha‑ ‑gwë kpö do ‑zian 'yii 'dho 'to 'ko ‑ta "dhʋ̈ng 'gü, ‑a ꞊gban ‑dho 'wü trëntrëndhö.»
MAT 24:3 ꞊Dhɛ 'ö ꞊wa 'dho ꞊wa ꞊loo Odhivie ‑tɔn ꞊gbin‑, 'yö Yesu ‑yö dho "sia‑ 'yö 'yaanu, 'yö‑ ‑bha ꞊klang ‑nu 'wo ꞊yɔɔn‑ "sɔɔ ꞊plɛ 'gü 'yö 'wo‑ dhɛɛ" kpɔ 'wo‑ pö: «Yi Dëmɛ, 'wɔn ‑nu 'i go‑ ‑pö yi ‑dhɛ ‑dhɛ 'gü ya, ‑wo ‑dho kë "dhʋ̈ ‑më "tʋ̈ng ꞊në‑ 'gü, "ɛɛn ꞊ya kë ꞊dhɛ 'bha 'dho dhang‑ 'gü i "dhiʋ̈ yee kë ‑sü waa‑ "sɛ "dhiʋ̈toyi ‑nu bha, yi ‑dho ‑a ‑nu 'suan‑ bho ‑më ‑nu ꞊në‑ ‑bha?»
MAT 24:4 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «‑Ka ‑dhɛ ‑ga, ‑ka ka ‑zʋ kë ka ‑dɩ "piʋ̈ kö mɛ 'bha 'ya 'dho "kpënng‑ kë ka ‑gɔ.
MAT 24:5 ‑A ‑gɛn ‑mü ꞊dhɛ mɛ 'gbɛ‑ ‑dho nu n 'tɔ 'gü 'ö 'wo‑ pö ꞊dhɛ wo ꞊në 'wo Atanna ‑bha ‑Yamɛ bha‑ 'ka. ‑Wo ‑dho "kpënng‑ kë mɛ 'gbɛ ‑gɔ 'ö 'wo‑ ‑nu ‑kan Atanna ‑bha.
MAT 24:6 ꞊Ya 'go yö ‑zë 'gü, ka ‑dho ‑gblü ‑da ‑wɔn ‑nu ma ka ‑züzü ‑dhɛ ‑nu 'gü 'ö 'ka‑ ‑taɔng ‑nu ma ‑dhɛ ꞊gblɛɛn 'gü, "kɛɛ ꞊ya kë "dhʋ̈ ka "gblʋ̈ʋ̈dhɛ 'ya 'dho "muu bho, ‑ka ka ‑zʋ ‑gban, ‑a ‑gɛn ‑mü ꞊dhɛ 'wɔn ‑nu 'bha ‑wo ‑dho kë gbonggbongdhö 'yii 'dho 'to‑ 'gü, "kɛɛ 'sa kö "kpʋngtaadhɛ "dhiʋ̈toyi 'yii ꞊loo ꞊kö.
MAT 24:7 "Sɛgɔ 'bha‑ ‑dho "wlü 'ö ‑pö "sɛgɔ 'bha‑ ‑ta 'ö 'wo ‑gblü gɔɔn, 'ö ‑gblüdë 'bha ‑yö ꞊wlü 'ö dho 'ö ‑gblü ‑da ‑gblüdë 'bha ‑ta, 'ö "vʋ̈ʋ̈ ‑yö ‑da, 'ö "sɛ ‑yö ꞊zii "sɛgɔ 'bha ‑nu 'gü.
MAT 24:8 "Kɛɛ yö ‑zë ꞊gban ‑dho kë ꞊dhɛ 'në 'kpɔ "gblükë zü bho ‑sü ꞊në‑ 'dhö.
MAT 24:9 ꞊Ya 'go yö ‑zë 'gü, ka ‑san ‑dho mɛ "bhɩɩ‑ ‑nu kë 'ö 'wo ka "dhiʋ̈ dɔ ‑gɔmɛ ‑nu ‑dhɛ, 'ö 'wo ka ‑wëë ‑kë wo 'ö 'wo ka zë ‑nu wo n ‑wɔn 'gü.
MAT 24:10 Mɛ 'gbɛ ꞊dede ‑dho 'go Atanna ‑bha zian ‑ta ‑a "tʋ̈ng bha ꞊në‑ 'gü 'ö 'wo wo 'ko ‑nu ‑san ‑kë 'ö 'wo ‑da wo 'ko ‑nu ‑dhɛ pë "piʋ̈.
MAT 24:11 'Ö Atanna ‑wʋdhiʋ̈loomɛ ꞊flüsü ‑nu 'wo nu 'wo‑ "kpënng‑ ‑kë mɛ 'gbɛ ‑gɔ 'ö 'wo‑ ‑nu ‑kan Atanna ‑bha.
MAT 24:12 'Wɔn yaa kë ‑sü ‑dho kë ꞊dhɛ "yi 'dhö 'ö pa, 'ö "sanni ‑yö dɔ 'mü kö pë 'wo‑ ‑dhɛ ‑dhɔ, mɛ 'bhaa‑ dɔ 'zü.
MAT 24:13 "Kɛɛ 'mɛ 'ö dho ö 'gü dɔ "gbɩɩ‑ 'ö 'dho 'ö zun‑ "dhiʋ̈todhɛ ‑bha ‑yö ‑dho dha.
MAT 24:14 'Wɔn ‑taɔng ‑së 'ö ‑gban Atanna ‑bha ‑gblüdëdhɛ ‑wɔn ‑bha bha ‑wo ‑dho ‑a ‑dhiang zë "sɛ ꞊gban "pɛpɛ 'gü kö mɛ ꞊gban "pɛpɛ "tʋ ‑yö ‑da n ‑wɔn 'gü. Yö ꞊në ꞊ya bo ‑kë "dhʋ̈ ‑sü 'ka "pɛɛpɛdhö, 'yö "kpʋngtaadhɛ "dhiʋ̈ yöö 'to 'yö gun ‑na 'to.»
MAT 24:15 'Yö‑ pö: «"Sɛ yën "tʋ̈ng bha 'ö 'to sië klöö" "tʋ̈ng 'ö‑ 'gü, ka "yan‑ ‑dho ‑da pë yaa ‑yënng ‑yënngsü 'ö Atanna ‑wʋdhiʋ̈loomɛ Daniɛ ‑ya ‑dhiang zë yi 'bha 'ka, Atanna ꞊bhlëë ‑siö ‑pë 'ka bha‑ ‑bha kö ‑yö ‑ya sië‑ ‑dhɔkëdhɛ "slʋ̈ʋ̈slʋ̈ 'ö 'yaa‑ ‑yɛa 'ka bha‑ 'gü. ('Yö Matiö ‑ya pö) 'mɛ 'ö dho 'sëëdhɛ ya‑ ‑wʋ pö, ‑a ‑mɛ ‑ya 'gü ma ö 'klɔɔ‑ 'ka!
MAT 24:16 ‑A "tʋ̈ng bha‑ 'gü, 'mɛ 'wo dho kë Zude ‑sɛ 'gü ꞊waa‑ pö 'wo ziö ‑bɛang 'ka ‑a ‑dhɛa ‑bha kö ‑wo wo wë dɔ ‑tɔn ‑gbeng 'gü ‑zian ꞊në‑ 'ka kö ‑wo 'dho wo ‑gblɛn 'kpɔ mü.
MAT 24:17 ‑A "tʋ̈ng bha yaa‑ wo 'mɛ 'ö‑ ‑bha kö ‑yö "kpɛnng, 'ya 'dho‑ pö 'ö 'dho pë 'bha 'sü ö ‑gɔ 'kɔɔdhö.
MAT 24:18 ‑Ɛɛ 'mɛ 'ö yaa‑ kë 'zü ö ‑gɔ 'bhlaa‑, 'ya 'dho‑ pö 'ö ö yee kë kö 'ö 'dho ö ‑bha ꞊gbauu‑ 'sü ‑dhɛ 'gü 'pödhö.
MAT 24:19 ‑A "tʋ̈ng bha‑ 'gü, dhong ‑nu 'ö waa‑ ‑kë 'gbiödhe 'ka, "ɛɛn 'ö 'në ꞊yaa‑ ‑kë ‑a ‑nu ‑gɔ 'yɔn ‑bha ‑a ‑nu ‑bha ‑dho kë ‑wëësü ꞊dedewo!
MAT 24:20 ‑Ka bhɛa" Atanna ‑dhɛ kö ka ‑bha ꞊dua ‑sü ‑gɛn 'ya 'dho ‑ya "nɛnɛ yi ‑bha "ɛɛn Atanna ‑bha ꞊glooyi ‑bha!
MAT 24:21 ‑A ‑gɛn ‑mü ꞊dhɛ ‑wëëwɔn ‑nu 'wo dho kë "tʋ̈ng bha‑ 'gü bha, ‑yö ‑dho kë ‑ziisü ꞊dedewo. 'Ö sü "kpʋngtaadhɛ kë ‑yi ‑bha 'ö nu 'ö zun‑ 'ka ꞊dɛɛ ‑bha, ‑a suu 'yii kë do, 'sa ‑a ‑bhɔ ‑bha 'yii 'dho kë 'pö 'zü 'ö to‑ ‑bha.
MAT 24:22 ꞊Ya kë ꞊dhɛ Atanna 'yii ‑dhɛkpaɔyi bha‑ 'bha "kan‑ "dhiʋ̈ 'nu ‑zianwo kö ‑dha 'wɔn bha‑ ‑gɔ ‑mɛ 'yii 'dho ꞊slɔɔ. "Kɛɛ ‑kë ‑së "kë "së, Atanna ꞊yaa‑ 'bha bho‑ "dhiʋ̈ 'mɛ 'ö‑ ‑nu sü ö ‑bha 'ka bha‑ ‑nu ‑wɔn 'gü.
MAT 24:23 ‑A "tʋ̈ng bha ꞊ya ꞊loo, mɛ "ʋʋ mɛ 'ö‑ pö ka ‑dhɛ ꞊dhɛ: ‹Atanna ‑bha ‑Yamɛ bha ‑yö yö!› "ɛɛn ‹‑Yö ‑dhɛ 'bha 'gü tii‑ ‑dhe!› 'ka 'dho 'dhang bho‑ "dhiʋ̈!
MAT 24:24 ‑A ‑gɛn ‑mü ꞊dhɛ a‑ ‑pö ka ‑dhɛ ꞊dhɛ 'mɛ 'wo dho‑ pö wo ‑dɩ ‑dhɛ ꞊dhɛ wo ꞊në 'wo Atanna ‑bha ‑Yamɛ bha‑ 'ka, waa‑ Atanna ‑wʋdhiʋ̈loomɛ ꞊flüsü ‑nu ‑dho nu "tʋ̈ng bha‑ 'gü, 'ö 'wo "slë "gblʋ̈gblʋ̈ ‑nu ‑kë 'ö 'wo "dhabhliwɔn ‑nu ‑kë, kë "dhʋ̈ kö aa" ꞊ni 'mɛ 'ö Atanna ‑ya ‑nu sü ö ‑bha 'ka bha, ‑a ‑nu ‑kɔ ‑zë ꞊ya ꞊mɔɔ‑ ‑bha kö ‑wa ‑nu "kan Atanna ‑bha.
MAT 24:25 ‑Ka ‑dhɛ ‑ga! 'Wɔn bha 'ma‑ 'to mü ꞊gblɛɛn 'ma‑ pö ka ‑dhɛ.
MAT 24:26 ‑A ‑kë "dhʋ̈ ‑sü 'gü, kö 'zü ꞊ya kë ꞊dhɛ mɛ ‑zian ꞊në ꞊ya nu ꞊yaa‑ pö ka ‑dhɛ ꞊dhɛ ‹Atanna ‑bha ‑Yamɛ bha ꞊ya nu, ‑yö "tʋngtadhɛ ya‑ 'gü!› "ɛɛn ‹‑Yö ‑dhɛ 'ö ‑kë ꞊ni‑ 'gü!› 'ka 'dho 'dhang bho‑ "dhiʋ̈ tongtongdhö "ɛɛn 'ka 'dho 'dho mü.
MAT 24:27 ‑A ‑gɛn ‑mü ꞊dhɛ mang Mɛgbömɛ n nu ‑sü ‑zë ‑yö ‑dho kë ꞊dhɛ ‑kɔ do 'ö dha ‑yö "yan kun‑ 'ka dhang‑ 'gü, 'ö ‑gban 'yënng‑ ‑wo ‑zian 'ka, 'ö "dhiʋ̈ ta 'yënng‑ ‑pö ‑zian 'ka bha ꞊në‑ 'dhö, 'yii 'dho ‑bin mɛ 'bha ‑gɔ.
MAT 24:28 ‑A ‑gɛn ‑mü ꞊dhɛ ‑kɔ do 'ö pë ꞊gee 'dhö ‑dhɛ 'ö‑ ‑bha ‑a ‑dhɛ yö ‑sü 'yaa ꞊gbaɔn "gblëë‑ ‑nu ‑ta bha, ꞊në mang Mɛgbömɛ n nu ‑sü dho kë‑ ‑bha.»
MAT 24:29 'Yö‑ pö: «"Kɛɛ ‑wëëwɔn "nɛnɛgasü 'a‑ ‑dhiang zë ka ‑dhɛ bha‑ ‑dhɛkpaɔyi ya bo zun ‑sü 'ka 'ko "dhiʋ̈, 'yënng‑ ‑dho 'to ‑dhɛ do bha‑ 'gü 'ö ꞊tröö ‑blünblündhö, 'ö "su ‑yö ö bo 'bhü ‑sü 'ka, 'ö "susëngga ‑nu 'wo dhang‑ ‑bha 'wo go 'mü 'wo ꞊wɛnng. 'Ö ‑ta "mlüü bɔ ‑pë ‑nu 'wo dhang‑ 'gü 'wo go "gblʋ̈ʋ̈‑.
MAT 24:30 Yö ꞊në ꞊ya kë "dhʋ̈, 'yö 'wɔn 'suan‑ ‑bho ‑bha ‑pë 'ö dho‑ ‑zɔn ‑dhɛ mang Mɛgbömɛ n nu "tʋ̈ng ꞊ya ꞊loo bha 'ö ‑wo "yɛa‑ dhang‑ ‑bha, 'yö "sɛgɔ "pɛpɛ 'wo "kpʋng ꞊taa ‑a 'gü ‑mɛ ‑nu ꞊gban "pɛpɛ 'wo ‑ya ‑wʋ 'kpɔ ‑sü ‑bha ꞊tɔn, kö ‑wo wo ‑kuu ‑ta ‑ma sië "gbʋ 'ka, 'yö 'wo wo "yan ‑kpan mang Mɛgbömɛ n ‑bha kö a nu sië dha 'kpong‑ ‑ta dhang‑ 'gü, 'gügbɩɩdhɛ waa‑ 'tɔbhɔdhe ‑ziisü 'ka.
MAT 24:31 "Truu 'kpii‑ bha ‑yö ‑dho "wɩ 'yi bha ꞊në‑ 'ka, 'yö 'a ma "kië ‑nu bɔ "kpʋngtaadhɛ ꞊gban "pɛpɛ 'gü, 'yö 'wo 'mɛ 'a‑ ‑nu sü n ‑bha 'ka bha‑ ‑nu sü ‑dhɛ "pɛpɛ bha‑ ꞊gban 'gü, 'yö 'wo‑ ‑nu ꞊loo 'ko ‑ta ‑dhɛ do 'gü.»
MAT 24:32 'Yö 'go mü 'ö‑ pö: «‑Ka 'wɔn 'suan‑ bho 'wɔn ‑zɔn 'ka 'ö maa‑ ‑zɔn ka ‑dhɛ bha ꞊në‑ ‑bha. Yö ‑mü ꞊dhɛ "tʋ̈ng 'ö figö ‑dhü 'dhö ö ‑gbeng ‑dee dɔ sië, 'ö ö "dhɛ ‑dee ‑ya sië kö 'ka‑ 'wɔn dɔ ꞊dhɛ blɛa" ꞊ya ziö, ‑nɛɛ 'gü ꞊ya ꞊loo.
MAT 24:33 ‑Kɔ do bha‑ 'gü, ka "yan 'dhö ‑da sië 'wɔn ‑nu 'a ‑ziö 'gü bha‑ ‑nu 'gü, ‑kaa 'wɔn dɔ ꞊dhɛ ‑a "tʋ̈ng ꞊ya ꞊tëng, ꞊dhɛ 'ma ‑ya "saan ‑bha.
MAT 24:34 A‑ ‑pö ka ‑dhɛ tɛan‑ ꞊dede 'ka ꞊dhɛ 'mɛ 'wo "yaan ꞊dɛɛ ‑yën ya‑ 'gü ya, ‑a ‑nu ꞊gban 'wii 'dho ga 'ö 'wɔn 'a‑ pö sië ka ‑dhɛ bha‑ ꞊gban 'gü ‑wɔn ‑yö ‑kë.
MAT 24:35 ‑Yö kë ka "yaan ꞊dhɛ "sɛ waa‑ dhang‑ ‑wo ‑dho ziö, "kɛɛ n ‑wʋ ‑zë do 'yii 'dho 'go "gblʋʋ tongtongdhö.»
MAT 24:36 'Yö go mü 'ö‑ pö: «꞊Ya 'go yö ‑zë 'gü, ‑a 'dhɛ 'kö ‑gban n nu ‑yi waa‑ n nu "tʋ̈ng ꞊dede ‑zë ‑bha bha, Atanna ‑bha "kië ‑nu oo, ‑a mang ‑zian 'a‑ Gbö 'ka 'a "wɩ sië ka ‑dhɛ ya mɛ 'bha 'yaa yö ‑zë dɔ kö 'yii kë n Dë Atanna ‑zë 'ka.
MAT 24:37 'Wɔn do 'ö ‑kë Noe ‑bha "tʋ̈ng 'gü ꞊në dho kë mang Mɛgbömɛ n nu ‑yi 'ka.
MAT 24:38 'Ö gun "tʋ̈ng bha‑ 'gü, kö "yi 'kpii‑ bha 'yii pa ꞊kö mɛ "bhɩɩ‑ ‑nu "tʋ 'yaa gun Atanna ‑wɔn ‑bha, ‑wo ‑gun pë ꞊në‑ ‑bhö sië, 'wo we mü, 'wo dhe sü, 'wo 'në ‑nu dɔ gwaan‑ ‑bha 'ö dho‑ 'ka "dhʋ̈ 'ö zun‑ 'ka yi 'ö Noe ‑yö ‑da 'ka "yitagɔ 'gü bha‑ ‑bha.
MAT 24:39 ‑A ‑nu "tʋ 'yaa gun 'wɔn "wɛɛ 'bha ‑bha ‑a 'dhɛ 'kö bha‑ zian 'gü 'ö 'to‑ 'ka "dhʋ̈ 'ö zun‑ 'ka dha 'kpii‑ 'ö ban 'ö "yi ‑yö "kpʋngtaadhɛ bho bha‑ ban ‑yi ‑bha, 'ö "yi ‑yö nu 'ö sɔ‑ ‑nu ‑ta. ‑Yö ‑dho kë 'pö ‑kɔ do bha ꞊në‑ 'gü mang Mɛgbömɛ n nu ‑yi 'ka.
MAT 24:40 A‑ ‑pö ka ‑dhɛ ꞊dhɛ ‑a 'yi bha‑ 'ka, gɔɔn‑ ‑nu ꞊plɛ 'wo dho kë 'bhlaa‑ do 'gü, ‑a mɛ 'dhɛ 'ö 'dhang bho n "dhiʋ̈ ‑yö ‑dho 'dho 'ö‑ mɛ do ‑yö to.
MAT 24:41 Dhong ‑nu ꞊plɛ 'wo dho kë pë zɔn ‑dhɛ 'gü "wlʋ̈ do 'gü, ‑a mɛ 'ö 'dhang bho n "dhiʋ̈ ‑yö ‑dho 'dho 'ö‑ mɛ do ‑yö to.
MAT 24:42 ‑A ‑kë "dhʋ̈ ‑sü bha‑ 'gü, ‑ka ‑ya ka "yaan, ‑a ‑gɛn ‑mü ꞊dhɛ yi 'ö ka Dëmɛ dho nu‑ 'ka 'kaa‑ dɔ.
MAT 24:43 ‑Yö kë ka "yaan ꞊dhɛ 'kɔdëmɛ ‑yö "tʋ̈ng 'ö ꞊kwaanmɛ dho nu‑ 'ka gbeng ‑a ‑dɔ 'nu kö ‑yö ‑dho ‑ya ö "yaan 'ö 'waa‑ ‑bha 'kɔ 'wü.
MAT 24:44 Yö ꞊në‑ ‑wɔn 'gü 'yö kaa ‑dɩ 'pö ꞊dhɛ 'ö ‑kë ꞊dhɛ 'kaa n nu "tʋ̈ng dɔ bha, 'yö ka ‑dho ‑ya ka "yaan; ‑a ‑gɛn ‑mü ꞊dhɛ "tʋ̈ng 'ö ka ‑zʋ 'yaa 'ka ꞊dhɛ mang Mɛgbömɛ a ‑dho nu bha ꞊në 'a dho "kan‑ 'ka ka 'gü.»
MAT 24:45 ꞊Dhɛ 'ö Yesu ꞊ya dhiang ‑nu bha‑ zë "dhʋ̈, 'yö "gwënng do 'bha ‑da ‑nu ‑dhɛ 'ö‑ pö: «꞊Ya kë "dhʋ̈ yö ‑zë 'gü kö 'mɛ 'ka bha 'dee dho kë gwëë" "klʋsë 'ö 'wɔn dɔ ‑a 'ka? Gwëë" "klʋsë 'ö "dhʋ̈ bha ꞊në‑ dëmɛ ‑ya ‑ya ‑a "tɛabɔ ‑nu ‑gɔ "dhiʋ̈ kö ‑yö ‑bhöpë nu‑ ‑nu ‑dhɛ ‑a nu "tʋ̈ng ‑bha 'yö nu 'yö ‑kpan ‑bha kö ‑ya kë sië ꞊dhɛ ‑kɔ 'wo ‑wʋ kpɔ 'ka‑ ‑bha bha‑ 'dhö.
MAT 24:46 ‑A mɛ 'dhɛ 'kö "dhʋ̈ bha kö‑ ‑bha ꞊ya kë ‑së.
MAT 24:47 A‑ ‑pö ka ‑dhɛ tɛan‑ ꞊dede 'ka ꞊dhɛ: «Mɛ 'ö "dhʋ̈ bha‑ dëmɛ ꞊ya nu, ‑yö ‑dho ‑a ‑ya ö ꞊slɔɔpë ꞊gban "pɛpɛ ‑gɔ "dhiʋ̈.
MAT 24:48 "Kɛɛ ꞊ya kë ꞊dhɛ gwëëmi bha‑ "klʋ ꞊ya kë 'ya‑, ‑yö ‑dho ‑a pö ö ‑dɩ ‑dhɛ ꞊dhɛ: «'Dho 'ö n dëmɛ ‑ya wo ya, ‑yö ‑dho nu ‑më yi 'ka?»
MAT 24:49 'Yö ‑ya ö "tɛabɔ ‑nu ‑ma ‑sü ‑bha, 'yö ‑ya pë ‑bhö ‑sü waa‑ we mü ‑sü ‑bha we mü ‑dudu ‑nu "piʋ̈.
MAT 24:50 ‑Yö ‑dho 'to‑ ‑kë "dhʋ̈ ‑sü ‑bha, 'yö‑ dëmɛ ‑yö nu 'yö ‑kan 'gü "tʋ̈ng ꞊dede 'ö‑ ‑zʋ 'yaa‑ ‑bha bha‑ 'ka.
MAT 24:51 Mɛ 'dhɛ 'kö bha kö‑ ‑bha ꞊ya kë ‑wëësü, ‑a ‑gɛn ‑mü ꞊dhɛ ‑a ‑gɔmɛ ‑dho 'wɔn wɔ‑ ‑ta 'ö ‑kë ‑ziiziisü, 'yö 'wɔn suu 'wo dho‑ wɔ ꞊flümɛ ‑nu ‑ta bha, 'yö 'wo‑ ‑wɔ ‑ta 'pö. ‑Yö ‑dho "gbʋ bɔ ‑dhɛ bha ꞊në‑ 'gü 'yö ö "sɔn "dhiʋ̈ ‑bhö 'ka klöklödhö.»
MAT 25:1 ꞊Dhɛ 'ö Yesu ꞊yaa‑ pö "dhʋ̈ 'yö "gwënng do 'bha ‑da ‑nu ‑dhɛ 'zü 'ö‑ pö: «Atanna ‑bha ‑gblüdëdhɛ kë "tʋ̈ng‑ ‑dho kë ꞊dhɛ 'nëdhiëng ‑nu ‑kaɔng do 'wo woo‑ ‑dhangbha ‑nu sü 'wo dho dhedɔ troo ‑ta ‑a ‑nu ‑bha 'wɔn 'dhö.
MAT 25:2 'Nëdhiëng ‑nu ‑kaɔng do bha‑ mɛ "sɔɔdhu 'waa gun ꞊kpaɔsü, 'yö‑ mɛ "sɔɔdhu 'dhɛ 'wo to wo ‑zë 'wo gun ‑glengmɛ 'ka.
MAT 25:3 ‑A mɛ "sɔɔdhu 'dhɛ 'wo gun ‑taamasü 'ka bha, 'yö 'wo woo‑ ‑dhangbha ‑nu sü "kɛɛ 'yö 'wii pɛng "yi ‑zë 'bha kun wo ‑kɔ "piʋ̈.
MAT 25:4 'Yö‑ mɛ 'dhɛ wo ‑zë 'wo gun ‑glengsü bha, 'yö wo ‑zë 'wo‑ ‑kë "dhʋ̈.
MAT 25:5 ꞊Dhɛ 'ö ꞊wa 'dho ꞊wa ꞊gwëë mü 'ö dhesügɔn bha 'yaa nu sië, 'yö yi ‑yö ‑da ‑nu "yan ‑bha, ‑pling 'yö 'wo ‑da yi 'gü.
MAT 25:6 ꞊Dhɛ 'ö gbeng ꞊zinng 'gü ꞊ya ꞊loo, 'yö 'wo mɛ do 'bha ‑wʋ ma kö ‑yö "gbla sië 'ö‑ pö: «Dhesügɔn ꞊ya nu bhoo! Dhesügɔn ꞊ya nu bhoo! ‑Ka 'dho dɔ‑ ‑gɔ zian‑ bhoo! ‑Ka 'dho dɔ‑ ‑gɔ zian‑ bhoo!»
MAT 25:7 'Yö 'nëdhiëngnë ‑nu bha 'wo ‑bö 'mɛ bha‑ ‑wʋ 'ka, 'yö 'wo woo‑ ‑dhangbha ‑nu ‑pë ‑kë, 'yö 'wo zun "kpɛnng.
MAT 25:8 ‑A mɛ 'dhɛ 'waa ꞊kpaɔsü 'ö 'wii pɛng "yi 'bha 'kun wo ‑kɔ "piʋ̈ bha 'wo dho ‑dhɛ ‑ga kö ‑a ‑nu ‑bha ‑dhangbha ‑nu ‑wo 'dho sië "sia‑ "wɛ ‑yɔɔndhö 'yö 'wo‑ pö 'mɛ 'dhɛ 'wo ꞊kpaɔsü bha‑ ‑nu ‑dhɛ 'wo‑ pö: «‑Ka yi ‑bha pɛng "yi 'në 'dɛdɛ 'në 'bha nu ‑dhe, yii‑ ‑dhangbha ‑yö "dhuu sië ‑wa!»
MAT 25:9 'Yö 'wo‑ pö‑ ‑nu ‑dhɛ: «'Aa bhoo! Yi ‑bha ya ꞊ya bhɔ‑ ‑bha ꞊dhɛ 'pë 'yii 'dho ꞊mɔɔ‑ 'dhö, ‑ka 'dho pɛng "yi "dhɔɔdɔmɛ ‑nu "piʋ̈ kö 'ka ka ‑bha taa 'dhɔ!»
MAT 25:10 ꞊Dhɛ 'ö ꞊waa‑ pö‑ ‑nu ‑dhɛ "dhʋ̈, 'yö 'mɛ bha 'wo ‑ziö 'wo dho woo‑ pɛng "yi mɔɔ‑ ‑dhɛ 'gü kö 'wo‑ 'dhɔ. ‑Wo ‑tɔ pɛng "yi mɔɔ‑ ‑zian 'ka 'yö dhesügɔn ‑yö nu, 'yö ö ‑kɔ ‑da mɛ 'dhɛ 'wo gun wo baa‑ ‑sü 'ka bha‑ ‑nu 'gü 'yö 'wo ‑da 'kɔɔdhö, 'yö 'wo "kwɛɛ ta 'wo "dhü ‑ziö 'gü.
MAT 25:11 ꞊Dhɛ 'ö ꞊wa ‑da 'kɔɔdhö 'ö‑ yi 'në 'bha ꞊ya ꞊gwëë, 'yö‑ mɛ "sɔɔdhu 'dhɛ 'wo gun ꞊taama bha 'wo nu, 'yö 'wo zun "gbla ‑sü ‑bha 'wo‑ pö: «Yi dëmɛ, yi dëmɛ, ‑bhö dɔ "gbɩɩ‑ kö i "kwɛɛ "pʋ yi ‑gɔ ‑dhe!»
MAT 25:12 "Kɛɛ 'yö dhesügɔn ‑yö bɔ 'kɔɔdhö 'ö‑ pö‑ ‑nu ‑dhɛ: «A‑ ‑pö ka ‑dhɛ tɛan‑ ꞊dede 'ka ꞊dhɛ 'maa ka dɔ!»
MAT 25:13 ꞊Dhɛ 'ö Yesu ‑yö "gwënng bha‑ ‑da ‑nu ‑dhɛ ꞊dhɛ ‑kɔ bha‑ 'dhö, ‑a "dhiʋ̈todhɛ bha 'yö‑ pö‑ ‑nu ‑dhɛ 'ö‑ pö: «‑Ka ‑ya ka "yaan! ‑A ‑gɛn ‑mü ꞊dhɛ yi 'a dho nu‑ 'ka "ɛɛn "tʋ̈ng 'a dho nu‑ 'ka 'kaa‑ dɔ!»
MAT 25:14 'Yö‑ pö 'zü‑ ‑nu ‑dhɛ 'ö‑ pö: «Atanna ‑bha ‑gblüdëdhɛ bha ‑yö ‑dho kë 'zü ꞊dhɛ gɔndënë do 'bha 'ö dho "ta 'gü ‑a ‑bha 'wɔn 'dhö. ꞊Dhɛ 'ö yöö 'dho 'yö ö ‑bha gwëëzë ‑nu ‑dhɛ 'yö ö ꞊slɔɔpë ꞊gban sü 'yö‑ ‑kɛfama bho‑ ‑nu ‑bha.
MAT 25:15 'Yö "sënng kpö këng "sɔɔdhu nu mɛ do ‑dhɛ, 'yö dho 'yö‑ këng ꞊plɛ nu mɛ ꞊plɛ ‑naa ‑dhɛ, 'yö dho 'yö‑ këng do nu mɛ ‑yaaga ‑naa ‑dhɛ. ꞊Dhɛ 'ö ꞊yaa‑ dan, 'ö 'mɛ 'dhö‑ ‑bha 'ö‑ ‑kɔ dho ꞊mɔɔ‑ ‑ziö 'gü ziö ‑sü ‑bha ꞊yaa‑ nu‑ ‑dhɛ 'yö dho.
MAT 25:16 ꞊Dhɛ 'ö ꞊ya 'dho 'yö mɛ 'dhɛ 'ö "sënngga këng "sɔɔdhu ꞊slɔɔ bha, 'yö dho 'yö‑ ‑ziö 'gü ‑ziö 'yö dho 'yö‑ kpö këng "sɔɔdhu 'bha ꞊slɔɔ 'yö‑ ‑da ‑ta.
MAT 25:17 'Yö mɛ 'dhɛ 'ö‑ këng ꞊plɛ ꞊slɔɔ 'pö bha, 'yö dho 'yö‑ ‑ziö 'gü ‑ziö, 'yö‑ këng ꞊plɛ 'bha ‑yö ‑da 'gü.
MAT 25:18 "Kɛɛ 'yö 'mɛ 'kö‑ ‑bha gun këng do bha 'yö dho 'yö "sɛ pɔn, 'yö ö dëmɛ bha "sënngga bha‑ ꞊loo mü, 'yö "sɛ kpa‑ ‑ta.
MAT 25:19 ꞊Dhɛ 'ö "tʋ̈ng 'bha ꞊ya ziö 'ö‑ yi ꞊ya ꞊gwëë, 'yö‑ ‑nu dëmɛ bha 'ö nu 'yö‑ pö‑ ‑nu ‑dhɛ mɛ 'ö "dhʋ̈ ‑yö nu kö ‑yö ö "kplëng bho ö ‑dhɛ.
MAT 25:20 'Yö‑ mɛ ‑blɛɛsü 'ö "sënngga këng "sɔɔdhu nu‑ ‑dhɛ bha 'ö nu. 'Yö‑ 'dhɛ 'wo‑ nu‑ ‑dhɛ bha‑ këng "sɔɔdhu 'bha ꞊nëng‑ ‑bha 'yö‑ pö ö dëmɛ ‑dhɛ 'ö‑ pö: «N dëmɛ, "sënng kpö këng "sɔɔdhu 'i‑ nu n ‑dhɛ bha‑ këng "sɔɔdhu ꞊në 'a ꞊slɔɔ i zian 'gü 'yö 'a‑ ꞊nëng‑ ‑bha, yö ꞊nɛ!»
MAT 25:21 'Yö‑ dëmɛ ‑ya pö‑ ‑dhɛ 'ö‑ pö: «꞊Ya dhi n ‑dhɛ, ma gwëëmi, i këwɔn ‑yö ‑së. 'Wlɔɔ‑ ‑mü i 'ka, i ‑to i ‑wʋ ‑ta. ꞊Dhɛ 'kö 'bha kë 'wlɔɔ‑ 'ka pë 'në 'dɛdɛ 'a‑ to i "piʋ̈ bha‑ ‑wɔn 'gü bha, ‑a ‑dho i 'sü 'a i ‑ya ‑a 'kpiki ‑kpiki ‑gɔ "dhiʋ̈. ꞊Dhɛ 'ö "dhʋ̈, ‑bhö nu kö 'kwa kwa "dhia bho.
MAT 25:22 ꞊Dhɛ 'ö 'mɛ 'dhɛ bha ꞊ya ziö 'yö‑ mɛ ꞊plɛ ‑naa 'ö‑ dëmɛ ‑yö "sënngga këng ꞊plɛ nu‑ ‑dhɛ bha 'yö nu. 'Yö‑ pö ö ‑gɔmɛ ‑dhɛ 'ö‑ pö: «N dëmɛ, "sënngga këng ꞊plɛ 'i‑ to n ‑gɔ bha‑ këng ꞊plɛ ꞊në 'a‑ ꞊slɔɔ i zian 'gü 'yö ‑da ‑ta, yö ꞊nɛ!»
MAT 25:23 'Yö‑ dëmɛ ‑ya pö‑ ‑dhɛ 'ö‑ pö: «꞊Ya dhi n ‑dhɛ, i këwɔn ‑yö ‑së, 'wlɔɔ‑ ‑mü i 'ka, i ‑to i ‑wʋ ‑ta. ꞊Dhɛ 'ö 'bha 'wlɔɔ‑ ‑dhɛ kë pë 'në 'dɛdɛ 'a‑ to i ‑gɔ bha‑ ‑wɔn 'gü bha, a ‑dho i 'sü 'a i ‑ya ‑a 'kpiki ‑kpiki ‑gɔ "dhiʋ̈. ꞊Dhɛ 'ö "dhʋ̈, ‑bhö nu kö 'kwa‑ 'gü "dhia bho.
MAT 25:24 'Yö dho 'yö zun 'mɛ 'dhɛ 'ö "sënngga këng do nu‑ ‑dhɛ bha‑ ‑bha. 'Yö ꞊yɔɔn 'pö ö dëmɛ "sɔɔ kö 'ö ö "kplëng bho. 'Yö‑ pö ö dëmɛ ‑dhɛ: «N dëmɛ, a‑ 'wɔn ‑dɔ ꞊dhɛ i ‑bha 'wɔn kë ‑dhɛ 'yaa ‑së. A‑ 'wɔn ‑dɔ ꞊dhɛ 'bhii pë ta ‑dhɛ 'ö‑ bha i‑ ‑bho mü, 'ö 'bhii pë 'kpɔ ꞊dhɛ 'ö 'gü 'i dho 'i pë ‑wlö mü.
MAT 25:25 'Wɔn 'ö‑ "suʋ̈ ‑yö n ‑kë 'yö 'mii i ‑bha "sënngga 'i‑ to n ‑gɔ bha‑ ‑ziö 'gü ziö bha 'yö bha. A ka ‑dho 'a‑ ‑da "sɛɛdhö 'yö 'a "sɛ kpa‑ ‑ta, ‑a yö ꞊nɛ.»
MAT 25:26 'Yö‑ ‑gɔmɛ ‑ya pö‑ ‑dhɛ 'ö‑ pö: «'Bha‑ pö "dhʋ̈ 'ma‑ ma. Gwëëmi ‑mawɔn yaasü, "fiamɛ, mangga i‑ ‑pö i‑ 'wɔn ‑dɔ ꞊dhɛ 'mii pë ta ‑dhɛ 'ö‑ 'gü ‑a ‑bho mü, 'ö 'mii pë 'kpɔ ‑dhɛ 'ö‑ 'gü, 'a‑ ‑wlö mü ‑kɛɛ? "Ɛɛn 'bhii‑ pö "dhʋ̈ ‑ee?
MAT 25:27 ꞊Dhɛ 'ö ‑kë ꞊dhɛ i‑ 'wɔn ‑dɔ "dhʋ̈ bha, ‑më ꞊në ‑kë 'sa 'yö 'bhii ma ꞊naɔ bha‑ ‑duɛ bho 'wëë‑ ‑kɔ 'gü kö "sanni 'a n "dhiʋ̈ yee kë kö ‑a ꞊trɔɔn ꞊ya ‑da ‑ta kö 'a ma pë 'sü.»
MAT 25:28 'Yö‑ pö ö ‑bha gwëëzë ‑nu ‑dhɛ 'ö‑ pö: «‑Ka "sënngga këng do 'ö‑ ‑gɔ bha‑ 'sü‑ ‑gɔ kö 'ka‑ dɔ mɛ 'ö‑ "gblü do 'dhö‑ ‑gɔ bha‑ ‑gɔ.
MAT 25:29 ‑A ‑gɛn ‑mü ꞊dhɛ pë ꞊ya kë 'mɛ 'ö‑ ‑gɔ 'ö‑ ‑ziö 'gü ‑ziö bha ꞊në 'wo dho‑ mɛ taa kë 'yö‑ ‑bha 'dhö ‑kë 'gbɛ, "kɛɛ mɛ 'dhɛ 'kö pë ‑tiandhö 'bha 'yaa‑ ‑gɔ, "kɛɛ 'ö‑ 'dhɛ 'ö‑ ‑gɔ 'yaa‑ ‑ziö 'gü ‑zë ziö bha, ‑a 'dhɛ 'në ‑zian 'ö dho kë‑ ‑gɔ ꞊në 'wo dho‑ 'sü‑ ‑mɛ ‑gɔ.
MAT 25:30 ꞊Ya 'go yö ‑zë 'gü gwëëmi 'dhɛ 'ö‑ ꞊trɔɔn 'yaa 'dhö 'ö dɔ bha, ‑kaa 'kun 'ka‑ ‑zuö "kpɛnng ‑dhɛtiidhɛ 'gü, ‑yö ‑dho "gbʋ bɔ ‑dhɛ bha ꞊në‑ 'gü, 'yö ö "sɔn "dhiʋ̈ ‑bhö klöklödhö.»
MAT 25:31 'Yö go mü 'zü 'ö‑ pö: «Mang Mɛgbömɛ 'a dhiang zë sië ka ‑dhɛ ya, dho 'ö maa‑ wo ya, n "dhiʋ̈ yee kë ‑yi 'ka, a ‑dho nu ma ‑gblüdëdhɛ 'gü kö Atanna ‑bha "kië ‑nu "pɛpɛ ꞊gban ‑wo n ꞊keng‑, 'yö 'a ‑ya ma ‑gblüdëdhɛ ‑gbloo 'gü.
MAT 25:32 ‑A 'yi bha ꞊në‑ 'ka 'yö "sɛgɔ ꞊gban "pɛpɛ 'gü ‑mɛ ‑nu dho ꞊loo 'ko ‑ta n wëëdhö, 'yö 'a‑ ‑nu bho 'koo ꞊dhɛ ‑kɔ 'ö ‑tuʋ̈ ‑gɔdhiʋ̈mɛ ‑yö "bhlaa ‑nu waa‑ ‑bhʋ ‑nu bho‑ 'ka 'koo ‑a 'dhö.
MAT 25:33 'Mɛ 'wo dho kë ꞊dhɛ "bhlaa ‑nu 'dhö, a ‑dho ‑a ‑nu bɔ n ‑kɔ ‑së 'gü, 'yö 'mɛ 'wo dho kë ꞊dhɛ ‑bhʋ ‑nu 'dhö, 'a‑ ‑nu bɔ n ꞊kwaa‑ 'gü.
MAT 25:34 'Ma bo ‑a ‑nu ‑kan 'koo ‑sü 'ka ꞊dhɛ ‑kɔ bha‑ 'dhö, 'yö 'a‑ pö 'mɛ 'wo dho kë n ‑kɔ ‑së 'gü bha‑ ‑nu ‑dhɛ 'mɛ 'ö n Dë Atanna bha 'dhuë‑ 'dhö ka 'kun ‑sü 'ka bha, ‑ka nu ‑yɛa 'ö n Dë ‑ya ‑pë ‑kë ö ‑bha ‑gblüdëdhɛkëdhɛ 'ka yi 'bha 'ka bha kö 'ka ‑ya 'gü.
MAT 25:35 ‑A ‑gɛn ‑mü ꞊dhɛ din‑ 'dhö gun n kë sië "tʋ̈ng 'ö‑ 'gü ka kë ‑bhöpë ‑nu n ‑dhɛ, 'ö ꞊dhɛ 'ö "yi mü ‑dhɔ ‑ya n 'kun 'ka "yi nu n ‑dhɛ. 'A ‑kë ‑dhɛng 'ka "tʋ̈ng 'ö‑ 'gü bha ka ꞊në 'ka n ꞊yëë bho.
MAT 25:36 Yi 'a gun‑ 'ka n 'kpee‑ ‑ka bha ka ꞊në 'ka sɔ ‑da n ‑bha. "Tʋ̈ng 'ö‑ 'ka 'ö n 'gü 'yaa gun ‑së bha, ka ꞊në 'ka nu 'ka ‑wo n ‑bha. Yi 'a gun‑ 'ka ‑kaso 'gü bha ka ꞊në 'ka nu zun n ‑dhɛ 'gü.»
MAT 25:37 'Yö mɛ 'ö pö 'aa‑ ‑nu ‑bha bha 'wo‑ dhɛɛ" kpɔ 'wo‑ pö: «Yi dëmɛ, yi ‑mɛɛ ꞊në 'yi ‑kpan 'ka i ‑bha kö din‑ ‑yö i ‑bha, 'yö 'yi i gba ‑bhöpë 'ka? "Ɛɛn yi ‑mɛɛ ꞊në "yi mü ‑dhɔ ‑yö gun‑ 'ka i ‑bha 'yö yi "yi nu i ‑dhɛ?
MAT 25:38 Yi ‑mɛɛ ꞊në 'yi ‑kpan 'ka i ‑bha kö i ‑dhɛng 'ka, 'yö 'yi i ꞊yëë bho "ɛɛn kö i 'kpee‑ 'ka 'yö 'yi sɔ ‑da i ‑bha?
MAT 25:39 Yi ‑mɛɛ ꞊në i 'gü 'yaa gun‑ 'ka ‑së, 'yö 'yi nu 'yi ‑wo i ‑bha, "ɛɛn 'zü kö i ‑kaso 'gü, 'yö 'yi ‑wo i ‑bha?»
MAT 25:40 ‑Gblüdë ‑dho pö‑ ‑nu ‑dhɛ yö ꞊në‑ 'gü 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ mɛ ‑wëësü ‑nu 'ö‑ ‑nu ꞊bhlëë 'bha 'yaa 'dhö mɛ 'bha wëëdhö, 'ö 'wo n dheebhang 'ka, 'ka 'wɔn ‑së ‑kë mɛ do ‑zian 'ö‑ ‑dhɛ bha kö ka‑ ‑kë ma ꞊në n ‑dhɛ bha.»
MAT 25:41 ꞊Ya 'go mü 'yö‑ pö 'mɛ 'wo‑ ꞊kwaa‑ 'gü bha‑ ‑nu ‑dhɛ 'ö‑ pö: «"Dhang ‑mɛ ‑nu! ‑Ka 'go n ‑bha bha! Pɛng 'wo‑ ‑ya Sɔtraan waa‑ ö ‑bha "kië ‑nu ‑dhɛ bha ka ‑zë kaa 'dho yö ꞊në‑ 'gü.
MAT 25:42 ‑A ‑gɛn ‑mü ꞊dhɛ "tʋ̈ng 'ö din‑ 'dhö gun n kë sië‑ 'ka, 'kii ‑bhöpë nu n ‑dhɛ, "yi mü ‑dhɔ 'dhö n kun 'kii "yi nu n ‑dhɛ,
MAT 25:43 'a gun ‑dhɛng 'ka 'kii n ꞊yëë bho, 'a gun n 'kpee‑ 'ka 'kii sɔ ‑da n ‑bha, n 'gü 'yaa gun ‑së, a ‑gun ‑kaso 'gü 'kii ꞊mɔɔ‑ ‑bha kö 'ka ‑wo n ‑dhɛ 'gü.»
MAT 25:44 ‑Wo ‑dho ‑yɔ bɔ‑ ‑gɔ 'pö 'wo‑ pö: «Yi Dëmɛ, yi ‑kpan i ‑bha 'mɛ kö din‑ ‑yö i ‑bha, "ɛɛn kö "yi mü ‑dhɔ ‑yö i ‑bha "ɛɛn 'zü kö i ‑dhɛng 'ka "ɛɛn 'zü kö i i 'kpee‑ 'ka "ɛɛn kö i 'gü 'yaa ‑së, yi ‑mɛɛ ꞊në 'yi ‑kpan 'ka i ‑bha 'zü kö i ‑kaso 'gü, 'yö 'yii "ta i ‑dhɛ?»
MAT 25:45 'Yö‑ ‑yɔ bɔ 'pö‑ ‑nu ‑gɔ 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: N dheebhang ‑nu 'ö‑ ‑nu ꞊bhlëë 'bha 'yaa gun mɛ ‑nu wëëdhö bha, 'kii‑ kë‑ mɛ do ‑zian ‑dhɛ. ꞊Ya kë "dhʋ̈ kö 'kii‑ kë ma ꞊në n ‑dhɛ bha.»
MAT 25:46 ꞊Dhɛ 'ö‑ pö‑ ‑nu ‑dhɛ "dhʋ̈ 'yö‑ ‑ta yɔ 'ö‑ pö: «'Mɛ 'wo "dhʋ̈ bha ‑dhɛ 'ö Atanna dho 'wɔn wɔ mɛ ‑ta ‑a 'gü, 'ö‑ "dhiʋ̈ 'to ‑dhɛ 'yii 'dho kë tongtongdhö bha ‑wo ‑dho 'dho yö ꞊në‑ 'gü, 'yö 'mɛ 'ö pö 'aa‑ ‑nu ‑bha bha 'wo dho ꞊sii 'ö 'yaa yën 'ö Atanna "piʋ̈ bha‑ kë ‑dhɛ 'gü.
MAT 26:1 ꞊Dhɛ 'ö Yesu ꞊ya ö bo 'wɔn ‑nu bha‑ ‑nu pö ‑sü 'ka, 'yö‑ pö ö ‑bha ꞊klang ‑nu ‑dhɛ 'ö‑ pö:
MAT 26:2 «Ka‑ 'wɔn ‑dɔ ꞊dhɛ ‑dhɛkpaɔyi ꞊ya 'to do ‑a ꞊plɛ ‑naa bha ꞊në dho kë Pakö yi 'ka, ‑a yi 'ö bha ꞊në dho kë mang Mɛgbömɛ n ‑da pë ꞊kwɛɛ‑ ‑yi 'ka kö ‑wo n ‑dɔ "dhü ‑bha.»
MAT 26:3 ꞊Dhɛ 'ö ꞊ya kë "dhʋ̈ 'yö "saabhomɛ ‑nu waa‑ ‑kwɛagbö ‑nu 'wo "sɛ bha‑ 'gü, 'wo ꞊loo 'ko ‑ta "saabhomɛ 'kpii‑ 'wo‑ Kaifö ‑kë bha‑ ‑gɔ 'kɔɔdhö.
MAT 26:4 'Yö ‑kɔ 'wo dho‑ kë‑ ‑bha kö 'wo Yesu 'kun ‑gleng 'gü 'wo‑ zë bha 'wo‑ ‑ya 'kwëë‑ ‑kë ‑dhɛ bha‑ 'gü, 'yö‑ ‑nu ‑wʋ ‑yö to‑ bha do ꞊dhɛ:
MAT 26:5 «'Kwa 'dho‑ 'kun Pakö yi 'ka, ‑a ‑gɛn ‑mü ꞊dhɛ 'kwa‑ kë "dhʋ̈ mɛ 'wo dho nu Pakö ‑ta bha ‑wo ‑dho "wlü kwa "piʋ̈.»
MAT 26:6 'Ö gun kö Yesu ‑yö Simɔ 'ö ꞊wee ‑yua ‑yö gun‑ ‑bha bha‑ ‑gɔ 'kɔɔdhö Betani, kö ‑wo pë ‑bhö sië, 'yö dhebhɔ 'në do 'bha bha 'ö ꞊yɔɔn‑ "sɔɔ kö ‑sangdhe suu 'bha 'wo‑ ‑kë gënng' ‑gwë 'ka bha‑ do 'ö ‑dhasiklɔɔ "yi 'bha 'ö‑ sɔɔn 'dhö "gbɩɩ‑ 'ka ꞊dhɛ pë 'bha 'dhö bha ‑ya 'gü, kö ‑yö dhebhɔ bha‑ ‑gɔ. Dhebhɔ bha ‑yö Yesu ‑to pë ‑bhö ‑dhɛ 'gü mü, 'yö pë "yi bha‑ ꞊wɛnng‑ ꞊gbin‑.
MAT 26:8 'Wɔn bha ꞊dhɛ 'ö‑ ‑bha ꞊klang ‑nu 'wo‑ ‑dhɛ yö, 'yö ‑siö ‑nu ‑dhɛ 'yö 'wo‑ pö: «Pë 'gü see‑ ‑kɔ suu ‑mɛɛ ꞊në ꞊ni? ‑A kë 'ö‑ wo "dhʋ̈ ya‑ ꞊trɔɔn ‑mü ‑më 'ka?
MAT 26:9 ꞊Ya kë ꞊dhɛ ‑dhasiklɔɔ "yi ꞊fii ‑së ya‑ "dhɔɔ ꞊në 'yi‑ dɔ 'nu sɔng "gbɩɩ‑ bha, 'ö yi‑ 'wëëga bha‑ sü 'yi‑ ꞊gbaɔ ‑wëëmɛ ‑nu ‑gɔ kö ꞊trɔɔn 'yaa‑ 'gü ‑ee!»
MAT 26:10 'Yö Yesu "tʋ 'dhö ‑da dhiang 'wo‑ zë bha‑ 'gü 'yö‑ pö‑ ‑nu ‑dhɛ 'ö‑ pö: «Ka dhebhɔnë bha‑ ‑din ‑yën "dhʋ̈ ‑më ‑wɔn 'gü? 'Kaa‑ 'wɔn dɔ ꞊dhɛ 'wɔn ‑së ꞊në 'ö‑ kë n ‑dhɛ bha ‑ee?
MAT 26:11 ‑Ka ‑dhɛ ‑ga, "flɛɛmɛ ‑nu, "ɛɛn ‑wëëmɛ ‑nu ‑zë ‑wo ka "piʋ̈ yö ‑kpɛawo, "kɛɛ ma ‑zë 'mii 'dho kë ka "piʋ̈ yö yi ꞊gban 'ka.
MAT 26:12 ‑A ‑kë "dhʋ̈ ‑sü bha‑ 'gü, dhebhɔnë bha 'ö pë "yi 'ö‑ ꞊wɛnng n ‑ta bha, dhasiklɔɔ "yi 'ö 'wo dho‑ ziö n ꞊gee ‑bha 'wo n ‑wɛɛ bho‑ 'ka bha ꞊në ꞊yaa‑ 'to "dhiʋ̈ 'yö yaa‑ kë bha.
MAT 26:13 A‑ pö ka ‑dhɛ tɛan‑ ꞊dede 'ka ꞊dhɛ: 'Wɔn 'ö dhebhɔnë bha 'ö‑ ‑kë bha, ‑dhɛ "pɛpɛ 'wo dho 'wɔn ‑taɔng ‑së ya‑ pö‑ ‑bha "kpʋng ꞊taa, ‑wo ‑dho ‑a ‑dhiang zë mü kö mɛ 'bha ‑zʋ 'ya 'dho bhɔ‑ 'ka.»
MAT 26:14 ꞊Dhɛ 'ö ꞊ya kë "dhʋ̈ 'yö Yesu ‑bha ꞊klang ‑nu ‑kaɔng do ga ꞊plɛ bha‑ mɛ 'dhɛ 'wo‑ ‑dhɛ Zuda Isikadhiɔtö bha 'yö ꞊wlü 'yö dho "saabhomɛ ‑nu ‑gɔmɛ ‑nu "piʋ̈,
MAT 26:15 'yö‑ pö‑ ‑nu ‑dhɛ 'ö‑ pö: «꞊Ya kë ꞊dhɛ 'ma Yesu nu ka ‑dhɛ, ka ‑dho n gba ‑më ꞊në‑ 'ka?» ꞊Dhɛ 'ö ꞊yaa‑ pö "dhʋ̈, 'yö 'mɛ 'wo bha 'wo 'wëë‑ "puu ga ‑kaɔng ‑yaaga ꞊dhʋng 'yö 'wo‑ nu Zuda ‑dhɛ.
MAT 26:16 ꞊Dhɛ 'ö 'wɔn bha ꞊ya kë "dhʋ̈, 'yö Zuda ‑yö zun ‑kɔ 'ö dho‑ kë 'ka kö 'ö Yesu "dhiʋ̈ dɔ 'mɛ bha‑ ‑nu ‑gɔ ‑a "slë mɔɔ‑ ‑sü ‑bha.
MAT 26:17 ꞊Dhɛ 'ö "dhɔɔgɔ 'ö 'bluu‑ 'ö "sɛkɛ 'yaa‑ ‑bha 'wo‑ ‑bhö 'ka 'wo‑ Pakö ‑kë bha‑ ‑dhɛkpaɔyi ‑blɛɛsü ꞊ya ꞊loo, 'yö Yesu ‑bha ꞊klang ‑nu 'wo‑ dhɛɛ" kpɔ 'wo‑ pö: «‑Yö i "piʋ̈ ꞊dhɛ 'yi Pakö ‑bhöpë ya‑ ‑kpa i ‑dhɛ ‑dhɛ ‑mɛɛ ꞊në‑ 'gü?»
MAT 26:18 'Yö Yesu ‑ya pö‑ ‑nu ‑dhɛ: «‑Ka 'dho 'pödhɛ 'ö ‑ya ka "dhiʋ̈ bha‑ 'gü kö'ka 'dho 'mɛ 'ö ꞊ni bha‑ ‑gɔ 'kɔɔdhö kö 'ka‑ pö‑ ‑dhɛ: «Yi Dëmɛ ‑ya ‑pö ö ‑bha "tʋ̈ng ꞊ya ꞊loo, "kɛɛ yöö Pakö ‑bhöpë ya ö ‑bha ‑bhö i ‑gɔ 'kɔɔdhɛ ꞊në‑ 'gü waa‑ ö bha ꞊klang ‑nu 'dhö.»
MAT 26:19 ꞊Dhɛ 'ö ꞊ya ö ‑wʋ 'kpɔ‑ ‑nu ‑bha ‑dhɛ ‑kɔ bha‑ 'dhö, 'yö 'wo dho 'wo‑ ‑kë ꞊dhɛ ‑kɔ 'ö‑ pö‑ 'ka‑ ‑nu ‑dhɛ bha‑ 'dhö, 'yö 'wo Pakö ‑pë bha‑ ‑kpa mü.
MAT 26:20 ꞊Dhɛ 'ö "bin ꞊ya 'ma, 'yö Yesu waa‑ ö ‑bha ꞊klang ‑nu ‑kaɔng do ga ꞊plɛ bha 'wo dho pë ‑bhö ‑dhɛ 'gü.
MAT 26:21 ꞊Dhɛ 'wo pë ‑bhö sië 'yö‑ pö ö ‑bha ꞊klang ‑nu ‑dhɛ 'ö‑ pö: «‑Ka ‑dhɛ ‑ga! A‑ ‑pö ka ‑dhɛ tɛan‑ ꞊dede 'ka ꞊dhɛ 'mɛ 'ka bha mɛ do‑ dho n "dhiʋ̈ dɔ n 'yaɔ‑ ‑nu ‑gɔ.
MAT 26:22 "Kɛɛ ꞊dhɛ 'ö ꞊yaa‑ pö "dhʋ̈ 'yö ‑siö ‑a ‑bha ꞊klang ‑nu bha‑ ‑nu ‑dhɛ ꞊dedewo 'yö 'wo wo wë 'gü ‑siö, 'yö 'mɛ ꞊ya dɔ 'yö‑ dhɛɛ" kpɔ 'ö‑ pö: «Mɛ kpö 'yi ya de ‑mü, n Dëmɛ? "Ɛɛn ma ‑mü ‑ee?
MAT 26:23 'Yö Yesu ‑ya ‑yɔ bɔ 'ö‑ pö: «'Mɛ 'ö yɛng 'yi yi ‑kɔ ‑da sië 'tɛa‑ 'gü ya ꞊në dho ‑da n ‑dhɛ pë "piʋ̈.» 'Yö ö ‑wʋ ‑ta ‑yɔ 'ö‑ pö:
MAT 26:24 «‑Yö "dhʋ̈ tɛan‑ 'ka ꞊dhɛ mang Mɛgbömɛ a ‑dho ga ꞊dhɛ ‑kɔ 'ö ‑bɛn zë ‑sü 'ka‑ 'ka n ‑bu 'gü Atanna ‑bha 'sëëdhɛ 'gü ꞊në‑ 'dhö, "kɛɛ 'mɛ 'ö yaa‑ ‑kë ö ‑bha 'wɔn 'ka ꞊në‑ ‑mɛ ‑bha 'dhö ‑wëësü. ‑Yö ‑së ‑zianwo ‑mɛ ‑bha 'ka 'nu kö 'ya 'dho bhɔ.»
MAT 26:25 ꞊Dhɛ 'ö Yesu ꞊yaa‑ pö "dhʋ̈, 'yö Zuda ꞊dede 'ö yöö‑ "dhiʋ̈ dɔ bha 'ö‑ dhɛɛ" kpɔ 'pö 'ö‑ pö: «N Dëmɛ, "ɛɛn ma ‑mü ‑ee?» 'Yö Yesu ‑ya pö‑ ‑dhɛ 'ö‑ pö: «'Bha yö ꞊në‑ pö bha.»
MAT 26:26 ꞊Dhɛ 'wo pë ‑bhö sië 'yö Yesu ‑yö 'bluu‑ sü. ꞊Dhɛ 'ö ꞊ya Atanna nuɛ" bho‑ ‑wɔn 'gü, 'yö‑ "kplükplü bho 'yö‑ nu ö ‑bha ꞊klang ‑nu ‑dhɛ 'yö‑ pö: «‑Ka ‑dhɛ ‑ga, n kwi "blɛɛn‑ ꞊nɛ. ‑Kaa 'sü kö 'ka‑ ‑bhö.»
MAT 26:27 ꞊Dhɛ 'ö ꞊ya ö bo 'yö we ‑kɔɔ ‑yan do sü 'yö Atanna nuɛ" bho‑ ‑wɔn 'gü, 'yö‑ nu‑ ‑nu ‑dhɛ 'ö‑ pö: «Mɛ ꞊gban "pɛpɛ ‑ka ka ‑bɛn ‑ya ‑ta 'dɔɔndhö,
MAT 26:28 ‑a 'dhɛ 'ö bha n ꞊yɔɔn "blɛɛn‑ ꞊në bha. N ꞊yɔɔn bha ꞊në dho ꞊wɛnng mɛ kpö 'gbɛ ꞊dede ‑wɔn 'gü, kö Atanna ‑ya ‑nu ‑mawɔn 'to. Yöö do bha ꞊në ‑mlɛɛ 'ö maa‑ ‑da waa‑ mɛ "bhɩɩ‑ ‑nu ‑a ‑nu ꞊zinng 'gü bha‑ zü ‑bho ‑dhɛ 'ka.
MAT 26:29 A‑ ‑pö ka ‑dhɛ tɛan‑ ꞊dede 'ka ꞊dhɛ: «‑Drɔɔ ya, ꞊ya 'go ꞊dɛɛ 'gü, 'mii 'dho‑ mü 'zü 'ö dho 'ö zun‑ 'ka yi 'ö kwɛng‑ ‑nu 'kwa dho‑ ‑dee mü‑ 'ka n Dë ‑bha ‑gblüdëdhɛ 'gü bha‑ ‑bha.»
MAT 26:30 ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka, 'yö 'wo troo 'ö kë Pakö troo 'ka bha‑ ‑ta "tan ‑nu 'wo Atanna 'tɔ bhɔ "tan ‑nu 'ka bha‑ bho, 'yö 'wo ‑ziö 'wo dho Odhivie ‑tɔn ꞊gbin‑.
MAT 26:31 ꞊Dhɛ 'wo 'dho sië 'yö Yesu ‑ya pö‑ ‑nu ‑dhɛ 'ö‑ pö: «A ‑dho kë ka ‑gɛn "dhiʋ̈ ‑zuö ‑bha ‑pë 'ka gbeng do 'ö ꞊dɛɛ‑ 'gü. ‑A ‑gɛn ‑mü ꞊dhɛ ‑yö ‑bɛn zë ‑sü 'ka Atanna ‑wʋ 'sëëdhɛ 'gü ꞊dhɛ: ‹A ‑dho ‑tuʋ̈ ‑gɔdhiʋ̈mɛ ‑ma 'yö‑ ‑bha ‑tuʋ̈ ‑nu 'wo dɔ bunnggɛɛdhö.›
MAT 26:32 "Kɛɛ 'ma ‑bö kö 'a 'go ga 'gü, a ‑dho ‑da ka "dhiʋ̈ 'a dho Gadhidhe.»
MAT 26:33 ꞊Dhɛ 'ö ꞊yaa‑ pö "dhʋ̈ 'yö Piɛdhö ‑ya pö‑ ‑dhɛ 'ö‑ pö: «'Kö 'zü 'mɛ 'yi ya mɛ "pɛpɛ ꞊gban woo "kan i ‑bha, "kɛɛ ma ‑zë 'mii 'dho "kan i ‑bha tongtongdhö, n Dëmɛ.»
MAT 26:34 "Kɛɛ 'yö Yesu ‑ya pö‑ ‑dhɛ 'ö‑ pö: «A‑ ‑pö i ‑dhɛ tɛan‑ ꞊dede 'ka, Piɛdhö, ꞊dhɛ gbeng do 'ö ꞊dɛɛ‑ 'gü, "sanni ‑wa pö ꞊dhɛ ‑tɔgɔn ꞊ya "wɩ kö 'bha n ‑wɔn zaɔ‑ ‑gɛn ‑yan 'ka ‑yaaga.»
MAT 26:35 'Yö Piɛdhö ‑ya pö‑ ‑dhɛ 'ö‑ pö: «'Kö 'zü 'ö ‑kë n ‑gɔ ‑to 'gü ‑wɔn 'ka, kö n ‑gɔ ꞊në dho 'to‑ 'gü, "kɛɛ 'mii 'dho i ‑wɔn ‑zë zaɔ‑ 'ö to‑ ‑bha. 'Yö‑ ‑bha ꞊klang ‑nu bha‑ ꞊gban "pɛpɛ 'wo‑ pö 'pö "dhʋ̈.
MAT 26:36 'Yö Yesu waa‑ ‑bha ꞊klang ‑nu bha 'wo dho "dhʋ̈ 'wo ꞊loo ‑dhɛ do 'bha 'wo‑ Zɛsemane ‑dhɛ ‑kë bha‑ 'gü. ꞊Dhɛ 'ö ꞊wa ꞊loo mü 'yö Yesu ‑ya pö‑ ‑nu ‑dhɛ: «‑Ka ‑ya yö kö ma ‑zë 'a bhɔ 'në 'bha wo taa‑ kö 'a 'dho bhɛa" Atanna ‑dhɛ.»
MAT 26:37 'Yö ‑ziö 'yö Piɛdhö 'dhö, Zebede gbö ‑nu ꞊plɛ 'dhö, 'yö‑ ‑nu sü 'yö 'wo dho, "kɛɛ kö "suʋ̈ ꞊ya ‑da 'gü, kö "nɛnɛga ‑sɛa ꞊ya ‑ya bha ‑sü ‑bha ‑a ‑bha, kö ‑wëë ‑yö bɔ sië‑ ‑ta ꞊dedewo.
MAT 26:38 ꞊Dhɛ 'ö ꞊wa bhɔ 'në 'bha wo 'mɛ 'wo bha‑ ‑nu ‑dhɛ taa‑, 'yö‑ pö 'mɛ 'wo gun‑ ꞊keng‑ bha‑ ‑nu ‑dhɛ: «‑Ka ‑ya yö kö 'kwa ‑toyaan kë, ‑a ‑gɛn ‑mü ꞊dhɛ ga ‑zii ꞊ya kpa n ‑ta.»
MAT 26:39 ꞊Dhɛ 'ö ꞊yaa‑ pö "dhʋ̈ 'yö bhɔ 'në 'bha wo ‑a ‑nu 'ka taa‑ 'bleng ‑bleng, 'yö "gblëënu 'yö ꞊bhɛa Atanna ‑dhɛ 'ö‑ pö: «N Dë, 'ö ꞊ya kë ꞊dhɛ 'ö dho kë ‑mɔɔ "kwëë ‑wɔn 'ka kö ‑bhö dɔ "gbɩɩ‑ kö 'wɔn "gbɩɩ‑ 'ö maa‑ "yi mü ya 'i‑ bho n ‑bha, "kɛɛ yö ‑zë ꞊gban 'gü, ‑yö n "piʋ̈ ꞊dhɛ ‑yö kë bhi ꞊në i dhɔɔbhaa 'ka 'ya 'dho 'to ma ‑zë n ‑bha ‑bha.»
MAT 26:40 ꞊Dhɛ ꞊ya ö bo ‑bhɛa Atanna ‑dhɛ ‑sü 'ka ꞊dhɛ ‑kɔ bha‑ 'dhö, 'yö ‑ziö 'ö dho zun ö ‑bha ꞊klang ‑nu ‑yaaga 'dhɛ 'wo nu "kwëë bha‑ ‑nu ‑dhɛ 'gü, 'ö dho 'ö ꞊loo mü kö ‑wo yi zë sië (꞊dhɛ 'ö ꞊ya 'pa‑ ‑nu ‑bha). 'Yö‑ pö Piɛdhö ‑dhɛ: «Piɛdhö, yi ‑zian ꞊në‑ 'ka‑ zë sië, 'kii ꞊mɔɔ‑ ‑bha kö 'ka "tʋ̈ng do ‑zian ‑to "yaan kë n "piʋ̈ ‑wa?
MAT 26:41 A‑ ‑pö 'ka ‑ya ka "yaan kö 'ka bhɛa" kö Sɔtraan ‑bha "kpënng‑ ‑kɔ 'ya 'dho ꞊mɔɔ ka ‑bha, ‑a ‑gɛn ‑mü ꞊dhɛ ‑yö mɛ 'nii‑ 'kö mɛ 'gü bha‑ "piʋ̈ ꞊dhɛ 'ö Atanna ‑dhidhɛwɔn ꞊në kë yi ꞊gban 'ka, "kɛɛ "sɩ 'yaa mɛ kwi ꞊në‑ ‑dhɛ.»
MAT 26:42 ꞊Dhɛ 'ö ꞊yaa‑ pö "dhʋ̈ 'yö‑ ‑nu to 'zü ꞊plɛ ‑naa wo, 'yö dho ‑bhɛa Atanna ‑dhɛ ‑dhɛ 'gü 'ö‑ pö: «N Dë, 'ö ꞊ya kë ꞊dhɛ 'wɔn "gbɩɩ‑ 'ö yöö wɔ n ‑ta bha, ‑a ‑bho n ‑ta ‑wɔn 'yii 'dho kë ‑mɔɔ "kwëë ‑wɔn 'ka kö ‑a 'dhɛ 'ö ‑dhi i ‑dhɛ ꞊në ‑yö 'to‑ ‑bha.»
MAT 26:43 ꞊Dhɛ 'ö ꞊ya ö bo, 'yö ö yee ‑kë 'zü ‑deewo 'ö dho ö ‑bha ꞊klang ‑nu bha‑ ‑nu ‑dhɛ 'gü, 'yö ‑kpan 'zü‑ ‑nu ‑bha ‑dee 'bha wo kö ꞊wa yi zë, ‑a ‑gɛn ‑mü ꞊dhɛ 'ö gun "dhʋ̈ kö‑ ‑nu "yankɔ ꞊gbaan kë 'gbiin‑ yi kaɔ.
MAT 26:44 'Yö Yesu ‑yö ‑kan 'zü‑ ‑nu ‑bha ‑deewo 'yö dho 'yö bhɛa" ‑kɔ ‑yaaga ‑naa 'bha wo 'zü Atanna ‑dhɛ ‑wʋ do bha‑ 'gü.
MAT 26:45 'Yö ö yee ‑kë 'ö nu ö ‑bha ꞊klang ‑nu bha‑ ‑nu "piʋ̈ ‑dee 'bha wo ('yö pa‑ ‑nu ‑bha) 'yö‑ pö‑ ‑nu ‑dhɛ: «Ka ‑zë yi ꞊në 'ka zë sië ꞊zɔɔ 'yö 'ka ka 'gü ꞊dhië sië‑ 'ka ‑wa! ‑Ka ‑dhɛ ‑ga, "tʋ̈ng 'a gun‑ ‑dhiang zë sië ka ‑dhɛ bha ꞊ya ꞊loo, mang Mɛgbömɛ n "dhiʋ̈ ‑dɔ 'wɔnyaakëmɛ ‑nu ‑gɔ "tʋ̈ng bha ꞊ya ꞊loo.
MAT 26:46 ‑Ka "wlü kö 'kwa 'dho! 'Mɛ yöö ‑da n ‑dhɛ pë "piʋ̈ bha ꞊ya ꞊tëng kwa ‑ta.»
MAT 26:47 Dhiang bha ‑yö ‑to Yesu "dhi 'yö Zuda 'ö ‑kë ‑bha ꞊klang ‑nu ‑kaɔng do ga ꞊plɛ bha‑ mɛ do 'ka bha 'ö ‑wo kö mɛ kpö 'gbɛ 'ö "dhü "kpla ‑nu oo, ‑siang ‑nu 'wo‑ ‑nu ꞊kwɛɛ‑ 'ö Zuifö ‑nu ‑bha "saabhomɛ ‑nu ‑gɔmɛ ‑nu waa‑ ‑kwɛagbö ‑nu 'wo "sɛ bha‑ 'gü 'wo‑ ‑nu bɔ bha kö ‑wa ꞊keng‑ "wɛ ‑dungdhö.
MAT 26:48 'Ö gun "dhʋ̈ kö Zuda 'ö ‑da Yesu ‑dhɛ pë "piʋ̈ bha ꞊ya ö ‑wʋ 'kpɔ‑ ‑nu ‑bha 'nu kö ꞊yaa‑ pö: «꞊Ya kë ꞊dhɛ 'kwa ꞊loo mü, 'mɛ 'a dho‑ ꞊loo‑ ‑bha bha kö 'mɛ bha 'yö bha, kö 'ka‑ 'kun.»
MAT 26:49 ꞊Dhɛ 'ö ꞊wa 'dho ꞊wa ꞊loo mü 'yö Zuda ‑yö ‑yɔɔn Yesu "sɔɔ 'yö‑ pö‑ ‑dhɛ: «N Dëmɛ, 'bha ꞊boo mü!» ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka, 'yö ꞊loo‑ ‑bha.
MAT 26:50 'Yö Yesu ‑ya ‑yɔ bɔ‑ ‑gɔ 'ö‑ pö: «N "taɔngdë, 'wɔn 'i nu‑ kë ‑bhö i bha pë kë wo i ‑ta "puu 'ka!» ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka 'yö 'mɛ 'wo bha 'wo ꞊yɔɔn‑ ‑bha 'yö 'wo‑ kun.
MAT 26:51 ꞊Dhɛ 'ö ꞊waa‑ 'kun 'yö 'mɛ 'wo gun Yesu ꞊keng‑ bha‑ mɛ do 'dhö ö ‑bha ‑siang bho ö ‑kpee 'gü, 'yö "saabhomɛ 'kpii‑ ‑bha gwëëmi zë‑ 'ka‑ "tʋ kpö ‑bha "wɛ "bɛidhö 'yö‑ bho mü.
MAT 26:52 'Yö Yesu ‑ya pö‑ ‑dhɛ 'ö‑ pö: «N "taɔngdë, ‑bhö i ‑bha ‑dhaa bha‑ ‑da ‑kpee 'gü, ‑a ‑gɛn ‑mü ꞊dhɛ mɛ "ʋʋ mɛ 'ö dho ‑piö 'si mɛ "piʋ̈, ‑a ‑mɛ ‑dho 'to ‑piö ꞊në‑ ‑gɔ.
MAT 26:53 "Ɛɛn 'bhaa‑ 'wɔn ꞊në‑ dɔ ꞊dhɛ a ‑mɔɔ ‑bha 'a "tabhoo ‑da n Dë Atanna ‑dhɛ 'ö ö ‑bha "kië ‑nu 'wo‑ ‑bha "sɔdha 'ka 'ö mɛ 'yaa ꞊mɔɔ‑ ‑bha kö mɛ ‑ya a "dhi dɔ bha‑ ‑nu bɔ n ‑dhɛ kö 'wo n ‑ta ‑gblü gɔɔn ‑ee?
MAT 26:54 "Kɛɛ ꞊ya kë ꞊dhɛ 'ma‑ kë "dhʋ̈ kö 'pë 'ö ‑bɛn zë ‑sü 'ka Atanna ‑gɔ 'sëëdhɛ 'gü bha‑ 'gü ‑wɔn ‑dho kë ‑kɔ ‑kë ꞊dhɛ "kɛɛ kö‑ ‑dhɛa ‑bha ꞊dhɛ ‑yö kë ꞊dhɛ ‑kɔ bha ꞊në‑ 'dhö?»
MAT 26:55 ꞊Dhɛ 'ö ꞊ya kë "dhʋ̈ 'yö Yesu ‑ya pö mɛ kpö bha‑ ‑nu ‑dhɛ 'ö‑ pö: «Ka ‑nu n 'kun ‑dhɛ 'gü "dhü "kpla ‑nu waa‑ ‑siang ‑nu 'ka ꞊dhɛ mɛ‑ dɔ 'wɔnyaakëmɛ 'bha 'ka ‑më ‑wɔn ꞊në‑ 'gü "kɛɛ kö a ‑gun 'dho sië ka kpö 'gü Atanna ‑dhɔkëgükɔ 'gü yi ꞊gban "pɛpɛ 'ka 'ö 'a mɛ ‑nu ꞊klang ‑nu kë mü 'yö 'kii n 'kun yö ‑zë 'bha 'gü!
MAT 26:56 "Kɛɛ ‑yö ‑kë "dhʋ̈ kö 'pë 'ö Atanna ‑wʋdhiʋ̈loomɛ ‑nu ‑wa pö n ‑bu 'gü bha‑ 'gü ‑wɔn ꞊në ‑yö kë. ꞊Dhɛ 'ö ꞊ya kë "dhʋ̈, 'yö‑ ‑bha ꞊klang ‑nu ꞊gban "pɛpɛ 'wo ‑kan ‑zü 'kwëë‑ 'wo dho.
MAT 26:57 ꞊Dhɛ 'ö ꞊wa Yesu 'kun, 'yö 'wo dho‑ 'ka "saabhomɛ ‑nu ‑gɔmɛ 'kpii‑ 'wo‑ Kaifö ‑kë bha‑ ‑kuu "dhiʋ̈, 'yö Zuifö ‑nu ‑bha 'tɔnggɔmɛ ‑nu waa‑ ‑nu ‑bha ‑kwɛagbö ‑nu 'wo ꞊loo 'ko ‑ta ‑dhɛ bha‑ 'gü.
MAT 26:58 'Wo gun 'dho sië Yesu 'ka "dhʋ̈ kö Piɛdhö ‑ya ꞊keng‑ "klëngklëngdhö 'wɔn 'suan‑ bho ‑sü 'ka, 'ö 'wo dho‑ 'ka "dhʋ̈ 'wo ꞊loo‑ 'ka "saabhomɛ ‑gɔmɛ 'kpii‑ bha‑ ‑gɔ "kwɛandhö. ꞊Dhɛ 'ö ꞊wa ‑da "kwɛandhɛ bha‑ 'gü, 'yö Piɛdhö ‑yö dho 'yö ‑ya "yan ‑to 'kɔ ‑bha ‑mɛ ‑nu kpö 'gü kö 'wɔn bha‑ "dhiʋ̈‑ dho ‑ya ‑kɔ 'kö‑ ‑bha ‑zë wo 'ö‑ dɔ.
MAT 26:59 'Ö gun "dhʋ̈ kö 'mɛ 'wo ‑kë "saabhomɛ ‑nu ‑gɔmɛ ‑nu 'ka waa‑ 'mɛ 'wo ‑kë zagɔbhomɛ ‑nu 'ka waa‑ Zuifö ‑nu ‑bha ‑kwɛagbö ‑nu 'dhɛ 'wo to kö 'pë 'wo dho‑ pö Yesu ‑bha, 'kö 'zü 'ö ‑kë ꞊sua 'ka "kɛɛ 'ö dho kë‑ zë ‑gɛn ‑zë 'ka bha ‑wa mɔɔ‑ sië.
MAT 26:60 "Kɛɛ kö mɛ 'gbɛ ꞊dede ꞊waa‑ dan kö 'wo ꞊sua ‑za ‑nu mɔɔ‑ kö 'wo‑ ‑ya ‑bha kö ꞊waa‑ dan ꞊wa ꞊fië‑ ‑bha. ꞊Dhɛ 'ö mɛ kpö 'gbɛ ꞊wa ziö mü, 'ö‑ 'bha ‑bha 'yii 'to‑ ‑bha, 'yö mɛ ꞊plɛ 'bha bha 'wo ꞊wlü 'wo‑ pö:
MAT 26:61 «'Mɛ 'ö dɔ bha ꞊në‑ pö, Atanna ‑dhɔkëgükɔ bha ö ‑dho 'wü 'ö‑ ‑dee dɔ ‑dhɛkpaɔyi ‑yaaga 'ka.»
MAT 26:62 ꞊Dhɛ 'ö ꞊waa‑ pö "dhʋ̈ 'yö "saabhomɛ ‑nu ‑gɔmɛ 'kpii‑ bha 'ö ꞊wlü 'ö‑ pö Yesu ‑dhɛ: «'Wɔn 'ö 'mɛ 'wo ya 'wo‑ pö sië i ‑bha ya, 'bhaa‑ ma ꞊në‑ wo 'yö 'bhaa‑ ‑yɔ bɔ ‑ee?»
MAT 26:63 "Kɛɛ 'yö Yesu ‑yö ö "dhi ta 'yö 'yii "wɩ. 'Yö "saabhomɛ ‑nu ‑gɔmɛ 'kpii‑ bha 'ö‑ pö 'zü‑ ‑dhɛ ‑deewo 'ö‑ pö: «'I‑ ‑zë Atanna "yaandhe ꞊dede ‑dhɛ, ꞊sii ꞊dede ‑ta, bhi ꞊në 'i‑ ‑bha ‑Yamɛ 'ö‑ Gbö 'ka bha‑ 'ka ‑ee? 'Ö ꞊ya kë ꞊dhɛ bhi ꞊në 'i‑ 'ka tɛan‑ ꞊dede 'ka, ‑bhö ‑a pö yi ‑dhɛ!»
MAT 26:64 'Yö Yesu ‑ya ‑yɔ bɔ‑ ‑gɔ 'ö‑ pö: «꞊Iin, ma ‑mü, "kɛɛ yö ‑zë ꞊gban 'gü a‑ ‑pö ka ‑dhɛ ꞊dhɛ 'ö sü ꞊dɛɛ ‑bha 'ö dho‑ 'ka "dhiʋ̈ ka "yan‑ ‑dho ‑kpan mang Mɛgbömɛ n ‑bha kö a ‑ya ‑sü 'ka Atanna 'ö‑ 'gü 'dhö "gbɩɩ‑ 'ö pë 'bha 'yaa ꞊mɔɔ‑ 'ka bha‑ "sɔɔ ‑dhɛ ꞊bhlëësü 'ö dhang‑ 'gü bha‑ 'gü. ꞊Ya 'go mü 'zü ka ‑dho n "dhiʋ̈ yee kë ‑sü yö kö a nu sië dha 'kpong‑ ‑ta dhang‑ 'gü.»
MAT 26:65 ꞊Dhɛ ꞊yaa‑ pö "dhʋ̈ 'yö ‑siö "saabhomɛ 'kpii‑ bha‑ ‑dhɛ ꞊dedewo 'yö ö ‑bha ‑sɔ ‑nu ‑pɛ 'yö‑ pö: «"Sɛɛ‑ ‑wɔn ‑zian 'yaa‑ 'gü 'zü, ꞊ya "si bho Atanna ‑gɔ! "Ɛɛn dhiang 'ö‑ zë bha 'kii‑ ma ‑ee?
MAT 26:66 Ka ka ‑bha ‑pö 'wɔn bha‑ 'gü ꞊dhɛ? ꞊Dhɛ 'ö ꞊yaa‑ pö "dhʋ̈, 'yö 'wo‑ ‑yɔ bɔ‑ ‑gɔ 'wo‑ pö: «‑A zë ꞊në ‑yö wo!»
MAT 26:67 ‑Wo ‑to ‑wʋ bha ꞊në‑ ‑ta, 'yö 'wo "dhidhi ‑suʋ̈ ‑a wëëdhö kö ‑wa zë sië ‑kɔ kpö ‑nu 'ka ('yö 'wo sɔ "pɛn ‑kplü ‑a "yan "dhiʋ̈).
MAT 26:68 'yö mɛ bha ‑nu 'wo‑ "tʋ ‑nu ‑ma kö ‑wa pö sië 'wo‑ pö: «Atanna ‑bha ‑Yamɛ, (bhii‑ pö i ‑dɩ ‑dhɛ ‑a ‑wʋdhiʋ̈loomɛ ‑mü i 'ka ‑ee) i‑ ‑zë "dhʋ̈ de në i ‑ma bha?»
MAT 26:69 'Wo gun‑ ‑bha "dhʋ̈ "tʋ̈ng 'ö‑ 'gü bha kö Piɛdhö ‑zë ‑yö ‑ya sië "kpɛnng "kwɛandhö mü. 'Yö gwëëdhe do ‑yö ꞊yɔɔn‑ "sɔɔ 'yö‑ pö ꞊dhɛ: «Bhi 'i ya ꞊ya bhɔ‑ ‑bha ꞊dhɛ i ‑gun 'pö Yesu 'ö go Gadhidhe bha‑ ꞊keng‑ "dhɛ?»
MAT 26:70 "Kɛɛ 'yö Piɛdhö ‑ya ꞊zaɔ mɛ "pɛpɛ 'wo gun mü bha‑ ‑nu "yan "dhiʋ̈ mü 'ö‑ pö: «'Wɔn 'dhɛ 'kö 'i‑ pö sië bha ‑yö "yɛ i ‑ta ‑wa.»
MAT 26:71 ꞊Dhɛ 'ö ꞊ya kë "dhʋ̈ 'yö Piɛdhö ‑yö ꞊wlü 'yö ö wë dɔ "kwɛɛ "dhi ‑zian 'ka. 'Yö gwëëdhe ‑nu bha‑ mɛ "wɛɛ do 'bha ‑ya yö kö ‑yö 'dho sië 'yö‑ pö 'mɛ 'wo gun 'mü bha‑ ‑nu ‑dhɛ 'ö‑ pö: «'Mɛ 'ö 'dho sië ya ‑yö ‑gun 'pö Yesu 'ö go Nazadhɛtö bha‑ ꞊keng‑!»
MAT 26:72 'Yö Piɛdhö ‑ya ꞊zaɔ 'zü ‑deewo, 'yö ‑sö ‑bhö 'ö‑ pö: «('A‑ zë Atanna ‑dhɛ) a‑ ‑pö ka ‑dhɛ 'maa 'mɛ bha‑ dɔ! (꞊Ya kë ꞊dhɛ ‑a pö 'a‑ wo sië bha ꞊ya kë ꞊sua 'ka 'a ga).»
MAT 26:73 ꞊Dhɛ 'ö "tʋ̈ng 'në 'bha ꞊ya ziö 'zü, 'ö 'mɛ 'wo gun mü bha ꞊wa ꞊yɔɔn Piɛdhö "sɔɔ 'yö 'wo‑ pö‑ ‑dhɛ 'wo‑ pö: «'Wɔn 'wo‑ pö sië i bha ya tɛan‑ ‑mü, 'mɛ 'ö ya‑ ‑bha mɛ ‑nu bha‑ mɛ do ‑mü i 'ka, ‑a zaɔ‑ ‑dhɛ 'bha 'yaa 'dhö, ‑a ‑gɛn ‑mü ꞊dhɛ i ‑wʋ ‑zian 'ö i "dhi bha ‑yö ‑bhɔ 'mɛ 'wo bha ꞊në‑ ‑nu ‑wʋ ‑bha.»
MAT 26:74 ꞊Dhɛ 'ö ꞊waa‑ pö "dhʋ̈, 'yö Piɛdhö ‑ya pö: «Dhiang 'a‑ zë sië ka ‑dhɛ bha ꞊ya kë ꞊sua 'ka 'a ga. A‑ ‑pö ka ‑dhɛ ꞊dhɛ 'maa 'mɛ bha‑ dɔ tongtongdhö.» ‑A ‑pö "dhʋ̈ ‑sü ‑yö ‑to Piɛdhö "dhi 'yö ‑tɔgɔn ‑yö ‑wɩ.
MAT 26:75 'Yö Piɛdhö ‑dɩ 'pö‑ ‑zʋ 'dhö to 'ö ‑bö ‑wʋ 'ö Yesu ‑ya pö‑ ‑dhɛ ꞊dhɛ ‹"sanni ‑tɔgɔn ‑yö "wɩ ꞊dɛɛ kö 'bha n ‑wɔn zaɔ‑ ‑gɛn ‑yan 'ka ‑yaaga› bha‑ 'ka. ꞊Dhɛ 'ö ꞊ya kë "dhʋ̈ 'ö Piɛdhö ꞊ya zun "kpɛnng 'yö ‑ya "gbʋ bɔ ‑sü ‑bha ꞊dedewo 'yö ‑kë ‑wëëwëësü 'ka ꞊ni.
MAT 27:1 ꞊Dhɛ 'ö ꞊ya kë "dhʋ̈ 'ö‑ ‑tadhɛ ꞊ya ꞊kpaɔ, 'yö "saabhomɛ ‑nu ‑gɔmɛ ‑nu waa‑ ‑kwɛagbö ‑nu bha 'wo ‑suʋ̈ 'wo dho "slën 'gü, 'yö 'wo Yesu zë ‑wɔn ‑ya 'kwëë‑ ‑kë 'yö‑ ‑nu ‑wʋ ‑yö to‑ ‑bha do.
MAT 27:2 'Yö 'wo dho 'wo Yesu ‑lö, 'yö 'wo dho‑ 'ka Wlɔmö ‑mɛ ‑nu 'wo 'mɛ 'ö‑ ‑ya "sɛdë 'ka Zuifö ‑nu ‑gɔ "dhiʋ̈ 'wo‑ Pidhatö ‑kë bha‑ ‑dhɛ.
MAT 27:3 ꞊Dhɛ 'ö Zuda 'ö ‑da Yesu ‑dhɛ pë "piʋ̈ bha ꞊yaa‑ 'wɔn dɔ ꞊dhɛ 'wɔn bha ꞊ya kë Yesu ‑gɔtogüwɔn 'ka, 'yö ‑da 'gü ‑zinngdhö, 'yö‑ zuë" 'dhö ‑ya za ‑dɔ ‑bha ‑sü ‑bha, 'yö ‑ya ‑a "slë mɔɔ‑ ‑sü ‑bha kö 'ö ö "gblʋʋ ‑ta baa‑. 'Yö "tanma ‑kaɔng ‑yaaga 'ö "Saabhomɛ ‑nu ‑gɔmɛ ‑nu waa‑ ‑kwɛagbö ‑nu 'wo‑ nu‑ ‑dhɛ bha‑ sü 'yö dho‑ 'ka‑ ‑nu ‑dhɛ
MAT 27:4 'yö‑ pö: «'Ma 'wɔn yaa kë, ‑a ‑gɛn ‑mü ꞊dhɛ 'mɛ 'a‑ "dhiʋ̈ dɔ ka ‑dhɛ bha 'wɔn yaa 'bha kö yöö‑ kë kö 'a‑ dɔ 'yaa 'dhö.» 'Yö 'wo‑ ‑yɔ bɔ‑ ‑gɔ 'wo‑ pö: «'Yö ‑yö ‑dɔ yi ‑zë yi ‑gɔ 'mɛ? I ‑ta ‑wɔn ꞊në yö ‑zë 'ka.
MAT 27:5 'Yö Zuda ‑yö 'wëë‑ "puu ga ‑kaɔng ‑yaaga bha‑ ꞊wɛnng Atanna ‑dhɔkëgükɔ 'gü mü, 'yö ‑ziö 'yö dho 'yö ö ‑dɩ dun.
MAT 27:6 ꞊Dhɛ 'ö Zuda ꞊ya bo 'dho ‑sü 'ka, 'yö "saabhomɛ ‑nu ‑gɔmɛ ‑nu bha 'wo 'wëë‑ bha‑ ‑wlö. ꞊Dhɛ 'ö ꞊wa wo bo‑ ‑wlö ‑sü 'ka 'yö 'wo‑ pö: «'Yaa ‑së kö 'kwa 'wëëga 'ö‑ suu 'dhö ya ‑da Atanna ‑bha ꞊naɔ ‑pë 'gü, ‑a ‑gɛn ‑mü ꞊dhɛ mɛ zë 'wëë‑ ‑mü.
MAT 27:7 ꞊Dhɛ 'ö ꞊wa wo bo‑ ‑ya 'kwëë‑ kë ‑sü 'ka, 'yö 'wo dho 'wo gbɔdɔmɛ ‑bha 'bhlaa‑ dhɔ‑ 'wëë‑ bha‑ 'ka kö 'wo ‑dhɛ kë ‑dhɛng ‑nu bun bho ‑dhɛ 'ka.
MAT 27:8 'Wɔn 'ö‑ ‑wɔn 'gü 'yö go‑ 'yi bha‑ ‑bha 'ö nu 'ö zun‑ 'ka ꞊dɛɛ ‑bha, 'yö 'wo‑ 'bhlaadhɛ bha‑ ‑dhɛ ‹mɛ ꞊yɔɔn sɔɔn ‑bhlaa› bha 'yö bha.
MAT 27:9 "Kɛɛ 'sa yö ꞊në ‑kë 'pö ‑wʋ 'ö Atanna ‑wʋdhiʋ̈loomɛ Zedhemi ‑ya pö yi 'bha 'ka 'ö‑ pö ꞊dhɛ: ‹'Wëë‑ "tanmaga ‑kaɔng ‑yaaga, 'wëëga 'ö Izraɛdhö ‑mɛ ‑nu 'wo ꞊mɔɔ‑ 'gü kö ‑wa nu mɛ ꞊bhlëësü bha‑ ‑wɔn 'gü bha ‑wa ‑sü
MAT 27:10 'yö 'wo gbɔdɔmɛ ‑bha 'bhlaadhɛ dhɔ‑ 'ka ꞊dhɛ ‑kɔ 'ö kwa Dëmɛ ‑ya pö‑ 'ka n ‑dhɛ ‑a 'dhö› bha‑ 'gü ‑wɔn kë ‑kɔ 'ka.»
MAT 27:11 ꞊Dhɛ 'ö ꞊ya kë "dhʋ̈, 'yö Yesu ‑yö dho 'ö ꞊loo Pidhatö ‑kuu "dhiʋ̈. ꞊Dhɛ 'ö 'mɛ 'wo dho‑ 'ka "sɛdë ‑kuu "dhiʋ̈ bha ꞊waa‑ ‑gɛn bho‑ ‑dhɛ 'kpakpadhö, 'yö Yesu dhɛɛ" kpɔ 'ö‑ pö: «Bhi ꞊në 'i Zuifö ‑nu ‑bha ‑gblüdë 'wo ‑wɩ 'ka bha‑ 'ka ‑ee?» 'Yö‑ pö‑ ‑dhɛ 'ö‑ pö: «꞊Iin, ma ‑mü.»
MAT 27:12 "Kɛɛ ‑a pö 'ö‑ wo "dhʋ̈ bha za 'kö "saabhomɛ ‑nu ‑gɔmɛ ‑nu waa‑ ‑kwɛagbö ‑nu 'wo dɔ‑ ‑bha ꞊suasua ‑dhiang ‑nu 'ka bha 'yii yö ‑zë 'bha ‑yɔ bɔ.
MAT 27:13 Pidhatö ‑ya ‑pö ‑dhɛ yö ꞊në‑ ‑wɔn 'gü 'ö‑ pö: «Dhiang 'gbɛ 'wo‑ zë sië i bha ya 'bhaa‑ ma ꞊në‑ wo ‑ee?»
MAT 27:14 "Kɛɛ Yesu 'yii‑ "wɩ‑ ‑bha kö ‑ya 'bha ‑yɔ bɔ, yö ꞊në‑ 'wɔn ‑yö ‑gblüdë Pidhatö kɔn ꞊dedewo.
MAT 27:15 ‑A "tʋ̈ng bha‑ 'gü kö Pakö yi ꞊ya ꞊loo ‑kɔ 'ö‑ ‑bha 'do 'do, 'yö ‑gblüdë ꞊ya 'mɛ 'wo ‑kaso 'gü bha‑ mɛ 'dhɛ Zuifö ‑nu ‑wo wo ‑kɔ ‑yɛ ‑bha bha‑ bho ‑kaso 'gü ‑a ‑nu ‑dhɛ.
MAT 27:16 "Tʋ̈ng 'wo Yesu kun‑ 'ka "dhʋ̈ bha, kö "gasagɔn do 'bha 'ö mɛ ꞊gban "pɛpɛ 'wo‑ dɔ ‑a këwɔn yaa ‑nu ‑bha 'wo‑ ‑dhɛ Badhabasö bha ‑yö ‑kaso 'gü.
MAT 27:17 ꞊Dhɛ 'ö Pidhatö ‑yö mɛ kpö bha‑ yö ꞊dhɛ ‑kɔ bha‑ 'dhö, 'yö‑ ‑nu dhɛɛ" kpɔ 'ö‑ pö: «Mɛ ꞊plɛ 'wo ya‑ de ‑sü ꞊në 'ka‑ "piʋ̈ ꞊dhɛ 'a‑ bho ‑kaso 'gü ka ‑dhɛ ‑kwɛ ya‑ 'ka? Badhabasö ‑ee? "Ɛɛn ‑a mɛ 'dhɛ 'wo‑ ‑dhɛ Yesu Klisi ya ‑ee?»
MAT 27:18 ‑A pö 'ö‑ wo "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö ‑ya 'wɔn ‑dɔ 'kpakpadhö ꞊dhɛ gblɛɛn" ꞊në ‑da ‑nu 'gü 'yö 'wo‑ "piʋ̈ ꞊dhɛ 'wo Yesu zë bha.
MAT 27:19 Pidhatö ‑yö ‑to 'wɔn ‑nu bha ꞊në‑ ‑nu kë ‑sü ‑bha zadɔdhɛ 'gü mü "dhʋ̈, 'yö‑ ‑bha dhebhɔ ‑yö naɔ bɔ‑ ‑dhɛ 'ö‑ pö: «'Ka 'dho ‑kaa pö Pidhatö ‑dhɛ ‑yö ö ‑dɩ 'kun kö‑ ‑kɔ ꞊ya 'dho ‑da 'mɛ bha‑ zë ‑wɔn 'gü, ‑a ‑gɛn ‑mü ꞊dhɛ ꞊sɔng 'bha 'yaa‑ ‑bha. "Kɛɛ 'mii yi zë ꞊dɛɛ gbeng 'mɛ bha‑ ‑wɔn 'gü, "yɛɛn 'a‑ bho ꞊dɛɛ ‑yö ‑gban 'mɛ bha ꞊në‑ ‑bha, "kɛɛ ‑yö ‑ziisü.»
MAT 27:20 "Kɛɛ kö Zuifö ‑nu ‑bha ‑kwɛagbö ‑nu waa‑ "saabhomɛ ‑nu ‑gɔmɛ ‑nu ‑zë ‑wo ‑wʋ ꞊në‑ 'ma sië mɛ "dhaa 'wo gun mü bha‑ ‑nu "tʋʋ, 'wo ‑da ‑nu ‑gɔ 'gü kö ‑wa pö ‑gblüdëdhɛ ꞊dhɛ ‑yö Badhabasö ꞊në‑ lɔɔ‑ wo ‑dhɛ kö ‑yö Yesu ‑zë zë.
MAT 27:21 ꞊Dhɛ 'ö ꞊ya kë "dhʋ̈ 'yö ‑gblüdë ‑ya ‑nu dhɛɛ" 'bha kpɔ 'ö‑ pö: «Ka‑ ‑pö 'a mɛ ꞊plɛ ya‑ de ‑sü ꞊në lɔɔ‑ ka ‑dhɛ!» 'Yö 'wo‑ ‑yɔ bɔ‑ ‑gɔ 'wo‑ pö: «Badhabasö.»
MAT 27:22 'Yö Pidhatö ‑ya pö‑ ‑nu ‑dhɛ: «꞊Dhɛ 'ö "dhʋ̈ ‑yö ka "piʋ̈ ꞊dhɛ 'a Yesu 'wo‑ ‑dhɛ Klisi ya‑ kë ꞊dhɛ?» 'Yö‑ ‑nu ꞊gban "pɛpɛ ‑wa pö: «‑Bhö ‑a dɔ "dhü ‑bha! (‑Bhö ‑a dɔ "dhü ‑bha!)»
MAT 27:23 'Yö ‑gblüdë bha 'ö‑ pö: «‑Yö ‑më ‑wɔn yaa ꞊në‑ ‑kë?» "Kɛɛ 'yö 'wo ꞊gbang dɔ ‑yuudhö "gbɩɩ‑ 'ka 'wo‑ pö: «Bhi ‑zë, ‑bhö ‑a dɔ ‑zë wo "dhü ‑bha ꞊zɔɔ!»
MAT 27:24 ꞊Dhɛ 'ö Pidhatö ꞊yaa‑ 'wɔn dɔ ꞊dhɛ 'ya ꞊nëng 'wɔn bha‑ 'gü kö yöö 'to 'mɛ bha‑ ‑nu "yënng "wɛɛwɛɛ, kö ‑wo ꞊gbang ꞊në‑ dɔ sië do 'wo dho‑ 'ka 'waa "tʋ ‑zian ‑dɔ ö ‑wʋ ‑bha, 'yö "yi sü, 'yö ö ‑kɔ ‑zu 'ka 'mɛ 'wo bha‑ ꞊gban "pɛpɛ "yan "dhiʋ̈ mü 'yö‑ pö: «'Mɛ 'ö ꞊sɔng 'bha 'yaa‑ ‑bha ‑a zë ‑wɔn 'ka dɔ‑ 'ka bha ma ‑zë n ‑kɔ 'yaa‑ 'gü, ‑yö 'to kaa do kaa 'wɔn 'ka.
MAT 27:25 'Yö mɛ "pɛpɛ bha‑ ꞊gban 'wo‑ pö: «꞊Iin, ‑yö kë "dhʋ̈, ‑yö 'to yaa yii‑ 'në ‑nu yii‑ 'wɔn 'ka!»
MAT 27:26 ꞊Dhɛ 'ö ꞊waa‑ pö Pidhatö ‑dhɛ "dhʋ̈, 'yö ö ‑kɔ bho‑ ‑nu ‑dhɛ Badhabasö 'gü. 'Yö "sɔdha ‑nu ‑ya Yesu ‑zë ‑bha kö ‑wa ‑ma ‑sabhlüga 'ka kö ‑wa dɔ "dhü bha.
MAT 27:27 ꞊Dhɛ 'ö ꞊ya kë "dhʋ̈, 'yö Pidhatö ‑bha "sɔdha ‑nu 'wo Yesu sü 'wo dho‑ 'ka Pidhatö ‑gɔ 'kɔɔdhö, 'yö "sɔdha ‑nu bha‑ ꞊gban 'wo ꞊klëën‑ ‑zü mü.
MAT 27:28 'Yö 'wo‑ ‑bha sɔ bho‑ ‑bha, 'yö 'wo ‑tɔyang ‑zaɔndhö do ‑da ‑bha,
MAT 27:29 'Yö 'wo "glɛɛn ‑kloo do "kɛɛga ‑kë 'yö 'wo‑ ‑ya ‑gɔ ‑bha ꞊dhɛ‑ ‑bha ‑gblüdëdhɛ 'faan‑ 'dhö. ('Yö 'wo ‑kaadhü do ‑da ‑a ‑kɔ ‑së 'gü ꞊dhɛ ‑gblüdë ‑nu ‑bha ‑taadhü 'dhö.) ꞊Dhɛ 'ö ꞊waa‑ kë "dhʋ̈, 'yö 'wo zun wo kpiö 'gü ‑a wëëdhö 'wo‑ pö: «Zuifö ‑nu ‑bha ‑gblüdë, 'bha ꞊boo mü!» 'Yö 'wo ꞊wɛɛ dɔ‑ 'ka‑ ‑bha.
MAT 27:30 'Yö 'wo wo "dhidhi ‑nu ‑suʋ̈ ‑bha, 'yö 'wo ‑kaadhüga ‑nu sü 'wo‑ ‑ma 'ka‑ ꞊gbin‑.
MAT 27:31 ꞊Dhɛ 'ö ꞊wa wo bo ꞊wɛɛ ‑dɔ ‑bha ‑sü 'ka, 'yö 'wo ‑tɔyang 'wo‑ ‑da ‑bha bha‑ bho‑ ‑bha, 'yö 'wo‑ ‑bha sɔ ‑da ‑bha 'zü ‑deewo 'yö 'wo dho‑ 'ka kö ‑wa dɔ "dhü ‑bha.
MAT 27:32 ꞊Dhɛ 'wo 'go sië 'pödhö kö ‑wo 'dho‑ ‑dɔ "dhü ‑bha ‑dhɛ 'gü, 'yö 'wo ‑kpan gɔndë do 'wo‑ ‑dhɛ Simɔ, 'ö go 'pödhɛ 'wo‑ ‑dhɛ Sidhɛnö ‑a 'gü bha‑ ‑bha. 'Yö 'wo faandhɛ ‑wɔ 'mɛ bha‑ ‑ta 'wo‑ pö ‑yö Yesu ‑dɔ ‑bha "dhü bha‑ 'sü
MAT 27:33 'Yö 'wo dho 'wo ꞊loo ‑dhɛ 'bha 'wo‑ ‑dhɛ eblö ‑wʋ 'gü Gɔgota bha‑ 'gü (꞊waa‑ pö "dhʋ̈ kö ‑wa ‑pö ‹mɛ ‑gɔ "kpɛa ‑tɔn›).
MAT 27:34 ꞊Dhɛ 'ö ꞊wa 'dho ꞊wa ꞊loo mü, 'yö 'wo nu ‑drɔɔ suu 'bha 'ö ꞊wa wü "këë wü‑ ꞊bhaa bha‑ 'ka Yesu ‑dhɛ kö ‑ya mü (kë "dhʋ̈ kö pë ‑nɛɛ ‑ma 'ka ‑sü bha ‑yö 'dho 'në 'bha wo "sia‑). "Kɛɛ ꞊dhɛ 'ö ö ‑bɛn ‑ya ‑ta, 'yö ‑kɔ ‑a mü ‑sü 'ka.
MAT 27:35 ꞊Dhɛ 'ö ꞊wa wo bo‑ ‑dɔ "dhü ‑bha ‑sü 'ka, 'ö ꞊wa "pɔni ‑gban ‑a ‑kɔ waa‑ ‑gɛn ‑nu ‑ta, 'yö 'wo‑ ‑bha sɔ ‑nu 'gü ‑gblü wo 'ko ‑ta zë "kpʋ̈ü kë ‑sü 'ka [kë "dhʋ̈ kö ‑wʋ 'ö Atanna ‑wʋdhiʋ̈loomɛ do 'bha ‑ya pö yi 'bha 'ka 'ö‑ pö ꞊dhɛ: «‑Wo kë n ‑dasɔ ‑nu 'gü ‑gblü wo 'ko ‑ta, 'ö 'wo zë "kpʋ̈ü ‑kë ma ‑da sɔ ꞊wlöö ‑sɔ ‑ta» bha‑ 'gü ‑wɔn ‑yö kë].
MAT 27:36 ꞊Dhɛ 'ö ꞊wa wo bo, 'yö 'wo ‑ya ‑a ‑maa ‑gɔ.
MAT 27:37 'Yö 'wo pë ‑bɛn zë ‑a ‑dɔ ‑bha "dhü bha‑ ‑bha ‑a ‑gɔ ‑ta "dhʋ̈ng 'gü 'wo‑ pö: «Yesu, Zuifö ‑nu ‑bha ‑gblüdë bha yö ꞊nɛ!» Kë "dhʋ̈ kö 'mɛ ꞊ya ꞊loo mü ‑ya zë ‑gɛn dɔ.
MAT 27:38 ‑Dhɛ 'wo Yesu dɔ "dhü ‑bha 'gü bha, 'yö 'wo dho 'wo mɛzëmɛ ꞊plɛ dɔ "dhü ‑bha 'pö‑ "sɔɔ mü. 'Yö 'wo mɛ do dɔ‑ ‑kɔ ‑së 'gü, 'yö 'wo mɛ do dɔ‑ ꞊kwaa 'gü.
MAT 27:39 'Mɛ 'wo gun zian ziö sië 'pö Yesu ‑dɔ "dhü ‑bha ‑dhɛ bha‑ 'gü, ꞊wa ‑kpan ‑bha 'yö 'wo wo ‑gɔ 'gü zë‑ ‑dhɛ, 'wo "si bho‑ ‑gɔ 'wo‑ pö:
MAT 27:40 «Bhi 'ö 'i‑ pö i ‑mɔɔ ‑bha 'i Atanna ‑dhɔkëgükɔ wü 'i‑ dɔ ‑dhɛkpaɔyi ‑yaaga 'ka bha, bhi 'aa mü i dɔ bha ‑ee? ‑Bhö i ‑dɩ dha ‑dhe! ꞊Ya kë ꞊dhɛ 'i Atanna Gbö 'ka ꞊dedewo tɛan‑ 'ka, ‑bhö 'go "dhü bha‑ ‑bha kö 'i zun "sia‑!»
MAT 27:41 Kö 'mɛ 'wo ‑kë "saabhomɛ ‑nu ‑gɔmɛ ‑nu 'ka oo, 'tɔnggɔmɛ ‑nu oo, ‑kwɛagbö ‑nu bha ‑wo ꞊wɛɛ dɔ sië‑ ‑bha 'pö 'wo‑ pö:
MAT 27:42 «꞊Ya mɛ "wɛɛ ‑nu dha "kɛɛ 'yaa ꞊mɔɔ‑ ‑bha kö ‑yö ö ‑dɩ ‑zë dha! 'Yii‑ pö ö ‑dɩ ‑dhɛ Izraɛdhö ‑mɛ ‑nu ‑bha ‑gblüdë ‑mü ö 'ka ‑ee? ꞊Ya kë ꞊dhɛ 'ö "dhʋ̈ tɛan‑ 'ka, ‑yö 'go "dhü bha‑ ‑bha kö ‑yö zun "sia‑ kö 'yi‑ ‑dhɛ yö, ꞊ya kë "dhʋ̈ kö 'ya 'dhang bho‑ "dhiʋ̈!
MAT 27:43 ‑Ɛɛ, 'ö ö ‑zʋ yö 'zü Atanna 'ö‑ ‑dhɛ bha, ꞊ya kë ꞊dhɛ ‑a ‑dhɔ 'dhö‑ ‑kë ꞊dedewo, ‑yö nu kö ‑ya bho "dhü bha‑ ‑bha! 'Yaa gun‑ pö sië ö ‑dɩ ‑dhɛ ꞊dhɛ Atanna Gbö ‑mü ö 'ka ‑ee?»
MAT 27:44 Kö mɛzëmɛ ‑nu 'wo‑ ‑nu dɔ 'pö "dhü ‑bha ‑a "sɔɔ mü bha, ‑wo "si bho sië‑ ‑gɔ 'pö ‑kɔ do bha‑ 'gü.
MAT 27:45 (꞊Dhɛ 'ö Yesu ga "tʋ̈ng ꞊ya ꞊tëng) 'ö sü 'yënng‑ ‑ya mɛ ‑gɔ ꞊zinng 'gü "tʋ̈ng bha‑ ‑bha, 'ö dho 'ö zun‑ 'ka "wɔ "yɛ ‑yën ‑bha, ‑dhɛ 'gü‑ kë ‑tröö "kpʋngtaadhɛ ꞊gban 'gü gbluungdhö.
MAT 27:46 ꞊Dhɛ 'ö 'yënng‑ ꞊ya 'kpɔ mɛ ‑gɔ 'ka ‑së 'ka, 'ö "tʋ̈ng ‑yaaga ‑naa ö yɛan" "piʋ̈ bha ꞊ya ꞊loo, 'yö Yesu ‑yö ꞊gbla "gbɩɩ‑ 'ka eblö ‑wʋ 'gü 'ö‑ pö: Edhi, Edhi, dhama sabatami!» ꞊Waa‑ pö "dhʋ̈ kö ‑wa ‑pö: «Ma Atanna, ma Atanna, ‑më ꞊në ‑kë 'yö 'i i ‑kɔ ‑kan n "dhiʋ̈ "dhʋ̈?»
MAT 27:47 ꞊Dhɛ 'ö ꞊ya kë "dhʋ̈, 'yö 'mɛ 'wo gun mü bha‑ mɛ 'bha ‑nu 'wo ‑ya pö ‑sü ‑bha ꞊dhɛ: «‑Yö (Atanna ‑wʋdhiʋ̈loomɛ Edhi 'ö gun yi 'bha 'ka bha‑) ‑dhɛ sië ‑wa!»
MAT 27:48 ꞊Dhɛ 'ö ꞊waa‑ pö "dhʋ̈, 'yö mɛ do ‑yö ‑bɛang sü 'ö dho ‑fuu 'sü, 'yö dho‑ 'ka 'ö‑ ‑da ‑drɔɔ 'wangwang 'bha bha‑ ꞊bhaa, 'yö‑ ‑ya ‑kaadhü "dhiʋ̈ 'yö‑ nu‑ ‑dhɛ kö ‑ya mü.
MAT 27:49 "Kɛɛ kö mɛ ‑kpɛa ‑zë ‑wa pö sië‑ ‑dhɛ: «‑Bhö kwaa‑ ‑zü ꞊kö, 'bha mü "dhʋ̈ Edhi ‑dho nu 'ö‑ dha.»
MAT 27:50 ꞊Dhɛ 'ö ꞊ya kë "dhʋ̈ 'yö Yesu ‑yö "gbla do 'bha wo 'zü "gbɩɩ‑ 'ka, 'yö‑ 'nii‑ 'dhö ‑pö.
MAT 27:51 ꞊Dhɛ 'ö ꞊ya kë "dhʋ̈, "tʋ̈ng ꞊dede 'ö Yesu 'nii‑ 'dhö ‑pö 'ka bha 'yö sɔ 'ö gun Atanna ‑dhɔkëgükɔ 'ö Zedhizadhɛmö ‑a 'gü ‑kan 'gü ‑sɔ 'ka bha, 'ö ‑pɛ 'gü ꞊zinng 'gü gbanngdhö 'ö‑ zü ‑yö bho ‑a "zɔ "dhiʋ̈ "dhʋ̈ng 'gü 'ö zun‑ 'ka "sia‑ (kö ‑ya ‑zɔn ꞊dhɛ ꞊zinng 'yaa Atanna waa‑ mɛ "bhɩɩ‑ ‑nu ‑a ‑nu ꞊zinng 'gü 'zü Yesu Klisi 'saa‑ 'gü). 'Yö "sɛ 'dhö ꞊zii 'yö ‑gwë ‑tɔn ‑nu 'wo ‑pɛ ‑nu wo.
MAT 27:52 'Yö mɛ bun ‑nu 'wo wü, 'yö 'mɛ 'wo ‑kë Atanna ‑bha mɛ ‑nu 'ka 'ö ꞊wa ga 'nu zii, 'yö‑ mɛ 'gbɛ 'wo ‑bö.
MAT 27:53 ꞊Dhɛ 'ö 'mɛ 'wo bha ‑wa 'go ga 'gü, 'ö ꞊wa ‑bö ‑nu wo ꞊dhɛ ‑kɔ bha‑ 'dhö, 'ö Yesu ꞊ya 'go ga 'gü 'pö ꞊ya ‑bö, 'yö 'wo dho 'wo ‑da Zedhizadhɛmö ‑pö 'ö ‑kë Atanna ‑bha 'pö‑ 'ka bha‑ 'gü, 'yö mɛ 'gbɛ ꞊dede 'wo wo "yan ‑kpan ‑nu ‑bha.
MAT 27:54 ꞊Dhɛ 'ö "sɔdha ‑gɔmɛ 'ö waa‑ ö ‑bha "sɔdha ‑nu 'wo gun ‑ya ‑sü 'ka Yesu ‑maa ‑gɔ bha ꞊wa "sɛ 'ö ꞊zii bha waa‑ "dhabhliwɔn ‑nu 'ö ‑kë bha‑ ‑dhɛ yö, 'yö "suʋ̈ 'dhö ‑da ‑nu 'gü ꞊dedewo 'yö 'wo‑ pö: «'Mɛ 'ö ya Atanna Gbö ꞊në gun‑ 'ka ꞊dedewo, ‑a zaɔ ‑dhɛ 'bhaa 'dhö 'zü.»
MAT 27:55 'Ö gun "dhʋ̈ kö dhong ‑nu 'ö waa‑ Yesu ‑nu 'wo go wo "kwëë Gadhidhe 'wo gun‑ "dhiʋ̈ ‑ziö wo sië bha ‑wo dɔ sië ꞊gblɛɛn 'wo‑ ‑dhɛ ‑ga.
MAT 27:56 Madhi 'ö go Madadha bha waa‑ Madhi 'dhɛ 'ö ‑kë Zakö waa‑ Zosɛfu ‑a ‑nu dhe 'ka bha, waa‑ Zebede gbö ‑nu 'ö 'wo gun Yesu ꞊keng‑ bha‑ ‑nu dhe ‑nu ‑wo ‑gun dhong ‑nu bha‑ ‑nu kpö 'gü.
MAT 27:57 ꞊Dhɛ 'ö "bin ꞊ya 'ma, 'yö gɔndë do 'ö ‑kë ꞊naɔmɛ 'ka 'ö go Adhimate ‑pö 'gü 'wo‑ ‑dhɛ Zosɛfu, 'ö ‑kë 'pö Yesu bha ꞊klangdhiʋ̈ do 'ka bha 'ö nu.
MAT 27:58 'Yö gɔndënë bha 'ö dho Pidhatö "piʋ̈ 'yö Yesu ꞊gee ‑gbadhɛ ‑gɔ. 'Yö Pidhatö ‑ya pö ‑wa dɔ‑ ‑gɔ,
MAT 27:59 'yö Zosɛfu ‑yö Yesu ꞊gee bha‑ sü 'yö sɔ "puu bɔ‑ ‑bha
MAT 27:60 'yö dho‑ 'ka 'ö‑ ‑da ‑a ‑dɩ ‑bha mɛ ‑wɛɛ bho ‑dhɛ ‑dee 'wo‑ pɔn‑ ‑dhɛ ‑gwë ‑tɔn 'gü bha‑ 'gü, 'yö ‑gwë gɔn 'kpii‑ do ꞊glün 'ö‑ ‑ya ‑yɛ bha‑ "dhiʋ̈ 'yö dho.
MAT 27:61 'Ö "dhʋ̈ bha kö Madhi 'ö go Madadha bha waa‑ Madhi 'dhɛ 'ö bha ‑wo ‑ya sië "gʋ̈ng ‑ta bunbhodhɛ bha‑ "sɔɔ mü.
MAT 27:62 (‑Wo Yesu ‑zë Zuifö ‑nu ‑bha ꞊glooyi yɛan" "piʋ̈ 'ka.) ꞊Dhɛ 'ö‑ ‑tadhɛ ꞊ya ꞊kpaɔ ‑a ‑nu ꞊glooyi ꞊dede bha‑ 'ka, 'yö "saabhomɛ ‑nu ‑gɔmɛ ‑nu 'wo dho Pidhatö "piʋ̈ waa‑ Fadhiziɛn ‑nu 'dhö
MAT 27:63 'yö 'wo‑ pö‑ ‑dhɛ: «Yi dëmɛ, 'wɔn do 'bha ‑yö ‑dhö. Yö ‑mü ꞊dhɛ 'ö gun kö ꞊suakëmɛ bha ‑yö ‑tun "yaan, ‑yö kë‑ ‑pö 'ö‑ pö ꞊dhɛ: «'Ma ga yi 'ö‑ 'ka, a ‑dho ‑bö kö ‑dhɛkpaɔyi ꞊plɛ ꞊ya ziö, ‑a ‑yaaga ‑naa bha‑ 'ka.
MAT 27:64 ꞊Dhɛ 'ö "dhʋ̈, ‑bhö mɛ bɔ kö ‑wo ‑ya bun bha‑ ‑maa ‑gɔ kö ‑yö 'dho‑ 'ka "dhʋ̈ ‑yö zun‑ 'ka‑ ‑dhɛkpaɔyi ‑yaaga ‑naa bha‑ ‑bha kö ‑a ‑bha ꞊klang ‑nu 'wa 'dho nu 'wo‑ ꞊gee ꞊kwaan 'wo dho 'wo ꞊sua ‑kë "sɛgümɛ ‑nu ‑dhɛ ꞊dhɛ ꞊ya ‑bö ꞊ya 'go ga 'gü, ‑a ‑gɛn ‑mü ꞊dhɛ kö‑ ‑nu ‑kɔ ‑yö ‑mɔɔ 'wɔn 'dhɛ 'kö bha‑ kë ‑sü ‑bha, ‑a 'gü ꞊sua 'wo dho‑ kë ‑yö ‑dho kë ‑ziisü 'ö ‑ziö ‑blɛɛsü ‑bha ‑zë ‑ta.
MAT 27:65 'Yö Pidhatö ‑ya pö‑ ‑nu ‑dhɛ: «‑Ka 'iin, ‑ka "sɔdha ‑nu 'kun kö ‑wo 'dho kö ‑wa ‑maa kë ‑kɔ 'ö ‑dhi ka ‑dhɛ ‑a 'ka.»
MAT 27:66 'Yö 'wo ‑ziö 'wo dho. ꞊Dhɛ 'ö ꞊wa ꞊loo mü, 'yö 'wo 'klëë‑ kpɔ‑ bun bha‑ ‑bha kö mɛ ꞊yaa‑ "dhiʋ̈ "pʋ kö ‑wa ‑dhɛ yö, 'yö 'wo "sɔdha ‑nu bha‑ ‑nu ‑ya ‑a ‑gɔ "dhiʋ̈ kö ‑wo wo "yan 'to‑ ‑bha.
MAT 28:1 ꞊Dhɛ 'ö Zuifö ‑nu ꞊glooyi bha ꞊ya ziö 'ö‑ ‑tadhɛ ꞊ya ꞊kpaɔ, 'yö Madhi 'ö go Madadha bha waa‑ Madhi 'dhɛ 'ö 'dhö 'wo ‑suʋ̈ 'piö‑ 'yö 'wo dho wo bhɔɔ" bho Yesu bun ‑bha.
MAT 28:2 ‑Wo ‑to mü 'yö "sɛ 'dhö ‑ya ꞊zii ‑sü ‑bha ꞊dhɛ mɛ‑ ‑më ‑kë. "Sɛ 'ö ꞊zii ‑ziisü 'ka "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö Atanna ‑bha "kië do ꞊ya 'go dhang‑ 'gü ꞊ya nu kö ꞊ya ‑gwë 'ö gun Yesu bun "dhiʋ̈ bha‑ bho 'mü kö ꞊yaa‑ glün‑ ꞊ya ‑ya ‑ta.
MAT 28:3 Atanna ‑bha "kië bha‑ 'bhü‑ ‑gun ꞊dhɛ dha 'ö "yaan kun‑ 'dhö, 'yö‑ ‑bha ‑sɔ ‑yö ‑flʋ̈ ‑papadhö.
MAT 28:4 'Yö 'mɛ 'wo gun bun ‑maa kë sië bha "suʋ̈ 'dhö ‑da ‑nu 'gü, 'yö 'wo ‑ya ꞊zii ‑sü ‑bha 'yö 'wo ‑pö "sia‑ 'yö 'wo ‑kë ꞊dhɛ 'pë ꞊wa ga ꞊në‑ wo 'dhö.
MAT 28:5 "Kɛɛ 'yö Atanna ‑bha "kië bha 'ö dhiang zë dhong ‑nu 'kö 'wo bha‑ ‑nu ‑dhɛ 'ö‑ pö: «"Suʋ̈ 'ya 'dho ka ‑zë ka kë, ‑a ‑gɛn ‑mü ꞊dhɛ a‑ 'wɔn ‑dɔ ꞊dhɛ Yesu 'wo‑ dɔ "dhü ‑bha bha ꞊në 'ka nu‑ mɔɔ‑ ‑dhɛ 'gü yö.
MAT 28:6 "Kɛɛ 'yaa yö 'zü ꞊ya 'go ga 'gü ꞊ya ‑bö ꞊dhɛ ‑kɔ 'ö‑ pö‑ 'ka ka ‑dhɛ kö 'yii ga ꞊kö bha‑ 'dhö. ‑Ka nu kö ‑dhɛ 'ö gun wɔ sië‑ ‑bha bha 'ka‑ ‑dhɛ ‑ga,
MAT 28:7 kö 'ka 'dho 'ka‑ pö‑ ‑bha ꞊klang ‑nu ‑dhɛ ꞊dhɛ ꞊ya ‑bö, ꞊ya ‑da ka "dhiʋ̈ ꞊ya 'dho Gadhidhe. Ka ‑dho ‑kpan ‑bha mü ꞊naa. 'Wɔn 'ö gun n "piʋ̈ 'a‑ pö ka ‑dhɛ 'yö bha.»
MAT 28:8 'Yö 'wo dɔ ‑bɛang ‑bha 'wo dho kö "suʋ̈ ‑ya ‑nu kë sië, "kɛɛ kö ‑a ‑nu ꞊nii ‑yö ‑da sië 'pö ꞊dedewo. 'Yö 'wo dho kö 'wo‑ ‑gɛn dɔ Yesu ‑bha ꞊klang ‑nu bha‑ ‑nu ‑dhɛ.
MAT 28:9 ꞊Dhɛ 'wo 'dho sië 'wo dho "kan wo ‑ta kö Yesu ꞊ya nu dɔ‑ ‑nu ‑gɔ zian‑ ꞊yaa‑ pö‑ ‑nu ‑dhɛ: «'Ka ꞊boo mü!» ꞊Dhɛ 'ö ꞊waa‑ yö, 'yö 'wo dho 'wo zun wo kpiö 'gü‑ ‑dhɛ.
MAT 28:10 ꞊Dhɛ 'ö ꞊ya kë "dhʋ̈, 'yö Yesu ‑ya pö‑ ‑nu ‑dhɛ 'ö‑ pö: «"Suʋ̈ 'ya 'dho ka kë, ‑ka 'dho 'ka‑ pö n dheebhang ‑nu ‑dhɛ ꞊dhɛ ‑wo 'dho Gadhidhe ‑sɛ 'gü, ‑wo ‑dho ‑kpan n ‑bha ‑dhɛ bha ꞊në‑ 'gü.»
MAT 28:11 "Tʋ̈ng 'ö dhong ‑nu bha 'wo 'dho sië‑ 'ka 'wɔn bha‑ ‑gɛn dɔ ‑dhɛ 'gü Yesu ‑bha ꞊klang ‑nu ‑dhɛ bha, kö bun ‑maakëmɛ ‑nu ‑dɩ 'pö‑ mɛ 'bha ‑nu ‑wo ‑da sië 'plöö 'wo ‑ziö Yesu ‑bö ‑kɔ zü bho ‑kɔ waa‑ "dhiʋ̈ ‑ya ‑kɔ ꞊gban 'gü "saabhomɛ ‑nu ‑gɔmɛ ‑nu bha‑ ‑nu ‑dhɛ.
MAT 28:12 'Mɛ 'wo bha ꞊dhɛ 'ö ꞊wa ziö 'wɔn bha‑ ‑gɛn 'gü‑ ‑nu ‑dhɛ "pɛɛpɛdhö, 'yö 'wo dho "slën 'gü, 'yö 'wo wo ‑bha ‑ya 'kwëë‑ ‑kë waa‑ ‑kwɛagbö ‑nu 'dhö. ꞊Dhɛ 'ö‑ ‑nu ‑wʋ ꞊ya 'to do, 'yö 'wo nu 'wo 'wëë‑ 'gbɛ ꞊dede sü 'wo‑ nu "sɔdha ‑nu bha‑ ‑nu ‑dhɛ.
MAT 28:13 'Yö 'wo‑ pö‑ ‑nu ‑dhɛ 'wo‑ pö: «‑Kaa pö 'ö gun kö yi yi zë sië gbeng, 'yö‑ ‑bha ꞊klang ‑nu 'wo nu 'wo‑ ꞊kwaan, 'yö 'wo dho‑ 'ka.»
MAT 28:14 ꞊Ya kë ꞊dhɛ "sɛdë ꞊ya 'wɔn bha‑ ma kö ‑ya pö 'ö 'wɔn 'bha kë ka 'ka ‑a ‑wɔn 'gü, yi ꞊në 'yi dho kpa‑ ‑zʋ ‑ta, 'yö 'yaa ka kë ‑kɔ 'bha 'gü.
MAT 28:15 ꞊Dhɛ 'ö ꞊waa‑ pö "sɔdha ‑nu bha‑ ‑nu ‑dhɛ "dhʋ̈, 'yö 'wo wo ‑kɔ ‑da 'wëë‑ bha‑ 'gü, 'yö 'wo‑ ‑kë ꞊dhɛ ‑kɔ 'wo ‑wʋ kpɔ‑ 'ka‑ ‑nu ‑bha bha‑ 'dhö. "Kɛɛ 'yö ‑wʋ 'ö ‑gɔmɛ ‑nu ‑wa kpɔ bun ‑maakëmɛ ‑nu ‑bha bha‑ ‑wʋ ‑yö sɔ "sɛ bha‑ 'gü ‑dhɛ ꞊gban "pɛpɛ 'gü, 'ö nu 'ö zun‑ 'ka ꞊dɛɛ ‑bha.
MAT 28:16 ꞊Dhɛ 'ö Yesu ‑bha ꞊klang ‑nu bha ꞊wa 'wɔn bha‑ ma, 'yö 'wo dho Gadhidhe ‑sɛ 'gü, ‑tɔn 'ö Yesu ‑ya ‑dhɛ ‑zɔn ‑nu ‑dhɛ bha‑ ꞊gbin‑.
MAT 28:17 ꞊Dhɛ 'ö ꞊wa 'dho ꞊wa ꞊loo mü, 'yö 'wo ‑kpan ‑bha, 'yö 'wo zun‑ ‑dhɛ wo kpiö 'gü, "kɛɛ yö ‑zë ꞊gban 'gü, 'mɛ 'wo bha‑ mɛ 'bha ‑nu ‑gun mü 'ö 'waa gun 'dhang bho sië Yesu ‑go ga 'gü ‑wɔn bha‑ "dhiʋ̈.
MAT 28:18 ꞊Dhɛ 'ö ꞊wa zun‑ ‑dhɛ kpiö 'gü "dhʋ̈, 'yö Yesu ‑yö ꞊yɔɔn‑ ‑nu "sɔɔ 'yö ö ‑wʋ kpɔ‑ ‑nu ‑bha 'ö‑ pö: «‑Kɔ ‑ziö "sɛ waa‑ dhang‑ ‑nu 'gü ‑pë ꞊gban "pɛpɛ ‑gɔ ‑faan bha Atanna ꞊yaa‑ nu n ‑dhɛ.
MAT 28:19 ꞊Dhɛ 'ö "dhʋ̈ ‑ka 'dho 'ka n ‑wɔn ‑dhiang zë "sɛ "pɛpɛ ꞊gban 'gü mɛ ‑nu ‑dhɛ kö ‑wo wo zuë" slëë‑ n "piʋ̈ kö 'ka‑ ‑nu ‑bɔ n 'ka ‑zu bho n Dë 'tɔ 'gü, ‑a Gbö 'tɔ 'gü, ‑a ‑bha 'Nii‑ "slʋ̈ʋ̈slʋ̈ 'tɔ 'gü.
MAT 28:20 Kö 'ka‑ ‑nu ꞊klang kë ‑zʋ ‑kë pë "pɛpɛ 'a‑ ‑bɛn zë 'a‑ to ka ‑gɔ bha‑ "piʋ̈ ‑sü 'ka. ‑Yö kë ka "yaan ꞊dhɛ a ka "piʋ̈ yi ꞊gban 'ka 'ö to‑ 'ka "dhʋ̈ 'ö zun‑ 'ka "sɛ "dhiʋ̈toyi ‑bha.»
MAR 1:1 Naɔ ‑së 'ö go Atanna "piʋ̈ 'ö ‑gban ‑a Gbö Yesu Klisi ‑wɔn ‑bha bha‑ zü bho ‑kɔ ꞊nɛ.
MAR 1:2 Atanna ‑wʋdhiʋ̈loomɛ Ezai ꞊në‑ ‑bɛn zë ö ‑gɔ 'sëëdhɛ 'gü yi 'bha 'ka 'ö‑ pö: «Atanna ‑ya pö (ö Gbö Yesu Klisi ‑nu "kpʋng ꞊taa ‑wɔn 'gü) 'ö‑ pö: ‑Bhö i "yan 'to, a ‑dho mɛ bɔ i "dhiʋ̈ kö ‑yö zian bho i ‑dhɛ.»
MAR 1:3 ‑Dhɛa "dhiʋ̈ bho ‑wʋ 'ö 'go sië "tʋng ‑ta bha‑ ‑gɛn ꞊në bha ‑ya ‑pö: ‑Ka kwa Dëmɛ ‑bha zian ‑ba kö 'ka‑ du bho‑ 'gü kö 'ka‑ ‑tadhɛ ‑pë kë kö ‑yö wɔ drëngdrëngdhö!»
MAR 1:4 'Mɛ 'wo‑ ‑dhɛ Zan 'ö gun mɛ ‑go 'wɔn yaa 'gü ‑zu bho sië bha, ‑yö ‑wlü ‑kɔ bha ꞊në‑ 'gü "tʋng ‑ta, 'yö zun ‑dhɛa "dhiʋ̈ bho ‑sü bha 'ö‑ pö: «‑Ka kaa‑ ‑tosɛa slëë‑ 'gü kö 'ka bɔ Atanna 'ka kö ‑wo ka "zu, kö ‑yö kaa‑ 'wɔn yaa ‑nu ‑mawɔn 'to!»
MAR 1:5 ‑A ‑kë "dhʋ̈ ‑sü bha‑ 'gü, Zude ‑sɛgümɛ ‑nu "pɛpɛ, 'ö dho 'ö ‑da 'ka Zedhizadhɛmö ‑mɛ ‑nu ‑bha, ‑wo ‑gun nu sië‑ "piʋ̈, 'ö 'wo ‑wɩ wo këwɔn yaa ‑nu ‑bha mɛ ꞊gban "yan "dhiʋ̈, 'yö‑ ‑nu ‑zu "yi 'wo‑ ‑dhɛ Zuudɛn bha‑ ꞊bhaa.
MAR 1:6 Zan bha‑ ‑dasɔ ‑gun ‑yɔɔnmɛa kaa‑ wo‑ "bhɛɛ ‑wɔ ꞊në‑ 'ka 'yö kwipɛn ‑kë bhiëga 'ka 'ö‑ dɔ ö ‑gɔ sɔ ‑ta, 'yö ‑kpaa ‑yö gun‑ ‑bhöpë 'ka waa‑ "zɔyɔn 'dhö. (‑A ‑gɛn ‑mü ꞊dhɛ Atanna ‑wʋdhiʋ̈loomɛ ‑nu 'wo gun ‑tosɛa kë sië "tʋng ‑ta "tʋ̈ng bha‑ 'gü ‑a ‑nu sɔ ‑da ‑kɔ waa‑ ‑nu ‑bhöpë ꞊në gun bha).
MAR 1:7 Yö 'ö bha ꞊në gun‑ pö sië 'mɛ 'wo nu bha‑ ‑nu ‑dhɛ 'ö‑ pö: «Mɛ do 'bha ‑yö nu sië, ‑yö ‑dho nu n zian‑ ‑ta, yö ‑zë 'gü ‑yö "gbɩɩ‑ 'ö ‑ziö n ‑ta, "kɛɛ ‑a ‑gɛn 'gü ‑sabha ‑zian fië‑ ‑dhö n 'ka.
MAR 1:8 Ma ‑zë a ka ‑zu "yi ꞊në‑ 'ka, "kɛɛ yö ‑zë ‑yö ‑dho ka pa 'Nii‑ "slʋ̈ʋ̈slʋ̈ 'ö go Atanna "piʋ̈ ꞊në‑ 'ka.
MAR 1:9 ꞊Dhɛ 'ö ꞊ya kë "dhʋ̈, yi do 'bha bha‑ 'ka 'yö Yesu ‑yö ꞊wlü Nazadhɛtö ‑pö 'ö Gadhidhe ‑sɛ 'gü bha‑ 'gü, 'yö dho Zan "piʋ̈, 'yö‑ ‑zu Zuudɛn ꞊bhaa.
MAR 1:10 ꞊Dhɛ 'ö ꞊ya ö bo ‑a "zu ‑sü 'ka, 'ö Yesu 'dhö 'go sië "yi ꞊bhaa, 'ö dho ‑dhɛ ‑ga kö dhang‑ "dhi ꞊ya "pʋ, kö 'Nii‑ 'ö go Atanna "piʋ̈ ‑yö lɔɔ‑ sië‑ ‑ta ꞊dhɛ ‑tong 'dhö.
MAR 1:11 'Yö‑ "tʋ 'dhö ‑da Atanna ‑wʋ 'gü kö ‑yö "wɩ sië dhang‑ 'gü 'ö‑ pö: «Bhi ꞊në 'i n Gbö 'ka, i ‑dhɔ 'ö n ‑kë "sinma "yɔɔ 'yaa 'dhö.»
MAR 1:12 ꞊Dhɛ 'ö ꞊ya bo ‑kë "dhʋ̈ ‑sü 'ka, 'yö 'Nii‑ 'ö go Atanna "piʋ̈ 'ö ‑da 'gü bha 'ö ‑yö ‑dhɛ "dhiʋ̈ 'yö dho‑ 'ka "tʋng ‑ta (‑dhɛ 'bha bha‑ 'gü).
MAR 1:13 'Dho 'ö Yesu ‑ya wo bha, ‑yö ‑dhɛkpaɔyi ‑kaɔng ‑yiisiö ꞊në‑ ‑kë mü kö "yina ‑nu ‑bha ‑gblüdë 'wo‑ Sɔtraan ‑kë bha, ‑ya 'gü dan sië. Waa‑ "bü ‑wü ‑nu ꞊në 'wo gun ‑tosɛa kë sië wo "kwëë kö Atanna ‑bha "kië ‑nu ‑wa "dhiʋ̈ ‑ziö wo sië.
MAR 1:14 ꞊Dhɛ 'ö ꞊wa Zan 'kun ꞊waa‑ ‑da ‑kaso 'gü, 'yö Yesu ‑yö ꞊wlü, 'yö dho Atanna ‑bha naɔ ‑së bha‑ dɔ ‑dhɛ 'gü Gadhidhe ‑sɛ 'gü.
MAR 1:15 'Yö‑ pö 'mɛ 'wo mü ‑a ‑nu ‑dhɛ 'ö‑ pö: «"Tʋ̈ng 'ö Atanna ‑ya ‑ya kö "plüün 'ö‑ bho mɛ "bhɩɩ‑ ‑nu ‑dhɛ bha 'ö‑ 'gü ‑wɔn kë‑ 'ka bha ꞊ya ꞊loo. ‑A ‑bha ‑gblüdëdhɛ kë "tʋ̈ng 'yaa ꞊gblɛɛn 'zü. ꞊Dhɛ 'ö "dhʋ̈, ‑ka ka bo ka ꞊sɔng 'ka kö 'ka ka zuë" slëë‑ Atanna "piʋ̈ kö 'ka 'dhang bho naɔ ‑së 'ö‑ bɔ ka ‑dhɛ ya‑ "dhiʋ̈!»
MAR 1:16 ꞊Dhɛ 'ö yi do 'ka kö Yesu ‑yö ziö sië "yitagbɛa 'ö Gadhidhe bha‑ "kpʋng "dhiʋ̈, 'yö ‑kpan "nuuzuömɛ ꞊plɛ, Simɔ waa‑ ö dheebhang Andre ‑a ‑nu ‑bha kö ‑wo "nuu ‑zuö sië "yi bha‑ ꞊bhaa, ‑a ‑gɛn ‑mü ꞊dhɛ ‑a ‑nu ‑bha yë ꞊në gun 'yuʋ̈‑ zë ‑sü 'ka.
MAR 1:17 'Yö‑ pö‑ ‑nu ‑dhɛ: «‑Ka nu kö 'ka ‑da n ꞊keng‑ kö 'a ka kë "nuu ‑zuö mɛ ‑gɔ ‑mɛ ‑nu 'ka kö 'ka nu‑ 'ka n ‑dhɛ!»
MAR 1:18 ‑Wo ‑to ‑dhɛ do bha‑ 'gü 'wo wo ꞊kwaa woo‑ "nuu ‑nu ‑zü, 'yö 'wo ‑ziö ꞊keng‑.
MAR 1:19 ꞊Dhɛ 'ö go ‑dhɛ bha‑ 'gü 'ö "ta 'në 'bha sü 'ö dho ꞊gblɛɛn, 'yö ‑kpan Zakö waa‑ ö dheebhang Zan 'wo ‑kë Zebede gbö ‑nu 'ka ‑a ‑nu ‑bha kö ‑wo ‑ya sië "yitagɔ do 'gü kö ‑wo woo‑ "nuu ‑nu ‑pë kë sië.
MAR 1:20 ꞊Dhɛ 'ö‑ ‑nu yö, 'yö to mü 'ö‑ ‑nu ‑dhɛ, 'yö 'wo wo dë Zebede waa‑ ö ‑bha yëkëmɛ ‑nu to 'mü, 'yö 'wo ‑ziö Yesu ꞊keng‑.
MAR 1:21 ꞊Dhɛ 'wo dho 'wo ꞊loo 'pödhɛ do 'bha 'wo‑ Kapɛɛnaɔmö ‑dhɛ ‑kë bha‑ 'gü, 'ö Zuifö ‑nu ꞊glooyi ꞊ya ꞊loo, 'yö Yesu ‑yö dho ‑a ‑nu ‑bha ‑yakwëëkëgükɔ 'gü, 'yö ‑ya Atanna ‑wɔn ‑dhiang ‑zë mɛ ‑nu ‑dhɛ ‑sü ‑bha.
MAR 1:22 'Mɛ 'wo gun mü, 'ö 'wo‑ ‑wʋ ma, 'yö‑ 'wɔn ‑ya ‑nu kɔn, ‑a ‑gɛn ‑mü ꞊dhɛ "trüün ‑yö ‑gun yö ‑zë ‑a ‑wʋ 'gü, ‑a ‑bha mɛ draan‑ ‑kɔ 'yaa gun ꞊dhɛ ‑a ‑nu ‑bha 'tɔnggɔmɛ ‑nu ‑bha 'dhö.
MAR 1:23 ‑A "tʋ̈ng ꞊dede bha‑ 'ka 'yö gɔndënë do 'bha 'ö "yina yaa 'dhö‑ 'gü 'ö ‑da 'kɔɔdhö mü. 'Yö 'mɛ bha 'ö ꞊gbla 'ö‑ pö:
MAR 1:24 «Yesu, Nazadhɛtö mi, 'kwa‑ ma mü? "Ɛɛn i ‑nu kö 'i yi 'gü see‑ ‑ee? ‑A pö 'a‑ wo "dhʋ̈ bha‑ ‑gɛn ‑mü ꞊dhɛ a i ‑gɛn ‑gban ‑kɔ ‑dɔ. A‑ 'wɔn ‑dɔ 'kpakpadhö ꞊dhɛ Atanna ‑bha ‑Yamɛ 'ö‑ bɔ yö ‑mü i 'ka!»
MAR 1:25 'Yö Yesu ‑yö ꞊gbla‑ ‑ta 'ö‑ pö: «I "dhi ta kö 'i ziö 'i 'go 'mɛ bha‑ 'gü!»
MAR 1:26 'Yö "yina yaa bha 'ö go 'mɛ bha‑ 'gü kö ‑yö "gbla sië "gbɩɩ‑ 'ka, "kɛɛ kö 'mɛ bha ‑yö ‑gblagbla bho sië.
MAR 1:27 'Yö mɛ "pɛpɛ 'wo gun mü, 'wo zun "kaabho ‑sü bha kö ‑wa pö sië wo 'ko ‑dhɛ 'wo‑ pö: «‑Më ‑wɔn suu ꞊në ꞊ni ‑oo? Mɛ 'ö ya‑ ‑bha mɛ draan‑ ‑kɔ ‑dee 'dhɛ 'kö ya‑ faan‑ 'gbiin‑ 'pö ‑kɛɛ! "Yina yaa ‑nu ‑zian ‑wa ‑wʋ ‑ma 'wo ꞊dua‑ ‑gɔ ‑wa!»
MAR 1:28 ꞊Dhɛ 'ö 'wɔn bha ꞊ya kë "dhʋ̈, 'yö Yesu 'tɔ 'dhö zun‑ bhɔ ‑sü ‑bha Gadhidhe ‑sɛ bha‑ 'gü ‑dhɛ ꞊gban "pɛpɛ 'gü.
MAR 1:29 ꞊Dhɛ 'wo go Zuifö ‑nu ‑bha ‑yakwëëkëgükɔ bha‑ 'gü, 'yö 'wo dho Simɔ waa‑ Andre ‑nu ‑gɔ 'kɔɔdhö kö Zakö waa‑ Zan ‑wa ‑nu ꞊keng‑.
MAR 1:30 'Ö "dhʋ̈ bha kö Simɔ ‑bha dhebhɔ dhe ‑yö 'waanu ‑sü 'ka, kö "nɛnɛ ꞊ya nu‑s‑ta, 'yö 'wo to 'wo nu 'wo‑ pö Yesu ‑dhɛ.
MAR 1:31 'Yö Yesu ‑yö ꞊yɔɔn‑ "sɔɔ, 'yö ö ‑kɔ ‑da ‑a ꞊kwɛɛ‑, 'yö‑ ꞊wlü, ‑yö ‑to ‑dhɛ do bha‑ 'gü 'ö ‑kë "klʋ̈ʋ̈klʋ̈, 'yö zun‑ ‑nu "dhi mɔɔ‑ ‑sü ‑bha.
MAR 1:32 ꞊Dhɛ 'ö dhɔng ꞊ya ‑da, kö 'yënng‑ ‑gɔ ꞊ya bo ‑pö ‑sü 'ka, 'yö 'wo nu "yuëdhi ‑nu "pɛpɛ 'wo gun ‑dhɛ bha‑ 'gü waa‑ 'mɛ 'ö "yina yaa ‑yö gun‑ ‑nu 'gü ‑a ‑nu 'ka Yesu ‑dhɛ.
MAR 1:33 Kö 'pögümɛ ‑nu ꞊gban "pɛpɛ ꞊wa bho 'ko ‑ta "dhiëngdhö mü.
MAR 1:34 'Yö "yua suu 'do 'do 'ö gun 'mɛ ‑a ‑nu ‑bha 'do 'do 'ka, 'yö‑ mɛ 'gbɛ ꞊dede dha, 'yö "yina yaa 'gbɛ ꞊dede ‑kë mɛ 'gü, "kɛɛ 'yaa gun "wɩ sië‑ ‑bha kö "yina yaa ‑nu bha ‑wo "wɩ, kë "dhʋ̈ kö mɛ "bhɩɩ‑ ‑nu 'wa 'dho ö dɔ ‑kɔ dɔ, ‑a ‑gɛn ‑mü ꞊dhɛ kö wo ‑zë ‑wa ‑dɔ.
MAR 1:35 ꞊Dhɛ 'ö‑ ‑tadhɛ ꞊ya ꞊kpaɔ, 'yö ‑suʋ̈ ‑dhɛkpaɔ tii 'gü, 'yö dho "tʋngtadhɛ 'bha bha‑ 'gü 'yö ꞊bhɛa Atanna ‑dhɛ mü.
MAR 1:36 'Yö Simɔ waa‑ ‑bha ꞊klang ‑nu ‑kpɛa 'wo to 'wo ‑ya ‑a mɔɔ‑ ‑sü ‑bha.
MAR 1:37 ꞊Dhɛ 'wo dho 'wo ‑kpan ‑bha, 'yö 'wo‑ pö‑ ‑dhɛ: «Mɛ ꞊gban "pɛpɛ ‑wo i mɔɔ‑ sië.»
MAR 1:38 'Yö‑ pö‑ ‑nu ‑dhɛ: «‑Yö "dhʋ̈ "kɛɛ ‑ka ‑kwa 'dho 'pö‑ "wɛɛwɛɛ 'dhɛ ‑nu 'wo kwa ‑züzü ya‑ 'gü kö 'a Atanna ‑wʋ pö 'mü 'pö, ‑a ‑gɛn ‑mü ꞊dhɛ n ‑nu "kpʋng ꞊taa ‑gɛn ꞊në bha.»
MAR 1:39 'Yö ‑da Gadhidhe ‑sɛ "piʋ̈ Atanna ‑wʋ pö ‑sü 'ka Zuifö ‑nu ‑bha ‑yakwëëkëgükɔ ‑nu 'gü kö ‑yö "yina yaa ‑nu kë sië.
MAR 1:40 Yi do 'ka 'yö ꞊weeyuamɛ do ‑yö nu‑ "piʋ̈, 'yö zun‑ ‑dhɛ ö kpiö 'gü, 'yö ꞊bhɛa‑ ‑dhɛ 'ö‑ pö: «N Dëmɛ, a ‑nu kö 'i n dha, ‑a ‑gɛn ‑mü ꞊dhɛ a 'dhang ‑bho "dhiʋ̈ ꞊dhɛ ꞊ya ga ‑zë wo i 'gü, i ‑mɔɔ ‑bha 'i n ‑kë "klʋ̈ʋ̈klʋ̈!»
MAR 1:41 ꞊Dhɛ 'ö ꞊yaa‑ pö "dhʋ̈, 'yö ‑wëë ‑yö bɔ Yesu ‑ta, 'yö ö ‑kɔ pa‑ 'ka 'ö‑ pö: «꞊Ya ga n 'gü, ꞊dhɛ 'ö "dhʋ̈, ‑bhö kë "klʋ̈ʋ̈klʋ̈!»
MAR 1:42 Mɛ bha ‑yö ‑to ‑dhɛ do bha‑ 'gü 'ö ꞊wee ‑yua bha 'ö bho‑ ‑bha.
MAR 1:43 ꞊Dhɛ 'ö ꞊ya kë "dhʋ̈, 'yö Yesu ‑yö ö ‑kɔ bho‑ 'gü, "kɛɛ 'yö ‑dhio dɔ‑ ‑ta glɔglɔdhö 'ö‑ pö:
MAR 1:44 «Kë 'i‑ wo "klʋ̈ʋ̈klʋ̈ bha, 'mii‑ pö 'i‑ ‑gɛn dɔ mɛ 'bha ‑mɛ 'bha ‑dhɛ ꞊kö, ‑bhö 'dho kö 'i i ‑dɩ ‑zɔn "saabhomɛ ꞊në‑ ‑dhɛ ꞊kö ‑blɛɛsü kö ‑ya 'wɔn dɔ ꞊dhɛ 'bha kë "klʋ̈ʋ̈klʋ̈ 'kpakpadhö, kö "saa‑ 'ö Moizö ‑ya ‑zɔn 'ö Atanna ‑bha 'tɔng‑ 'sëëdhɛ 'gü 'ö ‑gban ‑kë "klʋ̈ʋ̈klʋ̈ ‑kɔ suu bha‑ ‑bha bha 'i‑ bho kö mɛ ꞊gban "pɛpɛ ‑wa 'wɔn dɔ‑ ‑bha ꞊tɔn ꞊dhɛ 'bha kë "klʋ̈ʋ̈klʋ̈.»
MAR 1:45 "Kɛɛ 'mɛ bha 'ö bo 'go ‑sü ‑zë 'ka Yesu ‑kuu "dhiʋ̈ kö ‑yö 'dho, ‑yö ‑ya ꞊në‑ wo 'wɔn bha‑ ‑dhiang zë ‑sü ‑bha ‑dhɛ ꞊gban "pɛpɛ 'gü, 'yö‑ ‑taɔng ‑yö ꞊mɔɔ ‑dhɛ ꞊gban 'gü. ‑A ‑kë "dhʋ̈ ‑sü bha‑ 'gü, 'ö dɔ mü kö Yesu 'yaa ꞊mɔɔ‑ ‑bha 'zü kö ‑yö ‑da 'pö‑ ‑nu 'gü mɛ 'bha "yaan ('mɛ 'wo gun nu sië "tʋ to‑ ‑wʋ ‑bha bha‑ ‑nu ‑kë 'gbɛ ‑kɔ yaa bha‑ ‑wɔn 'gü), kö ‑yö ‑dɔ ‑dhɛ "gbɛadhɛ ‑nu 'wo 'pö‑ ‑züzü bha ꞊në‑ 'gü, waa‑ "tʋngtadhɛ ‑nu 'dhö, 'yö mɛ ‑yö go ‑dhɛ ꞊gban "pɛpɛ 'gü 'wo nu‑ "piʋ̈.
MAR 2:1 ꞊Dhɛ 'ö ‑dhɛkpaɔyi 'bha ꞊ya ziö, 'yö Yesu ‑yö ꞊wlü 'zü ‑deewo 'ö dho Kapɛɛnaɔmö ‑pö 'gü. 'Yö 'wo‑ ma ꞊dhɛ ꞊ya ꞊loo ö ꞊yëë "dhiʋ̈.
MAR 2:2 Mɛbhɩɩdhe doseng 'ö bho "dhuu ‑zianwo yö ‑zë 'gü, ‑dɔ "tɛɛ "dhiʋ̈ ‑kɔ 'yii kë, 'ö ꞊yɔɔn mü kö ‑duɛ 'yaa 'kɔ "dhiëngdhɛ ‑zian 'gü 'zü, 'yö Atanna ‑wɔn ‑dhiang zë‑ ‑nu ‑dhɛ.
MAR 2:3 'Wo dho ‑dhɛ ‑ga kö ‑gɛnloomɛ do 'ö mɛ ‑yiisiö 'wo‑ 'sü ‑sü 'ka, ‑wo nu sië‑ 'ka.
MAR 2:4 "Kɛɛ ‑dhɛ 'wo dho bɔ‑ ‑bha kö ‑wo ‑kpan Yesu ‑bha, ‑a ‑dhɛ 'yaa gun mɛ ‑kë 'gbɛ ‑kɔ ‑ziisü bha‑ ‑wɔn 'gü. ‑A ‑kë "dhʋ̈ ‑sü bha‑ 'gü, 'yö 'wo ‑da 'kɔ 'ö gun‑ 'gü bha‑ ‑ta "dhʋ̈ng 'gü, 'yö 'wo dho 'wo‑ "dhi bho Yesu ‑ta "dhʋ̈ng 'gü ‑dhɛ ꞊dede 'gü. 'Yö 'wo "trüünyuamɛ bha‑ to ö ‑wɔtapë ‑ta, 'yö 'wo‑ ꞊lɔɔ bhië" ‑bha Yesu ‑kuu "dhiʋ̈ 'kɔɔdhö mü
MAR 2:5 ꞊Dhɛ 'ö ꞊yaa‑ 'wɔn dɔ ꞊dhɛ 'dhang ꞊dede ꞊në 'mɛ bha 'wo‑ bho ö "dhiʋ̈, 'yö‑ pö ‑gɛnloomɛ bha‑ ‑dhɛ 'ö‑ pö: «N "taɔngdë, 'ma i ‑bha 'wɔn yaa ‑nu ‑mawɔn 'to!»
MAR 2:6 "Kɛɛ 'ö gun‑ pö sië "dhʋ̈ ‑dhɛ 'ö‑ 'gü bha kö 'tɔnggɔmɛ ‑nu 'bha ‑nu ‑wo ‑ya ‑sü 'ka mü kö ‑wo wo ‑zʋ gɔn sië 'wo‑ pö:
MAR 2:7 «Dhiang suu 'kö ya‑ zë ‑gɛn 'kö 'mɛ ya‑ ‑gɔ ‑a ‑gɛn ‑mü ‑më 'ka? ‑Yö ‑da ꞊në‑ wo sië Atanna "dhiʋ̈ bha. 'Dee ꞊mɔɔ‑ ‑bha 'ö mɛ ‑bha 'wɔn yaa ‑mawɔn to kö 'yii kë Atanna ‑zë 'ka?»
MAR 2:8 'Wɔn 'wo gun wo ‑zʋ 'gɔn sië 'ka "dhʋ̈ bha, Yesu ‑ya ‑to ‑a ‑nu zuë" "piʋ̈ 'ö‑ dɔ, 'yö‑ pö‑ nu ‑dhɛ 'ö‑ pö: «Ka ‑zʋ 'gɔn ‑kɔ suu bha‑ kë ‑më ‑wɔn 'gü?
MAR 2:9 ‑A pö ‑sü 'ö "trüünyuamɛ ‑dhɛ ꞊dhɛ «'bɔn ꞊ya 'go i ‑bha!» 'pö "gbɩɩ‑ ‑ee? "Ɛɛn ‑a pö ‑sü 'ö‑ ‑dhɛ ꞊dhɛ ‹‑bhö "wlü kö 'i i ‑wɔtapë 'sü 'kii ziö!› yö ꞊në "gbɩɩ‑?»
MAR 2:10 'Yö‑ pö: «‑A kë 'a‑ wo "dhʋ̈ bha a‑ ‑kë "dhʋ̈ kö 'ka‑ 'wɔn ꞊në‑ dɔ ꞊dhɛ 'wɔn yaa ‑bho mɛ "bhɩɩ‑ ‑nu ‑bha ‑sü 'ö "kpʋng ꞊taa yö bha‑ "sɩ ‑yö mang Mɛgbömɛ n ‑dhɛ.»
MAR 2:11 ꞊Dhɛ 'ö ꞊yaa‑ pö "dhʋ̈, 'yö‑ pö ‑gɛnloomɛ bha‑ ‑dhɛ: «Ma ꞊në 'a‑ pö, ‑bhö "wlü kö 'i i ‑wɔtapë 'sü 'i 'dho i ‑gɔ 'kɔɔdhö!»
MAR 2:12 ‑Yö ‑to mɛ ꞊gban "yan "dhiʋ̈ ‑dhɛ do bha‑ 'gü mü 'ö ꞊wlü 'ö ö ‑wɔtapë sü 'ö ‑ziö. Kë 'ö‑ wo "dhʋ̈ bha 'yö‑ 'wɔn ‑yö mɛ ꞊gban kɔn ꞊dedewo, 'yö 'wo‑ pö: «Atanna 'tɔ ‑yö bhɔ, ‑a ‑gɛn ‑mü ꞊dhɛ 'wɔn suu 'dhɛ 'kö ya, yi "yan 'yii ‑da ‑dhɛ 'gü do!»
MAR 2:13 ꞊Dhɛ 'ö Yesu ‑yö go 'pö‑ bha‑ 'gü, 'yö ö wë ‑dee 'bha dɔ 'zü "yitagbɛa 'ö Gadhidhe bha‑ "pɛan "piʋ̈. 'Yö mɛ kpö 'gbɛ ꞊dede 'wo nu‑ ‑dhɛ 'gü, 'yö Atanna ‑wɔn ‑dhiang zë‑ ‑nu ‑dhɛ.
MAR 2:14 ꞊Dhɛ 'ö ziö sië, 'yö Dhevi 'ö ‑kë Adhöfe gbö 'ka bha‑ yö kö ‑yö ‑ya ‑sü 'ka 'nii‑ sɔng bho‑ 'gü ‑kɔ 'gü, 'yö‑ pö‑ ‑dhɛ: «‑Bhö nu kö 'kwa 'dho!» 'Yö Dhevi ‑yö ꞊wlü 'ö ‑ziö ꞊keng‑.
MAR 2:15 ꞊Dhɛ 'ö ꞊wa 'dho ꞊wa ꞊loo Dhevi ‑gɔ 'kɔɔdhö, 'ö Yesu ꞊ya zun pë ‑bhö ‑sü ‑bha, 'yö 'niisɔngkunmɛ ‑nu 'gbɛ waa‑ mɛ 'ö‑ ‑nu 'tɔ ꞊ya see‑ ‑a ‑nu këwɔn ‑nu ‑wɔn 'gü, waa‑ Yesu ‑bha ꞊klang ‑nu bha 'wo dho‑ "piʋ̈, 'yö 'wo zun pë ‑bhö ‑sü ‑bha wo "kwëë, ‑a ‑gɛn ‑mü ꞊dhɛ mɛ suu 'wo "dhʋ̈ bha‑ 'gbɛ ꞊në gun Yesu ꞊keng‑.
MAR 2:16 ꞊Dhɛ 'ö 'tɔnggɔmɛ ‑nu 'wo Fadhiziɛn 'ka bha 'wo Yesu yö kö waa‑ 'niisɔngkunmɛ ‑nu waa‑ 'mɛ‑ ‑nu 'tɔ ꞊ya zë bha ‑wo pë ‑bhö sië wo "kwëë, 'yö 'wo‑ pö‑ ‑bha ꞊klang ‑nu ‑dhɛ 'wo‑ pö: «‑Yö 'ö ‑kɔ ‑da 'niisɔngkunmɛ ‑nu, ꞊flümɛ ‑nu bha waa‑ Atanna ‑bha 'tɔngbhomɛ ‑nu bha‑ ‑nu "piʋ̈ ‑më ‑wɔn 'gü?»
MAR 2:17 ꞊Dhɛ 'ö Yesu ‑ya ‑nu ‑wʋ bha‑ ma, 'yö‑ ‑yɔ bɔ‑ ‑nu ‑gɔ 'ö‑ pö: «Nu 'a‑ wo "kpʋng ꞊taa ya a ‑nu 'wɔnyaakëmɛ ‑nu ꞊në‑ ‑nu mɔɔ‑ kö ‑wo wo bo 'wɔn yaa kë ‑sü 'ka, 'mii nu 'mɛ 'wo‑ pö wo ‑dɩ ‑dhɛ ꞊dhɛ 'bɔn 'bha ‑bha 'bha 'yaa wo ‑bha bha‑ ‑nu mɔɔ‑ ‑dhɛ 'gü, ‑a ‑gɛn ‑mü ꞊dhɛ 'mɛ 'ö‑ 'gü 'yaa ‑së ꞊në‑ ‑mawɔn ‑yö zun ‑dhɔtrɔɔ ‑bha. ('Mɛ 'kö "klʋ̈ʋ̈klʋ̈ ‑a ‑mawɔn 'yaa kë ‑dhɔtrɔɔ ‑bha.)»
MAR 2:18 Yi do 'ka kö Zan Mɛzumɛ ‑bha ꞊klangdhiʋ̈ ‑nu ‑wo 'sunng‑ 'ma sië, waa‑ Fadhiziɛn ‑nu 'dhö, 'yö mɛ 'bha ‑nu bha 'wo nu Yesu "piʋ̈, 'yö 'wo‑ dhɛɛ" kpɔ 'wo‑ pö: «‑Yö ‑kë mü ꞊dhɛ 'yö Zan ‑bha ꞊klang ‑nu waa‑ Fadhiziɛn ‑nu ‑bha ‑nu ‑zë 'wo 'sunng‑ ma ꞊dhɛ ‑kɔ 'ö Atanna ‑wʋ ‑ya pö‑ 'ka ‑a 'dhö, 'yö i ‑bha ‑nu ‑zë 'waa‑ 'ma?»
MAR 2:19 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «‑Yö ka 'gü ꞊dhɛ 'mɛ 'ö ꞊wa nu‑ ‑bha dhe dɔ, ‑a ‑bha dhedɔmɛ ‑nu ‑dho ꞊gloo din‑ 'ka kö yöö ꞊dede ‑yö mü ‑ee? ‑Abin! 'Waa ꞊mɔɔ‑ ‑bha kö ‑wo din‑ "dhiʋ̈ "tʋ̈ng 'dhɛ 'kö bha‑ 'gü, (‑a ‑gɛn ‑mü ꞊dhɛ kö‑ ‑nu ꞊nii ‑yö ‑da ‑sü 'ka).
MAR 2:20 "Kɛɛ ‑a "tʋ̈ng ‑yö nu sië, "tʋ̈ng 'wo dho dhemɛdë 'sü‑ 'ka ‑a ‑nu ‑gɔ bha kö‑ ‑nu 'sunng‑ 'ma "tʋ̈ng ꞊ya ꞊loo, (‑a ‑gɛn ‑mü ꞊dhɛ kö zuëdhiʋ̈tɛɛ ꞊ya ‑ya ‑nu ‑bha).
MAR 2:21 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ 'bhaa sɔ zii "pɛn ꞊nëng sɔ ‑dee ‑bha kö ‑wa ‑wɔ 'ka, ꞊ya kë "dhʋ̈ ‑a sɔ ‑dee "pɛn bha ‑yö sɔ zii bha‑ ‑gan, 'ö‑ "pɛ ‑dhɛ ‑yö ‑da "dhiʋ̈.
MAR 2:22 "Ɛɛn 'zü mɛ 'bhaa we ‑kiansü ꞊loo puu" zii 'gü, ‑a we ‑yö puu" bha‑ ‑bhö 'ö zua, 'ö ‑kë pë ꞊plɛ 'gü see‑ ‑sü 'ka. ‑Wo we ‑kiansü ‑da puu" ‑dee ꞊në‑ 'gü.»
MAR 2:23 Zuifö ‑nu ‑bha ꞊glooyi do 'bha 'ka, kö Yesu waa‑ ‑bha ꞊klang ‑nu ‑wo zian ziö sië tapë suu 'bha 'ö bhɔ ‑mlü ‑bha, 'wo 'bluu‑ ‑kë 'ka, 'wo‑ ‑dhɛ 'ble‑ bha‑ ‑bhlaa 'gü. 'Yö‑ ‑bha ꞊klang ‑nu 'wo zun‑ ga ‑vlɔ ‑a ‑kpaa ‑bha ‑sü ‑bha kö ‑wa ‑bhö.
MAR 2:24 ꞊Dhɛ 'ö Fadhiziɛn ‑nu ‑wa ‑dhɛ yö, 'yö 'wo Yesu dhɛɛ" kpɔ 'wo‑ pö: «‑Bhö i ‑bha ꞊klang ‑nu ‑ga! 'Wɔn 'wo‑ kë sië bha kë ‑pë ‑mü ꞊glooyi 'ka "wɛ ‑ee?»
MAR 2:25 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «A‑ ‑pö bhaa, 'wɔn 'ö Davi ‑ya ‑kë yi 'bha 'ka kö din‑ ‑ya kë sië, waa‑ ꞊kengmɛ ‑nu 'dhö bha 'kii‑ ‑wʋ pö ꞊në‑ wo do Atanna ‑bha 'sëëdhɛ 'gü ‑ee?
MAR 2:26 'Kii‑ ma do ‑dhɛ 'ö gun kö Abiataa ‑yö "saabhomɛ ‑nu ‑gɔmɛ 'ka, Davi kë ‑da Atanna ‑gɔ 'kɔɔdhö 'ö 'bluu‑ 'wo‑ ‑dhɔkë 'ka mü, 'ö mɛ "wɛɛ 'bha 'yaa‑ ‑bhö kö 'yii kë Atanna ‑bha "saabhomɛ ‑nu ‑zë ‑nu 'ka bha‑ ‑bhö, 'ö go mü 'ö‑ 'bha ‑zian nu ö ꞊kengmɛ ‑nu ‑dhɛ 'wo‑ ‑bhö 'pö ‑ee?»
MAR 2:27 ꞊Dhɛ 'ö ꞊yaa‑ ‑nu dhɛɛ" 'kpɔ "dhʋ̈, 'yö go mü 'ö‑ pö‑ ‑nu ‑dhɛ: «Atanna ‑yö ꞊glooyi ‑da mɛbhɩɩdhe ꞊në ‑dhɛ, 'yii mɛ "bhɩɩ‑ ‑zë ‑da ꞊glooyi ‑dhɛ.
MAR 2:28 ‑A ‑kë "dhʋ̈ ‑sü 'gü, mang Mɛgbömɛ ꞊në ma ꞊glooyi 'dhö 'dhö, (꞊dhɛ 'ö "dhʋ̈, kö 'wɔn 'ö ma ꞊klang ‑nu ‑wa ‑kë bha 'yaa 'wɔn yaa 'ka).»
MAR 3:1 ꞊Dhɛ 'ö ꞊ya kë "dhʋ̈, 'yö Yesu ‑yö dho 'zü ‑deewo 'ö ‑sɔ Zuifö ‑nu ‑bha ‑yakwëëkëgükɔ 'gü. ‑A yi 'ö bha‑ 'ka, kö mɛ do 'bha 'ö‑ ‑kɔ 'dhö ga ‑sü 'ka‑ ‑bha bha ‑yö mü.
MAR 3:2 'Mɛ 'wo gun mü bha ‑wo ‑gun Yesu 'suan‑ bho sië 'pö, kë "dhʋ̈ kö ꞊ya 'mɛ bha‑ kë "klʋ̈ʋ̈klʋ̈ ꞊glooyi bha‑ 'ka kö 'wo‑ kë woo‑ za ‑gɛn 'ka ‑a ‑bha kö 'wo‑ 'kun ‑dhɛ yö.
MAR 3:3 'Yö Yesu ‑ya pö mɛ ‑kɔ ꞊niɔɔsü bha‑ ‑dhɛ: «‑Bhö "wlü kö 'i dɔ i ‑gɛan mɛ kpö 'gü bha!»
MAR 3:4 ꞊Dhɛ 'ö ꞊yaa‑ pö "dhʋ̈, 'yö‑ pö 'mɛ 'wo gun‑ ‑gɛn mɔɔ‑ sië bha‑ ‑nu ‑dhɛ 'ö‑ pö: «Kwa ‑bha 'tɔng‑ ‑ya ‑pö ꞊dhɛ? ‑Ya ‑pö ‑wo 'wɔn ‑së ꞊në‑ kë ꞊glooyi 'ka "ɛɛn ‑wo 'wɔn yaa ꞊në‑ kë? ‑Wo mɛ dha ꞊në‑ wo, "ɛɛn ‑wa ‑mɛ 'to ꞊në‑ wo mü kö‑ 'gü‑ see‑?» "Kɛɛ 'yö‑ ‑nu dhɛɛ" 'ö‑ kpɔ "dhʋ̈ bha, 'yö ‑dhɛa ‑yö ga‑ ‑nu ‑ta dingdhö, 'yö mɛ do 'yii ꞊slɔɔ‑ ‑nu kpö 'gü kö ‑ya ‑yɔ bɔ.
MAR 3:5 ꞊Dhɛ 'ö ꞊ya kë "dhʋ̈, 'yö Yesu ‑yö ö "yan ꞊nië‑ ‑nu ‑ta ‑drüüüdhö, "kɛɛ kö‑ ‑nu zuë" ‑kë "glɔɔglɔɔ ‑kɔ bha, ꞊ya ‑siö ‑dhɛ ꞊dedewo kö bhlɔɔ ꞊ya 'ma‑ 'gü. 'Yö‑ pö mɛ ‑kɔ ꞊niɔɔsü bha‑ ‑dhɛ: «‑Bhö i ‑gbe 'gü "pʋ!» 'Yö‑ 'gü ‑pʋ, ‑yö ‑to mü 'ö‑ ‑kɔ bha 'ö bo.
MAR 3:6 ꞊Dhɛ 'ö 'wɔn bha ꞊ya kë "dhʋ̈, 'yö Fadhiziɛn ‑nu bha 'wo zun "kpɛnng, 'yö waa‑ ‑gblüdë Edhodö "piʋ̈ ‑mɛ ‑nu 'wo dho Yesu zë ‑wɔn "slën 'gü.
MAR 3:7 'Yö Yesu ‑yö go ‑dhɛ 'dhɛ bha‑ 'gü, 'yö ö wë dɔ "yitagbɛa 'ö Gadhidhe bha‑ "pɛan "piʋ̈ waa‑ ‑bha ꞊klang ‑nu 'dhö. 'Yö mɛ kpö 'gbɛ ꞊dede 'wo go Gadhidhe ‑sɛ oo,
MAR 3:8 Zude ‑sɛ ‑nu oo, Zedhizadhɛmö ‑dhɛ ‑nu oo, Idume ‑sɛ ‑nu oo, Tii‑ ‑dhɛ waa‑ Sidɔn ‑dhɛ ‑nu ‑züzü ‑dhɛ ‑nu waa‑ Zuudɛn ꞊taama ‑dhɛ ‑nu 'gü, 'yö mɛ kpö ‑ziisü bha 'wo nu‑ ‑dhɛ 'gü, kö 'wɔn ‑nu 'ö‑ kë sië bha ꞊waa‑ ma.
MAR 3:9 ꞊Dhɛ 'ö 'mɛ 'wo bha‑ ‑nu ‑ta ‑ga kö ꞊ya kë ‑ziisü, 'yö‑ pö ö ‑bha ꞊klang ‑nu ‑dhɛ ꞊dhɛ ‑wo 'dho kö ‑wo "yitagɔ 'në 'dɛdɛ do 'sü kö ‑wo nu‑ 'ka ö ‑dhɛ kö 'ö dɔ‑ 'gü kö 'wa 'dho ö bhlʋʋ‑.
MAR 3:10 ‑A pö 'ö‑ wo "dhʋ̈ bha‑ ‑gɛn ‑mü ꞊dhɛ mɛ "pɛpɛ 'ö‑ ‑nu 'gü 'yaa gun ‑së, ‑wo ‑gun drun ꞊në‑ dɔ sië‑ ‑ta kë "dhʋ̈ kö 'wo zun‑ ‑bha, "yua 'ö gun‑ bho sië mɛ ‑nu ‑bha bha‑ ‑wɔn 'gü.
MAR 3:11 "Yinayaamɛ ‑nu ꞊waa‑ yö, 'yö 'wo zun‑ ‑dhɛ wo kpiö 'gü 'wo‑ pö: «Atanna Gbö ‑mü i 'ka!»
MAR 3:12 "Kɛɛ 'yö Yesu ‑yö ‑dhio dɔ‑ ‑nu ‑ta glɔglɔdhö, 'ö ö kɔngga ꞊ziö‑ 'ka‑ ‑nu ‑dhɛ "sɛɛ 'ö‑ pö 'wa 'dho ö ‑kë Atanna Gbö 'ka ‑wɔn pö mɛ 'bha ‑dhɛ.
MAR 3:13 'Ö go mü 'yö dho 'ö ‑da ‑tɔn ꞊gbin‑, 'yö 'mɛ 'ö‑ ‑nu ‑dhɛ ‑wɔn ‑yö ga‑ 'gü ‑a ‑nu ‑dhɛ, 'yö 'wo dho‑ ‑dhɛ 'gü ‑tɔn ꞊gbin‑ mü.
MAR 3:14 'Yö dho 'yö‑ mɛ ‑kaɔng do ga ꞊plɛ ‑ya kö wo ‑zë ‑wo kë ö ꞊keng‑,
MAR 3:15 kö 'ö faan ‑da ‑nu 'gü kö 'ö‑ ‑nu bɔ Atanna ‑bha ꞊naɔ dɔ ‑dhɛ 'gü, kö ꞊wa 'dho kö ‑wo "yina yaa ‑nu kë faan bha‑ 'ka.
MAR 3:16 Mɛ ‑kaɔng do ga ꞊plɛ 'ö‑ ‑nu ‑ya "dhʋ̈ bha, ‑wa mɛ do ‑dhɛ Simɔ, 'yö yö ‑zë 'ö‑ 'tɔ kpɔ Piɛdhö,
MAR 3:17 'yö Zebede gbö ‑nu ꞊plɛ Zakö waa‑ ö dheebhang Zan 'ö‑ ‑nu 'tɔ kpɔ 'ö‑ pö ‑wa ‑nu ‑dhɛ Boanɛzɛsö (꞊waa‑ pö "dhʋ̈ kö ‑wa ‑pö ‹'mɛ 'wo bhɔ dha "wɩ ‑sü ‑bha›),
MAR 3:18 'yö Andre, 'yö Fidhipö, 'yö Batedhemi, 'yö Matiö, 'yö Toma, 'yö Adhöfe gbö Zakö, 'yö Tade, 'yö Simɔ 'ö go "sɛ ‑ta ‑ko zë ‑mɛ ‑nu suu 'gü,
MAR 3:19 'yö Zuda Isikadhiɔtö 'ö Yesu "dhiʋ̈ dɔ bha.
MAR 3:20 ꞊Dhɛ 'ö Yesu waa‑ ö ‑bha ꞊klang ‑nu ꞊wa wo yee kë ꞊wa nu "kwɛandhö, 'yö mɛ ‑yö bho 'zü "dhuu ‑deewo 'yö 'wo nu mü, 'yö waa‑ ö ‑bha ꞊klang ‑nu woo‑ kë ‑zianwo ‑kɔ 'ö 'gü kö ‑wo pë ‑bhö ‑a ‑kɔ 'yaa gun.
MAR 3:21 ꞊Dhɛ 'ö‑ ‑bha mɛ ‑nu 'wo 'wɔn ‑nu 'ö‑ kë sië bha‑ ma, 'yö 'wo nu kö 'wo‑ 'kun kö 'wo 'dho‑ 'ka, ‑a ‑gɛn ‑mü ꞊dhɛ 'ö gun "dhʋ̈ kö wo ‑zë ‑wa pö sië pë ꞊në ꞊ya ‑da "yan 'gü.
MAR 3:22 "Kɛɛ kö 'tɔnggɔmɛ ‑nu 'kö 'wo go Zedhizadhɛmö 'wo nu bha, wo ‑zë ‑wa pö sië ꞊dhɛ: «"Yina ‑gblüdë 'wo‑ Bɛɛzebidhö ‑kë bha ꞊në‑ 'gü, kö mɛ 'bha ‑nu ‑wa pö sië 'pö ꞊dhɛ ‑yö "yina yaa ‑nu ‑kë ‑a ‑nu ‑gɔmɛ bha ꞊në‑ faan 'ka.
MAR 3:23 ꞊Dhɛ 'ö Yesu ꞊yaa‑ ma, 'yö‑ ‑nu ‑dhɛ, 'yö‑ ‑yɔ bɔ‑ ‑nu ‑gɔ "gwënng 'gü 'ö‑ pö: «Sɔtraan ‑zë ‑yö Sɔtraan "piʋ̈ kë ‑kɔ ‑kë ꞊dhɛ?»
MAR 3:24 'Yö‑ pö: «꞊Ya kë ꞊dhɛ "sɛgɔ do ꞊ya "pɛ kö‑ 'gü ‑mɛ ‑nu ‑wo ‑gblü gɔɔn wo "kwëë, ‑a "sɛ bha ‑yö dɔ ‑kɔ ‑kë ꞊dhɛ?»
MAR 3:25 'Yö‑ pö: «꞊Ya kë ꞊dhɛ 'kɔ do 'gü ‑mɛ ‑nu ꞊wa "pɛ 'gü kö ‑wo ‑ya 'ko ‑san 'ka, ‑a 'kɔ bha ‑yö pa ‑kɔ ‑kë ꞊dhɛ?
MAR 3:26 ꞊Ya kë "dhʋ̈, 'ka‑ pö ꞊dhɛ a "yina yaa "piʋ̈ kë sië Sɔtraan ꞊në‑ faan 'ka, kö‑ ‑bha 'kɔ 'yii "pɛ‑ 'gü ꞊naa bha ‑ee? ꞊Ya kë "dhʋ̈, ‑yö ‑mɔɔ ‑bha 'ö‑ 'kɔ 'kö bha ö dɔ ‑kɔ ‑kë ꞊dhɛ? ꞊Ya kë "dhʋ̈, kö‑ 'kɔ 'dhɛ 'kö bha 'yii 'wü ꞊naa bha ‑ee?
MAR 3:27 "Ɛɛn ‑wo ‑mɔɔ ‑bha 'wo ‑da ‑kɛgbaan 'bha ‑gɔ 'kɔɔdhö, 'yö 'wo zun‑ ꞊kwɛɛ‑ ‑nu ‑wlö ‑sü ‑bha kö 'wii‑ ‑lö ꞊kö ‑blɛɛsü kpɛnngkpɛnngdhö ‑ee? ‑Abin! ‑A ‑mɛ 'yaa 'dhö. "Fɔn kö ‑wa ‑mɛ ‑lö ꞊në‑ wo ‑blɛɛsü ꞊kö kö ‑kɔ gun ‑na ꞊mɔɔ‑ ‑bha kö ‑wa ꞊kwɛɛ‑ ‑nu ‑wlö.»
MAR 3:28 'Yö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: Atanna ‑dho 'wɔn yaa ꞊gban "pɛpɛ suu 'do 'do ‑mawɔn 'to mɛ "bhɩɩ‑ ‑nu ‑dhɛ (kö ꞊wa bhɛa"‑ ‑dhɛ ‑a ‑wɔn 'gü), 'ö ꞊ya kë ꞊dhɛ yöö ‑zian ꞊në ꞊waa‑ ‑bhafang bho ‑kɔ suu "ʋʋ suu 'ö‑ 'gü, 'ö ‑mɔɔ ‑bha 'ö‑ ‑mɛ ‑mawɔn to (kö ꞊ya bhɛa"‑ ‑dhɛ),
MAR 3:29 "kɛɛ mɛ "ʋʋ mɛ 'ö ‑da Atanna ‑bha 'Nii‑ "slʋ̈ʋ̈slʋ̈ "dhiʋ̈, 'ö‑ ‑bhafang bho, Atanna 'yii 'dho‑ ‑mɛ ‑mawɔn 'to tongtongdhö. Kö 'wɔn yaa suu 'ö ꞊waa‑ kë 'ö‑ 'bɔn ‑yö to mɛ bha ‑todhʋ̈ 'ka ꞊në ꞊yaa‑ kë bha.
MAR 3:30 ‑A pö 'ö Yesu ‑ya wo "dhʋ̈ bha, ‑a ‑gɛn ‑mü ꞊dhɛ 'ö gun "dhʋ̈ kö ꞊waa‑ pö ꞊në‑ wo‑ ‑dhɛ ꞊dhɛ "yina yaa ꞊në‑ 'gü, 'yö "yina yaa ‑nu kë sië‑ faan 'ka bha.
MAR 3:31 ‑Yö ‑to dhiang ‑nu bha‑ ‑nu zë ‑dhɛ 'gü, 'yö‑ dhe waa‑ dheebhang ‑nu 'wo nu, 'yö 'wo dɔ "kpɛnng 'wo mɛ bɔ‑ ‑dhɛ ‑dhɛ 'gü 'kɔɔdhö.
MAR 3:32 'Mɛ 'ö dho bha ‑yö ‑kpan ‑bha kö mɛ kpö ꞊wa ꞊klëën‑ ‑zü, 'yö‑ pö‑ ‑dhɛ: «‑Bhö ‑dhɛ ‑ga, i dhe waa‑ i dheebhang ‑nu ꞊wa nu i mɔɔ‑ ‑dhɛ 'gü, ‑wo dɔ sië "kpɛnngdhö.»
MAR 3:33 'Yö‑ ‑yɔ bɔ‑ ‑mɛ ‑gɔ 'ö‑ pö: «De në 'ka‑ ‑dhɛ sië n dhe "ɛɛn n dheebhang ‑nu bha?»
MAR 3:34 ꞊Dhɛ 'ö ꞊yaa‑ pö "dhʋ̈, 'yö ö "yan ꞊nië 'mɛ 'wo gun ꞊klëën ‑sü 'ka‑ ‑zü bha‑ ‑nu ‑ta 'yö‑ pö: «‑Ka ‑dhɛ ‑ga, n dhe waa‑ n dheebhang ‑nu ꞊në 'wo ya.
MAR 3:35 ‑A ‑gɛn ‑mü ꞊dhɛ mɛ "ʋʋ mɛ 'ö n Dë Atanna ‑dhidhɛwɔn ‑kë kö yö ꞊në n dhe "ɛɛn n dheebhang 'ka.»
MAR 4:1 ꞊Dhɛ 'ö Yesu ‑yö go mü, 'yö dho 'zü ‑deewo Atanna ‑wʋ ‑pö mɛ ‑nu ‑dhɛ ‑dhɛ 'gü "yitagbɛa 'ö Gadhidhe bha‑ "kpʋng "dhiʋ̈. ꞊Dhɛ 'ö mɛ 'gbɛ ꞊dede ꞊wa nu ꞊wa ꞊loo mü ('ö ‑gɛnziödhɛ 'bhaa 'dhö 'zü mɛbhɩɩdhe ‑gɔ), 'yö dho 'ö ‑da "yitagɔ do 'gü "yi ‑ta. 'Yö mɛ "pɛpɛ bha‑ ꞊gban to "sia‑ "yi "kpʋng "dhiʋ̈.
MAR 4:2 'Yö dhiang 'gbɛ ꞊dede zë‑ ‑nu ‑dhɛ "gwënng 'gü 'ö‑ pö:
MAR 4:3 «‑Ka ka "tʋ 'to! Yi do 'ka, 'yö 'kekëmɛ do ‑yö ꞊wlü 'ö dho ö ‑bha pë ta ‑dhɛ 'gü ö ‑gɔ 'bhlaa.
MAR 4:4 ꞊Dhɛ 'ö zun 'pë 'ö dho‑ ta bha‑ ‑pɛn ‑sü ‑bha, 'yö‑ "pɛan 'bha ‑yö ꞊wɛnng zian ‑gloo "piʋ̈ ('yö 'yii 'dho "sɛɛdhö), 'yö ‑maa ‑nu 'wo nu 'wo‑ ‑bhö.
MAR 4:5 'Yö‑ ‑kɔ "pɛan 'bha ‑yö ꞊wɛnng ‑gwë 'saa‑ "dhiʋ̈, ‑dhɛ 'ö "sɛ 'yaa mü 'gbɛ bha‑ 'gü, 'yö to 'ö bhɔ 'dho 'ö 'yii‑ wo "sɛɛdhö ꞊gblɛɛn bha‑ ‑wɔn 'gü.
MAR 4:6 "Kɛɛ ꞊dhɛ 'ö 'yënng‑ ꞊ya zun 'bhü ‑sü ‑bha, 'yö‑ ꞊gban ‑yö "kpɛa kpɔ "pɛɛpɛdhö ‑a yun ziö ‑dhɛ 'ö 'yaa 'dhö bha‑ ‑wɔn 'gü.
MAR 4:7 'Yö‑ ‑kɔ "pɛan 'bha‑ dho 'zü 'ö ꞊wɛnng "glɛɛn ‑kpɔɔ 'gü. ꞊Dhɛ 'ö waa‑ "glɛn ‑nu bha‑ ‑nu ꞊gban ꞊wa bhɔ, 'yö "glɛɛn ‑kpɔɔ faan ‑yö ‑kë ‑ta 'gbiin‑ 'yö‑ ‑kpaa 'yii kë.
MAR 4:8 'Yö‑ ‑kɔ "pɛan 'bha ‑yö ꞊wɛnng "sɛ ‑së 'gü, 'yö bhɔ, 'yö ꞊kpɛa, 'yö yö ‑zë 'ö ‑dhi. 'Yö‑ ‑kpaaga do ga ‑yö ‑kë ‑bha ‑kaɔng ‑yaaga, ‑kaɔng "saɔdo, "ɛɛn këng do ‑nu 'gü.
MAR 4:9 ꞊Dhɛ 'ö ꞊ya ö bo "gwënng bha‑ ‑da ‑sü 'ka, 'yö‑ pö: «'Mɛ 'ö‑ 'wɔn ma ‑tʋ 'dhö 'dhö ‑ya 'gü ma!»
MAR 4:10 ꞊Dhɛ 'wo to wo do 'ka, 'yö‑ ‑bha ꞊klang ‑nu ‑kaɔng do ga ꞊plɛ bha ‑waa 'mɛ 'wo gun‑ ꞊keng‑ mü 'wo‑ dhɛɛ" kpɔ "gwënng ‑nu 'ö‑ ‑da bha‑ 'klɔɔ‑ 'ka.
MAR 4:11 'Yö‑ ‑yɔ bɔ‑ ‑nu ‑gɔ 'ö‑ pö: «Ka ꞊në Atanna 'dhö ö ‑bha ‑gblüdëdhɛ 'ö ‑bin ‑sü 'ka bha‑ ‑ta "pʋ ‑sü 'ka ka ‑dhɛ, "kɛɛ 'mɛ ‑kpɛa 'kö 'wo to ‑wo ‑dho wo ‑bha ma "gwënng ꞊në‑ 'gü.
MAR 4:12 Kë "dhʋ̈ kö ('pë 'ö Atanna ‑wʋdhiʋ̈loomɛ Ezai ‑ya pö yi 'bha 'ka ꞊dhɛ: Kë "dhʋ̈ kö) ‑Wa ‑dhɛ yö wo "yan 'ka, "kɛɛ kö 'wa 'dho‑ dɔ, kö ‑wa ma wo "tʋ 'ka, "kɛɛ kö 'wa 'dho‑ 'gü ma ö 'klɔɔ‑ 'ka 'ö 'wo wo zuë" ꞊slëë Atanna "piʋ̈, 'ö‑ ‑nu ‑mawɔn 'to bha‑ 'gü ‑wɔn ‑yö kë.
MAR 4:13 ꞊Dhɛ 'ö ꞊yaa‑ pö "dhʋ̈, 'yö go mü 'ö‑ pö‑ ‑nu ‑dhɛ: «"Gwënng 'a‑ ‑da bha 'kaa‑ 'klɔɔ‑ dɔ ‑ee? ꞊Ya kë ꞊dhɛ 'kii‑ 'dhɛ 'kö bha‑ 'gü ma, ka ‑dho ‑a ‑kpɛa 'ö to‑ 'gü ma 'sa ‑kɔ ‑kë ꞊dhɛ?
MAR 4:14 "Gwënng 'a‑ ‑da bha‑ 'klɔɔ‑ ꞊nɛ: Pëtamɛ 'ö pëga ‑pɛn bha ꞊në ꞊dhɛ Atanna ‑bha naɔdɔmɛ 'dhö, 'yö‑ tapë ga bha 'ö‑ Atanna ‑wʋ 'ka.
MAR 4:15 'Yö "tʋ ‑to ‑a ‑wʋ ‑bha ‑mɛ ‑nu bha‑ mɛ 'bha ‑nu zuë" 'dhö ꞊dhɛ zian ‑gloo "piʋ̈ ‑dhɛ 'dhö. 'Yö dhiang 'wo‑ zë‑ ‑nu ‑dhɛ bha 'ö ꞊dhɛ pëga 'ö ꞊wɛnng zian ‑gloo ‑ta bha‑ 'dhö. ꞊Wa bo Atanna ‑wʋ ma ‑sü 'ka, 'yö Sɔtraan ‑yö nu 'yö‑ ꞊gban bho‑ ‑nu ‑zʋ ‑bha "pɛɛpɛdhö.
MAR 4:16 'Yö‑ mɛ 'bha ‑nu zuë" 'dhö ‑kë 'zü ꞊dhɛ ‑gwë 'saa‑ "dhiʋ̈ ‑dhɛ 'ö "sɛ 'yaa mü 'gbɛ ‑a 'dhö. ꞊Wa bo Atanna ‑wʋ ma ‑sü 'ka, ‑wo ‑to mü 'ö‑ ‑nu ‑zʋ kun 'ö 'wo ‑wɩ ‑bha.
MAR 4:17 "Kɛɛ ‑a zü 'yaa kë ‑gban ‑sü 'ka ‑a ‑nu zuë" "piʋ̈. ꞊Wa bo 'dhang ‑bho Atanna ‑wʋ "dhiʋ̈ ‑sü 'ka, 'yö 'wo ꞊nëng‑ ‑bha "tʋ̈ng 'në 'bha 'ka, "kɛɛ ꞊dhɛ 'ö sëëbhodhe ‑yö nu, 'ö 'wo zun Atanna ‑bha mɛ ‑nu ‑wëëdhɛ bho ‑sü ‑bha, 'yö 'wo ‑kan ‑a ‑wʋ ‑bha.
MAR 4:18 'Yö‑ mɛ 'bha ‑nu zuë" 'gü ‑dhɛ 'dhö ꞊dhɛ "glɛɛn ‑kpɔɔ 'gü ‑dhɛ 'dhö; ‑wo Atanna ‑wʋ ma ‑zë ‑wo,
MAR 4:19 "kɛɛ 'yö ‑tosɛa kë ‑sü 'ö "kpʋng ꞊taa bha‑ ‑zʋgɔndhe waa‑ ꞊naɔ ‑wɔn ‑nu waa‑ pë "wɛɛ ‑nu ‑wɔn ‑zʋgɔndhe ‑yö dho 'ö sɔ Atanna ‑wʋ 'wo‑ ma bha‑ ‑ta 'yö‑ ꞊trɔɔn 'yaa kë.
MAR 4:20 "Kɛɛ 'yö‑ mɛ 'bha ‑nu ‑dɩ 'pö‑ ‑nu zuë" ‑yö ‑kë ꞊dhɛ "sɛ ‑së 'dhö, 'yö ꞊wa Atanna ‑wʋ ma, 'yö 'wo 'dhang bho‑ "dhiʋ̈, 'yö 'wo ꞊trɔɔn ‑kë Atanna ‑dhɛ, 'yö ‑kë ꞊dhɛ ‑mlü 'ö‑ ‑kpaaga do ga‑ ‑kë ‑bha ‑kaɔng ‑yaaga, ‑kaɔng "saɔdo, këng do ‑nu 'gü bha‑ 'dhö.
MAR 4:21 'Yö go mü 'ö‑ pö: «"Ɛɛn ‑yö ka 'gü ꞊dhɛ ‑dhangbha 'wo dɔng ꞊sië 'kɔɔdhö bha, ‑wa ‑dɔ kö ‑wa ‑da gbɔ ꞊wlöö ꞊naa, "ɛɛn kö ‑wa ‑da 'dhii‑ ꞊wlöö ꞊naa ‑ee? ꞊Waa‑ dɔ 'waa‑ ‑ya ‑dhangbha ‑dɔtapë ‑zë ‑ta ‑ee?
MAR 4:22 ‑Yö kë ka "yaan ꞊dhɛ pë "pɛpɛ 'ö ‑gblɛn 'kpɔ 'gü, ‑a ꞊gban ‑dho zun zang ‑ta. ꞊Dhɛ 'wɔn 'bha ‑wɔn 'bha 'gü 'yii 'dho 'to tii 'ka kö ‑dhɛ 'yii yö‑ 'gü.
MAR 4:23 ꞊Dhɛ 'ö "dhʋ̈, 'mɛ 'ö‑ 'wɔn ma ‑tʋ 'dhö 'dhö ‑ya dɔ ‑së 'ka kö ‑ya 'gü ma!»
MAR 4:24 'Yö go mü 'zü 'ö‑ pö‑ ‑nu ‑dhɛ: «‑Ka ka "tʋ̈ng kë ‑wʋ ‑nu 'ka‑ ma sië bha‑ 'gü, ‑a ‑gɛn ‑mü ꞊dhɛ pë do 'ka‑ sü 'ka pë dan‑ 'ka mɛ ‑dhɛ bha ꞊në Atanna dho‑ 'sü 'yö ka ‑bha dan‑ 'ka 'pö, 'yö ka taa ‑da ‑ta.
MAR 4:25 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ pë 'dhö 'mɛ 'ö‑ ‑gɔ 'ö‑ ‑ziö 'gü ‑ziö, 'yö 'wo dho‑ ‑mɛ taa kë, "kɛɛ mɛ 'dhɛ 'kö‑ ‑bha 'yaa 'gbɛ, "kɛɛ 'ö 'yaa‑ ‑ziö 'gü ziö bha, ‑a 'dhɛ 'në 'ö‑ ‑gɔ ꞊në 'wo dho‑ 'sü‑ ‑gɔ ‑zianwo do.»
MAR 4:26 'Yö go mü 'zü 'ö‑ pö: «Atanna ‑bha ‑gblüdëdhɛ bha ‑yö ꞊dhɛ mɛ 'ö ꞊wlü 'ö dho 'ö pë ta ꞊në‑ 'dhö.
MAR 4:27 ꞊Ya ö bo‑ ‑da ‑sü ‑zë 'ka "sɛɛdhö, ‑yö ‑to "yaan oo, ‑yö yi ‑zian ꞊në zë oo, tapë 'kö bha ‑yö ‑bhɔ 'ö ö ‑bha "gla ꞊gban wo ö ‑dɩ ‑ta kö 'yaa‑ ‑kɔ 'bha dɔ.
MAR 4:28 "Sɛ 'ö pë ta‑ 'gü bha ꞊në ö ‑dɩ 'gü "slë ‑kë, 'yö 'pë 'wo‑ ta bha 'ö bhɔ, 'yö dho 'ö ‑kë pë ‑bhong 'ka, 'yö dho 'yö ö ‑kpaa ‑ya, kö‑ ga 'ö‑ ‑kpaa ‑bha bha‑ "flɩɩ‑ ‑ya 'gü mü "dhʋ̈ do.
MAR 4:29 ꞊Ya bo ‑pë kë ‑sü 'ka, 'yö 'wo ‑dhaa ‑da 'gü, kö‑ "kan "tʋ̈ng ꞊në ꞊loo bha.»
MAR 4:30 ꞊Dhɛ 'ö go mü, 'yö "gwënng do 'bha ‑da ‑a ‑nu ‑dhɛ 'zü ‑deewo 'ö‑ zü bho 'ö‑ pö: «‑Më ꞊në 'kwa ꞊mɔɔ‑ ‑bha 'kwa Atanna ‑bha ‑gblüdëdhɛ ‑zɔn 'ka? "Ɛɛn 'kwa‑ pö 'kwa‑ kë "gwënng 'ka kö 'kwa‑ ‑da, kwa ‑dho ‑a ‑da ‑kɔ kë ꞊dhɛ kö ‑wa 'gü ma?»
MAR 4:31 'Yö‑ pö: «‑Yö ꞊dhɛ tapë 'wo‑ ‑dhɛ seneve bha‑ 'dhö. ‑A ga 'kö mɛ ‑ya ‑da "sɛɛdhö bha mɛ‑ mɛ "yan "nuu ꞊në‑ dɔ‑ ‑ta, ‑a ‑gɛn ‑mü ꞊dhɛ ‑a ga 'yaa ꞊mɔɔ tapë "pɛpɛ 'kö 'wo‑ ta‑ 'bha ga 'ka.
MAR 4:32 "Kɛɛ ꞊waa‑ ta ꞊ya bhɔ, 'yö ‑gla, 'yö dho 'ö ziö tapë ꞊gban "pɛpɛ suu ‑ta. 'Yö ‑gbeng bho, 'yö ꞊diëë, 'yö ꞊bhlɛɛ, ꞊ya dɔ mü kö ‑maa ‑nu ‑wo nu sië 'wo 'kɔ dɔ‑ "dhɛ 'gü.
MAR 4:33 Yesu ‑gun Atanna ‑wʋ pö sië mɛ ‑nu ‑dhɛ "gwënng ‑nu ꞊në‑ ‑da ‑sü 'ka 'gbɛ 'ka ꞊dhɛ ‑kɔ bha‑ 'dhö, "kɛɛ ‑a 'dhɛ 'ö ꞊yaa‑ ‑da 'wo ꞊mɔɔ‑ ‑bha 'wo‑ 'gü ma ꞊në 'ö gun‑ ‑da sië "tʋ ‑to ö ‑wʋ ‑bha ‑mɛ ‑nu ‑dhɛ, kë "dhʋ̈ kö ‑wa 'gü ma.
MAR 4:34 'Yaa gun dhiang 'bha zë sië‑ ‑nu ‑dhɛ "wɛɛwɛɛ kö 'yii‑ kë "gwënng 'ka, "kɛɛ ꞊yaa‑ ‑da "dhʋ̈, ꞊wa 'to wo do 'ka, 'yö ꞊yaa‑ 'klɔɔ‑ pö ö ‑bha ꞊klang ‑nu ‑dhɛ.
MAR 4:35 ‑A yi do bha‑ 'ka yɛan" "piʋ̈, 'yö Yesu ‑ya pö ö ‑bha ꞊klang ‑nu ‑dhɛ ꞊dhɛ 'wo "yi "kan kö 'wo bɔ "yi ꞊taama.
MAR 4:36 "Yitagɔ 'gbɛ ꞊në gun ‑dhɛ bha‑ 'gü. ꞊Dhɛ 'ö ꞊wa wo bo mɛ "dhaa bha‑ ‑nu ‑dɔ zian ‑sü 'ka 'ö ꞊wa 'dho, 'yö waa‑ ‑bha ꞊klang ‑nu 'wo dho 'wo ‑da "yitagɔ 'dhɛ 'ö gun ‑ya sië‑ 'gü, 'ö dhiang zë bha‑ 'gü.
MAR 4:37 ꞊Dhɛ 'ö ꞊wa ‑da "yi ‑ta 'wo 'dho sië, 'wo dho "kan wo ‑ta kö "tɛɛ ‑ziiziisü ꞊ya ‑ya ziö ‑sü ‑bha. Kö "yi ꞊ya ‑ya zɔn ‑sü ‑bha, kö "yikpö ‑nu ꞊wa ‑ya ‑da ‑sü ‑bha "yitagɔ bha‑ 'gü, "tɛɛ 'gü 'kun ‑kɔ yaa bha‑ ‑wɔn 'gü, ‑wo ‑to ‑dhɛ do bha‑ 'gü 'ö "yi ‑yö zun "yitagɔ bha‑ pa ‑sü ‑bha.
MAR 4:38 'Wɔn ‑nu bha 'wo kë sië "dhʋ̈ "tʋ̈ng 'ö‑ 'gü bha kö Yesu ‑zë ꞊ya ö ‑gɔ dɔ ‑gɔdɔtapë ‑ta kö ‑yö ö ‑bha yi zë sië ö 'flëë‑ 'gü "yitagɔ zü "piʋ̈ ‑zian 'ka. 'Yö‑ ‑bha ꞊klang ‑nu 'wo pa‑ ‑bha, 'yö 'wo‑ pö‑ ‑dhɛ: «Yi Dëmɛ, ga 'ö kwaa‑ wo ya 'bhaa‑ ‑dhɛ ꞊në yö ‑ee? "Ɛɛn 'yaa i 'gü ꞊në wo 'wɔn 'bha 'ka ‑ee?»
MAR 4:39 ꞊Dhɛ 'ö ‑bö, 'yö ꞊gbla "tɛɛ 'ö gun ziö sië bha‑ ‑ta. 'Yö‑ pö "yi bha‑ ‑dhɛ: «‑Bhö dɔ! ‑Dhɛa ga i ‑ta!» 'Yö "tɛɛ ‑yö bo ziö ‑sü 'ka, 'yö ‑dhɛta ‑yö dɔ dingdhö.
MAR 4:40 'Yö‑ pö ö ‑bha ꞊klang ‑nu ‑dhɛ: «Ka "suʋ̈ "sinma kö "dhʋ̈‑ ‑wo ‑më ‑wɔn 'gü? "Ɛɛn 'kii 'dhang ꞊në bho ꞊kö n "dhiʋ̈ ‑ee?
MAR 4:41 'Yö "suʋ̈ ‑ziisü ‑yö ‑da 'mɛ 'wo gun mü bha‑ ‑nu 'gü 'wɔn 'ö Yesu ‑ya ‑kë bha‑ ‑wɔn 'gü. 'Yö 'wo zun wo 'ko dhɛɛ" 'kpɔ ‑sü ‑bha 'wo‑ pö: «De suu 'ö ya ꞊zɔɔ 'yö "tɛɛ waa‑ "yi ‑nu ꞊gban 'wo wo ‑gɔ dho‑ ‑dhɛ "sia‑ ꞊ni?»
MAR 5:1 ꞊Dhɛ 'ö ꞊ya kë "dhʋ̈, 'yö Yesu waa‑ ‑bha ꞊klang ‑nu 'wo "yitagbɛa 'ö Gadhidhe bha‑ ‑kan, 'yö 'wo bɔ‑ ꞊taama Zedhazeni ‑sɛ 'gü.
MAR 5:2 ꞊Dhɛ 'ö go "yitagɔ 'gü 'ö zun "sia‑ bhoo, 'yö gɔndë do 'ö "yina yaa ‑yö gun‑ 'gü 'ö gun wɔ sië mɛ ꞊gee ‑bho 'gü ‑yɛ ‑nu 'wo ‑tɔn 'gü ‑a ‑nu 'gü bha, 'ö go bun ꞊taa ‑zian 'ka 'yö nu‑ ‑gɔ zian‑.
MAR 5:3 'Mɛ bha ‑yö ‑gun wɔ sië ‑dhɛ bha ꞊në‑ 'gü, kö mɛ 'bha ‑kɔ 'yaa ꞊mɔɔ‑ ‑bha 'zü kö ‑ya ‑lö ‑piö lɔɔ" ‑zian 'ka.
MAR 5:4 ‑A ‑gɛn ‑mü ꞊dhɛ 'ö gun "dhʋ̈ kö ꞊waa‑ ‑gɛn ‑nu waa‑ ‑kɔ ‑nu ‑lö ‑piö döngga ‑nu waa‑ ‑piö lɔɔ" ‑nu 'ka ‑blɛɛsü, "kɛɛ kö ꞊yaa‑ ꞊gban "kan "pɛɛpɛdhö kö mɛ 'bha ‑kɔ 'yaa ꞊mɔɔ‑ ‑bha 'zü kö ‑ya 'kun.
MAR 5:5 Kö buntaadhɛ ‑nu waa‑ ‑tɔn ‑bha ‑dhɛ ‑nu bha ꞊në ꞊wa 'to‑ ꞊gloodhɛ 'ka 'yënng‑ 'gü waa‑ gbeng 'gü ‑nu 'gü kö ‑yö "gbla sië, 'ö ö ‑dɩ ‑pɛ ‑nu wo ‑gwë 'ka.
MAR 5:6 ꞊Dhɛ 'ö Yesu yö kö ‑yö nu sië ‑dhɛ ꞊gblɛɛn 'gü, 'yö dho‑ ‑gɔ zian‑ ‑bɛang 'ka. ꞊Dhɛ 'ö dho 'ö ꞊loo‑ ‑dhɛ 'gü, 'yö Yesu ‑ya pö "yina yaa 'ö gun gɔndënë bha‑ 'gü bha‑ ‑dhɛ 'ö‑ pö: «‑Bhö 'go 'mɛ bha‑ 'gü 'kii ziö!» 'Yö 'mɛ bha 'ö zun Yesu ‑dhɛ ö kpiö 'gü, 'yö "yina 'ö gun‑ 'gü bha 'ö ꞊gbla "gbɩɩ‑ 'ka 'ö‑ pö: «'Kwa ma mü, Atanna 'ö dhang‑ 'gü ‑a Gbö Yesu? Bhɛa" ꞊në 'a‑ wo i ‑dhɛ kö i dɔ "gbɩɩ‑ kö 'i‑ kë Atanna ‑dhɛ kö 'bha 'dho n kë ‑kɔ 'bha 'gü ‑dhe!»
MAR 5:9 'Yö Yesu ‑ya dhɛɛ" kpɔ 'ö‑ pö: «I 'tɔ‑ de?» 'Yö‑ pö: «‑Wo n ‑dhɛ ‑gblü "dhaa, ‑a ‑gɛn ‑mü ꞊dhɛ yi 'gbɛ ‑ziisü.»
MAR 5:10 'Yö "yina yaa ‑nu bha 'wo zun ‑gbɛʋʋ kë ‑sü bha Yesu ‑dhɛ 'wo‑ pö ‑yö dɔ "gbɩɩ‑ kö 'ya 'dho wo kë "sɛ bha‑ 'gü.
MAR 5:11 "Tʋ̈ng 'wo kë sië‑ 'ka "dhʋ̈ bha kö ‑bhɔ ‑kpluu 'kpii‑ 'bha ‑yö ‑bhöpë mɔɔ‑ sië ‑tɔn ‑bha ‑a ‑nu "sɔɔ ‑dhɛ 'bha 'gü mü,
MAR 5:12 'yö "yina yaa ‑nu bha 'wo ꞊bhɛa Yesu ‑dhɛ 'wo‑ pö: «‑Bhö dɔ "gbɩɩ‑ kö 'bha‑ pö 'i yi kë, kö 'i yi bɔ ‑bhɔ ‑kplü ya‑ 'gü kö 'yi ‑da 'gü!»
MAR 5:13 'Yö Yesu ‑ya pö: «'Ma "wɩ‑ ‑bha, ‑ka 'dho mü!» 'Yö "yina yaa ‑nu bha 'wo go 'mɛ bha‑ 'gü, 'yö 'wo dho 'wo ‑da ‑bhɔ ‑nu bha‑ ‑nu 'gü, 'yö ‑bhɔ 'ö ꞊mɔɔ "gblü ꞊plɛ ‑nu ‑bha bha 'wo ‑pɛn, 'yö 'wo dɔ ‑bɛang ‑bha goo bha‑ ‑bha, 'wo dho 'wo ‑pö "yitagbɛa bha‑ ꞊bhaa, 'yö "yi ‑ya ‑nu zë.
MAR 5:14 'Yö 'mɛ 'wo gun ‑bhɔ ‑kplü bha‑ ‑maa kë sië bha, 'wo ꞊dua 'wo dho 'wɔn bha‑ ‑taɔng 'ka ‑a ‑nu ‑bha 'pö‑ ‑nu waa‑ ꞊gbɛatadhɛ ‑nu 'gü. 'Yö mɛ ‑yö bho "dhuu 'wo go ‑dhɛ ‑nu bha‑ 'gü, 'wo nu 'wɔn bha‑ ‑dhɛ ‑ga ‑dhɛ 'gü.
MAR 5:15 'Yö 'wo nu Yesu ‑dhɛ 'gü, 'yö 'wo 'mɛ 'ö "yina yaa "gblü ꞊plɛ ‑yö gun‑ 'gü bha‑ yö kö ‑yö ‑ya ‑sü 'ka Yesu "sɔɔ, kö sɔ ‑ya ‑bha, kö ꞊ya kë "klʋ̈ʋ̈klʋ̈ 'kpakpadhö, 'yö‑ "suʋ̈ 'dhö ‑da ‑a ‑nu 'gü.
MAR 5:16 'Yö 'mɛ 'ö‑ ‑nu "yan 'dhö gun 'mɛ 'ö "yina yaa ‑yö gun‑ 'gü bha‑ ‑kë "klʋ̈ʋ̈klʋ̈ ‑dhɛ 'gü, waa‑ 'wɔn 'ö ‑kë ‑bhɔ ‑nu bha‑ ‑nu 'ka bha‑ 'dhö bha, 'wo ‑ya ‑a ‑gɛn dɔ ‑sü ‑bha 'mɛ 'wo nu bha‑ ‑nu ‑dhɛ.
MAR 5:17 ꞊Dhɛ 'ö "sɛgümɛ ‑nu bha 'wo 'wɔn bha‑ ma, 'yö 'wo zun ‑bhɛa Yesu ‑dhɛ ‑sü ‑bha kö ‑yö 'go wo ‑gɔ "sɛ bha‑ 'gü.
MAR 5:18 ꞊Dhɛ 'ö 'mɛ 'ö "yina yaa ‑yö gun‑ 'gü bha 'ö Yesu yö kö ‑yö ‑da sië "yitagɔ 'gü, 'yö ꞊bhɛa‑ ‑dhɛ 'ö‑ pö: «A ‑dho 'dho i ꞊keng‑.»
MAR 5:19 "Kɛɛ 'yii "wɩ‑ ‑bha, 'yö‑ pö‑ ‑dhɛ: «‑Bhö 'dho i ‑gɔ 'kɔɔdhö kö ‑kɔ 'ö i ‑wëë ‑yö Atanna ‑kë 'ka, 'ö i dha, waa‑ 'wɔn ‑së 'ö‑ ‑kë i ‑dhɛ bha 'i‑ ‑gɛn dɔ i ‑gɔ 'kɔɔmɛ ‑nu ‑dhɛ.
MAR 5:20 'Yö 'mɛ bha 'ö dho, 'yö ‑ya 'wɔn 'ö Yesu ‑ya ‑kë ‑dhɛ bha‑ ‑gɛn dɔ ‑sü bha "sɛgɔ 'wo‑ ‑dhɛ 'pödhɛ ‑kaɔng do ‑sɛ bha‑ 'gü ‑dhɛ ꞊gban "pɛpɛ 'gü. 'Yö‑ 'wɔn ‑yö mɛ ꞊gban kɔn.
MAR 5:21 'Yö Yesu waa‑ ö ‑bha ꞊klang 'nu 'wo ‑da "yitagɔ 'gü, 'yö 'wo "yitagbɛa bha‑ ‑kan 'zü ‑deewo. ꞊Dhɛ 'ö ꞊wa "yi "kan, ꞊wa bɔ "yi ꞊taama, 'yö mɛ ‑yö bho 'zü "dhuu, 'yö 'wo nu 'wo ꞊klëën‑ ‑zü "yi "kpʋng "dhiʋ̈ mü.
MAR 5:22 'Wo dho "kan wo ‑ta kö Zuifö ‑nu ‑bha ‑yakwëëkëgükɔ ‑gɔmɛ do 'wo‑ ‑dhɛ Zɛdhiusö bha, ꞊ya nu. ꞊Dhɛ 'ö Yesu yö, 'yö nu 'ö "gblëënu‑ ꞊wlöö,
MAR 5:23 'yö ‑gbɛ "ʋʋ ‑kë ‑dhɛ 'ö‑ pö: «N Dëmɛ, n 'dhunë ‑ya wɔ 'ya‑, ‑bhö dɔ "gbɩɩ‑ kö 'i 'dho 'i i ‑kɔ 'pa‑ 'ka n ‑dhɛ kö ‑yö dha.»
MAR 5:24 ꞊Dhɛ 'ö‑ pö "dhʋ̈, 'yö waa‑ Yesu ‑nu 'wo ‑ziö, kö mɛ kpö 'gbɛ ꞊dede ‑wa ꞊keng‑ kö ‑wa bhlʋʋ sië wo 'ko ꞊zinng 'gü.
MAR 5:25 Yaa" kë 'wo‑ wo sië bha, dhebhɔ do 'bha ‑ya ‑nu kpö 'gü mü, ꞊yɔɔn yën ‑yua 'ö zun‑ ‑bha ‑a ‑kwɛ ꞊ya ꞊mɔɔ ‑kaɔng do ga ꞊plɛ ‑nu ‑bha.
MAR 5:26 ꞊Yaa‑ kë ‑dho ‑dhɔtrɔɔ ‑nu "piʋ̈ ‑sü 'ka ‑a 'gü ꞊ya ga. ‑A ꞊kwɛɛ ꞊gbaan ꞊wɛnng ö ‑dɩ ‑pë kë ‑sü ‑ta ‑dhɔtrɔɔ ‑nu "piʋ̈, "kɛɛ kö‑ 'bha 'yii 'wɔn 'kun do, ‑a "yua 'bha ꞊në ‑da 'gü ‑kpɛawo 'ö dho‑ 'ka.
MAR 5:27 ꞊Dhɛ 'ö Yesu ‑taɔng ma, 'yö nu 'yö ‑da mɛ kpö bha‑ 'gü Yesu ꞊kee‑ ‑ta, 'yö dho 'ö ö ‑kɔ pa‑ ‑bha sɔ 'ka.
MAR 5:28 ‑A kë 'ö‑ wo "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö ‑yö 'dhang ‑bho "dhiʋ̈, 'ö‑ pö ö ‑dɩ ‑dhɛ ꞊dhɛ: «꞊Ya kë ꞊dhɛ kö n ‑kɔ ‑zian ‑yö 'pa‑ ‑bha sɔ 'ka kö 'ma dha.»
MAR 5:29 'Ö ö ‑kɔ pa‑ ‑bha sɔ 'ka ‑dhɛ do 'ö‑ 'gü 'pö bha, ‑yö ‑to mü 'ö‑ ‑bha "yua bha 'ö bo, 'ö yöö ꞊dede 'ö 'dhang bho‑ "dhiʋ̈ ꞊dhɛ 'ya kë "klʋ̈ʋ̈klʋ̈ 'kpakpadhö.
MAR 5:30 Yesu ‑yö ‑to 'pö ‑dhɛ do bha‑ 'gü 'ö‑ 'wɔn dɔ ꞊dhɛ ö faan 'bha ꞊ya 'go ö 'gü ꞊ya zun "kpɛnng, 'yö ꞊slëë ö 'gü mɛ kpö bha‑ 'gü 'ö‑ pö: «De ꞊në pa ma sɔ 'ka bha?»
MAR 5:31 'Yö‑ ‑bha ꞊klang ‑nu ‑wa pö‑ ‑dhɛ: «'Aa, yi Dëmɛ, i ‑mɔɔ ‑bha 'i dhɛɛ" 'kpɔ suu bha‑ ‑kë, "kɛɛ kö i dɔ sië mɛ "bhɩɩ‑ "dhaa 'gü ꞊dhɛ 'pë 'ya 'dhö ‑ee?»
MAR 5:32 "Kɛɛ kö ‑yö ‑dhɛ ‑ga sië ö ‑zü ‑zü "dhʋ̈ do kö 'mɛ 'ö bhɔ bha 'ö‑ mɛ dɔ.
MAR 5:33 ꞊Dhɛ 'ö dhebhɔ bha ꞊ya 'wɔn ꞊slɔɔ 'gü ꞊dhɛ mɛ 'ö pa Yesu ‑bha sɔ 'ka bha, ‑ya mɛ mɔɔ‑ sië, 'yö "suʋ̈ 'dhö ‑da 'gü, 'yö ‑ya ꞊zii ‑sü ‑bha, "kɛɛ ꞊dhɛ 'ö ‑kë ꞊dhɛ ‑ya 'wɔn dɔ 'kpakpadhö ꞊dhɛ 'ya dha, 'yö nu 'yö "gblëënu Yesu ꞊wlöö, 'yö ‑kɔ 'ö ‑kë 'ka 'yö ‑ziö ‑dhɛ ‑a ‑gɛn 'gü "pɛɛpɛdhö.
MAR 5:34 "Kɛɛ 'yö Yesu ‑ya pö‑ ‑dhɛ: «N "tɛado, i ‑bha 'dhang bho n "dhiʋ̈ ‑sü ꞊në i dha bha. ‑Bhö i ‑bha 'dho wo i 'flëë‑ 'gü, 'bha kë "klʋ̈ʋ̈klʋ̈.»
MAR 5:35 Dhiang bha ‑yö ‑to Yesu "dhi, 'yö mɛ ‑yö go Zɛdhiusö ‑gɔ 'kɔɔdhö, 'yö 'wo nu 'wo‑ pö Zɛdhiusö ‑dhɛ: «Yi Dëmɛ, 'bha 'dho kwa Dëmɛ ziö "yɛ 'gü "wɛɛwɛɛ, i 'dhu 'yaa mü 'zü,
MAR 5:36 "kɛɛ ‑a pö 'wo‑ wo "dhʋ̈ bha, 'yii 'dho Yesu ꞊gbin‑, 'yö‑ pö Zɛdhiusö ‑dhɛ: «‑A 'to "dhʋ̈ ꞊zɔɔ 'dhɛ, 'bha 'dho "suʋ̈, ‑bhö 'dhang bho n "dhiʋ̈ doseng!»
MAR 5:37 ꞊Dhɛ 'ö ꞊yaa‑ pö "dhʋ̈, 'yö Zɛdhiusö ‑bha 'kɔɔ ‑zian sü, "kɛɛ ‑a 'dho ‑sü 'ka 'yii "wɩ‑ ‑bha kö mɛ "wɛɛ 'bha ‑yö 'dho 'ö dɔ kö 'yii kë Piɛdhö, Zakö waa‑ ö 'zlaa‑ Zan ‑nu ‑zë 'ka.
MAR 5:38 'Yö 'wo dho 'wo ꞊loo Zuifö ‑nu ‑bha ‑yakwëëkëgükɔ ‑gɔmɛ bha‑ ‑gɔ "kwɛandhö. 'Wo ꞊loo mü kö ‑wo "tabhoo ‑da sië mü ‑yuudhö, kö mɛ 'bha ‑nu ‑wo "gbʋ bɔ sië 'wo ꞊gbla‑ 'ka "gbɩɩ‑ 'ka.
MAR 5:39 'Yö ‑da 'kɔɔdhö, 'yö‑ pö 'mɛ 'wo gun mü bha‑ ‑nu ‑dhɛ: «‑Më ‑wɔn ꞊në 'ka‑ "gbʋ bɔ 'yö 'ka ꞊gbang dɔ sië‑ 'ka ‑yuudhö ya? ꞊Ya 'to 'në 'kö ya‑ ‑bha ‑zë ‑bha kö 'yii ga, ‑yö yi ꞊në‑ zë.
MAR 5:40 ꞊Dhɛ 'wo‑ ma "dhʋ̈, 'yö 'wo zun ꞊wɛɛ dɔ ‑sü ‑bha ‑a ‑bha. "Kɛɛ 'yö mɛ ꞊gban "pɛpɛ zun "kpɛnng, 'yö to ‑a 'dhö, 'në dë bha‑ 'dhö, 'në dhe 'dhö ‑a ‑nu ‑bha waa‑ ‑bha ꞊klang ‑nu ‑yaaga 'wo nu‑ dɔ bha‑ ‑nu 'dhö, 'yö 'wo dho 'wo ‑da 'kɔ 'ö 'në ꞊gee ‑yö gun‑ 'gü bha‑ 'gü.
MAR 5:41 'Yö dho 'ö 'në bha‑ kun‑ ‑kɔ ‑bha 'ö‑ pö‑ ‑dhɛ (eblö ‑wʋ 'gü) 'ö‑ pö: «Tadhita kumi!» ꞊Waa‑ pö "dhʋ̈ kö ‑wa pö: «'Nëdhiëngnë, ma ꞊në 'a‑ pö, ‑bhö "wlü!»
MAR 5:42 'Në bha ‑yö ‑to ꞊kwɛng mü 'ö ꞊wlü 'ö dɔ ö ‑gɛan, 'ö zun "ta 'sü ‑sü ‑bha, ‑a ‑gɛn ‑mü ꞊dhɛ 'ö gun "dhʋ̈ kö‑ ‑kwɛ ꞊ya kë ‑kaɔng do ga ꞊plɛ. 'Wɔn bha 'yö 'mɛ 'wo gun mü bha‑ ‑nu ꞊gban "dhi dɔ bong 'ka.
MAR 5:43 'Wɔn bha ꞊dhɛ 'ö ꞊ya kë "dhʋ̈, 'yö Yesu ‑yö ‑dhio dɔ 'mɛ 'wo gun mü bha‑ ‑nu ‑ta, 'ö ö kɔngga ziö‑ 'ka‑ ‑nu ‑dhɛ "sɛɛ glɔglɔdhö kö mɛ 'bha 'ya 'dho 'wɔn ꞊slɔɔ‑ 'gü. 'Yö go mü 'ö‑ pö‑ 'kpɔmɛ ‑nu ‑dhɛ ‑wo ‑bhöpë nu 'nëdhiëngnë bha‑ ‑dhɛ kö ‑ya ‑bhö.
MAR 6:1 ꞊Dhɛ 'ö ꞊ya kë "dhʋ̈, 'yö Yesu ‑yö go ‑dhɛ bha‑ 'gü, 'yö dho Nazadhɛtö, 'pödhɛ 'ö ‑gla 'gü bha‑ 'gü waa‑ ‑bha ꞊klang ‑nu 'dhö.
MAR 6:2 ꞊Dhɛ 'ö Zuifö ‑nu ‑bha ꞊glooyi ꞊ya ꞊loo, 'yö dho‑ ‑nu ‑bha ‑yakwëëkëgükɔ 'gü 'yö ‑ya mɛ draan‑ ‑sü ‑bha. 'Yö mɛ kpö 'wo‑ ‑wʋ ma bha‑ 'wɔn ‑ya ‑nu kɔn, 'yö 'wo zun‑ pö ‑sü ‑bha: «'Yö ‑yö ‑go ꞊zɔɔ ö ‑bha 'wɔndɔdhe ‑nu, ꞊kpaɔdhɛ ‑nu waa‑ "dhabhliwɔn ‑nu 'ö‑ kë sië ya‑ 'ka 'mɛ?
MAR 6:3 "Ɛɛn "dhüyënmɛ (do "wɛ 'ö mɛ ꞊gban 'kwa‑ dɔ ya) 'yaa ‑mü ‑ee? "Ɛɛn Madhi gbö ya 'yaa ‑mü ‑ee? "Ɛɛn Zakö, Zozö, Zudë waa‑ Simɔ ‑nu dheebhang ya 'yaa kë ꞊ni ‑ee? "Ɛɛn ‑a dheebhang dhong ‑nu ya 'aa mü 'wo kwa kpö 'gü ya ‑ee?» 'Yö "mɔnɛ ‑yö ma‑ ‑nu 'gü, 'yö Yesu ‑kë ‑nu ‑gɔ ꞊dhɛ ‑a ‑nu ‑gɛn "dhiʋ̈ ‑zuö ‑bha ‑gwë 'dhö ('dhang 'ö 'wii‑ bho‑ "dhiʋ̈ bha‑ ‑wɔn 'gü).
MAR 6:4 "Kɛɛ 'yö Yesu ‑ya ‑yɔ bɔ‑ ‑nu ‑gɔ 'ö‑ pö: «‑A ‑pö "dhʋ̈ ‑dhɛ ‑mü ka ‑gɔ, ‑a ‑gɛn ‑mü ꞊dhɛ ‑wo Atanna ‑wʋdhiʋ̈loomɛ ꞊bhlëë ‑ya ‑dhɛ ꞊gban "pɛpɛ 'gü, "kɛɛ ‑a ‑gɔ "sɛgümɛ ‑nu oo, ‑a ‑bha 'kɔdhigümɛ ‑nu waa‑ ‑gɔ 'kɔɔmɛ ‑nu ‑zë 'waa‑ yö pë 'bha 'ka.
MAR 6:5 'Dhang 'ö 'wii‑ bho‑ "dhiʋ̈ bha‑ ‑wɔn 'gü, 'yii ꞊mɔɔ‑ ‑bha kö ‑yö "slë "wɛɛ 'bha kë kö 'yii kë ö ‑kɔ 'ö‑ ‑ya "yuëdhi 'do 'do 'bha ‑nu ‑ta, 'wo dha ‑a 'ka, kö‑ ‑nu ‑bha gɔɔgbɩɩdhɛ bha‑ 'wɔn ꞊yaa‑ 'kɔn ꞊dedewo. ꞊Dhɛ 'ö go mü, 'yö ‑da 'pö‑ ‑nu 'wo‑ ‑nu ‑züzü mü bha‑ ‑nu ‑bhiëë ‑ta mɛ ‑nu ꞊klang ‑kë Atanna ‑wʋ 'ka ‑sü 'ka.
MAR 6:7 Yi do 'ka 'yö ö ‑bha ꞊klang ‑nu ‑kaɔng do ga ꞊plɛ bha‑ ‑nu ‑dhɛ, 'yö‑ ‑nu dan ꞊plɛ ꞊plɛ 'yö‑ ‑nu bɔ (‑dhɛ ‑nu 'gü) kö ꞊ya ‑kɔ ‑ziö "yina yaa ‑nu ‑gɔ ‑faan nu‑ ‑nu ‑dhɛ.
MAR 6:8 'Yö ö ‑wʋ kpɔ‑ ‑nu ‑bha 'ö‑ pö: «'Ka 'dho sië, 'ka 'dho pë 'bha 'kun ka ‑kɔ "piʋ̈ kö 'yii kë "dhünë 'ö ka ꞊kwɛɛ‑ ‑a 'ka. 'Ka 'dho ‑bhöpë 'sü, "ɛɛn 'ka 'dho 'wëëga ‑da ka ‑ta (‑a ‑gɛn ‑mü ꞊dhɛ 'pë ka ‑mawɔn dho zun‑ ‑bha ‑wo ‑dho ‑a nu ka ‑dhɛ). "Ta ‑kpɔ 'ka bhɔɔ 'ya 'dho kë ka ‑ta,
MAR 6:9 'ka 'dho "bhɛɛ ꞊plɛ ‑da 'ko ‑ta, ‑ka ‑sabha ꞊në ‑ya ka ‑gɛn ‑bha doseng.»
MAR 6:10 'Yö go mü 'zü 'ö‑ pö‑ ‑nu ‑dhɛ: «'Ka 'dho 'ka ‑da 'pö‑ "ʋʋ 'pö‑ 'ö‑ 'gü, ꞊wa ka ꞊yëë bho 'kɔ 'ö‑ 'gü, ‑ka 'to‑ 'gü ‑yö 'to "dhʋ̈ ‑yö zun‑ 'ka ka ‑go 'pö‑ bha‑ 'gü ‑yi ‑bha (kë "dhʋ̈ 'ö 'wɔn ‑yö ‑siö ka ‑dhɛngbhɔɔ ‑nu ‑dhɛ ka "piʋ̈).
MAR 6:11 'Pödhɛ 'dhɛ 'wii ‑kɔ ‑ya ka ‑dhɛng ‑bha ‑a 'gü, "ɛɛn 'ö 'wii "tʋ 'to ka ‑wʋ ‑bha, ‑ka 'go 'plöö mü kö 'ka 'dho ‑dhɛ "wɛɛ 'bha 'gü, "kɛɛ 'ka‑ pö 'ka 'dho, ‑ka ka ‑kɔ ‑ma ka ‑gɛn ‑bha kö ‑bobi 'ö ‑dɔ ka ‑gɛn ‑bha 'pö‑ bha‑ 'gü bha, ‑yö 'go ka ‑gɛn ‑bha, kö ‑yö kë Atanna ‑bha za ‑bha ‑a ‑nu zë ‑gɛn 'ka dhia".»
MAR 6:12 ꞊Dhɛ 'ö ö bo ‑wʋ ‑kpɔ ‑a ‑nu ‑bha ‑sü 'ka ꞊dhɛ ‑kɔ bha‑ 'dhö, 'yö 'wo dho, 'yö 'wo Atanna ‑bha naɔ bha‑ dɔ ‑dhɛ ꞊gban "pɛpɛ 'gü ꞊dhɛ ‑wo wo bo wo kë ‑sɔng yaa ‑nu 'ka kö ‑wo bɔ Atanna 'ka.
MAR 6:13 'Wo dho ‑wo ‑gun "yina yaa 'gbɛ kë sië 'pö mɛ "bhɩɩ‑ ‑nu 'gü, 'ö 'wo "yɔn ꞊gii "yuëdhi 'gbɛ ‑nu ‑bha ‑nu wo 'wo dha.
MAR 6:14 ‑Gblüdë Edhodö ‑yö Yesu ‑wɔn ‑ma "tʋ̈ng bha ꞊në‑ 'gü, ‑a ‑gɛn ‑mü ꞊dhɛ 'ö gun "dhʋ̈ kö‑ 'tɔ ꞊ya ꞊mɔɔ "sɛ bha‑ 'gü ‑dhɛ ꞊gban "pɛpɛ 'gü ("dhabhliwɔn ‑nu 'ö gun‑ kë sië bha‑ ‑wɔn 'gü), "kɛɛ 'mɛ 'wo gun‑ ‑dhiang zë sië "dhʋ̈ bha‑ ‑nu ‑wʋ 'yaa gun do. Mɛ 'bha ‑nu ‑gun pö sië ꞊dhɛ Zan Mɛzumɛ 'wo‑ zë bha ꞊në ꞊ya ‑bö ‑deewo, 'yö‑ ‑wɔn 'gü 'yö "dhabhliwɔn ‑nu kë sië bha.
MAR 6:15 Kö mɛ 'bha ‑nu ‑wa pö sië Edhi ('ö gun Atanna ‑wʋdhiʋ̈loomɛ 'ka yi 'bha 'ka bha yö ‑mü). Kö mɛ 'bha ‑nu ‑dɩ 'pö ‑wa pö sië: «‑Yö ‑dho kë Atanna ‑wʋdhiʋ̈loomɛ do 'bha ꞊në‑ 'ka ꞊dhɛ ‑a 'mɛ 'wo gun zii 'kpa ‑a ‑nu 'dhö.»
MAR 6:16 "Kɛɛ ꞊dhɛ Edhodö ‑zë 'ö‑ ma, 'yö‑ pö: «Zan Mɛzumɛ 'a‑ ‑gɔ ‑kan bha ꞊në ꞊ya ‑bö bha!»
MAR 6:17 ‑A pö 'ö‑ wo "dhʋ̈ bha‑ ‑gɛn ‑mü ꞊dhɛ yöö ꞊dede ꞊në kë ö ‑wʋ kpɔ mɛ ‑bha, 'yö 'wo Zan kun 'wo‑ ‑lö, 'yö 'wo‑ ‑da ‑kaso 'gü, ‑a pö 'ö Zan ‑ya wo‑ ‑dhɛ ꞊dhɛ ꞊ya ö dheebhang Fidhipö ‑bha dhebhɔ Edhodiadö bho‑ ‑gɔ ꞊ya 'wɔn yaa kë bha‑ ‑wɔn 'gü. ‑A ‑gɛn ‑mü ꞊dhɛ Zan‑ kë‑ ‑pö ‑dhɛ ‑ta "puu 'ka 'ö‑ pö: «‑A ‑dhɛ 'yaa ‑bha kö 'i i dheebhang ‑bha dhe bho‑ ‑gɔ.»
MAR 6:19 ‑A pö 'ö Zan ‑ya wo "dhʋ̈ bha 'yö ‑siö Edhodiadö ‑dhɛ. ‑A bhlɔɔ ‑ma 'gü ‑kɔ yaa bha, 'yö gun "piʋ̈ ꞊dhɛ 'ö Zan zë,
MAR 6:20 "kɛɛ 'yö‑ ‑kɔ 'yaa gun, ‑a ‑gɛn ‑mü ꞊dhɛ Edhodö ‑gun "suʋ̈ sië Zan ‑gɔ ‑a ‑bha ‑kë mɛ 'ö ꞊sɔng 'bhaa‑ ‑bha 'ö tɛanwɔn pö, "kɛɛ 'ö Atanna dhɔɔbhaamɛ 'ka ‑sü ‑wɔn 'gü. ‑Yö ‑gun ö "tʋ ‑nu dɔ sië‑ ‑wʋ ‑bha 'ö‑ ‑wʋ "dhia ‑yö ma‑ 'gü, 'ö ꞊ya ö "tʋ 'to‑ ‑wʋ ‑bha ‑kɔ 'ö‑ 'gü 'do 'do, 'ö‑ "gblʋ̈ʋ̈dhɛ ‑yö "muu bho, ‑yö ‑gun Zan ‑maa kë sië yö ꞊në‑ ‑wɔn 'gü Edhodiadö ‑gɔ kö 'ya 'dho‑ zë ö tii' 'ka.
MAR 6:21 "Kɛɛ yö ꞊në‑ ꞊gban 'gü, yi do‑ kë ‑slɔɔ 'ö ‑kë Edhodiadö bhlɔɔ bho ‑yi 'ka. ‑Yö ‑kë "dhʋ̈ yi 'ö Edhodö 'kpɔ ‑kwɛ ‑yö zun‑ 'ka 'ko "dhiʋ̈ bha ꞊në‑ 'ka. ‑A ‑dhɛkpaɔyi bha‑ 'ka, 'yö Edhodö ‑yö trooyi ‑da ‑a ‑bha mɛ ‑tiandhö ‑nu, ‑a ‑bha "sɔdha ‑gɔmɛ ‑nu waa‑ 'tɔmɛ ‑nu 'wo Gadhidhe ‑sɛ 'gü ‑a ‑nu ‑gɔ.
MAR 6:22 ꞊Dhɛ 'ö 'mɛ 'wo‑ ‑nu ‑dhɛ bha ꞊wa nu, 'ö ꞊wa ‑da trookëgükɔ 'gü, 'ö ‑dhɔkëdhe zü ꞊ya bho, 'yö Edhodiadö 'dhu ‑yö ‑da 'kɔɔdhö, 'yö zun "tan kë ‑sü ‑bha, 'yö‑ "dhia ‑yö ma Edhodö waa‑ ö ‑bha trootamɛ ‑nu bha‑ ‑nu 'gü. 'Yö Edhodö ‑ya pö 'nëdhiëngnë 'ö "tan kë sië bha‑ ‑dhɛ 'ö‑ pö: «Pë "ʋʋ pë 'ö ‑dhi i ‑dhɛ, ‑a ‑gbadhɛ n ‑gɔ kö 'a‑ nu i ‑dhɛ!»
MAR 6:23 ꞊Dhɛ 'ö‑ pö "dhʋ̈, 'yö go mü 'ö ‑sö ‑bhö 'ö‑ pö: «Pë "ʋʋ pë 'ö ‑dhi i ‑dhɛ, ‑a pö, 'kö ‑kë ma ‑gblüdëdhɛ "pɛan do ‑zian 'ka, a ‑dho ‑a nu i ‑dhɛ. ('Mii‑ kë "dhʋ̈, Atanna ‑yö n 'sü).»
MAR 6:24 ꞊Dhɛ 'ö ‑gblüdë ‑ya pö "dhʋ̈, 'yö 'në bha 'ö 'kwama kun, 'yö zun "kpɛnng 'yö dho‑ ‑zɔn ö dhe ‑dhɛ, 'yö‑ dhe ‑ya pö‑ ‑dhɛ: «‑Bhö 'dho 'kii‑ pö ‑yö Zan Mɛzumɛ ‑gɔ nu i ‑dhɛ!»
MAR 6:25 'Yö ö yee kë ‑bɛang 'ka 'ö dho Edhodö ‑dhɛ 'gü 'yö‑ pö‑ ‑dhɛ: «N dëmɛ, ‑yö n "piʋ̈ ꞊dhɛ 'i Zan Mɛzumɛ ‑gɔ ꞊në‑ ‑ya 'tɛa‑ 'gü ꞊dede ya‑ 'gü kö 'i n gba‑ 'ka.»
MAR 6:26 'Nëdhiëngnë bha‑ pö 'ö‑ wo ‑wo ö gba Zan ‑gɔ ꞊në‑ 'ka bha, 'yii dhi ‑gblüdë Edhodö ‑dhɛ, "kɛɛ yöö kë ꞊tɔn ꞊dhɛ kö ꞊ya ö bo ‑sö ‑bhö ‑sü 'ka. 'Yö zë ‑sö 'ö‑ ‑bhö waa‑ 'mɛ 'ö‑ ‑nu ‑dhɛ bha‑ ‑nu ‑wɔn ‑dhɛ, kö ‑a kë ‑kɔ ‑zë "wɛɛ 'bhaa 'dhö 'zü,
MAR 6:27 'yö "sɔdha 'wo‑ ‑maa kë bha‑ do bɔ Zan ‑gɔ 'sü ‑dhɛ 'gü kö ‑yö nu‑ 'ka.
MAR 6:28 'Yö 'mɛ bha 'ö dho, 'yö Zan ‑gɔ ‑kan, 'yö‑ ‑da 'tɛa‑ 'gü 'ö nu‑ 'ka, 'yö‑ dɔ 'nëdhiëngnë bha‑ ‑gɔ, 'yö‑ sü 'pö 'ö dho‑ 'ka ö dhe ‑dhɛ.
MAR 6:29 ꞊Dhɛ 'ö Zan ‑bha ꞊klangdhiʋ̈ ‑nu 'wo‑ ma ꞊dhɛ ꞊wa Zan zë, 'yö 'wo dho 'wo‑ bhingkplü 'ö to bha‑ sü 'wo dho‑ 'ka 'wo‑ ‑wɛɛ bho.
MAR 6:30 ꞊Dhɛ 'ö Yesu ‑bha bɔmɛ ‑nu 'ö‑ ‑nu bɔ bha, ꞊wa wo yee kë ꞊wa nu, yi do 'bha bha‑ 'ka 'yö 'wo bho 'ko ‑ta Yesu ‑kuu "dhiʋ̈, 'yö 'wo zun 'wo "kplëng bho ‑sü ‑bha. 'Yö 'wɔn "pɛpɛ 'wo‑ ‑kë, waa‑ 'wo Atanna ‑wɔn ‑dhiang zë ‑kɔ ‑nu 'ö‑ ‑bha, 'yö 'wo ‑ya ‑ziö ‑gɛn 'gü ‑sü ‑bha Yesu ‑dhɛ.
MAR 6:31 'Yö‑ ‑ya pö‑ ‑nu ‑dhɛ 'ö‑ pö: «‑Ka nu kö 'kwa 'dho "tʋngtadhɛ 'bha 'gü kö 'ka ka "tɛɛ 'në 'bha 'pa.» ‑A pö 'ö‑ wo "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö 'mɛ 'wo 'dho sië 'wo nu sië ꞊wa kë 'gbɛ ꞊dedewo kö ‑kɔ 'ö Yesu waa‑ ‑bha yëkëmɛ ‑nu 'wo dho‑ kë‑ 'ka kö ‑wo pë ‑zian ‑bhö ‑a ‑kɔ 'yaa 'dhö.
MAR 6:32 'Yö 'wo dho 'wo ‑da "yitagɔ 'gü 'wo dho ‑dhɛ 'ö mɛ 'bhaa mü 'ö 'wo dho wo ‑dɩ ‑slɔɔ ‑bha bha‑ 'gü.
MAR 6:33 "Kɛɛ 'yö mɛ 'gbɛ ‑wa ‑nu 'dho ‑dhɛ yö, 'yö 'wo‑ ‑nu dɔ, 'yö mɛ ‑yö go 'pödhɛ "pɛpɛ 'wo mü ‑a ꞊gban 'gü 'do 'do, 'yö 'wo dho wo ‑gɛn ‑ta, 'yö 'wo ‑da ‑nu "dhiʋ̈ ‑dhɛ 'wo 'dho sië‑ ‑bha bha‑ 'gü. "Sanni Yesu waa‑ ö ꞊kengmɛ ‑nu ‑wo nu kö ‑wo ꞊loo mü kö 'mɛ 'wo bha ꞊wa ꞊loo mü 'nu.
MAR 6:34 ꞊Dhɛ 'ö Yesu ‑yö go "yitagɔ 'gü 'ö zun "sia‑, kö mɛ ꞊ya ‑dhɛ ꞊gban pa tingtingdhö; 'yö ‑wëë ‑yö zun bɔ ‑sü ‑bha ‑a ‑ta ‑a ‑nu ‑wɔn 'gü, ‑a ‑gɛn ‑mü ꞊dhɛ ꞊yaa‑ ‑nu ‑ga, ‑wo ‑kë 'gü ꞊dhɛ ‑tuʋ̈ 'ö‑ ‑gɔdhiʋ̈mɛ 'yaa 'dhö ꞊në‑ 'dhö. 'Yö zun 'wɔn 'gbɛ 'ö ‑gban Atanna ‑wɔn ‑bha ‑a 'klɔɔ‑ ‑pö ‑nu ‑dhɛ ‑sü ‑bha.
MAR 6:35 ꞊Dhɛ 'ö‑ ‑bha ꞊klang ‑nu 'wo‑ ‑ga ꞊dhɛ 'yënng‑ ‑gɔ ꞊ya ‑ya ‑tɔn ‑ta, 'yö 'wo ꞊yɔɔn‑ "sɔɔ 'wo‑ pö‑ ‑dhɛ: «‑Dhɛ 'kwa‑ ‑bha ya "tʋngtadhɛ ‑mü, 'sa "bin ꞊ya 'ma.
MAR 6:36 'Dho‑ ‑bha kö 'i ‑wʋ 'kpɔ 'mɛ bha‑ ‑nu ‑bha kö ‑wo 'dho wo ‑bhöpë 'dhɔ ‑dhɛ 'gü 'pö‑ ‑nu 'wo kwa ‑züzü ya waa‑ gbɛɛtadhɛ ‑nu 'gü kö ‑wa ‑bhö.
MAR 6:37 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Aa bhoo, kaa ꞊dede ꞊në ‑kaa ‑nu gba ‑bhöpë 'ka!» "Kɛɛ 'yö 'wo‑ pö: «'Aa, 'mɛ 'wo ya ‑wo 'gbɛ "gbɩɩ‑ ‑wa! ‑Yö i "piʋ̈ ꞊dhɛ 'yi 'dho 'wëë‑ 'wo dho yëkëmɛ do ꞊saa bho‑ 'ka "su "saaga "piʋ̈ bha‑ 'bluu‑ ‑dhɔ kö 'yi‑ nu‑ ‑nu ‑dhɛ kö ‑wa ‑bhö ‑ee? "Kɛɛ kö 'zü yii‑ kë "dhʋ̈ 'yii 'dho ꞊mɔɔ‑ ‑nu ‑ta zɔɔ ‑wa!»
MAR 6:38 'Yö Yesu ‑ya ‑yɔ bɔ 'ö‑ pö: «‑Ka 'dho ꞊zɔɔ kö 'ka ka bhɔɔ" bho mü, 'bluu‑ bhɛ ꞊dhɛ ꞊në ꞊ya 'to mü? ꞊Dhɛ 'wo dho 'wo wo bhɔɔ" bho mü 'ö 'wo 'pë ꞊ya 'to ‑a ꞊dhʋng ‑së 'ka, 'yö 'wo nu 'wo‑ pö‑ ‑dhɛ: «'Bluu‑ bhɛ "sɔɔdhu waa‑ 'yuʋ̈‑ ꞊plɛ ꞊në ꞊ya 'to mü.»
MAR 6:39 ꞊Dhɛ 'ö ꞊waa‑ pö‑ ‑dhɛ "dhʋ̈, 'yö‑ pö ‑wo 'mɛ 'wo bha‑ ‑nu ‑ya kpö kpö 'ka blëë ‑nɛɛ ‑ta mü.
MAR 6:40 'Yö 'wo ‑ya kpö kpö 'ka, këng do këng do, "ɛɛn ‑kaɔng "sɔɔdhu "sɔɔdhu.
MAR 6:41 'Yö ö ‑kɔ ‑da 'bluu‑ bhɛ "sɔɔdhu bha‑ 'gü, waa‑ 'yuʋ̈‑ ga ꞊plɛ bha‑ 'dhö, 'yö ö "yan "dhiʋ̈ ꞊wlü dhang‑ 'gü, 'yö Atanna nuɛ" bho 'bluu‑ bha‑ ‑wɔn 'gü waa‑ 'yuʋ̈‑ bha‑ 'dhö, 'yö 'bluu‑ bha‑ "kplü "kplü bho, 'yö‑ dɔ ö ‑bha ꞊klang ‑nu ‑gɔ kö ‑wa 'gü ‑gblü 'mɛ 'wo bha‑ ‑nu ‑ta. 'Yö dho 'ö 'yuʋ̈‑ ꞊plɛ bha‑ nu 'pö‑ ‑nu ‑dhɛ, 'yö 'wo‑ 'gü ‑gblü 'pö 'mɛ 'wo bha‑ ‑nu ‑ta.
MAR 6:42 'Yö 'mɛ 'wo bha‑ ꞊gban "pɛpɛ 'wo 'bluu‑ bha‑ ‑bhö 'wo kën, 'yö‑ ‑kpɛa ‑yö to.
MAR 6:43 'Yö 'bluu‑ waa‑ 'yuʋ̈‑ bha‑ ‑nu ‑da 'ko ‑ta ‑sü ‑kpɛa 'ö to 'ö dho 'ö ꞊mɔɔ töö ‑yan ‑kaɔng do ga ꞊plɛ ‑bha,
MAR 6:44 "kɛɛ 'sa kö gɔɔn‑ ‑nu 'wo 'pë bha‑ ‑bhö ‑wo gun mɛ "gblü "sɔɔdhu (kö 'wii 'në ‑nu waa‑ dhong ‑nu ‑a ‑nu ‑da mü).
MAR 6:45 ꞊Dhɛ 'wo wo bo 'pë bha‑ ‑bhö ‑sü 'ka, 'yö Yesu ‑yö zun ‑fɛɛ ‑ya ö ‑bha ꞊klang ‑nu ‑bha ‑sü ‑bha 'ö‑ pö wo ‑zë ‑wo ‑da ꞊sië "yitagɔ 'gü kö ‑wo "yi "kan "vaandhö, ‑wo ‑da ö "dhiʋ̈ ‑wo 'dho Bɛsaida "pɛan "piʋ̈ kö yö ‑zë 'ö ö ‑wʋ 'kpɔ 'mɛ 'wo bha‑ ‑nu ‑bha.
MAR 6:46 ꞊Dhɛ 'ö ö ‑wʋ kpɔ‑ ‑nu ‑bha "pɛpɛdhö, 'ö 'wo dho, 'yö dho ‑bhɛa Atanna ‑dhɛ ‑dhɛ 'gü ‑tɔn ꞊gbin‑.
MAR 6:47 ꞊Dhɛ 'ö‑ ‑bha ꞊klang ‑nu bha 'wo "yi "kan sië 'ö ꞊wa 'dho ꞊wa ꞊loo "yi ꞊zinng 'gü, "kɛɛ kö "bin ꞊ya 'ma‑ ‑nu ‑bha ꞊dedewo, kö Yesu ‑zë ‑yö ‑tun "sia‑ "yi ꞊taama ö ‑dɩ ‑ta,
MAR 6:48 'yö 'wɔn ꞊slɔɔ‑ 'gü ꞊dhɛ "yi "kan ‑sü ‑yö ꞊gbaɔn sië ö ‑bha ꞊klang ‑nu ‑ta ꞊dedewo, ‑a ‑gɛn ‑mü ꞊dhɛ 'ö gun "dhʋ̈ kö "tɛɛ ꞊ya ‑siö ‑a ‑nu ‑gɔ, kö "tɛɛ ‑yö go sië‑ ‑nu 'dho ‑zian 'ka, 'ö "yitagɔ ‑blü 'ö dho‑ 'ka. ꞊Dhɛ 'wo dɔ ‑dhɛkpaɔ "dhiʋ̈, 'yö dho‑ ‑nu ꞊keng‑ kö ‑yö "ta sië "yi bha‑ ‑ta, "kɛɛ kö ꞊ya kë ꞊dhɛ yöö ziö‑ ‑nu ‑ta.
MAR 6:49 ꞊Dhɛ 'ö‑ ‑bha ꞊klang ‑nu 'wo‑ yö kö ‑yö "ta sië "yi ‑ta 'ö nu, ‑wa ‑ga mɛ ‑zii 'ka, 'yö 'wo zun "tabhoo ‑da ‑sü ‑bha,
MAR 6:50 kö "suʋ̈ ꞊ya ‑da ‑nu 'gü kö‑ ‑nu "gblʋ̈ʋ̈‑ ‑yan ꞊gbaan 'wü, 'yö to 'ö dhiang ‑da ‑nu ‑ta 'ö‑ pö: «Ma ‑mü, ‑ka ka ‑zʋ ‑gban, "suʋ̈ 'ya 'dho ka kë!»
MAR 6:51 'Yö ‑da ‑nu "piʋ̈ "yitagɔ 'gü, 'yö "tɛɛ ‑yö bo ziö ‑sü 'ka, 'yö‑ 'wɔn ‑ya ‑bha ꞊klang ‑nu bha‑ ‑nu kɔn ꞊dedewo.
MAR 6:52 ‑A ‑gɛn ‑mü ꞊dhɛ "slë 'ö Yesu ‑ya ‑kë 'bluu‑ 'ö‑ 'gü ‑gblü bha‑ ‑wɔn 'gü bha 'wii‑ ꞊taama dɔ, gun 'ö‑ wo "dhʋ̈ kö 'wɔn 'gü ma zuë" 'yii ‑da ‑nu "gblʋ̈ʋ̈‑ ꞊kö bha‑ ‑wɔn 'gü, (‑a ‑gɛn ‑mü ꞊dhɛ ‑a ‑nu 'dhang bho ‑sü 'yaa gun‑ "dhiʋ̈ ꞊dhɛ ‑yö ‑mɔɔ ‑bha 'ö 'wɔn suu ‑nu bha‑ ‑nu ‑kë).
MAR 6:53 ꞊Dhɛ 'wo bo "yi bha‑ "kan ‑sü 'ka, 'wo ‑da Zenezadhe ‑sɛ 'gü, 'yö 'wo woo‑ "yitagɔ to "yi "dhiʋ̈ mü.
MAR 6:54 ‑A ‑nu ‑go "yitagɔ 'gü ꞊në "gbɩɩ‑, 'yö mɛ ꞊gban 'wo to 'wo Yesu dɔ.
MAR 6:55 'Yö ꞊ya ꞊loo ‑dhɛ "ʋʋ ‑dhɛ 'ö‑ 'gü, ‑yö ‑kë 'pö‑ 'kpii‑ 'ka oo, ‑yö ‑kë 'pö‑ 'sɛɛnnë 'ka oo, "ɛɛn ‑yö ‑kë 'bhlaa ꞊gbɛatadhɛ ‑zian ꞊në‑ 'ka oo, 'yö‑ 'gü ‑mɛ ‑nu 'wo dɔ ‑bɛang ‑bha 'wo dho woo‑ "yuëdhi ‑nu 'sü "nuu ‑nu 'gü 'wo nu‑ 'ka, 'yö 'wo‑ ‑nu ꞊loo "dhɛɛdhɛ "gbɛa do 'gü, 'yö 'wo ꞊bhɛa Yesu ‑dhɛ kö 'mɛ 'wo bha ‑wo zun‑ ‑bha sɔ ‑bha (kö ‑wo dha). 'Yö mɛ "ʋʋ mɛ 'ö‑ ‑kɔ ‑zë ‑yö zun‑ ‑bha sɔ "zɔdhiʋ̈ ‑zian ‑bha, 'yö‑ ‑nu ꞊gban "pɛpɛ 'wo ‑kë "klʋ̈ʋ̈klʋ̈.
MAR 7:1 Yi do 'ka, 'yö Fadhiziɛn ‑nu waa‑ 'tɔnggɔmɛ ‑nu 'wo go Zedhizadhɛmö 'wo bho 'ko ‑ta Yesu ‑dhɛ 'gü.
MAR 7:2 'Yö 'wo Yesu ‑bha ꞊klang ‑nu yö kö‑ mɛ 'bha ‑nu ‑wo pë ‑bhö sië wo ‑kɔ ‑dhii 'ka, kö 'wii wo ‑kɔ "zu (꞊dhɛ ‑kɔ 'wo‑ ‑kë 'ka ‑a ‑nu wɔ ‑kɔ 'gü Atanna ‑wɔn "gblʋʋ "piʋ̈ kö 'wo kë "slʋ̈ʋ̈slʋ̈ ‑a wëëdhö bha‑ 'dhö).
MAR 7:3 "Kɛɛ 'sa kö Fadhiziɛn ‑nu waa‑ mɛ "pɛpɛ 'kö 'wo Zuifö ‑zë 'ka, ‑a ‑nu 'bha ‑bha 'bha 'yaa pë ‑bhö kö 'yii ö ‑kɔ "zu 'kpakpadhö (kë "dhʋ̈ 'ö ‑kë ‑dhiisü Atanna wëëdhö), ‑a ‑gɛn ‑mü ꞊dhɛ ‑a ‑nu "bhɛma ‑nu 'wo 'wluu‑ ‑nu 'ö‑ ‑ya bha "yi 'yaa zun‑ 'bha ‑wɔn ‑bha ‑a ‑nu ‑gɔ.
MAR 7:4 ‑A ‑wɔn 'gü, ꞊wa 'go "dhɛɛdhö kö ‑wo nu, 'wii 'bɔn ‑bho wo ‑bha ‑zu bha‑ wo ꞊kö, 'waa ‑bhöpë ‑bhö. ꞊Ya 'go‑ 'dhɛ bha‑ 'gü, ‑a ‑nu ‑bha 'wluu‑ "wɛɛwɛɛ 'në ‑dhɛ ‑nu 'wo ‑gban "yitakɔɔ ‑nu oo, "yitagbɔ ‑nu "ɛɛn ‑piögagbɔ waa‑ ‑nu ‑wɔtapë ‑nu "zu ‑sü ‑nu ‑bha ‑wo kpö 'ka.
MAR 7:5 Fadhiziɛn ‑nu waa‑ 'tɔnggɔmɛ ‑nu ‑wa ‑zë 'wɔn bha ꞊në ‑dhɛ 'yö ꞊dhɛ 'ö ꞊wa Yesu ‑bha ꞊klang ‑nu bha‑ ‑nu yö kö ‑wo pë ‑bhö sië kö 'wii wo ‑kɔ "zu, 'yö 'wo‑ dhɛɛ" kpɔ 'wo‑ pö: «‑Yö mü ꞊dhɛ 'yö i ‑bha ꞊klang ‑nu 'waa 'wluu‑ 'ö kwa "bhɛma ‑nu ‑wa ‑ya bha‑ ‑ya ꞊bhlëë 'gü, 'yö 'wo pë ‑bhö wo ‑kɔ ‑dhii 'ka?»
MAR 7:6 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «"Gblʋ̈ʋ̈dhɛgblɛɛnmɛ ‑nu 'ka ya, Atanna ‑wʋdhiʋ̈loomɛ Ezai 'dhö dhiang 'ö‑ zë ka ‑bha yi 'bha 'ka 'ö ‑bɛn zë ‑sü 'ka Atanna ‑bha 'sëëdhɛ 'gü 'ö‑ pö: ‹Atanna ‑ya ‑pö: "Sɛgɔ ya‑ 'gü ‑mɛ ‑nu ‑wo n ꞊bhlëë ‑ya wo "dhi 'gü "wɛɛwɛɛ, "kɛɛ‑ ‑nu zuë" ‑zë ‑yö n 'ka ꞊gblɛɛn, ‑a ‑nu ‑bha n ‑dhɔkë ‑gɛn 'yaa 'dhö, ‑a ‑gɛn ‑mü ꞊dhɛ 'wluu‑ ‑nu 'ö mɛ "bhɩɩ‑ ‑nu ‑wa ‑ya bha ꞊në, 'wo wo 'ko ꞊draan‑ ‑bha ꞊dhɛ 'pë 'ö go Atanna ꞊në‑ "piʋ̈ ‑a 'dhö› bha 'yii ꞊sua kë;
MAR 7:8 ‑a ‑gɛn ‑mü ꞊dhɛ ka ka ‑kwaa Atanna ‑bha 'tɔng‑ ‑zë ‑zü 'ö 'ka‑ ‑zuö ka ‑kɔ ꞊kee‑ ‑ta, 'yö 'ka 'wluu‑ 'ö mɛ "bhɩɩ‑ ‑nu ‑wa ‑ya bha ꞊në‑ ‑ya ꞊bhlëë 'gü.
MAR 7:9 'Yö go mü 'zü 'ö‑ pö‑ ‑nu ‑dhɛ: «Ka "tʋ 'yaa Atanna ‑bha 'tɔng‑ ‑bha 'wɔn 'ö‑ 'gü 'yö bha, kë "dhʋ̈ kö kaa‑ 'wluu‑ ‑nu ꞊në ‑wo 'to.
MAR 7:10 ‑A ‑gɛn ‑mü ꞊dhɛ Moizö ‑yö 'tɔng‑ ‑dɔ 'ö‑ pö: ‹I dë waa‑ i dhe ‑a ‑nu ꞊bhlëë ‑yö kë i ‑gɔ.› 'Yö go mü 'zü 'ö‑ pö: Mɛ "ʋʋ mɛ 'ö dhiang yaa ze ö 'kpɔmɛ ‑nu ‑dhɛ, ‑wa ‑mɛ zë,
MAR 7:11 "kɛɛ ka ‑zë, ka‑ ‑pö ꞊dhɛ: «Mɛ ꞊yaa‑ pö ö 'kpɔmɛ ‑nu ‑dhɛ ꞊dhɛ 'pë 'ö gun n "piʋ̈ ꞊dhɛ 'a‑ nu ka ‑dhɛ bha 'ma‑ ꞊gbaɔ Atanna ‑gɔ, kö‑ 'dhɛ bha ꞊ya zun ꞊naa bha.»
MAR 7:12 Kö‑ ‑dhɛ 'yaa ‑bha 'zü ꞊dhɛ ‑a ‑mɛ ‑yö 'wɔn 'bha kë ö dë waa‑ ö dhe ‑a ‑nu ‑dhɛ,
MAR 7:13 'yö 'ka bhluu" ma‑ 'ka Atanna ‑bha 'tɔng‑ ‑nu ‑bha, ka ‑bha 'wluu‑ ‑nu 'ka‑ ‑ya bha‑ ‑wɔn 'gü. 'Yö 'wɔn suu ‑nu 'wo "dhʋ̈ 'ka‑ 'gbɛ ‑kë.
MAR 7:14 ꞊Dhɛ 'ö ö bo‑ ‑pö "dhʋ̈ ‑sü 'ka, 'yö mɛ kpö 'wo gun mü bha‑ ‑nu ‑dhɛ 'zü ‑deewo, 'yö‑ pö‑ ‑nu ‑dhɛ: «‑Ka ka "tʋ 'to n ‑bha ‑së 'ka kö dhiang 'ö maa‑ zë bha 'ka‑ 'gü ma.»
MAR 7:15 'Yö‑ pö: «Pë "ʋʋ pë 'ö go "kpɛnng 'ö ‑da mɛ "dhi 'ö mɛ ‑ya ‑bhö, ‑a 'bha 'yaa mɛ kë ‑dhiisü Atanna wëëdhö, "kɛɛ 'pë 'ö go‑ ‑mɛ zuë" 'gü 'ö zun "kpɛnng bha ꞊në‑ ‑mɛ ‑kë 'wɔnyaakëmɛ 'ka.
MAR 7:16 'Yö‑ pö ‑a zë 'a‑ wo sië bha 'mɛ 'wɔn 'gü ma ‑mɛ 'ka, ‑ya 'gü ma.
MAR 7:17 ꞊Dhɛ 'ö mɛ kpö bha‑ ‑nu to 'ö dho 'ö ‑da 'kɔɔdhö, 'yö‑ ‑bha ꞊klang ‑nu 'wo‑ dhɛɛ" kpɔ "gwënng 'ö‑ ‑da bha‑ 'klɔɔ‑ 'ka.
MAR 7:18 'Yö‑ pö‑ ‑nu ‑dhɛ: «Kaa ‑dɩ 'pö 'kii kë 'wɔn 'gü ma ‑mɛ 'ka ꞊në wo ꞊kö ‑ee? "Ɛɛn 'kaa‑ 'wɔn dɔ ꞊dhɛ pë 'dhɛ 'kö go "kpɛnng 'ö ‑da mɛ "dhi 'ö mɛ ‑ya ‑bhö, ‑a 'bha 'yaa mɛ ‑dhii kun Atanna wëëdhö ‑ee?
MAR 7:19 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ pë 'dhɛ 'kö mɛ ‑ya ‑bhö ‑a 'bhaa 'dho mɛ zuë" ‑zë 'gü, ‑yö ‑dho mɛ "gblʋ̈ʋ̈dhɛ ꞊në‑ 'gü, ꞊ya 'go mü 'yö mɛ dho‑ 'ka blëë 'gü.» (‑A pö 'ö Yesu ‑ya wo "dhʋ̈ bha ꞊në‑ ‑zɔn ꞊dhɛ ‑bhöpë ‑zë 'bha 'yaa mɛ "kian 'ka.)
MAR 7:20 'Yö go mü 'zü 'ö‑ pö: «'Pë 'ö go mɛbhɩɩdhe 'gü ꞊në mɛ ‑dhii kun Atanna wëëdhö.
MAR 7:21 ‑A ‑gɛn ‑mü ꞊dhɛ mɛ zuëpiʋ̈dhɛ bha ꞊në ‑zʋ yaa ‑gɔn mɛ 'ka ‑sü ‑nu oo, ‑da dhe "piʋ̈ ‑sü ‑nu "ɛɛn ‑ziö mɛ ‑nu ‑bha gɔn ꞊keng‑ ‑sü ‑nu oo, "yënng dɔ ‑sü ‑nu oo, mɛ zë ‑sü ‑nu oo,
MAR 7:22 ꞊kwaan bho ‑sü ‑nu oo, zuë" ‑dɔ ꞊naɔ ‑bha ‑sü ‑nu oo, suu yaa ‑dhɛ ‑nu, ꞊flü kë ‑sü ‑nu, 'wɔn ‑ma 'koo ‑sü kë ‑sü ‑nu, zuë" ‑bhɔ mɛ ‑nu ‑bha pë ‑bha ‑sü, mɛ ‑nu 'tɔ zë ‑sü ‑nu, ‑dɩ ‑sü 'kpii‑ ‑sü ‑nu waa‑ slaa" ‑dhɛ ‑wɔn kë ‑sü ‑nu 'wo go‑ 'gü.
MAR 7:23 'Wɔn yaa suu "pɛpɛ 'ö "dhʋ̈ bha, ‑yö ‑go mɛ zuë" ꞊në‑ "piʋ̈, 'yö mɛ ‑kë 'wɔnyaakëmɛ 'ka Atanna wëëdhö.»
MAR 7:24 ꞊Dhɛ 'ö ö bo dhiang ‑nu bha‑ ‑nu zë ‑sü 'ka, 'yö go ‑dhɛ bha‑ 'gü 'ö dho Tii‑ ‑sɛ 'gü. 'Yö‑ pö ö ‑dɩ ‑dhɛ 'ö 'dho kö 'ö ö ‑gblɛn 'kpɔ 'kɔ 'bha 'gü kö mɛ 'bha 'ya 'dho ö nu ‑wɔn 'wɔn dɔ, "kɛɛ 'yö 'yii zun‑ ‑gɔ 'kɔ "dhiʋ̈.
MAR 7:25 ‑A ‑gɛn ‑mü ꞊dhɛ ꞊dhɛ 'ö dhebhɔnë do 'bha 'ö "yina yaa ‑yö gun‑ 'dhu 'gü bha, 'ö‑ ma ꞊dhɛ Yesu ꞊ya nu ꞊ya ꞊loo mü, 'yö dho 'ö "gblëënu‑ ꞊wlöö.
MAR 7:26 ‑A dhebhɔ 'ö "dhʋ̈ bha 'yaa gun Zuifö 'ka, Glɛkö ꞊në gun‑ 'ka, 'yii go Izraɛdhö ‑sɛ 'gü, ‑yö ‑go Sidhofenisi ‑sɛ 'gü. "Kɛɛ 'yö nu 'ö ꞊bhɛa Yesu ‑dhɛ 'ö‑ pö ‑yö dɔ "gbɩɩ‑ kö "yina yaa 'ö‑ 'dhu 'gü bha ‑ya kë.
MAR 7:27 'Yö Yesu ‑ya ‑yɔ bɔ‑ ‑gɔ 'ö‑ pö: «‑Bhö dɔ kö 'në ‑nu ‑wo 'kën ꞊kö, ‑a ‑gɛn ‑mü ꞊dhɛ 'yaa ‑së kö ‑wo ‑bhöpë 'sü 'në ‑nu ‑bɛn "dhiʋ̈ kö ‑wa nu 'gbɛnnë ‑nu ‑dhɛ.»
MAR 7:28 'Yö dhebhɔnë bha 'ö‑ ‑yɔ bɔ‑ ‑gɔ 'ö‑ pö: «‑Yö "dhʋ̈ tɛan‑ 'ka, n Dëmɛ, "kɛɛ ‑a ꞊blün 'kö go 'në ‑nu ‑kɔ ‑bha 'ö ꞊wɛnng ‑a ‑nu ‑gɛn "piʋ̈ bha 'gbɛnnë ‑nu ‑wa yö ‑zë ‑bhö.»
MAR 7:29 ꞊Dhɛ 'ö‑ pö "dhʋ̈, 'yö Yesu ‑ya ‑yɔ bɔ‑ ‑gɔ 'ö‑ pö: «‑Bhö 'dho, "yina yaa ꞊ya 'go i 'dhu bha‑ 'gü ‑a pö i‑ wo "dhʋ̈ bha‑ ‑wɔn 'gü.»
MAR 7:30 ꞊Dhɛ 'ö ö yee kë 'ö dho 'ö ꞊loo ö ‑gɔ 'kɔɔdhö, ‑yö ‑kpan ö 'dhunë ‑bha kö ‑yö wɔ sië "gbang ‑ta, kö "yina yaa ꞊gbaan 'dho.
MAR 7:31 ꞊Dhɛ 'ö ꞊ya kë "dhʋ̈, 'yö Yesu ‑yö go Tii ‑sɛ 'gü 'ö bɔ Sidɔn, 'yö dho "yitagbɛa 'ö Gadhidhe bha‑ "pɛan "piʋ̈. ‑A 'dho ‑sü 'ka ‑yö ‑bɔ "sɛ ‑gɔ 'ö‑ 'pö‑ 'dhö ‑kaɔng do bha‑ 'gü.
MAR 7:32 'Yö 'wo nu‑ ‑dhɛ "bhʋbhʋgɔn do 'ka, 'yö 'wo ꞊bhɛa‑ ‑dhɛ kö ‑yö ö ‑kɔ ‑ya ‑ta kö ‑yö bhɛa" Atanna ‑dhɛ ‑a ‑wɔn 'gü kö ‑yö kë "klʋ̈ʋ̈klʋ̈.
MAR 7:33 'Yö 'mɛ bha‑ sü, 'yö bhɔ‑ 'ka mɛ kpö bha‑ ‑nu 'ka taa‑ 'bleng ‑bleng, 'yö ö kɔngga ‑da ‑a "tʋ ꞊gban ꞊plɛ 'gü, 'yö ö ‑kɔ ‑yɛ 'ö "dhidhi ‑bha 'yö‑ zun‑ 'nɛɛ‑ ‑bha.
MAR 7:34 ꞊Dhɛ 'ö ꞊ya ö bo, 'yö ö "yan "dhiʋ̈ ꞊wlü dhang‑ 'gü, 'yö ö ‑fʋʋ ꞊loo "yuëdhi bha‑ ‑wëë 'ö gun‑ kë sië bha‑ ‑wɔn 'gü, 'yö‑ pö‑ ‑dhɛ: «Efata!» (꞊Waa‑ pö "dhʋ̈ ‑a ‑nu ‑wʋ 'gü kö ‑wa pö ‹‑bhö "pʋ!›.)
MAR 7:35 ‑Yö ‑to ‑dhɛ do bha‑ 'gü, 'ö‑ "tʋ "dhiʋ̈ ‑yö ‑pʋ 'ö dhiang ma, 'ö‑ 'nɛɛ‑ ‑yö zun ‑slëë 'gü ‑sü ‑bha 'ö dhiang zë 'kpakpadhö.
MAR 7:36 'Yö Yesu ‑yö ‑dhio dɔ‑ ‑nu ‑ta 'ö‑ pö 'wa 'dho‑ ‑gɛn dɔ mɛ 'bha ‑dhɛ. "Kɛɛ 'yii 'wɔn "dhiʋ̈ 'kun, ꞊yaa‑ pö "dhʋ̈ ‑yö ‑kë ‑zianwo ꞊dhɛ ‑ya pö ‑ka ka faan dɔ. ‑A ‑gɛn dɔ mɛ ‑nu ‑dhɛ ‑sü 'bha ꞊në ‑da 'gü‑ ‑nu ‑gɔ 'ö dho‑ 'ka.
MAR 7:37 "Dhabhliwɔn ‑nu 'ö Yesu ‑ya ‑kë bha, 'yö‑ 'wɔn ‑ya ‑nu kɔn ꞊dedewo, 'yö 'wo‑ pö: «'Aa mi, mɛ 'ö ya‑ këwɔn ‑së ꞊tɔn ‑kɛɛ! ‑Yö "tʋ ꞊wlü ‑mɛ ‑zian ‑kë dhiangmamɛ 'ka 'ö "bhʋbhʋ ‑nu ꞊gban ‑kë "wɩmɛ 'ka ‑wa!»
MAR 8:1 ‑A yi 'ö bha‑ 'ka 'zü kö mɛ kpö 'gbɛ ꞊dede ꞊wa bho "dhuu Yesu ‑dhɛ 'gü, "kɛɛ kö 'pë 'ö woo‑ ‑bhö 'yaa 'dhö, 'yö ö ‑bha ꞊klang ‑nu ‑dhɛ, 'yö‑ pö‑ ‑nu ‑dhɛ 'ö‑ pö:
MAR 8:2 «'Mɛ 'wo ya‑ ‑nu ‑wëë ꞊dede ‑yö n kë sië, ‑a ‑gɛn ‑mü ꞊dhɛ 'wo nu n "piʋ̈ ‑a ‑dhɛkpaɔyi ‑yaaga ‑naa ꞊nɛ, "kɛɛ ‑bhöpë 'bha 'ö yöö kë‑ ‑nu ‑gɔ kö ‑wa ‑bhö 'yaa 'dhö.
MAR 8:3 ꞊Ya kë ꞊dhɛ 'ma‑ ‑nu 'to din‑ 'ka ꞊dhɛ ‑kɔ ya‑ 'dhö, kö 'a ‑wʋ 'kpɔ‑ ‑nu ‑bha kö ‑wo 'dho, "yiyaadhe ‑dho ‑a ‑nu bho kö 'wii ꞊loo ꞊kö wo ‑dɩ ꞊plöö, ‑a ‑gɛn ‑mü ꞊dhɛ ‑a mɛ 'bha ‑nu 'godhɛ ‑yö ꞊gblɛɛn.»
MAR 8:4 'Yö‑ ‑bha ꞊klang ‑nu 'wo ‑yɔ bɔ‑ ‑gɔ 'wo‑ pö: «Mɛ "sinma 'wo ma ya‑ ‑nu ‑bhöpë ‑dho 'go 'mɛ "tʋngtadhɛ 'kwa dɔ‑ ‑bha ya‑ 'gü?»
MAR 8:5 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Bluu‑ bhɛ ꞊dhɛ ꞊në ka ‑gɔ?» 'Yö 'wo‑ ‑yɔ bɔ 'wo‑ pö: «'Bluu‑ bhɛ "saɔplɛ.»
MAR 8:6 'Yö Yesu ‑ya pö ‑wo 'mɛ 'wo bha‑ ‑nu ꞊gban "pɛpɛ 'yaanu "sia‑. ꞊Dhɛ 'wo‑ ‑nu ꞊gban 'yaanu "pɛɛpɛdhö, 'yö 'bluu‑ bhɛ "saɔplɛ bha‑ sü, 'yö Atanna nuɛ" bho‑ ‑wɔn 'gü 'yö‑ "kplü "kplü bho 'yö‑ nu ö ‑bha ꞊klang ‑nu ‑dhɛ kö ‑wa 'gü ‑gblü ‑a ‑nu ‑ta. 'Yö 'wo‑ 'gü ‑gblü mɛ kpö bha‑ ‑nu ‑ta.
MAR 8:7 'Ö gun "dhʋ̈ kö 'yuʋ̈ga 'në 'sɛnsɛnnë 'bha ‑nu ‑ya ‑nu ‑gɔ. 'Yö Yesu ‑ya ‑nu sü 'pö, 'yö Atanna nuɛ" bho‑ ‑wɔn 'gü, 'yö 'wo‑ 'gü ‑gblü ‑a ‑nu ‑ta.
MAR 8:8 'Yö 'mɛ 'wo bha 'wo 'bluu‑ bha‑ ‑bhö 'wo kën, 'yö‑ "kplü "kplü ‑kpɛa 'ö to 'wo‑ ꞊loo töö 'gü, 'yö dho 'ö ‑kë töö ‑yan "saɔplɛ 'ka.
MAR 8:9 'Mɛ 'wo 'bluu‑ bha‑ ‑bhö "dhʋ̈ bha, ‑wo ‑gun mɛ "gblü ‑yiisiö. ꞊Dhɛ 'wo wo bo pë ‑bhö ‑sü 'ka, 'yö ö ‑wʋ kpɔ‑ ‑nu ‑bha, 'yö 'wo dho.
MAR 8:10 ‑Wo ‑to ‑dhɛ do bha‑ 'gü, 'yö Yesu waa‑ ö ‑bha ꞊klang ‑nu 'wo ‑da "kplagɔnë 'gü, 'yö 'wo "yi ‑kan 'wo dho Damanuta ‑sɛ 'gü.
MAR 8:11 ꞊Dhɛ 'ö ꞊wa 'dho ꞊wa ꞊loo mü, 'yö Fadhiziɛn ‑nu 'wo bho "dhuu, 'yö waa‑ Yesu ‑nu 'wo ‑ya zaɔdhe ‑da ‑sü ‑bha. 'Yö 'wo‑ pö Yesu ‑dhɛ ‑a 'gü dan kian 'ka ꞊dhɛ ‑yö "slë do 'bha kë wo "yaan kö ‑ya ‑zɔn wo ‑dhɛ ꞊dhɛ Atanna ꞊në‑ bɔ tɛan‑ 'ka.
MAR 8:12 ꞊Dhɛ 'wo‑ pö "dhʋ̈, 'yö Yesu ‑yö ö ‑fʋʋ ꞊loo pinngdhö, 'yö go mü 'ö‑ pö: «"Tʋ̈ng ya‑ 'gü ‑mɛ ‑nu ‑wo n ‑wɔn 'suan‑ ‑bho ‑bha ‑pë ‑mɔɔ ‑më ‑wɔn 'gü? A‑ ‑pö ka ‑dhɛ tɛan‑ ꞊dede 'ka ꞊dhɛ: 'Mii 'dho "slë ‑zë "wɛɛwɛɛ 'bha kë ꞊dɛɛ 'gü ‑mɛ ‑nu ka ‑dhɛ tongtongdhö kö 'ka 'wɔn 'suan‑ bho‑ ‑bha.»
MAR 8:13 ꞊Dhɛ 'ö ꞊yaa‑ pö "dhʋ̈, 'yö ‑da "kplagɔnë 'gü, 'yö‑ ‑nu to 'ö "yi ‑kan 'zü ‑deewo 'ö dho "yi ꞊taama.
MAR 8:14 ‑A ‑nu 'dho ‑sü 'ka, 'yö‑ ‑bha ꞊klang ‑nu ‑zʋ ‑yö bhɔ 'bluu‑ 'sü ‑wɔn 'ka, 'sa 'ö gun "dhʋ̈ kö 'bluu‑ bhɛ do ꞊në‑ ‑nu ‑gɔ "kplagɔnë 'gü mü.
MAR 8:15 ꞊Dhɛ 'wo ‑da zian ‑ta, 'yö Yesu ‑yö ‑dhio dɔ‑ ‑nu ‑ta 'ö‑ pö: «‑Ka ka ‑dɩ 'kun ꞊gɔng 'ö Edhodö waa‑ Fadhiziɛn ‑nu ‑gɔ bha‑ ‑gɔ!»
MAR 8:16 ‑A pö 'ö‑ wo "dhʋ̈ bha, 'yö ‑kë ‑nu 'gü ꞊dhɛ ‑yö ‑wɩ 'bluu‑ ꞊në‑ 'ka, 'yö 'wo ‑ya ‑a pö ‑sü ‑bha wo 'ko ‑dhɛ ꞊dhɛ: «‑Yö kë 'ö‑ wo ꞊dhɛ 'bluu‑ 'yaa kwa ‑gɔ bha 'yö‑ pö sië "dhʋ̈ bha.»
MAR 8:17 ꞊Dhɛ 'ö Yesu ꞊yaa‑ 'wɔn dɔ ꞊dhɛ ‑wa pö sië "dhʋ̈, 'yö‑ pö‑ ‑nu ‑dhɛ 'ö‑ pö: «Ka ka ‑zʋ ‑gɔn "dhʋ̈ ‑më ‑wɔn 'gü? 'Kii kë 'wɔn 'gü ma ‑mɛ ꞊në‑ 'ka ꞊kö 'yö dhiang 'kö 'a‑ zë bha 'kii‑ 'gü ma ‑ee?
MAR 8:18 "Ɛɛn ka zuë" ꞊dede ꞊në "glɔɔglɔ "dhʋ̈, 'yö ka "yan 'dhö 'dhö, "kɛɛ 'yö 'kaa ‑dhɛ yö, "ɛɛn 'zü 'yö ka "tʋ 'dhö 'dhö, "kɛɛ 'yö 'kaa 'wɔn ma "dhʋ̈ bha ‑ee? "Ɛɛn ka ‑zʋ bhɔ ‑dhɛ ꞊në ‑së ꞊dedewo "dhʋ̈ bha ‑ee?»
MAR 8:19 'Yö‑ ‑nu dhɛɛ" kpɔ 'ö‑ pö: «'Bluu‑ bhɛ "sɔɔdhu 'a mɛ "gblü "sɔɔdhu "dhiʋ̈ gba‑ 'ka 'nu bha, ‑a töö ‑yan ꞊dhɛ ꞊në kë to?» 'Yö 'wo‑ ‑yɔ bɔ 'wo‑ pö: «‑A töö ‑yan ‑kaɔng do ga ꞊plɛ.»
MAR 8:20 'Yö‑ ‑nu dhɛɛ" 'bha kpɔ 'ö‑ pö: «'Yö‑ "saɔplɛ 'dhɛ 'a mɛ "gblü ‑yiisiö "dhiʋ̈ gba‑ 'ka 'zü bha ꞊wɛ, ‑a töö ‑yan ꞊dhɛ ꞊në kë to?» 'Yö 'wo‑ ‑yɔ bɔ 'wo‑ pö: «‑A töö ‑yan "saɔplɛ.»
MAR 8:21 'Yö‑ ‑nu dhɛɛ" kpɔ 'ö‑ pö: «'Kii‑ 'gü ma ꞊kö yö ‑zë 'bha 'gü ‑ee? (‑Yö ‑kë ka 'gü ꞊dhɛ a ‑wɩ 'bluu‑ ꞊në‑ 'ka ‑ee?)»
MAR 8:22 'Yö 'wo dho 'wo ꞊loo Bɛsaida ‑pö 'gü. 'Yö 'wo nu "yanwlümɛ do 'ka Yesu ‑dhɛ, 'yö 'wo ꞊bhɛa‑ ‑dhɛ kö ‑yö ö ‑kɔ pa‑ 'ka kë "dhʋ̈ kö ‑yö kë "klʋ̈ʋ̈klʋ̈.
MAR 8:23 'Yö ö ‑kɔ ‑da ꞊kwɛɛ‑, 'yö go‑ 'ka 'plöö 'yö dho‑ 'ka "saan ‑gɔ ‑bha. 'Yö ö "dhidhi ‑ziö ‑a "yan "dhiʋ̈, 'yö ö ‑kɔ ‑ya ‑a "yan ‑ta, 'yö‑ dhɛɛ" kpɔ 'ö‑ pö: «I ‑dhɛ yö sië ‑ee?»
MAR 8:24 'Yö 'mɛ bha 'ö ‑dhɛ ‑ga zuudhö, 'yö‑ pö: «꞊Iin, a mɛ "bhɩɩ‑ ‑yö kö ‑yö "ta sië, "kɛɛ ‑yö kë n "yan 'gü ꞊dhɛ "dhü 'dhö.»
MAR 8:25 'Yö Yesu ‑yö ö ‑kɔ kpa 'zü ‑deewo "yan "dhiʋ̈, ꞊dhɛ 'ö ö ‑kɔ bho mü, 'yö 'mɛ bha 'ö ‑dhɛ ‑ga 'zü zuudhö, 'yö‑ "yan 'gü 'dhö ‑pʋ, 'yö pë ꞊gban yö 'kpakpadhö ‑së 'ka.
MAR 8:26 'Yö Yesu ‑ya pö‑ ‑dhɛ ‑yö 'to mü kö ‑yö 'dho ö ‑gɔ 'kɔɔdhö, 'yö‑ pö‑ ‑dhɛ: «‑Bhö 'dho, 'bha 'dho ‑da 'plöö 'zü!»
MAR 8:27 Yi do 'ka kö Yesu waa‑ ö ‑bha ꞊klang ‑nu ‑wo 'dho sië 'pödhɛ 'wo‑ ‑dhɛ Fidhipö ‑bha Sezadhe ‑pö ‑nu bha‑ ‑nu 'gü, 'yö‑ ‑nu dhɛɛ" kpɔ zian 'ka 'ö‑ pö: «Ka‑ ‑ma mɛ ‑nu ‑ta ꞊dhɛ de suu ‑mü n 'ka?»
MAR 8:28 'Yö 'wo‑ ‑yɔ bɔ‑ ‑gɔ 'wo‑ pö: «Mɛ 'bha ‑nu ‑wa ‑pö Zan Mɛzumɛ ‑mü i 'ka, 'yö‑ mɛ 'bha ‑nu ‑wa pö Atanna ‑wʋdhiʋ̈loomɛ Edhi ('ö gun yi 'bha 'ka bha yö) ‑mü i 'ka, kö mɛ 'bha ‑nu ‑wo pö sië 'pö ‑a mɛ 'dhɛ 'wo gun yi 'bha 'ka 'pö bha‑ mɛ do ‑mü i 'ka.»
MAR 8:29 ꞊Dhɛ 'wo‑ pö "dhʋ̈ 'dɔɔndhö, 'yö‑ pö‑ ‑nu ‑dhɛ: «Yö ka ‑zë ꞊wɛ? Ka ka ‑bha ‑pö 'gü ꞊dhɛ?» 'Yö Piɛdhö ‑ya ‑yɔ bɔ‑ ‑gɔ 'ö‑ pö: «'Mɛ 'ö Atanna ‑ya ‑ya 'ö‑ ‑wɔn "plüün bho bha, yö ‑mü i 'ka.»
MAR 8:30 'Yö ‑dhio dɔ‑ ‑nu ‑ta glɔglɔdhö 'ö‑ pö 'wa 'dho‑ pö mɛ "wɛɛwɛɛ 'bha ‑dhɛ "dhʋ̈.
MAR 8:31 ‑Yö ‑zun ö ga ‑wɔn waa‑ ö ‑bö ‑wɔn ‑dhiang zë ‑sü ‑bha ö ‑bha ꞊klang ‑nu ‑dhɛ "tʋ̈ng bha ꞊në‑ 'gü 'ö‑ pö: «‑A ‑dhɛa ‑bha ꞊dhɛ mang Mɛgbömɛ 'a sëë bho ꞊dedewo, kö ‑kwɛagbö ‑nu 'wo Izraɛdhö ‑sɛ 'gü waa‑ "saabhomɛ ‑nu ‑gɔmɛ ‑nu waa‑ 'tɔnggɔmɛ ‑nu ‑wo wo ‑kɔ "kan n "dhiʋ̈, kö ‑wo n zë, "kɛɛ 'ma ga a ‑dho ‑bö ‑a ‑dhɛkpaɔyi ‑yaaga ‑naa bha‑ 'ka.
MAR 8:32 ‑Yö ‑gun dhiang ‑nu bha‑ zë sië‑ ‑nu ‑dhɛ "puu 'ka. 'Yö Piɛdhö ‑ya ‑dhɛ ꞊plɛ 'gü, 'yö ‑ya ‑dɔn ‑bho 'ka ‑sü ‑bha (‑a pö 'ö‑ wo "dhʋ̈ bha‑ ‑wɔn 'gü).
MAR 8:33 "Kɛɛ 'yö Yesu ‑yö ꞊slëë ö 'gü 'yö ö ‑bha ꞊klang ‑nu ‑ta ‑ga, 'yö ꞊gbla Piɛdhö ‑ta 'ö‑ pö: «'Go n "sɔɔ bha, Sɔtraan! ‑A ‑gɛn ‑mü ꞊dhɛ mɛbhɩɩdhe zuëga ꞊në i ‑gɔ, 'wɔn 'dhɛ 'kö go Atanna "piʋ̈ ‑a 'bha 'yaa 'dho i ꞊gbin‑.»
MAR 8:34 ꞊Dhɛ 'ö ö bo‑ ‑pö "dhʋ̈ ‑sü 'ka, 'yö mɛ kpö 'wo gun‑ ꞊keng‑ bha‑ ‑nu ‑dhɛ, waa‑ ‑bha ꞊klang ‑nu 'dhö, 'yö‑ pö‑ ‑nu ‑dhɛ: «Mɛ "ʋʋ mɛ 'ö‑ "piʋ̈ ꞊dhɛ 'ö bɔ n 'ka, ‑a ‑mɛ ‑yö bo ö ‑dɩ 'ka n ‑wɔn 'gü, kö ‑yö saan" ꞊dhɛ ‑kɔ 'a ꞊saan‑ 'ka ‑a 'dhö.
MAR 8:35 ‑A ‑gɛn ‑mü ꞊dhɛ 'mɛ 'ö yaa‑ ‑pö 'ö ö ‑dɩ dha, ‑a ‑mɛ ‑gɔ ‑dho 'to‑ 'gü, "kɛɛ mɛ 'ö bo ö ‑dɩ 'ka n ‑wɔn waa‑ 'wɔn ‑taɔng ‑së ‑wɔn 'gü, ‑yö ‑dho dha.
MAR 8:36 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë ꞊dhɛ mɛ ꞊ya pë "pɛpɛ 'ö "kpʋng ꞊taa‑ ꞊gban ꞊slɔɔ, "kɛɛ kö‑ 'nii‑ ‑zë ‑yö ꞊dhɛng, 'dhang 'ö 'yii‑ bho n "dhiʋ̈ bha‑ ‑wɔn 'gü, kö‑ ‑tosɛa kë ‑gɛn ꞊në kë ‑kë ‑më 'ka?
MAR 8:37 ‑Më ꞊në dho ꞊slɔɔ mɛbhɩɩdhe ‑gɔ kö ‑yö ö 'nii‑ ‑gɔ ‑ta 'dhɔ‑ 'ka Atanna ‑gɔ?»
MAR 8:38 'Yö‑ pö: «‑A pö 'a‑ wo 'zü "dhʋ̈ bha‑ ‑gɛn ‑mü ꞊dhɛ mɛ "ʋʋ mɛ 'ö dho 'yiʋ̈‑ kë n ‑wɔn 'ka, "ɛɛn 'ö dho 'yiʋ̈‑ kë n ‑wʋ "dhiʋ̈ ꞊loo ‑sü 'ka 'mɛ ꞊wa "kan Atanna ‑bha zian ‑bha 'ö ꞊wa kë ꞊dhɛ dhebhɔ 'ö ꞊ya 'go gwaan‑ bha 'ö ‑zua zë sië‑ 'dhö, 'ö 'wɔn yaa ꞊në‑ ‑nu ‑bhöpë 'ka ya‑ ‑nu ‑bha, mang Mɛgbömɛ a ‑dho 'yiʋ̈‑ kë 'pö‑ ‑mɛ ‑nu 'tɔ ‑ya n ‑bha ‑sü 'ka yi 'a dho nu‑ 'ka n Dë ‑bha mɛdhɛ ‑kwi 'gü kö‑ ‑bha "kië ‑nu 'wo ‑ya ‑sü 'ka‑ ‑bha ‑ya 'gü bha ‑wo n ꞊keng‑ bha‑ 'ka.
MAR 9:1 ꞊Dhɛ 'ö ö bo‑ ‑pö "dhʋ̈ ‑sü 'ka, 'yö go mü 'zü 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ 'mɛ 'ka ma bha mɛ 'bha ‑nu ‑wo ka kpö 'gü 'wii 'dho ga kö 'wii Atanna ‑bha ‑gblüdëdhɛ 'a "wɩ sië‑ 'ka bha‑ nu ‑dhɛ yö faan 'gü.
MAR 9:2 ꞊Dhɛ 'ö ‑dhɛkpaɔyi "saɔdo ꞊ya ziö, 'yö Yesu ‑yö Piɛdhö 'dhö, Zakö 'dhö, Zan 'dhö, ‑a ‑nu ‑da ö ꞊keng‑, 'yö wɛng‑ ‑nu 'wo ‑ziö 'wo dho ‑tɔn ꞊gblɛɛn 'bha ꞊gbin‑, kö mɛ "wɛɛ 'bha 'yaa‑ ‑nu "piʋ̈ mü. 'Yö ‑gla ‑a ‑nu "yaan.
MAR 9:3 'Yö sɔ 'ö gun‑ ‑bha bha‑ "yan 'dhö zun bhɔ ‑sü ‑bha, 'ö dɔ mü kö "flʋ̈ 'ö‑ wo sië kö‑ ‑zɔn 'ka ‑pë 'bhaa 'dhö "kpʋng ꞊taa 'zü.
MAR 9:4 'Wo dho "kan wo ‑ta kö Edhi waa‑ Moizö ('ö ꞊wa ga 'nu yi 'bha 'ka bha ꞊wa 'go dhang‑ 'gü ꞊wa nu), kö waa‑ Yesu ‑nu ‑wo dhiang zë sië.
MAR 9:5 'Yö Piɛdhö ‑ya pö Yesu ‑dhɛ 'ö‑ pö: «N Dëmɛ, ‑dhɛ 'ö ya ‑yö ‑së "dhɛ! 'Kwa ‑ya yö ‑yö ‑dho kë ‑së ꞊zɔɔ ‑wa! ‑Bhö dɔ kö 'yi bɔɔ" ‑yaaga dɔ kö‑ do‑ kë i ‑bha 'ka, kö‑ do‑ kë Moizö ‑bha 'ka, kö‑ do‑ kë Edhi ‑bha 'ka ‑dhe.»
MAR 9:6 ‑A pö 'ö Piɛdhö ‑ya wo "dhʋ̈ bha‑ "sɩ 'yaa gun‑ ‑dhɛ. ‑Yö "suʋ̈ ‑ziisü 'ö ‑da ‑a ‑nu 'gü 'wɔn bha‑ 'gü bha ꞊në‑ "dhiʋ̈ ‑dhiang zë.
MAR 9:7 'Wo dho "kan 'zü wo ‑ta kö "dhuu ꞊ya ‑ya ‑a ‑nu ‑ta ‑susudhö. 'Yö Atanna ‑yö bɔ "dhuu bha‑ 'gü 'ö dhiang zë‑ ‑nu ‑dhɛ 'ö‑ pö: «N Gbö (do 'ö n ‑gɔ) 'yö ya, ‑a ‑dhɔ 'ö n ‑kë ‑a "sinma 'yaa 'dhö, ‑ka ka "tʋ 'to‑ ‑wʋ ‑bha kö 'ka‑ ꞊bhlëë ‑ya!»
MAR 9:8 'Wo dho "kan 'zü wo ‑ta 'bha wo kö Yesu yöö do ꞊në ꞊ya 'to‑ ‑nu "piʋ̈ mü.
MAR 9:9 ꞊Dhɛ 'wo go sië ‑tɔn ꞊gbin‑ 'wo lɔɔ‑ sië, 'yö ‑dhio dɔ‑ ‑nu ‑ta 'ö‑ pö 'wa 'dho 'wɔn 'wo‑ ‑dhɛ yö bha‑ ‑gɛn dɔ mɛ 'bha ‑mɛ 'bha ‑dhɛ ‑yö 'to‑ 'ka "dhʋ̈ ‑yö zun‑ 'ka yi 'ö yöö Mɛgbömɛ 'ö dho 'go‑ 'ka ga 'gü 'ö ‑bö bha‑ ‑bha.
MAR 9:10 ‑A pö 'ö‑ wo "dhʋ̈ bha, ‑yö ‑to ‑nu "yaan, "kɛɛ kö‑ 'dhɛ 'kö zun‑ ‑go ga 'gü kö ‑yö ‑bö ‑wɔn ‑bha bha 'waa‑ 'gü ma, kö ‑wo wo 'ko dhɛɛ" 'kpɔ sië 'wo‑ pö: «꞊Yaa‑ pö ꞊dhɛ 'pɛ 'dhö kö ꞊ya ‑pö ꞊dhɛ?»
MAR 9:11 'Yö‑ ‑bha ꞊klang ‑nu ‑wa dhɛɛ" kpɔ 'wo‑ pö: «"Kɛɛ ‑a pö 'ö 'tɔnggɔmɛ ‑nu ‑wa wo 'sa ꞊dhɛ Edhi ‑dho nu, 'yö Atanna ‑bha ‑Yamɛ gun ‑na nu ya‑ 'klɔɔ‑ ‑mü ‑më 'ka?»
MAR 9:12 'Yö‑ ‑yɔ bɔ‑ ‑nu ‑gɔ 'ö‑ pö: «Tɛan‑ ‑mü, Edhi dho nu ꞊kö ‑blɛɛsü kö ‑yö Atanna ‑wɔn ꞊gban zun ö zun ‑dhɛ 'gü "pɛɛpɛdhö ‑së 'ka, ('yö‑ ‑bha ‑Yamɛ ‑yö gun ‑na nu). "Kɛɛ ‑wʋ 'ö ‑bɛn zë ‑sü 'ka 'pö Atanna ‑gɔ 'sëëdhɛ 'gü ꞊dhɛ: ‹‑Wo ‑dho ꞊bhlëë bho Mɛgbömɛ ‑bha 'ö 'wo‑ ‑wëë ‑kë wo "yan ‑ziö 'gü 'ka› bha‑ 'klɔɔ‑ ‑mü ‑më 'ka?
MAR 9:13 A‑ ‑pö ka ‑dhɛ ꞊dhɛ Edhi ꞊ya nu 'nu, 'yö 'wɔn 'ö ‑dhi ‑nu ‑dhɛ ꞊waa‑ wɔ‑ ‑ta ꞊dhɛ ‑kɔ 'ö ‑bɛn zë ‑sü 'ka‑ 'ka Atanna ‑gɔ 'sëëdhɛ 'gü ‑a 'dhö.» Edhi 'ö Yesu ‑yö ‑wɩ 'ka "dhʋ̈ bha ꞊në Zan Mɛzumɛ 'ka.
MAR 9:14 ꞊Dhɛ 'wo dho 'wo ꞊loo‑ ‑bha ꞊klang ‑nu 'dhɛ 'wo to ‑tɔn ‑gɛnngdhö bha‑ ‑nu "sɔɔ, ‑wo ‑kpan mɛ kpö 'kpii‑ ‑bha kö ꞊wa ꞊klëën‑ ‑nu ‑zü, kö‑ ‑bha ꞊klang ‑nu bha waa‑ 'tɔnggɔmɛ ‑nu ‑wo zaɔdhe ‑da sië wo "kwëë.
MAR 9:15 Mɛ kpö bha ‑wo Yesu ‑yö ‑kan 'gü 'ka. ꞊Dhɛ 'wo‑ yö, 'yö 'wo dɔ ‑bɛang ‑bha 'wo dho‑ ꞊tua bho ‑dhɛ 'gü.
MAR 9:16 ꞊Dhɛ 'ö dho 'ö ꞊loo ö ‑bha ꞊klang ‑nu bha‑ ‑nu ‑dhɛ 'gü, 'yö‑ ‑nu dhɛɛ" kpɔ 'ö‑ pö: «‑Më ‑wɔn ꞊në kɛng‑ ‑nu 'ka‑ zaɔdhe ‑da sië?»
MAR 9:17 'Yö mɛ do‑ bɔ mɛ kpö bha‑ 'gü 'ö‑ ‑yɔ bɔ 'ö‑ pö: «N Dëmɛ, ma ꞊në "yina yaa 'dhö n gbö ya‑ 'gü, 'yö 'yaa "wɩ, 'yö 'a‑ sü 'a nu‑ 'ka i "piʋ̈.
MAR 9:18 "Yina 'ö‑ 'gü bha ꞊ya ‑da ‑ta ‑dhɛ 'ö‑ 'gü, 'yö‑ ‑zuö "sia‑, 'yö‑ "dhidhi "vuu 'dhö ‑ya ‑kpɔkpɔdhö kö ‑yö ö "sɔn "dhiʋ̈ ‑bhö sië, ꞊ya 'go mü 'yö dɔ zɛɛndhö. ꞊Dhɛ 'a nu 'ö 'mii i yö, 'yö 'a ꞊bhɛa i ‑bha ꞊klang ‑nu ‑dhɛ kö ‑wo "yina yaa bha‑ kë, "kɛɛ 'wii ꞊mɔɔ‑ ‑bha. ('Wɔn 'ö 'yi‑ zɔadhe ‑da sië bha 'yö bha).»
MAR 9:19 ꞊Dhɛ 'ö ꞊yaa‑ pö "dhʋ̈, 'yö Yesu ‑yö ‑dɔn bho ö ‑bha ꞊klang ‑nu 'ka 'ö‑ pö: «'Mɛ 'ö ‑zʋ ‑yö Atanna ‑dhɛ ‑sü 'yaa ka ‑gɔ ya, ka ‑dho 'dhang bho n "dhiʋ̈ ‑më yi ꞊në‑ 'ka, "ɛɛn ‑yö ka 'gü ꞊dhɛ a ‑dho 'to ka "piʋ̈ ‑kpɛawo, 'ö 'a ka ‑kwɛɛ bun 'ö‑ "dhiʋ̈todhɛ 'yaa kë ‑ee?» 'Yö‑ pö: «‑Ka nu‑ 'në 'ka n ‑dhɛ yö!» 'Yö 'wo nu‑ 'ka.
MAR 9:20 'Në bha 'ö Yesu yö ‑dhɛ do 'ö‑ 'gü ‑yö ‑to mü 'ö "yina bha 'ö ‑da 'gü, 'yö zun ‑dɩ ‑zë ‑sü ‑bha "gbɩɩ‑ 'ka, 'yö ‑pö, 'yö zun glün‑ ‑sü bha ꞊dhɛ mɛ‑ sɛɛ" ‑be ‑kë kö‑ "dhidhi "vuu‑ bhɔ sië.
MAR 9:21 'Yö Yesu ‑ya dë dhɛɛ" kpɔ 'ö‑ pö: «'Wɔn ya 'ö i gbö ꞊slɔɔ ‑a ‑kwɛ ꞊ya kë ꞊dhɛ?» 'Yö‑ ‑yɔ bɔ‑ ‑gɔ 'ö‑ pö: «‑A zü‑ ‑bho kö ‑yö 'në 'ka.
MAR 9:22 "Ta ꞊në ‑bhö ‑a wo yi ‑dhɛ, "kɛɛ ꞊ya kë ‑nu wo ꞊sië ‑zianwo "yina bha ‑yö ma 'në bha‑ ‑zuö pɛng "dhiʋ̈ ‑dhɛ ‑nu waa‑ "yi ꞊bhaa ‑dhɛ ‑nu ꞊gban 'gü kö 'ö‑ zë. ꞊Ya kë ꞊dhɛ yi ‑ta 'kun "sɩ ‑zë ꞊ya kë i ‑dhɛ kö ‑bhö dɔ ꞊në wo "gbɩɩ‑ kö yi ‑wëë ‑yö i kë kö 'i "ta yi ‑dhɛ!»
MAR 9:23 'Yö Yesu ꞊ya ‑yɔ bɔ‑ ‑gɔ 'ö‑ pö: «I ‑ta 'kun "sɩ ‑kë n ‑dhɛ ‑wɔn ꞊në 'i‑ pö ‑ee? Ma ‑zë i dhɛɛ" ꞊në maa‑ 'kpɔ ꞊dhɛ: ‑Zʋ ‑yö Atanna ‑dhɛ ‑sü ‑yö i ‑gɔ ‑ee? ‑A ‑gɛn ‑mü ꞊dhɛ mɛ "ʋʋ mɛ 'ö ö ‑zʋ yö Atanna ‑dhɛ ‑a ‑mɛ ‑fië ‑bha 'wɔn 'yaa 'dhö.»
MAR 9:24 'Yö 'në dë bha 'ö to 'ö ‑gbla 'ö‑ pö: «A 'dhang ‑bho Atanna "dhiʋ̈, "kɛɛ ma 'dhang ‑bho ‑a "dhiʋ̈ ‑sü bha 'yaa 'kpakpadhö ꞊në‑ wo. ‑Bhö n ‑ta 'kun kö ‑a "dhiʋ̈ ‑ya pa!»
MAR 9:25 ꞊Dhɛ 'ö Yesu ‑yö mɛ kpö bha‑ ‑nu yö kö ꞊wa dɔ ‑bɛang ‑bha, ‑wo nu sië ö ‑ta, 'yö ꞊gbla "yina yaa bha‑ ‑ta 'ö‑ pö: «"Yina 'i mɛ ‑kë "bhʋbhʋ 'ka 'i mɛ "tʋ wü 'i 'në ya‑ 'gü ya ma ꞊në 'a‑ pö ‑bhö 'go 'në bha‑ 'gü, 'bha 'dho, 'bha 'dho i yee kë 'i nu mü 'zü!»
MAR 9:26 'Yö "yina bha 'ö go 'në bha‑ 'gü kö ‑yö "gbla sië, kö 'në ‑yö ö ‑dɩ ‑zë sië "gbɩɩ‑ ꞊dedewo. 'Ö go mü 'yö ‑wɔ ꞊dhɛ mɛ ꞊ya ga‑ 'dhö, kö mɛ 'gbɛ ‑wa pö sië ꞊dhɛ ꞊ya ga ‑zian ꞊në‑ wo.
MAR 9:27 "Kɛɛ 'yö Yesu ‑yö ö ‑kɔ ‑da ‑a ꞊kwɛɛ‑ 'ö‑ ꞊wlü. 'Yö ꞊wlü 'ö dɔ ö ‑gɛan.
MAR 9:28 ꞊Dhɛ 'ö 'wɔn bha ꞊ya kë "dhʋ̈, 'ö Yesu ꞊ya 'dho ö ꞊yëë "dhiʋ̈, 'ö waa‑ ‑bha ꞊klang ‑nu ꞊wa 'to wo do 'ka, 'yö 'wo‑ dhɛɛ" kpɔ 'wo‑ pö: «Yi Dëmɛ, yi ‑kɔ 'ö 'yii ꞊mɔɔ "yina ya‑ kë ‑sü ‑bha ya‑ ‑gɛn ꞊në ‑më 'ka?»
MAR 9:29 'Yö‑ ‑yɔ bɔ‑ ‑nu ‑gɔ 'ö‑ pö: «‑Bhɛa Atanna ‑dhɛ ‑sü 'ö ‑sɔbhɛɛ ‑bha ꞊në "yina suu 'dhɛ 'kö bha‑ dho.»
MAR 9:30 ꞊Dhɛ 'ö ꞊ya kë "dhʋ̈, 'yö 'wo go ‑dhɛ 'dhɛ bha‑ 'gü 'wo bɔ Gadhidhe ‑sɛ 'gü, "kɛɛ 'yaa gun Yesu "piʋ̈ ꞊dhɛ mɛ 'bha ‑yö 'wɔn ꞊slɔɔ ö ‑bɔ mü ‑wɔn 'gü.
MAR 9:31 ‑A ‑gɛn ‑mü ꞊dhɛ 'ö gun "dhʋ̈ kö 'wɔn 'ö yöö kë ö 'ka bha ‑ya ‑ta "pʋ sië ö ‑bha ꞊klang ‑nu ‑dhɛ 'ö‑ pö: «‑Wo ‑dho mang Mɛgbömɛ n ꞊gbaɔ mɛ "bhɩɩ‑ ‑nu ‑gɔ 'ö 'wo n zë, "kɛɛ ꞊wa n zë "dhʋ̈, a ‑dho ‑bö ‑a ‑dhɛkpaɔyi ‑yaaga ‑naa bha‑ 'ka.»
MAR 9:32 ‑A pö 'ö‑ wo "dhʋ̈ bha‑ ‑bha ꞊klang ‑nu 'wii‑ 'gü ma ö 'klɔɔ‑ 'ka, "kɛɛ 'sa kö‑ dhɛɛ" 'kpɔ ‑sü "suʋ̈ ‑ya ‑nu 'gü.
MAR 9:33 'Yö 'wo dho "dhʋ̈ 'wo ꞊loo Kapɛɛnaɔmö ‑pö 'gü. ꞊Dhɛ Yesu ꞊ya bo ‑da ‑sü 'ka 'kɔɔdhö, 'yö ö ‑bha ꞊klang ‑nu dhɛɛ" kpɔ 'ö‑ pö: «‑Më ‑wɔn ꞊në 'ka gun‑ zaɔkpadhe ‑da sië zian ‑ta bha?»
MAR 9:34 "Kɛɛ ꞊dhɛ 'ö‑ ‑nu dhɛɛ" kpɔ "dhʋ̈, 'yö ‑dhɛa ‑yö ga‑ ‑nu ‑ta dingdhö, ‑a ‑gɛn ‑mü ꞊dhɛ 'ö gun "dhʋ̈ kö ‑duɛ 'kpii‑ ‑dhɛ 'ö dhang‑ 'gü ꞊waa‑ ‑wɔn zaɔdhe ‑da zian ‑ta kë "dhʋ̈ kö 'mɛ 'ö‑ ‑duɛ 'dhö 'kpii‑ 'wo‑ dɔ.
MAR 9:35 ꞊Dhɛ 'ö ꞊ya kë "dhʋ̈, 'yö Yesu ‑yö 'yaanu, 'yö ö ‑bha ꞊klang ‑nu ‑kaɔng do ga ꞊plɛ bha‑ ‑nu ‑dhɛ, 'yö‑ pö‑ ‑nu ‑dhɛ: «'Ö 'mɛ 'dhɛ 'ö‑ "piʋ̈ ꞊dhɛ yö ꞊në ö ‑duɛ kë 'kpii‑, ‑a ‑mɛ ‑yö ö ‑dɩ ‑da mɛ ꞊gban "pɛpɛ ꞊wlöö kö ‑yö kë mɛ ꞊gban "dhiʋ̈ ‑ziö wo ‑mɛ 'ka.»
MAR 9:36 'Yö ‑ziö 'ö ö ‑kɔ ‑da 'në 'dɛdɛ do 'gü, 'yö‑ dɔ‑ ‑nu kpö 'gü, 'yö go mü 'ö‑ sü, 'ö‑ ‑wɔ ö ‑gbe 'gü, 'yö‑ pö ö ‑bha ꞊klang ‑nu ‑dhɛ:
MAR 9:37 «Mɛ "ʋʋ mɛ 'ö yaa ö ‑kɔ ‑ya 'mɛ 'wo ꞊dhɛ 'në ‑nu ya‑ ‑nu 'dhö, ‑a mɛ do ‑zian ‑dhɛng ‑bha, ‑a ‑mɛ ‑bha kë n ‑bha 'ka ‑sü ‑wɔn 'gü, kö ‑yö ö ‑kɔ ‑ya ma ꞊në n ‑dhɛng ‑bha bha, 'sa mɛ "ʋʋ mɛ 'ö ‑kɔ ‑ya n ‑dhɛng ‑bha, kö 'yii mang do n ‑dhɛng 'kun, kö n Dë Atanna 'ö n ‑bɔ bha ꞊në 'ö ö ‑kɔ ‑ya ‑dhɛng ‑bha 'pö bha.»
MAR 9:38 ꞊Dhɛ 'ö ꞊yaa‑ pö "dhʋ̈ ꞊ya ö bo, 'yö Zan ‑ya pö‑ ‑dhɛ: «N Dëmɛ, yi ‑kpan mɛ do 'bha ‑bha yi do 'ka kö ‑yö "yina yaa kë sië mɛ ‑nu 'gü i 'tɔ 'gü "kɛɛ 'sa kö 'yaa kwa ꞊keng‑, 'yö 'yi‑ ‑kɔ bho‑ ‑bha.»
MAR 9:39 'Yö Yesu ‑ya ‑yɔ bɔ 'ö‑ pö: «"Dhabhliwɔn 'bha ꞊ya kë "dhʋ̈ ꞊taamasü 'gü, 'ka 'dho‑ ‑mɛ ‑kɔ bho‑ ‑bha, ‑a ‑gɛn ‑mü ꞊dhɛ mɛ 'ö 'wɔn suu 'ö "dhʋ̈‑ ‑kë n 'tɔ 'gü, 'yii 'dho 'go mü 'zü kö ‑yö n ‑dhiang yaa zë ö "gblʋʋ pɛng ‑sü do bha‑ ‑ta.
MAR 9:40 ‑Yö kë ka "yaan ꞊dhɛ 'mɛ 'yii dɔ kwa ‑gɔ ‑gɔn ‑yan 'gü kö ‑yö ‑bɔ kwa 'ka.
MAR 9:41 Mɛ "ʋʋ mɛ 'ö dho ka gba "yi ‑kɔɔ ‑yan do 'ka 'ka‑ mü, ka ‑bha ‑kë mang Klisi ‑mɛ ma mɛ 'ka ‑sü ‑wɔn 'gü, a‑ ‑pö ka ‑dhɛ tɛan‑ ꞊dede 'ka ꞊dhɛ ‑a ‑mɛ 'yii 'dho ꞊fië ö ꞊trɔɔn 'ka tongtongdhö.»
MAR 9:42 'Yö go mü 'ö‑ pö: «"Kɛɛ mɛ "ʋʋ mɛ 'ö dho kë 'mɛ 'wo ꞊dhɛ 'nësɛɛnnë ‑nu 'dhö 'dhang ‑bho n "dhiʋ̈ ‑sü 'gü bha‑ mɛ do ‑zian ‑bho Atanna ‑bha ziantamɛ 'ka, ‑gwë kpö 'kpii‑ do ‑kplü ‑a ‑mɛ bhɔ ‑bha ‑sü ‑zian 'wo‑ ‑mɛ ‑zuö 'ka ꞊weeyi ꞊bhaa ‑a fië‑ ‑dhö 'wɔn 'ö (Atanna) dho kë‑ ‑mɛ 'ka dhia" bha‑ ‑bha.
MAR 9:43 ‑A ‑kë "dhʋ̈ ‑sü ‑wɔn 'gü, ꞊ya kë ꞊dhɛ i ‑kɔ 'ö i "dhiʋ̈ bha ꞊ya kë i ‑da Atanna "dhiʋ̈ ‑pë 'ka, ‑bhö ‑a "kan i ‑bha. ("Tʋ̈ng 'ö 'bhii‑ kë ꞊kö‑ 'ka bha‑ 'ka). I ‑to ‑gbe "kplü 'ka ‑sü 'ö 'i ‑da 'ka Atanna ‑bha ‑tosɛa 'ö 'yaa yën ‑a 'gü ‑sü fië‑ ‑dhö i ‑gbe ꞊gban ‑to i ‑bha ‑sü 'ö 'i dho‑ 'ka ꞊geebɔɔ ‑pɛng 'ö 'yaa "dhuu ‑a 'gü ‑sü ‑bha.
MAR 9:44 [‑Dhɛ 'ö "dhʋ̈ bha bhiënë ‑nu 'wo mɛ ‑bhö mü bha 'waa ga tongtongdhö "ɛɛn pɛng 'ö mü 'yaa "dhuu].
MAR 9:45 ꞊Ya kë 'zü ꞊dhɛ i ‑gɛn do ꞊ya kë i ‑da Atanna "dhiʋ̈ ‑pë 'ka, ‑bhö ‑a bho i ‑bha. ("Tʋ̈ng 'ö 'bhii‑ kë‑ 'ka ꞊kö bha‑ 'ka). ‑A ‑gɛn ‑mü ꞊dhɛ i ‑da ‑sü 'ö ꞊niɔɔsü 'ka ‑tosɛa 'ö 'yaa yën‑ kë ‑dhɛ 'gü ‑sü fië‑ ‑dhö i ‑gɛn ꞊plɛ ꞊gban ‑to mü ‑sü 'ö 'i dho‑ 'ka ꞊geebɔɔ ‑pɛng 'gü ‑a ‑bha.
MAR 9:46 [‑Dhɛ 'ö "dhʋ̈ bha bhiënë ‑nu 'wo mɛ ‑bhö mü bha 'waa ga tongtongdhö "ɛɛn pɛng 'ö mü 'yaa "dhuu.]
MAR 9:47 I "yanga do ꞊ya kë i ‑da Atanna "dhiʋ̈ ‑pë 'ka, ‑bhö ‑a bho mü, ("tʋ̈ng 'ö 'yii i ‑da ꞊kö 'wɔn yaa 'gü bha‑ 'ka) i ‑da i "yanga do 'ka Atanna ‑bha ‑gblüdëdhɛpö 'gü ‑sü fië‑ ‑dhö i "yanga ꞊gban ꞊plɛ ‑to mü ‑sü 'ö 'i dho‑ 'ka ꞊geebɔɔ ‑pɛng 'gü,
MAR 9:48 ‑dhɛ 'ö ꞊yuun 'ö mü ꞊ya ‑da mɛ 'gü 'yaa ga tongtongdhö, "ɛɛn 'ö pɛng 'ö mü 'yaa "dhuu tongtongdhö bha‑ 'gü ‑sü ‑bha.
MAR 9:49 ‑A ‑gɛn ‑mü ꞊dhɛ Atanna ‑dho mɛ ꞊gban kwa këwɔn ‑nu "zu pɛng 'ka ꞊dhɛ ‑kɔ 'wo ꞊wee ‑da sië‑ 'ka "tʋʋ ‑bha bha‑ 'dhö.
MAR 9:50 ꞊Dhɛ 'ö "dhʋ̈, kaa ꞊wee ‑yö kë ka 'gü kö 'ka 'to ka 'ko ‑dhɛ ‑së, ‑a ‑gɛn ‑mü ꞊dhɛ mɛ ꞊gban kwa‑ 'wɔn ‑dɔ ꞊dhɛ ꞊wee bha pë ‑së ‑mü, "kɛɛ ꞊ya kë ꞊dhɛ ‑a din ꞊ya bo 'go ‑sü 'ka ‑bha, ‑më "wɛɛ 'bha ꞊në 'wo dho‑ 'sü kö ‑wa din dhi‑ 'ka 'zü ‑deewo? ꞊Ya kë "dhʋ̈ kö ‑zun "dhiʋ̈ ‑bhlɔɔ ꞊në 'yaa 'dhö 'zü bha (kö ꞊ya 'to ‑zuöpë ꞊në‑ 'ka.).»
MAR 10:1 ꞊Dhɛ 'ö Yesu ‑yö go ‑dhɛ bha‑ 'gü, waa‑ ö ‑bha ꞊klang ‑nu 'dhö 'yö ‑ziö 'ö dho Zude ‑sɛ 'gü, Zuudɛn ꞊taama. 'Yö mɛ "bhɩɩ‑ ‑yö ta gblaa‑ ‑bha 'zü ‑deewo 'wo nu‑ ‑dhɛ 'gü, 'yö zun 'zü‑ ‑nu ꞊klang kë ‑sü ‑bha Atanna ‑wɔn 'ka ꞊dhɛ ‑kɔ 'ö‑ ‑kë 'ka ‑kpɛawo ‑a 'dhö.
MAR 10:2 'Yö Fadhiziɛn 'bha ‑nu 'wo nu 'wo‑ dhɛɛ" kpɔ ‑a 'gü dan kian 'ka 'wo‑ pö: «Mɛ‑ ‑mɔɔ ‑bha 'ö mɛ ‑yö dhe bho "bü ‑ee?»
MAR 10:3 'Yö Yesu ‑ya ‑nu dhɛɛ" kpɔ 'pö 'ö‑ pö: «Moizö ‑ya ‑pö ka ‑dhɛ ꞊dhɛ ö ‑bha 'tɔng‑ 'sëëdhɛ 'ö‑ ‑bɛn zë bha‑ 'gü?»
MAR 10:4 'Yö 'wo‑ ‑yɔ bɔ 'pö 'wo‑ pö: «‑Ya ‑pö 'mɛ 'ö dho dhe bho "bü ‑yö 'sëëdhɛ kë kö ‑ya ꞊nëng ‑bha kö ‑ya bho‑ 'ka "bü.»
MAR 10:5 'Yö Yesu ‑ya pö‑ ‑nu ‑dhɛ: «‑A pö 'ö Moizö ‑ya wo "dhʋ̈ bha ‑yö ‑sü kaa‑ gɔɔgbɩɩdhɛ ꞊në‑ ‑bha,
MAR 10:6 "kɛɛ Atanna ‑zë ‑yö gɔn waa‑ dhe ꞊në‑ ‑nu ‑da "kpʋngtaadhɛ ‑da "tʋ̈ng 'gü.
MAR 10:7 Yö ꞊në‑ ‑wɔn 'gü, 'yö gɔɔn‑ dho "kan ö dhe waa‑ ö dë ‑a ‑nu ‑bha, 'yö ‑kplü ö ‑bha dhebhɔ ‑bha,
MAR 10:8 'yö mɛ ꞊plɛ bha 'wo ‑kë pë do 'ka. ꞊Ya kë "dhʋ̈ kö 'waa mɛ ꞊plɛ 'ka 'zü, kö ꞊wa kë pë do ꞊në‑ 'ka.
MAR 10:9 ‑A ‑kë "dhʋ̈ ‑sü ‑wɔn 'gü, ‑a ‑dhɛ 'yaa‑ ‑bha kö 'pë 'ö Atanna ꞊yaa‑ ꞊nëng 'kwëë‑ bha mɛ "bhɩɩ‑ ‑zë ‑ya "kan 'kwëë‑.»
MAR 10:10 ꞊Dhɛ 'ö waa‑ ‑bha ꞊klang ‑nu 'wo dho 'wo ꞊loo wo ꞊yëë "dhiʋ̈, 'yö 'wo‑ dhɛɛ" ‑dee 'bha kpɔ 'zü 'wɔn do bha‑ 'ka.
MAR 10:11 'Yö‑ ‑yɔ bɔ‑ ‑nu ‑gɔ 'ö‑ pö: «Mɛ "ʋʋ mɛ 'ö ö ‑bha dhe bho "bü 'ö‑ ‑dee sü, kö‑ ‑mɛ ‑yö 'wɔn yaa ꞊në ‑kë ö ‑bha dhebhɔ ‑blɛɛsü 'ka bha, "kɛɛ kö ‑yö ‑da ꞊në wo mɛ ‑nu ‑bha dhe "piʋ̈ bha.
MAR 10:12 ꞊Ya kë 'pö ꞊dhɛ kö dhebhɔ ‑yö 'go gwaan‑ ‑bha kö ‑yö gwaan‑ "wɛɛ 'kpɔ, kö ‑yö ‑zua ꞊në‑ zë.
MAR 10:13 ꞊Dhɛ 'ö ꞊ya kë "dhʋ̈, 'yö 'wo nu 'në 'sɛɛnnë 'bha ‑nu 'ka Yesu ‑dhɛ, kë "dhʋ̈ kö ‑yö ö ‑kɔ 'pa‑ ‑nu 'ka kö ‑yö 'dhuë‑ kë‑ ‑nu ‑bha, "kɛɛ 'yö‑ ‑bha ꞊klang ‑nu 'wii "wɩ‑ ‑bha, 'yö 'wo zun pɛng ꞊wɛnng 'mɛ 'wo bha‑ ‑nu "yan 'gü ‑sü ‑bha.
MAR 10:14 ꞊Dhɛ 'ö Yesu ‑ya ‑dhɛ yö, 'yii dhi‑ ‑dhɛ, 'yö‑ pö ö ‑bha ꞊klang ‑nu ‑dhɛ: «'Ka 'dho 'në 'sɛɛnnë ‑nu kë n ‑bha, ‑kaa ‑nu 'to mü kö ‑wo nu n "piʋ̈, ‑a ‑gɛn ‑mü ꞊dhɛ Atanna ‑bha ‑gblüdëdhɛ bha ‑yö 'mɛ 'ö‑ ‑nu ‑bha 'wɔn 'gü ma ‑kɔ 'dhö ꞊dhɛ ‑a ‑nu 'dhö ꞊në‑ ‑nu ‑bha 'ka.»
MAR 10:15 'Yö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ 'mɛ 'yii "wɩ Atanna ‑bha ‑gblüdëdhɛ ‑wɔn ‑bha ꞊dhɛ 'në 'sɛɛnnë ‑nu ‑wɩ 'wɔn ‑bha ‑kɔ 'dhö, 'yii 'dho ‑da mü tongtongdhö.
MAR 10:16 ꞊Dhɛ 'ö‑ pö "dhʋ̈, 'yö 'në ‑nu bha‑ ‑nu ‑wɔ ö ‑gbe 'gü 'do 'do, 'yö ö ‑kɔ ‑ya ‑nu ‑ta, 'yö 'dhuë‑ ‑kë ‑nu ‑bha.
MAR 10:17 ꞊Dhɛ 'ö Yesu ‑yö go ‑dhɛ bha‑ 'gü 'ö ‑da zian ‑ta, 'yö gɔndë do ‑yö dɔ ‑bɛang ‑bha 'yö nu 'yö zun‑ ‑dhɛ ö kpiö 'gü, 'yö‑ dhɛɛ" kpɔ 'ö‑ pö: «N Dëmɛ "klʋsësü, a ‑dho ‑a kë ‑kɔ ‑kë ꞊dhɛ kö 'a ꞊sii 'ö 'yaa yën 'ö Atanna "piʋ̈ bha‑ ‑slɔɔ?»
MAR 10:18 'Yö Yesu ‑ya pö‑ ‑dhɛ: «I n ‑dhɛ "klʋsëmɛ ‑më ‑wɔn 'gü? "Klʋsëmɛ 'bha 'yaa 'dhö kö 'yii kë Atanna ‑zë 'ka.»
MAR 10:19 'Yö go mü 'ö‑ pö: «Mangga 'tɔng‑ 'kö ‑bɛn zë ‑sü 'ka Atanna ‑gɔ 'sëëdhɛ 'gü ꞊dhɛ: ‹'Bha 'dho ‑zua zë, 'bha 'dho mɛ zë, 'bha 'dho ꞊kwaan bho, 'bha 'dho ꞊sua ‑ya mɛ ‑nu ‑bha, 'bha 'dho kwɛɛ" yaa ‑za bho mɛ 'bha ‑bha, "ɛɛn ü dhe waa‑ i dë ‑a ‑nu ꞊bhlëë ‑ya› bha, i yö ‑zë dɔ ‑kɛɛ?»
MAR 10:20 'Yö gɔndë bha ‑ya ‑yɔ bɔ 'ö‑ pö: «‑A 'dhɛ 'kö bha yö ‑zë n kë ‑pë ‑mü 'a go‑ 'ka n 'nëdhe 'gü, n Dëmɛ.»
MAR 10:21 ꞊Dhɛ 'ö Yesu ‑ya ‑ga zuudhö, 'yö‑ "dhia ‑yö ma‑ 'gü, 'yö‑ pö‑ ‑dhɛ: «‑Yö ("dhʋ̈ tɛan‑ 'ka, "kɛɛ) pë do ꞊në‑ këwɔn ꞊ya 'to i ‑bha, ‑bhö 'dho kö pë "pɛpɛ 'ö i ‑gɔ 'i‑ ꞊gban "dhɔɔ dɔ, kö 'i‑ ‑naɔ ꞊gbaɔ "flɛɛmɛ ‑nu ‑gɔ. Atanna ‑dho ‑a ‑gɔ "yɔɔ dɔ i ‑gɔ ꞊naɔ 'dhɛ 'ö dhang‑ 'gü ‑a 'ka, 'bha 'go mü kö 'i nu 'i ‑da n ꞊keng‑.
MAR 10:22 "Kɛɛ ‑a pö 'ö Yesu ‑ya wo 'mɛ bha‑ ‑dhɛ "dhʋ̈ bha 'yö ma‑ 'ka, 'yö ö ‑bha 'dho wo ö wë ‑ta ‑sɛa 'ka, ‑a ‑gɛn ‑mü ꞊dhɛ ꞊naɔ 'ö gun‑ ‑gɔ ‑a ‑dhiang 'yaa zë, (‑a ‑wɔn 'gü, 'yaa gun‑ "piʋ̈ ꞊dhɛ 'ö ö ‑kɔ bho‑ 'gü).
MAR 10:23 ꞊Dhɛ 'ö 'mɛ bha ꞊ya 'dho, 'yö Yesu ‑yö ‑dhɛ ‑ga ö ‑züzü, 'yö‑ pö ö ‑bha ꞊klang ‑nu ‑dhɛ: «꞊Naɔmɛ ‑nu ꞊dede ‑zë ‑a ‑nu ‑da Atanna ‑bha mɛ ‑nu kpö 'gü ‑dhɛ ‑dho kë 'ya‑!»
MAR 10:24 ‑A pö 'ö Yesu ‑ya wo "dhʋ̈ bha, 'yö‑ 'wɔn ‑ya ‑bha ꞊klang ‑nu kɔn. 'Yö go mü 'yö‑ ‑ta ‑pʋ ‑a ‑nu ‑dhɛ 'ö‑ pö: «N bhang ‑nu, a‑ ‑pö ka ‑dhɛ ꞊dhɛ ‑da Atanna ‑bha ‑gblüdëdhɛ 'gü ‑dhɛ ‑yö 'ya‑!
MAR 10:25 ‑Yɔɔnmɛa ‑bha ‑bɔ ‑sɛdha ‑yɛ 'ka ‑sü ‑yö "gbɩɩ‑, "kɛɛ ꞊naɔmɛ ‑bha ‑da Atanna ‑bha ‑gblüdëdhɛ 'gü ‑sü ‑yö "gbɩɩ‑ 'ö ‑ziö yö ‑zë ‑ta.»
MAR 10:26 'Yö‑ 'wɔn ‑ya ‑bha ꞊klang ‑nu kɔn 'zü 'ö ziö mü, 'yö 'wo ‑ya wo 'ko ‑nu dhɛɛ" 'kpɔ ‑sü ‑bha 'wo‑ pö: «Yö ‑zë ꞊ya kë "dhʋ̈ 'sa kö 'dee dho dha?»
MAR 10:27 'Yö Yesu ‑ya ‑nu ‑ga 'ö‑ pö: «Mɛ "bhɩɩ‑ ‑nu ‑zë 'waa ꞊mɔɔ‑ ‑bha, "kɛɛ Atanna ‑zë ‑yö ‑mɔɔ ‑bha, ‑a ‑gɛn ‑mü ꞊dhɛ Atanna ‑zë ‑fiëbhawɔn 'yaa 'dhö.»
MAR 10:28 'Yö Piɛdhö ‑ya pö‑ ‑dhɛ: «'Yö 'mɛ 'kö yi ‑zë 'ya "kan yii‑ pë ꞊gban "pɛpɛ ‑bha 'ya ‑da i ꞊keng‑ yö ꞊wɛ?»
MAR 10:29 'Yö Yesu ‑ya ‑yɔ bɔ‑ ‑gɔ 'ö‑ pö: «A‑ ‑pö ka ‑dhɛ kö ‑yö 'to ka "yaan ꞊dhɛ mɛ "ʋʋ mɛ 'ö zë n ‑wɔn ‑dhɛ, "ɛɛn 'ö zë 'wɔn ‑taɔng ‑së 'ö go Atanna ‑a ‑wɔn ‑dhɛ, 'ö go ö ‑gɔ 'kɔɔdhö, "ɛɛn 'ö ‑kan ö dheebhang gɔɔn‑ ‑nu, "ɛɛn dhong ‑nu, ö dë waa‑ ö dhe "ɛɛn ö ‑bha 'në ‑nu waa‑ ö ‑bha 'bhlaa‑ ‑nu ‑bha,
MAR 10:30 ‑a ‑mɛ ‑dho ‑a ‑gaɔ këng do ꞊slɔɔ "kpʋng ꞊taa yö, 'kɔ ‑nu 'ö‑ ‑mɛ ‑ya to bha oo, "ɛɛn ‑a dheebhang dhong ‑nu, gɔɔn ‑nu 'ö‑ ‑nu to oo, ‑a dhe ‑nu oo, ‑a ‑bha 'në ‑nu "ɛɛn ‑a ‑bha "sɛ ‑nu 'ö‑ to bha, ‑yö ‑dho ‑a "wɛɛ ꞊slɔɔ, "kɛɛ ‑yö ‑dho ‑a ꞊slɔɔ "yënng ꞊gbaɔn 'gü kö ‑wa ‑wëë ‑kë wo sië n ‑wɔn 'gü. "Kɛɛ ꞊ya 'go mü, ‑a ‑mɛ ‑dho ꞊sii 'ö 'yaa yën 'ö Atanna "piʋ̈, ‑a ‑slɔɔ ‑a ‑dhɛkpaɔ dhia" saan 'ka.
MAR 10:31 "Kɛɛ a‑ ‑pö ka ‑dhɛ ꞊dhɛ 'mɛ 'wo "dhiʋ̈, "tʋ̈ng ya‑ 'gü bha‑ mɛ 'gbɛ‑ ‑dho bɔ ꞊taama, 'ö 'mɛ 'wo gun ꞊taama bha‑ mɛ 'gbɛ ‑wo bɔ "dhiʋ̈.»
MAR 10:32 ꞊Dhɛ 'ö ꞊wa ‑da 'zü zian ‑ta 'wo 'dho sië Zedhizadhɛmö, kö ‑ya ‑nu ‑dhɛ "dhiʋ̈, kö‑ ‑bha ꞊klang ‑nu ꞊gban "gblʋ̈ʋ̈dhɛ ꞊ya "muu bho, "kɛɛ kö ‑wa ꞊keng‑ "suʋ̈ 'ka mü "dhʋ̈, ‑yö mɛ ‑kaɔng do ga ꞊plɛ bha‑ ‑nu ‑dhɛ ö "sɔɔ, 'yö zun 'wɔn 'ö yöö kë ö 'ka bha‑ ‑gɛn bho ‑sü ‑bha ‑a ‑nu ‑dhɛ.
MAR 10:33 'Yö‑ pö: «‑Ka ‑dhɛ ‑ga, 'dho do 'kwa‑ wo sië Zedhizadhɛmö ya, ‑wo ‑dho mang Mɛgbömɛ n 'kun, 'ö 'wo n nu "saabhomɛ ‑nu ‑gɔmɛ ‑nu waa‑ 'tɔnggɔmɛ ‑nu ‑dhɛ, 'ö 'wo n zë za 'ka, 'wo‑ pö ‑wo n zë, 'ö 'wo dho 'wo n nu 'mɛ 'waa Atanna dɔ 'wo go "sɛ "wɛɛ 'gü bha‑ ‑nu ‑dhɛ.
MAR 10:34 'Ö 'wo ꞊wɛɛ dɔ n ‑bha, 'ö 'wo wo "dhidhi ‑pɛn n ‑bha, 'ö 'wo n ma "dhü 'ka, 'ö 'wo n zë, "kɛɛ ‑dhɛkpaɔyi ‑yaaga ꞊ya ziö, a ‑dho 'go ga 'gü 'a ‑bö.»
MAR 10:35 ꞊Dhɛ 'ö ö bo‑ ‑pö "dhʋ̈ ‑sü 'ka, 'yö Zakö waa‑ Zan 'wo ‑kë Zebede gbö ‑nu 'ka bha, 'wo ꞊yɔɔn‑ "sɔɔ, 'yö 'wo‑ pö‑ ‑dhɛ: «Yi Dëmɛ, 'pë 'ö yi "piʋ̈ 'yi‑ ‑gbadhɛ i ‑gɔ ‑bha, ‑bhö dɔ "gbɩɩ‑ kö 'i‑ kë yi ‑dhɛ.»
MAR 10:36 'Yö‑ ‑yɔ bɔ‑ ‑nu ‑gɔ 'ö‑ pö: «‑Yö ka "piʋ̈ 'a‑ kë ka ‑dhɛ ꞊dhɛ?»
MAR 10:37 'Yö 'wo‑ pö: «Yi Dëmɛ, ‑bhö dɔ "gbɩɩ‑ kö yi 'ö i ‑bha ‑gblüdëdhɛ dho ‑ya ‑bha ‑a 'ka bha, mɛ ꞊plɛ 'yi ya ‑duɛ 'ö mü bha i yi gba ‑a ꞊bhlëësü ‑sü 'ka ‑dhe!»
MAR 10:38 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «Pë 'ka‑ ‑gbadhɛ sië n ‑gɔ bha ka‑ ‑dɔ ‑ee? Ka ‑mɔɔ ‑bha 'ö "yi ‑dhiisü 'ö maa mü bha 'ka‑ mü ‑ee? "Ɛɛn saan" 'ö maa‑ wo bha ka ‑dho ꞊mɔɔ‑ wo ‑sü ‑bha ‑ee?» 'Yö 'wo‑ pö‑ ‑dhɛ: «꞊Iin, yi ‑dho ꞊mɔɔ‑ ‑bha.»
MAR 10:39 'Yö Yesu ꞊ya ‑yɔ bɔ‑ ‑nu ‑gɔ 'ö‑ pö: «‑Yö "dhʋ̈ tɛan‑ 'ka ꞊dhɛ 'wɔn "gbɩɩ‑ 'ö maa‑ "yi mü bha waa‑ saan" 'ö maa‑ wo bha, ka ‑dho ka ‑bha wo,
MAR 10:40 "kɛɛ ‑a 'dhɛ 'kö ‑gban mɛ ‑bha ‑ya n ‑kɔ ‑së "ɛɛn n ꞊kwaa 'gü ‑sü ‑wɔn ‑bha, 'yaa ma ‑zë ma 'wɔn 'ka. ꞊Ya 'go mü, 'mɛ 'ö 'wɔn 'dhɛ bha Atanna ‑ya ‑ya ‑nu ‑bha 'ka ꞊në 'wo dho‑ ꞊slɔɔ.»
MAR 10:41 ꞊Dhɛ 'ö‑ ‑bha ꞊klang ‑nu bha‑ mɛ ‑kaɔng do 'dhɛ 'wo to 'wo 'wɔn bha‑ ma, 'yö ‑kë ‑nu ‑siödhɛwɔn 'ka Zan waa‑ Zakö ‑a ‑nu kwi ‑bha.
MAR 10:42 ꞊Dhɛ 'ö Yesu ‑yö 'wɔn ꞊slɔɔ‑ 'gü, 'yö‑ ‑nu ‑dhɛ 'yö‑ pö‑ ‑nu ‑dhɛ: «Ka‑ 'wɔn dɔ ꞊dhɛ ‑gblüdë ‑nu 'wo "kpʋng ꞊taa yö 'wɔn 'ö ‑dhi ‑nu ‑dhɛ, 'yö 'wo‑ ‑wɔ woo‑ "sɛgümɛ ‑nu ‑ta, 'yö 'mɛ 'wo mɛ ‑tiandhö ‑nu 'ka, 'wo mɛ ‑dhɛ ‑faan ‑wɔ wo ꞊kɔɔnmɛ ‑nu ‑ta,
MAR 10:43 "kɛɛ ka ‑zë ka ‑bha 'yaa "dhʋ̈. 'Mɛ 'ö‑ "piʋ̈ ꞊dhɛ ö ‑duɛ kë 'kpii‑ ka kpö 'gü Atanna wëëdhö, ‑a ‑mɛ ‑zian ꞊në ‑yö kë ka "dhiʋ̈ ‑ziö wo ‑mɛ 'ka.
MAR 10:44 Kö 'mɛ 'ö‑ "piʋ̈ ꞊dhɛ 'ö kë mɛ ꞊bhlëësü 'ka ka kpö 'gü (Atanna wëëdhö), yö ꞊në ‑yö kë mɛ ꞊gban ka ‑bha ꞊dhuëng 'ka.
MAR 10:45 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ mang Mɛgbömɛ nu 'a‑ wo "kpʋng ꞊taa bha, 'mii nu kö mɛ ‑yö ma ‑zë n "dhiʋ̈ ‑ziö wo, "kɛɛ kö ma ꞊në 'a ka "dhiʋ̈ ‑ziö wo, kö 'a n ‑dɩ nu ka ‑gɔtadhɔpë 'ka kö mɛ 'gbɛ ‑wo kë dhamɛ 'ka ‑dhɛkpaɔ dhia" 'gü.»
MAR 10:46 'Yö waa‑ ‑bha ꞊klang ‑nu 'wo dho "dhʋ̈ 'wo ꞊loo Zedhiko. ꞊Dhɛ 'ö ꞊ya 'go 'pö‑ bha‑ 'gü, waa‑ mɛ kpö 'kpii‑ 'ö gun‑ ꞊keng‑ bha‑ 'dhö, kö Time gbö 'wo‑ ‑dhɛ Batime 'ö gun gbadhɛmɛ 'ka ‑a ‑kë "yan ‑wlü 'ka ‑sü ‑wɔn 'gü bha, ‑yö ‑ya sië zian "gʋ̈ng "piʋ̈.
MAR 10:47 ꞊Dhɛ 'ö‑ ma ꞊dhɛ Yesu 'ö go Nazadhɛtö bha ꞊në ziö sië bha, 'yö zun "gbla ‑sü ‑bha 'ö‑ pö: «Yesu, Davi suu, ‑bhö n ‑wëë ‑ga kö 'i "ta n ‑dhɛ ‑dhe!»
MAR 10:48 'Ö gun "gbla sië "dhʋ̈ kö mɛ 'gbɛ ‑wo ‑dɔn bho sië‑ 'ka 'wo‑ pö ‑yö ö "dhi ta. "Kɛɛ ꞊waa‑ pö‑ ‑dhɛ "dhʋ̈ ‑yö ‑kë ꞊dhɛ 'pë 'wo‑ pö ‑yö "gbla 'bha ꞊në wo "gbɩɩ‑ 'ka ‑a 'dhö, 'yö ö ‑wʋ "dhiʋ̈ ꞊wlü 'zü 'ö ‑ziö ‑a 'dhɛ 'ö gun ‑blɛɛsü bha‑ ‑ta 'ö‑ pö: «Davi Gbö, ‑bhö n ‑wëë ‑ga ‑dhe!»
MAR 10:49 'Yö Yesu ‑yö 'daɔnnu 'ö‑ pö: «‑Kaa ‑dhɛ!» 'Yö 'wo "yanwlümɛ bha‑ ‑dhɛ 'wo‑ pö: «‑Bhö i 'gü dɔ "gbɩɩ‑ kö 'i "wlü 'i 'dho, ‑ya ‑pö 'i nu!»
MAR 10:50 'Yö ö ‑bha ꞊gbauu‑ 'ö gun‑ ‑bha bha‑ bho 'mü 'ö‑ ‑zuö "sia‑ (kö 'ya 'dho ‑da ö ‑gɛn 'gü), 'yö ꞊wlü 'vadhö 'ö dho Yesu ‑zian 'ka.
MAR 10:51 ꞊Dhɛ 'ö ꞊loo mü, 'yö Yesu ‑ya pö‑ ‑dhɛ: «‑Më ꞊në i "piʋ̈ ꞊dhɛ 'a‑ kë i ‑dhɛ?» 'Yö‑ pö‑ ‑dhɛ: «N Dëmɛ, ‑yö n "piʋ̈ ꞊dhɛ 'i "ta n ‑dhɛ kö n "yan ya ꞊në ‑yö ‑dhɛ yö ‑deewo!»
MAR 10:52 'Yö Yesu ‑ya pö‑ ‑dhɛ: «‑Bhö 'dho, i ‑bha 'dhang ‑bho n "dhiʋ̈ ‑sü ꞊në i dha bha.» ‑Yö ‑to ‑dhɛ do bha‑ 'gü 'ö‑ "yan ‑yö ‑dhɛ yö ‑deewo, 'yö ‑ziö Yesu ꞊keng‑ 'yö 'wo dho zian 'ö gun 'dho sië‑ 'ka bha‑ 'ka.
MAR 11:1 ꞊Dhɛ 'wo 'dho sië 'ö ꞊wa ꞊yɔɔn Zedhizadhɛmö ‑pö "sɔɔ, "kɛɛ 'ö ꞊wa ꞊loo 'pödhɛ 'wo Bɛfaze ‑dhɛ ‑kë bha waa‑ Betani ‑dhɛ ‑a ‑nu "saan "dhiʋ̈, ‑tɔn 'wo‑ Odhivie ‑tɔn ‑kë bha‑ "pɛan "piʋ̈, 'yö ö ‑bha ꞊klang ‑nu bha‑ mɛ ꞊plɛ bɔ.
MAR 11:2 'Yö ö ‑wʋ kpɔ‑ ‑nu ‑bha 'ö‑ pö: «‑Ka 'dho 'pö‑ 'ö ‑ya ka "dhiʋ̈ bha‑ 'gü, ka ‑dho ‑kpan ꞊soofëng 'në do ‑bha kö ‑yö ‑kplü ‑sü 'ka ka ‑da 'plöö ‑dhɛ 'gü, mɛ 'bha 'yii ‑ya ‑ta do, 'ka 'dho ‑kaa "pʋ kö 'ka nu‑ 'ka.
MAR 11:3 ꞊Ya kë ꞊dhɛ ꞊wa ka dhɛɛ" kë kö ‑wa pö: ‹Ka‑ ‑kë "dhʋ̈ ꞊dhɛ?› ‑kaa pö: ‹Yi Dëmɛ ꞊në‑ ‑mawɔn ꞊ya zun‑ ‑bha, "kɛɛ ꞊ya ö bo ‑yö ‑dho ö ‑kɔ bho‑ 'gü 'ö 'yi nu‑ 'ka.›»
MAR 11:4 'Yö 'mɛ 'wo bha 'wo dho, 'yö 'wo ‑kpan ꞊soofëng 'në bha‑ ‑bha kö ‑yö ‑kplü ‑sü 'ka "kpɛnng 'kɔdhi "dhiʋ̈ zian "sɔɔ, 'yö 'wo‑ ‑pʋ.
MAR 11:5 'Yö 'mɛ 'wo gun mü bha‑ mɛ kpö 'bha 'wo‑ pö‑ ‑nu ‑dhɛ: «‑Më ꞊në 'ka‑ kë sië bha? Ka ꞊soofëng 'në bha‑ ‑pʋ ‑më ‑wɔn 'gü?»
MAR 11:6 'Yö 'wo‑ ‑yɔ bɔ ꞊dhɛ ‑kɔ 'ö Yesu ‑ya pö‑ 'ka‑ ‑nu ‑dhɛ bha‑ 'dhö. ꞊Dhɛ 'wo‑ pö "dhʋ̈ 'yö 'wo wo ‑kɔ bho‑ 'gü, 'yö 'wo dho‑ 'ka.
MAR 11:7 ꞊Dhɛ 'wo dho 'wo ꞊loo ꞊soofëng 'në bha‑ 'ka Yesu ‑dhɛ 'gü, 'yö 'wo woo‑ sɔ ‑nu ꞊loo‑ ‑ta, 'yö Yesu 'dhö ‑ya ‑ta.
MAR 11:8 'Yö mɛ 'gbɛ 'wo woo‑ sɔ kpɔ zian ‑ta ‑dhɛ ‑nu 'gü, waa‑ "dhü kwɛɛ" ‑nu 'ö mɛ 'bha ‑nu ‑wa ‑kan 'bhlaa‑ ‑nu 'gü ‑a ‑nu 'dhö.
MAR 11:9 Kö 'mɛ 'wo Yesu "dhiʋ̈ waa‑ 'mɛ 'wo‑ ꞊taama ‑dhɛ ‑nu 'gü, ‑wo "gɛɛ kë sië 'wo ꞊gbla ‑nu wo 'wo‑ pö: "Sookwedhi! "Sookwedhi! 'Mɛ 'ö nu sië kwa Dëmɛ ‑bha nu 'gü bha‑ 'tɔ ‑yö bhɔ!
MAR 11:10 Kwa dë Davi ‑bha ‑gblüdëdhɛ 'ö nu sië bha ‑yö ꞊bhlɛɛ! 'Mɛ 'ka dhang‑ 'gü, ‑ka ‑bhabhoo 'kun kö 'ka‑ pö "sookwedhi!»
MAR 11:11 'Yö Yesu ‑yö dho "dhʋ̈ 'ö ‑da Zedhizadhɛmö, 'yö dho Atanna ‑dhɔkëgükɔ 'gü. ꞊Dhɛ 'ö 'wɔn ‑nu 'wo mü ‑a ꞊gban 'suan‑ bho ‑së 'ka, "kɛɛ kö 'yënng‑ ꞊ya 'dho, 'yö waa‑ ‑bha ꞊klang ‑nu ‑kaɔng do ga ꞊plɛ bha 'wo wo yee ‑kë 'wo dho Betani ‑pö 'gü.
MAR 11:12 ꞊Dhɛ 'ö ꞊ya wɔ mü 'ö‑ ‑tadhɛ ꞊ya ꞊kpaɔ, 'ö 'wo 'go sië Betani 'wo 'dho sië 'zü ‑deewo Zedhizadhɛmö, 'yö din‑ ‑yö Yesu kun.
MAR 11:13 'Yö dɔ ꞊gblɛɛn 'ö figö ‑dhü do yö kö‑ "dhɛ ‑ya ‑ta, 'yö dho 'ö ‑wo ‑bha kö‑ ‑kpʋ 'bha 'dhö mü kö 'ö‑ bho 'ö‑ ‑bhö, (‑a ‑gɛn ‑mü ꞊dhɛ 'ö gun "dhʋ̈ kö figö ‑pë kë "tʋ̈ng 'yii ꞊loo ꞊kö), "kɛɛ 'ö 'dho ꞊yɔɔn‑ "sɔɔ ‑yö ‑kpan ‑a "dhɛ ‑dɩ ‑slɔɔ ꞊në‑ ‑bha.
MAR 11:14 ‑Yö "dhang ‑da figö ‑dhü bha‑ ‑bha yö ꞊në‑ ‑wɔn 'gü 'ö‑ pö: «'Bha 'dho bhɛ dɔ 'zü tongtongdhö 'ö mɛ ‑ya ‑bhö!» ‑A pö 'ö‑ wo "dhʋ̈ bha, 'yö‑ ‑wʋ ‑yö ‑da ‑a ‑bha ꞊klang ‑nu "tʋʋdhö.
MAR 11:15 ꞊Dhɛ 'ö ꞊wa 'dho ꞊wa ꞊loo Zedhizadhɛmö, 'yö Yesu ‑yö dho 'ö ‑da Atanna ‑dhɔkëgükɔ 'gü. 'Yö ‑ya 'mɛ 'wo gun "dhɔɔ ‑nu dɔ sië, "ɛɛn 'wo gun pë 'dhɔ sië 'kɔɔdhö mü bha‑ ‑nu kë ‑sü ‑bha, 'yö 'mɛ 'wo nu 'wëë‑ fië bho ‑dhɛ 'gü 'wëë‑ 'dhɛ 'ö Atanna ‑dhɔkëgükɔ 'gü mü bha‑ ‑bha bha‑ ‑nu ‑bha 'kpongpaa ‑nu 'wo gun 'wëë‑ fië bho sië‑ ‑ta, waa‑ 'mɛ 'wo gun ‑tong "dhɔɔ dɔ sië mü (kö ‑wo "saa‑ bho‑ 'ka bha‑) ‑nu ‑yata ‑gbloo ‑nu ꞊wɛnng.
MAR 11:16 'Yö ‑kɔ mɛ ‑bha zian ‑kan pë 'bha 'ka ‑sü ‑zian 'ö Atanna ‑dhɔkëgükɔ 'gü mü bha‑ ‑bha.
MAR 11:17 'Yö zun dhiang ‑zë 'mɛ 'wo gun mü ‑a ‑nu ‑dhɛ ‑sü ‑bha 'ö‑ pö: «‑Yö ‑bɛn zë ‑sü 'ka Atanna ‑gɔ 'sëëdhɛ 'gü ꞊dhɛ: ‹‑Wo ‑dho ma 'kɔ ‑dhɛ "sɛ ꞊gban "pɛpɛ 'gü ‑mɛ ‑nu ‑bha ‑bhɛa Atanna ‑dhɛ 'gü ‑kɔ› "kɛɛ yö ꞊në ka ‑zë 'ka‑ kë ꞊kwaanmɛ ‑nu ‑ya 'gü ‑yɛ ꞊në‑ 'ka bha.»
MAR 11:18 ꞊Dhɛ 'ö Yesu ‑wʋ bha 'ö ‑da "saabhomɛ ‑nu ‑gɔmɛ ‑nu waa‑ 'tɔnggɔmɛ ‑nu "tʋʋdhö, 'yö ‑yɛ ‑nu ‑bha ꞊dedewo, 'yö 'wo ‑ya ‑a "slë mɔɔ‑ ‑sü ‑bha kö 'wo‑ zë ‑gblɛn 'kpɔ 'gü. ‑A ‑gɛn ‑mü ꞊dhɛ ‑wo ‑gun "suʋ̈ sië‑ ‑gɔ, ‑a ‑nu ‑suʋ̈ ‑gɔ 'klɔɔ‑ ‑mü ꞊dhɛ 'ö gun "dhʋ̈ kö‑ ‑bha mɛ draan‑ ‑kɔ bha ꞊ya mɛ ꞊gban ‑zʋ 'kun, (‑a ‑wɔn 'gü ꞊waa‑ pö 'wo‑ 'kun "dhɛɛ ‑ta kö woo‑ ‑nu ‑zuö ‑gwë 'ka).
MAR 11:19 ꞊Dhɛ 'ö "bin ꞊ya bo 'ma ‑sü 'ka, 'yö Yesu ‑yö go ö ‑bha ꞊klang ‑nu 'ka pö yaan‑ ‑bha.
MAR 11:20 ꞊Dhɛ 'ö‑ ‑tadhɛ ꞊ya ꞊kpaɔ, 'ö Yesu waa‑ ö ‑bha ꞊klang ‑nu 'wo ziö sië, 'yö‑ ‑bha ꞊klang ‑nu 'wo figö ‑dhü 'ö "dhang ‑da ‑bha bha‑ yö kö ꞊ya ga klöngklöngdhö ꞊ya ‑da 'ka ‑a yun 'gü "sɛɛdhö.
MAR 11:21 ‑Dhɛ 'ö Piɛdhö ‑zʋ ‑yö ‑bö ‑kɔ 'ö ‑kë 'ka yaan "dhiʋ̈ bha‑ 'ka, 'yö‑ pö Yesu ‑dhɛ: «N Dëmɛ, ‑bhö ‑dhɛ ‑ga ꞊zɔɔ, figö ‑dhü 'i "dhang ‑da ‑bha yaan "dhiʋ̈ bha ꞊ya ga.»
MAR 11:22 'Yö Yesu ‑yö dhiang zë‑ ‑nu ‑dhɛ 'ö‑ pö: «‑A 'wɔn 'ya 'dho ka 'kɔn. 'Pë 'ö‑ ‑wɔn 'dhö ka ‑bha yö ‑mü ‑zʋ ‑yö Atanna ‑dhɛ ‑sü ꞊në‑ 'ka doseng (꞊dhɛ‑ ‑fiëbhawɔn 'yaa 'dhö).
MAR 11:23 A‑ ‑pö ka ‑dhɛ tɛan‑ ꞊dede 'ka ꞊dhɛ 'dhang ‑bho Atanna "dhiʋ̈ ‑sü ꞊ya kë ka ‑gɔ ꞊dedewo 'kpakpadhö, 'ka‑ pö ‑tɔn 'ö dɔ ya‑ ‑dhɛ ‑yö 'go ö "gblʋ̈ kö ‑yö 'dho ‑yö ‑pö ꞊weeyi ꞊bhaa, kö 'kii dɔ 'kën 'gü, ka ‑dho ‑a ‑dhɛ yö kö ꞊ya kë.
MAR 11:24 Yö ꞊në‑ ‑wɔn 'gü 'yö 'a‑ pö ka ‑dhɛ pë "pɛpɛ 'ö 'ka dho‑ ‑gbadhɛ Atanna ‑gɔ kö ka bhɛa" sië‑ ‑dhɛ bha, ‑ka 'dhang bho‑ "dhiʋ̈ ꞊dhɛ 'ka‑ ꞊slɔɔ, ka ‑dho ‑a yö kö ‑a 'gü ‑wɔn ‑yö kë sië.
MAR 11:25 ꞊Ya kë ꞊dhɛ 'ka bhɛa" sië Atanna ‑dhɛ, kö ka ‑zʋ ‑yö ‑bö ꞊dhɛ 'wɔn ‑yö kaa mɛ 'bha ka ꞊zinng 'gü, ‑kaa ‑mɛ ‑mawɔn 'to, kë "dhʋ̈ kö ka Dë 'ö dhang‑ 'gü ‑yö kaa‑ 'wɔn yaa ‑nu ‑mawɔn 'to 'pö.
MAR 11:26 ["Kɛɛ ꞊ya kë ꞊dhɛ 'kii "wɩ‑ ‑bha kö 'ka‑ mɛ ‑mawɔn 'to, ka Dë 'ö dhang‑ 'gü, 'yii 'dho kaa‑ 'wɔn yaa ‑nu ‑mawɔn 'to 'pö.]»
MAR 11:27 ꞊Dhɛ 'ö ꞊wa 'dho ꞊wa ꞊loo ‑deewo Zedhizadhɛmö, 'ö Yesu 'dhö ziö sië Atanna ‑dhɔkëgükɔ 'gü, 'yö "saabhomɛ ‑nu ‑gɔmɛ ‑nu oo, 'tɔnggɔmɛ ‑nu waa‑ ‑kwɛagbö ‑nu 'wo nu‑ "piʋ̈.
MAR 11:28 'Yö 'wo‑ dhɛɛ" kpɔ 'wo‑ pö: «'Wɔn 'i‑ kë sië ya, i‑ ‑kë de ‑bha kë 'gü? "Ɛɛn i wɛa ‑loo ‑dhɛ ‑mɛ ‑mü de 'ka?»
MAR 11:29 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «A ‑dho ka dhɛɛ" do 'kpɔ 'pö, ꞊ya kë ꞊dhɛ 'ka‑ ‑yɔ bɔ n ‑gɔ kö 'a ka ‑bha bha‑ ‑yɔ bɔ:
MAR 11:30 Zan ‑bha mɛ ‑bɔ Atanna 'ka ‑zu 'ö gun‑ bho sië bha Atanna ꞊në‑ pö "ɛɛn mɛ "bhɩɩ‑ ‑nu ꞊në 'wo‑ bho wo ‑dɩ 'gü? ‑Kaa ‑yɔ bɔ n ‑gɔ!»
MAR 11:31 "Kɛɛ 'yö 'wo ‑ya ‑a "slën bho ‑sü ‑bha wo "kwëë 'wo‑ pö: «꞊Ya kë ꞊dhɛ 'ya‑ pö Atanna ꞊në‑ pö, ‑yö ‑dho ‑a pö kwa ‑dhɛ: ‹‑Yö ‑kë mü ꞊dhɛ 'sa 'yö 'kii 'dhang bho‑ "dhiʋ̈?›
MAR 11:32 "kɛɛ 'sa 'ya‑ pö ꞊dhɛ mɛ "bhɩɩ‑ ‑nu ꞊në 'wo‑ bho wo ‑dɩ 'gü kö ‑nnn!» (‑A pö 'wo wo "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö ‑wo "suʋ̈ sië "sɛgümɛ ‑nu ‑gɔ, ‑a 'klɔɔ‑ ‑mü ꞊dhɛ mɛ ꞊gban "pɛpɛ‑ ‑gun 'dhang bho sië Zan "dhiʋ̈ ꞊dhɛ Atanna ‑wʋdhiʋ̈loomɛ ꞊dede ‑mü.)
MAR 11:33 ꞊Dhɛ 'ö ꞊ya kë "dhʋ̈, 'yö 'wo‑ ‑yɔ bɔ Yesu ‑gɔ 'wo‑ pö: «'Yaa‑ 'wɔn dɔ.» 'Yö‑ ‑yɔ bɔ 'pö‑ ‑nu ‑gɔ 'ö‑ pö: «Mang ‑dɩ 'pö, 'mii 'dho n ‑bha ya‑ wɛa ‑loo ‑dhɛ ‑mɛ pö ka ‑dhɛ.»
MAR 12:1 ꞊Dhɛ 'ö ꞊wa wo bo dhiang ‑nu bha‑ ‑nu zë ‑sü 'ka ꞊dhɛ ‑kɔ bha‑ 'dhö, 'yö Yesu ‑yö zun dhiang ‑zë ‑a ‑nu ‑dhɛ ‑sü ‑bha "gwënng 'gü 'ö‑ pö: «Yi do 'ka 'yö gɔndë do 'bha ‑yö ö ‑bha ‑drɔɔ ‑bhlaa kpɔ. 'Yö‑ ‑zü ꞊klëën "dhʋʋ 'ka kpɛnngkpɛnngdhö, 'yö dho 'ö‑ "yibhogüpë ‑pë ‑kë, 'yö dho 'ö 'kɔ dɔ‑ "dhiʋ̈ (kö ‑yö kë ‑dhɛ bha‑ ‑maa ‑kë ꞊wlöö ‑kɔ 'ka), 'yö dho 'ö 'bhlaa‑ bha‑ ‑da buzan 'gü 'yö dho "ta 'gü.
MAR 12:2 ꞊Dhɛ 'ö ‑drɔɔ ga bho "tʋ̈ng ꞊ya ꞊loo, 'yö ö ‑bha gwëëmi do bɔ buzankëmɛ ‑nu bha‑ ‑nu "piʋ̈ kö ꞊wa wo bo kö ‑wa ‑gblü kö ‑wo ö ‑bha dɔ ö ‑bha gwëëmi bha‑ ‑gɔ kö ‑yö nu‑ 'ka ö ‑dhɛ.
MAR 12:3 'Yö buzankëmɛ ‑nu bha 'wo gwëëmi bha‑ kun, 'yö 'wo‑ ‑ma ‑tɛkpɛ ‑tɛkpɛdhö 'wo wo ꞊kwaa‑ ‑zü 'yö dho ö ‑kɔ 'gü "fië 'ka ö dëmɛ ‑ta.
MAR 12:4 'Yö ꞊slëë 'zü 'yö mɛ "wɛɛ 'bha bɔ, 'yö 'mɛ 'wo bha 'wo mɛ 'dhɛ bha‑ kun 'zü 'wo‑ ‑ma ‑tëkë ‑tëkëdhö, 'yö 'wo bhië ‑ya ‑gɔ ‑bha, 'yö 'wo "si bho‑ ‑gɔ ‑kɔ ꞊gban ‑kɔ ꞊gban 'gü
MAR 12:5 'yö dho 'ö‑ mɛ ‑yaaga ‑naa bɔ, 'yö 'wo dho 'wo yö ‑zë zë, 'yö dho 'ö mɛ kpɔ 'bha bɔ 'zü ꞊taama, "kɛɛ 'yö‑ 'bha 'yii 'wɔn "dhiʋ̈ 'kun, 'yö 'wo‑ ‑nu ‑ma, "ɛɛn 'wo‑ ‑nu zë.
MAR 12:6 ‑A "tʋ̈ng bha‑ 'ka kö ‑drɔɔdhɛ dëmɛ bha‑ gbö do 'në 'ö‑ ‑bha 'wɔn ꞊gban "pɛpɛ 'ka ꞊në ꞊ya 'to‑ ‑gɔ, kö yö ꞊në ꞊ya 'to ꞊dhɛ bɔmɛ 'dhö ‑a ‑kɔ "dhiʋ̈ ꞊taamasü 'gü. 'Yö‑ pö ö ‑dɩ ‑dhɛ ꞊dhɛ mɛ 'dhɛ 'kö ya ‑yö kë 'ö‑ wo n gbö 'ka bha, ‑wo ‑dho ‑a ꞊bhlëë ‑ya 'ö 'wo wo "tʋ to‑ ‑wʋ ‑bha. 'Yö ‑ziö 'ö‑ bɔ, "kɛɛ ꞊dhɛ 'ö‑ gbö bha 'ö dho 'ö ꞊loo mü, 'yö buzankëmɛ ‑nu bha 'wo‑ ‑ya 'kwëë‑ ‑kë 'wo‑ pö: «Mɛ ꞊dede 'ö yöö 'kɛan‑ bha‑ 'sü ‑zianwo 'yö nu bha, ‑ka ‑kwaa 'kun 'kwa‑ zë, kö 'kɛan‑ bha ‑yö 'to kwa ‑gɔ!»
MAR 12:8 'Yö 'wo‑ kun 'wo‑ zë, 'yö 'wo dɔ‑ ꞊gee ‑bha 'wo‑ ‑zuö "bü ꞊gblɛɛn.
MAR 12:9 'Mɛ 'ka dɔ bha, ꞊ya kë "dhʋ̈ kö ‑më ‑wɔn ꞊në ‑drɔɔdhɛ dëmɛ yöö kë ꞊taamasü 'gü? Kö yöö ꞊dede ꞊në‑ nu ‑wɔn ꞊ya 'to, kö ‑yö buzankëmɛ ‑nu bha‑ ‑nu zë, kö ‑yö ö bha 'bhlaa‑ 'sü ‑ya dɔ mɛ "wɛɛ ‑nu ‑gɔ.»
MAR 12:10 ꞊Dhɛ 'ö‑ pö "dhʋ̈ 'ö ö bo, 'yö‑ ‑nu dhɛɛ" kpɔ 'ö‑ pö: «‑Wʋ 'ö ‑bɛn zë ‑sü 'ka Atanna ‑gɔ 'sëëdhɛ 'gü ꞊dhɛ: ‹‑Gwë 'ö 'kɔdɔmɛ ‑nu 'wo wo ꞊kwaa‑ ‑zü bha ꞊në kë ‑kë 'kɔ "kpan ‑ya ‑ta ‑gwë 'ka bha 'kii‑ ma do ‑ee?
MAR 12:11 ‑A ‑bha ‑kë 'kɔ "kpan ‑ya ‑ta ‑gwë 'ka ‑sü bha, ‑yö ‑dhi Atanna ꞊në‑ ‑dhɛ, ‑yö "dhabhliwɔn ‑zian ꞊në‑ 'ka.›»
MAR 12:12 ꞊Dhɛ 'ö ö bo‑ ‑pö "dhʋ̈ ‑sü 'ka bhoo, 'yö "saabhomɛ ‑nu ‑gɔmɛ ‑nu waa‑ 'tɔnggɔmɛ ‑nu waa‑ ‑kwɛagbö ‑nu bha 'wo‑ 'wɔn dɔ ꞊dhɛ ‑yö "gwënng bha‑ ‑da wo ꞊në wo ‑dhɛ. 'Yö 'wo zun‑ "slë mɔɔ‑ ‑sü ‑bha kö 'wo‑ 'kun, "kɛɛ kö ‑wo "suʋ̈ sië "sɛgümɛ ‑nu kpö 'wo gun 'mü bha‑ ‑nu ‑gɔ, 'yö 'wo‑ to 'mü 'wo woo‑ 'dho wo.
MAR 12:13 ꞊Dhɛ 'ö 'mɛ 'wo bha 'wo dho, 'yö 'wo Fadhiziɛn 'bha ‑nu waa‑ Edhodö ‑bha mɛ 'bha ‑nu bɔ kö ‑wo Yesu ‑wʋ mɔɔ‑, kö‑ ‑wʋ ꞊ya ꞊dië ‑dhɛ 'ö‑ 'gü kö ‑yö kë‑ ‑nu bɔdhɛ 'ka kö‑ ‑nu ‑kɔ ‑yö ꞊mɔɔ‑ ‑bha.
MAR 12:14 ꞊Dhɛ 'wo nu, 'yö 'wo‑ pö Yesu ‑dhɛ: «Yi Dëmɛ, ‑a 'wɔn ‑yö yi "yaan ꞊dhɛ tɛanwɔn pömɛ ‑mü i 'ka, ꞊dhɛ 'bhaa "suʋ̈ mɛ 'bha ‑mɛ 'bha ‑gɔ, 'sa 'bhaa ‑kpla mɛ 'bha ‑gɔ ‑a ‑bha ‑kë ‑tiandhö ‑sü ‑wɔn 'gü kö i ꞊flü kë mɛ ‑gɔ, ꞊dhɛ tɛan‑ ‑zian 'ö go Atanna "piʋ̈ ꞊në 'i‑ ‑zɔn mɛ ‑dhɛ. ‑A ‑kë "dhʋ̈ ‑sü 'gü, 'wɔn 'ö ‑gban 'nii‑ sɔng ‑bho Wlɔmö ‑mɛ ‑nu ‑bha ‑gblüdë 'kpii‑ ‑dhɛ ‑sü ‑bha ya i i ‑bha ‑pö 'gü ꞊dhɛ? 'Yi‑ bho ‑ee? "Ɛɛn 'ya 'dho‑ bho ‑ee?»
MAR 12:15 ꞊Dhɛ 'ö Yesu ‑ya 'wɔn dɔ ꞊dhɛ kpa ꞊në 'wo‑ wo sië ö ‑dhɛ 'gu ‑ta bha, 'yö‑ ‑yɔ bɔ‑ ‑nu ‑gɔ 'ö‑ pö: «Ka n 'gü ‑dan ‑më ‑wɔn 'gü? ‑Ka nu n ‑dhɛ "tanmaga do 'ka kö 'a‑ ‑ga!»
MAR 12:16 'Yö 'wo nu‑ ‑dhɛ ‑a do 'ka. 'Yö‑ ‑nu dhɛɛ" kpɔ 'ö‑ pö: «De ꞊në‑ ‑gɔ "blɛɛn‑ waa‑ 'tɔ 'wo‑ ‑ta ya?» 'Yö 'wo‑ pö‑ ‑dhɛ: «Wlɔmö ‑mɛ ‑nu ‑bha ‑gblüdë 'kpii‑.»
MAR 12:17 'Yö‑ pö‑ ‑nu ‑dhɛ: «꞊Dhɛ 'ö "dhʋ̈, ‑ka 'dho kö pë 'dhɛ 'ö ‑gblüdë bha‑ ‑bha 'ka 'ka‑ dɔ‑ ‑gɔ, kö‑ 'dhɛ 'ö Atanna ‑bha 'ka 'ka‑ nu Atanna ‑dhɛ!» ‑A ‑yɔ 'ö‑ bɔ‑ ‑nu ‑gɔ "dhʋ̈ bha, 'yö‑ 'wɔn ‑ya ‑nu kɔn ꞊dedewo.
MAR 12:18 ꞊Dhɛ 'ö ꞊ya kë "dhʋ̈, 'yö 'mɛ 'wo‑ ‑nu Sadusiɛn ‑nu ‑kë 'ö 'waa 'dhang bho 'mɛ ꞊wa ga ‑a ‑nu ‑bö ‑wɔn "dhiʋ̈ bha, 'wo nu Yesu "piʋ̈, 'yö 'wo‑ dhɛɛ" kpɔ 'wo‑ pö:
MAR 12:19 «Yi Dëmɛ, 'pë 'ö Moizö ‑ya ‑bɛn zë 'ö‑ to kwa ‑gɔ 'yö ya. ‑Ya ‑pö 'mɛ 'ö‑ dheebhang ꞊ya dhe 'sü, kö ‑yö ga kö waa‑ ‑bha dhebhɔ bha 'wii 'në ꞊slɔɔ, ‑a ‑dhɛa ‑bha ꞊dhɛ ‑a ‑mɛ dheebhang 'zlaa‑ ‑ya 'kɛandhe bha‑ 'sü dhe 'ka kö wɛng ‑wo 'në 'kpɔ kö ‑yö kë‑ dheebhang 'ö ga bha‑ suu 'ka.
MAR 12:20 "Kɛɛ ‑bhö ‑a ‑ga, dheebhangzë ‑nu "saɔplɛ ꞊në 'wo gun, 'yö‑ mɛ 'kpiisü ‑yö dhe sü, 'yö 'wii 'në 'kpɔ 'yö ga.
MAR 12:21 'Yö 'mɛ 'dhɛ dɔ mü 'ö‑ 'kɛan‑ ‑dhe bha‑ sü, 'yö 'wii 'në 'kpɔ 'pö, 'yö ga. 'Yö‑ mɛ ‑yaaga ‑naa ‑bha dho 'pö 'ö ‑kë ‑dhɛ ‑kɔ do bha‑ 'dhö,
MAR 12:22 'yö dho‑ 'ka "dhʋ̈ 'yö mɛ "saɔplɛ bha‑ ꞊gban 'wo dhe do bha‑ sü, 'yö‑ ‑nu "wɛɛ 'bha 'wii 'në 'kpɔ, 'yö‑ ꞊gban ‑wo ga. ꞊Dhɛ 'ö gɔɔn‑ ‑nu bha‑ ‑nu ꞊gban ꞊wa ga, 'yö dhebhɔ bha 'ö ga 'pö.
MAR 12:23 'Mɛ 'wo bha‑ ‑nu ꞊gban ꞊wa dhe do bha‑ 'sü ꞊tɔn. ꞊Ya kë "dhʋ̈ yi 'ö 'mɛ ꞊wa ga 'wo dho bɔ‑ 'ka bha ꞊ya ꞊loo, dhebhɔ bha‑ ‑dho kë 'mɛ 'wo bha‑ de ‑sü ꞊në‑ bha dhe 'ka kpɛnngdhö?»
MAR 12:24 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «Zian ꞊në 'ka‑ to 'yö 'ka "wɩ sië bha, ‑a ‑gɛn ‑mü ꞊dhɛ 'pë 'ö Atanna ‑wʋ ‑ya pö 'kaa 'bha 'gü ma, "ɛɛn 'kaa 'wɔn 'ö Atanna ‑bha 'gügbɩɩdhɛ ‑yö ꞊mɔɔ‑ ‑bha 'ö‑ ‑kë ‑a 'bha dɔ.»
MAR 12:25 'Yö‑ pö: «‑A pö 'a‑ wo "dhʋ̈ bha‑ ‑gɛn ‑mü ꞊dhɛ yi 'ö 'mɛ ꞊wa ga 'wo dho ‑bö 'ka bha, mɛ 'bha 'yii 'dho dhe 'sü, "ɛɛn dhebhɔ 'bha 'yii 'dho gwaan‑ 'kpɔ, "kɛɛ mɛ ꞊gban ‑dho kë ꞊dhɛ Atanna ‑bha "kië ‑nu ꞊në‑ 'dhö dhang‑ 'gü.
MAR 12:26 "Ɛɛn 'wɔn 'ö ‑gban 'mɛ ꞊wa ga 'nu ‑a ‑nu ‑bö ‑wɔn ‑bha ‑a ‑dhiang 'ö Atanna ‑ya zë, 'ö ‑bɛn zë ‑sü 'ka Moizö ‑gɔ 'sëëdhɛ 'gü, kö ꞊ya ö ‑dɩ ‑zɔn ‑dhɛ ‑kpɔɔ kpö 'gü bha 'kii‑ ma do ‑ee? ‑A pö 'ö‑ wo ꞊dhɛ: ‹Ma ꞊në 'a Ablaamö oo, Izaakö oo, Zakɔbö oo, a ‑nu ‑bha Atanna 'ka› bha, 'kii‑ ma ‑ee? (A‑ ‑pö ka ‑dhɛ ꞊dhɛ Atanna ‑yö dhiang bha‑ zë Moizö ‑dhɛ "dhʋ̈ kö 'mɛ 'wo bha ꞊wa ga 'nu kö‑ yi ꞊ya ꞊gwëë. "Kɛɛ ‑ya ‑pö Moizö ‑dhɛ 'ö‑ pö: «Ma ꞊në 'a‑ ‑nu ‑bha Atanna 'ka», 'yii‑ pö: «Ma ꞊në 'a gun‑ ‑nu ‑bha Atanna 'ka.»)
MAR 12:27 ꞊Ya kë "dhʋ̈ kö kwa‑ 'wɔn ‑dɔ ꞊dhɛ Atanna bha ‑yö 'mɛ 'wo "yaandhe 'ka ꞊në‑ ‑nu ‑bha Atanna 'ka, 'mɛ ꞊wa ga bha‑ ‑nu ‑bha Atanna 'yaa ‑mü. ‑A ‑kë "dhʋ̈ ‑sü 'gü, ꞊ya kë ꞊dhɛ 'ka ka ‑zʋ 'gɔn ꞊dhɛ 'mɛ ꞊wa ga 'waa ‑bö, kö "kpënng‑ ꞊në 'ka‑ kë sië ka ‑dɩ ‑gɔ.»
MAR 12:28 ꞊Dhɛ 'ö 'tɔnggɔmɛ ‑nu 'wo gun mü bha 'wo‑ 'wɔn dɔ ꞊dhɛ zaɔdhe 'ö Sadusiɛn ‑nu waa‑ Yesu ‑nu 'wo‑ ‑da bha ꞊yaa‑ ‑yɔ bɔ ‑kɔ ‑së kë ‑a ‑nu ‑gɔ, 'yö‑ ‑mɛ do ‑yö ꞊yɔɔn 'pö‑ "sɔɔ 'yö‑ dhɛɛ" kpɔ 'ö‑ pö: «Atanna ‑bha 'tɔng‑ "pɛpɛ bha‑ ‑mɛɛ ꞊në‑ ꞊bhlëë 'dhö 'kpii‑?»
MAR 12:29 'Yö Yesu ‑ya ‑yɔ bɔ‑ ‑gɔ 'ö‑ pö: «‑A 'kpiisü ꞊në: Izraɛdhö ‑mɛ ‑nu, ‑a 'wɔn kë ka "yaan ꞊dhɛ kwa Dëmɛ 'ö kwa ‑bha Atanna 'ka bha ꞊në 'ö Atanna ‑zë 'ka "dhʋ̈ doseng,
MAR 12:30 ꞊dhɛ 'ö "dhʋ̈, kwa Dëmɛ bha‑ ‑dhɔ ‑yö ka kë ka zuë" ꞊gban 'ka, ka ‑zʋtakɔ ꞊gban 'ka, ka faan ꞊gban 'ka bha‑ 'ka.
MAR 12:31 ‑A 'dhɛ dɔ‑ "piʋ̈ ꞊në‑ pö ꞊dhɛ: «I këyɔɔ ‑dhɔ ‑yö i kë ꞊dhɛ i ‑dɩ ‑dhɔ 'dhö i ‑dɩ ‑kë ‑kɔ 'ö‑ ‑bha bha‑ 'dhö.» 'Tɔng‑ "wɛɛwɛɛ 'bhaa 'kpii‑ kö ‑yö ziö ‑a ꞊plɛ 'kö bha ꞊në‑ ‑ta.»
MAR 12:32 'Yö 'tɔnggɔmɛ bha 'ö‑ pö‑ ‑dhɛ: ‑Yö "dhʋ̈ tɛan‑ 'ka, n Dëmɛ, ‑a pö 'i‑ wo ꞊dhɛ Atanna ‑yö doseng ‑a "wɛɛ 'bhaa 'dhö yö ‑zë zian 'gü bha 'yaa ꞊sua 'ka,
MAR 12:33 "ɛɛn 'zü ‑a pö 'i‑ wo ꞊dhɛ Atanna bha‑ ‑dhɔ ‑bha mɛ kë ‑sü 'ö i zuë" ꞊gban 'ka, i ‑zʋgɔngüwɔn ꞊gban 'ka, i 'nii‑ ꞊gban 'ka, "ɛɛn i faan ꞊gban 'ka, "ɛɛn 'zü i këyɔɔ ‑dhɔ ‑bha i kë ‑sü 'ö ꞊dhɛ i ‑dɩ 'dhö bha‑ ꞊bhlëë‑ 'kpii‑ 'ö ‑ziö "saa‑ ꞊gban "pɛpɛ suu ‑ta bha‑ 'bha 'yaa ꞊sua 'ka.
MAR 12:34 ꞊Dhɛ 'ö Yesu ‑ya dɔ ꞊dhɛ ‑a ‑yɔ 'ö 'tɔnggɔmɛ bha 'ö‑ bɔ bha ‑ya ‑bɔ ꞊kpaɔdhɛ ‑bha 'yö‑ pö‑ ‑dhɛ: «Bhi ‑zë 'bha ꞊tëng ‑da Atanna ‑bha ‑gblüdëdhɛ 'gü ‑sü ‑ta.» 'Ö go yö ‑zë 'gü, mɛ 'bha 'yii ꞊mɔɔ‑ ‑bha kö ‑ya dhɛɛ" 'kpɔ 'zü.
MAR 12:35 ꞊Dhɛ 'ö ꞊ya kë "dhʋ̈, 'yö Yesu ‑yö zun 'zü mɛ ꞊klang kë ‑sü ‑dee ‑bha Atanna ‑dhɔkëgükɔ bha‑ 'gü. 'Yö dho 'ö dhɛɛ" do kpɔ 'ö‑ pö: «‑A pö 'ö 'tɔnggɔmɛ ‑nu ‑wa wo ꞊dhɛ Izraɛdhö ‑mɛ ‑nu Dhamɛ Klisi bha Davi suu ‑mü ya‑ ‑gɛn ‑mü ‑më 'ka?
MAR 12:36 "kɛɛ kö Davi yöö ꞊dede ꞊në‑ pö Atanna ‑bha 'Nii‑ "slʋ̈ʋ̈slʋ̈ ‑kɔ 'ka yi 'bha 'ka ꞊dhɛ: ‹Atanna ‑ya pö n Dëmɛ ‑dhɛ 'ö‑ pö: ‑Bhö ‑ya ‑yɛa ꞊bhlëësü 'ö n "sɔɔ ya‑ 'gü ‑yö 'to‑ 'ka "dhʋ̈ ‑yö zun‑ 'ka yi 'a dho i 'yaɔ‑ ‑nu kë‑ 'ka i ‑gɛn ꞊wlöö ‑sabha 'ka bha‑ ‑bha.›
MAR 12:37 Mɛ 'ö Davi yöö ꞊dede 'ö‑ ‑dhɛ ö Dëmɛ bha, ‑yö kë ‑kɔ ‑kë ꞊dhɛ 'yö dho 'ö ‑kë 'zü yö ‑zë bhaanë 'ka?» 'Ö gun "dhʋ̈ kö mɛ kpö 'gbɛ ꞊dede ‑wo "tʋ 'to sië‑ ‑wʋ ‑bha 'ö‑ "dhia ‑yö ma‑ ‑nu 'gü.
MAR 12:38 'Yö zun 'mɛ 'wo bha‑ ‑nu ꞊klang kë ‑sü ‑bha 'ö‑ pö: «‑Ka ka ‑dɩ 'kun 'tɔnggɔmɛ ‑nu ‑gɔ. ‑A ‑gɛn ‑mü ꞊dhɛ sɛɛ" ‑kpɔ mɛ ‑nu ‑dhɛ "yigblütamɛ ‑nu ‑mü. ‑Tɔyang ꞊gblɛɛngblɛɛn bha ꞊në‑ ‑da ‑dhɔ ‑ya ‑nu ‑kë, waa‑ ‑bhɛa Atanna ‑dhɛ ‑kɔ 'gü ꞊gblɛɛngblɛɛn ‑nu bha‑ 'dhö, kë "dhʋ̈ kö mɛ ꞊gban "pɛpɛ ‑wa ‑nu ꞊bhlëë ‑ya, "ɛɛn kö mɛ ꞊gban "yan ‑ya ‑nu 'kun, kö ꞊wa ꞊loo "dhɛɛdhɛ ‑nu 'gü, kö ‑wa ‑nu ꞊bhlëë ‑ya, kö ‑wa ‑nu ꞊tua bho ‑së ꞊dede 'ka, "ɛɛn 'zü kö ‑wo ‑yɛa ꞊bhlëësü ꞊në‑ nu wo ‑dhɛ ‑dhɔkëdhɛ kë ‑dhɛ ‑nu waa‑ Zuifö ‑nu ‑bha ‑yakwëëkëgükɔ ‑nu 'gü, "kɛɛ 'sa kö wo ꞊në 'wo ꞊gɛandhe ‑nu ‑ta ‑bhö ‑sü ‑gɔ ‑bha. ‑A kë 'wo‑ wo sië "dhʋ̈ bha, Atanna ‑dho 'wɔn bho‑ ‑nu 'gü 'ö ‑ziö mɛ ꞊gban ‑bha ‑ta.
MAR 12:41 ꞊Dhɛ 'ö ö bo dhiang ‑nu bha‑ ‑nu zë ‑sü 'ka, 'yö dho 'ö ‑ya 'wëëga 'wo‑ ꞊gbaɔ Atanna ‑gɔ ‑a ‑dagüpë 'ö Atanna ‑dhɔkëgükɔ 'gü mü bha‑ "tʋ̈ng 'gü ꞊dhɛ ꞊dede 'gü. 'Yö zun 'wɔn 'suan‑ bho ‑sü bha kö gbaɔ‑ 'ö 'mɛ 'wo gun mü bha 'wo‑ wo sië‑ Atanna ‑gɔ bha 'ö‑ ‑dhɛ yö ‑së 'ka. ꞊Naɔmɛ 'gbɛ ‑wo ‑gun mü 'ö 'wo gun‑ ‑da sië mü wɛɛ" wɛɛdhö
MAR 12:42 ‑Yö ‑to ‑a ‑dhɛ ‑ga ‑dhɛ 'gü, 'yö ꞊gɛandhe "flɛɛsü 'në 'bha bha 'ö nu, 'yö 'wëë‑ "puu ga 'ö‑ ꞊bhlëë 'yaa ꞊mɔɔ 'wëëga do ‑zian ‑bha bha‑ ga ꞊plɛ ‑da 'pë bha‑ 'gü.
MAR 12:43 ꞊Dhɛ 'ö Yesu ‑ya ‑dhɛ yö, 'yö ö ‑bha ꞊klang ‑nu ‑dhɛ 'yö‑ pö‑ ‑nu ‑dhɛ: «‑Ka ‑dhɛ ‑ga, a‑ ‑pö ka ‑dhɛ tɛan‑ ꞊dede 'ka ꞊dhɛ ꞊gɛandhe ya 'pë 'ö‑ ꞊gbaɔ Atanna ‑gɔ ya ‑yö 'kpii‑ 'ö ‑ziö mɛ "pɛpɛ 'ö ꞊wa pë ꞊gbaɔ Atanna ‑gɔ ꞊dɛɛ ‑a ‑nu ꞊gban ‑bha ‑ta.
MAR 12:44 ‑A ‑gɛn ‑mü ꞊dhɛ 'mɛ 'wo bha‑ ꞊gban "pɛpɛ ‑wo ꞊naɔ ‑yaan ꞊në‑ kë sië, ‑a ‑nu ‑kɔ ‑kë ‑a ‑nu 'kën ‑gu ‑ta ‑sü ‑wɔn 'gü, "kɛɛ dhebhɔnë 'kö ya, 'pë 'ö ꞊ya gun ꞊ya 'to‑ ‑gɔ ‑a ‑bha pë ꞊gban ‑pë ꞊gban 'ka ꞊në 'ö‑ nu bha.»
MAR 13:1 ꞊Dhɛ 'ö Yesu ‑yö ö bo dhiang ‑nu bha‑ ‑nu zë ‑sü 'ka, 'ö go Atanna ‑dhɔkëgükɔ bha‑ 'gü 'ö zun "kpɛnng, 'yö‑ ‑bha ꞊klang ‑nu bha‑ mɛ do ‑yö ꞊yɔɔn‑ "sɔɔ 'yö‑ pö‑ ‑dhɛ: «N Dëmɛ, ‑bhö 'kɔ ya‑ ‑ga ꞊zɔɔ, ‑gwë suu ‑nu 'wo‑ dɔ‑ 'ka bha ‑bhö ‑a ‑ga kö 'i‑ ‑kë 'kpii‑ ‑kɔ waa‑ dhi ‑kɔ ‑nu bha‑ ‑ga.»
MAR 13:2 'Yö Yesu ‑ya ‑yɔ bɔ‑ ‑gɔ 'ö‑ pö: «'Kɔ suu ‑nu 'wo dɔ bha i "yan ‑ya ‑nu ‑bha ‑ee? ‑A ‑gwë ‑nu 'i‑ ‑ga sië bha‑ 'bha 'yii 'dho 'to 'ko ‑ta "dhʋ̈ng 'gü, ‑a ꞊gban ‑dho 'wü 'ö wü trëntrëndhö.»
MAR 13:3 ꞊Dhɛ 'ö ö bo dhiang bha‑ ‑yɔ bɔ ‑sü 'ka, 'yö dho 'ö ‑ya ‑tɔn 'wo Odhivie ‑tɔn ‑kë bha‑ ꞊gbin‑, Atanna ‑dhɔkëgükɔ bha‑ wëëdhɛ ꞊dede 'gü. 'Yö‑ ‑bha ꞊klang ‑nu bha‑ mɛ 'dhɛ 'wo‑ Piɛdhö ‑kë bha oo, Zakö oo, Zan oo, Andre oo, 'wo‑ dhɛɛ" kpɔ ꞊plɛ 'gü 'wo‑ pö:
MAR 13:4 «'Wɔn 'i go‑ pö yi ‑dhɛ ya, ‑yö ‑dho kë "dhʋ̈ ‑më "tʋ̈ng 'gü? "Ɛɛn 'zü ‑a kë "tʋ̈ng ꞊ya ꞊loo yi ‑dho ‑a 'suan‑ bho ‑më ‑wɔn waa‑ ‑më ‑wɔn ‑nu ꞊në‑ ‑bha?»
MAR 13:5 ꞊Dhɛ 'wo dhɛɛ" bha‑ kpɔ "dhʋ̈, 'yö zun dhiang ‑zë ‑a ‑nu ‑dhɛ ‑sü ‑bha 'ö‑ pö: «‑Ka ka ‑dɩ 'kun ‑së kö 'wa 'dho "kpënng‑ kë ka ‑gɔ,
MAR 13:6 ‑a ‑gɛn ‑mü ꞊dhɛ mɛ 'gbɛ‑ ‑dho nu n 'tɔ 'gü, 'ö 'wo‑ pö wo ꞊në 'wo n 'ka. 'Ö 'wo mɛ 'gbɛ ꞊dede bho Atanna ‑bha zian ‑ta.
MAR 13:7 "Tʋ̈ng 'ö ka dho‑ ma‑ 'ka ꞊dhɛ "sɛ 'ö ꞊ni waa‑ "sɛ 'ö ꞊ni ‑wo ‑gblü gɔɔn sië, "ɛɛn 'ö‑ gɔn ‑taɔng ‑nu dho ‑da 'ka ka "tʋʋdhö ka "sɔɔ, "ɛɛn 'zü ka 'ka ꞊gblɛɛn bha ka "gblʋ̈ʋ̈dhɛ 'ya 'dho "muu bho, ‑a 'klɔɔ‑ ‑mü ꞊dhɛ 'wɔn 'ö dho kë 'ö 'yii 'dho 'to‑ 'gü yö ‑mü, "kɛɛ yö ‑zë 'yii 'dho kë "kpʋngtaadhɛ "dhiʋ̈toyi 'ka.
MAR 13:8 "Sɛgɔ 'bha‑ ‑dho "wlü 'ö dho 'ö ‑pö "sɛgɔ 'bha ‑ta, 'ö ‑gblüdë 'bha ‑yö ꞊wlü, 'ö dho 'ö ‑gblü ‑da ‑gblüdë bha ‑ta, 'ö "sɛ 'dhö ꞊zii ‑nu wo ‑dhɛ ‑nu 'gü 'ka‑ ma, 'ö "vʋ̈ʋ̈ 'dhö ‑da ‑dhɛ ‑nu 'gü, "kɛɛ yö ‑zë ꞊gban‑ ‑dho kë ꞊dhɛ 'nëkpɔdhe ‑bha "gblü kë zübhosü ꞊në‑ 'dhö.
MAR 13:9 ‑Ka ka ‑zʋ 'kpɔ ka ‑dɩ 'gü, ‑a ‑gɛn ‑mü ꞊dhɛ ‑wo ‑dho 'dho ka 'ka za ꞊gblü "dhiʋ̈ ‑dhɛ ‑nu 'gü, 'ö 'wo ka ‑ma Zuifö ‑nu ‑bha ‑yakwëëkëgükɔ ‑nu 'gü, 'ö 'wo dho ka 'ka "sɛdë ‑nu ‑kuu "dhiʋ̈, 'ö 'wo dho ka 'ka ‑gblüdë ‑nu ‑kuu "dhiʋ̈ ka ‑bha ‑kë n ‑bha 'ka ‑sü ‑wɔn 'gü, kë "dhʋ̈ kö 'ka kë n "sɛɛ‑ 'ka ‑a ‑nu ‑dhɛ.
MAR 13:10 ꞊Ya 'go yö ‑zë 'gü, Atanna ‑bha naɔ ‑së bha 'yii "kpʋngtaadhɛ zun 'ko "dhiʋ̈ ꞊kö, "kpʋngtaadhɛ "dhiʋ̈ 'yii 'dho 'to. ‑A ‑dhɛa ‑bha ꞊dhɛ "sɛ ꞊gban "pɛpɛ 'gü ‑mɛ ‑nu ‑wa ma.
MAR 13:11 "Tʋ̈ng 'a "wɩ sië 'ka bha ꞊ya ꞊loo, ꞊wa ka 'kun kö ‑wo 'dho ka 'ka "sɛdë ‑nu waa‑ ‑gblüdë ‑nu ‑kuu "dhiʋ̈ n ‑wɔn 'gü, dhiang 'ö kaa‑ zë mü ‑a "sika 'ya 'dho kë ka 'gü, ‑a 'dhɛ 'ö dho nu ka zuë" "piʋ̈‑ "tʋ̈ng ꞊dede bha‑ 'gü bha ‑kaa pö, ‑a ‑gɛn ‑mü ꞊dhɛ 'yii 'dho 'go kaa ꞊dede ka 'gü, Atanna ‑bha 'Nii‑ "slʋ̈ʋ̈slʋ̈ 'ö ka 'gü bha ꞊në dho‑ dɔ ka "dhi.
MAR 13:12 ‑A "tʋ̈ng bha ꞊ya ꞊loo, 'në waa‑ ꞊dhoo ‑wo ‑dho wo 'ko "dhiʋ̈ dɔ ga ‑gɔ, 'ö 'në dë ‑yö ö gbö "ɛɛn ö 'dhu "dhiʋ̈ dɔ, 'ö 'në ‑nu ‑wo ꞊wlü wo 'kpɔmɛ ‑nu "piʋ̈ 'wo‑ ‑nu "dhiʋ̈ dɔ 'wo‑ ‑nu zë.
MAR 13:13 Ka ‑san ‑dho mɛ ꞊gban "pɛpɛ kë ka ‑bha ‑kë n ‑bha 'ka ‑sü ‑wɔn 'gü, "kɛɛ 'mɛ 'ö 'yii ö bo n 'ka, 'mɛ 'ö yaa ‑to ‑kplü ‑sü 'ka n ‑wɔn ‑bha "dhʋ̈ kö‑ 'to‑ 'ka "dhʋ̈ ‑yö ꞊loo‑ 'ka ‑a "dhiʋ̈yadhɛ 'gü, ‑a ‑mɛ ‑dho dha.»
MAR 13:14 'Yö go mü 'ö‑ pö: «‑A "tʋ̈ng bha ꞊ya ꞊loo, ka ‑dho 'pë 'wo‑ ‑dhɛ Atanna ꞊bhlëësiöpë 'yaa ‑yënngyënngsü, 'ö dho zë‑ ‑wɔn ‑dhɛ 'ö bo ö ‑bha 'kɔ 'ka bha‑ yö kö ‑yö ‑ya ‑sü 'ka ‑a ‑dhɔkëgükɔ 'gü ‑dhɛ 'ö 'yaa‑ ‑yɛa 'ka bha‑ 'gü. ('Yö Makö ‑ya pö: «A‑ ‑pö "dhʋ̈ kö 'mɛ 'ö 'sëëdhɛ ya‑ ‑wʋ pö sië ‑ya pö ö 'suan‑ 'ka.») 'Ka‑ ‑dhɛ yö "dhʋ̈ "tʋ̈ng 'ö‑ 'gü, 'mɛ 'ka dho kë Zude ‑sɛ 'gü, ‑ka ꞊dua 'ka 'dho ‑tɔn ‑gbeng 'gü ‑dhɛ ‑nu 'gü 'ka ka ‑gblɛn 'kpɔ mü.
MAR 13:15 'Mɛ 'ö yaa‑ ‑kë 'zü "kpɛnng, 'ya 'dho‑ pö ö ‑dɩ ‑dhɛ ꞊dhɛ 'ö 'dho pë 'bha 'sü ö ‑gɔ 'kɔɔdhö kö 'ö gun ‑na ziö ‑bɛang 'ka.
MAR 13:16 'Mɛ 'ö yaa‑ ‑kë 'zü 'bhlaa‑, 'ya 'dho‑ pö 'ö ö yee kë kö 'ö nu ö ‑bha "bhɛɛ 'sü ‑dhɛ 'gü 'pödhö,
MAR 13:17 "kɛɛ dhebhɔ ‑nu 'kö waa‑ ‑kë 'gbiö‑ "tʋ̈ng bha‑ 'gü, "ɛɛn 'ö 'në yaa‑ ‑kë ‑nu ‑gɔ 'yɔn ‑bha, wo ‑zë ‑a ‑nu ‑bha ‑dho kë ‑wëësü ꞊dedewo!
MAR 13:18 ‑Ka bhɛa" Atanna ‑dhɛ kö 'wɔn bha 'ya 'dho kë "dhʋ̈ "nɛnɛ yi 'ka,
MAR 13:19 ‑a ‑gɛn ‑mü ꞊dhɛ 'wɔn 'ö dho kë "tʋ̈ng bha‑ 'gü bha, ‑a ‑bha ‑kë ‑wëësü ‑sü ‑dhiang ‑zian 'yaa zë. Atanna 'dhö "kpʋngtaadhɛ ‑da "dhʋ̈ yi bha‑ 'ka, ‑a ‑wëëwɔn suu 'ö "dhʋ̈ 'yii kë do, "ɛɛn ‑a "sinma 'yii 'dho kë 'zü 'ö to‑ ‑bha.
MAR 13:20 ꞊Ya kë ꞊dhɛ ‑dhɛkpaɔyi 'ö "dhʋ̈ bha Atanna 'yii‑ 'bha "kan‑ "dhiʋ̈ 'nu, kö dhamɛ ‑zian 'yii 'dho ꞊slɔɔ, "kɛɛ ꞊yaa‑ 'bha "kan‑ "dhiʋ̈ 'mɛ 'ö‑ ‑nu ‑ya ‑dɩ ‑ta ö ‑bha 'ka bha‑ ‑nu ‑wɔn 'gü.
MAR 13:21 ‑A ‑kë "dhʋ̈ ‑sü 'gü, ꞊waa‑ pö ka ‑dhɛ ꞊dhɛ Klisi ꞊ya nu, ‑yö ‑dhɛ 'ö ya‑ 'gü, "ɛɛn ‑yö ‑dhɛ 'ö ꞊ni‑ 'gü, 'ya 'dho bhɔ ka 'gü tɛan‑ ‑bha.
MAR 13:22 ‑A ‑gɛn ‑mü ꞊dhɛ ‑dɩ ‑kë Klisi 'ka ‑mɛ ‑nu waa‑ Atanna ‑wʋdhiʋ̈loomɛ ꞊flü ‑sü ‑nu 'gbɛ‑ ‑dho "wlü "tʋ̈ng bha‑ 'gü, 'ö 'wo "slë ‑nu waa‑ "dhabhliwɔn "gblʋ̈gblʋ̈ ‑nu ‑kë, kë "dhʋ̈ kö ‑wo 'mɛ 'ö Atanna ‑ya ‑nu ‑ya 'ö 'wo bɔ‑ 'ka bha‑ ‑nu bho‑ ‑bha zian ‑ta "ni kö‑ ‑nu faan ‑zë ꞊ya ꞊mɔɔ‑ ‑bha.
MAR 13:23 ‑A ꞊gban 'to 'a‑ wo "dhiʋ̈ 'a‑ pö ka ‑dhɛ bha a‑ ‑kë "dhʋ̈ kö 'ka ‑ya ꞊në‑ wo ka 'suan‑ 'ka.»
MAR 13:24 ꞊Dhɛ 'ö‑ pö "dhʋ̈, 'yö go mü 'ö‑ pö: «'Wɔn "nɛnɛgasü 'a‑ ‑dhiang zë ka ‑dhɛ bha yö ꞊në ꞊ya bo kë ‑sü 'ka kö ‑a ‑dhɛkpaɔyi ‑yö zun 'ko "dhiʋ̈, 'yö 'yënng‑ ‑gɔ 'dho ꞊tröö, 'yö "su ‑dɩ 'pö 'ö bo 'bhü ‑sü 'ka.
MAR 13:25 'Yö "susëngga ‑nu 'wo go dhang‑ ‑bha 'wo ꞊wɛnng, 'yö pë ‑ziisü ‑ziisü ‑nu 'wo dhang‑ 'gü ‑a ‑nu ꞊gban 'wo go "glʋʋ.
MAR 13:26 'Yö 'wo gun ‑na mang Mɛgbömɛ n yö kö a nu sië dha 'kpong‑ ‑ta ma ‑gblüdëdhɛ ‑faan waa‑ 'gü 'tɔbhɔdhe bha‑ 'ka ‑yɛɛdhö.
MAR 13:27 'Yö 'a gun ‑na ma "kië ‑nu bɔ "kpʋngtaadhɛ ꞊gban "pɛpɛ 'gü kö ‑wo 'mɛ 'wo bɔ n 'ka 'ö Atanna ‑ya ‑nu ‑ya bha‑ ‑nu ꞊loo 'ko ‑ta ‑dhɛ do 'gü.
MAR 13:28 ꞊Dhɛ 'ö ö bo, 'yö‑ pö 'wɔn ‑nu bha‑ ‑nu 'suan‑ ‑bho ‑bha ‑pë 'a dho‑ ‑zɔn ka ‑dhɛ yö ‑mü figö ‑dhü ꞊në‑ 'ka, 'ka "dhü bha‑ yö, kö ‑yö ö ‑trɔng ‑dee "pʋ sië kö 'ka 'to 'ka‑ 'wɔn dɔ ꞊dhɛ ‑a bhɛ dɔ "tʋ̈ng ꞊ya ꞊loo ꞊gban wo.
MAR 13:29 ꞊Ya kë ꞊dhɛ 'ka 'wɔn ‑nu 'a‑ ‑dhiang zë ka ‑dhɛ bha‑ kë ‑dhɛ yö 'pö ꞊dhɛ ‑kɔ bha‑ 'dhö, kö ‑yö kë ka "yaan ꞊dhɛ n nu "tʋ̈ng ꞊ya ꞊loo, ꞊dhɛ 'ma dɔ "kpan "dhiʋ̈.
MAR 13:30 A‑ ‑pö ka ‑dhɛ tɛan‑ ꞊dede 'ka ꞊dhɛ 'mɛ 'wo ‑tosɛa kë sië dɔ ‑kɔ ya‑ 'gü ya, ‑a ‑nu ꞊gban 'wii 'dho ga kö 'pë 'a‑ pö bha‑ ꞊gban 'yii kë ꞊kö.
MAR 13:31 ‑Yö kë ka "yaan ꞊dhɛ "sɛ waa‑ dhang‑ ‑wo ‑dho ziö, "kɛɛ n ‑wʋ 'yii 'dho go "gblʋʋ tongtongdhö.»
MAR 13:32 ꞊Dhɛ 'ö‑ pö "dhʋ̈, 'yö‑ ‑ta yɔ‑ ‑nu ‑dhɛ 'ö‑ pö: «N nu ‑yi ‑zë mɛ 'bhaa‑ dɔ waa‑ n nu "tʋ̈ng ꞊dede 'dhö kö 'yii kë n Dë Atanna ‑zë 'ka, mang ꞊dede ‑zian 'a‑ gbö 'ka ya 'maa‑ dɔ kö yöö ‑nu 'to‑ ‑bha "kië ‑nu ꞊në‑ ‑bha.
MAR 13:33 ꞊Dhɛ 'ö "dhʋ̈, ‑ka ‑ya ka "yaan kö 'ka bhɛa" kö 'ka ka "tʋ̈ng kë 'wɔn ‑nu 'a‑ pö ka ‑dhɛ bha‑ ‑nu 'gü kö ‑wo 'to ka "yaan. ‑A ‑gɛn ‑mü ꞊dhɛ 'kaa yi 'ö bha‑ ꞊loo "tʋ̈ng dɔ.
MAR 13:34 ‑Yö ‑dho kë ꞊dhɛ gɔndënë do 'ö dho "ta 'gü ꞊në‑ 'dhö. ꞊Dhɛ 'ö yöö 'dho, 'yö ö ‑bha 'kɔ to, 'yö ö ‑wʋ kpɔ ö ‑bha gwëëzë ‑nu ‑bha, 'yö‑ pö 'kɔ ‑maakëmɛ ‑dhɛ ‑yö ö ‑zʋ kë 'kɔ bha‑ 'gü kö ‑ya ‑maa kë, 'ya 'dho yi zë.
MAR 13:35 Kaa ‑dɩ 'pö, ‑ka ‑ya ka "yaan ‑kɔ do bha‑ 'gü, ‑a ‑gɛn ‑mü ꞊dhɛ 'kaa ka Dëmɛ nu "tʋ̈ng dɔ, kö ‑yö ‑dho nu yɛan" "piʋ̈ ‑ee? Kö ‑yö ‑dho nu gbeng ꞊zinng 'gü ‑ee? Kö ‑yö ‑dho nu ‑dhɛkpaɔ "dhiʋ̈ ‑ee? "Ɛɛn kö ‑yö ‑dho nu dhia" "piʋ̈ ‑ee? Kaa‑ dɔ.
MAR 13:36 ꞊Dhɛ 'ö ‑kë ꞊dhɛ ‑yö ‑dho "kan ꞊në‑ wo ka 'gü bha, ‑ka kë ka 'suan‑ 'ka kö 'ya 'dho ‑kpan ka ‑bha kö ka yi 'gü.
MAR 13:37 (‑Gɔngɔɔnmɛ ‑nu ‑bha ‑dhio ‑yö do), 'ma‑ pö ka ‑dhɛ "dhʋ̈ kö mɛ ꞊gban "pɛpɛ ꞊në 'a‑ ‑nu ‑bha dhiang zë bha do, ‑ka ‑ya ka "yaan!»
MAR 14:1 ꞊Dhɛ 'ö ‑dhɛkpaɔyi ꞊ya 'to ꞊plɛ kö Pakö troo waa‑ 'bluu‑ 'ö "sɛkɛ 'yaa‑ ‑bha ‑a ‑bhö ‑yi ‑yö ꞊loo, 'yö "saabhomɛ ‑nu ‑gɔmɛ ‑nu waa‑ 'tɔnggɔmɛ ‑nu 'wo zun‑ "slë mɔɔ‑ ‑sü ‑bha kö 'wo "kpënng‑ kë Yesu ‑gɔ 'wo‑ 'kun ‑suɛɛdhö 'wo‑ zë.
MAR 14:2 ‑A 'klɔɔ‑ ‑mü ꞊dhɛ kö ‑wa pö sië ꞊dhɛ ꞊ya kë troo yi ꞊dede 'ka wo ‑kɔ 'yii 'dho ꞊mɔɔ‑ ‑bha kö 'wo‑ 'kun, ‑a ‑gɛn ‑mü ꞊dhɛ ꞊ya kë "dhʋ̈ "sɛgümɛ ‑nu ‑dho "wlü wo "piʋ̈.
MAR 14:3 'Ö gun kö Yesu ‑yö Simɔ 'ö go Betani 'ö ꞊wee ‑yua gun‑ ‑bha bha‑ ‑gɔ 'kɔɔdhö Betani, 'yö dhebhɔ do ‑yö ‑da 'kɔɔdhö, ‑a "tʋ̈ng bha‑ 'ka kö ‑wo pë ‑bhö sië. 'Ö ‑da 'kɔɔdhö kö ‑dhasiklɔɔ "yi sɔng "gbɩɩ‑ 'wo‑ ‑pë ‑kë "dhü 'wo‑ naadhö ‑kë bha‑ yun 'ka bha, ‑yö ‑gwë "puu ‑sangdhe do pa ‑sü 'ka kö ‑ya ‑gɔ. ꞊Dhɛ 'ö ‑da 'kɔɔdhö, 'yö ‑sangdhe bha‑ ‑gɔ bho‑ "dhiʋ̈, 'yö ‑dhasiklɔɔ "yi 'ö gun‑ 'gü bha‑ ꞊wɛnng Yesu ꞊gbin‑.
MAR 14:4 ‑A kë 'ö‑ wo "dhʋ̈ bha 'yii dhi 'mɛ 'wo gun mü bha‑ mɛ 'bha ‑nu ‑dhɛ, 'yö 'wo‑ pö: «'Yö ‑dhasiklɔɔ sɔng "gbɩɩ‑ suu 'kö ya‑ ‑see ꞊ni ‑gɛn ‑mü ‑më 'ka?
MAR 14:5 ꞊Ya kë 'nu ꞊dhɛ ‑a "dhɔɔ ꞊në 'kwa‑ dɔ, ‑yö ‑mɔɔ ‑bha 'nu 'ö 'wëë‑ 'kpii‑ ꞊dede ꞊slɔɔ, 'yö 'wëëga 'kö bha 'kwa‑ 'gü ‑gblü "flɛɛmɛ ‑nu ‑ta, ("kɛɛ yö ꞊në ꞊waa‑ ꞊gban see‑ bha!)» 'Yö 'wo zun ‑dɔn bho ‑sü bha dhebhɔ bha‑ 'ka.
MAR 14:6 "Kɛɛ 'yö Yesu ‑ya pö: «‑Ka ka kwaa dhebhɔ bha‑ ‑zü. Ka‑ ‑din ‑yën ‑më ‑wɔn 'gü? ꞊Ya ö ‑bha 'wɔn ‑së ꞊në kë n ‑dhɛ bha,
MAR 14:7 ‑a ‑gɛn ‑mü ꞊dhɛ "flɛɛmɛ ‑nu ‑zë ‑wo ‑dho kë ka "piʋ̈ "kpʋng ꞊taa yi ꞊gban 'ka, 'wɔn ‑së ‑kë ‑a ‑nu ‑dhɛ ‑wɔn ꞊ya ga ka 'gü "tʋ̈ng "ʋʋ "tʋ̈ng 'ö‑ 'gü ka ‑mɔɔ ‑bha 'ka‑ ‑kë ‑a ‑nu ‑dhɛ, "kɛɛ ma ‑zë, 'mii 'dho kë ka "piʋ̈ yö yi ꞊gban 'ka, 'ö "dhʋ̈ kö ‑a "tʋ̈ng ꞊në ‑tun ya kö 'ka‑ ‑zɔn n ‑dhɛ ꞊dhɛ n ‑dhɔ ‑yö ka ‑kë.
MAR 14:8 Dhebhɔ bha‑ ‑bha 'ö‑ ‑kɔ ꞊mɔɔ‑ ‑bha 'yö‑ kë bha. ‑Dhasiklɔɔ "yi 'ö yöö‑ ꞊wɛnng n ꞊gee ‑bha 'nu kö ‑wo n ‑wɛɛ bho‑ 'ka bha ꞊në 'ö‑ yi to "dhiʋ̈ 'yö ꞊wɛnng n ‑ta bha.
MAR 14:9 A‑ ‑pö ka ‑dhɛ tɛan‑ ꞊dede 'ka ꞊dhɛ 'wɔn 'ö dhebhɔnë ya 'ö‑ ‑kë bha, 'wo dho Atanna ‑bha naɔ ‑së ya‑ dɔ ‑dhɛ "ʋʋ ‑dhɛ 'ö‑ 'gü "kpʋng ꞊taa, ‑wo ‑dho ‑a ‑dhiang zë mü 'pö kö mɛ 'bha ‑zʋ 'ya 'dho bhɔ‑ 'ka.»
MAR 14:10 ꞊Dhɛ 'ö ꞊ya kë "dhʋ̈, 'yö Zuda Isikadhiɔtö 'ö ‑kë ‑a ‑bha ꞊klang ‑nu ‑kaɔng do ga ꞊plɛ bha‑ ‑mɛ do 'ka bha, 'ö ꞊wlü 'ö dho "saabhomɛ ‑nu ‑gɔmɛ ‑nu "piʋ̈, kö 'ö Yesu "dhiʋ̈ dɔ‑ ‑nu ‑dhɛ.
MAR 14:11 ꞊Dhɛ 'ö dho 'ö ö "kplëng bho ‑a ‑nu ‑dhɛ, 'yö‑ 'gü ‑wɔn ‑yö ‑dhi ‑a ‑nu ‑dhɛ ꞊dedewo, 'yö 'wo "plüün bho‑ ‑dhɛ 'wo‑ pö wo ‑dho ‑a gba 'wëë‑ 'ka. ꞊Dhɛ 'ö Zuda ‑yö go mü, 'yö zun "tʋ̈ng ‑së 'ö‑ ‑kɔ dho ꞊mɔɔ‑ 'ka‑ ‑bha kö ‑ya "dhiʋ̈ dɔ‑ 'ka ‑a ‑nu ‑dhɛ bha‑ mɔɔ‑ ‑sü ‑bha.
MAR 14:12 ꞊Dhɛ 'ö troo 'ö 'wo 'bluu‑ 'ö "sɛkɛ 'yaa‑ ‑bha ‑a ‑bhö ‑ta bha‑ yi ‑blɛɛsü 'ö‑ yi ꞊bhlëësü ꞊dede 'ka, 'ö ‑tuʋ̈ ‑zian 'wo dho‑ zë troo 'ö‑ ‑nu ‑zʋ ‑da ‑a ‑nu "bhɛma ‑nu ‑go Ezitö ‑yi ‑ta, 'wo‑ Pakö ‑kë bha‑ zë‑ 'ka bha ꞊ya ꞊loo, 'yö‑ ‑bha ꞊klang ‑nu bha 'wo‑ pö‑ ‑dhɛ: «‑Dhɛ ‑mɛɛ ꞊në i "piʋ̈ ꞊dhɛ 'yi 'dho‑ ‑bha kö 'yi i ‑bha Pakö ‑pë ‑kpa mü, yi Dëmɛ?»
MAR 14:13 'Yö ö ‑bha ꞊klang ‑nu bha‑ mɛ ꞊plɛ bɔ, 'yö ö ‑wʋ kpɔ‑ ‑nu ‑bha 'ö‑ pö: «‑Ka 'dho Zedhizadhɛmö, 'ka 'dho ka ‑dho ‑kpan gɔndë do 'bha ‑bha kö "yipë ‑ya ‑gɔ, 'ka‑ yö ‑ka ziö‑ ꞊keng‑,
MAR 14:14 'ka 'dho, yaa‑ ‑da 'kɔ 'ö‑ 'gü bha, ‑kaa pö‑ 'kɔ bha‑ dëmɛ ‑dhɛ ꞊dhɛ: ‹Yi dëmɛ ‑ya ‑pö 'yi nu kö 'yi i dhɛɛ" 'kpɔ kö 'kɔdhi 'ö waa‑ ö ‑bha ꞊klang ‑nu wo dho Pakö ‑bhöpë ‑bhö 'gü bha 'i‑ ‑zɔn yi ‑dhɛ.›
MAR 14:15 'Ka‑ pö "dhʋ̈, ‑yö ‑dho 'kɔ 'gü 'bong ‑bong do, 'ö‑ 'güdhɛ ꞊gban 'dhö ‑pë kë ‑sü 'ka ‑së 'ka, 'ö ‑yatapë ꞊gban 'dhö mü ‑a ‑dhɛ ‑zɔn ka ‑dhɛ 'kɔ ‑ta "dhʋ̈ng 'gü. ‑Dhɛ bha ꞊në 'ka dho kwa ‑bha Pakö ‑pë ‑kpa ‑a 'gü.»
MAR 14:16 'Yö‑ ‑bha ꞊klang ‑nu ꞊plɛ bha 'wo dho. 'Yö 'wo ‑kpan ‑bha ꞊dhɛ ‑kɔ do 'ö‑ pö‑ 'ka ‑a ‑nu ‑dhɛ bha‑ 'dhö. 'Yö 'wo Pakö ‑pë ‑kpa mü. ꞊Dhɛ 'wo wo bo, 'yö 'wo wo yee ‑kë 'wo dho‑ ‑dhɛ 'gü.
MAR 14:17 ꞊Dhɛ 'ö ꞊wa ꞊gloo mü 'ö "bin ꞊ya 'ma, 'yö waa‑ ‑bha ꞊klang ‑nu ‑kaɔng do ga ꞊plɛ bha 'wo ꞊loo Pakö ‑pë ‑bhö ‑dhɛ bha‑ 'gü.
MAR 14:18 ꞊Dhɛ 'wo ꞊klëën ‑bhöpë bha‑ ‑zü, 'ö 'wo‑ ‑bhö ‑sü zü bho ‑së 'ka, 'yö‑ pö‑ ‑nu ‑dhɛ 'ö‑ pö: «Kwa‑ ‑bha ‑zë wo, "kɛɛ tɛanwɔn do 'bha‑ ‑dhö 'a dho‑ pö ka ‑dhɛ. Yö ‑mü ꞊dhɛ 'mɛ 'ö kwɛng‑ ‑nu kwa ‑kɔ 'dhö 'tɛa‑ do 'gü ya, mɛ do‑ ‑dho n "dhiʋ̈ dɔ n 'yaɔ‑ ‑nu ‑gɔ
MAR 14:19 ‑A pö 'ö‑ wo "dhʋ̈ bha, 'yö‑ ‑nu "gblʋ̈ʋ̈dhɛ "muu bho, 'yö ‑wëë ‑yö zun ‑da ‑sü ‑bha ‑a ‑nu ‑ta, ‑a ‑gɛn ‑mü ꞊dhɛ 'yaa gun‑ ‑nu "piʋ̈ ꞊dhɛ 'wɔn suu bha ‑yö kë Yesu 'ka. 'Yö 'mɛ 'ö "dhʋ̈ 'ö zun‑ dhɛɛ" 'kpɔ ‑sü ‑bha 'ö‑ pö: «‑A ‑ga 'i‑ wo bha ꞊wɛ, n Dëmɛ, ‑yö i 'gü ꞊dhɛ ma ‑mü ‑ee?»
MAR 14:20 'Yö‑ ‑yɔ bɔ‑ ‑nu ‑gɔ 'ö‑ pö: «Mɛ ‑kaɔng do ga ꞊plɛ 'ka bha mɛ do ‑mü. Mɛ 'dhɛ yɛng yi ‑kɔ 'dhö 'tɛa‑ do 'gü bha yö ‑mü.»
MAR 14:21 'Yö go mü 'ö‑ pö: «‑Yö "dhʋ̈ tɛan‑ 'ka ꞊dhɛ mang Mɛgbömɛ n ga ‑wɔn ‑yö ‑dhö ꞊dhɛ ‑kɔ 'ö ‑bɛn zë ‑sü 'ka‑ 'ka Atanna ‑gɔ 'sëëdhɛ 'gü‑ 'dhö, "kɛɛ 'mɛ 'ö dho kë ‑a ‑gbɔ ‑dɔ ö ‑dɩ ꞊gbin‑ ‑mɛ 'ka bha ꞊në‑ ‑mɛ ‑bha 'dhö ‑wëësü. ‑A fië‑ ‑dhö ‑zianwo 'nu kö‑ ‑mɛ 'ya 'dho bhɔ.»
MAR 14:22 'Wo gun pë ‑bhö sië, 'yö Yesu ‑yö 'bluu‑ sü, 'yö Atanna nuɛ" bho‑ ‑wɔn 'gü, ꞊dhɛ 'ö ö bo, 'yö‑ "kplü "kplü bho, 'yö‑ 'gü ‑gblü ö ‑bha ꞊klang ‑nu ‑ta, 'yö‑ pö‑ ‑nu ‑dhɛ: «N kwi "blɛɛn‑ ꞊nɛ, ‑kaa 'kun 'ka‑ ‑bhö.»
MAR 14:23 'Yö go mü 'zü 'ö we ‑kɔɔ sü, 'yö Atanna nuɛ" bho‑ ‑wɔn 'gü, ꞊dhɛ 'ö ö bo, 'yö‑ nu‑ ‑nu ‑dhɛ, 'yö‑ ‑nu ꞊gban 'wo‑ mü.
MAR 14:24 'Yö‑ pö‑ ‑nu ‑dhɛ: «N ꞊yɔɔn 'ö yöö ‑wɛnng kö ‑yö kë ‑mlɛɛ ‑dee 'ö maa‑ ‑da n Dë Atanna waa‑ mɛ kpö 'gbɛ ‑a ‑nu ꞊zinng 'gü kö ‑ya ‑nu ‑kɔ ‑da 'ko ꞊kwɛng bha‑ "blɛɛn‑ ꞊nɛ.»
MAR 14:25 'Yö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: ꞊Ya 'go ꞊dɛɛ 'gü, 'mii 'dho ‑drɔɔ mü 'ö dho 'ö zun‑ 'ka yi 'a dho‑ ‑dee mü‑ 'ka Atanna ‑bha ‑gblüdëdhɛpö 'gü bha‑ ‑bha.»
MAR 14:26 ꞊Dhɛ 'wo wo bo 'yö 'wo Pakö "tan ‑nu bho, 'yö 'wo ‑ziö 'wo dho Odhivie ‑tɔn ꞊gbin‑.
MAR 14:27 ꞊Dhɛ 'wo dho 'wo ꞊loo mü 'yö Yesu ‑ya pö ö ‑bha ꞊klang ‑nu ‑dhɛ 'ö‑ pö: «Mɛ "pɛpɛ 'ka bha mɛ ꞊gban ka ‑dho "kan n ‑zü 'kwëë‑, 'ö 'ka ꞊dua. ‑A ‑gɛn ‑mü ꞊dhɛ ‑yö ‑bɛn zë ‑sü 'ka Atanna ‑bha 'sëëdhɛ 'gü ꞊dhɛ: A ‑dho ‑tuʋ̈ ‑maagɔmɛ zë, 'yö‑ ‑bha ‑tuʋ̈ ‑nu 'wo dɔ bunnggɛɛdhö.
MAR 14:28 "Kɛɛ ꞊wa n zë "dhʋ̈, a ‑dho ‑bö 'zü ‑deewo. ꞊Ya kë ꞊dhɛ 'ma bo ‑bö ‑sü 'ka, a ‑dho ‑da ka "dhiʋ̈ 'a dho Gadhidhe ‑sɛ 'gü.»
MAR 14:29 ꞊Dhɛ 'ö‑ pö "dhʋ̈, 'yö Piɛdhö ‑ya pö‑ ‑dhɛ: «(N Dëmɛ,) 'kö 'zü mɛ ꞊gban "pɛpɛ ꞊wa bo i 'ka, "kɛɛ ma ‑zë, 'mii 'dho bo i 'ka tongtongdhö.»
MAR 14:30 'Yö Yesu ‑ya ‑yɔ bɔ‑ ‑gɔ 'ö‑ pö: «Piɛdhö, a‑ ‑pö i ‑dhɛ tɛan‑ ꞊dede 'ka ꞊dhɛ bhii ꞊dede ‑zian 'i "wɩ sië bha, gbeng do 'ö ꞊dɛɛ 'yii 'dho ziö kö 'wɔn 'a‑ pö bha 'bha‑ kë. ‑A ‑gɛn ‑mü ꞊dhɛ "sanni ‑wa pö ‑tɔgɔn ꞊ya "wɩ ꞊dhɛ pë ꞊plɛ 'dhö, kö 'bha bo n 'ka ‑gɛnyan 'ka ‑yaaga.»
MAR 14:31 "Kɛɛ 'yö Piɛdhö ‑ya zë 'zü ö ‑sɔbhɛɛ ꞊dede ‑bha 'ö‑ pö: «'Kö ꞊ya kë ga ‑zian ꞊në‑ 'ka, yi ‑dho ‑a wo yi "kwëë, "kɛɛ 'mii 'dho "kan ‑zë wo i ‑bha tongtongdhö, n Dëmɛ.» 'Yö 'mɛ 'wo bha‑ ‑nu ꞊gban 'wo ‑wʋ do bha‑ pö.
MAR 14:32 'Yö 'wo ‑ziö 'zü 'wo dho ‑dhɛ do 'bha 'wo‑ Zɛsemane ‑dhɛ ‑kë bha‑ 'gü. ꞊Dhɛ 'wo ꞊loo mü 'yö Yesu ‑ya pö ö ‑bha ꞊klang ‑nu ‑dhɛ: «‑Ka ‑ya n ‑gɔ yö kö 'a 'dho ‑bhɛa Atanna ‑dhɛ ‑dhɛ 'gü.»
MAR 14:33 'Yö Piɛdhö 'dhö, Zakö 'dhö, Zan 'dhö ‑a ‑nu ‑dhɛ, 'yö 'wo dho. "Kɛɛ "tʋ̈ng 'wo dho sië‑ 'ka "dhʋ̈ bha, kö "suʋ̈ ꞊ya ‑da ‑a 'gü, kö "nɛnɛga ‑sɛa ꞊ya ‑ya bha ‑sü ‑bha ‑a ‑bha, kö ‑wëë ‑yö ‑da sië‑ ‑ta.
MAR 14:34 'Yö‑ pö mɛ ‑yaaga bha‑ ‑nu ‑dhɛ 'ö‑ pö: «Ga ‑sü zii ꞊ya kpa n ‑ta, ꞊dhɛ 'ö "dhʋ̈, ‑ka 'to yö, "kɛɛ ‑ka ‑ya ka "yaan 'ka 'dho yi zë.»
MAR 14:35 ꞊Dhɛ 'ö‑ pö "dhʋ̈, 'yö ꞊yɔɔn 'dɛdɛ wo ö "dhiʋ̈, 'yö ꞊kwaa ö ‑dɩ ‑zü "sia‑, 'yö ꞊bhɛa Atanna ‑dhɛ kö ꞊ya kë ꞊dhɛ ꞊ya kë‑ ‑dhidhɛwɔn 'ka, kö "tʋ̈ng bha ‑ya dɔ ö 'ka ꞊gblɛɛn.
MAR 14:36 'Yö ꞊bhɛa 'ö‑ pö: «N Dë, bhi ꞊në i ‑fiëbhawɔn 'yaa 'dhö, ‑bhö dɔ "gbɩɩ‑, "ni kö ꞊ya kë i ‑dhidhɛwɔn ‑zë 'ka, kö 'wɔn "gbɩɩ‑ 'ö maa‑ "yi mü ya 'i‑ 'kpɔ n 'ka, "kɛɛ yö ꞊në‑ ꞊gban 'gü, kö ‑yö ga bhi ꞊në i 'gü, kö 'ya 'dho kë ma ‑zë n ‑dhidhɛwɔn 'ka.»
MAR 14:37 ꞊Dhɛ 'ö ꞊bhɛa Atanna ‑dhɛ "dhʋ̈ 'ö ö bo, 'yö ö yee ‑kë 'ö nu ö ‑bha ꞊klangdhiʋ̈ ‑nu ‑yaaga bha‑ ‑nu ‑dhɛ 'gü. 'Ö nu ‑yö ‑kpan ‑nu ‑bha kö ꞊wa yi zë. 'Yö pa‑ ‑nu ‑bha 'yö‑ pö Piɛdhö ‑dhɛ: «Simɔ, 'bha yi zë 'nu ‑wa! 'Aa, Piɛdhö, bhii ꞊mɔɔ‑ ‑bha kö 'i "tʋ̈ng do ‑zian ‑to "yaan kë ‑wa?
MAR 14:38 ‑Ka ‑ya ka "yaan kö 'ka bhɛa", kë "dhʋ̈ kö Sɔtraan ‑bha "kpënng‑ ‑kɔ 'ya 'dho ꞊mɔɔ ka ‑bha 'ö ka ‑da Atanna "dhiʋ̈, ‑a ‑gɛn ‑mü ꞊dhɛ ‑to Atanna dhɔɔbhaa ‑zian ‑ta ‑dhɔ ‑yö kë mɛ "bhɩɩ‑ ‑nu ‑bha, "kɛɛ ‑a kë "sɩ ꞊në 'yaa kë‑ ‑nu ‑dhɛ.»
MAR 14:39 'Yö ‑ziö 'zü ‑deewo 'ö dho ‑dhɛ do 'ö ꞊bhɛa Atanna ‑dhɛ ‑a 'gü ‑blɛɛsü bha‑ 'gü, 'yö ꞊bhɛa 'zü ꞊dhɛ ‑kɔ do 'ö ꞊bhɛa‑ 'ka ‑blɛɛsü bha‑ 'dhö.
MAR 14:40 'Yö nu 'zü ‑deewo ö ‑bha ꞊klang ‑nu ‑dhɛ 'gü, 'ö nu ‑yö ‑kpan ‑a ‑nu ‑bha kö ꞊wa yi zë 'zü ‑deewo. ‑A ‑gɛn ‑mü ꞊dhɛ 'ö gun "dhʋ̈ kö‑ ‑nu "yankɔ ꞊gbaan kë 'gbiin‑ yi kaɔ. Woo dhiang 'ö‑ zë‑ ‑dhɛ 'wii‑ ꞊slɔɔ.
MAR 14:41 'Yö ‑ziö 'zü ‑deewo 'ö dho. Nu ‑yaaga ‑naa 'ö‑ wo, 'yö pa‑ ‑nu ‑bha 'yö‑ pö‑ ‑nu ‑dhɛ 'ö‑ pö: «Yi ‑zian ꞊në 'ka‑ zë sië "dhʋ̈ do ‑wa! ‑Yö 'to "dhʋ̈! "Tʋ̈ng 'a gun "suʋ̈ sië‑ ‑gɔ ꞊ya ꞊loo ‑ya bo, ‑a ‑gɛn ‑mü ꞊dhɛ mang Mɛgbömɛ n "dhiʋ̈ ‑dɔ 'wɔnyaakëmɛ ‑nu ‑dhɛ "tʋ̈ng bha ꞊ya ꞊loo.
MAR 14:42 ‑Ka "wlü 'kwa 'dho, 'mɛ 'ö yöö n "dhiʋ̈ dɔ bha ꞊ya dun kwa ‑ta.»
MAR 14:43 Dhiang bha ‑yö ‑to Yesu "dhi, 'yö‑ ‑bha ꞊klang ‑nu ‑kaɔng do ga ꞊plɛ bha‑ mɛ 'dhɛ 'wo Zuda ‑kë bha 'ö ‑wo, kö mɛ kpö 'kpii‑ 'ö ‑siang ‑nu waa‑ "dhünë ‑nu 'wo‑ ‑nu ‑ta, 'ö "saabhomɛ ‑nu ‑gɔmɛ ‑nu oo, 'tɔnggɔmɛ ‑nu waa‑ Zuifö ‑nu ‑bha ‑kwɛagbö ‑nu 'wo‑ bɔ bha ‑wa ꞊keng‑.
MAR 14:44 Yö ‑zë 'ö gun kë sië "dhʋ̈ "tʋ̈ng 'ö‑ 'gü bha kö Zuda 'ö dho‑ "dhiʋ̈ dɔ‑ 'kunmɛ ‑nu ‑dhɛ bha ꞊ya ö ‑wʋ 'kpɔ 'mɛ wɛng‑ ‑nu 'wo nu sië bha‑ ‑nu ‑bha ꞊yaa‑ pö: «꞊Ya kë ꞊dhɛ 'kwa 'dho, 'mɛ 'a dho‑ ꞊loo‑ ‑bha bha kö 'mɛ 'a ‑wɩ 'ka bha 'yö bha, kö 'ka‑ 'kun 'ka 'dho‑ 'ka, "kɛɛ 'ka‑ 'kun ‑së (kö 'ya 'dho dha ka ‑gɔ).»
MAR 14:45 ꞊Dhɛ 'wo nu 'wo ꞊loo‑ ‑nu ‑dhɛ 'gü, 'yö to 'ö dho Yesu ‑zian 'ka, 'yö‑ pö‑ ‑dhɛ: «N Dëmɛ!» 'Yö‑ ꞊loo‑ ‑bha,
MAR 14:46 'yö 'mɛ 'wo bha 'wo Yesu kun.
MAR 14:47 'Yö 'mɛ 'wo gun Yesu ꞊keng‑ bha‑ mɛ do ‑yö ‑kɔ ‑da ö ‑bha ‑siang 'gü, 'yö bho ö kwɛɛ", 'yö "saabhomɛ ‑gɔmɛ 'kpii‑ ‑bha gwëëmi zë‑ 'ka‑ ‑gɔ ‑bha, 'yö‑ "tʋ kpö bho mü.
MAR 14:48 'Yö Yesu ‑yö dhiang zë 'mɛ 'wo nu‑ 'kun bha‑ ‑nu ‑dhɛ 'ö‑ pö: «Nu 'ka‑ wo n 'kun ‑dhɛ 'gü ‑siang ‑nu waa‑ "dhünë ‑nu 'ka ꞊dhɛ mɛ‑ dɔ mɛzëmɛ 'ka ya‑ ‑gɛn ‑mü ‑më 'ka?
MAR 14:49 Ka "yan 'yaa gun n ‑bha ka kpö 'gü yi ꞊gban "pɛpɛ 'ka kö a mɛ ‑nu ꞊klang kë sië Atanna ‑dhɔkëgükɔ 'gü ‑dhɛ ya 'gü ‑ee? ‑Yö ‑kë ‑mü ꞊dhɛ 'yö 'kii n 'kun‑ "tʋ̈ng 'dhɛ 'kö bha yö ‑zë 'bha 'gü? "Kɛɛ 'yaa 'wɔn 'bha 'ka, ‑yö ‑kë "dhʋ̈ kö 'pë 'ö ‑bɛn zë ‑sü 'ka Atanna ‑gɔ 'sëëdhɛ 'gü n ‑bu 'gü bha ꞊në‑ 'gü ‑wɔn ‑yö kë.»
MAR 14:50 'Ö bo kë ‑sü 'ka "dhʋ̈, 'yö 'mɛ 'wo gun‑ ꞊keng‑ bha‑ ꞊gban 'wo ‑kan ‑zü 'kwëë‑ 'wo ꞊dua 'wo dho.
MAR 14:51 'Nëglɔɔnnë do 'ö ‑kpata doseng ꞊në gun‑ gban "dhiʋ̈ bha ‑yö ‑gun ꞊keng‑ kö ꞊waa‑ 'kun ‑wo 'dho sië‑ 'ka. 'Yö 'wo dho 'wo yöö ‑dɩ 'pö‑ kun.
MAR 14:52 "Kɛɛ 'yö yö ‑zë 'ö ö ‑bha ‑kpata bha‑ to‑ ‑nu ꞊kwɛɛ‑ 'yö ‑ziö ‑bɛang 'ka 'ö dho ö 'kpee‑ 'ka.
MAR 14:53 ꞊Dhɛ 'wo Yesu kun, 'yö 'wo dho‑ 'ka "saabhomɛ ‑nu ‑gɔmɛ 'kpii‑ ‑kuu "dhiʋ̈, 'yö "saabhomɛ ‑nu ‑gɔmɛ ‑nu "pɛpɛ 'wo to oo, ‑kwɛagbö ‑nu waa‑ 'tɔnggɔmɛ ‑nu 'wo bho 'ko ‑ta ‑a ‑gɔ "kwɛandhö mü.
MAR 14:54 ‑A ‑nu 'dho ‑sü 'ka kö Piɛdhö ‑ya ‑nu ꞊keng‑, "kɛɛ 'yaa ꞊yɔɔn‑ ‑nu "sɔɔ, 'yö 'wo dho 'wo ‑da 'ka "kwɛandhɛ bha‑ 'gü. 'Yö Piɛdhö dho 'ö ‑ya pɛng ‑bha gwëëzë ‑nu "sɔɔ, kö pɛng 'në 'bha ‑yö ‑ma ö bha kö "nɛnɛ ‑yö go ö 'gü.
MAR 14:55 'Yö "saabhomɛ ‑nu ‑gɔmɛ ‑nu "pɛpɛ bha waa‑ zagɔbhomɛ ‑nu 'wo nu bha 'wo zun 'wɔn do 'wo dho‑ ꞊slɔɔ Yesu ‑bha ‑tosɛa 'gü kö ‑yö kë‑ zë ‑gɛn 'ka ‑a mɔɔ‑ ‑sü ‑bha, "kɛɛ 'yö 'wii‑ ꞊slɔɔ tongtongdhö.
MAR 14:56 ‑A ‑gɛn ‑mü ꞊dhɛ mɛ 'gbɛ ꞊dede ‑wo nu 'wo ꞊sua ‑dhiang ‑nu zë‑ ‑bha, "kɛɛ mɛ 'bha ꞊ya nu ꞊yaa‑ 'bha pö, mɛ 'dhɛ ꞊ya 'dho dɔ mɛ 'dhɛ bha‑ "piʋ̈, ꞊ya nu 'yö‑ "wɛɛ 'bha pö, 'yö‑ ‑nu ‑wʋ 'yaa kë do.
MAR 14:57 Kö mɛ 'bha ‑nu ‑wo "wlü sië 'wo ꞊sua ‑ya ‑bha 'wo‑ pö:
MAR 14:58 «Yi ‑zë yi‑ ‑ma "dhi kö ‑ya pö sië ꞊dhɛ: ‹Atanna ‑dhɔkëgükɔ 'wo‑ dɔ wo ‑kɔ "dhiʋ̈ ya, ö ‑dho ‑a 'wü 'ö‑ ‑dee 'ö 'yii dho kë mɛ ‑kɔ "gblʋʋ 'ka 'a‑ dɔ ‑dhɛkpaɔyi ‑yaaga 'ka.›
MAR 14:59 Aa" ꞊ni ‑a ‑dhɛ ‑zian 'wo‑ pö "dhʋ̈ bha, ‑a ‑nu ‑wʋ 'yaa gun‑ 'gü do.
MAR 14:60 ꞊Dhɛ 'ö ꞊wa 'wɔn ‑nu bha‑ pö "dhʋ̈ 'dɔɔndhö, 'yö "saabhomɛ ‑nu ‑gɔmɛ 'kpii‑ bha 'ö ꞊wlü mɛ "dhaa bha‑ 'gü, 'yö‑ pö Yesu ‑dhɛ 'ö‑ pö: «Dhiang "pɛpɛ 'ö 'mɛ 'wo nu i 'ka n ‑dhɛ ya 'wo‑ zë i ‑bha ya i "tʋ ‑ya ꞊gban 'gü, i ‑bha ‑yɔ 'i‑ dɔ‑ 'gü yö ‑mü ‑më 'ka? "Ɛɛn ‑a ‑yɔ 'yaa i ‑gɔ ‑ee?»
MAR 14:61 "Kɛɛ 'yö Yesu ‑yö ö "dhi ta, 'yö 'yii "wɩ. 'Yö "saabhomɛ ‑nu ‑gɔmɛ 'kpii‑ bha 'ö‑ dhɛɛ" 'bha kpɔ 'ö‑ pö: «"Ɛɛn bhi ꞊në 'i Atanna ‑bha ‑Yamɛ, Atanna 'kwa‑ ‑dhɔkë ya‑ Gbö 'ka ‑ee?»
MAR 14:62 'Yö Yesu ‑ya ‑yɔ bɔ 'ö‑ pö: «꞊Iin, yö ‑mü n 'ka. ꞊Ya 'go mü ka "yan ‑dho mang Mɛgbömɛ n yö kö a ‑ya ‑sü 'ka Atanna 'gügbɩɩsü bha‑ ‑yɛa 'ö ꞊bhlëësü 'ka bha‑ 'gü, 'ö 'ka n yö 'zü kö a 'go sië dhang‑ 'gü 'a nu dha 'kpong‑ ‑ta.»
MAR 14:63 ꞊Dhɛ 'ö "saabhomɛ ‑nu ‑gɔmɛ bha 'ö ‑wʋ bha‑ ma, 'yö ‑siö ‑dhɛ, 'yö ö ‑bha ‑sɔ ‑pɛ, 'yö go mü 'ö‑ pö: «'Mɛ 'ka ma bha, kwa ‑mawɔn 'yaa "sɛɛ‑ ‑zian ‑bha 'zü.
MAR 14:64 "Ɛɛn ö ‑dɩ 'ö‑ dan Atanna 'ka bha 'kii‑ ‑dhɛ yö ‑ee? "Ɛɛn ka ka ‑bha pö‑ 'gü ꞊dhɛ?» 'Yö mɛ "pɛpɛ 'wo gun mü bha‑ ‑nu ‑wʋ 'dhö to‑ ‑bha do ꞊dhɛ za 'bhaa‑ 'gü 'zü, "kɛɛ ‑a zë ‑wɔn ꞊në to‑ ‑bha.»
MAR 14:65 ‑Wo ‑to mü 'yö mɛ 'bha ‑nu 'wo zun "dhidhi ‑suʋ̈ ‑bha ‑sü ‑bha, 'yö 'wo sɔ kpa‑ "yan "dhiʋ̈, 'yö 'wo zun‑ ‑zë ‑kɔkpö 'ka ‑sü ‑bha kö ‑wo ꞊wɛɛ dɔ sië‑ ‑bha 'wo‑ pö: «Atanna ‑wʋdhiʋ̈loomɛ, 'mɛ 'ö i ‑ma bha de ‑mü? ‑A ‑mɛ pö "kpʋ̈üdhö!» 'Yö gwëëzë ‑nu 'wo wo ‑kɔ ‑da 'gü kö 'wo 'dho‑ 'ka, "kɛɛ kö ‑wa "tʋ ‑nu ‑ma sië "dhʋ̈ do.
MAR 14:66 "Tʋ̈ng 'ö kë sië‑ 'ka "dhʋ̈ bha kö Piɛdhö ‑ya ‑nu ꞊wlöö "sia‑ "kpɛnngdhö, "kwɛandhɛ bha‑ 'gü mü kö Yesu ‑zë ‑yö 'kɔɔdhö 'kɔ ‑ta "dhʋ̈ng 'gü. ‑Yö ‑to ‑dhɛ bha ꞊në‑ 'gü, 'yö "saabhomɛ ‑nu ‑gɔmɛ 'kpii‑ bha‑ ‑bha gwëëdhe do ‑yö nu.
MAR 14:67 ꞊Dhɛ 'ö Piɛdhö yö kö ‑yö ‑ya sië pɛng ‑bha, 'yö‑ ‑ga "sɛnngdhö, 'yö‑ pö‑ ‑dhɛ: «Bhii ‑dɩ 'pö i ‑gun Yesu 'ö go Nazadhɛtö bha‑ ꞊keng‑ "dhɛ!»
MAR 14:68 "Kɛɛ 'yö Piɛdhö ‑ya ꞊zaɔ 'ö‑ pö: «'Pë 'i‑ pö sië bha 'maa‑ dɔ, 'maa‑ 'gü ‑zian ma.» ꞊Dhɛ 'ö‑ pö "dhʋ̈ 'yö ‑ziö 'ö dho 'ö dɔ "kwɛandhɛ bha‑ "dhi ‑wo ‑dhɛ 'gü, 'yö to 'yö ‑tɔgɔn ‑blɛɛsü ‑yö ‑wɩ.
MAR 14:69 ꞊Dhɛ 'ö dhebhɔ bha 'ö Piɛdhö yö 'zü ‑deewo, 'yö‑ pö 'mɛ 'wo gun mü ‑a ‑nu ‑dhɛ 'ö‑ pö: «'Mɛ 'wo bha‑ mɛ do ꞊nɛ!» 'Yö Piɛdhö ‑ya ꞊zaɔ 'zü ‑deewo.
MAR 14:70 ꞊Dhɛ 'ö "tʋ̈ng 'në 'bha ꞊ya ziö, 'yö 'mɛ 'wo gun mü bha 'wo‑ pö 'zü Piɛdhö ‑dhɛ: «‑A pö 'wo‑ wo ꞊dhɛ 'mɛ 'wo ya‑ mɛ do ‑mü i 'ka ya 'yaa ꞊sua 'ka; ‑a ‑gɛn ‑mü ꞊dhɛ [mɛ ‑ya ‑dhɛ ‑yö i "dhiwʋ ‑bha].»
MAR 14:71 ꞊Dhɛ 'kö 'wo‑ pö "dhʋ̈, 'yö Piɛdhö ‑yö zun ‑sö ‑bhö ‑sü ‑bha 'ö‑ pö: «'A‑ zë ma Atanna ‑dhɛ, 'mɛ 'ka "wɩ sië‑ 'ka bha, 'maa‑ dɔ. (꞊Ya kë ꞊dhɛ ‑a pö 'a‑ wo sië ya ꞊ya kë ꞊sua 'ka 'a ga!)»
MAR 14:72 Dhiang bha ‑yö ‑to "dhi, 'yö ‑tɔgɔn ꞊plɛ ‑naa ‑yö ‑wɩ. 'Yö‑ ‑zʋ ‑yö ‑bö dhiang 'ö Yesu ‑ya zë‑ ‑dhɛ 'ö‑ pö: «"Sanni ‑tɔgɔn ‑yö "wɩ ꞊plɛ kö ꞊ya bo ö 'ka ꞊dhɛ pë ‑yaaga 'dhö bha‑ 'ka. ꞊Dhɛ 'ö‑ ‑zʋ 'dhö ‑bö 'wɔn bha‑ 'ka, 'yö zun "gbʋ bɔ ‑sü ‑bha.
MAR 15:1 ‑Dhɛ ‑zë 'ö ꞊kpaɔ bhoo, mɛ "pɛpɛ 'wo Atanna ‑wɔn ‑gɔ ‑ta, "saabhomɛ ‑nu ‑gɔmɛ oo, ‑kwɛagbö ‑nu oo, 'tɔnggɔmɛ ‑nu waa‑ zagɔbhomɛ ‑nu ‑wo ‑ya 'kwëë‑ ꞊në‑ ‑kë ‑dhɛkpaɔ tii bha‑ 'gü kö 'wo dho Yesu ‑wɔn 'kun ‑kɔ 'ö‑ 'gü 'wo‑ dɔ. ꞊Dhɛ 'ö‑ ‑nu ‑wʋ ꞊ya kë do, 'yö 'wo‑ kun 'wo‑ ‑kɔ ꞊nëng 'kwëë‑ 'wo‑ ‑lö, (kö 'ya 'dho ꞊dua) 'yö 'wo dho‑ 'ka Wlɔmö mi 'ö gun‑ ‑nu ‑bha "sɛ bha‑ ‑gɔdhiʋ̈mɛ 'ka 'wo‑ ‑dhɛ Pidhatö bha‑ ‑dhɛ.
MAR 15:2 ꞊Dhɛ 'wo dho 'wo ꞊loo Pidhatö ‑kuu "dhiʋ̈, 'yö Yesu dhɛɛ" kpɔ 'ö‑ pö: «Bhi ꞊në 'i Zuifö ‑nu ‑bha ‑gblüdë 'ka ya ‑ee?» 'Yö‑ ‑yɔ bɔ‑ ‑gɔ 'ö‑ pö: «꞊Iin, ma ‑mü.»
MAR 15:3 ꞊Dhɛ 'ö‑ pö "dhʋ̈, 'yö "saabhomɛ ‑nu ‑gɔmɛ ‑nu bha 'wo zun za 'gbɛ ‑dɔ ‑bha ‑sü ‑bha.
MAR 15:4 'Yö Pidhatö ‑ya dhɛɛ" ‑dee 'bha kpɔ 'ö‑ pö: «Za "pɛpɛ 'wo‑ dɔ sië i ‑bha ya 'bhaa‑ ma ꞊në‑ wo 'yö 'bhaa‑ ‑yɔ 'bha bɔ ‑ee? "Ɛɛn ‑a ‑yɔ ꞊në 'yaa i ‑gɔ ‑ee?»
MAR 15:5 "Kɛɛ Yesu 'yii‑ ‑yɔ 'bha bɔ 'zü tongtongdhö, 'yö‑ 'wɔn ‑yö Pidhatö kɔn ꞊dedewo.
MAR 15:6 ‑A "tʋ̈ng bha‑ 'gü, kö Pakö yi ꞊ya ꞊loo ‑kɔ 'ö‑ 'gü 'do 'do, 'yö ‑gblüdë ꞊ya 'mɛ 'wo ‑kaso 'gü bha‑ mɛ 'dhɛ Zuifö ‑nu ꞊waa‑ pö ‑ya bho ‑kaso 'gü wo ‑dhɛ, 'yö ꞊yaa‑ bho ‑kaso 'gü.
MAR 15:7 "Tʋ̈ng 'wo Yesu kun‑ 'ka bha kö gɔndënë do 'wo Badhabasö ‑kë, 'ö waa‑ ö "tɛabɔ ‑nu 'wo mɛ zë kö ꞊wa "wlü "sɛgɔmɛ "piʋ̈ bha ‑yö ‑kaso 'gü.
MAR 15:8 'Yö mɛ kpö 'gbɛ ꞊dede 'wo ꞊wlü 'yi bha‑ 'ka 'wo dho Pidhatö "piʋ̈, 'yö 'wo ꞊bhɛa‑ ‑dhɛ kö ‑yö mɛ do bho wo ‑dhɛ ‑kaso 'gü ꞊dhɛ ‑kɔ 'ö‑ ‑kë 'ka zii‑ 'dhö.
MAR 15:9 'Yö Pidhatö ‑ya ‑nu dhɛɛ" kpɔ 'ö‑ pö: «‑Yö ka "piʋ̈ ꞊dhɛ 'a n ‑kɔ bho Zuifö ‑nu ‑bha ‑gblüdë ya‑ 'gü ka ‑dhɛ ‑ee?»
MAR 15:10 Dhɛɛ" 'ö Pidhatö ‑ya kpɔ "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö ‑ya 'wɔn dɔ ꞊dhɛ gblɛɛn" ꞊në "saabhomɛ ‑gɔmɛ ‑nu bha 'wo gun gɔn sië Yesu 'ka, 'yö‑ ‑wɔn 'gü 'yö 'wo nu‑ 'ka ö ‑dhɛ, "kɛɛ ꞊sɔng 'bhaa‑ ‑bha.
MAR 15:11 "Kɛɛ ꞊dhɛ 'ö dhɛɛ" bha‑ kpɔ "dhʋ̈, 'yö "saabhomɛ ‑nu ‑gɔmɛ ‑nu bha 'wo ‑da mɛ kpö bha‑ ‑nu ‑gɔ 'gü, 'yö 'wo ‑wʋ ma‑ ‑nu "tʋʋ, kë "dhʋ̈ kö Pidhatö ‑yö ö ‑kɔ bho Badhabasö ꞊në‑ 'gü.
MAR 15:12 'Yö Pidhatö ‑ya ‑nu dhɛɛ" ‑dee 'bha kpɔ 'zü 'ö‑ pö: «‑Yö ka "piʋ̈ 'sa ꞊dhɛ 'mɛ 'ka‑ ‑dhɛ Zuifö ‑nu ‑bha ‑gblüdë ya 'a‑ kë ꞊dhɛ?»
MAR 15:13 'Yö 'wo ꞊gbla "gbɩɩ‑ 'ka 'wo‑ pö: «‑Bhö ‑a dɔ "dhü ‑bha!»
MAR 15:14 'Yö Pidhatö ‑ya ‑yɔ bɔ‑ ‑nu ‑gɔ 'ö‑ pö: «‑A ‑dɔ "dhü ‑bha ‑gɛn ‑mü ‑më 'ka? ‑Yö ‑më ‑wɔn yaa ꞊në‑ ‑kë?» "Kɛɛ 'yö 'wo ꞊gbla 'zü "gbɩɩ‑ ꞊dede 'ka 'wo‑ pö: «Yi‑ ‑pö 'i dɔ "dhü ‑bha!»
MAR 15:15 'Yö Pidhatö ‑ya zë mɛ kpö bha‑ ‑nu dhɔɔbhaawɔn kë ‑sü ‑dhɛ, 'yö ö ‑kɔ bho Badhabasö 'gü. 'Yö "sɔdha ‑nu ‑ya Yesu ‑zë ‑bha 'yö 'wo‑ ‑ma. ꞊Dhɛ 'wo‑ ‑ma 'bha wo, 'yö ö ‑kɔ bho‑ 'gü kö ‑wo 'dho‑ 'ka kö ‑wa dɔ "dhü ‑bha.
MAR 15:16 ꞊Dhɛ 'ö Pidhatö ‑yö ö ‑kɔ bho Yesu 'gü "sɔdha ‑nu ‑dhɛ, 'yö 'wo‑ sü za ꞊gblü "dhiʋ̈ 'yö 'wo dho‑ 'ka ‑gblüdë ‑gɔ 'kɔɔdhɛ ꞊dede 'gü, 'yö 'wo wo këyɔɔ ꞊gban "pɛpɛ ‑dhɛ mü.
MAR 15:17 'Yö 'wo ‑gblüdë ‑nu ‑da ꞊gbauu‑ "yan ‑zaɔndhö 'bha bha‑ ‑da ‑bha kö ‑yö kë ꞊dhɛ ‑gblüdë 'dhö, kö 'wo ꞊wɛɛ ‑dɔ ‑bha ‑dhɛ yö, 'yö 'wo dho 'wo "glɛn 'faan‑ bɔ 'wo‑ ‑ya ‑gɔ ‑bha,
MAR 15:18 'yö 'wo zun‑ ꞊wɛɛ ‑dɔ ‑bha ‑sü ‑bha 'wo‑ ꞊tua bho 'wo‑ pö: «Zuifö ‑nu ‑bha ‑gblüdë, 'bha ꞊boo!»
MAR 15:19 'Yö 'wo zun‑ ‑ma ‑sü ‑bha "dhü 'ka ‑a ꞊gbin‑, kö ‑wo "dhidhi ‑pɛn sië‑ ‑bha, kö ‑wo zun sië wo kpiö 'gü, 'wo‑ ꞊bhlëë ‑ya ꞊dhɛ ‑gblüdë 'dhö.
MAR 15:20 ꞊Dhɛ 'wo wo bo ꞊wɛɛ ‑dɔ ‑bha ‑sü 'ka ꞊dhɛ ‑kɔ bha‑ 'dhö, 'yö 'wo ꞊gbauu‑ bha‑ bho‑ ‑bha, 'yö 'wo‑ ‑dɩ ‑a sɔ ‑da ‑bha, 'yö 'wo dho‑ 'ka ‑a ‑dɔ "dhü ‑bha ‑dhɛ 'gü.
MAR 15:21 ꞊Dhɛ 'ö ꞊wa ‑da zian ‑ta 'wo 'dho sië, 'yö 'wo ‑kpan Simɔ 'wo‑ gbö do ‑dhɛ Dhɛzandrö, 'wo‑ mɛ do 'bha ‑dhɛ Dhufusö 'ö go Sidhɛnö bha‑ ‑bha kö ‑yö 'go sië ö ‑gɔ gbɛɛ 'gü ‑yö ziö sië. 'Yö 'wo zun‑ "dhiʋ̈ 'wo‑ pö‑ ‑dhɛ ‑yö Yesu ‑dɔ ‑bha "dhü bha‑ 'sü kö 'wo 'dho‑ 'ka.
MAR 15:22 'Yö 'wo Yesu sü 'wo dho‑ 'ka ‑dhɛ 'wo‑ ‑dhɛ eblö ‑wʋ 'gü Gɔgota bha‑ 'gü (꞊waa‑ pö "dhʋ̈ kö ‑wa ‑pö ‹mɛ ‑gɔ "kpɛa ‑tɔn›.)
MAR 15:23 ꞊Dhɛ 'wo dho 'wo ꞊loo mü, 'yö 'wo pë 'bha 'wo‑ 'miidhö ‑kë, 'ö pë ‑nɛɛ ‑ma mɛ 'ka ‑sü dho "sia‑ bha‑ ‑da ‑drɔɔ "piʋ̈ 'yö 'wo‑ nu‑ ‑dhɛ, "kɛɛ 'yii "wɩ‑ ‑bha kö ‑ya mü.
MAR 15:24 ꞊Dhɛ 'ö ꞊waa‑ ꞊gban kë "dhʋ̈ ꞊wa wo bo, 'yö 'wo‑ sü 'wo‑ dɔ "dhü ‑bha, 'yö 'wo "pɔni ‑gban ‑a ‑kɔ waa‑ ‑gɛn ‑nu ‑ta. 'Yö 'wo‑ ‑bha ‑sɔ ‑nu bha‑ ‑nu 'gü ‑gblü wo 'ko ‑ta ‑a zë "kpʋ̈ü kë ‑sü 'ka, kë "dhʋ̈ kö mɛ 'ö 'dhö ‑a ‑bha 'ö dho‑ ꞊slɔɔ kö ‑ya dɔ.
MAR 15:25 ‑Wa ‑dɔ "dhü ‑bha "dhʋ̈ dhia" "piʋ̈ 'yënng‑ "tɛɛ "gbɩɩ‑ ‑ta.
MAR 15:26 Pë ‑bɛn 'wo‑ zë kö ꞊wa ꞊nëng ‑a ‑dɔ ‑bha ‑dhü bha‑ ‑bha kö mɛ ꞊gban "pɛpɛ ‑wa zë ‑gɛn dɔ bha, 'yö 'wo‑ pö: «Zuifö ‑nu ‑bha ‑gblüdë ꞊nɛ». 'Yö 'wo‑ ꞊nëng "dhü ‑bha ‑a ‑gɔ ‑ta "dhʋ̈ng 'gü.
MAR 15:27 ‑Wo waa‑ mɛzëmɛ ‑nu ꞊plɛ ꞊në‑ ‑nu dɔ "dhü ‑bha 'ko "tʋ̈ng do 'gü. 'Yö 'wo‑ mɛ do dɔ‑ ‑kɔ ‑së 'gü, 'yö 'wo mɛ do dɔ‑ ꞊kwaa 'gü.
MAR 15:28 [Kë "dhʋ̈ kö ‑wʋ 'ö ‑bɛn zë ‑sü 'ka Atanna ‑gɔ 'sëëdhɛ 'gü ꞊dhɛ: «‑Wo kë‑ ‑dɔ 'wɔnyaakëmɛ ‑nu ‑bhiëë 'gü» bha‑ 'gü ‑wɔn ‑yö kë.]
MAR 15:29 'Kö 'mɛ 'wo zian ziö sië ‑wo "si bho sië‑ ‑gɔ 'ö 'wo wo ‑gɔ 'gü zë‑ 'ka‑ ‑dhɛ 'wo‑ pö: «‑Aao! ‑A 'dhɛ 'i‑ ‑dhɛ ꞊mɔɔ 'yö bha! 'Bhii‑ pö i ‑mɔɔ ‑bha 'i Atanna ‑dhɔkëgükɔ wü, 'i‑ ‑dee dɔ ‑dhɛkpaɔyi ‑yaaga 'ka ‑ee?
MAR 15:30 ‑Bhö i ‑dɩ dha ‑dhe! ‑Bhö 'go "dhü bha‑ ‑bha ꞊tɔn kö 'i zun "sia‑ ‑dhe!»
MAR 15:31 Kö "saabhomɛ ‑nu ‑gɔmɛ ‑nu ‑dɩ 'pö ‑wo ꞊wɛɛ dɔ sië‑ ‑bha waa‑ 'tɔnggɔmɛ ‑nu 'dhö, 'wo‑ pö wo 'ko ‑dhɛ: «꞊Ya mɛ ‑nu dha, "kɛɛ ‑a ‑kɔ 'yaa ꞊mɔɔ‑ ‑bha kö ‑yö ö ‑dɩ ‑zë dha!»
MAR 15:32 'Ö 'wo‑ pö: «'Bhii‑ pö i ‑dɩ ‑dhɛ ꞊dhɛ bhi ꞊në 'i Izraɛdhö ‑mɛ ‑nu ‑bha ‑gblüdë 'ka, ꞊dhɛ bhi ꞊në 'i 'mɛ 'ö Atanna ‑ya ‑ya kö 'ö‑ bɔ yi dha ‑dhɛ 'gü ‑a 'ka ‑ee? 'Bha‑ pö 'yi 'dhang bho i "dhiʋ̈, ‑bhö i ‑dɩ bho "dhü bha‑ ‑bha kö 'i lɔɔ‑ kö 'yi‑ ‑dhɛ yö kö 'yi 'dhang bho i "dhiʋ̈!» Kö 'mɛ 'wo wɛng‑ ‑nu ‑a ‑nu ‑gban "dhü ‑bha ‑dhɛ do 'gü bha, ‑wo "si bho sië‑ ‑gɔ 'pö.
MAR 15:33 ꞊Dhɛ 'ö 'yënng‑ ꞊ya ‑ya mɛ ‑gɔ ꞊zinng 'gü, 'yö ‑dhɛ ‑yö ꞊tröö "kpʋngtaadhɛ ꞊gban "pɛpɛ 'gü, 'yö dho 'ö zun‑ 'ka "wɔ "yɛ ‑yën ‑bha.
MAR 15:34 ꞊Dhɛ 'ö 'yënng‑ ꞊ya 'kpɔ mɛ ‑gɔ 'ka ‑së 'ka, 'yö Yesu ‑yö ꞊gbla "gbɩɩ‑ 'ka eblö ‑wʋ 'gü 'ö‑ pö: «Edhoi, dhama sabatami! (꞊Waa‑ pö "dhʋ̈ kö ‑wa ‑pö: «"Eke n Dë Atanna, "eke, i i ‑kɔ ‑kan n "dhiʋ̈ ꞊ni ‑më ‑wɔn 'gü?»
MAR 15:35 ꞊Dhɛ 'ö 'mɛ 'wo gun mü bha 'wo‑ ‑wʋ ma ꞊dhɛ ‑kɔ bha‑ 'dhö, 'yö‑ mɛ ga 'bha ‑wa pö: «‑Ka dɔ! ‑Yö Edhi ‑dhɛ sië ‑wa!»
MAR 15:36 'Yö‑ mɛ do ‑yö dɔ ‑bɛang ‑bha 'ö dho 'ö ‑fuu ‑kɔn 'bha bha‑ ‑da we 'wangwang 'bha bha‑ ꞊bhaa, 'yö‑ ‑ya "dhü "dhiʋ̈, 'yö nu‑ 'ka‑ ‑dhɛ kö ‑ya mü, "kɛɛ kö ‑ya pö sië: «‑Kaa 'to mü kö (Atanna ‑wʋdhiʋ̈loomɛ) Edhi 'ö‑ ‑dhɛ sië bha ‑yö nu kö ‑ya lɔɔ 'kwa‑ ‑dhɛ yö!»
MAR 15:37 "Kɛɛ ꞊dhɛ 'ö ꞊ya kë "dhʋ̈, 'yö Yesu ‑yö ꞊gbla "gbɩɩ‑ 'ka, 'yö ‑kë ‑a 'nii‑ ‑pö ‑sü 'ka.
MAR 15:38 ‑A 'nii‑ 'dhö ‑pö "tʋ̈ng ꞊dede 'ö‑ 'ka bha, 'yö sɔ 'ö gun Atanna ‑dhɔkëgükɔ 'ö Zedhizadhɛmö bha‑ 'gü, ‑a 'gü ‑kan 'gü ‑sɔ 'ka bha 'ö ‑pɛ ꞊zinng 'gü gbanngdhö, 'yö go‑ 'ka "dhʋ̈ng 'gü 'ö zun‑ 'ka "sia‑ (kö ‑ya ‑zɔn ꞊dhɛ ꞊zinng 'yaa Atanna waa‑ mɛ "bhɩɩ‑ ‑nu ‑a ‑nu ꞊zinng 'gü 'zü Yesu Klisi 'saa‑ 'gü).
MAR 15:39 ꞊Dhɛ 'ö Wlɔmö ‑mɛ ‑nu ‑bha "sɔdha këng do ‑gɔmɛ 'ö gun dɔ sië Yesu wëëdhö mü bha 'ö‑ ga ‑kɔ bha‑ 'suan‑ bho, 'yö yöö ꞊dede 'ö‑ ‑kan ö "dhi 'ka 'ö‑ pö: «'Mɛ 'ö ya Atanna Gbö ꞊në gun‑ 'ka tɛan‑ ꞊dede 'ka!»
MAR 15:40 'Ö gun "dhʋ̈ 'pö kö dhong ‑nu kpö 'bha bha ‑wo dɔ sië ꞊gblɛɛn 'wo‑ ‑dhɛ ‑ga. Dhong ‑nu 'wo gun ‑dhɛ ‑ga sië "dhʋ̈ bha, Madhi 'ö go Madadha oo, Madhi 'dhɛ 'ö ‑kë Zakö sɛɛnnë waa‑ Zoze ‑a ‑nu dhe 'ka bha waa‑ Sadhome ‑wo ‑gun ‑nu kpö 'gü.
MAR 15:41 Mɛ 'dhɛ 'kö 'wo bha wo ‑zë ‑wo gun Yesu ꞊keng‑ kö ‑yö ‑tun "yaan, wo ꞊në 'wo gun‑ "dhiʋ̈ ‑ziö wo sië kö ‑yö Gadhidhe, "kɛɛ dhebhɔ ‑nu 'gbɛ ꞊dede 'wo ‑ziö Yesu ꞊keng‑ kö ‑yö 'dho sië Zedhizadhɛmö, ‑wo ‑gun mü 'pö.
MAR 15:42 ꞊Dhɛ 'ö ‑kë ꞊dhɛ 'wɔn bha ‑yö ‑kë "dhʋ̈ Zuifö ‑nu ‑bha ꞊glooyi yɛan" "piʋ̈ 'ka, 'ö 'wɔn "pɛpɛ 'wo dho‑ kë ꞊glooyi 'ka 'wo‑ ꞊gban ꞊baa 'yi bha ꞊në‑ 'ka, "kɛɛ kö "bin ꞊ya 'ma ꞊gban wo, 'yö gɔndë do 'wo‑ ‑dhɛ Zosɛfu 'ö go Adhimate ‑pö 'gü bha 'ö nu.
MAR 15:43 Zosɛfu bha ‑yö ‑gun mɛ ‑tiandhö 'wo‑ ꞊bhlëë ‑ya ꞊dedewo ‑a 'ka, ‑a ‑gɛn ‑mü ꞊dhɛ za ‑gɔ "yɛ ‑mɛ ‑nu 'wo gun "sɛ bha‑ 'gü ‑a mɛ do ꞊në gun‑ 'ka, "kɛɛ yö ‑zë ‑yö ‑gun 'mɛ 'ö 'dhang bho Atanna ‑bha ‑gblüdëdhɛ ‑wɔn "dhiʋ̈, 'ö ‑ya ‑sü 'ka‑ ‑bha ‑ya 'gü ‑a 'ka. ꞊Dhɛ 'ö nu, 'yö ö ‑zʋ ‑gban 'ö dho Pidhatö "piʋ̈, 'yö Yesu ꞊gee ‑gbadhɛ ‑gɔ.
MAR 15:44 "Kɛɛ Yesu ‑ga 'piö‑ ‑wɔn 'ö "dhʋ̈ bha‑ 'wɔn ‑yö Pidhatö ‑kɔn ꞊dedewo. ‑Yö "sɔdha ‑gɔmɛ bha‑ ‑dhɛ yö ꞊në‑ ‑wɔn 'gü, 'yö‑ dhɛɛ" kpɔ 'ö‑ pö: «'Mɛ bha‑ ga ‑yi ꞊ya ꞊gwëë 'pö wo ‑ee?»
MAR 15:45 ꞊Dhɛ 'ö bo‑ ꞊iin pö ‑sü 'ka, ‑yö ö ‑kɔ ꞊në bho Yesu ꞊gee 'gü Zosɛfu ‑dhɛ.
MAR 15:46 ꞊Dhɛ 'ö Yesu ꞊gee nu Zosɛfu ‑dhɛ, 'yö Zosɛfu dho 'yö sɔ "puu dhɔ, 'yö nu 'yö Yesu ꞊gee bha‑ bho "dhü ‑bha, 'yö sɔ "puu bɔ‑ ‑bha, 'yö dho‑ 'ka 'ö‑ ‑wɛɛ bho ‑gwë ‑yɛ 'bha 'ö ꞊waa‑ 'pɔn 'nu ‑blɛɛsü bha‑ 'gü, 'yö ‑gwë kpö 'kpii‑ do 'bha ꞊glün 'ö nu‑ 'ka 'ö‑ zun ‑gwë ‑yɛ bha‑ "dhiʋ̈.
MAR 15:47 ‑A "tʋ̈ng 'ö‑ kë sië‑ 'ka "dhʋ̈ bha kö Madhi 'ö go Madadha bha waa‑ Zoze dhe Madhi ‑a ‑nu "yan ‑ya ‑dhɛ 'gü.
MAR 16:1 ꞊Dhɛ 'ö Zuifö ‑nu ꞊glooyi bha‑ 'yënng‑ ‑gɔ ꞊ya bo ‑pö ‑sü 'ka, 'yö Madhi 'ö go Madadha bha‑ 'dhö, Zakö dhe Madhi 'dhö, Sadhome 'dhö, 'wo dho 'wo ‑dhasiklɔɔ "yɔn dhɔ, kö 'wo 'dho‑ 'ka 'wo‑ ziö Yesu ꞊gee ‑bha (꞊dhɛ ‑kɔ 'wo‑ ‑kë 'ka ‑a ‑nu wɔ ‑kɔ 'gü ‑a 'dhö).
MAR 16:2 ꞊Dhɛ 'ö‑ ‑ta ‑dhɛ ꞊ya ꞊kpaɔ, kö 'yënng‑ "tɛɛ ꞊ya ‑wo ‑së 'ka, 'yö 'wo ‑ziö 'wo dho Yesu bun ꞊taa.
MAR 16:3 "Kɛɛ 'wo gun 'dho sië kö "sika ‑ya ‑nu 'gü, kö ‑wa pö sië: «Kwa 'dho ‑zë wo sië, "kɛɛ 'de yöö ‑gwë 'gbɔng bha‑ bho ꞊zɔɔ kwa ‑dhɛ ‑yɛ bha‑ "dhiʋ̈?»
MAR 16:4 ꞊Dhɛ 'wo dho 'wo ꞊loo mü, 'wo dho wo "yan "dhiʋ̈ "wlü kö ‑wo ‑dhɛ ‑ga, kö ‑gwë 'gbɔng ‑ziisü 'ö gun ‑ya ‑sü 'ka ‑yɛ bha‑ "dhiʋ̈ bha 'yaa mü 'zü, kö ꞊waa‑ glün‑ ꞊wa 'dho‑ ‑ya zian "wɛɛ 'ka.
MAR 16:5 'Yö 'wo dho 'wo ‑da ‑gwë ‑yɛ 'wo Yesu ‑wɛɛ bho‑ 'gü bha‑ 'gü, 'yö 'wo Atanna ‑bha "kië do yö kö sɔ "puu ‑ya ‑bha kö ‑yö ‑ya ‑sü 'ka‑ 'ka ‑a ‑nu ‑kɔ ‑së "pɛan "piʋ̈ ‑yɛ 'gü mü. 'Yö "suʋ̈ 'dhö ‑da ‑a ‑nu 'gü.
MAR 16:6 'Yö‑ pö‑ ‑nu ‑dhɛ: «"Suʋ̈ 'ya 'dho ka kë, Yesu 'ö go Nazadhɛtö 'wo‑ dɔ "dhü ‑bha bha 'aa mü 'ka‑ mɔɔ‑ sië ‑ee? ꞊Ya ‑bö 'nu, 'yaa yö 'zü, ‑ka nu kö 'ka‑ wɔdhɛ ‑ga!
MAR 16:7 ‑Ka 'dho kö 'ka‑ pö‑ ‑bha ꞊klang ‑nu ‑dhɛ, "kɛɛ kö 'ka‑ pö Piɛdhö ‑dhɛ ꞊dhɛ ꞊ya 'go ga 'gü, ꞊ya ‑da ka "dhiʋ̈ ꞊ya 'dho Gadhidhe. Ka ‑dho ‑kpan ‑bha ‑dhɛ bha ꞊në‑ 'gü ꞊dhɛ ‑kɔ 'ö‑ pö‑ 'ka ka ‑dhɛ kö 'yii ga ꞊kö bha‑ 'dhö.»
MAR 16:8 'Yö 'wo go ‑yɛ bha‑ 'gü 'wo ‑ziö ‑bɛang 'ka, kö "suʋ̈ ꞊ya ‑da ‑nu 'gü kö‑ ‑nu "gblʋ̈ʋ̈dhɛ ꞊gbaan "muu bho "suʋ̈ yaa 'gü yaa 'ö ‑da ‑a ‑nu 'gü bha‑ ‑wɔn 'gü, 'wii ꞊mɔɔ‑ ‑bha kö ‑wa ‑gɛn dɔ mɛ bha ‑dhɛ ‑zianwo.
MAR 16:9 [꞊Dhɛ 'ö Yesu ‑yö ‑bö Zuifö ‑nu ꞊glooyi bha‑ ‑tadhɛkpaɔ ‑ta, mɛ ‑blɛɛsü 'ö ö ‑dɩ ‑zɔn ‑dhɛ 'yö ‑kë Madhi 'ö go Madadha 'ö Yesu ‑yö "yina yaa "saɔplɛ ‑kë 'gü "tʋ̈ng 'bha 'gü bha‑ 'ka.
MAR 16:10 'Yö dho 'ö‑ pö 'mɛ 'wo gun Yesu ꞊keng‑ ‑blɛɛsü bha ꞊në‑ ‑nu ‑dhɛ. 'Ö dho 'ö ꞊loo mü kö Yesu ga ‑wɔn zuëdhiʋ̈tɛɛ 'ö ‑ya ‑nu ‑bha bha ‑wo ‑tun ꞊kö‑ 'gü "gbʋ bɔ‑.
MAR 16:11 ꞊Dhɛ 'ö Madhi ‑ya ‑gɛn dɔ‑ ‑nu ‑dhɛ, 'ö 'wo‑ ma‑ ‑ta ꞊dhɛ ‑yö "yaandhe 'ka, "kɛɛ 'ya 'ö "yanga ꞊plɛ ‑kpan ‑a ‑kpong 'gü ‑dhɛ ‑bha, 'wii 'dhang bho‑ "dhiʋ̈ tongtongdhö.
MAR 16:12 ꞊Dhɛ 'ö go yö ‑zë 'gü, 'yö dho 'ö ö ‑dɩ ‑zɔn 'zü ‑deewo 'mɛ 'wo gun‑ ꞊keng‑ bha‑ mɛ ꞊plɛ 'wo gun 'go sië Zedhizadhɛmö, 'wo dho 'pö‑ ‑kɔ 'gü ‑a ‑nu ‑dhɛ, "kɛɛ 'wii‑ dɔ zü bho ‑yi 'ka.
MAR 16:13 'Yö woo ‑dɩ 'pö 'wo nu 'wo‑ ‑gɛn dɔ mɛ ‑kpɛa ‑dhɛ, "kɛɛ 'wii 'dhang bho‑ ‑nu ‑wʋ "dhiʋ̈ yö ‑zë 'bha 'gü.
MAR 16:14 'Yö gun ‑na ö ‑dɩ ‑zɔn ö ‑bha ꞊klang ‑nu ‑kaɔng do ga do 'wo to bha‑ ‑nu ‑dhɛ "dhʋ̈ kpɔɔ" ‑ɔɔdhö yi do 'ka kö ‑wo pë ‑bhö sië. 'Yö ‑dɔn bho‑ ‑nu 'ka ‑a ‑nu ‑bha gɔɔgbɩɩdhɛ waa‑ 'dhang ‑bho ö "dhiʋ̈ ‑sü 'ö 'yii kë‑ ‑nu ‑gɔ bha‑ ‑wɔn 'gü. ‑A ‑gɛn ‑mü ꞊dhɛ 'mɛ 'wo‑ "yaandhe yö, 'ö 'wo nu 'wo‑ ‑gɛn dɔ‑ ‑nu ‑dhɛ bha, 'wii 'dhang bho‑ 'bha "dhiʋ̈.
MAR 16:15 ꞊Dhɛ 'ö ‑dɔn bho‑ ‑nu 'ka "dhʋ̈ 'ö ö bo, 'yö ‑wʋ kpɔ‑ ‑nu ‑bha 'ö‑ pö: «‑Ka 'dho "kpʋngtaadhɛ ꞊gban "pɛpɛ 'gü kö naɔ ‑së bha 'ka‑ dɔ "kpʋngtaamɛ ꞊gban "pɛpɛ ‑gɔ.
MAR 16:16 Mɛ "ʋʋ mɛ 'ö yaa‑ ‑wɩ ka ‑wʋ bha‑ ‑bha kö ‑yö 'dhang bho n "dhiʋ̈, kö ‑wa ‑mɛ ‑bɔ n 'ka ‑zu bho, ‑a ‑mɛ ‑dho dha, "kɛɛ 'mɛ 'yii "wɩ‑ ‑bha, Atanna ‑dho 'wɔn bho‑ ‑mɛ 'gü.»
MAR 16:17 'Yö go mü 'ö‑ pö: «‑Ka ‑dhɛ ‑ga: Mɛ "ʋʋ mɛ 'ö 'dhang bho 'wɔn bha‑ "dhiʋ̈, "dhabhliwɔn ‑nu 'ö‑ ‑mɛ dho‑ kë ‑kaa ‑ga, ‑a ‑mɛ ‑dho "yina yaa kë mɛ 'gü n 'tɔ 'gü, 'ö Atanna ‑yö ‑wʋ ‑dee 'ö‑ 'yaa‑ dɔ tongtongdhö ‑a dɔ‑ "dhi 'ö‑ pö.
MAR 16:18 ‑A ‑mɛ ‑dho ‑mlɛɛ 'kun ö ‑kɔ 'ka 'ö 'yaa‑ kë ‑kɔ 'bha‑ 'gü, müpë 'ö waa mü 'ö mɛ zë, ‑a ‑mɛ ‑dho ‑a mü, 'ö 'yaa‑ kë ‑kɔ 'bha 'gü. ‑A ‑mɛ ꞊ya ö ‑kɔ ‑ya "yuëdhi ‑bha kö ‑yö bhɛa" Atanna ‑dhɛ ‑a ‑wɔn 'gü, ‑yö ‑dho kë "klʋ̈ʋ̈klʋ̈.
MAR 16:19 ꞊Dhɛ 'ö kwa Dëmɛ ‑yö ö bo ‑wʋ ‑kpɔ ö ‑bha ꞊klang ‑nu ‑bha ‑sü 'ka ꞊dhɛ ‑kɔ bha‑ 'dhö, 'yö Atanna ‑ya ꞊wlü, 'yö dho dhang‑ 'gü, 'yö dho 'ö ‑ya ‑yɛa ꞊bhlëësü 'ö Atanna ‑kɔ ‑së 'gü mü bha‑ 'gü.
MAR 16:20 'Yö‑ ‑bha ꞊klang ‑nu bha 'wo ‑ziö 'wo dho, 'yö 'wo zun Atanna ‑wʋ pö ‑sü ‑bha ‑dhɛ ꞊gban "pɛpɛ 'gü. Kwa Dëmɛ ‑gun ‑a ‑nu ꞊keng‑ 'pö ‑dhɛ ꞊gban 'gü 'ö wɛng‑ ‑nu 'wo yë bha‑ kë wo "kwëë, 'ö ꞊wa dhiang zë ‑dhɛ 'ö‑ 'gü, 'ö "dhabhliwɔn "gblʋ̈gblʋ̈ ‑nu ‑wo ‑kë ‑a ‑nu ‑kɔ ‑ta, kë "dhʋ̈ kö mɛ ꞊gban ‑wa 'wɔn dɔ ꞊dhɛ yö ꞊në‑ ‑nu bɔ.]
LUK 1:1 ꞊Bhlëëmɛ Teofidhö, 'wɔn ‑nu 'wo kë ‑sü 'ka kwa ‑kwɛ ya‑ 'ka 'ö ‑gban Yesu Klisi ‑wɔn ‑bha bha, 'mɛ 'ö‑ ‑nu "yan 'dhö dɔ‑ ‑dhɛ 'gü, 'ö 'wo‑ zü bho ‑kɔ waa‑ "dhiʋ̈ ‑ta ‑kɔ ꞊gban dɔ, 'ö naɔ ‑së bha‑ dɔ ‑sü ‑yö gun‑ ‑nu ‑bha yë 'ka, ‑kɔ ꞊dede 'wo‑ ‑gɛn dɔ‑ 'ka kwa ‑dhɛ bha mɛ 'gbɛ ‑wa "dhiʋ̈ "wlü ‑sü 'ka‑ ‑bha 'wo‑ ‑bɛn zë "kpʋ̈üdhö ꞊dhɛ ‑kɔ 'wo‑ pö‑ 'ka ‑a 'dhö.
LUK 1:3 ‑A ‑kë "dhʋ̈ ‑sü bha‑ 'gü, mang Dhukö ‑mɛ ‑zë n ‑bha 'ka, ‑yö ‑kë 'pö n 'gü ‑së kö 'wɔn 'ö "dhʋ̈ bha 'a‑ ‑bha mɔɔ‑ kö ‑kɔ 'ö ‑kë 'ka kpɛnngdhö ‑a zübhoyi 'ka bha 'a‑ ‑bɛn zë 'sëëdhɛ 'gü kö 'a‑ bɔ i ‑dhɛ,
LUK 1:4 kë "dhʋ̈ kö 'i 'dhang bho 'mɛ 'wo i ꞊klang ‑kë 'wɔn bha‑ 'ka bha‑ ‑nu "dhiʋ̈ kö 'i‑ 'wɔn dɔ ꞊dhɛ 'pë 'wo‑ pö bha 'yaa ꞊sua 'ka.
LUK 1:5 "Tʋ̈ng 'ö Edhodö ‑yö gun‑ 'ka "sɛdë 'ka Zude ‑sɛ 'gü bha, "saabhomɛ do 'bha ‑yö gun‑ ‑gɔ 'kɔɔdhö 'wo gun‑ ‑dhɛ sië Zakadhi. Zakadhi bha ‑yö ‑kë "saabhomɛ ‑nu 'wo gun Izraɛdhö ‑sɛ 'gü "tʋ̈ng bha‑ 'gü bha‑ ‑nu kpö 'dhɛ 'wo‑ ‑dhɛ Abia ‑bha mɛ ‑nu bha ꞊në‑ mɛ do 'ka. 'Yö 'wo gun‑ ‑bha dhebhɔ ‑dhɛ sië Dhizabɛtö, 'yö ‑kë 'pö "saabhomɛ ‑nu ‑gɔmɛ 'kpii‑ 'wo gun‑ Aadhɔn kë sië bha‑ suu 'gü ‑në do 'ka.
LUK 1:6 Mɛ ꞊plɛ 'wo "dhʋ̈ bha ‑wo ‑gun 'wɔn ‑ma Atanna ‑ta ‑mɛ ꞊dede 'ka, 'ö pö 'aa gun‑ ‑nu ‑bha 'wɔn 'bha 'gü Atanna wëëdhö, 'ö 'wo‑ ‑bha 'tɔng‑ ꞊gban kun 'ö 'wo‑ ꞊bhlëë ‑ya 'kpakpadhö.
LUK 1:7 "Kɛɛ 'yö 'në 'bha 'yaa gun‑ ‑nu ‑gɔ, ‑a ‑gɛn ‑mü ꞊dhɛ Dhizabɛtö bha ‑yö ‑gun ꞊gblöödhe 'ka, "kɛɛ kö ‑a ‑nu ꞊gban ꞊plɛ ꞊wa kë mɛ ‑zʋgbansü ‑nu 'ka.
LUK 1:8 "Kɛɛ ꞊dhɛ 'ö yi do 'ka, 'ö Zakadhi ‑nu ‑bha kpö bha‑ ‑da "dhɛɛdhö ‑yi ꞊ya ꞊loo kö ‑wo Atanna ‑dhɔkë, kö ‑wo ‑dhasiklɔɔ "gʋ̈‑ ‑dhɛ, 'ö ꞊waa‑ zë "kpʋ̈ü kë ꞊dhɛ ‑kɔ 'wo‑ ‑kë 'ka "saabhomɛ ‑nu wɔ ‑kɔ 'gü ‑a 'dhö, 'ö ꞊ya 'to Zakadhi ‑bha ‑bha, 'ö ‑dhasiklɔɔ bha‑ "gʋ̈ sië Atanna ‑dhɔkëgükɔ 'gü, kö‑ ꞊fii ‑së bha ‑yö 'dho‑ ‑gɔ,
LUK 1:10 kö Zuifö ‑nu "pɛpɛ 'wo nu Atanna ‑dhɔkëdhɛ 'gü mü bha ‑wo kpö dɔ ‑sü 'ka 'pö "kpɛnngdhö kö ‑wo bhɛa" sië‑ ‑dhɛ "tʋ̈ng do bha‑ 'gü.
LUK 1:11 'Yö‑ ‑bha "kië do ‑yö ö ‑dɩ ‑zɔn Zakadhi ‑dhɛ ‑dhasiklɔɔ "gʋ̈ ‑dhɛ bha‑ 'gü. ‑A ‑bha "kië bha ‑yö ‑gun dɔ sië "saabhotapë bha‑ ‑kɔ ‑së 'gü "pɛan "piʋ̈.
LUK 1:12 ꞊Dhɛ 'ö Zakadhi ‑ya yö, 'yö "suʋ̈ ‑yö ‑da 'gü, 'yö‑ "gblʋ̈ʋ̈dhɛ 'dhö "muu bho.
LUK 1:13 "Kɛɛ 'yö Atanna ‑bha "kië bha 'ö‑ pö‑ ‑dhɛ: «"Suʋ̈ 'ya 'dho i kë, Zakadhi, ‑a ‑gɛn ‑mü ꞊dhɛ Atanna ꞊ya i ‑bha bhɛawʋ ma. I ‑bha dhebhɔ Dhizabɛtö ‑dho 'nëgɔɔn do 'kpɔ i ‑gɔ, i ‑dho ‑a ‑dhɛ Zan.
LUK 1:14 ‑Yö ‑dho kë i ‑gɔ zuë" ꞊nii ‑da 'gü ‑wɔn 'kpii‑ ꞊dede 'ka 'ö 'i i "dhia bho, 'ö‑ ‑bha bhɔ ‑sü ‑yö mɛ 'gbɛ ꞊nii ‑da ꞊dedewo,
LUK 1:15 ‑a ‑gɛn ‑mü ꞊dhɛ 'në bha‑ ‑duɛ ‑dho kë 'kpii‑ Atanna ‑kuu "dhiʋ̈, ‑a ‑dhɛ 'yaa‑ ‑bha kö 'në 'ö "dhʋ̈ bha ‑yö we mü "ɛɛn pë 'ö ꞊waa‑ mü 'ö mɛ kun kö ‑yö zun‑ 'bha ‑bha; ‑a ‑gɛn ‑mü ꞊dhɛ ‑yö ‑dho bhɔ kö ‑yö pa ‑sü 'ka Atanna ‑bha 'Nii‑ "slʋ̈ʋ̈slʋ̈ 'ka.
LUK 1:16 ‑Yö ‑dho mɛ 'gbɛ "dhiʋ̈ yee kë Izraɛdhö ‑mɛ ‑nu kpö 'gü 'ö dho‑ ‑nu 'ka ‑a ‑nu Dëmɛ, ‑a ‑nu ‑bha Atanna "piʋ̈.
LUK 1:17 'Gügbɩɩdhɛ 'ö gun Atanna ‑wʋdhiʋ̈loomɛ Edhi 'gü ‑a ‑bha 'Nii‑ "slʋ̈ʋ̈slʋ̈ faan 'ka bha ‑yö ‑dho kë‑ 'gü, 'ö "ta sü‑ 'ka Atanna wëëdhö, kë "dhʋ̈ kö ‑yö 'në waa‑ dë nu ‑kɔ 'wü 'koo kö ‑a ‑nu ‑wʋ ‑yö kë do, 'kö ‑yö gɔɔgbɩɩmɛ ‑nu dɔ zian ‑ta kö ‑wo ‑gleng 'sü 'mɛ 'wo 'dhang bho Atanna "dhiʋ̈ ‑a ‑nu ‑bha, kö ‑yö Izraɛdhö ‑sɛgümɛ ‑nu ‑ya "yaan Atanna ‑wɔn "gblʋʋ "piʋ̈.
LUK 1:18 "Kɛɛ 'yö Zakadhi ‑ya pö Atanna ‑bha "kië bha‑ ‑dhɛ 'ö‑ pö: «‑A 'wɔn 'dhɛ 'kö bha a ‑dho 'dhang bho‑ "dhiʋ̈ ‑kɔ kë ꞊dhɛ kö‑ mɛ ꞊plɛ 'yi‑ 'nëkpɔmɛ 'ka mɛ ꞊gban ꞊plɛ 'ya kë zii!»
LUK 1:19 'Yö Atanna ‑bha "kië bha 'ö‑ ‑yɔ bɔ‑ ‑gɔ 'ö‑ pö: «Ma 'ö i n ‑ga ya, ma ꞊në 'wo n ‑dhɛ Gabliɛ, ma ꞊në 'a dɔ Atanna wëëdhö ‑a ‑bha "kië ‑nu kpö 'gü 'yö 'a‑ "dhiʋ̈ ‑ziö wo, yö ꞊në n bɔ kö 'a nu 'a dhiang zë i ‑dhɛ ꞊dhɛ ‑kɔ bha‑ 'dhö, kö 'a naɔ ‑së bha‑ dɔ i ‑gɔ.
LUK 1:20 "Kɛɛ ꞊dhɛ 'ö ‑kë ꞊dhɛ 'wɔn 'a nu‑ pö i ‑dhɛ 'ö‑ 'gü ‑wɔn ‑nu dho kë ö kë "tʋ̈ng 'gü bha, 'bhii 'dhang bho‑ "dhiʋ̈ 'ö bha‑ zaɔ bha, i ‑dho "gla "bhʋbhʋ 'gü, 'bhii 'dho "wɩ 'ö dho 'ö zun‑ 'ka 'wɔn bha‑ kë ‑yi ‑bha.»
LUK 1:21 'Ö kë sië "dhʋ̈ "tʋ̈ng 'ö‑ 'gü bha kö mɛ "pɛpɛ 'wo gun "kpɛnng "yasa 'gü mü bha ‑wo "yan 'to sië Zakadhi ‑gɔ, kö ꞊gwëë 'ö‑ wo sië Atanna ‑dhɔkëgükɔ 'gü bha‑ 'wɔn ꞊yaa‑ ‑nu 'kɔn.
LUK 1:22 ꞊Dhɛ 'ö Zakadhi ꞊ya zun "kpɛnng, 'yii ꞊mɔɔ‑ ‑bha kö ‑yö dhiang zë 'mɛ 'wo bha‑ ‑nu ‑dhɛ kö‑ "dhi ꞊ya ta. 'Mɛ 'wo bha ‑wa 'wɔn ‑dɔ yö ꞊në‑ ‑wɔn 'gü ꞊dhɛ ‑a "yan 'gü ꞊në gun ‑da sië 'yö ꞊gwëë 'kɔɔdhö "dhʋ̈ bha, ‑a ‑gɛn ‑mü ꞊dhɛ kö ‑yö ö ‑kɔ "paa 'gü ꞊në zë sië‑ ‑nu ‑dhɛ.
LUK 1:23 ꞊Dhɛ 'ö ꞊ya kë "dhʋ̈, 'ö‑ ‑bha yë ‑kë Atanna ‑gɔ 'kɔɔdhö ‑dhɛkpaɔyi ꞊ya yën, 'yö dho ö ꞊plöö.
LUK 1:24 ꞊Dhɛ 'ö "tʋ̈ng 'në bha ꞊ya ziö, 'yö‑ ‑bha dhebhɔ Dhizabɛtö bha 'ö 'gu sü, 'yö ö ‑gblɛn kpɔ 'gu bha‑ 'ka "su "sɔɔdhu 'ka kö ‑ya pö sië ö ‑dɩ ‑dhɛ ꞊dhɛ:
LUK 1:25 «‑Gasitɛ 'dhɛ 'kö ya n Dëmɛ ꞊në yö ‑zë ‑kë n ‑dhɛ, 'yö ö wë bɔ n ‑ta, kë "dhʋ̈ kö 'ö 'yiʋ̈‑ bho n ‑ta mɛ ꞊zinng 'gü ('yö ꞊ya n kë 'nëkpɔmɛ 'ka ya).
LUK 1:26 Dhizabɛtö ‑bha 'gu bha‑ "su "saɔdo ‑naa 'ka, 'yö Atanna ‑yö ö ‑bha "kië Gabliɛ do bha‑ bɔ 'zü Gadhidhe ‑pö do 'bha 'wo‑ ‑dhɛ Nazadhɛtö ‑a 'gü.
LUK 1:27 ‑A bɔ 'ö‑ wo "dhʋ̈ bha ‑ya ‑bɔ ‑dhaagadhee do, 'ö gɔndënë do 'ö ‑kë Davi suu 'gü ꞊në‑ 'ka 'wo‑ ‑dhɛ Zosɛfu bha ꞊yaa‑ ‑za dɔ ꞊në‑ "piʋ̈. ‑A ‑dhaagadhee 'ö "dhʋ̈ bha ‑wa ‑dhɛ Madhi.
LUK 1:28 ꞊Dhɛ 'ö Atanna ‑bha "kië bha ꞊ya 'dho ꞊ya ‑da Madhi ‑gɔ 'kɔɔdhö 'yö‑ pö‑ ‑dhɛ: «Madhi, 'bha ꞊boo mü,! Atanna ‑yö i "piʋ̈! Kwa Dëmɛ Atanna ꞊ya ‑gasitɛ 'kpii‑ do kë i ‑dhɛ!»
LUK 1:29 ꞊Tua bho kë ‑kɔ suu 'ö Atanna ‑bha "kië ‑ya ‑kë 'ka bha 'yö Madhi "gblʋ̈ʋ̈dhɛ "muu bho, 'yö ‑ya ‑a 'klɔɔ‑ mɔɔ‑ ‑sü ‑bha ö ‑dɩ "piʋ̈.
LUK 1:30 ‑Yö ‑to ‑a 'klɔɔ‑ mɔɔ‑ ‑dhɛ 'gü 'yö Atanna ‑bha "kië bha 'ö‑ pö‑ ‑dhɛ: «Madhi, i "gblʋ̈ʋ̈dhɛ 'ya 'dho "muu bho, ‑a ‑gɛn ‑mü ꞊dhɛ i ꞊bhlëë ‑yö ‑dhö Atanna wëëdhö.
LUK 1:31 ‑Dhɛ ‑ga, i ‑dho 'gu sü 'ö 'i 'në do kpɔ. 'Në 'i dho‑ 'kpɔ "dhʋ̈ bha, 'tɔ 'ka dho‑ ‑dhɛ 'ka ꞊në Yesu 'ka.
LUK 1:32 'Në bha ‑yö ‑dho "gla 'ö‑ ‑duɛ ‑yö ‑kë 'kpii‑. ꞊Ya kë "dhʋ̈ yi 'ö‑ 'ka, ‑wo ‑dho ‑a 'tɔ kpɔ 'wo‑ ‑dhɛ Atanna 'ö ‑ya ‑sü 'ka dhang‑ 'gü ‑a Gbö. Kwa Dëmɛ Atanna ‑dho ‑a "bhɛma Davi ‑bha ‑gblüdëdhɛ bha‑ nu‑ ‑dhɛ.
LUK 1:33 ‑Yö ‑dho mɛdhɛ kë Zakɔbö ‑bha 'kɔdhi bha‑ 'gü ‑todhʋ̈ 'ka 'ö‑ ‑bha mɛdhɛ "dhiʋ̈todhɛ 'yaa kë.»
LUK 1:34 'Yö Madhi ‑ya pö Atanna ‑bha "kië bha‑ ‑dhɛ 'ö‑ pö: «"Kɛɛ ‑a 'wɔn 'dhɛ 'kö bha ‑yö ‑dho kë ‑kɔ kë ꞊dhɛ ꞊zɔɔ, n Dëmɛ, kö 'maa gɔɔn‑ ‑wɔn ‑bhokoo 'bha dɔ ya!»
LUK 1:35 'Yö Atanna ‑bha "kië bha 'ö‑ ‑yɔ bɔ‑ ‑gɔ 'ö‑ pö: «‑Dhɛ ‑ga, Madhi, Atanna ‑bha 'Nii‑ "slʋ̈ʋ̈slʋ̈ ‑dho lɔɔ i ‑ta, Atanna ‑bha 'gügbɩɩdhɛ ꞊në dho 'wɔn bha‑ kë. Yö ꞊në‑ ‑wɔn 'gü, 'yö 'në "slʋ̈ʋ̈slʋ̈ 'i dho‑ kpɔ bha, 'wo dho‑ ‑dhɛ Atanna Gbö.
LUK 1:36 ‑Dhɛ ‑ga, Dhizabɛtö 'ö ‑kë i dëbhang dhebhɔ 'ka bha, yöö ‑dɩ 'pö ꞊ya ö ‑bha 'nëgɔɔn do ‑gu 'sü. Yö 'wo gun‑ ‑dhɛ sië ꞊gblöödhe bha 'ö 'gu sü ‑a "su "saɔdo ‑naa ꞊nɛ.
LUK 1:37 'Pë 'ö‑ ‑wɔn 'gü 'yö 'wɔn ‑nu bha 'wo ‑kë "dhʋ̈ bha‑ ‑gɛn ‑mü ꞊dhɛ Atanna ‑fiëbhawɔn 'yaa 'dhö.»
LUK 1:38 'Yö Madhi ‑ya pö: «‑Ɛɛ, n Dëmɛ ‑bha gwëëdhe ‑mü n 'ka, ‑yö kë n ‑dhɛ ꞊dhɛ ‑kɔ 'i‑ pö‑ 'ka bha‑ 'dhö!» ꞊Dhɛ 'ö ꞊yaa‑ pö "dhʋ̈, 'yö Atanna ‑bha "kië bha 'ö ziö 'ö dho.
LUK 1:39 ‑A "tʋ̈ng do bha‑ 'gü, 'yö Madhi ‑yö ꞊wlü 'yö dho ‑bɛang 'ka Zuda ‑pö do 'bha 'ö ‑ya ‑sü 'ka ‑tɔn ‑gbeng 'gü bha‑ 'gü,
LUK 1:40 'yö dho 'yö ‑da Zakadhi ‑gɔ 'kɔɔdhö 'yö Dhizabɛtö ꞊tua bho.
LUK 1:41 ꞊Dhɛ 'ö Dhizabɛtö "tʋ 'dhö ‑da Madhi ꞊tua bho kë ‑wʋ bha‑ 'gü, 'yö 'në 'ö‑ "gblʋ̈ʋ̈‑ bha 'ö pa ö diëë 'ka. 'Yö to ‑dhɛ do bha‑ 'gü 'yö pa Atanna ‑bha 'Nii‑ "slʋ̈ʋ̈slʋ̈ 'ka,
LUK 1:42 'yö ꞊gbla "gbɩɩ‑ 'ka 'ö‑ pö: «Atanna ‑bha 'dhuë‑ ‑yö bhi ꞊në i 'kun ‑sü 'ka dhong‑ ‑nu ꞊gban "pɛpɛ kpö 'gü, yö ꞊në‑ ‑wɔn 'gü 'yö 'në 'i dho‑ 'kpɔ bha 'dhuë‑ bha 'ö‑ 'kun ‑sü 'ka 'pö.
LUK 1:43 ‑A kë ‑sü kö ma ‑zë n Dëmɛ dhe ‑yö ‑da n ‑gɔ 'kɔɔdhö, ‑a 'wɔn ꞊në n kɔn!
LUK 1:44 ‑A ‑gɛn ‑mü ꞊dhɛ ꞊dhɛ 'ö i ‑bha ꞊tua bho kë ‑wʋ ꞊ya ‑da n "tʋ 'gü bhoo, 'yö to 'yö 'në 'ö n "gblʋ̈ʋ̈‑ ya 'ö pa ö diëë ꞊niidadhe 'ka.
LUK 1:45 I ‑bha ‑yö ‑së! ‑A ‑gɛn ‑mü ꞊dhɛ 'pë 'ö n Dëmɛ ‑ya pö 'ö‑ 'gü ‑wɔn dho kë bha i ka 'dhang bho‑ "dhiʋ̈.»
LUK 1:46 'Yö Madhi ‑ya ‑wʋ "dhiʋ̈ kun 'ö‑ pö: «'Ma n Dëmɛ nuɛ" bho, 'ma‑ 'badhika ‑ya ‑ta.
LUK 1:47 N zuë" ꞊nii ꞊ya ‑da ꞊dedewo Atanna 'ö n Dhamɛ 'ka bha‑ ‑wɔn 'gü.
LUK 1:48 ‑A ‑gɛn ‑mü ꞊dhɛ ‑yö ‑wɩ ‑bha 'ö ö "yan ꞊lɔɔ 'ö‑ ‑da ma 'a ‑kë ‑a ‑bha gwëëdhe 'ö‑ ꞊bhlëë 'yaa 'dhö ‑a 'ka bha n ‑ta. Yö ꞊në‑ ‑wɔn 'gü, 'yö go ꞊dɛɛ ‑bha 'ö dho 'ö zun‑ 'ka "sɛ "dhiʋ̈toyi ‑bha 'yö mɛ ꞊gban "pɛpɛ suu dho‑ pö ꞊dhɛ ma ꞊në n ‑bha 'dhö ‑së.
LUK 1:49 ‑A ‑gɛn ‑mü ꞊dhɛ 'gügbɩɩ Atanna 'ö‑ 'tɔ 'dhö "slʋ̈ʋ̈slʋ̈ bha, ꞊ya 'wɔn ‑së 'kpii‑ kë n ‑dhɛ.
LUK 1:50 'Mɛ 'wo ‑suʋ̈ ‑gɔ 'wo‑ ꞊bhlëë ‑ya, ‑a ‑nu ‑wëë ‑dho ‑a kë 'ö‑ "dhiʋ̈todhɛ 'yaa kë.
LUK 1:51 Yö ꞊në 'wɔn "gblʋ̈gblʋ̈ ‑nu ‑kë ö ‑kɔ 'ka, faan ‑ya 'gü. Yö ꞊në‑ ‑wɔn 'gü 'yö 'mɛ 'ö ‑dɩ ‑sü 'kpii‑ 'dhö‑ ‑nu 'gü 'yö bhluu" ma‑ ‑nu ‑bha.
LUK 1:52 Yö ꞊në ‑gblüdë "gblʋ̈gblʋ̈ ‑nu bho ‑yɛa ‑bha. 'Yö 'mɛ 'ö‑ ‑nu ꞊bhlëë 'yaa 'dhö bha‑ ‑nu ‑ya ‑dhɛ "gblʋ̈gblʋ̈ 'gü.
LUK 1:53 Yö 'ö bha ꞊në din‑ 'dhö 'mɛ 'ö‑ ‑bha, 'yö‑ ‑mɛ gba ‑bhöpë ‑së ꞊dede 'ka, 'yö ꞊naɔmɛ ‑nu "piʋ̈ ‑kë, 'yö 'wo dho wo ‑kɔ 'gü "fië 'ka.
LUK 1:54 Yö 'ö bha ꞊në‑ yi to "dhiʋ̈ ꞊gblɛɛn, 'yö‑ pö kwa "bhɛma ‑nu ‑dhɛ Ablaamö waa‑ 'gü ‑në ‑nu yi ‑wëë ‑dho ‑a kë "dhʋ̈ "dhʋ̈ 'ö‑ ‑naa 'yaa kë. ‑Kɔ do 'ö‑ pö‑ 'ka‑ ‑bha yi 'bha 'ka bha ꞊në 'ö‑ kë ‑sü 'ka‑ ‑bha ꞊dɛɛ, 'yö 'mɛ 'kwa ‑kë Izraɛdhö ‑mɛ ‑nu 'ka, 'yö kwa bho ‑sü 'ka 'wɔn 'gü bha.»
LUK 1:56 Madhi ‑yö ‑to Dhizabɛtö "piʋ̈ mü "su ‑yaaga "sinma 'ka 'yö gun ‑na 'dho ö ‑dɩ ꞊plöö.
LUK 1:57 ꞊Dhɛ 'ö ꞊ya kë "dhʋ̈ 'ö Dhizabɛtö 'në yö "tʋ̈ng ꞊ya ꞊loo, 'yö dho 'yö "bɔ bho 'nëgɔɔn do 'ka.
LUK 1:58 'Wɔn bha ꞊dhɛ 'ö‑ ‑yayɔɔ ‑nu waa‑ 'kpɔmɛ ‑nu ꞊waa‑ ma ꞊dhɛ ‑a ‑wëë ꞊ya Atanna kë ꞊yaa‑ gba 'në 'ka, 'yö ꞊wɛnng ‑nu 'wo‑ ꞊niidadhe ‑kë wo "kwëë.
LUK 1:59 ꞊Dhɛ 'ö 'në bha ꞊ya bhɔ, ‑a ‑dhɛkpaɔyi "saaga ‑naa "dhiʋ̈ pa ‑yi bha, 'yö mɛ ‑nu ‑wo nu mü kö ‑wa kë 'gbannë 'ka ꞊dhɛ ‑kɔ 'wo‑ ‑kë 'ka ‑a ‑nu wɔ ‑kɔ 'gü ‑a 'dhö. 'Yö 'wo‑ 'tɔ kpɔ‑ dë 'tɔ ‑bha 'wo‑ ‑dhɛ Zakadhi.
LUK 1:60 "Kɛɛ ꞊dhɛ 'ö ꞊waa‑ 'tɔ kpɔ "dhʋ̈, 'yö‑ dhe ‑ya pö: «‑Abin! 'Në bha ‑wa ‑dhɛ Zan.»
LUK 1:61 'Yö 'wo‑ pö‑ ‑dhɛ: «I suu 'gü ‑mɛ ‑mɛɛ ꞊në 'wo‑ ‑dhɛ Zan, 'yö bhii 'në ‑da ‑dhɛ.»
LUK 1:62 'Yö 'wo wo "yan zë Zakadhi ‑dhɛ kë "dhʋ̈ kö ‑yö ö "dhi ‑da 'wɔn bha‑ 'gü (‑a ‑gɛn ‑mü ꞊dhɛ 'ö gun "dhʋ̈ kö 'yaa "wɩ), kö 'tɔ 'ö dho‑ ‑ya 'në bha‑ ‑bha 'wo‑ dɔ.
LUK 1:63 'Yö Zakadhi ‑yö ö ‑kɔ 'gü zë‑ ‑nu ‑dhɛ kö ‑wo nu ö ‑dhɛ 'kpongpaa 'në 'bha 'ka. ꞊Dhɛ 'ö ꞊wa nu‑ 'ka 'yö 'në bha‑ 'tɔ ‑ya ‑ta 'ö‑ pö ‑wa ‑dhɛ Zan. 'Yö‑ 'wɔn ‑yö mɛ ꞊gban "pɛpɛ kɔn.
LUK 1:64 ‑Yö ‑to ‑dhɛ do bha‑ 'gü, 'yö‑ "dhi ‑yö ‑pʋ, 'yö‑ 'nɛɛga ‑yö go‑ "dhiëng 'gü 'yö "wɩ ‑sü zü bho, kö ‑yö Atanna 'tɔ bhɔ sië.
LUK 1:65 'Wɔn bha kë 'ö‑ wo "dhʋ̈ bha, 'yö "suʋ̈ ‑da mɛ "pɛpɛ 'wo gun‑ ‑nu ‑züzü bha‑ ‑nu ꞊gban 'gü, 'yö 'wo ‑ya ‑dhiang zë ‑sü ‑bha ‑tɔn 'gü mü ‑dhɛ ꞊gban "pɛpɛ 'gü Zude ‑sɛ bha‑ 'gü.
LUK 1:66 'Yö mɛ "pɛpɛ 'ö ꞊wa 'wɔn 'ö Zakadhi ‑ya pö 'në bha‑ ‑bu 'gü bha‑ ma, 'yö 'wo‑ ‑da woo‑ ‑gleng "piʋ̈ kö ‑wa pö sië: «‑A 'në 'kö ya ‑yö ‑dho kë ‑më ꞊në‑ suu 'ka?» "Kɛɛ 'sa Atanna ‑yö gun 'në bha‑ "piʋ̈ tɛan‑ ꞊dede 'ka.
LUK 1:67 ꞊Dhɛ 'ö ꞊ya kë "dhʋ̈, 'yö 'në bha‑ dë 'ö ‑kë Zakadhi 'ka bha, 'yö pa Atanna ‑bha 'Nii‑ "slʋ̈ʋ̈slʋ̈ 'ka ‑a "tʋ̈ng do 'ö‑ ɔngyaa ga ‑yö go‑ 'ka‑ "dhiëng 'gü bha‑ 'gü, 'yö‑ ‑wʋ "dhiʋ̈ ꞊loo 'ö‑ pö:
LUK 1:68 «Kwa Dëmɛ 'tɔ ‑yö bhɔ, Izraɛdhö ‑mɛ ‑nu ‑bha Atanna 'tɔ ‑yö ‑bhɔ, ‑a ‑gɛn ‑mü ꞊dhɛ yö 'ö bha ꞊në‑ ‑zʋ ‑yö ‑bö kwa ‑wɔn 'ka, 'yö nu 'ö kwa ‑gɔ ‑ta dhɔ.
LUK 1:69 'Yö mɛ 'gügbɩɩ do 'ö dho kë kwa Dhamɛ 'ka, ‑a sü ‑a ‑bha gwëëmi Davi suu 'gü 'yö‑ bɔ kwa ‑dhɛ
LUK 1:70 ꞊dhɛ ‑kɔ 'ö‑ ‑dhiang zë‑ 'ka, ‑a ‑wʋdhiʋ̈loomɛ ‑nu 'wo "slʋ̈ʋ̈slʋ̈ ‑a ‑nu "dhi 'gü yi 'bha 'ka bha‑ 'dhö,
LUK 1:71 ꞊dhɛ ö ‑dho Mɛdhamɛ do 'ö dho kwa bho kwa 'yaɔ‑ ‑nu waa‑ 'mɛ 'ö kwa ‑san ‑ya ‑nu ‑kë ‑a ‑nu ꞊kwɛɛ‑ ‑a bɔ.
LUK 1:72 Kwa "bhɛma ‑nu ‑wëë ‑ya ‑kë ‑kɔ bha ꞊në‑ 'gü, 'yö‑ ‑zʋ ‑yö ‑bö ‑mlɛɛ "slʋ̈ʋ̈slʋ̈ 'ö‑ ‑da wɛng‑ ‑nu ‑a ‑nu ꞊zinng 'gü yi bha‑ 'ka bha‑ ‑ta,
LUK 1:73 ‑yö "plüün bha‑ ‑bho "dhʋ̈ 'ö ‑sö ‑bhö 'ka kwa 'ziʋ̈‑ Ablaamö ꞊në‑ ‑dhɛ.
LUK 1:74 Kë "dhʋ̈ kö 'ya kwa dha kwa 'yaɔ‑ ‑nu ‑gɔ kö 'kwa 'dho‑ ‑dhɔkë "suʋ̈ 'ka,
LUK 1:75 "kɛɛ kö 'kwa kë mɛ 'ö "slʋ̈ʋ̈slʋ̈ 'ö pö 'aa‑ ‑bha ‑a 'ka ö wëëdhö kö ‑yö 'to‑ 'ka "dhʋ̈ ‑yö zun‑ 'ka kwa ga ‑yi ‑bha.
LUK 1:76 'Yö ꞊në‑ ‑wɔn 'gü, 'yö bhi 'i bha ma 'në, 'yö 'wo dho i ‑dhɛ Atanna 'ö ‑ya ‑sü 'ka dhang‑ 'gü ‑a ‑wʋdhiʋ̈loomɛ; ‑a ‑gɛn ‑mü ꞊dhɛ bhi ꞊në 'i dho ‑da kwa Dëmɛ bha‑ ‑dhɛ "dhiʋ̈, 'yö 'i‑ ‑bɔ ‑ta ‑zian ꞊baa,
LUK 1:77 'yö 'i‑ ‑wɔn "dhiʋ̈ ꞊loo‑ ‑gɔ "sɛgümɛ ‑nu ‑bha 'yö 'wo‑ dɔ ꞊dhɛ yö ꞊në dho‑ ‑nu dha, 'yö‑ ‑nu ‑bha 'wɔn yaa ‑nu 'wo‑ ‑kë bha‑ ‑nu ‑mawɔn to.
LUK 1:78 ‑A ‑gɛn ‑mü ꞊dhɛ mɛ "bhɩɩ‑ ‑nu kwa ‑wëë 'ö kwa Dë Atanna ‑kë bha‑ "sinma "yɔɔ 'yaa 'dhö, ‑gasitɛ 'yii‑ ‑bha mɛ ‑wëë ‑bha ‑a kë zuëga bha ꞊në‑ ꞊slɔɔ, 'yö‑ ‑bha mɛdhɛ 'ö go dhang‑ 'gü bha‑ 'bhü ꞊ya 'sɔ ‑sü zü bho kwa ‑ta ꞊dhɛ 'yënng‑ "tɛɛ 'bhü 'dhö bha,
LUK 1:79 kë "dhʋ̈ kö 'mɛ 'wo "ta sië "yënng tii 'gü, 'ö ga dhɔng ꞊ya kpa ‑nu ‑ta bha, kö ‑yö ‑dhɛ "pʋ wo ꞊në‑ ‑nu ‑ta, kë "dhʋ̈ kö ‑yö ‑to 'ko ‑dhɛ ‑së ‑zian bho kwa 'ka.» Zakadhi ‑yö 'tɔ ‑loo Atanna ‑bha ‑kɔ bha ꞊në‑ 'gü.
LUK 1:80 ꞊Dhɛ 'ö ꞊ya kë "dhʋ̈ 'yö 'në bha 'ö ‑gla, "kɛɛ 'yö kë "yaakimɛ ꞊dede 'ka, 'yö dho 'ö ‑ya "tʋngtadhɛ 'bha 'gü, 'yö to 'mü 'ö dho 'ö zun‑ 'ka ‑a ‑dɩ ‑zɔn Izraɛdhö ‑sɛgümɛ ‑nu ‑dhɛ ‑yi ‑bha.
LUK 2:1 ‑A "tʋ̈ng do bha ꞊në‑ 'gü 'yö "sɛkɔɔnmɛ 'kpii‑ 'ö gun Wlɔmö ‑sɛ ‑gɔ "dhiʋ̈ 'wo gun‑ ‑dhɛ sië Sezaa Wogisi bha 'ö mɛ bɔ ‑a ‑bha "sɛ ‑ta ‑dhɛ ꞊gban "pɛpɛ 'gü kö ‑wo mɛ ꞊gban dhʋng.
LUK 2:2 Mɛ dhʋng ‑kɔ ‑blɛɛsü 'ö "dhʋ̈ bha 'ö ‑kë kö 'mɛ 'ö ‑gblüdë bha‑ ‑kɔdhiʋ̈mɛ 'ka Siidhi ‑sɛ 'gü ‑wa ‑dhɛ Kidhinisö.
LUK 2:3 'Yö mɛ ꞊gban "pɛpɛ 'wo ‑ya 'dho ‑sü ‑bha wo 'kpɔpö ‑nu 'gü kö ‑wo wo dhʋng mü.
LUK 2:4 'Ö gun "dhʋ̈ kö Zosɛfu ‑yö ‑ya ‑sü 'ka 'pödhɛ 'wo‑ ‑dhɛ Nazadhɛtö 'ö Gadhidhe ‑sɛ 'gü bha‑ 'gü. ꞊Dhɛ 'ö ꞊yaa‑ ma ꞊dhɛ mɛ ꞊gban ‑wo 'dho sië wo 'kpɔpö ‑nu 'gü, 'yö ꞊wlü 'pö 'yö dho Betedhɛmö, ‑gblüdë Davi ‑bha 'pödhɛ 'ö Zude ‑sɛ 'gü bha‑ 'gü; ‑a ‑gɛn ‑mü ꞊dhɛ ‑yö go Davi ‑gɔ 'kɔɔdhö, Davi suu 'gü ‑në ‑mü ‑a 'ka.
LUK 2:5 ‑Yö ‑dho "dhʋ̈ kö 'ö waa‑ Madhi wo dhʋng mü, ‑a ‑gɛn ‑mü ꞊dhɛ 'ö gun "dhʋ̈ kö ꞊ya Madhi ‑za dɔ kö 'ö‑ 'sü dhe 'ka. 'Sa 'wo gun 'dho sië‑ "dhʋ̈ "tʋ̈ng 'ö‑ 'ka bha kö Madhi ‑yö 'gbiödhe 'ka.
LUK 2:6 ꞊Dhɛ 'ö ꞊wa 'dho ꞊wa ꞊loo Betedhɛmö, 'ö Zosɛfu 'dhö 'wɔn bha‑ 'gü ‑ziö ‑nu wo sië, 'yö Madhi "bɔ bho "tʋ̈ng ‑yö ꞊loo.
LUK 2:7 'Yö ö ‑bha 'nëgɔɔn ‑blɛɛsü bha‑ kpɔ 'kɔ 'wo gun‑ 'gü bha‑ 'gü. ꞊Dhɛ 'ö 'në bha ꞊ya bhɔ, 'yö sɔ bɔ‑ ‑bha 'yö‑ ‑wɔ ‑tuʋ̈ ‑nu pë ‑bhö ‑dhɛ 'gü; ‑a ‑gɛn ‑mü ꞊dhɛ 'ö gun "dhʋ̈ kö ꞊wa ‑dhɛng ꞊yëë bho 'kɔ 'wo gun‑ 'gü bha‑ wɔdhɛ ‑zë 'gü.
LUK 2:8 ‑Tuʋ̈ ‑maakëmɛ 'bha ‑nu ‑wo ‑gun Zude "sɛgɔ bha‑ gbɛɛtadhɛ 'bha 'gü mü.
LUK 2:9 'Mɛ 'wo bha 'wo dho "kan wo ‑ta kö Atanna ‑bha "kië do ꞊ya ‑wo ‑nu ‑ta kö‑ ‑bha ‑gblüdëdhɛ 'bhü 'ö ꞊dhɛ 'yënng‑ 'bhü 'dhö bha ꞊ya 'sɔ‑ ‑nu ‑ta, 'yö pɛng ‑yö ‑kan ‑nu ‑bha "wɛ ‑budhö, 'yö "suʋ̈ ‑ziisü ‑yö ‑da ‑nu 'gü.
LUK 2:10 "Kɛɛ 'yö Atanna ‑bha "kië bha 'ö‑ pö‑ ‑nu ‑dhɛ 'ö‑ pö: «"Suʋ̈ 'ya 'dho ka kë, ‑a ‑gɛn ‑mü ꞊dhɛ naɔ 'a nu‑ dɔ ka ‑gɔ bha‑ 'gü ‑wɔn ‑dho dhi "sɛgümɛ ‑nu ꞊gban "pɛpɛ ‑dhɛ 'ö‑ ‑nu ꞊nii ‑da ꞊dedewo.
LUK 2:11 Yö ‑mü ꞊dhɛ Atanna ‑bha bɔmɛ Klisi 'ö‑ ‑ya Mɛdhamɛ 'ka, kwa Dëmɛ bha ꞊në ꞊ya bhɔ ꞊dɛɛ Davi ‑gɔ 'pödhö.
LUK 2:12 (‑Ka 'dho kö 'ka ‑wo mü), ꞊ya kë ꞊dhɛ 'ka 'dho 'ka ꞊loo mü, pë 'ka dho‑ 'suan‑ bho‑ ‑bha ꞊dhɛ 'wɔn 'a‑ pö bha tɛan‑ ‑mü, ꞊dhɛ Mɛdhamɛ bha ꞊ya bhɔ, yö ‑mü ꞊dhɛ ka ‑dho ‑kpan 'në do 'ö sɔ 'dhö bɔ ‑sü 'ka‑ ‑bha ‑a ‑bha kö ‑wa wɔ ‑sü 'ka ‑tuʋ̈ ‑nu pë ‑bhö ‑dhɛ 'gü.»
LUK 2:13 ꞊Dhɛ 'ö Atanna ‑bha "kië bha ꞊yaa‑ pö "dhʋ̈, 'wo dho "kan 'zü wo ‑ta kö‑ kpö 'kpii‑ 'bha ꞊ya nu 'zü kö ꞊wa ‑da mɛ 'dhɛ bha‑ ‑bha kö ‑wo "yʋʋ 'sü sië Atanna ‑dhɛ ("tan 'ka) 'wo‑ pö:
LUK 2:14 «Atanna 'i dhang‑ 'gü, kwaa‑ "yʋʋ ‑mü! Kwaa‑ "yʋʋ ‑mü! I 'tɔ ‑yö bhɔ, ‑a ‑gɛn ‑mü ꞊dhɛ "kpʋngtaamɛ ‑nu ‑dhɔ ‑yö i ‑kë, ‑a ‑wɔn 'gü 'bha i ‑bha zuë" ‑ya "gblʋ̈ʋ̈‑ 'ö dhang‑ 'gü bha‑ nu‑ ‑nu ‑dhɛ.»
LUK 2:15 ꞊Dhɛ 'ö Atanna ‑bha "kië ‑nu bha ꞊wa ‑wawa bho "dhʋ̈ 'ö ꞊wa wo yee kë ꞊wa 'dho dhang‑ 'gü, 'yö ‑tuʋ̈ ‑maakëmɛ ‑nu bha 'wo‑ pö wo 'ko ‑dhɛ: «‑Ka nu kö 'kwa 'dho Betedhɛmö kö 'wɔn ‑së 'ö Atanna ‑ya ‑kë 'ö‑ "blɛɛn‑ ‑zɔn kwa ‑dhɛ bha kwa "yan ‑yö ‑da ‑dhɛ 'gü!»
LUK 2:16 'Yö 'wo dɔ ‑bɛang ‑bha 'wo dho 'mü. 'Yö 'wo dho 'wo ‑kpan Zosɛfu waa‑ Madhi ‑a ‑nu ‑bha kö 'në bha 'pö ‑yö wɔ sië ‑tuʋ̈ pë ‑bhö ‑dhɛ 'gü ‑a ‑nu "sɔɔ mü.
LUK 2:17 ꞊Dhɛ 'wo 'në bha‑ yö, 'yö 'wɔn 'ö Atanna ‑bha "kië ‑ya pö‑ ‑nu ‑dhɛ 'në bha‑ ‑bu 'gü bha 'wo‑ ‑gɛn dɔ 'pö.
LUK 2:18 'Wɔn 'ö ‑tuʋ̈ ‑maakëmɛ ‑nu ‑wa ‑gɛn dɔ bha mɛ "pɛpɛ 'kö 'wo‑ ma, 'yö‑ 'wɔn ‑ya ‑nu ꞊gban kɔn,
LUK 2:19 "kɛɛ kö Madhi ‑zë ‑ya 'kun ꞊në wo sië ö zuë" "piʋ̈ 'ö ö "yan ‑ta 'gü 'ö dho‑ 'ka.
LUK 2:20 ꞊Dhɛ 'ö 'wɔn bha ꞊ya kë "dhʋ̈, 'yö ‑tuʋ̈ ‑maakëmɛ ‑nu bha 'wo wo yee ‑kë 'wo dho wo ꞊plöö kö ‑wo Atanna nuɛ" bho sië 'ö 'wo 'tɔ ꞊loo‑ ‑bha 'wɔn ‑nu 'ö‑ ‑nu "yan 'dhö ‑da 'gü waa‑ 'dhɛ ‑nu 'wo‑ ma bha kë 'ö‑ wo tɛan‑ 'ka ꞊dhɛ ‑kɔ 'ö‑ ‑bha "kië ‑ya pö 'ka‑ ‑nu ‑dhɛ ‑a 'dhö bha‑ ‑wɔn 'gü.
LUK 2:21 ꞊Dhɛ 'ö Yesu ꞊ya bhɔ 'ö‑ ‑dhɛkpaɔyi ꞊ya kë "saaga, 'yö mɛ ‑nu ‑wo nu kö ‑wa kë 'gbannë 'ka. 'Yö‑ 'tɔ 'ö Atanna ‑bha "kië ‑ya kpɔ kö 'wii‑ ‑gu ‑zian 'sü ꞊kö bha 'wo‑ ‑ya ‑bha, 'yö 'wo‑ pö ‑wa ‑dhɛ Yesu.
LUK 2:22 ꞊Dhɛ 'ö ‑dhɛkpaɔyi 'ö dhebhɔ 'ö ꞊ya "bɔ bho 'ö‑ ‑kë 'kɔɔdhö 'yö gun ‑na 'dho Atanna ‑dhɔkëgükɔ 'gü ꞊dhɛ ‑kɔ 'ö ‑bɛn zë ‑sü 'ka‑ 'ka ‑a ‑bha 'tɔng‑ 'sëëdhɛ 'ö Moizö ‑ya ‑bɛn zë bha‑ 'gü bha‑ 'dhö, 'ö‑ ‑dhɛkpaɔyi ‑kaɔng ‑yiisiö 'ka bha ꞊ya zun 'ko "dhiʋ̈, 'yö Zosɛfu waa‑ Madhi 'wo Yesu sü 'wo dho‑ 'ka Zedhizadhɛmö kö 'wo‑ "kplëng bho kwa Dëmɛ ‑dhɛ
LUK 2:23 ꞊dhɛ ‑kɔ 'ö ‑bɛn zë ‑sü 'ka‑ 'ka Atanna ‑bha 'tɔng‑ 'sëëdhɛ 'gü ꞊dhɛ: «'Nëgɔɔn ‑blɛɛsü "pɛpɛ 'ka dho‑ 'kpɔ, ka ‑dho ‑a "kplëng bho Atanna ‑dhɛ» bha‑ 'dhö. Kë 'pö "dhʋ̈ kö‑ 'dhɛ 'ö ‑bɛn zë ‑sü 'ka 'pö ꞊dhɛ ꞊ya kë 'zü "dhʋ̈:
LUK 2:24 «'Ka ‑tong ꞊plɛ "ɛɛn ‑a suu 'bha 'ö mü bha‑ "gbɔng ꞊plɛ nu "saabhomɛ ‑nu ‑dhɛ kö ‑wo "saa‑ bho‑ 'ka Atanna "dhiʋ̈» bha ‑wa 'gü ‑wɔn kë ꞊dhɛ ‑kɔ 'ö ‑bɛn zë ‑sü 'ka‑ 'ka ‑a 'dhö (kë "dhʋ̈ 'pö kö Madhi ‑yö kë "slʋ̈ʋ̈slʋ̈).
LUK 2:25 ‑A "tʋ̈ng do bha‑ 'gü kö gɔndë do 'bha ‑yö Zedhizadhɛmö ‑pö bha‑ 'gü 'wo‑ ‑dhɛ Simeɔn. 'Mɛ 'ö ꞊sɔng 'bha 'yaa‑ ‑bha, 'ö Atanna ꞊bhlëë ‑ya ꞊dedewo ꞊në gun gɔndënë bha‑ 'ka. 'Sa 'ö gun "dhʋ̈ kö ‑yö ö "yan 'to sië 'mɛ 'ö dho Izraɛdhö ‑mɛ ‑nu dha bha ꞊në‑ ‑gɔ. Atanna ‑bha 'Nii‑ "slʋ̈ʋ̈slʋ̈ ‑yö ‑gun 'gü.
LUK 2:26 'Ö gun "dhʋ̈ kö Atanna ꞊ya bɔ 'nu ö bha 'Nii‑ "slʋ̈ʋ̈slʋ̈ ‑ta kö Yesu bhɔ "tʋ̈ng ‑zian 'yii ꞊loo ꞊kö kö ꞊yaa‑ pö Simeɔn ‑dhɛ ꞊dhɛ 'yii 'dho ga kö 'yii ö "yan ‑kpan ꞊kö 'mɛ 'ö kwa Dëmɛ ‑ya ‑ya Izraɛdhö ‑mɛ ‑nu Dhamɛ 'ka bha‑ ‑bha.
LUK 2:27 ‑A ‑bha 'Nii‑ "slʋ̈ʋ̈slʋ̈ do bha ꞊në zun 'zü‑ ‑dhɛ "dhiʋ̈ 'yi bha‑ 'ka 'yö dho‑ 'ka Atanna ‑dhɔkëgükɔ 'ö Zedhizadhɛmö bha‑ 'gü. ꞊Dhɛ 'ö ꞊ya 'dho ꞊ya ꞊loo mü, 'ö dho ‑dhɛ ‑ga kö Yesu dë ‑nu ‑wo nu sië‑ 'ka kö 'pë 'ö Atanna ‑bha 'tɔng‑ ‑ya pö bha ‑wa 'gü ‑wɔn kë.
LUK 2:28 ꞊Dhɛ 'ö ꞊yaa‑ ‑nu yö, 'yö ö ‑kɔ kpɔ 'në bha‑ ‑gɔ 'yö 'tɔ ꞊loo Atanna ‑bha 'ö‑ pö:
LUK 2:29 «‑A "tʋ̈ng ꞊ya ꞊loo ꞊tɔn, n Dëmɛ, kö 'i i ‑kɔ bho ma 'a i ‑bha gwëëmi 'ka bha n 'gü, kö 'a nu i "piʋ̈ zuëniida 'ka ꞊dhɛ ‑kɔ 'ö i ‑wʋ ‑ya pö‑ 'ka ‑a 'dhö; ‑a ‑gɛn ‑mü ꞊dhɛ 'wɔn 'i‑ yi to "dhiʋ̈ 'i‑ "plüün bho yi ‑dhɛ bha‑ 'gü ‑wɔn ꞊ya kë.
LUK 2:30 ‑A ‑gɛn ‑mü ꞊dhɛ Mɛdhamɛ 'i‑ bɔ 'ö 'i‑ ‑ya "sɛgɔ ꞊gban "pɛpɛ Dhamɛ 'ka bha, mang ꞊dede n "yanga ꞊plɛ ꞊ya ‑kpan ‑a ‑kponggüdhɛ ‑bha.
LUK 2:32 'Mɛ 'ö dho kë "sɛgɔ "pɛpɛ ꞊gban 'gü ‑mɛ ‑nu ‑bha ‑dhɛpuudhɛ 'ka, 'ö dho‑ ‑nu "yan "dhiʋ̈ "pʋ kö ‑wo i dɔ, 'ö dho Izraɛdhö ‑mɛ ‑nu 'i yi sü 'i yi ‑ya ‑dɩ ‑ta i ‑bha 'ka bha yi 'tɔ ‑wo bha 'ma‑ yö.»
LUK 2:33 Dhiang ‑nu 'ö Simeɔn gun‑ zë sië Yesu ‑bu 'gü "dhʋ̈ bha, ‑ya dhe waa‑ dë ‑a ‑nu ‑kɔn.
LUK 2:34 ꞊Dhɛ 'ö ꞊ya kë "dhʋ̈, 'yö 'dhuë‑ ‑kë ‑nu ‑bha, 'yö go mü 'ö‑ pö Yesu dhe Madhi ‑dhɛ: «'Në 'i‑ kpɔ bha, Atanna ‑ya ‑ya kö ‑yö kë Izraɛdhö ‑sɛgümɛ ‑nu 'bha ‑nu ‑pö ‑bha ‑pë 'ka, "kɛɛ kö ‑yö kë mɛ 'bha ‑nu ‑dɩ 'pö ‑a ‑nu ‑wlübhamɛ 'ka. ‑Yö ‑dho kë Atanna ‑bha 'wɔn 'suan‑ ‑bho ‑bha ‑mɛ ꞊në‑ 'ka; ‑a ‑gɛn ‑mü ꞊dhɛ mɛ "bhɩɩ‑ ‑nu ‑dho wo ꞊taa zun‑ ‑gɔ.
LUK 2:35 Yö ꞊në dho kë 'wɔn ‑nu 'wo ‑gblɛn 'kpɔ ‑sü 'ka mɛ 'gbɛ zuë" "piʋ̈ bha‑ ‑nu ‑wo zangtamɛ 'ka. "Kɛɛ bhi ‑zë, i ‑bha 'ka zuë" "dhiʋ̈ "tɛɛ‑ ‑dho i zuë" ‑gi ꞊dhɛ ‑kɔ 'ö ‑siangga ‑yö mɛ zua 'ka bha‑ 'dhö.»
LUK 2:36 ‑A "tʋ̈ng do bha‑ 'gü, Atanna ‑wʋ "dhiʋ̈ ꞊loo ‑dhe do 'bha ‑yö ‑gun "sɛ bha‑ 'gü 'wo‑ ‑dhɛ Anö, 'ö kë Fanuɛ 'dhu 'ka, 'ö go Asɛɛ ‑gɔ 'kɔdhi 'gü. Dhebhɔ bha 'ö gun "dhʋ̈ kö ꞊ya kë zii ꞊dedewo, "kɛɛ kö 'ö dho gwaan‑ ‑bha ‑yö ‑kwɛ ‑kë mü "saɔplɛ, 'yö‑ ‑bha gɔn ‑yö ga.
LUK 2:37 ‑A ꞊gɛandhe ‑sü bha kö‑ ‑kwɛ ꞊ya kë ‑kaɔng "saaga ö ga ‑yiisiö, "kɛɛ 'yaa 'go Atanna ‑dhɔkëgükɔ 'gü tongtongdhö kö ‑yö 'dho ‑dhɛ 'bha 'gü. Kö ‑ya ‑dhɔkë 'yënng‑ 'gü waa gbeng ‑nu ꞊gban 'gü ‑bhɛa ‑a ‑dhɛ ‑sü waa‑ 'sunng‑ 'ma ‑sü ‑nu 'ka ‑kpɛawo.
LUK 2:38 Yöö ‑dɩ 'pö ‑yö ꞊loo mü "tʋ̈ng ꞊dede 'wo dho Yesu 'ka ‑a 'gü mü bha ꞊në‑ 'gü. ꞊Dhɛ 'ö Yesu "blë "puu bha‑ yö, 'yö ‑ya Atanna nuɛ" bho ‑sü ‑bha, 'yö dho‑ ‑wɔn ‑gɛn dɔ ‑sü 'ka mɛ "pɛpɛ 'ö‑ ‑nu "yan ‑yö gun Zedhizadhɛmö ‑dhɛ ‑bho ꞊dhuëngdhɛ 'gü ‑yi ‑gɔ bha‑ ‑nu ꞊gban "pɛpɛ ‑dhɛ.
LUK 2:39 ꞊Dhɛ 'ö 'mɛ 'wo bha ꞊wa 'wɔn 'ö ‑bɛn zë ‑sü 'ka Atanna ‑bha 'tɔng‑ 'gü bha‑ ꞊gban 'gü "ta sü 'ö ꞊ya ꞊mɔɔ "kwëë, 'yö Zosɛfu waa‑ Madhi 'wo wo yee ‑kë 'wo nu ‑a ‑nu ‑gɔ 'pödhö Nazadhɛtö, Gadhidhe ‑sɛ 'gü.
LUK 2:40 'Në bha ‑yö ‑gla 'pö‑ bha ꞊në‑ 'gü, 'yö ‑kë faanmɛ 'ka, ‑yö ‑gun "yaakimɛ ꞊dede 'ka, 'yö Atanna ‑yö gun‑ "piʋ̈.
LUK 2:41 Yesu 'kpɔmɛ ‑nu ‑wo ‑gun 'dho sië Pakö troo ‑ta Zedhizadhɛmö ‑kwɛ ꞊gban "pɛpɛ ‑ta.
LUK 2:42 ꞊Dhɛ 'ö Yesu ‑kwɛ ꞊ya kë ‑kaɔng do ga ꞊plɛ 'ö Pakö yi bha‑ 'bha ꞊ya ꞊loo, 'yö 'wo dho 'zü ꞊dhɛ ‑kɔ do 'wo dho‑ 'ka zii 'kpa ‑a 'dhö.
LUK 2:43 ꞊Dhɛ 'ö ꞊wa 'dho 'ö ꞊wa troo bha‑ kë ꞊ya yën, 'ö 'wo wo yee kë sië kö ‑wo nu wo ꞊plöö, 'yö Yesu ‑yö to Zedhizadhɛmö "kɛɛ ‑a dhe waa‑ dë 'wii 'wɔn ꞊slɔɔ‑ 'gü,
LUK 2:44 kö ‑wo wo ‑zʋ 'gɔn sië ꞊dhɛ ‑yö wo "tayɔɔ ‑nu kpö 'gü. ꞊Dhɛ 'ö ꞊wa ‑dhɛkpaɔyi do "ta sü, 'yö 'wo ‑ya ‑a mɔɔ‑ ‑sü ‑bha woo‑ mɛ ‑nu waa‑ ‑a ‑nu dɔmɛ ‑nu "wɛɛwɛɛ ‑nu kpö 'gü.
LUK 2:45 ꞊Dhɛ 'ö ꞊waa‑ mɔɔ‑ "dhʋ̈ 'ö 'wii‑ yö, 'yö 'wo wo yee ‑kë 'zü ‑deewo 'wo dho Zedhizadhɛmö ‑a mɔɔ‑ ‑sü 'ka.
LUK 2:46 ‑Wa ‑mɔɔ ‑dhɛkpaɔyi ‑yaaga. ‑A ‑yaaga ‑naa bha‑ 'ka 'yö 'wo dho 'wo ‑kpan ‑bha Atanna ‑dhɔkëgükɔ 'ö Zedhizadhɛmö bha‑ 'gü, kö ‑yö ‑ya sië mɛ ‑nu ‑draan Atanna ‑wʋ ‑bha ‑mɛ ‑nu ‑gɔmɛ "gblʋ̈gblʋ̈ ‑nu bha‑ ‑nu kpö 'gü, 'ö ö "tʋ 'to‑ ‑nu ‑wʋ ‑bha 'ö‑ ‑nu dhɛɛ" ‑nu 'kpɔ.
LUK 2:47 Dhiang ‑yɔ ‑nu 'ö gun‑ bɔ sië, waa‑ dhɛɛ" ‑nu 'ö‑ kpɔ bha 'mɛ 'wo‑ ma, ‑a 'wɔn ‑ya ‑nu ‑kɔn ꞊dedewo ꞊kpaɔdhɛ 'ö gun‑ ‑gɔ waa‑ dhiang ‑yɔ bɔ ‑kɔ ‑nu bha‑ ‑nu ‑wɔn 'gü.
LUK 2:48 ꞊Dhɛ 'ö‑ 'kpɔmɛ ‑nu ꞊waa‑ yö, 'yö‑ 'wɔn ‑ya ‑nu kɔn. 'Yö‑ dhe ‑ya pö‑ ‑dhɛ 'ö‑ pö: «Yesu n gbö, ‑më ‑wɔn suu ꞊në 'i‑ kë yi 'ka "dhʋ̈? 'Bha yi zuë" ‑ya "yi ‑ta "gbɩɩ‑ ‑wa! Yaa‑ i dë 'yi ‑bhɔ i mɔɔ‑ ‑sü 'ka ‑a ‑dhɛkpaɔyi ‑yaaga ‑naa ꞊nɛ.
LUK 2:49 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «Ka n ‑mɔɔ ‑më 'ka? "Ɛɛn ‑a 'wɔn 'yaa ka "yaan ꞊dhɛ ‑a ‑dhɛa ‑bha ꞊dhɛ 'a n dë ‑gɔ ‑wɔn ‑nu kë ‑ee?»
LUK 2:50 "Kɛɛ ‑a pö 'ö Yesu ‑ya wo "dhʋ̈ bha 'wii‑ 'gü ma‑ 'klɔɔ‑ 'ka.
LUK 2:51 ꞊Dhɛ 'ö ꞊ya kë "dhʋ̈, 'yö wɛng‑ ‑nu 'wo ‑ziö 'wo dho Nazadhɛtö, ‑a ‑gɛn ‑mü ꞊dhɛ ‑yö ‑gun ‑a ‑nu ꞊bhlëë ‑ya sië ꞊dedewo. 'Wɔn "pɛpɛ 'wo gun‑ kë sië "dhʋ̈ bha kö ‑a dhe ‑dɩ 'pö ‑ya 'kun sië ö zuë" "piʋ̈ ‑dhɛkpaɔ dhia" ‑wɔn 'gü.
LUK 2:52 Kö Yesu ‑dɩ 'pö ‑yö "gla sië, 'ö‑ ‑bha ꞊kpaɔdhɛ ‑ta ‑yö ‑da, 'ö‑ ‑dhɔ ‑yö Atanna ‑kë waa‑ mɛ "bhɩɩ‑ ‑nu ꞊gban 'dhö.
LUK 3:1 "Tʋ̈ng 'ö Tibɛɛ ‑yö gun‑ 'ka "sɛkɔɔnmɛ 'kpii‑ 'ka bha‑ ‑kwɛ ‑kaɔng do ga "sɔɔdhu ‑naa 'ka, kö Pɔngsö Pidhatö ꞊në Zude ‑sɛgɔdhiʋ̈, 'yö Edhodö 'dhö Gadhidhe ‑sɛ 'gü 'pö, kö Edhodö dheebhang 'wo‑ Fidhipö ‑kë 'pö bha ‑yö Itudhö ‑sɛ waa‑ Trasonitö ‑sɛ 'gü, kö mɛ 'dhɛ 'wo‑ ‑dhɛ Dhizania bha ‑yö Abidhɛnö ‑sɛ 'gü 'pö, 'yö Atanna ‑yö dhiang zë Zan 'ö ‑kë Zakadhi gbö 'ka bha‑ ‑dhɛ "tʋng ‑ta. ‑A "tʋ̈ng bha‑ 'gü 'pö kö 'mɛ 'wo "saabhomɛ "gblʋ̈gblʋ̈ ‑nu 'ka Izraɛdhö ‑sɛ 'gü ‑wa mɛ do ‑dhɛ Anö 'ö 'wo‑ mɛ do ‑dhɛ Kaifö.
LUK 3:3 ꞊Dhɛ 'ö Zan ꞊ya Atanna ‑wʋ ma ꞊dhɛ ‑kɔ bha‑ 'dhö, 'yö ꞊wlü 'yö dho 'ö ‑da ꞊gwaanga 'wo‑ Zuudɛn ‑kë bha‑ "piʋ̈, "sɛgɔ ‑nu 'wo mü bha‑ ‑nu 'gü 'do 'do 'ka, 'yö ö ‑wʋ "dhiʋ̈ ꞊wlü "gbɩɩ‑ 'ka mɛ "bhɩɩ‑ ‑nu ‑dhɛ 'ö‑ pö: «‑Ka nu kö 'ka bɔ Atanna 'ka kö ‑wo ka ‑go 'wɔn yaa 'gü ‑zu bho kö ‑yö ka këwɔn yaa ‑nu ‑mawɔn 'to;
LUK 3:4 ꞊dhɛ ‑kɔ 'ö‑ ‑wʋdhiʋ̈loomɛ Ezai ‑ya ‑bɛn zë‑ 'ka ö ‑gɔ 'sëëdhɛ 'gü ꞊dhɛ: ‹Mɛ 'bha ꞊në ‑dhɛa "dhiʋ̈ bho sië "tʋng ‑ta bha. ‑A ‑mɛ ‑ya ‑pö: ‑Ka kwa Dëmɛ ‑ziö ‑ta ‑zian baa‑ kö 'ka‑ dɔ ꞊zinng 'gü kpengdhö.
LUK 3:5 Kö 'ka ‑tɔn ‑gbeng 'gü ‑dhɛ ‑nu ta, kö 'ka ‑tɔn ‑nu waa‑ "trʋʋ ‑nu 'wü, kö‑ ‑dhɛ ‑yö wɔ ‑tɛkpɛ ‑tɛkpɛdhö, kö 'ka zian dudu ‑nu bho‑ 'gü, kö‑ ‑tadhɛ 'ö yanggeedhö ‑dhɛ ‑nu 'ö‑ 'gü kö 'ka‑ ‑dhɛ ‑pë kë "pɛɛpɛdhö.
LUK 3:6 ꞊Ya kë "dhʋ̈ Atanna dho ö ‑bha Mɛdhamɛ 'ö‑ bɔ bha mɛ ꞊gban ‑dho ‑a yö› bha‑ 'dhö.»
LUK 3:7 ‑A ‑kë "dhʋ̈ ‑sü bha‑ 'gü mɛ kpö‑ ‑gun 'dho sië yi ꞊gban 'ka Zan "piʋ̈ kö ‑ya ‑nu "zu. "Kɛɛ ꞊wa 'dho "dhʋ̈ 'yö‑ pö‑ ‑nu ‑dhɛ: «Suuyaamɛ ‑nu 'ö 'kaa ka ‑dɩ dɔ 'ka ya! Za 'kpii‑ 'ö Atanna dho‑ dɔ ka ‑bha ‑dhɛ 'bha ꞊kpaɔyi ‑bha bha de ꞊në ‑dua ‑gɔ ‑sü ‑gleng ‑da ka ‑bha?
LUK 3:8 'Ö ꞊ya kë ꞊dhɛ 'ka ka bo ka sɔng 'ka ꞊dedewo tɛan‑ 'ka kö ‑kaa ‑zɔn ka "ta ‑kɔ ‑bha kö mɛ ꞊gban ‑wa ‑dhɛ yö ꞊dhɛ 'ka ka zuë" slëë" ꞊dedewo tɛan‑ 'ka, 'ka 'dho‑ pö ka ‑dɩ ‑dhɛ ꞊dhɛ Ablaamö suu ‑mü ka 'ka ('ö "dhʋ̈ kö Atanna ‑bha 'në ‑nu ‑mü ka 'ka ꞊naa bha), ‑a ‑gɛn ‑mü ꞊dhɛ a‑ pö ka ‑dhɛ ꞊dhɛ ‑yö ‑mɔɔ ‑bha 'ö ‑gwë ‑nu ya‑ ‑nu ‑gla Ablaamö suu 'gü ‑në ‑nu 'gü.
LUK 3:9 ꞊Dua ‑zian ‑yö ‑ya ‑sü 'ka "dhü ‑bho "sɛɛ ‑yan ‑ta 'nu ‑blɛɛsü. ‑A ‑kë "dhʋ̈ ‑sü bha‑ 'gü, "dhü 'ö 'yaa bhɛ ‑së dɔ ‑a "kan ꞊në yöö wo kö ‑yö "gʋ̈.»
LUK 3:10 ‑A pö 'ö Zan ‑ya wo "dhʋ̈ bha, 'yö mɛ "dhaa 'wo gun mü bha 'wo‑ dhɛɛ" kpɔ 'wo‑ pö: «'Ö "dhʋ̈ 'sa 'yi‑ kë ꞊dhɛ?»
LUK 3:11 ꞊Dhɛ 'ö ꞊wa dhɛɛ" bha‑ 'kpɔ, 'yö Zan ‑ya ‑yɔ bɔ 'ö‑ pö: «‑Ka 'dho kö "bhɛɛ ꞊plɛ 'dhö 'mɛɛ‑ ‑gɔ, kö ‑ya do ꞊gbaɔ‑ 'bha 'yaa 'mɛɛ‑ ‑gɔ bha‑ ‑gɔ. Kö ‑bhöpë 'dhö 'mɛɛ‑ ‑gɔ ‑a ‑mɛ ‑ya 'gü ‑gblü kö ‑yö pë 'bha 'yaa 'mɛɛ‑ ‑gɔ ‑a ‑bha nu.»
LUK 3:12 ꞊Dhɛ 'ö ꞊yaa‑ pö "dhʋ̈ 'ö ꞊ya ö bo, 'yö 'mɛ 'wo ‑kë 'niisɔngkunmɛ ‑nu 'ka 'wo nu 'pö wo "zu ‑wɔn 'gü ‑a "piʋ̈, 'yö 'wo‑ dhɛɛ" kpɔ 'pö 'wo‑ pö: «Yi dëmɛ, 'yö yi ‑zë ꞊wɛ, 'yi‑ kë ꞊dhɛ?»
LUK 3:13 'Yö‑ ‑yɔ bɔ‑ ‑nu ‑gɔ 'ö‑ pö: «꞊Ya kë ꞊dhɛ 'ka 'dho 'wëë‑ 'kun ‑dhɛ 'gü, ‑a 'dhɛ 'wo‑ "dhi pö ka ‑dhɛ bha ꞊në ‑kaa 'kun, 'ka 'dho ziö yö ‑zë ‑ta.»
LUK 3:14 ꞊Dhɛ 'ö ꞊ya ‑wʋ 'kpɔ mɛ 'dhɛ bha‑ ‑nu ‑bha, 'yö "sɔdha ‑nu ‑dɩ 'pö 'wo‑ dhɛɛ" kpɔ 'wo‑ pö: «'Yö yi ‑zë ꞊wɛ?» 'Yö‑ ‑yɔ bɔ‑ ‑nu ‑gɔ 'pö 'ö‑ pö: «'Ka 'dho ‑pö mɛ 'bha ‑ta 'ka faan ‑wɔ ‑ta 'ka‑ ‑bha pë sü‑ ‑gɔ, "ɛɛn 'ka 'dho mɛ 'bha ‑tabhö, "kɛɛ ‑ka ka "tʋ̈ng kë ka ꞊saa ꞊në‑ 'gü.»
LUK 3:15 ‑A kë 'ö Zan gun‑ wo sië "dhʋ̈ bha, 'yö "sɛgümɛ ‑nu 'wo ‑ya wo ‑zʋ 'gɔn ‑sü ‑bha ꞊dhɛ yö ꞊në Atanna ‑bha ‑Yamɛ 'wo ‑ya ‑gɔ bha‑ 'ka; ‑a ‑gɛn ‑mü ꞊dhɛ 'ö gun "dhʋ̈ kö‑ ‑nu "yan ‑yö ‑Yamɛ bha ꞊në‑ ‑gɔ.
LUK 3:16 ꞊Dhɛ 'ö Zan ꞊ya 'wɔn ꞊slɔɔ 'gü ꞊dhɛ 'mɛ 'wo bha‑ ‑nu zuë" ꞊ya kë ꞊plɛ, 'yö‑ pö‑ ‑nu ‑dhɛ 'ö‑ pö: «Ma ‑zë a ka ‑zu "yi ꞊në 'ka, "kɛɛ mɛ do 'bha ‑yö ‑dhö, ‑yö nu sië, yö ‑zë 'gü ‑yö "gbɩɩ‑ 'ö ‑ziö n ‑ta. Yö ‑zë ‑gɛn 'gü ‑sabha ‑zian fië‑ ‑dhö n 'ka. Yö ‑zë ꞊ya nu ‑yö ‑dho ka pa Atanna ‑bha 'Nii‑ "slʋ̈ʋ̈slʋ̈ waa‑ pɛng ꞊në‑ 'ka.
LUK 3:17 Yö ‑zë ‑bha 'dhaa‑ ‑ya ‑gɔ do 'ö nu‑ 'ka kö ‑yö ö ‑bha ‑mlü ‑piö 'gü, kö ꞊yaa‑ ‑piö kö ‑ya ga zlɔɔ" ꞊loo "bhutu 'gü kö ‑ya dɔ ꞊gbaandhö, kö ‑ya ‑gbʋ waa‑ ꞊flee ‑nu bha‑ ‑nu ꞊pia pɛng 'ö 'yaa "dhuu tongtongdhö bha‑ 'gü.»
LUK 3:18 Zan‑ ‑gun 'wɔn ‑taɔng ‑së pö sië "sɛgümɛ ‑nu ‑dhɛ ‑kɔ bha ꞊në‑ 'gü, 'yö ‑dhio "wɛɛ ‑nu dɔ‑ ‑nu ‑ta ‑nu wo 'pö 'gbɛ 'ka.
LUK 3:19 ‑Yö kë ‑dɔn ‑bho Edhodö 'ka "tʋ̈ng do bha ꞊në‑ 'gü, ‑a dheebhang ‑bha dhebhɔ 'wo‑ ‑dhɛ Edhodiadö bha‑ bho 'ö‑ wo‑ ‑gɔ, waa‑ 'wɔn yaa "wɛɛwɛɛ ‑nu 'ö‑ ‑kë ‑a ‑wɔn 'gü.
LUK 3:20 "Kɛɛ yö ꞊në‑ ꞊gban 'gü, Edhodö "tʋ 'yii kë mü, ‑yö kë ö ‑bha 'wɔn yaa bha‑ ‑ta ‑zian ꞊në‑ pa Zan ‑da ‑kaso 'gü ‑sü 'ka.
LUK 3:21 'Ö gun kö 'wii Zan 'kun ꞊kö kö ‑wa ‑da ‑kaso 'gü, "sɛgümɛ ‑nu ꞊gban "pɛpɛ‑ ‑gun 'dho sië ‑yö ꞊në‑ "piʋ̈ 'yö‑ ‑nu ‑go 'wɔn yaa 'gü ‑zu bho. Yi do 'ka 'yö Yesu ‑dɩ 'pö 'ö dho kö Zan ‑ya "zu. ꞊Dhɛ 'ö ꞊ya bo‑ "zu ‑sü 'ka 'ö Yesu 'dhö bhɛa" sië Atanna ‑dhɛ, 'yö dhang‑ "dhi 'dhö ‑pʋ.
LUK 3:22 'Yö Atanna ‑bha 'Nii‑ "slʋ̈ʋ̈slʋ̈ ‑yö ‑gla 'yö ‑kë ꞊dhɛ ‑tong 'dhö 'yö go dhang‑ 'gü 'ö ꞊lɔɔ Yesu ‑ta. 'Yö ‑wʋ do 'bha ‑yö bɔ dhang‑ 'gü 'ö ‑wɩ 'ö‑ pö: «Bhi ꞊në i n gbö do 'ö n ‑gɔ ‑a 'ka, i ‑dhɔ 'ö n ‑kë bha‑ "sinma 'yaa 'dhö.»
LUK 3:23 Yesu ‑yö ö ‑bha yë zü ‑bho kö‑ ‑kwɛ ꞊ya ꞊mɔɔ ‑kaɔng ‑yaaga ‑nu "sinma ‑bha. Mɛ ꞊gban "pɛpɛ ‑gun wo ‑zʋ 'gɔn sië ꞊dhɛ Yesu bha Zosɛfu ꞊në‑ gbö 'dhö ‑mü, 'yö Edhi ‑zë 'ö Zosɛfu kpɔ,
LUK 3:24 'yö 'wo Edhi ‑bha dë ‑dhɛ Mata, 'yö Dhevi ‑yö Mata kpɔ, 'yö Dhevi ‑bha dë ‑yö ‑kë Mɛdhöki 'ka, 'yö Zanai ‑yö Medhöki kpɔ, 'yö Zosɛfu ‑yö Zanai kpɔ,
LUK 3:25 'yö Matasia ‑yö Zosɛfu kpɔ, 'yö Amɔsö ‑yö Matasia kpɔ, 'yö Naɔmö ‑yö Amɔsö kpɔ, 'yö Ɛsidhi ‑yö Naɔmö kpɔ, 'yö Nagai ‑yö Ɛsidhi kpɔ,
LUK 3:26 'yö Maatö ‑yö Nagai kpɔ, 'yö Matasia ‑yö Maatö kpɔ, 'yö Semei ‑yö Matasia kpɔ, 'yö Zosɛsö ‑yö Semei kpɔ, 'yö Zoda ‑yö Zosɛsö kpɔ,
LUK 3:27 'yö Zoana ‑yö Zoda kpɔ, 'yö Dhesa ‑yö Zoana kpɔ, 'yö Zodhobabɛdhö ‑yö Dhesa kpɔ, 'yö Sadhasiɛdhö ‑yö Zodhobabɛdhö kpɔ, 'yö Nedhi ‑yö Sadhasiɛdhö kpɔ,
LUK 3:28 'yö Mɛdhosi ‑yö Nedhi kpɔ, 'yö Adi ‑yö Mɛdhosi kpɔ, 'yö Kosamö ‑yö Adi kpɔ, 'yö Ɛdhömadamö ‑yö Kosamö kpɔ, 'yö Ɛdhö ‑yö Ɛdhömadamö kpɔ
LUK 3:29 'yö Yesu ‑yö Ɛdhö kpɔ, 'yö Edhiezɛɛ ‑yö Yesu kpɔ, 'yö Zodhimö ‑yö Edhiezɛɛ kpɔ, 'yö Mata ‑yö Zodhimö kpɔ, 'yö Dhevi ‑yö Mata kpɔ,
LUK 3:30 'yö Simeɔn ‑yö Dhevi kpɔ, 'yö Zuda ‑yö Simeɔn kpɔ, 'yö Zosɛfu ‑yö Zuda kpɔ, 'yö Zona ‑yö Zosɛfu kpɔ, 'yö Edhiakimö ‑yö Zona kpɔ,
LUK 3:31 'yö Medhea ‑yö Edhiakimö kpɔ, 'yö Mena ‑yö Medhea kpɔ, 'yö Matata ‑yö Mena kpɔ, 'yö Natan ‑yö Matata kpɔ, 'yö Davi ‑yö Natan kpɔ,
LUK 3:32 'yö Izai ‑yö Davi kpɔ, 'yö Zɔbɛdö ‑yö Izai kpɔ, 'yö Boozö ‑yö Zobɛdö kpɔ, 'yö Salmɔ ‑yö Boozö kpɔ, 'yö Naasɔn ‑yö Salmɔ kpɔ,
LUK 3:33 'yö Aminadabö ‑yö Naasɔn kpɔ, 'yö Adimi ‑yö Abinadabö kpɔ, 'yö Adhimi ‑yö Adimi kpɔ, 'yö Ɛsrɔn ‑yö Adhimi kpɔ, 'yö Pedhɛtö ‑yö Ɛsrɔn kpɔ, 'yö Zuda ‑yö Pedhɛtö kpɔ,
LUK 3:34 'yö Zakɔbö ‑yö Zuda kpɔ, 'yö Izaakö ‑yö Zakɔbö kpɔ, 'yö Ablaamö ‑yö Izaakö kpɔ, 'yö Tadha ‑yö Ablaamö kpɔ, 'yö Nasɔɔ ‑yö Tadha kpɔ,
LUK 3:35 'yö Sedhusö ‑yö Nasɔɔ kpɔ, 'yö Dhago ‑yö Sedhusö kpɔ, 'yö Fadhɛkö ‑yö Dhago kpɔ, 'yö Ebɛ ‑yö Fadhɛkö kpɔ, 'yö Sadha ‑yö Ebɛ kpɔ,
LUK 3:36 'yö Kainamö ‑yö Sadha kpɔ, 'yö Apasadö ‑yö Kainamö kpɔ, 'yö Sɛmö ‑yö Apasadö kpɔ, 'yö Noe ‑yö Sɛmö kpɔ, 'yö Dhamɛsö ‑yö Noe kpɔ,
LUK 3:37 'yö Matusadha ‑yö Dhamɛsö kpɔ, 'yö Enɔkö ‑yö Matusadha kpɔ, 'yö Zadhɛdö ‑yö Enɔkö kpɔ, 'yö Malelɛdhö ‑yö Zadhɛdö kpɔ, 'yö Kaina ‑yö Malelɛdhö kpɔ,
LUK 3:38 'yö Enɔsö ‑yö Kaina kpɔ, 'yö Sɛtö ‑yö Enɔsö kpɔ, 'yö Adan ‑yö Sɛtö kpɔ, 'yö Atanna ‑yö Adan ‑da.
LUK 4:1 Yesu ‑go Zuudɛn ꞊bhaa ‑sü 'ka kö Atanna ‑bha 'Nii‑ "slʋ̈ʋ̈slʋ̈ ꞊yaa‑ pa. 'Yö 'Nii‑ bha 'ö zian bho‑ 'ka, 'yö dho‑ 'ka "tʋng ‑ta.
LUK 4:2 ‑Yö ‑dhɛkpaɔyi ‑kë ‑dhɛ bha‑ 'gü ‑kaɔng ‑yiisiö kö Sɔtraan ‑ya 'gü dan sië kö 'yaa pë 'bha ‑pë 'bha ‑bhö. ꞊Dhɛ 'ö ‑dhɛkpaɔyi ‑kaɔng ‑yiisiö bha ꞊ya zun 'ko "dhiʋ̈, 'yö din‑ ‑ya kun,
LUK 4:3 'yö Sɔtraan ‑ya pö‑ ‑dhɛ: «Atanna Gbö 'yaa ‑mü i 'ka ‑ee? ‑Bhö ‑gwë ya‑ "gla ‑bhöpë 'gü kö 'i‑ ‑bhö ‑dhe!»
LUK 4:4 'Yö Yesu ‑ya ‑yɔ bɔ‑ ‑gɔ 'ö‑ pö: «Atanna ‑ya ‑pö ö ‑wʋ 'sëëdhɛ 'gü ꞊dhɛ: ‹Mɛbhɩɩdhe ‑tosɛa ‑kë ‑ta ‑pë 'yaa ‑mü ‑bhöpë yöö doseng 'ka!›»
LUK 4:5 'Yö Sɔtraan ‑ya sü 'zü 'yö dho‑ 'ka ‑tɔn ꞊gblɛɛn do ꞊gbin‑, 'yö "sɛgɔ "pɛpɛ 'ö "kpʋng ꞊taa 'ö ‑gblüdëdhɛ 'dhö‑ 'gü ‑a ꞊gban ‑zɔn ‑dhɛ 'dɔɔndhö ꞊dhɛ mɛ‑ mɛ "yan zë,
LUK 4:6 'yö‑ pö‑ ‑dhɛ: «"Sɛ "pɛpɛ 'i‑ yö bha‑ ꞊gban ‑yö ma ꞊në n ‑bha 'ka, ‑a ‑nu mɛ "ʋʋ mɛ 'ö‑ ‑dhɛ ‑dhɔ ꞊ya n kë 'ma‑ nu‑ ‑dhɛ n dhɛɛkpɔmɛ 'yaa 'dhö; ‑a ‑gɛn ‑mü ꞊dhɛ ꞊wa n gba‑ 'ka waa‑ 'gü ‑naɔ ꞊gban 'dhö.
LUK 4:7 ꞊Dhɛ 'ö "dhʋ̈, ‑bhö zun n ‑dhɛ kpiö 'gü. ꞊Ya kë ꞊dhɛ 'bha zun n ‑dhɛ kpiö 'gü, a ‑dho ‑a ꞊gban "pɛpɛ nu i ‑dhɛ!»
LUK 4:8 'Yö Yesu ‑ya ‑yɔ bɔ‑ ‑gɔ 'ö‑ pö: «‑Yö ‑bɛn zë ‑sü 'ka Atanna ‑wʋ 'sëëdhɛ 'gü ꞊dhɛ: ‹'Mɛ 'ö ‑zun ‑dhɛ kpiö 'gü ‑mɛ 'ka kö ‑wa ‑dhɔkë, yö ‑mü Atanna 'ö mɛ "pɛpɛ ꞊gban Dëmɛ 'ka bha ꞊në‑ 'ka, ‑a "wɛɛ 'bha 'yaa yö ‑zë zian 'gü.›»
LUK 4:9 'Yö Sɔtraan ‑ya sü 'zü ‑deewo 'ö dho‑ 'ka Atanna ‑bha 'kɔ 'kpii‑ 'ö Zedhizadhɛmö bha‑ ꞊gbin‑, 'yö‑ pö‑ ‑dhɛ: «꞊Ya kë ꞊dhɛ 'i Atanna Gbö 'ka ꞊dedewo tɛan‑ 'ka, ‑bhö dɔ ‑dhɛ ya‑ 'gü kö 'i ‑wlö 'i zun "sia‑, ‑a ‑gɛn ‑mü ꞊dhɛ ‑yö ‑bɛn zë ‑sü 'ka 'pö Atanna ‑gɔ 'sëëdhɛ 'gü ꞊dhɛ:
LUK 4:10 ‹‑Yö ‑dho ‑wʋ 'kpɔ ö ‑bha "kië ‑nu ‑bha kö ‑wo i ‑maa kë› ꞊ya 'go mü 'zü:
LUK 4:11 ‹‑Wo ‑dho i ‑ya wo ‑kɔ ‑ta, kë "dhʋ̈ kö i ‑gɛn "dhiʋ̈ 'ya 'dho ‑zuö ‑gwë 'bha ‑bha.›»
LUK 4:12 'Yö Yesu ‑ya ‑yɔ bɔ‑ ‑gɔ 'ö‑ pö: «Atanna ‑ya ‑pö 'pö ꞊dhɛ: ‹I Dëmɛ 'ö i ‑bha Atanna 'ka bha 'bha 'dho‑ 'gü dan tongtongdhö!›»
LUK 4:13 ꞊Dhɛ 'ö Sɔtraan ꞊yaa‑ 'gü dan ‑kɔ ꞊gban ‑kɔ ꞊gban 'gü 'ö‑ ‑kɔ 'yii ꞊mɔɔ‑ ‑bha, 'yö ö ꞊kwaa‑ ‑zü ꞊kö 'në bha wo kö 'ö "yan 'to "tʋ̈ng "wɛɛ 'bha ‑gɔ.
LUK 4:14 ꞊Dhɛ 'ö ꞊ya kë "dhʋ̈, 'yö Yesu 'ö pa ‑sü 'ka 'Nii‑ "slʋ̈ʋ̈slʋ̈ faan 'ka bha 'ö ꞊wlü 'ö dho Gadhidhe ‑sɛ 'gü. 'Yö‑ 'tɔ 'dhö ‑ya bhɔ ‑sü ‑bha "sɛ "pɛpɛ 'wo‑ ‑züzü mü bha‑ ꞊gban 'gü.
LUK 4:15 'Yö ‑ya mɛ ‑nu ꞊klang kë ‑sü ‑bha Zuifö ‑nu ‑bha ‑yakwëëkëgükɔ ‑nu 'gü, 'yö mɛ ꞊gban "pɛpɛ 'wo ‑ya ‑a ‑dhiang ‑së zë ‑sü ‑bha.
LUK 4:16 Yi do 'ka 'yö dho Nazadhɛtö, 'pödhɛ 'ö "klʋ bho‑ 'gü bha‑ 'gü. ꞊Dhɛ 'ö Zuifö ‑nu ‑bha ꞊glooyi bha ꞊ya ꞊loo, 'yö ꞊wlü 'ö dho ‑a ‑nu ‑bha ‑ya 'kwëë‑ kë 'gü ‑kɔ 'gü ꞊dhɛ ‑kɔ 'ö‑ kë‑ 'ka zii 'kpa ‑a 'dhö. ꞊Dhɛ 'ö ꞊ya ꞊loo mü, 'yö ꞊wlü 'ö dɔ ö ‑gɛan kö 'ö Atanna ‑bha 'sëëdhɛ ‑wʋ pö.
LUK 4:17 'Yö 'wo Atanna ‑wʋdhiʋ̈loomɛ Ezai ‑bha 'sëëdhɛ ‑be bha‑ sü 'wo‑ nu‑ ‑dhɛ, 'yö‑ "dhi ‑pʋ. ‑Dhɛ 'ö‑ "dhi ‑pʋ ‑bha bha kö ‑yö ‑bɛn zë ‑sü 'ka mü ꞊dhɛ:
LUK 4:18 «Atanna ꞊ya ö ‑bha 'Nii‑ "slʋ̈ʋ̈slʋ̈ ‑ya n 'gü, ‑a ‑gɛn ‑mü ꞊dhɛ ‑yö ma ꞊në n ‑ya kö 'a‑ ‑bha naɔ ‑së bha‑ dɔ ‑wëëmɛ ‑nu ‑gɔ, kö 'a zuëwaanusü nu 'mɛ 'wo "yënnggbaɔndhe 'gü ‑a ‑nu ‑dhɛ Kö 'mɛ 'wo ‑kaso 'gü 'a‑ ‑nu bho mü, kö 'a ‑ya ‑dɩ 'flëë‑ 'gü ‑sü nu‑ ‑nu ‑dhɛ. Kö 'mɛ 'ö‑ ‑nu "yan 'gü 'dhö tii 'ö 'waa ‑dhɛ yö 'a‑ ‑nu "yan "dhiʋ̈ "pʋ. Kö 'mɛ 'ö 'wɔn ꞊ya ꞊gbaɔn‑ ‑nu ‑ta 'a‑ ‑nu ‑ta 'kun kö ‑wo ‑ya ‑dɩ 'flëë‑ 'gü ‑sü ꞊slɔɔ.
LUK 4:19 Kö 'a Atanna ‑bha ‑gasitɛ ‑kë mɛ "bhɩɩ‑ ‑nu ‑dhɛ ‑kwɛ ‑dhiang zë mɛ ꞊gban "pɛpɛ ‑dhɛ.»
LUK 4:20 ꞊Dhɛ 'ö ꞊ya ö bo 'sëëdhɛ bha‑ ‑wʋ pö ‑sü 'ka, 'yö‑ ‑be sü 'ö‑ dɔ 'mɛ 'ö yë ‑kë 'kɔɔdhö mü 'ö gun mü bha‑ ‑gɔ, 'yö dho "sia‑ 'yö 'yaanu (꞊dhɛ ‑kɔ 'wo‑ ‑kë 'ka‑ ‑nu ‑gɔ mü ‑a 'dhö kö 'ö‑ ‑nu ꞊klang kë). Kö mɛ "pɛpɛ 'wo ‑yakwëëkëgükɔ bha‑ 'gü ‑a ‑nu ꞊gban ꞊wa wo "yan bɔ‑ ‑ta.
LUK 4:21 'Yö dhiang zë ‑sü zü bho‑ ‑nu ‑dhɛ 'ö‑ pö: «‑Ka ‑dhɛ ‑ga! Atanna ‑wʋ 'ö ‑bɛn zë ‑sü 'ka 'a go‑ ‑wʋ pö bha ꞊në‑ 'gü ‑wɔn ꞊ya kë ꞊dɛɛ ya.»
LUK 4:22 ꞊Dhɛ 'ö 'mɛ 'wo gun mü bha ‑wʋ ‑nu 'ö‑ pö bha 'ö‑ ‑nu ‑zʋ kun kö ‑wʋ "nɛɛnɛɛ ‑nu 'wo 'go sië‑ "dhi bha‑ din‑ dhi sië‑ ‑nu 'gü, 'yö‑ 'wɔn ‑ya ‑nu kɔn, 'yö 'wo ‑ya ‑a pö ‑sü bha: «‑A! Zosɛfu gbö do "wɛ 'ö ya 'yaa ‑mü ‑ee?»
LUK 4:23 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «A‑ 'wɔn dɔ ꞊dhɛ ka ‑mɔɔ ‑bha 'ka "gwënng ‑da n ‑dhɛ 'ka‑ pö: «‑Dhɔtrɔɔgɔn, ‑bhö i ‑dɩ ‑zë dha ꞊kö ‑blɛɛsü kö 'i gun ‑na mɛ "wɛɛ dha». "Ɛɛn 'ö 'ka‑ pö 'zü ꞊dhɛ: «'Wɔn "gblʋ̈gblʋ̈ ‑nu 'i‑ ‑kë Kapɛɛnaɔmö 'yi‑ ma bha, ‑bhö ‑a 'bha kë 'pö i ‑dɩ ꞊plöö ‑dhɛ ya‑ 'gü kö 'yi‑ ‑dhɛ yö»».
LUK 4:24 'Yö‑ ‑gɔ dɔ 'ö‑ pö: «"Kɛɛ a‑ ‑pö ka ‑dhɛ tɛan‑ ꞊dede 'ka ꞊dhɛ Atanna ‑wʋdhiʋ̈loomɛ 'bha 'yaa 'dhö kö‑ ꞊bhlëë ‑yö kë ö dë ‑pö 'gü.
LUK 4:25 A‑ ‑pö ka ‑dhɛ tɛan‑ ꞊dede 'ka ꞊dhɛ 'ö gun Edhi ‑bha "tʋ̈ng 'gü, ꞊gɛandhe 'gbɛ ꞊në gun Izraɛdhö ‑sɛ 'gü, "tʋ̈ng 'ö Atanna ‑yö dhang‑ "dhi ta‑ 'ka 'ö dha 'yii ban ‑kwɛ ‑yaaga waa‑ "su "saɔdo 'ka, 'ö "vʋ̈ʋ̈ 'dhö ‑da 'ka "kpʋng ꞊taa bha‑ 'ka.
LUK 4:26 "Kɛɛ yö ꞊në‑ ꞊gban 'gü, 'yii Edhi bɔ ꞊gɛandhe 'gbɛ bha‑ 'bha "piʋ̈ kö ‑ya ‑ta 'kun kö 'yii kë dhebhɔnë 'ö go Sadhɛta, Sidɔn ‑sɛ 'ö "sɛ "wɛɛ 'ka bha‑ 'gü bha yö ‑zë 'ka.
LUK 4:27 'Ö gun 'zü Edhize 'ö ‑kë Atanna ‑wʋdhiʋ̈loomɛ 'ka bha‑ ‑bha "tʋ̈ng 'gü, ꞊weeyuamɛ 'gbɛ ꞊në gun Izraɛdhö ‑sɛ 'gü, "kɛɛ yö ꞊në‑ ꞊gban 'gü mɛ 'gbɛ bha‑ ‑nu 'bha 'wii dha Edhize ‑kɔ ‑ta ‑a ‑nu ‑bha "yua ‑gɔ kö 'yii kë Naama ('ö yö ‑zë 'ö gun ‑dhɛng 'ka) 'ö go Siidhi ‑sɛ 'ö "sɛ "wɛɛ 'ka 'pö bha‑ 'gü bha‑ 'ka.
LUK 4:28 ꞊Dhɛ 'ö 'mɛ 'wo gun‑ ‑nu ‑bha ‑yakwëëkëgükɔ 'gü mü bha 'wo 'wɔn ‑nu bha‑ ma, 'ö 'wo‑ 'wɔn dɔ ꞊dhɛ ‑yö ‑ya ꞊në‑ wo sië wo "yan 'gü bha, 'yö ‑siö ‑nu ‑dhɛ ꞊dedewo.
LUK 4:29 'Yö 'wo ꞊wlü 'wo zun Yesu kë ‑sü ‑bha, 'yö 'wo dho‑ 'ka "dhʋ̈ 'wo ꞊loo‑ 'ka ‑tɔn 'ö‑ ‑nu ‑bha 'pö‑ gun‑ ꞊gbin‑ bha‑ "dhiʋ̈ ‑dhɛ ꞊dede 'gü, kë "dhʋ̈ kö 'wo wo ‑kɔ ꞊yɔɔn‑ ‑bha kö ‑yö ‑pö baandhö;
LUK 4:30 "kɛɛ 'yö go‑ ‑nu kpö 'gü 'ö dho.
LUK 4:31 ꞊Dhɛ 'ö ꞊ya kë "dhʋ̈, 'yö Yesu ‑yö ‑ziö 'ö dho 'pödhɛ 'ö Gadhidhe ‑sɛ 'gü 'wo‑ Kapɛɛnaɔmö ‑dhɛ ‑kë bha‑ 'gü, 'yö ‑ya mɛ ‑nu draan‑ ‑sü ‑bha Zuifö ‑nu ‑bha ‑yakwëëkëgükɔ 'gü mü ꞊glooyi bha‑ 'ka.
LUK 4:32 "Trüün‑ ‑gun ‑wʋ 'gü, 'ö‑ ‑bha mɛ draan‑ ‑kɔ bha‑ ‑gleng ‑yö mɛ ꞊gban kɔn.
LUK 4:33 Gɔndënë do ‑yö ‑gun 'kɔɔdhö mü 'ö "yina yaa ‑yö gun‑ 'gü. 'Yö 'mɛ bha 'ö zun "gbla ‑sü ‑bha "gbɩɩ‑ 'ka 'ö‑ pö:
LUK 4:34 «'Aa! Yesu, Nazadhɛtö mi, 'kwa ma mü! A ‑suʋ̈ i ‑gɔ ‑wa! ‑A ‑gɛn ‑mü ꞊dhɛ a i ‑gɛn 'godhɛ ‑dɔ, Atanna ‑bha ‑Yamɛ "slʋ̈ʋ̈slʋ̈! "Ɛɛn i ‑nu kö 'i yi ‑wëë ‑kë wo ‑ee?»
LUK 4:35 'Yö Yesu ‑yö ꞊gbla‑ ‑ta 'ö‑ pö: «‑Dhɛa ga i ‑ta kö 'i 'go 'mɛ bha‑ 'gü!» 'Yö "yina yaa bha 'ö 'mɛ bha‑ "dhiʋ̈ pɔn mɛ kpö bha‑ 'gü, "kɛɛ ‑a ‑dhɛ 'bha 'yii ‑gi, 'yö go‑ 'gü.
LUK 4:36 'Yö mɛ "pɛpɛ 'wo gun mü bha‑ 'wɔn ‑ya ‑nu kɔn, 'yö 'wo ‑ya "kaa ‑sü bha 'wo‑ pö: «"Nn‑, ‑më ‑wɔn suu ꞊nɛ ‑oo? 'Mɛ 'ö ya "trüün ‑ya ‑wʋ 'gü, "kɛɛ yöö do bha 'zü ‑yö faan ‑wɔ "yina yaa ‑nu ꞊gban ‑ta 'wo ꞊dua‑ ‑gɔ ‑wa!
LUK 4:37 'Yö‑ 'tɔ 'dhö ‑ya 'dho ‑sü ‑bha "sɛgɔ "pɛpɛ 'wo‑ ‑nu ‑züzü bha‑ ꞊gban 'gü.
LUK 4:38 ꞊Dhɛ 'ö Yesu ‑yö go ‑yakwëëkëgükɔ bha‑ 'gü, 'yö dho Simɔ ‑gɔ 'kɔɔdhö. ‑A "tʋ̈ng bha‑ 'gü kö‑ "na 'gü 'yaa ‑së, kö "nɛnɛ ‑ya kë sië ꞊dedewo ‑sɔbhɛɛ 'ka. 'Yö 'wo ꞊bhɛa Yesu ‑dhɛ kö ‑yö "ta wo ‑dhɛ.
LUK 4:39 'Yö dho 'yö dun Simɔ "na bha‑ ‑ta, 'yö ‑ya "yua bha‑ "yan 'gü. ꞊Dhɛ 'ö ꞊ya ‑ya "yan 'gü "dhʋ̈, 'yö "nɛnɛ ‑ziisü 'ö gun dhebhɔ bha‑ ‑bha bha 'ö bo 'gbaandhö, 'yö ꞊wlü 'ö zun‑ ‑nu "dhi mɔɔ‑ ‑sü ‑bha.
LUK 4:40 ꞊Dhɛ 'ö 'yënng‑ ‑gɔ ꞊ya bo ‑pö ‑sü 'ka ('ö ꞊waa‑ 'wɔn dɔ ꞊dhɛ ‑a ‑nu ‑bha ꞊glooyi ꞊ya ziö "pɛɛpɛdhö, ꞊dhɛ wo ‑mɔɔ ‑bha 'wo yë kë ‑sü zü bho), 'yö mɛ "pɛpɛ 'ö "yuëdhi ‑nu 'ö "yua suu 'do 'do ꞊gban 'dhö‑ ‑nu ‑bha 'wo‑ ‑nu ‑gɔ 'kɔɔdhɛ ‑nu 'gü bha 'wo nu‑ ꞊gban "pɛpɛ 'ka Yesu "piʋ̈, 'yö ö ‑kɔ ‑ya ‑a ‑nu ‑ta 'do 'do 'ka 'yö 'wo dha.
LUK 4:41 Kö "yina yaa ‑nu ‑wo ꞊dua sië 'wo go mɛ 'gbɛ 'gü kö ‑wo "gbla sië 'wo‑ pö: «Atanna Gbö ‑mü i 'ka! Atanna Gbö ‑mü i 'ka!» "Kɛɛ ꞊waa‑ pö "dhʋ̈ 'yö ‑ya ‑nu "yan 'gü kë "dhʋ̈ kö 'wa 'dho "wɩ; ‑a ‑gɛn ‑mü ꞊dhɛ wo ‑zë ‑wa ‑dɔ ꞊dhɛ Yesu ꞊në Atanna ‑bha ‑Yamɛ 'ka.
LUK 4:42 ꞊Dhɛ 'ö‑ ‑tadhɛ ꞊ya ꞊kpaɔ, 'yö Yesu ‑yö ꞊wlü 'yö dho ‑bhɛa Atanna ‑dhɛ ‑dhɛ 'gü ö ‑dɩ ‑ta "tʋngtadhɛ 'bha bha‑ 'gü. 'Yö mɛ kpö 'wo ‑ya ‑a mɔɔ‑ ‑sü ‑bha 'wo dho‑ 'ka "dhʋ̈ 'wo ꞊loo‑ 'ka ‑dhɛ 'ö gun‑ ‑bha bha‑ 'gü. ꞊Dhɛ 'ö ꞊wa 'dho ꞊wa ‑kpan ‑bha, 'yaa gun ‑zian wo‑ ‑nu "piʋ̈ ꞊dhɛ ‑yö "kan wo ‑bha kö ‑yö 'dho ‑dhɛ 'bha 'gü ‑bhɛa Atanna ‑dhɛ ‑dhɛ 'gü,
LUK 4:43 "kɛɛ 'yö Yesu ‑ya pö‑ ‑nu ‑dhɛ 'ö‑ pö: «Atanna ‑yö n ‑bɔ kö 'a 'wɔn ‑taɔng ‑së ya ꞊në‑ pö mɛ ꞊gban "pɛpɛ ‑dhɛ. ‑A ‑kë "dhʋ̈ ‑sü 'gü, ‑a ‑dhɛa ‑bha 'pö ꞊dhɛ 'pödhɛ ‑dhɛ ‑nu 'wo to 'ö 'mii 'dho‑ ‑nu 'gü ꞊kö bha 'a 'dho mü kö 'a naɔ ‑së 'ö ‑gban ‑a ‑bha ‑gblüdëdhɛ ‑bha bha‑ dɔ‑ ‑nu ‑gɔ.
LUK 4:44 ꞊Dhɛ 'ö ꞊yaa‑ pö "dhʋ̈, 'yö ‑ziö 'yö dho ‑yakwëëkëgükɔ ‑nu 'wo Izraɛdhö ‑sɛ 'gü mü bha‑ ‑nu ‑bhiëë ‑ta 'dɔɔndhö Atanna ‑wʋ pö ‑sü 'ka.
LUK 5:1 ꞊Dhɛ 'ö ꞊ya 'dho ꞊ya ꞊loo "yi ‑ta "gbɛa 'wo‑ Zenezadhe ‑yi ‑kë bha‑ "sɔɔ, kö mɛ "bhɩɩ‑ ꞊ya ꞊klëën‑ ‑zü tingtingdhö kö ‑wo ‑yɛa ‑nu mɔɔ‑ sië ‑bɛang 'ka kö 'wo wo "tʋ 'to Atanna ‑wʋ ‑bha,
LUK 5:2 'ö dho ‑dhɛ ‑ga kö "kplagɔnë ꞊plɛ ‑wo dɔ sië "yi "kpʋng "dhiʋ̈ mü kö 'mɛ 'wo gun‑ 'gü bha ꞊wa lɔɔ‑ "yi ꞊bhaa kö ‑wo woo‑ "nuu ‑nu "zu sië.
LUK 5:3 'Yö ‑da "kplagɔnë bha‑ do 'gü, 'ö ‑da ‑a 'dhɛ 'ö‑ 'gü bha ‑yö ‑gun Simɔ ꞊në‑ ‑bha 'ka, 'yö ꞊bhɛa ‑dhɛ 'ö‑ pö ‑ya ꞊yɔɔn 'dɛdɛ 'në 'bha wo "yi ꞊bhaa kö 'ö bhɔ 'në 'bha wo "kpʋngtaadhɛ 'ka taa‑ 'bleng ‑bleng. ꞊Dhɛ 'ö Piɛdhö ꞊yaa‑ kë "dhʋ̈, 'yö Yesu ‑yö ‑ya mü 'yö zun mɛ kpö 'wo bha‑ ‑nu ꞊klang kë ‑sü ‑bha.
LUK 5:4 ꞊Dhɛ 'ö ꞊ya ö bo dhiang zë ‑sü 'ka, 'yö‑ pö Simɔ ‑dhɛ: «‑Bhö ꞊yɔɔn "kplagɔnë bha‑ 'ka "yi ꞊zinng 'gü kö kaa‑ i "tayɔɔ ‑nu bha 'ka "nuu bha‑ ‑së do ‑zuö mü.»
LUK 5:5 'Yö Simɔ ‑ya pö‑ ‑dhɛ: «N Dëmɛ, 'ya wɔ "yaan "nuu ‑zuö ‑sü ‑bha 'yii pë 'bha 'sü, "kɛɛ ꞊dhɛ 'ö ‑kë ꞊dhɛ 'bha‑ pö "dhʋ̈, a ‑dho ‑a ‑së do ‑zuö mü kö 'a‑ ‑bha ‑ga.»
LUK 5:6 'Yö Simɔ ‑yö "nuu bha‑ ‑zuö Yesu ‑wʋ bha‑ "dhiʋ̈, 'yö 'wo ‑ya ‑a "gan ‑sü ‑bha, 'wo dho ‑dhɛ ‑ga kö 'yuʋ̈‑ ‑ya pa ‑sü 'ka, kö‑ "nuu ga ‑nu ‑wo "kan sië.
LUK 5:7 'Yö 'wo wo ‑kɔ "paa 'gü zë 'mɛ 'wo "kplagɔ 'dhɛ 'ö to ‑a 'gü bha‑ ‑nu ‑dhɛ kö ‑wo nu wo "piʋ̈ kö ‑wo wo ‑ta 'kun. 'Yö 'wo nu 'wo 'yuʋ̈‑ bha‑ bho "nuu bha‑ 'gü, 'yö 'wo‑ ꞊loo "kplagɔnë ꞊plɛ bha‑ 'gü, 'yö‑ ꞊gban ꞊plɛ pa, 'ö dɔ mü kö ‑wo 'dho sië "yi ꞊wlöö.
LUK 5:8 ꞊Dhɛ 'ö Simɔ "yan 'dhö ‑da 'wɔn bha‑ ‑dhɛ 'gü, 'yö dho 'ö zun ö kpiö 'gü Yesu ‑dhɛ 'ö‑ pö: «N Dëmɛ, 'bha 'dho dɔ n "sɔɔ, ‑a ‑gɛn ‑mü ꞊dhɛ 'wɔnyaakëmɛ ‑mü n 'ka.»
LUK 5:9 ‑A pö 'ö Piɛdhö ‑ya wo "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö "suʋ̈ ꞊ya ‑da waa‑ "tɛabɔ ‑nu bha‑ ‑nu 'gü ꞊dedewo 'yuʋ̈‑ 'wo‑ sü "nuu 'ka bha‑ ‑wɔn 'gü.
LUK 5:10 "Suʋ̈‑ ‑gun ‑da ‑sü 'ka Zan waa‑ Zakö 'wo ‑kë Zebede gbö ‑nu 'ka 'ö waa‑ Piɛdhö ‑nu 'wo gun "nuu ‑zuö sië bha‑ ‑nu 'gü 'pö ꞊dedewo. Yesu ‑ya ‑pö Simɔ ‑dhɛ yö ꞊në‑ ‑wɔn 'gü 'ö‑ pö: «Simɔ, "suʋ̈ 'ya 'dho i kë, ‑a ‑gɛn ‑mü ꞊dhɛ ꞊ya 'go ꞊dɛɛ 'gü, i ‑dho kë "nuu ‑zuö mɛ ‑gɔ ‑mɛ ꞊në‑ 'ka.»
LUK 5:11 ꞊Dhɛ 'ö 'mɛ 'wo bha ꞊wa nu woo‑ "kplagɔnë ‑nu bha‑ ꞊gban 'ka "yi "kpʋng "dhiʋ̈, 'yö 'wo‑ to 'mü 'wo dho Yesu ꞊keng‑.
LUK 5:12 'Ö gun kö Yesu ‑yö 'pö‑ ‑nu bha‑ do 'bha 'gü, 'ö dho ‑dhɛ ‑ga kö mɛ do 'bha 'ö ꞊wee ‑yua ꞊ya "bhɛɛ ‑da ‑bha bha ꞊ya nu kö ꞊ya "gblëënu‑ ꞊wlöö kö ꞊ya bhɛa" ‑dhɛ ꞊yaa‑ pö: «N Dëmɛ, ‑bhö "ta n ‑dhɛ ‑dhe! ‑A ‑gɛn ‑mü ꞊dhɛ ꞊ya kë ꞊dhɛ ꞊ya ga ‑zë wo i 'gü, i ‑kɔ ‑mɔɔ ‑bha kö 'i "yua ya‑ bho n ‑bha.»
LUK 5:13 ꞊Dhɛ 'ö ꞊yaa‑ pö "dhʋ̈, 'yö Yesu ‑yö ö ‑kɔ ‑pʋ 'yö ‑kɔ pa 'mɛ bha‑ 'ka, 'yö‑ pö‑ ‑dhɛ: «꞊Ya ga n 'gü, ‑bhö kë "klʋ̈ʋ̈klʋ̈!» ‑Yö ‑to 'pö ‑dhɛ do bha‑ 'gü 'ö‑ ‑bha "yua bha 'ö bo.
LUK 5:14 ꞊Dhɛ 'ö ꞊ya kë "dhʋ̈, 'yö ‑dhio dɔ‑ ‑ta 'ö‑ pö: «'Bha 'dho, 'bha 'dho‑ ‑gɛn dɔ mɛ 'bha ‑dhɛ, "kɛɛ ‑bhö 'dho kö 'i i ‑dɩ ‑zɔn "saabhomɛ ‑nu ꞊në‑ ‑nu ‑dhɛ kö "saa‑ 'ö Moizö ‑ya ‑bɛn zë Atanna ‑bha 'tɔng‑ 'sëëdhɛ 'gü yi 'bha 'ka bha 'i‑ bho kö mɛ ꞊gban ‑wa 'wɔn dɔ‑ ‑bha ꞊dhɛ 'bha kë "klʋ̈ʋ̈klʋ̈.»
LUK 5:15 'Yö‑ 'tɔ bhɔ ‑sü 'bha 'dhö ‑da 'gü ‑kpɛawo, 'yö‑ 'tɔ 'dhö dho ‑dhɛ ꞊gban "pɛpɛ 'gü, 'yö 'wo go ‑dhɛ ‑nu 'gü kpö kpö 'ka 'wo nu "tʋ ‑to ‑a ‑wʋ ‑bha ‑dhɛ 'gü, "ɛɛn 'zü kö 'wo kë "klʋ̈ʋ̈klʋ̈;
LUK 5:16 "kɛɛ 'yö Yesu ‑zë ꞊ya kë 'yö dho ö ‑dɩ ‑ta "tʋngtadhɛ ‑nu 'gü 'yö ꞊bhɛa Atanna ‑dhɛ mü.
LUK 5:17 ꞊Dhɛ 'ö yi do 'ka kö Yesu ‑yö mɛ ꞊klang kë sië, kö Fadhiziɛn ‑nu waa‑ 'tɔnggɔmɛ ‑nu ꞊wa 'go 'pödhɛ "pɛpɛ 'wo Gadhidhe ‑sɛ 'gü ‑dhɛ ‑nu, Zude ‑sɛ 'gü ‑dhɛ ‑nu waa‑ Zedhizadhɛmö ‑dhɛ ‑nu 'gü ꞊wa nu, kö ‑wo 'yaanu sië kö Yesu ‑yö Atanna ‑bha 'gügbɩɩdhɛ ‑zɔn sië mɛ ‑nu ‑kë "klʋ̈ʋ̈klʋ̈ ‑sü 'ka,
LUK 5:18 'wo dho ‑dhɛ ‑ga kö mɛ kpö 'bha bha ꞊wa "trüünyuamɛ do 'sü "gbang ‑ta kö ‑wo nu sië‑ 'ka. ꞊Dhɛ 'ö ꞊wa nu ꞊wa ꞊loo mü, 'yö 'wo ‑ya ‑a "slë mɔɔ‑ ‑sü ‑bha kö 'wo ‑da 'mɛ bha‑ 'ka 'kɔɔdhö kö 'wo‑ wɔ‑ ‑kuu "dhiʋ̈.
LUK 5:19 "Kɛɛ ꞊dhɛ 'ö ꞊waa‑ "slë mɔɔ‑ 'ö 'wii‑ yö mɛ "dhaa 'wo gun 'mü bha‑ ‑nu ‑gɔ, 'yö 'wo 'mɛ bha‑ sü 'wo ‑da 'ka 'kɔ ‑ta, 'yö 'wo‑ ‑yɛ bho, 'yö 'wo 'mɛ bha‑ bɔ ‑yɛ bha‑ ‑bha waa‑ ‑wɔ ‑ta "gbang bha‑ 'dhö, 'yö 'wo‑ ꞊lɔɔ bhiëga ‑bha mɛ kpö 'gü Yesu wëëdhö mü.
LUK 5:20 ꞊Dhɛ 'ö Yesu ꞊ya 'mɛ 'wo bha‑ ‑nu ‑bha 'dhang ‑bho ö "dhiʋ̈ ‑kɔ ('ö ꞊dhɛ ‑yö ‑mɔɔ ‑bha 'ö 'mɛ bha‑ dha) bha‑ ‑dhɛ yö, 'yö‑ pö "yuëdhi bha‑ ‑dhɛ 'ö‑ pö: «N "taɔngdë, 'ma i ‑bha 'wɔn yaa ‑nu ‑mawɔn to, 'bɔn ꞊ya 'go i ‑bha!»
LUK 5:21 "Kɛɛ 'yö 'mɛ 'wo ‑kë 'tɔngdɔmɛ ‑nu waa‑ Fadhiziɛn ‑nu 'ka bha 'wo ‑ya ‑a pö ‑sü ‑bha ꞊dhɛ: «De suu ꞊në ya ꞊zɔɔ 'yö Atanna ꞊bhlëë 'yaa ‑gɔ ꞊ni ‑oo? De ꞊në‑ ‑kɔ ꞊mɔɔ‑ ‑bha "kpʋngtaadhɛ ya‑ 'gü kö ‑yö mɛbhɩɩdhe ‑bha 'wɔn yaa ‑mawɔn 'to kö 'yii kë Atanna ‑zë 'ka?»
LUK 5:22 ꞊Dhɛ 'wo wo ‑zʋ 'gɔn sië "dhʋ̈, 'ö Yesu ꞊yaa‑ ‑nu ‑zʋgɔngüwɔn bha‑ dɔ, 'yö‑ ‑yɔ bɔ‑ ‑nu ‑gɔ 'ö‑ pö: «‑Më ꞊në ‑kë 'yö 'ka ka ‑zʋ gɔn ꞊dhɛ ‑kɔ bha‑ 'dhö?
LUK 5:23 'Wɔn ꞊plɛ bha‑ ‑mɛɛ ꞊në "gbɩɩ‑? ‑A pö ‑sü 'ö mɛ ‑dhɛ ꞊dhɛ 'ma i ‑bha 'wɔn yaa ‑nu ‑mawɔn 'to yö ꞊në "gbɩɩ‑ ‑ee, "ɛɛn ‑a pö ‑sü 'ö‑ ‑mɛ ‑dhɛ ꞊dhɛ 'bha kë "klʋ̈ʋ̈klʋ̈, ‑bhö "wlü kö 'i "ta yö ꞊në "gbɩɩ‑ ‑ee?»
LUK 5:24 ꞊Dhɛ 'ö ꞊yaa‑ pö "dhʋ̈, 'yö go mü 'zü 'ö‑ pö: «‑A ‑dhɛa ‑bha ꞊dhɛ 'ka‑ 'wɔn dɔ ꞊dhɛ mɛ ‑bha 'wɔn yaa ‑mawɔn 'to "sɩ ‑yö mang Mɛgbömɛ n ‑dhɛ "kpʋng ꞊taa yö. 'Yö‑ pö "trüünyuamɛ bha‑ ‑dhɛ: «‑Bhö "wlü kö 'i i ‑kɔ ‑da i ‑bha "gbang 'gü kö 'i 'dho i ‑gɔ 'kɔɔdhö!»
LUK 5:25 ꞊Dhɛ 'ö Yesu ꞊yaa‑ pö "dhʋ̈, 'yö 'mɛ bha 'ö to ‑dhɛ do bha‑ 'gü 'ö ‑kë "klʋ̈ʋ̈klʋ̈, 'yö ꞊wlü 'mɛ 'wo bha‑ ‑nu "yaan mü 'yö ö ‑kɔ ‑da ö ‑bha "gbang 'gü, 'yö dho ö ‑gɔ 'kɔɔdhö Atanna 'tɔ bhɔ ‑sü 'ka.
LUK 5:26 'Wɔn bha 'yö‑ 'wɔn ‑yö 'mɛ 'wo gun mü bha‑ ꞊gban "pɛpɛ kɔn, 'yö "suʋ̈ 'dhö ‑da ‑a ‑nu 'gü, 'yö 'wo ‑ya Atanna 'tɔ bhɔ ‑sü ‑bha 'wo‑ pö: «'Aa! Yi "yan ꞊ya ‑da 'wɔn ‑ziisü ‑dhɛ 'gü ‑dhɛkpaɔyi 'ö ꞊dɛɛ bha‑ 'ka!»
LUK 5:27 ꞊Dhɛ 'ö 'wɔn bha ꞊ya kë "dhʋ̈, 'yö Yesu ‑yö zun "kpɛnng 'yö dho. ꞊Dhɛ 'ö ꞊ya 'dho ꞊ya ꞊loo ‑dhɛ 'bha bha‑ 'gü, 'yö ‑kpan 'niisɔngkunmɛ do 'bha 'wo‑ ‑dhɛ Dhevi bha‑ ‑bha kö ‑yö ‑ya sië 'nii‑ sɔng ‑kun 'gü ‑kɔ 'gü. ꞊Dhɛ 'ö ꞊yaa‑ yö 'yö‑ pö‑ ‑dhɛ: «Dhevi, nu 'kii ‑da n ꞊keng‑!»
LUK 5:28 'Yö 'mɛ bha 'ö ö ꞊kwaa pë "pɛpɛ 'ö gun‑ ‑gɔ ‑a ꞊gban ‑zü 'yö ‑ziö Yesu ꞊keng‑.
LUK 5:29 ꞊Dhɛ 'ö ꞊ya kë "dhʋ̈, 'yö Dhevi ‑yö Yesu ‑dhɛ ö ‑gɔ 'kɔɔdhö kö 'ö‑ ‑dhɔkë. ‑Dhɔkëdhe bha‑ kë "tʋ̈ng 'gü, 'niisɔngkunmɛ ‑nu bha‑ mɛ 'gbɛ ‑wo ‑gun mü waa‑ mɛ "wɛɛ ‑nu 'ö 'wo 'wɔnyaakëmɛ ‑nu 'ka 'pö ‑a ‑nu 'dhö, 'yö waa‑ Yesu ‑nu ꞊gban 'wo zun pë ‑bhö ‑sü ‑bha wo "kwëë waa‑ ‑bha ꞊klang ‑nu 'dhö.
LUK 5:30 ꞊Dhɛ 'ö Fadhiziɛn ‑nu waa‑ 'tɔnggɔmɛ ‑nu 'wo Yesu yö kö waa‑ 'mɛ 'wo bha ‑wo wo ‑kɔ ‑da sië pëfië do 'gü, 'yö 'wo zun ‑dɔn bho ‑sü ‑bha wo yun 'gü, 'yö 'wo‑ pö Yesu ‑bha ꞊klang ‑nu ‑dhɛ: «'Wɔnyaakëmɛ ‑nu 'kö 'wo ya kɛng‑ ‑nu ‑zë ka ‑kɔ ‑da 'tɛa‑ do 'gü ‑gɛn ‑mü ‑më 'ka ("kɛɛ kö 'waa Atanna ꞊bhlëë dɔ).»
LUK 5:31 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Mɛ 'wo "klʋ̈ʋ̈klʋ̈ wo ‑zë ‑a ‑nu ‑mawɔn 'yaa kë ‑dhɔtrɔɔ ‑bha, mɛ ꞊dede 'ö‑ ‑nu 'gü 'yaa ‑së bha ꞊në‑ ‑nu ‑mawɔn ‑yö zun‑ bha.
LUK 5:32 Nu 'a‑ wo "kpʋng ꞊taa ya 'mii nu kö 'a 'mɛ 'wo‑ pö wo ‑dɩ ‑dhɛ ꞊dhɛ pö 'aa wo ‑bha bha wo ‑zë ‑a ‑nu ‑dhɛ Atanna "piʋ̈, a ‑nu kö 'wɔnyaakëmɛ ‑nu bha ꞊në 'a‑ ‑nu ‑dhɛ.»
LUK 5:33 'Yö 'mɛ 'wo bha 'wo‑ pö Yesu ‑dhɛ: «'Bha‑ pö "dhʋ̈ 'kwa‑ ma, "kɛɛ 'wɔn do 'bha‑ ‑dhö. ꞊Ya kë ‑nu wo Zan ‑bha ꞊klang ‑nu 'waa Fadhiziɛn ‑nu ‑bha ꞊klang ‑nu ‑wo 'sunng‑ ‑nu ‑ma 'ö 'wo ꞊bhɛa Atanna ‑dhɛ, "kɛɛ 'yii‑ ‑dhɛ yö i ‑bha ꞊klang ‑nu 'kö 'wo ya‑ ‑nu ‑gɔ do, ‑më ꞊në ‑kë 'yö ‑kë "dhʋ̈?»
LUK 5:34 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «‑A ‑dhɛ 'yaa‑ ‑bha kö 'mɛ 'wo nu dhe dɔ troo ‑ta ‑wa pö‑ ‑nu ‑dhɛ ꞊dhɛ 'wa 'dho ‑bhöpë zun wo "dhi ‑bha, "kɛɛ kö dhesügɔn yöö ꞊dede ‑yö mü (kö‑ ‑nu ꞊nii ‑yö ‑da sië).
LUK 5:35 ‑A ‑gɛn ‑mü ꞊dhɛ ‑a "tʋ̈ng ‑yö nu sië 'ö‑ ‑nu "yan‑ dho ꞊fië dhesügɔn bha‑ 'ka, ‑a yi 'ö bha ꞊në ꞊ya ꞊loo kö‑ ‑nu 'sunng‑ 'ma "tʋ̈ng ꞊ya ꞊loo, (‑a ‑gɛn ‑mü ꞊dhɛ kö ꞊wa kë ‑wëësü).»
LUK 5:36 'Yö to 'mü 'ö "gwënng do ‑da ‑nu ‑dhɛ 'ö‑ pö: «Mɛ 'bha 'yaa sɔ ‑dee "pɛ kö ‑ya "pɛn 'sü ‑ya ꞊nëng sɔ zii ꞊dhong "dhiʋ̈, ꞊ya kë "dhʋ̈ kö‑ ‑mɛ ꞊ya sɔ ‑dee ‑sü bha‑ "pɛ "wɛɛwɛɛ, ‑a ‑gɛn ‑mü ꞊dhɛ yö ‑zë ‑ya "pɛdhɛ ‑da ꞊në‑ wo "dhiʋ̈.
LUK 5:37 ꞊Ya 'go mü 'zü, mɛ 'bha 'yaa we ‑kiansü ‑da puu" zii 'gü, ‑ya ‑wü 'ö‑ we ‑yö ꞊wɛnng, 'yö ‑kë pë ꞊plɛ 'gü see‑ ‑sü 'ka.
LUK 5:38 "Kɛɛ ‑wo we suu bha‑ ‑loo puu" ‑dee ꞊në‑ 'gü.
LUK 5:39 ꞊Ya 'go mü 'zü, 'mɛ 'ö ꞊ya we "dhiʋ̈‑ 'gü dɔ, we ‑dee ‑dhɔ 'yaa‑ kë, ‑ya zii fië‑ ‑bho ‑a ‑dee ‑bha.
LUK 6:1 Zuifö ‑nu ‑bha ꞊glooyi do 'ka kö Yesu ‑yö ziö sië ‑mlü suu 'wo‑ ‑kë 'bluu‑ 'ka 'wo‑ ‑dhɛ 'ble‑ bha‑ ‑bhlaa do 'gü, kö din‑ ꞊yaa‑ ‑bha ꞊klang ‑nu 'kun, 'yö 'wo ‑ya ‑mlü bha‑ ‑kpaa ‑wo 'gü ‑sü ‑bha, 'yö 'wo‑ ꞊slëë wo ꞊kwɛɛ‑ 'yö 'wo‑ ga bɔ wo "dhi 'wo‑ ‑bhö.
LUK 6:2 ꞊Dhɛ 'ö Fadhiziɛn ‑nu 'wo‑ ‑dhɛ yö 'yö 'wo‑ pö‑ ‑nu ‑dhɛ: «‑Yö mü ꞊dhɛ 'yö 'wɔn 'ö kwaa‑ 'tɔng‑ ‑ya kë ‑sü ‑bha ‑dhio dɔ ꞊glooyi 'ka bha ka ‑zë 'ka‑ ‑kë?»
LUK 6:3 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Wɔn 'ö Davi ‑ya kë yi 'bha 'ka 'ö ‑bɛn zë ‑sü 'ka Atanna ‑bha 'sëëdhɛ 'gü bha 'kii‑ ‑wʋ ꞊në‑ pö "ɛɛn 'kaa‑ 'gü ꞊në‑ ma ‑ee?
LUK 6:4 (‑A pö 'ö‑ wo ꞊dhɛ) ꞊dhɛ 'ö din‑ ꞊ya waa‑ ö ꞊kengmɛ ‑nu 'kun, ‑yö ‑dho 'ö ‑da Atanna ‑dhɔkëgükɔ 'gü, 'ö 'bluu‑ 'wo‑ ‑ya Atanna ‑dhɔkë 'ka ‑pë 'ka bha‑ sü 'ö dho‑ 'ka 'ö waa‑ ‑bha mɛ ‑nu 'wo‑ ‑bhö, "kɛɛ 'sa kö ‑yö ‑bɛn zë ‑sü 'ka kwaa‑ 'tɔng‑ 'gü ꞊dhɛ ‑yö "saabhomɛ ‑nu ‑dɩ ‑slɔɔ ꞊në‑ ‑nu ‑bhöpë 'ka bha 'kii‑ ma ‑ee? ꞊Ya kë "dhʋ̈ kö 'wɔn 'ö ma ꞊klang ‑nu ‑wa ‑kë bha‑ ‑kë 'wɔn yaa 'ka ‑dhɛ ꞊në 'mɛ?»
LUK 6:5 ꞊Dhɛ 'ö ꞊yaa‑ pö "dhʋ̈, 'yö 'go mü 'ö‑ pö‑ ‑nu ‑dhɛ: «‑Yö kë ka "yaan ꞊dhɛ mang Mɛgbömɛ ma ꞊në ma ꞊glooyi 'dhö 'dhö.»
LUK 6:6 Zuifö ‑nu ‑bha ꞊glooyi do 'bha 'ka 'zü, 'yö Yesu ‑yö dho ‑a ‑nu bha ‑yakwëëkëgükɔ 'gü 'yö ‑ya mɛ draan‑ ‑sü ‑bha. 'Mɛ 'ö gun‑ ‑nu ꞊klang kë sië "dhʋ̈ bha mɛ do‑ ‑gun mü 'ö‑ ‑kɔ ‑së 'gü ‑gbe ‑yö gun ga ‑sü 'ka‑ ‑bha.
LUK 6:7 Atanna ‑bha 'tɔnggɔmɛ ‑nu waa‑ Fadhiziɛn ‑nu 'wo gun mü bha 'ö gun "dhʋ̈ kö wo Yesu 'suan‑ bho sië, 'ö 'wo wo "yan kpɔ‑ këwɔn ‑nu "piʋ̈ 'kpakpadhö, kë "dhʋ̈ kö ꞊ya "yuëdhi 'bha dha 'yi bha‑ 'ka kö 'wo‑ ‑dhɛ yö; ‑a ‑gɛn ‑mü ꞊dhɛ 'ö gun "dhʋ̈ kö ‑wa ‑gɛn mɔɔ‑ sië kö za 'wo dho‑ dɔ‑ ‑bha ‑wa ꞊slɔɔ.
LUK 6:8 ꞊Dhɛ 'ö ‑kë ꞊dhɛ Yesu ‑yö 'mɛ 'wo bha‑ ‑nu ‑zʋ "piʋ̈ ‑wɔn ‑dɔ, 'yö‑ pö 'mɛ 'ö‑ ‑kɔ do‑ gun ga ‑sü 'ka‑ ‑bha bha‑ ‑dhɛ 'ö‑ pö: «‑Bhö "wlü kö 'i dɔ mɛ kpö 'gü yö!» ꞊Dhɛ 'ö 'mɛ bha ꞊ya "wlü ꞊ya dɔ ö ‑gɛan 'mɛ 'wo bha‑ ‑nu ꞊zinng 'gü,
LUK 6:9 'yö Yesu ‑ya ‑nu dhɛɛ" kpɔ 'ö‑ pö: «'Wɔn 'ö kwaa‑ 'tɔng‑ ‑yö kwa ꞊klang ‑kë 'ka ꞊glooyi ‑wɔn 'gü yö ‑mü ‑më 'ka? ‑Ya ‑pö 'kwa 'wɔn ‑së kë ‑ee? "Ɛɛn 'kwa 'wɔn yaa ꞊në‑ kë ‑ee, 'kwa mɛ dha ‑ee, "ɛɛn 'kwa‑ ‑mɛ to mü kö‑ 'gü ‑yö see‑ ‑ee?»
LUK 6:10 ꞊Dhɛ 'ö ꞊yaa‑ pö "dhʋ̈, 'yö‑ ‑nu ‑ta ‑ga, 'yö‑ pö 'mɛ bha‑ ‑dhɛ: «‑Bhö i ‑gbe 'gü "pʋ!» 'Yö‑ 'gü ‑pʋ, 'yö‑ ‑kɔ bha 'ö pa ö diëë, 'yö bo.
LUK 6:11 'Wɔn 'ö Yesu ‑ya ‑kë "dhʋ̈ ꞊glooyi 'ka bha, 'pu 'ö‑ wo ‑gɔmɛ ‑nu bha‑ ‑nu ‑bha, ‑a ‑naa 'yii kë, 'yö 'wo ‑ya 'pë 'wo dho‑ kë Yesu 'ka ‑a "slën bho ‑sü ‑bha.
LUK 6:12 ‑A "tʋ̈ng ꞊dede 'ö "dhʋ̈ bha‑ 'ka, 'yö Yesu ‑yö ꞊wlü 'yö dho ‑bhɛa Atanna ‑dhɛ ‑dhɛ 'gü ‑tɔn ꞊gbin‑, 'yö ‑wɔ 'gü "yaan 'yö ‑dhɛ ‑yö ꞊kpaɔ.
LUK 6:13 ꞊Dhɛ 'ö ‑dhɛ ꞊ya ꞊kpaɔ, 'yö ö ‑bha ꞊klang ‑nu ‑dhɛ, 'yö‑ mɛ ‑kaɔng do ga ꞊plɛ zë‑ 'gü, 'yö‑ ‑nu ‑ya ö ‑bha bɔmɛ ‑nu 'ka.
LUK 6:14 'Mɛ 'ö‑ ‑nu ‑ya "dhʋ̈ bha ‑wa mɛ do ‑dhɛ Simɔ, 'yö‑ 'tɔ ‑ya ‑ta ‑dhɛ Piɛdhö. 'Yö 'wo‑ mɛ do 'bha ‑dhɛ Andre, 'yö ‑kë Piɛdhö 'zlaa‑ 'ka, 'yö Zakö waa‑ Zan, 'yö Fidhipö, 'yö Batedhemi,
LUK 6:15 'yö Matiö, Toma, 'yö Adhöfe gbö Zakö, 'yö Simɔ 'dhɛ 'wo‑ ‑dhɛ «"sɛtakozëmɛ»
LUK 6:16 'yö Zudë 'ö ‑kë Zakö gbö 'ka waa‑ Zuda Isikadhiɔtö 'ö Yesu go bha.
LUK 6:17 ꞊Dhɛ 'ö ꞊ya ö ‑bha bɔmɛ ‑nu bha‑ ‑nu ‑ya "dhʋ̈, 'yö wɛng‑ ‑nu 'wo ꞊lɔɔ, 'yö 'wo dho 'wo ꞊loo ‑dhɛ "gbɛa ‑dhɛ do 'gü, kö‑ ‑bha ꞊klang ‑nu kpö 'dhɛ 'wo to ‑wo dɔ sië‑ ‑gɔ mü, waa‑ mɛbhɩɩdhe "dhaa 'wo go Zude ‑sɛ ꞊gban "pɛpɛ 'gü waa‑ Zedhizadhɛmö ‑dhɛ ‑nu waa‑ 'pödhɛ ‑nu 'wo "yi "kpʋng "dhiʋ̈ ‑dhɛ ‑nu 'gü, Tii‑ ‑dhɛ ‑nu waa‑ Sidɔn ‑dhɛ ‑nu 'gü ‑a ‑nu 'dhö, kö ꞊wa nu kö ‑wo wo "tʋ 'to‑ ‑wʋ ‑bha, kö ‑yö wo dha woo‑ "yua ‑nu ‑gɔ.
LUK 6:18 'Yö 'mɛ 'ö "yina yaa ‑yö gun‑ ‑nu ‑wëë ‑kë wo sië bha 'wo nu‑ "piʋ̈, 'yö 'wo dha.
LUK 6:19 Mɛ "pɛpɛ 'wo bha‑ ‑nu ꞊gban‑ ‑gun ‑kɔ ‑zun Yesu bha ‑dhɛ ꞊në‑ mɔɔ‑ sië, ‑a ‑gɛn ‑mü ꞊dhɛ 'gügbɩɩdhɛ 'ö gun‑ 'gü bha ꞊në gun‑ ‑nu dha sië‑ ‑nu ‑bha "yua ‑nu ‑gɔ.
LUK 6:20 ꞊Dhɛ 'ö ꞊ya kë "dhʋ̈, 'yö 'daɔnnu 'yö ö ‑bha ꞊klang ‑nu ‑ta ‑ga 'yö‑ pö: «'Mɛ 'ka "flɛɛmɛ ‑nu 'ka ka ‑bha ‑së; ‑a ‑gɛn ‑mü ꞊dhɛ Atanna ‑bha ‑gblüdëdhɛ ‑yö ‑ya kaa‑ ‑ya 'gü.
LUK 6:21 'Mɛ 'ö din‑ 'dhö ka ‑bha ka ‑bha ‑së; ‑a ‑gɛn ‑mü ꞊dhɛ ka 'kën ‑wɔn ‑yö ‑dhö! 'Mɛ 'ka "gbʋ bɔ sië "tʋ̈ng ya‑ 'gü ka ‑bha ‑së; ‑a ‑gɛn ‑mü ꞊dhɛ ka ꞊niida ‑wɔn ‑yö ‑dhö!
LUK 6:22 'Mɛ 'ö mɛ "bhɩɩ‑ ‑nu 'wo dho ‑ya ka ‑san 'ka "ɛɛn 'wo dho 'tɔng ‑ya ka ‑ta ‑nu wo, "ɛɛn 'wo "si ‑nu bho ka ‑gɔ, "ɛɛn 'wo kpaɔ ‑pɛ ka ‑bha mang Mɛgbömɛ n ‑wɔn 'gü, kö ka ‑bha ‑së.
LUK 6:23 ꞊Ya kë "dhʋ̈ ka ꞊nii ‑yö ‑da kö 'ka ‑së kë‑ "dhiʋ̈, ‑a 'klɔɔ‑ ‑mü ꞊dhɛ ka ‑dho ‑a ꞊trɔɔn 'kpii‑ ꞊slɔɔ dhang‑ 'gü; ‑a ‑gɛn ‑mü ꞊dhɛ ‑a ‑nu "bhɛma ‑nu ‑dɔ 'ka ‑mü, ‑wo kë ‑kë "dhʋ̈ Atanna ‑wʋdhiʋ̈loomɛ ‑nu 'ka yi 'bha 'ka.
LUK 6:24 "Kɛɛ 'mɛ 'kö ka ‑zë 'ka ꞊naɔmɛ ‑nu 'ka "tʋ̈ng ya‑ 'gü bha ka ‑bha ‑yö ‑wëësü; ‑a ‑gɛn ‑mü ꞊dhɛ ka ‑bha ꞊në 'ka‑ kë sië bha ("kɛɛ dhia" ‑zë 'yaa ka ‑bha ‑së!)
LUK 6:25 'Mɛ 'ka 'kënsü 'ka "tʋ̈ng ya‑ 'gü bha ka ‑bha ‑yö ‑wëësü; ‑a ‑gɛn ‑mü ꞊dhɛ din‑ ‑dho ka kë. 'Mɛ 'ka "yɩɩ 'to sië "tʋ̈ng ya‑ 'gü bha, ka ‑bha ‑yö ‑wëësü; ‑a ‑gɛn ‑mü ꞊dhɛ ‑wëë ‑dho bɔ ka ‑ta 'ö 'ka "gbʋ bɔ!
LUK 6:26 'Mɛ 'ö mɛ ꞊gban "pɛpɛ 'wo ka ‑dhiang ‑së zë sië bha, ka ‑bha ‑yö ‑wëësü, ‑a ‑gɛn ‑mü ꞊dhɛ ‑a ‑nu "bhɛma ‑nu kë ‑gleng do bha ꞊në‑ ‑kë Atanna ‑wʋ ꞊kwaanmɛ ‑nu ‑gɔ.
LUK 6:27 Yö ꞊në‑ ‑wɔn 'gü, 'yö 'mɛ 'ka ka "tʋ 'to sië n ‑wʋ ‑bha bha, 'a dho‑ pö ka ‑dhɛ ꞊dhɛ ka ‑zë ka 'yaɔ‑ ‑nu ‑dhɔ ‑yö ka kë, kö 'ka 'wɔn ‑së kë 'mɛ ka ‑san ‑ya ‑nu ‑kë ‑a ‑nu ‑dhɛ.
LUK 6:28 ‑Ka 'dhuë‑ kë 'mɛ 'wo "dhang ‑da sië ka ‑bha bha‑ ‑nu ‑bha, kö 'ka bhɛa" Atanna ‑dhɛ 'mɛ 'wo ka ‑wëëdhɛ bho sië‑ ‑nu ‑wɔn 'gü.
LUK 6:29 ꞊Ya kë ꞊dhɛ ꞊wa ka "tʋ "pɛan do ‑ma, ‑kaa "pɛan do 'dhɛ 'ö to‑ slëë‑ ‑mɛ ‑ta kö ‑ya ‑ma 'pö. ꞊Ya kë ꞊dhɛ ꞊wa ka ‑bha ꞊gbauu‑ 'sü ka ‑gɔ (faandhɛ ‑bha), ‑kaa ‑mɛ 'to mü kö ‑yö kaa‑ "bhɛɛ ‑nu ꞊gban 'sü.
LUK 6:30 Mɛ "ʋʋ mɛ 'ö pë ‑gbadhɛ ka ‑gɔ, ‑kaa nu‑ ‑mɛ ‑dhɛ. ꞊Ya kë ꞊dhɛ mɛ 'bha ꞊ya ka ꞊slɔɔpë 'sü ka ‑gɔ, ‑kaa 'to‑ ‑gɔ.
LUK 6:31 'Pë 'ö 'ka‑ "piʋ̈ ꞊dhɛ ‑wa kë ka ‑dhɛ bha kaa ‑dɩ 'pö ‑kaa kë mɛ ‑nu ‑dhɛ.
LUK 6:32 ꞊Ya kë ꞊dhɛ 'mɛ 'ö ka ‑dhɔ ‑ya ‑nu ‑kë wo ꞊në‑ ‑nu ‑dhɔ ꞊ya ka kë doseng bha ‑oo, kö ka ‑bho "kpʋngtaamɛ ‑nu "piʋ̈ ‑dhɛ 'pö 'mɛ? Mɛ ꞊gban ‑wa 'dhɛ 'kö bha‑ ‑kë!
LUK 6:33 ꞊Ya kë 'zü ꞊dhɛ 'ka 'wɔn ‑së kë 'mɛ 'wo 'wɔn ‑së ‑kë ka ‑dhɛ ꞊në‑ ‑nu ‑dhɛ doseng bha ‑oo, kö ka ‑bho 'ko "piʋ̈ ‑dhɛ 'pö 'mɛ? 'Wɔnyaakëmɛ ‑nu ‑wa yö ‑zë ‑kë 'pö!
LUK 6:34 ꞊Ya kë ꞊dhɛ 'ka "pɔ dɔ 'mɛ 'ka 'dhang bho‑ "dhiʋ̈ ꞊dhɛ ‑yö ‑dho ‑a bho bha ꞊në‑ ‑mɛ ‑bha doseng bha ‑oo, kö ka ‑bho "kpʋngtaamɛ ‑nu "piʋ̈ ‑dhɛ 'pö 'mɛ? Woo ‑dɩ 'pö ‑wo "pɔ ‑dɔ mɛ ‑nu ‑bha "dhʋ̈ kë "dhʋ̈ kö 'wo‑ "wɛɛ ꞊slɔɔ.
LUK 6:35 Ka ‑zë ka 'yaɔ‑ ‑nu ‑dhɔ ka kë kö 'ka 'wɔn ‑së kë do 'ka 'dho‑ 'ka, kö 'ka "pɔ dɔ 'ka 'dho ka ‑zʋ 'gɔn‑ bho ‑wɔn ‑dhɛ. ꞊Ya kë "dhʋ̈ ka ꞊trɔɔn‑ ‑dho kë 'kpii‑ dhang‑ 'gü, 'ö mɛ ꞊gban 'wo ka dɔ Atanna 'ö dhang‑ 'gü ‑a ‑bha 'në ‑nu 'ka, ‑a ‑gɛn ‑mü ꞊dhɛ ‑a "klʋ ‑yö ‑së 'mɛ 'waa 'wɔn ‑së dɔ bha waa‑ "gblüyaamɛ ‑nu ꞊gban 'ka.
LUK 6:36 ‑A ‑kë "dhʋ̈ ‑sü ‑wɔn 'gü, ka Dë 'ö dhang‑ 'gü bha mɛbhɩɩdhe ‑wëë 'dhö‑ kë ‑kɔ do 'ö‑ ‑bha bha mɛ ‑wëë ‑yö ka kë 'pö‑ ‑kɔ ‑bha.
LUK 6:37 'Ka 'dho mɛ ‑nu ‑dhiang yaa zë kö Atanna ‑dɩ 'pö 'ya 'dho za dɔ ka ‑bha. 'Ka 'dho 'tɔng‑ ‑ya mɛ ‑ta kö Atanna yöö ‑dɩ 'pö 'ya 'dho 'tɔng‑ ‑ya ka ‑ta. ‑Ka mɛ ‑nu ‑mawɔn 'to kö Atanna ‑dɩ 'pö ‑yö ka ‑mawɔn 'to.
LUK 6:38 ‑Ka gbaɔ‑ mɛ ‑nu ‑gɔ, kö Atanna ‑dɩ 'pö ‑yö gbaɔ‑ ka ‑gɔ. ‑Yö ‑dho pë dan 'ö pë pa 'ö ꞊wɛnng ‑zü 'ö‑ sü 'ö‑ ꞊loo ka ‑gɔ ꞊gbauu‑ "yië‑ 'gü; ‑a ‑gɛn ‑mü ꞊dhɛ pë do 'ka dho‑ 'sü 'ka pë dan‑ ‑bha mɛ ‑nu ‑dhɛ bha ꞊në 'ö dho‑ 'sü 'pö 'ö ka ‑bha dan‑ ‑bha.»
LUK 6:39 'Yö "gwënng "wɛɛ do 'bha ‑da ‑a ‑nu ‑dhɛ 'ö‑ pö: «"Ɛɛn ‑yö ka 'gü ꞊dhɛ "yanwlümɛ ‑mɔɔ ‑bha 'ö zun "yanwlümɛ 'bha ‑dhɛ "dhiʋ̈, 'yö‑ ꞊gban ꞊plɛ 'waa ‑pö ‑yɛ 'gü ‑ee?
LUK 6:40 ‑Yö kë ka "yaan ꞊dhɛ ꞊klangdhiʋ̈ ‑zë yöö pë dɔ ‑kɔ "ʋʋ ‑kɔ 'ö‑ 'gü, 'yii 'dho ziö ö ‑gɔmɛ ‑zë ‑ta. ꞊Ya kë ꞊dhɛ ꞊ya pë dɔ "gbɩɩ‑, ‑yö ‑mɔɔ ‑bha 'ö ꞊mɔɔ ö ‑gɔmɛ 'ka, "kɛɛ 'yii 'dho ziö ‑zë wo‑ ‑ta.
LUK 6:41 ‑Më ꞊në ‑kë 'yö 'i "yɛ ‑bi yö mɛ ‑nu ‑zë ‑nu "yan ‑bha, 'yö 'bhaa "dhü ꞊blün 'kö bhi ‑zë i "yan ‑bha bha‑ yö?
LUK 6:42 "Ɛɛn i ‑mɔɔ ‑bha 'i‑ pö mɛ ‑dhɛ ꞊dhɛ: «N "taɔngdë, ‑bhö dɔ kö 'a blëë bho i "yan ‑bha ‑kɔ kë ꞊dhɛ kö "dhü ꞊blün 'ö bhi ‑zë i "yënng bha 'bhii‑ bho mü. "Gblʋ̈ʋ̈dhɛtiimɛ, ‑bhö "dhü ꞊blün 'ö i "yënng bha‑ bho 'mü ꞊kö ‑blɛɛsü kö 'i ‑dhɛ yö ‑së 'ka kö 'i gun ‑na "yɛ ‑bi bho i "tɛado "yënng
LUK 6:43 ‑Yö kë ka "yaan ꞊dhɛ "dhü ‑së 'yaa bhɛ yaa dɔ, "ɛɛn "dhü yaa 'yaa bhɛ ‑së dɔ 'pö;
LUK 6:44 ‑a ‑gɛn ‑mü ꞊dhɛ "dhü 'ö 'dhö ‑wa suu ‑dɔ ö bhɛ ꞊në‑ ‑bha. 'Waa "dhü "wɛɛ bhɛ bho "dhü "wɛɛ 'gü.
LUK 6:45 Zuëga ‑së 'dhö 'mɛ 'ö "gblʋ̈ʋ̈‑ ‑a ‑mɛ ‑bha "klʋsëdhɛ ‑gɛn ‑yö ‑gban ‑a zuëga bha ꞊në‑ ‑bha, 'yö zuëga yaa 'dhö mɛ 'ö "gblʋ̈ʋ̈‑ 'ö‑ ‑bha ‑mawɔnyaadhɛ ‑gɛn ‑yö go 'pö‑ zuë" 'gü ꞊dhɛ ‑kɔ do bha‑ 'dhö; ‑a ‑gɛn ‑mü ꞊dhɛ pë 'ö mɛ zuë" "piʋ̈ 'yö ‑wo mɛ "dhi ‑ta.»
LUK 6:46 'Yö Yesu ‑ya pö‑ ‑nu ‑dhɛ: «N ‑dhɛ 'ka‑ wo n Dëmɛ, n Dëmɛ ya‑ ‑gɛn ‑mü ‑më 'ka "kɛɛ kö 'pë 'a‑ pö ka ‑dhɛ 'kaa‑ 'bha kë?
LUK 6:47 'Mɛ ꞊ya bɔ n 'ka 'ö n ‑wʋ ‑ya 'klɔɔ‑ "dhiʋ̈, 'ö ‑tosɛa ‑kë ‑bha bha 'ö bhɔ pë 'dhɛ 'ö‑ ‑bha a ‑dho ‑a pö ka ‑dhɛ.
LUK 6:48 ‑A ‑mɛ ‑yö ‑bhɔ gɔndënë do 'ö‑ pö yöö 'kɔ dɔ, 'ö ö ‑bha 'kɔ bha‑ "kpan "sɛ pɔn 'ö dho 'ö zun‑ 'ka ‑gwë ‑bha, 'ö dho 'ö 'kɔ bha‑ ‑gɛn ‑gban ‑gwë ‑ta ꞊në‑ ‑bha. ꞊Dhɛ 'ö ꞊yaa‑ 'kɔ bha‑ dɔ, yi do 'ka 'yö dha ‑yö ban, 'yö "yi ‑yö pa, 'yö "yi "tɛɛ ‑yö nu ‑yö ‑gban 'kɔ bha‑ ‑bha, "kɛɛ 'yö 'yii 'wü, ‑a ‑gɛn 'ö ‑gban ‑sü 'ka ‑gwë ‑ta bha‑ ‑wɔn 'gü.
LUK 6:49 "Kɛɛ mɛ 'ö bɔ n 'ka 'ö n ‑wʋ ma, "kɛɛ 'ö 'yaa‑ ‑yaki ‑ya, 'ö‑ "tʋ 'yaa kë‑ ‑bha ‑a ‑mɛ ‑yö ‑bhɔ 'mɛ 'ö‑ pö 'ö 'kɔ dɔ, 'ö 'yii 'kɔ "kpan "sɛ 'pɔn kö ‑ya ‑gɛn ‑da "sɛɛ, "kɛɛ 'ö‑ "kpan ‑ya 'tëng‑ ‑ta "wɛɛwɛɛ ꞊në‑ ‑bha. ꞊Dhɛ 'ö ꞊yaa‑ dɔ, 'yö dha ‑yö ban, 'yö "yi ‑yö pa, 'yö "yi "tɛɛ ‑yö nu 'ö ‑gban 'kɔ ‑bha. "Kɛɛ 'yö 'yii dha‑ ‑gɔ, ‑pö 'ö‑ wo 'ö wü, ‑yö kë ‑wü ‑trëkë ‑trëkëdhö.
LUK 7:1 ꞊Dhɛ 'ö Yesu ꞊ya ziö 'mɛ 'wo bha‑ ‑nu ‑dhɛ 'wɔn ‑nu 'gü "dhʋ̈ 'dɔɔndhö, 'yö ‑ziö 'ö dho Kapɛɛnaɔmö.
LUK 7:2 'Ö gun "dhʋ̈ kö Wlɔmö ‑mɛ ‑nu ‑bha "sɔdha ‑gɔmɛ do 'bha bha‑ ‑bha gwëëmi 'ö‑ ‑wɔn 'dhö‑ ‑gɔ "gbɩɩ‑ ꞊dedewo bha‑ 'gü 'yaa ‑së, kö ꞊ya wɔ "dhëng yaa "dhiʋ̈.
LUK 7:3 ꞊Dhɛ 'ö "sɔdha ‑gɔmɛ bha 'ö Yesu ‑wɔn ‑taɔng ma, 'yö Zuifö ‑nu ‑bha mɛ zizi 'bha ‑nu bɔ 'mü kö ‑wo 'dho ‑wo bhɛa" Yesu ‑dhɛ kö ‑yö nu kö ‑yö ö ‑bha gwëëmi bha‑ dha ö ‑dhɛ.
LUK 7:4 'Yö 'mɛ 'wo bha 'wo dho 'wo ꞊loo Yesu ‑dhɛ 'gü, 'yö 'wo ꞊bhɛa‑ ‑dhɛ ꞊dedewo ‑sɔbhɛɛ 'ka 'wo‑ pö: «‑Bhö dɔ ꞊në‑ wo "gbɩɩ‑ kö 'i "ta 'mɛ bha‑ ‑dhɛ, ‑a ‑gɛn ‑mü ꞊dhɛ 'mɛ bha 'mɛ 'ö ꞊ya mɛ ‑dhɛ 'ö mɛ‑ dho‑ ‑bha ꞊dhiɔwʋ ‑bha ‑a ‑mɛ ‑mü;
LUK 7:5 ‑a ‑gɛn ‑mü ꞊dhɛ yii‑ "sɛgɔ ya‑ ‑dhɔ ‑ya ‑kë, yö ꞊në yii‑ ‑yakwëëkëgükɔ ya‑ dɔ.»
LUK 7:6 'Mɛ 'wo bha 'yö waa‑ Yesu ‑nu 'wo ‑ziö 'wo dho. ꞊Dhɛ 'ö ꞊wa ꞊tëng "sɔdha ‑gɔmɛ bha‑ ‑bha 'kɔ ‑ta, 'yö gɔndë bha 'ö ö ‑sëmɛ 'bha ‑nu bɔ Yesu ‑dhɛ. 'Yö 'mɛ bha 'wo‑ pö Yesu ‑dhɛ: «Yi Dëmɛ, yi "taɔngdë ‑ya pö 'yi nu kö 'yi‑ pö i ‑dhɛ ꞊dhɛ 'bha 'dho i ‑dɩ ziö "yɛ 'gü "wɛɛwɛɛ, "kɛɛ ö ꞊bhlëë 'yaa 'dhö kö 'i ‑da ö ‑gɔ 'kɔɔdhö.
LUK 7:7 Yö ꞊në‑ ‑wɔn 'gü 'yö yöö ꞊dede 'yii nu i ‑dhɛ 'gü, ‑a ‑gɛn ‑mü ꞊dhɛ ‑yö ö ‑dɩ ‑dɔ ꞊dhɛ 'yaa ‑wo i wëëdhö ‑mɛ 'ka. "Kɛɛ 'ö 'dhang ‑bho "dhiʋ̈ ꞊dhɛ 'bha 'to yö kö 'i "dhiyanwʋ do ‑zian pö, ö ‑bha gwëëmi bha‑ ‑dho dha.
LUK 7:8 ‑A ‑gɛn ‑mü ꞊dhɛ yöö ‑dɩ 'pö ö ‑gɔdhiʋ̈mɛ ‑dhö, "kɛɛ ‑yö ö ‑bha ‑pö 'pö ö ‑kɔwlöömɛ ‑nu ‑dhɛ 'wo‑ ma, 'ö‑ pö mɛ 'bha ‑dhɛ: «‑Bhö 'dho!» 'ö dho, 'ö‑ pö mɛ 'bha ‑dhɛ: «‑Bhö nu!» 'ö nu, 'ö‑ pö ö ‑bha gwëëmi ‑dhɛ: «‑Bhö ‑a kë ꞊ni!» 'ö‑ ‑kë. ("Sanni ‑wa kë yö ‑zë ö ‑dhɛ "dhʋ̈ 'yö bhi ‑zë ꞊wɛ?»)
LUK 7:9 ꞊Dhɛ 'wo naɔ bha‑ dɔ Yesu ‑gɔ 'ö‑ ma ꞊dhɛ ‑kɔ bha‑ 'dhö, 'yö "sɔdha ‑gɔmɛ bha‑ ‑wɔn "dhia ‑yö ma‑ 'gü ‑a ‑wʋ bha‑ "piʋ̈. 'Yö ö wɔ ꞊slëë mɛ kpö 'wo gun‑ ꞊keng‑ bha‑ ‑nu ‑ta 'ö‑ pö: «A‑ ‑pö ka ‑dhɛ ꞊dhɛ 'mii 'dhang bho n "dhiʋ̈ ‑mɛ 'ö ꞊dhɛ 'mɛ ya‑ 'dhö ‑a yö Izraɛdhö ‑mɛ ‑nu ‑zian kpö 'gü.
LUK 7:10 'Mɛ 'wo nu naɔ dɔ bha‑ ‑nu yee kë ‑sü 'ka kö ‑wo 'dho "kwɛandhö, "sanni ‑wo 'dho kö ‑wo ꞊loo kö gwëëmi 'ö‑ 'gü 'yaa gun ‑së bha ꞊ya kë "klʋ̈ʋ̈klʋ̈.
LUK 7:11 ‑A ‑dhɛkpaɔyi 'dhɛ 'ö dɔ‑ "piʋ̈, 'yö Yesu ‑yö dho 'pödhɛ do 'bha 'wo‑ ‑dhɛ Naɛ bha‑ 'gü kö‑ ‑bha ꞊klang ‑nu waa‑ mɛ kpö 'gbɛ ‑wa ꞊keng‑.
LUK 7:12 ꞊Dhɛ 'ö ꞊wa 'dho ꞊wa ꞊loo 'pö‑ "saan "dhiʋ̈, 'wo dho ‑dhɛ ‑ga kö ‑wo 'dho sië mɛ ꞊gee do 'bha ‑wɛɛ bho ‑dhɛ 'gü, 'nëglɔɔnnë 'wo gun 'dho sië‑ 'ka "dhʋ̈ bha ꞊gɛandhe 'bha gbö ꞊në gun‑ 'ka, "kɛɛ ‑yö ‑gun ö dhe ‑gɔ "dhʋ̈ doseng. Kö mɛ kpö 'kpii‑ 'wo go 'pödhɛ bha‑ 'gü 'wo 'dho sië 'në bha ‑wɛɛ bho ‑dhɛ 'gü bha ꞊wa dɔ dhebhɔ bha‑ ꞊keng‑ "wɛ ‑dungdhö.
LUK 7:13 ꞊Dhɛ 'ö kwa Dëmɛ ‑ya yö, 'yö ‑wëë ‑yö bɔ‑ ‑ta 'yö‑ pö‑ ‑dhɛ: «'Bha 'dho "gbʋ bɔ, dhebhɔnë!»
LUK 7:14 'Yö ꞊yɔɔn mɛ ꞊gee bha‑ "sɔɔ, 'yö ö ‑kɔ ‑ya ‑bha. 'Yö 'mɛ 'wo gun‑ bun sië bha 'wo wo bo 'wo 'daɔnnu, 'yö‑ pö: «'Nëglɔɔnnë, ‑bhö "wlü, ma ꞊në 'a‑ pö!»
LUK 7:15 ꞊Dhɛ 'ö ꞊yaa‑ pö "dhʋ̈, 'yö mɛ bha 'ö ꞊wlü 'ö ‑ya ö ‑gɛan, 'yö zun dhiang zë ‑sü ‑bha. 'Yö Yesu ‑ya sü 'ö‑ nu‑ dhe ‑dhɛ.
LUK 7:16 'Yö "suʋ̈ 'dhö ‑da mɛ 'wo gun mü bha‑ ‑nu ꞊gban "pɛpɛ 'gü, 'yö 'wo ‑ya Atanna 'tɔ bhɔ ‑sü ‑bha 'wo‑ pö: «Atanna ꞊ya ö ‑wʋdhiʋ̈loomɛ 'kpii‑ do bɔ kwa ‑dhɛ, ‑a ‑zʋ ꞊ya ‑bö (Izraɛdhö ‑mɛ ‑nu 'ö yi sü 'ö yi ‑ya ‑dɩ ‑ta ö ‑bha 'ka) bha yi ‑wɔn ‑ta.
LUK 7:17 'Wɔn 'ö Yesu ‑ya ‑kë "dhʋ̈ bha, 'yö‑ ‑taɔng ‑yö dho 'ö ꞊mɔɔ Izraɛdhö ‑sɛ ꞊gban "pɛpɛ 'gü waa‑ ‑züzü ‑dhɛ ‑nu 'dhö.
LUK 7:18 'Yö 'wɔn ‑nu 'ö Yesu gun‑ kë sië bha Zan ‑bha ꞊klang ‑nu 'wo dho 'wo‑ ꞊gban ‑gɛn dɔ‑ ‑dhɛ.
LUK 7:19 'Yö Zan ‑ya mɛ ꞊plɛ ‑dhɛ 'yö‑ ‑nu bɔ Yesu "piʋ̈ kö ‑wa dhɛɛ" 'kpɔ ‑wa pö: «'Mɛ 'wo ‑ya ‑gɔ bha yö ‑mü yö ꞊në‑ 'ka ‑ee, "ɛɛn ‑wo ‑tun ꞊kö dɔ mɛ "wɛɛ 'bha ‑gɔ ‑ee?»
LUK 7:20 ꞊Dhɛ 'ö ꞊wa 'dho ꞊wa ꞊loo mü, 'yö 'wo‑ pö Yesu ‑dhɛ: «Zan Mɛzumɛ ‑yö yi ‑bɔ i "piʋ̈ kö 'yi i dhɛɛ" 'kpɔ ꞊dhɛ 'mɛ 'yi ‑ya ‑gɔ bha yö ‑mü i 'ka ‑ee, "ɛɛn yi ‑tun ꞊kö ‑ya mɛ "wɛɛ 'bha ‑gɔ ‑ee?»
LUK 7:21 ‑Wo ‑to ‑dhɛ do bha‑ 'gü, 'yö Yesu ‑yö mɛ 'gbɛ dha ‑a ‑nu ‑bha "yua ‑nu oo, ‑a ‑nu ‑bha ꞊niɔɔdhɛ ‑nu waa "yina yaa ‑nu ‑gɔ, 'yö "yanwlümɛ 'gbɛ "yan "dhiʋ̈ ‑pʋ.
LUK 7:22 'Yö dhɛɛ" bha‑ ‑yɔ bɔ‑ ‑nu ‑gɔ 'ö‑ pö: «'Wɔn 'ö ka "yan ‑ya yö 'ö ka "tʋ ‑yö ‑da 'gü bha, ‑ka 'dho 'ka‑ ‑gɛn dɔ Zan ‑dhɛ kö 'ka‑ pö‑ ‑dhɛ ꞊dhɛ: «"Yanwlümɛ ‑nu ‑wo ‑dhɛ yö sië, 'ö ‑gɛnloomɛ ‑nu 'wo "ta sü, ꞊weeyuamɛ ‑nu ‑wo kë sië "klʋ̈ʋ̈klʋ̈, 'ö "tʋwlümɛ ‑nu 'wo 'wɔn ma, 'ö 'mɛ ꞊wa ga 'wo ‑bö sië, 'ö 'wo Atanna ‑bha naɔ ‑së bha‑ dɔ sië ‑wëëmɛ ‑nu ‑gɔ.
LUK 7:23 Mɛ "ʋʋ mɛ 'ö 'mii kë ꞊dhɛ ‑a ‑gɛn "dhiʋ̈ ‑zuö ‑bha ‑gwë 'dhö Atanna ‑bha zian ‑ta kö ‑yö ‑pö ‑a ‑wɔn 'gü, kö‑ ‑mɛ ‑bha ‑së.»
LUK 7:24 ꞊Dhɛ 'ö 'mɛ 'ö Zan ‑ya ‑nu bɔ bha ꞊wa 'dho, 'yö Yesu ‑yö zun dhɛɛ" 'kpɔ ‑sü ‑bha 'mɛ 'wo gun mü bha‑ ‑nu ‑gɔ Zan ‑bu 'gü 'ö‑ pö: «"Tʋngtadhɛ 'ö Zan gun‑ 'gü bha, ‑më ꞊në 'ka kë dho‑ ‑ga ‑dhɛ 'gü mü bha? ‑Kaadhüga 'ö "tɛɛ ‑ya ‑vin 'ö dho‑ 'ka ꞊ni 'ö dho‑ 'ka ꞊ni yö ‑mü ‑ee?
LUK 7:25 "Ɛɛn mɛ 'bha 'ö sɔ ‑së ‑yö gun‑ ‑bha yö ‑mü ‑ee? "Ɛɛn ‑më ꞊në 'ka kë dho‑ ‑ga ‑dhɛ 'gü? ‑Ka ‑dhɛ ‑ga! 'Mɛ 'ö sɔ ‑së 'dhö‑ ‑nu ‑bha 'ö 'wo ‑tosɛa ‑së kë sië, ‑wo ‑kë ‑gblüdëdhɛ ‑kɔ ‑nu ꞊në‑ 'gü.
LUK 7:26 ‑Më ꞊në 'ka kë dho ‑ga ‑dhɛ 'gü 'sa? Atanna ‑wʋdhiʋ̈loomɛ ‑ee? A‑ ‑pö ka ‑dhɛ ꞊ma ꞊iin, ‑a yöö ‑zian ‑zë ꞊bhlëë‑ 'kpii‑ Atanna ‑wʋdhiʋ̈loomɛ ‑bha.
LUK 7:27 'Mɛ 'ö Atanna ‑ya ‑dhiang zë ö ‑gɔ 'sëëdhɛ 'gü 'ö‑ pö‑ ‑bha ꞊dhɛ: ‹‑Bhö ‑dhɛ ‑ga, 'ma mɛ bɔ i "dhiʋ̈ kö ‑yö i ‑bɔ ‑ta ‑zian ‑pë kë bha 'yö bha.›
LUK 7:28 A‑ ‑pö ka ‑dhɛ kpɛnngdhö ꞊dhɛ: Mɛ "pɛpɛ 'kö dhebhɔ ‑ya ‑nu kpɔ, ‑a mɛ 'bha 'kö‑ ‑duɛ dho kë 'kpii‑ kö ‑yö ziö Zan ‑bha ‑ta 'yaa 'dhö, "kɛɛ 'sa kö 'mɛ 'ö mɛ "bhlëngsü 'ka Atanna ‑bha ‑gblüdëdhɛpö 'gü, yö ‑zë ‑duɛ ‑yö 'kpii‑ Zan ‑zë ‑bha.»
LUK 7:29 'Sa mɛ "pɛpɛ 'kö 'wo Zan dhiang zë ‑dhɛ yö, aa" ꞊ni 'niisɔngkunmɛ ‑nu ‑zian ‑wo kë 'dhang ‑bho ‑wʋ "dhiʋ̈ 'ö 'wo tɛanwɔn nu Atanna ‑dhɛ, 'ö 'wo ‑wɩ ‑bha kö ‑yö wo ‑go 'wɔn yaa 'gü ‑zu bho.
LUK 7:30 "Kɛɛ Fadhiziɛn ‑nu waa‑ Zuifö ‑nu ‑bha 'tɔnggɔmɛ ‑nu ‑zë 'wii‑ ‑yɔ bɔ, 'wii "wɩ‑ ‑bha kö Zan ‑yö wo "zu. Yö ꞊në‑ ‑wɔn 'gü, 'yö ‑a ‑nu dha 'ö Atanna yöö‑ wo 'nu bha 'wo wo ‑dɩ ꞊fië ‑sü 'ka‑ 'gü.
LUK 7:31 'Yö go mü 'ö‑ pö: «꞊Ya kë "dhʋ̈ kö 'mɛ 'wo ꞊dɛɛ ‑yën ya‑ 'gü, ‑a ‑dho ‑a ‑nu ‑zɔn ‑më ꞊në‑ 'ka?
LUK 7:32 ‑A ‑nu ꞊tɛni‑ ‑kë ꞊dhɛ nuë" ‑nu 'wo ‑ya ‑sü 'ka "dhɛɛ 'kpii‑ 'gü, 'wo dhiang zë sië wo 'ko ‑dhɛ ‑a ‑nu 'dhö ꞊dhɛ: «'Ya "tan bho ka ‑dhɛ kö 'ka‑ kë, "kɛɛ 'kii "wɩ‑ ‑bha kö 'ka "tan kë. Kaa do bha 'ya "gbʋ bɔ 'zü ka ‑dhɛ, "kɛɛ 'kii "gbʋ bɔ!
LUK 7:33 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ ꞊dhɛ 'ö Zan Mɛzumɛ ꞊ya nu "kpʋng ꞊taa 'ö 'yii we mü, 'ö 'yii ‑bhöpë ‑bhö, 'yö 'ka‑ pö‑ ‑bha ꞊dhɛ "yina yaa ‑ya 'gü.
LUK 7:34 ꞊Dhɛ 'ö mang Mɛgbömɛ 'ma nu 'zü 'ö ma ‑zë 'mii we waa‑ ‑bhöpë ‑nu ‑kian 'to, 'yö ka‑ pö n ‑bha ꞊dhɛ we mü ‑dudu ‑mü n 'ka. "Ɛɛn 'zü a ‑nëng 'niisɔngkunmɛ ‑nu "ɛɛn Atanna 'tɔ zë ‑mɛ ‑nu ‑bha!
LUK 7:35 "Kɛɛ yö ꞊në‑ ꞊gban 'gü, 'mɛ 'kö 'wo 'wɔndɔmɛ ‑nu 'ka, ‑a ‑nu ꞊gban "pɛpɛ ‑wo kë‑ 'wɔn ‑dɔ ꞊dhɛ zian 'ö Zan ‑ya ‑zɔn bha ꞊në tɛan‑ ‑zian 'ka.»
LUK 7:36 Yi do 'ka 'yö Fadhiziɛn mi do ‑yö Yesu ‑dhɛ ‑bhöpë 'ka ö ‑gɔ 'kɔɔdhö. 'Yö dho. ꞊Dhɛ 'ö ꞊ya 'dho ꞊ya ꞊loo mü, ('yö 'waanu ꞊dhɛ ‑kɔ 'wo‑ ‑kë 'ka wo wɔ ‑kɔ 'gü ‑a 'dhö), 'yö 'wo zun pë ‑bhö ‑sü ‑bha,
LUK 7:37 "kwɛɛkwɛɛkëdhe do 'bha ‑yö ‑gun 'pödhɛ bha‑ 'gü. ꞊Dhɛ 'ö ꞊ya Yesu ‑kë Fadhiziɛn mi bha‑ ‑gɔ 'kɔɔdhö ‑wɔn ma, 'yö dho mü kö ‑sangdhe do 'ö ‑dhasiklɔɔ "yi 'dhö‑ pa ‑sü 'ka ‑ya ‑gɔ.
LUK 7:38 ꞊Dhɛ 'ö ꞊ya 'dho ꞊ya ꞊loo mü, 'yö bɔ Yesu ꞊kee‑ ‑ta, 'yö dho‑ ‑gɛn "piʋ̈ 'yö zun ö kpiö 'gü, 'yö ‑ya "gbʋ bɔ ‑sü ‑bha, 'yö‑ "yanyi ‑yö zun ꞊wɛnng ‑sü ‑bha Yesu ‑gɛn ‑ta ‑wla ‑wla ‑wladhö, 'yö ö ‑gɔ "gblëënu 'yö ö ‑gɔdhɛ kun 'ö‑ ‑ziö ö "yanyi bha‑ ‑bha, 'yö ö "dhi ꞊gblü Yesu ‑gɛn bha‑ ‑bha 'yö‑ ‑bha mü, 'yö ‑dhasiklɔɔ "yi bha‑ ꞊wɛnng‑ ‑gɛn ‑ta.
LUK 7:39 ꞊Dhɛ 'ö Fadhiziɛn mi 'ö Yesu ‑dhɛ bha 'ö 'wɔn bha‑ ‑dhɛ yö, 'yö ‑ya ö ‑zʋ 'gɔn ‑sü ‑bha 'ö‑ pö: «꞊Ya kë ꞊dhɛ 'mɛ 'ö ya ‑yö Atanna ‑wʋdhiʋ̈loomɛ ꞊dede 'ka 'nu, kö ‑yö ‑dho dhebhɔ 'ö kë sië‑ ‑bha bha‑ dɔ, 'ö‑ suu dɔ ꞊dhɛ ꞊niëdhe ‑mü.
LUK 7:40 "Kɛɛ Yesu ‑yö ‑zʋgɔndhe bha‑ ‑to ‑a "gblʋ̈ʋ̈dhö 'ö‑ pö‑ ‑dhɛ: «Simɔ, ‑yö n "piʋ̈ ꞊dhɛ 'a 'wɔn do 'bha pö i ‑dhɛ.» 'Yö Simɔ ‑ya pö‑ ‑dhɛ: «N Dëmɛ, n "tʋ ‑yö i ‑wʋ ‑bha, ‑a pö!»
LUK 7:41 'Yö‑ pö: «Simɔ, gɔndë do 'bha ꞊në gun 'yö "pɔ dɔ mɛ ꞊plɛ ‑bha. 'Yö 'wëë‑ "gblü ‑kaɔng ꞊plɛ "pɔ dɔ mɛ do bha, 'yö dho 'yö 'wëë‑ "gblü ꞊plɛ nu mɛ do 'dhɛ to bha‑ ‑dhɛ.
LUK 7:42 ꞊Dhɛ 'ö "pɔ bha ꞊ya ꞊gwëë, 'ö ꞊yaa‑ 'wɔn dɔ ꞊dhɛ ‑a bho "sɩ 'yaa‑ ‑nu ‑dhɛ, 'yö‑ to "dhʋ̈ 'ö‑ ꞊gbaɔ‑ ‑nu ‑gɔ.» 'Yö Yesu ‑ya pö Simɔ ‑dhɛ: «'Ma i dhɛɛ" 'kpɔ: Mɛ ꞊plɛ 'wo‑ ‑nu ‑mawɔn to bha, ‑a de ‑sü 'pö 'mɛ 'ö‑ ‑nu ‑mawɔn to bha‑ ‑dhɔ dho‑ kë 'ö ‑ziö mü?»
LUK 7:43 'Yö Simɔ ‑ya ‑yɔ bɔ 'ö‑ pö: «A n ‑zʋ ‑gɔn ꞊dhɛ 'mɛ 'ö‑ ‑bha 'wëë‑ gun 'kpii‑ bha yö ‑mü.» 'Yö Yesu ‑ya pö‑ ‑dhɛ: «‑Yö "dhʋ̈ tɛan‑ 'ka, Simɔ!»
LUK 7:44 ꞊Dhɛ 'ö ꞊yaa‑ pö "dhʋ̈, 'yö ꞊slëë ö 'gü 'ö ö wë bɔ dhebhɔnë bha‑ ‑ta 'ö‑ pö Simɔ ‑dhɛ 'zü ‑deewo 'ö‑ pö: «‑Bhö ‑dhɛ ‑ga! 'Bha dhebhɔ ya yö ‑ee?» Nu 'a‑ wo i ‑gɔ 'kɔɔdhö ya 'bhii n ‑gɛn ‑bha "zu (꞊dhɛ ‑kɔ 'kwa‑ ‑kë 'ka kwa wɔ ‑kɔ 'gü bha‑ 'dhö), "kɛɛ yö ‑zë ꞊ya n ‑gɛn ‑bha "zu ö "yanyi 'ka ꞊ya ö wundhɛ ziö‑ ‑bha.
LUK 7:45 'A ‑da i ‑gɔ 'kɔɔdhö 'bhii ‑së kë n ‑bha kö 'i ꞊loo n ‑bha (꞊dhɛ ‑kɔ 'kwa kwa 'ko ꞊tua bho‑ 'ka kwa wɔ ‑kɔ 'gü bha‑ 'dhö), "kɛɛ 'a ‑da ‑zë wo 'kɔɔdhö yö ꞊dɛɛ, yö ‑zë 'ö zun ‑loo n n ‑gɛn ‑bha ‑sü 'ö‑ bha 'yö‑ ‑bha.
LUK 7:46 'Bhii ‑dhasiklɔɔ "yi zun n ꞊gbin‑ kö ‑yö kë ꞊dhɛ 'bha ꞊bhlëë ‑ya n ‑bha (꞊dhɛ ‑kɔ 'ö‑ 'ka kwa wɔ ‑kɔ 'gü ‑a 'dhö), "kɛɛ yö ‑zë ꞊ya ‑dhasiklɔɔ ꞊wɛnng n ‑gɛn ‑ta.
LUK 7:47 Yö ꞊në‑ ‑wɔn 'gü, Simɔ, 'yö 'a dho‑ pö i ‑dhɛ ꞊dhɛ 'pë 'ö ‑kë 'yö n ‑dhɔ ‑yö dhebhɔnë bha‑ ‑kë "gbɩɩ‑ "dhʋ̈ bha‑ ‑gɛn ‑mü ꞊dhɛ 'wɔn yaa "pɛpɛ 'ö‑ ‑kë 'ö‑ ‑naa 'yaa gun bha‑ ꞊gban bian ꞊ya 'go‑ ‑bha "pɛɛpɛdhö; ‑a ‑gɛn ‑mü ꞊dhɛ 'mɛ 'wo‑ ‑mawɔn to 'wɔn 'dɛdɛ 'gü, 'yö‑ mɛ ‑dhɔ ‑ya ‑kë 'dɛdɛ.»
LUK 7:48 'Yö‑ pö dhebhɔ bha‑ ‑dhɛ: «Dhebhɔnë, 'bɔn 'ö gun i ‑bha bha‑ ꞊gbaan 'go i ‑bha!»
LUK 7:49 ꞊Dhɛ 'ö ꞊yaa‑ pö "dhʋ̈, 'yö 'mɛ wɛng‑ ‑nu 'wo gun pë ‑bhö sië wo "kwëë bha 'wo zun wo ‑zʋ 'gɔn ‑sü ‑bha 'wo‑ pö: «'Mɛ 'ö ya de suu ‑mü ꞊zɔɔ 'yö mɛ ‑nu ‑bha 'wɔn yaa ‑nu ꞊gban ‑mawɔn to ya ‑oo?»
LUK 7:50 "Kɛɛ 'yö Yesu 'yii ö "tʋ kë yö ‑zë ‑bha, 'yö‑ to "dhʋ̈ 'ö‑ pö dhebhɔnë bha‑ ‑dhɛ: «‑Bhö i ‑bha dho wo i ‑ta "puu 'ka, i ‑bha 'dhang ‑bho n "dhiʋ̈ ‑sü ꞊në i dha bha.»
LUK 8:1 ꞊Dhɛ 'ö ꞊ya kë "dhʋ̈, 'yö Yesu ‑yö ‑da 'pö‑ "gblʋ̈gblʋ̈ ‑nu waa‑ 'sɛɛnnë ‑nu ‑bhiëë "piʋ̈, Atanna ‑bha naɔ ‑së 'ö ‑gban ‑a ‑bha ‑gblüdëdhɛ ‑bha bha‑ dhiang zë ‑sü 'ka. Kö‑ ‑bha ꞊klangdhiʋ̈ ‑nu ‑kaɔng do ga ꞊plɛ bha ‑wa ꞊keng‑ waa‑ dhong ‑nu 'bha ‑nu 'ö‑ ‑nu dha "yua ‑gɔ, "ɛɛn 'ö "yina yaa ‑kë ‑nu 'gü bha‑ ‑nu 'dhö. Dhong ‑nu bha ‑wa mɛ do ‑dhɛ Madhi 'ö go 'pödhɛ 'wo‑ ‑dhɛ Madadha bha‑ 'gü. Madhi bha ꞊në "yina yaa "saɔplɛ ‑yö gun‑ 'gü, 'yö Yesu ‑ya bho‑ 'gü.
LUK 8:3 'Yö Zanö, 'ö ‑kë ‑gblüdë Edhodö ‑bha "kwɛangɔdhiʋ̈ 'wo‑ ‑dhɛ Suza bha‑ ‑bha dhebhɔ 'ka, 'yö Sizanö waa‑ mɛ kpö 'bha 'ö woo ‑dɩ 'pö 'wo gun waa‑ ‑bha ꞊klang ‑nu ‑a ‑nu ‑ta 'kun sië ‑a ‑nu ꞊slɔɔpë ‑nu 'ka bha‑ ‑nu 'dhö.
LUK 8:4 ꞊Dhɛ 'ö yi do 'ka kö mɛ ꞊ya 'go 'pö‑ ‑nu 'gü 'do 'do 'ka ꞊wa bho wo 'ko ‑ta "tʋ ‑to ‑a ‑wʋ ‑bha ‑dhɛ 'gü, 'yö "gwënng do ‑da ‑nu ‑dhɛ 'ö‑ pö:
LUK 8:5 «Yi do 'ka 'yö gɔndë do ‑yö ꞊wlü 'yö dho ‑mlü bɔ ‑dhɛ 'gü ö ‑gɔ 'bhlaa‑. ꞊Dhɛ 'ö ꞊ya 'dho ꞊ya ꞊loo mü, 'yö zun ‑mlü ‑pɛn ‑sü ‑bha. ‑A ‑pɛn 'ö‑ wo bha 'yö‑ ga 'bha ‑nu 'wo ꞊wɛnng zian ‑gloo "piʋ̈ ('yö "sɛ 'yii kpa‑ ‑ta), 'yö zian ziö ‑mɛ ‑nu 'wo taa‑ ‑ta, 'yö ‑maa ‑ya ‑kpɛa ‑bhö.
LUK 8:6 'Yö‑ ‑kɔ "pɛan 'bha ‑yö ꞊wɛnng ‑gwë 'saa‑ "dhiʋ̈, ꞊dhɛ 'ö ꞊ya bhɔ 'yö "kpɛaga "yi 'ö 'yaa gun "sɛɛdhö mü bha‑ ‑wɔn 'gü.
LUK 8:7 'Yö‑ ‑kɔ "pɛan 'bha ‑yö ꞊wɛnng "glɛɛn ‑kpɔɔ 'gü, 'yö bhɔ, "kɛɛ waa‑ "glɛn ‑wo ‑bhɔ 'ö 'wo ꞊kpɛa wo "kwëë, 'yö "glɛn faan ‑yö ‑kë ‑ta 'gbiin‑ 'yö‑ zë.
LUK 8:8 'Yö‑ ‑kɔ "pɛan 'dhɛ 'ö to 'ö ꞊wɛnng "sɛ ‑së 'gü, 'yö bhɔ faan ꞊dede 'ka 'yö ‑dhi, 'yö‑ ‑kpaaga do ga‑ ‑kë ‑bha këng do.» ꞊Dhɛ 'ö ꞊ya ö bo "gwënng bha‑ ‑da ‑sü 'ka "dhʋ̈, 'yö ö ‑wʋ "dhiʋ̈ ꞊wlü 'ö‑ pö: «'Mɛ 'ö 'wɔn 'gü ma ‑mɛ 'ka ‑ya 'gü ma!»
LUK 8:9 ꞊Dhɛ 'ö ꞊ya kë "dhʋ̈, 'yö‑ ‑bha ꞊klang ‑nu 'wo ꞊yɔɔn‑ "sɔɔ 'wo‑ dhɛɛ" kpɔ 'wo‑ pö: «"Gwënng 'i‑ ‑da bha‑ 'klɔɔ‑ ‑mü ‑më 'ka?»
LUK 8:10 'Yö‑ ‑yɔ bɔ‑ ‑nu ‑gɔ 'ö‑ pö: «Ka ‑zë Atanna ‑bha ‑gblüdëdhɛ 'gü ‑wɔn ‑nu 'ö gun ‑gblɛn 'kpɔ ‑sü 'ka 'ö mɛ 'bha 'yaa gun‑ dɔ sië bha ꞊yaa‑ ‑ta "pʋ ka ‑dhɛ, "kɛɛ mɛ ‑kpɛa 'kö 'wo to ‑a ‑nu ‑bha ‑zë, a ‑dho ‑dhiang zë‑ ‑nu ‑dhɛ "gwënng ꞊në‑ 'gü, kë "dhʋ̈ kö‑ ‑nu "yan ‑ya ‑dhɛ yö "kɛɛ kö 'wa 'dho‑ dɔ, kö‑ ‑nu "tʋ ‑ya ma, "kɛɛ kö 'wa 'dho‑ 'klɔɔ‑ dɔ tongtongdhö.
LUK 8:11 "Kɛɛ "gwënng 'a‑ ‑da bha‑ 'klɔɔ‑ ꞊nɛ: Atanna ‑wʋ bha ꞊në ꞊dhɛ ‑mlüga 'wo‑ bɔ bha‑ 'dhö.
LUK 8:12 ‑A 'dhɛ 'ö ꞊wɛnng zian ‑gloo "piʋ̈ bha ꞊në ꞊dhɛ 'mɛ 'wo Atanna ‑wʋ ma 'ö ꞊ya 'go mü 'ö Sɔtraan ‑yö nu 'ö‑ bho‑ ‑nu ‑zʋ ‑bha, kë "dhʋ̈ kö 'wa 'dho 'dhang bho‑ "dhiʋ̈ 'ö 'wo dha bha‑ ‑nu 'dhö.
LUK 8:13 ‑A 'dhɛ 'ö ꞊wɛnng ‑gwë saa‑ "dhiʋ̈ bha ꞊në ꞊dhɛ 'pö ꞊dhɛ 'mɛ ꞊wa Atanna ‑wʋ ma, 'ö 'wo sa‑ ‑ta 'wo‑ kun wo faan 'ka, "kɛɛ 'ö‑ yun 'yaa ziö‑ ‑nu 'gü, 'ö 'wɔn "gbɩɩ‑ 'në 'bha ꞊ya ‑da ‑nu ‑ta kö ꞊wa "tʋ̈ng 'në 'bha kë 'mü 'wo ‑kan Atanna ‑wʋ ‑bha bha‑ ‑nu 'dhö.
LUK 8:14 ‑A 'dhɛ 'ö ꞊wɛnng "glɛn 'gü bha ꞊në ꞊dhɛ 'pö ꞊dhɛ 'mɛ 'wo Atanna ‑wʋ ma, 'ö 'wo 'dhang bho‑ "dhiʋ̈, "kɛɛ 'yö "kpʋngtaapë ‑nu 'ö ‑gban ‑zʋgɔndhe ‑nu oo, ꞊naɔ ‑dhɔ ‑nu oo, ꞊niidadhe kë ‑sü ‑nu 'ö "kpʋng ꞊taa yö ‑a ‑wɔn ‑bha bha 'ö‑ ‑nu ‑kan Atanna ‑bha 'yö 'wo‑ ‑wʋ 'ö‑ ma bha‑ ꞊trɔɔn 'yaa kë‑ ‑nu ‑bha bha‑ ‑nu 'dhö.
LUK 8:15 ‑A 'dhɛ 'ö ꞊wɛnng "sɛ ‑së 'gü bha ꞊në ꞊dhɛ 'pö ꞊dhɛ 'mɛ 'wo Atanna ‑wʋ ma, 'ö 'wo ‑wɩ ‑bha zuë" ‑së 'ka 'ö 'wo ‑kplü ‑bha wo faan ꞊gban 'ka, 'ö 'wo ꞊trɔɔn ‑kë ‑dhɛ zuësɛadhɛ 'gü ‑a ‑nu 'dhö.
LUK 8:16 ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka, 'yö "gwënng ‑dee 'bha ‑da 'zü‑ ‑nu ‑dhɛ 'ö‑ pö: «Mɛ 'bha 'yaa ‑dhangbha dɔ 'yaa 'dho 'yaa 'tɛa‑ kpa‑ ‑ta, "ɛɛn 'yaa dho 'yaa‑ ‑da "gbang ꞊wlöö, "kɛɛ ‑ya ‑sü 'ö‑ dɔ ‑dhangbha ‑dɔtapë ꞊në‑ ‑ta kë "dhʋ̈ kö mɛ ꞊ya ‑da 'kɔɔdhö kö ‑yö ‑dhɛ yö.
LUK 8:17 ‑A ‑gɛn ‑mü ꞊dhɛ pë "ʋʋ pë 'dhɛ 'kö ‑bin 'gü, ‑a ꞊gban‑ ‑dho ‑wo "yɛa‑, ‑a 'bha 'yii 'dho 'to ‑gblɛn 'kpɔ 'gü, 'sa 'wɔn "pɛpɛ 'ö‑ 'gü 'dhö tii, ‑a ꞊gban ‑ta ‑dho "pʋ 'ö ‑ya 'yënng‑ ‑dhɛ.
LUK 8:18 ꞊Dhɛ 'ö "dhʋ̈, ‑ka ka ‑zʋ 'to ka ‑dɩ 'gü ka "tʋ ‑to 'wɔn ‑bha ‑kɔ 'gü; ‑a ‑gɛn ‑mü ꞊dhɛ 'mɛ 'ö pë 'dhö‑ ‑gɔ 'ö‑ ‑ziö 'gü ‑ziö ꞊në 'wo dho‑ ‑mɛ taa kë, "kɛɛ 'mɛ 'kö pë 'bha 'yaa‑ ‑gɔ, 'ö‑ sɛɛn" 'në 'dhɛ ‑zian 'ö‑ ‑gɔ 'yaa‑ ‑ziö 'gü ziö bha, ‑a 'dhɛ 'në ö ‑zʋ 'gɔn sië‑ ‑dhɛ bha, ‑wo ‑dho ‑a 'sü‑ ‑mɛ ‑gɔ.
LUK 8:19 ‑Yö ‑to ‑dhɛ bha‑ 'gü 'yö‑ dhe waa‑ dheebhang ‑nu 'wo nu‑ ꞊keng‑. "Kɛɛ ‑kɔ 'wo dho‑ kë‑ 'ka kö ‑wo ‑kpan ‑bha, 'wii‑ ‑kɔ yö mɛ "bhɩɩ‑ "dhaa 'wo gun‑ ꞊klëën ‑sü 'ka‑ ‑zü bha‑ ‑wɔn 'gü.
LUK 8:20 'Yö 'wo nu 'wo‑ pö Yesu ‑dhɛ: «I dhe waa‑ i dheebhang ‑nu ꞊wa nu, ‑wo "kpɛnngdhö, ‑wa "piʋ̈ ꞊dhɛ 'ka ka 'ko yö.»
LUK 8:21 "Kɛɛ 'yö Yesu ‑ya ‑yɔ bɔ 'ö‑ pö: «N dheebhang 'bha 'yaa 'dhö kö 'yii kë 'mɛ 'kö 'wo wo "tʋ 'to Atanna ‑wʋ ‑bha 'wo‑ 'gü ‑wɔn ‑kë bha‑ ‑nu 'ka.»
LUK 8:22 Yi do 'ka 'yö Yesu waa‑ ‑bha ꞊klang ‑nu 'wo ‑da "kplagɔnë do 'gü, 'yö‑ pö‑ ‑nu ‑dhɛ: «‑Ka ‑kwa "yi "kan 'kwa bɔ "yi ꞊taama!» 'Yö 'wo ‑ziö.
LUK 8:23 ꞊Dhɛ 'wo 'dho sië, 'yö "tɛɛ ‑dha ‑ziisü ‑yö ‑ya ban ‑sü ‑bha ‑a ‑nu ‑bha "yi ‑ta mü, 'yö "yi 'dhö ‑ya "kplagɔnë bha‑ pa ‑sü ‑bha "wɛ ‑yaan ‑yaandhö, kö ꞊wa dɔ ‑dhëng yaa "dhiʋ̈, "kɛɛ 'kö Yesu ‑zë ‑yö yi ꞊në‑ zë sië.
LUK 8:24 'Yö‑ ‑bha ꞊klang ‑nu 'wo ꞊yɔɔn‑ "sɔɔ 'wo pa‑ ‑bha 'wo‑ pö: «Yi Dëmɛ, yi Dëmɛ, ꞊ya dɔ 'ya‑ ꞊zɔɔ ‑wa, ga ꞊ya dun kwa ‑ta ‑wa!» ꞊Dhɛ 'ö ꞊wa 'pa‑ ‑bha "dhʋ̈, 'yö ꞊wlü 'yö ꞊gbla "tɛɛ waa‑ "yi kpö kpö ‑nu 'wo gun ‑da sië‑ ‑nu ‑gɔ "kplagɔnë 'gü bha‑ ‑ta, 'yö "tɛɛ ‑yö bo ziö ‑sü 'ka, 'yö "yi ‑dɩ 'pö 'ö bo zɔn ‑sü 'ka, 'yö ‑dhɛ ‑ta ‑yö dɔ dingdhö.
LUK 8:25 ꞊Dhɛ 'ö ꞊ya bo ‑kë "dhʋ̈ ‑sü 'ka, 'yö‑ pö ö ‑bha ꞊klang ‑nu ‑dhɛ: «Ka ‑zʋ ‑yö n ‑dhɛ ‑dhɛ ꞊në 'mɛ 'sa?» "Kɛɛ 'ö gun "dhʋ̈ kö "suʋ̈ ‑ya ‑nu kë sië ꞊dedewo kö 'wɔn bha‑ 'wɔn ꞊yaa‑ ‑nu 'kɔn, 'yö 'wo ‑ya ‑a pö ‑sü ‑bha wo 'ko ‑nu ‑dhɛ 'wo‑ pö: «De suu ꞊në ya ꞊zɔɔ 'yö yö ‑zë 'ö ö faan ‑wɔ "tɛɛ waa‑ "yi ‑nu ꞊gban ‑ta 'yö 'wo‑ ‑wʋ ma ꞊ni ‑oo?»
LUK 8:26 'Yö 'wo dho 'wo ꞊loo ‑dhɛ 'wo gun dho sië‑ ‑bha Zedhazeni ‑sɛ 'ö Gadhidhe ‑sɛ "tʋ̈ng 'gü bha‑ 'gü bha‑ 'gü.
LUK 8:27 ꞊Dhɛ 'ö Yesu ꞊ya 'go "kplagɔnë 'gü ꞊ya zun "sia‑, 'yö mɛ do 'bha 'ö go 'pödhɛ bha‑ 'gü bha 'ö nu dɔ‑ ‑gɔ zian‑. Mɛ 'ö "dhʋ̈ bha "yina yaa kpö 'në 'bha ‑yö ‑gun 'gü. 'Ö gun "dhʋ̈ kö‑ yi ꞊ya ꞊gwëë kö 'yaa sɔ ‑da ö ‑bha, kö 'yaa wɔ 'kɔɔdhö 'zü ‑zianwo, kö ‑yö ‑wɔ bun ꞊taa ‑dhɛ ‑nu ꞊në‑ 'gü.
LUK 8:28 ꞊Dhɛ 'ö Yesu yö, 'yö ꞊gbla "gbɩɩ‑ 'ka, 'yö zun ö kpiö 'gü Yesu ‑dhɛ kö ‑ya pö sië "gbɩɩ‑ 'ka 'ö‑ pö: «Yesu, Atanna 'ö dhang‑ 'gü ‑a gbö, 'kwa ma mü? "Ɛɛn i ‑nu kö 'i n ‑wëëdhɛ bho ‑ee? ‑Bhö dɔ "gbɩɩ‑ bhɛa" ꞊në 'a‑ wo i ‑dhɛ, 'bha 'dho n ‑wëëdhɛ bho!»
LUK 8:29 ‑A pö 'ö‑ wo "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö Yesu ‑ya pö sië‑ ‑dhɛ ꞊dhɛ 'mɛ 'ö ö ‑yɛa kun‑ 'gü 'ö‑ yi ꞊ya ꞊gwëë bha ‑yö 'go‑ 'gü. 'Sa kö 'mɛ 'ö bha ‑kɔ 'yaa ꞊mɔɔ‑ ‑bha 'zü, kö ꞊waa‑ ‑lö lɔɔga ‑nu waa‑ ‑piö döngga ‑zian 'ka ‑a ‑gɛn ‑bha, ‑ya ‑kan 'ö "yina ‑nu bha 'wo‑ sü 'wo dho‑ 'ka "tʋngtadhɛ ‑nu 'gü.
LUK 8:30 'Yö Yesu ‑ya dhɛɛ" kpɔ 'ö‑ pö: «‑Wo i ‑dhɛ ꞊dhɛ?» 'Yö‑ pö: «‑Wo n ‑dhɛ ‹‑gblü "dhaa›»; ‑a ‑gɛn ‑mü ꞊dhɛ "yina ‑nu 'wo gun‑ 'gü bha ‑wo ‑gun 'gbɛ yaa wo.
LUK 8:31 "Kɛɛ kö ‑wo bhɛa" sië Yesu ‑dhɛ ꞊dedewo kö 'ya 'dho wo kë 'mɛ bha‑ 'gü 'ö‑ ‑nu bɔ ‑klɔng züziösü 'gü.
LUK 8:32 "Tʋ̈ng 'wo‑ kë sië‑ 'ka "dhʋ̈ bha kö ‑bhɔ kpö 'bha ‑yö ‑bhöpë mɔɔ‑ sië goo ‑bha ‑dhɛ 'bha 'gü ‑tɔn ‑bha mü. 'Yö "yina ‑nu bha 'wo ꞊bhɛa Yesu ‑dhɛ kö ꞊ya wo kë 'mɛ bha‑ 'gü ‑yö dɔ "gbɩɩ‑ ‑yö wo bɔ ‑bhɔ kpö bha‑ 'gü kö 'wo ‑da ‑a ‑nu 'gü. 'Yö Yesu ‑ya ‑nu bɔ mü.
LUK 8:33 'Yö "yina ‑nu bha 'wo go 'mɛ bha‑ 'gü, 'yö 'wo dho 'wo ‑da ‑bhɔ ‑kpluu bha‑ 'gü, 'yö ‑bhɔ ‑nu bha 'wo dɔ ‑bɛang ‑bha 'wo go‑ 'ka goo ‑bha ‑dhɛ bha‑ 'gü, 'yö 'wo dho 'wo drung dɔ "yi ‑ta "gbɛa 'ö gun mü bha‑ ꞊bhaa, 'yö "yi ‑ya ‑nu ꞊gban zë.
LUK 8:34 ꞊Dhɛ 'ö 'mɛ 'wo gun ‑bhɔ ‑kpluu bha‑ ‑gɔdhiʋ̈mɛ ‑nu 'ka bha 'wo 'wɔn bha‑ ‑dhɛ yö, 'yö 'wo dɔ ‑bɛang ‑bha 'wo dho‑ ‑taɔng 'ka 'pödhɛ bha waa‑ ‑züzüdhɛ ꞊gban "pɛpɛ 'gü.
LUK 8:35 'Yö mɛ ‑yö go ‑dhɛ ‑nu bha‑ 'gü 'wo nu 'wɔn bha‑ ‑dhɛ ‑ga ‑dhɛ 'gü. 'Yö 'wo dho 'wo ‑kpan 'mɛ bha‑ ‑bha kö ꞊ya kë "klʋ̈ʋ̈klʋ̈ ꞊ya sɔ ‑da ö ‑bha kö ‑yö ‑ya sië Yesu "sɔɔ, kö "yina yaa bha‑ ꞊gbaan 'go‑ 'gü dee" wo "pɛpɛdhö kö‑ "yan 'gü ꞊ya ꞊söng. ꞊Dhɛ 'wo‑ ‑dhɛ yö "dhʋ̈, 'yö "suʋ̈ 'dhö ‑da ‑a ‑nu 'gü.
LUK 8:36 'Yö 'mɛ 'kö wo ‑zë 'wo gun 'mɛ bha‑ ‑kë "klʋ̈ʋ̈klʋ̈ ‑dhɛ ꞊dede 'gü bha, ‑kɔ 'ö ‑kë 'ka 'yö 'mɛ 'ö "yina ‑kpaa ‑yö gun‑ 'gü bha 'ö dha, 'yö 'wo‑ ‑gɛn dɔ 'mɛ 'wo nu bha‑ ‑nu ‑dhɛ.
LUK 8:37 ꞊Dhɛ 'ö ꞊ya kë "dhʋ̈, 'yö "suʋ̈ 'dhö ‑da mɛ "pɛpɛ 'wo gun Zenezadhe ‑sɛ bha‑ 'gü bha‑ ‑nu ꞊gban "pɛpɛ 'gü ꞊dedewo, 'yö 'wo nu 'wo ꞊bhɛa Yesu ‑dhɛ kö ‑yö 'dho ‑yö 'go wo ‑gɔ "sɛ 'gü. ꞊Dhɛ 'ö ꞊ya kë "dhʋ̈, 'yö Yesu ‑yö ‑da "kplagɔnë 'gü 'yö ö yee ‑kë 'ö dho.
LUK 8:38 'Yö 'mɛ 'ö "yina yaa ‑yö gun‑ 'gü bha 'ö ꞊bhɛa‑ ‑dhɛ kö 'ö 'to‑ ꞊keng‑. "Kɛɛ 'yö 'yii "wɩ‑ ‑bha, 'yö‑ pö‑ ‑dhɛ:
LUK 8:39 «‑Bhö 'dho i ‑gɔ 'kɔɔdhö kö 'wɔn 'ö Atanna ‑ya ‑kë i ‑dhɛ bha 'i‑ ‑gɛn dɔ 'mɛ 'wo mü‑ ‑nu ‑dhɛ. 'Yö 'mɛ bha 'ö dho 'yö ‑da 'wɔn 'ö Yesu ‑ya ‑kë ö ‑dhɛ bha‑ ‑gɛn dɔ ‑sü 'ka 'pö‑ "piʋ̈.
LUK 8:40 ꞊Dhɛ 'ö ꞊ya ö "dhiʋ̈ yee kë 'ö ꞊ya "yi ‑ta "gbɛa 'ö Zenezadhe bha‑ "kan 'zü ‑deewo, ꞊ya 'dho ꞊ya ꞊loo ‑dhɛ 'wo "ta zü bho‑ ‑bha ‑blɛɛsü bha‑ 'gü kö mɛ ꞊gban "pɛpɛ "yan ‑ya ‑gɔ, kö mɛ "dhaa ‑yö dɔ sië‑ ‑gɔ mü,
LUK 8:41 'yö gɔndënë do 'ö ‑kë Zuifö ‑nu ‑bha Atanna ‑dhɔkëgükɔ ‑gɔmɛ 'ka 'wo‑ ‑dhɛ Zɛdhiusö bha 'ö nu‑ "piʋ̈, 'yö zun‑ ‑dhɛ ö kpiö 'gü, 'yö ꞊bhɛa‑ ‑dhɛ kö 'wo 'dho ö ‑gɔ 'kɔɔdhö.
LUK 8:42 ‑A pö 'ö‑ wo "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö‑ 'dhunë do 'ö‑ ‑gɔ, 'ö‑ ‑kwɛ ꞊ya ꞊mɔɔ ‑kaɔng do ga ꞊plɛ ‑nu ‑bha bha‑ 'gü 'yaa ‑së, kö ꞊ya wɔ 'ya‑. Yesu 'dhö gun 'dho sië mü "tʋ̈ng 'ö‑ 'gü bha, kö mɛbhɩɩdhe ‑ya ꞊keng‑ ‑yɛɛdhö, kö ꞊ya dɔ‑ ‑nu ‑kɔ "bhɔ 'gü sɔkɔtɔdhö.
LUK 8:43 'Mɛ 'wo gun‑ ꞊keng‑ "dhʋ̈ bha, dhebhɔnë do 'bha ‑yö ‑gun ‑nu kpö 'gü, 'ö‑ 'gü 'yaa gun ‑së. 'Ö gun "dhʋ̈ kö ꞊yɔɔn yën ‑yua 'ö zun‑ ‑bha ‑a ‑kwɛ ꞊ya kë ‑kaɔng do ga ꞊plɛ. Kö‑ ꞊kwɛɛ ꞊gbaan ꞊wɛnng "yua bha‑ ‑pë kë ‑sü ‑ta ‑dhɔtrɔɔ ‑nu "piʋ̈, kö‑ ‑nu 'bha ‑kɔ 'yii ꞊mɔɔ‑ dha ‑sü ‑bha.
LUK 8:44 Dhebhɔ bha 'yö bɔ Yesu ꞊taama, 'yö ꞊yɔɔn‑ "sɔɔ, 'yö ö ‑kɔ ‑yɛ ‑bha sɔ "zɔ ‑bha. ‑Yö ‑to ‑dhɛ do bha‑ 'gü, 'ö‑ ‑bha "yua 'ö gun‑ ‑bha bha 'ö bo.
LUK 8:45 'Yö Yesu ‑ya pö: «‑Ka dɔ! De ꞊në‑ ‑kɔ pa n 'ka bha?» ꞊Dhɛ 'ö mɛ ꞊gban 'wo zun ‑dɩ ‑zë ‑sü ‑bha dhɛɛ" 'kpɔ 'ö‑ ‑kë bha‑ "dhiʋ̈, 'yö Piɛdhö ‑ya pö‑ ‑dhɛ: «'Yö dhɛɛ" suu ‑mɛɛ ꞊në 'i‑ kpɔ "dhʋ̈, n Dëmɛ? Mɛ "dhaa 'ö ma i ‑zü ya 'bhaa‑ yö ꞊në wo ‑ee?»
LUK 8:46 "Kɛɛ 'yö Yesu ‑ya ‑yɔ bɔ 'ö‑ pö: «A‑ ‑pö mɛ 'bha ꞊ya ‑kɔ 'pa n 'ka! ‑A ‑gɛn ‑mü ꞊dhɛ faan 'bha ꞊ya 'go n 'gü, 'ma‑ ‑dhɛ yö.»
LUK 8:47 ꞊Dhɛ 'ö dhebhɔnë bha ꞊yaa‑ 'wɔn dɔ ꞊dhɛ 'slüü‑ ꞊ya bho ö ‑ta, 'yö ‑ya ꞊zii ‑sü ‑bha, 'yö dho 'ö zun ö kpiö 'gü Yesu ꞊wlöö, 'yö 'wɔn 'ö‑ ‑wɔn 'gü, 'ö pa‑ ‑bha sɔ 'ka bha 'ö‑ ‑gɛn bho mɛ ꞊gban "pɛpɛ "yaan, 'yö ‑kɔ 'ö to‑ 'ka 'pö ‑dhɛ do bha‑ 'gü, 'ö‑ ‑bha "yua ‑yö bo bha 'ö‑ ꞊gban pö.
LUK 8:48 'Yö Yesu ‑ya pö‑ ‑dhɛ: «N "tɛado, i ‑bha 'dhang ‑bho n "dhiʋ̈ ‑sü ꞊në i dha bha, ‑bhö i ‑bha 'dho wo i 'flëë‑ 'gü!»
LUK 8:49 ‑Yö ‑to ‑a pö "dhʋ̈ ‑dhɛ 'gü, 'yö mɛ ‑yö go Zuifö ‑nu ‑bha ‑yakwëëkëgükɔ ‑gɔmɛ bha‑ ‑gɔ 'kɔɔdhö, 'yö‑ pö gɔndë bha‑ ‑dhɛ: «'Bha 'dho kwa Dëmɛ ziö "yɛ 'gü "wɛɛwɛɛ, i 'dhu 'yaa mü 'zü.»
LUK 8:50 "Kɛɛ ꞊dhɛ 'ö Yesu ‑yö ‑wʋ bha‑ ma, 'yö‑ pö ‑yakwëëkëgükɔ ‑gɔmɛ bha‑ ‑dhɛ 'ö‑ pö: «'Bha 'dho "suʋ̈, 'bha 'dhang bho n "dhiʋ̈, i 'dhu bha ‑yö ‑dho dha.»
LUK 8:51 ꞊Dhɛ 'ö dho 'ö ꞊loo mü, 'yii "wɩ‑ ‑bha kö mɛ 'bha ‑yö ‑da ö ꞊keng‑ 'kɔɔdhö kö 'yii kë Piɛdhö 'dhöö, Zan 'dhöö, Zakö waa‑ 'në bha‑ dhe waa‑ dë ‑nu ‑zë 'ka.
LUK 8:52 Kö 'mɛ 'kö 'wo gun mü, ‑a ‑nu ꞊gban "pɛpɛ ‑wo "gbʋ ꞊në‑ bɔ sië, 'ö 'wo ‑wëë ‑wʋ kpɔ 'në bha‑ ga ‑sü ‑wɔn 'gü. 'Yö Yesu ‑ya ‑nu ‑dhɛa ‑ga 'ö‑ pö: «'Ka 'dho "gbʋ bɔ, ‑a ‑gɛn ‑mü ꞊dhɛ ‑yö yi ꞊në‑ ‑zë 'yii ga.»
LUK 8:53 ꞊Dhɛ 'ö‑ pö "dhʋ̈, 'yö 'wo ꞊wɛɛ dɔ‑ ‑bha, ‑a ‑gɛn ‑mü ꞊dhɛ 'ö gun "dhʋ̈ kö ‑wa 'wɔn ‑dɔ 'kpakpadhö ꞊dhɛ ꞊ya ga.
LUK 8:54 "Kɛɛ ꞊dhɛ 'ö ꞊ya kë "dhʋ̈, 'yö Yesu ‑yö 'në bha‑ kun‑ ‑kɔ ‑bha, 'yö ꞊gbla "gbɩɩ‑ 'ka 'ö‑ pö: «'Nëdhiëngnë, ‑bhö "wlü!»
LUK 8:55 'Në bha ‑yö ‑to ‑dhɛ do bha‑ 'gü 'yö‑ 'nii‑ ‑sɛa ‑yö ‑da 'gü, 'yö ꞊wlü, 'yö Yesu ‑ya pö ‑wo nu‑ ‑dhɛ ‑bhöpë 'ka kö ‑ya ‑bhö.
LUK 8:56 'Yö 'wɔn bha‑ 'wɔn ‑yö 'në bha‑ 'kpɔmɛ ‑nu kɔn ꞊dedewo, "kɛɛ 'yö Yesu ‑ya pö‑ ‑nu ‑dhɛ 'wa 'dho‑ ‑gɛn dɔ mɛ 'bha ‑dhɛ.
LUK 9:1 Yi do 'ka 'yö Yesu ‑yö ö ‑bha ꞊klang ‑nu ‑kaɔng do ga ꞊plɛ bha‑ ‑nu ‑dhɛ ‑dhɛ do 'gü, 'yö "yina yaa ‑nu ‑kë mɛ 'gü ‑sü waa‑ "yuëdhi ‑nu ‑kë "klʋ̈ʋ̈klʋ̈ ‑sü ‑faan ‑da ‑nu 'gü.
LUK 9:2 ꞊Dhɛ 'ö ꞊yaa‑ kë "dhʋ̈, 'yö dho 'yö‑ ‑nu bɔ Atanna ‑bha ‑gblüdëdhɛ ‑dhiang zë ‑dhɛ 'gü mɛ ‑nu ‑dhɛ, kö ꞊wa 'dho ‑wo "yuëdhi ‑nu dha.
LUK 9:3 ꞊Dhɛ 'ö woo ziö, 'yö‑ pö‑ ‑nu ‑dhɛ: «Ka 'dho ‑sü 'ka, 'ka 'dho pë 'bha ‑pë 'bha 'kun ka ‑kɔ "piʋ̈ "ta ‑kpɔ 'ka ‑pë 'ka, 'ka 'dho ‑taadhü 'kun ka ꞊kwɛɛ‑, "ɛɛn ꞊kwɛɛsügüpë 'bha 'ya 'dho kë ka ‑gɔ, ‑bhöpë 'ya 'dho kë ka ‑ta, "ɛɛn 'wëëga 'ya 'dho kë ka ‑ta. ‑Ka 'dho ka ‑kɔ 'waa ka ‑gɛn 'ka, sɔ do 'ö ka ‑bha bha ꞊në ‑yö 'to ka ‑bha, 'ka 'dho‑ "wɛɛ bha 'sü.
LUK 9:4 ꞊Ya kë ꞊dhɛ 'ka 'dho, ꞊wa ka ꞊yëë bho 'kɔ 'ö‑ 'gü, ‑ka 'to yö ꞊në‑ 'gü kö ‑yö 'to "dhʋ̈ ‑yö zun‑ 'ka ka 'dho ‑yi ‑bha, kö 'ka 'dho 'go mü 'ö 'ka dho ka ꞊yëë bhɔ ‑dhɛ "wɛɛ 'bha 'gü ('ö ‑siö ka ‑dhɛng bhɔɔ ‑nu ‑dhɛ ka "piʋ̈).
LUK 9:5 ꞊Ya kë ꞊dhɛ 'ka ‑da 'pödhɛ 'ö‑ 'gü, ‑a 'gü ‑mɛ ‑nu 'wii "wɩ ka ꞊yëë bho ‑wɔn ‑bha, ‑ka 'go mü kö 'ka 'dho. "Kɛɛ ka 'dho ‑sü 'ka, 'ka ka ‑gɛn ‑bha ‑ma kö ‑bobi 'ö dɔ ka ‑gɛn ‑bha 'pö‑ bha‑ 'gü bha, ‑yö 'go ka ‑gɛn ‑bha kö ‑wa 'wɔn dɔ ꞊dhɛ ('wa wo ‑dɩ zë za 'ka Atanna wëëdhö dhia").»
LUK 9:6 ꞊Dhɛ 'ö ꞊ya ö bo ö ‑wʋ ‑kpɔ ‑a ‑nu ‑bha ‑sü 'ka ꞊dhɛ ‑kɔ bha‑ 'dhö, 'yö 'wo dho 'wo ‑da 'pö‑ ‑nu ‑bhiëë "piʋ̈, Atanna ‑bha ‑gblüdëdhɛ ‑wɔn ‑dhiang zë ‑sü 'ka, kö ‑wo "yua ‑nu bho sië mɛ ‑nu ‑bha.
LUK 9:7 ꞊Dhɛ 'ö Edhodö 'ö gun Gadhidhe ‑sɛ ꞊kɔɔnmɛ 'ka bha ꞊ya 'wɔn ‑nu 'wo gun kë sië bha‑ ‑nu ma, yöö ö ‑bha pö ‑kɔ 'ö‑ 'gü ‑a ‑kɔ 'yaa gun, ‑a ‑gɛn ‑mü ꞊dhɛ 'ö gun "dhʋ̈ 'kö 'mɛ 'wo Yesu ‑wɔn ‑dhiang zë sië ‑a ‑nu ‑wʋ 'yaa do. Kö mɛ 'bha ‑nu ‑wa pö sië ꞊dhɛ Zan Mɛzumɛ 'ö Edhodö ‑ya zë bha ꞊në ꞊ya ‑bö,
LUK 9:8 "ɛɛn Atanna ‑wʋdhiʋ̈loomɛ Edhi 'ö gun yi 'bha 'ka bha ꞊në ꞊ya nu, "ɛɛn 'zü ‑a ‑wʋdhiʋ̈loomɛ "wɛɛ 'bha ‑nu ꞊në‑ mɛ do 'bha ꞊ya ‑bö ‑deewo, (kö ‑wo "wɩ sië‑ 'ka "dhʋ̈ yuudhö).
LUK 9:9 "Kɛɛ kö Edhodö ‑zë ‑ya pö sië: «"Kɛɛ mɛ 'dhɛ 'kö 'wo‑ ‑dhiang "sinma zë sië ya de ‑mü 'sa "kɛɛ kö 'ma Zan ‑zë zë?» Kö ‑ya "slë mɔɔ‑ sië kö 'ö ‑kpan Yesu ‑bha.
LUK 9:10 ꞊Dhɛ 'ö Yesu ‑bha bɔmɛ ‑nu bha ꞊wa wo yee kë ꞊wa nu, 'yö 'wo ‑ya 'wɔn ‑nu 'wo‑ ‑kë mü ‑a ‑nu ‑gɛn dɔ ‑sü ‑bha ‑a ‑dhɛ. 'Yö‑ ‑nu sü, 'yö 'wo dho wo ‑dɩ ‑ta ‑dhɛ 'bha 'ö 'pödhɛ 'wo Bɛsaida ‑dhɛ ‑kë bha‑ "sɔɔ bha‑ 'gü.
LUK 9:11 ꞊Dhɛ 'ö mɛ "dhaa 'wo gun Yesu ꞊keng‑ bha 'wo‑ 'wɔn dɔ ꞊dhɛ ꞊ya 'dho, 'yö 'wo ‑ziö ꞊keng‑. ꞊Dhɛ 'ö ꞊yaa‑ ‑nu yö kö ‑wo nu sië ö mɔɔ‑ ‑dhɛ 'gü, 'yö ö ‑kɔ ‑ya ‑a ‑nu ‑dhɛng ‑bha. 'Yö zun Atanna ‑bha ‑gblüdëdhɛ ‑dhiang zë ‑sü ‑bha ‑a ‑nu ‑dhɛ, kö ‑yö mɛ 'dhɛ "yua 'dhö gun‑ ‑nu ‑bha 'ö‑ ‑nu ‑mawɔn 'dhö gun dha ‑sü ‑bha ‑a ‑nu dha sië 'pö.
LUK 9:12 ꞊Dhɛ 'ö ꞊ya dhiang zë 'mɛ bha‑ ‑nu ‑dhɛ "dhʋ̈, 'ö "bin 'dhö 'ma sië, 'yö‑ ‑bha ꞊klang ‑nu ‑kaɔng do ga ꞊plɛ bha 'wo ꞊yɔɔn‑ "sɔɔ 'wo‑ pö‑ ‑dhɛ: «Yi Dëmɛ, ‑bhö i ‑wʋ 'kpɔ 'mɛ 'wo ya‑ ‑nu ‑bha kö 'wo 'dho wo ꞊yëë ‑nu, waa‑ wo ‑bhöpë ‑nu mɔɔ‑ ‑dhɛ 'gü, 'pö‑ ‑nu "ɛɛn gbɛɛtadhɛ ‑nu 'wo kwa ‑züzü ya‑ ‑nu 'gü; ‑a ‑gɛn ‑mü ꞊dhɛ ‑dhɛ 'kwa‑ bha ya "tʋngtadhɛ ‑mü, 'kɔ 'bha 'yaa mü kö yöö 'to ‑bhöpë ꞊në‑ ‑bha.
LUK 9:13 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «Ka ꞊në ‑kaa ‑nu "dhiʋ̈ gba!» "Kɛɛ 'yö 'wo‑ ‑yɔ bɔ‑ ‑gɔ 'wo‑ pö: «'Bluu‑ bhɛ "sɔɔdhu waa‑ 'yuʋ̈ga ꞊plɛ ꞊në ꞊ya 'to, 'pë 'ö yi ‑gɔ ‑a ‑kpɛa ꞊në bha. ꞊Ya 'to yö ‑zë ‑bha kö 'dho ꞊në yii‑ wo mɛ ‑tu "tu ya‑ ‑nu ‑bhöpë 'dhɔ ‑dhɛ 'gü.
LUK 9:14 "Kɛɛ 'sa 'mɛ 'wo gun ‑dhɛ bha‑ 'gü, ‑wo ‑gun 'gbɛ ꞊dedewo tɛan‑ 'ka, ‑a ‑gɛn ‑mü ꞊dhɛ gɔɔn‑ ‑nu 'wo gun mü ‑wo ‑mɔɔ mɛ "gblü "sɔɔdhu ‑nu ‑bha (kö 'wii 'në ‑nu waa‑ dhong ‑nu ‑da mü). 'Yö Yesu ‑ya pö ö ‑bha ꞊klang ‑nu ‑dhɛ: «‑Kaa ‑nu dan ‑kaɔng "sɔɔdhu "sɔɔdhu kö 'ka‑ ‑nu ‑yɛa baa‑.»
LUK 9:15 'Yö 'wo‑ ‑nu ‑yɛa ꞊baa ꞊dhɛ ‑kɔ 'ö‑ pö‑ 'ka bha‑ 'dhö, 'yö‑ ‑nu ꞊gban "pɛpɛ 'wo wo ‑yɛa kun.
LUK 9:16 'Yö Yesu ‑yö ö ‑kɔ ‑da 'bluu‑ bhɛ "sɔɔdhu waa‑ 'yuʋ̈ga ꞊plɛ bha‑ 'gü, 'yö ö "yan "dhiʋ̈ ‑wlü dhang‑ 'gü, 'yö Atanna nuɛ" bho‑ ‑wɔn 'gü, 'yö‑ ‑nu "kplü "kplü bho, 'yö‑ nu ö ‑bha ꞊klang ‑nu ‑dhɛ kö ‑wa 'gü ‑gblü 'mɛ 'wo bha‑ ‑nu ‑ta.
LUK 9:17 'Yö 'wo‑ 'gü ‑gblü, 'yö 'mɛ 'wo bha‑ ‑nu ꞊gban "pɛpɛ 'wo pë ‑bhö 'wo kën kpɛnngkpɛnngdhö, 'yö‑ ‑kpɛa ‑yö to, 'yö‑ ‑bha ꞊klang ‑nu 'wo‑ ‑kpɛa bha‑ ꞊loo töö ‑kaɔng do ga ꞊plɛ 'gü 'yö‑ pa.
LUK 9:18 ꞊Dhɛ 'ö yi do 'ka kö Yesu ‑yö bhɛa" sië Atanna ‑dhɛ ö ‑dɩ ‑ta ‑dhɛ 'bha bha‑ 'gü waa‑ ‑bha ꞊klang ‑nu 'dhö, 'yö dhɛɛ" ya‑ kpɔ‑ ‑nu ‑gɔ 'ö‑ pö: «Ka‑ ‑ma ꞊dhɛ de suu ꞊në n 'ka?»
LUK 9:19 'Yö 'wo‑ ‑yɔ bɔ‑ ‑gɔ 'wo‑ pö: «('Mɛ 'wo i ‑dhiang zë sië) ‑a ‑nu ‑wʋ 'yaa do, mɛ 'bha ‑nu ‑wa ‑pö Zan Mɛzumɛ ‑mü i 'ka, "ɛɛn Edhi ‑mü i 'ka, "ɛɛn 'zü Atanna ‑wʋdhiʋ̈loomɛ ‑nu 'wo gun yi 'bha 'ka bha ꞊në‑ mɛ 'bha ꞊ya ‑bö.»
LUK 9:20 'Yö Yesu ‑ya pö‑ ‑nu ‑dhɛ: «'Yö ka ‑zë ꞊wɛ, ka ka ‑bha ‑pö 'gü ꞊dhɛ?» 'Yö Piɛdhö ‑ya ‑yɔ bɔ‑ ‑gɔ 'ö‑ pö: «Atanna ‑bha ‑Yamɛ ‑mü i 'ka, n Dëmɛ.»
LUK 9:21 'Yö ‑dhio dɔ‑ ‑nu ‑ta glɔɔglɔdhö 'ö‑ pö 'wa 'dho‑ pö "dhʋ̈ mɛ "wɛɛ 'bha ‑dhɛ.
LUK 9:22 ꞊Dhɛ 'ö ꞊yaa‑ pö‑ ‑nu ‑dhɛ "dhʋ̈, 'yö go mü ö‑ ‑ta yɔ 'ö‑ pö: «‑A ‑dhɛa ‑bha ꞊dhɛ mang Mɛgbömɛ 'a sëë bho ꞊dedewo, kö Zuifö ‑nu ‑bha mɛ zii ‑nu ‑wo wo ‑kɔ "kan n "dhiʋ̈, waa‑ "saabhomɛ ‑nu ‑gɔmɛ ‑nu waa‑ 'tɔnggɔmɛ ‑nu 'dhö, kö ‑wo n zë, kö 'a ‑bö ‑a ‑dhɛkpaɔyi ‑yaaga ‑naa 'ka.»
LUK 9:23 ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka, 'yö‑ pö 'mɛ 'wo gun mü ‑a ‑nu ꞊gban "pɛpɛ ‑dhɛ 'ö‑ pö: «'Mɛ 'ö‑ "piʋ̈ ꞊dhɛ 'ö bɔ n 'ka, ‑a mɛ ‑yö ö bo ö ‑dɩ 'ka kö ‑yö sëë bho 'pö ꞊dhɛ n 'dhö yi ꞊gban 'ka.
LUK 9:24 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ "ʋʋ mɛ 'ö dho kë‑ "piʋ̈ ꞊dhɛ 'ö ö ‑dɩ dha ‑dhɛ mɔɔ‑ ö ‑dɩ ‑dhɛ, ‑a ‑mɛ ‑gɔ ‑dho 'to‑ 'gü, "kɛɛ mɛ 'ö ‑kɔ ‑kan ö ‑dɩ ‑wɔn "dhiʋ̈ ma ‑zë n ‑wɔn 'gü, ‑a ‑mɛ ‑dho dha.
LUK 9:25 "Ɛɛn pë "pɛpɛ 'ö "kpʋng ꞊taa ‑a ꞊gban ꞊slɔɔ ‑sü kö ‑yö kë mɛ ‑gɔ, "kɛɛ kö‑ ‑mɛ 'nii‑ ‑zë ‑yö ꞊dhɛng, "ɛɛn kö‑ 'gü ‑yö see‑, ('kö 'ya 'dho ‑da Atanna ‑bha ‑gblüdëdhɛkëdhɛ 'gü ‑dhɛ 'bha ꞊kpaɔ ‑yi 'ka) ‑gɛn ‑mü ‑më 'ka?
LUK 9:26 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ "ʋʋ mɛ 'ö dho 'yiʋ̈‑ kë n 'tɔ ‑pö ö ‑bha ‑sü 'ka, "ɛɛn 'ö dho 'yiʋ̈‑ kë n ‑wʋ ‑pö mɛ ‑nu ‑dhɛ ‑sü 'ka, a ‑dho 'yiʋ̈‑ kë 'pö‑ ‑mɛ ‑gɔ yi 'ö mang Mɛgbömɛ 'a dho nu‑ 'ka ma 'tɔbhɔdhe 'gü yaa ma "kië "slʋ̈ʋ̈slʋ̈ ‑nu bha‑ ‑nu 'dhö n dë ‑bha ‑gblüdëdhɛ 'gü bha‑ 'ka.»
LUK 9:27 'Yö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: Mɛ 'wo ‑dhɛ ya‑ 'gü ya‑ ꞊gban 'wii 'dho ga kö Atanna ‑bha mɛdhɛ bha‑ zü 'yii bho ꞊kö.»
LUK 9:28 ꞊Dhɛ 'ö ꞊ya ö bo dhiang ‑nu bha‑ zë ‑sü 'ka "dhʋ̈, 'ö ‑dhɛkpaɔyi ꞊ya kë "saaga, 'yö Piɛdhö 'dhö, Zan 'dhö, Zakö 'dhö ‑a ‑nu sü 'yö 'wo dho ‑bhɛa Atanna ‑dhɛ ‑dhɛ 'gü ‑tɔn 'bha bha‑ ꞊gbin‑.
LUK 9:29 ꞊Dhɛ 'ö ꞊wa zun bhɛa" ‑sü ‑bha, 'yö Yesu wëëdhɛ ‑yö ‑gla, 'yö‑ ‑bha ‑sɔ 'bhü 'dhö ‑ya bhɔ ‑sü ‑bha ‑papadhö.
LUK 9:30 'Wo dho "kan wo ‑ta kö mɛ ꞊plɛ ‑wo dɔ sië‑ "sɔɔ mü kö ‑wo wo ‑gɔ dun sië. Atanna ‑wʋdhiʋ̈loomɛ ‑nu ꞊plɛ 'bha 'wo gun yi 'bha 'ka 'wo‑ mɛ do ‑dhɛ Moizö, 'wo‑ mɛ do ‑dhɛ Edhi bha.
LUK 9:31 "Kɛɛ kö Atanna ‑bha ‑gblüdëdhɛ ö dhang‑ 'gü bha‑ 'bhü ‑yö dɔ sië‑ ‑nu ‑bha, kö‑ ‑nu kwi "yan‑ bhɔ sië ‑papadhö, kö 'wɔn 'ö yöö 'dho‑ kë Zedhizadhɛmö, ‑a zë 'ö woo‑ wo kö ‑yö kë 'wɔn 'ö nu‑ 'gü "kpʋng ꞊taa ‑a ‑gɔ dɔ ‑kɔ 'ka bha ‑wa ‑dhiang zë sië.
LUK 9:32 ‑A "tʋ̈ng bha‑ 'gü kö Piɛdhö waa‑ ö "tɛabɔ ‑nu ‑a ‑nu "yankɔ ꞊gbaan kë 'gbin‑ 'gbin‑ 'ka yi kaɔ, "kɛɛ yö ‑zë ꞊gban 'gü, ‑wo ‑to wo "yaan 'ö 'wo wo "yan ‑kpan Yesu ‑bha mɛdhɛ 'bhü bha‑ ‑bha waa‑ mɛ ꞊plɛ bha‑ ‑nu 'dhö.
LUK 9:33 ꞊Dhɛ 'ö mɛ ꞊plɛ bha woo "kan Yesu ‑bha, 'yö Piɛdhö ‑ya pö‑ ‑dhɛ 'ö‑ pö: «N Dëmɛ, 'kwa ‑ya ‑dhɛ ya‑ 'gü ‑yö ‑dho kë ‑së "dhɛ! ‑Ka nu kö 'kwa sɔ ‑kɔ ‑yaaga dɔ ‑dhɛ ya‑ 'gü kö ‑a do ‑yö kë i ‑bha 'ka, kö‑ do ‑yö kë Moizö ‑bha 'ka, kö‑ do ‑yö kë Edhi ‑bha 'ka ‑dhe!» "Kɛɛ ‑a pö 'ö gun wo sië "dhʋ̈ bha 'yaa gun‑ 'gü ma sië ö ‑dɩ ‑gɔ.
LUK 9:34 ‑Yö ‑to dhiang bha‑ zë ‑dhɛ 'gü, 'yö "dhuu ‑yö go dhang‑ 'gü 'yö nu 'yö kpa Yesu waa‑ mɛ ꞊plɛ 'ö wɛng‑ ‑nu 'wo gun wo ‑gɔ dun sië bha‑ ‑nu ‑bha. ꞊Dhɛ 'ö ꞊klang ‑nu bha 'wo‑ ‑nu ‑da "dhuu 'gü ‑dhɛ yö "dhʋ̈, 'yö "suʋ̈ 'dhö ‑da ‑nu 'gü.
LUK 9:35 'Yö ‑wʋ do 'bha ‑yö bɔ "dhuu bha‑ 'gü 'ö ‑wɩ 'ö‑ pö: «N Gbö (do 'ö n ‑gɔ) 'yö ya, ‑ka ka "tʋ to‑ ‑wʋ ‑bha!»
LUK 9:36 ꞊Dhɛ 'ö ‑wʋ bha ꞊ya bo "wɩ ‑sü 'ka "dhʋ̈, 'wo dho ‑dhɛ ‑ga kö Yesu ꞊ya 'to ö do 'ka. "Kɛɛ 'wɔn 'wo‑ ‑dhɛ yö bha 'wo go mü 'wii‑ ‑gɛn dɔ mɛ 'bha ‑mɛ 'bha ‑dhɛ ‑a "tʋ̈ng 'dhɛ kö bha‑ 'gü, (‑yö kë ‑to ‑a ‑nu zuë" "piʋ̈).
LUK 9:37 ꞊Dhɛ 'ö‑ ‑ta ‑dhɛ ꞊ya ꞊kpaɔ, 'ö ꞊wa 'go ‑tɔn ꞊gbin‑ ꞊wa lɔɔ‑, 'yö mɛ kpö 'bha ‑yö nu Yesu ‑dhɛ 'gü.
LUK 9:38 'Yö mɛ do ‑yö bɔ 'mɛ 'wo bha‑ ‑nu kpö 'gü 'ö‑ pö: «N Dëmɛ, ‑bhö "ta n ‑dhɛ ‑dhe! ‑Bhö dɔ "gbɩɩ‑ kö 'i n gbö ya‑ ‑wëë ‑ga ‑dhe! ‑Yö n ‑gɔ "dhʋ̈ doseng ‑wa,
LUK 9:39 "yua 'ö ma 'në ya‑ ‑bha ya "yina ‑yua ‑mü. ‑A "yina bha ꞊ya ‑da 'gü, 'yö ‑ya "gbla ‑sü ‑bha, 'yö ꞊ya ‑dɩ zë‑ 'ka ‑gblagbladhö. 'Yö‑ "dhidhi "vuu ‑yö bhɔ, 'yö 'yaa "wɩ‑ ‑bha kö ‑yö 'go‑ ‑ta "vaandhö "kɛɛ kö ꞊yaa‑ ‑zlukpa bho kö "sɩ 'bha 'yaa‑ ‑dhɛ 'zü.
LUK 9:40 ꞊Dhɛ 'a nu‑ 'ka, a‑ ‑nu i ‑bha ꞊klang ‑nu ya ꞊në‑ ‑nu ‑dhɛ ꞊kö ‑blɛɛsü kö ‑wa dha n ‑dhɛ, "kɛɛ 'yö‑ ‑nu ‑kɔ 'yii ꞊mɔɔ‑ ‑bha.»
LUK 9:41 ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka, 'yö Yesu ‑ya pö 'mɛ 'wo gun mü bha‑ ‑nu ‑dhɛ 'ö‑ pö: «Gɔɔgbɩɩmɛ ‑nu, suuyaamɛ ‑nu 'ka ya, 'kaa "wɩ 'ö‑ wo‑ ‑bha kö 'ka 'dhang bho Atanna ‑bha 'gügbɩɩdhɛ "dhiʋ̈ ya ‑yö ka 'gü ꞊dhɛ a ‑dho 'to ka "piʋ̈ 'ö 'a ka ‑kwɛɛ bun "dhʋ̈ ‑kpɛawo ‑ee?» 'Yö‑ pö 'mɛ bha‑ ‑dhɛ: «‑Bhö nu i gbö bha‑ 'ka n ‑dhɛ yö!»
LUK 9:42 ꞊Dhɛ 'ö 'në bha 'ö ꞊yɔɔn Yesu "sɔɔ, 'yö "yina bha 'ö ꞊wlü‑ 'gü, 'yö‑ ‑zuö "sia‑, 'yö zun ‑dɩ zë ‑sü ‑bha "gbɩɩ‑ 'ka, "kɛɛ 'yö Yesu ‑yö ꞊gbla "yina yaa bha‑ ‑ta, 'yö 'në bha‑ dha, 'yö‑ sü 'ö‑ dɔ‑ dë ‑gɔ.
LUK 9:43 ꞊Dhɛ 'ö ꞊ya kë "dhʋ̈, 'yö mɛ ꞊gban "pɛpɛ 'wo 'dhang bho Atanna ‑bha 'gügbɩɩdhɛ ‑bha ‑kë ‑ziisü ‑sü "dhiʋ̈. "Dhabhliwɔn ‑nu 'ö Yesu gun kë sië bha, 'mɛ 'wo bha ‑wo ‑to ‑a din "piʋ̈, 'yö Yesu ‑ya pö ö ‑bha ꞊klang ‑nu ‑dhɛ 'ö‑ pö:
LUK 9:44 «'Mɛ 'kö 'ka bha ka ‑zë, ‑ka ka "tʋ 'to n ‑ta ‑së 'ka kö dhiang 'ö maa‑ zë ka ‑dhɛ bha ꞊në 'ya 'dho 'go ka "yaan. Yö ‑mü ꞊dhɛ mang Mɛgbömɛ ‑wo ‑dho n ꞊gbaɔ mɛ "bhɩɩ‑ ‑nu ‑gɔ,
LUK 9:45 "kɛɛ ‑a ‑bha ꞊klang ‑nu ‑zë 'waa gun ‑wʋ bha‑ 'gü ma sië, ‑a 'gü‑ ‑gun ‑nu 'gü tii, 'ö 'waa‑ 'klɔɔ‑ dɔ. 'Sa ‑wo gun "suʋ̈ sië‑ ‑gɔ, 'wii‑ dhɛɛ" 'kpɔ kö ‑ya 'klɔɔ‑ pö‑ ‑nu ‑dhɛ.
LUK 9:46 "Kɛɛ 'sa kö 'wɔn 'ö ‑gban 'mɛ 'wo bha‑ mɛ 'dhɛ 'ö‑ ‑duɛ dho kë 'kpii‑ dhang‑ 'gü dhia" ‑a ‑wɔn ‑bha bha ‑wo wo 'ko 'kun sië‑ 'gü.
LUK 9:47 ꞊Dhɛ 'ö Yesu ꞊ya 'wɔn 'ö gun‑ ‑nu ‑gɔ 'gü bha‑ dɔ, 'yö 'në 'dɛdɛ do sü 'yö‑ dɔ ö "sɔɔ,
LUK 9:48 'yö‑ pö‑ ‑nu ‑dhɛ: «Mɛ "ʋʋ mɛ 'ö ꞊bhlëë ‑ya 'në suu 'ö ꞊ni‑ ‑bha n ‑wɔn 'gü kö ‑yö ꞊bhlëë ‑ya ma ꞊në n ‑bha bha. 'Mɛ 'ö n ꞊bhlëë ‑ya 'pö kö ‑yö ꞊bhlëë ‑ya 'mɛ 'ö n bɔ ꞊në‑ ‑bha bha. ‑A ‑kë "dhʋ̈ ‑sü ‑wɔn 'gü, 'mɛ 'ö dho ö ‑dɩ kë mɛ sɛɛn" 'nësü 'ka ka kpö 'gü bha, ‑a ‑mɛ ꞊në dho kë mɛ 'kpii‑ 'ka dhang‑ 'gü.
LUK 9:49 ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka, 'yö Zan ‑ya pö‑ ‑dhɛ: «N Dëmɛ, 'dho 'yi‑ wo i ‑bha naɔ ‑së bha‑ dɔ ‑dhɛ 'gü bha yi ‑kpan mɛ 'bha ‑bha kö ‑yö "yina yaa kë sië mɛ ‑nu 'gü i 'tɔ 'gü, "kɛɛ kö 'yaa‑ dɔ, 'yö 'yi‑ pö‑ ‑dhɛ ‑yö 'to‑ ‑gɔ ‑naa 'ka.»
LUK 9:50 'Yö Yesu ‑ya ‑yɔ bɔ‑ ‑gɔ 'ö‑ pö: «'Ka 'dho‑ ‑kɔ bho‑ ‑bha, ‑a ‑gɛn ‑mü ꞊dhɛ 'mɛ 'kö 'yii dɔ ka ‑gɔ ‑gblü gɔɔn ‑yan ‑zë 'gü kö ‑yö ‑bɔ ka 'ka.
LUK 9:51 ꞊Dhɛ 'ö "tʋ̈ng 'ö Yesu dho 'go‑ 'ka "kpʋng ꞊taa ꞊ya 'to klöö‑, 'yö‑ "dhiʋ̈ ꞊wlü‑ ‑bha kö 'ö 'dho Zedhizadhɛmö.
LUK 9:52 ꞊Dhɛ 'ö ‑da zian ‑ta, 'yö mɛ bɔ ö "dhiʋ̈. 'Mɛ 'ö‑ ‑nu bɔ bha 'yö 'wo dho 'wo ‑da Samadhi ‑pö do 'bha bha‑ 'gü, 'yö 'wo ‑ya Yesu ꞊yëë bhɔ 'gü ‑kɔ mɔɔ‑ ‑sü ‑bha.
LUK 9:53 "Kɛɛ 'yö 'wii "wɩ‑ ‑bha kö ‑wa ꞊yëë bho 'dho 'ö‑ wo sië Zedhizadhɛmö Atanna ‑dhɔkëdhɛ 'gü bha‑ ‑wɔn 'gü (‑a ‑gɛn ‑mü ꞊dhɛ 'waa gun "wɩ sië‑ ‑bha kö Zuifö ‑nu ‑wo bɔ wo ‑gɔ 'pödhö ‑wo 'dho wo ‑bha Atanna ‑dhɔkëdhɛ 'gü Zedhizadhɛmö).
LUK 9:54 ꞊Dhɛ 'ö Zakö waa‑ Zan 'wo ‑kë ‑a ‑bha ꞊klangdhiʋ̈ ‑nu 'ka bha, 'wo 'wɔn bha‑ ‑dhɛ yö, 'yö 'wo‑ pö‑ ‑dhɛ: «Yi Dëmɛ, ‑bhö dɔ 'sa kö 'yi pɛng ‑gbadhɛ Atanna ‑gɔ dhang‑ 'gü kö ‑yö 'mɛ 'wo ya‑ ‑nu ‑bhö ‑dhe!»
LUK 9:55 'Yö Yesu ‑yö ö wë bɔ‑ ‑nu ‑ta, 'yö ‑dɔn bho‑ ‑nu 'ka ['ö‑ pö: «"Yina suu 'ö ‑da ka 'gü 'yö 'ka dhiang suu bha‑ zë sië bha 'kaa‑ dɔ;
LUK 9:56 ‑a ‑gɛn ‑mü ꞊dhɛ mang Mɛgbömɛ 'mii nu kö 'a mɛ ‑nu 'nii‑ zë 'gü see‑, a ‑nu kö 'a‑ ‑nu dha ꞊në‑ wo.] 'Yö 'wo ‑ziö 'wo dho 'pödhɛ "wɛɛ 'gü.
LUK 9:57 ꞊Dhɛ 'ö ꞊wa ziö 'wo 'dho sië, 'yö mɛ do 'bha ‑ya pö‑ ‑dhɛ: «N Dëmɛ, a ‑dho 'dho i ꞊keng‑ ‑dhɛ ꞊gban "pɛpɛ 'gü.»
LUK 9:58 'Yö‑ ‑yɔ bɔ‑ ‑gɔ 'ö‑ pö: «('Bha‑ pö "dhʋ̈ ma ‑zë n ‑bha 'yaa "gbɩɩ‑ "kɛɛ) ‑yö kë i "yaan ꞊dhɛ "sakpadë ‑nu ‑yɛ ‑dhö 'wo ‑wɔ 'gü, 'ö ‑maa ‑nu 'kɔ 'dhö 'dhö, "kɛɛ mang Mɛgbömɛ ‑zë, n ‑gɔ ‑dɔ ꞊wlöö ‑pë ‑zian 'yaa 'dhö.»
LUK 9:59 'Yö‑ pö mɛ "wɛɛ 'bha ‑dhɛ: «‑Bhö nu kö 'i ‑da n ꞊keng‑!» "Kɛɛ 'yö 'mɛ bha 'ö‑ ‑yɔ bɔ Yesu ‑gɔ 'ö‑ pö: «N Dëmɛ, ‑bhö dɔ "gbɩɩ‑ kö 'a 'dho ꞊kö kö n dë ꞊ya ga yi 'ö‑ 'ka 'ma‑ ‑wɛɛ bho kö 'a nu ‑dhe!»
LUK 9:60 "Kɛɛ 'yö Yesu ‑ya ‑yɔ bɔ‑ ‑gɔ 'pö 'ö‑ pö: «‑Bhö i kwaa‑ 'mɛ Atanna ‑ya ‑nu sü ꞊dhɛ mɛ ꞊gee 'dhö bha‑ ‑nu ‑zü kö ‑wo wo 'ko ‑nu ‑wɛɛ bho, bhi ‑zë, ‑bhö 'dho Atanna ‑bha ‑gblüdëdhɛ ‑wɔn ‑dhiang zë mɛ ‑nu ‑dhɛ.»
LUK 9:61 'Yö mɛ do "wɛɛ 'bha ‑ya pö: «N Dëmɛ, a ‑dho 'dho i ꞊keng‑, "kɛɛ ‑bhö dɔ kö 'a 'dho n ‑wʋ ‑da ‑dhɛ 'gü n ‑gɔ 'kɔɔmɛ ‑nu ‑dhɛ.»
LUK 9:62 'Yö‑ ‑yɔ bɔ‑ ‑gɔ 'ö‑ pö: «Mɛ "ʋʋ mɛ 'ö ꞊ya 'dhang bho n "dhiʋ̈, ‑a ‑dhɛa ‑bha ꞊dhɛ‑ ‑mɛ ‑yö ‑dhɛ ‑ga ö "dhiʋ̈ do kö ‑yö 'dho‑ 'ka, kö 'ya 'dho ‑dhɛ ‑ga ö ꞊taama, 'mɛ 'ö ‑dhɛ ‑ga ö ꞊taama kö‑ ‑mɛ 'yaa ‑tosɛa ‑kë Atanna ‑bha ‑gblüdëdhɛ 'gü ‑mɛ 'ka.»
LUK 10:1 ꞊Dhɛ 'ö ꞊ya kë "dhʋ̈, 'yö Yesu ‑yö ‑kɔ ‑yɛ 'zü 'mɛ 'wo gun‑ ꞊keng‑ bha‑ mɛ ‑kaɔng "saɔplɛ "wɛɛ 'bha ‑bha, 'yö‑ ‑nu dan ꞊plɛ ꞊plɛ, 'yö‑ ‑nu bɔ ö "dhiʋ̈ 'pödhɛ "pɛpɛ 'ö ‑bɔ 'gü ‑wɔn ‑yö gun‑ ‑bha bha‑ ‑nu 'gü.
LUK 10:2 ꞊Dhɛ 'ö yöö‑ ‑nu bɔ ꞊dhɛ ‑kɔ bha‑ 'dhö, 'yö ‑wʋ kpɔ‑ ‑nu ‑bha 'ö‑ pö: «Atanna ‑bha yë 'ö‑ këwɔn 'dhö 'dhö bha ‑kaa ‑ta ‑ga. 'Ö ꞊dhɛ ‑mlü 'dhö kö yö ꞊në ꞊ya ‑pë kë ‑dhɛ ꞊gban "pɛpɛ 'gü bha, "kɛɛ ‑a "kan ‑mɛ 'yaa 'dhö. ꞊Dhɛ 'ö "dhʋ̈, ‑ka bhɛa" 'bhlaadë ‑dhɛ kö ‑yö ö ‑bha ‑mlü bha‑ "kan ‑mɛ bɔ.»
LUK 10:3 'Yö‑ pö‑ ‑nu ‑dhɛ: «‑Ka 'dho, "kɛɛ ka bɔ 'a‑ wo bha‑ 'wɔn kë ka "yaan ꞊dhɛ a ka ‑bɔ ꞊dhɛ mɛ "bhlaanë ‑nu bɔ laa ‑nu kpö 'gü.
LUK 10:4 Ka 'dho ‑sü 'ka 'ka 'dho 'wëëga ‑da ka ‑ta, ꞊kwɛɛsügüpë 'bha 'ya 'dho kë ka ‑gɔ. "Ɛɛn 'ka 'dho ‑sabha ꞊plɛ ‑naa ‑da ka ‑ta. 'Mɛ "ʋʋ mɛ 'ö 'ka ‑kpan ‑bha zian ‑ta, 'ka 'dho‑ ꞊tua bho.
LUK 10:5 'Ka 'dho 'ka ‑da 'kɔ "ʋʋ 'kɔ 'ö‑ 'gü, 'ka ‑da 'kɔɔdhö 'mü, ‑wʋ ‑blɛɛsü 'ka dho‑ pö yö ‑mü ꞊dhɛ: «Zuëwaanusü ‑yö kë 'kɔ ya‑ 'gü ‑mɛ ‑nu ka ‑gɔ!»
LUK 10:6 'Ka‑ pö "dhʋ̈, ꞊ya kë ꞊dhɛ 'mɛ 'ö zuë" 'waanu ‑sü 'ö go Atanna "piʋ̈ bha‑ ‑dhɔ 'dhö‑ ‑bha ꞊ya kë 'kɔ bha‑ 'gü, ka ‑bha 'dhuë‑ bha ‑yö ‑dho ‑a ‑mɛ 'kun, "kɛɛ yö ‑zë 'yii kë "dhʋ̈, ka ‑bha 'dhuë‑ ‑dho ö yee kë 'ö nu ka "piʋ̈.
LUK 10:7 'Ka 'dho ziö 'kɔ 'gü ‑zaadhö (kë "dhʋ̈ 'ö ‑siö ka ꞊dhɛng bhɔɔ ‑nu ‑dhɛ), ꞊wa ka ꞊yëë bho 'kɔ 'ö‑ 'gü, ‑ka 'to mü kö 'pë 'wo‑ nu ka ‑dhɛ, ‑yö ‑kë ‑bhöpë 'ka oo, ‑yö ‑kë müpë 'ka oo, kö 'ka‑ ‑bhö, "ɛɛn kö 'ka‑ mü; ‑a ‑gɛn ‑mü ꞊dhɛ 'mɛ 'ö yë ‑kë, ‑a ‑dhɛa ‑bha ꞊dhɛ ‑wa ꞊saa bho.
LUK 10:8 'Ka ‑da 'pö‑ "ʋʋ 'pö‑ 'ö‑ 'gü kö ‑wo ka ‑dhɛng ‑zë 'kun, pë "ʋʋ pë 'wo‑ nu ka ‑dhɛ ‑bhöpë ‑zë 'ka ‑kaa ‑bhö.
LUK 10:9 Kö 'ka "yuëdhi ‑nu 'wo 'pö‑ bha‑ 'gü ‑a ‑nu dha, kö 'ka‑ pö 'pö‑ bha‑ 'gü ‑mɛ ‑nu ‑dhɛ: «Atanna ‑bha ‑gblüdëdhɛ ꞊ya ꞊tëng ka ‑ta.»
LUK 10:10 ꞊Ya kë ꞊dhɛ 'ka ‑da 'pö‑ "ʋʋ 'pö‑ 'ö 'gü kö‑ 'gü ‑mɛ ‑nu 'wii ka ꞊yëë bho (Atanna ‑wʋ ‑san ‑bha ‑a ‑mɛ ‑nu kë ‑sü ‑wɔn 'gü), ‑ka 'dho kö 'ka dɔ "dhɛɛdhö 'ka‑ pö 'pö‑ bha‑ 'gü ‑mɛ ‑nu ‑dhɛ ꞊dhɛ:
LUK 10:11 «‑Bobi ‑zian 'ö yi ‑gɛn kun ka ‑gɔ 'pö‑ ya‑ 'gü ya ꞊në 'yi‑ bho sië yi ‑bha ya, (kö ka ‑bha "dhang 'ka‑ ꞊mɔɔ bha ‑yö 'to ka ‑ta). "Kɛɛ ‑yö kë ‑zë wo ka "yaan ꞊dhɛ Atanna ‑bha ‑gblüdëdhɛ ꞊ya dun ka ‑ta.
LUK 10:12 ꞊Ya kë ꞊dhɛ 'ka‑ pö "dhʋ̈, a‑ pö ka ‑dhɛ tɛan‑ ꞊dede 'ka ꞊dhɛ kö Atanna ‑bha mɛ "bhɩɩ‑ ‑nu dhɛɛ" 'kpɔ ‑yi bha ‑yö ꞊loo, 'wɔn 'ö dho wɔ 'pö‑ bha‑ 'gü ‑mɛ ‑nu ‑ta ‑a "dhiʋ̈ ‑dho ziö 'wɔn 'ö‑ ‑wɔ Sodɔmö ‑mɛ ‑nu ('ö‑ ‑wɔn "dhia 'yaa gun‑ ‑nu 'gü 'pö yi 'bha 'ka bha‑ ‑nu ‑ta) bha‑ ‑ta.
LUK 10:13 Yö ꞊në‑ ‑wɔn 'gü 'yö Yesu ‑ya pö: «Kodhazɛn ‑mɛ ‑nu, ka 'vee‑! Bɛsaida ‑mɛ ‑nu, ka 'vee‑! ‑A ‑pö ka ‑dhɛ "dhʋ̈ ‑gɛn ‑mü ꞊dhɛ "dhabhliwɔn ‑nu 'a‑ ‑kë ‑nu wo ka kpö 'gü bha, ꞊ya kë ꞊dhɛ a‑ ‑kë "dhʋ̈ Tii‑ ‑pö waa‑ Sidɔn ‑pö ‑nu ꞊në‑ 'gü, kö‑ ‑nu ‑gbɛʋʋ kë Atanna ‑dhɛ ‑yi 'yaa ꞊dɛɛ.
LUK 10:14 ‑A ‑kë "dhʋ̈ ‑sü 'gü, Atanna ‑bha mɛ "bhɩɩ‑ ‑nu dhɛɛ" 'kpii‑ 'kpɔ ‑yi bha ꞊ya ꞊loo yi 'ö‑ 'ka, 'wɔn 'ö ‑kë 'mɛ 'wo gun 'pödhɛ 'wo‑ Sidɔn waa‑ Tii ‑pö ‑kë bha‑ 'gü yi 'bha 'ka bha‑ ‑nu 'ka bha‑ fië‑ ‑dho kë ka ‑bha ‑bha.
LUK 10:15 Kapɛɛnaɔmö ‑mɛ ‑nu, kaa ‑dɩ 'pö ꞊wɛ! ‑Yö ‑kë ka 'gü ꞊dhɛ ka ‑zë 'ka kpɛa‑ ka ‑gɔ ꞊ya zun dhang‑ ‑bha, "kɛɛ ka ‑gɔ ‑dho lɔɔ‑ 'ö dho 'ö ‑sɔ pɛng ‑kaso 'ö ꞊geebɔɔ bha‑ 'gü.
LUK 10:16 ꞊Dhɛ 'ö ꞊yaa‑ pö "dhʋ̈, 'yö go mü 'zü 'ö‑ pö ö bha ꞊klang ‑nu bha‑ ‑nu ‑dhɛ 'ö‑ pö: «꞊Ya kë ꞊dhɛ 'ka 'dho mɛ 'ö ꞊ya "tʋ 'to ka ‑wʋ ‑bha kö ꞊ya "wɩ ma ꞊në n ‑wʋ ‑bha bha, ‑ɛɛ 'mɛ 'ö ‑kɔ 'zü ka ‑wʋ 'ka kö ‑yö ‑kɔ ma ꞊në n ‑wʋ 'ka bha, 'sa kö‑ ‑mɛ ‑yö ‑kɔ 'pö 'mɛ 'ö n bɔ ꞊në‑ ‑wʋ 'ka bha.
LUK 10:17 ꞊Dhɛ 'ö mɛ ‑kaɔng "saɔplɛ bha ꞊wa 'dho, ‑a ‑nu yee kë ‑sü 'ka ‑wo ‑nu ꞊niidadhe ꞊dede 'ka. ꞊Dhɛ 'wo nu 'yö 'wo‑ pö wo Dëmɛ ‑dhɛ: «Yi Dëmɛ, 'dho 'yi‑ wo bha "yina yaa ‑nu ‑zian ‑wo kë wo ‑gɔ ‑lɔɔ yi ‑dhɛ i 'tɔ 'gü!»
LUK 10:18 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «‑A ‑kë "dhʋ̈ ‑sü 'wɔn 'ya 'dho ka 'kɔn,) ‑a ‑gɛn ‑mü ꞊dhɛ n ‑kɔ ꞊ya ziö Sɔtraan ‑gɔ,
LUK 10:19 ꞊ya 'go mü, 'ma ‑kɔ ‑ziö ‑a zü ‑gban 'gü ‑pë "pɛpɛ ꞊gban ‑gɔ ‑sü ‑faan ‑da ka 'gü 'pö, kë "dhʋ̈ kö pë "ʋʋ ‑pë 'bha ‑kɔ 'ya 'dho ꞊mɔɔ ka ‑bha, ‑a ‑wɔn 'gü ka ‑dho taa‑ ‑mlɛɛ ‑nu waa‑ gɛan" ‑nu ‑ta 'ö 'waa ka kë ‑kɔ 'bha 'gü, ‑a 'klɔɔ‑ ‑mü ꞊dhɛ a kë Sɔtraan yö kö ‑yö 'go sië dhang‑ 'gü 'ö ‑pö ꞊dhɛ dha 'ö "yaan‑ kun ‑a 'dhö.»
LUK 10:20 "Kɛɛ 'kö 'zü yöö kë "dhʋ̈, 'wɔn 'ö yöö kë ka ꞊nii ‑da 'gü ‑wɔn 'ka 'yaa "yina yaa ‑nu ‑bha ‑gɔ ‑dho ka ‑dhɛ "sia‑ ‑wɔn ‑zë 'ka. 'Wɔn 'ö dho ka ꞊nii ‑da yö ‑mü ꞊dhɛ mɛ 'ka bha ka 'tɔ ‑bɛn ‑yö zë ‑sü 'ka dhang‑ 'gü.
LUK 10:21 Dhiang bha ‑yö ‑to Yesu "dhi 'yö zuëniidadhe ‑ya pa Atanna ‑bha 'Nii‑ "slʋ̈ʋ̈slʋ̈ ‑kɔ 'ka 'yö‑ pö: «'A, n Dë Atanna, 'ma i nuɛ" bho ꞊dedewo, "sɛ waa‑ dhang‑ ‑a ‑nu 'gü ‑pë ꞊gban ‑gɔdhiʋ̈mɛ, ‑a ‑gɛn ‑mü ꞊dhɛ 'wɔn ‑nu ya 'bha‑ ‑bin 'wɔn dɔ ‑mɛ ‑nu waa‑ "yaakimɛ ‑nu 'wo "kpʋngtaadhɛ ya‑ 'gü ‑nu ‑gɔ, 'yö 'bha‑ ‑ta "pʋ 'mɛ 'wo ꞊dhɛ 'në 'sɛɛnnë ‑nu 'dhö ꞊në‑ ‑nu ‑dhɛ. Tɛan‑ ꞊dede 'ka, n Dë, a i nuɛ" ‑bho "wɩ 'i‑ wo‑ bha kö ‑yö kë "dhʋ̈ bha‑ ‑wɔn 'gü.»
LUK 10:22 'Yö go 'mü 'yö‑ pö: «N Dë ꞊ya 'wɔn ꞊gban "pɛpɛ dɔ n ‑kɔ 'ka, mɛ 'bha 'yaa yɛng yi ‑bho "kʋʋ dɔ. Ma 'a ‑kë ‑a Gbö 'ka, mɛ 'bha 'yaa n dɔ kö 'yii kë n Dë 'ka, "ɛɛn yö 'ö ‑kë 'pö n Dë 'ka, mɛ 'bha 'yaa‑ dɔ kö 'yii kë ma 'a kë ‑a Gbö 'ka, "ɛɛn 'zü 'mɛ 'kö 'a‑ ‑ta ‑pʋ ‑a ‑nu ‑dhɛ bha kwa 'ka.»
LUK 10:23 ꞊Dhɛ 'ö ꞊yaa‑ pö "dhʋ̈, 'yö ö wë bɔ ö ‑bha ꞊klang ‑nu ‑ta, 'yö‑ pö‑ ‑nu ‑dhɛ ‑dɩ ‑wɔn "dhiʋ̈ 'ö‑ pö: «'Mɛ 'ö‑ ‑nu "yan ‑yö ‑dhɛ 'ö 'ka yö sië ya‑ yö, ‑a ‑nu ‑bha ‑së!
LUK 10:24 ‑A 'klɔɔ‑ ‑mü ꞊dhɛ a‑ ‑pö ka ‑dhɛ ꞊dhɛ ‑yö ‑gun Atanna ‑wʋdhiʋ̈loomɛ ‑nu waa‑ ‑gblüdë 'gbɛ "piʋ̈ ꞊dhɛ wo "yan ‑yö ‑da 'wɔn ‑nu 'a‑ ‑kë ka‑ ‑dhɛ yö sië ya‑ ‑dhɛ 'gü, "kɛɛ 'wii‑ ‑dhɛ yö, ꞊dhɛ wo "tʋ ‑yö ‑da 'wɔn ‑nu 'ka‑ ma sië ya‑ 'gü, "kɛɛ 'wii‑ ma.»
LUK 10:25 ꞊Dhɛ 'ö Yesu ꞊yaa‑ pö "dhʋ̈, 'yö Atanna ‑bha 'tɔnggɔmɛ do ‑yö ꞊wlü 'yö‑ pö 'ö‑ 'gü dan 'yö‑ pö‑ ‑dhɛ: «N Dëmɛ, a ‑dho ‑a kë ‑kɔ kë ꞊dhɛ kö 'a kë ‑tosɛa 'ö 'yaa yën 'ö Atanna "piʋ̈ bha‑ kë ‑mɛ 'ka?»
LUK 10:26 'Yö Yesu ‑ya ‑yɔ bɔ‑ ‑gɔ 'ö‑ pö: «‑Më ‑wɔn ꞊në ‑bɛn zë ‑sü 'ka Atanna ‑bha 'tɔng‑ 'sëëdhɛ 'gü 'wɔn bha‑ "gblʋʋ "piʋ̈ 'i‑ dɔ, "ɛɛn 'bha‑ ‑wʋ pö i‑ 'gü ma ‑kɔ ‑kë ꞊dhɛ?»
LUK 10:27 'Yö ‑yɔ bɔ‑ ‑gɔ 'ö‑ pö: «Atanna ‑wʋ ‑ya ‑pö ꞊dhɛ: Bha‑ pö 'i ‑da ‑a ‑bha ꞊sii 'ö 'yaa yën bha‑ kë ‑dhɛ 'gü, ‑a ‑dhɛa ‑bha ꞊dhɛ ‑a ‑dhɔ ‑yö i kë i zuë" ꞊gban 'ka, i 'nii‑ ꞊gban 'ka, i faan ꞊gban 'ka, ꞊ya 'go mü kö i këyɔɔ ‑dhɔ ‑yö i kë ꞊dhɛ i ‑dɩ 'dhö.»
LUK 10:28 'Yö Yesu ‑ya pö‑ ‑dhɛ: «I‑ ‑pö ‑së, 'bha 'dho ‑bhö ‑a kë "dhʋ̈, i ‑dho ‑da ‑bha ‑gblüdëdhɛkëdhɛ 'gü.»
LUK 10:29 "Kɛɛ 'yaa gun 'tɔnggɔmɛ bha‑ "piʋ̈ ꞊dhɛ dhiang ‑yɔ ‑yö 'to ö ‑ta, 'yö‑ pö Yesu ‑dhɛ: «De suu ꞊në 'wo‑ ‑dhɛ mɛ këyɔɔ?»
LUK 10:30 'Yö Yesu ‑yö dhiang zü ‑dee bho 'ö‑ pö: «Yi do 'ka 'yö mɛ do 'bha 'dhö gun 'go sië Zedhizadhɛmö kö ‑yö 'dho sië Zedhiko. 'Yö dho 'yö ‑da 'wɔnyaakëmɛ ‑nu ꞊kwɛɛ‑. 'Yö 'wo ‑pö ‑ta 'wo‑ ‑bha pë ꞊gban "pɛpɛ sü‑ ‑gɔ, 'yö 'wo‑ ‑ma ‑tëkë ‑tëkëdhö. ꞊Dhɛ 'wo‑ ‑ga ꞊dhɛ ꞊ya wɔ 'ya‑ 'yö 'wo wo ꞊kwaa‑ ‑zü 'wo dho.
LUK 10:31 'Yö "saabhomɛ ‑nu 'wo Atanna ‑dhɔkëgükɔ 'gü bha‑ mɛ do 'dhö gun 'go sië 'pö Zedhizadhɛmö, 'yö bɔ zian do bha‑ ‑ta, 'yö dho 'yö ‑kan 'mɛ 'wo‑ "dhama ‑da bha‑ 'gü, 'yö kpɔ‑ 'ka 'yö bɔ zian "wɛɛ 'ka 'yö dho.
LUK 10:32 'Yö Dhevi ‑gɔ 'kɔɔmɛ ‑nu ('ö woo ‑dɩ 'pö 'wo "saabhomɛ ‑nu ‑ta kun Atanna ‑bha yë kë ‑sü ‑bha) bha‑ mɛ do 'bha 'ö gun bɔ sië 'pö ‑dhɛ do bha‑ 'gü, 'yö ‑kpan 'mɛ bha‑ ‑bha. 'Yö kpɔ‑ 'ka 'pö 'yö dho.
LUK 10:33 "Kɛɛ ꞊dhɛ 'ö Samadhi mi do 'bha bha 'ö gun ö bha "ta 'kpɔ sië, 'yö nu 'ö ꞊loo ‑dhɛ bha‑ 'gü 'yö 'mɛ bha‑ yö, 'yö ‑wëë ‑yö bɔ‑ ‑ta ꞊dedewo.
LUK 10:34 'Yö ꞊yɔɔn 'mɛ bha‑ "sɔɔ 'yö‑ ‑bha bhië ‑nu ‑zu "pɛɛpɛdhö, 'yö pë ‑ya "dhiʋ̈, 'yö sɔ "pɛn ꞊piʋ̈‑ 'ka, 'yö‑ sü 'ö‑ ‑ya ö ‑dɩ ‑bha ꞊soo bha‑ ‑ta, 'yö dho‑ 'ka ‑dhɛng ‑nu ꞊yëëbhogükɔ do 'bha 'gü, 'yö‑ "dhiʋ̈ ‑ziö wo ‑së 'ka.
LUK 10:35 ꞊Dhɛ 'ö ꞊wa wɔ mü 'ö‑ ‑ta ‑dhɛ ꞊ya ꞊kpaɔ, 'yö ‑kɔ ‑da ö ‑gɔ "yië‑ 'gü, 'yö 'wëë‑ këng do ‑nu "sinma sü 'mü, 'yö‑ nu wo ‑dhɛngbhɔɔdë bha‑ ‑dhɛ, 'yö ö ‑wʋ kpɔ‑ ‑bha 'ö‑ pö: «'I i ‑zʋ kë ma mɛ ya‑ 'gü n ‑dhɛ ‑së 'ka. 'Ma 'dho a nu sië, 'pë ʋʋ pë 'i dho‑ see‑ ‑bha n zian 'gü, 'ma nu kö 'i‑ pö n ‑dhɛ kö 'a i gba‑ "wɛɛ 'ka.»
LUK 10:36 'Yö 'tɔnggɔmɛ bha‑ dhɛɛ" kpɔ 'ö‑ pö: «Mɛ ‑yaaga bha‑ de ‑sü ꞊në 'i‑ dɔ ꞊dhɛ 'mɛ 'ö ‑pö 'wɔnyaakëmɛ ‑nu ꞊kwɛɛ‑ bha‑ këyɔɔ 'dhö?»
LUK 10:37 'Yö‑ ‑yɔ bɔ Yesu ‑gɔ 'ö‑ pö: «Mɛ 'dhɛ ‑a ‑wëë ‑ya ‑kë bha ꞊në‑ këyɔɔ 'ka.» 'Yö Yesu ‑ya pö‑ ‑dhɛ: «‑Ɛɛ, kö 'bha 'dho 'sa ‑bhö ‑a kë 'pö ꞊dhɛ 'mɛ bha‑ 'dhö!»
LUK 10:38 ꞊Dhɛ 'ö Yesu waa‑ ö ‑bha ꞊klang ‑nu ꞊wa ‑da zian ‑ta 'wo 'dho sië Zedhizadhɛmö, 'yö 'wo ꞊loo 'pödhɛ 'bha bha‑ 'gü, 'yö dhebhɔnë do 'bha 'wo‑ ‑dhɛ Matö bha, 'ö‑ ꞊yëë bho ö ‑gɔ 'kɔɔdhö.
LUK 10:39 Matö bha‑ dheebhang do‑ ‑gun mü 'wo‑ ‑dhɛ Madhi. ꞊Dhɛ 'ö Yesu ꞊ya 'dho ꞊ya ‑da 'kɔɔdhö, 'yö Madhi dho 'ö ‑ya ‑a "sɔɔ kö 'ö ö "tʋ 'to‑ ‑wʋ ‑bha.
LUK 10:40 Kö Matö ‑zë ‑yö 'kɔɔdhö ‑yë ‑nu kë sië, 'yö Matö nu 'ö‑ pö Yesu ‑dhɛ: «N Dëmɛ, n 'to 'ö n 'zlaa‑ Madhi ‑ya wo yë ‑bha 'ö nu "tʋ ‑to i ‑wʋ ‑bha ‑dhɛ 'gü ya i i ‑bha ‑pö 'gü ꞊dhɛ? ‑A pö‑ ‑dhɛ kö ‑yö n ‑ta 'kun ‑dhe!»
LUK 10:41 'Yö Yesu ‑ya ‑yɔ bɔ‑ ‑gɔ 'ö‑ pö: «Matö n "tɛado, 'wɔn 'gbɛ ꞊në 'i dɔ sië 'kën 'gü ‑a ‑wɔn 'gü 'yö i zuëdhiʋ̈tɛɛ sië bha,
LUK 10:42 "kɛɛ pë dosengseng ꞊në‑ ‑wɔn 'dhö "gbɩɩ‑, yö ꞊në Madhi ‑ya sü bha. 'Pë 'ö Madhi ‑ya ‑sü bha ꞊në mɛ 'bha ‑kɔ 'yaa ꞊mɔɔ‑ ‑bha kö ‑ya 'sü‑ ‑gɔ.
LUK 11:1 ‑Dhɛkpaɔyi do 'ka, 'yö Yesu ‑yö ꞊wlü 'ö dho ‑bhɛa Atanna ‑dhɛ ‑dhɛ 'gü ‑dhɛ do 'bha 'gü. ꞊Dhɛ 'ö ö bo ‑bhɛa ‑a ‑dhɛ ‑sü 'ka, 'yö‑ ‑bha ꞊klangdhiʋ̈ ‑nu bha‑ mɛ do ‑ya pö‑ ‑dhɛ: «N Dëmɛ, ‑bhö ‑bhɛa Atanna ‑dhɛ ‑kɔ ‑zɔn yi ‑dhɛ ꞊dhɛ ‑kɔ 'ö Zan ‑ya ‑zɔn 'ka ö ‑bha ꞊klang ‑nu ‑dhɛ bha‑ 'dhö ‑dhe!»
LUK 11:2 'Yö Yesu ‑ya pö‑ ‑nu ‑dhɛ: «'Kwa‑ ma! 'ka‑ pö 'ka bhɛa" Atanna ‑dhɛ, ‑kaa pö: «Yi Dë, i 'tɔ ‑yö kë ꞊bhlëësü, 'wɔn‑ 'to bhi ꞊në i ‑bha ‑bha "kpʋng ꞊taa yö ꞊dhɛ ‑kɔ 'ö‑ 'ka dhang‑ 'gü ‑a 'dhö.
LUK 11:3 ‑Bhö dɔ "gbɩɩ‑ kö ‑dhɛ "puu 'ö ꞊kpaɔ 'i yi ‑bhöpë nu yi ‑dhɛ.
LUK 11:4 ‑Bhö yi këwɔn yaa ‑nu ‑mawɔn 'to ꞊dhɛ ‑kɔ 'ö mɛ ꞊ya 'wɔn yaa kë 'pö yi 'ka, 'yi‑ ‑mɛ ‑mawɔn to 'ka bha‑ 'dhö. ‑Bhö yi ‑maa kë kö 'ya 'dho ‑da 'wɔn yaa 'gü.»
LUK 11:5 ꞊Dhɛ 'ö Yesu ꞊ya ö bo ‑bhɛa Atanna ‑dhɛ ‑kɔ ‑zɔn ‑sü 'ka ‑a ‑nu ‑dhɛ "dhʋ̈, 'yö‑ "gwënng do ‑da ‑nu ‑dhɛ 'ö‑ pö: «꞊Ya kë ꞊dhɛ 'mɛ 'ka bha mɛ 'bha ꞊ya "wlü gbeng ꞊zinng 'gü kö ‑yö 'dho ö "taɔngdë "piʋ̈ kö ‑ya pö‑ ‑dhɛ: «N "taɔngdë, ‑bhö ‑bhöpë "pɔ dɔ n ‑bha!
LUK 11:6 N "taɔngdë ‑dhɛng 'bha ꞊në ꞊ya bhɔ n ‑ta, "kɛɛ maa pë 'ö‑ ‑kpa ‑dhɛ n "yan 'yaa‑ "dhiʋ̈, ‑bhö dɔ "gbɩɩ‑!»
LUK 11:7 Kö‑ "taɔngdë bha ‑yö bɔ 'kɔɔdhö ‑ya pö‑ ‑dhɛ: «‑Fɛɛ bha! 'Ma "kwɛɛ ta 'nu, yaa‑ n "piʋ̈mɛ ‑nu 'ya 'waanu, 'mii 'dho ꞊mɔɔ‑ ‑bha 'zü kö 'a "wlü kö 'a ‑bhöpë nu i ‑dhɛ», "kɛɛ kö‑ "taɔngdë 'ö nu 'bluu‑ ‑gbadhɛ bha ‑yö ‑fɛɛ ‑ya ‑bha,
LUK 11:8 a‑ ‑pö ka ‑dhɛ tɛan‑ ꞊dede 'ka ꞊dhɛ 'kö 'zü 'ö ‑kë ꞊dhɛ 'mɛ bha 'yii "wlü kö ‑yö ‑bhöpë bha‑ nu ö "taɔngdë bha‑ ‑dhɛ ‑a ‑bha ‑kë ‑a "taɔngdë 'ka ‑sü ‑wɔn 'gü, "kɛɛ ‑yö ‑dho "wlü zë wo 'ö pë "pɛpɛ 'ö‑ ‑mawɔn 'dhö‑ ‑bha bha‑ nu ‑dhɛ 'ö ‑fɛɛ 'ö‑ ‑ya ‑bha bha yö ‑zë ‑wɔn 'gü.» (‑Bhɛa Atanna ‑dhɛ ‑sü bha 'ö ‑kɔ 'ö‑ ‑bha 'yö bha.)
LUK 11:9 Yö ꞊në‑ ‑wɔn 'gü, 'yö ma ‑zë 'a‑ pö ka ‑dhɛ: «‑Ka pë ‑gbadhɛ Atanna ‑gɔ, ‑yö ‑dho ‑a nu ka ‑dhɛ. ‑Ka pë mɔɔ‑, ka ‑dho ‑a ꞊slɔɔ. ‑Ka "kwɛɛ ‑ta ‑ma, ‑wo ‑dho "kwɛɛ "pʋ ka ‑gɔ.
LUK 11:10 ‑A ‑gɛn ‑mü ꞊dhɛ 'mɛ 'ö pë ‑gbadhɛ Atanna ‑gɔ, 'yö‑ nu‑ ‑dhɛ, 'mɛ 'ö pë ꞊mɔɔ 'yö‑ yö, 'mɛ 'ö "kwɛɛ ‑ta ‑ma 'yö 'wo‑ ‑pʋ ‑gɔ.
LUK 11:11 "Ɛɛn 'në dë 'bha‑ ‑kë 'yö‑ ‑bha 'në ꞊ya 'bluu‑ ‑gbadhɛ ‑gɔ, 'yö 'bluu‑ 'kö bha‑ to 'yö ‑gwë nu‑ ‑dhɛ ‑ee? "Ɛɛn 'ö ꞊ya 'yuʋ̈ga ‑gbadhɛ, 'yö‑ to 'yö ‑mlɛɛ "yaandhe nu‑ ‑dhɛ ‑ee?
LUK 11:12 "Ɛɛn mɛ 'bha ‑yö ka kpö 'gü, 'yö‑ ‑bha 'në ꞊ya ‑tɔyaan ‑gbadhɛ ‑gɔ, 'yö gɛan" nu‑ ‑dhɛ ‑ee?
LUK 11:13 "Sanni ka 'kö ka "gblü 'dhö 'ya‑ bha 'ka pë ‑sɛngbɔ ‑nu nu kaa‑ 'në ‑nu ‑dhɛ ꞊dhɛ ‑kɔ bha‑ 'dhö, 'yö n Dë 'kö‑ "klʋ 'dhö ‑së ꞊wɛ, ‑yö ‑dho ‑kɔ 'mɛ 'wo 'Nii‑ "slʋ̈ʋ̈slʋ̈ ‑gbadhɛ ‑gɔ ‑a ‑nu ‑dhɛ ‑kɔ kë ꞊dhɛ ‑a ‑ta?
LUK 11:14 Yi do 'ka, 'yö Yesu ‑yö "yina yaa 'ö gun mɛ do 'bha 'gü 'ö gun‑ kë sië "bhʋbhʋ 'ka bha‑ ‑kë, 'yö go 'mɛ bha‑ 'gü 'yö dhiang zë. 'Yö‑ 'wɔn ‑yö mɛ kpö 'wo gun mü bha‑ ‑nu kɔn, 'yö 'wo "dhi dɔ Yesu ‑bha bong 'ka.
LUK 11:15 "Kɛɛ 'yö mɛ 'bha ‑nu ‑wa pö: «'Mɛ 'ö bha "yina ‑nu 'ö‑ "piʋ̈ kë sië bha, Bɛɛzebidhö 'ö kë "yina yaa ‑nu ‑bha ‑gblüdë 'ka bha ꞊në‑ ‑faan nu‑ ‑dhɛ.»
LUK 11:16 Kö 'mɛ 'wo‑ 'güdandhɛ mɔɔ‑ sië 'pö ‑wa pö sië‑ ‑dhɛ 'wo‑ pö: «'Ö ꞊ya kë ꞊dhɛ faan 'ö i 'gü 'i 'wɔn ‑nu kë sië‑ ‑bha bha 'ö go Atanna ꞊në‑ "piʋ̈ dhang‑ 'gü tɛan‑ 'ka, ‑bhö "dhabhliwɔn 'bha kë kö 'yi‑ ‑dhɛ yö!»
LUK 11:17 "Kɛɛ ꞊dhɛ 'ö ‑kë ꞊dhɛ Yesu ‑ya ‑nu zuëpiʋ̈wɔn ‑dɔ, 'yö‑ ‑yɔ bɔ‑ ‑nu ‑gɔ 'ö‑ pö: «'Yaa ka 'gü ꞊dhɛ "sɛ "ʋʋ "sɛ 'ö‑ 'gümɛ ‑nu ꞊wa ‑ya 'ko ‑zë 'wo "kwëë ‑sü ‑bha, kö‑ "sɛ bha ꞊ya 'wü ꞊naa bha ‑ee? ꞊Ya kë "dhʋ̈ ‑a 'kɔdhi ‑nu 'waa 'wü ꞊në wo 'wo dho‑ 'ka ‑ee?
LUK 11:18 ꞊Ya kë "dhʋ̈ 'ka‑ pö ꞊dhɛ Sɔtraan ꞊në faan nu n ‑dhɛ 'yö 'a "yina yaa ‑nu ‑kë 'ka mɛ ‑nu 'gü bha oo, ꞊ya kë ꞊dhɛ Sɔtraan ꞊ya ö ‑gɛn ‑da ö ‑dɩ ‑bha mɛdhɛ 'gü kö ‑yö ‑gblü gɔɔn ö ‑dɩ 'ka bha ‑oo, ‑a ‑bha ‑gblüdëdhɛ ‑dho ꞊gwëë ‑kɔ ‑kë ꞊dhɛ?
LUK 11:19 ꞊Ya kë ꞊dhɛ 'ka‑ pö ma ‑zë a "yina ‑nu ‑kë mɛ 'gü Bɛɛzebidhö ꞊në‑ faan 'ka bha ‑oo, 'yö ka gbö ‑nu ‑zë ꞊wɛ? Yö ꞊në‑ ‑wɔn 'gü 'yö 'a dho‑ pö ka ‑dhɛ ꞊dhɛ ka ‑dɩa 'në ‑nu bha ꞊në 'wo dho ka zë za 'ka yi do 'ka.
LUK 11:20 "Kɛɛ ꞊ya kë ‑zë wo ꞊dhɛ a "yina yaa ‑nu bha‑ ‑nu ‑kë Atanna faan ꞊në‑ 'ka, kö‑ ‑bha ‑gblüdëdhɛ ꞊ya nu ka "piʋ̈.»
LUK 11:21 ꞊Dhɛ 'ö Yesu ꞊yaa‑ pö "dhʋ̈, 'yö‑ ‑ta "gwënng ‑da ‑nu ‑dhɛ 'ö‑ pö: «'Mɛ 'ö ‑kɛgbaan 'ka, 'ö ‑gblü ‑gɔɔn 'ka ‑kwɛɛ 'dhö‑ ‑gɔ, ꞊ya ö ‑bha "kwɛandhɛ ‑maa kë, ‑a ꞊slɔɔpë ‑nu ‑wo ‑kë wo 'flëë‑ 'gü.
LUK 11:22 "Kɛɛ 'mɛ 'ö‑ faan 'dhö "gbɩɩ‑ 'ö ‑ziö yö ‑zë ‑ta ꞊ya nu, kö‑ ‑kɔ ‑zë ‑yö wɔ‑ ‑ta, ‑ya 'kpee‑ ꞊në‑ bho, 'yö‑ ‑bha 'ko ‑zë 'ka ‑kwɛɛ ꞊gban sü‑ ‑gɔ 'yö‑ ꞊slɔɔpë ꞊gban "pɛpɛ 'gü ‑gblü mɛ ‑nu ‑ta.
LUK 11:23 ‑A ‑kë "dhʋ̈ ‑sü bha‑ 'gü, a‑ ‑pö ka ‑dhɛ ꞊dhɛ 'mɛ 'yii bɔ n 'ka kö ‑yö ‑nu n ‑gɔ, 'yö 'mɛ 'yii n ‑ta 'kun n "piʋ̈ ‑mɛ ‑nu ‑loo 'ko ‑ta ‑sü ‑bha, kö‑ ‑nu ‑kan 'kwëë‑ ‑mɛ ꞊në ‑mü.»
LUK 11:24 'Yö go mü 'ö‑ pö: «꞊Ya 'go yö ‑zë 'gü, "yina yaa ꞊ya 'go mɛ 'gü ꞊ya 'dho, ‑yö ‑dhɛ "kpɛadhɛ ‑nu ꞊në‑ ꞊mɔɔ kö 'ö ‑ya 'gü. ꞊Ya kë ꞊dhɛ ꞊yaa‑ ‑dhɛ mɔɔ‑ 'yii‑ yö 'yö‑ pö: «'A, ꞊ya 'to yö ‑zë ‑bha kö a ‑dho n yee kë 'a dho n ‑gɔ 'kɔɔdhɛ 'a go‑ ‑bha bha‑ 'gü "dhɛ.»
LUK 11:25 ꞊Ya kë "dhʋ̈ ꞊ya ö yee kë kö ‑yö nu, kö 'kɔɔdhɛ bha ꞊waa‑ ‑gblö "pɛɛpɛdhö, kö ꞊wa 'kɔɔdhɛ dhipë ‑nu ꞊loo mü ‑dhɛ ꞊gban 'gü,
LUK 11:26 'yö ö yee ‑dee 'bha ‑kë 'ö dho 'yö ö ‑kɔ ‑da "yina yaa ‑dee "saɔplɛ 'ö wo ‑zë ‑a ‑nu ‑mawɔn 'dhö 'ya‑ 'ö ‑ziö ö ‑ta ‑a ‑nu 'gü, 'yö 'wo nu 'zü ‑deewo 'wo ‑da 'mɛ bha‑ 'gü, 'yö 'wo wo ‑yɛa kun mü. ꞊Wa wo ‑yɛa ‑dee 'dhɛ 'kö bha‑ 'kun ꞊dhɛ ‑kɔ bha‑ 'dhö, ‑a 'mɛ bha‑ këwɔn ꞊ya ‑siö ‑zianwo ꞊taamasü bha‑ 'gü, ‑yö kë ꞊dhɛ 'pë 'yii pë 'bha kë ‑blɛɛsü ‑a 'dhö.
LUK 11:27 Yesu ‑yö ‑to dhiang ‑nu bha‑ ‑nu zë ‑dhɛ 'gü, 'yö dhebhɔnë do ‑yö bɔ mɛ kpö 'gü 'yö ö ‑wʋ "dhiʋ̈ ꞊wlü 'ö‑ pö: «'Aami, 'në suu 'kö ya 'ö ‑wɔ dhebhɔ 'kö "gblʋ̈ʋ̈‑, 'ö 'yɔn mü‑ ‑gɔ ‑a ‑bha ‑së ꞊tɔn ‑kɛɛ!»
LUK 11:28 "Kɛɛ 'yö Yesu ‑ya ‑yɔ bɔ 'ö‑ pö: «Mɛ ‑zian 'kö 'wo wo "tʋ 'to Atanna ‑wʋ ‑bha 'ö 'wo‑ 'gü ‑ta sü wo ‑zë ‑a ‑nu ‑bha ‑së 'ö ‑ziö dhebhɔ kö n kpɔ bha‑ ‑bha ‑ta!»
LUK 11:29 Yi do 'bha bha‑ 'ka 'zü, kö Yesu ꞊ya mɛ ‑nu yö kö ‑wo nu sië "tʋ ‑to ö ‑wʋ ‑bha ‑dhɛ 'gü ‑dhɛ ꞊gban 'gü yuudhö, 'yö ‑ya dhiang zë ‑sü ‑bha ‑a ‑nu ‑dhɛ 'ö‑ pö: «"Tʋ̈ng ya‑ 'gü ‑mɛ ‑nu këwɔn 'bha ‑bha 'bha 'yaa ‑së, "kɛɛ ‑ya ‑nu "piʋ̈ 'sa ꞊dhɛ 'a "dhabhliwɔn do 'bha kë ‑a ‑nu "yaan kö 'wo‑ 'suan‑ bho‑ ‑bha ꞊dhɛ Atanna ꞊në n bɔ tɛan‑ 'ka. "Kɛɛ 'mii 'dho "dhabhliwɔn ‑zë ‑dee 'bha kë 'zü ‑a ‑nu "yan "dhiʋ̈ kö 'yii kë 'wɔn 'ö ‑kë Atanna ‑wʋdhiʋ̈loomɛ Zonasö 'ka yi 'bha 'ka, ('ö ‑dhɛkpaɔyi ‑yaaga ‑kë 'yuʋ̈‑ "gblʋ̈ʋ̈‑ 'yö ‑wo 'zü "yɛa‑ 'ö ‑tosɛa ‑kë bha yö ‑zë suu 'ka).
LUK 11:30 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Zonasö ‑wɔn 'dhö ‑kë Ninivö ‑mɛ ‑nu ‑gɔ "dhabhliwɔn 'ka ‑kɔ do 'ö‑ 'gü yi 'bha 'ka bha, mang Mɛgbömɛ mang ‑dɩ 'pö n ‑wɔn ‑dho kë "tʋ̈ng ya‑ 'gü ‑mɛ ‑nu ‑gɔ ‑kɔ do bha ꞊në‑ 'gü.
LUK 11:31 ‑A ‑wɔn 'gü, Atanna ‑bha mɛ "bhɩɩ‑ ‑nu dhɛɛ" 'kpii‑ 'kpɔ ‑yi bha ꞊ya ꞊loo yi 'ö‑ 'ka, ‑gblüdëdhe 'ö gun Seba ‑sɛ ‑gɔ "dhiʋ̈ yi 'bha 'ka bha ꞊në dho "wlü 'yö 'mɛ 'wo "tʋ̈ng ya‑ 'gü bha‑ ‑nu zë za 'ka Atanna ‑kuu "dhiʋ̈; ‑a ‑gɛn ‑mü ꞊dhɛ yö ‑zë ‑yö kë ‑go "sɛ ꞊gblɛɛn ꞊dede 'gü 'ö nu 'ö ö "tʋ to (‑gblüdë) Sadhomɔ zë ‑dhiang ‑nu ‑bha, "yaaki 'ö Atanna ‑ya nu Sadhomɔ ‑dhɛ bha‑ "piʋ̈, 'sa a‑ ‑pö ka ‑dhɛ ꞊dhɛ ma 'kö a ka kpö 'gü ya, (ma ‑zë ma 'wɔn dɔ ‑sü ‑yö ‑ziö Sadhomɔ ‑bha ‑ta, "kɛɛ 'sa mɛ 'bha 'yaa ö "tʋ to n ‑wʋ ‑bha).
LUK 11:32 Ninivö ‑mɛ ‑nu ‑dɩ 'pö ‑wo ‑dho "wlü 'yi bha‑ 'ka Atanna wëëdhö, 'ö 'wo "tʋ̈ng ya‑ 'gü ‑mɛ ‑nu zë za 'ka; ‑a ‑gɛn ‑mü ꞊dhɛ ꞊dhɛ 'ö Zonasö ꞊ya 'dho ꞊ya dhiang zë 'mɛ 'wo bha‑ ‑nu ‑dhɛ ‑wo kë wo zuë" ‑slëë Atanna "piʋ̈. "Kɛɛ 'sa a‑ ‑pö ka ‑dhɛ ꞊dhɛ 'mɛ 'ö dhiang zë sië ka ‑dhɛ ya, yö ‑zë ‑duɛ ‑yö 'kpii‑ Zonasö ‑zë ‑bha ("kɛɛ yö ꞊në‑ ꞊gban 'gü 'waa "wɩ‑ ‑bha kö ‑wo wo zuë" slëë‑ Atanna "piʋ̈).»
LUK 11:33 'Yö‑ pö: «Mɛ 'bha 'yaa ‑dhangbha dɔ kö ‑yö gbɔ ‑gblü ‑ta, "ɛɛn 'zü kö ‑ya ‑gblɛn 'kpɔ, "kɛɛ ꞊waa‑ dɔ ‑wa ‑ya ‑dhangbha ‑dɔtapë ꞊në‑ ‑ta, 'yö 'mɛ ꞊ya ‑da 'kɔɔdhö 'yö ‑dhɛ yö.
LUK 11:34 ‑Kɔ do bha‑ 'gü, mɛ "yan ꞊në ꞊dhɛ mɛ kwi ‑bha ‑dhangbha 'dhö. "Tʋ̈ng 'ö mɛ "yan ‑dhɛ 'bha 'yaa‑ ‑bha, 'ö 'flëë‑ 'gü ‑së 'ka kö mɛ kwi ‑yö ‑dhɛpuudhɛ 'gü 'pö. "Kɛɛ mɛ "yan ‑dhɛ ꞊ya ‑ya ‑bha kö mɛ kwi ꞊ya ‑da ‑dhɛtiidhɛ 'gü.
LUK 11:35 ꞊Dhɛ 'ö "dhʋ̈ kö ‑ka ka ‑zʋ 'kpɔ ka ‑dɩ 'gü kö ‑dhɛpuudhɛ 'ö ka 'gü bha 'ya 'dho "gla ‑dhɛtiidhɛ 'gü.
LUK 11:36 ꞊Ya kë ꞊dhɛ ‑dhɛ 'dhö "pʋ ‑sü 'ka mɛ ‑dhɛ ꞊gban ‑dhɛ ꞊gban ‑ta, kö i ‑dhɛ 'bha 'yaa ‑dhɛtiidhɛ 'gü 'zü, kö ‑dhɛ ꞊ya "pʋ i ‑ta blongdhö ꞊naa bha. ꞊Ya kë "dhʋ̈ kö 'bha kë ꞊dhɛ 'mɛ 'ö dɔ sië ‑dhangbha 'bhü "dhiʋ̈, 'ö ‑dhɛ ꞊ya "pʋ‑ ‑zü zian ꞊gban 'ka ‑a 'dhö.»
LUK 11:37 ‑Yö ‑to dhiang bha‑ zë ‑dhɛ 'gü, 'yö Fadhiziɛn mi do ‑ya ‑dhɛ ‑bhöpë 'ka ö ‑gɔ 'kɔɔdhö 'yö dho.
LUK 11:38 ꞊Dhɛ 'wo gun pë ‑bhö sië, 'ö Yesu 'yii ö ‑kɔ "zu ꞊kö kö ‑yö gun ‑na pë ‑bhö ꞊dhɛ ‑kɔ 'ö‑ 'ka ‑a ‑nu 'tuʋ̈‑ 'ka ‑a 'dhö, 'yö‑ 'wɔn ‑yö Fadhiziɛn mi bha‑ kɔn.
LUK 11:39 "Kɛɛ 'yö kwa Dëmɛ ‑ya pö‑ ‑dhɛ 'ö‑ pö: «Fadhiziɛn ‑nu, 'ka bha ka ꞊dhɛ 'mɛ 'wo "yitakɔɔ ‑nu waa‑ pëbhögütɛa ‑nu ‑bha ‑dhɛ ‑zu 'ö 'wo‑ 'gü ‑dhɛ ‑zë to "dhʋ̈ ꞊në‑ 'dhö. Ka pa ‑sü 'ka ka dhɔɔbhaa ‑pë ‑nu ‑dhɔ waa‑ ꞊kwaan bho ‑sü ‑nu waa‑ "gblüyaadhɛ ‑nu ꞊në‑ 'ka kpɛnngkpɛnngdhö.
LUK 11:40 ꞊Ya kë "dhʋ̈ kö 'wɔn ‑ma 'koo ‑sü 'aa mü 'ka kë‑ sië bha ‑ee? ‑Gɔgütiimɛ ‑nu 'ka ya! "Ɛɛn Atanna 'ö pë kwi ‑bha ‑zian ‑da bha 'yii‑ 'gü ‑zian ‑zë ‑da ‑ee?
LUK 11:41 ‑Ka 'wɔn ‑nu 'wo ka zuë" "piʋ̈ bha ꞊në‑ bho 'mü ꞊kö ‑blɛɛsü kö pë ‑së 'ö go mü bha 'ka‑ ꞊gbaɔ ‑wëëmɛ ‑nu ‑gɔ. 'Ka yö ꞊në‑ kë "dhʋ̈ kö ka ꞊slɔɔpë ꞊gban "pɛpɛ ꞊ya kë "slʋ̈ʋ̈slʋ̈ Atanna 'gü.
LUK 11:42 "Kɛɛ ka ‑bha ‑yö ‑wëësü, Fadhiziɛn ‑nu! ‑A ‑gɛn ‑mü ꞊dhɛ ka kaa‑ tapë ‑nu 'nii‑ bho Atanna ‑dhɛ 'ö 'ka dho 'ka "tʋʋdhɛ ‑nu ꞊gban ‑zian 'nii‑ bho, "kɛɛ 'yö 'wɔn 'dhɛ 'kö këwɔn 'ka 'kaa‑ kë; ‑a ‑gɛn ‑mü ꞊dhɛ Atanna ‑dhɔ ‑bha mɛ kë ‑sü waa‑ dhɔɔbhaawɔn kë ‑sü 'ö‑ ‑dhio dɔ bha, yö ‑zë 'yaa 'dho ka ꞊gbin‑. "Kɛɛ 'sa kö yö ꞊në këpë 'ka 'nu ‑blɛɛsü, 'yö‑ 'dhɛ 'kö bha 'ö dɔ‑ "piʋ̈.
LUK 11:43 Ka ‑bha ‑yö ‑wëësü, Fadhiziɛn ‑nu! ‑A ‑gɛn ‑mü ꞊dhɛ ‑yɛa ‑blɛɛsü ‑nu 'wo Zuifö ‑nu ‑bha ‑yakwëëkëgükɔ 'gü ‑dhɛ ‑nu 'gü 'ö ꞊bhlëësü bha ꞊në ‑ya 'gü ‑dhɔ ‑yö ka ‑kë. 'Yö ka "piʋ̈ ꞊dhɛ 'ka kë mɛ kpö 'gü "dhɛɛdhɛ ‑nu 'gü, ‑wo ka ꞊në ka ꞊tua bho ꞊bhlëësü 'ka kö ‑yö ziö mɛ ‑kpɛa ‑ta.
LUK 11:44 Ka ‑bha ‑kë ‑wëësü ‑gɛn ‑mü ꞊dhɛ ka ꞊dhɛ mɛ bun 'ö‑ 'suan‑ ‑bho ‑bha ‑pë 'yaa 'dhö, 'ö mɛ ‑yö ꞊taa‑ ‑ta mɛ tii' 'ka, 'ö‑ bian ‑yö mɛ kun bha ꞊në‑ 'dhö.»
LUK 11:45 ꞊Dhɛ 'ö ꞊yaa‑ pö "dhʋ̈, 'yö 'tɔnggɔmɛ ‑nu 'wo gun mü bha‑ mɛ do ‑ya pö‑ ‑dhɛ 'ö‑ pö: «N Dëmɛ, ‑a 'dhɛ 'kö bha 'bha‑ pö "dhʋ̈ kö i "si bho sië mɛ ꞊gban "pɛpɛ ꞊në yi ‑gɔ bha 'sa ‑wa!»
LUK 11:46 'Yö Yesu ‑ya ‑yɔ bɔ‑ ‑gɔ 'ö‑ pö: «'Tɔnggɔmɛ ‑nu, kaa ‑dɩ 'pö ka ‑bha ‑yö ‑wëësü; ‑a ‑gɛn ‑mü ꞊dhɛ 'tɔng‑ ‑nu 'ka‑ dɔ mɛ ‑nu ‑dhɛ bha ‑yö ‑kë ꞊dhɛ ꞊kwɛɛ‑ 'gbiin‑ 'ö mɛ 'bha 'yaa ꞊mɔɔ‑ ‑bha 'ö 'ka‑ dhu 'ka mɛ ‑nu dɔ‑ 'ka ꞊në‑ 'dhö. Mɛ ‑nu ꞊në 'ka‑ ‑nu ‑ta dɔ‑ 'ka, "kɛɛ kö ka ‑zë 'kaa "wɩ‑ ‑bha kö 'ka ka kɔngga ‑zian zun‑ ‑bha kö yöö ‑nu to‑ 'sü ‑wɔn ꞊në‑ ‑bha.
LUK 11:47 A‑ ‑pö ka ‑bha ‑yö ‑wëësü, ‑a ‑gɛn ‑mü ꞊dhɛ bun ‑sɛngbɔ ‑nu ꞊në 'ka Atanna ‑wʋdhiʋ̈loomɛ ‑nu 'ö ka "bhɛma ‑nu ‑wa zë yi 'bha 'ka bha‑ ‑nu ‑wɔ sië‑ 'gü, "kɛɛ kö kaa ꞊dede ka‑ 'wɔn ‑dɔ ꞊dhɛ wo ꞊në 'wo‑ ‑nu zë.
LUK 11:48 ‑A kë 'ka‑ wo "dhʋ̈ bha ꞊në‑ ‑zɔn ꞊dhɛ kaa‑ ka "bhɛma ‑nu ka zü ‑yö do, ‑a ‑gɛn ‑mü ꞊dhɛ ꞊dhɛ 'wo‑ ‑nu zë 'yö ka ‑zë 'ka 'kɔ dɔ‑ ‑nu bun ‑ta.
LUK 11:49 'Wɔn 'ö‑ ‑wɔn 'gü 'yö Atanna ‑ya pö ö ‑bha ꞊kpaɔdhɛ ‑bha yi 'bha 'ka ꞊dhɛ: ‹A ‑dho n ‑wʋdhiʋ̈loomɛ ‑nu bɔ‑ ‑nu ‑dhɛ, waa‑ ma bɔmɛ ‑nu 'dhö, 'yö 'wo‑ mɛ 'bha ‑nu zë, 'yö 'wo‑ mɛ ‑kpɛa ‑wëëdhɛ bho› bha 'yö bha.
LUK 11:50 ‑A ‑kë "dhʋ̈ ‑sü 'gü, Atanna ‑wʋdhiʋ̈loomɛ ‑nu 'wo ‑gban ‑a ‑nu zë ‑sü bha "dhʋ̈ yi 'bha ‑yi 'bha 'ka 'ö nu 'ö zun ꞊dɛɛ ‑bha bha, ‑a "dhang ‑dho 'mɛ 'ka "tʋ̈ng ya‑ 'gü bha ꞊në ka 'kun.
LUK 11:51 'Ö go Abɛdhö ‑bha 'ö dho 'ö zun‑ 'ka Zakadhi 'wo‑ zë "saabhodhɛ waa‑ Atanna ‑dhɔkëgükɔ ‑a ‑nu ꞊zinng 'gü bha‑ ‑bha, a‑ ‑pö ka ‑dhɛ tɛan‑ ꞊dede 'ka ꞊dhɛ 'mɛ 'ka ꞊dɛɛ ‑yën ya‑ 'gü ya ꞊në‑ "dhang 'dhö ka ‑bha.
LUK 11:52 'Tɔngdɔmɛ ‑nu, ka ‑bha ‑yö ‑wëësü, ‑a ‑gɛn ‑mü ꞊dhɛ zian 'ö dho Atanna "piʋ̈ 'ö tɛan‑ ‑zian 'ka bha, 'ka‑ ta mɛ "bhɩɩ‑ ‑nu ‑gɔ 'ka‑ ‑dhaklɩ ‑da ka ‑ta. Mɛ dha ‑zian bha 'kaa "wɩ‑ ‑bha kö 'ka ‑da ‑ta, "kɛɛ 'sa 'ka zun mɛ ‑kpɛa ‑gɔ zian‑, ‑a ‑nu ‑da mü ‑kɔ 'bhaa 'dhö, "kɛɛ kö ‑a ‑dhɔ ‑ya wo ‑zë ‑a ‑nu ‑bha 'sa.»
LUK 11:53 ꞊Dhɛ 'ö Yesu ꞊ya ö bo dhiang ‑nu bha‑ ‑nu zë ‑sü 'ka 'ö 'dho sië, 'yö Fadhiziɛn ‑nu waa‑ 'tɔnggɔmɛ ‑nu 'wo wo wë 'gü ‑siö kö ‑wo ꞊nëng sië‑ "sɔn 'gü 'wo dhɛɛ" ꞊gban "pɛpɛ suu 'do 'do kpɔ‑ ‑gɔ
LUK 11:54 ‑a ‑gɛn mɔɔ‑ kian 'ka, kë "dhʋ̈ kö 'wo‑ 'kun‑ ‑dɩ "dhi ‑dhiang ‑bha.
LUK 12:1 Yö ‑zë 'ö kë sië "dhʋ̈ "tʋ̈ng 'ö‑ 'gü bha kö mɛ "bhɩɩ‑ 'ö bho 'ko ‑ta kö ꞊ya kë ‑ziisü. Kö‑ ‑nu pɛng ꞊ya bhɔ 'ko zë ꞊dhɛ ‑bha. 'Mɛ 'wo gun ‑dhɛ bha‑ 'gü ‑wo ‑mɔɔ mɛ "gblü drun ꞊dede ‑bha. ‑Yö ‑ya ‑dhio dɔ ‑sü ‑bha ö ‑bha ꞊klang ‑nu ‑ta yö ꞊në‑ 'gü 'ö‑ pö: «‑Ka ka ‑dɩ 'kun Fadhiziɛn ‑nu ‑bha ꞊gɔng 'wo‑ ‑da mɛ ‑nu ‑gɔ "gblʋ̈ʋ̈dhɛ ꞊gblɛɛndhɛ ‑bha bha ꞊në‑ ‑gɔ ('kö 'ka 'dho kë ꞊dhɛ‑ ‑nu 'dhö),
LUK 12:2 ‑a ‑gɛn ‑mü ꞊dhɛ 'wɔn "pɛpɛ 'wo ‑bin ‑sü 'ka ‑a 'bha 'yii 'dho 'to ‑bin 'gü kö "dhɛ 'yii bho‑ ‑ta, "ɛɛn 'wɔn "pɛpɛ 'wo‑ ‑kë ‑bin 'gü, ‑a 'bha 'yii 'dho 'to ‑gblɛn 'kpɔ 'gü, ‑a ꞊gban‑ ‑dho ‑wo zang ‑ta.
LUK 12:3 'Yö 'wɔn 'ö‑ ‑wɔn 'gü 'yö 'wɔn "pɛpɛ 'ka dho‑ pö ‑dhɛtiidhɛ 'gü, 'yö‑ ꞊gban dho ‑wo "yɛa‑ ‑dhɛpuudhɛ 'gü, 'yö dhiang ‑nu 'ka dho‑ zë "waa 'gü ka ‑gɔ 'kɔɔdhɛ ‑nu 'gü bha 'wo‑ ꞊gban pö "dhɛɛ ‑ta bha 'yö bha.
LUK 12:4 'Mɛ 'ka n "taɔngdë ‑nu 'ka bha ꞊në 'a dhiang ‑nu bha‑ zë ka ‑dhɛ ꞊dhɛ: "Suʋ̈ 'ya 'dho ka kë 'mɛ ꞊wa ka zë 'wii 'dho ꞊mɔɔ‑ ‑bha kö ‑wo 'wɔn "wɛɛ 'bha kë ka 'ka yö ‑zë zian‑ ‑ta bha‑ ‑nu ‑gɔ,
LUK 12:5 "kɛɛ 'mɛ 'ö ‑suʋ̈gɔmɛ 'ka, a ‑dho ‑zɔn ka ‑dhɛ. Atanna 'ö ꞊ya ka zë 'ö ꞊mɔɔ‑ ‑bha 'ö ka 'nii‑ ‑da pɛng ‑kaso 'gü bha ꞊në ‑suʋ̈gɔmɛ 'ka. A‑ ‑pö ka ‑dhɛ tɛan‑ ꞊dede 'ka ꞊dhɛ 'mɛ 'ö ‑suʋ̈ ‑gɔ ‑mɛ 'ka 'yö bha.
LUK 12:6 Zöngnë ‑nu ꞊në 'wo ꞊mɔɔ‑ ‑bha 'wo‑ "sɔɔdhu "dhɔɔ dɔ ‑suga ꞊plɛ ‑bha, "kɛɛ 'sa kö ‑a ‑nu ‑bha ‑kë 'sɛɛnnë ‑sü ꞊gban waa‑ ‑bha ‑bha Atanna ‑zʋ 'yaa bhɔ‑ do ‑zian 'ka.
LUK 12:7 'Sa ka ‑zë ka ‑gɔdhɛ ‑zian 'ö ka ‑gɔ ‑bha ‑yö dhong‑ ‑sü 'ka 'ö‑ "dhi 'dhö Atanna "yaan. A‑ ‑pö yö ꞊në‑ ‑wɔn 'gü ka ‑dhɛ ꞊dhɛ 'ka 'dho "suʋ̈; ‑a ‑gɛn ‑mü ꞊dhɛ ka ꞊bhlëë ‑yö 'kpii‑ 'ö ‑ziö zöngnë 'gbɛ ꞊dede ‑zian ‑ta.
LUK 12:8 A‑ ‑pö ka ‑dhɛ ꞊dhɛ: Mɛ "ʋʋ mɛ 'ö dɔ "dhɛɛ ‑ta 'ö‑ pö ö ‑bɔ n 'ka, mang ‑dɩ 'pö a ‑dho dɔ Atanna ‑bha "kië ‑nu wëëdhö yi do 'ka 'a‑ pö a ‑bɔ ‑a ‑mɛ 'ka, mang Mɛgbömɛ ma ꞊në 'a‑ pö.
LUK 12:9 "Kɛɛ mɛ "ʋʋ mɛ 'ö bo n 'ka "dhɛɛ ‑ta, mang ‑dɩ 'pö a ‑dho bo‑ ‑mɛ 'ka Atanna ‑bha "kië ‑nu "yan "dhiʋ̈ yi do 'ka.
LUK 12:10 ꞊Ya 'go yö ‑zë 'gü, mɛ "ʋʋ mɛ 'ö mang Mɛgbömɛ n ‑bhafang bho, Atanna ‑dho ‑a ‑mɛ ‑mawɔn to, "kɛɛ mɛ "ʋʋ mɛ 'ö‑ ‑bha 'Nii‑ "slʋ̈ʋ̈slʋ̈ ‑bhafang bho, 'yii 'dho‑ ‑mɛ ‑mawɔn 'to tongtongdhö.
LUK 12:11 ꞊Ya kë ꞊dhɛ ꞊wa ka 'kun kö ‑wo 'dho ka 'ka Zuifö ‑nu ‑bha ‑yakwëëkëgükɔ ‑nu 'gü, "ɛɛn zadɔmɛ ‑nu ‑kuu "dhiʋ̈, "ɛɛn 'zü ‑gɔmɛ "gblʋ̈gblʋ̈ ‑nu ‑kuu "dhiʋ̈ (ma ‑zë n ‑wɔn 'gü), 'ka dho ka ‑dɩ ‑ta za dɔ ‑kɔ ‑nu 'ö‑ 'gü, "ɛɛn dhiang ‑nu 'ka dho‑ zë, ‑a 'bha "sika 'ya 'dho kë ka 'gü;
LUK 12:12 ‑a ‑gɛn ‑mü ꞊dhɛ Atanna ‑bha 'Nii‑ "slʋ̈ʋ̈slʋ̈ bha ‑yö ‑dho ‑a ‑da ka zuë" "piʋ̈ ‑a "tʋ̈ng ꞊dede bha‑ 'gü 'yö 'pë 'ö pöpë 'ka ‑a dɔ ka "dhi.
LUK 12:13 Yesu ‑yö ‑to ‑a pö "dhʋ̈ ‑dhɛ 'gü, 'yö mɛ do 'bha ‑yö bɔ mɛ kpö bha‑ 'gü 'ö‑ pö: «N Dëmɛ, ‑bhö ‑a pö n ꞊dhoo ya‑ ‑dhɛ ‑yö kwa dë 'kɛan‑ bha‑ 'gü ‑gblü kö ‑yö n ‑bha nu.»
LUK 12:14 'Yö Yesu ‑ya ‑yɔ bɔ‑ ‑gɔ 'ö‑ pö: «N "taɔngdë, de ꞊në n ‑ya ka ‑gɔ "dhiʋ̈, "ɛɛn 'ö n ‑ya kaa‑ 'kɛan‑ 'gü ‑gblü ‑mɛ 'ka?»
LUK 12:15 'Yö‑ pö‑ ‑nu ‑dhɛ 'ö‑ pö: «Ka ka ‑dɩ 'kun ‑së ꞊naɔ ‑dhɔ ‑bha ka kë ‑sü yaa 'gü yaa ‑gɔ, 'ka 'dho 'to ‑kplü ‑sü 'ka ꞊naɔ ‑bha; ‑a ‑gɛn ‑mü ꞊dhɛ 'kö 'zü 'mɛ 'bha ꞊naɔ ꞊slɔɔ ‑kɔ "ʋʋ ‑kɔ 'ö‑ 'gü, "kɛɛ mɛbhɩɩdhe ‑bha ‑tosɛa kë ‑sü 'yaa ‑gban ꞊naɔ ‑kë mɛ ‑gɔ ‑sü ‑bha.»
LUK 12:16 'Yö "gwënng do ‑da ‑nu ‑dhɛ 'ö‑ pö: «꞊Naɔmɛ 'kpii‑ do 'bha ꞊në gun yi 'bha 'ka, 'yö 'ke‑ 'kpii‑ ‑kë ‑kwɛ 'bha bha‑ ‑ta, 'yö 'ke‑ ‑yö ‑dhi ‑gɔ ꞊dedewo ‑kwɛ bha‑ ‑ta.
LUK 12:17 Tapë ‑dhi ‑gɔ ‑kɔ yaa 'ö ‑kwɛ bha‑ ‑ta bha‑ ‑wɔn 'gü, 'yö ‑ya ö ‑zʋ 'gɔn ‑sü ‑bha 'ö‑ pö: «‑Bhöpë 'ö "sinma 'dhö ya‑ ꞊loo ‑dhɛ ‑yö 'mɛ? Maa‑ kë ‑kɔ kë ꞊dhɛ?»
LUK 12:18 'Yö ö ‑zʋ gɔn "sɛnngdhö 'yö‑ pö: «‑ën 'hëëën! 'Pë 'ö maa‑ kë 'ma‑ dɔ. Ma ‑bhöpë ‑loo 'gü ‑kɔ ‑nu 'ö ꞊wa kë 'sɛɛnnë bha ꞊në maa‑ 'wü kö 'a ‑dee dɔ kö 'a ma tapë ‑nu ꞊loo‑ 'gü, waa‑ n ꞊slɔɔpë ‑kpɛa 'dhö.
LUK 12:19 ꞊Ya kë ꞊dhɛ 'ma n bo, 'yö 'a‑ pö n ‑dɩ ‑dhɛ ꞊dhɛ: ‑Kwɛ ꞊ya dhi, ‑bhöpë ꞊ya ziö n ‑ta, 'mii 'dho 'ke‑ kë ‑kwɛ kpö 'ka, maa n "tɛɛ pa kö 'a pë ‑bhö kö 'a pë mü kö 'a n 'flëë‑ bho.»
LUK 12:20 "Kɛɛ 'yö Atanna ‑ya pö‑ ‑dhɛ 'ö‑ pö: «A ‑tamamɛ 'i ya! I ‑dho ga gbeng do 'ö ꞊dɛɛ‑ 'gü kö‑ ꞊naɔ bha 'mɛ 'ö yöö ö 'flëë‑ bho‑ 'gü 'i‑ ‑mɛ pö?»
LUK 12:21 ꞊Dhɛ 'ö Yesu ꞊ya ö bo "gwënng bha‑ ‑da ‑sü 'ka, 'yö‑ ‑ta yɔ ‑nu ‑dhɛ 'ö‑ pö: «Mɛ "ʋʋ mɛ 'ö ꞊naɔ ꞊mɔɔ 'ö‑ drung dɔ ö ‑dɩ ‑dhɛ "kpʋng ꞊taa yö, 'ö 'yaa ö ‑zʋ 'gɔn 'ö ‑dhɛkpaɔ dhia" 'ö Atanna wëëdhö ‑a 'ka, ‑a ‑mɛ ‑kë ꞊dhɛ 'mɛ bha ꞊në‑ 'dhö.»
LUK 12:22 'Yö‑ pö ö ‑bha ꞊klang ‑nu ‑dhɛ: «'Pë 'ö‑ ‑wɔn 'gü 'yö 'a‑ pö ka ‑dhɛ ꞊dhɛ: 'Ka 'dho ‑ya kaa‑ ‑tosɛa ‑wɔn zuën ‑ta bha 'yö bha. Ka ‑bhöpë ‑wɔn ‑nu oo, ka ‑dasɔ ‑wɔn ‑nu oo, 'ka 'dho ‑ya ‑a 'bha ‑wɔn zuën ‑ta.
LUK 12:23 ‑A ‑gɛn ‑mü ꞊dhɛ mɛ 'nii‑ ‑zë ‑wɔn ‑yö "gbɩɩ‑ 'ö ‑ziö ‑bhöpë ‑wɔn ‑ta, 'yö mɛ kwi ‑dɩ 'pö‑ ‑wɔn 'dhö "gbɩɩ‑ 'ö ‑ziö sɔ ‑wɔn ‑ta.
LUK 12:24 ‑Ka 'wɔn 'suan‑ bho gɔngdë ‑nu ‑bha! ‑An ‑bha 'bhlaadhɛ ‑yö 'mɛ kö woo‑ ‑mlü "kan? 'Kɔ ‑zian 'yaa‑ ‑nu ‑gɔ kö yöö 'to‑ ꞊gbaandhɛ kë ‑sü ‑bha. "Kɛɛ 'sa ‑wo pë ‑bhö yi ꞊gban 'ka 'wo kën. Atanna ꞊në‑ ‑nu "dhiʋ̈ gba. ‑Ka ‑dhɛ ‑ga, ka ‑zë ka ꞊bhlëë 'ö Atanna ‑gɔ ‑yö ‑ziö ‑maa ‑nu ‑ta. ‑A ‑dhiang ‑zian 'yaa zë.
LUK 12:25 "Ɛɛn mɛ 'bha ‑yö ka kpö 'gü 'ö‑ ‑mɛ ‑bha ‑ya ö ‑dɩ ‑bha ‑tosɛa ‑wɔn zuën ‑ta ‑sü ‑wɔn 'gü, 'ö ꞊mɔɔ‑ ‑bha 'ö ö ‑dɩ ‑bha ꞊sii "pɛn 'në 'dɛdɛ ‑zian ‑da 'gü ‑ee?
LUK 12:26 'Kii ꞊mɔɔ 'wɔn 'në ‑bhaasü 'kö bha‑ kë ‑sü ‑bha, ka ‑ya 'sa 'wɔn ‑kpɛa 'ö to ‑a ‑nu zuën ‑ta ‑më ‑wɔn 'gü?»
LUK 12:27 'Yö‑ pö: «‑Ka "dhü ‑nu 'wo "bin ‑ya sië bha‑ ‑nu ‑ga, 'waa yë 'bha kë, 'waa sɔ bɔ, "kɛɛ sɔ 'wo‑ ‑da wo ‑bha bha a‑ ‑pö ka ‑dhɛ ꞊dhɛ (‑gblüdë) Sadhomɔ 'ö gun ꞊naɔmɛ ‑ziisü 'ka yi 'bha 'ka bha, ‑a ‑bha 'tɔbhɔdhe ꞊gban waa‑ ‑bha ‑bha, 'yii‑ sɔ suu bha‑ ‑da tongtongdhö 'ö to‑ ‑bha.
LUK 12:28 Yö ꞊në‑ ‑wɔn 'gü 'yö 'a‑ pö 'ka ka ‑zʋ yö Atanna ꞊në‑ ‑dhɛ. Kaa‑ ‑zʋ ‑yö ‑a ‑dhɛ ‑sü ꞊në 'dɛdɛ. 'Yaa yö ‑zë 'ka, "sanni ‑yö sɔ ‑da "bü ‑zë ‑bha ꞊dhɛ ‑kɔ bha‑ 'dhö bha ‑oo, 'yö ka ‑zë ꞊wɛ?
LUK 12:29 Ka ‑zë 'ka 'dho ka ‑bhöpë "ɛɛn ka müpë mɔɔ‑, 'ka 'dho ‑ya ‑zianwo ‑a ‑wɔn zuën ‑ta;
LUK 12:30 ‑a ‑gɛn ‑mü ꞊dhɛ 'mɛ 'waa Atanna dɔ ꞊në 'wo pë 'dhɛ ‑nu bha‑ ‑nu ꞊mɔɔ. "Kɛɛ ka ‑zë, ka Dë bha ‑ya 'wɔn ‑dɔ ꞊dhɛ ka ‑mawɔn ‑ya ‑bha.
LUK 12:31 'Pë 'ö mɔɔpë 'ka ka ‑zë ka ‑bha 'ka ‑blɛɛsü yö ‑mü ‑a ‑bha ‑gblüdëdhɛ 'ö dhang‑ 'gü bha ꞊në‑ 'ka, 'ka yö ꞊në‑ kë "dhʋ̈ 'yö pë "pɛpɛ 'ö ka ‑mawɔn 'dhö‑ ‑bha, 'yö‑ nu ka ‑dhɛ.
LUK 12:32 ‑A ‑wɔn 'gü, 'mɛ 'ka bɔ n 'ka 'ö ka kpö 'në 'dhö ꞊dhɛ ‑tuʋ̈ kpö 'dhö ya, "suʋ̈ 'bha ‑bha 'bha 'ya 'dho ka kë! ‑A ‑gɛn ‑mü ꞊dhɛ ‑yö ‑ga ka Dë Atanna ꞊në‑ 'gü 'yö ö ‑bha ‑gblüdëdhɛ bha‑ nu ka ‑dhɛ.
LUK 12:33 ‑Ka ka ꞊slɔɔpë ‑nu 'go kö 'ka‑ sɔng ꞊gbaɔ ‑wëëmɛ ‑nu ‑gɔ kö ꞊naɔ 'ö 'yaa see‑, "ɛɛn 'ö 'yaa kë zii bha ꞊në 'ka‑ mɔɔ‑, kö 'ka ꞊naɔ 'ö 'yaa yën bha ꞊në‑ ꞊loo 'ko ‑ta dhang‑ 'gü. ‑Dhɛ bha ꞊në ꞊kwaanmɛ 'bha 'yaa 'dho mü "ɛɛn 'ö ꞊zɛ 'yaa pë see‑ ‑bha tongtongdhö.
LUK 12:34 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑dhɛ 'ö mɛ ꞊slɔɔpë 'dhö‑ ‑bha ꞊në mɛ zuë" 'yaa 'go mü.»
LUK 12:35 'Yö go mü 'ö‑ pö: «꞊Ya 'go yö ‑zë 'gü, ka ‑ta ‑yö kë 'kun ‑sü 'ka "tʋ̈ng ꞊gban "pɛpɛ 'gü kö kaa‑ ‑dhangbha ‑nu ‑wo kë dɔ ‑sü 'ka.
LUK 12:36 Ka ‑zë ‑ka kë ꞊dhɛ gwëëzë ‑nu 'ö‑ ‑nu Dëmɛ ꞊ya 'dho dhedɔ troo ‑ta ‑dhɛ 'bha 'gü, 'ö 'wo ‑ya sië‑ ‑gɔ kö ꞊ya nu ꞊ya "kwɛɛ ‑ta ‑ma kö ‑wo 'to ‑wo "kwɛɛ "pʋ‑ ‑gɔ ꞊në‑ 'dhö.
LUK 12:37 Gwëë" 'ö suu 'dhö "dhʋ̈ 'ö‑ ‑gɔmɛ yaa‑ ‑go "ta 'gü 'ö dho nu 'ö ‑kpan ‑bha kö ‑yö ‑ya sië ö "yaan "dhʋ̈ bha kö‑ ‑bha ‑së. A‑ ‑pö ka ‑dhɛ tɛan‑ ꞊dede 'ka ꞊dhɛ ‑yö ‑dho ö ‑ta kun 'ö‑ ‑nu 'yaanu. 'Ö ꞊wa bo 'yaanu ‑sü 'ka 'ö‑ ‑nu "dhiʋ̈ ‑ziö wo.
LUK 12:38 Yaa‑ ‑nu "tʋ̈ng "ʋʋ "tʋ̈ng 'ö‑ 'gü, ‑yö ‑kë gbeng ꞊zinng 'gü oo, ‑yö ‑kë ‑dhɛkpaɔ "dhiʋ̈ oo, 'mɛ 'ö dho ‑kpan ‑a ‑nu ‑bha kö ‑wo ‑ya sië wo "yaan ‑a ‑bha gwëëzë ‑nu bha‑ ‑nu kpö 'gü, kö‑ ‑nu ‑bha ‑së.
LUK 12:39 ‑Yö kë ka "yaan ꞊dhɛ ꞊ya kë 'nu ꞊dhɛ 'kɔdë 'ö 'dhö ‑yö "tʋ̈ng 'ö ꞊kwaanmɛ dho nu‑ 'ka ö ‑gɔ 'kɔɔdhö ‑a ‑dɔ, kö ‑yö ‑dho ‑ya ö "yaan 'ö 'waa ꞊kwaan bho‑ ‑ta 'ö 'waa‑ ‑bha 'kɔ zua.
LUK 12:40 ꞊Dhɛ 'ö "dhʋ̈, kaa ‑dɩ 'pö ‑ka kë baa‑ ‑sü 'ka yi ꞊gban "pɛpɛ 'ka; ‑a ‑gɛn ‑mü ꞊dhɛ mang Mɛgbömɛ a ‑dho nu "tʋ̈ng 'ö ka ‑zʋ 'yaa‑ ‑bha ꞊në‑ 'ka.»
LUK 12:41 'Yö Piɛdhö ‑ya pö‑ ‑dhɛ 'ö‑ pö: «N Dëmɛ, "gwënng 'i‑ ‑da bha i‑ ‑da 'mɛ 'yi ‑kë i ‑bha ꞊klang ‑nu 'ka ya ꞊në yi ‑dhɛ, "ɛɛn i ‑wɩ mɛ ꞊gban "pɛpɛ ꞊në yi 'ka bha do ‑ee?»
LUK 12:42 'Yö‑ ‑yɔ bɔ‑ ‑gɔ 'ö‑ pö: «Gwëëmi ‑towʋtasü 'ö ꞊kpaɔsü "dhʋ̈ bha yö ‑mü de ꞊në‑ 'ka 'sa? Yö ‑mü 'mɛ 'ö‑ Dëmɛ dho ö ‑bha 'kɔ 'to‑ "piʋ̈ 'ö ö ‑zʋ ‑kë 'gü, 'ö ‑bhöpë nu‑ dëmɛ ‑bha yëkëmɛ ‑nu ‑dhɛ ‑a nu "tʋ̈ng ‑bha bha ꞊në‑ 'ka.
LUK 12:43 'Mɛ 'ö‑ dëmɛ yaa‑ ‑nu kö ‑ya kë sië "dhʋ̈ bha kö‑ ‑bha ‑së.
LUK 12:44 A‑ pö ka ‑dhɛ tɛan‑ ꞊dede 'ka ꞊dhɛ ‑yö ‑dho ‑a ‑ya ö ꞊slɔɔpë ꞊gban "pɛpɛ ‑gɔ "dhiʋ̈.
LUK 12:45 "Kɛɛ ꞊ya kë ‑zë wo ꞊dhɛ ‑a gwëëmi ꞊yaa‑ pö ö ‑dɩ ‑dhɛ ꞊dhɛ: «‑Ee', 'mɛ bha 'yii 'dho nu 'piö‑, ꞊ya ‑ya ö dëmɛ ‑bha yëkëmɛ ‑nu ‑ma ‑sü ‑bha, ꞊ya ‑ya pë ‑bhö ‑sü waa‑ we mü ‑sü ‑bha, kö ‑ya mü kö ‑ya 'kun,
LUK 12:46 ‑a gwëëmi suu bha‑ dëmɛ ‑dho "kan‑ 'gü 'ö nu yi 'ö‑ ‑zʋ 'yaa‑ ‑bha waa‑ "tʋ̈ng 'ö 'yaa‑ dɔ bha ꞊në‑ 'ka. 'Yö ꞊ya nu bha‑ wo "dhʋ̈ 'yö‑ gwëëmi bha‑ kun 'yö 'wɔn bho‑ 'gü ꞊dedewo, 'yö‑ sü 'yö waa‑ 'wɔnyaakëmɛ ‑nu 'ö 'wii 'to ‑kplü ‑sü 'ka Atanna ‑bha bha‑ ‑nu bɔ ‑dhɛ do 'gü,
LUK 12:47 Gwëëmi 'ö ö dëmɛ ‑dhidhɛwɔn dɔ "kɛɛ 'ö 'yaa‑ kë bha‑ dëmɛ ‑dho "dhü ‑yan 'bha bho‑ 'gü ‑sɔbhɛɛ ꞊dede 'gü.
LUK 12:48 Gwëëmi 'dhɛ 'ö 'yii ö Dëmɛ dhɔɔbhaawɔn dɔ, yö ‑zë ꞊ya mɛ ‑ma 'gü ‑wɔn kë, ‑wo ‑dho ‑a ‑ma ‑zë wo 'pö, "kɛɛ 'yii 'dho kë ꞊dhɛ mɛ ‑blɛɛsü ‑bha 'dhö; ‑a ‑gɛn ‑mü ꞊dhɛ 'mɛ 'wo pë 'gbɛ nu‑ ‑dhɛ, 'yö 'wo ꞊trɔɔn 'kpii‑ mɔɔ‑ ‑mɛ "dhiʋ̈ 'pö, 'yö 'wo ꞊nëng‑ "sɔn 'gü pë 'gbɛ 'wo‑ nu‑ ‑dhɛ bha‑ ‑wɔn 'gü.»
LUK 12:49 'Yö‑ pö: «Nu 'a‑ wo "kpʋng ꞊taa bha a ‑nu pɛng ꞊në ‑da ‑dhɛ 'gü. ꞊Ya kë ꞊dhɛ ꞊ya ‑dhɛ ‑bhö ‑sü zü bho 'nu n "yaan ‑yö ‑dho dhi n ‑dhɛ ꞊dedewo!
LUK 12:50 "Kɛɛ 'wɔn "gbɩɩ‑ 'ö ‑bɔ 'gü ‑wɔn 'dhö ‑tun n ‑bha bha ꞊në‑ ‑zii 'dhö ‑tun n ‑ta 'ö dho 'ö zun‑ 'ka ‑a ‑gɔ ‑da 'plöö ‑yi ‑bha!
LUK 12:51 ‑Yö ‑kë ka 'gü ꞊dhɛ zuëwaanusü ꞊në 'a nu‑ 'ka "kpʋng ꞊taa yö ‑ee? A‑ ‑pö ka ‑dhɛ ‑abin! 'Mii nu zuëwaanusü 'ka, a ‑nu ‑kankwëësü ꞊në‑ 'ka "kpʋng ꞊taa.
LUK 12:52 ‑A ‑gɛn ‑mü ꞊dhɛ ꞊ya 'go ꞊dɛɛ 'gü, 'mɛ 'wo 'kɔ do 'gü ꞊wa kë "sɔɔdhu, ‑wo ‑dho "pɛ 'gü 'ö mɛ ‑yaaga 'wo 'dhang bho n "dhiʋ̈ 'wo bɔ "pɛan do "piʋ̈, 'ö‑ mɛ ꞊plɛ 'ö 'waa 'dhang bho n "dhiʋ̈ 'wo bɔ 'pö "pɛan do "piʋ̈, "ɛɛn 'zü mɛ ꞊plɛ‑ ‑dho bɔ "gʋ̈ng 'bha "piʋ̈, 'ö mɛ ‑yaaga bɔ "gʋ̈ng 'bha "piʋ̈.
LUK 12:53 'Nëdë ‑dho ‑siö ö gbö ‑bha, 'ö 'në 'dhö ‑siö ö dë ‑bha. 'Nëdhe ‑dho ꞊sië ö 'dhu ‑bha, 'ö‑ 'dhu ‑dɩ 'pö 'ö ‑siö ö dhe ‑bha. Gɔndhe ‑dho ‑siö ö gbö ‑bha dhebhɔ ‑bha, 'ö‑ gbö ‑bha dhebhɔ ‑dɩ 'pö 'ö ‑siö ö "na ‑bha (n ‑wɔn 'gü).»
LUK 12:54 'Yö‑ pö 'zü mɛ kpö bha‑ ‑nu ‑dhɛ 'ö‑ pö: «'Ka dha 'kpong‑ 'suan‑ bho kö ꞊ya ‑ya dhang‑ ‑bha dha gɛnngdhö, 'yö 'ka‑ pö: «Pë ꞊gban yöö kë, dha ‑dho ban ꞊dɛɛ», 'yö dha bha ö ban 'pö tɛan‑ 'ka.
LUK 12:55 'Yö 'ka "tɛɛ yö kö ‑yö 'go sië dha gɛnngdhö 'yö 'ka‑ pö: «'Yënng‑ ‑dho 'bhü ꞊dɛɛ», 'yö kë 'pö "dhʋ̈ tɛan‑ 'ka.
LUK 12:56 Ka 'wɔn ‑nu kö 'wo ‑gban "sɛ waa‑ dhang‑ ‑nu ‑a ‑nu ‑bha wo ‑zë ‑a ‑nu 'suan‑ ‑bho, 'ö 'ka‑ ‑bhokoo dɔ, ‑yö kë ‑kɔ ‑kë ꞊dhɛ 'sa 'yö 'kaa 'wɔn 'suan‑ ‑bho ‑bha pë ‑nu 'ö Atanna 'dhö‑ kë sië "tʋ̈ng ya‑ 'gü bha yö ‑zë 'suan‑ bho kö 'ka‑ dɔ, "gblʋ̈ʋ̈dhɛ ꞊gblɛɛn ‑mɛ ‑nu 'ka ya!
LUK 12:57 ‑Yö kë ‑kɔ kë ꞊dhɛ 'yö 'kaa 'wɔn 'ö ‑së, 'ö pö 'aa‑ ‑bha ‑a ‑bhokoo dɔ?
LUK 12:58 A‑ ‑pö ka ‑dhɛ ꞊dhɛ: 'Mɛ 'ö kaa‑ i za dɔ "yɔɔ 'ka 'dho sië za ꞊gblü "dhiʋ̈, ‑kaa "slë mɔɔ‑ kö kaa‑ ‑mɛ 'ka mɔɔ‑ 'gü kö ka ‑tun zian ‑ta, kë "dhʋ̈ kö i za dɔ "yɔɔ 'ya 'dho i "dhiʋ̈ dɔ zadɔmɛ ‑nu ‑gɔ, 'ö woo ‑dɩ 'pö 'wo i "dhiʋ̈ dɔ "sɔdha ‑nu ‑gɔ, 'ö 'wo i ‑da ‑kaso 'gü.
LUK 12:59 A‑ ‑pö i ‑dhɛ "puu 'ka ꞊dhɛ kö ‑wo bo i ‑da ‑sü ‑zë 'ka ‑kaso 'gü, mɛ ‑nu ‑bha "pɔ 'ö i ‑bha bha‑ ‑suga ‑zian 'yii dho 'to i ‑bha kö ‑wo i bho ‑kaso bha‑ 'gü.»
LUK 13:1 ‑A "tʋ̈ng do bha‑ 'gü, 'yö mɛ 'bha ‑nu ‑wo nu 'yö 'wo ‑ya 'wɔn 'ö Pidhatö ‑ya ‑kë, 'ö ‑gban mɛ 'bha ‑nu 'wo go Gadhidhe 'wo gun Atanna ‑dhɔkë sië, 'ö Pidhatö ‑ya pö ‑wa ‑nu zë kö ‑wo "saa‑ bho sië Atanna ‑dhɛ ‑a ‑nu ‑wɔn ‑bha bha‑ ‑gɛn dɔ ‑sü ‑bha Yesu ‑dhɛ.
LUK 13:2 'Yö‑ ‑yɔ bɔ‑ ‑nu ‑gɔ 'ö‑ pö: «‑Yö ka 'gü ꞊dhɛ Gadhidhe ‑mɛ ‑nu 'wo‑ ‑nu ‑wëë ‑kë "dhiʋ̈ bho "dhʋ̈ bha ꞊në‑ ‑nu këwɔn 'dhö ya 'ö ‑ziö mɛ ‑kpɛa 'wo to ‑a ‑nu ‑ta ‑ee?»
LUK 13:3 'Yö‑ pö: «A‑ ‑pö ka ‑dhɛ ‑abin, "kɛɛ ꞊ya kë ꞊dhɛ 'kii ka kwaa‑ ka "ta ‑kɔ yaya ‑nu bha‑ ‑nu ‑zü, kö 'ka ka wë bɔ Atanna "piʋ̈, ka ‑dho ‑wëëga wo 'pö ꞊dhɛ 'mɛ 'wo bha‑ ‑nu 'dhö.
LUK 13:4 "Ɛɛn 'zü ‑yö ka 'gü ꞊dhɛ mɛ ‑kaɔng do ga "saaga 'ö Sidhoe ‑kɔ ‑yö wü‑ ‑nu ‑ta yi 'bha 'ka 'ö‑ ‑nu zë bha wo ꞊në‑ ‑nu "ta ‑kɔ ‑yö gun 'ya‑ 'ö ‑ziö Zedhizadhɛmö ‑mɛ ꞊gban "pɛpɛ ‑ta ‑ee?»
LUK 13:5 'Yö‑ pö: «A‑ ‑pö ka ‑dhɛ ‑abin! "Kɛɛ ꞊ya kë ꞊dhɛ 'kii ka kwaa‑ ka "ta ‑kɔ yaya ‑nu bha‑ ‑nu ‑zü, kö 'ka ka wë bɔ Atanna "piʋ̈, ka ‑dho ‑wëë ‑ga wo 'pö ꞊dhɛ 'mɛ 'wo bha‑ ‑nu 'dhö.»
LUK 13:6 'Yö to 'mü 'ö "gwënng do 'bha ‑da ‑a ‑nu ‑dhɛ 'ö‑ pö: «Figö ‑dhü do 'bha ‑yö ‑gun gɔndënë do 'bha bha‑ ‑gɔ 'bhlaa. 'Yö yi do 'ka, 'yö 'bhlaadhɛ dëmɛ bha 'ö nu kö 'ö "dhü bha‑ bhɛ bho, 'yö 'yii pë 'bha yö mü.
LUK 13:7 'Yö‑ pö 'bhlaadhɛ bha‑ ‑yëkëmɛ ‑nu ‑dhɛ 'ö‑ pö: «'A ‑gban nu sü ‑bha "dhü do ya‑ bhɛ bho ‑dhɛ 'gü ‑a ‑kwɛ ‑yaaga ‑naa ꞊nɛ, "kɛɛ 'mii‑ bhɛ yö‑ 'gü do. ꞊Dhɛ 'ö "dhʋ̈, ‑bhö ‑a "kan; ‑a ‑gɛn ‑mü ꞊dhɛ ‑a ta ‑gɛn 'yaa 'dhö, ‑yö ‑dɔ ‑duɛ bha‑ 'gü "wɛɛwɛɛ, ‑a ꞊trɔɔn 'bhaa 'dhö.»
LUK 13:8 'Yö‑ figö ‑dhɛ ‑yëkëmɛ bha 'ö‑ ‑yɔ bɔ‑ ‑gɔ 'ö‑ pö: «N Dëmɛ, ‑bhö ‑a 'to "dhʋ̈ kö ‑kwɛ do ya ‑yö ziö, a ‑dho ‑a "piʋ̈ 'pɔn 'a "sɛ ‑së ꞊loo‑ ‑gɛn "piʋ̈ kö kwa‑ ‑bha ‑ga ‑kwɛ dhia" 'ka.
LUK 13:9 'Bha mü "dhʋ̈ ‑yö ‑dho bhɛ kë ꞊wɛ. ꞊Ya kë 'zü ꞊dhɛ 'yii "wɩ‑ ‑bha kö ‑yö ö bhɛ kë yö ‑zë 'gü, kö‑ "kan ‑wɔn ꞊në dho 'to‑ ‑bha.
LUK 13:10 Yi do 'ka, Yesu ‑gun dhiang zë sië mɛ ‑nu ‑dhɛ 'ö‑ ‑nu ꞊klang ‑kë 'wɔn ‑nu 'wo ‑gban Atanna ‑bha ‑a 'ka Zuifö ‑nu ‑bha ‑yakwëëkëgükɔ do 'bha 'gü.
LUK 13:11 'Mɛ 'ö gun dhiang zë sië‑ ‑nu ‑dhɛ "dhʋ̈ bha, dhebhɔ do 'bha ‑yö ‑gun ‑nu kpö 'gü 'ö dhang‑ ‑yua ‑yö gun‑ ‑bha. "Yua 'ö "dhʋ̈ bha "yina yaa ‑nu 'wo gun dhebhɔ 'bha‑ 'gü ꞊në 'wo‑ ‑da 'gü. ‑A "tʋ̈ng bha‑ 'gü kö‑ ‑kwɛ ꞊ya kë ‑kaɔng do ga "saaga kö dhebhɔ bha 'yaa ꞊mɔɔ‑ ‑bha kö ‑yö "wlü kö ‑yö dɔ ö ‑gɛan tongtongdhö.
LUK 13:12 ꞊Dhɛ 'ö Yesu ꞊ya yö 'yö‑ pö‑ ‑dhɛ: «Dhebhɔ, i ꞊niɔɔdhɛ 'ö i ‑bha bha ꞊ya bo ꞊dɛɛ, 'bha kë "klʋ̈ʋ̈klʋ̈!»
LUK 13:13 'Yö ö ‑kɔ ‑ya dhebhɔ bha‑ ‑ta. ‑Yö ‑to ‑dhɛ do bha‑ 'gü, 'ö ꞊wlü 'ö dɔ ö ‑gɛan, 'yö zun Atanna 'tɔ bhɔ ‑sü ‑bha.
LUK 13:14 "Kɛɛ ꞊dhɛ 'ö ꞊ya kë "dhʋ̈, 'wɔn bha 'yii dhi ‑yakwëëkëgükɔ bha‑ ‑gɔdhiʋ̈mɛ ‑dhɛ, 'yö zun ‑dɔn bho ‑sü ‑bha 'mɛ 'wo gun mü bha‑ ‑nu 'ka 'ö‑ pö: «‑Dhɛkpaɔyi 'ö Atanna ‑ya ‑ya kö ‑wo yë kë‑ 'ka ‑yö "saɔdo, ‑a "saɔplɛ ‑naa ‑zë ꞊glooyi ‑mü. 'Ka‑ pö 'ka nu ka ‑kë "klʋ̈ʋ̈klʋ̈ ‑dhɛ mɔɔ‑ ‑dhɛ 'gü, ‑ka nu yi "wɛɛ ‑nu bha‑ ‑nu 'ka, 'ya 'dho kë ꞊glooyi ‑zë 'ka!»
LUK 13:15 'Yö Yesu ‑ya ‑yɔ bɔ‑ ‑gɔ 'ö‑ pö: «A gblɛɛn" ‑gɔn mɛ ‑nu 'ka ‑mɛ ‑nu 'ka ya! Kaa‑ ‑du ‑nu waa‑ kaa‑ ꞊soofëng ‑nu ꞊wa kë ‑kplü ‑sü 'ka 'kaa‑ ‑nu "pʋ ꞊glooyi 'ka 'waa 'dho "yi mü ‑ee?»
LUK 13:16 "Ɛɛn 'yaa ka 'gü ꞊dhɛ dhebhɔ 'ö Sɔtraan ꞊yaa‑ ‑kplü 'ö‑ ‑kwɛ ‑kaɔng do ga "saaga ‑naa 'dhö ya bha, Ablaamö bhang do 'bha ‑mü 'pö ‑ee? ‑Më ꞊në ‑kë 'yö 'waa‑ dha ꞊glooyi 'ka?»
LUK 13:17 "Tʋ̈ng 'ö Yesu gun‑ pö sië‑ 'ka "dhʋ̈ bha kö‑ 'yaɔ‑ ‑nu bha‑ ‑nu ꞊gban wë ꞊ya lɔɔ‑ dee" wo "pɛɛpɛdhö, "kɛɛ kö mɛ kpö kö 'wo bha‑ ‑nu ꞊nii ꞊në ‑da sië Atanna 'tɔ bhɔ ‑wɔn ‑nu 'ö‑ kë sië bha‑ ‑wɔn 'gü.
LUK 13:18 'Yö go mü 'zü 'ö "gwënng do 'bha ‑da 'ö‑ pö: «Atanna ‑bha ‑gblüdëdhɛ bha ‑yö ‑bhɔ ‑më ꞊në‑ ‑bha, "ɛɛn ‑a ‑zɔn 'ka ‑mü ‑më 'ka?
LUK 13:19 ‑A suu‑ ‑kë ꞊dhɛ tapë 'wo‑ seneve ‑kë bha‑ ga 'ö gɔndënë do ‑ya ta ö ‑gɔ "dhü ‑bhlaa 'gü ꞊në‑ 'dhö. (Pë 'ö bha mɛ‑ mɛ "yan "nuu ꞊në‑ dɔ‑ ga ‑ta.) "Kɛɛ ꞊dhɛ 'ö gɔndënë bha ꞊yaa‑ ta, 'ö ꞊ya bhɔ, 'yö ꞊kpɛa, 'yö ꞊kpɛa, 'yö 'dho ö ‑kë "dhü 'kpii‑ 'ka, 'yö ‑maa ‑nu 'wo go dhang‑ 'gü 'wo nu 'wo 'kɔ dɔ‑ kwɛɛ" 'gü.»
LUK 13:20 'Yö go mü 'zü 'ö‑ pö: «Atanna ‑bha ‑gblüdëdhɛ bha a ‑mɔɔ ‑bha 'zü 'a‑ ‑zɔn ‑më 'ka?
LUK 13:21 A ‑mɔɔ ‑bha 'a‑ ‑zɔn "sɛkɛ 'ö dhebhɔ do ‑ya sü 'ö‑ ‑da 'bluu‑ ‑bi "kidhʋng ‑kaɔng ꞊plɛ ga "sɔɔdhu ‑bha, 'ö ꞊ya kë "dhʋ̈ 'ö ö ‑yagüpë pa 'ö ꞊wɛnng ‑zü bha ꞊në‑ 'ka.»
LUK 13:22 Yesu ‑gun 'dho sië 'pö‑ "gblʋ̈gblʋ̈ ‑nu waa‑ 'pö‑ 'sɛɛnnë ‑nu 'gü mɛ ‑nu ꞊klang kë ‑sü 'ka kö ‑yö 'dho sië Zedhizadhɛmö.
LUK 13:23 Yi do 'ka, 'yö mɛ do 'bha ‑ya dhɛɛ" kpɔ 'ö‑ pö: «N Dëmɛ, 'mɛ 'wo dho dha ‑wo ‑dho kë 'gbɛ "wɛ ‑ee?» 'Yö‑ ‑yɔ bɔ‑ ‑gɔ 'ö‑ pö:
LUK 13:24 «‑Ka ka 'gü dɔ "gbɩɩ‑ kö 'ka ka ziö ‑dhɛ yö (kö 'ka bɔ Atanna "piʋ̈), 'yaa yö ‑zë 'ka a‑ ‑pö ka ‑dhɛ ꞊dhɛ ‑yö ‑dho kë mɛ 'gbɛ "piʋ̈ ꞊dhɛ 'wo bɔ‑ 'ka, "kɛɛ 'wii 'dho ꞊mɔɔ‑ ‑bha; ‑a ‑gɛn ‑mü ꞊dhɛ ‑kë Atanna ‑bha 'ka ‑dhɛ ‑yö 'ya‑. ‑A ‑dhɛ ‑yö ꞊dhɛ ‑da 'kɔ 'ö‑ "dhi 'dhö "sɔɔsɔɔ ‑a 'gü ‑sü 'dhö.
LUK 13:25 "Kɛɛ ꞊ya kë ‑zë wo ꞊dhɛ kö 'kɔdë ‑yö "wlü kö ‑yö 'dho ‑yö "kwɛɛ ta, kö ka ‑zë 'kii ‑da 'kɔɔdhö ꞊kö, kö 'ka bɔ "kpɛnng 'ka "kwɛɛ ‑ta ‑ma 'ka‑ pö: «N Dëmɛ, n Dëmɛ, ‑bhö "kwɛɛ "pʋ yi ‑gɔ! ‑Yö ‑dho bɔ 'kɔɔdhö 'ö‑ pö ka ‑dhɛ: «'Maa ka 'godhɛ dɔ.»
LUK 13:26 ꞊Ya bo kë ‑sü 'ka "dhʋ̈, ka ‑dho bɔ "kpɛnng yö ꞊në‑ 'gü 'ka‑ pö: «I‑ pö ‑zë ‑wo ꞊dhɛ 'bhaa yi 'godhɛ dɔ, "kɛɛ kwɛng‑ ‑nu kwa kë ‑kɔ ‑da pëfië do 'gü kwa "kwëë, 'ö ‑ya mü 'zü 'i dhiang ‑nu zë 'i bɔ‑ 'ka yii‑ 'pö‑ ‑nu 'gü, ‑kpinng ‑ta ‑dhɛ ‑nu 'gü ‑wa!
LUK 13:27 'Yö‑ ‑yɔ bɔ ka ‑gɔ 'ö‑ pö: «‑Ka bhɔ n 'ka taa‑ ꞊gblɛɛn, 'wɔnyaakëmɛ ‑nu! 'Maa mɛ 'bha ka 'godhɛ dɔ; ‑a ‑gɛn ‑mü ꞊dhɛ ka ‑to kaa‑ 'wɔn yaa kë ‑sü ꞊në‑ ‑bha 'ö‑ 'wɔn‑ yën.
LUK 13:28 "Gbʋ‑ ‑dho "wɩ ‑dhɛ bha ꞊në‑ 'gü, 'ö 'wo wo "sɔn "dhiʋ̈ ‑bhö klöklödhö, ‑a ‑gɛn ‑mü ꞊dhɛ ‑a "tʋ̈ng bha‑ 'gü kö 'ka ka "yan ‑kpan Ablaamö oo, Izaakö waa‑ Zakɔbö ‑nu ‑bha, waa‑ Atanna ‑wʋdhiʋ̈loomɛ ‑nu ꞊gban "pɛpɛ 'dhö ‑a ‑bha ‑gblüdëdhɛ bha‑ 'gü, "kɛɛ kö ka ‑zë ꞊wa ka ‑zuö "kpɛnngdhö.
LUK 13:29 Mɛ‑ ‑dho 'go 'yënng‑ ‑wo ‑zian 'ka, 'ö go 'yënng‑ ‑pö ‑zian 'ka, 'ö go mɛ ‑kɔ ‑së 'gü, 'ö go mɛ ꞊kwaa 'gü, 'ö 'wo wo ‑kɔ ‑da 'tɛa‑ do 'gü Atanna ‑bha ‑gblüdëdhɛ bha‑ 'gü.
LUK 13:30 ‑A yi 'ö bha‑ 'ka, ꞊taama ‑gɛn 'bha ‑nu ‑dho bɔ "dhiʋ̈, 'ö "dhiʋ̈ ‑gɛn 'bha ‑nu 'wo bɔ ꞊taama.»
LUK 13:31 ‑A yi do bha‑ 'ka, 'yö Fadhiziɛn ‑nu 'bha ‑nu 'wo nu 'wo‑ pö‑ ‑dhɛ: «‑Bhö ziö kö 'i 'dho, ‑bhö 'go ‑dhɛ ya‑ 'gü, ‑a ‑gɛn ‑mü ꞊dhɛ Edhodö ‑ya ‑dhɛ mɔɔ‑ sië kö 'ö i zë.»
LUK 13:32 'Yö‑ ‑yɔ bɔ 'ö‑ pö: «‑Ka 'dho kö 'ka‑ pö "gblʋ̈ʋ̈dhɛtiimɛ bha‑ ‑dhɛ ꞊dhɛ a ‑tun kö "yina yaa ‑nu kë mɛ "bhɩɩ‑ 'gü ‑dhɛ ya‑ 'gü, 'ö 'a "yuëdhi ‑nu dha ꞊dɛɛ waa‑ dhia" ‑nu 'gü 'yö 'a‑ ‑gɔ ‑da 'plöö dhia" ꞊taama, 'yö 'a gun ‑na 'dho‑.
LUK 13:33 ‑A ‑gɛn ‑mü ꞊dhɛ 'kö 'zü 'ö ‑ya "yan "ʋʋ "yan 'ö‑ ‑ta, "kɛɛ ‑a ‑dhɛa ‑bha ꞊dhɛ 'a "ta bha‑ 'sü "dhʋ̈ ꞊dɛɛ waa‑ dhia" 'gü kö 'a 'dho 'a ‑da 'ka Zedhizadhɛmö ‑a ‑dhɛkpaɔyi ‑yaaga ‑naa 'ka, ‑a pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑a ‑dhɛ 'yaa ‑bha ꞊dhɛ 'mɛ 'ö ‑kë Atanna ‑wʋdhiʋ̈loomɛ 'ka ‑wa zë ‑dhɛ "wɛɛ 'bha 'gü kö 'yii kë Zedhizadhɛmö ‑dhɛ ‑zë 'ka.»
LUK 13:34 ꞊Dhɛ 'ö ꞊yaa‑ pö "dhʋ̈, 'yö ‑ya "gbʋ bɔ ‑sü ‑bha Zedhizadhɛmö ‑dhɛ ‑bha 'ö‑ pö: «Zedhizadhɛmö ‑mɛ ‑nu, Zedhizadhɛmö ‑mɛ ‑nu, ka 'kö kaa‑ yë 'dhö ‑mü Atanna ‑wʋdhiʋ̈loomɛ zë ‑sü 'ka, 'ö 'mɛ 'wo‑ ‑nu bɔ ka ‑dhɛ kö ‑wo 'pa ka ‑bha 'ka ‑gwë ‑zuö ‑nu 'ka‑ ‑nu zë‑ 'ka bha, ‑yö ‑gun n "piʋ̈ ꞊dhɛ 'a‑ "slë mɔɔ‑ ‑kɔ ꞊gban ‑kɔ ꞊gban 'gü kö 'a ka ꞊loo 'ko ‑ta n gban ꞊wlöö ꞊dhɛ ‑kɔ 'ö ‑tɔdhee "buɛdhe ‑yö ö 'në ‑nu ‑kë 'ka ‑a 'dhö, "kɛɛ 'kii‑ ‑yɔ bɔ n ‑gɔ!
LUK 13:35 Yö ꞊në‑ ‑wɔn 'gü, 'yö 'a dho n kwaa‑ ka ‑wɔn ‑zü, "kɛɛ a‑ ‑pö ka ‑dhɛ tɛan‑ ꞊dede 'ka ꞊dhɛ ka "yan 'yii 'dho ‑kpan n ‑kpong 'gü ‑dhɛ ‑bha 'zü 'ö dho 'ö zun‑ 'ka yi 'ka dho‑ pö‑ 'ka ꞊dhɛ: «'Mɛ 'ö nu kwa Dëmɛ 'tɔ 'gü bha, Atanna ‑bha 'dhuë‑ ‑ya ‑mɛ 'kun!» bha‑ ‑bha.»
LUK 14:1 Yi do 'ka 'yö Fadhiziɛn ‑nu ‑gɔmɛ do 'bha ‑yö Yesu ‑dhɛ ö ‑gɔ 'kɔɔdhö kö 'wo pë ‑bhö. ‑Yö ‑kë "dhʋ̈ Zuifö ‑nu ‑bha ꞊glooyi do 'ka. 'Yö dho 'yö ‑da 'kɔɔdhö. Yaa" kë 'wo wo sië bha Fadhiziɛn ‑nu ‑kpɛa 'wo to ‑wo Yesu 'suan‑ ꞊në‑ bho sië.
LUK 14:2 'Wo dho ‑dhɛ ‑ga kö mɛ do 'bha 'ö ‑bhla ‑yua 'dhö‑ 'gü ‑yö dɔ sië‑ wëëdhö.
LUK 14:3 'Yö 'tɔnggɔmɛ ‑nu waa‑ Fadhiziɛn ‑nu 'wo gun mü bha‑ ‑nu dhɛɛ" kpɔ 'ö‑ pö: «'Wɔn 'ö ‑gban "yuëdhi ‑nu dha ‑sü ‑bha ꞊glooyi 'ka bha kwa ‑bha 'tɔng‑ ‑ya ‑pö ꞊dhɛ ‑a ‑wɔn 'gü? 'Kwa‑ kë ‑ee "ɛɛn 'kwa 'dho‑ ‑kë ‑ee?»
LUK 14:4 'Yö ‑dhɛa ‑yö ga‑ ‑nu ‑ta, 'yö 'wo dɔ dingdhö. ‑Yö ‑to 'gü 'yö Yesu ‑yö ö ‑kɔ pa "yuëdhi bha‑ 'ka 'yö‑ dha, 'yö‑ pö‑ ‑dhɛ ‑yö 'dho.
LUK 14:5 ꞊Dhɛ 'ö ꞊ya bo ‑wʋ ‑kpɔ 'mɛ 'ö‑ ‑kë "klʋ̈ʋ̈klʋ̈ bha‑ ‑bha ‑sü 'ka, 'yö‑ pö 'mɛ 'wo to‑ ‑nu ‑dhɛ 'ö‑ pö: «'Mɛ 'ka bha de ‑mü 'ka ka kpö 'gü 'yö‑ ‑bha 'në "ɛɛn ‑a ‑bha ‑du ꞊ya ‑da ‑klɔng 'gü ꞊glooyi 'ka, 'yö 'yii 'dho 'to 'ö‑ bho mü?
LUK 14:6 ‑An dhɛɛ" 'ö‑ kpɔ "dhʋ̈ bha, ‑a ‑yɔ 'yii ꞊slɔɔ‑ ‑nu ‑gɔ kö ‑wa bɔ.
LUK 14:7 ꞊Dhɛ 'ö ꞊ya kë "dhʋ̈, 'yö "gwënng do ‑da 'mɛ 'wo‑ ‑nu ‑dhɛ ‑dhɔkëdhe ‑ta 'wo gun ‑yɛa ‑blɛɛsü kɔɔ‑ sië bha‑ ‑nu ‑dhɛ 'ö‑ pö:
LUK 14:8 «꞊Wa 'mɛ i ‑dhɛ ‑dhɔkëdhe ‑ta, ꞊dhɛ dhe dɔ ‑dhɛ ‑nu 'dhö, 'bha 'dho ‑yɛa ‑blɛɛsü mɔɔ‑, ‑a ‑gɛn ‑mü ꞊dhɛ 'kö 'mɛ 'wo ka ‑dhɛ bha‑ mɛ 'bha‑ mü 'ö‑ ꞊bhlëë 'dhö 'kpii‑ 'ö ‑ziö i ‑bha ‑ta 'bhaa‑ dɔ.
LUK 14:9 Kë "dhʋ̈ kö 'mɛ 'ö ka ‑dhɛ bha 'ya 'dho nu 'ö‑ pö i ‑dhɛ: ‹‑Bhö 'go ‑yɛa 'dhɛ bha‑ 'gü kö 'mɛ 'ö ya ‑yö ‑ya mü›. ꞊Ya kë "dhʋ̈ kö ꞊ya kë kpaɔ 'ka ꞊ya "pɛ i ‑bha. Kö i ‑bha ‑go ‑yɛa 'dhɛ bha‑ 'gü ‑sü kö 'i 'dho ‑ya ꞊taama bha‑ 'yiʋ̈‑ yöö i kë.
LUK 14:10 "Kɛɛ 'mɛ 'ö ꞊wa i ‑dhɛ ‑dhɔkëdhe ‑ta, ‑bhö 'dho kö 'i ‑ya ‑yɛa ‑totaamasü ꞊në‑ 'gü, kë "dhʋ̈ kö 'mɛ 'ö ka ‑dhɛ bha ꞊ya nu kö ‑ya pö i ‑dhɛ: «N "taɔngdë, ‑bhö bɔ "dhiʋ̈!» ꞊Ya kë "dhʋ̈, i ‑gɛngbɔ ‑dho kë "gblʋ̈gblʋ̈ mɛ "pɛpɛ 'wo ‑dhɔkëdhe ‑ta mü bha‑ ‑nu ꞊gban 'gü.»
LUK 14:11 'Yö‑ pö: «‑A pö 'a‑ wo ka ‑dhɛ "dhʋ̈ bha‑ ‑gɛn ‑mü ꞊dhɛ 'mɛ 'i dho i ‑dɩ 'sü ‑kiandhö i "tɛabɔ ‑nu ‑bha, Atanna ‑dho i ‑da ‑a ‑nu ꞊wlöö, "kɛɛ 'mɛ 'i dho i ‑dɩ ‑da i "tɛabɔ ‑nu ꞊wlöö, ‑yö ‑dho i gba ‑duɛ 'kpii‑ 'ka.»
LUK 14:12 ꞊Dhɛ 'ö ö bo‑ ‑pö "dhʋ̈ ‑sü 'ka, 'yö‑ pö 'mɛ 'ö‑ ‑dhɛ 'ö wɛng‑ ‑nu 'wo gun‑ ‑gɔ 'kɔɔdhö bha‑ ‑dhɛ 'ö‑ pö: «N "taɔngdë, ꞊ya kë ꞊dhɛ 'bha‑ pö 'i mɛ ‑nu ‑dhɔkë, "ɛɛn 'bha‑ pö 'i ‑dhɔkëdhe kë, 'bha 'dho i "taɔngdë ‑nu oo, i dheebhang ‑nu oo, i 'kɛ‑ ‑nu "ɛɛn i ‑yayɔɔ ‑nu 'wo ꞊naɔmɛ 'ka ‑a ‑nu ‑dhɛ ‑dhɔkëdhe ‑ta, kë "dhʋ̈ kö 'wa 'dho i ‑dhɛ 'pö 'ö 'wo 'wɔn 'i‑ ‑kë bha‑ ‑gɔyɔɔ dɔ i ‑gɔ.
LUK 14:13 "Kɛɛ 'bha‑ pö bhii ‑dhɔkëdhe kë, ‑bhö ‑wëëmɛ ‑nu waa‑ ꞊niɔɔmɛ ‑nu, "ta ‑sü 'bebedhö ‑mɛ ‑nu waa‑ "yanwlümɛ ‑nu ꞊në‑ ‑nu ‑dhɛ.
LUK 14:14 'Bha‑ kë "dhʋ̈, i zuë" ꞊nii ‑dho ‑da, ‑a ‑gɛn ‑mü ꞊dhɛ 'mɛ 'wo bha 'waa ꞊mɔɔ‑ ‑bha kö ‑wa ‑gɔyɔɔ dɔ i ‑dhɛ, ꞊ya 'go mü 'zü, Atanna ‑dho ‑a ‑gɔyɔɔ dɔ i ‑dhɛ, 'mɛ 'wo 'dhang bho‑ "dhiʋ̈ ‑a ‑nu ‑bö ‑yi 'ka.
LUK 14:15 ꞊Dhɛ 'ö 'mɛ 'ö wɛng‑ ‑nu ‑a ‑nu ‑kɔ ‑yö gun 'tɛa‑ do 'gü bha 'wo 'wɔn bha‑ ma, 'yö‑ mɛ do ‑ya pö Yesu ‑dhɛ: «꞊Ya kë "dhʋ̈ yö ‑zë 'gü 'sa kö 'mɛ 'ö dho pë ‑bhö Atanna ‑bha ‑gblüdëdhɛkëdhɛ 'gü kö‑ ‑mɛ ‑bha ‑së "dhɛ!»
LUK 14:16 'Yö‑ ‑yɔ bɔ‑ ‑gɔ 'ö‑ pö: «‑Bhö ‑dhɛ ‑ga zɔɔ, yi do 'ka 'yö mɛ do 'bha ‑yö ‑dhɔkëdhe 'kpii‑ do ‑kë, 'yö mɛ 'gbɛ ‑dhɛ.
LUK 14:17 ꞊Dhɛ 'ö pë ‑bhö "tʋ̈ng ꞊ya ꞊loo, 'yö ö ‑bha gwëëmi do bɔ 'mɛ 'ö‑ ‑nu ‑dhɛ bha‑ ‑nu ‑dhɛ ‑dhɛ 'gü 'yö‑ pö ‑wo nu, ‑bhöpë ꞊ya ma.
LUK 14:18 "Kɛɛ 'yö 'mɛ 'wo bha‑ ‑nu ꞊gban "pɛpɛ 'wo ‑kɔ 'dho ‑sü ‑bha. 'Yö mɛ ‑blɛɛsü ‑ya pö: «N ‑kpladhɛ ‑yö n ‑bha, 'bhlaadhɛ do 'bha 'a‑ dhɔ ya, ‑a ‑dhɛa ‑bha ꞊dhɛ 'a 'dho kö 'a ‑wo mü, ꞊dhɛ 'ö "dhʋ̈ ‑yö n ‑mawɔn 'to.»
LUK 14:19 'Yö‑ mɛ do 'bha ‑ya pö: «Mang ‑dɩ 'pö, ‑du ‑kaɔng do 'a‑ dhɔ ya, ‑yö n "piʋ̈ ꞊dhɛ 'a dho kö 'a‑ ‑nu draan‑ yë kë ‑sü ‑bha. 'Bha 'dho ‑bhö ‑a pö i dëmɛ ‑dhɛ 'mii 'dho nu.»
LUK 14:20 'Yö‑ mɛ ‑yaaga ‑naa ‑ya pö: «A ‑go dhe 'sü ‑dhɛ 'gü ‑dee 'gü, 'wɔn 'ö‑ ‑wɔn 'gü 'mii 'dho nu 'pö 'yö bha.»
LUK 14:21 'Yö‑ ‑bha gwëëmi bha 'ö ö yee kë 'ö nu 'ö ‑ziö 'wɔn bha‑ ꞊gban ‑gɛn 'gü "pɛɛpɛdhö ö dëmɛ ‑dhɛ, 'yö 'wɔn bha 'ö ‑siö 'mɛ 'ö ꞊dhiɔ kë bha‑ ‑dhɛ. 'Yö ‑wʋ ‑dee 'bha kpɔ gwëëmi bha‑ ‑bha 'ö‑ pö: «‑Bhö 'dho ‑bɛang 'ka "dhɛɛdhɛ waa‑ zian ‑gbeng ‑ta ‑dhɛ ‑nu 'gü kö 'i ‑wëëmɛ ‑nu, ꞊niɔɔmɛ ‑nu, "yanwlümɛ ‑nu waa‑ "ta ‑sü 'bebedhö ‑mɛ ‑nu ‑dhɛ kö 'ka nu.» 'Yö 'mɛ bha 'ö dho 'yö nu,
LUK 14:22 'yö‑ pö ö ‑gɔmɛ ‑dhɛ: «N dëmɛ, ‑kɔ 'i‑ pö 'a‑ kë‑ ‑bha bha 'ma‑ kë‑ ‑bha, "kɛɛ ‑yɛa 'bha ꞊ya 'to.»
LUK 14:23 'Yö‑ ‑gɔmɛ ‑ya pö‑ ‑dhɛ: «‑Bhö 'dho zian ‑gɔ ‑ta ‑dhɛ ‑nu waa‑ "yasa "piʋ̈ ‑dhɛ ‑nu 'gü kö 'i ꞊dhiɔ kë, mɛ "ʋʋ mɛ 'i dho ‑kpan ‑bha, ‑bhö ‑fɛɛ ‑ya ‑bha kö ‑yö nu kö ‑yö ‑da 'kɔɔdhö kö 'kɔ ‑yö pa;
LUK 14:24 ‑a ‑gɛn ‑mü ꞊dhɛ a‑ ‑pö ka ‑dhɛ ꞊dhɛ 'mɛ 'a‑ ‑nu ‑dhɛ ‑a ‑nu ꞊bhlëë ‑bha bha‑ mɛ do ‑zian 'yii dho 'pë 'wo‑ ‑kpa bha‑ din ‑zian ‑ga.»
LUK 14:25 Yi do 'ka kö mɛ ꞊ya ta Yesu ‑bha kö ‑wo 'dho sië zian ‑ta ‑yɛɛdhö, 'yö ꞊slëë ö 'gü 'yö‑ pö 'mɛ 'wo bha‑ ‑nu ‑dhɛ 'ö‑ pö:
LUK 14:26 «'Mɛ 'ka nu sië bha mɛ "ʋʋ mɛ 'ö‑ pö 'ö bɔ n 'ka, "kɛɛ 'ö‑ ‑mɛ ‑yö ö dë oo, ö dhe oo, ö ‑bha dhebhɔ oo, ö ‑bha 'në ‑nu oo, ö dheebhang gɔɔn‑ ‑nu "ɛɛn dhong ‑nu "ɛɛn ‑a ‑mɛ ‑dɩ ‑bha ‑tosɛa ꞊dede ‑zian fië bho n ‑bha, kö ma ꞊klangdhiʋ̈ 'yaa ‑mü.
LUK 14:27 "Ɛɛn 'zü 'mɛ 'yii "wɩ‑ ‑bha kö ‑yö saan" n ‑wɔn 'gü, kö 'yaa ꞊mɔɔ‑ ‑bha kö ‑yö kë ma ꞊klangdhiʋ̈ 'ka.»
LUK 14:28 'Yö‑ pö: «‑A pö 'a‑ wo ka ‑dhɛ "dhʋ̈ bha‑ ‑gɛn ‑mü ꞊dhɛ mɛ 'bha 'yaa 'dhö ka kpö 'gü bha kö ‑ya pö ꞊dhɛ yö ‑zë 'ya‑ pö 'ö 'kɔ dɔ, 'yaa 'yaanu kö ‑yö ö ‑zʋ 'gɔn 'pë 'ö dho ꞊mɔɔ 'kɔ bha‑ dɔ ‑sü ‑bha kö ‑yö bo‑ ‑wɔn ‑ta,
LUK 14:29 kë "dhʋ̈ kö 'ya 'dho ö bo 'kɔkpan ‑ya ‑sü 'ka 'ö 'wëë‑ ‑yö kɔn, 'ö ꞊fië‑ 'kɔ dɔ ‑sü ‑bha 'ö mɛ 'wo "yan ‑kpan bha kö ‑yö 'kɔ bha‑ dɔ sië bha 'wo ꞊wɛɛ dɔ ‑bha 'wo‑ pö:
LUK 14:30 «'Mɛ 'ö ya, ‑yö ‑gun 'kɔ dɔ sië "kɛɛ ꞊ya ꞊fië‑ ‑bha ‑wa!
LUK 14:31 "Ɛɛn 'zü ‑gblüdë ‑mɛɛ ‑mü, 'yö ꞊yaa‑ pö 'ö 'dho ‑gblü bha, "kɛɛ kö mɛ "gblü ‑kaɔng do ꞊në‑ ‑gɔ, 'yö 'yaa 'yaanu 'yaa ö ‑zʋ 'gɔn "ni 'ö‑ faan dho ꞊mɔɔ 'mɛ 'ö nu sië‑ ‑gɔ mɛ "gblü ‑kaɔng ꞊plɛ 'ka bha‑ ‑bha ‑sü ‑wɔn 'gü, 'yö 'yaa gun ‑na 'dho‑?
LUK 14:32 ‑A ‑mɛ ꞊yaa‑ yö ꞊në‑ kë "dhʋ̈, 'yö ꞊ya kë ꞊dhɛ 'yii 'dho ꞊mɔɔ‑ ‑bha, 'yö ‑gblüdë 'dhɛ bha‑ to ꞊gblɛɛn, 'yö mɛ bɔ‑ ‑dhɛ 'yö‑ pö: «‑Gblü 'yaa n "piʋ̈».
LUK 14:33 Yö ꞊në‑ ‑wɔn 'gü, 'yö 'a‑ pö ka ‑dhɛ ꞊dhɛ 'ö mɛ "ʋʋ mɛ 'ö‑ 'ka 'ö ka kpö 'gü 'ö 'yii ö kwaa‑ pë "pɛpɛ 'ö‑ ‑gɔ ‑a ꞊gban ‑zü, kö ‑yö ziö n ꞊keng‑, ‑a ‑mɛ 'yaa ꞊mɔɔ‑ ‑bha kö ‑yö kë ma ꞊klangdhiʋ̈ 'ka.»
LUK 14:34 'Yö‑ pö: «꞊Wee 'ö bha pë ‑së ‑mü, "ɛɛn 'yaa "dhʋ̈ ‑ee? "Kɛɛ ꞊ya kë ꞊dhɛ ꞊wee din ꞊ya 'go‑ ‑bha kö "slë "wɛɛ 'bha 'kö 'wo dho‑ kë ꞊taamasü 'gü kö‑ din ‑yö dhi 'yaa 'dhö 'zü.
LUK 14:35 Kö ꞊ya kë pë see‑ ‑sü ꞊në‑ 'ka bha, kö‑ ꞊trɔɔn 'yaa 'dhö 'zü "sɛ waa‑ "dung ‑zian 'bha ‑bha. Kö ꞊ya 'to ‑zuö "kpɛnng ‑pë ꞊në‑ 'ka.» 'Yö‑ pö: «'Ma‑ pö "dhʋ̈, 'wɔn ma ‑tʋ 'dhö 'mɛ 'ö‑ ‑gɔ ‑bha ‑ya 'gü ma!»
LUK 15:1 ‑A "tʋ̈ng bha‑ 'gü, 'niisɔngkunmɛ ‑nu waa‑ 'wɔnyaakëmɛ "wɛɛdhe ‑nu ‑gun nu sië Yesu ‑dhɛ 'gü kö 'wo "tʋ 'to‑ ‑wʋ ‑bha.
LUK 15:2 'Yö Fadhiziɛn ‑nu waa‑ 'tɔnggɔmɛ ‑nu 'wo ‑ya Yesu ꞊tɔɔ kë ‑sü ‑bha "waa 'gü 'wo‑ pö: «Mɛ 'kö ya yö ‑zë waa‑ 'mɛ 'ö‑ ‑nu "ta ‑kɔ 'yaa ‑së bha ꞊në 'wo ꞊nëng 'kwëë‑. Wɛng‑ ‑nu ‑wo pë ‑zian ‑bhö wo "kwëë.»
LUK 15:3 'Yö Yesu ‑yö "gwënng do ‑da ‑nu ‑dhɛ ‑a ‑wɔn 'gü 'ö‑ pö:
LUK 15:4 «De ‑mü ka kpö 'gü 'yö "bhlaa këng do ꞊ya kë‑ ‑gɔ, 'yö‑ do ꞊ya ꞊dhɛng 'yö 'yaa‑ ‑kaɔng "sueisiö waa‑ "bhlaa "sueisiö 'ö to bha‑ 'to "tʋng ‑ta, 'yö 'yaa 'dho‑ do ö ꞊dhɛng bha‑ mɔɔ‑ ‑dhɛ 'gü, 'yö 'yaa 'to‑ mɔɔ‑ ‑dhɛ 'gü 'yaa 'dho 'yaa zun‑ 'ka ‑a yö ‑sü ‑bha?
LUK 15:5 A‑ ‑pö ka ‑dhɛ ꞊dhɛ: ꞊Ya kë ꞊dhɛ‑ ‑mɛ ꞊yaa‑ yö, ‑a ꞊nii ‑yö ‑da 'ö‑ sü 'ö‑ ‑wɔ ö gbaandhö,
LUK 15:6 'ö nu‑ 'ka "kwɛandhö 'ö ö "tɛabɔ ‑nu waa‑ ö ‑yayɔɔ ‑nu ‑dhɛ 'ö‑ pö‑ ‑nu ‑dhɛ: «‑Ka nu kö 'kwa ma "tan kë n ‑dhɛ, ‑a ‑gɛn ‑mü ꞊dhɛ ma "bhlaa 'ö ꞊dhɛng bha 'ma‑ yö!»
LUK 15:7 A‑ ‑pö ka ‑dhɛ tɛan‑ ꞊dede 'ka ꞊dhɛ: ‑Kɔ do bha ꞊në ꞊niidadhe ‑yö kë‑ 'ka dhang‑ 'gü kö 'wɔnyaakëmɛ doseng ‑zian ꞊ya bɔ Atanna 'ka "kpʋng ꞊taa 'ö ‑ziö 'ka mɛ ‑kaɔng "sueisiö ga "sueisiö 'ö pö 'aa‑ ‑nu ‑bha ‑a ‑nu ‑dɩ 'gü, 'ö‑ ‑nu ‑mawɔn 'yaa ‑bɔ Atanna 'ka ‑wɔn ‑bha 'zü ‑a ‑nu ‑wɔn ‑ta.»
LUK 15:8 'Yö go mü 'zü 'ö‑ pö: «Kö 'wëë‑ "puu ga ‑kaɔng do ‑yö kë dhebhɔ do ‑gɔ, kö‑ ga do ‑yö ꞊dhɛng, ‑yö ‑dho ‑dhangbha dɔ 'ö ‑pia sü 'ö‑ ‑ziö 'kɔ "piʋ̈ ‑dhɛ ꞊gban "pɛpɛ 'gü, "fɔn kö ꞊yaa‑ yö. "Ɛɛn 'yaa kë "dhʋ̈ ‑ee?
LUK 15:9 ꞊Ya ö bo‑ yö ‑sü 'ka, 'yö ö "tɛabɔ ‑nu waa‑ ö ‑yayɔɔ ‑nu ‑dhɛ 'yö‑ pö: «‑Ka nu 'kwa ma troo kë n ‑dhɛ, ‑a ‑gɛn ‑mü ꞊dhɛ ma 'wëë‑ "puu ga 'a kë‑ ꞊dhɛng bha 'ma‑ yö!»
LUK 15:10 'Yö‑ pö: «A‑ ‑pö ka ‑dhɛ ꞊dhɛ: Kö 'wɔnyaakëmɛ do ‑yö bɔ Atanna 'ka, ‑a ꞊niidadhe ‑yö ‑kë ‑a ‑bha "kië ‑nu kpö 'gü dhang‑ 'gü ‑kɔ do bha ꞊në‑ 'gü.»
LUK 15:11 'Yö ‑ya mü 'zü 'ö "gwënng do 'bha ‑da 'ö‑ pö: «Gɔndënë do 'bha ꞊në gun, 'yö 'nëgɔɔn ꞊plɛ ‑yö gun‑ ‑gɔ.
LUK 15:12 'Yö‑ mɛ "bhlëngsü ‑ya pö ö dë ‑dhɛ yi do 'ka 'ö‑ pö: «N dë, i 'kɛan‑ 'ö dho 'to yi ‑gɔ dhia" bha, ‑bhö ‑a 'gü ‑gblü kö 'i n ‑bha nu.» 'Yö‑ dë ‑yö ö 'kɛan‑ 'gü ‑gblü ‑a ‑nu ‑ta.
LUK 15:13 ꞊Dhɛ 'ö mɛ "bhlëngsü bha 'ö ö ‑kɔ ‑da ö ‑bha ꞊naɔ bha‑ 'gü, 'yö ‑dhɛkpaɔyi 'në 'bha ‑kë, 'yö ꞊wlü 'ö dho "sɛ ꞊gblɛɛn 'bha 'gü, 'yö ‑ya 'nëglɔɔndhɛ kë ‑sü ‑bha ꞊naɔ bha‑ 'gü, 'yö ‑ya ‑a 'gü see‑ ‑sü ‑bha.
LUK 15:14 ꞊Dhɛ 'ö ꞊ya ö bo‑ ꞊gban 'gü see‑ ‑sü 'ka "pɛɛpɛdhö, 'yö "vʋ̈ʋ̈ ‑yö ‑da "sɛ bha‑ 'gü, 'yö ‑kpla ‑yö zun‑ 'kun ‑sü ‑bha.
LUK 15:15 'Yö dho 'yö ‑da yë 'gü "sɛ bha‑ 'gü mi do "piʋ̈, 'yö 'mɛ bha 'ö‑ bɔ ö ‑gɔ ‑bhɔ ‑kluu 'gü kö ‑yö ‑ya ‑a ‑nu ‑gɔ "dhiʋ̈.
LUK 15:16 "Tʋ̈ng 'ö gun‑ 'ka ‑bhɔ ‑gɔ "dhiʋ̈ bha, ‑bhɔ ‑nu ‑bhöpë 'wo‑ nu‑ ‑nu ‑dhɛ bha‑ 'bha ‑bhö ‑dhɔ ‑gun ‑bha; ‑a ‑gɛn ‑mü ꞊dhɛ kö ‑bhöpë 'bhaa‑ ‑gɔ, (kö din‑ ‑ya kë sië), "kɛɛ 'waa gun‑ ‑bha nu sië.
LUK 15:17 Yi do 'ka 'yö 'yaanu 'ö ö ‑zʋ gɔn "fluudhö 'yö‑ pö: «Din‑ ‑yö n ‑zë ‑më ‑wɔn ‑zë 'gü kö 'mɛ 'wo yë 'gü n dë ‑gɔ ‑wo 'gbɛ, "kɛɛ kö ‑wo pë ‑bhö 'wo ꞊fië‑ ‑kpɛa ‑bha.
LUK 15:18 A ‑dho "wlü 'a dho n dë "piʋ̈, 'ö 'a‑ pö n dë ‑dhɛ: «N dë, ‑bhö n 'to, 'ma ‑da Atanna "dhiʋ̈, 'ma ‑da i "dhiʋ̈,
LUK 15:19 ‑a ‑dhɛ 'yaa ‑bha ‑zianwo 'zü ꞊dhɛ ‑wo i 'tɔ pö n ‑bha ꞊dhɛ i gbö ‑mü n 'ka, "kɛɛ 'kö 'zü 'i n 'sü ‑zianwo ꞊dhɛ i ‑bha yëkëmɛ do 'dhö kö 'yö bha.»
LUK 15:20 ꞊Dhɛ 'ö 'në bha 'ö ö ‑zʋ gɔn "dhʋ̈, 'yö ꞊wlü 'ö dho ö dë "piʋ̈. ꞊Dhɛ 'ö‑ dë ‑ya yö kö ‑yö nu sië, 'yö dho dɔ‑ ‑gɔ zian‑ ‑dhɛ ꞊gblɛɛn 'gü, 'yö ‑wëë ‑yö bɔ‑ ‑ta ꞊dedewo, 'yö ‑bɛang sü 'ö dho ö gbö bha‑ "dhiʋ̈ ‑gɔ 'yö dho 'yö ꞊loo‑ ‑bha.
LUK 15:21 'Yö‑ gbö ‑ya pö‑ ‑dhɛ: «N dë, 'ma nu, "kɛɛ nu 'a‑ wo bha a‑ ‑dɔ ꞊dhɛ 'ma ‑da Atanna "dhiʋ̈, 'ma ‑da i "dhiʋ̈, ‑a ‑dhɛ 'yaa ‑bha 'zü ꞊dhɛ ‑wo i 'tɔ ‑zian pö n ‑bha.»
LUK 15:22 "Kɛɛ 'yö‑ dë ‑ya pö ö ‑bha gwëëzë ‑nu ‑dhɛ 'ö‑ pö: «‑Ka 'dho "vaandhö kö 'ka nu ma ꞊gbauu‑ ga ‑sësü ꞊dede 'ö 'kɔɔdhö bha‑ 'ka kö 'ka‑ ‑da n gbö ya‑ ‑bha, kö 'ka kɔnggaapë ‑ya ‑kɔ ‑bha (kö ‑ya ‑zɔn ꞊dhɛ ‑kɔ do 'ö gun‑ ‑bha n ‑gɔ ‑blɛɛsü bha ꞊ya kë 'zü‑ ‑bha ‑deewo), kö 'ka ‑slu ‑ya ‑gɛn ‑bha!
LUK 15:23 ‑Ka 'dho kö 'ka nu ‑du "gbɔng 'ö 'kwa‑ "dhiʋ̈ gba 'ö ꞊ya "yɔn kë bha‑ 'ka kö 'ka‑ zë kö 'kwa pë ‑bhö kö 'kwa troo kë!
LUK 15:24 ‑A ‑gɛn ‑mü ꞊dhɛ n gbö 'ka‑ ‑ga sië 'ö dɔ bha, ꞊ya gun ꞊ya kë ꞊dhɛ 'mɛ ꞊ya ga ꞊në‑ 'dhö, n gbö 'ö ꞊ya bhɔ ‑deewo ö dɔ bha ꞊ya gun ꞊ya ꞊dhɛng 'nu n ‑gɔ, "kɛɛ 'yö 'ma‑ yö bha!» 'Yö 'wo ‑ya troo kë ‑sü ‑bha.
LUK 15:25 "Kɛɛ kë 'wo‑ wo sië "dhʋ̈ bha kö ‑a gbö 'kpiisü ‑zë ‑yö 'bhlaa. ꞊Dhɛ 'ö ꞊ya nu ꞊ya ꞊loo "kwɛandhɛ "sɔɔ, 'yö‑ "tʋ ‑yö ‑da "wɩpë ‑nu waa‑ troo ‑nu ‑wʋ 'gü.
LUK 15:26 'Yö ö dë ‑bha gwëë" ‑nu bha‑ mɛ do ‑dhɛ 'yö‑ dhɛɛ" kpɔ 'ö‑ pö: «'Kwa‑ ma "kwɛandhö?»
LUK 15:27 'Yö gwëëmi bha 'ö‑ pö‑ ‑dhɛ: «I dheebhang 'ö kë dho "sɛ "piʋ̈ bha ꞊në ꞊ya ö yee kë ꞊ya nu, 'yö i dë ꞊ya ‑du zë‑ ‑dhɛ, nu 'ö‑ wo kö ‑a "klʋ̈ʋ̈klʋ̈ ‑sü ‑yö ‑kpan ‑bha bha‑ ‑wɔn 'gü.»
LUK 15:28 ‑A ma 'ö‑ wo "dhʋ̈ bha 'yö ‑siö ‑dhɛ, 'yö ‑zʋʋ ‑kë 'ö‑ pö 'yii 'dho 'dho "kwɛandhö. ‑A dë‑ ‑zun "kpɛnng ‑gɛn ꞊nɛ, 'yö ꞊bhɛa‑ ‑dhɛ kö 'wo 'dho 'kɔɔdhö.
LUK 15:29 "Kɛɛ 'yö‑ pö ö dë ‑dhɛ 'ö‑ pö: «Ma ‑zë 'a zun yë ‑kë i ‑dhɛ ‑sü ‑bha "dhʋ̈ 'yi bha‑ 'ka, yö ꞊në‑ ꞊dɛɛ 'dhö 'dhö, 'mii i ‑wʋ bho‑ "piʋ̈ do, "kɛɛ 'bhii ‑bhʋ 'në ‑zian nu n ‑dhɛ do kö yaa‑ n "tɛabɔ ‑nu 'yi‑ ‑bhö kö 'yi troo kë‑ ‑ta,
LUK 15:30 "Kɛɛ i gbö 'kö yö ‑zë 'ö i ‑bha ꞊naɔ sü 'ö dho‑ 'ka "sɛ "piʋ̈, 'ö‑ ꞊gban 'gü see‑ ‑zuadhe ‑nu ‑bha bha, yö ‑zë 'ö nu 'bha ‑du 'kwa gun‑ "dhiʋ̈ gba sië bha‑ zë‑ ‑dhɛ ‑kɛɛ!»
LUK 15:31 'Yö‑ dë ‑ya pö‑ ‑dhɛ 'ö‑ pö: «Gɔnnë, bhi ‑zë kwɛng ko 'ko "piʋ̈ yi ꞊gban 'ka, pë "pɛpɛ 'ö n ‑gɔ ya i ‑bha ‑mü,
LUK 15:32 "kɛɛ bhii ꞊dede ‑bhö ‑a ‑ga bha, i 'zlaa‑ 'ö dɔ ya, ꞊ya gun ꞊ya kë ꞊dhɛ 'mɛ ꞊ya ga‑ 'dhö, 'yö ꞊ya ‑bö 'ö dɔ bha, ꞊ya gun ꞊ya kë ꞊dhɛ 'mɛ ꞊ya ꞊dhɛng ‑a 'dhö, 'yö 'ma‑ yö ö dɔ bha. (‑A ‑kë "dhʋ̈ ‑sü 'gü, ‑a ‑dhɛ ‑gun ‑bha ꞊dhɛ i 'zlaa‑ 'ö nu bha, 'kwa‑ 'gü ‑troo kë kö 'kwa kwa "dhia bho).»
LUK 16:1 ꞊Dhɛ 'ö ꞊ya kë "dhʋ̈, 'yö go mü 'zü 'yö "gwënng ‑dee 'bha ‑da ö ‑bha ꞊klang ‑nu ‑dhɛ 'ö‑ pö: «Gɔndënë do 'bha ‑yö ‑gun, 'ö ꞊naɔ gun‑ ‑gɔ. 'Yö‑ ‑bha ꞊naɔ bha‑ ‑gɔdhiʋ̈mɛ ‑yö gun. Yi do 'ka 'yö 'wo nu 'wo‑ pö ꞊naɔmɛ bha‑ ‑dhɛ ꞊dhɛ ‑a ‑bha ꞊naɔ ‑gɔdhiʋ̈mɛ bha ‑ya ‑bha ꞊naɔ bha‑ 'gü ꞊në‑ see‑ sië.
LUK 16:2 'Yö gɔndë bha 'ö ö ‑bha ꞊naɔ ‑gɔdhiʋ̈mɛ bha‑ ‑dhɛ 'ö‑ pö‑ ‑dhɛ: «‑Wʋ ‑nu 'a‑ ma sië i ‑bha ya‑ 'bha 'yaa n ‑zʋ 'kun. ꞊Dhɛ 'ö "dhʋ̈, ‑bhö nu kö 'i ma ꞊naɔ bha‑ "kplëng bho n ‑dhɛ; ‑a ‑gɛn ‑mü ꞊dhɛ 'yaa n "piʋ̈ ꞊dhɛ 'i ‑ya ‑gɔ "dhiʋ̈ 'zü.»
LUK 16:3 'Yö 'mɛ 'bha 'ö zun ö ‑zʋ 'gɔn ‑sü ‑bha 'ö‑ pö: «N dëmɛ ‑ya pö 'ö‑ wo yöö ö ‑bha ꞊naɔ ꞊gban 'sü n ‑gɔ ya, a ‑dho ‑a kë mü ꞊dhɛ, "kɛɛ kö 'ke‑ kë "sɩ 'yaa n ‑dhɛ, kö ‑gbadhɛsü ‑yö n 'gü 'pö 'yiʋ̈sü ya?»
LUK 16:4 'Yö‑ pö: «'Kwa‑ ma, 'pë maa kë kö mɛ ‑nu ‑wo n gba ‑yɛa 'ka wo ‑gɔ 'kɔɔdhö kö ꞊wa n kë yë bha‑ 'gü 'ma‑ dɔ.»
LUK 16:5 'Yö ö dëmɛ ‑bha "pɔ 'dhö 'mɛ 'ö‑ ‑nu ‑bha bha‑ ‑nu ‑dhɛ, 'yö‑ pö mɛ ‑blɛɛsü ‑dhɛ: «N dëmɛ ‑bha 'wëë‑ ꞊dhɛ 'pö i ‑bha?»
LUK 16:6 'Yö‑ pö: «‑A ‑bha "yɔn "gbʋnggbʋ këng do ꞊në n ‑gɔ.» 'Yö‑ pö‑ ‑dhɛ: «‑Bhö 'yaanu kö 'i i ‑dɩ ‑bha "pɔ 'sëëdhɛ bha‑ ‑bɛn zë kö 'i ‑ya 'gü ꞊dhɛ "yɔn "gbʋnggbʋ ‑kaɔng "sɔɔdhu ꞊në i ‑gɔ.»
LUK 16:7 'Yö go mü 'ö‑ pö mɛ do 'bha ‑dhɛ 'ö‑ pö: «'Yö bhi ‑zë ꞊wɛ?» 'Yö‑ ‑yɔ bɔ 'pö‑ ‑gɔ 'ö‑ pö: «‑A ‑bha ‑mlüga 'tɛa‑ ‑yan këng do ꞊në n ‑gɔ.» 'Yö‑ pö‑ ‑dhɛ: «‑Bhö i ‑bha "pɔ 'sëëdhɛ 'sü 'pö kö 'i ‑kaɔng "saaga ‑bɛn zë‑ ‑ta.»
LUK 16:8 ꞊Dhɛ 'ö ꞊naɔmɛ bha 'ö‑ ma ꞊dhɛ ö ‑kɔdhiʋ̈mɛ ꞊flüsü bha ꞊yaa‑ kë "dhʋ̈, 'yö "dhɛ ‑ya ‑ta 'ö‑ pö ‑yö ‑dɔ 'wɔn kë ‑dhɛ 'ka. ꞊Dhɛ 'ö Yesu ꞊yaa‑ pö "dhʋ̈, 'yö‑ pö ö ‑bha ꞊klang ‑nu ‑dhɛ: «‑A pö 'a‑ wo ka ‑dhɛ "dhʋ̈ bha‑ ‑gɛn ‑mü ꞊dhɛ 'mɛ 'waa Atanna dɔ 'wo ꞊dɛɛ ‑yën ya‑ 'gü ya, ‑wo woo‑ 'wɔn ‑nu ‑zun 'ko "dhiʋ̈ kë ‑kɔ ‑dɔ wo 'ko ꞊zinng 'gü 'ö ‑ziö 'ka 'mɛ 'wo Atanna dɔ ‑a ‑nu ‑ta.»
LUK 16:9 'Ö go mü 'yö‑ pö 'zü ö ‑bha ꞊klang ‑nu ‑dhɛ 'ö‑ pö: «‑A ‑kë "dhʋ̈ ‑sü 'gü, mang ‑dɩ 'pö a‑ ‑pö ka ‑dhɛ ꞊dhɛ: "Dhang ‑naɔ 'ö "kpʋng ꞊taa yö bha, 'ka "taɔngdëdhɛ 'kun‑ 'ka mɛ ‑nu ‑bha. ꞊Ya kë "dhʋ̈, ‑a ꞊naɔ 'ö ka ‑gɔ bha ꞊ya yën yi 'ö‑ 'ka Atanna ‑dho ö ‑kɔ 'kpɔ ka ‑gɔ ‑a ‑bha ꞊sii 'ö 'yaa yën bha‑ këdhɛ 'gü,
LUK 16:10 'sa 'mɛ 'ö 'wlɔɔdhɛ ‑kë 'wɔn 'sɛɛnnë ‑nu 'gü, kö ‑yö ‑dho ‑a kë 'wɔn 'kpii‑ 'gü 'pö, "kɛɛ mɛ 'ö 'yaa 'wlɔɔdhɛ kë 'wɔn 'sɛɛnnë 'gü, kö‑ ‑mɛ 'yii dho‑ kë 'wɔn 'kpii‑ 'gü.
LUK 16:11 ‑A ‑kë "dhʋ̈ ‑sü 'gü, ꞊ya kë ꞊dhɛ 'wii ka 'wlɔɔdhɛ yö ꞊flü ‑naɔ 'ö "kpʋng ꞊taa yö bha‑ ‑wɔn 'gü, 'dee dho ꞊mɔɔ‑ ‑bha 'ö ꞊naɔ ‑së 'ö Atanna "piʋ̈ bha‑ ‑kɛfama bho ka ‑bha?
LUK 16:12 ꞊Ya kë 'zü ꞊dhɛ mɛ ‑nu ‑bha pë 'wo‑ ‑duɛ bho ka "piʋ̈ bha 'kii‑ 'kun ‑së, Atanna ‑dho ‑a 'dhɛ ka ‑bha 'ka ‑a nu ka ‑dhɛ ‑kɔ ‑kë ꞊dhɛ?
LUK 16:13 ‑Yö kë ka "yaan ꞊dhɛ: Mɛ do 'yaa ꞊mɔɔ‑ ‑bha kö ‑yö yë kë mɛ ꞊plɛ "piʋ̈. ꞊Ya kë "dhʋ̈, ꞊ya kë ‑kɔ "ʋʋ ‑kɔ 'ö‑ 'gü mɛ do ‑san ‑dho ‑a kë 'ö mɛ do ‑dhɔ ‑ya ‑kë. "Ɛɛn 'zü ‑yö ‑dho ‑kplü mɛ do ‑bha, 'ö‑ mɛ do to. Kaa ‑dɩ 'pö 'kii 'dho ꞊mɔɔ‑ ‑bha kö 'ka kë Atanna ‑bha mɛ 'ka kö 'ka ‑ya mü 'zü 'ka kë ꞊naɔ ‑gɔ ꞊dhuëngdhɛ 'gü ‑kɔ do bha ꞊në‑ 'gü.»
LUK 16:14 Dhiang ‑nu 'ö Yesu gun‑ zë sië "dhʋ̈ bha kö Fadhiziɛn ‑nu "tʋ ‑ya ‑bha. "Kɛɛ ꞊dhɛ 'ö ‑kë ꞊dhɛ ꞊naɔ ‑dhɔ ‑ya ‑nu kë "gbɩɩ‑ bha, ‑wo ‑gun ꞊wɛɛ ꞊në‑ dɔ sië‑ ‑bha.
LUK 16:15 ‑Ya ‑pö ‑nu ‑dhɛ yö ꞊në‑ ‑wɔn 'gü 'ö‑ pö: «Fadhiziɛn ‑nu, ka ‑zë ‑kɔ 'ka dho‑ kë‑ 'ka kö 'ka bhɔ mɛ ‑nu 'gü Atanna dhɔɔbhaawɔn kë ‑mɛ ‑bha ꞊në 'ka‑ ‑dhɛ ꞊mɔɔ, "kɛɛ 'sa kö yö ‑zë ‑yö ‑dhɛ yö ka zuë" "piʋ̈. 'Pë 'ö mɛ "bhɩɩ‑ ‑nu ‑zë ‑a ‑nu 'gü pë ‑së 'ka bha ꞊në yö ‑zë 'gü pë ‑yënngsü 'ka.
LUK 16:16 ꞊Ya 'go mü ‑a ‑bha 'tɔng‑ ‑nu 'ö Moizö ‑ya ‑bɛn zë yi 'bha 'ka bha waa‑ ‑wʋdhiʋ̈loomɛ ‑nu ‑a ‑nu ‑bha "tʋ̈ng ꞊në gun ‑blɛɛsü kö Zan 'yii bhɔ ꞊kö. (Kë "dhʋ̈ kö ‑yö Atanna ‑dhidhɛwɔn kë ‑kɔ ‑gleng ‑da Izraɛdhö ‑mɛ ‑nu ‑bha), "kɛɛ 'ö go Zan bhɔ ‑sü ‑bha 'ö nu 'ö zun‑ 'ka ꞊dɛɛ bha, ꞊naɔ ‑së 'ö ‑gban Atanna ‑bha ‑gblüdëdhɛ ‑bha ꞊në 'yi‑ pö sië. Mɛ ꞊gban ‑wo wo 'gü dɔ sië "gbɩɩ‑ yö ꞊në‑ ‑wɔn 'gü 'yö 'wo ‑kplakpla zë sië kö 'wo ‑da mü bha.
LUK 16:17 "Kɛɛ yö ꞊në‑ ꞊gban 'gü, dhang‑ waa‑ "sɛ ‑a ‑nu ziö ‑sü ‑dho kë ‑bhaasü Atanna ‑bha 'tɔng‑ bha‑ ꞊blünga ‑zian ‑go ‑bha ‑sü 'ka.
LUK 16:18 ‑A ‑kë "dhʋ̈ ‑sü 'gü, mɛ "ʋʋ mɛ 'ö‑ dhe bho "bü 'ö‑ ‑dee sü kö ‑yö ‑da ꞊në‑ wo mɛ ‑nu ‑bha "piʋ̈ bha. 'Sa kö mɛ "ʋʋ mɛ 'ö ‑yö dhe 'ö ꞊wa wo bo‑ 'ka ‑a 'sü, kö‑ ‑mɛ ‑yö ‑da ꞊në wo sië mɛ ‑nu ‑bha dhe "piʋ̈ bha.»
LUK 16:19 'Yö Yesu ‑ya pö‑ ‑nu ‑dhɛ 'ö‑ pö: «꞊Naɔmɛ 'kpii‑ 'bha ꞊në gun, sɔ ‑nu 'wo gun‑ ‑gɔ, "yi 'yaa zun‑ 'bha ‑bha. ‑Yö ‑gun sɔga "kpɛakpɛa ‑dɩ ‑slɔɔ 'ö ‑ma 'yaa wo‑ sɔng ‑bha bha ꞊në‑ ‑da sië. 'Yö ‑dhɛ "puu 'ö ꞊kpaɔ, 'yö ö "dhia bho 'yö pë ‑sɛsɛngbɔ ‑nu ‑bhö.
LUK 16:20 ‑Wëëmɛ 'bha ‑yö gun mü 'pö 'wo‑ gun ‑dhɛ sië Dhazaa. Bhiëë ‑yö ‑gun ‑bha ‑dhɛ ꞊gban "pɛpɛ 'gü, 'yö gun nu sië ‑kpɛawo 'ö ‑wɔ ꞊naɔmɛ bha‑ ‑gɔ 'kɔ "dhiëngdhö.
LUK 16:21 Kë "dhʋ̈ kö 'mɛ bha 'ö 'pë 'ö‑ ‑bhö sië kö‑ ꞊blünblün 'në ‑nu 'wo ꞊wɛnng bha ‑wa nu ö ‑dhɛ kö 'ö‑ ‑bhö. Kö 'gbɛn‑ ‑nu ‑wo nu sië 'wo bhiëë 'ö‑ kwi ‑bha bha‑ ‑ma pa ‑nu wo.
LUK 16:22 Yi do 'ka 'yö ‑wëëmɛ bha 'ö ga, 'yö Atanna ‑bha "kië ‑nu ‑wa sü 'wo dho‑ 'ka ‑dhɛ ‑së 'ö Ablaamö "sɔɔ bha‑ 'gü. 'Yö ꞊naɔmɛ bha yöö ‑dɩ 'pö 'ö dho 'ö ga. 'Yö 'wo dho 'wo‑ ‑wɛɛ bho.
LUK 16:23 ꞊Dhɛ 'ö ꞊ya 'dho ꞊ya ꞊loo ꞊geebɔɔ 'pö, 'ö ‑wëëdhɛ yö sië mü ꞊dedewo, 'ö dho ö "yan "dhiʋ̈ "wlü kö ‑yö ‑dhɛ ‑ga, kö Ablaamö ‑yö dɔ sië ‑dhɛ 'bha 'gü 'tiii mü, "kɛɛ kö Dhazaa ‑ya "piʋ̈ mü.
LUK 16:24 'Yö ö ‑wʋ "dhiʋ̈ ꞊wlü "gbɩɩ‑ 'ka 'ö‑ pö: «N dë Ablaamö, ‑bhö dɔ "gbɩɩ‑ kö 'i n ‑wëë ‑ga kö 'i Dhazaa bɔ kö ‑yö ö kɔngga "zɔ "yɛ "yi ‑bha kö ‑yö nu‑ 'ka ‑ya zun n 'nɛɛ‑ ꞊taa kö ‑yö ꞊dhië ‑dhe! Saan" ‑yö 'ma sië n ‑bha pɛng ya‑ 'gü "gbɩɩ‑ ‑wa!»
LUK 16:25 'Yö Ablaamö ‑ya ‑yɔ bɔ‑ ‑gɔ 'ö‑ pö: «Gɔnnë n gbö, ‑a 'wɔn kë i "yaan ꞊dhɛ ‑tosɛa ‑së ‑zë ‑a 'bha ꞊në 'i gun‑ kë sië "kpʋng ꞊taa bha. ‑A "tʋ̈ng bha‑ 'gü kö Dhazaa ‑dɩ 'pö ‑yö saan" 'gü, "kɛɛ 'yö dɔ 'kwa‑ wo ya yö ‑zë ꞊nii 'dhö ‑da sië ‑dhɛ ya‑ 'gü 'yö bhi ‑zë 'i ‑wëëdhɛ yö sië bha.
LUK 16:26 "Kɛɛ yö ꞊në‑ ꞊gban 'gü ‑zianwo, ꞊zinng ‑yö kwa ꞊zinng 'gü, ꞊gblüga do 'bha ‑yö kwa ꞊zinng 'gü bha‑ ‑kë ꞊gblɛɛn ‑kɔ 'yaa ‑së. Kë "dhʋ̈ kö mɛ ꞊yaa‑ pö 'ö 'go yi "pɛan "piʋ̈ kö 'ö bɔ ka "pɛan "piʋ̈, "ɛɛn kö ‑yö 'go ka "pɛan "piʋ̈ ‑yö bɔ ‑dhɛ ya‑ 'gü, kö 'ya 'dho ꞊mɔɔ‑ ‑bha.»
LUK 16:27 'Yö ꞊naɔmɛ bha 'ö‑ pö: «‑Bhö dɔ "gbɩɩ‑ 'sa, n dë Ablaamö, bhɛa" ꞊në 'a‑ wo i ‑dhɛ kö 'i Dhazaa bɔ n dë ‑gɔ 'kɔdhi 'gü, ‑a ‑gɛn ‑mü ꞊dhɛ n dheebhang ‑nu "sɔɔdhu ‑wo mü.
LUK 16:28 Kö ‑yö 'dho ‑yö 'wɔn ‑nu ya‑ ‑nu ‑gɛn dɔ‑ ‑nu ‑dhɛ kö wo ‑zë ‑wo Atanna ‑wʋ ‑ya ꞊bhlëë 'gü kö 'wa 'dho nu ‑wëëdhɛyödhɛ ya‑ 'gü.»
LUK 16:29 'Yö Ablaamö ‑ya ‑yɔ bɔ‑ ‑gɔ 'ö‑ pö: «Atanna ‑wʋ 'sëëdhɛ 'ö Moizö ‑ya ‑bɛn zë bha ‑yö mü, ‑a 'dhɛ 'ö‑ ‑wʋdhiʋ̈loomɛ ‑nu ‑wa ‑bɛn zë 'pö bha ‑yö mü, ‑wo ‑dho ‑a ‑wʋ pö‑ ‑nu ‑dhɛ, ‑wo wo "tʋ 'to‑ ‑bha!»
LUK 16:30 'Yö ꞊naɔmɛ bha 'ö‑ pö Ablaamö ‑dhɛ: «(꞊Iin, ‑yö "dhʋ̈ tɛan‑ 'ka n dë Ablaamö,) "kɛɛ 'mɛ 'kö 'wo bha wo ‑zë ‑a ‑nu ‑wʋ ꞊në 'yii 'dho ꞊mɔɔ‑ ‑nu ‑bha. "Kɛɛ ꞊ya kë ꞊dhɛ mɛ ꞊ya 'go ꞊geebɔɔ kö ‑yö 'dho ‑a ‑nu "piʋ̈, ‑wo ‑dho wo bo wo kë ‑sɔng ‑nu 'ka yö ‑zë 'gü.»
LUK 16:31 'Yö Ablaamö ‑ya ‑yɔ bɔ‑ ‑gɔ 'ö‑ pö: «꞊Ya kë ꞊dhɛ 'wii wo "tʋ to 'sëëdhɛ 'ö Moizö waa‑ Atanna ‑wʋdhiʋ̈loomɛ ‑nu 'wo‑ ‑bɛn zë bha yö ‑zë ‑wʋ ‑bha, 'kö mɛ "yaandhe ‑zian yöö 'go ꞊geebɔɔ kö ‑yö 'dho, 'yii 'dho bhɔ‑ ‑nu 'gü tɛan‑ ‑bha.»
LUK 17:1 ꞊Dhɛ 'ö ꞊ya kë "dhʋ̈, 'yö Yesu ‑yö go mü 'zü 'ö dhiang zë ö ‑bha ꞊klang ‑nu ‑dhɛ 'ö‑ pö: ꞊Ya kë ‑kɔ "ʋʋ ‑kɔ 'ö 'gü, 'wɔn‑ ‑dho ‑da ‑nu wo mɛ "bhɩɩ‑ ‑nu ‑gɛn 'gü 'ö 'wo ‑da Atanna "dhiʋ̈, "kɛɛ 'mɛ 'kö yaa‑ ‑kë 'wɔn ‑nu bha‑ ‑nu ‑da mɛ ‑gɛn 'gü ‑mɛ 'ka bha ꞊në‑ ‑mɛ bha dho kë ‑wëësü.
LUK 17:2 ‑Gwë kpö 'kpikpi ‑zian ‑dun ‑a ‑mɛ bhɔ ‑bha ‑sü 'wo‑ ‑zuö 'ka ꞊weeyi ꞊bhaa ‑a fië‑ ‑dhö ‑a ‑mɛ ‑bha 'mɛ 'wo ꞊dhɛ 'në 'sɛɛnnë ‑nu ya‑ ‑nu 'dhö 'dhang ‑bho n "dhiʋ̈ ‑sü 'gü bha mɛ do zian ‑da Atanna "dhiʋ̈ ‑sü ‑bha.
LUK 17:3 ‑A ‑kë "dhʋ̈ ‑sü bha‑ 'gü, ‑ka "ta ka 'suan‑ 'ka. ꞊Ya kë ꞊dhɛ i dheebhang ꞊ya 'wɔn yaa kë i 'ka, ‑bhö ‑a ‑dhiang zë ‑së 'ka kö 'i ‑dhio dɔ‑ ‑ta. ꞊Ya kë ꞊dhɛ ꞊ya "wɩ i ‑bha ‑bha kö ‑yö ö bo ö ꞊sɔng bha‑ 'ka, ‑a ‑mawɔn 'to.
LUK 17:4 ꞊Ya kë ꞊dhɛ ꞊ya ‑da i "dhiʋ̈ ꞊dhɛ pë "saɔplɛ 'dhö ‑dhɛkpaɔyi do 'ka, kö ꞊ya ‑da i "dhiʋ̈ ‑kɔ 'ö‑ 'gü 'do 'do kö ‑yö nu ‑ya pö i ‑dhɛ ꞊dhɛ 'ya ‑da i "dhiʋ̈, "kɛɛ 'yii 'dho‑ 'bha kë "dhʋ̈ 'zü, ‑a ‑dhɛa ‑bha ꞊dhɛ 'i‑ ‑mawɔn 'to.
LUK 17:5 ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka, 'yö‑ ‑bha bɔmɛ ‑nu ‑wa pö‑ ‑dhɛ: «Yi Dëmɛ, ‑bhö yi ‑bha ‑zʋ ‑yö Atanna ‑dhɛ ‑sü taa kë!»
LUK 17:6 'Yö‑ ‑yɔ bɔ‑ ‑nu ‑gɔ 'ö‑ pö: «꞊Ya kë ꞊dhɛ ka ‑bha ‑zʋ ‑yö Atanna ‑dhɛ ‑sü ꞊ya kë ‑zianwo ꞊dhɛ "pënngga 'dhö, 'ka‑ pö "dhü 'kpii‑ 'ö dɔ ya‑ ‑dhɛ ‑yö 'go ö "gblʋʋ kö ‑yö 'dho dɔ ꞊weeyi ꞊bhaa, ‑yö ‑dho 'dho ka ‑wʋ bha‑ "dhiʋ̈.»
LUK 17:7 'Yö‑ pö 'zü‑ ‑nu ‑dhɛ 'ö‑ pö: «'Mɛ 'ka ya de ‑mü 'ka ka kpö 'gü 'yö‑ ‑bha ꞊dhuënggɔmi ꞊ya 'go 'ke‑ kë ‑dhɛ 'gü kö ‑yö nu, "ɛɛn ꞊ya 'go ‑tuʋ̈ ‑maa kë ‑dhɛ 'gü kö ‑yö nu, 'yö dho ꞊mɔɔ‑ ‑bha kö ‑ya pö‑ ‑dhɛ: «‑Bhö nu "vaandhö kö 'i pë ‑bhö? ‑A ‑mɛ 'yaa 'dhö.
LUK 17:8 'Pë 'ö dho‑ pö yö ‑mü ꞊dhɛ ‑yö ö baa‑, ‑yö 'bhlaa‑ ‑sɔ bha‑ bho ö ‑bha kö ‑yö ö "dhi mɔɔ‑ kö 'ö pë ‑bhö kö 'ö müpë mü. Kö ꞊ya bo ö ‑bha bha‑ 'ka kö yö ‑zë ‑yö gun ‑na 'yaanu kö ‑yö ö ‑bha ‑bhö "ɛɛn ö ‑bha müpë mü.
LUK 17:9 Kö ‑yö kë ꞊dhɛ yöö‑ nuɛ" 'bha ꞊në‑ bho ‑a këwɔn ‑bha 'yaa ‑mü. "Ɛɛn 'yaa "dhʋ̈ ‑ee?
LUK 17:10 Ka ‑bha ‑yö ‑kɔ bha ꞊në‑ 'gü 'pö. ꞊Ya kë ꞊dhɛ ‑wʋ ‑nu 'a dho‑ 'kpɔ ka ‑bha bha, 'ka ka bo‑ ꞊gban 'gü ‑wɔn kë ‑sü 'ka, ‑kaa pö: «Gwëëmi "wɛɛwɛɛdhe ‑mü yi 'ka, yi kë ‑yë ꞊në 'yi‑ ‑kë, nuɛbhomɛ ‑zian 'yaa ‑mü yi 'ka.»
LUK 17:11 ꞊Dhɛ 'ö yi do 'ka kö Yesu ‑yö 'dho sië Zedhizadhɛmö, 'yö bɔ Samadhi ‑sɛ waa‑ Gadhidhe ‑sɛ ‑nu ‑naa "dhiʋ̈.
LUK 17:12 'Ö gun kö ‑yö ‑da sië 'pödhɛ do 'bha 'gü, 'yö ꞊weeyuamɛ ‑kaɔng do 'wo nu dɔ‑ ‑gɔ zian‑, ‑wo ‑to 'ka 'bleng ‑bleng, 'yö 'wo wo ‑wʋ "dhiʋ̈ ꞊wlü 'wo‑ pö‑ ‑dhɛ:
LUK 17:13 «Yesu yi Dëmɛ, ‑bhö yi ‑wëë ‑ga ‑dhe!»
LUK 17:14 ꞊Dhɛ 'ö‑ ‑nu yö, 'yö‑ pö‑ ‑nu ‑dhɛ: «‑Ka 'dho kö 'ka ka ‑dɩ ‑zɔn "saabhomɛ ‑nu ‑dhɛ!» ꞊Dhɛ 'ö 'mɛ 'wo bha 'wo 'dho sië, 'wo dho "kan wo ‑ta kö ꞊wa kë "klʋ̈ʋ̈klʋ̈.
LUK 17:15 ꞊Dhɛ 'ö 'mɛ 'wo bha‑ mɛ do 'ö ö ‑dɩ yö kö 'ya kë "klʋ̈ʋ̈klʋ̈ 'kpakpadhö, 'yö ‑yɛ ö 'gü 'zü ‑deewo 'ö nu Atanna 'tɔ bhɔ ‑sü 'ka "gbɩɩ‑ 'ka.
LUK 17:16 'Yö nu 'ö zun ö kpiö 'gü Yesu ‑dhɛ, 'yö zun‑ nuɛ" bho ‑sü ‑bha, "kɛɛ 'sa kö Samadhi mi ꞊në gun 'mɛ 'kö bha‑ 'ka.
LUK 17:17 Yesu ‑ya ‑pö yö ꞊në‑ ‑wɔn 'gü 'ö‑ pö: «Mɛ ‑kaɔng do 'wo gun bha, ‑a ‑nu ꞊gban 'wii kë ꞊në wo "klʋ̈ʋ̈klʋ̈ ‑ee? 'Yö‑ mɛ ‑kpɛa ‑nu ‑zë ‑wo 'mɛ?
LUK 17:18 ‑Më ‑wɔn ꞊në ‑kë 'yö‑ mɛ ‑kpɛa ‑zë ‑a ‑nu 'bha ‑zʋ 'yii ‑da Atanna nuɛ" bho ‑wɔn ‑ta kö ‑wo wo yee kë ‑wo nu kö 'yii kë "sɛ "wɛɛ 'gü mi 'kö ya‑ 'ka?»
LUK 17:19 ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka, 'yö‑ pö 'mɛ 'bha‑ ‑dhɛ: «N "taɔngdë, ‑bhö "wlü kö 'i i ‑bha 'dho wo; i ‑bha 'dhang ‑bho n "dhiʋ̈ ‑sü ꞊në i dha bha.»
LUK 17:20 ꞊Dhɛ 'ö 'wɔn bha ꞊ya kë "dhʋ̈, 'yö Fadhiziɛn ‑nu ‑wo Yesu dhɛɛ" kpɔ 'wo‑ pö: «Atanna ‑bha ‑gblüdëdhɛ ‑dho nu ‑më "tʋ̈ng ꞊në‑ 'gü?» 'Yö‑ ‑yɔ bɔ‑ ‑nu ‑gɔ 'ö‑ pö: «‑A ‑bha ‑gblüdëdhɛ ‑bha nu ‑sü bha 'yii 'dho kë mɛ 'bha "yan ‑bha 'kun ‑wɔn 'ka.
LUK 17:21 'Wii 'dho‑ pö: «Atanna ‑bha ‑gblüdëdhɛ ‑bha ꞊dhɛ ꞊ya nu ꞊dɛɛ ꞊ya ꞊loo ‑dhɛ 'ö ꞊ni‑ 'gü!», "ɛɛn: «‑Yö ‑dhɛ 'dhɛ ya‑ 'gü!»; ‑a ‑gɛn ‑mü ꞊dhɛ ‑a ‑bha ‑gblüdëdhɛ ‑yö ka kpö 'gü yö.»
LUK 17:22 'Yö‑ pö ö ‑bha ꞊klang ‑nu ‑dhɛ 'ö‑ pö: «‑Ka ‑dhɛ ‑ga, "tʋ̈ng 'bha‑ mü ‑dho ꞊loo 'ö 'ka‑ "slë ꞊mɔɔ kö ka "yan ‑yö ‑da mang Mɛgbömɛ ma mɛdhɛ kë ‑yi "zɔ "dhiʋ̈ 'në 'dɛdɛ 'në 'bha ‑zian 'gü, "kɛɛ 'kii 'dho‑ ‑dhɛ yö.
LUK 17:23 ‑Wo ‑dho ‑a pö ka ‑dhɛ: «‑Ka 'dho ‑dhɛ ya‑ 'gü, ‑yö mü!» "ɛɛn: «‑Yö ‑dhɛ 'dhɛ ꞊ni‑ 'gü!», "kɛɛ ꞊waa‑ pö "dhʋ̈ 'ka 'dho‑ ‑yɔ bɔ, 'ka 'dho ‑bɛang 'sü 'ka dho‑ ‑dhɛ mɔɔ‑;
LUK 17:24 ‑a ‑gɛn ‑mü ꞊dhɛ mang Mɛgbömɛ n nu ‑sü bha ‑yö ‑dho kë ꞊dhɛ ‑kɔ 'ö dha ‑yö "yaan‑ kun‑ 'ka, 'ö ‑kë ꞊dhɛ mɛ‑ mɛ "yan zë, "kɛɛ 'ö "sɛ zun‑ 'ka 'ko "dhiʋ̈ bha ꞊në‑ 'dhö.
LUK 17:25 "Kɛɛ "sanni ‑yö kë "dhʋ̈, kö ꞊dɛɛ ya‑ 'gü ‑mɛ ‑nu ꞊në ꞊wa wo bo n 'ka, kö ꞊wa n ‑wëë ‑kë "dhiʋ̈ ꞊gban "pɛpɛ suu bho.
LUK 17:26 'Wɔn do 'ö ‑kë yi 'bha 'ka Noe ‑bha "tʋ̈ng 'gü, ‑a do 'bha ‑dho kë mang Mɛgbömɛ n nu ‑yi 'ka.
LUK 17:27 ‑A "tʋ̈ng bha‑ 'gü kö mɛ "bhɩɩ‑ ‑nu ‑wo pë ꞊në ‑bhö sië, 'ö 'wo we mü, 'ö 'wo dhe sü, 'ö 'wo‑ sü "dhʋ̈ wo gbö ‑nu ‑dhɛ 'ö 'to‑ 'ka "dhʋ̈ 'ö zun‑ 'ka Noe ‑bha ‑da "yitagɔ 'gü ‑yi ‑bha. ‑wo ‑to 'wɔn ‑nu bha ꞊në‑ ‑bha 'yö dha ‑yö zun "sɛɛ, 'yö "yi ‑yö pa, 'yö‑ ‑nu ꞊gban zë "pɛɛpɛdhö.
LUK 17:28 'Wɔn do 'ö ‑kë Dhɔtö ‑bha "tʋ̈ng 'gü 'zü ꞊në dho kë. ‑A "tʋ̈ng bha‑ 'gü kö pë ‑bhö ‑sü ‑nu oo, we mü ‑sü ‑nu oo, pë 'dhɔ ‑sü ‑nu, pë "dhɔɔ dɔ ‑sü ‑nu, pë ta ‑sü ‑nu waa‑ 'kɔ dɔ ‑sü ‑nu ꞊në ꞊wa wɔ mɛ "bhɩɩ‑ ‑nu ‑gɔ ‑së.
LUK 17:29 ‑Wo ‑to 'wɔn ‑nu bha ꞊në‑ kë ‑sü ‑bha, 'yö Dhɔtö ‑go Sodɔmö ‑yi ‑yö ꞊loo. ꞊Dhɛ 'ö ꞊ya bo 'go ‑sü 'ka Sodɔmö ‑pö 'gü, 'yö pɛng waa‑ blɔɔn" ‑dha ‑yö zun ban ‑sü ‑bha, 'yö‑ ‑nu ꞊gban "pɛpɛ zë.
LUK 17:30 Yi 'ö Mɛgbömɛ dho nu‑ 'ka, ‑yö ‑dho kë ‑kɔ do bha ꞊në‑ 'gü.
LUK 17:31 Mɛ "ʋʋ mɛ 'ö dho kë 'kɔ ꞊taa yi 'ö "dhʋ̈ bha‑ 'ka, 'ö‑ ꞊kwɛɛ yaa‑ ‑kë 'kɔɔdhö, 'ya 'dho‑ pö ö ‑dɩ ‑dhɛ ꞊dhɛ 'ö lɔɔ‑ kö 'ö dho‑ 'sü ‑dhɛ 'gü, ‑ɛɛ 'mɛ yaa‑ ‑kë 'zü 'bhlaadhɛ 'bha 'gü, 'ya 'dho‑ pö 'ö ö yee kë kö 'ö 'dho ö ꞊taama.
LUK 17:32 'Ma‑ pö "dhʋ̈, ka ‑zʋ ‑yö ‑da 'wɔn 'ö Dhɔtö ‑bha dhebhɔ ꞊slɔɔ yi 'bha 'ka ('ö ‑dhɛ ‑ga ö ꞊taama 'ö‑ 'gü ‑yö see‑ bha ꞊në‑ ‑ta).
LUK 17:33 'Mɛ 'ö yaa ö ‑dɩ dha ‑dhɛ ‑mɔɔ ‑a ‑mɛ ‑gɔ ‑dho 'to‑ 'gü. 'Yö 'mɛ 'ö yaa ‑wɩ ö ‑gɔ ‑to 'gü ‑wɔn ‑bha bha yö ‑zë 'ö dha.
LUK 17:34 A‑ ‑pö ka ‑dhɛ tɛan‑ ꞊dede 'ka ꞊dhɛ: ‑A yi 'ö bha‑ 'ka gbeng, mɛ ꞊plɛ 'wo wɔ ‑sü 'ka sɛɛ" do ‑ta, 'gbʋ‑ ‑dho mɛ do 'sü 'ö dho‑ 'ka 'ö‑ mɛ do to.
LUK 17:35 'Ö dhong ‑nu ꞊plɛ 'wo dho kë pë zɔn ‑dhɛ 'gü "wlʋ̈ do 'gü, 'ö 'gbʋ‑ ‑ya mɛ do sü 'ö‑ mɛ do to.
LUK 17:36 Gɔɔn‑ ‑nu ꞊plɛ 'ö waa‑ ‑kë 'bhlaa‑ do 'gü, 'gbʋ‑ ‑dho mɛ do 'sü 'ö‑ mɛ do to.»
LUK 17:37 'Yö‑ ‑bha ꞊klang ‑nu ‑wa dhɛɛ" kpɔ 'wo‑ pö: «‑A 'wɔn 'i "wɩ sië‑ 'ka bha, ‑yö ‑dho kë "dhʋ̈ ‑dhɛ ‑mɛɛ ꞊në‑ 'gü, yi Dëmɛ?» 'Yö‑ pö: «‑Ka 'wɔn 'suan‑ bho "gblëë‑ ‑nu bha. ‑Dhɛ 'ö pë ꞊gee 'dhö‑ ‑bha, 'yö "gblëë‑ ‑nu ‑wo bho 'ko ‑ta ‑a ‑dhɛ 'gü.
LUK 18:1 ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka, 'yö "gwënng do ‑da ö ‑bha ꞊klang ‑nu bha‑ ‑nu ‑dhɛ, kë "dhʋ̈ kö 'ö‑ ‑zɔn ‑nu ‑dhɛ ꞊dhɛ ‑a ‑dhɛa ‑bha ꞊dhɛ ‑wo bhɛa" Atanna ‑dhɛ yi ꞊gban "pɛpɛ 'ka kö‑ ‑nu 'gü 'ya 'dho ga 'yö‑ pö:
LUK 18:2 «Zadɔmɛ do 'bha ‑yö ‑gun 'pödhɛ do 'bha 'gü yi 'bha 'ka, 'ö 'yaa gun "suʋ̈ sië Atanna ‑gɔ, "ɛɛn 'ö 'yaa gun ‑kpla sië mɛ 'bha ‑mɛ ‑bha ‑mɛ 'bha ‑gɔ 'pö.
LUK 18:3 ꞊Gɛandhe do 'bha ‑yö ‑gun 'pö 'pödhɛ do bha‑ 'gü, 'ö dhiang ‑yö gun waa‑ mɛ 'bha ‑a ‑nu ꞊zinng 'gü. 'Yö ꞊gɛandhe bha 'ö dho 'ö dhiang bha‑ ‑da zadɔmɛ bha‑ ‑dhɛ. ꞊Ya kë ꞊sië ‑nu wo 'yö dho zadɔmɛ bha‑ "piʋ̈, 'yö‑ pö‑ ‑dhɛ ‑yö woo‑ za bha‑ dɔ.
LUK 18:4 'Yö ꞊gɛandhe bha 'ö ö ‑gɛn dɔ zadɔmɛ bha‑ ‑dhɛ 'gü pinpindhö kö 'yaa "wɩ‑ ‑bha kö ‑ya ‑nu ‑bha za bha‑ dɔ. "Kɛɛ ‑a ‑fɛɛ ‑ya ‑bha ‑kɔ yaa bha‑ ‑wɔn 'gü, 'yö yi do 'ka 'yö zadɔmɛ bha 'ö‑ pö: «'Kwa‑ ma, 'maa "suʋ̈ ‑zë wo Atanna ‑gɔ tɛan‑ 'ka, "ɛɛn 'maa ‑kpla mɛ 'bha ‑gɔ,
LUK 18:5 "kɛɛ yö ꞊në‑ ꞊gban 'gü, ꞊dhɛ 'ö 'maa n ‑yɛa yö dhebhɔ ya‑ ‑gɔ bha, ‑ka dɔ kö 'a‑ ‑bha za bha‑ dɔ kö‑ ‑bha ‑fɛɛ 'go n ‑bha.»
LUK 18:6 'Yö kwa Dëmɛ Yesu ‑ya ‑ta yɔ 'ö‑ pö: «Zadɔmɛ ‑mawɔn yaa bha 'ö dhiang 'ö‑ zë bha ka‑ ma ‑ee?»
LUK 18:7 'Yö‑ pö: «("Sanni mɛ "bhɩɩ‑ ‑zë ‑yö ꞊dua ‑fɛɛ ‑gɔ kö ‑yö za dɔ ꞊dhɛ ‑kɔ bha‑ 'dhö, "kɛɛ kö yö ‑zë ‑mawɔn ‑yö 'ya‑ "dhʋ̈ bha ‑oo,) 'yö Atanna ‑zë ꞊wɛ? ‑Më ꞊në ‑kë 'yö 'yaa ö ‑bha mɛ ‑nu ‑ta ‑za dɔ kö ‑wo bhɛa" sië‑ ‑dhɛ 'yënng‑ 'gü waa‑ gbeng 'gü ‑nu ꞊gban 'gü?»
LUK 18:8 'Yö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: ‑A 'gü ‑zian 'yii 'dho ꞊gwëë 'yö ka ‑ta ‑za dɔ. "Kɛɛ 'wɔn do 'bha‑ ‑dhö, yö ‑mü ꞊dhɛ: 'Ö yaa‑ ‑dɔ mang Mɛgbömɛ n nu ‑yi ‑bha kö ‑zʋ ‑yö n ‑dhɛ ‑sü ‑yö ‑tun mɛ 'bha ‑gɔ "kpʋng yö ꞊taa "wɛ ‑ee?»
LUK 18:9 ꞊Dhɛ 'ö Yesu ꞊ya ö bo "gwënng 'dhɛ bha‑ ‑da ‑sü 'ka ꞊dhɛ ‑kɔ bha‑ 'dhö, 'yö dho 'yö‑ do 'bha ‑da 'mɛ 'wo gun wo ‑zʋ 'gɔn sië ꞊dhɛ wo ‑zë pö 'yaa wo ‑bha Atanna wëëdhö, 'ö 'waa gun mɛ ‑kpɛa yö sië‑ 'gü bha‑ ‑nu ‑dhɛ 'ö‑ pö:
LUK 18:10 «Yi do 'ka, 'yö mɛ ꞊plɛ 'wo ꞊wlü 'wo dho ‑bhɛa Atanna ‑dhɛ ‑dhɛ 'gü ‑a ‑dhɔkëgükɔ 'gü. Mɛ ꞊plɛ 'wo "dhʋ̈ bha‑ mɛ do ‑gun Fadhiziɛn 'ka. 'Yö‑ mɛ do‑ gun 'niisɔngkunmɛ 'ka.
LUK 18:11 ꞊Dhɛ 'ö ꞊wa 'dho ꞊wa ‑da 'kɔɔdhö, 'yö‑ Fadhiziɛn mi ‑sü ‑yö dɔ "pɛan do "piʋ̈, 'yö zun ‑bhɛa Atanna ‑dhɛ ‑sü ‑bha 'ö‑ pö: «'Aa, n Dë Atanna, 'ma i nuɛ" bho ꞊dedewo, "wɩ 'ö bhii‑ wo‑ ‑bha kö 'a kë ꞊kwaanmɛ 'ka, "ɛɛn kö 'a kë 'wɔnyaakëmɛ "ɛɛn ‑zuazëmɛ 'ka ꞊dhɛ mɛ ‑kpɛa 'wo to‑ ‑nu 'dhö, "ɛɛn 'zü kö 'maa ꞊dhɛ 'niisɔngkunmɛ 'ö dɔ ya‑ 'dhö bha‑ ‑wɔn 'gü;
LUK 18:12 ‑a ‑gɛn ‑mü ꞊dhɛ a 'sunng‑ ‑ma ‑dhɛkpaɔyi ꞊plɛ ꞊në 'ka "dhɔɔgɔ do 'gü, 'ö 'a n ꞊slɔɔpë ꞊gban "pɛpɛ 'nii‑ bho i ‑dhɛ.»
LUK 18:13 Kö 'niisɔngkunmɛ 'kö bha ‑yö dɔ sië "pɛan "wɛɛ "piʋ̈, kö 'yaa ꞊mɔɔ ‑zian wo‑ ‑bha kö ‑yö ö "yan "dhiʋ̈ "wlü dhang‑ 'gü. "kɛɛ kö ‑yö ö ‑kɔ ‑ya sië ö ‑kuu 'gü 'ö‑ pö: «'Aaa, n Dë Atanna, ‑bhö i zuë" kë ‑sɛa n "piʋ̈ kö 'i n ‑mawɔn 'to ‑dhe, 'wɔnyaakëmɛ ‑mü n 'ka ‑wa.»
LUK 18:14 'Yö Yesu ‑ya ‑ta yɔ 'ö‑ pö: «A‑ ‑pö ka ‑dhɛ ꞊sii ꞊dede ‑ta ꞊dhɛ mɛ ꞊plɛ bha‑ mɛ 'dhɛ 'ö ꞊bhɛa "dhʋ̈ bha, Atanna ‑yö kë‑ ‑mawɔn ‑to 'ö dho ö ‑ta "puu 'ka ö ‑gɔ 'kɔɔdhö mɛ 'dhɛ 'ö to bha‑ ‑bha; ‑a ‑gɛn ‑mü ꞊dhɛ 'mɛ 'ö dho‑ pö 'ö ö ‑dɩ fië bho mɛ ‑kpɛa ‑bha, Atanna ‑dho ‑a ꞊bhlëë ‑pö kpɛkpɛdhö, "kɛɛ 'mɛ 'ö yaa ö ‑dɩ ‑da mɛ ꞊gban ꞊wlöö, ‑yö ‑dho ‑a ‑mɛ gba ‑duɛ 'kpii‑ 'ka.»
LUK 18:15 'Ö go‑ 'dhɛ bha‑ 'gü, 'yö 'wo nu‑ ‑dhɛ 'në 'sɛɛnnë ‑nu 'ka 'pö kö ‑yö ö ‑kɔ zun‑ ‑nu ‑bha kö Atanna ‑bha 'dhuë‑ ‑ya ‑nu 'kun. "Kɛɛ ꞊dhɛ 'ö‑ ‑bha ꞊klang ‑nu 'wo‑ ‑dhɛ yö "dhʋ̈, 'yö ‑siö ‑nu ‑dhɛ, 'yö 'wo ‑ya ‑dɔn bho ‑sü ‑bha 'mɛ 'wo nu 'në ‑nu 'ka bha‑ ‑nu 'ka.
LUK 18:16 'Yö Yesu ‑ya pö ‑wo nu‑ ‑nu 'ka. ꞊Dhɛ ꞊ya kë "dhʋ̈ 'yö‑ pö‑ ‑nu ‑dhɛ: «‑Ka ka kwaa‑ 'në ‑nu ‑zü kö ‑wo nu n "piʋ̈, 'ka 'dho‑ ‑nu "kan n ‑bha, ‑a ‑gɛn ‑mü ꞊dhɛ Atanna ‑bha ‑gblüdëdhɛ 'ö dhang‑ 'gü bha ‑yö 'mɛ 'wo ꞊dhɛ ‑a ‑nu 'dhö ꞊në‑ ‑nu ‑bha 'ka.»
LUK 18:17 'Yö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: Mɛ "ʋʋ mɛ 'ö 'yii ö ‑kɔ ‑ya Atanna ‑bha ‑gblüdëdhɛ bha‑ ‑bha ꞊dhɛ ‑kɔ 'ö 'nësɛɛnnë ‑nu 'wo "wɩ sië‑ 'ka 'wɔn ‑bha bha‑ 'dhö, ‑a ‑mɛ 'yii 'dho ‑da mü tongtongdhö.»
LUK 18:18 Yi do 'ka 'yö Zuifö ‑nu ‑gɔmɛ do ‑yö nu, 'yö Yesu dhɛɛ" kpɔ 'ö‑ pö: «‑Gɔmɛdë këwɔn ‑sësü, ‑më ꞊në këwɔn 'ka 'ö 'ma‑ kë 'yö a dho ꞊sii 'ö 'yaa yën 'ö Atanna "piʋ̈ bha‑ ‑slɔɔ?»
LUK 18:19 'Yö Yesu ‑ya ‑yɔ bɔ‑ ‑gɔ 'ö‑ pö: «I n ‑dhɛ mɛ këwɔn ‑së ‑më ‑wɔn 'gü, "kɛɛ kö Atanna yöö do ꞊në‑ këwɔn 'dhö ‑së?»
LUK 18:20 'Yö‑ pö: «I‑ 'wɔn ‑dɔ ꞊dhɛ ‑yö ‑bɛn zë ‑sü 'ka Atanna ‑bha 'tɔng‑ 'gü ꞊dhɛ: ‹'Waa ‑da mɛ ‑nu ‑bha dhe "piʋ̈ tongtongdhö, 'waa mɛ zë tongtongdhö, 'waa ꞊kwaan bho tongtongdhö, 'waa ꞊sua ‑ya mɛ 'bha ‑bha tongtongdhö, ‑bhö i 'kpɔmɛ ‑nu ꞊bhlëë ‑ya.› ‑Yö n 'gü ꞊dhɛ i yö ‑zë ‑dɔ.»
LUK 18:21 'Yö‑ pö: «꞊Iin, ‑a 'dhɛ 'kö bha a yö ‑zë ‑dɔ, a ‑bhɔ yö ‑zë kë ‑sü 'ka n 'nëdhɛ 'gü 'nu yi 'bha 'ka.»
LUK 18:22 ꞊Dhɛ 'ö Yesu ꞊yaa‑ ma "dhʋ̈ 'yö‑ pö‑ ‑dhɛ: «'Wɔn do ꞊në‑ këwɔn ꞊ya 'to i ‑bha.» 'Yö‑ pö: «‑Bhö 'dho kö 'i i ꞊slɔɔpë ꞊gban "pɛpɛ "dhɔɔ dɔ kö i‑ ꞊naɔ bha 'gü ‑gblü ‑wëëmɛ ‑nu ‑ta kö 'i nu 'i 'to n ꞊keng‑, ꞊ya kë "dhʋ̈ Atanna ‑dho i gba ꞊naɔ bha‑ "wɛɛ 'ka dhang‑ 'gü.»
LUK 18:23 ꞊Dhɛ 'ö ‑wʋ 'dhɛ 'kö bha‑ ma Yesu "dhi, 'yö ö wëë' 'gü ‑siö, ‑a ‑gɛn ‑mü ꞊dhɛ ꞊naɔ ‑yö ‑gun ‑gɔ ꞊dedewo, 'yö 'yii "wɩ‑ ‑bha kö ‑yö ö ‑kɔ bho ö ‑bha ꞊naɔ bha‑ 'gü.
LUK 18:24 ꞊Dhɛ 'ö Yesu ‑ya ‑dhɛ yö ꞊dhɛ ‑a wɔ ‑ta ꞊ya ga kpɛkpɛdhö dhiang 'ö‑ zë‑ ‑dhɛ bha‑ ‑wɔn 'gü, 'yö‑ pö 'mɛ 'wo gun mü bha‑ ‑nu ‑dhɛ: «Ka ‑dhɛ ‑yö bha ‑ee? A‑ ‑pö ka ‑dhɛ ꞊dhɛ ꞊naɔmɛ ‑nu ‑da Atanna ‑bha ‑gblüdëdhɛ 'gü ‑sü ‑dho ꞊gbaɔn ꞊dedewo.
LUK 18:25 ‑Yɔɔnmɛa ‑zian ‑bha ‑ziö ‑sɛdha ‑yɛ 'ka ‑dhɛ ‑dho kë ‑së ꞊naɔmɛ ‑nu ‑bha ‑da Atanna ‑bha ‑gblüdëdhɛ 'gü ‑sü ‑ta.»
LUK 18:26 ꞊Dhɛ 'ö 'mɛ 'wo gun mü 'wo 'wɔn bha‑ ma, 'yö 'wo‑ dhɛɛ" kpɔ 'wo‑ pö: «꞊Ya kë "dhʋ̈ 'sa kö 'dee dho dha 'wɔn yö‑ 'gü?»
LUK 18:27 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «Mɛ "bhɩɩ‑ ꞊në‑ ‑fiëbhawɔn 'dhö 'dhö, "kɛɛ Atanna ‑zë ‑fiëbhawɔn 'yaa 'dhö tongtongdhö.»
LUK 18:28 'Yö Piɛdhö ‑ya pö‑ ‑dhɛ: 'Yö 'mɛ 'kö 'ya yi 'kɛ‑ ‑nu waa‑ yi ꞊slɔɔpë ꞊gban "pɛpɛ 'to 'ya nu i ꞊keng‑ 'sa yö ꞊wɛ?»
LUK 18:29 'Yö‑ ‑yɔ bɔ‑ ‑gɔ 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: Mɛ "ʋʋ mɛ 'ö zë Atanna ‑bha ‑gblüdëdhɛ ‑wɔn ‑dhɛ 'ö bo ö ‑bha 'kɔ 'ka "ɛɛn 'ö ‑kan ö ‑bha dhebhɔ ‑bha, "ɛɛn ö dheebhang ‑nu ‑bha, "ɛɛn ö 'kɛ‑ ‑nu ‑bha, "ɛɛn ö ‑bha 'në ‑nu ‑bha,
LUK 18:30 Atanna ‑dho ‑a "dhiʋ̈ziöta nu‑ ‑mɛ ‑dhɛ "tʋ̈ng 'kwa dɔ‑ 'ka ya‑ 'gü, 'ö dho 'ö‑ gba ꞊sii 'ö 'yaa yën 'ö‑ "piʋ̈ bha‑ 'ka ‑dhɛkpaɔ dhia" 'gü.»
LUK 18:31 ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka, 'yö ö ‑bha ꞊klang ‑nu ‑kaɔng do ga ꞊plɛ bha‑ ‑nu ‑dhɛ ‑dɩ ‑ta, 'yö‑ pö‑ ‑nu ‑dhɛ: «‑Ka ‑dhɛ ‑ga, 'dho ꞊në kwa‑ wo sië Zedhizadhɛmö bha. 'Wɔn "pɛpɛ 'ö ‑gban mang Mɛgbömɛ n ‑wɔn ‑bha 'ö Atanna ‑wʋdhiʋ̈loomɛ ‑nu ‑wa ‑bɛn zë bha, ‑a 'gü ‑wɔn kë "tʋ̈ng ꞊në ꞊loo bha,
LUK 18:32 ‑a ‑gɛn ‑mü ꞊dhɛ 'dho kwa‑ wo sië ya ‑wo ‑dho n ꞊gbaɔ 'mɛ 'waa Atanna dɔ‑ ‑nu ‑gɔ, 'ö 'wo ꞊wɛɛ dɔ n ‑bha, 'ö 'wo "si bho n ‑gɔ, 'ö 'wo wo "dhidhi ‑pɛn n ‑bha,
LUK 18:33 'ö 'wo n ‑ma ꞊klangga 'ka, 'ö 'wo n zë, "kɛɛ ꞊wa bo n zë ‑sü 'ka, a ‑dho ‑bö ‑a ‑dhɛkpaɔyi ‑yaaga ‑naa bha‑ 'ka.»
LUK 18:34 "Kɛɛ ‑a pö 'ö‑ wo "dhʋ̈ bha 'wii‑ 'gü ma, ‑a 'gü ‑yö ‑gun ‑nu 'gü tii', 'wii‑ 'klɔɔ‑ 'bha dɔ.
LUK 18:35 ꞊Dhɛ 'wo 'dho sië, 'ö Yesu ꞊ya ꞊loo Zedhiko ‑pö "saan "dhiʋ̈, 'yö 'wo ‑kpan "yanwlümɛ do ‑bha kö ‑yö ‑ya sië zian "gʋ̈ng "piʋ̈ kö ‑yö gba ‑dhɛ sië.
LUK 18:36 ꞊Dhɛ 'ö‑ "tʋ 'dhö ‑da mɛ kpö 'wo gun ziö sië ‑yuudhö bha‑ ‑nu ‑wʋ 'gü, 'yö mɛ ‑nu dhɛɛ" kpɔ,
LUK 18:37 'yö 'wo‑ pö‑ ‑dhɛ: «Yesu 'ö go Nazadhɛtö bha ꞊në ziö sië bha.»
LUK 18:38 'Yö "yanwlümɛ bha 'ö ꞊gbla 'ö‑ pö: «Yesu, Davi Gbö, ‑bhö n ‑wëë ‑ga ‑dhe!»
LUK 18:39 ꞊Dhɛ 'ö‑ pö "dhʋ̈, 'yö 'mɛ 'wo gun "ta 'sü sië 'wo gun Yesu "dhiʋ̈ bha 'wo zun ‑ya ‑a "yan 'gü ‑sü ‑bha, kë "dhʋ̈ kö ‑yö ö "dhi ta. "Kɛɛ 'yii‑ ‑yɔ bɔ, 'yö ö ‑wʋ "dhiʋ̈ 'bha ꞊wlü 'zü "gbɩɩ‑ 'ka 'ö‑ pö: «Davi Gbö, ‑bhö n ‑wëë ‑ga ‑dhe!»
LUK 18:40 ꞊Dhɛ 'ö Yesu "tʋ ‑yö ‑da ‑a ‑wʋ 'gü, 'yö 'daɔnnu, 'yö‑ pö ‑wo nu‑ 'ka ö ‑dhɛ. ꞊Dhɛ 'ö ꞊wa nu ꞊wa ꞊loo‑ 'ka Yesu "sɔɔ,
LUK 18:41 'yö‑ dhɛɛ" kpɔ 'ö‑ pö: «‑Më ‑wɔn ꞊në 'i‑ "piʋ̈ ꞊dhɛ 'a‑ kë i ‑dhɛ?» 'Yö‑ ‑yɔ bɔ‑ ‑gɔ 'ö‑ pö: «N Dëmɛ, ‑yö n "piʋ̈ ꞊dhɛ 'i n "yan ya ꞊në‑ "dhiʋ̈ "pʋ kö a ‑dhɛ yö ‑deewo.»
LUK 18:42 'Yö Yesu ‑ya pö‑ ‑dhɛ: «꞊Dhɛ 'ö "dhʋ̈, i "yan "dhiʋ̈ ‑yö "pʋ, i ‑bha 'dhang ‑bho n "dhiʋ̈ ‑sü ꞊ya i dha!»
LUK 18:43 'Mɛ bha ‑yö ‑to ‑dhɛ do bha‑ 'gü 'ö‑ "yan ‑yö ‑dhɛ yö ‑deewo, 'yö ‑ziö Yesu ꞊keng‑ kö ‑yö Atanna 'tɔ bhɔ sië. 'Yö mɛ "pɛpɛ 'kö 'wo gun Yesu ꞊keng‑, 'ö 'wo 'wɔn bha‑ ‑dhɛ yö, 'yö 'wo ‑ya Atanna 'tɔ bhɔ ‑sü ‑bha.
LUK 19:1 'Yö Yesu ‑yö ‑dho "dhʋ̈ 'ö ‑da Zedhiko ‑pö 'gü, 'yö zun 'pö‑ 'gü "pɛ ‑sü ‑bha.
LUK 19:2 'Ö "dhʋ̈ bha kö gɔndënë do 'bha 'ö ‑kë ꞊naɔmɛ 'ka, "kɛɛ 'ö ‑kë 'niisɔngkunmɛ ‑gɔmɛ 'ka 'wo‑ ‑dhɛ Zase bha ‑ya "slë mɔɔ‑ sië kö 'ö Yesu dɔ.
LUK 19:3 "Kɛɛ ꞊dhɛ 'ö ‑kë ꞊dhɛ 'yaa gun mɛ ꞊gblɛɛn 'ka, ‑a ‑kɔ 'yii ꞊mɔɔ‑ ‑bha mɛ kpö 'ö gun Yesu ꞊keng‑ bha‑ ‑wɔn 'gü.
LUK 19:4 'Yö ‑bɛang sü 'ö ‑da "dhiʋ̈, 'yö dho ö ‑da "dhü do 'bha bha‑ 'gü, kë "dhʋ̈ kö 'ö Yesu yö; ‑a ‑gɛn ‑mü ꞊dhɛ 'ö gun "dhʋ̈ kö ꞊yaa‑ 'wɔn dɔ ꞊dhɛ ‑yö ‑dho bɔ ‑dhɛ bha ꞊në‑ 'gü.
LUK 19:5 ꞊Dhɛ 'ö Yesu dho 'ö ꞊loo "dhü 'ö Zase gun‑ 'gü bha‑ ꞊wlöö, 'yö ö ‑gɔ "dhiʋ̈ ꞊wlü 'ö ‑dhɛ ‑ga "dhü bha‑ 'gü, 'yö‑ pö Zase ‑dhɛ: «Zase, ‑bhö lɔɔ‑ "vaandhö, ‑a ‑gɛn ‑mü ꞊dhɛ ꞊dɛɛ 'ö ꞊dɛɛ 'ka a ‑dho ‑da 'ka i ‑gɔ 'kɔɔdhö.»
LUK 19:6 'Yö Zase ‑yö ꞊lɔɔ ‑bɛang 'ka, 'yö dho 'ö‑ ꞊yëë bho ꞊niidadhe ꞊dede 'ka ö ‑gɔ 'kɔɔdhö.
LUK 19:7 ꞊Dhɛ 'ö 'mɛ 'wo gun Yesu ꞊keng‑ bha 'wo 'wɔn bha‑ ‑dhɛ yö, 'yö‑ ‑nu ꞊gban "pɛpɛ 'wo ‑ya ‑dɔn ‑bho wo yun 'gü ‑sü ‑bha Yesu 'ka 'wo‑ pö: «'Mɛ bha ꞊ya 'dho ö ꞊yëë bho 'wɔnyaakëmɛ ‑gɔ 'kɔɔdhö ‑wa!»
LUK 19:8 "Kɛɛ "tʋ̈ng 'wo‑ pö sië 'ka "dhʋ̈ bha kö Zase ꞊ya 'dho ꞊ya dɔ Yesu wëëdhö kö ‑ya pö sië‑ ‑dhɛ 'ö‑ pö: «N Dëmɛ, ꞊ya 'go ꞊dɛɛ 'gü, ꞊naɔ 'ö n ‑gɔ a ‑dho ‑a "pɛ 'gü 'a‑ "pɛan do nu "flɛɛmɛ ‑nu ‑dhɛ, 'ö mɛ "pɛpɛ 'a "kpënng‑ ‑kë ‑nu ‑gɔ 'a‑ ‑nu ‑bha ꞊naɔ ‑bhö bha 'a dho 'a‑ ‑gaɔ ‑yiisiö nu‑ ‑mɛ ‑nu ‑dhɛ.»
LUK 19:9 ꞊Dhɛ 'ö ꞊yaa‑ pö "dhʋ̈, 'yö Yesu ‑ya pö‑ ‑dhɛ: «Zase, dha ‑sü ‑bhiëë ꞊ya zun i ‑bha 'kɔ ‑bha ꞊dɛɛ, ‑a ‑gɛn ‑mü ꞊dhɛ Ablaamö suu ‑mü i 'ka 'pö.
LUK 19:10 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mang Mɛgbömɛ a ‑nu "kpʋng ꞊taa kö 'mɛ 'ö Atanna ‑bha zian ꞊ya ꞊dhɛng‑ ‑nu ‑gɔ ꞊në 'a‑ ‑nu mɔɔ‑ kö 'a‑ ‑nu dha.»
LUK 19:11 "Tʋ̈ng 'ö Yesu 'dhö "wɩ sië‑ 'ka "dhʋ̈ bha kö 'waa Zedhizadhɛmö ‑dhɛ 'ka ꞊gblɛɛn 'zü, kö 'mɛ 'wo wo "tʋ 'to sië‑ ‑wʋ ‑bha bha ‑wo wo ‑zʋ 'gɔn sië ꞊dhɛ 'wa bo 'dho ‑sü ‑zë 'ka kö 'wo ꞊loo Zedhizadhɛmö bhoo, kö Atanna ‑bha ‑gblüdëdhɛ ꞊ya ‑ya ‑bha ꞊naa bha.
LUK 19:12 'Yö "gwënng do ‑da ‑nu ‑dhɛ 'ö‑ pö: «Yi do 'ka 'yö gɔndënë do 'ö bhɔ ‑gblüdëdhɛ ‑kɔdhi 'gü, 'yö ꞊wlü 'ö dho "sɛ ꞊gblɛɛn 'bha 'gü kö ꞊wa bo ö kë ‑sü 'ka ‑gblüdë 'ka mü kö 'ö nu 'ö ‑ya ö ‑bha "sɛ ‑gɔ "dhiʋ̈.
LUK 19:13 ꞊Dhɛ 'ö yöö 'dho, 'yö ö ‑bha gwëëzë ‑nu ‑kaɔng do ‑dhɛ, 'yö "sënng ga ‑kaɔng do 'gü ‑gblü ‑a ‑nu ‑ta 'yö‑ pö: «‑Ka 'dho‑ 'ka kö 'ka‑ ‑ziö 'gü ziö "sanni n nu ‑sü ꞊zinng 'gü.»
LUK 19:14 "Kɛɛ ꞊dhɛ 'ö ‑kë ꞊dhɛ 'mɛ bha‑ ‑san ‑gun ö ‑gɔ "sɛgümɛ ‑nu kë sië bha, 'yö 'wo mɛ bɔ‑ ꞊keng‑ "sɛ 'ö dho‑ 'gü bha‑ 'gü, 'yö 'wo‑ pö 'mɛ 'wo mü‑ ‑nu ‑dhɛ: «'Yaa yi "piʋ̈ ꞊dhɛ 'ka 'mɛ bha‑ ‑ya yii‑ ‑gblüdë 'ka.»
LUK 19:15 "Kɛɛ yö ꞊në‑ ꞊gban‑ 'gü, ꞊dhɛ 'ö ꞊wa bo 'mɛ bha‑ ‑ya ‑sü 'ka ‑gblüdë 'ka, 'ö ꞊ya ö yee kë ꞊ya nu ö ‑gɔ "sɛ 'gü, 'yö mɛ bɔ ö ‑bha gwëëzë ‑nu bha‑ ‑nu ‑dhɛ kö ‑wo nu kö ‑wo wo "kplëng bho ö ‑dhɛ.
LUK 19:16 ‑A mɛ ‑blɛɛsü 'ö nu, 'yö ö "kplëng bho 'ö‑ pö: «N Dëmɛ, "sënng ga do 'i‑ to n ‑gɔ bha, ‑a ‑kaɔng do ꞊në 'a‑ ꞊slɔɔ‑ ‑bha.»
LUK 19:17 'Yö ‑gblüdë ‑ya pö‑ ‑dhɛ: «꞊Ya dhi, i këwɔn ‑yö ‑së. 'Ma‑ dɔ ꞊dhɛ 'wlɔɔ‑ 'në ‑mü i 'ka pë ‑bhaasü 'a‑ to i "piʋ̈ ya‑ ‑bha. ꞊Dhɛ 'ö "dhʋ̈, 'ma i ‑ya 'pö‑ "gblʋ̈gblʋ̈ ‑kaɔng do ‑gɔ "dhiʋ̈.»
LUK 19:18 'Yö mɛ ꞊plɛ ‑naa ‑yö nu 'yö‑ pö: «N Dëmɛ, "sënng kpö do 'i‑ to n ‑gɔ bha, ‑a "sɔɔdhu ꞊në 'a‑ ꞊slɔɔ‑ ‑bha.»
LUK 19:19 'Yö‑ pö‑ ‑dhɛ: «Bhii ‑dɩ 'pö, ‑bhö ‑ya 'pö‑ "gblʋ̈gblʋ̈ "sɔɔdhu ‑gɔ "dhiʋ̈.»
LUK 19:20 'Yö‑ mɛ do 'bha‑ nu 'ö‑ pö: «N Dëmɛ, "sënng kpö 'i‑ nu n ‑dhɛ bha, ‑a ‑ga 'a‑ ‑da sɔ 'gü 'a kpö ‑kë 'ö ya.»
LUK 19:21 'Yö‑ pö: «‑A kë 'a‑ wo "dhʋ̈ bha‑ ‑gɛn ‑mü ꞊dhɛ "suʋ̈ ꞊në 'a‑ wo i ‑gɔ, a‑ ‑dɔ ꞊dhɛ i ‑mawɔn ‑yö 'ya‑, 'pë 'yaa i ‑bha 'ka 'i‑ ‑sü 'ö to i ‑gɔ, 'ö 'bhii ‑mlü bɔ ‑dhɛ 'ö‑ 'gü 'i dho 'i ‑mlü ‑kan mü.»
LUK 19:22 'Yö ‑gblüdë ‑ya pö‑ ‑dhɛ: «I ‑dɩ ‑wʋ ꞊në 'a dho i 'kun‑ ‑bha, ‑a ‑gɛn ‑mü ꞊dhɛ gwëë" suu yaa ‑mü i 'ka. I‑ ‑pö i‑ ‑dɔ ꞊dhɛ n ‑mawɔn ‑yö 'ya‑, 'pë 'yaa n ‑bha 'ka, a‑ ‑sü 'ö to n ‑gɔ, 'ö 'mii 'pëë‑ ta 'a‑ bhɛ bho,
LUK 19:23 ‑yö ‑kë ‑mü ꞊dhɛ 'sa 'yö 'bhii 'dho ma ꞊naɔ 'a‑ dɔ i ‑gɔ bha‑ 'ka kö 'i‑ ‑da 'wëë‑ ‑kɔ 'gü, kö "sanni ‑yö dɔ n nu ‑yi ‑bha kö ‑a ꞊trɔɔn ꞊ya ‑da, 'yö i‑ to i ‑ta?»
LUK 19:24 'Yö‑ pö 'mɛ 'wo gun mü bha‑ ‑nu ‑dhɛ 'ö‑ pö: «‑Ka ma "sënng kpö 'ö 'mɛ bha‑ ‑gɔ bha‑ 'sü‑ ‑gɔ kö 'ka‑ dɔ‑ ‑kaɔng do 'dhö 'mɛ‑ ‑gɔ bha‑ ‑gɔ.»
LUK 19:25 'Yö 'mɛ 'wo bha 'wo‑ pö‑ ‑dhɛ: «'Yö n Dëmɛ, ‑a ‑kaɔng do 'dhö 'mɛ 'kö‑ ‑gɔ 'yö 'i‑ pö 'zü 'yi‑ 'bha nu yö ꞊në‑ ‑dhɛ ‑ee?»
LUK 19:26 'Yö‑ ‑yɔ bɔ‑ ‑nu ‑gɔ 'ö‑ pö: «'A‑ zë ka ‑dhɛ ꞊sii ꞊dede ‑ta ꞊dhɛ: ‑A 'bha 'dhö 'mɛ 'ö‑ ‑gɔ 'ö‑ ‑ziö 'gü ‑ziö ꞊në 'wo dho‑ ‑mɛ taa kë, "kɛɛ pë 'bha 'yaa 'mɛ 'kö‑ ‑gɔ, ‑a 'dhɛ 'në ‑zian 'ö‑ ‑gɔ ('ö 'yaa‑ ‑ziö 'gü ziö) bha ꞊në 'wo dho‑ 'sü‑ ‑gɔ do.
LUK 19:27 ꞊Ya 'go yö ‑zë 'gü, 'mɛ 'wii "wɩ‑ ‑bha kö 'a kë‑ ‑nu ‑bha ‑gblüdë 'ka bha, ‑ka nu‑ ‑nu 'ka kö 'ka‑ ‑nu zë n "yaan yö!»
LUK 19:28 ꞊Dhɛ 'ö ꞊ya ö bo dhiang ‑nu bha‑ ‑nu zë ‑sü 'ka, 'yö ‑da mɛ kpö bha‑ ‑nu ‑dhɛ "dhiʋ̈, 'yö 'wo dho Zedhizadhɛmö.
LUK 19:29 ꞊Dhɛ 'ö ꞊wa 'dho 'ö ꞊ya ꞊loo Bɛfaze ‑pö waa‑ Betani ‑pö ‑nu "sɔɔ, ‑tɔn 'wo‑ ‑dhɛ Odhivie ‑tɔn bha‑ "pɛan "piʋ̈, 'yö ö ‑bha ꞊klang ‑nu bha‑ mɛ ꞊plɛ bɔ, 'yö‑ pö‑ ‑nu ‑dhɛ:
LUK 19:30 «‑Ka 'dho 'pö‑ 'ö ‑ya kwa wëëdhö bha‑ 'gü. 'Ka ‑da 'plöö ka ‑dho ꞊soofëng 'në do 'ö mɛ 'bha 'yii ‑ya ‑ta do ‑a yö kö ‑yö ‑kplü ‑sü 'ka, 'ka‑ yö ‑kaa "pʋ kö 'ka nu‑ 'ka.
LUK 19:31 Mɛ ꞊ya ka dhɛɛ" 'kpɔ ꞊yaa‑ pö: «Ka‑ ‑pʋ kö 'ka‑ kë ꞊dhɛ?», ‑kaa pö‑ ‑mɛ ‑dhɛ: «Yi dëmɛ ‑mawɔn ꞊ya zun‑ ‑bha.»
LUK 19:32 'Mɛ 'ö‑ ‑nu bɔ "dhʋ̈ bha 'yö 'wo dho. 'Yö 'wo ‑kpan ꞊soofëng 'në bha‑ ‑bha ꞊dhɛ ‑kɔ 'ö‑ pö‑ 'ka bha‑ 'dhö.
LUK 19:33 ꞊Dhɛ 'wo ꞊soofëng 'në bha‑ "pʋ sië, 'yö‑ ‑mɛ ‑nu ‑wo nu 'wo‑ ‑nu dhɛɛ" kpɔ 'wo‑ pö: «Ka‑ ‑pʋ ‑më ‑wɔn 'gü?»
LUK 19:34 'Yö 'wo‑ ‑yɔ bɔ‑ ‑nu ‑gɔ 'wo‑ pö: «Yi Dëmɛ ‑mawɔn ꞊ya zun‑ ‑bha.» 'Yö 'mɛ 'wo bha 'wii "wɩ.
LUK 19:35 'Yö 'wo‑ sü 'wo dho‑ 'ka Yesu ‑dhɛ. ꞊Dhɛ 'ö ꞊wa 'dho ꞊wa ꞊loo‑ 'ka Yesu ‑dhɛ 'gü, 'yö 'wo woo‑ sɔ ‑nu ꞊loo‑ ‑ta, 'yö 'wo Yesu ‑ya ‑ta.
LUK 19:36 ꞊Dhɛ 'ö ꞊soofëng 'në bha 'ö zun "ta 'sü ‑sü ‑bha, 'yö mɛ ‑nu 'wo sɔ kpɔ zian ‑ta ‑dhɛ ꞊gban 'gü 'wo dho‑ 'ka "dhiʋ̈.
LUK 19:37 ꞊Dhɛ 'ö ꞊wa 'dho 'ö 'wo Odhivie ‑tɔn bha‑ lɔɔ‑ sië 'kö ꞊wa ꞊yɔɔn Zedhizadhɛmö ‑pö "sɔɔ, 'yö‑ ‑bha ꞊klang ‑nu bha‑ ‑nu ꞊gban "pɛpɛ 'wo wo ‑wʋ "dhiʋ̈ ꞊wlü, 'yö 'wo zun Atanna 'tɔ bhɔ ‑sü ‑bha kö ‑a ‑nu ꞊nii ‑yö ‑da sië ꞊dedewo "dhabhliwɔn "gblʋ̈gblʋ̈ ‑nu 'ö Yesu ‑ya ‑kë 'wo‑ ‑dhɛ yö bha‑ ‑wɔn 'gü
LUK 19:38 'yö 'wo‑ pö: «‑Gblüdë 'ö nu kwa Dëmɛ ‑bha nu 'gü bha, ‑a 'tɔ ‑yö bhɔɔ! ‑Ya ‑dɩ 'flëë‑ 'gü ‑sü ‑yö kë dhang‑ 'gü kö Atanna 'ö dhang‑ 'gü ‑a 'tɔ‑ bhɔɔ!»
LUK 19:39 ꞊Dhɛ 'wo‑ pö sië "dhʋ̈, 'yö Fadhiziɛn ‑nu ga bha ‑wo bɔ mɛ "dhaa bha‑ 'gü 'wo‑ pö Yesu ‑dhɛ: «Yi Dëmɛ, ‑a pö i ‑bha ꞊klang ‑nu ‑dhɛ kö ‑wo wo "dhi ta!»
LUK 19:40 'Yö‑ ‑yɔ bɔ‑ ‑nu ‑gɔ 'ö‑ pö: ««A‑ ‑pö ka ‑dhɛ ꞊dhɛ kö 'mɛ 'wo bha ‑wo wo "dhi ta, ‑gwë ‑nu ‑dho "wɩ!»
LUK 19:41 ꞊Dhɛ 'ö ꞊wa ꞊yɔɔn 'pödhɛ "sɔɔ, 'yö Yesu zun "gbʋ bɔ ‑sü ‑bha Zedhizadhɛmö ‑pö 'gü ‑mɛ ‑nu bha 'ö‑ pö:
LUK 19:42 «Zedhizadhɛmö ‑mɛ ‑nu, ꞊ya kë 'nu ꞊dhɛ 'wɔn 'ö dho ka gba ‑ya ‑dɩ 'flëë‑ 'gü ‑sü 'ka, 'ö kë sië ka ‑dhɛ ꞊dɛɛ ya, ka‑ ‑dɔ 'nu, kö ka ‑bha ‑dho kë ‑së. "Kɛɛ ‑kaa ‑ga ꞊tɔn 'ö 'yaa "dhʋ̈, 'yö ‑bin ‑sü 'ka ka ‑gɔ 'yö 'kaa‑ yö bha.
LUK 19:43 ‑Ka ‑dhɛ ‑ga, ‑a dɔ 'ö 'kii‑ wo bha‑ ‑wɔn 'gü, "tʋ̈ng 'bha ‑dho ꞊loo 'ö ka 'yaɔ‑ ‑nu 'wo nu 'wo "saan ‑kan kaa‑ 'pö‑ ya‑ ‑zü, 'ö ‑gblü ‑yö 'gba dɔ ka ‑bha 'ö 'wo ka ꞊klëën zian ꞊gban ‑zian ꞊gban 'ka, 'ö 'wo ka ꞊kang.
LUK 19:44 ‑Wo ‑dho kaa‑ 'pö‑ ya‑ 'wü ‑trukpɛ ‑trukpɛdhö, 'ö mɛ do ‑zian 'yaa 'to "yaan, 'ö 'wo dho 'wo wo ‑gɛn ‑ziö ‑a "yʋʋ 'gü, 'ö‑ 'kɔ "kpan ‑gwë do ‑zian 'yaa 'to 'ko ‑ta, ‑a ‑gɛn ‑mü ꞊dhɛ "tʋ̈ng 'ö Atanna ‑ya sü kö 'ö "ta‑ 'ka ka ‑dhɛ bha 'kii‑ dɔ.»
LUK 19:45 ꞊Dhɛ 'ö dho 'ö ꞊loo Zedhizadhɛmö, 'yö dho 'ö ‑da Atanna ‑dhɔkëgükɔ 'gü, 'ö dho ‑yö ‑kpan "dhɔɔdɔmɛ ‑nu ‑bha mü kö ‑wo woo‑ pë 'në ‑nu "dhɔɔ dɔ sië. 'Yö ‑ya ‑a ‑nu "piʋ̈ kë ‑sü ‑bha
LUK 19:46 kö ‑ya pö sië‑ ‑nu ‑dhɛ 'ö‑ pö: «‑Yö ‑bɛn zë ‑sü 'ka Atanna ‑bha 'sëëdhɛ 'gü ꞊dhɛ ‑a ‑bha 'kɔ‑ ‑dho kë ‑bhɛa 'gü ‑kɔ ꞊në‑ 'ka, "kɛɛ yö ꞊në ka ‑zë 'ka‑ kë ꞊kwaanmɛ ‑nu ‑ya 'gü ‑yɛ ꞊në‑ 'ka bha!»
LUK 19:47 ‑A "tʋ̈ng bha‑ 'gü, ‑yö gun 'dho sië yi ꞊gban "pɛpɛ 'ka Atanna ‑dhɔkëgükɔ 'gü, 'ö mɛ ‑nu ꞊klang ‑nu ‑kë ‑nu wo, "kɛɛ 'sa kö "saabhomɛ ‑nu ‑gɔmɛ ‑nu oo, 'tɔnggɔmɛ ‑nu waa‑ Zuifö ‑nu ‑bha ‑kwɛagbö ‑nu ‑wa "slë mɔɔ‑ sië kö 'wo‑ zë.
LUK 19:48 "Kɛɛ ‑kɔ 'ö woo‑ kë‑ 'ka kö‑ ‑nu ‑kɔ ꞊mɔɔ‑ ‑bha 'wii‑ yö, ‑a ‑gɛn ‑mü ꞊dhɛ kö "sɛgümɛ ‑nu ꞊gban "pɛpɛ ‑wo wo "tʋ 'to sië‑ ‑wʋ bha‑ ‑bha 'wo‑ din yö ꞊dedewo 'ö 'wo‑ tɛandhɛ ‑nu ꞊gban yö.
LUK 20:1 Yi do 'bha bha‑ 'ka kö Yesu ‑yö 'wɔn ‑taɔng ‑së pö sië "sɛgümɛ ‑nu ‑dhɛ, 'ö‑ ‑nu ꞊klang ‑kë ‑a ‑wɔn 'ka Atanna ‑dhɔkëgükɔ 'ö Zedhizadhɛmö bha‑ 'gü, 'yö "saabhomɛ ‑nu ‑gɔmɛ ‑nu 'wo nu waa‑ 'tɔnggɔmɛ ‑nu waa‑ ‑kwɛagbö ‑nu 'dhö,
LUK 20:2 'yö 'wo‑ pö Yesu ‑dhɛ: «'Wɔn ‑nu 'i‑ kë sië ya i‑ ‑kë de ꞊në‑ ‑bha kë 'gü "ɛɛn i‑ ‑sabho de "dhiʋ̈?»
LUK 20:3 'Yö ‑yɔ bɔ‑ ‑nu ‑gɔ 'ö‑ pö: «'Kwa‑ ma, a ‑dho ‑a ‑yɔ bɔ, "kɛɛ a ‑dho ka dhɛɛ" do 'kpɔ 'pö.
LUK 20:4 Kaa ‑dɩ 'pö Zan ‑bha mɛ ‑bɔ Atanna 'ka ‑zʋ 'ö gun‑ wo sië ya, ‑yö ‑gun ‑sabho sië de ꞊në‑ "dhiʋ̈? Mɛ "bhɩɩ‑ ‑nu ‑ee, "ɛɛn Atanna ‑ee?»
LUK 20:5 ꞊Dhɛ 'ö‑ pö "dhʋ̈, 'yö 'wo ‑ya ‑wɩ 'gü ‑sü ‑bha wo 'ko ꞊zinng 'gü 'wo‑ pö: «Ya kë ꞊dhɛ 'kwa‑ pö ‑yö ‑go Atanna "piʋ̈, kö yöö‑ pö kwa ‑dhɛ yö kë ‑mü ꞊dhɛ 'sa 'yö 'kii 'dhang bho‑ "dhiʋ̈,
LUK 20:6 "kɛɛ ꞊ya kë 'zü ꞊dhɛ 'kwa‑ pö ‑yö ‑gun kë sië mɛ "bhɩɩ‑ ‑nu ꞊në‑ ‑nu ‑bha kë 'gü, kö "sɛgümɛ ‑nu ꞊gban "pɛpɛ woo (꞊wɛɛ dɔ kwa ‑bha) kö ‑wo kwa ‑zuö ‑gwë 'ka, ‑a ‑gɛn ‑mü ꞊dhɛ ‑wo 'dhang ‑bho "dhiʋ̈ ꞊dhɛ Atanna ‑wʋdhiʋ̈loomɛ ꞊në gun Zan 'ka.»
LUK 20:7 ꞊Dhɛ 'ö ꞊waa‑ zɔn‑ 'gü "dhʋ̈, 'yö 'wo‑ pö Yesu ‑dhɛ 'waa‑ 'go ‑dhɛ dɔ.
LUK 20:8 'Yö ‑yɔ bɔ‑ ‑nu ‑gɔ 'pö 'ö‑ pö: «Mang ‑dɩ 'pö, 'wɔn 'a‑ kë sië bha 'mɛ 'a‑ kë‑ ‑bha kë 'gü 'maa‑ dɔ.»
LUK 20:9 ‑Yö ‑to ‑dhɛ bha‑ 'gü 'yö "gwënng do 'bha ‑da "sɛgümɛ ‑nu ‑dhɛ 'ö‑ pö: «Mɛ do 'bha ꞊në gun, 'yö ö ‑bha ‑drɔɔdhɛ kpɔ, 'yö dho 'yö‑ ‑da buzan 'gü 'yö dho "ta ꞊gblɛɛn 'bha 'gü.
LUK 20:10 ꞊Dhɛ 'ö ‑drɔɔ bha‑ ga bho "tʋ̈ng ꞊ya ꞊loo, 'yö ö ‑bha gwëëmi do bɔ buzankëmɛ ‑nu bha‑ ‑nu "piʋ̈, kö ‑wa 'gü ‑gblü kö ‑wo ö ‑bha dɔ‑ ‑gɔ kö ‑yö nu‑ 'ka ö ‑dhɛ, "kɛɛ 'yö buzankëmɛ ‑nu bha 'wo gwëëmi bha‑ ‑ma ‑tëkë ‑tëkëdhö, 'yö 'wo‑ "piʋ̈ kë 'yö dho ö ‑kɔ 'gü "fië 'ka ö dëmɛ ‑ta.
LUK 20:11 'Yö ꞊slëë 'zü 'ö mɛ "wɛɛ do 'bha bɔ, 'yö 'wo‑ kun 'zü 'wo‑ ‑ma ‑tɛkpɛ ‑tɛkpɛdhö, 'yö 'wo "si bho‑ ‑gɔ, 'yö 'wo‑ ‑kë 'yö dho ö ‑kɔ "fië 'ka ö dëmɛ ‑ta 'pö.
LUK 20:12 'Yö dho 'zü 'ö‑ mɛ ‑yaaga ‑naa bɔ. Yö ‑zë 'ö ꞊loo mü, ‑a ‑gi ꞊në 'wo‑ wo, 'yö 'wo‑ ‑kë 'yö dho.
LUK 20:13 ꞊Dhɛ 'ö mɛ 'dhɛ bha 'ö dho, 'yö ‑drɔɔdhɛ dëmɛ ‑ya pö: «‑Kaa 'to "dhʋ̈! 'Mɛ 'a‑ ‑nu bɔ bha kë 'wo‑ wo mɛ "wɛɛ 'ka 'yö ‑kë, ‑ka dɔ kö 'a n ga 'gü ꞊në ꞊dede bɔ, 'bha mü "dhʋ̈ ‑wo ‑dho yö ‑zë ‑ya ꞊bhlëë 'gü.»
LUK 20:14 "Kɛɛ ꞊dhɛ 'ö‑ gbö ꞊ya 'dho ꞊ya ꞊loo mü, 'ö buzankëmɛ ‑nu bha ꞊waa‑ yö 'yö 'wo‑ pö: «‑An aaan‑! Mɛ ꞊dede 'ö‑ ‑bha 'kɛanpë 'dhö ‑mü 'yö nu bha, yö ꞊në zëmɛ ‑zian 'ka, yö ‑zë 'kwa‑ zë kö ‑dhɛ ya ꞊ya 'to kwa ‑gɔ!»
LUK 20:15 'Yö 'wo ‑pö ‑ta 'wo‑ kun 'yö 'wo go‑ 'ka ‑drɔɔdhɛ 'gü, 'yö 'wo‑ zë.» ꞊Dhɛ 'ö bo "gwënng bha‑ ‑da ‑sü 'ka, 'yö‑ ‑nu dhɛɛ" kpɔ 'ö‑ pö: «‑Yö ka 'gü ꞊dhɛ ꞊ya kë "dhʋ̈ bhao‑, 'bhlaamɛ bha ‑yö ‑dho buzankëmɛ ‑nu bha‑ ‑nu kë ꞊dhɛ ꞊taamasü 'gü?
LUK 20:16 ‑Yö kë ka "yaan ꞊dhɛ ꞊ya nu, ‑yö ‑dho buzankëmɛ ‑nu bha‑ ‑nu zë ꞊në‑ wo kö ‑yö ö ‑bha 'bhlaa‑ 'sü ‑ya dɔ mɛ "wɛɛ ‑nu ‑gɔ. ꞊Dhɛ 'ö "sɛgümɛ ‑nu ‑wo 'wɔn bha‑ ma 'yö 'wo‑ pö: «'Wɔn 'dhɛ 'kö bha‑ yaa ‑yö dɔ mɛ 'ka ꞊gblɛɛn ‑wa.»
LUK 20:17 "Kɛɛ ꞊dhɛ 'wo‑ pö "dhʋ̈, 'yö Yesu ‑ya ‑nu ‑ta ‑ga 'yö‑ pö: «꞊Ya kë "dhʋ̈ 'sa kö‑ pö 'ö Atanna ‑wʋ 'sëëdhɛ ‑ya wo ꞊dhɛ: ‹‑Gwë 'ö 'kɔdɔmɛ ‑nu ‑wa ‑zuö bha ꞊në kë ‑kë 'kɔ "kpan ‑ya ‑ta ‑gwë 'ka› bha kö ka‑ 'klɔɔ‑ ‑dɔ ꞊naa bha "wɛ ‑ee?»
LUK 20:18 A‑ ‑pö ka ‑dhɛ ꞊dhɛ mɛ "ʋʋ mɛ 'ö yaa‑ ‑pö ‑gwë bha‑ ‑ta, ‑a ‑mɛ "dhiʋ̈ ‑dho "yɛ, "kɛɛ 'sa ‑gwë bha yaa‑ ‑pö mɛ "ʋʋ 'mɛ 'ö‑ ‑ta, ‑yö ‑dho ‑a ‑mɛ ‑bʋ̈ʋ̈ bho.
LUK 20:19 "Saabhomɛ ‑nu ‑gɔmɛ ‑nu waa‑ 'tɔnggɔmɛ ‑nu ‑gun ‑a "slë mɔɔ‑ sië kö wo ‑kɔ yö wɔ‑ ‑ta ‑dhɛ do bha‑ 'gü, ‑a ‑gɛn ‑mü ꞊dhɛ 'ö gun "dhʋ̈ kö ꞊waa‑ 'wɔn dɔ ꞊dhɛ ‑yö "wɩ sië wo ꞊në wo 'ka bha, "kɛɛ kö ‑wo "suʋ̈ sië "sɛgümɛ ‑nu ‑gɔ.
LUK 20:20 ꞊Dhɛ 'ö ꞊ya kë "dhʋ̈, 'yö 'wo mɛ bɔ kö ‑wo 'kpɔ‑ ‑dhɛ "yɛɛdhö kö ‑wa ‑gɛn mɔɔ‑. 'Mɛ 'wo "dhʋ̈ bha, 'yö 'wo wo ‑dɩ ‑kë ꞊dhɛ 'wɔnsëkëmɛ 'dhö, 'yö 'wo dhɛɛ" "kapɩ ‑kapɩ ‑nu kpɔ‑ ‑gɔ, kë "dhʋ̈ kö ꞊ya 'kɔn‑ ‑gɔ "kwëë ‑dhɛ 'ö‑ 'gü kö 'wo‑ 'kun 'wo 'dho‑ 'ka "sɛgɔdhiʋ̈mɛ ‑nu ‑kuu "dhiʋ̈.
LUK 20:21 'Yö 'wo‑ dhɛɛ" kpɔ 'wo‑ pö: «Yi Dëmɛ, yi 'wɔn ‑dɔ ꞊dhɛ 'bhaa ꞊sua kë, ꞊dhɛ pë "pɛpɛ 'i yi ꞊klang ‑kë 'ka bha tɛan‑ ‑mü, ꞊ya 'go mü 'zü, 'bhaa ‑kpla mɛ 'bha ‑bha ‑kë ‑tiandhö ‑sü ‑gɔ kö i 'kpɔ tɛanwɔn 'ka, Atanna ‑bha zian ꞊në 'i‑ ‑zɔn mɛ ‑dhɛ ꞊sii ꞊dede ‑ta.
LUK 20:22 ‑A ‑kë "dhʋ̈ ‑sü 'gü, yi 'nii‑ sɔng ‑bho "sɛkɔɔnmɛ 'kpii‑ ‑dhɛ ‑sü ya, këwɔn ‑mü "ɛɛn këwɔn 'yaa ‑mü?»
LUK 20:23 ꞊Dhɛ 'ö Yesu ‑ya ‑nu ‑bha "kpënng‑ bha‑ 'gü yö, 'yö‑ pö‑ ‑nu ‑dhɛ 'ö‑ pö: «‑Ka nu "tanmaga do 'ka!»
LUK 20:24 ꞊Dhɛ 'wo nu‑ 'ka, 'yö‑ ‑nu dhɛɛ" kpɔ 'ö‑ pö: «De ꞊në‑ 'tɔ waa‑ "blɛɛn‑ 'wo "tanmaga bha‑ ‑ta bha?» 'Yö 'wo‑ pö‑ ‑dhɛ «Wlɔmö ‑mɛ ‑nu ‑bha ‑gblüdë 'kpii‑ ‑mü.»
LUK 20:25 'Yö‑ pö: «꞊Dhɛ 'ö "dhʋ̈ 'sa kö pë 'dhɛ 'ö Sezaa ‑bha 'ka, ‑kaa bho ‑gblüdë 'kpii‑ ‑dhɛ, kö pë 'dhɛ Atanna ‑bha 'ka 'ka‑ bho‑ ‑dhɛ!»
LUK 20:26 ꞊Dhɛ 'ö‑ pö‑ ‑nu ‑dhɛ "dhʋ̈, 'ö 'mɛ 'wo‑ ‑nu bɔ ‑a ‑wʋ mɔɔ‑ ‑dhɛ 'gü bha 'wii ‑yɛ yö dhiang ‑yɔ 'ö‑ bɔ mɛ kpö bha‑ 'gü bha‑ ‑bha ‑dhɛ 'bha ‑dhɛ 'bha 'gü, ‑a 'wɔn ‑zian ꞊në‑ ‑nu kɔn, 'yö 'wo wo "dhi ta.
LUK 20:27 'Mɛ 'wo ‑kë Sadusiɛn ‑nu 'ka, 'ö 'wo ‑zë 'waa 'dhang bho 'mɛ ꞊ya ga ‑a ‑bö ‑wɔn "dhiʋ̈ bha, yi do 'ka 'yö‑ mɛ ga 'bha 'wo dho Yesu "piʋ̈, 'yö 'wo‑ dhɛɛ" kpɔ 'wo‑ pö:
LUK 20:28 «Yi Dëmɛ, 'pë Moizö ‑ya ‑bɛn zë yi ‑dhɛ ‑a ‑ga 'ö ya, ‑ya pö ꞊dhɛ: ‹'Mɛ 'ö dhe 'dhö‑ ‑gɔ, ꞊ya kë ꞊dhɛ ꞊ya ga kö 'në 'yaa‑ ‑gɔ, ‑a ‑mɛ 'zlaa‑ ‑ya ‑bha dhebhɔ bha‑ 'sü kö wɛng ‑wo 'në 'kpɔ, kö ‑yö kë 'mɛ 'ö ga bha‑ suu 'ka.›
LUK 20:29 "Kɛɛ ‑bhö ‑a ‑ga kö dheebhang ‑zë ‑nu "saɔplɛ 'wo gun, kö mɛ ‑blɛɛsü ‑yö dhe 'sü kö ‑yö 'dho ‑yö ga kö 'yii 'në 'kpɔ ꞊kö.
LUK 20:30 Kö‑ mɛ ꞊plɛ ‑naa waa‑ mɛ ‑yaaga ‑naa ‑wo 'dho kö ‑wa ‑bha dhebhɔ bha‑ 'sü kö‑ ‑nu 'bha 'wii 'në 'kpɔ.
LUK 20:31 Kö mɛ "saɔplɛ bha‑ ‑nu ꞊gban ‑wo 'dho kö ‑wo dhe bha‑ 'sü kö waa‑ "wɛɛ 'bha 'wii 'në 'kpɔ tongtongdhö.
LUK 20:32 Kö ‑yö to‑ 'ka "dhʋ̈ kö‑ dhebhɔ bha ‑yö ga 'pö.
LUK 20:33 ꞊Ya kë "dhʋ̈, gamɛ ‑nu bhɔ ‑yi bha ꞊ya ꞊loo, dhebhɔ bha ‑yö ‑dho kë 'mɛ 'wo bha‑ de ‑sü 'pö‑ ‑bha dhebhɔ 'ka kpɛnngdhö, "kɛɛ kö ‑a ‑nu ꞊gban ‑wo kë 'ke‑ ‑kë dhebhɔ bha‑ ‑dhɛ.»
LUK 20:34 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Mɛ 'wo ꞊dɛɛ ‑yën ya‑ 'gü ꞊në‑ ‑nu ‑mawɔn 'dhö dhe 'sü ‑sü waa‑ gwaan‑ 'kpɔ ‑sü ‑bha,
LUK 20:35 "kɛɛ 'mɛ 'kö 'wo dho kë ‑tosɛakëmɛ 'ka ‑dhɛkpaɔ dhia" 'gü, ‑tosɛa ‑dee 'ö Atanna dho‑ kë bha‑ 'gü kö ꞊wa ‑bö ꞊wa 'go ga 'gü bha, wo ‑zë ‑a ‑nu ‑mawɔn 'yii 'dho kë dhe 'sü ‑wɔn "ɛɛn gwaan‑ 'kpɔ ‑wɔn ‑bha;
LUK 20:36 ‑a ‑gɛn ‑mü ꞊dhɛ kö 'wii 'dho ga 'zü tongtongdhö, "kɛɛ kö woo kë ꞊dhɛ Atanna ‑bha "kië ‑nu ꞊në 'dhö ꞊taamasü 'gü, kö 'go 'wo‑ wo ga 'gü bha ꞊wa kë Atanna ‑bha 'në 'ka.
LUK 20:37 ꞊Ya 'go yö ‑zë 'gü, ꞊ya 'to‑ 'dhɛ 'kö ‑gban gamɛ ‑nu ‑bö ‑wɔn ‑bha bha‑ ‑bha, 'pë 'ö Moizö ‑ya ‑bɛn zë yi 'bha 'ka ö ‑gɔ 'sëëdhɛ 'gü, 'ö ‑gban ‑kpɔɔ kpö 'ö "gʋ̈ sië‑ ‑bha bha ‑ya ‑zɔn ꞊dhɛ 'yaa ꞊sua 'ka; ‑a ‑gɛn ‑mü ꞊dhɛ Moizö ‑yö Atanna ‑dhɛ ‑dhɛ bha ꞊në‑ 'gü Ablaamö ‑bha Atanna, Izaakö ‑bha Atanna, Zakɔbö ‑bha Atanna.
LUK 20:38 "Kɛɛ 'sa a‑ ‑pö ka ‑dhɛ ꞊dhɛ mɛ 'dhɛ 'kö Atanna ‑ya 'tɔ pö ö ‑bha "dhʋ̈ bha, ‑a ‑nu ꞊gban ‑wo "yaanmɛ ꞊në‑ 'ka, ‑a ‑gɛn ‑mü ꞊dhɛ 'kö 'wii kë "yaandhe 'ka kwa kpö 'gü ꞊dɛɛ, "kɛɛ ‑a ‑nu ꞊gban "pɛpɛ ‑wo "yaan Atanna ‑zë ‑gɔ.»
LUK 20:39 ꞊Dhɛ 'ö‑ pö "dhʋ̈ 'ö ö bo, 'yö 'tɔnggɔmɛ ‑nu bha‑ mɛ ga 'bha 'wo‑ pö‑ ‑dhɛ 'wo‑ pö: «'A, n Dëmɛ, i dɔ ‑zë ‑wo mɛa‑ dhiang ‑nu ‑yɔ bɔ ‑dhɛ 'ka.»
LUK 20:40 'Ö go yö ‑zë 'gü, Sadusiɛn ‑nu bha 'wii‑ dhɛɛ" "wɛɛ 'bha 'kpɔ 'zü.
LUK 20:41 ꞊Dhɛ 'ö ꞊ya kë "dhʋ̈, 'yö Yesu ‑ya pö 'pö‑ ‑nu ‑dhɛ 'ö‑ pö: «꞊Ya kë "dhʋ̈ 'sa kö ‑a pö 'wo‑ wo sië ꞊dhɛ 'mɛ 'ö Atanna ‑bha ‑Yamɛ 'ka bha Davi suu ‑mü bha‑ ‑gɛn ‑mü ‑më 'ka,
LUK 20:42 "kɛɛ kö Davi yöö ꞊dede ‑ya ‑pö ö ‑bha "tan 'ö‑ bho Atanna ‑dhɛ bha‑ 'sëëdhɛ 'gü Klisi bha‑ ‑bu 'gü ꞊dhɛ: ‹Kwa Dëmɛ ‑ya ‑pö n Dëmɛ ‑dhɛ: ‑Bhö ‑ya ‑duɛ ‑së 'ö n ‑kɔ ‑së ‑ta ya‑ 'gü ꞊kö
LUK 20:43 kö ‑yö 'dho "dhʋ̈ ‑yö zun‑ 'ka yi 'a dho i 'yaɔ‑ ‑nu kë‑ 'ka i ‑gɛn ‑dɔ ‑ta ‑pë 'ka› bha‑ ‑bha.
LUK 20:44 ꞊Ya kë "dhʋ̈ 'mɛ 'ö Davi ‑zë ‑ya ‑dhɛ ö Dëmɛ bha ‑yö ‑mɔɔ ‑bha 'ö ‑kë ‑a bhaa 'në 'ka ‑kɔ ‑kë ꞊dhɛ? ("Kɛɛ 'yö‑ ‑yɔ 'yii ꞊slɔɔ‑ ‑nu ‑gɔ.)
LUK 20:45 ꞊Dhɛ 'ö dhiang ‑nu bha‑ ‑nu zë sië "dhʋ̈, 'ö mɛ ꞊gban "pɛpɛ 'wo "tʋ 'to sië‑ ‑wʋ ‑bha, 'yö‑ pö ö ‑bha ꞊klang ‑nu ‑dhɛ 'ö‑ pö:
LUK 20:46 «‑Ka ka ‑dɩ 'kun ‑së 'tɔnggɔmɛ ‑nu ‑gɔ! ‑A ‑gɛn ‑mü ꞊dhɛ 'mɛ 'wo bha ‑tɔyang ꞊gblɛɛngblɛɛn ꞊në‑ ‑da ‑dhɔ ‑ya ‑nu ‑kë kö 'wo ꞊nië‑ 'ka ‑dhɛ ‑nu 'gü kö 'wa ꞊loo "dhɛɛdhɛ ‑nu 'gü kö ‑wo zun‑ ‑nu ‑dhɛ kpiö 'gü kö ‑wa ‑nu ꞊bhlëë ‑ya. ‑Yɛa ‑blɛɛsü ‑nu bha ꞊në 'wo‑ ꞊mɔɔ Zuifö ‑nu ‑bha ‑yakwëëkëgükɔ ‑nu waa‑ dɔtadhɛ ‑nu 'gü kö 'wo ‑ya 'gü.
LUK 20:47 "Kɛɛ ꞊wa 'go mü kö ‑wo 'dho sië 'wo ꞊gɛandhe ‑nu ‑ta ‑bhö, ꞊wa 'go mü ꞊wa ꞊loo mɛ ‑nu "yan "dhiʋ̈, 'yö 'wo ꞊bhɛa Atanna ‑dhɛ ‑kɔ 'gü ꞊gblɛɛngblɛɛn ‑nu bha‑ ‑kë, (kë "dhʋ̈, kö 'wo bhɔ mɛ ‑nu 'gü Atanna dhɔɔbhaawɔn kë ‑mɛ ‑nu ‑bha, "kɛɛ kö 'waa‑ "gblʋʋ ‑zian ‑bha). A‑ ‑pö ka ‑dhɛ ꞊dhɛ 'wɔn 'ö Atanna dho‑ wɔ 'mɛ 'wo bha‑ ‑nu ‑ta, ‑a "dhiʋ̈‑ ‑dho ziö mɛ ꞊gban ‑bha ‑ta.
LUK 21:1 ꞊Dhɛ 'ö Yesu ‑yö ö bo ‑a ‑pö "dhʋ̈ ‑sü 'ka, 'yö ö ‑gɔ "dhiʋ̈ ꞊wlü. 'Ö dho ‑dhɛ ‑ga kö ꞊naɔmɛ ‑nu ‑wo gbaɔ sië Atanna ‑gɔ, kö ‑wa 'wëë‑ ‑da sië 'pë 'wo‑ nu Atanna ‑dhɛ ‑a ‑da 'gü ‑pë 'ö‑ ‑dhɔkëgükɔ 'gü bha‑ 'gü.
LUK 21:2 "Kɛɛ kö ꞊gɛandhe ‑wëësü 'në do 'bha bha 'pö "tanmaga ꞊plɛ ‑ya ꞊kwɛɛ‑, kö ‑ya ‑da sië mü 'pö.
LUK 21:3 'Yö Yesu ‑ya pö: «A‑ ‑pö ka ‑dhɛ tɛan‑ ꞊dede 'ka ꞊dhɛ "tanmaga ꞊plɛ 'ö ꞊gɛandhe ya 'ö‑ ꞊gbaɔ Atanna ‑gɔ ya, ‑yö 'gbiin‑ 'ö ‑ziö mɛ 'wo bha‑ ‑nu ꞊gban "pɛpɛ ‑bha ‑ta.
LUK 21:4 ‑A ‑gɛn ‑mü ꞊dhɛ wo ‑zë ‑a ‑nu ‑kɔ ꞊në‑ ‑nu 'kën ‑gu ‑ta, 'yö‑ 'dhɛ 'ö‑ ‑nu "yan 'yaa ‑kë 'ka ‑pë "dhiʋ̈ bha 'wo‑ ꞊gbaɔ Atanna ‑gɔ, "kɛɛ ꞊gɛandhe 'në ‑wëësü 'kö pë 'bhaa‑ ‑gɔ 'ö dɔ bha, a‑ ‑pö ka ‑dhɛ ꞊dhɛ 'pë ꞊ya 'to‑ 'nu‑ ‑gɔ ‑a ‑bha ‑bhöpë sɔng ‑zian 'ka ‑a ‑kpɛa ꞊në 'ö‑ nu Atanna ‑dhɛ bha.
LUK 21:5 'Ö gun kö mɛ 'bha ‑nu ‑wo Atanna ‑dhɔkëgükɔ 'ö Zedhizadhɛmö bha‑ ‑kë ‑së ‑dhiang zë sië, ‑gwë suu ‑nu 'wo‑ sü 'wo 'kɔ bha‑ dɔ‑ 'ka waa‑ pë ‑nu 'wo‑ ꞊gbaɔ Atanna ‑gɔ 'wo mü bha‑ ‑wɔn 'gü, 'yö Yesu ‑yö dhiang do zë 'ö‑ pö:
LUK 21:6 «‑Ka ‑dhɛ ‑ga, ‑a yi ‑yö nu sië 'ö ‑gwë ‑sɛngbɔ ‑nu 'ka‑ ‑ga sië bha, 'ö‑ ꞊gban ‑yö ꞊loo, 'ö‑ do ‑zian 'yaa 'to 'ko ‑ta.»
LUK 21:7 ꞊Dhɛ 'ö ꞊yaa‑ pö "dhʋ̈, 'yö 'wo‑ dhɛɛ" kpɔ 'wo‑ pö: «Yi Dëmɛ, ‑a 'wɔn bha ‑yö ‑dho kë "dhʋ̈ ‑më "tʋ̈ng ꞊në‑ 'gü? "Ɛɛn ꞊yaa‑ pö 'ö kë yi ‑dho ‑a 'suan‑ bho ‑më ‑nu ꞊në‑ ‑bha?»
LUK 21:8 'Yö‑ ‑yɔ bɔ‑ ‑nu ‑gɔ 'ö‑ pö: «‑Kaa kë ‑së kö 'wa 'dho "kpënng‑ kë ka ‑gɔ 'wo ka ‑pö; ‑a ‑gɛn ‑mü ꞊dhɛ mɛ 'gbɛ‑ ‑dho nu n 'tɔ 'gü, 'ö 'wo‑ pö ka ‑dhɛ ꞊dhɛ n nu "tʋ̈ng ꞊ya ꞊loo, "ɛɛn wo ꞊në 'wo n 'ka, "kɛɛ ꞊waa‑ pö "dhʋ̈, 'ka 'dho‑ ‑yɔ bɔ.
LUK 21:9 ꞊Ya 'go yö ‑zë 'gü, ka ‑dho ‑a ma ka "tʋ 'ka ꞊dhɛ ‑wo ‑gblü gɔɔn sië ‑dhɛ ‑nu 'wo ꞊ni ‑a ‑nu 'gü, "ɛɛn "sɛgɔ ‑nu "yan ‑yö dɔ sië ‑gɛan. ꞊Ya kë "dhʋ̈ ka "gblʋ̈ʋ̈dhɛ 'ya 'dho "muu bho, ‑a ‑gɛn ‑mü ꞊dhɛ ‑a ‑dhɛa ‑bha ꞊dhɛ 'wɔn ‑nu bha ‑wo kë ꞊kö ‑blɛɛsü. "Kɛɛ yö ‑zë 'yii 'dho kë "sɛ "dhiʋ̈todhɛ 'ka.»
LUK 21:10 "Sɛgɔ 'bha‑ ‑dho "wlü 'ö dho ö ‑gblü ‑da ‑a 'bha ‑ta, 'ö ‑gblüdë 'bha ‑yö ꞊wlü 'ö dho 'ö ‑pö mɛ 'bha ‑ta.
LUK 21:11 'Ö "sɛ ‑yö ꞊zii ‑kɔ ‑ziisü ‑ziisü ‑nu ‑kë, 'ö "vʋ̈ʋ̈ 'dhö ‑da ‑dhɛ ‑nu 'gü 'zuuzudhö 'ö 'ka‑ ma, 'ö "yua yaya ‑nu 'wo sɔ. 'Ö "dhabhliwɔn ‑nu 'ö ꞊ya kë 'ö "suʋ̈ ‑da mɛ 'gü 'ö ‑kë dhang‑ 'gü ‑dhɛ ‑nu 'gü 'ka‑ yö.
LUK 21:12 "Kɛɛ "sanni 'wɔn ‑nu bha‑ ꞊gban "pɛpɛ ‑yö kë, ‑wo ‑dho ka 'kun ꞊kö ‑blɛɛsü 'wo ka ‑wëë ‑kë ꞊gban "pɛpɛ suu wo, 'ö wo ka "dhiʋ̈ dɔ pë ‑gɔ, 'ö 'wo 'wɔn bho ka 'gü Zuifö ‑nu ‑bha ‑yakwëëkëgükɔ ‑nu 'gü, 'ö 'wo ka ‑da ‑nu wo ‑kaso 'gü, 'ö 'wo dho ka 'ka ‑gblüdë ‑nu waa‑ "sɛgɔdhiʋ̈mɛ ‑nu ‑kuu "dhiʋ̈ n 'tɔ ‑wɔn 'gü.
LUK 21:13 'Wɔn ‑nu bha ‑wo ‑dho kë ka 'ka "dhʋ̈, "kɛɛ ‑a ‑gɛn ‑mü ꞊dhɛ kë "dhʋ̈ kö 'ka "sɛɛdhɛ kë n ‑bha ‑a ‑nu ‑dhɛ.
LUK 21:14 A‑ ‑pö "dhʋ̈ kö ‑yö 'to ka "yaan kö ‑a yi ꞊ya ꞊loo kö ka ‑dɩ ‑ta ‑za dɔ ‑wɔn ‑zʋgɔndhe 'ya 'dho ‑ya ka ‑bha,
LUK 21:15 ‑a ‑gɛn ‑mü ꞊dhɛ ka ‑ziö dhiang 'gü "tʋ̈ng ꞊ya ꞊loo kö ꞊wa 'dho ka 'ka ‑gɔmɛ ‑nu ‑kuu "dhiʋ̈ (dhiang 'ö kaa‑ zë ma ꞊në 'a dho‑ dɔ ka "dhi). Ma ꞊në 'a dho "yaaki nu ka ‑dhɛ. "Yaaki ‑zian 'a dho‑ nu ka ‑dhɛ bha, ‑yö ‑dho ziö ka ‑da ‑mɛ ‑nu ‑bha ‑ta, 'ö‑ ‑nu "dhi kun 'ö 'ka dhiang ‑yɔ bɔ, 'ö 'pë woo‑ pö ka ‑dhɛ 'ö ꞊dhɛng‑ ‑nu ‑gɔ.
LUK 21:16 A‑ ‑pö ka ‑dhɛ ꞊dhɛ 'mɛ 'wo ‑kë ka 'kpɔmɛ ‑nu 'ka waa‑ ka dheebhang ‑nu, 'mɛ 'ö kɛng‑ ‑nu ka suu 'dhö do, "ɛɛn ka "taɔngdë ‑nu ‑zian ‑dho ka "dhiʋ̈ dɔ ka 'yaɔ‑ ‑nu ‑dhɛ. ‑Wo ‑dho mɛ ga 'bha zë ka "piʋ̈.
LUK 21:17 Ka ‑san ‑dho mɛ ꞊gban "pɛpɛ kë n ‑wɔn 'gü,
LUK 21:18 "kɛɛ yö ꞊në‑ ꞊gban 'gü, ka wun "dhɛ 'ö ka ‑gɔ ‑bha bha‑ do ‑zian 'yii 'dho ꞊dhɛng Atanna ‑gɔ.
LUK 21:19 ꞊Ya kë ꞊dhɛ yö ꞊në ꞊ya 'kun bho ka 'gü, kö 'kii bo n 'ka, 'yö 'ka dho ‑da ꞊sii 'ö yaa yën ‑a kë ‑dhɛ 'gü ‑dhɛkpaɔ dhia" 'gü.»
LUK 21:20 'Yö Yesu ‑yö go mü 'ö‑ pö: «꞊Ya 'go yö ‑zë 'gü, yi 'ö 'ka dho‑ ma‑ 'ka ꞊dhɛ ‑gblü ꞊ya 'gba dɔ Zedhizadhɛmö ‑dhɛ ‑bha ‑dhɛ ꞊gban "pɛpɛ 'gü ꞊ya ꞊klëën‑ 'ka‑ ‑zü, ‑yö kë ka "yaan ꞊dhɛ kö ‑a 'wü "tʋ̈ng ꞊ya ꞊loo.
LUK 21:21 ‑A yö ‑zë ꞊ya kë "dhʋ̈, 'mɛ 'wo dho kë Zude ‑sɛ 'gü ‑a "tʋ̈ng bha‑ 'gü, ‑wo ‑bɛang sü kö ‑wo 'dho ‑tɔn ‑gbeng 'gü ‑dhɛ ‑nu 'gü. Kö 'mɛ 'wo Zedhizadhɛmö ‑pö yaan‑ ‑bha ‑wo ‑da "bü, kö 'mɛ 'ö wo ‑zë waa‑ ‑kë gbɛɛ ‑ta ‑dhɛ ‑nu 'gü, 'wa 'dho ‑nu 'plöödhɛ mɔɔ‑.
LUK 21:22 ‑A ‑gɛn ‑mü ꞊dhɛ Atanna ‑dho 'wɔn bho ka 'gü 'yi bha ꞊në‑ 'ka, kë "dhʋ̈ kö 'wɔn "pɛpɛ 'ö ‑bɛn zë ‑sü 'ka‑ ‑bha 'sëëdhɛ 'gü bha‑ 'gü ‑wɔn ‑yö kë.
LUK 21:23 ‑A "tʋ̈ng bha‑ 'gü, dhong ‑nu 'wo dho kë 'gbiödhe 'ka, "ɛɛn 'ö 'në dho kë‑ ‑nu ‑gɔ "yɔn ‑bha, ‑a ‑nu ‑bha ‑dho kë ‑wëësü; ‑a ‑gɛn ‑mü ꞊dhɛ Atanna ‑dho ö ‑mawɔn ‑siö "sɛgɔ ya‑ 'gü mɛ ‑nu 'ka "tʋ̈ng bha ꞊në‑ 'gü, 'ö "sɛ ya‑ 'gü ‑mɛ ‑nu 'wo ‑kë ‑wëëwëësü ꞊dedewo.
LUK 21:24 'Mɛ 'waa Atanna dɔ ‑a ‑nu ‑bha ‑gblü ‑kɔ ‑dho ꞊mɔɔ‑ ‑nu ‑bha, 'ö 'wo‑ ‑nu kun ꞊dhuëng 'ka, 'ö 'wo dho nu‑ 'ka "sɛgɔ ꞊gban "pɛpɛ 'do 'do 'gü, 'ö "sɛ "wɛɛ 'gü ‑mɛ ‑nu 'wo ꞊taa Zedhizadhɛmö ‑dhɛ ‑ta, 'ö 'wo‑ ‑da wo ‑gɛn ꞊wlöö 'ö dho‑ 'ka "dhʋ̈ 'ö zun‑ 'ka‑ ‑nu ‑bha "tʋ̈ng 'ö Atanna ‑ya ‑ya ‑a ziö ‑yi ‑bha.»
LUK 21:25 ꞊Ya 'go yö ‑zë 'gü, "dhabhliwɔn ‑dho kë 'ö 'ka‑ ‑dhɛ yö 'yënng‑ waa‑ "su waa‑ "susëngga ‑nu ‑bha. "Suʋ̈‑ ‑dho ‑da "kpʋngtaamɛ ‑nu 'gü, 'ö "sika ‑yö ‑da ‑nu 'gü, ‑a ‑gɛn ‑mü ꞊dhɛ ‑a "tʋ̈ng bha‑ 'gü, ꞊weeyi ‑dho ö kpö kë ꞊dhɛ ‑tɔn 'dhö 'ö ꞊loo 'ö dho 'ö ‑zuö ‑yuudhö.
LUK 21:26 ‑A "tʋ̈ng bha‑ 'gü, mɛ 'bha ‑nu ‑dho ga zuëdhiʋ̈tɛɛ ‑gɔ kö ‑wo wo ‑zʋ 'gɔn sië 'wɔn ‑nu 'wo dho wɔ "kpʋngtaadhɛ ‑ta bha‑ 'ka, ‑a ‑gɛn ‑mü ꞊dhɛ Atanna ‑bha 'gügbɩɩdhɛ 'ö dhang‑ 'gü bha ‑yö ‑dho ꞊loo 'yi bha ꞊në‑ 'ka.
LUK 21:27 ‑Wo ‑dho mang Mɛgbömɛ n yö "tʋ̈ng bha ꞊në‑ 'gü kö a nu sië dha 'kpong‑ ‑ta ma mɛdhɛ ‑faan "gbɩɩ‑ bha‑ 'ka waa‑ 'tɔbhɔdhe ‑ziisü 'dhö.
LUK 21:28 ꞊Ya kë ꞊dhɛ 'ka 'wɔn ‑nu bha‑ ‑dhɛ yö "tʋ̈ng 'ö‑ 'gü kö ꞊ya kë ‑sü ‑zü bho, ‑ka dɔ ꞊zinng 'gü kö 'ka ka ‑gɔ "dhiʋ̈ "wlü, ‑a ‑gɛn ‑mü ꞊dhɛ 'ö kë sië "dhʋ̈ "tʋ̈ng 'ö‑ 'gü kö ka ‑bho 'wɔn 'gü "tʋ̈ng ꞊ya "gan klöö‑.»
LUK 21:29 'Yö 'wɔn ‑zɔn 'ka do ‑zɔn ‑a ‑nu ‑dhɛ 'ö‑ pö: «‑Ka figö ‑dhü ‑nu waa‑ "dhü "wɛɛ 'dhɛ ‑nu 'wo to ‑a ‑nu ‑ga kö 'ka 'wɔn 'suan‑ bho‑ ‑bha:.
LUK 21:30 ‑a ‑gɛn ‑mü ꞊dhɛ 'ka‑ ‑nu yö kö ‑wo wo ‑trɔng ‑dee ‑ya sië, kö 'ka‑ 'wɔn dɔ ꞊dhɛ dha "yi ꞊ya ꞊tëng.
LUK 21:31 ꞊Ya kë 'pö ꞊dhɛ ka "yan 'dhö ‑da sië 'wɔn ‑nu bha‑ ‑nu kë ‑dhɛ 'gü, ‑yö kë ka "yaan ꞊dhɛ Atanna ‑bha ‑gblüdëdhɛ ‑ya dun ka ‑ta.
LUK 21:32 A‑ ‑pö ka ‑dhɛ tɛan‑ ꞊dede 'ka ꞊dhɛ: 'Wɔn ‑nu bha‑ ꞊gban ‑dho kë kö 'mɛ 'wo "tʋ̈ng ya‑ 'gü ya‑ ‑nu ꞊gban 'wii ga ꞊kö.
LUK 21:33 ‑A ‑gɛn ‑mü ꞊dhɛ "sɛ waa‑ dhang‑ ‑wo ‑dho ziö, "kɛɛ n ‑wʋ ‑zë 'yii 'dho bho‑ ‑bha tongtongdhö.»
LUK 21:34 Yesu ‑ya ‑pö ‑nu ‑dhɛ yö ꞊në‑ ‑wɔn 'gü 'ö‑ pö: «‑Kaa kë ka 'suan‑ 'ka kö ka ‑gɔ 'ya 'dho 'to pë ‑së ‑bhö ‑sü waa‑ we mü ‑sü "ɛɛn ‑ya "kpʋngtaapë ‑nu ‑wɔn zuën ‑ta ‑sü 'ö "dhiʋ̈ ziö 'ka‑ ‑bha, 'ö yi bha 'ö nu 'ö ‑kan ka 'gü;
LUK 21:35 ‑a ‑gɛn ‑mü ꞊dhɛ yi 'ö bha‑ nu ‑sü ‑dho kë ꞊dhɛ "nuu 'ö "yibhakëmɛ ‑nu ‑wa ‑zuö "yi ꞊bhaa bha ꞊në‑ 'dhö 'ö ‑kan "kpʋngtaamɛ ꞊gban "pɛpɛ 'gü.
LUK 21:36 ‑A ‑kë "dhʋ̈ ‑sü 'gü, ‑ka ‑ya ka "yaan kö 'ka bhɛa" Atanna ‑dhɛ "tʋ̈ng ꞊gban 'gü, kë "dhʋ̈ kö 'ka faan ꞊slɔɔ, kö 'wɔn "pɛpɛ 'ö nu sië bha ‑yö 'kun bho ka 'gü, kö yi 'ö Mɛgbömɛ dho nu‑ 'ka bha ‑yö ‑kpan ka ‑bha ‑dɔ ‑gɛan ‑sü 'ka.»
LUK 21:37 "Tʋ̈ng 'ö Yesu ‑ya ‑kë Zedhizadhɛmö bha ‑dhɛ ‑ya ꞊kpaɔ ‑kɔ 'ö‑ 'gü 'do 'do 'yö dho Atanna ‑dhɔkëgükɔ 'gü, 'yö mɛ ꞊draan mü, "bin 'dhö 'ma sië, 'yö dho ‑tɔn 'wo Odhivie ‑tɔn ‑kë bha‑ ꞊gbin‑ 'yö ‑wɔ mü.
LUK 21:38 ‑A ‑wɔn 'gü, "sɛgümɛ ‑nu ꞊gban "pɛpɛ ‑wo ‑gun ‑suʋ̈ sië ‑dhɛkpaɔ tii' 'gü, 'ö 'wo nu Atanna ‑dhɔkëgükɔ 'gü kö 'wo‑ ‑wʋ ma.
LUK 22:1 'Ö gun "dhʋ̈ kö 'bluu‑ 'ö "sɛkɛ 'yaa‑ ‑bha 'wo‑ ‑bhö ‑troo 'ö‑ ‑ta 'wo‑ ‑dhɛ 'Pakö bha, ‑a yi ꞊ya 'to klöö‑,
LUK 22:2 kö 'mɛ 'wo ‑kë "saabhomɛ ‑nu ‑gɔmɛ ‑nu 'ka, waa‑ 'tɔnggɔmɛ ‑wa "slë mɔɔ‑ sië kö 'wo Yesu 'kun, "kɛɛ kö ‑wo "suʋ̈ sië "sɛgümɛ ‑nu ‑gɔ.
LUK 22:3 "Kɛɛ 'sa Sɔtraan ‑yö ‑da Yesu ‑bha ꞊klang ‑nu ‑kaɔng do ga ꞊plɛ bha‑ mɛ 'dhɛ 'wo‑ ‑dhɛ Zuda Isikadhiɔtö bha‑ ‑gɔ 'gü "tʋ̈ng ꞊dede bha ꞊në‑ 'gü.
LUK 22:4 'Yö ‑ziö 'ö dho ö ‑gɔ dun "saabhomɛ ‑nu ‑gɔmɛ ‑nu waa‑ Atanna ‑bha 'kɔ ‑gɔdhiʋ̈mɛ ‑nu ‑gɔmɛ ‑nu 'ka kö ‑kɔ 'ö dho Yesu "dhiʋ̈ dɔ‑ 'ka‑ ‑nu ‑dhɛ kö ‑wa ‑ya 'kwëë‑ kë.
LUK 22:5 ꞊Dhɛ 'ö dho 'ö‑ pö‑ ‑nu ‑dhɛ 'yö‑ 'gü ‑wɔn ‑yö ‑dhi ‑nu ‑dhɛ ꞊dedewo, 'yö 'wo‑ pö‑ ‑dhɛ ꞊yaa‑ yö ‑zë kë "dhʋ̈, ‑wo ‑dho ‑a gba 'wëë‑ 'ka.
LUK 22:6 ꞊Dhɛ 'ö bo ‑wɩ 'wɔn bha‑ ‑bha ‑sü 'ka, 'yö ‑ya ‑a "slë mɔɔ‑ ‑sü ‑bha kö 'ö Yesu ꞊gbaɔ‑ ‑nu ‑gɔ mɛ ꞊gban tii' 'ka.
LUK 22:7 ‑Wo ‑to 'wɔn bha‑ ‑bha "dhʋ̈, 'yö yi 'wo ‑tuʋ̈ ‑pë 'wo‑ zë troo bha‑ ‑ta bha‑ zë‑ 'ka bha 'ö ꞊loo.
LUK 22:8 'Yö Yesu ‑yö Piɛdhö waa‑ Zan ‑a ‑nu bɔ, 'yö‑ pö‑ ‑nu ‑dhɛ: «‑Ka 'dho kwa ‑bha Pakö ‑pë ‑kpa kö 'kwa‑ ‑bhö!»
LUK 22:9 'Yö 'mɛ 'wo bha 'wo‑ pö‑ ‑dhɛ: «‑Yö i "piʋ̈ ꞊dhɛ 'yi‑ ‑kpa 'mɛ?»
LUK 22:10 'Yö‑ pö: «‑Ka ‑dhɛ ‑ga, ꞊ya kë ꞊dhɛ 'ka 'dho 'ka ‑da Zedhizadhɛmö 'plöö, ka ‑dho ‑kpan mɛ do 'bha ‑bha kö "yipë ‑ya ‑gɔ, 'ka‑ yö ‑ka ziö‑ ꞊keng‑ kö kɛng‑ ‑nu 'ka 'dho, 'kɔ 'ö yaa‑ ‑da 'gü bha kö 'ka ‑da ꞊keng‑ mü.
LUK 22:11 ꞊Ya kë ꞊dhɛ 'ka ‑da 'kɔɔdhö mü kö 'ka‑ pö‑ 'kɔ dë ‑dhɛ: «'Kɔ dë, yi Dëmɛ ‑ya ‑pö ‑dhɛ 'ö waa‑ ö ‑bha ꞊klang ‑nu 'wo dho 'Pakö ‑pë ‑bhö ‑bha 'i‑ ‑dhɛ ‑zɔn yi ‑dhɛ.»
LUK 22:12 'Ka‑ pö‑ ‑dhɛ "dhʋ̈ ‑yö ‑dho 'kɔdhi ‑mɔɔbhasü 'ö‑ 'gü ‑dhɛ 'dhö ‑pë kë ‑sü 'ka, 'ö ‑yatapë ꞊gban 'dhö mü, ‑a ‑dhɛ ‑zɔn ka ‑dhɛ 'kɔ ‑ta "dhʋ̈ng 'gü. ‑Dhɛ 'ka dho kwaa‑ Pakö ‑pë ‑kpa ‑bha 'yö bha.»
LUK 22:13 'Yö 'mɛ 'wo bha 'wo dho, 'yö ‑kɔ do 'ö Yesu ‑ya pö‑ 'ka bha 'yö ‑kë 'pö‑ ‑kɔ ‑bha "kpʋ̈üdhö, 'yö 'wo Pakö pë ‑kpa mü.
LUK 22:14 ꞊Dhɛ 'ö ꞊wa wo bo pë bha‑ ‑kpa ‑sü 'ka 'ö‑ ‑bhö "tʋ̈ng ꞊ya ꞊loo, 'yö Yesu waa‑ ö ‑bha bɔmɛ ‑nu 'wo ‑ya pëpë "dhiʋ̈.
LUK 22:15 'Yö‑ pö ö ‑bha ꞊klang ‑nu ‑dhɛ: «Pakö ‑pë 'dhɛ 'kwa‑ ‑bhö sië ya ‑a 'gü ‑wɔn ‑yö ‑dhi n ‑dhɛ ꞊dedewo, ‑a ‑gɛn ‑mü ꞊dhɛ ‑yö ‑gun n "piʋ̈ ꞊dhɛ‑ do 'dhɛ 'kö ya 'kwa‑ ‑bhö kwa "kwëë gbonggbongdhö kö 'a gun ‑na saan".
LUK 22:16 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mii 'dho‑ 'bha ‑bhö "kpʋng ya‑ ꞊taa 'zü 'ö dho 'ö zun‑ 'ka ‑a 'klɔɔ‑ zun zang ‑ta ‑sü ('ö n ga ‑sü 'ka) bha‑ ‑bha, 'ö dho 'ö zun‑ 'ka‑ 'dhɛ 'kwa dho‑ ‑bhö Atanna ‑bha ‑gblüdëdhɛ 'gü bha‑ yi ‑bha.
LUK 22:17 ꞊Dhɛ 'ö ꞊yaa‑ pö "dhʋ̈ 'ö ꞊ya ö bo, 'yö ö ‑kɔ ‑da we ‑kɔɔ 'gü, 'yö Atanna nuɛ" bho 'yö‑ pö: «‑Ka we ‑kɔɔ ya‑ 'kun kö 'ka‑ 'gü ‑gblü ka 'ko ‑ta;
LUK 22:18 ‑a ‑gɛn ‑mü ꞊dhɛ a‑ ‑pö ka ‑dhɛ ꞊dhɛ ‑drɔɔ ga "yi 'ö ya 'mii 'dho‑ mü 'zü tongtongdhö 'ö dho 'ö zun‑ 'ka Atanna ‑bha ‑gblüdëdhɛ nu ‑yi ‑bha.»
LUK 22:19 ꞊Dhɛ 'ö ö bo‑ pö "dhʋ̈ ‑sü 'ka, 'yö ö ‑kɔ ‑da 'bluu‑ 'gü, 'yö Atanna nuɛ" bho. ꞊Dhɛ 'ö ꞊ya ö bo, 'yö‑ "kplü "kplü bho 'yö‑ 'gü ‑gblü ‑a ‑nu ‑ta 'yö‑ pö: «‑Ka ‑dhɛ ‑ga, n kwi 'a‑ nu ka ‑wɔn 'gü bha‑ "blɛɛn‑ ꞊nɛ, ['ka kë ‑kaa ‑bhö ꞊sië kö ka ‑zʋ ‑yö ‑bö n ‑wɔn ‑ta ‑kpɛawo.»
LUK 22:20 ꞊Dhɛ 'wo wo bo pë ‑bhö ‑sü 'ka, 'yö wekɔɔ sü 'zü ‑kɔ do bha‑ 'gü, 'yö‑ nu‑ ‑nu ‑dhɛ 'yö‑ pö: «N ꞊yɔɔn 'ö woo‑ ꞊wɛnng kö ‑yö kë ‑mlɛɛ ‑dee 'ö maa ‑da n Dë Atanna waa‑ mɛ "bhɩɩ‑ ‑nu ‑a ‑nu ꞊zinng 'gü ‑a ‑gɛn 'ka bha‑ "blɛɛn‑ ꞊nɛ].
LUK 22:21 "Kɛɛ 'sa 'mɛ 'ö dho n ‑da pë ꞊kwɛɛ‑ "dhʋ̈ bha, yɛng ꞊në yi ‑kɔ 'dhö pëfië do 'gü ya!»
LUK 22:22 "Kɛɛ a‑ ‑pö ka ‑dhɛ tɛan‑ ꞊dede 'ka ꞊dhɛ mang Mɛgbömɛ ga 'ö maa‑ wo ya 'a‑ wo "dhʋ̈ kö 'wɔn 'ö Atanna ꞊yaa‑ ‑bɛn zë 'nu ꞊ya bo bha ‑ya yö ꞊në‑ 'gü ‑wɔn kë, "kɛɛ 'mɛ 'kö dho 'wɔn bha‑ ‑gbɔ dɔ ö ‑dɩ ꞊gbin‑ ꞊në‑ ‑mɛ ‑bha 'dhö ‑wëësü!
LUK 22:23 ꞊Dhɛ 'ö ꞊yaa‑ pö "dhʋ̈, 'yö‑ ‑bha ꞊klang ‑nu 'wo ‑ya wo 'ko ‑nu dhɛɛ" 'kpɔ ‑sü ‑bha kö 'mɛ 'ö dho 'wɔn bha‑ kë 'wo‑ dɔ.
LUK 22:24 ‑Wo ‑to ‑dhɛ do bha‑ 'gü, 'yö Yesu ‑bha ꞊klang ‑nu bha 'wo ‑ya wo 'ko zaɔ‑ ‑sü ‑bha ‑duɛ 'kpiidhɛ ‑wɔn 'gü,
LUK 22:25 'yö‑ ‑yɔ bɔ‑ ‑nu ‑gɔ 'ö‑ pö: «‑Gblüdë ‑nu 'wo "kpʋng ꞊taa ‑a ‑nu ‑kɔ ‑yö ‑mɔɔ woo‑ "sɛgümɛ ‑nu ‑bha, 'ö 'wɔn 'ö ‑dhi ‑nu ‑dhɛ 'wo‑ ‑wɔ ‑nu ‑ta, "kɛɛ 'ö ꞊wa 'go mü 'wo‑ pö wo ‑gɔmɛ ‑nu këwɔn ‑yö ‑së.
LUK 22:26 "Kɛɛ ka ‑zë ka ‑bha 'ya 'dho kë "dhʋ̈. Ka ‑zë 'mɛ 'ö‑ ‑duɛ dho kë 'kpii‑ ka kpö 'gü, ‑a ‑dhɛa ‑bha ꞊dhɛ yö ꞊në ‑yö kë ꞊dhɛ mɛ ꞊gban ka ‑da ꞊wlöö 'dhö, kö mɛ 'ö ka ‑gɔdhiʋ̈ ꞊në ‑yö kë ꞊dhɛ ka "dhiʋ̈ ‑ziöwomɛ 'dhö.
LUK 22:27 "Ɛɛn mɛ ꞊plɛ ꞊wa kë kö mɛ do ‑yö kë pë ‑bhö ‑dhɛ 'gü, kö mɛ do ‑ya "dhiʋ̈ ‑ziö wo kö mɛ ꞊plɛ 'wo bha 'dee 'kpii‑? Kö 'mɛ 'wo‑ "dhiʋ̈ ‑ziö wo sië bha 'yaa ‑mü ‑ee? "Kɛɛ ‑kaa ‑ga 'ö ma ‑zë 'ma kë ka kpö 'gü ꞊dhɛ ka "dhiʋ̈ ‑ziöwomɛ 'dhö bha.
LUK 22:28 Ka ‑zë ka ꞊në 'ka 'to n ꞊keng‑ 'ö 'kwa ‑ziö 'wɔn "gbɩɩ‑ "pɛpɛ 'ö ‑wɔ n ‑ta ‑a ꞊gban 'gü.
LUK 22:29 Yö ꞊në ‑wɔn 'gü, 'yö 'a ‑gblüdëdhɛ nu ‑sü 'ka ka ‑dhɛ ꞊dhɛ ‑kɔ do 'ö n Dë ‑ya nu‑ 'ka n ‑dhɛ ‑a 'dhö.
LUK 22:30 Kë "dhʋ̈ kö kwɛng‑ ‑nu 'kwa ‑kɔ ‑da pëfië do 'gü ma ‑gblüdëdhɛ ‑ya ‑bha ‑yi 'ka, kö 'ka ‑ya 'pö ‑blüdëdhɛ ‑gbloo ‑nu 'gü kö 'ka Izraɛdhö "sɛgɔ ‑kaɔng do ga ꞊plɛ bha‑ 'mɛ 'ö 'dhö ‑a ‑duɛ ‑zɔn.»
LUK 22:31 ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka, 'yö‑ pö Piɛdhö ‑dhɛ: «Piɛdhö, Sɔtraan ꞊ya ka ‑gbadhɛ Atanna ‑gɔ kö 'ö ka ‑piö ꞊dhɛ ‑kɔ 'wo ‑mlü ‑piö 'ka 'ö‑ ꞊flee ‑yö go‑ 'gü bha‑ 'dhö,
LUK 22:32 "kɛɛ 'ma bhɛa" Atanna ‑dhɛ i ‑wɔn 'gü kö i ‑bha 'dhang ‑bho n "dhiʋ̈ ‑sü 'bha 'ya 'dho "kan‑ ‑ta 'ö 'i ‑kan n ‑bha. 'Bha i ‑dɩ ꞊slɔɔ yi 'ö‑ 'ka kö i zuë" ꞊ya 'waanu, bhii ‑dɩ 'pö 'i i dheebhang ‑nu 'ö kɛng‑ ‑nu 'ka bɔ n 'ka bha‑ ‑nu ‑zʋ ‑gban.»
LUK 22:33 'Yö Piɛdhö ꞊ya ‑yɔ bɔ‑ ‑gɔ 'ö‑ pö: «N Dëmɛ, ‑a "sɩ 'yaa n ‑dhɛ kö 'a "kan i ‑bha. 'Kö ꞊ya kë ga ‑zian 'ka kwa ‑dho ‑a wo kwa "kwëë, ꞊ya kë 'zü dha ‑sü 'ka kwa ‑dho ‑a wo kwa "kwëë.»
LUK 22:34 'Yö Yesu ‑ya pö‑ ‑dhɛ: «Piɛdhö, a‑ ‑pö i ‑dhɛ ꞊dhɛ "sanni ‑tɔgɔn ‑yö "wɩ gbeng 'ö ꞊dɛɛ 'gü, kö 'bha bo n 'ka ꞊dhɛ pë ‑yaaga 'dhö.»
LUK 22:35 ꞊Dhɛ 'ö go mü 'yö‑ ‑nu dhɛɛ" kpɔ 'ö‑ pö: «Ka bɔ 'a‑ wo "tʋ̈ng 'bha 'gü, 'ö 'a‑ pö ka ‑dhɛ ꞊dhɛ 'ka‑ pö kaa 'dho 'ka 'dho ꞊kwɛɛsügüpë waa‑ 'wëë‑ ‑nu, 'waa ‑sabha ‑nu 'bha 'sü bha, ꞊dhɛ 'ö 'ka dho pë 'bha ‑kpla ‑yö kë ka ‑kun ‑ee?» 'Yö 'wo‑ pö‑ ‑dhɛ: «'Aa bhoo, pë 'bha ‑kpla 'yii yi 'kun.»
LUK 22:36 'Yö‑ pö‑ ‑nu ‑dhɛ: «'Ka‑ pö 'ka 'dho ꞊taamasü ya‑ 'gü, 'mɛ 'ö‑ ‑bha 'wëëga 'dhö‑ ‑gɔ ‑yö ö ‑bha pë 'sü, ꞊kwɛɛsügüpë 'dhö 'mɛ 'ö‑ ‑gɔ ‑ya 'sü, kö 'mɛ 'ö ‑siangga 'yaa‑ ‑gɔ, ‑yö ö ‑bha ‑sɔ "dhɔɔ dɔ kö ‑ya 'dhɔ;
LUK 22:37 ‑a ‑gɛn ‑mü ꞊dhɛ ‑a ‑dhɛa ‑bha ꞊dhɛ 'pë 'ö ‑bɛn zë ‑sü 'ka Atanna ‑bha 'sëëdhɛ 'gü n ‑bu 'gü bha, ‑a 'gü ‑wɔn ‑yö kë ꞊dhɛ: ‹꞊Waa‑ dɔ 'wɔnyaakëmɛ ‑nu ‑bhiëë 'gü.› "Kɛɛ 'sa 'wɔn 'ö ‑bɛn zë ‑sü 'ka n ‑bu 'gü, 'ö‑ këwɔn 'dhö 'dhö "dhʋ̈ bha‑ kë "tʋ̈ng ꞊ya ꞊tëng. Yö ꞊në dho kë 'wɔn 'ö Atanna ‑yö n bɔ‑ 'gü bha‑ ‑gɔ ‑da 'plöö ‑sü 'ka.»
LUK 22:38 'Yö 'wo‑ pö‑ ‑dhɛ: «Yi Dëmɛ, ‑siangga ꞊plɛ ꞊nɛ!» 'Yö‑ pö‑ ‑nu ‑dhɛ: «‑A 'dhɛ bha ‑yö 'to "dhʋ̈, ꞊ya ꞊mɔɔ.» (‑A pö 'ö‑ wo "dhʋ̈ bha‑ 'klɔɔ‑ ‑mü ꞊dhɛ 'pë 'ö‑ pö‑ ‑nu ‑dhɛ bha 'wii‑ 'gü ma ö 'klɔɔ‑ 'ka.)
LUK 22:39 Yesu ‑gun 'dho sië Odhivie ‑tɔn ꞊gbin‑ zii 'kpa 'ö ꞊bhɛa Atanna ‑dhɛ mü, 'ö ꞊ya gun ꞊ya kë‑ 'tuʋ̈‑ 'ka. ꞊Dhɛ 'ö go 'kɔ bha‑ 'gü 'ö zun "kpɛnng, ‑yö ‑ziö do 'ö ö wë dɔ Odhivie ‑tɔn ꞊gbin‑, 'yö‑ ‑bha ꞊klang ‑nu ‑dɩ 'pö 'wo ‑ziö ꞊keng‑.
LUK 22:40 ꞊Dhɛ 'wo dho 'wo ꞊loo mü, 'yö‑ pö ö ‑bha ꞊klang ‑nu ‑dhɛ: «‑Ka bhɛa" Atanna ‑dhɛ kö 'ka 'dho ‑da Sɔtraan ‑gɔ döng 'gü!»
LUK 22:41 'Yö yö ‑zë 'ö bhɔ 'në 'bha wo‑ ‑nu ‑dhɛ taa‑ 'bleng ‑bleng 'yö zun ö kpiö 'gü, 'yö zun ‑bhɛa Atanna ‑dhɛ ‑sü ‑bha 'ö‑ pö:
LUK 22:42 «N Dë Atanna, ꞊ya kë ꞊dhɛ ꞊ya ga i 'gü kö 'wɔn "gbɩɩ‑ 'ö maa‑ "yi mü ya 'i n dha‑ ‑gɔ, ‑yö ‑dho ‑dhi n ‑dhɛ, "kɛɛ yö ꞊në‑ ꞊gban 'gü, 'yaa n "piʋ̈ ꞊dhɛ ‑yö 'to ma ‑zë n ‑bha ‑bha, ‑yö n "piʋ̈ ꞊dhɛ bhi ꞊në i dhɔɔbhaa ‑yö kë.»
LUK 22:43 [‑Yö ‑to mü 'yö Atanna ‑bha "kië do ‑yö go dhang‑ 'gü 'yö nu 'yö faan ‑sɛa ‑da 'gü.
LUK 22:44 ꞊Dhɛ 'kö 'ö‑ ‑ga ꞊dhɛ ga ‑zii ꞊ya kpa ö ‑ta, 'yö zun ‑bhɛa Atanna ‑dhɛ ‑sü ‑bha ö ‑sɔbhɛɛ ꞊dede 'ka, 'ö dɔ mü kö 'fëyi 'ö bhɔ sië‑ ‑bha 'ö ꞊loo "sia‑ bha, ꞊ya kë ꞊dhɛ ꞊yɔɔn kpö kpö ꞊në‑ 'dhö.]
LUK 22:45 ꞊Dhɛ 'ö ö bo, 'yö ꞊wlü 'ö dho ö ‑bha ꞊klang ‑nu ‑dhɛ 'gü, 'ö dho ‑yö ‑kpan ‑a ‑nu ‑bha kö ‑a ‑nu ꞊gban ꞊wa yi zë kplɔɔngdhö ‑wëë 'ö bɔ sië‑ ‑nu ‑ta bha‑ ‑wɔn 'gü.
LUK 22:46 'Yö‑ pö‑ ‑nu ‑dhɛ: «Yi ‑zian ꞊në 'ka‑ zë sië ‑wa! A‑ ‑pö ka ‑dhɛ ꞊dhɛ 'ka "wlü kö 'ka bhɛa" kö Sɔtraan 'ya 'dho "kpënng‑ kë ka ‑gɔ 'ö 'ka ‑da Atanna "dhiʋ̈!»
LUK 22:47 ‑Yö ‑to dhiang bha‑ zë ‑dhɛ 'gü, 'yö mɛ kpö ‑yö ‑wo kö‑ ‑bha ꞊klang ‑nu ‑kaɔng do ga ꞊plɛ bha‑ mɛ 'dhɛ 'wo‑ Zuda ‑kë bha ‑ya ‑nu ‑dhɛ "dhiʋ̈. ꞊Dhɛ 'wo nu, 'yö ꞊yɔɔn Yesu "sɔɔ 'yö ꞊loo‑ ‑bha.
LUK 22:48 'Yö Yesu ‑ya pö‑ ‑dhɛ: «Zuda, 'wɔn 'ö i 'gü 'yö bha ‑ee? I mang Mɛgbömɛ n "dhiʋ̈ ‑dɔ ‑loo n ‑bha ‑sü ꞊në‑ 'ka ‑ee?»
LUK 22:49 ꞊Dhɛ 'mɛ 'wo gun Yesu ꞊keng‑ bha‑ ‑nu "yan 'dhö ‑da 'wɔn bha‑ ‑dhɛ 'gü, 'yö 'wo‑ dhɛɛ" kpɔ 'wo‑ pö: «Yi Dëmɛ, ‑yö mü ꞊dhɛ, 'yi 'mɛ 'wo‑ ya‑ ‑nu 'yën ‑siang 'ka ‑ee?»
LUK 22:50 ‑A ‑pö "dhʋ̈ ‑sü ꞊në "gbɩɩ‑ kö‑ mɛ do ꞊ya ‑siang bɔ ö ‑ta kö ꞊ya "saabhomɛ 'kpii‑ ‑bha gwëëmi zë‑ 'ka‑ ‑kɔ ‑së 'gü "tʋ kpö ‑bha kö ꞊yaa‑ bho mü.
LUK 22:51 "Kɛɛ 'yö Yesu ‑ya pö‑ ‑nu ‑dhɛ: «꞊Ya ꞊mɔɔ! ‑Kaa 'to "dhʋ̈.» 'Yö 'mɛ bha‑ "tʋ kpö bha ‑sü 'yö‑ ‑ya mü ö "gblʋʋ 'ka ‑deewo 'yö‑ ‑kë "klʋ̈ʋ̈klʋ̈.
LUK 22:52 ꞊Dhɛ 'ö ꞊ya kë "dhʋ̈, 'yö Yesu ‑ya pö "saabhomɛ ‑gɔmɛ ‑nu waa‑ Atanna ‑bha 'kɔ ‑maakëmɛ ‑nu ‑gɔmɛ ‑nu waa‑ ‑kwɛagbö ‑nu 'wo nu bha‑ ‑nu ‑dhɛ 'ö‑ pö: «Nu 'ka‑ wo n 'kun ‑dhɛ 'gü ꞊dhɛ mɛ‑ nu mɛzëmɛ 'kun, 'ö 'ka nu "dhü ‑nu waa‑ ‑siang ‑nu 'ka ya‑ ‑gɛn ‑mü ‑më 'ka?
LUK 22:53 "Kɛɛ kö yi ꞊gban "pɛpɛ 'ka, kwɛng‑ ‑nu kwa ‑gun Atanna ‑dhɔkëgükɔ 'gü ‑dhɛ do 'gü, 'yö 'kii n 'kun ‑a "tʋ̈ng bha‑ 'gü, "kɛɛ a‑ 'wɔn ‑dɔ ꞊dhɛ ka ‑bha "tʋ̈ng ꞊në ꞊loo bha, ‑a ‑gɛn ‑mü ꞊dhɛ Sɔtraan 'ö ‑dhɛtiidhɛ ‑gɔmɛ 'ka bha, ‑a ‑kɔ ‑mɔɔ n ‑bha "tʋ̈ng 'ö Atanna ‑ya ‑ya ꞊në ꞊loo bha.
LUK 22:54 ꞊Dhɛ 'wo Yesu kun, 'yö 'wo dho‑ 'ka "saabhomɛ ‑nu ‑gɔmɛ 'kpii‑ ‑gɔ "kwɛandhö kö Piɛdhö ‑ya ꞊keng‑ "kɛɛ kö ‑ya 'ka ꞊gblɛɛn.
LUK 22:55 ꞊Dhɛ 'wo dho 'wo ꞊loo "kwɛandhɛ bha‑ 'gü, 'yö 'wo pɛng ‑ya 'dhuëng ‑ta "kpɛnngdhö mü, 'yö 'wo ‑ya ‑bha. 'Yö Piɛdhö dho‑ ‑nu kpö 'gü mü 'yö 'yaanu.
LUK 22:56 ‑Wo ‑ya ‑zlëëdhö, 'yö gwëëdhe do 'bha bha 'ö Piɛdhö yö kö ‑yö ‑ya sië pɛng 'bhü "dhiʋ̈, 'yö ö "yan ‑gban 'gü zuudhö 'ö‑ pö: «'Mɛ 'ö ya ‑yö ‑gun 'mɛ 'wo‑ kun bha‑ ꞊keng‑ "dhɛ!»
LUK 22:57 "Kɛɛ 'yö Piɛdhö ‑ya ꞊zaɔ‑ 'ö‑ pö: «'Maa 'mɛ bha‑ dɔ ‑wa, dhebhɔnë!»
LUK 22:58 ꞊Dhɛ 'ö‑ ‑dhɛ 'në bha ꞊ya ꞊gwëë, 'yö mɛ "wɛɛ 'bha ‑ya yö 'zü 'yö‑ pö‑ ‑dhɛ: «'Mɛ 'wo bha‑ mɛ do ‑mü i 'ka "dhɛ!» 'Yö Piɛdhö ‑ya pö: «'Aa, 'maa ‑mü ‑wa, gɔɔn‑ ‑së!»
LUK 22:59 ꞊Dhɛ 'ö "tʋ̈ng 'bha ꞊ya ziö 'zü, 'yö mɛ do 'bha ‑yö ꞊nëng 'gü 'zü 'ö‑ pö: «'Mɛ 'ö ya ‑yö ‑gun 'mɛ bha‑ ꞊keng‑ tɛan‑ ꞊dede 'ka, ‑a ‑gɛn ‑mü ꞊dhɛ Gadhidhe mi ‑mü, (mɛ ‑ya ‑dhɛ ‑yö ‑a "dhi ‑wʋ ‑bha).»
LUK 22:60 'Yö Piɛdhö ‑ya ‑yɔ bɔ‑ ‑gɔ 'ö‑ pö: «Dhiang ‑zian 'i‑ zë sië bha n "tʋ 'yaa‑ ‑bha.» Piɛdhö ‑to dhiang bha‑ zë ‑dhɛ 'gü ‑dhɛ do bha‑ 'gü 'yö ‑tɔgɔn ‑yö ‑wɩ.
LUK 22:61 'Yö kwa Dëmɛ ‑yö ꞊slëë ö 'gü 'yö‑ ‑ga. 'Yö Piɛdhö ‑zʋ ‑yö ‑bö 'pö dhiang 'ö‑ zë‑ ‑dhɛ ‑blɛɛsü, 'ö‑ pö ꞊dhɛ "sanni ‑tɔgɔn ‑yö "wɩ, kö ꞊ya bo ö 'ka ꞊dhɛ pë ‑yaaga 'dhö bha‑ ‑ta.
LUK 22:62 'Yö zun "kpɛnng, 'yö zun "gbʋ bɔ ‑sü ‑bha ‑wëëwëësü 'ka.
LUK 22:63 "Tʋ̈ng 'ö kë sië‑ 'ka "dhʋ̈ bha kö 'mɛ 'kö‑ ‑nu ‑kɔ 'dhö gun Yesu ‑bha bha ‑wa ‑ma ꞊në wo sië 'ö 'wo ꞊wɛɛ dɔ‑ ‑bha.
LUK 22:64 'Ö 'wo pë ‑kplü ‑a "yan "dhiʋ̈, ('wo‑ ‑ma) 'wo‑ pö‑ ‑dhɛ: «De ꞊në i ‑ma bha? ‑Bhö ‑a ‑mɛ 'tɔ pö, Atanna ‑wʋdhiʋ̈loomɛ!»
LUK 22:65 'Ö 'wo "si ꞊gban ‑si ꞊gban suu bho‑ ‑gɔ.
LUK 22:66 ꞊Dhɛ 'ö ‑dhɛ ꞊ya ꞊kpaɔ, 'yö Zuifö ‑nu ‑bha ‑kwɛagbö ‑nu oo, "saabhomɛ ‑nu ‑gɔmɛ ‑nu waa‑ 'tɔnggɔmɛ ‑nu 'wo bho 'ko ‑ta, 'yö 'wo mɛ bɔ kö ‑wo nu Yesu 'ka wo ‑kuu "dhiʋ̈.
LUK 22:67 ꞊Dhɛ 'wo nu‑ 'ka, 'yö 'wo‑ pö‑ ‑dhɛ: «꞊Ya kë ꞊dhɛ 'ö bhi ꞊në 'i Atanna ‑bha ‑Yamɛ bha‑ 'ka ꞊dedewo tɛan‑ 'ka, ‑bhö ‑a pö yi ‑dhɛ!» 'Yö Yesu ‑ya ‑yɔ bɔ 'ö‑ pö: «'Kö maa‑ pö ka ‑dhɛ "dhʋ̈ ꞊wɛ, 'kii 'dho 'dhang bho‑ "dhiʋ̈,
LUK 22:68 'ma ka dhɛɛ" ‑zian 'kpɔ, 'kii 'dho‑ ‑yɔ bɔ,
LUK 22:69 "kɛɛ 'wɔn 'ö tɛanwɔn 'ka yö ‑mü ꞊dhɛ ꞊ya 'go ꞊dɛɛ 'gü, mang Mɛgbömɛ, n ‑yɛa ꞊në dho kë n Dë Atanna 'ö‑ 'gü 'dhö "gbɩɩ‑ bha‑ ‑kɔ ‑së 'gü dhang‑ 'gü.»
LUK 22:70 'Yö‑ ‑nu ꞊gban "pɛpɛ 'wo‑ pö: «'Bha‑ pö "dhʋ̈ kö i‑ ‑pö ꞊dhɛ? Atanna Gbö ‑mü i 'ka ‑ee?» 'Yö‑ pö: «꞊Iin, yö ꞊në 'ka‑ pö bha, Atanna Gbö ‑mü n 'ka.»
LUK 22:71 ꞊Dhɛ 'kö 'wo‑ ma "dhʋ̈ bhoo 'yö 'wo‑ pö: «‑Më ‑wɔn ꞊në ka "piʋ̈ ꞊dhɛ ‑ya pö ka ‑dhɛ 'zü‑ 'dhɛ 'kö bha‑ zian 'gü, "kɛɛ kö yöö ꞊dede ‑a "dhi ꞊yaa‑ pö kö 'kwa‑ ma?»
LUK 23:1 ꞊Dhɛ 'wo‑ pö "dhʋ̈, 'yö 'mɛ 'wo bha‑ ꞊gban "pɛpɛ 'wo ‑wlü 'wo ‑ta Yesu ‑bha, 'yö 'wo dho‑ 'ka Pidhatö ‑kuu "dhiʋ̈.
LUK 23:2 ꞊Dhɛ 'wo dho 'wo ꞊loo mü, 'yö 'wo Yesu ‑da Pidhatö ‑dhɛ 'wo‑ pö: «Yi ‑kpan 'mɛ ya‑ ‑bha kö ‑yö ‑da sië "sɛgümɛ ‑nu ‑gɔ 'gü, 'ö‑ pö‑ ‑nu ‑dhɛ 'wa 'dho 'nii‑ sɔng bho ‑gblüdë Sezaa ‑dhɛ, "ɛɛn yö ‑zë Klisi ‑mü ö 'ka, ö "dhʋ̈ kö ‑gblüdë ‑mü ö 'ka 'pö.»
LUK 23:3 ꞊Dhɛ 'ö ꞊waa‑ ‑da Pidhatö ‑dhɛ ‑wʋ bha‑ 'gü, 'yö Pidhatö ‑ya dhɛɛ" kpɔ 'ö‑ pö: «I‑ ‑pö Zuifö ‑nu ‑bha ‑gblüdë ‑mü i 'ka tɛan‑ 'ka ‑ee?» 'Yö Yesu ‑ya ‑yɔ bɔ 'ö‑ pö: «Yö ꞊në 'i‑ pö sië bha.»
LUK 23:4 'Yö Pidhatö ‑ya pö "saabhomɛ ‑nu ‑gɔmɛ ‑nu waa‑ mɛ kpö 'wo gun 'mü bha‑ ‑nu ‑dhɛ 'ö‑ pö: «꞊Sɔng 'ö yöö kë 'mɛ 'ka nu‑ ka ya‑ ‑bha kö ‑yö kë‑ zë ‑gɛn 'ka 'mii‑ yö.»
LUK 23:5 "Kɛɛ 'yö 'wo ꞊nëng 'gü 'wo‑ pö: «Yi‑ ‑pö ‑yö ‑da ꞊në wo sië "sɛgümɛ ‑nu ‑gɔ 'gü, 'ö‑ ‑nu ‑gɔ 'gü ꞊see dhiang ‑nu 'ö‑ zë wuudhö 'ö ‑ziö 'ka, 'ö zü bho Gadhidhe ‑sɛ 'gü 'ö ꞊ya bɔ‑ 'ka Zude ‑sɛ 'gü ‑dhɛ ꞊gban 'gü ꞊ya nu ꞊ya ꞊loo‑ 'ka yö bha‑ 'ka.»
LUK 23:6 ꞊Dhɛ 'ö Pidhatö ꞊ya Yesu 'tɔ ma Gadhidhe ‑dhɛ ‑bha, 'yö‑ ‑nu dhɛɛ" kpɔ‑ ‑kë Gadhidhe mi 'ka ‑sü ‑wɔn 'ka.
LUK 23:7 ꞊Dhɛ 'kö 'wo bo‑ ꞊iin 'pö ‑sü ‑zë 'ka, 'ö‑ 'wɔn dɔ ꞊dhɛ ‑yö ‑go Gadhidhe, "sɛgɔ 'ö Edhodö gun‑ ‑gɔdhiʋ̈ bha‑ 'gü, 'yö‑ bɔ Edhodö ‑dhɛ, ‑a ‑gɛn ‑mü ꞊dhɛ 'ö gun "dhʋ̈ kö Edhodö ‑yö Zedhizadhɛmö "tʋ̈ng bha‑ 'gü.
LUK 23:8 ꞊Dhɛ 'ö Edhodö ‑yö Yesu yö, ‑a 'gü ‑wɔn ‑yö ‑dhi ‑dhɛ ꞊dedewo, ‑a ‑gɛn ‑mü ꞊dhɛ 'ö gun "dhʋ̈ kö 'ö zun‑ "slë mɔɔ‑ ‑sü ‑bha kö 'ö ‑kpan ‑bha kö‑ yi ꞊ya ꞊gwëë. Pë 'ö ‑kë 'yö gun‑ "slë mɔɔ‑ sië kö 'ö‑kpan ‑bha bha, ‑a ‑gɛn ‑mü ꞊dhɛ kö ꞊yaa‑ ‑taɔng ma, 'yö gun ö ‑zʋ 'gɔn sië ꞊dhɛ 'ö ‑kpan ‑bha yi do 'ka kö ‑yö "dhabhliwɔn ‑nu bha‑ 'bha kë ö "yaan.
LUK 23:9 ‑A ‑wɔn 'gü ꞊dhɛ 'ö Yesu ‑yö ꞊loo mü, Edhodö ‑yö dhɛɛ" 'gbɛ ꞊dede ‑kpɔ ‑gɔ "kɛɛ 'yii‑ 'bha ‑yɔ bɔ.
LUK 23:10 Kö "saabhomɛ ‑nu ‑gɔmɛ ‑nu waa‑ 'tɔnggɔmɛ ‑nu ‑wo mü, kö ‑wo wo ‑wʋ "dhiʋ̈ "wlü sië 'ö 'wo ꞊sua ‑ya ‑bha ‑a ‑san ‑bha ‑mawɔnyaadhɛ 'ka "dhʋ̈ do.
LUK 23:11 'Yö Edhodö waa‑ ö ‑bha "sɔdha ‑nu 'wo zun ꞊wɛɛ ‑dɔ Yesu ‑bha ‑sü ‑bha kö‑ ‑san ꞊ya zun‑ ‑nu 'gü "pɛɛpɛdhö. ꞊Dhɛ 'ö ꞊wa ꞊wɛɛ 'bha dɔ‑ ‑bha 'ö ꞊wa wo bo, 'yö Edhodö ‑yö sɔ ga do sü 'ö‑ ‑da ‑bha, 'yö‑ sü 'zü ‑deewo 'ö‑ bɔ Pidhatö ‑dhɛ.
LUK 23:12 ‑A "tʋ̈ng bha‑ 'gü, kö Edhodö waa‑ Pidhatö 'waa ‑së, "kɛɛ ‑wo ‑dhi wo 'ko ‑dhɛ yi do bha‑ ꞊në‑ 'ka, 'yö 'wo ‑kë "taɔngdë ‑zë ‑nu 'ka.
LUK 23:13 ꞊Dhɛ 'wo dho 'zü ‑deewo 'wo ꞊loo Pidhatö ‑kuu "dhiʋ̈, 'yö Pidhatö ‑yö "saabhomɛ ‑nu ‑gɔmɛ ‑nu waa‑ mɛ ‑kiandhö ‑nu ꞊loo 'ko ‑ta waa‑ "sɛgümɛ ‑nu 'dhö, 'yö‑ pö‑ ‑nu ‑dhɛ:
LUK 23:14 «'Mɛ 'ka nu‑ 'ka n ‑dhɛ ya ka‑ ‑pö ‑bha ꞊dhɛ ‑yö ‑da ꞊në wo sië "sɛgümɛ ‑nu ‑gɔ 'gü kö 'wa 'dho yi ‑wʋ ma, "kɛɛ ‑a dhɛɛ" 'a‑ kpɔ kaa ꞊dede ka "yaan ya, pë "pɛpɛ 'ö 'ka‑ pö‑ ‑bha bha‑ 'bha 'kö 'a dho‑ yö ‑a ꞊sɔng 'gü 'yaa 'dhö.
LUK 23:15 A‑ ‑sü 'a‑ bɔ Edhodö ‑dhɛ yö ꞊në‑ ‑wɔn 'gü, "kɛɛ yöö ‑dɩ 'pö 'yii ꞊sɔng 'bha yö‑ ‑bha. Yö ꞊në‑ ‑wɔn 'gü 'yö ꞊yaa‑ bɔ 'zü ‑deewo kwa ‑dhɛ ya. ꞊Ya kë "dhʋ̈ kö 'wɔn 'kö yöö kë mɛ ‑zë 'gü ‑wɔn 'ka, 'yii‑ 'bha kë.
LUK 23:16 ꞊Dhɛ 'ö "dhʋ̈, a ‑dho ‑a pö kö ‑wa ‑wëëdhɛ bho ‑zë wo, "kɛɛ ꞊waa‑ ‑ma 'bha wo a ‑dho n kwaa‑ ‑zü 'ö dho.»
LUK 23:17 ['Ö "dhʋ̈ bha kö Pakö yi ꞊ya ꞊loo ‑kɔ 'ö‑ 'gü 'do 'do, Pidhatö ‑yö ‑kasogümɛ do ‑lɔɔ Zuifö ‑nu ‑dhɛ.]
LUK 23:18 ꞊Dhɛ 'ö ꞊yaa‑ pö "dhʋ̈, 'yö 'mɛ 'wo bha 'wo ta wo 'gü 'wo ꞊gbla "gbɩɩ‑ 'ka 'wo‑ pö Pidhatö ‑dhɛ 'wo‑ pö: «‑Bhö mɛ 'dhɛ 'kö bha ꞊në‑ zë kö 'i Badhabasö ‑zë lɔɔ‑ yi ‑dhɛ.»
LUK 23:19 "Kɛɛ kö Badhabasö 'wo "wɩ sië‑ 'ka bha, ‑wa ‑da ‑kaso 'gü "dhinaa 'kpii‑ 'bha 'ö ‑da 'plöö mü bha waa‑ mɛ 'ö‑ zë ꞊në‑ ‑wɔn 'gü.
LUK 23:20 'Yö Pidhatö ‑yö ö ‑kɔ ‑ya ‑nu zuë" ‑ta 'zü ‑deewo kë "dhʋ̈ kö ‑wo "wɩ‑ ‑bha kö 'ö ö kwaa‑ Yesu ‑zü.
LUK 23:21 "Kɛɛ 'yö 'wii‑ ‑yɔ bɔ, 'yö 'wo ꞊gbla 'wo‑ pö: «‑A dɔ "dhü ‑bha! ‑a dɔ "dhü ‑bha!»
LUK 23:22 'Yö Pidhatö ‑ya pö 'zü‑ ‑nu ‑dhɛ ‑gɛn ‑yan ‑yaaga ‑naa 'ka 'ö‑ pö: «‑Më ‑wɔn yaa ꞊në 'mɛ ya 'ö‑ ‑kë? A‑ ‑pö ka ‑dhɛ ꞊dhɛ ma ‑zë 'mii ꞊sɔng 'bha yö‑ ‑bha kö ‑yö kë‑ zë ‑gɛn 'ka. ꞊Dhɛ 'ö "dhʋ̈, ꞊waa‑ ‑ma 'bha wo a ‑dho n kwaa‑ ‑zü.»
LUK 23:23 "Kɛɛ 'wii "wɩ‑ ‑bha tongtongdhö, 'yö 'wo ꞊nëng 'gü 'yö 'wo ꞊gbang dɔ‑ 'ka ‑yuudhö ꞊dhɛ ‑wo Yesu ꞊në‑ zë. 'Yö‑ ‑nu ‑bha ‑yö to‑ ‑bha "gbla 'wo‑ wo "dhʋ̈ kpö 'ka bha‑ ‑wɔn 'gü.
LUK 23:24 'Yö Pidhatö ‑ya pö: «‑Ɛɛ, ‑a 'dhɛ kaa‑ ‑pö ꞊në dho kë.»
LUK 23:25 'Yö dho 'ö ö ‑kɔ bho "dhinaa ‑damɛ, mɛzëmɛ 'kö bha yö ‑zë 'gü 'mɛ 'wo bha‑ ‑nu ‑dhɛ. 'Yö Yesu dɔ‑ ‑nu ‑gɔ kö 'pë 'ö ‑dhi ‑nu ‑dhɛ ‑wa kë‑ 'ka.
LUK 23:26 ꞊Dhɛ 'ö "sɔdha ‑nu ꞊wa Yesu 'kun 'wo dho sië‑ 'ka ‑a zë ‑dhɛ 'gü, 'yö 'wo dho 'wo ‑kpan Sidhɛnö mi do 'bha 'wo‑ ‑dhɛ Simɔ bha‑ ‑bha kö ‑yö 'go sië 'bhlaa‑, 'yö 'wo‑ kun 'pö 'wo Yesu ‑dɔ bha "dhü bha‑ nu‑ ‑dhɛ kö ‑ya 'sü ‑yö 'dho‑ 'ka‑ ꞊keng‑.
LUK 23:27 'Wo gun 'dho sië Yesu 'ka "dhiʋ̈ kö mɛ kpö 'gbɛ ꞊dede ‑wa ꞊keng‑, kö dhong ‑nu 'gbɛ 'bha ‑nu ‑wo mü 'pö kö ‑wo wo ‑kuu ‑ta ‑ma sië "gbʋ 'ka, 'ö 'wo ‑wëë ‑wʋ kpɔ Yesu ‑bha.
LUK 23:28 'Yö Yesu ‑yö ö wë bɔ‑ ‑nu ‑ta 'ö‑ pö: «Zedhizadhɛmö dhong ‑nu, 'ka 'dho "gbʋ bɔ ma ‑zë n ‑bha, ‑ka "gbʋ bɔ ka ‑dɩ ꞊në‑ bha waa‑ kaa‑ 'në ‑nu 'dhö.
LUK 23:29 ‑A ‑gɛn ‑mü ꞊dhɛ "tʋ̈ng 'bha‑ ‑dho ‑wo 'ö 'wo‑ pö ꞊gblöödhe ‑nu oo, 'mɛ 'wii 'në 'kpɔ do waa‑ 'mɛ 'wii "yɔn nu 'në ‑dhɛ do ‑a ‑nu ‑bha ‑së!
LUK 23:30 ‑A "tʋ̈ng bha ꞊në‑ 'gü, 'yö 'wo dho 'daɔnnu 'wo‑ pö ‑tɔn "gblʋ̈gblʋ̈ ‑nu ‑dhɛ: «‑Ka nu 'ka ‑gblü yi ‑ta! ‑Tɔn 'sɛɛnnë ‑nu, ‑ka nu 'ka yi ‑ta kpa!»
LUK 23:31 ‑A ‑gɛn ‑mü ꞊dhɛ "sanni ‑wo 'wɔn suu ya‑ wɔ "dhü ‑sɛa ‑zë ‑ta, 'yö "dhü "kpɛa ‑zë ꞊wɛ?»
LUK 23:32 "Tʋ̈ng 'wo gun 'dho sië Yesu 'ka "dhʋ̈ bha kö 'wɔnyaakëmɛ ‑nu "wɛɛ ꞊plɛ 'wo 'dho sië‑ ‑nu zë 'pö ‑wo mü, ‑wo ‑gun 'dho sië waa‑ Yesu ‑nu ꞊gban ꞊në‑ ‑nu 'ka bha.
LUK 23:33 ꞊Dhɛ 'wo dho 'wo ꞊loo ‑tɔn 'wo‑ mɛ ‑gɔ "kpɛa ‑tɔn ‑kë bha‑ ꞊gbin‑, 'yö 'wo Yesu waa‑ 'wɔnyaakëmɛ ‑nu ꞊plɛ bha‑ ‑nu ‑gban "dhü ‑bha ‑dhɛ bha‑ 'gü. 'Yö 'wo‑ mɛ do bɔ Yesu ‑kɔ ‑së 'gü, 'yö 'wo‑ mɛ do bɔ ‑a ꞊kwaa 'gü, 'yö 'wo‑ dɔ‑ ‑nu ꞊zinng 'gü.
LUK 23:34 "Tʋ̈ng 'wo gun‑ dɔ sië‑ 'ka "dhü ‑bha bha kö ‑yö ö zë ‑mɛ ‑nu "dhiʋ̈ bhɛa" wo sië‑ Atanna ‑dhɛ 'ö‑ pö: «N Dë, ‑bhö ‑a ‑nu ‑mawɔn 'to, ‑a ‑gɛn ‑mü ꞊dhɛ 'pë 'wo‑ kë sië bha 'waa‑ dɔ.» 'Yö 'wo zë "kpʋ̈ü ‑kë ‑a ‑dasɔ ‑nu ‑ta, 'yö 'wo‑ 'gü ‑gblü wo 'ko ‑ta.
LUK 23:35 'Ö kë sië "dhʋ̈ bha kö mɛ kpö 'kpii‑ bha ‑wo mü, kö ‑wa ‑dhɛ ‑ga sië. Kö Zuifö ‑nu ‑gɔmɛ ‑nu bha ‑wo ꞊wɛɛ dɔ sië Yesu ‑bha 'wo‑ pö: «꞊Ya kë ꞊dhɛ 'ö Klisi 'ka, 'ö 'mɛ 'ö Atanna ‑ya ‑ya ‑a 'ka ꞊dedewo tɛan‑ 'ka, ꞊ya mɛ ‑nu dha 'gbɛ, ‑yö ö ‑dɩ dha ꞊tɔn kö 'wo‑ ‑dhɛ yö!»
LUK 23:36 Kö "sɔdha ‑nu ‑dɩ 'pö 'wo ꞊wɛɛ dɔ sië‑ ‑bha 'pö, 'ö 'wo we din yaa 'bha bha‑ sü 'wo‑ nu‑ ‑dhɛ.
LUK 23:37 'Ö 'wo‑ pö: «'Bha kë Zuifö ‑nu ‑bha ‑gblüdë 'ka ꞊dedewo tɛan‑ 'ka ‑bhö i ‑dɩ dha kö 'kwa‑ ‑dhɛ ‑ga!»
LUK 23:38 Kö ꞊wa pë ‑bɛn do 'bha zë kö ꞊waa‑ ꞊nëng "dhü ‑bha ‑a ‑ta "dhʋ̈ng 'gü ꞊dhɛ: «Zuifö ‑nu ‑bha ‑gblüdë ꞊nɛ».
LUK 23:39 Kö 'wɔnyaakëmɛ ‑nu 'ö 'wo‑ ‑nu ‑dɔ "dhü ‑bha ‑a "sɔɔ mü bha‑ mɛ do ‑yö "si bho sië‑ ‑gɔ 'pö 'ö‑ pö: «Atanna ‑bha ‑Yamɛ 'yaa ‑mü i 'ka ‑ee? ‑Bhö i ‑dɩ dha ꞊tɔn kö 'i yi dha 'pö ‑dhe!»
LUK 23:40 "Kɛɛ kö‑ mɛ do ‑sü ‑zë ‑yö ‑dɔn bho sië ö "tɛado 'ka 'ö‑ pö: «'Bhaa "suʋ̈ ꞊në‑ wo Atanna ‑gɔ 'yö 'i dhiang zë "dhʋ̈ ‑ee? "Ɛɛn 'wɔn do 'ö wɔ sië‑ ‑ta bha 'aa mü 'ö‑ 'bha 'dhö wɔ sië i ‑ta 'pö bha ‑ee?
LUK 23:41 Yi ‑zë ‑zianwo yi ‑bha ‑zë ‑a ‑wɔ yi ‑ta "dhʋ̈ ‑dhɛ ‑mü, ‑a ‑gɛn ‑mü ꞊dhɛ yi ‑zë 'wɔn yaa 'yi‑ ‑kë ꞊në‑ 'gü ‑wɔn 'dhö wɔ sië yi ‑ta, "kɛɛ yö ‑zë ‑yö ‑më ‑wɔn yaa ꞊në‑ ‑kë?»
LUK 23:42 'Yö to 'mü 'ö‑ pö Yesu ‑dhɛ: «N Dëmɛ, yi 'i dho nu‑ 'ka i ‑bha ‑gblüdëdhɛ 'gü, 'i dɔ "gbɩɩ‑ kö i ‑zʋ ‑yö ‑bö n ‑wɔn ‑ta.»
LUK 23:43 'Yö Yesu ‑ya ‑yɔ bɔ‑ ‑gɔ 'ö‑ pö: «A‑ ‑pö i ‑dhɛ ꞊sii ꞊dede ‑ta ꞊dhɛ kwa ‑dho ‑da ‑yɛa ‑së 'ö n Dë Atanna "piʋ̈ bha‑ 'gü ‑dhɛkpaɔyi do 'ö ꞊dɛɛ‑ 'ka!»
LUK 23:44 ꞊Dhɛ 'ö 'yënng‑ ‑yö ‑ya mɛ ‑gɔ ꞊zinng 'gü, 'yö ‑dhɛ ‑yö ꞊tröö "kpʋngtaadhɛ ꞊gban "pɛpɛ 'gü mɔɔdhö do, 'yö to "dhʋ̈ 'ö zun‑ 'ka "wɔ "yɛ ‑yën 'bhü "tʋ̈ng bha‑ ‑bha.
LUK 23:45 'Yö 'yënng‑ ‑yö bo 'bhü ‑sü 'ka, 'yö "bin ‑yö ma 'yënng‑ bha‑ 'gü, 'yö Atanna ‑dhɔkëgükɔ 'ö Zedhizadhɛmö bha‑ 'gükangüsɔ ‑yö ‑pɛ ö ꞊zinng 'gü ꞊gbanngdhö do "tʋ̈ng do bha‑ 'ka (kö ‑ya ‑zɔn ꞊dhɛ zian 'ö dho Atanna "piʋ̈ ‑a "dhi ꞊ya "pʋ).
LUK 23:46 ꞊Dhɛ 'ö ‑dhɛ 'gü ‑yö ꞊tröö "dhʋ̈, 'yö Yesu ‑yö ꞊gbla "gbɩɩ‑ 'ka 'ö‑ pö: «N Dë, 'ma n 'nii‑ wɔ i ꞊kwɛɛ‑.» ꞊Dhɛ 'ö ꞊yaa‑ pö "dhʋ̈ ꞊ya ö bo 'yö ‑tɔn ‑da.
LUK 23:47 ꞊Dhɛ 'ö Wlɔmö "sɔdha ‑gɔmɛ 'ö gun mü bha 'ö 'wɔn bha‑ ‑dhɛ yö, 'yö Atanna 'tɔ bhɔ 'ö‑ pö: «'Mɛ 'ö ya pö 'aa gun‑ ‑bha tɛan‑ ꞊dede 'ka, ‑a ‑bho "piʋ̈ ‑dhɛ 'bhaa 'dhö!»
LUK 23:48 ꞊Dhɛ 'ö 'wɔn bha ꞊ya bo kë ‑sü 'ka ꞊dhɛ ‑kɔ bha‑ 'dhö, 'yö mɛ kpö 'wo gun mü 'ö‑ ‑nu "yan ‑yö dɔ‑ ‑dhɛ 'gü bha, 'wo wo yee kë 'wo dho wo ꞊plöö ‑a ‑wëë ‑wʋ 'kpɔ ‑sü 'ka kö‑ ‑nu ‑kɔ ‑ya ‑nu ‑kuu 'gü.
LUK 23:49 "Tʋ̈ng 'ö 'wɔn ‑nu bha 'wo kë sië‑ 'ka‑ "dhʋ̈ bha, kö mɛ "pɛpɛ 'kö 'wo Yesu dɔ waa‑ dhebhɔ ‑nu 'wo go‑ ꞊keng‑ Gadhidhe ‑sɛ 'gü 'wo nu bha‑ ‑nu ꞊gban "pɛpɛ ‑wo dɔ sië‑ 'ka ꞊gblɛɛn 'në 'bha wo 'wo 'wɔn ‑nu bha‑ ‑nu ‑dhɛ ‑ga.
LUK 23:50 "Kɛɛ mɛ do 'bha ‑yö ‑gun mü 'wo‑ ‑dhɛ Zosɛfu, 'ö go Zuifö ‑bha 'pö‑ 'wo‑ ‑dhɛ bha‑ 'gü, 'ö gun "klʋsëmɛ 'ö Atanna dɔ ‑a 'ka. ‑Kwɛagbö ‑nu 'wo‑ ‑nu ‑ya "sɛ bha‑ 'gü dhiangzëmɛ 'ka kö ꞊wa ꞊loo 'ko ‑ta bha‑ mɛ do ꞊në gun Zosɛfu bha‑ 'ka.
LUK 23:51 Mɛ 'ö bha 'wɔn "pɛpɛ 'ö Zuifö ‑nu ‑wa ‑wɔ Yesu ‑ta bha‑ ‑kɔ 'yaa gun‑ 'bha 'gü, "ɛɛn 'yaa gun‑ ‑ya 'kwëë‑ kë ‑dhɛ ‑zian 'gü; ‑a ‑gɛn ‑mü ꞊dhɛ ‑yö ‑gun 'dhang ‑bho Atanna "dhiʋ̈ ‑mɛ 'ka, 'ö‑ "yan‑ gun ‑a ‑bha ‑gblüdëdhɛ nu ‑sü ‑gɔ.
LUK 23:52 Mɛ 'ö bha 'yö dho 'yö Yesu ꞊gee ‑gbadhɛ Pidhatö ‑gɔ.
LUK 23:53 ꞊Dhɛ 'ö Pidhatö ꞊ya ö ‑kɔ bho‑ 'gü ‑a ‑dhɛ, 'yö dho 'yö‑ bho "dhü ‑bha, 'yö sɔ "puu bɔ‑ ‑bha, 'yö dho‑ 'ka 'yö‑ ‑wɛɛ bho ‑gwëyɛ 'bha 'ö mɛ 'bha 'yii mɛ ‑wɛɛ ‑blɛɛsü bho‑ bha do bha‑ 'gü.
LUK 23:54 'Wɔn bha ‑yö ‑kë "dhʋ̈ yi 'ö Zuifö ‑nu ‑bha ꞊gloo ‑sü zü ‑yö bho‑ 'ka yɛan" "piʋ̈ bha‑ 'ka.
LUK 23:55 'Ö gun kö Zosɛfu ‑yö dho sië Yesu 'ka, 'yö dhong ‑nu 'wo go‑ ꞊keng‑ Gadhidhe bha 'wo dho‑ dɔ, 'yö 'wo Yesu ‑wɛɛbhodhɛ waa‑ ‑a wɔ ‑kɔ ꞊gban ‑dhɛ yö 'kpakpadhö.
LUK 23:56 ꞊Dhɛ 'wo go mü, 'yö 'wo dho wo ꞊yëë "dhiʋ̈ ‑dhɛ ‑nu 'gü, 'yö 'wo "yɔn ‑nu waa‑ ‑dhasiklɔɔ "yi ‑nu ꞊mɔɔ 'yö 'wo‑ ‑ya wo ‑kɔ "sɔɔ kö 'wo dho‑ ꞊wɛnng Yesu ꞊gee ‑bha. ꞊Dhɛ 'ö ꞊glooyi bha 'ö ꞊loo, 'yö 'wo ꞊gloo ꞊dhɛ ‑kɔ 'ö ‑bɛn zë ‑sü 'ka Atanna ‑gɔ 'sëëdhɛ 'gü ‑a 'dhö.
LUK 24:1 ꞊Dhɛ 'ö Zuifö ‑nu ꞊glooyi bha ꞊ya ziö 'ö‑ ‑tadhɛ ꞊ya ꞊kpaɔ, 'yö dhong ‑nu 'wo gun Yesu ꞊keng‑ bha 'wo ꞊wlü 'wo dho ‑a bun ꞊taa ‑dhɛkpaɔ tii 'gü, "yɔn ‑nu waa‑ ‑dhasiklɔɔ ‑nu 'wo‑ ꞊mɔɔ bha‑ 'ka.
LUK 24:2 ꞊Dhɛ 'wo dho 'wo ꞊loo mü, 'wo dho ‑dhɛ ‑ga kö ‑gwë 'wo ‑yɛ "dhiʋ̈ ‑ta 'ka bha 'yaa mü, kö ꞊waa‑ glün‑ ꞊waa‑ ‑ya zian "wɛɛ 'ka.
LUK 24:3 'Yö 'wo ‑sɔ ‑yɛ bha‑ 'gü, "kɛɛ 'wii‑ ‑nu Dëmɛ Yesu ꞊gee yö mü.
LUK 24:4 'Wɔn bha 'yö‑ 'wɔn ‑ya ‑nu kɔn, ‑wo ‑to wo ‑zʋ 'gɔn ‑sü ‑bha 'wɔn bha‑ 'gü, 'yö gɔɔn‑ ‑nu ꞊plɛ ‑wo wo ‑dɩ ‑zɔn ‑a ‑nu ‑dhɛ. Mɛ ꞊plɛ 'wo bha sɔ 'ö gun‑ ‑nu ‑bha bha ‑yö ‑dɔ mɛ "yan 'gü ‑glanglandhö.
LUK 24:5 ꞊Dhɛ dhong ‑nu bha 'wo 'mɛ 'wo bha‑ ‑nu yö, 'yö "suʋ̈ 'dhö ‑da ‑nu 'gü, 'yö 'wo wo ‑gɔ "dhiʋ̈ "gblëënu. "Kɛɛ 'yö 'mɛ 'wo bha 'wo‑ pö‑ ‑nu ‑dhɛ 'wo‑ pö: «'Mɛ 'ö "yaandhe 'ka ka‑ ‑mɔɔ 'mɛ ꞊wa ga ‑a ‑nu kpö 'gü ‑më ‑wɔn 'gü?
LUK 24:6 'Yaa ‑dhɛ ya‑ 'gü 'zü, ꞊ya ‑bö 'nu, ka ‑zʋ 'ya 'dho bhɔ dhiang 'ö‑ zë ka ‑dhɛ kö ‑yö ‑tun Gadhidhe 'ö‑ pö ꞊dhɛ: «‑A ‑dhɛ ‑ya ‑bha ꞊dhɛ ‑wo Mɛgbömɛ "dhiʋ̈ dɔ 'wɔnyaakëmɛ ‑nu ‑gɔ kö ‑wa dɔ "dhü ‑bha kö ‑wa zë, "kɛɛ kö ‑yö ‑bö ‑a ‑dhɛkpaɔyi ‑yaaga ‑naa 'ka bha ꞊në‑ 'ka.»
LUK 24:8 ꞊Dhɛ 'ö ꞊waa‑ pö‑ ‑nu ‑dhɛ "dhʋ̈, 'yö‑ ‑nu ‑zʋ ‑yö ‑bö ‑wʋ 'ö Yesu ‑ya pö‑ ‑nu ‑dhɛ "dhʋ̈ bha‑ 'ka.
LUK 24:9 ꞊Dhɛ 'ö ꞊wa 'go bun ꞊taa ꞊wa nu, 'yö 'wo 'wɔn bha‑ ‑gɛn dɔ Yesu ‑bha ꞊klang ‑nu ‑kaɔng do ga do 'wo to bha‑ ‑nu ‑dhɛ waa‑ mɛ ‑kpɛa 'wo to‑ ‑nu 'dhö.
LUK 24:10 'Mɛ 'ö‑ ‑nu "yan 'dhö ‑da 'wɔn ‑nu bha‑ ‑dhɛ 'gü, 'ö 'wo nu 'wo‑ ‑gɛn dɔ "dhʋ̈ bha, 'yö‑ mɛ do‑ ‑kë Madhi 'ö go Madadha ‑a 'ka, 'yö Zanö, 'yö Madhi Zakö dhe waa‑ 'mɛ 'wo gun‑ ‑nu ꞊keng‑.
LUK 24:11 "Kɛɛ 'wɔn 'ö dhong ‑nu bha 'wo‑ ‑gɛn dɔ "dhʋ̈ bha 'yii bhɔ Yesu ‑bha ꞊klang ‑nu bha‑ ‑nu 'gü tɛan‑ ‑bha, ‑wa ‑ga ꞊dhɛ "wlaa‑ ꞊në 'wo‑ zë.
LUK 24:12 "Kɛɛ 'yö Piɛdhö ‑zë 'ö ꞊wlü 'ö dɔ ‑bɛang ‑bha 'ö dho mü. ꞊Dhɛ 'ö dho 'ö ꞊loo mü, 'yö ö ‑gɔ 'naanu 'yö ‑dhɛ ‑ga ‑yɛ 'gü mü, "kɛɛ 'yii pë "wɛɛ 'bha yö kö 'yii kë sɔ 'kö 'wo‑ bɔ Yesu ‑bha 'ö‑ ‑kɔn ‑yö to "sia‑ mü bha‑ 'ka. ꞊Dhɛ 'ö‑ ‑dhɛ yö "dhʋ̈, 'yö‑ 'wɔn ‑ya kɔn 'pö 'yö ‑ziö 'ö dho ö ‑gɔ "kwɛandhö.
LUK 24:13 ‑A yi do bha‑ 'ka, 'yö Yesu ‑bha ꞊klang ‑nu bha‑ mɛ ꞊plɛ 'wo ꞊wlü 'yö 'wo gun 'dho sië 'pödhɛ do 'bha 'ö "kidhʋng ‑kaɔng do ga do "sinma "dhiʋ̈ Zedhizadhɛmö ‑dhɛ "sɔɔ mü 'wo‑ Emausö ‑dhɛ ‑kë bha‑ 'gü.
LUK 24:14 ꞊Dhɛ 'wo ‑da zian ‑ta, 'yö 'wɔn "pɛpɛ 'ö ‑kë Yesu ‑wɔn 'gü bha 'wo zun‑ ‑dhiang zë ‑sü ‑bha.
LUK 24:15 ꞊Dhɛ 'wo 'wɔn ‑nu bha‑ ‑dhiang zë sië 'ö 'wo‑ zaɔdhe ‑da sië 'wo 'dho sië‑ 'ka, 'yö Yesu ‑yö nu 'ö ‑da ‑a ‑nu "piʋ̈ 'yö 'wo "ta bha sü wo "kwëë.
LUK 24:16 ‑Wo "ta bha‑ ‑sü wo "kwëë "dhʋ̈ 'wo dho‑ 'ka, "kɛɛ kö ꞊ya kë ꞊dhɛ pë 'bha ꞊ya kpa mɛ "yan "dhiʋ̈, kö 'waa Yesu dɔ.
LUK 24:17 'Yö‑ ‑nu dhɛɛ" kpɔ 'ö‑ pö: «‑Më ‑wɔn ꞊në 'ka‑ ‑dhiang zë sië‑ zian ‑ta bha?» ꞊Dhɛ 'ö‑ ‑nu dhɛɛ" kpɔ "dhʋ̈, 'yö‑ ‑nu wë ‑ta ‑yö ga ‑yɔɔndhö, 'yö 'wo 'daɔnnu.
LUK 24:18 ꞊Dhɛ 'wo 'daɔnnu, 'yö‑ mɛ do 'dhɛ 'wo Kleopasö ‑kë bha 'ö‑ pö Yesu ‑dhɛ: «‑Kë ꞊dhɛ bhii do ꞊në 'wɔn 'ö ‑kë Zedhizadhɛmö ‑dhɛkpaɔyi ꞊plɛ ya‑ 'ka bha 'bhii‑ ma "dhɛ!» 'Yö Yesu ‑ya pö: «‑Më ‑wɔn ꞊në ‑kë Zedhizadhɛmö?»
LUK 24:19 'Yö 'wo‑ ‑yɔ bɔ‑ ‑gɔ 'wo‑ pö: «'Wɔn 'ö kë Yesu 'ö go Nazadhɛtö, 'ö gun Atanna ‑wʋdhiʋ̈loomɛ 'kpii‑ 'ka, 'ö gun "dhabhliwɔn "gblʋ̈gblʋ̈ ‑nu kë sië, 'ö ꞊ya dhiang zë 'ö 'yaa bhɔ mɛ "bhɩɩ‑ ‑bha mɛ 'bha 'gü, 'ö Atanna ꞊dede ‑ya dɔ,
LUK 24:20 "kɛɛ 'ö kwaa "saabhomɛ ‑nu ‑gɔmɛ ‑nu waa‑ "sɛgɔdhiʋ̈mɛ ‑nu 'wo‑ "dhiʋ̈ dɔ ‑a 'yaɔ‑ ‑nu ‑gɔ kö ‑wa zë, 'ö 'wo‑ ‑gban "dhü ‑bha bha 'bhii‑ ma ‑ee?»
LUK 24:21 ‑Yö ‑gun yi 'gü ꞊dhɛ 'mɛ 'kö bha ꞊në dho Izraɛdhö ‑mɛ ‑nu bho ꞊dhuëngdhɛ 'gü 'nu, "kɛɛ 'wɔn bha 'ö bo kë ‑sü 'ka "dhʋ̈, ‑a ‑dhɛkpaɔyi ‑yaaga ‑naa ꞊në ꞊dɛɛ.
LUK 24:22 ‑Yö "dhʋ̈ tɛan‑ 'ka ꞊dhɛ 'mɛ 'yi gun‑ ꞊keng‑ bha‑ dhong ‑nu 'bha ‑nu ꞊wa 'go‑ ‑wɛɛ bho ‑dhɛ 'gü ꞊wa nu, ‑wʋ ‑nu 'wo go‑ 'ka mü bha 'yi‑ ma, ‑a 'wɔn ‑yö yi ‑kɔn. ‑Wa ‑pö ꞊dhɛ wo ‑zë wo kë ‑suʋ̈ ‑dhɛkpaɔ tii 'gü 'wo dho‑ bun ꞊taa,
LUK 24:23 "kɛɛ 'dho 'wo‑ wo bha 'wii ‑kpan ‑a ꞊gee ‑bha mü, 'wo nu ‑wa ‑pö yi ‑dhɛ ꞊dhɛ wo wo "yan ‑kpan Atanna ‑bha "kië ‑nu ꞊në‑ ‑nu ‑bha, 'yö 'wo‑ pö wo ‑dhɛ ꞊dhɛ ‑yö "yaandhe 'ka.
LUK 24:24 'Yö 'mɛ 'ö yɛng ‑nu 'yi gun‑ ꞊keng‑ bha‑ mɛ 'bha ‑nu 'wo dho 'pö mü, 'yö 'wo ‑kpan 'pö‑ ‑dhɛ ‑bha ꞊dhɛ ‑kɔ 'ö dhong ‑nu bha 'wo‑ ‑gɛn dɔ‑ 'ka yi ‑dhɛ bha‑ 'dhö, "kɛɛ yö ‑zë 'wii‑ yö tongtongdhö.»
LUK 24:25 ꞊Dhɛ 'ö ꞊waa‑ pö "dhʋ̈, 'yö Yesu ‑ya ‑yɔ bɔ 'ö‑ pö: «'Aa 'mɛ 'ka ya! Ka "yaaki ‑yö 'sɛɛnnë ꞊tɔn ‑kɛɛ! 'Wɔn 'ö Atanna ‑wʋdhiʋ̈loomɛ ‑nu ‑wa to "dhʋ̈ 'wo‑ pö yi 'bha yi 'bha 'ka bha 'dhang ‑bho "dhiʋ̈ zuëga 'yaa ka ‑gɔ ‑wa!
LUK 24:26 "Ɛɛn 'kaa‑ 'wɔn ꞊në‑ dɔ ꞊dhɛ 'mɛ 'ö Atanna ‑ya ‑ya Izraɛdhö ‑mɛ ‑nu Dhamɛ 'ka bha ‑yö ‑dho saan" ꞊dhɛ ‑kɔ bha ꞊në‑ 'dhö kö ‑yö gun ‑na ‑da ö ‑bha mɛdhɛ ‑kwi 'gü ‑ee?
LUK 24:27 ꞊Dhɛ 'ö ꞊yaa‑ pö‑ ‑nu ‑dhɛ "dhʋ̈, 'yö 'wɔn "pɛpɛ 'ö ‑gban ‑bha 'ö ‑bɛn zë ‑sü 'ka Atanna ‑bha 'sëëdhɛ 'gü, yö ‑zun 'klɔɔ‑ ‑pö ‑nu ‑dhɛ ‑sü ‑bha, 'yö‑ zü bho 'sëëdhɛ 'ö Moizö ‑ya ‑bɛn zë bha‑ ‑ta 'yö dho‑ 'ka 'ö ‑da 'ka Atanna ‑wʋdhiʋ̈loomɛ ‑nu ‑gɔ 'sëëdhɛ 'gü, 'yö dho‑ 'ka "dhʋ̈ 'dɔɔndhö.
LUK 24:28 ꞊Dhɛ 'wo dho 'wo ꞊tëng 'pödhɛ 'wo 'dho sië‑ 'gü bha‑ ‑ta, 'yö Yesu ‑ya ‑kë ꞊dhɛ 'pë 'ö yö ‑zë 'ö ‑tun 'dho‑ ‑dhɛ ꞊gblɛɛn 'gü ‑a 'dhö.
LUK 24:29 'Yö 'wo‑ bho zian‑ 'wo‑ pö‑ ‑dhɛ: «‑Bhö dɔ "gbɩɩ‑ kö i wɔ, ‑a ‑gɛn ‑mü ꞊dhɛ "bin ꞊ya 'ma ꞊ya bo, 'yënng‑ ‑gɔ ꞊ya ‑ya ‑tɔn ‑ta.» 'Yö ‑wɩ ‑bha 'yö dho‑ ‑nu ꞊keng‑.
LUK 24:30 ꞊Dhɛ 'wo dho, 'ö pë ‑bhö "tʋ̈ng 'dhö ꞊loo, 'ö woo zun pë ‑bhö ‑sü ‑bha, 'yö ö ‑kɔ ‑da 'bluu‑ 'gü, 'yö Atanna nuɛ" bho‑ ‑wɔn 'gü, 'yö‑ "kplü "kplü bho 'yö‑ 'gü ‑gblü ‑a ‑nu ‑ta.
LUK 24:31 ꞊Dhɛ 'ö ꞊ya kë "dhʋ̈, 'yö‑ ‑nu "yan "dhiʋ̈ ‑yö ‑pʋ, 'yö 'wo‑ dɔ, "kɛɛ 'yö to 'mü 'pö 'ö ꞊dhɛng‑ ‑nu ‑gɔ.
LUK 24:32 ꞊Dhɛ 'ö bo ‑dhidha 'sü ‑sü 'ka ‑a ‑nu ‑gɔ ꞊dhɛ ‑kɔ bha‑ 'dhö, 'yö 'wo zun‑ ‑pö wo 'ko ‑nu ‑dhɛ ‑sü ‑bha ꞊dhɛ: «Mɛ 'ö bha "tʋ̈ng 'ö gun Atanna ‑wʋ 'klɔɔ‑ pö sië‑ 'ka kwa ‑dhɛ zian ‑ta bha, kö kwa zuë" 'yaa 'dho sië "sia‑ ‑yɔɔndhö ꞊dhɛ 'pë ꞊wa böö‑ ‑sɛa ꞊në‑ ‑ya ‑ta ‑a 'dhö ‑ee?»
LUK 24:33 ‑Wo ‑to ‑dhɛ do bha‑ 'gü 'wo ꞊wlü 'wo wo wë dɔ 'zü ‑deewo Zedhizadhɛmö. 'Wo dho ‑wo ‑kpan mɛ ‑kaɔng do ga do bha waa‑ 'mɛ wɛng‑ ‑nu 'wo gun "kwëë bha‑ ‑nu ‑bha kö ‑wo ‑dhɛ do 'gü
LUK 24:34 kö ‑wa pö sië: «Kwa Dëmɛ ꞊ya ‑bö tɛan‑ 'ka, Simɔ ꞊yaa‑ yö.»
LUK 24:35 'Yö woo ‑dɩ 'pö ‑kɔ 'ö‑ ‑nu ‑bha ‑ya ‑nu ꞊slɔɔ‑ 'ka, ‑kɔ 'wo Yesu dɔ‑ 'ka kö ‑yö 'bluu‑ "kplü "kan sië bha 'wo ‑ziö 'pö‑ ‑gɛn 'gü ‑a ‑nu ‑dhɛ.
LUK 24:36 Dhiang bha ‑yö ‑to ‑nu "dhi, 'yö Yesu ‑yö go ‑dhidha 'gü ‑a ‑nu ‑dhɛ, 'yö dɔ‑ ‑nu ꞊zinng 'gü 'ö‑ pö: «Zuëyagblʋ̈ʋ̈‑ ‑yö kë ka ‑gɔ!»
LUK 24:37 "Kan 'ö‑ wo‑ ‑nu 'gü "dhʋ̈ bha 'yö pɛng ‑yö ‑kan ‑a ‑nu ‑bha 'yö "suʋ̈ ‑yö ‑da ‑a ‑nu 'gü, ‑a ‑gɛn ‑mü ꞊dhɛ ‑yö ‑bhɔ ‑a ‑nu 'gü mɛ ‑zii ‑bha.
LUK 24:38 "Kɛɛ 'yö‑ pö‑ ‑nu ‑dhɛ 'ö‑ pö: «"Suʋ̈ ‑yö ‑da ka 'gü 'yö ꞊yɔɔn ‑gblü ‑yö dɔ ka zuë" ‑ta 'yö 'ka ‑zʋ 'gɔn ‑kɔ suu ‑nu bha‑ ‑kë ‑më ‑wɔn 'gü?
LUK 24:39 ‑Ka "pɔni "gblʋʋ ‑nu 'wo n ‑kɔ ‑nu waa‑ n ‑gɛn ‑nu ‑bha ya‑ ‑ga kö 'ka 'dhang bho‑ "dhiʋ̈ ꞊dhɛ pë "wɛɛ 'bha 'yaa ‑mü, ma ‑mü! ‑Ka nu kö 'ka ka ‑kɔ zun n kwi ‑bha kö 'ka 'dhang bho‑ "dhiʋ̈. "Ɛɛn mɛ ‑zii ga‑ ‑kë 'gü ꞊dhɛ ‑kɔ 'ö n ‑bha 'dhö‑ ‑bha ya‑ 'dhö ‑ee?»
LUK 24:40 'Ö‑ pö sië "dhʋ̈ kö ‑yö ö ‑kɔ waa‑ ö ‑gɛn ‑nu ‑zɔn sië‑ ‑nu ‑dhɛ.
LUK 24:41 ꞊Dhɛ 'ö ‑kë ꞊dhɛ "yan 'wo‑ ‑kpan Yesu ‑bha bha‑ 'gü ‑wɔn ‑yö ‑dhi ‑nu ‑dhɛ ꞊dedewo, "kɛɛ 'ö‑ 'wɔn ‑ya ‑nu kɔn 'ö‑ ‑wɔn 'gü kö 'wii 'dhang bho‑ "dhiʋ̈ ꞊kö 'kpakpadhö bha, 'yö‑ pö‑ ‑nu ‑dhɛ 'ö‑ pö: «‑Bhöpë 'bha ‑yö ka ‑gɔ yö ‑ee?»
LUK 24:42 'Yö 'wo‑ pö: «꞊Iin.» 'Yö 'wo nu‑ ‑dhɛ 'yuʋ̈‑ ‑yɛsü "kplü do 'ka,
LUK 24:43 'yö‑ ‑bhö ‑a ‑nu "yaan mü.
LUK 24:44 ꞊Dhɛ 'ö ö bo‑ ‑bhö ‑sü 'ka 'yö‑ pö: «‑Ka ‑dhɛ ‑ga, ‑wʋ ‑nu 'a gun‑ pö sië ka ‑dhɛ kö a ‑tun ka kpö 'gü, 'ö 'a‑ pö ꞊dhɛ 'wɔn "pɛpɛ 'ö Moizö oo, Atanna ‑wʋdhiʋ̈loomɛ ‑nu oo, "ɛɛn ‑a ‑bha "tan 'sëëdhɛ ‑ya ‑dhiang zë n ‑bu 'gü bha, ‑a ꞊gban 'gü ‑wɔn ‑dho kë bha, ‑kaa ‑ga bha.»
LUK 24:45 ꞊Dhɛ 'ö ꞊yaa‑ pö "dhʋ̈, 'yö 'wɔn 'gü ma zuëga nu‑ ‑nu ‑dhɛ, kë "dhʋ̈ kö ‑wo Atanna ‑wʋ 'gü ma ö 'klɔɔ‑ 'ka.
LUK 24:46 'Yö‑ pö‑ ‑nu ‑dhɛ 'ö‑ pö: «‑Yö ‑bɛn zë ‑sü 'ka Atanna ‑wʋ 'sëëdhɛ 'gü ꞊dhɛ ‑a ‑bha ‑Yamɛ bha ‑yö ‑dho saan" ꞊dedewo 'ö 'wo‑ zë, "kɛɛ ‑yö ‑dho ‑bö ‑a ‑dhɛkpaɔyi ‑yaaga ‑naa 'ka.
LUK 24:47 'Ö 'wo mɛbhɩɩdhe ‑bha ‑kwaa ö ꞊sɔng ‑zü kö ‑yö bɔ Atanna 'ka ‑sü waa‑ Atanna ‑bha mɛbhɩɩdhe ‑bha 'wɔn yaa ‑mawɔn 'to ‑sü ‑dhiang zë ‑sü zü bho Zedhizadhɛmö ‑pö ya‑ 'gü, 'ö 'wo dho‑ 'ka "sɛgɔ "pɛpɛ ꞊gban 'gü ‑a 'tɔ 'gü.
LUK 24:48 Ka ꞊në 'ka n "sɛɛ‑ 'ka 'wɔn ‑nu bha‑ "gblʋʋ "piʋ̈.
LUK 24:49 ꞊Dhɛ 'ö "dhʋ̈, 'pë 'ö n Dë ‑ya bɔ ‑wɔn "plüün bho ka ‑dhɛ bha mang ꞊dede ꞊në 'a dho‑ bɔ ka ‑dhɛ. "Kɛɛ "sanni ‑yö kë "dhʋ̈ ‑a ‑dhɛa ‑bha ꞊dhɛ 'ka 'to Zedhizadhɛmö ‑pö ya‑ 'gü kö ‑yö 'to "dhʋ̈ ‑yö zun‑ 'ka yi 'ö faan 'ö "dhʋ̈ bha 'ö dho 'go‑ 'ka dhang‑ 'gü kö ‑yö ‑da ka 'gü bha‑ yi ‑bha.
LUK 24:50 ꞊Dhɛ 'ö ꞊ya ö bo ‑wʋ bha‑ ‑kpɔ ‑nu ‑bha ‑sü 'ka, 'yö‑ ‑nu sü 'ö wë dɔ‑ ‑nu 'ka Betani ‑zian 'ka, ꞊dhɛ 'ö ꞊wa ꞊loo‑ ‑nu 'dho ‑dhɛ 'gü, 'yö ö ‑kɔ "dhiʋ̈ ꞊wlü 'yö 'dhuë‑ ‑kë ‑nu ‑bha.
LUK 24:51 ‑Yö ‑to 'dhuë‑ ‑kë ‑nu ‑bha ‑dhɛ bha ꞊në‑ 'gü, 'yö ‑kan ‑a ‑nu ‑bha 'yö 'gbʋ‑ ‑ya sü 'yö dho‑ 'ka dhang‑ 'gü.
LUK 24:52 ꞊Dhɛ 'ö 'dho sië "dhʋ̈, 'yö‑ ‑bha ꞊klang ‑nu ‑zë 'wo zun wo kpiö 'gü, 'yö 'wo 'tɔ ꞊loo‑ ‑bha. ꞊Dhɛ 'wo wo bo, 'yö 'wo nu 'zü ‑deewo Zedhizadhɛmö "kɛɛ kö ‑a ‑nu zuë" ꞊nii ꞊ya ‑da ‑tɛkpɛ ‑tɛkpɛdhö.
LUK 24:53 'Ö go yö ‑zë 'gü, ‑wo ‑gun Atanna ‑dhɔkëgükɔ 'ö Zedhizadhɛmö bha‑ 'gü yi ꞊gban "pɛpɛ 'ka 'ö 'wo ꞊gloo‑ 'tɔ bhɔ ‑sü ‑bha.
JOH 1:1 'Ö gun kö "sɛ waa‑ dhang‑ 'waa 'dhö kö (Atanna Gbö) 'ö‑ ‑Wʋ 'ka bha yö ‑zë ‑yö ‑dhö kö wɛng‑ ‑wo wo 'ko "piʋ̈. ‑Yö ‑gun 'dhö ‑kpɛawo 'pö (꞊dhɛ Atanna 'dhö), yöö ‑dɩ 'pö ‑yö Atanna ꞊në‑ 'ka.
JOH 1:3 Pë ‑nu 'ö Atanna ‑ya ‑kë, ‑ya ‑nu ‑kë yö ꞊në‑ ‑kɔ 'ka. Pë "pɛpɛ 'ö‑ ‑kë, ‑a 'bha 'yii kë "wɛɛwɛɛ kö ‑a Gbö 'kö bha 'yaa ‑mü.
JOH 1:4 Yö ꞊në ‑tosɛa ꞊dede ‑gɔgodhɛ 'ka. Yö 'ö "dhʋ̈ bha 'zü ꞊në ‑dhɛpuudhɛ nu mɛ "bhɩɩ‑ ‑nu ‑dhɛ.
JOH 1:5 Yö 'ö bha ꞊në‑ ‑kë 'yö 'mɛ 'wo ‑dhɛtiidhɛ 'gü 'wo ‑dhɛ yö, "kɛɛ 'yö 'wii 'dhang bho‑ "dhiʋ̈.
JOH 1:6 'Yö Atanna 'dhö mɛ do bɔ, 'mɛ bha ꞊në 'wo‑ ‑dhɛ Zan.
JOH 1:7 Zan bha ꞊në nu kö ‑yö "sɛɛdhɛ kë ‑dhɛpuudhɛ bha‑ ‑bha. Kë "dhʋ̈ kö mɛ "bhɩɩ‑ ‑nu ‑wo 'dhang bho ‑dhɛpuudhɛ bha‑ "dhiʋ̈ dhiang ‑nu 'ö Zan gun‑ zë sië bha‑ ‑wɔn 'gü.
JOH 1:8 Yöö ꞊dede ‑zë 'yaa gun ‑dhɛpuudhɛ bha‑ 'ka, "kɛɛ ‑yö ‑gun 'mɛ 'ö Atanna ‑ya bɔ kö ‑yö "sɛɛdhɛ kë ‑dhɛpuudhɛ bha‑ ‑bha ꞊në‑ 'ka.
JOH 1:9 ‑Dhɛpuudhɛ 'ö "dhʋ̈ bha ꞊në gun ‑dhɛpuudhɛ ꞊dede, 'ö nu "kpʋng ꞊taa kö ‑yö ‑dhɛ "pʋ mɛ "pɛpɛ ꞊gban ‑ta ‑a 'ka.
JOH 1:10 Yesu 'ö Atanna ‑wʋ 'ka "dhʋ̈ bha ‑yö ‑gun "kpʋng ꞊taa. Atanna ‑yö "kpʋngtaadhɛ ‑pë ‑kë yö ꞊në‑ ‑kɔ 'ka, "kɛɛ 'sa "kpʋngtaamɛ ‑nu 'wii‑ dɔ.
JOH 1:11 'Yö dho ö ‑dɩ ‑gɔ "sɛ 'gü, 'yö‑ ‑gɔ "sɛ 'gü ‑mɛ ‑nu 'wii ‑kɔ ‑ya ‑bha.
JOH 1:12 "Kɛɛ yö ‑zë ꞊gban 'gü, mɛ ga 'bha ‑wo 'dhang ‑bho ‑a "dhiʋ̈, 'ö 'wo ‑kɔ ‑ya ‑wɔn ‑bha. 'Mɛ 'wo "dhʋ̈ bha 'yö‑ ‑kë kö ‑wo kë Atanna ‑bha 'në 'ka.
JOH 1:13 "Kɛɛ ‑a ‑nu ‑bha ‑kë Atanna ‑bha 'në 'ka ‑kɔ ‑yö ‑dɩ ‑ta, 'yaa ꞊dhɛ mɛ "bhɩɩ‑ ‑nu ‑bha 'ö‑ ‑nu dë (waa‑ dhe) 'dhö ‑dhö bha‑ 'dhö; Atanna ꞊në‑ ‑nu gba ‑tosɛa ‑dee 'ka.
JOH 1:14 Yö 'ö ‑kë Atanna ‑wʋ 'ka "dhʋ̈ bha, 'yö dho 'ö ‑kë mɛ "bhɩɩ‑ 'ka, 'yö nu 'ö ‑tosɛa ‑kë kwa kpö 'gü, Atanna ‑bha "klʋsëdhɛ ꞊gban "pɛpɛ waa‑ tɛanwɔn 'ö ‑gban ‑bha bha‑ 'ka, 'yö kwa "yan 'dhö ‑da ‑a ‑bha 'tɔbhɔdhe kë 'kpiisü 'gü. ‑Yö ‑gun 'në ga do 'ka ö Dë ‑gɔ, 'yö gun‑ ‑bha 'tɔbhɔdhe ‑zɔn sië.
JOH 1:15 Yö ꞊në Zan ‑ya ‑dhiang zë 'ö‑ pö: «'Mɛ 'a‑ pö ka ‑dhɛ ꞊dhɛ ‑yö nu sië n zian‑ ‑ta, "kɛɛ yö ‑zë ‑yö ꞊bhlëësü ma ‑zë n ‑bha, ‑a ‑gɛn ‑mü ꞊dhɛ 'ö gun kö 'maa 'dhö kö yö ‑zë ‑yö ‑dhö bha.»
JOH 1:16 Kwaa ‑dɩ 'pö kwa kwa ‑bha ꞊trɔɔn ‑slɔɔ ‑a ‑bha "klʋsëdhɛ ‑ziisü bha‑ 'gü, 'ö‑ ‑wɔn 'gü Atanna ‑bha 'dhuë‑ ‑yö dɔ 'ko ‑gɛn "piʋ̈ kwa ‑gɔ.
JOH 1:17 'Ö gun yi 'bha 'ka, Atanna ‑yö bɔ Moizö ꞊në‑ ‑ta 'yö 'tɔng‑ nu kwa ‑dhɛ. "Kɛɛ ‑a ‑bha "klʋsëdhɛ waa‑ tɛanwɔn 'ö ‑gban ‑bha bha, ‑yö ‑bɔ Yesu Klisi ꞊në‑ ‑ta 'yö nu kwa "piʋ̈ ꞊dɛɛ ‑yën ya‑ 'gü.
JOH 1:18 Mɛ 'bha 'yii "yan ‑kpan ‑bha do, "kɛɛ ‑a Gbö doseng 'ö Atanna 'ka ('pö ꞊dhɛ ‑a 'dhö), 'ö ö Dë "sɔɔ yi ꞊gban "pɛpɛ 'ka bha ꞊në‑ ‑zɔn mɛ "bhɩɩ‑ ‑nu ‑dhɛ.
JOH 1:19 (‑A "tʋ̈ng bha‑ 'gü kö Zan ‑yö mɛ ‑go 'wɔn yaa 'gü ‑zu bho sië "yiga 'wo‑ Zuudɛn ‑kë bha‑ ꞊bhaa.) ꞊Dhɛ 'ö Zuifö ‑nu ‑bha ‑yamɛ ‑nu ꞊wa ‑ya Zedhizadhɛmö ꞊waa‑ ma "dhʋ̈, 'yö 'wo "saabhomɛ ‑nu waa‑ Dhevi ‑gɔ 'kɔɔmɛ ‑nu bɔ Zan dhɛɛ" 'kpɔ ‑dhɛ 'gü. ꞊Dhɛ 'ö ꞊wa nu ꞊wa ꞊loo‑ ‑dhɛ 'gü, 'yö 'wo‑ dhɛɛ" kpɔ 'wo‑ pö: «Bhi 'i ya de suu ‑mü i 'ka?» ꞊Dhɛ 'ö ꞊waa‑ pö "dhʋ̈, 'yö Zan ‑yö ö ‑bha "sɛɛdhɛ ‑kë ‑a ‑nu ‑dhɛ "puu 'ka mɛ ꞊gban "pɛpɛ wëëdhö mü 'ö‑ pö: «Ma ‑zë Atanna ‑bha ‑Yamɛ ('ö‑ "plüün bho bha) 'yaa ‑mü n 'ka.»
JOH 1:21 'Yö 'wo‑ dhɛɛ" 'bha kpɔ 'zü 'wo‑ pö: «"Kɛɛ de ‑mü i 'ka 'sa? "Ɛɛn (Atanna ‑wʋdhiʋ̈loomɛ) Edhi ('ö gun yi 'bha 'ka bha) ‑ee?» 'Yö Zan ‑ya pö: «‑Abin! Edhi 'yaa ‑mü n 'ka!» 'Yö 'wo‑ pö: «"Ɛɛn Atanna ‑wʋdhiʋ̈loomɛ 'ö‑ bɔ ‑wɔn "plüün bho yi ‑dhɛ 'ö 'yi ‑ya ‑gɔ bha yö ‑mü i 'ka ‑ee?» 'Yö Zan ‑ya pö 'zü: «‑Abin.»
JOH 1:22 ꞊Dhɛ 'ö ꞊yaa‑ pö "dhʋ̈, 'yö 'wo‑ pö‑ ‑dhɛ: "Kɛɛ de ‑mü i 'ka 'sa? ‑Bhö i ‑dɩ ‑zɔn yi ‑dhɛ, ‑a ‑gɛn ‑mü ꞊dhɛ ‑a ‑dhɛa ‑bha ꞊dhɛ 'yi 'dho ‑wʋ do 'ka 'mɛ 'wo yi bɔ bha‑ ‑nu ‑dhɛ.»
JOH 1:23 'Yö Zan ‑ya ‑yɔ bɔ‑ ‑nu ‑gɔ 'ö‑ pö: «Ma ‑zë 'mɛ 'ö ‑wɩ "wla ‑ta ꞊dhɛ ‑kɔ 'ö Atanna ‑wʋdhiʋ̈loomɛ Ezai ‑ya pö‑ 'ka ‑a 'dhö ꞊dhɛ: ‹‑Ka ka Dëmɛ ‑bha zian ‑ba kö 'ka‑ du ꞊gban "pɛpɛ bho‑ 'gü, kö 'ka‑ ‑ta ‑dhɛ ‑pë kë› bha yö ‑mü n 'ka.»
JOH 1:24 'Mɛ 'wo‑ ‑nu bɔ "dhʋ̈ bha Fadhiziɛn ‑nu ‑gun ‑nu kpö 'gü.
JOH 1:25 ꞊Dhɛ 'ö ꞊wa Zan ‑wʋ ma ꞊dhɛ ‑kɔ bha‑ 'dhö, 'yö 'wo‑ dhɛɛ" kpɔ 'pö 'wo‑ pö: «I‑ ‑pö Atanna ‑bha ‑Yamɛ 'ö‑ "plüün bho kwa ‑dhɛ bha 'yaa ‑mü i 'ka, "ɛɛn Edhi 'yaa ‑mü i 'ka, "ɛɛn Atanna ‑wʋdhiʋ̈loomɛ 'yi ‑ya ‑gɔ bha 'yaa ‑mü i 'ka, "kɛɛ ‑yö ‑kë ꞊dhɛ 'sa 'yö 'i "zu ‑zë bho?»
JOH 1:26 'Yö Zan ‑ya ‑yɔ bɔ 'pö‑ ‑nu ‑gɔ 'ö‑ pö: «Ma ‑zë a mɛ ‑zu "yi ꞊në‑ 'ka, ‑a ‑gɛn ‑mü ꞊dhɛ 'mɛ ('kwa ‑ya ‑gɔ bha ‑yö ka kpö 'gü),
JOH 1:27 ‑yö ‑dho nu n zian‑ ‑ta, "kɛɛ 'kii‑ dɔ ꞊kö. ‑A ‑gɛn 'gü ‑sabha ‑zian fië‑ ‑dhö ma ‑zë n 'ka.
JOH 1:28 'Wɔn "pɛpɛ 'ö "dhʋ̈ bha ‑yö ‑kë "dhʋ̈ ‑dhɛ 'wo‑ Betani ‑dhɛ ‑kë, 'ö "yi 'wo‑ Zuudɛn ‑kë bha‑ ꞊taama, ‑dhɛ 'ö Zan gun mɛ ‑go 'wɔn yaa 'gü ‑zu bho sië mü bha ꞊në‑ 'gü.
JOH 1:29 ꞊Dhɛ 'ö‑ ‑ta ‑dhɛ ꞊ya ꞊kpaɔ, 'yö Zan ‑yö Yesu yö kö ‑yö nu sië ö ‑zian 'ka. 'Yö‑ pö: «‑Ka ‑dhɛ ‑ga, "bhlaanë 'ö Atanna ‑ya bɔ kö ‑ya kë "saa‑ 'ka kö mɛ ꞊gban "pɛpɛ ‑bha 'wɔn yaa ‑mawɔn ‑yö 'to bha yö ꞊nɛ!
JOH 1:30 Yö ꞊në 'a‑ ‑dhiang zë ka ‑dhɛ 'a‑ pö: «Mɛ do 'bha ‑yö ‑dho nu n zian‑ ‑ta, ‑a ‑duɛ ‑yö 'kpii‑ 'ö ‑ziö n ‑ma ‑ta, ‑a ‑gɛn ‑mü ꞊dhɛ 'ö gun kö 'mii bhɔ ꞊kö kö yö ‑zë ‑yö ‑dhö bha.
JOH 1:31 "Kɛɛ "tʋ̈ng 'a gun‑ pö sië‑ 'ka ka ‑dhɛ "dhʋ̈ bha kö 'mii‑ dɔ ꞊kö. Ma ‑zë a mɛ ‑go 'wɔn yaa 'gü ‑zu bho "yi ꞊në‑ 'ka, kë "dhʋ̈ kö 'a yö ꞊në‑ ‑zɔn Izraɛdhö ‑mɛ ‑nu ‑dhɛ.»
JOH 1:32 'Yö Zan ‑ya pö 'zü: «Mang ꞊dede n "yan ‑yö ‑kpan Atanna ‑bha 'Nii‑ "slʋ̈ʋ̈slʋ̈ ‑bha kö ‑yö 'go sië dhang‑ 'gü 'ö ꞊lɔɔ‑ ‑ta ꞊dhɛ ‑tong 'dhö 'ö to 'mü.
JOH 1:33 A‑ ‑pö ka ‑dhɛ ꞊dhɛ ‑a "tʋ̈ng bha‑ 'gü kö 'mii‑ dɔ ꞊kö 'kpakpadhö. "Kɛɛ Atanna 'ö n bɔ ‑go 'wɔn yaa 'gü ‑zu bho ‑dhɛ 'gü "yi 'ka bha ꞊në‑ pö n ‑dhɛ ꞊dhɛ: «'Mɛ 'i dho i "yan ‑kpan ma 'Nii‑ "slʋ̈ʋ̈slʋ̈ ‑bha kö ‑yö 'go sië dhang‑ 'gü 'ö ꞊lɔɔ‑ ‑ta 'ö to 'mü bha ꞊në dho mɛ pa 'Nii‑ "slʋ̈ʋ̈slʋ̈ 'ka.».
JOH 1:34 'Yö Zan ‑ya pö: «A‑ ‑pö ka ‑dhɛ ꞊dhɛ a kë n "yan ‑kpan ‑bha ꞊dhɛ ‑kɔ bha‑ 'dhö tɛan‑ 'ka. 'Wɔn 'ö‑ ‑wɔn 'gü 'yö 'a‑ pö ka ‑dhɛ ꞊dhɛ yö ꞊në Atanna Gbö 'ka bha 'yö bha.»
JOH 1:35 ꞊Dhɛ 'ö‑ ‑tadhɛ 'bha ꞊ya ꞊kpaɔ, kö Zan ‑yö ‑tun ‑dhɛ do bha‑ 'gü waa‑ ‑bha ꞊klangdhiʋ̈ ‑nu ꞊plɛ 'dhö,
JOH 1:36 'yö ö "yan ‑kpan 'zü Yesu ‑bha kö ‑yö ziö sië. 'Yö‑ pö: «"Saa‑ "bhlaanë 'ö Atanna ‑ya bɔ (kö ‑yö mɛ "bhɩɩ‑ ‑nu ‑bha 'wɔn yaa bho‑ ‑nu ‑bha) bha yö ꞊nɛ!»
JOH 1:37 ꞊Dhɛ 'ö Zan ‑bha ꞊klangdhiʋ̈ ‑nu ꞊plɛ bha ꞊waa‑ ‑wʋ ma ꞊dhɛ ‑kɔ bha‑ 'dhö, 'yö 'wo ‑ziö Yesu ꞊keng‑.
JOH 1:38 ꞊Dhɛ 'ö ꞊ya ‑kë "dhʋ̈, 'yö Yesu ‑yö ꞊slëë ö 'gü, 'yö "yan ‑kpan ‑a ‑nu ‑bha kö ‑wa ꞊keng‑, 'yö‑ pö‑ ‑nu ‑dhɛ: «Kwa‑ ma 'mü?» 'Yö 'wo‑ ‑yɔ bɔ‑ ‑gɔ 'wo‑ pö: «Dhabi, i ꞊yëë ‑yö 'mɛ?» (꞊Waa‑ pö «Dhabi» ‑a ‑nu ‑wʋ 'gü kö ‑wa pö «n Dëmɛ».)
JOH 1:39 'Yö‑ ‑yɔ bɔ 'pö‑ ‑nu ‑gɔ 'ö‑ pö: «‑Ka ‑kwa 'dho kö 'ka‑ ‑dhɛ dɔ!» 'Yö 'wo ‑ziö 'wo dho. 'Yö 'wo ‑kpan ‑a ‑dhɛ ‑bha, 'yö 'wo ‑dhɛ ꞊kpaɔ ‑yi 'dhɛ bha‑ ‑kë ‑a "piʋ̈ mü. (‑a ‑gɛn ‑mü ꞊dhɛ ‑yö ‑kë "dhʋ̈ 'yënng‑ ‑dho bhaa 'ka).
JOH 1:40 Mɛ ꞊plɛ 'wo "tʋ to Zan ‑wʋ bha‑ ‑bha 'wo ‑ziö Yesu ꞊keng‑ bha, 'yö‑ mɛ do‑ ‑kë Andre 'ö ‑kë Simɔ Piɛdhö dheebhang 'ka bha‑ 'ka.
JOH 1:41 ꞊Dhɛ 'ö ꞊ya kë "dhʋ̈, Andre ‑yö ‑kpan ö dheebhang Simɔ ꞊në‑ ‑bha ꞊kö ‑blɛɛsü 'yö‑ pö‑ ‑dhɛ: «Yi ‑zë 'ya ‑kpan Atanna ‑bha ‑Yamɛ 'ö‑ ‑wɔn 'dhö 'dhö bha‑ ‑bha!» (Yö ꞊në 'wo‑ ‑dhɛ glɛkö ‑wʋ 'gü Klisi bha.)
JOH 1:42 'Yö dho Simɔ 'ka Yesu "piʋ̈. ꞊Dhɛ 'ö Yesu ꞊yaa‑ yö, 'yö‑ ‑ga "sɛnngdhö 'yö‑ pö: «Bhi ꞊në 'wo i ‑dhɛ Simɔ, 'yö 'i ‑kë Zonasö gbö 'ka, "kɛɛ ‑wo ‑dho i ‑dhɛ ꞊taamasü ya‑ 'gü Sefasö (꞊waa‑ pö "dhʋ̈ kö ‑wa ‑pö Piɛdhö, "ɛɛn 'zü ‑gwë).
JOH 1:43 ꞊Dhɛ 'ö‑ ‑ta ‑dhɛ 'bha ꞊ya ꞊kpaɔ, kö ‑yö Yesu "piʋ̈ ꞊dhɛ 'ö 'dho Gadhidhe ‑sɛ 'gü, 'yö ‑kpan Fidhipö ‑bha, 'yö‑ pö‑ ‑dhɛ: «‑Bhö nu kö 'i ‑da n ꞊keng‑!»
JOH 1:44 Fidhipö 'ö "dhʋ̈ bha ‑yö ‑go 'pödhɛ 'wo‑ ‑dhɛ Bɛsaida 'ö Andre waa‑ Piɛdhö 'wo go‑ 'gü bha ꞊në‑ 'gü.
JOH 1:45 ꞊Dhɛ 'ö ꞊ya kë "dhʋ̈, 'yö Fidhipö ‑yö ‑kpan Natanaɛɛ ‑bha 'yö‑ pö‑ ‑dhɛ: «'Mɛ 'ö Moizö ‑ya ‑dhiang zë 'tɔng‑ 'sëëdhɛ 'gü, 'ö Atanna ‑wʋdhiʋ̈loomɛ ‑nu ‑dɩ 'pö 'wo‑ ‑dhiang zë yi 'bha 'ka bha 'ya ‑kpan ‑bha. ‑Wa ‑dhɛ Yesu, Zosɛfu gbö, ‑yö ‑go Nazadhɛtö.»
JOH 1:46 'Yö Natanaɛɛ ‑ya pö‑ ‑dhɛ: «Pë ‑tiandhö 'bha‑ ‑mɔɔ ‑bha 'ö go Nazadhɛtö 'pö ‑ee?» 'Yö Fidhipö ‑ya ‑yɔ bɔ‑ ‑gɔ 'ö‑ pö: «‑Bhö nu ‑zë wo ꞊zɔɔ!»
JOH 1:47 ꞊Dhɛ 'ö Yesu ꞊ya Natanaɛɛ yö kö ‑yö nu sië ö ‑zian 'ka, 'yö‑ pö‑ ‑bu 'gü 'ö‑ pö: «Izraɛdhö mi ꞊dede ꞊nɛ, pö 'aa‑ ‑bha!»
JOH 1:48 'Yö Natanaɛɛ ‑ya dhɛɛ" kpɔ 'ö‑ pö: «I n dɔ ‑kɔ ‑kë ꞊dhɛ?» 'Yö Yesu ‑ya pö‑ ‑dhɛ: «"Sanni Fidhipö ‑yö i ‑dhɛ, "tʋ̈ng 'i gun ‑ya sië‑ 'ka figö ‑dhü ꞊wlöö bha kö n "yan ‑yö i ‑bha.»
JOH 1:49 ꞊Dhɛ ꞊yaa‑ pö "dhʋ̈, 'yö Natanaɛɛ ‑ya pö‑ ‑dhɛ: «N Dëmɛ, Atanna Gbö ‑mü i 'ka ꞊dedewo tɛan‑ 'ka, 'ma‑ ‑dhɛ yö, Izraɛdhö ‑mɛ ‑nu ‑bha ‑gblüdë ‑mü i 'ka!»
JOH 1:50 'Yö Yesu ‑ya ‑yɔ bɔ‑ ‑gɔ 'ö‑ pö: «‑A pö 'a‑ wo i ‑dhɛ ꞊dhɛ n "yan ‑yö ‑gun i ‑bha kö i ‑ya sië figö ‑dhü ꞊wlöö bha 'yö 'i 'dhang bho n "dhiʋ̈ bha "kɛɛ ('bha 'to n ꞊keng‑), i "yan‑ ‑dho ‑da 'wɔn "gblʋ̈gblʋ̈ ‑nu 'wo ‑ziö ‑a 'dhɛ 'kö bha‑ ‑ta ‑a ‑dhɛ 'gü!»
JOH 1:51 'Yö‑ pö‑ ‑dhɛ 'bha wo 'zü 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ dhang‑ "dhi‑ ‑dho "pʋ 'ö 'ka‑ ‑dhɛ yö kö Atanna ‑bha "kië ‑nu ‑wo ‑da sië 'wo ꞊lɔɔ mang Mɛgbömɛ n ‑ta.»
JOH 2:1 ꞊Dhɛ 'ö ꞊ya kë "dhʋ̈, 'ö ‑dhɛkpaɔyi ꞊ya ziö ꞊plɛ ‑a ‑yaaga ‑naa bha‑ 'ka kö ‑wo dhedɔ troo do kë sië 'pödhɛ 'wo‑ ‑dhɛ Kana 'ö Gadhidhe ‑sɛ 'gü bha‑ 'gü, kö Yesu dhe ‑yö mü, 'yö 'wo Yesu waa‑ ö bha ꞊klangdhiʋ̈ ‑nu ‑a ‑nu ‑dhɛ troo bha‑ ‑ta.
JOH 2:3 ꞊Dhɛ 'ö ꞊wa ‑drɔɔ mü 'ö‑ ꞊ya yën. 'Yö Yesu dhe ‑ya pö‑ ‑dhɛ: «‑A ‑nu ‑bha we bha ꞊ya yën ‑wa!»
JOH 2:4 'Yö Yesu ꞊ya ‑yɔ bɔ‑ ‑gɔ 'ö‑ pö: «"Kɛɛ kö ma ‑zë 'a‑ kë ꞊dhɛ, dhebhɔnë, kö n ‑bha "tʋ̈ng 'yii ꞊loo ꞊kö?»
JOH 2:5 ꞊Dhɛ 'ö ꞊ya kë "dhʋ̈ 'yö‑ dhe ‑ya pö gwëëzë ‑nu ‑dhɛ 'ö‑ pö: «Pë "ʋʋ pë 'ö dho‑ pö ka ‑dhɛ ‑kaa kë ꞊zɔɔ 'dhɛ!»
JOH 2:6 Zuifö ‑nu ‑bha ‑zu 'ka "yi 'bha 'ö‑ ‑nu wɔ ‑kɔ 'gü bha‑ ‑ya 'gü pë "fië 'ö ‑gwë 'ka, 'ö‑ ‑yan do ‑yö ꞊mɔɔ ‑sangdhe këng do ‑nu ‑bha bha‑ "saɔdo ‑yö ‑gun ‑dhɛ bha‑ 'gü.
JOH 2:7 'Yö Yesu ‑ya pö gwëëzë ‑nu bha‑ ‑nu ‑dhɛ: «‑Ka pë "fië ‑nu bha‑ "dhiʋ̈ pa "yi 'ka!» 'Yö 'wo‑ ꞊gban "pɛpɛ "dhiʋ̈ pa "klënklëndhö.
JOH 2:8 ꞊Dhɛ 'ö ꞊waa‑ kë "dhʋ̈, 'yö Yesu ‑ya pö‑ ‑nu ‑dhɛ: «‑Kaa 'bha 'sü kö 'ka 'dho‑ 'ka troo ‑gɔmɛ ‑dhɛ!» 'Yö 'wo‑ 'bha sü 'wo dho‑ 'ka‑ ‑dhɛ.
JOH 2:9 'Yö troo ‑gɔmɛ bha 'ö "yi 'ö Yesu ‑ya ‑gla we 'gü bha‑ din ‑ga. Yö ‑zë we bha 'yaa gun‑ 'godhɛ dɔ sië "kɛɛ kö gwëëzë ‑nu 'kö 'wo‑ "dhiʋ̈ ‑wlö sië bha wo ‑zë ‑wa ‑dɔ. 'Yö troo ‑gɔmɛ bha 'ö dhemɛdë ‑dhɛ,
JOH 2:10 'yö‑ pö‑ ‑dhɛ: «('Yö‑ we 'dhɛ 'kö ya ‑yö ‑go 'mɛ 'yö‑ din‑ ‑kë ‑së "dhʋ̈) we din ‑së ꞊në mɛ ꞊gban 'wo‑ ‑dɔ ‑dhɛng ‑dhɛ ‑blɛɛsü 'yö ꞊wa 'kën 'yö 'wo gun ‑na ‑a 'dhɛ 'ö‑ din ꞊ya 'go zian ‑ta bha‑ nu ‑a ‑nu ‑dhɛ, "kɛɛ bhi ‑zë we 'dhɛ‑ din ꞊ya 'go zian ‑ta ꞊në 'i‑ nu ‑blɛɛsü 'yö 'i gun ‑na ‑a ‑së nu ꞊taama ‑wa!»
JOH 2:11 Yesu ‑yö ö ‑bha "dhabhliwɔn ‑blɛɛsü ‑kë Kana ‑pö 'ö Gadhidhe ‑sɛ 'gü bha‑ 'gü ‑kɔ bha ꞊në‑ 'gü, 'yö ö ‑bha 'tɔbhɔdhe ‑zɔn 'ka‑ ‑nu ‑dhɛ. 'Yö‑ ‑bha ꞊klangdhiʋ̈ ‑nu ‑bha 'dhang ‑bho ‑a "dhiʋ̈ ‑sü 'bha 'dhö ‑da 'gü.
JOH 2:12 ꞊Dhɛ 'ö ꞊ya kë "dhʋ̈ 'yö Yesu 'dhö, ‑a dhe 'dhö, ‑a dheebhang ‑nu 'dhö, ‑a ‑bha ꞊klangdhiʋ̈ ‑nu 'dhö, 'yö 'wo dho 'pödhɛ 'wo‑ ‑dhɛ Kapɛɛnaɔmö bha‑ 'gü 'yö 'wo ‑dhɛkpaɔyi 'bha ‑kë mü.
JOH 2:13 ꞊Dhɛ 'ö gun kö Zuifö ‑nu ‑bha troo 'wo‑ ‑dhɛ Pakö bha‑ yi 'yaa ꞊gblɛɛn 'zü, 'yö Yesu ‑yö dho Zedhizadhɛmö.
JOH 2:14 ꞊Dhɛ 'ö ꞊ya ‑da "kwɛandhɛ 'ö Atanna ‑dhɔkëgükɔ 'dhö‑ ‑bha bha‑ 'gü, 'yö ‑kpan ‑du ‑nu oo, "bhlaa ‑nu oo, ‑tong ‑nu ('ö Zuifö ‑nu ‑wa dhɔ kö ‑wo "saa‑ bho‑ 'ka Atanna ‑dhɔkë 'gü ‑kɔ 'gü bha‑) "dhɔɔdɔmɛ ‑nu ‑bha mü, waa‑ 'mɛ 'wo nu 'wëë‑ fië bho 'wëë‑ 'dhɛ 'ö Atanna ‑dhɔkëgükɔ 'gü mü ‑bha ‑bha bha‑ ‑nu 'dhö 'pö kö ‑wo ‑ya sië woo‑ ‑tabɛdhi ‑nu ‑bha.
JOH 2:15 ꞊Dhɛ 'ö ꞊ya ‑kpan ‑nu ‑bha ꞊dhɛ ‑kɔ bha‑ 'dhö, 'yö ö ‑kɔ ‑da bhiëga 'bha 'gü 'yö‑ ‑kë ꞊dhɛ ꞊klangga 'dhö, 'yö‑ ‑nu ꞊gban "pɛpɛ ‑kë ‑dhɛ bha‑ 'gü waa‑ ‑nu ‑bha ‑du ‑nu waa‑ "bhlaa ‑nu 'dhö, 'yö 'wëë‑ fiëbhomɛ ‑nu ‑bha 'wëë‑ ꞊gban ꞊wɛnng, 'yö‑ ‑nu ‑bha ‑tabɛdhi ‑nu "dhiʋ̈ ‑zuö,
JOH 2:16 'yö‑ pö ‑tong "dhɔɔdɔmɛ ‑nu ‑dhɛ: «Pë ‑nu bha ‑kaa ‑nu bho bha, 'ka 'dho n Dë ‑bha 'kɔ kë kaa‑ "dhɔɔ ‑kɔ 'ka!»
JOH 2:17 ꞊Dhɛ 'ö‑ ‑bha ꞊klangdhiʋ̈ ‑nu ꞊waa‑ ma "dhʋ̈, 'yö‑ ‑nu ‑zʋ ‑yö ‑bö ‑wʋ 'ö ‑bɛn zë ‑sü 'ka Atanna ‑bha 'sëëdhɛ 'gü 'ö‑ pö: ‹Atanna ‑wɔn ‑yö ‑dɔ n ‑zʋ ‑bha ꞊dhɛ pɛng 'dhö› bha‑ 'ka.»
JOH 2:18 ꞊Dhɛ 'ö ꞊ya bo ‑a ‑nu "piʋ̈ kë ‑sü 'ka ꞊dhɛ ‑kɔ bha‑ 'dhö, 'yö Zuifö ‑nu ‑gɔmɛ ‑nu 'wo‑ dhɛɛ" kpɔ 'wo‑ pö: «‑A kë 'i‑ wo "dhʋ̈ bha‑ 'klɔɔ‑ ‑mü ‑më 'ka? ‑Më ꞊në dho ꞊mɔɔ‑ ‑bha kö ‑ya ‑zɔn yi ‑dhɛ ꞊dhɛ ‑a ‑dhɛa ‑bha ꞊dhɛ 'i‑ kë "dhʋ̈, ‑a ‑pë ‑zɔn yi ‑dhɛ!»
JOH 2:19 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «‑Ka Atanna ‑dhɔkëgükɔ ya‑ 'wü, a ‑dho dɔ ‑dhɛkpaɔyi ‑yaaga 'ka.»
JOH 2:20 'Yö 'wo‑ pö‑ ‑dhɛ: «'Ö ‑më! 'Kɔ 'yi‑ dɔ ‑kwɛ ‑kaɔng ‑yiisiö ga "saɔdo 'ka ya bhi ‑zë i‑ ‑pö i ‑dho dɔ ‑dhɛkpaɔyi ‑yaaga 'ka ‑ee?»
JOH 2:21 'Sa Atanna ‑dhɔkëgükɔ 'ö Yesu ‑ya pö "dhʋ̈ bha pë "wɛɛ 'bha 'yaa ‑mü, ‑yö ‑wɩ ö ‑dɩ ꞊në‑ 'ka.
JOH 2:22 ꞊Dhɛ 'ö‑ yi ꞊ya ꞊gwëë 'ö Yesu ꞊ya ga 'ö ꞊ya ‑bö (‑a ‑dhɛkpaɔyi ‑yaaga ‑naa bha‑ 'ka), 'yö‑ ‑bha ꞊klangdhiʋ̈ ‑nu ‑zʋ 'dhö ‑bö ꞊dhɛ ‑yö kë‑ pö wo ‑dhɛ "dhʋ̈ yi do 'ka, 'yö 'wo 'dhang bho Atanna ‑wʋ 'ö ‑bɛn zë ‑sü 'ka 'sëëdhɛ 'gü waa‑ 'dhɛ 'ö Yesu ‑ya pö 'pö bha‑ ‑nu "dhiʋ̈.
JOH 2:23 "Tʋ̈ng 'ö Yesu gun‑ 'ka Zedhizadhɛmö Pakö troo ‑ta bha, ‑yö kë "dhabhliwɔn ‑nu ‑kë 'ö mɛ 'gbɛ 'wo 'dhang bho‑ "dhiʋ̈ ‑a ‑wɔn 'gü,
JOH 2:24 "kɛɛ Yesu ‑zë 'yii 'dhang bho‑ ‑nu "dhiʋ̈, ‑a ‑gɛn ‑mü ꞊dhɛ 'ö gun "dhʋ̈ kö ‑ya nu zuëpiʋ̈wɔn ‑dɔ 'kpakpadhö.
JOH 2:25 ‑A ‑mawɔn 'yaa gun‑ ‑bha kö ‑wo mɛ sɔng ‑gɛn dɔ‑ ‑dhɛ, ‑a ‑gɛn ‑mü ꞊dhɛ ‑yö mɛ "bhɩɩ‑ ‑nu zuëpiʋ̈wɔn ‑dɔ.
JOH 3:1 ꞊Dhɛ 'ö yi do 'ka 'yö Zuifö ‑nu ‑bha ‑gɔmɛ do 'wo‑ ‑dhɛ Nikodɛmö, "kɛɛ 'ö ‑kë Fadhiziɛn 'ka,
JOH 3:2 'yö nu Yesu "piʋ̈ gbeng, 'yö‑ pö‑ ‑dhɛ: «N Dëmɛ, yi‑ 'wɔn ‑dɔ ꞊dhɛ Atanna ꞊në i bɔ kö 'i mɛ "bhɩɩ‑ ‑nu draan‑; ‑a ‑gɛn ‑mü ꞊dhɛ "dhabhliwɔn suu ‑nu 'i‑ ‑kë sië ya mɛ 'bha ‑kɔ 'yaa ꞊mɔɔ‑ ‑bha kö ‑ya kë kö Atanna 'yaa‑ ‑mɛ "piʋ̈.»
JOH 3:3 ꞊Dhɛ 'ö ꞊yaa‑ pö "dhʋ̈, 'yö Yesu ‑ya pö‑ ‑dhɛ: «A‑ ‑pö i ‑dhɛ tɛan‑ ꞊dede 'ka ꞊dhɛ: Mɛ "ʋʋ mɛ 'ö 'bhii bhɔ ‑deewo, 'bhii 'dho ‑da Atanna ‑bha ‑gblüdëdhɛkëmɛ ‑nu ‑bhiëë 'gü.»
JOH 3:4 'Yö Nikodɛmö ‑ya pö‑ ‑dhɛ: «Mɛ 'bha‑ ‑mɔɔ ‑bha 'ö bhɔ 'ö go mü 'zü ‑deewo 'ö ‑da ö dhe "gblʋ̈ʋ̈‑ ‑ee? "Ɛɛn 'bha‑ pö "dhʋ̈ kö i‑ ‑pö ꞊dhɛ?»
JOH 3:5 'Yö Yesu ‑ya ‑yɔ bɔ‑ ‑gɔ 'ö‑ pö: «A‑ ‑pö i ‑dhɛ tɛan‑ ꞊dede 'ka ꞊dhɛ mɛ "ʋʋ mɛ 'ö Atanna 'yii i 'kpɔ ‑deewo "yi waa‑ 'Nii‑ "slʋ̈ʋ̈slʋ̈ ‑kɔ 'ka, 'bhii 'dho ‑da ‑bha ‑gblüdëdhɛ 'gü.
JOH 3:6 ‑A ‑gɛn ‑mü ꞊dhɛ 'mɛ 'ö bhɔ dhe waa‑ gɔn ‑a ‑nu suu 'gü, mɛ ‑dhɛ zuëga ꞊në ‑kë ‑mɛ ‑gɔ; "kɛɛ 'mɛ 'ö Atanna ‑bha 'Nii‑ "slʋ̈ʋ̈slʋ̈ ‑ya ‑gla bha, Atanna zuë" ꞊në ‑kë ‑mɛ ‑zë ‑gɔ.
JOH 3:7 ‑A pö 'a‑ wo i ‑dhɛ ꞊dhɛ ‑a ‑dhɛa ‑bha ꞊dhɛ 'ka bhɔ ‑deewo bha 'ya 'dho i "gblʋ̈ʋ̈dhɛ "muu bho; ‑a ‑gɛn ‑mü ꞊dhɛ
JOH 3:8 Atanna ‑bha 'Nii‑ "slʋ̈ʋ̈slʋ̈ ‑bha mɛ "gla ‑sü bha ‑yö ‑kë ꞊dhɛ "tɛɛ 'ö ‑ziö ꞊sië bha ꞊në‑ 'dhö; ‑yö ‑ziö ‑dhɛ 'ö ‑dhi ‑dhɛ ꞊në‑ 'gü, 'ö mɛ ‑ya vin ma, "kɛɛ 'bhaa‑ 'godhɛ waa‑ 'dhodhɛ 'bha dɔ.
JOH 3:9 'Yö Nikodɛmö ‑ya pö‑ ‑dhɛ: «Yö ‑zë 'zü ‑yö kë ‑kɔ ‑kë ꞊dhɛ?»
JOH 3:10 'Yö Yesu ‑ya ‑yɔ bɔ‑ ‑gɔ 'ö‑ pö: «‑A kë ‑sü kö bhi 'i ‑kë Atanna ‑wʋ ‑gɔmɛ 'kpii‑ do 'ka Izraɛdhö ‑sɛ 'gü bha 'bhaa 'wɔn ‑nu bha‑ ‑nu dɔ bha‑ 'wɔn ‑yö n ‑kɔn.
JOH 3:11 A‑ ‑pö i ‑dhɛ tɛan‑ ꞊dede 'ka ꞊dhɛ 'wɔn 'yi‑ dɔ, 'ö yi "yan‑ ‑yö ‑da 'gü ꞊në 'yi‑ pö ka ‑dhɛ, "kɛɛ 'kaa "wɩ‑ ‑bha kö 'ka 'dhang bho‑ "dhiʋ̈.
JOH 3:12 ꞊Ya kë ꞊dhɛ 'wɔn ‑nu 'wo ‑gban Atanna ‑bha, 'ö "kpʋngtaadhɛ ya‑ 'gü 'ma‑ ‑dhiang zë ka ‑dhɛ 'kii‑ 'gü ma, ‑a 'dhɛ 'kö ‑gban ‑bha dhang‑ 'gü 'ma‑ ‑dhiang zë ka ‑dhɛ ka ‑dho ‑a 'gü ma ‑kɔ kë ꞊dhɛ 'yö 'ka 'dhang bho‑ "dhiʋ̈,
JOH 3:13 "kɛɛ kö mɛ 'bha 'yii 'dho ‑dhɛ 'ö‑ ‑bha dhang‑ 'gü bha‑ 'gü do kö 'yii kë mang Mɛgbömɛ 'a go 'mü 'a ꞊lɔɔ "kpʋng ꞊taa yö bha ma ‑zë n 'ka?»
JOH 3:14 ‑Bhö ‑dhɛ ‑ga, ‑kɔ do 'ö Moizö ‑yö ‑mlɛɛ "blɛɛn‑ ‑kë 'ka yi 'bha 'ka zën 'ka 'ö‑ dɔ "dhü ‑bha "wla ‑ta bha, ‑wo ‑dho Mɛgbömɛ dɔ "dhü bha 'pö ‑kɔ do bha‑ 'gü, kë "dhʋ̈ kö mɛ "ʋʋ mɛ 'ö ꞊ya 'dhang bho‑ "dhiʋ̈, kö ꞊sii 'ö 'yaa yën 'ö Atanna "piʋ̈ bha ‑yö kë‑ ‑mɛ ‑dhɛ 'pö (꞊dhɛ ‑kɔ do 'ö ‑kë 'ka Izraɛdhö ‑mɛ ‑nu kpö 'gü yi 'bha 'ka, 'ö 'mɛ ꞊ya ö "yan "dhiʋ̈ "wlü kö ‑yö ‑mlɛɛ bha‑ ‑ga 'ö gun dha sië bha‑ 'dhö.)
JOH 3:16 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ "bhɩɩ‑ ‑nu ‑dhɔ 'ö Atanna ‑kë ‑a "sinma 'yaa 'dhö. Yö ꞊në‑ ‑wɔn 'gü 'yö 'në ga do 'ö‑ ‑gɔ ‑a bɔ‑ ‑nu ‑dhɛ, kö mɛ "ʋʋ mɛ 'ö dho 'dhang bho‑ "dhiʋ̈, kö ‑tosɛa 'ö 'yaa yën 'ö‑ "piʋ̈ bha ‑yö kë‑ ‑mɛ ‑dhɛ, kö‑ ‑mɛ 'gü 'ya 'dho see‑.
JOH 3:17 Atanna ‑yö ö Gbö ‑bɔ mɛ "bhɩɩ‑ ‑nu ‑dhɛ kö ‑ya ‑nu dha ꞊në‑ wo, 'yii‑ bɔ kö ‑yö za ‑zë dɔ‑ ‑nu ‑bha.
JOH 3:18 "Kɛɛ 'mɛ 'kö 'yii 'dhang bho‑ Gbö bha‑ "dhiʋ̈, kö za ‑ya ‑bha. ‑A ‑gɛn ‑mü ꞊dhɛ kö 'yii 'dhang bho Atanna ‑bha 'në ga do bha‑ "dhiʋ̈. 'Mɛ 'kö ꞊ya 'dhang bho 'pö‑ Gbö bha‑ "dhiʋ̈ kö za ꞊ya 'go‑ ‑mɛ ‑bha.
JOH 3:19 Za kë mɛ ‑bha ‑gɛn ‑mü ‑më 'ka? ‑A ‑gɛn ‑mü ꞊dhɛ (Atanna Gbö 'ö ‑kë) ‑dhɛpuudhɛ 'ka bha ꞊ya nu "kpʋng ꞊taa, "kɛɛ mɛ "bhɩɩ‑ ‑nu këwɔn 'bha 'yaa kë 'ö‑ wo ‑së bha, 'yö 'wo wo ‑to ‑dhɛ tii 'gü ‑sü fië‑ bho ‑dhɛ ‑pʋ wo ‑ta ‑sü ‑bha.
JOH 3:20 ‑A ‑gɛn ‑mü ꞊dhɛ mɛ "pɛpɛ 'wo 'wɔn yaa ‑kë, ‑dhɛpuudhɛ ‑san ‑ya ‑nu ‑kë. 'Waa "wɩ‑ ‑bha kö ‑wo ‑wo zang ‑ta, kë "dhʋ̈ kö‑ ‑nu këwɔn yaa ‑nu bha ‑wo 'to ‑gblɛn 'kpɔ 'gü.
JOH 3:21 "Kɛɛ 'mɛ 'kö Atanna ‑wʋ 'dhö 'pë 'ö‑ pö, 'ö yö ꞊në tɛanwɔn 'ka bha‑ 'gü ‑wɔn ‑kë, ‑a ‑mɛ 'yaa "suʋ̈ ‑dhɛpuudhɛ ‑gɔ. Kë "dhʋ̈ kö ‑wo "yan ‑kpan ö këwɔn ‑së ‑nu ‑bha. ‑A ‑gɛn ‑mü ꞊dhɛ ‑yö ö zü ‑gban Atanna ꞊në‑ 'gü.
JOH 3:22 ꞊Dhɛ 'ö ꞊ya kë "dhʋ̈, 'yö Yesu waa‑ ö ‑bha ꞊klangdhiʋ̈ ‑nu 'wo dho Zude ‑sɛ 'gü, 'yö wɛng‑ ‑nu 'wo to mü "tʋ̈ng 'në 'bha 'ka 'yö 'wo mɛ ‑nu ‑go 'wɔn yaa 'gü ‑zu bho.
JOH 3:23 ‑A "tʋ̈ng bha‑ 'gü kö Zan ‑dɩ 'pö ‑yö mɛ "zu sië 'pö ‑dhɛ 'wo‑ ‑dhɛ ‑dhɛ Ɛnɔ, 'ö ‑ya ‑sü 'ka 'pödhɛ 'wo‑ ‑dhɛ Sadhimö ‑a "sɔɔ bha‑ 'gü; ‑a ‑gɛn ‑mü ꞊dhɛ "yigɔ 'gbɛ ‑yö ‑gun ‑dhɛ bha‑ 'gü. Mɛ ‑nu ‑gun 'dho sië‑ "piʋ̈ (‑dhɛ bha ꞊në‑ 'gü) 'yö‑ ‑nu ‑zu.
JOH 3:24 ('Ö "dhʋ̈ bha kö 'wii Zan ‑da ꞊kö ‑kaso 'gü.)
JOH 3:25 ꞊Dhɛ 'ö ꞊ya kë "dhʋ̈ 'yö Zan ‑bha ꞊klangdhiʋ̈ ‑nu bha‑ mɛ 'bha ‑nu waa‑ Zuifö mi do 'wo ‑ya zaɔdhe ‑da ‑sü ‑bha 'wɔn 'ö ‑gban ‑a ‑nu ‑bha ‑kë "slʋ̈ʋ̈slʋ̈ ‑zu bho ‑sü 'ö‑ ‑nu wɔ ‑kɔ 'gü ‑a ‑bha bha‑ 'gü.
JOH 3:26 ꞊Dhɛ 'ö ꞊ya kë "dhʋ̈ 'yö 'wo dho Zan "piʋ̈ 'yö 'wo‑ pö‑ ‑dhɛ: «Yi Dëmɛ, ‑dhɛ ‑ga, 'mɛ 'i‑ ‑dhiang zë yi ‑dhɛ yuënggü Zuudɛn ꞊taama bha ‑yö mɛ ‑go 'wɔn yaa 'gü ‑zu bho sië, mɛ 'kpii‑ ‑dhɛ ꞊gban ‑wo 'go sië i "piʋ̈ 'wo dho yö ꞊në‑ ꞊keng‑.
JOH 3:27 'Yö Zan ‑ya ‑yɔ bɔ‑ ‑nu ‑gɔ 'ö‑ pö: «Atanna 'yii i gba ‑duɛ 'ö‑ 'ka 'bhaa‑ ꞊slɔɔ.
JOH 3:28 Kaa ꞊dede ka ‑mɔɔ ‑bha 'ka‑ "sɛɛdhɛ ‑kë ꞊dhɛ a kë‑ ‑pö ka ‑dhɛ ꞊dhɛ ma ‑zë 'mii kë Atanna ‑bha ‑Yamɛ bha‑ 'ka, "kɛɛ a ‑kë ‑a "dhiʋ̈ ‑naɔdɔmɛ ꞊në‑ 'ka.
JOH 3:29 ‑Yö kë ka "yaan ꞊dhɛ ma ‑zë a ꞊dhɛ 'mɛ 'wo nu sië‑ ‑bha dhe dɔ ‑a "taɔngdë ꞊në‑ 'dhö. ‑A dhebhɔ ‑zë ‑yö dhemɛdë ꞊në‑ ‑bha 'ka, "kɛɛ 'yö‑ "taɔngdë ‑zë 'ö dɔ‑ "sɔɔ, 'yö‑ ‑wʋ ma, 'yö‑ ꞊nii ‑yö ‑da. ‑Kɔ 'ö n ꞊nii 'dhö ‑da sië‑ 'ka ("tʋ̈ng ya‑ 'gü) 'yö bha; ‑a ‑gɛn ‑mü ꞊dhɛ 'wɔn 'a‑ pö ‑a 'gü ‑wɔn ꞊ya kë.
JOH 3:30 ‑A ‑dhɛa ‑bha ꞊dhɛ yö ꞊në‑ ‑duɛ ‑yö kë 'kpii‑ ‑kpɛawo ma ‑zë n ‑bha ‑bha,
JOH 3:31 ‑a ‑gɛn ‑mü ꞊dhɛ 'mɛ 'ö go Atanna "piʋ̈ yö ‑zë ‑duɛ ‑yö 'kpii‑ 'ö ‑ziö mɛ ꞊gban "pɛpɛ ‑bha ‑ta. Mɛ 'ö bhɔ mɛ "bhɩɩ‑ ‑nu suu 'gü kö "kpʋngtaamɛ ‑mü. Pë 'ö "kpʋng ꞊taa yö 'yö‑ ‑dhiang zë, "kɛɛ 'mɛ 'ö go Atanna "piʋ̈ ‑a ‑duɛ ‑yö mɛ ꞊gban ‑bha ‑ta "dhʋ̈ng 'gü;
JOH 3:32 ‑a ‑gɛn ‑mü ꞊dhɛ 'pë 'ö‑ yö, 'yö‑ ‑dhiang zë, ‑a 'dhɛ 'ö‑ "tʋ ‑ya ma, 'yö‑ pö, "kɛɛ mɛkpiidhɛ ꞊në 'waa 'dhang bho‑ ‑bha "sɛɛdhɛ "dhiʋ̈.
JOH 3:33 ‑A ‑wɔn 'gü, 'mɛ 'ö ꞊ya 'dhang bho‑ "dhiʋ̈, 'yö ö ‑kɔ ‑ya ‑wɔn ‑bha, 'yö‑ 'wɔn dɔ ꞊dhɛ pë "pɛpɛ 'ö Atanna ‑ya pö ‑a 'bha 'yaa ꞊sua 'ka.
JOH 3:34 'Mɛ 'ö Atanna ꞊yaa‑ bɔ, ‑a ‑mɛ ‑ya ‑wʋ ꞊në‑ "dhiʋ̈ ꞊loo, ‑a ‑gɛn ‑mü ꞊dhɛ 'yaa ö bha 'Nii‑ "slʋ̈ʋ̈slʋ̈ dan kö ‑ya nu‑ ‑mɛ ‑dhɛ.
JOH 3:35 ꞊Dhɛ 'ö ‑kë ꞊dhɛ ‑a Gbö ‑dhɔ ‑ya ‑kë, 'yö pë ꞊gban "pɛpɛ dɔ‑ ‑kɔ 'ka.
JOH 3:36 'Mɛ 'ö ꞊ya 'dhang bho‑ "dhiʋ̈, kö ‑tosɛa 'ö 'yaa yën 'ö Atanna "piʋ̈ bha ꞊yaa‑ ꞊slɔɔ, "kɛɛ 'mɛ 'yii‑ Gbö ꞊bhlëë ‑ya, ‑tosɛa bha‑ ‑mɛ 'yii 'dho‑ ꞊slɔɔ; ‑a ‑gɛn ‑mü ꞊dhɛ kö ‑yö ö ‑dɩ ‑ya ‑sü 'ka Atanna ‑bha 'wɔn ‑bho mɛ 'gü ‑sü ꞊në‑ ‑bha ‑ya 'gü.
JOH 4:1 ꞊Dhɛ 'ö ꞊ya kë "dhʋ̈ 'yö Fadhiziɛn ‑nu 'wo‑ ma ꞊dhɛ 'mɛ 'wo bɔ Yesu 'ka 'wo‑ ‑nu ‑go 'wɔn yaa 'gü ‑zu bho sië ꞊wa kë 'gbɛ ꞊wa ziö Zan ‑bha ‑ta, ("kɛɛ tɛan‑ ꞊dede 'ka, Yesu ‑zë 'yaa gun mɛ 'bha "zu sië. ‑A ‑bha ꞊klangdhiʋ̈ ‑nu ꞊në 'wo gun mɛ "zu bha‑ bho sië). ꞊Dhɛ 'ö Yesu ꞊yaa‑ ma "dhʋ̈, 'yö go Zude ‑sɛ 'gü 'yö ö yee ‑kë 'ö dho Gadhidhe ‑sɛ 'gü.
JOH 4:4 ‑A 'dho ‑sü 'ka ‑a ‑dhɛ ‑gun ‑bha ꞊dhɛ ‑yö bɔ Samadhi ‑sɛ ꞊në‑ 'gü.
JOH 4:5 ꞊Dhɛ 'ö ꞊ya 'dho ꞊ya ꞊loo 'pödhɛ do 'bha 'ö "sɛ bha‑ 'gü 'wo‑ ‑dhɛ Sisiaa, 'ö ‑ya ‑sü 'ka 'bhlaadhɛ 'ö Zakɔbö ‑ya nu ö gbö Zosɛfu ‑dhɛ yi 'bha 'ka bha‑ "sɔɔ bha‑ 'gü,
JOH 4:6 ‑a "tʋ̈ng bha‑ 'gü kö 'yënng‑ ꞊ya ‑ya mɛ ‑gɔ ꞊zinng 'gü, 'yö ꞊loo Zakɔbö ‑bha ‑klɔng "dhiʋ̈ kö‑ 'gü ꞊ya ga, 'yö dho 'yö ‑ya ‑klɔng bha‑ "kpʋng "dhiʋ̈.
JOH 4:7 'Ö gun "dhʋ̈ kö‑ ‑bha ꞊klangdhiʋ̈ ‑nu ꞊wa 'dho ‑bhöpë 'dhɔ ‑dhɛ 'gü 'pödhö. 'Yö dhebhɔnë do 'ö go Samadhi ‑sɛ bha‑ 'gü 'ö nu "yi 'tɔdhɛ 'gü. 'Yö Yesu ‑ya pö‑ ‑dhɛ: «‑Bhö n ‑bha "yi nu 'kaa‑ mü!»
JOH 4:9 'Yö‑ ‑yɔ bɔ‑ ‑gɔ 'ö‑ pö: «'Yö bhi kö 'i ‑kë Zuifö 'ka ‑yö kë ‑kɔ ‑kë ꞊dhɛ 'yö 'i‑ pö a i gba "yi 'ka "kɛɛ kö ma ‑zë a ‑kë Samadhi dhebhɔ 'ka!» (‑A ‑yɔ 'ö‑ bɔ "dhʋ̈ bha‑ ‑gɛn ‑mü ꞊dhɛ Samadhi ‑mɛ ‑nu bha waa‑ Zuifö ‑nu 'waa gun wo 'ko ‑dhɛ ‑së ‑kpɛidhö.)
JOH 4:10 'Yö Yesu ‑ya ‑yɔ bɔ‑ ‑gɔ 'ö‑ pö: «꞊Ya kë 'nu ꞊dhɛ 'pë 'ö Atanna ‑ya ꞊gbaɔ mɛ "bhɩɩ‑ ‑nu ‑gɔ bha 'i‑ ‑dɔ, 'ö 'mɛ 'ö "yi ‑gbadhɛ sië i ‑gɔ kö 'ö‑ mü bha 'i‑ dɔ, kö bhi ꞊në 'i dho "yi ‑gbadhɛ yö ‑zë ‑gɔ 'nu 'yö "yi ziösü nu i ‑dhɛ.»
JOH 4:11 'Yö dhebhɔnë ‑ya ‑yɔ bɔ‑ ‑gɔ 'ö‑ pö: «N Dëmɛ, ‑a "yi 'kö "dhʋ̈ i ‑dho ‑a nu ‑kɔ kë ꞊dhɛ n ‑dhɛ kö ‑klɔng ‑tɔ 'ka ‑pë 'yaa i ‑gɔ, "kɛɛ kö ‑klɔng ya ‑yö ꞊gblɛɛn.
JOH 4:12 ("Ɛɛn ‑a "yi 'dhɛ 'kö "dhʋ̈‑ suu‑ mü ꞊dhɛ? "Ɛɛn yö ‑zë ꞊bhlëë ꞊në 'kpii‑ 'ö ‑ziö ‑a 'dhɛ 'ö) yi "bhɛma Zakɔbö ‑ya pɔn yi ‑dhɛ, 'ö yöö ꞊dede 'ö‑ 'bha mü, 'ö‑ bhang ‑nu waa‑ ‑bha ‑tuʋ̈ ‑nu 'wo‑ 'bha mü 'pö ya‑ ‑ta ‑ee? "Ɛɛn bhi ꞊në bhi ‑zë i ꞊bhlëë 'dhö 'kpii‑ 'ö ‑ziö yi "bhɛma Zakɔbö ꞊dhɛ 'ö ‑kë ꞊dhɛ i ‑mɔɔ ‑bha 'i "yi suu "wɛɛ nu yi ‑dhɛ bha‑ ‑wɔn 'gü ‑ee?»
JOH 4:13 'Yö Yesu ‑ya ‑yɔ bɔ‑ ‑gɔ 'ö‑ pö: «Mɛ 'ö "yi 'dhɛ 'kö ya‑ mü, "yi mü ‑dhɔ ‑dho ‑a mɛ kë ‑deewo,
JOH 4:14 "kɛɛ mɛ "ʋʋ mɛ 'ö "yi 'a dho‑ nu‑ ‑dhɛ bha‑ mü, "yi mü ‑dhɔ 'yii 'dho‑ ‑mɛ kë 'zü tongtongdhö; ‑a ‑gɛn ‑mü ꞊dhɛ "yi 'dhɛ 'a dho‑ nu‑ ‑mɛ ‑dhɛ bha ‑yö ‑dho kë "yi ziösü 'ö ‑tosɛa 'ö 'yaa yën ‑a ‑kë mɛ ‑dhɛ bha‑ 'ka 'ö‑ ‑gɔ ‑yö bhɔ‑ ‑mɛ 'gü.»
JOH 4:15 ꞊Dhɛ 'ö Yesu ꞊yaa‑ pö "dhʋ̈, 'yö dhebhɔnë bha 'ö‑ pö‑ ‑dhɛ: «N Dëmɛ, ‑bhö ‑a "yi suu bha‑ nu n ‑dhɛ 'sa kö "yi mü ‑dhɔ 'ya 'dho n kë 'zü, "ɛɛn kö 'ma 'dho nu "yi 'tɔ ‑dhɛ ya‑ 'gü 'zü ‑dhe!» (‑Yö ‑kë 'gü ꞊dhɛ "yi ꞊dede kwa‑ mü sië ya ꞊në Yesu ‑ya ‑dhiang zë bha.)
JOH 4:16 "Kɛɛ 'yö Yesu ‑ya ‑yɔ bɔ‑ ‑gɔ 'ö‑ pö: «‑Bhö 'dho kö 'i i ꞊gɔn ‑dhɛ kö kɛng 'ka nu!»
JOH 4:17 'Yö dhebhɔnë ‑ya ‑yɔ bɔ‑ ‑gɔ 'ö‑ pö: «'Maa gwaan‑ ‑bha.» 'Yö Yesu ‑ya pö‑ ‑dhɛ: «‑A pö 'i‑ wo 'bhaa gwaan‑ ‑bha bha tɛan‑ ‑mü,
JOH 4:18 ‑a ‑gɛn ‑mü ꞊dhɛ 'bha gwaan‑ 'kpɔ "sɔɔdhu, mɛ 'dhɛ 'i‑ ‑kɔ ‑bha ꞊dɛɛ 'yënng‑ ya‑ 'gü bha i ꞊gɔn 'yaa ‑mü, 'bhii ꞊sua kë.»
JOH 4:19 'Yö dhebhɔnë ‑ya pö‑ ‑dhɛ: «N Dëmɛ, 'ma‑ 'wɔn dɔ ꞊dhɛ Atanna ‑wʋdhiʋ̈loomɛ ‑mü i 'ka, (‑a ‑gɛn ‑mü ꞊dhɛ 'wɔn "pɛpɛ 'ö gun ma ‑tosɛa 'gü 'bha‑ ꞊gban pö.)
JOH 4:20 "Kɛɛ ‑a pö 'ö Zuifö ‑nu 'ka‑ wo ꞊dhɛ Atanna ‑dhɔkë ꞊dhɛ 'ö 'dhö ‑yö Zedhizadhɛmö ꞊naa, "kɛɛ kö yi "bhɛma ‑nu ‑zë ‑wo wo ‑bha ‑dhɔkë ‑tɔn ya ꞊në‑ ꞊gbin‑ bha (bhi ‑zë i i ‑bha ‑pö 'gü ꞊dhɛ?).»
JOH 4:21 'Yö Yesu ꞊ya ‑yɔ bɔ‑ ‑gɔ 'ö‑ pö: «‑Yö kë i "yaan ꞊dhɛ Atanna bha 'nii‑ ‑mü, ‑a ‑wɔn 'gü 'mɛ 'wo dho‑ ‑dhɔkë, ‑a "tʋ̈ng ‑dho ꞊loo 'ö 'wii 'dho 'dho ‑tɔn ya‑ ꞊gbin‑ ‑dhɛ yöö do‑ 'gü, "ɛɛn Zedhizadhɛmö ‑dhɛ ‑zian 'gü, ("kɛɛ 'ö 'wo dho‑ ‑dhɔkë ‑dhɛ ꞊gban "pɛpɛ ꞊në‑ 'gü); ‑a ‑gɛn ‑mü ꞊dhɛ Samadhi ‑mɛ ‑nu 'ka bha 'pë 'ka‑ ‑dhɔkë bha 'kaa‑ dɔ. 'Yö 'mɛ 'kö 'yi ‑kë Zuifö 'ka bha yi ‑zë 'pë 'yi‑ ‑dhɔkë bha 'yi‑ dɔ. ‑A 'klɔɔ‑ ‑mü ꞊dhɛ Atanna ‑yö ‑bɔ Zuifö ꞊në‑ ‑nu ‑ta 'yö mɛ "bhɩɩ‑ ‑nu dha. ‑A ‑wɔn 'gü ‑a "tʋ̈ng ‑dho ꞊loo, 'ö ꞊ya ꞊loo ‑zianwo, 'ö Atanna ‑bha 'Nii‑ "slʋ̈ʋ̈slʋ̈ 'ö tɛanwɔn 'ö‑ ‑wɔn 'gü ‑a ‑zɔn mɛ ‑dhɛ bha 'ö‑ ‑kë kö mɛ "bhɩɩ‑ ‑nu ‑wo n Dë Atanna bha‑ ‑dhɔkë (‑dhɛ ꞊gban "pɛpɛ 'gü). ꞊Dhɛ 'ö ‑kë ꞊dhɛ Atanna bha 'Nii‑ ‑mü bha ‑a ‑dhɛa ‑bha ꞊dhɛ 'mɛ 'wo dho‑ ‑dhɔkë 'pö bha‑ ‑bha tɛanwɔn pö 'Nii‑ bha ‑ya "sɩ kë‑ ‑nu ‑dhɛ kö ‑wa ‑dhɔkë ꞊dhɛ ‑kɔ 'ö‑ 'ka ‑a 'dhö; ‑a ‑gɛn ‑mü ꞊dhɛ ‑yö mɛ suu 'ö "dhʋ̈ ꞊në‑ ꞊mɔɔ kö ‑wa ‑dhɔkë.»
JOH 4:25 'Yö dhebhɔnë ‑ya ‑yɔ bɔ‑ ‑gɔ 'ö‑ pö: «A‑ 'wɔn ‑dɔ ꞊dhɛ Atanna ‑bha ‑Yamɛ 'wo‑ Klisi ‑kë bha ‑yö ‑dho nu. ꞊Dhɛ ꞊ya nu yö ꞊në dho 'wɔn ꞊gban 'klɔɔ‑ pö yi ‑dhɛ.»
JOH 4:26 'Yö Yesu ‑ya pö‑ ‑dhɛ: «Ma 'a dhiang zë sië i ‑dhɛ ya ma ꞊në 'wo n ‑dhɛ "dhʋ̈.»
JOH 4:27 ‑A "tʋ̈ng ꞊dede bha‑ 'ka 'yö‑ ‑bha ꞊klangdhiʋ̈ ‑nu 'wo go 'pödhö 'wo nu. ‑Kpan 'wo‑ wo‑ ‑bha kö waa‑ dhebhɔnë bha ‑wo dhiang zë sië bha 'yö‑ 'wɔn ‑ya ‑nu kɔn, "kɛɛ ‑a ‑nu 'bha 'wii ꞊mɔɔ‑ ‑bha kö ‑wa dhɛɛ" 'kpɔ kö ‑wa pö: «I ‑bha ‑më ꞊në‑ ‑gɔ?» "ɛɛn «ka ‑më ‑dhiang ꞊në‑ zë sië?».
JOH 4:28 ꞊Dhɛ 'ö ꞊ya kë "dhʋ̈, 'yö dhebhɔnë bha 'ö ö bha "yigbɔ to 'mü 'yö ö yee ‑kë 'ö dho 'pödhö 'yö‑ pö 'pömɛ ‑nu ‑dhɛ:
JOH 4:29 «‑Ka nu kö 'ka ‑dhɛ 'bha ‑ga! 'Mɛ 'ö ya 'wɔn ‑nu 'a‑ ‑kë ‑ya ꞊gban ‑dɔ, ꞊yaa‑ ꞊gban pö n ‑dhɛ "pɛɛpɛdhö ("kɛɛ kö 'mii‑ yö ‑zianwo do)! Atanna ‑bha ‑Yamɛ bha 'yaa ‑mü "wɛ ‑ee?»
JOH 4:30 ꞊Dhɛ 'ö ꞊yaa‑ pö "dhʋ̈ 'yö 'pö‑ bha‑ 'gü ‑mɛ ‑nu 'wo dɔ ‑bɛang ‑bha 'wo dho Yesu ‑dhɛ 'gü.
JOH 4:31 "Tʋ̈ng 'ö kë sië‑ 'ka "dhʋ̈ bha kö‑ ‑bha ꞊klangdhiʋ̈ ‑nu ‑zë ‑wo ‑gban sië‑ ‑bha pë ‑bhö ‑wɔn ꞊në‑ 'ka 'wo‑ pö: «Yi Dëmɛ, ‑bhö pëbhee 'në 'bha ‑zë ‑bhö.»
JOH 4:32 "Kɛɛ 'yö Yesu ‑ya pö‑ ‑nu ‑dhɛ 'ö‑ pö: «'Pë 'ö n ‑bhöpë 'ka 'kaa‑ dɔ.»
JOH 4:33 'Yö‑ ‑bha ꞊klangdhiʋ̈ ‑nu 'wo ‑ya wo 'ko ‑nu dhɛɛ" 'kpɔ ‑sü ‑bha 'wo‑ pö: «"Ɛɛn mɛ 'bha ꞊në ꞊ya nu‑ ‑dhɛ ‑bhöpë 'ka 'nu ‑ee?»
JOH 4:34 'Yö Yesu ‑ya pö‑ ‑nu ‑dhɛ: «'Mɛ 'ö n bɔ bha‑ ‑zʋ "piʋ̈ ‑wɔn kë ‑sü waa‑ yë 'ö‑ nu n ‑dhɛ ‑a "dhiʋ̈ ‑ta ‑sü bha ꞊në ꞊dhɛ n ‑bhöpë 'dhö.
JOH 4:35 "Ɛɛn 'waa‑ pö kwa ‑wʋ 'gü ꞊dhɛ «"Su ꞊ya 'to ‑yiisiö kö 'kwa ‑mlü "kan ‑ee?») "Kɛɛ ma ‑zë a‑ ‑pö ka ‑dhɛ ꞊dhɛ 'ka ka "yan "dhiʋ̈ "wlü kö 'ka ‑dhɛ ‑ga. 'Mɛ 'wo nu sië ‑yɛɛdhö bha ‑kaa ‑nu ‑ta ‑ga, ‑wo ꞊dhɛ 'bhlaadhɛ 'ö‑ ‑mlü ꞊ya ‑pë kë ꞊në‑ 'dhö bha.
JOH 4:36 'Mɛ 'ö ‑mlü ta ꞊yaa‑ "kan kö ‑ya dɔ ꞊gbaandhö kö yë 'ö‑ ‑kë bha ꞊yaa‑ ꞊saa ꞊në‑ 'sü bha, ‑a ꞊nii ‑yö ‑da. ‑Kɔ do bha‑ 'gü 'mɛ 'ö 'dhang ‑bho Atanna "dhiʋ̈ ‑mɛ ‑nu ꞊loo 'ko ‑ta, ‑a ꞊nii ‑yö ‑da 'pö ‑a ‑nu ‑bha ‑da ‑tosɛa 'ö 'yaa yën ‑a kë ‑dhɛ 'gü ‑sü bha‑ ‑wɔn 'gü. ‑A ‑kë "dhʋ̈ ‑sü bha‑ 'gü, kö 'mɛ 'ö ‑mlü bɔ waa‑ 'mɛ 'ö‑ ‑kan, ‑a ‑nu ꞊nii ‑yö ‑da ꞊dhɛ 'ko 'dhö.
JOH 4:37 ‑A ‑wɔn 'gü "gwënng 'wo‑ ‑da 'wo‑ pö: «Mɛ 'bha ꞊në ‑mlü bɔ 'yö mɛ 'bha ‑ya ‑kan» bha 'yaa ꞊sua 'ka,
JOH 4:38 ‑a ‑gɛn ‑mü ꞊dhɛ 'bhlaadhɛ 'a ka bɔ‑ 'gü ‑mlü "kan ‑dhɛ 'gü bha 'kii‑ ‑yë 'bha kë, mɛ "wɛɛ ‑nu ꞊në 'wo‑ ‑ke ‑kë 'yö ka ‑zë ka dɔ‑ ‑nu "gblʋʋ ‑ta bha.
JOH 4:39 Samadhi ‑pö bha‑ 'gü ‑mɛ ‑nu 'wo dho Yesu ‑dhɛ 'gü bha ꞊dhɛ 'ö ꞊wa 'dho ꞊wa ꞊loo mü, ‑a mɛ 'gbɛ ꞊dede kë 'dhang ‑bho "dhiʋ̈ ‑a pö 'ö dhebhɔnë bha 'ö‑ wo ꞊dhɛ «'Wɔn "pɛpɛ 'a‑ ‑kë ꞊yaa‑ ꞊gban‑ pö n ‑dhɛ bha‑ ‑wɔn 'gü.»
JOH 4:40 Yö ꞊në‑ ‑wɔn 'gü 'yö 'mɛ 'wo nu bha 'wo ‑gban Yesu ‑bha ꞊dhɛ ‑yö ‑dhɛkpaɔyi 'bha kë wo "piʋ̈ mü. 'Yö to 'mü 'yö ‑dhɛkpaɔyi ꞊plɛ ‑kë ‑a ‑nu ‑dhɛ 'gü.
JOH 4:41 Dhiang ‑nu 'ö Yesu ꞊dede 'ö‑ zë‑ ‑nu ‑dhɛ bha 'mɛ 'wo 'dhang bho‑ "dhiʋ̈ ‑wo kë ‑kë 'gbɛ, 'wo ‑ziö 'mɛ 'wo 'dhang bho dhebhɔnë bha‑ ‑wʋ "dhiʋ̈ ‑a ‑nu ‑ta.
JOH 4:42 'Yö 'wo‑ pö dhebhɔnë bha‑ ‑dhɛ 'wo‑ pö: «'Dhang 'yi‑ bho sië‑ "dhiʋ̈ ꞊taamasü ya‑ 'gü ya‑ 'klɔɔ‑ 'yaa ‑mü 'wɔn 'i‑ ‑gɛn dɔ yi ‑dhɛ bha‑ 'ka 'zü, "kɛɛ yii ꞊dede 'ya‑ ‑wʋ ma, 'ya‑ 'wɔn dɔ 'pö ꞊dhɛ yö ꞊në Atanna ‑ya bɔ ꞊dedewo tɛan‑ 'ka kö ‑yö mɛ "bhɩɩ‑ ‑nu dha.
JOH 4:43 ꞊Dhɛ 'ö Yesu ꞊ya ‑dhɛkpaɔyi ꞊plɛ kë ‑dhɛ bha‑ 'gü, 'yö waa‑ ꞊kengmɛ ‑nu 'wo go 'mü 'wo dho Gadhidhe ‑sɛ ('ö ‑kë ‑a ‑kpɔ 'gü ‑sɛ 'ka bha‑) 'gü.
JOH 4:44 'Ö gun "dhʋ̈ kö ꞊yaa‑ pö 'nu ꞊dhɛ «Atanna ‑wʋdhiʋ̈loomɛ ꞊bhlëë 'yaa kë ö ‑dɩ ꞊plöö».
JOH 4:45 "Kɛɛ ꞊dhɛ 'ö ꞊ya 'dho ꞊ya ꞊loo Gadhidhe ‑sɛ bha‑ 'gü, ‑a "sɛ bha‑ 'gü ‑mɛ ‑nu 'ö ‑wɩ ‑nu 'ka "dhʋ̈ bha ‑wo kë ‑dɔ ‑gɔ zian‑ ‑së 'ka, ‑a ‑gɛn ‑mü ꞊dhɛ woo ‑dɩ 'pö ‑wo kë ‑dho Pakö troo ‑ta Zedhizadhɛmö 'ö 'wo 'wɔn ‑nu "pɛpɛ 'ö gun‑ kë sië 'mü bha‑ ‑dhɛ yö.
JOH 4:46 ꞊Dhɛ 'ö ꞊ya kë "dhʋ̈ 'yö ö yee ‑kë 'zü ‑deewo 'ö dho Kana ‑pö 'ö "yi ‑gla we 'gü ‑a 'gü "tʋ̈ng 'bha 'gü bha‑ 'gü. ‑Gblüdë ‑bha ‑yamɛ ꞊bhlëësü do 'bha ‑yö ‑gun 'pö‑ bha‑ 'gü 'ö‑ gbö do 'gü 'yaa gun ‑së 'pödhɛ "wɛɛ 'dhɛ 'wo‑ ‑dhɛ Kapɛɛnaɔmö bha‑ 'gü.
JOH 4:47 ꞊Dhɛ 'ö mɛ bha ꞊yaa‑ ma ꞊dhɛ Yesu ꞊ya 'go Zude ‑sɛ 'gü ꞊ya nu Gadhidhe, 'yö dho‑ "piʋ̈, 'yö ꞊bhɛa‑ ‑dhɛ kö wɛng 'wo 'dho Kapɛɛnaɔmö kö ‑ya gbö kë "klʋ̈ʋ̈klʋ̈, ‑a ‑gɛn ‑mü ꞊dhɛ 'ö gun "dhʋ̈ kö‑ gbö 'gü 'yaa ‑së ꞊dedewo, kö ꞊ya wɔ 'ya‑.
JOH 4:48 'Yö Yesu ‑ya pö‑ ‑dhɛ: «Ka ‑zë ka "yan 'yii ‑da "dhabhliwɔn "gblʋ̈gblʋ̈ ‑nu 'gü, 'dhang ‑bho n "dhiʋ̈ ‑sü 'yii 'dho kë ka ‑gɔ tongtongdhö.»
JOH 4:49 'Yö ‑gblüdë ‑bha ‑yamɛ bha 'ö‑ ‑yɔ bɔ‑ ‑gɔ 'ö‑ pö: «N Dëmɛ, ‑bhö dɔ "gbɩɩ‑ kö i nu kö 'kwa 'dho, 'yii kë "dhʋ̈ n gbö bha yöö ga.»
JOH 4:50 'Yö Yesu ‑ya pö‑ ‑dhɛ: «‑Bhö 'dho, i gbö bha ꞊ya kë "klʋ̈ʋ̈klʋ̈!» ꞊Dhɛ 'ö Yesu ꞊yaa‑ pö "dhʋ̈, 'yö 'mɛ bha 'ö 'dhang bho‑ ‑wʋ bha‑ "dhiʋ̈ 'yö dho.
JOH 4:51 ꞊Dhɛ 'ö gun 'dho sië, ‑yö ‑to zian ‑ta 'yö ‑kpan ‑a ‑bha gwëëzë ‑nu ‑bha kö ‑wo nu sië ‑dɔ ‑gɔ zian ‑dhɛ 'gü. ꞊Dhɛ 'ö ꞊wa ‑kpan ‑bha 'yö 'wo‑ pö‑ ‑dhɛ: «Yi Dëmɛ, i gbö ꞊ya dha!»
JOH 4:52 'Yö‑ ‑nu dhɛɛ" kpɔ 'ö‑ pö: «‑Yö ö ‑dɩ ‑slɔɔ ‑më "tʋ̈ng 'gü?» 'Yö 'wo‑ pö‑ ‑dhɛ: «‑Yö ‑kë "dhʋ̈ yaan "dhiʋ̈ kö 'yënng‑ ꞊ya 'kpɔ mɛ ‑gɔ 'ka ‑dee 'gü. Pɛng‑ ‑zɔɔ kwi 'gü "tʋ̈ng bha ꞊në‑ 'gü.»
JOH 4:53 ꞊Dhɛ 'ö ꞊waa‑ pö "dhʋ̈ 'yö gɔndënë bha‑ ‑zʋ ‑yö ‑bö ꞊dhɛ "tʋ̈ng ꞊dede bha ꞊në Yesu ‑ya pö‑ 'ka ö ‑dhɛ ꞊dhɛ ö gbö ꞊ya kë "klʋ̈ʋ̈klʋ̈. ꞊Dhɛ 'ö ꞊ya kë "dhʋ̈ 'yö waa‑ "piʋ̈mɛ ‑nu ꞊gban "pɛpɛ 'wo 'dhang bho Yesu "dhiʋ̈.
JOH 4:54 Yesu 'ö go Zude 'ö dho Gadhidhe, "dhabhliwɔn ꞊plɛ ‑naa 'ö‑ ‑kë 'yö bha.
JOH 5:1 ꞊Dhɛ 'ö ꞊ya 'wɔn ‑nu bha‑ kë ꞊dhɛ ‑kɔ bha‑ 'dhö, 'ö Zuifö ‑nu ‑bha Atanna ‑dhɔkë troo do 'bha yi ꞊ya ꞊loo, 'yö dho Zedhizadhɛmö.
JOH 5:2 "Yi ꞊gblü 'kpikpi do 'bha ‑yö 'pödhɛ bha‑ 'gü 'ö dɔ sië "saan 'wo‑ ꞊klëën Atanna ‑dhɔkë ‑dhɛ ‑zü bha‑ "dhi 'dhɛ 'wo‑ ‑dhɛ "bhlaa ‑nu bɔdhɛ bha‑ "sɔɔ, 'ö 'wo‑ ‑dhɛ Eblö ‑wʋ 'gü Bɛsata. "Yi ꞊gblü 'ö "dhʋ̈ bha 'kɔ 'zaa‑ do 'bha‑ ‑gun dɔ sië‑ ‑ta 'ö‑ "dhi‑ gun "sɔɔdhu.
JOH 5:3 ‑A "dhi "dhiʋ̈ ‑dhɛ ‑nu bha 'yö "yuëdhi ‑nu 'wo nu 'gbɛ 'ka ꞊dedewo 'wo ꞊loo 'ko ‑ta mü. "Yanwlümɛ ‑nu, ‑göngklöömɛ ‑nu, ꞊niɔɔmɛ ‑nu, ‑gɛnloomɛ ‑nu, 'yö‑ ‑nu ꞊gban "pɛpɛ 'wo nu ‑dhɛ bha‑ 'gü, ['yö 'wo ‑ya "yi ꞊gblü bha‑ ꞊bang "bang kë ‑sü ‑gɔ.
JOH 5:4 ‑A ‑gɛn ‑mü ꞊dhɛ Atanna ‑bha "kië do 'bha‑ ‑gun nu sië 'mü ꞊siësië 'yö "yi bha‑ ꞊bang "bang ‑kë. 'Yö "yi bha 'ö ꞊bang "bang kë sië "tʋ̈ng 'ö‑ 'gü "dhʋ̈ bha, mɛ "ʋʋ mɛ 'ö "yua suu "ʋʋ suu 'ö ‑kë ‑bha, 'ö ‑pö "yi bha‑ ꞊bhaa ‑blɛɛsü, 'yö ‑kë "klʋ̈ʋ̈klʋ̈].
JOH 5:5 "Yuëdhi ‑nu ꞊loo ‑dhɛ bha gɔndënë do 'bha ‑yö ‑gun mü, kö "yua 'ö zun‑ ‑bha ‑a ‑kwɛ ꞊ya kë ‑kaɔng ‑yaaga ga "saaga.
JOH 5:6 ꞊Dhɛ 'ö Yesu ꞊ya ö "yan ‑kpan 'mɛ bha‑ ‑bha, 'ö ꞊yaa‑ 'wɔn dɔ ꞊dhɛ "yua ꞊ya ꞊gwëë‑ ‑bha ꞊dhɛ ‑kɔ bha‑ 'dhö, 'yö‑ pö‑ ‑dhɛ: «‑Yö i "piʋ̈ ꞊dhɛ 'i kë "klʋ̈ʋ̈klʋ̈ ‑ee?»
JOH 5:7 'Yö "yuëdhi bha 'ö‑ pö Yesu ‑dhɛ: «N Dëmɛ, mɛ 'bha ꞊në 'yaa n ‑gɔ kö ‑yö n ‑zuö "yi ꞊bhaa kö ‑yö ꞊bang "bang kë sië, 'yö 'ma‑ pö 'a 'dho kö 'a ‑pö mü, 'yö mɛ 'bha ‑yö to 'ö ‑pö mü n "dhiʋ̈ ‑wa, 'yaa "dhʋ̈ ‑a ‑dhɔ ‑zë ‑yö n ‑bha.»
JOH 5:8 'Yö Yesu ‑ya pö‑ ‑dhɛ: «‑Bhö "wlü kö 'i i ‑bha sɛɛ" ‑be kë kö 'i 'dho!»
JOH 5:9 'Mɛ bha ‑yö ‑to ‑dhɛ do bha‑ 'gü 'ö kë "klʋ̈ʋ̈klʋ̈. 'Yö ö ‑wɔtapë sü 'yö ‑ya "ta 'sü ‑sü ‑bha. "Kɛɛ ꞊dhɛ 'ö ‑kë ꞊dhɛ 'wɔn bha ‑yö ‑kë "dhʋ̈ Zuifö ‑nu ‑bha ꞊glooyi 'ka,
JOH 5:10 'yö‑ ‑nu ‑gɔmɛ ‑nu ‑wa pö 'mɛ 'ö Yesu ‑ya ‑kë "klʋ̈ʋ̈klʋ̈ bha‑ ‑dhɛ: «꞊Glooyi ꞊në ꞊dɛɛ, ‑yö kë ‑kɔ ‑kë ꞊dhɛ 'yö 'i i ‑wɔtapë ‑kwɛɛ sü "kɛɛ kö kwaa‑ 'tɔng‑ ‑ya ‑pö 'kwa 'dho yë 'bha kë yi 'ö ꞊dɛɛ‑ 'ka?»
JOH 5:11 'Yö‑ ‑yɔ bɔ‑ ‑nu ‑gɔ 'ö‑ pö: «'Mɛ 'ö n ‑kë "klʋ̈ʋ̈klʋ̈ ya ꞊në‑ pö n ‑dhɛ: «‑Bhö i ‑wɔtapë 'sü kö 'i ziö!»
JOH 5:12 ꞊Dhɛ 'ö ꞊yaa‑ pö "dhʋ̈ 'yö 'wo‑ dhɛɛ" 'bha kpɔ 'zü 'wo‑ pö: «'Mɛ 'kö yö ‑zë 'ö‑ pö i ‑dhɛ yi 'kö ꞊dɛɛ‑ 'ka ꞊dhɛ «‑bhö i ‑wɔtapë 'sü 'kii ziö» bha de suu ‑mü?»
JOH 5:13 "Kɛɛ 'mɛ 'ö ‑kë "klʋ̈ʋ̈klʋ̈ "dhʋ̈ bha mɛ ꞊dede 'ö‑ pö‑ ‑dhɛ ꞊dhɛ «‑bhö i ‑wɔtapë 'sü 'kii ziö» bha 'yii‑ ‑mɛ dɔ, ‑a ‑gɛn ‑mü ꞊dhɛ 'ö gun "dhʋ̈ kö Yesu ꞊ya ꞊dhɛng mɛ "dhaa 'wo gun mü bha‑ ‑nu ꞊zinng 'gü.
JOH 5:14 ꞊Dhɛ 'ö "tʋ̈ng 'bha ꞊ya ziö, 'yö Yesu ‑yö ‑kpan 'mɛ bha‑ ‑bha Atanna ‑dhɔkëgükɔ 'gü 'yö‑ pö‑ ‑dhɛ: «‑Bhö ‑dhɛ ‑ga, 'bha kë ‑zë wo "klʋ̈ʋ̈klʋ̈ "kɛɛ 'bha 'dho, 'bha 'dho ‑da Atanna "dhiʋ̈ 'zü, kö 'wɔn 'dhɛ 'ö ‑ziö 'dhɛ 'ö ‑blɛɛsü bha‑ ‑ta 'ya 'dho i "dhiʋ̈ ꞊slɔɔ!»
JOH 5:15 ꞊Dhɛ 'ö ꞊ya kë "dhʋ̈ 'yö gɔndënë bha 'ö dho 'yö‑ pö Zuifö ‑nu ‑gɔmɛ ‑nu ‑dhɛ ꞊dhɛ Yesu ꞊nɛ ö ‑kë "klʋ̈ʋ̈klʋ̈.
JOH 5:16 'Yö 'wo ‑ya Yesu ‑san kë ‑sü ‑bha ‑a kë 'ö‑ wo "dhʋ̈ ꞊glooyi 'ka bha‑ ‑wɔn 'gü.
JOH 5:17 "Kɛɛ 'yö Yesu ‑ya ‑yɔ bɔ‑ ‑nu ‑gɔ 'ö‑ pö: «N Dë ‑yö 'wɔn ‑së ‑kë yi ꞊gban "pɛpɛ 'ka ('yaa ö "tɛɛ 'pa), mang ‑dɩ 'pö a n ‑bha ‑kë "dhʋ̈.
JOH 5:18 ‑A pö 'ö Yesu ‑ya wo "dhʋ̈ bha 'yö Zuifö ‑nu ‑gɔmɛ ‑nu 'wo ‑ya ‑san kë ‑sü ‑bha ‑a ‑wɔn 'gü 'yö ‑ziö 'ka ‑blɛɛsü ‑bha ‑ta, kë "dhʋ̈ kö 'wo‑ zë. ‑A kë 'wo‑ wo "dhʋ̈ bha‑ ‑gɛn 'yii kë‑ ‑nu ‑bha 'tɔng‑ bho ‑wɔn doseng 'ka, "kɛɛ ꞊dhɛ 'ö ‑kë ꞊dhɛ ‑ya ‑pö 'pö ꞊dhɛ ö Dë ꞊dede ‑mü Atanna 'ka bha, 'yö 'wo‑ pö 'pö ꞊dhɛ ꞊ya kë "dhʋ̈ kö ꞊ya ö ‑dɩ dan Atanna 'ka.
JOH 5:19 'Yö Yesu ‑yö dhiang zë‑ ‑nu ‑dhɛ ‑dee wo 'zü 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: Ma 'a Atanna Gbö 'ka bha 'maa 'wɔn 'bha kë n ‑dɩ ‑ta "wɛɛwɛɛ kö 'mii‑ ‑dhɛ yö n Dë ‑gɔ, "kɛɛ 'wɔn 'a‑ këdhɛ yö n Dë ‑gɔ ꞊në 'a‑ ‑kë 'pö. ‑Yö kë ka "yaan ꞊dhɛ pë "pɛpɛ 'ö n Dë ‑ya ‑kë a‑ ‑kë 'pö.
JOH 5:20 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ n ‑dhɔ ‑bha n Dë këwɔn 'gü, pë "pɛpɛ 'ö‑ ‑kë ‑ya ‑zɔn n ‑dhɛ. 'Wɔn "gblʋ̈gblʋ̈ ‑nu 'wo ‑ziö ‑a 'dhɛ 'kö ya‑ ‑ta ‑yö ‑dho ‑a ‑zɔn n ‑dhɛ 'a‑ ‑kë 'ö‑ 'wɔn ‑yö mɛ suu ‑nu 'wo ꞊dhɛ ka 'dhö ‑a ‑nu kɔn.
JOH 5:21 ‑A ‑gɛn ‑mü ꞊dhɛ ‑kɔ do 'ö n Dë ‑yö ꞊sii ‑dee ‑da 'ka 'mɛ ꞊wa ga ‑a ‑nu 'gü bha, a‑ ‑da 'mɛ ‑a ‑da ‑nu 'gü ‑dhɔ ꞊ya n kë‑ ‑nu 'gü ‑kɔ do bha‑ 'gü 'pö.
JOH 5:22 ꞊Ya 'go yö ‑zë 'gü, n Dë ‑zë 'yaa za dɔ mɛ 'bha ‑bha, "kɛɛ ‑yö za dɔ ‑sü 'sü ‑sü 'ka 'ö‑ dɔ ma ꞊në n ‑kɔ 'ka.
JOH 5:23 Kë "dhʋ̈ kö mɛ ꞊gban "pɛpɛ ‑wo n ꞊bhlëë ‑ya ꞊dhɛ ‑kɔ 'wo n Dë ꞊bhlëë ‑ya 'ka ‑a 'dhö. 'Mɛ 'ö 'yii n ꞊bhlëë ‑ya, kö 'yaa n Dë 'ö n bɔ bha‑ ꞊bhlëë ‑ya 'pö.
JOH 5:24 A‑ pö ka ‑dhɛ tɛan‑ ꞊dede 'ka ꞊dhɛ 'mɛ 'ö ö "tʋ to n ‑wʋ ‑bha, 'ö 'dhang bho 'mɛ 'ö n bɔ bha‑ "dhiʋ̈, kö ꞊ya ‑tosɛa 'ö Atanna "piʋ̈ ‑a ꞊slɔɔ, kö 'yii 'dho 'wɔn bho‑ ‑mɛ 'gü, kö yö ‑zë ꞊ya bɔ ga 'gü ꞊ya ꞊sii ꞊slɔɔ ꞊naa bha.
JOH 5:25 A‑ pö ka ‑dhɛ tɛan‑ ꞊dede 'ka ꞊dhɛ ‑a "tʋ̈ng ‑dho ꞊loo, 'ö ꞊ya ‑wo ‑zianwo, 'ö 'mɛ ꞊wa ga bha 'wo mang Atanna gbö ‑mɛ n ‑wʋ ma, 'ö 'mɛ 'wo dho‑ ma "dhʋ̈ bha 'wo ‑tosɛa ‑kë.
JOH 5:26 ‑A ‑gɛn ‑mü ꞊dhɛ ‑kɔ do 'ö ‑tosɛa ‑nu mɛ ‑dhɛ "sɩ 'dhö‑ 'ka n Dë ‑dhɛ bha ‑ya "sɩ kë ‑sü 'ka mang ‑dɩ 'pö n ‑dhɛ, kö 'a‑ nu 'pö mɛ ‑dhɛ.
JOH 5:27 Za dɔ ‑sü dɔ 'ö‑ wo n ‑kɔ 'ka bha‑ ‑gɛn ‑mü ꞊dhɛ mɛ "bhɩɩ‑ ‑bha 'në ‑mü n 'ka.
JOH 5:28 ‑A 'wɔn 'ya 'dho ka 'kɔn, ‑a ‑gɛn ‑mü ꞊dhɛ ‑a "tʋ̈ng‑ nu sië 'ö mɛ "pɛpɛ 'ö ꞊wa ga 'wo bun 'gü, 'wo n ‑wʋ ma,
JOH 5:29 'ö 'wo go wo wɔdhɛ ‑nu 'gü 'wo ‑wo "yɛa‑, 'ö 'mɛ 'wo 'wɔn ‑së ‑kë 'wo ‑bö, 'ö 'wo ‑tosɛa ‑kë Atanna "piʋ̈. 'Yö 'mɛ 'wo 'wɔn yaa ‑kë 'wo ‑bö 'pö, "kɛɛ kö Atanna ‑yö 'wɔn bho wo ‑zë ‑a ‑nu 'gü.
JOH 5:30 Ma ‑zë 'maa 'wɔn 'bha ‑wɔn 'bha kë n ‑dɩ ‑ta. 'Pë 'ö n Dë ‑ya pö n ‑dhɛ 'yö 'a za dɔ‑ 'ka. Yö ꞊në‑ ‑wɔn 'gü 'yö 'maa ꞊sua za dɔ, ‑a ‑gɛn ‑mü ꞊dhɛ 'maa n ‑dɩ ‑gɔ. 'Mɛ 'ö n bɔ bha ꞊në 'a‑ ‑gɔ.
JOH 5:31 ꞊Ya kë ꞊dhɛ mang do ꞊në 'a "sɛɛdhɛ ‑kë 'nu n ‑dɩ ‑bha, kö 'pë 'a‑ pö 'yii 'dho bhɔ ka 'gü tɛan‑ ‑bha.
JOH 5:32 "Kɛɛ n Dë ꞊në ꞊dhɛ mɛ "wɛɛ 'ö "sɛɛdhɛ ‑kë n ‑bha ‑a 'dhö. ‑A ‑wɔn 'gü, a 'dhang ‑bho "dhiʋ̈ ꞊dhɛ 'pë 'ö‑ pö n ‑bha bha 'yaa ꞊sua 'ka.
JOH 5:33 Ka ꞊në 'ka mɛ bɔ Zan ‑dhɛ kë "dhʋ̈ kö 'ö 'pë‑ pö sië 'ka‑ dɔ, 'yö 'wɔn 'ö ‑gban tɛanwɔn ‑bha ‑a "sɛɛdhɛ ‑kë ka ‑dhɛ.
JOH 5:34 "Kɛɛ ma ‑zë n ‑bha 'ka, ma ‑wɔn 'yaa mɛ "bhɩɩ‑ ‑nu ‑bha "sɛɛdhɛ ‑kë n ‑bha ‑sü ‑bha. A‑ ‑pö "dhʋ̈ kë "dhʋ̈ kö ka ꞊në 'ka dha.
JOH 5:35 Zan‑ gun ꞊dhɛ ‑dhangbha 'ö dɔ ‑sü 'ka 'ö ‑dhɛ ‑pʋ ꞊në‑ 'dhö, 'yö 'ka ‑wɩ ‑bha 'yö ka ꞊nii 'në 'bha 'dhö ‑da ‑a 'bhü "dhiʋ̈ "tʋ̈ng 'në 'bha 'ka.
JOH 5:36 "Kɛɛ ma ‑zë "sɛɛdhɛ 'ö ‑gban n ‑bha ‑yö 'kpii‑ 'ö ‑ziö Zan ‑bha ‑zë ‑ta, ‑a ‑gɛn ‑mü ꞊dhɛ "dhabhliwɔn ‑nu 'ö n Dë ‑ya dɔ n ‑kɔ 'ka kö 'a‑ kë, 'ö 'a‑ kë sië bha ꞊në‑ ‑zɔn ꞊dhɛ n Dë ꞊në n bɔ.
JOH 5:37 'Yö n Dë 'ö n bɔ 'pö "dhʋ̈ bha, 'kö ‑kë ꞊dhɛ 'kii‑ ‑wʋ ma do tongtongdhö, 'ö 'kii‑ wëëdhɛ ‑zian yö do, "kɛɛ yöö ꞊dede ‑ya "sɛɛdhɛ ‑kë 'pö n ‑bha.
JOH 5:38 "Kɛɛ ‑a ‑wʋ 'yaa 'dho ka "tʋʋdhö, ‑a ‑gɛn ‑mü ꞊dhɛ 'kaa 'dhang bho ma 'ö n bɔ bha n "dhiʋ̈.
JOH 5:39 ‑A ‑wʋ bha ꞊në 'ka ka "yan "nuu dɔ‑ ‑bha, 'yö ‑kë ka 'gü ꞊dhɛ ‑tosɛa 'ö 'yaa yën ka ‑dho ‑a ꞊slɔɔ yö ꞊në‑ 'gü, "kɛɛ 'sa kö ‑wʋ ‑nu ꞊dede 'wo "dhʋ̈ bha ꞊në 'wo n ‑wɔn ‑dhiang zë.
JOH 5:40 "Kɛɛ yö ‑zë ꞊gban 'gü 'kaa "wɩ‑ ‑bha kö 'ka 'dhang bho n "dhiʋ̈ kö 'ka ꞊sii ꞊dede ꞊slɔɔ.
JOH 5:41 'Mii mɛ "bhɩɩ‑ ‑nu ‑bha "dhɛ ‑ya n ‑ta ‑sü mɔɔ‑,
JOH 5:42 "kɛɛ a ka suu ‑dɔ. A‑ ‑dɔ ꞊dhɛ Atanna ‑dhɔ 'yaa ka 'gü.
JOH 5:43 N Dë ꞊në n bɔ, "kɛɛ 'yö 'kaa "wɩ‑ ‑bha kö 'ka ‑kɔ ‑ya n ‑dhɛng ‑bha. "Kɛɛ 'sa mɛ "wɛɛ 'bha ‑zë ꞊ya nu ö ‑dɩ 'ka, ka ‑dho ka ‑kɔ ‑ya yö ‑zë ‑dhɛng ‑bha!
JOH 5:44 "Kɛɛ mɛ 'ö 'ka mɛ "bhɩɩ‑ ‑nu ꞊në‑ ‑nu ‑bha "dhɛ ‑ya ka ‑ta ‑dhɛ ꞊mɔɔ, 'ö 'kaa‑ mɔɔ‑ kö Atanna doseng 'ö 'dhö yö ‑zë ‑yö "dhɛ ‑ya ka ‑ta bha ka ‑dho 'dhang bho n "dhiʋ̈ ‑kɔ ‑kë ꞊dhɛ?
JOH 5:45 "Kɛɛ yö ꞊në‑ ꞊gban 'gü, 'ka 'dho ka ‑zʋ 'gɔn ꞊dhɛ ma ꞊në 'a dho yang ‑ya ka ‑bha n Dë ‑kuu "dhiʋ̈. 'Mɛ 'ö yang ‑ya ‑sü 'ka ka ‑bha yö ‑mü Moizö ꞊në‑ 'ka, ‑a ‑gɛn ‑mü ꞊dhɛ yö ꞊në 'ka ka ‑zʋ gɔn‑ ‑dhɛ 'ö 'ka 'dhang bho‑ "dhiʋ̈.
JOH 5:46 "Kɛɛ ꞊ya kë ‑zianwo 'nu ꞊dhɛ ka 'dhang bho Moizö "dhiʋ̈ ꞊dedewo, kö ka ‑dho 'dhang bho 'pö n "dhiʋ̈. ‑A ‑gɛn ‑mü ꞊dhɛ 'pë 'ö Moizö ‑ya ‑bɛn zë bha ‑yö ‑gban ma ꞊në n ‑bha.
JOH 5:47 "Kɛɛ ꞊dhɛ 'ö ‑kë ꞊dhɛ 'kaa 'dhang bho pë ‑nu 'ö‑ ‑bɛn zë bha‑ ‑nu "dhiʋ̈, 'kii dho 'dhang bho 'pö n ‑wʋ "dhiʋ̈.»
JOH 6:1 ꞊Dhɛ 'ö ꞊ya kë "dhʋ̈ 'yö dho "yitagbɛa 'ö Gadhidhe 'wo‑ ‑dhɛ 'pö Tibedhiadö ‑yi bha‑ ꞊taama.
JOH 6:2 Mɛ "dhaa ‑yö ‑gun ꞊keng‑ ‑kpɛawo "dhabhliwɔn ‑nu 'ö gun‑ kë sië "yua ‑bho mɛ ‑bha ‑sü ‑nu 'ka bha‑ ‑wɔn 'gü.
JOH 6:3 ꞊Dhɛ 'ö ꞊ya ‑wo "yi ꞊taama ‑dhɛ bha‑ 'gü, 'yö ‑da ‑tɔn ꞊gbin‑ waa‑ ‑bha ꞊klangdhiʋ̈ ‑nu 'dhö 'yö 'wo ‑ya mü.
JOH 6:4 ‑A "tʋ̈ng bha‑ 'gü kö Pakö 'ö ‑kë Zuifö ‑nu ‑bha Atanna ‑dhɔkë ‑yi 'kpii‑ 'ka bha‑ yi 'yaa ꞊gblɛɛn 'zü.
JOH 6:5 Yesu dho ö ‑gɔ "dhiʋ̈ "wlü kö 'ö ‑dhɛ ‑ga, kö mɛ "bhɩɩ‑ ꞊ya ta‑ 'gü kö ‑wo nu sië ‑yɛɛdhö ‑dhɛ ꞊gban 'gü. 'Yö‑ pö Fidhipö ‑dhɛ: «Mɛ "sinma 'wo nu sië ya ꞊zɔɔ ‑dhɛ ‑mɛɛ ꞊në 'kwa dho ‑bhöpë ꞊slɔɔ‑ ‑bha kö 'kwa‑ 'dhɔ kö 'kwa‑ nu‑ ‑nu ‑dhɛ kö ‑wa ‑bhö kö ‑wo 'kën?» 'Ö gun "dhʋ̈ kö 'pë yöö‑ kë ‑ya ‑dɔ, "kɛɛ ‑ya dhɛɛ" ‑kpɔ "dhʋ̈ ö ‑dɩ "yaan ‑a 'gü dan kian 'ka.
JOH 6:7 ꞊Dhɛ 'ö ꞊yaa‑ pö "dhʋ̈, 'yö Fidhipö ‑ya ‑yɔ bɔ‑ ‑gɔ 'ö‑ pö: «‑Tu "tu 'dhɛ kö 'wo nu sië bha ꞊ya 'to wo ‑zë ‑nu "dhiʋ̈ gba ‑wɔn ‑bha, aa" ꞊ni kwaa 'wëë‑ 'wo dho yëkëmɛ do ꞊saa bho‑ 'ka "su "saaga "piʋ̈ ‑a 'bluu‑ 'dhɔ, 'yii 'dho ꞊mɔɔ‑ ‑nu ‑ta kö mɛ do ‑ya "kplü 'në 'dɛdɛ ‑zian ꞊slɔɔ (kö yöö 'to‑ ‑nu 'kën ‑wɔn ꞊në‑ ‑bha).»
JOH 6:8 ꞊Dhɛ 'ö Fidhipö ꞊yaa‑ pö "dhʋ̈, 'yö Yesu ‑bha ꞊klang ‑nu bha‑ mɛ 'dhɛ 'wo‑ ‑dhɛ Andre 'ö ‑kë Simɔ Piɛdhö 'zlaa‑ 'ka bha 'ö‑ pö‑ ‑dhɛ:
JOH 6:9 «'Në "gbɔng 'në do 'bha ‑yö yö 'ö 'bluu‑ bhɛ 'sɛnsɛn 'në "sɔɔdhu waa‑ 'yuʋ̈ga ꞊plɛ 'wo‑ ‑gɔ, "kɛɛ mɛbhɩɩdhe "dhaa 'kö ma ya 'pë 'kö bha ‑yö ‑dho ꞊mɔɔ ‑më ꞊në‑ ‑bha?»
JOH 6:10 ꞊Dhɛ 'ö ꞊yaa‑ pö "dhʋ̈ 'yö Yesu ‑ya pö‑ ‑nu ‑dhɛ: «‑Kaa pö kö mɛ ꞊gban "pɛpɛ ‑wo 'yaanu!» Blëë‑ ‑gun ‑dhɛ bha‑ 'gü mɔɔdhö ‑dhɛ ꞊gban 'gü. 'Yö gɔɔn‑ ‑nu 'wo ꞊mɔɔ mɛ "gblʋ̈ "sɔɔdhu ‑nu ‑bha, (kö 'wii 'në ‑nu waa‑ dhong ‑nu ‑zë ‑da mü bha) 'wo dho "sia‑ 'wo 'yaanu.
JOH 6:11 ꞊Dhɛ 'ö ꞊wa 'yaanu "dhʋ̈, 'yö Yesu ‑yö ö ‑kɔ ‑da 'bluu‑ bha‑ 'gü 'yö Atanna nuɛ" bho‑ ‑wɔn 'gü, 'yö 'wo‑ 'gü ‑gblü 'mɛ 'wo gun mü bha‑ ‑nu ‑ta. 'Yö dho 'yö 'yuʋ̈ga bha‑ ‑bha ‑kë "dhʋ̈, 'yö 'wo‑ ‑bhö ‑kɔ 'ö ‑dhi ‑nu ‑dhɛ 'gü.
JOH 6:12 ꞊Dhɛ 'ö ꞊waa‑ ‑bhö ꞊wa 'kën, 'yö Yesu ‑ya pö ö ‑bha ꞊klang ‑nu ‑dhɛ ‑wa "kplü ‑kpɛa 'ö to bha‑ ‑wlö kö‑ 'gü 'ya 'dho see‑.
JOH 6:13 'Yö 'wo 'bluu‑ bhɛ 'sɛnsɛn 'në "sɔɔdhu 'ö gun bha‑ "kplü 'dhɛ 'ö to 'ö 'wo ꞊fië‑ ‑bha bha‑ ‑wlö, 'yö dho 'ö ‑kë töö ‑yan ‑kaɔng do ga ꞊plɛ 'ka.
JOH 6:14 ꞊Dhɛ 'ö 'mɛ 'wo bha‑ ‑nu "yan ꞊ya ‑da "dhabhliwɔn 'ö Yesu ‑ya kë bha‑ ‑dhɛ 'gü, 'yö 'wo ‑ya ‑a pö ‑sü ‑bha ꞊dhɛ: «Atanna ‑wʋdhiʋ̈loomɛ 'yi ‑ya ‑gɔ bha yö ꞊nɛ ꞊dedewo tɛan‑ 'ka!»
JOH 6:15 "Kɛɛ ꞊dhɛ 'ö Yesu ꞊yaa‑ 'wɔn dɔ ꞊dhɛ woo nu kö wo faan wɔ ö ‑ta kö ‑wo ö 'kun ‑wo 'dho ö 'ka ‑wo ö ‑ya "sɛgɔ "dhiʋ̈, 'yö ꞊dua‑ ‑nu ‑gɔ 'ö dho 'zü ‑dee "wɛɛ wo ‑tɔn ꞊gbin‑ ö do 'ka.
JOH 6:16 ꞊Dhɛ 'ö "bin ꞊ya 'ma, 'yö Yesu ‑bha ꞊klangdhiʋ̈ ‑nu 'wo ꞊lɔɔ "yitagbɛa bha‑ "kpʋng "dhiʋ̈.
JOH 6:17 'Yö 'wo ‑da "kplagɔnë 'gü 'wo ‑ya "yi "kan ‑sü ‑bha kö ‑a ‑nu wë ‑ya 'gü Kapɛɛnaɔmö ‑zian 'ka. ‑A "tʋ̈ng bha‑ 'ka kö ‑dhɛ 'gü ꞊ya trö "kɛɛ kö Yesu 'yii ‑kpan ‑a ‑nu ‑bha ꞊kö.
JOH 6:18 'Yö "tɛɛ "gbɩɩ‑ 'dhö ‑ya ‑ziö ‑sü ‑bha, 'yö "yi 'dhö ‑ya zɔn ‑sü ‑bha bang ꞊bang bangdhö.
JOH 6:19 ꞊Dhɛ 'ö 'pë 'ö ꞊mɔɔ "kidhʋng "sɔɔdhu "saɔdo ‑nu ‑bha waa‑ "ta 'sü "yi ‑ta, 'yö 'wo Yesu yö kö ꞊ya ꞊tëng‑ ‑nu ‑bha "yitagɔ bha‑ ‑ta kö ‑yö "ta sië "yi ‑ta 'ö nu‑ 'ka. 'Yö "suʋ̈ 'dhö ‑da ‑a ‑nu 'gü,
JOH 6:20 "kɛɛ 'yö Yesu ‑ya pö‑ ‑nu ‑dhɛ 'ö‑ pö: «"Suʋ̈ 'ya 'dho ka kë, ma ‑mü!»
JOH 6:21 ‑Wo ‑to ‑a pö ‑dhɛ 'gü ꞊dhɛ 'wo‑ ‑da wo "piʋ̈ "kplagɔnë 'gü 'yö to 'yö ‑kë ‑a ‑gɔ ‑gban "kpʋng ‑bha ‑sü 'ka, 'yö 'wo ꞊loo‑ ‑nu 'dhodhɛ 'gü.
JOH 6:22 Mɛ kpö 'wo‑ ‑nu to "yi ꞊taama bha ‑wa 'wɔn ‑dɔ ꞊dhɛ "yitagɔ do ꞊në gun ‑dhɛ bha‑ 'gü. ꞊Dhɛ Yesu ‑zë 'yii ‑da "yitagɔ bha‑ 'gü ‑a ‑bha ꞊klang ‑nu "piʋ̈, ꞊dhɛ ‑wo kë ‑dho wo do 'ka.
JOH 6:23 ꞊Dhɛ 'ö‑ ‑ta ‑dhɛ ꞊ya ꞊kpaɔ, 'ö "yitagɔ 'bha ‑nu ꞊wa 'go Tibedhiadö ꞊wa nu ꞊wa ꞊loo ‑dhɛ 'ö kwa Dëmɛ ‑yö Atanna nuɛ" bho 'bluu‑ ‑wɔn 'gü mü 'wo‑ ‑bhö bha‑ ‑dhɛ "sɔɔ,
JOH 6:24 'ö mɛ kpö bha ꞊waa‑ 'wɔn dɔ ꞊dhɛ Yesu waa‑ ‑bha ꞊klang ‑nu 'bha 'waa ‑dhɛ bha‑ 'gü, 'yö 'wo ‑da "yitagɔ ‑nu bha‑ 'gü wo ‑dɩ 'ka 'wo dho Kapɛɛnaɔmö, ‑a mɔɔ‑ ‑dhɛ 'gü.
JOH 6:25 ꞊Dhɛ 'ö ꞊wa 'dho ꞊wa ‑kpan ‑bha "yi ꞊taama mü, 'yö 'wo‑ pö‑ ‑dhɛ: «Yi Dëmɛ, i ‑loo ‑dhɛ ya‑ 'gü ‑më yi 'ka?»
JOH 6:26 "Kɛɛ 'yö Yesu ‑ya ‑yɔ bɔ‑ ‑nu ‑gɔ 'ö‑ pö: «A‑ pö ka ‑dhɛ tɛan‑ ꞊dede 'ka ꞊dhɛ n mɔɔ‑ 'ka‑ wo sië bha a‑ 'klɔɔ‑ ‑dɔ. ‑A 'klɔɔ‑ 'yaa ‑mü "dhabhliwɔn ‑nu 'ka‑ ‑dhɛ yö bha‑ 'ka, ‑a 'klɔɔ‑ ‑mü 'bluu‑ 'ka‑ ‑bhö 'ka kën bha ꞊në‑ 'ka.
JOH 6:27 'Sa a‑ ‑pö ka ‑dhɛ ꞊dhɛ: 'Ka 'dho‑ pö 'ka sëë bho ‑bhöpë 'ö ꞊see bha yö ‑zë ‑wɔn 'gü, "kɛɛ 'ka sëë bho ‑bhöpë 'ö ꞊gwëë, 'ö ꞊sii 'ö 'yaa yën‑ ‑kë mɛ ‑dhɛ bha ꞊në‑ ‑wɔn 'gü. ‑A ‑bhöpë suu 'ö "dhʋ̈ bha mang Mɛgbömɛ ꞊në 'a dho‑ nu ka ‑dhɛ. ‑A 'klɔɔ‑ ‑mü ꞊dhɛ n Dë Atanna ꞊ya ö ‑kɔ "gblʋʋ 'ö‑ ‑zɔn ꞊dhɛ yö ꞊në n bɔ bha‑ ‑ya n ‑bha.»
JOH 6:28 'Yö 'mɛ 'wo bha 'wo‑ pö‑ ‑dhɛ: «Yi ‑dho ‑a kë ꞊dhɛ kö 'yi Atanna ‑dhidhɛ ‑wɔn kë?»
JOH 6:29 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Pë 'ö ‑dhi Atanna ‑dhɛ 'ö‑ "piʋ̈ ꞊dhɛ 'ka‑ kë yö ‑mü ꞊dhɛ kö 'ka 'dhang bho ma 'ö n bɔ bha ꞊në n "dhiʋ̈.»
JOH 6:30 'Yö 'wo‑ pö‑ ‑dhɛ: «꞊Dhɛ 'ö "dhʋ̈ kö ‑bhö "dhabhliwɔn do kë 'sa kö yi "yan‑ ‑da 'gü kö ‑ya ‑zɔn yi ‑dhɛ ꞊dhɛ Atanna ꞊në i bɔ, kö 'yi 'dhang bho i "dhiʋ̈.»
JOH 6:31 ‑A pö 'yi‑ wo "dhʋ̈ bha‑ ‑gɛn ‑mü ꞊dhɛ ‑bhöpë 'ö go dhang‑ 'gü, 'wo‑ ‑dhɛ manö bha, yi "bhɛma ‑nu kë‑ ‑bhö "tʋng ‑ta 'ö ‑bɛn zë ‑sü 'ka 'pö "dhʋ̈ Atanna ‑wʋ 'gü ꞊dhɛ: ‹Atanna ‑yö kë 'bluu‑ 'ö go dhang‑ 'gü ‑a ‑nu ‑nu ‑dhɛ 'wo‑ ‑bhö›.
JOH 6:32 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: 'Mɛ 'ö kë ‑bhöpë 'ö go dhang‑ 'gü ‑a ‑nu ka "bhɛma ‑nu ‑dhɛ bha Moizö 'yaa ‑mü, n Dë ‑mü. N Dë do bha ꞊në ‑bhöpë ꞊dede 'ö go dhang‑ 'gü ‑a nu sië 'zü ka ‑dhɛ ya.
JOH 6:33 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ ‑bhöpë 'ö Atanna ‑ya nu yö ꞊në go dhang‑ 'gü 'yö nu 'yö ꞊sii nu mɛ "bhɩɩ‑ ‑nu ‑dhɛ.»
JOH 6:34 'Yö mɛ kpö bha 'wo‑ pö Yesu ‑dhɛ: «Yi Dëmɛ, ‑bhöpë 'ö suu 'dhö bha ‑bhö ‑a nu yi ‑dhɛ yi ꞊gban 'ka 'sa ‑dhe!»
JOH 6:35 'Yö Yesu ‑ya pö‑ ‑nu ‑dhɛ 'ö‑ pö: «Ma ꞊në 'a ‑bhöpë 'ö ꞊sii ‑kë mɛ ‑dhɛ "dhʋ̈ bha‑ 'ka. 'Mɛ 'ö ꞊ya nu n "piʋ̈, din‑ 'yii 'dho‑ ‑mɛ kë tongtongdhö. Mɛ 'ö ꞊ya 'dhang bho n "dhiʋ̈, "yi mü ‑dhɔ 'yii 'dho‑ mɛ kë 'zü tongtongdhö.
JOH 6:36 'Sa 'ma‑ pö ka ‑dhɛ "dhʋ̈, ꞊ya 'go mü 'zü ka "yan ‑yö n ‑bha "kɛɛ yö ‑zë ꞊gban 'gü 'kaa 'dhang bho‑ "dhiʋ̈.
JOH 6:37 "Kɛɛ a‑ pö ka ‑dhɛ ꞊dhɛ mɛ "pɛpɛ 'dhɛ 'kö n Dë ‑ya nu n ‑dhɛ, ‑wo ‑dho nu n "piʋ̈. Mɛ 'dhɛ 'kö ꞊ya nu 'pö n "piʋ̈, 'mii 'dho‑ ‑mɛ "kan n ‑bha tongtongdhö.
JOH 6:38 ‑A ‑gɛn ‑mü ꞊dhɛ 'go 'a‑ wo dhang‑ 'gü 'a nu bha 'mii nu 'kaa n ‑dɩ dhɔɔbhaa kë. A ‑nu kö 'mɛ 'ö n bɔ bha ꞊në 'a‑ dhɔɔbhaa kë.
JOH 6:39 'Sa 'mɛ 'ö n bɔ bha‑ dhɔɔbhaa 'ö 'dhö yö ‑mü ꞊dhɛ kö mɛ "pɛpɛ 'ö‑ nu n ‑dhɛ bha‑ 'bha 'gü 'ya 'dho see‑ n ‑kɔ ‑ta, "kɛɛ kö 'a‑ ‑nu ‑bö ꞊në‑ wo kö ‑wo 'go ga 'gü ‑tosɛa yën ‑yi 'ka.
JOH 6:40 N Dë dhɔɔbhaa 'ö 'dhö yö ‑mü ꞊dhɛ kö mɛ "ʋʋ mɛ 'ö "yan ‑kpan n ‑bha, 'ö 'dhang bho n "dhiʋ̈, kö ꞊sii 'ö 'yaa yën ‑yö kë‑ ‑mɛ ‑dhɛ. ꞊Ya kë "dhʋ̈ a ‑dho ‑a ‑mɛ ‑bö ‑tosɛa yën ‑yi 'ka.
JOH 6:41 ‑A pö 'ö Yesu ‑ya wo ꞊dhɛ ‑bhöpë 'ö go dhang‑ 'gü yö ‑mü yö ꞊në ö 'ka bha, 'yö Zuifö ‑nu 'wo ‑ya ‑dɔn bho ‑sü ‑bha ‑a 'ka wo yun 'gü ‑a ‑wɔn 'gü
JOH 6:42 'wo‑ pö: «Yesu do "wɛ 'kwa‑ dhe waa‑ dë ꞊gban dɔ ya 'yaa ‑mü ‑ee? "Ɛɛn 'waa‑ dë ‑dhɛ Zosɛfu 'nu ‑ee? ‑Yö kë mü ꞊dhɛ 'yö‑ pö ö ‑go dhang‑ 'gü?»
JOH 6:43 'Yö‑ ‑yɔ bɔ‑ ‑nu ‑gɔ 'ö‑ pö: «'Ka 'dho ‑dɔn bho n 'ka ka yun 'gü ‑a pö 'a‑ wo "dhʋ̈ bha‑ ‑wɔn 'gü,
JOH 6:44 ‑a ‑gɛn ‑mü ꞊dhɛ mɛ 'bha 'yii 'dho ꞊mɔɔ ‑bɔ n 'ka ‑sü ‑bha ö ‑dɩ 'ka kö n Dë 'kö n bɔ bha 'yii‑ ‑mɛ "gan. Yö ꞊në ꞊yaa‑ ‑mɛ "gan "dhʋ̈, 'yö ma ‑zë 'a dho‑ ‑mɛ ‑bö ‑dhɛkpaɔyi ‑totaamasü 'ka.
JOH 6:45 'Wɔn 'ö‑ ‑wɔn 'gü 'yö Atanna ‑wʋdhiʋ̈loomɛ ‑nu 'wo‑ ‑bɛn zë woo‑ 'sëëdhɛ 'gü yi 'bha 'ka 'wo‑ pö ꞊dhɛ: ‹‑A ‑nu ꞊gban "pɛpɛ‑ ‑dho tɛanwɔn ma Atanna ꞊në‑ ‑ta› bha 'yö bha. 'Wɔn 'ö‑ ‑wɔn 'gü 'pö 'yö mɛ "ʋʋ mɛ 'ö ꞊ya n Dë Atanna ‑bha mɛ ꞊klangkëwʋ ('ö 'ka‑ ma bha‑) ma, 'yö to 'ö nu n "piʋ̈ bha 'yö bha.
JOH 6:46 'Yii kë ꞊dhɛ ꞊ya kë "dhʋ̈ kö mɛ 'bha ꞊në ꞊ya "yan ‑kpan n Dë ‑bha kö 'yii kë ma 'kö ma ‑zë 'a go mü bha n 'ka.
JOH 6:47 A‑ pö ka ‑dhɛ tɛan‑ ꞊dede 'ka ꞊dhɛ mɛ 'ö ꞊ya 'dhang bho n "dhiʋ̈ ‑yö ‑dho ꞊sii 'ö 'yaa yën 'ö Atanna "piʋ̈ bha‑ ꞊slɔɔ.
JOH 6:48 Ma ꞊në 'a ‑bhöpë 'ö ꞊waa‑ ‑bhö 'wo ‑tosɛa ‑kë bha‑ 'ka.
JOH 6:49 Ka dë ‑nu kë ‑bhöpë 'ö go dhang‑ 'gü 'wo‑ manö ‑kë bha‑ ‑bhö "tʋng ‑ta "dhʋ̈ tɛan‑ 'ka "kɛɛ yö ‑zë ꞊gban 'gü ‑wo kë ‑ga.
JOH 6:50 "Kɛɛ ‑ka ‑dhɛ ‑ga, ‑bhöpë 'ö go dhang‑ 'gü bha 'mɛ ꞊yaa‑ ‑bhö 'yii 'dho ga 'zü tongtongdhö.
JOH 6:51 ‑Bhöpë "yaandhe 'ö go dhang‑ 'gü 'ö ꞊lɔɔ "dhʋ̈ bha yö ‑mü ma ꞊në n 'ka. 'Mɛ 'ö ꞊ya ‑bhöpë 'dhɛ 'kö bha‑ ‑bhö, ‑yö ‑dho ‑tosɛa kë ‑todhʋ̈ 'ka. ‑Bhöpë 'a dho‑ nu "dhʋ̈ bha n ‑wü ‑mü. Yö ꞊në 'a dho‑ nu "kpʋngtaamɛ ‑nu dha ‑sü ‑wɔn 'gü.»
JOH 6:52 ꞊Dhɛ 'ö ꞊yaa‑ pö "dhʋ̈ 'yö Zuifö ‑nu 'wo ‑ya zaɔdhe ‑da wo "kwëë ‑sü ‑bha 'wo‑ pö: «'Mɛ 'ö ya ‑yö ‑dho ö ‑wü ‑zë nu ‑kɔ kë ꞊dhɛ kwa ‑dhɛ ‑bhöpë 'ka kö 'kwa‑ ‑bhö?»
JOH 6:53 'Yö Yesu ‑ya pö‑ ‑nu ‑dhɛ: «A‑ ‑pö ka ‑dhɛ tɛan‑ ꞊dede 'ka ꞊dhɛ ꞊ya kë ꞊dhɛ kö 'kii Mɛgbömɛ ‑wü ‑zë ‑bhö, kö 'kii‑ ꞊yɔɔn mü, kö ꞊sii ꞊dede 'yaa ka 'gü.
JOH 6:54 "Kɛɛ mɛ 'ö n ‑wü ‑bhö 'ö n ꞊yɔɔn mü, kö ꞊sii 'ö 'yaa yën 'ö Atanna "piʋ̈ bha ꞊ya kë‑ ‑mɛ ‑dhɛ, kö a ‑dho ‑a ‑mɛ ‑bö 'ö go ga 'gü "kpʋngtaadhɛ yën ‑yi 'ka.
JOH 6:55 ‑A ‑gɛn ‑mü ꞊dhɛ n ‑wü bha ‑yö ‑bhöpë ꞊dede ꞊në‑ 'ka. N ꞊yɔɔn ‑dɩ 'pö, ‑yö müpë ꞊dede ꞊në‑ 'ka.
JOH 6:56 'Mɛ 'ö n ‑wü ‑bhö, 'ö n ꞊yɔɔn bha‑ mü kö yaa‑ ‑mɛ yi ‑kɔ ‑yö 'ko ꞊kwɛng ‑kpɛawo,
JOH 6:57 ꞊dhɛ ‑kɔ 'ö n Dë 'ö "yaandhe 'ka 'ö n bɔ‑ 'ka 'ö 'a ‑tosɛa ‑kë ‑a 'saa‑ 'gü bha‑ 'dhö. 'Mɛ 'ö n ‑wü ‑bhö, ‑yö ‑dho ‑tosɛa kë n 'saa‑ 'gü 'pö.
JOH 6:58 Ma ꞊në 'a ‑bhöpë 'ö go dhang‑ 'gü ‑a 'ka, ma ‑zë 'maa ꞊dhɛ ‑a 'dhɛ 'ö ka "bhɛma ‑nu kë‑ ‑bhö bha‑ 'dhö. ‑A ‑gɛn ‑mü ꞊dhɛ ꞊dhɛ 'wo‑ ‑bhö "dhʋ̈, wo kë ‑ga. 'Mɛ 'kö ‑bhöpë 'dhɛ 'kö ya‑ ‑bhö, ‑yö ‑dho ‑tosɛa kë "dhʋ̈ "dhʋ̈ "dhʋ̈ 'ö‑ "dhiʋ̈ 'to ‑dhɛ 'yaa kë.»
JOH 6:59 Yesu ‑yö dhiang ‑nu bha‑ zë "dhʋ̈ kö ‑yö mɛ ‑nu ꞊klang kë sië Kapɛɛnaɔmö, Zuifö ‑nu ‑bha ‑yakwëëkëgükɔ 'gü.
JOH 6:60 ꞊Dhɛ 'ö‑ ‑bha ꞊klangdhiʋ̈ ‑nu ꞊wa ‑wʋ bha‑ ma ꞊dhɛ ‑kɔ bha‑ 'dhö, 'yö‑ mɛ kpö 'bha 'wo‑ pö: «Dhiang 'dhɛ 'kö‑ zë ya, ꞊ya 'to yö ‑zë ‑bha kö ‑yö "gbɩɩ‑ "dhɛ! 'Dee dho ꞊mɔɔ yö ‑zë kë ‑sü ‑bha?»
JOH 6:61 ꞊Dhɛ 'ö Yesu ꞊yaa‑ 'wɔn dɔ ꞊dhɛ ‑a ‑bha ꞊klang ‑nu ‑wo ‑dɔn bho sië wo yun 'gü 'wɔn bha‑ 'gü 'pö, 'yö‑ pö‑ ‑nu ‑dhɛ 'ö‑ pö: «'Wɔn 'kö 'a‑ pö bha yö 'pö ‑yɛ ka ‑bha 'yö ka ‑din yën "dhʋ̈ bha ‑ee?
JOH 6:62 'Yö 'ka "yan ‑zë ‑kpan mang Mɛgbömɛ n ‑bha yi 'kö‑ 'ka kö a n yee kë sië 'a ‑tɔn kun 'a dho ‑dhɛ 'a gun‑ 'gü ‑blɛɛsü bha‑ 'gü 'sa ꞊wɛ! Ka ‑dho ‑a kë mü ꞊dhɛ?
JOH 6:63 ꞊Ya kë ꞊dhɛ 'ma‑ pö ꞊dhɛ 'ka n ‑wü ‑bhö, ‑kaa 'gü ma ꞊dhɛ 'mii "wɩ n ‑wü 'ö n ‑bha ya‑ 'ka, 'mii‑ pö 'ka yö ‑zë ‑bhö. ‑A ‑gɛn ‑mü ꞊dhɛ mɛ ‑wü 'dhɛ kö mɛ ‑bha "kpʋng ꞊taa yö bha yö ‑zë ꞊bhlëë 'yaa 'dhö Atanna wëëdhö, "kɛɛ 'ma‑ pö "dhʋ̈ kö a‑ ‑pö: 'Nii‑ "slʋ̈ʋ̈slʋ̈ 'ö n 'gü bha ꞊ya ‑da mɛ "ʋʋ mɛ 'ö‑ 'gü kö‑ ‑mɛ ꞊ya ꞊sii 'ö 'yaa yën‑ ꞊slɔɔ ꞊naa bha. ꞊Ya kë "dhʋ̈ kö ‑wʋ ‑nu 'a‑ pö ka ‑dhɛ bha ‑wo ‑gban ꞊sii 'ö 'yaa yën ‑a ‑da 'ö 'Nii‑ "slʋ̈ʋ̈slʋ̈ ‑ya wo mɛ 'gü bha ꞊në ‑wɔn ‑bha.
JOH 6:64 "Kɛɛ 'sa mɛ 'bha ‑nu ‑wo ka kpö 'gü 'ö 'waa 'dhang bho n "dhiʋ̈.» ‑A pö 'ö‑ wo "dhʋ̈ bha‑ ‑gɛn ‑mü ꞊dhɛ kö 'mɛ 'waa 'dhang bho‑ "dhiʋ̈ bha ‑ya ‑nu ‑dɔ, 'ö 'mɛ 'ö dho‑ ꞊gbaɔ bha 'ö‑ dɔ 'pö.
JOH 6:65 'Yö‑ 'bha ‑da ‑ta 'ö‑ pö: «'Wɔn 'ö ‑wɔn 'gü 'yö 'a‑ pö ka ‑dhɛ ꞊dhɛ mɛ 'bha 'yaa ꞊mɔɔ‑ ‑bha kö ‑yö 'dhang bho n "dhiʋ̈ kö n Dë ‑zë 'yii‑ ‑mɛ gba‑ ‑faan 'ka bha 'yö bha.
JOH 6:66 ꞊Dhɛ 'ö Yesu ꞊ya bo‑ ‑pö "dhʋ̈ ‑sü 'ka 'yö‑ ‑bha ꞊klang ‑nu bha‑ mɛ 'gbɛ 'wo wo ‑kɔ ꞊lɔɔ wo "piʋ̈, 'yö 'wo wo yee ‑kë ꞊keng‑.
JOH 6:67 ꞊Dhɛ 'ö ꞊yaa‑ 'wɔn dɔ "dhʋ̈ 'yö‑ pö ö ‑bha ꞊klang ‑nu ‑kaɔng do ga ꞊plɛ 'wo 'dhö ‑a ‑nu ‑dhɛ 'ö‑ pö: «Kaa ‑dɩ 'pö ꞊wɛ, 'kii 'dho 'dho ‑ee?»
JOH 6:68 'Yö Simɔ Piɛdhö ‑ya ‑yɔ bɔ‑ ‑gɔ 'ö‑ pö: «N Dëmɛ, yi ‑dho i 'to yi dho 'mɛ, "kɛɛ kö ꞊sii 'ö 'yaa yën ‑a ‑kë mɛ ‑dhɛ ‑dhiang ‑go bhi ꞊në i "dhi!
JOH 6:69 Yi ‑zë 'ya 'dhang bho‑ "dhiʋ̈ 'ya‑ 'wɔn ‑dɔ ꞊tɔn ꞊dhɛ Atanna ‑bha ‑Yamɛ 'ö pö 'aa‑ ‑bha 'ö‑ bɔ yö ‑mü bhi ꞊në i 'ka tɛan‑ ꞊dede 'ka!»
JOH 6:70 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «Mɛ ‑kaɔng do ga ꞊plɛ 'kö 'ka bha ma ꞊në 'a ka ‑zë ka ‑ya, "kɛɛ 'sa mɛ do ‑yö ka kpö 'gü "yina yaa ‑mɛ ‑mü!»
JOH 6:71 ‑Yö ‑gun "wɩ sië Simɔ Isikadhiɔtö gbö 'wo Zuda ‑kë bha ꞊në‑ 'ka "dhʋ̈ bha, ‑a ‑gɛn ‑mü ꞊dhɛ yö 'ö ‑kë mɛ ‑kaɔng do ga ꞊plɛ bha‑ mɛ do 'ka bha ꞊nɛ dho ‑da ‑dhɛ pë "piʋ̈.
JOH 7:1 ꞊Dhɛ 'ö ꞊ya kë "dhʋ̈ 'yö Yesu ‑yö ‑ya "ta 'kpɔ ‑sü ‑bha Gadhidhe ‑sɛ 'gü, "kɛɛ 'yaa gun‑ "piʋ̈ ꞊dhɛ 'ö ‑da 'ka Zude ‑sɛ 'gü, ‑a ‑gɛn ‑mü ꞊dhɛ kö Zuifö ‑nu ‑gɔmɛ ‑nu ‑wa "slë mɔɔ‑ sië kö ‑wa zë.
JOH 7:2 "Kɛɛ 'sa 'ö gun "dhʋ̈ kö Zuifö ‑nu bha troo 'wo‑ ‑kë bɔɔ" ꞊wlöö bha‑ yi 'yaa ꞊gblɛɛn 'zü.
JOH 7:3 'Yö Yesu dheebhang ‑nu 'wo‑ pö‑ ‑dhɛ 'wo‑ pö: «‑Bhö 'dho Zude ‑sɛ 'gü 'pö kö i ‑bha ꞊klang ‑nu 'dhɛ 'wo mü ‑wo 'wɔn ‑nu 'i‑ kë sië ya‑ ‑dhɛ yö ‑dhe;
JOH 7:4 ‑a ‑gɛn ‑mü ꞊dhɛ 'mɛ 'kö 'i‑ "piʋ̈ ꞊dhɛ ‑wo i dɔ, 'bhaa 'wɔn kë ‑gblɛn 'kpɔ 'gü. ꞊Dhɛ 'ö "dhʋ̈ ‑bhö 'dho kö 'wɔn ‑nu 'i‑ kë sië bha 'i‑ kë mɛ ꞊zinng 'gü kö mɛ ꞊gban ‑wo i dɔ.»
JOH 7:5 ‑A pö 'ö‑ dheebhang ‑nu ‑wa wo "dhʋ̈ bha‑ ‑gɛn ‑mü ꞊dhɛ 'waa gun 'dhang bho sië‑ "dhiʋ̈.
JOH 7:6 'Yö Yesu ‑ya pö‑ ‑nu ‑dhɛ 'ö‑ pö: «꞊Ya kë ka ‑zë ka ‑bha 'ka kö "tʋ̈ng ꞊gban ‑yö ‑së, "kɛɛ ma ‑zë n ‑bha "tʋ̈ng 'yii ꞊loo ꞊kö.»
JOH 7:7 ‑A ‑gɛn ‑mü ꞊dhɛ ka ‑zë ka ‑san 'yaa "kpʋngtaamɛ ‑nu kë, "kɛɛ ma ‑zë n ‑san ‑ya ‑nu ‑kë, ‑a 'klɔɔ‑ ‑mü ꞊dhɛ 'ma "dhɛ bho‑ ‑nu ‑ta, a‑ pö‑ ‑nu këwɔn ‑yö 'ya‑.
JOH 7:8 Ka ‑zë ‑ka 'dho troo bha‑ ‑ta, "kɛɛ ꞊ya 'to ma ‑zë n ‑bha ‑bha kö 'maa maa 'dho ꞊kö, ‑a ‑gɛn ‑mü ꞊dhɛ ‑a "tʋ̈ng 'yii ꞊loo ꞊kö.»
JOH 7:9 ꞊Dhɛ 'ö ꞊yaa‑ pö‑ ‑nu ‑dhɛ "dhʋ̈ 'yö to Gadhidhe ‑sɛ 'gü.
JOH 7:10 ꞊Dhɛ 'ö‑ 'zlaabɔ ‑nu bha ꞊wa 'dho Atanna ‑dhɔkë ‑dhɛ 'gü troo bha‑ ‑ta, 'yö yöö ‑dɩ 'pö 'ö ꞊wlü ‑suɛɛdhö kö mɛ 'bha 'ya 'dho ö yö, 'yö dho.
JOH 7:11 'Yö Zuifö ‑nu 'wo ‑ya mɔɔ‑ ‑sü ‑bha troo bha‑ ‑ta kö ‑wa pö sië: «‑Yö 'mɛ?»
JOH 7:12 Kö ‑wa ‑dhiang zë sië wo "dhi ꞊wlöö mɛ kpö 'gü ‑dhɛ ꞊gban 'gü ‑nu wo 'ö ‑kɔ "pɛan 'bha ꞊ya pö: «'Wɔnsëkëmɛ ‑mü». Kö mɛ 'bha ‑nu ‑wa pö sië 'pö: «‑Abin, "kpënng‑ ‑kë mɛ ‑gɔ ‑mɛ ‑mü.»
JOH 7:13 "Kɛɛ mɛ 'bha 'yaa gun‑ ‑dhiang zë sië ö ‑ta "puu 'ka, ‑a ‑gɛn ‑mü ꞊dhɛ kö ‑wo "suʋ̈ sië Zuifö ‑nu ‑gɔmɛ ‑nu ‑gɔ.
JOH 7:14 ꞊Dhɛ 'ö ꞊wa troo bha‑ kë 'ö ꞊wa dɔ‑ ꞊zinng 'gü, 'yö Yesu ‑yö dho Atanna ‑dhɔkëgükɔ 'ö Zedhizadhɛmö bha‑ 'gü, 'yö ‑ya mɛ draan‑ ‑sü ‑bha mü.
JOH 7:15 ꞊Dhɛ 'ö Zuifö ‑nu ‑gɔmɛ ‑nu 'wo‑ mɛ draan‑ ‑kɔ bha‑ ‑dhɛ yö, 'yö‑ 'wɔn ‑ya ‑nu kɔn, 'yö 'wo‑ pö: «Mɛ 'ö 'yii ꞊klang 'bha kë ya ‑yö Atanna ‑wʋ "sinma ya‑ ‑dɔ 'mɛ?»
JOH 7:16 'Yö Yesu ꞊ya ‑yɔ bɔ‑ ‑nu ‑gɔ 'ö‑ pö: «‑Wʋ ‑nu 'a mɛ ꞊klang kë sië‑ 'ka bha 'wii 'go n ‑dɩ 'gü, Atanna 'ö n bɔ bha ꞊në‑ dɔ n "dhi!»
JOH 7:17 Atanna dhɔɔbhaawɔn kë ‑dhɔ ꞊ya kë 'mɛ 'ö‑ ‑bha, 'ö ‑wʋ ‑nu 'a‑ pö sië bha 'wo go ma ꞊në n 'gü oo, "ɛɛn 'wo go Atanna ꞊në 'gü oo, ‑a ‑mɛ ꞊në dho‑ 'wɔn dɔ.
JOH 7:18 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ 'mɛ 'ö ö ‑dɩ 'gü ‑dhiang zë, ‑ya ‑mɔɔ kö yö ꞊në 'ö 'tɔ ‑yö bhɔ, "kɛɛ 'mɛ 'kö 'wo‑ bɔ ꞊në wo 'ö‑ mɔɔ‑ sië kö 'mɛ 'ö ö bɔ bha ꞊në‑ 'tɔ ‑yö bhɔ, ‑a ‑mɛ ‑yö tɛanwɔn ꞊në pö, 'sa ꞊ya kë "dhʋ̈ kö ‑a ‑mɛ ‑zë ‑wʋ 'yaa mɛ ‑pö ‑wʋ 'ka.
JOH 7:19 "Ɛɛn Moizö 'aa mü 'ö kaa‑ 'tɔng‑ ‑nu dɔ yi 'bha 'ka ‑ee? "Ɛɛn 'yaa "dhʋ̈ ‑ee? "Kɛɛ 'mɛ 'ka bha 'dee 'tɔng‑ bha‑ 'kun sië ꞊dɛɛ, mɛ ꞊gban 'kii ka ꞊taa ‑ya ‑gɔ ‑ee? Ka n ‑gɛn ‑mɔɔ kö 'ka n zë 'sa ‑më ‑wɔn 'gü?»
JOH 7:20 'Yö mɛ kpö bha 'wo‑ ‑yɔ bɔ‑ ‑gɔ 'wo‑ pö: «Bhi 'i ya slaa" ‑yö i 'gü "dhɛ! 'Dee "piʋ̈ ꞊dhɛ 'ö i zë ‑dhɛ ya‑ 'gü?»
JOH 7:21 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Wɔn doseng ꞊në 'a‑ kë (꞊glooyi 'ka), 'yö ‑yɛ ka ‑bha ('yö 'ka‑ "piʋ̈ ꞊dhɛ 'ka n zë bha),
JOH 7:22 "kɛɛ 'sa kö ka ‑zë ka mɛ ‑kë 'gbannë 'ka ꞊glooyi bha‑ 'ka, ꞊dhɛ 'ö ‑kë ꞊dhɛ Moizö ꞊në 'wluu‑ ‑ya, 'ö‑ pö ꞊dhɛ 'ka gɔɔn‑ ‑nu kë 'gbannë 'ka bha‑ ‑wɔn 'gü, "kɛɛ 'sa kö yö ‑zë 'yii‑ zü bho, kö ka "bhɛma ‑nu ꞊në 'wo‑ zü bho (kö yö ‑zë 'yii bhɔ ‑zianwo ꞊kö).
JOH 7:23 ꞊Ya kë ꞊dhɛ ka ‑zë 'ka ꞊mɔɔ‑ ‑bha 'ka 'nëgɔɔn ‑nu kë 'gbannë 'ka ꞊glooyi 'ka kë "dhʋ̈ kö 'ka Moizö ‑bha 'tɔng‑ ꞊bhlëë ‑ya bha oo, 'yö ma ‑zë 'ma mɛbhɩɩdhe ‑dhü kë "klʋ̈ʋ̈klʋ̈ ꞊glooyi 'ka, ‑yö ‑siö ka ‑dhɛ ‑më ‑wɔn 'gü?
JOH 7:24 N këwɔn ‑yö ‑kë ‑së oo, ‑yö ‑kë 'ya‑ oo, "kɛɛ 'ka‑ pö 'ka za dɔ mɛ ‑bha ‑kaa dɔ tɛan‑ ‑ta. 'Ka 'dho‑ dɔ‑ ‑mɛ këwɔn 'ka‑ yö bha yö ‑zë ‑bha.»
JOH 7:25 ꞊Dhɛ ꞊ya ö bo‑ pö "dhʋ̈ ‑sü 'ka, 'yö Zedhizadhɛmö ‑mɛ ‑nu 'bha ‑nu 'wo ‑ya pö ‑sü ‑bha: «'Mɛ 'wo‑ mɔɔ‑ sië kö ‑wa zë ya 'yaa ‑mü 'ö ya ‑ee?»
JOH 7:26 ‑Kaa ‑ga 'ö dhiang zë sië mɛ kpö ya‑ 'gü ö 'flëë‑ 'gü 'ö 'waa‑ kë ‑kɔ 'bha‑ 'gü ya! "Ɛɛn ꞊ya kë "dhʋ̈ kö kwa ‑gɔmɛ ‑nu ꞊waa‑ 'wɔn ꞊në dɔ ꞊dhɛ Atanna ‑bha ‑Yamɛ 'ö‑ bɔ yö ‑mü tɛan‑ 'ka ‑ee?
JOH 7:27 "Kɛɛ 'sa Atanna ‑bha ‑Yamɛ 'ö‑ nu ‑wɔn 'dhö 'dhö bha yö ‑zë mɛ 'bha 'yii 'dho‑ 'kpɔmɛ ‑nu dɔ, "kɛɛ mɛ 'dhɛ 'kö ya kwa‑ 'kpɔmɛ ‑nu ‑dɔ.»
JOH 7:28 "Tʋ̈ng 'wo dhiang zë sië‑ 'ka "dhʋ̈ bha kö Yesu ‑yö mɛ draan‑ sië Atanna ‑dhɔkëgükɔ 'gü. 'Yö ö ‑wʋ "dhiʋ̈ ꞊wlü 'ö‑ pö: «Ka‑ pö ‑zë ‑wo ka ‑dɩ ‑dhɛ ꞊dhɛ 'ka n ‑dɔ 'ö 'ka n 'kpɔmɛ ‑nu ꞊gban dɔ, "kɛɛ a‑ ‑pö ka ‑dhɛ ꞊dhɛ 'mii nu n ‑dɩ 'ka, 'mɛ 'ö n bɔ bha ꞊në tɛanwɔn pömɛ 'ka, ka ꞊në 'kaa‑ dɔ
JOH 7:29 "kɛɛ ma ‑zë a‑ ‑dɔ, ‑a ‑gɛn ‑mü ꞊dhɛ yö ꞊në n bɔ, a ‑nu 'pö yö ꞊në‑ ‑bha nu 'gü.»
JOH 7:30 ‑Wo ‑gun "slë mɔɔ‑ sië kö ‑wa 'kun, "kɛɛ mɛ 'bha ‑kɔ 'yii ꞊mɔɔ‑ ‑bha, ‑a ‑gɛn ‑mü ꞊dhɛ kö‑ ‑bha "tʋ̈ng 'yii ꞊loo ꞊kö.
JOH 7:31 ‑A ‑kë "dhʋ̈ ‑sü ꞊gban waa‑ ‑bha ‑bha, mɛ 'gbɛ ꞊dede ‑wo kë ‑slɔɔ mɛ kpö bha‑ 'gü 'wo 'dhang bho‑ "dhiʋ̈ 'wo‑ pö: «Atanna ‑bha ‑Yamɛ 'ö‑ nu ‑wɔn 'dhö 'dhö ya yaa‑ ‑nu yi 'ö‑ 'ka, ‑yö ‑dho "dhabhliwɔn ‑nu kë 'ö ‑ziö 'mɛ ya‑ ‑bha ‑ta "wɛ ‑ee?»
JOH 7:32 ‑Wʋ ‑nu 'wo gun‑ pö sië "dhʋ̈ bha 'yö ‑da Fadhiziɛn ‑nu "tʋ 'gü. 'Yö Zuifö ‑nu ‑bha "saabhomɛ ‑nu ‑gɔmɛ ‑nu waa‑ Fadhiziɛn ‑nu 'wo mɛ bɔ kö ‑wa 'kun.
JOH 7:33 'Yö Yesu ‑ya pö‑ ‑nu ‑dhɛ 'ö‑ pö: «A ‑dho n yee kë 'a dho 'mɛ 'ö n bɔ bha‑ "piʋ̈, "kɛɛ ‑a "tʋ̈ng 'yii ꞊loo ꞊kö, a ‑tun ꞊kö "tʋ̈ng ꞊në 'bha ‑kë ka "piʋ̈ yö.
JOH 7:34 'Ma 'dho yi 'ö‑ 'ka ka ‑dho n mɔɔ‑, "kɛɛ 'kii 'dho n yö, ‑a ‑gɛn ‑mü ꞊dhɛ ‑dhɛ 'a dho kë‑ 'gü "dhʋ̈ bha 'kii 'dho ꞊mɔɔ ‑dho mü ‑sü ‑bha.»
JOH 7:35 ꞊Dhɛ 'ö ꞊yaa‑ pö "dhʋ̈, 'yö Zuifö ‑nu ‑gɔmɛ ‑nu 'wo ‑ya wo 'ko dhɛɛ" 'kpɔ ‑sü ‑bha 'wo‑ pö: «‑Dhɛ ‑mɛɛ ꞊në "wɩ sië 'ka ya? ‑Yö ‑dho 'dho ‑dhɛ ‑mɛɛ ꞊në‑ 'gü kö 'ya 'dho ꞊mɔɔ ‑dho mü ‑sü ‑bha? "Ɛɛn kö ‑yö 'dho Zuifö ‑nu 'wo ‑pɛn ‑sü 'ka Glɛkö ‑nu kpö 'gü bha‑ ‑nu "piʋ̈ kö ‑yö 'mɛ 'waa Zuifö 'ka bha‑ ‑nu ꞊klang kë 'pö ‑ee?
JOH 7:36 "Ɛɛn ‑a pö 'ö‑ wo ꞊dhɛ ka ‑dho n mɔɔ‑, 'kii 'dho n yö, ‑a ‑gɛn ‑mü ꞊dhɛ ‑dhɛ 'a dho kë‑ 'gü bha 'kii 'dho ꞊mɔɔ‑ ‑bha kö 'ka 'dho mü ya‑ 'klɔɔ‑ ‑mü ‑më 'ka?»
JOH 7:37 Troo 'wo dho‑ ‑ta "dhʋ̈ bha‑ ‑dhɛkpaɔyi ‑totaamasü ꞊në ꞊bhlëësü ꞊dedewo. ꞊Dhɛ 'ö‑ yi 'kpii‑ bha ꞊ya ꞊loo, 'yö Yesu ‑yö ꞊wlü 'yö dɔ ö ‑gɛan mɛ "dhaa bha‑ ‑nu wëëdhö 'yö dhiang zë‑ ‑nu ‑dhɛ "gbɩɩ‑ 'ka 'ö‑ pö: «"Yi mü ‑dhɔ 'dhö 'mɛ 'ö‑ kë sië ‑a ‑mɛ nu n "piʋ̈ kö ‑yö "yi mü!
JOH 7:38 'Mɛ 'ö ꞊ya 'dhang bho n "dhiʋ̈, "yigɔ 'ö ꞊dhɛ ꞊gwaan 'dhö ‑yö ‑dho bhɔ‑ ‑mɛ zuë" 'gü ꞊dhɛ ‑kɔ 'ö Atanna ‑wʋ ‑ya pö‑ 'ka ‑a 'dhö.»
JOH 7:39 Yesu ‑gun "wɩ sië Atanna ‑bha 'Nii‑ 'ö 'mɛ 'wo dho 'dhang bho‑ "dhiʋ̈, 'wo dho‑ ꞊slɔɔ bha ꞊në‑ 'ka "dhʋ̈ bha, ‑a ‑gɛn ‑mü ꞊dhɛ ‑a "tʋ̈ng bha‑ 'gü kö Atanna 'yii 'Nii‑ bha‑ bɔ ꞊kö, ‑a 'klɔɔ‑ ‑mü ꞊dhɛ 'ö gun "dhʋ̈ kö ‑a 'tɔ bhɔ "tʋ̈ng 'yii ꞊loo ꞊kö.
JOH 7:40 ꞊Dhɛ 'ö mɛ 'bha ‑nu 'wo gun mɛ kpö bha‑ 'gü 'wo Yesu ‑wʋ ma ꞊dhɛ ‑kɔ bha‑ 'dhö 'yö 'wo‑ pö: «'Mɛ 'ö ya Atanna ‑wʋdhiʋ̈loomɛ 'ö‑ ‑nu ‑wɔn 'dhö 'dhö bha yö ‑mü ꞊dedewo tɛan‑ 'ka!»
JOH 7:41 'Yö mɛ 'bha ‑nu ‑dɩ 'pö 'wo‑ pö: «‑A ‑bha ‑Yamɛ ‑mü!» Kö mɛ 'bha ‑nu ‑dɩ 'pö ‑wa pö sië: «"Kɛɛ ‑ka dɔ! Atanna ‑bha ‑Yamɛ bha ‑yö ‑mɔɔ ‑bha 'ö go Gadhidhe "wɛ ‑ee?
JOH 7:42 ‑A 'klɔɔ‑ ‑mü ꞊dhɛ ‑yö ‑bɛn zë ‑sü 'ka ‑a ‑wʋ 'gü ꞊dhɛ ‑a ‑bha ‑Yamɛ bha‑ ‑dho kë Davi suu 'gü ‑në ‑nu ꞊në‑ mɛ do 'ka, ‑yö ‑dho go Betedhɛmö, 'pödhɛ 'ö Davi ‑yö go‑ 'gü bha ꞊në‑ 'gü!»
JOH 7:43 Mɛ kpö 'wo bha‑ ‑nu ‑pɛ 'gü ‑gɛn ꞊në bha Yesu ‑wɔn 'gü.
JOH 7:44 Mɛ 'bha ‑nu ‑gun ‑nu kpö 'gü 'ö ('wo‑ ‑nu bɔ, 'ö) gun‑ ‑nu "piʋ̈ ꞊dhɛ 'wo‑ 'kun "kɛɛ mɛ 'bha ‑kɔ 'yii ꞊mɔɔ‑ ‑bha.
JOH 7:45 'Yö 'mɛ 'wo‑ ‑nu bɔ bha 'wo wo yee ‑kë 'wo dho "saabhomɛ ‑nu ‑gɔmɛ waa‑ Fadhiziɛn ‑nu 'wo‑ ‑nu bɔ bha‑ ‑nu "piʋ̈. ꞊Dhɛ 'ö ꞊wa wo "yan ‑kpan 'mɛ 'wo‑ bɔ bha‑ ‑nu ‑bha kö ꞊wa wo yee kë ꞊wa nu wo ‑kɔ 'gü "fië 'ka, 'yö 'wo‑ ‑nu dhɛɛ" kpɔ 'wo‑ pö: «‑Yö ‑kë ‑mü ꞊dhɛ 'yö 'kii‑ 'kun kö 'ka nu‑ 'ka?»
JOH 7:46 'Yö 'wo ‑yɔ bɔ‑ ‑nu ‑gɔ 'wo‑ pö: «'Aa! Yi ‑zë mɛ suu 'bha 'yii dhiang zë ꞊dhɛ 'mɛ bha‑ 'dhö yi "yaan do ‑wa!»
JOH 7:47 ꞊Dhɛ 'ö ꞊waa‑ pö "dhʋ̈ 'yö Fadhiziɛn ‑nu 'wo‑ pö‑ ‑nu ‑dhɛ: «"Ɛɛn ‑a ‑kɔ ꞊ya ꞊mɔɔ kaa ‑dɩ 'pö ka ‑bha ꞊në wo ꞊zɔɔ ‑ee?
JOH 7:48 "Ɛɛn ‑yö ka 'gü ꞊dhɛ ‑gɔmɛ ‑nu waa‑ Fadhiziɛn ‑nu 'yi ‑dhɛ ya‑ 'gü ya mɛ 'bha ꞊në ꞊ya 'dhang bho‑ "dhiʋ̈,
JOH 7:49 kö 'yii kë "wlaamɛ ‑nu 'ö 'waa Moizö ‑bha 'tɔng‑ 'bha dɔ, "dhangmɛ ‑nu bha wo ‑zë ‑a ‑nu 'ka ‑ee?
JOH 7:50 Fadhiziɛn ‑nu 'wo gun‑ pö sië "dhʋ̈ bha Nikodɛmö ‑gun ‑nu kpö 'gü. 'Ö gun "dhʋ̈ kö yö ‑zë ꞊ya 'dho 'nu Yesu ‑dhɛ 'gü ‑blɛɛsü wo. ꞊Dhɛ 'wo‑ pö "dhʋ̈ 'yö‑ pö‑ ‑nu ‑dhɛ:
JOH 7:51 «'Ö kwaa‑ 'tɔng‑ 'gü bha ‑oo, za‑ ‑mɔɔ ‑bha 'ö mɛ 'bha zë "wɛɛwɛɛ kö 'yii ziö ö ‑bha 'gü, "ɛɛn 'zü kö 'waa‑ ‑mɛ këwɔn dɔ ‑ee?»
JOH 7:52 'Yö 'wo‑ ‑yɔ bɔ Nikodɛmö ‑gɔ 'wo‑ pö: «i ‑go Gadhidhe ꞊në‑ wo 'pö 'yö 'i dhiang zë "dhʋ̈ ‑ee? ‑Bhö i "yan "ta Atanna ‑wʋ 'gü ‑së 'ka, ꞊ya kë ꞊dhɛ 'bha i "yan 'ta‑ 'gü, bhii ꞊dede i ‑dho ‑a ‑dhɛ yö ꞊dhɛ Atanna ‑wʋdhiʋ̈loomɛ ‑zë 'bha 'yii go Gadhidhe do.»
JOH 7:53 [꞊Dhɛ 'ö go‑ 'gü 'yö mɛ 'ö "dhʋ̈ 'ö dho ö ‑gɔ 'kɔɔ.
JOH 8:1 ꞊Dhɛ 'ö ꞊ya kë "dhʋ̈ 'yö Yesu ‑yö ꞊wlü 'ö dho ‑tɔn 'wo Odhivie ‑tɔn ‑kë bha‑ ꞊gbin‑.
JOH 8:2 "Kɛɛ ꞊dhɛ 'ö‑ ‑ta ‑dhɛ ꞊ya ꞊kpaɔ, 'yö ‑ziö 'zü ‑deewo 'ö dho Atanna ‑dhɔkëgükɔ 'gü ‑dhɛkpaɔ tii 'gü, 'yö "sɛgümɛ ‑nu ꞊gban "pɛpɛ 'wo nu‑ ‑dhɛ 'gü. ꞊Dhɛ 'ö ꞊ya bo 'yaanu ‑sü 'ka, 'yö‑ ‑nu ꞊klang kë ‑sü zü bho.
JOH 8:3 ‑Yö ‑to mü 'yö Zuifö ‑nu ‑bha 'tɔnggɔmɛ ‑nu waa‑ Fadhiziɛn ‑nu 'wo nu dhebhɔnë do 'wo‑ kun ꞊mlaabɔ ‑bha ‑a 'ka.
JOH 8:4 'Yö 'wo‑ ‑ya wo ꞊zinng 'gü, 'yö 'wo‑ pö Yesu ‑dhɛ: «Yi Dëmɛ, dhebhɔnë ya ‑wa ‑kun ꞊mlaabɔ ꞊në‑ ‑bha.
JOH 8:5 'Tɔng‑ 'ö Moizö ‑ya ‑bɛn zë kwa ‑dhɛ bha ‑ya ‑pö ꞊dhɛ ꞊wa dhebhɔ 'kun ꞊mlaabɔ ‑bha ꞊dhɛ ‑kɔ bha‑ 'dhö, ‑wa zë ‑gwë 'ka kö ‑yö ga. Bhi ‑zë i i ‑bha ‑pö 'gü ꞊dhɛ?»
JOH 8:6 ‑Wa ‑pö "dhʋ̈‑ ‑wʋ mɔɔ‑ kian ꞊në‑ 'ka kë "dhʋ̈ kö 'wo za ‑dɔ ‑bha ‑dhɛ yö. "Kɛɛ ꞊dhɛ 'ö ꞊waa‑ pö "dhʋ̈, 'yö Yesu ‑yö "gblëënu, 'yö ‑ya ‑bɛn zë ‑sü ‑bha ö kɔngga 'ka "sia‑.
JOH 8:7 'Ö gun kö ‑wa dhɛɛ" 'kpɔ sië ‑dhɔkɔ ‑dhɔkɔdhö ‑dhɛ do 'gü, 'yö ö ‑gɔ "dhiʋ̈ ꞊wlü 'ö‑ pö‑ ‑nu ‑dhɛ: «'Mɛ 'ö ka kpö 'gü bha 'ö 'yii 'wɔn yaa kë do ‑a ‑mɛ ‑yö ‑gwë ‑blɛɛsü 'sü kö ‑ya ‑zuö dhebhɔ bha‑ ‑bha.»
JOH 8:8 'Yö "gblëënu 'zü ‑deewo 'ö ‑ya ‑bɛn zë ‑sü ‑bha "sia‑.
JOH 8:9 ꞊Dhɛ 'mɛ 'wo bha 'wo 'wɔn bha‑ ma, ('yö‑ ‑nu zuë" 'dhö ‑ya za dɔ ‑sü ‑bha ‑a ‑nu ‑bha,) 'yö‑ mɛ "gblʋ̈gblʋ̈ ‑nu 'wo gun‑ ‑nu ‑ta bha 'wo ‑ya 'dho ‑sü ‑bha, 'yö 'wo dho "dhʋ̈ flɛ ꞊flɛ flɛdhö ('yö‑ ‑nu ꞊gban 'wo dho). 'Yö dhebhɔnë bha 'ö to ö do 'ka Yesu ‑kuu "dhiʋ̈ mü.
JOH 8:10 'Yö Yesu ‑yö ö ‑gɔ "dhiʋ̈ ꞊wlü 'zü ‑deewo, ('ö dho ‑dhɛ ‑ga kö 'mɛ 'wo bha‑ ꞊gban ꞊wa 'dho kö dhebhɔ bha yöö do ꞊në ꞊ya 'to mü). 'Yö‑ pö‑ ‑dhɛ: «'Yö 'mɛ 'wo nu i 'ka ya ‑wo 'mɛ, dhebhɔnë? "Ɛɛn i ‑zëzakamɛ 'yii ꞊slɔɔ‑ ‑nu kpö 'gü ‑ee?»
JOH 8:11 'Yö‑ ‑yɔ bɔ Yesu ‑gɔ 'ö‑ pö: «꞊Iin ‑wa, n Dëmɛ.» 'Yö Yesu ‑ya pö‑ ‑dhɛ: «‑Ɛɛ! Mang ‑dɩ 'pö 'mii 'dho i zë za 'ka. ‑Bhö 'dho, "kɛɛ 'bha 'dho, 'bha 'dho 'wɔn yaa kë 'zü!»]
JOH 8:12 'Yö Yesu ‑yö dhiang zë 'zü ‑deewo 'mɛ 'wo gun mü ‑blɛɛsü bha‑ ‑nu ‑dhɛ 'ö‑ pö: «Ma ꞊në 'a "kpʋngtaadhɛ ‑bha ‑dhɛpuudhɛ 'ka. 'Mɛ 'ö ꞊ya ziö n ꞊keng‑, ‑dhɛ ‑dho "pʋ‑ ‑mɛ ‑bha ‑tosɛa ‑ta 'ö 'yaa ‑tosɛa kë ö tii ‑bha 'zü tongtongdhö, "kɛɛ 'ö‑ ‑kë ‑dhɛpuudhɛ ꞊në‑ 'gü.»
JOH 8:13 ꞊Dhɛ 'ö ꞊yaa‑ pö "dhʋ̈ 'yö Fadhiziɛn ‑nu ‑wa pö‑ ‑dhɛ 'wo‑ pö: «‑A 'dhɛ 'kö bha "sɛɛdhɛ ꞊në‑ kë sië i ‑dɩ ‑bha bha. ꞊Ya 'to yö ‑zë ‑bha kö 'pë 'i‑ pö sië bha ꞊sua ꞊në‑ ꞊gban 'ka.»
JOH 8:14 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Kö 'zü 'ö ‑kë ꞊dhɛ a "sɛɛdhɛ ‑kë n ‑dɩ ‑bha oo, 'mii‑ kë n ‑dɩ ‑bha oo, a‑ 'wɔn ‑dɔ ꞊dhɛ tɛanwɔn ꞊në 'a‑ pö, ‑a ‑gɛn ‑mü ꞊dhɛ ka ꞊në 'kaa n 'godhɛ waa‑ n 'dhodhɛ dɔ, "kɛɛ ma ‑zë a‑ ‑dɔ.
JOH 8:15 Ka ꞊në 'ka za dɔ n ‑bha ka ‑gɔ "piʋ̈ "wɛɛwɛɛ, "kɛɛ ma ‑zë 'maa za dɔ mɛ 'bha ‑bha.
JOH 8:16 'Kö 'zü 'ma za ‑zian dɔ mɛ ‑bha kö tɛanwɔn ꞊në 'a‑ pö, ‑a ‑gɛn ‑mü ꞊dhɛ 'maa n do 'ka, n Dë 'ö n bɔ bha ‑yö n "piʋ̈.
JOH 8:17 'Yö‑ ‑bɛn 'dhö zë ‑sü 'ka 'zü ka ‑bha 'tɔng‑ 'sëëdhɛ 'gü ꞊dhɛ "sɛɛ‑ ꞊plɛ ‑wʋ ꞊ya kë do 'wɔn 'dhɛ 'kö‑ ‑bha kö tɛan‑ ‑mü.
JOH 8:18 ‑A ‑kë "dhʋ̈ ‑sü 'gü, a n ‑dɩ "sɛɛ‑ 'ka, 'yö n Dë 'ö n bɔ bha 'ö "sɛɛdhɛ ‑kë n ‑bha 'pö.»
JOH 8:19 'Yö 'wo‑ dhɛɛ" kpɔ 'wo‑ pö: «I dë ꞊në de 'ka?» 'Yö‑ ‑yɔ bɔ‑ ‑nu ‑gɔ 'ö‑ pö: «N dɔ 'ö 'kaa‑ wo ꞊në‑ ‑wɔn 'gü 'yö 'kaa n Dë dɔ bha. ꞊Ya kë ꞊dhɛ ka n ‑dɔ 'nu kö n Dë ‑dɩ 'pö ka‑ ‑dɔ.»
JOH 8:20 ‑Yö dhiang ‑nu bha‑ ‑zë "dhʋ̈ kö ‑yö Atanna ‑dhɔkëgükɔ 'ö Zedhizadhɛmö bha‑ 'gü, ‑dhɛ 'wo Atanna ‑bha 'kɔ ‑yë ‑kë 'ka 'wëë‑ bho‑ ‑bha bha‑ 'gü, "kɛɛ mɛ 'bha ‑kɔ 'yii ꞊mɔɔ‑ 'kun ‑sü ‑bha, ‑a ‑gɛn ‑mü ꞊dhɛ kö‑ ‑bha yi 'yii ꞊loo ꞊kö.
JOH 8:21 'Yö‑ pö 'zü‑ ‑nu ‑dhɛ ‑deewo 'ö‑ pö: «Maa 'dho, "kɛɛ 'ma 'dho, ka ‑dho n mɔɔ‑, "kɛɛ 'kii 'dho n yö 'ö to "dhʋ̈ 'ö 'ka ga ka ꞊sɔng 'ka ka ‑bha; ‑a ‑gɛn ‑mü ꞊dhɛ ‑dhɛ 'a 'dho sië‑ ‑bha bha, 'kii 'dho ꞊mɔɔ‑ ‑bha kö 'ka 'dho mü.»
JOH 8:22 ꞊Dhɛ 'ö‑ pö "dhʋ̈ 'yö ‑gɔmɛ ‑nu bha 'wo‑ pö wo 'ko ‑dhɛ: «‑Yö ‑më ‑dhiang ꞊në‑ zë ꞊ni? "Ɛɛn yöö ö ‑dɩ zë ‑ee?» "Ɛɛn 'zü ‑a pö 'ö‑ wo ꞊dhɛ ‑dhɛ 'ö yöö 'dho‑ ‑bha 'kwaa ꞊mɔɔ‑ ‑bha kö 'kwa dho mü bha‑ ‑gɛn ‑mü ‑më 'ka?»
JOH 8:23 'Yö‑ pö‑ ‑nu ‑dhɛ: «Ka ‑zë ka kpu‑ ‑go "kpʋng ꞊taa yö, "kɛɛ ma ‑zë n kpu‑ ‑go dhang‑ 'gü. "Kpʋngtaamɛ ‑mü ka ‑zë ka 'ka, "kɛɛ "kpʋngtaamɛ 'yaa ‑mü ma ‑zë n 'ka.
JOH 8:24 Yö ꞊në‑ ‑wɔn 'gü 'yö 'a‑ pö ka ‑dhɛ ꞊dhɛ ka ‑dho ga ka ꞊sɔng 'ka ka ‑bha. ꞊Ya kë ꞊dhɛ kö 'kii 'dhang bho‑ "dhiʋ̈ ꞊dhɛ ma ꞊në 'a 'dhö 'ka, ka ‑dho ga ka ꞊sɔng 'ka ka ‑bha.»
JOH 8:25 'Yö 'wo‑ pö‑ ‑dhɛ: «De ‑zë ‑mü i 'ka ‑zë wo ꞊zɔɔ?» 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «Pë do 'a ‑gban pö ‑sü ‑bha ka ‑dhɛ 'yi bha‑ 'ka ꞊në 'a‑ 'ka.
JOH 8:26 ꞊Sɔng 'gbɛ ‑yö ka ‑bha, 'ö 'a ꞊mɔɔ‑ 'nu‑ ‑bha 'a‑ pö "ɛɛn 'ö 'a za dɔ‑ 'ka ka ‑bha, "kɛɛ ꞊dhɛ 'ö ‑kë ꞊dhɛ 'mɛ 'ö n bɔ bha yö ꞊në tɛanwɔn pö bha, yö ꞊në‑ ‑wɔn 'gü 'yö 'wɔn 'dhɛ 'a‑ ma‑ ‑ta ꞊në 'a‑ pö mɛ "bhɩɩ‑ ‑nu ‑dhɛ.»
JOH 8:27 "Kɛɛ ‑a pö 'ö‑ wo "dhʋ̈ bha 'wii‑ 'gü ma ꞊dhɛ ‑yö ‑wɩ ö Dë Atanna ꞊në‑ 'ka.
JOH 8:28 Yö ꞊në‑ ‑wɔn 'gü 'yö‑ pö 'zü‑ ‑nu ‑dhɛ 'ö‑ pö: «꞊Ya kë ꞊dhɛ 'ka bo mang Mɛgbömɛ n ‑dɔ "dhü ‑bha ‑sü 'ka yi 'ö‑ 'ka, 'yö 'pë 'a‑ 'ka 'ka gun ‑na ‑a dɔ, "ɛɛn 'zü ꞊dhɛ 'maa 'wɔn 'bha kë n ‑dɩ ‑ta, "kɛɛ ‑wʋ 'ö n Dë ‑ya kpɔ n ‑bha 'yö 'a‑ 'gü ‑wɔn ‑kë.
JOH 8:29 'Mɛ 'ö n bɔ "dhʋ̈ bha ‑yö n "piʋ̈, 'yii n 'to n do 'ka, ‑a ‑gɛn ‑mü ꞊dhɛ a‑ ‑dhidhɛwɔn ꞊në‑ ‑kë yi ꞊gban ‑yi ꞊gban 'ka.»
JOH 8:30 Mɛ 'gbɛ ‑wo kë 'dhang bho‑ "dhiʋ̈ dhiang ‑nu 'ö‑ zë "dhʋ̈ bha‑ ‑wɔn 'gü.
JOH 8:31 'Yö‑ pö Zuifö ‑nu 'wo 'dhang bho‑ "dhiʋ̈ bha‑ ‑nu ‑dhɛ 'ö‑ pö: «꞊Ya kë ꞊dhɛ 'ka 'to ‑kplü ‑sü 'ka n ‑wʋ ‑bha ‑së 'ka "pɛɛpɛdhö, kö 'ka kë ma ꞊klang ꞊dede 'ka.
JOH 8:32 Ka ‑dho tɛanwɔn dɔ, 'ö tɛanwɔn bha 'ö ka gba ‑ya ‑dɩ 'flëë‑ 'gü ‑sü 'ka.»
JOH 8:33 'Yö 'wo‑ ‑yɔ bɔ‑ ‑gɔ 'wo‑ pö: «Ablaamö suu ‑mü yi 'ka, 'yii ‑da ꞊dhuëngdhɛ 'gü mɛ 'bha ‑gɔ do, ‑yö kë ‑kɔ ‑kë ꞊dhɛ 'yö 'i‑ pö yi ‑dho 'go ꞊dhuëngdhɛ 'gü?»
JOH 8:34 'Yö Yesu ‑ya pö: «A‑ ‑pö ka ‑dhɛ tɛan‑ ꞊dede 'ka ꞊dhɛ mɛ "ʋʋ mɛ 'ö 'wɔn yaa ‑zë ‑kë, kö‑ ‑mɛ ‑yö 'wɔn yaa ‑gɔ ꞊dhuëngdhɛ 'gü.
JOH 8:35 "Kɛɛ 'sa kö ꞊dhuëng ‑zë 'yaa 'to 'kɔdhi 'gü kö 'yii kë 'kɔ 'gü 'në ‑zë 'ka.
JOH 8:36 ‑A ‑kë "dhʋ̈ ‑sü 'gü, ꞊ya kë ꞊dhɛ mang Atanna gbö ‑mɛ ‑zë 'ma ka bho ꞊dhuëngdhɛ 'gü kö 'ka 'go ꞊dede ꞊në‑ wo ꞊dhuëngdhɛ 'gü bha.
JOH 8:37 A‑ 'wɔn ‑dɔ ꞊dhɛ Ablaamö suu ‑mü ka 'ka, "kɛɛ n ‑wʋ 'yaa 'dho 'ö‑ wo ka "tʋʋdhö 'yö ‑kë 'yö ka "piʋ̈ ꞊dhɛ 'ka n zë bha.
JOH 8:38 Pë 'ö n Dë ‑ya ‑zɔn n ‑dhɛ ꞊në 'a‑ ‑dhiang zë, "kɛɛ ka ‑zë, 'pë 'ö ka dë ‑ya ‑dhiang zë ka ‑dhɛ ꞊në 'ka‑ ‑kë.»
JOH 8:39 'Yö 'wo‑ ‑yɔ bɔ‑ ‑gɔ 'wo‑ pö: «Ablaamö ꞊në yi dë 'ka!» 'Yö Yesu ‑ya pö 'pö‑ ‑nu ‑dhɛ: «(Ablaamö suu 'yaa ‑mü ka 'ka!) ꞊Ya kë ꞊dhɛ ka ‑kë Ablaamö suu 'ka 'nu kö ka ‑dho Ablaamö këwɔn ‑nu kë.
JOH 8:40 "Kɛɛ ka ‑zë n zë ‑zian ꞊në 'kaa‑ mɔɔ‑ sië, "kɛɛ 'sa kö tɛanwɔn 'a‑ ma n Dë ‑ta ꞊në 'a‑ pö ka ‑dhɛ. 'Sa Ablaamö ‑zë 'yii yö ‑zë suu kë!»
JOH 8:41 ꞊Ya kë "dhʋ̈ kö 'pë ka dë ‑ya ‑kë 'yö 'ka‑ kë sië bha, (kö Ablaamö ‑zë 'yaa ka dë 'ka).» 'Yö 'wo‑ pö‑ ‑dhɛ: «Yi ‑zë 'tʋʋ‑ ‑ta ‑në 'yaa ‑mü yi 'ka ‑wa. Yi dë ‑yö doseng yö ‑mü Atanna ꞊në‑ 'ka!»
JOH 8:42 'Yö Yesu ‑ya pö‑ ‑nu ‑dhɛ: «Ka dë 'yaa ‑mü Atanna 'ka! Ka dë‑ ‑kë Atanna 'ka 'nu kö n ‑dhɔ ‑dho ka kë. ‑A ‑gɛn ‑mü ꞊dhɛ a ‑go yö ꞊në‑ 'gü. ꞊Ya 'go mü 'zü a ‑nu yö ꞊në‑ ‑bha nu 'gü. 'Mii nu n ‑dɩ 'ka, yö ꞊në n bɔ.
JOH 8:43 ‑Më ꞊në ‑kë 'yö 'kaa n ‑wʋ 'gü ma? ‑A ‑gɛn ‑mü ꞊dhɛ 'kaa "tʋ 'to n ‑wʋ ‑bha!
JOH 8:44 ꞊Ya kë "dhʋ̈ kö ka ‑zë ka dë ꞊në Sɔtraan 'ka, 'yö 'ka‑ "piʋ̈ ꞊dhɛ 'ka ka dë bha‑ ‑dhidhɛwɔn kë bha, 'sa kö yö ‑zë mɛzëmɛ ‑mü 'ö ‑bhɔ 'ka "dhʋ̈ ‑a zübhoyi 'ka 'yii tɛanwɔn pö do, ‑a ‑gɛn ‑mü ꞊dhɛ tɛanwɔn pö zuëga 'yaa‑ "gblʋ̈ʋ̈‑, ‑a ‑dɔ 'ka ‑mü ꞊sua ꞊në‑ 'ka, 'yii ꞊sua kë‑ ꞊nii 'yaa ‑da, ‑a ‑gɛn ‑mü ꞊dhɛ yö ꞊në ꞊sua suu ‑da.
JOH 8:45 'Wɔn 'ö‑ ‑wɔn 'gü, 'yö ma ‑zë 'ma tɛanwɔn pö ka ‑dhɛ 'yö 'kaa 'dhang bho n "dhiʋ̈ bha 'yö bha.
JOH 8:46 "Ɛɛn de ‑mü 'ka ka kpö 'gü bha 'yö ꞊sɔng yö ‑sü 'ka n ‑bha? ꞊Ya kë "dhʋ̈ 'ma tɛanwɔn pö ka ‑dhɛ bha ‑oo! 'Kaa 'dhang bho‑ "dhiʋ̈ ‑më ‑wɔn ꞊në‑ 'gü?
JOH 8:47 Ka ‑zë ka dë ꞊në 'yaa Atanna 'ka 'yö‑ ‑wɔn 'gü 'yö 'kaa ka "tʋ 'to n ‑wʋ ‑bha bha, "kɛɛ 'yaa yö ‑zë 'ka, mɛ "ʋʋ mɛ 'kö Atanna ‑bha 'ka, ‑yö ö "tʋ ‑to ‑a ‑wʋ ‑bha!»
JOH 8:48 'Yö Zuifö ‑nu ‑gɔmɛ ‑nu bha 'wo‑ ‑yɔ bɔ‑ ‑gɔ 'wo‑ pö: «‑A pö 'yi‑ wo ꞊dhɛ Atanna ‑wɔn ‑ma ‑zukplü ‑bha ‑mɛ ‑nu 'wo‑ ‑nu Samadhi ‑mɛ ‑nu ‑kë bha‑ mɛ do ‑mü i 'ka, "kɛɛ "yina yaa ‑yö i 'gü ya 'yaa ꞊sua 'ka.»
JOH 8:49 'Yö Yesu ꞊ya ‑yɔ bɔ‑ ‑nu ‑gɔ 'pö 'ö‑ pö: «"Yina yaa 'bha 'yaa n 'gü, ma ‑zë n Dë ꞊në 'a‑ ꞊bhlëë ‑ya, "kɛɛ 'yö ka ‑zë 'ka ꞊bhlëë ꞊në‑ bho n ‑bha.
JOH 8:50 Ma ‑zë 'mii n ‑dɩ 'tɔbhɔdhɛ mɔɔ‑, ‑a ‑gɛn ‑mü ꞊dhɛ ‑a ‑mɔɔ n ‑dhɛ ‑mɛ ‑dhö, yö 'ö "dhʋ̈ bha ꞊në ma ‑zë n ‑ta ‑zadɔmɛ 'ka.
JOH 8:51 "Kɛɛ a‑ pö ka ‑dhɛ tɛan‑ ꞊dede 'ka ꞊dhɛ 'mɛ ꞊ya n ‑wʋ ma kö‑ ‑mɛ ‑ya ‑ya ꞊bhlëë 'gü, ‑a ‑mɛ 'yii 'dho ga tongtongdhö.»
JOH 8:52 ꞊Dhɛ 'ö Yesu ꞊yaa‑ pö "dhʋ̈ 'yö 'wo‑ ‑yɔ bɔ‑ ‑gɔ 'wo‑ pö: «'Ya‑ 'wɔn dɔ ꞊tɔn ꞊dedewo ꞊dhɛ "yina yaa ꞊në i 'gü, ‑a ‑gɛn ‑mü ꞊dhɛ bhi ‑zë i‑ ‑pö ꞊dhɛ mɛ "ʋʋ mɛ 'ö ꞊ya 'dhang bho i "dhiʋ̈ ‑a ‑mɛ 'yii 'dho ga tongtongdhö, "kɛɛ 'sa kö Ablaamö waa‑ Atanna ‑wʋdhiʋ̈loomɛ ‑nu ‑zë ꞊gban ꞊wa ga.
JOH 8:53 "Ɛɛn ꞊ya kë "dhʋ̈ kö bhi ‑zë i fië‑ ꞊në 'dhö yi dë Ablaamö 'ö yö ‑zë ꞊ya ga bha‑ 'ka bha ‑ee? Atanna ‑wʋdhiʋ̈loomɛ ‑nu ꞊gban ꞊wa ga ‑dhɛ 'ö‑ ‑bha bha bhi ‑zë de ‑mü i 'ka ('yö 'i‑ pö 'mɛ ꞊ya 'dhang bho i "dhiʋ̈ 'yii 'dho ga tongtongdhö)?»
JOH 8:54 'Yö Yesu ‑ya pö‑ ‑nu ‑dhɛ 'ö‑ pö: ꞊Ya kë 'nu ꞊dhɛ kö ma ꞊në 'a n ‑dɩ 'tɔ bhɔ sië, kö n 'tɔ bhɔ ‑sü 'yaa pë 'bha 'ka, kö ‑yö "wlaasü, "kɛɛ n Dë do 'ka‑ ‑dhɛ sië kaa‑ Atanna bha ꞊në n 'tɔ bhɔ sië.
JOH 8:55 "Kɛɛ 'sa kö 'kaa‑ dɔ, 'sa ma ‑zë a‑ ‑dɔ. ꞊Ya kë ꞊dhɛ a‑ ‑pö 'nu ꞊dhɛ 'maa‑ dɔ kö ꞊suakëmɛ ‑mü n 'ka 'pö ꞊dhɛ ka 'dhö. "Kɛɛ a‑ ‑dɔ, a‑ ‑wʋ ‑ma yö ꞊në‑ ‑wɔn 'gü.
JOH 8:56 'Sa kö ka 'ziʋ̈‑ Ablaamö ‑zë ‑yö ö ‑zʋ ‑gɔn ꞊dhɛ ö ‑dho n nu "tʋ̈ng yö, 'yö ö ‑sëkë "dhiʋ̈, "kɛɛ kö‑ yi‑ ‑tun mü ꞊gblɛɛn. ꞊Dhɛ 'ö‑ "yan 'dhö ‑da ‑a ‑dhɛ 'gü, ‑a ꞊nii‑ kë ‑da.»
JOH 8:57 'Yö Zuifö ‑nu 'wo‑ pö: «‑A ‑kwɛ ‑zian 'yii ꞊mɔɔ ꞊kö ‑kaɔng "sɔɔdhu ‑bha "kɛɛ ‑yö Ablaamö ‑dhiang zë sië!»
JOH 8:58 'Yö Yesu ‑ya pö‑ ‑nu ‑dhɛ 'ö‑ pö: «A‑ pö ka ‑dhɛ tɛan‑ ꞊dede 'ka ꞊dhɛ 'ö gun kö Ablaamö 'yii bhɔ ꞊kö kö ma ‑zë a ‑dhö.»
JOH 8:59 ꞊Dhɛ 'ö ꞊yaa‑ pö "dhʋ̈ 'yö Zuifö ‑nu 'wo ‑gwë sü 'yö 'wo‑ pö 'wo‑ zë ‑gwë 'ka, "kɛɛ 'yö ö ‑gblɛn kpɔ 'yö zun "kpɛnng.
JOH 9:1 'Ö gun kö Yesu ‑yö ziö sië 'pö‑ "piʋ̈, 'yö ‑kpan gɔndënë do 'bha bha‑ ‑bha. 'Mɛ bha 'ö bhɔ kö‑ "yan ‑yö ꞊wlü 'ka.
JOH 9:2 'Yö Yesu ‑bha ꞊klang ‑nu 'wo‑ dhɛɛ" kpɔ 'wo‑ pö: «Yi Dëmɛ, 'mɛ 'ö ya yö ꞊në 'wɔn yaa ‑kë ‑ee, "ɛɛn ‑a dë ‑nu ꞊në 'wo 'wɔn yaa ‑kë 'yö‑ ‑wɔn 'gü 'yö bhɔ kö‑ "yan ‑yö 'wü ‑sü 'ka ya?»
JOH 9:3 'Yö‑ ‑yɔ bɔ‑ ‑nu ‑gɔ 'ö‑ pö: «'Ö bhɔ 'ö‑ wo "yan ꞊wlü 'ka bha‑ ‑gɛn 'yii ‑gban ‑a ‑bha 'wɔn yaa kë ‑sü, "ɛɛn 'zü ‑a 'kpɔmɛ ‑nu ‑bha ‑bha, "kɛɛ ‑yö ‑kë "dhʋ̈ kö mɛ "bhɩɩ‑ ‑nu ꞊në ‑wo Atanna ‑bha 'gügbɩɩdhɛ dɔ‑ ‑bha.
JOH 9:4 ꞊Dhɛ 'ö ‑kë ꞊dhɛ "bin 'yii 'ma ꞊kö bha‑ ‑dhɛa ‑bha ꞊dhɛ mɛ 'ö n bɔ bha, 'ö n bɔ‑ 'wɔn 'ö‑ 'gü 'kwa‑ kë, ‑a 'klɔɔ‑ ‑mü ꞊dhɛ "bin ‑zë ꞊ya bo 'ma ‑sü 'ka, kö yë kë "tʋ̈ng ꞊ya ziö.
JOH 9:5 "Tʋ̈ng 'a ‑tun 'ka "kpʋng ꞊taa yö bha ma ꞊në 'a ‑dhɛ ‑pʋ mɛ "bhɩɩ‑ ‑nu ‑ta.»
JOH 9:6 ꞊Dhɛ 'ö ꞊yaa‑ pö "dhʋ̈ 'yö "dhidhi bho "sia‑, 'yö pa‑ 'gü, 'yö ‑kë bʋ̈ʋ̈‑ 'ka, 'yö‑ ‑kan 'mɛ bha‑ "yan 'gü.
JOH 9:7 ꞊Dhɛ 'ö ꞊yaa‑ "kan‑ "yan 'gü "dhʋ̈ 'yö‑ pö‑ ‑dhɛ: «‑Bhö 'dho kö 'i i wëë' "zu "yi ꞊gblü 'wo‑ Sidhoe ‑kë bha‑ ꞊bhaa.» (꞊Waa‑ pö Sidhoe ‑a ‑nu ‑wʋ 'gü kö ‑wa pö "yi 'wo‑ bɔ). ꞊Dhɛ 'ö ꞊yaa‑ pö "dhʋ̈, 'yö gɔndënë bha 'ö dho "yi bha‑ ꞊bhaa, 'yö ö wëë' ‑zu mü. ‑A ‑go mü ‑sü 'ka kö‑ "yan 'gü ꞊ya "pʋ, kö ꞊ya ‑dhɛ yö 'kpakpadhö.
JOH 9:8 ꞊Dhɛ 'ö ꞊ya kë "dhʋ̈, 'yö‑ ‑yayɔɔ ‑nu waa‑ 'mɛ 'wo‑ dɔ gbadhɛmɛ 'ka 'nu ‑blɛɛsü bha 'wo‑ pö: «Gbadhɛmɛ 'ö gun ‑ya ‑sü 'ka ‑dhɛ 'ya‑ 'gü ya 'yaa kë ꞊ni ‑ee?»
JOH 9:9 'Yö mɛ 'bha ‑nu ‑wa pö: «Yö ‑mü.» Kö mɛ 'bha ‑nu ‑wa pö sië 'pö: «‑Abin ꞊maa, ‑yö ‑bhɔ ꞊në wo‑ ‑bha "kɛɛ 'yaa ‑mü!» 'Yö yöö ꞊dede 'ö‑ pö: «Mɛ "wɛɛ 'bha 'yaa ‑mü, ma ‑mü!»
JOH 9:10 ꞊Dhɛ 'ö ꞊yaa‑ pö "dhʋ̈, 'yö 'wo‑ dhɛɛ" kpɔ 'wo‑ pö: «I "yan ‑yö "pʋ ‑kɔ ‑kë ꞊dhɛ 'sa?»
JOH 9:11 'Yö‑ ‑yɔ bɔ‑ ‑nu ‑gɔ 'ö‑ pö: «'Mɛ 'wo‑ ‑dhɛ Yesu bha ꞊në bʋ̈ʋ̈‑ ‑kë 'yö‑ ‑kan n "yan 'gü, 'yö‑ pö n ‑dhɛ 'a 'dho kö 'a n wëë' "zu "yi 'wo‑ Sidhoe ‑kë bha‑ ꞊bhaa, 'yö 'a 'dho 'a n wëë' ‑zu mü. ꞊Dhɛ 'ö 'ma bo n wëë' "zu ‑sü 'ka, 'yö n "yan ‑yö ‑dhɛ yö.»
JOH 9:12 'Yö 'wo‑ dhɛɛ" 'bha kpɔ 'zü 'wo‑ pö: «‑A 'mɛ 'ö "dhʋ̈ bha ‑yö 'mɛ?» 'Yö‑ pö‑ ‑nu ‑dhɛ: «'Aa! 'maa‑ yö ‑zë 'wɔn dɔ!»
JOH 9:13 ꞊Dhɛ 'ö ꞊ya kë "dhʋ̈, 'yö 'mɛ 'ö Yesu ‑ya dha bha 'wo dho‑ 'ka Fadhiziɛn ‑nu ‑kuu "dhiʋ̈.
JOH 9:14 Bʋ̈ʋ̈‑ 'ö Yesu ‑ya ‑kë 'ö gɔndënë bha‑ dha‑ 'ka bha ‑ya ‑kë "dhʋ̈ Zuifö ‑nu ‑bha ꞊glooyi do 'bha ꞊në‑ 'ka.
JOH 9:15 Yö ꞊në‑ ‑wɔn 'gü 'yö Fadhiziɛn ‑nu 'wo gɔndënë bha‑ dhɛɛ" kpɔ 'pö ‑kɔ 'ö ‑kë 'ka 'yö‑ "yan ‑yö ‑dhɛ yö bha‑ ‑wɔn 'ka. 'Yö‑ ‑yɔ bɔ 'pö‑ ‑nu ‑gɔ 'ö‑ pö: «‑Yö bʋ̈ʋ̈‑ ꞊në‑ ‑kan n "yan 'gü 'yö 'a dho 'a n wëë' ‑zu 'yö 'a ‑dhɛ yö.»
JOH 9:16 'Yö Fadhiziɛn ‑nu 'wo ‑pɛ 'gü, 'yö ‑kɔ "pɛan bha ‑ya pö: «'Mɛ 'ö bhɔ "dhʋ̈ bha Atanna ‑bha mɛ 'yaa ‑mü; yö ꞊në‑ ‑wɔn 'gü 'yö 'yaa‑ ‑bha 'tɔng‑ 'ö‑ ‑gban ꞊glooyi ‑bha bha‑ ꞊bhlëë ‑ya.» Kö ‑kɔ "pɛan 'bha ‑dɩ 'pö ‑ya pö sië 'ö‑ pö: «Atanna ‑bha mɛ ‑mü! 'Yaa "dhʋ̈ 'mɛ 'kö 'yaa Atanna ‑bha mɛ 'ka ‑yö ‑mɔɔ ‑bha 'ö "dhabhliwɔn suu ‑nu ya‑ kë ‑kɔ ‑kë ꞊dhɛ?»
JOH 9:17 'Yö Fadhiziɛn ‑nu 'wo‑ dhɛɛ" 'bha kpɔ 'zü 'wo‑ pö: «'Ö bhi 'kö bhi ‑zë i "yan "dhiʋ̈ ‑pʋ bha i i ‑bha ‑pö 'gü ꞊dhɛ?» 'Yö‑ pö: «Ma ‑zë a‑ ‑pö Atanna ‑wʋdhiʋ̈loomɛ ‑mü ‑wa!»
JOH 9:18 "Kɛɛ ‑a ‑pö ꞊dhɛ 'mɛ 'kö bha‑ "yan‑ ‑gun 'wü ‑sü 'ka "pɛɛpɛdhö 'yö ‑dhɛ ‑dee 'bha yö sië bha‑ ‑wɔn ‑zë 'yii bhɔ Fadhiziɛn ‑nu bha‑ ‑nu 'gü tɛan‑ ‑bha tongtongdhö. 'Yö 'wo 'mɛ bha‑ dë ‑nu ‑dhɛ kö 'wo‑ ‑nu dhɛɛ" 'kpɔ 'pö.
JOH 9:19 ꞊Dhɛ 'ö ꞊wa nu, 'yö 'wo‑ ‑nu dhɛɛ" kpɔ 'wo‑ pö: «'Mɛ ya ka gbö ‑mü ‑ee? ‑Wa ‑pö 'ö bhɔ kö‑ "yan ‑yö 'wü ‑sü 'ka ‑wa, tɛan‑ ‑mü ‑ee? 'Yö ‑yö kë ‑kɔ ‑kë ꞊dhɛ 'yö ‑dhɛ yö ‑deewo?»
JOH 9:20 'Yö "yanwlümɛ bha‑ 'kpɔmɛ ‑nu bha 'wo‑ ‑yɔ bɔ‑ ‑nu ‑gɔ 'wo‑ pö: «Yi gbö ‑mü, 'ö bhɔ kö‑ "yan ‑yö ꞊wlü 'ka "dhʋ̈ tɛan‑ 'ka,
JOH 9:21 "kɛɛ 'ö ‑kë ‑kɔ 'kö‑ ‑bha 'yö ‑dhɛ ‑dee 'bha yö sië ya 'yaa yö ‑zë 'wɔn dɔ, 'mɛ 'ö 'wɔn bha‑ ‑kë 'pö 'yaa‑ dɔ. ‑Kaa yöö ꞊dede dhɛɛ" 'kpɔ kö ‑ya ‑gɛn bho ka ‑dhɛ, ‑a ‑gɛn ‑mü ꞊dhɛ 'yaa 'në 'dɛdɛ 'ka 'zü!»
JOH 9:22 ‑A pö 'ö 'mɛ bha‑ dë ‑nu bha ‑wa wo "dhʋ̈ bha‑ 'klɔɔ‑ ‑mü ꞊dhɛ kö ‑wo "suʋ̈ sië Zuifö ‑nu ‑gɔmɛ ‑nu bha‑ ‑nu ‑gɔ; ‑a ‑gɛn ‑mü ꞊dhɛ 'ö gun "dhʋ̈ kö ꞊wa ‑ya 'kwëë‑ kë kö‑ ‑nu ‑wʋ ꞊ya 'to‑ ‑bha do ꞊dhɛ mɛ "ʋʋ mɛ 'ö dho‑ pö ꞊dhɛ Yesu bha Atanna ‑bha ‑Yamɛ Klisi ‑mü, ‑wo ‑dho a‑ ‑mɛ ‑gɛn ‑naa 'kpɔ, 'ö 'yaa ‑da ‑a ‑nu ‑bha ‑yakwëëkëgükɔ 'bha ‑bha 'bha 'gü 'zü.
JOH 9:23 'Wɔn 'ö‑ ‑wɔn 'gü 'yö‑ dë ‑nu ‑wa pö 'në 'dɛdɛ 'yaa ‑mü, ‑kaa yöö ꞊dede dhɛɛ" 'kpɔ kö ‑ya ‑gɛn bho bha 'yö bha.
JOH 9:24 'Yö Fadhiziɛn ‑nu 'wo 'mɛ 'ö "yan ‑yö gun ꞊wlü 'ka bha‑ ‑dhɛ 'zü ‑deewo, 'yö 'wo‑ pö‑ ‑dhɛ: «'i‑ zë Atanna ‑dhɛ! 'Mɛ 'ö i dha bha de suu ‑mü? ‑A pö 'yi‑ wo "dhʋ̈ bha‑ ‑gɛn ‑mü ꞊dhɛ yi ‑zë yi 'dhang bho ‑sü ‑ya "dhiʋ̈ ꞊dhɛ 'mɛ bha 'wɔnyaakëmɛ ‑mü.»
JOH 9:25 'Yö‑ ‑yɔ bɔ‑ ‑nu ‑gɔ 'ö‑ pö: «'Wɔnyaakëmɛ ‑mü ‑ee, "ɛɛn 'wɔnyaakëmɛ 'yaa ‑mü ‑ee, 'maa yö ‑zë 'wɔn dɔ! N ‑bha 'a‑ dɔ ‑yö doseng, yö ‑mü ꞊dhɛ 'a bhɔ kö 'maa ‑dhɛ yö "kɛɛ 'ma ‑dhɛ yö ꞊taa yö‑ ‑bha.»
JOH 9:26 'Yö 'wo‑ pö‑ ‑dhɛ: «‑Yö i "yan "dhiʋ̈ "pʋ ‑kɔ kë ꞊dhɛ? ‑Yö ‑më ꞊në‑ ‑kë i ‑bha?»
JOH 9:27 'Yö‑ ‑yɔ bɔ 'zü‑ ‑nu ‑gɔ 'ö‑ pö: «'Ma ziö ‑zë wo‑ ‑gɛn 'gü ka ‑dhɛ 'nu, "tʋ ꞊në 'kii‑ 'to n ‑wʋ ‑bha, ka n dhɛɛ" ‑kpɔ 'zü ‑deewo ‑më ‑wɔn 'gü? "Ɛɛn ‑yö ka "piʋ̈ 'pö ꞊dhɛ 'ka ‑da ꞊keng‑ kö 'ka kë‑ ‑bha ꞊klangdhiʋ̈ 'ka ‑ee?»
JOH 9:28 ꞊Dhɛ 'ö‑ pö "dhʋ̈ 'yö 'wo ‑ya "si bho ‑sü ‑bha ‑a ‑gɔ, 'yö 'wo‑ pö‑ ‑dhɛ: «Bhi ꞊në 'i‑ ‑bha ꞊klangdhiʋ̈ 'ka, "kɛɛ yi ‑zë yi Moizö ꞊në‑ ‑bha ‑gɔ 'gü.
JOH 9:29 ‑A ‑gɛn ‑mü ꞊dhɛ yi Moizö ꞊në‑ dɔ ꞊dhɛ 'mɛ 'ö Atanna ‑yö dhiang zë‑ ‑dhɛ ‑a 'dhö, "kɛɛ mɛ 'dhɛ 'kö bha 'yaa‑ 'godhɛ dɔ.»
JOH 9:30 'Yö 'mɛ bha 'ö‑ pö‑ ‑nu ‑dhɛ 'ö‑ pö: «‑A kë ‑sü kö 'ka‑ pö ꞊dhɛ 'kaa 'mɛ 'kö bha‑ 'godhɛ dɔ ‑zë 'wɔn ꞊në n kɔn, "kɛɛ 'sa yö ꞊në ma ‑zë n dha.
JOH 9:31 Mɛ ꞊gban kwa‑ 'wɔn ‑dɔ ꞊dhɛ Atanna 'yaa ö "tʋ 'to 'wɔnyaakëmɛ ‑bha bhɛa" ‑wʋ ‑bha kö 'yii kë 'mɛ kö‑ ꞊bhlëë ‑ya, 'ö ö "tʋ to‑ ‑wʋ ‑bha ‑a 'ka.
JOH 9:32 ꞊Ya 'go ‑mü 'zü 'kwii‑ ‑ma "sɛ ya‑ 'gü do ꞊dhɛ 'mɛ 'ö bhɔ kö‑ "yan ‑yö 'wü ‑sü 'ka mɛ 'bha ꞊yaa‑ ‑mɛ kë "klʋ̈ʋ̈klʋ̈ do.
JOH 9:33 ꞊Ya kë 'nu ꞊dhɛ 'mɛ bha Atanna ‑bha mɛ 'yaa ‑mü, kö‑ ‑kɔ 'yii 'dho ꞊mɔɔ 'wɔn bha‑ kë ‑sü ‑bha!»
JOH 9:34 'Yö Fadhiziɛn ‑nu bha 'wo‑ ‑yɔ bɔ‑ ‑gɔ 'wo‑ pö: «Bhi 'ö bhi ‑zë 'wɔn yaa "kɔngblɛ 'dhö i ‑bha, 'ö 'i bhɔ 'wɔn yaa 'gü, 'ö 'i ‑gla 'wɔn yaa 'gü bha ‑yö i "piʋ̈ ꞊dhɛ 'i yi ꞊klang kë ‑më ‑wɔn ꞊në‑ 'ka?» 'Yö 'wo‑ ‑kë Zuifö ‑nu ‑bha ‑yakwëëkëgükɔ bha‑ 'gü.
JOH 9:35 ꞊Dhɛ 'ö 'mɛ bha ꞊ya ziö ꞊ya 'dho, 'yö Yesu ‑ya ma 'pö ꞊dhɛ ꞊waa‑ "piʋ̈ kë Zuifö ‑nu ‑bha ‑yakwëëkëgükɔ 'gü. ꞊Dhɛ 'ö ‑kpan ‑bha ‑dhɛ 'bha bha‑ 'gü, 'yö‑ dhɛɛ" kpɔ 'ö‑ pö: «I 'dhang ‑bho Mɛgbömɛ ‑wɔn "dhiʋ̈ "wɛ ‑ee?»
JOH 9:36 'Yö‑ ‑yɔ bɔ‑ ‑gɔ 'ö‑ pö: «A‑ dɔ ‑zë wo 'nu kö a ‑dho 'dhang bho‑ "dhiʋ̈ ‑dhe, n Dëmɛ! "Kɛɛ ‑yö 'mɛ ‑zë wo?»
JOH 9:37 'Yö Yesu ‑ya pö‑ ‑dhɛ: «'Bha ‑kpan ‑bha ꞊naa bha, ‑a ‑gɛn ‑mü ꞊dhɛ yö ꞊në kɛng 'ka "wɩ sië bha.»
JOH 9:38 'Yö‑ pö: «'Ma 'dhang bho‑ "dhiʋ̈, n Dëmɛ!» ꞊Dhɛ 'ö ꞊yaa‑ pö "dhʋ̈, 'yö zun‑ ‑dhɛ ö kpiö 'gü.
JOH 9:39 Yesu ‑ya ‑pö ‑dhɛ yö ꞊në‑ 'gü 'ö‑ pö: «Nu 'a‑ wo "kpʋng ꞊taa bha a ‑nu kö 'a 'wɔnbhokota ꞊në‑ kë kö 'mɛ 'waa ‑dhɛ yö tongtongdhö ‑wo ‑dhɛ yö, kö 'mɛ 'wo‑ pö wo ‑dɩ ‑dhɛ wo ‑dhɛ yö bha 'wa 'dho ‑dhɛ 'bha yö, kö‑ ‑nu "yan ‑yö 'wü.»
JOH 9:40 ꞊Dhɛ 'ö ꞊yaa‑ pö "dhʋ̈ 'ö Fadhiziɛn ‑nu 'bha ‑nu 'wo gun‑ ꞊keng‑ mü bha ꞊waa‑ ma, 'yö 'wo‑ dhɛɛ" kpɔ 'wo‑ pö: «꞊Ya kë "dhʋ̈ kö 'mɛ 'yi ya 'pö yi "yan‑ ꞊wlü 'ka ꞊naa bha ‑ee?»
JOH 9:41 'Yö‑ ‑yɔ bɔ‑ ‑nu ‑gɔ 'ö‑ pö: «꞊Ya kë 'nu ꞊dhɛ ka ka ‑dɩ ‑sü ꞊dhɛ "yanwlümɛ 'dhö kö 'bɔn 'yaa ka ‑bha, "kɛɛ ka‑ ‑pö ka ‑dɩ ‑dhɛ ꞊dhɛ ka ‑dhɛ ‑yö; 'wɔn 'ö‑ ‑wɔn 'gü 'yö 'bɔn 'yii 'dho 'go ka ‑bha tongtongdhö bha 'yö bha.»
JOH 10:1 'Yö Yesu ‑yö "gwënng do ‑da ‑a ‑nu ‑dhɛ 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ mɛ "ʋʋ mɛ 'ö 'yii bɔ "bhlaa wlɛɛ "dhi 'ka kö ‑yö ‑da 'gü, "kɛɛ 'ö bɔ zian "wɛɛ 'ka, kö 'mɛ bha ꞊kwaanmɛ "ɛɛn pëgüseemɛ ‑mü.
JOH 10:2 "Kɛɛ 'mɛ 'ö bɔ "bhlaa wlɛɛ "dhi 'ka 'ö ‑da 'gü bha kö yö ꞊në "bhlaa bha‑ ‑maakëmɛ 'ö‑ ‑mɛ ꞊dede 'ka ‑a 'ka.
JOH 10:3 "Bhlaa wlɛɛ "dhiʋ̈mɛ ‑zë ‑yö wlɛɛ "dhi "pʋ ꞊në‑ wo 'yö ‑tuʋ̈ dëmɛ 'ö ö ‑bha ‑tuʋ̈ ‑nu ‑dhɛ, 'yö 'wo‑ ‑wʋ ma. Yö ‑zë ‑yö ö ‑bha "bhlaa ‑nu bha‑ ‑nu ‑sü 'tɔ 'ka 'do 'do 'yö‑ ‑nu ‑dhɛ, 'yö dho‑ ‑nu 'ka "kpɛnng.
JOH 10:4 ꞊Ya bo ö ‑dɩ ‑bha ‑tuʋ̈ ‑nu bha‑ ‑nu ‑zun "kpɛnng ‑sü 'ka ꞊dhɛ ‑kɔ bha‑ 'dhö, 'yö ‑da ‑nu ‑dhɛ "dhiʋ̈ 'yö 'wo ‑ziö ꞊keng‑, ‑a 'klɔɔ‑ ‑mü ꞊dhɛ ‑wa ‑wʋ ‑dɔ.
JOH 10:5 'Mɛ 'wo mɛ "wɛɛ 'ka ‑a ‑bha ‑tuʋ̈ ‑nu bha ‑wo ‑dho ꞊dua ꞊në‑ wo‑ ‑nu ‑gɔ, 'wii 'dho ziö‑ ‑nu ꞊keng‑, ‑a 'klɔɔ‑ ‑mü ꞊dhɛ 'waa‑ ‑nu ‑wʋ dɔ.»
JOH 10:6 "Gwënng bha Yesu ‑ya ‑da ‑a ‑nu ‑dhɛ "dhʋ̈ "kɛɛ 'wii‑ 'klɔɔ‑ dɔ.
JOH 10:7 'Yö‑ 'klɔɔ‑ pö 'zü‑ ‑nu ‑dhɛ ‑deewo 'ö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ: Ma ꞊në 'a ꞊dhɛ ‑tuʋ̈ wlɛɛ "dhiʋ̈ "kwɛɛ ‑yaan 'dhö;
JOH 10:8 ‑a ‑gɛn ‑mü ꞊dhɛ mɛ "pɛpɛ 'wo gun wo ‑dɩ kë sië ‑tuʋ̈ ‑mɛ 'ka 'wo nu bha, ‑tuʋ̈ ‑nu 'wii wo "tʋ 'to‑ 'bha ‑wʋ ‑bha. ‑A ‑gɛn ‑mü ꞊dhɛ ꞊kwaanmɛ ‑nu waa‑ pëgüseemɛ ‑nu ꞊në gun wo ‑zë ‑a ‑nu 'ka.
JOH 10:9 Ma ꞊në 'a ꞊dhɛ ‑tuʋ̈ wlɛɛ "dhi 'dhö. 'Mɛ 'ö bɔ n ‑ta 'ö ‑da wlɛɛ 'gü, ‑yö ‑dho dha, ‑yö ‑dho ꞊mɔɔ‑ ‑bha 'ö ‑da 'kɔɔdhö 'ö zun "kpɛnng, (‑a ‑gɛn ‑mü ꞊dhɛ kö ‑yö ꞊dhɛ mɛ 'dhö mɛ ‑dɩ ‑gɔ 'kɔɔdhö). ꞊Ya 'go mü 'zü ‑yö ‑dho ö ‑bhöpë ꞊slɔɔ.
JOH 10:10 ꞊Kwaanmɛ ‑zë ‑yö ‑nu kö 'ö ꞊kwaan ꞊në‑ bho kö 'ö ‑tuʋ̈ ‑nu zë ‑nu wo kö 'ö‑ ‑nu 'gü see‑, "kɛɛ ma ‑zë a ‑nu kö 'a‑ ‑nu ‑maa ꞊në‑ kë kö ꞊sii ‑yö kë‑ ‑nu ‑dhɛ kö ‑wo ‑ya ‑a "yi ꞊bhaa.
JOH 10:11 Ma ꞊në 'a ‑tuʋ̈ ‑maakëmɛ ꞊dede 'ö ‑tuʋ̈mɛ 'ka ‑a 'ka. ‑A ‑gɛn ‑mü ꞊dhɛ "bhlaa ‑tuʋ̈ ‑maakëmɛ ꞊dede ꞊në ꞊mɔɔ‑ ‑bha 'ö ö ‑bha ‑tosɛa ꞊gbaɔ ö ‑bha ‑tuʋ̈ ‑nu ‑wɔn 'gü;
JOH 10:12 "kɛɛ 'mɛ 'kö yö ‑zë 'wo‑ ꞊saa ꞊në‑ bho, 'ö 'yaa ‑tuʋ̈mɛ 'ka, "ɛɛn 'ö 'yaa ‑tuʋ̈ ‑maakëmɛ ‑së 'ka, ꞊ya laa yö kö ‑yö nu sië ‑tuʋ̈ 'kun ‑dhɛ 'gü, ‑yö ö kwaa‑ ꞊në‑ wo‑ ‑nu zü 'ö ‑ziö ‑bɛang 'ka, 'yö laa ‑ya nu zë, 'yö‑ ‑nu ‑pɛn 'yö 'wo dɔ 'do 'do.
JOH 10:13 ꞊Naɔmɔɔmɛ ‑zë ‑ziö ‑bɛang 'ka ‑gɛn ‑mü ꞊dhɛ yö ‑zë ꞊naɔmɔɔmɛ ꞊në ‑mü ‑a 'ka, ‑tuʋ̈ ‑nu ‑wɔn 'yaa‑ ‑gɔ ‑dhɛ ‑tuʋ̈mɛ ꞊dede 'dhö, "kɛɛ ma ‑zë ‑tuʋ̈ ‑maakëmɛ ‑së ꞊dede 'ö‑ 'ka yö ‑mü n 'ka.
JOH 10:14 A ma ‑tuʋ̈ ‑nu ‑dɔ, woo ‑dɩ 'pö 'wo n dɔ.
JOH 10:15 ꞊Dhɛ ‑kɔ 'ö n Dë ‑yö n dɔ‑ 'ka 'ö mang ‑dɩ 'pö 'a‑ dɔ‑ bha‑ 'dhö. Yö ꞊në‑ ‑wɔn 'gü 'yö 'a ma ‑tosɛa nu ma ‑tuʋ̈ ‑nu ‑wɔn 'gü.
JOH 10:16 ‑Tuʋ̈ ‑nu 'wo "dhʋ̈ bha‑ ‑kpɛa 'yaa kë ꞊ni, ‑a 'bha ‑nu ‑wo ‑dhö 'ö 'waa wlɛɛ ya‑ 'gü. ‑A 'dhɛ 'wo "dhʋ̈ bha "fɔn kö 'a nu‑ ‑nu 'ka wlɛɛ ya‑ 'gü 'pö. A ‑dho ‑a ‑nu ‑dhɛ 'wo n ‑wʋ ma, 'ö 'wo nu 'ö ‑tuʋ̈ kpö ‑yö to do, 'ö‑ ‑gɔdhiʋ̈mɛ ‑yö ‑kë do 'pö.
JOH 10:17 N ‑dhɔ ‑yö n Dë ‑kë, ‑a ‑gɛn ‑mü ꞊dhɛ a ma ‑tosɛa ‑nu "dhʋ̈ kö 'a‑ 'sü ‑deewo.
JOH 10:18 Mɛ 'bha ‑kɔ 'yii ziö n ‑gɔ, a‑ ‑nu n ‑dɩ ꞊nii ꞊në‑ ‑bha. ‑A ‑gɛn ‑mü ꞊dhɛ ‑a nu "sɩ ‑yö n ‑dhɛ, ‑a 'sü "sɩ ‑yö n ‑dhɛ. 'Wɔn 'ö n Dë ‑ya ‑ya n ꞊kwɛɛ‑ kö 'a‑ kë 'yö bha.»
JOH 10:19 ‑Wʋ 'ö Yesu ‑ya pö "dhʋ̈ bha 'yö 'gügblüdhe ‑dee 'bha ‑da 'zü Zuifö ‑nu kpö 'gü.
JOH 10:20 'Yö mɛ kpö 'kpii‑ 'bha ‑wa pö: «'Mɛ bha ‑tamamɛ ‑mü!» "ɛɛn: «Slaa" ꞊në ꞊ya ‑da 'gü, 'ka 'dho ka "tʋ 'to‑ ‑wʋ ‑bha!»
JOH 10:21 "Kɛɛ kö mɛ 'bha ‑nu ‑zë ‑wa pö sië 'pö ꞊dhɛ: «‑Tamamɛ "ɛɛn slaamɛ ‑zë "wɩ ‑kɔ 'yaa kë "dhʋ̈, ‑a ‑gɛn ‑mü ꞊dhɛ "yina yaa ‑zë 'yaa ꞊mɔɔ‑ ‑bha kö ‑yö "yanwlümɛ "yan "dhiʋ̈ "pʋ.»
JOH 10:22 'Wɔn bha ‑yö ‑kë "dhʋ̈ "nɛnɛ ziö "tʋ̈ng 'gü kö Zuifö ‑nu ‑bha "saa‑ ‑bho Atanna ‑dhɛ ‑dhɛ 'wo‑ ‑pë ‑kë yi 'bha 'ka bha ‑wa ‑kwɛ ‑zun 'ko "dhiʋ̈ troo kë sië Zedhizadhɛmö.
JOH 10:23 Kö Yesu ‑yö ꞊nië sië Atanna ‑dhɔkëgükɔ 'ö Zedhizadhɛmö bha‑ "kwɛɛdhɛ 'wo‑ ‑dhɛ Sadhomɔ ‑bha "kwɛɛdhɛ bha‑ 'gü,
JOH 10:24 'yö Zuifö ‑nu 'wo nu 'wo bho 'ko ‑ta ‑a ‑dhɛ 'gü mü 'wo‑ pö‑ ‑dhɛ: «'Ya dɔ ꞊tɔn 'kën 'gü i ‑wɔn 'gü "gbɩɩ‑ ‑wa, i ‑dho yi bho‑ 'gü ‑më yi ꞊në‑ 'ka? 'Ö ꞊ya kë ꞊dhɛ bhi ꞊në 'i Atanna ‑bha ‑Yamɛ 'ö‑ nu ‑wɔn 'dhö 'dhö bha‑ 'ka tɛan‑ 'ka, ‑bhö ‑a pö yi ‑dhɛ!»
JOH 10:25 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Ma‑ pö ‑zë wo ka ‑dhɛ 'nu ‑wa, 'dhang ꞊në 'kaa‑ bho n "dhiʋ̈. "Kɛɛ 'sa kö 'wɔn ‑nu 'a‑ ‑kë n Dë ‑bha 'gügbɩɩdhɛ ‑kɔ 'ka bha ‑wa ‑zɔn ꞊dhɛ ma ꞊në 'a Atanna ‑bha ‑Yamɛ bha‑ 'ka "dhʋ̈ tɛan‑ 'ka.
JOH 10:26 "Kɛɛ 'dhang 'ö 'kaa‑ bho n "dhiʋ̈ bha‑ 'klɔɔ‑ ‑mü ꞊dhɛ 'kaa ma "bhlaa ‑tuʋ̈ kpö 'gü ‑mɛ ꞊në‑ 'ka.
JOH 10:27 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ ma ‑tuʋ̈ kpö 'gü ‑mɛ ‑nu ‑zë ‑wo wo "tʋ ‑to n ‑wʋ ‑bha, 'ö 'a‑ ‑nu dɔ, 'ö 'wo ‑ziö n ꞊keng‑ 'pö,
JOH 10:28 'yö 'a ꞊sii 'ö 'yaa yën‑ ‑da ‑nu 'gü. ‑A ‑wɔn 'gü 'wii 'dho ga tongtongdhö, 'yö pë 'bha ‑pë 'bha ‑kɔ 'yii 'dho ꞊mɔɔ‑ ‑bha 'pö kö ‑ya ‑nu bho n ꞊kwɛɛ‑.
JOH 10:29 ‑A ‑gɛn ‑mü ꞊dhɛ n Dë 'ö‑ ‑nu nu n ‑dhɛ bha‑ 'gü ‑yö "gbɩɩ‑ 'ö ‑ziö pë ꞊gban "pɛpɛ ‑ta. 'Wɔn 'ö‑ ‑wɔn 'gü 'yö mɛ 'bha ‑kɔ 'yaa ꞊mɔɔ‑ ‑bha 'pö kö ‑ya ‑nu 'sü n Dë ‑gɔ bha 'yö bha.
JOH 10:30 'Sa yaa‑ n Dë ‑zë yi do.»
JOH 10:31 ꞊Dhɛ 'ö Yesu ‑ya pö "dhʋ̈ bhoo, 'yö Zuifö ‑nu ‑gɔmɛ ‑nu bha 'wo ‑kɔ ‑da 'zü ‑deewo ‑gwë 'gü kö 'wo‑ ‑zuö 'ka.
JOH 10:32 'Yö‑ pö‑ ‑nu ‑dhɛ 'ö‑ pö: «'Wɔn ‑sɛngbɔ ‑nu 'gbɛ 'ö go n Dë "piʋ̈ 'a‑ ‑kë 'ö ka "yan‑ ‑da 'gü ya‑ ‑mɛɛ ꞊në kaa n zë ‑gwë 'ka‑ ‑wɔn 'gü ya?»
JOH 10:33 'Yö ‑gɔmɛ ‑nu bha 'wo‑ ‑yɔ bɔ‑ ‑gɔ 'wo‑ pö: «Bhi 'ö 'i ‑kë mɛbhɩɩdhe 'ka ꞊dhɛ yi 'dhö ‑a pö 'i‑ wo ꞊dhɛ kaa‑ Atanna ka do bha ꞊në‑ ‑wɔn 'gü 'yö 'yi‑ "piʋ̈ ꞊dhɛ 'yi i zë, ‑a ‑gɛn ‑mü ꞊dhɛ 'bha‑ pö "dhʋ̈ kö 'bha ‑da Atanna "dhiʋ̈. ‑A ‑gɛn 'yaa ‑mü 'wɔn ‑së ‑nu 'kö 'i‑ ‑kë bha‑ 'ka!»
JOH 10:34 'Yö Yesu ‑ya ‑yɔ bɔ‑ ‑nu ‑gɔ 'zü 'ö‑ pö: «'Yaa ‑bɛn zë ‑sü 'ka ka ‑gɔ 'tɔng‑ 'sëëdhɛ 'gü ꞊dhɛ: ‹Atanna ‑ya ‑pö ꞊dhɛ: Ka ꞊dhɛ ‑zlan ‑nu 'dhö› ‑ee? "Ɛɛn 'yaa "dhʋ̈ ‑ee?
JOH 10:35 'Sa kö 'wɔn 'kö ‑bɛn zë ‑sü 'ka Atanna ‑bha 'sëëdhɛ 'gü 'yaa bho "gblʋʋ tongtongdhö. ꞊Ya kë "dhʋ̈, "sanni 'mɛ 'kö Atanna 'dhö ö ‑wʋ ꞊në‑ nu‑ ‑nu ‑dhɛ ‑ya ‑nu ‑dhɛ ‑zlan ‑nu bha ‑oo,
JOH 10:36 'yö ma 'kö n ‑ya, 'ö n sü 'ö n bɔ "kpʋng ꞊taa ꞊wɛ? Ka ‑mɔɔ ‑bha 'ka‑ pö n ‑bha ꞊dhɛ ꞊dhɛ 'ö ‑kë ꞊dhɛ 'ma‑ pö n Dë ‑mü Atanna 'ka bha ꞊ya kë "dhʋ̈ kö 'ma ‑da "dhiʋ̈ ‑ee?
JOH 10:37 ꞊Ya kë ꞊dhɛ 'mii n Dë këwɔn kë, 'ka 'dho 'dhang bho n "dhiʋ̈.
JOH 10:38 "Kɛɛ 'ö ꞊ya kë ‑zë wo ꞊dhɛ a n Dë këwɔn ꞊në‑ ‑kë, 'kö 'kii 'dhang bho ma ‑zë n "dhiʋ̈, "kɛɛ ‑ka 'dhang bho 'wɔn ‑nu 'kö 'wo kë sië bha‑ ‑nu "dhiʋ̈ kö 'ka‑ 'gü ma kö 'ka 'dhang bho‑ "dhiʋ̈ ꞊dhɛ n Dë ‑mü Atanna 'ka, yɛng yi do.»
JOH 10:39 ‑A pö 'ö‑ wo "dhʋ̈ bha 'yö 'wo ‑ya 'kun ‑yan ‑ta, "kɛɛ 'yö dha‑ ‑nu ‑gɔ.
JOH 10:40 ꞊Dhɛ 'ö dha‑ ‑nu ‑gɔ "dhʋ̈, 'yö dho ꞊gwaan 'wo‑ Zuudɛn ‑kë bha‑ ꞊taama, ‑dhɛ 'ö Zan gun mɛ "zu sië mü bha‑ 'gü 'yö ö "tɛɛ pa mü.
JOH 10:41 Mɛ kpö ‑wo ‑gun nu sië‑ ‑dhɛ 'gü ‑dhɛ bha‑ 'gü 'wo‑ pö: «Zan 'yii "dhabhliwɔn "wɛɛ 'bha kë, "kɛɛ 'ö dhiang "pɛpɛ 'ö‑ zë 'mɛ 'ö ya‑ ‑bu 'gü ‑a ꞊gban ‑gun tɛan‑ 'ka.»
JOH 10:42 'Yö mɛ 'gbɛ 'wo ‑wɩ Yesu ‑wɔn ‑bha ‑dhɛ bha‑ 'gü.
JOH 11:1 Gɔndënë do 'bha 'wo‑ ‑dhɛ Dhazaa bha‑ 'gü 'yaa gun ‑së. Dhazaa bha ‑yö ‑go Betani, 'pödhɛ 'ö Madhi waa‑ ö dheebhang Matö 'wo go‑ 'gü bha‑ 'gü. Madhi bha ꞊në kë ‑dhasiklɔɔ "yi ꞊fii ‑së ꞊wɛnng Yesu ‑gɛn ‑ta 'yö ö ‑gɔ "dhɛ ‑ziö ‑bha "tʋ̈ng 'bha 'gü bha.
JOH 11:3 'Yö dheebhang ‑zë ‑nu ꞊plɛ bha 'wo mɛ bɔ Yesu ‑dhɛ kö ‑wa pö‑ ‑dhɛ ‑a "taɔngdë Dhazaa 'gü 'yaa ‑së.
JOH 11:4 ꞊Dhɛ 'ö Yesu ꞊ya 'wɔn bha‑ ma 'yö‑ pö: «"Yua 'ö Dhazaa kë sië bha 'yii 'dho 'to‑ ‑gɔ. ‑Yö ‑kë "dhʋ̈ kö Atanna 'tɔ‑ bhɔ, kö ‑yö Atanna Gbö ‑dɩ 'pö‑ 'tɔ bhɔ.»
JOH 11:5 ꞊Dhɛ 'ö‑ ma ꞊dhɛ Dhazaa 'gü 'yaa ‑së, 'yö ‑dhɛkpaɔyi ꞊plɛ ‑kë ‑dhɛ 'ö gun‑ 'gü bha‑ 'gü ‑deewo. "Kɛɛ 'sa kö Dhazaa 'dhö, ‑a dheebhang ‑nu 'ö‑ mɛ do ‑kë Matö 'ka, 'ö‑ mɛ do ‑kë Madhi 'ka bha‑ ‑nu ‑wɔn ‑gun ‑gɔ "gbɩɩ‑.
JOH 11:7 ꞊Dhɛ 'ö ꞊ya ‑dhɛkpaɔyi ꞊plɛ bha‑ kë "dhʋ̈, 'yö gun ‑na ‑a pö ö ‑bha ꞊klang ‑nu ‑dhɛ: «‑Ka ‑kwa kwa yee kë 'kwa 'dho Zude ‑sɛ 'gü!»
JOH 11:8 'Yö‑ ‑bha ꞊klang ‑nu 'wo‑ pö‑ ‑dhɛ: «Yi Dëmɛ, ‑dhɛ 'ö Zuifö ‑nu gun‑ "piʋ̈ ꞊dhɛ 'wo i zë‑ ‑bha ꞊dede ya‑ 'gü bha 'yö i "piʋ̈ 'zü ꞊dhɛ 'i 'dho mü bha ‑ee?»
JOH 11:9 'Yö‑ pö‑ ‑nu ‑dhɛ: «"Tʋ̈ng 'ö ‑dhɛkpaɔyi do 'gü ‑yö ꞊dhɛ? 'Yaa ‑kaɔng do ga ꞊plɛ ‑ee? 'Mɛ 'ö "ta sü 'yënng‑ 'gü ‑a ‑mɛ ‑gɛn "dhiʋ̈ 'yaa ‑zuö, ‑a ‑gɛn ‑mü ꞊dhɛ kö‑ ‑mɛ ‑yö ‑dhɛ ‑yö ‑dhɛpuudhɛ 'ö "kpʋng ꞊taa yö bha‑ 'bhü "dhiʋ̈.
JOH 11:10 "Kɛɛ 'mɛ 'ö "ta sü gbeng, ‑a ‑mɛ ꞊në "ta sü 'tuu‑ 'tudhö, 'yö 'yaa ‑dhɛ yö, ‑a ‑gɛn ‑mü ꞊dhɛ kö ‑dhɛpuudhɛ 'yaa‑ ‑gɔ.»
JOH 11:11 ꞊Dhɛ 'ö ꞊yaa‑ pö‑ ‑nu ‑dhɛ "dhʋ̈ 'yö go mü 'ö‑ pö: «Kwa "taɔngdë Dhazaa ꞊ya yi zë, "kɛɛ a ‑dho 'dho 'a pa‑ ‑bha.»
JOH 11:12 'Yö‑ ‑bha ꞊klang ‑nu 'wo‑ pö‑ ‑dhɛ: «Yi Dëmɛ, ꞊dhɛ 'kö ꞊ya yi ‑zë zë kö ‑yö ‑dho kë "klʋ̈ʋ̈klʋ̈ 'sa ‑dhe!»
JOH 11:13 ‑A pö 'ö Yesu ‑ya wo "dhʋ̈ bha 'wii‑ 'gü ma. ‑Yö ‑kë ‑nu 'gü ꞊dhɛ Dhazaa ‑yö yi ꞊dede ꞊në zë 'yö‑ pö "dhʋ̈ bha, "kɛɛ kö ‑ya ga ‑wɔn ꞊në‑ pö.
JOH 11:14 'Yö‑ ‑ta ‑pʋ ‑nu ‑dhɛ 'ö‑ pö: «Dhazaa ꞊ya ga.
JOH 11:15 "Kɛɛ ga 'ö‑ wo kö 'maa mü bha ‑yö ‑dhi n ‑dhɛ ka ꞊në ka ‑bu 'gü, kë "dhʋ̈ kö 'ka 'dhang bho n "dhiʋ̈ 'kpakpadhö. ꞊Dhɛ 'ö "dhʋ̈ ‑ka ‑kwa 'dho zun‑ ‑dhɛ 'gü!»
JOH 11:16 ꞊Dhɛ 'ö‑ pö "dhʋ̈, ‑a ‑bha ꞊klangdhiʋ̈ 'dhɛ 'wo‑ ‑dhɛ Toma 'wo‑ 'tɔ ‑ya ‑ta ‑dhɛ 'peng‑ bha 'yö‑ pö: «꞊Dhɛ 'ö "dhʋ̈ kö mɛ ꞊gban ‑ka ‑kwa 'dho kö 'wo dho kwa Dëmɛ zë ‑dhɛ 'ö‑ 'gü kö ‑wo mɛ ꞊gban kwa zë mü do!»
JOH 11:17 ꞊Dhɛ 'ö Yesu ‑yö dho 'ö ꞊loo mü, kö 'wo Dhazaa ‑wɛɛ bho ‑a ‑dhɛkpaɔyi ꞊ya kë ‑yiisiö.
JOH 11:18 'Ö gun "dhʋ̈ kö Betani ‑dhɛ kë 'ö‑ wo Zedhizadhɛmö ‑dhɛ "sɔɔ, 'ö‑ ‑nu ꞊zinng 'gü ‑dhɛ 'yaa ꞊mɔɔ "kidhʋng ‑yaaga ‑zian ‑bha bha,
JOH 11:19 'kö Zuifö ‑nu kpö 'gbɛ ꞊wa 'go Zedhizadhɛmö ꞊wa nu Matö waa‑ Madhi ‑a ‑nu sɛɛgbengbha bho ‑dhɛ 'gü ‑a ‑nu dheebhang 'ö ga bha‑ ‑wɔn 'gü.
JOH 11:20 ꞊Dhɛ 'ö Matö ꞊yaa‑ ma ꞊dhɛ Yesu ‑yö nu sië, 'yö dho dɔ‑ ‑gɔ zian‑, 'yö Madhi ‑zë 'ö to 'yaanu ‑sü 'ka 'kɔɔdhö.
JOH 11:21 ꞊Dhɛ 'ö Matö 'dhö 'ö "yan ‑kpan Yesu ‑bha 'yö‑ pö‑ ‑dhɛ: «N Dëmɛ, bhi ‑zë i ‑kë yö 'nu kö n dheebhang ya 'yii 'dho ga,
JOH 11:22 "kɛɛ a‑ 'wɔn ‑dɔ ꞊dhɛ dɔ ‑zian 'kwa‑ wo ya pë "ʋʋ pë i‑ ‑gbadhɛ Atanna ‑gɔ ‑yö ‑dho ‑a kë i ‑dhɛ.»
JOH 11:23 'Yö Yesu ‑ya pö‑ ‑dhɛ: «Matö, i dheebhang bha ‑yö ‑dho ‑bö!»
JOH 11:24 'Yö Matö ‑ya ‑yɔ bɔ‑ ‑gɔ 'ö‑ pö: «꞊Iin, n Dëmɛ, ‑yö "dhʋ̈, a‑ 'wɔn ‑dɔ ꞊dhɛ ‑yö ‑dho ‑bö mɛ ꞊gban ‑go ga 'gü ‑yi 'ka "sɛ yën "tʋ̈ng 'gü.»
JOH 11:25 'Yö Yesu ‑ya pö: «Matö, ꞊waa‑ pö gamɛ ‑nu ‑bö ‑mɛ, kö ‑wo ‑wɩ ma ꞊në n 'ka, ꞊waa‑ pö ꞊sii, kö ‑wo ‑wɩ ma ꞊në‑ 'ka. 'Mɛ 'ö 'dhang bho n "dhiʋ̈, aa" ꞊ni ꞊ya ga, ‑yö ‑dho ‑tosɛa kë.
JOH 11:26 'Sa kö mɛ "ʋʋ mɛ 'ö ‑yö 'dhang bho n "dhiʋ̈ kö ‑yö ö "yaan, kö‑ ‑mɛ ‑yö ꞊sii 'kö bha‑ ꞊slɔɔ, 'yii 'dho ga 'zü tongtongdhö. I 'dhang ‑bho "dhiʋ̈ "dhʋ̈ "wɛ ‑ee?»
JOH 11:27 'Yö Matö ‑ya pö: «꞊Iin, n Dëmɛ, a 'dhang ‑bho "dhiʋ̈ ꞊dhɛ Atanna ‑bha ‑Yamɛ, ‑a Gbö 'ö‑ nu ‑wɔn 'dhö 'dhö "kpʋng ꞊taa bha yö ‑mü i 'ka!»
JOH 11:28 ꞊Dhɛ 'ö Matö ꞊yaa‑ pö "dhʋ̈, 'yö Madhi ‑dhɛ ꞊plɛ 'gü 'yö‑ pö‑ ‑dhɛ: «Madhi, kwa Dëmɛ ꞊ya nu, ‑ya ‑pö 'i nu.»
JOH 11:29 ꞊Dhɛ 'ö Madhi 'dhö‑ ma ꞊dhɛ Yesu ꞊ya nu, 'yö ꞊wlü 'zodhö 'yö dho mü.
JOH 11:30 ‑A ‑gɛn ‑mü ꞊dhɛ 'ö gun "dhʋ̈ kö 'yii ‑da ꞊kö 'plöö, kö ‑yö ‑tun 'pö‑ "saan "dhiʋ̈, ‑dhɛ 'ö Matö 'dhö ‑kpan ‑bha ‑a 'gü bha‑ 'gü.
JOH 11:31 ꞊Dhɛ 'ö Madhi ꞊ya "wlü 'vadhö "dhʋ̈ 'ö ꞊ya zun "kpɛnng, 'yö Zuifö ‑nu 'wo gun‑ "piʋ̈ 'kɔɔdhö 'mü 'wo gun‑ ‑taga sië bha 'wo ‑ziö ꞊keng‑ kö ‑wa pö sië: «‑Kë ꞊dhɛ ‑yö 'dho sië ö dheebhang bun ꞊taa ꞊naa bha kö yö "gbʋ 'bha bɔ 'mü.»
JOH 11:32 ꞊Dhɛ 'ö Madhi ꞊ya 'dho ꞊ya ꞊loo ‑dhɛ 'ö Yesu‑ gun‑ ‑bha bha‑ 'gü 'ö ꞊yaa‑ yö, 'yö zun ö kpiö 'gü 'yö "gblëënu‑ ꞊wlöö 'yö‑ pö: «N Dëmɛ, ꞊ya kë ꞊dhɛ i kë yö 'nu‑ zü bho ‑yi 'ka kö n dheebhang ya 'yii 'dho ga!»
JOH 11:33 ꞊Dhɛ 'ö Yesu 'dhö Madhi yö kö ‑yö "gbʋ bɔ sië waa‑ Zuifö ‑nu 'wo nu‑ ꞊keng‑ bha‑ 'dhö, 'yö ‑wëë ‑yö bɔ‑ ‑ta ꞊dedewo, 'yö‑ "gblʋ̈ʋ̈dhɛ ‑yö "muu bho,
JOH 11:34 'yö‑ ‑nu dhɛɛ" kpɔ 'ö‑ pö: «Ka‑ ‑wɔ 'mɛ?» 'Yö 'wo‑ pö‑ ‑dhɛ: «Yi Dëmɛ, nu kö 'kwa 'dho kö 'yi‑ ‑dhɛ ‑zɔn i ‑dhɛ!»
JOH 11:35 'Yö Yesu ‑yö ‑da "gbʋ 'gü 'pö.
JOH 11:36 ꞊Dhɛ 'ö Zuifö ‑nu 'wo Yesu "gbʋbɔdhɛ yö 'yö 'wo‑ pö: «‑A ‑dhɔ ‑zë ‑gun kë sië ꞊zɔɔ ‑kɛɛ!»
JOH 11:37 Kö mɛ ga 'bha ‑nu ‑dɩ 'pö ‑wa pö sië: «Yö 'ö "yanwlümɛ "yan "dhiʋ̈ ‑pʋ bha 'yaa ꞊mɔɔ 'nu‑ ‑bha 'ö "slë 'bha ‑kë 'ö Dhazaa ‑yö dha "yua ya‑ ‑gɔ ‑ee?»
JOH 11:38 'Yö ‑wëë ‑dee 'bha ‑yö bɔ 'zü Yesu ‑ta, 'yö dho Dhazaa bun ‑ta ‑dhɛ ꞊dede 'gü. ‑Yɛ 'wo‑ pɔn ‑tɔn 'gü ꞊në gun‑ 'ka, 'yö 'wo ‑gwë zun‑ "dhiʋ̈.
JOH 11:39 ꞊Dhɛ 'ö ꞊loo ‑yɛ bha‑ "dhi "dhiʋ̈ 'yö‑ pö: «‑Ka ‑gwë bha‑ bho mü!» 'Yö Matö 'ö ‑kë mɛ 'ö ga bha‑ dheebhang 'ka bha 'ö‑ pö‑ ‑dhɛ: «N Dëmɛ, 'mɛ bha‑ "gbiën ꞊ya dɔ ꞊zɔɔ ‑wa!» 'Mɛ 'wo‑ ‑wɛɛ bho 'ö‑ ‑dhɛkpaɔyi ‑yiisiö ‑naa ꞊nɛ aa!»
JOH 11:40 'Yö Yesu ‑ya ‑yɔ bɔ‑ ‑gɔ 'ö‑ pö: «Matö, 'mii‑ pö i ‑dhɛ ꞊dhɛ 'bha 'dhang bho n "dhiʋ̈, i ‑dho Atanna ‑bha 'gügbɩɩdhɛ ‑dhɛ yö ‑ee?»
JOH 11:41 ꞊Dhɛ 'ö ꞊yaa‑ pö "dhʋ̈ 'yö 'wo ‑gwë bha‑ bho 'mü, 'yö Yesu ‑yö ö "yan "dhiʋ̈ ꞊wlü dhang‑ 'gü 'yö‑ pö: «N Dë, 'ma i nuɛ" bho bhɛa" 'a‑ wo i ‑dhɛ 'i‑ ‑slëëta ‑kë bha‑ ‑wɔn 'gü.
JOH 11:42 Ma ‑zë a‑ 'wɔn ‑dɔ ꞊dhɛ i "tʋ ‑yö n bhɛa" ‑wʋ ‑bha yi ꞊gban 'ka 'ö 'i‑ ‑slëëta ‑kë ‑kpɛawo, "kɛɛ a‑ ‑pö "dhʋ̈ mɛ kpö 'wo ‑klëën n ‑zü ya ꞊në‑ ‑nu ‑wɔn 'gü, kë "dhʋ̈ kö ‑wa 'wɔn dɔ ꞊dhɛ bhi ꞊në 'i n bɔ.»
JOH 11:43 ꞊Dhɛ 'ö ꞊yaa‑ pö "dhʋ̈ 'ö ꞊ya ö bo, 'yö ꞊gbla "gbɩɩ‑ 'ka 'ö‑ pö: «Dhazaa, ‑bhö zun "kpɛnng!»
JOH 11:44 'Yö 'mɛ 'ö ꞊ya ga 'nu 'ö‑ yi ꞊ya ꞊gwëë bha 'ö zun "kpɛnng kö sɔ "pɛn ‑yö piʋ̈‑ ‑sü 'ka‑ ‑kɔ waa‑ ‑gɛn ‑nu 'ka, kö sɔ 'bha ‑yö bɔ ‑sü 'ka‑ ‑gɔ ‑bha mlɔngdhö. 'Yö Yesu ‑ya pö 'mɛ 'wo gun mü bha‑ ‑nu ‑dhɛ: «‑Ka sɔ bha‑ bho‑ ‑bha kö 'ka ka kwaa‑ ‑zü kö ‑yö 'dho!»
JOH 11:45 ꞊Dhɛ 'ö ꞊ya kë "dhʋ̈, 'yö Zuifö ‑nu 'wo nu Madhi ‑nu ‑dhɛaga ‑dhɛ 'gü 'wo 'wɔn bha‑ ‑dhɛ yö bha‑ mɛ 'gbɛ 'wo 'dhang bho Yesu "dhiʋ̈.
JOH 11:46 "Kɛɛ 'yö‑ mɛ ga 'bha 'wo dho 'wɔn 'ö Yesu ‑ya ‑kë bha‑ ‑gɛn dɔ ‑dhɛ 'gü Fadhiziɛn ‑nu ‑dhɛ.
JOH 11:47 ꞊Dhɛ 'ö Fadhiziɛn ‑nu 'wo 'wɔn bha‑ ma, 'yö 'wo "saabhomɛ ‑nu ‑gɔmɛ ‑nu ‑dhɛ, 'yö 'wo zagɔbhomɛ ‑nu ‑dhɛ 'yö 'wo bhokota ‑dhɛ do 'gü 'yö 'wo‑ pö: «'Wɔn ya kwa ‑dho ‑a 'kun ‑kɔ kë ꞊dhɛ? Mɛ 'ö ya ‑yö "dhabhliwɔn ‑nu kë sië "gbɩɩ‑ "dhɛ!
JOH 11:48 ꞊Ya kë ꞊dhɛ 'kwa kwa kwaa‑ ‑zü kö ‑ya kë "dhʋ̈ ‑yö 'dho‑ 'ka ‑kpɛawo mɛ ꞊gban "pɛpɛ ‑dho 'dhang bho‑ "dhiʋ̈. 'Sa ꞊ya kë "dhʋ̈ kö Wlɔmö mɛ ‑nu ‑bha "sɛgɔdhiʋ̈mɛ ‑nu woo nu kö ‑wo kwaa‑ "sɛ wü waa‑ kwaa‑ Atanna ‑dhɔkëgükɔ 'dhö!»
JOH 11:49 ꞊Dhɛ 'ö ꞊waa‑ pö "dhʋ̈ 'yö gɔndënë do 'ö gun‑ ‑nu kpö 'gü mü 'wo‑ ‑dhɛ Kaifö, 'ö gun "saabhomɛ ‑nu bha‑ ‑nu bha mɛ 'kpii‑ ‑sü 'ka ‑kwɛ bha‑ ‑ta bha 'ö‑ pö: «'Kaa 'wɔn bha‑ 'gü ma!»
JOH 11:50 'Yaa ka 'gü ꞊dhɛ mɛ do ‑bha ga ‑sü 'ö "sɛ 'gü ‑mɛ ‑nu ‑wɔn 'gü ‑a fië‑ ‑dhö 'ö ‑ziö "sɛgümɛ ‑nu ꞊gban 'gü see‑ ‑sü ‑ta ‑ee?»
JOH 11:51 "Kɛɛ 'sa ‑a pö 'ö gun‑ wo sië "dhʋ̈ bha 'yaa gun‑ ‑dɩ ꞊kwɛɛ‑ ‑wɔn 'ka, ‑a ‑gɛn ‑mü ꞊dhɛ 'ö ‑gun "dhʋ̈ kö yö ꞊në "saabhomɛ ‑nu ‑gɔmɛ 'ka ‑kwɛ bha‑ ‑ta, "kɛɛ kö ꞊ya bo‑ pö ‑sü 'ka Atanna ‑wʋ "dhiʋ̈ ꞊loo ‑sü 'ka 'nu ꞊dhɛ Yesu ꞊në dho ga Zuifö ‑nu ‑wɔn 'gü,
JOH 11:52 "kɛɛ Zuifö ‑nu woo do 'waa ‑mü ‑zianwo, ‑yö ‑ga 'pö kö ‑yö Atanna ‑bha 'në ‑nu "pɛpɛ 'wo ‑pɛn ‑sü 'ka "kpʋngtaadhɛ ꞊gban "pɛpɛ 'gü bha ꞊në waa‑ Zuifö ‑nu ‑a ‑nu ‑kɔ 'wü 'koo kö ‑wo kë mɛ do 'ka.
JOH 11:53 Zuifö ‑nu ‑gɔmɛ ‑nu ‑wʋ ‑yö ‑mɔɔ Yesu ‑zë ‑sü ‑bha 'yi bha ꞊në‑ 'ka.
JOH 11:54 Yö ꞊në‑ ‑wɔn 'gü 'yö Yesu ‑yö ö bo ‑dho ‑a ‑nu kpö 'gü ‑sü 'ka, 'yö ö ‑bha 'dho wo "sɛgɔ 'bha 'ö ‑ya ‑sü 'ka "wlatadhɛ "sɔɔ, "kɛɛ ‑a 'pödhɛ 'dhɛ 'wo‑ ‑dhɛ Eflaimö bha‑ 'gü 'yö waa‑ ‑bha ꞊klang ‑nu 'wo wo "tɛɛ 'bha pa mü.
JOH 11:55 'Ö gun "dhʋ̈ kö Zuifö ‑nu ‑bha troo 'wo‑ Pakö ‑kë bha ꞊ya ꞊tëng. Kö ꞊dhɛ 'ö ‑kë ꞊dhɛ Pakö yi 'yii ꞊loo ꞊kö bha mɛ 'gbɛ ‑wo 'dho sië Zedhizadhɛmö kö ‑wo wo kë "slʋ̈ʋ̈slʋ̈.
JOH 11:56 'Ö gun "dhʋ̈ 'pö kö ‑wo Yesu mɔɔ‑ sië. ꞊Dhɛ ('ö 'mɛ 'wo gun 'dho sië wo ‑kë "slʋ̈ʋ̈slʋ̈ ‑dhɛ 'gü "dhʋ̈ bha) 'wo wo 'ko yö Atanna ‑dhɔkëgükɔ 'ö Zedhizadhɛmö bha‑ 'gü, 'yö 'wo wo 'ko ‑nu dhɛɛ" kpɔ 'wo‑ pö: «Ka ka ‑zʋ ‑gɔn ꞊dhɛ ‑yö ‑dho ö yee kë 'ö nu troo ya‑ ‑ta ‑ee?»
JOH 11:57 "Kɛɛ 'sa 'ö gun "dhʋ̈ kö Fadhiziɛn ‑nu waa‑ "saabhomɛ ‑nu ‑gɔmɛ ‑nu ꞊waa‑ pö ‑wa ‑dhɛa "dhiʋ̈ bho "sɛ 'gü ‑dhɛ ꞊gban "pɛpɛ 'gü kö ‑wa pö ꞊dhɛ mɛ "ʋʋ mɛ 'ö Yesu ‑dhɛ dɔ, ‑a mɛ ‑yö nu kö ‑ya pö wo ‑dhɛ kö 'wo mɛ bɔ‑ 'kun ‑dhɛ 'gü.
JOH 12:1 'Ö gun kö ‑dhɛkpaɔyi ꞊ya 'to "saɔdo kö Pakö yi ‑yö ꞊loo, 'yö Yesu ‑yö dho Betani, ‑dhɛ 'ö Dhazaa 'ö‑ ‑bö bha 'ö gun‑ ‑bha bha‑ 'gü.
JOH 12:2 ꞊Dhɛ 'ö ꞊ya 'dho ꞊ya ꞊loo mü, 'yö 'wo‑ "dhi ꞊mɔɔ. Dhazaa ‑yö ‑gun 'mɛ 'wo gun‑ "piʋ̈ pë ‑bhö ‑dhɛ 'gü mü bha‑ ‑nu kpö 'gü, 'yö Matö ‑zë 'ö gun‑ ‑nu "dhiʋ̈ ‑ziö wo sië.
JOH 12:3 'Yö Madhi ‑yö ‑dhasiklɔɔ "yi ꞊bhlëësü sɔng "gbɩɩ‑ wo‑ ‑dhɛ 'naadhö, 'ö 'waa‑ kaan‑ suu "wɛɛwɛɛ 'bha 'ka bha‑ sü, 'yö nu‑ ‑sangdhe ‑yan do 'ka, 'yö‑ ꞊wɛnng Yesu ‑gɛn ‑ta, 'yö ö ‑gɔ "dhɛ ‑ziö ‑bha. 'Yö‑ ꞊fii ‑yö ꞊mɔɔ 'kɔ 'gü ‑dhɛ ꞊gban "pɛpɛ 'gü.
JOH 12:4 "Kɛɛ ꞊dhɛ 'ö ꞊yaa‑ kë "dhʋ̈, 'yö Yesu ‑bha ꞊klang ‑nu bha‑ mɛ 'dhɛ 'wo‑ ‑dhɛ Zuda Isikadhiɔtö, 'ö yöö ‑da ‑dhɛ pë "piʋ̈ bha 'ö‑ pö:
JOH 12:5 «꞊Ya kë ꞊dhɛ ‑dhasiklɔɔ "yi 'ö‑ sɔng ‑yö ꞊mɔɔ mɛ do ꞊saa 'ö ‑kwɛ do 'gü‑ ‑bha ya‑ "dhɔɔ ꞊në 'kwa‑ dɔ 'nu 'ö 'kwa‑ 'wëë‑ ‑zë ꞊gbaɔ ‑wëëmɛ ‑nu ‑gɔ kö ꞊bhlëë 'yaa‑ ‑bha 'ö ‑ziö ‑a ꞊wɛnng 'wo‑ wo i ‑gɛn ‑ta bha‑ ‑ta ‑ee?»
JOH 12:6 "Kɛɛ kö ‑a pö 'ö‑ wo "dhʋ̈ bha‑ ‑gɛn 'yii kë ꞊dhɛ ‑yö ‑ya ‑sü ꞊në‑ 'ka ‑wëëmɛ ‑nu zuën ‑ta "gbɩɩ‑, "kɛɛ ꞊dhɛ 'ö ‑kë ꞊dhɛ ‑yö ꞊kwaan ‑bho bha kë "dhʋ̈ kö 'ö‑ ꞊kwaan; ‑a ‑gɛn ‑mü ꞊dhɛ ‑a ‑nu ‑bha ‑naɔ ‑duɛ bho ‑sü ‑gun yö ꞊në‑ "piʋ̈.
JOH 12:7 "Kɛɛ 'yö Yesu ‑ya pö‑ ‑dhɛ: «‑A 'to "dhʋ̈ "sɛnngdhö! ‑A ‑gɛn ‑mü ꞊dhɛ ‑dhasiklɔɔ "yi 'ö dho‑ ꞊wɛnng 'nu n ꞊gee ‑bha n bun bho ‑yi 'ka bha ꞊në ꞊ya n 'to "yaan ꞊yaa‑ ꞊wɛnng n ‑bha bha.
JOH 12:8 ‑Wëëmɛ ‑nu ‑zë ‑wo ka "piʋ̈ "kpʋngtaadhɛ ya‑ 'gü yi ꞊gban 'ka, "kɛɛ ma ‑zë 'mii 'dho to ka "piʋ̈ yö ‑kpɛawo ꞊dhɛ ‑a ‑nu 'dhö.
JOH 12:9 ꞊Dhɛ 'ö Zuifö ‑nu ꞊waa‑ ma ꞊dhɛ Yesu ‑yö Betani, 'yö 'wo wo kpö dɔ ‑yɛɛdhö 'wo dho mü. ‑Wo ‑dho "dhʋ̈ kö 'wo "yan ‑kpan ‑bha, "kɛɛ kö 'wo wo "yan ‑kpan 'pö Dhazaa 'ö‑ ‑bö bha‑ ‑bha.
JOH 12:10 'Yö "saabhomɛ ‑nu ‑gɔmɛ ‑nu 'wo‑ ‑yakwëë ‑kë, 'yö‑ ‑nu ‑wʋ ‑yö ‑kë ‑bha do ꞊dhɛ 'wo Dhazaa ‑dɩ 'pö‑ zë,
JOH 12:11 ‑a ‑gɛn ‑mü ꞊dhɛ kö Zuifö ‑nu 'gbɛ ‑wo 'go sië‑ ‑nu "piʋ̈ 'wo bɔ Yesu 'ka ‑a ‑bö ‑wɔn ‑kë tɛan‑ 'ka ‑wɔn ꞊në‑ 'gü.
JOH 12:12 ꞊Dhɛ 'ö‑ ‑ta ‑dhɛ ꞊ya ꞊kpaɔ, 'ö mɛbhɩɩdhe kpö ‑ziisü 'wo nu troo ‑ta Zedhizadhɛmö bha ꞊waa‑ ma ꞊dhɛ Yesu ‑yö nu sië,
JOH 12:13 'yö 'wo "sɔɔndhɛ ‑nu ‑kan, 'yö 'wo dho dɔ‑ ‑gɔ zian‑, kö ‑wo "gɛɛ kë sië ‑nu wo 'wo ‑bhabhoo kun 'wo‑ pö: «"Sookwedhi! ‑Bha ‑bha ‑bha! "Sookwedhi! Izraɛdhö ‑mɛ ‑nu ‑bha ‑gblüdë ‑yö nu sië! ‑Yö ‑nu kwa Dëmɛ ‑bha nu 'gü! "Sookwedhi! Atanna 'tɔ‑ bhɔ!»
JOH 12:14 Kö Yesu ‑yö ‑ya ‑sü 'ka ꞊soofëng "gbɔng do 'ö ‑kpan ‑bha zian 'ka bha‑ ‑ta, ‑a ‑gɛn ‑mü ꞊dhɛ ‑yö ‑gun ‑bɛn zë ‑sü 'ka Atanna ‑wʋ 'gü zii ‑be ꞊dhɛ:
JOH 12:15 «‑Ka ‑dhɛ ‑ga, Siɔn ‑mɛ ‑nu, 'ka 'dho "suʋ̈ 'zü, kaa‑ ‑gblüdë ‑yö nu sië, ‑yö ‑ya ‑sü 'ka ꞊soofëng "gbɔng do ‑ta.»
JOH 12:16 Yesu ‑bha ꞊klang ‑nu 'wii 'wɔn bha‑ 'gü ma ‑a "tʋ̈ng bha‑ 'gü, "kɛɛ ꞊dhɛ 'ö ꞊ya bo 'dho ‑sü 'ka 'ö ‑ya ‑ya ö ‑bha ‑blüdëdhɛ ‑gbloo 'gü ö Dë "sɔɔ dhang‑ 'gü, 'yö‑ ‑nu ‑zʋ ‑yö ‑bö ꞊dhɛ ‑yö ‑gun ‑bɛn zë ‑sü 'ka "dhʋ̈ ‑a ‑bu 'gü tɛan‑ 'ka, yö ꞊në‑ ‑wɔn 'gü 'yö Zedhizadhɛmö ‑mɛ ‑nu 'wo‑ 'gü ‑wɔn ‑kë ꞊dhɛ ‑kɔ 'ö ‑bɛn zë ‑sü 'ka‑ 'ka ‑a 'dhö.
JOH 12:17 Mɛ "pɛpɛ 'kö 'wo gun ‑dhɛ 'ö Yesu ‑yö Dhazaa ‑dhɛ ‑bha 'ö go ga 'gü 'ö ‑bö bha‑ 'gü, ‑a ‑nu ꞊gban "pɛpɛ‑ ‑gun 'wɔn bha‑ ‑gɛn dɔ sië 'wo ‑ziö 'ka.
JOH 12:18 Yö ꞊në‑ ‑wɔn 'gü 'yö mɛ kpö ‑ziisü bha 'wo nu dɔ Yesu ‑gɔ zian‑; ‑a ‑gɛn ‑mü ꞊dhɛ 'ö gun "dhʋ̈ kö ꞊waa‑ ma ꞊dhɛ ꞊ya "dhabhliwɔn 'ö suu 'dhö bha‑ kë.
JOH 12:19 ꞊Dhɛ 'ö ꞊ya kë "dhʋ̈, 'yö Fadhiziɛn ‑nu 'wo ‑ya ‑a pö ‑sü ‑bha wo 'ko ‑nu ‑dhɛ 'wo‑ pö: «‑Ka ‑dhɛ ‑ga bha, 'mɛ bha 'yaa ‑kɔ ‑mɔɔ ‑bha ‑mɛ 'ka 'zü, ‑a ‑gɛn ‑mü ꞊dhɛ mɛ 'gbɛ ꞊gban ꞊wa bɔ‑ 'ka.»
JOH 12:20 'Mɛ 'wo nu Atanna ‑dhɔkë ‑dhɛ 'gü troo ‑ta Zedhizadhɛmö "dhʋ̈ bha 'mɛ 'waa Zuifö 'ka ‑a ‑nu ga bha‑ ‑gun ‑a ‑nu kpö 'gü.
JOH 12:21 'Yö 'mɛ 'wo bha 'wo ꞊yɔɔn Fidhipö 'ö go Bɛsaida, Gadhidhe ‑sɛ 'gü bha‑ "sɔɔ, 'yö 'wo‑ pö‑ ‑dhɛ: «N Dëmɛ, yi ‑nu kö 'yi yi "yan ‑kpan Yesu ‑bha!»
JOH 12:22 'Yö Fidhipö ‑yö dho 'yö‑ ‑gɛn dɔ Andre ‑dhɛ, 'yö wɛng 'wo dho Yesu "piʋ̈, 'yö 'wo‑ pö‑ ‑dhɛ.
JOH 12:23 'yö Yesu ‑ya pö‑ ‑nu ‑dhɛ 'ö‑ pö: «‑A yi ꞊ya ꞊loo ꞊tɔn kö mang Mɛgbömɛ 'a 'dho kö 'a ‑ya ma ‑blüdëdhɛ ‑gbloo 'ö Atanna "piʋ̈ bha‑ 'gü.
JOH 12:24 ("Kɛɛ n 'dho ‑sü bha‑ "dhiʋ̈ ‑bha ‑kë ꞊dhɛ) ‑mlüga ‑da "sɛɛ ‑sü 'dhö, ‑a ‑gɛn ‑mü ꞊dhɛ a‑ ‑pö ka ‑dhɛ tɛan‑ ꞊dede 'ka ꞊dhɛ: «‑Mlüga 'dhɛ 'kö 'yii 'dho "sɛɛdhö kö ‑yö ga, 'yaa ‑gɔ bho kö ‑yö dhi. "Fɔn kö yö 'dho "sɛɛdhö.
JOH 12:25 ‑A ‑kë "dhʋ̈ ‑sü bha‑ 'gü, 'mɛ 'ö ‑ya ö ‑dɩ ‑bha ‑tosɛa ‑wɔn zuën ‑ta "dhiʋ̈ ziö 'ka, ‑a ‑mɛ ‑dho ‑a 'ma ‑zukplü ‑bha. "Kɛɛ 'mɛ‑ ‑bha ‑tosɛa ‑wɔn 'yaa‑ ‑gɔ "gbɩɩ‑ "kpʋng ꞊taa yö ꞊në‑ ‑mɛ ‑bha dho 'to‑ ‑gɔ ‑dhɛkpaɔ dhia" 'gü, 'yö dho ‑da 'ka ꞊sii 'ö 'yaa yën 'ö Atanna "piʋ̈ bha‑ kë ‑dhɛ 'gü.
JOH 12:26 'Mɛ 'ö‑ "piʋ̈ ꞊dhɛ 'ö bɔ n 'ka, ‑a ‑dhɛa ‑bha ꞊dhɛ ‑a ‑mɛ ‑yö ziö n ꞊keng‑ kö ‑dhɛ 'a‑ ‑bha ‑yö kë mü 'pö, ‑a 'klɔɔ‑ ‑mü ꞊dhɛ yë ‑kë n ‑dhɛ ‑mɛ bha n Dë ‑ya ꞊bhlëë ‑ya.
JOH 12:27 ꞊Dhɛ 'ö‑ pö "dhʋ̈ 'yö 'go mü ö‑ pö: «"Tʋ̈ng 'kwa‑ dɔ‑ 'ka ya n zuë" ꞊ya kaan‑ "kwëë, "kɛɛ maa‑ kë ꞊dhɛ? ‑A pö ꞊në maa‑ wo ꞊dhɛ: N Dë, ‑bhö n dha "tʋ̈ng 'ö nu sië ya‑ ‑gɔ, "kɛɛ kö a ‑nu kö 'a yö ꞊në‑ 'gü ‑wɔn kë kö 'a saan" bha‑ wo "dhʋ̈ ‑ee?
JOH 12:28 ꞊Dhɛ 'ö "dhʋ̈, n Dë, bhi ꞊në ‑bhö i 'tɔ bhɔ!» ꞊Dhɛ 'ö ꞊yaa‑ pö "dhʋ̈, 'yö ‑wʋ 'bha ‑yö bɔ dhang‑ 'gü 'ö ‑wɩ 'ö‑ pö: «A ‑bhɔ n 'tɔ ‑zë bhɔ ‑sü 'ka zii 'nu ‑blɛɛsü, "kɛɛ a ‑dho ‑a 'bha bhɔ 'zü ‑deewo.»
JOH 12:29 ꞊Dhɛ 'ö mɛ ‑tu "tu 'wo gun ‑dhɛ bha‑ 'gü bha 'wo ‑wʋ bha‑ ma, 'yö ‑kɔ "pɛan 'bha ‑ya pö: «Dha ꞊në ‑wɩ bha!» 'Yö‑ "pɛan 'bha ‑ya pö: «Atanna ‑bha "kië ꞊në dhiang zë‑ ‑dhɛ bha!»
JOH 12:30 "Kɛɛ 'yö Yesu ‑ya pö‑ ‑nu ‑dhɛ 'ö‑ pö: «‑Wʋ 'ö ‑wɩ bha 'yii "wɩ ma ‑zë n ‑dhɛ, ‑yö ‑wɩ ka ꞊në ka ‑dhɛ.
JOH 12:31 ‑A ‑gɛn ‑mü ꞊dhɛ "kpʋngtaadhɛ "dhɔɔ ga "tʋ̈ng 'yaa ꞊gblɛɛn 'zü, Sɔtraan 'ö ‑gblüdë 'ka ('ö mɛ ꞊gban 'dhö‑ ‑gɔ 'kun 'gü) "kpʋng ꞊taa bha‑ ‑bha ‑gblüdëdhɛ ‑sü ‑gɔ "tʋ̈ng ꞊ya ꞊loo, kö Atanna ‑ya yöö ꞊dede ‑zuö "kpɛnng yi do 'ka.
JOH 12:32 "Kɛɛ ma ‑zë ꞊wa bo n "dhiʋ̈ ‑wlü "sia‑ ‑sü 'ka kö ‑wo n dɔ 'tëng‑ ‑ta, a ‑dho mɛ ꞊gban "gan n ‑bha.»
JOH 12:33 ‑Ya ‑pö "dhʋ̈ kö ga ‑kɔ suu 'ö dho ga‑ 'ka ‑a ‑dɔ "dhʋ̈ ‑bha ‑sü 'ka bha ꞊në 'ö‑ ‑zɔn 'ka ‑zɔn.
JOH 12:34 'Yö mɛ kpö bha 'wo‑ ‑yɔ bɔ‑ ‑gɔ 'wo‑ pö: «Yi‑ ‑ma Atanna ‑bha 'tɔng‑ 'sëëdhɛ 'gü ꞊dhɛ ‑a ‑bha ‑Yamɛ 'ö dho nu bha 'yii 'dho ga tongtongdhö, "kɛɛ bhi 'ö bhi ‑zë yi ‑zʋ 'dhö i 'gü 'zü bha) 'yö i‑ ‑pö sië ‑a ‑dhɛa ‑bha ꞊dhɛ Mɛgbömɛ ‑yö dɔ 'tëng‑ ‑ta bha. ꞊Ya kë "dhʋ̈ 'sa kö ‑Yamɛ 'ö "dhʋ̈ bha ꞊në de 'ka?»
JOH 12:35 'Yö‑ ‑yɔ bɔ‑ ‑nu ‑gɔ 'ö‑ pö: «‑Dhɛpuudhɛ ‑yö ‑tun ka kpö 'gü, "kɛɛ ‑a 'dho "tʋ̈ng 'yaa ꞊gblɛɛn 'zü. 'Ö "dhʋ̈, "tʋ̈ng 'ö ‑tun 'ka ka kpö 'gü bha ‑ka "ta‑ 'ka‑ 'bhü "dhiʋ̈ kö ‑dhɛtiidhɛ 'ya 'dho "kan ka 'gü, ‑a ‑gɛn ‑mü ꞊dhɛ 'mɛ 'ö "ta sië ‑dhɛtiidhɛ 'gü 'yaa ö 'dho ‑zian dɔ.
JOH 12:36 ‑A ‑wɔn 'gü, ‑ka 'dhang bho ‑dhɛpuudhɛ "dhiʋ̈ "tʋ̈ng 'ö ‑tun 'ka ka "piʋ̈ bha‑ 'gü kö 'ka kë ‑dhɛpuudhɛ 'gü ‑mɛ ‑nu 'ka.» ꞊Dhɛ 'ö ꞊yaa‑ pö "dhʋ̈, 'yö dho ‑dhɛ ꞊gblɛɛn 'gü 'yö ö ‑gblɛn 'kpɔ‑ ‑nu ‑gɔ.
JOH 12:37 "Dhabhliwɔn 'gbɛ 'ö Yesu ‑ya ‑kë 'ö‑ ‑nu "yan ‑yö ‑da ‑dhɛ 'gü bha, "kɛɛ yö ꞊në‑ ꞊gban 'gü 'wii 'dhang bho‑ "dhiʋ̈.
JOH 12:38 "Kɛɛ ‑yö ‑kë "dhʋ̈ kö 'wɔn 'ö Atanna ‑wʋdhiʋ̈loomɛ Ezai ‑ya pö yi 'bha 'ka ꞊dhɛ: «N Dëmɛ, i ‑bha naɔ 'yi‑ dɔ bha ‑yö kë ‑bhɔ de ꞊në‑ 'gü tɛan‑ ‑bha? "Ɛɛn 'ö ö ‑gbe 'ö‑ ‑wo zang ‑ta bha de ꞊në‑ kë‑ dɔ bha‑ 'gü ‑wɔn ‑yö kë!»
JOH 12:39 'Waa ꞊mɔɔ‑ ‑bha 'nu 'pö kö ‑wo 'dhang bho‑ "dhiʋ̈, ‑a ‑gɛn ‑mü ꞊dhɛ Ezai kë‑ ‑pö 'zü 'ö‑ pö:
JOH 12:40 ꞊Yaa‑ ‑nu "yënng tröö, ꞊yaa‑ ‑nu gɔɔ kë "gbɩɩ‑, kë "dhʋ̈ kö‑ ‑nu "yan 'ya 'dho ‑dhɛ yö 'ö 'wo 'wɔn ‑nu ‑yaki dɔ 'ö 'wo wo zuë" ꞊slëë 'ö 'a‑ ‑nu dha.»
JOH 12:41 Ezai ‑yö 'wɔn ‑nu bha‑ ‑nu ‑pö "dhʋ̈ kö‑ "yan ꞊ya ‑da Yesu ‑bha mɛdhɛ bha ꞊në‑ 'gü 'yö‑ ‑dhiang zë "dhʋ̈ bha.
JOH 12:42 'Wɔn bha aa" ꞊ni Zuifö ‑nu ‑gɔmɛ ‑nu 'gbɛ ꞊dede ‑gun 'dhang bho sië Yesu "dhiʋ̈, "kɛɛ 'ö 'waa ‑mɔɔ ‑bha kö ‑wa ‑dɔ "yaan‑ dɔ Fadhiziɛn ‑nu ‑wɔn 'gü, kö ‑wo "suʋ̈ sië‑ ‑nu ‑gɔ kö 'wa 'dho‑ ‑nu kë ‑a ‑nu ‑bha ‑yakwëëkëgükɔ ‑nu 'gü;
JOH 12:43 ‑a ‑gɛn ‑mü ꞊dhɛ ‑wo mɛ "bhɩɩ‑ ‑nu ‑bha "dhɛ ‑ya wo ‑ta ‑sü fië‑ ‑bho Atanna ‑bha "dhɛ ‑ya wo ‑ta ‑sü ‑bha.
JOH 12:44 Yi do 'ka 'yö Yesu ‑yö ö ‑wʋ "dhiʋ̈ ꞊wlü 'ö‑ pö: «'Mɛ "ʋʋ mɛ 'ö ꞊ya 'dhang bho n "dhiʋ̈, kö‑ ‑mɛ 'yii 'dhang bho ma ‑zë n "dhiʋ̈, "kɛɛ kö‑ 'dhang ‑bho 'mɛ 'ö n bɔ bha ꞊në‑ "dhiʋ̈ bha.
JOH 12:45 ‑A ‑wɔn 'gü, 'mɛ 'ö ꞊ya n yö kö ꞊ya mɛ 'ö n bɔ bha‑ yö.
JOH 12:46 Ma ‑zë a ‑nu ꞊dhɛ ‑dhɛpuudhɛ ꞊në 'dhö "kpʋng ꞊taa, kë "dhʋ̈ kö mɛ "ʋʋ mɛ 'ö ꞊ya 'dhang bho n "dhiʋ̈, kö‑ mɛ 'ya 'dho ‑tosɛa kë 'wɔn yaa 'gü ‑kpɛawo.
JOH 12:47 ‑A ‑wɔn 'gü, 'mɛ 'ö n ‑wʋ ma 'ö 'yaa ö "tʋ kë‑ ‑bha, ma ‑zë 'mii 'dho‑ ‑mɛ dhɛɛ" 'kpɔ, ‑a ‑gɛn ‑mü ꞊dhɛ ma ‑zë a ‑nu mɛ "bhɩɩ‑ ‑nu dha ꞊në‑ wo 'mii nu‑ ‑nu zë za 'ka.
JOH 12:48 'Mɛ 'ö‑ pö ö "tʋ 'yaa n ‑wɔn ‑bha, 'ö 'yaa 'ö "tʋ 'to n ‑wʋ ‑bha, ‑a ‑mɛ ‑bha zadɔmɛ ‑yö ‑dhö. ꞊Ya kë ꞊dhɛ "tʋ̈ng ‑totaamasü ꞊ya ꞊loo, dhiang ‑nu 'a‑ zë bha ꞊në dho‑ ‑mɛ zë za 'ka.
JOH 12:49 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ 'mii n ‑dɩ 'gü ‑dhiang zë tongtongdhö, "kɛɛ n Dë 'ö n bɔ bha ꞊në ö ‑wʋ kpɔ n ‑bha, 'yö ‑wʋ ‑nu 'a dho mɛ ‑nu ꞊klang kë‑ 'ka waa‑ "ta ‑kɔ ‑nu 'a dho‑ ‑zɔn ‑nu ‑dhɛ bha‑ ‑nu ‑zɔn n ‑dhɛ.
JOH 12:50 'Sa a‑ 'wɔn ‑dɔ ꞊dhɛ ‑wʋ 'ö‑ kpɔ n ‑bha bha ꞊në ‑tosɛa 'ö 'yaa yën 'ö‑ "piʋ̈ bha‑ ‑kë mɛ ‑dhɛ. 'Wɔn 'ö‑ ‑wɔn 'gü 'yö pë do 'ö n Dë ‑ya pö n ‑dhɛ 'a yö ꞊në‑ pö 'pö bha 'yö bha.»
JOH 13:1 ‑Yö ‑kë "dhʋ̈ Pakö "dhɔɔ yɛan" "piʋ̈ 'ka kö‑ yi ꞊ya 'to ꞊dhɛ dhia" 'dhö, kö Yesu ꞊yaa‑ 'wɔn dɔ ꞊dhɛ ö ‑go "kpʋng ꞊taa "tʋ̈ng ꞊ya ꞊loo kö 'ö 'dho ö Dë Atanna "piʋ̈. ‑A ‑bha mɛ ‑nu 'wo "kpʋng ꞊taa ‑a ‑nu ‑dhɔ ‑gun kë 'ö‑ wo sië "dhiʋ̈ ziö 'ka bha, 'yö‑ ‑gɔ ‑da 'plöö yi bha‑ 'ka.
JOH 13:2 'Ö gun "dhʋ̈ kö waa‑ ‑bha ꞊klang ‑nu ‑wo pë ‑bhö sië, kö Sɔtraan ꞊yaa‑ "dhiʋ̈ dɔ zuëga ‑da 'nu Zuda 'ö ‑kë Simɔ Isikadhiɔtö gbö 'ka bha‑ "gblʋ̈ʋ̈‑.
JOH 13:3 ꞊Dhɛ 'ö ‑kë ꞊dhɛ Yesu yöö ꞊dede ‑ya 'wɔn ‑dɔ ꞊dhɛ ö ‑go Atanna "piʋ̈, 'ö ö yee kë sië 'zü 'ö dho Atanna "piʋ̈ ‑dhɛ do bha ꞊në‑ 'gü, ꞊dhɛ ö Dë ‑yö ö ‑ya sü 'ka pë ꞊gban "pɛpɛ ‑gɔ ‑ta bha,
JOH 13:4 'yö ꞊wlü ‑bhöpë ‑pë "dhiʋ̈, 'yö ö ‑bha ꞊gbauu‑ bho ö ‑bha, 'yö ‑zu 'ka ‑sɔ 'kpii‑ do sü 'yö‑ ‑kplü ö 'drüü.
JOH 13:5 'Yö "yi ‑da pëfië do 'gü, 'yö ‑ya ö ‑bha ꞊klangdhiʋ̈ ‑nu bha‑ ‑nu ‑gɛn ‑bha "zu ‑sü ‑bha ꞊dhɛ ‑a ‑nu bha gwëëmi 'dhö. ꞊Ya mɛ 'dhɛ‑ ‑gɛn ‑bha "zu, 'yö ‑zu 'ka ‑sɔ 'ö‑ ‑kplü ö ‑ta bha‑ sü 'ö‑ ‑ziö ‑mɛ ‑bha.
JOH 13:6 ‑Ya yö ꞊në‑ ‑kë "dhʋ̈ 'yö dho 'ö zun Simɔ Piɛdhö ‑bha. 'Yö Piɛdhö ‑ya pö‑ ‑dhɛ: «N Dëmɛ, bhi ꞊në, bhii ma ‑zë n ‑gɛn ‑bha "zu ‑ee?»
JOH 13:7 'Yö Yesu ‑ya pö‑ ‑dhɛ 'ö‑ pö: «‑Dhɛ ‑ga, Simɔ, 'wɔn 'a‑ kë sië bha 'bhii 'dho‑ 'gü ma ꞊dɛɛ ‑zë 'gü, "kɛɛ i ‑dho ‑a 'gü ma yi "wɛɛ 'ka.»
JOH 13:8 'Yö Piɛdhö ‑ya pö‑ ‑dhɛ: «‑Abin! N Dëmɛ, 'bhii 'dho ma ‑zë n ‑gɛn ‑bha "zu tongtongdhö!» 'Yö Yesu ‑ya ‑yɔ bɔ‑ ‑gɔ 'ö‑ pö: «꞊Ya kë ꞊dhɛ 'mii i ‑gɛn bha "zu kö i ‑duɛ 'yaa n "piʋ̈.»
JOH 13:9 'Yö Piɛdhö ‑ya ‑yɔ bɔ‑ ‑gɔ 'pö 'ö‑ pö: «꞊Ya kë "dhʋ̈ 'sa yö ‑zë 'gü, n Dëmɛ, kö 'bha n ‑gɛn ‑bha "zu, ‑bhö n ‑kɔ waa‑ n ‑gɔ ‑nu ꞊gban ‑bha "zu do!»
JOH 13:10 'Yö Yesu ‑ya pö‑ ‑dhɛ: «Simɔ, 'mɛ 'kö ꞊ya 'go ö "zu "yi 'kpii‑ ꞊bhaa kö‑ ‑mɛ ‑dhɛ 'bha "zu ‑wɔn 'yaa 'dhö 'zü kö 'yii kë‑ ‑gɛn 'kö ‑ta ‑ta bha‑ 'ka, ‑a ‑gɛn ‑mü ꞊dhɛ kö ‑dhii 'yaa‑ ‑mɛ ‑bha. ꞊Ya kë "dhʋ̈ kö ka ‑zë ‑dhii ꞊ya 'go ka ‑bha Atanna wëëdhö ꞊naa bha, "kɛɛ 'sa mɛ ꞊gban ꞊dede ‑zë 'kii kë "dhʋ̈.»
JOH 13:11 ‑A pö 'ö‑ wo ꞊dhɛ mɛ ꞊gban ‑zë 'kii kë "slʋ̈ʋ̈slʋ̈ bha‑ ‑gɛn ‑mü ꞊dhɛ 'ö gun "dhʋ̈ kö ‑yö ö "dhiʋ̈dɔmɛ ‑dɔ ‑a ‑nu kpö 'gü.
JOH 13:12 ꞊Dhɛ 'ö ꞊ya ö bo‑ ‑nu ‑gɛn ‑bha "zu ‑sü 'ka, 'yö ö ‑bha sɔ ‑nu ‑da ö ‑bha, 'yö 'yaanu ‑deewo ö ‑yɛa 'gü 'yö‑ pö‑ ‑nu ‑dhɛ: «'Wɔn 'a‑ ‑kë bha ka‑ ‑gɛn ‑dɔ "wɛ ‑ee?
JOH 13:13 N ‑dhɛ 'ka‑ wo «yi ‑Gɔmɛ» «yi Dëmɛ» bha tɛanwɔn ‑yö ka "piʋ̈, ‑a ‑gɛn ‑mü ꞊dhɛ a‑ 'ka "dhʋ̈ tɛan‑ 'ka.»
JOH 13:14 ꞊Ya kë "dhʋ̈ ma 'kö ma ‑zë 'a ‑kë ka ‑gɔmɛ 'ka 'a ka Dëmɛ 'ka bha 'ma ka ‑gɛn ‑bha "zu, ‑a ‑dhɛa ‑bha ꞊dhɛ kaa ‑dɩ 'pö 'ka ka ‑dɩ kë ‑bha ‑sü kö 'ka ka 'ko ‑nu ‑ta 'kun;
JOH 13:15 ‑a ‑gɛn ‑mü ꞊dhɛ 'wɔn zaɔn ꞊në 'a‑ nu ka ‑dhɛ bha kö 'ka‑ kë 'pö ꞊dhɛ n 'dhö.
JOH 13:16 A‑ ‑pö ka ‑dhɛ tɛan‑ ꞊dede 'ka ꞊dhɛ gwëë" 'bha 'yaa 'dhö kö‑ ꞊bhlëë ‑yö kë 'kpii‑ ‑yö ziö‑ 'ka ö dëmɛ ‑zë ‑ta, "ɛɛn ꞊dhɛ bɔmɛ ‑zë 'bha 'yaa 'dhö kö‑ ꞊bhlëë ‑yö kë 'kpii‑ ‑yö ziö‑ 'ka 'mɛ 'kö‑ bɔ bha‑ ‑ta.
JOH 13:17 'Ma‑ pö ka ‑dhɛ 'ka‑ dɔ. ꞊Ya kë ꞊dhɛ 'ka‑ 'gü ‑wɔn ‑zë kë, ka ‑bha ‑dho kë ‑së.
JOH 13:18 'Sa a‑ ‑pö "dhʋ̈ "kɛɛ 'mii "wɩ mɛ ꞊gban 'ka, ‑a ‑gɛn ‑mü ꞊dhɛ 'mɛ 'a‑ ‑nu ‑ya a‑ ‑nu ‑dɔ. "Kɛɛ ‑a ‑dhɛa ‑bha ꞊dhɛ 'pë 'ö Atanna ‑wʋ ‑ya pö 'ö‑ pö ꞊dhɛ: ‹'Mɛ yɛng yi ‑kɔ 'dhö gun 'tɛa‑ do ‑bha bha ꞊ya ‑da n ‑dhɛ pë "piʋ̈› bha‑ 'gü ‑wɔn ‑yö kë.
JOH 13:19 A 'wɔn bha‑ ‑to "dhiʋ̈ 'a‑ pö ka ‑dhɛ "dhʋ̈ kë "dhʋ̈ kö ꞊ya kë yi 'ö‑ 'ka kö 'ka‑ 'wɔn dɔ ꞊dhɛ Atanna ‑bha ‑Yamɛ bha yö ‑mü ma ꞊në n 'ka.
JOH 13:20 A‑ ‑pö ka ‑dhɛ tɛan‑ ꞊dede 'ka ꞊dhɛ 'mɛ 'ö ö ‑kɔ ‑ya 'mɛ 'a‑ bɔ ‑a ‑dhɛng ‑bha, kö ꞊ya ö ‑kɔ ‑ya n ‑dhɛng ‑bha ꞊naa bha. 'Sa mɛ "ʋʋ mɛ 'ö ö ‑kɔ ‑ya n ‑dhɛng ‑bha kö ꞊ya ö ‑kɔ ‑ya 'mɛ 'ö n bɔ ‑a ‑dhɛng ‑bha 'pö ꞊naa bha.»
JOH 13:21 ꞊Dhɛ 'ö ꞊ya ö bo‑ ‑pö "dhʋ̈ ‑sü 'ka 'yö‑ "gblʋ̈ʋ̈dhɛ ‑yö "muu bho, 'yö‑ "dhiʋ̈ ꞊loo‑ ‑nu ‑bha 'ö‑ pö «‑Ka ‑dhɛ ‑ga, a‑ ‑pö ka ‑dhɛ tɛan‑ ꞊dede 'ka ꞊dhɛ 'mɛ 'ka bha ꞊në‑ mɛ do dho ‑da n ‑dhɛ pë "piʋ̈.»
JOH 13:22 'Yö 'wo ‑ya wo 'ko ‑ga ‑sü ‑bha, ‑a ‑gɛn ‑mü ꞊dhɛ kö 'ö "wɩ sië 'mɛ 'ö‑ 'ka "dhʋ̈ bha 'waa‑ dɔ.
JOH 13:23 'Ö gun "dhʋ̈ kö Yesu ‑bha ꞊klang ‑nu bha‑ ‑mɛ 'dhɛ 'ö‑ ‑dhɔ ‑ya kë bha ‑yö ‑ya ‑sü 'ka‑ "sɔɔ klüü" klüüdhö.
JOH 13:24 'Yö Simɔ Piɛdhö ‑yö dhiang zë‑ ‑dhɛ ö "yanga 'gü kö ‑yö Yesu dhɛɛ" 'kpɔ kö 'ö "wɩ sië 'mɛ 'ö‑ 'ka bha ‑ya pö wo ‑dhɛ.
JOH 13:25 'Yö 'mɛ bha 'ö ö ‑gɔ ꞊yɔɔn Yesu "sɔɔ 'yö‑ pö‑ ‑dhɛ: «N Dëmɛ, de ‑mü?»
JOH 13:26 'Yö Yesu ‑ya ‑yɔ bɔ 'ö‑ pö: «'Bluu‑ 'ö maa ziö "tʋʋ 'ka ya maa‑ ‑dɔ mɛ 'ö‑ ‑gɔ bha kö‑ ‑mɛ ꞊në bha. 'Yö 'bluu‑ "kplü do sü, 'yö‑ ‑ziö "tʋʋ 'ka 'yö‑ nu Zuda 'wo‑ dë ‑dhɛ Simɔ Isikadhiɔtö bha‑ ‑dhɛ.
JOH 13:27 ꞊Dhɛ 'ö Zuda ‑yö 'bluu‑ "kplü bha‑ 'sü bhoo, 'yö Sɔtraan ‑yö 'wɔn yaa kë zuëga ‑da ‑a "gblʋ̈ʋ̈‑. Yesu ‑yö ‑to mü 'pö 'ö‑ pö‑ ‑dhɛ: «Zuda, 'wɔn 'ö bhii‑ kë ‑bhö ‑a kë "vaandhö!»
JOH 13:28 ‑A pö 'ö‑ wo Zuda ‑dhɛ "dhʋ̈ bha 'mɛ 'ö wɛng‑ ‑nu 'wo gun ‑dhɛ do 'gü mü bha‑ ‑nu 'bha 'wii‑ 'klɔɔ‑ dɔ.
JOH 13:29 ‑Yö ‑kë mɛ 'gbɛ 'gü ꞊dhɛ ꞊dhɛ 'ö ‑kë ꞊dhɛ Zuda ꞊në gun 'mɛ 'wo bha‑ ‑nu ‑bha ꞊naɔ ‑duɛ bho ‑mɛ 'ka bha ꞊Ya kë "dhʋ̈ kö Yesu ‑ya ‑pö ‑yö 'dho ‑bhöpë 'wo dho‑ ‑bhö troo ‑ta ꞊në‑ 'dhɔ ‑dhɛ 'gü, "ɛɛn 'zü ꞊dhɛ ‑yö pë 'bha nu ‑wëëmɛ ‑nu ‑dhɛ.
JOH 13:30 ꞊Dhɛ 'ö ꞊ya kë "dhʋ̈ 'yö Zuda ‑yö 'ö ‑kɔ ‑da 'bluu‑ "kplü bha‑ 'gü, 'yö to 'ö zun "kpɛnng, "kɛɛ 'ö gun "dhʋ̈ kö "bin ꞊ya 'ma.
JOH 13:31 ꞊Dhɛ 'ö Zuda ꞊ya zun "kpɛnng 'ö "tʋ̈ng 'në 'bha ꞊ya ziö, 'yö Yesu ‑ya pö ö ‑bha ꞊klang ‑nu ‑dhɛ 'ö‑ pö: «‑A "tʋ̈ng ꞊ya ꞊loo kö mang Mɛgbömɛ n 'tɔ ‑yö bhɔ ga 'ö maa‑ wo bha‑ 'gü, kö Atanna ‑dɩ 'pö‑ 'tɔ ‑yö bhɔ n ‑bu 'gü.
JOH 13:32 'Sa ꞊ya kë ꞊dhɛ Atanna 'tɔ ꞊ya bhɔ n ‑bu 'gü kö yöö‑ "slë kë 'pö kö mang Mɛgbömɛ n 'tɔ ‑yö bhɔ 'pö ö ‑bu 'gü. ‑A ‑kë "dhʋ̈ "tʋ̈ng 'yaa ꞊gblɛɛn 'zü.»
JOH 13:33 'Yö‑ pö 'zü‑ ‑nu ‑dhɛ 'ö‑ pö: «"Tʋ̈ng 'ö ꞊ya 'to n ‑gɔ kö 'a‑ kë ka "piʋ̈ 'yaa ꞊gblɛɛn 'zü, n bhang ‑nu, ‑a "tʋ̈ng 'ö "dhʋ̈ bha ꞊ya ziö, ka ‑dho n mɔɔ‑ "kɛɛ 'wɔn do 'a‑ pö Zuifö ‑nu ‑gɔmɛ ‑nu ‑dhɛ ꞊në 'a‑ ‑pö sië ka ‑dhɛ 'pö ya, ꞊dhɛ 'kii 'dho ꞊mɔɔ‑ ‑bha kö 'ka 'dho ‑dhɛ 'a 'dho sië‑ ‑bha bha‑ 'gü.
JOH 13:34 ‑A ‑kë "dhʋ̈ ‑sü 'gü, ma ‑zë ma ‑dhio ‑dee 'a dho‑ dɔ ka ‑ta 'yö ‑mü ꞊dhɛ kö ka 'ko ‑nu ‑dhɔ ‑yö ka 'ko kë ꞊dhɛ ‑kɔ 'ö ka ‑dhɔ ‑yö n ‑kë 'ka ya‑ 'dhö. ꞊Dhɛ 'ö "dhʋ̈, ka ‑dhɔ ‑yö ka 'ko kë.
JOH 13:35 ꞊Ya kë ꞊dhɛ ka ‑dhɔ ꞊në ꞊ya ka 'ko kë ꞊dhɛ ‑kɔ bha‑ 'dhö, 'yö mɛ ꞊gban‑ dho‑ 'wɔn dɔ ꞊dhɛ ma ꞊klang ‑nu ‑mü ka 'ka.
JOH 13:36 ‑Dhɛ 'ö ꞊yaa‑ pö "dhʋ̈ 'yö Simɔ Piɛdhö ‑ya dhɛɛ" kpɔ 'ö‑ pö: «N Dëmɛ, i ‑dho 'mɛ?» 'Yö Yesu ‑ya pö‑ ‑dhɛ: «‑Dhɛ 'a 'dho sië‑ ‑bha bha i ‑dho 'dho mü ('pö "kɛɛ yö ‑zë ‑yö ‑dho kë), "kɛɛ "tʋ̈ng ‑dhɛ 'kö 'kwa dɔ‑ 'ka ya 'bhii 'dho ꞊mɔɔ ‑dho mü ‑sü ‑bha.»
JOH 13:37 'Yö Piɛdhö ‑ya ‑yɔ bɔ‑ ‑gɔ 'ö‑ pö: «N Dëmɛ, i‑ ‑pö "dhʋ̈ ‑më ‑wɔn 'gü? A‑ ‑pö i ‑dhɛ ꞊dhɛ "tʋ̈ng kwa dɔ‑ 'ka ya n ‑kɔ ‑mɔɔ ‑bha kö 'a ga ‑zianwo i ‑wɔn 'gü!»
JOH 13:38 'Yö Yesu ‑ya ‑yɔ bɔ‑ ‑gɔ 'ö‑ pö: «I‑ ‑pö i ‑mɔɔ ‑bha 'i ga n ‑wɔn 'gü ꞊dedewo tɛan‑ 'ka ‑ee, Piɛdhö? A‑ ‑pö i ‑dhɛ tɛan‑ ꞊dede 'ka ꞊dhɛ ‑dhɛkpaɔyi do 'ö ꞊dɛɛ, "sanni ‑wa pö ꞊dhɛ ‑tɔgɔn ꞊ya "wɩ, kö 'bha n ‑wɔn zaɔ‑ ‑gɛn ‑yan 'ka ‑yaaga, (kö 'bha‑ pö 'bhaa n dɔ).»
JOH 14:1 ꞊Dhɛ 'ö ꞊ya kë "dhʋ̈ 'yö Yesu ‑ya pö‑ ‑nu ‑dhɛ 'ö‑ pö: "Kɛɛ ka zuë" 'ya 'dho kaan‑ "kwëë. ‑Ka 'dhang bho Atanna "dhiʋ̈ kö 'ka 'dhang bho mang ‑dɩ 'pö n "dhiʋ̈!
JOH 14:2 ‑Yɛa 'ö n Dë "piʋ̈ dhang‑ 'gü ‑yö 'gbɛ. ‑A yö ‑zë 'yaa "dhʋ̈ 'nu kö 'mii 'dho‑ pö ka ‑dhɛ ꞊dhɛ 'ma 'dho ka ‑yɛa baa‑ ‑dhɛ 'gü.
JOH 14:3 ꞊Ya kë ꞊dhɛ 'ma 'dho kö 'a ka ‑yɛa ‑pë kë, a ‑dho n yee kë 'zü ‑deewo a ‑nu ka 'sü ‑dhɛ 'gü 'yö 'ka ‑kë n "sɔɔ, kë "dhʋ̈ kö ‑dhɛ 'a‑ ‑bha kaa ‑dɩ 'pö 'ka kë mü.
JOH 14:4 'Sa zian 'ö dho ‑dhɛ 'a 'dho sië‑ ‑bha bha‑ 'gü ka‑ ‑dɔ.»
JOH 14:5 ꞊Dhɛ 'ö ꞊yaa‑ pö "dhʋ̈ 'yö Toma ‑ya pö‑ ‑dhɛ: «N Dëmɛ, ‑dhɛ 'i 'dho sië‑ ‑bha 'ö 'yaa‑ dɔ ‑zianwo bha yi ‑dho ‑a zian ‑zë dɔ ‑kɔ kë ꞊dhɛ?»
JOH 14:6 'Yö Yesu ‑ya pö‑ ‑dhɛ: «Toma, ma ꞊në 'a zian 'ö dho Atanna "piʋ̈ ‑a 'ka, ma ꞊në 'wo n ‑dhɛ tɛanwɔn, ꞊waa‑ pö 'zü ꞊sii 'ö 'yaa yën, kö ‑wo ‑wɩ ma ꞊në n 'ka. Mɛ 'bha 'yaa 'dho n Dë ‑dhɛ 'gü kö 'yii zun ma ‑zë n ‑bha.
JOH 14:7 'Ka ma ‑zë n dɔ kö 'ka n Dë dɔ ꞊naa bha. ꞊Ya 'go ꞊dɛɛ 'gü, 'ka n Dë dɔ ꞊naa bha, ‑a ‑gɛn ‑mü ꞊dhɛ 'ka n yö kö 'ka‑ yö.»
JOH 14:8 'Yö Fidhipö ‑ya pö‑ 'pö‑ ‑dhɛ 'ö‑ pö: «N Dëmɛ, ‑bhö i Dë ‑zɔn yi ‑dhɛ ‑dhe! 'Bha‑ ‑zɔn yi ‑dhɛ kö ꞊ya yi ‑bha bho.»
JOH 14:9 'Yö Yesu ‑ya ‑yɔ bɔ‑ ‑gɔ 'ö‑ pö: «Fidhipö, bhi 'ö ka ‑da n ꞊keng‑ ‑yi "sinma ꞊ya ꞊gwëë ya 'bhii n dɔ ꞊kö, i ‑tun pö ‑deewo ꞊dhɛ 'a n Dë ‑zɔn i ‑dhɛ ‑ee? ‑Dhɛ ‑ga, 'mɛ 'bha n yö kö 'bha n Dë yö. 'Bha 'dho‑ pö 'zü ‑deewo ꞊dhɛ «‑bhö i Dë ‑zɔn yi ‑dhɛ».
JOH 14:10 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ yaa n Dë yi do. "Ɛɛn 'bhaa‑ 'wɔn dɔ ꞊dhɛ n Dë ‑yö n 'gü mang ‑dɩ 'pö a‑ 'gü ‑ee? ‑Wʋ ‑nu 'a‑ pö sië ka ‑dhɛ bha 'mii‑ 'bha bho n ‑dɩ 'gü! N Dë 'ö n 'gü bha ꞊në 'wɔn ‑së ‑nu bha‑ ‑nu ‑kë.
JOH 14:11 ‑Ka 'dhang bho‑ "dhiʋ̈ ꞊dhɛ a n Dë 'gü n Dë ‑dɩ 'pö ‑yö n 'gü. 'Kö 'zü 'kii 'dhang bho n zë ‑dhiang ‑zë "dhiʋ̈, "kɛɛ 'wɔn ‑nu 'kö 'a‑ kë sië bha ‑kaa ‑ga kö 'ka 'dhang bho n "dhiʋ̈ ‑a ‑bha.
JOH 14:12 A‑ ‑pö ka ‑dhɛ tɛan‑ ꞊dede 'ka ꞊dhɛ: «Mɛ "ʋʋ mɛ 'ö 'dhang bho n "dhiʋ̈, 'wɔn ‑nu 'a‑ kë sië bha‑ ‑mɛ ‑dho ‑a kë. ‑A ‑mɛ ‑zian ‑zë ‑dho ‑a "dhiʋ̈ ‑ziö ‑ta kë, ‑a ‑gɛn ‑mü ꞊dhɛ ma ‑zë n ‑dho n Dë "piʋ̈ ‑sü ꞊nɛ (kö 'a Atanna ‑bha 'Nii‑ "slʋ̈ʋ̈slʋ̈ bha‑ bɔ ka ‑dhɛ).
JOH 14:13 ꞊Ya kë 'zü ꞊dhɛ 'ma 'dho, pë "pɛpɛ 'ka dho‑ ‑gbadhɛ n Dë ‑gɔ n 'tɔ 'gü a ‑dho ‑a kë ka ‑dhɛ, kë "dhʋ̈ kö n Dë 'tɔ ‑yö bhɔ ma 'a‑ Gbö 'ka bha n ‑bha.
JOH 14:14 ꞊Ya kë 'zü ꞊dhɛ 'ka pë ‑gbadhɛ n ‑gɔ n 'tɔ 'gü a ‑dho ‑a kë ka ‑dhɛ.»
JOH 14:15 'Yö Yesu ‑ya pö 'zü‑ ‑nu ‑dhɛ 'ö‑ pö: «"Ni ꞊ya kë ꞊dhɛ n ‑dhɔ ‑zë 'ö ka ‑kë tɛan‑ ꞊dede 'ka, kö ‑wʋ ‑nu 'a‑ kpɔ ka ‑bha bha 'ka‑ 'gü ‑wɔn kë.
JOH 14:16 Ma ‑zë 'ma 'dho a ‑dho bhɛa" n Dë ‑dhɛ kö ‑yö mɛ "wɛɛ bha bɔ ka ‑dhɛ kö ‑yö ka ‑ta 'kun. A ‑dho bhɛa" n Dë ‑dhɛ kö ‑yö tɛanwɔn pö 'Nii‑ bha‑ bɔ ka ‑dhɛ kö ‑yö kë ka "piʋ̈ yi ꞊gban 'ka. 'Nii‑ 'ö "dhʋ̈ bha "kpʋngtaamɛ ‑nu ‑zë 'waa ꞊mɔɔ‑ ‑bha kö ‑wa ꞊slɔɔ, ‑a ‑gɛn ‑mü ꞊dhɛ 'waa ꞊mɔɔ‑ ‑bha kö ‑wa yö, "ɛɛn kö ‑wa dɔ. "Kɛɛ ka ‑zë ka‑ ‑dɔ, ‑a ‑gɛn ‑mü ꞊dhɛ ‑yö ka "piʋ̈ yi ꞊gban 'ka, ‑yö ka 'gü.
JOH 14:18 'Dho 'ö maa‑ wo bha 'mii 'dho n ‑kɔ "kan ka "dhiʋ̈ kö 'ka to ꞊dhɛ ‑tɩnë 'dhö, a ‑dho n "dhiʋ̈ yee kë 'a nu 'zü ka "piʋ̈ ‑deewo.
JOH 14:19 'Sa ‑a "tʋ̈ng 'yaa ꞊gblɛɛn 'zü kö 'ma ꞊dhɛng "kpʋngtaamɛ ‑nu ‑gɔ, "kɛɛ ka ‑zë ka ‑dho n yö, ‑a ‑gɛn ‑mü ꞊dhɛ a "yaandhe 'ka, ꞊ya 'go mü 'zü kaa ‑dɩ 'pö ka ‑dho kë ꞊dhɛ n 'dhö 'ö 'kaa ga 'zü tongtongdhö.
JOH 14:20 ‑A yi 'ö bha ꞊në‑ 'ka, 'yö 'ka dho‑ 'wɔn dɔ ꞊dhɛ a n Dë 'gü, 'yö 'ka n 'gü, 'yö mang ‑dɩ 'pö 'a ka 'gü.
JOH 14:21 'Mɛ 'ö dho ö ‑zʋ 'kpɔ ‑wʋ ‑nu 'a‑ kpɔ ka ‑bha bha‑ 'gü, 'ö‑ 'gü ‑wɔn ‑kë kö n ‑dhɔ ‑ya ‑mɛ ꞊në‑ ‑kë. 'Mɛ 'ö "dhʋ̈ bha‑ ‑dhɔ ‑dho n Dë kë 'ö‑ ‑dhɔ ‑yö mang ‑dɩ 'pö n ‑kë 'ö 'a n ‑dɩ ‑zɔn ‑mɛ ‑dhɛ.
JOH 14:22 ꞊Dhɛ 'ö ꞊yaa‑ pö "dhʋ̈ 'yö Zudë ‑ya pö‑ ‑dhɛ: «N Dëmɛ, ‑yö kë ‑kɔ ‑kë ꞊dhɛ 'yö 'i‑ pö i ‑dho i ‑dɩ ‑zɔn yi ‑zë yi ‑dhɛ "kɛɛ 'bhii 'dho i ‑dɩ ‑zɔn "kpʋngtaamɛ ‑nu ‑zë ‑a ‑nu ‑dhɛ?» Zudë 'dhɛ 'ö dhɛɛ" kpɔ "dhʋ̈ bha ‑yö ‑dɩ ‑ta 'yö Zuda Isikadhiɔtö ‑dɩ 'pö 'ö ‑dɩ ‑ta.
JOH 14:23 'Yö Yesu ꞊ya ‑yɔ bɔ‑ ‑gɔ 'ö‑ pö: «‑A pö 'a‑ wo "dhʋ̈ bha‑ ‑gɛn ‑mü ꞊dhɛ 'mɛ 'ö n ‑dhɔ ‑ya ‑kë ‑a ‑mɛ ‑zë ‑yö ‑dho ö "tʋ 'to n ‑wʋ ‑bha 'ö‑ 'gü ‑wɔn ‑kë, 'mɛ 'ö "dhʋ̈ bha 'pö 'yö‑ ‑dhɔ dho n Dë kë, 'yö yaa n Dë 'yi dho nu yi ‑dhɛng bhɔ‑ ‑mɛ ‑ta 'yö 'yi ‑ya mü.
JOH 14:24 "Kɛɛ 'mɛ 'kö n ‑dhɔ 'yaa‑ kë, ‑a ‑mɛ 'yaa ö "tʋ 'to n ‑wʋ ‑bha. 'Sa ‑wʋ ‑nu 'ka‑ ma sië n ‑ta bha 'mii‑ 'bha bho n ‑dɩ 'gü. N Dë 'ö n bɔ bha ꞊në‑ ‑nu dɔ n "dhi.
JOH 14:25 ꞊Dhɛ 'ö ‑kë ꞊dhɛ a ‑tun ka "piʋ̈ yö bha a 'wɔn ‑nu bha‑ ‑nu ‑pö ka ‑dhɛ 'yö ꞊në‑ ‑wɔn 'gü.
JOH 14:26 "Kɛɛ 'mɛ 'ö dho ka ‑zʋ gban kö 'ma 'dho bha‑ ‑mɛ ‑dho nu. 'Nii‑ "slʋ̈ʋ̈slʋ̈ 'ö n Dë dho‑ bɔ ka ‑dhɛ ma bɔ 'gü bha ꞊në dho ka ꞊klang kë pë ꞊gban "pɛpɛ 'ka, 'yö ka ‑zʋ ‑bö 'pö pë "pɛpɛ 'a‑ pö ka ‑dhɛ bha‑ ꞊gban 'ka.
JOH 14:27 Zuëwaanusü ꞊në ma ‑zë 'a‑ to ka ‑gɔ. Zuëwaanusü 'ö n ‑gɔ bha ꞊në 'a‑ ꞊gbaɔ ka ‑gɔ. Yö ‑zë 'yaa ꞊dhɛ 'mɛ 'waa Atanna dɔ‑ ‑nu ‑bha 'dhö. ‑A ‑wɔn 'gü ka zuë" 'ya 'dho kaan‑ "kwëë, "suʋ̈ 'ya 'dho ka kë!
JOH 14:28 'Sa ‑a pö 'a‑ wo ka ‑dhɛ ꞊dhɛ «maa 'dho "kɛɛ 'ma 'dho a ‑dho n "dhiʋ̈ yee kë 'zü 'a nu ka "piʋ̈» bha ‑yö ka "tʋʋdhö. ꞊Ya kë 'nu ꞊dhɛ n ‑dhɔ ‑yö ka ‑kë kö ‑a pö 'a‑ wo "dhʋ̈ bha‑ "dhia‑ ‑dho 'ma ka 'gü 'nu, ‑a 'klɔɔ‑ ‑mü ꞊dhɛ n Dë 'a 'dho sië‑ "piʋ̈ bha yö ‑zë ‑duɛ 'kpii‑ ma ‑zë n ‑bha.
JOH 14:29 'Sa 'wɔn 'ö dho kë ‑a 'to 'a‑ wo "dhiʋ̈ 'a‑ pö ka ‑dhɛ 'pö "dhʋ̈ bha, a‑ ‑kë "dhʋ̈ kö ꞊ya kë yi 'ö‑ 'ka kö 'ka 'dhang bho n "dhiʋ̈.
JOH 14:30 Dhiang 'ö maa‑ zë ka ‑dhɛ ka ꞊klang kë ‑dhiang 'ka ‑a ‑kpɛa ꞊në 'a‑ zë sië bha, ‑a ‑gɛn ‑mü ꞊dhɛ Sɔtraan 'ö "kpʋng ꞊taa ‑gblüdë 'ka bha ‑yö nu sië n ‑gɔ. 'Sa kö ‑yö kë ꞊dhɛ ‑a faan ꞊në "gbɩɩ‑ 'ö ‑ziö n ‑bha ‑ta 'yaa ‑mü.
JOH 14:31 "Kɛɛ ‑a ‑dhɛa ‑bha ꞊dhɛ "kpʋngtaamɛ ‑nu ‑wa 'wɔn dɔ ꞊dhɛ n Dë ‑dhɔ ‑yö n ‑kë, ꞊dhɛ 'pë 'ö‑ pö n ‑dhɛ ꞊në 'a‑ ‑kë. ꞊Dhɛ 'ö "dhʋ̈ ‑ka "wlü kö 'kwa 'dho 'kwa 'go ‑dhɛ ya 'gü!»
JOH 15:1 ꞊Dhɛ 'ö Yesu ꞊ya ö bo‑ ‑pö ‑nu ‑dhɛ "dhʋ̈ ‑sü 'ka 'yö "gwënng do ‑da ‑nu ‑dhɛ 'ö‑ pö: «Ma ꞊në 'a ꞊dhɛ ‑drɔɔ ‑dhü ꞊dede 'wo‑ ta ‑a 'dhö, 'yö n Dë ‑zë 'ö‑ ta ‑mɛ 'ka.
JOH 15:2 ('Yö mɛ "pɛpɛ 'wo 'dhang bho n "dhiʋ̈ bha 'wo ꞊dhɛ 'pö ꞊dhɛ n ‑gbeng ‑nu 'dhö.) N ‑gbeng "pɛpɛ 'wo n ‑bha 'ö 'waa bha n Dë ꞊në‑ ‑nu ‑kan, 'yö‑ 'dhɛ 'wo bha 'yö‑ ‑nu ‑ta zë, kë "dhʋ̈ kö ‑wo sa, kö ‑wo bhɛ ‑ya kö ‑yö ziö ‑blɛɛsü ‑bha ‑ta.
JOH 15:3 "Kɛɛ ꞊ya 'to ka ‑zë 'ka ‑bha ‑bha kö ‑wʋ ‑nu 'a ka ꞊klang ‑kë 'ka bha ꞊wa 'ka ‑gbeng yaya ꞊gban "kan ka ‑bha, ꞊wa ka ‑ta zë, 'ka ‑kë "slʋ̈ʋ̈slʋ̈ 'dhang 'ka‑ bho‑ "dhiʋ̈ bha‑ ‑wɔn 'gü.
JOH 15:4 ꞊Dhɛ 'ö "dhʋ̈ ‑ka 'to ‑kplü ‑sü 'ka n ‑bha, kö 'a 'to 'pö ‑kplü ‑sü 'ka ka ‑bha (kö kwa ‑wʋ ‑yö kë do). Ka‑ 'wɔn ‑dɔ ꞊dhɛ "dhü ‑gbeng 'ö ꞊ya "kan ö ‑dhü ‑bha 'yaa ꞊mɔɔ‑ ‑bha 'zü kö ‑yö bha ö ‑dɩ ‑ta. ‑Kɔ do bha‑ 'gü 'kii 'to ‑kplü ‑sü 'ka n ‑bha, kö 'ka kë ꞊dhɛ "dhü ‑gbeng 'ö ꞊ya "kan ö ‑dhü ‑bha ꞊në‑ 'dhö bha.
JOH 15:5 Ma ꞊në 'a ꞊dhɛ ‑drɔɔ ‑dhü ꞊dede 'dhö, 'yö ka ‑zë 'ka ꞊dhɛ n ‑gbeng ‑nu 'dhö. 'Mɛ 'ö ꞊ya 'to ‑kplü ‑sü 'ka n ‑bha 'ö mang ‑dɩ 'pö n ‑kɔ 'dhö‑ ‑mɛ ‑bha, 'ö yi ‑wʋ 'dhö do, ‑yö ‑dho bha ꞊dedewo. ‑A pö 'a‑ wo "dhʋ̈ bha‑ ‑gɛn ‑mü ꞊dhɛ 'kaa ꞊mɔɔ‑ ‑bha kö 'ka pë 'bha kë kö n ‑kɔ 'yaa‑ 'gü.
JOH 15:6 Mɛ "ʋʋ mɛ 'ö 'yii 'to ‑kplü ‑sü 'ka n ‑bha, n Dë ‑ya ‑mɛ ‑zuö "kpɛnng ꞊dhɛ "dhü ‑gbeng 'ö 'yaa bha‑ 'dhö 'yö "kpɛa kpɔ klöngklöngdhö, 'yö 'wo‑ ‑wlö 'wo‑ ꞊loo pɛng "dhiʋ̈ 'yö ‑gʋ̈.
JOH 15:7 "Kɛɛ ꞊ya kë ꞊dhɛ 'ka 'to ‑kplü ‑sü ‑zë 'ka n ‑bha kö kwa ‑wʋ ‑yö kë do, kö ‑wʋ ‑nu 'a‑ pö ka ‑dhɛ bha ‑wo 'to ka "tʋʋdhö, pë "ʋʋ pë 'ö ‑dhi ka ‑dhɛ, ‑kaa ‑gbadhɛ n Dë ‑gɔ, ‑yö ‑dho ‑a kë ka ‑dhɛ.
JOH 15:8 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ n Dë 'tɔ bhɔ ‑kɔ 'ö 'dhö, yö ‑mü ꞊dhɛ kö 'ka kë ꞊dhɛ "dhü ‑gbeng 'ö ꞊waa‑ baa‑, 'ö bha sië ꞊dedewo bha ꞊në‑ 'dhö. Yö ꞊në ꞊ya kë "dhʋ̈ kö 'ka kë ma ꞊klangdhiʋ̈ 'ka ꞊dedewo "pɛɛpɛdhö.
JOH 15:9 Ka ‑dhɔ ‑yö n ‑kë 'pö ꞊dhɛ ‑kɔ 'ö n ‑dhɔ ‑yö n Dë ‑kë 'ka ‑a 'dhö. ꞊Dhɛ 'ö "dhʋ̈, ‑ka 'to ‑kplü ‑sü 'ka ‑dhɔ bha‑ ‑bha.
JOH 15:10 ꞊Ya kë ꞊dhɛ 'ka ka ‑zʋ kë ‑wʋ ‑nu 'a‑ kpɔ ka ‑bha bha‑ 'gü kö 'ka‑ 'gü ‑wɔn kë, kö ka ‑kplü ‑sü 'ka n ‑bha, kö ka ‑dhɔ bha‑ "gblʋʋ ‑ta ꞊dhɛ ‑kɔ 'ö mang ‑dɩ 'pö 'a n Dë ‑wʋ kun‑ 'ka 'ö n ‑dhɔ ‑ya ‑kë bha‑ 'dhö ꞊naa bha.
JOH 15:11 'Wɔn ‑nu bha a‑ ‑nu ‑pö ka ‑dhɛ "dhʋ̈ kö zuëniidadhe 'ö n ‑gɔ bha yö ꞊në ‑yö kë ka ‑gɔ 'pö, kë "dhʋ̈ kö ka zuë" ꞊nii ‑yö ‑da ꞊dedewo ‑tɛkpɛ ‑tɛkpɛdhö.
JOH 15:12 Ka ‑dhɔ ‑yö ka 'ko kë ꞊dhɛ ‑kɔ 'ö ka ‑dhɔ ‑yö n ‑kë 'ka bha‑ 'dhö. ‑Wʋ 'a‑ kpɔ ka ‑bha 'yö bha.
JOH 15:13 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ mɛ "taɔngdë 'ö‑ ‑dhɔ ‑yö mɛ ‑kë 'yö mɛ‑ ꞊mɔɔ‑ ‑bha mɛ mɛ ‑dɩ nu‑ ‑wɔn 'gü. Mɛ ‑dhɔ ‑bha mɛ kë ‑sü ‑zë "wɛɛ 'bha 'yaa ziö‑ 'dhɛ 'kö bha ꞊në‑ ‑ta.
JOH 15:14 ꞊Dhɛ 'ö "dhʋ̈ n "taɔngdë ‑nu, ꞊ya kë ꞊dhɛ ‑wʋ 'a‑ kpɔ ka ‑bha bha 'ka yö ꞊në‑ 'gü ‑wɔn kë kö 'ka kë n "taɔngdë ꞊dede 'ka.
JOH 15:15 'Maa ka 'sü 'zü ꞊dhɛ ma gwëëzë ‑nu 'dhö, ‑a ‑gɛn ‑mü ꞊dhɛ gwëëmi ‑zë 'yaa ö dëmɛ zuëpiʋ̈wɔn ‑nu dɔ. "Kɛɛ ma ‑zë 'wɔn 'a‑ dɔ n Dë "gblʋʋ "piʋ̈ 'ma‑ ꞊gban ‑zɔn ka ‑dhɛ. 'Wɔn 'ö‑ ‑wɔn 'gü 'yö 'a ka ‑dhɛ n "taɔngdë ‑nu bha 'yö bha.
JOH 15:16 "Kɛɛ 'sa ka ‑zë 'kii n ‑ya. Ma ꞊në ma ‑zë 'a n ‑kɔ ‑yɛ ka ‑bha, 'yö 'a ka ‑ya kö 'a ka bɔ, kö 'ka bhɛ ‑së dɔ "tʋ̈ng ꞊gban 'gü, 'wɔn ‑së kë ‑sü waa‑ ‑dhɔkë mɛ ꞊gban "pɛpɛ 'ka ‑sü 'ka, kö ‑yö kë "dhʋ̈ kö 'pë 'ö 'ka dho‑ ‑gbadhɛ n Dë ‑gɔ n 'tɔ 'gü bha ‑ya nu ka ‑dhɛ.
JOH 15:17 ‑Wʋ 'a‑ kpɔ ka ‑bha yö ‑mü ꞊dhɛ kö ka ‑dhɔ ‑yö ka 'ko kë ꞊dedewo.
JOH 15:18 'Yö‑ pö‑ ‑nu ‑dhɛ 'zü 'ö‑ pö: «"Kɛɛ ꞊ya kë ꞊dhɛ ka ‑san ꞊ya mɛ "bhɩɩ‑ ‑nu kë, ka ‑zʋ ‑yö ‑bö ꞊dhɛ ma ꞊në n ‑san ‑ya ‑nu ‑kë ‑blɛɛsü.
JOH 15:19 ꞊Ya kë 'nu ꞊dhɛ ka ‑tosɛa ‑kë ꞊dhɛ 'mɛ 'waa Atanna dɔ‑ ‑nu 'dhö, kö ka ‑dhɔ ‑dho ‑a ‑nu kë, ‑a ‑gɛn ‑mü ꞊dhɛ 'mɛ 'kö wɛng‑ ‑nu 'wo bɔ ‑a ‑nu ‑dhɔ ‑ya ‑nu ‑kë. "Kɛɛ ka 'sü 'a‑ wo 'a ka ‑ya ‑dɩ ‑ta, 'a ka ‑kan ‑a ‑nu ‑bha, 'ö kɛng‑ ‑nu ka ‑wʋ 'yaa do 'zü bha ka ‑san ‑ya ‑nu ‑kë yö ꞊në‑ ‑wɔn 'gü.
JOH 15:20 ‑A ‑kë "dhʋ̈ ‑sü bha‑ 'gü, ‑wʋ 'a‑ pö ka ‑dhɛ 'a‑ pö ꞊dhɛ gwëëmi 'bha ‑bha 'bha fië‑ 'yaa 'dhö ö dëmɛ 'ka bha ka ‑zʋ 'ya 'dho bhɔ yö ꞊në‑ 'ka. ꞊Ya kë ꞊dhɛ ꞊wa n ‑wëëdhɛ bho kö ‑yö kë ka "yaan ꞊dhɛ ‑wo ‑dho ka ‑wëëdhɛ bho 'pö. ꞊Ya kë ꞊dhɛ ꞊wa 'dhang bho n ‑wʋ "dhiʋ̈ kö ‑wo ‑dho 'dhang bho 'pö ka ‑bha "dhiʋ̈.
JOH 15:21 "Kɛɛ ‑wo ‑dho 'wɔn ‑nu bha‑ ꞊gban "pɛpɛ kë ka 'ka "dhʋ̈ ma ꞊në n ‑wɔn 'gü, ‑a ‑gɛn ‑mü ꞊dhɛ 'mɛ 'ö n bɔ bha 'waa‑ ‑dɔ.
JOH 15:22 'Sa ꞊ya kë ꞊dhɛ 'mii nu 'nu kö 'a dhiang zë‑ ‑nu ‑dhɛ, kö za 'yaa‑ ‑nu ‑bha. "Kɛɛ 'ma nu 'ma dhiang zë‑ ‑nu ‑dhɛ. ꞊Ya kë ꞊dhɛ 'wii 'dhang bho n "dhiʋ̈ kö za ‑ya ‑nu ‑bha.
JOH 15:23 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ 'mɛ 'ö n ‑san ‑ya ‑kë kö n Dë ‑san ‑ya ‑kë.
JOH 15:24 ꞊Ya kë ꞊dhɛ 'wɔn ‑nu 'ö mɛ 'bha 'yii‑ suu kë do bha 'mii yö ꞊në‑ 'bha kë 'nu ‑a ‑nu kpö 'gü kö‑ ‑nu "yan‑ ‑da ‑dhɛ 'gü, kö za 'yaa‑ ‑nu ‑bha. "Kɛɛ ‑a ‑nu "yan ꞊ya ‑da ‑dhɛ 'gü, ꞊wa ‑ya mü 'zü yaa n Dë yi ‑san ꞊yaa‑ ‑nu kë, ꞊ya kë "dhʋ̈ kö‑ ‑nu ‑dha za bha‑ ‑gɔ ‑dhɛ 'bhaa 'dhö.
JOH 15:25 "Kɛɛ ‑yö ‑kë "dhʋ̈ kö 'pë 'ö ‑bɛn zë ‑sü 'ka Atanna ‑bha 'tɔng‑ 'sëëdhɛ 'wo‑ pö wo 'dhang ‑bho "dhiʋ̈ bha‑ 'gü ꞊dhɛ: ‹N ‑san ‑ya ‑nu ‑kë "wɛɛwɛɛ ‑a ‑gɛn 'bhaa 'dhö› bha ꞊në‑ 'gü ‑wɔn ‑yö kë.
JOH 15:26 ꞊Dhɛ 'ö ‑kë ꞊dhɛ ka ‑gun n "piʋ̈ yë ya‑ zübhodhɛ 'gü bha 'ma 'dho, tɛanwɔn pö 'Nii‑ 'ö go n Dë "piʋ̈ bha‑ ‑dho ‑a ‑gbadhɛ ‑gɔ kö ‑ya bɔ ka ‑dhɛ kö ‑yö ka ‑ta 'kun kö ‑yö n ‑dhiang zë ka ‑dhɛ. Kö kaa ‑dɩ 'pö 'ka‑ "sɛɛdhɛ kë n ‑bha.»
JOH 16:1 'Yö Yesu ‑ya pö 'zü ö ‑bha ꞊klang ‑nu ‑dhɛ 'ö‑ pö: «A‑ ‑pö ka ‑dhɛ "dhʋ̈ kö ka ‑zʋ ꞊në ‑yö ‑gban ka ‑bha ‑zʋ ‑yö Atanna ‑dhɛ ‑sü 'gü, kö 'ka 'dho "kan‑ ‑wʋ ‑bha.
JOH 16:2 A‑ ‑pö ka ‑dhɛ ꞊dhɛ ‑wo ‑dho ka ‑gɛn ‑naa 'kpɔ Zuifö ‑nu ‑bha ‑yakwëë ‑kë 'gü ‑kɔ ‑nu 'gü. "Tʋ̈ng 'bha ‑zian ‑dho ꞊loo 'ö 'wo ka zë, 'ö 'mɛ 'wo ka zë sië "dhʋ̈ bha 'ö ‑kë ‑nu 'gü ꞊dhɛ ‑wo Atanna ‑dhɔ ꞊në‑ kë sië bha.
JOH 16:3 ‑A ‑kë "dhʋ̈ ‑gɛn ‑mü ꞊dhɛ 'wii n Dë dɔ, 'wii n dɔ.
JOH 16:4 ‑A pö 'a‑ wo sië ka ‑dhɛ "dhʋ̈ bha‑ ‑gɛn ‑mü ꞊dhɛ kö 'wo‑ kë sië ka 'ka "dhʋ̈ "tʋ̈ng 'ö‑ 'gü, kö‑ 'wɔn 'ya 'dho ka 'kɔn. 'Mii‑ pö 'ö‑ wo ka ‑dhɛ zü bho ‑yi 'ka bha‑ ‑gɛn ‑mü ꞊dhɛ kö a ‑tun ka "piʋ̈ yö.
JOH 16:5 "Kɛɛ ‑a "tʋ̈ng ꞊ya ꞊loo kö 'a 'dho 'mɛ 'ö n bɔ bha‑ ‑dhɛ 'gü. 'Sa mɛ 'bha kö yöö n dhɛɛ" 'kpɔ ka kpö 'gü ꞊dhɛ «n Dëmɛ, i ‑dho 'mɛ?» 'yaa 'dhö.
JOH 16:6 "Kɛɛ a‑ 'wɔn ‑dɔ ꞊dhɛ ‑a pö 'a‑ wo ka ‑dhɛ "dhʋ̈ bha ꞊në ‑wëë bɔ sië ka ‑ta.
JOH 16:7 "Kɛɛ 'sa kö tɛanwɔn ꞊në 'a‑ pö. ‑Yö ‑së ka ‑bha 'ka kö 'a 'dho, ‑a ‑gɛn ‑mü ꞊dhɛ kö 'mii 'dho, 'mɛ 'ö dho ka ‑zʋ ‑gban bha 'yii 'dho nu, "kɛɛ ꞊ya kë ꞊dhɛ 'ma 'dho 'yö 'a‑ bɔ ka ‑dhɛ.»
JOH 16:8 'Yö‑ pö 'zü‑ ‑nu ‑dhɛ 'ö‑ pö: «Ka ‑zʋ ‑gban ‑mɛ 'ö "dhʋ̈ bha ꞊në ꞊ya nu, 'yö dho 'wɔn yaa 'ö "kpʋngtaamɛ ‑nu ‑wa ‑kë bha‑ ‑zɔn ‑nu ‑dhɛ 'kpakpadhö 'yö 'wo‑ dɔ. 'Yö tɛanwɔn 'dhö Atanna "piʋ̈ 'klɔɔ‑ 'ö‑ 'gü, ‑a pö 'ö‑ wo ꞊dhɛ za ‑ya ‑nu ‑bha bha‑ ‑wɔn 'gü bha, waa za bha 'ö dho‑ ‑nu zë 'klɔɔ‑ 'ö‑ ‑bha bha 'yö 'wo‑ dɔ 'pö.
JOH 16:9 'Yö 'wo‑ 'wɔn dɔ ꞊dhɛ ‑a pö 'ö Atanna ‑ya wo ꞊dhɛ za ‑ya ‑nu ‑bha bha‑ 'klɔɔ‑ ‑mü 'dhang 'ö 'wii‑ bho n "dhiʋ̈ bha ꞊në‑ 'ka.
JOH 16:10 'Yö 'wo‑ 'wɔn dɔ 'zü ꞊dhɛ tɛanwɔn ‑kë Atanna "piʋ̈ ‑sü bha‑ 'klɔɔ‑ ‑mü nu 'a‑ wo 'ö 'wii‑ dɔ ꞊dhɛ n Dë Atanna ꞊në n bɔ, 'ö maa n yee kë kö 'a 'dho, "kɛɛ 'ö 'dho 'ö maa‑ wo bha 'wii 'dho n yö 'zü bha ꞊në‑ 'ka.
JOH 16:11 'Yö 'wo‑ 'wɔn dɔ ꞊dhɛ za 'ö dho‑ ‑nu zë kö 'wii 'dhang bho n "dhiʋ̈ bha‑ 'klɔɔ‑ ‑mü ꞊dhɛ Sɔtraan 'ö ‑gblüdë 'ka "kpʋng ꞊taa, 'ö 'wo bɔ‑ 'ka bha za ꞊yaa‑ zë 'nu ('yö 'wo‑ 'wɔn dɔ ꞊dhɛ 'dhang ‑bho n "dhiʋ̈ ‑sü ‑dɩ doseng ꞊në ꞊sɔng bho mɛ ‑bha Atanna wëëdhö).»
JOH 16:12 'Yö‑ pö: «Ka ꞊klang ‑kë 'ka ‑wɔn 'gbɛ ꞊dede ‑yö n ‑gɔ, "kɛɛ 'kii 'dho ꞊mɔɔ‑ ꞊gban ‑kwɛɛ 'sü ‑sü bha "tʋ̈ng ya‑ 'gü.
JOH 16:13 "Kɛɛ ka ‑zʋ ‑gban ‑mɛ 'ö ‑kë tɛanwɔn pö 'Nii‑ 'ka bha ꞊në ꞊ya nu, 'yö dho zun ka ‑dhɛ "dhiʋ̈, 'yö tɛanwɔn suu ꞊gban "pɛpɛ 'do 'do ‑zɔn ka ‑dhɛ. 'Yii 'dho ö ‑dɩ 'gü ‑dhiang zë ka ‑dhɛ, ‑a ‑gɛn ‑mü ꞊dhɛ 'yaa ö ‑dɩ ‑gɔ. 'Wɔn ‑nu 'ö‑ ma n ‑ta, waa‑ 'wɔn ‑nu 'ö dho kë ‑dhɛkpaɔ dhia" 'gü bha ꞊në 'ö dho ka ꞊klang kë‑ 'ka.
JOH 16:14 Yö ꞊në dho n 'tɔ bhɔ, ‑a ‑gɛn ‑mü ꞊dhɛ ma ꞊në 'a dho n ‑wʋ 'kpɔ‑ ‑bha kö ‑yö nu‑ pö ka ‑dhɛ.
JOH 16:15 'Yö‑ pö: «N Dë ꞊slɔɔpë "pɛpɛ ꞊gban ‑yö ma ꞊në n ‑bha 'ka. Yö ꞊në‑ ‑wɔn 'gü 'yö 'a‑ pö ka ‑dhɛ ꞊dhɛ ‑wʋ 'a dho‑ 'kpɔ‑ ‑bha ꞊në 'ö dho‑ pö ka ‑dhɛ.»
JOH 16:16 'Yö 'go mü 'zü 'ö‑ pö‑ ‑nu ‑dhɛ 'ö‑ pö: «‑A "tʋ̈ng 'yaa ꞊gblɛɛn 'zü kö ka "yan ‑yö ꞊fië n 'ka, ‑a ‑gɛn ‑mü ꞊dhɛ (maa 'dho n Dë "piʋ̈). Kö "tʋ̈ng 'në 'bha ꞊ya ziö 'zü kö 'ka "yan ‑dee 'bha ‑kpan n ‑bha.
JOH 16:17 ꞊Dhɛ 'ö ꞊yaa‑ pö "dhʋ̈, 'yö‑ ‑bha ꞊klang ‑nu bha‑ mɛ 'bha ‑nu 'wo ‑ya wo 'ko dhɛɛ" 'kpɔ ‑sü ‑bha 'wo‑ pö: «'Yö ꞊yaa‑ pö ꞊ni kö ‑ya ‑pö ꞊dhɛ 'zü «‑a "tʋ̈ng 'yaa ꞊gblɛɛn 'zü kö ka "yan ‑yö ꞊fië n 'ka, kö "tʋ̈ng 'në 'bha ꞊ya ziö 'zü kö 'ka n yö ‑deewo», "ɛɛn «maa 'dho n Dë "piʋ̈» ‑zë 'klɔɔ‑ ꞊në ‑më 'ka?
JOH 16:18 "Tʋ̈ng 'në kö "wɩ sië‑ 'ka ya ‑më "tʋ̈ng ‑mü 'yö 'yaa‑ 'gü ma ya?»
JOH 16:19 'Yö Yesu ‑ya 'wɔn dɔ ꞊dhɛ ‑ya ‑nu "piʋ̈ ꞊dhɛ 'wo ö dhɛɛ" 'kpɔ. ꞊Dhɛ 'ö ꞊yaa‑ 'wɔn dɔ "dhʋ̈ 'yö‑ ‑nu dhɛɛ" 'kpɔ 'ö‑ pö: «‑A pö 'a‑ wo ka ‑dhɛ ꞊dhɛ ‑a "tʋ̈ng 'yaa ꞊gblɛɛn 'zü kö ka "yan ‑yö ꞊fië n 'ka, kö ꞊ya 'go mü kö "tʋ̈ng 'në 'bha ꞊ya ziö kö 'ka n yö ‑deewo bha ꞊në‑ 'ka ka 'ko ‑nu dhɛɛ" 'kpɔ sië‑ 'ka bha ‑ee?
JOH 16:20 'Yö‑ pö: «A‑ ‑pö ka ‑dhɛ tɛan‑ ꞊dede 'ka ꞊dhɛ ('ma ga yi 'ö‑ 'ka) ka ‑dho "gbʋ bɔ 'ö 'ka ‑wëë ‑wʋ ꞊gban suu kpɔ, kö "kpʋngtaamɛ ‑nu ‑zë ‑wo wo "dhia bho sië. Ka zuë" "dhiʋ̈ ‑dho "tɛɛ, "kɛɛ ka ‑bha zuëdhiʋ̈tɛɛ bha 'yö ‑dho "gla ka ‑gɔ ꞊niidadhe 'gü.
JOH 16:21 ‑Yö kë ka "yaan ꞊dhɛ dhebhɔ 'ö‑ 'në yö "tʋ̈ng ꞊ya ꞊loo, ‑a zuë" "dhiʋ̈ ‑yö ‑tɛɛ, ‑a ‑gɛn ‑mü ꞊dhɛ kö yöö ziö "tʋ̈ng "gbɩɩ‑ do 'gü. "Kɛɛ ꞊ya bo 'në yö ‑sü 'ka 'yö‑ ꞊nii ‑yö ‑da, ‑a "tʋ̈ng 'dhɛ 'kö bha‑ 'gü kö‑ ‑zʋ ꞊ya bhɔ sëë 'ö‑ bho bha‑ 'ka 'ö mɛbhɩɩdhe ‑dhü do 'ö ‑da "kpʋng ꞊taa bha‑ ‑wɔn 'gü.
JOH 16:22 ‑Kɔ do bha ꞊në ka zuë" 'dhö ꞊gbaɔn sië‑ 'ka "tʋ̈ng ya‑ 'gü, "kɛɛ a ‑dho ka yö 'zü ‑deewo (kö 'ma 'go ga 'gü 'ma ‑bö), 'yö ka zuë" ꞊nii ‑yö ‑da. ‑A zuëniidadhe 'dhɛ 'kö bha mɛ 'bha ‑kɔ 'yii 'dho ꞊mɔɔ‑ ‑sü ka ‑gɔ ‑sü ‑bha.
JOH 16:23 ‑A yi 'ö bha ꞊ya ꞊loo yi 'ö 'ka, 'kii 'dho n dhɛɛ" 'kpɔ 'wɔn "wɛɛ 'bha 'ka 'zü; ‑a ‑gɛn ‑mü ꞊dhɛ a‑ ‑pö ka ‑dhɛ tɛan‑ ꞊dede 'ka ꞊dhɛ ‑a yi 'ö bha‑ 'ka, pë "pɛpɛ ka dho‑ ‑gbadhɛ n Dë ‑gɔ n 'tɔ 'gü, ‑yö ‑dho ‑a kë ka ‑dhɛ.
JOH 16:24 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ ('ö go ka ‑da n ꞊keng‑ ‑yi ‑bha) 'ö dho 'ö zun‑ 'ka ꞊dɛɛ ‑bha, 'kii pë ‑gbadhɛ n Dë ‑gɔ n 'tɔ 'gü do, "kɛɛ ‑a "tʋ̈ng ꞊ya ꞊loo ꞊tɔn kö 'ka pë ‑gbadhɛ kö ‑ya kë ka ‑dhɛ (kö ka zuë" 'ya 'dho 'to ꞊taama 'wɔn 'bha 'gü,) "kɛɛ kö ka ꞊nii ‑yö ‑da ‑tɛkpɛ ‑tɛkpɛdhö.»
JOH 16:25 'Yö 'go mü 'zü 'ö‑ pö: «'Sa 'wɔn ‑nu bha a‑ ꞊gban ‑dhiang ‑zë ka ‑dhɛ "gwënng 'gü, "kɛɛ ‑a "tʋ̈ng ‑dho ꞊loo 'ö 'a bo "gwënng ‑da ka ‑dhɛ ‑sü 'ka, 'ö 'wɔn ‑nu 'wo ‑gban n Dë ‑bha bha 'a‑ ‑dhiang ‑ta ‑pʋ ka ‑dhɛ ‑së 'ka 'kpakpadhö.
JOH 16:26 ‑A yi 'ö bha ꞊ya ꞊loo, ka ‑dho pë ‑gbadhɛ n Dë ‑gɔ n 'tɔ 'gü. 'Sa 'mii 'dho‑ pö ka ‑dhɛ ꞊dhɛ a ‑dho bhɛa"‑ ‑dhɛ ka ‑bha 'ka,
JOH 16:27 ‑a ‑gɛn ‑mü ꞊dhɛ ka ‑dhɔ ‑yö yöö ꞊dede ‑a ‑kë n ‑dhɔ 'ö ka ‑kë 'ö 'ka 'dhang bho‑ "dhiʋ̈ ꞊dhɛ yö ꞊në n bɔ bha‑ ‑wɔn 'gü.
JOH 16:28 A‑ pö ka ‑dhɛ tɛan‑ ꞊dede 'ka ꞊dhɛ a ‑go n Dë ꞊në‑ "piʋ̈ 'yö 'a nu "kpʋng ꞊taa yö, maa 'go 'zü "kpʋng ꞊taa yö kö 'a 'dho n Dë do bha ꞊në‑ "piʋ̈.»
JOH 16:29 'Yö‑ ‑bha ꞊klang ‑nu 'wo‑ pö‑ ‑dhɛ: «‑A ‑ga bha! I bo 'i‑ wo dhiang ‑zë yi ‑dhɛ "gwënng 'gü ‑sü 'ka 'i‑ zë sië "puu 'ka ‑së 'ka bha,
JOH 16:30 'ya‑ 'wɔn dɔ ꞊tɔn ꞊dhɛ bhi ‑zë dhɛɛ" 'kpɔ ‑mɛ ‑zian 'yaa ‑mü i 'ka; ‑a ‑gɛn ‑mü ꞊dhɛ 'wɔn 'bha ‑wɔn 'bha 'yaa ‑bin ‑sü 'ka i ‑gɔ. Yö ꞊në‑ ‑wɔn 'gü 'yö 'yi‑ dɔ ꞊dhɛ i ‑go Atanna "piʋ̈ tɛan‑ ꞊dede 'ka.»
JOH 16:31 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «'Ka 'dhang bho‑ "dhiʋ̈ ꞊tɔn ‑ee?»
JOH 16:32 'Yö‑ pö: «‑Ka ‑dhɛ ‑ga, ‑a "tʋ̈ng ‑yö nu sië 'ö ꞊ya ꞊loo ‑zianwo 'ö 'ka dho "kan n ‑zü 'kwëë‑ 'ka n to n do 'ka, 'ö 'ka dho ka ‑gɔ 'kɔɔdhɛ ‑nu 'gü 'do 'do 'ka. "Kɛɛ 'kö 'zü kaa‑ kë "dhʋ̈, 'mii 'dho 'to n do 'ka, ‑a ‑gɛn ‑mü ꞊dhɛ n Dë ‑yö n "piʋ̈.
JOH 16:33 'Wɔn ‑nu bha a‑ ‑nu ‑pö ka ‑dhɛ "dhʋ̈ kö ka zuë" ꞊në ‑yö 'waanu kwɛng‑ ‑nu kwa ‑bha ‑kë 'ko "piʋ̈ ‑sü bha‑ 'gü; ‑a ‑gɛn ‑mü ꞊dhɛ ka ‑dho sëë bho ꞊dedewo "kpʋngtaadhɛ ya‑ 'gü, "kɛɛ ‑ka ka faan dɔ, n ‑kɔ ꞊ya ziö "kpʋngtaadhɛ ‑gɔ.»
JOH 17:1 ꞊Dhɛ 'ö Yesu ꞊ya ö bo‑ pö "dhʋ̈ ‑sü 'ka, 'yö ö "yan "dhiʋ̈ ꞊wlü dhang‑ 'gü 'ö ꞊bhɛa Atanna ‑dhɛ 'ö‑ pö: «N Dë, ‑a "tʋ̈ng bha ꞊ya ꞊loo, ‑bhö ma 'a i Gbö 'ka bha n 'tɔ bhɔ kö mang ‑dɩ 'pö 'a i 'tɔ bhɔ!
JOH 17:2 ‑A ‑gɛn ‑mü ꞊dhɛ ‑kɔ ‑ziö mɛbhɩɩdhe ꞊gban "pɛpɛ ‑gɔ ‑sü ‑faan 'i‑ nu n ‑dhɛ bha, i‑ ‑kë "dhʋ̈ kö 'a ꞊sii 'ö 'yaa yën ꞊në‑ nu mɛ "pɛpɛ 'i‑ ‑nu nu n ‑dhɛ bha‑ ‑nu ‑dhɛ.
JOH 17:3 "Kɛɛ 'sa kö ꞊sii 'ö 'yaa yën "dhʋ̈ bha‑ ‑nu ‑a ‑nu ‑dhɛ ‑kɔ 'ö 'dhö yö mü ꞊dhɛ kö 'mɛ 'wo "dhʋ̈ bha ‑wo bhi 'ö 'i ‑kë Atanna doseng 'ö 'dhö ‑a 'ka bha bhi ꞊në i dɔ, kö ‑wo mang Yesu Klisi ‑mɛ 'i n bɔ bha n dɔ 'pö.
JOH 17:4 Nu 'a‑ wo "kpʋng ꞊taa yö bha 'ma i 'tɔ bhɔ, yë 'i‑ nu n ‑dhɛ kö 'a‑ kë bha 'ma‑ ꞊gban kë 'ma‑ ‑gɔ dɔ.
JOH 17:5 ꞊Dhɛ 'ö "dhʋ̈, n Dë, 'tɔbhɔdhe 'ö gun n ‑gɔ ‑blɛɛsü i "sɔɔ kö "sɛ 'yaa 'dhö bha, ‑bhö ‑a nu n ‑dhɛ 'zü ‑deewo ꞊dhɛ ‑kɔ bha‑ 'dhö.
JOH 17:6 'Mɛ 'i‑ ‑nu sü "kpʋngtaamɛ ‑nu kpö 'gü 'i‑ nu n ‑dhɛ bha, 'ma i dɔ ‑kɔ ꞊gban pö‑ ‑nu ‑dhɛ. 'Mɛ 'wo "dhʋ̈ bha ‑wo ‑gun i ‑bha 'ka ‑blɛɛsü, 'yö 'i‑ ‑nu nu n ‑dhɛ, ‑wo i ‑wʋ bha‑ ꞊bhlëë ‑ya ‑sü 'ka 'pö.
JOH 17:7 ꞊Waa‑ 'wɔn dɔ ꞊taamasü ya‑ 'gü ꞊dhɛ pë "pɛpɛ 'a‑ ‑ta ‑pʋ ‑nu ‑dhɛ bha, ‑wo ‑go bhi ꞊në i 'gü, bhi ꞊në 'i n ꞊draan‑ ‑bha.
JOH 17:8 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑wʋ "pɛpɛ 'i‑ kpɔ n ‑bha bha ꞊në 'a‑ ‑nu ꞊klang ‑kë 'ka, 'yö 'wo 'dhang bho‑ "dhiʋ̈. ‑A ‑kë "dhʋ̈ ‑sü bha‑ 'gü, ‑wa 'wɔn dɔ ‑sü 'ka 'kpakpadhö ꞊dhɛ bhi ꞊në 'a go i 'gü, ꞊dhɛ bhi ꞊në 'i n bɔ.
JOH 17:9 'Mɛ 'wo "dhʋ̈ bha a ‑bhɛa i ‑dhɛ wo ꞊në‑ ‑nu ‑wɔn 'gü. 'Mii bhɛa" i ‑dhɛ mɛ "wɛɛ "pɛpɛ 'dhɛ 'wo to bha‑ ‑nu 'bha ‑wɔn 'gü kö 'yii kë 'mɛ 'kö 'i‑ nu n ‑dhɛ bha‑ ‑nu 'ka; ‑a ‑gɛn ‑mü ꞊dhɛ ‑wo bhi ꞊në i ‑bha 'ka.
JOH 17:10 i‑ 'wɔn dɔ ꞊dhɛ koo‑ pë ‑yö do, i ‑bha pë ‑zë kö n ‑bha ‑mü, "ɛɛn 'pë 'ö n ‑bha 'ka 'pö kö ‑yö i ‑bha 'ka. 'Wɔn 'ö‑ ‑wɔn 'gü 'yö ma mɛdhɛ 'bhü 'dhö ‑wo ‑sü 'ka ‑a ‑nu ‑bha bha 'yö bha.
JOH 17:11 i‑ 'wɔn ‑dɔ ꞊dhɛ 'go ꞊në maa‑ wo "kpʋng ꞊taa yö kö 'a nu i "piʋ̈ bha, "kɛɛ wo ‑zë ‑wo yö. ꞊Dhɛ 'ö "dhʋ̈, n Dë "slʋ̈ʋ̈slʋ̈, ‑bhö ‑a ‑nu ‑maa kë 'gügbɩɩdhɛ 'ö‑ ‑naa 'yaa 'dhö 'ö i 'tɔ 'gü bha‑ 'ka. 'Sa 'tɔ do 'ö "dhʋ̈ bha ꞊në 'i‑ nu n ‑dhɛ 'pö, "kɛɛ ‑bhö ‑a kë "dhʋ̈ kö ‑wo kë do 'pö ꞊dhɛ kwɛng 'ko do ‑kɔ 'ö‑ 'gü bha‑ 'dhö.
JOH 17:12 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ "tʋ̈ng 'a gun‑ 'ka‑ ‑nu "piʋ̈ "kpʋng ꞊taa bha, ma ꞊në 'a gun‑ ‑nu ‑maa kë sië i 'tɔ 'gü. 'Ö 'a n ‑zʋ ‑kë mɛ 'dhɛ 'kö 'i‑ n ‑dhɛ bha‑ ‑nu "piʋ̈ 'ö‑ mɛ do ‑zian 'yii ꞊dhɛng, kö 'yii kë mɛ 'dhɛ 'kö‑ ‑bha gun ‑bɛn zë ‑sü 'ka i ‑wʋ 'gü ꞊dhɛ ‑yö ‑dho kë "dhʋ̈, kë "dhʋ̈ kö 'pë 'ö i ‑wʋ ‑ya pö ‑a 'gü ‑wɔn ‑yö kë bha‑ 'ka.
JOH 17:13 ꞊Dhɛ 'ö "dhʋ̈ ‑a "tʋ̈ng ꞊ya ꞊loo kö 'a nu i "piʋ̈, "kɛɛ ꞊dhɛ 'ö ‑kë ꞊dhɛ a ‑tun "kpʋng ꞊taa bha, a‑ ‑pö i ‑dhɛ "dhʋ̈ yö ꞊në‑ 'gü kë "dhʋ̈ kö ma zuëniidadhe ‑yö kë‑ ‑nu ‑gɔ kö‑ ‑nu zuë" ꞊nii ‑yö ‑da ‑tɛkpɛ ‑tɛkpɛdhö, kö‑ "piʋ̈ 'ya 'dho 'to.
JOH 17:14 I ‑wʋ bha ꞊në 'a‑ "dhiʋ̈ ꞊loo‑ ‑nu ‑bha 'yö 'wo 'dhang bho‑ "dhiʋ̈ 'yö‑ ‑nu ‑san 'dhö "kpʋngtaamɛ ‑nu ‑kë, ꞊Dhɛ 'ö ‑kë ꞊dhɛ yaa "kpʋngtaamɛ ‑nu 'yaa do, 'ö woo ‑dɩ 'pö 'waa ꞊dhɛ ‑a ‑nu 'dhö 'zü bha‑ ‑wɔn 'gü.
JOH 17:15 'Mii bhɛa" i ‑dhɛ kö 'i‑ ‑nu bho "kpʋng ꞊taa yö, "kɛɛ kö 'i‑ ‑nu ‑maa ꞊në‑ kë mɛ yaa bha‑ ‑gɔ.
JOH 17:16 'Waa "kpʋngtaadhɛ ‑bha 'ka 'zü ꞊dhɛ 'maa "kpʋngtaadhɛ ‑bha 'ka 'pö ‑kɔ 'ö‑ 'gü bha‑ 'dhö.
JOH 17:17 ‑Bhö dɔ "gbɩɩ‑ yö ꞊në‑ ‑wɔn 'gü, n Dë, kö 'i‑ ‑nu "zu i ‑bha tɛanwɔn bha‑ 'ka kö ‑wo kë "slʋ̈ʋ̈slʋ̈. Tɛanwɔn bha yö ‑mü i ‑wʋ ꞊në‑ 'ka, (kö i ‑wʋ bha 'i‑ ‑ta "pʋ‑ ‑nu ‑dhɛ kö ‑yö kë‑ ‑nu ‑ya i ‑bha ‑ya 'gü ‑kɔ 'ka).
JOH 17:18 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ 'i n bɔ ‑kɔ do 'ö‑ 'gü "kpʋng ꞊taa bha, mang ‑dɩ 'pö 'ma‑ ‑nu bɔ ‑kɔ do bha‑ 'gü.
JOH 17:19 'Wɔn 'ö‑ ‑wɔn 'gü 'yö 'a n ‑dɩ nu i ‑dhɛ ‑a ‑nu ‑wɔn 'gü bha 'yö bha, kë "dhʋ̈ kö woo ‑dɩ 'pö ‑wo kë i ‑bha 'ka ꞊dedewo 'kpakpadhö.
JOH 17:20 ꞊Ya kë "dhʋ̈ kö 'mii bhɛa" i ‑dhɛ woo do ‑a ‑nu ‑wɔn 'gü, kö a ‑bhɛa i ‑dhɛ 'pö mɛ "pɛpɛ 'ö 'mɛ 'wo bha 'wo dho n ‑dhiang zë‑ ‑nu ‑dhɛ, 'ö 'wo dho 'dhang bho‑ "dhiʋ̈ ‑a ‑nu ‑wʋ "dhiʋ̈ bha ꞊në‑ ꞊gban "pɛpɛ ‑wɔn 'gü bha do.
JOH 17:21 Kë "dhʋ̈ kö ‑a ‑nu ꞊gban "pɛpɛ ‑wo kë do ꞊dhɛ ‑kɔ 'ö kwɛng 'ko ko "kʋʋ‑ ‑bha bha‑ 'dhö kö ‑wo 'to ‑kplü ‑sü 'ka ko ‑bha kpɛnngkpɛnngdhö, kë "dhʋ̈ kö "kpʋngtaamɛ ‑nu ‑wo 'dhang bho‑ "dhiʋ̈ ꞊dhɛ bhi ꞊në 'i n bɔ tɛan‑ 'ka.
JOH 17:22 'Tɔbhɔdhe 'i‑ nu n ‑dhɛ bha 'ma‑ nu‑ ‑nu ‑dhɛ 'pö, kë "dhʋ̈ kö ‑wo kë do ꞊dhɛ kwɛng 'ko do ‑kɔ 'ö‑ 'gü bha‑ 'dhö.
JOH 17:23 Kö 'a kë‑ ‑nu 'gü ꞊dhɛ 'i n 'gü ‑kɔ 'ö 'gü bha‑ 'dhö kö ‑a ‑nu ‑bha kë do ‑sü "piʋ̈ 'ya 'dho 'to. Kë "dhʋ̈ kö "kpʋngtaamɛ ‑nu ‑wo 'dhang bho‑ "dhiʋ̈ ꞊dhɛ bhi ꞊në 'i n bɔ, ꞊dhɛ ‑a ‑nu ‑dhɔ ‑yö i ‑kë 'pö ꞊dhɛ ‑kɔ 'ö n ‑dhɔ ‑yö i kë‑ 'ka bha‑ 'dhö.
JOH 17:24 ꞊Dhɛ 'ö "dhʋ̈, n Dë, bhi ꞊në 'i‑ ‑nu nu n ‑dhɛ. 'Wɔn 'ö n 'gü ‑wɔn 'ka ‑yö ‑mü ꞊dhɛ kö ‑dhɛ 'a dho kë‑ 'gü bha ‑wo kë mü 'pö, kö 'tɔbhɔdhe 'i‑ nu n ‑dhɛ n ‑dhɔ 'ö i ‑kë kö 'bhii "kpʋngtaadhɛ ‑da ꞊kö ‑a ‑wɔn 'gü bha ‑wa ‑dhɛ yö.
JOH 17:25 N Dë Atanna, bhi 'ö 'bhaa 'kpɔ tɛanwɔn 'ka, 'ö pö 'aa i ‑bha bha "kpʋngtaamɛ ‑nu ꞊në 'waa i dɔ, "kɛɛ ma ‑zë a i ‑dɔ, 'mɛ 'wo ya 'pö ‑wa 'wɔn ‑dɔ ꞊dhɛ bhi ꞊në 'i n bɔ.
JOH 17:26 'Ma i ‑wɔn ‑ta "pʋ‑ ‑nu ‑dhɛ "pɛpɛdhö, "kɛɛ a ‑tun 'zü ‑a ‑ta "pʋ‑ ‑nu ‑dhɛ, kë "dhʋ̈ kö n ‑dhɔ 'dhö i ‑kë ‑kɔ do 'ö‑ 'gü bha n ‑dhɔ ‑ya ‑nu kë 'pö ‑kɔ do bha‑ 'gü, kö 'a kë‑ ‑nu zuë" 'gü "tʋ̈ng ꞊gban 'gü.
JOH 18:1 ꞊Dhɛ 'ö Yesu ꞊ya ö bo ‑bhɛa Atanna ‑dhɛ ‑sü 'ka ꞊dhɛ ‑kɔ bha‑ 'dhö, 'yö waa‑ ‑bha ꞊klang ‑nu 'wo ‑ziö 'wo dho 'wo "yi 'wo‑ Sedrɔn ‑kë bha‑ ‑kan, 'yö 'wo dho‑ ꞊taama. "Dhü ‑bhlaa 'bha ‑yö ‑gun ‑dhɛ bha‑ 'gü, 'yö 'wo dho‑ 'gü.
JOH 18:2 ‑Dhɛ 'wo dho‑ 'gü "dhʋ̈ bha‑ ‑dhɛ ‑gun Zuda 'ö ‑da ‑dhɛ pë "piʋ̈ bha‑ "yaan, ‑a ‑gɛn ‑mü ꞊dhɛ 'ö gun "dhʋ̈ kö waa‑ ‑bha ꞊klang ‑nu ꞊wa 'dho mü ‑blɛɛsü wo ‑nu wo.
JOH 18:3 ꞊Dhɛ 'ö 'mɛ 'wo bha waa‑ Yesu ‑nu ꞊wa 'dho "dhʋ̈, 'yö Zuda ‑dɩ 'pö 'ö ‑ziö 'ö dho mü, waa‑ Wlɔmö "sɔdha ‑nu, waa‑ "yan ‑to Atanna ‑dhɔkëgükɔ ‑bha ‑mɛ ‑nu, waa‑ 'mɛ 'ö "saabhomɛ ‑nu ‑gɔmɛ ‑nu waa‑ Fadhiziɛn ‑nu 'wo‑ ‑nu bɔ kö ‑wo Yesu 'kun bha‑ ‑nu kpö 'kpii‑ bha‑ 'dhö. Kö ‑dhangbha ‑nu, "sɔng ‑nu waa‑ 'ko ‑zë 'ka ‑kwɛɛ ‑nu ‑wa ‑nu ‑gɔ.
JOH 18:4 'Ö gun "dhʋ̈ kö 'wɔn 'ö nu sië‑ këwɔn 'gü bha‑ ꞊gban ‑naa ‑yö Yesu ‑zë "yaan. ꞊Dhɛ 'ö ꞊yaa‑ ‑nu yö kö ‑wo nu sië, 'yö go ö ‑bha ꞊klang ‑nu kpö 'gü 'ö dho‑ ‑nu "dhiʋ̈ ‑gɔ, 'yö‑ pö‑ ‑nu ‑dhɛ: «'De ꞊në 'ka‑ mɔɔ‑ sië?»
JOH 18:5 'Yö 'wo‑ ‑yɔ bɔ‑ ‑gɔ 'wo‑ pö: «Yesu 'ö go Nazadhɛtö bha‑ yö.» 'Yö‑ pö‑ ‑nu ‑dhɛ: «‑Ɛɛ! Kö ma ꞊nɛ 'sa.» 'Ö "dhʋ̈ bha kö Zuda 'ö ‑da ‑dhɛ pë "piʋ̈ bha ‑ya ‑nu kpö 'gü mü.
JOH 18:6 ꞊Dhɛ Yesu ꞊ya ö bo‑ ‑pö ‑nu ‑dhɛ ‑sü 'ka ꞊dhɛ «kö ma ꞊në 'ka n mɔɔ‑ sië bha», 'yö 'wo go‑ ‑bha wo zun wo zü 'ka.
JOH 18:7 'Yö‑ ‑nu dhɛɛ" kpɔ 'zü 'bha wo 'ö‑ pö: «A‑ pö de ꞊në 'ka‑ mɔɔ‑ sië?» 'Yö 'wo‑ pö: «Yi‑ ‑pö Yesu 'ö go Nazadhɛtö bha.»
JOH 18:8 ꞊Dhɛ 'ö ꞊waa‑ pö "dhʋ̈ 'yö Yesu ‑ya pö‑ ‑nu ‑dhɛ: «'Ma‑ pö ka ‑dhɛ 'nu ꞊dhɛ ma ꞊në 'wo n ‑dhɛ "dhʋ̈, 'ö ꞊ya kë ꞊dhɛ 'ka ma ꞊në n mɔɔ‑ sië ‑zë wo kö ‑ka ka kwaa‑ 'mɛ 'kö 'wo ya‑ ‑nu ‑zü kö wo ‑zë ‑wo 'dho.»
JOH 18:9 ‑Wʋ 'ö Yesu ‑ya pö kö ‑yö bhɛa" sië Atanna ‑dhɛ 'ö‑ pö: «N Dë, 'i mɛ "pɛpɛ 'ö‑ nu n ‑dhɛ ‑a 'bha 'gü 'yii see‑ n ‑kɔ ‑ta bha‑ 'gü ‑wɔn kë ‑kɔ ꞊në gun bha.»
JOH 18:10 'Ö gun "dhʋ̈ kö‑ ‑bha ꞊klang ‑nu bha‑ mɛ 'dhɛ 'wo‑ ‑dhɛ Simɔ Piɛdhö bha ‑siang ga do ‑ya ‑gɔ. 'Yö‑ bho ö ‑kpee 'gü, 'yö "saabhomɛ ‑nu ‑gɔmɛ 'kpii‑ ‑bha gwëëmi zɔn‑ 'ka "wɛ "bɛidhö, 'yö‑ ‑kɔ ‑së 'gü "tʋ kpö bho‑ 'ka mü. 'Mɛ 'wo‑ "tʋ kpö bho 'mü "dhʋ̈ bha ‑wa ‑dhɛ Masiusö.
JOH 18:11 "Kɛɛ ꞊dhɛ 'ö Piɛdhö ꞊yaa‑ kë "dhʋ̈ 'yö Yesu ‑ya pö‑ ‑dhɛ: «Piɛdhö, i ‑bha ‑dhaa bha‑ ‑da ‑kpee 'gü! ‑A pö 'a‑ wo "dhʋ̈ bha‑ ‑gɛn ‑mü ꞊dhɛ ‑a ‑dhɛa ‑bha ꞊dhɛ saan" 'ö n Dë "piʋ̈ ꞊dhɛ 'a‑ wo bha 'a‑ wo.
JOH 18:12 ꞊Dhɛ 'ö ꞊ya kë "dhʋ̈ 'yö "sɔdha kpö 'wo nu bha waa‑ ‑nu ‑gɔmɛ waa‑ "yan ‑to Atanna ‑dhɔkëgükɔ ‑bha ‑mɛ ‑nu 'ö Zuifö ‑nu ‑wa bɔ bha 'wo Yesu kun, 'yö 'wo‑ ‑lö.
JOH 18:13 ꞊Dhɛ ꞊wa bo‑ ‑lö ‑sü 'ka, mɛ ‑blɛɛsü 'wo dho‑ 'ka‑ ‑kuu "dhiʋ̈ bha ‑wa ‑dhɛ Anö (yö ꞊në gun "saabhomɛ 'kpii‑ ziisü 'ka "tʋ̈ng bha‑ 'gü). 'Ö gun "dhʋ̈ ‑kwɛ bha‑ ‑ta kö Kaifö ꞊në Atanna ‑bha "saabhomɛ 'kpii‑ 'ka, 'yö Anö ‑zë 'dhu ‑yö gun Kaifö bha‑ ‑gɔ.
JOH 18:14 'Sa Kaifö bha ꞊në kë‑ pö kö Zuifö ‑nu ‑gɔmɛ ‑nu ꞊wa ꞊loo 'ko ‑ta 'ö‑ pö ꞊dhɛ: «Mɛ doseng ‑ga "sɛ 'gü ‑mɛ ꞊gban "pɛpɛ ‑wɔn 'gü ‑sü ‑zë fië‑ ‑dhö mɛ ꞊gban 'gü see‑ ‑sü ‑bha» bha.
JOH 18:15 ꞊Dhɛ 'ö ꞊wa Yesu 'kun 'wo dho sië‑ 'ka, 'yö Simɔ Piɛdhö waa‑ ‑bha ꞊klang ‑nu bha‑ mɛ "wɛɛ do ‑wo ‑ziö 'wo dho‑ ꞊keng‑. 'Ö gun "dhʋ̈ kö "saabhomɛ 'kpii‑ bha ‑ya ‑bha ꞊klang ‑nu bha‑ mɛ 'dhɛ 'ö waa‑ Piɛdhö 'wo dho‑ ꞊keng‑ bha‑ ‑dɔ. ꞊Dhɛ 'ö ꞊wa 'dho ꞊wa ꞊loo "saabhomɛ 'kpii‑ bha‑ ‑gɔ "kwɛandhö, 'yö ꞊klangdhiʋ̈ "wɛɛ do 'dhɛ 'ö bha waa‑ Yesu ‑zë 'wo ‑da "kwɛandhɛ yaan‑ bha ‑dhɛ ꞊dede 'gü wo "kwëë.
JOH 18:16 'Yö Piɛdhö ‑zë 'ö to "kwɛandhɛ bha‑ "dhi ‑wo ‑dhɛ 'gü "kpɛnng. 'Yö‑ mɛ 'dhɛ waa‑ Yesu 'wo ‑da "kwɛandhɛ yaan‑ ‑bha, 'ö gun "saabhomɛ ‑nu ‑gɔmɛ dɔ ‑mɛ 'ka bha 'ö dho "kpan "dhiʋ̈, ‑da "kwɛandhö ‑dhɛ 'gü, 'yö dhiang zë dhebhɔ 'ö gun 'kɔdhi ‑maa kë sië bha‑ ‑dhɛ, 'yö Piɛdhö ‑da 'kɔɔdhö.
JOH 18:17 ꞊Dhɛ 'ö Piɛdhö gun ‑da sië 'kɔɔdhö, 'yö dhebhɔ bha 'ö Piɛdhö dhɛɛ" kpɔ 'ö‑ pö: «'Mɛ 'wo‑ kun ya‑ ‑bha ꞊klang ‑nu bha‑ mɛ do 'yaa ‑mü i 'ka "wɛ ‑ee?» 'Yö Piɛdhö ‑ya ‑yɔ bɔ‑ ‑gɔ 'ö‑ pö: «'Aa! ꞊Iin "dhɛ! ‑A ‑bha pë 'bha ‑pë 'bha 'yaa ‑mü n 'ka!»
JOH 18:18 'Ö gun "dhʋ̈ kö gwëëzë ‑nu waa‑ 'mɛ 'wo‑ ‑nu bɔ bha ꞊wa pɛng ‑ya 'dhuëngtadhɛ bha‑ 'gü kö ‑wo dɔ sië‑ ‑bha. ‑A kë 'wo‑ wo "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ "tʋ̈ng bha‑ 'gü kö "nɛnɛ ‑yö ziö sië. 'Yö Piɛdhö ‑yö dho 'pö ‑dɔ pɛng ‑bha ‑dhɛ 'gü ‑a ‑nu "piʋ̈ mü.
JOH 18:19 ꞊Dhɛ 'ö 'wɔn bha ꞊ya kë "dhʋ̈, 'yö Anö 'ö gun "saabhomɛ ‑nu ‑gɔmɛ zii 'ka bha 'ö Yesu dhɛɛ" kpɔ ‑a ‑bha ꞊klang ‑nu 'waa‑ ‑bha mɛ draan‑ ‑kɔ ‑nu ‑wɔn 'ka.
JOH 18:20 'Yö‑ ‑yɔ bɔ‑ ‑gɔ 'ö‑ pö: «"Tʋ̈ng "pɛpɛ 'a gun mɛ ꞊klang kë sië‑ 'ka 'maa gun‑ 'bha kë sië ‑gblɛn 'kpɔ 'gü, a ‑gun ꞊gban kë sië Zuifö ‑nu ‑bha ‑yakwëëkëgükɔ ‑nu "ɛɛn ‑a ‑nu ‑bha Atanna ‑dhɔkëgükɔ ꞊në‑ 'gü, 'ö 'a dhiang zë mɛ ꞊gban "pɛpɛ wëëdhö kö Zuifö ‑nu ꞊wa bho 'ko ‑ta, 'ö dhiang ‑nu 'a‑ zë 'mii‑ 'bha zë ‑gblɛn 'kpɔ 'gü.
JOH 18:21 ꞊Dhɛ 'ö "dhʋ̈, ma ‑zë n dhɛɛ" 'kpɔ ‑dhɛ 'yaa‑ ‑bha. 'Mɛ 'wo gun wo "tʋ 'to sië n ‑wʋ ‑bha bha ꞊në ‑bhö ‑a ‑nu dhɛɛ" 'kpɔ, 'pë 'a‑ pö‑ ‑nu ‑dhɛ ‑ya ‑nu "yaan.»
JOH 18:22 Dhiang bha ‑yö ‑to Yesu "dhi 'yö "yan ‑to Atanna ‑dhɔkëgükɔ ‑bha ‑mɛ ‑nu bha‑ mɛ do 'bha 'ö gun mü bha 'ö‑ ‑gɔ ‑ma, 'yö‑ pö‑ ‑dhɛ: «I dhiang ‑yɔ ‑bɔ "saabhomɛ ‑nu ‑gɔmɛ 'kpii‑ ‑gɔ ‑kɔ ꞊në bha ‑ee?»
JOH 18:23 'Yö Yesu ‑ya pö‑ ‑dhɛ: «Dhiang 'a‑ zë ya‑ ‑mɛɛ ꞊në dhiang yaa 'ka? ‑A 'dhɛ 'ö dhiang yaa 'ka ‑a pö n ‑dhɛ. 'Ö ꞊ya kë 'zü ꞊dhɛ 'mii dhiang yaa zë kö n ‑gɔ 'i‑ ‑ma ya‑ ‑ma ‑gɛn ‑mü ‑më 'ka?»
JOH 18:24 ꞊Dhɛ 'ö ꞊ya kë "dhʋ̈, 'yö Anö ‑yö Yesu to ‑lö ‑sü 'ka "dhʋ̈ 'yö‑ bɔ "saabhomɛ 'kpii‑ 'wo‑ Kaifö ‑kë bha‑ ‑dhɛ.
JOH 18:25 "Tʋ̈ng 'wo gun‑ kë sië‑ 'ka "dhʋ̈ bha kö Piɛdhö ‑yö dɔ sië pɛng ‑bha mü. 'Yö 'wo‑ dhɛɛ" kpɔ 'wo‑ pö: «Bhii ‑dɩ 'pö 'mɛ 'ö ya‑ ‑bha ꞊klang ‑nu bha‑ mɛ do 'yaa ‑mü i 'ka nu "wɛ ‑ee?» 'Yö‑ ꞊zaɔ 'zü 'ö‑ pö: «'Mɛ bha‑ ‑bha mɛ 'bha 'yaa ‑mü n 'ka tongtongdhö!»
JOH 18:26 ꞊Dhɛ 'ö ꞊ya kë "dhʋ̈, 'yö "saabhomɛ ‑nu ‑gɔmɛ ‑bha gwëëzë ‑nu bha‑ mɛ do 'ö ‑kë 'mɛ 'ö Piɛdhö ‑ya "tʋ kpö sü mü bha‑ ‑gɔ "kwɛangümɛ do 'ka bha 'ö‑ pö‑ ‑dhɛ 'ö‑ pö: «"Kɛɛ ma ‑zë a kë i ‑yö ‑a ꞊keng‑ "dhɛ. "Ɛɛn kɛng‑ ‑nu 'aa mü 'ka gun "dhü ‑bhlaa 'gü tii‑ ‑dhö ya ‑ee?»
JOH 18:27 'Yö Piɛdhö ‑ya zaɔ‑ 'zü ‑deewo. ‑Yö ‑to mü 'yö ‑tɔgɔn ‑yö ‑wɩ.
JOH 18:28 ꞊Dhɛ 'ö 'wɔn bha ꞊ya kë "dhʋ̈, 'yö 'wo go Yesu 'ka Kaifö ‑gɔ "kwɛandhö 'wo dho‑ 'ka ‑gblüdë 'ö gun "sɛ bha‑ ‑gɔ "dhiʋ̈ "tʋ̈ng bha‑ 'gü bha‑ ‑gɔ zadɔgükɔ "dhiëngdhö. Yö ‑zë 'ö gun kë sië "dhʋ̈ "tʋ̈ng 'ö‑ 'gü bha kö ‑dhɛ ꞊ya ꞊kpaɔ, "kɛɛ 'mɛ 'wo dho Yesu 'ka "dhʋ̈ bha Zuifö ‑nu ‑gɔmɛ ‑nu 'wo gun‑ ‑nu kpö 'gü bha wo ‑zë 'wii ‑da ‑gblüdë ‑bha zadɔdhɛ bha‑ 'gü, kë "dhʋ̈ kö 'wa 'dho wo ‑dɩ "kian zë 'ö‑ ‑nu ‑bha Pakö ‑bhöpë ‑bhö ‑sü ‑yö ꞊see. (‑A ‑gɛn ‑mü ꞊dhɛ Zuifö ‑nu 'waa gun ‑da sië 'mɛ 'waa Zuifö 'ka‑ ‑nu ‑gɔ 'kɔɔdhö tongtongdhö.)
JOH 18:29 Pidhatö ‑yö zun "kpɛnng yö ꞊në‑ ‑wɔn 'gü 'yö dho 'mɛ 'wii ‑da 'kɔɔdhö bha‑ ‑nu ‑dhɛ 'gü 'yö‑ pö‑ ‑nu ‑dhɛ: «'Yö 'kwa‑ ma mü? Ka ‑nu 'mɛ bha‑ 'ka n ‑dhɛ ‑më ‑wɔn 'gü?»
JOH 18:30 'Yö 'wo‑ ‑yɔ bɔ‑ ‑gɔ 'wo‑ pö: «'Wɔnyaakëmɛ ‑mü ꞊në‑ wo, 'yaa "dhʋ̈ 'nu kö 'yii 'dho nu‑ 'ka i ‑kuu "dhiʋ̈.»
JOH 18:31 ꞊Dhɛ 'ö ꞊waa‑ pö "dhʋ̈, 'yö Pidhatö ‑ya ‑yɔ bɔ‑ ‑nu ‑gɔ 'ö‑ pö: «'Mɛ 'ö bha kaa ꞊dede ‑ka 'dho‑ 'ka kö 'ka‑ ‑bha za dɔ ꞊dhɛ ‑kɔ 'ö ‑bɛn zë ‑sü 'ka‑ 'ka kaa‑ 'tɔng‑ 'gü bha‑ 'dhö!» 'Yö Zuifö ‑nu 'wo‑ ‑yɔ bɔ‑ ‑gɔ 'wo‑ pö: «Yi ‑zë ‑a ‑dhɛ 'yaa‑ ‑bha kö 'yi mɛ zë yi ‑dɩ ‑ta.»
JOH 18:32 ‑A pö 'wo‑ wo "dhʋ̈ bha ꞊në ‑kë 'pö dhiang 'ö Yesu ‑ya zë ‑blɛɛsü 'ö ‑gban ‑a ga ‑kɔ ‑bha bha‑ 'gü ‑wɔn kë ‑kɔ 'ka.
JOH 18:33 ꞊Dhɛ 'ö ꞊waa‑ pö Pidhatö ‑dhɛ "dhʋ̈, 'yö ‑ziö 'ö dho 'ö ‑da 'zü ‑deewo ö ‑gɔ zadɔgükɔ 'gü, 'yö Yesu ‑dhɛ mü, 'yö‑ pö‑ ‑dhɛ: «Bhi ꞊në 'i Zuifö ‑nu ‑bha ‑gblüdë 'ka ya ‑ee?»
JOH 18:34 'Yö‑ ‑yɔ bɔ 'ö‑ pö: «Dhiang 'i‑ zë bha i‑ ‑bho i ‑dɩ 'gü, "ɛɛn mɛ 'bha ꞊në n ‑wɔn ‑dhiang zë i ‑dhɛ ‑ee?»
JOH 18:35 'Yö Pidhatö ‑ya ‑yɔ bɔ‑ ‑gɔ 'ö‑ pö: «N ‑ga 'i‑ wo bha Zuifö ‑mü n 'ka ‑ee? I ‑gɔ "sɛ 'gü ‑mɛ ‑nu waa‑ kaa‑ "saabhomɛ ‑nu ‑gɔmɛ ‑nu ꞊në 'aa mü 'wo nu i ‑da ‑dhɛ 'gü n ‑dhɛ ‑ee? ‑Më ꞊në 'i‑ ‑kë?»
JOH 18:36 'Yö Yesu ‑ya ‑yɔ bɔ‑ ‑gɔ 'ö‑ pö: «Ma ‑gblüdëdhɛ 'yaa "kpʋng ꞊taa yö. ꞊Ya kë 'nu ꞊dhɛ ma ‑gblüdëdhɛ ‑yö "kpʋng ꞊taa yö kö ma gwëëzë ‑nu ‑dho n ta ‑gblü gɔɔn 'nu 'ö Zuifö ‑nu ‑kɔ 'yaa ꞊mɔɔ n ‑bha, "kɛɛ ‑a ‑ga bha, ma ‑gblüdëdhɛ 'yaa "kpʋng ꞊taa yö.»
JOH 18:37 'Yö Pidhatö ‑ya pö‑ ‑dhɛ: «꞊Ya kë "dhʋ̈ 'sa kö ‑gblüdë ‑mü i 'ka ‑kɛɛ?» 'Yö Yesu ‑ya pö‑ ‑dhɛ: «꞊Iin, ‑gblüdë ‑mü n 'ka.» Bhɔ 'a‑ wo "kpʋng ꞊taa yö bha a ‑bhɔ "dhʋ̈ kö 'a tɛanwɔn ꞊në‑ ‑ta "pʋ mɛ "bhɩɩ‑ ‑nu ‑dhɛ. Yö ꞊në‑ ‑wɔn 'gü 'yö mɛ "ʋʋ mɛ 'ö tɛanwɔn dɔ ꞊në ö "tʋ 'to n ‑wʋ ‑bha.»
JOH 18:38 'Yö Pidhatö ‑ya pö‑ ‑dhɛ: «'Ö ‑më? ‑Më ꞊në 'wo‑ ‑dhɛ tɛanwɔn?» ꞊Dhɛ 'ö Pidhatö ꞊ya bo dhɛɛ" bha‑ ‑kpɔ Yesu ‑gɔ ‑sü 'ka "dhʋ̈, 'yö zun 'zü ‑deewo "kpɛnng 'yö dho Zuifö ‑nu ‑gɔmɛ ‑nu bha‑ ‑nu "piʋ̈, 'yö‑ pö‑ ‑nu ‑dhɛ: «'Aa! Kaa‑ 'mɛ ka nu‑ 'ka n ‑dhɛ bha, 'wɔn 'bha 'kö yöö‑ kë kö 'a‑ dɔ, kö ‑yö kë‑ zë ‑gɛn 'ka 'mii‑ yö "dhɛ!
JOH 18:39 "Kɛɛ ꞊dhɛ 'ö ‑kë ꞊dhɛ ‑kwɛ ꞊ya zun 'ko "dhiʋ̈ ‑kɔ 'ö‑ ‑bha 'do 'do Pakö yi 'ka, 'ö 'a mɛ do bho ‑kaso 'gü ka ‑dhɛ bha, ‑yö ka "piʋ̈ ꞊dhɛ ‑a 'dhɛ ya 'a ‑kɔ bho ka ‑dhɛ de ꞊në‑ 'gü? Zuifö ‑nu ‑bha ‑gblüdë ya ‑ee?»
JOH 18:40 ꞊Dhɛ 'ö ꞊yaa‑ ‑nu dhɛɛ" 'kpɔ "dhʋ̈, 'yö‑ ‑nu ꞊gban "pɛpɛ 'wo ta wo 'gü 'wo‑ pö‑ ‑dhɛ: «'Aabhoo! Yö ‑zë ‑yö 'to mü kö 'i Badhabasö ꞊në‑ bho mü!» "Kɛɛ 'sa kö Badhabasö 'kö bha ‑yö ‑gun mɛ zë ‑mɛ ꞊në‑ 'ka.
JOH 19:1 ꞊Dhɛ 'ö 'mɛ 'wo bha ꞊waa‑ pö Pidhatö ‑dhɛ ꞊dhɛ 'waa Yesu ‑zë "piʋ̈ "kɛɛ ‑wa yö ꞊në‑ zë, 'yö Pidhatö ‑ya pö "sɔdha ‑nu ‑dhɛ ‑wo nu kö ‑wa 'sü kö ‑wa ‑ma ꞊klangga 'ka. ('Yö dho 'zü ‑deewo ö ‑gɔ 'kɔɔdhö.)
JOH 19:2 ꞊Dhɛ 'ö "sɔdha ‑nu bha ꞊wa Yesu ‑ma, 'yö 'wo dho 'wo "glɛɛn 'faan‑ do bɔ, 'yö 'wo‑ ‑ya ‑gɔ ‑bha ꞊wɛɛ ‑dɔ ‑bha kian 'ka ꞊dhɛ ‑a ‑bha ‑gblüdëdhɛ 'faan‑ ꞊në bha. 'Yö 'wo dho 'wo "gblan "bhɛɛ do ‑da ‑bha, 'yö 'wo ꞊yɔɔn‑ "sɔɔ 'wo‑ pö‑ ‑dhɛ:
JOH 19:3 «Zuifö ‑nu ‑bha ‑gblüdë, 'bha ꞊boo mü!» Kö ‑wa "tʋ ‑nu ‑ma sië.
JOH 19:4 ꞊Dhɛ 'ö 'wɔn bha 'ö kë sië "dhʋ̈, 'yö Pidhatö ‑yö zun 'zü ‑dee wo "kpɛnng, 'yö‑ pö mɛ kpö bha‑ ‑nu ‑dhɛ 'ö‑ pö: «‑Ka ‑dhɛ ‑ga, 'mɛ bha maa‑ 'sü kö 'a nu‑ 'ka ka ‑dhɛ "kpɛnng yö kö‑ ‑naa kë ka "yaan ꞊dhɛ ma ‑zë n ‑kɔ 'yaa‑ zë ‑wɔn 'gü.»
JOH 19:5 ‑Yö Yesu ‑zun "kpɛnng yö ꞊në‑ ‑wɔn 'gü kö "glɛɛn 'faan‑ bha ‑ya ‑gɔ ‑bha "dhʋ̈ waa‑ "gblan "bhɛɛ bha‑ ‑dhö. 'Yö‑ pö‑ 'mɛ 'wo bha‑ ‑nu ‑dhɛ: «Kaa‑ 'mɛ bha 'yö ya! ('Pë 'ö ‑dhi ka ‑dhɛ, ‑kaa kë‑ 'ka ꞊tɔn!)»»
JOH 19:6 ꞊Dhɛ 'ö "saabhomɛ ‑nu ‑gɔmɛ ‑nu waa‑ "yan ‑to Atanna ‑dhɔkëgükɔ ‑bha ‑mɛ ‑nu bha 'wo Yesu yö, 'yö 'wo ‑ya "gbla ‑sü ‑bha 'wo‑ pö: «‑Kaa dɔ "dhü ‑bha! ‑Kaa dɔ "dhü ‑bha! ‑Kaa dɔ "dhü ‑bha!» 'Yö Pidhatö ‑ya pö‑ ‑nu ‑dhɛ: «'Aa! ꞊Ya 'to yö ‑zë ‑bha kö kaa ꞊dede ‑kaa 'sü 'ka 'dho‑ 'ka 'ka‑ dɔ "dhü ‑bha ‑wa, 'yaa "dhʋ̈ ma ‑zë 'wɔn yaa 'kö mɛ zë ‑gɛn bho 'mii‑ yö‑ ‑bha.»
JOH 19:7 'Yö Zuifö ‑nu ‑gɔmɛ ‑nu bha 'wo‑ ‑yɔ bɔ‑ ‑gɔ 'wo‑ pö: «Yi ‑bha 'tɔng‑ ‑yö ‑dhö. 'Tɔng‑ 'ö "dhʋ̈ bha ꞊në‑ pö ꞊dhɛ mɛ 'ö bha‑ ‑dhɛa ‑bha ꞊dhɛ ‑wa zë, ‑a ‑gɛn ‑mü ꞊dhɛ ꞊ya ö ‑dɩ kë Atanna Gbö 'ka».
JOH 19:8 "Suʋ̈ ‑zë ‑yö ‑gun Pidhatö 'gü ‑blɛɛsü "kɛɛ ꞊dhɛ 'ö‑ "tʋ ‑yö ‑da ‑wʋ bha‑ 'gü, 'yö‑ ‑ta ‑kpɛa ‑yö dɔ do. 'Yö‑ "gblʋ̈ʋ̈dhɛ ‑yö "muu bho,
JOH 19:9 'yö ‑sɔ 'zü za dɔ 'gü ‑kɔ bha‑ 'gü ‑deewo 'yö Yesu ‑dhɛ mü, 'yö‑ dhɛɛ" do 'bha kpɔ 'zü 'ö‑ pö: «A‑ ‑pö bhaa, i‑ ‑pö de suu ‑mü i 'ka "wɛ kpɛnngdhö?» "Kɛɛ 'yii‑ ‑yɔ bɔ kö ‑ya ‑yɔ bɔ‑ ‑gɔ.
JOH 19:10 'Yö Pidhatö ‑ya pö‑ ‑dhɛ: «I "dhi ‑taga ma ꞊në n ‑wʋ 'ka 'yö 'bhaa "wɩ bha ‑ee? "Ɛɛn 'bhaa‑ 'wɔn dɔ ꞊dhɛ a ‑mɔɔ ‑bha 'a i dɔ "dhü ‑bha "ɛɛn 'zü 'a i dha ‑ee?»
JOH 19:11 'Yö Yesu ‑ya ‑yɔ bɔ‑ ‑gɔ 'ö‑ pö: «‑A "sɩ 'yaa i ‑dhɛ 'nu kö 'i pë 'bha kë n 'ka kö Atanna 'kö dhang‑ 'gü bha 'yii "wɩ‑ ‑bha. 'Wɔn 'ö‑ ‑wɔn 'gü 'yö 'mɛ 'ö n "dhiʋ̈ dɔ i ‑dhɛ bha ꞊në‑ ‑mɛ ‑bha 'wɔn yaa 'dhö 'kpii‑ 'ö ‑ziö i ‑bha ‑ta bha 'yö bha.»
JOH 19:12 ꞊Dhɛ 'ö ꞊yaa‑ pö "dhʋ̈, 'yö Pidhatö ‑yö zun‑ "slë mɔɔ‑ ‑sü ‑bha kö 'ö‑ dha, "kɛɛ kö Zuifö ‑nu ‑gɔmɛ ‑nu ‑zë ‑wo "gbla sië "gbɩɩ‑ 'ka ‑kpɛawo 'wo‑ pö: «꞊Ya kë ꞊dhɛ 'kii i ‑kɔ bho 'mɛ bha‑ 'gü, kö 'bhaa bɔ yii‑ ‑gblüdë 'kpiisü 'ka tongtongdhö, ‑a ‑gɛn ‑mü ꞊dhɛ mɛ "pɛpɛ 'kö 'wo wo ‑dɩ ‑kë ‑gblüdë 'ka kö‑ 'yaɔ‑ ‑nu ‑mü.»
JOH 19:13 ꞊Dhɛ 'ö Pidhatö ꞊ya ‑wʋ bha‑ ma 'zü "dhʋ̈, 'yö Yesu sü 'zü 'yö zun‑ 'ka "kpɛnng, 'yö dho 'ö ‑ya za ‑dɔ ‑ta ‑gbloo 'gü "wasi 'wo‑ zadɔgükɔ "sɔɔ 'wo‑ ‑dhɛ ꞊dhɛ Eblö ‑wʋ 'gü Gabata bha‑ 'gü.
JOH 19:14 'Wɔn bha ‑yö ‑kë "dhʋ̈ yi 'ö ꞊ya 'go mü 'ö Pakö yi ‑yö dɔ mü bha‑ 'ka kö 'yënng‑ ꞊ya ‑ya mɛ ‑gɔ ꞊zinng 'gü. ꞊Dhɛ 'ö ꞊ya kë "dhʋ̈, 'yö Pidhatö ‑ya pö Zuifö ‑nu ‑gɔmɛ ‑nu bha‑ ‑nu ‑dhɛ: «Kaa‑ ‑gblüdë bha 'yö ya!»
JOH 19:15 "Kɛɛ 'yö 'wo ‑ya "gbla ‑sü ‑bha 'zü 'wo‑ pö: «Yi‑ ‑pö ‑a zë ꞊në ‑yö wo, yi‑ ‑pö ‑a zë ꞊në wo, ‑a dɔ "dhü ‑bha!» 'Yö Pidhatö ‑ya ‑nu dhɛɛ" kpɔ 'ö‑ pö: «Ka‑ ‑pö 'a kaa‑ ‑gblüdë bha‑ dɔ "dhü ‑bha tɛan‑ ꞊dede 'ka ‑ee?» 'Yö "saabhomɛ ‑nu ‑gɔmɛ ‑nu ‑wa ‑yɔ bɔ 'wo‑ pö: «Yii‑ ‑gblüdë "wɛɛwɛɛ 'bha 'yaa 'dhö kö 'yii kë i ‑gɔmɛ ‑zë 'ka! ‑A dɔ "dhü ‑bha!»
JOH 19:16 ꞊Dhɛ 'ö ꞊waa‑ pö "dhʋ̈ 'yö Pidhatö ‑yö ö ‑kɔ bho Yesu 'gü ‑a ‑nu ‑dhɛ kö ‑wa dɔ "dhü ‑bha. ꞊Dhɛ 'ö ꞊ya ö ‑wʋ bho‑ ‑ta, 'yö 'wo‑ sü 'wo dho‑ 'ka.
JOH 19:17 ‑A ‑dɔ ‑bha "dhü bha ‑yö ‑gun yöö ꞊dede ꞊në‑ ‑gɔ 'wo go‑ 'ka 'plöö 'wo dho 'wo ꞊loo‑ 'ka ‑tɔn 'wo‑ mɛ ‑gɔ "kpɛa ‑tɔn ‑kë, 'wo‑ ‑dhɛ Eblö ‑wʋ 'gü «Gɔgota» bha‑ ꞊gbin‑.
JOH 19:18 ‑Wo Yesu ‑dɔ "dhü ‑bha ‑dhɛ bha ꞊në‑ 'gü, 'yö 'wo 'wɔnyaakëmɛ ꞊plɛ dɔ 'pö "dhü ‑bha ‑a "sɔɔ mü 'yö 'wo‑ mɛ do dɔ‑ ‑kɔ ‑së 'gü, 'yö 'wo‑ mɛ do dɔ‑ ꞊kwaa 'gü, 'yö dɔ‑ ‑nu ꞊zinng 'gü.
JOH 19:19 ꞊Dhɛ 'ö ꞊ya kë "dhʋ̈ 'yö Pidhatö ‑yö ‑wʋ do 'bha ‑bɛn zë 'yö‑ ꞊nëng Yesu ‑dɔ ‑bha "dhü bha‑ ‑bha 'ö‑ pö: «'Mɛ 'ö ya ꞊në 'wo‑ ‑dhɛ Yesu 'ö go Nazadhɛtö, Zuifö ‑nu ‑bha ‑gblüdë».
JOH 19:20 ‑Wʋ 'ö Pidhatö ‑ya ‑bɛn zë "dhʋ̈ bha Zuifö ‑nu 'gbɛ ꞊dede ‑wo kë‑ ‑wʋ ‑pö, ‑a ‑gɛn ‑mü ꞊dhɛ ‑dhɛ 'wo‑ dɔ "dhü ‑bha ‑a ‑dhɛ 'gü "dhʋ̈ bha ‑yö ‑gun 'pö‑ "sɔɔ, 'yö ‑wʋ 'wo‑ ‑bɛn zë 'wo ꞊nëng‑ ‑dɔ ‑bha "dhü ‑bha bha 'ö gun 'pö ‑bɛn zë ‑sü 'ka eblö ‑wʋ oo, glɛkö ‑wʋ waa‑ Wlɔmö ‑mɛ ‑nu ‑wʋ 'wo‑ dhatɛn ‑wʋ ‑kë bha‑ ꞊gban 'gü.
JOH 19:21 'Yö Zuifö ‑nu ‑bha "saabhomɛ ‑nu ‑gɔmɛ ‑nu 'wo‑ pö Pidhatö ‑dhɛ 'wo‑ pö: «'Bha 'dho‑ ‑bɛn zë 'i‑ pö Zuifö ‑nu ‑bha ‑gblüdë, ‑a pö 'mɛ 'ö‑ pö ꞊dhɛ yö ꞊në 'ö Zuifö ‑nu ‑bha ‑gblüdë 'ka.»
JOH 19:22 "Kɛɛ 'yö Pidhatö ‑ya ‑yɔ bɔ‑ ‑nu ‑gɔ 'ö‑ pö: «‑A 'dhɛ 'kö 'ma‑ ‑bɛn zë bha 'ma‑ zë, (yö ‑zë 'yii 'dho bho "gblʋʋ 'zü).
JOH 19:23 ꞊Dhɛ 'ö "sɔdha ‑nu bha ꞊wa wo bo Yesu ‑dɔ "dhü ‑bha ‑sü 'ka, 'yö 'wo‑ ‑bha sɔ ‑nu sü 'wo‑ "dhɛa ‑yiisiö ‑ya, 'yö 'wo‑ 'gü ‑gblü wo 'ko ‑ta, 'yö mɛ do ‑ya "dhɛa do sü. 'Yö 'wo‑ ‑bha sɔ 'dhɛ 'ö‑ ‑da sɔ ꞊wlöö bha‑ sü 'pö, "kɛɛ 'sa yö ‑zë ‑wɔ ‑dhɛ 'yaa gun‑ ‑bha ‑dhɛ 'bha ‑dhɛ ‑bha ‑dhɛ 'bha 'gü, 'yö 'wo‑ pö wo 'ko ‑nu ‑dhɛ:
JOH 19:24 «'Kwa 'dho‑ "pɛ, ‑ka nu kö 'kwa‑ zë "kpʋ̈ü kë kö 'mɛ ꞊yaa‑ zë kö ‑ya 'sü!» 'Yö 'wo‑ ‑kë "dhʋ̈. ‑A pö 'wo‑ wo "dhʋ̈ bha ‑yö ‑kë "dhʋ̈ kö 'pë 'ö Atanna ‑wʋdhiʋ̈loomɛ ‑nu ‑wa pö yi 'bha 'ka, 'ö ‑bɛn zë ‑sü 'ka ‑a ‑wʋ 'sëëdhɛ 'gü ꞊dhɛ: «‑Wo kë n ‑dasɔ ‑nu 'gü ‑gblü wo 'ko ‑ta, 'ö 'wo zë "kpʋ̈ü ‑kë ma ‑da "bhɛɛ ꞊wlöö ‑sɔ ‑ta» bha ꞊në‑ 'gü ‑wɔn ‑yö kë. 'Wɔn bha 'yö "sɔdha ‑nu bha 'wo‑ ‑kë ꞊dhɛ ‑kɔ bha‑ 'dhö.
JOH 19:25 'Wɔn ‑nu bha 'wo kë sië "dhʋ̈ "tʋ̈ng 'ö‑ 'gü bha kö Madhi 'ö ‑kë Yesu dhe 'ka bha waa‑ ö dheebhang dhebhɔ do 'dhö, Madhi 'dhɛ 'ö ‑kë 'pö Klopa ‑bha dhebhɔ 'ka bha‑ 'dhö, Madhi 'dhɛ 'ö go Madadha bha‑ 'dhö, kö ‑wo dɔ sië Yesu ‑zë ‑bha ‑dhü bha‑ "sɔɔ mü.
JOH 19:26 ꞊Dhɛ 'ö ꞊ya ö dhe yö kö waa‑ ‑bha ꞊klangdhiʋ̈ 'dhɛ 'ö‑ ‑dhɔ gun‑ kë sië ꞊dedewo bha ‑wo dɔ sië wo 'ko "sɔɔ mü, 'yö‑ pö ö dhe ‑dhɛ 'ö‑ pö: «Dhebhɔnë, ꞊ya 'go ꞊dɛɛ 'gü i gbö ꞊në dɔ i "sɔɔ bha.»
JOH 19:27 'Yö go mü 'ö‑ pö 'pö ö ‑bha ꞊klangdhiʋ̈ bha‑ ‑dhɛ 'ö‑ pö: «N ‑sëmɛ, ꞊ya 'go 'pö ꞊dɛɛ 'gü i dhe ꞊në dɔ bha.» Yesu ‑bha ꞊klangdhiʋ̈ bha ‑yö ‑to ‑dhɛ do bha‑ 'gü 'ö ö ‑kɔ ‑da Madhi 'gü 'yö zun ö ‑zʋ ‑kë "piʋ̈ ‑sü ‑bha.
JOH 19:28 ꞊Dhɛ 'ö ꞊ya kë "dhʋ̈ 'ö Yesu ꞊yaa‑ 'wɔn dɔ ꞊dhɛ 'wɔn 'ö nu‑ 'gü "kpʋng ꞊taa bha ꞊ya ꞊mɔɔ "kwëë, 'yö‑ pö: «"Yi mü ‑dhɔ ꞊ya n 'kun.» 'Sa ‑ya ‑pö "dhʋ̈ kö 'pë 'ö ‑bɛn zë ‑sü 'ka Atanna ‑wʋ 'sëëdhɛ 'gü ‑a ‑bu 'gü bha ꞊në‑ 'gü ‑wɔn ‑yö kë.
JOH 19:29 "Tʋ̈ng 'ö‑ pö sië‑ 'ka‑ "dhʋ̈ bha kö we 'wangwang 'bha ‑yö dɔ ‑sü 'ka "sɔdha ‑nu bha‑ ‑nu "sɔɔ pëfië 'bha 'gü mü. ꞊Dhɛ 'ö ꞊yaa‑ pö "dhʋ̈ 'yö 'wo dho 'wo ‑fuu ‑da we bha‑ ꞊bhaa, 'yö 'wo‑ sü 'wo‑ ‑ya "dhü suu 'bha 'wo‑ izɔpö ‑kë bha‑ ‑gbeng do "dhiʋ̈, 'yö 'wo‑ ‑da ‑a "dhi.
JOH 19:30 ꞊Dhɛ 'ö ꞊yaa‑ ‑kplü 'bha "kan 'yö‑ pö: «‑A ꞊gbaan zun 'ko "dhiʋ̈ ꞊tɔn.» ꞊Dhɛ 'ö ꞊yaa‑ pö "dhʋ̈ 'yö ö ‑gɔ zun "sɛɛ, 'yö ö 'nii‑ ‑wɔ Atanna ꞊kwɛng.
JOH 19:31 'Wɔn "pɛpɛ bha‑ ꞊gban‑ ‑kë "dhʋ̈ yi 'ö ꞊ya 'go mü 'ö Zuifö ‑nu ‑bha ꞊glooyi ‑yö dɔ mü bha ꞊në‑ 'ka ("Kɛɛ ‑a ‑dhɛkpaɔyi 'dhɛ bha ‑yö kë 'ö‑ wo Pakö zübhoyi 'ka bha‑ ‑wɔn 'gü), 'yaa gun Zuifö ‑nu "piʋ̈ ꞊dhɛ 'mɛ 'wo‑ ‑nu dɔ "dhü ‑bha "dhʋ̈ bha‑ ‑nu ꞊gee ‑yö ꞊gloo mü kö‑ ‑nu ꞊glooyi bha ‑yö ꞊loo‑ ‑bha. ‑A ‑gɛn ‑mü ꞊dhɛ ‑a ‑nu ꞊glooyi 'dhɛ 'kö bha Atanna ‑dhɔkë ‑yi 'kpii‑ ꞊në gun yö ‑zë 'ka ‑a ‑nu ‑gɔ. ‑Wo ‑bhɛa Pidhatö ‑dhɛ yö ꞊në‑ 'gü 'wo‑ pö ‑yö dɔ "gbɩɩ‑ kö ‑yö mɛ bɔ 'mɛ 'wo‑ ‑nu dɔ "dhü ‑bha bha‑ ‑nu ‑gɛn "yɛ ‑dhɛ 'gü, (kë "dhʋ̈ kö ‑wo ga "vaandhö) kö ‑wa ‑nu bho "dhü ‑bha.
JOH 19:32 'Yö "sɔdha ‑nu 'wo dho 'wo mɛ ‑blɛɛsü ‑gɛn ꞊loo waa‑ "tɛado 'wo‑ ‑nu dɔ "dhü bha "kwëë bha‑ 'dhö.
JOH 19:33 ꞊Dhɛ 'ö ꞊wa zun Yesu ‑bha 'ö ꞊waa‑ 'wɔn dɔ ꞊dhɛ yö ‑zë ꞊ya ga 'nu, 'yö 'wii yö ‑zë kë ‑kɔ 'bha 'gü.
JOH 19:34 "Kɛɛ 'yö‑ "sɔdha ‑nu bha‑ mɛ do ‑yö 'düga sü 'yö‑ "sɛn 'gü ꞊zua‑ 'ka, 'yö to 'yö ꞊yɔɔn waa‑ "yi 'wo go‑ ‑dhɛ 'gü 'wo ꞊wɛnng.
JOH 19:35 'Mɛ 'ö 'wɔn bha‑ ‑gɛn dɔ sië ka ‑dhɛ bha yöö ꞊dede ꞊në‑ "yan ‑yö ‑da ‑a ‑dhɛ 'gü. 'Wɔn 'ö‑ pö bha 'yaa ꞊sua 'ka yö ꞊në‑ 'gü. ‑A ‑kë tɛanwɔn 'ka ‑sü bha ꞊në‑ ‑wɔn 'gü 'yö‑ ‑gɛn dɔ 'pö ka ‑dhɛ, kë "dhʋ̈ kö kaa ‑dɩ 'pö 'ka 'dhang bho‑ "dhiʋ̈ ꞊dhɛ Yesu bha Atanna Gbö ‑mü ꞊dedewo tɛan‑ 'ka.
JOH 19:36 'Wɔn ‑nu bha ‑wo ‑kë "dhʋ̈ kö 'pë 'ö ‑bɛn zë ‑sü 'ka Atanna ‑wʋ 'gü ꞊dhɛ: «‑A ga do ‑zian 'yii 'dho "yɛ‑ kwi 'gü»
JOH 19:37 "ɛɛn 'zü 'ö ‑bɛn zë ‑sü 'ka ‑dhɛ "wɛɛ 'bha‑ 'gü ꞊dhɛ: «'Mɛ 'wo mɛ zua bha woo ꞊dede ‑wo ‑dho 'mɛ 'wo‑ zua bha‑ yö wo "yanga ꞊plɛ 'ka» bha kö‑ 'gü ‑wɔn ‑yö kë.
JOH 19:38 ꞊Dhɛ 'ö 'wɔn bha ꞊ya kë "dhʋ̈, 'yö Zosɛfu 'ö go 'pödhɛ 'wo‑ Adhimate ‑dhɛ ‑kë bha‑ 'gü bha 'ö dho Pidhatö "piʋ̈, 'yö Yesu ꞊gee ‑gbadhɛ ‑gɔ. Zosɛfu bha Yesu ‑bha ꞊klangdhiʋ̈ do ꞊në gun‑ 'ka 'pö, "kɛɛ yö ‑zë ‑yö ‑gun ö ‑bha kë sië ‑gblɛn 'kpɔ 'gü, ‑a ‑gɛn ‑mü ꞊dhɛ ‑yö ‑gun "suʋ̈ sië Zuifö ‑nu ‑gɔmɛ ‑nu ‑gɔ. ꞊Dhɛ 'ö ꞊ya 'dho ꞊yaa‑ ꞊gee ‑gbadhɛ Pidhatö ‑gɔ, 'yö‑ nu‑ ‑dhɛ. 'Yö nu 'yö‑ ꞊gee sü 'yö dho‑ 'ka.
JOH 19:39 'Yö gɔndënë 'wo‑ ‑dhɛ 'pö Nikodɛmö, 'ö dho Yesu "piʋ̈ 'nu gbeng yi do 'ka bha 'ö dho mü 'pö. ‑A 'dho ‑sü 'ka, ‑dhasiklɔɔ "yi suu 'bha ‑nu 'wo‑ miidhö waa‑ adhoe ‑kë bha‑ ‑kaan "kwëë ‑sü "kidhʋng 'ö ꞊mɔɔ ‑kaɔng ‑yaaga ‑bha ‑yö ‑gun ‑gɔ 'ö dho‑ 'ka.
JOH 19:40 'Yö mɛ ꞊plɛ bha 'wo dho 'wo Yesu sü, 'yö 'wo sɔ bɔ‑ ‑bha kö ‑wo ‑dhasiklɔɔ "yi bha‑ ꞊wɛnng sië‑ ‑bha ꞊dhɛ ‑kɔ 'wo mɛ ꞊gee ‑pë ‑kë 'ka Zuifö ‑nu ‑gɔ "sɛ 'gü bha‑ 'dhö.
JOH 19:41 ‑Dhɛ 'wo Yesu zë‑ ‑bha bha "dhü ‑bhlaa do 'bha ‑yö gun‑ ‑dhɛ "sɔɔ, 'ö bun ‑dee 'wo‑ pɔn ‑gwë ‑tɔn 'gü, 'ö 'wii mɛ ‑blɛɛsü wɔ‑ 'gü ꞊kö bha 'ö gun‑ 'gü.
JOH 19:42 ‑Wo Yesu ‑wɛɛ ‑bho ‑dhɛ bha ꞊në‑ 'gü, kë 'ö wo Zuifö ‑nu ‑bha ꞊glooyi yɛan" "piʋ̈ 'ka, kö "tʋ̈ng 'yaa‑ ‑nu ‑gɔ kö ‑wo ‑dhɛ ‑dee 'bha mɔɔ‑ ‑dhɛ "wɛɛ 'gü bha‑ ‑wɔn 'gü. ‑A ‑gɛn ‑mü ꞊dhɛ ‑dhɛ bha ꞊në‑ ‑dhɛ 'yaa gun ꞊gblɛɛn, ('yö 'wo ‑gwë kpö 'kpii‑ do sü 'wo‑ zun‑ "dhiʋ̈).
JOH 20:1 ꞊Dhɛ 'ö Zuifö ‑nu ꞊glooyi bha ꞊ya ziö 'ö‑ ‑ta ‑dhɛ ꞊ya ꞊kpaɔ, 'yö Madhi 'ö go Madadha bha 'ö ‑suʋ̈ ‑dhɛkpaɔ tii 'gü 'yö dho Yesu bun ꞊taa. 'Ö dho 'ö ꞊loo mü kö ‑gwë kpö 'wo‑ zun‑ bun "dhiʋ̈ bha 'yaa mü 'zü.
JOH 20:2 'Yö dɔ ‑bɛang ‑bha 'ö dho Simɔ Piɛdhö waa‑ ꞊klang ‑nu bha‑ mɛ 'dhɛ 'ö‑ ‑dhɔ gun Yesu kë sië bha‑ ‑nu "piʋ̈, 'yö‑ pö‑ ‑nu ‑dhɛ: «'Mɛ 'ka dɔ bha, ꞊wa kwa Dëmɛ 'sü ꞊waa‑ bho‑ ‑wɛɛ bha‑ 'gü "kɛɛ 'wo dho‑ 'ka ‑dhɛ 'ö‑ 'gü 'yaa‑ ‑dhɛ dɔ.»
JOH 20:3 'Yö Piɛdhö waa‑ Yesu ‑bha ꞊klangdhiʋ̈ 'dhɛ bha 'wo zun "kpɛnng, 'yö 'wo dho Yesu ‑wɛɛ bho ‑dhɛ 'gü.
JOH 20:4 ‑An ꞊gban ꞊plɛ‑ ‑gun 'dho sië ‑bɛang 'ka "kɛɛ 'yö‑ ꞊klangdhiʋ̈ 'dhɛ bha‑ ‑gɛn ‑yö Piɛdhö to, 'yö dho 'ö ꞊loo mü ‑a "dhiʋ̈.
JOH 20:5 'Dho 'ö‑ wo 'ö ꞊loo mü bha 'yii ‑da ‑yɛ 'gü mü, "kɛɛ ꞊dhɛ 'ö ꞊ya "gblëënu, 'ö ꞊ya ‑dhɛ ‑ga ‑yɛ bha‑ 'gü, ‑a "yan ‑yö ‑kpan sɔ "pɛn ‑nu kö 'wo gun piʋ̈‑ ‑sü 'ka Yesu 'ka bha‑ ‑nu ‑bha mü.
JOH 20:6 ꞊Dhɛ 'ö Simɔ Piɛdhö 'ö yö ‑zë 'ö gun ꞊taama bha ꞊ya nu ꞊ya ꞊loo mü, 'yö ‑da ‑yɛ bha‑ 'gü, 'yö sɔ "pɛn ‑nu 'wo gun "sia‑ mü bha‑ ‑nu yö 'pö
JOH 20:7 waa‑ sɔ 'wo kë‑ kpa Yesu ‑gɔ ‑ta bha‑ 'dhö "kɛɛ kö 'waa ‑dhɛ do 'gü, kö sɔ 'kö bha yö ‑zë yö "yɛ ‑sü 'ka 'ö wɔ ‑sü 'ka ‑dɩ ‑ta ‑dhɛ "wɛɛ 'gü.
JOH 20:8 'Yö ꞊klang ‑nu bha‑ mɛ 'dhɛ 'ö kë dho 'ö ꞊loo bun ‑ta mü ‑blɛɛsü "kɛɛ 'ö 'yii ‑da ‑yɛ 'gü mü bha 'ö dho 'pö 'ö ‑da ‑yɛ bha‑ 'gü, 'yö‑ "yan ‑yö ‑da 'wɔn bha‑ ‑dhɛ 'gü 'pö, 'yö 'dhang bho‑ "dhiʋ̈ ꞊dhɛ ꞊ya 'go ga 'gü ꞊ya ‑bö tɛan‑ 'ka.
JOH 20:9 ‑A ‑gɛn ‑mü ꞊dhɛ 'ö gun "dhʋ̈ kö Atanna ‑wʋ 'ö ‑bɛn zë ‑sü 'ka‑ ‑gɔ 'sëëdhɛ 'gü ꞊dhɛ Yesu ‑dho 'go ga 'gü 'ö ‑bö bha 'wii‑ 'gü ma ö 'klɔɔ‑ 'ka ꞊kö.
JOH 20:10 ꞊Dhɛ 'ö ꞊ya kë "dhʋ̈, 'yö Yesu ‑bha ꞊klang ‑nu ꞊plɛ bha 'wo wo yee ‑kë 'wo dho wo ꞊yëë "dhiʋ̈.
JOH 20:11 'Mɛ 'wo bha ‑wo Madhi ‑zë ‑to mü kö ‑yö dɔ sië Yesu bun "sɔɔ "kpɛnng kö ‑yö "gbʋ bɔ sië. ‑Yö ‑to "gbʋ bha‑ bɔ ꞊dhɛ 'gü "dhʋ̈, 'ö dho "gblëënu kö ‑yö ‑dhɛ ‑ga ‑yɛ 'gü mü
JOH 20:12 kö Atanna ‑bha "kië ꞊plɛ 'ö sɔ "puu 'dhö‑ ‑nu ‑bha ‑wo ‑ya sië ‑dhɛ 'ö Yesu ‑yö gun wɔ sië‑ ‑bha bha‑ 'gü, kö‑ mɛ do ‑yö ‑ya sië‑ ‑gɔ ‑duɛ 'gü, kö‑ ‑mɛ 'dhɛ 'ö to ‑yö ‑ya sië 'pö‑ ‑gɛn ‑wɛɛ 'gü.
JOH 20:13 'Yö 'wo‑ pö Madhi ‑dhɛ 'wo‑ pö: «Dhebhɔnë, i ‑më ‑wɔn ꞊në‑ "gbʋ bɔ?» 'Yö‑ ‑yɔ bɔ‑ ‑nu ‑gɔ 'ö‑ pö: «N "gbʋ bɔ ‑gɛn ‑mü ꞊dhɛ n Dëmɛ 'wo‑ ‑wɛɛ bho ‑dhɛ ya‑ 'gü yuënggü bha ꞊waa‑ 'sü mü ꞊wa 'dho‑ 'ka "kɛɛ 'wo dho‑ 'ka 'wo‑ ‑wɔ ‑dhɛ 'ö‑ 'gü 'maa‑ ‑dhɛ dɔ.»
JOH 20:14 ‑Yö ‑to ‑a ‑pö "dhʋ̈ ‑dhɛ 'gü 'ö dho slëë‑ ö 'gü kö 'ö ‑dhɛ ‑ga kö Yesu ‑yö dɔ sië‑ "sɔɔ mü, "kɛɛ 'yii‑ dɔ.
JOH 20:15 'Yö‑ dhɛɛ" kpɔ 'ö‑ pö: «Dhebhɔnë, i‑ ‑mɛɛ ꞊në‑ "gbʋ bɔ? i 'dee‑ mɔɔ‑ sië?» Madhi ‑zë ‑yö ö ‑zʋ ‑gɔn ꞊dhɛ "dhü ‑bhlaa bha‑ yëkëmɛ ‑mü. 'Yö‑ pö‑ ‑dhɛ: «N Dëmɛ, 'ö ꞊ya kë ꞊dhɛ bhi ꞊në 'i n Dëmɛ Yesu ꞊gee sü 'i dho‑ 'ka kö ‑bhö dɔ "gbɩɩ‑ kö 'i‑ ‑wɔ ‑dhɛ 'ö‑ 'gü 'i‑ ‑dhɛ ‑zɔn n ‑dhɛ kö 'a 'dho‑ 'sü.»
JOH 20:16 'Yö Yesu ‑ya ‑dhɛ 'ö‑ pö: «Madhi!» 'Yö ꞊slëë ö 'gü 'ö ö wë bɔ‑ ‑ta, 'yö‑ pö‑ ‑dhɛ Eblö ‑wʋ 'gü 'ö‑ pö: «Dhabuni!» (꞊Waa‑ pö "dhʋ̈ kö ‑wa ‑pö «n Dëmɛ».)
JOH 20:17 (꞊Dhɛ 'ö yöö ꞊loo Yesu ‑bha,) 'yö‑ pö‑ ‑dhɛ: «'Bha 'dho i ‑kɔ zun n ‑bha, ‑a ‑gɛn ‑mü ꞊dhɛ 'mii ‑tɔn 'kun ꞊kö kö 'a 'dho n Dë "piʋ̈ dhang‑ 'gü. "Kɛɛ ‑bhö 'dho kö 'i‑ pö n dheebhang ‑nu ‑dhɛ ‑zë wo ꞊dhɛ 'dho ꞊në maa‑ wo n Dë 'ö ka Dë 'ka 'pö, ma Atanna 'ö ka ‑bha Atanna 'ka 'pö bha‑ "piʋ̈ ya.»
JOH 20:18 'Yö Madhi ‑yö dho Yesu ‑bha ꞊klang ‑nu ‑zian 'ka, 'yö 'wɔn bha‑ ‑gɛn dɔ‑ ‑nu ‑dhɛ 'ö‑ pö: «'Ma ‑kpan kwa Dëmɛ ‑bha. Yö ꞊në ‑wʋ 'ö ꞊ni 'ö ꞊ni‑ kpɔ n ‑bha. 'Yö ‑ziö ‑nu ‑dhɛ ‑wʋ ‑nu bha‑ 'gü.
JOH 20:19 ‑A yi do 'ö ‑kë Zuifö ‑nu ꞊glooyi ‑tadhɛkpaɔ ‑ta 'ka bha‑ 'ka yɛan" "piʋ̈, 'yö Yesu ‑yö nu 'yö dɔ ö ‑bha ꞊klang ‑nu kpö 'gü 'yö ö ‑dɩ ‑zɔn ‑nu ‑dhɛ kö 'kɔ 'wo gun‑ 'gü bha‑ "dhi ꞊gban "pɛpɛ ‑yö ta ‑sü 'ka, ‑a ‑gɛn ‑mü ꞊dhɛ 'ö gun "dhʋ̈ kö ‑wo ‑tun ꞊kö "suʋ̈ Zuifö ‑nu ‑gɔmɛ ‑nu ‑gɔ. ꞊Dhɛ 'ö ꞊ya nu ꞊ya dɔ‑ ‑nu kpö 'gü "dhʋ̈ 'yö‑ pö: «Zuëyagblʋ̈ʋ̈‑ ‑yö kë ka ‑gɔ!»
JOH 20:20 ꞊Dhɛ 'ö ꞊ya ö bo‑ pö‑ ‑nu ‑dhɛ "dhʋ̈ ‑sü 'ka, 'yö ö ‑kɔ ꞊kwɛng ‑dhɛ ‑nu ‑zɔn ‑a ‑nu ‑dhɛ waa‑ "sɛn 'gü ‑dhɛ 'dhö, (kë "dhʋ̈ kö ‑wo "pɔni waa‑ 'düga "gblʋʋ ‑nu bha‑ yö). ꞊Dhɛ 'ö‑ ‑bha ꞊klang ‑nu ꞊waa‑ ‑dhɛ yö "dhʋ̈, 'yö‑ ‑nu zuë" ꞊nii ‑da ꞊dedewo.
JOH 20:21 'Yö‑ pö‑ ‑nu ‑dhɛ 'zü ‑deewo 'ö‑ pö: «Zuëyagblʋ̈ʋ̈‑ ‑yö kë ka ‑gɔ! 'Ma ka bɔ 'pö ꞊dhɛ ‑kɔ 'ö n Dë ‑yö n bɔ‑ 'ka bha‑ 'dhö.
JOH 20:22 ꞊Dhɛ 'ö ꞊yaa‑ pö "dhʋ̈ 'yö ö "tɛɛ ‑blü ‑a ‑nu ‑bha 'yö‑ pö: «Atanna ‑bha 'Nii‑ "slʋ̈ʋ̈slʋ̈ bha ꞊në 'a‑ ‑da ka 'gü bha.»
JOH 20:23 'Yö 'go mü 'zü 'ö‑ pö: «Mɛ "ʋʋ mɛ 'ö 'ka‑ ‑mawɔn 'to "kpʋng ꞊taa yö, kö Atanna ꞊yaa‑ mɛ ‑mawɔn 'to 'pö ꞊naa bha. Mɛ "ʋʋ mɛ 'ö 'kii‑ ‑bha 'wɔn yaa ‑mawɔn 'to, kö Atanna ‑dɩ 'pö 'yii 'dho‑ ‑mɛ ‑mawɔn 'to.
JOH 20:24 "Tʋ̈ng 'ö ö ‑dɩ ‑zɔn 'ka ö ‑bha ꞊klang ‑nu ‑dhɛ "dhʋ̈ bha kö Toma 'wo‑ 'tɔ ‑ya ‑ta ‑dhɛ Didimö bha 'yaa mü.
JOH 20:25 ‑A "tɛabɔ ‑nu ‑wa pö‑ ‑dhɛ yö ꞊në‑ 'gü kö ꞊wa ‑kpan ‑bha 'wo‑ pö: «Toma, yi ‑zë 'ya kwa Dëmɛ yö.» 'Yö Toma ‑ya ‑yɔ bɔ‑ ‑nu ‑gɔ 'ö‑ pö: «꞊Ya kë ꞊dhɛ kö mang ꞊dede ‑zë n "yan 'yii ‑da "pɔni 'wo‑ ‑gban ‑a ꞊kwɛng bha‑ ‑dhɛ 'gü, kö 'a n ‑kɔ dan ‑dhɛ 'gü ꞊ni, "ɛɛn kö 'a n ‑kɔ dan ‑dhɛ 'wo zua‑ ‑bha ‑a "sɛnngdhö bha‑ ‑dhɛ 'gü 'pö ꞊ni, 'mii 'dho 'dhang bho 'wɔn 'ka‑ pö bha‑ "dhiʋ̈ tongtongdhö.»
JOH 20:26 ꞊Dhɛ 'ö ‑dhɛkpaɔyi "saɔplɛ ꞊ya ziö, ‑a "saaga ‑naa bha‑ 'ka, 'yö Yesu ‑bha ꞊klang ‑nu bha 'wo bho 'zü 'ko ‑ta ‑deewo 'kɔ do bha‑ 'gü. ‑A yi 'dhɛ kö bha‑ 'ka kö Toma ‑yö mü. Kö 'mɛ 'wo bha ‑wo "kwɛɛ ta ‑sü ꞊wlöö 'pö 'zü. 'Wo dho "kan wo ‑ta kö ‑yö dɔ sië‑ ‑nu kpö 'gü mü. 'Yö‑ pö‑ ‑nu ‑dhɛ 'zü ‑deewo 'ö‑ pö: «Zuëyagblʋ̈ʋ̈‑ ‑yö kë ka ‑gɔ!»
JOH 20:27 ꞊Dhɛ 'ö ꞊yaa‑ pö "dhʋ̈ 'yö go mü 'ö‑ pö Toma ‑dhɛ: «Toma, ‑bhö ꞊yɔɔn n "sɔɔ yö kö bhii ꞊dede 'i i ‑kɔ dan ‑dhɛ 'wo n zua‑ ‑bha n ꞊kwɛng bha‑ ‑dhɛ 'gü, kö 'i‑ dan 'zü ‑dhɛ 'wo n zua‑ ‑bha n "sɛnngdhö bha‑ ‑dhɛ 'gü kö 'i i bo gɔɔgbɩɩdhɛ bha‑ 'ka kö 'i 'dhang bho n "dhiʋ̈.»
JOH 20:28 'Yö Toma ‑ya ‑yɔ bɔ‑ ‑gɔ 'ö‑ pö: «N Dëmɛ, ma Atanna!» "Kɛɛ ‑yö ‑to ‑a "dhi, 'yö Yesu ‑ya pö‑ ‑dhɛ:
JOH 20:29 «"Yan 'i‑ ‑kpan n ‑bha bha ꞊në‑ ‑wɔn 'gü 'yö 'i 'dhang bho n "dhiʋ̈, "kɛɛ 'mɛ 'kö 'wii n yö 'wo 'dhang bho n "dhiʋ̈ bha‑ ‑nu ‑bha ‑së.»
JOH 20:30 "Slë ‑nu 'ö Yesu ‑ya ‑kë ö ‑bha ꞊klang ‑nu "yaan ‑a 'gbɛ ꞊në 'yaa 'sëëdhɛ ‑be ya‑ 'gü.
JOH 20:31 "Kɛɛ ‑a 'dhɛ ‑nu 'ö‑ ‑nu ‑bɛn 'dhö zë ‑sü 'ka ya yi‑ ‑bɛn zë "dhʋ̈ kö 'ka 'dhang bho‑ "dhiʋ̈ ꞊dhɛ Yesu ꞊në Atanna ‑bha ‑Yamɛ bha‑ 'ka, ꞊dhɛ yö 'ö bha ꞊në Atanna Gbö 'ka, kö ka ‑bha 'dhang ‑bho ‑a "dhiʋ̈ ‑sü 'gü, kö 'ka ꞊sii ꞊slɔɔ ‑a 'saa‑ 'gü.
JOH 21:1 ꞊Dhɛ 'ö ꞊ya kë "dhʋ̈ 'ö yi do 'bha 'ka 'zü, kö‑ ‑bha ꞊klang ‑nu bha‑ mɛ "saɔplɛ 'ö‑ mɛ do‑ ‑kë Simɔ Piɛdhö 'ka, 'ö‑ mɛ do‑ ‑kë Toma 'ka 'ö 'wo‑ 'tɔ kpɔ Didimö bha waa‑ Natanaɛɛ 'ö go Kana, Gadhidhe ‑sɛ 'gü bha waa‑ Zebede gbö ‑nu, waa‑ ‑bha ꞊klang ‑nu bha‑ mɛ "wɛɛ ꞊plɛ ‑wo piʋ̈" ‑da sië "yitagbɛa 'wo‑ Tibedhiadö ‑yi ‑kë bha‑ ꞊bhaa, 'yö Yesu ‑yö ö ‑dɩ ‑zɔn 'zü ‑dee wo‑ ‑nu ‑dhɛ. ‑Kɔ 'ö ö ‑dɩ ‑zɔn 'ka ‑kaa ‑ga 'ö ya:
JOH 21:3 ‑A mɛ 'dhɛ 'wo‑ ‑dhɛ Simɔ Piɛdhö bha ꞊në‑ pö 'mɛ 'wo bha‑ ‑nu ‑dhɛ: «Maa 'dho "yi "piʋ̈.» 'Yö 'wo‑ pö 'pö‑ ‑dhɛ: «꞊Ya kë "dhʋ̈ kö yi ‑dho 'dho 'pö i ꞊keng‑.» ꞊Dhɛ 'ö‑ ‑nu ‑wʋ ꞊ya kë do, 'yö 'wo zun "kpɛnng 'wo dho 'wo ‑da "kplagɔnë do 'gü 'yö 'wo dho "yi ‑bha kë ‑dhɛ 'gü, "kɛɛ 'wii pë 'bha 'sü gbeng 'kö bha‑ 'gü.
JOH 21:4 ꞊Dhɛ 'ö ‑dhɛ ꞊ya ꞊kpaɔ, 'yö 'wo dho 'wo ‑kpan Yesu ‑bha "yi "kpʋng "dhiʋ̈ mü, "kɛɛ 'wii‑ dɔ.
JOH 21:5 'Yö‑ pö‑ ‑nu ‑dhɛ 'ö‑ pö: «N bhang ‑nu, 'yuʋ̈‑ ꞊në 'yaa ka ‑gɔ 'zü kö 'ka‑ ‑bhö ‑ee?» 'Yö wo‑ pö‑ ‑dhɛ: «꞊Iin.»
JOH 21:6 ꞊Dhɛ 'wo‑ pö "dhʋ̈ 'yö‑ pö‑ ‑nu ‑dhɛ: «‑Kaa "nuu bha‑ ‑zuö 'sa "kplagɔnë bha‑ ‑kɔ ‑së 'gü "pɛan bha‑ 'ka, ka ‑dho 'yuʋ̈‑ zë. 'Yö 'wo "nuu bha‑ ‑zuö ꞊dhɛ ‑kɔ 'ö‑ pö 'ka‑ ‑nu ‑dhɛ bha‑ 'dhö, 'yö‑ ‑nu faan 'yii ꞊mɔɔ‑ "gan ‑sü ‑bha 'yuʋ̈‑ 'ö gun‑ 'gü bha‑ ‑wɔn 'gü.
JOH 21:7 ꞊Dhɛ 'ö ꞊ya kë "dhʋ̈, 'yö‑ ‑bha ꞊klang ‑nu bha‑ mɛ 'dhɛ 'ö‑ ‑dhɔ gun‑ kë sië bha 'ö‑ pö Piɛdhö ‑dhɛ: «Piɛdhö, kwa Dëmɛ ꞊në bha!» ꞊Dhɛ 'ö Simɔ ꞊yaa‑ ma ꞊dhɛ wo Dëmɛ ꞊në bha, 'yö sɔ ‑da ö ‑bha, 'yö ‑pö "yi bha‑ ꞊bhaa 'yö dho‑ ‑zian 'ka.
JOH 21:8 'Yö mɛ 'dhɛ 'wo to "yitagɔ 'gü bha 'wo ‑ya "nuu bha‑ "gan ‑sü ‑bha 'wo nu‑ 'ka "yi "kpʋng "dhiʋ̈, ‑a ‑gɛn ‑mü ꞊dhɛ 'ö gun "dhʋ̈ kö 'waa "yi "kpʋng 'ka ꞊gblɛɛn 'zü, kö ‑wo ꞊dhɛ ‑gɛn ‑yan këng do "sinma "dhiʋ̈ ‑dhɛ 'dhö, "kɛɛ kö "nuu bha ‑yö pa ‑sü 'ka 'yuʋ̈‑ 'ka ‑tɛtɛdhö.
JOH 21:9 ꞊Dhɛ 'ö ꞊wa 'go "yitagɔ 'gü ꞊wa zun "sia‑, 'wo dho ‑dhɛ ‑ga kö 'yuʋ̈‑ ꞊pia ‑sü ‑yö pɛng ꞊dhuu ‑ta kö 'bluu‑ ‑ya "sɔɔ mü.
JOH 21:10 'Yö Yesu ‑ya pö‑ ‑nu ‑dhɛ: «‑Ka nu 'yuʋ̈‑ 'ka‑ kun bha‑ 'bha 'ka!»
JOH 21:11 'Yö Simɔ Piɛdhö ‑yö ‑da "kplagɔ bha‑ 'gü 'yö "nuu bha‑ ‑gan 'ö nu‑ 'ka "sia‑, kö 'yuʋ̈‑ ‑ya pa ‑sü 'ka. 'Yuʋ̈‑ 'ö gun "nuu bha‑ 'gü bha‑ ꞊gban ‑da 'kwëë‑ ‑sü gun 'yuʋ̈‑ këng do ö ‑kɔ "sɔɔdhu waa‑ 'yuʋ̈‑ ‑yaaga. 'Sa ‑a 'bha 'yaa gun 'sɛɛnnë "kɛɛ yö ‑zë ꞊gban 'gü, "nuu bha‑ ga do ‑zian 'yii "kan.
JOH 21:12 'Yö Yesu ‑ya pö‑ ‑nu ‑dhɛ: «‑Ka nu kö 'ka pë ‑bhö!» "Kɛɛ 'mɛ 'wo bha‑ mɛ do ‑zian 'yii ꞊mɔɔ‑ ‑bha kö ‑ya dhɛɛ" 'kpɔ ꞊dhɛ: «De ‑zë ‑mü i 'ka ‑zë wo ꞊zɔɔ?» ‑A ‑gɛn ‑mü ꞊dhɛ kö ‑wa 'wɔn ‑dɔ ꞊dhɛ wo Dëmɛ ‑mü.
JOH 21:13 ꞊Dhɛ 'ö ꞊ya kë "dhʋ̈ 'yö ꞊yɔɔn‑ ‑nu "sɔɔ 'yö 'bluu‑ bha‑ sü 'yö‑ nu‑ ‑nu ‑dhɛ waa‑ 'yuʋ̈‑ ꞊pia ‑sü bha‑ 'dhö.
JOH 21:14 'Go 'ö Yesu ‑ya wo ga 'gü bha‑ ‑bha ö ‑dɩ ‑zɔn ö ‑bha ꞊klang ‑nu ‑dhɛ ‑kɔ ‑yaaga ‑naa ꞊në gun bha.
JOH 21:15 ꞊Dhɛ 'ö ꞊wa wo bo pë ‑bhö ‑sü 'ka, 'yö‑ pö Piɛdhö ‑dhɛ: «Simɔ, Zan gbö, n ‑dhɔ ‑yö i ‑kë 'ö ‑ziö mɛ 'wo ya‑ ‑nu ‑ta "wɛ ‑ee?» 'Yö Piɛdhö ‑ya ‑yɔ bɔ‑ ‑gɔ 'ö‑ pö: «꞊Iin, n Dëmɛ, i‑ 'wɔn ‑dɔ ꞊dhɛ i ‑dhɔ ‑yö n ‑kë.» 'Yö‑ pö‑ ‑dhɛ: «‑Ɛɛ, ꞊dhɛ 'ö "dhʋ̈ ‑bhö i ‑zʋ 'to ('mɛ 'wo bɔ n 'ka 'wo ꞊dhɛ) ma ‑tuʋ̈ ‑nu 'dhö bha‑ ‑nu "piʋ̈!»
JOH 21:16 'Yö 'go mü 'zü 'ö‑ dhɛɛ" ꞊plɛ ‑naa kpɔ 'ö‑ pö: «Simɔ Zan gbö, n ‑dhɔ ‑yö i ‑kë ‑ee?» 'Yö Piɛdhö ‑ya pö‑ ‑dhɛ: «꞊Iin, n Dëmɛ, ‑a 'wɔn ‑yö i "yaan ꞊dhɛ i ‑dhɔ ‑yö n ‑kë.» 'Yö Yesu ‑ya pö‑ ‑dhɛ: «‑Ɛɛ, ꞊dhɛ 'ö "dhʋ̈ ‑bhö i ‑zʋ 'to ('mɛ 'wo bɔ n 'ka 'wo ꞊dhɛ) ma ‑tuʋ̈ ‑nu 'dhö bha‑ ‑nu "piʋ̈!»
JOH 21:17 'Yö 'go mü 'ö‑ dhɛɛ" ‑yaaga ‑naa kpɔ 'zü 'ö‑ pö: «Simɔ, Zan gbö, i‑ ‑pö n ‑dhɔ ‑yö i ‑kë ꞊dedewo "wɛ ‑ee?» 'Yö Piɛdhö ‑yö ö wëë 'gü ‑siö ‑a dhɛɛ" ‑yaaga ‑naa 'ö Yesu ‑ya kpɔ bha‑ ‑wɔn 'gü. 'Yö‑ ‑yɔ bɔ‑ ‑gɔ 'ö‑ pö: «'Aa, n Dëmɛ, bhi 'ö bhi ‑zë 'i 'wɔn ꞊gban ‑wɔn ꞊gban dɔ ya, 'bhaa‑ 'wɔn dɔ ꞊në wo ꞊dhɛ i ‑dhɔ ‑yö n ‑kë ‑ee?» Yesu ‑ya ‑pö ‑dhɛ yö ꞊në‑ ‑wɔn 'gü: «꞊Dhɛ 'ö "dhʋ̈ kö ‑bhö ma ‑tuʋ̈ ‑nu "dhiʋ̈ gba!»
JOH 21:18 'Yö ö ‑wʋ ‑ta ‑yɔ 'ö‑ pö: «Piɛdhö, a‑ ‑pö i ‑dhɛ, tɛan‑ ꞊dede 'ka ꞊dhɛ: 'Ö gun kö i 'në "gbɔng 'ka, 'wɔn 'ö ‑dhi i ‑dhɛ ꞊në 'i gun‑ kë sië, 'ö 'i dho ‑dhɛ 'ö ‑dhi i ‑dhɛ ‑a 'gü ꞊dhɛ ‑kɔ 'ö ‑dhi i ‑dhɛ ‑a 'dhö, "kɛɛ 'bha kë zii yi 'ö‑ 'ka, i ‑dho i ‑gbe wang ꞊në‑ "pʋ, 'yö mɛ "wɛɛ ‑yö dho i 'ka ‑dhɛ 'ö‑ ‑dhɔ 'yaa i ‑bha bha‑ 'gü.
JOH 21:19 Saan" ‑kɔ 'ö Piɛdhö dho saan"‑ 'ka kö‑ ga ‑kɔ ‑yö Atanna 'tɔ bhɔ bha ꞊në Yesu ‑ya to "dhiʋ̈ 'ö‑ dhiang zë "dhʋ̈ bha. ꞊Dhɛ 'ö ꞊ya bo‑ ‑pö "dhʋ̈ ‑sü 'ka 'yö‑ pö‑ ‑dhɛ: «‑Bhö nu 'kwa 'dho.»
JOH 21:20 ꞊Dhɛ 'ö ꞊wa ziö 'wo 'dho sië, Piɛdhö dho slëë‑ ö 'gü kö ‑yö ‑dhɛ ‑ga kö Yesu ‑bha ꞊klang ‑nu bha‑ mɛ 'dhɛ 'ö‑ ‑dhɔ gun‑ kë sië, 'ö kë ö ‑gɔ ‑wɔ ‑a ‑kuu ‑ta kö ‑wo pë ‑bhö sië 'ö‑ dhɛɛ" kpɔ 'ö‑ pö «N Dëmɛ, 'dee yöö ‑da i ‑dhɛ pë "piʋ̈ bha» ‑yö nu sië‑ ‑nu ꞊keng‑.
JOH 21:21 'Yö Yesu dhɛɛ" kpɔ 'ö‑ pö: «'Yö mɛ 'dhɛ 'kö nu sië ya ꞊wɛ, n Dëmɛ? Yö ‑zë ‑bha ga ‑kɔ ‑dho kë mü ꞊dhɛ?»
JOH 21:22 'Yö Yesu ‑ya ‑yɔ bɔ‑ ‑gɔ 'ö‑ pö: «‑A 'dhɛ 'kö bha 'yaa dɔ i ‑gɔ ‑dhɛ 'bha 'gü, ꞊ya ga n 'gü, ‑yö ‑mɔɔ ‑bha 'ö to "yaan 'ö zun‑ 'ka n "dhiʋ̈ yee kë ‑yi ‑bha. Bhi ‑zë ‑bhö nu ꞊zɔɔ kö 'kwa 'dho!»
JOH 21:23 ‑A pö 'ö Yesu ‑ya wo "dhʋ̈ bha 'yö‑ ‑wʋ ‑yö ꞊mɔɔ kwa dheebhang ‑nu kpö 'gü ꞊dhɛ ‑a ‑bha ꞊klangdhiʋ̈ 'dhɛ 'kö bha 'yii 'dho ga 'zü tongtongdhö. "Kɛɛ 'sa kö Yesu ‑zë 'yii‑ pö Piɛdhö ‑dhɛ ꞊dhɛ 'yii 'dho ga 'zü, ‑ya ‑pö ꞊naa 'kö 'zü ꞊ya 'to "yaan kö ‑yö zun‑ 'ka n nu yi ‑bha ꞊wɛ, yö ‑zë ‑yö ‑dɔ i ‑gɔ 'mɛ?»
JOH 21:24 ‑A ꞊klangdhiʋ̈ 'ö "dhʋ̈ bha ꞊në 'wɔn ‑nu bha‑ ‑gɛn dɔ 'yö‑ ‑bɛn zë bha. Yö ꞊në‑ ‑wɔn 'gü 'yö 'yi 'dhang bho‑ "dhiʋ̈ ꞊dhɛ 'wɔn 'ö‑ ‑gɛn dɔ bha tɛan‑ ‑mü.
JOH 21:25 'Wɔn 'ö Yesu ‑ya ‑kë ‑a ‑kpɛa 'yaa ‑mü ‑a 'dhɛ 'yi‑ ‑gɛn dɔ 'sëëdhɛ ya‑ 'gü ya‑ 'ka. ꞊Ya kë 'nu ꞊dhɛ 'wɔn ‑nu 'kö Yesu ‑ya ‑kë yi‑ ꞊gban ‑sü 'do 'do 'yi‑ ‑bɛn zë, ‑a 'sëëdhɛ ‑be 'yii 'dho ꞊mɔɔ "kpʋngtaadhɛ ‑todhʋ̈sü ‑zian 'gü.
ACT 1:1 Teofidhö, n dheebhang ꞊bhlëësü, ma 'sëëdhɛ ‑blɛɛsü 'a‑ ‑bɛn zë bha, 'wɔn 'ö ‑gban pë "pɛpɛ 'ö Yesu ‑ya ‑kë waa‑ pë ‑nu 'ö mɛ ‑nu ꞊draan‑ ‑bha 'ö go‑ 'ka‑ ‑bha yë zü bho ‑sü ‑bha
ACT 1:2 'ö dho 'ö zun‑ 'ka ‑dhɛkpaɔyi 'ö Atanna ‑ya ꞊wlü 'ö dho‑ 'ka dhang‑ 'gü ‑a ‑bha bha, a kë‑ ꞊gban "pɛpɛ ‑gɛn ‑dɔ ‑a 'gü. "Sanni ‑yö 'dho dhang‑ 'gü, ‑yö ö ‑wʋ ‑kpɔ mɛ ‑nu 'ö‑ ‑nu sü ö ‑bha bɔmɛ ‑nu 'ka "kpʋng ꞊taa yö bha‑ ‑nu ‑bha 'Nii‑ "slʋ̈ʋ̈slʋ̈ ‑bha 'gügbɩɩdhɛ 'ka.
ACT 1:3 ꞊Dhɛ 'ö ꞊ya 'go ga 'gü, ‑yö ö ‑dɩ ‑zɔn ‑nu ‑dhɛ ‑gɛn ‑yan 'gbɛ ꞊dede 'ka ‑dhɛkpaɔyi ‑kaɔng ‑yiisiö 'ka 'yö‑ ‑zɔn ‑nu ‑dhɛ ꞊dhɛ 'ö "yaan. ‑Wo wo "yan ‑kpan ‑bha 'pö 'ö 'wɔn 'ö ‑gban Atanna ‑bha ‑gblüdëdhɛ ‑bha 'ö‑ pö‑ ‑nu ‑dhɛ.
ACT 1:4 Yi do 'ka kö waa‑ ‑bha ꞊klangdhiʋ̈ ‑nu bha ‑wo pë ‑bhö sië ‑dhɛ do 'gü, 'yö‑ pö‑ ‑nu ‑dhɛ 'ö‑ pö: «'Ka 'dho bhɔ Zedhizadhɛmö ‑dhɛ 'ka taa‑ ꞊gblɛɛn ꞊kö, ‑ka ka "yan 'to 'Nii‑ "slʋ̈ʋ̈slʋ̈ 'ö n Dë ‑ya "plüün bho ka ‑dhɛ, 'a‑ ‑dhiang zë ka ‑dhɛ bha‑ ‑gɔ!
ACT 1:5 ‑A ‑gɛn ‑mü ꞊dhɛ Zan ‑zë ‑yö mɛ ‑nu ‑zu "yi ꞊në‑ 'ka, "kɛɛ ka ‑zë ‑a yi 'yaa ꞊gblɛɛn 'zü kö Atanna ‑yö ka pa 'Nii‑ "slʋ̈ʋ̈slʋ̈ 'ka.
ACT 1:6 Yesu ‑bha bɔmɛ ‑nu 'ö wɛng‑ ‑nu 'wo gun ‑dhɛ do 'gü bha, 'wo‑ dhɛɛ" kpɔ 'wo‑ pö: «Yi Dëmɛ, i‑ ‑pö ‑a yi ꞊ya ‑loo kö 'i Izraɛdhö ‑mɛ ‑nu bho ꞊dhuëngdhɛ 'gü (Wlɔmö ‑mɛ ‑nu ‑gɔ) kö ‑wo ‑ya wo ‑dɩ 'flëë‑ 'gü 'zü ‑deewo ‑ee?»
ACT 1:7 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «‑Abin! ‑A ‑dhɛ 'yaa‑ ‑bha kö yi ‑nu waa‑ "tʋ̈ng ‑nu ('wo ‑gban 'wɔn ‑nu bha‑ ‑bha) 'ö n Dë ‑ya ‑ya ö ‑bha ‑gblüdëdhɛ 'gü ‑wʋ 'ka bha 'ka‑ ‑nu dɔ.
ACT 1:8 "Kɛɛ (‑a 'dhɛ ka ‑mawɔn 'dhö‑ ‑bha kö 'ka‑ dɔ yö ‑mü ꞊dhɛ:) 'Nii‑ "slʋ̈ʋ̈slʋ̈ ‑dho lɔɔ‑ ka ‑ta 'ö Atanna ‑yö 'gügbɩɩdhɛ nu ka ‑dhɛ. Yö ꞊në ꞊ya kë "dhʋ̈ 'yö 'wɔn 'ö ‑gban n ‑bha 'ka dho kë‑ pö ‑mɛ 'ka 'mɛ 'wo Zedhizadhɛmö pö 'gü ‑dhɛ ‑nu oo, Zude ‑sɛ 'gü ‑dhɛ ‑todhʋ̈sü waa‑ Samadhi ‑dhɛ ‑nu 'gü ‑a ‑nu ‑dhɛ 'ö dho "dhʋ̈ 'ö zun‑ 'ka "sɛ "dhiʋ̈todhɛ 'gü.»
ACT 1:9 ꞊Dhɛ 'ö ꞊ya 'wɔn ‑nu bha‑ pö "dhʋ̈ 'dɔɔndhö 'ö ꞊ya ö bo, 'yö ꞊wlü Atanna ‑bha 'gügbɩɩdhɛ 'ka 'yö dho dhang‑ 'gü, 'yö dho "dhʋ̈ 'ö ‑da dha 'kpong‑ 'gü, 'yö dha 'kpong‑ ‑yö kpa‑ ‑ta ‑a ‑nu "yan "dhiʋ̈ mü.
ACT 1:10 ‑A ‑nu "yan‑ ‑to Yesu ꞊keng‑ zian 'ö 'dho sië‑ 'ka dhang‑ 'gü bha‑ 'ka, 'wo dho ‑dhɛ ‑ga kö gɔɔn‑ ‑nu ꞊plɛ 'ö sɔ "puu 'dhö‑ ‑nu ‑bha (Atanna ‑bha "kië ‑nu bha) kö ‑wo dɔ sië‑ ‑nu "sɔɔ mü.
ACT 1:11 'Yö gɔɔn‑ ‑nu ꞊plɛ bha 'wo‑ pö‑ ‑nu ‑dhɛ: «Gadhidhe ‑mɛ ‑nu 'ka ya, ‑më 'ö ‑kë 'yö 'ka ‑dhɛ ‑ga dhang‑ 'gü zuudhö "dhʋ̈? Yesu do 'ö 'go sië ka kpö 'gü 'ö dho dhang‑ 'gü bha, ‑yö ‑dho ö yee kë 'zü 'ö nu ꞊dhɛ ‑kɔ do 'ka‑ yö‑ 'ka kö ‑yö 'dho sië bha‑ 'dhö.
ACT 1:12 ꞊Dhɛ 'ö ꞊ya kë "dhʋ̈ 'yö Yesu ‑bha bɔmɛ ‑nu bha 'wo go ‑tɔn 'wo‑ ‑dhɛ Odhivie ‑tɔn 'ö Zedhizadhɛmö ‑dhɛ "sɔɔ bha‑ ꞊gbin‑, 'yö 'wo wo yee ‑kë 'wo dho Zedhizadhɛmö 'plöö. ‑Go Zedhizadhɛmö 'plöö kö 'i dho Odhivie ‑tɔn ꞊gbin‑ ‑yö ‑mɔɔ "kidhʋng do ‑nu "sinma ‑bha.
ACT 1:13 ꞊Dhɛ 'ö ꞊wa ‑loo Zedhizadhɛmö, 'yö 'wo dho 'kɔdhi 'wo gun‑ 'gü 'kɔ ‑ta "dhʋ̈ng 'gü bha‑ 'gü. 'Mɛ 'wo gun mü bha ‑wa mɛ do ‑dhɛ Piɛdhö, 'yö 'wo‑ mɛ do 'bha ‑dhɛ Zan, 'yö Zakö, Andre, Fidhipö, Toma, Batedhemi, Matiö, Zakö 'ö ‑kë Adhöfe gbö 'ka, 'yö Simɔ, 'wo‑ 'tɔ kpɔ 'wo‑ ‑dhɛ "yangüsiʋ̈mɛ bha waa‑ Zudë 'ö ‑kë Zakö gbö 'ka 'pö.
ACT 1:14 'Mɛ 'wo bha‑ ‑nu ‑wʋ ‑gun do 'ö 'wo ‑yɛa do 'gü 'wo ꞊bhɛa ‑kpɛawo, waa‑ dhebhɔ 'bha ‑nu waa‑ Yesu dhe Madhi waa‑ dheebhang ‑nu 'dhö.
ACT 1:15 Yi do 'ka kö 'dhang ‑bho Yesu "dhiʋ̈ ‑mɛ ‑nu 'wo dho ꞊mɔɔ mɛ këng do ö ‑kɔ ꞊plɛ ‑nu ‑bha bha ‑wo ‑dhɛ do 'gü, 'yö Piɛdhö ‑yö ꞊wlü‑ ‑nu ꞊gban wëëdhö mü 'ö‑ pö‑ ‑nu ‑dhɛ:
ACT 1:16 «N dheebhang ‑nu, ‑yö ‑së kö 'pë 'ö Atanna ‑bha 'Nii‑ ‑ya pö yi 'bha 'ka Davi "dhi 'ö ‑bɛn zë ‑sü 'ka‑ ‑bha 'sëëdhɛ 'gü, 'ö ‑gban Zuda 'ö zian bho 'mɛ 'wo Yesu kun ‑a ‑nu 'ka ‑a ‑bha bha ‑yö kë.
ACT 1:17 Zuda bha ‑yö ‑kë 'mɛ 'kwa gun Yesu ꞊keng‑ bha‑ mɛ do 'ka, yë 'kwa‑ ‑kë bha‑ ‑bha ‑gun 'pö.
ACT 1:18 'Wëëga 'ö ‑kë ‑a mɛ zë ꞊saa 'ka bha 'yö 'bhlaadhɛ do dhɔ‑ 'ka. ꞊Dhɛ 'ö ꞊ya kë "dhʋ̈, 'yö dho ö ‑gɔ 'bhlaadhɛ bha‑ 'gü 'yö‑ ‑pö mü 'ö wü, 'yö‑ gblëën‑ ꞊gban 'wo ‑pɛn 'do 'do, 'yö ga.
ACT 1:19 'Mɛ 'wo Zedhizadhɛmö ‑pö ya‑ 'gü ‑a ‑nu ꞊gban "pɛpɛ ‑wo kë 'wɔn bha‑ ma, 'yö‑ ‑wɔn 'gü 'yö 'wo 'bhlaadhɛ bha‑ ‑dhɛ wo ‑wʋ 'gü Akɛdama (꞊waa‑ pö "dhʋ̈ kö ‑wa ‑pö 'bhlaadhɛ 'ö mɛ ꞊yɔɔn ‑yö ꞊wɛnng‑ 'gü).
ACT 1:20 'Wɔn 'ö ‑gban Zuda ‑bha bha ‑yö ‑bɛn zë ‑sü 'ka "Tan 'sëëdhɛ ('wo‑ Somö kë bha‑) 'gü 'nu yi 'bha 'ka ꞊dhɛ: «Mɛ 'bha ‑bha ‑wɔn 'ya 'dho zun‑ ‑bha 'kɔ ‑bha, mɛ 'bha 'ya 'dho ‑ya 'gü.» 'Yö ‑bɛn zë ‑sü 'ka 'zü ꞊dhɛ: «Mɛ do 'bha ‑yö dɔ‑ "gblʋʋ 'gü».
ACT 1:21 ꞊Dhɛ 'ö "dhʋ̈ mɛ do ‑yö ‑da yi "piʋ̈ kö ‑yö kë kwa Dëmɛ Yesu ‑bha ‑go ga 'gü ‑sü bha‑ "sɛɛ‑ 'ka 'pö. Mɛ 'ö "dhʋ̈ bha ‑yö kë 'mɛ 'ö gun 'mɛ 'ö 'kwa gun kwa Dëmɛ Yesu ꞊keng‑ "tʋ̈ng "pɛpɛ 'ö‑ ‑kë, 'ö bɔ‑ 'ka "sɛ ‑nu 'gü 'ö go‑ 'ka yi 'ö Zan ‑ya ‑zu 'ka bha‑ ‑bha 'ö dho 'ö zun‑ 'ka yi 'ö go‑ 'ka kwa kpö 'gü, 'ö Atanna ‑ya ꞊wlü 'ö dho‑ 'ka dhang‑ 'gü ‑a ‑bha bha‑ mɛ do ꞊në‑ 'ka.
ACT 1:23 ꞊Dhɛ 'ö ꞊ya kë "dhʋ̈ 'yö 'wo mɛ ꞊plɛ 'tɔ sü, mɛ 'wo bha ‑wa mɛ do ‑dhɛ Zosɛfu 'wo‑ ‑dhɛ Baazabasö, 'yö 'wo‑ 'tɔ kpɔ Zutusö, waa‑ Matiasö.
ACT 1:24 'Yö 'wo ꞊bhɛa kwa Dëmɛ ‑dhɛ 'wo‑ pö: «Yi Dëmɛ, bhi 'ö 'i mɛ ꞊gban "pɛpɛ zuëga dɔ, mɛ ꞊plɛ 'wo ya‑ mɛ 'dhɛ 'i i ‑kɔ ‑yɛ ‑bha ‑a ‑zɔn yi ‑dhɛ
ACT 1:25 kö ‑yö kë Zuda "yɔɔ 'gü 'ka! ‑A ‑gɛn ‑mü ꞊dhɛ Zuda ‑yö kë ‑go ö ‑bha yë 'ö ‑kë i ‑bha "ta 'sü ‑yë 'ka bha‑ 'gü 'yö dho ‑dhɛ 'ö‑ ꞊mɔɔ bha‑ 'gü.
ACT 1:26 ꞊Dhɛ ꞊wa bhɛa" ꞊dhɛ ‑kɔ bha‑ 'dhö 'yö 'wo zë "kpʋ̈ü ‑kë, 'yö to Matiasö ‑bha ‑bha, 'yö ‑da Yesu ‑bha bɔmɛ ‑nu ‑kaɔng do ga do bha‑ ‑nu "piʋ̈.
ACT 2:1 ꞊Dhɛ 'ö Zuifö ‑nu ‑bha ꞊niidadhe 'wo‑ ‑dhɛ Pangtökɔtö bha‑ yi ꞊ya ꞊loo, 'dhang ‑bho Yesu "dhiʋ̈ ‑mɛ ‑nu ꞊gban "pɛpɛ ‑wo ‑gun ‑dhɛ do 'gü 'kɔ do 'bha 'gü.
ACT 2:2 'Wo dho "kan wo ‑ta kö pë vin "gbɩɩ‑ 'bha ꞊ya ‑da ‑nu "tʋ 'gü dhang‑ 'gü. ‑A vin‑ ‑kë ꞊dhɛ "tɛɛ "gbɩɩ‑ 'ö ‑ziö ‑a 'dhö 'yö 'kɔ 'wo gun‑ 'gü bha‑ pa.
ACT 2:3 'Yö pë 'bha 'ö bhɔ pɛng 'nɛɛ‑ ‑bha bha 'ö ‑ya ‑a ‑nu ꞊gbin‑ 'dɔɔndhö.
ACT 2:4 'Yö 'Nii‑ "slʋ̈ʋ̈slʋ̈ ‑yö ‑da ‑a ‑nu 'gü, 'yö‑ ‑nu ꞊gban "pɛpɛ pa, 'yö 'wo ‑ya dhiang zë ‑sü ‑bha ‑wʋ "wɛɛ 'ö 'waa‑ dɔ 'nu ‑blɛɛsü bha‑ 'gü ꞊dhɛ ‑kɔ 'ö Atanna ‑bha 'Nii‑ bha 'ö‑ dɔ‑ 'ka‑ ‑nu "dhi ‑a 'dhö.
ACT 2:5 ‑A yi 'ö "dhʋ̈ bha‑ 'ka kö Zuifö ‑nu 'wo Zedhizadhɛmö 'plöö, waa‑ mɛ 'dhɛ ‑nu 'wo go "sɛ "pɛpɛ ꞊gban 'gü, 'ö 'wo ‑kë Atanna ꞊bhlëëyamɛ 'ka kö ‑wo Zedhizadhɛmö mü.
ACT 2:6 ꞊Dhɛ 'ö pë vin bha ꞊waa‑ ma, 'yö‑ mɛ kpö 'gbɛ ꞊dede 'wo nu 'kɔ bha‑ "dhi "dhiʋ̈ mü ꞊gbang 'wo‑ dɔ sië 'kɔɔdhö mü bha‑ ‑wɔn 'gü. 'Wɔn bha‑ 'wɔn ‑ya ‑nu ‑kɔn ꞊dedewo, ‑a ‑gɛn ‑mü ꞊dhɛ mɛ "pɛpɛ 'wo nu "dhʋ̈ bha ‑wo 'dhang ‑bho Yesu "dhiʋ̈ ‑mɛ ‑nu ‑wʋ 'gü ma wo ‑dɩ ‑wʋ ‑nu 'gü 'do 'do 'ka, 'ö dhiang ‑nu 'wo‑ zë sië bha 'wo‑ 'gü ma 'kpakpadhö.
ACT 2:7 ꞊Dhɛ 'ö‑ 'wɔn ‑ya ‑nu kɔn "dhʋ̈, 'yö 'wo ‑ya "kaabho bho ‑sü ‑bha 'wo‑ pö: «‑Ka dɔ! 'Mɛ 'wo dhiang zë sië ya, Gadhidhe ‑mɛ ‑nu 'waa ‑mü ‑ee?
ACT 2:8 ‑Yö kë ‑kɔ ‑kë ꞊dhɛ 'yö dhiang ‑nu 'wo‑ zë sië ya kwa‑ 'gü ma kwa ‑dɩ ‑wʋ ‑nu 'gü 'do 'do 'ka?
ACT 2:9 "Kɛɛ kö 'mɛ 'kwa ya mɛ 'bha ‑nu ‑go Paatö ‑sɛ ‑nu oo, Medi ‑sɛ ‑nu waa‑ Edhamö ‑sɛ ‑nu 'gü, 'ö mɛ 'bha ‑nu ‑wo go Mezopotami ‑sɛ, Zude ‑sɛ, Kapadɔsö ‑sɛ, Pɔng ‑sɛ, Azi ‑sɛ
ACT 2:10 Flizi ‑sɛ, Panfidhi ‑sɛ, Ezitö ‑sɛ waa‑ Dhibi ‑pö ‑nu 'wo Sidhɛnö ‑dhɛ ‑züzü ‑a ‑nu 'gü, 'ö mɛ 'bha ‑nu 'wo go Wlɔmö,
ACT 2:11 'ö mɛ 'wo Zuifö 'në ꞊dede 'ka 'pö, 'mɛ 'wo wo zuë" ꞊slëë 'pö Zuifö ‑nu ‑bha bhɛa" ‑kɔ 'gü waa‑ mɛ ‑nu 'wo go Klɛtö ‑dhɛ ‑nu, waa‑ Adhabi ‑sɛ ‑nu 'gü 'wo mü, "kɛɛ 'yö dhiang ‑nu 'wo‑ zë sië 'ö ‑gban Atanna ‑bha 'wɔn ‑së 'ö‑ ‑kë ‑a ‑bha bha 'kwa‑ ma kwa ‑dɩ ‑wʋ ‑nu 'gü 'do 'do 'ka?»
ACT 2:12 ‑A 'wɔn ‑ya ‑nu ‑kɔn ꞊dedewo 'ö 'pë 'wo dho‑ pö 'wii‑ dɔ, 'yö 'wo‑ pö wo 'ko ‑nu ‑dhɛ: «꞊Ya kë "dhʋ̈ kö 'wɔn ya‑ 'klɔɔ‑ ‑mü ‑më 'ka?»
ACT 2:13 "Kɛɛ ‑a mɛ bha ‑nu ‑zë kö ‑wo ꞊wɛɛ dɔ sië 'dhang bho Yesu "dhiʋ̈ ‑mɛ ‑nu ‑bha 'wo‑ pö: «‑Aa, n 'bha, 'mɛ 'wo bha we ꞊në ꞊yaa‑ ‑nu 'kun!»
ACT 2:14 'Yö Piɛdhö waa‑ Yesu ‑bha bɔmɛ ‑nu ‑kaɔng do ga do ‑kpɛa 'wo to bha 'wo ꞊wlü 'wo dɔ wo ‑gɛan 'mɛ 'wo bha‑ ‑nu wëëdhö, 'yö Piɛdhö ‑yö ö ‑wʋ "dhiʋ̈ ꞊wlü 'yö dhiang zë‑ ‑nu ‑dhɛ 'ö‑ pö: «'Mɛ 'ka Zuifö 'ka, 'ö 'ka Zedhizadhɛmö ‑pö ya‑ 'gü waa 'mɛ 'ka nu, ‑ka ka "tʋ 'to kö 'wɔn 'ö kë sië bha 'a‑ ‑gɛn pö ka ‑dhɛ.
ACT 2:15 ‑A ‑gɛn ‑mü ꞊dhɛ 'mɛ 'ka‑ ‑nu ‑ga sië bha we 'yaa‑ ‑nu ‑bha ꞊dhɛ ‑kɔ 'ka ka ‑zʋ 'gɔn sië‑ 'ka bha‑ 'dhö. ‑A 'klɔɔ‑ ‑mü ꞊dhɛ "tʋ̈ng 'kwa dɔ‑ 'ka ya "yënng "tɛɛ ‑ta ‑mü (we ‑bha mɛ 'kun "tʋ̈ng 'yaa kë ꞊ni!).
ACT 2:16 "Kɛɛ 'pë 'ö Atanna ‑yö bɔ ö ‑wʋdhiʋ̈loomɛ Zoɛdhö 'gü 'ö‑ pö yi 'bha 'ka bha 'yö‑ 'gü ‑wɔn 'dhö kë sië ꞊dɛɛ bha.
ACT 2:17 ‑A ‑gɛn ‑mü ꞊dhɛ Atanna ‑ya ‑pö Zoɛdhö ‑dhɛ 'ö‑ pö: ‹"Tʋ̈ng ‑totaamasü 'gü, a ‑dho ma 'Nii‑ 'gü ‑gblü mɛ suu "pɛpɛ ꞊gban ‑ta, 'ö ka gbö ‑nu waa‑ ka 'dhu ‑nu 'wo n ‑wʋ "dhiʋ̈ ꞊loo, 'ö ka ‑bha 'në "wlü ‑sü ‑nu "yan 'gü 'dhö ‑da 'wo tɛanwɔn 'ö ‑gban Atanna ‑bha ‑a dɔ 'Ö kaa‑ mɛ zizi ‑nu 'wo "yɛɛn bho (tɛanwɔn ‑nu 'wo Atanna "piʋ̈) ‑a 'ka.
ACT 2:18 Tɛan‑ ꞊dede 'ka, a ‑dho ma 'Nii‑ 'gü ‑gblü ma yëkëmɛ ‑nu, gɔɔn‑ ‑nu waa‑ dhong ‑nu ‑ta kö ‑wo n ‑wʋ "dhiʋ̈ ꞊loo yi 'ö bha‑ 'ka.
ACT 2:19 A ‑dho "dhabhliwɔn "gblʋ̈gblʋ̈ ‑nu kë dhang‑ 'gü ‑dhɛ ‑nu waa‑ "kpʋngtaadhɛ ‑nu 'gü. ꞊Yɔɔn ‑nu, pɛng ‑nu waa‑ pɛng "gbiën ‑nu ‑wo ‑dho kë.
ACT 2:20 'Yënng‑ 'bhü‑ ‑dho kë tii, 'ö "su ‑yö ‑kë ꞊dhɛ ꞊yɔɔn 'dhö, 'yö yi 'ö kwa Dëmɛ ‑ya ‑ya ö 'tɔ bhɔ ‑yi 'ka, yi 'kpii‑ bha 'yö gun ‑na ꞊loo.
ACT 2:21 ꞊Ya bo kë ‑sü 'ka "dhʋ̈, mɛ "ʋʋ mɛ 'ö dho kwa Dëmɛ mɔɔ‑, ‑yö ‑dho "ta‑ ‑mɛ ‑dhɛ 'ö‑ dha›.»
ACT 2:22 'Yö Piɛdhö ‑yö dhiang zë 'zü 'ö‑ pö: «Izraɛdhö ‑mɛ ‑nu, ‑ka ka "tʋ to: Yesu 'ö go Nazadhɛtö bha Atanna ‑ya ‑bɔ kwa ‑dhɛ, 'yö bɔ‑ 'gü kö ‑ya ‑zɔn kwa ‑dhɛ ꞊dhɛ yö ꞊në‑ bɔ, 'yö "dhabhliwɔn "gblʋ̈gblʋ̈ ‑nu ‑kë ꞊dhɛ ‑kɔ 'ö kaa ꞊dede 'ka‑ dɔ‑ 'ka bha‑ 'dhö.
ACT 2:23 "Kɛɛ 'yö 'wo‑ "dhiʋ̈ dɔ ka ‑dhɛ ꞊dhɛ ‑kɔ 'ö gun‑ 'ka Atanna zuë" "piʋ̈ 'nu ‑blɛɛsü, 'ö gun‑ "piʋ̈ ꞊dhɛ ‑yö kë‑ 'ka ‑a 'dhö, 'yö 'ka‑ dɔ 'wɔnyaakëmɛ ‑nu ‑gɔ, 'yö 'wo‑ dɔ "dhü ‑bha 'wo‑ zë,
ACT 2:24 "kɛɛ ꞊dhɛ 'ö ꞊wa bo‑ ‑wëëdhɛ bho ‑sü 'ka 'ö ꞊ya ga, Atanna ‑ya ‑bho ga ‑bha "dhiʋ̈dhɛ ‑gɔ 'ö‑ bo, ‑a ‑gɛn ‑mü ꞊dhɛ ga faan 'yaa ꞊mɔɔ‑ ‑bha kö ‑yö wɔ‑ ‑ta
ACT 2:25 ꞊dhɛ ‑kɔ 'ö Davi ‑ya pö‑ 'ka yi 'bha 'ka ‑a ‑bu 'gü 'ö‑ pö ꞊dhɛ: ‹A‑ 'wɔn dɔ ꞊dhɛ n Dëmɛ ‑yö n "piʋ̈ ‑kpɛawo, 'ö n ‑maa ‑kë, ‑a ‑wɔn 'gü n 'yaɔ‑ ‑nu ‑kɔ 'yii 'dho ꞊mɔɔ n ‑bha.
ACT 2:26 Yö ꞊në‑ ‑wɔn 'gü 'yö n ꞊nii 'dhö ‑da, 'yö 'a dhiang zë zuë" ꞊nii ‑da 'ka. A‑ 'wɔn ‑dɔ ꞊dhɛ a ‑dho ga ‑dhɛkpaɔyi do 'ka, "kɛɛ a n ‑zʋ ‑yö 'pë 'ö Atanna ‑ya pö ö ‑dho kë n ‑dhɛ bha‑ ‑dhɛ ‑kpɛawo.
ACT 2:27 ‑A ‑gɛn ‑mü ꞊dhɛ a‑ ‑pö ‑dhɛ: 'Bhii 'dho kwaa‑ n 'nii‑ ‑zü ꞊geebɔɔ, ꞊ya 'go mü 'bhii 'dho "wɩ‑ ‑bha kö i ‑bha yëkëmɛ "slʋ̈ʋ̈slʋ̈ bha‑ kwi ‑yö "bu.
ACT 2:28 'Bha ‑tosɛa kë ‑zian ‑zɔn n ‑dhɛ, i ‑bha ‑kë n "piʋ̈ ‑sü bha ‑yö n zuë" ꞊nii ‑da ‑kpɛawo› bha‑ 'dhö.»
ACT 2:29 'Yö Piɛdhö ‑yö dhiang zë 'ö dho‑ 'ka ö "dhiʋ̈ 'ö‑ pö: «N dheebhang ‑nu, ‑ka dɔ kö 'wɔn 'ö ‑gban kwa "bhɛma ‑wɔngbɩɩsü Davi ‑bha bha 'a‑ pö ka ‑dhɛ 'kpakpadhö. ‑A ‑gɛn ‑mü ꞊dhɛ Davi bha ‑yö ‑ga 'ö 'wo‑ ꞊gee bho, 'ö‑ bun 'dhö ‑tun ꞊dɛɛ kwa ‑gɔ yö.
ACT 2:30 "Kɛɛ 'ö gun kö ‑yö ‑tun "yaan ‑yö ‑gun Atanna ‑wʋdhiʋ̈loomɛ 'ka, 'ö‑ 'wɔn dɔ 'kpakpadhö ꞊dhɛ ‑yö dhiang ‑zë ö ‑dhɛ 'ö ‑sö ‑bhö 'ö‑ pö ö ‑dhɛ ꞊dhɛ ö ‑dho ‑a suu 'gü ‑në do 'sü 'ö‑ ‑ya ö ‑bha ‑gblüdë 'ka ꞊dhɛ Davi 'dhö 'pö.
ACT 2:31 ‑A ‑kë "dhʋ̈ ‑sü bha‑ 'gü 'wɔn 'ö dho kë 'yö Davi ‑ya to "dhiʋ̈ 'ö‑ dɔ. 'Wɔn 'ö ‑gban Atanna ‑bha ‑Yamɛ ‑bha ‑go ga 'gü ‑sü ‑bha bha ꞊në 'ö‑ ‑dhiang zë 'ö‑ pö ꞊dhɛ: ‹Atanna 'yii ‑kɔ "kan‑ "dhiʋ̈ ꞊geebɔɔ kö‑ kwi ‑yö "bu› bha. (‑A ‑kë "dhʋ̈ ‑sü bha‑ 'gü, kö dhiang 'ö Davi ‑ya zë bha 'yii‑ bho ö ‑dɩ 'gü, Atanna ‑bha 'Nii‑ "slʋ̈ʋ̈slʋ̈ ꞊në‑ dɔ‑ "dhi.)
ACT 2:32 Yesu 'a‑ ‑dhiang zë sië ka ‑dhɛ ya, Atanna ꞊yaa‑ bho ga 'gü, mɛ ꞊gban "pɛpɛ kwa‑ "sɛɛ‑ 'ka, kwa‑ 'wɔn ‑dɔ.
ACT 2:33 'Yö‑ sü 'ö‑ ‑ya ‑yɛa ꞊bhlëësü 'ö‑ "sɔɔ dhang‑ 'gü bha‑ 'gü, 'yö 'Nii‑ "slʋ̈ʋ̈slʋ̈ 'ö‑ dë ‑ya "plüün bho‑ ‑dhɛ bha‑ ꞊slɔɔ, 'yö‑ ꞊lɔɔ yi ‑ta. Pë ‑nu 'ka‑ yö sië "ɛɛn 'ka‑ ma sië bha 'Nii‑ "slʋ̈ʋ̈slʋ̈ bha ꞊në‑ ‑nu ‑kë.
ACT 2:34 ‑A ‑gɛn ‑mü ꞊dhɛ Davi bha 'yii ‑da dhang‑ 'gü ꞊dhɛ Yesu 'dhö, "kɛɛ ‑ya ‑pö 'ö‑ pö: ‹N Dëmɛ Atanna ‑ya ‑pö n Dëmɛ ‑dhɛ: ‑Bhö ‑ya ma ‑yɛa ‑së ya‑ 'gü!
ACT 2:35 Kö ‑yö 'to‑ 'ka "dhʋ̈ ‑yö zun‑ 'ka yi 'a dho i ‑kɔ ziö‑ 'ka i 'yaɔ‑ ‑nu ‑gɔ bha‑ ‑bha›.
ACT 2:36 ꞊Dhɛ 'ö "dhʋ̈ Izraɛdhö ‑mɛ ‑nu ꞊gban "pɛpɛ, ‑ka 'dhang bho‑ "dhiʋ̈ ꞊dhɛ Yesu 'ka‑ dɔ "dhü ‑bha bha ꞊në Atanna ‑ya ‑ya mɛ ꞊gban "pɛpɛ Dëmɛ, ‑a ‑bha ‑Yamɛ Klisi 'ka. Yö ꞊në Atanna ‑ya pö ö ‑dho bɔ mɛ "bhɩɩ‑ ‑nu ‑dhɛ.»
ACT 2:37 ꞊Dhɛ 'wo Piɛdhö ‑wʋ bha‑ ma, 'yö dho‑ ‑nu ‑gɔ ꞊gblɛɛn, 'yö pɛng ‑yö ‑kan ‑nu ‑bha, kö ꞊waa‑ 'wɔn dɔ ꞊dhɛ 'wa ‑da Atanna "dhiʋ̈. 'Yö 'wo Piɛdhö waa‑ 'dhang ‑bho Yesu "dhiʋ̈ ‑mɛ ‑nu 'wo to bha‑ ‑nu dhɛɛ" kpɔ 'wo‑ pö: «Yi dheebhang ‑nu, ꞊dhɛ 'ö "dhʋ̈ bha 'yi‑ kë ꞊dhɛ?»
ACT 2:38 'Yö Piɛdhö ‑ya pö‑ ‑nu ‑dhɛ: «‑Ka bo ka ꞊sɔng 'ka kö 'mɛ 'ö "dhʋ̈ ‑yö ö ‑bha ‑tosɛadhe slëë‑, kö ‑yö ö kwaa‑ ö kë ‑sɔng yaa ‑nu ‑zü, kö ‑wa ‑bɔ Yesu 'ka ‑zu bho Yes ‑a 'tɔ 'gü, kö ‑ya ‑bha 'wɔn yaa ‑nu ‑mawɔn 'to! ꞊Ya kë "dhʋ̈ 'Nii‑ "slʋ̈ʋ̈slʋ̈ 'ö Atanna ‑ya ꞊gbaɔ bha ka ‑dho ka ‑bha ꞊slɔɔ.
ACT 2:39 ‑A ‑gɛn ‑mü ꞊dhɛ ‑ya "plüün ‑së bha‑ ‑bho kaa‑ ka bhang ‑nu ka ‑dhɛ, 'yö dho 'ö‑ bho 'pö 'mɛ 'wo "sɛ "wɛɛ ‑nu 'gü ꞊gblɛɛngblɛɛn, 'ö kwa Dëmɛ, kwa ‑bha Atanna dho‑ ‑nu ‑dhɛ kö ‑wo kë‑ ‑bha 'në ‑nu 'ka bha‑ ‑nu ‑dhɛ.»
ACT 2:40 'Yö Piɛdhö ‑yö dhiang ‑nu zë 'zü 'gbɛ 'ka ‑a ‑nu ‑dhɛ, 'yö ‑dhio ‑nu dɔ‑ ‑nu ‑ta 'ö‑ ‑nu faan dɔ, kö ꞊wa "wɩ dha ‑sü ‑wɔn ‑bha kö ‑wo 'go 'wɔnyaakëmɛ ‑nu 'wo Yesu zë, 'ö Atanna dho 'wɔn bho‑ ‑nu 'gü bha‑ ‑nu kpö 'gü.
ACT 2:41 'Yö mɛ 'gbɛ 'wo 'dhang bho Atanna ‑wʋ 'ö Piɛdhö ‑ya pö bha‑ "dhiʋ̈, 'yö 'wo‑ ‑nu ‑bɔ Yesu 'ka ‑zu bho. 'Yö mɛ 'wo ꞊mɔɔ mɛ "gblü ‑yaaga ‑bha 'wo ‑da 'dhang ‑bho Yesu "dhiʋ̈ ‑mɛ ‑nu "piʋ̈ yi do bha‑ 'ka.
ACT 2:42 ‑Wo ‑gun wo faan dɔ sië ‑kpɛawo 'ö 'wo wo "tʋ to mɛ draan‑ ‑wʋ ‑nu 'ö Yesu ‑bha bɔmɛ ‑nu gun‑ ‑zɔn sië‑ ‑nu ‑dhɛ bha‑ ‑bha. 'Ö‑ ‑nu ‑kɔ ‑yö ‑kë 'wɔn do ‑bha, 'ö‑ ‑nu ‑bha ‑dhië gun do, ('yö 'wo to mü 'wo kwa Dëmɛ Yesu ‑bha ‑bhöpë ‑bhö), ‑a ‑nu ‑bha ‑bhɛa Atanna ‑dhɛ ‑sü ‑nu bha 'wo‑ ꞊gban ‑kë wo "kwëë.
ACT 2:43 "Suʋ̈‑ ‑gun mɛ ꞊gban "pɛpɛ 'gü, 'ö 'wo 'dhang ‑bho Yesu "dhiʋ̈ ‑mɛ ‑nu ꞊bhlëë ‑ya "dhabhliwɔn "gblʋ̈gblʋ̈ ‑nu waa‑ ‑kian ‑wɔn 'gbɛ ‑nu 'ö‑ ‑bha bɔmɛ ‑nu gun‑ kë sië bha‑ ‑wɔn 'gü.
ACT 2:44 'Dhang ‑bho Yesu "dhiʋ̈ ‑mɛ ‑nu ‑gun wo kpö 'ka "dhʋ̈ do, 'ö‑ ‑nu ꞊slɔɔpë ꞊gban‑ gun do.
ACT 2:45 'Mɛ 'wo bha ‑wo gun woo‑ 'bhlaadhɛ ‑nu, "ɛɛn pë ‑nu 'ö‑ ‑nu ꞊slɔɔpë 'ka ‑a ‑nu "dhɔɔ dɔ sië 'yö 'wo‑ ‑naɔ ꞊loo 'ko ‑ta, 'yö 'pë 'ö ꞊mɔɔ 'mɛ 'ö "dhʋ̈ ‑a ‑bha ‑kpla ‑bho 'ka ‑pë ‑bha 'wo‑ nu‑ ‑mɛ ‑dhɛ.
ACT 2:46 'Yö 'wo ꞊loo 'ko ‑ta ‑dhɛkpaɔyi ꞊gban "pɛpɛ 'ka Zuifö ‑nu ‑bha Atanna ‑dhɔkëgükɔ 'gü, 'yö 'wo kwa Dëmɛ Yesu ‑bha ‑bhöpë ‑bhö, kö ‑wo pë ‑nu ‑bhö sië 'ko "piʋ̈ ‑a ‑nu ‑gɔ 'kɔɔdhɛ ‑nu 'gü ꞊niidadhe waa‑ zuëwaanusü 'ka.
ACT 2:47 'Yö 'wo Atanna 'tɔ bhɔ, 'yö‑ ‑nu ‑dhɔ ‑yö "sɛgümɛ ‑nu ‑kë. 'Yö kwa Dëmɛ Yesu ‑yö 'dhang bho ö "dhiʋ̈ ‑mɛ 'ö ꞊wa dha ‑a ‑da ‑a ‑nu "piʋ̈ yi ꞊gban "pɛpɛ 'ka.
ACT 3:1 Yi do 'ka kö Piɛdhö waa‑ Zan ‑wo 'dho sië Zuifö ‑nu ‑bha Atanna ‑dhɔkëgükɔ 'gü kö 'yënng‑ ꞊ya 'kpɔ mɛ ‑gɔ 'ka ‑a ‑nu ‑bha ‑bhɛa Atanna ‑dhɛ "tʋ̈ng 'gü,
ACT 3:2 'yö 'wo ‑gɛnloomɛ do yö kö ‑yö ‑ya ‑sü 'ka 'kɔdhi 'dhɛ 'wo‑ ‑dhɛ 'kɔdhi ‑sësü bha‑ "dhiʋ̈. Gɔndë bha ‑yö ‑bhɔ ö ‑bha "yua bha‑ 'ka. ‑Wo ‑nu 'ka ‑dhɛkpaɔyi ꞊gban "pɛpɛ 'ka 'wo‑ ‑ya mü kö ‑yö 'wëëga ‑gbadhɛ 'mɛ 'wo ‑da sië Atanna ‑dhɔkëgükɔ 'gü bha ꞊në‑ ‑nu ‑gɔ.
ACT 3:3 'Yö Piɛdhö waa‑ Zan ‑nu yö kö ‑wo 'dho sië Atanna ‑dhɔkëgükɔ 'gü, 'yö gba ‑dhɛ ‑a ‑nu ‑gɔ.
ACT 3:4 'Yö Piɛdhö waa‑ Zan 'wo‑ ‑ga zuudhö, 'yö Piɛdhö ‑ya pö‑ ‑dhɛ: «‑Bhö ‑dhɛ ‑ga ꞊zɔɔ!»
ACT 3:5 'Yö gɔɔn‑ bha 'ö ö "yan "dhiʋ̈ ꞊wlü 'yö‑ ‑nu ‑ga ‑së 'ka, ‑a ‑gɛn ‑mü ꞊dhɛ kö ‑yö ö ‑zʋ 'gɔn sië ꞊dhɛ ‑wo ‑dho pë 'bha nu ö ‑dhɛ.
ACT 3:6 'Yö Piɛdhö ‑ya pö‑ ‑dhɛ 'zü 'ö‑ pö: «'Wëëga 'yaa n ‑gɔ kö 'a‑ nu i ‑dhɛ "kɛɛ pë 'bha ‑yö n ‑gɔ, a ‑dho yö ‑zë nu i ‑dhɛ: Yesu Klisi 'ö go Nazadhɛtö bha‑ 'tɔ 'gü, ‑bhö "wlü kö 'i "ta!»
ACT 3:7 ꞊Dhɛ 'ö ꞊yaa‑ pö "dhʋ̈ 'yö gɔɔn‑ bha‑ kun‑ kwɛɛ" 'ka, 'yö‑ ꞊wlü, 'yö‑ ‑gɛn ‑yö dɔ dingdhö ‑a ꞊wlöö,
ACT 3:8 'yö ‑wlö 'ö ‑gban ö ‑gɛn bha‑ ‑ta, 'yö ‑ya "ta 'sü ‑sü ‑bha. 'Yö waa‑ Yesu ‑bha bɔmɛ ‑nu 'wo ‑da Atanna ‑dhɔkëgükɔ 'gü kö ‑yö "ta 'sü sië, kö ‑yö ‑wlö sië, kö ‑yö Atanna 'tɔ bhɔ sië.
ACT 3:9 Mɛ "pɛpɛ 'wo gun 'mü ‑wa ‑yö kö ‑yö "ta 'sü sië Atanna 'tɔ bhɔ ‑sü 'ka.
ACT 3:10 ꞊Dhɛ 'ö ꞊waa‑ ‑ga 'ö ꞊waa‑ dɔ ꞊dhɛ 'mɛ 'ö gun ‑ya ‑sü 'ka Atanna ‑dhɔkëgükɔ "dhi ‑sësü "dhiʋ̈, 'ö gun gba ‑dhɛ sië bha yö mü, 'yö "suʋ̈ 'dhö ‑da ‑nu 'gü 'yö 'wɔn 'ö ‑kë ‑dhɛ bha‑ 'wɔn ‑ya ‑nu kɔn.
ACT 3:11 Gɔndënë bha 'yii go Piɛdhö waa‑ Zan ‑a ‑nu ꞊keng‑, ‑a ‑wɔn 'gü mɛ kpö 'wo gun Atanna ‑dhɔkëgükɔ 'gü bha 'mɛ bha‑ ‑kë "klʋ̈ʋ̈klʋ̈ ‑wɔn bha 'yö‑ 'wɔn ‑ya ‑nu kɔn ꞊dedewo, 'yö 'wo ‑bɛang sü 'wo nu‑ ‑nu ‑zian 'ka 'kɔ "gbɛɛtazëdhɛ 'dhɛ 'wo‑ ‑dhɛ Sadhomɔ ‑bha 'kɔ "gbɛɛtazëdhɛ bha‑ 'gü.
ACT 3:12 ꞊Dhɛ 'ö Piɛdhö ꞊yaa‑ ‑nu yö, 'yö‑ pö‑ ‑nu ‑dhɛ: «Izraɛdhö ‑mɛ ‑nu, ‑më 'ö ‑kë 'yö 'mɛ ya‑ ‑kë "klʋ̈ʋ̈klʋ̈ ‑sü ‑wɔn ‑yö ka kɔn? ‑Më 'ö ‑kë 'yö 'ka yi ‑ga ꞊dhɛ 'pë yi ꞊në 'yi gɔndënë ya‑ ‑bha "yua bo yi ‑dɩ ‑bha 'gügbɩɩdhɛ "ɛɛn yi ‑dɩ ‑bha ‑kplü Atanna ‑bha ‑kɔ ‑së 'ka ‑a 'dhö?
ACT 3:13 Ablaamö, Izaakö waa‑ Zakɔbö ‑a ‑nu ‑bha Atanna 'ö ‑kë kwa "bhɛma ‑nu ‑bha Atanna 'ka bha ꞊në‑ ‑kë kö mɛ ‑nu ‑wo ö ‑bha yëkëmɛ Yesu 'tɔ bhɔ ('yö‑ ‑bö 'ö‑ bho ga 'gü). Yesu 'ö "dhʋ̈ bha Zuifö ‑nu kaa ꞊dede ka kë‑ ‑kun 'ka‑ dɔ kaa‑ "sɛgɔdhiʋ̈mɛ ‑nu ‑gɔ, 'ö 'ka 'wɔn yaa ‑nu pö‑ ‑bha Pidhatö ‑kuu "dhiʋ̈, "kɛɛ kö yö ‑zë ‑ya "piʋ̈ ꞊dhɛ 'ö ö kwaa‑ ‑zü.
ACT 3:14 'Ö 'kii "wɩ mɛ 'ö "slʋ̈ʋ̈slʋ̈, 'ö pö 'aa‑ ‑bha Atanna wëëdhö bha‑ ‑wɔn ‑bha, 'ö 'ka 'mɛ yö ‑zë 'ö ‑kë mɛzëmɛ 'ka bha ꞊në‑ ‑dhɛ Pidhatö ‑gɔ kö ‑ya bho ‑kaso 'gü ka ‑dhɛ.
ACT 3:15 'Yö 'ka 'mɛ 'ö ‑tosɛadhe nu mɛ ꞊gban "pɛpɛ ‑dhɛ bha‑ zë ‑kɔ bha‑ 'gü. "Kɛɛ Atanna ‑ya ‑bho ga 'gü, yi‑ "sɛɛ‑ 'ka.
ACT 3:16 'Mɛ 'ka‑ dɔ 'kpakpadhö 'ö ‑ya ya, 'gügbɩɩdhɛ 'ö Yesu 'tɔ 'gü bha ꞊në‑ gba faan 'ka 'yö 'ka‑ ‑ga sië bha. ‑Zʋ ‑yö Yesu ‑dhɛ ‑sü ꞊në gɔndënë ya‑ ‑bha "yua bo 'kpakpadhö mɛ ꞊gban "pɛpɛ ka "yaan bha.
ACT 3:17 ꞊Dhɛ 'ö "dhʋ̈, n dheebhang ‑nu, 'a‑ ‑dɔ ꞊dhɛ 'wɔn kaa‑ ka ‑gɔmɛ ‑nu 'ka‑ ‑kë Yesu 'ka "dhʋ̈ bha 'kaa‑ 'wɔn ꞊në‑ dɔ.
ACT 3:18 "Kɛɛ ‑yö ‑kë "dhʋ̈ kö 'pë 'ö Atanna ‑yö bɔ ö ‑wʋdhiʋ̈loomɛ ꞊gban "pɛpɛ ‑ta 'ö‑ pö bha‑ 'gü ‑wɔn ꞊në ‑yö kë. Yö ‑mü ꞊dhɛ ‑a ‑bha ‑Yamɛ ‑wëëdhɛ ‑dho bho.
ACT 3:19 ‑A ‑wɔn 'gü, ‑ka ka zuë" slëë‑ kö 'ka ka wë ‑ya Atanna "piʋ̈ kö ‑yö kaa‑ 'wɔn yaa ‑nu ‑mawɔn 'to.
ACT 3:20 ꞊Ya kë "dhʋ̈, ‑yö ‑dho ‑ya ‑dɩ 'flëë‑ 'gü "tʋ̈ng nu ka ‑dhɛ, 'ö 'mɛ 'ö ꞊yaa‑ ‑ya 'nu "pɛpɛdhö ka Dhamɛ 'ka 'ö ‑kë Yesu 'ka bha‑ nu ka ‑dhɛ.
ACT 3:21 ꞊Ya 'go yö ‑zë 'gü, Yesu Klisi ‑dho 'to dhang‑ 'gü 'ö dho‑ 'ka "dhʋ̈ 'ö zun‑ 'ka pë ꞊gban "pɛpɛ kë ‑dee "tʋ̈ng 'ö Atanna ‑yö bɔ‑ 'ka ö ‑wʋdhiʋ̈loomɛ 'ö‑ ‑nu ‑ya ‑dɩ ‑ta bha‑ ‑nu ‑ta, 'ö‑ pö 'ö‑ yi ꞊ya ꞊gwëë bha‑ ‑bha.
ACT 3:22 'Yö Yesu ‑wɔn dhiang zë‑ ‑nu ‑dhɛ 'ö‑ pö: «Moizö kë‑ ‑pö yö ꞊në‑ ‑bu 'gü yi 'bha 'ka 'ö‑ pö: ‹Kwa Dëmɛ, kwa ‑bha Atanna ‑dho ö ‑wʋdhiʋ̈loomɛ 'ö ꞊dhɛ n 'dhö ‑a sü ka ꞊zinng 'gü 'ö‑ bɔ ka ‑dhɛ. 'Wɔn "pɛpɛ 'ö dho‑ pö ka ‑dhɛ bha ‑kaa ma!
ACT 3:23 Mɛ "ʋʋ mɛ 'ö 'yii‑ ‑wʋ ma, ‑yö ‑dho 'go Atanna ‑bha mɛ ‑nu ꞊zinng 'gü 'ö‑ 'gü ‑yö ꞊see› bha.»
ACT 3:24 Atanna ‑wʋdhiʋ̈loomɛ ‑nu "pɛpɛ 'ö go‑ 'ka Samiɛdhö ‑bha 'ö zun‑ 'ka ꞊dɛɛ ‑bha, ‑a ‑nu ꞊gban "pɛpɛ ‑wo 'wɔn 'ö ‑gban 'yi bha‑ ‑bha bha‑ ‑dhiang ‑zë.
ACT 3:25 'Pë 'ö Atanna ‑ya "plüün bho 'ö bɔ‑ 'ka ö ‑wʋdhiʋ̈loomɛ ‑nu ‑ta bha ‑yö ka ‑bha 'ka, 'ö ‑nëngkwëëdhe 'ö‑ ‑da waa‑ ka "bhɛma ‑nu wo ꞊zinng 'gü bha 'ö ka ‑bha 'ka 'pö. ‑A ‑gɛn ‑mü ꞊dhɛ ‑ya ‑pö Ablaamö ‑dhɛ 'ö‑ pö: ‹A ‑dho bɔ i suu 'gü ‑në ‑nu ‑ta 'a 'dhuë‑ ‑kë "kpʋngtaamɛ "pɛpɛ ꞊gban ‑bha›.
ACT 3:26 Yö ꞊në‑ ‑wɔn 'gü, 'yö Atanna ‑yö ö ‑bha yëkëmɛ (Yesu) sü 'ö‑ bɔ ka ꞊në ka ‑dhɛ "dhiʋ̈ ‑blɛɛsü ꞊kö kö ‑yö 'dhuë‑ kë ka ‑bha, "kɛɛ kö ‑yö 'mɛ 'ö "dhʋ̈ ‑a ‑kɔ bho‑ këwɔn yaa ‑nu bha 'do 'do 'ka.»
ACT 4:1 Piɛdhö waa‑ Zan ‑wo ‑to dhiang ‑zë "sɛgümɛ ‑nu ‑dhɛ ‑dhɛ 'gü, 'yö "saabhomɛ ‑nu oo, "yan ‑to Zuifö ‑nu ‑bha Atanna ‑dhɔkëgükɔ ‑bha ‑mɛ ‑nu ‑gɔmɛ ‑nu waa‑ Sadusiɛn ‑nu 'wo dɔ ‑bɛang ‑bha 'wo nu.
ACT 4:2 Yesu ‑bha bɔmɛ ‑nu ‑bha "sɛgümɛ ‑nu draan‑ ‑wɔn bha 'yii dhi‑ ‑nu ‑dhɛ, ‑a ‑gɛn ‑mü ꞊dhɛ ‑wa ‑pö "sɛgümɛ ‑nu ‑dhɛ ꞊dhɛ Yesu ‑yö ‑go ga 'gü kö ‑ya ‑zɔn ꞊dhɛ 'mɛ ꞊wa ga ‑wo ‑mɔɔ ‑bha kö ‑wo 'go ga 'gü.
ACT 4:3 'Yö 'wo‑ ‑nu kun 'wo‑ ‑nu ‑da ‑kaso 'gü, 'yö 'wo ‑wɔ mü 'yö ‑dhɛ ‑yö ꞊kpaɔ. ‑A ‑gɛn ‑mü ꞊dhɛ 'wo‑ ‑nu kun kö "bin ꞊ya 'ma.
ACT 4:4 "Tʋ̈ng 'ö kë sië‑ 'ka "dhʋ̈ bha kö 'mɛ 'ö 'wɔn ‑taɔng ‑së 'ö Piɛdhö waa‑ Zan 'wo‑ pö bha 'wo‑ ma, kö‑ mɛ 'gbɛ ‑dhɛ ꞊wa 'dhang bho Yesu ‑wɔn "dhiʋ̈. 'Yö 'dhang ‑bho Yesu "dhiʋ̈ ‑mɛ ‑nu 'wo kë 'gbɛ 'wo dho 'wo ‑mɔɔ mɛ "gblü "sɔɔdhu ‑nu "sinma ‑bha.
ACT 4:5 ꞊Dhɛ 'ö‑ ‑tadhɛ ꞊ya ꞊kpaɔ, 'yö Zuifö ‑nu ‑gɔmɛ ‑nu waa‑ ‑nu ‑bha mɛ zizi ‑nu waa‑ ‑nu ‑bha 'tɔnggɔmɛ ‑nu 'wo bho 'ko ‑ta Zedhizadhɛmö 'plöö.
ACT 4:6 "Saabhomɛ 'kpii‑ 'wo‑ ‑dhɛ Anö bha‑ 'dhö, Kaifö 'dhö, Zan 'dhö, Dhɛzandrö waa‑ "saabhomɛ 'kpii‑ ‑gɔ 'kɔɔmɛ ‑nu ꞊gban "pɛpɛ ‑wo ‑gun ‑dhɛ bha‑ 'gü.
ACT 4:7 'Yö 'wo nu Yesu ‑bha bɔmɛ ‑nu bha‑ ‑nu 'ka ‑a ‑nu ‑kuu "dhiʋ̈, 'yö 'wo‑ ‑nu dhɛɛ" kpɔ 'wo‑ pö: «‑Gɛnloomɛ ya ka‑ ‑bha "yua bo ‑kɔ ‑kë ꞊dhɛ? 'Gügbɩɩdhɛ suu ‑mɛɛ ꞊në 'ka‑ bo‑ 'ka, "ɛɛn ka‑ ‑bo de 'tɔ 'gü?»
ACT 4:8 'Yö Piɛdhö 'ö 'Nii‑ "slʋ̈ʋ̈slʋ̈‑ 'dhö‑ pa ‑sü 'ka bha 'ö‑ ‑yɔ bɔ‑ ‑nu ‑gɔ 'ö‑ pö: «"Sɛkɔɔnmɛ ‑nu, mɛ zizi ‑nu,
ACT 4:9 ꞊dhɛ 'ö ‑kë ꞊dhɛ 'ka nu yi 'ka zagɔbhomɛ ‑kuu "dhiʋ̈, 'ö‑ ‑gɛn 'yii kë 'wɔn "wɛɛ 'bha ‑zë 'ka 'ö ‑kë "ta 'yi‑ wo ‑gɛnloomɛ ya‑ ‑dhɛ 'yi‑ ‑bha "yua bo bha ꞊në‑ 'ka, 'yö 'ka yi dhɛɛ" 'kpɔ sië 'zü ‑a dha ‑kɔ 'ka bha,
ACT 4:10 ‑yö ‑së kö 'ka‑ ‑gɛn ma, kö Izraɛdhö ‑mɛ ‑nu ꞊gban "pɛpɛ ‑wa dɔ 'pö. Gɔndënë bha kë 'ö‑ wo "klʋ̈ʋ̈klʋ̈ 'kpakpadhö 'ö ka "yan 'dhö‑ ‑bha 'ö dɔ bha ‑ya ‑wo 'gügbɩɩdhɛ 'ö Yesu Klisi 'ö go Nazadhɛtö, 'ö 'ka‑ dɔ "dhü ‑bha 'ka‑ zë, 'ö Atanna ‑ya bho ga 'gü bha‑ 'tɔ bha ꞊në‑ 'saa‑ 'gü.
ACT 4:11 Yesu 'ö 'wɔn 'ö ‑gban ‑bha 'ö ‑bɛn zë ‑sü 'ka Atanna ‑bha 'sëëdhɛ 'gü ꞊dhɛ: ‹‑Gwë 'ö 'kɔdɔmɛ ‑nu 'ka ka ꞊kwaa‑ ‑zü bha ꞊në ꞊ya kë 'kɔ "kpan ‑ya ‑ta ‑gwë 'ka bha yö ‑mü›.
ACT 4:12 Yöö doseng ꞊në dha ‑sü ‑yö ꞊slɔɔ‑ "piʋ̈, ‑a ‑gɛn ‑mü ꞊dhɛ 'tɔ "wɛɛ 'bha kö dho kë "kpʋng ꞊taa kö 'kwa bɔ‑ ‑ta 'kwa dha 'yaa 'dhö.»
ACT 4:13 ꞊Dhɛ 'ö ꞊wa Piɛdhö waa‑ Zan ‑nu dhiang zë ‑kɔ bha‑ yö ‑zʋgbandhe 'ka, ‑a 'wɔn ‑ya ‑nu ‑kɔn, ‑a ‑gɛn ‑mü ꞊dhɛ ‑a ‑nu ꞊bhlëë 'yaa gun "ɛɛn 'zü 'wii ꞊klang 'bha kë kö woo pë dɔ, 'pë 'mɛ 'kö 'wo bha 'wo‑ dɔ doseng yö ‑mü ꞊dhɛ ‑wo ‑gun Yesu ꞊keng‑.
ACT 4:14 "Kɛɛ ꞊dhɛ 'ö ‑kë ꞊dhɛ 'mɛ 'ö ‑kë "klʋ̈ʋ̈klʋ̈ bha ‑yö ‑gun dɔ ‑sü 'ka‑ ‑nu "sɔɔ mü, 'ö‑ ‑nu "yan ‑yö gun‑ ‑bha bha, 'pë 'wo dho‑ pö 'wii‑ ꞊slɔɔ.
ACT 4:15 ꞊Dhɛ 'ö ꞊ya kë "dhʋ̈ 'yö 'wo‑ pö Piɛdhö waa‑ Zan ‑nu ‑dhɛ ‑wo zun "kpɛnng. ꞊Dhɛ 'ö ꞊wa zun "kpɛnng, ‑yö zagɔbhomɛ ‑nu 'wo wo ‑gɔ dun 'pë 'wo dho‑ kë Piɛdhö waa‑ Zan ‑a ‑nu 'ka ‑a ‑wɔn 'gü.
ACT 4:16 'Yö 'wo‑ pö wo 'ko ‑nu ‑dhɛ: «‑Më ꞊dede ꞊në 'kwa dho ꞊mɔɔ‑ ‑bha 'kwa‑ kë 'mɛ 'wo ya‑ ‑nu 'ka? 'Mɛ 'wo Zedhizadhɛmö ‑pö ya‑ 'gü ‑a ‑nu ꞊gban "pɛpɛ ‑wa 'wɔn ‑dɔ ꞊dhɛ "dhabhliwɔn 'kpii‑ 'ö ‑kë ya wo ꞊në 'wo‑ ‑kë, yii ‑dɩ 'pö 'yii 'dho ꞊mɔɔ‑ ‑bha kö 'yi zaɔdhe ‑da ‑bha.
ACT 4:17 "Kɛɛ kö 'wɔn bha 'ya 'dho ‑pɛn ‑dhɛ ꞊gban "pɛpɛ 'gü, ‑ka ‑kwa ‑ya ‑a ‑nu "yan 'gü kö 'kwa‑ pö‑ ‑nu ‑dhɛ glɔglɔdhö ꞊dhɛ 'wa 'dho dhiang zë mɛ 'bha ‑dhɛ 'zü Yesu bha‑ 'tɔ 'gü!»
ACT 4:18 'Yö 'wo Piɛdhö waa‑ Zan ‑a ‑nu ‑dhɛ, 'yö 'wo‑ pö‑ ‑nu ‑dhɛ glɔglɔdhö ꞊dhɛ ‑wo wo bo mɛ ‑nu ꞊klang kë ‑sü waa‑ dhiang ‑zë mɛ ‑nu ‑dhɛ ‑sü 'ö Yesu 'tɔ 'gü bha‑ 'ka tongtongdhö.
ACT 4:19 "Kɛɛ 'yö Piɛdhö waa‑ Zan 'wo‑ pö‑ ‑nu ‑dhɛ: «Kaa ꞊dede ‑kaa ‑ga, ‑yö ‑së Atanna wëëdhö kö 'yi ka ꞊bhlëë ‑ya kö ‑yö ziö yö ‑zë ‑bha ‑ta ‑ee?
ACT 4:20 ‑Abin! Yi ‑zë 'yii 'dho ꞊mɔɔ‑ ‑bha kö 'yi yi bo 'wɔn 'yi‑ yö, "ɛɛn 'yi‑ ma ‑a pö ‑sü 'ka!»
ACT 4:21 'Yö zagɔbhomɛ ‑nu 'wo "suʋ̈ ‑da ‑nu 'gü 'zü ‑deewo, 'yö 'wo wo ꞊kwaa‑ ‑nu ‑zü 'wo dho. 'Yö 'wii‑ ‑nu ‑wëëdhɛ bho ‑dhɛ yö, ‑a ‑gɛn ‑mü ꞊dhɛ kö "sɛgümɛ ‑nu ꞊gban "pɛpɛ ‑wo Atanna 'tɔ bhɔ sië 'wɔn 'ö ‑kë bha‑ ‑wɔn 'gü.
ACT 4:22 'Mɛ 'ö‑ ‑dhɛ ‑yö bo "dhabhli 'gü "dhʋ̈ bha 'ö gun "dhʋ̈ kö‑ ‑kwɛ ꞊ya ziö ‑kwɛ ‑kaɔng ‑yiisiö ‑ta.
ACT 4:23 ꞊Dhɛ 'ö ꞊wa wo kwaa‑ ‑nu ‑zü, 'yö Piɛdhö waa‑ Zan 'wo dho woo‑ mɛ ‑nu "piʋ̈, 'yö ‑wʋ 'ö "saabhomɛ ‑gɔmɛ ‑nu waa‑ mɛ zizi ‑nu 'wo‑ pö‑ ‑nu ‑dhɛ bha 'wo‑ ‑gɛn dɔ 'pö‑ ‑nu ‑dhɛ.
ACT 4:24 ꞊Dhɛ 'ö ꞊wa 'wɔn bha‑ ma, 'yö 'dhang ‑bho Yesu "dhiʋ̈ ‑mɛ ‑nu 'wo wo ‑wʋ ‑kë do 'yö 'wo ꞊bhɛa Atanna ‑dhɛ 'wo‑ pö: «Yi Dëmɛ, bhi ꞊në 'i dhang‑ 'dhö, "sɛ 'dhö, "yi waa‑ ‑nu 'güpë "pɛpɛ ꞊gban ‑da.
ACT 4:25 Bhi ꞊në 'i bɔ yi "bhɛma Davi 'ö ‑kë i ‑bha yëkëmɛ 'ka bha‑ 'gü yi 'bha 'ka, 'yö 'i‑ pö i ‑bha 'Nii‑ "slʋ̈ʋ̈slʋ̈ ‑wʋ 'ka ꞊dhɛ: ‹‑Më ꞊në ‑kë 'yö 'wɔn ‑siö mɛ ‑dhɛ ‑kɔ suu ya 'ö ‑da 'mɛ 'waa Zuifö 'ka‑ ‑nu 'gü? ꞊Wa "kpënng‑ kë kwa Dëmɛ ‑gɔ, "kɛɛ ‑a ‑nu ‑kɔ 'yii ꞊mɔɔ‑ ‑bha kö ‑wa 'gü ‑wɔn kë.
ACT 4:26 "Kpʋng ꞊taa ‑gblüdë ‑nu ꞊wa dɔ‑ ‑gɔ ꞊gɔɔn ‑yan 'gü, 'yö ‑gɔmɛ ‑nu ꞊wa wo zü 'ma 'koo kwa Dëmɛ Atanna waa‑ ‑bha ‑Yamɛ 'ö‑ pö ö dho ‑a bɔ mɛ "bhɩɩ‑ ‑nu ‑dhɛ bha‑ ‑nu ‑gɔ›.
ACT 4:27 ‑A ‑gɛn ‑mü ꞊dhɛ ‑yö tɛan‑ ꞊dede 'ka ꞊dhɛ Edhodö 'dhö, Pidhatö waa‑ mɛ 'bha ‑nu 'ö 'waa Zuifö 'ka ‑a ‑nu 'dhö, Izraɛdhö ‑mɛ ‑nu 'dhö, ‑a ‑nu ꞊gban "pɛpɛ ‑wo kë ‑loo wo 'ko ‑ta 'pödhɛ ya‑ 'gü i ‑bha yëkëmɛ "slʋ̈ʋ̈slʋ̈ Yesu 'ö i ‑bha ‑Yamɛ 'ka bha‑ ‑gɔ.
ACT 4:28 'Yö 'wo pë "pɛpɛ 'i ‑wɩ ‑bha "dhiʋ̈ yi 'bha 'ka i ‑bha 'gügbɩɩdhɛ 'gü, 'ö ‑kë i ‑dhidhɛwɔn 'ka bha‑ ‑kë ‑kɔ bha‑ 'gü.
ACT 4:29 ꞊Dhɛ 'ö "dhʋ̈, yi Dëmɛ, ‑bhö ‑a ‑nu ‑bha "suʋ̈ ‑da yi 'gü ‑wʋ ‑nu ya‑ ‑nu ‑ga kö 'i "wɩ‑ ‑bha 'mɛ 'yi kë i ‑bha yëkëmɛ ‑nu 'ka ya yi ‑gɔ kö 'yi i ‑wʋ pö ‑zʋgbandhe 'ka mɛ ‑nu ‑dhɛ.
ACT 4:30 ‑Bhö i ‑bha 'gügbɩɩdhɛ ‑zɔn mɛ ‑nu ‑dhɛ, "yua ‑bho mɛ ‑bha ‑sü waa‑ "dhabhliwɔn ‑nu kë ‑sü 'ka i ‑bha yëkëmɛ "slʋ̈ʋ̈slʋ̈ Yesu bha‑ 'tɔ 'gü.»
ACT 4:31 ꞊Dhɛ 'ö ꞊wa wo bo ‑bhɛa Atanna ‑dhɛ ‑sü 'ka ꞊dhɛ ‑kɔ bha‑ 'dhö, 'yö ‑dhɛ 'wo gun ‑ya ‑sü 'ka‑ 'gü bha 'ö ‑ya ꞊zii ‑sü ‑bha, 'yö‑ ‑nu ꞊gban "pɛpɛ 'wo pa 'Nii‑ "slʋ̈ʋ̈slʋ̈ 'ka, 'yö 'wo ‑ya Atanna ‑wʋ pö ‑sü ‑bha ‑zʋgbandhe 'ka mɛ ‑nu ‑dhɛ.
ACT 4:32 'Dhang ‑bho Yesu "dhiʋ̈ ‑mɛ ‑nu kpö 'wo bha‑ ‑nu ‑zʋgɔngüwɔn ‑gun do, ‑a ‑nu ‑dhidhɛwɔn ‑gun do. ‑A mɛ 'bha 'yii‑ pö pë 'bha ‑bha ꞊dhɛ mang do n ‑bha ‑mü, "kɛɛ pë 'dhö 'mɛ 'dhɛ‑ ‑gɔ, ‑wa ‑loo 'ko ‑ta 'yö ‑kë ‑a ‑nu ꞊gban ‑bha 'ka.
ACT 4:33 Yesu ‑bha bɔmɛ ‑nu bha ‑wo kwa Dëmɛ Yesu ‑bha ‑go ga 'gü ‑sü ‑dhiang ‑zë 'gügbɩɩdhɛ ꞊dede 'ka; 'yö Atanna ‑yö 'dhang ‑bho Yesu "dhiʋ̈ ‑mɛ ‑nu ‑kaɔwɔn ‑dhi ꞊dedewo.
ACT 4:34 Pë 'bha ‑saan 'yaa gun mɛ 'bha ‑bha ‑a ‑nu kpö 'gü, ‑a ‑gɛn ‑mü ꞊dhɛ 'mɛ 'ö 'bhlaadhɛ ‑nu 'wo‑ ‑nu ‑gɔ waa‑ 'kɔ ‑nu 'dhö ‑wa "dhɔɔ ‑dɔ, 'ö 'wo dho‑ 'wëëga 'ka Yesu ‑bha bɔmɛ ‑nu ‑dhɛ, 'yö 'wo‑ ‑wɛɛ bho kö ‑wa 'gü ‑gblü wo 'ko ‑ta, 'yö 'mɛ 'ö 'dhö ‑a ‑ma ‑wɔn 'dhö zun 'wëëga 'ö‑ ‑bha, 'yö‑ pö, 'yö 'wo‑ nu‑ ‑mɛ ‑dhɛ.
ACT 4:36 Zosɛfu 'ö ‑kë Dhevi ‑gɔ "kwɛan‑ 'gü 'në do 'ka 'ö bhɔ Siplë 'ö Yesu ‑bha bɔmɛ ‑nu ‑wa 'tɔ kpɔ (glɛkö ‑wʋ 'gü) 'wo‑ ‑dhɛ Baanabasö, ('ö ꞊waa‑ pö "dhʋ̈ kö ‑wa ‑pö mɛ faandɔmɛ bha)
ACT 4:37 ‑Yö ö ‑bha 'bhlaa‑ do "dhɔɔ dɔ ‑kɔ bha ꞊në‑ 'gü 'yö nu‑ 'wëëga 'ka Yesu ‑bha bɔmɛ ‑nu ‑dhɛ.
ACT 5:1 "Kɛɛ 'yö gɔndënë do 'wo‑ ‑dhɛ Ananiasö, 'wo‑ ‑bha dhebhɔ ‑dhɛ 'pö Safiidha bha 'wo ꞊mɔɔ‑ 'gü, 'yö 'wo wo ‑bha ‑dhɛ do "dhɔɔ dɔ.
ACT 5:2 ‑A 'wëëga bha 'yö Ananiasö ‑ya 'bha ‑gblɛn kpɔ kö ‑yö 'to wo ‑gɔ, 'yö‑ ‑kpɛa sü ö dho‑ 'ka Yesu ‑bha bɔmɛ ‑nu ‑dhɛ kö waa‑ ‑bha dhebhɔ ‑a ‑nu "yaan ‑wɔn ‑yö 'ko "yaan.
ACT 5:3 ꞊Dhɛ 'ö ꞊ya kë "dhʋ̈ 'yö Piɛdhö ‑ya pö‑ ‑dhɛ: «Ananiasö, ‑më ꞊në ‑kë 'yö 'i ‑wɩ ‑bha 'yö Sɔtraan ‑yö ‑ya i zuë" 'gü 'yö 'i ꞊sua ‑kë 'Nii‑ "slʋ̈ʋ̈slʋ̈ ‑dhɛ, 'yö ‑dhɛ 'i‑ "dhɔɔ dɔ bha 'i‑ 'wëëga 'bha ‑gblɛn kpɔ?
ACT 5:4 De ꞊në faan ‑wɔ i ‑ta kö 'i i ‑bha ‑dhɛ bha‑ "dhɔɔ dɔ? "Ɛɛn ‑a 'wëëga bha i ‑bha 'yaa ‑mü ‑ee? ‑Më ꞊në ‑kë 'yö "slë suu bha 'ö ‑da i 'gü? ꞊Sua bha 'bhii‑ kë mɛ "bhɩɩ‑ ‑zë ‑dhɛ, i‑ ‑kë Atanna ꞊në‑ ‑dhɛ bha, (i ‑dho ‑a ‑dhɛ yö).»
ACT 5:5 ꞊Dhɛ 'ö Ananiasö ‑ya ‑wʋ bha‑ ma, 'yö to 'mü 'ö ‑pö "sia‑ 'yö ga. Mɛ "pɛpɛ 'wo 'wɔn bha‑ ma, 'yö "suʋ̈ ‑ziisü ‑yö ‑da ‑nu 'gü.
ACT 5:6 'Yö 'nëglɔɔn ‑nu 'wo nu 'wo sɔ bɔ‑ ‑bha, 'yö 'wo‑ sü 'wo dho‑ 'ka 'wo‑ ‑wɛɛ bho.
ACT 5:7 ꞊Dhɛ 'ö ꞊wa ‑ya 'në 'bha wo pinngdhö, 'yö Ananiasö ‑bha dhebhɔ ‑yö ‑da 'kɔɔdhö 'pö kö 'wɔn 'ö ‑kë bha 'yaa‑ 'bha dɔ.
ACT 5:8 'Yö Piɛdhö ‑ya dhɛɛ" kpɔ 'pö 'ö‑ pö: «‑Bhö tɛan‑ ‑dhiang zë n ‑dhɛ, Safiidha, 'wëëga 'ö 'ka ka ‑bha ‑dhɛ bha‑ "dhɔɔ dɔ‑ ‑bha bha‑ ꞊gban ꞊në ya ‑ee?» 'Yö‑ pö‑ ‑dhɛ: «꞊Iin, ‑a ꞊gban ꞊në bha.»
ACT 5:9 'Yö Piɛdhö ‑ya pö‑ ‑dhɛ: «‑Më ꞊në ‑kë 'yö 'ka ka zü ma 'kʋʋ kö 'ka Atanna ‑bha 'Nii‑ 'gü dan? ‑Dhɛ ‑ga, 'mɛ 'wo 'go sië i ‑gɔn bun bho ‑dhɛ 'gü ꞊wa ꞊loo 'kɔ "kpan "dhiʋ̈, ‑wo ‑dho 'dho bhii ‑dɩ 'pö i 'ka.»
ACT 5:10 ‑Yö ‑to 'pö ‑dhɛ do bha‑ 'gü 'ö ‑pö Yesu ‑bha bɔmɛ bha‑ ꞊wlöö mü 'yö ga. 'Yö 'nëglɔɔn ‑nu do bha 'wo ‑da 'kɔɔdhö kö ꞊ya ga, 'yö 'wo‑ sü 'wo dho‑ 'ka 'wo‑ ‑wɛɛ bho‑ ‑bha gɔn "sɔɔ.
ACT 5:11 'Yö Atanna ‑bha 'kɔdhigümɛ ‑nu waa‑ mɛ "pɛpɛ 'wo 'wɔn bha‑ ma, 'yö "suʋ̈ ‑ziisü 'dhö ‑da ‑nu 'gü.
ACT 5:12 Yesu ‑bha bɔmɛ ‑nu ‑wo "dhabhliwɔn ‑nu waa‑ ‑kian ‑wɔn 'gbɛ ꞊dede ‑kë "sɛgümɛ ‑nu "yan "dhiʋ̈. 'Dhang ‑bho Yesu "dhiʋ̈ ‑mɛ ‑nu ‑wo ‑gun wo 'ko kpö 'ka ꞊dhɛ 'kɔ do 'gü ‑mɛ ‑nu 'dhö, 'kɔ "gbɛɛta zë ‑dhɛ 'wo‑ ‑dhɛ ‑dhɛ Sadhomɔ ‑bha 'kɔ "gbɛɛta zë ‑dhɛ bha‑ 'gü.
ACT 5:13 'Ö 'mɛ 'waa 'dhang bho Yesu ‑wɔn "dhiʋ̈ 'waa gun ꞊mɔɔ sië‑ ‑bha kö ‑wo ‑da ‑a ‑nu kpö 'gü, "kɛɛ ‑a ‑nu 'tɔ ‑zë ‑yö ‑gun ‑a ‑nu "dhi ‑kpɛawo.
ACT 5:14 Mɛ kpö 'gbɛ ꞊dede, dhong ‑nu waa‑ gɔɔn‑ ‑nu, ‑wo 'dhang ‑bho kwa Dëmɛ Yesu ‑wɔn "dhiʋ̈, 'ö 'wo ‑da 'dhang ‑bho ‑a "dhiʋ̈ ‑mɛ ‑nu ‑bhiëë 'gü.
ACT 5:15 "Dhabhliwɔn ‑nu 'ö 'dhang ‑bho Yesu "dhiʋ̈ ‑mɛ ‑nu gun‑ kë sië bha‑ ‑wɔn 'gü, mɛ ‑nu ‑gun nu sië wo ‑bha "yuëdhi ‑nu 'ka zian ‑glooga 'ö Piɛdhö ‑yö bɔ‑ ‑ta bha‑ "piʋ̈, 'yö 'wo‑ ‑nu ‑wɔ "gbang ‑nu waa‑ sɛɛ" ‑nu ‑ta kö Piɛdhö ꞊ya ziö, kö‑ dhɔng "fiëfiëdë ‑zë ‑yö dɔ‑ ‑nu ‑ta kö‑ ‑nu ‑bha "yua ‑yö bo.
ACT 5:16 Mɛ 'gbɛ ‑ta ‑gbɛ ‑nu ‑wo gun 'go sië 'pödhɛ ‑nu 'wo Zedhizadhɛmö ‑dhɛ ‑züzü ‑dhɛ ‑nu 'gü bha‑ ‑nu 'gü 'wo nu woo‑ "yuëdhi ‑nu 'ka, waa‑ 'mɛ 'ö "yina yaa 'dhö‑ ‑nu sëë bho sië‑ ‑nu 'dhö, 'ö‑ ‑nu ꞊gban ‑bha "yua ‑nu 'wo bo, 'ö "yina yaa ‑yö go‑ ‑nu 'gü 'pö.
ACT 5:17 ꞊Dhɛ 'ö ꞊ya kë "dhʋ̈ 'yö "saabhomɛ ‑nu ‑gɔmɛ 'kpii‑ waa‑ ö ‑bha mɛ ‑nu 'wo Zedhizadhɛmö, 'wo ‑kë Sadusiɛn ‑nu 'ka, 'yö gblɛɛn" ‑yö ma‑ ‑nu 'gü Yesu ‑bha bɔmɛ ‑nu bha‑ ‑nu ‑bha. 'Yö 'wo‑ pö 'wo 'wɔn bho‑ ‑nu 'gü.
ACT 5:18 'Yö 'wo‑ ‑nu kun 'wo‑ ‑nu ‑da ‑kaso 'gü.
ACT 5:19 ꞊Dhɛ ꞊ya dɔ gbeng, 'yö Atanna ‑bha "kië do ‑yö nu 'yö ‑kaso ‑kɔ "dhi ‑pʋ ‑a ‑nu ‑gɔ, 'yö‑ ‑nu zun "kpɛnng, 'yö‑ pö‑ ‑nu ‑dhɛ:
ACT 5:20 «‑Ka 'dho Atanna ‑dhɔkëgükɔ 'gü kö 'ka ‑tosɛa kë ‑kɔ ‑dee 'ö‑ ‑bha zian ‑ta bha‑ ‑zɔn mɛ ‑nu ‑dhɛ!»
ACT 5:21 'Yö Yesu ‑bha bɔmɛ ‑nu 'wo‑ ‑kë ꞊dhɛ ‑kɔ 'ö‑ pö‑ 'ka‑ ‑nu ‑dhɛ bha‑ 'dhö. 'Yö 'wo dho Atanna ‑dhɔkëgükɔ 'gü ‑dhɛkpaɔ tii 'gü, 'yö 'wo ‑ya mɛ draan‑ ‑sü ‑bha mü. 'Yö "saabhomɛ ‑nu ‑gɔmɛ 'kpii‑ waa‑ mɛ "pɛpɛ 'wo‑ "piʋ̈ bha 'wo Zuifö ‑nu ‑bha mɛ zizi ‑nu ‑dhɛ ‑dhɛ do 'gü kö 'wo ‑ya 'kwëë‑ kë. ("Yan ‑to Zuifö ‑nu ‑bha Atanna ‑dhɔkëgükɔ ‑bha ‑mɛ ‑nu ‑gɔmɛ ‑yö ‑gun mü 'pö). 'Yö 'wo "sɔdha ‑nu bɔ kö ‑wo 'dho Yesu ‑bha bɔmɛ ‑nu bha‑ ‑nu ‑dhɛ ‑dhɛ 'gü ‑kaso ‑kɔ 'gü.
ACT 5:22 "Kɛɛ ꞊dhɛ 'ö ꞊wa 'dho ꞊wa ꞊loo mü, 'wii‑ ‑nu yö ‑kaso ‑kɔ 'gü, 'yö 'wo wo yee ‑kë 'wo nu 'wo‑ ‑gɛn dɔ‑ ‑nu ‑dhɛ 'wo‑ pö:
ACT 5:23 «꞊Dhɛ 'yi ꞊loo mü, yi ‑kpan ‑kaso ‑kɔ "dhi ‑nu ‑bha kö ‑wo ta ‑sü 'ka ‑së 'ka, 'ö 'yi "yan ‑to 'kɔdhi ‑bha ‑mɛ ‑nu yö kö ‑wo dɔ sië 'kɔdhi ‑nu ‑bha, "kɛɛ ꞊dhɛ 'yi "kwɛɛ ‑pʋ 'yi ‑da 'kɔɔdhö 'yii‑ ‑nu yö.»
ACT 5:24 ꞊Dhɛ 'ö "yan ‑to Zuifö ‑nu ‑bha Atanna ‑dhɔkëgükɔ ‑bha mɛ ‑nu ‑gɔmɛ waa‑ "saabhomɛ ‑nu ‑gɔmɛ ‑nu 'wo 'wɔn bha‑ ma, 'yö‑ 'wɔn ‑ya ‑nu kɔn, 'yö 'pë 'wo dho‑ pö 'wii‑ dɔ, 'yö 'wo‑ pö wo 'ko ‑dhɛ: «‑Më ‑wɔn suu ꞊në ꞊ni ‑oo?»
ACT 5:25 ‑Wo ‑to mü 'yö mɛ do ‑yö ‑wo, 'yö‑ pö‑ ‑nu ‑dhɛ: «‑Ka ‑dhɛ ‑ga, 'mɛ 'ka‑ ‑nu kun 'ka‑ ‑nu ‑da ‑kaso 'gü yaan "dhiʋ̈ bha, ‑wo mɛ draan‑ sië Atanna ‑dhɔkëgükɔ 'gü tii‑ ‑dhö.»
ACT 5:26 ꞊Dhɛ 'ö ꞊ya kë "dhʋ̈, 'yö "yan ‑to Zuifö ‑nu ‑bha Atanna ‑dhɔkëgükɔ ‑bha ‑mɛ ‑nu ‑gɔmɛ waa‑ ö ‑bha mɛ ‑nu 'wo gun 'mü bha 'wo dho Yesu ‑bha bɔmɛ ‑nu bha‑ ‑nu 'kun ‑dhɛ 'gü, 'yö 'wo nu‑ ‑nu 'ka, "kɛɛ 'wii‑ ‑nu kë ‑kɔ 'bha 'gü, ‑a ‑gɛn ‑mü ꞊dhɛ kö ‑wo "suʋ̈ sië "sɛgümɛ ‑nu ‑gɔ kö 'wa 'dho wo ‑zuö ‑gwë 'ka.
ACT 5:27 ꞊Dhɛ 'ö ꞊wa nu‑ ‑nu 'ka, 'yö 'wo dho‑ ‑nu 'ka ‑ya 'kwëë‑ këdhɛ 'gü, 'yö "saabhomɛ ‑nu ‑gɔmɛ 'kpii‑ 'dhö‑ ‑nu dhɛɛ" kpɔ 'ö‑ pö:
ACT 5:28 «'Yii ‑dhio dɔ ka ‑ta 'yii‑ pö 'ka 'dho mɛ 'bha draan‑ Yesu ya‑ 'tɔ 'ka 'zü ‑ee? ‑Më ꞊në 'ka‑ ‑kë ya? 'Yö ka ‑bha mɛ draan‑ ‑wʋ ꞊ya ꞊mɔɔ Zedhizadhɛmö ‑dhɛ ya‑ 'gü ‑dhɛ ꞊gban "pɛpɛ 'gü, 'yö ka "piʋ̈ ‑zianwo ꞊dhɛ 'ka 'mɛ bha‑ ga ‑wɔn kë yi ꞊kwɛɛ‑ 'ka ya.»
ACT 5:29 'Yö Piɛdhö waa‑ Yesu ‑bha bɔmɛ ‑nu ‑kpɛa 'wo to bha 'wo‑ ‑yɔ bɔ‑ ‑gɔ 'wo‑ pö: «‑A ‑dhɛa ‑bha ꞊dhɛ 'yi Atanna ꞊në‑ ꞊bhlëë ‑ya kö ‑yö ziö‑ mɛ "bhɩɩ‑ ‑zë ‑bha ‑ta!
ACT 5:30 Yesu 'ka‑ dɔ "dhü ‑bha 'ka‑ zë bha kwa "bhɛma ‑nu ‑bha Atanna ꞊yaa‑ bho ga 'gü,
ACT 5:31 ꞊yaa‑ "wlü ꞊yaa‑ ‑ya ö ‑bha ‑yɛa ꞊bhlëësü 'gü, ꞊yaa‑ ‑ya ‑gɔmɛ 'ka Mɛdhamɛ 'ka, kë "dhʋ̈ kö Izraɛdhö ‑sɛgümɛ ‑nu ‑wo bɔ‑ ‑ta kö ‑wo wo ‑bha ‑tosɛadhe slëë‑ Atanna "piʋ̈ kö ‑wo dha ‑sü ꞊slɔɔ, kö ‑ya ‑nu ‑bha 'wɔn yaa ‑nu ‑mawɔn 'to.
ACT 5:32 Yi 'wɔn ‑nu bha‑ "sɛɛ‑ 'ka, 'Nii‑ "slʋ̈ʋ̈slʋ̈ 'ö Atanna ‑ya nu ö ꞊bhlëëyamɛ ‑nu ‑dhɛ bha ‑ya "sɛɛ‑ 'ka 'pö.»
ACT 5:33 ꞊Dhɛ 'ö ‑yakwëëkëmɛ ‑nu ꞊wa ‑wʋ bha‑ ma, 'yö ‑siö ‑nu ‑dhɛ "gbɩɩ‑ ꞊dedewo, 'yö 'wo‑ pö 'wo Yesu ‑bha bɔmɛ ‑nu zë.
ACT 5:34 "Kɛɛ Fadhiziɛn mi do‑ gun‑ ‑nu kpö 'gü mü, 'wo‑ ‑dhɛ Gamadhiɛdhö, 'ö "sɛgümɛ ‑nu ‑wa ꞊bhlëë ‑ya ꞊dedewo, 'ö kë 'pö 'tɔnggɔmɛ do 'ka, 'yö ꞊wlü ‑yakwëëkëmɛ ‑nu bha‑ ‑nu kpö 'gü mü 'ö‑ pö‑ ‑nu ‑dhɛ ‑wo Yesu ‑bha bɔmɛ ‑nu bha‑ ‑nu zun "kpɛnng 'në 'dɛdɛ wo.
ACT 5:35 ꞊Dhɛ 'ö ꞊waa‑ ‑nu zun "kpɛnng, 'yö‑ pö ‑yakwëëkëmɛ ‑nu bha‑ ‑nu ‑dhɛ: «Izraɛdhö ‑mɛ ‑nu 'ka ya, ‑ka ka ‑dɩ 'kun 'pë 'ka dho‑ kë 'mɛ 'wo ya‑ ‑nu 'ka bha‑ ‑wɔn 'gü!
ACT 5:36 Kaa ꞊dede ka‑ 'wɔn ‑dɔ 'kpakpadhö ꞊dhɛ gɔndënë 'wo‑ ‑dhɛ Tëüdasö, 'ö gun ö ‑dɩ 'sü sië mɛ ꞊bhlëësü 'ka bha ‑yö kë ‑wlü kwaa‑ "sɛ ya‑ 'gü ‑a yi 'yii ꞊gwëë ꞊kö, 'ö 'mɛ 'wo ꞊mɔɔ mɛ këng ‑yiisiö ‑nu ‑bha 'wo ‑ziö ꞊keng‑, "kɛɛ ꞊dhɛ 'ö ꞊waa‑ zë, 'yö 'mɛ 'wo gun‑ ꞊keng‑ bha 'wo ‑pɛn, 'yö‑ ‑nu ꞊gban 'wo ‑kan 'kwëë‑, 'yö ‑kë 'wɔn 'dhɛ bha‑ "dhiʋ̈todhɛ 'ka.
ACT 5:37 ꞊Dhɛ 'ö‑ 'dhɛ bha ꞊ya kë "dhʋ̈, mɛ dhʋng "tʋ̈ng 'gü 'zü, 'yö 'mɛ 'dhɛ 'wo‑ ‑dhɛ 'pö Zuda 'ö go Gadhidhe ‑sɛ 'gü bha 'ö ꞊wlü. 'Yö mɛ 'gbɛ ꞊dede gɔɔ bho 'yö 'wo ‑ziö ꞊keng‑. ꞊Dhɛ 'ö ꞊waa‑ zë 'pö, mɛ "pɛpɛ 'wo gun‑ ꞊keng‑ bha 'yö 'wo ‑pɛn 'pö.
ACT 5:38 ‑A ‑kë "dhʋ̈ ‑sü bha‑ 'gü, a‑ ‑pö ka ‑dhɛ: ‑Ka ka kwaa‑ 'mɛ bha‑ ‑nu ‑zü kö ‑wo 'dho, 'ka 'dho ka "tʋ kë‑ ‑nu ‑bha 'zü do. ‑A ‑gɛn ‑mü ꞊dhɛ ꞊ya kë ꞊dhɛ ‑a ‑nu kë "slë ‑nu waa‑ ‑nu kë ‑yë ‑nu bha ‑wo ‑go mɛ "bhɩɩ‑ ꞊në‑ 'gü, kö ‑yö ‑dho 'wü ꞊dhɛ 'mɛ 'wo bha‑ ‑nu ‑bha bha‑ 'dhö,
ACT 5:39 "kɛɛ ꞊ya kë ꞊dhɛ 'ö ‑go Atanna ꞊në‑ "piʋ̈ ꞊dedewo tɛan‑ 'ka, kö ka ‑kɔ 'yii 'dho ꞊mɔɔ‑ ‑bha kö 'ka‑ 'wü. ‑A ‑wɔn 'gü ‑kaa kë ‑së kö 'ka 'dho 'ko zë Atanna 'ka!» 'Yö ‑ya 'kwëë‑ këmɛ ‑nu bha 'wo ‑wɩ Gamadhiɛdhö ‑wʋ ‑bha.
ACT 5:40 'Yö 'wo Yesu ‑bha bɔmɛ ‑nu bha‑ ‑nu ‑dhɛ, 'yö 'wo‑ pö "sɔdha ‑nu ‑dhɛ ‑wa ‑nu ‑ma. ꞊Dhɛ ꞊wa bo‑ ‑nu ‑ma ‑sü 'ka, 'yö 'wo‑ pö‑ ‑nu ‑dhɛ 'wa 'dho dhiang zë mɛ 'bha ‑dhɛ 'zü Yesu 'tɔ 'gü, 'yö 'wo wo ꞊kwaa‑ ‑nu ‑zü.
ACT 5:41 'Yö Yesu ‑bha bɔmɛ ‑nu 'wo go ‑ya 'kwëë‑ bha‑ ‑dhɛ 'gü ꞊niidadhe ꞊dede 'ka, ‑a ‑gɛn ‑mü ꞊dhɛ 'yiʋ̈‑ ‑dɔ ‑nu ‑bha ‑sü 'ö Yesu 'tɔ ‑wɔn 'gü bha ꞊në‑ ‑nu ꞊bhlëë ‑kë Atanna wëëdhö.
ACT 5:42 'Yö 'wo mɛ ‑nu ꞊draan ‑kpɛawo yi ꞊gban "pɛpɛ 'ka Atanna ‑dhɔkëgükɔ 'gü ‑dhɛ waa‑ 'kɔ "wɛɛ 'gü ‑dhɛ ‑nu 'gü 'wɔn ‑taɔng ‑së 'ö ‑gban ‑a ‑bha ‑Yamɛ Yesu ‑wɔn ‑bha bha‑ 'ka.
ACT 6:1 ‑A "tʋ̈ng bha‑ 'gü, ꞊dhɛ 'ö ‑kë ꞊dhɛ 'dhang ‑bho Yesu ‑wɔn "dhiʋ̈ ‑mɛ ‑nu ‑gun ‑da sië‑ "dhiʋ̈ ‑kpɛawo, 'yö "dhinaa ‑yö ‑da Zuifö ‑nu 'wo bhɔ "sɛ "wɛɛ 'gü 'wo glɛkö ‑wʋ pö waa‑ mɛ 'dhɛ 'wo bhɔ Zuifö ‑sɛ 'gü ‑a ‑nu ꞊zinng 'gü. Mɛ 'dhɛ 'wo glɛkö ‑wʋ pö bha, ‑wa ‑pö ꞊dhɛ 'waa ‑bhöpë nu woo‑ ꞊gɛandhe ‑nu ‑dhɛ ꞊dhɛ ‑kɔ 'wo‑ nu 'ka 'mɛ 'wo to ‑a ‑nu ‑dhɛ bha‑ 'dhö yi "pɛpɛ 'wo ‑bhöpë 'gü ‑gblü 'ka bha‑ ꞊gban 'ka.
ACT 6:2 'Yö Yesu ‑bha bɔmɛ ‑nu ‑kaɔng do ga ꞊plɛ bha 'wo 'dhang ‑bho Yesu "dhiʋ̈ ‑mɛ ‑nu ꞊gban ‑dhɛ ‑dhɛ do 'gü, 'yö 'wo‑ pö‑ ‑nu ‑dhɛ: «Yi dheebhang ‑nu, 'yaa ‑së kö 'yi yi kwaa‑ Atanna ‑wʋ pö ‑sü ‑zü kö 'yi yi ‑zʋ kë ‑bhöpë ‑wɔn "piʋ̈! ꞊Dhɛ 'ö "dhʋ̈, ‑ka mɛ "saɔplɛ 'ö mɛ "pɛpɛ ꞊gban 'wo‑ ‑nu 'tɔ ‑së pö, 'ö 'Nii‑ "slʋ̈ʋ̈slʋ̈ 'dhö‑ ‑nu pa ‑sü 'ka, 'ö 'wo ꞊kpaɔsü ‑a ‑nu 'sü ka ꞊zinng 'gü kö yë 'dhɛ bha 'yi‑ dɔ‑ ‑nu ‑kɔ 'ka.
ACT 6:4 Yö ꞊në ꞊ya kë "dhʋ̈, 'yö yi ‑kɔ dho ꞊mɔɔ‑ ‑bha kö 'yi bhɛa" Atanna ‑dhɛ "ɛɛn kö 'yi‑ ‑wʋ pö "tʋ̈ng ꞊gban "pɛpɛ 'gü kö 'yi 'dho‑ 'ka "dhiʋ̈ ‑kpɛawo.»
ACT 6:5 ‑A pö 'wo‑ wo "dhʋ̈ bha 'yö‑ "dhia ‑yö ma mɛ kpö bha‑ ‑nu 'gü ꞊dedewo, 'yö 'wo Etiɛnö 'ö pa ‑sü 'ka 'Nii‑ "slʋ̈ʋ̈slʋ̈ waa‑ ‑zʋ ‑yö Atanna ‑dhɛ ‑sü 'ka bha‑ 'dhö, Fidhipö 'dhö, Plosɔdhö waa‑ Nikanɔɔ 'dhö, Timɔ waa‑ Paamenasö 'dhö, Nikodha 'ö go Angtiɔsö 'ö ö zuë" ꞊slëë Zuifö ‑nu ‑bha bhɛa" ‑kɔ 'ö gun "dhiʋ̈ ‑blɛɛsü ‑a 'gü bha‑ ‑nu sü.
ACT 6:6 'Yö 'wo‑ ‑nu ‑zɔn Yesu ‑bha bɔmɛ ‑nu ‑dhɛ, 'yö 'wo ꞊bhɛa Atanna ‑dhɛ ‑a ‑nu ‑wɔn 'gü, 'yö 'wo wo ‑kɔ kpa‑ ‑nu ‑ta (kö ‑ya ‑nu ‑kaɔwɔn dhi).
ACT 6:7 ꞊Dhɛ 'ö ꞊ya kë "dhʋ̈, Atanna ‑wʋ ‑yö ‑dho "dhiʋ̈ ‑kpɛawo 'yö 'dhang ‑bho Yesu "dhiʋ̈ ‑mɛ ‑nu 'bha 'dhö ‑da ‑ta ‑kpɛawo 'pö Zedhizadhɛmö ‑pö 'gü, 'yö "saabhomɛ ‑nu 'gbɛ ꞊dede 'wo ‑wɩ ‑bha kö 'wo wo ‑zʋ yö Yesu ‑dhɛ.
ACT 6:8 Etiɛnö bha Atanna ‑bha 'dhuë‑ waa‑ ‑bha 'gügbɩɩdhɛ ‑wo ‑gun pa ‑sü 'ka. ‑A ‑wɔn 'gü ‑yö ‑gun "dhabhliwɔn "gblʋ̈gblʋ̈ ‑nu waa‑ ‑kian ‑wɔn ‑nu kë sië.
ACT 6:9 ꞊Dhɛ 'ö ‑kë "dhʋ̈, 'yö mɛ 'bha ‑nu 'wo zaɔdhe ‑da Etiɛnö 'ka. 'Mɛ 'wo "dhʋ̈ bha‑ mɛ 'bha ‑nu ‑kë Zuifö ‑nu ‑bha ‑yakwëëkëgükɔ 'gü ‑mɛ ‑nu 'wo‑ ‑nu ‑dhɛ «‑go ꞊dhuëngdhɛ 'gü ‑mɛ ‑nu» bha ꞊në‑ 'ka. 'Mɛ 'wo "dhʋ̈ bha ‑wo ‑go Sidhɛnö ‑pö waa‑ Dhɛzandri ‑pö ‑nu 'gü, 'yö waa‑ Zuifö 'bha ‑nu 'ö 'waa wo ‑zë ‑a ‑nu ‑dhɛ "dhʋ̈, "kɛɛ 'wo go Sidhisi ‑dhɛ waa‑ Azi ‑dhɛ ‑nu 'gü 'pö bha waa‑ Etiɛnö ‑nu 'wo ‑ya zaɔdhe ‑da ‑sü ‑bha wo "kwëë.
ACT 6:10 "Kɛɛ ‑a ‑nu "dhi ‑yö ‑kun 'ö‑ ‑nu ‑kɔ 'yii ꞊mɔɔ dhiang zë ‑sü ‑bha 'zü, ‑a ‑gɛn ‑mü ꞊dhɛ kö Etiɛnö ‑yö dhiang zë sië 'wɔndɔdhe 'ö 'Nii‑ "slʋ̈ʋ̈slʋ̈ ‑ya nu‑ ‑dhɛ bha‑ 'ka.
ACT 6:11 'Yö 'mɛ 'wo bha 'wo mɛ ‑nu gbadhiʋ̈ ‑kë kö ‑wa pö Etiɛnö ‑bha ꞊dhɛ: «Yi‑ ‑yö kö ‑yö Moizö waa‑ Atanna ‑a ‑nu ‑bha fang bho sië.»
ACT 6:12 'Yö 'wo "sɛgümɛ ‑nu waa‑ mɛ zizi ‑nu waa‑ 'tɔnggɔmɛ ‑nu zü ꞊yɔɔn Etiɛnö ‑bha ‑kɔ bha‑ 'gü, 'yö 'wo ꞊loo‑ ‑ta 'wo‑ kun, 'yö 'wo dho‑ 'ka zagɔbhomɛ 'kpii‑ ‑kuu "dhiʋ̈.
ACT 6:13 'Yö 'wo nu 'pö 'mɛ 'wo ꞊sua ‑ya Etiɛnö ‑bha bha‑ ‑nu 'ka 'yö 'wo‑ pö: «'Mɛ ya 'yaa ö bo kwa ‑bha Atanna ‑dhɔkëgükɔ ꞊bhlëësü bha waa‑ Moizö ‑bha 'tɔng‑ ‑nu ‑bha fang bho ‑sü 'ka.
ACT 6:14 Yi‑ ‑ma ‑ta ꞊dhɛ Yesu 'ö go Nazadhɛtö bha ‑yö ‑dho Atanna ‑dhɔkëgükɔ 'wü, 'ö kwa wɔ ‑kɔ 'ö Moizö ‑ya nu kwa "bhɛma ‑nu ‑dhɛ bha‑ ‑bho "glʋʋ.
ACT 6:15 'Yö 'mɛ 'wo gun za ‑gɔ ‑yɛ 'gü ‑kɔ 'gü mü bha 'wo wo "yan ‑gban Etiɛnö 'gü 'yö 'wo‑ ‑ga "wɛ zuudhö, 'yö 'wo‑ ‑dhɛ yö kö‑ wɔ 'gü‑ 'bhü sië ꞊dhɛ Atanna ‑bha "kië wë 'dhö.
ACT 7:1 'Yö "saabhomɛ ‑gɔmɛ 'kpii‑ ‑yö Etiɛnö dhɛɛ" kpɔ 'ö‑ pö: «Dhiang ‑nu 'wo‑ pö i kë‑ ‑zë bha ‑yö ‑gun "dhʋ̈ ‑ee?»
ACT 7:2 'Yö Etiɛnö ‑ya ‑yɔ bɔ 'ö‑ pö: «N dë ‑nu, n dheebhang ‑nu, ‑ka ka "tʋ 'to! Atanna 'ö‑ 'tɔ ‑yö bhɔ bha ‑yö kë ö ‑dɩ ‑zɔn kwa "bhɛma Ablaamö ‑dhɛ yi 'bha 'ka kö ‑yö ‑tun Mezopotami ‑sɛ 'gü, kö 'yii 'dho ꞊kö ‑ya Saadhang ‑pö 'gü,
ACT 7:3 'yö‑ pö‑ ‑dhɛ: «‑Bhö 'go i ‑gɔ "sɛgümɛ ‑nu waa‑ i ‑gɔ 'kɔɔmɛ ‑nu kpö 'gü kö 'i 'dho "sɛ a dho‑ ‑dhɛ ‑zɔn i ‑dhɛ bha‑ 'gü.»
ACT 7:4 Ablaamö ‑yö ‑go yö ꞊në‑ 'gü Sadee ‑sɛ 'gü 'yö dho ‑ya Saadhang. ‑A dë ‑yö ‑ga ‑dhɛ bha ꞊në‑ 'gü. 'Yö Atanna ‑yö Ablaamö bɔ "sɛ 'ka‑ 'gü ꞊dɛɛ ya‑ 'gü.
ACT 7:5 'Yii ‑dhɛ 'bha nu‑ ‑dhɛ mü. ‑Dhɛ 'në ‑zian 'ö ‑kë ꞊dhɛ mɛ ‑gɛn ‑yɛa 'dhö 'yii‑ nu‑ ‑dhɛ mü kö ‑yö kë‑ ‑dɩ ‑bha 'ka, "kɛɛ ‑ya "plüün ‑bho ‑dhɛ ꞊dhɛ 'ö ‑dho "sɛgɔ bha‑ nu‑ ‑dhɛ, 'ö‑ nu 'pö‑ suu 'gü ‑në ‑nu ‑dhɛ, "kɛɛ kö‑ "tʋ̈ng bha‑ 'gü kö 'në 'bha ‑zian 'yii kë ꞊kö Ablaamö ‑gɔ.
ACT 7:6 ‑Wʋ 'ö Atanna ‑ya pö‑ ‑dhɛ ‑kaa ‑ga 'ö ya, ‑ya ‑pö: ‹I suu 'gü ‑në ‑nu ‑dho ‑tosɛa kë ‑dhɛngdhɛ ‑ta "sɛgɔ "wɛɛ 'gü, ‑wo ‑dho ꞊dhuëngdhɛ zë "sɛ bha‑ 'gü 'ö 'wo‑ ‑nu ‑wëëdhɛ bho ‑kwɛ këng ‑yiisiö 'ka.
ACT 7:7 "Kɛɛ a ‑dho 'wɔn "gbɩɩ‑ wɔ "sɛgɔ 'wo dho kë‑ 'gü ꞊dhuëng 'ka bha‑ 'gü ‑mɛ ‑nu ‑ta, 'ö 'wo go "sɛgɔ bha‑ 'gü 'wo nu n ‑dhɔkë ‑dhɛ 'gü "sɛ ya‑ 'gü.›»
ACT 7:8 'Yö Etiɛnö ‑yö dhiang zë 'ö dho‑ 'ka ö "dhiʋ̈ 'ö‑ pö: «꞊Dhɛ 'ö ꞊ya kë "dhʋ̈ 'yö Atanna ‑yö ‑mlɛɛ ‑kë Ablaamö 'ka, 'yö‑ daɔdɔpë ‑kë ‑dho 'gbannë 'gü ‑sü 'ka (kö ‑ya ‑zɔn ꞊dhɛ wo ꞊në 'wo ö ‑bha 'ka). 'Yö Ablaamö ‑yö ö gbö Izaakö kpɔ, 'yö‑ ‑kë 'gbannë 'ka kö ꞊ya bhɔ kö‑ ‑dhɛkpaɔyi ꞊ya kë "saaga. 'Yö Izaakö ‑dɩ 'pö 'ö ö gbö Zakɔbö ‑kë 'pö 'gbannë 'ka ‑kɔ do bha‑ 'gü. 'Yö Zakɔbö ‑dɩ 'pö 'ö ö bhang ‑nu ‑kaɔng do ga ꞊plɛ 'wo ‑kë kwa "bhɛma ‑wɔngbɩɩsü 'ka bha‑ ‑nu ‑kë 'gbannë 'ka 'pö ‑kɔ do bha‑ 'gü.
ACT 7:9 'Yö kwa "bhɛma ‑nu bha 'wo gblɛɛn" gɔn wo dheebhang Zosɛfu 'ka, 'yö 'wo‑ "dhɔɔ dɔ, 'yö kë ꞊dhuëng 'ka Ezitö ‑sɛ 'gü, "kɛɛ Atanna ‑yö ‑to "piʋ̈.
ACT 7:10 'Yö‑ bho‑ ‑bha sëëbhodhe ꞊gban "pɛpɛ 'gü 'yö‑ gba ꞊kpaɔdhɛ 'ka, 'yö 'glëën‑ ‑ya 'gü Ezitö ‑mɛ ‑nu ‑bha ‑gblüdë 'ö gun "tʋ̈ng bha‑ 'gü bha‑ "yan 'gü. 'Yö Zosɛfu ‑ya Ezitö ‑sɛ waa‑ ö ꞊slɔɔpë "pɛpɛ ꞊gban ‑gɔdhiʋ̈mɛ 'ka.
ACT 7:11 ꞊Dhɛ 'ö 'wɔn ‑nu bha ‑wa kë "dhʋ̈, 'yö "vʋ̈ʋ̈ ‑yö ‑da Ezitö ‑sɛ waa‑ Kanaa ‑sɛ ‑nu 'gü, 'yö‑ sëëbhodhe ‑yö ‑kë 'gbɛ ꞊dedewo, 'yö 'pë 'ö kwa "bhɛma ‑nu woo‑ ‑bhö 'yaa gun.
ACT 7:12 ꞊Dhɛ 'ö Zakɔbö ꞊yaa‑ ma ꞊dhɛ ‑bhöpë ‑yö Ezitö ‑sɛ 'gü, 'yö ö bhang ‑nu 'wo ‑kë kwa "bhɛma ‑nu 'ka bha‑ ‑nu bɔ 'mü, ‑bhöpë 'dhɔ ‑dhɛ 'gü ‑kɔ ‑blɛɛsü wo.
ACT 7:13 'Dho ꞊plɛ ‑naa 'dhɛ 'wo dho‑ wo bha 'yö Zosɛfu ‑yö ö ‑dɩ ‑zɔn ö dheebhang ‑nu ‑dhɛ (꞊dhɛ 'ö "yaan, 'yii ga ꞊dhɛ ‑kɔ 'ö wo ‑zë 'wo gun wo ‑zʋ 'gɔn sië‑ 'ka bha‑ 'dhö), 'yö Fadhaɔn ‑yö gun ‑na Zosɛfu ‑bha 'kɔɔmɛ ‑nu dɔ.
ACT 7:14 ꞊Dhɛ 'ö ꞊ya kë "dhʋ̈ 'yö Zosɛfu ‑yö naɔ dɔ 'ö dheebhang ‑nu bha‑ ‑nu ‑gɔ kö ‑wa dɔ wo dë Zakɔbö ‑gɔ kö waa‑ ö ‑gɔ 'kɔɔmɛ ‑nu 'ö‑ ‑nu ‑da 'kwëë‑ ‑sü ‑yö gun mɛ ‑dhü ‑kaɔng "saɔplɛ ga "sɔɔdhu bha ‑wo nu.
ACT 7:15 ꞊Dhɛ naɔ bha 'wo‑ dɔ‑ ‑nu dë ‑gɔ, 'yö‑ ‑nu dë Zakɔbö waa‑ ö ‑gɔ 'kɔɔmɛ ‑nu 'wo dho Ezitö ‑sɛ 'gü. 'Yö 'wo to 'mü 'yö zun‑ 'ka‑ ‑nu ga ‑yi ‑bha.
ACT 7:16 ꞊Dhɛ Zakɔbö ꞊ya ga, 'yö 'wo dho‑ ꞊gee 'ka Ablaamö ‑bha mɛ ꞊geebhodhɛ 'ö‑ dhɔ Emɔɔ ‑bha 'në ‑nu ‑gɔ Sisɛmö ‑pö 'gü bha‑ 'gü. ‑Dhɛ do 'wo Zakɔbö ꞊wɛɛ bho‑ 'gü bha ꞊në 'wo kwa "bhɛma ‑nu ‑wɔ ‑bha 'pö.
ACT 7:17 ꞊Dhɛ 'ö 'pë 'ö Atanna ‑ya "plüün bho Ablaamö ‑dhɛ (꞊dhɛ ö ‑dho Kanaa ‑sɛ nu‑ suu ‑nu ‑dhɛ) bha‑ 'gü ‑wɔn kë ‑yi 'yaa ꞊gblɛɛn 'zü, "kɛɛ kö kwa "bhɛma ‑nu ꞊wa pa ꞊dedewo kö ꞊wa kë 'gbɛ Ezitö ‑sɛ 'gü,
ACT 7:18 'yö ‑gblüdë "wɛɛ 'ö 'yaa Zosɛfu dɔ ꞊dhɛ Fadhaɔn 'dhö bha 'ö ‑ya "sɛgɔ "dhiʋ̈ Ezitö ‑sɛ bha‑ 'gü.
ACT 7:19 'Yö ‑gblüdë 'dhɛ 'ö bha 'ö "kpënng‑ ‑kë kwa "bhɛma ‑nu ‑gɔ, 'yö‑ ‑nu ‑wëëdhɛ bho, 'yö‑ pö‑ ‑nu ‑dhɛ ‑wo wo kwaa‑ woo‑ 'në "blë ‑dee ‑nu ‑zü kö ‑wo ga.
ACT 7:20 Moizö ‑bhɔ "tʋ̈ng bha ꞊në‑ 'gü, 'yö gun 'në ‑dee ‑së ꞊dede 'ka, 'yö‑ ‑dhɔ ‑yö Atanna kë. 'Yö‑ 'kpɔmɛ ‑nu 'wo‑ ‑bin "su ‑yaaga 'ka wo ‑gɔ 'kɔɔdhö (kö Fadhaɔn 'ya 'dho‑ 'wɔn dɔ).
ACT 7:21 "Kɛɛ ꞊dhɛ 'ö‑ kë ‑kɔ 'bhaa 'dhö 'zü, 'ö ꞊wa wo kwaa‑ ‑zü "bü, 'yö Fadhaɔn 'dhu ‑ya yö, 'yö‑ sü 'ö dho‑ 'ka 'ö‑ ‑kë ö ‑bha 'në 'ka 'yö ö ‑zʋ ‑kë "piʋ̈.
ACT 7:22 'Yö 'wo Moizö ꞊draan Ezitö ‑sɛ bha‑ 'gü ‑wɔn kë ‑kɔ "pɛpɛ ꞊gban ‑bha, 'yö ‑kë mɛ "gbɩɩ‑ 'ka ö "wɩ ‑kɔ ‑nu waa‑ ö këwɔn ‑nu 'gü.
ACT 7:23 ꞊Dhɛ Moizö 'kpɔ ‑kwɛ ꞊ya kë ‑kaɔng ‑yiisiö, 'yö ꞊wlü yi do 'ka, 'yö dho ‑wo ö dheebhang ‑nu 'wo ‑kë Izraɛdhö ‑mɛ ‑nu 'ka bha‑ ‑nu ‑bha kö 'wo ‑kɔ 'ö‑ 'gü 'ö‑ dɔ.
ACT 7:24 ꞊Dhɛ 'ö dho 'yö ‑kpan Ezitö mi do ‑bha kö ‑yö ö dheebhang ‑nu bha‑ mɛ do ‑wëëdhɛ bho sië "wɛɛwɛɛ, 'yö dho ö dheebhang bha‑ "piʋ̈ kö ö‑ bhlɔɔ bho, 'yö Ezitö mi bha‑ zë.
ACT 7:25 'Yö ö ‑zʋ ‑gɔn ꞊dhɛ ö dheebhang ‑nu 'wo ‑kë Izraɛdhö ‑mɛ ‑nu 'ka bha, ‑wo ‑dho ‑a 'gü ma ꞊dhɛ Atanna ‑dho bɔ yö ꞊në ö ‑ta kö ‑ya ‑nu bho ꞊dhuëngdhɛ 'gü, "kɛɛ 'wii‑ 'gü ma "dhʋ̈.
ACT 7:26 ‑A ‑dhɛkpaɔyi 'dhɛ 'ö dɔ‑ "piʋ̈ bha, 'yö Moizö ‑yö ‑kpan Izraɛdhö mi ꞊plɛ ‑bha kö ‑wo ‑gɔn gɔn sië, 'yö‑ pö 'ö‑ ‑nu "kan 'kwëë‑ kö ‑wo dhi wo 'ko ‑dhɛ 'yö‑ pö‑ ‑nu ‑dhɛ: ‹'Mɛ 'ka ya, ‑yö ‑kë mü ꞊dhɛ 'yö ka ‑dɩ ‑slɔɔ 'ka ka 'ko ‑nu ‑wëë ‑kë wo sië "kɛɛ kö dheebhang ‑zë ‑mü ka 'ka ya?›
ACT 7:27 "Kɛɛ 'yö‑ mɛ 'dhɛ 'ö za yaa bho ö "tɛado ‑bha bha 'ö Moizö ‑blü, 'yö‑ pö‑ ‑dhɛ: ‹De ꞊në i ‑ya yi ‑gɔmɛ 'ka "ɛɛn yii‑ zadɔmɛ 'ka?
ACT 7:28 "Ɛɛn ‑yö i "piʋ̈ ꞊dhɛ 'i n zë ꞊dhɛ ‑kɔ 'i Ezitö mi zë‑ 'ka yaan "dhiʋ̈ bha‑ 'dhö ‑ee?›
ACT 7:29 ꞊Dhɛ 'ö Moizö ꞊yaa‑ ‑wʋ ma ꞊dhɛ 'pë bha‑ 'dhö, 'yö ꞊dua 'yö dho Madian ‑sɛ 'gü 'yö ‑ya mü, 'yö 'nëgɔɔn ꞊plɛ kpɔ "sɛ bha‑ 'gü.
ACT 7:30 ꞊Dhɛ 'ö ‑kwɛ ‑kaɔng ‑yiisiö ꞊ya ziö, 'yö Atanna ‑bha "kië do ‑yö ö ‑dɩ ‑zɔn Moizö ‑dhɛ "tʋngtadhɛ 'ö Sinai ‑tɔn "sɔɔ bha‑ 'gü pɛng 'gü kö ‑yö ‑kpɔɔkpö do ‑bhö sië ("kɛɛ kö 'yaa "gʋ̈).
ACT 7:31 ꞊Dhɛ 'ö Moizö ꞊ya ‑dhɛ bha‑ yö 'yö‑ 'wɔn ‑ya kɔn. ꞊Dhɛ 'ö ꞊yɔɔn sië ‑kpɔɔkpö bha‑ "sɔɔ kö 'ö‑ ‑ga 'kpakpadhö, 'yö kwa Dëmɛ Atanna ‑wʋ ma kö ‑ya pö sië:
ACT 7:32 ‹Ma ꞊në 'a i "bhɛma ‑nu ‑bha Atanna 'ka, 'a Ablaamö, Izaakö waa‑ Zakɔbö ‑nu ‑bha Atanna 'ka.› 'Yö Moizö ‑yö ‑ya ꞊zii ‑sü ‑bha "suʋ̈ 'ka, 'yö ‑dhɛ ‑ga ‑dhɛ bha‑ 'gü ‑sü ‑yö ‑kë 'gü ‑ziisü.
ACT 7:33 'Yö kwa Dëmɛ ‑ya pö‑ ‑dhɛ: «‑Bhö i ‑bha ‑sabha bho i ‑gɛn 'gü, ‑a ‑gɛn ‑mü ꞊dhɛ "sɛ 'i dɔ‑ ‑ta bha "sɛ 'ö ‑ya ‑sü 'ka ‑dɩ ‑wɔn "dhiʋ̈ Atanna ‑bha 'ka yö ‑mü.» ꞊Dhɛ 'ö ꞊yaa‑ pö‑ ‑dhɛ "dhʋ̈, 'yö go mü 'ö‑ pö:
ACT 7:34 «Sëë 'ö ma mɛ ‑nu 'wo‑ bho sië Ezitö ‑sɛ 'gü bha 'ma‑ ‑dhɛ yö, 'ma‑ ‑nu "gbʋ ‑wʋ ma; Yö ꞊në‑ ‑wɔn 'gü 'yö 'a ꞊lɔɔ kö 'a‑ ‑nu bho ꞊dhuëngdhɛ 'gü. ꞊Dhɛ 'ö "dhʋ̈, ‑bhö nu, ‑a "tʋ̈ng ꞊ya ꞊loo kö 'a i bɔ Ezitö ‑sɛ 'gü!»
ACT 7:35 'Yö Etiɛnö ‑yö dho ö "dhiʋ̈ dhiang zë ‑sü 'ka 'ö‑ pö: «Moizö ꞊dede 'ö Izraɛdhö ‑mɛ ‑nu 'wo‑ pö‑ ‑dhɛ: ‹'Dee i ‑ya yi ‑gɔmɛ 'ka "ɛɛn za ‑dɔ yi ‑bha ‑mɛ 'ka› bha ꞊në Atanna ‑ya bɔ kö ‑ya ‑nu bho ꞊dhuëngdhɛ 'gü kö ‑yö kë‑ ‑nu ‑gɔmɛ 'ka. Atanna ‑bha "kië 'ö ö ‑dɩ ‑zɔn ‑dhɛ ‑kpɔɔ kpö 'ö pɛng 'dhö ‑bhö sië‑ 'gü bha ꞊në‑ ‑ta kun kö ‑yö kë Izraɛdhö ‑mɛ ‑nu ‑gɔmɛ waa‑ ‑nu ‑bho ꞊dhuëngdhɛ 'gü ‑mɛ bha‑ 'ka.
ACT 7:36 Moizö ꞊në Izraɛdhö ‑mɛ ‑nu bho ꞊dhuëngdhɛ 'gü Ezitö ‑sɛ 'gü, "dhabhliwɔn ‑nu kë ‑sü 'ka "sɛ bha‑ 'gü, ꞊weeyi ‑zaɔndhö "dhiʋ̈ ‑dhɛ ‑nu waa‑ "tʋngtadhɛ ‑nu 'gü ‑kwɛ ‑kaɔng ‑yiisiö 'ka.
ACT 7:37 Moizö do bha 'zü ꞊në‑ pö Izraɛdhö ‑mɛ ‑nu ‑dhɛ: ‹Atanna ‑dho ö ‑wʋdhiʋ̈loomɛ do 'ö ꞊dhɛ n 'dhö, ö dho 'go ka suu 'gü ‑a bɔ ka ‑dhɛ›.
ACT 7:38 Moizö bha ꞊në gun Izraɛdhö ‑mɛ ‑nu kpö 'gü "tʋng ‑ta. 'Yö ‑kë kwa "bhɛma ‑nu "piʋ̈, 'yö ‑kë 'zü Atanna ‑bha "kië 'ö dhiang zë‑ ‑dhɛ Sinai ‑tɔn ꞊gbin‑ bha‑ "piʋ̈, 'yö Atanna ‑yö ö ‑bha ‑tosɛa 'ö 'yaa yën ‑a ‑kë ‑bha ‑wʋ ‑nu nu‑ ‑dhɛ kö ‑ya nu kwa ‑dhɛ.
ACT 7:39 "Kɛɛ kwa "bhɛma ‑nu 'wii "wɩ‑ ‑bha kö ‑wo Moizö ꞊bhlëë ‑ya, 'yö 'wo ‑kɔ ‑a ‑wʋ 'ka 'yö 'wo‑ pö ‑yö wo 'gü ‑së kö 'wo wo yee kë 'wo 'dho Ezitö ‑sɛ 'gü.
ACT 7:40 'Yö 'wo‑ pö Aadhɔn ‑dhɛ: «‑Bhö yi ‑bha ‑zlan ‑nu 'wo dho "ta yi 'ka ‑a ‑nu ‑pë kë! ‑A ‑gɛn ‑mü ꞊dhɛ Moizö 'ö go yi 'ka Ezitö ‑sɛ 'gü ya 'pë 'ö‑ ‑kë 'yaa‑ ‑dɔ!›
ACT 7:41 'Yö ‑du 'në do ‑pë ‑kë, 'yö 'wo "saa‑ bho‑ "dhiʋ̈, 'yö 'wo wo "dhia bho‑ ‑nu ‑dɩ ‑bha ‑kë ‑kɔ "dhiʋ̈ ‑pë bha‑ ‑dhɛ.
ACT 7:42 'Yö Atanna ‑yö ö ꞊taa ‑ya ‑nu ‑gɔ 'wɔn bha‑ 'gü, 'yö ö ꞊kwaa‑ ‑nu ‑zü 'yö 'wo 'bhüpë ‑nu 'wo dhang‑ 'gü ‑a ‑nu ‑dhɔkë ꞊dhɛ ‑kɔ 'ö ‑bɛn zë ‑sü 'ka‑ 'ka Atanna ‑wʋdhiʋ̈loomɛ ‑nu ‑gɔ 'sëëdhɛ 'gü ‑a 'dhö ꞊dhɛ: ‹Atanna ‑ya ‑pö: Izraɛdhö ‑mɛ ‑nu, wü ‑nu 'ka‑ zë "ɛɛn "saa‑ ‑nu 'ka‑ bho ‑kwɛ ‑kaɔng ‑yiisiö 'ka "tʋng ‑ta bha, ka‑ ‑bho ma ꞊në n ‑dhɛ ‑ee?
ACT 7:43 "Kɛɛ kö ka kë ‑dhɔkëpë 'wo‑ ‑dhɛ Mɔdhɔkö bha‑ ‑bha sɔ 'kɔ ‑sü 'ö 'ka dho‑ 'ka ‑dhɛ ꞊gban ‑dhɛ ꞊gban 'gü, waa‑ 'dhɛ 'ö‑ "blɛɛn‑ 'dhö "susëng 'ka 'wo‑ ‑dhɛ Dhefan bha‑ 'dhö. ‑Dhɔkëpë ‑nu 'wo "dhʋ̈ 'ö 'wo ‑kë ka ‑bha ‑kë ‑kɔ "dhiʋ̈ ‑pë ‑nu 'ka bha ꞊në 'ka‑ ‑nu ‑dhɔkë. ‑A ‑kë "dhʋ̈ ‑sü ‑wɔn 'gü, a ‑dho "slë kë kö ‑wo 'dho ka 'ka ‑dhɛ ꞊gblɛɛn 'gü Babidhɔnö ‑dhɛ ꞊taama›
ACT 7:44 Sɔ 'kɔ 'ö Atanna ‑bha 'tɔng‑ ꞊gbëë ‑yö gun‑ 'gü bha ‑yö ‑gun ‑nu ‑gɔ "tʋngtadhɛ bha‑ 'gü. Sɔ 'kɔ bha ‑wa ‑kë ꞊dhɛ ‑kɔ 'ö Atanna ‑ya pö‑ 'ka Moizö ‑dhɛ 'ö‑ ‑gleng ‑da 'ka‑ ‑bha bha ꞊në‑ 'dhö.
ACT 7:45 'Yö sɔ 'kɔ bha 'ö ‑da 'pö kwa "bhɛma ‑nu 'wo dɔ mɛ 'dhɛ bha‑ ‑nu "piʋ̈ bha‑ ‑nu ꞊kwɛɛ‑, 'yö Zozue ‑yö zun‑ ‑nu ‑dhɛ "dhiʋ̈ 'yö 'wo sɔ 'kɔ bha‑ sü 'wo dho‑ 'ka Kanaa ‑sɛ 'gü. "Kɛɛ kö "sanni ‑wo ꞊loo "sɛ bha‑ 'gü kö Atanna ꞊ya "sɛ bha‑ 'gü ‑mɛ ‑nu "piʋ̈ kë‑ ‑nu "dhiʋ̈, kö ꞊waa‑ ‑nu ‑bha "sɛ bha‑ 'kun‑ ‑nu ‑gɔ. Sɔ 'kɔ bha ‑yö ‑to ‑nu ‑gɔ "sɛ bha‑ 'gü 'ö dho 'ö zun‑ 'ka Davi ‑bha ‑gblüdëdhɛ "tʋ̈ng ‑bha.
ACT 7:46 Davi ‑wɔn ‑yö Atanna ‑zʋ ‑kun. 'Yö‑ ‑dhɛ ö ‑bha Atanna 'ö ‑kë ‑a "bhɛma Zakɔbö ‑bha Atanna 'ka bha‑ ‑gɔ kö 'ö‑ ‑bha 'kɔ dɔ.
ACT 7:47 "Kɛɛ ꞊dhɛ 'ö ꞊ya kë "dhʋ̈, Sadhomɔ ꞊në kë Atanna ‑bha 'kɔ bha‑ dɔ ꞊taama.
ACT 7:48 "Kɛɛ a‑ ‑pö ka ‑dhɛ tɛan‑ ꞊dede 'ka ꞊dhɛ Atanna ꞊bhlëësü 'ö ‑ya ‑sü 'ka dhang‑ 'gü bha, 'yaa ‑ya 'kɔ ‑nu 'ö mɛ "bhɩɩ‑ ‑nu 'wo‑ dɔ bha‑ 'gü ꞊dhɛ ‑kɔ 'ö Atanna ‑wʋdhiʋ̈loomɛ Ezai ‑ya pö‑ 'ka bha‑ 'dhö ꞊dhɛ: ‹Kwa Dëmɛ ‑ya ‑pö:
ACT 7:49 Dhang‑ 'gü ‑dhɛ ꞊në ma ‑blüdëdhɛ ‑gbloo 'gü ‑dhɛ 'ka, 'yö "sɛ 'dhö n ‑gɛndɔtapë 'ka. ‑A ‑kë "dhʋ̈ ‑sü bha‑ 'gü ‑më ‑kɔ suu ꞊në 'ka dho‑ dɔ n ‑dhɛ? "Ɛɛn ‑dhɛ ‑mɛɛ ꞊në dho kë n "tɛɛpadhɛ 'ka?
ACT 7:50 Ma 'aa mü 'a pë ‑nu bha‑ ꞊gban ‑pë ‑kë ‑ee?›
ACT 7:51 'Yö Etiɛnö ‑ya pö: «Gɔɔgbɩɩmɛ ‑nu 'ö ka zuë" waa‑ ka "tʋ ‑nu 'wo ta ‑sü 'ka Atanna ‑wʋ ‑gɔ 'ö 'kaa "wɩ‑ ‑bha kö 'ka 'Nii‑ "slʋ̈ʋ̈slʋ̈ ‑wʋ ma ‑kpɛawo ya, ka ‑bhɔ ka "bhɛma ‑nu ‑bha ꞊dedewo.
ACT 7:52 Atanna ‑wʋdhiʋ̈loomɛ ‑mɛɛ ꞊në ka "bhɛma ‑nu 'wii‑ ‑wëë ‑kë "dhiʋ̈ bho? ‑Wo ka 'mɛ ‑nu 'wo mɛ doseng 'ö pö 'aa‑ ‑bha ‑a nu ‑wɔn 'pö bha‑ ‑nu ‑zë. ‑A mɛ doseng 'ö pö 'aa‑ ‑bha 'zü "dhʋ̈ bha 'yö 'ka ka ‑kɔ ‑kan 'zü‑ "dhiʋ̈ 'yö 'ka‑ zë.
ACT 7:53 Atanna 'dhö bɔ 'zü ö ‑bha "kië ‑nu ‑ta 'ö 'tɔng‑ 'ö‑ nu ka ‑dhɛ 'kii‑ 'bha ꞊bhlëë ‑ya.»
ACT 7:54 ꞊Dhɛ 'ö zagɔbhomɛ ‑nu ꞊wa Etiɛnö ‑wʋ bha‑ ma, 'yö ‑siö ‑nu ‑dhɛ ꞊dedewo 'yö 'wo ‑ya "sɔn "dhiʋ̈ ‑bhö ‑sü ‑bha ‑a ‑bha.
ACT 7:55 "Kɛɛ Etiɛnö 'kö 'Nii‑ "slʋ̈ʋ̈slʋ̈ 'dhö‑ pa ‑sü 'ka bha, 'yö ‑dhɛ ‑ga dhang‑ 'gü, 'yö Atanna ‑bha 'tɔbhɔdhe 'bhü yö, 'yö ö "yan ‑kpan Yesu ‑bha kö ‑yö dɔ sië Atanna "sɔɔ ‑dhɛ ꞊bhlëësü bha‑ 'gü
ACT 7:56 'yö‑ pö: «‑Ka ‑dhɛ ‑ga! 'Ma dhang‑ yö kö‑ "dhi ꞊ya "pʋ, ma n "yan ‑kpan Mɛgbömɛ ‑bha kö ‑yö dɔ sië Atanna "sɔɔ ‑dhɛ ꞊bhlëësü bha‑ 'gü.»
ACT 7:57 ꞊Dhɛ 'ö ꞊ya kë "dhʋ̈, 'yö 'wo ꞊gbla "gbɩɩ‑ 'ka 'wo wo ‑kɔ kpa wo "tʋ "dhiʋ̈ 'yö 'wo ꞊wlü 'wo dho 'wo ꞊loo Etiɛnö ‑ta.
ACT 7:58 'Yö 'wo‑ ‑gan wo "piʋ̈ ‑zuudhö 'wo dho‑ 'ka 'pö‑ ꞊taama, 'yö 'wo ‑ya ‑a ‑zuö ‑gwë 'ka ‑sü ‑bha kö 'wo‑ zë. 'Yö 'mɛ 'wo "sɛɛdhɛ ‑kë ‑bha ‑a ‑bha zadɔyi 'ka bha, 'wo wo ‑bha sɔ 'dhɛ 'wo‑ ‑da sɔ ‑ta bha‑ ‑nu bho 'mü 'wo‑ dɔ 'nëglɔɔnnë do 'wo‑ ‑dhɛ Sɔdhö ‑a ‑gɔ kö ‑yö ö "yan 'to‑ ‑bha kö 'wo woo‑ ‑gwë ‑zuö ‑dhɛ yö.
ACT 7:59 ꞊Dhɛ 'wo gun Etiɛnö zë sië ‑gwë 'ka, 'yö ꞊bhɛa 'ö‑ pö: «N Dëmɛ Yesu, ma n ‑dɩ ‑wɔn wɔ i ꞊kwɛɛ‑!»
ACT 7:60 ꞊Dhɛ 'ö ꞊yaa‑ pö "dhʋ̈ 'yö zun ö kpiö 'gü 'yö ꞊gbla "gbɩɩ‑ 'ka 'ö‑ pö: «N Dëmɛ, 'bha 'dho‑ ‑nu 'kun tëë 'ka ‑a ‑nu këwɔn bha‑ ‑bha!» ꞊Dhɛ 'ö‑ pö "dhʋ̈ 'yö‑ 'nii‑ 'dhö ‑pö.
ACT 8:1 Sɔdhö zü‑ ‑gun Etiɛnö zëmɛ ‑nu bha‑ ‑nu "piʋ̈. ꞊Dhɛ 'ö ꞊ya kë "dhʋ̈, 'yö Atanna ꞊bhlëëyamɛ ‑nu 'wo Etiɛnö sü 'wo dho 'wo‑ ‑wɛɛ bho, 'yö 'wo‑ ‑gbʋ bɔ ꞊dedewo. Atanna ‑bha 'kɔdhigümɛ ‑nu 'wo Zedhizadhɛmö ‑a ‑nu ‑bha "yënnggbaɔndhe 'kpii‑ zü ‑yö ‑bho 'pö ‑dhɛkpaɔyi do bha ꞊në‑ 'ka. 'Yö ꞊ya 'go Yesu ‑bha bɔmɛ ‑nu ‑zë 'gü, 'dhang ‑bho Yesu "dhiʋ̈ ‑mɛ ‑nu ꞊gban "pɛpɛ 'wo ‑pɛn 'wo dho Zude ‑sɛ waa‑ Samadhi ‑sɛ ‑nu 'gü.
ACT 8:3 Sɔdhö ‑zë ‑yö ‑gun ö faan dɔ sië ꞊dedewo kö 'ö Atanna ‑bha 'kɔdhigümɛ ‑nu ꞊në‑ ‑nu suu yën, 'yö ‑sɔ 'kɔ ‑nu 'gü 'dɔɔndhö 'yö 'dhang ‑bho Yesu "dhiʋ̈ ‑mɛ ‑nu kun, gɔɔn‑ ‑nu waa dhong ‑nu, 'yö‑ ‑nu ‑da ‑kaso 'gü.
ACT 8:4 'Dhang ‑bho Yesu Klisi "dhiʋ̈ ‑mɛ ‑nu 'wo ‑pɛn "dhʋ̈ bha, 'yö 'wo 'wɔn ‑taɔng ‑së bha‑ pö ‑dhɛ ꞊gban "pɛpɛ 'gü 'wo dho‑ 'ka.
ACT 8:5 'Yö Fidhipö ‑yö ‑dho Samadhi ‑pö do 'bha 'gü 'pö, 'yö Klisi ‑wɔn dhiang zë 'mɛ 'wo mü‑ ‑nu ‑dhɛ 'ö‑ pö Atanna ‑bha ‑Yamɛ 'ö‑ ‑wɔn pö bha ꞊në Yesu 'ka.
ACT 8:6 ꞊Dhɛ 'ö mɛ 'gbɛ 'wo gun wo "tʋ 'to sië Fidhipö ‑wʋ ‑bha bha 'wo 'wɔn ‑nu 'ö‑ pö sië bha waa‑ "dhabhliwɔn ‑nu 'ö‑ kë sië bha‑ ‑dhɛ yö, mɛ ꞊gban "pɛpɛ ‑wo wo "tʋ to ‑së 'ka ꞊dedewo 'ö ‑dhɛa ‑yö ga‑ ‑nu ‑ta dingdhö;
ACT 8:7 ‑a ‑gɛn ‑mü ꞊dhɛ 'mɛ 'ö "yina yaa ‑nu gun‑ ‑nu 'gü, ‑a ‑nu ‑bha "yina yaa ‑nu bha ‑wo gun 'go sië‑ ‑nu 'gü "gbla ‑sü 'ka "gbɩɩ‑ 'ka, 'ö "trüünyuamɛ ‑nu waa‑ ‑gɛnloomɛ ‑nu 'wo ‑kë "klʋ̈ʋ̈klʋ̈ 'pö.
ACT 8:8 'Yö 'pö‑ bha‑ 'gümɛ ‑nu ꞊nii 'dhö ‑da ꞊dedewo.
ACT 8:9 Gɔndënë do 'wo‑ ‑dhɛ Simɔ ‑yö ‑gun 'pödhɛ bha‑ 'gü. Simɔ bha ‑yö ‑gun "zʋʋmi "gbɩɩ‑ do 'ö‑ ‑wɔn ‑yö Samadhi ‑mɛ ‑nu kɔn ‑a 'ka. ‑A ‑wɔn 'gü ‑yö ‑gun ö ‑dɩ kë sië mɛ ꞊bhlëësü ꞊dede 'ka.
ACT 8:10 'Ö 'mɛ 'wo 'pödhɛ bha‑ 'gü, 'ö go‑ 'ka 'në ‑nu ‑bha ö zun‑ 'ka mɛ "gblʋ̈gblʋ̈ ‑nu ‑bha, 'wo wo "tʋ to‑ ‑wʋ ‑bha ‑së ꞊dede 'ka 'ö 'wo‑ ꞊bhlëë ‑ya, kö ‑wa pö sië: «Kwa ‑bha ‑zlan 'wo‑ ‑dhɛ «'gü "gbɩɩ‑ ‑zlan» "kɛɛ 'ö‑ ‑bha 'gügbɩɩdhɛ 'dhö ‑ziisü, 'ö ꞊lɔɔ kwa ‑dhɛ yö ‑mü Simɔ ꞊në‑ 'ka.»
ACT 8:11 ‑Wo ‑gun wo "tʋ 'to sië‑ ‑wʋ ‑bha ‑së 'ka, ‑a ‑gɛn ‑mü ꞊dhɛ 'ö gun "dhʋ̈ kö‑ ‑bha "zʋʋdhɛ bha‑ ‑wɔn ‑zun ‑a ‑nu 'kɔn ‑sü ‑bha ‑yi ꞊ya ꞊gwëë.
ACT 8:12 "Kɛɛ ꞊dhɛ 'ö Fidhipö ꞊ya 'wɔn ‑taɔng ‑së 'ö ‑gban Atanna ‑bha ‑gblüdëdhɛ waa‑ Yesu Klisi ‑bha bha‑ ‑dhiang zë‑ ‑nu ‑dhɛ, 'yö gɔɔn‑ ‑nu waa‑ dhong ‑nu 'bha ‑nu 'wo 'pödhɛ bha‑ 'gü bha 'wo 'dhang bho‑ "dhiʋ̈, 'yö 'wo‑ ‑nu ‑bɔ Yesu 'ka ‑zu bho.
ACT 8:13 'Yö Simɔ ‑dɩ 'pö 'ö 'dhang bho Yesu Klisi ‑wɔn "dhiʋ̈, 'yö 'wo‑ ‑bɔ 'ka ‑zu bho 'pö. 'Yö to Fidhipö ꞊keng‑ 'yö‑ "yan 'dhö ‑da "dhabhliwɔn "gblʋ̈gblʋ̈ ‑nu 'ö gun‑ kë sië bha‑ ‑dhɛ 'gü, 'yö‑ 'wɔn ‑ya kɔn.
ACT 8:14 Yesu ‑bha bɔmɛ ‑nu 'wo gun Zedhizadhɛmö bha, 'yö 'wo‑ ma ꞊dhɛ 'mɛ 'wo Samadhi ꞊wa 'dhang bho Yesu ‑wɔn "dhiʋ̈, 'yö 'wo Piɛdhö waa‑ Zan ‑a ‑nu bɔ mü.
ACT 8:15 ꞊Dhɛ 'ö 'mɛ 'wo bha ꞊wa 'dho ꞊wa ꞊loo Samadhi ‑sɛ 'gü, 'yö 'wo ꞊bhɛa 'dhang ‑bho Yesu "dhiʋ̈ ‑mɛ ‑nu ‑wɔn 'gü Atanna ‑dhɛ kë "dhʋ̈ kö ‑wo 'Nii‑ "slʋ̈ʋ̈slʋ̈ ꞊slɔɔ.
ACT 8:16 ‑A ‑gɛn ‑mü ꞊dhɛ 'ö gun "dhʋ̈ kö 'Nii‑ "slʋ̈ʋ̈slʋ̈ 'yii ‑da ‑a mɛ do ‑zian 'gü ꞊kö, "kɛɛ kö ꞊waa‑ ‑nu ‑bɔ Yesu 'ka ‑zu ‑zë wo ‑a 'tɔ 'gü.
ACT 8:17 ꞊Dhɛ 'ö ꞊ya kë "dhʋ̈, 'yö Piɛdhö waa‑ Zan 'wo wo ‑kɔ kpa‑ ‑nu ‑ta 'wo ꞊bhɛa Atanna ‑dhɛ, 'yö 'Nii‑ "slʋ̈ʋ̈slʋ̈ 'dhö ‑da ‑a ‑nu 'gü.
ACT 8:18 ꞊Dhɛ 'ö Simɔ ꞊ya 'wɔn bha‑ ‑dhɛ yö, ꞊dhɛ Atanna ꞊ya 'Nii‑ slʋ̈ʋ̈slʋ̈ nu 'dhang ‑bho Yesu "dhiʋ̈ ‑mɛ ‑nu ‑dhɛ, Yesu ‑bha bɔmɛ ‑nu 'wo ‑kɔ 'ö‑ kpa‑ ‑nu ‑ta bha‑ ‑wɔn 'gü, 'yö 'wëëga nu Piɛdhö waa‑ Zan ‑a ‑nu ‑dhɛ
ACT 8:19 'yö‑ pö‑ ‑nu ‑dhɛ: «‑Ka 'gügbɩɩdhɛ bha‑ nu n ‑dhɛ 'pö kö 'ma n ‑kɔ kpa 'mɛ 'ö‑ ‑ta, kö 'Nii‑ "slʋ̈ʋ̈slʋ̈ ‑yö ‑da ‑mɛ 'gü!»
ACT 8:20 "Kɛɛ 'yö Piɛdhö ‑ya pö‑ ‑dhɛ: «Kaa‑ i ‑bha ꞊naɔ ‑nu ꞊gban, ‑ka 'gü ‑yö see‑! ‑A ‑gɛn ‑mü ꞊dhɛ i i ‑zʋ ‑gɔn ꞊dhɛ 'bha yi gba 'wëë‑ 'ka Atanna dho 'gügbɩɩdhɛ 'ö‑ ꞊gbaɔ ꞊në‑ wo bha‑ nu i ‑dhɛ 'wëëga bha‑ ꞊trɔɔn 'ka kö 'i 'Nii‑ "slʋ̈ʋ̈slʋ̈ nu‑ 'ka mɛ ‑nu ‑dhɛ. i ‑bha 'wɔn 'bha 'yaa 'wɔn ya‑ 'gü,
ACT 8:21 ‑a ‑gɛn ‑mü ꞊dhɛ i zuë" 'yaa "puu Atanna wëëdhö.
ACT 8:22 ꞊Dhɛ 'ö "dhʋ̈, ‑bhö i kwaa‑ ‑zʋ 'gɔn ‑kɔ suu bha‑ ‑zü kö 'i bhɛa" kwa Dëmɛ ‑dhɛ kö ꞊ya "wɩ‑ ‑bha kö ‑yö i ‑zʋtagüwɔn ‑nu bha‑ ‑nu ‑mawɔn 'to,
ACT 8:23 ‑a ‑gɛn ‑mü ꞊dhɛ 'ma‑ 'wɔn dɔ ꞊dhɛ i pa ‑sü 'ka 'wɔn yaa 'gbɛ 'ka, 'i 'wɔn yaa ‑gɔ ꞊dhuëngdhɛ 'gü.»
ACT 8:24 'Yö Simɔ ‑ya pö Piɛdhö waa‑ Zan‑ ‑nu ‑dhɛ: «Kaa ‑dɩ 'pö, ‑ka bhɛa" kwa Dëmɛ ‑dhɛ n ‑wɔn 'gü kö pë ‑nu 'ka‑ pö sië bha 'wa 'dho kë n 'ka!»
ACT 8:25 ꞊Dhɛ 'ö 'pë 'ö Piɛdhö waa‑ Zan 'wo‑ dɔ Yesu Klisi ‑wɔn 'gü, 'wo‑ pö mɛ ‑nu ‑dhɛ 'ö 'wo kwa Dëmɛ ‑bha 'wɔn ‑taɔng ‑së pö, 'yö 'wo wo yee ‑kë 'wo dho Zedhizadhɛmö. ꞊Dhɛ 'ö ꞊wa ‑da zian ‑ta 'wo 'dho sië, 'yö 'wo naɔ ‑së bha‑ dɔ Samadhi ‑pö 'gbɛ ‑nu 'gü.
ACT 8:26 Yi do 'ka 'yö kwa Dëmɛ ‑bha "kië do ‑ya ‑pö Fidhipö ‑dhɛ: «‑Bhö 'dho "siayën ‑zian 'ka, zian 'ö go Zedhizadhɛmö 'ö dho Gaza bha‑ "pɛan 'ka! ‑Kpinngga 'ö "dhʋ̈ bha "tʋng ‑ta ‑zian ‑mü.»
ACT 8:27 'Yö Fidhipö ‑yö ꞊wlü 'ö dho. ‑A 'dho ‑sü 'ka 'yö ‑kpan gɔndënë do ‑bha zian ‑ta. Gɔndënë bha ‑yö ‑kë ꞊lamɛ 'kpii‑ do 'ö go Etiopi ‑sɛ 'gü, 'ö ö ‑zʋ to ‑gblüdëdhe 'ö go Etiopi ‑sɛ 'gü 'wo‑ ‑dhɛ Kandasö bha‑ ‑bha ꞊naɔ 'gü ‑a 'ka, 'yö nu Zedhizadhɛmö kö 'ö Atanna ‑dhɔkë.
ACT 8:28 Yö gun ö yee kë sië 'ö dho ö ‑gɔ "sɛ 'gü kö ‑yö ‑ya ‑sü 'ka ö ‑bha gɔ suu 'bha 'ö ꞊soo ‑nu 'wo‑ ‑gan bha‑ 'gü kö ‑yö Atanna ‑wʋdhiʋ̈loomɛ Ezai ‑bha 'sëëdhɛ bha‑ ‑wʋ pö sië.
ACT 8:29 'Yö 'Nii‑ "slʋ̈ʋ̈slʋ̈ ‑ya pö Fidhipö ‑dhɛ: «‑Bhö 'dho kö 'i dɔ gɔ bha‑ "sɔɔ!»
ACT 8:30 'Yö Fidhipö ‑yö dho ‑bɛang 'ka 'yö ‑kpan Etiopi mi bha‑ ‑bha, 'yö‑ ‑wʋ ma kö ‑yö Atanna ‑wʋdhiʋ̈loomɛ Ezai ‑bha 'sëëdhɛ bha‑ ‑wʋ pö sië. 'Yö‑ dhɛɛ" kpɔ 'ö‑ pö: «'Pë 'i‑ ‑wʋ pö sië bha i‑ 'gü ‑ma "wɛ ‑ee?»
ACT 8:31 'Yö gɔndënë bha 'ö‑ ‑yɔ bɔ‑ ‑gɔ 'ö‑ pö: «(‑Yö n "piʋ̈ ꞊tɔn ꞊dhɛ 'a‑ 'gü ma "kɛɛ) ꞊ya kë ꞊dhɛ mɛ 'bha 'yii‑ 'klɔɔ‑ pö n ‑dhɛ, ‑a ‑dho ‑a dɔ ‑kɔ ‑kë ꞊dhɛ?» 'Yö‑ pö Fidhipö ‑dhɛ: «‑Bhö ‑da kö 'i ‑ya n "sɔɔ yö!» 'Yö Fidhipö ‑yö ‑da "piʋ̈ mü.
ACT 8:32 'Pë 'ö gun ‑bɛn zë ‑sü 'ka 'sëëdhɛ bha‑ 'gü 'ö Etiopi mi gun‑ ‑wʋ pö sië bha ‑ya ‑pö: «‑Yö ‑kë ꞊dhɛ "bhlaa 'wo 'dho sië‑ 'ka ‑a zë ‑dhɛ 'gü ‑a 'dhö. 'Ö ‑kë ꞊dhɛ "bhlaanë 'wo‑ kaa‑ "kan sië 'ö 'yaa "wɩ ‑a 'dhö, 'yii ö "dhi "pʋ.
ACT 8:33 ‑Wo ꞊bhlëë ‑bho ‑bha 'ö 'wo‑ ‑bha tɛanwɔn ‑kë ꞊suawɔn 'ka, ‑a ‑wɔn 'gü mɛ 'bha 'yii 'dho‑ 'gü ‑në do ‑zian 'tɔ ma 'zü, ‑a 'klɔɔ‑ ‑mü ꞊dhɛ ‑a ‑bha ‑bha ‑zë ꞊ya bho‑ "dhiʋ̈ "kpʋng ꞊taa yö ꞊naa bha, ‑a ‑gɛn ‑mü ꞊dhɛ ꞊waa‑ ‑bha ‑kë "kpʋng ꞊taa ‑sü ‑zë bho‑ "dhiʋ̈.»
ACT 8:34 'Yö Etiopi mi bha 'ö Fidhipö dhɛɛ" kpɔ 'ö‑ pö: «‑Bhö dɔ "gbɩɩ‑ bhɛa" ꞊në 'a‑ wo i ‑dhɛ kö 'i‑ 'klɔɔ‑ pö n ‑dhɛ. De ꞊në 'ö Atanna ‑wʋdhiʋ̈loomɛ ‑ya ‑dhiang zë bha? ‑Yö ‑wɩ ö ‑dɩ 'ka ‑ee, "ɛɛn ‑yö ‑wɩ mɛ "wɛɛ 'bha ꞊në‑ 'ka ‑ee?»
ACT 8:35 'Yö Fidhipö ‑ya zü bho 'wɔn ‑gɛn do ö gun‑ ‑wʋ pö sië bha‑ ‑ta 'ö naɔ ‑së 'ö ‑gban Yesu ‑wɔn ‑bha bha‑ pö‑ ‑dhɛ.
ACT 8:36 ꞊Dhɛ 'wo 'dho sië wo "dhiʋ̈, 'yö 'wo dho 'wo ꞊loo "yi 'bha bha‑ ꞊bhaa, 'yö Etiopi mi bha 'ö‑ pö: «"Yi ꞊nɛ, ‑më ꞊në‑ ‑wɔn ꞊ya 'to kö 'a ‑bɔ Yesu 'ka ‑zu bho?»
ACT 8:37 'Yö Fidhipö ‑ya pö‑ ‑dhɛ: «꞊Ya kë ꞊dhɛ 'bha 'dhang bho Yesu "dhiʋ̈ i zuë" ꞊gban "pɛpɛ 'ka kö i ‑mɔɔ ‑bha 'i ‑bɔ ‑a 'ka ‑zu bho.» 'Yö gɔndënë bha 'ö‑ pö: «A 'dhang ‑bho "dhiʋ̈ ꞊dhɛ Yesu Klisi bha Atanna Gbö ‑mü.»
ACT 8:38 ꞊Dhɛ 'ö ꞊ya kë "dhʋ̈, 'yö Etiopi mi bha 'ö‑ pö 'mɛ 'ö gɔ bha‑ "dhiʋ̈ "ta 'sü sië bha‑ ‑dhɛ ‑yö 'gbaannu. ꞊Dhɛ 'ö 'gbaannu, 'yö Etiopi mi waa‑ Fidhipö 'wo go gɔ bha‑ 'gü 'wo zun "sia‑, 'yö‑ ‑nu ꞊gban ꞊plɛ 'wo ꞊lɔɔ "yi ꞊bhaa. 'Yö Fidhipö ‑yö Etiopi mi bha‑ ‑bɔ Yesu 'ka ‑zu bho.
ACT 8:39 ꞊Dhɛ 'ö ꞊wa 'go "yi ꞊bhaa, 'yö kwa Dëmɛ ‑bha 'Nii‑ ‑yö Fidhipö sü 'zodhö 'yö dho‑ 'ka. 'Yö Etiopi mi bha‑ "yan ‑yö ꞊fië‑ 'ka, "kɛɛ 'yö yö ‑zë 'ö dho ö ‑bha "ta 'ka ö "dhiʋ̈ ꞊niidadhe 'ka.
ACT 8:40 Fidhipö dho "kan ö ‑ta (kö 'Nii‑ "slʋ̈ʋ̈slʋ̈ ꞊yaa‑ 'sü ꞊dhɛ 'gbʋ‑ ‑yö mɛ sü,) kö ‑yö dɔ sië Azo ‑pö 'gü. ꞊Dhɛ 'ö ‑kë "dhʋ̈ 'yö dho 'pö ö ‑bha "ta 'ka "dhiʋ̈, 'yö naɔ ‑së bha‑ dɔ 'pödhɛ ‑nu 'gü 'ö dho‑ 'ka "dhʋ̈ 'ö ꞊loo‑ 'ka Sezadhe ‑pö 'gü.
ACT 9:1 ‑A "tʋ̈ng bha‑ 'gü, kö Sɔdhö ‑yö "suʋ̈ ‑da kwa Dëmɛ ‑bha ꞊klang ‑nu 'gü, 'ö‑ ‑nu zë "slë ꞊mɔɔ ‑kpɛawo. Yi do 'ka 'yö ꞊wlü 'ö dho "saabhomɛ ‑nu ‑gɔmɛ 'kpii‑ "piʋ̈,
ACT 9:2 'yö‑ ‑kɔ "gblʋʋ 'sëëdhɛ ('ö ꞊ya kë‑ ‑gɔ 'wo dho‑ dɔ‑ ‑bha ꞊dhɛ wo ꞊në 'wo‑ bɔ, "ɛɛn 'wɔn ‑nu 'ö‑ kë sië bha ‑ya ‑kë wo ꞊në wo faan 'ka bha) 'ö dho‑ ‑wɔn 'gü kö 'ö 'dho‑ 'ka Zuifö ‑nu ‑bha ‑yakwëëkëgükɔ ‑gɔmɛ ‑nu 'wo Damasö ‑pö 'gü ‑a ‑nu ‑dhɛ. Kë "dhʋ̈ kö 'ya "ta ‑sü Yesu ‑bha ziantamɛ ‑nu yö Damasö ‑pö 'gü, dhong ‑nu ‑mü ‑ee "ɛɛn gɔɔn‑ ‑nu ‑mü ‑ee, kö 'ö‑ ‑nu 'kun 'ö nu‑ ‑nu 'ka Zedhizadhɛmö.
ACT 9:3 'Yö ‑da zian 'ö dho Damasö bha‑ ‑ta. ꞊Dhɛ 'ö ꞊ya ꞊yɔɔn 'pödhɛ bha‑ "sɔɔ, 'ö dho "kan ö ‑ta kö ‑dhɛpuudhɛ 'ö go dhang‑ 'gü ‑yö 'bhü sië ö ‑züzü.
ACT 9:4 'Yö kɔn ꞊soo 'ö gun‑ ‑ta bha‑ 'ka 'yö ‑pö "sia‑, 'yö mɛ 'bha ‑wʋ ma kö ‑ya pö sië ö ‑dhɛ: «Sɔdhö, Sɔdhö, i n "yënng ꞊gbaɔn "dhʋ̈ ‑më ‑wɔn 'gü?»
ACT 9:5 'Yö Sɔdhö ‑ya dhɛɛ" kpɔ 'ö‑ pö: «Bhii 'de 'i bha?» 'Yö kwa Dëmɛ Yesu ‑ya pö‑ ‑dhɛ: «Mang Yesu 'i n "yan 'gü ꞊gbaɔn bho sië bha ma ‑mü, ["kɛɛ i ‑dha n ‑gɔ ‑dhɛ ‑dho kë 'ya‑.» 'Yö "suʋ̈ 'dhö ‑da Sɔdhö 'gü, 'yö ‑ya ꞊zii ‑sü ‑bha 'yö‑ pö: «N Dëmɛ, ‑yö i "piʋ̈ ꞊dhɛ 'a‑ kë ꞊dhɛ?» 'Yö kwa Dëmɛ ‑ya pö‑ ‑dhɛ:]
ACT 9:6 «‑Bhö "wlü kö 'i 'dho 'pödhɛ 'ö ‑ya i "dhiʋ̈ bha‑ 'gü! ‑Wo ‑dho 'pë 'i dho‑ kë ‑a pö i ‑dhɛ mü.»
ACT 9:7 'Wɔn bha 'yö‑ 'wɔn ‑yö Sɔdhö "tayɔɔ ‑nu kɔn ꞊dedewo 'yö 'pë woo‑ kë 'wii‑ dɔ, ‑a ‑gɛn ‑mü ꞊dhɛ ‑wʋ 'ö ‑wɩ bha ‑wa ‑ma, "kɛɛ 'wii mɛ 'bha yö.
ACT 9:8 'Yö Sɔdhö ‑yö ꞊wlü "sia‑ 'yö ö "yan "dhiʋ̈ ‑pʋ, "kɛɛ 'yii ‑dhɛ yö. 'Yö 'wo‑ kun‑ ‑kɔ ‑bha 'wo dho‑ 'ka Damasö 'plöö.
ACT 9:9 ‑Yö ‑dhɛkpaɔyi ‑yaaga ‑kë mü kö 'yaa ‑dhɛ yö, 'yaa pë 'bha ‑bhö, 'yaa müpë 'bha mü.
ACT 9:10 'Dhang ‑bho Yesu "dhiʋ̈ ‑mɛ do bha 'wo‑ ‑dhɛ Ananiasö ‑yö ‑gun Damasö ‑pö bha‑ 'gü. 'Yö kwa Dëmɛ ‑ya "yan 'gü ‑pʋ, 'yö‑ yö, 'yö‑ pö‑ ‑dhɛ: «Ananiasö!» 'Yö Ananiasö ‑ya pö: «꞊Yoo, 'ma "wɩ, n Dëmɛ!»
ACT 9:11 'Yö kwa Dëmɛ ‑ya pö‑ ‑dhɛ: «‑Bhö "wlü kö 'i 'dho ‑kpinngga 'wo‑ ‑dhɛ ‑kpinngga 'ö dɔ vɛɛdhö bha‑ ‑ta kö 'i 'dho 'i ‑da Zuda ‑gɔ 'kɔɔdhö, gɔɔn‑ 'ö go Taasö ‑pö 'gü 'wo‑ ‑dhɛ Sɔdhö bha‑ mɔɔ‑ ‑dhɛ 'gü! ‑Yö bhɛa" sië n ‑dhɛ 'kɔɔdhö mü.
ACT 9:12 'Yö‑ "yan 'gü 'dhö ‑da ‑sü 'ka bhii Ananiasö ‑mɛ i 'ka kö 'bha ‑da ‑gɔ 'kɔɔdhö kö 'bha i ‑kɔ kpa‑ ‑ta kö ‑yö ‑dhɛ yö ‑deewo.»
ACT 9:13 'Yö Ananiasö ‑ya ‑yɔ bɔ 'ö‑ pö: «N Dëmɛ, mɛ 'gbɛ ꞊wa 'wɔn ‑nu 'ö ‑gban gɔndënë bha‑ ‑bha ‑a ‑gɛn dɔ n ‑dhɛ, 'wɔn yaa ‑nu 'ö‑ ‑kë i ‑bha mɛ ‑nu 'wo Zedhizadhɛmö ‑a ‑nu 'ka ꞊waa‑ ꞊gban pö n ‑dhɛ ‑wa!
ACT 9:14 ‑A ‑nu yö ‑sü bha 'zü ‑yö ‑nu faan 'ö "saabhomɛ ‑nu ‑gɔmɛ "gblʋ̈gblʋ̈ ‑nu ‑wa nu‑ ‑dhɛ bha ꞊në‑ 'ka kö ‑yö 'mɛ 'wo ꞊bhɛa i 'tɔ 'gü ‑a ‑nu 'kun kö ‑ya ‑nu ‑da ‑kaso 'gü ꞊zɔɔ ‑wa! (I‑ ‑pö 'a 'dho mü ‑ee?)
ACT 9:15 "Kɛɛ 'yö kwa Dëmɛ ‑ya pö Ananiasö ‑dhɛ: «‑Bhö 'dho ꞊zɔɔ, ‑a ‑gɛn ‑mü ꞊dhɛ 'ma 'mɛ bha‑ 'sü ma yëkëmɛ 'ka kö 'a‑ bɔ "sɛgɔ "wɛɛ ‑nu 'ö‑ 'gü ‑mɛ ‑nu 'waa Zuifö 'ka waa‑ ‑nu ‑bha ‑gblüdë ‑nu waa‑ Izraɛdhö ‑sɛ 'gü ‑mɛ ‑nu "piʋ̈ kö ‑yö n ‑wɔn ‑dhiang zë‑ ‑nu ‑dhɛ.
ACT 9:16 ‑A ‑wëëdhɛ ‑nu dho bho‑ ‑kɔ ‑nu ö‑ 'gü n 'tɔ ‑wɔn 'gü, mang ꞊dede a ‑dho ‑a pö‑ ‑dhɛ.»
ACT 9:17 'Yö Ananiasö ‑yö ꞊wlü 'ö dho 'yö ꞊loo 'kɔ bha‑ 'gü, 'yö ö ‑kɔ kpa Sɔdhö ‑ta 'yö‑ pö‑ ‑dhɛ: «Sɔdhö n dheebhang, kwa Dëmɛ Yesu 'ö ö ‑dɩ ‑zɔn i ‑dhɛ zian ‑ta kö i nu sië bha ꞊në n bɔ i "piʋ̈ 'pö kö 'i ‑dhɛ yö 'zü ‑deewo kö i pa 'Nii‑ "slʋ̈ʋ̈slʋ̈ 'ka.»
ACT 9:18 ‑Yö ‑to ‑dhɛ do bha‑ 'gü, 'yö pë 'bha ‑nu 'wo ‑kë ꞊dhɛ 'yuʋ̈‑ "kɛɛ 'dhö 'wo go Sɔdhö "yan ‑bha 'wo ꞊wɛnng "sia‑, 'yö ‑dhɛ yö, ꞊dhɛ 'ö ꞊ya kë "dhʋ̈, 'yö 'wo‑ ‑bɔ Yesu 'ka ‑zu bho.
ACT 9:19 ꞊Dhɛ 'ö ꞊ya kë "dhʋ̈ 'yö Sɔdhö ‑yö pë ‑bhö, 'yö‑ faan ‑sɛa ‑yö ‑da 'gü. 'Yö waa‑ 'dhang ‑bho Yesu "dhiʋ̈ ‑mɛ ‑nu 'wo mü bha 'wo ‑dhɛkpaɔyi kpö ‑kë wo 'ko "piʋ̈ Damasö mü.
ACT 9:20 ‑Yö ‑to ‑dhɛ do bha‑ 'gü 'ö zun Atanna ‑wʋ pö ‑sü ‑bha Zuifö ‑nu ‑bha ‑yakwëëkëgükɔ ‑nu 'gü 'ö‑ pö: «Yesu bha Atanna Gbö ‑mü.»
ACT 9:21 Mɛ "pɛpɛ 'wo‑ ‑wʋ bha‑ ma 'yö‑ 'wɔn ‑ya ‑nu kɔn 'yö 'wo‑ pö: «Gɔɔn‑ ya 'yaa mü 'ö gun 'mɛ 'wo ꞊bhɛa Yesu 'tɔ 'gü ‑a ‑nu 'kun sië 'ö‑ ‑nu ‑wëëdhɛ bho ‑kɔ ‑ziisü ‑kë ya ‑ee? Nu 'ö‑ wo ya 'zü 'yii nu kö ‑ya ‑nu 'kun kö ‑yö 'dho‑ ‑nu 'ka "saabhomɛ ‑nu ‑gɔmɛ ‑nu ‑dhɛ ‑ee?»
ACT 9:22 "Kɛɛ kö Sɔdhö ‑zë ‑yö ö ‑bha Atanna ‑wʋ ꞊në‑ pö sië ö faan 'ka ‑kpɛawo 'ö Zuifö ‑nu 'wo Damasö ‑a ‑nu zuë" ꞊kaan‑ 'ka "kwëë 'ö dho‑ 'ka, 'ö ꞊yaa‑ pö Yesu ꞊në Atanna ‑bha ‑Yamɛ 'ö‑ ‑ya bha‑ 'ka, 'ö 'pë woo‑ pö‑ ‑dhɛ 'waa‑ dɔ.
ACT 9:23 ꞊Dhɛ 'ö ‑dhɛkpaɔyi kpö ꞊ya ziö, 'yö Zuifö ‑nu 'wo ‑ziö wo 'ko "piʋ̈ kö 'wo Sɔdhö zë. 'Yö‑ ‑nu ‑wʋ ‑yö to‑ ‑bha do,
ACT 9:24 "kɛɛ 'yö mɛ 'bha ‑nu 'wo Sɔdhö ꞊kpaɔ "slë 'ö Zuifö ‑nu 'wo‑ kë sië bha‑ 'ka. Mɛ ‑nu ‑wo wo "yan ‑to "saan 'wo‑ ‑kan 'pö‑ ‑zü bha‑ "dhi ‑bha 'yënng‑ 'gü waa‑ gbeng ‑nu ꞊gban 'gü kë "dhʋ̈ kö ꞊ya kë ꞊dua ‑pë 'ka, kö 'wa‑ 'kun 'wo‑ zë.
ACT 9:25 ꞊Dhɛ 'ö ꞊ya kë "dhʋ̈ 'yö 'mɛ 'wo 'dhang bho Yesu ‑wɔn "dhiʋ̈ Sɔdhö ‑wʋ "dhiʋ̈ bha 'wo‑ "slë ꞊mɔɔ‑ ‑bha gbeng, waa‑ Sɔdhö ‑nu 'dhö, 'yö 'wo‑ ‑da "gblü 'gü, 'yö 'wo bhiëga dɔ‑ ‑bha 'wo‑ ꞊lɔɔ "saan ('ö gun ꞊klëën ‑sü 'kaa 'pö‑ bha‑ ‑zü bha‑) ꞊zlöö 'yö dho.
ACT 9:26 ꞊Dhɛ 'ö Sɔdhö ꞊ya 'dho ꞊ya ꞊loo Zedhizadhɛmö, 'yö "slë ꞊mɔɔ‑ ‑bha kö 'ö 'dho 'dhang ‑bho Yesu "dhiʋ̈ ‑mɛ ‑nu kpö 'gü, "kɛɛ ‑wo ‑gun "suʋ̈ sië‑ ‑gɔ, ‑a ‑gɛn ‑mü ꞊dhɛ 'wii 'dhang bho Sɔdhö ‑bha ‑kë 'dhang ‑bho Yesu ‑wɔn "dhiʋ̈ ‑mɛ 'ka ‑sü bha‑ "dhiʋ̈.
ACT 9:27 'Yö Baanabasö ‑yö ‑da ‑dhɛ "dhiʋ̈ 'yö 'wo dho Yesu ‑bha yëkëmɛ ‑nu ‑dhɛ 'gü. 'Yö ‑kɔ 'ö kwa Dëmɛ ‑yö ö ‑dɩ ‑zɔn 'ka Sɔdhö ‑dhɛ Damasö ‑zian ‑ta waa‑ 'ö dhiang ‑nu 'ö‑ zë‑ ‑dhɛ bha Baanabasö ‑ya ‑gɛn dɔ‑ ‑nu ‑dhɛ. 'Yö ‑kɔ 'ö Sɔdhö ‑yö dhiang zë‑ 'ka ‑zʋgbandhe 'ka Yesu 'tɔ 'gü Damasö ‑mɛ ‑nu ‑dhɛ bha‑ ‑gɛn dɔ‑ ‑nu ‑dhɛ 'pö.
ACT 9:28 ꞊Dhɛ 'ö ꞊ya kë "dhʋ̈, 'yö Sɔdhö ‑yö ‑da ‑a ‑nu ‑bhiëë 'gü, 'yö wɛng‑ ‑nu 'wo ‑ziö Zedhizadhɛmö ‑pö 'gü ‑dhɛ ꞊gban "pɛpɛ 'gü kö ‑yö kwa Dëmɛ ‑bha ꞊naɔ ‑së bha‑ dɔ sië ö ‑ta "puu 'ka.
ACT 9:29 'Yö dhiang zë 'pö Zuifö ‑nu 'wo glɛkö ‑wʋ pö bha‑ ‑nu ‑dhɛ, 'yö 'wo zaɔdhe ‑nu ‑da, "kɛɛ 'mɛ 'wo bha ‑wo ‑gun "slë mɔɔ‑ sië‑ ‑bha kö 'wo‑ zë.
ACT 9:30 ꞊Dhɛ 'ö‑ dheebhang ‑nu 'wo ‑kë Yesu ‑bha mɛ 'ka bha ꞊waa‑ ma ꞊dhɛ woo‑ zë, 'yö 'wo dho‑ 'ka Sezadhe ‑pö 'gü 'yö 'wo‑ bɔ Taasö ‑pö 'ö‑ 'kpɔ ‑pö 'ka bha‑ 'gü.
ACT 9:31 Zuëyagblʋ̈ʋ̈‑ ‑yö ‑gun Atanna ‑bha 'kɔdhigümɛ ‑nu 'wo Zude ‑dhɛ ‑nu, Gadhidhe ‑dhɛ ‑nu waa‑ Samadhi ‑dhɛ ‑nu 'gü bha‑ ‑nu ‑gɔ, 'ö faan 'dhö ‑kë ‑a ‑nu ‑gɔ ꞊dedewo, 'ö 'wo wo ‑bha ‑tosɛadhe ‑nu ‑kë kwa Dëmɛ ꞊bhlëë ‑ya ‑sü 'ka. 'Ö 'Nii‑ "slʋ̈ʋ̈slʋ̈ ‑bha ‑a ‑nu ‑ta 'kun ‑sü ‑wɔn 'gü, 'ö Atanna ‑bha mɛ ‑nu ‑wo ‑da "dhiʋ̈ ‑kpɛawo 'ö dho‑ 'ka.
ACT 9:32 ‑A "tʋ̈ng bha‑ 'gü, Piɛdhö ‑gun ꞊nië sië "sɛ 'gü ‑dhɛ ꞊gban "pɛpɛ 'gü. Yi do 'ka 'yö dho 'dhang ‑bho Yesu "dhiʋ̈ ‑mɛ ‑nu 'wo Dhida ‑pö 'gü bha‑ ‑nu ‑dhɛ 'gü.
ACT 9:33 'Yö ‑kpan gɔndënë do 'wo‑ ‑dhɛ Ene bha‑ ‑bha kö‑ 'gü 'yaa ‑së, kö ‑yö wɔ sië sɛɛ" ‑ta, "kɛɛ kö "trüün ‑yua ꞊yaa‑ kë ‑kwɛ "saaga 'ka.
ACT 9:34 'Yö Piɛdhö ‑ya pö‑ ‑dhɛ: «Ene, Yesu Klisi ꞊ya i kë "klʋ̈ʋ̈klʋ̈! ‑Bhö "wlü kö 'i i ‑bha sɛɛ" ‑be kë!» Ene ‑to mü 'ö ꞊wlü.
ACT 9:35 ꞊Dhɛ 'ö 'mɛ 'wo Dhida ‑pö bha waa‑ Saadhɔng ‑sɛ ‑nu 'gü 'wo‑ yö, 'yö 'wo wo zuë" ꞊slëë, 'yö 'wo 'dhang bho Yesu ‑wɔn "dhiʋ̈.
ACT 9:36 Dhebhɔnë do 'ö 'dhang bho Yesu ‑wɔn "dhiʋ̈ 'wo‑ ‑dhɛ Tabita, "kɛɛ 'ö glɛkö ‑nu 'wo‑ ‑dhɛ Dɔɔkasö ('ö ꞊waa‑ pö "dhʋ̈ Adhameɛn ‑wʋ 'gü kö ‑wa ‑pö ꞊zloo bha), ‑yö ‑gun Zope ‑pö 'gü. ‑Yö ‑gun 'wɔn ‑sëkëdhe ꞊dede 'ka, 'ö "flɛɛmɛ ‑nu ‑ta kun.
ACT 9:37 ‑A "tʋ̈ng bha‑ 'gü 'yö "yua 'dhö ‑pö ‑ta, 'yö ga. ꞊Dhɛ 'ö ꞊waa‑ ꞊gee "zu, 'yö 'wo‑ ‑wɔ 'kɔdhi do 'gü 'kɔ ‑ta "dhʋ̈ng 'gü.
ACT 9:38 'Yö 'dhang ‑bho Yesu "dhiʋ̈ ‑mɛ ‑nu 'wo Zope 'wo‑ ma ꞊dhɛ Piɛdhö ‑yö Dhida ‑pö 'ö Zope ‑dhɛ "sɔɔ mü bha‑ 'gü. 'Yö 'wo mɛ ꞊plɛ bɔ Piɛdhö ‑dhɛ ‑dhɛ 'gü 'wo‑ pö: «Yi ‑bhɛa i ‑dhɛ kö 'i zun yi ‑dhɛ 'gü "vaandhö!»
ACT 9:39 ꞊Dhɛ 'ö ꞊waa‑ pö Piɛdhö ‑dhɛ "dhʋ̈, ‑yö ‑to ‑dhɛ do bha‑ 'gü 'ö ‑ziö ‑nu ꞊keng‑ 'wo dho. ꞊Dhɛ 'ö ꞊wa ꞊loo Zope ‑pö 'gü, 'yö 'wo dho Piɛdhö 'ka 'kɔdhi 'ö 'kɔ ‑ta "dhʋ̈ng 'gü bha‑ 'gü, kö ꞊gɛandhe ‑nu ‑wo ꞊yɔɔn sië‑ ‑bha "gbʋ 'ka, 'ö 'wo "bhɛɛ ‑nu 'wo‑ ‑da "bhɛɛ ꞊wlöö waa‑ ꞊gbauu‑ ‑nu 'ö Dɔɔkasö ‑ya bɔ kö ‑yö ‑tun ꞊kö ziö ö ‑gɛn "dhiʋ̈ bha‑ ‑zɔn ‑dhɛ.
ACT 9:40 'Yö Piɛdhö ‑yö mɛ ꞊gban "pɛpɛ zun "kpɛnng, 'yö zun ö kpiö 'gü 'yö ꞊bhɛa Atanna ‑dhɛ, 'yö ö wë ꞊slëë mɛ ꞊gee bha‑ ‑zian 'ka 'ö‑ pö: «Tabita, ‑bhö "wlü!» 'Yö mɛ ꞊gee bha 'ö ö "yan "dhiʋ̈ ‑pʋ. ꞊Dhɛ 'ö ꞊ya Piɛdhö yö, 'yö ꞊wlü 'ö ‑ya ö ‑gɛan.
ACT 9:41 'Yö Piɛdhö ‑yö ö ‑kɔ ‑da ꞊kwɛɛ‑ 'yö‑ dɔ ‑gɛan, 'yö ꞊gɛandhe ‑nu waa‑ 'dhang ‑bho Yesu "dhiʋ̈ ‑mɛ ‑nu 'wo to 'ö 'wo ‑ya ‑sü 'ka ‑dɩ ‑wɔn "dhiʋ̈ Atanna ‑bha 'ka bha‑ ‑nu ‑dhɛ 'kɔ bha‑ 'gü, 'yö dhebhɔ 'ö ga bha‑ ‑zɔn ‑a ‑nu ‑dhɛ kö ꞊ya ‑bö.
ACT 9:42 'Wɔn bha 'yö 'wo‑ ma Zope ‑pö 'gü ‑dhɛ ꞊gban "pɛpɛ 'gü, 'yö mɛ 'gbɛ ‑dhɛ 'wo 'dhang bho kwa Dëmɛ ‑wɔn "dhiʋ̈.
ACT 9:43 Piɛdhö ‑yö ‑to Zope ‑pö 'gü pinngdhö wükwi ‑yëkëmɛ do 'bha 'wo‑ ‑dhɛ Simɔ bha‑ ‑gɔ 'kɔɔdhö.
ACT 10:1 Gɔndënë do‑ ‑gun 'pödhɛ 'bha 'wo‑ ‑dhɛ Sezadhe bha‑ 'gü 'wo‑ ‑dhɛ Kɔɔnɛi, ‑yö ‑gun Wlɔmö "sɔdha këng do ‑gɔmɛ 'ka "sɔdha kpö 'ö go Itadhi ‑sɛ 'gü bha‑ 'gü.
ACT 10:2 Gɔndënë bha waa‑ ö ‑bha 'kɔɔmɛ ‑nu ꞊gban "pɛpɛ ‑wo ‑gun ‑suʋ̈ Atanna ‑gɔ mɛ 'ka 'ö 'wo‑ ꞊bhlëë ‑ya, 'yö Zuifö "flɛɛsü ‑nu 'wo "sɛ bha‑ 'gü ‑a ‑nu ‑ta kun ꞊dedewo, 'yö ꞊bhɛa Atanna ‑dhɛ 'yö‑ 'gü 'yaa ga.
ACT 10:3 Yi do 'ka kö 'yënng‑ ꞊ya 'kpɔ mɛ ‑gɔ 'ka, (Zuifö ‑nu ‑bha ‑bhɛa Atanna ‑dhɛ "tʋ̈ng 'ka), 'yö gɔndënë bha‑ "yan 'gü 'dhö ‑da. ‑A "yan 'gü 'ö ‑da bha 'yö Atanna ‑bha "kië do yö "pɛɛpɛdhö ‑së 'ka kö ꞊ya ‑da ö ‑gɔ 'kɔɔdhö 'yö‑ pö‑ ‑dhɛ: «Kɔɔnɛi!»
ACT 10:4 'Yö Kɔɔnɛi ‑ya ‑ga pinngdhö 'yö "suʋ̈ 'dhö ‑da 'gü 'yö‑ pö: «'Kwa ma 'mü, n Dëmɛ?» 'Yö Atanna ‑bha "kië ‑ya pö‑ ‑dhɛ: «Atanna ꞊ya i ‑bha bhɛa" ‑wʋ ma, i ‑bha "flɛɛmɛ ‑nu ‑ta 'kun ‑sü bha ꞊yaa‑ ‑zʋ 'kun.
ACT 10:5 ‑A ‑kë "dhʋ̈ ‑sü bha‑ 'gü, ‑bhö mɛ bɔ Zope ‑pö 'gü kö ‑wa pö gɔndënë do 'wo‑ ‑dhɛ Simɔ 'wo‑ 'tɔ kpɔ Piɛdhö bha‑ ‑dhɛ kö ‑yö nu.
ACT 10:6 ‑Yö wükwi ‑yëkëmɛ 'wo‑ ‑dhɛ Simɔ, 'ö‑ ‑bha 'kɔ‑ dɔ ꞊weeyi "sɔɔ bha‑ ‑gɔ 'kɔɔdhö.»
ACT 10:7 ꞊Dhɛ 'ö Atanna ‑bha "kië 'ö dhiang zë‑ ‑dhɛ bha ꞊ya 'dho, 'yö Kɔɔnɛi ‑yö ö ‑bha gwëëzë ‑nu ꞊plɛ waa‑ ‑dɩ ‑bha "sɔdha do 'ö Atanna ꞊bhlëë ‑ya 'pö, 'ö ‑kë "sɔdha kpö 'dhɛ 'ö Kɔɔnɛi ‑dɩ ‑bha 'ka ‑a 'gü bha‑ ‑nu ‑dhɛ.
ACT 10:8 'Yö 'wɔn "pɛpɛ 'ö ‑kë bha‑ ꞊gban ‑gɛn dɔ‑ ‑nu ‑dhɛ, 'yö‑ ‑nu bɔ Zope.
ACT 10:9 ‑A ‑dhɛkpaɔyi 'dhɛ 'ö dɔ‑ "piʋ̈ kö 'mɛ 'wo bha ‑wo ‑tun zian ‑ta, "kɛɛ kö ꞊wa ꞊yɔɔn Zope ‑pö "sɔɔ 'yënng‑ ‑ya mɛ ‑gɔ ꞊zinng 'gü "tʋ̈ng ‑bha, 'yö Piɛdhö ‑yö ‑da 'kɔ ‑ta "dhʋ̈ng 'gü, (‑a ‑gɛn ‑mü ꞊dhɛ ‑a 'kɔ bha‑ ‑ta "dhʋ̈ng 'gü ‑dhɛ ‑yö ‑gun "gbɛa 'ka ‑së 'ka). ‑Yö ‑dho "dhʋ̈ kö 'ö bhɛa" Atanna ‑dhɛ mü.
ACT 10:10 ‑Yö ‑to ‑dhɛ bha‑ 'gü 'yö din‑ ‑ya kun. ꞊Dhɛ 'ö 'mɛ 'ö‑ ‑nu ‑gɔ 'kɔɔdhö bha ꞊wa zun‑ ‑bhö pë ‑kpa ‑sü ‑bha, 'yö Piɛdhö "yan 'gü ‑yö ‑da.
ACT 10:11 'Ö dho ‑dhɛ ‑ga kö dhang‑ "dhi ꞊ya "pʋ, kö pë 'bha ‑yö 'go sië 'mü 'ö ꞊lɔɔ. 'Pë 'ö bha ‑yö ‑kë ꞊dhɛ sɔ 'kpii‑ suu 'bha 'ö‑ "zɔ ‑yiisiö ꞊gban 'wo mɛ ꞊kwɛɛ‑ ‑a 'dhö, kö ‑yö lɔɔ‑ sië 'ö go dhang‑ 'gü.
ACT 10:12 ꞊Kwlaa ‑ta ‑wü ‑nu waa‑ "siapë ‑nu waa‑ ‑maa suu ꞊gban "pɛpɛ ‑wo ‑gun sɔ bha‑ 'gü,
ACT 10:13 'Yö‑ "tʋ 'dhö ‑da ‑wʋ do bha 'gü kö ‑ya pö sië: «Piɛdhö, ‑bhö "wlü kö 'i‑ 'bha zë 'i‑ ‑bhö!»
ACT 10:14 'Yö Piɛdhö ‑ya pö: «‑Abin, n Dëmɛ! 'Pë 'ö Zuifö ‑nu yi ‑bha 'tɔng‑ ‑ya pö 'ya 'dho‑ ‑bhö 'mii‑ 'bha ‑bhö do!»
ACT 10:15 'Yö ‑wʋ do bha 'ö‑ pö 'zü‑ ‑dhɛ ‑deewo 'ö‑ pö: «'Pë 'ö Atanna ꞊yaa‑ pö ‑yö ‑së ‑bhöpë 'ka, bhi ‑zë 'bha 'dho‑ pö ‑yö 'ya‑!»
ACT 10:16 ‑Wa ‑pö "dhʋ̈ ‑gɛnyan 'ka ‑yaaga, 'yö 'pë bha 'ö ö yee ‑kë 'ö dho dhang‑ 'gü.
ACT 10:17 Piɛdhö ‑to ö ‑zʋ 'gɔn ‑sü ‑bha ‑a "yan 'gü 'ö ‑da bha‑ 'klɔɔ‑ 'ka, 'yö Kɔɔnɛi ‑bha 'mɛ 'ö‑ ‑nu bɔ bha 'wo ‑da 'plöö 'pö, 'yö 'wo ‑ya Simɔ ‑bha 'kɔ ‑dhɛ mɔɔ‑ ‑sü ‑bha kö ‑wo mɛ ‑nu dhɛɛ" ‑nu 'kpɔ sië. 'Yö 'wo dho 'wo ꞊loo Simɔ ‑bha 'kɔdhi "dhiʋ̈,
ACT 10:18 'yö 'wo‑ 'kɔ dëmɛ ‑dhɛ 'wo‑ dhɛɛ" kpɔ 'wo‑ pö: «Simɔ 'wo‑ ‑dhɛ Piɛdhö bha ‑yö 'kɔ ya ꞊në‑ 'gü ‑ee?»
ACT 10:19 Piɛdhö ‑to ö ‑zʋ 'gɔn ‑sü ‑bha ‑a "yan 'gü 'ö ‑da bha‑ 'klɔɔ‑ 'gü, 'yö 'Nii‑ "slʋ̈ʋ̈slʋ̈ ‑ya pö‑ ‑dhɛ: «‑Bhö ‑dhɛ ‑ga, mɛ ‑yaaga ‑wo i mɔɔ‑ sië,
ACT 10:20 ‑bhö "wlü kö 'i zun "sia‑ kö kɛng‑ ‑nu 'ka 'dho, "sika 'ya 'dho kë i 'gü, ‑a ‑gɛn ‑mü ꞊dhɛ ma ꞊në 'a‑ ‑nu bɔ!»
ACT 10:21 ꞊Dhɛ 'ö ꞊ya kë "dhʋ̈, 'yö Piɛdhö ‑yö go 'kɔ ‑ta "dhʋ̈ng 'gü, 'yö‑ pö 'mɛ 'wo bha‑ ‑nu ‑dhɛ: «Ma ꞊në 'ka n mɔɔ‑ sië bha, 'kwa ma mü?»
ACT 10:22 'Yö 'wo‑ pö‑ ‑dhɛ: «"Sɔdha ‑gɔmɛ Kɔɔnɛi ꞊në yi bɔ, ‑yö ‑kë 'mɛ 'ö pö 'aa‑ ‑bha, 'ö Atanna ꞊bhlëë ‑ya ꞊dedewo ‑a 'ka, Zuifö ‑nu ꞊gban "pɛpɛ ‑wa 'tɔ ‑së pö. 'Yö Atanna ‑yö ö ‑bha "kië do bɔ‑ ‑dhɛ kö ‑ya pö i ‑dhɛ kö 'i nu 'i dhiang zë‑ ‑dhɛ kö ‑yö ö "tʋ 'to‑ ‑bha.»
ACT 10:23 'Yö Piɛdhö ‑ya ‑nu ꞊yëë bho 'yö 'wo ‑wɔ mü. ꞊Dhɛ 'ö ‑dhɛ ꞊ya ꞊kpaɔ, 'yö waa‑ Piɛdhö ‑nu 'wo ‑da zian ‑ta. 'Yö 'dhang ‑bho Yesu "dhiʋ̈ ‑mɛ ‑nu 'wo go Zope mü 'wo dho Piɛdhö dɔ, 'yö 'wo dho 'wo ꞊loo Sezadhe ‑pö 'gü.
ACT 10:24 'Wo dho ‑wo ‑loo Sezadhe ‑a ‑tadhɛkpaɔ ‑ta. 'Ö "dhʋ̈ bha kö Kɔɔnɛi ꞊ya ö dëbhang ‑nu 'bha ‑nu waa‑ "taɔngdë ꞊dede ‑nu ‑dhɛ kö ‑wo ‑ya sië Piɛdhö ‑gɔ.
ACT 10:25 ꞊Dhɛ 'ö Kɔɔnɛi ꞊ya Piɛdhö yö kö ‑yö ‑da sië 'kɔɔdhö, 'yö dho‑ ‑gɔ zian‑, 'yö "gblëënu‑ ꞊wlöö.
ACT 10:26 "Kɛɛ 'yö Piɛdhö ‑yö ö ‑kɔ ‑da 'gü, 'yö‑ pö‑ ‑dhɛ: «‑Bhö "wlü, mɛ ‑mü n 'ka 'pö ꞊dhɛ i 'dhö!»
ACT 10:27 'Yö zun dhiang ‑zë Kɔɔnɛi ‑dhɛ ‑sü ‑bha 'yö 'wo dho 'wo ‑da 'ka 'kɔɔdhö, 'yö ‑kpan 'pö mɛ kpö ‑bha mü
ACT 10:28 'yö‑ pö‑ ‑nu ‑dhɛ: «Kaa ꞊dede ka‑ 'wɔn ‑dɔ ꞊dhɛ 'ö Zuifö ‑nu wɔ ‑kɔ 'gü 'waa ‑da 'mɛ 'waa Zuifö 'ka‑ ‑nu ‑gɔ 'kɔɔdhö, "ɛɛn 'waa ꞊nëng‑ ‑nu ‑bha, "kɛɛ Atanna ‑ya ‑zɔn n ‑dhɛ ꞊dhɛ 'ma 'dho mɛ 'bha ‑ga pë yaa 'ka 'zü 'ö 'a ‑kan ‑bha.
ACT 10:29 'Wɔn 'ö‑ ‑wɔn 'gü 'yö n ‑dhɛ 'ka‑ wo bha "sika bha 'yii ‑da n 'gü 'yö 'a nu bha 'yö bha. ꞊Dhɛ 'ö "dhʋ̈ 'kwa‑ ma yö?»
ACT 10:30 'Yö Kɔɔnɛi ‑ya pö: «‑A ‑dhɛkpaɔyi ‑yiisiö ‑naa ꞊nɛ, ‑a "tʋ̈ng ꞊dede ꞊në 'kwa dɔ‑ 'gü ya, kö a bhɛa" sië Atanna ‑dhɛ n ‑gɔ 'kɔɔdhö, 'yö n "yan 'gü 'dhö ‑da 'yënng‑ ‑kpɔ slöö' bha‑ 'ka, 'a dho ‑dhɛ ‑ga kö gɔndënë do 'ö sɔ 'bhü bhɔ ‑sü 'dhö‑ ‑bha ‑yö dɔ sië n wëëdhö mü
ACT 10:31 'yö‑ pö n ‑dhɛ: «Kɔɔnɛi, Atanna ꞊ya i bhɛa" ‑wʋ ma, i ‑bha "flɛɛmɛ ‑nu ‑ta 'kun ‑sü bha ꞊yaa‑ ‑zʋ 'kun.
ACT 10:32 ꞊Dhɛ 'ö "dhʋ̈, ‑bhö mɛ bɔ Zope kö 'mɛ 'wo‑ ‑dhɛ Simɔ 'wo‑ 'tɔ ‑ya ‑ta ‑dhɛ Piɛdhö bha ‑yö nu. ‑Yö Simɔ 'dhɛ 'ö ‑kë wükwi ‑yëkëmɛ 'ka bha‑ ‑gɔ 'kɔɔdhö ꞊weeyi "dhiʋ̈.»
ACT 10:33 'Wɔn 'ö ‑kë 'yö 'a mɛ bɔ i ‑dhɛ vɛɛdhö bha 'yö bha. ꞊Dhɛ 'ö 'bha nu ‑zë wo kö ꞊ya kë ‑së. ꞊Dhɛ 'ö "dhʋ̈ kö mɛ ꞊gban 'kwa bho 'ko ‑ta Atanna wëëdhö ‑së kö 'pë 'ö‑ dɔ i "dhi 'i‑ pö yi ‑dhɛ.»
ACT 10:34 'Yö Piɛdhö ‑yö dhiang zë ‑sü zü bho‑ ‑nu ‑dhɛ 'ö‑ pö: «'Ma‑ 'wɔn dɔ ꞊tɔn ꞊dhɛ Atanna 'yaa mɛ ‑zë 'gü kë 'zü ꞊taamasü ya‑ 'gü kö ‑yö ö ‑bha dhasü nu‑ ‑mɛ ‑dhɛ.
ACT 10:35 "Kɛɛ mɛ "ʋʋ mɛ 'ö go "sɛ "ʋʋ "sɛ 'ö‑ 'gü 'ö‑ ꞊bhlëë ‑ya, 'ö 'wɔn ‑nu 'ö pö 'aa‑ ‑bha ‑a ‑kë, ‑a ‑mɛ ‑dhɔ ‑ya ‑kë.
ACT 10:36 ‑Wʋ 'dhɛ 'kö Atanna ‑ya bɔ Izraɛdhö ‑mɛ ‑nu ‑dhɛ bha yö ‑zë ka‑ ‑dɔ. Naɔ ‑së 'ö ‑gban zuëyagblʋ̈ʋ̈‑ 'ö Atanna ‑ya kë waa‑ mɛ "bhɩɩ‑ ‑nu wo ꞊zinng 'gü ‑a ‑bha bha ‑yö ‑bɔ 'ka Yesu Klisi ꞊në‑ ‑ta 'yö‑ ‑kë. Yesu Klisi bha ꞊në mɛ "bhɩɩ‑ ꞊gban "pɛpɛ ꞊kɔɔnmɛ 'ka.
ACT 10:37 'Wɔn ‑nu 'wo ‑kë Zude ‑sɛ "pɛpɛ ꞊gban 'gü, "kɛɛ 'ö‑ zü ‑yö bho Gadhidhe kö Zan ꞊ya mɛ ‑go 'wɔn yaa 'gü ‑zu bho ‑sü ‑dhiang zë bha ka‑ ‑nu ‑dɔ.
ACT 10:38 ‑Kɔ 'ö Atanna ‑yö ö ‑bha 'Nii‑ "slʋ̈ʋ̈slʋ̈ waa‑ ‑bha 'gügbɩɩdhɛ nu‑ 'ka Yesu 'ö go Nazadhɛtö bha‑ ‑dhɛ bha ka‑ ‑dɔ 'pö. 'Ö go mü 'zü ‑kɔ 'ö Yesu bha 'ö ꞊nië‑ 'ka kwa ‑bha "sɛ ya‑ 'gü 'wɔn ‑së kë ‑sü waa‑ 'mɛ 'wo Sɔtraan ‑gɔ ꞊dhuëngdhɛ 'gü ‑a ‑nu ‑bha "yua ‑bho ‑a ‑nu ‑bha ‑sü ‑nu 'ka 'pö‑ ‑nu 'gü 'dɔɔndhö bha ka‑ ‑dɔ! 'Wɔn ‑nu 'ö‑ ‑kë "dhʋ̈ bha‑ ‑gɛn ‑mü ꞊dhɛ Atanna ‑yö ‑gun "piʋ̈.
ACT 10:39 Pë "pɛpɛ 'ö‑ ‑kë Zedhizadhɛmö ‑dhɛ waa‑ Zuifö "sɛgɔ 'dhɛ ‑nu 'wo to ‑a ‑nu 'gü, yi‑ "sɛɛ‑ 'ka, "kɛɛ 'yö 'wo‑ zë ‑a ‑dɔ "dhü ‑bha ‑sü 'ka.
ACT 10:40 'Yö Atanna ‑ya bho ga 'gü ‑a ‑dhɛkpaɔyi ‑yaaga ‑naa 'ka, 'yö 'gügbɩɩdhɛ nu‑ ‑dhɛ kö ‑yö ö ‑dɩ ‑zɔn mɛ ‑nu ‑dhɛ ꞊dhɛ ö "yaandhe 'ka,
ACT 10:41 "kɛɛ Atanna 'yii "wɩ‑ ‑bha ‑a ‑gɔ kö ‑yö ö ‑dɩ ‑zɔn "sɛgümɛ ‑nu ꞊gban ‑dhɛ kö 'yii kë 'mɛ 'ö yi sü ‑blɛɛsü 'ö yi ‑ya ‑dɩ ‑ta kö 'yi kë‑ "sɛɛ‑ 'ka bha yi 'ka. ꞊Dhɛ 'ö ꞊yaa‑ bho ga 'gü "dhʋ̈, yi ‑bhöpë ‑nu ‑bhö 'yi müpë ‑nu mü yi 'kwëë‑.
ACT 10:42 'Yö‑ pö yi ‑dhɛ 'yi 'wɔn ‑taɔng ‑së pö Zuifö ‑nu ‑dhɛ kö 'yi‑ pö‑ ‑nu ‑dhɛ 'zü ꞊dhɛ yö ꞊në Atanna ‑yö ö ‑ya kö 'ö za dɔ "yaanmɛ ‑nu 'wo "kpʋng ꞊taa yö waa‑ ꞊geebɔɔmɛ ‑nu ‑bha.
ACT 10:43 Yesu bha 'wɔn 'ö ‑gban ‑bha, Atanna ‑wʋdhiʋ̈loomɛ ‑nu ꞊gban "pɛpɛ ‑wa ‑dhiang ‑zë 'wo‑ pö ꞊dhɛ, mɛ "ʋʋ 'mɛ 'ö ꞊ya 'dhang bho‑ "dhiʋ̈, kö ꞊ya ö ‑bha 'wɔn yaa ‑nu ‑mawɔn 'to ‑sü ꞊slɔɔ Atanna "piʋ̈ ‑a 'tɔ 'gü.»
ACT 10:44 Piɛdhö ‑yö ‑to dhiang bha‑ zë ‑dhɛ 'gü, 'yö 'Nii‑ "slʋ̈ʋ̈slʋ̈ ‑yö ꞊lɔɔ mɛ "pɛpɛ 'wo gun wo "tʋ to sië‑ ‑wʋ ‑bha bha‑ ‑nu ‑ta.
ACT 10:45 Zuifö ‑nu 'wo 'dhang bho Yesu "dhiʋ̈ 'ö waa Piɛdhö ‑nu 'wo nu bha ꞊dhɛ 'ö ꞊wa 'wɔn bha‑ ‑dhɛ yö, ‑a 'wɔn ‑ya ‑nu kɔn ꞊dedewo Atanna ‑bha 'Nii‑ "slʋ̈ʋ̈slʋ̈ bha lɔɔ‑ 'ö‑ wo 'mɛ 'waa Zuifö 'ka‑ ‑nu ‑ta bha‑ ‑wɔn 'gü.
ACT 10:46 ‑A "tʋ̈ng bha‑ 'gü kö ‑wʋ ‑dee ‑nu 'ö 'waa‑ ma ‑wa pö sië, kö ‑wo Atanna 'tɔ bhɔ sië‑ ‑bha ‑kë 'kpiisü ‑wɔn 'gü.
ACT 10:47 ꞊Dhɛ 'ö ꞊ya kë "dhʋ̈ 'yö Piɛdhö ‑ya pö ö "tayɔɔ ‑nu ‑dhɛ: «'Mɛ ꞊wa 'Nii‑ "slʋ̈ʋ̈slʋ̈ ꞊slɔɔ ꞊dhɛ kwa 'dhö ya, kwa ‑dho ‑kɔ ‑a ‑nu ‑dhɛ ‑bɔ Yesu 'ka ‑zu bho ‑sü ‑ta ‑ee?»
ACT 10:48 ꞊Dhɛ 'ö ꞊ya kë "dhʋ̈ 'yö‑ pö‑ ‑nu ‑dhɛ ‑wa ‑nu ‑bɔ Yesu 'ka ‑zu bho ‑a 'tɔ 'gü. 'Yö 'wo‑ ‑nu ‑zu. 'Yö 'mɛ 'wo bha 'wo‑ pö Piɛdhö ‑dhɛ ‑yö ‑dhɛkpaɔyi 'në 'bha kë wo "piʋ̈ mü, 'yö Piɛdhö ‑yö ‑wɩ ‑bha.
ACT 11:1 ꞊Dhɛ 'ö Yesu ‑bha yëkëmɛ ‑nu waa‑ 'dhang ‑bho "dhiʋ̈ ‑mɛ ‑nu 'wo Zude ‑sɛ 'gü ꞊waa‑ ma ꞊dhɛ 'mɛ 'waa Zuifö 'ka ‑a mɛ 'bha ‑nu ꞊wa 'dhang bho Atanna ‑wʋ "dhiʋ̈,
ACT 11:2 'ö Piɛdhö ꞊ya ö yee kë ꞊ya nu ꞊ya ꞊loo Zedhizadhɛmö 'plöö, 'yö Zuifö ‑nu 'wo ‑to Yesu Klisi "piʋ̈ ‑mɛ ‑nu 'ka mü bha 'wo ‑ya ‑a pö ‑sü ‑bha Piɛdhö ‑dhɛ 'wo‑ pö:
ACT 11:3 «‑Da 'i‑ wo 'mɛ 'waa yi suu 'gü ‑mɛ ‑nu 'ka ‑a ‑nu ‑gɔ 'kɔɔdhö 'ö 'ka pë ‑bhö ka 'kwëë‑ bha 'yii yi ‑zʋ 'kun tongtongdhö!»
ACT 11:4 'Yö Piɛdhö ‑yö 'wɔn bha‑ ‑gɛn dɔ‑ ‑nu ‑dhɛ "pɛɛpɛdhö 'ö go‑ zübhodhɛ ‑bha 'ö dho 'ö zun‑ 'ka‑ "dhiʋ̈todhɛ ‑bha 'ö‑ pö:
ACT 11:5 «N dheebhang ‑nu, a ‑gun Zope ‑pö 'gü kö a bhɛa" sië Atanna ‑dhɛ, 'yö n "yan 'gü 'dhö ‑da, 'yö 'a pë 'bha yö kö ‑yö nu sië n "tʋ̈ng 'ka, 'pë bha ‑yö ‑gun ꞊dhɛ sɔ 'kpii‑ bha 'ö‑ "zɔ ‑yiisiö ꞊gban 'wo mɛ ꞊kwɛɛ‑ ‑a 'dhö kö ‑yö 'go sië dhang‑ 'gü 'ö ꞊yɔɔn n "sɔɔ.
ACT 11:6 'A ‑dhɛ ‑ga 'pë bha‑ 'gü "sɛnngdhö, kö ꞊kwlaa ‑ta ‑wü ‑nu, "bü ‑wü ‑nu, "siapë ‑nu waa‑ ‑maa ‑nu ‑a ‑nu ꞊gban "pɛpɛ suu ‑yö 'pë bha‑ 'gü.
ACT 11:7 'Yö n "tʋ 'dhö ‑da ‑wʋ do 'bha 'gü kö ‑ya pö sië n ‑dhɛ: «‑Bhö "wlü, Piɛdhö, kö 'i‑ 'bha zë 'i‑ ‑bhö!»
ACT 11:8 'Yö 'a‑ pö: «‑Abin, n Dëmɛ, 'pë 'ö yii‑ 'tɔng‑ ‑ya pö 'ya 'dho‑ ‑bhö 'mii‑ 'bha ‑bhö do!»
ACT 11:9 'Yö ‑wʋ do 'bha ‑yö go dhang‑ 'gü 'zü 'ö‑ pö n ‑dhɛ: «'Pë 'ö Atanna ꞊yaa‑ pö ‑yö ‑së kö ‑wa ‑bhö, bhi ‑zë 'bha 'dho‑ pö‑ ‑bha ‑yö 'ya‑!»
ACT 11:10 'Wɔn bha ‑yö ‑kë "dhʋ̈ ‑gɛnyan 'ka ‑yaaga, 'yö pë ‑nu bha 'wo wo yee ‑kë 'wo dho dhang‑ 'gü.
ACT 11:11 ‑A "tʋ̈ng ꞊dede bha‑ 'gü, 'yö mɛ ‑yaaga 'wo‑ ‑nu bɔ n ‑dhɛ ‑dhɛ 'gü 'wo go Sezadhe bha 'wo ꞊loo 'kɔ 'a gun‑ 'gü bha‑ "dhi "dhiʋ̈.
ACT 11:12 'Yö Atanna ‑bha 'Nii‑ ‑ya pö n ‑dhɛ ꞊dhɛ yɛng ‑nu 'yi 'dho, "sika 'ya 'dho kë n 'gü. 'Yö kwa dheebhang ‑nu "saɔdo 'ö yɛng‑ ‑nu 'yi nu ya 'wo ‑da n "piʋ̈, 'yö 'yi dho Kɔɔnɛi ‑gɔ 'kɔɔdhö Sezadhe ‑pö 'gü.
ACT 11:13 'Yö ‑kɔ 'ö Kɔɔnɛi ‑yö Atanna ‑bha "kië yö‑ 'ka ö ‑gɔ 'kɔɔdhö, 'yö‑ ‑gɛn dɔ yi ‑dhɛ 'ö‑ pö. 'Yö Atanna ‑bha "kië bha 'ö‑ pö n ‑dhɛ: «‑Bhö mɛ bɔ Zope, Simɔ 'ö‑ 'tɔ ‑ya ‑ta 'dhö Piɛdhö 'ka bha‑ ‑dhɛ kö ‑yö nu!
ACT 11:14 Kö ‑wʋ ‑nu 'ö kaa‑ i ‑gɔ 'kɔɔmɛ ‑nu 'ka dho bɔ‑ ‑ta 'ka dha bha ‑ya pö i ‑dhɛ!»
ACT 11:15 ꞊Dhɛ 'ö 'ya 'dho 'ya ꞊loo mü, 'ö 'ma dhiang zë ‑sü zü bho, 'yö 'Nii‑ "slʋ̈ʋ̈slʋ̈ ‑yö ꞊lɔɔ‑ ‑nu ‑ta ꞊dhɛ ‑kɔ do 'ö ꞊lɔɔ‑ 'ka kwa ‑ta zübhoyi 'ka bha‑ 'dhö.
ACT 11:16 'Yö n ‑zʋ ‑yö ‑bö kwa Dëmɛ ‑wʋ 'ö‑ pö ꞊dhɛ: «Zan ‑zë ‑yö mɛ ‑zu "yi ꞊në‑ 'ka, "kɛɛ ka ‑zë ka ‑dho pa 'Nii‑ "slʋ̈ʋ̈slʋ̈ ꞊në‑ 'ka bha‑ 'ka.
ACT 11:17 Atanna ‑yö gbaɔdhe do bha‑ ‑kë ‑a ‑nu ‑gɔ 'pö ꞊dhɛ ‑kɔ do 'ö‑ ‑kë 'ka yi ‑gɔ kö 'ya 'dhang bho kwa Dëmɛ Yesu Klisi "dhiʋ̈ bha‑ 'dhö. ꞊Ya kë "dhʋ̈ ma ‑zë a ‑dho pö Atanna ‑dhɛ 'ya 'dho kë "dhʋ̈ ‑ee?»
ACT 11:18 ꞊Dhɛ 'wo ‑wʋ ‑nu bha‑ ma, 'yö ‑dhɛa ‑yö ga‑ ‑nu ‑ta, 'yö 'wo ‑ya Atanna 'tɔ bhɔ ‑sü ‑bha ꞊dhɛ: «꞊Ya "wɩ‑ ‑bha kö 'mɛ 'waa Zuifö 'ka ‑wo wo zuë" slëë‑ ö "piʋ̈, kö ‑wo ‑tosɛa 'ö‑ "dhiʋ̈todhɛ 'yaa 'dhö ‑a ꞊slɔɔ 'pö.»
ACT 11:19 "Tʋ̈ng 'wo ‑to Yesu "piʋ̈ ‑mɛ ‑nu ‑wëëdhɛ bho‑ 'ka, 'ö 'wo Etiɛnö zë‑ 'ka bha 'dhang ‑bho Yesu "dhiʋ̈ ‑mɛ ‑nu ‑wo ‑pɛn "sɛ 'gü "tʋ̈ng bha ꞊në‑ 'gü, 'yö‑ mɛ 'bha ‑nu ‑wo dho ‑ya Fenisi ‑sɛ ‑nu, Siplë ‑sɛ ‑nu waa‑ Angtiɔsö ‑pö ‑nu 'gü, 'yö 'wo ‑ya Atanna ‑wʋ pö ‑sü ‑bha mɛ ‑nu ‑dhɛ, "kɛɛ ‑wa ‑pö Zuifö ‑nu ‑dɩ ‑slɔɔ ꞊në‑ ‑nu ‑dhɛ.
ACT 11:20 'Yö 'dhang ‑bho Yesu "dhiʋ̈ ‑mɛ ‑nu 'do 'do 'wo gun Siplë ‑dhɛ waa‑ Sidhɛnö ‑dhɛ ‑nu 'gü 'pö bha 'wo dho Angtiɔsö ‑pö 'gü, 'yö 'wo naɔ ‑së 'ö ‑gban kwa Dëmɛ Yesu ‑wɔn ‑bha bha‑ dɔ 'mɛ 'waa Zuifö 'ka ‑a ‑nu ‑gɔ 'pö.
ACT 11:21 Kwa Dëmɛ ‑bha 'gügbɩɩdhɛ ‑gun ‑nu "piʋ̈, 'yö mɛ 'gbɛ ‑dhɛ 'wo 'dhang bho‑ "dhiʋ̈, 'yö 'wo wo zuë" ꞊slëë‑ "piʋ̈.
ACT 11:22 ꞊Dhɛ 'ö Atanna ‑bha 'kɔdhigümɛ ‑nu 'wo Zedhizadhɛmö ꞊wa 'wɔn 'ö "dhʋ̈ bha‑ ‑taɔng ma, 'yö 'wo Banabasö bɔ Angtiɔsö.
ACT 11:23 ꞊Dhɛ 'ö ꞊ya 'dho ꞊ya ꞊loo mü, 'ö‑ "yan ꞊ya ‑da 'wɔn ‑së 'ö Atanna ‑ya ‑kë 'mɛ 'wo mü ‑a ‑nu ‑dhɛ bha‑ 'gü, ‑ya zuë" ꞊nii ‑da ꞊dedewo. 'Yö‑ ‑nu faan dɔ kö ‑wo wo ‑zʋ ‑gban ‑to kwa Dëmɛ "piʋ̈ ‑sü 'ö mɛ zuë" ꞊gban 'ka bha‑ ‑bha.
ACT 11:24 Banabasö bha ‑yö ‑kë 'mɛ 'ö‑ këwɔn gun ‑së, 'ö pa ‑sü 'ka Atanna ‑bha 'Nii‑ waa‑ ‑zʋ ‑yö ‑a ‑dhɛ ‑sü 'ka ‑a 'ka. Mɛ 'gbɛ ꞊dede ‑wo ka wo zuë" ‑slëë kwa Dëmɛ "piʋ̈ 'pö‑ bha‑ 'gü.
ACT 11:25 ꞊Dhɛ 'ö ꞊ya kë "dhʋ̈, 'yö Banabasö ‑yö dho Taasö ‑pö 'gü kö 'ö Sɔdhö mɔɔ‑ mü.
ACT 11:26 ꞊Dhɛ 'ö Sɔdhö yö, 'yö nu‑ 'ka Angtiɔsö 'yö wɛng 'wo ‑kwɛ do ‑kë mü Atanna ‑bha 'kɔdhigümɛ ‑nu 'wo mü bha‑ ‑nu "piʋ̈, 'yö 'wo‑ mɛ 'gbɛ ꞊draan 'wɔn ‑nu 'wo ‑gban ‑to Atanna "piʋ̈ ‑kɔ ‑bha bha‑ ‑bha. ‑Dhɛ 'ö Angtiɔsö bha ꞊në 'wo 'dhang ‑bho Yesu "dhiʋ̈ ‑mɛ ‑nu 'tɔ ‑blɛɛsü kpɔ‑ 'gü 'wo‑ ‑nu ‑dhɛ «kletiɛn ‑nu» (꞊waa‑ pö "dhʋ̈ kö ‑wa ‑pö ‑to Klisi "piʋ̈ ‑mɛ ‑nu).
ACT 11:27 ‑A "tʋ̈ng bha‑ 'gü 'yö Atanna ‑wʋdhiʋ̈loomɛ ‑nu 'bha ‑nu 'wo go Zedhizadhɛmö 'wo nu Angtiɔsö.
ACT 11:28 'Yö 'mɛ 'wo bha‑ mɛ do 'wo‑ ‑dhɛ Agabusö, 'yö ꞊wlü‑ ‑nu kpö 'gü mü 'ö dɔ ö ‑gɛan 'ö dhiang zë Atanna ‑bha 'Nii‑ "slʋ̈ʋ̈slʋ̈ ‑bha 'gügbɩɩdhɛ 'ka 'ö‑ pö: «‑A yi 'yaa ꞊gblɛɛn 'zü kö "vʋ̈ʋ̈‑ ‑da "kpʋngtaadhɛ ꞊gban "pɛpɛ 'gü.» ('Yö‑ "vʋ̈ʋ̈ 'ö "dhʋ̈ bha 'ö ‑da 'pö "tʋ̈ng 'ö Klodö ‑yö gun‑ 'ka ‑gblüdë 'kpii‑ 'ka bha‑ 'gü "dhʋ̈ tɛan‑ 'ka.)
ACT 11:29 'Yö 'dhang ‑bho Yesu "dhiʋ̈ ‑mɛ ‑nu 'wo‑ pö wo ‑dho 'pë 'ö‑ ‑nu ‑kɔ dho ꞊mɔɔ‑ ‑bha ‑a bho 'ko ‑ta kö 'wo‑ bɔ wo dheebhang ‑nu 'wo Yesu ‑bha mɛ 'ka Zude ‑sɛ 'gü bha‑ ‑nu ‑dhɛ.
ACT 11:30 'Yö 'wo‑ ‑kë ꞊dhɛ ‑kɔ 'wo‑ pö‑ 'ka bha‑ 'dhö, 'yö 'wo pë bho 'ko ‑ta 'wo‑ dɔ Banabasö waa‑ Sɔdhö ‑a ‑nu ‑gɔ, 'yö 'wo dho‑ 'ka mɛ zizi ‑nu 'wo ‑to Atanna "piʋ̈ ‑mɛ 'ka Zude ‑sɛ 'gü bha‑ ‑nu ‑dhɛ.
ACT 12:1 ‑A "tʋ̈ng do bha‑ 'gü, 'yö ‑gblüdë Edhodö ‑yö zun Atanna ‑bha 'kɔdhigümɛ ‑nu 'bha ‑nu ‑wëëdhɛ bho ‑sü ‑bha,
ACT 12:2 'yö‑ pö ‑wo Zan dheebhang Zakö zë, 'yö 'wo‑ ‑gɔ ‑kan.
ACT 12:3 ꞊Dhɛ 'ö ꞊yaa‑ 'wɔn dɔ ꞊dhɛ Zakö zë ‑sü bha‑ 'gü ‑wɔn ꞊ya dhi Zuifö ‑nu ‑dhɛ, 'yö Piɛdhö kun 'pö. (‑Yö ‑kë "dhʋ̈ Zuifö ‑nu ‑bha ꞊niidadhe 'wo‑ ‑dhɛ 'bluu‑ 'ö "sɛkɛ 'yaa‑ ‑bha ‑a ‑bhö ‑ta ꞊niidadhe bha‑ ‑ta.)
ACT 12:4 ꞊Dhɛ 'ö ꞊wa Piɛdhö 'kun, 'yö Edhodö ‑ya ‑da ‑kaso 'gü, 'yö "sɔdha ‑nu ‑kaɔng do ga "saɔdo sü, 'yö‑ ‑nu dan ‑yiisiö ‑yiisiö, 'yö 'wo wo 'ko ‑ta kun Piɛdhö ‑maa kë ‑sü ‑bha, ‑a ‑gɛn ‑mü ꞊dhɛ ‑yö ‑gun Edhodö "piʋ̈ ꞊dhɛ Pakö ꞊niidadhe bha ꞊ya "kan, kö 'ö 'dho Piɛdhö 'ka "sɛgümɛ ‑nu ‑kuu "dhiʋ̈ kö ‑wa zë ‑wɔn ‑ya 'kwëë‑.
ACT 12:5 ‑A ‑kë "dhʋ̈ ‑sü bha‑ 'gü "sɔdha ‑nu ‑wo ‑gun Piɛdhö ‑gɔ "dhiʋ̈ ‑kaso 'kɔɔdhö mü, "kɛɛ kö Atanna ‑bha 'kɔdhigümɛ ‑nu ‑zë ‑wo bhɛa" sië Atanna ‑dhɛ ‑a ‑wɔn 'gü wo faan ꞊gban 'ka "dhʋ̈ ‑kpɛawo.
ACT 12:6 ‑Dhɛkpaɔyi 'ö Edhodö dho 'dho Piɛdhö 'ka "sɛgümɛ ‑nu ‑kuu "dhiʋ̈‑ 'ka bha‑ 'ka gbeng, kö Piɛdhö ‑yö yi zë sië "sɔdha ‑nu ꞊plɛ 'wo wo "yan to‑ ‑bha bha‑ ‑nu ꞊zinng 'gü, kö ‑wo lɔɔga ꞊plɛ ‑kplü ‑sü 'ka‑ ‑bha, kö "sɔdha 'bha ‑nu ‑wo 'kɔdhi 'wo Piɛdhö ‑da 'gü bha‑ "dhi "dhiʋ̈ 'pö.
ACT 12:7 'Wo dho "kan wo ‑ta kö kwa Dëmɛ ‑bha "kië do ꞊ya ‑wo "yɛa‑, kö ‑dhɛpuudhɛ ‑ya ‑da 'kɔdhi bha‑ 'gü ‑dhɛ ꞊gban "pɛpɛ 'gü, kö Atanna ‑bha "kië bha ꞊ya 'pa Piɛdhö ‑bha ꞊yaa‑ pö‑ ‑dhɛ: «‑Bhö "wlü "vaandhö!» ꞊Dhɛ 'ö‑ pö "dhʋ̈, 'yö lɔɔga ‑nu 'wo gun Piɛdhö ‑bha bha 'wo ‑kan, 'yö 'wo go‑ ‑kɔ ‑nu ‑bha.
ACT 12:8 'Yö Atanna ‑bha "kië ‑ya pö Piɛdhö ‑dhɛ: «‑Bhö kwi "pɛn ‑ya i ‑ta kö 'i i ‑bha ‑sabha ‑ya i ‑gɛan!» 'Yö Piɛdhö ‑ya ‑kë ꞊dhɛ ‑kɔ 'ö‑ pö‑ 'ka‑ ‑dhɛ bha‑ 'dhö. 'Yö‑ pö 'zü‑ ‑dhɛ: «‑Bhö i ‑bha ꞊gbauu ‑da kö 'i nu 'ko 'dho!»
ACT 12:9 'Yö Piɛdhö ‑yö ö ‑bha ꞊gbauu‑ ‑da, 'yö ‑ziö Atanna ‑bha "kië bha‑ ꞊keng‑, 'yö 'wo go ‑kaso ‑kɔdhi bha‑ 'gü kö Piɛdhö 'yii 'dhang bho ꞊kö‑ "dhiʋ̈ ꞊dhɛ 'wɔn 'ö kë sië bha tɛan‑ ‑mü. Kö ‑yö ‑tun ꞊kö ö ‑zʋ 'gɔn ꞊dhɛ ö "yan 'gü ꞊në ‑da sië,
ACT 12:10 'yö 'wo ‑ziö "sɔdha kpö ‑blɛɛsü ‑ta, 'yö 'wo dho 'wo ‑ziö ‑a ꞊plɛ ‑naa ‑ta, 'yö 'wo dho 'wo ‑wo ‑da ‑dhɛ 'kpii‑ 'ö‑ "kwɛɛ 'dhö ‑piö 'kpong 'ka ‑wo "kpɛnng ‑dhɛ 'gü bha‑ "dhiʋ̈, 'yö 'kpong bha 'ö ‑pʋ ö ‑dɩ kaɔ ‑a ‑nu wëëdhö, 'yö 'wo zun "kpɛnng. ꞊Dhɛ 'wo "ta sië ‑kpinngga do "piʋ̈, Piɛdhö dho "kan ö ‑ta kö Atanna ‑bha "kië bha ꞊ya ꞊dhɛng kö ꞊ya 'to ö do 'ka.
ACT 12:11 'Yö Piɛdhö ‑yö gun ‑na ‑a 'wɔn dɔ ꞊dhɛ 'ö "yan 'gü 'yii ‑da, "kɛɛ tɛan‑ ‑mü. 'Yö‑ pö: «'Ma‑ 'wɔn dɔ ꞊tɔn ꞊dhɛ n Dëmɛ ꞊në ö ‑bha "kië bɔ kö ‑yö n bho Edhodö ‑bha mɛ ‑dhɛ waa‑ 'wɔn yaa 'ö Zuifö ‑nu "piʋ̈ 'wo‑ kë n 'ka bha‑ ‑gɔ ꞊dedewo tɛan‑ 'ka!»
ACT 12:12 ꞊Dhɛ 'ö ö ‑dɩ ‑wɔn 'gü yö ‑së 'ka, 'yö ‑ziö 'ö dho Zan 'wo‑ 'tɔ ‑ya ‑ta ‑dhɛ Makö bha‑ dhe 'wo‑ ‑dhɛ Madhi bha‑ ‑gɔ 'kɔɔdhö. Mɛ 'gbɛ ‑wo ‑gun bhɛa" sië Atanna ‑dhɛ Piɛdhö ‑wɔn 'gü 'kɔ bha‑ 'gü.
ACT 12:13 ꞊Dhɛ 'ö Piɛdhö ꞊ya 'dho ꞊ya ꞊loo mü, 'yö "kwɛɛ ‑ta ‑ma, 'yö gwëëdhe do 'wo‑ ‑dhɛ Dhodë bha 'ö ‑wo mü kö ‑ya ‑mɛ dɔ.
ACT 12:14 'Yö Piɛdhö ‑wʋ dɔ. 'Wɔn bha‑ ‑dhidhɛ ‑kɔ yaa bha‑ 'gü, 'yii 'dho kö ‑yö "kwɛɛ ‑zë "pʋ ꞊yën Piɛdhö ‑gɔ, 'yö dɔ ‑bɛang ‑bha 'ö dho‑ pö 'mɛ 'wo 'kɔɔdhö ꞊në‑ ‑nu ‑dhɛ ꞊dhɛ: «Piɛdhö ꞊ya ꞊loo 'kɔdhi "dhiʋ̈ yö!»
ACT 12:15 'Yö 'wo‑ pö‑ ‑dhɛ: «Slaa" ꞊në yöö i 'kun 'yö Piɛdhö 'ö ‑kaso 'gü bha 'i‑ pö ꞊ya nu ‑ee?» "Kɛɛ ꞊dhɛ 'ö nëng ‑kë ‑pö "dhʋ̈ ‑sü 'gü 'yö 'wo‑ pö: «Atanna ‑bha "kië 'ö Piɛdhö ꞊keng‑ ꞊në bha.
ACT 12:16 Kö Piɛdhö ‑yö "kwɛɛ ‑ta ‑ma sië ‑kpɛawo. ꞊Dhɛ 'wo "kwɛɛ ‑pʋ 'wo Piɛdhö yö, 'yö‑ 'wɔn ‑ya ‑nu kɔn ꞊dedewo.
ACT 12:17 "Kɛɛ ꞊dhɛ 'ö ‑kë "dhʋ̈, 'yö Piɛdhö ‑yö ö ‑kɔ "paa 'gü zë‑ ‑nu ‑dhɛ kö ‑wo wo "dhi ta, 'yö ‑kɔ 'ö kwa Dëmɛ ‑ya bho‑ 'ka ‑kaso 'gü 'yö‑ ‑gɛn dɔ‑ ‑nu ‑dhɛ kö ‑wa ‑gɛn dɔ Zakö waa‑ 'dhang ‑bho Yesu "dhiʋ̈ ‑mɛ ‑nu 'wo to ‑a ‑nu ‑dhɛ 'pö, 'yö zun "kpɛnng 'yö dho zian "wɛɛ 'ka.
ACT 12:18 ꞊Dhɛ 'ö ‑dhɛ ꞊ya kpaɔ, 'yö "suʋ̈ ‑ziisü ‑yö ‑da "sɔdha ‑nu 'wo gun wo "yan 'to sië Piɛdhö ‑bha ‑kaso 'gü bha‑ ‑nu 'gü, 'yö 'wo dɔ bunnggɛɛdhö; ‑a ‑gɛn ‑mü ꞊dhɛ ‑dhɛ 'ö Piɛdhö ‑yö bɔ‑ ‑bha "ɛɛn 'pë 'ö‑ ‑kë 'wii‑ dɔ.
ACT 12:19 'Yö Edhodö ‑ya pö ‑wa mɔɔ‑, 'yö 'wo‑ ꞊mɔɔ "kɛɛ 'wii‑ yö. 'Yö "sɔdha ‑nu 'wo wo "yan to Piɛdhö ‑bha bha‑ ‑nu dhɛɛ" kpɔ Piɛdhö ‑wɔn 'ka. ꞊Dhɛ 'ö ‑kë ꞊dhɛ ‑dhɛ 'ö Piɛdhö 'dhö‑ ‑bha "sɔdha ‑nu bha 'waa‑ ‑dhɛ dɔ bha 'yö‑ pö ‑wa ‑nu zë. ꞊Dhɛ 'ö ꞊ya kë "dhʋ̈, 'yö Edhodö ‑yö go Zude ‑sɛ 'gü 'yö dho Sezadhe 'plöö, 'yö "tʋ̈ng 'në 'bha ‑kë mü.
ACT 12:20 'Wɔn‑ ‑gun ‑siö ‑sü 'ka Edhodö ‑dhɛ ꞊dedewo Tii ‑mɛ ‑nu waa‑ Sidɔn ‑mɛ ‑nu "glʋʋ "piʋ̈. 'Yö 'mɛ 'wo bha 'wo wo ‑wʋ ‑kë do kö 'wo 'dho Edhodö ‑kuu "dhiʋ̈ 'wo za dhi‑ ‑gɔ, 'yö 'wo bɔ ‑gblüdë ‑bha 'kɔ ‑maakëmɛ 'wo‑ ‑dhɛ Blasöti bha‑ ‑ta, 'yö 'wo dho Edhodö "piʋ̈ kö 'wo dhi wo 'ko ‑dhɛ, ‑a ‑gɛn ‑mü ꞊dhɛ ‑a ‑nu ‑bha "sɛgümɛ ‑nu ‑bhöpë ‑gun 'go sië yö ꞊në‑ ꞊kwɛɛ‑.
ACT 12:21 Yi 'wo‑ ‑ya bha ꞊dhɛ 'ö ꞊ya ꞊loo, 'yö Edhodö ‑yö ö ‑bha ‑gblüdëdhɛ ‑sɔ ‑da, 'yö dho 'yö ‑ya ö ‑bha ‑blüdëdhɛ ‑gbloo 'gü, 'yö ‑ya dhiang zë ‑sü ‑bha mɛ ꞊gban "pɛpɛ ‑dhɛ.
ACT 12:22 'Yö "sɛgümɛ ‑nu 'wo zun "gbla ‑sü ‑bha 'wo‑ pö: «'Mɛ 'ö dhiang zë sië bha mɛ "bhɩɩ‑ 'yaa ‑mü, ‑zlan do 'bha ‑mü!»
ACT 12:23 "Kɛɛ ‑yö ‑to ‑dhɛ do bha‑ 'gü, 'ö kwa Dëmɛ ‑bha "kië do ‑yö 'wɔn bho‑ 'gü, 'yö "yua 'dhö ‑da 'gü, 'yö ‑dhiasɛɛ 'në ‑yö ꞊gɔɔn‑ 'gü 'yö‑ ‑bhö, 'yö ga Atanna ‑bha 'tɔbhɔdhe 'ö‑ to ö ‑dɩ ‑gɔ ('ö ö ‑dɩ sü Atanna 'ka bha‑ ‑wɔn 'gü.)
ACT 12:24 'Yö 'mɛ 'wo 'dhang bho Atanna "dhiʋ̈ 'wo ‑kë 'gbɛ ‑kpɛawo 'ö dho‑ 'ka.
ACT 12:25 ꞊Dhɛ 'ö Banabasö waa‑ Sɔdhö ꞊wa bo ('wëë‑ 'ö 'dhang ‑bho Yesu "dhiʋ̈ ‑mɛ ‑nu 'wo Angtiɔsö 'wo‑ bho 'ko ‑ta bha‑ "kplëng ‑bho 'mɛ 'wo Zedhizadhɛmö ‑a ‑nu ‑bha ‑sü 'ka), 'yö 'wo wo yee ‑kë 'wo dho Angtiɔsö. 'Yö Zan 'wo‑ 'tɔ ‑ya ‑ta ‑dhɛ Makö bha 'wo‑ ‑da wo ꞊keng‑.
ACT 13:1 Atanna ‑wʋdhiʋ̈loomɛ ‑nu waa‑ 'dhang ‑bho Yesu "dhiʋ̈ ‑mɛ ‑nu draan‑ ‑mɛ ‑nu ‑wo ‑gun ‑bha 'kɔdhigümɛ ‑nu 'wo Angtiɔsö ‑pö 'gü bha‑ ‑nu kpö 'gü. 'Mɛ 'wo "dhʋ̈ bha ‑wa mɛ do ‑dhɛ Baanabasö, 'yö 'wo‑ mɛ do 'bha ‑dhɛ Simeɔn 'yö 'wo‑ 'tɔ kpɔ 'wo‑ ‑dhɛ Mɛtii, 'yö 'wo‑ mɛ do ‑dhɛ Dhusiusö ('yö go 'pö Sidhɛnö ‑sɛ 'gü), 'yö Manaɛ 'ö "klʋ bho ‑gblüdë Edhodö ꞊keng‑, waa‑ Sɔdhö.
ACT 13:2 Yi do 'ka kö ‑wo kwa Dëmɛ ‑dhɔkë sië, kö ‑wo 'sunng‑ ma sië, 'yö 'Nii‑ "slʋ̈ʋ̈slʋ̈ ‑ya pö‑ ‑nu ‑dhɛ: «‑Ka Baanabasö waa‑ Sɔdhö ‑a ‑nu ‑ya ‑dɩ ‑ta kö yë 'a‑ ‑nu ‑dhɛ 'ka bha ‑wa kë!»
ACT 13:3 'Yö 'wo 'sunng‑ ma 'wo ꞊bhɛa Atanna ‑dhɛ ‑a ‑nu ‑wɔn 'gü, 'yö 'wo wo ‑kɔ kpa‑ ‑nu ‑ta, 'yö 'wo 'dhuë‑ ‑kë ‑nu ‑bha, 'yö 'wo wo kwaa‑ ‑nu ‑zü 'wo dho.
ACT 13:4 'Yö Baanabasö waa‑ Sɔdhö 'ö 'Nii‑ "slʋ̈ʋ̈slʋ̈ ‑ya ‑nu bɔ bha, 'wo dho 'wo ꞊loo Sedhösi ‑pö 'gü, 'yö 'wo ‑ya "yitagɔ 'gü mü 'wo dho "sɛgɔ 'dhɛ ‑ya ‑sü 'ka "yi ꞊zinng 'gü 'wo‑ ‑dhɛ Siplë bha‑ 'gü.
ACT 13:5 ꞊Dhɛ 'ö ꞊wa 'dho ꞊wa ꞊loo Sadhaminö ‑pö 'gü, 'yö 'wo zun Atanna ‑wʋ pö ‑sü ‑bha Zuifö ‑nu ‑bha ‑yakwëëkëgükɔ 'gü. Zan Makö ‑yö ‑gun ‑nu ꞊keng‑ 'yö‑ ‑nu ‑ta kun.
ACT 13:6 'Yö 'wo ‑ziö "sɛgɔ bha‑ 'gü 'wo dho "dhʋ̈ 'wo ꞊loo Pafɔsö ‑pö 'gü. ꞊Dhɛ 'ö ꞊wa ꞊loo Pafɔsö, 'yö 'wo ‑kpan "zʋʋdhɛ këmɛ do 'ö Zuifö 'ka 'wo‑ ‑dhɛ Baa Yesu bha‑ ‑bha mü. 'Mɛ 'ö bha ‑ya ‑pö ö ‑dɩ ‑dhɛ Atanna ‑wʋdhiʋ̈loomɛ ‑mü ö 'ka,
ACT 13:7 "kɛɛ ‑yö ‑kë 'pö ‑gblüdë 'wo‑ ‑dhɛ Sɛɛziusö Podhusö bha‑ ꞊kengmɛ do 'ka. ‑Gblüdë bha ‑yö ‑gun ꞊kpaɔmɛ 'ka, 'yö Baanabasö waa‑ Sɔdhö ‑nu ‑dhɛ kö ‑wo Atanna ‑wʋ pö ö ‑dhɛ.
ACT 13:8 "Kɛɛ "zʋʋdhɛ këmɛ 'wo‑ 'tɔ kpɔ glɛkö ‑wʋ 'gü 'wo‑ ‑dhɛ Edhimasö bha, Sɔdhö waa‑ Baanabasö 'wii Atanna ‑wʋ ‑pö ‑gblüdë bha‑ ‑dhɛ ‑dhɛ 'yö‑ ‑gɔ, kö ‑ya "slë mɔɔ‑ sië kö ‑gblüdë bha 'ya 'dho 'dhang bho Yesu ‑wɔn "dhiʋ̈.
ACT 13:9 ꞊Dhɛ 'ö ꞊ya kë "dhʋ̈, 'yö Sɔdhö 'wo‑ 'tɔ kpɔ 'pö Pɔdhö bha 'Nii‑ "slʋ̈ʋ̈slʋ̈ ‑ya pa, 'yö ö wë ꞊slëë ‑dɛ mi bha‑ ‑ta 'yö‑ ‑ga zuudhö
ACT 13:10 'yö‑ pö‑ ‑dhɛ: «Bhi 'ö 'i Sɔtraan gbö 'ka 'ö 'wɔn ‑së ‑dhɔ 'yaa i kë, 'ö 'i pa ‑sü 'ka "kpënng‑ waa‑ "slë yaa suu ꞊gban "pɛpɛ ꞊në‑ 'ka ya, ‑yö i "piʋ̈ 'zü ꞊dhɛ 'i tɛanwɔn 'ö ‑gban yi Dëmɛ ‑bha bha‑ bhɔ mɛ ‑nu 'gü ꞊sua ‑bha ‑ee?
ACT 13:11 ‑Bhö ‑dhɛ ‑ga, yi Dëmɛ ‑dho i ‑wëëdhɛ bho, ‑yö ‑dho i "yënng trö 'ö 'bhaa ‑dhɛ yö 'ö dho 'ö zun‑ 'ka "tʋ̈ng kpö ‑bha!» Edhimasö ‑to ‑dhɛ do bha‑ 'gü 'ö‑ "yënng ‑yö ꞊tröö 'sënsëndhö, 'yö zun ö ‑kɔ dan ‑sü ‑bha ö ‑züzü kö 'mɛ 'ö dho zian bho ö 'ka 'ö‑ ꞊slɔɔ.
ACT 13:12 ꞊Dhɛ 'ö ‑gblüdë bha ꞊ya 'wɔn 'ö ‑kë Edhimasö 'ka bha‑ ‑dhɛ yö, 'yö 'dhang bho Atanna ‑wʋ "dhiʋ̈, 'yö mɛ draan‑ ‑kɔ ‑nu 'wo go kwa Dëmɛ Yesu "piʋ̈ bha 'wo‑ ‑zʋ kun.
ACT 13:13 'Yö Pɔdhö waa‑ ö "tayɔɔ ‑nu ‑wo ‑da "yitagɔ 'gü Pafɔsö ‑pö 'gü 'zü ‑deewo, 'yö 'wo dho Pɛɛzö ‑pö 'ö Panfidhi ‑sɛ 'gü bha‑ 'gü. ꞊Dhɛ 'ö ꞊wa ꞊loo mü, 'yö Zan Makö ‑yö ‑kan ‑a ‑nu ‑bha 'yö dho Zedhizadhɛmö.
ACT 13:14 'Yö wo ‑zë 'wo dho wo "dhiʋ̈ 'wo dho 'wo ꞊loo Angtiɔsö ‑pö 'ö Pisidi bha‑ 'gü, 'yö 'wo dho Zuifö ‑nu kpö 'gü ‑a ‑nu ‑bha ‑yakwëëkëgükɔ ‑nu 'gü ‑a ‑nu ꞊glooyi 'ka 'wo ‑ya mü.
ACT 13:15 ꞊Dhɛ 'ö 'kɔ bha‑ ‑gɔmɛ ‑nu ꞊wa wo bo Atanna ‑bha 'tɔng‑ ‑nu waa‑ Atanna ‑wʋdhiʋ̈loomɛ ‑nu ‑wʋ 'bha ‑nu ‑wʋ pö ‑sü 'ka‑ ‑bha 'sëëdhɛ 'gü, 'yö Zuifö ‑nu ‑bha ‑yakwëëkëgükɔ ‑gɔmɛ ‑nu ‑wa pö Pɔdhö waa‑ Baanabasö ‑a ‑nu ‑dhɛ: «Yi dheebhang ‑nu, ꞊ya kë ꞊dhɛ 'wɔn 'bha 'dhö ka ‑gɔ kö 'ka‑ pö mɛ faan dɔ ‑wʋ 'ka 'mɛ 'wo ya‑ ‑nu ‑dhɛ kö "dhɛɛ ‑yö ka ‑gɔ.»
ACT 13:16 'Yö Pɔdhö ‑yö ꞊wlü 'yö ö ‑kɔ "paa 'gü zë‑ ‑nu ‑dhɛ 'ö‑ pö: «Izraɛdhö ‑mɛ ‑nu waa‑ 'mɛ 'kaa Zuifö 'ka, "kɛɛ 'ö 'ka Atanna ‑wʋ ꞊bhlëë ‑zë ‑ya, ‑ka ka "tʋ 'to n ‑bha!
ACT 13:17 Izraɛdhö ‑mɛ ‑nu, kwa ‑bha Atanna bha ‑yö kwa "bhɛma ‑nu sü ö ‑bha 'ka 'ö‑ ‑nu suu ‑da "dhiʋ̈ kö ‑wo ‑tun ꞊dhuëngdhɛ 'gü Ezitö ‑sɛ 'gü, 'yö‑ ‑nu bho mü ö ‑bha 'gügbɩɩdhɛ 'ka,
ACT 13:18 'yö "klʋ bho‑ ‑nu ‑bha ‑kwɛ 'ö ꞊mɔɔ ‑kwɛ ‑kaɔng ‑yiisiö ‑bha ‑a 'ka "tʋng ‑ta.
ACT 13:19 'Yö Kanaa "sɛgɔ "saɔplɛ bha‑ ‑nu 'gü ꞊see ‑gblü 'ka, 'yö‑ nu kwa "bhɛma ‑nu ‑dhɛ kö ‑wo ‑ya mü.
ACT 13:20 'Yö zagɔbhomɛ ‑nu ‑ya ‑nu ‑gɔ "dhiʋ̈ ‑kwɛ 'ö ꞊mɔɔ ‑kwɛ këng ‑yiisiö waa‑ ‑kwɛ ‑kaɔng "sɔɔdhu ‑nu ‑bha ‑a 'ka 'ö dho "dhʋ̈ 'ö zun Atanna ‑wʋdhiʋ̈loomɛ Samiɛdhö ‑bha "tʋ̈ng ‑bha.
ACT 13:21 'Yö 'wo ‑gblüdë do ‑gbadhɛ Samiɛdhö ‑gɔ, 'yö Atanna ‑yö Saidhö 'ö ‑kë Kisö gbö 'ka, 'ö go Bɛnngzamɛ ‑gɔ "kwɛandhö bha‑ nu‑ ‑nu ‑dhɛ, 'yö ‑ya Izraɛdhö ‑sɛ ‑gɔ "dhiʋ̈ ‑kwɛ ‑kaɔng ‑yiisiö 'ka.
ACT 13:22 ꞊Dhɛ 'ö Atanna ‑yö ö ‑kɔ ‑kan Saidhö "dhiʋ̈, 'yö Davi ‑kë ‑nu ‑bha ‑gblüdë 'ka, 'yö "sɛɛdhɛ kë Davi ‑bha 'ö‑ pö: ‹Izai gbö Davi bha n dhɔɔbhaamɛ ‑mü, yö ꞊në dho n dhɔɔbhaawɔn ꞊gban kë›.
ACT 13:23 Davi bha‑ suu 'gü ‑në do ꞊në Atanna ‑ya ‑ya Izraɛdhö ‑sɛ 'gü ‑mɛ ‑nu Dhamɛ 'ka ꞊dhɛ ‑kɔ 'ö‑ "plüün bho‑ 'ka ‑a 'dhö. Mɛdhamɛ 'ö "dhʋ̈ bha ꞊në 'wo‑ ‑dhɛ Yesu.
ACT 13:24 'Ö gun kö Yesu 'yii Atanna ‑bha yë zü bho ꞊kö mɛ kpö 'gü, Zan ‑yö Atanna ‑wʋ ‑pö 'ö‑ pö Izraɛdhö ‑sɛgümɛ ‑nu ‑dhɛ ꞊dhɛ ‑wo wo kwaa‑ wo ‑kë ‑sɔng yaa ‑nu ‑zü kö ‑wo wo wë bɔ Atanna "piʋ̈ kö ‑wa ‑nu ‑bɔ ‑a 'ka ‑zu bho.
ACT 13:25 ꞊Dhɛ 'ö Zan 'dhö ‑wo sië ö ‑bha ‑tosɛa "dhiʋ̈todhɛ 'gü 'yö‑ pö: «Ka ka ‑zʋ ‑gɔn ꞊dhɛ de suu 'pö n 'ka? 'Mɛ 'ka ‑ya sië‑ ‑gɔ bha 'yaa ‑mü n 'ka, yö ‑zë ‑yö nu sië n zian‑ ‑ta. Mɛ 'ö bha yö ‑zë ꞊bhlëë ‑yö 'kpii‑ 'ö ‑ziö n ‑ta, ‑a ‑gɛn 'gü ‑sabha ‑zian fië‑ ‑dhö n 'ka.»
ACT 13:26 'Yö Pɔdhö ‑ya pö: «N dheebhang ‑nu, ka 'ö 'ka ‑kë Ablaamö suugümɛ ‑nu 'ka, waa‑ 'mɛ 'ö 'kaa Zuifö 'ka "kɛɛ 'ö 'ka Atanna ꞊bhlëë ‑zë ‑ya, kwa ꞊në naɔ ‑së 'ö ‑kë dha ‑sü ‑naɔ 'ka bha 'ö nu kwa ‑dhɛ.
ACT 13:27 'Mɛ 'wo Zedhizadhɛmö waa‑ wo ‑gɔdhiʋ̈mɛ ‑nu 'wii "wɩ‑ ‑bha kö ‑wo Yesu 'sü wo Dhamɛ 'ka, 'wii Atanna ‑wʋdhiʋ̈loomɛ ‑nu ‑wʋ 'wo‑ pö ꞊glooyi ꞊gban "pɛpɛ 'ka bha‑ 'gü ma, "kɛɛ ‑wo kë‑ 'gü ‑wɔn ‑zë ‑kë Yesu zë ‑sü 'ka.
ACT 13:28 ‑A zë ‑gɛn 'bha 'yii kë, "kɛɛ ‑wo kë‑ ‑pö Pidhatö ‑dhɛ ‑ya zë.
ACT 13:29 ꞊Dhɛ 'ö ꞊wa 'wɔn ‑nu 'ö ‑bɛn zë ‑sü 'ka Atanna ‑bha 'sëëdhɛ 'gü 'ö ‑gban Yesu ‑wëëdhɛ bho ‑sü waa‑ ga ‑sü ‑nu ‑bha bha‑ ꞊gban "pɛpɛ 'gü ‑wɔn kë, 'yö 'wo‑ bho "dhü ‑bha, 'yö 'wo‑ ‑da ‑gwë ‑yɛ 'gü, (‑a ‑gɛn ‑mü ꞊dhɛ ‑a ‑nu ‑bha mɛ ‑wɛɛ bho ‑kɔ bha).
ACT 13:30 "Kɛɛ 'yö Atanna ‑ya bho ga 'gü,
ACT 13:31 'yö ö ‑dɩ ‑zɔn 'mɛ 'wo gun‑ ꞊keng‑ 'wo go‑ 'ka Gadhidhe ‑sɛ 'gü 'wo dho‑ 'ka Zedhizadhɛmö bha‑ ‑nu ‑dhɛ ‑dhɛkpaɔyi 'gbɛ ꞊dede 'ka, 'mɛ 'wo "dhʋ̈ bha ꞊në 'wo‑ "sɛɛ‑ 'ka ꞊taamasü ya‑ 'gü, 'yö 'wo Yesu ‑dhiang zë sië Izraɛdhö ‑sɛgümɛ ‑nu ‑dhɛ.
ACT 13:32 Yii ‑dɩ 'pö yi ‑nu 'wɔn ‑taɔng ‑së bha ꞊në‑ 'ka ka ‑dhɛ. 'Wɔn ‑taɔng ‑së bha yö ‑mü ꞊dhɛ 'wɔn 'ö Atanna ‑ya pö kwa "bhɛma ‑nu ‑dhɛ yi 'bha 'ka bha,
ACT 13:33 ‑ya kë ‑sü 'ka kwa 'ö 'kwa‑ ‑nu bhang ‑nu 'ka bha ꞊në kwa ‑dhɛ ꞊dɛɛ Yesu ‑bho ga 'gü ‑sü 'ka ‑dhɛ ‑kɔ 'ö ‑bɛn zë ‑sü 'ka‑ 'ka "Tan 'sëëdhɛ ('wo‑ Somö ‑kë bha‑) ꞊plɛ ‑naa 'gü bha‑ 'dhö ꞊dhɛ: ‹Atanna ‑ya ‑pö ꞊dhɛ: Bhi ꞊në 'i n Gbö 'ka, ꞊ya 'go ꞊dɛɛ 'gü 'ma‑ ‑zɔn mɛ ꞊gban ‑dhɛ ꞊dhɛ ma ꞊në 'a i Dë 'ka›.
ACT 13:34 'Yö Atanna ‑ya pö ꞊dhɛ ‑yö ‑dho ‑a bho ga 'gü kö 'ya 'dho ga 'zü. 'Yö‑ pö 'zü ꞊dhɛ: ‹'Dhuë‑ 'ö "slʋ̈ʋ̈slʋ̈ 'ö‑ "plüün bho Davi ‑dhɛ bha ö ‑dho ‑a kë ka ‑bha tɛan‑ 'ka›.
ACT 13:35 'Wɔn bha ‑yö ‑bɛn zë ‑sü 'ka Atanna ‑bha 'sëëdhɛ 'gü ‑dhɛ 'bha 'gü 'zü, ‑a ‑gɛn ‑mü ꞊dhɛ 'mɛ 'ö "Tan 'sëëdhɛ ('wo‑ Somö ‑kë bha‑) ‑bɛn zë bha ‑ya ‑pö Atanna ‑dhɛ: ‹'Bhii 'dho "wɩ‑ ‑bha kö i ‑sëmɛ "slʋ̈ʋ̈slʋ̈ bha‑ kwi ‑yö "bu›.
ACT 13:36 Yë 'ö Atanna ‑ya ‑ya Davi ‑bha 'ka ‑yö kë‑ ‑kë, "kɛɛ ꞊dhɛ 'ö ꞊yaa‑ kë 'yö ga, 'yö 'wo‑ ‑wɛɛ bho ‑a "bhɛma ‑nu ‑wɛɛ bho ‑dhɛ 'gü, 'yö‑ kwi ‑yö ‑bu. (꞊Ya kë "dhʋ̈ kö ‑wʋ 'ö Atanna ‑ya pö "dhʋ̈ bha 'yii‑ pö Davi ‑zë ‑dhɛ.)
ACT 13:37 Mɛ 'ö Atanna ‑ya bho ga 'gü bha yö ‑zë kwi 'yii "bu.
ACT 13:38 ‑A ‑kë "dhʋ̈ ‑sü bha‑ 'gü n dheebhang ‑nu, ‑kaa dɔ ꞊dhɛ pë 'ö Yesu ‑ya ‑kë bha ꞊në‑ ‑wɔn 'gü 'yö Atanna dho ꞊mɔɔ‑ ‑bha 'ö mɛ ‑nu ‑bha 'wɔn yaa ‑nu ‑mawɔn to ꞊dhɛ ‑kɔ 'yi‑ pö sië‑ 'ka ka ‑dhɛ ꞊dɛɛ ya‑ 'dhö.
ACT 13:39 Moizö ‑bha 'tɔng‑ ‑zë 'yii 'dho ka kë ‑sɔng bho ka ‑bha Atanna wëëdhö, "kɛɛ 'dhang ‑bho Yesu ‑wɔn "dhiʋ̈ ‑sü bha ꞊në dho ka kë "slʋ̈ʋ̈slʋ̈ Atanna wëëdhö.
ACT 13:40 Kö ‑kaa kë ‑së kö 'pë 'ö Atanna ‑wʋdhiʋ̈loomɛ ‑nu ‑wa pö bha 'ya 'dho kë ka 'ka;
ACT 13:41 ‑a ‑gɛn ‑mü ꞊dhɛ ‑a ‑wʋdhiʋ̈loomɛ ‑nu ‑wa ‑pö: ‹Atanna ‑ya pö: 'Mɛ 'ka Atanna ‑wʋ ‑san ‑kë, 'wɔn ‑yö ka 'kɔn kö 'ka 'ma "sɛ 'ka, ‑a 'klɔɔ‑ ‑mü ꞊dhɛ yë 'ö ꞊waa‑ ‑wɔn ‑gɛn dɔ ka ‑dhɛ, 'ö 'kii 'dho 'dhang bho‑ "dhiʋ̈, a ‑dho ‑a kë ka ‑bha "tʋ̈ng 'gü›.»
ACT 13:42 ꞊Dhɛ 'ö ꞊wa bo dhiang ‑nu bha‑ ‑nu zë ‑sü 'ka, 'ö Pɔdhö waa‑ Baanabasö 'wo zun sië "kpɛnng, 'yö 'wo‑ pö‑ ‑nu ‑dhɛ ‑wo nu 'zü ꞊glooyi 'dhɛ 'ö dho dɔ‑ "piʋ̈ bha‑ 'ka kö ‑wo ‑wʋ ‑nu bha‑ 'gü 'bha pö wo ‑dhɛ.
ACT 13:43 ꞊Dhɛ 'ö ꞊wa ziö 'wo 'dho sië, 'yö Zuifö ‑nu 'gbɛ waa‑ 'mɛ 'wo ‑da Zuifö ‑nu ‑bha ‑bhɛa Atanna ‑dhɛ ‑kɔ 'gü ‑nu wo bha 'wo ‑ziö ‑a ‑nu ꞊keng‑. 'Yö Pɔdhö waa‑ Baanabasö 'wo dhiang ‑nu zë‑ ‑nu ‑dhɛ ‑a ‑nu faan dɔ ‑sü 'ka kö ‑wo 'to Atanna ‑bha "gblüsë 'ö‑ ‑kë bha‑ 'gü woo‑ ‑tosɛadhe ꞊gban 'ka kö ‑wo 'dho‑ 'ka "dhiʋ̈.
ACT 13:44 ‑A ꞊glooyi 'dhɛ 'ö dɔ‑ 'dhɛ bha‑ "piʋ̈ bha‑ 'ka, 'mɛ 'wo 'pö‑ bha‑ 'gü, ‑a ‑nu 'kpii‑ ‑dhɛ ꞊gban ‑wo kë ‑loo 'ko ‑ta ‑dhɛ do bha‑ 'gü kö 'wo Atanna ‑wʋ ma.
ACT 13:45 "Kɛɛ ꞊dhɛ 'ö Zuifö ‑nu ꞊wa mɛ kpö bha‑ ‑nu yö, 'yö ꞊drɔ ‑yö ‑da ‑nu 'gü 'yö 'wo ‑ya ꞊sua ‑yɛ Pɔdhö "yan ‑bha ‑sü ‑bha. 'Yö 'wo ‑ya ‑dhiang yaa ‑zë ‑a ‑bha ‑sü ‑bha mɛ ‑nu ‑dhɛ.
ACT 13:46 "Kɛɛ Pɔdhö waa‑ Baanabasö ‑wo wo ‑zʋ ‑gban 'wo dhiang zë‑ ‑nu ‑dhɛ 'wo‑ pö: «Atanna ‑wʋ ya‑ ‑dhɛa ‑bha ꞊dhɛ ‑yö pö ka ꞊në ka ‑dhɛ nu ‑blɛɛsü, "kɛɛ ꞊dhɛ 'ö ‑kë ꞊dhɛ 'kaa "wɩ‑ ‑bha kö 'ka 'dhang bho‑ ‑wɔn "dhiʋ̈, 'ö 'kaa ka ‑dɩ 'sü ꞊dhɛ ꞊sii 'ö 'yaa yën ‑a ꞊slɔɔ ‑mɛ 'dhö bha yi ‑dho yi wë slëë‑ 'mɛ 'waa Zuifö 'ka‑ ‑nu "piʋ̈.
ACT 13:47 ‑a ‑gɛn ‑mü ꞊dhɛ yi Dëmɛ ‑ya ‑pö yi ‑dhɛ: «A i ‑ya "sɛgɔ "wɛɛ ‑nu ꞊në‑ ‑nu ‑bha ‑dhɛpuudhɛ 'ka kö 'i 'dho dha ‑sü bha‑ ‑naɔ 'ka "sɛgɔ ‑nu 'wo ‑dhɛ ꞊gblɛɛn 'gü ‑a ‑nu 'gü.
ACT 13:48 ꞊Dhɛ 'ö 'mɛ 'waa Zuifö 'ka 'wo‑ ‑nu ‑wʋ bha‑ ma, 'yö‑ ‑nu ꞊nii ‑da ꞊dedewo 'yö 'wo‑ pö: «Kwa Dëmɛ ‑wʋ bha ‑yö ‑së!» 'Yö mɛ "pɛpɛ 'ö Atanna ‑ya ‑nu ‑da ‑tosɛa 'ö 'yaa yën ‑a këmɛ 'ka bha 'wo 'dhang bho Yesu ‑wɔn "dhiʋ̈.
ACT 13:49 'Yö kwa Dëmɛ ‑wʋ ‑yö ‑pɛn "sɛgɔ bha‑ 'gü ‑dhɛ ꞊gban "pɛpɛ 'gü.
ACT 13:50 "Kɛɛ 'yö Zuifö ‑nu 'wo dhebhɔ ꞊bhlëësü ‑nu 'wo 'pö‑ bha‑ 'gü, 'wo ‑da Zuifö ‑nu ‑bha bhɛa" ‑kɔ 'gü bha waa‑ 'pödë ‑nu zü ꞊yɔɔn Pɔdhö waa‑ Baanabasö ‑nu ‑bha kö ‑wa ‑nu ‑wëëdhɛ bho. ꞊Dhɛ 'ö ꞊ya kë "dhʋ̈ 'yö 'wo‑ ‑nu ‑kë, 'yö 'wo go‑ ‑nu ‑bha "sɛgɔ bha‑ 'gü.
ACT 13:51 'Yö Pɔdhö waa‑ Baanabasö 'wo wo ‑gɛn ‑bha ‑ma kö "sɛ 'ö dɔ‑ ‑nu ‑gɛn ‑bha 'pö‑ bha‑ 'gü bha ‑yö 'go‑ ‑nu ‑gɛn ‑bha kö ‑wa ‑zɔn ‑nu ‑dhɛ ꞊dhɛ ('mɛ 'wo bha Atanna ꞊ya 'wɔn bho‑ ‑nu 'gü kö‑) ‑dhɛ 'bha 'yii 'to wo ‑zë wo ‑bha, 'yö 'wo dho Ikɔnö ‑pö 'gü.
ACT 13:52 'Dhang ‑bho Yesu "dhiʋ̈ ‑mɛ ‑nu 'wo Angtiɔsö ‑wo ‑gun pa ‑sü 'ka zuëniidadhe waa‑ 'Nii‑ "slʋ̈ʋ̈slʋ̈ 'ka.
ACT 14:1 ꞊Dhɛ 'ö Pɔdhö waa‑ Banabasö 'wo ꞊loo Ikɔnö ‑pö 'gü, 'yö 'wo ‑da Zuifö ‑nu ‑bha ‑yakwëëkëgükɔ 'gü 'zü, 'yö 'wo ‑ya Yesu ‑bha 'wɔn ‑taɔng ‑së pö ‑sü ‑bha 'mɛ 'wo gun mü bha‑ ‑nu ‑dhɛ. ‑A ‑kë "dhʋ̈ ‑sü ‑wɔn 'gü, 'mɛ 'wo Zuifö 'ka waa‑ 'mɛ 'waa Zuifö 'ka‑ mɛ 'gbɛ ‑wo kë 'dhang ‑bho Yesu ‑wɔn "dhiʋ̈ 'ö 'wo‑ ‑wɔn ‑dhɛ tɛanwɔn.
ACT 14:2 "Kɛɛ 'yö Zuifö 'dhɛ 'wii "wɩ‑ ‑bha kö ‑wo 'dhang bho 'wɔn "dhiʋ̈ bha, 'wo 'mɛ 'waa Zuifö 'ka ‑a ‑nu ‑zü ‑yɔɔn kwa dheebhang 'dhɛ ‑nu 'wo Yesu ‑wɔn ‑dhɛ tɛanwɔn bha‑ ‑nu ‑bha kö ‑wo ‑zʋ 'gɔn ‑kɔ yaa kë‑ ‑nu ‑wɔn 'gü.
ACT 14:3 "Kɛɛ yö ‑zë ꞊gban 'gü Pɔdhö waa‑ Banabasö ‑wo kë ‑gwëë Ikɔnö ‑pö 'gü 'ö 'wo 'wɔn 'ö ‑gban kwa Dëmɛ ‑bha ‑a ‑dhiang zë ‑zʋgbandhe waa‑ ‑zʋ ‑yö kwa Dëmɛ ‑dhɛ ‑sü 'ka, 'ö kwa Dëmɛ ‑ya ‑zɔn 'pö mɛ ꞊gban ‑dhɛ ꞊dhɛ 'wɔn ‑nu 'wo ‑gban ‑a ‑bha "gblüsëdhɛ ‑bha 'wo‑ pö bha tɛan‑ ‑mü, 'ö ‑kɔ ‑mɔɔ 'wɔn ‑bha ‑sü nu‑ ‑nu ‑dhɛ kö ‑wo "dhabhliwɔn ‑nu kë‑ 'ka.
ACT 14:4 'Yö 'pömɛ ‑nu 'wo ‑pɛ 'gü, 'yö‑ mɛ ‑kɔ "pɛan do ‑yö bɔ Zuifö ‑nu 'ka, 'yö‑ ‑kɔ "pɛan 'bha ‑yö ‑kë Yesu ‑bha yëkëmɛ ‑nu ‑bha 'ka.
ACT 14:5 ꞊Dhɛ 'ö ꞊ya kë "dhʋ̈ 'yö Zuifö ‑nu waa‑ 'mɛ 'waa Zuifö 'ka bha 'wo wo zü ma 'koo waa‑ wo ‑gɔdhiʋ̈mɛ ‑nu 'dhö kö 'wo Pɔdhö waa‑ Banabasö ‑nu ‑wëëdhɛ bho kö 'wo‑ ‑nu ‑zuö ‑gwë 'ka.
ACT 14:6 "Kɛɛ ꞊dhɛ 'ö mɛ ꞊plɛ bha 'wo‑ 'wɔn dɔ, wo ‑dɩ 'ka, 'yö 'wo ꞊dua 'wo dho Dhikaoni ‑sɛ 'gü, 'pödhɛ 'wo‑ ‑dhɛ Dhitrö bha waa‑ Dɛɛbö ‑dhɛ ‑nu 'gü waa‑ ‑nu ‑züzü ‑dhɛ ‑nu 'dhö,
ACT 14:7 'yö 'wo ‑ya 'wɔn ‑taɔng ‑së pö ‑sü ‑bha mü.
ACT 14:8 Dhitrö ‑dhɛ bha "trüünyuamɛ do‑ ‑gun mü. 'Mɛ bha ‑yö ‑bhɔ "yua bha‑ 'ka, 'ö gun "dhʋ̈ kö 'ö bhɔ 'yii dɔ ö ‑gɛan do.
ACT 14:9 "Kɛɛ ‑yö ‑gun ö "tʋ 'to sië dhiang 'ö Pɔdhö gun‑ zë sië bha‑ ‑bha. ꞊Dhɛ 'ö Pɔdhö ꞊yaa‑ dɔ ꞊dhɛ ‑yö 'dhang ‑bho Yesu ‑wɔn "dhiʋ̈, ꞊dhɛ ‑yö ‑mɔɔ ‑bha 'ö‑ ‑bha "yua bo, 'yö ö "yan ‑gban 'gü "wɛ zuudhö,
ACT 14:10 'yö‑ pö‑ ‑dhɛ "gbɩɩ‑ 'ka 'ö‑ pö: «‑Bhö "wlü 'vadhö kö 'i dɔ i ‑gɛan!» 'Yö 'mɛ bha 'ö ꞊wlü 'vadhö 'yö dɔ ö ‑gɛan 'yö zun "ta 'sü ‑sü ‑bha.
ACT 14:11 ꞊Dhɛ 'ö mɛ kpö 'gbɛ ꞊wa 'wɔn 'ö Pɔdhö ‑ya ‑kë bha‑ ‑dhɛ yö, 'yö 'wo ꞊gbla woo‑ "sɛ 'gü ‑wʋ 'ö ‑kë Dhikaoni ‑wʋ 'ka bha‑ 'gü 'wo‑ pö: «‑Zlan ‑nu ꞊wa mɛbhɩɩdhe kwi ‑da wo ‑bha ꞊wa 'go dhang‑ 'gü ꞊wa nu kwa "piʋ̈!»
ACT 14:12 'Yö 'wo Banabasö 'tɔ kpɔ woo‑ ‑dhɔkëpë ꞊bhlëësü 'wo‑ ‑dhɛ Zösö bha‑ 'tɔ bha, 'yö 'wo Pɔdhö yöö ‑dɩ 'pö‑ 'tɔ kpɔ woo‑ ‑dhɔkëpë do 'bha 'wo‑ ‑dhɛ 'pö Ɛɛmɛsö bha‑ 'tɔ ‑bha; ‑a ‑gɛn ‑mü ꞊dhɛ mɛ ꞊plɛ bha Pɔdhö ꞊në gun dhiangzëmɛ 'ka ꞊dhɛ ‑a ‑nu ‑bha ‑zlan Ɛɛmɛsö bha‑ 'dhö.
ACT 14:13 ‑A ‑nu ‑bha ‑dhɔkëpë 'wo‑ Zösö ‑kë bha‑ ‑dhɔkëgükɔ ‑gun dɔ sië ‑da 'plöö ‑dhɛ 'gü. 'Yö ‑zlan ‑kɔ bha‑ "dhiʋ̈mɛ ‑yö nu ‑du ‑nu 'wo "dhü "bin ta ‑sü 'ka bhië" ‑bha, 'wo‑ ‑da ‑nu bhɔ 'gü bha‑ 'ka "saan 'ö ꞊klëën 'pö‑ ‑zü bha‑ "dhi do "dhiʋ̈. 'Yö Zösö "dhiʋ̈mɛ bha waa‑ mɛ kpö 'wo gun 'mü ‑a ‑nu ‑wʋ 'dhö ‑kë 'gü do kö 'wo "saa‑ bho ‑du ‑nu bha‑ nu‑ 'ka Banabasö waa‑ Pɔdhö ‑nu "dhiʋ̈.
ACT 14:14 "Kɛɛ ꞊dhɛ 'ö Yesu ‑bha yëkëmɛ ‑nu ꞊plɛ 'ö‑ 'mɛ do‑ ‑kë Pɔdhö 'ka 'ö‑ mɛ do‑ ‑kë Baanabasö 'ka bha ꞊wa 'wɔn bha‑ ma, 'yö 'wo woo‑ sɔ ‑ta "dhʋ̈ng 'gü ‑sɔ ‑nu ‑pɛ, (kö ‑wa ‑zɔn ‑a ‑nu ‑dhɛ ꞊dhɛ 'wii "wɩ‑ ‑bha kö ‑wa kë "dhʋ̈). 'Yö 'wo ‑bɛang sü 'wo ‑sɔ ‑nu kpö 'gü kö ‑wa pö sië‑ ‑nu ‑dhɛ:
ACT 14:15 «'Mɛ 'ka ya, ‑më 'pö ka ‑bha 'yö 'ka "slë suu bha‑ ‑kë ꞊dhɛ 'pë bha‑ 'dhö? Mɛ "bhɩɩ‑ ‑mü yi 'ka 'pö ꞊dhɛ ka 'dhö, Atanna 'yaa ‑mü yi 'ka, "kɛɛ naɔ ‑së 'yi nu‑ pö ka ‑dhɛ yö ‑mü ꞊dhɛ kö 'ka ka kwaa‑ ‑dhɔkëpë "wlaasü ‑nu bha‑ ‑nu ‑zü kö 'ka ka wë slëë‑ Atanna "yaandhe 'ö dhang‑ 'dhö, "sɛ 'dhö, ꞊weeyi 'dhö ‑a ‑nu ‑kë waa‑ ‑nu 'gü ‑pë ‑nu 'dhö bha ꞊në‑ "piʋ̈ kö 'ka‑ ‑dhɔkë!
ACT 14:16 Atanna 'ö "dhʋ̈ bha ‑yö kë ö ‑kwaa "sɛgɔ "pɛpɛ ꞊gban 'gü ‑mɛ ‑nu ‑zü yi 'bha 'ka 'ö 'wo wo dhɔɔbhaawɔn ‑nu ‑kë.
ACT 14:17 "Kɛɛ 'sa kö ‑yö ö ‑bha "klʋsëdhɛ ‑zɔn sië ka ‑dhɛ ‑kpɛawo 'wɔn ‑së ‑nu ‑kë ka ‑dhɛ ‑sü 'ka, ‑a ‑gɛn ‑mü ꞊dhɛ yö ꞊në ka gba dha "yi 'ka, 'ö go mü 'ö‑ "slë ‑kë 'yö ka ‑bha tapë ‑nu 'wo ‑dhi 'yö 'ka‑ ‑nu ‑kan ‑a "kan "tʋ̈ng 'gü, 'yö ‑bhöpë ‑nu nu ka ‑dhɛ, 'yö go mü 'zü 'ö ka gba zuëniidadhe 'ka kë "dhʋ̈ kö 'ka ö dɔ.»
ACT 14:18 "Kɛɛ yö ꞊në‑ ꞊gban 'gü, Banabasö waa‑ Pɔdhö ‑wo kë sëë ‑bho ꞊dedewo 'mɛ 'wo bha‑ ‑nu ‑kɔ ‑bho "saa‑ bha ‑bho wo "dhiʋ̈ ‑sü bha‑ ‑bha.
ACT 14:19 ꞊Dhɛ 'ö ꞊ya kë "dhʋ̈, 'yö Zuifö ‑nu 'bha ‑nu ‑wo ‑go Angtiɔsö ‑dhɛ 'ö Pisidi ‑sɛ 'gü waa‑ Ikɔnö ‑pödhɛ ‑nu bha‑ ‑nu 'gü, 'wo nu 'wo mɛ kpö bha‑ ‑nu zuë" ‑slëë wo "piʋ̈. 'Yö 'wo zun Pɔdhö ‑zë ‑gwë 'ka ‑sü ‑bha 'wo‑ ꞊gbiʋ̈ 'wo dho‑ 'ka 'pö‑ ꞊taama 'wo‑ to mü kö ‑wo wo ‑zʋ 'gɔn sië ꞊dhɛ ꞊ya ga.
ACT 14:20 "Kɛɛ ꞊dhɛ 'ö 'mɛ 'wo 'dhang bho Yesu "dhiʋ̈ bha ꞊wa nu ꞊wa ꞊loo mü, 'ö ꞊wa ꞊klëën Pɔdhö ‑zü, 'yö Pɔdhö ‑yö ꞊wlü 'yö 'wo dho 'pödhö. ꞊Dhɛ 'ö‑ ‑tadhɛ ꞊ya ꞊kpaɔ, 'yö waa‑ Banabasö 'wo dho Dɛɛbö ‑pö 'gü.
ACT 14:21 'Yö 'wo Yesu ‑bha 'wɔn ‑taɔng ‑së pö mü. 'Yö mɛgbɛdhɛ 'wo 'dhang bho Yesu ‑wɔn "dhiʋ̈ ‑a ‑nu ‑wʋ "dhiʋ̈ 'yö 'wo ‑kë ‑bha ꞊klang ‑nu 'ka. 'Ö go 'mü 'yö 'wo wo yee ‑kë 'zü ‑deewo 'wo dho Dhitrö ‑pö, Ikɔnö ‑pö waa‑ Angtiɔsö ‑pö ‑nu 'wo Pisidi ‑sɛ 'gü bha‑ ‑nu 'gü.
ACT 14:22 'Yö 'wo 'mɛ 'wo 'dhang bho Yesu "dhiʋ̈ ‑a ‑nu faan dɔ kö ‑wo wo 'gü dɔ "gbɩɩ‑ ‑zʋ ‑yö ‑a ‑dhɛ ‑sü ‑bha 'yö 'wo‑ pö‑ ‑nu ‑dhɛ: «Mɛ "pɛpɛ 'wo 'dhang bho‑ ‑wɔn "dhiʋ̈ ‑wo ‑dho saan" 'sü ꞊dedewo "kpʋngtaadhɛ ya‑ 'gü, 'yö 'wo gun ‑na ‑da Atanna ‑bha ‑gblüdëdhɛkëdhɛ 'gü.
ACT 14:23 'Yö 'wo "dhiʋ̈ ‑sü mɛ 'ka ‑mɛ ‑nu ‑ya Atanna ‑bha 'kɔdhigümɛ kpö 'gü ‑dhɛ ꞊gban "pɛpɛ 'gü. ꞊Dhɛ 'ö ꞊wa bo 'sunng‑ 'ma ‑sü waa‑ ‑bhɛa Atanna ‑dhɛ ‑sü 'ka, 'yö 'wo 'mɛ 'wo Atanna ‑bha mɛ kpö 'dhɛ 'ö‑ 'gü ‑a ‑wɔn ‑wɔ kwa Dëmɛ 'wo 'dhang bho‑ "dhiʋ̈ bha‑ ꞊kwɛɛ‑.
ACT 14:24 'Yö 'wo bɔ Pisidi ‑sɛ 'gü 'wo dho Panfidhi ‑sɛ 'gü,
ACT 14:25 'yö 'wo Atanna ‑wʋ pö 'mɛ 'wo Pɛɛzö ‑pö 'gü ‑a ‑nu ‑dhɛ. 'Yö go mü 'yö 'wo dho Atadhi ‑pö 'gü.
ACT 14:26 ꞊Dhɛ 'wo go 'mü, 'yö 'wo ‑da "yitagɔ 'gü 'wo dho 'zü Angtiɔsö, ‑dhɛ do 'wo wo ‑bha "ta zü bho‑ ‑bha bha‑ 'gü. ‑Dhɛ bha ꞊në "sanni ‑wo 'dho woo‑ "ta bha‑ 'gü, 'yö 'mɛ 'wo 'dhang bho Yesu ‑wɔn "dhiʋ̈ 'wo mü bha 'wo‑ ‑nu ‑wɔn ‑wɔ Atanna ꞊kwɛɛ‑ kö ‑yö ö ‑zʋ kë‑ ‑nu 'gü kö yë 'wo 'dho sië‑ kë bha ‑yö dhi‑ ‑nu ‑gɔ.
ACT 14:27 ꞊Dhɛ 'ö ꞊wa ꞊loo Angtiɔsö, 'yö 'wɔn "pɛpɛ 'ö waa‑ Atanna ‑nu 'wo‑ ‑kë kö ‑wo "ta bha‑ 'kpɔ sië bha, ꞊waa‑ ‑kɔ 'ö "kwɛɛ ‑pʋ 'ka 'mɛ 'waa Zuifö 'ka‑ ‑nu ‑gɔ kö woo ‑dɩ 'pö ‑wo 'dhang bho ö "dhiʋ̈ bha‑ ‑gɛn dɔ 'dhang ‑bho Yesu "dhiʋ̈ ‑mɛ ‑nu 'wo mü‑ ‑nu ‑dhɛ.
ACT 14:28 'Yö 'wo "tʋ̈ng 'bha ‑kë ‑a ‑nu "piʋ̈ mü.
ACT 15:1 ꞊Dhɛ 'ö ꞊ya kë "dhʋ̈, 'yö mɛ 'bha ‑nu ‑wo go Zude ‑sɛ 'gü 'wo nu Angtiɔsö ‑pö 'gü, 'yö 'wo zun 'dhang ‑bho Yesu "dhiʋ̈ ‑mɛ ‑nu 'wo mü ‑a ‑nu draan‑ ‑sü ‑bha 'wo‑ pö: «꞊Ya kë ꞊dhɛ 'kii 'dho 'gbannë ‑zë 'gü ꞊dhɛ ‑kɔ 'ö ‑bɛn zë ‑sü 'ka Moizö ‑bha 'tɔng‑ 'gü ‑a 'dhö, 'kii 'dho dha.»
ACT 15:2 'Yö 'wo ‑ya dhiang ‑nu zë ‑sü waa‑ zaɔdhe ‑da Pɔdhö waa‑ Banabasö ‑nu 'ka ‑sü ‑bha, ‑a ‑gɛn ‑mü ꞊dhɛ Pɔdhö waa‑ Banabasö 'wii "wɩ‑ ‑nu ‑wʋ ‑bha gbonggbongdhö. 'Yö ‑kë Yesu ‑bha mɛ ‑nu 'wo Angtiɔsö ‑a ‑nu 'gü ‑së kö 'wo mɛ dɔ Pɔdhö waa‑ Baanabasö ‑nu ꞊keng‑ kö ‑wo 'dho Zedhizadhɛmö kö Yesu ‑bha yëkëmɛ ‑nu waa‑ Atanna ‑bha mɛ ‑nu "dhiʋ̈ziöwomɛ ‑nu 'wo mü bha ‑wo 'wɔn bha‑ ‑bho 'koo kë wo ‑dhɛ.
ACT 15:3 'Yö 'wo‑ ‑nu dɔ zian‑ 'yö 'wo dho. 'Yö 'wo bɔ Fenisi ‑sɛ waa‑ Samadhi ‑sɛ ‑nu 'gü, 'yö ‑kɔ 'ö 'mɛ 'waa Zuifö 'ka 'wo wo zuë" ꞊slëë‑ 'ka Atanna "piʋ̈ bha, 'wo‑ ‑gɛn ‑nu dɔ 'dhang ‑bho Yesu "dhiʋ̈ ‑mɛ ‑nu 'wo ‑dhɛ ‑nu bha‑ 'gü ‑a ‑nu ‑dhɛ, 'yö‑ ‑nu zuë" ꞊nii ‑da 'pö ꞊dedewo.
ACT 15:4 ꞊Dhɛ 'ö ꞊wa ꞊loo Zedhizadhɛmö 'plöö, 'yö 'dhang ‑bho Yesu "dhiʋ̈ ‑mɛ ‑nu 'dhö, Yesu ‑bha yëkëmɛ ‑nu waa‑ Atanna ‑bha ‑mɛ ‑nu "dhiʋ̈ziöwomɛ ‑nu 'wo ‑dhɛ bha‑ 'gü 'wo ‑kɔ ‑ya ‑a ‑nu ‑dhɛng ‑gɔ, 'yö woo ‑dɩ 'pö waa‑ Atanna ‑nu 'wo 'wɔn ‑nu 'wo‑ ‑kë wo 'kwëë‑ ‑a ‑nu ‑bha "ta 'kpɔ ‑sü 'gü bha 'wo‑ ‑gɛn dɔ 'pö‑ ‑nu ‑dhɛ.
ACT 15:5 'Yö Fadhiziɛn ‑nu 'bha ‑nu 'wo 'dhang bho Yesu ‑wɔn "dhiʋ̈ bha 'wo ꞊wlü 'wo‑ pö: «‑Ka ‑kwaa pö 'dhang ‑bho Yesu "dhiʋ̈ ‑mɛ ‑nu 'ö 'waa Zuifö 'ka bha‑ ‑nu ‑dhɛ ‑wo 'dho 'gbannë 'gü, ꞊ya 'go mü kö 'tɔng‑ 'ö Moizö ‑ya nu kwa ‑dhɛ bha ‑wa ꞊bhlëë ‑ya.
ACT 15:6 'Yö Yesu ‑bha yëkëmɛ ‑nu waa‑ Atanna ‑bha mɛ ‑nu "dhiʋ̈ziöwomɛ ‑nu 'wo ‑ya ‑dhɛ do 'gü kö 'wo ‑dhɛ ‑ga 'wɔn bha‑ 'gü.
ACT 15:7 ꞊Dhɛ 'ö‑ ‑nu ‑dɩ ‑slɔɔ ꞊wa zaɔdhe ‑da wo "kwëë pinpindhö 'wɔn bha‑ 'gü, 'yö Piɛdhö ‑yö ꞊wlü 'ö‑ pö: «N dheebhang ‑nu, kaa ꞊dede ka‑ 'wɔn ‑dɔ 'kpakpadhö ‑a yi ꞊ya ꞊gwëë ‑dhɛ Atanna ꞊në n ‑ya ka kpö 'gü kë "dhʋ̈ kö 'a kë ö ‑bha mɛ dha ‑sü ‑naɔ 'ö ‑gban Yesu ‑bha bha‑ pömɛ 'ka 'mɛ 'waa Zuifö 'ka ‑a ‑nu ‑dhɛ kö ‑wa ma kö ‑wo 'dhang bho‑ "dhiʋ̈ 'pö.
ACT 15:8 'Yö Atanna 'ö mɛ "bhɩɩ‑ ‑nu zuë" dɔ bha 'ö ö ‑bha 'Nii‑ "slʋ̈ʋ̈slʋ̈ ꞊lɔɔ‑ ‑nu ‑ta ꞊dhɛ kwa 'dhö kö ‑ya ‑zɔn ꞊dhɛ ‑a ‑nu "dhia ‑yö ö 'gü 'pö.
ACT 15:9 'Yii 'mɛ 'wo Zuifö 'ka waa‑ 'mɛ 'waa Zuifö 'ka ‑a ‑nu ‑bho 'koo kë kwa ꞊zinng 'gü. 'Yö‑ ‑nu këwɔn yaa ‑nu ‑mawɔn to‑ ‑nu ‑bha 'dhang ‑bho Yesu "dhiʋ̈ ‑sü ‑wɔn 'gü, 'yö‑ ‑nu sü 'mɛ 'ö pö 'aa‑ ‑nu ‑bha 'ka ö wëëdhö.
ACT 15:10 ꞊Dhɛ 'ö "dhʋ̈, 'pë 'ö Atanna ‑ya pö 'kwa 'dho‑ kë ka‑ ‑kë ‑më ‑wɔn 'gü? "Ɛɛn Atanna 'gü 'pö 'ka‑ dan sië ‑ee? ‑A ‑bha 'tɔng‑ 'ö kwaa kwa "bhɛma ‑nu kwa ‑kɔ 'yii ꞊mɔɔ‑ ‑bha kö 'kwa‑ 'kun ‑a ‑bha ‑kë "gbɩɩ‑ ‑sü ‑wɔn 'gü bha 'yö 'ka‑ "piʋ̈ 'zü ꞊dhɛ 'dhang ‑bho Yesu "dhiʋ̈ ‑mɛ ‑nu 'ö 'waa Zuifö 'ka ‑wa yö ꞊në‑ 'kun ‑ee?
ACT 15:11 Kwa 'dhang ‑bho "dhiʋ̈ ꞊dhɛ kwa Dëmɛ Yesu ‑bha ‑gasitɛ ꞊në‑ ‑wɔn 'gü 'yö 'kwa dhasü ꞊slɔɔ. ‑Kɔ do bha ꞊në woo‑ ‑dɩ 'pö 'wo‑ ꞊slɔɔ‑ 'ka.»
ACT 15:12 ꞊Dhɛ 'ö Piɛdhö ꞊ya bo dhiang bha‑ zë ‑sü 'ka, 'yö ‑dhɛa ‑yö ga 'mɛ 'wo gun 'mü bha‑ ‑nu ‑ta. 'Yö 'wo wo "tʋ to Banabasö waa‑ Pɔdhö ‑nu ‑wʋ ‑bha, 'yö 'wo zun ‑kɔ 'ö Atanna ‑yö bɔ‑ 'ka wo ‑ta 'ö "dhabhliwɔn ‑nu ‑kë 'ka ‑a ‑nu ‑bha ꞊nië ‑sü 'ö 'mɛ 'waa Zuifö 'ka‑ ‑nu kpö 'gü bha 'wo zun‑ ‑gɛn bho ‑sü ‑bha ‑a ‑nu ‑dhɛ.
ACT 15:13 ꞊Dhɛ 'ö ꞊wa bo 'wɔn ‑nu bha‑ ‑nu ‑gɛn bho ‑sü 'ka 'yö Zakö ‑ya pö: «N dheebhang ‑nu, ‑ka ka "tʋ 'to n ‑ta!
ACT 15:14 ‑Kɔ 'ö Atanna ‑yö ö ‑zʋ ‑kë 'ka ‑kɔ ‑blɛɛsü wo 'mɛ 'waa Zuifö 'ka‑ ‑nu "piʋ̈ kö ‑yö mɛ 'sü‑ ‑nu ꞊zinng 'gü kö ‑wo kë ö ‑bha "sɛgɔ 'gümɛ ‑nu 'ka bha, Simɔ ꞊yaa‑ ‑dhiang zë.
ACT 15:15 'Sa waa‑ Atanna ‑wʋdhiʋ̈loomɛ ‑nu 'wo gun yi 'bha 'ka ‑a ‑nu ‑wʋ ‑ya 'gü do, ‑a ‑gɛn ‑mü ꞊dhɛ 'pë 'ö ‑bɛn zë ‑sü 'ka Atanna ‑bha 'sëëdhɛ 'gü Davi suu 'gü ‑në ‑nu ‑bu 'gü ‑ya ‑pö:
ACT 15:16 ‹Kwa Dëmɛ ‑ya pö: 'Wɔn ‑nu ya ꞊wa ziö, a ‑dho n yee kë 'a nu 'a Davi ‑bha 'kɔ 'ö wü bha‑ dɔ 'zü ‑deewo, 'yö 'a‑ 'wü ‑dhɛ ‑nu bha‑ ‑nu ‑pë ‑kë kö ‑yö ‑gban 'zü ‑deewo.
ACT 15:17 Kë "dhʋ̈ kö mɛ ‑kpɛa 'wo to ‑wo kwa Dëmɛ "gblʋʋ mɔɔ‑, kö 'a 'mɛ 'waa Zuifö 'ka‑ ‑nu ‑dhɛ 'pö kö ‑wo kë n ‑bha 'ka›.»
ACT 15:18 'Wɔn ‑nu 'ö kwa Dëmɛ ‑ya pö 'ö‑ yi ꞊ya ꞊gwëë bha ꞊në 'wo bha.»
ACT 15:19 'Yö Zakö ‑yö ö ‑bha ‑da ‑ta 'ö‑ pö: «Pë ‑nu 'wo bha ꞊në‑ ‑nu ‑wɔn 'gü 'yö ‑kë n 'gü ‑së kö 'kwa 'dho sëëbhodhe nu 'mɛ 'waa Zuifö 'ka 'ö 'wo wo zuë" ꞊slëë Atanna "piʋ̈ bha‑ ‑nu ‑dhɛ!
ACT 15:20 "Kɛɛ ‑ka ‑kwa 'sëëdhɛ bɔ‑ ‑nu ‑dhɛ kö 'kwa‑ pö 'wa 'dho ‑tuʋ̈pë ‑nu 'wo "saa‑ bho sië‑ 'ka ‑dhɔkëpë ‑nu "dhiʋ̈ bha ꞊në‑ ‑bhö! ꞊Dhɛ ‑wo wo ‑dɩ 'kun ‑zua zë ‑sü ‑gɔ, ꞊ya 'go mü 'zü wü 'ö‑ ꞊yɔɔn 'yii ꞊wɛnng 'wa 'dho‑ ‑bhö. ꞊Ya 'go mü 'zü 'wa 'dho pë ꞊yɔɔn ‑bhö,
ACT 15:21 ‑a ‑gɛn ‑mü ꞊dhɛ 'ö go‑ 'ka kwa "bhɛma ‑nu ‑bha "tʋ̈ng ‑bha 'ö nu 'ö zun‑ 'ka ꞊dɛɛ ‑bha, ‑wo Moizö ‑bha 'tɔng‑ ‑wɔn dhiang ‑zë mɛ ‑dhɛ 'pö‑ ꞊gban "pɛpɛ 'gü ‑kpɛawo; ‑a ‑gɛn ‑mü 'zü ꞊dhɛ Zuifö ‑nu ‑wo 'tɔng‑ bha‑ ‑wʋ ‑pö wo ‑bha ‑yakwëëkëgükɔ ‑nu 'gü ‑a ‑nu ꞊glooyi ꞊gban "pɛpɛ 'ka.
ACT 15:22 ꞊Dhɛ 'ö ꞊ya kë "dhʋ̈ 'yö Yesu ‑bha yëkëmɛ ‑nu 'wo Zedhizadhɛmö ‑pö 'gü bha waa‑ mɛ zizi ‑nu waa‑ 'dhang ‑bho Yesu "dhiʋ̈ ‑mɛ ‑nu 'wo to ‑a ‑nu ꞊gban "pɛpɛ 'wo wo ‑wʋ ‑kë do 'yö 'wo ‑kɔ ‑yɛ mɛ 'bha ‑nu ‑bha wo kpö 'gü, 'yö 'wo‑ ‑nu ‑da Pɔdhö waa‑ Banabasö ‑nu "piʋ̈, 'yö 'wo‑ ‑nu bɔ Angtiɔsö. 'Mɛ 'wo ‑kɔ ‑yɛ ‑nu ‑bha "dhʋ̈ bha ‑wa mɛ do ‑dhɛ Zudë, 'yö 'wo‑ 'tɔ kpɔ Bazabasö, 'yö 'wo‑ mɛ do 'bha ‑dhɛ Sidhasö. Mɛ ꞊plɛ bha ‑wʋgbiindhɛ ‑gun ‑nu ‑gɔ ‑a ‑nu kpö 'gü.
ACT 15:23 'Sëëdhɛ 'wo‑ dɔ‑ ‑nu ‑gɔ kö ‑wo 'dho‑ 'ka Angtiɔsö ‑mɛ ‑nu ‑dhɛ bha ‑wa ‑bɛn ‑zë 'pö 'wo‑ pö: «Yesu ‑bha yëkëmɛ ‑nu waa‑ mɛ zizi ‑nu 'yi ka dheebhang 'ka 'yi Zedhizadhɛmö 'plöö ya, 'ya 'mɛ 'ka 'dhang bho Yesu ‑wɔn "dhiʋ̈ "kɛɛ 'ö 'kaa Zuifö 'ka, 'ö 'ka Angtiɔsö ‑pö 'gü "ɛɛn 'ö 'ka Siidhi ‑sɛ waa‑ Sidhisi ‑sɛ ‑nu 'gü bha ka ꞊tua bho 'gbɛ.
ACT 15:24 'Ya‑ ma ꞊dhɛ mɛ 'bha ‑nu ꞊wa 'go yi "piʋ̈ yö ꞊wa zuëkaankwëëdhe waa‑ ‑zʋgɔndhe 'gbɛ ‑da ka 'gü ‑a ‑nu zë ‑dhiang ‑nu 'ka, "kɛɛ 'yii ‑wʋ 'kpɔ‑ ‑nu ‑bha kö ‑wa kë "dhʋ̈ (‑wa ‑bho wo ‑dɩ 'gü).
ACT 15:25 'Wɔn 'ö‑ ‑wɔn 'gü 'yö ꞊dhɛ 'ö 'ya ‑ya ‑dhɛ do 'gü 'ö 'ya ‑dhɛ ‑ga 'wɔn bha‑ 'gü, 'ö yi ‑wʋ ꞊ya kë‑ 'gü do 'yö 'yi mɛ ‑da Baanabasö waa‑ Pɔdhö ‑a ‑nu ꞊keng‑ 'yi‑ ‑nu bɔ sië ka ‑dhɛ bha 'yö bha, ‑a ‑gɛn ‑mü ꞊dhɛ mɛ ꞊plɛ bha‑ ‑nu ‑wɔn ‑yö yi ‑gɔ "gbɩɩ‑.
ACT 15:26 ‑A pö 'yi‑ wo "dhʋ̈ bha‑ 'klɔɔ‑ ‑mü ꞊dhɛ mɛ ꞊plɛ bha ꞊në 'wo woo‑ ‑tosɛa "dhiʋ̈ dɔ kwa Dëmɛ Yesu Klisi 'tɔ ‑wɔn 'gü.
ACT 15:27 ꞊Dhɛ 'ö "dhʋ̈ yi Zudë waa‑ Sidhasö ‑a ‑nu ‑bɔ ka ‑dhɛ kö 'wɔn ‑nu 'yi‑ ‑nu ‑bɛn zë sië 'sëëdhɛ 'gü ya ꞊në ‑wa 'gü pö ka ‑dhɛ 'kpakpadhö ‑së 'ka wo ‑dɩ "dhi.
ACT 15:28 ‑A ‑gɛn ‑mü ꞊dhɛ ‑yö ‑kë yaa‑ Atanna ‑bha 'Nii‑ "slʋ̈ʋ̈slʋ̈ ‑nu yi 'gü ‑së kö 'ya 'dho ꞊kwɛɛ‑ 'gbiin‑ "wɛɛ 'bha ‑ya ka ‑ta 'zü kö 'yii kë 'wɔn ‑nu 'ö 'tɔng‑ ‑ya pö 'ka ka kwaa‑ ‑zü ‑a 'ka.
ACT 15:29 Yö ‑mü ꞊dhɛ kö ‑tuʋ̈pë ‑nu 'wo "saa‑ bho‑ 'ka ‑dhɔkëpë ‑nu "dhiʋ̈ bha 'ka 'dho‑ ‑bhö. ꞊Ya 'go mü 'zü 'ka 'dho pë ꞊yɔɔn ‑bhö. 'Ka 'dho wü 'ö 'wii‑ ꞊yɔɔn ꞊wɛnng ‑a ‑bhö 'pö, ‑a ‑gɛn ‑mü ꞊dhɛ kö‑ "tɩng ꞊ya 'to‑ 'gü, ꞊ya 'go mü 'zü kö 'ka ka ‑dɩ 'kun ‑zua zë ‑sü ‑gɔ. 'Ya ka ꞊tua bho 'gbɛ»
ACT 15:30 ꞊Dhɛ 'ö ꞊ya kë "dhʋ̈, 'yö 'wo wo ꞊kwaa 'mɛ 'wo bha‑ ‑nu ‑zü 'yö 'wo dho Angtiɔsö. ꞊Dhɛ 'ö ꞊wa 'dho ꞊wa ꞊loo mü 'yö 'wo 'dhang ‑bho Yesu "dhiʋ̈ ‑mɛ ‑nu "pɛpɛ ꞊gban ‑dhɛ ‑dhɛ do 'gü, 'yö 'wo 'sëëdhɛ bha‑ nu‑ ‑nu ‑dhɛ.
ACT 15:31 ꞊Dhɛ 'ö ꞊wa bo‑ ‑wʋ pö ‑sü 'ka, 'yö‑ ‑nu zuë" ꞊nii 'dhö ‑da ꞊dedewo ‑a ‑nu faan dɔ ‑wʋ 'wo‑ bɔ‑ ‑nu ‑dhɛ bha‑ ‑wɔn 'gü.
ACT 15:32 Zudë waa‑ Sidhasö 'wo ‑kë Atanna ‑wʋdhiʋ̈loomɛ 'ka 'pö bha ‑wo dhiang ‑zë pinngdhö wo dheebhang ‑nu 'wo mü bha‑ ‑nu ‑dhɛ, 'ö 'wo‑ ‑nu faan dɔ ‑a ‑nu ‑bha ‑zʋ ‑yö Yesu ‑dhɛ ‑sü bha‑ ‑bha.
ACT 15:33 ꞊Dhɛ 'ö ꞊wa "tʋ̈ng 'bha kë 'mü, 'yö 'mɛ 'wo nu "dhʋ̈ bha‑ mɛ 'bha ‑nu 'wo wo ‑wʋ ‑da wo dheebhang ‑nu 'wo mü bha‑ ‑nu ‑dhɛ kö 'wo wo yee kë 'wo 'dho wo ꞊taama. 'Yö 'wo wo ‑wʋ kpɔ‑ ‑nu ‑bha 'yö 'wo dho.
ACT 15:34 "Kɛɛ 'yö Sidhasö ‑zë 'yii "wɩ 'dho ‑wɔn ‑bha, 'yö to mü.
ACT 15:35 'Yö Pɔdhö waa‑ Baanabasö ‑nu 'wo to mü waa‑ mɛ "wɛɛ 'gbɛ 'dhö, 'yö 'wo mɛ ꞊draan‑ Atanna ‑wʋ ‑bha, kö ‑wo 'wɔn ‑taɔng ‑së 'ö ‑kë kwa Dëmɛ ‑wʋ 'ka bha‑ pö sië mɛ ‑nu ‑dhɛ.
ACT 15:36 ꞊Dhɛ 'ö "tʋ̈ng 'bha ꞊ya ziö, 'yö Pɔdhö ‑ya pö Banabasö ‑dhɛ: «‑Kwa kwa yee kë 'kwa bɔ 'pö‑ ‑nu 'gü, kwa dheebhang ‑nu 'kwa kwa Dëmɛ ‑wʋ pö‑ ‑nu ‑dhɛ bha‑ ‑nu "piʋ̈ kö 'wo 'dho sië "dhiʋ̈ ‑a ‑nu ‑bha ‑zʋ ‑yö Yesu ‑dhɛ ‑sü 'gü kö 'kwa‑ 'wɔn dɔ!»
ACT 15:37 ‑Yö ‑gun Banabasö "piʋ̈ ꞊dhɛ Zan 'wo‑ 'tɔ kpɔ Makö bha ‑yö 'dho wo ꞊keng‑,
ACT 15:38 "kɛɛ 'yö Pɔdhö ‑zë 'yii "wɩ‑ ‑bha; ‑a ‑gɛn ‑mü ꞊dhɛ 'ö gun "dhʋ̈ kö ꞊ya "kan‑ ‑nu ‑bha 'nu Panfidhi ‑sɛ 'gü.
ACT 15:39 'Yö ‑kë zaɔdhe 'kpii‑ 'ka Pɔdhö waa‑ Banabasö ‑a ‑nu ꞊zinng 'gü 'yö 'wo ‑kan 'kwëë‑. 'Yö Banabasö ‑yö Makö sü ö ꞊keng‑ 'yö 'wo ‑da "yitagɔ 'gü 'wo dho "sɛgɔ 'ö ‑ya ‑sü 'ka "yi ꞊zinng 'gü 'wo‑ Siplë ‑dhɛ ‑kë bha‑ 'gü.
ACT 15:40 'Yö Pɔdhö ‑yö Sidhasö sü ö ꞊keng‑ 'pö. 'Yö 'dhang ‑bho Yesu ‑wɔn "dhiʋ̈ ‑mɛ ‑nu 'wo Angtiɔsö ‑pö 'gü 'wo Pɔdhö waa‑ Sidhasö ‑nu ‑wɔn ꞊loo kwa Dëmɛ ꞊kwɛɛ‑ kö ‑yö ö ‑zʋ kë‑ ‑nu "piʋ̈ 'yö 'wo dho.
ACT 15:41 'Yö 'wo bɔ Siidhi ‑dhɛ waa‑ Sidhisi ‑dhɛ ‑nu 'gü 'dhang ‑bho Yesu "dhiʋ̈ ‑mɛ ‑nu 'wo mü ‑a ‑nu faan dɔ ‑sü 'ka ‑zʋ ‑yö Yesu ‑dhɛ ‑sü ‑bha.
ACT 16:1 'Yö Pɔdhö ‑yö dho 'ö ꞊loo Dɛɛbö ‑pö waa‑ Dhitrö ‑pö ‑nu 'gü. 'Dhang ‑bho Yesu "dhiʋ̈ ‑mɛ do ‑yö ‑gun 'pö‑ bha‑ 'gü 'wo‑ ‑dhɛ Timote. ‑Yö ‑gun Zuifö dhebhɔ do 'ö 'dhang bho Yesu "dhiʋ̈ ꞊në‑ gbö 'ka, "kɛɛ 'yö‑ dë ‑zë 'ö ‑kë Glɛkö mi 'ka.
ACT 16:2 'Dhang ‑bho Yesu "dhiʋ̈ ‑mɛ ‑nu 'wo Dhitrö ‑dhɛ waa‑ Ikɔnö ‑dhɛ ‑nu 'gü ‑wo ‑gun "sɛɛdhɛ ‑së kë sië Timote bha‑ ‑bha.
ACT 16:3 'Yö ‑kë Pɔdhö 'gü ‑së kö ‑yö ziö wo ꞊keng‑, 'yö‑ sü 'ö‑ ‑kë 'gbannë 'ka Zuifö ‑nu 'wo "sɛ bha‑ 'gü bha‑ ‑nu ‑wɔn 'gü kö‑ ‑nu zuë" 'ya 'dho 'to ꞊taama, ‑a ‑gɛn ‑mü ꞊dhɛ mɛ ꞊gban "pɛpɛ‑ ‑gun 'wɔn dɔ sië ꞊dhɛ ‑a dë‑ Glɛkö mi 'ka, (yö ꞊në‑ ‑wɔn 'gü 'yö 'yii 'dho 'gbannë 'gü ö 'nëdhɛ 'gü).
ACT 16:4 'Pödhɛ "pɛpɛ 'wo bɔ‑ 'gü, 'wɔn ‑nu 'ö Yesu ‑bha yëkëmɛ ‑nu waa‑ mɛ zizi ‑nu 'wo Zedhizadhɛmö 'wo‑ pö bha ‑wa ‑gɛn ‑dɔ 'dhang ‑bho Yesu "dhiʋ̈ ‑mɛ ‑nu 'wo mü ‑a ‑nu ‑dhɛ 'pö kö ‑wa kë ꞊dhɛ ‑kɔ 'wo‑ pö‑ 'ka bha‑ 'dhö.
ACT 16:5 Atanna ‑bha 'kɔdhigümɛ ‑nu ‑gun faan ꞊slɔɔ sië ‑zʋ ‑yö Yesu ‑dhɛ ‑sü bha‑ 'gü, 'ö‑ ‑nu 'bha 'dhö ‑da 'gü ‑kpɛawo ‑dhɛkpaɔyi "pɛpɛ ꞊gban‑ 'ka.
ACT 16:6 Atanna ‑bha 'Nii‑ "slʋ̈ʋ̈slʋ̈ 'yii "wɩ‑ ‑bha 'mɛ 'wo bha‑ ‑nu ‑gɔ kö ‑wo ‑a ‑wʋ pö Azi ‑pö ‑nu 'gü. 'Wɔn 'ö‑ ‑wɔn 'gü 'yö 'wo bɔ Flizi ‑sɛ waa‑ Gadhatö ‑sɛ ‑nu ꞊në‑ 'gü bha 'yö bha.
ACT 16:7 ꞊Dhɛ 'ö ꞊wa ꞊loo Misi ‑dhɛ "sɔɔ, ‑yö ‑gun ‑nu "piʋ̈ ꞊dhɛ 'wo 'dho Bitini ‑sɛ 'gü, "kɛɛ Yesu ‑bha 'Nii‑ "slʋ̈ʋ̈slʋ̈ 'ö‑ ‑nu 'gü bha 'yii "wɩ‑ ‑bha ‑a ‑nu ‑gɔ kö ‑wo 'dho mü.
ACT 16:8 ‑A ‑kë "dhʋ̈ ‑sü bha‑ 'gü 'yö 'wo bɔ Misi ‑sɛ 'gü, 'yö 'wo dho 'wo ꞊loo Troasö 'plöö "yitagɔ dɔdhɛ 'gü.
ACT 16:9 ꞊Dhɛ 'ö dɔ gbeng, 'yö Pɔdhö "yan 'gü 'dhö ‑da, 'yö gɔndënë do 'ö go Maseduanö ‑sɛ 'gü bha‑ yö kö ‑yö dɔ sië ö wëëdhö, 'yö ꞊bhɛa Pɔdhö ‑dhɛ 'ö‑ pö: «‑Bhö dɔ "gbɩɩ‑ kö 'i bɔ Maseduanö ‑sɛ 'gü kö i "ta yi ‑dhɛ!»
ACT 16:10 ꞊Dhɛ 'ö Pɔdhö "yan 'gü ‑ya ‑da ꞊dhɛ ‑kɔ bha‑ 'dhö, 'yö 'yi‑ "slë ꞊mɔɔ kö 'yi 'dho Maseduanö ‑sɛ 'gü, ‑a ‑gɛn ‑mü ꞊dhɛ kö 'ya‑ 'wɔn dɔ ꞊dhɛ Atanna ‑yö yi ‑dhɛ mü kö 'yi 'dho Yesu ‑bha 'wɔn ‑taɔng ‑së bha‑ 'ka 'mɛ 'wo "pɛan bha‑ 'ka ꞊në‑ ‑nu ‑dhɛ.
ACT 16:11 'Yö yi ‑da "yitagɔ 'gü 'yi go Troasö 'yi dho vɛɛdhö 'pödhɛ 'wo‑ ‑dhɛ Samotrasö bha‑ 'gü. ꞊Dhɛ 'ö ‑dhɛ ꞊ya ꞊kpaɔ, 'yö 'yi go 'mü 'zü 'yi dho Neapodhi ‑pö 'gü.
ACT 16:12 'Yö 'yi go mü 'zü 'yi "ta sü 'yi dho Fidhipö ‑pö 'ö Maseduanö ‑sɛ bha‑ 'pö‑ ꞊bhlëësü ‑sü 'ka bha‑ 'gü. Fidhipö ‑pö 'gü ‑mɛ ‑nu bha ‑wo ‑kë 'mɛ 'wo go Wlɔmö ‑a ‑nu 'ka.
ACT 16:13 Yi ‑dhɛkpaɔyi 'në 'bha ‑kë mü. 'Yö Zuifö ‑nu ‑bha ꞊glooyi 'ka 'yi go 'pödhö 'yi dho 'pö ꞊taama, "yi do 'bha bha‑ "kpʋng "dhiʋ̈. Yi 'dho ‑sü 'ka yi yi ‑zʋ ‑gɔn ꞊dhɛ yi ‑dho Zuifö ‑nu ‑bha ‑bhɛa Atanna ‑dhɛ ‑dhɛ 'bha yö ‑mü. ꞊Dhɛ 'yi dho 'yi ꞊loo ‑dhɛ 'ö "dhʋ̈ bha‑ 'gü, 'yö yi 'yaanu, 'yö 'yi dhiang zë dhong ‑nu 'wo gun ꞊loo ‑sü 'ka 'ko ‑ta mü bha‑ ‑nu ‑dhɛ.
ACT 16:14 Dhebhɔ do 'wo‑ ‑dhɛ Dhidi 'ö go Tiatii ‑pö 'gü ‑yö ‑gun dhong ‑nu bha‑ ‑nu kpö 'gü. Dhidi bha ‑yö ‑kë yɩɩga sɔ ‑zaɔndhö ꞊bhlëësü 'ö ‑ma 'yaa wo‑ sɔng ‑bha bha‑ "dhɔɔdɔdhe 'ka, "kɛɛ ‑yö Atanna ꞊bhlëë ‑ya. 'Yö kwa Dëmɛ ‑ya zuë" "dhiʋ̈ ‑pʋ kö ‑yö 'dhang bho Pɔdhö ‑wʋ bha‑ "dhiʋ̈.
ACT 16:15 'Yö 'wo waa‑ ‑bha 'kɔɔmɛ ‑nu ‑a ‑nu ‑bɔ Atanna 'ka ‑zu bho. ꞊Dhɛ 'ö go 'mü, 'yö‑ pö yi ‑dhɛ: «꞊Dhɛ 'ö ‑kë ꞊dhɛ 'ka 'dhang bho‑ "dhiʋ̈ 'kpakpadhö ꞊dhɛ mang ‑dɩ 'pö 'ma 'dhang bho kwa Dëmɛ ‑wɔn "dhiʋ̈ bha, ‑ka nu n ‑gɔ 'kɔɔdhö kö 'ka ‑ya mü.» 'Yö ꞊bhɛa yi ‑dhɛ ꞊dedewo, 'yö 'yi ‑kpla 'pö‑ ‑gɔ 'yi dho.
ACT 16:16 Yi do 'ka kö yi 'dho sië Zuifö ‑nu ‑bha ‑bhɛa Atanna ‑dhɛ ‑dhɛ 'gü, 'yö 'yi ꞊dhuëngdhe do 'ö "yina yaa 'dhö‑ 'gü, 'ö‑ kë ‑sü 'ka ‑dɛdhe 'ka bha‑ yö zian ‑ta. Dhebhɔ bha ꞊ya ‑dɛbɔ "dhʋ̈ 'yö dho‑ ‑naɔ "gblʋ̈gblʋ̈ bha‑ 'ka ö ‑gɔmɛ ‑nu ‑dhɛ.
ACT 16:17 Dhebhɔ bha 'yö ‑ya ‑ziö yaa‑ Pɔdhö ‑nu yi ꞊keng‑ ‑sü ‑bha kö ‑yö "gbla sië 'ö‑ pö mɛ ‑nu ‑dhɛ: «Gɔɔn‑ ‑nu ya ‑wo Atanna 'ö 'kpii‑ 'ö ‑ziö ‑dhɔkëpë "pɛpɛ 'wo to‑ ‑nu ‑ta bha ꞊në‑ ‑bha yëkëmɛ ‑nu 'ka! ‑Wo mɛ dha ‑zian ꞊në ‑zɔn sië ka ‑dhɛ bha.»
ACT 16:18 'Yö‑ ‑kë "dhʋ̈ ‑dhɛkpaɔyi 'gbɛ ꞊dede 'ka. 'Yö 'wɔn bha 'ö ꞊sië Pɔdhö ‑dhɛ 'yö ꞊gbla "yina yaa 'ö dhebhɔ bha‑ 'gü bha‑ ‑ta 'ö‑ pö: «A‑ ‑pö i ‑dhɛ Yesu Klisi 'tɔ 'gü, ‑bhö 'go dhebhɔ ya‑ 'gü!» 'Yö "yina bha 'ö go dhebhɔ bha‑ 'gü ‑dhɛ do bha‑ 'gü.
ACT 16:19 ꞊Dhɛ 'ö ‑dɛdhe bha‑ ‑gɔmɛ ‑nu ꞊waa‑ 'wɔn dɔ ꞊dhɛ 'wii 'dho 'wëëga 'bha ꞊slɔɔ‑ "gblʋʋ "piʋ̈ 'zü, 'yö 'wo Pɔdhö waa‑ Sidhasö ‑nu kun, 'yö 'wo‑ ‑nu ꞊gbiʋ̈ wo "piʋ̈ ‑zuudhö "dhɛɛdhɛ bha‑ 'gü, ‑gɔmɛ "gblʋ̈gblʋ̈ ‑nu 'wo go Wlɔmö 'wo gun 'pö bha‑ ‑gɔ "dhiʋ̈ bha‑ ‑nu ‑kuu "dhiʋ̈. ꞊Dhɛ 'ö ꞊wa ꞊loo mü, 'yö 'wo‑ pö‑ ‑nu ‑dhɛ 'wo‑ pö: «'Mɛ 'wo ya ꞊wa nu mɛ zuë" ‑kaan "kwëë ‑wɔn 'ka 'pödhɛ ya‑ 'gü!
ACT 16:21 Zuifö ‑nu ‑mü "kɛɛ ‑wo mɛ ‑nu draan‑ sië pë ‑nu 'ö kwaa‑ 'tɔng‑ ‑ya pö 'mɛ 'kwa Wlɔmö ‑mɛ ‑nu 'ka, 'kwa 'dho‑ kë "ɛɛn 'kwa 'dho "wɩ‑ ‑bha bha‑ ‑bha kö ‑wa kë.»
ACT 16:22 'Yö mɛ kpö 'kpii‑ 'wo gun 'mü bha 'wo wo 'zü ‑kë do Pɔdhö waa‑ Sidhasö ‑nu ‑dhɛ. 'Yö ‑gɔmɛ "gblʋ̈gblʋ̈ ‑nu bha 'wo‑ pö woo‑ "tasümɛ ‑nu ‑dhɛ ‑wo sɔ bho‑ ‑nu ‑bha kö ‑wa ‑nu ‑ma ꞊klangga 'ka.
ACT 16:23 ꞊Dhɛ 'ö ꞊wa ꞊klangga ‑yan 'gbɛ ꞊dede bho‑ ‑nu 'gü, 'yö 'wo‑ ‑nu ‑zuö ‑kaso 'gü. 'Yö ‑gɔmɛ ‑nu ‑wa pö "yan ‑to ‑kaso ‑kɔ "dhi ‑bha ‑mɛ ‑dhɛ kö ‑yö ö "tʋ̈ng kë‑ ‑nu 'gü ‑së 'ka.
ACT 16:24 ꞊Dhɛ 'ö "yan ‑to ‑kaso ‑kɔ "dhi ‑bha ‑mɛ ꞊ya ‑wʋ bha‑ ma, 'yö dho mɛ ꞊plɛ bha‑ ‑nu 'ka ‑kaso ‑kɔdhi 'dhɛ 'ö 'kɔɔdhö mü ꞊yën ꞊gblɛɛn bha‑ 'gü, 'yö 'wo‑ ‑nu ‑gɛn ‑da "dhü "kplü 'gü.
ACT 16:25 ꞊Dhɛ 'ö dɔ gbeng ꞊zinng 'gü, 'yö Pɔdhö waa‑ Sidhasö 'wo ‑ya ‑bhɛa Atanna ‑dhɛ ‑sü ‑bha kö ‑wo "tan ‑nu bho sië‑ 'tɔ bhɔ ‑sü 'ka, kö ‑kasogümɛ ‑nu ‑kpɛa ‑wo wo "tʋ 'to sië‑ ‑nu ‑wʋ ‑bha.
ACT 16:26 ‑Wo ‑to ‑dhɛ bha‑ 'gü 'yö "sɛ 'dhö ‑ya ꞊zii ‑sü ‑bha "gbɩɩ‑ ꞊dede 'ka, 'yö ‑kaso ‑kɔ bha‑ "kpan ‑gwë ꞊gban 'dhö ‑ya vin ‑sü ‑bha, 'yö‑ "dhi ꞊gban 'wo ‑pʋ, 'yö 'mɛ 'wo gun ‑kaso 'gü mü bha‑ ‑nu ꞊gban ‑bha lɔɔga ‑nu ‑wo go‑ ‑nu ‑bha.
ACT 16:27 'Yö "yan ‑to ‑kaso ‑kɔdhi ‑bha ‑mɛ ‑yö ‑bö. ꞊Dhɛ 'ö‑ ‑dhɛ yö kö ‑kaso ‑kɔdhi ꞊gban ꞊wa "pʋ, 'yö ö ‑bha ‑siang sü kö 'ö ö ‑dɩ zë, ‑a ‑gɛn ‑mü ꞊dhɛ ‑yö ö ‑zʋ gɔn ꞊dhɛ ‑kasogümɛ ‑nu ꞊gban ꞊wa ꞊dua.
ACT 16:28 "Kɛɛ ꞊dhɛ Pɔdhö ꞊yaa‑ 'wɔn dɔ, 'yö ꞊gbla ö faan ꞊gban "pɛpɛ 'ka 'ö‑ pö: «'Bha 'dho i ‑dɩ zë! Mɛ ꞊gban yi yö!»
ACT 16:29 ꞊Dhɛ 'ö ꞊ya kë "dhʋ̈, 'yö "yan ‑to ‑kaso ‑kɔdhi ‑bha ‑mɛ bha 'ö‑ pö ‑wo pɛng 'pu, 'yö ‑bɛang sü 'ö dho‑ 'ka 'kɔdhi 'dhɛ 'ö Pɔdhö waa‑ Sidhasö 'wo‑ 'gü bha‑ 'gü ꞊zii ‑sü 'ka, 'yö zun ö kpiö 'gü ‑a ‑nu ‑dhɛ.
ACT 16:30 ꞊Dhɛ ꞊ya kë "dhʋ̈ 'yö‑ ‑nu zun "kpɛnng, 'yö‑ ‑nu dhɛɛ" kpɔ 'ö‑ pö: «N Dëmɛ ‑nu, a ‑dho ‑a kë ꞊dhɛ kö 'a dhasü ꞊slɔɔ?»
ACT 16:31 'Yö 'wo‑ ‑yɔ bɔ‑ ‑gɔ 'wo‑ pö: «‑Bhö 'dhang bho yi Dëmɛ Yesu ‑wɔn "dhiʋ̈, ꞊ya kë "dhʋ̈ kaa‑ i ‑gɔ 'kɔɔmɛ ‑nu ka ‑dho dha.»
ACT 16:32 'Yö 'wo kwa Dëmɛ ‑dhiang zë waa‑ ‑gɔ 'kɔɔdhö mɛ ꞊gban "pɛpɛ ‑dhɛ.
ACT 16:33 'Yö "yan ‑to ‑kaso ‑kɔdhi ‑bha ‑mɛ bha 'ö dho‑ ‑nu 'ka ö ‑gɔ "kwɛandhö gbeng do bha‑ 'gü, "tʋ̈ng do bha‑ 'ka, 'yö‑ ‑nu ‑bha bhië ‑nu ‑zu. ‑Wo ‑to ‑dhɛ do bha‑ 'gü 'pö 'wo waa‑ ‑bha 'kɔɔmɛ ‑nu ‑a ‑nu ‑bɔ Yesu 'ka ‑zu bho.
ACT 16:34 'Yö dho Pɔdhö waa‑ Sidhasö ‑nu 'ka ö ‑gɔ 'kɔɔdhö 'yö ‑bhöpë nu‑ ‑nu ‑dhɛ. 'Yö gɔndënë bha waa‑ ‑bha 'kɔɔmɛ ‑nu ‑a ‑nu zuë" ꞊nii ‑yö ‑da ꞊dedewo ‑a ‑nu ‑bha 'dhang ‑bho Atanna "dhiʋ̈ ‑wɔn bha‑ 'gü. (꞊Dhɛ 'ö ꞊ya kë "dhʋ̈, 'yö 'wo wo yee ‑kë 'zü ‑deewo 'wo dho ‑kaso ‑kɔɔdhö.)
ACT 16:35 ꞊Dhɛ 'ö ‑dhɛ ꞊ya ꞊kpaɔ, 'yö ‑gɔmɛ "gblʋ̈gblʋ̈ ‑nu 'wo go Wlɔmö bha 'wo mɛ bɔ "yan ‑to ‑kaso ‑kɔdhi ‑bha ‑mɛ ‑dhɛ kö ‑wa pö‑ ‑dhɛ ‑yö ö kwaa‑ Pɔdhö waa‑ Sidhasö ‑nu ‑zü kö ‑wo 'dho.
ACT 16:36 'Yö "yan ‑to ‑kaso ‑kɔdhi ‑bha ‑mɛ bha 'ö nu, 'yö‑ pö Pɔdhö ‑dhɛ 'ö‑ pö: «‑Gɔmɛ ‑nu ꞊wa wo ‑wʋ bɔ n ‑dhɛ, ‑wa ‑pö 'a n kwaa‑ ka ‑zü. ꞊Dhɛ 'ö "dhʋ̈ ‑ka kaa‑ 'dho wo ka ‑ta "puu 'ka!»
ACT 16:37 "Kɛɛ 'yö Pɔdhö ‑ya pö mɛ 'wo‑ ‑nu bɔ bha‑ ‑nu ‑dhɛ 'ö‑ pö: «Yi 'ö 'yi ‑kë Wlɔmö 'në ‑nu 'ka ('ö‑ ‑dhɛ 'yaa‑ ‑bha ꞊dhɛ ‑wo yi ‑ma, "ɛɛn ‑wo yi ‑da ‑kaso 'gü kö za 'yii yi zë bha) 'yö 'wo yi ‑ma mɛ "pɛpɛ ꞊gban "yan "dhiʋ̈, 'yö 'wo yi ‑da 'zü ‑kaso 'gü bha 'yö 'wo‑ "piʋ̈ ꞊taamasü ya‑ 'gü ꞊dhɛ ‑wo yi ‑wo "kpɛnng ‑bin 'gü bha ‑ee? ‑Abin, ‑a pö‑ ‑nu ‑dhɛ woo ꞊dede ‑wo nu kö ‑wo yi bho ‑kaso 'gü!»
ACT 16:38 ꞊Dhɛ 'ö ꞊ya kë "dhʋ̈ 'yö 'mɛ 'wo bha 'wo dho Pɔdhö ‑wʋ bha‑ 'ka ‑gɔmɛ "gblʋ̈gblʋ̈ ‑nu bha‑ ‑nu ‑dhɛ. ꞊Dhɛ 'ö ‑gɔmɛ ‑nu bha 'wo‑ ma ꞊dhɛ Wlɔmö 'në ‑mü Pɔdhö waa‑ Sidhasö ‑a ‑nu 'ka, 'yö "suʋ̈ 'dhö ‑da ‑nu 'gü
ACT 16:39 'yö 'wo nu 'wo ‑wʋ ‑së pö‑ ‑nu ‑dhɛ ‑a kë 'wo‑ wo "dhʋ̈ bha‑ ‑wɔn 'gü, 'yö 'wo‑ ‑nu bho ‑kaso 'gü 'wo ꞊bhɛa‑ ‑nu ‑dhɛ kö ‑wo 'go 'pödhɛ bha‑ 'gü.
ACT 16:40 ꞊Dhɛ 'ö Pɔdhö waa‑ Sidhasö ꞊wa 'go ‑kaso 'gü, 'yö 'wo dho Dhidi ‑gɔ 'kɔɔdhö. ꞊Dhɛ 'ö ꞊wa "yan ‑kpan 'dhang ‑bho Yesu "dhiʋ̈ ‑mɛ ‑nu 'wo mü ‑a ‑nu ‑bha, 'yö 'wo‑ ‑nu faan dɔ, 'yö 'wo go 'pödhɛ bha‑ 'gü 'wo dho.
ACT 17:1 ꞊Dhɛ 'ö ꞊ya kë "dhʋ̈, 'yö 'wo bɔ Angfipodhi ‑pö waa‑ Apodhoni ‑pö ‑nu 'gü, 'yö 'wo dho 'wo ꞊loo Tesadhonikö ‑pö 'ö Zuifö ‑nu ‑bha ‑bhɔ "kwëë ‑kɔ do‑ gun‑ ‑bha bha‑ 'gü.
ACT 17:2 'Yö Pɔdhö ‑yö dho Zuifö ‑nu ‑bha ‑bhɔ "kwëë ‑kɔ 'gü ꞊dhɛ ‑kɔ 'ö‑ ‑kë 'ka ‑kpɛawo bha‑ 'dhö. 'Yö Atanna ‑wʋ 'ö ‑bɛn zë ‑sü 'ka bha‑ pö‑ ‑nu ‑dhɛ, 'yö‑ ‑nu ꞊klang ‑kë 'ka Zuifö ‑nu ‑bha ꞊glooyi ‑yaaga 'ka.
ACT 17:3 'Yö‑ 'klɔɔ‑ ‑nu pö‑ ‑nu ‑dhɛ ꞊dhɛ ‑kɔ 'ö ‑bɛn zë ‑sü 'ka‑ 'ka Atanna ‑bha 'sëëdhɛ 'gü ‑a 'dhö, 'yö‑ ‑zɔn ‑nu ‑dhɛ ꞊dhɛ ‑yö ‑bɛn zë ‑sü 'ka ꞊dhɛAtanna ‑bha ‑Yamɛ ‑dho sëë bho 'ö ga, 'ö go ga 'gü. 'Yö‑ pö‑ nu ‑dhɛ ꞊dhɛ: «Yesu 'a‑ ‑dhiang zë sië ka ‑dhɛ bha ꞊në Klisi bha‑ 'ka.»
ACT 17:4 ꞊Dhɛ 'ö ꞊ya kë "dhʋ̈, 'yö mɛ 'do 'do 'bha ‑nu ‑wo go‑ ‑nu kpö 'gü 'wo 'dhang bho Atanna ‑wʋ 'ö Pɔdhö ‑ya pö‑ ‑nu ‑dhɛ bha‑ "dhiʋ̈, 'yö 'wo ‑da Pɔdhö waa‑ Sidhasö ‑nu "piʋ̈. 'Yö mɛ kpö 'gbɛ 'wo ‑kë Glɛkö ‑nu 'ka 'wo Atanna ‑dhɔkëmɛ ‑nu 'ka 'pö waa‑ dhebhɔ ꞊bhlëësü ‑nu 'gbɛ ‑ta ‑gbɛ 'wo gun 'pödhɛ bha‑ 'gü bha 'wo‑ ‑kë ‑kɔ do bha‑ 'gü 'pö.
ACT 17:5 'Yö ꞊drɔ ‑yö ‑da Zuifö ‑nu 'gü, ‑a ‑gɛn ‑mü ꞊dhɛ mɛ 'gbɛ ‑bha ‑dho Pɔdhö waa‑ Sidhasö ‑nu ꞊keng‑ ‑sü 'ö ꞊dhɛ ‑kɔ bha‑ 'dhö bha 'yii dhi‑ ‑nu ‑dhɛ. 'Yö 'wo "wlaamɛ ‑nu ꞊kpaa 'kwëë‑ ‑kpinng ‑ta ‑dhɛ ‑nu 'gü, 'yö 'wo zun mɛ ‑nu ꞊bhluu "bhluu kë ‑sü ‑bha 'yö 'wo 'pö‑ ‑mɛ ‑nu zuë" ꞊kaan‑ 'ka "kwëë, 'yö 'wo nu gɔndënë do 'bha 'wo‑ ‑dhɛ Zazɔn bha‑ ‑gɔ 'kɔ "dhiëngdhö, Pɔdhö waa‑ Sidhasö ‑nu mɔɔ‑ ‑sü 'ka kö 'wo 'dho‑ ‑nu 'ka 'pö‑ dë ‑nu ‑kuu "dhiʋ̈.
ACT 17:6 ꞊Dhɛ 'ö 'wii‑ ‑nu yö 'mü, 'yö 'wo Zazɔn waa‑ 'dhang ‑bho Yesu "dhiʋ̈ ‑mɛ ‑nu 'bha ‑nu ꞊gaan "gaan ‑kë, 'yö 'wo dho‑ ‑nu 'ka 'pödë ‑nu ‑kuu "dhiʋ̈, 'yö 'wo ‑ya "gbla ‑sü ‑bha 'wo‑ pö: «'Mɛ ꞊wa "kpʋngtaamɛ ‑nu ꞊gban "pɛpɛ zuëkaankwëëdhe ꞊gban 'gü bha ꞊në ꞊wa nu ꞊wa ꞊loo 'pö‑ ya‑ 'gü ya!
ACT 17:7 "Kɛɛ Zazɔn ꞊në‑ ‑nu ꞊yëë bho ‑sü 'ka ö ‑gɔ 'kɔɔdhö! 'Mɛ 'wo bha ‑dhɛ "pɛpɛ 'wo ꞊loo‑ 'gü, ‑wo 'tɔng‑ ‑nu 'ö kwa ‑bha "sɛkɔɔnmɛ 'kpii‑ ‑ya dɔ bha‑ ꞊gban "pɛpɛ ‑see, 'ö 'wo‑ pö ꞊dhɛ ‑gblüdë "wɛɛ 'bha ‑yö ‑dhö 'wo‑ ‑dhɛ Yesu!»
ACT 17:8 'Yö ‑wʋ bha 'ö ‑siö mɛ kpö 'gbɛ waa‑ 'pödë ‑nu ‑dhɛ, 'yö‑ ‑nu zuë" ‑yö ꞊wlü.
ACT 17:9 'Yö Zazɔn waa‑ 'mɛ 'wo dho‑ ‑nu 'ka 'pö‑ dë ‑nu ‑kuu "dhiʋ̈ bha 'wo pë go‑ ‑nu ‑dhɛ "kɛɛ kö 'wii 'wɔn yaa 'bha kë. ꞊Dhɛ 'ö ꞊wa bo pë ‑go ‑a ‑nu ‑dhɛ ‑sü 'ka, 'yö 'wo wo ꞊kwaa‑ ‑nu ‑zü 'wo dho.
ACT 17:10 ꞊Dhɛ 'ö "bin ꞊ya 'ma, 'yö 'dhang ‑bho Yesu ‑wɔn "dhiʋ̈ ‑mɛ ‑nu 'wo wo ‑wʋ kpɔ Pɔdhö waa‑ Sidhasö ‑a ‑nu ‑bha kö ‑wo "suʋ̈ sië, 'yö 'wo dho Beedhe. ꞊Dhɛ 'ö ꞊wa ꞊loo mü, 'yö 'wo dho Zuifö ‑nu ‑bha ‑yakwëëkëgükɔ 'gü 'zü.
ACT 17:11 Zuifö ‑nu 'wo gun 'pö‑ bha‑ 'gü, "tʋ ‑to Pɔdhö waa‑ Sidhasö ‑nu ‑wʋ ‑bha ‑sü ‑yö kë ‑dhi ‑a ‑nu ‑dhɛ 'ö ꞊ziö‑ 'ka mɛ 'dhɛ 'wo gun Tesadhonikö bha‑ ‑nu ‑ta. 'Yö 'wo Atanna ‑wʋ kun 'zü wo zuë" ꞊gban‑ 'ka, 'yö yi ꞊gban "pɛpɛ 'ka 'wo ‑ya ‑dhɛ do 'gü, 'yö 'wo Atanna ‑wʋ 'ö ‑bɛn zë ‑sü 'ka bha‑ ‑wʋ pö kö ꞊ya kë ꞊dhɛ 'pë 'ö Pɔdhö 'dhö‑ pö sië bha 'ö tɛan‑ 'ka 'wo‑ dɔ.
ACT 17:12 'Yö Zuifö 'gbɛ 'wo go‑ ‑nu kpö 'gü 'wo 'dhang bho Yesu ‑wɔn "dhiʋ̈. 'Yö Glɛkö dhong ‑nu ꞊bhlëësü ‑nu waa‑ gɔɔn‑ ‑nu 'gbɛ ‑ta ‑gbɛ 'wo 'dhang bho Yesu ‑wɔn "dhiʋ̈ 'pö.
ACT 17:13 "Kɛɛ ꞊dhɛ 'ö Zuifö ‑nu 'wo Tesadhonikö ꞊waa‑ ma ꞊dhɛ Pɔdhö ‑yö Atanna ‑wʋ pö sië Beedhe ‑pö 'gü, 'yö 'wo nu 'wo ‑da 'pö‑ ‑mɛ ‑nu ‑gɔ 'gü, 'yö 'wo‑ ‑nu dɔ bhlukuudhö, 'yö 'wo‑ ‑nu zü ꞊yɔɔn Pɔdhö ‑nu ‑bha.
ACT 17:14 ꞊Dhɛ 'ö ꞊ya kë "dhʋ̈ 'yö 'dhang ‑bho Yesu "dhiʋ̈ ‑mɛ ‑nu 'wo Beedhe bha 'wo to 'wo dho Pɔdhö dɔ zian‑ ꞊weeyi "dhiʋ̈ ‑zian 'ka ‑bɛang 'ka, 'yö 'wo ‑wʋ kpɔ‑ ‑bha 'yö dho.
ACT 17:15 "Kɛɛ 'yö Sidhasö waa‑ Timote ‑zë ‑wo ‑to Beedhe ‑pö 'gü. 'Mɛ 'wo dho Pɔdhö ‑dɔ zian ‑dhɛ 'gü bha ‑wo ‑dho "dhʋ̈ 'wo ꞊loo Atɛnö 'plöö. 'Yö 'wo gun ‑na wo yee ‑kë 'wo nu naɔ 'ö Pɔdhö ‑ya dɔ‑ ‑nu ‑gɔ kö ‑wa dɔ Sidhasö waa‑ Timote ‑a ‑nu ‑gɔ bha‑ 'ka ꞊dhɛ ‑wo nu "vaandhö kö ‑wo ‑kpan ö ‑bha mü.
ACT 17:16 "Tʋ̈ng 'ö Pɔdhö gun dɔ sië‑ 'ka Sidhasö waa‑ Timote ‑nu ‑gɔ Atɛnö bha, ‑a zuë" ‑yö ‑gi ꞊dedewo, ‑a ‑gɛn ‑mü ꞊dhɛ Atɛnö ‑pö bha ‑yö ‑gun pa ‑sü 'ka ‑dhɔkëpë ꞊në‑ 'ka.
ACT 17:17 'Yö Pɔdhö waa‑ Zuifö ‑nu waa‑ 'mɛ 'waa Zuifö 'ka "kɛɛ 'wo ‑kë Atanna ꞊bhlëëyamɛ ‑nu 'ka bha wo ‑ya ‑dhɛ do 'gü Zuifö ‑nu ‑bha ‑bhɔ "kwëë ‑kɔ 'gü, 'yö 'wo zaɔdhe ‑nu ‑da ('wɔn ‑nu 'ö ‑gban Atanna ‑wʋ ‑bha bha‑ 'gü). 'Yö Pɔdhö ꞊ya ‑kpan 'pö 'mɛ ‑nu 'ö‑ ‑nu ‑bha "dhɛɛ 'kpii‑ 'gü ‑dhɛ ‑nu 'gü yi "ʋʋ yi 'ö‑ 'ka, 'yö wɛng‑ ‑nu 'wo dhiang ‑nu zë 'pö.
ACT 17:18 'Yö 'wɔndɔmɛ 'bha ‑nu 'wo ‑wɩ 'wɔn 'ö Epikudhö ‑yö mɛ ꞊draan‑ 'ka bha waa‑ mɛ 'bha ‑nu 'wo ‑wɩ Zenɔ ‑bha pë ‑zɔn ‑wʋ ‑bha, 'wo‑ ‑nu ‑dhɛ Sitoisiɛn ‑nu bha 'wo ‑ya dhiang ‑zë Pɔdhö ‑dhɛ ‑sü ‑bha. 'Yö mɛ 'bha ‑nu ‑wa pö: «‑Më ‑wɔn ꞊në dhiang plëëdë ya 'ö‑ pö sië‑ ya?» 'Yö mɛ 'bha ‑nu ‑wa pö 'zü: «‑Kë ꞊dhɛ ‑yö ‑zlan ‑dee 'bha ‑nu ꞊në‑ ‑dhiang zë sië bha!» ‑A ‑pö "dhʋ̈ ‑gɛn ‑mü ꞊dhɛ Pɔdhö ‑yö ‑gun Yesu ‑wɔn waa‑ mɛ "bhɩɩ‑ ‑nu ‑bha ‑go ga 'gü ‑dhiang ꞊në‑ zë sië.
ACT 17:19 'Yö 'wo‑ ‑da wo ꞊keng‑ 'wo dho‑ 'ka mɛ zizi ‑nu ‑bha ‑yakwëëkëdhɛ 'kpii‑ 'wo‑ ‑dhɛ ‑dhɛ Adheopazö bha‑ 'gü, 'yö 'wo‑ pö‑ ‑dhɛ: «I ‑mɔɔ ‑bha 'i Atanna ‑dhɔkë ‑kɔ ‑dee 'dhɛ 'i mɛ draan‑ sië‑ ‑bha bha‑ ‑zɔn yi ‑dhɛ ‑ee?
ACT 17:20 ‑A pö 'yi‑ wo "dhʋ̈ bha‑ ‑gɛn ‑mü ꞊dhɛ 'wɔn ‑nu 'i‑ pö sië yi ‑dhɛ bha 'yii‑ ma do, ‑yö yi "piʋ̈ ꞊dhɛ 'yi‑ ‑gɛn ma 'kpakpadhö.»
ACT 17:21 (Atɛnö ‑mɛ ‑nu bha waa‑ ‑nu ‑bha ‑dhɛng ‑nu ‑a ‑nu ‑dhidhɛwɔn 'ö gun ꞊në gun 'wɔn ‑taɔng ‑dee ‑nu bha‑ ma ‑sü waa‑ pö ‑sü ‑nu 'ka yi ꞊gban 'ka.)
ACT 17:22 'Yö Pɔdhö ‑yö ꞊wlü 'yö dɔ mɛ zizi ‑nu 'wo nu Adheopazö ‑ya "kwëë ‑ta bha‑ ‑nu wëëdhö 'ö‑ pö: «Atɛnö ‑mɛ ‑nu, a‑ dɔ 'kpakpadhö ꞊dhɛ Atanna mɔɔ‑ ‑mɛ ꞊dede ‑mü ka 'ka, ka ‑bha ‑zlan mɔɔ‑ ‑sü ‑yö ‑ziö ‑naa 'gü;
ACT 17:23 ‑a ‑gɛn ‑mü ꞊dhɛ 'ö gun kö a ꞊nië sië‑ 'ka ‑bha 'pödhɛ ya‑ 'gü kö a ka ‑bha ‑zlan ‑dhɔkëdhɛ ‑nu ‑ga sië, a ‑dhɛ ‑dhɔkëdhɛ do 'bha ‑yö 'ö ‑bɛn zë ‑sü 'ka mü ꞊dhɛ: «Atanna 'ö 'yaa‑ dɔ ‑a ‑dhɔkëdhɛ ꞊nɛ.» ꞊Dhɛ 'ö "dhʋ̈ a ‑nu kö Atanna 'ö 'ka‑ ‑dhɔkë "kɛɛ 'ö 'kaa‑ dɔ bha 'a yö ꞊në‑ ‑dhiang zë ka ‑dhɛ.
ACT 17:24 Atanna 'ö "dhʋ̈ bha ꞊në "kpʋngtaadhɛ waa‑ ö 'gü ‑pë ꞊gban ‑da, yö ꞊në "sɛ waa‑ dhang‑ ‑nu ꞊kɔɔnmɛ 'ka, ‑a ‑kë "dhʋ̈ ‑sü bha‑ 'gü, 'yaa ꞊mɔɔ‑ ‑bha kö ‑yö ‑ya 'kɔ 'ö mɛ "bhɩɩ‑ ‑nu ‑wa dɔ wo ‑kɔ "dhiʋ̈ bha‑ 'gü.
ACT 17:25 "Ɛɛn 'zü, ‑a "tʋ 'yaa mɛbhɩɩdhe ꞊kwɛngpë ‑bha, ‑a ‑gɛn ‑mü ꞊dhɛ yö ꞊në ‑tosɛa waa‑ "tɛɛ ‑sü ‑nu waa‑ pë "pɛpɛ 'ö mɛ "bhɩɩ‑ ‑nu ‑mawɔn ‑yö zun‑ ‑bha bha‑ nu‑ ‑nu ‑dhɛ.
ACT 17:26 Yö ꞊në gɔndënë do ‑da yi 'bha 'ka. Gɔndënë do bha ꞊në "kpʋngtaamɛ "pɛpɛ ꞊gban 'wo go‑ 'gü. Yö 'ö bha ꞊në‑ ‑kë 'zü kö 'mɛ 'wo bha ‑wo ꞊mɔɔ "kpʋngtaadhɛ "pɛpɛ ꞊gban 'gü. Yö 'ö bha ꞊në 'mɛ 'ö‑ ‑nu ‑da "dhʋ̈ bha‑ ‑nu ‑ya ‑dhɛ ‑nu 'wo dho "dhiëng kë‑ ‑bha 'gü 'yö "tʋ̈ng ‑nu 'wo dho‑ kë "kpʋng ꞊taa ‑a ‑nu ‑naa ‑kan 'yö gun ‑na mɛ "bhɩɩ‑ ‑nu kë.
ACT 17:27 Atanna ‑yö mɛ "bhɩɩ‑ ‑nu ‑da kö ‑wo ö mɔɔ‑ ꞊në‑ wo ‑kɔ "wla bho ‑sü 'ka ‑dhɛ 'gbɛ 'gü, 'bha mü "dhʋ̈ ‑wo ‑dho ö yö. "Kɛɛ 'sa kö 'yaa mɛ 'bha 'ka ꞊gblɛɛn.
ACT 17:28 ‑A ‑gɛn ‑mü ꞊dhɛ kwa ‑bha ‑tosɛa kë ‑sü waa‑ kwa ‑bha ‑pa diëë ‑sü ‑nu waa‑ 'pë 'ö 'kwa‑ 'ka ‑a ꞊gban‑ ‑go yö ꞊në‑ 'gü. Ka ‑bha "dhikanmɛ 'bha‑ ‑nu ‑wo ‑wʋ do ‑pö 'ö bhɔ ‑wʋ 'a‑ pö sië ka ‑dhɛ bha‑ ‑bha 'wo‑ pö: «Atanna ꞊në kwa ‑da, ‑a ‑wɔn 'gü ‑a ‑bha 'në ‑nu ‑mü kwa 'ka.»
ACT 17:29 ꞊Dhɛ 'ö ‑kë ꞊dhɛ kwa Atanna ‑bha 'në 'ka bha kö 'kwii 'dho kwa ‑zʋ 'gɔn ꞊dhɛ Atanna ‑yö ꞊dhɛ pë "blɛɛn‑ 'wo‑ ‑pë ‑kë "sënng waa‑ 'wëë‑ waa‑ ‑gwë ‑nu 'ka, 'ö 'mɛ 'wo dɔ‑ ‑pë kë ‑dhɛ 'ka 'wo‑ kë sië‑ 'ka bha‑ 'dhö. (Pë ‑nu 'wo "dhʋ̈ bha pë "blɛɛn‑ "wɛɛwɛɛdhe 'ö "tɛɛ ‑sü 'yaa‑ ‑gɔ ꞊në‑ ‑nu 'ka.)
ACT 17:30 "Tʋ̈ng 'ö mɛ ꞊gban‑ gun‑ 'ka wo tiibha bha, 'yaa gun Atanna "piʋ̈ ꞊dhɛ 'ö za dɔ mɛ ‑bha ‑a "tʋ̈ng bha‑ 'gü, "kɛɛ ꞊taamasü ya‑ 'gü, ‑yö mɛ "pɛpɛ ꞊gban ‑dhɛ sië ‑dhɛ "pɛpɛ ꞊gban 'gü kö ‑wo wo kwaa wo ‑bha ‑tosɛa kë ‑kɔ yaa ‑nu bha‑ ‑nu ‑zü kö ‑wo nu ö "piʋ̈.
ACT 17:31 ‑A 'klɔɔ‑ ‑mü ꞊dhɛ ‑yö ‑dhɛkpaɔyi do ‑ya ‑sü 'ka kö ‑yö bɔ‑ 'ka mɛ 'ö‑ ‑ya ('wo‑ ‑dhɛ Yesu) bha‑ ‑ta kö ‑yö za dɔ‑ 'ka "kpʋngtaamɛ ‑nu ‑bha tɛan‑ ‑ta. 'Wɔn 'ö‑ ‑wɔn 'gü 'yö‑ yi to "dhiʋ̈ 'yö 'mɛ 'ö "dhʋ̈ bha‑ bɔ, 'yö‑ bho ga 'gü kö mɛ ꞊gban ‑wa dɔ bha 'yö bha.
ACT 17:32 ꞊Dhɛ 'ö Atɛnö ‑mɛ ‑nu ꞊wa 'wɔn 'ö ‑kë mɛ "bhɩɩ‑ ‑nu ‑bha ‑go ga 'gü ‑sü 'ka bha‑ ma, 'yö mɛ 'bha ‑nu 'wo ꞊wɛɛ dɔ Pɔdhö ‑bha, 'yö mɛ 'bha ‑nu ‑dɩ 'pö 'wo‑ pö: «Yi ‑dho yi "tʋ 'to 'wɔn ‑nu 'i‑ pö sië bha‑ ‑bha yi "wɛɛ 'bha 'ka.
ACT 17:33 ꞊Dhɛ 'ö ꞊ya kë "dhʋ̈, 'yö Pɔdhö ‑yö ‑kan ‑nu ‑bha.
ACT 17:34 "Kɛɛ yö ‑zë ꞊gban 'gü, mɛ ga 'bha ‑wo kë ‑slɔɔ mü 'wo to ‑kplü ‑sü 'ka Pɔdhö ‑bha, 'ö 'wo 'dhang bho ‑wʋ ‑nu 'ö‑ pö bha‑ "dhiʋ̈. Denisi 'ö ‑kë zagɔbhomɛ ‑nu 'wo Adheopazö mü bha‑ mɛ do 'ka bha waa‑ dhebhɔnë do 'bha 'wo‑ ‑dhɛ 'pö Damadhisö bha waa‑ mɛ ga "kɛɛ bha ‑zë ‑wo kë 'dhang ‑bho Atanna ‑wʋ "dhiʋ̈.
ACT 18:1 ꞊Dhɛ 'ö ꞊ya kë "dhʋ̈ 'yö Pɔdhö ‑yö go Atɛnö 'yö ‑ziö 'ö dho Kodhɛngtö ‑pö 'gü,
ACT 18:2 'ö dho 'yö ‑kpan Zuifö mi do 'wo‑ ‑dhɛ Akidhasö, 'ö bhɔ 'Pɔn ‑sɛ 'gü bha waa‑ ö ‑bha dhebhɔ 'wo‑ ‑dhɛ 'pö Plisidhö bha‑ ‑nu ‑bha kö ꞊wa 'go Itadhi ‑sɛ 'gü ꞊wa nu Kodhɛngtö, "kɛɛ kö‑ yi 'yii ꞊gwëë ꞊kö. ‑A ‑nu nu ‑gɛn ‑mü ꞊dhɛ kö Itadhi ‑sɛkɔɔnmɛ 'kpii‑ 'wo‑ ‑dhɛ Klodö bha ꞊yaa‑ pö Zuifö ‑nu "pɛpɛ ꞊gban ‑wo 'go Wlɔmö ‑pö 'gü. 'Yö Pɔdhö ‑yö dho‑ ‑nu ‑dhɛ 'gü.
ACT 18:3 ꞊Dhɛ 'ö ‑kë ꞊dhɛ wɛng‑ ‑nu ‑a ‑nu kë ‑yë ‑yö ‑gun do, ('ö 'wo ‑kë sɔkɔdɔmɛ 'ka bha), 'yö Pɔdhö ‑yö to‑ ‑nu ‑gɔ 'kɔɔdhö 'yö wɛng‑ ‑nu 'wo yë ‑kë wo "kwëë.
ACT 18:4 'Yö Pɔdhö waa‑ Zuifö ‑nu waa‑ Glɛkö ‑nu 'wo zaɔdhe ‑da wo "kwëë ‑kpɛawo Atanna ‑wʋ ‑ta Zuifö ‑nu ‑bha ‑bhɔ "kwëë ‑kɔ 'gü ‑a ‑nu ‑bha ꞊glooyi "pɛpɛ ꞊gban 'ka. 'Yö Pɔdhö ‑ya 'gü pö‑ ‑nu ‑dhɛ ö faan ꞊gban 'ka kö ‑wo "wɩ ö ‑wʋ ‑bha.
ACT 18:5 ꞊Dhɛ 'ö Sidhasö waa‑ Timote ꞊wa 'go Maseduanö ‑wa nu, 'yö Pɔdhö ‑yö dho "tʋ̈ng ꞊gban 'gü Atanna ‑wʋ ‑pö Zuifö ‑nu ‑dhɛ ‑dhɛ 'gü, kë "dhʋ̈ kö 'ö‑ ‑zɔn ‑nu ‑dhɛ ꞊dhɛ Yesu ꞊në Atanna ‑bha ‑Yamɛ 'ka.
ACT 18:6 "Kɛɛ ꞊dhɛ 'ö Zuifö ‑nu 'wii "wɩ Pɔdhö ‑wʋ ‑bha, 'ö 'wo gun "si ‑nu bho sië‑ ‑gɔ, 'yö ö ‑bha ‑sɔ ꞊kpëng kö 'ö‑ ‑zɔn ‑a ‑nu ‑dhɛ ꞊dhɛ ‑a ‑nu 'gü ꞊ya see‑ kö‑ ‑dhɛ 'bha 'yii 'to ö ‑bha. 'Yö‑ pö‑ ‑nu ‑dhɛ "gbɩɩ‑ 'ka 'ö‑ pö: «꞊Ya kë ꞊dhɛ 'kii dha (Atanna ‑bha 'wɔn ‑bho mɛ 'gü ‑sü ‑gɔ) kö ‑yö ‑sü kaa ꞊dede ꞊në ka ‑bha kö 'yii 'to ma ‑zë n ‑bha. ꞊Dhɛ 'ö "dhʋ̈ ꞊ya 'go ꞊dɛɛ 'gü, a ‑dho n ‑kɔ "kan ka "dhiʋ̈ 'a dho 'mɛ 'waa Zuifö 'ka‑ ‑nu "piʋ̈ kö 'a Atanna ‑wʋ pö‑ ‑nu ‑dhɛ.»
ACT 18:7 ꞊Dhɛ 'ö ꞊ya kë "dhʋ̈, 'yö ö ꞊kwaa‑ ‑nu ‑zü 'yö dho gɔndënë do 'wo‑ ‑dhɛ Titiusö Zutusö 'ö ‑kë Atanna ꞊bhlëëyamɛ 'ka, 'ö‑ ‑bha 'kɔ‑ gun dɔ sië Zuifö ‑nu ‑bha ‑bhɔ "kwëë ‑kɔ "sɔɔ bha‑ ‑gɔ 'kɔɔdhö.
ACT 18:8 Klipusö 'ö ‑kë Zuifö ‑nu ‑bha ‑bhɔ "kwëë ‑kɔ ‑gɔmɛ 'ka bha ‑yö kë 'dhang ‑bho kwa Dëmɛ ‑wʋ "dhiʋ̈ waa‑ ö ‑gɔ 'kɔɔmɛ ‑nu 'dhö. 'Yö Kodhɛngtö ‑mɛ ‑nu 'dhɛ 'wo Pɔdhö ‑wʋ ma 'pö, ‑a mɛgbɛdhɛ 'wo 'dhang bho Yesu ‑wɔn "dhiʋ̈ 'yö 'wo‑ ‑nu ‑bɔ Yesu 'ka ‑zu bho.
ACT 18:9 Gbeng do 'gü 'yö Pɔdhö "yan 'gü ‑yö ‑da, 'yö kwa Dëmɛ ‑ya pö‑ ‑dhɛ: «"Suʋ̈ 'ya 'dho i kë! ‑Bhö i faan dɔ dhiang ‑zë 'mɛ 'wo ‑dhɛ ya‑ 'gü ‑a ‑nu ‑dhɛ ‑sü ‑bha, 'bha 'dho i "dhi ta,
ACT 18:10 ‑a ‑gɛn ‑mü ꞊dhɛ a i "piʋ̈. Mɛ 'bha ‑kɔ 'yii 'dho ꞊mɔɔ‑ ‑bha kö ‑yö i 'kun kö ‑yö pë yaa 'bha kë i 'ka; ‑a ‑gɛn ‑mü 'zü ꞊dhɛ 'mɛ 'wo dho bɔ n 'ka 'pödhɛ ya‑ 'gü ‑wo 'gbɛ!»
ACT 18:11 Pɔdhö ‑yö ‑kwɛ do waa‑ ö 'gbu ꞊në‑ ‑kë Kodhɛngtö ‑pö bha‑ 'gü kö ‑yö mɛ ‑nu draan‑ sië Atanna ‑wʋ ‑bha.
ACT 18:12 "Tʋ̈ng 'ö Gadhiɔn‑ gun‑ 'ka ‑gblüdë 'ka Wlɔmö "sɛ ‑gɔ 'dhɛ 'wo‑ ‑dhɛ Akai bha‑ 'gü bha‑ 'ka, 'yö Zuifö ‑nu 'wo wo zü ma 'koo Pɔdhö ‑dhɛ, 'yö 'wo‑ kun 'wo dho‑ 'ka "sɛgɔdhiʋ̈mɛ ‑kuu "dhiʋ̈ 'yö 'wo‑ 'wɔn ‑da ‑dhɛ,
ACT 18:13 'wo‑ pö‑: «'Mɛ ya ꞊ya yii‑ 'tɔng‑ bho, ‑a ‑gɛn ‑mü ꞊dhɛ ‑yö Atanna ‑dhɔkë ‑kɔ ‑dee 'ö 'yaa yii‑ 'tɔng‑ 'gü ꞊në‑ ‑zɔn sië mɛ ‑nu ‑dhɛ!»
ACT 18:14 ꞊Dhɛ 'ö Pɔdhö yöö dhiang zë, 'yö Gadhiɔn ‑ya pö Zuifö ‑nu ‑dhɛ: «Zuifö ‑nu 'ka ya, ‑Ka ‑dhɛ ‑ga! ꞊Ya kë ꞊dhɛ 'mɛ 'ö ya ‑yö 'wɔn "gbɩɩ‑ "wɛɛ 'bha ꞊në‑ ‑kë, "ɛɛn 'wɔn yaa 'bha ‑mü 'nu, kö a ‑dho "tʋ̈ng 'sü 'a n "tʋ to‑ ‑bha ‑së 'ka,
ACT 18:15 "kɛɛ ꞊dhɛ 'kö ‑kë ꞊dhɛ zaɔdhe 'ö ‑gban ‑wʋ "wlaasü ‑nu ‑bha, "ɛɛn mɛ 'tɔ ‑nu ‑bha, "ɛɛn ka ‑bha 'tɔng‑ ‑nu ‑bha ‑a ‑wɔn ‑mü bha, kaa ꞊dede ‑kaa ‑gɔ bho. Ma ‑zë 'mii 'dho "wɩ 'wɔn suu ‑nu bha‑ ‑nu ‑gɔ bho ‑sü ‑bha!»
ACT 18:16 'Yö ö ‑bha "sɔdha ‑nu bɔ 'yö 'wo‑ ‑nu ‑kë ö ‑bha zadɔkɔ bha‑ 'gü.
ACT 18:17 ꞊Dhɛ 'ö ꞊ya kë "dhʋ̈, 'yö 'mɛ 'wo ‑dhɛ bha‑ 'gü bha 'wo Sɔsitɛnö 'ö ‑kë Zuifö ‑nu ‑bha ‑yakwëëkëgükɔ ‑gɔmɛ 'ka bha‑ kun, 'yö 'wo ‑ya ‑ma ‑sü ‑bha zadɔgükɔ "dhiëngdhö mü, "kɛɛ 'yii kë Gadhiɔn 'gü 'wɔn 'bha 'ka.
ACT 18:18 Pɔdhö kë ‑gwëë Kodhɛngtö ‑pö 'gü ꞊dedewo 'dhang ‑bho Yesu "dhiʋ̈ ‑mɛ ‑nu 'wo mü bha‑ ‑nu "piʋ̈, 'yö gun ‑na 'ö ꞊kwɛɛ 'dhu kö yö 'dhö, Plisidhö 'dhö, (‑a ‑bha gɔn) Akidhasö 'dhö 'wo dho Siidhi ‑sɛ 'gü. "Kɛɛ "sanni ‑wo 'dho, Pɔdhö ‑yö ‑to "yitagɔ 'sü ‑dhɛ 'ö Kodhɛngtö, 'wo‑ Sangkle ‑dhɛ ‑kë bha‑ 'gü 'ö ö ‑gɔ "kpaa bho ‑sö 'ö‑ ‑bhö Atanna ‑dhɛ bha‑ ‑wɔn 'gü (꞊dhɛ ‑kɔ 'wo‑ ‑kë 'ka ‑a ‑nu wɔ ‑kɔ 'gü ‑a 'dhö), 'yö 'wo gun ‑na ‑da "yitagɔ 'gü.
ACT 18:19 'Yö 'wo dho 'wo ꞊loo Efɛzö, 'yö Pɔdhö ‑yö ‑kan Plisidhö waa‑ Akidhasö ‑a ‑nu ‑bha ‑dhɛ bha‑ 'gü. 'Yö yö ‑zë 'ö dho Zuifö ‑nu ‑bha ‑bhɔ "kwëë ‑kɔ 'gü, 'yö wɛng‑ ‑nu 'wo ‑ya ‑dhɛ do 'gü 'wo zaɔdhe ‑nu ‑da 'wɔn ‑nu 'wo ‑gban Atanna ‑wʋ ‑bha bha‑ 'gü.
ACT 18:20 'Yö 'wo‑ pö‑ ‑dhɛ ‑yö ꞊gloo wo "piʋ̈ mü, "kɛɛ 'yö Pɔdhö 'yii "wɩ‑ ‑bha ‑a ‑nu ‑gɔ.
ACT 18:21 'Yö ö ‑wʋ ‑da ‑nu ‑dhɛ 'ö‑ pö: «꞊Ya kë ꞊dhɛ Atanna ꞊ya "wɩ‑ ‑bha a ‑dho n yee kë 'zü ‑deewo 'a nu zun ka ‑dhɛ 'gü.» 'Yö ‑da "yitagɔ 'gü 'ö go Efɛzö 'ö dho.
ACT 18:22 ꞊Dhɛ 'ö dho 'ö ꞊loo Sezadhe, 'yö ꞊lɔɔ mü, 'yö ‑ta "sia‑ 'ö dho Zedhizadhɛmö kö 'ö Atanna ‑bha 'kɔdhigümɛ ‑nu 'wo mü ‑a ‑nu ꞊tua bho. ꞊Dhɛ 'ö ꞊yaa‑ kë "dhʋ̈, 'yö dho Angtiɔsö.
ACT 18:23 ꞊Dhɛ 'ö ꞊ya "tʋ̈ng 'në 'bha kë mü, 'yö dho 'yö ꞊nië Gadhatö ‑sɛ waa‑ Flizi ‑sɛ ‑nu 'gü, 'dhang ‑bho Yesu "dhiʋ̈ ‑mɛ ‑nu faan dɔ ‑sü 'ka ‑a ‑nu ‑bha ‑zʋ ‑yö Atanna ‑dhɛ ‑sü ‑bha.
ACT 18:24 ꞊Dhɛ 'ö ꞊ya kë "dhʋ̈ 'yö Zuifö mi do 'wo‑ ‑dhɛ Apodhɔsö 'ö bhɔ Dhɛzandri ‑pö 'gü bha 'ö ‑nu Efɛzö. 'Mɛ bha ‑yö ‑gun "dhikanmɛ 'ö Atanna ‑wʋ 'ö ‑bɛn zë ‑sü 'ka ‑a dɔ 'kpakpadhö ‑a 'ka.
ACT 18:25 ꞊Ya go mü 'zü 'wɔn 'ö ‑gban 'dhang ‑bho Yesu "dhiʋ̈ ‑sü ‑bha, ‑yö kë‑ ꞊draan 'gbɛ 'ka ꞊dedewo. Yöö do bha 'zü ‑yö ‑gun "yangüsiʋ̈mɛ 'ka, 'yö Atanna ‑wʋ pö mɛ ‑nu ‑dhɛ 'yö mɛ ‑nu ꞊draan tɛanwɔn ‑nu 'wo ‑gban Yesu ‑bha ‑a ‑nu 'ka, "kɛɛ 'wɔn 'dhɛ 'kö ‑gban mɛ "zu ‑sü ‑bha bha‑ 'dhɛ 'ö ‑kë Zan ‑bha mɛ ‑go 'wɔn yaa 'gü ‑zu bho ‑sü 'ka ꞊në 'ö gun‑ dɔ sië doseng.
ACT 18:26 'Yö zun dhiang zë ‑sü ‑bha ‑zʋgbandhe 'ka Zuifö ‑nu ‑bha ‑yakwëëkëgükɔ 'gü. "Kɛɛ ꞊dhɛ 'ö Plisidhö waa‑ Akidhasö ‑wa ‑wʋ ma, 'yö 'wo‑ ‑dhɛ wo ‑gɔ 'kɔɔdhö 'yö 'wo Atanna ‑bha zian bha‑ 'dhɛ 'yii‑ dɔ ꞊kö bha‑ ‑zɔn ‑dhɛ.
ACT 18:27 ꞊Dhɛ 'ö ꞊ya kë "dhʋ̈, 'yö Apodhɔsö ‑ya pö yöö 'dho Akai ‑sɛ 'gü, 'yö 'dhang ‑bho Yesu ‑wɔn "dhiʋ̈ ‑mɛ ‑nu 'wo Efɛzö 'wo‑ faan dɔ 'dho ‑sü ‑bha, 'yö 'wo 'sëëdhɛ ‑kë 'wo‑ dɔ‑ ‑gɔ kö ‑yö 'dho‑ 'ka mɛ 'dhɛ 'wo mü ‑a ‑nu ‑dhɛ kö ‑wa ‑dhɛng bun ‑së 'ka. ꞊Dhɛ 'ö ꞊ya 'dho ꞊ya ꞊loo mü, 'yö dho 'dhang ‑bho Yesu ‑wɔn "dhiʋ̈ ‑mɛ ‑nu 'wo mü ‑a ‑nu "piʋ̈, ‑gasitɛ 'ö Atanna ‑ya ‑kë ‑dhɛ bha‑ ꞊trɔɔn ‑yö kë ‑to 'mɛ 'wo mü bha‑ ‑nu ‑bha ꞊dedewo;
ACT 18:28 ‑a ‑gɛn ‑mü ꞊dhɛ ‑yö ‑dɔ 'pö Zuifö ‑nu ‑ta ö ‑wʋ 'ka 'ö‑ pö‑ ‑nu ‑dhɛ ꞊dhɛ 'pë 'wo‑ kë sië bha wo ‑dɩ ‑pö ꞊në 'wo‑ wo sië, 'yö‑ ‑zɔn ‑nu ‑dhɛ ꞊dhɛ Atanna ‑bha ‑Yamɛ ‑zë ‑yö "dhʋ̈ do, yö ‑mü Yesu ꞊në‑ 'ka ꞊dhɛ ‑kɔ 'ö ‑bɛn zë ‑sü 'ka‑ 'ka Atanna ‑bha 'sëëdhɛ 'gü bha‑ 'dhö.
ACT 19:1 ꞊Dhɛ 'ö gun kö Apodhɔsö ‑yö Kodhɛngtö, 'yö Pɔdhö ‑yö bɔ Azi ‑sɛ 'gü 'ö dho 'ö ꞊loo Efɛzö, 'yö ‑kpan 'dhang ‑bho Yesu ‑wɔn "dhiʋ̈ ‑mɛ 'bha ‑nu ‑bha mü
ACT 19:2 'yö‑ ‑nu dhɛɛ" kpɔ 'ö‑ pö: «꞊Dhɛ 'ö 'ka 'dhang bho Yesu ‑wɔn "dhiʋ̈, ka kë Atanna ‑bha 'Nii‑ "slʋ̈ʋ̈slʋ̈ ‑slɔɔ "wɛ ‑ee?» 'Yö 'wo‑ pö‑ ‑dhɛ: «'Yii‑ ma ‑zianwo do ꞊dhɛ 'Nii‑ "slʋ̈ʋ̈slʋ̈ 'bha ‑yö ‑dhö (kö yöö 'to‑ ꞊slɔɔ ‑sü ꞊në‑ ‑bha).
ACT 19:3 'Yö Pɔdhö ‑ya ‑nu dhɛɛ" 'bha kpɔ 'ö‑ pö: «"Kɛɛ ‑go 'wɔn yaa 'gü ‑zu bho ‑kɔ suu ‑mɛɛ 'pö 'ka‑ wo ‑sü 'ka 'sa?» 'Yö 'wo‑ ‑yɔ bɔ‑ ‑gɔ 'wo‑ pö: «‑A suu 'dhɛ 'ö Zan ‑ya ‑dhiang zë bha ꞊në 'yi‑ wo.»
ACT 19:4 'Yö Pɔdhö ‑ya pö‑ ‑nu ‑dhɛ: «'Mɛ 'wo ‑wɩ ‑bha 'wo go woo‑ ꞊sɔng yaa 'gü ꞊në Zan ‑ya ‑nu ‑zu, 'yö‑ pö Izraɛdhö ‑sɛgümɛ ‑nu ‑dhɛ ‑wo 'dhang bho 'mɛ 'ö dho nu ö zian ‑ta bha‑ ‑wɔn "dhiʋ̈, ‑yö ‑gun "wɩ sië‑ Yesu ꞊në‑ 'ka "dhʋ̈ bha. (꞊Dhɛ 'ö "dhʋ̈, ‑a ‑dhɛa ‑bha ꞊dhɛ 'ka ‑bɔ Atanna 'ka ‑zü bho Yesu bha ꞊në‑ 'to 'gü kö ‑ya ‑zɔn ꞊dhɛ 'ka 'dhang bho‑ "dhiʋ̈.)»
ACT 19:5 ꞊Dhɛ 'ö 'wɔn bha ꞊waa‑ ma, 'yö 'wo ‑wɩ ‑bha 'wo‑ ‑nu ‑bɔ Yesu 'ka ‑zu bho kwa Dëmɛ 'tɔ 'gü.
ACT 19:6 'Yö Pɔdhö ‑yö ö ‑kɔ kpa‑ ‑nu ‑ta ('yö ꞊bhɛa Atanna ‑dhɛ), 'yö 'Nii‑ "slʋ̈ʋ̈slʋ̈ ‑yö nu‑ ‑nu 'gü, 'yö 'wo ‑ya dhiang zë ‑sü ‑bha ‑wʋ "wɛɛ 'ö 'waa‑ dɔ ‑a 'gü, 'yö 'wo ‑ya ‑wʋ ‑nu 'ö Atanna ‑ya dɔ‑ ‑nu "dhi ‑a pö ‑sü ‑bha mɛ ‑nu ‑dhɛ.
ACT 19:7 'Mɛ 'wo "dhʋ̈ ‑a ‑nu ‑kpaa 'kwëë‑ ‑sü ‑gun mɛ ‑kaɔng do ö ga ꞊plɛ ‑nu "sinma 'ka.
ACT 19:8 'Yö Pɔdhö ‑yö dho Zuifö ‑nu ‑bha ‑bhɔ "kwëë ‑kɔ 'gü 'ö dhiang zë ‑zʋgbandhe 'ka. 'Yö 'wɔn 'ö ‑gban Atanna ‑bha ‑gblüdëdhɛ ‑wɔn ‑bha ‑a ‑dhiang zë‑ ‑nu ‑dhɛ "su ‑yaaga 'ka, kö ‑ya "slë mɔɔ‑ sië ö zë ‑dhiang ‑nu 'gü kö mɛ 'ö dhiang zë sië‑ ‑nu ‑dhɛ bha ‑wo 'dhang bho ‑wʋ ‑nu 'ö‑ pö sië‑ ‑nu ‑dhɛ bha‑ "dhiʋ̈.
ACT 19:9 "Kɛɛ mɛ 'gbɛ ‑wo wo gɔɔ‑ ‑kë "gbɩɩ‑ 'ö 'wii 'dhang bho Yesu ‑wɔn "dhiʋ̈, 'yö 'wo ‑ya Atanna ‑bha zian ‑san kë ‑dhiang ‑nu zë ‑sü ‑bha mɛ 'gbɛ 'wo gun 'mü bha‑ ‑nu ‑dhɛ. 'Yö Pɔdhö ‑yö 'dhang ‑bho Yesu "dhiʋ̈ ‑mɛ ‑nu 'wo gun 'mü ‑a ‑nu sü ö ꞊keng‑, 'yö 'wo go mɛ kpö 'gü mü 'yö ‑ya Atanna ‑wʋ pö‑ ‑nu ‑dhɛ ‑sü ‑bha yi ꞊gban "pɛpɛ 'ka 'kɔ 'kpii‑ 'ö gɔndënë do 'wo‑ ‑dhɛ Tidhanisö 'ö gun mɛ ‑nu ꞊klang kë sië‑ 'gü bha‑ 'gü.
ACT 19:10 'Wɔn bha ‑wa ‑kë "dhʋ̈ ‑kwɛ ꞊plɛ ꞊në‑ 'ka, 'wɔn 'ö‑ ‑wɔn 'gü 'yö mɛ "pɛpɛ 'wo bɔ Azi ‑sɛ 'gü, 'wo Zuifö 'ka, "ɛɛn 'ö 'waa Zuifö 'ka ‑a ‑nu ꞊gban "pɛpɛ 'wo 'wɔn 'ö ‑gban kwa Dëmɛ ‑bha ‑a ma bha 'yö bha.
ACT 19:11 Atanna ‑gun "dhabhliwɔn "gblʋ̈gblʋ̈ ꞊dede ‑nu kë sië Pɔdhö ‑kɔ ‑bha,
ACT 19:12 'ö‑ ‑wɔn 'gü mɛ ‑nu ‑wo ‑ziö wëëdhö ‑sɔ ‑nu waa‑ sɔ "wɛɛdhe ‑nu 'ö ꞊wa zun Pɔdhö kwi ‑bha ‑a ‑nu sü 'wo dho‑ 'ka "yuëdhi ‑nu ‑dhɛ, 'ö 'wo‑ ‑yɛ wo kwi ‑bha, 'ö‑ ‑nu ‑bha "yua ‑yö bo "ɛɛn 'zü 'ö "yina yaa ‑nu 'wo go‑ ‑nu 'gü.
ACT 19:13 Zuifö 'bha ‑nu ‑wo gun ꞊nië sië "yina yaa ‑nu ‑kë mɛ ‑nu 'gü ‑sü 'ka 'pö, 'yö 'wo‑ pö wo‑ ‑kë Yesu 'tɔ 'gü, 'yö 'wo‑ pö "yina yaa ‑nu ‑dhɛ: «Yi‑ ‑pö ka ‑dhɛ Yesu 'ö Pɔdhö 'dhö‑ ‑dhiang zë sië bha‑ 'tɔ 'gü, ‑ka 'go 'mɛ 'wo ya‑ ‑nu 'gü!»
ACT 19:14 ('Mɛ 'wo 'wɔn suu bha‑ ‑kë bha Zuifö ‑nu ‑bha "saabhomɛ 'kpii‑ do 'wo‑ ‑dhɛ Seva ‑a gbö ‑nu ꞊në gun‑ ‑nu 'ka, ‑wo ‑gun "saɔplɛ.)
ACT 19:15 "Kɛɛ 'yö "yina yaa ‑ya pö‑ ‑nu ‑dhɛ yi do 'ka 'ö‑ pö: «A Yesu ‑dɔ, 'ö Pɔdhö 'dhö 'pë 'ö‑ 'ka 'a‑ dɔ 'pö, "kɛɛ ka ‑zë de ‑mü ka 'ka?»
ACT 19:16 'Yö 'mɛ 'ö "yina yaa ‑yö gun‑ 'gü bha 'ö ‑pö ‑nu ‑ta, 'yö‑ ‑kɔ ‑yö ‑ziö ‑a ‑nu ‑gɔ 'yö ‑ya ‑a ‑nu ‑wëëdhɛ bho ‑sü ‑bha ꞊dedewo, 'yö 'wo ꞊dua‑ ‑gɔ 'wo ‑ziö ‑bɛang 'ka wo 'kpee‑ 'ka kö ꞊wa ‑gi ‑nu wo, 'yö 'wo go‑ ‑gɔ 'kɔɔdhö.
ACT 19:17 Mɛ "pɛpɛ 'wo gun Efɛzö, Zuifö ‑nu oo, 'mɛ 'waa Zuifö 'ka oo, "kɛɛ mɛ "pɛpɛ 'kö 'wo 'wɔn bha‑ ma, 'yö "suʋ̈ 'dhö ‑da ‑nu 'gü, 'yö 'wo ‑ya kwa Dëmɛ Yesu 'tɔ ꞊bhlëë ‑ya ‑sü ‑bha ꞊dedewo 'ö ‑ziö 'ka ‑blɛɛsü ‑bha ‑ta.
ACT 19:18 'Yö mɛ 'gbɛ ‑nu 'ö ꞊wa kë 'dhang ‑bho Yesu ‑wɔn "dhiʋ̈ ‑mɛ ‑nu 'ka, 'wo nu mɛ ‑nu wëëdhö, 'yö 'wɔn yaa ‑nu 'wo‑ ‑kë 'yö 'wo gun ‑na 'dhang bho Yesu ‑wɔn "dhiʋ̈ bha 'wo‑ ‑nu pö.
ACT 19:19 'Yö 'mɛ 'wo gun "zʋʋdhɛ këmɛ ‑nu 'ka ‑nu wo, ‑a mɛgbɛdhɛ 'wo nu 'sëëdhɛ ‑be ‑nu 'wo gun "zʋʋdhɛ kë sië‑ ‑bha bha‑ 'ka, 'yö 'wo‑ ‑nu ‑gʋ̈ mɛ ꞊gban "yan "dhiʋ̈ 'pö kö‑ suu ‑yö 'go "sia‑. 'Yö 'sëëdhɛ ‑be ‑nu bha 'wo‑ ‑nu sɔng ‑zun ko "dhiʋ̈ ‑kë, ‑a ‑nu sɔng ‑kë "gbɩɩsü bha‑ ‑wɔn 'gü, 'yö‑ 'wëë‑ ‑da 'ko ‑ta ‑sü ‑yö ‑kë 'wëë‑ 'gbɛ ꞊dede 'ka.
ACT 19:20 Kwa Dëmɛ ‑wʋ ‑yö ‑pɛn ‑kɔ bha ꞊në‑ 'gü 'gügbɩɩdhɛ 'ka, 'yö‑ ‑bha 'gügbɩɩdhɛ ‑zɔn.
ACT 19:21 ꞊Dhɛ 'ö 'wɔn ‑nu bha ꞊wa bo ‑kë "dhʋ̈ ‑sü 'ka, 'yö Pɔdhö ‑ya pö 'ö 'dho Zedhizadhɛmö. ‑A 'dho ‑sü 'ka 'yö bɔ Maseduanö ‑dhɛ waa‑ Akai ‑dhɛ ‑nu 'gü, kö ‑yö ö ‑zʋ 'gɔn sië ꞊dhɛ 'ya 'dho Zedhizadhɛmö ö ‑dho dho 'ö ꞊loo Wlɔmö 'pö.
ACT 19:22 ꞊Dhɛ 'ö ꞊ya kë "dhʋ̈, 'yö ö ‑takunmɛ ‑nu ꞊plɛ, Timote waa‑ Edhatö ‑a ‑nu bɔ Maseduanö ‑sɛ 'gü, 'yö yö ‑zë 'ö "tʋ̈ng 'dɛdɛ 'bha ‑kë 'zü Azi ‑sɛ 'gü mü.
ACT 19:23 ‑A "tʋ̈ng ꞊dede bha‑ 'ka 'yö zuëkaankwëëdhe 'kpii‑ ‑yö ‑da Efɛzö ‑pö 'gü kwa Dëmɛ ‑bha zian bha‑ ‑wɔn 'gü.
ACT 19:24 Mɛ do 'bha 'wo‑ ‑dhɛ Demetrisö, 'ö ‑kë ‑piöbhomɛ 'ka bha 'yö ꞊gebhɔ 'kpii‑ 'wo‑ ‑dhɛ Atemi bha‑ ‑dhɔkëgükɔ "blɛɛn‑ ‑nu ‑kë 'wëë‑ 'ka. 'Yö ‑kë ‑a kë ‑yë 'ka, 'yö 'wëë‑ 'gbɛ ꞊slɔɔ‑ 'gü, 'yö ö ‑bha yëkëmɛ ‑nu ꞊saa‑ bho‑ 'ka.
ACT 19:25 'Yö Demetrisö bha 'ö ö ‑bha yëkëmɛ ‑nu waa‑ mɛ 'bha ‑nu 'ö‑ ‑nu kë ‑yë 'dhö do bha‑ ‑nu ‑dhɛ ‑dhɛ do 'gü 'yö‑ pö‑ ‑nu ‑dhɛ: «Gɔɔn‑ ‑nu, kaa ꞊dede ka‑ ‑dɔ ꞊dhɛ kwa ‑bha ꞊naɔ ‑yö ‑go yë ‑nu 'kwa‑ kë sië ya ꞊në‑ 'gü,
ACT 19:26 "kɛɛ 'mɛ 'wo‑ ‑dhɛ Pɔdhö ya, 'pë 'ö‑ kë sië ya ka "yan ‑ya ‑dhɛ 'gü, ka "tʋ ‑ya 'gü 'pö. ‑A ‑gɛn ‑mü ꞊dhɛ ‑ya ‑pö 'ö‑ pö ‑dhɔkëpë ‑nu 'ö mɛ "bhɩɩ‑ ‑nu 'wo‑ kë sië bha 'waa Atanna ꞊dede 'ka, 'yö mɛ 'gbɛ ꞊gban 'wo 'dhang bho sië‑ "dhiʋ̈, "kɛɛ 'yö 'yii kë Efɛzö ‑dhɛ doseng ‑zian 'ka, 'yö‑ ‑dhɛ ꞊ya 'to 'dɛdɛ kö ꞊ya Azi ‑sɛ ya‑ 'gü ‑mɛ ‑nu "pɛpɛ ꞊gban zuë" slëë‑ ꞊yaa‑ ‑nu zuë" bho kwa ‑bha ‑zlan bha‑ ‑wɔn "piʋ̈.
ACT 19:27 'Wɔn bha 'yii kë ꞊dhɛ ‑yö kwa ‑bha yë yöö do ꞊në‑ ‑gɔ zë, "kɛɛ kwa ‑bha ‑dhɔkëpë 'kpii‑ bha‑ ‑dhɔkëgükɔ ꞊bhlëë 'bha 'yaa mɛ 'bha ‑gɔ 'zü, 'sa ꞊ya kë "dhʋ̈ 'pö kö ‑a ‑bha 'tɔbhɔdhe 'ö Azi ‑sɛ "pɛpɛ ꞊gban 'gü 'ö ‑da 'ka "kpʋngtaadhɛ "pɛpɛ ꞊gban ‑bha bha ꞊ya bo ꞊naa bha.»
ACT 19:28 ꞊Dhɛ 'ö 'mɛ 'wo gun "tʋ 'to sië‑ ‑wʋ ‑bha bha 'wo ‑wʋ bha‑ ma, 'yö ‑siö ‑nu ‑dhɛ ꞊dedewo 'yö 'wo ‑ya "gbla ‑sü ‑bha 'wo pö: «Efɛzö ‑mɛ ‑nu, yi ‑bha Atemi ‑yö 'kpii‑, ‑yö 'kpii‑, ‑yö 'kpii‑!»
ACT 19:29 'Yö ꞊bhluubhluudhe ‑yö ‑da 'plöö ‑dhɛ ꞊gban "pɛpɛ 'gü. 'Yö mɛ ‑nu 'wo ‑ya Gayusö waa‑ Adhitakö ‑a ‑nu ꞊gbiʋ̈ ‑sü ‑bha wo "piʋ̈ ‑zuudhö. Mɛ ꞊plɛ bha ‑wo ‑go Maseduanö ‑sɛ 'gü 'yö 'wo ‑kë Pɔdhö "tayɔɔ 'ka. 'Yö 'wo‑ ‑nu ꞊gbiʋ̈ 'wo dho‑ ‑nu 'ka ‑bɛang 'ka "dhɛɛdhö.
ACT 19:30 ‑Yö ‑gun Pɔdhö "piʋ̈ 'nu ꞊dhɛ 'ö ‑wo zang ‑ta kö 'ö ö ‑dɩ ‑zɔn mɛ kpö bha‑ ‑nu ‑dhɛ, "kɛɛ 'yö 'dhang bho Yesu "dhiʋ̈ ‑mɛ ‑nu 'wo gun mü bha 'wii "wɩ‑ ‑bha.
ACT 19:31 'Yö mɛ ꞊bhlëësü 'bha ‑nu 'wo go Azi ‑sɛ 'gü 'wo gun Pɔdhö "taɔngdë ‑nu 'ka 'mü bha 'wo mɛ bɔ kö ‑yö bhɛa"‑ ‑dhɛ kö 'ya 'dho 'dho "dhɛɛdhö.
ACT 19:32 Zuëkaankwëëdhe 'kpii‑ ‑yö ‑da 'mɛ 'wo ꞊loo 'ko ‑ta bha‑ ‑nu kpö 'gü ‑kɔ bha ꞊në‑ 'gü 'yö 'wo ‑ya ꞊gbang dɔ ‑sü ‑bha. Mɛ 'bha ‑nu 'wo "gbla sië ‑kɔ 'bha 'gü kö mɛ 'bha ‑nu ‑wo wo ‑bha wo sië ‑kɔ "wɛɛ bha‑ 'gü 'pö. 'Ö mɛ 'gbɛ ꞊dede 'wo ‑kë ‑a ‑nu kpö 'gü 'ö 'wii‑ ‑nu ‑loo 'ko ‑ta ‑gɛn dɔ.
ACT 19:33 (Mɛ 'bha ‑nu ‑gun ‑nu kpö 'gü mü 'ö 'wo wo ‑zʋ ‑gɔn ꞊dhɛ Dhɛzandrö ꞊në nu ꞊gbang dɔ ‑sü bha‑ 'ka,) ‑a ‑gɛn ‑mü ꞊dhɛ kö Zuifö ‑nu ‑wa ‑blü sië wo "dhiʋ̈. ꞊Dhɛ 'ö ꞊ya kë "dhʋ̈, 'yö Dhɛzandrö ‑yö ö ‑kɔ "paa 'gü zë mɛ kpö bha‑ ‑nu ‑dhɛ kö 'ö Zuifö ‑nu ‑ta 'kɔɔ‑ ‑dhiang zë‑ ‑nu ‑dhɛ.
ACT 19:34 "Kɛɛ ꞊dhɛ 'ö waa‑ 'wɔn dɔ ꞊dhɛ Zuifö ‑mü 'ka, 'yö 'wo wo ‑wʋ ‑da 'kwëë‑ 'wo ‑ya "gbla ‑sü ‑bha dhiang ‑wʋ do 'ka, 'ö dho 'ö zun‑ 'ka "tʋ̈ng kpö ꞊dede ‑bha ‑a pö ‑sü 'ka ꞊dhɛ: «'Kpiidhɛ ‑yö Efɛzö ‑mɛ ‑nu ‑bha Atemi ꞊në‑ ‑gɔ! 'Kpiidhɛ ‑yö Efɛzö ‑mɛ ‑nu ‑bha Atemi ꞊në‑ ‑gɔ!»
ACT 19:35 ꞊Dhɛ 'ö ꞊ya kë "dhʋ̈ 'yö 'wɔn "yanbhɔmɛ do 'ö gun 'pödhɛ bha‑ 'gü, 'yö mɛ kpö bha‑ ‑nu ‑ta ga, 'yö‑ pö‑ ‑nu ‑dhɛ: «Efɛzö ‑mɛ ‑nu, mɛ "pɛpɛ ꞊gban kwa‑ ‑dɔ ꞊dhɛ 'mɛ 'kwa Efɛzö ‑pö ya‑ 'gü ꞊në 'kwa kwa ‑bha ‑zlan 'kpii‑ 'wo‑ ‑dhɛ Atemi bha‑ ‑dhɔkëgükɔ waa‑ "blɛɛn‑ 'ö go dhang‑ 'gü 'ö ‑pö bha‑ ‑maa kë ‑kɔ ‑së ‑kë.
ACT 19:36 Mɛ 'bha 'yaa ‑dhö kö ‑ya zaɔ‑. ꞊Dhɛ 'ö "dhʋ̈ kö ‑ka dɔ dingdhö kö 'ka ‑ka bo ka 'ko ‑nu ꞊bhluu "bhluu kë ‑sü 'ka!
ACT 19:37 ‑A ‑gɛn ‑mü ꞊dhɛ 'mɛ 'ka‑ ‑nu kun 'ka nu‑ ‑nu 'ka ya, 'wii ‑dhɔkëpë 'bha ꞊kwaan kwa ‑bha ‑zlan ‑dhɔkëgükɔ 'gü "ɛɛn 'wii kwa ‑bha ‑zlan 'kpii‑ ya‑ ‑dhiang yaa 'bha zë.
ACT 19:38 ꞊Ya kë ꞊dhɛ Demetrisö waa‑ ‑bha yëkëmɛ ‑nu 'wo 'dhö, za 'dhö‑ ‑nu ‑gɔ kö ‑wa dɔ mɛ 'bha ‑bha, zadɔyi ‑yö ‑dhö. ꞊Ya 'go mü 'zü, 'pö‑ ‑gɔdhiʋ̈mɛ ‑nu ‑wo ‑dhö. ‑Dhɛ bha ꞊në‑ ‑dhɛ 'dhö‑ ‑bha kö ‑wo 'dho woo‑ 'wɔn ‑nu 'ka‑ 'gü!
ACT 19:39 ꞊Ya kë 'zü ꞊dhɛ 'wɔn 'bha 'dhö‑ ka ‑gɔ kö 'ka‑ pö kö ‑ka 'dho‑ 'ka 'pödë ‑nu ‑kuu "dhiʋ̈, wo ꞊në 'wo 'tɔng‑ ‑nu dɔ, wo ꞊në 'wo dho‑ bho 'koo,
ACT 19:40 'ka 'dho ꞊gbang dɔ 'zü ꞊dhɛ 'pë 'ka‑ dɔ sië bha‑ 'dhö, ‑a ‑gɛn ‑mü ꞊dhɛ 'pë 'ka‑ ‑kë ꞊dɛɛ bha 'yaa ‑së. ꞊Ya kë ꞊dhɛ Wlɔmö ‑mɛ ‑nu ꞊wa 'wɔn bha‑ ma, ‑wo ‑dho za dɔ yi ‑bha 'wo‑ pö: «Yi "sɛgümɛ ‑nu zuë" "wlü sië "sɛkɔɔnmɛ 'kpii‑ "piʋ̈!» ‑A ‑gɛn ‑mü ꞊dhɛ bho 'ö 'kwa‑ wo "dhuu 'ö kwa ꞊loo 'ko ‑ta ya‑ ‑gɛn kpɛnngdhö 'yaa 'dhö kö ‑yö za ‑së nu kwa ‑dhɛ. ꞊Ya 'go mü ‑a 'klɔɔ‑ 'ö dho 'to mɛ "tʋʋdhö 'yaa kwa ‑gɔ kö 'kwa‑ pö.»
ACT 19:41 ꞊Dhɛ 'ö 'mɛ bha ꞊ya bo dhiang bha‑ zë ‑sü 'ka, 'yö‑ pö mɛ kpö bha‑ ‑nu ‑dhɛ ‑wo 'dho, 'yö 'wo ‑kan 'kwëë‑.
ACT 20:1 ꞊Dhɛ 'ö mɛ kpö bha ꞊wa "kan wo 'kwëë‑, 'yö Pɔdhö ‑yö 'dhang ‑bho Yesu "dhiʋ̈ ‑mɛ ‑nu ‑dhɛ ‑dhɛ do 'gü, 'yö‑ ‑nu faan dɔ ‑wʋ 'gbɛ 'ka. ꞊Dhɛ 'ö ꞊yaa‑ kë "dhʋ̈ 'yö ö ‑wʋ ‑da ‑nu ‑dhɛ 'yö dho Maseduanö ‑sɛ 'gü.
ACT 20:2 'Yö bɔ "sɛ bha‑ 'gü 'dhang ‑bho Yesu "dhiʋ̈ ‑mɛ ‑nu 'wo mü ‑a ‑nu faan dɔ ‑sü 'ka, 'yö Atanna ‑wʋ pö‑ ‑nu ‑dhɛ 'gbɛ ꞊dede 'ka. ꞊Dhɛ 'ö ꞊ya kë "dhʋ̈, 'yö dho Akai ‑sɛ 'ö Glɛkö ‑sɛ 'gü bha‑ 'gü,
ACT 20:3 'yö "su ‑yaaga ‑kë "sɛ bha‑ 'gü, ꞊dhɛ 'ö ꞊ya kë "dhʋ̈ 'yö ö ꞊kwɛɛ‑ ‑nu dhu kö 'ö dho Siidhi ‑sɛ 'gü "yitagɔ 'gü 'nu, "kɛɛ ꞊dhɛ 'ö ꞊yaa‑ ma ꞊dhɛ Zuifö ‑nu ꞊wa wo 'zü 'ma "kʋʋ kö ‑wo ö zë, 'yö bɔ Maseduanö ‑sɛ 'gü.
ACT 20:4 Mɛ 'bha ‑nu yi kë ‑dho Pɔdhö ꞊keng‑ Azi ‑sɛ 'gü. 'Ö Pidhusö gbö 'wo‑ ‑dhɛ Sopatɛɛ 'ö go Beedhe bha waa‑ Adhitakö waa‑ Sekundusö 'ö 'wo go Tesadhonikö waa‑ Gayusö 'ö go 'pö Dɛɛbö, Timote, Tisikö waa‑ Trofimö 'ö woo ‑dɩ 'pö 'wo ‑kë Azi ‑sɛ 'gü 'në ꞊dede 'ka,
ACT 20:5 'wo go 'pö yi kpö 'gü 'wo dho yi "dhiʋ̈ Troasö ‑pö 'gü 'yö 'wo dɔ yi ‑gɔ mü.
ACT 20:6 ꞊Dhɛ 'ö troo 'wo‑ ‑dhɛ troo 'ö 'bluu‑ 'ö "sɛkɛ 'yaa‑ ‑bha ‑a ‑bhö ‑ta troo bha ꞊ya yën, 'yö 'yi yi ‑bha ꞊kwɛɛ‑ dhu 'yi ‑da "yitagɔ 'gü Fidhipö, 'yö 'yi ‑dhɛkpaɔyi "sɔɔdhu ‑kë zian ‑ta 'yö 'yi ‑kpan ‑a ‑nu ‑bha Troasö ‑pö 'gü 'yö 'yi "dhɔɔgɔ do ‑kë mü.
ACT 20:7 Zuifö ‑nu ꞊glooyi bha‑ 'ka yɛan" "piʋ̈, 'yö 'yi bho 'ko ‑ta kö 'yi ‑bhöpë "slʋ̈ʋ̈slʋ̈ ‑bhö. 'Yö Pɔdhö ‑yö dhiang zë mɛ kpö 'wo gun 'mü ‑a ‑nu ‑dhɛ. ꞊Dhɛ 'ö ‑kë ꞊dhɛ ‑yö ‑dho dho ‑a ‑tadhɛkpaɔ ‑ta bha, 'yö dhiang zë 'yö‑ to‑ 'ka "dhʋ̈, 'yö gbeng ꞊zinng 'gü ‑yö ꞊loo.
ACT 20:8 ‑Dhangbha 'gbɛ ‑yö gun 'kɔdhi 'yi gun‑ 'gü 'kɔ ‑ta "dhʋ̈ng 'gü bha‑ 'gü.
ACT 20:9 'Nëglɔɔnnë "gbɔng do 'wo‑ ‑dhɛ Ötisö ‑yö ‑gun ‑ya ‑sü 'ka 'kɔ finɛtrö "dhiʋ̈ kö Pɔdhö ‑yö Atanna ‑wʋ 'gü ꞊gblɛɛn bha‑ pö sië, 'yö yi ‑yö ‑ziö 'nëglɔɔnnë bha‑ 'ka, 'yö go finɛtrö 'ö 'kɔ ‑yaaga ‑naa 'ö 'kɔ ‑ta "dhʋ̈ng 'gü, 'yi gun‑ 'gü bha‑ "dhiʋ̈ 'ö ‑pö "sia‑ "kpɛnngdhö. 'Wo dho ‑kɔ ‑da 'gü kö ꞊ya ga.
ACT 20:10 ꞊Dhɛ 'ö ꞊ya kë "dhʋ̈ 'yö Pɔdhö ‑yö ꞊lɔɔ 'yö "gblëënu 'nëglɔɔnnë bha‑ ‑ta 'yö‑ sü 'ö‑ ‑wɔ ö ‑gbe 'gü 'yö‑ pö: «"Sika 'ya 'dho ‑da ka 'gü, (kö 'zü ꞊ya ga "kɛɛ ‑yö ‑dho ‑bö)!»
ACT 20:11 ꞊Dhɛ 'ö ꞊ya kë "dhʋ̈, 'yö ‑da 'zü ‑deewo "dhʋ̈ng 'gü 'yö 'bluu‑ "kplükplü bho 'yö waa‑ 'dhang ‑bho Yesu "dhiʋ̈ ‑mɛ ‑nu 'wo‑ ‑bhö. ꞊Dhɛ 'ö ꞊ya dhiang zë 'zü pinpindhö 'ö ꞊ya 'to‑ 'ka "dhʋ̈ 'yënng‑ "tɛɛ ꞊ya ‑wo, 'yö ‑ziö 'ö dho.
ACT 20:12 'Nëglɔɔnnë 'ö "dhʋ̈ bha‑ "yaan ‑sü ꞊në 'wo dho‑ dɔ‑ ‑gɔ 'kɔɔdhö, 'yö ‑kë ‑a ‑nu ꞊gban "pɛpɛ zuë" ꞊niida ‑wɔn 'kpii‑ 'ka.
ACT 20:13 ꞊Dhɛ 'ö ꞊ya kë "dhʋ̈ 'yö 'yi dho "dhiʋ̈, 'yö 'yi dho 'yi ‑da "yitagɔ 'ö dho yi 'ka 'pödhɛ 'wo‑ ‑dhɛ Asɔsö bha‑ 'gü bha‑ 'gü. ‑Dhɛ bha ꞊në 'yi dɔ Pɔdhö ‑gɔ ‑a 'gü, ‑a ‑gɛn ‑mü ꞊dhɛ ‑ya ‑pö yi ‑dhɛ ö ‑dho bɔ ö ‑gɛn ‑ta.
ACT 20:14 ꞊Dhɛ 'ö ꞊ya ‑kpan yi ‑bha mü, 'yö 'yi‑ sü yi ‑bha "yitagɔ 'yi nu‑ 'gü bha‑ 'gü, 'yö yi dho Mitidhɛnö ‑pö 'gü.
ACT 20:15 ‑A ‑dhɛkpaɔyi 'ö dɔ‑ "piʋ̈ kö 'ya 'go ‑dhɛ 'dhɛ bha‑ 'gü, 'yö 'yi dho‑ 'ka Sio ‑sɛ 'ö ‑ya ‑sü 'ka "yi ꞊zinng 'gü bha‑ "sɔɔ. ‑A ‑dhɛkpaɔyi 'dhɛ 'ö dɔ‑ 'dhɛ bha‑ "sɔɔ, 'yö 'yi dho "sɛgɔ bha‑ 'dhɛ 'wo‑ Samɔsö ‑dhɛ ‑kë bha‑ 'gü. ‑A ‑dhɛkpaɔyi 'dhɛ 'ö dɔ‑ "piʋ̈ 'zü 'yö 'yi dho 'yi ꞊loo Midhe ‑pö 'gü.
ACT 20:16 'Yö Pɔdhö ‑ya pö 'yi bɔ Efɛzö ‑pö "sɔɔ, "kɛɛ kö 'ya 'dho 'daɔnnu mü kö "tʋ̈ng 'ya 'dho ziö yi ‑ta Azi ‑sɛ 'gü. ‑A ‑zʋ ‑yö ‑gun dun sië, kë "dhʋ̈ kö ö ‑kɔ ꞊ya ꞊sloo‑ ‑bha, kö 'ö kë Zedhizadhɛmö Pangtökɔtö ꞊niidadhe ‑yi ꞊dede bha‑ 'ka.
ACT 20:17 ꞊Dhɛ 'ö 'ya ꞊loo Midhe ‑pö 'gü, 'yö Pɔdhö ‑yö mɛ bɔ 'mɛ 'wo zian bho sië 'mɛ 'wo 'dhang bho Yesu ‑wɔn "dhiʋ̈ Efɛzö ‑a ‑nu 'ka 'bha‑ ‑nu ‑dhɛ kö ‑wo nu.
ACT 20:18 ꞊Dhɛ 'ö ꞊wa nu ꞊wa ꞊loo‑ ‑dhɛ 'gü, 'yö‑ pö‑ ‑nu ‑dhɛ: «Kaa ꞊dede ka n kë ‑kɔ 'a ‑kë 'ka ka ‑dhɛ 'gü 'ö sü yi ‑blɛɛsü 'a nu‑ 'ka Azi ‑sɛ 'gü ‑a ‑bha 'ö zun‑ 'ka ꞊dɛɛ ‑bha bha‑ ‑dɔ.
ACT 20:19 ꞊Dhɛ a ka yë ‑kë kwa Dëmɛ ‑dhɛ ‑gɔ ‑dho ‑a ‑dhɛ "sia‑ ‑sü waa‑ "gbʋ 'ka 'ö 'a ‑ziö 'wɔn "gbɩɩ‑ ‑nu 'gü, 'ö Zuifö ‑nu 'wo ꞊suasua ‑nu ‑ya n ‑bha kö ꞊wa wo zü 'ma 'koo.
ACT 20:20 Kaa ꞊dede ka‑ 'wɔn ‑dɔ 'kpakpadhö ꞊dhɛ 'wɔn ‑nu 'wo ꞊bhlëësü ka ‑bha dhasü ‑wɔn 'gü, 'mii‑ 'bha ‑bin ka ‑gɔ, "kɛɛ a ka ‑draan ‑a ꞊gban "pɛpɛ ‑bha mɛ kpö 'gü, "ɛɛn ka ‑bha 'kɔɔdhɛ ‑nu 'gü,
ACT 20:21 'ö 'a Zuifö ‑nu waa‑ 'mɛ 'waa Zuifö 'ka ‑a ‑nu ‑dhɛ n faan ꞊gban 'ka kö ‑wo 'go woo‑ 'wɔn yaa 'gü kö ‑wo slëë‑ Atanna "piʋ̈, kö ‑wo 'dhang bho kwa Dëmɛ Yesu ‑wɔn "dhiʋ̈.
ACT 20:22 ꞊Dhɛ 'ö "dhʋ̈, 'dho ꞊në 'a‑ wo sië Zedhizadhɛmö ꞊dhɛ ‑kɔ 'ö 'Nii‑ "slʋ̈ʋ̈slʋ̈ ‑ya pö‑ 'ka n ‑dhɛ ꞊dhɛ 'a‑ kë‑ 'ka gbonggbongdhö ‑a 'dhö ya. 'Sa 'wɔn 'ö dɔ sië n ‑gɔ mü 'maa‑ dɔ.
ACT 20:23 ‑A 'dhɛ 'a‑ ‑dɔ 'ö 'Nii‑ "slʋ̈ʋ̈slʋ̈ ‑ya ‑zɔn n ‑dhɛ 'pö‑ ‑nu 'a ziö sië‑ 'gü 'dɔɔndhö bha‑ ‑nu 'gü, yö ‑mü ꞊dhɛ sëë "gbɩɩ‑ bho ‑sü waa‑ ‑dho ‑kaso 'gü ‑wɔn ‑yö n ‑bha.
ACT 20:24 "Kɛɛ ꞊ya 'to mang ꞊dede ‑zë n ‑bha ‑bha, n "tʋ 'yaa ma ‑tosɛa ‑wɔn ‑bha, 'maa‑ yö ‑zianwo ꞊dhɛ 'pë 'ö‑ ‑wɔn 'dhö "gbɩɩ‑ ‑a 'dhö, 'wɔn doseng 'ö ma 'yaanu 'a n ‑zʋ gɔn‑ 'ka, ‑yö ‑mü ‑kɔ 'a dho‑ kë‑ 'ka kö yë 'ö n Dëmɛ Yesu ‑ya "kplëng bho n ‑bha, 'ö ‑kë ‑a ‑bha 'wɔn ‑taɔng ‑së 'ö ‑gban Atanna ‑bha ‑gasitɛ 'ö‑ ‑kë kwa ‑dhɛ ‑a ‑bha ‑a pö ‑sü 'ka bha 'a‑ "dhiʋ̈ ‑ya ‑së 'ka, kö 'ö ꞊dhɛ ‑bɛang 'dhö 'a‑ ‑ga 'sü bha ꞊në‑ 'ka.
ACT 20:25 A kë ‑nu ka kpö 'gü 'ö 'wɔn 'ö ‑gban Atanna ‑bha ‑gblüdëdhɛ ‑bha 'a‑ pö ka ‑dhɛ, "kɛɛ a‑ ‑dɔ ꞊taama ‑sü ya‑ 'gü ꞊dhɛ mɛ 'bha 'kii 'dho "yan ‑kpan n ‑bha 'zü, 'dho 'ö maa‑ wo ya‑ zian‑ 'gü.
ACT 20:26 'Wɔn 'ö‑ ‑wɔn 'gü, 'yö 'a‑ pö sië ka ‑dhɛ ꞊dɛɛ n zuë" ꞊gban 'ka ꞊dhɛ 'mɛ 'ö dho ö ‑dɩ ꞊dhɛng, ('ö go zian 'ö‑ du 'yaa‑ ‑bha ya‑ ‑ta) ka ꞊zinng 'gü, kö ma ‑zë n ‑da ‑wɔn 'yaa ‑mü bha 'yö bha,
ACT 20:27 ‑a ‑gɛn ‑mü ꞊dhɛ "ta ‑kɔ 'ö Atanna ‑bha zian ‑ta 'ma‑ ꞊gban pö ka ‑dhɛ 'mii‑ 'bha ‑bin ka ‑gɔ.
ACT 20:28 ꞊Dhɛ 'ö "dhʋ̈, ‑ka ka ‑zʋ kë ka ‑dɩ "piʋ̈ kö 'ka ka ‑zʋ kë Atanna ‑bha mɛ ‑nu 'ö 'Nii‑ "slʋ̈ʋ̈slʋ̈ ‑yö ka ‑ya ‑a ‑gɔ "dhiʋ̈ kö 'ka‑ ‑maa kë bha‑ "piʋ̈ 'pö! ꞊Ya 'go yö ‑zë 'gü, ‑ka ka ‑zʋ 'to Atanna ‑bha mɛ ‑nu "pɛpɛ 'ö yöö ꞊dede 'ö‑ ‑nu dhɔ ö ‑dɩ Gbö 'wo‑ zë ‑a ꞊yɔɔn 'ka bha‑ "piʋ̈;
ACT 20:29 ‑a ‑gɛn ‑mü ꞊dhɛ a‑ ‑dɔ ꞊dhɛ ꞊ya kë ꞊dhɛ 'ma 'dho, 'mɛ 'wo ꞊dhɛ laa 'dhö 'ö 'wo dho "kpënng‑ kë 'mɛ 'wo bha‑ ‑nu ‑gɔ, ‑wo ‑dho ‑da ka kpö 'gü.
ACT 20:30 'Ö ꞊suakëmɛ 'bha ‑nu ‑zian 'wo ꞊wlü ka kpö 'gü ‑dhɛ ꞊dede 'gü 'wo ꞊sua ‑dhiang ‑nu zë kö 'wo 'dhang ‑bho Yesu "dhiʋ̈ ‑mɛ ‑nu bho zian 'ö pö 'aa‑ ‑bha bha‑ ‑ta kö ‑wo ziö‑ ‑nu ꞊keng‑.
ACT 20:31 ꞊Dhɛ 'ö "dhʋ̈ ‑ka ka ‑zʋ 'to ka ‑dɩ 'gü! ꞊Ya 'go mü 'zü kö 'ka‑ kë 'pö ꞊dhɛ ‑kɔ 'a‑ ‑kë 'ka ka kpö 'gü ‑kwɛ ‑yaaga 'ka, 'ö n 'gü 'yii ga ‑dhio ‑dɔ ka ‑ta ‑sü 'ka 'yënng‑ 'gü waa‑ gbeng ‑nu ꞊gban 'gü "gbʋ 'ka bha‑ 'dhö.
ACT 20:32 'Ma ka "kplëng bho Atanna waa‑ ‑bha ‑gasitɛ ‑kë kwa ‑dhɛ ‑wʋ bha ꞊në‑ ‑bha kö yö ꞊në ‑yö ö "tʋ̈ng kë ka 'gü ꞊taama ‑sü ya‑ 'gü, ‑a ‑gɛn ‑mü ꞊dhɛ yö ꞊në‑ ‑kɔ dho ꞊mɔɔ‑ ‑bha kö ‑yö ka gba faan 'ka, ‑ɛɛ 'zü kö ‑yö ‑dhɛkpaɔ dhia" saan 'ö‑ ‑ya 'mɛ 'wo bɔ ö 'ka‑ ‑nu ‑gɔ bha ‑yö ka ‑bha nu.
ACT 20:33 N zuë" 'yii bhɔ mɛ 'bha ‑bha 'wëë‑ ‑bha, "ɛɛn ‑a ‑bha sɔ 'bha ‑bha ka kpö 'gü.
ACT 20:34 Kaa ꞊dede, ka‑ ‑dɔ ꞊dhɛ yë ꞊në 'a‑ ‑kë n ‑dɩ ‑kɔdhɛ 'ka 'yö 'pë 'ö yaa ma ‑mɛ ‑nu yi ‑mawɔn ‑yö zun‑ ‑bha 'a‑ ꞊slɔɔ.
ACT 20:35 A‑ ‑kë "dhʋ̈ kö 'a‑ ‑zɔn ꞊në‑ wo ka ‑dhɛ ꞊dhɛ kwa ‑dho yë kë ꞊dhɛ ‑kɔ bha ꞊në‑ 'dhö kö 'kwa mɛ 'ö "sɩ 'yaa‑ ‑nu ‑dhɛ ‑a ‑nu ‑ta 'kun, kö kwa ‑zʋ ‑yö ‑bö kwa Dëmɛ Yesu yöö ꞊dede 'ö ‑wʋ 'ö‑ pö ꞊dhɛ: «I ‑bha pë ‑nu mɛ ‑dhɛ ‑sü ‑yö i ‑bha 'wɔn ‑së 'kpii‑ 'ka 'ö ꞊ziö‑ mɛ ‑bha pë ‑nu i ‑dhɛ ‑sü ‑ta bha‑ ‑ta».»
ACT 20:36 ꞊Dhɛ 'ö Pɔdhö ꞊ya bo 'wɔn ‑nu bha‑ ‑nu pö ‑sü 'ka, 'yö waa‑ 'mɛ ‑nu 'wo bha 'wo zun wo kpiö 'gü 'yö 'wo ꞊bhɛa‑ ‑dhɛ.
ACT 20:37 ꞊Dhɛ 'ö ꞊wa bo ‑bhɛa Atanna ‑dhɛ ‑sü 'ka, 'yö 'wo wo ‑wʋ ‑da Pɔdhö ‑dhɛ "gbʋ 'ka, ‑a ‑gɛn ‑mü ꞊dhɛ Pɔdhö ‑dhɔ ‑gun ‑a ‑nu kë sië ꞊dedewo.
ACT 20:38 ‑A ‑nu ꞊gban wëë'‑ ‑gun ‑siö ‑sü 'ka ꞊dedewo ‑a pö 'ö Pɔdhö ‑ya wo‑ ‑nu ‑dhɛ ꞊dhɛ 'yii 'dho ö "yan ‑kpan wo ‑bha 'zü bha‑ ‑wɔn 'gü. 'Yö 'wo dho‑ ‑dɔ zian ‑dhɛ 'gü 'wo dho 'wo ꞊loo "yitagɔ "dhiʋ̈.
ACT 21:1 ꞊Dhɛ 'ö 'ya "kan yi 'kwëë‑, 'yö 'yi ‑da "yitagɔ 'gü 'yi dho vɛɛdhö Kɔsö ‑sɛ 'gü. ꞊Dhɛ 'ö‑ ‑tadhɛ ꞊ya ꞊kpaɔ, 'yö 'yi dho Dhɔdö ‑sɛ 'gü, 'yö go mü 'zü 'yi dho Patadha 'plöö.
ACT 21:2 'Yö 'yi ‑kpan "yitagɔ do ‑bha mü kö ‑yö 'dho sië Fenisi ‑sɛ 'gü, 'yö 'yi go‑ ‑blɛɛsü bha‑ 'gü, 'yi ‑da 'dhɛ bha‑ 'gü 'yi dho.
ACT 21:3 'Yö 'yi dho 'yi ꞊loo "sɛgɔ 'ö ‑ya ‑sü 'ka "yi ꞊zinng 'gü 'wo‑ ‑dhɛ Siplë bha‑ "sɔɔ, 'yö 'yi "sɛgɔ bha‑ yö yi "dhiʋ̈ ꞊dhɛ 'pɛ 'dhö, "kɛɛ 'yö 'yi‑ to yi ꞊kwaa‑ 'gü, 'yö 'yi dho Siidhi ‑sɛ 'gü 'yi dho 'yi ꞊loo Tii ‑dhɛ 'ö "yitagɔ dho ꞊kwɛɛ‑ lɔɔ‑ ‑bha bha‑ 'gü 'yö 'yi ꞊lɔɔ mü.
ACT 21:4 ꞊Dhɛ 'ö 'ya ‑kpan 'dhang ‑bho Yesu "dhiʋ̈ ‑mɛ ‑nu ‑bha ‑dhɛ bha‑ 'gü, 'yö 'yi "dhɔɔgɔ do ‑kë ‑a ‑nu "piʋ̈ mü. 'Yö 'Nii‑ "slʋ̈ʋ̈slʋ̈ ‑yö 'dhang ‑bho Yesu ‑wɔn "dhiʋ̈ ‑mɛ ‑nu 'wo mü bha‑ ‑nu ‑zʋ ‑bö ꞊dhɛ 'wɔn "gbɩɩ‑ ‑dho Pɔdhö ꞊slɔɔ Zedhizadhɛmö, 'yö 'wo‑ pö‑ ‑dhɛ 'ya 'dho 'dho.
ACT 21:5 "Kɛɛ ꞊dhɛ 'ö 'ya "dhɔɔgɔ do kë‑ ‑nu "piʋ̈ mü, 'yö 'yi dho yii‑ "ta 'ka "dhiʋ̈, 'yö waa‑ ‑nu ‑bha dhebhɔ ‑nu, ‑a ‑nu ‑bha 'në ‑nu 'wo dho yi ‑dɔ zian‑ ‑dhɛ 'gü, 'yi go‑ 'ka 'plöö 'yi dho 'yi ꞊loo "saan "dhiʋ̈, 'yö 'yi zun yi kpiö 'gü ꞊weeyi "dhiʋ̈ ‑dhɛ bha‑ 'gü 'yö 'yi ꞊bhɛa Atanna ‑dhɛ.
ACT 21:6 ꞊Dhɛ 'ö 'ya ‑wʋ ‑da yi 'ko ‑nu ‑dhɛ "pɛpɛdhö, 'yi ‑da sië "yitagɔ 'gü kö woo ‑dɩ 'pö ‑wo 'dho sië wo ‑gɔ 'pödhö.
ACT 21:7 'Yö 'yi dho yii‑ "ta 'ka "dhiʋ̈ 'yi go Tii 'yi dho Pötodhemaisö ‑pö 'gü 'yö 'yi yi dheebhang ‑nu 'wo Yesu ‑bha 'ka mü ‑a ‑nu ꞊tua bho, 'yö 'yi ‑dhɛkpaɔyi do ‑kë ‑a ‑nu "piʋ̈ mü 'pö.
ACT 21:8 ꞊Dhɛ 'ö ‑dhɛ ꞊ya ꞊kpaɔ, 'yö 'yi dho yi "dhiʋ̈, 'yi dho 'yi ꞊loo Sezadhe ‑pö 'gü, yi ‑da Fidhipö 'ö ‑kë Atanna ‑wʋ pö ‑mɛ 'ka bha‑ ‑gɔ 'kɔɔdhö ‑dhɛ bha ꞊në‑ 'gü 'yö 'yi ‑wɔ mü. Fidhipö bha ‑yö ‑kë mɛ "saɔplɛ 'ö Yesu ‑bha ꞊klangdhiʋ̈ ‑nu 'wo ‑kɔ ‑yɛ ‑nu ‑bha Zedhizadhɛmö "tʋ̈ng 'bha 'gü bha‑ mɛ do 'ka. ('Wɔn 'ö ‑gban mɛ "saɔplɛ bha‑ ‑nu ‑wɔn ‑bha ‑yö mü.)
ACT 21:9 Fidhipö bha‑ 'dhu 'nëdhiëng ‑nu ‑yiisiö 'ö 'waa gwaan‑ ‑bha ‑wo ‑gun mü 'ö 'wo gun Atanna ‑wʋ "dhiʋ̈ ꞊loo sië ‑nu wo.
ACT 21:10 Yi ‑dhɛkpaɔyi 'gbɛ ‑dɩ "pʋ̈pʋ̈ ‑kë mü, 'yö Atanna ‑wʋdhiʋ̈loomɛ do 'wo‑ ‑dhɛ Agabusö bha 'ö go Zude ‑sɛ 'gü 'ö nu yi "piʋ̈.
ACT 21:11 'Yö Pɔdhö ‑bha kwi "pɛn sü, 'yö ö ‑gɛn waa‑ ö ‑kɔ ‑nu ‑lö 'ka 'yö‑ pö: «'Wɔn 'ö 'Nii‑ "slʋ̈ʋ̈slʋ̈ ‑ya pö n ‑dhɛ 'yö ya, ‑ya pö: «'Mɛ 'ö‑ ‑bha kwi "pɛn 'dhö n ‑gɔ ya, Zuifö ‑nu ‑dho ‑a ‑lö Zedhizadhɛmö ꞊dhɛ ‑kɔ ya‑ 'dhö, 'yö 'wo‑ dɔ 'mɛ 'waa Atanna dɔ‑ ‑nu ‑gɔ».»
ACT 21:12 ꞊Dhɛ 'ö ‑wʋ ‑nu bha 'ya‑ ma, 'yö yi 'dhö, Sezadhe ‑mɛ ‑nu 'dhö, 'yi ꞊kpaa yi 'kwëë‑ 'yi ꞊bhɛa Pɔdhö ‑dhɛ ꞊dedewo kö 'ya 'dho 'dho Zedhizadhɛmö,
ACT 21:13 "kɛɛ 'yö‑ ‑yɔ bɔ yi ‑gɔ 'ö‑ pö: «‑Më ꞊në ‑kë 'yö 'ka "gbʋ bɔ kö n zuë" "dhiʋ̈ ‑yö "tɛɛ? ꞊Ya 'to ma ‑zë n ‑bha ‑bha n ‑lö ‑sü 'yaa n 'gü 'wɔn 'bha 'ka, 'kö 'ma ga ‑zian ꞊në‑ wo Zedhizadhɛmö n Dëmɛ Yesu ‑wɔn 'gü ‑yö n 'gü ‑së.»
ACT 21:14 "Kɛɛ ꞊dhɛ 'ö ‑kë ꞊dhɛ Pɔdhö 'yii "wɩ yi ‑wʋ ‑bha, 'yö 'yi yi bo ‑a ‑bho zian‑ ‑sü 'ka, 'yö 'yi‑ pö kwa Dëmɛ dhɔɔbhaa ‑yö kë.
ACT 21:15 ꞊Dhɛ 'ö 'ya ‑dhɛkpaɔyi 'bha kë 'mü, 'yö 'yi yii‑ ꞊kwɛɛ‑ ‑nu dhu 'yö 'yi dho Zedhizadhɛmö.
ACT 21:16 'Dhang ‑bho Yesu "dhiʋ̈ ‑mɛ ‑nu 'bha ‑nu ‑wo kë ‑go Sezadhe, 'wo dho yi dɔ zian‑. ‑Wo ‑dho 'wo yi dɔ gɔndënë do 'ö‑ 'dhang ‑bho Yesu "dhiʋ̈ ‑yi ꞊ya ꞊gwëë 'pö 'wo‑ ‑dhɛ Nasɔn 'ö go "sɛgɔ 'ö ‑ya ‑sü 'ka "yi ꞊zinng 'gü 'wo‑ ‑dhɛ Siplë bha‑ 'gü bha‑ ‑gɔ 'kɔɔdhö 'yö 'yi ‑wɔ mü.
ACT 21:17 ꞊Dhɛ 'ö 'ya 'dho 'ya ꞊loo Zedhizadhɛmö, yi dheebhang ‑nu 'wo Yesu ‑bha 'ka mü ‑wo yi ‑dhɛng bun zuë" ꞊nii ‑da ‑sü 'ka ꞊dedewo.
ACT 21:18 ꞊Dhɛ 'ö ‑dhɛ ꞊ya ꞊kpaɔ, 'yö yaa‑ Pɔdhö ‑nu 'yi dho Zakö ‑gɔ 'kɔɔdhö, 'yö mɛ zizi ‑nu 'wo Yesu ‑bha 'ka Zedhizadhɛmö 'wo nu 'wo ‑kpan yi ‑bha mü.
ACT 21:19 'Yö Pɔdhö ‑ya ‑nu ꞊tua bho, 'yö ö "kplëng bho‑ ‑nu ‑dhɛ, 'yö pë ‑nu 'ö Atanna ‑ya ‑kë ‑a ‑kɔ ‑bha 'mɛ 'waa Zuifö 'ka‑ ‑nu kpö 'gü bha‑ ꞊gban "pɛpɛ sü 'do 'do 'yö‑ ‑gɛn bho‑ ‑nu ‑dhɛ.
ACT 21:20 ꞊Dhɛ 'ö ꞊waa‑ ‑wʋ ‑nu bha‑ ma, 'yö 'wo ‑ya Atanna 'tɔ bhɔ ‑sü ‑bha. 'Yö 'wo‑ pö Pɔdhö ‑dhɛ: «Yi dheebhang, ‑bhö ‑dhɛ ‑ga, pë ‑nu 'wo kë sië Zedhizadhɛmö ‑pö ya‑ 'gü ‑a ‑nu ‑ga 'wo ya: Zuifö ‑nu "gblü drun 'gbɛ ꞊dede ꞊wa 'dhang bho Yesu ‑wɔn "dhiʋ̈. ‑A ‑nu ꞊gban "pɛpɛ ‑wo Atanna ‑bha 'tɔng‑ ‑nu 'ö Moizö ‑ya nu kwa ‑dhɛ bha‑ ‑kun ‑së 'ka.
ACT 21:21 "Kɛɛ ‑wa ma ‑sü 'ka ꞊dhɛ i‑ ‑pö Zuifö ‑nu 'wo ‑pɛn ‑sü 'ka "sɛgɔ "wɛɛwɛɛ ‑nu 'gü bha‑ ‑nu ‑dhɛ 'i‑ ‑nu ꞊klang ‑kë 'ka ꞊dhɛ ‑wo wo kwaa‑ 'tɔng‑ 'ö Moizö ‑ya nu kwa ‑dhɛ bha‑ ‑zü, ꞊ya 'go mü 'zü 'wa 'dho woo‑ 'në ‑nu kë 'gbannë 'ka 'zü "ɛɛn 'wa 'dho Zuifö ‑nu ‑bha ‑tosɛadhe kë ‑kɔ 'wo bhɔ‑ 'gü bha‑ 'bha kë 'zü.
ACT 21:22 ꞊Dhɛ 'ö "dhʋ̈ 'kwa‑ kë ꞊dhɛ? ꞊Ya kë ꞊dhɛ kö 'mɛ 'wo bha ‑wo i nu ‑wɔn ya‑ ma, ‑wo ‑dho bho 'ko ‑ta 'gbɛ ꞊dede 'ka.
ACT 21:23 ꞊Dhɛ 'ö "dhʋ̈, 'pë 'yi dho‑ pö i ‑dhɛ bha ‑bhö ‑a kë! Gɔɔn‑ ‑nu ‑yiisiö 'wo "plüün bho ‑sü 'ka Atanna ‑dhɛ ‑wo kwa kpö 'gü ‑dhɛ ya‑ 'gü.
ACT 21:24 ꞊Dhɛ 'ö "dhʋ̈ ‑bhö 'dho kö kɛng‑ ‑nu 'ka ꞊mɔɔ‑ 'gü kö ‑bhɔkwëëdhe 'ö‑ ‑nu "plüün ‑bho 'gü ‑wɔn kë ‑sü "dhiʋ̈todhɛ 'gü, 'ö dho‑ ‑nu kë "slʋ̈ʋ̈slʋ̈ Atanna wëëdhö bha 'ka‑ kë ka "kwëë. "Kɛɛ kö bhi ꞊në 'i‑ ‑nu ‑bha "saa‑ ‑bho 'ka ‑pë ‑nu sɔng nu kë "dhʋ̈ kö ‑wo wo ‑gɔ bho. Yö ꞊në ꞊ya kë "dhʋ̈ 'yö mɛ ꞊gban‑ dho‑ 'wɔn dɔ ꞊dhɛ 'pë 'wo‑ pö i ‑bha bha‑ ‑bha 'yaa tɛanwɔn 'ka, "kɛɛ i i ‑bha ‑tosɛa ‑kë Moizö ‑bha 'tɔng‑ 'kun ‑sü 'ka.
ACT 21:25 ‑A 'dhɛ 'ö ‑gban 'mɛ 'waa Zuifö 'ka "kɛɛ 'ö ꞊wa 'dhang bho Yesu ‑wɔn "dhiʋ̈ ‑a ‑nu ‑bha ‑bha bha, 'wɔn 'yi‑ dɔ 'wɔn ‑së 'ka ‑a ‑nu ‑bha 'ka, yi‑ ‑bɛn zë ‑sü 'ka 'sëëdhɛ 'gü 'yi‑ bɔ‑ ‑nu ‑dhɛ. Yö ‑mü ꞊dhɛ kö 'wa 'dho ‑bhöpë ‑nu 'wo "saa‑ bho‑ 'ka ‑dhɔkëpë ‑nu "dhiʋ̈ bha‑ ‑bhö. ꞊Ya 'go mü 'zü 'wa 'dho pë ꞊yɔɔn ‑bhö, ꞊ya 'go mü 'zü wü 'ö‑ ꞊yɔɔn 'yii ꞊wɛnng 'wa 'dho‑ ‑bhö, ‑a ‑gɛn ‑mü ꞊dhɛ kö‑ "tɩng 'yii "pʋ. ꞊Ya 'go mü 'zü kö ‑wo wo ‑dɩ 'kun ‑zua zë ‑sü ‑gɔ.
ACT 21:26 ꞊Dhɛ 'ö ꞊ya kë "dhʋ̈ 'yö Pɔdhö waa‑ gɔɔn‑ ‑nu ‑yiisiö bha 'wo dho. ꞊Dhɛ 'ö ‑dhɛ ꞊ya ꞊kpaɔ, 'yö‑ ‑nu ꞊gban 'wo ‑gɔ "kian 'gü ‑sü bha‑ ‑kë. 'Yö Pɔdhö ‑yö dho Atanna ‑dhɔkëgükɔ 'gü, 'yö "tʋ̈ng 'ö‑ ‑nu ‑bha ‑kë "slʋ̈ʋ̈slʋ̈ ‑troo dho yën‑ 'ka bha‑ pö mɛ ‑nu ‑dhɛ, ‑a ‑gɛn ‑mü ꞊dhɛ yi 'ö bha ꞊në 'ö dho‑ ‑nu ‑bha "saabhokapë ‑nu sɔng nu‑ 'ka.
ACT 21:27 ꞊Dhɛ 'ö‑ ‑dhɛkpaɔyi "saɔplɛ ('ö 'wɔn 'wo‑ "plüün bho Atanna ‑dhɛ bha‑ 'gü ‑wɔn ‑kë 'gü ‑dhɛkpaɔyi 'ka bha) bha ꞊ya yën ꞊gban wo, 'yö Zuifö ‑nu 'bha ‑nu 'wo go Azi ‑sɛ 'gü bha 'wo "yan ‑kpan Pɔdhö ‑bha Atanna ‑dhɔkëgükɔ 'gü, 'yö 'wo mɛ 'gbɛ zuë" ꞊wlü Pɔdhö "piʋ̈ 'yö 'wo‑ kun.
ACT 21:28 'Yö 'wo ‑ya "gbla ‑sü ‑bha "gbɩɩ‑ 'ka 'wo‑ pö: «Izraɛdhö ‑mɛ ‑nu, ‑ka nu yi ‑dhɛ! ‑Ka ‑dhɛ ‑ga, 'mɛ 'ö ya ꞊në ‑da "sɛ "piʋ̈ 'yö bɔ ‑dhɛ ꞊gban "pɛpɛ 'gü 'yö mɛ ꞊gban "pɛpɛ ꞊draan 'ö pö: «'Mɛ 'yi ‑kë Izraɛdhö ‑mɛ ‑nu 'ka oo, Moizö ‑bha 'tɔng‑ ‑nu oo "ɛɛn Atanna ‑dhɔkëgükɔ ya yi 'bha yi ꞊bhlëë 'yaa 'dhö!» ꞊Ya 'go mü 'zü ꞊ya ‑da 'mɛ 'waa Zuifö 'ka‑ ‑nu 'ka kwa ‑bha Atanna ‑dhɔkëgükɔ ya‑ 'gü, 'yö‑ ‑kë "dhʋ̈ ‑sü bha‑ 'gü ꞊ya ‑dhɛ 'ö "slʋ̈ʋ̈slʋ̈ bha‑ ‑kë ‑dhiisü.»
ACT 21:29 ['Pë 'ö ‑kë 'yö 'wo‑ pö "dhʋ̈ bha yö ‑mü ꞊dhɛ kö ꞊wa wo "yan ‑kpan Trofimö 'ö go Efɛzö 'ö 'yaa Zuifö 'ka bha‑ ‑bha Pɔdhö ꞊keng‑ 'pö‑ bha‑ 'gü, 'yö ‑kë ‑nu 'gü ꞊dhɛ ꞊ya ‑da 'ka Atanna ‑dhɔkëgükɔ ('ö 'mɛ 'waa Zuifö 'ka 'waa ‑da mü bha‑) 'gü.]
ACT 21:30 'Yö ꞊bhluubhluudhe ‑yö ‑da 'pödhɛ bha‑ 'gü zian ꞊gban 'ka, 'yö 'pögümɛ ‑nu 'wo go ‑bɛang 'ka ‑dhɛ ꞊gban 'gü 'wo nu 'wo Pɔdhö kun 'yö 'wo‑ ꞊gbiʋ̈ ‑zuudhö 'wo go‑ 'ka Atanna ‑dhɔkëgükɔ 'gü, 'yö 'wo‑ "kwɛɛ ta ‑dhɛ do bha‑ 'gü.
ACT 21:31 ‑Wo ‑to ‑a "slë mɔɔ‑ ‑dhɛ 'gü kö 'wo Pɔdhö zë, 'yö‑ ‑taɔng ‑yö dho 'ö ‑kpan Wlɔmö ‑mɛ ‑nu ‑bha "sɔdha ‑gɔmɛ 'kpii‑ 'ö gun Zedhizadhɛmö mü bha‑ ‑bha ꞊dhɛ ꞊bhluubhluudhe ꞊ya ‑da 'pömɛ ‑nu ꞊zinng 'gü.
ACT 21:32 ‑Wo ‑to ‑dhɛ do bha‑ 'gü 'yö "sɔdha ‑gɔmɛ 'kpii‑ bha 'ö ö ‑kɔwlöömɛ ‑nu waa‑ "sɔdha ‑nu ‑dhɛ, 'yö 'wo dɔ ‑bɛang ‑bha 'wo dho mɛ kpö 'gü mü. ꞊Dhɛ 'ö Zuifö ‑nu bha‑ ‑nu "yan ꞊ya ‑kpan ꞊lamɛ 'kpii‑ bha waa‑ ö ‑bha mɛ ‑nu bha‑ ‑nu ‑bha, 'yö 'wo wo bo Pɔdhö ‑ma ‑sü 'ka.
ACT 21:33 ꞊Dhɛ 'ö ꞊ya kë "dhʋ̈ 'yö "sɔdha ꞊lamɛ 'kpii‑ bha 'ö‑ pö ö ‑bha ‑yamɛ ‑nu ‑dhɛ ‑wo Pɔdhö 'kun kö ‑wa ‑lö lɔɔga ꞊plɛ 'ka, 'ö "dhʋ̈ bha kö yöö ꞊dede ꞊ya ꞊yɔɔn Pɔdhö 'ka klöö‑. ꞊Dhɛ 'ö ꞊ya kë "dhʋ̈ 'yö 'mɛ 'wo gun ꞊klëën ‑sü 'ka Pɔdhö ‑zü bha 'yö‑ ‑nu dhɛɛ" kpɔ 'pë 'ö‑ ‑kë waa‑ 'pë 'ö‑ 'ka ‑a ka.
ACT 21:34 "Kɛɛ kö mɛ 'bha ‑nu ‑wo "gbla sië ‑kɔ "wɛɛ 'gü mɛ kpö bha‑ 'gü, 'ö mɛ 'bha ‑nu ‑wo ‑gbla ‑kɔ "wɛɛ 'bha 'gü 'pö. ꞊Dhɛ 'ö "sɔdha ‑gɔmɛ 'kpii‑ bha ꞊yaa‑ dɔ ꞊dhɛ 'mɛ 'wo bha‑ ‑nu ‑wʋ 'yaa do, 'yö‑ pö ö ‑bha ‑ya ‑mɛ ‑nu ‑dhɛ ‑wo 'dho Pɔdhö 'ka wo ‑gɔ "yasa 'gü.
ACT 21:35 "Tʋ̈ng 'wo ꞊loo‑ 'ka 'kɔ bha‑ "kpan gɛnng‑ ‑dhɛ ꞊dede 'gü bha kö "sɔdha ‑nu ꞊wa Pɔdhö ‑ya wo ‑kɔ ‑ta "dhʋ̈ng 'gü ‑dhɛ ꞊në‑ 'gü mɛ kpö bha‑ ‑nu ‑gɔ kö ꞊wa bhɔ‑ zë ‑dhɛ ‑bha.
ACT 21:36 ‑a ‑gɛn ‑mü ꞊dhɛ kö mɛ "pɛpɛ 'wo gun‑ ‑nu ꞊keng‑ bha ‑wa pö sië ꞊dhɛ ‑wa zë ꞊në‑ wo.
ACT 21:37 ꞊Dhɛ 'ö "sɔdha ‑nu 'wo 'dho sië Pɔdhö 'ka wo ‑gɔ "yasa 'gü, 'yö dhiang zë‑ ‑nu ‑bha ꞊lamɛ 'kpii‑ bha ‑dhɛ glɛkö ‑wʋ 'gü 'ö‑ pö: «A ‑mɔɔ ‑bha 'a 'wɔn do 'bha pö i ‑dhɛ "wɛ ‑ee?» 'Yö "sɔdha ꞊lamɛ 'kpii‑ bha 'ö Pɔdhö dhɛɛ" kpɔ 'ö‑ pö: «"Kwo! I glɛkö ‑wʋ ‑ma?
ACT 21:38 ꞊Dhɛ 'kö 'i glɛkö ‑wʋ ma kö Ezitö mi 'ö mɛ ‑nu zuë" ꞊wlü ‑dee ya‑ 'gü "sɛgɔdhiʋ̈mɛ ‑nu "piʋ̈ 'ö dho mɛzëmɛ "gblü ‑yiisiö 'ka "tʋng ‑ta bha 'yaa ‑mü i 'ka 'sa!»
ACT 21:39 'Yö Pɔdhö ‑ya ‑yɔ bɔ‑ ‑gɔ 'ö‑ pö: «‑Abin, 'mɛ bha 'yaa ‑mü n 'ka, ma ‑zë Zuifö ‑mü n 'ka, Taasö ‑pö 'ö Sidhisi ‑sɛ 'gü 'ö‑ 'tɔ‑ bhɔ bha‑ 'gü ‑në ‑mü n 'ka. ꞊Dhɛ 'ö "dhʋ̈ ‑bhö dɔ "gbɩɩ‑ kö 'a dhiang zë mɛ kpö ya‑ ‑nu ‑dhɛ.»
ACT 21:40 'Yö "sɔdha ꞊lamɛ 'kpii‑ bha 'ö ‑wɩ ‑bha. 'Yö Pɔdhö ‑yö dɔ 'kɔ 'wo gun 'dho sië‑ 'ka ‑a 'gü bha‑ "kpan ‑ta 'yö ö ‑kɔ "paa 'gü zë 'mɛ 'wo bha‑ ‑nu ‑dhɛ. ꞊Dhɛ 'ö ‑dhɛ ‑ta ꞊ya dɔ dingdhö, 'yö dhiang zë‑ ‑nu ‑dhɛ ‑a ‑nu ‑dɩ ‑wʋ 'ö ‑kë eblö ‑wʋ 'ka bha‑ 'gü 'ö‑ pö:
ACT 22:1 «N dheebhang ‑nu, n dë ‑nu, ‑ka ka "tʋ 'to n ‑takɔɔwʋ 'ö maa‑ pö ka ‑dhɛ ya‑ ‑bha ‑së 'ka!»
ACT 22:2 ꞊Dhɛ 'ö ꞊waa‑ yö kö ‑yö dhiang zë sië‑ ‑nu ‑dhɛ ‑a ‑nu ‑dɩ ‑wʋ ꞊në‑ 'gü, 'yö ‑dhɛa ‑yö ‑ga ‑a ‑nu ‑ta ‑kpɛawo do. 'Yö Pɔdhö ‑yö dhiang zë‑ ‑nu ‑dhɛ 'ö dho‑ 'ka "dhiʋ̈ 'ö‑ pö:
ACT 22:3 «Zuifö ‑mü n 'ka, a ‑bhɔ Taasö ‑pö 'ö Sidhisi ‑sɛ 'gü bha‑ 'gü, "kɛɛ a n "klʋ ‑bho Zedhizadhɛmö ‑dhɛ ya ꞊në‑ 'gü Gamadhiɛdhö ꞊keng‑. ‑Yö n ꞊klang ‑kë 'pö kwa "bhɛma ‑nu ‑bha 'tɔng‑ bha‑ 'kun ‑kɔ 'ka ꞊dedewo. ‑A ‑wɔn 'gü mang ‑dɩ 'pö Atanna ‑bha yë kë ‑pɛng ‑yö ‑gun n ‑ta ꞊dhɛ ‑kɔ 'ö 'ka‑ 'ka ꞊dɛɛ bha‑ 'dhö.
ACT 22:4 'Ö 'a 'mɛ 'wo ‑da kwa Dëmɛ ‑bha zian ‑dee ya‑ ‑ta, ‑a ‑nu ‑wëëdhɛ bho 'a‑ ‑nu zë‑ 'ka, 'ö 'a gɔɔn‑ ‑nu waa‑ dhong ‑nu kun 'a‑ ‑nu ‑da ‑kaso 'gü.
ACT 22:5 "Saabhomɛ ‑gɔmɛ 'kpii‑ waa‑ mɛ zizi ‑nu 'wo Zedhizadhɛmö ‑dhɛ ya‑ 'gü ‑wo ‑mɔɔ ‑bha 'wo ‑kë n "sɛɛ‑ 'ka ꞊dhɛ 'pë 'a‑ pö sië bha tɛan‑ ‑mü, "ɛɛn 'zü ꞊sua ‑mü. Woo ꞊dede bha ‑wo kë 'sëëdhɛ ‑nu ‑nu n ‑dhɛ kö 'a dho‑ 'ka kwa dheebhang ‑nu 'wo Zuifö 'ka Damasö ‑pö 'gü ‑a ‑nu ‑dhɛ, 'yö 'a dho ‑dhɛ bha‑ 'gü kë "dhʋ̈ kö 'a 'dhang ‑bho Yesu ‑wɔn "dhiʋ̈ ‑mɛ ‑nu 'wo mü ‑a ‑nu 'kun 'a nu‑ ‑nu 'ka Zedhizadhɛmö kö ‑wa ‑nu ‑wëëdhɛ bho.
ACT 22:6 ꞊Dhɛ 'ö 'ma ‑da zian ‑ta 'ma 'dho 'ma ꞊loo Damasö ‑dhɛ "sɔɔ, "kɛɛ kö 'yënng‑ ꞊ya ‑ya mɛ ‑gɔ ꞊zinng 'gü, 'yö to 'yö ‑dhɛpuudhɛ ‑ziisü 'bha ‑yö go 'dhang 'gü 'yö sɔ n ‑ta ꞊dhɛ mɛ mɛ‑ mɛ "yan zë,
ACT 22:7 'yö 'a ‑pö "sia‑, 'yö n "tʋ ‑yö ‑da ‑wʋ do 'gü kö ‑ya pö sië: «Sɔdhö, Sɔdhö, ‑yö mü ꞊dhɛ 'yö 'i n "yënng ꞊gbaɔn "dhʋ̈?»
ACT 22:8 'Yö 'a‑ dhɛɛ" kpɔ 'a‑ pö: «Bhii 'de 'i bha ꞊zɔɔ?» 'Yö‑ pö n ‑dhɛ: «Mang Yesu 'a go Nazadhɛtö i‑ "yënng ꞊gbaɔn sië bha ma ‑mü.»
ACT 22:9 'Mɛ 'wo gun n ꞊keng‑ ‑wo kë ‑dhɛpuudhɛ bha‑ yö 'pö, "kɛɛ ‑wʋ 'kö dhiang zë n ‑dhɛ bha 'wii‑ ma ‑së.
ACT 22:10 'Yö 'a‑ dhɛɛ" kpɔ 'zü 'a‑ pö: «‑Më ꞊në 'i‑ "piʋ̈ 'a‑ kë, n Dëmɛ?» 'Yö kwa Dëmɛ ‑ya pö n ‑dhɛ: «‑Bhö "wlü kö 'i 'dho Damasö! ‑Dhɛ bha ꞊në 'pë 'ö Atanna "piʋ̈ kö 'i‑ kë 'wo dho‑ pö i ‑dhɛ ‑a ‑dhɛ 'gü.»
ACT 22:11 ꞊Dhɛ 'ö ‑kë ꞊dhɛ n "yënng ‑yö ꞊tröö ‑dhɛpuudhɛ 'ö‑ 'bhü ‑yö ‑gban n "yan 'gü bha‑ ‑wɔn 'gü, 'yö n "tayɔɔ ‑nu 'wo ‑kɔ ‑da n ꞊kwɛɛ‑ 'yö 'wo dho n 'ka Damasö 'plöö.
ACT 22:12 Gɔndënë do ‑yö ‑gun 'pödhɛ bha‑ 'gü 'wo‑ ‑dhɛ Ananiasö 'ö ‑kë Atanna ꞊bhlëëyamɛ 'ka 'ö kwa ‑bha 'tɔng‑ ‑nu kun 'pö, 'ö Zuifö ‑nu 'wo 'pö‑ bha‑ 'gü 'wo‑ ‑dhiang ‑së zë.
ACT 22:13 'Yö nu 'yö ‑kpan n ‑bha 'yö‑ pö n ‑dhɛ: «Sɔdhö, n dheebhang, i "yan 'gü ‑yö "pʋ 'zü ‑deewo!» 'Yö to mü 'yö n "yan 'gü 'dhö ‑pʋ 'yö 'a‑ yö.
ACT 22:14 'Yö‑ pö n ‑dhɛ: «Kwa "bhɛma ‑nu ‑bha Atanna ‑yö i ‑sü kö 'i 'pë 'ö‑ dhɔɔbhaa 'ka ꞊në‑ dɔ, kö 'i i "yan ‑kpan mɛ doseng 'ö pö 'aa‑ ‑bha ('ö‑ Gbö 'ka) bha‑ ‑bha kö 'i ‑wʋ 'ö go‑ "dhi bha‑ ma.
ACT 22:15 ‑A ‑gɛn ‑mü ꞊dhɛ i ‑dho kë ‑a "sɛɛ‑ 'ka kö 'wɔn ‑nu 'ö i "yan 'dhö ‑da 'gü, "ɛɛn 'ö i "tʋ 'dhö‑ ma bha 'i‑ pö mɛ ꞊gban "pɛpɛ ‑dhɛ.
ACT 22:16 ‑A ‑wɔn 'gü i ‑dɔ ‑më ‑gɔ? ‑Bhö "wlü kö ‑wo i ‑bɔ Yesu 'ka ‑zu bho kö ‑yö i ‑bha 'wɔn yaa ‑nu ‑mawɔn 'to kö 'i kwa Dëmɛ ‑dhɛ kö ‑yö nu i ‑dhɛ.
ACT 22:17 ꞊Dhɛ 'ö ꞊ya kë "dhʋ̈, 'yö 'a n yee ‑kë 'a nu Zedhizadhɛmö. 'Yö yi do 'ka kö a bhɛa" sië Atanna ‑dhɛ ‑a ‑dhɔkëgükɔ 'gü, 'yö n "yan 'gü 'dhö ‑da,
ACT 22:18 'yö 'a kwa Dëmɛ yö, 'yö‑ pö n ‑dhɛ: «‑Bhö ‑a kë "dhʋ̈ "vaandhö kö 'i 'go Zedhizadhɛmö ‑pö ya‑ 'gü, ‑a ‑gɛn ‑mü ꞊dhɛ ‑a 'gü ‑mɛ ‑nu 'wii 'dho wo "tʋ 'to n ‑wɔn 'i‑ pö sië‑ ‑nu ‑dhɛ bha‑ ‑bha.»
ACT 22:19 'Yö 'a‑ ‑yɔ bɔ‑ ‑gɔ 'a‑ pö: «N Dëmɛ, woo ꞊dede ‑wa dɔ ꞊dhɛ a gun 'dho sië Zuifö ‑nu ‑bha ‑yakwëëkëgükɔ ‑nu 'gü, 'ö 'a 'dhang ‑bho i "dhiʋ̈ ‑mɛ ‑nu kun 'a‑ ‑nu ‑da ‑kaso 'gü, 'ö 'a‑ "slë ꞊mɔɔ 'ö 'wo‑ ‑nu ‑ma ‑nu wo ꞊klangga 'ka.
ACT 22:20 ꞊Ya 'go mü 'zü Etiɛnö 'ö ‑kë i "sɛɛ‑ 'ka bha 'wo gun‑ zë sië kö a mü, 'ö 'a 'mɛ 'wo gun‑ zë sië bha‑ ‑nu faan dɔ, 'a‑ pö 'wɔn ‑së ꞊në 'wo‑ ‑kë bha, 'ö ma ꞊në 'a ‑kë ‑a ‑nu ‑bha sɔ ‑kwɛɛ ‑wɛɛ bho ‑mɛ 'ka ‑zianwo.
ACT 22:21 "Kɛɛ 'yö kwa Dëmɛ ‑ya pö n ‑dhɛ: ‹‑Bhö 'dho, ‑a ‑gɛn ‑mü ꞊dhɛ a i ‑bɔ mü ꞊gblɛɛn 'mɛ 'waa Zuifö 'ka ꞊në‑ ‑nu "piʋ̈.›
ACT 22:22 Mɛ kpö bha ‑wo wo "tʋ ‑to Pɔdhö ‑wʋ ‑bha 'ö dho 'ö dhiang ‑nu bha‑ ꞊gban "pɛpɛ zë, "kɛɛ ꞊dhɛ 'wo‑ ‑bha ‑dho 'mɛ 'waa Zuifö 'ka‑ ‑nu "piʋ̈ ‑wɔn bha‑ ma, 'yö 'wo zun "gbla ‑sü ‑bha 'wo‑ pö: «‑Ka mɛ bha‑ zë kö ‑yö 'go mɛ "yan "dhiʋ̈ bha. ‑Tosɛa këmɛ 'yaa ‑mü!»
ACT 22:23 'Yö 'wo ‑ya "gbla ‑sü ‑bha kö ‑wo woo‑ ‑bha sɔ ‑nu ꞊kpëng 'ö ‑wo ‑bobi ‑nu ‑pɛn 'tëng‑ ‑ta ꞊dhɛ ‑kɔ 'ö 'mɛ 'wɔn ꞊ya ‑siö ‑a ‑nu ‑dhɛ 'wo‑ ‑kë 'ka ‑a ‑nu ‑gɔ "sɛ 'gü bha‑ 'dhö, (‑a ‑gɛn ‑mü ꞊dhɛ ‑wa ‑pö Pɔdhö ꞊ya ‑da Atanna "dhiʋ̈).
ACT 22:24 'Yö "sɔdha ‑gɔmɛ 'kpii‑ ‑ya pö ö ‑bha "sɔdha ‑nu ‑dhɛ ‑wo 'dho Pɔdhö 'ka ‑a ‑nu ‑gɔ "yasa 'gü kö ‑wa ‑ma ꞊klangga 'ka kö 'pë 'ö‑ ‑wɔn 'gü 'ö mɛ kpö bha 'wo "gbla sië "dhʋ̈ ‑a ꞊keng‑ bha kö ‑ya ‑gɛn pö, 'yö 'wo dho‑ 'ka ‑a ‑nu ‑gɔ "yasa 'gü.
ACT 22:25 "Kɛɛ ꞊dhɛ 'ö ꞊waa‑ ‑lö kö ‑wa ‑ma ꞊klangga 'ka, 'yö Pɔdhö ‑ya pö "sɔdha ‑nu ‑gɔmɛ 'ö gun mü bha‑ ‑dhɛ: «Ma 'a ‑kë Wlɔmö 'në 'ka ka ‑mɔɔ ‑bha 'ka n ‑ma kö za 'bha 'yii n zë ‑ee? ‑Wa ‑kë "dhʋ̈ kwa ‑gɔ "sɛ ya‑ 'gü "wɛ ‑ee?»
ACT 22:26 ꞊Dhɛ 'ö ꞊yaa‑ ‑wʋ bha‑ ma, 'yö dho 'ö‑ pö "sɔdha ꞊lamɛ bha‑ ꞊dhɛ 'ö‑ pö: «'Mɛ kwaa‑ ‑ma bha ꞊zɔɔ bha Wlɔmö 'në ꞊dede ‑mü ‑wa! ꞊Dhɛ 'ö "dhʋ̈ i ‑dho ‑a kë ‑mü ꞊dhɛ kö 'ya 'dho kë i ‑gɔ 'wɔn 'ka?»
ACT 22:27 'Yö "sɔdha ꞊lamɛ 'kpii‑ ꞊dede bha 'ö nu Pɔdhö "piʋ̈ 'yö‑ dhɛɛ" kpɔ 'ö‑ pö: «Wlɔmö 'në ‑mü i 'ka tɛan‑ 'ka ‑ee? ꞊Ya kë ꞊dhɛ Wlɔmö 'në 'dhö i 'ka tɛan‑ 'ka ‑bhö ‑a pö n ‑dhɛ.» 'Yö Pɔdhö ‑ya pö‑ ‑dhɛ: «꞊Iin, Wlɔmö 'në ‑mü n 'ka.»
ACT 22:28 'Yö "sɔdha ꞊lamɛ bha 'ö‑ pö Pɔdhö ‑dhɛ: «Ma ‑zë ma ‑kë Wlɔmö mi 'ka ‑sü bha 'wëë‑ 'gbɛ ꞊në 'a‑ go. 'Yö Pɔdhö ‑ya pö‑ ‑dhɛ: «Ma ‑zë 'mii 'wëëga 'bha nu kö 'a gun ‑na kë Wlɔmö 'në 'ka, a ‑bhɔ 'ka.»
ACT 22:29 ꞊Dhɛ 'ö bo‑ pö "dhʋ̈ ‑sü 'ka, 'ö dho "kan ö ‑ta kö 'mɛ 'wo gun‑ "piʋ̈ ꞊dhɛ 'wo‑ ‑ma bha ꞊wa "kan‑ ‑zü 'kwëë‑. ꞊Dhɛ 'ö "sɔdha ‑gɔmɛ 'kpii‑ ‑dɩ 'pö 'ö‑ 'wɔn dɔ ꞊dhɛ 'wɔn 'ö 'yaa këwɔn 'ka 'ya‑ kë, 'ya Pɔdhö 'ö Wlɔmö 'në 'ka ‑a ‑lö lɔɔga 'ka, 'yö "suʋ̈ 'dhö ‑da 'gü, (‑a ‑gɛn ‑mü ꞊dhɛ kö ꞊yaa‑ 'wɔn dɔ ꞊dhɛ Wlɔmö ‑mɛ ‑nu ‑bha ‑gblüdë 'kpii‑ ‑dho ꞊mɔɔ‑ ‑bha 'ö za dɔ ö ‑bha 'wɔn 'ö‑ ‑kë bha‑ ‑wɔn 'gü).
ACT 22:30 "Kɛɛ ꞊dhɛ 'ö ‑kë ꞊dhɛ ‑yö ‑gun "sɔdha ‑gɔmɛ 'kpii‑ bha "piʋ̈ ꞊dhɛ 'ö 'pë 'ö‑ ‑wɔn 'gü Zuifö ‑nu 'wo za ‑ya sië Pɔdhö ‑bha bha‑ ‑gɛn ma bha‑ ‑wɔn 'gü, ꞊dhɛ 'ö ‑dhɛ ꞊ya ꞊kpaɔ, 'yö ‑piö lɔɔ" bha bho Pɔdhö ‑bha, 'yö‑ pö "saabhomɛ ‑nu "gblʋ̈gblʋ̈ ‑nu waa‑ Zuifö ‑nu ‑bha 'wɔngɔtamɛ ‑nu 'wo ‑ya 'kwëë‑ ‑nu ‑kë bha‑ ‑nu ‑dhɛ ‑wo ‑ya ‑dhɛ do 'gü. ꞊Dhɛ 'ö ꞊ya kë "dhʋ̈ 'yö 'wo Pɔdhö sü 'wo nu‑ 'ka wo kpö 'gü.
ACT 23:1 'Yö Pɔdhö ‑yö ö "yan "dhiʋ̈ ꞊wlü ‑ya 'kwëë‑ këmɛ ‑nu bha‑ ‑nu ‑ta, 'yö‑ pö‑ ‑nu ‑dhɛ: «N dheebhang ‑nu, ‑tosɛa 'a‑ ‑kë Atanna wëëdhö 'ö nu 'ö zun‑ 'ka ꞊dɛɛ ‑bha bha a‑ ‑kë n zuë" "puu 'ka.»
ACT 23:2 'Yö "saabhomɛ ‑nu ‑gɔmɛ Ananiasö ‑ya pö 'mɛ 'wo gun Pɔdhö "sɔɔ ‑a ‑nu ‑dhɛ ‑wo Pɔdhö "tʋ ‑ma.
ACT 23:3 'Yö Pɔdhö ‑ya pö‑ ‑dhɛ 'ö‑ pö: «'Wɔn 'i‑ ‑kë n 'ka bha Atanna ꞊në dho i ‑bha "yɔɔ bho, ꞊flümɛ. ‑Wo i ‑dhɛ kö 'i za dɔ n ‑bha tɛanwɔn ꞊në‑ ‑ta ꞊dhɛ ‑kɔ 'ö kwaa‑ 'tɔng‑ ‑ya pö‑ 'ka ‑a 'dhö, "kɛɛ 'pë 'ö 'tɔng‑ ‑ya pö 'bhaa yö ‑zë kë, ꞊flü ꞊në 'i‑ kë sië, i‑ ‑pö mɛ ‑nu ‑dhɛ ‑wo n ‑ma "wɛɛwɛɛ kö‑ ‑gɛn 'bhaa 'dhö ‑më ‑wɔn 'gü?»
ACT 23:4 'Yö 'mɛ 'wo gun Pɔdhö "sɔɔ mü bha 'wo‑ pö‑ ‑dhɛ 'wo‑ pö: «I "si bho sië Atanna ‑bha "saabhomɛ ‑nu ‑gɔmɛ 'kpii‑ ꞊në‑ ‑gɔ bha ꞊zɔɔ ‑wa!»
ACT 23:5 'Yö Pɔdhö ‑ya ‑yɔ bɔ 'ö‑ pö: «N dheebhang ‑nu, 'maa‑ 'wɔn ꞊në‑ dɔ ꞊dhɛ "saabhomɛ 'kpii‑ ‑mü, (a‑ 'wɔn ‑dɔ "dhʋ̈ 'nu 'mii dho‑ pö "dhʋ̈ ‑a ‑gɛn ‑mü ꞊dhɛ) 'pë 'ö ‑bɛn zë ‑sü 'ka Atanna ‑bha 'sëëdhɛ 'gü yö ‑mü ꞊dhɛ: ‹'Bha 'dho dhiang yaa zë i ‑gɔdhiʋ̈mɛ ‑nu ‑bha›.»
ACT 23:6 ꞊Dhɛ 'ö ‑kë ꞊dhɛ ‑ya 'wɔn ‑dɔ ꞊dhɛ zadɔmɛ ‑nu bha‑ mɛ ‑kɔ "pɛan do ‑yö ‑kë 'mɛ 'wo‑ ‑nu Sadusiɛn ‑nu ‑kë bha‑ 'ka, 'yö‑ ‑kɔ "pɛan 'bha 'dhö mɛ 'dhɛ 'wo‑ ‑nu Fadhiziɛn ‑nu ‑kë bha‑ ‑nu 'ka 'pö bha‑ ‑wɔn 'gü, 'yö Pɔdhö ‑ya pö‑ ‑nu ‑kuu "dhiʋ̈ 'ö‑ pö: «N dheebhang ‑nu, Fadhiziɛn ‑mü n 'ka, n dë‑ ‑kë Fadhiziɛn 'ka. 'Dhang ꞊në 'a‑ bho "dhiʋ̈, n ‑zʋ ‑yö Atanna ‑dhɛ ‑sü 'ka ꞊dhɛ ‑yö ‑dho gamɛ ‑nu bho ga 'gü 'yö 'wo za ‑ya sië n ‑bha ya.
ACT 23:7 ꞊Dhɛ 'ö ꞊ya ö bo 'wɔn ‑nu bha‑ pö ‑sü 'ka, 'yö Fadhiziɛn ‑nu waa‑ Sadusiɛn ‑nu 'wo ‑ya zaɔdhe ‑da wo "kwëë ‑sü ‑bha, 'yö 'gügblüdhe ‑yö ‑da zadɔmɛ ‑nu bha‑ ‑nu ꞊zinng 'gü,
ACT 23:8 (‑a ‑gɛn ‑mü ꞊dhɛ Sadusiɛn ‑nu ‑wa ‑pö gamɛ ‑nu 'wii 'dho 'go ga 'gü "ɛɛn 'zü "yina 'yaa 'dhö, "ɛɛn Atanna ‑bha "kië ‑nu 'waa 'dhö, "kɛɛ 'yö Fadhiziɛn ‑nu ‑zë 'wo 'dhang bho 'wɔn ‑nu bha‑ ꞊gban "pɛpɛ "dhiʋ̈.)
ACT 23:9 'Yö 'wo wo ‑wʋ "dhiʋ̈ ꞊wlü "gbɩɩ‑ 'ka, 'yö 'tɔnggɔmɛ ‑nu 'bha ‑nu 'wo ‑kë Fadhiziɛn ‑nu ‑bha mɛ 'ka bha 'wo ꞊wlü, 'wo‑ pö 'mɛ 'wo gun za dɔ sië Pɔdhö ‑bha bha‑ ‑nu ‑dhɛ ꞊dhɛ 'wii "wɩ‑ ‑nu ‑wʋ ‑bha tongtongdhö, 'yö 'wo‑ pö: «'Wɔn yaa 'bha 'ö 'mɛ ya 'ö dho‑ kë 'yaa 'dhö, "kɛɛ ‑yö ‑dho kë "yina "ɛɛn Atanna ‑bha "kië 'bha ‑bha dhiang ‑zë ‑a ‑dhɛ ‑sü ꞊në‑ 'ka.
ACT 23:10 'Ö dɔ mü kö ‑a ‑nu ‑bha zaɔdhe "tɛɛ ꞊ya kë "gbɩɩ‑, 'yö "suʋ̈ 'dhö ‑da "sɔdha ꞊lamɛ 'kpii‑ bha‑ 'gü, 'yö ‑kë 'gü ꞊dhɛ woo‑ Pɔdhö ꞊gaan "gaan kë kö ‑wa zë‑ 'ka do, 'yö‑ pö ö ‑bha "sɔdha ‑nu ‑dhɛ ‑wo lɔɔ‑ kö ‑wo 'dho mɛ kpö 'gü mü kö ‑wo Pɔdhö bho mɛ kpö 'gü kö ‑wo 'dho‑ 'ka "yasa 'gü.
ACT 23:11 ‑A gbeng 'dhɛ 'ö dɔ‑ "piʋ̈, 'yö kwa Dëmɛ ‑yö ö ‑dɩ ‑zɔn Pɔdhö ‑dhɛ 'yö‑ pö‑ ‑dhɛ: «‑Bhö i faan dɔ, 'bha "sɛɛdhɛ kë n ‑bha Zedhizadhɛmö yö "kɛɛ Wlɔmö ‑dhɛ ‑bha ‑wɔn ‑yö ‑tun i ‑bha.»
ACT 23:12 ‑A ‑tadhɛkpaɔ ‑ta dhia" "piʋ̈, 'yö Zuifö ‑nu 'wo wo zü ma 'koo 'yö 'wo ‑sö ‑bhö 'wo‑ pö 'wii 'dho pë ‑bhö "ɛɛn 'wii 'dho müpë ‑zë 'bha mü "fɔn kö 'wa Pɔdhö ꞊në‑ zë.
ACT 23:13 'Mɛ 'wo wo zü ma 'koo "dhʋ̈ bha ‑wo ‑ziö mɛ ‑kaɔng ‑yiisiö ‑ta.
ACT 23:14 'Yö 'wo dho "saabhomɛ ‑gɔmɛ ‑nu waa‑ mɛ zizi ‑nu "piʋ̈, 'yö 'wo‑ pö‑ ‑nu ‑dhɛ: «'Ya yi ‑wʋ kë do 'ya ‑sö ‑bhö yi ‑dɩ ‑ta ꞊dhɛ, 'yii dho pë 'bha ‑bhö "ɛɛn 'yii 'dho müpë 'bha mü 'ö dho ö zun‑ 'ka yi ‑bha Pɔdhö zë ‑sü ‑bha.
ACT 23:15 ꞊Dhɛ 'ö "dhʋ̈, ‑kaa ‑dhɛ "sɔdha ꞊lamɛ 'kpii‑ ‑gɔ kaa‑ zagɔbhomɛ 'kpii‑ ‑nu 'dhö kö ‑yö nu Pɔdhö 'ka ka ‑dhɛ, ‑kaa pö‑ ‑dhɛ ꞊dhɛ ‑yö ka "piʋ̈ ꞊dhɛ 'ka 'wɔn bha‑ 'gü ma ‑së 'ka. Yi ‑zë 'ya ꞊mɔɔ‑ 'gü kö 'yi‑ zë kö 'yii ꞊loo ꞊kö ka ‑dhɛ 'gü.»
ACT 23:16 "Kɛɛ 'yö Pɔdhö dheebhang ‑dhebhɔ gbö ‑yö Zuifö ‑nu ‑bha "kpënng‑ bha‑ ‑wɔn ma, 'yö dho "sɔdha ‑nu ‑gɔ "yasa 'gü mü 'yö‑ pö Pɔdhö ‑dhɛ.
ACT 23:17 'Yö Pɔdhö ‑yö "sɔdha ‑gɔmɛ ‑nu bha‑ mɛ do ‑dhɛ 'yö‑ pö‑ ‑dhɛ: «‑Bhö 'dho 'nëglɔɔnnë ya‑ 'ka "sɔdha ꞊lamɛ 'kpii‑ ‑dhɛ 'gü, 'wɔn 'bha ‑ya ‑gɔ kö ‑ya pö‑ ‑dhɛ.»
ACT 23:18 'Yö "sɔdha ‑gɔmɛ bha waa‑ 'nëglɔɔnnë bha 'wo ‑ziö 'wo dho "sɔdha ꞊lamɛ 'kpii‑ "piʋ̈ 'yö‑ pö‑ ‑dhɛ: «Pɔdhö 'ö ‑kaso 'gü bha ‑ya ‑pö 'a nu 'nëglɔɔnnë ya‑ 'ka i ‑dhɛ 'gü, dhiang 'bha ‑ya ‑gɔ kö ‑ya zë i ‑dhɛ.»
ACT 23:19 'Yö "sɔdha ꞊lamɛ 'kpii‑ bha 'ö 'në bha‑ kun‑ ‑kɔ ‑bha, 'yö 'wo dho ‑dhɛ "wɛɛ 'gü, 'yö‑ dhɛɛ" kpɔ 'ö‑ pö: «‑Më ‑wɔn ꞊në i "piʋ̈ 'i‑ pö n ‑dhɛ?»
ACT 23:20 'Yö‑ ‑yɔ bɔ 'ö‑ pö: «Zuifö ‑nu ꞊wa ziö wo 'ko "piʋ̈ kö ‑wo Pɔdhö ‑gbadhɛ i ‑gɔ kö ‑yö nu wo ‑bha zadɔmɛ ‑nu ‑kuu "dhiʋ̈ dhia". Kë "dhʋ̈ kö zadɔmɛ ‑nu ‑wo 'wɔn 'ö ‑gban ‑a ‑bha bha‑ 'gü ma ‑së 'ka.
ACT 23:21 "Kɛɛ 'bha 'dho 'dhang bho‑ ‑nu "dhiʋ̈, ‑a ‑gɛn ‑mü ꞊dhɛ mɛ ‑dhü 'ö ‑ziö ‑kaɔng ‑yiisiö ‑ta, ꞊wa wo ‑gblɛn 'kpɔ kö 'wo ‑pö ‑ta zian 'ka, ‑a ‑nu zü ‑yö do 'wɔn bha‑ 'gü, ꞊wa ‑sö ‑nu ꞊gban ‑bhö ‑wa ‑pö 'wii 'dho pë 'bha ‑bhö "ɛɛn 'wii dho müpë suu "wɛɛwɛ 'bha mü kö 'wii Pɔdhö zë ꞊kö. ꞊Wa ꞊mɔɔ‑ 'gü "pɛpɛdhö, 'pë 'kö ꞊ya 'to yö ‑mü ꞊dhɛ kö 'i "wɩ‑ ‑bha kö 'i‑ bɔ.»
ACT 23:22 ꞊Dhɛ 'ö ꞊ya kë "dhʋ̈, 'yö "sɔdha ꞊lamɛ 'kpii‑ bha 'ö‑ pö 'nëglɔɔnnë bha‑ ‑dhɛ: «꞊Dhɛ 'kö 'bha‑ pö n ‑dhɛ bha 'bha 'dho‑ ‑gɛn dɔ mɛ "wɛɛ 'bha ‑dhɛ.» 'Yö ö ‑kɔ bho‑ 'gü 'yö dho.
ACT 23:23 ꞊Dhɛ 'ö ꞊ya kë "dhʋ̈ 'yö "sɔdha ꞊lamɛ 'kpii‑ bha 'ö ö ‑bha "sɔdha ‑gɔmɛ ‑nu bha‑ mɛ ꞊plɛ ‑dhɛ, 'yö‑ pö‑ ‑nu ‑dhɛ: «‑Ka "sɔdha këng ꞊plɛ ‑dhɛ ‑dhɛ do 'gü kö 'ka ꞊soomɛ ‑nu ‑kaɔng "saɔplɛ 'sü kö 'ka mɛ këng ꞊plɛ 'ö 'düga 'dhö‑ ‑nu ꞊kwɛɛ‑ 'pö ‑a ‑nu 'sü kö 'ka ka baa‑ ‑së 'ka, kö "tʋ̈ng "sueisiö ‑naa 'ka gbeng, 'ka 'dho Sezadhe.
ACT 23:24 ‑Ka ꞊soo 'bha ‑nu ‑pë kë 'pö kö 'ka Pɔdhö 'sü‑ ‑ta kö 'wɔn 'bha 'ya 'dho‑ "dhiʋ̈ ꞊slɔɔ, kö 'ka 'dho ‑gblüdë Fedhisö "piʋ̈.»
ACT 23:25 'Yö 'sëëdhɛ ‑bɛn zë ö ‑dɩ ‑wʋ 'ka 'ö‑ pö:
ACT 23:26 «N ‑gɔdhiʋ̈mɛ ꞊bhlëësü, ‑gblüdë Fedhisö, mang Klodö Dhisiasö 'ma i ꞊tua bho 'gbɛ!
ACT 23:27 Zuifö ‑nu ꞊wa 'mɛ 'a‑ bɔ i ‑dhɛ bha‑ 'kun 'nu kö ‑wa zë, "kɛɛ ꞊dhɛ 'ma‑ ma ꞊dhɛ Wlɔmö 'në ꞊dede ‑mü ‑a 'ka, 'yö yaa‑ ma "sɔdha ‑nu 'yi dho mü 'yi‑ bho‑ ‑nu ‑gɔ,
ACT 23:28 'yö 'a‑ sü 'a dho‑ 'ka Zuifö ‑nu ‑bha zadɔmɛ ‑nu ‑kuu "dhiʋ̈, kë "dhʋ̈ kö 'wɔn 'ö‑ ‑wɔn 'gü 'wo za dɔ sië‑ ‑bha bha 'a‑ dɔ.
ACT 23:29 'Pë 'a‑ ma mü yö ‑mü ꞊dhɛ ‑wo za ‑ya ‑bha 'wɔn ‑nu 'wo ‑gban ‑a ‑nu ‑bha 'tɔng‑ ‑nu ‑wɔn ‑bha ꞊në‑ ‑wɔn 'gü, "kɛɛ 'wɔn 'wo dho‑ pö kö ‑yö kë ‑a ‑dho ‑kaso 'gü ‑gɛn 'ka, "ɛɛn ‑a zë ‑gɛn 'ka kö 'a‑ dɔ 'yii ꞊slɔɔ.
ACT 23:30 ꞊Dhɛ 'ö ꞊waa‑ pö 'zü n ‑dhɛ ꞊dhɛ Zuifö 'bha ‑nu ꞊wa wo zü 'ma "kʋʋ ‑a ‑bha, 'yö 'a‑ bɔ i ‑dhɛ 'piö‑ ‑sü 'ka, 'yö 'a‑ pö 'zü za ‑dɔ ‑bha ‑mɛ ‑nu ‑dhɛ ꞊dhɛ ‑wo nu mü kö ‑wa ‑da i ‑dhɛ.»
ACT 23:31 'Yö "sɔdha ‑nu 'wo‑ ‑kë ꞊dhɛ ‑kɔ 'wo‑ pö‑ 'ka‑ ‑nu ‑dhɛ bha‑ 'dhö. 'Yö 'wo Pɔdhö sü gbeng do bha‑ 'gü 'wo dho‑ 'ka Angtipatrisö ‑pö 'gü.
ACT 23:32 ꞊Dhɛ 'ö ‑dhɛ ꞊ya ꞊kpaɔ, 'yö "sɔdha 'dhɛ ‑nu 'wo "ta sü wo ‑gɛn ‑ta bha 'wo wo yee ‑kë 'wo dho wo ‑gɔ "yasa 'gü, 'yö mɛ 'dhɛ 'wo ꞊soo ‑ta bha waa‑ Pɔdhö ‑nu 'wo dho "ta 'ka wo "dhiʋ̈.
ACT 23:33 ꞊Dhɛ 'ö ꞊wa 'dho ꞊wa ꞊loo Sezadhe 'plöö, 'yö "sɔdha ‑nu bha 'wo 'sëëdhɛ bha‑ dɔ ‑gblüdë Fedhisö ‑gɔ waa‑ Pɔdhö 'dhö.
ACT 23:34 'Yö ‑gblüdë ‑yö 'sëëdhɛ bha‑ ‑wʋ pö. ꞊Dhɛ 'ö ꞊ya bo, 'yö Pɔdhö dhɛɛ" kpɔ "sɛgɔ ꞊dede 'ö go‑ 'gü ‑a ‑wɔn 'ka. ꞊Dhɛ 'ö ꞊yaa‑ ma ꞊dhɛ ‑yö ‑go Sidhisi ‑sɛ 'gü,
ACT 23:35 'yö‑ pö Pɔdhö ‑dhɛ: «꞊Ya kë ꞊dhɛ mɛ 'wo za ‑ya i ‑bha bha ꞊wa nu ꞊diö kö 'ka ziö dhiang 'gü kö 'yi ka ‑wʋ ma.» ꞊Dhɛ 'ö go‑ 'gü, 'yö‑ pö ö ‑bha "sɔdha ‑nu ‑dhɛ ‑wo 'dho Pɔdhö 'ka 'kɔ 'ö ‑gblüdë Edhodö kë dɔ bha‑ 'gü kö ‑wo wo "yan 'to‑ ‑bha.
ACT 24:1 ꞊Dhɛ 'ö ‑dhɛkpaɔyi "sɔɔdhu ꞊ya ziö, 'yö "saabhomɛ ‑gɔmɛ 'kpii‑ 'wo‑ ‑dhɛ Ananiasö bha waa‑ mɛ zizi ‑nu 'bha ‑nu, waa‑ ‑nu ‑bha dhiang "dhüsümɛ do 'wo‑ ‑dhɛ 'pö Tɛɛtudhusö bha 'wo dho Sezadhe. 'Yö 'wo dho ‑gblüdë Fedhisö ‑kuu "dhiʋ̈ kö 'wo Pɔdhö ‑da ‑dhɛ.
ACT 24:2 'Yö 'wo Pɔdhö ‑dhɛ, 'yö nu, 'yö Tɛɛtudhusö ‑yö ‑ya Pɔdhö këwɔn ‑gɛn dɔ ‑sü ‑bha 'ö‑ pö:
ACT 24:3 «Yii‑ ‑gblüdë dhɔɔbhaasü Fedhisö 'ö i ‑bha ‑kë ꞊kpaɔsü ‑sü ‑wɔn 'gü, 'yi ‑ya ‑sü 'ka yi 'flëë‑ 'gü "sɛgɔ ya‑ 'gü "tʋ̈ng ꞊gban 'gü bha, yi‑ 'wɔn ‑dɔ ꞊dhɛ pë "pɛpɛ 'yi‑ ꞊slɔɔ "sɛ ya‑ 'gü bha yi‑ ‑slɔɔ bhi ꞊në i 'saa‑ 'gü.
ACT 24:4 'Ö "dhʋ̈ 'yaa n "piʋ̈ ꞊dhɛ 'a i ‑ya i ko ‑ta pinngdhö, "kɛɛ kö i ‑bha "klʋsëdhɛ ‑wɔn 'gü 'i i "tʋ 'në 'dɛdɛ 'to yi ‑bha.
ACT 24:5 'Mɛ 'ö ya yi‑ dɔ ꞊dhɛ mɛ ‑nu zuëkaankwëëmɛ ‑mü. Yöö do bha mɛ suu yaa ‑mü, yö ꞊në ꞊ya 'gügblüdhe ‑da Zuifö ‑nu 'wo "sɛ "pɛpɛ ꞊gban 'gü ‑a ‑nu ꞊zinng 'gü. Mɛ kpö 'wo ‑kë Nazadhɛtö ‑mɛ ‑nu 'ka, ‑a ‑nu ‑bha mɛ ꞊dhɛng ‑zian bha‑ ‑gɔmɛ ꞊në bha.
ACT 24:6 ‑Ya "piʋ̈ kö 'ö yi ‑bha Atanna ‑dhɔkëgükɔ "slʋ̈ʋ̈slʋ̈ bha‑ see‑, 'pë 'ö ‑kë 'yö 'yi‑ kun bha 'yö bha. ['Yö yi‑ 'pö 'yi za dɔ‑ ‑bha ꞊dhɛ ‑kɔ 'ö yi ‑bha 'tɔng‑ ‑ya pö‑ 'ka ‑a 'dhö.
ACT 24:7 "Kɛɛ 'yö "sɛkɔɔnmɛ Dhisiasö ‑ya sü yi ‑gɔ faandhɛ ‑bha,
ACT 24:8 'yö‑ pö 'mɛ 'yi za ‑ya ‑bha bha yi‑ ‑dhɛ 'yi nu‑ 'ka i ‑kuu "dhiʋ̈.] ꞊Ya kë ꞊dhɛ 'mɛ bha 'bha‑ dhɛɛ" 'kpɔ, 'pë 'ö ‑kë 'yö 'yi za ‑ya ‑bha bha, bhii ꞊dede i ‑dho tɛanwɔn dɔ‑ 'gü.
ACT 24:9 'Yö Zuifö ‑nu 'bha ‑nu 'wo to 'wo wo ‑wʋ ‑da Tɛɛtudhusö ‑bha "piʋ̈ ‑kɔ do bha‑ 'gü kö ‑ya ‑zɔn ꞊dhɛ 'pë 'ö‑ pö bha 'yaa ꞊sua 'ka.
ACT 24:10 'Yö ‑gblüdë ‑ya pö Pɔdhö ‑dhɛ ‑yö dhiang zë. 'Yö Pɔdhö ‑ya pö: «A‑ ‑dɔ ꞊dhɛ bhi ꞊në 'i zagɔbhomɛ 'ka "sɛgɔ ya‑ 'gü 'ö‑ ‑kwɛ kpö 'dhö ya. ‑A ‑wɔn 'gü "sika 'yaa n 'gü n ‑dɩ ‑ta ‑za dɔ ‑sü 'gü i ‑kuu "dhiʋ̈.
ACT 24:11 Bhii ꞊dede ‑bhö ‑dhɛ ‑ga dhiang ‑nu 'a dho‑ zë i ‑dhɛ bha‑ 'gü ‑së 'ka, ‑a ‑gɛn ‑mü ꞊dhɛ 'a nu Zedhizadhɛmö ‑dhɛ ya‑ 'gü, yi ‑bha Atanna ‑dhɔkë ‑dhɛ 'gü ‑a ‑dhɛkpaɔyi 'yii ziö ‑kaɔng do ö ga ꞊plɛ ‑ta ꞊kö.
ACT 24:12 'Wii n yö kö a "dhinaa 'ma sië mɛ 'bha 'ka Atanna ‑dhɔkëgükɔ 'gü, "ɛɛn kö 'ma mɛ ‑nu ‑kɔ ‑ya 'kwëë‑ yi ‑bha ‑bhɔ "kwëë ‑kë 'gü ‑kɔ ‑nu 'gü, "ɛɛn 'zü 'pö‑ yaan‑ ‑bha ‑dhɛ "wɛɛ 'bha ‑zian 'gü.
ACT 24:13 A‑ 'wɔn ‑dɔ ꞊dhɛ 'mɛ 'wo ya za 'wo‑ dɔ sië n ‑bha ya‑ ‑gɛn kpɛnngdhö 'wo dho‑ bho i ‑dhɛ 'yaa‑ ‑nu ‑gɔ.
ACT 24:14 ‑A ‑kë "dhʋ̈ ‑sü bha‑ 'gü, 'pë 'ö ma ‑zë 'a‑ dɔ 'ö 'a dho‑ pö i ‑dhɛ ‑a ‑ga 'ö ya: Yö ‑mü ꞊dhɛ yi "bhɛma ‑nu ‑bha Atanna ꞊në 'a‑ ‑dhɔkë 'yö 'a‑ ‑bha yë ‑kë, 'yö 'a "ta sü zian ‑dee 'ö wo ‑zë 'wo‑ ‑dhɛ ꞊sua ‑zian bha‑ ‑ta. "Kɛɛ Atanna ‑bha 'tɔng‑ 'ö Moizö ‑ya ‑bɛn zë 'sëëdhɛ 'gü waa‑ Atanna ‑wʋdhiʋ̈loomɛ ‑nu ‑wʋ 'ö 'dhö, a 'dhang ‑bho ꞊gban "dhiʋ̈.
ACT 24:15 A n ‑zʋ ‑yö Atanna ‑dhɛ ꞊dhɛ ‑kɔ 'ö woo ‑dɩ 'pö 'wo wo ‑zʋ yö‑ 'ka ‑a 'dhö, ꞊dhɛ Atanna ‑dho 'mɛ 'ö‑ ‑nu këwɔn 'dhö ‑së waa‑ mɛ 'ö‑ ‑nu këwɔn 'yaa ‑së ‑a ‑nu ‑bö 'ö 'wo go ga 'gü.
ACT 24:16 Yö ꞊në‑ ‑wɔn 'gü 'yö 'a n ‑dɩ "gbɩɩ‑ ‑ta bho kö kë "dhʋ̈ 'ö Atanna ‑wʋ 'ö n 'gü bha 'ö dho za dɔ n ‑bha ‑a wëëdhö "ɛɛn mɛ "bhɩɩ‑ ‑nu ‑zian wëëdhö.
ACT 24:17 ꞊Dhɛ 'ö ‑kë ꞊dhɛ 'a go Zedhizadhɛmö ‑a ‑kwɛ ꞊ya kë 'gbɛ, 'yö 'a nu 'zü kö 'a 'wëëga 'bha ꞊gbaɔ Zuifö ‑nu 'bha ‑nu ‑gɔ ‑a ‑nu ‑takunpë 'ka kö 'a "saa‑ bho 'zü yi ‑bha Atanna bha‑ "dhiʋ̈.
ACT 24:18 ꞊Dhɛ 'a gun "saa‑ bha‑ bho sië yi ‑bha Atanna ‑dhɔkëgükɔ 'gü, 'yö 'wo nu 'wo ‑kpan n ‑bha mü, "kɛɛ kö 'ma bo ‑go "kian 'gü ‑sü ‑zë 'ka 'nu. Mɛ kpö 'bha 'yaa gun mü "ɛɛn ꞊bhluubhluudhe 'bha 'yaa gun mü.
ACT 24:19 Zuifö 'bha ‑nu 'wo go Azi ‑sɛ 'gü ꞊në 'wo gun mü, wo ꞊në‑ ‑dhɛ 'dhö‑ ‑bha 'nu ꞊dhɛ ‑wo za dɔ n ‑bha i ‑kuu "dhiʋ̈, "ni kö ‑a ‑nu ‑bha 'wɔn 'bha ‑zë ‑yö n ‑bha.
ACT 24:20 'Yii kë "dhʋ̈ 'mɛ 'wo nu ya 'wɔn yaa 'a‑ ‑kë 'ö‑ ‑wɔn 'gü ‑za ‑yö n zë zagɔbhomɛ ‑bha za ‑dɔ n ‑bha ‑yi 'ka bha ‑wa pö.
ACT 24:21 "Ni kö 'yii kë dhiang 'a n ‑wʋ "dhiʋ̈ ꞊wlü‑ ‑bha "gbɩɩ‑ 'ka ‑a ‑nu ꞊gban wëëdhö 'a‑ pö ꞊dhɛ a 'dhang ‑bho gamɛ ‑nu ‑bha ‑go ga 'gü ‑sü "dhiʋ̈ bha yö ‑zë 'ka, 'wɔn 'ö‑ ‑wɔn 'gü 'yö 'a dɔ sië ka ‑kuu "dhiʋ̈ ꞊dɛɛ bha 'yö bha.»
ACT 24:22 ꞊Dhɛ 'ö ‑kë ꞊dhɛ Fedhisö ‑yö 'wɔn 'ö ‑gban Klisi ‑wɔn ‑bha bha‑ ‑dɔ ‑së 'ka bha, 'yö 'kwa ma kun, 'yö yi "wɛɛ kpɔ 'mɛ 'wo gun 'mü bha‑ ‑nu ‑gɔ 'ö‑ pö‑ ‑nu ‑dhɛ: «꞊Ya kë ꞊dhɛ "sɛkɔɔnmɛ Dhisiasö ꞊ya nu kö 'a ‑wʋ do pö ka ‑dhɛ.»
ACT 24:23 'Yö‑ pö ö ‑bha "sɔdha ‑gɔmɛ ‑dhɛ ‑wo 'dho Pɔdhö 'ka ‑kaso 'gü "kɛɛ ‑wo ‑pʋtaasü nu‑ ‑dhɛ ‑kaso ‑kɔ 'gü kö ‑wo wo kwaa‑ 'pö ‑a "tɛabɔ ‑nu ‑zü kö pë "pɛpɛ 'ö‑ ‑mawɔn dho zun‑ ‑bha ‑wa nu‑ ‑dhɛ.
ACT 24:24 ꞊Dhɛ 'ö ‑dhɛkpaɔyi 'bha ꞊ya ziö, 'yö Fedhisö waa‑ ö ‑bha dhebhɔ 'ö ‑kë Zuifö dhebhɔ 'ka 'wo‑ ‑dhɛ Drusidhö bha 'wo nu. 'Yö Fedhisö ‑yö mɛ bɔ 'yö 'wo nu Pɔdhö 'ka 'yö ö "tʋ to 'wɔn 'ö ‑gban ‑zʋ ‑yö Yesu Klisi ‑dhɛ ‑sü 'ö Pɔdhö 'dhö‑ pö sië bha‑ ‑bha bha‑ ‑bha.
ACT 24:25 "Kɛɛ ꞊dhɛ 'ö Pɔdhö ‑yö zun 'wɔn 'ö ‑gban ‑kë kpengdhö ‑sü waa‑ mɛ ‑bha ‑kɔ ‑mɔɔ ö ‑dɩ ‑bha ‑sü waa‑ za 'ö Atanna dho‑ dɔ mɛ ‑bha dhia", mɛ "bhɩɩ‑ ‑nu këwɔn ‑nu ‑wɔn 'gü bha‑ ‑dhiang zë ‑sü ‑bha, 'yö "suʋ̈ 'dhö ‑da Fedhisö 'gü 'yö‑ pö: «‑Bhö 'dho ꞊kö, ꞊ya kë ꞊dhɛ 'ma "tʋ̈ng bha‑ ꞊slɔɔ a ‑dho i ‑dhɛ kö 'i‑ 'bha pö.»
ACT 24:26 ‑Ya ‑ga ꞊dhɛ Pɔdhö dho gbadhiʋ̈ kë 'nu ö ‑dhɛ 'wëë‑ 'ka 'yö ꞊ya kë ꞊sië 'yö‑ ‑dhɛ ‑nu wo, 'yö 'wo "gbɛɛta ‑nu zë.
ACT 24:27 'Wɔn bha ‑wo ‑to 'ka "dhʋ̈ 'ö ‑kwɛ ꞊plɛ ‑yö ‑da 'gü. ꞊Dhɛ 'ö ‑kwɛ ꞊plɛ bha ꞊ya ziö, 'yö Pɔɔsiusö Fɛtusö 'dhö ‑kë ‑gblüdë 'ka Fedhisö "gblʋʋ 'gü. Fedhisö ‑yö Pɔdhö ‑to ‑kaso 'gü kë "dhʋ̈ 'nu kö 'ö Zuifö ‑nu dhɔɔbhaa kë.
ACT 25:1 ꞊Dhɛ 'ö Fɛtusö ꞊ya ꞊loo "sɛ "pɛan 'dhɛ bha‑ 'gü, 'ö‑ ‑dhɛkpaɔyi ꞊ya kë ‑yaaga, 'yö go Sezadhe 'ö dho Zedhizadhɛmö.
ACT 25:2 ‑Dhɛ bha‑ 'gü, 'yö Zuifö ‑nu ‑bha mɛ "gblʋ̈gblʋ̈ ‑nu waa‑ "saabhomɛ ‑gɔmɛ ‑nu 'wo Pɔdhö ‑wɔn ‑da Fɛtusö ‑dhɛ 'wo‑ pö
ACT 25:3 ‑yö 'wɔn ‑së do kë wo ‑dhɛ, ‑yö Pɔdhö bɔ Zedhizadhɛmö. 'Ö "dhʋ̈ bha kö ꞊wa wo zü ma "kʋʋ 'nu kö 'wo Pɔdhö zë zian ‑ta.
ACT 25:4 "Kɛɛ 'yö Fɛtusö ‑ya ‑yɔ bɔ‑ ‑nu ‑gɔ 'ö‑ pö: «Pɔdhö ‑yö ‑kaso 'gü Sezadhe, ꞊ya 'go mü mang ꞊dede n ‑dho mü ‑wɔn ‑dhö.»
ACT 25:5 'Yö‑ pö 'zü‑ ‑nu ‑dhɛ: «Ka ‑gɔmɛ ‑nu ‑wo nu kö 'kwa 'dho Sezadhe kö ꞊ya kë ꞊dhɛ 'mɛ bha 'wɔn yaa ꞊në 'ö‑ ‑kë ꞊dedewo tɛan‑ 'ka kö ‑wa ‑za dɔ‑ ‑bha mü.»
ACT 25:6 Fɛtusö 'yii ꞊gwëë mü, ‑yö 'pë 'ö ꞊mɔɔ ‑dhɛkpaɔyi "saaga "ɛɛn ‑kaɔng do ‑nu ‑bha ꞊në‑ ‑kë ‑nu "piʋ̈ Zedhizadhɛmö mü, 'yö ö yee kë 'ö dho Sezadhe. ꞊Dhɛ 'ö ‑dhɛ ꞊ya ꞊kpaɔ, 'yö dho zadɔgükɔ 'gü 'yö ‑ya ö ‑bha za ‑dɔ 'gü ‑gbloo 'gü 'yö‑ pö ‑wo nu Pɔdhö 'ka.
ACT 25:7 ꞊Dhɛ 'ö ꞊wa nu Pɔdhö 'ka ꞊wa ꞊loo mü, 'yö Zuifö ‑nu 'wo go Zedhizadhɛmö bha 'wo ꞊klëën‑ ‑zü, 'yö 'wo 'wɔn yaya ‑nu pö‑ ‑bha 'gbɛ 'ka, "kɛɛ 'sa 'wɔn ‑nu 'wo "dhʋ̈ bha 'waa ꞊mɔɔ‑ ‑bha kö ‑wa ‑gɛn bho ‑së 'ka.
ACT 25:8 "Kɛɛ yö ꞊në‑ ꞊gban 'gü, Pɔdhö ‑yö ö ‑dɩ ‑ta ‑kɔɔ 'ö‑ pö: «'Mii Zuifö ‑nu yi ‑bha 'tɔng‑ 'bha bho "ɛɛn 'mii 'wɔn yaa 'bha kë 'pö yi ‑bha Atanna ‑dhɔkëgükɔ 'gü kö yöö 'to‑ Wlɔmö ‑mɛ ‑nu ‑bha "sɛkɔɔnmɛ 'kpii‑ ꞊në‑ ‑bha.
ACT 25:9 ꞊Dhɛ 'ö ‑kë ꞊dhɛ ‑yö ‑gun Fɛtusö "piʋ̈ ꞊dhɛ 'ö Zuifö ‑nu dhɔɔbhaawɔn ꞊në‑ kë bha 'yö‑ pö Pɔdhö ‑dhɛ: «I ‑dho ꞊mɔɔ‑ ‑bha kö 'i nu Zedhizadhɛmö kö 'yi za bha‑ dɔ n ‑kuu "dhiʋ̈ mü kö ꞊ya kë ꞊dhɛ 'pë 'wo‑ pö sië i ‑bha bha 'ö tɛan‑ 'ka 'a‑ dɔ ‑ee?»
ACT 25:10 'Yö Pɔdhö ‑ya ‑yɔ bɔ‑ ‑gɔ 'ö‑ pö: «‑Abin, ꞊ya 'to yö ‑zë ‑bha kö 'maa maa "wɩ‑ ‑bha, ꞊ya kë ꞊dhɛ bhi 'ö bhi ‑zë 'i "sɛkɔɔnmɛ 'kpii‑ ‑bha bɔmɛ 'ka bha 'bhii ꞊mɔɔ ma za bha‑ dɔ ‑sü ‑bha kö a ‑dho 'dho Wlɔmö, "sɛkɔɔnmɛ 'kpii‑ yöö ꞊dede ‑a ‑kuu "dhiʋ̈, ‑a ‑gɛn ‑mü ꞊dhɛ bhii ꞊dede i‑ 'wɔn ‑dɔ ꞊dhɛ 'mii 'wɔn yaa 'bha kë Zuifö ‑nu 'ka.
ACT 25:11 ꞊Ya kë ꞊dhɛ 'a 'wɔn yaa ꞊në‑ kë ‑sü 'ka "ɛɛn 'pë 'ö mɛ zë ‑gɛn bho 'ma yö ꞊në‑ 'bha kë, 'mii ‑kɔ n zë ‑wɔn ‑bha, "kɛɛ ꞊ya kë ꞊dhɛ 'wɔn ‑nu 'wo‑ pö sië n ‑bha ya 'ö tɛanwɔn ‑zë 'yaa‑ 'gü, kö mɛ 'bha 'yii 'dho ꞊mɔɔ‑ ‑bha kö ‑yö n dɔ‑ ‑nu ‑gɔ. 'Mɛ n "piʋ̈ kö ‑yö ma za ya‑ dɔ yö ‑mü "sɛkɔɔnmɛ 'kpii‑ ('ö Wlɔmö bha) ꞊në‑ 'ka.»
ACT 25:12 ꞊Dhɛ 'ö Fɛtusö waa‑ ö ‑bha zadɔmɛ ‑nu ꞊wa dhiang 'bha ‑nu zë wo 'ko ꞊zinng 'gü, 'yö‑ ‑yɔ bɔ Pɔdhö ‑gɔ 'ö‑ pö: «꞊Dhɛ 'ö ‑kë ꞊dhɛ ‑yö i "piʋ̈ kö "sɛkɔɔnmɛ 'kpii‑ ꞊në ‑yö i ‑bha za dɔ bha, i ‑dho 'dho "sɛkɔɔnmɛ 'kpii‑ ‑kuu "dhiʋ̈.»
ACT 25:13 ꞊Dhɛ 'ö ‑dhɛkpaɔyi 'bha ꞊ya ziö, 'yö ‑gblüdë Aglipa waa‑ ‑bha dhebhɔ Bedhenisö 'wo dho Sezadhe kö 'wo Fɛtusö ꞊tua bho.
ACT 25:14 ꞊Dhɛ 'ö ꞊wa ‑dhɛkpaɔyi kpö kë mü, 'yö Fɛtusö ‑yö Pɔdhö ‑bha 'wɔn bha‑ ‑da ‑gblüdë ‑dhɛ, 'yö‑ pö‑ ‑dhɛ: «Gɔndënë do 'ö Fedhisö ‑ya to ‑kaso 'gü ‑yö yö.
ACT 25:15 ꞊Dhɛ 'ö 'ma 'dho Zedhizadhɛmö, Zuifö ‑nu ‑bha "saabhomɛ ‑gɔmɛ ‑nu waa‑ ‑nu ‑bha mɛ zizi ‑nu ‑wo ka ‑nu 'wo‑ ‑wɔn ‑da n ‑dhɛ 'wo‑ pö 'a‑ zë za 'ka.
ACT 25:16 'Yö 'a‑ ‑yɔ bɔ‑ ‑nu ‑gɔ 'a‑ pö 'ö Wlɔmö ‑mɛ ‑nu wɔ ‑kɔ 'gü 'waa mɛ 'bha zë za 'ka "wɛɛwɛɛ kö 'mɛ 'wo za dɔ‑ ‑bha bha 'yii ziö ö ‑bha za ‑gɛn 'gü ‑a za dɔ "yɔɔ ‑nu wëëdhö,
ACT 25:17 'yö 'wo ‑ziö n ꞊keng‑ 'yö 'yi nu yö, 'yö 'wɔn 'ö "dhʋ̈ bha 'mii‑ ‑da n ‑gɛn ꞊wlöö, "kɛɛ ꞊dhɛ 'ö ‑dhɛ ꞊ya ꞊kpaɔ, 'yö 'yi dho zadɔgükɔ 'gü kö 'a za bha‑ dɔ, 'yö 'a‑ pö ‑wo nu 'mɛ bha‑ 'ka.
ACT 25:18 'Yö‑ ‑da ‑mɛ ‑nu 'wo nu, "kɛɛ 'yö 'wɔn yaa ‑nu 'ö ma zë 'a n ‑zʋ gɔn‑ 'ka bha 'wii‑ 'bha pö.
ACT 25:19 'Wɔn do 'ö wɛng‑ ‑nu 'wo‑ zaɔdhe ‑da wo 'ko ꞊zinng 'gü yö ‑mü ꞊dhɛ ‑a ‑nu ‑bha Atanna ‑dhɔkë ‑kɔ 'yaa do, ꞊ya 'go mü 'zü, gɔndënë do 'bha 'wo‑ ‑dhɛ Yesu 'ö ꞊ya ga "kɛɛ 'ö Pɔdhö ‑ya pö glɔglɔdhö ꞊dhɛ ‑yö "yaan bha‑ ‑wɔn ‑mü.
ACT 25:20 'Yö ‑kɔ 'a dho‑ kë‑ 'ka kö 'a 'wɔn bha‑ 'gü ma 'mii‑ dɔ, 'yö‑ ‑wɔn 'gü 'a‑ ‑dhɛ Pɔdhö ‑gɔ kö ꞊ya "wɩ‑ ‑bha kö ‑yö 'dho Zedhizadhɛmö kö 'a‑ ‑bha za dɔ 'mü.
ACT 25:21 "Kɛɛ Pɔdhö ‑ya ‑pö 'zü n ‑dhɛ glɔglɔdhö ꞊dhɛ 'ö‑ "piʋ̈ 'ö 'to ‑kaso 'gü kö "sɛkɔɔnmɛ 'kpii‑ ꞊dede ꞊në ‑yö ö ‑bha za dɔ. 'Yö 'a‑ pö ma "sɔdha ‑nu ‑dhɛ ‑wo wo ‑zʋ 'to‑ 'gü kö ‑yö zun‑ 'ka yi 'a dho‑ bɔ‑ 'ka "sɛkɔɔnmɛ 'kpii‑ ‑kuu "dhiʋ̈ bha‑ ‑bha.»
ACT 25:22 'Yö Aglipa ‑ya pö Fɛtusö ‑dhɛ: «‑Yö n "piʋ̈ ꞊dhɛ mang ‑dɩ 'pö 'a 'mɛ bha‑ ‑wʋ ma.» 'Yö Fɛtusö ‑ya pö‑ ‑dhɛ: «I ‑dho ‑a ‑wʋ ma dhia".»
ACT 25:23 ꞊Dhɛ 'ö ‑dhɛ ꞊ya ꞊kpaɔ, 'yö 'wo ta Aglipa waa‑ Bedhenisö ‑nu ‑bha, 'yö 'wo dho ‑yakwëëkëgükɔ 'kpii‑ 'gü. 'Yö "sɔdha ‑nu, "sɔdha ‑gɔmɛ waa‑ 'pö‑ ꞊kɔɔnmɛ ‑nu 'wo dho 'mü. 'Yö Fɛtusö ‑yö dhiang zë ö ‑bha "sɔdha ‑nu ‑dhɛ 'yö 'wo nu Pɔdhö 'ka.
ACT 25:24 'Yö Fɛtusö ‑ya pö 'mɛ 'wo bho 'ko ‑ta bha‑ ‑nu ‑dhɛ: «‑Gblüdë Aglipa waa‑ mɛ "pɛpɛ 'ka yi "piʋ̈ yö, 'mɛ 'ö Zuifö 'gbɛ ‑dhɛ 'wo za dɔ‑ ‑bha 'wo nu‑ 'ka n "piʋ̈ Zedhizadhɛmö "gbla ‑sü 'ka, 'ö 'wo nu 'zü‑ 'ka n "piʋ̈ yö "gbla ‑sü 'ka ꞊dhɛ ‑wa zë bha yö ꞊nɛ.
ACT 25:25 "Kɛɛ ma ‑zë n ‑bha 'ka pë yaa 'ö‑ ‑kë 'ö 'wo dho‑ zë‑ ‑wɔn 'gü 'mii‑ yö. ꞊Dhɛ 'ö ‑kë 'pö ꞊dhɛ yöö ꞊dede ‑ya ‑pö ‑yö ö "piʋ̈ 'ö 'dho "sɛkɔɔnmɛ 'kpii‑ ‑kuu "dhiʋ̈ bha, ‑yö n 'gü ‑së 'pö kö 'a‑ bɔ 'mü.
ACT 25:26 "Kɛɛ pë 'bha 'kö 'a dho‑ ‑ya 'sëëdhɛ 'gü kö 'a‑ bɔ "sɛkɔɔnmɛ 'kpii‑ ‑dhɛ ‑a ‑bha 'wɔn bha‑ 'gü 'maa‑ dɔ. 'Wɔn 'ö‑ ‑wɔn 'gü 'yö 'a nu‑ 'ka ka ‑kuu "dhiʋ̈ "kɛɛ bhii ‑gblüdë Aglipa ‑mɛ i ‑kuu "dhiʋ̈ "vaandhö kö ‑a dhɛɛ" ꞊ya 'kpɔ, kö 'pë 'a dho‑ ‑bɛn zë 'a‑ dɔ bha 'yö bha.
ACT 25:27 ‑A ‑gɛn ‑mü ꞊dhɛ 'ma ‑kasogümɛ bɔ ‑gblüdë 'kpii‑ ‑kuu "dhiʋ̈ kö 'mii za 'kö‑ kun ‑a ‑gɛn pö, kö‑ bɔ ‑gɛn 'yaa 'dhö.»
ACT 26:1 'Yö Aglipa ‑ya pö Pɔdhö ‑dhɛ: «‑Pʋtaasü ‑yö i ‑gɔ kö 'i i ‑dɩ ‑ta kɔɔ‑ ‑dhiang zë.» 'Yö Pɔdhö ‑yö ö ‑kɔ wang ‑pʋ kö yöö dhiang zë, 'yö‑ pö:
ACT 26:2 «‑Gblüdë Aglipa, n zuë" ꞊nii ‑yö ‑da kö 'a dɔ i ‑kuu "dhiʋ̈ ꞊dɛɛ ꞊dhɛ 'pë ya‑ 'dhö kö 'a n ‑dɩ ‑ta kɔɔ‑ ‑dhiang zë 'wɔn 'ö Zuifö ‑nu 'wo‑ pö sië n ‑bha bha‑ ‑wɔn 'gü.
ACT 26:3 ‑A ‑gɛn ‑mü ꞊dhɛ bhii ꞊dede i Zuifö ‑nu wɔ ‑kɔ ‑dɔ. ꞊Ya 'go mü i‑ ‑nu ‑bha zaɔdhe ‑da 'gü ‑wɔn ‑nu ‑dɔ. ꞊Dhɛ 'ö "dhʋ̈, a‑ ‑dhɛ i ‑gɔ kö 'i i "tʋ 'to n ‑wʋ ‑bha ‑së 'ka.
ACT 26:4 Zuifö ‑nu "pɛpɛ ꞊gban ‑wo n ‑tosɛa kë ‑kɔ 'a‑ ‑kë 'ka 'ö sü n 'nëglɔɔndhɛ 'gü ‑bha 'ö zun‑ 'ka ꞊dɛɛ ‑bha ‑a ‑dɔ. 'Ö ‑kɔ 'a ‑tosɛa ‑kë 'ka n ‑gɔ "sɛ 'gü ‑dhɛ waa‑ Zedhizadhɛmö ‑pö ya‑ 'gü 'wo‑ dɔ 'pö.
ACT 26:5 ꞊Ya kë ꞊dhɛ ꞊wa "wɩ‑ ‑bha ‑wo ‑mɔɔ ‑bha kö woo‑ ꞊dede ‑wo kë n "sɛɛ‑ 'ka ꞊dhɛ dhiang 'a‑ zë sië bha 'yaa ꞊sua 'ka. ‑A ‑gɛn ‑mü ꞊dhɛ ‑wo n ‑dɔ Fadhiziɛn ‑nu 'wo Zuifö ‑nu ‑bha 'tɔng‑ 'ö‑ ‑nu ‑bha Atanna ‑dhɔkëgükɔ 'gü ‑a ꞊bhlëë ‑ya wo faan ꞊gban 'ka 'wo ‑ziö 'ka mɛ ‑kpɛa ‑ta bha‑ mɛ do 'ka ‑a yi 'yaa ꞊dɛɛ.
ACT 26:6 'Yö 'ma kë za ‑dɔ ‑bha ‑mɛ 'ka dɔ 'kwa‑ wo ꞊dɛɛ ya‑ 'gü, 'yö‑ ‑gɛn 'dhö ‑kë ꞊dhɛ 'pë 'ö Atanna ‑ya "plüün bho yi "bhɛma ‑nu ‑dhɛ ('ö ‑gban ‑Yamɛ nu ‑wɔn ‑bha) bha n "yan ‑ya kë ‑yi ‑gɔ.
ACT 26:7 "Plüün bho ‑wʋ 'ö yö ꞊në yi ‑bha "kwɛan‑ ‑gɔ ‑kaɔng do ga ꞊plɛ 'wo ‑ya ‑sü 'ka ‑a kë ‑yi ‑gɔ, 'yö 'wo yë ‑kë Atanna ‑dhɛ wo faan ꞊gban 'ka 'yënng‑ 'gü waa‑ gbeng ‑nu ꞊gban 'gü bha‑ yö ꞊në‑ ‑wɔn 'gü, ‑gblüdë, 'yö Zuifö ‑nu 'wo za dɔ sië n ‑bha ya.»
ACT 26:8 'Yö Pɔdhö ‑yö ö wë ꞊slëë Zuifö ‑nu ‑ta 'ö‑ pö: «Zuifö ‑nu 'ka ma ya, ‑më ꞊në ‑kë 'yö 'kaa 'dhang bho yi ‑bha Atanna ‑bha mɛ ‑bho ga 'gü ‑sü ‑wɔn "dhiʋ̈?
ACT 26:9 Ma ‑zë n ‑bha 'ka, a ‑gun n ‑zʋ 'gɔn sië ꞊dhɛ 'a pë yaa "pɛpɛ ꞊gban suu kë Yesu 'ö go Nazadhɛtö bha‑ 'ka.
ACT 26:10 Pë 'ö gun n kë ‑pë 'ka ‑blɛɛsü Zedhizadhɛmö 'yö bha, 'ö "saabhomɛ ‑nu ‑gɔmɛ ‑nu 'wo ‑wʋ ‑kpɔ n ‑bha kö 'a 'dhang ‑bho Yesu "dhiʋ̈ ‑mɛ ‑nu 'gbɛ ‑da ‑kaso 'gü. 'Yö ꞊ya 'go mü ꞊waa‑ ‑nu zë za 'ka kö ‑wa ‑nu zë, 'yö ‑kë mɛ ꞊gban yi ‑ya 'kwëë‑ ‑wɔn 'ka.
ACT 26:11 'Ö‑ 'bha ‑nu ꞊wa kë ‑zianwo, 'a 'wɔn "dhiʋ̈‑ ‑nu ‑kë ‑a ‑nu 'ka, Zuifö ‑nu ‑bha ‑yakwëëkëgükɔ ‑nu 'gü, 'yö 'a‑ "slë ꞊mɔɔ, faan ‑wɔ ‑a ‑nu ‑ta ‑sü 'ka kö ‑wo wo kwaa‑ ‑zʋ ‑yö Yesu ‑dhɛ ‑sü ‑zü. 'Wɔn ‑siö n ‑dhɛ ‑kɔ yaa 'gü yaa 'ö‑ "piʋ̈ bha‑ ‑wɔn 'gü, a ‑gun "wlü sië 'a dho 'wɔn ‑wɔ ‑a ‑nu ‑ta ‑dhɛ 'gü 'pö "gblʋ̈gblʋ̈ "wɛɛ ‑nu ‑zian 'gü.
ACT 26:12 ‑A kë 'a gun‑ wo sië "dhʋ̈ bha‑ ‑wɔn 'gü, 'yö "saabhomɛ ‑nu ‑gɔmɛ ‑nu 'wo n bɔ Damasö 'plöö yi do 'ka, ‑kɔ ‑mɔɔ 'wɔn ‑bha ‑sü 'wo‑ nu n ‑dhɛ bha‑ 'ka.
ACT 26:13 ‑Gblüdë, ꞊dhɛ ma ‑da zian ‑ta, 'ö 'yënng‑ ꞊ya ‑ya mɛ ‑gɔ ꞊zinng 'gü, 'yö ‑dhɛpuudhɛ 'ö go dhang‑ 'gü 'ö‑ 'bhü 'dhö ‑ziö 'yënng‑ 'bhü ‑ta bha 'ö sɔ ma 'dhöö, ‑ta n ‑bha ‑mɛ ‑nu 'wo ‑kë n "tayɔɔ ‑nu 'ka ‑a ‑nu 'dhö, yi ‑ta.
ACT 26:14 'Yö mɛ "pɛpɛ ꞊gban 'yi ‑pö "sia‑, 'yö 'a mɛ ‑wʋ do 'bha ma. ‑Wʋ bha 'yö‑ pö n ‑dhɛ eblö ‑wʋ 'gü 'ö‑ pö: ‹Sɔdhö, Sɔdhö, ‑më ꞊në ‑kë 'yö 'i n "yënng ꞊gbaɔn "dhʋ̈? 'Bha 'ko zë n 'ka kö i 'wɔn yaa ‑kë i ‑dɩ ꞊në‑ 'ka ꞊dhɛ ‑kɔ 'ö ‑du ‑yö ö ‑dɩ ‑gban 'ka ö ‑maakëmɛ ‑gɔ "dhü "zɔ "dhiʋ̈ bha‑ 'dhö.»
ACT 26:15 ꞊Dhɛ 'ö ꞊ya kë "dhʋ̈ 'yö 'a‑ dhɛɛ" kpɔ 'a‑ pö: «Bhii 'de i bha ꞊zɔɔ?» 'Yö yi Dëmɛ ‑ya pö: «Mang Yesu 'i n "yënng ꞊gbaɔn sië bha ma ‑mü.
ACT 26:16 ‑Bhö "wlü kö 'i dɔ i ‑gɛan, a n ‑dɩ ‑zɔn i ‑dhɛ "dhʋ̈ kö 'i kë ma yëkëmɛ ‑mɛ ꞊në‑ 'ka, i ‑dho kë n "sɛɛ‑ 'ka kö ‑kɔ 'a n ‑dɩ ‑zɔn 'ka i ‑dhɛ ꞊dɛɛ bha 'i‑ pö 'mɛ 'wo to ‑a ‑nu ‑dhɛ. ꞊Ya 'go mü kö 'pë 'a dho‑ ‑zɔn i ‑dhɛ bha 'i‑ ‑gɛn dɔ‑ ‑nu ‑dhɛ 'pö.
ACT 26:17 A ‑dho i bɔ Zuifö ‑nu waa‑ 'mɛ 'waa Zuifö 'ka‑ ‑nu "piʋ̈, ꞊wa ‑ya i ‑san 'ka kö ‑wa pö 'wo i zë, a ‑dho i dha‑ ‑nu ‑gɔ.
ACT 26:18 A i ‑bɔ kö 'i‑ ‑nu "yan "dhiʋ̈ ꞊në‑ "pʋ kö ‑wo 'go ‑dhɛtiidhɛ 'gü kö ‑wo nu ‑dhɛpuudhɛ 'gü, kö ‑wo 'go Sɔtraan ‑gban ꞊wlöö, kö ‑wo nu Atanna "piʋ̈, kö ꞊wa 'dhang bho n ‑wɔn "dhiʋ̈ kö Atanna ‑ya ‑nu ‑bha 'wɔn yaa ‑mawɔn 'to kö ‑wo wo ‑yɛa ꞊slɔɔ 'pö 'mɛ 'ö Atanna ‑ya ‑nu ‑ya ‑dɩ ‑ta bha‑ ‑nu kpö 'gü.
ACT 26:19 ‑Gblüdë Aglipa, ‑a kë "dhʋ̈ ‑sü bha‑ 'gü, ꞊dhɛ 'ö n "yan ꞊ya ‑da 'wɔn 'ö go dhang‑ 'gü bha‑ 'gü ‑dhɛ ‑kɔ bha‑ 'dhö, 'yö 'a‑ ‑kë ꞊dhɛ ‑kɔ 'ö n Dëmɛ ‑ya pö‑ 'ka n ‑dhɛ bha‑ 'dhö 'pö.
ACT 26:20 'Yö 'a Atanna ‑wʋ pö Damasö ‑pö 'gü, 'yö 'a‑ 'bha pö Zedhizadhɛmö ‑pö 'gü waa‑ Zude ‑sɛ 'dhö. 'Yö 'a dho‑ 'ka "sɛ "wɛɛ 'gbɛ ꞊gban 'gü kö a‑ pö sië‑ ‑nu ‑dhɛ ‑wo wo kwaa‑ woo‑ sɔng yaa ‑zü kö ‑wo wo zuë" slëë‑ Atanna "piʋ̈ kö këwɔn ‑së ‑nu 'wo‑ ‑zɔn ꞊dhɛ ꞊wa wo wë slëë‑ Atanna "piʋ̈ ꞊dedewo bha ‑wa kë.
ACT 26:21 Ma Atanna ‑wʋ ‑pö "dhʋ̈ ‑sü ꞊në‑ ‑wɔn 'gü, 'yö Zuifö ‑nu 'wo n kun kö a Atanna ‑dhɔkëgükɔ 'gü, 'yö 'wo‑ "slë ꞊mɔɔ kö ‑wo n zë,
ACT 26:22 "kɛɛ Atanna ‑yö n ‑ta ‑kun ‑kpɛawo 'ö nu 'ö zun‑ 'ka ꞊dɛɛ ‑bha kö 'a ma "sɛɛdhɛ kë 'mɛ 'ö‑ ‑nu ꞊bhlëë 'yaa 'dhö waa‑ 'mɛ 'ö‑ ‑nu ꞊bhlëë 'dhö 'dhö bha‑ ‑nu wëëdhö. 'Mii 'wɔn "wɛɛ 'bha pö kö 'yii kë Moizö waa‑ Atanna ‑wʋdhiʋ̈loomɛ ‑nu 'wo ‑wʋ 'ö‑ pö yi 'bha 'ka bha‑ 'ka.
ACT 26:23 ꞊Dhɛ Atanna ‑bha ‑Yamɛ ‑wëëdhɛ ‑dho bho 'ö ga 'ö ‑kë mɛ ‑blɛɛsü 'ö go ga 'gü ‑a 'ka kö ‑yö dhasü 'ö ‑dhɛpuudhɛ 'ka bha‑ ‑dhiang zë Zuifö ‑nu waa‑ 'mɛ 'waa Zuifö 'ka ‑a ‑nu ‑dhɛ.»
ACT 26:24 ꞊Dhɛ 'ö Pɔdhö 'dhö ö ‑dɩ ‑ta ‑za dɔ sië "dhʋ̈, 'yö Fɛtusö ‑yö ö ‑wʋ "dhiʋ̈ ꞊wlü 'ö‑ pö: «Slaa" 'pö yöö i 'kun ꞊zɔɔ ‑ee, Pɔdhö, ‑a ‑ga bha, i ‑bha 'sëëdhɛ draan‑ ‑kɔ yaa 'gü yaa bha‑ ‑ga 'ö ꞊ya slaa" ‑da i ‑ta bha!»
ACT 26:25 'Yö Pɔdhö ‑ya ‑yɔ bɔ‑ ‑gɔ 'ö‑ pö: «Slaa" 'yii ‑da n 'gü, ma mɛ ‑wɔngbɩɩsü Fɛtusö, "kɛɛ 'wɔn ‑nu 'a‑ pö sië bha tɛanwɔn ‑mü, a‑ ‑pö 'pö ꞊kpaɔdhɛ ‑bha.
ACT 26:26 ‑Gblüdë Aglipa ‑yö 'wɔn ‑nu bha‑ ‑nu ‑dɔ, ‑a ‑wɔn 'gü a ‑mɔɔ ‑bha 'a‑ ‑dhiang zë n ‑ta "puu 'ka ‑a wëëdhö. A‑ ‑dɔ ꞊dhɛ 'wɔn ‑nu 'wo "dhʋ̈ bha ‑ya ꞊gban ‑dɔ "pɛpɛdhö, ‑a ‑gɛn ‑mü ꞊dhɛ pë ‑nu bha‑ 'bha 'yii kë ‑bin 'gü!»
ACT 26:27 ꞊Dhɛ 'ö go 'mü 'yö Pɔdhö ‑ya pö Aglipa ‑dhɛ: «‑Gblüdë Aglipa, 'wɔn 'ö Atanna ‑wʋdhiʋ̈loomɛ ‑nu ‑wa pö (yi 'bha 'ka 'ö ‑gban Atanna ‑bha ‑Yamɛ ‑wɔn ‑bha) bha i 'dhang ‑bho "dhiʋ̈ "wɛ ‑ee? "Kɛɛ a‑ ‑dɔ ‑zë wo ꞊dhɛ i 'dhang ‑bho "dhiʋ̈!»
ACT 26:28 'Yö Aglipa ‑ya pö Pɔdhö ‑dhɛ: «‑Yö i "piʋ̈ ꞊dhɛ i ‑kɔ ‑yö ꞊mɔɔ n ‑bha ‑dede ya‑ 'gü kö 'i n kë 'dhang ‑bho Yesu "dhiʋ̈ ‑mɛ 'ka ‑wa?»
ACT 26:29 'Yö Pɔdhö ‑ya pö: «'Kö 'zü 'ö ‑kë ꞊dɛɛ, "ɛɛn 'ö ‑kë yi "wɛɛ 'ka, "kɛɛ a ‑bhɛa yi ‑bha Atanna ‑dhɛ kö 'ya 'dho kë bhii do ‑zian i 'ka, "kɛɛ kö mɛ "pɛpɛ 'ka "tʋ 'to sië n ‑wʋ ‑bha ꞊dɛɛ ya 'ka kë 'dhang ‑bho Yesu "dhiʋ̈ ‑mɛ 'ka ꞊dhɛ n 'dhö, "kɛɛ kö 'ka 'dho kë ‑kasogümɛ ‑zë 'ka ꞊dhɛ ‑kɔ 'a‑ 'ka ya‑ 'dhö.»
ACT 26:30 ꞊Dhɛ 'ö ꞊ya kë "dhʋ̈ 'yö ‑gblüdë 'dhöö, "sɛkɔɔnmɛ 'dhö, Bedhenisö waa‑ mɛ "pɛpɛ 'wo bho wo 'ko ‑ta bha 'wo ꞊wlü.
ACT 26:31 ꞊Dhɛ 'ö ꞊wa 'go wo "gblʋʋ, 'yö 'wo‑ pö wo 'ko ‑dhɛ: «'Mɛ ya 'wɔn yaa 'ö dho kë‑ këmɛ 'ka kö ‑wa zë‑ ‑wɔn 'gü "ɛɛn kö ‑wa ‑da ‑kaso 'gü ‑zianwo 'yaa 'dhö.»
ACT 26:32 ꞊Dhɛ 'ö ꞊ya kë "dhʋ̈ 'yö Aglipa ‑ya pö Fɛtusö ‑dhɛ: «꞊Ya kë ꞊dhɛ 'mɛ ya 'yii‑ pö 'nu ꞊dhɛ ‑yö ö "piʋ̈ 'ö ‑wo ‑gblüdë 'kpii‑ ‑kuu "dhiʋ̈ kö kwa ‑dho kwa kwaa‑ ‑zü, "kɛɛ ꞊dhɛ 'ö ‑kë ꞊dhɛ ‑ya "piʋ̈ kö 'ö ‑wo ‑a ‑kuu "dhiʋ̈ bha, kwa ‑dho ‑a 'to ‑kaso 'gü kö 'kwa‑ bɔ‑ ‑dhɛ.»
ACT 27:1 ꞊Dhɛ 'ö ‑gblüdë ‑nu bha‑ ‑nu ‑wʋ ꞊ya 'to‑ ‑bha do ꞊dhɛ yi ‑dho 'dho "yitagɔ 'gü Itadhi ‑sɛ 'gü, 'yö 'wo Pɔdhö waa‑ ‑kasogümɛ 'bha ‑nu dɔ "sɔdha ‑gɔmɛ do 'wo‑ ‑dhɛ Zudhiusö 'ö ‑kë Wlɔmö 'në 'ka bha‑ ‑gɔ. Zudhiusö bha ‑yö ‑kë Wlɔmö "sɛkɔɔnmɛ 'kpii‑ ‑dɩ ‑bha "sɔdha kpö ‑gɔmɛ do 'ka.
ACT 27:2 'Yö 'yi ‑ya "yitagɔ 'ö go Adramitö ‑pö 'gü 'ö dho "yitagɔ 'gbaannu ‑dhɛ 'ö Azi ‑sɛ 'gü ‑a ‑bha bha‑ 'gü 'yö 'yi dho. Adhitakö 'ö ‑kë Maseduanö mi 'ka 'ö go Tesadhonikö bha ‑yö ‑gun yi "piʋ̈ mü.
ACT 27:3 'Yö ‑dhɛkpaɔyi 'dhɛ 'ö dɔ‑ "piʋ̈ bha 'yi ꞊loo‑ 'ka Sidɔn ‑pö 'gü. Zudhiusö "klʋ‑ ‑gun ‑së Pɔdhö ‑bha 'ö ‑pʋtaasü nu‑ ‑dhɛ kö ‑yö 'dho zun ö "taɔngdë ‑nu 'wo gun mü ‑a ‑nu ‑dhɛ 'gü kö 'pë 'ö‑ ‑mawɔn 'dhö‑ ‑bha ‑wa nu‑ ‑dhɛ.
ACT 27:4 ꞊Dhɛ 'ö ꞊ya kë "dhʋ̈ 'ö 'ya go mü, 'yö "tɛɛ 'dhö ‑ya yi ‑bha. 'Yö yi ‑bha "ta 'yi‑ sü "sɛgɔ 'ö "yi ꞊zinng 'gü 'wo‑ ‑dhɛ Siplë ‑a "sɔɔ bha‑ 'gü bha, 'yi dho‑ 'ka "pɛan 'dhɛ 'ö "tɛɛ 'yii dho ‑ya yi ‑bha "yitagɔ ‑bha ‑a 'ka bha‑ 'ka.
ACT 27:5 'Yö yi ꞊weeyi ‑kan Sidhisi ‑sɛ waa‑ Panfidhi ‑sɛ ‑nu "sɔɔ, 'yö 'yi nu 'yi ꞊loo Midha ‑pö 'ö Dhisi ‑sɛ 'gü bha‑ 'gü.
ACT 27:6 ‑Dhɛ bha ꞊në "sɔdha këng do ‑gɔmɛ ‑yö "yitagɔ 'ö 'go sië Dhɛzandri ‑pö 'gü 'ö 'dho sië Itadhi ‑sɛ 'gü bha‑ yö‑ ‑bha, 'yö 'yi go yi ‑bha "yitagɔ 'yi nu‑ 'gü bha‑ 'gü 'yi dho 'yi ‑da "yitagɔ 'dhɛ bha‑ 'gü 'yö 'yi dho.
ACT 27:7 ꞊Dhɛ 'ö 'ya ꞊yɔɔn 'dɛdɛ wo yi "dhiʋ̈, 'yö "tɛɛ 'dhö ‑ya 'zü yi ‑bha "yitagɔ bha‑ ‑bha "gbɩɩ‑ 'ka. ‑A ‑wɔn 'gü yi yi ‑zlaɔ 'yi dho. 'Ö 'yi "ta sü ‑dhɛkpaɔyi 'gbɛ ꞊dede 'ka, 'yö 'yi gun ‑na ꞊loo Kinidö ‑pö "saan "dhiʋ̈ kö 'ya sëë bho. ꞊Dhɛ 'ö ‑kë ꞊dhɛ "tɛɛ 'yii "wɩ‑ ‑bha yi ‑gɔ kö 'yi 'dho 'zü "pɛan 'dhɛ bha‑ 'ka bha, 'yö 'yi‑ zë‑ 'gü "sɛ "pɛan 'dhɛ "yi ꞊zinng 'gü 'zü, 'wo‑ ‑dhɛ Klɛtö ‑sɛ bha‑ "sɔɔ, "pɛan 'ö bɔ "sɛ ‑kɔ "pɛan 'dhɛ 'wo‑ ‑dhɛ 'Kapö Salmɔnɛ bha‑ 'ka. "Pɛan 'dhɛ bha "tɛɛ 'yaa gun‑ 'ka.
ACT 27:8 "yitagɔ 'yi gun‑ 'gü bha ‑yö ‑nëng "kpʋng "piʋ̈, 'ö 'yi ꞊loo ‑dhɛ 'wo‑ ‑dhɛ ‑dhɛ «"yitagɔ dɔdhɛ ‑së» 'ö Dhasö ‑pö "sɔɔ bha‑ 'gü sëëbhodhe ꞊dede 'ka.
ACT 27:9 ꞊Dhɛ 'ö 'ya ‑dhɛkpaɔyi kpö kë 'mü, 'yö "ta 'sü ‑sü 'ö "yi ‑ta bha 'ö ‑kë ‑ziisü, ‑a ‑gɛn ‑mü ꞊dhɛ kö ‑kwɛ "dhiʋ̈ 'to ‑yi ꞊ya 'to klöö‑, kö Zuifö ‑nu ‑bha ꞊bhlëëkpɔdhe 'ö ꞊waa‑ kë 'wo‑ dɔ ꞊dhɛ Atanna ꞊ya wo ‑bha ꞊sɔng yaa ‑nu ‑mawɔn 'to bha ꞊waa‑ kë 'nu. (‑A "tʋ̈ng bha‑ 'ka kö "tɛɛ "gbɩɩ‑ nu "tʋ̈ng 'yaa ꞊gblɛɛn 'zü).
ACT 27:10 'Yö Pɔdhö ‑yö ‑dhio dɔ‑ ‑nu ‑ta 'ö‑ pö: «Gɔɔn‑ ‑nu, "ta ya 'kwa 'dho‑ 'ka "dhiʋ̈ ‑yö ‑dho ꞊gbaɔn, ‑a ‑gɛn ‑mü ꞊dhɛ "yitagɔ waa‑ ꞊kwɛɛ‑ ‑nu ‑zë ‑a ꞊gban ‑dho see‑, 'ö kwaa ‑dɩ 'pö 'yii kë ‑së 'ö kwa 'gü ‑yö ꞊see, (꞊dhɛ 'ö "dhʋ̈, ‑ka ‑kwa 'to yö kö "tʋ̈ng yaa bha ‑yö ziö).»
ACT 27:11 "Kɛɛ 'yö "sɔdha këng do ‑gɔmɛ bha 'ö ö ‑zʋ yö "yitagɔ dëmɛ waa‑ "dhiʋ̈ "ta 'sü ‑mɛ ‑dhɛ 'ö ziö‑ 'ka Pɔdhö ‑ta.
ACT 27:12 "Yitagɔ dɔdhɛ 'yi gun‑ 'gü bha 'yaa ‑së kö mɛ ‑yö 'to mü "tɛɛ "gbɩɩ‑ bha‑ "tʋ̈ng 'gü. Yö ꞊në‑ ‑wɔn 'gü 'yö 'mɛ waa‑ Pɔdhö ‑nu ‑wo gun "ta 'sü sië bha mɛgbɛdhɛ 'wo gun‑ "piʋ̈ ꞊dhɛ 'wo 'go mü kö 'wo 'dho ꞊weeyi ‑ta. 'Yö 'wo‑ "slë ꞊mɔɔ kö 'wo ꞊loo "yitagɔ dɔdhɛ 'dhɛ 'ö Fenisö, Klɛtö ‑sɛ 'gü bha‑ 'gü. Fenisö ‑dhɛ bha ‑yö ‑gun 'yënng‑ ‑pö ‑zian 'ka. Kë "dhʋ̈ kö 'wo "tɛɛ "gbɩɩ‑ "tʋ̈ng bha‑ kë mü.
ACT 27:13 ꞊Dhɛ 'ö ‑kë ꞊dhɛ "tɛɛ ꞊zɔngsü 'ö go "sia‑ ꞊yën bha ‑yö ‑gun ziö sië bha, 'yö ‑kë ‑nu 'gü ꞊dhɛ 'wɔn ‑nu 'wo‑ ‑ya 'ko "dhiʋ̈ ‑kë bha ‑yö ‑dho kë ꞊dhɛ ‑kɔ 'wo wo ‑zʋ gɔn‑ 'ka bha‑ 'dhö. 'Yö 'wo ‑piö kpö 'gbiin‑ 'ö ‑kë "yitagɔ 'gbaannu 'ka ‑pë 'ka 'ö "yi ꞊wlöö bha‑ bho‑ ‑gɔ, 'yö zun "ta 'sü ‑sü ‑bha "tɛɛ bha‑ ‑kɔ 'ka, 'yö 'wo dho‑ 'ka "sɛ "pɛan 'ö "yi ꞊zinng 'gü 'wo‑ ‑dhɛ Klɛtö bha‑ "pɛan "piʋ̈.
ACT 27:14 ꞊Dhɛ 'ö "tʋ̈ng 'dɛdɛ 'bha ꞊ya ziö, 'yö "tɛɛ "gbɩɩ‑ 'wo‑ ‑dhɛ «"tɛɛ "gbɩɩ‑ 'ö go "dhuʋ̈‑ ꞊yën» 'ö go Klɛtö ‑sɛgɔ 'ö "yi ꞊zinng 'gü bha‑ "piʋ̈ ꞊yën bha 'yö ‑ya ziö ‑sü ‑bha "gbɩɩ‑ 'ka "pɛan bha‑ ‑ta.
ACT 27:15 'Yö yi ‑bha "yitagɔ ꞊bang "bang kë ‑sü zü bho. 'Yö 'yi‑ "slë ꞊mɔɔ kö 'yi 'dho yi "dhiʋ̈ "tɛɛ 'go ‑zian 'ka, "kɛɛ 'yii ꞊mɔɔ‑ ‑bha. 'Yö 'yi yi ꞊kwaa yi ‑bha "yitagɔ bha‑ ‑zü 'yö "tɛɛ 'dhö‑ ‑blü 'yö dho‑ 'ka "pɛan 'ö ‑dhi ‑dhɛ ‑a 'ka.
ACT 27:16 'Yö 'yi dho 'yi ꞊loo "sɛ "pɛan 'dɛdɛ 'ö "yi ꞊zinng 'gü 'wo‑ ‑dhɛ Kloda bha‑ "sɔɔ. 'Yö 'yi bɔ‑ "pɛan 'dhɛ 'ö‑ ‑bha "tɛɛ 'yaa "gbɩɩ‑ bha‑ 'ka, 'yö 'yi "yitagɔ 'dɛdɛ ‑sü 'ö ‑kë ‑kplü ‑sü 'ka "yitagɔ 'kpiisü ꞊taama bha‑ bho 'mü kë "dhʋ̈ kö "yi kpö 'ya 'dho‑ 'wü. "Kɛɛ ‑a ‑bho mü ‑sü ‑yö ‑kë "gbɩɩ‑ ꞊dedewo.
ACT 27:17 'Yö 'wo "yitagɔ 'në 'dɛdɛ bha‑ ꞊wlü 'wo‑ dɔ‑ 'kpiisü ‑ta, 'yö 'wo bhiëga ꞊klëën‑ 'kpiisü bha‑ ‑zü ‑zü kö ‑yö "yitagɔ bha‑ 'kun glengdhö (kö 'ya 'dho 'wü). 'Yö "suʋ̈ 'dhö ‑ya ‑nu kë ‑sü ‑bha "ta 'sü ‑sü 'ö "yi ‑ta bha‑ 'gü, ‑a ‑gɛn ‑mü ꞊dhɛ ‑wo wo ‑zʋ ‑gɔn ꞊dhɛ wo ‑bha "yitagɔ ‑dho ‑gban "yɛɛn ‑tɔn ‑nu 'wo "yi ꞊wlöö Dhibi ‑sɛ "sɔɔ bha‑ ‑nu ‑bha. 'Yö 'wo sɔ "kplü 'ö "tɛɛ ꞊ya dɔ‑ 'gü 'ö "yitagɔ dho "dhiʋ̈ bha‑ bho 'mü. 'Yö 'wo ꞊kwaa "tɛɛ ‑zü 'yö‑ ‑nu ‑bha "yitagɔ ‑blü zian 'ö ‑dhi ‑a 'ka.
ACT 27:18 "Tɛɛ "gbɩɩ‑ bha ‑yö ‑gun ziö sië yi ‑bha "dhʋ̈ "gbɩɩ‑ 'ka 'ö dho‑ 'ka "dhiʋ̈ ‑kpɛawo. ‑A ‑dhɛkpaɔyi 'dhɛ 'ö dɔ‑ "piʋ̈, 'yö 'wo pë ‑nu 'wo gun "yitagɔ 'gü bha‑ 'bha ‑nu ꞊wɛnng "yi ꞊bhaa.
ACT 27:19 ‑A ‑dhɛkpaɔyi 'dhɛ 'ö dɔ‑ "piʋ̈ 'zü, 'yö woo‑ ꞊dede 'wo pë 'bha ‑nu 'wo "yitagɔ "ta sü bha‑ 'bha ‑nu ꞊wɛnng "yi ꞊bhaa.
ACT 27:20 'Yii yi "yan ‑kpan 'yënng‑ ‑bha ‑dhɛkpaɔyi 'gbɛ ꞊dede 'ka, "ɛɛn "susëngga ‑zian ‑bha kö "tɛɛ "gbɩɩ‑ bha ‑yö ziö sië "dhʋ̈ ‑kpɛawo (kö yi 'dho ‑zian ꞊gbaan ꞊dhɛng yi ‑gɔ ‑a ‑kë "dhʋ̈ ‑sü bha‑ 'gü). 'Yö 'yi yi ‑zʋ ‑gɔn ꞊dhɛ 'yii dho dha 'zü.
ACT 27:21 'Mɛ 'wo "yitagɔ 'gü 'wii pë ‑bhö ‑dhɛkpaɔyi 'gbɛ ꞊dede 'ka. 'Yö Pɔdhö ‑yö ꞊wlü‑ ‑nu ꞊gban "pɛpɛ wëëdhö 'ö‑ pö: «Gɔɔn‑ ‑nu, ꞊ya kë ꞊dhɛ ka ka "tʋ ‑to n ‑wʋ ‑bha 'ö 'kwa to Klɛtö kö ‑yö ‑dho kë ‑së. Kö 'wɔn "gbɩɩ‑ 'ö nu kwa ‑ta ya 'yii 'dho nu kwa ‑ta 'nu, "ɛɛn kö pë 'bha 'yii dho see‑ kwa ‑bha.
ACT 27:22 "Kɛɛ "tʋ̈ng ya‑ 'gü a‑ ‑dhɛ ka ‑gɔ kö 'ka ka faan dɔ, ‑a ‑gɛn ‑mü ꞊dhɛ mɛ 'bha 'yii dho ga ka kpö 'gü, "yitagɔ bha yöö do ꞊në 'yii 'dho dha.
ACT 27:23 A‑ 'wɔn ‑dɔ, ‑a ‑gɛn ‑mü ꞊dhɛ Atanna 'a‑ ‑bha 'ka 'ö 'a‑ ‑bha yë kë sië bha‑ ‑bha "kië do ‑yö ‑wo n ‑ta ꞊dɛɛ gbeng,
ACT 27:24 'yö‑ pö n ‑dhɛ: «Pɔdhö, "suʋ̈ 'ya 'dho i kë, ‑a ‑dhɛa ‑bha ꞊dhɛ 'i 'dho "sɛkɔɔnmɛ 'kpii‑ ‑kuu "dhiʋ̈ (kö 'i dhiang zë‑ ‑dhɛ). ꞊Dhɛ 'ö ‑kë ꞊dhɛ Atanna "gblü ‑yö ‑së 'pö bha, ‑yö ‑dho 'wɔn ‑së kë i ‑dhɛ, ‑a ‑gɛn ‑mü ꞊dhɛ mɛ "pɛpɛ 'wo i "piʋ̈ "yitagɔ 'gü bha ‑yö ‑dho ‑a ‑nu ꞊gban dha 'pö.»
ACT 27:25 'Yö Pɔdhö ‑yö dhiang zë‑ ‑nu ‑dhɛ 'ö dho‑ 'ka ö "dhiʋ̈ 'ö‑ pö: «Gɔɔn‑ ‑nu, 'wɔn 'ö Atanna ‑bha "kië ‑ya pö bha‑ ‑wɔn 'gü ‑ka ka faan dɔ, ‑a ‑gɛn ‑mü ꞊dhɛ n 'dhang bho ‑sü ‑yö Atanna "dhiʋ̈, ‑yö ‑dho ‑a kë ꞊dhɛ ‑kɔ 'ö‑ pö‑ 'ka n ‑dhɛ bha‑ 'dhö.
ACT 27:26 "Kɛɛ ‑a ‑dhɛ ‑dho kë 'ya‑, ‑a ‑gɛn ‑mü ꞊dhɛ kwa ‑bha "yitagɔ ‑zë ‑dho 'wü "tɛɛ "gbɩɩ‑ 'ö dho kwa ‑blü "kpʋng "piʋ̈ ‑dhɛ do 'bha 'gü bha‑ kaɔ.
ACT 27:27 'Sa "tɛɛ "gbɩɩ‑ bha 'ö ‑ya ziö ‑sü ‑bha ‑a gbeng 'gü ‑kaɔng do ga ‑yiisiö ‑naa ꞊në 'kwa "wɩ sië‑ 'ka "dhʋ̈ bha, "kɛɛ kö ‑yö 'dho sië yi 'ka ꞊weeyi 'wo‑ ‑dhɛ Meditedhane bha‑ ‑ta ‑kpɛawo. ꞊Dhɛ 'ö gbeng ꞊zinng 'gü ꞊ya 'to klöö‑, 'yö "yitagɔ ‑yëkëmɛ ‑nu 'wo wo ‑zʋ gɔn ꞊dhɛ yi ꞊yɔɔn sië "sɛ "sɔɔ.
ACT 27:28 'Yö‑ ‑nu ‑bha bhië" ga 'wo "yi ꞊wlöö ‑dhɛ dan‑ 'ka bha 'wo‑ ꞊lɔɔ "yi ꞊wlöö, 'yö "yiwlöödhɛ ‑naa 'dhö ‑kë ‑gɛnyan ‑kaɔng ‑yaaga ö ga "saɔplɛ. ꞊Dhɛ 'ö ꞊wa ꞊yɔɔn 'bha wo wo "dhiʋ̈, 'yö 'wo‑ ‑zuö 'bha wo "yi ꞊bhaa, 'yö ‑kë 'zü ‑deewo ‑gɛnyan ‑kaɔng ꞊plɛ ö ga "saaga.
ACT 27:29 'Yö 'wo ‑ya wo ‑zʋ 'gɔn ‑sü ‑bha ꞊dhɛ 'wa ꞊yɔɔn 'bha wo wo "dhiʋ̈, "tɛɛ‑ ‑dho ‑nu ‑bha "yitagɔ ‑gban ‑gwë ‑bha, ‑a ‑gɛn ‑mü ꞊dhɛ kö "yi 'yaa ꞊gblɛɛn 'zü. 'Yö 'wo wo ‑bha ‑piö kpö ‑yiisiö 'ö ‑kë "yitagɔ 'gbaannupë 'ka bha‑ ‑nu ꞊lɔɔ "yi ꞊bhaa "yitagɔ ꞊taama, 'yö ‑gban mü, "kɛɛ kö "suʋ̈ ‑ya ‑nu kë sië kö ‑a ‑nu ‑zʋ ‑yö dun sië 'pö ꞊dhɛ ‑dhɛ ‑yö ꞊kpaɔ "vaandhö.
ACT 27:30 'Yö yi ‑bha "yitagɔ ‑yëkëmɛ ‑nu 'wo‑ "slë ꞊mɔɔ kö 'wo ꞊dua "yitagɔ 'gü, 'yö 'wo "yitagɔ 'në 'dɛdɛ ‑sü 'ö‑ 'kpiisü ‑ta "dhʋ̈ng 'gü bha‑ ꞊lɔɔ "yi ꞊bhaa "yitagɔ 'kpiisü bha‑ "dhiʋ̈, kö ‑wa kë sië ꞊dhɛ 'pë woo ‑da 'gü kö 'wo "yitagɔ 'gbaannu ‑bha ‑pë ‑nu bha ꞊në‑ ‑gban ꞊gblɛɛn 'në 'bha bho ‑a 'dhö.
ACT 27:31 "Kɛɛ ꞊dhɛ 'ö Pɔdhö ‑ya ‑dhɛ yö, 'yö‑ pö "sɔdha këng do ‑gɔmɛ waa‑ "sɔdha ‑nu bha‑ ‑nu ‑dhɛ: «Kwaa‑ "yitagɔ ‑yëkëmɛ ‑nu ya 'wii 'to "yitagɔ ya‑ 'gü, mɛ ꞊gban ka 'gü ‑dho see‑.»
ACT 27:32 ꞊Dhɛ 'ö ꞊ya kë "dhʋ̈, 'yö "sɔdha ‑nu 'wo "yitagɔ sɛɛn" 'në ‑sü bha‑ bhië" ga 'ö ‑kplü ‑a 'kpiisü ‑bha bha‑ ‑kan 'yö 'wo ꞊kwaa‑ ‑zü "yi ‑ta 'yö dho.
ACT 27:33 ꞊Dhɛ 'ö ‑dhɛ 'gü 'dhö "pʋ sië kö "tʋ̈ng bha ꞊ya ziö, 'yö Pɔdhö ‑yö ꞊bhɛa‑ ‑nu ‑dhɛ kö ‑wo pë ‑bhö. 'Yö‑ pö‑ ‑nu ‑dhɛ: «'Ka ‑ya ka ‑dɩ ‑wɔn zuën ‑ta ‑a ‑dhɛkpaɔyi ‑kaɔng do ga ‑yiisiö ꞊në ꞊dɛɛ, 'kii pë 'bha ‑bhö ꞊kö.
ACT 27:34 ꞊Dhɛ 'ö "dhʋ̈ a ‑bhɛa ka ‑dhɛ kö 'ka pë ‑bhö, ‑a ‑gɛn ‑mü ꞊dhɛ ka ‑mawɔn ‑ya ‑bha kö 'ka faan ꞊slɔɔ kö 'ka dha. Pë 'bha 'yii 'dho mɛ 'bha ka kë.»
ACT 27:35 ꞊Dhɛ 'ö ꞊ya bo‑ pö "dhʋ̈ ‑sü 'ka, 'yö 'bluu‑ sü 'yö ꞊bhɛa Atanna ‑dhɛ ‑a ‑nu ꞊gban "pɛpɛ wëëdhö mü, Atanna nuɛ" bho ‑sü 'ka ‑bhöpë 'ö‑ nu‑ ‑nu ‑dhɛ bha‑ ‑wɔn 'gü, 'yö‑ "kplü bho, 'yö zun‑ ‑bhö ‑sü ‑bha.
ACT 27:36 'Yö‑ ‑nu zuë" 'dhö ‑kë ‑sɛa 'yö 'wo‑ ‑bhö 'pö.
ACT 27:37 'Mɛ 'yi gun "yitagɔ bha‑ 'gü, yi ‑gun mɛ këng ꞊plɛ ‑kɔ "saɔplɛ waa‑ mɛ "saɔdo.
ACT 27:38 ꞊Dhɛ 'ö ꞊wa pë ‑bhö ꞊wa 'kën, 'yö 'wo 'bluu‑ ‑kë 'ka ‑pë 'wo‑ ‑dhɛ "kwi ‑wʋ 'gü ble bha‑ 'dhɛ 'ö gun‑ ‑nu ‑gɔ "yitagɔ 'gü bha‑ ꞊loo "yi ꞊bhaa kö "yitagɔ ‑yö 'to 'fʋ̈ʋ̈‑.
ACT 27:39 ꞊Dhɛ 'ö ‑dhɛ ꞊ya ꞊kpaɔ, 'yö yi "yan 'dhö ‑kpan "sɛ ‑bha yi "dhiʋ̈, "kɛɛ yi ‑bha "yitagɔ ‑yëkëmɛ ‑nu 'wii‑ dɔ. 'Yö 'wo ꞊weeyi ‑gbeng bho ‑dhɛ "kpʋng "dhiʋ̈ ‑dhɛ ‑së do 'bha yö. 'Yö 'wo‑ "slë ꞊mɔɔ kö 'wo 'dho wo ‑bha "yitagɔ ‑gban mü.
ACT 27:40 'Yö "yitagɔ ‑yëkëmɛ 'bha ‑nu 'wo ‑piö kpö ‑nu 'wo "yitagɔ ‑gban bha‑ ‑nu bhië" ‑kan 'yö 'wo dho "yi ꞊bhaa, kö mɛ 'bha ‑nu ‑dɩ 'pö ‑wo "dhü "pɛn ‑nu 'wo "yitagɔ dɔ‑ 'ka ꞊zinng 'gü 'wo ‑kë "yitagɔ ꞊taama bha, ‑wo bhiëga "pʋ sië‑ ‑bha kö ‑wo "yitagɔ dɔ‑ 'ka ꞊zinng 'gü 'zü ‑deewo. 'Yö 'wo sɔ "kplü do ꞊wlü "yitagɔ "dhiʋ̈ ꞊yën, kö "tɛɛ ‑yö "yitagɔ ‑blü "kpʋng "dhiʋ̈.
ACT 27:41 "Kɛɛ 'yö yi ‑bha "yitagɔ bha 'ö ‑gban "yɛɛn ‑tɔn bha "yi ꞊wlöö 'yö 'gbaannu, 'yö to mü; ‑a ‑gɛn ‑mü ꞊dhɛ kö‑ ‑gɔ ꞊ya ‑gban "yɛɛn 'gü, "kɛɛ kö ‑a "pɛan 'dhɛ 'ö ꞊taama bha ‑yö 'wü sië "yikpö ‑nu 'wo ‑ma sië‑ ‑bha "gbɩɩ‑ 'ka "dhʋ̈ do bha‑ ‑wɔn 'gü.
ACT 27:42 ‑Yö ‑gun "sɔdha ‑nu "piʋ̈ ꞊dhɛ 'wo ‑kasogümɛ ‑nu zë, kë "dhʋ̈ 'ö 'wo "yi ‑kë 'wo dha 'ö 'wo ꞊dua.
ACT 27:43 "Kɛɛ "sɔdha këng do ‑gɔmɛ bha ‑yö ‑gun "piʋ̈ ꞊dhɛ 'ö Pɔdhö ‑zë dha, 'yö‑ ‑wɔn 'gü 'ö‑ pö‑ ‑nu ‑dhɛ ‑wo mɛ ꞊gban dha. 'Yö‑ pö 'mɛ 'wo dɔ "yi kë ‑dhɛ 'ka ‑a ‑nu ‑dhɛ ‑wo ‑pö "yi ꞊bhaa kö ‑wo "yi kë ‑wo 'dho "kpʋng ꞊taa.
ACT 27:44 'Yö‑ pö mɛ ‑kpɛa ‑nu ‑dhɛ ‑wo ‑pö "yi ‑ta 'pö kö ‑wo ‑kplü "yitagɔ "pɛn ‑nu "ɛɛn "dhü "pɛn 'bha ‑nu 'wo 'go sië‑ 'gü bha‑ ‑nu ‑bha. Mɛ ꞊gban yi ‑dha ‑kɔ bha ꞊në‑ 'gü.
ACT 28:1 ꞊Dhɛ 'ö mɛ ꞊gban 'yi dha, 'yö 'yi‑ ma ꞊dhɛ "sɛ 'ö "yi ꞊zinng 'gü 'ö 'yi bɔ‑ 'gü 'yi dha bha ‑wa ‑dhɛ ‑dhɛ Maltö.
ACT 28:2 'Mɛ 'wo gun "sɛ bha‑ 'gü bha‑ ‑nu "klʋ ‑yö ‑dhi yi ‑bha ꞊dedewo. ꞊Dhɛ 'ö ‑kë ꞊dhɛ dha ‑yö ‑gun ban sië kö "nɛnɛ ꞊ya kë 'gbɛ bha, 'yö 'wo pɛng 'kpii‑ do bha ‑ya, 'yö 'wo yi ‑dhɛ ‑bha mü.
ACT 28:3 'Yö Pɔdhö ‑yö "wɔ "kang 'bha ‑nu sü kö 'ö‑ ‑nu ‑da pɛng 'gü, 'yö ‑mlɛɛ ‑yö go "wɔ "kang bha‑ 'gü pɛng "tɛɛ bha‑ ‑wɔn 'gü, 'yö Pɔdhö kun‑ ‑kɔ ‑bha 'yö dun‑ ‑kɔ ‑bha mü.
ACT 28:4 ꞊Dhɛ 'ö 'mɛ 'wo "sɛgɔ bha‑ 'gü ꞊wa ‑mlɛɛ bha‑ yö kö ‑yö dun ‑sü 'ka Pɔdhö ‑kɔ bha ‑dhɛ ‑kɔ bha‑ 'dhö 'yö 'wo‑ pö wo 'ko ‑dhɛ: «Gɔndënë ya kwaa 'dho ‑yö ‑dho kë mɛzëmɛ 'ka, ‑a ‑gɛn ‑mü ꞊dhɛ Atanna 'ö 'yaa ꞊flü kë bha 'yii "wɩ‑ ‑bha kö ‑yö dha, "kɛɛ kö ꞊ya dha ꞊weeyi ‑zë ‑gɔ.»
ACT 28:5 "Kɛɛ 'yö Pɔdhö ‑yö ö ‑kɔ ꞊kpëng pɛng ‑ta, 'yö ‑mlɛɛ bha 'ö go‑ ‑kɔ ‑bha 'ö ‑pö pɛng 'gü, 'yö‑ bhaa 'yii‑ kë ‑kɔ 'bha 'gü.
ACT 28:6 ‑Yö ‑gun kë sië mɛ ‑nu 'gü ꞊dhɛ ‑yö ‑dho ‑bhla "ɛɛn ‑yö ‑dho ga ‑mlɛɛ bha‑ bhaa "dhiʋ̈ "sia‑ mü. "Kɛɛ ꞊dhɛ 'ö‑ ‑dhɛ ꞊ya ꞊gwëë, 'ö ꞊waa‑ dɔ ꞊dhɛ pë 'bha 'yii‑ kë, 'yö 'wo wo ‑wʋ ꞊slëë, 'yö 'wo ‑ya pö ‑sü ‑bha ꞊dhɛ Atanna ‑mü ‑a 'ka.
ACT 28:7 ‑Dhɛ 'bha‑ ‑gun ‑dhɛ 'wo gun‑ ‑bha bha‑ "sɔɔ mü 'ö gun "sɛ bha‑ 'gü ‑mɛ ‑nu ‑gɔmɛ 'wo‑ ‑dhɛ Pibliüsö bha‑ ‑bha ‑dhɛ 'ka. Pibliüsö bha 'pö, ‑yö yi ‑dhɛng bun ‑dhɔ 'gü 'ö 'yi ‑wɔ ‑gɔ 'kɔɔdhö ‑dhɛkpaɔyi ‑yaaga 'ka.
ACT 28:8 Pibliüsö dë ‑yö ‑gun wɔ sië dhii‑ ‑ta, ‑a ‑gɛn ‑mü ꞊dhɛ "nɛnɛ waa‑ ‑tɔɔtɔɔ ‑wo gun‑ kë sië, 'yö Pɔdhö ‑yö dho‑ ‑gɔ 'kɔɔdhö 'yö ö ‑kɔ kpa‑ ꞊gbin‑ 'yö ꞊bhɛa Atanna ‑dhɛ ‑a ‑wɔn 'gü, 'yö‑ ‑bha "yua ‑nu bha 'wo bo.
ACT 28:9 ꞊Dhɛ 'ö ꞊ya kë "dhʋ̈, 'yö "yuëdhi ‑nu 'wo "sɛgɔ bha‑ 'gü 'wo nu 'pö, 'yö‑ ‑nu ‑bha "yua ‑yö bo.
ACT 28:10 ‑Wo yi ꞊bhlëë ‑ya ‑kɔ ꞊gban "pɛpɛ suu 'gü ‑dhɛ bha‑ 'gü. ꞊Dhɛ 'yi yi ‑bha ꞊kwɛɛ‑ ‑nu dhu, 'yö pë "pɛpɛ 'ö yi ‑mawɔn dho zun‑ ‑bha yi ‑bha "ta ‑zian bha‑ ‑ta, 'yö 'wo‑ nu yi ‑dhɛ.
ACT 28:11 ꞊Dhɛ 'ö "su ‑yaaga ꞊ya ziö, 'yö 'yi ‑ya "yitagɔ 'ö go Dhɛzandri ‑pö 'gü 'wo‑ ‑dhɛ «'peng‑ ‑zlan ‑nu» 'ö "tɛɛ "gbɩɩ‑ "tʋ̈ng bha‑ ‑kë ‑dhɛ bha‑ 'gü bha‑ 'gü.
ACT 28:12 'Yö 'yi dho 'yi ꞊loo Siidhakusö ‑pö 'gü, 'yö 'yi ‑dhɛkpaɔyi ‑yaaga ‑kë mü.
ACT 28:13 ‑Dhɛ 'ya 'go mü, 'yö 'yi bɔ‑ "sɛn ‑ta 'yi dho 'yi ꞊loo Dhezio 'plöö. ꞊Dhɛ 'ö ‑dhɛ ꞊ya ꞊kpaɔ, 'yö "tɛɛ 'ö go "yi ‑zü ‑gɔ bha 'ö ‑ya ziö ‑sü ‑bha. Yi ‑dhɛkpaɔyi ꞊plɛ "gbeng ꞊në‑ ‑kë "yitagɔ 'gü 'yö 'yi ꞊loo Puzɔdhö ‑pö 'ö "yitagɔ dɔdhɛ 'ka bha‑ 'gü, ('yö 'yi go "yitagɔ 'gü).
ACT 28:14 Yi ‑kpan 'dhang ‑bho Yesu "dhiʋ̈ ‑mɛ ‑nu 'bha ‑nu ‑bha 'pö‑ bha‑ ꞊në‑ 'gü 'yö 'wo ꞊bhɛa yi ‑dhɛ kö 'yi "dhɔɔgɔ do kë mü, ('yö 'yi ‑wɩ ‑bha). 'Yö 'yi "dhɔɔgɔ do ‑kë ‑a ‑nu "piʋ̈ mü 'yö 'yi gun ‑na 'dho Wlɔmö.
ACT 28:15 ꞊Dhɛ 'ö 'dhang ‑bho Yesu "dhiʋ̈ ‑mɛ ‑nu 'wo Wlɔmö ꞊waa‑ ‑wapö ma ꞊dhɛ yi zian ‑ta yi nu sië, 'yö 'wo nu dɔ yi ‑gɔ zian‑, 'wo nu "dhʋ̈ 'wo ꞊loo Apiusö "dhɔɔkwëëdhö 'yö 'yi ‑kpan 'kwëë‑ mü. ꞊Dhɛ 'ya 'dho 'ya ꞊loo ‑dhɛng ꞊yëëbhodhɛ 'wo‑ ‑dhɛ 'kɔ ‑yaaga "dhiʋ̈ ‑dhɛ bha‑ 'gü, 'yö 'yi ‑kpan 'zü mɛ kpö 'bha ‑bha mü kö ‑wo nu sië. ꞊Dhɛ 'ö Pɔdhö ꞊ya ‑kpan mɛ "pɛpɛ 'wo nu ‑dɔ yi ‑gɔ zian bha‑ ‑nu ‑bha, 'yö Atanna nuɛ" bho, 'yö faan ꞊slɔɔ 'yö 'yi ꞊kpaa 'kwëë‑ 'yi dho Wlɔmö 'plöö.
ACT 28:16 ꞊Dhɛ 'ö 'ya ‑loo Wlɔmö, 'yö Wlɔmö ‑pö ꞊kɔɔnmɛ ‑nu 'wo ‑wɩ ‑bha kö Pɔdhö ‑yö 'to ö ꞊yëë "dhiʋ̈, kö 'ya 'dho 'dho ‑kaso 'gü, "kɛɛ 'yö 'wo "sɔdha do ‑ya ‑gɔ "dhiʋ̈ kö 'ya 'dho ꞊dua.
ACT 28:17 ꞊Dhɛ 'ö ‑dhɛkpaɔyi ‑yaaga ꞊ya ziö, 'yö Pɔdhö ‑yö Zuifö ‑nu ‑bha mɛ zizi ‑nu 'wo Wlɔmö ‑pö 'gü ‑a ‑nu ‑dhɛ ö ꞊yëë "dhiʋ̈. ꞊Dhɛ 'ö ꞊wa ꞊loo 'ko ‑ta, 'yö‑ pö‑ ‑nu ‑dhɛ: «N dheebhang ‑nu, 'mii pë yaa 'bha kë kwa ‑bha "sɛgümɛ ‑nu 'ka "ɛɛn kwa "bhɛma ‑nu wɔ ‑kɔ 'ka, "kɛɛ Zuifö ‑nu ‑wo n ‑kun 'wo n ‑da ‑kaso 'gü Zedhizadhɛmö, 'yö 'wo n dɔ Wlɔmö ‑mɛ ‑nu ‑gɔ.
ACT 28:18 'Yö 'mɛ 'wo bha 'wo n dhɛɛ" kpɔ 'pë 'a‑ ‑kë ‑a 'ka, 'yö 'wo‑ "slë ꞊mɔɔ kö ‑wo wo kwaa‑ n ‑zü, ‑a ‑gɛn ‑mü ꞊dhɛ 'pë 'kö 'a dho‑ kë kö ‑yö kë n zë ‑gɛn 'ka 'yii ꞊slɔɔ.
ACT 28:19 "Kɛɛ Zuifö ‑nu ‑gɔmɛ ‑nu 'wii "wɩ‑ ‑bha. 'Yö mang ‑dɩ 'pö 'ö ‑kë n 'gü ‑së kö "sɛkɔɔnmɛ 'kpii‑ ‑yö za bha‑ dɔ yi ꞊zinng 'gü. "Kɛɛ ma ‑zë 'mii 'dho za ‑ya ma "sɛgümɛ ‑nu ‑bha.
ACT 28:20 'Pë 'ö ‑kë 'yö 'a ka ‑dhɛ bha 'yö bha. 'Wɔn 'ö ‑gban Atanna ‑bha ‑Yamɛ 'ö Izraɛdhö ‑sɛgümɛ ‑nu 'wo ‑ya ‑gɔ bha‑ ‑wɔn ‑bha bha ꞊në 'a ('dhang bho‑ "dhiʋ̈ 'yö 'a) ‑kasogümɛ 'ka‑ ‑wɔn 'gü, 'yö 'a ‑dɔ lɔɔga 'ka ka kpö 'gü ꞊dɛɛ ya.»
ACT 28:21 'Yö 'wo‑ pö‑ ‑dhɛ: «'Sëëdhɛ 'ö dho 'go Zude ‑sɛ 'gü kö ‑yö 'wɔn 'ö ‑gban i ‑bha ‑a pö yi ‑dhɛ 'yii‑ yö, ꞊ya 'go mü 'zü kö yi dheebhang Zuifö ‑nu 'wo mü kö ‑a mɛ 'bha ‑zian ‑yö 'go mü kö ‑ya ‑gɛn dɔ yi ‑dhɛ, "ɛɛn kö ‑yö dhiang yaa 'bha zë i ‑bha 'yii kë,
ACT 28:22 "kɛɛ ‑yö yi "piʋ̈ ꞊dhɛ 'i i zuëpiʋ̈wɔn pö yi ‑dhɛ, ‑a ‑gɛn ‑mü ꞊dhɛ yi 'wɔn ‑dɔ ꞊dhɛ ka ‑bha ‑zʋ ‑yö Atanna ‑dhɛ ‑kɔ bha ‑wa ‑dhiang yaa ‑zë ‑dhɛ ꞊gban "pɛpɛ 'gü.»
ACT 28:23 'Yö waa‑ Pɔdhö ‑nu 'wo yi do kpɔ wo 'ko ‑gɔ. ꞊Dhɛ 'ö yi bha ꞊ya ꞊loo, 'yö mɛ kpö 'gbɛ 'wo nu Pɔdhö ꞊yëë "dhiʋ̈. 'Yö sü dhia" "piʋ̈ ‑bha, 'ö dho 'ö zun‑ 'ka yɛan" "piʋ̈ ‑bha, 'yö Pɔdhö ‑yö 'wɔn ‑nu 'wo ‑gban Atanna ‑bha ‑gblüdëdhɛ ‑bha ‑a ‑gɛn pö‑ ‑nu ‑dhɛ. 'Yö‑ "slë ꞊mɔɔ 'pö kö ‑wo (Yesu dɔ ꞊dhɛ 'mɛ 'ö Atanna ‑ya ‑ya ‑a ‑nu dhamɛ 'ka ‑a 'dhö, kö ‑wo) "wɩ‑ ‑wɔn ‑bha, 'yö bɔ‑ 'ka Moizö ‑bha 'tɔng‑ 'sëëdhɛ ‑ta, 'yö dho 'yö ‑wo 'ka Atanna ‑wʋdhiʋ̈loomɛ ‑nu ‑gɔ 'sëëdhɛ 'gü.
ACT 28:24 'Yö mɛ 'bha ‑nu 'wo 'dhang bho Pɔdhö zë ‑dhiang bha‑ "dhiʋ̈, 'yö 'wo ‑wɩ Atanna ‑wʋ ‑bha. 'Yö mɛ 'bha ‑nu ‑dɩ 'pö 'wii 'dhang bho‑ ‑wʋ "dhiʋ̈.
ACT 28:25 'Yö 'wo ‑ya zaɔdhe ‑da ‑sü ‑bha wo "kwëë. ꞊Dhɛ 'wo 'dho sië zaɔdhe bha‑ 'ka wo ‑gɔ 'kɔɔdhɛ ‑nu 'gü, 'yö Pɔdhö ‑ya pö‑ ‑nu ‑dhɛ: «'Wɔn 'ö 'Nii‑ "slʋ̈ʋ̈slʋ̈ ‑ya pö ka "bhɛma ‑nu ‑dhɛ yi 'bha 'ka 'ö bɔ‑ 'ka Atanna ‑wʋdhiʋ̈loomɛ Ezai ‑ta bha 'yaa ꞊sua 'ka.
ACT 28:26 ‑A ‑gɛn ‑mü ꞊dhɛ Atanna ‑ya ‑pö ‑dhɛ: «‑Bhö 'dho i ‑gɔ "sɛgümɛ ‑nu "piʋ̈ kö 'i‑ pö‑ ‑nu ‑dhɛ: «Ka ‑dho n ‑wʋ ma 'kpakpadhö, "kɛɛ 'kii 'dho‑ 'gü ma, 'ka ‑dho ‑dhɛ ‑ga 'kpakpadhö, "kɛɛ 'kii 'dho ‑dhɛ 'bha yö,
ACT 28:27 ‑a ‑gɛn ‑mü ꞊dhɛ ‑a ‑nu zuëga ꞊ya kë "drɔɔdrɔ 'ka ꞊dhɛ ꞊nii ‑gwë 'dhö. ꞊Wa wo "tʋ "dhiʋ̈ ‑te ‑gban kö 'wa 'dho 'wɔn ma, 'yö ꞊wa wo "yan ta kpɛnngkpɛnngdhö kö 'wa 'dho ‑dhɛ yö, ‑wa ‑kë "dhʋ̈ kö 'wa 'dho 'wɔn 'gü ma kö ‑a ‑nu zuë" 'ya 'dho slëë‑ n "piʋ̈ 'ö 'a‑ ‑nu dha.»
ACT 28:28 'Yö Pɔdhö ‑yö ö ‑bha ‑da ‑ta 'ö‑ pö: «꞊Dhɛ 'ö "dhʋ̈, ‑kaa 'wɔn dɔ ꞊dhɛ ꞊taamasü ya‑ 'gü Atanna ꞊ya ö ‑bha mɛ dha ‑wʋ bha‑ bɔ 'mɛ 'waa Zuifö 'ka‑ ‑nu ‑dhɛ. Wo ‑zë ('ya‑ pö‑ ‑nu ‑dhɛ) ‑wo ‑dho wo "tʋ 'to‑ ‑bha.»
ACT 28:29 [꞊Dhɛ 'ö Pɔdhö ꞊ya bo 'wɔn ‑nu bha‑ ‑nu pö ‑sü 'ka, 'yö Zuifö ‑nu 'wo dho wo ‑gɔ 'kɔɔdhɛ ‑nu 'gü, zaɔdhe ‑da wo "kwëë ‑sü 'ka ꞊dedewo.]
ACT 28:30 ‑Kwɛ ꞊plɛ ꞊në‑ Pɔdhö ‑ya kë 'kɔ 'ö‑ sü bha‑ 'gü. Mɛ "pɛpɛ 'wo nu zun‑ ‑dhɛ 'gü ‑wo ‑kpan ‑bha ‑dhɛ bha ꞊në‑ 'gü.
ACT 28:31 'Yö Atanna ‑bha ‑gblüdëdhɛ ‑wɔn ‑dhiang zë‑ ‑nu ‑dhɛ, 'yö 'wɔn 'ö ‑gban kwa Dëmɛ Yesu Klisi ‑wɔn ‑bha bha 'ö mɛ ꞊draan‑ ‑bha ‑zʋgbandhe waa‑ ‑pʋtaasü 'ka.
ROM 1:1 Mang Pɔdhö ‑mɛ 'a ‑kë Yesu Klisi ‑bha gwëëmi 'ka, 'ö Atanna ‑yö n sü 'ö n ‑ya ‑dɩ ‑ta kö 'a kë Yesu Klisi ‑bha bɔmɛ 'ka kö 'a kë naɔ ‑së 'ö go‑ "piʋ̈ ‑a dɔmɛ 'ka bha ma ꞊në 'a 'sëëdhɛ ya‑ bɔ ka ‑dhɛ.
ROM 1:2 Naɔ ‑së 'ö ‑gban Yesu Klisi 'ö ‑kë Atanna Gbö 'ka ‑a ‑bha bha, Atanna ‑ya ‑to "dhiʋ̈ ꞊gblɛɛn 'ö bɔ 'ö ‑wʋdhiʋ̈loomɛ ‑nu ‑ta 'ö‑ "plüün bho, ‑yö ‑bɛn zë ‑sü 'ka ‑a ‑bha 'sëëdhɛ 'gü.
ROM 1:3 Yö 'ö bha ꞊në ꞊ya kë mɛbhɩɩdhɛ 'gü, 'yö ‑kë Davi ‑bha 'në 'ka,
ROM 1:4 'yö ꞊ya ‑da Atanna ‑wɔn "gblʋʋ "piʋ̈, 'yö‑ ‑bha 'Nii‑ "slʋ̈ʋ̈slʋ̈ ‑ya bho 'ö‑ wo ga 'gü 'ö‑ ‑bö ö ‑bha 'gügbɩɩdhɛ 'ka bha ‑ya ‑zɔn ꞊dhɛ ‑a Gbö ‑mü. Yöö Yesu Klisi ‑mɛ bha ꞊në kwaa‑ ‑gblüdë 'ka.
ROM 1:5 Yö 'ö bha ꞊në Atanna ‑yö bɔ‑ ‑ta 'yö ‑gasitɛ ‑kë n ‑dhɛ, 'yö n ‑ya ‑a ‑bha bɔmɛ 'ka, kë "dhʋ̈ kö 'a‑ pö "sɛ ꞊gban "pɛpɛ 'gü ‑mɛ ‑nu ‑dhɛ ꞊dhɛ ‑wo 'dhang bho‑ "dhiʋ̈ kö 'pë 'ö dho‑ pö‑ ‑nu ‑dhɛ ‑wa kë kö ‑wo dha ‑a 'saa‑ 'gü.
ROM 1:6 'Sa 'mɛ 'wo "dhʋ̈ bha 'mɛ 'ö Yesu Klisi ꞊ya ka ‑dhɛ 'ö 'ka‑ ‑bha 'ka 'ö 'ka Wlɔmö ka‑ ‑nu ‑bhiëë 'gü 'pö.
ROM 1:7 A 'sëëdhɛ ya‑ ‑bɔ 'mɛ 'ka Atanna dhɔɔbhaamɛ ‑nu 'ka Wlɔmö ‑pö 'gü, 'ö ka ‑ya kö 'ka ‑tosɛa kë ö ‑bha kë 'gü, "ta ‑kɔ ‑së 'ka kö pö 'ya 'dho kë ka ‑bha bha ka ꞊në ka ‑dhɛ. A ‑bhɛa ‑dhɛ kö yö 'ö kwa Dë 'ka bha waa‑ kwa Dëmɛ Yesu Klisi 'ö 'dhö ‑wo dɔ "gbɩɩ‑ kö ‑wo ‑gasitɛ kë ka ‑dhɛ, kö ‑wo ‑ya ‑dɩ 'flëë‑ 'gü ‑sü wɔ ka ‑gɔ ‑a ‑ta!
ROM 1:8 A ‑bɔ Yesu Klisi ‑ta 'ö 'a Atanna nuɛ" bho ꞊kö ‑blɛɛsü mɛ ꞊gban "pɛpɛ ka ‑wɔn 'gü, ‑a ‑gɛn ‑mü ꞊dhɛ ka ‑bha ‑zʋ ‑yö ‑a ‑dhɛ ‑sü bha‑ ‑taɔng ‑yö ꞊mɔɔ ‑sü 'ka "kpʋngtaadhɛ ꞊gban "pɛpɛ 'gü, 'ö mɛ ꞊gban ‑wa ‑dhiang zë.
ROM 1:9 'A bhɛa" sië‑ ‑dhɛ ‑kɔ 'ö‑ 'gü 'do 'do, a ‑bhɛa 'pö ka ‑wɔn 'gü, n ‑zʋ 'yaa bhɔ ka 'ka tongtongdhö. Atanna 'a‑ ‑dhɔkë n faan ꞊gban 'ka, 'ö 'a‑ ‑bha naɔ ‑së 'ö ‑gban ‑a Gbö Yesu Klisi ‑bha ‑a dɔ sië 'a ‑ziö 'ka bha ꞊në n "sɛɛ‑ 'ka. ‑Ya 'wɔn ‑dɔ ꞊dhɛ 'pë 'a‑ pö sië bha 'yaa ꞊sua 'ka. A ‑bhɛa 'pö‑ ‑dhɛ kö ꞊ya kë ꞊dhɛ ꞊ya kë ‑a ‑dhidhɛwɔn 'ka ꞊dhɛ 'a nu kö 'a ‑wo ka ‑dhɛ 'gü, ‑ɛɛ! Kö ‑ya zian "dhi "pʋ n ‑gɔ kö 'a nu.
ROM 1:11 ‑A ‑gɛn ‑mü ꞊dhɛ ‑nu zun ka ‑dhɛ 'gü ‑dhɔ ꞊ya n 'kun ꞊dedewo. ‑Yö n "piʋ̈ ꞊dhɛ 'a nu kö 'a n "yan ‑kpan ka ‑bha, "kɛɛ kö Atanna ‑bha gbaɔdhe 'ö‑ ‑bha 'Nii‑ "slʋ̈ʋ̈slʋ̈ ‑ya nu mɛ ‑dhɛ bha 'a nu ka ‑bha 'ka, kö ‑yö ka gba faan 'ka ‑zʋ ‑yö ‑a ‑dhɛ ‑sü 'gü, kö ka ‑gɛn ‑yö "sɛ 'kun ‑a ‑bha zian ‑ta.
ROM 1:12 N ‑nu ka "piʋ̈ mü ‑sü bha‑ ‑gɛn "gbɩɩ‑ 'bha ‑mü 'zü ꞊dhɛ kö 'kwa kwa 'ko ‑nu faan dɔ‑ ‑bha "ta bha‑ 'sü ‑sü ‑bha. ‑A ‑gɛn ‑mü ꞊dhɛ ka ‑bha ‑zʋ ‑yö ‑a ‑dhɛ ‑sü bha kö n "yan ‑yö ‑da ‑dhɛ 'gü, ‑yö ‑dho n faan dɔ, 'ö ka "yan ꞊ya ‑da 'pö n ‑bha ‑dhɛ 'gü 'ö ka faan dɔ.
ROM 1:13 N dheebhang ‑nu, ‑yö n "piʋ̈ ꞊dhɛ 'ka‑ 'wɔn dɔ ꞊dhɛ ‑nu ka "piʋ̈ mü ‑dhɔ ‑yö n ‑kë ‑kpɛawo, "kɛɛ ‑a "sɩ ꞊në 'yaa n ‑dhɛ. ‑Yö n "piʋ̈ ꞊dhɛ 'a nu kö 'a Yesu ‑wɔn ‑dhiang zë kaa‑ 'pö‑ bha‑ 'gü 'pö kö 'mɛ 'wo mü ‑wo 'dhang bho‑ "dhiʋ̈ ꞊dhɛ ‑kɔ 'a‑ ‑kë 'ka "sɛ ‑kpɛa 'wo to ‑a ‑nu 'gü ‑a 'dhö.
ROM 1:14 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Yesu ‑wɔn ‑dhiang 'a‑ zë sië bha, ‑a ‑dhɛa ‑bha ꞊dhɛ 'mɛ kwɛng‑ ‑nu kwa wɔ ‑kɔ 'dhö do ('ö kwa 'wɔn dɔ ‑kɔ 'dhö do oo), 'mɛ 'ö‑ ‑nu ‑bha ‑yö ‑da kwa ‑bha ꞊wlöö oo, 'mɛ 'wo 'sëëdhɛ dɔ oo, 'mɛ 'waa‑ dɔ oo, ‑a ‑nu ꞊gban "pɛpɛ ‑wa ma. ‑A ‑kë "dhʋ̈ ‑sü bha ‑yö ꞊dhɛ "pɔ ꞊në 'dhö 'yö n ‑bha.
ROM 1:15 'Wɔn 'ö‑ ‑wɔn 'gü 'yö ‑nu zun 'mɛ 'ka Wlɔmö ‑pö 'gü ka ‑dhɛ 'gü ‑dhɔ ꞊ya n 'kun kö 'a naɔ ‑së 'ö go Atanna "piʋ̈ bha‑ dɔ ka ‑gɔ 'pö bha 'yö bha.
ROM 1:16 'Yiʋ̈‑ 'yaa n kë naɔ ‑së 'ö go Atanna "piʋ̈ bha‑ dɔ ‑sü 'gü tongtongdhö, ‑a 'klɔɔ‑ ‑mü ꞊dhɛ a 'dhang bho‑ "dhiʋ̈ 'kpakpadhö ꞊dhɛ 'gügbɩɩdhɛ 'ö bɔ‑ ‑ta 'ö mɛ "bhɩɩ‑ ‑nu dha yö ‑mü. Mɛ "ʋʋ mɛ 'ö ꞊ya 'dhang bho‑ "dhiʋ̈ kö ꞊ya dha. "Kɛɛ Zuifö ‑nu ꞊në 'wo 'mɛ 'wo "dhʋ̈ bha‑ ‑blɛɛsü 'ka, 'yö 'mɛ 'waa Zuifö 'ka 'wo ‑tun ‑na dɔ mü.
ROM 1:17 'Pë 'ö‑ ‑kë "dhʋ̈ bha‑ 'klɔɔ‑ ‑mü ꞊dhɛ ‑a naɔ ‑së bha ꞊në ‑kɔ 'ö mɛ ꞊ya kë‑ 'ka 'yö Atanna ‑yö mɛ ‑kë 'kpëdhö bha‑ ‑zɔn kwa ‑dhɛ ꞊dhɛ: Pë "wɛɛ 'bha 'kö dho bɔ‑ ‑ta kö ‑yö mɛ ‑mawɔn 'to 'yaa 'dhö kö 'yii kë 'dhang ‑bho ö "dhiʋ̈ ‑sü kö ‑wo wo ‑zʋ yö ö ‑dhɛ ‑zë 'ka, ꞊dhɛ ‑kɔ 'ö ‑bɛn zë ‑sü 'ka‑ 'ka ‑a ‑bha 'sëëdhɛ 'gü ‑a 'dhö ꞊dhɛ: «'Mɛ 'ö ö ‑zʋ yö Atanna ‑dhɛ, ‑a ‑mɛ ‑dho dha ö ‑bha 'dhang ‑bho ‑a "dhiʋ̈ ‑sü bha ꞊në‑ ‑wɔn 'gü, 'yö ‑tosɛa ‑së kë "kpʋng ꞊taa, 'yö dho 'yö‑ 'bha ‑kë ‑a "piʋ̈ dhang‑ 'gü ‑todhʋ̈ 'ka.»
ROM 1:18 "Kɛɛ 'mɛ 'kö wo ‑zë 'waa "suʋ̈ Atanna ‑gɔ, 'ö 'wo‑ ‑siödhɛwɔn ꞊në‑ ‑kë 'yö 'wo zun‑ 'ka‑ ‑bha tɛanwɔn bha‑ ‑gɔ zian‑ bha, yö 'ö ‑ya ‑sü 'ka dhang‑ 'gü bha‑ ‑siö ‑dhɛ ‑wɔn 'ö‑ ‑nu "piʋ̈ 'yaa ꞊dhɛng ‑dhɛ ‑bha.
ROM 1:19 ‑A 'klɔɔ‑ ‑mü ꞊dhɛ Atanna dɔ ‑kɔ 'dhɛ 'kö mɛ "bhɩɩ‑ ꞊mɔɔ‑ ‑bha 'ö‑ dɔ‑ 'ka, ‑a ꞊gban ‑ya ‑nu "yaan 'kpakpadhö. Yöö ꞊dede ꞊në‑ ‑ta ‑pʋ ‑nu ‑dhɛ.
ROM 1:20 Mɛ 'bha 'yii‑ yö do tɛan‑ 'ka, "kɛɛ 'ö sü ‑bha "sɛ kë ‑yi ‑bha 'ö dho 'ö zun‑ 'ka ꞊dɛɛ ‑bha, ‑a ‑bha 'gügbɩɩdhɛ 'ö‑ ‑naa 'yaa 'dhö bha oo, ‑a ‑bha ‑kë Atanna 'ka ‑sü oo, mɛ ‑ya ‑dhɛ ‑yö ‑a kë ‑pë ‑nu bha ꞊në‑ ‑nu ‑bha 'kpakpadhö. 'Wɔn 'ö‑ ‑wɔn 'gü, 'yö 'mɛ 'waa "suʋ̈‑ ‑gɔ, 'ö 'waa‑ ꞊bhlëë ‑ya bha, ‑a ‑nu ‑mawɔn 'to ‑gɛn 'bhaa 'dhö‑ ‑gɔ bha 'yö bha.
ROM 1:21 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑wa 'wɔn ‑dɔ ꞊dhɛ Atanna ‑yö ‑dhö, "kɛɛ ‑a ꞊bhlëë ꞊në 'yaa‑ ‑nu ‑gɔ, 'waa "wɩ ꞊në‑ wo‑ ‑bha kö ‑wa nuɛ" bho ꞊dhɛ ‑kɔ 'ö‑ ‑dhɛ 'dhö‑ ‑bha kö ‑wa kë‑ 'ka 'nu pë ‑nu 'ö‑ ‑kë bha‑ ‑wɔn 'gü bha‑ 'dhö, 'yö 'wo wo ‑dɩ sü 'wɔndɔmɛ "gbɩɩ‑ ꞊në‑ 'ka, 'yö tɛanwɔn ꞊gbaan ꞊dhɛng‑ ‑nu ‑gɔ, 'yö‑ ‑nu "yaaki 'bhaa 'dhö 'zü, 'yö 'waa tɛanwɔn dɔ 'zü ‑a ‑wɔn 'gü.
ROM 1:22 ‑Wo wo ‑dɩ ‑sü 'wɔndɔmɛ 'ka, "kɛɛ kö 'waa pë 'bha dɔ 'sa.
ROM 1:23 ꞊Wa Atanna 'ö 'yaa ga tongtongdhö bha‑ ‑bha 'tɔbhɔdhe 'sü ꞊waa‑ ‑nu "wlaapë ‑nu ‑dhɛ. ꞊Wa pë "blɛɛn‑ ‑nu 'yën ꞊dhɛ "dhü ‑nu waa‑ ‑gwë ‑nu, ‑maa ‑nu, ꞊kwlaa ‑ta ‑wü ‑nu, ꞊mlɛɛ ‑nu "ɛɛn mɛ "bhɩɩ‑ ‑nu 'dhö, 'yö ꞊waa‑ dɔ‑ "gblʋʋ 'gü, "kɛɛ kö mɛ "bhɩɩ‑ ‑zë ‑yö ‑ga 'sa.
ROM 1:24 Atanna ꞊ya ö ‑kɔ "kan‑ ‑nu "dhiʋ̈ yö ꞊në‑ ‑wɔn 'gü kö ‑wo wo zuë" ‑bhɔ ‑bha ‑wɔn yaya ‑nu ‑bha ꞊në‑ kë wo 'dho‑ 'ka. ꞊Wa wo ‑dɩ "dhiʋ̈ ‑da yö ꞊në‑ ‑wɔn 'gü, 'yö 'yiʋ̈‑ ‑wɔn ‑dɩ ‑slɔɔ ꞊në 'wo‑ kë sië 'wo dho‑ 'ka ‑bha.
ROM 1:25 Wo 'ö wo "dhʋ̈ bha ꞊në 'wo tɛanwɔn 'ö go Atanna "piʋ̈ bha‑ "gla ‑sü 'ka ꞊sua 'gü, 'yö 'wo 'pë 'kö Atanna ‑ya ‑da bha yö ‑zë 'tɔ bhɔ, 'yö 'wo yö 'kö pë ‑nu bha‑ ‑nu ‑da bha‑ to, "kɛɛ kö yö ꞊në‑ ‑dhɛ 'dhö‑ ‑bha ꞊dhɛ mɛ ‑ya 'tɔ bhɔ ‑todhʋ̈ 'ka, kö ‑yö gwëë" ‑dhɛ kë‑ ‑dhɛ. Kö ‑yö kë "dhʋ̈ bha 'aa ‑yö kë!
ROM 1:26 Atanna ‑kɔ ‑kan ‑a ‑nu "dhiʋ̈ ‑gɛn ꞊në bha, kë "dhʋ̈ kö 'yiʋ̈‑ ‑wɔn ‑nu 'ö‑ kë ‑sü ‑pɛng ‑yö dɔ‑ ‑nu ‑ta bha ‑wa kë wo wëë' 'ka do. ‑A ‑gɛn ‑mü ꞊dhɛ dhe waa‑ gɔn ‑a ‑nu ‑bha ‑kë 'ko "piʋ̈ ‑sü 'ö Atanna ‑ya ‑da bha wo ‑zë ꞊waa‑ "gla‑ ‑ta, 'yö dhong ‑nu ‑dɩ ‑slɔɔ ꞊në 'wo bhluu" 'ma sië wo 'ko ‑nu bha,
ROM 1:27 'yö gɔɔn‑ ‑nu ‑dɩ 'pö 'waa "wɩ‑ ‑bha 'zü kö waa‑ dhong ‑nu ‑zë ‑a ‑nu ‑bha sɛɛ" ‑yö kë do ꞊dhɛ ‑kɔ 'ö‑ 'ka ‑a 'dhö, "kɛɛ 'yö‑ ‑nu ‑dɩ ‑slɔɔ ꞊në‑ ‑nu ‑wɔ 'ko "piʋ̈ ‑sü ‑pɛng ‑yö dɔ‑ ‑nu ‑ta, 'yö 'wo 'yiʋ̈‑ ‑wɔn suu ‑nu bha‑ ‑kë wo "kwëë, 'yö‑ kë 'ö ꞊waa‑ wo "dhʋ̈ bha, ꞊dhɛng 'wo‑ wo bha‑ 'gü ‑wɔn 'ö ꞊dhɛ‑ ꞊saa 'dhö bha 'yö ‑wɔ ‑nu ‑ta bha.
ROM 1:28 ‑A ‑nu "tʋ 'ö 'yaa Atanna ‑wɔn ‑bha, 'ö 'yaa‑ ‑nu "piʋ̈ ‑zianwo ꞊dhɛ 'wo‑ dɔ bha ꞊në‑ ‑wɔn 'gü, 'yö ꞊ya ö ‑kɔ "kan‑ ‑nu "dhiʋ̈ 'pö, 'yö 'wo ‑tosɛa kë sië ‑tama ‑dhɛ "piʋ̈, 'yö 'wɔn 'ö 'yaa këwɔn 'ka ꞊në 'wo‑ kë sië ‑kpɛawo bha.
ROM 1:29 'Wɔn 'ö‑ ‑wɔn 'gü, 'yö 'wɔn yaa suu "pɛpɛ ꞊gban ꞊në‑ kë ‑dhɔ ‑ya ‑nu ‑kë bha 'yö bha. ‑A ‑nu "gblü ‑yö 'ya‑ yö ꞊në‑ ‑wɔn 'gü, 'yö ꞊naɔ ‑dhɔ ‑ya ‑nu ‑kë "dhiʋ̈ ziö 'ka, 'yö 'wɔn yaa ‑dɩ ‑slɔɔ ꞊në‑ kë ‑dhɔ ‑ya ‑nu ‑kë ‑a ‑nu "tɛabɔ ‑nu 'ka, 'yö ꞊drɔ kë ‑sü ꞊në‑ ‑nu 'gü, 'yö 'wo mɛ zë, 'yö 'wo "dhi ‑naa ‑nu ma, 'yö 'wo "kpënng‑ ‑nu ‑kë mɛ ‑nu ‑gɔ, 'yö 'yaɔdhɛ zuëga ꞊në‑ ‑nu "gblʋ̈ʋ̈‑ bha.
ROM 1:30 Dhiang ‑yö ‑pa ‑nu ‑ta yö ꞊në‑ ‑wɔn 'gü, 'yö 'wo mɛ ‑nu ‑dhiang yaa ꞊në‑ zë, 'yö 'wo ꞊sua ‑nu ‑ya ‑a ‑nu ‑bha, 'yö Atanna ‑san ‑ya ‑nu ‑kë, 'yö 'waa mɛ 'bha yö‑ 'gü, 'yö 'wo wo ‑dɩ ꞊bhlɛɛ mɛ ‑nu "yan 'gü, 'yö 'wɔn yaa kë ‑sü ‑gɛn ‑dee ꞊në 'wo‑ ꞊mɔɔ ‑kpɛawo, 'yö 'waa wo 'kpɔmɛ ‑nu ‑wʋ ma bha.
ROM 1:31 'Wɔn ‑yaki 'si zuëga 'yaa‑ ‑nu "gblʋ̈ʋ̈‑, 'waa 'to ‑wʋ do ‑ta, mɛ 'bha ‑dhɔ 'yaa‑ ‑nu kë, 'sa mɛ 'bha ‑mɛ 'bha ‑wëë 'yaa‑ ‑nu kë.
ROM 1:32 'Wɔn 'ö Atanna dho‑ wɔ 'wɔn suu ‑nu bha‑ këmɛ ‑nu ‑ta ‑wa ‑dɔ, ‑wa 'wɔn ‑dɔ 'kpakpadhö ꞊dhɛ 'mɛ 'wo 'wɔn suu ‑nu bha‑ ‑kë, ‑a ‑naa ‑mü ‑a ‑nu 'gü see‑ ‑sü 'ka, "kɛɛ yö ‑zë ꞊gban 'gü ‑wa ‑kë "dhʋ̈ do. ꞊Ya 'to 'nu‑ 'dhɛ 'kö bha‑ ‑bha ‑zianwo kö‑ fië 'në 'bha‑ ‑dhö, "kɛɛ mɛ 'wo 'wɔn suu ‑nu bha‑ ‑kë ‑wa ‑nu faan ‑zian ꞊në‑ dɔ.
ROM 2:1 Mɛ ꞊yaa‑ ma ꞊dhɛ ‑kɔ bha‑ 'dhö, mɛ‑ ‑mɔɔ ‑bha 'ö mɛ ‑ya pö: Haa'! 'Mɛ 'kö 'wo ya ‑wo 'ya‑ 'pö ‑kɛɛ!» "Kɛɛ ‑ka ka ‑dɩ 'kun, 'ka 'dho 'to 'ö 'ka za dɔ‑ ‑nu ‑bha. ‑A ‑gɛn ‑mü ꞊dhɛ bhi 'ö bhi ‑zë 'i za dɔ sië mɛ ‑bha "dhʋ̈ bha, i fië‑ 'yaa 'dhö 'mɛ 'i za dɔ sië‑ ‑bha bha‑ 'ka. ‑A 'klɔɔ‑ ‑mü ꞊dhɛ 'bha‑ pö ꞊dhɛ Atanna 'wɔn ‑bho 'mɛ 'wo bha‑ ‑nu 'gü ‑dhɛ ‑mü, ‑a ‑nu këwɔn ‑yö 'ya‑, "kɛɛ kö kɛng‑ ‑nu ka ‑zë 'gü ‑pee ‑yö do, kö mɛ ꞊gban ꞊në 'i ka zë za 'ka bha do.
ROM 2:2 Mɛ ꞊gban "pɛpɛ ‑wa 'wɔn ‑dɔ ꞊dhɛ 'mɛ 'wo 'wɔn suu ‑nu bha‑ ‑kë Atanna ꞊ya 'wɔn bho‑ ‑nu 'gü kö‑ ‑bha tɛanwɔn ‑mü.
ROM 2:3 "Kɛɛ bhi 'ö bhi ‑zë 'i za dɔ sië 'mɛ 'wo 'wɔn suu ‑nu bha‑ ‑kë ‑a ‑nu ‑bha, "kɛɛ kö i‑ ‑kë 'pö ꞊dhɛ‑ ‑nu 'dhö bha ‑yö i 'gü ꞊dhɛ i ‑dho dha Atanna ‑bha za ‑gɔ "wɛ ‑ee?
ROM 2:4 "Klʋsëdhɛ 'ö‑ ‑kë i 'ka, 'ö ö zuë" ‑kë i "piʋ̈ ‑sɛa bha i‑ ‑dhɛ ‑yö "wɛ ‑ee? "Ɛɛn i "tʋ 'yaa ‑mü ‑ee? "Ɛɛn 'yaa i 'gü ꞊dhɛ ‑a kë 'ö‑ wo "dhʋ̈ 'ö ‑bhɔ 'ka yi 'bha ‑yi 'bha 'ka, 'ö 'yii 'wɔn wɔ i ‑ta do bha, ‑ya ‑kë "dhʋ̈ kö 'i i bo 'wɔn yaa kë ‑sü 'ka kö 'i i zuë" slëë‑ ö "piʋ̈ ꞊në‑ wo ‑ee?
ROM 2:5 "Kɛɛ ꞊ya kë ꞊dhɛ 'bha "tʋgbɩɩdhɛ kë, kö 'wɔn 'ö Atanna ‑ya ‑kë bha 'yii 'dho i ꞊gbin‑, kö 'bhii i bo 'wɔn yaa kë ‑sü 'ka, 'kö 'wɔn 'ö dho‑ wɔ 'mɛ 'wo 'wɔn suu bha‑ kë sië bha‑ ‑nu ‑ta tɛanwɔn 'gü, 'ö‑ yi 'dhö nu sië bha‑ ‑kwɛɛ ꞊në 'i 'dhu sië 'pö i ‑dɩ ‑ta do 'i dho‑ 'ka bha. ‑A 'yi bha ꞊ya ꞊loo, Atanna ‑dho 'wɔn wɔ i ‑ta 'pö ꞊dhɛ‑ ‑nu 'dhö.
ROM 2:6 'Sa za 'ö Atanna dho‑ dɔ "dhʋ̈ bha‑ yi ꞊ya ꞊loo, ‑yö ‑dho mɛ 'ö "dhʋ̈‑ ‑duɛ ‑zɔn ‑a kë ‑sɔng ꞊në‑ ‑bha.
ROM 2:7 ‑Yö ‑dho ꞊sii 'ö 'yaa yën‑ nu 'mɛ 'wo to wo ‑wʋ ‑ta, 'dhang ‑bho ö "dhiʋ̈ ‑sü 'gü, 'ö 'wo 'wɔn ‑së ‑kë, 'ö 'wo to ꞊bhlëë waa‑ 'tɔbhɔdhe waa‑ ꞊sii ‑së 'ö‑ "piʋ̈ ‑a mɔɔ‑ ‑zian ‑ta bha‑ ‑nu ‑dhɛ 'yi bha‑ ꞊në‑ 'ka.
ROM 2:8 'Yö 'wɔn bho 'mɛ 'wo ö ꞊bhlëë ‑siö, 'ö 'wo zë zaɔdhe ‑da ‑wɔn ‑dhɛ 'wo wo ꞊taa zun tɛanwɔn 'ö ‑gban Atanna ‑bha ‑a ‑gɔ, 'ö 'wo wo ‑gɔ ‑gban 'wɔn yaa kë ‑sü 'gü bha‑ ‑nu 'gü 'pö.
ROM 2:9 Mɛ "ʋʋ 'mɛ 'wo 'wɔn yaa ‑zë ‑kë, ‑yö ‑kë Zuifö 'ka oo, "ɛɛn ‑yö ‑kë mɛ "wɛɛ ‑zian ꞊në‑ 'ka oo, zuëdhiʋ̈tɛɛ waa‑ "yënng ꞊gbaɔndhe ‑dho nu‑ ‑nu ‑ta 'yi bha ꞊në‑ 'ka. "Kɛɛ ‑a 'zü ‑dho bho Zuifö ‑nu ꞊në‑ ‑ta.
ROM 2:10 'Yö mɛ "ʋʋ mɛ 'ö 'wɔn ‑së ‑kë 'pö, ‑yö ‑kë Zuifö 'ka oo, "ɛɛn ‑yö ‑kë mɛ "wɛɛ 'ka oo, "kɛɛ 'ö 'wɔn ‑së ‑zë ‑kë, 'yö Atanna ‑yö 'tɔbhɔdhe nu‑ ‑mɛ ‑dhɛ, 'yö ꞊bhlëëyamɛ ‑bha, 'yö‑ ‑mɛ gba zuëyagblʋ̈ʋ̈‑ 'ka.
ROM 2:11 ‑A ‑gɛn ‑mü ꞊dhɛ mɛ ꞊gban "pɛpɛ ‑wo do Atanna wëëdhö, 'yaa bɔ mɛ 'bha 'ka ꞊flü ‑wɔn 'gü.
ROM 2:12 (Mɛbhɩɩdhe ‑gaɔ 'ö "kpʋng ꞊taa 'ö dho za dɔ‑ ‑nu ‑bha "dhʋ̈ bha ‑wo ꞊plɛ: Mɛ 'wo ‑kë Zuifö ‑nu 'ka 'ö 'wo‑ ‑bha 'tɔng‑ dɔ ‑wo mü, 'yö 'mɛ 'waa Zuifö 'ka 'ö 'waa‑ ‑bha 'tɔng‑ dɔ 'pö 'wo mü.) Atanna ‑bha za dɔ ‑yi bha‑ 'ka, 'wɔn yaa 'dhö ‑kɔ "pɛan ꞊plɛ bha‑ 'dhɛ 'ö‑ "piʋ̈ ‑yö ‑dho ‑a za dɔ ö dɔ ‑kɔ 'gü. Mɛ 'waa‑ ‑bha 'tɔng‑ dɔ, ‑yö ‑dho za dɔ‑ ‑nu ‑bha ꞊dhɛ 'mɛ 'waa‑ ‑bha 'tɔng‑ dɔ ‑a 'dhö 'ö 'yaa za dɔ‑ ‑nu ‑bha 'tɔng‑ "gblʋʋ ‑ta. 'Yö 'mɛ wo ‑zë 'wo‑ ‑bha 'tɔng‑ dɔ, "kɛɛ 'ö 'wii "wɩ‑ ‑bha kö ‑wa ꞊bhlëë ‑ya bha, 'yö za dɔ‑ ‑nu ‑bha 'pö 'tɔng‑ bha‑ "gblʋʋ ‑ta.
ROM 2:13 ‑A ‑gɛn ‑mü ꞊dhɛ 'tɔng‑ ‑kë mɛ ‑gɔ ‑sü ‑zë 'yaa‑ "dhiʋ̈, ‑kë 'kpëdhö ‑sü 'ö Atanna wëëdhö 'ö dho mɛ ‑mawɔn 'to‑ ‑bha bha 'yaa ‑gban "tʋ ‑to ‑a ‑bha 'tɔng‑ ‑bha ‑sü ‑zë ‑bha, "kɛɛ 'mɛ ꞊wa wo "tʋ 'to‑ ‑bha 'wo‑ 'gü ‑wɔn ‑kë bha ꞊në‑ ‑nu "dhia‑ dho 'ma‑ 'gü.
ROM 2:14 ‑A ‑kë "dhʋ̈ ‑sü 'gü, 'mɛ 'waa‑ ‑bha 'tɔng‑ dɔ, 'ö 'waa Zuifö 'ka bha ꞊wa 'wɔn yaa kë, ‑yö ‑dho 'wɔn bho‑ ‑nu 'gü, ‑a ‑gɛn ‑mü ꞊dhɛ ‑wo 'wɔn ‑së waa‑ 'wɔn yaa ‑nu ‑bho 'koo ‑dɔ wo zuë" "piʋ̈, 'ö ꞊wa 'wɔn yaa kë 'ö‑ ‑nu zuë" ‑yö za dɔ‑ ‑nu ‑bha. ‑A ‑kë "dhʋ̈ ‑sü ‑ya ‑zɔn ꞊dhɛ ‑a ‑bha 'tɔng‑ ‑ya ‑nu zuë" "piʋ̈ 'wo bhɔ‑ 'ka, 'wɔn 'ö‑ ‑wɔn 'gü 'yö ꞊wa 'wɔn yaa kë 'yö‑ ‑nu zuë" ‑yö za dɔ‑ ‑nu ‑bha, "ɛɛn 'ö ꞊wa 'wɔn ‑së kë 'zü, 'ö‑ ‑nu zuë" ‑yö 'waanu bha 'yö bha.
ROM 2:16 'Wɔn 'a‑ ‑dhiang zë sië 'a ‑ziö 'ka 'yö bha. ꞊Dhɛ Atanna ‑yö Yesu Klisi ꞊në ‑ya ‑sü 'ka, kö "tʋ̈ng 'bha ꞊ya ꞊loo, kö ‑yö za dɔ mɛ "bhɩɩ‑ ‑nu ‑bha 'wɔn "pɛpɛ 'wo‑ ‑kë ‑gblɛn 'kpɔ 'gü ‑gblɛn 'kpɔ 'gü bha‑ ꞊gban ‑wɔn 'gü.
ROM 2:17 ꞊Ya kë "dhʋ̈ kö bhi 'ö bhi ‑zë 'i‑ pö i ‑dɩ ‑dhɛ ꞊dhɛ Zuifö ‑mü i 'ka, ꞊dhɛ Atanna ‑yö ö ‑bha 'tɔng‑ ‑nu ‑nu ka ꞊në ka ‑dhɛ, 'ö 'i i gban dɔ i ‑bha ꞊ni, 'ö 'i‑ pö i ‑dɩ ‑dhɛ kaa‑ Atanna ‑zë ka "taɔngdëdhɛ 'gü,
ROM 2:18 'ö 'i‑ pö i ‑dɩ ‑dhɛ bhi ‑zë 'wɔn 'ö‑ dhɔɔbhaa 'ka i‑ ‑dɔ, 'ö 'i 'wɔn ‑së waa‑ 'wɔn yaa ‑nu ‑bho 'koo dɔ ‑a ‑bha 'tɔng‑ ‑kë i ‑gɔ ‑sü ‑wɔn 'gü,
ROM 2:19 'ö 'i‑ pö i ‑dɩ ‑dhɛ ꞊dhɛ ꞊ya kë "dhʋ̈ kö bhi ‑zë i ꞊dhɛ zian ‑bho "yan ꞊wlü 'ka ‑mɛ 'dhö, ꞊dhɛ 'mɛ 'ö 'waa Atanna dɔ 'ö 'wo ‑dhɛtiidhɛ 'gü, bhi ꞊në 'i ꞊dhɛ ‑dhɛpuudhɛ 'ö dho zian 'ö dho Atanna "piʋ̈ ‑a bho‑ ‑nu 'ka ‑a 'dhö,
ROM 2:20 'ö 'i‑ pö i ‑dɩ ‑dhɛ ꞊dhɛ bhi ‑zë i ‑mɔɔ ‑bha 'i 'mɛ 'waa‑ dɔ ‑a ‑nu ꞊draan 'wɔn 'ö ‑gban ‑bha ‑a ‑bha, 'ö 'i zun 'mɛ 'waa 'wɔn 'bha dɔ‑ ‑wɔn 'gü ‑a ‑nu ‑dhɛ "dhiʋ̈, ꞊dhɛ 'ö ‑kë ꞊dhɛ 'tɔng‑ 'ö‑ nu i ‑dhɛ bha 'wɔndɔdhe waa‑ tɛanwɔn ‑wa 'gü bha‑ ‑wɔn 'gü,
ROM 2:21 bhi 'ö bhi ‑zë 'i mɛ ‑nu ꞊klang kë sië bha, 'bhaa bhɔ i ‑wʋ ‑bha, i‑ ‑pö mɛ ‑nu ‑zë ‑dhɛ 'waa ꞊kwaan bho, "kɛɛ kö bhi ‑zë i‑ ‑bho.
ROM 2:22 'Bha‑ pö mɛ ‑nu ‑dhɛ ꞊nië ‑sü 'yaa ‑së, kö bhi ‑zë i‑ kë sië. I‑ ‑pö ‑dhɔkëpë ‑nu ‑san ‑yö i ‑kë, "kɛɛ i ‑dho 'i‑ 'kɔ 'gü ‑zë ꞊yʋ̈ʋ̈ 'i ꞊naɔ 'kö 'kɔɔdhö mü bha‑ ꞊gban ‑wlö.
ROM 2:23 Bhi 'ö 'tɔng‑ 'ö Atanna ‑ya nu i ‑dhɛ bha‑ ‑wɔn 'gü 'i i gban dɔ i ‑bha ꞊ni bha, "kɛɛ 'bha ꞊bhlëë bho‑ ‑bha ‑a ‑bha 'tɔng‑ ‑ya 'ö 'bhaa‑ wo ꞊bhlëë 'gü bha‑ ‑wɔn 'gü. ꞊Ya kë "dhʋ̈ kö i 'tɔ ‑kun Zuifö ‑dhɛ ‑bha ‑gɛn ‑mü ‑më 'ka? Kö‑ ‑gɛn 'yaa 'dhö!
ROM 2:24 ‑A ‑gɛn ‑mü ꞊dhɛ Atanna 'tɔ ꞊gban ꞊ya zë "pɛpɛdhö 'mɛ 'waa Zuifö 'ka‑ ‑nu kpö 'gü ꞊dhɛ ‑kɔ 'ö ‑bɛn zë ‑sü 'ka‑ 'ka‑ ‑gɔ 'sëëdhɛ 'gü ‑a 'dhö ka "ta ‑kɔ bha ꞊në‑ ‑wɔn 'gü.
ROM 2:25 Ka 'tɔ ‑kun Zuifö ‑dhɛ ‑bha ‑sü 'ö 'ka ka 'tɔ kun‑ 'ka ‑go 'gbannë 'gü ‑sü ‑bha 'ka‑ pö: 'Mɛ 'kö 'yi Zuifö 'ka yi ‑zë yi ‑go 'gbannë 'gü, "kɛɛ mɛ ‑kpɛa 'waa 'go‑ 'gü bha, ꞊ya kë ꞊dhɛ 'kii Atanna ‑bha 'tɔng‑ ‑zë ‑ya ꞊bhlëë 'gü, kö‑ ‑pö "dhʋ̈ ‑gɛn 'yaa 'dhö ka ‑gɔ. Kö ka ꞊dhɛ 'mɛ 'yii 'go 'gbannë 'gü ꞊në‑ 'dhö.
ROM 2:26 ꞊Ya kë "dhʋ̈ kö mɛ ‑zian 'ö 'yaa Zuifö 'ka 'ö 'yaa 'go 'gbannë 'gü, "kɛɛ 'ö‑ ‑bha 'tɔng‑ ‑zë ‑ya ꞊bhlëë 'gü, ‑yö ‑dho ‑a ‑mɛ 'sü ꞊dhɛ Zuifö 'ö go 'gbannë 'gü ‑a 'dhö (ka ‑zë ka ‑bha).
ROM 2:27 ꞊Ya kë "dhʋ̈ kö 'mɛ 'yaa 'go 'gbannë 'gü ꞊dhɛ i 'dhö, "kɛɛ 'ö Atanna ‑bha 'tɔng‑ ‑zë ‑ya ꞊bhlëë 'gü bha ‑yö ‑dho bhi 'ö bhi ‑zë 'i Zuifö 'ka, 'ö 'i go 'gbannë 'gü, 'ö Atanna ‑bha 'tɔng‑ 'ö ‑bɛn zë ‑sü 'ka bha 'ö i ‑gɔ, 'ö 'i i ‑gɔ dɔ‑ ‑gbëë ‑ta bha i zë za 'ka yi do 'ka‑ ‑kuu "dhiʋ̈.
ROM 2:28 ‑A ‑gɛn ‑mü ꞊dhɛ 'mɛ 'ö Atanna ‑zë 'ö‑ ‑dhɛ Zuifö, 'yaa ‑mü 'mɛ 'ö ‑go 'gbannë 'gü ‑sü 'ö 'mɛ ‑kɔ "dhiʋ̈ bha‑ wo, "ɛɛn 'ö mɛ ‑ya ‑bha ‑kë Zuifö 'ka ‑sü ‑dhɛ yö‑ kwi ꞊në‑ ‑bha bha‑ 'ka.
ROM 2:29 "Kɛɛ Zuifö ꞊dede 'ö 'dhö, 'ö Atanna ‑ya ‑dhɛ Zuifö, yö ‑mü 'mɛ 'ö ꞊ya 'go 'gbannë 'gü ö zuë" ꞊në‑ "piʋ̈, 'ö‑ ‑bha 'tɔng‑ ꞊bhlëë ‑ya ꞊në‑ 'ka. 'Mɛ 'ö "dhʋ̈ bha Atanna ‑bha 'Nii‑ ꞊në‑ ‑mɛ ‑gla, 'sa mɛ "ʋʋ mɛ 'ö‑ ‑bha 'nii‑ ꞊yaa‑ "gla ꞊dhɛ ‑kɔ bha‑ 'dhö, mɛ "bhɩɩ‑ ‑nu ‑wo "dhɛ ‑ya ‑ta oo, 'wii‑ ‑ya ‑ta oo, yö ‑zë ‑ya ‑ya ‑ta.
ROM 3:1 ꞊Ya kë 'sa "dhʋ̈ yö ‑zë 'gü kö ‑kë Zuifö 'ka ‑sü ꞊trɔɔn ꞊në 'mɛ? "Ɛɛn kö ‑go 'gbannë 'gü ‑sü ꞊trɔɔn ‑mü ‑më 'ka?
ROM 3:2 "Kɛɛ 'kö yöö kë "dhʋ̈ ‑kɔ "ʋʋ ‑kɔ 'ö‑ 'gü, ‑kë Zuifö 'ka ‑sü ꞊trɔɔn‑ ‑dhö. ‑Yö 'kpii‑ ‑zianwo. ‑A ꞊trɔɔn ‑blɛɛsü 'ö‑ 'gü yö ‑mü ꞊dhɛ Atanna ‑yö kë "plüün ‑bho Zuifö ‑nu ꞊në‑ ‑nu ‑dhɛ.
ROM 3:3 'Sa Zuifö ‑nu 'wo bha‑ mɛ 'bha ‑nu ‑wo mü 'ö wo ‑zë 'wii 'dhang bho‑ ‑wʋ bha‑ "dhiʋ̈, "Kɛɛ 'kö 'zü yöö kë "dhʋ̈, yö ‑zë ꞊ya 'wɔn 'kö‑ pö, 'yii 'dho ꞊fië‑ 'gü ‑wɔn kë ‑sü ‑bha tongtongdhö.
ROM 3:4 ‑A ‑gɛn ‑mü ꞊dhɛ ‑a ‑dhɛa ‑bha ꞊dhɛ mɛ ꞊gban "pɛpɛ ‑wa 'wɔn dɔ ꞊dhɛ yö ‑zë 'yaa ꞊sua kë. 'Kö 'zü mɛ ꞊gban "pɛpɛ woo kë ꞊sua këmɛ 'ka, yö ‑zë ꞊yaa‑ 'dhɛ 'kö "kan ö "dhi 'ka, ‑yö ‑dho bhɔ ö ‑wʋ ‑bha tɛan‑ ꞊dede 'ka ꞊dhɛ ‑kɔ 'ö‑ ‑wʋ 'sëëdhɛ ‑ya pö‑ 'ka ‑a 'dhö ꞊dhɛ: «‑Yö kë "dhʋ̈ kö mɛ suu "ʋʋ suu ‑zian 'ö za dɔ i këwɔn ‑nu ‑bha, kö ‑ya 'wɔn dɔ ꞊dhɛ i ‑bhɔ i ‑wʋ ‑bha, ꞊dhɛ i tɛan‑ ‑dhiang ꞊në‑ zë ‑kpɛawo» bha‑ 'dhö.
ROM 3:5 'Yö ꞊ya kë 'sa "dhʋ̈ kö kwa ‑dho ‑a pö ꞊dhɛ? ꞊Ya kë ꞊dhɛ kwa ‑bha 'wɔn yaa kë ‑sü ꞊në ꞊ya kë‑ ‑zɔn ‑pë 'ka ꞊dhɛ Atanna ‑yö dhiang ‑zë tɛan‑ ‑ta bha ‑oo, kö‑ 'wɔn ‑wɔ kwa ‑ta ‑gɛn 'yaa 'dhö 'sa kö 'kwa 'wɔn yaa kë ‑dhe! "Ɛɛn ꞊dhɛ? ꞊Ya kë "dhʋ̈ kö 'yii 'wɔn wɔ kwa ‑ta ꞊flü ‑ta ꞊naa bha ‑ee? ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ 'gbɛ ‑wo wo ‑zʋ ‑gɔn ꞊dhɛ ‑kɔ bha ꞊në‑ 'dhö.
ROM 3:6 "Kɛɛ 'yaa "dhʋ̈ tongtongdhö! ꞊Ya kë ꞊dhɛ Atanna ‑yö ö "yan ‑ta 'wɔn yaa ‑ta nu 'ö 'yaa "wɩ, kö 'yii 'dho ‑mɔɔ ‑bha kö ‑yö za dɔ "kpʋngtaadhɛ ‑bha, "ɛɛn kö ‑yö 'wɔn wɔ mɛ 'bha ‑ta!
ROM 3:7 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë ꞊dhɛ ma ‑zë ma 'wɔn yaa kë ‑sü ꞊ya kë‑ yö ‑zë 'tɔ bhɔ ‑gɛn 'ka, kö ma ‑zë 'ma ꞊sua kë kö ‑yö kë yö ‑zë 'tɔ bhɔ ‑gɛn 'ka kö ‑ya ‑zɔn ꞊dhɛ yö ‑zë 'yaa ꞊flü kë, kö 'ma 'wɔn yaa kë 'yii 'dho ꞊mɔɔ‑ ‑bha kö ‑yö n dhɛɛ" ‑zian 'kpɔ kö yöö 'to 'wɔn ‑wɔ n ‑ta ‑sü ꞊në‑ ‑bha.
ROM 3:8 'Yö ‑zʋ 'gɔn ‑kɔ suu bha mɛ ꞊yaa‑ kë kö mɛ‑ 'dho‑ 'ka "dhiʋ̈, ‑a ‑gɔ dɔ ‑dhɛ 'ö 'dhö yö ‑mü ꞊dhɛ: Mɛ 'dhö 'wɔn yaa kë sië kö yöö "gla 'wɔn ‑së ꞊në‑ 'gü. 'Sa mɛ 'bha ‑nu ‑wa ‑pö mang Pɔdhö ‑mɛ 'a dhiang 'ö‑ zë sië 'a ‑ziö 'ka 'yö bha. Kë "dhʋ̈ kö 'wo n ‑dhiang yaa zë. Atanna ꞊ya 'wɔn bho mɛ suu 'wo "dhʋ̈ bha‑ ‑nu 'gü kö‑ ‑bha tɛanwɔn ‑mü.
ROM 3:9 ꞊Ya kë "dhʋ̈ kö ꞊dhɛ ꞊në bha? Kö mɛ 'kwa Zuifö 'ka, kwa fië‑ ꞊në 'dhö mɛ ‑kpɛa 'wo to‑ ‑nu 'ka bha ‑ee? ‑Abin! ‑A 'klɔɔ‑ ‑mü ꞊dhɛ 'ma‑ ‑bho 'koo kë 'nu ‑blɛɛsü 'kpakpadhö ꞊dhɛ i ‑kë Zuifö 'ka oo, 'bhii kë Zuifö 'ka oo, "kɛɛ mɛ "ʋʋ mɛ kö Atanna ‑ya ‑da, ‑a 'bha 'yaa 'dhö kö ‑ya pö ö ‑kɔ 'yaa 'wɔn yaa ‑gɔ ‑gwë ꞊wlöö. ‑A ‑nu ꞊gban "pɛpɛ ‑wo 'wɔn yaa ‑gɔ ꞊dhuëngdhɛ 'gü ꞊dhɛ ‑kɔ 'ö ‑bɛn zë ‑sü 'ka‑ 'ka ‑a ‑wʋ 'sëëdhɛ 'gü ‑a 'dhö ꞊dhɛ:
ROM 3:10 «Mɛ 'bha 'yaa 'dhö kö ꞊sɔng 'ya 'dho kë‑ ‑bha Atanna wëëdhö, aa" ꞊ni mɛ do ‑zian.
ROM 3:11 'Wɔn 'ö ‑së, mɛ 'bhaa‑ dɔ. Mɛ 'bhaa 'dhö kö ‑yö Atanna dhɔɔbhaa ‑zian mɔɔ‑,
ROM 3:12 ‑a ‑nu ꞊gban "pɛpɛ ‑wo ꞊dhɛ 'mɛ ꞊wa zian 'to 'ö ꞊wa ꞊dhɛng ꞊në‑ 'dhö. ‑A mɛ 'bha 'yaa 'dhö kö ‑yö kë 'wɔnsëkëmɛ 'ka, aa" ꞊ni mɛ do ‑zian.
ROM 3:13 ‑A ‑nu "dhiwʋ ‑yö ꞊dhɛ wü 'ö ꞊ya "bu ‑a 'dhö. ꞊Sua ꞊në‑ ‑nu ‑bhö ‑dhü ga 'ka. ‑Wʋ 'ö go‑ ‑nu "dhi ‑yö ꞊dhɛ ꞊mlɛɛ bhaa 'dhö, ‑yö ‑mɔɔ ‑bha 'ö mɛ zë.
ROM 3:14 "Dhang ꞊në 'wo‑ bho mɛ ‑nu ‑bha waa‑ ‑wʋ yaa ‑nu pö ‑sü 'dhö yi ꞊gban 'ka.
ROM 3:15 ‑A ‑nu ‑kɔ ‑ta ‑yö 'fʋ̈ʋ̈‑ mɛ zë ‑sü ‑bha.
ROM 3:16 Pë seesü ꞊në‑ ‑nu ‑bha yë 'ka, ꞊wa bɔ ‑dhɛ "ʋʋ ‑dhɛ 'ö‑ 'gü, ‑wo ‑wëëwɔn ꞊në‑ ‑kë mü.
ROM 3:17 ‑Kɔ 'ö ꞊wa kë‑ 'ka 'wo to wo 'ko ‑dhɛ ‑së bha 'waa‑ 'bha dɔ.
ROM 3:18 ꞊Dhɛ ‑suʋ̈ Atanna ‑gɔ zuëga ‑tangga ‑zian 'yaa‑ ‑nu ‑gɔ bha‑ 'dhö.
ROM 3:19 'Sa ‑wʋ "pɛpɛ 'wo‑ ‑bɛn zë Atanna ‑bha 'tɔng‑ 'sëëdhɛ 'gü ꞊dhɛ ‑kɔ ‑nu bha‑ 'dhö bha, kwa‑ 'wɔn ‑dɔ 'kpakpadhö ꞊dhɛ ‑wa ‑bɛn zë "dhʋ̈ Zuifö ‑nu 'wo 'tɔng‑ ‑gban ꞊wlöö bha ꞊në‑ ‑nu ‑dhɛ. Kë "dhʋ̈ kö mɛ 'wo Zuifö 'ka waa‑ 'mɛ 'waa Zuifö 'ka, ‑a ‑nu ꞊gban "pɛpɛ ‑wa 'wɔn dɔ ꞊dhɛ ‑dha Atanna ‑bha za ‑gɔ ‑dhɛ 'bhaa 'dhö tongtongdhö, kë "dhʋ̈ kö ‑yö kë‑ ‑nu "dhi ta ‑gɛn 'ka.
ROM 3:20 (Kö ‑a pö 'a‑ wo bha ka‑ 'gü ma ‑ee, "ɛɛn kö ꞊dhɛ ‑ee? "Kɛɛ 'pë n "piʋ̈ ꞊dhɛ ‑yö 'to ka "yaan yö ‑mü ꞊dhɛ:) Pë 'ö‑ ‑wɔn 'gü, 'yö Atanna 'yaa‑ pö mɛ 'bha ‑bha ꞊dhɛ ꞊sɔng 'yaa‑ ‑bha ‑a ‑mɛ ‑bha ‑a ‑bha 'tɔng‑ 'kun ‑sü ‑wɔn 'gü bha 'yö bha. ‑A 'klɔɔ‑ ‑mü ꞊dhɛ 'tɔng‑ ‑zë ‑ya ‑zɔn ꞊në‑ wo kwa ‑dhɛ ꞊dhɛ sɔng ‑yö kwa ‑bha.
ROM 3:21 "Kɛɛ "tʋ̈ng 'dhɛ 'kwa dɔ‑ 'ka ya, zian 'dhɛ 'ö Atanna ‑ya ‑zɔn kwa ‑dhɛ kö 'kwa bɔ‑ ‑ta 'kwa dha ‑a ‑bha za ‑gɔ bha ‑yö ‑dɩ ‑ta. Yö ‑zë 'yaa ‑gban ‑a ‑bha 'tɔng‑ 'kun ‑sü, kë "dhʋ̈ kö 'i kë "slʋ̈ʋ̈slʋ̈ ‑a wëëdhö bha‑ ‑bha. Zian ‑dee 'dhɛ 'ö bha ꞊në‑ ‑bha 'tɔng‑ do bha waa‑ ‑wʋdhiʋ̈loomɛ ‑nu 'wo‑ ‑dhiang zë yi 'bha 'ka.
ROM 3:22 ‑A zian 'ö "dhʋ̈ bha yö ‑mü ꞊dhɛ ꞊ya kë ꞊dhɛ 'kwa 'dhang bho Yesu Klisi "dhiʋ̈ ꞊dhɛ ‑yö ‑mɔɔ ‑bha 'ö kwaa‑ 'wɔn yaa ‑nu bho kwa ‑bha, kö Atanna ꞊ya kwa "zu ꞊naa bha, kö ꞊sɔng 'yaa kwa ‑bha 'zü. Mɛ "pɛpɛ 'kö ꞊wa 'dhang bho 'wɔn bha‑ "dhiʋ̈, ‑yö ‑kë mɛ suu "ʋʋ suu 'ö‑ 'ka, 'yaa‑ ‑nu ‑bho 'ko "piʋ̈ kë, ‑ya ‑kë ‑a ‑nu ꞊gban ‑dhɛ ꞊dhɛ 'ko 'dhö.
ROM 3:23 'Sa ‑yö "dhʋ̈ tɛan‑ 'ka ꞊dhɛ mɛ "bhɩɩ‑ ꞊gban "pɛpɛ ‑zë 'gü ‑pee ‑yö do, ‑a ‑nu ‑bho 'ko "piʋ̈ ‑dhɛ 'yaa 'dhö, ‑a ‑nu ꞊gban "pɛpɛ ‑wo 'wɔn yaa kë ‑sü 'ka. 'Wɔn 'ö‑ ‑nu ꞊gban ꞊fië ‑da Atanna ‑bha mɛdhɛ këdhɛ bha‑ 'gü ‑sü 'gü bha 'yö bha.
ROM 3:24 "Kɛɛ yö ‑zë "klʋ ‑yö ‑së. ‑Ya ‑zë ö ‑bha "klʋ ‑së ‑dhɛ bha ꞊në‑ ‑dhɛ 'yö‑ pö mɛ "ʋʋ mɛ 'ö ꞊ya 'dhang bho Yesu Klisi ‑wɔn "dhiʋ̈, kö‑ "tʋ̈ng 'yaa‑ ‑mɛ ‑bha 'wɔn yaa ‑wɔn 'gü 'zü, kö‑ ‑mɛ ꞊ya kë "slʋ̈ʋ̈slʋ̈ ꞊naa bha. ‑Yö ‑gasitɛ ꞊në‑ 'ka 'yö‑ ‑kë kwa ‑dhɛ "wɛɛwɛɛ, 'yö kwa kë 'mɛ 'ö ꞊sɔng 'yaa‑ ‑bha ‑a 'ka, Yesu Klisi ‑bha ‑kë kwa ‑gɔtadhɔmɛ 'ka ‑sü 'saa‑ 'gü.
ROM 3:25 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Yesu Klisi bha ꞊në Atanna ‑ya bɔ kö saan" 'kwa dho‑ bho 'nu kwa ‑bha 'wɔn yaa ‑nu "gblʋʋ "piʋ̈ bha yö ‑zë ‑ya bho kwa ‑dhɛ, ‑a 'klɔɔ‑ ‑mü ꞊dhɛ ‑a ꞊yɔɔn 'ö ꞊wɛnng kwa ‑wɔn 'gü bha 'mɛ ꞊ya 'dhang bho‑ "dhiʋ̈, kö 'bɔn ꞊ya 'go‑ ‑mɛ ‑bha Atanna wëëdhö. Dɔ 'kwa‑ wo ꞊taamasü ya‑ 'gü ya, ‑kɔ 'ö Atanna "piʋ̈ 'ö‑ ‑zɔn 'ka kwa ‑dhɛ ꞊dhɛ pö 'yaa ö ‑bha ö këwɔn 'bha 'gü 'yö bha. ‑A ‑gɛn ‑mü ꞊dhɛ ꞊ya zuësɛadhɛ kë 'wɔnyaakëmɛ ‑nu "piʋ̈ 'ö ‑bhɔ 'ka 'nu zii, 'yii 'wɔn bho‑ ‑nu 'gü do.
ROM 3:26 ("Kɛɛ ꞊ya ‑kɔ 'ö 'bɔn bho‑ 'ka mɛbhɩɩdhe ‑bha ‑a ‑zɔn "tʋ̈ng ya‑ 'gü.) 'Sa ‑ya ‑kë "dhʋ̈ kö 'wa 'dho "yi ꞊në yö ö ‑gɔ we "piʋ̈, kö 'ya‑ pö 'mɛ 'ö ꞊ya 'dhang bho Yesu ‑wɔn "dhiʋ̈ ‑a ‑bha ꞊dhɛ 'bɔn 'yaa‑ ‑bha, kö 'ya 'dho kë pö ‑ya ö ‑bha ‑gɛn 'ka.
ROM 3:27 ꞊Ya kë "dhʋ̈ kö 'mɛ 'ö ꞊ya dha ‑a ‑bha ö 'tɔ 'kun ‑gɛn ‑dhö "wɛ ‑ee? ‑Abin! ‑A ‑bha ö 'tɔ 'kun ‑gɛn 'yaa 'dhö! ‑A ‑gɛn ‑mü ꞊dhɛ 'yii 'dho ꞊mɔɔ‑ ‑bha kö ‑ya pö ꞊dhɛ ‑a pö 'ö Atanna ‑ya wo 'bɔn 'yaa ö ‑bha bha ‑yö ‑sü 'ö ‑bha 'tɔng‑ ꞊bhlëë ‑ya ‑sü ꞊në‑ ‑bha. ‑A pö 'a‑ wo "dhʋ̈ bha‑ 'klɔɔ‑ ‑mü ‑më 'ka? ‑A 'klɔɔ‑ ‑mü ꞊dhɛ ‑a pö 'ö Atanna ‑ya wo "dhʋ̈ bha 'yii ‑gban ‑a ‑mɛ këwɔn ‑nu ‑kë ‑së ‑sü 'ö‑ ‑bha 'tɔng‑ 'kun ‑sü "gblʋʋ "piʋ̈ bha‑ ‑bha. "Kɛɛ ‑yö ‑gban 'dhang 'ö‑ ‑mɛ ‑ya bho Yesu Klisi "dhiʋ̈, 'wɔn 'ö‑ ‑kë kwa ‑dhɛ bha‑ ‑wɔn 'gü bha ꞊në‑ ‑bha.
ROM 3:28 ꞊Dhɛ 'ö "dhʋ̈, ‑yö kë ka "yaan ꞊dhɛ zian "wɛɛ 'bha kö dho kë kö mɛ ꞊ya bɔ‑ ‑ta kö Atanna ‑yö mɛ ‑mawɔn 'to 'yaa 'dhö kö 'yii kë 'dhang ‑bho Yesu "dhiʋ̈ ‑sü ‑zë 'ka.
ROM 3:29 ‑A 'klɔɔ‑ ‑mü ꞊dhɛ Atanna ‑yö doseng, yö 'ö "dhʋ̈ bha ꞊në Zuifö ‑nu ‑bha Atanna 'ka 'yö dho 'ö kë 'mɛ 'waa Zuifö 'ka‑ ‑nu ‑bha 'ka 'pö. ‑A ‑kë "dhʋ̈ ‑sü 'gü, mɛ "ʋʋ mɛ 'ö ꞊ya 'dhang bho Yesu Klisi ‑wɔn "dhiʋ̈, ‑yö ‑kë Zuifö 'ka oo, ‑yö kë mɛ "wɛɛ 'ka oo, ‑yö ‑dho ‑a ‑mɛ "zu ‑a ‑bha 'dhang ‑bho "dhiʋ̈ bha ꞊në‑ ‑wɔn 'gü.
ROM 3:31 'Sa ꞊ya kë "dhʋ̈ kö ꞊dhɛ ꞊në bha? Kö Atanna ‑bha 'tɔng‑ 'kun ‑wɔn ꞊ya bho‑ ‑bha ꞊naa bha ‑ee? ‑Abin, 'yaa "dhʋ̈! "Kɛɛ 'kwa 'dhang bho Yesu "dhiʋ̈, kö‑ ‑bha 'tɔng‑ 'kun ‑sü bha 'kwa‑ ‑gɔ ‑da 'plöö.
ROM 4:1 ‑Ka ‑dhɛ ‑ga, Ablaamö bha ꞊në 'mɛ 'kwa Zuifö 'ka kwa 'ziʋ̈‑ 'kpii‑ 'ka. "Kɛɛ ‑a pö 'ö Atanna ‑ya wo yi 'bha 'ka ꞊dhɛ pö 'yaa‑ ‑bha bha ‑yö kë ‑kɔ ‑kë ꞊dhɛ?
ROM 4:2 ꞊Ya kë 'nu ꞊dhɛ 'wɔn ‑së 'ö Ablaamö ‑ya ‑kë ꞊në Atanna ‑ya zë‑ ‑wɔn ‑dhɛ 'yö‑ pö‑ ‑bha ꞊dhɛ 'bɔn 'yaa‑ ‑bha, kö Ablaamö ‑mɔɔ ‑bha 'nu 'ö 'tɔ kun Atanna ‑ta. "kɛɛ 'yii‑ kë "dhʋ̈. ‑A 'tɔ ‑kun Atanna ‑ta ‑gɛn 'yii ꞊slɔɔ yö ꞊në‑ ‑wɔn 'gü.
ROM 4:3 ‑A ‑gɛn ‑mü ꞊dhɛ ‑wʋ 'ö ‑bɛn zë ‑sü 'ka Atanna ‑gɔ 'sëëdhɛ 'gü yö ‑mü ꞊dhɛ: «Ablaamö kë 'dhang ꞊në‑ bho Atanna "dhiʋ̈, 'yö zë‑ ‑wɔn ‑dhɛ 'yö‑ pö‑ ‑bha ꞊dhɛ pö 'aa‑ ‑bha.»
ROM 4:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'ö ö ‑zʋ gɔn ꞊dhɛ Atanna ‑dho ö dha ‑a ‑bha 'tɔng‑ ꞊bhlëë ‑ya ‑sü ꞊në‑ ‑wɔn 'gü, kö‑ ‑mɛ ꞊tɛni ꞊dhɛ 'mɛ 'ö ꞊saa ‑yë ‑kë ꞊në‑ 'dhö. 'Mɛ 'ö ꞊saa ‑yë ‑kë ꞊ya ö bo, ‑a ‑dhɛa ‑bha ꞊dhɛ ‑wa ꞊saa bho, 'waa‑ pö yö ‑zë ‑bha ꞊dhɛ 'ma gbaɔ‑ ‑mɛ ‑gɔ. Kö ꞊sua ꞊në 'wo‑ ‑kë, kö yë 'ö‑ ‑mɛ ‑ya ‑kë 'yö 'wo‑ ꞊saa bho. "Kɛɛ Atanna ‑bha mɛ ‑dha za ‑gɔ ‑sü bha 'yaa "dhʋ̈, gbaɔdhe ‑mü. ‑A ‑gɛn ‑mü ꞊dhɛ 'bha bo 'dhang bho ‑sü ‑zë 'ka Yesu ‑wɔn "dhiʋ̈ kö 'bɔn 'yaa i ‑bha 'zü ‑a wëëdhö. ꞊Ya kë "dhʋ̈ kö ‑a ‑yë 'i‑ ‑kë ꞊në 'mɛ?
ROM 4:6 'Sa Atanna ‑bha ‑a ‑pö mɛ ‑bha ‑sü 'ö "wɛkɛ "wɛkɛ ꞊dhɛ 'bɔn 'yaa‑ ‑bha kö‑ ‑mɛ 'yii‑ 'gü ‑yë 'bha kë bha ꞊në ‑gblüdë Davi ‑ya ‑dhiang zë yi 'bha 'ka 'ö‑ pö:
ROM 4:7 «'Mɛ 'ö Atanna ꞊yaa‑ ‑nu ‑mawɔn 'to, 'ö ꞊ya ö "tʋ̈ng 'go‑ ‑nu ‑bha 'wɔn yaa ‑nu ‑wɔn 'gü, ‑a ‑nu ‑bha ‑së.
ROM 4:8 'Mɛ 'ö Atanna ‑zʋ ꞊ya bhɔ ꞊sɔng ‑kë ‑a ‑nu ‑bha ‑wɔn 'ka, ‑a ‑nu ‑bha ‑së ꞊dedewo.»
ROM 4:9 Ka ‑mɔɔ ‑bha 'ka‑ pö: "Kɛɛ 'wɔn ‑së 'ö suu 'dhö "dhʋ̈ bha ‑yö ‑mɔɔ ‑bha 'ö ‑kë 'mɛ 'wo 'dhang ꞊në‑ bho Yesu ‑wɔn "dhiʋ̈, "kɛɛ 'ö 'waa Zuifö ‑nu ‑bha 'tɔng‑ ꞊bhlëë ‑ya bha‑ ‑nu ‑dhɛ 'pö ‑ee, "ɛɛn ‑yö Zuifö ‑nu ‑dɩ ‑slɔɔ ꞊në‑ ‑nu ‑bha 'ka ‑ee? ‑Ka ‑kwaa 'suan‑ bho Ablaamö ‑bha ‑ta. ‑Yö kë ‑kɔ ‑kë ꞊dhɛ? Yi‑ ‑pö ꞊dhɛ: ‑A pö 'ö Atanna ‑ya wo Ablaamö ‑dhɛ yi 'bha 'ka ꞊dhɛ pö 'yaa‑ ‑bha bha ‑ya ‑zë ‑a ‑bha ‑zʋ ‑yö ö ‑dhɛ ‑sü ꞊në‑ ‑dhɛ 'yö‑ pö "dhʋ̈.
ROM 4:10 ‑A pö 'ö‑ wo "dhʋ̈ bha 'ö "dhʋ̈ kö Ablaamö ꞊ya 'go 'gbannë 'gü ‑ee, "ɛɛn kö 'yii 'go‑ 'gü ꞊kö? ‑Yö ‑kë "dhʋ̈ kö Ablaamö 'yii 'dho 'gbannë 'gü ꞊kö.
ROM 4:11 ‑A ‑dho 'gbannë 'gü ‑sü ‑zë ‑gɛn ‑yö ‑gban ‑a pö 'ö Atanna ‑ya wo 'bɔn 'bha ‑bha 'bha 'yaa‑ ‑bha ‑a ‑bha ‑zʋ ‑yö ‑a ‑dhɛ ‑sü ‑wɔn 'gü bha ꞊në‑ ‑bha. Kë "dhʋ̈ kö ‑go 'gbannë 'gü ‑sü ‑zë ‑yö kë 'wɔn ‑së 'ö Atanna ‑ya ‑kë ‑dhɛ bha‑ "blɛɛn‑ ꞊në‑ 'ka ‑a kwi 'gü. Ablaamö ‑yö ‑kë mɛ "pɛpɛ 'ö 'waa Zuifö 'ka, "kɛɛ 'ö Atanna ‑ya pö 'bɔn 'yaa‑ ‑nu ‑bha ‑a ‑nu ‑bha ‑zʋ ‑yö Yesu ‑dhɛ ‑wɔn 'gü bha‑ ‑nu dë 'ka 'pö ‑kɔ bha ꞊në‑ 'gü. ꞊Dhɛ 'ö ‑kë ꞊dhɛ Ablaamö ‑yö ‑kë "slʋ̈ʋ̈slʋ̈ Atanna wëëdhö ‑a ‑bha ‑zʋ ‑yö ‑a ‑dhɛ ‑sü ꞊në‑ ‑bha, 'ö‑ ‑gɛn 'yii ‑gban ‑a ‑go 'gbannë 'gü ‑sü ‑zë ‑bha bha, Atanna ‑yö mɛ "pɛpɛ 'wo 'dhang bho Yesu ‑wɔn "dhiʋ̈, 'ö 'waa 'go 'gbannë 'gü ‑a ‑nu ‑kë "slʋ̈ʋ̈slʋ̈ 'pö ‑kɔ do bha ꞊në‑ 'gü.
ROM 4:12 Yöö do bha 'zü ꞊në Zuifö ‑nu 'wo go 'gbannë 'gü, "kɛɛ 'ö 'wo wo ‑zʋ yö Atanna ‑dhɛ ꞊dhɛ ‑kɔ 'ö Ablaamö ‑ya ‑kë 'ka kö 'yii 'go ꞊kö 'gbannë 'gü ‑a 'dhö bha‑ ‑nu dë 'ka.
ROM 4:13 Atanna kë "kpʋngtaadhɛ "plüün ‑bho Ablaamö waa‑ suu 'gü ‑në ‑nu ‑dhɛ ꞊dhɛ‑ ‑nu 'kɛan‑ 'dhö. ‑A kë 'ö‑ wo "dhʋ̈ bha‑ ‑gɛn 'yii kë ‑a ‑bha Atanna ‑bha 'tɔng‑ ‑nu ꞊bhlëë ‑ya "gbɩɩ‑ ‑sü ‑zë 'ka. ‑Ya ‑kë "dhʋ̈ ‑a ‑bha ‑zʋ ‑yö ‑a ‑dhɛ ‑sü ꞊në‑ ‑wɔn 'gü.
ROM 4:14 ‑A ‑gɛn ‑mü ꞊dhɛ ꞊ya kë 'nu ꞊dhɛ pë 'ö Atanna ‑ya "plüün bho "dhʋ̈ bha ‑yö ‑slɔɔ ‑a ‑bha 'tɔng‑ ‑kun ‑së ‑sü ꞊në "gblʋʋ "piʋ̈, kö ‑zʋ ‑yö ‑a ‑dhɛ ‑gɛn 'yaa 'dhö. 'Sa kö "plüün 'ö‑ bho 'ö ‑gban 'mɛ ꞊wa 'dhang bho Yesu "dhiʋ̈ kö ꞊wa dha ‑wɔn ‑bha bha, kö‑ bho ‑gɛn 'yaa 'dhö 'zü, kö ꞊ya kë "wlaasü.
ROM 4:15 ‑A 'klɔɔ‑ ‑mü ꞊dhɛ 'tɔng‑ ‑zë ‑yö 'wɔn yaa bho ꞊në‑ wo "dhuu, 'yö ꞊waa‑ bho, 'yö Atanna zuë" ꞊wlü ‑kpɛawo 'ö dho‑ 'ka, "kɛɛ 'tɔng‑ ‑zë 'yaa ‑dhɛ 'ö‑ 'gü tongtongdhö, kö‑ bho ‑sü 'yaa 'dhö 'pö.
ROM 4:16 Yö ꞊në‑ ‑wɔn 'gü, 'yö 'mɛ 'ö Atanna ‑yö "plüün bha‑ bho‑ ‑nu ‑dhɛ bha 'wo‑ ꞊slɔɔ ‑zʋ ‑yö ‑a ‑dhɛ ‑sü ꞊në‑ "gblʋʋ "piʋ̈. Kë "dhʋ̈ kö ‑yö kë 'pë 'ö‑ ꞊gbaɔ "wɛɛwɛɛ ꞊në‑ 'ka, kö 'ya 'dho 'to Zuifö ‑nu 'ö wo ‑zë ‑a ‑bha 'tɔng‑ 'dhö‑ ‑nu ‑gɔ bha woo do‑ ‑nu ‑bha 'wɔn 'ka, "kɛɛ kö ‑yö kë mɛ "pɛpɛ 'wo dho 'dhang bho‑ "dhiʋ̈ ‑a ‑nu ꞊gban ‑bha 'wɔn 'ka ꞊dhɛ ‑kɔ 'ö ‑kë 'ka mɛ ꞊gban "pɛpɛ kwa "bhɛma Ablaamö ‑dhɛ yi 'bha 'ka bha‑ 'dhö. ‑A ‑gɛn ‑mü ꞊dhɛ ‑yö ‑bɛn zë ‑sü 'ka Atanna ‑gɔ 'sëëdhɛ 'gü ꞊dhɛ:
ROM 4:17 «Bhi ꞊në 'a i ‑ya kö 'i kë "sɛgɔ 'gbɛ ꞊dede 'gü ‑mɛ ‑nu ꞊gban dë 'ka.» Atanna 'ö 'dhang bho‑ "dhiʋ̈, yö 'ö 'mɛ ꞊wa ga ‑a ‑nu ‑bö 'ö 'wo ‑kë ‑tosɛa ‑dee këmɛ 'ka, 'ö yö ꞊në 'pë 'yaa 'dhö tongtongdhö ‑a ‑da bha Ablaamö ꞊në kwa dë 'ka ‑a wëëdhö.
ROM 4:18 ‑A 'klɔɔ‑ ‑mü ꞊dhɛ ‑zʋ ‑yö ‑a ‑dhɛ ‑kɔ 'yaa ‑kɔ 'ö‑ ‑bha, Ablaamö bha ꞊në kë ‑zʋ yö‑ ‑dhɛ ‑a 'kɔ 'gü. ‑A ‑gɛn ‑mü ꞊dhɛ yö 'ö bha ꞊në Atanna ‑yö nëgɔɔn do "plüün bho‑ ‑dhɛ, "kɛɛ kö‑ ‑kwɛ ꞊ya kë këng do, kö‑ ‑bha dhebhɔ ‑dɩ 'pö ꞊ya kë mɛ ꞊kpaɔsü ꞊dede 'ka, kö 'yaa 'nëkpɔmɛ 'ka 'zü, 'yö Atanna ‑ya pö‑ ‑dhɛ ‑a Gbö 'ö dho bhɔ "dhʋ̈ bha ꞊në‑ suu 'gü ‑në ‑nu dho pa 'wo ‑kë "sɛgɔ ‑zii ‑sü do 'ka, "kɛɛ 'yö waa‑ ‑bha dhebhɔ ‑a ‑nu ‑kë zii ‑sü ꞊gban waa‑ ‑bha ‑bha, 'yö Ablaamö ‑yö 'dhang bho‑ ‑wʋ bha‑ "dhiʋ̈, 'yö‑ ‑bha ‑zʋ ‑yö ‑a ‑dhɛ ‑sü 'bha 'yii "kan‑ ‑ta.
ROM 4:20 Ablaamö ‑bha ‑zʋ ‑yö Atanna ‑dhɛ ‑kɔ yaa 'gü yaa bha‑ ‑wɔn 'gü, "sika 'bha ‑zian 'yii kë‑ 'gü 'wɔn 'ö Atanna ‑ya pö‑ ‑dhɛ bha‑ "gblʋʋ "piʋ̈, ‑ya ‑to "dhiʋ̈ 'ö zun‑ nuɛ" bho ‑sü ‑bha.
ROM 4:21 ‑A 'klɔɔ‑ ‑mü ꞊dhɛ ‑a 'dhang bho ‑sü ‑gun "dhiʋ̈ 'kpakpadhö ꞊dhɛ Atanna ‑fiëbhawɔn 'yaa 'dhö, ꞊ya 'wɔn "ʋʋ 'wɔn 'ö‑ pö, ‑yö ‑mɔɔ ‑bha 'ö‑ ‑kë.
ROM 4:22 'Dhang 'ö Ablaamö ‑ya bho "plüün 'ö Atanna ‑ya bho‑ ‑dhɛ bha‑ "dhiʋ̈ "dhʋ̈ bha ꞊në‑ ‑wɔn 'gü, 'yö Atanna ‑ya pö ꞊sɔng 'yaa‑ ‑bha.
ROM 4:23 "Kɛɛ ‑a pö 'ö‑ wo "dhʋ̈ bha 'yii‑ pö "dhʋ̈ Ablaamö yöö do‑ ‑dhɛ.
ROM 4:24 ‑Ya ‑pö "dhʋ̈ mɛ ꞊gban ꞊në kwa ‑dhɛ bha. ‑A ‑gɛn ‑mü ꞊dhɛ ꞊ya kë ꞊dhɛ 'kwa 'dhang bho 'pë 'ö Atanna 'ö kwa Dëmɛ Yesu ‑bö 'ö go ga 'gü bha ‑ya "plüün bho bha‑ "dhiʋ̈, ‑yö ‑dho ö ‑kɔ ‑ya 'pö kwa ‑bha ꞊dhɛ ‑kɔ do 'ö ö ‑kɔ ‑ya 'ka Ablaamö ‑bha bha‑ 'dhö.
ROM 4:25 ‑A 'klɔɔ‑ ‑mü ꞊dhɛ Yesu bha ꞊në ga kwa ‑wɔn 'gü, kë "dhʋ̈ kö 'bɔn ‑yö 'go kwa ‑bha. 'Yö dho 'yö Atanna ‑ya ‑bö, 'yö go ga 'gü, kë "dhʋ̈ kö ꞊sɔng 'ya 'dho kë kwa ‑bha ö wëëdhö.
ROM 5:1 ‑A ‑kë "dhʋ̈ ‑sü 'gü, ꞊dhɛ 'ö ‑kë ꞊dhɛ 'kwa 'dhang bho Yesu Klisi ‑wɔn "dhiʋ̈, kwa ‑bha 'dhang ‑bho ‑a ‑wɔn "dhiʋ̈ ‑sü bha‑ ‑wɔn 'gü, Atanna ꞊ya kwa kë 'mɛ 'ö pö 'aa‑ ‑bha ‑a 'ka ö wëëdhö, 'yö 'kwa ‑ya kwa 'flëë‑ 'gü ꞊taamasü ya‑ 'gü kwa Dëmɛ Yesu Klisi 'saa‑ 'gü.
ROM 5:2 Atanna ‑bha ‑gasitɛ 'kwa ‑ya ‑a "yi ꞊bhaa ꞊dɛɛ bha kwa‑ ‑slɔɔ 'dhang 'kwa‑ bho Yesu ‑wɔn "dhiʋ̈ bha ꞊në‑ "gblʋ̈ "piʋ̈, Yesu bha ꞊në 'kwa bɔ‑ ‑ta, kwa ‑bha 'dhang ‑bho ‑a "dhiʋ̈ ‑sü ‑wɔn 'gü, 'yö 'kwa ꞊yɔɔn Atanna "sɔɔ. ‑A ‑kë "dhʋ̈ ‑sü 'gü, kwa ꞊nii ‑da ‑gɛn ‑mü ꞊dhɛ kwa ‑kë Atanna ‑bha 'tɔbhɔdhe 'gü ‑mɛ 'ka ‑wɔn ‑yö ‑dhö. Yö ꞊në kwa ‑zʋ 'dhö‑ 'gü
ROM 5:3 Yö ꞊në‑ ‑wɔn 'gü, 'yö kwa ꞊nii 'dhö ‑da saan" ‑zian 'gü, ‑a ‑gɛn ‑mü ꞊dhɛ kwa‑ 'wɔn ‑dɔ ꞊dhɛ saan" ꞊në mɛ ꞊yaa‑ wo 'yö mɛ zuë" 'dhö ‑kë ‑sɛa,
ROM 5:4 'yö zuësɛadhɛ ‑yö 'wɔn ꞊gban 'kun bho mɛ 'gü, 'yö mɛ 'gü 'yaa ga ‑zʋ ‑yö Atanna ‑dhɛ ‑sü 'ka.
ROM 5:5 'Sa 'mɛ 'ö ö "yan to Atanna ‑bha mɛ ‑dhɛ bha‑ ‑gɔ, 'yiʋ̈‑ 'yaa dɔ‑ ‑bha. ‑A 'klɔɔ‑ ‑mü ꞊dhɛ ꞊ya ö ‑bha 'Nii‑ "slʋ̈ʋ̈slʋ̈ ꞊gbaɔ kwa ‑gɔ. ‑A ‑bha 'Nii‑ 'ö "dhʋ̈ bha ꞊në kwa pa ‑a ‑dhɔ 'ka.
ROM 5:6 ‑A 'klɔɔ‑ ‑mü ꞊dhɛ 'ö gun kö‑ dhɔɔbhaawɔn kë "sɩ 'yii kë kwa ‑dhɛ ꞊kö, 'yö Yesu Klisi ‑yö ga 'wɔnyaakëmɛ ‑nu bha kwa ‑wɔn 'gü, yi 'ö Atanna ‑ya ‑ya ö ‑zʋ "piʋ̈ ‑a ‑kë "dhʋ̈ ‑yi 'ka bha‑ 'ka.
ROM 5:7 'Sa ‑yö kë ka "yaan ꞊dhɛ ‑ga 'wɔnsëkëmɛ ‑zian ‑wɔn 'gü ‑dhɛ ‑yö 'ya‑. ‑Ɛɛ, 'kö mɛ ‑zian ꞊ya ꞊slɔɔ 'zü kö ‑yö ga mɛ ‑wɔn 'gü, "kɛɛ kö‑ ga ‑gɛn ‑yö ‑dho kë 'mɛ 'ö ga‑ ‑wɔn 'gü bha‑ këwɔn ‑së ꞊në‑ 'ka. "Kɛɛ yö ‑zë ꞊gban 'gü ‑a ‑dhɛ 'yaa ‑së.
ROM 5:8 "Kɛɛ Klisi ‑bha ga ‑zë ‑ya ‑wo kö kwa ‑tun kö 'wɔnyaakëmɛ 'ka. Kë "dhʋ̈ kö 'kwa‑ 'wɔn dɔ ꞊dhɛ kwa ‑dhɔ 'ö Atanna ‑kë ‑a "sinma "yɔɔ 'yaa 'dhö.
ROM 5:9 Ga 'ö‑ wo "dhʋ̈ bha ꞊në‑ ‑wɔn 'gü, 'yö Atanna ‑ya pö kwa ‑bha ꞊dɛɛ ꞊dhɛ 'bɔn 'yaa kwa ‑bha. 'Wɔn 'ö‑ ‑wɔn 'gü 'pö 'yö 'kwa dho dha 'wɔn 'ö Atanna dho‑ wɔ mɛ "bhɩɩ‑ ‑nu ‑ta ‑dhɛ 'bha ꞊kpaɔ ‑yi ‑bha bha‑ ‑gɔ bha 'yö bha.
ROM 5:10 ‑A ‑gɛn ‑mü ꞊dhɛ 'ö gun kö‑ Gbö bha 'yii ga ꞊kö kwa ‑wɔn 'gü, kwɛng‑ ‑nu kwa ‑gun 'yaɔdhɛ ꞊në‑ 'gü. Ga 'ö‑ wo "dhʋ̈ bha 'yö kwa wü 'koo. 'Yö "sanni 'mɛ 'ö 'kwa gun Atanna 'yaɔ‑ 'ka ‑yö "wɩ‑ ‑bha kö ‑yö kwa 'wü 'koo bha ‑oo, 'yö 'kwa bo 'wü ‑sü ‑zë 'ka 'koo ꞊wɛ? ‑Më ꞊në Atanna dho‑ fië‑ bho kwa ‑bha ꞊taamasü ya‑ 'gü kö 'kwa kë‑ "taɔngdë ‑nu 'ka, kö‑ ‑bha ꞊sii ‑yö kwa 'gü.
ROM 5:11 ꞊Ya 'to‑ 'dhɛ 'kö bha‑ ‑bha ‑zianwo 'nu, mɛ‑ ‑mɔɔ ‑bha 'ö mɛ ‑ya 'bha pö‑ 'gü, "kɛɛ 'ö ‑ya mü 'zü, "yi 'ö kwa Dëmɛ Yesu Klisi ‑ya kpɔ kwaa‑ Atanna ‑nu kwa ꞊zinng 'gü bha‑ 'saa‑ 'gü, kwa ‑mɔɔ ‑bha 'kwa kwa "dhia bho, dhi 'ö kwɛng‑ ‑nu 'kwa‑ wo bha‑ ‑wɔn 'gü, 'ö kwa ꞊nii 'dhö ‑da ꞊dedewo.
ROM 5:12 ‑A ‑gɛn ‑mü ꞊dhɛ mɛ doseng ꞊në 'wɔn yaa ‑yö bɔ‑ ‑ta 'yö ‑da "kpʋngtaamɛ ꞊gban "pɛpɛ ꞊yɔɔn 'gü, 'yö ga ‑yö bɔ‑ ‑ta 'pö 'yö ‑da "kpʋng ꞊taa. 'Wɔn 'ö‑ ‑wɔn 'gü 'yö ga 'yaa mɛ 'bha ‑mɛ 'bha 'to bha 'yö bha. ‑A 'klɔɔ‑ ‑mü ꞊dhɛ mɛ ꞊gban "pɛpɛ ‑wo 'wɔnyaakëmɛ 'ka 'mɛ bha ꞊në 'wo‑ ‑dhɛ Adan.
ROM 5:13 'Ö gun kö Atanna ‑bha 'tɔng‑ ‑zian 'ö Moizö ‑ya ‑bɛn zë bha 'yii‑ ‑bɛn zë ꞊kö, kö 'wɔn yaa kë ‑sü ‑zë ‑yö ‑dhö. "Kɛɛ gun 'ö‑ wo "dhʋ̈ kö 'yii 'tɔng‑ dɔ ꞊kö bha‑ "tʋ 'yaa gun‑ ‑bha.
ROM 5:14 Adan ‑zë ꞊tɔn ‑yö Atanna ‑wʋ ꞊në bho ö "tʋʋ, 'yö ‑kë ‑a 'wɔn yaa kë 'klɔɔ‑ 'ka, "kɛɛ mɛ "pɛpɛ ‑zian 'ö 'wii‑ ‑wʋ bho wo "tʋʋ ꞊dhɛ Adan ‑bha bha‑ 'dhö, ga ‑kɔ ‑gun ziö ‑sü 'ka‑ ‑nu ꞊gban ‑gɔ yö ‑zë ꞊gban 'gü, 'ö dho 'ö zun‑ 'ka Atanna ‑bha 'tɔng‑ 'ö Moizö ‑ya dɔ bha‑ dɔ ‑yi ‑bha, ‑a ‑gɛn ‑mü ꞊dhɛ kö 'wɔn yaa ‑ya ‑nu ‑bha 'pö, 'sa Klisi 'ö nu kwa dɔ ‑kɔ ya‑ 'gü bha‑ ‑zɔn 'ka ꞊në gun Adan bha‑ 'ka.
ROM 5:15 "Kɛɛ ‑gasitɛ 'ö Atanna ‑ya ‑kë kwa ‑dhɛ bha‑ ꞊bhlëë ‑yö 'kpii‑ 'ö ‑ziö 'wɔn yaa 'ö Adan ‑ya ‑kë bha‑ ‑ta ꞊gblɛɛn. ‑Yö "dhʋ̈ tɛan‑ 'ka ꞊dhɛ mɛ 'gbɛ ꞊dede ‑wo kë ‑ga mɛ dosengseng bha 'ö 'wɔn yaa 'ö‑ ‑kë bha‑ ‑wɔn 'gü, "kɛɛ ‑gasitɛ 'ö Atanna ‑ya ‑kë 'pö kwa ‑dhɛ 'ö Yesu Klisi bɔ bha‑ ꞊bhlëë ‑yö 'kpii‑ ‑ziisü, ‑a ‑gɛn ‑mü ꞊dhɛ mɛ 'gbɛ ‑wo ‑bɔ 'pö yö ꞊në‑ ‑ta 'yö 'wo dha "wɛɛwɛɛ (Adan ‑kë Klisi ‑zɔn 'ka 'ka 'klɔɔ‑ ꞊në bha).
ROM 5:16 ꞊Ya 'go mü 'zü, Atanna ‑bha gbaɔdhe bha‑ ꞊bhlëë 'ö ‑kë 'kpiisü 'ö ‑ziö 'wɔn yaa 'ö mɛ do ‑ya kë bha‑ ‑ta bha, ‑a 'klɔɔ‑ 'bha 'ö mü 'zü yö ‑mü ꞊dhɛ 'wɔn yaa 'ö mɛ doseng ‑ya ‑kë bha ꞊në ‑kë mɛ ꞊gban "pɛpɛ ‑gɔ ‑to ‑bha ‑wɔn 'ka, "kɛɛ Yesu Klisi ‑bha nu ‑sü kö ‑yö kwaa‑ Atanna ‑nu kwa ‑kɔ 'wü 'koo bha‑ ‑wɔn 'gü, Atanna ꞊ya kwa dha, 'sa kö 'kwa 'wɔn yaa "sinma ‑sinma bha‑ kë 'nu.
ROM 5:17 Mɛ do ꞊në 'wɔn yaa ‑kë 'yö ga ‑kɔ ‑yö ꞊mɔɔ mɛ ꞊gban "pɛpɛ ‑bha, yöö do ‑a ‑bha 'wɔn yaa 'ö‑ ‑kë bha‑ ‑wɔn 'gü "dhʋ̈ tɛan‑ 'ka, "kɛɛ 'wɔn 'dhɛ 'kö ‑kë kwa ‑dhɛ 'pö Yesu Klisi 'saa‑ 'gü bha ‑yö ‑ziö ‑a 'dhɛ 'kö bha‑ ‑ta pongpongdhö. ‑A ‑gɛn ‑mü ꞊dhɛ mɛ "ʋʋ mɛ 'ö ꞊ya 'dhang bho yöö Yesu Klisi bha ꞊në‑ "dhiʋ̈, 'yö Atanna ‑ya ‑mɛ sü ꞊dhɛ 'mɛ 'ö 'bɔn 'bha 'yaa‑ ‑bha 'zü ‑a 'dhö. 'Yö‑ ‑mɛ ‑yö ‑ya ‑a ‑bha ‑gasitɛ bha‑ "yi ꞊bhaa Klisi bha‑ 'saa‑ 'gü, 'yö mɛdhɛ ‑kë ‑a "piʋ̈.
ROM 5:18 ‑A ‑kë "dhʋ̈ ‑sü bha‑ 'gü, ‑kɔ do 'ö Atanna ‑bha za ‑yö bɔ‑ 'ka Adan yöö do‑ ‑bha 'wɔn yaa kë ‑sü ‑ta 'ö mɛ ꞊gban "pɛpɛ zë‑ 'ka bha, Atanna ‑yö ‑bɔ 'wɔn ‑së 'ö Yesu Klisi 'ö ꞊sɔng 'bha 'yaa‑ ‑bha 'ö‑ ‑kë bha ꞊në‑ ‑ta ‑kɔ do bha‑ 'gü 'pö, 'yö 'bɔn bho‑ 'ka mɛ ꞊gban "pɛpɛ ‑bha, 'yö ꞊sii ‑da ‑a ‑nu 'gü.
ROM 5:19 Mɛ dosengseng ‑bha ‑da Atanna "dhiʋ̈ ‑sü ꞊në pö ‑ya mɛ 'gbɛ ‑bha ‑a wëëdhö. ‑Kɔ do bha‑ 'gü 'pö Yesu Klisi yöö doseng ‑a ‑bha Atanna ꞊bhlëë 'ö‑ ‑ya bha ꞊në dho mɛ 'gbɛ dha, 'yö ꞊sɔng bho‑ ‑nu ‑bha Atanna wëëdhö.
ROM 5:20 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑yö ö ‑bha 'tɔng‑ ‑nu ‑nu mɛ "bhɩɩ‑ ‑dhɛ kö ‑wa ‑bho 'koo ꞊në dɔ ꞊dhɛ ‑a "sɩ 'yaa mɛ "bhɩɩ‑ bha ‑dhɛ kö ‑ya ‑bha 'tɔng‑ 'kun 'kpakpadhö kö ‑yö kë ‑a dha ‑gɛn 'ka. Kë "dhʋ̈ kö ꞊waa‑ 'wɔn dɔ, kö ‑wa ‑bha ‑gasitɛ bha‑ ꞊bhlëë dɔ, kö ‑wa 'wɔn dɔ ꞊dhɛ "tʋ̈ng 'ö mɛ "bhɩɩ‑ ‑bha 'wɔn yaa ‑yö ‑da 'ka 'kpii‑ 'gü bha, 'yö Atanna ‑bha ‑gasitɛ ‑yö ‑ziö 'ka ‑gbaɔ 'gü 'pö.
ROM 5:21 Kë "dhʋ̈ kö ‑wa 'wɔn dɔ ꞊dhɛ ‑kɔ do 'ö 'wɔn yaa ‑yö ‑ya 'ka "sɛ "dhiʋ̈ 'ö ga ‑yö bɔ‑ ‑ta 'ö‑ ‑kɔ ‑yö ꞊mɔɔ‑ 'ka mɛ "bhɩɩ‑ ‑bha bha, Atanna ‑dɩ 'pö ‑yö ‑gasitɛ ‑kë kwa ‑dhɛ ‑kɔ do bha ꞊në‑ 'gü, 'yö 'kwa bɔ kwa Dëmɛ Yesu Klisi 'ka, 'yö‑ pö kwa ‑bha ꞊dhɛ 'bɔn 'yaa kwa ‑bha, 'yö ꞊sii 'ö 'yaa yën ‑a ‑da kwa 'gü.
ROM 6:1 ꞊Ya kë "dhʋ̈ kö 'wɔn bha‑ ‑gɔ 'kwa‑ sü‑ 'gü yö ‑mü ‑më 'ka? Kwa ‑dho zë Atanna ‑bha ‑gasitɛ ‑kë kwa ‑dhɛ ‑sü ‑wɔn ꞊në‑ ‑dhɛ kö 'kwa ‑tosɛa kë 'wɔn yaa 'gü ‑kpɛawo 'kwa 'dho‑ 'ka, kë "dhʋ̈ kö ‑yö ö ‑bha ‑gasitɛ bha‑ 'bha ‑da 'gü 'pö ‑kpɛawo ‑ee?
ROM 6:2 ‑Abin! ‑A ‑gɛn ‑mü ꞊dhɛ 'kwa bɔ Yesu 'ka kö 'kwa kë ꞊dhɛ 'mɛ ꞊ya ga ‑a 'dhö 'wɔn yaa kë ‑sü ‑gɔ. Kö 'kwaa 'dhö 'zü 'wɔn yaa ‑zë ‑bha 'ka, ꞊ya kë "dhʋ̈ kö 'kwaa‑ ꞊mɔɔ‑ ‑bha kö 'kwa 'wɔn yaa kë 'zü ‑kpɛawo 'kwa 'dho‑ 'ka.
ROM 6:3 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑yö 'to ka "yaan ꞊dhɛ mɛ "pɛpɛ 'ö ꞊wa kwa ‑bɔ Yesu Klisi 'ka ‑zu bho 'ö 'kwa ‑kplü ‑a ‑bha bha kö ga 'ö‑ wo bha kwɛng‑ ‑nu kwa‑ ‑wo kwa "kwëë.
ROM 6:4 ꞊Ya kë "dhʋ̈ kö 'dho 'ö 'kwa‑ wo "yi ꞊wlöö kwa ‑bɔ ‑a 'ka ‑zu bho ‑dhɛ 'gü bha ꞊në ꞊dhɛ ga 'ö kwɛng‑ ‑nu 'kwa‑ wo kwa "kwëë, 'ö 'wo kwa bun bho ‑a 'dhö. Kë "dhʋ̈ kö 'kwa 'tosɛa kë 'pö ꞊dhɛ Klisi ‑bha 'ö‑ kë sië kö‑ Dë ‑bha 'gügbɩɩdhɛ ꞊bhlëësü bha ꞊yaa‑ bho ga 'gü ꞊yaa‑ ‑bö bha‑ 'dhö.
ROM 6:5 ‑A 'klɔɔ‑ ‑mü ꞊dhɛ kwɛng‑ ‑nu 'kwa kë do, kwa ga ‑kɔ ꞊ya kë do ꞊dhɛ ‑kɔ bha‑ 'dhö, kö kwa ‑go ga 'gü ‑sü 'ö 'kwa ‑bö bha ‑yö ‑dho kë 'pö ꞊dhɛ ‑a ‑bha 'dhö.
ROM 6:6 ‑A kë "dhʋ̈ ‑sü bha‑ 'gü, ‑a ‑dhɛa ‑bha ꞊dhɛ ‑a ‑naa kë kwa "yaan ꞊dhɛ mɛ suu 'dhɛ 'kwa gun‑ 'ka ‑blɛɛsü bha ꞊në ꞊ya ga Klisi "piʋ̈ "dhü ‑bha bha. Kë "dhʋ̈ kö zuëga yaa 'ö gun kwa "gblʋ̈ʋ̈‑ ‑blɛɛsü bha‑ 'gü ‑yö see‑, kö 'kwa 'go 'wɔn yaa kë ‑sü ‑gɔ ꞊dhuëngdhɛ 'gü.
ROM 6:7 ‑A ‑gɛn ‑mü ꞊dhɛ 'mɛ ꞊ya ga kö 'wɔn yaa kë ‑sü "pɔ ꞊ya 'go‑ ‑bha, ‑a 'klɔɔ‑ ‑mü ꞊dhɛ kö 'wɔn yaa kë "sɩ 'yaa‑ ‑mɛ ‑dhɛ 'zü.
ROM 6:8 'Sa ꞊ya kë ꞊dhɛ kwaa‑ Klisi ‑nu 'kwa ga ‑zë wo kwa "kwëë, kö kwa 'dhang bho ‑sü ‑ya "dhiʋ̈ 'kpakpadhö ꞊dhɛ kwɛng‑ ‑nu kwa ‑dho ‑tosɛa kë 'pö kwa "kwëë.
ROM 6:9 'Ö kwa 'dhang bho ‑sü ‑yö ‑kë "dhiʋ̈ 'kpakpadhö 'pö ꞊dhɛ Klisi 'ö Atanna ‑ya ‑bö bha 'yii 'dho ga 'zü tongtongdhö, ꞊dhɛ ga ‑kɔ 'yii 'dho ꞊mɔɔ‑ ‑bha 'zü.
ROM 6:10 ‑A 'klɔɔ‑ ‑mü ꞊dhɛ ga do 'ö‑ wo bha ‑ya ‑wo "dhʋ̈ kö 'ö ‑gwë zun 'wɔn yaa ‑bha 'gügbɩɩdhɛ 'ö mɛ "bhɩɩ‑ ‑nu ‑bha bha ꞊në‑ ‑naa "dhiʋ̈, ‑tosɛa 'dhɛ 'ö‑ kë sië "tʋ̈ng ya‑ 'gü ‑a ‑bö ‑sü zian‑ ‑ta bha ‑ya kë sië 'pö Atanna ꞊në‑ ‑bha kë 'gü.
ROM 6:11 ‑A ‑kë "dhʋ̈ ‑sü ‑wɔn 'gü, kaa ‑dɩ 'pö, ‑ka ka ‑dɩ ‑sü ꞊dhɛ 'mɛ ꞊ya ga 'wɔn yaa ‑gɔ ‑a 'dhö, kö 'ka ‑tosɛa kë Atanna ‑bha kë 'gü Yesu Klisi ꞊yënng 'gü.
ROM 6:12 ꞊Dhɛ 'ö "dhʋ̈, 'ka 'dho "wɩ‑ ‑bha 'zü tongtongdhö 'ö 'wɔn yaa ‑kɔ ‑yö ‑ziö ka kwi 'ö ga ‑pë 'ka bha‑ ‑gɔ. 'Wɔn yaya ‑nu 'ö ka zuë" ‑yö bhɔ‑ kë ‑sü ‑bha bha, 'ka 'dho‑ 'bha kë 'zü.
ROM 6:13 Ka daɔ ‑nu 'wo ka ‑bha bha 'ka 'dho‑ ‑nu "kplëng bho 'wɔn yaa kë ‑sü ‑dhɛ ꞊dhɛ ‑a ‑bha yë ‑kë 'ka ‑kwɛɛ ‑nu 'dhö, "kɛɛ ‑ka ka ‑dɩ nu Atanna ‑dhɛ ‑kɔ ꞊gban ‑kɔ ꞊gban 'gü, kö 'ka kaa‑ ‑tosɛa ꞊gban nu‑ ‑dhɛ. ‑A 'klɔɔ‑ ‑mü ꞊dhɛ ka 'ö 'ka gun 'ka ga bha 'ka 'go ga 'gü 'ka ‑bö, ‑tosɛa ‑dee ꞊në‑ 'ka‑ kë sië ꞊taamasü ya‑ 'gü Atanna ‑bha kë 'gü. ‑A ‑wɔn 'gü, ‑ka ka daɔ ‑nu "kplëng bho yö ꞊në ‑dhɛ ꞊dhɛ ‑a ‑bha yë ‑kë 'ka ‑kwɛɛ 'dhö kö 'wɔn 'ö pö 'aa‑ ‑bha ꞊në 'ka‑ kë.
ROM 6:14 ‑A ‑gɛn ‑mü ꞊dhɛ ‑a ‑bha ‑gasitɛ ꞊në 'ka ‑kplü ‑sü 'ka‑ ‑bha ꞊taamasü ya‑ 'gü, 'ö 'ka ‑tosɛa kë sië‑ ꞊yënng 'gü. 'Kaa 'tɔng‑ ‑gɔ ‑kpla 'gü 'zü, 'wɔn 'ö‑ ‑wɔn 'gü 'yö 'wɔn yaa ‑kɔ 'yii 'dho ꞊mɔɔ ka ‑bha 'zü bha 'yö bha.
ROM 6:15 "Kɛɛ ꞊ya kë "dhʋ̈ kö ꞊dhɛ ꞊në bha? Kö ꞊dhɛ 'ö ‑kë ꞊dhɛ kwa ‑kɔ 'yaa 'tɔng‑ ‑gɔ ‑gwë ꞊wlöö 'zü 'ö 'kwa ‑kplü ‑sü 'ka Atanna ‑bha ‑gasitɛ ꞊në‑ ‑bha bha, kwa ‑mɔɔ ‑bha 'kwa 'wɔn yaa ‑kë ‑ee? ‑Abin tongtongdhö.
ROM 6:16 "Ɛɛn 'yaa ka 'gü ꞊dhɛ 'mɛ 'ö ꞊wlü 'ö dho ö ‑dɩ "kplëng bho mɛ ‑dhɛ kö 'ö ‑da ‑mɛ ‑gɔ gwëëdhɛ 'gü, kö‑ ‑mɛ ꞊ya kë 'ö gwëëdhɛ kë sië 'mɛ 'ö‑ ‑dhɛ bha‑ ‑bha ꞊dhuëng 'ka ꞊naa bha ‑ee? ꞊Ya kë "dhʋ̈, 'mɛ 'ö 'bha i ‑dɩ nu 'wɔn yaa kë ‑sü ‑dhɛ, kö 'bha ‑da ‑gɔ ꞊dhuëngdhɛ 'gü ꞊naa bha, i ‑gɔ ‑dho 'to‑ ‑bha 'ö i 'gü ‑yö ꞊see. 'Mɛ 'bha i ‑dɩ "kplëng bho 'pö Atanna ‑dhɛ kö 'i‑ ꞊bhlëë ‑ya, ‑yö ‑dho i kë 'mɛ 'ö pö 'aa‑ ‑bha ‑a 'ka.
ROM 6:17 "Kɛɛ Atanna nuɛ", ‑a ‑gɛn ‑mü ꞊dhɛ ka 'ö 'ka gun 'wɔn yaa kë ‑sü ꞊në‑ ‑gɔ ꞊dhuëngdhɛ 'gü ‑blɛɛsü bha, ‑gasitɛ yö ꞊në‑ ‑bha 'yö 'wo "ta ‑kɔ ‑së 'ö ‑zɔn ka ‑dhɛ bha ꞊në 'ka‑ 'sü ‑sü 'ka ka 'nii‑ ‑bha ‑wɔn 'ka dɔ ‑kɔ ya‑ 'gü.
ROM 6:18 ‑A ‑wɔn 'gü, 'go 'ka‑ wo 'wɔn yaa ‑gɔ ꞊dhuëngdhɛ 'gü bha ka ‑da ‑sü 'ka 'wɔn ‑së kë ‑sü ꞊në‑ ‑gɔ ꞊dhuëngdhɛ 'gü.
ROM 6:19 'Wɔn ‑zɔn 'ka 'a‑ ‑zɔn 'ö ‑gban ꞊dhuëngdhɛ ‑bha bha a‑ ‑kë "dhʋ̈ kö 'wɔn 'a‑ pö sië bha ꞊në 'ka‑ 'gü ma 'kpakpadhö, ꞊dhɛ ‑kɔ do 'ka gun ka ‑kɔ waa‑ ka ‑gɛn ꞊gban ‑da ‑sü 'ka‑ 'ka 'wɔnmakoosü ‑nu kë ‑sü ‑nu waa‑ 'wɔn yaa kë ‑sü ‑gɔ ꞊dhuëngdhɛ 'gü, 'ö 'ka gun 'ka kë "bhluubhlu ‑a ‑wɔn 'gü bha ꞊në 'ka dho‑ kë‑ 'ka 'wɔn ‑së kë ‑sü 'gü ꞊taamasü ya‑ 'gü 'pö, kö 'ka kë "slʋ̈ʋ̈slʋ̈ Atanna ‑bha 'ka.
ROM 6:20 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'ö gun kö ka ‑kɔ ‑yö 'wɔn yaa ‑gɔ ‑gwë ꞊wlöö, kö 'kaa 'wɔn ‑së kë ‑sü ‑zë ‑gɔ ꞊dhuëngdhɛ 'gü tongtongdhö, kö ka flëë‑ 'gü 'wɔn ‑së kë ‑sü ‑zë ‑gɔ.
ROM 6:21 ‑A kë 'ka gun‑ wo sië "dhʋ̈ "tʋ̈ng bha‑ 'gü bha, ‑a ꞊trɔɔn 'ka‑ ꞊slɔɔ‑ 'gü ꞊dɛɛ yö ‑mü ‑më 'ka? Yö ‑mü 'wɔn ‑nu bha‑ ‑nu 'yiʋ̈‑ 'ö ka kë sië ꞊dɛɛ bha ꞊në‑ 'ka. ‑A 'klɔɔ‑ ‑mü ꞊dhɛ 'wɔn 'dhɛ 'kö 'ka gun‑ kë sië bha ‑wo ga ‑zian ꞊në‑ bho mɛ 'ka.
ROM 6:22 "Kɛɛ dɔ 'dhɛ 'kwa‑ wo ꞊dɛɛ, 'ö 'ka 'go 'wɔn yaa ‑gɔ ꞊dhuëngdhɛ 'gü 'ö 'ka bɔ Atanna 'ka bha‑ ꞊trɔɔn 'ö ka ‑bha yö ‑mü pö 'ö 'yaa ka ‑bha ‑a wëëdhö bha ꞊në‑ 'ka, 'yö‑ ‑gɔ ‑yö dho 'ö dɔ ‑tosɛa 'ö 'yaa yën 'ö‑ "piʋ̈ bha‑ ꞊slɔɔ ‑sü ‑ta.
ROM 6:23 ‑A ‑gɛn ‑mü ꞊dhɛ ꞊trɔɔn 'ö 'wɔn yaa kë ‑sü 'gü 'yö ga 'ka. "Kɛɛ 'pë 'ö Atanna ‑ya ꞊gbaɔ 'mɛ 'ö 'dhang bho kwa Dëmɛ Yesu Klisi "dhiʋ̈ ‑a ‑gɔ "wɛkɛwɛkɛ, 'yö ‑mü ‑tosɛa 'ö 'yaa yën 'ö‑ "piʋ̈ bha ꞊në‑ 'ka.
ROM 7:1 N dheebhang ‑nu, a‑ 'wɔn ‑dɔ "pɛɛpɛdhö ꞊dhɛ 'pë 'ö maa‑ pö ka ‑dhɛ bha ka‑ ‑dɔ 'nu ‑blɛɛsü, ‑a 'klɔɔ‑ ‑mü ꞊dhɛ ka 'tɔng‑ ‑dɔ 'kpakpadhö. Ka‑ 'wɔn ‑dɔ ꞊dhɛ mɛ 'ö 'yii ga ꞊kö, 'ö ‑tun ‑zë wo "yaan, kö‑ ‑mɛ ‑kɔ ‑yö ‑tun 'tɔng‑ ‑gɔ kpö ꞊wlöö ꞊naa bha. "Ɛɛn 'yaa "dhʋ̈ ‑ee?
ROM 7:2 ‑Yö ‑kë ꞊dhɛ dhebhɔ 'ö gwaan‑ ‑bha ‑a 'dhö. 'Ö 'tɔng‑ 'ö dhe 'sü ‑sü 'gü bha‑ "gblʋʋ ‑ta, "tʋ̈ng 'ö dhebhɔ bha‑ ‑bha gɔn 'ö ‑tun 'ka "yaan, kö waa‑ ‑bha gɔn bha‑ ‑nu gën ‑yö 'kwëë‑ ꞊naa bha. "Kɛɛ ‑a ‑bha gɔn ꞊ya bo ga ‑sü ‑zë 'ka, kö 'tɔng‑ bhië" ꞊ya "kan‑ ‑bha.
ROM 7:3 ‑A ‑kë "dhʋ̈ ‑sü 'gü, "tʋ̈ng 'ö‑ 'ka 'ö dhebhɔ bha‑ ‑bha gɔn 'dhö ‑tun 'ka "yaan, kö ‑ya 'to ‑yö 'dho ‑yö gwaan‑ ‑dee 'kpɔ, kö ‑yö ‑zua ꞊në‑ zë bha. "Kɛɛ ‑a ‑bha gɔn ꞊ya bo ga ‑sü ‑zë 'ka, kö 'tɔng‑ bhië" 'ö gun‑ ‑bha gwaan‑ 'kpɔ ‑sü "gblʋʋ "piʋ̈ bha ꞊ya "kan, ꞊ya ö ‑bha gwaan‑ ‑dee 'kpɔ, ‑ya ‑kpɔ ö ‑ta "puu 'ka.
ROM 7:4 ‑Kɔ do bha‑ 'gü, n dheebhang ‑nu, gun 'ka‑ wo 'tɔng‑ ‑gɔ 'kun 'gü yi 'bha 'ka bha 'yaa "dhʋ̈ 'zü. 'Ka ga 'tɔng‑ bha‑ ‑gɔ ꞊naa bha, 'yii 'dho ka 'kun 'zü, ‑a 'klɔɔ‑ ‑mü ꞊dhɛ ga 'ö Klisi ‑ya wo bha ‑ya ‑wo kaa‑ wo 'gü, ka ‑ga Atanna ‑bha 'tɔng‑ ‑gɔ ‑kɔ ꞊në bha. Kë "dhʋ̈ kö 'ka kë Klisi ‑bha 'ka ꞊dhɛ ‑kɔ 'ö ꞊gɛandhe ‑yö gwaan‑ "wɛɛ kpɔ‑ 'ka bha‑ 'dhö. ‑A mɛ "wɛɛ 'ö "dhʋ̈ bha ꞊në Klisi 'ö go ga 'gü 'ö ‑bö bha‑ 'ka. ‑A kë 'ö Klisi ‑ya wo "dhʋ̈ bha ‑ya ‑kë "dhʋ̈ kö 'mɛ 'ö 'kwa ‑kë ‑a ‑bha mɛ ‑nu 'ka 'kwa ꞊trɔɔn kë Atanna ‑dhɛ.
ROM 7:5 ‑A 'klɔɔ‑ ‑mü ꞊dhɛ "tʋ̈ng 'kwa gun‑ 'ka kwa ‑dɩ dhɔɔbhaa kë ‑zian ‑ta bha, 'wɔn yaa 'ö Atanna ‑bha 'tɔng‑ ‑ya kë ‑sü ‑dhio dɔ bha ꞊në‑ kë ‑sü ‑pɛng ‑yö gun dɔ sië kwa daɔ ‑nu 'ka 'yö kwa "dhiʋ̈ bho‑ 'ka ga ‑dhɛ.
ROM 7:6 "Kɛɛ dɔ 'dhɛ 'kö 'kwa‑ wo ꞊taamasü ya‑ 'gü ya, 'kwa 'go 'tɔng‑ ‑gɔ ꞊dhuëngdhɛ 'gü, ‑a 'klɔɔ‑ ‑mü ꞊dhɛ pë 'ö gun kwa 'kun ‑sü 'ka 'yö kwa gun‑ ‑gɔ ‑kaso 'gü bha 'kwa ga‑ ‑pë ‑gɔ. ‑A ‑kë "dhʋ̈ ‑sü ‑wɔn 'gü, yë ‑dee 'dhɛ 'kwa‑ kë sië ꞊taamasü ya‑ 'gü, Atanna ‑bha kë 'gü bha‑ ‑bha 'Nii‑ "slʋ̈ʋ̈slʋ̈ bha ꞊në‑ kë ‑faan ‑da kwa 'gü. ‑A kë ‑kɔ zii 'dhɛ 'ö gun 'tɔng‑ "gblʋʋ ‑ta bha 'kwaa‑ ‑gɔ ‑kaso 'gü 'zü.
ROM 7:7 "Kɛɛ ꞊ya kë 'sa "dhʋ̈ bha ‑oo, kö ꞊dhɛ ꞊në bha? Kö Atanna ‑bha 'tɔng‑ bha ꞊në pë yaa 'ka bha ‑ee? ‑Abin! "Kɛɛ ‑a 'klɔɔ‑ 'ö mü yö ‑mü ꞊dhɛ Atanna ‑bha 'tɔng‑ bha ꞊në‑ ‑zɔn n ‑dhɛ ꞊dhɛ 'wɔn 'dhɛ 'ö ꞊ni ꞊waa‑ kë kö 'wɔn yaa ꞊në bha, 'yö‑ ‑wɔn 'gü 'yö 'a 'wɔn yaa dɔ. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë ꞊dhɛ Atanna ‑bha 'tɔng‑ bha 'yii ‑dhio dɔ 'nu kö ‑ya pö ꞊dhɛ i zuë" ya 'dho bhɔ pë ‑bha, kö 'maa zuë" ‑bhɔ pë ‑bha ‑sü dɔ 'wɔn yaa 'ka.
ROM 7:8 ‑A pö 'ö 'tɔng‑ bha ‑ya wo ꞊dhɛ zuë" ‑bhɔ pë ‑bha ‑sü bha 'yaa ‑së bha ꞊në 'wɔn yaa ‑yö ö zü ‑gban 'gü, 'yö 'wɔn yaa suu "pɛpɛ 'ö 'tɔng‑ ‑ya pö 'yaa ‑së bha‑ kë ‑dhɔ ‑da n ‑zʋ ‑bha. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë 'nu ꞊dhɛ 'tɔng‑ bha 'yaa 'dhö, kö ‑a pö ‑sü 'ö ꞊dhɛ 'bha‑ kë ꞊ni kö 'bha 'wɔn yaa kë bha‑ 'bhaa 'dhö 'pö.
ROM 7:9 ꞊Ya kë "dhʋ̈ kö ma ‑zë n ‑bha 'ka, 'wɔn 'a n ‑zʋ gɔn‑ 'ka yö ‑mü ꞊dhɛ 'ö gun kö 'mii 'pë 'ö Atanna ‑bha 'tɔng‑ ‑ya ‑dhio dɔ ‑a 'bha dɔ ꞊kö, 'maa gun ‑tosɛa kë sië "sika 'ka. "Kɛɛ ꞊dhɛ 'a‑ dɔ, 'ö 'a‑ 'wɔn dɔ ꞊dhɛ 'ma‑ ‑bha 'tɔng‑ bho, ꞊dhɛ 'wɔnyaakëmɛ ‑mü n 'ka,
ROM 7:10 'yö 'a‑ 'wɔn dɔ ꞊dhɛ ga 'a dho‑ wo bha‑ ‑gɛn ꞊në bha. ‑A ‑kë "dhʋ̈ ‑sü bha ꞊në‑ ‑wɔn 'gü, 'yö 'tɔng‑ 'ö Atanna ‑ya dɔ kö ‑yö dha ‑zian ꞊në‑ bho kwa 'ka bha, 'yö ‑kë ga ‑zian ꞊në‑ ‑bho ma ‑zë n 'ka ‑pë 'ka.
ROM 7:11 ‑A ‑gɛn ‑mü ꞊dhɛ 'wɔn yaa ‑yö ö zü ‑gban ‑a ‑bha 'tɔng‑ 'kö ‑së bha ꞊në‑ 'gü 'yö "kpënng‑ ‑kë n ‑gɔ, 'yö bɔ‑ ‑ta 'yö n ‑pö, 'yö ‑kë n ga ‑gɛn 'ka.
ROM 7:12 ‑A ‑kë "dhʋ̈ ‑sü 'gü, Atanna ‑bha 'tɔng‑ ‑zë yaa ‑dhɛ 'bha 'yaa‑ ‑bha, yö ‑zë ‑yö ‑së, ‑yö "slʋ̈ʋ̈slʋ̈.
ROM 7:13 'Wɔn yaa 'ö n zuë" "piʋ̈ bha ꞊në‑ ‑da ‑wɔn 'dhö ‑mü. Kë "dhʋ̈ kö ‑a ‑bha ‑kë yaa ‑yënngsü ‑sü bha 'kwa‑ dɔ. Yö ꞊në pë ‑së bha‑ sü 'ö‑ ‑kë n zë ‑pë 'ka. ‑Kɔ 'ö 'wɔn yaa ‑yö ö zü ‑gban 'ka Atanna ‑bha 'tɔng‑ 'gü 'yö ‑kë pë yaa ‑yënngsü 'ka bha 'yö bha. 'Yaa yö ‑zë 'ka, 'pë 'kö pë ‑së 'ka ‑yö ‑kë ma ‑zë n zë ‑pë 'ka ‑kɔ ‑kë ꞊dhɛ?
ROM 7:14 ‑Ka ‑dhɛ ‑ga, mɛ ꞊gban kwa‑ 'wɔn ‑dɔ 'kpakpadhö ꞊dhɛ 'tɔng‑ ‑yö ‑go Atanna ꞊në‑ "piʋ̈. ‑Yö ‑së, "kɛɛ ma ꞊në ma ‑zë 'a 'wɔn yaa ‑gɔ ꞊dhuëngdhɛ 'gü, n ‑kë mɛ "bhɩɩ‑ 'ka ‑sü 'ö "sɩ 'yaa n ‑dhɛ bha‑ ‑wɔn 'gü,
ROM 7:15 'yö 'pë 'a‑ ‑kë 'maa‑ dɔ n ‑dɩ ‑gɔ. ‑A 'klɔɔ‑ ‑mü ꞊dhɛ 'pë 'kö‑ kë ‑dhɔ 'dhö n ‑bha 'maa yö ‑zë kë, ‑a 'dhɛ 'ö‑ ‑san 'dhö n ‑kë bha ꞊në 'a‑ ‑kë.
ROM 7:16 ‑A ‑kë "dhʋ̈ ‑sü 'gü, ꞊ya kë ꞊dhɛ 'pë 'yaa n "piʋ̈ ꞊dhɛ 'a‑ kë, 'ma‑ kë, kö‑ ‑dhɛ 'bhaa Atanna ‑bha 'tɔng‑ ‑zë ‑bha, yö ‑zë ‑yö ‑së,
ROM 7:17 kö‑ ‑dhɛ 'bha 'yaa mang ‑dɩ 'pö n ‑bha, kö 'wɔn yaa 'ö n ‑zʋ "piʋ̈ bha ꞊në‑ ‑da ‑wɔn 'dhö ‑mü.
ROM 7:18 ‑A 'klɔɔ‑ ‑mü ꞊dhɛ ꞊ya 'to n suu ‑zë ‑bha ‑bha, n ‑kë mɛ "bhɩɩ‑ 'ka ‑sü "gblʋ̈ "piʋ̈, kö a‑ 'wɔn ‑dɔ ꞊dhɛ 'wɔn ‑së ‑zë ‑a do ‑zian ‑yɛa 'yaa n 'gü. 'Wɔn ‑së kë ‑dhɔ ‑yö ‑kë n ‑bha, "kɛɛ n ‑kɔ ꞊në 'yaa ꞊mɔɔ‑ kë ‑sü ‑bha.
ROM 7:19 ‑A ‑kë "dhʋ̈ ‑sü bha‑ 'gü, 'wɔn ‑së 'ö‑ kë ‑dhɔ 'dhö n ‑bha bha 'maa yö ‑zë kë, "kɛɛ 'wɔn yaa 'ö yö ‑zë kë ‑dhɔ 'yaa n ‑bha bha ꞊në 'a‑ ‑kë.
ROM 7:20 'Ö "dhʋ̈ 'dhö ‑mü, ꞊ya kë ꞊dhɛ 'pë 'kö kë ‑dhɔ 'yaa n ‑bha 'ma‑ kë, kö mang ꞊dede ‑zë 'mii‑ "dhiʋ̈ "wlü ‑bha kö 'a 'wɔn bha‑ kë, "kɛɛ kö 'wɔn yaa 'ö ꞊ya 'kɔ dɔ n 'gü bha ꞊në‑ ‑da ‑wɔn 'dhö ‑mü.
ROM 7:21 ꞊Ya kë "dhʋ̈ kö n ‑bha 'kö ꞊slɔɔ‑ 'gü 'a‑ dɔ, yö ‑mü ꞊dhɛ 'ma‑ pö 'a 'wɔn ‑së kë, 'maa ꞊mɔɔ‑ ‑bha. Pë doseng 'ö n ‑kɔ ‑yö ꞊mɔɔ‑ kë ‑sü ‑bha, 'yö 'wɔn yaa 'ka.
ROM 7:22 'Sa 'ma 'yaanu kö 'a n ‑zʋ 'gɔn, Atanna ‑bha 'tɔng‑ "dhia ‑zë ‑yö n 'gü ꞊tɔn, "kɛɛ ‑a ‑kɔ 'mɛ?
ROM 7:23 'Tɔng‑ "wɛɛ 'dhɛ 'ö n kwi ꞊wlöö bha ꞊në 'ko zë‑ 'dhɛ 'ö n zuë" "piʋ̈ bha‑ 'ka, 'yö n ‑kë 'wɔn yaa 'ö ꞊ya 'kɔ dɔ n kwi 'gü bha‑ ‑bha ꞊dhuëng 'ka.
ROM 7:24 ‑A ‑kë "dhʋ̈ ‑sü bha‑ 'gü, a 'wɔn yaa ‑gɔ ꞊dhuëngdhɛ 'gü ‑kpɛawo ma ‑kë mɛ "bhɩɩ‑ 'ka ‑sü ꞊në‑ ‑wɔn 'gü, "kɛɛ n zuëga ‑zë Atanna ‑bha 'tɔng‑ 'kun ‑dhɔ ‑ya ‑bha. "Eke! Mang ‑wëësü 'ö 'ma n ‑dɩ "yaan ‑ga wo ꞊tɔn ya 'dee dho n dha, 'dee dho kwi 'dhɛ 'a‑ 'gü ya‑ bho n ‑bha? "Kɛɛ ‑gasitɛ 'yaa Atanna ‑bha ‑a Gbö Yesu Klisi 'ö kwa Dëmɛ 'ka bha‑ ‑bha ga 'ö‑ wo bha‑ 'saa‑ 'gü.
ROM 8:1 ‑A 'klɔɔ‑ ‑mü ꞊dhɛ dɔ 'dhɛ 'kö 'kwa‑ wo "tʋ̈ng ya‑ 'gü ya, mɛ "pɛpɛ 'dhɛ 'kö ꞊wa ‑kplü Yesu Klisi ‑bha, Atanna ‑bha za 'yaa‑ ‑nu ‑bha 'zü.
ROM 8:2 ‑A ‑gɛn ‑mü ꞊dhɛ zian 'ö Atanna ‑bha 'Nii‑ "slʋ̈ʋ̈slʋ̈ 'ö ꞊sii 'ö 'yaa yën‑ ‑da 'mɛ 'kwa bɔ Yesu Klisi 'ka kwa 'gü bha ꞊në kwa dha zian 'dhɛ kwa ‑da 'wɔn yaa ‑gɔ ꞊dhuëngdhɛ 'gü, 'ö gun kwa "dhiʋ̈ bho sië ga ‑dhɛ bha‑ ‑gɔ.
ROM 8:3 'Wɔn 'ö kwa mɛbhɩɩdhe ‑dhɛ ‑kwi 'yaa gun ꞊mɔɔ sië‑ 'gü ‑wɔn kë ‑sü ‑bha Moizö ‑bha 'tɔng‑ "gblʋʋ ‑ta bha, Atanna ꞊yaa‑ 'gü ‑wɔn kë. ‑A 'klɔɔ‑ ‑mü ꞊dhɛ ꞊ya yöö ꞊dede ö Gbö bɔ kwi 'ö kwa ‑bha 'ö 'tɔng‑ 'kun "sɩ 'yaa ‑dhɛ bha‑ 'gü kö yö ‑zë ‑ya 'kun, kö ‑yö kpaɔ "pɛ‑ 'ka 'wɔn yaa ‑bha, kö ‑yö kë Atanna ‑bha za ‑loo 'wɔn yaa ‑ta ‑gɛn 'ka kö ‑ya bho kwa ‑bha.
ROM 8:4 Atanna ‑ya kë "dhʋ̈ kö 'pë 'ö 'tɔng‑ ‑ya pö‑ 'gü ‑wɔn ‑yö kë 'mɛ 'ö 'kwaa ‑tosɛa kë sië kwa ‑dɩ faan ‑bha 'zü, "kɛɛ 'ö 'kwa‑ kë sië‑ ‑bha 'Nii‑ "slʋ̈ʋ̈slʋ̈ ꞊në‑ 'saa‑ 'gü ya kwa ꞊në kwa ‑dhɛ.
ROM 8:5 ‑A 'klɔɔ‑ ‑mü ꞊dhɛ mɛ 'wo ‑tosɛa ‑kë wo ‑dɩ dhɔɔbhaa 'ka bha, 'pë 'ö‑ ‑dhɔ ‑ya ‑nu ‑kë ꞊në 'wo ‑ya ‑a ‑wɔn zuën ‑ta, "kɛɛ 'mɛ 'kö 'wo ‑tosɛa kë sië Atanna ‑bha 'Nii‑ "slʋ̈ʋ̈slʋ̈ 'saa‑ 'gü, wo ‑zë ‑wo ‑ya 'pë 'ö‑ ‑dhɔ ‑yö 'Nii‑ "slʋ̈ʋ̈slʋ̈ bha‑ ‑kë ꞊në‑ kë ‑sü zuën ‑ta.
ROM 8:6 'Sa ‑ya 'pë 'kö‑ ‑dhɔ ‑yö mɛ ‑kë ‑a kë ‑sü zuën ‑ta ‑sü ‑zë, ‑yö mɛ "dhiʋ̈ ‑bho ga ꞊në‑ ‑dhɛ, "kɛɛ ‑ya 'pë 'ö‑ ‑dhɔ ‑yö Atanna ‑bha 'Nii‑ "slʋ̈ʋ̈slʋ̈ ‑kë ‑a kë ‑sü zuën ‑ta ‑sü 'yaa zian "wɛɛ 'bha bho mɛ 'ka kö 'yii kë ‑tosɛa 'ö 'yaa yën 'ö Atanna "piʋ̈, waa‑ ‑ya ‑dɩ 'flëë‑ 'gü ‑sü ‑zë 'ka.
ROM 8:7 ‑A ‑gɛn ‑mü ꞊dhɛ mɛ "pɛpɛ 'wo ‑ya 'pë 'ö‑ ‑dhɔ ‑ya ‑nu ‑kë ‑a kë ‑sü zuën ‑ta bha, Atanna 'yaɔ‑ ‑mü ‑a ‑nu 'ka, 'waa‑ ‑bha 'tɔng‑ ꞊bhlëë ‑ya, 'waa ꞊mɔɔ ‑zian ꞊në‑ wo‑ ‑bha.
ROM 8:8 'Sa 'mɛ 'wo "dhʋ̈ bha‑ ‑nu "dhia 'yaa ꞊mɔɔ‑ ‑bha kö ‑yö 'ma‑ 'gü 'pö.
ROM 8:9 "Kɛɛ ka ‑zë 'kaa ‑tosɛa kë ka ‑dɩ dhɔɔbhaa 'ka 'zü, ka ‑tosɛa kë sië ‑a ‑bha 'Nii‑ bha ꞊në‑ dhɔɔbhaa 'ka. ‑A 'klɔɔ‑ ‑mü ꞊dhɛ‑ ‑bha 'Nii‑ bha ‑yö ka 'gü. Klisi ‑bha 'Nii‑ bha 'yaa mɛ "ʋʋ mɛ 'ö‑ 'gü, kö 'yaa Klisi ‑bha 'ka.
ROM 8:10 ꞊Ya kë ꞊dhɛ Klisi ꞊në ꞊ya kë ka 'gü, 'kö 'zü ka kwi ‑zë ꞊ya kë ga ‑pë 'ka 'wɔn yaa ‑wɔn 'gü, "kɛɛ kö ꞊sii 'ö 'yaa yën bha ‑yö ka 'gü ‑a ‑bha 'Nii‑ 'ö ka 'gü bha‑ ‑wɔn 'gü, ‑a 'klɔɔ‑ ‑mü ꞊dhɛ kö Atanna ꞊ya ka kë "slʋ̈ʋ̈slʋ̈ ö wëëdhö.
ROM 8:11 ꞊Ya kë ꞊dhɛ Atanna ‑bha 'Nii‑ "slʋ̈ʋ̈slʋ̈ 'ö Yesu ‑bö 'ö go ga 'gü bha ꞊në ꞊ya ‑yɛa 'kun ka 'gü, 'yö yöö Atanna 'ö Klisi ‑bö 'ö go ga 'gü 'pö bha, 'ö bɔ‑ ‑bha 'Nii‑ 'ö ka 'gü bha‑ ‑ta 'yö ka kwi 'dhɛ 'ö gapë 'ka bha‑ ‑bö 'pö, 'yö ꞊sii ‑dee ‑da ka 'gü.
ROM 8:12 ‑A ‑kë "dhʋ̈ ‑sü bha‑ 'gü, n dheebhang ‑nu, "pɔ ‑yö kwa ‑bha. "Kɛɛ "pɔ 'ö bha 'yii kë kwa ‑dɩ dhɔɔbhaa kë "pɔ 'ka.
ROM 8:13 ‑A ‑gɛn ‑mü ꞊dhɛ 'ka ‑tosɛa kë ka ‑dɩ dhɔɔbhaa ‑zë 'ka kö ka ‑dho ga. "Kɛɛ ꞊ya kë ꞊dhɛ 'ka ka zü ‑gban Atanna ‑bha 'Nii‑ 'kö bha‑ 'gü, kö ka ‑dɩ dhɔɔbhaawɔn ‑nu bha 'ka ka kwaa‑ ‑zü, kö ‑yö kë ka ‑gɔ ꞊dhɛ 'pë ꞊ya ga ‑a 'dhö, ka ‑dho ‑tosɛa kë.
ROM 8:14 ‑A 'klɔɔ‑ ‑mü ꞊dhɛ mɛ "pɛpɛ 'kö 'wo ‑tosɛa kë sië Atanna ‑bha 'Nii‑ bha‑ ‑faan 'ka, kö‑ ‑bha 'në ‑nu ‑mü.
ROM 8:15 ‑A ‑gɛn ‑mü ꞊dhɛ ‑a ‑bha 'Nii‑ 'kö‑ ꞊gbaɔ ka ‑gɔ 'ö ka 'gü bha, 'yii kë 'Nii‑ 'ö mɛ ‑kë "suʋ̈ ‑mɛ 'ka, "ɛɛn 'ö mɛ ‑kë ꞊dhuëng 'ka ‑a 'ka. "Kɛɛ yö ꞊në ka ‑kë ‑a ‑bha 'në 'ka, 'yö 'kwa ꞊mɔɔ‑ ‑bha 'kwa‑ ‑dhɛ «Kwa Dë».
ROM 8:16 ‑A 'klɔɔ‑ ‑mü ꞊dhɛ Atanna ‑bha 'Nii‑ bha yöö ꞊dede ‑ya "sɛɛdhɛ ‑kë kwa 'nii‑ ‑dhɛ 'ö‑ pö kwa‑ ‑bha 'në 'ka.
ROM 8:17 'Sa ꞊ya kë ꞊dhɛ 'kwa kë‑ ‑bha 'në 'ka, kö 'pë 'ö‑ "plüün bho ö ‑bha 'në ‑nu ‑dhɛ ‑dhɛkpaɔ dhia" 'gü bha kwaa‑ Klisi ‑nu kwa ‑bha ‑mü. ‑A 'klɔɔ‑ ‑mü ꞊dhɛ 'kwa saan" Klisi ‑wɔn 'gü ꞊dhɛ ‑kɔ 'ö ꞊saan‑ 'ka ‑a 'dhö, kwɛng‑ ‑nu kwa ‑dho kë 'pö ‑dhɛ do 'gü ‑a 'tɔ bhɔ ‑yi 'ka.
ROM 8:18 ‑A ‑wɔn 'gü, a‑ 'wɔn ‑dɔ 'kpakpadhö ꞊dhɛ Atanna ‑bha ‑gblüdëdhɛ 'ö dho‑ nu kwa ‑dhɛ, waa‑ ‑bha 'tɔbhɔdhe 'ö‑ ꞊keng‑ bha‑ ‑nu ‑bha ‑kë ‑së ‑sü bha, 'waa‑ ‑zɔn ‑zianwo saan" 'kwa‑ wo sië ꞊dɛɛ bha‑ 'ka.
ROM 8:19 Pë "pɛpɛ 'ö Atanna ‑ya ‑da, ‑a ꞊gban ‑zʋ ‑yö dun sië‑ ‑bha 'në ‑nu bha‑ ‑nu ‑wo "yɛa‑ ‑yi bha‑ ‑wɔn 'gü.
ROM 8:20 ‑A ‑gɛn ‑mü ꞊dhɛ pë "pɛpɛ 'ö‑ ‑da ‑a ꞊gban‑ ‑kë see‑ ‑pë ꞊në‑ 'ka, kë 'ö‑ wo "dhʋ̈ bha yö ꞊në‑ pö ‑yö kë "dhʋ̈. "Kɛɛ yö ꞊në‑ ꞊gban 'gü, ‑a ‑nu ‑zʋyödhɛ ‑wɔn ‑yö ‑dhö.
ROM 8:21 Yö ‑mü ꞊dhɛ ‑yö ‑gun Atanna ‑zʋ "piʋ̈ ꞊dhɛ ö ‑dho ö ‑bha ‑da ‑pë ‑nu bha‑ ‑nu ‑bho ꞊dhuëngdhɛ 'gü yi do 'ka 'güseedhe bha‑ ‑gɔ, 'ö 'wo ‑ya wo ‑dɩ 'flëë‑ 'gü ‑a ‑bha 'në ‑nu mɛdhɛ kë ‑yi bha‑ 'ka.
ROM 8:22 'Yaa kwa tii' 'ka ‑wɔn 'ka, kwa‑ 'wɔn ‑dɔ 'kpakpadhö ꞊dhɛ 'ö go‑ 'ka "kpʋngtaadhɛ ‑da ‑sü ‑bha 'ö nu 'ö zun‑ 'ka ꞊dɛɛ ‑bha, pë "pɛpɛ 'ö Atanna ‑ya ‑da, ‑a 'bha 'yii ‑ya ö ‑dɩ 'flëë‑ 'gü do, "dhiʋ̈ ꞊në 'wo‑ wo sië 'wo dho‑ 'ka, ꞊dhɛ dhebhɔ 'ö‑ "gblü 'dhö‑ kë sië ‑a 'dhö saan" 'wo‑ wo sië bha‑ ‑kwɛɛ ꞊wlöö.
ROM 8:23 "Kɛɛ 'wɔn 'ö "dhʋ̈ bha 'yii kë "kpʋngtaamɛ ‑nu ‑dɩ ‑slɔɔ ‑a ‑nu ‑bha 'wɔn 'ka, ‑a ‑gɛn ‑mü ꞊dhɛ 'mɛ kwaa ‑dɩ 'pö 'kwa Atanna ‑bha 'në ‑nu 'ka bha kwa "dhiʋ̈ 'pö "dhʋ̈ kwa zuë" "piʋ̈. "Kɛɛ 'sa kö ꞊ya kwa ‑zë kwa "kan ‑ga ‑gɔ bhië" "dhiʋ̈ ꞊yaa‑ daɔ dɔ ‑a ‑bha 'Nii‑ "slʋ̈ʋ̈slʋ̈ 'ö‑ ꞊gbaɔ kwa ‑gɔ bha‑ 'ka. "Kɛɛ ꞊dhɛ 'ö ‑kë ꞊dhɛ ‑a ‑gɔ ‑da 'plöö ‑yi ꞊në dho kë yi 'ö dho kwa bho‑ 'ka kwi 'dhɛ ga ‑kwi 'ka ya‑ 'gü 'ö kwa dha‑ 'ka ga ‑gɔ bha ꞊në‑ 'ka bha ꞊në‑ ‑wɔn 'gü 'yö 'kwa ‑tun ‑dhiö 'pö kwa zuë" "piʋ̈ bha.
ROM 8:24 Pë 'ö mɛ "yan 'yaa‑ ‑bha ꞊në ꞊ya kë 'yö mɛ ‑yö mɛ "yan to‑ ‑gɔ zuësɛadhɛ 'ka. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'kwa dha 'nu, "kɛɛ kwa ‑tun ꞊kö kwa "yan 'to‑ ‑dhɛkpaɔyi ‑së 'ö 'kwa dho ‑da 'ka ‑a ‑bha ‑gblüdëdhɛpö 'gü bha‑ ‑gɔ. ‑A ‑gɛn ‑mü ꞊dhɛ pë 'ö mɛ "yan 'yaa‑ ‑bha 'yö mɛ‑ mɛ "yan to‑ ‑gɔ. "Ɛɛn 'pë 'ö mɛ "yan 'dhö‑ ‑bha mɛ‑ ‑mɔɔ ‑bha 'ö mɛ‑ mɛ "yan to 'zü‑ ‑gɔ ‑ee?
ROM 8:26 ꞊Ya 'go yö ‑zë 'gü, 'mɛ 'ö "sɩ 'yaa kwa ‑dhɛ ‑bhɛa Atanna ‑dhɛ ‑sü 'gü bha, ‑a ‑bha 'Nii‑ "slʋ̈ʋ̈slʋ̈ ‑yö ‑nu kö ‑yö kwa ꞊në kwa ‑ta 'kun ‑bhɛa ‑dhɛ ‑sü ‑bha. ‑A 'klɔɔ‑ ‑mü ꞊dhɛ ‑kɔ 'wo ꞊bhɛa‑ 'ka ‑a ‑dhɛ 'kwaa‑ dɔ ‑së 'ka. ‑A ‑bha 'Nii‑ bha ꞊në ꞊bhɛa‑ ‑dhɛ kwa ‑dhɛ, 'yö ‑bhɛa ‑dhɛ ‑kɔ 'ö‑ ‑zʋ kun ‑a wo kwa ‑dhɛ ‑zʋ ꞊lɔɔ ‑kɔ 'ö ‑wʋ 'ö go‑ 'gü ‑a pö ‑kɔ 'yaa ꞊slɔɔ mɛ "bhɩɩ‑ ‑gɔ ‑a 'ka.
ROM 8:27 ꞊Ya kë "dhʋ̈, 'yö Atanna 'ö ‑dhɛ yö mɛ zuë" 'gü bha 'ö ö ‑bha 'Nii‑ "slʋ̈ʋ̈slʋ̈ bha‑ ‑wʋ 'gü ma, ‑a 'klɔɔ‑ ‑mü ꞊dhɛ 'Nii‑ bha ‑yö ‑bhɛa ‑dhɛ ‑a ‑bha mɛ ‑nu ꞊në‑ ‑nu ‑wɔn 'gü ꞊dhɛ ‑kɔ 'ö‑ "piʋ̈ ꞊dhɛ ‑wa kë‑ 'ka ‑a 'dhö.
ROM 8:28 ‑A ‑wɔn 'gü, mɛ "pɛpɛ 'ö Atanna ‑dhɔ ‑ya ‑nu ‑kë 'ö‑ ‑nu sü 'ö‑ ‑nu ‑ya ö ‑bha ‑ya 'gü ꞊dhɛ ‑kɔ 'ö gun‑ 'ka‑ ‑zʋ "piʋ̈ yi 'bha 'ka ‑a 'dhö, 'wɔn "pɛpɛ 'ö ‑da ‑a ‑nu ‑ta, ‑a ꞊gban "dhiʋ̈ ‑ya ‑dhɛ ‑kë ‑nu ‑bha 'wɔn ‑së ꞊në‑ 'ka.
ROM 8:29 ‑A 'klɔɔ‑ ‑mü ꞊dhɛ Atanna yöö ꞊dede 'ö 'mɛ 'ö‑ ‑nu dɔ kö 'wii bhɔ ‑zianwo ꞊kö, 'ö‑ ‑ya ö zuë" "piʋ̈‑ ‑nu ‑bha ꞊dhɛ ꞊wa bhɔ ‑wo ‑dho kë ö ‑bha 'ka bha, ‑ya ‑bɛn ‑zë wo ꞊në‑ ‑nu ‑bha yi 'bha 'ka kö ‑wo kë ꞊dhɛ ö Gbö 'dhö ‑kɔ 'ö‑ 'gü ‑a 'dhö. Kë "dhʋ̈ kö ‑a Gbö bha ‑yö kë ö dheebhang ‑nu 'gbɛ bha‑ ‑nu ‑bhɔ ‑be 'ka.
ROM 8:30 'Sa 'mɛ 'ö Atanna ‑ya ‑kë "dhʋ̈ ‑wɔn ‑ya ö ‑zʋ "piʋ̈‑ ‑nu ‑dhɛ yi 'bha 'ka bha ‑ya wo ꞊në‑ ‑nu sü mɛ ꞊zinng 'gü. 'Mɛ 'ö‑ ‑nu sü "dhʋ̈ bha, 'yö dho 'yö‑ ‑nu ‑kë "slʋ̈ʋ̈slʋ̈ ö wëëdhö. ‑A mɛ do 'wo "dhʋ̈ bha, 'yö dho 'zü 'ö‑ ‑nu ‑kë 'tɔbhɔdhe ‑kë ö "piʋ̈ ‑mɛ 'ka.
ROM 8:31 ꞊Ya kë "dhʋ̈ kwa ‑dho ‑a pö 'sa ꞊dhɛ? Atanna ‑zë ꞊ya bo bɔ ‑sü 'ka kwa 'ka, kwa 'yaɔ‑ ‑mɛɛ ꞊në ‑kɔ dho ꞊mɔɔ kwa ‑bha?
ROM 8:32 ‑Më ꞊në Atanna dho‑ fië‑ bho kwa ‑bha ꞊taamasü ya‑ 'gü, "kɛɛ kö 'yii ꞊döng ö de Gbö ‑ta kwa ‑dhɛ tongtongdhö, kö ꞊ya ö ‑kɔ bho‑ 'gü kö ‑yö ga mɛ ꞊gban "pɛpɛ kwa ‑wɔn 'gü. ꞊Dhɛ 'kö ꞊ya ö ‑kɔ bho ö Gbö ‑zë 'gü kwa ‑wɔn 'gü ꞊dhɛ ‑kɔ bha‑ 'dhö bha, kö ‑yö ‑dho pë ꞊gban "pɛpɛ nu kwa ‑dhɛ ‑a Gbö 'ö‑ nu bha‑ taa 'ka.
ROM 8:33 Atanna ꞊në ꞊yaa‑ pö 'mɛ 'ö‑ ‑bha ꞊dhɛ ꞊sɔng ‑ya ‑bha kö ꞊sɔng ‑ya ‑mɛ ‑bha. Yöö do bha ꞊në ꞊yaa‑ pö 'yaa 'mɛ 'ö‑ ‑bha kö 'yaa‑ ‑bha. 'Dee dho‑ pö 'mɛ 'ö Atanna ‑ya ‑nu ‑ya ‑a ‑nu ‑bha ꞊dhɛ ꞊sɔng ‑ya ‑nu ‑bha? ‑A ‑mɛ 'yaa 'dhö!
ROM 8:34 'Dee dho Atanna dhɔɔbhaamɛ ‑nu kwa zë za 'ka, "kɛɛ kö Yesu Klisi ꞊ya ga kwa ‑wɔn 'gü, kö ꞊ya 'dho ꞊ya 'go ga 'gü ꞊ya ‑bö, kö ‑yö ‑ya ‑sü 'ka ‑duɛ ꞊bhlëësü 'ö‑ Dë "sɔɔ bha‑ 'gü, kö ‑yö bhɛa" sië ö Dë ‑dhɛ kwa ‑wɔn 'gü.
ROM 8:35 ‑Më suu ꞊në dho mɔɔ‑ ‑bha 'ö 'kwa ‑kan ‑dhɔ 'ö Klisi ‑ya ‑kë kwa 'ka bha‑ ‑bha. "Yënng ꞊gbaɔndhe ‑ee? "Ɛɛn zuëdhiʋ̈tɛɛ ‑ee? "Ɛɛn mɛ ‑wëëdhɛ bho ‑sü ‑ee? "Ɛɛn din‑ ‑ee? "Ɛɛn "flɛɛ ‑ee? "Ɛɛn ‑dɔ "dhëng yaa "dhiʋ̈ ‑sü ‑ee? "Ɛɛn ga ‑ee? ‑A ‑pë 'yaa 'dhö.
ROM 8:36 ‑A ‑gɛn ‑mü ꞊dhɛ ‑yö ‑bɛn zë ‑sü 'ka Atanna ‑wʋ 'sëëdhɛ 'gü ꞊dhɛ: «(‑Tosɛa Atanna,) bhi ꞊në 'yi dɔ ‑sü 'ka ga "dhiʋ̈ i ‑wɔn 'gü 'yënng‑ 'gü waa‑ gbeng ‑nu ꞊gban 'gü, 'ö 'wo yi 'sü sië ꞊dhɛ "bhlaa 'wo 'dho sië‑ 'ka ‑a zë ‑dhɛ 'gü ‑a 'dhö ya.»
ROM 8:37 "Kɛɛ yö ‑zë ꞊gban 'gü, 'mɛ 'ö kwa ‑dhɔ ‑ya ‑kë bha, kwa ‑ziö 'wɔn ‑nu bha‑ ꞊gban 'gü yö ꞊në‑ 'saa‑ 'gü, ‑a ‑gɛn ‑mü ꞊dhɛ "kplëë ‑dhɛ 'ö‑ nu kwa ‑dhɛ bha, ‑a ‑mɔɔ 'ka 'yaa 'dhö.
ROM 8:38 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ n 'dhang bho ‑sü ‑ya "dhiʋ̈ 'kpakpadhö ꞊dhɛ kwa ‑kan ‑dhɔ bha‑ ‑bha ‑pë 'bhaa 'dhö: Ga 'yii 'dho ꞊mɔɔ‑ ‑bha, "ɛɛn ‑tosɛa 'yaa ‑mü, "ɛɛn Atanna ‑bha "kië ‑nu 'waa ‑mü, "ɛɛn 'gügbɩɩdhɛpë "ɛɛn ‑ziö mɛ ‑gɔ ‑pë ‑nu zian 'wo dhang‑ 'gü ‑a 'bha ‑kɔ 'yii 'dho ꞊mɔɔ‑ ‑bha, "ɛɛn ꞊dɛɛ 'yaa ‑mü, "ɛɛn dhia" 'yaa ‑mü,
ROM 8:39 faan ‑pë ‑nu 'wo dhang‑ 'gü oo, ‑a 'dhɛ 'wo "kpʋng ꞊taa oo, "ɛɛn Atanna ‑bha ‑dapë suu "ʋʋ suu 'bha ‑zian ꞊në‑ ‑kɔ 'yii 'dho ꞊mɔɔ‑ ‑bha kö ‑yö kwa "kan ‑dhɔ 'ö Atanna ‑ya ‑kë kwa 'ka kwa Dëmɛ Yesu Klisi 'saa‑ 'gü bha‑ ‑bha.
ROM 9:1 Dhiang 'ö maa‑ zë bha tɛan‑ ꞊dede ‑mü, a‑ ‑zë Klisi 'tɔ 'gü, n zuëga 'dhö, Atanna ‑bha 'Nii‑ "slʋ̈ʋ̈slʋ̈ 'ö n 'gü bha‑ 'dhö, wo ꞊në 'wo n "sɛɛ‑ 'ka ꞊dhɛ 'pë 'a‑ pö sië bha 'mii ꞊sua kë.
ROM 9:2 ꞊Dhɛ n zuë" "dhiʋ̈ ‑yö ‑tɛɛ yi ꞊gban "pɛpɛ 'ka 'ö ‑wëë ‑yö bɔ n ‑ta, n dheebhang ‑nu 'wo ‑kë Izraɛdhö ‑mɛ ‑nu 'ka bha‑ ‑nu ‑wɔn 'gü.
ROM 9:3 'Ma n ‑zʋ 'gɔn 'dhang 'ö 'wii‑ bho Klisi ‑wɔn "dhiʋ̈ bha‑ 'ka, ‑yö ‑kë n "piʋ̈ ꞊dhɛ 'kö 'zü Atanna ꞊ya "dhang ‑zian ꞊në‑ bho ma ‑zë n ‑bha ‑a ‑nu ‑wɔn 'gü, "ɛɛn 'kö 'zü 'ma "kan ‑zian ꞊në‑ wo Klisi ‑bha, "kɛɛ kö wo ‑zë ‑wo dha, ‑yö ‑dho 'kun bho n 'gü.
ROM 9:4 ‑A 'klɔɔ‑ ‑mü ꞊dhɛ Izraɛdhö ‑mɛ ‑nu 'kwa bha ꞊në 'kwa Atanna dhɔɔbhaamɛ ‑nu 'ka, 'yö "klʋ bho kwa ‑bha ꞊dhɛ mɛ‑ pë bho ‑tɩnë ‑nu ‑bha. Atanna ꞊dede bha‑ 'bhü ‑yö ‑gun dɔ sië kwa "bhɛma ‑nu ꞊në‑ ‑nu ‑ta. ‑Yö ‑mlɛɛdhɛ ‑da 'zü waa‑ kwa "bhɛma ‑nu do bha ꞊në‑ ‑nu ꞊zinng 'gü ‑gɛn ‑yan kpö 'ka, 'yö dho 'ö‑ 'gü 'tɔng‑ dɔ‑ ‑nu ‑dhɛ, 'yö dho 'ö ö ‑dhɔkë ‑kɔ ‑zɔn ‑a ‑nu ‑dhɛ, 'yö dho 'ö "plüün bho‑ ‑nu ‑dhɛ.
ROM 9:5 ‑A mɛ 'dhɛ 'wo ꞊dɛɛ bha ‑wo mɛ 'dhɛ 'wo gun yi 'bha 'ka "dhʋ̈ bha ꞊në‑ ‑nu 'gü ‑në ‑nu 'ka. Woo do bha 'zü ꞊në ꞊ya kë mɛbhɩɩdhɛ 'gü, 'yö Klisi ‑yö go‑ ‑nu 'gü. 'Sa Klisi bha ꞊në pë ꞊gban "pɛpɛ ‑gɔ ‑ta, yö ꞊në Atanna 'ö‑ 'tɔ ‑yö bhɔ ‑kpɛawo ‑a 'ka. Kö ‑yö kë "dhʋ̈ bha 'aa ‑yö kë!
ROM 9:6 'Ma‑ pö "dhʋ̈ kö 'mii‑ pö ꞊dhɛ ꞊ya kë "dhʋ̈ kö "plüün 'ö Atanna ‑ya bho Izraɛdhö ‑mɛ ‑nu ‑dhɛ bha 'yii 'to‑ ‑bha, ‑a ‑gɛn ‑mü ꞊dhɛ mɛ "pɛpɛ 'wo Izraɛdhö 'gü ‑në ‑nu 'ka, Atanna 'yaa‑ ‑nu ꞊gban ‑ga ꞊dhɛ Izraɛdhö 'në ꞊dede 'dhö.
ROM 9:7 Kwa‑ 'wɔn ‑dɔ ꞊dhɛ kwa "bhɛma Ablaamö suu 'gü ‑në ‑nu ‑mü, "kɛɛ yö ‑zë ꞊gban 'gü, ‑a ‑nu ꞊gban "pɛpɛ ‑zë 'wii kë ‑a 'kpɔ ‑në ꞊dede 'ka. ‑A 'klɔɔ‑ ‑mü ꞊dhɛ Atanna ‑ya ‑pö Ablaamö ‑dhɛ 'ö‑ pö: «I gbö Izaakö 'kpɔ ‑në ‑nu ‑dɩ ‑slɔɔ ꞊në 'wo dho‑ ‑nu ‑dhɛ i 'kpɔ ‑në ‑nu.»
ROM 9:8 ꞊Waa‑ pö "dhʋ̈ kö ‑wa pö‑ ‑nu ꞊gban 'wii 'dho kë Atanna ‑bha 'në 'ka ‑a ‑nu ꞊gban ‑kë Ablaamö ꞊yɔɔn 'ka ‑sü ‑wɔn ‑zë 'gü, "kɛɛ 'në ‑dhɛ ‑nu 'ö Atanna ‑ya ‑nu ‑dhɛ ‑sü "plüün bho bha ꞊në 'wo‑ bhang ꞊dede ‑nu 'ka.
ROM 9:9 ‑A ‑gɛn ‑mü ꞊dhɛ "plüün 'ö Atanna ‑ya bho‑ ‑dhɛ "dhʋ̈ yi 'bha 'ka bha, ‑a ‑bho 'gü ‑wʋ ꞊nɛ. ‑Ya ‑pö ‑dhɛ 'ö‑ pö: «"Sanni "tʋ̈ng 'kwa dɔ‑ 'ka ya ‑a 'bha ‑yö ꞊loo ‑kwɛ dhia" 'ka, kö ma nu i "piʋ̈ kö i ‑bha dhebhɔ Saadha ꞊ya 'nëgɔɔn do 'kpɔ.»
ROM 9:10 ‑A ‑kpɛa ‑zian 'yaa kë "dhʋ̈, ‑a ‑gɛn ‑mü ꞊dhɛ Dhebeka yöö ‑dɩ 'pö‑ ‑bha ‑gun "dhʋ̈. 'Ö ö ‑bha 'nëgɔɔn ꞊plɛ 'ö‑ kpɔ, 'wo gun 'peng 'ka bha ‑ya ‑nu ‑gu ‑sü kwa 'ziʋ̈‑ Izaakö yöö do ꞊në‑ ‑gɔ kö Atanna ꞊yaa‑ "plüün bho‑ ‑dhɛ.
ROM 9:11 'Sa Atanna ‑bha ‑kɔ ‑yɛ mɛ ‑bha ‑sü ‑zë "slë ‑yö yöö do ꞊në‑ ‑gɔ. 'Mɛ 'ö ‑dhi ‑dhɛ 'yö‑ ‑ya, 'yaa ‑gban ‑a ‑mɛ këwɔn ‑nu ‑bha. ‑A 'klɔɔ‑ ‑mü ꞊dhɛ ‑yö 'në ꞊plɛ bha‑ ‑nu bhɔ "tʋ̈ng ‑to "dhiʋ̈ kö‑ ‑nu këwɔn ‑së "ɛɛn yaa 'bha ‑zian 'yii kë ꞊kö 'ö‑ pö: «‑A mɛ 'kpiisü ‑dho gwëëdhɛ kë ö 'zlaa‑ ‑dhɛ.»
ROM 9:13 ‑A 'klɔɔ‑ ‑mü ꞊dhɛ ‑yö ‑bɛn zë ‑sü 'ka‑ ‑gɔ 'sëëdhɛ 'gü ‑a ‑wʋ 'ka ꞊dhɛ: «Zakɔbö ‑dhɔkë n ‑kë 'ö ‑ziö Ezau ‑zë ‑ta.»
ROM 9:14 'Sa ꞊ya kë "dhʋ̈ kö ꞊dhɛ ꞊në bha? 'Kö ꞊flü ‑yö Atanna ‑bha 'wɔn 'gü ꞊naa bha ‑ee? ‑Abin!
ROM 9:15 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑yö kë‑ ‑pö Moizö ‑dhɛ 'ö‑ pö: «'Mɛ 'ö "klʋ ‑dhi ‑bha ‑dhɔ ꞊ya n kë, 'yö 'a‑ ‑dhi ‑bha. 'Mɛ 'ö‑ ‑wëë n kë ‑dhɔ ꞊ya n kë, 'yö 'a‑ ‑wëë ‑ga bho.»
ROM 9:16 ꞊Ya kë "dhʋ̈ kö ‑yö Atanna do ꞊në‑ ‑bha 'wɔn 'ka, yö ꞊në mɛ ‑wëë ‑ya ‑kë. 'Yaa ‑gban mɛ 'ö "dhʋ̈ ‑a ‑zʋ 'gɔn ‑kɔ ‑nu "ɛɛn ‑a këwɔn ‑nu ‑bha.
ROM 9:17 ‑A ‑gɛn ‑mü ꞊dhɛ ‑yö dhiang ‑zë 'zü Fadhaɔn 'ö ‑kë Ezitö ‑mɛ ‑nu ‑bha ‑gblüdë 'ka bha‑ ‑dhɛ yi 'bha 'ka 'ö‑ pö: «I ‑ya 'a‑ wo ‑gblüdë 'ka bha, a‑ ‑kë "dhʋ̈ kö 'a bɔ i ‑ta 'a ma 'gügbɩɩdhɛ ꞊në‑ ‑zɔn "kpʋngtaamɛ ‑nu ꞊gban "pɛpɛ ‑dhɛ, kö mɛ ꞊gban ‑wo n 'tɔ dɔ ‑dhɛ ꞊gban 'gü "kpʋng ꞊taa.»
ROM 9:18 ‑A ‑kë "dhʋ̈ ‑sü 'gü, 'mɛ 'ö‑ ‑wëë ‑bha ‑a kë ‑dhɔ ꞊yaa‑ kë, 'yö‑ ‑wëë ‑ya ‑kë, 'mɛ 'ö‑ gɔɔ ‑kë "gbɩɩ‑ ‑dhɔ ꞊yaa‑ kë ‑ya ‑mɛ gɔɔ ‑kë "gbɩɩ‑.
ROM 9:19 'Ma‑ pö "dhʋ̈, ‑wo ‑mɔɔ ‑bha 'wo n dhɛɛ" kpɔ 'wo‑ pö 'yö ꞊ya kë "dhʋ̈ 'sa kö Atanna za ‑dɔ mɛ "bhɩɩ‑ ‑bha ‑gɛn ‑mü ‑më 'ka? 'Wɔn 'kö Atanna ꞊yaa‑ pö ‑yö kë, 'dee dho dha‑ ‑gɔ?»
ROM 9:20 'Mɛ 'ö bhi ‑zë 'i dhɛɛ" suu bha‑ 'kpɔ sië bha ‑më ‑mü i 'ka 'yö kaa‑ Atanna kaa za dɔ. "Ɛɛn "sɛ gbɔ‑ ‑mɔɔ ‑bha 'ö‑ pö ö dɔ ‑mɛ ‑dhɛ ꞊dhɛ: «I n kë ꞊ni ‑më ‑wɔn 'gü ‑ee?»
ROM 9:21 Gbɔ "sɛ ‑yö gbɔdɔmɛ ꞊në‑ ‑gɔ. ‑Kɔ "ʋʋ ‑kɔ 'ö ‑dhi ‑dhɛ 'yö‑ ‑kë 'ka. ꞊Ya dhi‑ ‑dhɛ 'yö‑ ‑kë gbɔ ꞊bhlëësü 'ka, ꞊ya dhi‑ ‑dhɛ 'yö‑ ‑kë gbɔ "wlaasü 'ka.
ROM 9:22 ‑Kɔ do bha‑ 'gü, ‑yö ‑dhi Atanna ꞊në‑ ‑dhɛ kö‑ ‑siödhɛwɔn 'ö mɛ "bhɩɩ‑ ‑nu "piʋ̈ bha ‑wa dɔ, ꞊ya 'go mü 'zü kö ‑wo ö 'gü ‑kë "gbɩɩdhɛ yö, 'wɔn 'ö‑ ‑wɔn 'gü 'yö ö zuë" kun ö ‑bha pinpindhö ö ‑siödhɛwɔn këmɛ ‑nu "piʋ̈ bha 'yö bha, "kɛɛ 'sa kö ꞊wa "dhang 'sü‑ ‑bha ‑kɔ ꞊gban ‑kɔ ꞊gban 'gü, kö ꞊wa kë ꞊dhɛ gbɔ "wlaasü 'ö‑ ‑zun "dhiʋ̈ ‑bhlɔɔ 'yaa 'dhö ‑a 'dhö.
ROM 9:23 "Kɛɛ 'sa kö 'mɛ 'kö kwa ‑zë 'kwa ꞊dhɛ ‑a ‑bha gbɔ ꞊bhlëësü ‑nu 'dhö, 'ö kwa ‑wëë ‑ya ‑kë, 'ö ꞊bhlëë ‑ya ‑sü 'ka kwa ‑bha ‑ziisü 'ka bha ‑ya "piʋ̈ ꞊dhɛ ö 'tɔ ‑yö bhɔ kwa ꞊në kwa ‑bha. ‑A ‑kë "dhʋ̈ ‑sü bha‑ 'klɔɔ‑ ‑mü ꞊dhɛ ꞊bhlëë ‑ya kwa ‑bha ‑wɔn ‑yö ‑gun ‑zʋ "piʋ̈ ‑blɛɛsü yi 'bha 'ka 'yö gun ‑na kwa ‑da. ‑A ‑kë "dhʋ̈ ‑sü ‑wɔn ꞊ya bo ga ‑sü 'ka Atanna ‑zë 'gü bha ‑oo, 'dee dhiang 'dhö ‑tun "piʋ̈?
ROM 9:24 ‑A ‑kë "dhʋ̈ ‑sü 'gü, 'mɛ 'ö kwa ‑ya "dhʋ̈ bha, yö ꞊në kwa ‑dhɛ, kwa 'sü 'ö‑ wo 'pö bha 'yii‑ wo Zuifö ‑nu woo do ‑a ‑nu kpö 'gü, ‑ya mɛ 'bha ‑nu ‑sü 'mɛ 'waa Zuifö 'ka‑ ‑nu kpö 'gü 'pö.
ROM 9:25 ‑Ya yö ꞊në ‑dhiang zë ‑a ‑wʋdhiʋ̈loomɛ Oze ‑gɔ 'sëëdhɛ 'gü 'ö‑ pö: «"Sɛgɔ ‑nu 'ö 'waa gun n ‑bha 'ka ‑blɛɛsü, a ‑dho ‑a ‑nu 'sü 'wo ‑kë n ‑bha 'ka, 'ö mɛ 'ö‑ ‑nu ‑dhɔ 'yaa gun n kë sië bha, 'a‑ ‑nu ‑dhɛ n dhɔɔbhaamɛ ‑nu.»
ROM 9:26 'Ö ‑dhɛ ‑nu 'wo gun pö sië‑ 'gümɛ ‑nu ‑bha ꞊dhɛ 'waa n ‑bha 'ka bha, 'wo wo ‑wʋ ꞊slëë mü, 'wo‑ ‑nu ‑dhɛ Atanna "yaandhe bhang ‑nu.»
ROM 9:27 Kö Ezai ‑dɩ 'pö ‑yö bɔ sië ö ‑bha "pɛan "piʋ̈ 'ö ‑gbla Izraɛdhö ‑bu 'gü 'ö‑ pö: «'Kö ꞊ya kë ‑zian ꞊në wo ꞊dhɛ Izraɛdhö ‑mɛ ‑nu ꞊wa pa, ꞊wa kë ꞊dhɛ "yɛɛn 'ö ꞊weeyi "kpʋng "dhiʋ̈ ‑a 'dhö, "kɛɛ ‑a ‑nu kpö 'në 'bha ꞊në dho dha.
ROM 9:28 ‑A 'klɔɔ‑ ‑mü ꞊dhɛ ‑wʋ 'ö Atanna ‑ya pö ‑yö ‑dho ‑a ꞊gban 'gü ‑wɔn kë "pɛɛpɛdhö, 'ö‑ do ‑zian 'yaa 'to, "kɛɛ "vaandhö, "kpʋngtaadhɛ ꞊gban 'gü.»
ROM 9:29 Ezai do bha ꞊në‑ pö 'zü ꞊dhɛ: «꞊Ya kë ꞊dhɛ Atanna yöö ꞊dede ‑zë 'yii kwa ‑ding 'në 'bha 'to 'nu, kö kwa suu ‑dho yën 'nu "kpʋng ꞊taa ꞊dhɛ Sodɔmö ‑mɛ ‑nu 'dhö, 'ö 'kwa bhɔ Gomɔɔ ‑mɛ ‑nu ‑bha.»
ROM 9:30 ꞊Ya kë "dhʋ̈ 'sa kö kwa ‑dho ‑a pö ꞊dhɛ? Kö kwa ‑dho ‑a pö 'mɛ 'ö wo ‑zë 'waa Zuifö 'ka, 'ö‑ ‑nu "tʋ 'yaa gun ‑kë "slʋ̈ʋ̈slʋ̈ ‑sü 'ö Atanna wëëdhö ‑a ‑bha ‑zianwo bha ꞊yaa‑ ‑nu kë "slʋ̈ʋ̈slʋ̈ ö wëëdhö ‑a ‑nu 'dhang ‑bho Yesu "dhiʋ̈ ‑sü ‑wɔn 'gü
ROM 9:31 'Yö Izraɛdhö ‑mɛ ‑nu 'kö wo ‑zë 'wo gun ‑kplakpla bho sië ‑kë "slʋ̈ʋ̈slʋ̈ ‑sü 'ö Atanna wëëdhö ‑a ‑wɔn 'gü, ‑a ‑bha 'tɔng‑ 'kun ‑sü 'ka bha 'wii ꞊mɔɔ‑ ‑bha.
ROM 9:32 ‑A ‑nu ‑fië ‑bha 'klɔɔ‑ ‑mü ‑më 'ka? ‑A 'klɔɔ‑ ‑mü ꞊dhɛ ‑a ‑nu ‑dɩ "dhia ‑ma Atanna 'gü ‑sü mɔɔ‑ 'wo gun‑ wo sië bha‑ ‑gɛn 'yii ‑gban ‑a ‑nu ‑bha ‑zʋ ‑yö ‑a ‑dhɛ ‑sü ‑bha, "kɛɛ ‑wo wo ‑zʋ ‑gɔn wo ‑dɩ faan 'ö Atanna ‑bha 'tɔng‑ 'kun ‑sü 'gü bha ꞊në‑ ‑dhɛ. ‑A kë 'wo‑ wo "dhʋ̈ bha ꞊në ‑kë ‑a ‑nu ‑gɛn "dhiʋ̈ ‑zuö ‑dhɛ 'ka.
ROM 9:33 ꞊Dhɛ ‑kɔ 'ö ‑bɛn zë ‑sü 'ka‑ 'ka Atanna ‑gɔ 'sëëdhɛ 'gü ‑a 'dhö ꞊dhɛ: «‑Ka ‑dhɛ ‑ga, ‑gwë 'a‑ ‑ya sië Siɔn ‑pö 'gü ya, mɛ 'bha ‑nu ‑gɛn "dhiʋ̈ ‑dho ‑zuö ‑bha, 'ö mɛ 'bha ‑nu 'wo ‑pö ‑bha 'pö, "kɛɛ 'mɛ 'kö wo ‑zë 'wo dho 'dhang bho‑ "dhiʋ̈, ‑a ‑nu 'klɔɔ‑ 'yii 'dho bhɔ tongtongdhö.»
ROM 10:1 N dheebhang ‑nu, 'wɔn 'ö 'ma 'yaanu 'a n ‑zʋ gɔn‑ 'ka ‑kpɛawo Zuifö ‑nu ‑wɔn 'gü, 'ö 'a ꞊bhɛa Atanna ‑dhɛ ‑a ‑wɔn 'gü, yö ‑mü ꞊dhɛ kö ‑wo dha.
ROM 10:2 ‑A 'klɔɔ‑ ‑mü ꞊dhɛ a 'dhang ‑bho "dhiʋ̈ 'kpakpadhö 'a ꞊mɔɔ‑ ‑bha 'a‑ "sɛɛdhɛ ‑kë ‑a ‑nu ‑bha ꞊dhɛ Atanna ‑dhɔkë ‑sü ‑pɛng ‑yö ‑dɔ ‑nu ‑ta, "kɛɛ ‑a 'gü ꞊në 'wii‑ ma.
ROM 10:3 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑kɔ 'ö Atanna ‑yö mɛ ‑kë 'ka "slʋ̈ʋ̈slʋ̈ ö wëëdhö bha, 'wii‑ 'gü ma, 'yö woo ꞊dede 'wo dho 'wo wo ‑dɩ ‑kë "slʋ̈ʋ̈slʋ̈ "slë ꞊mɔɔ wo ‑dɩ ‑dhɛ.
ROM 10:4 ‑A 'dhɛ 'ö 'wii‑ 'gü ma bha yö ‑mü ꞊dhɛ Klisi ‑bha nu ‑sü bha, 'yö ‑kë Moizö ‑bha 'tɔng‑ ‑nu ‑gɔ ‑da 'plöö ‑sü 'ka. Yö ꞊në‑ ‑wɔn 'gü, 'yö mɛ "ʋʋ mɛ 'ö ꞊ya 'dhang bho yö ‑zë ‑wɔn "dhiʋ̈ "tʋ̈ng 'dhɛ 'kwa dɔ‑ 'ka ya‑ 'gü, kö ꞊ya kë "slʋ̈ʋ̈slʋ̈ Atanna wëëdhö.
ROM 10:5 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ 'pë 'ö Moizö ‑ya ‑bɛn zë 'ö ‑gban ‑kë "slʋ̈ʋ̈slʋ̈ ‑sü 'ö Atanna wëëdhö ‑a ‑bha 'tɔng‑ 'kun ‑sü "gblʋʋ "piʋ̈ ‑kaa ‑ga 'ö ya. ‑Ya ‑pö: «'Mɛ yaa‑ ‑dɔ Atanna ‑bha 'tɔng‑ bha‑ 'kun ‑dhɛ 'ka 'kpakpadhö ‑së 'ka, ‑yö ‑dho ‑tosɛa kë yö ꞊në‑ ‑bha.»
ROM 10:6 "Kɛɛ 'yö ‑kë "slʋ̈ʋ̈slʋ̈ ‑kɔ 'dhɛ 'ö 'dhang ‑bho Yesu "dhiʋ̈ ‑sü "gblʋʋ "piʋ̈ bha, 'pë 'ö‑ pö ‑kaa ‑ga 'ö ya, ‑ya ‑pö: «'Ka 'dho ka ‑zʋ 'gɔn 'ka‑ pö: 'Dee dho ꞊mɔɔ‑ ‑bha 'ö 'dho dhang‑ 'gü? (‑A pö 'ö‑ wo "dhʋ̈ bha‑ 'klɔɔ‑ ‑mü ꞊dhɛ: 'Dee dho 'dho dhang‑ 'gü kö ‑yö nu Klisi 'ka "sia‑?)
ROM 10:7 'Sa 'ka 'dho ka ‑zʋ 'gɔn 'zü 'ka‑ pö: ‹'Dee dho ꞊mɔɔ‑ ‑bha 'ö dho "sɛ ꞊wlöö 'ö dho 'ö ꞊loo ꞊geebɔɔ? (‑A 'dhɛ bha‑ 'klɔɔ‑ ‑mü 'zü ꞊dhɛ: 'Dee dho ꞊mɔɔ‑ ‑bha 'ö dho Klisi 'sü ꞊geebɔɔ 'ö ‑wo 'ka "yɛa‑?)›»
ROM 10:8 'Yö ꞊ya kë "dhʋ̈ kö Atanna ‑wʋ ‑ya ‑pö ꞊dhɛ 'sa? 'Pë 'ö‑ pö yö ‑mü ꞊dhɛ: «Atanna ‑wʋ 'yii "wɩ ka 'ka ꞊gblɛɛn, ‑yö ‑wɩ ka "sɔɔ, ‑yö ka "dhi, ‑yö ka zuë" "piʋ̈.» Yö ꞊në‑ ‑wɔn 'gü, 'yö 'yi‑ pö ka ‑dhɛ ꞊dhɛ: ‑Zʋ ‑yö Atanna ‑dhɛ ‑naɔ ‑së 'yi‑ dɔ sië bha ꞊në‑ ‑wʋ 'ka.
ROM 10:9 ꞊Ya kë ꞊dhɛ 'bha‑ "kan i "dhi 'ka mɛ ꞊gban "yaan ꞊dhɛ Yesu bha mɛ ꞊gban Dëmɛ ‑mü, kö 'i 'dhang bho‑ "dhiʋ̈ 'kpakpadhö i zuë" "piʋ̈ ꞊dhɛ Atanna ꞊yaa‑ bho ga 'gü ꞊yaa‑ ‑bö, i ‑dho dha.
ROM 10:10 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'ö ꞊ya 'dhang bho Yesu ‑wɔn "dhiʋ̈ ö zuë" "piʋ̈, 'yö Atanna ‑ya kë "slʋ̈ʋ̈slʋ̈ ö wëëdhö. 'Mɛ 'ö ꞊yaa‑ "kan ö "dhi 'ka ꞊dhɛ Yesu bha mɛ ꞊gban Dëmɛ ‑mü, 'yö Atanna ‑ya ‑mɛ dha.
ROM 10:11 ‑A ‑gɛn ‑mü ꞊dhɛ ‑a ‑wʋ ‑ya ‑pö ꞊dhɛ: «Mɛ "ʋʋ mɛ 'ö ꞊ya 'dhang bho‑ "dhiʋ̈, 'yiʋ̈‑ 'yii 'dho dɔ‑ ‑mɛ ‑bha.»
ROM 10:12 ‑A ‑kë "dhʋ̈ ‑sü bha‑ 'gü, ‑naa 'bha ‑bha 'bha 'yaa Zuifö ‑nu waa‑ mɛ "wɛɛ ‑nu ‑a ‑nu ꞊zinng 'gü 'zü, ‑a 'klɔɔ‑ ‑mü ꞊dhɛ ‑a ‑nu ꞊gban Dëmɛ ‑yö do, yö 'ö "dhʋ̈ bha ꞊në 'wɔn ‑së ‑kë mɛ "pɛpɛ 'wo ꞊bhɛa‑ ‑dhɛ ‑a ‑nu ‑dhɛ.
ROM 10:13 ‑A 'klɔɔ‑ ‑mü ꞊dhɛ Atanna ‑wʋ ‑ya ‑pö 'ö‑ pö: «Mɛ "pɛpɛ 'ö waa‑ "tabhoo ‑da kwa Dëmɛ ‑dhɛ, ‑wo ‑dho dha.»
ROM 10:14 "Kɛɛ ‑wo ‑dho "tabhoo ‑da ‑dhɛ ‑kɔ kë ꞊dhɛ kö 'wii 'dhang ‑zë bho‑ "dhiʋ̈? 'Yö ‑wo ‑dho 'dhang bho‑ "dhiʋ̈ ‑kɔ kë ꞊dhɛ kö 'wii‑ ‑wɔn ma wo "tʋ 'ka? 'Yö ‑wo ‑dho ‑a ma ‑kɔ kë ꞊dhɛ 'sa kö mɛ ‑zë 'yii‑ ‑dhiang zë?
ROM 10:15 'Yö ‑wo ‑dho ‑a ‑dhiang zë ‑kɔ kë ꞊dhɛ kö 'wii mɛ 'bha bɔ ꞊dhɛ ‑kɔ 'ö Atanna ‑wʋ 'sëëdhɛ ‑ya pö‑ 'ka ‑a 'dhö ꞊dhɛ: ‹'Wɔn ‑së 'ö go Atanna "piʋ̈, ‑a ‑naɔdɔmɛ ‑nu nu ‑sü "dhia‑ ‑dhö ꞊tɔn ‑kɛɛ!›
ROM 10:16 "Kɛɛ mɛ ꞊gban 'wii 'dhang bho naɔ ‑së 'ö go Atanna "piʋ̈ bha‑ "dhiʋ̈. Yö ꞊në‑ ‑wɔn 'gü 'yö Ezai 'ö ‑kë ‑a ‑wʋdhiʋ̈loomɛ 'ka bha 'ö dhiang zë 'ö‑ pö: «N Dëmɛ, mɛ "pɛpɛ 'yi i ‑bha naɔ ‑së bha‑ dɔ‑ ‑nu ‑gɔ bha, ‑yö kë ‑bhɔ de ꞊në‑ 'gü tɛan‑ ‑bha, 'de ꞊në kë 'dhang bho‑ "dhiʋ̈?»
ROM 10:17 ‑A ‑kë "dhʋ̈ ‑sü bha‑ 'gü, ‑zʋ ‑yö Atanna ‑dhɛ ‑sü bha‑ ‑gɛn ‑yö go ‑a ‑dhiang 'ö mɛ ‑ya ma bha ꞊në‑ 'gü, 'sa‑ dhiang 'ö "dhʋ̈ bha yö ‑mü Klisi ‑wʋ ꞊në‑ 'ka.
ROM 10:18 "Kɛɛ ꞊ya kë "dhʋ̈ kö Zuifö ‑nu ‑zë ‑a ma ꞊në 'wii‑ wo ‑ee? ‑Abin, ‑wo kë‑ ‑ma 'kpakpadhö! ‑A 'klɔɔ‑ ‑mü ꞊dhɛ Atanna ‑wʋ ‑ya pö 'ö‑ pö: «‑A ‑bha naɔdɔmɛ ‑nu ‑wʋ kë ‑mɔɔ "kpʋngtaadhɛ ꞊gban "pɛpɛ 'gü 'ö zun‑ 'ka 'ko "dhiʋ̈.»
ROM 10:19 "Kɛɛ ꞊ya kë "dhʋ̈ 'sa kö Izraɛdhö ‑mɛ ‑nu ‑zë ‑a 'gü ꞊në 'wii ma ‑ee? ‑A 'dhɛ bha‑ ‑yɔ zü‑ ‑gban dhiang 'ö Moizö ‑ya zë yi 'bha 'ka ꞊në‑ ‑ta. ‑A ‑gɛn ‑mü ꞊dhɛ Moizö ꞊në dhiang zë 'ö‑ pö: «Atanna ‑ya ‑pö: 'Mɛ 'waa bhɔ ‑zianwo "sɛ ‑gɔ ‑bha ꞊dɛɛ bha, a ‑dho ‑a ‑nu 'sü 'wo ‑kë n dhɔɔbhaa ‑sɛ 'ka, 'yö 'a bhlɔɔ ma‑ 'ka ka 'gü. A ‑dho ka zuë" "dhiʋ̈ "wlü 'mɛ 'waa n dɔ bha‑ ‑nu ‑bha ‑kë n dhɔɔbhaa ‑sɛ 'ka ‑sü ‑wɔn 'gü.»
ROM 10:20 Ezai ‑zë ‑zianwo ‑yö ‑ziö 'dhɛ bha‑ ‑ta 'ö‑ pö: Atanna ‑ya ‑pö: 'Mɛ 'waa gun n mɔɔ‑ sië bha ꞊në ꞊wa n yö, 'yö 'ma n ‑dɩ ‑zɔn 'mɛ 'waa gun n ‑wɔn ‑bha 'gü dhɛɛ" ‑zian kë sië bha‑ ‑nu ‑dhɛ.»
ROM 10:21 "Kɛɛ 'yö‑ pö Izraɛdhö ‑mɛ ‑nu ‑zë ‑a ‑nu ‑bu 'gü 'ö‑ pö: «A kë ‑gloo n ‑gbe 'gü "pʋ ‑sü bha "sɛ ‑gɔ 'ö‑ 'gü ‑mɛ ‑nu ꞊gban 'wo "gblang 'ka, 'ö‑ ‑nu gɔɔ 'dhö "gbɩɩ‑ bha‑ ‑nu ‑gɔ.»
ROM 11:1 A‑ ‑pö 'sa ꞊ya kë "dhʋ̈ kö Atanna ꞊ya ö ‑kɔ ꞊në "kan Izraɛdhö ‑sɛ "dhiʋ̈ "dhʋ̈, "kɛɛ kö‑ ‑bha mɛ ‑nu ‑mü bha ‑ee? ‑Abin! ‑A 'klɔɔ‑ ‑mü ꞊dhɛ mang ꞊dede 'a "wɩ sië bha Izraɛdhö mi ‑mü n 'ka, n 'ziʋ̈‑ ‑mü Ablaamö 'ka, 'ö 'a go Bɛnngzamɛ ‑gɔ 'kɔɔdhö.
ROM 11:2 "Sɛgɔ ‑blɛblɛsü 'ö Atanna ‑yö ö ‑kɔ ‑yɛ ‑bha yi 'bha 'ka, 'ö ‑kë Izraɛdhö ‑sɛ 'ka bha, 'yii ö ‑kɔ "kan‑ "dhiʋ̈. ‑A 'klɔɔ‑ ‑mü ꞊dhɛ ka‑ 'wɔn ‑dɔ 'kpakpadhö ꞊dhɛ Atanna ‑wʋdhiʋ̈loomɛ Edhi 'ö gun yi 'bha 'ka bha yö kë "gbʋ ‑bɔ Atanna ‑dhɛ Izraɛdhö ‑mɛ ‑nu ‑wɔn 'gü 'ö ‑bɛn zë ‑sü 'ka ‑a ‑bha 'sëëdhɛ 'gü 'ö‑ pö:
ROM 11:3 «N Dëmɛ, i ‑wʋdhiʋ̈loomɛ "pɛpɛ 'wo gun "sɛ ya‑ 'gü, ꞊waa‑ ꞊gban zë, ꞊wa ‑ya mü ꞊wa ‑dhɛ 'ö gun i ‑dhɔkë ‑dhɛ 'ka ‑a ꞊gban 'gü see‑, mang do 'ö 'ma 'to ya ‑wo ma ꞊në n mɔɔ‑ sië kö ‑wo n zë ꞊zɔɔ ‑wa!»
ROM 11:4 "Kɛɛ 'yö Atanna ‑ya ‑yɔ bɔ‑ ‑gɔ 'ö‑ pö: «‑Yö kë i "yaan ꞊dhɛ 'kö 'zü yöö kë "dhʋ̈, "kɛɛ mɛ "gblü "saɔplɛ ‑wo mü 'ö 'wo 'to ‑sü 'ka ‑kplü ‑sü 'ka n ‑bha, 'ö 'a‑ ‑nu ‑maa kë ‑sü 'ka 'pö, 'ö 'wii zun kpiögɔ 'gü ꞊gebhɔ 'wo‑ Baadhö ‑kë bha‑ ‑dhɛ tongtongdhö kö ‑wa ‑dhɔkë.»
ROM 11:5 ‑Kɔ do 'ö gun‑ 'ka "dhʋ̈ yi 'bha 'ka bha‑ 'gü ꞊dɛɛ, mɛ kpö 'në 'bha ‑yö Izraɛdhö ‑mɛ ‑nu kpö 'gü mü, 'ö Atanna 'dhö‑ ‑nu ‑ya ‑sü 'ka ‑dɩ ‑ta ‑a ‑bha "klʋ ‑së ‑dhɛ 'gü.
ROM 11:6 'Sa ‑a ‑nu ‑ya 'ö‑ wo ‑dɩ ‑ta "dhʋ̈ bha, ‑a ‑gɛn 'yii ‑gban ‑a ‑nu këwɔn ‑së ‑nu ‑bha, ‑yö ‑gasitɛ ꞊në‑ ‑kë ‑nu ‑dhɛ, 'yaa yö ‑zë 'ka 'nu kö‑ kë 'ö‑ wo "dhʋ̈ bha 'wii 'dho‑ pö‑ ‑bha ꞊dhɛ ꞊ya ‑gasitɛ kë‑ ‑nu ‑dhɛ.
ROM 11:7 'Sa ꞊ya kë "dhʋ̈ kö kwa ‑dho ‑a pö ꞊dhɛ ꞊naa bha? Kö dha ‑dhɛ 'ö Izraɛdhö ‑mɛ ‑nu gun‑ mɔɔ‑ sië Atanna wëëdhö bha 'wii‑ yö. Mɛ 'dhɛ 'ö‑ ‑nu sü ö ‑bha 'ka bha ꞊në 'wo kë‑ yö, 'yö mɛ ‑kpɛa 'wo to ‑a ‑nu gɔɔ ‑kë "gbɩɩ‑ ꞊dhɛ ‑kɔ do 'ö ‑bɛn zë ‑sü 'ka‑ 'ka ‑a ‑wʋ 'sëëdhɛ 'gü bha‑ 'dhö ꞊dhɛ:
ROM 11:8 «Atanna ‑yö kë zuë" 'ö "glɔɔglɔ ‑a ‑da ‑nu "gblʋ̈ʋ̈‑, 'ö "yan 'ö 'yaa ‑dhɛ yö ‑a ‑ya ‑a ‑nu ‑gɔ ‑bha, 'ö "tʋ 'ö 'yaa 'wɔn ‑ma ‑a dɔ‑ ‑nu ‑gɔ ‑bha 'ö dho ö zun‑ 'ka ꞊dɛɛ ‑bha.»
ROM 11:9 'Yö ‑gblüdë Davi ‑dɩ 'pö 'ö ö ‑bha pö 'ö‑ pö: «(N Dë Atanna,) ‑bhö ‑a "slë kë kö ‑a ‑nu ‑bha ‑dhië 'wo‑ ‑kë 'ö 'wo‑ pö wo ‑dɩ ‑dhɛ ꞊dhɛ wo Atanna ꞊në‑ ‑dhɔkë sië bha ‑yö kë‑ ‑nu ‑gɔ ꞊dhɛ döng 'wo‑ ‑dhio kö ‑ya ‑nu 'kun ‑a 'dhö, ‑ɛɛ 'zü ꞊dhɛ te 'wo "yi ‑bha ‑kë 'ka bha‑ 'dhö, kö‑ ‑nu ‑gɛn ‑yö ‑da 'gü kö ‑yö kë‑ ‑nu ‑pö ‑gɛn 'ka, kë "dhʋ̈ kö 'wɔn ‑yö bho‑ ‑nu 'gü 'kpakpadhö.
ROM 11:10 ‑Bhö ‑a ‑nu "yan 'gü trö kö 'wa 'dho ‑dhɛ yö 'zü, ‑bhö ‑a kë kö ‑wo 'to ꞊dhuëngdhɛ ‑kë mɛ ‑nu ‑dhɛ ‑mɛ ꞊në‑ 'ka ‑kpɛawo.»
ROM 11:11 A‑ ‑pö 'sa ꞊ya kë "dhʋ̈ kö Zuifö ‑nu ‑gɛn "dhiʋ̈ 'ö ‑zuö bha Atanna ꞊ya ö ‑kɔ ꞊dede ꞊në‑ "kan‑ ‑nu ꞊kee‑ bha "wɛ ‑ee? ‑Abin! 'Yii ö ‑kɔ "kan‑ ‑nu ꞊kee‑, "kɛɛ ‑pö 'wo‑ wo 'wɔn kë ‑sü 'gü bha ꞊në‑ ‑kë 'yö "sɛgɔ ‑kpɛa 'wo to 'wo dha ‑sü ꞊slɔɔ, kë "dhʋ̈ kö ꞊drɔ ‑yö ‑da Zuifö ‑nu 'gü.
ROM 11:12 ꞊Ya kë ꞊dhɛ Zuifö ‑nu ‑bha ‑pö 'wo‑ wo Atanna ‑wɔn 'gü bha ꞊ya kë mɛ "pɛpɛ 'waa Zuifö 'ka‑ ‑nu ‑ya ‑së ‑gɛn 'ka, kö 'yiʋ̈‑ 'ö dɔ‑ ‑nu ‑bha bha ‑yö kë dɔ ‑dhi 'mɛ 'waa Zuifö 'ka‑ ‑nu 'ka ‑sü 'ka bha ‑oo, 'yö‑ ‑nu ꞊gban "pɛpɛ ꞊wa dhië‑ ‑zë wo wo 'gü kö ‑wo nu Atanna "piʋ̈ ꞊wɛ? ‑Yö ‑dho kë mü ꞊dhɛ? ‑A yö ‑zë ‑bha 'dhuë‑ ‑dho kë ‑ziisü 'ö ‑ziö ‑blɛɛsü ‑bha ‑ta.
ROM 11:13 ꞊Ya 'go‑ 'dhɛ 'kö bha‑ 'gü, 'mɛ 'kaa Zuifö 'ka 'ma zun ka ‑bha. A‑ ‑pö ka ‑dhɛ ꞊dhɛ ma ꞊në Atanna ‑yö n ‑ya ö ‑bha bɔmɛ 'ka ka kpö 'gü, ‑a yë 'ö‑ nu n ‑dhɛ 'pö "dhʋ̈ bha‑ "dhia ‑yö n 'gü.
ROM 11:14 Kë "dhʋ̈ kö bhlɔɔ ‑yö 'ma n dheebhang ‑nu 'wo Zuifö 'ka bha‑ ‑nu 'gü kö‑ mɛ ga 'bha ‑zë ‑yö dha ‑a kë 'a‑ wo "dhʋ̈ bha‑ ‑wɔn 'gü.
ROM 11:15 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑bha Zuifö ‑nu ‑ya "gʋ̈ng ‑ta ‑sü ‑zë ꞊ya kë 'wɔn ‑së 'kpii‑ ‑kë 'mɛ 'waa Zuifö 'ka‑ ‑nu ‑dhɛ ‑gɛn 'ka kö waa‑ Atanna ‑nu ‑wo 'wü 'koo, 'yö ꞊yaa‑ ‑nu 'sü ‑zë wo ‑dee wo ꞊wɛ? Kö 'yii kë 'wɔn ‑së ‑ziisü 'ka ꞊dhɛ 'mɛ ꞊wa ga 'nu ‑a ‑nu ‑bö ‑sü 'dhö ‑ee?
ROM 11:16 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Zuifö ‑nu bha ꞊në Atanna ‑ya ‑nu "bhɛma ‑nu ‑ya ‑dɩ ‑ta ö ‑bha 'ka yi 'bha 'ka, ‑a ‑nu ꞊tɛni ‑kë ꞊dhɛ ta ‑pë ‑blɛɛsü 'wo‑ ꞊loo bha‑ 'dhö. Pë ‑blɛɛsü 'wo ꞊loo Atanna ‑dhɛ bha ꞊wa bo yö ‑zë ‑nu ‑dhɛ ‑sü 'ka kö‑ ‑kpɛa 'ö to‑ ꞊gban ‑ya ‑bha 'ka ꞊naa bha. "Ɛɛn 'zü ꞊dhɛ "dhü 'ö‑ yun 'dhö Atanna ‑bha 'ka ‑a 'dhö, ꞊ya kë "dhʋ̈ kö‑ kwɛɛ" ꞊gban ‑ya ‑bha 'ka ꞊naa bha.
ROM 11:17 Zuifö ‑nu bha ꞊në 'wo ꞊dhɛ odhivie ‑dhü 'wo‑ ta ‑a 'dhö, ꞊ya kë "dhʋ̈, ꞊wa odhivie ‑dhü 'wo‑ ta ‑a kwɛɛ" "kan kö ka 'kö 'kaa Zuifö 'ka 'ö 'ka ꞊dhɛ odhivie ‑dhü 'ö "bü ‑a 'dhö, ‑wo ka 'sü ‑wo ka ‑gban ‑a kwɛɛ" 'dhɛ 'wo‑ ‑kan bha‑ "gblʋʋ 'gü kö 'ka ‑tosɛa kë‑ yun bha‑ ‑bha bha ‑oo,
ROM 11:18 kö ka ‑zë ka ‑dɩ fië‑ ‑bho "dhü 'kö 'wo‑ ‑ta ‑a ‑gbeng 'dhɛ 'wo‑ ‑kan bha‑ ‑bha ‑gɛn ‑mü ‑më 'ka? Kö‑ ‑gɛn 'yaa 'dhö, ‑a 'klɔɔ‑ ‑mü ꞊dhɛ "dhü bha ꞊në ka ‑zë ka bun sië, ka ‑zë 'kaa yö ‑zë bun sië.
ROM 11:19 Ka ‑mɔɔ ‑bha 'ka‑ pö ꞊dhɛ: "Kɛɛ "dhü bha‑ ‑gbeng "kan ꞊në 'wo‑ wo 'yö 'wo yi ‑zë yi ‑gban "gblʋʋ 'gü bhoo, ('yaa yi ‑dɩ fië‑ bho‑ ‑bha ‑më ‑wɔn ꞊në‑ 'gü?)
ROM 11:20 'Ka‑ pö "dhʋ̈ kö tɛan‑ ‑yö ka "piʋ̈, 'dhang ‑bho Yesu "dhiʋ̈ ‑sü 'ö 'yii kë‑ ‑nu ‑gɔ 'yö 'wo‑ ‑nu ‑kan ‑a ‑nu ‑dhü ‑bha, 'yö ka 'kö ka ‑zë 'ka 'dhang bho‑ "dhiʋ̈ bha, 'wo ka ‑gban ‑a "gblʋʋ 'gü bha, "kɛɛ 'ka 'dho ka ‑dɩ 'sü 'kpii‑ ‑a ‑wɔn 'gü, "suʋ̈ ‑zian ꞊në ‑yö kë ka 'gü.
ROM 11:21 ‑A 'klɔɔ‑ ‑mü ꞊dhɛ mɛ 'kö wo ‑zë 'wo ꞊dhɛ "dhü ta ‑sü gbeng 'dhö, Atanna ꞊ya ꞊mɔɔ‑ ‑bha ꞊ya 'wɔn bho‑ ‑nu 'gü bha ‑oo, 'yö ka 'kö ka ‑zë 'wo ka ‑gban ꞊në‑ wo ꞊wɛ, 'ka 'wɔn yaa kë, ‑yö ‑dho ka ‑mawɔn 'to "wɛ ‑ee?
ROM 11:22 ꞊Ya kë "dhʋ̈, ka ‑zë ‑ka Atanna ‑bha "klʋsëdhɛ waa‑ ‑bha "dhiʋ̈dhɛ bha ꞊në‑ 'suan‑ bho. ꞊Dhɛ ‑yö "dhiʋ̈dhɛ ‑kë 'mɛ 'wo go‑ ‑bha zian ‑ta bha‑ ‑nu ‑bha, 'yö "klʋ ‑dhi ka ‑zë ka ‑bha, "kɛɛ ‑a ‑dhɛa ‑bha ꞊dhɛ 'ka 'to ꞊në wo 'pö ‑kplü ‑sü 'ka ‑a ‑bha "klʋsëdhɛ bha‑ ‑bha kpɛnngkpɛnngdhö. "Kɛɛ 'yii kë "dhʋ̈, ‑yö ‑dho ka "kan 'pö ‑a ‑bha ta ‑dhü bha‑ ‑bha.
ROM 11:23 ꞊Ya kë 'pö ꞊dhɛ Zuifö ‑nu ꞊wa wo bo woo‑ gɔɔgbɩɩdhɛ 'ka kö ‑wo nu Atanna "piʋ̈, ‑yö ‑dho ‑a ‑nu ‑gban 'zü ‑deewo ‑dhɛ 'wo gun‑ 'gü ‑blɛɛsü bha‑ 'gü. ‑A 'klɔɔ‑ ‑mü ꞊dhɛ ‑a "sɩ ‑ya ‑dhɛ kö ‑ya ‑nu ‑gban 'zü ‑deewo.
ROM 11:24 Ka 'ö 'kaa Zuifö 'ka bha ka ꞊dhɛ odhivie ‑dhü 'ö 'wii‑ ta 'ö bhɔ ö ‑dɩ ‑ta "bü ‑a kwɛɛ" ꞊në‑ 'dhö. ‑A "kan ꞊në 'wo‑ wo 'yö 'wo‑ ‑gban ‑a 'dhɛ 'wo‑ ta, "kɛɛ 'ö 'yaa gun ‑a ‑dhü 'ka ‑blɛɛsü bha‑ ‑bha. 'Yö Zuifö ‑nu ‑zë 'wo‑ 'dhɛ 'wo‑ ta bha‑ ‑gbeng 'ka, ‑a ‑nu ‑dɩ ‑dhü ‑mü. ꞊Ya kë "dhʋ̈ kö wo ‑zë ‑a ‑nu ‑gban ‑sü 'ö ‑deewo ‑a ‑nu ‑dɩ ‑dhü bha‑ ‑bha bha yö ‑zë 'yaa 'wɔn 'bha ‑wɔn 'bha 'ka.
ROM 11:25 N dheebhang ‑nu, tɛanwɔn do 'bha 'ö gun ‑bin ‑sü 'ka ꞊në maa‑ pö ka ‑dhɛ bha kö 'ka 'dho ka ‑dɩ 'sü 'wɔndɔmɛ 'ka. Yö ‑mü ꞊dhɛ ‑yö "dhʋ̈ tɛan‑ 'ka ꞊dhɛ Izraɛdhö ‑mɛ ‑nu bha‑ ‑nu ‑kɔ "pɛan 'bha ‑yö kë ‑sü 'ka ꞊dhɛ 'mɛ ꞊wa gɔɔgbɩɩdhɛ kë Atanna ‑wʋ ‑ta ‑a 'dhö, "kɛɛ 'wii 'dho 'to "dhʋ̈ "sɛ 'tuʋ̈‑ 'ka. "Kɛɛ ‑wo ‑dho 'to "dhʋ̈ ꞊kö 'ö dho 'ö zun‑ 'ka yi 'ö 'mɛ 'waa Zuifö 'ka 'ö 'wo dho bɔ Atanna 'ka bha ‑a ‑nu "dhiʋ̈ pa ‑yi ‑bha. Yö ꞊në ꞊ya bo kë ‑sü 'ka ꞊dhɛ ‑kɔ bha‑ 'dhö,
ROM 11:26 'yö Zuifö ꞊gban 'wo dho dha, ‑a 'klɔɔ‑ ‑mü ꞊dhɛ ‑yö ‑bɛn zë ‑sü 'ka Atanna ‑gɔ 'sëëdhɛ 'gü ꞊dhɛ «Zakɔbö 'gü ‑në ‑nu 'wo ‑kë Izraɛdhö ‑mɛ ‑nu 'ka bha, ‑a ‑nu ‑kan bhië" "dhiʋ̈ mɛ bha ‑yö ‑dho 'go ‑tɔn 'ö Zedhizadhɛmö 'wo‑ Siɔn ‑tɔn ‑kë bha ꞊në‑ ꞊gbin‑, 'yö bɔn bho‑ ‑nu ‑bha ‑deewo "pɛɛpɛdhö.»
ROM 11:27 ꞊Dhɛ Atanna ‑ya ‑pö 'zü ꞊dhɛ: «‑Mlɛɛ ‑dho ‑da kwɛng‑ ‑nu kwa ꞊zinng 'gü ‑kɔ bha ꞊në‑ 'gü, 'yö 'wɔn yaya "pɛpɛ 'wo‑ ‑kë bha, 'a‑ ꞊gban bian bho‑ ‑nu ‑bha.»
ROM 11:28 ‑A ‑kë "dhʋ̈ ‑sü bha‑ ‑wɔn 'gü, ꞊ya kë ꞊dhɛ Zuifö ‑nu ‑bha ‑kan Atanna ‑wʋ ‑bha ‑sü bha 'kwa‑ ‑ga, kwa ‑mɔɔ ‑bha 'kwa‑ pö ‑wo ‑kë Atanna 'yaɔ‑ 'ka ka ‑zë ka ‑së 'gü, "kɛɛ ꞊ya kë ꞊dhɛ 'kwa‑ ‑nu ‑ga ‑a ‑nu 'sü 'ö Atanna ‑ya wo ö ‑bha 'ka, 'ö‑ ‑nu ‑ya ‑dɩ ‑ta bha yö ‑zë ‑bha, kö kwa ‑dho ‑a pö wo ꞊në 'wo Atanna dhɔɔbhaamɛ ‑nu 'ka ‑a ‑nu "bhɛma ‑nu bha‑ ‑nu 'ko ‑sɔn.
ROM 11:29 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ꞊ya bo ö ‑bha ‑gasitɛ bha‑ kë ‑sü 'ka 'mɛ 'ö‑ ‑dhɛ 'yaa‑ 'sü‑ ‑mɛ ‑gɔ 'zü, 'yö ꞊ya ö bo 'pö 'mɛ 'ö‑ ‑ya ‑sü 'ka, 'yaa 'go ö ‑wʋ ‑ta ‑a ‑mɛ ‑dhɛ 'zü tongtongdhö.
ROM 11:30 'Ö gun 'pö yi 'bha 'ka, 'mɛ 'ö 'kaa Zuifö 'ka bha ka kë ‑da Atanna "dhiʋ̈, "kɛɛ dɔ 'kwa‑ wo ꞊dɛɛ ya ka ‑wëë ꞊yaa‑ kë ‑dhio 'ö Zuifö ‑nu ‑dɩ 'pö 'wii‑ ma‑ ‑ta bha‑ ‑wɔn 'gü.
ROM 11:31 'Sa woo ‑dɩ 'pö, ‑dhio 'ö 'waa‑ ma ‑sü 'ka Atanna ‑gɔ "tʋ̈ng ya‑ 'gü bha, ‑yö ‑kë "dhʋ̈ kö ka ꞊në ka ‑wëë ‑ya kë, "kɛɛ kö woo ‑dɩ 'pö‑ ‑nu ‑wëë ‑ya kë 'pö ꞊dhɛ ‑kɔ do bha‑ 'dhö.
ROM 11:32 ‑A 'klɔɔ‑ ‑mü ꞊dhɛ Atanna ‑yö ‑wɩ ‑bha kö mɛ ꞊gban "pɛpɛ ‑wo kë gɔɔgbɩɩmɛ 'ka ö ‑wʋ ‑gɔ "dhʋ̈, kë "dhʋ̈ kö‑ ‑nu ‑wëë 'ö‑ ‑kë bha 'ö yö ꞊në‑ ‑zɔn ‑nu ‑dhɛ.
ROM 11:33 ꞊Ya kë "dhʋ̈ yö ‑zë 'gü, kö Atanna ‑bha 'wɔndɔdhe 'ö‑ ‑gɔ waa‑ "yaaki 'ö‑ ‑bha ‑a ‑dhiang 'yaa zë ꞊tɔn ‑kɛɛ! 'Wɔn ‑nu 'ö‑ ‑nu ‑yaki ‑ya "dhʋ̈ bha, de ꞊në ꞊mɔɔ‑ ‑bha 'ö‑ 'klɔɔ‑ pö? De ꞊në ꞊mɔɔ‑ ‑bha 'ö 'wɔn ‑nu 'ö‑ ‑yaki 'kun sië ö ‑zʋ "piʋ̈ ‑a 'gü ma?
ROM 11:34 ‑Yö ‑bɛn zë ‑sü 'ka‑ ‑wʋ 'sëëdhɛ 'gü yö ꞊në‑ ‑wɔn 'gü ꞊dhɛ: «'Dee Atanna ‑zʋ "piʋ̈ ‑wɔn dɔ? 'Dee ꞊mɔɔ‑ ‑bha 'ö ‑dhio dɔ‑ ‑ta? "Ɛɛn 'ö ‑gleng ‑da ‑bha?
ROM 11:35 'Dee 'wɔn ‑kë ‑a ‑dhɛ ‑blɛɛsü 'yö gun ‑na ‑a ‑gɔ "yɔɔ dɔ‑ ‑mɛ ‑gɔ?»
ROM 11:36 Pë ꞊gban "pɛpɛ‑ ‑go yö ꞊në‑ 'gü, yö ꞊në pë "pɛpɛ ꞊gban ‑da, pë ꞊gban "pɛpɛ ‑wo ‑ya ‑sü 'ka yö ꞊në‑ ‑bha ‑ya 'gü. Yöö dosengseng ꞊në‑ 'tɔ ‑yö bhɔ "tʋ̈ng ꞊gban "pɛpɛ 'gü. Kö ‑yö kë "dhʋ̈ bha 'aa ‑yö kë.
ROM 12:1 N dheebhang ‑nu, ꞊dhɛ 'ö ‑kë ꞊dhɛ Atanna ꞊ya "klʋsëdhɛ 'ö‑ suu 'dhö "dhʋ̈ bha‑ kë kwa 'ka, ‑ka dɔ ꞊në‑ wo "gbɩɩ‑ kö 'ka ka ‑dɩ nu‑ ‑dhɛ ꞊dhɛ "saa‑ pë "yaandhe 'ö "slʋ̈ʋ̈slʋ̈, 'ö‑ "dhia‑ dho 'ma‑ 'gü ‑a 'dhö, 'ka yö ꞊në‑ kë "dhʋ̈, kö‑ ‑dhɔkë ‑kɔ ꞊dede 'ö‑ 'gü ‑së bha 'ka‑ wo.
ROM 12:2 'Ka 'dho ka ‑dɩ ‑da ꞊dɛɛ 'gü ‑mɛ ‑nu "piʋ̈, 'ö 'ka ‑tosɛa ‑kë ꞊dhɛ‑ ‑nu 'dhö, "kɛɛ ‑ka "wɩ‑ ‑bha kö 'wɔndɔdhe ‑dee 'ö Atanna ‑ya nu ka ‑dhɛ bha, ‑yö ka "ta ‑kɔ ꞊gban "gla "pɛɛpɛdhö. Yö ꞊në ꞊ya kë "dhʋ̈ 'yö 'ka dho‑ dhɔɔbhaawɔn ‑nu ‑bho 'koo dɔ. 'Yö 'wɔn 'ö ‑së, 'ö ꞊bhlëë 'dhö‑ ‑bha, 'ö‑ ‑zë 'ka ‑dhɛ 'yaa‑ ‑bha, 'ka ‑kë ‑a këmɛ 'ka.
ROM 12:3 ‑Gasitɛ 'ö Atanna ‑ya ‑kë n ‑dhɛ bha‑ ‑wɔn 'gü, a‑ ‑pö ka ‑dhɛ ꞊dhɛ 'ka ‑kɔ 'ö‑ ‑bha 'do 'do, mɛ 'bha 'ka 'dho ka ‑dɩ 'sü 'kpii‑ kö 'ka ka ‑dɩ 'sü 'pë 'ö 'kaa‑ 'ka ‑a 'ka, "kɛɛ 'ka ‑kɔ 'ö ‑bha ꞊në ‑ka ka ‑zʋ 'gɔn‑ ‑naa ‑bha, kö 'mɛ 'ö "dhʋ̈ ‑a ‑bha ‑zʋ ‑yö Atanna ‑dhɛ ‑naa 'ö‑ nu‑ ‑dhɛ bha ꞊në ‑yö "ta 'sü‑ ‑naa ‑bha.
ROM 12:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑kɔ do 'ö kwa daɔ ‑nu 'wo 'gbɛ 'ka‑ ‑bha kwa ‑bha, "kɛɛ 'ö‑ ‑nu kë ‑yë 'yaa do bha,
ROM 12:5 Mɛ 'kwa Klisi ‑bha 'ka bha kwa ‑kɔ do bha ꞊në‑ 'gü 'pö. Kwa 'gbɛ "dhʋ̈, "kɛɛ kwa ‑gban kwa 'kwëë‑, kwa mɛ do ꞊në‑ 'ka.
ROM 12:6 "Kɛɛ mɛ 'ö "dhʋ̈ 'do 'do ‑a ‑bha 'pë 'ö Atanna ‑ya ꞊gbaɔ‑ ‑gɔ kö ‑ya ‑bha yë kë‑ 'ka ‑yö ‑dhö, 'yaa bhɔ 'kwëë‑. Mɛ 'ö Atanna ꞊ya ö ‑wʋ "dhiʋ̈ ꞊loo ‑sü gbaɔdhe kë‑ ‑gɔ, ‑a ‑dhɛa ‑bha ꞊dhɛ ‑a ‑mɛ ‑ya kë ‑zʋ ‑yö ‑a ‑dhɛ ‑faan 'dhɛ 'ö‑ ꞊gbaɔ‑ ‑gɔ bha‑ 'ka.
ROM 12:7 Mɛ 'dhɛ ꞊yaa‑ ‑bha kë yë ‑kë ö ‑bha mɛ ‑nu ‑dhɛ ‑sü 'ka, ‑a ‑mɛ ‑ya kë. Mɛ 'dhɛ 'ö mɛ ꞊klang ‑kë ‑a ‑wʋ 'ka ‑sü ꞊në ꞊ya kë 'zü‑ ‑gɔ, ‑a ‑mɛ ‑ya kë.
ROM 12:8 Mɛ 'dhɛ i ‑bha ‑ya kë 'zü mɛ ‑nu faan dɔ ‑sü 'ka ‑a ‑bha yë kë ‑sü ‑bha, ‑bhö ‑a kë i faan 'ka. Mɛ 'dhɛ i ‑bha ꞊ya kë gbaɔsü 'ka, ‑bhö ‑a kë ‑kɔwodhɛ ‑bha do 'gbaandhö. Zian ‑bho Atanna ‑bha mɛ ‑nu 'ka ‑sü ꞊ya kë 'mɛ i ‑gɔ, ‑bhö ‑a 'kun i 'nii‑ 'ka. ‑Wëëmɛ ‑nu ‑ta 'kun ‑faan ꞊ya kë 'mɛ 'ö‑ ‑gɔ, ‑a mɛ ‑ya kë ö wëë' "puu 'ka, 'ya 'dho ö wë 'gü ‑siö, ‑a ‑gɛn ‑mü ꞊dhɛ ‑yö ‑gasitɛ ꞊në‑ 'ka 'yö Atanna ‑ya ‑kë kwa ‑dhɛ.
ROM 12:9 Mɛ ‑dhɔ ‑bha ka kë ‑sü "yi 'ya 'dho kë‑ ꞊wlöö. 'Wɔn yaa kë ‑sü ‑yënng ‑yö ka kë kö 'ka ‑kplü 'wɔn ‑së kë ‑sü ꞊në‑ ‑bha.
ROM 12:10 Ka ‑wɔn ‑yö kë ka 'ko ‑nu ‑gɔ "gbɩɩ‑ ꞊dhɛ dheebhang ‑zë ‑nu 'dhö, kö ka 'ko ꞊bhlëë ‑ya ‑sü ‑pɛng ‑yö dɔ ka ‑ta.
ROM 12:11 'Wɔn "ʋʋ 'wɔn 'ka dho‑ kë, ‑kaa kë ka 'nii‑ ‑bha. 'Ka 'dho kë "fiamɛ 'ka, kwa Dëmɛ ‑bha yë kë ‑pɛng 'ö‑ ‑bha 'Nii‑ "slʋ̈ʋ̈slʋ̈ ‑ya dɔ ka ‑ta bha, ‑kaa ‑bha yë kë‑ 'ka!
ROM 12:12 ‑Dhɛkpaɔ dhia" 'ö 'ka ka "yan 'to sië‑ ‑gɔ Yesu Klisi "piʋ̈ bha ka ꞊nii ‑yö ‑da ‑a ‑wɔn 'gü ‑kpɛawo. 'Kö ka ‑wëëdhɛ ꞊ya bho ‑kɔ "ʋʋ ‑kɔ 'ö‑ 'gü, 'ka ka zuë" kë ‑sɛa kö 'ka‑ 'kun ka ‑bha. Ka 'gü 'ya 'dho ga ‑bhɛa Atanna ‑dhɛ ‑sü 'ka.
ROM 12:13 'Ka 'dho Atanna ‑bha mɛ ‑nu 'to ‑kpla 'gü, ‑dhɛng ꞊ya bhɔ ka ‑ta, ‑kaa ‑dhɔkë.
ROM 12:14 ‑Ka 'dhuë‑ kë 'mɛ 'wo ka ‑wëë ‑kë wo sië‑ ‑nu ‑bha, ka ‑bha kë 'dhuë‑ ꞊në‑ kë ‑sü 'ka, 'ka 'dho "dhang ‑da mɛ ‑bha tongtongdhö.
ROM 12:15 Mɛ 'ö‑ ‑nu ꞊nii 'dhö ‑da sië kɛng‑ ‑nu ka ꞊nii ‑yö ‑da "kwëë, kö 'ka "gbʋ bɔ mɛ 'wo "gbʋ bɔ sië‑ ‑nu "piʋ̈.
ROM 12:16 Mɛ ꞊gban "pɛpɛ ‑ka dhi ka 'ko ‑dhɛ, ka zuë" 'ya 'dho bhɔ ‑duɛ ꞊bhlëësü ‑nu ‑bha. ‑Ka "wɩ‑ ‑bha kö 'wɔn ‑nu 'ö‑ ꞊bhlëë 'yaa 'kpii‑ mɛ "bhɩɩ‑ ‑nu 'gü bha 'ka‑ kë. 'Ka 'dho ka ‑dɩ 'sü 'wɔndɔmɛ 'ka.
ROM 12:17 'Ka 'dho 'wɔn yaa "yɔɔ bho mɛ 'bha ‑gɔ 'wɔn yaa 'ka. 'Wɔn 'ö ‑së mɛ ꞊gban 'gü ꞊në ‑kaa kë.
ROM 12:18 Kaa‑ mɛ ꞊gban "pɛpɛ ‑ka kë ka 'ko ‑dhɛ ‑së. ꞊Ya kë ꞊dhɛ 'yii kë 'zü ‑mɔɔ "kwëë ‑wɔn 'ka, "kɛɛ 'ya 'dho 'to ka ‑zë ka ‑bha.
ROM 12:19 N "taɔngdë ‑nu, 'ka 'dho ka ‑dɩ bhlɔɔ bho, ‑kaa 'to "dhʋ̈ kö Atanna ꞊në ‑yö ka bhlɔɔ bho. ‑A 'klɔɔ‑ ‑mü ꞊dhɛ ‑yö ‑bɛn zë ‑sü 'ka‑ ‑gɔ 'sëëdhɛ 'gü ꞊dhɛ: «Mang Atanna ‑mɛ 'a ka Dëmɛ 'ka bha ma ꞊në 'a‑ pö: Mɛ bhlɔɔ bho ‑sü ‑yö ma ꞊në n ‑gɔ, ma ꞊në 'a 'wɔn ‑bho mɛ 'gü ‑mɛ 'ka.
ROM 12:20 'Yö go mü 'zü 'ö‑ pö: «꞊Ya kë ꞊dhɛ din‑ 'dhö i 'yaɔ‑ kë sië, ‑bhö ‑a gba ‑bhöpë 'ka. "Yi mü ‑dhɔ ꞊yaa‑ 'kun, ‑bhö ‑a gba "yi 'ka, ‑a 'klɔɔ‑ ‑mü ꞊dhɛ 'i‑ kë sië "dhʋ̈ kö‑ ‑bha 'yiʋ̈‑ ꞊në 'i‑ 'bha ‑da sië‑ 'gü bha, ‑a ‑gɔ ‑dho kë‑ ‑ta 'gbinkin ‑gbinkin.»
ROM 12:21 ‑Kaa kë ‑së kö 'wɔn yaa ‑kɔ 'ya 'dho ziö ka ‑gɔ, "kɛɛ ka ꞊në ka ‑kɔ ‑yö ziö 'wɔn yaa ‑gɔ ‑kpɛawo 'wɔn ‑së kë ‑sü 'ka.
ROM 13:1 ꞊Ya 'go yö ‑zë 'gü, ‑a ‑dhɛa ‑bha ꞊dhɛ mɛ ꞊gban ‑wo wo ‑gɔ 'dho "sɛgɔdhiʋ̈mɛ ‑nu ‑dhɛ "sia‑. ‑A 'klɔɔ‑ ‑mü ꞊dhɛ mɛdhɛ ‑zë 'bha ‑bha 'bha 'yaa 'dhö kö 'yii 'go Atanna "piʋ̈. Mɛ "pɛpɛ 'wo mɛdhɛ ‑kë, Atanna ꞊në‑ ‑nu ‑ya.
ROM 13:2 ‑A ‑kë "dhʋ̈ ‑sü bha‑ 'gü, mɛ "ʋʋ mɛ 'ö gɔɔgbɩɩdhɛ ‑kë mɛdhɛkëmɛ ‑nu ‑gɔ, kö ‑yö gɔɔgbɩɩdhɛ ‑kë Atanna ꞊në‑ ‑gɔ bha. 'Mɛ ꞊yaa‑ kë "dhʋ̈, kö yö ꞊në 'wɔn bho ö ‑dɩ 'ka "dhuu.
ROM 13:3 'Sa 'mɛ 'kö 'wɔn ‑së ‑zë ‑kë, ‑a ‑dhɛ 'yaa‑ ‑bha ꞊dhɛ yö ‑zë ‑yö "suʋ̈ mɛ ‑tiandhö ‑nu ‑gɔ. "Fɔn 'wɔnyaakëmɛ. ꞊Ya kë ꞊dhɛ 'yaa 'mɛ 'ö‑ "piʋ̈ ꞊dhɛ 'ö "suʋ̈ ‑gɔmɛ ‑nu ‑gɔ, ‑yö 'wɔn ‑së kë. Yö ꞊në ꞊ya kë "dhʋ̈ 'yö ꞊bhlëë dho kë‑ ‑mɛ ‑bha ‑a ‑nu wëëdhö.
ROM 13:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ꞊në‑ ‑nu ‑ya, 'sa ‑ya ‑nu ‑ya i ‑së 'gü. "Kɛɛ 'bha 'wɔn yaa ‑zë kë, ‑bhö "suʋ̈‑ ‑nu ‑gɔ. ‑A 'klɔɔ‑ ‑mü ꞊dhɛ "sɩ 'ö‑ ‑nu ‑dhɛ 'wo ꞊mɔɔ‑ ‑bha 'wo 'wɔn bho‑ 'ka i 'gü ‑bha Atanna ꞊në‑ ‑kë ‑a ‑nu ‑dhɛ, kë "dhʋ̈ kö ‑wo ö bhlɔɔ bho, kö ‑wo 'wɔn bho 'wɔnyaakëmɛ 'gü.
ROM 13:5 'Wɔn 'ö‑ ‑wɔn 'gü 'yö‑ ‑dhɛ 'dhö‑ ‑bha ꞊dhɛ mɛ ‑yö ꞊bhlëë ‑ya "sɛgɔdhiʋ̈mɛ ‑nu ‑bha bha 'yö bha. ‑A 'klɔɔ‑ 'yii kë 'wɔn ‑bho mɛ 'gü ‑sü "sɩ 'ö Atanna ‑ya ‑kë ‑a ‑nu ‑dhɛ bha yöö do‑ 'ka. ‑A 'bha ‑mü ꞊dhɛ kwaa ꞊dede kwa‑ 'wɔn ‑dɔ kwa zuë" "piʋ̈ ꞊dhɛ ‑a ‑dhɛ ‑zë ‑mü.
ROM 13:6 'Wɔn 'ö‑ ‑wɔn 'gü 'pö 'ka 'nii‑ sɔng bho bha 'yö bha. ‑A 'klɔɔ‑ ‑mü ꞊dhɛ mɛ 'dhɛ 'wo 'wɔn 'dhɛ bha‑ ‑gɔ "dhiʋ̈ bha, Atanna ꞊në‑ ‑nu ‑ya. Kë "dhʋ̈ kö ‑wa kë ö kë ‑kɔ ‑ta.
ROM 13:7 ‑A ‑kë "dhʋ̈ ‑sü 'gü, ‑a mɛ 'dhɛ ‑a ‑bha 'wɔn ꞊ya kë ka ‑bha, ‑kaa bho ka ‑bha. Mɛ 'ö‑ ‑bha 'dhö 'nii‑ sɔng 'ka, ‑kaa bho, mɛ 'ö ‑bha 'dhö 'tɔng‑ ꞊saa ‑nu, "ɛɛn pë "ʋʋ pë 'ö‑ ꞊saa bho ‑wɔn 'ka, ‑kaa bho. Mɛ 'ö ‑suʋ̈gɔmɛ 'ka, ‑ka "suʋ̈‑ ‑gɔ kö mɛ 'ö ꞊bhlëëyamɛ 'ka 'ka‑ ꞊bhlëë ‑ya.
ROM 13:8 Mɛ 'bha ‑bha "pɔ 'ya 'dho kë ka ‑bha kö 'yii kë ka 'ko ‑dhɔ ‑bha ka 'ko kë ‑sü ‑zë 'ka. ‑A 'klɔɔ‑ ‑mü ꞊dhɛ 'mɛ 'ö‑ këyɔɔ ‑dhɔ ‑ya ‑kë bha kö 'pë 'ö Atanna ‑bha 'tɔng‑ ‑ya pö ‑a mɛ ꞊yaa‑ kë.
ROM 13:9 ‑A ‑gɛn ‑mü ꞊dhɛ ‑a ‑bha 'tɔng‑ ‑ya ‑pö 'ö‑ pö: «'Bha 'dho ‑da mɛ ‑nu ‑bha dhe "piʋ̈, "ɛɛn 'bha 'dho mɛ ‑nu ‑bha gɔn 'kun ꞊mlaabɔ 'ka, 'bha 'dho mɛ zë, 'bha 'dho ꞊kwaan bho, i zuë" 'ya 'dho bhɔ mɛ ‑nu ‑bha pë ‑bha.» ‑A 'tɔng‑ 'dhɛ ‑nu 'wo bha waa‑ ‑kpɛa "pɛpɛ 'wo to ‑a ‑nu ‑gɔ 'ö 'dhö yö ‑mü: «I këyɔɔ ‑dhɔ ‑yö i kë ꞊dhɛ i ‑dɩ 'dhö.» ꞊në‑ 'ka.
ROM 13:10 Mɛ 'ö‑ këyɔɔ ‑dhɔ ‑ya ‑kë, 'yaa 'wɔn yaa suu "ʋʋ suu 'bha kë‑ 'ka. ‑A ‑kë "dhʋ̈ ‑sü 'gü, mɛ ‑dhɔ ꞊ya i kë kö pë 'ö Atanna ‑bha 'tɔng‑ ‑ya pö 'bha‑ ꞊gban 'gü ‑wɔn kë "pɛɛpɛdhö i ‑bha ‑tosɛa 'gü.
ROM 13:11 'Wɔn 'ö‑ ‑wɔn 'gü, 'yö 'a ꞊nëng 'gü "dhʋ̈ bha‑ 'klɔɔ‑ ‑mü ꞊dhɛ "tʋ̈ng kwa dɔ‑ 'ka ya ka‑ dɔ 'kpakpadhö. ꞊Dhɛ 'ö "dhʋ̈, ‑ka ‑bö kö 'ka 'go yi 'gü, ka ‑go yi 'gü "tʋ̈ng ꞊ya ꞊loo. ‑A 'klɔɔ‑ ‑mü ꞊dhɛ kwa dhamɛ nu "tʋ̈ng 'yaa kwa 'ka ꞊gblɛɛn 'zü ꞊dhɛ ‑kɔ 'ö gun‑ 'ka ‑blɛɛsü kö 'kwa 'dhang bho‑ "dhiʋ̈ ‑dee 'gü bha‑ 'dhö.
ROM 13:12 Gbeng 'gü "pɛan 'dhɛ 'kwa ziö‑ 'gü ꞊në ꞊ya kë 'kpiisü. ‑Dhɛkpaɔ ‑sü 'gü 'yaa ꞊gblɛɛn 'zü. ꞊Dhɛ 'ö "dhʋ̈, ‑ka ‑kwa kwa kwaa‑ 'wɔn yaa ‑nu 'kwa gun‑ kë sië kö 'kwii 'dhang bho ꞊kö Yesu "dhiʋ̈ bha‑ ‑zü, kö 'kwa dɔ ‑dhɛpuudhɛ 'gü kö 'kwa kwa ‑kɔ ‑da 'ko ‑zë 'ka ‑kwɛɛ ‑nu 'ö 'kwa ꞊mɔɔ‑ ‑bha 'kwa 'ko zë‑ 'ka ‑dhɛpuudhɛ 'gü bha‑ 'gü.
ROM 13:13 ‑Ka ‑kwa "ta ‑kɔ ‑së kë ꞊dhɛ mɛ‑ dɔ 'yënng‑ 'gü. ‑Ka ‑kwa kwa ‑dɩ 'kun ‑së kö 'kwa 'dho kë pë ‑bhö ‑sü oo, we mü ‑sü oo, ‑a ‑nu ‑bha ꞊dhuëng 'ka. Kö 'kwa 'dho kë ‑zuazëmɛ 'ka, "ɛɛn kö 'kwa 'wɔn ‑nu kë ‑sü "dhiʋ̈ ziö. Kö 'kwa 'dho "dhinaa 'ma, "ɛɛn ꞊drɔ 'ya 'dho ‑da kwa 'gü kwa 'ko ‑nu ‑bha.
ROM 13:14 "Kɛɛ ‑tosɛa kë ‑kɔ ‑dee 'ö kwa Dëmɛ Yesu Klisi ‑bha ‑zian ‑ta bha, ‑ka ‑kwaa sɔ ‑da kwa ‑bha. 'Kwa 'dho kwaa‑ kwa ‑dɩ ‑zü 'ö 'wɔn yaya ‑nu 'ö‑ ‑nu kë ‑sü ‑yö dɔ kwa ‑zʋ ‑bha bha ‑a ‑nu ‑kɔ ‑yö ‑ziö kwa ‑gɔ 'ö 'kwa‑ ‑nu dhɔɔbhaawɔn ‑nu ‑kë.
ROM 14:1 ꞊Ya kë ꞊dhɛ mɛ 'ö‑ ‑zʋ 'yii ‑gban ꞊kö 'dhang ‑bho Atanna "dhiʋ̈ ‑sü 'gü ꞊ya kë ka kpö 'gü, ‑kaa ‑mɛ 'kun ‑së, 'ka 'dho zaɔdhe ‑da 'ka ‑a ‑bha 'dhang bho Atanna "dhiʋ̈ ‑sü 'ö ‑tun ‑naa 'dhɛ 'ö ‑ta bha‑ 'gü.
ROM 14:2 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ 'bha 'ö mü, ‑ya ‑pö ö ‑bha ‑zʋ ‑yö Atanna ‑dhɛ ‑sü 'gü ꞊dhɛ 'ö "kian ‑yaa ‑bhöpë ‑zë 'bha ‑bha. "Kɛɛ kö 'mɛ 'kö‑ ‑bha 'dhang ‑bho Atanna "dhiʋ̈ ‑sü 'yaa 'kpii‑ bha yö ‑zë ‑ya pö sië ꞊dhɛ yö ‑zë ö ‑dho tapë ‑dɩ ‑slɔɔ ꞊në‑ ‑bhö.
ROM 14:3 ‑A ‑kë "dhʋ̈ ‑sü 'gü, ‑a ‑dhɛ 'yaa‑ ‑bha ꞊dhɛ 'mɛ 'ö pë ꞊gban ‑bhö bha ‑yö mɛ 'ö yö ‑zë 'yaa pë 'bha ‑nu ‑bhö bha‑ zë "dhi. Mɛ 'ö yöö ‑dɩ 'pö 'yaa pë 'bha ‑nu ‑bhö bha, ‑a ‑dhɛ 'yaa‑ ‑bha ꞊dhɛ ‑yö 'mɛ 'ö pë ꞊gban ‑bhö bha‑ ‑dhiang yaa zë, ‑a 'klɔɔ‑ ‑mü ꞊dhɛ Atanna ꞊ya ö ‑kɔ ‑ya ‑bha.
ROM 14:4 De ‑mü bhi ‑zë i 'ka 'yö 'i Atanna ‑bha gwëëmi ‑dhiang yaa zë? 'Bha‑ kë "dhʋ̈ ‑a "dhiʋ̈ ‑bha ‑yö kë ꞊dhɛ bhi 'ö bhi ‑zë 'i mɛ "wɛɛ 'ka 'bha mɛ ‑nu ‑bha gwëë" ‑dhiang yaa zë, "kɛɛ kö‑ dëmɛ ‑zë ‑yö 'yaanu ‑sü 'ka. ‑A ‑mɛ ‑to zian ‑ta oo, ‑yö ‑go zian ‑ta oo, waa‑ dëmɛ ‑a ‑nu ‑ta ‑wɔn ‑mü yö ‑zë 'ka. "Kɛɛ ‑yö ‑dho 'to ꞊në‑ wo zian ‑ta ‑zianwo, ‑a ‑gɛn ‑mü ꞊dhɛ ‑a ‑ta 'kun ‑faan ‑yö Atanna 'ö‑ Dëmɛ 'ka bha‑ 'gü.
ROM 14:5 Mɛ 'bha‑ mü 'zü ‑yö ö ‑zʋ ‑gɔn ꞊dhɛ ‑dhɛkpaɔyi 'bha ‑nu ‑wo mü 'ö‑ ‑nu ꞊bhlëë 'dhö 'kpii‑ 'ö ‑ziö ‑a 'bha ‑nu ‑ta, kö mɛ 'bha ‑dɩ 'pö ‑ya pö sië ꞊dhɛ ‑dhɛkpaɔyi ‑zë ꞊gban ‑yö do. ‑A ‑dhɛa ‑bha ꞊dhɛ mɛ "dhɛ 'ö "dhʋ̈ ‑yö 'wɔn ‑nu kë ꞊dhɛ ‑kɔ 'dhɛ 'ö 'dhang bho‑ "dhiʋ̈ ö zuë" "piʋ̈ bha ꞊në‑ 'dhö.
ROM 14:6 ‑A 'klɔɔ‑ ‑mü ꞊dhɛ mɛ 'ö ‑dhɛkpaɔyi 'bha sü ꞊bhlëësü 'ka ‑a 'bha 'ka, kö ‑yö kwa Dëmɛ ꞊në‑ ꞊bhlëë ‑ya. 'Mɛ 'ö pë ꞊gban ‑bhö kö ‑ya ‑kë kwa Dëmɛ ‑dhɛ, ‑a ‑gɛn ‑mü ꞊dhɛ ‑yö Atanna nuɛ" ‑bho 'ö ‑bha ‑bhöpë bha‑ ‑wɔn 'gü. Mɛ 'ö yöö ‑dɩ 'pö 'yaa pë ꞊gban ‑bhö, kö ‑ya ‑kë kwa Dëmɛ ‑dhɛ, ‑yö Atanna nuɛ" ‑bho 'pö.
ROM 14:7 Tɛanwɔn 'ö 'dhö yö ‑mü ꞊dhɛ: Mɛ 'kwa "yaan oo, mɛ ꞊wa ga oo, mɛ 'bha 'kwaa kwa ‑dɩ ‑gɔ. 'Kwa ‑tosɛa kë sië, kwa‑ ‑kë kwa Dëmɛ ‑dhɛ.
ROM 14:8 ꞊Ya kë 'zü ꞊dhɛ 'kwa ga, kwa ‑ga kwa Dëmɛ ‑dhɛ. ‑A ‑kë "dhʋ̈ ‑sü bha‑ 'gü, kwa ‑kë "yaan oo, kwa ‑ga oo, kwa Dëmɛ ꞊në 'kwa‑ ‑gɔ.
ROM 14:9 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ga 'ö Klisi ‑ya wo 'ö ‑bö bha ‑ya ‑wo "dhʋ̈ kö 'ö kë mɛ 'wo "yaan waa‑ mɛ ꞊wa ga ꞊në‑ ‑nu ꞊gban Dëmɛ 'ka.
ROM 14:10 "Kɛɛ bhi ‑zë, i i "tɛado ‑dhiang yaa ‑zë ꞊dhɛ, "ɛɛn bhi ‑zë i i "tɛado ‑zë "dhi ‑më ‑wɔn 'gü, "kɛɛ kö mɛ 'kwa "dhʋ̈ 'do 'do, mɛ ꞊gban kwa ‑dho ‑wo Atanna ‑kuu "dhiʋ̈ 'ö za dɔ kwa ‑bha.
ROM 14:11 ‑A 'klɔɔ‑ ‑mü ꞊dhɛ ‑ya ‑pö ö ‑wʋ 'sëëdhɛ 'gü 'ö‑ pö: «A "yaandhe 'ka, mɛ ꞊gban "pɛpɛ ‑dho nu zun kpiö 'gü ma ꞊në n ‑dhɛ. Mɛ ꞊gban "pɛpɛ "dhi‑ ‑dho pö ꞊dhɛ ma ꞊në 'a Atanna 'ka. Mang Atanna ‑mɛ 'a ka Dëmɛ 'ka bha ma ꞊në 'a‑ pö.»
ROM 14:12 ‑A ‑kë "dhʋ̈ ‑sü bha‑ 'gü, 'mɛ 'dhɛ "dhʋ̈ ꞊në dho ziö ö ‑bha ‑gɛn 'gü Atanna ‑dhɛ.
ROM 14:13 ꞊Dhɛ 'ö "dhʋ̈, ‑ka ‑kwa kwa bo za ‑dɔ kwa 'ko ‑bha ‑sü 'ka kö 'kwa ‑ya ‑kɔ 'kwa dho‑ kë‑ 'ka kö 'kwa 'dho 'wɔn 'bha kë 'ö ‑kë kwa dheebhang ‑gɛn "dhiʋ̈ ‑zuö ‑bha ‑pë 'ka, "ɛɛn 'ö ‑kë ‑a ‑da Atanna "dhiʋ̈ ‑wɔn 'ka ꞊në‑ zuën ‑ta.
ROM 14:14 ‑A 'klɔɔ‑ ‑mü ꞊dhɛ a 'dhang ‑bho "dhiʋ̈ 'kpakpadhö ꞊dhɛ 'mɛ 'ö ‑kplü ‑sü 'ka kwa Dëmɛ Yesu ‑bha, 'ö ‑tosɛa kë sië‑ dhiang 'gü, kö‑ ‑mɛ "kian 'yaa 'dhö 'zü. "Kɛɛ ꞊ya kë ꞊dhɛ mɛ 'bha ꞊yaa‑ pö 'zü ꞊dhɛ pë 'bha ‑yö mü 'ö ö "kian 'ka, ‑ɛɛ, kö ꞊ya kë‑ ‑mɛ ꞊në‑ "kian 'ka.
ROM 14:15 ꞊Ya kë ꞊dhɛ ‑bhöpë ‑wɔn ‑zë ꞊ya kë i dheebhang wëë' 'gü ‑siö i ‑bha ‑gɛn 'ka, kö Atanna ‑bha "ta 'i‑ 'sü sië bha 'bhaa‑ 'sü sië ‑dhɔ 'gü ꞊naa bha. 'Bha 'dho zë ‑bhöpë ‑wɔn ‑dhɛ 'i i dheebhang 'ö Klisi ‑yö ga‑ ‑wɔn 'gü bha‑ bho Atanna ‑bha zian ‑ta.
ROM 14:16 ‑Ka ‑kwaa kë ‑së kö ‑gasitɛ 'ö Atanna ‑ya ‑kë kwa ‑dhɛ 'ö "kian bho kwa ‑bha bha 'ya 'dho kë pö ‑ya kwa ‑bha ‑gɛn 'ka, 'ö 'wo kwa ‑dhiang yaa zë.
ROM 14:17 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑bha ‑gblüdëdhɛpö bha, ‑a ‑wɔn 'yii ‑gban ‑bhöpë 'waa müpë ‑zë ‑bha. ‑Yö ‑gban "ta ‑kɔ ‑së 'ö pö 'aa‑ ‑bha, ‑ya ‑dɩ 'flëë‑ 'gü ‑sü waa‑ ꞊niidadhe 'ö‑ ‑bha 'Nii‑ "slʋ̈ʋ̈slʋ̈ ‑ya nu mɛ ‑dhɛ bha ꞊në‑ bha.
ROM 14:18 Mɛ "ʋʋ mɛ 'ö Klisi ‑bha yë ‑kë ꞊dhɛ ‑kɔ bha‑ 'dhö, ‑a ‑mɛ "dhia ‑yö ‑ma Atanna 'gü, 'ö ꞊ya 'go mü 'zü 'ö mɛ ꞊gban 'wo‑ ‑dhiang ‑së zë.
ROM 14:19 ꞊Dhɛ 'ö "dhʋ̈, 'wɔn 'ö dho kwa zuë" 'waanu kwa 'ko "piʋ̈, waa‑ 'wɔn ‑nu 'ö mɛ ‑yö ꞊mɔɔ‑ ‑bha mɛ ‑yö mɛ 'ko ‑nu ‑zʋ ‑gban ‑zʋ ‑yö Atanna ‑dhɛ ‑sü 'gü ‑a 'ka bha ꞊në ‑ka ‑kwaa kë ‑zian mɔɔ‑.
ROM 14:20 'Kwa 'dho zë ‑bhöpë ‑wɔn ‑dhɛ 'ö 'kwa Atanna kë ‑yë 'gü ꞊see. Pë ꞊gban "pɛpɛ ‑yö ‑bhöpë 'ka "dhʋ̈ tɛan‑ 'ka, "kɛɛ pë 'dhɛ 'kö 'bha‑ ‑bhö, 'ö dho kë i dheebhang ‑da Atanna "dhiʋ̈ ‑pë 'ka ‑a ‑bhö ‑sü 'yaa ‑së.
ROM 14:21 'Pë 'ö ‑së, yö ‑mü ‑bo pë ‑nu 'ö 'bha‑ ‑bhö "ɛɛn 'ö 'bha‑ mü 'ö dho kë i dheebhang ‑da Atanna "dhiʋ̈ ‑pë 'ka bha‑ ‑nu ‑bhö ‑sü "ɛɛn‑ ‑nu mü ‑sü 'ka ‑sü ꞊në‑ 'ka.
ROM 14:22 I ‑bha 'i 'dhang bho‑ "dhiʋ̈ 'kpakpadhö 'wɔn bha‑ 'gü, ‑bhö ‑a 'kun "gbɩɩ‑. Kaa‑ i ‑bha Atanna ka ꞊zinng 'gü ‑wɔn ꞊në yö ‑zë 'ka. Mɛ "ʋʋ mɛ 'ö ꞊yaa‑ pö 'ö 'wɔn 'bha kë 'ö‑ zuë" 'yaa za dɔ‑ ‑bha kö‑ ‑mɛ ‑bha ‑së.
ROM 14:23 "Kɛɛ mɛ 'ö dɔ 'kën 'gü pë 'bha 'ö mü‑ ‑bhö ‑sü 'gü, ‑a ‑mɛ ꞊yaa‑ ‑bhö kö ꞊ya ‑da Atanna "dhiʋ̈, ‑yö ‑dho 'wɔn bho‑ 'gü, ‑a 'klɔɔ‑ ‑mü ꞊dhɛ kö 'wɔn 'ö‑ ‑kë bha, 'yii‑ kë ‑zʋ ‑yö Atanna ‑dhɛ ‑sü 'gü. 'Sa 'wɔn "pɛpɛ kö 'i‑ ‑kë 'ö i zuëga ‑yö za dɔ i ‑bha ‑a zian‑ ‑ta kö 'wɔn yaa ‑mü.
ROM 15:1 'Mɛ 'ö kwa ‑bha ‑zʋ ‑yö Atanna ‑dhɛ ‑sü 'dhö 'kpii‑ bha‑ ‑dhɛa ‑bha ꞊dhɛ 'kwa 'mɛ 'ö‑ ‑faan 'yaa‑ ‑nu 'gü 'gbɛ bha‑ ‑nu ‑ta 'kun, kö 'kwa 'dho‑ pö 'kwa ‑ya kwa ‑dɩ ‑wɔn zuën ꞊në‑ ‑ta do 'kwa dho‑ 'ka.
ROM 15:2 "Kɛɛ 'kwa ‑kɔ 'ö‑ 'gü 'do 'do, ‑ka ‑kwa 'wɔn 'ö dho kwa këyɔɔ ‑zʋ 'kun, 'ö dho kë‑ ‑bha 'wɔn ‑së 'ka ꞊në‑ kë ‑dhɛ mɔɔ‑, kë "dhʋ̈ kö ‑a faan‑ ‑yö dɔ "ta ‑sü Atanna ‑bha zian ‑ta ‑sü ‑bha.
ROM 15:3 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Klisi 'yii ö ‑dɩ ‑dhidhɛwɔn ‑zë kë. "Kɛɛ ‑ya ‑kë ꞊dhɛ ‑kɔ 'ö ‑bɛn zë ‑sü 'ka 'ka Atanna ‑wʋ 'sëëdhɛ 'gü ꞊në‑ 'dhö ꞊dhɛ: «N Dë Atanna, "si 'ö woo‑ bho i ‑gɔ, ꞊waa‑ ꞊gban bho n ‑gɔ.»
ROM 15:4 ‑Yö kë ka "yaan ꞊dhɛ pë "pɛpɛ 'ö ‑bɛn zë ‑sü 'ka Atanna ‑gɔ 'sëëdhɛ 'gü 'kwa‑ yö bha, ‑wa ‑bɛn ‑zë "dhʋ̈ yi 'bha 'ka kö ‑yö kë kwa ꞊klang kë ‑pë ꞊në‑ 'ka kö 'kwa 'wɔn kë ‑kɔ 'sü‑ ‑bha. Kë "dhʋ̈ kö kwa zuë" ‑yö kë ‑sɛa, kö ‑yö kwa faan dɔ "yan ‑to Yesu nu ‑sü ‑gɔ ‑sü ‑bha.
ROM 15:5 A ‑bhɛa Atanna ‑dhɛ kö ‑yö dɔ "gbɩɩ‑ kö yö 'ö mɛ gba zuësɛadhɛ waa‑ faan 'ka bha, ‑ya ‑kë "dhʋ̈ ‑sü "sɩ kë ka ‑dhɛ kö ka ‑kɔ ‑yö 'to 'wɔn do ‑bha, kö ka ꞊bhlëë ‑ya ka 'ko ‑bha ‑kɔ ‑yö kë do ꞊dhɛ ‑kɔ 'ö Yesu Klisi ‑ya ‑kë 'ka ‑a 'dhö.
ROM 15:6 Kë "dhʋ̈ kö mɛ ꞊gban "pɛpɛ ka zuë" ‑yö kë do, kö ka ‑wʋ ‑yö kë do Atanna 'ö kwa Dëmɛ Yesu Klisi Dë 'ka bha‑ 'tɔ bhɔ ‑sü ‑bha.
ROM 15:7 ‑A ‑kë "dhʋ̈ ‑sü bha‑ 'gü, mɛ ꞊gban ‑ka ‑kɔ ‑ya ka 'ko ‑nu ‑wɔn ‑bha ꞊dhɛ ‑kɔ 'ö Klisi ‑yö ‑kɔ ‑ya 'ka ka ‑wɔn ‑bha bha‑ 'dhö, kë "dhʋ̈ kö Atanna 'tɔ ‑yö bhɔ.
ROM 15:8 ‑A pö 'a wo "dhʋ̈ bha‑ 'klɔɔ‑ ‑mü ꞊dhɛ: A‑ ‑pö ka ‑dhɛ tɛan‑ ꞊dede 'ka ꞊dhɛ kë 'ö Klisi ‑ya wo Zuifö ‑nu ‑bha gwëë" 'ka bha, ‑ya ‑kë "dhʋ̈ kö 'pë 'ö Atanna ‑ya "plüün bho ‑a ‑nu "bhɛma ‑nu ‑dhɛ yi 'bha 'ka bha ꞊në‑ 'gü ‑wɔn ‑yö kë, kö mɛ ꞊gban ‑wa 'wɔn dɔ ꞊dhɛ Atanna ꞊ya 'wɔn 'dhɛ 'kö‑ pö kö ꞊yaa‑ pö, 'yaa 'to‑ 'gü tongtongdhö.
ROM 15:9 Nu 'ö‑ wo bha ‑ya ‑wo 'pö "dhʋ̈ kö 'mɛ 'waa Zuifö 'ka ‑wo bɔ ‑a ‑bha "klʋsëdhɛ ‑ta kö ‑wo Atanna 'tɔ bhɔ ꞊dhɛ ‑kɔ 'ö ‑bɛn zë ‑sü 'ka ‑a 'ka ‑a ‑bha 'tɔng‑ 'sëëdhɛ 'gü ‑a 'dhö ꞊dhɛ: «'Wɔn 'ö‑ ‑wɔn 'gü 'yö 'a dho i 'tɔ bhɔ "sɛ "wɛɛ ‑kpɛa 'gü, 'ö 'a "tan bho i 'tɔ ‑zü» bha 'yö bha.
ROM 15:10 'Yö go mü 'zü 'ö‑ pö: «"Sɛgɔ "wɛɛ 'gü ‑mɛ ‑nu, ‑ka ka "dhia bho 'pö 'mɛ 'ö Atanna ‑ya ‑nu sü ö ‑bha 'ka bha‑ ‑nu "piʋ̈!»
ROM 15:11 'Yö go mü 'bha wo 'zü 'ö‑ pö: «"Sɛ "pɛpɛ 'ö 'kaa Zuifö ‑sɛ 'ka, ‑ka kwa Dëmɛ 'tɔ bhɔ, "sɛ ꞊gban "pɛpɛ suu, ‑ka "wɩ kwa Dëmɛ ‑zü!»
ROM 15:12 ꞊Ya 'go yö ‑zë 'gü 'zü, Atanna ‑wʋdhiʋ̈loomɛ Ezai ‑yö dhiang ‑zë 'ö‑ pö: «Izai ‑ding dho bhɔ‑ ‑bha, ‑a ‑ding 'ö dho bhɔ bha ꞊në‑ ‑kɔ dho ziö "sɛ ‑gɔ, 'yö 'wo wo ‑zʋ gɔn‑ ‑dhɛ.»
ROM 15:13 ‑A ‑kë "dhʋ̈ ‑sü bha‑ 'gü, Atanna 'ö mɛ gba ‑zʋ ‑yö ö ‑dhɛ ‑faan 'ka bha ‑yö dɔ "gbɩɩ‑ kö ‑yö ka zuë" ‑da kö ‑yö ka zuë" ꞊nii 'waanu ‑tɛkpɛ ‑tɛkpɛdhö, 'dhang ‑bho ‑a "dhiʋ̈ ‑sü 'ö ka ‑gɔ bha‑ 'gü. kö ‑yö ka gba ‑ya ‑a ‑gɔ ‑sü bha‑ ‑faan 'kpii‑ 'ka ‑a ‑bha 'Nii‑ "slʋ̈ʋ̈slʋ̈ 'ö ka 'gü bha‑ ‑faan 'ka.
ROM 15:14 N dheebhang ‑nu, mang ꞊dede a 'dhang bho‑ "dhiʋ̈ 'kpakpadhö ꞊dhɛ "klʋsëdhɛ 'ö ka ‑gɔ ‑a ‑naa 'yaa 'dhö, ꞊dhɛ ka 'wɔn ‑dɔ 'kpakpadhö, ꞊dhɛ ka ‑mɔɔ ‑dhio dɔ ‑sü ‑bha ka 'ko ‑ta Atanna ‑wɔn "gblʋʋ "piʋ̈.
ROM 15:15 "Kɛɛ yö ‑zë ꞊gban 'gü, ‑gasitɛ 'ö Atanna ‑ya ‑kë n ‑dhɛ 'ö n ‑ya ‑sü 'ka "yi ‑dɔ Klisi ‑kɔ ‑bha ‑mɛ 'ka 'mɛ 'waa Zuifö 'ka‑ ‑nu kpö 'gü bha, 'sëëdhɛ 'a‑ bɔ ka ‑dhɛ bha, a n faan ‑da 'gü ‑dhɛ 'bha ‑nu 'gü yö ꞊në‑ ‑wɔn 'gü, kë "dhʋ̈ kö ‑yö ka ‑zʋ ‑bö 'në 'bha wo 'wɔn 'nu 'ka‑ draan‑ 'nu ‑blɛɛsü bha‑ 'ka. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑yö n ‑ya ö ‑kɔ "dhiʋ̈ "dhʋ̈ kö 'a kë Klisi ‑bha gwëëmi 'ka 'mɛ 'waa Zuifö 'ka ꞊në‑ ‑nu ‑dhɛ. N ‑ya 'ö‑ wo Klisi ‑kɔdhiʋ̈dɔmɛ 'ka "dhʋ̈ bha, ‑ya ‑kë "dhʋ̈ kö 'a dhiang ꞊në zë‑ ‑nu ‑dhɛ kö ‑wo wo wë slëë‑ Atanna "piʋ̈ kö ‑a ‑bha 'Nii‑ "slʋ̈ʋ̈slʋ̈ ‑ya ‑nu ‑ya ö ‑bha ‑ya 'gü, kö‑ ‑nu ꞊tɛni‑ kë ꞊dhɛ "saa‑ ‑pë 'wo Atanna ‑dhɔkë 'ka 'ö‑ "dhia ‑yö ma‑ 'gü ‑a 'dhö.
ROM 15:17 ‑A ‑kë "dhʋ̈ ‑sü ‑wɔn 'gü, a ‑mɔɔ ‑bha 'a n ‑tɔ kun Atanna wëëdhö Yesu Klisi 'saa‑ 'gü ‑a ‑bha yë 'a‑ kë sië bha‑ ‑wɔn 'gü.
ROM 15:18 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë ꞊dhɛ 'ma kë dhiang 'bha ‑zian zë ‑pë 'ka, kö 'pë 'a dho‑ ‑dhiang zë ‑yö dosengseng, yö ‑mü bɔ 'ö Klisi ‑ya wo n ‑ta kö ‑yö 'mɛ 'waa Zuifö 'ka‑ ‑nu kë Atanna ꞊bhlëëyamɛ 'ka, dhiang 'ö‑ dɔ n "dhi kö 'a‑ zë‑ ‑nu ‑dhɛ, "ɛɛn faan 'ö‑ ‑da n 'gü kö 'a‑ 'gü ‑wɔn ‑nu kë‑ 'ka bha ꞊në‑ 'ka.
ROM 15:19 A kë‑ ‑bha naɔ ‑së 'ö ‑gban Klisi ‑bha bha‑ ‑dɔ ‑dhɛ ꞊gban ‑dhɛ ꞊gban 'gü, 'a go‑ 'ka Zedhizadhɛmö 'a bɔ‑ 'ka "sɛ "piʋ̈ "sɛ "piʋ̈ 'a dho 'a ‑wo 'ka Idhidhi ‑sɛ 'gü, "dhabhliwɔn "gblʋ̈gblʋ̈ ‑nu waa‑ ‑kian ‑wɔn ‑nu 'ö‑ ‑kë n ‑kɔ ‑ta ‑a ‑bha 'Nii‑ "slʋ̈ʋ̈slʋ̈ faan 'ka bha ꞊në‑ ‑bha.
ROM 15:20 "Kɛɛ ‑a kë 'a‑ wo "dhʋ̈ bha, naɔ bha a‑ ‑dɔ ‑dhɛ ‑nu 'ö 'wii Klisi ‑dhiang ‑blɛɛsü zë‑ 'gü do ꞊në‑ 'gü. Kë "dhʋ̈ kö 'ma 'dho 'kɔ dɔ mɛ ‑nu ‑bha 'kɔ "kpan 'ö ꞊waa‑ ‑ya 'nu bha‑ ‑ta.
ROM 15:21 "Kɛɛ kö pë 'ö Atanna ‑wʋ ‑ya pö, ö ‑bɛn zë ‑sü 'ka‑ ‑gɔ 'sëëdhɛ 'gü ꞊dhɛ: «Mɛ 'wii‑ ‑wɔn ‑dhiang zë‑ ‑nu ‑dhɛ do, ‑wo ‑dho ‑a këwɔn ‑nu yö, 'ö mɛ 'wii‑ ‑dhiang ma do, 'wo‑ 'gü ma» bha‑ ꞊në‑ 'gü ‑wɔn ‑yö kë.
ROM 15:22 'Wɔn 'ö n ꞊fië ‑wo ka ‑bha ‑sü ‑bha ‑gɛn ‑yan 'gbɛ 'ka bha 'yö bha.
ROM 15:23 "Kɛɛ 'ma n bo ꞊tɔn yë 'ö Atanna ‑ya dɔ n ‑kɔ 'ka "dhʋ̈ bha‑ 'ka "pɛan 'dhɛ 'ö ya‑ "piʋ̈, 'a zun‑ ‑ya ‑sü ‑bha n ‑zʋ "piʋ̈ ꞊dhɛ 'a nu ‑wo ka ‑bha, ꞊ya ꞊mɔɔ ‑kwɛ kpö ꞊dede ‑bha.
ROM 15:24 ‑Yö n "piʋ̈ ꞊dhɛ 'a 'dho sië Ɛsipangyö ‑sɛ 'gü "tʋ̈ng 'ö‑ 'gü 'a bɔ ka ‑dhɛ 'gü. ‑A ‑gɛn ‑mü ꞊dhɛ ‑yö n 'gü ꞊dhɛ n 'dho ‑sü 'ka a ‑dho ‑kpan ka ‑bha, 'ö 'ka n ‑ta kun kë "dhʋ̈ kö n ‑kɔ ‑yö ꞊mɔɔ ma "ta bha‑ 'sü ‑sü ‑bha. "Kɛɛ "sanni ‑yö kë "dhʋ̈ kö "tʋ̈ng 'në 'dhɛ 'ö‑ ‑kë ka "piʋ̈ ‑dhɔ ‑yö gun n ‑bha bha 'ma‑ kë.
ROM 15:25 "Kɛɛ dɔ 'kwa‑ wo ya a ‑tun ꞊kö 'dho 'pë 'wo‑ ꞊gbaɔ Yesu ‑bha mɛ ‑nu 'wo Zedhizadhɛmö ‑a ‑nu ‑gɔ ‑a dɔ ‑dhɛ 'gü.
ROM 15:26 ‑A ‑gɛn ‑mü ꞊dhɛ Yesu ‑bha mɛ ‑nu 'wo Maseduanö ‑sɛ waa‑ Glɛkö ‑sɛ 'gü ꞊wa ‑gasitɛ kë ꞊wa 'wëë‑ bho 'ko ‑ta kwa dheebhang ‑nu 'wo "flɛɛmɛ ‑nu 'ka Zedhizadhɛmö bha‑ ‑nu ‑dhɛ.
ROM 15:27 Mɛ 'wo gbaɔ bha‑ wo "dhʋ̈ bha ‑wa ‑bho wo ‑dɩ 'gü, "kɛɛ ‑a ‑kë "dhʋ̈ ‑dhɛ ‑zë ‑mü ‑a ‑nu ‑gɔ, ‑a ‑gɛn ‑mü ꞊dhɛ Zuifö ‑nu 'wo Yesu ‑bha 'ka Zedhizadhɛmö waa‑ 'mɛ 'waa Zuifö 'ka 'wo 'dhuë‑ 'ö go Atanna "piʋ̈ ‑a 'gü ‑gblü 'ko ‑ta ‑kɔ do 'ö‑ 'gü bha, ‑a ‑dhɛa ‑bha ꞊dhɛ woo ‑dɩ 'pö ‑wo "kpʋngtaapë ‑nu 'gü ‑gblü ‑a ‑nu 'ka ‑kɔ do bha‑ 'gü.
ROM 15:28 ꞊Ya kë ꞊dhɛ 'ma bo 'dho ‑sü 'ka kö 'pë 'wo‑ bho ko ‑ta bha, 'a‑ dɔ 'mɛ 'wo ‑mü ‑a ‑nu ‑gɔ, kö maa 'dho Ɛsipangyö ‑sɛ 'gü, "kɛɛ n 'dho ‑sü 'ka, a ‑dho bɔ ka "piʋ̈ mü.
ROM 15:29 'Yö 'a 'dhang bho 'pö‑ "dhiʋ̈ 'kpakpadhö ꞊dhɛ n ‑nu 'ka ‑dhɛ 'gü ‑sü 'ka, Yesu ‑bha 'dhuë‑ ‑dho kë n ‑kɔ pa ‑sü 'ka 'a nu‑ 'ka ka ‑dhɛ.
ROM 15:30 "Kɛɛ n dheebhang ‑nu, 'pë 'a‑ ‑dhɛ ka ‑gɔ kö 'ka‑ kë yö ‑mü ꞊dhɛ kö 'ka zë kwa Dëmɛ Yesu Klisi ‑wɔn ‑dhɛ, kö 'ka zë ‑dhɔ 'ö Atanna ‑bha 'Nii‑ "slʋ̈ʋ̈slʋ̈ ‑ya ‑da kwa 'gü bha‑ ‑dhɛ, kö 'ka Atanna ‑wɔn ‑ta ‑ko zë n "piʋ̈ ‑bhɛa ‑dhɛ ‑sü 'ka n ‑wɔn 'gü, bhɛa" ꞊në‑ 'ka 'yö 'a‑ wo ka ‑dhɛ.
ROM 15:31 Ka ‑bhɛa Atanna ‑dhɛ n ‑wɔn 'gü ‑gɛn ‑mü ꞊dhɛ kö 'dho 'a‑ wo sië Zedhizadhɛmö bha 'a dha mɛ 'waa 'dhang bho Yesu ‑wɔn "dhiʋ̈ 'wo Zude ‑sɛ 'gü bha‑ ‑nu ‑gɔ, kö 'pë 'wo‑ bho 'ko ‑ta 'pö 'ö 'a dho sië‑ 'ka Zedhizadhɛmö Yesu ‑bha mɛ ‑nu 'wo mü ‑a ‑nu ‑ta 'kun ‑pë 'ka bha‑ 'gü ‑wɔn ‑yö dhi‑ ‑nu ‑dhɛ.
ROM 15:32 Yö ꞊në ꞊ya kë "dhʋ̈, 'yö Atanna ꞊ya "wɩ‑ ‑bha, 'yö 'a dho ꞊loo ka ‑dhɛ 'gü zuë" ꞊nii ‑da 'ka, 'yö 'a n "tɛɛ 'në 'bha pa mü.
ROM 15:33 Kö Atanna 'ö mɛ ꞊gban "pɛpɛ gba zuëwaanusü 'ka bha, ‑yö 'to ka "piʋ̈ bha 'aa ‑yö kë.
ROM 16:1 ꞊Ya 'go‑ 'dhɛ bha‑ 'gü, kwa dheebhang ‑dhebhɔ 'wo Febe ‑kë, 'ö yë ‑kë Atanna ‑bha 'kɔdhigümɛ ‑nu 'wo Sangkle ‑pö 'gü ‑a ‑nu kpö 'gü bha, 'ma‑ "kplëng bho ka ‑bha kö 'ka dɔ "gbɩɩ‑,
ROM 16:2 'ka‑ ‑dhɛng ‑wɔn 'kun ꞊dhɛ ‑kɔ 'wo kwa Dëmɛ ‑bha 'kɔɔmɛ ‑nu ‑dhɛng kun‑ 'ka ‑a 'dhö. ‑A 'klɔɔ‑ ‑mü ꞊dhɛ ‑a ‑kë "dhʋ̈ ‑sü bha ꞊në‑ ‑dɔ ‑yö ‑dhi Atanna ‑bha mɛ ‑nu 'ka. 'Wɔn "ʋʋ 'wɔn 'ö‑ ‑bha ‑wɔn dho zun ka ‑bha ‑a 'gü, ‑kaa kë‑ ‑dhɛ, ‑a 'klɔɔ‑ ‑mü ꞊dhɛ yöö ‑dɩ 'pö ‑yö mɛ kpö ꞊dede ‑ta 'kun ‑sü 'ka, 'ö mang ꞊dede ‑zian 'a "wɩ sië ka ‑dhɛ ya n ‑ta 'kun ‑sü 'ka 'pö.
ROM 16:3 ‑Ka Plisidhö waa‑ Akidhasö 'wo ‑kë n yëkëyɔɔ 'ka kwa Dëmɛ Yesu Klisi ‑bha zian ‑ta bha‑ ‑nu ꞊tua bho n ‑dhɛ.
ROM 16:4 ‑Wo kë wo ‑dɩ "dhiʋ̈ ‑dɔ pë ‑dhɛ ma ‑zë n ‑wɔn 'gü, kë "dhʋ̈ kö 'a dha. ‑Kaa ‑nu nuɛ" bho n ‑dhɛ 'gbɛ, mang do ‑zian 'maa‑ ‑nu nuɛ" bho sië 'wɔn 'wo‑ ‑kë bha‑ 'gü. Atanna ‑bha 'kɔdhigümɛ ‑nu "pɛpɛ 'ö 'waa Zuifö 'ka ꞊në yɛng‑ ‑nu ꞊gban 'yi‑ ‑nu nuɛ" bho sië bha.
ROM 16:5 ‑Ka Atanna ‑bha 'kɔdhigümɛ ‑nu 'wo ꞊loo 'ko ‑ta ‑a ‑nu ‑gɔ 'kɔɔdhö bha, ‑a ‑nu ꞊tua bho n ‑dhɛ 'pö. ‑Ka Epainɛtö ꞊tua bho n ‑dhɛ 'pö, ‑a ‑wɔn ‑yö n ‑gɔ "gbɩɩ‑, ‑a ‑gɛn ‑mü ꞊dhɛ yö ꞊në 'mɛ 'wo 'dhang bho Klisi ‑wɔn "dhiʋ̈ Azi ‑sɛ 'gü ‑a mɛ ‑blɛɛsü 'ka.
ROM 16:6 Dhebhɔ 'ö saan" ‑sü 'ka ka ‑dhɛ 'pö 'wo‑ Madhi ‑kë bha, 'ma‑ ꞊tua bho.
ROM 16:7 'Ma Andronikusö waa‑ Zunia 'ö yɛng 'yi ‑gban 'kwëë‑, 'ö 'yi ‑kaso ‑kë 'zü yi "kwëë bha‑ ‑nu ꞊tua bho 'gbɛ. ‑A ‑nu ‑duɛ ‑yö 'kpii‑ ꞊dedewo Yesu ‑bha bɔmɛ ‑nu kpö 'gü, 'ö ‑ya mü 'zü woo ‑zian ‑wo kë 'dhang ‑bho Yesu ‑wɔn "dhiʋ̈ n "dhiʋ̈.
ROM 16:8 ‑Ka n "taɔngdë 'ö kwa Dëmɛ ‑bha zian ‑ta, 'wo‑ ‑dhɛ Angpliatusö bha‑ ꞊tua bho n ‑dhɛ.
ROM 16:9 'Ma Udhibɛn 'ö ‑kë n yëkëyɔɔ 'ka Klisi ‑bha zian ‑ta bha waa‑ n "taɔngdë Sitasisö ‑a ‑nu ꞊tua bho.
ROM 16:10 'Ma Apedhɛsö 'ö mɛ ꞊gban ‑mɛ ꞊gban ‑wa dɔ ‑zʋ ‑gban ‑mɛ 'ka Klisi ‑bha zian ‑ta bha‑ ꞊tua bho. 'Ma 'mɛ 'wo Adhitobudhö ‑gɔ 'kɔɔdhö ‑a ‑nu ꞊tua bho 'gbɛ.
ROM 16:11 'Ma Edhodiɔn 'ö 'yi ‑gban 'pö 'kwëë‑ bha‑ ꞊tua bho. 'Ma 'mɛ 'wo 'dhang bho kwa Dëmɛ "dhiʋ̈ 'ö 'wo Naasisö ‑gɔ 'kɔɔdhö bha‑ ‑nu ꞊tua bho.
ROM 16:12 'Ma Tidhifɛnö waa‑ Tidhifɔzö 'ö‑ ‑nu ‑wëëdhɛ ꞊ya bho kwa Dëmɛ ‑bha yë ‑wɔn 'gü bha‑ ‑nu ꞊tua bho. 'Ma dhebhɔnë 'wo‑ Pɛsidö ‑kë bha‑ ꞊tua bho 'gbɛ, ‑a ‑wɔn ‑yö n ‑gɔ "gbɩɩ‑, ‑a 'klɔɔ‑ ‑mü ꞊dhɛ ‑a ‑wëëdhɛ ‑yö bho ‑sü 'ka kwa Dëmɛ ‑bha yë ‑bha ꞊dedewo.
ROM 16:13 ‑Ka Dhufusö 'ö kwa Dëmɛ ‑ya ‑ya bha waa‑ dhe 'ö ꞊dhɛ n dhe 'dhö 'pö bha‑ ‑nu ꞊tua bho n ‑dhɛ.
ROM 16:14 ‑Ka Asɛngklitö oo, Fedhegɔn oo, Ɛdhomɛsö oo, Patrobasö oo, Ɛdhömasö waa‑ kwa dheebhang 'dhɛ ‑nu 'ö wɛng‑ ‑nu 'wo 'ko "piʋ̈ bha‑ ‑nu ꞊tua bho n ‑dhɛ.
ROM 16:15 'Ma Fidhodhɔgö waa‑ Zudhi ‑a ‑nu ꞊tua bho. 'Ma Nedhe waa‑ ö dheebhang dhebhɔ bha‑ ‑nu ꞊tua bho. 'Ma Odɛnpasö waa‑ Atanna ‑bha mɛ ‑nu "pɛpɛ 'ö wɛng‑ ‑nu 'wo wo 'ko "piʋ̈, ‑a ‑nu ꞊gban ꞊tua bho 'gbɛ.
ROM 16:16 ‑Ka ka 'ko ‑nu ꞊tua bho kö 'ka ꞊loo ka 'kwëë‑ ꞊dhɛ ‑kɔ 'ö dheebhang ‑zë ‑nu ‑wa ‑kë 'ka ‑a 'dhö. Klisi ‑bha mɛ ‑nu ꞊gban "pɛpɛ ꞊wa ka ꞊tua bho 'gbɛ.
ROM 16:17 N dheebhang ‑nu, bhɛa" ꞊në 'a‑ wo sië ka ‑dhɛ kö 'ka dɔ "gbɩɩ‑ kö 'ka ka ‑dɩ 'kun mɛ 'wo‑ kë sië "dhʋ̈ kö Atanna ‑bha mɛ ‑nu ‑wo "kan 'kwëë‑ bha‑ ‑nu ‑gɔ. ‑A 'klɔɔ‑ ‑mü ꞊dhɛ Atanna ‑wʋ 'dhɛ 'ka‑ ma ‑blɛɛsü ‑a ‑ma 'wo‑ wo sië "gbɔng 'ka 'ö 'wo ‑wʋ "wɛɛ pö ka ‑dhɛ bha, ka ‑pö ꞊në 'wo‑ wo sië bha. ‑A ‑kë "dhʋ̈ ‑sü bha‑ 'gü, ‑ka ka ‑dɩ 'kun‑ ‑nu ‑gɔ ‑së kö 'ka "kan‑ ‑nu ‑bha.
ROM 16:18 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ suu ‑nu 'wo "dhʋ̈ bha 'waa kwa Dëmɛ Klisi bha yö ‑zë ‑dhɔkë, ‑wo wo ‑dɩ dhɔɔbhaawɔn ꞊në‑ ‑kë. 'Yö 'mɛ ‑a ‑nu ‑zʋ 'yaa 'wɔn 'bha "piʋ̈ bha 'wo ‑wʋ ‑së ‑dhɛ "yi bho ‑wʋ "nɛɛnɛɛ ‑nu ‑pö ‑nu ‑dhɛ ‑sü 'ka 'yö 'wo‑ ‑nu ‑gɔ 'gü ꞊see‑ 'ka, 'yö 'wo‑ ‑nu wë bho Atanna ‑ta.
ROM 16:19 "Kɛɛ ka ‑zë ka ‑bha Atanna ꞊bhlëë ‑ya ‑sü bha mɛ ꞊gban "pɛpɛ ‑wa 'wɔn ‑dɔ. N zuë" ꞊nii ‑yö ‑da ꞊dedewo ka ‑wɔn 'gü ‑a ‑kë "dhʋ̈ ‑sü bha‑ 'gü, "kɛɛ yö ‑zë ꞊gban 'gü, ‑yö n "piʋ̈ ꞊dhɛ ka "yaaki ‑yö 'to 'daɔnnu ‑sü 'ka 'wɔn ‑së ‑dɩ ‑slɔɔ ꞊në‑ kë ‑sü ‑bha, kö 'wɔn yaa ‑zë kë ‑zʋgɔndhe ‑zian ꞊në 'ya 'dho ‑da ka ‑zʋ "piʋ̈ tongtongdhö.
ROM 16:20 ‑A ‑naa ‑yö n "yaan ꞊dhɛ Atanna do 'ö ‑gblü "kan Atanna 'ka bha ꞊në dho Sɔtraan 'pɔn ka ‑dhɛ 'yö 'ka "ta sü ‑a ꞊kpë "dhiʋ̈. ꞊Ya 'go yö ‑zë 'gü, kö kwa Dëmɛ Yesu ‑yö ö ‑bha ‑gasitɛ bha‑ kë ka ‑dhɛ ‑kpɛawo bha 'aa ‑yö kë!
ROM 16:21 Timote 'ö n ‑ta 'kun sië Atanna ‑bha yë ‑bha bha, ꞊ya ka ꞊tua bho 'gbɛ. Dhusiusö oo, Zazɔn waa‑ Sosipatɛɛ 'ö yɛng‑ ‑nu 'yi ‑gban 'kwëë‑ bha, ꞊wa ka ꞊tua bho 'gbɛ.
ROM 16:22 Mang Tɛɛtiusö ‑mɛ 'a 'sëëdhɛ ya‑ ‑bɛn zë 'ö 'a kwa Dëmɛ ‑bha zian ‑ta 'pö ꞊dhɛ ka 'dhö bha, 'ma ka ꞊tua bho 'gbɛ.
ROM 16:23 ꞊Ya 'go mü, mang Pɔdhö ‑mɛ n ‑dhɛngbhɔɔdë 'wo‑ ‑dhɛ Gayusö, 'ö Atanna ‑bha 'kɔdhigümɛ ‑nu 'wo ‑dhɛ ya‑ 'gü ‑a ‑nu ꞊gban 'wo bho 'ko ‑ta ‑a ‑gɔ 'kɔɔdhö 'pö bha, ꞊ya ka ꞊tua bho. Edhatö 'ö kë 'pö‑ ya‑ 'gü ‑mɛ ‑nu ‑bha 'wëëkɔdhiʋ̈ 'ka bha waa‑ kwa dheebhang Kaatusö, ꞊wa ka ꞊tua bho.
ROM 16:24 [Kö kwa Dëmɛ Yesu Klisi ‑bha ‑gasitɛ bha ‑ya kë ka ‑dhɛ "tʋ̈ng ꞊gban "pɛpɛ 'gü bha 'aa ‑yö kë.]
ROM 16:25 ‑Ka ‑kwa Atanna 'tɔ bhɔ, ‑a 'klɔɔ‑ ‑mü ꞊dhɛ yö ꞊në‑ "sɩ 'dhö‑ ‑dhɛ kö ‑yö ka kë "kplëë 'ka 'dhang ‑bho Yesu "dhiʋ̈ ‑sü 'gü. 'Wɔn 'ö ‑gban Yesu Klisi ‑wɔn ‑bha 'ö gun ‑bin ‑sü 'ka, 'ö Atanna yöö do ꞊në gun‑ dɔ sië, 'ö ‑bhɔ ‑a ‑bin ‑sü 'ka kwa ‑gɔ yi 'bha 'ka bha ꞊në 'a‑ ‑dhiang zë sië.
ROM 16:26 "kɛɛ ꞊ya "dhɛ bho‑ ‑ta kwa ‑dhɛ "tʋ̈ng ya‑ 'gü ‑a ‑wʋdhiʋ̈loomɛ ‑nu ‑gɔ 'sëëdhɛ 'gü ꞊dhɛ ‑kɔ 'ö gun‑ 'ka yöö 'ö‑ bhɔ ‑yi 'yaa 'dhö, 'ö‑ ga ‑yi 'yaa 'dhö bha‑ ‑zʋ "piʋ̈ bha‑ 'dhö. ꞊Yaa‑ ‑zɔn "sɛ ꞊gban "pɛpɛ 'gü ‑mɛ ‑nu ‑dhɛ, kë "dhʋ̈ kö ‑wo 'dhang bho ö "dhiʋ̈ kö ‑wo ö ꞊bhlëë ‑ya.
ROM 16:27 Kö Atanna 'ö yöö do ꞊në 'wɔndɔdhe 'dhö‑ ‑gɔ bha yö ꞊në‑ 'tɔ ‑yö bhɔ Yesu Klisi 'saa‑ 'gü ‑kpɛawo bha 'aa‑ ‑yö kë.
1CO 1:1 Mang Pɔdhö ‑mɛ 'ö ga Atanna ꞊në‑ 'gü 'yö n ‑ya Yesu Klisi ‑bha bɔmɛ 'ka bha, yaa‑ Sɔsitɛnö 'ö kwa dheebhang 'ka kwa ‑kë Atanna ‑bha 'në 'ka ‑sü "gblʋʋ "piʋ̈ bha, yi ꞊në 'yi 'sëëdhɛ ya‑ bɔ ka ‑dhɛ.
1CO 1:2 Yi 'sëëdhɛ ya‑ ‑bɔ Atanna ‑bha 'kɔdhigümɛ ‑nu 'ö 'ka ‑ya ‑sü 'ka‑ ‑bha ‑ya 'gü Kodhɛngtö ‑pö 'gü, 'ö ꞊ya ka kë "slʋ̈ʋ̈slʋ̈ ö "yan 'gü kwa Dëmɛ Yesu Klisi 'saa‑ 'gü bha, waa‑ mɛ "pɛpɛ 'wo zun wo kpiö 'gü Yesu Klisi 'ö kwɛng‑ ‑nu ꞊gban kwa Dëmɛ 'ka bha‑ ‑dhɛ ‑dhɛ "wɛɛ "pɛpɛ ꞊gban 'gü bha ꞊në ka ‑dhɛ.
1CO 1:3 Yi ‑bhɛa kwa dë Atanna ‑dhɛ kö waa‑ kwa Dëmɛ Yesu Klisi 'ö 'dhö, ‑wo ‑gasitɛ kë ka ‑dhɛ, kö ‑wo ka gba zuëyagblʋ̈ʋ̈‑ 'ka.
1CO 1:4 A ma Atanna bha‑ nuɛ" ‑bho ‑kpɛawo ‑gasitɛ 'ö bɔ‑ 'ka Yesu Klisi ‑ta 'ö‑ ‑kë ka ‑dhɛ bha‑ ‑wɔn 'gü.
1CO 1:5 'Sa bɔ 'ka‑ wo Yesu Klisi 'ka "dhʋ̈ bha ꞊në‑ ‑wɔn 'gü 'yö Atanna 'dhö ka ‑kɔ pa ‑sü 'ka gbaɔdhe ꞊gban "pɛpɛ suu 'do 'do 'ka, "kɛɛ 'yö ka gba ‑sü 'ka ‑dɔ "wɩ ‑dhɛ 'ka ‑sü waa‑ 'wɔn dɔ ‑sü 'ka ö ‑bha zian ‑ta ‑kɔ ꞊gban ‑kɔ ꞊gban 'gü bha.
1CO 1:6 Yë 'ö Klisi ‑bha naɔdɔmɛ ‑nu 'yi‑ ‑kë ka ꞊plöö mü bha, yun 'ö‑ ziö ‑sü 'ka ka kpö 'gü troo 'yaa‑ ‑bha.
1CO 1:7 'Wɔn 'ö‑ ‑wɔn 'gü 'yö mɛ "pɛpɛ 'ö 'ka "yan 'to sië kwa Dëmɛ Yesu Klisi ‑gɔ bha, 'ö Atanna ‑bha gbaɔdhe 'ö‑ ‑kë ö ‑bha 'në ‑nu ‑gɔ bha‑ 'bha ‑bo 'yaa ka zë ‑sü 'ka bha 'yö bha.
1CO 1:8 Yö 'ö "dhʋ̈ bha ꞊në dho ka ‑kwɛɛ bun, 'yö ka ‑gɛn ‑yö to ‑gban ‑sü 'ka‑ ‑bha zian bha‑ ‑ta 'ö dho‑ 'ka "dhʋ̈ 'ö zun‑ 'ka‑ "dhiʋ̈todhɛ ‑bha, kë "dhʋ̈ kö pö 'a 'dho ‑ya ka ‑bha tongtongdhö kwa Dëmɛ Yesu Klisi nu ‑yi 'ka.
1CO 1:9 Atanna ꞊ya ‑wʋ 'dhɛ 'kö‑ pö kö ꞊yaa‑ pö, 'yaa 'go "gblʋʋ 'zü tongtongdhö. 'Sa yö 'ö "dhʋ̈ bha ꞊në ka ‑dhɛ kö kaa‑ ö Gbö Yesu Klisi 'ö kwa Dëmɛ 'ka bha kɛng‑ ‑nu 'ka ‑tosɛa kë ka "kwëë, kö ka ‑kɔ 'ya 'dho 'go 'ko ꞊kwɛng.
1CO 1:10 N dheebhang ‑nu, ‑yö bhɛa" ꞊në‑ 'ka 'yö 'a‑ wo sië ka ‑dhɛ kwa Dëmɛ Yesu Klisi 'tɔ 'gü, kö 'ka dɔ "gbɩɩ‑ kö ka ‑wʋ ‑yö kë do, kö 'gügblüdhe 'ya 'dho ‑da ka ꞊zinng 'gü 'ö 'ka ‑kan 'kwëë‑. Bhɛa" ꞊në 'a‑ wo ka ‑dhɛ kö 'ka kë ꞊dhɛ mɛ do 'dhö, kö ka zuëpiʋ̈wɔn ‑yö kë do, kö ka ‑kɔ ‑yö kë 'wɔn do ‑bha.
1CO 1:11 ‑A pö 'a‑ wo "dhʋ̈ bha n dheebhang ‑nu, ‑a 'klɔɔ‑ ‑mü ꞊dhɛ mɛ ꞊ya 'go Kloe ‑gɔ 'kɔɔdhö ꞊ya nu ꞊yaa‑ pö n ‑dhɛ ꞊dhɛ "dhinaa ‑yö ka ꞊zinng 'gü.
1CO 1:12 A‑ ‑ma ꞊dhɛ ka ‑wʋ 'yaa do. Mɛ 'bha ‑nu 'wo‑ pö sië: «Ma ‑zë a ‑bɔ Pɔdhö 'ka», kö mɛ 'bha ‑nu ‑wa pö sië: «Ma ‑zë a ‑bɔ Apodhɔsö ꞊në‑ 'ka», kö mɛ 'bha ‑nu ‑wa pö sië: «Ma ‑zë a ‑bɔ Piɛdhö 'ka,» kö mɛ 'bha ‑nu ‑wa pö sië: «Ma ‑zë a ‑bɔ Klisi ꞊në‑ 'ka».
1CO 1:13 ‑Yö ka 'gü ꞊dhɛ Klisi bha ‑yö "pɛ ‑sü 'ka ö 'gü 'gbɛ 'ka "dhʋ̈ ‑ee? "Ɛɛn Pɔdhö ꞊në ga "dhü ‑bha ka ‑wɔn 'gü ‑ee? "Ɛɛn ‑wo kë ka ‑bɔ ma ꞊në n 'ka ‑zu bho ‑ee?
1CO 1:14 Mang ‑zian a Atanna nuɛ" ‑bho 'mii mɛ 'bha ka ‑bɔ Yesu 'ka ‑zu bho 'ö‑ wo kö 'yii kë Klipusö waa‑ Gayusö ‑nu 'ka bha‑ ‑wɔn 'gü.
1CO 1:15 ‑A ‑kë "dhʋ̈ ‑sü bha‑ 'gü, mɛ 'bha 'yii 'dho ꞊mɔɔ‑ ‑bha kö ‑ya pö ka kpö 'gü ꞊dhɛ ‑wo kë ka ‑bɔ ma ꞊në n 'ka ‑zu bho.
1CO 1:16 ‑Ɛɛ a kë Tefana ‑gɔ 'kɔɔmɛ ‑nu ‑zu 'pö "dhʋ̈ tɛan‑ 'ka, "kɛɛ ꞊ya 'go yö ‑zë 'gü, mɛ "wɛɛ 'bha 'kö maa‑ ‑bha wo kö n ‑zʋ ‑yö ‑bö 'ka 'yaa 'dhö.
1CO 1:17 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ n bɔ 'ö Klisi ‑ya wo bha 'yii n bɔ kö 'a mɛ "zu ‑zë bho. ‑Yö n ‑bɔ kö 'a 'wɔn ‑taɔng ‑së 'ö go Atanna "piʋ̈ bha ꞊në‑ pö, "kɛɛ kö 'ma‑ pö, kö 'ma 'dho‑ pö 'wɔndɔdhe 'ö "kpʋng ꞊taa yö bha‑ ‑bha, ('ö mɛ ꞊gban "yan ‑yö bɔ ma ꞊në n ‑ta) 'ö faan bho Klisi ‑bha ga 'ö‑ wo "dhü ‑bha bha‑ ‑bha 'ö ‑kë "wlaawɔn 'ka.
1CO 1:18 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Klisi ‑bha ‑ga "dhü ‑bha ‑sü ‑dhiang 'yi‑ zë sië bha, ‑yö slaadhɛ ‑wɔn ꞊në‑ 'ka 'mɛ wo 'gü see‑ ‑zian ‑ta bha‑ ‑nu 'gü. "Kɛɛ 'mɛ 'kö kwa ‑zë 'kwa dha ‑zian ‑ta bha ‑yö Atanna ‑bha 'gügbɩɩdhɛ ꞊në‑ 'ka kwa 'gü.
1CO 1:19 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑yö ‑bɛn zë ‑sü 'ka Atanna ‑wʋ 'sëëdhɛ 'gü (Yesu ‑bha ‑ga "dhü ‑bha ‑sü bha ꞊në‑ ‑wɔn 'gü) ꞊dhɛ: «'Mɛ 'wo "yaakimɛ ‑nu 'ka a ‑dho ‑a ‑nu "yaaki 'gü see‑ 'ö 'maa 'mɛ 'wo 'wɔndɔmɛ ‑nu 'ka ‑a ‑nu ‑bha 'wɔn dɔ ‑sü ‑ya 'klɔɔ‑ "dhiʋ̈.»
1CO 1:20 ꞊Ya kë "dhʋ̈ bha ‑oo, ‑më ‑wʋ ꞊në dho ꞊slɔɔ "yaakimɛ ‑mü ‑ee, "ɛɛn 'wɔndɔmɛ ‑mü ‑ee, "ɛɛn zaɔdhedamɛ 'ö ꞊dɛɛ ‑a ‑gɔ kö ‑ya pö, kö Atanna ꞊ya bo‑ ‑zɔn ‑sü 'ka ꞊dhɛ 'wɔndɔdhe 'ö "kpʋng ꞊taa yö bha ‑yö slaadhɛ ꞊në‑ 'ka?
1CO 1:21 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑a "sɩ 'yii kë mɛ 'bha ‑dhɛ "kpʋng ꞊taa kö ‑yö Atanna dɔ ö ‑dɩ ‑bha "yaaki ‑bha, ‑dhɛ 'ö ö ‑dɩ ‑zɔn 'ka ö ‑bha "yaaki ‑bha bha‑ 'gü. 'Wɔn 'ö‑ ‑wɔn 'gü 'yö naɔ 'ö bhɔ mɛ ‑nu 'gü slaadhɛ ‑naɔ ‑bha 'yi‑ dɔ sië bha ꞊në Atanna ‑yö bɔ‑ ‑ta 'yö 'mɛ 'wo 'dhang bho‑ "dhiʋ̈ ‑a ‑nu dha bha 'yö bha.
1CO 1:22 Zuifö ‑nu ꞊wa dɔ ‑wa ‑pö 'yi ‑kian ‑wɔn ‑nu ꞊në‑ kë kö 'wo gun ‑na 'dhang bho Klisi ‑wɔn "dhiʋ̈. 'Mɛ 'waa Zuifö 'ka ꞊wa dɔ ‑wa ‑pö ꞊dhɛ ꞊dhɛ 'ö ‑kë ꞊dhɛ ‑wo ‑kë 'wɔndɔmɛ "gblʋ̈gblʋ̈ ‑nu 'ka bha, 'wɔndɔdhe ꞊në‑ ‑bha ‑yö to‑ ‑bha.
1CO 1:23 "Kɛɛ yi ‑zë yi ‑bha 'ka, Klisi 'ö ga "dhü ‑bha bha ꞊në 'yi‑ dhiang zë. 'Sa ‑a ‑dhiang 'yi‑ zë "dhʋ̈ bha ꞊në Zuifö ‑nu ‑siödhɛwɔn 'ka, 'yö 'mɛ 'waa Zuifö 'ka 'wo‑ ‑dhɛ 'pö slaadhɛ ‑dhiang.
1CO 1:24 "Kɛɛ mɛ "pɛpɛ 'kö Atanna ‑ya ‑nu ‑dhɛ, ‑yö ‑kë Zuifö 'ka "ɛɛn 'yii kë Zuifö 'ka, Klisi bha ꞊në Atanna ‑bha 'gügbɩɩdhɛ waa‑ "yaaki ꞊gban 'ka wo ‑zë ‑a ‑nu ‑bha 'ka.
1CO 1:25 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔn 'ö Atanna ‑ya kë "dhʋ̈ 'ö bhɔ mɛ "bhɩɩ‑ ‑nu ‑zë 'gü slaa" ‑bha bha‑ "dhiʋ̈‑ ‑ziö mɛ "bhɩɩ‑ ‑nu ‑bha "yaaki ‑zë ‑ta pongpongdhö. 'Kö 'zü ‑a kë 'ö Atanna ‑ya wo "dhʋ̈ bha ꞊ya kë wo ‑zë ‑a ‑nu 'gü ꞊dhɛ 'pë 'ö "sɩ ꞊në 'yaa‑ ‑dhɛ ‑a 'dhö, "kɛɛ ‑a "dhiʋ̈‑ ‑ziö ‑a ‑nu ‑bha 'gügbɩɩdhɛ ꞊gban ‑ta pongpongdhö.
1CO 1:26 N dheebhang ‑nu, mɛ 'ö Atanna ‑ya ‑nu ‑dhɛ 'ö ka kpö 'dhö do bha ‑kaa ‑nu 'suan‑ bho ‑së 'ka. 'Mɛ 'wo 'wɔndɔmɛ ꞊dede 'ka 'waa 'gbɛ, ‑gblüdë ‑nu "ɛɛn mɛ ‑tiandhö ‑nu ‑zian 'waa 'gbɛ ka kpö 'gü.
1CO 1:27 "Kɛɛ kë 'ö‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'ö "kpʋngtaamɛ ‑nu ‑wa ‑nu ‑ga slaamɛ ‑nu 'ka bha, ꞊në Atanna ‑ya sü 'yö 'yiʋ̈‑ dɔ‑ 'ka 'mɛ wo ‑zë 'wo‑ ‑nu ‑dhɛ "yaakimɛ ‑nu bha‑ ‑nu ‑bha. 'Yö 'mɛ 'ö "sɩ 'yaa‑ ‑nu ‑dhɛ "kpʋngtaamɛ ‑nu "yan 'gü bha ꞊në Atanna ‑ya ‑nu sü 'yö 'yiʋ̈‑ dɔ‑ 'ka 'mɛ 'ö "sɩ 'dhö‑ ‑nu ‑dhɛ wo ‑zë ‑a ‑nu 'gü bha‑ ‑nu ‑bha.
1CO 1:28 Mɛ 'ö "kpʋngtaamɛ ‑nu ‑wa ‑nu ‑ga "wlaamɛ ‑nu 'ka 'ö 'waa‑ ‑yaki ‑ya bha ꞊në Atanna ‑ya ‑nu sü 'yö ꞊bhlëë bho‑ 'ka mɛ 'dhɛ wo ‑zë 'wo‑ yö ꞊bhlëëmɛ 'ka bha‑ ‑nu bha.
1CO 1:29 ‑A ‑kë "dhʋ̈ ‑sü bha‑ 'gü, mɛ 'bha 'yaa 'dhö kö ‑ya pö yö ‑zë ö ‑dho ö 'tɔ 'kun Atanna wëëdhö.
1CO 1:30 "Kɛɛ ka ‑kplü 'ö Atanna ‑ya wo Klisi ‑bha, 'ö yö ꞊në kwa "yaaki 'ka bha ‑yö ‑ga yö ꞊në‑ 'gü. Klisi bha ꞊në 'kwa bɔ‑ ‑ta 'yö pö 'yaa kwa ‑bha Atanna wëëdhö, 'yö 'kwa ꞊mɔɔ‑ ‑bha 'kwa ‑tosɛa ‑kë ‑a ‑bha kë 'gü, 'yö kwa dha 'wɔn yaa ‑gɔ.
1CO 1:31 Kë "dhʋ̈ kö 'wɔn 'ö Atanna ‑wʋ ‑ya pö ꞊dhɛ: «Mɛ 'ö 'tɔ 'kun ‑dhɔ 'dhö‑ ‑bha ‑a ‑dhɛa ‑bha ꞊dhɛ ‑a ‑mɛ ‑yö ö 'tɔ 'kun 'wɔn 'ö kwa Dëmɛ ‑ya ‑kë bha ꞊në‑ ‑wɔn 'gü» bha‑ 'gü ‑wɔn ‑yö kë.
1CO 2:1 ‑A ‑kë "dhʋ̈ ‑sü bha‑ 'gü, n dheebhang ‑nu, nu 'a‑ wo Atanna ‑bha naɔ ‑së 'ö gun ‑bin ‑sü 'ka bha‑ dɔdhɛ 'gü ka ‑gɔ "sɛ bha‑ 'gü "tʋ̈ng 'bha 'gü bha, 'mii‑ dɔ "dhikan ‑bha, "ɛɛn 'mii‑ dɔ mɛ "bhɩɩ‑ ‑nu ‑bha 'wɔndɔdhe "wɛɛwɛɛdhe ‑bha.
1CO 2:2 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'yaa gun n "piʋ̈ ꞊dhɛ 'a 'wɔn "wɛɛwɛɛ 'bha ‑dhiang zë "tʋ̈ng 'a gun‑ 'ka ka "piʋ̈ mü bha‑ 'gü kö 'yii kë Yesu Klisi 'ö dɔ "dhü ‑bha bha yö ‑zë ‑wɔn 'ka.
1CO 2:3 'Wɔn 'ö‑ ‑wɔn 'gü 'yö 'a nu ka kpö 'gü ꞊dhɛ 'mɛ 'yaa pë 'bha 'ka ‑a 'dhö, kö a ꞊zii sië ‑yayadhö "suʋ̈ 'ka bha 'yö bha.
1CO 2:4 Atanna ‑wɔn ‑dhiang 'a‑ zë ka ‑dhɛ waa‑ ka ꞊klang ‑nu 'a‑ ‑kë bha 'mii‑ 'bha kë "dhikan waa‑ 'wɔndɔdhe "wɛɛwɛɛdhe ‑bha. "Kɛɛ a n zü ‑gban "dhabhliwɔn "gblʋ̈gblʋ̈ ‑nu 'ö Atanna ‑bha 'Nii‑ "slʋ̈ʋ̈slʋ̈ ‑ya ‑kë, 'ö mɛ ꞊gban "yan ‑bha kun bha ꞊në‑ 'gü, kë "dhʋ̈ kö mɛ ꞊gban‑ ‑wo Klisi ‑wɔn dɔ tɛanwɔn 'ka yö ꞊në‑ ‑bha.
1CO 2:5 Kë "dhʋ̈ kö 'ka 'dho ‑zʋ 'gɔn mɛ "bhɩɩ‑ ‑nu ‑bha 'wɔndɔdhe ‑dhɛ ka ‑bha ‑zʋ ‑yö Atanna ‑dhɛ ‑sü bha‑ 'gü, "kɛɛ kö 'ka 'dhang bho‑ "dhiʋ̈ ‑a ‑bha 'gügbɩɩdhɛ bha ꞊në‑ ‑wɔn 'gü.
1CO 2:6 'Sa yö ‑zë ꞊gban 'gü, dhiang 'kwa‑ zë sië bha ‑yö 'wɔndɔdhe ꞊në‑ 'ka 'mɛ 'kö ꞊wa ‑kian Atanna ‑wɔn "gblʋʋ "piʋ̈ ‑a ‑nu ‑bha 'ka. "Kɛɛ 'wɔndɔdhe 'dhɛ 'kö bha 'yii 'go "kpʋng ꞊taa, "ɛɛn 'yii 'go ‑gblüdë ‑nu 'wo "kpʋng ya‑ ꞊taa, 'ö Atanna dho‑ ‑nu ‑bha mɛdhɛ 'gü see‑ bha‑ ‑nu "piʋ̈.
1CO 2:7 ‑Abin tongtongdhö! 'Wɔndɔdhe 'dhɛ 'a‑ ‑dhiang zë sië bha, 'wɔndɔdhe 'ö go Atanna "piʋ̈ 'ö ‑bin ‑sü 'ka "kpʋngtaamɛ ‑nu ‑gɔ, 'ö Atanna ꞊yaa‑ ‑ya ‑dɩ ‑ta 'nu kwa ‑bha 'ka kö 'yii "kpʋngtaadhɛ kë ꞊kö, kö 'kwa 'tɔbhɔdhe kë‑ 'gü bha yö ‑mü.
1CO 2:8 ‑Gblüdë "pɛpɛ 'wo "kpʋng ya‑ ꞊taa ‑a ‑nu 'bha 'wii‑ dɔ. ꞊Ya kë 'nu ꞊dhɛ ‑wa ‑dɔ kö 'wii 'dho ꞊mɔɔ‑ ‑bha kö ‑wo kwa Dëmɛ 'tɔ bhɔ ‑sü "sinma bha‑ zë "dhü ‑bha.
1CO 2:9 "Kɛɛ ꞊dhɛ 'ö ‑kë ꞊dhɛ ‑yö ‑bɛn zë ‑sü 'ka Atanna ‑gɔ 'sëëdhɛ 'gü ꞊dhɛ: «'Wɔn 'ö mɛ 'bha ‑mɛ 'bha "yan 'yii ‑da 'gü do, "ɛɛn 'ö 'wii‑ ma do, 'ö mɛ 'bha ‑mɛ 'bha ‑zʋ 'yii ‑da ‑ta do, Atanna ꞊yaa‑ ‑ya ‑dɩ ‑ta 'mɛ 'ö ö ‑dhɔ ‑ya ‑nu ‑kë ‑a ‑nu ‑dhɛ» bha ꞊në‑ ‑wɔn 'gü 'yö mɛ 'bha ‑mɛ 'bha 'yii‑ dɔ "kpʋng ꞊taa yö bha.
1CO 2:10 'Sa 'wɔn 'ö mɛ "wɛɛ 'bha 'yii‑ dɔ "dhʋ̈ bha Atanna ‑ya ‑ta "pʋ ‑sü 'ka kwa ꞊në kwa ‑dhɛ ‑a ‑bha 'Nii‑ "slʋ̈ʋ̈slʋ̈ 'ö‑ ‑da kwa 'gü bha‑ ‑bha. ‑A 'klɔɔ‑ ‑mü ꞊dhɛ ‑a ‑bha 'Nii‑ "slʋ̈ʋ̈slʋ̈ bha ꞊në 'wɔn ꞊gban ‑wɔn ꞊gban 'klɔɔ‑ dɔ, yö 'ö bha ꞊në Atanna ‑zʋ "piʋ̈ ‑wɔn ꞊gban dɔ 'kpakpadhö 'ö dho 'ö ‑da 'ka ‑a zuëwlöödhɛ ‑nu ꞊gban 'gü.
1CO 2:11 ꞊Ya kë ꞊dhɛ 'kwa‑ 'sü mɛbhɩɩdhɛ ‑dhi 'gü, mɛ 'nii‑ 'ö mɛ 'gü bha ꞊në mɛ ‑zʋ "piʋ̈ ‑wɔn ꞊gban dɔ 'kpakpadhö. ‑Kɔ do bha‑ 'gü, Atanna ‑bha 'Nii‑ "slʋ̈ʋ̈slʋ̈ bha ꞊në 'wɔn 'ö ‑gban ‑a ‑bha ‑a ꞊gban dɔ 'pö 'kpakpadhö.
1CO 2:12 'Sa kwa ‑zë 'Nii‑ 'ö kwa 'gü bha 'yii 'go "kpʋng ꞊taa yö. Atanna ꞊në ö ‑bha 'Nii‑ "slʋ̈ʋ̈slʋ̈ bha ‑da kwa 'gü, kë "dhʋ̈ kö pë ‑nu 'ö‑ ꞊gbaɔ kwa ‑gɔ ‑gasitɛ 'ö‑ ‑kë kwa ‑dhɛ bha‑ "gblʋʋ "piʋ̈ bha 'kwa‑ dɔ.
1CO 2:13 'Wɔn 'ö‑ ‑wɔn 'gü 'yö 'ya‑ ‑dhiang zë 'yö 'yaa‑ zë 'wɔndɔdhe 'wo‑ ꞊draan "kpʋng ꞊taa yö bha‑ 'ka, "kɛɛ 'ö 'yi‑ zë 'wɔndɔdhe 'ö‑ ‑bha 'Nii‑ "slʋ̈ʋ̈slʋ̈ ‑yö yi ꞊klang ‑kë 'ka bha ꞊në‑ ‑bha, 'yö tɛanwɔn 'ö ‑gban ‑a ‑bha 'yi‑ pö 'mɛ 'ö‑ ‑bha 'Nii‑ bha 'ö‑ ‑nu 'gü ‑a ‑nu ‑dhɛ bha 'yö bha.
1CO 2:14 Mɛ "ʋʋ mɛ 'ö Atanna ‑bha 'Nii‑ "slʋ̈ʋ̈slʋ̈ bha 'yaa‑ 'gü, ‑a ‑mɛ 'yaa ꞊mɔɔ‑ ‑bha kö ‑yö ö ‑kɔ ‑ya tɛanwɔn 'ö go 'Nii‑ bha‑ "piʋ̈ bha‑ ‑bha. ‑A ꞊gban‑ ‑kë ‑mɛ 'gü ꞊dhɛ slaadhɛ ‑wɔn 'dhö. ‑A 'gü ma "sɩ 'yaa kë‑ ‑mɛ ‑dhɛ. ‑A 'klɔɔ‑ ‑mü ꞊dhɛ ‑a ‑bha 'Nii‑ bha ꞊në mɛ ‑ta kun 'wɔn ‑nu bha‑ ‑nu 'gü ma ‑sü ‑bha 'yö mɛ ‑ya 'gü ma.
1CO 2:15 Mɛ "ʋʋ mɛ 'ö‑ ‑bha 'Nii‑ "slʋ̈ʋ̈slʋ̈ bha 'ö‑ 'gü 'pö, ‑a ‑mɛ ꞊në ꞊mɔɔ‑ ‑bha 'ö 'wɔn ꞊gban bho 'koo, "kɛɛ 'yö mɛ 'bhaa ꞊mɔɔ‑ ‑bha kö ‑yö yö ‑zë ‑gɔwɔn ‑nu 'ö ‑gban Atanna ‑bha bha‑ 'bha ‑bho 'koo dɔ.
1CO 2:16 ꞊Dhɛ ‑kɔ 'ö ‑bɛn zë ‑sü 'ka‑ 'ka ‑a ‑gɔ 'sëëdhɛ 'gü ‑a 'dhö ꞊dhɛ: «'Dee kwa Dëmɛ ‑zʋ "piʋ̈ ‑wɔn dɔ? "ɛɛn 'dee ꞊mɔɔ‑ ‑bha 'ö ‑gleng ‑da ‑bha?» bha‑ 'dhö. "Kɛɛ kwa ‑zë 'wɔndɔdhe 'ö Klisi ‑gɔ bha ꞊në kwa ‑gɔ.
1CO 3:1 Ma ‑zë n ‑bha 'ka, n dheebhang ‑nu, Atanna ‑wɔn ‑dhiang 'a‑ zë ka ‑dhɛ kö a ka "piʋ̈ mü 'bha 'mii‑ zë ka ‑dhɛ ꞊dhɛ mɛ‑ pë zë 'mɛ (꞊wa ‑kian ‑a ‑bha zian ‑ta,) 'ö 'Nii‑ 'ö go‑ "piʋ̈ bha 'ö‑ ‑nu 'gü ‑a ‑nu ‑dhɛ. "Kɛɛ a‑ zë ka ‑dhɛ ꞊dhɛ mɛ‑ pë zë "kpʋngtaamɛ ‑nu "wɛɛdhe 'ö 'waa Atanna dɔ ꞊në‑ ‑nu ‑dhɛ. ꞊Dhɛ mɛ‑ pë zë 'zü 'mɛ 'wo ‑tun 'në 'ka ‑zʋ ‑yö ‑a ‑dhɛ ‑sü 'gü ꞊në‑ ‑nu ‑dhɛ.
1CO 3:2 ‑A ‑wʋ ‑nu 'wo ꞊dhɛ 'yɔnyi 'dhö bha ꞊në 'a gun‑ pö sië ka ‑dhɛ, ‑a 'dhɛ 'ö ꞊dhɛ ‑bhöpë "gblʋ̈ʋ̈gblʋ̈ ‑nu 'dhö bha 'mii yö ‑zë 'bha pö ka ‑dhɛ, ‑a 'klɔɔ‑ ‑mü ꞊dhɛ 'yii 'dho 'kun bho 'nu ka 'gü. Aa" ꞊ni dɔ ‑zian 'kwa‑ wo ꞊dɛɛ ya, 'yii 'dho 'kun bho ka 'gü.
1CO 3:3 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ ka ‑tun ‑tosɛa kë ꞊dhɛ "kpʋngtaamɛ ‑nu 'ö 'waa Atanna dɔ ‑a ‑nu 'dhö. 'Sa ‑yö "dhʋ̈ tɛan‑ 'ka ꞊dhɛ ꞊drɔ‑ ‑tun ka ꞊zinng 'gü, ka ‑tun "dhinaa ‑nu 'ma‑ ka "kwëë. ꞊Ya kë "dhʋ̈ kö 'kaa ‑tun ꞊dhɛ 'mɛ 'waa Atanna dɔ ‑a ‑nu 'dhö ꞊naa bha ‑ee?
1CO 3:4 ‑Yö kë ka "yaan ꞊dhɛ "tʋ̈ng 'ö‑ 'ka 'ö mɛ 'dhö ‑tun pö ka kpö 'gü ꞊dhɛ «Ma ‑zë a ‑bɔ Pɔdhö 'ka», "ɛɛn «Ma ‑zë a ‑bɔ Apodhɔsö 'ka» kö ka ‑tun ꞊kö ꞊dhɛ 'mɛ 'waa Atanna dɔ ‑a ‑nu 'dhö ꞊naa bha.
1CO 3:5 "Ɛɛn ‑yö ka 'gü ꞊dhɛ ‑më "wɛɛ 'bha ꞊në mang Pɔdhö ‑mɛ ‑zë n 'ka, "ɛɛn ‑më ‑mü Apodhɔsö 'ka? ('Yö 'ka dho "pɛ‑ 'gü yi ‑wɔn 'gü?) Yi ‑zë Atanna ‑bha yëkëmɛ "wɛɛwɛɛdhe 'ö bɔ‑ ‑nu ‑ta 'ö dhiang zë ka ‑dhɛ, kë "dhʋ̈ kö 'ka 'dhang bho ö "dhiʋ̈ ꞊në‑ yi 'ka. 'Mɛ 'kö 'yi bha 'mɛ 'ö "dhʋ̈ ‑a ‑bha 'ö Atanna ‑ya dɔ‑ ‑kɔ 'ka 'yö‑ ‑kë.
1CO 3:6 'Ö ꞊dhɛ pë ta ‑sü 'dhö kö ma ꞊në ma ‑zë 'a‑ ta, 'yö Apodhɔsö ‑yö "yi kpɔ‑ ‑ta. "Kɛɛ Atanna ꞊në yö ‑zë 'ö‑ ‑bhong ‑ya "dhiʋ̈ 'yö bhɔ.
1CO 3:7 ꞊Ya kë "dhʋ̈ kö 'mɛ 'ö pë ta waa‑ 'mɛ 'ö "yi kpɔ‑ ‑ta, ‑a ‑nu 'bha 'waa pë 'bha 'ka. Kö Atanna 'ö yö ‑zë 'ö‑ ‑bhong bhɔ 'yö ‑gla bha ꞊në‑ 'tɔ 'dhö 'dhö.
1CO 3:8 'Mɛ 'ö‑ ta waa‑ 'mɛ 'ö "yi kpɔ‑ ‑ta wo ‑zë ‑wo do. Atanna ‑dho 'mɛ 'ö "dhʋ̈ ‑a ꞊trɔɔn 'ö ꞊mɔɔ yë 'ö‑ ‑kë bha‑ ‑bha ‑a nu‑ ‑mɛ ‑dhɛ.
1CO 3:9 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'kö 'yi bha yaa‑ Atanna ‑nu yi yë ꞊në‑ ‑kë yi 'kwëë‑. 'Yö ka ‑zë 'ka ꞊dhɛ ‑a ‑bha 'bhlaadhɛ 'dhö. 'Yö 'ka ꞊dhɛ 'zü ꞊dhɛ ‑a ‑bha 'kɔ 'wo‑ dɔ sië ‑a 'dhö.
1CO 3:10 ‑Gasitɛ 'ö‑ ‑kë n ‑dhɛ bha‑ 'saa‑ 'gü, ma ꞊në 'a 'kɔ bha‑ "kpan ‑ya ꞊kpaɔdhɛ 'ö‑ nu n ‑dhɛ bha‑ 'ka. "Kɛɛ mɛ "ʋʋ mɛ 'i dho 'kɔ dɔ 'kɔ "kpan bha‑ ‑ta, ‑a ‑dhɛa ‑bha ꞊dhɛ 'i‑ dɔ "slë 'ka.
1CO 3:11 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑a "kpan ꞊ya bo ‑ya ‑sü 'ka 'nu, yö ‑mü Yesu Klisi ꞊në‑ 'ka, mɛ 'bha 'yii 'dho ꞊mɔɔ‑ ‑bha 'zü kö ‑ya "wɛɛ bha ‑ya.
1CO 3:12 'Sa Atanna ‑bha 'kɔ 'ö "dhʋ̈ bha 'mɛ 'ö 'dhö ‑a ‑bha dɔ ‑kɔ ‑yö ‑dhö. Mɛ 'bha ‑nu ‑wo mü 'wo wo ‑bha dɔ "sënng ‑nu, 'wëë‑ ‑nu waa‑ ‑gwë ꞊bhlëësü ‑nu 'ka 'kɔ "kpan bha‑ ‑ta. 'Yö mɛ 'bha ‑nu 'wo wo ‑bha dɔ "dhü ‑nu, 'dɛn‑ ‑nu waa‑ "yɛ ‑nu 'ka.
1CO 3:13 "Kɛɛ 'mɛ 'ö "dhʋ̈ ‑a ‑bha yë 'ö‑ kë bha ‑yö ‑dho zun zang ‑ta Atanna ‑bha zadɔyi 'ka 'ö mɛ ꞊gban ‑wa yö. ‑A yi bha ꞊ya ꞊loo, 'mɛ 'ö "dhʋ̈ ‑a ‑bha yë 'ö‑ ‑kë bha ‑wo ‑dho ‑a 'gü dan pɛng 'ka, 'yö pɛng ‑ya bho 'koo.
1CO 3:14 ꞊Ya kë ꞊dhɛ 'mɛ 'ö‑ ‑bha yë 'ö‑ ‑kë 'kɔ "kpan bha‑ ‑ta bha ꞊ya dha pɛng ‑gɔ, ‑a ‑mɛ ‑dho ‑a ꞊trɔɔn yö.
1CO 3:15 "Kɛɛ pɛng ꞊ya 'mɛ 'ö‑ ‑bha ‑bhö, kö‑ ‑mɛ ꞊ya ꞊fië 'ö ꞊trɔɔn 'gü ꞊naa bha. ‑A ‑mɛ ‑dho dha zë wo, "kɛɛ ‑yö ‑dho dha ꞊dhɛ 'mɛ 'ö dha pɛng ‑gɔ ꞊në‑ 'dhö.
1CO 3:16 A‑ ‑pö ka ‑dhɛ ꞊dhɛ Atanna ‑bha 'kɔ ‑mü ka ꞊në ka 'ka, ‑a ‑bha 'Nii‑ "slʋ̈ʋ̈slʋ̈ ꞊yëë ‑yö ka ꞊në ka 'gü, ka‑ 'wɔn ‑dɔ 'kpakpadhö.
1CO 3:17 Mɛ "ʋʋ mɛ 'ö Atanna ‑bha 'kɔ bha‑ wü, ‑yö ‑dho ‑a ‑mɛ 'gü see‑ 'pö. ‑A 'klɔɔ‑ ‑mü ꞊dhɛ ‑a ‑bha 'kɔ bha pë "slʋ̈ʋ̈slʋ̈ ‑mü, 'yö ka ꞊në 'ka‑ 'ka. 1co4
1CO 3:18 ‑A ‑wɔn 'gü mɛ 'bha 'ya 'dho "kpënng‑ kë ö ‑dɩ ‑gɔ. ꞊Ya kë ꞊dhɛ mɛ ꞊ya kë ka kpö 'gü 'ö ö ‑zʋ 'gɔn sië ꞊dhɛ "yaaki 'ö "kpʋng ya‑ ꞊taa bha ‑yö ö ‑bha, kö‑ ‑dhɛa ‑bha ꞊dhɛ ‑a ‑mɛ ‑yö kë ꞊dhɛ 'mɛ "yaaki 'yaa‑ ‑bha ‑a 'dhö kö ‑yö kë "yaakimɛ 'ka Atanna "piʋ̈.
1CO 3:19 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ "yaaki 'ö "kpʋng ꞊taa yö bha ‑yö slaa" ꞊në‑ 'ka Atanna wëëdhö. ‑A ‑gɛn ‑mü ꞊dhɛ Atanna ‑wʋ ‑ya ‑pö ‑a ‑wʋ 'sëëdhɛ 'gü 'ö‑ pö: «'Mɛ 'wo‑ pö ‑wo "kpënng‑ ‑kë mɛ ‑nu ‑gɔ "yaaki ‑kë ‑a ‑nu ‑bha ‑sü ‑wɔn 'gü bha, Atanna ‑ya ‑kë 'ö 'wo ‑da wo ‑dɩa "sɔ 'wo‑ "dhiʋ̈ bha‑ 'gü.»
1CO 3:20 'Yö go mü 'zü 'ö‑ pö: «Atanna ‑yö "yaakimɛ ‑nu 'wɔn ‑zun 'ko "dhiʋ̈ kë ‑kɔ ‑dɔ, ‑ya 'wɔn ‑dɔ ꞊dhɛ ‑a 'bha ‑zun "dhiʋ̈ ‑bhlɔɔ 'yaa 'dhö.»
1CO 3:21 ‑A ‑kë "dhʋ̈ ‑sü bha‑ 'gü, ‑a ‑dhɛ 'yaa‑ ‑bha ꞊dhɛ mɛ 'bha ‑yö ö ‑zʋ 'gɔn mɛ "bhɩɩ‑ ‑zë ‑dhɛ kö ‑yö "plüün bho‑ 'tɔ 'gü, ‑a 'klɔɔ‑ ‑mü ꞊dhɛ pë ꞊gban "pɛpɛ ‑yö ka ꞊në ka ‑gɔ.
1CO 3:22 ‑A Pɔdhö oo, Apodhɔsö oo, Piɛdhö oo, ‑a "kpʋngtaadhɛ oo, ‑a ‑tosɛa oo, ‑a ga oo, ‑a ꞊dɛɛ oo, ‑a dhia" oo, ‑a ꞊gban ‑yö ka ꞊në ka ‑gɔ.
1CO 3:23 'Yö kaa ‑dɩ 'pö 'ka Klisi ‑gɔ, 'yö Klisi 'dhö Atanna ‑gɔ 'pö.
1CO 4:1 ‑A ‑kë "dhʋ̈ ‑sü bha‑ 'gü, ‑a ‑dhɛa ‑bha ꞊dhɛ 'ka yi 'sü ꞊dhɛ Klisi ‑bha gwëëzë ‑nu, 'ö Atanna ꞊ya ö ‑zʋ "piʋ̈ ‑wɔn ‑nu 'ö ‑bin ‑sü 'ka ‑a ‑kɛfama bho‑ ‑nu ‑bha kö ‑wa ‑ta "pʋ mɛ "bhɩɩ‑ ‑nu ‑dhɛ ꞊në‑ 'dhö.
1CO 4:2 'Sa 'mɛ 'kö ꞊wa i ‑ya yë 'dhɛ 'kö‑ këmɛ 'ka, 'bha‑ yë bha‑ kë‑ kë ‑kɔ ꞊në‑ ‑ta 'yö ‑dhi 'mɛ i ‑ya bha‑ ‑dhɛ.
1CO 4:3 ꞊Ya 'to ma ‑zë n ‑bha ‑bha, ‑wʋ "ʋʋ ‑wʋ 'ö ‑dhi ka ‑dhɛ ‑kaa pö n ‑bha, "ɛɛn 'pë 'ö ‑dhi mɛ "bhɩɩ‑ ‑nu ‑dhɛ ‑wo n ‑zɔn 'ka, ‑a 'bha 'yaa n 'gü 'wɔn 'bha ‑wɔn 'bha 'ka. 'Sa ma ‑zë 'wɔn 'bha 'kö maa ‑pö n ‑dɩ ‑bha ꞊dhɛ n ꞊sɔng 'dhö 'yaa 'dhö, ‑a 'klɔɔ‑ ‑mü ꞊dhɛ 'wɔn 'bha kö n zuë" yöö za dɔ‑ 'ka n ‑bha kö 'a‑ dɔ 'yaa 'dhö ꞊kö.
1CO 4:4 "Kɛɛ 'kö 'zü n zuëga 'yii za dɔ n ‑bha ꞊wɛ, kö‑ kë ꞊dhɛ ꞊ya kë "dhʋ̈ kö ꞊sɔng ꞊në 'yaa n ‑bha tongtongdhö 'yaa ‑mü. "Kɛɛ 'mɛ 'ö‑ pö ‑mɛ 'ka ꞊dhɛ ꞊sɔng ‑yö n ‑bha yö ‑mü kwa Dëmɛ ꞊në‑ 'ka.
1CO 4:5 'Wɔn 'ö‑ ‑wɔn 'gü 'yö 'a‑ pö ka ‑dhɛ ꞊dhɛ 'ka 'dho za dɔ mɛ 'bha ‑bha kö "tʋ̈ng 'ö Atanna ‑ya ‑ya 'yii ꞊loo ꞊kö bha 'yö bha. ‑Ka dɔ kö kwa Dëmɛ ‑yö nu. Yö ꞊në dho ‑dhɛ "pʋ 'wɔn ‑nu 'wo ‑bin ‑sü 'ka ‑dhɛtiidhɛ 'gü ‑a ‑nu ‑ta, 'yö mɛ "bhɩɩ‑ ‑nu zuëpiʋ̈wɔn ‑nu ‑wo "yɛa‑. Yö ꞊në ꞊ya kë "dhʋ̈ 'yö‑ ‑bha yëkëmɛ ‑nu bha‑ 'mɛ 'ö 'dhö ‑a ‑bha "dhɛ ‑ya ‑ta ‑kɔ 'dhö ‑kɔ 'ö‑ 'gü, 'yö‑ ‑ya ‑ta ‑a ‑kɔ ‑bha.
1CO 4:6 N dheebhang ‑nu, a 'wɔn bha‑ ‑zɔn 'ka ‑zɔn yaa‑ Apodhɔsö yii‑ 'wɔn 'ka ka ꞊në ka ‑wɔn 'gü. 'Sa a‑ ‑kë "dhʋ̈ kö 'ka 'wɔn 'suan‑ bho yi ‑bha bha ꞊në‑ ‑bha, kö 'ka 'dho ziö ‑wʋ 'ö ‑bɛn zë ‑sü 'ka Atanna ‑bha 'sëëdhɛ 'gü bha 'ö‑ 'dhɛ 'ö‑ pö ꞊në‑ ‑ta. ‑A ‑kë "dhʋ̈ ‑sü bha‑ 'gü, 'ka 'dho ka ‑dɩ 'sü 'kpii‑ 'ö 'ka ka zü bɔ mɛ 'bha 'ka 'ö mɛ do ‑san ‑yö ka ‑kë.
1CO 4:7 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ 'bha fië‑ 'yaa 'dhö mɛ 'bha 'ka. ‑A ‑gɛn ‑mü ꞊dhɛ 'kö 'bha kë ‑duɛ 'kpii‑ 'gü kö Atanna ꞊në i ‑ya mü. ‑A ‑kë "dhʋ̈ ‑sü bha‑ 'gü, 'bha 'dho i ‑dɩ 'sü 'kpii‑ i ‑ya ‑yɛa bha‑ 'gü ‑wɔn 'gü ꞊dhɛ 'pë 'wii‑ nu ‑zë wo i ‑dhɛ, 'i‑ ꞊slɔɔ i ‑dɩ faan ꞊në‑ ‑bha ‑a 'dhö.
1CO 4:8 'Aami, ka ‑zë 'ka 'kën 'nu 'wɔn ꞊gban 'gü, 'ka 'to 'nu 'ka kë ‑gbanmɛ 'ka 'wɔn 'kwa‑ ‑bha bha‑ 'gü ‑wa! Ka ‑zë 'ka kë‑ 'gü ‑gblüdë 'ka "kɛɛ kö 'mɛ 'kö yi ‑zë 'yi ya 'yii kë‑ 'ka ꞊kö ‑wa! "Kɛɛ ‑ɛɛ, ꞊ya kë "dhʋ̈ kö ꞊ya kë ‑së ‑dhe, ‑yö ‑dho dhi yi ‑dhɛ, ‑a ‑gɛn ‑mü ꞊dhɛ ka ‑zë 'ka kë‑ ‑gblüdë bha‑ 'ka yi ‑dho dɔ 'pö ka "piʋ̈ mü.
1CO 4:9 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑yö n 'gü ꞊dhɛ 'mɛ 'ö yi ‑zë 'yi Yesu ‑bha bɔmɛ ‑nu 'ka ya, Atanna ‑yö yi kë ‑sü 'ka mɛ ꞊gban "pɛpɛ ‑totaama ꞊në‑ 'ka. Yi ꞊dhɛ 'mɛ 'ö ꞊wa bhië" dɔ‑ ‑nu bhɔ ‑bha kö ‑wo 'dho‑ ‑nu zë ꞊në‑ 'dhö, 'yö ꞊wa yi dɔ "dhɛɛ 'kpii‑ 'gü kö "kpʋngtaamɛ ꞊gban "pɛpɛ "yan ‑yö bɔ yi ‑ta waa‑ Atanna ‑bha "kië ‑nu 'dhö.
1CO 4:10 ‑A ‑kë "dhʋ̈ ‑sü bha‑ 'gü yi ‑zë yi ꞊dhɛ 'mɛ 'ö "yaaki 'yaa‑ ‑bha ‑a 'dhö Klisi ‑wɔn 'gü, 'yö ka ‑zë 'ka "yaakimɛ 'ka! Yi ‑zë yi ꞊dhɛ 'mɛ "sɩ 'yaa ‑dhɛ ‑a 'dhö, 'yö ka ‑zë 'ka faanmɛ ‑nu 'ka! ꞊Bhlëë 'yaa yi ‑zë yi bha, "kɛɛ ꞊bhlëë ‑yö ka ‑zë ka ‑bha! ("Kɛɛ ‑ɛɛ! ꞊Ya kë "dhʋ̈ ‑yö ‑dho dhi yi ‑dhɛ),
1CO 4:11 ‑a ‑gɛn ‑mü ꞊dhɛ yi ‑zë yi ‑tun ꞊kö saan" 'gü 'ö nu 'ö zun‑ 'ka "tʋ̈ng 'kwa dɔ‑ 'ka ya‑ ‑bha, yi sëë bho sië din‑ waa‑ "yi mü ‑dhɔ ‑nu kaɔ, sɔ 'yaa yi ‑gɔ, "kɛɛ ‑wo yi ‑ma sië "dhʋ̈ do, 'yaa ‑ya ‑dhɛ do 'gü, ziö ꞊në 'yi‑ wo "sɛ "piʋ̈ "sɛ "piʋ̈ 'yi dho‑ 'ka.
1CO 4:12 'Ö 'yi yë ‑kë 'yi sëë bho kë "dhʋ̈ kö 'yi yi ‑dɩ ‑bhöpë ꞊slɔɔ. ꞊Wa "si bho yi ‑gɔ, 'dhuë‑ ꞊në 'yi‑ kë‑ ‑mɛ ‑bha. ꞊Wa yi ‑wëëdhɛ bho ‑yö 'kun ‑bho yi 'gü 'ö 'yaa "wɩ.
1CO 4:13 ꞊Wa yi ‑dhiang yaa zë yi‑ ‑yɔ ‑bɔ ‑mɛ ‑nu ‑gɔ "nɛɛnɛɛ 'ka. 'Ya kë ꞊dhɛ blëë 'wo‑ ‑gblö ꞊në‑ 'dhö mɛ "bhɩɩ‑ ‑nu ‑gɔ, 'wo ‑gban yi ‑gblö ‑dhɛ 'ö‑ mɔɔ‑ ‑sü ‑bha yi 'bha ‑yi 'bha 'ka kö ‑wo yi ꞊wɛnng "dung ꞊taa ꞊në‑ ꞊dɛɛ 'dhö 'dhö ("kɛɛ ka ‑zë 'ka ꞊loo).
1CO 4:14 Dhiang ‑nu 'a‑ ‑bɛn zë sië kö 'a‑ bɔ ka ‑dhɛ ya 'mii‑ kë "dhʋ̈ kö 'a 'yiʋ̈‑ dɔ‑ 'ka ka ‑bha, "kɛɛ a‑ ‑kë "dhʋ̈ kö ‑yö kë ‑dhio ꞊në‑ 'ka kö 'a‑ dɔ ka ‑ta ꞊dhɛ 'në 'ö‑ ‑wɔn 'dhö‑ dë ‑gɔ "gbɩɩ‑, ‑a dë 'dhö ‑dhio dɔ‑ ‑ta ‑kɔ 'ö‑ 'gü bha‑ 'dhö.
1CO 4:15 ‑A ‑gɛn ‑mü ꞊dhɛ 'kö 'zü ꞊ya kë ꞊dhɛ ka ‑draan "ta ‑sü Klisi ‑bha zian ‑ta ‑sü ‑bha ‑mɛ ‑nu ꞊wa ꞊mɔɔ "gblü ‑kaɔng do ‑zian ‑bha ꞊dɛɛ, "kɛɛ 'ka 'dhang bho Yesu Klisi ‑wɔn "dhiʋ̈ mɛ 'kö‑ 'saa‑ 'gü, 'ö ꞊dhɛ ka dë 'dhö, ‑yö dosengseng. Yö ‑mü ma ꞊në n 'ka, ‑a ‑gɛn ‑mü ꞊dhɛ ma ꞊në 'a nu 'a Atanna ‑bha naɔ ‑së bha‑ dɔ ka ‑gɔ.
1CO 4:16 ‑A ‑wɔn 'gü, bhɛa" ꞊në 'a‑ wo ka ‑dhɛ kö 'ka dɔ "gbɩɩ‑ 'ka n "ta ‑kɔ 'sü.
1CO 4:17 'Wɔn 'ö‑ 'wɔn 'gü 'yö 'a Timote bɔ ka ‑dhɛ bha 'yö bha. Timote bha ‑yö ꞊dhɛ n gbö ꞊në‑ 'dhö kwa Dëmɛ ‑bha zian ‑ta. ‑A ‑wɔn ‑yö n ‑gɔ "gbɩɩ‑. N 'dhang bho ‑sü ‑ya "dhiʋ̈ 'pö 'kpakpadhö. ‑Kɔ 'a "ta sü‑ 'ka Yesu Klisi ‑bha zian ‑ta 'ö 'ma 'dho Atanna ‑bha 'Kɔdhigümɛ ‑nu kpö 'gü ‑dhɛ "ʋʋ ‑dhɛ 'ö‑ 'gü 'a‑ ‑nu ꞊draan‑ ‑bha bha, ‑yö ‑dho ka ‑zʋ ‑bö 'ka.
1CO 4:18 Mɛ 'bha ‑nu ‑wo ka kpö 'gü 'ö ꞊wa pa ‑dɩ ‑sü 'kpii‑ 'ka ꞊dhɛ 'pë 'mii 'dho nu mü‑ 'dhö.
1CO 4:19 "Kɛɛ ꞊ya kë ꞊dhɛ Atanna ‑zë ꞊ya "wɩ‑ ‑bha, ‑a "tʋ̈ng 'yaa ꞊gblɛɛn ‑zü kö 'a nu ‑wo ka ‑dhɛ 'gü. Nu 'ö bha ꞊në 'ma‑ wo "dhʋ̈ kö 'a ꞊loo mü, 'yö 'mɛ 'wo wo ‑dɩ 'sü sië 'kpii‑ bha Atanna ‑bha faan 'dhö‑ ‑nu 'gü ‑naa 'ö‑ ‑ta 'yö 'a‑ dɔ.
1CO 4:20 ‑A 'klɔɔ‑ ‑mü ꞊dhɛ 'mɛ 'wo dho ‑tosɛa ‑kë Atanna ‑bha ‑gblüdëdhɛpö bha‑ 'gü bha, mɛ 'yaa‑ ‑nu dɔ‑ ‑nu "dhiwʋ doseng ‑zë ‑bha, mɛ ‑ya ‑nu 'suan‑ ‑bho 'pö ‑a ‑bha yë kë ‑faan 'ö‑ ‑nu 'gü 'wo‑ ‑bha "ta 'sü sië‑ ‑bha bha‑ ‑bha.
1CO 4:21 ‑Yö ka "piʋ̈ ꞊dhɛ 'a nu sië 'a nu "vian ꞊në‑ 'ka ka ‑ta "ɛɛn 'a nu ka ‑dhɔ ꞊në‑ ‑bha "dhidhɛ "nɛɛnɛɛdhɛ 'ka?
1CO 5:1 ‑Wo ka ‑zua zë ‑dhiang ꞊në‑ zë sië ‑dhɛ ꞊gban "pɛpɛ 'gü, "kɛɛ ‑zua zë ‑kɔ ‑zian 'ö "dhʋ̈, ‑zua zë ‑kɔ yaa 'ö mɛ ‑zian 'waa Atanna dɔ 'waa ꞊mɔɔ‑ ‑bha kö ‑wa kë, yö ꞊në ka ‑zë 'ka‑ kë sië. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑wa ‑dhiang ‑zë 'ö mɛ ‑ya ma ꞊dhɛ mɛ 'bha ‑yö ka kpö 'gü 'ö dhe bho ‑sü 'ka ö dë ‑gɔ!
1CO 5:2 "Kɛɛ yö ‑zë ꞊gban 'gü ka "dhi‑ ‑tun "wɩ mü "dhʋ̈ do 'ka dho‑ 'ka. ‑A ‑dhɛa ‑bha 'nu ꞊dhɛ 'ka ‑wëë ‑ya ꞊në‑ wo kö 'mɛ 'ö bhɔ suu 'ö "dhʋ̈‑ wo bha 'ka‑ kë ka kpö 'gü.
1CO 5:3 'Kö 'zü n ꞊dede 'yii kë ka "piʋ̈ mü kö n "yan‑ kë‑ ‑dhɛ 'gü, "kɛɛ n zuë" ‑zë ‑yö ka "piʋ̈ mü ‑kpɛawo. ꞊Ya 'to ma ‑zë n ‑bha ‑bha, ꞊dhɛ n zuë" 'dhö ka "piʋ̈ mü ‑kɔ 'ö‑ 'gü bha‑ 'dhö, kö 'mɛ 'ö ‑gleng suu 'ö "dhʋ̈‑ ‑kë bha 'ma‑ zë za 'ka 'nu kwa Dëmɛ Yesu ‑bha zë 'gü.
1CO 5:4 A‑ ‑pö ka ‑dhɛ ꞊dhɛ ‑a ‑dhɛa ‑bha ꞊dhɛ 'ka ‑ya ‑dhɛ do 'gü, ꞊ya kë ꞊dhɛ ka ‑ya ‑dhɛ do 'gü n zuëga‑ ‑dho kë ka "piʋ̈ mü, 'ö kwa Dëmɛ Yesu ‑bha 'gügbɩɩdhɛ bha 'ö ‑kë mü 'pö.
1CO 5:5 Yö ꞊në 'ka dho ka zü ‑gban 'gü 'yö 'ka 'mɛ 'ö bhɔ suu 'ö "dhʋ̈‑ wo bha‑ "dhiʋ̈ dɔ Sɔtraan ‑dhɛ, kë "dhʋ̈ kö‑ ‑mɛ kwi 'ö‑ ‑bha bha yö ‑zë 'gü ꞊ya see‑, "kɛɛ kö‑ 'nii‑ ‑zë ‑yö dha kwa Dëmɛ bha‑ nu ‑yi 'ka.
1CO 5:6 ‑A ‑kë "dhʋ̈ ‑sü bha‑ 'gü, ka ‑dɩ ‑sü 'kpii‑ ‑gɛn 'yaa 'dhö. "Ɛɛn "gwënng 'wo‑ ‑da 'wo‑ pö ꞊dhɛ 'bha «"sɛkɛ 'në 'dɛdɛ ‑da 'bluu‑ ‑bʋ̈ʋ̈ ‑bha ‑ya ‑puën 'ö ‑kë 'kpii‑» bha 'kii‑ ma do ‑ee?
1CO 5:7 ꞊Dhɛ 'ö "dhʋ̈, 'wɔn yaa 'ö ꞊dhɛ "sɛkɛ slëë 'dhö ka kpö 'gü bha, ‑ka ka bo‑ 'ka kë "dhʋ̈ kö 'ka kë "slʋ̈ʋ̈slʋ̈ ‑kpɛawo do ꞊dhɛ 'bluu‑ ‑bʋ̈ʋ̈ ‑dee 'ö "sɛkɛ 'yaa‑ ‑bha, ('ö Zuifö ‑nu ‑wa ‑bhö woo‑ Pakö troo ‑ta bha‑ 'dhö). 'Sa ka yö ꞊në‑ 'ka ‑zë wo tɛan‑ 'ka Klisi 'saa‑ 'gü. ‑A 'klɔɔ‑ ‑mü ꞊dhɛ kwa ‑bha Pakö troo bha‑ zü ꞊ya bho, kë 'ö‑ wo ꞊dhɛ Atanna ꞊ya Klisi kë "saa‑ 'ka 'nu ꞊dhɛ ‑kɔ 'wo "bhlaa zë‑ 'ka Pakö troo ‑ta bha‑ 'dhö bha‑ ‑wɔn 'gü.
1CO 5:8 ꞊Dhɛ 'ö "dhʋ̈, ‑ka ‑kwa kwa ‑bha Pakö troo bha‑ kë ꞊dhɛ ‑kɔ 'ö Zuifö ‑nu 'wo wo ‑bha ‑kë 'ka bha‑ 'dhö. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ wo ‑zë 'waa wo ‑bha kë 'bluu‑ 'ö "sɛkɛ slëë 'dhö‑ ‑bha bha‑ 'ka. 'Ma‑ pö "dhʋ̈ kö a‑ ‑pö ꞊dhɛ kwa ‑bha "ta 'kwa dho‑ wo Atanna ‑bha zian ‑ta bha ‑zua zë ‑sü waa‑ 'wɔn yaa kë ‑sü ‑wo 'go‑ ‑ta kö 'kwa kë ꞊dhɛ 'bluu‑ 'dhɛ 'ö "sɛkɛ 'yaa kë‑ ‑bha bha‑ 'dhö, kö 'kwa 'wɔn ꞊gban "pɛpɛ kë "gblʋ̈ʋ̈dhɛ "puu ‑ta, "ɛɛn 'zü kö 'kwa‑ ‑kë tɛan‑ ‑ta.
1CO 5:9 'Sëëdhɛ 'a‑ bɔ ka ‑dhɛ bha a‑ ‑pö ka ‑dhɛ ‑a 'gü ꞊dhɛ 'ka ꞊zinng ‑da kaa‑ ‑zuazëmɛ ‑nu ka ꞊zinng 'gü, kɛng‑ ‑nu 'ka 'dho ꞊nëng ka 'kwëë‑.
1CO 5:10 ‑A pö 'a ‑wo "dhʋ̈ bha 'mii "wɩ mɛ "pɛpɛ 'wo "kpʋng ꞊taa yö, 'wo ‑zuazëmɛ 'ka, "ɛɛn 'wo zuë" ‑bhɔ ꞊naɔ ‑bha ‑mɛ ‑nu 'ka, "ɛɛn 'wo ‑sɔmɛtamɛ ‑nu 'ka, "ɛɛn 'zü 'wo ꞊gebhɔ ‑dhɔkëmɛ ‑nu 'ka bha‑ ‑nu ꞊gban 'ka. ꞊Ya kë 'nu yö ‑zë 'ka, kö 'go ꞊në 'ka dho‑ wo "kpʋng ꞊taa yö.
1CO 5:11 "Kɛɛ 'ma‑ pö "dhʋ̈ kö a ‑wɩ 'mɛ 'wo‑ pö sië wo ‑dɩ ‑dhɛ ꞊dhɛ kɛng‑ ‑nu ka ‑kɔ ‑yö 'wɔn do ‑bha, ꞊dhɛ Yesu ‑bha mɛ ‑mü wo 'ka, "kɛɛ kö ‑wo ‑zua ‑zë, kö‑ ‑nu zuë" ‑yö ‑bhɔ ꞊naɔ ‑bha, kö ‑wo ꞊gebhɔ ‑nu ‑dhɔkë, "ɛɛn kö‑ ‑nu "dhidhɛ ‑yö 'ya‑, "ɛɛn kö ‑wo we mü ‑dudu 'ka, "ɛɛn 'zü kö ‑wo ‑sɔmɛtamɛ ‑nu 'ka bha wo ꞊në‑ ‑nu 'ka. A‑ ‑pö 'ka "kan 'mɛ wo "dhʋ̈ bha ꞊në‑ ‑nu ‑bha. Kɛng‑ ‑nu 'ka 'dho ka ‑kɔ ‑zian ‑da 'tɛa‑ do 'gü.
1CO 5:12 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ma ‑zë 'mii kë 'mɛ 'wo "kpɛnng, 'ö 'waa 'dhang bho Yesu ‑wɔn "dhiʋ̈ bha‑ ‑nu ‑bha za dɔ mɛ 'ka. 'Pë 'wo‑ 'ka, Atanna ꞊në dho‑ pö. "Kɛɛ Atanna ‑yö ka ‑ya ‑sü 'ka 'wɔnbhokoomɛ 'ka 'mɛ 'wo‑ ‑bha 'ka bha ꞊në‑ ‑nu kpö 'gü. ‑A ‑kë "dhʋ̈ ‑sü bha‑ 'gü, a‑ ‑pö ka ‑dhɛ ꞊dhɛ 'ka 'wɔn yaa këmɛ bho ka kpö 'gü ꞊dhɛ ‑kɔ 'ö Atanna ‑wʋ ‑ya pö‑ 'ka bha‑ 'dhö.
1CO 6:1 (꞊Ya 'go‑ 'dhɛ bha‑ 'gü,) ‑yö kë mü ꞊dhɛ 'yö 'wɔn ꞊ya ‑da 'mɛ 'ka bɔ Atanna 'ka ka ‑dɩ ‑slɔɔ ka ꞊zinng 'gü 'yö 'kaa‑ ‑dhiang zë ka 'ko ‑nu ꞊zinng 'gü, 'yö 'ka dho 'ka‑ ‑da 'mɛ 'waa bɔ‑ 'ka ‑a ‑nu ‑dhɛ.
1CO 6:2 "Ɛɛn 'kaa‑ 'wɔn ꞊në‑ dɔ ꞊dhɛ 'mɛ 'wo bɔ‑ 'ka bha ‑wo ‑dho za dɔ "kpʋngtaamɛ ‑nu ‑bha ‑ee? 'Yö ꞊ya kë ꞊dhɛ ka ‑zë 'ka kë "kpʋngtaamɛ ‑nu ‑bha zadɔmɛ 'ka bha ‑oo, ka ‑dho 'wɔn 'nësɛnsɛnnë ‑nu bha‑ ‑nu 'ka "kpʋngtaamɛ ‑nu ‑kuu "dhiʋ̈ ‑gɛn ‑mü ‑më 'ka 'yö 'kaa‑ 'gü baa‑ ka 'ko ‑nu ꞊zinng 'gü?
1CO 6:3 "Ɛɛn 'kaa‑ 'wɔn ꞊në‑ dɔ 'zü ꞊dhɛ 'mɛ 'kwa bɔ Atanna 'ka bha ꞊në 'kwa dho zaa dɔ‑ ‑bha "kië ‑nu ‑bha ‑dhɛ 'bha ꞊kpaɔ ‑yi ‑bha ‑ee? 'Wɔn 'ö‑ "sinma 'dhö bha 'ö "dhʋ̈ bha bha ‑oo, ka ‑fië 'wɔn ‑nu 'wo "kpʋng ꞊taa yö‑ ‑nu ‑bhokoo ‑sü ‑bha ‑gɛn ‑mü ‑më 'ka?
1CO 6:4 'Wɔn ‑nu 'kö 'wo bha ‑wo "dhʋ̈, "kɛɛ 'ka 'go mü 'yö 'wɔn ꞊ya ‑da ka ꞊zinng 'gü, 'yö 'ka‑ sü 'ka dho‑ 'ka 'mɛ ‑a ‑nu ꞊bhlëë 'bha ‑bha 'bha 'yaa 'dhö Atanna ‑bha 'kɔdhigümɛ ‑nu kpö 'gü bha ꞊në‑ ‑nu ‑kuu "dhiʋ̈!
1CO 6:5 Kaa‑ 'yiʋ̈‑ ‑wɔn ‑wa! ꞊Ya kë "dhʋ̈ kö mɛ do ‑zian 'ö dho ꞊mɔɔ‑ ‑bha 'ö ka ꞊zinng 'gü ‑dhiang zë ꞊në 'yaa ka kpö 'gü "dhʋ̈ bha ‑ee?
1CO 6:6 'Ka‑ kë "dhʋ̈ ‑a 'wɔn ‑zian ꞊në n kɔn. ‑A 'klɔɔ‑ ‑mü ꞊dhɛ 'yaa gun n 'gü ꞊dhɛ 'mɛ 'kö 'ka bɔ Yesu 'ka bha ka ‑mɔɔ ‑bha 'nu 'ka "sɔng ‑zian ‑kan ka 'ko ‑dhɛ kö yöö 'to‑ ‑za ‑dɔ 'mɛ 'waa 'dhang bho‑ "dhiʋ̈ ‑a ‑nu ‑kuu "dhiʋ̈ ‑sü ꞊në‑ ‑bha.
1CO 6:7 ‑A kë ‑sü kö za ‑zian ‑zë ‑yö ‑da ka ꞊zinng 'gü ‑wɔn bha, ‑ya ‑zɔn ꞊dhɛ 'kii ꞊mɔɔ Atanna ‑bha "ta bha‑ 'sü ‑sü ‑bha ꞊kö. ‑A 'klɔɔ‑ ‑mü ꞊dhɛ "sanni bhi 'ö 'bha kë Yesu ‑bha mɛ 'ka bha 'i "wlü kö 'i 'dho i "tɛado ‑da ‑dhɛ 'gü ‑zian zë wo bha ‑oo, 'ö 'wɔn yaa 'kö‑ ‑kë i 'ka bha 'bhaa‑ 'kun ‑zë wo i ‑bha ꞊dhɛ? 'Kö 'zü 'ö ꞊ya i ‑ta ‑zian ꞊në‑ ‑bhö bha ‑oo, 'bhaa‑ 'kun i ‑bha ‑më ‑wɔn 'gü?
1CO 6:8 Kaa ‑zian ꞊në 'ka 'wɔn yaa kë sië ka "tɛabɔ ‑nu 'ka 'yö 'ka‑ ‑nu ‑ta ‑nu ‑bhö. 'Sa ‑a kë 'ka‑ wo "dhʋ̈ bha, ka‑ ‑kë 'mɛ ꞊wa kë ꞊dhɛ ka dheebhang ‑nu 'dhö Atanna ‑bha zian ‑ta bha ꞊në‑ ‑nu 'ka bha!
1CO 6:9 'Sa ka‑ 'wɔn dɔ 'kpakpadhö ꞊dhɛ 'wɔnyaakëmɛ ‑nu 'wii 'dho ‑da Atanna ‑bha ‑gblüdëdhɛkëdhɛ 'gü. 'Ka 'dho ka ‑dɩ ‑ta ma "wɛɛwɛɛ: ‑a 'wɔn‑ kë ka "yaan ꞊dhɛ ‑zuazëmɛ ‑nu oo, ꞊gebhɔ ‑dhɔkëmɛ ‑nu oo, ‑ziö mɛ nu ‑bha dhe ꞊kengmɛ "ɛɛn mɛ ‑nu ‑bha gɔn ꞊kengmɛ ‑nu oo, wo 'ko ‑nu ‑kun "nɔbhɔ 'ka ‑gɔɔn ‑nu oo,
1CO 6:10 ꞊kwaanmɛ ‑nu oo, zuë" ‑bhɔ ꞊naɔ ‑bha ‑mɛ ‑nu oo, we mü ‑dudu ‑nu oo, "dhidhɛyaamɛ ‑nu oo, mɛzëmɛ ‑nu bha 'wii 'dho ‑da Atanna ‑bha ‑gblüdëdhɛkëdhɛ 'gü.
1CO 6:11 'Sa 'pë 'ö mɛ 'bha ‑nu 'wo ka kpö 'gü ꞊dɛɛ 'wo gun‑ 'ka 'yö bha. "Kɛɛ 'yö Atanna ꞊ya ka "zu, 'yö ꞊ya kaa‑ 'wɔn yaa bho ka ‑bha, 'yö ꞊ya ka kë "slʋ̈ʋ̈slʋ̈ ö wëëdhö, 'yö ꞊ya ka ‑ya ö ‑bha ‑ya 'gü, 'yö ꞊ya ka ‑bha za dhi ka ‑bɔ kwa Dëmɛ Yesu Klisi 'ka ‑sü ‑wɔn 'gü. 'Sa 'wɔn ‑sɛngbɔ ‑nu "pɛpɛ 'ö‑ ‑kë ka ‑dhɛ "dhʋ̈ bha ‑ya ‑kë 'ö ‑bha 'Nii‑ "slʋ̈ʋ̈slʋ̈ bha ꞊në‑ ‑kɔ 'ka.
1CO 6:12 ꞊Ya 'go‑ 'dhɛ bha‑ 'gü, mɛ 'bha ‑nu ‑wo ka kpö 'gü 'wo‑ pö: «Mɛ ꞊ya bɔ Yesu 'ka, 'wɔn "ʋʋ 'wɔn 'ö ‑dhi mɛ ‑dhɛ 'mɛ‑ ‑mɔɔ ‑bha 'ö mɛ ‑ya ‑kë», ꞊iin, ‑yö ‑mɔɔ ‑bha 'nu 'ö ‑kë ꞊dhɛ ‑kɔ bha‑ 'dhö, "kɛɛ 'wɔn ꞊gban ꞊në‑ ꞊trɔɔn ‑së 'yaa kë mɛ ‑bha. ꞊Ya 'go yö ‑zë 'gü, aa" ꞊ni 'ö 'a ꞊mɔɔ‑ ‑bha ‑zianwo 'nu 'a n ‑dhidhɛwɔn ꞊gban ‑kë, "kɛɛ 'mii 'dho ꞊mɔɔ‑ ‑bha kö 'a n ‑dɩ ‑da pë "ʋʋ pë 'bha ‑gɔ ꞊dhuëngdhɛ ‑zë 'gü 'zü.
1CO 6:13 ꞊Ya 'go yö ‑zë 'gü, ka‑ ‑pö ‑nu wo ꞊dhɛ Atanna ‑yö ‑bhöpë ‑da mɛ "gblʋ̈ʋ̈dhɛ ꞊në‑ ‑dhɛ, 'yö mɛ "gblʋ̈ʋ̈dhɛ ‑da 'pö ‑bhöpë ‑dhɛ.» A‑ ‑pö ka ‑dhɛ ꞊dhɛ ‑yö "dhʋ̈ tɛan‑ 'ka, "kɛɛ pë ꞊plɛ bha Atanna ‑dho ‑a ꞊gban 'gü see‑. "Kɛɛ kwa ‑dhü 'kö Atanna ‑ya ‑da bha 'yii‑ ‑da ‑zua zë ‑sü ‑dhɛ. ‑Ya ‑da kwa Dëmɛ ꞊në ‑bha 'ka, 'yö kwa Dëmɛ ‑dɩ 'pö‑ ‑ya kwa ‑dhü bha‑ ‑mɛ 'ka.
1CO 6:14 Atanna do 'ö kwa Dëmɛ ‑bö 'ö go ga 'gü bha 'zü ꞊në dho kwa ‑bö 'pö 'ö 'kwa go ga 'gü ‑a ‑bha 'gügbɩɩdhɛ ‑bha.
1CO 6:15 "Ɛɛn 'yaa ka "yaan ꞊dhɛ 'ka bɔ Klisi 'ka kö 'ka ‑kɔ 'ö‑ ‑bha 'do 'do, 'ka kë ꞊dhɛ Klisi daɔ ‑nu 'wo‑ bha ꞊në‑ 'dhö bha ‑ee? ꞊Ya kë "dhʋ̈ mɛ‑ ‑mɔɔ ‑bha 'ö mɛ‑ Klisi daɔ ‑nu bha‑ "pɛan 'bha sü 'ö mɛ ‑ya ‑gla ‑zuadhe daɔ 'gü ‑ee? ‑Abin!
1CO 6:16 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'ö waa ‑zuadhe ‑a ‑nu ‑bha sɛɛ" 'dhö ‑kë do, kö wɛng ꞊wa kë mɛ ‑dhü do 'ka ꞊naa bha. ‑A ‑gɛn ‑mü ꞊dhɛ ‑yö ‑bɛn zë ‑sü 'ka Atanna ‑wʋ 'sëëdhɛ 'gü dhe waa‑ gɔn ‑a ‑nu ‑bu 'gü ꞊dhɛ: «꞊Ya kë "dhʋ̈ kö mɛ ꞊plɛ bha ꞊wa kë mɛ ‑dhü do ꞊në‑ 'ka bha.»
1CO 6:17 "Kɛɛ 'mɛ 'ö ‑kplü kwa Dëmɛ ‑bha kö wɛng ꞊wa kë do Atanna ‑bha "dhi 'gü ꞊naa bha, ('wɔn 'ö‑ ‑wɔn 'gü 'yö 'a‑ pö ꞊dhɛ mɛ 'yaa ꞊mɔɔ‑ ‑bha kö ‑yö Klisi daɔ 'sü kö ‑ya kë ‑zuadhe daɔ 'ka bha 'yö bha).
1CO 6:18 ‑A ‑kë "dhʋ̈ ‑sü ‑wɔn 'gü, ‑ka ꞊dua ‑zua zë ‑sü ‑gɔ! ‑A 'klɔɔ‑ ‑mü ꞊dhɛ 'wɔn yaa suu "pɛpɛ 'ö mɛ ya ‑kë ‑zua zë ‑sü ‑zë zian 'gü, 'yaa zun mɛ kwi ‑bha. "Kɛɛ mɛ "ʋʋ mɛ 'ö ö ‑gɛn ‑da ‑zua zë ‑sü 'gü, kö ‑yö 'wɔn yaa kë sië ö ‑dɩ ‑dhü ꞊në‑ 'ka bha.
1CO 6:19 "Ɛɛn 'kaa‑ 'wɔn ꞊në‑ dɔ ꞊dhɛ ka kwi 'gü ‑dhɛ bha Atanna ‑bha 'Nii‑ "slʋ̈ʋ̈slʋ̈ 'ö‑ nu ka ‑dhɛ 'ö ka 'gü bha‑ ‑yɛa ꞊në bha ‑ee? ‑A ‑kë "dhʋ̈ ‑sü bha‑ 'gü, ‑yö kë ka "yaan ꞊dhɛ 'kaa ka ‑dɩ ‑gɔ.
1CO 6:20 ‑A 'klɔɔ‑ ‑mü ꞊dhɛ "saa‑ 'ö Klisi ‑ya bho ka ‑wɔn 'gü bha‑ ꞊bhlëë ‑kë 'kpii‑ ‑kɔ "sinma 'yaa 'dhö. ꞊Dhɛ 'ö "dhʋ̈, ‑ka ka ‑dhü bha‑ 'kun ‑së kö Atanna 'tɔ‑ bhɔ‑ ‑bha.
1CO 7:1 ꞊Ya 'go‑ 'dhɛ 'kö bha‑ 'gü, 'wɔn 'ka 'sëëdhɛ bɔ n ‑dhɛ ‑a ‑wɔn 'gü bha ꞊në maa‑ ‑yɔ bɔ bha. 'Pë 'a dho‑ pö ka ‑dhɛ yö ‑mü ꞊dhɛ: ‑Yö ‑së kö gɔɔn‑ 'ya 'dho dhe 'sü.
1CO 7:2 "Kɛɛ ꞊dhɛ 'ö ‑kë ꞊dhɛ ‑zua zë ‑sü ꞊në ꞊ya 'sɔ bha, 'mɛ 'ö "dhʋ̈ ‑a dhe 'sü ‑sü "ɛɛn ‑a gwaan‑ 'kpɔ ‑sü fië‑ ‑dhö, kë "dhʋ̈ kö 'ka 'dho ‑da ‑zua zë ‑sü 'gü.
1CO 7:3 Mɛ ꞊plɛ 'ö ꞊wa bo wo 'ko 'sü ‑sü 'ka, ‑a ‑dhɛa ‑bha ꞊dhɛ 'mɛ 'ö "dhʋ̈ ‑a ‑bha 'ö ‑gban ‑bha ‑ya kë ö kë ‑kɔ ‑ta. Kö gɔɔn‑ 'ö 'dhö 'wɔn 'ö‑ ‑wɔn 'gü 'yö‑ ‑bha dhebhɔ ‑ya ‑dhɛ 'ö ‑gɔn, kö ‑ya 'gü ‑wɔn kë‑ ‑dhɛ. Kö dhebhɔ ‑dɩ 'pö ‑ya kë ꞊dhɛ ‑kɔ do bha‑ 'dhö.
1CO 7:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ dhebhɔ 'ö ꞊ya bo gwaan‑ ‑zë 'kpɔ ‑sü 'ka, kö‑ ‑dhü 'yaa‑ ‑dɩ ‑bha 'ka 'zü tongtongdhö kö yöö 'pë 'ö ‑dhi ‑dhɛ ‑a kë‑ 'ka. Kö‑ ‑dhü ꞊ya kë‑ ‑bha gɔn ꞊në‑ ‑bha 'ka. Gɔɔn‑ ‑dɩ 'pö, ‑a ‑dhɛ 'yaa ‑bha ꞊dhɛ 'wɔn 'ö ‑dhidhɛ ‑ya kë ö ‑dhü 'ka, ‑a 'klɔɔ‑ ‑mü ꞊dhɛ ꞊ya bo dhe ‑zë ‑sü ‑sü 'ka kö‑ ‑dhü ꞊ya kë‑ ‑bha dhebhɔ ꞊në‑ ‑bha 'ka.
1CO 7:5 ‑A ‑kë "dhʋ̈ ‑sü bha‑ 'gü, 'ka 'dho "kan ka 'kwëë‑ 'ö 'mɛ 'ö "dhʋ̈ 'ö ‑wɔ ö ‑dɩ ‑ta, kö 'yii kë "tʋ̈ng 'ka‑ ‑ya 'kwëë‑ ‑kë kö 'ka‑ 'sü 'ka bhɛa" 'ka Atanna ‑dhɛ ‑a 'ka. ꞊Ya kë ꞊dhɛ "tʋ̈ng 'ka‑ ‑ya 'kwëë‑ bha ꞊ya bo ziö ‑sü 'ka, kaa‑ sɛɛ" ‑yö kë do 'zü ‑deewo, kë "dhʋ̈ kö 'kii ꞊mɔɔ ka zuë" ‑kun ka ‑bha ‑sü ‑bha, kö Sɔtraan 'ya 'dho "kpënng‑ kë ka ‑gɔ ('ö 'ka ‑da Atanna "dhiʋ̈ ꞊dhɛ ‑kɔ bha‑ 'dhö).
1CO 7:6 ‑A pö 'a‑ wo "dhʋ̈ bha 'yii kë 'tɔng‑ 'ka kö 'a‑ ‑ya. ‑Yö ‑gleng ꞊në‑ 'ka 'yö 'a‑ ‑da ka ‑bha.
1CO 7:7 Mang ‑zian ‑zë ‑yö n "piʋ̈ 'nu ꞊dhɛ dhe 'yaa n ‑gɔ ‑kɔ 'ö‑ 'gü ya mɛ ꞊gban ‑wo kë ꞊dhɛ n 'dhö. "Kɛɛ 'mɛ 'ö "dhʋ̈ ‑a ‑bha gbaɔdhe 'ö Atanna ‑ya ‑kë ‑gɔ ‑yö ‑dhö. Mɛ 'bha ‑bha 'dhö ‑kɔ 'bha 'gü, kö mɛ 'bha ‑dɩ 'pö‑ ‑bha ‑yö ‑kɔ "wɛɛ 'bha 'gü.
1CO 7:8 "Kɛɛ 'mɛ 'kö wo ‑zë 'wii dhe 'sü ꞊kö, "ɛɛn 'ö 'wii gwaan‑ 'kpɔ ꞊kö "ɛɛn 'zü 'ö ꞊wa ꞊gɛan bho, wo ‑zë a ‑dhio ‑dɔ ‑nu ‑ta, ꞊dhɛ ‑a ‑nu ‑to ꞊dhɛ n 'dhö ‑sü fië‑ ‑dhö.
1CO 7:9 "Kɛɛ ꞊ya kë 'zü ꞊dhɛ ‑a ‑nu ‑kɔ 'yii ꞊mɔɔ‑ ‑nu zuë" ‑kun wo ‑bha ‑sü ‑bha, ‑wo woo‑ dhe 'sü wo, "ɛɛn ‑wo woo‑ gwaan‑ 'kpɔ wo. ‑A 'klɔɔ‑ ‑mü ꞊dhɛ dhe 'sü ‑sü, "ɛɛn gwaan‑ 'kpɔ ‑sü ‑zë fië‑ ‑dhö zuëdhiʋ̈tɛɛ yaa 'gü yaa ‑ya mɛ ‑bha ‑sü ‑zë ‑bha.
1CO 7:10 'Mɛ 'ö ꞊wa bo bɔ ‑sü 'ka Yesu 'ka, 'ö dhe 'dhö‑ ‑nu ‑gɔ "ɛɛn 'ö 'wo gwaan‑ ‑bha, 'wɔn 'a‑ 'tɔng‑ dɔ‑ ‑nu ‑dhɛ ('ö mang ‑zian ‑zë 'mii‑ dɔ "kɛɛ 'ö kwa Dëmɛ ꞊në‑ dɔ), yö ‑mü ꞊dhɛ kö dhebhɔ 'ya 'dho 'go gwaan‑ ‑bha tongtongdhö.
1CO 7:11 ꞊Ya kë 'zü ꞊dhɛ ꞊ya gwaan‑ "kan, 'ya 'dho gwaan‑ ‑dee 'kpɔ. Gwaan‑ 'kpɔ ‑dhɔ ‑zë ꞊ya kë‑ ‑bha, ‑a ‑dhɛa ‑bha ꞊dhɛ ‑yö 'dho ö ‑gɔn zii ꞊në‑ ꞊kee‑. Kö gɔɔn‑ ‑dɩ 'pö 'ya 'dho ö ‑bha dhebhɔ bho "bü tongtongdhö.
1CO 7:12 ꞊Ya 'go yö ‑zë 'gü, mɛ ‑kpɛa 'wo to, ‑dhio 'dhɛ 'a‑ dɔ sië‑ ‑nu ‑ta ya (mang ꞊dede ꞊në 'a yö ‑zë dɔ sië, kwa Dëmɛ 'yaa ‑mü), ꞊ya kë ꞊dhɛ 'mɛ 'ö 'dhang bho Yesu ‑wɔn "dhiʋ̈, dhebhɔ 'ö 'yaa 'dhang bho‑ ‑wɔn "dhiʋ̈ ꞊ya kë‑ ‑gɔ, kö‑ dhebhɔ 'kö bha yö ‑zë 'yii "kan gɔɔn‑ bha‑ ‑bha, ‑a ‑dhɛ 'yaa‑ ‑bha ꞊dhɛ ‑a ‑mɛ ‑ya dhebhɔ bha‑ bho "bü.
1CO 7:13 ‑Kɔ do bha‑ 'gü 'zü, ꞊ya kë ꞊dhɛ dhebhɔ 'ö 'dhang bho Yesu ‑wɔn "dhiʋ̈ ꞊ya kë gɔɔn‑ 'ö 'yaa 'dhang bho‑ ‑wɔn "dhiʋ̈ ‑a ‑gɔ, kö gɔɔn‑ 'kö bha 'yii‑ dhebhɔ bha‑ bho "bü, yö ‑zë 'ya 'dho bo‑ 'ka.
1CO 7:14 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ dhemɛdë suu 'ö "dhʋ̈ bha kö ꞊ya ꞊yɔɔn Atanna "sɔɔ ‑a ‑bha dhebhɔ 'saa‑ 'gü ‑a ‑kë ‑a ‑bha dhebhɔ 'ka ‑sü 'gü. ‑Kɔ do bha‑ 'gü, dhebhɔ 'ö yöö ‑dɩ 'pö 'yaa 'dhang bho Yesu ‑wɔn "dhiʋ̈, ‑yö ‑yɔɔn Atanna "sɔɔ ‑a ‑kë gɔɔn‑ 'ö 'dhang bho‑ "dhiʋ̈ ‑a ‑bha dhe 'ka ‑sü ‑wɔn ꞊në‑ 'gü. 'Yaa yö ‑zë 'ka 'nu kö Atanna ‑bha 'dhuë‑ 'yii 'dho‑ ‑nu ‑bha 'në ‑nu 'kun ‑a wëëdhö, "kɛɛ 'sa kö yö ‑zë ‑yö ö ‑kɔ ‑ya ‑sü 'ka‑ ‑nu ‑bha.
1CO 7:15 ꞊Ya kë 'zü ꞊dhɛ mɛ ‑gaɔ ꞊plɛ bha‑ mɛ 'dhɛ 'ö 'yaa 'dhang bho Yesu ‑wɔn "dhiʋ̈ ꞊në‑ "piʋ̈ ꞊dhɛ 'ö "kan ö "tɛado ‑bha aa, ‑ɛɛ! kö zian‑ "puu yö ‑zë 'gü. ꞊Ya kë yö ‑zë 'gü "dhʋ̈, kö mɛ 'dhɛ 'ö bɔ Yesu 'ka bha‑ ‑kpla ‑gɛn 'yaa 'dhö. ‑A 'klɔɔ‑ ‑mü ꞊dhɛ Atanna ‑yö kwa ‑dhɛ kö 'kwa 'go zuëdhiʋ̈tɛɛ ꞊në‑ 'gü kö 'kwa ‑tosɛa kë kwa 'flëë‑ 'gü.
1CO 7:16 Pë "pɛpɛ 'a‑ pö "dhʋ̈ bha‑ 'klɔɔ‑ ‑mü ꞊dhɛ 'kö dhebhɔ i ‑bha gɔn dho dha bhi ꞊në i 'ka 'dee‑ 'wɔn dɔ? "Ɛɛn 'kö gɔɔn‑ i ‑bha dhebhɔ dho dha bhi ꞊në i 'ka 'zü, 'dee‑ 'wɔn dɔ?
1CO 7:17 ꞊Ya 'go yö ‑zë 'gü, ‑dhio 'dhɛ 'a‑ dɔ ka ‑ta yö ‑mü ꞊dhɛ kö ‑kɔ 'ka‑ 'gü 'do 'do, 'mɛ 'ö "dhʋ̈ Atanna 'dhö i ‑dhɛ kö i ‑kɔ 'ö‑ ‑bha bha 'i 'to‑ ‑bha. 'Tɔng‑ 'a‑ dɔ Atanna ‑bha 'kɔdhigümɛ ‑nu ‑dhɛ 'a ‑ziö 'ka 'yö bha.
1CO 7:18 'Mɛ 'ö Atanna 'dhö i ‑dhɛ kö 'bha 'go 'gbannë 'gü 'nu ꞊dhɛ Zuifö ‑nu 'dhö, ‑bhö 'to ‑kɔ bha‑ 'gü 'bha 'dho‑ pö 'zü ‑deewo bhii kë ‑kplëë 'ka. 'Mɛ 'ö Atanna ‑yö i ‑dhɛ kö i ‑tun ‑kplëë 'ka 'pö, ‑bhö 'to "dhʋ̈, 'bha 'dho‑ pö ꞊dhɛ ꞊dhɛ 'ö ꞊ya kë "dhʋ̈ bhii 'dho 'gbannë 'gü.
1CO 7:19 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔn 'ö "gbɩɩ‑ ‑bɔ Atanna 'ka ‑sü bha‑ 'gü 'yaa ‑mü ‑go 'gbannë 'gü ‑sü "ɛɛn ‑to ‑kplëë 'ka ‑sü ‑zë 'ka. Yö ‑mü ‑a ‑bha 'tɔng‑ ‑nu ꞊bhlëë ‑ya ‑sü ꞊në‑ 'ka.
1CO 7:20 ‑A ‑dhɛa ‑bha ꞊dhɛ 'mɛ 'ö "dhʋ̈ Atanna 'dhö‑ ‑dhɛ kö ‑yö ‑kɔ 'ö‑ ‑bha 'yö 'to‑ ‑bha.
1CO 7:21 Atanna 'dhö 'mɛ 'ö i ‑dhɛ kö i ꞊dhuëng 'ka, ‑a ‑zʋgɔndhe 'ya 'dho kë i ‑bha. ꞊Ya kë 'zü ꞊dhɛ i ‑da i ‑dɩ ‑kɔ ‑bha "slë ‑zë ꞊ya ꞊slɔɔ, 'bha 'dho ‑kpla, ‑bhö ‑a kë kö i ‑da i ‑dɩ ‑kɔ ‑bha.
1CO 7:22 'Pë 'ö ‑kë 'yö 'a‑ pö "dhʋ̈ bha‑ 'klɔɔ‑ ‑mü ꞊dhɛ 'mɛ 'ö to ꞊dhuëng 'ka 'ö kwa Dëmɛ ‑ya ‑dhɛ kö ‑yö bɔ ö 'ka, kö‑ ‑mɛ ‑bha ꞊dhuëngdhɛ ꞊ya yën ꞊në‑ wo kwa Dëmɛ 'saa‑ 'gü bha. ‑Kɔ do bha‑ 'gü 'pö 'mɛ 'ö Klisi ‑ya ‑dhɛ kö 'yaa ꞊dhuëng 'ka, kö ꞊ya kë ꞊në‑ wo‑ ‑bha ꞊dhuëng 'ka 'pö bha.
1CO 7:23 'Pë 'ö Atanna ‑yö ka ‑gɔ ‑ta dhɔ‑ 'ka bha‑ ꞊bhlëë‑ 'kpii‑ ‑ziisü. ‑A ‑kë "dhʋ̈ ‑sü bha‑ 'gü, 'ka 'dho‑ pö 'ka ꞊dhuëngdhɛ kë mɛ "bhɩɩ‑ ‑nu ‑zë ‑dhɛ.
1CO 7:24 ‑Kɔ 'ö Atanna ‑yö ka ‑dhɛ 'ö 'ka bɔ‑ 'ka kö ka‑ ‑bha, 'mɛ 'ö "dhʋ̈ ‑yö ‑tosɛa kë ö ‑bha ‑kɔ 'gü n dheebhang ‑nu.
1CO 7:25 ‑A 'dhɛ 'ö ‑gban 'mɛ 'waa gwaan‑ ‑bha "ɛɛn 'ö dhe 'yaa‑ ‑nu ‑gɔ ‑a ‑nu ‑wɔn ‑bha, kwa Dëmɛ 'yii 'tɔng‑ 'bha dɔ n "dhi kö 'a‑ dɔ‑ ‑nu ‑dhɛ, n dheebhang ‑nu. "Kɛɛ n ‑bha kö n ‑zʋ "piʋ̈ a ‑dho pö ‑zë wo, ‑a 'klɔɔ‑ ‑mü ꞊dhɛ 'mii kë "wlaa‑ mɛ 'ö 'waa‑ ‑wʋ ‑ya 'klɔɔ‑ "dhiʋ̈ ‑a 'ka ‑gasitɛ 'ö Atanna ‑ya ‑kë n ‑dhɛ bha‑ ‑wɔn 'gü.
1CO 7:26 ꞊Dhɛ 'ö ‑kë ꞊dhɛ "tʋ̈ng 'ö nu sië bha ‑yö ‑dho kë "gbɩɩ‑ bha, n ‑bha 'ö n 'gü ‑së yö ‑mü ꞊dhɛ kö gɔɔn‑ 'i 'dhö, 'i ‑kɔ 'ö‑ ‑bha kö 'i 'to‑ ‑bha.
1CO 7:27 'Kö ꞊ya kë ꞊dhɛ dhe 'dhö i ‑gɔ, kö 'bha 'dho‑ bho "bü. 'Kö ꞊ya kë 'zü ꞊dhɛ dhe ꞊në 'yaa i ‑gɔ, kö 'bha 'dho‑ pö 'i‑ 'sü.
1CO 7:28 'Kö 'zü maa‑ pö "dhʋ̈, "kɛɛ 'mɛ 'bha dhe 'sü kö 'bhii 'wɔn yaa kë tongtongdhö, ‑ɛɛ 'mɛ ꞊ya gwaan‑ 'kpɔ 'zü kö 'yii 'wɔn yaa kë tongtongdhö. "Kɛɛ ‑a pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'yaa n "piʋ̈ ꞊në‑ wo ꞊dhɛ zuëdhiʋ̈tɛɛ 'ö "kpʋng ꞊taa yö bha ‑yö 'ma‑ ‑nu ‑bha. ‑Yö n "piʋ̈ ꞊dhɛ 'a‑ ‑nu dha yö ꞊në‑ ‑gɔ.
1CO 7:29 N dheebhang ‑nu, 'ma‑ pö "dhʋ̈ kö a‑ ‑pö ‑tosɛa 'ö "kpʋng ꞊taa yö bha‑ "dhiʋ̈ 'to "tʋ̈ng ꞊në 'yaa ꞊gblɛɛn 'zü. ‑A ‑wɔn 'gü ꞊ya 'go ꞊dɛɛ 'gü, kö 'mɛ 'ö dhe 'dhö‑ ‑nu ‑gɔ ‑wo kë ꞊dhɛ dhe 'yaa mɛ ‑gɔ, kö‑ zuëdhiʋ̈tɛɛ 'ya 'dho kë‑ ‑nu ‑bha 'ö ‑ziö mü. ("Kɛɛ kö ‑wo kwa Dëmɛ ‑wɔn bha ꞊në‑ kë woo‑ ‑tosɛa ‑gɔ 'ka).
1CO 7:30 Kö 'mɛ 'wo "gbʋ bɔ sië ‑wo kë ꞊dhɛ 'pë 'waa "gbʋ bɔ sië‑ 'dhö, kö 'mɛ 'ö‑ ‑nu ꞊nii 'dhö ‑da sië ‑wo kë ꞊dhɛ 'pë‑ ‑nu ꞊nii 'yaa ‑da sië‑ 'dhö. Kö 'mɛ ꞊wa pë 'dhɔ 'ö‑ ‑nu ‑gɔ kö ‑wo kë ꞊dhɛ 'mɛ 'pë 'wo‑ dhɔ bha 'yaa‑ ‑nu ‑gɔ ‑a 'dhö.
1CO 7:31 Kö 'mɛ 'wo wo "dhia bho sië "kpʋngtaapë ‑nu 'gü ‑wo kë ꞊dhɛ 'pë ꞊wa wo "kian 'kpɔ‑ 'ka ‑a 'dhö, ‑a ‑gɛn ‑mü ꞊dhɛ "kpʋngtaadhɛ ya mɛ ꞊yaa‑ ‑ga "sɛnngdhö kwa dɔ ‑kɔ ya‑ 'gü, mɛ ‑ya 'wɔn ‑dɔ ꞊dhɛ ‑yö 'dho sië ö "dhiʋ̈todhɛ 'gü.
1CO 7:32 'Sa a‑ ‑kë "dhʋ̈ kö zuëdhiʋ̈tɛɛ ꞊gban "pɛpɛ ꞊në ‑yö 'go ka ‑bha. ‑A 'klɔɔ‑ ‑mü ꞊dhɛ 'mɛ 'ö dhe 'yaa‑ ‑gɔ ‑yö ‑ya kwa Dëmɛ ‑gɔ ‑wɔn ‑nu ꞊në ‑zʋgɔndhe ‑ta. Zian 'ö dho bɔ‑ 'ka kö ö "dhia‑ 'ma kwa Dëmɛ ꞊në‑ 'gü ꞊në 'ö‑ ‑dhɛ ‑mɔɔ.
1CO 7:33 "Kɛɛ 'mɛ 'ö dhe 'dhö‑ ‑gɔ, ‑yö ‑ya "kpʋng ꞊taa ‑wɔn ‑nu ꞊në‑ ‑fɛɛ ‑ta, ‑kɔ 'ö dho kë‑ 'ka kö ö "dhia‑ 'ma ö ‑bha dhebhɔ 'gü ꞊në 'ö‑ ꞊mɔɔ.
1CO 7:34 'Sa ꞊ya kë "dhʋ̈ kö‑ ‑mɛ ‑yö ‑kplasü 'ka 'wɔn ꞊plɛ ꞊gban ꞊në‑ 'gü bha. ‑Kɔ do bha‑ 'gü, dhebhɔ "ɛɛn 'nëdhiëngnë 'ö 'yaa gwaan‑ ‑bha, ‑kɔ 'ö dho bɔ‑ 'ka kö ö ‑wɔn "dhia‑ 'ma kwa Dëmɛ 'gü ꞊në 'ö‑ ‑dhɛ ꞊mɔɔ. ‑A ‑gɛn ‑mü ꞊dhɛ kö ‑ya "piʋ̈ ꞊dhɛ 'ö ö ‑kɔ waa‑ ö ‑gɛn ꞊gban ꞊në‑ "kplëng bho‑ ‑bha do, kë "dhʋ̈ kö 'ö "dhia‑ 'ma‑ 'gü ‑kɔ ꞊gban ‑kɔ ꞊gban 'gü. "Kɛɛ mɛ 'dhɛ 'ö gwaan‑ ‑bha ‑yö ö ‑zʋ ‑gɔn "kpʋng ꞊taa ‑wɔn ‑nu ꞊në‑ 'ka, ‑kɔ 'ö dho‑ kë‑ 'ka kö ö ‑dhɔ ‑yö ö ‑bha gɔn kë 'yö‑ ‑zian ꞊mɔɔ.
1CO 7:35 A‑ ‑pö "dhʋ̈ kö ‑yö kë ka ꞊në ka ‑gɔ ‑së, 'yii kë "kpënng‑ ‑kë ka ‑gɔ ‑sü 'ka. A‑ ‑kë "dhʋ̈ kö 'ka ka "tʋ̈ng 'go 'wɔn ꞊gban ‑wɔn ꞊gban ꞊në‑ 'gü kö ka "ta ‑kɔ ‑yö dhi kwa Dëmɛ ‑bha zian bha‑ ‑ta, kö 'ka 'to ‑kplü ‑sü 'ka‑ ‑bha kpɛnngkpɛnngdhö.
1CO 7:36 ‑A 'dhɛ 'ö ‑gban 'nëglɔɔn ‑nu ‑bha ‑bha, ꞊ya kë ꞊dhɛ mɛ ꞊ya ꞊slɔɔ‑ ‑nu kpö 'gü kö dhe 'ö yöö‑ 'sü 'ö dɔ sië‑ ‑gɔ bha, ‑kwaa ‑zü ‑sü ꞊ya kë‑ 'gü 'ya‑, ‑a "sika ꞊ya kë‑ 'gü, ‑a 'dhang bho ‑sü 'yii kë‑ "dhiʋ̈ ꞊dhɛ 'ö ‑kɔ ‑dho ꞊mɔɔ ö zuë" ‑kun ö ‑bha ‑sü ‑bha, ꞊yaa‑ pö ö ‑dho ö dhi "yɔɔ bha‑ 'sü aa, ‑ɛɛ! Kö ‑ya ‑kë ‑së, ‑wo wo 'ko 'sü. ꞊Yaa‑ kë "dhʋ̈ kö 'yii ‑da Atanna "dhiʋ̈.
1CO 7:37 "Kɛɛ 'yii kë ‑zë wo "dhʋ̈, ꞊ya kë ꞊dhɛ ‑a 'nëglɔɔnnë 'dhang bho ‑sü ꞊ya kë‑ "dhiʋ̈ 'kpakpadhö ꞊dhɛ 'ö ‑mɔɔ ‑bha 'ö ö "klʋ kun, ‑a "sika 'yii kë‑ 'gü, ꞊yaa‑ pö 'yii 'dho dhe 'sü, kö ‑ya ‑kë ‑së 'ö ziö mü. "Kɛɛ ‑yö 'kun bho‑ ‑mɛ ꞊në‑ 'gü kö ‑ya 'kun ö 'nii‑ 'ka, 'ya 'dho kë mɛ ‑wʋ "dhiʋ̈ ‑wɔn 'ka.
1CO 7:38 ꞊Ya kë "dhʋ̈, kö 'mɛ 'ö ö dhiyɔɔ sü ‑ya ‑kë ‑së. "Kɛɛ 'mɛ 'yii ö ‑bha 'sü 'pö kö ‑ya ‑kë ‑së 'ö ‑ziö mü.
1CO 7:39 ‑Ya 'go‑ 'dhɛ bha‑ 'gü, dhebhɔ suu "ʋʋ suu 'ö gwaan‑ ‑zë ‑bha kwa Dëmɛ ‑bha zian ‑ta, ‑a ‑bha gɔn 'yii ga ‑zë wo ꞊kö kö ‑yö ‑tun ‑kpla 'gü. "Kɛɛ ‑a ‑bha gɔn ꞊ya bo ga ‑sü ‑zë 'ka kö ‑kpla ꞊ya 'go‑ ‑bha. ‑A 'klɔɔ‑ ‑mü ꞊dhɛ kö ‑yö ‑mɔɔ ‑bha ꞊tɔn 'ö ‑ya mɛ "ʋʋ mɛ 'ö ‑dhidhɛ ‑a ‑gɔ, "ni kö‑ ‑mɛ ‑yö ‑bhɛa Atanna ‑dhɛ ‑mɛ ‑zë 'ka.
1CO 7:40 "Kɛɛ ꞊ya 'to ma ‑zë n ‑bha ‑bha, ‑a ‑mɛ ‑todhʋ̈sü 'ö 'yaa gwaan‑ ‑dee 'kpɔ ‑a fië‑ ‑dhö. 'Sa ‑yö n 'gü ꞊dhɛ Atanna ‑bha 'Nii‑ "slʋ̈ʋ̈slʋ̈ bha ‑yö mang ‑dɩ 'pö n 'gü.
1CO 8:1 ‑A 'dhɛ 'ö ‑gban dhɛɛ" 'dhɛ 'ka‑ kpɔ n ‑gɔ 'ö ‑gban wü 'wo‑ zë ‑dhɔkëpë ‑nu ‑dhɛ ‑a ‑bhö ‑wɔn ‑bha bha‑ ꞊yɔɔ 'ö maa bɔ ka ‑gɔ yö ‑mü ꞊dhɛ: 'Wɔndɔmɛ ‑mü mɛ ꞊gban kwa 'ka "dhʋ̈ tɛan‑ 'ka ꞊dhɛ ‑kɔ 'ka‑ pö‑ 'ka bha‑ 'dhö. "Kɛɛ mɛ ‑dɩ ‑sü 'wɔndɔmɛ 'ka ‑sü bha ‑yö ‑dɩ ‑sü 'kpii‑ ꞊në‑ ‑da mɛ 'gü, "kɛɛ ‑dhɔ ‑zë ‑yö mɛ ‑bha ‑zʋ ‑yö Atanna ‑dhɛ ‑sü 'bha ꞊në‑ ‑da 'gü 'ö dho‑ 'ka.
1CO 8:2 ‑A ‑wɔn 'gü, mɛ ‑zian 'ö ö ‑zʋ 'gɔn sië ꞊dhɛ yö ‑zë ö 'wɔn ‑dɔ, "kɛɛ kö‑ ‑mɛ 'yii‑ dɔ kö ꞊dhɛ ‑kɔ 'ö‑ ‑dhɛ 'dhö‑ ‑bha 'nu ꞊dhɛ ‑ya dɔ‑ 'ka ‑a 'dhö.
1CO 8:3 "Kɛɛ 'mɛ 'ö Atanna ‑zë ‑dhɔ ‑ya ‑kë, ‑ya ‑mɛ ‑dɔ.
1CO 8:4 'Kwa zun ‑dhɔkëpë ‑nu ‑wɔn ‑bha ꞊tɔn. 'Pë 'a dho‑ pö ka ‑dhɛ 'wɔn bha‑ 'gü yö ‑mü ꞊dhɛ mɛ ꞊gban kwa‑ 'wɔn ‑dɔ 'kpakpadhö ꞊dhɛ ‑dhɔkëpë ‑nu 'wo "kpʋng ꞊taa bha "wlaapë ‑nu ‑mü. ꞊Dhɛ Atanna ‑zë ‑yö "dhʋ̈ do.
1CO 8:5 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'kö 'zü pë 'bha ‑nu ꞊wa ꞊slɔɔ "kpʋngtaadhɛ ya‑ 'gü "ɛɛn dhang‑ 'gü ‑dhɛ ‑nu 'gü kö mɛ "bhɩɩ‑ ‑nu ‑wa ‑dhɔkë ꞊dhɛ Atanna 'dhö, 'kö 'zü 'wo ‑kë 'gbɛ ‑kɔ "ʋʋ ‑kɔ 'ö‑ 'gü, 'sa pë ‑nu 'wo‑ ‑nu ‑dhɔkë "dhʋ̈ bha waa‑ mɛ ‑gɔdhiʋ̈mɛ ‑nu bha ‑wo ‑dhö "dhʋ̈ tɛan‑ 'ka,
1CO 8:6 "kɛɛ yö ‑zë ꞊gban 'gü, kwa ‑zë kwa ‑bha Atanna ‑yö do, Atanna 'ö pë ꞊gban "pɛpɛ suu ‑da bha ꞊në kwa Dë 'ka, yö ꞊në 'kwa ‑ya ‑sü 'ka‑ ‑bha ‑ya 'gü, kwa Dëmɛ ‑yö "dhʋ̈ 'pö do, yö ‑mü Yesu Klisi 'ö‑ ‑kɔ "gblʋʋ 'dhö pë "pɛpɛ 'ö Atanna ‑ya ‑da ‑a ꞊gban 'ka, 'ö 'kwa ‑tosɛa kë sië‑ 'saa‑ 'gü bha ꞊në‑ 'ka.
1CO 8:7 "Kɛɛ ‑a 'wɔndɔdhe suu bha 'yaa mɛ ꞊gban ‑gɔ. Mɛ 'bha ‑nu ‑wo mü 'ö ꞊wa ‑dhɔkëpë ‑nu ‑wɔn 'gü dɔ 'nu ‑blɛɛsü ‑ziisü. ‑A ‑wɔn 'gü, ꞊wa 'dhang bho kwa Dëmɛ Yesu ‑wɔn "dhiʋ̈ "kɛɛ yö ‑zë ꞊gban 'gü, wü 'wo‑ zë ‑dhɔkëpë ‑nu ‑bha bha 'wo‑ ‑bhö sië ‑yö ‑bhɔ ‑nu 'gü "saapë ‑bha, ꞊ya kë "dhʋ̈ 'yö ‑kë ‑nu 'gü ꞊dhɛ 'wa ‑da Atanna "dhiʋ̈, 'yö‑ ‑nu zuë" 'yaa 'waanu ‑a ‑bhö ‑sü 'gü, 'yö "suʋ̈ 'dhö ‑kë ‑nu 'gü.
1CO 8:8 'Sa ‑bhöpë ‑zian 'ö "dhʋ̈ kö ‑yö kë ꞊dhɛ 'mɛ 'ö ꞊yaa‑ ‑bhö ‑ya ‑mɛ ‑wɔn "dhia ‑ma Atanna 'gü ‑sü 'bha ꞊në‑ ‑da 'gü 'yaa ‑mü. 'Kwa‑ ‑bhö, kwa 'bha 'yaa ‑da ‑ta, "ɛɛn 'kwii‑ ‑bhö, kwa 'bha 'yaa "kan‑ ‑ta. ‑Kɔ do 'kwa‑ ‑bha 'yö 'kwa dho 'to‑ ‑bha Atanna wëëdhö.
1CO 8:9 ‑A ‑kë "dhʋ̈ ‑sü bha‑ 'gü, mɛ 'dhɛ ka ‑zë "saapë 'yaa ka "kian 'ka 'zü bha ‑kaa kë ka 'suan‑ 'ka kö 'ka 'dho 'mɛ 'wo ‑tun "saapë ‑kian 'gü bha‑ ‑nu kë ‑da Atanna "dhiʋ̈ ‑mɛ 'ka.
1CO 8:10 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ bhi 'ö bhi ‑zë 'i i ‑dɩ 'gü pë dɔ ‑mɛ 'ka, 'ö "saa‑ pë ‑bhö ‑sü "suʋ̈ 'yaa i 'gü bha, ‑a "suʋ̈ 'dhö mɛ 'kö‑ 'gü ꞊ya i yö kö i wü ‑bhö sië ꞊gebhɔ ‑kɔ 'gü kö yöö‑ ‑bhö 'pö "kɛɛ 'sa kö yö ‑zë ‑ya ‑bhö "suʋ̈ 'ka, kö ‑yö ö ‑zʋ 'gɔn sië ꞊dhɛ 'ya ‑da Atanna "dhiʋ̈.
1CO 8:11 ꞊Ya kë "dhʋ̈ kö i dheebhang 'ö‑ "kian ‑bhö ‑sü "suʋ̈ 'dhö ‑tun 'gü bha‑ 'gü yöö see‑ Atanna wëëdhö i ‑bha i ‑dɩ ‑sü pë dɔ ‑mɛ 'ka ‑sü bha‑ ‑wɔn 'gü, 'sa kö Klisi ‑yö ‑ga 'pö yö ꞊në‑ ‑wɔn 'gü.
1CO 8:12 ‑Gleng 'ö‑ suu 'dhö bha 'mɛ 'i‑ ‑kë i dheebhang 'ö "saa‑ pë ‑bhö ‑sü "suʋ̈ 'dhö ‑tun 'gü ‑a 'ka, kö‑ ‑mɛ ‑yö zun zü 'ka, kö i‑ ‑kë Klisi ꞊në‑ 'ka bha.
1CO 8:13 'Wɔn 'ö‑ ‑wɔn 'gü 'yö mang Pɔdhö ‑mɛ ‑zë 'a dho n bo ‑bhöpë suu 'bha 'ö mü, 'ö 'ma‑ ‑bhö 'ö dho n dheebhang zun zü 'ka (Atanna ‑bha zian ‑ta) bha‑ ‑bhö ‑sü 'ka bha 'yö bha. 'Mii 'dho wü suu bha‑ ‑bhö yö ꞊në‑ ‑wɔn 'gü tongtongdhö kë "dhʋ̈ kö 'ma 'dho kë n dheebhang ‑pö ‑mɛ 'ka.
1CO 9:1 "Ɛɛn ‑yö ka 'gü ꞊dhɛ 'ma‑ kë "dhʋ̈ kö 'maa ꞊mɔɔ ꞊në‑ wo‑ ‑bha 'nu kö 'a‑ ‑bhö ‑ee? ‑Abin! Yesu ‑bha bɔmɛ ‑mü n 'ka! N "yanga ꞊plɛ 'ö n ‑gɔ ‑bha ya ‑yö kë ‑kpan kwa Dëmɛ Yesu bha‑ ‑bha! ꞊Ya 'go mü, kaa ꞊dede ‑zian 'ka bha ꞊në 'ka n ‑kɔ "gblʋʋ 'ka kwa Dëmɛ ‑bha zian ‑ta!
1CO 9:2 'Kö 'zü ꞊ya kë ‑zianwo ꞊dhɛ mɛ 'bha ‑nu 'dhang bho ‑sü 'yaa n "dhiʋ̈ ꞊dhɛ Yesu ‑bha bɔmɛ 'dhö, "kɛɛ ka ‑zë ‑a ‑dhɛa ‑bha ꞊dhɛ 'ka n dɔ‑ ‑bha. ‑A 'klɔɔ‑ ‑mü ꞊dhɛ ka ꞊në 'ka ꞊dhɛ n ‑kɔ "gblʋʋ 'dhö kwa Dëmɛ ‑bha zian ‑ta ka ‑bha 'dhang ‑bho ‑a "dhiʋ̈ ‑sü 'gü. ꞊Ya kë "dhʋ̈ kö ka ‑zë ‑a ‑dhɛa ‑bha ꞊dhɛ 'ka n dɔ ꞊dhɛ ‑a ‑bha bɔmɛ 'dhö.
1CO 9:3 'Pë 'a dho‑ pö 'mɛ 'waa 'dhang bho n ‑kë Yesu ‑bha bɔmɛ 'ka ‑sü "dhiʋ̈ bha‑ ‑nu ‑dhɛ 'yö bha.
1CO 9:4 "Ɛɛn 'yaa ka 'gü ꞊dhɛ a ‑mɔɔ ‑bha 'nu 'pö 'a n ‑bhöpë waa‑ n müpë ‑gbadhɛ Atanna ‑bha mɛ ‑nu ‑gɔ 'pö ꞊dhɛ mɛ ‑kpɛa 'dhö ‑ee?
1CO 9:5 A ‑mɔɔ ‑bha 'nu 'pö 'a kwa ‑bɔ kwa Dëmɛ 'ka "yɔɔ ‑nu bha‑ 'bha sü dhe 'ka 'ö dho n dɔ "ta 'gü 'ö kë n ‑gɔ 'pö ꞊dhɛ ‑kɔ 'ö kwa Dëmɛ Yesu ‑bha bɔmɛ ‑nu ‑kpɛa oo, a dheebhang ‑nu oo, "ɛɛn 'zü Piɛdhö ‑nu 'wo‑ kë sië‑ 'ka bha‑ 'dhö.
1CO 9:6 "Ɛɛn yaa Baanabasö ‑zë yi‑ ‑mɛɛ ꞊në‑ ‑kë 'yö yi ‑zë 'yi yë ꞊në‑ ‑kë 'yö 'yi gun ‑na pë ‑bhö?
1CO 9:7 "Ɛɛn 'ka‑ ma do ꞊dhɛ 'mɛ 'ö "sɔdha ‑dhɛ 'gü ‑yö ö ‑zu 'ö ‑dɩ ‑gong 'gü ‑yi ꞊në‑ 'ka ‑ee? "Ɛɛn 'zü ꞊dhɛ mɛ 'bha ‑yö 'bhlaa‑ ‑kpɔ 'yö 'yaa‑ 'gü ‑pë ‑bhö ‑ee? "Ɛɛn 'ka‑ ma 'zü do ꞊dhɛ ‑tuʋ̈ ‑maakëmɛ 'bha ‑yö ‑ya ‑tuʋ̈ ‑gɔ "dhiʋ̈ 'yö 'yaa‑ 'yɔnyi 'bha ‑zian mü ‑ee?
1CO 9:8 'Ma‑ pö "dhʋ̈ 'ya 'dho kë ka 'gü ꞊dhɛ 'pë 'ö mɛbhɩɩdhe ꞊në‑ bho ö ‑dɩ 'gü ‑a 'dhö. ‑A ‑gɛn ‑mü ꞊dhɛ ‑yö ‑bɛn zë ‑sü 'ka "dhʋ̈ 'pö Atanna ‑bha 'tɔng‑ 'ö Moizö ‑ya ‑bɛn zë bha‑ 'gü.
1CO 9:9 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑bha 'tɔng‑ bha ‑yö ‑bɛn zë ‑sü 'ka‑ 'gü (Zuifö ‑nu yi ‑bu 'gü) ꞊dhɛ: «'Bha 'dho ‑du 'ö i ‑bha ‑mlü slëë‑ sië ‑a "dhi 'kun.» ‑Yö ka 'gü ꞊dhɛ ‑du ‑nu ꞊dede ꞊në Atanna ‑yö ‑ya ‑a ‑nu ‑wɔn zuën ‑ta "dhʋ̈ bha ‑ee?
1CO 9:10 ‑Yö kë ka "yaan ꞊dhɛ 'yii "wɩ mɛ "wɛɛ 'bha 'ka, ‑yö ‑wɩ kwa ꞊në kwa 'ka, ‑yö ‑zë kwa ꞊në kwa ‑wɔn ‑dhɛ 'yö‑ pö ‑wa ‑bɛn zë ö ‑gɔ 'tɔng‑ 'sëëdhɛ 'gü ꞊dhɛ: «‑A ‑dhɛa ‑bha ꞊dhɛ 'mɛ 'ö ‑mlü bɔ sië ‑yö ö ‑zʋ yö‑ ‑bhö ‑sü ‑dhɛ. "Ɛɛn 'zü ꞊dhɛ 'mɛ 'ö ‑mlü slëë‑ sië ‑a ‑mɛ 'dhang bho ‑sü kë‑ "dhiʋ̈ ꞊dhɛ 'yii 'dho 'go‑ 'gü ö kaɔ "fië.»
1CO 9:11 ꞊Ya kë "dhʋ̈, kö 'mɛ 'kö 'yi ya, naɔ ‑së 'ö go Atanna "piʋ̈ bha 'ö ꞊dhɛ ‑mlü bɔ ‑sü 'dhö kö yi ꞊në 'yi nu‑ 'ka ka ‑dhɛ. Kö‑ ‑dhɛa ‑bha ꞊dhɛ yi ꞊në 'yi ka ꞊trɔɔn ‑bhö. "Ɛɛn 'ya ka ꞊kwɛngpë ‑bhö kö 'ya‑ "dhiʋ̈ ziö ‑ee?
1CO 9:12 "Sanni mɛ "wɛɛ ‑nu ‑zë ‑wo kë ka ꞊trɔɔn bha‑ ‑bhö ‑mɛ 'ka ꞊dɛɛ, ‑yö n 'gü ꞊dhɛ yi ꞊në yi ‑zë 'yi‑ ‑bhö ‑mɛ 'ka 'nu. "Kɛɛ "wɩ 'ö 'yii‑ wo‑ ‑bha kö 'yi‑ kë "dhʋ̈ bha‑ 'klɔɔ‑ ‑mü ꞊dhɛ 'yaa yi "piʋ̈ ꞊në‑ wo ꞊dhɛ 'yi zian ta Klisi ‑bha naɔ ‑së bha‑ ‑gɔ. 'Wɔn 'ö‑ ‑wɔn 'gü 'yö 'yi 'wɔn ꞊gban ‑wɔn ꞊gban kun yi ‑bha bha 'yö bha.
1CO 9:13 'Sa ‑kɔ do 'ö‑ ('ka Zuifö ‑nu kwa wɔ ‑kɔ 'gü 'ö) 'mɛ 'wo yë ‑kë Atanna ‑dhɔkëgükɔ 'gü 'wo wo ‑bhöpë ꞊slɔɔ‑ 'ka mü, 'ö 'mɛ 'wo wo ‑bha ‑kë ‑a ‑bha "saa‑ ‑bho ‑ta ‑gwë "klʋ ‑ta 'wo wo ‑bha ꞊slɔɔ‑ 'ka mü 'pö 'ö 'ka‑ dɔ bha,
1CO 9:14 kwa Dëmɛ ‑yö ö ‑wʋ ‑kpɔ 'ö ‑bha naɔdɔmɛ ‑nu ‑bha 'pö ‑kɔ do bha ꞊në‑ 'gü ꞊dhɛ ‑wo wo ‑bhöpë mɔɔ‑ ö ‑bha naɔ dɔ ‑sü bha ꞊në‑ 'gü.
1CO 9:15 "Kɛɛ ma ‑zë n "tʋ ‑zian ꞊në 'yii kë n ‑duɛ 'ö "dhʋ̈ bha‑ ‑wɔn ‑bha. 'Sa ‑a ‑bɛn 'a‑ zë sië ya 'mii‑ zë "dhʋ̈ kö 'a n ‑dɩ ꞊bhlëë ‑gbadhɛ kë "dhʋ̈ kö 'ka‑ kë n ‑dhɛ. ‑A 'klɔɔ‑ ‑mü ꞊dhɛ ‑a kë 'ö 'mii‑ wo "dhʋ̈ bha‑ ꞊bhlëë 'ö n ‑bha ‑yö ‑ziisü. N ga ‑sü fië‑ ‑dhö ‑a ‑bho n ‑bha ‑sü ‑bha. 'Tɔ ‑së 'ö‑ 'ka n ‑bha bha‑ ‑bho n ‑bha ‑mɛ 'yaa 'dhö.
1CO 9:16 ‑A ‑gɛn ‑mü ꞊dhɛ n ‑bha Atanna ‑wʋ 'a‑ pö sië bha gamɛ 'gü ‑wɔn 'yaa ‑mü. ‑Zun "dhiʋ̈ ‑mü. 'Maa ꞊mɔɔ‑ ‑bha kö 'a n 'tɔ 'kun‑ 'gü 'wɔn 'ö‑ 'gü bha 'yö bha, 'mii‑ kë "dhʋ̈ 'yaa n ‑bha ‑së.
1CO 9:17 ꞊Ya kë 'nu ꞊dhɛ 'wɔn 'ö ga ꞊në wo n 'gü 'yö 'a‑ kë sië yö ‑mü, kö a ‑mɔɔ ‑bha 'a n "tʋ̈ng ‑kë ꞊saa ‑wɔn 'gü, "kɛɛ ꞊dhɛ 'ö ‑kë ꞊dhɛ ‑yö ‑kpla "bhɛɛ ꞊në‑ 'ka 'yö n ‑bha, a‑ kë sië yö ꞊në‑ ‑wɔn 'gü kö ‑yö 'go n ‑bha.
1CO 9:18 'Wɔn 'ö‑ ‑wɔn 'gü 'yö n "tʋ 'yaa n ꞊saa ‑wɔn ‑bha bha 'yö bha, ‑a ‑gɛn ‑mü ꞊dhɛ n ꞊nii 'ö ‑da kö a Atanna ‑bha ꞊naɔ bha‑ dɔ sië "wɛɛwɛɛ a ꞊ziö‑ 'ka bha ꞊në ꞊dhɛ n ꞊saa 'dhö.
1CO 9:19 ('Sa ‑a kë 'a‑ wo "dhʋ̈ bha) ꞊në‑ ‑wɔn 'gü 'yö 'maa mɛ 'bha ‑gɔ 'kun 'gü, "kɛɛ 'yö 'ma n ‑dɩ kë mɛ ꞊gban "pɛpɛ ‑bha ꞊dhuëng 'ka kë "dhʋ̈ kö n ‑kɔ ꞊mɔɔ mɛ 'gbɛ ꞊dede ‑bha (Yesu ‑dhɛ).
1CO 9:20 ‑A ‑kë "dhʋ̈ ‑sü bha‑ 'gü 'ma kë Zuifö ‑nu kpö 'gü a ‑tosɛa ‑kë ꞊dhɛ Zuifö ‑nu 'dhö kë "dhʋ̈ kö n ‑kɔ ꞊mɔɔ‑ ‑nu ‑bha. 'Maa Atanna ‑bha 'tɔng‑ 'ö Moizö ‑ya ‑bɛn zë bha‑ ‑gban ꞊wlöö 'zü, "kɛɛ 'sa 'ma kë 'mɛ 'wo 'tɔng‑ bha‑ ‑gban ꞊wlöö ‑a ‑nu kpö 'gü, a ‑tosɛa ‑kë ꞊dhɛ 'mɛ 'ö 'tɔng‑ bha‑ ‑gban ꞊wlöö, ‑a 'dhö kë "dhʋ̈ kö yɛng‑ ‑nu 'yi ꞊mɔɔ‑ 'gü.
1CO 9:21 'Mɛ 'waa 'tɔng‑ bha‑ 'gü Atanna ‑gɔ 'ma kë‑ ‑nu kpö 'gü, 'yö 'a ‑da 'pö‑ ‑nu kwi 'gü, kë "dhʋ̈ kö n ‑kɔ ꞊mɔɔ‑ ‑nu ‑bha. 'Ma‑ pö "dhʋ̈ kö 'mii‑ pö ꞊dhɛ ꞊ya kë "dhʋ̈ kö 'maa Atanna ‑bha 'tɔng‑ ꞊bhlëë ‑ya. ‑Abin! ‑A ‑gɛn ‑mü ꞊dhɛ a Klisi ‑bha 'tɔng‑ ‑gɔ ‑kpla 'gü.
1CO 9:22 'Ma kë 'zü 'mɛ 'ö‑ ‑nu ‑gɛn 'yii "sɛ 'kun ꞊kö Atanna ‑bha zian ‑ta bha‑ ‑nu kpö 'gü, a n ‑dɩ ‑kë ꞊dhɛ ‑a ‑nu 'dhö kë "dhʋ̈ kö ‑wo bɔ n 'ka 'pö. A n ‑dɩ ‑dhi mɛ ꞊gban "pɛpɛ suu ‑dhɛ ‑kɔ bha ꞊në‑ 'gü kë "dhʋ̈ kö ꞊ya kë ‑kɔ "ʋʋ ‑kɔ 'ö‑ 'gü, "kɛɛ kö n ‑kɔ ‑yö ‑mɔɔ mɛ ga 'bha ‑zë ‑bha kö ‑wo dha.
1CO 9:23 'Wɔn "pɛpɛ bha a‑ ꞊gban ‑kë "dhʋ̈ Atanna ‑bha naɔ ‑së bha ꞊në‑ ‑wɔn 'gü kë "dhʋ̈ kö‑ ‑bha 'dhuë‑ 'ö‑ ꞊keng‑ bha 'a n ‑bha ꞊slɔɔ‑ 'gü.
1CO 9:24 "Ɛɛn ‑bɛang 'wo‑ yi ‑dang ꞊sië bha‑ 'sü ‑mɛ ‑nu 'waa kë 'gbɛ "kɛɛ mɛ do 'aa mü 'ö ‑kë ga 'ka ‑ee? ꞊Dhɛ 'ö "dhʋ̈, ‑bɛang 'ö Atanna ‑ya yi ‑da bha‑ 'sü ‑kɔ 'ka dho‑ 'sü‑ 'ka kö 'ka‑ ga 'sü ꞊në ‑kaa bho.
1CO 9:25 Mɛ "pɛpɛ 'wo ‑bɛang bha‑ sü "dhʋ̈ bha ‑wo wo "kian ‑kpɔ pë 'gbɛ ꞊dede ꞊në‑ 'ka kë "dhʋ̈ kö ‑bɛang ‑yö dhi wo ‑gɔ kö 'wo 'tɔ 'sü, 'sa kö 'tɔ 'ö "dhʋ̈ bha‑ ‑dhɛkpaɔ dhia" 'yaa 'dhö. "Kɛɛ kwa ‑zë 'kwa kwa "kian bha‑ 'kpɔ "dhʋ̈, 'kwa‑ kpɔ 'wɔn 'ö‑ 'gü bha‑ ‑dhɛkpaɔ dhia" ‑dhö. ‑A ‑gɛn ‑mü ꞊dhɛ 'tɔ 'ö kwaa‑ 'sü bha‑ ‑sü kwa ‑gɔ ‑mɛ 'yaa 'dhö tongtongdhö.
1CO 9:26 ‑A ‑kë "dhʋ̈ ‑sü bha‑ 'gü, 'ö ꞊dhɛ ‑bɛang 'dhö kö ma ‑zë n ‑bha 'a‑ 'sü sië bha 'maa‑ 'sü n ‑gɔ "piʋ̈ 'kaa 'dho‑ 'ka. "Ɛɛn 'ö ꞊dhɛ 'zü ꞊dhɛ ‑kɔkpö ‑zuö ‑sü 'dhö kö n ‑bha 'a ‑zuö bha 'maa‑ ‑zuö "bhluubhludhɛ "piʋ̈.
1CO 9:27 "Kɛɛ ꞊gbaɔn ꞊në 'a‑ wo n ‑dɩ ‑ta, 'yö 'a n zuë" kun n ‑bha 'wɔn ꞊gban ‑wɔn ꞊gban 'gü, 'nii‑ yaa ‑dhɛ ‑bha, kë "dhʋ̈ kö 'ma 'dho Atanna ‑bha naɔ bha‑ dɔ mɛ ‑nu ‑gɔ 'ö 'wo ‑duɛ ꞊slɔɔ‑ "piʋ̈ 'ö ma ‑zë 'a dho 'a ꞊fië‑ 'gü.
1CO 10:1 N dheebhang ‑nu, 'yaa n "piʋ̈ ꞊dhɛ 'wɔn 'ö kwa "bhɛma ‑nu "dhiʋ̈ ꞊slɔɔ yi 'bha 'ka kö Moizö ‑ya ‑nu ‑dhɛ "dhiʋ̈ bha 'ka kë‑ 'gü ka tii ‑bha. ‑A 'klɔɔ‑ ‑mü ꞊dhɛ 'mɛ 'wo bha Atanna ‑bha "dhuu 'ö yöö ꞊dede 'ö gun ‑ya ‑sü 'ka‑ 'gü bha ‑yö ‑gun ‑ya ‑sü 'ka‑ ‑nu ꞊gban ‑ta ꞊dhɛ 'ko 'dhö, 'ö‑ ‑nu ꞊gban 'wo dho 'wo ꞊weeyi ‑zaɔndhö ‑kan ꞊dhɛ 'ko 'dhö.
1CO 10:2 ‑A ‑nu ꞊gban ‑wo kë ‑bɔ Moizö 'ka ‑zu ‑bho "dhuu waa‑ ꞊weeyi bha‑ ꞊bhaa ‑kɔ bha ꞊në‑ 'gü kö Moizö ‑ya ‑nu ‑dhɛ "dhiʋ̈.
1CO 10:3 ‑Bhöpë 'ö Atanna yöö ꞊dede 'ö‑ bɔ‑ ‑nu ‑dhɛ waa‑ "yi 'ö‑ ‑gɔ bhɔ‑ ‑nu ‑dhɛ ‑gwë 'gü bha‑ ‑nu ꞊gban ‑wo kë‑ ‑bhö 'ö 'wo‑ mü ꞊dhɛ 'ko 'dhö. 'Sa ‑gwë ‑tɔn 'wo gun "yi mü sië‑ 'gü "dhʋ̈ bha ‑yö ‑gun "ta 'sü sië‑ ‑nu ꞊keng‑. 'Sa ‑yö ‑gun Klisi ꞊në‑ 'ka.
1CO 10:5 "Kɛɛ yö ‑zë ꞊gban 'gü kwa "bhɛma ‑nu bha‑ ‑nu 'kpii‑ ‑dhɛ ꞊në‑ këwɔn 'yii Atanna ‑zʋ 'kun. 'Wɔn 'ö‑ ‑wɔn 'gü 'yö 'wii ꞊loo‑ ‑nu 'dhodhɛ 'gü 'yö 'wo to "tʋ̈ng ‑ta 'wo ga bha 'yö bha.
1CO 10:6 'Sa 'wɔn ‑nu bha kë 'wo‑ wo "dhʋ̈ bha ‑wo ‑kë "dhʋ̈ kö ‑yö kë kwa ꞊në kwa 'wɔn 'suan‑ ‑bho ‑bha ‑pë 'ka, kë "dhʋ̈ kö kwa zuë" 'ya 'dho bhɔ 'wɔn yaa kë ‑sü ‑bha ꞊dhɛ ‑a ‑nu 'dhö.
1CO 10:7 Kö 'kwa 'dho‑ pö 'kwa Atanna 'to 'zü 'ö 'kwa ‑ya ꞊gebhɔ ‑nu ‑dhɔkë ‑sü ‑bha ꞊dhɛ kwa "bhɛma ‑nu bha‑ mɛ 'bha ‑nu 'dhö ꞊dhɛ ‑kɔ 'ö ‑bɛn zë ‑sü 'ka‑ 'ka Atanna ‑gɔ 'sëëdhɛ 'gü ‑a 'dhö ꞊dhɛ: «꞊Dhɛ 'ö ꞊ya kë "dhʋ̈, 'yö Izraɛdhö ‑mɛ ‑nu 'wo 'yaanu 'yö 'wo pë ‑bhö 'yö 'wo we ‑nu mü, 'yö 'wo ꞊wlü 'wo zun "tan kë ‑sü ‑bha» bha‑ 'dhö.»
1CO 10:8 "Ɛɛn kö 'kwa 'dho‑ pö 'kwa ‑da 'zü ‑zua zë ‑sü 'gü 'pö ꞊dhɛ ‑kɔ 'ö‑ mɛ 'bha ‑nu ‑wa ‑kë 'ka 'yö‑ mɛ "gblü ‑kaɔng ꞊plɛ ga ‑yaaga ‑gɔ to‑ 'gü ‑dhɛkpaɔyi doseng 'ka bha‑ 'dhö.
1CO 10:9 Kö 'kwa 'dho‑ pö 'zü 'kwa kwa Dëmɛ 'gü dan 'pö ꞊dhɛ ‑kɔ 'ö‑ mɛ 'bha ‑nu ‑wa ‑kë 'ka 'yö ꞊mlɛɛ ‑ya ‑nu kun 'yö 'wo ga bha‑ 'dhö.
1CO 10:10 Kö 'kwa 'dho‑ pö 'zü 'kwa ‑dɔn bho Atanna 'ka 'pö ꞊dhɛ ‑kɔ 'ö kwa "bhɛma ‑nu bha‑ mɛ 'bha ‑nu ‑wa ‑kë 'ka 'yö ‑a ‑bha "kië 'ö 'wɔn bho mɛ 'gü bha 'ö nu 'ö‑ ‑nu 'gü ꞊see bha‑ 'dhö.
1CO 10:11 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔn "gbɩɩ‑ "pɛpɛ 'ö ‑wɔ ‑nu ‑ta "dhʋ̈ bha ‑yö ‑kë "dhʋ̈ kö 'kwa ‑gleng ꞊në‑ 'sü‑ ‑bha. 'Wɔn 'ö‑ ‑wɔn 'gü 'yö 'wo‑ ‑bɛn zë 'pö Atanna ‑bha 'tɔng‑ 'sëëdhɛ 'gü bha 'yö bha, kë "dhʋ̈ kö ‑yö kë ‑dhio ꞊në‑ 'ka 'mɛ 'kwa bhɔ sië kö ‑tosɛa yën "tʋ̈ng 'yaa ꞊gblɛɛn 'zü ya kwa ‑dhɛ.
1CO 10:12 ‑A ‑kë "dhʋ̈ ‑sü bha‑ 'gü, 'mɛ i 'dhang bho ‑sü 'dhö i ‑dɩ "dhiʋ̈ ꞊dhɛ i "ta ‑kɔ ‑së Atanna ‑bha zian bha‑ ‑ta, ‑bhö kë i 'suan‑ 'ka kö 'bha 'dho zian 'to.
1CO 10:13 ‑A 'klɔɔ‑ ‑mü ꞊dhɛ ka 'gü 'ö Sɔtraan ‑ya dan bha ‑ya ‑dan "dhʋ̈ mɛ ꞊gban "pɛpɛ ‑gɔ, ‑a suu 'bha 'yaa 'dhö kö ‑wa pö‑ ‑bha ꞊dhɛ 'yii wo mɛ 'bha 'ka do. ꞊Ya 'go yö ‑zë 'gü, Atanna bha 'yaa ‑wʋ ꞊plɛ pö, ‑yö ‑to ö ‑wʋ ‑ta. 'Yii 'dho "wɩ‑ ‑bha kö Sɔtraan ‑yö ka 'gü dan kö ‑yö ziö‑ 'ka ka faan 'ö ka 'gü bha‑ ‑naa ‑ta. "Kɛɛ 'kö ꞊ya kë ‑zianwo ꞊dhɛ 'güdandhe ꞊në nu ka ‑ta, ‑yö ‑dho ‑a "slë kë 'ö 'ka ꞊mɔɔ‑ ‑kun ka ‑bha ‑sü ‑bha, 'ö 'ka dho‑ 'ka "dhʋ̈ 'ka go‑ 'gü.
1CO 10:14 'Wɔn 'ö‑ ‑wɔn 'gü, n dhɔɔbhaamɛ ‑nu, 'yö 'a dho‑ pö ka ‑dhɛ ꞊dhɛ 'ka ꞊dua ꞊gebhɔ ‑dhɔkë ‑sü ‑gɔ bha 'yö bha.
1CO 10:15 ‑Yö n 'gü ꞊dhɛ ka ꞊kpaɔ ‑sü, ka ‑mɔɔ ‑bha 'ka 'wɔn ‑nu ‑ya 'klɔɔ‑ "dhiʋ̈, dhiang 'a‑ zë bha kaa ꞊dede ‑kaa ‑ya 'klɔɔ‑ "dhiʋ̈ kö 'ka‑ ‑ga.
1CO 10:16 "Ɛɛn ‑a ‑ga 'ka‑ wo bha ꞊wɛ, 'dhuë‑ 'kwa‑ ‑gbadhɛ Atanna ‑gɔ ꞊sië kö 'kwa ‑ya ‑dhɛ do 'gü ‑a ‑bha ‑bhöpë "slʋ̈ʋ̈slʋ̈ bha‑ ‑bhö ‑dhɛ 'gü bha‑ 'klɔɔ‑ ‑mü ‑më 'ka? 'Kwa‑ we bha‑ mü 'kwaa‑ kë "dhʋ̈ kö 'kwa‑ mü kö ‑a 'dhuë‑ bha ‑yö kwa 'kun Yesu ꞊yɔɔn 'ö ꞊wɛnng kwa ‑wɔn 'gü bha‑ 'saa‑ 'gü ‑ee? "Ɛɛn ‑a 'bluu‑ 'kwa‑ 'gü ‑gblü sië kwa 'ko ‑ta bha ꞊wɛ? 'Kwaa‑ kë "dhʋ̈ kö ‑yö kë ‑a kwi 'ö wü kwa ‑wɔn 'gü bha ꞊në‑ "blɛɛn‑ 'ka ‑ee?
1CO 10:17 ‑Kɔ do 'ö 'bluu‑ 'dhö‑ ‑bha "dhʋ̈ do "kɛɛ 'ö‑ "kplükplü 'dhö 'gbɛ bha, ‑kɔ do bha ꞊në 'kwa‑ ‑bha 'pö. Kwa 'gbɛ 'ka "dhʋ̈ "kɛɛ kwa ꞊dhɛ mɛ do ꞊në‑ 'dhö. ‑A 'klɔɔ‑ ‑mü ꞊dhɛ mɛ 'gbɛ 'kwa bha 'bluu‑ do bha ꞊në 'kwa‑ ‑bhö.
1CO 10:18 ‑A pö 'a‑ wo "dhʋ̈ bha kaa ꞊dede ‑kaa 'suan‑ bho Izraɛdhö ‑mɛ ‑nu ‑bha. 'Mɛ 'wo bha‑ mɛ 'dhɛ 'wo "saa‑ pë ‑bhö bha kö waa‑ Atanna 'wo‑ "saa‑ bho‑ ‑dhɛ bha wɛng‑ ‑nu ‑a ‑nu ‑kɔ ꞊në 'ko ꞊kwɛng. "Ɛɛn 'yaa "dhʋ̈ ‑ee?
1CO 10:19 'Ya 'dho kë ka 'gü ꞊dhɛ 'ma‑ pö "dhʋ̈ kö a‑ ‑pö ꞊gebhɔ ‑nu 'ö 'mɛ 'waa 'dhang bho Klisi ‑wɔn "dhiʋ̈ 'wo‑ ‑dhɔkë sië bha Atanna ‑mü, "ɛɛn 'zü ꞊dhɛ ‑a "saa‑ 'wo‑ bho sië‑ ‑nu ‑dhɛ bha‑ ꞊bhlëë ‑yö ‑dhö. ‑Abin!
1CO 10:20 'Wɔn n "piʋ̈ 'a‑ pö bha yö ‑mü ꞊dhɛ 'mɛ 'wo ꞊gebhɔ ‑nu ‑dhɔkë ꞊dhɛ ‑kɔ bha‑ 'dhö bha kö waa‑ "yina yaa ‑nu ꞊në‑ ‑nu ‑kɔ 'dhö 'ko ꞊kwɛng, kö ‑wa wo ꞊në‑ ‑nu ‑dhɔkë bha, kö 'wii Atanna ‑zë ‑dhɔkë, 'sa 'maa‑ "piʋ̈ ꞊dhɛ kaa "yina yaa ‑nu bha ꞊në ka ‑kɔ ‑yö kë 'ko ꞊kwɛng.
1CO 10:21 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'kwa bɔ Atanna 'ka ya 'kwaa ꞊mɔɔ‑ ‑bha 'zü kö 'kwa bo kwa ‑bɛn ‑ya ‑sü 'ka‑ ‑bha ‑kɔɔ "dhiʋ̈, kö 'kwa 'go mü 'zü 'kwa‑ ‑ya "yina yaa ‑nu ‑bha "dhiʋ̈. "Ɛɛn kö kwaa‑ kwa Dëmɛ ‑nu 'kwa kwa ‑kɔ ‑da 'tɛa‑ do 'gü kö 'kwa 'go mü 'zü 'kwa 'dho kö kwaa‑ "yina yaa ‑nu 'kwa kwa ‑kɔ ‑da 'tɛa‑ do 'gü.
1CO 10:22 "Ɛɛn ‑yö ka "piʋ̈ ꞊dhɛ 'ka bhlɔɔ ꞊në 'ma kwa Dëmɛ 'gü ‑ee? "Ɛɛn ‑yö ka 'gü ꞊dhɛ mɛ "bhɩɩ‑ 'gü ‑yö "gbɩɩ‑ 'ö ‑ziö ‑ta ‑ee? ('Ka‑ kë "dhʋ̈ ‑yö ‑dho 'wɔn bho ka 'gü.)
1CO 10:23 ‑A pö 'ö mɛ 'bha ‑nu ‑wa wo ꞊dhɛ 'mɛ ꞊ya bɔ Yesu 'ka ‑yö ‑mɔɔ ‑bha 'ö 'wɔn ꞊gban "pɛpɛ suu ‑kë ö ‑ta "puu 'ka bha, mang ‑dɩ 'pö a‑ ‑pö ꞊iin ‑yö "dhʋ̈ tɛan‑ 'ka, "kɛɛ 'wɔn ꞊gban ꞊trɔɔn ‑së ꞊në 'yaa 'to mɛ ‑bha. 'Wɔn "ʋʋ 'wɔn 'ö ‑dhi mɛ ‑dhɛ mɛ‑ ‑mɔɔ ‑bha 'nu 'ö mɛ ‑ya ‑kë, "kɛɛ ‑a 'bha ‑nu ‑wo mü 'ö 'waa mɛ 'dho "dhiʋ̈ "ta ‑sü Atanna ‑bha zian ‑ta ‑sü bha‑ 'gü.
1CO 10:24 ꞊Dhɛ 'ö "dhʋ̈, ‑ka ‑ya ka 'ko ‑nu ‑wɔn zuën ‑ta. 'Ka 'dho‑ pö 'ka ‑ya ka ‑dɩ ‑wɔn ‑zë zuën ‑ta doseng.
1CO 10:25 Pë "pɛpɛ 'kö 'wo‑ "dhɔɔ ‑zë dɔ, "sika 'ya 'dho kë ka 'gü ‑a 'bha ‑bhö ‑sü 'gü. 'Ka 'dho‑ 'godhɛ ‑zian mɔɔ‑.
1CO 10:26 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ pë "pɛpɛ 'ö "kpʋng ꞊taa, ‑a ꞊gban ‑yö kwa Dëmɛ ꞊në‑ ‑bha 'ka, (‑ya ‑da kö 'ka ka "dhia ꞊në‑ bho‑ 'gü).
1CO 10:27 ꞊Ya kë ꞊dhɛ 'mɛ 'ö 'yaa 'dhang bho kwa Dëmɛ Yesu ‑wɔn "dhiʋ̈ ꞊ya ka ‑dhɛ ‑bhöpë 'ka kö 'ka 'dho mü, pë "ʋʋ pë 'wo‑ ‑ya ka ‑kuu "dhiʋ̈ ‑kaa ‑bhö, 'ka 'dho‑ 'go ‑dhɛ ‑wɔn ‑bha 'gü dhɛɛ" ‑zian 'kpɔ.
1CO 10:28 "Kɛɛ ꞊waa‑ pö ka ‑dhɛ pë "ʋʋ pë 'ö‑ ‑bha ꞊dhɛ "saa‑ pë ‑mü, 'ka 'dho‑ ‑bhö tongtongdhö, ‑a ‑gɛn ‑blɛɛsü ‑mü ꞊dhɛ kö mɛ ꞊ya "dhi bho‑ ‑ta ka ‑dhɛ ꞊dhɛ "saa‑ pë ‑mü. ‑A ꞊plɛ ‑naa ‑mü ꞊dhɛ ꞊ya kë ꞊dhɛ 'ka‑ ‑bhö, ‑a "sika ‑dho ‑da mɛ 'dhɛ bha ꞊në‑ 'gü.
1CO 10:29 'Sa a‑ ‑pö ka ‑dhɛ ꞊dhɛ ‑a "sika ‑dho ‑da 'mɛ 'ö‑ pö ka ‑dhɛ ꞊dhɛ "saa‑ pë ‑mü bha ꞊në‑ 'gü. 'Yö ꞊ya kë ꞊dhɛ 'wɔn 'ö ma ‑zë 'mii‑ kë "sika 'ka, mɛ 'bha ꞊yaa‑ pö‑ ‑bha ꞊dhɛ 'yaa ‑së, kö‑ kë ‑gɛn ‑mü ‑më 'ka?
1CO 10:30 ꞊Ya kë ꞊dhɛ 'a Atanna nuɛ" bho sië ‑bhöpë 'ö‑ ‑wɔn 'gü, ꞊wa n ꞊tɔɔ yaa kë‑ ‑bhö ‑wɔn 'gü kö Atanna nuɛ" bho ‑gɛn ꞊në kë ‑kë ‑më 'ka?
1CO 10:31 ‑A ‑kë "dhʋ̈ ‑sü bha‑ 'gü, a‑ ‑pö ka ‑dhɛ ꞊dhɛ: 'Wɔn "ʋʋ 'wɔn 'ö ka dho‑ kë, ‑yö ‑kë pë ‑bhö ‑sü 'ka oo, ‑yö ‑kë müpë ‑nu mü ‑sü 'ka oo, "ɛɛn 'zü ‑yö ‑kë 'wɔn "ʋʋ 'wɔn 'ö‑ suu 'ka, ‑kaa kë Atanna 'tɔ bhɔ ‑dhɔ ‑dhɛ.
1CO 10:32 ‑Ka ‑tosɛa kë Atanna ‑bha zian bha‑ ‑ta ka 'suan‑ 'ka kö Zuifö ‑mü ‑ee, "ɛɛn mɛ "wɛɛ ‑mü ‑ee, "ɛɛn Atanna ‑bha 'kɔdhigümɛ ‑mü ‑ee, kö 'ka 'dho kë "dhü ꞊kpë 'ka 'ö 'ka ‑wɔ mɛ 'bha ‑gɔ zian‑.
1CO 10:33 ‑Kɔ do 'a ‑tosɛa kë sië‑ 'ka kë "dhʋ̈ kö n "dhia‑ 'ma mɛ ꞊gban 'gü 'wɔn ꞊gban "pɛpɛ suu 'gü, 'ö 'maa ‑ya n ‑dɩ ‑wɔn zuën ‑ta, "kɛɛ 'ö 'a 'wɔn ‑kë mɛ ꞊në‑ ‑dhɛ ‑dhɛ ꞊mɔɔ "tʋng ꞊gban 'gü, kë "dhʋ̈ kö ‑wo dha bha ꞊në ‑ka ‑tosɛa kë‑ ‑kɔ ‑bha.
1CO 11:1 ‑Ka ka "ta ‑kɔ 'sü n ‑bha ‑bha ꞊dhɛ ‑kɔ do 'a n ‑bha ‑sü 'ka 'pö Klisi ‑bha bha ꞊në‑ 'dhö.
1CO 11:2 A ka nuɛ" ‑bho ka ‑zʋ 'ö 'yaa bhɔ n 'ka 'wɔn 'bha ‑wɔn 'bha 'gü waa‑ "ta ‑sü Atanna ‑bha zian ‑ta ‑kɔ 'a‑ ‑zɔn ka ‑dhɛ bha‑ wo 'ka‑ wo sië bha‑ ‑wɔn 'gü ꞊dedewo.
1CO 11:3 "Kɛɛ yö ‑zë ꞊gban 'gü 'wɔn do 'bha‑ mü 'ö n "piʋ̈ ꞊dhɛ 'a‑ pö ka ‑dhɛ kö ‑yö 'to ka "yaan, yö ‑mü ꞊dhɛ: Klisi bha ꞊në gɔɔn‑ ‑zë ꞊gban ‑gɔ "dhiʋ̈, 'yö gɔɔn‑ ‑dɩ 'pö 'ö ö ‑bha dhebhɔ ‑gɔ "dhiʋ̈, 'yö Atanna ‑dɩ 'pö 'ö Klisi ‑gɔ "dhiʋ̈.
1CO 11:4 ꞊Dhɛ 'ö "dhʋ̈, 'yaa ‑së kö gɔɔn‑ ‑zë ‑a 'bha ‑bha 'bha ‑yö 'faan‑ 'to ö ‑gɔ ‑bha kö ‑yö bhɛa"‑ 'ka Atanna ‑dhɛ "ɛɛn kö ‑ya ‑wʋ "dhiʋ̈ ꞊loo‑ 'ka. ‑A 'klɔɔ‑ ‑mü ꞊dhɛ ꞊yaa‑ kë "dhʋ̈ kö ‑yö ꞊bhlëë ꞊në‑ bho ö ‑gɔmɛ 'ö Klisi 'ka bha‑ ‑bha bha.
1CO 11:5 ‑Kɔ do bha‑ 'gü, ꞊ya kë 'pö ꞊dhɛ kö dhebhɔ ‑yö bhɛa" Atanna ‑dhɛ "ɛɛn kö ‑ya ‑wʋ "dhiʋ̈ ꞊loo kö sɔ 'yaa kpa ‑sü 'ka‑ ‑gɔ ‑bha, kö ‑yö ꞊bhlëë ‑bho ö ‑bha gɔn ꞊në‑ ‑bha bha. Kö‑ ꞊tɛni ꞊ya kë ꞊dhɛ dhebhɔ 'ö ꞊ya ö ‑gɔ ꞊loo ꞊në‑ 'dhö bha.
1CO 11:6 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ dhebhɔ 'ö 'yaa pë 'bha ‑ya ö ‑gɔ ‑bha, 'yaa ö ‑gɔ kaan‑ ‑ta 'sa do ꞊dhɛ? 'Sa ‑gɔ ‑zë ‑ta ‑sü "ɛɛn ‑gɔ ꞊loo ‑sü ‑zë ‑yö 'yiʋ̈‑ ‑sü dhong ‑nu ‑gɔ. ꞊Dhɛ 'ö "dhʋ̈ ‑a ‑dhɛa ‑bha ꞊dhɛ ‑wo pë 'bha ‑ya wo ‑gɔ ‑bha.
1CO 11:7 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ gɔɔn‑ ꞊në Atanna "blɛɛn‑ 'ka, mɛ ‑ya ‑bha 'tɔbhɔdhe 'bhü ‑yö yö ꞊në‑ 'gü. 'Yö dhebhɔ ‑zë 'ö gɔɔn‑ ‑bha 'tɔbhɔdhe 'bhü 'ka. 'Wɔn 'ö‑ ‑wɔn 'gü 'yö‑ ‑dhɛ 'yaa‑ ‑bha ꞊dhɛ gɔɔn‑ ‑zë ‑yö 'faan‑ ‑ya (Atanna ‑dhɔkë "tʋ̈ng 'gü) bha 'yö bha.
1CO 11:8 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ gɔɔn‑ ‑zë 'yii 'go dhebhɔ 'gü, dhebhɔ ꞊në go gɔɔn‑ 'gü.
1CO 11:9 ꞊Ya 'go mü 'zü, Atanna ‑ya ‑zë gɔɔn‑ ꞊në‑ ‑wɔn ‑dhɛ 'yö dhebhɔ ‑da, 'yii gɔɔn‑ ‑da dhebhɔ 'ko ‑sɔn.
1CO 11:10 'Wɔn 'ö‑ ‑wɔn 'gü 'yö‑ ‑dhɛ 'dhö‑ ‑bha ꞊dhɛ dhebhɔ ‑yö 'faan‑ ‑ya bha 'yö bha, kë "dhʋ̈ kö ‑ya ‑zɔn ꞊dhɛ 'yaa ö ‑dɩ ‑gɔ. 'Sa ‑a kë 'ö dho‑ wo "dhʋ̈ bha ‑ya ‑kë "dhʋ̈ Atanna ‑bha "kië ‑nu 'wo mü bha ꞊në‑ ‑nu ‑wɔn 'gü.
1CO 11:11 "Kɛɛ yö ‑zë ꞊gban 'gü, ꞊ya kë kwa Dëmɛ Yesu Klisi ‑bha zian ‑zë ‑ta, dhebhɔ 'yaa 'dhö kö gɔɔn‑ 'yaa 'dhö, gɔɔn‑ 'yaa 'dhö 'pö kö dhebhɔ 'yaa 'dhö.
1CO 11:12 ‑A 'klɔɔ‑ ‑mü ꞊dhɛ ‑kɔ do 'ö Atanna ‑yö dhebhɔ ‑kë 'ka 'ö‑ sü gɔɔn‑ 'gü bha dhebhɔ ‑dɩ 'pö ‑yö gɔɔn‑ ‑kpɔ ‑kɔ do bha ꞊në‑ 'gü, "kɛɛ 'wɔn 'ö "dhʋ̈ bha‑ ꞊gban‑ ‑go Atanna ꞊në‑ 'gü.
1CO 11:13 "Ɛɛn ‑a ‑ga 'ö kaa ꞊dede 'ka‑ wo bha ꞊wɛ, ‑yö ‑së kö dhebhɔ ‑yö bhɛa" Atanna ‑dhɛ kö 'faan‑ 'yaa‑ ‑gɔ ‑bha "wɛ ‑ee? ‑Abin!
1CO 11:14 ‑A 'klɔɔ‑ ‑mü ꞊dhɛ 'kö ꞊ya kë "kpʋng ꞊taa 'dhu ‑zian 'gü, gɔɔn‑ ‑gɔdhɛ ‑kë ꞊gblɛɛngblɛɛn ‑sü ‑zë ‑dɔ 'yaa dhi‑ 'ka.
1CO 11:15 "Kɛɛ ‑a ‑dɔ ‑dhi dhebhɔ ‑zë 'ka, ‑a ‑gɛn ‑mü ꞊dhɛ Atanna ‑ya ‑kë "dhʋ̈ kö ‑yö kë ꞊dhɛ 'faan‑ ꞊në‑ 'dhö ‑a ‑nu ‑gɔ ‑bha.
1CO 11:16 ‑A pö 'a‑ wo bha‑ ‑bho "piʋ̈ ‑dhɔ ꞊ya kë 'mɛɛ‑ ‑bha, ‑ya bho‑ "piʋ̈ "kɛɛ ma ‑zë n ‑bha 'a‑ pö yö bha. ‑Yö kë‑ ‑mɛ "yaan ꞊dhɛ yi ‑zë yaa‑ Atanna ‑bha 'kɔdhigümɛ ‑nu yi ‑bha 'wluu‑ "wɛɛ 'bha 'yaa 'dhö ‑a 'dhɛ 'kö bha‑ zian 'gü.
1CO 11:17 ‑A 'dhɛ 'kö maa‑ pö ya ka nuɛ" bho ‑wʋ "wɛɛ 'bhaa ‑mü. ‑Dɔn ‑zian ꞊në maa‑ bho ka 'ka. ‑A 'klɔɔ‑ ‑mü ꞊dhɛ a‑ ‑ma ꞊dhɛ 'ka bho 'ko ‑ta kwa Dëmɛ Yesu ‑bha ‑bhöpë "slʋ̈ bha‑ ‑bhö ‑dhɛ 'gü, 'wɔn 'ka‑ ‑kë mü ‑a 'bha 'yaa kë ka ‑dho "dhiʋ̈ ‑a ‑bha zian ‑ta ‑wɔn ‑zë 'ka, ‑yö ‑kë ka ‑da ꞊taama ‑wɔn ‑nu ꞊në‑ 'ka.
1CO 11:18 ‑A zü bho ‑sü 'gü, a‑ ‑ma ꞊dhɛ 'ka bho 'ko ‑ta ꞊dhɛ ‑kɔ bha‑ 'dhö, ka ‑kë "pɛ ‑sü 'ka‑ 'gü. 'Maa 'dhang bho‑ ꞊gban "dhiʋ̈ "kɛɛ a‑ 'wɔn ‑zë ‑dɔ ꞊dhɛ tɛanwɔn ‑ya 'gü,
1CO 11:19 "kɛɛ 'sa 'ma‑ ‑ga, ‑a ‑dhɛa ‑bha ꞊dhɛ ‑yö kë "dhʋ̈, kë "dhʋ̈ kö 'mɛ 'wo 'dhang ‑bho Atanna "dhiʋ̈ ‑mɛ ꞊dede 'ka mɛ ‑ya ‑nu dɔ. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kö 'kii "pɛ‑ 'gü ꞊dhɛ ‑kɔ bha‑ 'dhö, 'mɛ 'ö 'dhang bho kwa Dëmɛ ‑wɔn "dhiʋ̈ ꞊dedewo ‑a dɔ 'yii 'dho bho.
1CO 11:20 ‑A ‑kë "dhʋ̈ ‑sü bha‑ 'gü, 'ka bho 'ko ‑ta Atanna ‑gɔ 'kɔɔdhö kö 'ka pë ‑bhö, 'yaa bhɔ 'wɔn ꞊bhlëësü bha‑ kë ‑sü ‑bha.
1CO 11:21 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ a‑ ‑ma ꞊dhɛ ꞊ya kë "dhʋ̈ ‑yö ‑kë ꞊dhɛ 'pë mɛ ꞊gban 'wo nu wo 'gudɔdhɛ ꞊në‑ mɔɔ‑ ‑dhɛ 'gü ‑a 'dhö, 'ö din‑ 'dhö mɛ 'bha ‑nu kë sië kö mɛ 'bha ‑nu ‑zë we ꞊yaa‑ ‑nu 'kun 'nu.
1CO 11:22 ‑A kë 'ka‑ wo "dhʋ̈ bha‑ 'klɔɔ‑ ‑mü ‑më 'ka? 'Kɔ 'pö 'yaa ka ‑gɔ 'yö pë ‑bhö ‑kɔ "ɛɛn pë mü ‑kɔ 'ö ‑dhi ka ‑dhɛ ‑kɔ 'ö‑ bha 'kaa‑ ‑bhö ‑bha "ɛɛn 'kaa‑ mü‑ ‑bha ka ‑gɔ 'kɔɔdhö ‑ee? "Ɛɛn 'kaa‑ 'wɔn ꞊në‑ dɔ ꞊dhɛ 'ka 'yiʋ̈‑ dɔ 'mɛɛ pë 'bhaa‑ ‑nu ‑gɔ bha‑ ‑nu ‑bha kö ka "yan ‑ziö 'gü ‑dɔ Atanna ‑bha 'kɔdhigümɛ ‑nu ꞊në‑ ‑nu ‑bha bha ‑ee? ‑Yö ka "piʋ̈ ꞊dhɛ 'a‑ pö ka ‑dhɛ ꞊dhɛ? 'A ka 'tɔ dhi ‑a kë 'ka‑ wo "dhʋ̈ bha‑ 'gü ‑ee? ‑Abin! A yö ‑zë "sɩ 'yaa n ‑dhɛ tongtongdhö.
1CO 11:23 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑wʋ 'ö kwa Dëmɛ ‑ya kpɔ n ‑bha ꞊në 'a ka ꞊draan‑ ‑bha. Yö ‑mü ꞊dhɛ yi ꞊dede 'ö Zuda ‑yö kwa Dëmɛ Yesu "dhiʋ̈ dɔ‑ 'ka bha‑ 'ka gbeng, 'yö kwa Dëmɛ ‑yö 'bluu‑ sü.
1CO 11:24 ꞊Dhɛ 'ö ꞊ya ö bo Atanna nuɛ" bho ‑sü 'ka 'bluu‑ bha‑ ‑wɔn 'gü, 'yö‑ "kplükplü bho, 'yö‑ pö ö ‑bha ꞊klang ‑nu ‑dhɛ: «‑Ka ‑dhɛ ‑ga, n kwi 'ö yöö 'wü ka ‑wɔn 'gü bha‑ "blɛɛn‑ ꞊nɛ. ‑Kaa kë ꞊ni "tʋ̈ng ꞊gban 'gü kö ka ‑zʋ 'ya 'dho bhɔ n ‑wɔn 'ka.»
1CO 11:25 'Yö dho 'ö we ‑kɔɔ sü 'zü ‑kɔ do bha‑ 'gü kö ꞊wa wo bo yɛan" "piʋ̈ ‑pë ‑bhö ‑sü 'ka 'yö‑ pö: «‑Mlɛɛ ‑dee 'dhɛ 'ö Atanna yöö‑ ‑da ka ꞊zinng 'gü n ꞊yɔɔn 'ö yöö ꞊wɛnng ka ‑wɔn 'gü bha‑ 'ka bha‑ "blɛɛn‑ ꞊nɛ. ('Ka kë ‑kaa mü ‑kpɛawo,) 'ka‑ mü sië, ka ‑zʋ ‑yö ‑bö n ‑wɔn ‑ta.»
1CO 11:26 ‑Wʋ 'ö kwa Dëmɛ ‑ya kpɔ n ‑bha 'yö bha. ‑A kë "dhʋ̈ ‑sü bha‑ 'gü, 'bluu‑ bha 'ka‑ ‑bhö sië ‑kɔ 'ö‑ 'gü 'do 'do, kö ka we bha‑ mü sië‑ ‑ta, "sanni ‑a nu ‑sü ꞊zinng 'gü, kö ga 'ö‑ wo kwa ‑wɔn 'gü bha ꞊në 'ka‑ ‑dhiang zë sië bha.
1CO 11:27 ('Wɔn 'ö‑ ‑wɔn 'gü 'yö‑ ‑dhɛ 'dhö ‑bha ꞊dhɛ 'mɛ 'ö 'dhö ‑yö ö ‑dɩ ‑ga ‑së 'ka kö ‑yö gun ‑na kwa Dëmɛ ‑bha ‑bhöpë bha‑ ‑bhö bha 'yö bha.) ‑A 'klɔɔ‑ ‑mü ꞊dhɛ 'mɛ 'ö yaa‑ 'bluu‑ bha‑ ‑bhö "ɛɛn 'ö yaa‑ we bha‑ ‑mü "vɔɔ 'gü, kö ‑yö kwa Dëmɛ ꞊yɔɔn waa‑ kwi bha‑ ‑nu 'klɔɔ‑ ꞊në‑ bho bha, 'sa kö ‑yö ‑da ꞊në‑ wo Atanna "dhiʋ̈ bha.
1CO 11:28 ꞊Dhɛ 'ö "dhʋ̈, "sanni 'ka 'bluu‑ bha‑ ‑bhö kö 'ka‑ we bha‑ mü, ‑ka ka ‑dɩ ‑ga ‑së 'ka.
1CO 11:29 ‑A ‑gɛn ‑mü ꞊dhɛ mɛ "ʋʋ mɛ 'ö‑ 'bluu‑ bha‑ ‑bhö 'ö‑ we bha‑ mü bhluu" 'ka kö 'yaa‑ ꞊bhlëë dɔ, kö‑ ‑mɛ ‑yö "dhang ꞊në "gan sië ö ‑dɩ ‑ta bha.
1CO 11:30 'Wɔn 'ö‑ ‑wɔn 'gü 'yö mɛ 'gbɛ ꞊wa ga ka kpö 'gü, 'yö "yua 'dhö mɛ 'gbɛ ‑bha 'ö "sɩ 'yaa‑ ‑nu ‑dhɛ 'zü bha 'yö bha.
1CO 11:31 "Kɛɛ ꞊ya kë ꞊dhɛ 'kwa kwa ‑dɩ ‑ga ‑së 'ka, kö 'kwa kwa zuë" "slën bho kö 'kwa gun ‑na ‑a ‑bhö, ‑a "dhang 'yii 'dho kwa 'kun.
1CO 11:32 "Kɛɛ ꞊ya kë 'zü ꞊dhɛ kwa Dëmɛ 'ö 'dhö ꞊ya 'wɔn bho kwa 'gü ꞊dhɛ ‑kɔ bha‑ 'dhö, kö ‑ya ‑kë "dhʋ̈ kö kwaa‑ mɛ "wɛɛ ‑nu 'wo to kwa ‑zë 'gü ‑pee ꞊në 'ya 'dho kë do, yi 'ö dho 'wɔn bho‑ 'ka ‑a ‑nu 'gü ‑dhɛ 'bha ꞊kpaɔ ‑yi ‑bha bha‑ 'ka.
1CO 11:33 ꞊Dhɛ 'ö "dhʋ̈ n dheebhang ‑nu, ꞊ya kë ꞊dhɛ 'ka bho 'ko ‑ta ‑bhöpë bha‑ ‑bhö ‑dhɛ 'gü, ‑ka dɔ ka 'ko ‑nu ‑gɔ.
1CO 11:34 Din‑ 'dhö 'mɛ 'ö‑ ‑bha, ‑a ‑mɛ ‑yö pë ‑bhö ö ‑gɔ 'kɔɔdhö kö ‑yö 'kën kpɛnngkpɛnngdhö, kë "dhʋ̈ kö ka ‑bho 'ko ‑ta ‑sü 'ö kwa Dëmɛ Yesu ‑bha ‑bhöpë bha‑ ‑bhö ‑dhɛ 'gü bha 'ya 'dho kë za ‑loo ka ‑dɩ ‑ta ‑sü 'ka ‑kpɛawo. 'Ma ꞊loo ka "piʋ̈ mü yi 'ö‑ 'ka 'yö 'kwa‑ ‑kpɛa 'ö to bha‑ pö.
1CO 12:1 Dhɛɛ" 'ka‑ kpɔ n ‑gɔ 'ö ‑gban ‑bhɔdhɛ 'ö 'Nii‑ "slʋ̈ʋ̈slʋ̈ ‑ya bhɔ mɛdhɛ ‑a ‑wɔn ‑bha bha‑ ‑yɔ 'a dho‑ bɔ ka ‑gɔ 'yö ya. N dheebhang ‑nu, 'yaa n "piʋ̈ ꞊dhɛ 'wɔn 'ö ‑gban Atanna ‑bha 'Nii‑ bha‑ ‑bha ‑bhɔdhɛ 'ö‑ bhɔ mɛdhɛ ‑a ‑wɔn ‑bha bha 'ka kë‑ 'gü ka tii ‑bha.
1CO 12:2 Ka‑ 'wɔn ‑dɔ 'kpakpadhö ꞊dhɛ 'ö gun kö 'kii 'dhang bho ꞊kö Atanna "dhiʋ̈, "yina yaa ‑nu ‑wo ‑gun faan wɔ sië ka ‑ta 'ö ꞊gebhɔ ‑nu 'ö‑ ‑nu "dhi 'yaa 'dhö kö ‑wo "wɩ bha 'ka wo ꞊në‑ ‑dhɔkë kö‑ "sɩ 'yaa ka ‑dhɛ.
1CO 12:3 Yö ꞊në‑ ‑wɔn 'gü 'yö n "piʋ̈ ꞊dhɛ 'a‑ ‑ta "pʋ ka ‑dhɛ ꞊dhɛ: mɛ "ʋʋ mɛ 'ö Atanna ‑bha 'Nii‑ bha 'ö‑ 'gü, ‑a ‑mɛ 'yaa ꞊mɔɔ‑ ‑bha kö ‑ya pö: «Yesu bha "dhang ‑ya ‑bha», "ɛɛn mɛ 'bha 'yaa ꞊mɔɔ‑ ‑bha kö ‑ya pö Yesu ‑bha ꞊dhɛ: «Yesu bha ö Dëmɛ ‑mü» kö Atanna ‑bha 'Nii‑ "slʋ̈ʋ̈slʋ̈ ‑zë 'yaa‑ ‑mɛ 'gü.
1CO 12:4 ‑Bhɔdhɛ 'ö Atanna ‑bha 'Nii‑ "slʋ̈ʋ̈slʋ̈ ‑ya bhɔ‑ ‑bha mɛ ‑nu ‑dhɛ bha‑ ‑gaɔ ‑yö 'gbɛ, "kɛɛ 'Nii‑ "slʋ̈ʋ̈slʋ̈ do bha ꞊në‑ ꞊gban bhɔ.
1CO 12:5 Atanna ‑bha yë kë ‑kɔ 'ö‑ ‑bha mɛ ‑nu ‑gɔ ‑yö 'gbɛ, "kɛɛ kwa Dëmɛ do bha ꞊në mɛ ꞊gban 'wo‑ ‑kë ‑dhɛ.
1CO 12:6 Yë 'wo‑ ‑kë Atanna ‑dhɛ ‑a ‑gaɔ ‑yö 'gbɛ "kɛɛ 'mɛ 'ö‑ kë ‑faan ‑da mɛ ꞊gban 'gü ‑yö "dhʋ̈ do, Atanna ‑mü.
1CO 12:7 'Nii‑ "slʋ̈ʋ̈slʋ̈ do bha ꞊në 'mɛ 'ö "dhʋ̈ ‑a ‑bha ‑bhɔdhɛ ‑wo "yɛa‑, 'yö‑ ꞊trɔɔn ‑yö to Atanna ‑bha mɛ ꞊gban "pɛpɛ ‑bha.
1CO 12:8 'Nii‑ "slʋ̈ʋ̈slʋ̈ bha ꞊në dhiang ‑zë "yaaki bha ‑sü ‑bhɔdhɛ bhɔ mɛ do ‑dhɛ, yöö do bha 'zü 'yö dho 'ö 'wɔnbhokoo ‑sü ‑bhɔdhɛ bhɔ mɛ 'bha ‑dhɛ.
1CO 12:9 'Nii‑ "slʋ̈ʋ̈slʋ̈ do 'ö "dhʋ̈ bha ꞊në ‑zʋ ‑yö Atanna ‑dhɛ ‑sü ‑bhɔdhɛ bhɔ mɛ 'bha ‑dhɛ, 'yö dho 'zü 'ö "yua ‑bho mɛ ‑bha ‑sü ‑bhɔdhɛ bhɔ mɛ "wɛɛ 'bha ‑dhɛ.
1CO 12:10 Atanna ‑bha 'Nii‑ bha ꞊në "dhabhliwɔn ‑nu kë ‑sü ‑bhɔdhɛ bhɔ mɛ 'bha ‑dhɛ, 'yö dho 'ö Atanna ‑wʋ "dhiʋ̈ ꞊loo ‑sü ‑bhɔdhɛ bhɔ mɛ "wɛɛ 'bha ‑dhɛ, 'yö dho 'zü 'ö "yina yaa waa‑ Atanna ‑bha 'Nii‑ ‑a ‑nu ‑bho 'koo dɔ ‑sü kö ‑wo mɛ 'gü bha‑ ‑bhɔdhɛ bhɔ mɛ "wɛɛ 'bha ‑dhɛ. Yöö do bha 'zü ꞊në ‑wʋ ‑dee pö ‑sü ‑bhɔdhɛ bhɔ mɛ 'bha ‑dhɛ, 'yö dho 'ö‑ 'klɔɔ‑ pö ‑sü ‑bhɔdhɛ bhɔ mɛ "wɛɛ 'bha ‑dhɛ.
1CO 12:11 Atanna ‑bha 'Nii‑ "slʋ̈ʋ̈slʋ̈ do bha ꞊në ‑bhɔdhɛ "pɛpɛ bha‑ ꞊gban bhɔ, 'mɛ 'ö "dhʋ̈ ‑ya ‑bha ‑bhɔ ‑dhɛ ‑kɔ 'ö ‑dhidhɛ ꞊në‑ 'gü.
1CO 12:12 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Klisi bha ‑yö ꞊dhɛ mɛ ‑dhü do, "kɛɛ 'ö‑ daɔ 'dhö‑ ‑bha 'gbɛ ꞊në‑ 'dhö. 'Kö 'zü mɛ ‑dhü 'ö "dhʋ̈ bha‑ daɔ ‑gaɔ yöö kë 'gbɛ ‑kɔ "ʋʋ ‑kɔ 'ö‑ 'gü, "kɛɛ ‑a ‑dhü ‑zë ‑yö "dhʋ̈ do.
1CO 12:13 ‑A ‑kë "dhʋ̈ ‑sü bha‑ 'gü, Zuifö ‑nu oo, 'mɛ 'waa Zuifö 'ka oo, 'mɛ 'wo ꞊dhuëng 'ka oo, 'mɛ 'waa ꞊dhuëng 'ka oo, kwa ‑pa 'Nii‑ "slʋ̈ʋ̈slʋ̈ 'ka, kë "dhʋ̈ kö 'Nii‑ "slʋ̈ʋ̈slʋ̈ do bha ꞊në ‑yö kwa kë mɛ ‑dhü do 'ka, kö yöö do bha ꞊në ‑yö kë mɛ ꞊gban "pɛpɛ 'kwa 'gü.
1CO 12:14 ‑A ꞊tɛni‑ ‑kë ꞊dhɛ mɛ ‑dhü 'dhö. Mɛ ‑dhü bha‑ daɔ 'ö‑ ‑bha ‑yö 'gbɛ, 'yaa doseng.
1CO 12:15 "Ɛɛn ‑yö ka 'gü ꞊dhɛ mɛ ‑gɛn ꞊yaa‑ pö ꞊dhɛ ꞊dhɛ 'ö ‑kë ꞊dhɛ yö ‑zë 'yaa mɛ ‑kɔ 'ka, 'ö "dhʋ̈ kö 'yaa mɛ daɔ 'ka, ꞊ya kë "dhʋ̈ kö 'yaa mɛ daɔ 'ka ꞊naa ꞊dedewo bha ‑ee?
1CO 12:16 "Ɛɛn mɛ "tʋdhɛ ꞊yaa‑ pö ꞊dhɛ: «꞊Dhɛ 'ö ‑kë ꞊dhɛ yö ‑zë 'yaa mɛ "yanga 'ka bha», ꞊ya kë "dhʋ̈ kö 'yaa mɛ daɔ 'ka ꞊naa bha, kö ‑yö bo ‑kë mɛ daɔ 'ka ‑wɔn 'ka yö ‑zë 'gü ‑ee?
1CO 12:17 ꞊Ya kë 'nu ꞊dhɛ mɛ ‑dhü ‑todhʋ̈sü ꞊ya kë mɛ "yanga 'ka kö mɛ "tʋʋdhɛ ‑zë 'yaa 'dhö, ‑yö ‑dho dhiang ma ‑kɔ ‑kë ꞊dhɛ? "Ɛɛn mɛ ‑dhü ‑todhʋ̈sü ꞊ya kë mɛ "tʋdhɛ 'ka kö mɛ yunkpö 'yaa 'dhö ‑yö ‑dho pë ꞊fii 'kun ‑kɔ ‑kë ꞊dhɛ?
1CO 12:18 Mɛ daɔ ‑nu 'ö Atanna ‑ya ‑gban mɛ ‑bha bha ‑ya ‑gban ‑kɔ 'ö ‑dhidhɛ ꞊në‑ 'gü.
1CO 12:19 ꞊Ya kë 'nu ꞊dhɛ mɛ ‑dhü ꞊gban ‑todhʋ̈sü ‑yö mɛ daɔ do ꞊në‑ 'ka, kö 'mɛ ‑dhü 'yaa 'dhö 'nu!
1CO 12:20 "Kɛɛ 'yaa "dhʋ̈. Mɛ daɔ ‑yö 'gbɛ 'ka "dhʋ̈ tɛan‑ ꞊dede 'ka "kɛɛ mɛ ‑dhü ‑zë ‑yö do.
1CO 12:21 ‑A ‑kë "dhʋ̈ ‑sü bha‑ 'gü, mɛ "yan 'yaa ꞊mɔɔ‑ ‑bha kö ‑ya pö mɛ ‑kɔ ‑dhɛ ꞊dhɛ: «N ‑mawɔn 'yaa i ‑bha!» ‑Kɔ do bha‑ 'gü, mɛ ‑gɔ 'yaa ꞊mɔɔ‑ ‑bha 'pö kö ‑ya pö mɛ ‑gɛn ‑dhɛ: «N ‑mawɔn 'yaa ka ‑bha!»
1CO 12:22 "Kɛɛ mɛ 'daɔ ‑zian 'dhɛ 'ö mɛ ‑ya ‑ga ꞊dhɛ faan 'yaa‑ ‑bha, ‑a ꞊bhlëë 'yaa 'dhö bha ꞊në‑ ‑wɔn 'dhö "gbɩɩ‑.
1CO 12:23 ‑A 'dhɛ ‑nu 'ö‑ ‑nu ꞊bhlëë ‑tiandhö 'bha 'yaa kwa ‑gɔ bha woo ‑zian ꞊në 'kwa‑ ‑nu ‑wɔn kun 'ö ‑ziö 'ka‑ ‑kpɛa ‑ta. 'Yö‑ 'dhɛ ‑nu 'ö‑ ‑nu 'tɔ 'yaa ‑wo mɛ "dhi ‑ta bha 'kwa‑ ‑nu ‑kpɛkpɛ bho,
1CO 12:24 "kɛɛ kö‑ 'dhɛ ‑nu 'kö 'wo ‑da mɛ "yan 'gü bha kwa ‑mawɔn 'yaa wo ‑zë ‑a ‑nu ‑bha. Atanna ‑yö kwa ‑dhü ‑da "dhabhli ‑sü 'ka "dhʋ̈ kö mɛ daɔ 'dhɛ 'ö‑ ꞊bhlëë 'yaa 'gbɛ kwa 'gü bha ꞊në 'kwa ꞊bhlëë ‑ya ‑bha.
1CO 12:25 ‑A ‑kë "dhʋ̈ ‑sü bha‑ 'gü, mɛ ‑dhü bha 'yaa ‑gblü ‑sü 'ka, kë "dhʋ̈ kö mɛ daɔ ‑nu bha‑ ‑nu këwɔn ‑yö ꞊mɔɔ "kwëë, ꞊dhɛ ‑kɔ 'ö mɛ ‑kɔ ꞊plɛ ‑wo wo 'ko ꞊taa ‑zu 'ka bha‑ 'dhö.
1CO 12:26 ‑Kɔ do bha‑ 'gü, ꞊ya kë ꞊dhɛ 'wɔn 'dhö ꞊gbaɔn sië mɛ daɔ do ‑ta, kö ‑yö ꞊gbaɔn sië‑ ‑nu ꞊gban ꞊në‑ ‑ta bha, ꞊bhlëë ꞊ya ‑ya a do ‑bha, ‑a ‑nu ꞊gban ꞊nii ‑yö ‑da ꞊dhɛ 'ko 'dhö.
1CO 12:27 Mɛ "pɛpɛ 'ka bha mɛ ꞊gban ꞊në 'ka ꞊dhɛ Klisi ‑dhü 'dhö, 'yö mɛ 'ö "dhʋ̈ 'do 'do 'ka 'ö ꞊dhɛ ‑a daɔ do 'dhö.
1CO 12:28 'Pë 'ö ‑kë 'yö Atanna ‑yö Yesu ‑bha bɔmɛ ‑nu ꞊në‑ ‑nu ‑ya ‑blɛɛsü 'ö ‑bha 'kɔdhigümɛ ‑nu kpö 'gü, 'yö dho 'ö ö ‑wʋdhiʋ̈loomɛ ‑nu ‑ya ‑a ‑nu ‑gaɔ ꞊plɛ ‑naa 'ka, 'yö mɛdraanmɛ ‑nu ‑ya ‑a ‑nu ‑gaɔ ‑yaaga ‑naa 'ka bha 'yö bha. ꞊Dhɛ 'ö go‑ 'gü, 'yö "dhabhliwɔn këmɛ ‑nu 'wo dɔ mü, 'yö dho 'yö "yua ‑bho mɛ ‑bha ‑mɛ ‑nu ‑ya, 'yö mɛ ‑nu ‑takunmɛ ‑nu ‑ya, 'yö zian ‑bho mɛ ‑kpɛa 'ka ‑mɛ ‑nu ‑ya, 'yö dho 'yö ‑wʋ ‑dee pö ‑mɛ ‑nu ‑ya.
1CO 12:29 Mɛ ꞊gban "pɛpɛ ‑zë 'waa kë Yesu ‑bha bɔmɛ 'ka, "ɛɛn Atanna ‑wʋdhiʋ̈loomɛ 'ka, "ɛɛn 'zü mɛdraanmɛ 'ka. "Dhabhliwɔn kë "sɩ 'yaa kë mɛ ꞊gban ‑dhɛ.
1CO 12:30 "Ɛɛn mɛ ꞊gban 'waa kë "yua ‑bho mɛ ‑bha ‑mɛ "ɛɛn ‑wʋ ‑dee pö ‑mɛ, "ɛɛn ‑a 'klɔɔ‑ pö ‑mɛ 'ka.
1CO 12:31 ‑A ‑kë "dhʋ̈ ‑sü bha‑ 'gü, ka zuë" ‑yö bhɔ ‑bhɔdhɛ ‑nu 'wo "dhʋ̈ bha‑ 'dhɛ ‑nu 'wo ꞊bhlëësü ꞊në‑ ‑bha. ꞊Ya go yö ‑zë 'gü, ‑ka dɔ kö 'a zian ‑së ꞊dede 'ö ꞊bhlëësü, 'ö‑ ‑mɔɔ 'ka 'yaa 'dhö bha‑ ‑zɔn ka ‑dhɛ.
1CO 13:1 (‑A ‑gɛn ‑mü ꞊dhɛ) 'kö 'zü 'ma ‑wʋ ‑dee pö, ‑yö ‑kë mɛ "bhɩɩ‑ ‑nu ‑wʋ 'ka ‑ee, "ɛɛn ‑yö ‑kë Atanna ‑bha "kië ‑nu ‑zian ‑wʋ 'ka ‑ee, "kɛɛ kö ‑dhɔ ‑zë 'yaa n 'gü, kö a ꞊dhɛ dhaɔ 'wo‑ zë, "ɛɛn ꞊dhɛ "gbʋ̈ng 'wo‑ zë 'ö‑ ‑wʋ ‑yö dɔ mɛ "tʋ 'gü "wɛɛwɛɛ ꞊në‑ 'dhö.
1CO 13:2 'Kö 'zü 'ma kë Atanna ‑wʋdhiʋ̈loomɛ 'ka, 'wɔn ‑bho 'koo dɔ ‑kɔ ꞊gban "pɛpɛ suu ꞊ya kë n ‑gɔ, 'ma 'wɔn ‑nu 'wo ‑bin ‑sü 'ka ‑a ꞊gban bho‑ 'ka "dhuu, ‑zʋ ‑yö Atanna ‑dhɛ ‑sü ꞊gban suu 'do 'do ꞊ya kë n ‑gɔ, 'ma ꞊mɔɔ‑ ‑bha 'ma ‑tɔn ‑zian bho‑ 'ka "gblʋʋ, "kɛɛ ‑dhɔ ‑zë 'yii kë n 'gü kö 'maa pë "ʋʋ ‑pë 'bha 'ka.
1CO 13:3 'Kö 'zü ꞊ya kë ꞊dhɛ pë "pɛpɛ 'ö n ‑gɔ 'ma‑ ꞊gban ꞊gbaɔ, "ɛɛn 'ma n ‑dɩ ‑zian nu Atanna ‑wɔn 'gü ꞊wa n ‑zuö pɛng 'gü, "kɛɛ ‑dhɔ ‑zë 'yii kë n 'gü, kö pë "pɛpɛ 'a‑ ‑kë bha‑ 'bha kë ‑gɛn 'yaa 'dhö.
1CO 13:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑dhɔ bha ꞊në ꞊ya kë mɛ 'gü 'yö mɛ zuë" ‑yö ‑kë ‑sɛa 'wɔn ꞊gban 'gü, 'yö mɛ "klʋ ‑yö ‑dhi, 'yö mɛ zuë" 'yaa bhɔ mɛ ‑nu ‑bha pë ‑bha, 'yö mɛ 'yaa mɛ 'tɔ 'kun mɛ ‑kpɛa ‑ta, 'yö mɛ 'yaa mɛ ‑dɩ 'sü 'kpii‑.
1CO 13:5 ‑Dhɔ bha ꞊në ꞊ya kë mɛ 'gü, 'yö 'wɔn 'ö 'yiʋ̈‑ ‑sü, 'ö 'yaa këwɔn 'ka mɛ ꞊zinng 'gü, mɛ 'yaa‑ kë, 'yö i ‑mɛ 'bhaa ‑ya i ‑dɩ ‑wɔn ꞊në‑ zuën ‑ta do 'bhaa 'dho‑ 'ka, 'yö 'wɔn 'yaa ‑siö i ‑dhɛ mɛ kwi ‑bha, 'yö 'bhaa 'wɔn 'kun i "gblʋ̈ʋ̈‑ mɛ ‑bha;
1CO 13:6 'yö 'i ‑së ‑kë 'wɔn ‑së ꞊në‑ "dhiʋ̈, 'yö 'bhaa ‑së kë 'wɔn yaa ‑zë "dhiʋ̈.
1CO 13:7 ‑Dhɔ bha ꞊në 'wɔn ꞊gban ‑wɔn ꞊gban ‑mawɔn to, 'ö mɛ 'dhang bho 'wɔn ꞊gban‑ "dhiʋ̈, 'ö mɛ ‑zʋ ‑së gɔn 'wɔn ꞊gban 'ka, ‑dhɔ bha ꞊në 'wɔn ꞊gban 'kun bho mɛ 'gü 'yö mɛ ‑ya kun mɛ ‑bha.
1CO 13:8 ‑Dhɔ bha ꞊në‑ "yi 'yaa "bhʋ̈ʋ̈. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑wʋ "dhiʋ̈ ꞊loo ‑sü ‑dho yën, 'ö ‑wʋ ‑dee pö ‑sü ‑yö yën, 'ö 'wɔn ‑bho 'koo dɔ ‑sü ‑yö yën.
1CO 13:9 ‑A ‑gɛn ‑mü ꞊dhɛ Atanna ‑wʋ "dhiʋ̈ ꞊loo ‑sü waa‑ 'wɔn ‑bho 'koo dɔ ‑sü bha‑ "pɛn 'në 'bha ꞊në 'kwa‑ dɔ.
1CO 13:10 "Kɛɛ ‑a ꞊gban dɔ 'kpakpadhö ‑sü ‑zë ꞊ya ‑wo "yɛa‑ yi 'ö‑ 'ka kö‑ "pɛn 'në 'bha dɔ ‑sü 'ö kwa ‑gɔ bha‑ ‑bha ꞊ya bho‑ "dhiʋ̈ ꞊naa bha.
1CO 13:11 (‑A ꞊tɛni‑ ‑kë ꞊dhɛ mɛ "bhɩɩ‑ ‑bha ‑tosɛa bha‑ 'dhö) 'a gun 'në 'ka, 'nëdhɛ ‑wɩ ꞊në 'a gun‑ wo sië, 'nëdhɛ ‑zʋ 'gɔn ‑kɔ ꞊në gun n ‑gɔ, 'yö 'a 'wɔn ‑yaki sü ꞊dhɛ 'në ‑nu 'dhö, "kɛɛ ꞊dhɛ 'a bo kë ‑sü ‑zë 'ka ꞊kpaɔsü, bo ꞊në 'a‑ wo 'nëdhɛ ‑wɔn ‑nu bha‑ 'ka.
1CO 13:12 'Wɔn 'dhɛ 'kö kwa "yan 'dhö ‑da sië‑ 'gü "tʋ̈ng ya‑ 'gü Atanna ‑wɔn "glʋʋ "piʋ̈ bha ‑yö ꞊dhɛ gbengkpö 'ö mɛ ‑ya ‑ga ‑dhuangdhe 'gü ꞊në‑ 'dhö, ‑yö ‑wlubhaadhö, mɛ 'yaa‑ yö ‑së 'ka, "kɛɛ 'wɔn ꞊gban "pɛpɛ ‑dɔ 'kpakpadhö ‑yi bha ꞊ya ꞊loo, kwa "yan ‑dho ‑kpan Atanna yöö ꞊dede wëëdhɛ ‑bha 'yi bha ꞊në‑ 'ka, "tʋ̈ng kwa dɔ‑ 'ka ya 'wɔn "pɛpɛ 'a‑ dɔ bha‑ "pɛn 'në 'bha ꞊në 'a‑ dɔ, "kɛɛ a ‑dho Atanna dɔ 'yi bha ꞊në‑ 'ka 'kpakpadhö ꞊dhɛ ‑kɔ 'ö n dɔ‑ 'ka 'pö ‑a 'dhö.
1CO 13:13 ‑A ‑kë "dhʋ̈ ‑sü bha‑ 'gü, 'wɔn ꞊dede 'ö‑ ‑wɔn 'dhö "gbɩɩ‑ Atanna ‑bha zian ‑ta, 'ö‑ 'bha 'yaa ‑bho "piʋ̈ ‑pë 'ka ‑yö ‑yaaga. 'Dhang ‑bho Atanna "dhiʋ̈ ‑sü ‑ya do 'ka, 'yö ‑zʋ ‑gɔn Atanna ‑wɔn 'ka ‑sü 'ö‑ do 'ka, 'yö ‑dhɔ 'dhö‑ do 'ka, "kɛɛ ‑a ‑gɔ 'ö‑ 'gü yö ‑mü ‑dhɔ ꞊në‑ 'ka.
1CO 14:1 ꞊Dhɛ 'ö "dhʋ̈ kö ‑dhɔ bha ꞊në ‑kaa mɔɔ‑. ‑Bhɔdhɛ ‑nu 'ö Atanna ‑ya bhɔ mɛ ‑dhɛ bha ka zuë" ‑yö bhɔ‑ ‑bha 'pö, "kɛɛ ‑a 'dhɛ 'ö ‑kë Atanna ‑wʋ "dhiʋ̈ ꞊loo ‑sü 'ka bha ꞊në ka zuë" ‑yö bhɔ‑ ‑bha 'kpiisü.
1CO 14:2 ‑A 'klɔɔ‑ ‑mü ꞊dhɛ mɛ 'ö ‑wʋ ‑dee pö bha ‑ya ‑pö Atanna ꞊në‑ ‑dhɛ, 'yii‑ pö mɛ "bhɩɩ‑ ‑dhɛ. ‑A ‑gɛn ‑mü ꞊dhɛ mɛ 'bhaa‑ ‑wʋ 'gü ma. Tɛanwɔn ‑nu 'wo ‑bin ‑sü 'ka Atanna "piʋ̈ bha ꞊në‑ ‑bha 'Nii‑ "slʋ̈ʋ̈slʋ̈ ‑ya dɔ‑ ‑nu "dhi 'gügbɩɩdhɛ 'ö‑ ‑gɔ bha‑ 'ka 'ö‑ pö.
1CO 14:3 "Kɛɛ 'mɛ 'ö Atanna ‑wʋ "dhiʋ̈ ꞊loo‑ ‑bha mɛ ‑nu ‑bha bha ‑yö dhiang ‑zë mɛ "bhɩɩ‑ ‑nu ꞊në‑ ‑dhɛ, kë "dhʋ̈ kö ‑a ‑nu ‑bha ‑zʋ ‑yö ‑a ‑dhɛ ‑sü yun ‑yö ziö, kö ‑ya ‑nu faan‑ dɔ, kö ‑yö kpa‑ ‑nu ‑zʋ ‑ta.
1CO 14:4 'Mɛ 'ö ‑wʋ ‑dee pö bha ‑yö ö ‑dɩ ‑bha ‑zʋ ‑yö ‑a ‑dhɛ ‑sü ꞊në‑ ‑ma 'gü ma, 'yö Atanna ‑wʋdhiʋ̈loomɛ ‑zë 'ö‑ ‑bha 'kɔdhigümɛ ꞊gban "pɛpɛ ‑loo 'ko ‑ta ‑sü ‑bha ‑a dɔ ‑sü 'bha ꞊në‑ ‑da 'gü.
1CO 14:5 Mɛ ꞊gban "pɛpɛ ka ‑wʋ ‑dee pö ‑sü ‑yö n 'gü ‑së, "kɛɛ ‑a 'dhɛ 'ö‑ "dhia 'dhö n 'gü 'ö ‑ziö mü yö ‑mü Atanna ‑wʋ "dhiʋ̈ ‑loo ‑sü bha ꞊në‑ 'ka. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑a ‑wʋdhiʋ̈loomɛ ꞊trɔɔn ‑yö ‑dhö ‑a ‑bha mɛ ‑nu bha 'ö ‑ziö ‑wʋ ‑dee pö ‑mɛ ‑ta, "ni kö‑ 'klɔɔ‑ pö ‑mɛ ‑zë 'yaa 'dhö. ‑A ‑kë "dhʋ̈ ‑sü bha‑ 'gü, ‑a ‑dhɛa ‑bha ꞊dhɛ ꞊wa ‑wʋ ‑dee pö ‑wa 'klɔɔ‑ pö, kë "dhʋ̈ kö ‑yö Atanna ‑bha mɛ ꞊gban "pɛpɛ faan dɔ ‑zʋ ‑yö ‑a ‑dhɛ ‑sü ‑bha.
1CO 14:6 "Ɛɛn ‑a ‑ga 'ka‑ wo bha ꞊wɛ, n dheebhang ‑nu, ꞊ya kë ꞊dhɛ 'ma nu ka ‑dhɛ 'gü kö 'a dhiang zë ka ‑dhɛ ‑wʋ ‑deedee ꞊në‑ 'gü bha ‑oo, ‑a ꞊trɔɔn ‑dho kë ka ‑bha ‑ee? ‑Yö n 'gü ꞊dhɛ ‑a 'dhɛ 'ö‑ ꞊trɔɔn dho kë ka ‑bha yö ‑mü ꞊dhɛ kö 'ma nu kö 'a 'wɔn ‑nu 'wo Atanna ‑zʋ "piʋ̈, "ɛɛn 'zü 'wɔn ‑bho 'koo ‑sü, "ɛɛn 'zü ‑wʋ 'ö‑ dɔ n "dhi, "ɛɛn mɛ ꞊klang kë ‑kɔ 'ö‑ ‑zɔn n ‑dhɛ bha ꞊në ka ꞊klang kë‑ 'ka ‑sü 'ka. Yö ‑zë ꞊trɔɔn‑ ‑dho kë ka ‑bha.
1CO 14:7 ‑Kwaa ‑zɔn 'ka ‑zɔn "truu gɔn waa‑ kɔnng ‑nu 'ka. ꞊Ya kë ꞊dhɛ "wɩpë ‑nu 'wo "dhʋ̈ bha ꞊wa "wɩ do wuudhö ‑a ‑nu ‑wʋ ‑bho 'ko ‑ta ‑yan 'yii kë bha ‑oo, ‑a ‑nu ‑wʋ 'gü ‑dho ma ‑kɔ ‑kë ꞊dhɛ?
1CO 14:8 ꞊Ya kë 'zü ꞊dhɛ "truu 'wo‑ ‑piö kö ‑wo 'dho ‑gblü ‑bha bha ꞊waa‑ ‑piö ꞊dhɛ mɛ‑ "truu "wɛɛ ‑piö, ‑a ‑wʋ ‑bho 'ko ‑ta ‑yan 'yii kë bha ‑oo, de në dho ‑dho ‑gblü ‑bha ‑sɔ ‑da?
1CO 14:9 ‑Kɔ do bha‑ 'gü, 'ka ‑wʋ ‑dee pö‑ 'klɔɔ‑ 'yii kë, mɛ 'bha 'yii 'dho‑ 'gü ma. ‑Yö ‑kë ꞊dhɛ mɛ‑ dhiang zë ‑dhɛ "fiëdhɛ ‑dhɛ.
1CO 14:10 ‑Wʋ 'ö "kpʋng ꞊taa ‑yö 'gbɛ 'ö‑ 'bhaa bhɔ 'kwëë‑, "kɛɛ ‑a 'bha 'yaa 'dhö kö‑ 'klɔɔ‑ 'ya 'dho kë.
1CO 14:11 ‑A ‑kë "dhʋ̈ ‑sü bha‑ 'gü, 'mɛ 'ö dhiang zë n ‑dhɛ ‑wʋ "wɛɛ 'ö 'maa‑ ma‑ 'gü, kö ꞊ya kë n 'gü ꞊dhɛ "sɛ "wɛɛ 'gü mi 'dhö, kö mang ‑dɩ 'pö 'ma kë‑ 'gü ꞊dhɛ "sɛ "wɛɛ 'gü ‑mɛ 'dhö.
1CO 14:12 ꞊Dhɛ 'ö "dhʋ̈, ꞊dhɛ 'ö ‑kë ꞊dhɛ ‑bhɔdhɛ 'ö go Atanna ‑bha 'Nii‑ "slʋ̈ʋ̈slʋ̈ "piʋ̈ bha‑ ‑wɔn "dhia ‑yö ka 'gü "dhiʋ̈ ziö 'ka bha, ‑kaa mɔɔ‑ kö ‑yö kë ka ‑gɔ 'gbɛ, "kɛɛ ‑a 'dhɛ 'ö dho Atanna ‑bha mɛ ‑nu 'dho "dhiʋ̈ ‑zʋ ‑yö ‑a ‑dhɛ ‑sü 'gü bha ꞊në ‑kaa mɔɔ‑.
1CO 14:13 ‑A ‑kë "dhʋ̈ ‑sü bha‑ 'gü, 'mɛ 'ö ‑wʋ ‑dee pö ‑mɛ 'ka ‑a ‑mɛ ‑yö bhɛa" Atanna ‑dhɛ kö ‑ya 'klɔɔ‑ pö ‑sü ‑bhɔdhɛ bhɔ‑ ‑dhɛ.
1CO 14:14 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'i ‑wʋ ‑dee pö sië "dhʋ̈, kö i 'nii‑ 'ö i 'gü bha yö ‑zë ‑yö bhɛa" sië Atanna ‑dhɛ, "kɛɛ kö i "yaaki ‑zë 'yaa 'wɔn 'i‑ pö sië bha‑ 'bha 'gü.
1CO 14:15 ‑A ‑kë "dhʋ̈ ‑sü bha‑ 'gü, ꞊ya kë ma ‑zë n 'ka, a ‑dho bhɛa"‑ ‑dhɛ n 'nii‑ 'gü, "kɛɛ a ‑dho bhɛa" 'pö kö n "yaaki ‑yö 'pë 'a‑ pö sië bha‑ dɔ. 'Kö "tan ‑zian ꞊në‑ 'ka 'a‑ bho sië, a ‑dho ‑a bho n 'nii‑ 'gü, "kɛɛ a ‑dho ‑a 'bha bho 'pö n "yaaki ‑bha.
1CO 14:16 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'bha Atanna nuɛ" bho i 'nii‑ 'gü kö 'mɛ 'ö ‑dhɛng 'ka ‑a ‑dhɔkë ‑sü 'gü ‑yö ka kpö 'gü, ‑a ‑mɛ ‑dho ‑a pö (꞊iin, 'wɔn bha ‑yö kë "dhʋ̈) ‑kɔ ‑kë ꞊dhɛ kö 'i 'pë‑ pö 'yaa‑ 'gü ma?
1CO 14:17 ꞊Ya kë "dhʋ̈, 'kö 'zü 'bha Atanna nuɛ" bho ‑wʋ "nɛɛnɛɛ 'ka ‑kɔ "ʋʋ ‑kɔ 'ö‑ 'gü, "kɛɛ 'bhaa mɛ 'dhɛ 'wo 'dhö ‑a ‑nu faan dɔ ‑zʋ ‑yö ‑a ‑dhɛ ‑sü ‑bha, (‑a ‑gɛn ‑mü ꞊dhɛ 'waa i ‑wʋ 'gü ma).
1CO 14:18 Mang ‑zian a Atanna nuɛ" ‑bho ꞊dedewo 'wɔn bha‑ 'gü, ‑a 'klɔɔ‑ ‑mü ꞊dhɛ a ‑wʋ ‑dee bha‑ ‑pö 'a ziö 'ka mɛ ꞊gban "pɛpɛ ka ‑ta.
1CO 14:19 "Kɛɛ 'ma kë Atanna ‑bha mɛ ‑nu kpö 'gü, a ‑wʋ "sɔɔdhu ‑zian pö ‑sü 'ö ‑bhɛa ‑a ‑dhɛ ‑sü 'gü, 'ö mɛ ꞊gban ‑wa 'gü ma, 'ö‑ ‑nu faan dɔ a‑ fië‑ ‑bho ‑wʋ ‑dee "gblü do pö ‑sü ‑bha.
1CO 14:20 ‑A ‑kë "dhʋ̈ ‑sü 'gü n dheebhang ‑nu, 'ka 'dho ka ‑dɩ 'sü ꞊dhɛ 'në ‑nu 'dhö 'wɔn dɔ ‑sü 'gü, 'wɔn 'ö ‑gban 'wɔn yaa kë ‑sü ‑bha bha ꞊në ‑ka kë‑ 'gü ꞊dhɛ 'në ‑nu 'dhö. "Kɛɛ ꞊ya zun 'wɔn dɔ ‑sü ‑zë ‑bha, ‑ka kë‑ 'gü ꞊dhɛ mɛ ꞊kpaɔsü 'dhö.
1CO 14:21 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑yö ‑bɛn zë ‑sü 'ka Atanna ‑bha 'tɔng‑ 'sëëdhɛ 'gü ꞊dhɛ: «Kwa Dëmɛ ‑ya ‑pö: Dhiang 'ö maa‑ zë Izraɛdhö ‑sɛ 'gü ‑mɛ ‑nu ‑dhɛ bha a ‑dho ‑a dɔ ‑wʋ "wɛɛ pö ‑mɛ ‑nu ꞊në‑ ‑nu "dhi, a ‑dho ‑a dɔ nu ‑mɛ ‑nu ꞊në‑ ‑nu "dhi, "kɛɛ yö ‑zë ꞊gban 'gü 'wii 'dho wo "tʋ 'to n ‑wʋ ‑bha.»
1CO 14:22 ‑A ‑kë "dhʋ̈ ‑sü bha‑ 'gü, ‑wʋ ‑dee pö ‑mɛ ‑nu 'wo bha ‑wo Atanna "sɛɛ‑ 'ka 'mɛ 'waa 'dhang bho‑ "dhiʋ̈ ꞊në‑ ‑nu 'gü, "kɛɛ 'waa‑ 'ka 'mɛ 'kö 'wo 'dhang bho‑ "dhiʋ̈ wo ‑zë ‑a ‑nu 'gü. 'Yö Atanna ‑wʋdhiʋ̈loomɛ ‑nu bha 'wo‑ "sɛɛ‑ 'ka 'pö 'mɛ 'wo 'dhang bho‑ "dhiʋ̈ ‑a ‑nu 'gü, "kɛɛ 'yö 'waa‑ 'ka 'mɛ 'kö 'waa 'dhang bho‑ "dhiʋ̈ ‑a ‑nu 'gü.
1CO 14:23 ꞊Ya kë ꞊dhɛ Atanna ‑bha 'kɔdhigümɛ ‑nu 'ka ꞊loo 'ko ‑ta kö mɛ ꞊gban "pɛpɛ 'ka ‑ya ‑wʋ ‑dee pö ‑sü ‑bha yuudhö, kö 'mɛ 'wo ‑tun "tʋngti 'ka Atanna ‑wɔn 'gü "ɛɛn 'ö 'waa 'dhang bho Yesu ‑wɔn "dhiʋ̈ ‑wo ‑kpan ka ‑bha kö ka "wɩ sië "dhʋ̈, 'wii 'dho‑ pö slaa" ‑yö ka 'gü ‑ee?
1CO 14:24 "Kɛɛ ꞊ya kë ꞊dhɛ 'ka ꞊loo 'ko ‑ta kö mɛ ꞊gban 'ka zun ‑a ‑wʋ "dhiʋ̈ ꞊loo ‑sü ꞊në‑ ‑bha, 'mɛ 'ö 'yaa 'dhang bho Yesu ‑wɔn "dhiʋ̈ "ɛɛn 'ö 'yii 'wɔn 'ö ‑gban ‑bha bha‑ 'gü ma ꞊kö ‑së 'ka ꞊ya ‑kpan ka ‑bha kö ka dɔ sië‑ ꞊sɔng ‑nu ‑bhiëë ‑ta 'dɔɔndhö Atanna ‑wʋ 'ka, ‑yö ‑dho ö ‑dɩ dɔ 'wɔnyaakëmɛ 'ka
1CO 14:25 "dhɛ 'ka‑ bho‑ ‑ta bha‑ ‑wɔn 'gü, ꞊ya kë "dhʋ̈ ‑a ‑mɛ ‑dho zun ö kpiö 'gü 'ö ꞊bhɛa Atanna ‑dhɛ 'ö‑ pö: «'Mɛ 'ka ya Atanna ‑yö ka kpö 'gü ꞊dedewo tɛan‑ 'ka!»
1CO 14:26 Pë "pɛpɛ 'a‑ pö bha‑ ‑gɔ 'ö‑ 'gü yö ‑mü ‑më 'ka, n dheebhang ‑nu? Yö ‑mü ꞊dhɛ 'ka ꞊loo 'ko ‑ta Atanna ‑dhɔkëdhɛ 'gü, mɛ 'bha 'ö mü "tan ꞊në‑ ‑gɔ ‑ee, mɛ 'bha‑ mü 'zü mɛ ꞊klang kë ‑wʋ ꞊në‑ ‑gɔ ‑ee, mɛ 'bha‑ mü Atanna ꞊ya 'wɔn 'bha ‑zɔn ‑dhɛ 'ö‑ "piʋ̈ 'ö‑ pö ‑ee, "ɛɛn 'zü mɛ 'bha‑ mü yöö ‑wʋ ‑dee ꞊në‑ pö kö mɛ 'bha‑ mü ‑ya 'klɔɔ‑ pö ‑ee, ‑a ‑dhɛa ‑bha ꞊dhɛ ‑a ꞊gban "pɛpɛ ‑yö kë Atanna ‑bha 'kɔdhigümɛ ‑nu faan ‑dɔ ‑zʋ ‑yö ‑a ‑dhɛ ‑sü ‑bha ‑wʋ ꞊në‑ 'ka.
1CO 14:27 ꞊Ya kë ꞊dhɛ 'wo dho ‑wʋ ‑dee pö, ‑yö kë mɛ ꞊plɛ ‑yaaga 'bha ꞊në‑ 'ka "kɛɛ ‑wa bho 'ko ‑dhɛ ‑dhaa "dhiʋ̈, kö mɛ do 'bha ‑ya 'klɔɔ‑ pö.
1CO 14:28 ꞊Ya kë ꞊dhɛ ‑a 'klɔɔ‑ pö mɛ 'ö suu 'dhö "dhʋ̈ 'yii kë ka kpö 'gü, 'mɛ 'wo dho ‑wʋ ‑dee pö bha ‑wo ‑ya wo "dhi "tʋng, "ɛɛn ‑wo woo‑ pë pö wo zuë" "piʋ̈, kö ‑yö 'to waa‑ Atanna ‑nu ꞊në‑ ‑nu ꞊zinng 'gü.
1CO 14:29 'Mɛ 'ö woo ‑dɩ 'pö ‑a ‑nu ‑bha dho kë‑ ‑wʋ "dhiʋ̈ ‑loo ‑sü 'ka bha, ꞊waa‑ pö 'wo‑ kë, mɛ ꞊plɛ ‑yaaga ‑wa kë kö mɛ ‑kpɛa 'wo to ‑wa 'gü ‑wlö.
1CO 14:30 ꞊Ya kë 'zü ꞊dhɛ mɛ "wɛɛ 'bha ꞊ya kë mü kö Atanna ꞊ya 'wɔn 'bha ‑zɔn ‑dhɛ kö ‑ya ‑mɛ "piʋ̈ ꞊dhɛ 'ö‑ pö, ‑a ‑dhɛa ‑bha ꞊dhɛ mɛ ‑blɛɛsü 'ö dhiang ‑yö gun‑ "dhi bha ‑yö ö bo "vaandhö.
1CO 14:31 Mɛ ꞊gban "pɛpɛ ka ‑mɔɔ ‑bha 'ka ‑da "dhɛɛdhö 'do 'do 'ka Atanna ‑wʋ "dhiʋ̈ ꞊loo kë "dhʋ̈ kö ‑yö mɛ ꞊gban ꞊kpaɔ, kö ‑ya ‑nu faan dɔ.
1CO 14:32 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑a ‑dhɛ 'yaa‑ ‑bha ꞊dhɛ 'mɛ 'ö Atanna 'dhö ö ‑wʋ "dhiʋ̈ ‑loo ‑sü ‑bhɔdhɛ bhɔ ‑sü 'ka‑ ‑nu ‑dhɛ bha ‑wo ‑da ‑a ‑nu ‑bha ‑bhɔdhɛ bha‑ ‑gɔ ꞊dhuëngdhɛ 'gü. ‑A ‑dhɛa ‑bha ꞊dhɛ wo ꞊në wo ‑zë ‑a ‑nu ‑kɔ ‑yö wɔ‑ ‑ta.
1CO 14:33 ‑A ‑gɛn ‑mü ꞊dhɛ Atanna ‑zë 'yaa 'wɔn "bhluubhlu kë, ‑yö 'wɔn ꞊gban dɔ ꞊në‑ wo ‑bhiëë 'gü. ‑A ‑dhɛa ‑bha ꞊dhɛ ‑a ‑bha 'në ‑nu 'ka ꞊loo 'ko ‑ta, ‑dhɛa ‑yö ga dhebhɔ ‑nu ‑ta ꞊dhɛ ‑kɔ 'ö ‑kë 'ka ‑a ‑bha 'kɔdhigümɛ ‑nu kpö 'gü ‑dhɛ ꞊gban "pɛpɛ 'gü bha‑ 'dhö.
1CO 14:34 ‑A ‑dhɛ 'yaa‑ ‑bha ꞊dhɛ dhong ‑nu 'wo "wɩ, ‑a ‑dhɛa ‑bha ꞊dhɛ ‑wo wo ‑gɔ 'dho gɔɔn‑ ‑nu ‑dhɛ "sia‑ ꞊dhɛ ‑kɔ 'ö Atanna ‑wʋ ‑ya pö‑ 'ka‑ ‑bha 'tɔng‑ 'sëëdhɛ 'gü bha‑ 'dhö.
1CO 14:35 ꞊Ya kë ꞊dhɛ dhɛɛ" 'kpɔ ‑dhɔ 'dhö dhebhɔ 'bha ‑bha 'wɔn 'bha 'gü, waa‑ ö ‑gɔn ꞊wa 'dho ꞊wa ꞊loo "kwɛandhö kö ‑ya dhɛɛ" 'kpɔ. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ dhiang ‑zë Atanna ‑bha mɛ ‑nu kpö 'gü ‑sü ‑dɔ 'yaa dhi dhong ‑nu 'ka.
1CO 14:36 "Ɛɛn Atanna ‑wʋ ‑yö ‑go ka "piʋ̈ mü ꞊naa ‑ee? "Ɛɛn kaa do ꞊në 'ka‑ ‑wʋ ma ‑ee?
1CO 14:37 Mɛ "ʋʋ mɛ 'ö‑ pö ö ‑dɩ ‑dhɛ ꞊dhɛ Atanna ‑wʋdhiʋ̈loomɛ ‑mü 'ö 'ka ka kpö 'gü, "ɛɛn 'zü 'ö‑ pö ö ‑dɩ ‑dhɛ ꞊ya ‑bhɔdhɛ ‑bhɔ ö ‑dhɛ, ‑a ‑dhɛa ‑bha ꞊dhɛ ‑a ‑mɛ ‑ya 'wɔn dɔ ꞊dhɛ ‑wʋ 'a‑ pö sië ka ‑dhɛ 'sëëdhɛ ya‑ 'gü ya 'tɔng‑ ‑mü 'yö 'a‑ dɔ, a‑ ‑dɔ kwa Dëmɛ ‑bha dɔ 'gü.
1CO 14:38 ꞊Ya kë ꞊dhɛ ‑a ‑mɛ 'yii‑ dɔ "dhʋ̈, mɛ 'bha "tʋ 'ya 'dho kë‑ ‑mɛ ‑bha.
1CO 14:39 ‑A ‑kë "dhʋ̈ ‑sü bha‑ 'gü n dheebhang ‑nu, ‑a ‑dhɛa ‑bha ꞊dhɛ ka zuë" ‑yö bhɔ Atanna ‑wʋ "dhiʋ̈ ‑loo ‑sü ꞊në‑ ‑bha. "Kɛɛ 'ma‑ pö "dhʋ̈ kö 'mii‑ pö ꞊dhɛ 'ka ‑wʋ ‑dee pö ‑sü ‑zë 'tɔng‑ dɔ. ‑Abin!
1CO 14:40 'Ma‑ pö "dhʋ̈ kö a‑ ‑pö ꞊dhɛ 'wɔn "ʋʋ 'wɔn 'ö ka "piʋ̈ ꞊dhɛ 'ka‑ kë, 'ka‑ kë mɛ wë ‑ta "pʋ ‑dhɔ ‑dhɛ, kö 'ka‑ ꞊gban ꞊në‑ bho 'ko ‑dhɛ ‑dhaa "dhiʋ̈ ‑së 'ka.
1CO 15:1 N dheebhang ‑nu, naɔ ‑së 'ö go Atanna "piʋ̈ 'a‑ pö ka ‑dhɛ "tʋ̈ng 'bha 'gü, 'ö 'ka 'dhang bho‑ "dhiʋ̈ 'ö ka ‑zʋ yö ‑sü 'dhö‑ ‑dhɛ ꞊dedewo bha ꞊në maa ka ‑zʋ ‑bö ‑a ‑wɔn 'ka ꞊taamasü ya‑ 'gü.
1CO 15:2 A‑ ‑pö 'wɔn ‑së 'ö 'ka‑ ‑wɔn 'kun ‑sü 'ka ka faan 'ka klöklödhö "dhʋ̈ bha ꞊ya kë ꞊dhɛ 'ka‑ 'gü ‑ta ‑zë 'sü ꞊dhɛ ‑kɔ 'a‑ pö‑ 'ka ka ‑dhɛ bha‑ 'dhö, kö ꞊ya ka dha ꞊naa bha. Yö ‑zë 'yii kë "dhʋ̈, kö 'dhang 'ka‑ bho‑ "dhiʋ̈ bha ka‑ ‑bho "dhiʋ̈ "wɛɛwɛɛ, kö‑ ꞊trɔɔn 'yaa 'dhö.
1CO 15:3 ‑Wʋ 'ö Atanna ‑ya dɔ n "dhi ꞊në 'a ka ꞊klang ‑kë 'ka, "kɛɛ ‑a 'dhɛ 'ö‑ "gbɩɩ‑ ‑sü ꞊dede 'ka 'ö‑ 'gü, yö ‑mü ꞊dhɛ ‑yö ‑gun ‑bɛn zë ‑sü 'ka ‑a ‑bha 'sëëdhɛ 'gü ꞊dhɛ Klisi ‑dho ga kwaa‑ 'wɔn yaa ‑nu ‑wɔn 'gü. Ga 'ö "dhʋ̈ bha Klisi ꞊yaa‑ wo 'pö tɛan‑ 'ka.
1CO 15:4 ‑Yö ‑gun ‑bɛn zë ‑sü 'ka Atanna ‑gɔ 'sëëdhɛ 'gü 'zü ꞊dhɛ ꞊ya ga ‑yö ‑dho ‑dhɛkpaɔyi ꞊plɛ ꞊në‑ kë ꞊geebɔɔ, 'yö ‑bö ‑a ‑dhɛkpaɔyi ‑yaaga ‑naa 'ka. ꞊Dhɛ 'ö ga, 'ö 'wo‑ ‑wɛɛ bho, ‑yö ‑wɔ ꞊geebɔɔ 'pö ꞊plɛ "dhʋ̈ tɛan‑ 'ka 'yö ‑bö ‑a ‑yaaga ‑naa ‑yi 'ka.
1CO 15:5 ꞊Dhɛ 'ö ‑bö 'ö go ga 'gü, ‑yö ö ‑dɩ ‑zɔn Piɛdhö ‑dhɛ, 'yö dho 'ö ö ‑dɩ ‑zɔn 'zü ö ‑bha bɔmɛ ‑nu ‑kaɔng do ga ꞊plɛ bha‑ ‑nu ‑dhɛ.
1CO 15:6 ꞊Dhɛ 'ö ꞊ya kë "dhʋ̈, 'yö dho 'zü 'ö ö ‑dɩ ‑zɔn ö ‑bha ꞊klang ‑nu 'wo ‑ziö mɛ këng "sɔɔdhu ‑ta ‑a ‑nu ‑dhɛ kö ‑wo ‑dhɛ do 'gü. 'Mɛ 'ö ö ‑dɩ ‑zɔn ‑nu ‑dhɛ "dhʋ̈ bha‑ mɛ 'bha ‑nu ꞊wa ga "kɛɛ ‑a mɛ 'gbɛ ꞊dede ‑wo ‑tun "yaan "tʋ̈ng 'kwa dɔ‑ 'ka ya‑ 'gü.
1CO 15:7 ꞊Dhɛ 'ö go mü, 'yö dho 'zü 'ö ö ‑dɩ ‑zɔn Zakö ‑dhɛ, 'yö ö ‑dɩ ‑zɔn 'zü ö ‑bha bɔmɛ ‑nu ꞊gban "pɛpɛ ‑dhɛ.
1CO 15:8 ꞊Dhɛ 'ö ꞊ya ö ‑dɩ ‑zɔn 'mɛ 'wo bha‑ ‑nu ꞊gban "pɛpɛ ‑dhɛ ꞊dhɛ ‑kɔ bha‑ 'dhö, 'yö dho 'ö ö ‑dɩ ‑zɔn mang ‑dɩ 'pö n ‑dhɛ. "Kɛɛ ma ‑zë a ‑gun ‑gɔ ꞊dhɛ 'në 'ö‑ bhɔ ‑wɔn 'yaa gun mɛ 'bha "yaan ꞊në‑ 'dhö.
1CO 15:9 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ma ꞊në 'a‑ ‑nu ꞊gban bha 'në tɔɔ 'ka, ‑a ‑dhɛ ‑zian 'yaa‑ ‑bha ꞊dhɛ ma ‑zë ‑wo n ‑dhɛ Yesu ‑bha bɔmɛ, ‑a 'klɔɔ‑ ‑mü ꞊dhɛ a kë Atanna ‑bha 'kɔdhigümɛ ‑nu ‑wëëdhɛ ‑bho ꞊dedewo.
1CO 15:10 "Kɛɛ ‑a ‑bha ‑gasitɛ ꞊në‑ 'saa‑ 'gü, 'yö ‑duɛ 'dhɛ 'a‑ 'gü ꞊dɛɛ ya 'a‑ 'gü. ‑Gasitɛ 'ö‑ ‑kë n ‑dhɛ 'pö "dhʋ̈ bha 'yii kë "wlaawɔn 'ka, ‑a ꞊trɔɔn ‑ya ‑bha. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yë 'a‑ kë ‑sü 'ka‑ ‑dhɛ ‑a "dhiʋ̈‑ ‑ziö ‑a ‑bha bɔmɛ ‑nu ꞊gban ‑bha ‑ta. 'Sa ‑a kë 'a‑ wo "dhʋ̈ bha 'mii‑ kë n ‑dɩ faan 'ka, ‑a ‑bha ‑gasitɛ 'ö‑ ‑kë n ‑dhɛ bha‑ 'saa‑ ‑mü. Yö ꞊në n gba‑ kë ‑faan 'ka.
1CO 15:11 ‑A ‑kë "dhʋ̈ ‑sü bha‑ 'gü, ‑yö ‑kë n 'ka oo, ‑yö ‑kë Yesu ‑bha bɔmɛ "wɛɛ 'bha 'ka oo, Atanna ‑bha naɔ do 'ö mɛ ꞊gban 'yi‑ dɔ ka ‑gɔ 'ö 'ka 'dhang bho‑ "dhiʋ̈ bha ꞊në 'a‑ 'klɔɔ‑ pö bha.
1CO 15:12 'Wɔn 'yi‑ ‑dhiang zë ka ‑dhɛ yö ‑mü ꞊dhɛ Klisi ꞊ya 'go ga 'gü ꞊ya ‑bö. ‑Yö ‑kë mü ꞊dhɛ 'sa 'yö mɛ ‑yö ꞊slɔɔ ka kpö 'gü 'yö‑ pö ꞊dhɛ 'mɛ ꞊wa ga kö ꞊wa ga 'wii 'dho ‑bö?
1CO 15:13 ‑A pö 'wo‑ wo "dhʋ̈ bha ꞊ya kë ꞊dhɛ 'ö tɛan‑ 'ka 'nu kö Klisi ‑dɩ 'pö 'yii ‑bö 'sa ‑kɛɛ!
1CO 15:14 'Yö ꞊ya kë ꞊dhɛ Klisi 'yii 'go ga 'gü 'nu 'pö tɛan‑ 'ka, kö ‑a ‑dhiang 'yi‑ zë ka ‑dhɛ bha "wlaa‑ ꞊në 'yi‑ zë "wɛɛwɛɛ, 'sa kö ka 'dhang ‑bho "dhiʋ̈ ‑gɛn 'yaa 'dhö 'pö.
1CO 15:15 'Sa ꞊ya kë ꞊dhɛ 'mɛ ꞊wa ga 'waa ‑bö 'nu tongtongdhö tɛan‑ 'ka, kö ‑a pö 'yi‑ wo ꞊dhɛ Atanna ꞊ya Klisi ‑bö bha ꞊sua ꞊në 'yi‑ ‑kë.
1CO 15:16 ‑A 'klɔɔ‑ ‑mü ꞊dhɛ ꞊ya kë ꞊dhɛ 'mɛ ꞊wa ga 'waa ‑bö 'nu tongtongdhö 'zü, kö Klisi ‑dɩ 'pö 'yii ‑bö ꞊naa bha.
1CO 15:17 'Yö ꞊ya kë ꞊dhɛ Klisi 'yii ‑bö 'pö 'nu tɛan‑ ꞊dede 'ka kö ka ‑dɩ ‑zian ꞊në 'ka‑ kë sië "wɛɛwɛɛ ‑zʋ ‑yö Atanna ‑dhɛ ‑sü 'ka bha, kö kaa‑ 'wɔn yaa 'yii 'go ka ‑bha, kö ka ‑tun ga ‑sü 'ka Atanna ‑gɔ ꞊naa bha.
1CO 15:18 ꞊Ya kë 'pö "dhʋ̈ kö 'mɛ 'wo to Klisi ‑bha zian bha‑ ‑ta 'wo ga bha kö‑ ‑nu 'gü ꞊ya see‑ ꞊naa bha.
1CO 15:19 ꞊Ya kë ꞊dhɛ kwa ‑bha ‑zʋ ‑yö Yesu ‑dhɛ ‑sü ꞊ya kë ‑tosɛa dosengseng 'ö 'kwa‑ kë sië "kpʋng ꞊taa yö bha ꞊në‑ ‑wɔn 'gü, kö‑ "wɛɛ 'bha 'yaa yö ‑zë zian‑ ‑ta, kö kwa ꞊në 'kwa ‑wëëmɛ ꞊gban "dhiʋ̈todhɛ 'ka.
1CO 15:20 "Kɛɛ 'yaa "dhʋ̈, Klisi ‑yö ‑bö ‑sü 'ka tɛan‑ ꞊dede 'ka, kë "dhʋ̈ kö ‑yö kë 'mɛ 'wo dho ‑bö ‑dhɛkpaɔ dhia" 'gü bha‑ ‑nu ‑bha ‑mɔɔ ‑blɛɛsü 'ö ‑wo ‑a 'ka.
1CO 15:21 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ga ‑yö ‑bɔ mɛ do ꞊në‑ ‑ta 'yö ‑da "kpʋng ꞊taa, ‑kɔ do bha‑ 'gü 'pö ‑go ga 'gü ‑sü ‑yö ‑bɔ mɛ do ꞊në‑ ‑ta 'yö nu.
1CO 15:22 Ga 'ö mɛ ꞊gban "pɛpɛ 'wo‑ wo sië bha‑ 'klɔɔ‑ ‑mü Adan ‑bha ‑kë mɛ ꞊gban "bhɛma 'ka ‑sü ꞊në‑ 'ka. ‑Kɔ do bha‑ 'gü 'pö 'go 'ö 'wo dho‑ wo ga 'gü bha‑ 'klɔɔ‑ ‑mü ‑bɔ Klisi 'ka ‑sü ꞊në‑ 'ka.
1CO 15:23 "Kɛɛ ‑bö ‑kɔ 'ö dho kë bha ‑yö ‑dho kë ‑bhiëë ꞊në‑ 'ka. Klisi ꞊në mɛ ‑blɛɛsü 'ö ‑bö ‑a 'ka, 'yö 'mɛ 'wo bɔ‑ 'ka bha 'wo wo ‑bha wo "tʋ̈ng 'ö dho nu‑ 'ka kö ‑yö mɛ ‑dhɛ kë bha‑ 'ka.
1CO 15:24 ꞊Ya 'go yö ꞊në‑ 'gü 'yö 'gügbɩɩdhɛ ‑pë "pɛpɛ 'ö‑ ‑nu ‑kɔ ‑yö ‑ziö "kpʋngtaadhɛ ‑gɔ bha Klisi ‑yö mɛdhɛ sü‑ ‑nu ‑gɔ, 'yö kpaɔ ‑pɛ ‑ziö mɛ ‑gɔ ‑pë "pɛpɛ ꞊gban ‑bha, ‑yö ‑dho "kpʋngtaadhɛ ꞊gban ‑gɔ 'waanu ‑kɔ bha ꞊në‑ 'gü 'yö‑ sü 'ö‑ "kplëng bho ö dë ‑dhɛ.
1CO 15:25 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑a ‑dhɛa ‑bha ꞊dhɛ Klisi ‑yö mɛdhɛ kë kö ‑yö 'to‑ 'ka "dhʋ̈ ‑yö zun‑ 'ka 'yi 'ö Atanna dho‑ 'yaɔ‑ ‑nu ‑da 'ka ‑a ‑gɛn ꞊wlöö bha‑ ‑bha.
1CO 15:26 'Sa ga ꞊në‑ 'yaɔ‑ ‑nu 'wo "dhʋ̈ bha‑ ‑nu ‑totaamasü 'ka.
1CO 15:27 ‑A 'klɔɔ‑ ‑mü ꞊dhɛ ‑yö ‑bɛn zë ‑sü 'ka ‑a ‑bha 'tɔng‑ 'sëëdhɛ 'gü ꞊dhɛ: «Atanna ꞊ya pë ꞊gban "pɛpɛ ‑da ‑a ‑gɛn ꞊wlöö.» "Kɛɛ ꞊waa‑ pö "dhʋ̈ kö 'wii "wɩ yö 'kö yö ‑zë 'ö pë ꞊gban ‑da Klisi ‑gɛn ꞊wlöö bha‑ 'ka.
1CO 15:28 ꞊Ya kë ꞊dhɛ Klisi ꞊ya ‑ya pë ꞊gban "pɛpɛ ‑gɔ "dhiʋ̈ yi 'ö‑ 'ka, kö‑ ‑bhiëë ꞊ya zun 'ko "dhiʋ̈, 'yö Klisi 'ö ‑kë Atanna Gbö 'ka bha yöö ‑dɩ 'pö 'ö ö ‑gɔ dho "sia‑ ö Dë ‑dhɛ, 'yö ‑ya 'pë bha‑ ꞊gban "pɛpɛ ‑gɔ "dhiʋ̈.
1CO 15:29 ‑Ka ‑dhɛ ‑ga, ꞊ya kë 'nu ꞊dhɛ 'mɛ ꞊wa ga 'waa ‑bö tongtongdhö kö 'mɛ 'wo‑ ‑nu ‑zu 'mɛ ꞊wa ga (kö 'wii‑ ‑nu ‑bɔ Yesu 'ka ‑zu bho) ‑a ‑nu ‑bha "zu 'gü bha‑ wo ‑gɛn 'yaa 'dhö. "Kɛɛ 'mɛ 'wo bha ‑wo wo ‑zʋ ‑gɔn ‑më ‑wɔn ‑zë ‑dhɛ 'yö 'wo‑ ‑nu ‑bɔ Yesu 'ka ‑zu bho?
1CO 15:30 ꞊Ya kë 'nu ꞊dhɛ 'mɛ ꞊wa ga 'waa ‑bö 'nu tongtongdhö kö 'mɛ 'kö 'yi ya yi ‑dɩ ‑dɔ ga "dhiʋ̈ "tʋ̈ng ꞊gban "pɛpɛ 'gü ‑gɛn ‑mü ‑më 'ka?
1CO 15:31 N dheebhang ‑nu, ka ꞊në 'ka n ‑gɛn gbɔ ‑kë "gblʋ̈gblʋ̈ kwa Dëmɛ Yesu Klisi ‑bha zian ‑ta. 'A‑ zë ka ‑dhɛ ꞊sii ꞊dede ‑ta ꞊dhɛ a ‑dɔ ga "dhiʋ̈ ‑dhɛ "puu 'ö ꞊kpaɔ ‑a ꞊gban 'gü.
1CO 15:32 ꞊Ya kë 'nu ꞊dhɛ 'mɛ ꞊wa ga 'waa ‑bö tongtongdhö, (kö Atanna ‑wʋ) ‑ta ‑ko 'a‑ zë Efɛzö ‑pö ya‑ 'gü ꞊dhɛ mɛ‑ pë zë wü "dhiʋ̈‑ 'ka bha‑ ꞊trɔɔn ‑mü ‑më 'ka? ꞊Ya kë 'nu ꞊dhɛ 'ko suu bha a‑ ‑zë "kpʋngtaapë ꞊në‑ ‑wɔn 'gü, kö‑ zë ‑gɛn 'yaa 'dhö. ꞊Ya kë "dhʋ̈ 'nu kö mang ‑dɩ 'pö a ‑dho ‑a pö 'nu ꞊dhɛ ‑kɔ 'wo‑ "gwënng ‑da 'ka ‑a 'dhö ꞊dhɛ: «꞊Dhɛ 'ö ‑kë ꞊dhɛ kwa ga ‑wɔn ‑yö ‑dhö dhia" bha, ‑ka ‑kwa 'wɔn "ʋʋ 'wɔn 'ö ‑dhi kwa ‑dhɛ ‑a ꞊gban kë 'sa.»
1CO 15:33 ꞊Dhɛ 'ö "dhʋ̈ n dheebhang ‑nu, a‑ ‑pö ka ‑dhɛ ꞊dhɛ 'ka 'dho "kpënng‑ kë ka ‑dɩ ‑gɔ. ‑A ‑gɛn ‑mü ꞊dhɛ: «'Bha ꞊nëng këkɔyaamɛ ‑bha i kë ‑kɔ ‑yö ‑siö.»
1CO 15:34 ꞊Dhɛ 'ö "dhʋ̈ n dheebhang ‑nu, ‑ka slëë‑ ka 'gü kö 'ka zun tɛan‑ ‑zian ‑bha ꞊dhɛ ‑kɔ 'ö‑ ‑dhɛ 'dhö‑ ‑bha ‑dhɛ mɛ ‑ya kë 'ka ‑a 'dhö, kö 'ka ka bo 'wɔn yaa kë ‑sü 'ka. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ 'bha ‑nu ‑wo ka kpö 'gü 'ö 'waa Atanna dɔ ‑zianwo. A‑ ‑pö "dhʋ̈ kö ‑yö bhɔ ꞊në‑ wo ka 'gü 'yiʋ̈‑ ‑wɔn ‑bha.
1CO 15:35 'Ma‑ pö "dhʋ̈ mɛ‑ ‑dho ꞊slɔɔ ka kpö 'gü 'ö‑ pö: «"Kɛɛ 'mɛ ꞊wa ga 'nu ‑wo ‑dho ‑bö ‑kɔ kë ꞊dhɛ 'sa? Kwi suu ‑mɛɛ ꞊në dho kë‑ ‑nu ‑bha?»
1CO 15:36 A ‑tamamɛ 'i ya, pëga 'i‑ ‑da "sɛɛdhö ꞊sië bha ‑yö ‑bhong bhɔ ‑kɔ ‑kë ꞊dhɛ kö 'yii ga ‑zë wo?
1CO 15:37 "Ɛɛn pë ‑bhong ꞊në 'i‑ ‑da "sɛɛ 'yaa kë pëga ‑zë 'ka ‑ee? ‑Yö ‑kë ‑mlü 'ka oo, ‑yö ‑kë pë "ʋʋ pë 'ö‑ 'ka oo, ‑a ga ꞊në 'wo‑ ta, 'yö gun ‑na ‑bhong ‑zë bhɔ.
1CO 15:38 Atanna ꞊në kwi 'ö ‑dhi ‑dhɛ ‑a ‑da pëga 'i‑ ‑da "sɛɛ bha‑ ‑bha, ‑a 'dhɛ 'ö "dhʋ̈ ‑a ‑bhong 'ö bhɔ‑ ‑bha 'yö‑ nu‑ ‑dhɛ.
1CO 15:39 'Sa "yaanpë "pɛpɛ 'ö 'dhö, ‑a ꞊gban ‑wü suu ‑yö ‑dɩ ‑ta ‑dɩ ‑ta. Mɛ "bhɩɩ‑ ‑nu ‑wü suu ‑yö ‑dɩ ‑ta, 'yö wü ‑nu ‑bha 'dhö ‑dɩ ‑ta, 'yö ‑maa ‑nu ‑bha 'dhö ‑dɩ ‑ta, 'yö 'yuʋ̈‑ ‑bha 'dhö ‑dɩ ‑ta 'pö.
1CO 15:40 Atanna ‑bha ‑dapë ‑nu 'wo "dhʋ̈ bha‑ 'bha ‑nu ‑wo dhang‑ 'gü, 'yö‑ 'bha ‑nu 'wo "kpʋng ꞊taa. ‑A 'dhɛ ‑nu 'wo dhang‑ 'gü ‑a ‑nu suu ‑yö ‑dɩ ‑ta, 'yö‑ 'dhɛ 'wo "kpʋng ꞊taa ‑a ‑nu ‑bha 'dhö ‑dɩ ‑ta 'pö. ‑A 'dhɛ 'wo dhang‑ 'gü ‑a ‑nu ‑bha ‑sëdhɛ ‑yö ‑bho ‑a 'dhɛ 'wo "kpʋng ꞊taa ‑a ‑nu "piʋ̈.
1CO 15:41 'Yënng‑ ‑bha ‑sëdhɛ ‑ya ‑gɔ, "su ‑bha ‑ya ‑gɔ, "susëng ‑bha ‑ya ‑gɔ, ‑a ‑nu ꞊gban ‑bha ‑sëdhɛ ‑yö ‑bho 'ko "piʋ̈, aa" ꞊ni "susëng ‑nu ‑dɩ ‑slɔɔ ‑zian 'wo bha, ‑a ‑nu ‑bha ‑sëdhɛ ‑yö ‑bho 'ko "piʋ̈.
1CO 15:42 'Mɛ ꞊wa ga ‑a ‑nu ‑bö ‑sü ‑dho kë ‑kɔ do bha ꞊në‑ 'gü, 'mɛ ꞊ya ga ‑a bun bho ‑sü bha ‑yö kë ꞊dhɛ pë ta ‑sü ꞊në‑ 'dhö. ꞊Wa bo‑ ‑sɔ ‑sü ‑zë 'ka "sɛɛ kö‑ "bu ‑wɔn ꞊në ꞊ya 'to. "Kɛɛ kwi ‑dee 'dhɛ 'kö yöö ‑bö 'ka bha yö ‑zë 'yaa "bupë 'ka.
1CO 15:43 ‑A ‑da "sɛɛ "tʋ̈ng 'kö bha‑ 'ka, kö ‑yö 'ya‑, kö "sɩ 'yaa‑ ‑dhɛ, "kɛɛ ‑a ‑bö "tʋ̈ng ‑zë 'ka kö ꞊ya kë ‑së, kö faan ꞊ya ‑da 'gü.
1CO 15:44 'Wo‑ ‑da "sɛɛ kwi 'dhɛ 'kö‑ 'ka bha mɛ "bhɩɩ‑ kwi ‑mü, "kɛɛ kwi 'dhɛ 'kö dho ‑bö 'ka bha ‑yö ‑go Atanna ꞊në‑ "piʋ̈. ‑A ‑gɛn ‑mü ꞊dhɛ ꞊dhɛ 'kö "kpʋng ꞊taa ‑kwi 'dhö 'dhö, kö Atanna ꞊plöö ‑kwi ‑yö ‑dhö 'pö.
1CO 15:45 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑yö ‑bɛn zë ‑sü 'ka Atanna ‑bha 'sëëdhɛ 'gü ꞊dhɛ: «Mɛ ‑blɛɛsü 'ö‑ ‑da yi 'bha 'ka 'wo‑ Adan ‑kë bha ‑ya ‑kë mɛbhɩɩdhe "yaandhe ꞊në‑ 'ka, "kɛɛ Klisi 'ö Adan bha‑ 'dhɛ kwa dɔ ‑kɔ ya‑ 'gü ‑a 'ka bha yö ‑zë 'Nii‑ 'ö ꞊sii ‑da mɛ 'gü ꞊në‑ 'ka.»
1CO 15:46 ‑Kɔ do bha‑ 'gü, kwi 'dhɛ 'ö kwa ‑bha "kpʋng ꞊taa ya ꞊në Atanna ‑ya ‑da ‑blɛɛsü, 'yö‑ ‑dee 'dhɛ 'ö dho 'go‑ "piʋ̈ 'ö dho bhɔ‑ ‑bha 'Nii‑ "slʋ̈ʋ̈slʋ̈ 'ka ö 'gü bha 'yö‑ ‑da ꞊taama.
1CO 15:47 Adan ‑blɛɛsü 'ö Atanna ‑ya ‑da bha ‑ya ‑kë "sɛ ꞊në‑ 'ka. "Kɛɛ ‑a ꞊plɛ ‑naa ‑zë ‑yö kë ‑go dhang‑ ꞊në‑ 'gü.
1CO 15:48 Adan 'dhɛ 'ö‑ ‑kë "sɛ 'ka bha‑ 'gü ‑në "pɛpɛ 'kö 'kwa "kpʋng ꞊taa ya kwa ‑bhɔ yö ꞊në‑ ‑bha, 'yö Adan 'dhɛ 'ö go dhang‑ 'gü ꞊taamasü ya‑ 'gü bha mɛ "pɛpɛ 'kö 'kwa bɔ Yesu 'ka 'kwa bhɔ 'pö‑ ‑bha.
1CO 15:49 ‑A ‑kë "dhʋ̈ ‑sü bha‑ 'gü, 'kwa mɛ 'dhɛ 'ö "sɛ ‑kɔn 'ka ‑a ‑bhɔ ‑bha 'ka ‑kɔ do 'ö‑ 'gü bha ꞊në 'kwa dho kë 'pö mɛ 'dhɛ 'ö go dhang‑ 'gü bha‑ ‑bhɔ ‑bha 'ka ‑a ‑kɔ do bha‑ 'gü.
1CO 15:50 N dheebhang ‑nu, 'ma‑ pö "dhʋ̈ kö a‑ ‑pö ꞊dhɛ kwa ꞊nëng 'ö kwa ‑bha waa‑ kwa ꞊yɔɔn 'ö kwa 'gü bha wo ‑zë 'waa ꞊mɔɔ‑ ‑bha kö ‑wo ‑da Atanna ‑bha ‑gblüdëdhɛkëdhɛ 'gü, ‑a 'klɔɔ‑ ‑mü ꞊dhɛ "bupë ‑zë 'yii 'dho ꞊mɔɔ‑ ‑bha kö ‑yö 'to "dhʋ̈ ꞊dhɛ 'pë 'yaa "bu‑ 'dhö.
1CO 15:51 ‑A ‑kë "dhʋ̈ ‑sü 'gü, 'wɔn 'ö ‑bin ‑sü 'ka, 'ö Atanna ‑zʋ "piʋ̈ ꞊në maa‑ pö ka ‑dhɛ bha. Yö ‑mü ꞊dhɛ mɛ ꞊gban "pɛpɛ ‑zë 'kwii 'dho ga, "kɛɛ "gla ꞊në mɛ ꞊gban "pɛpɛ 'kwa dho‑ wo.
1CO 15:52 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yi 'ö Atanna ‑bha "truu ꞊taamasü dho "wɩ‑ 'ka bha, mɛ ꞊gban kwa ‑dho "gla ꞊dhɛ ‑kɔ 'ö mɛ‑ mɛ "yan zë‑ 'ka bha‑ 'dhö. ‑A ‑gɛn ‑mü ꞊dhɛ ꞊ya bo "wɩ ‑sü 'ka, 'yö 'mɛ ꞊wa ga 'nu bha 'wo ‑bö kwi ‑dee 'dhɛ 'ö ꞊ya kë mɛ ‑bha 'ö mɛ 'yaa ga tongtongdhö 'zü bha‑ 'ka, 'yö 'mɛ 'kwa dho kë "yaan 'pö "tʋ̈ng bha‑ 'gü bha 'kwa ‑gla.
1CO 15:53 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑a ‑dhɛa ‑bha ꞊dhɛ kwi 'dhɛ "bu ‑kwi 'ka bha ‑yö "gla kwi 'dhɛ 'yaa "bu bha‑ 'gü kö pë 'dhɛ gapë 'ka ‑yö "gla 'pö 'pë 'yaa ga tongtongdhö ‑a 'gü.
1CO 15:54 ꞊Ya kë ꞊dhɛ 'pë 'ö gapë 'ka ꞊ya bo kwi 'dhɛ 'yaa ga ‑a ‑da ‑sü 'ka ö ‑bha, kö 'pë 'ö ga ‑yö bo "gla ‑sü 'ka 'pë 'yaa ga ‑a 'gü, kö ‑wʋ 'ö ‑bɛn zë ‑sü 'ka Atanna ‑bha 'sëëdhɛ 'gü ꞊dhɛ: «Atanna ‑kɔ ꞊ya ziö ga ‑gɔ, ‑a ‑bha ‑gblü ꞊yaa‑ "mëng.»
1CO 15:55 "Ɛɛn 'zü ꞊dhɛ: «Ga i ‑kɔ ‑ziö mɛ "bhɩɩ‑ ‑gɔ ‑dhɛ ꞊në 'mɛ? I ꞊glongga 'i gun mɛ 'kun sië‑ 'ka bha ‑yö 'mɛ ꞊tɔn bha?» ‑a 'gü ‑wɔn ꞊ya kë.
1CO 15:56 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ga ‑yö ö zü ‑gban ꞊sɔng yaya ‑nu 'wo kwa ‑bha bha ꞊në‑ 'gü 'yö‑ ‑kɔ ‑yö ‑ziö kwa ‑gɔ. 'Yö kwa ꞊sɔng ‑nu bha 'pö 'wo wo zü ‑gban Atanna ‑bha 'tɔng‑ 'gü. ꞊Ya kë 'nu ꞊dhɛ 'kwaa 'wɔn yaa kë, kö 'kwaa ga.
1CO 15:57 "Kɛɛ ‑ka ‑kwa Atanna nuɛ" bho, ‑a ‑gɛn ‑mü ꞊dhɛ yö ꞊në kwa ‑kɔ ‑ziö 'wɔn yaa waa‑ ga ‑a ‑nu ‑gɔ kwa Dëmɛ Yesu Klisi 'saa‑ 'gü.
1CO 15:58 ‑A ‑kë "dhʋ̈ ‑sü bha‑ 'gü n dheebhang ‑nu, ka ‑bha ‑zʋ ‑yö Atanna ‑dhɛ ‑sü bha ‑kaa 'kun "gbɩɩ‑ kö 'ka ka faan dɔ ‑a ‑bha yë bha‑ ‑bha ‑kpɛakpɛawo. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kaa ꞊dede ka‑ 'wɔn ‑dɔ ꞊dhɛ yë 'ka‑ kë sië‑ ‑dhɛ ka ‑bha ‑kë kwa Dëmɛ ‑bha 'ka ‑sü ‑wɔn 'gü bha yë 'gü "fië 'yaa ‑mü.
1CO 16:1 'Wɔn 'dhɛ 'kö gun n "piʋ̈ ꞊dhɛ 'a‑ pö ka ‑dhɛ ꞊në 'a‑ pö bha. ‑A 'dhɛ 'ö ꞊ya 'to ‑pö ka ‑dhɛ ‑pë 'ka ꞊taamasü ya‑ 'gü, 'yö ‑kë 'pë 'ka‑ bho sië Atanna ‑bha mɛ ‑nu 'wo Zedhizadhɛmö ‑a ‑nu ‑dhɛ bha‑ ‑wɔn 'ka. 'A ‑wʋ kpɔ Atanna ‑bha 'kɔdhigümɛ ‑nu 'wo Gadhatö ‑a ‑nu ‑bha 'a‑ pö ‑wa kë ‑kɔ 'ö‑ ‑bha bha, Kodhɛngtö ‑mɛ ‑nu, ‑kaa kë 'pö ‑kɔ do bha‑ 'gü.
1CO 16:2 A‑ ‑pö 'ka ka 'gü dɔ "gbɩɩ‑ kö ꞊glooyi ꞊ya ꞊loo ‑kɔ 'ö‑ ‑bha 'do 'do, kö 'pë 'ka‑ ꞊slɔɔ "dhɔɔ ꞊zinng 'gü do 'gü, ‑a 'dhɛ 'ö ka ‑kɔ ‑yö ꞊mɔɔ‑ ‑bha, 'ka‑ ‑ya ‑dɩ ‑ta kö 'ka‑ ꞊loo 'ko ‑ta kö 'ka‑ bɔ Atanna ‑bha mɛ ‑nu 'wo Zedhizadhɛmö ‑a ‑nu ‑dhɛ, kö 'ka 'dho‑ pö 'ka dɔ n ‑loo mü ‑sü ‑gɔ.
1CO 16:3 'Mɛ 'ka 'dhang bho‑ "dhiʋ̈, ‑kaa ‑nu ‑ya ka ‑kɔ "sɔɔ kö 'ma nu 'ma ꞊loo mü, kö 'sëëdhɛ 'wo dho wo "kplëng bho‑ ‑ta 'a‑ kë kö 'a‑ dɔ‑ ‑nu ‑gɔ kö ‑wo 'dho 'pë 'ka‑ ꞊gbaɔ bha‑ 'ka 'mɛ 'wo Zedhizadhɛmö ‑a ‑nu ‑dhɛ.
1CO 16:4 ꞊Ya kë 'zü ꞊dhɛ 'pë 'ka dho‑ bho bha ꞊ya kë 'gbɛ, kö ‑yö mang ꞊dede n 'dho ‑gɛn bho, kö 'yi 'dho yi "kwëë.
1CO 16:5 ꞊Ya 'go yö ‑zë 'gü, ‑yö n "piʋ̈ ꞊dhɛ 'a nu zun ka ‑dhɛ 'gü. "Kɛɛ n ‑bɔ Maseduanö ‑sɛ 'gü ‑wɔn ‑yö ‑tun ꞊kö 'kö 'a gun ‑na nu.
1CO 16:6 'Bha mü "dhʋ̈ 'ma nu a ‑dho ꞊gwëë 'në 'bha bho ka "piʋ̈ mü, 'ö 'a ‑nɛɛ 'gü ‑zian ‑kë mü. ꞊Ya kë "dhʋ̈ ka ‑dho ꞊mɔɔ‑ ‑bha 'ka dho n dɔ ‑dhɛ "pɛpɛ 'ö ‑dho mü ‑wɔn 'dhö n ‑bha bha‑ 'gü.
1CO 16:7 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'yaa n "piʋ̈ ꞊dhɛ 'ma nu 'ma n "yan ‑kpan ka ‑bha 'a 'to 'a ziö. ꞊Ya kë ꞊dhɛ ꞊ya kë kwa Dëmɛ ‑dhidhɛwɔn ‑zë 'ka, ‑yö n "piʋ̈ ꞊dhɛ 'ma nu 'a ꞊gwëë 'në 'bha wo ka "piʋ̈ mü.
1CO 16:8 "Kɛɛ yö ‑zë ꞊gban 'gü, a ‑dho to Efɛzö ‑pö ya‑ 'gü ꞊kö 'ö Pangtökɔtö yi ‑yö ꞊loo.
1CO 16:9 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'ko ‑zë Atanna ‑wʋ 'ka ‑mɛ ‑nu ‑kë 'gbɛ ‑sü ꞊gban waa‑ ‑bha ‑bha, ‑a ‑bha yë bha‑ ‑yɛ "dhi ‑yö "pʋ ‑sü 'ka n ‑gɔ 'pö‑ ya‑ 'gü ꞊dedewo.
1CO 16:10 Timote ‑zë ꞊ya ‑da n "dhiʋ̈ ‑yö nu sië, "kɛɛ ꞊ya nu ꞊ya ꞊loo mü ‑kaa ‑dhɛng 'kun "yɔn ‑kɔ 'ka kö‑ "dhia ‑yö 'ma‑ 'gü, ‑a ‑gɛn ‑mü ꞊dhɛ kwa Dëmɛ ‑bha yëkëmɛ ‑mü 'ka 'pö ꞊dhɛ n 'dhö.
1CO 16:11 'Ka 'dho‑ pö 'ka‑ ‑ga "yan ‑wlö ‑ta 'ka. ‑Kaa dɔ zian‑ ‑së 'ka kö‑ "dhiʋ̈ yee kë ‑sü ‑yö ‑wo n ‑ta zuë" ꞊nii ‑da 'ka, ‑a ‑gɛn ‑mü ꞊dhɛ n "yan ‑yö waa‑ kwa dheebhang ‑nu ‑gɔ.
1CO 16:12 Kwa dheebhang Apodhɔsö ‑zë a‑ ‑pö ‑dhɛ "tʋ̈ng ꞊gban 'gü ꞊dhɛ kwa dheebhang ‑nu 'wo nu sië zun ka ‑dhɛ 'gü wɛng‑ ‑nu ‑wo nu wo "kwëë, "wɩ ꞊në 'yii‑ wo n ‑gɔ ‑bha ꞊kö. "Kɛɛ yö ‑zë ꞊gban 'gü 'yii 'dho 'to‑ 'gü, ꞊ya ö ‑dɩ ꞊slɔɔ ‑yö ‑dho nu zun ka ‑dhɛ 'gü.
1CO 16:13 ‑Ka ‑ya ka "yaan, ka 'gü 'ya 'dho ga ‑zʋ ‑yö Atanna ‑dhɛ ‑sü 'ka, ‑ka ka faan dɔ, ‑ka ka 'gü dɔ "gbɩɩ‑.
1CO 16:14 'Wɔn "pɛpɛ 'ka dho‑ kë, ‑kaa kë ‑dhɔ 'gü.
1CO 16:15 Ka Tefana waa‑ ‑bha 'kɔɔmɛ ‑nu ‑dɔ. Ka‑ 'wɔn ‑dɔ 'kpakpadhö ꞊dhɛ wo ꞊në 'wo 'dhang bho Yesu ‑wɔn "dhiʋ̈ ‑blɛblɛsü Akai ‑sɛ bha‑ 'gü, 'yö 'wo wo ‑dɩ "kplëng bho ‑sü 'ka Atanna ‑bha mɛ ‑nu 'wo "sɛ bha‑ 'gü ‑a ‑nu ‑dhɛ. ꞊Dhɛ 'ö "dhʋ̈ n dheebhang ‑nu, bhɛa" ꞊në 'a‑ wo ka ‑dhɛ,
1CO 16:16 kö 'ka dɔ "gbɩɩ‑ 'ka ka "tʋ 'to 'mɛ 'wo bha waa‑ mɛ ‑nu 'ö‑ ‑nu ‑kɔ 'dhö 'wɔn do ‑bha bha ꞊në‑ ‑nu ‑wʋ ‑bha kö ‑wo kë "dhiʋ̈ ‑sü ka 'ka ‑mɛ ‑nu 'ka.
1CO 16:17 Tefana 'dhöö, Fɔɔtunatusö 'dhöö, Akaikusö 'dhö, nu 'wo‑ wo ‑wo n ‑dhɛ 'gü yö bha dhi 'ö‑ wo n ‑dhɛ ‑a "sinma 'yaa 'dhö. ‑A 'klɔɔ‑ ‑mü ꞊dhɛ ka ‑dhɔ 'ö ꞊ya gun ꞊ya 'kpɔ n "dhiʋ̈ bha, wo ꞊në ꞊waa‑ 'dho 'në 'bha wo n ‑gɔ "sia‑.
1CO 16:18 'Ö go mü 'zü wo ꞊në ꞊wa n zuë" 'waanu ꞊dhɛ ‑kɔ 'wo ka zuë" 'waanu 'ka 'pö mü bha‑ 'dhö. Mɛ suu 'wo "dhʋ̈ bha‑ ‑dhɛa ‑bha ‑dhɛ 'ka ꞊bhlëë ‑ya ‑nu ‑bha kö 'ka dɔ‑ ‑nu ‑wɔn 'kun ‑dhɛ 'ka.
1CO 16:19 ('Wɔn ‑nu 'wo gun n "piʋ̈ ꞊dhɛ 'a‑ pö ka ‑dhɛ kö ‑yö 'to ‑dhio ‑wʋ ‑totaamasü 'ka 'yö bha.) ꞊Dhɛ 'ö "dhʋ̈, mɛ "pɛpɛ 'dhɛ 'kö 'wo Atanna ‑bha 'kɔdhigümɛ 'ka Azi ‑sɛ ya‑ 'gü ꞊wa ka ꞊tua bho 'gbɛ. Akidhasö waa‑ ‑bha dhebhɔ Plisidhö waa‑ Atanna ‑bha 'kɔdhigümɛ ‑nu 'wo ꞊loo 'ko ‑ta ‑a ‑nu ‑gɔ 'kɔɔdhö bha, ‑wa ‑pö 'wa ka ꞊tua bho kwa Dëmɛ Yesu Klisi 'tɔ 'gü.
1CO 16:20 Kwa dheebhang ‑nu "pɛpɛ 'wo ‑dhɛ ya‑ 'gü ꞊wa ka ꞊tua bho 'gbɛ. 'Ka ‑kpan ka 'ko ‑nu ‑bha ‑ka ꞊loo ka 'kwëë‑ ꞊dhɛ ‑kɔ 'ö dheebhang ‑zë ‑nu ‑wa ‑kë 'ka ‑a 'dhö.
1CO 16:21 ꞊Tuabhonaɔ 'kö ya mang Pɔdhö ‑mɛ ma ꞊në 'a‑ ‑bɛn zë n ‑dɩ ‑kɔ "dhɛ 'ka.
1CO 16:22 Mɛ "ʋʋ mɛ 'ö kwa Dëmɛ ‑dhɔ 'yaa‑ kë ‑a ‑mɛ ‑bha "dhang ꞊në bha! "Kɛɛ yi ‑zë yi‑ ‑pö «Madhanata»! 'Ya‑ pö "dhʋ̈ kö yi‑ ‑pö yi Dëmɛ bha ‑yö nu.
1CO 16:23 Kö kwa Dëmɛ Yesu ‑yö ‑gasitɛ kë ka ‑dhɛ bha 'aa ‑yö kë.
1CO 16:24 Mɛ ꞊gban "pɛpɛ ka ‑dhɔ ‑yö n ‑kë Yesu Klisi ‑wɔn 'ko ‑sɔn.
2CO 1:1 'Sëëdhɛ ya mang Pɔdhö ‑mɛ 'ö Atanna ꞊në n ‑ya Yesu Klisi ‑bha bɔmɛ 'ka bha, yaa‑ Timote 'ö ‑kë yi dheebhang 'ka 'pö kwa Dëmɛ bha‑ ‑bha zian ‑ta bha yi ꞊në 'yi‑ bɔ ka ‑dhɛ. Yi 'sëëdhɛ ya‑ ‑bɔ mɛ "pɛpɛ 'ka Atanna ‑bha 'kɔdhigümɛ ‑nu 'ka Kodhɛngtö ‑pö 'gü waa‑ mɛ "pɛpɛ 'dhɛ 'wo to 'wo ka ‑gɔ Akai ‑sɛ bha‑ 'gü bha ꞊në ka ‑dhɛ.
2CO 1:2 Kö kwa Dë Atanna waa‑ kwa Dëmɛ Yesu Klisi 'ö 'dhö ‑wo ka gba zuëyagblü 'ka, kö ‑wo ‑gasitɛ kë ka ‑dhɛ bha ('aa ‑yö kë).
2CO 1:3 ‑Ka ‑kwa Atanna 'ö ‑kë kwa Dëmɛ Yesu Klisi Dë 'ka, yö 'ö mɛ ‑nu ‑wëë ‑ya ‑kë ‑ziiziisü 'ka, 'ö mɛ ‑zʋ ‑gban ‑kɔ ꞊gban ‑kɔ ꞊gban 'gü bha‑ nuɛ" bho ꞊dedewo.
2CO 1:4 Yö ꞊në yi ‑zʋ ‑gban "yënng ꞊gbaɔndhe ꞊gban "pɛpɛ suu 'gü, kë "dhʋ̈ kö ‑kɔ do 'ö yi ‑zʋ ‑gban 'ka bha 'yi mɛ "wɛɛ ‑nu ‑zʋ ‑gban 'ka 'pö kö ‑wa ‑nu ‑wëëkë wo sië.
2CO 1:5 ‑Kɔ do 'ö Klisi ‑wëëdhɛ ‑yö bho‑ 'ka, yii ‑dɩ 'pö yi ‑wëëdhɛ ‑yö ‑bho 'ka, "kɛɛ yi ‑wëëdhɛ bho ‑sü bha‑ 'bha 'dhö ‑da sië‑ 'gü Klisi ‑wɔn 'gü kö Klisi ‑dɩ 'pö ‑yö yi faan dɔ sië "dhʋ̈ do 'ö dho‑ 'ka.
2CO 1:6 'Ya saan", kö yi ‑saan kë "dhʋ̈ kö ka ꞊në ka ‑zʋ ‑yö ‑gban, kë "dhʋ̈ kö 'ka dha. Klisi ꞊ya yi ‑zʋ ‑gban, kö ‑ya ‑kë "dhʋ̈ kö yi ‑wëëkë "dhiʋ̈ ‑nu 'wo‑ wo bha ka‑ ‑dhɛ yö, kö ka ‑zʋ ‑yö ‑gban, kö ka zuë" ‑yö kë ‑sɛa, kö ꞊wa ka ‑wëëkë wo 'pö ꞊dhɛ yi 'dhö kö ‑yö 'kun bho ka 'gü.
2CO 1:7 ‑A ‑kë "dhʋ̈ ‑sü bha‑ 'gü, yi ‑zʋ ‑ya 'gü klöklödhö 'ö 'yi‑ 'wɔn dɔ 'kpakpadhö ꞊dhɛ ka ‑wëëdhɛ 'dhö bho sië ꞊dhɛ yi 'dhö ‑kɔ do 'ö‑ 'gü bha, Atanna do 'ö yi ‑zʋ ‑gban bha ‑yö ‑dho ka ‑zʋ ‑gban 'pö ‑kɔ do bha‑ 'gü.
2CO 1:8 N dheebhang ‑nu, 'yaa yi "piʋ̈ tongtongdhö ꞊dhɛ sëë ‑ziisü 'yi‑ bho Azi ‑sɛ 'gü bha 'ka kë‑ 'gü ka ti ‑bha. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ sëë 'yi‑ bho Azi ‑sɛ 'gü bha‑ ‑dhiang 'yaa zë. 'Ö dɔ mü kö yi dha ‑wɔn ‑zian 'yaa yi "yaan 'zü.
2CO 1:9 Kö yi dha ‑wɔn ‑zë ꞊ya kë yi tii' 'ka ‑wɔn ꞊në‑ 'ka, kö yi ga ‑wɔn ꞊në yi "yaan ‑wɔn 'ka. "Kɛɛ kë 'ö‑ wo "dhʋ̈ bha ‑yö kë "dhʋ̈ kö 'yi yi ‑zʋ ‑ya Atanna 'ö‑ ‑kɔ ‑yö ꞊mɔɔ mɛ ‑bho ga 'gü ‑sü ‑bha 'bha ꞊në‑ ‑dhɛ, kö 'ya 'dho yi ‑zʋ 'gɔn yi ‑dɩ ‑dhɛ.
2CO 1:10 Yö 'ö "dhʋ̈ bha ꞊në yi dha 'wɔn 'ö yi ‑gɔ ‑yö ꞊mɔɔ‑ ‑bha 'nu 'ö 'to‑ 'gü bha‑ ‑gɔ. 'Sa yö ꞊në dho yi dha‑ ‑gɔ "dhʋ̈ ‑kpɛawo.
2CO 1:11 "Kɛɛ ‑a ‑dhɛa ‑bha ꞊dhɛ 'ka yi ‑ta 'kun ‑bhɛa Atanna ‑dhɛ ‑sü ‑bha yi ‑wɔn 'gü. Yö ꞊në ꞊ya kë "dhʋ̈, 'yö dho zë mɛ 'gbɛ ‑bha bhɛa" 'wo‑ wo sië yi ‑wɔn 'gü bha‑ ‑dhɛ 'yö ‑gasitɛ ‑kë yi ‑dhɛ. 'Yö‑ 'gü ‑wɔn ꞊ya bo kë ‑sü 'ka, 'yö mɛ 'gbɛ ‑wa nuɛ" bho ‑a kë 'ö‑ wo yi ‑dhɛ "dhʋ̈ bha‑ ‑wɔn 'gü.
2CO 1:12 ‑Ka ‑dhɛ ‑ga, 'ya yi ‑zʋ 'gɔn "sɛnngdhö yi ‑mɔɔ ‑bha 'yi yi 'tɔ kun. Yi 'tɔ 'kun ‑gɛn ‑mü ꞊dhɛ ‑tosɛa 'yi‑ ‑kë "kpʋngtaadhɛ ya‑ 'gü, "kɛɛ 'ö 'yi‑ ‑kë ka kpö 'gü kö yi mü bha, yi‑ ‑kë ꞊dhɛ ‑kɔ 'ö Atanna ‑ya ‑zɔn 'ka yi ‑dhɛ ꞊në‑ 'dhö "gblüdhɛ "puu ‑ta "kɛɛ tɛanwɔn 'ö go‑ "piʋ̈ ‑a ‑ta, "kɛɛ yi‑ ‑kë "dhʋ̈ ‑gasitɛ 'ö‑ ‑kë yi ‑dhɛ bha ꞊në‑ 'saa‑ 'gü, 'yii‑ kë mɛ ‑nu ‑bha 'wɔndɔdhe ‑bha. ‑A ‑kë "dhʋ̈ ‑sü bha‑ 'gü yi zuë" 'yaa za dɔ yi ‑bha. 'Wɔn 'ö‑ ‑wɔn 'gü 'yö 'yi ꞊mɔɔ‑ ‑bha 'yi yi 'tɔ kun bha 'yö bha.
2CO 1:13 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'sëëdhɛ ‑zian 'yi‑ bɔ ka ‑dhɛ bha tɛanwɔn "puu ꞊në 'yi‑ pö ka ‑dhɛ ‑a 'gü, 'yii "kpënng‑ kë ka ‑gɔ kö 'yi‑ 'bha 'to yi "gblu ꞊dhɛ ‑kɔ 'ö kaa ꞊dede 'ka‑ ‑wʋ pö‑ 'ka bha‑ 'dhö. ‑A ‑kë "dhʋ̈ ‑sü bha‑ 'gü ‑yö n 'gü ꞊dhɛ 'kö 'kii‑ 'gü ‑zian ma "tʋ̈ng ya‑ 'gü "kɛɛ kwa Dëmɛ Yesu ‑bha 'yiën‑ yaa‑ ‑ya dhang‑ ‑bha yi 'ö‑ 'ka ka ‑dho ‑a 'wɔn dɔ ꞊dhɛ ka ‑bhaa 'tɔ ‑bhɔ ‑bha ‑mɛ ‑mü yi ꞊në yi 'ka 'yö yi ‑bha 'dhö ka 'ka 'pö. 'Sa ka‑ ‑naa 'në 'bha ‑zë ‑dɔ "dhʋ̈.
2CO 1:15 N 'dhang ‑bho 'wɔn bha‑ "dhiʋ̈ ‑kɔ yaa 'gü yaa bha ꞊në‑ ‑wɔn 'gü, 'yö gun n "piʋ̈ ꞊dhɛ 'a nu ka ‑dhɛ 'gü 'nu ꞊kö ‑blɛɛsü, kë "dhʋ̈ kö‑ 'gü ‑wɔn ‑së bha ‑yö kë ka ‑dhɛ 'koodhö ꞊plɛ.
2CO 1:16 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'ma gun 'ma‑ ‑ya 'nu n ‑zʋ "piʋ̈ ꞊dhɛ n 'dho ‑sü ꞊ya kë Maseduanö ‑sɛ 'gü 'a bɔ ka "piʋ̈ mü, kö n yee kë ‑sü 'ka 'zü 'a bɔ 'mü kö 'a n "yan 'bha ‑kpan ka ‑bha. ꞊Ya kë "dhʋ̈ 'nu ka ‑mɔɔ ‑bha 'ka n dɔ zian‑ 'yö 'a 'dho Zude ‑sɛ 'gü.
2CO 1:17 ("Kɛɛ 'ma‑ "ta bha‑ bho‑ ‑ta.) Ka ‑mɔɔ ‑bha 'ka‑ pö: «'Yö i‑ ‑bho ‑ta ‑më ‑wɔn 'gü? "Ɛɛn ‑a yi 'kö 'i gun‑ 'kpɔ sië ‑blɛɛsü kö 'bhii i ‑zʋ 'pö‑ 'gɔn ‑ee? "Ɛɛn 'mɛ 'ö "ta sü ö ‑dɩa ‑gleng ‑bha 'ö ꞊yaa‑ pö 'wɔn ‑bha ꞊iin 'ö go 'mü 'ö‑ pö 'wɔn do bha‑ ‑bha 'zü 'aa bhoo yö ‑mü i 'ka ‑ee?»
2CO 1:18 ‑Abin! 'Yaa "dhʋ̈ tongtongdhö. ‑Kɔ do 'ö Atanna 'dhö‑ 'ka 'ö 'yaa ‑wʋ ꞊plɛ pö tongtongdhö bha ꞊në 'a‑ 'ka. 'Maa‑ pö 'wɔn ‑bha ꞊iin 'maa 'go mü 'maa‑ pö "uun; ‑a ‑wɔn 'gü ‑wʋ 'a‑ pö ka ‑dhɛ bha 'yaa ꞊sua 'ka.
2CO 1:19 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Yesu Klisi 'ö Atanna Gbö 'ka 'ö Timote 'dhö, Silivɛn 'dhö, ma 'dhö, 'yi‑ ‑dhiang zë ka ‑dhɛ bha 'yaa gun ꞊iin waa‑ "uun ꞊gban ‑kaankwëëmɛ 'ka. ‑A 'klɔɔ‑ ‑mü ꞊dhɛ ꞊iin‑ 'ö Atanna ‑ya pö bha ꞊në Yesu ‑ya 'gü ‑wɔn ‑kë.
2CO 1:20 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ "plüün "pɛpɛ 'ö Atanna ‑ya bho kwa ‑dhɛ bha yö ꞊në‑ ꞊iin 'ka. ‑A ‑kë kö 'yaa ‑wʋ ꞊plɛ pö ‑sü bha 'yö yii ‑dɩ 'pö 'yi‑ "sɛɛdhɛ ‑kë mɛ ꞊gban "pɛpɛ ‑dhɛ kë "dhʋ̈ kö‑ 'tɔ ‑yö bhɔ.
2CO 1:21 Atanna yöö ꞊dede bha ꞊në kwɛng‑ ‑nu ꞊gban kwa ‑zʋ ‑gban Klisi ‑bha zian bha‑ ‑ta. Yöö do bha 'zü ꞊në kwa ‑ya ‑dɩ ‑ta.
2CO 1:22 'Yö ö 'tɔ ‑ya kwa ‑bha, 'yö dho 'ö ö ‑bha 'Nii‑ "slʋ̈ʋ̈slʋ̈ bha‑ ‑ya kwa 'gü kö ‑yö kë 'wɔnsë 'ö‑ ‑ya ‑sü 'ka kwa ‑gɔ ‑dhɛkpaɔ dhia" 'gü bha‑ taɔng 'ka.
2CO 1:23 ‑A ‑kë "dhʋ̈ ‑sü bha‑ 'gü, n ‑nu mü ‑sü bha‑ bho 'a‑ wo‑ ‑ta bha a‑ ‑kë "dhʋ̈ kö 'ma 'dho 'wɔn bho ka ꞊në ka 'gü. ‑A pö 'a‑ wo "dhʋ̈ bha Atanna ꞊në n "sɛɛ‑ 'ka, ꞊ya kë ꞊dhɛ ꞊ya kë ꞊sua 'ka ‑yö n 'sü.
2CO 1:24 ‑A 'klɔɔ‑ ‑mü ꞊dhɛ 'yaa yi "piʋ̈ ꞊dhɛ ka ‑bha 'dhang ‑bho Klisi "dhiʋ̈ ‑sü bha ‑yö kë ꞊dhɛ 'pë 'yi ka ‑kɔ ꞊në‑ kpɔ‑ 'ka ‑a 'dhö. "Kɛɛ ‑kɔ 'yi dho‑ kë‑ 'ka kö 'yi ka ‑ta 'kun kö ka zuë" ꞊nii ꞊në ‑yö ‑da tɛkpɛtɛkpɛdhö ꞊në 'yi‑ ‑dhɛ mɔɔ sië. ‑A ‑gɛn ‑mü ꞊dhɛ ꞊ya kë ‑zʋ ‑yö Atanna ‑dhɛ ‑sü ‑zë 'ka kö 'ka yö ‑zë ‑koso "kan.
2CO 2:1 "Kɛɛ 'wɔn 'ö‑ ‑wɔn 'gü 'yö 'a n ‑nu zun ka ‑dhɛ 'gü ‑wɔn bha‑ bho‑ ‑ta bha 'yö bha, kë "dhʋ̈ kö 'ma 'dho (dɔn bho ka 'ka 'a) ka zuë" ‑gii 'zü ‑deewo.
2CO 2:2 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ka 'ö ka ‑zë n ‑zʋ ꞊ya ‑bö ka ‑wɔn ‑ta 'yö n ꞊nii ‑yö ‑da bha 'ma ‑dhɛang bhɔ ka ‑ta kö 'a dɔn ꞊në‑ bho ka 'ka bha ‑oo, kö de ‑yö n ꞊nii ‑da? "Ɛɛn 'mɛ 'a‑ ‑nu ‑yua ‑bha ‑dhiang zë bha ‑ee?
2CO 2:3 'Wɔn 'ö‑ ‑wɔn 'gü 'yö 'a 'sëëdhɛ 'ö bɔ ka ‑dhɛ bha 'a‑ ‑bɛn zë "dhʋ̈ bha 'yö bha. ‑A ‑gɛn ‑mü ꞊dhɛ 'yaa n "piʋ̈ ꞊dhɛ 'ma nu mü 'mɛ 'ö ka ‑zë 'ka dho kë n ꞊nii ‑da ‑mɛ 'ka bha 'ka kë n wëgüsiömɛ 'ka. ‑A ‑gɛn ‑mü ꞊dhɛ a 'dhang ‑bho "dhiʋ̈ 'kpakpadhö ꞊dhɛ n ꞊nii 'dhö ‑da ‑sü 'ka, kö kaa‑ ‑dɩ 'pö ka ꞊nii ‑yö ‑da ‑sü 'ka.
2CO 2:4 'Sa ‑yö "dhʋ̈ tɛan‑ 'ka, ꞊dhɛ "tʋ̈ng 'a 'sëëdhɛ ya‑ bɔ‑ 'ka ka ‑dhɛ bha kö "suʋ̈ ꞊dede ꞊ya ‑da n 'gü, kö n zuë" "dhiʋ̈ ‑yö "tɛɛ sië ꞊dedewo. A‑ ‑bɔ "gbʋ 'ka, "kɛɛ 'mii‑ "dhiʋ̈ wluu" ‑bha kö ‑yö kë ka wë 'gü ‑siö ‑pë ‑zë 'ka. A‑ ‑kë "dhʋ̈ kö 'ka‑ 'wɔn ꞊në‑ dɔ ꞊dhɛ ka ‑dhɔ 'ö n ‑kë bha‑ "sɩ ‑zian ꞊në 'yaa n ‑dhɛ.
2CO 2:5 'Sa mɛ 'ö 'wɔn yaa bha‑ ‑kë bha 'yii mang do ‑zë n ‑yua ‑bha ‑wɔn kë. ꞊Ya kë ꞊dhɛ 'mii "suʋ̈ ꞊sua ‑gɔ kö 'a ‑mɔɔ ‑bha 'a‑ pö ‑yö mɛ ꞊gban "pɛpɛ ꞊në ka ‑yua ‑bha ‑wɔn ‑kë bha. 'Kö 'yii kë 'zü mɛ ꞊gban ka 'ka "kɛɛ kö mɛ kpö 'bha ‑zë ‑mü.
2CO 2:6 "Kɛɛ ꞊dhɛ 'kö mɛ 'gbɛ ꞊gban 'ka 'wɔn ‑zë bho‑ ‑mɛ "yan 'gü bha‑ 'dhɛ bha ‑yö 'to "dhʋ̈.
2CO 2:7 ‑Kaa ‑mawɔn 'to kö 'ka‑ ‑zʋ ‑gban, kë "dhʋ̈ kö 'ya 'dho "yua‑ ‑bha "dhiʋ̈ ziö‑ 'ka 'ö ‑kë ‑a ‑go Atanna ‑bha zian ‑ta ‑gɛn 'ka.
2CO 2:8 ‑Ka dɔ "gbɩɩ‑ kö 'ka‑ 'kun "yɔn ‑kɔ 'ka kö ‑ya 'wɔn dɔ ꞊dhɛ ö ‑dhɔ ‑yö ka ‑kë, kö 'ya 'dho bhɔ‑ 'gü ‑sanmɛkë ‑bha.
2CO 2:9 'Sëëdhɛ 'dhɛ 'ö ya‑ ‑bɔ ka ‑dhɛ 'klɔɔ‑ 'yaa 'wɔn "wɛɛ 'bha 'ka, ‑a "dhiʋ̈ ꞊në 'a‑ ꞊wlü‑ ‑bha. A‑ ‑kë "dhʋ̈ kö 'a ka 'gü ꞊në‑ dan "ni kö 'ka ‑ya ‑sü 'ka ‑dhio ‑ma n ‑ta ‑yan 'gü "tʋ̈ng ꞊gban "pɛpɛ 'gü kö 'a‑ 'wɔn dɔ.
2CO 2:10 Mɛ "ʋʋ mɛ 'ö 'ka‑ ‑mawɔn 'to, kö mang ‑dɩ 'pö 'ma‑ ‑mawɔn 'to. 'Ö ꞊ya kë 'zü ꞊dhɛ mɛ wë zë ‑mɛ 'ö "dhʋ̈ bha ka ‑gun dɔ sië ma ꞊në n ‑gɔ kö 'ma‑ ‑mawɔn 'to kö 'ka gun ‑na ‑a ‑mawɔn 'to, kö 'ma‑ ‑mawɔn 'to 'sa ka 'ko ‑sɔn Klisi wëëdhö.
2CO 2:11 'Sa ‑a ‑mɛ ‑mawɔn 'kwa‑ to "dhʋ̈ bha kwa‑ ‑kë "dhʋ̈ kö Sɔtraan ꞊në 'ya 'dho ö ‑duɛ yö kwa ‑bha. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔn 'ö‑ ‑zʋ "piʋ̈ kwa ‑bha bha kwa‑ ‑dɔ 'kpakpadhö.
2CO 2:12 ꞊Dhɛ 'ö 'ma nu 'ma ꞊loo naɔ ‑së 'ö ‑gban kwa Dëmɛ Yesu Klisi ‑wɔn ‑bha bha‑ pö ‑sü 'ka Troasö ‑pö 'gü, n "yan ‑yö ‑da ‑dhɛ 'gü 'ö 'a‑ 'wɔn dɔ 'kpakpadhö ꞊dhɛ Atanna ‑bha yë 'ö‑ dɔ n ‑kɔ 'ka bha‑ ‑yɛ "dhi ‑yö "pʋ ‑sü 'ka n ‑gɔ mü kwa Dëmɛ 'saa‑ 'gü.
2CO 2:13 "Kɛɛ ‑a "sɩ 'yii kë n ‑dhɛ kö 'a ‑dhɛkpaɔyi 'bha kë mü. ‑A 'klɔɔ‑ ‑mü ꞊dhɛ kö n zuë" ‑yö dɔ ‑sü 'ka foodhö ‑kpan 'ö 'mii‑ wo kwa dheebhang Titö ‑bha mü bha‑ ‑wɔn 'gü. 'Wɔn 'ö‑ ‑wɔn 'gü 'yö 'a to 'a n ‑wʋ ‑da Troasö ‑mɛ ‑nu ‑dhɛ 'yö 'a dho Maseduanö ‑sɛ 'gü bha 'yö bha.
2CO 2:14 "Kɛɛ Atanna nuɛ". ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yö ꞊në ö ‑gɛn zun 'ö 'yaɔ‑ ‑nu ꞊gban "pɛpɛ ꞊gbin‑ 'yö kwa ‑ya ö ‑kɔ "dhiʋ̈mɛ ‑nu 'ka, 'yö ‑gblü ‑yö ‑dhi kwa ‑gɔ ‑kpɛawo kwa ‑bha ‑kë Klisi ‑bha 'ka ‑sü ‑wɔn 'gü, yöö do bha 'zü ꞊në kwa ‑ya Klisi ‑wɔn ‑ta ‑pʋ mɛ ‑nu ‑dhɛ ‑mɛ 'ka, kë "dhʋ̈ kö ‑a ‑wɔn ‑yö ꞊mɔɔ ‑dhɛ ꞊gban "pɛpɛ 'gü ꞊dhɛ ‑dhasiklɔɔ ꞊fii ‑së 'wo‑ ꞊wɛnng ‑a 'dhö.
2CO 2:15 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'kwa ya ꞊në 'kwa ꞊dhɛ ‑dhasiklɔ ꞊fii ‑së 'ö Klisi ‑ya ꞊wɛnng Atanna ‑dhɛ ‑a 'dhö. 'Sa kwa‑ 'ka "dhʋ̈ 'mɛ 'wo dha ‑mɛ ‑nu 'ka waa‑ 'mɛ 'wo 'gü see‑ ‑mɛ ‑nu 'ka ‑a ‑nu ꞊gban ‑gɔ.
2CO 2:16 'Mɛ 'wo 'gü see‑ ‑mɛ ‑nu 'ka bha kwa ꞊dhɛ pë ꞊fii 'ö mɛ zë ꞊në‑ 'dhö wo ‑zë ‑a ‑nu ‑gɔ, "kɛɛ 'mɛ 'kö 'wo dhamɛ ‑nu 'ka wo ‑zë kwa ꞊dhɛ pë ꞊fii 'ö mɛ dha 'ö ꞊sii ‑da mɛ 'gü ꞊në‑ 'dhö ‑a ‑nu ‑gɔ. ꞊Ya kë "dhʋ̈ bha ‑oo, 'dee dho ꞊mɔɔ‑ ‑bha 'ö yë "sima ‑sima bha‑ ‑kë?
2CO 2:17 Yi ‑zë 'yaa ꞊dhɛ 'mɛ 'wo Atanna ‑wʋ ‑kë "dhɔɔ pë 'ka bha‑ ‑nu 'dhö, "kɛɛ yi ‑zë yi‑ ‑bha naɔ bha‑ ‑dɔ "gblüdhɛ "puu ‑ta ꞊dhɛ Klisi ‑bha gwëëzë ‑nu 'dhö kö yöö ꞊dede ‑a "yan ‑ya ‑dhɛ 'gü. ‑A kë 'yi‑ wo "dhʋ̈ bha‑ 'klɔɔ‑ ‑mü ꞊dhɛ yöö ꞊dede ꞊në yi bɔ.
2CO 3:1 ‑A pö 'yi‑ wo "dhʋ̈ bha ꞊ya kë "dhʋ̈ kö 'yii kë ꞊dhɛ yi ‑dɩ 'sü ꞊në 'yi‑ wo sië‑ 'kpii‑ ‑dee 'bha wo 'zü. "Ɛɛn 'ya 'dho kë ka 'gü 'zü ꞊dhɛ 'sëëdhɛ 'ö mɛ ‑ya ‑bɛn zë 'ö ꞊mɔɔ‑ ‑bha 'ö‑ ‑zɔn ka ‑dhɛ ꞊dhɛ (Yesu ‑bha bɔmɛ ‑mü yi 'ka), "ɛɛn 'ö dho‑ ‑zɔn 'zü mɛ "wɛɛ ‑nu ‑dhɛ "dhʋ̈ bha ꞊në 'yi‑ mɔɔ‑ sië. ‑Abin! 'Yaa "dhʋ̈ tongtongdhö.
2CO 3:2 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kaa ꞊dede 'ka bha ꞊në 'ka 'sëëdhɛ 'ö "dhʋ̈, 'ö‑ ‑wʋ 'ö‑ 'gü 'ö ‑bɛn zë ‑sü 'ka yi zuë" "piʋ̈ 'ö mɛ ꞊gban "pɛpɛ 'wo ꞊mɔɔ‑ ‑bha 'wo‑ dɔ, 'ö 'wo‑ ‑wʋ pö ‑a 'ka.
2CO 3:3 'Sa ‑a pö 'a‑ wo "dhʋ̈ bha 'yaa ꞊sua 'ka. 'Yaa ‑bin ‑sü ‑nu 'bha ‑zian ꞊në‑ 'ka ꞊dhɛ ka ꞊në 'ka 'sëëdhɛ ö Klisi ‑ya ‑bɛn zë yi ‑kɔ ‑ta ‑a 'ka. ‑A ‑bɛn 'ö‑ zë "dhʋ̈ ‑zianwo bha 'yii‑ zë pë "yi 'wo 'sëëdhɛ ‑bɛn zë‑ 'ka bha‑ 'ka, ‑ya ‑zë 'Nii‑ "slʋ̈ʋ̈slʋ̈ 'ö go Atanna "yaandhe ꞊dede 'gü bha ꞊në‑ 'ka. 'Sa ‑a ‑bɛn 'ö‑ zë "dhʋ̈ bha 'yii‑ zë ‑gwë "kpongpaa ‑ta, ‑ya ‑zë mɛ ‑nu ꞊në ka zuë" "piʋ̈.
2CO 3:4 'Sa ta 'yi‑ wo yi 'gü 'pö 'wɔn bha‑ ‑dhiang zë ‑sü ‑bha 'ö 'ya‑ zë 'yaa‑ zë "sika ka bha‑ 'klɔɔ‑ ‑mü ꞊dhɛ yi 'dhang bho ‑sü ꞊në Atanna "dhiʋ̈ 'kpakpadhö 'wɔn bha‑ 'gü, Klisi 'saa‑ 'gü.
2CO 3:5 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yi ‑zë ‑a "sɩ ‑tangga ‑zian ꞊në 'yaa yi ‑dhɛ kö 'yi 'wɔn suu bha‑ kë yi ‑dɩ ‑ta. Yi zü ‑gban ‑sü ‑yö Atanna ꞊në‑ 'gü.
2CO 3:6 Kë 'yi‑ wo ‑mlɛ ‑dee 'ö‑ ‑da kwa ꞊zinng 'gü bha‑ "sɛɛ‑ 'ka bha, yö ꞊në ‑kë 'ka ‑sü "sɩ ‑kë yi ‑dhɛ. 'Sa ‑mlɛ ‑dee 'ö "dhʋ̈ bha‑ ꞊slɔɔ 'kwa‑ wo bha 'yii ‑gban kwa ‑bha Atanna ‑bha 'tɔng‑ 'ö ‑bɛn zë ‑sü 'ka bha‑ 'kun ‑sü ‑bha, kwa‑ ‑slɔɔ ‑bha 'Nii‑ 'ö‑ ‑ya ‑sü 'ka kwa 'gü bha ꞊në‑ 'saa‑ 'gü. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑a ‑bha 'tɔng‑ 'ö ‑bɛn zë ‑sü 'ka bha ‑yö mɛ "dhiʋ̈ ꞊në dɔ ga ‑dhɛ, (mɛ ‑kɔ 'ö 'yaa ꞊mɔɔ‑ ꞊gban 'gü ‑wɔn kë ‑sü ‑bha bha‑ ‑wɔn 'gü), "kɛɛ 'Nii‑ "slʋ̈ʋ̈slʋ̈ 'kö go‑ "piʋ̈ bha ‑yö ꞊sii ꞊në‑ ‑da mɛ 'gü.
2CO 3:7 'Sa "tʋ̈ng 'ö Atanna ‑yö mɛ "dhiʋ̈ ‑dɔ ga ‑dhɛ ‑pë bha‑ ‑bɛn zë‑ 'ka ‑gwë 'kpongpaa 'në ‑nu ‑ta bha ꞊dhɛ 'ö ꞊ya ö bo, 'yö‑ ‑bha 'tɔbhɔdhe 'ö dhang‑ 'gü bha‑ 'bhü ‑yö ‑wo "yɛa‑. (꞊Dhɛ 'ö‑ dɔ Moizö ‑gɔ 'ö nu 'ö ꞊loo‑ 'ka Izraɛdhö ‑mɛ ‑nu kpö 'gü), 'yö‑ wëëdhɛ "yan ‑yö ‑ya bhɔ ‑sü ‑bha, 'ö dɔ mü kö 'waa ꞊mɔɔ‑ ‑bha 'zü kö ‑wa ‑ga ‑a wëëdhö ‑a wëëdhɛ 'bhü ‑gɔ. "Kɛɛ 'sa kö 'tɔbhɔdhe 'bhü 'ö "dhʋ̈ bha‑ ‑ziö ‑wɔn ‑dhö. (N dheebhang ‑nu), 'tɔng‑ 'kö yö ‑zë 'ö mɛ "dhiʋ̈ ꞊në‑ dɔ ga ‑dhɛ bha yö ‑zë nu ‑sü 'bhü ꞊ya kë ꞊dhɛ ‑kɔ bha‑ 'dhö bha ‑oo,
2CO 3:8 'Yö 'Nii‑ "slʋ̈ʋ̈slʋ̈ 'kö go Atanna "piʋ̈ bha ‑wɛ? Yö ‑zë ‑bha ‑dho kë mü ꞊dhɛ?
2CO 3:9 "Sanni 'wɔn 'kö yö ‑zë 'ö mɛ ‑nu "dhiʋ̈ ꞊në‑ dɔ ga ‑dhɛ bha‑ "dhiʋ̈ ꞊loo ‑mɛ wëëdhɛ 'bhü ‑yö bhɔ ꞊dhɛ ‑kɔ bha‑ 'dhö bha ‑oo, 'yö‑ 'dhɛ 'kö nu kö ‑yö mɛbhɩɩdhe "zu ꞊në‑ wo Atanna wëëdhö ꞊wɛ? A‑ pö ka ‑dhɛ ꞊dhɛ ‑a ‑bha ‑zë ‑dho kë ‑ziiziisü.
2CO 3:10 Kwa ‑mɔɔ ‑bha ‑zianwo 'kwa‑ pö‑ 'dhɛ 'ö gun 'kpa bha 'waa‑ ‑zɔn ‑a 'dhɛ 'ö ꞊dɛɛ bha‑ 'ka ‑a ‑bha 'tɔbhɔdhe ‑kë ‑ziisü ‑sü ‑wɔn 'gü.
2CO 3:11 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ "sanni 'pë 'kö yö ‑zë ‑bha "tʋ̈ng 'ö Atanna ‑ya kpɔ kö ‑wa kë‑ 'ka ‑a 'gü 'bhaa gun ꞊gblɛɛn bha yö ‑zë 'bhü‑ bhɔ ꞊dhɛ ‑kɔ bha‑ 'dhö, kö‑ 'dhɛ 'kö yö ‑zë "dhiʋ̈todhɛ 'yaa 'dhö ꞊wɛ? ‑A ‑dhɛa ‑bha ꞊dhɛ yöö zian ‑zë ‑bha "dhiʋ̈‑ ziö ‑a ‑blɛɛsü ‑bha ‑ta pongpongdhö.
2CO 3:12 'Wɔn bha ꞊në yi ‑zʋ 'dhö‑ 'gü, 'yö 'ya‑ ‑dhiang zë 'yö 'yaa‑ zë "sika 'ka.
2CO 3:13 Yi ‑zë 'yaa ꞊dhɛ Moizö 'dhö. ‑A ‑gɛn ‑mü ꞊dhɛ Moizö ꞊në gun sɔ kpa sië ö wëëdhö kë "dhʋ̈ kö ꞊dhɛ 'ö ‑kë ꞊dhɛ ‑a wëëdhɛ "yan 'ö gun bhɔ sië bha‑ 'gü 'yaa gun ꞊gblɛɛn bha kö Izraɛdhö ‑mɛ ‑nu 'wa 'dho‑ ‑go ‑a wë ‑bha ‑dhɛ yö.
2CO 3:14 "Kɛɛ pë "pɛpɛ 'ö Moizö ‑ya ‑bɛn zë "dhʋ̈ bha‑ 'bha 'gü ma "sɩ 'yaa gun‑ ‑nu ‑dhɛ. Aa" ꞊ni dɔ 'kwa‑ wo ꞊dɛɛ ya, ꞊wa ‑mlɛ ‑blɛɛsü 'ö Atanna ‑ya ‑kë kwa 'ka ‑a 'sëëdhɛ ('ö Moizö ‑ya ‑bɛn zë) bha‑ ‑wʋ pö 'waa‑ 'gü ma. Sɔ do 'ö gun Moizö wëëdhö bha ‑yö ‑tun kpa ‑sü 'ka‑ ‑nu ‑bha 'wɔndɔdhe ‑ta ꞊dɛɛ. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'ö ꞊ya ‑kplu Klisi ꞊në‑ ‑bha 'yö 'pë 'ö kpa ‑sü 'ka‑ ‑bha 'wɔndɔdhe ‑ta bha 'ö bho 'mü.
2CO 3:15 Aa" ꞊ni ꞊dɛɛ ‑mü ꞊dɛɛ 'ka, ꞊wa 'sëëdhɛ 'ö Moizö ‑ya ‑bɛn zë bha‑ ‑wʋ pö, pë ‑yö ‑kpa ‑a ‑nu ‑bha 'wɔndɔdhe ‑ta 'zü ‑deewo 'ö 'waa‑ 'gü ma.
2CO 3:16 "Kɛɛ 'mɛ ꞊ya bo ö wë slëë‑ ‑sü 'ka kwa Dëmɛ ‑ta, kö‑ 'pë 'ö gun kpa ‑sü 'ka‑ ‑bha 'wɔndɔdhe ‑ta bha ꞊ya 'go mü ꞊dhɛ ‑kɔ 'ö ‑bɛn zë ‑sü 'ka‑ 'ka Atanna ‑bha 'tɔng‑ 'sëëdhɛ 'gü ‑a 'dhö.
2CO 3:17 'Sa kwa Dëmɛ 'wo‑ ‑dhiang zë Atanna ‑gɔ 'sëëdhɛ 'gü ‑dhɛ bha‑ 'gü bha 'yaa pë "wɛɛ 'bha 'ka kö 'yii kë 'Nii‑ "slʋ̈ʋ̈slʋ̈ ‑zë 'ka. 'Nii‑ "slʋ̈ʋ̈slʋ̈ bha ꞊në ꞊ya kë ‑dhɛ 'ö‑ 'gü, 'yö mɛ ‑yö ‑kë mɛ 'flëë‑ 'gü.
2CO 3:18 ‑A ‑kë "dhʋ̈ ‑sü bha‑ 'gü, 'mɛ "pɛpɛ 'ö 'kwa bɔ kwa Dëmɛ bha‑ 'ka, 'ö pë 'bhaa kpa ‑sü 'ka kwa wëëdhö bha kwa ꞊në 'kwa ꞊dhɛ ‑a ‑bha mɛdhɛ 'bhü 'dhö. ‑A ‑kë "dhʋ̈ ‑sü bha‑ 'gü, ꞊ya kwa "gla kë "dhʋ̈ kö 'kwa kë ö ‑bhɔbha 'ka. ‑A ‑wɔn 'gü 'kwa 'go 'tɔbhɔdhe ‑blɛɛsü bha‑ 'gü 'kwa ‑da ‑a 'dhɛ 'ö 'kpii‑ 'ö ‑ziö ‑a 'dhɛ bha‑ ‑ta bha‑ 'gü. 'Pë 'ö kwa Dëmɛ 'ö‑ ‑bha 'Nii‑ "slʋ̈ʋ̈slʋ̈ 'dhö ‑mü bha 'ö‑ ‑kë kwa ‑dhɛ bha 'yö bha.
2CO 4:1 Yë 'ö Atanna ‑ya dɔ yi ‑kɔ 'ka 'ö 'yi‑ kë sië ya ‑ya kë "dhʋ̈ 'ö ‑bha "klʋsëdhɛ ꞊në‑ ‑wɔn 'gü. 'Wɔn 'ö‑ ‑wɔn 'gü 'yö yi 'gü 'yaa ga ‑a kë ‑sü 'ka 'pö bha 'yö bha.
2CO 4:2 'Wɔn 'ö‑ ‑wɔn 'gü 'pö 'yö 'yaa "wɩ‑ ‑bha kö yi ‑kɔ ‑yö ‑da 'yiʋ̈‑ ‑wɔn ‑nu 'wo‑ ‑kë ‑nu wo ‑bin 'gü ‑bin 'gü bha‑ 'gü, 'ö 'yaa "wɩ‑ ‑bha kö 'yi "kpënng‑ kë mɛ ‑nu ‑gɔ, kö 'yi Atanna ‑wʋ "glaa‑ ‑ta ‑nu wo, 'ö ‑kɔ 'ö yi ‑zë 'yi dho‑ kë 'ka ‑zianwo kö mɛ ꞊gban "pɛpɛ ‑wo tɛanwɔn bha ꞊në‑ 'gü ma 'kpakpadhö, kë "dhʋ̈ kö ‑wo 'dhang bho yi "dhiʋ̈ ꞊dhɛ Atanna ‑bha yëkëmɛ ‑mü yi 'ka bha 'yö bha.
2CO 4:3 "Kɛɛ yö ‑zë ꞊gban 'gü, Atanna ‑bha 'wɔntaɔngsë 'yi‑ pö sië bha‑ 'gü ‑yö tii mɛ 'bha ‑nu 'gü. "Kɛɛ 'mɛ 'wo 'gü see‑ ‑mɛ ‑nu 'ka bha ꞊në‑ 'gü 'dhö tii ‑a ‑nu 'gü.
2CO 4:4 'Dhang 'ö 'waa‑ bho Klisi ‑wɔn "dhiʋ̈ bha‑ 'klɔɔ‑ ‑mü ꞊dhɛ Sɔtraan 'ö "kpʋng ꞊taa yö bha ꞊në wo ‑zë ‑a ‑nu ‑bha ‑zlan 'ka, 'yö ꞊yaa‑ ‑nu "gblüdhö ‑yan ꞊gban 'wü "pɛɛpɛdhö, kë "dhʋ̈ kö 'wa 'dho Atanna ‑bha naɔ ‑së 'yi‑ dɔ sië, 'ö yö ꞊në ꞊dhɛ ‑dhangbha 'dhö ‑dhɛtiidhɛ 'gü bha‑ yö. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔntaɔngsë bha ꞊në 'mɛ ꞊ya 'dhang bho‑ "dhiʋ̈ 'yö‑ ‑mɛ ‑ta ‑yö ‑pʋ, 'yö Atanna ‑bha mɛdhɛ bha‑ 'bhü yö Klisi 'ö Atanna "blɛɛn‑ 'ka bha‑ ‑bha.
2CO 4:5 Yi ‑zë ziö "pɛpɛ 'yi‑ wo bha 'yaa yi ‑dɩ ‑dhiang zë mɛ 'bha ‑dhɛ, Yesu Klisi 'ö kwa Dëmɛ 'ka bha ꞊në 'yi‑ ‑dhiang zë. Yi yi ‑dɩ ‑sü ꞊dhɛ kaa‑ gwëëzë ‑nu 'dhö Yesu bha ꞊në‑ ‑wɔn 'gü.
2CO 4:6 ‑A 'klɔɔ‑ ‑mü ꞊dhɛ Atanna do 'ö‑ pö yi 'bha 'ka ꞊dhɛ: «‑Dhɛ 'gü‑ ‑dho "pʋ ‑dhɛtiidhɛ 'gü bha» yöö do bha ꞊në ‑dhɛ ‑pʋ kwa zuë" "piʋ̈ "tʋ̈ng 'kwa dɔ‑ 'ka ya‑ 'gü kë "dhʋ̈ kö‑ ‑bha mɛdhɛ 'bhü 'ö Klisi ‑bha bha 'kwa‑ dɔ.
2CO 4:7 "Kɛɛ yi ‑dhü 'ö pë ꞊bhlëbhlësü 'ö‑ "sima 'yaa 'dhö bha 'ö ‑ya ‑sü 'ka‑ 'gü bha ‑yö "wlaasü 'ka ꞊dhɛ "sɛgbɔ 'dhö, kë "dhʋ̈ kö ‑wa 'wɔn dɔ ꞊dhɛ 'gü gbɩɩdhɛ ‑ziisü 'ö yi 'gü bha Atanna ꞊në‑ ‑bha 'dhö ‑mü, yi ‑dɩ ‑bha 'yaa ‑mü.
2CO 4:8 ‑A ‑kë "dhʋ̈ ‑sü bha‑ 'gü, 'wɔn "gbɩɩ‑ ꞊gban "pɛpɛ suu 'do 'do ‑yö wɔ sië yi ‑ta, "kɛɛ 'ö ꞊dhɛ ꞊kwɛɛ 'dhö kö 'yii yi "yɛ ‑zë bho. "Sika ‑yö yi ‑bha "kɛɛ 'yii yi ‑din ‑zë yën.
2CO 4:9 ‑Wo yi ‑wëëkë "dhiʋ̈ ‑bho, "kɛɛ Atanna ‑zë 'yaa ‑kɔ "kan yi "dhiʋ̈. ‑Wo yi 'pɔn ‑sü 'ka "kɛɛ yi 'gü ‑zë 'yii see‑.
2CO 4:10 Sëë do 'ö Yesu ‑ya bho 'ö dho 'ö zun‑ 'ka‑ ga ‑sü ‑bha bha ꞊në 'yi‑ bho sië 'pö ꞊dhɛ‑ 'dhö, kë "dhʋ̈ kö ꞊sii gɔɔ ꞊gblɛɛn 'ö‑ 'gü bha ‑yö ‑kë yi 'gü 'pö.
2CO 4:11 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ "yaandhe ‑zian 'yi‑ 'ka 'ö 'yii ga ꞊kö ya, "kɛɛ ‑wo yi "dhiʋ̈ ‑zë ‑dɔ ga ‑dhɛ ‑kpɛawo Yesu ‑wɔn 'gü. "Kɛɛ ‑yö ‑kë yi 'ka "dhʋ̈ kë "dhʋ̈ kö ꞊sii gɔɔ ꞊gblɛɛn 'ö Yesu 'gü bha ꞊në‑ "dhiʋ̈ ‑yö ‑wo kwi 'ö yi ‑bha 'ö "bu ‑pë 'ka ya‑ 'gü.
2CO 4:12 ‑A ‑kë "dhʋ̈ ‑sü bha‑ 'gü, ga ‑yö ꞊gbaɔn sië yi ‑zë yi ‑ta (naɔ ‑së 'yi‑ dɔ sië bha‑ ‑wɔn 'gü), 'yö ꞊sii ‑da sië ka ‑zë ka 'gü.
2CO 4:13 'Yö ꞊dhɛ 'ö ‑kë ꞊dhɛ ‑yö ‑bɛn zë ‑sü 'ka Atanna ‑bha 'tɔng‑ 'sëëdhɛ 'gü ꞊dhɛ: «'Dhang ꞊në 'a‑ ‑bho ‑a "dhiʋ̈ 'yö 'a‑ pö», "kɛɛ kö yii ‑dɩ 'pö 'dhang ‑bho ‑a "dhiʋ̈ zuë" ‑yö yi "gblʋ̈ʋ̈‑ bha ꞊në‑ ‑wɔn 'gü 'yö 'yaa dɔ 'pö yi "dhi "tung.
2CO 4:14 ‑A ‑gɛn ‑mü ꞊dhɛ yi 'dhang bho ‑sü ‑ya "dhiʋ̈ 'kpakpadhö ꞊dhɛ 'mɛ 'ö kwa Dëmɛ Yesu ‑bö 'ö go ga 'gü bha ‑yö ‑dho yi ꞊nëng ‑bha 'ö yi ‑bö 'pö. 'Yö kwɛng‑ ‑nu ꞊gban kwa ꞊loo 'ko ‑ta 'ö ‑kuu "dhiʋ̈.
2CO 4:15 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔn "pɛpɛ bha‑ ꞊gban‑ ‑kë "dhʋ̈ ka ꞊në ka ‑wɔn 'gü, kë "dhʋ̈ kö 'mɛ 'ö Atanna dho ‑gasitɛ kë‑ ‑nu ‑dhɛ bha ‑wo pa ꞊në‑ wo do ‑wo 'dho‑ 'ka, kë "dhʋ̈ kö‑ nuɛ" bho ‑mɛ ‑nu ‑wo kë 'gbɛ 'ka yuudhö kö‑ 'tɔ ‑yö bhɔ.
2CO 4:16 'Wɔn 'ö‑ ‑wɔn 'gü 'yö yi 'gü 'yaa ga bha 'yö bha. ‑A ‑gɛn ‑mü ꞊dhɛ 'kö 'zü yi ‑dhü ‑zë 'bha 'dhö "kan sië‑ "dhiʋ̈ ‑slëëslëëdhö 'ö dho‑ 'ka, "kɛɛ yi 'nii‑ kö yi 'gü bha faan ‑sɛa ꞊në Atanna ‑ya ‑da 'gü ‑kpɛakpɛawo 'pö 'ö dho‑ 'ka.
2CO 4:17 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yi ‑wëëdhɛ 'në ‑nu 'wo bho sië 'ö‑ 'gü 'yaa ꞊gwëë bha ꞊në yi zü ‑gban 'gü 'ka ‑dhɛ 'bha ꞊kpaɔyi ‑bha, yi ‑wëëdhɛ 'ö bho sië bha waa‑ mɛdhɛ 'yi dho ‑da 'gü bha 'waa ‑zɔn "kwëë ‑pë ‑zian ꞊në‑ 'ka. ‑A ‑gɛn ‑mü ꞊dhɛ mɛdhɛ 'yi dho‑ kë "dhʋ̈ bha‑ ‑bha ‑kë 'kpii‑ ‑sü ‑dhiang 'yaa zë, yöö do bha 'yaa yën tongtongdhö.
2CO 4:18 'Wɔn 'ö‑ ‑wɔn 'gü 'yö yi ‑wëëdhɛ 'ö bho sië bha 'ö dho "gla yi ‑gɔ mɛdhɛ 'gü bha‑ 'klɔɔ‑ ‑mü ꞊dhɛ yi ‑zʋ 'gɔn ‑sü 'yaa pë 'dhɛ 'kö mɛ ‑ya yö mɛ "yanga 'ka bha‑ ‑dhɛ. Yi ‑zʋ 'gɔn ‑sü ‑ya 'dhɛ 'ö mɛ "yan 'yaa‑ yö bha ꞊në‑ ‑dhɛ. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ pë 'dhɛ 'kö mɛ "yan ‑ya yö bha‑ 'bha 'yaa ꞊gwëë ‑A 'dhɛ 'ö mɛ "yan 'yaa‑ yö 'ö Atanna "piʋ̈ bha ꞊në‑ ‑bha ꞊gwëë ‑sü "dhiʋ̈todhɛ ‑zian 'yaa 'dhö.
2CO 5:1 'Sa kwa‑ 'wɔn ‑dɔ 'kpakpadhö ꞊dhɛ kwi 'dhɛ 'kö 'kwa ‑tosɛa kë sië 'gü 'ö kwa ‑bha ya ‑yö ꞊dhɛ bɔɔ" ꞊në‑ 'dhö, 'kɔ ꞊dede 'dhɛ 'kö 'kwa dho ‑tosɛa kë‑ 'gü Atanna "piʋ̈ bha yö ‑zë ‑yö dhang‑ 'gü. Yöö Atanna ‑mɛ ꞊dede ꞊në yö ‑zë dɔ, yö ꞊në 'kwa dho ‑tosɛa kë‑ 'gü ‑todhʋ̈ 'ka.
2CO 5:2 'Wɔn 'ö‑ ‑wɔn 'gü 'yö yi ‑wëëdhɛ 'dhö bho sië "tʋ̈ng ya‑ 'gü bha 'yö bha, ‑a 'klɔɔ‑ mü ꞊dhɛ kwi ‑dee 'dhɛ 'ö Atanna "piʋ̈ dhang‑ 'gü bha‑ ‑da ‑wɔn bha ꞊në‑ "dhia 'dhö yi 'gü ꞊dedewo.
2CO 5:3 "Kɛɛ ꞊ya kë ꞊dhɛ "tʋ̈ng bha ꞊ya ꞊loo kö‑ kwi zii ‑sü bha ‑yö kwa ‑bha ‑zë wo, kö 'kwaa kwa ‑dhü 'ka, 'yö 'kwa‑ ‑dee ‑sü bha‑ ‑da ‑a zii ‑sü bha‑ ‑ta ꞊dhɛ ‑kɔ bha‑ 'dhö ('yö kpa‑ zii ‑sü bha‑ ‑ta).
2CO 5:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ "tʋ̈ng 'ö 'kwa ‑tun 'ka "kpʋng ꞊taa yö, saan" bha kwa ‑dho ‑a wo 'ö ‑kë ꞊dhɛ ꞊kwɛɛ 'dhö kwa ‑ta ‑kpɛawo, "kɛɛ ‑a kë 'kwa‑ wo sië "dhʋ̈ bha‑ ‑gɛn ‑mü ꞊dhɛ 'yaa kwa "piʋ̈ ꞊dhɛ 'kwa‑ kwi zii ‑sü 'ö kwa ‑bha bha‑ bho kwa ‑bha, ‑yö kwa "piʋ̈ ꞊dhɛ 'kwa 'to‑ 'gü kë "dhʋ̈ kö kwi 'dhɛ 'ö ꞊sii 'yaa‑ 'gü 'ö kwa ‑bha bha ‑yö 'to kwa ‑bha kö‑ 'dhɛ 'ö ꞊sii 'dhö‑ 'gü 'ö Atanna "piʋ̈ bha 'kwa‑ ‑da 'dhɛ bha‑ ‑ta.
2CO 5:5 'Wɔn suu bha 'mɛ 'ö kwa ‑da ‑a këmɛ 'ka bha Atanna ‑mü. ꞊Dhɛ 'ö ꞊yaa‑ kë "dhʋ̈, 'yö dho 'yö ö ‑bha 'Nii‑ "slʋ̈ʋ̈slʋ̈ bha‑ ‑da kwa 'gü kë "dhʋ̈ kö ‑yö kë 'wɔn ‑së 'ö‑ ‑kë kwa ‑dhɛ bha‑ tɔng 'ka kwa ‑gɔ kö 'kwa‑ ꞊slɔɔ‑ 'saa‑ 'gü.
2CO 5:6 ‑A ‑kë "dhʋ̈ ‑sü bha‑ 'gü, yi 'gü 'yaa ga tongtongdhö, yi 'dhang bho ‑sü ‑ya "dhiʋ̈ ꞊dhɛ "tʋ̈ng 'kwa ‑tun 'ka kwi 'dhɛ 'ö kwa ‑bha ya‑ 'gü, kö kwa ‑tun kwa Dëmɛ bha‑ 'ka ꞊gblɛɛn.
2CO 5:7 ‑A ‑gɛn ‑mü ꞊dhɛ 'dhang 'yi‑ bho pë ‑nu bha‑ ‑nu ‑wɔn "dhiʋ̈ bha ꞊në 'yi zë‑ ‑dhɛ 'yö 'yi ‑tosɛa suu bha‑ kë sië bha, kö‑ kë ꞊dhɛ 'ya yi "yan ꞊në‑ ‑kpan ‑a ‑nu ‑bha 'yaa ‑mü.
2CO 5:8 "Kɛɛ yi ‑zʋ 'gɔn ‑sü ‑ya ‑dhɛ klöklödhö, yö ꞊në‑ ‑wɔn 'gü 'yö yi "piʋ̈ ‑zianwo ꞊naa ꞊dhɛ 'yi go kwi 'dhɛ 'ö ya‑ 'gü kö 'yi 'dho ‑tosɛa kë kwa Dëmɛ bha‑ "sɔɔ.
2CO 5:9 'Wɔn 'ö‑ ‑wɔn 'gü 'yö 'yi faan wɔ sië yi ‑dɩ ‑ta 'pö bha 'yö bha, kë "dhʋ̈ kö 'kö 'zü 'yi to kwi ya‑ 'gü oo, 'yi go‑ 'gü oo, "kɛɛ kö yi "dhia ‑zë ‑yö kë‑ 'gü ‑kpɛawo.
2CO 5:10 ‑A ‑gɛn ‑mü ꞊dhɛ mɛ ꞊gban "pɛpɛ kwa ‑wo Klisi ‑bha za ꞊gblü "dhiʋ̈ ‑wɔn ‑yö ‑dhö kö 'mɛ 'ö "dhʋ̈ 'ö ‑wɔn ‑së 'ö‑ ‑kë, "ɛɛn 'wɔn yaa 'ö‑ ‑kë, kwi 'dhɛ 'ö kwa ‑bha ya‑ 'gü bha ‑ya ꞊trɔɔn ꞊slɔɔ.
2CO 5:11 ‑A ‑kë "dhʋ̈ ‑sü bha‑ 'gü, ꞊dhɛ 'ö ‑kë ꞊dhɛ yi 'pë 'wo‑ ‑dhɛ ‑suʋ̈ kwa Dëmɛ ‑gɔ ‑sü bha‑ ‑dɔ, yö ꞊në‑ ‑wɔn 'yö 'yi‑ "slë ꞊mɔɔ kö mɛ ꞊gban ‑wo 'dhang bho‑ ‑wɔn "dhiʋ̈. Atanna ‑yö yi ‑dɔ 'kpakpadhö, ‑yö n 'gü ꞊dhɛ kaa ‑dɩ 'pö ka n ‑dɔ 'kpakpadhö 'pö ka zuë" "piʋ̈.
2CO 5:12 'Ya 'dho kë ka 'gü ꞊dhɛ yi yi ‑dɩ ꞊gɔɔn ‑dee 'bha ꞊në‑ bho sië kö yi "dhia ‑yö 'ma ka 'gü. ‑A pö 'yi‑ wo "dhʋ̈ bha yi‑ ‑pö "dhʋ̈ kö ka ꞊në ka ‑gɛn gbɔ‑ kë "gblʋ̈gblʋ̈, ka ‑kë yi "sɛɛ‑ 'gü ‑sü ‑wɔn 'gü, kë "dhʋ̈ kö 'mɛ 'ö wo ‑zë 'wo wo 'tɔ kun 'wɔn ‑nu 'ö mɛ "yan ‑bha kun ꞊në‑ 'gü, 'ö 'waa wo 'tɔ 'kun zuëga ‑së ‑kë ‑a ‑nu "gblʋ̈ʋ̈‑ ‑wɔn ‑zë 'gü bha ꞊wa pë "ʋʋ pë 'ö‑ pö, kö‑ ‑yɔ ‑yö ꞊slɔɔ ka ‑gɔ.
2CO 5:13 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'kö 'ya kë ‑tamamɛ 'ka, kö yi Atanna ꞊në‑ ‑bha ‑tamamɛ 'ka, 'ya kë 'zü ‑glengmɛ 'ka, kö ka ꞊në 'yi ka ‑bha ‑glengmɛ 'ka.
2CO 5:14 ‑A ‑gɛn ‑mü ꞊dhɛ kwa ‑dhɔ 'ö Klisi ‑kë bha‑ ‑pɛng ‑yö ‑dɔ yi ‑ta 'böbödhö; ‑a ‑gɛn ‑mü ꞊dhɛ yi 'dhang ‑bho "dhiʋ̈ ꞊dhɛ mɛ doseng bha ꞊në ga mɛ ꞊gban "pɛpɛ ‑bha ga 'gü, 'yö ‑kë mɛ ꞊gban ‑bha ga bha‑ bho ‑kɔ 'ka.
2CO 5:15 ‑Yö ‑ga mɛ ꞊gban "pɛpɛ ‑wɔn 'gü "dhʋ̈ kë "dhʋ̈ kö 'mɛ 'wo "yaan 'wa 'dho ‑tosɛa kë wo ‑dɩa kë 'gü 'zü, "kɛɛ kö ‑wa kë 'mɛ 'ö ga‑ ‑nu ‑wɔn 'gü 'ö dho 'ö ‑bö bha ꞊në‑ dhɔɔbhaa 'ka.
2CO 5:16 ‑A ‑kë "dhʋ̈ ‑sü bha‑ 'gü, 'yaa ꞊yɔɔ mɛ 'bha ‑bha ꞊taamasü ya‑ 'gü 'zü ‑a ꞊bhlë ‑kë ‑dhö ‑sü "ɛɛn ‑a ꞊bhlë 'yaa 'dhö ‑sü ‑bha. Kö 'zü 'ö ‑kë ꞊dhɛ yi "yan‑ kë ‑yɔɔ Klisi 'gü pinpindhö ꞊dhɛ ‑kɔ bha‑ 'dhö, "kɛɛ yi "yan ꞊yɔɔ ‑sü 'yaa‑ 'gü 'zü.
2CO 5:17 'Wɔn 'ö‑ ‑wɔn 'gü 'yö 'yi‑ pö 'yaa ꞊yɔɔ mɛ 'bha ‑bha 'zü bha‑ 'klɔɔ‑ ‑mü ꞊dhɛ mɛ "ʋʋ mɛ 'ö ꞊ya ‑kplu Klisi ‑bha, kö‑ ‑mɛ ꞊ya "gla, kö 'ö gun ‑kɔ 'ö‑ ‑bha ‑blɛɛsü bha 'yaa‑ ‑bha 'zü, kö Atanna ꞊yaa‑ ‑mɛ ‑da ‑deewo. Kö ‑tosɛa 'dhɛ 'ö‑ ‑mɛ ‑yö gun‑ kë sië ‑blɛɛsü bha ꞊ya ziö, kö‑ ‑mɛ ꞊ya ‑da ‑tosɛa ‑dee 'gü.
2CO 5:18 ‑Wɔn "pɛpɛ 'ö "dhʋ̈ bha 'mɛ 'ö‑ ‑kë yö ‑mü Atanna do 'ö kwa ‑kɔ wü 'koo Klisi 'saa‑ 'gü, 'ö 'dho 'zü 'ö ö (‑bha yëkëmɛ ‑nu) yi ‑ya mɛ ‑kpɛa 'wo to ‑a ‑nu ‑dhɛ ‑a ‑bha ‑gasitɛ bha‑ ‑bha ‑mɛ 'ka bha ꞊në‑ 'ka.
2CO 5:19 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑yö ‑bɔ Klisi ꞊në‑ ‑ta 'yö waa‑ mɛ ‑nu ‑a ‑nu ‑kɔ wü 'koo, 'yö ‑da "pɛpɛ 'ö mɛ ‑nu 'wo‑ wo‑ "dhiʋ̈ bha 'yii‑ 'bha ‑yaki 'sü, 'yö ‑ya mü 'zü 'yö yi ‑ya ‑kɔ ‑wü 'koo dhe 'ö "dhʋ̈ bha‑ ‑dhiang ‑zë mɛ ‑nu ‑dhɛ ‑mɛ 'ka.
2CO 5:20 ‑A ‑kë "dhʋ̈ ‑sü bha‑ 'gü, dhiang ‑nu 'yi‑ zë bha yi‑ ‑zë Klisi ꞊në‑ ‑bha zë 'gü, ꞊dhɛ 'pë 'ö Atanna yöö ꞊dede ꞊në bɔ yi ‑ta 'ö ka ‑dhɛ ‑a 'dhö. ‑A ‑wɔn 'gü, bhɛa" ꞊në 'yi‑ wo sië ka ‑dhɛ ꞊dedewo kwa Dëmɛ Klisi bha‑ 'tɔ 'gü, kö 'ka dɔ "gbɩɩ‑ 'ka "wɩ‑ ‑bha kö kaa‑ Atanna ‑nu 'ka 'wü 'koo!
2CO 5:21 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Klisi bha 'yii 'wɔn yaa kë tongtongdhö, "kɛɛ Atanna ‑yö kë kwaa‑ 'wɔnyaa ‑nu ‑kwɛɛ ‑ya yö ꞊në‑ ꞊gbin‑ 'yö‑ ‑dhii kun kpɔnkplɔndhö ꞊dhɛ 'pë 'ö yöö ꞊dede ‑zian ꞊në 'wɔn yaa 'ka ‑a 'dhö. ‑A kë 'ö‑ wo "dhʋ̈ bha ‑ya ‑kë "dhʋ̈ kwa ꞊në kwa ‑wɔn 'gü, kë "dhʋ̈ kö 'kwa bɔ Klisi 'ka, kö ꞊sɔng 'bha 'ya 'dho kë kwa ‑bha ö wëëdhö.
2CO 6:1 ꞊Dhɛ 'ö ‑kë ꞊dhɛ yi ꞊në 'yi "yi dɔ sië Atanna ‑kɔ ‑bha bha, yi ‑bhɛa ka ‑dhɛ yö ꞊në‑ ‑wɔn 'gü kö 'ka‑ kë ‑së kö ‑gasitɛ 'ö‑ ‑ya ‑kë ka ‑dhɛ 'ö 'ka 'dhang bho ‑sü 'ka‑ "dhiʋ̈ bha 'ya 'dho kë 'wɔn 'gü "fië 'ka ka ‑gɔ.
2CO 6:2 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑yö ‑bɛn zë ‑sü 'ka Atanna ‑wʋ 'sëëdhɛ 'gü ꞊dhɛ: «Bhɛa" 'i‑ wo n ‑dhɛ bha a kë i ‑wʋ ‑ma ‑a ma "tʋ̈ng ꞊dede ꞊në‑ 'gü, 'yö 'a nu i ‑dhɛ. A ‑ta i ‑dhɛ dha "tʋ̈ng ꞊në‑ 'gü.» ‑A yö ꞊në‑ ‑wɔn 'gü 'yö 'a‑ pö ka ‑dhɛ: ‑Ka ‑dhɛ ‑ga, "tʋ̈ng ‑së ꞊dede 'wo gun‑ pö sië bha ꞊në ꞊ya ꞊loo bha. Mɛ dha "tʋ̈ng 'wo gun‑ ‑dhiang zë sië yi 'bha 'ka bha ꞊në ꞊ya ꞊loo ꞊dɛɛ bha.
2CO 6:3 Yi 'ö 'yi "wɩ sië ka ‑dhɛ "dhʋ̈ bha ‑kɔ 'yi dho‑ kë‑ 'ka kö 'ya 'dho kë mɛ 'bha ‑mɛ 'bha ‑bho Atanna ‑bha zian ‑ta ‑mɛ 'ka ꞊në 'yi‑ mɔɔ‑ sië. Kë "dhʋ̈ kö‑ ‑bha yë 'yi‑ kë sië bha 'wa 'dho‑ ‑dhiang yaa zë.
2CO 6:4 'Wɔn 'ö‑ ‑wɔn 'gü 'yö 'wɔn ꞊gban "pɛpɛ suu ‑yö 'kun bho yi 'gü bha 'yö bha, kë "dhʋ̈ kö ‑wa dɔ ꞊dhɛ ‑a ‑bha yëkëmɛ ‑mü yi 'ka. Yö ꞊në‑ ‑wɔn 'gü 'yö 'ya ‑wëëdhɛ ‑zian yö oo, 'yi ‑kpla ‑zian ꞊në‑ 'gü oo, "ɛɛn 'ö "yënng ꞊gbaɔndhe ꞊në‑ 'ka oo, 'yö 'yi‑ ꞊gban kun yi ‑bha zuësɛadhɛ 'ka.
2CO 6:5 'Yö 'wo yi ‑ma ‑nu wo, 'yö 'wo yi ‑da ‑kaso 'gü, 'yö 'wo "dhinaa ‑nu ꞊mɔɔ yi "dhiʋ̈, 'yö 'yi yë "gbɩɩ‑ "gbɩɩ‑ ‑nu ‑kë, 'yö 'yi ‑wɔ ‑nu wo "yaan, 'yö 'yi ꞊gloo ‑nu wo diin‑ 'ka.
2CO 6:6 Yi ‑dɩ 'kun ‑nu 'yi‑ wo ‑së kö pö 'a 'dho ‑ya yi bha oo, 'wɔndɔdhe 'ö yi ‑gɔ Atanna dɔ ‑sü "gblʋ "piʋ̈ ‑bha oo, zuësɛadhɛ ‑nu 'yi‑ ‑kë oo, "klʋsëdhɛ ‑nu 'yi‑ ‑kë "ɛɛn mɛ ‑nu ‑dhɔ 'ö yi ‑kë 'ö‑ "yi 'yaa kë‑ ꞊wlö bha yi‑ ꞊gban ‑kë "dhʋ̈ Atanna ‑bha 'Nii‑ "slʋ̈ʋ̈slʋ̈ 'ö yi 'gü bha ꞊në‑ 'saa‑ 'gü, (kë "dhʋ̈ kö ‑wo yi dɔ‑ ‑bha yëkëmɛ 'ka).
2CO 6:7 'Wɔn 'yi zë‑ ‑dhɛ 'yö 'yi Atanna ‑bha tɛanwɔn bha ꞊në‑ ‑naɔ dɔ, 'yö ('wo yi ‑kë ‑a ‑bha yëkëmɛ 'ka ‑sü ‑dhɛ yö) 'gügbɩɩdhɛ 'ö‑ ‑kë 'wɔn ‑nu 'yi‑ kë sië bha ꞊në‑ ‑bha, 'yö 'wɔn 'ö pö 'aa‑ ‑bha ꞊në 'yi‑ ‑kë bha 'yö bha. Kö yi këwɔn ‑nu "ɛɛn yi "ta ‑kɔ ‑nu bha ꞊në ‑wo kë yii‑ 'ko ‑zë 'ka ‑piö ‑nu "ɛɛn "dhɛ ‑ya yi ‑ta ‑pë ‑nu 'ka yi ‑dhiang yaa zë ‑mɛ ‑nu ‑gɔ.
2CO 6:8 'Kö 'zü 'wo ꞊bhlë ‑ya yi ‑bha oo, 'wo 'yiʋ̈‑ dɔ yi ‑bha oo, 'wo yi ‑dhiang ‑së zë oo, 'wo‑ yaa zë oo, 'kö 'zü 'wo yi ‑ga ꞊suakëmɛ 'ka "kɛɛ kö tɛanwɔn ꞊në 'yi‑ pö sië oo,
2CO 6:9 kö 'zü 'wo yi ‑ga ꞊dhɛ 'mɛ 'ö mɛ 'bhaa‑ dɔ‑ 'dhö "kɛɛ kö mɛ ꞊gban "pɛpɛ 'wo yi ‑dɔ oo, 'kö 'zü 'wo yi sü ꞊dhɛ 'mɛ yöö ga‑ 'dhö "kɛɛ kö yi "yaan ꞊dhɛ ‑kɔ 'ö kaa ꞊dede 'ka‑ dɔ‑ 'ka bha‑ 'dhö oo, 'wo 'wɔn bho yi 'gü "kɛɛ 'waa yi zë ‑zë wo oo, 'ö 'yaa "wɩ bha 'yö bha, kë "dhʋ̈ kö mɛ ꞊gban ‑wo yi dɔ Atanna ‑bha yëkëmɛ ꞊në‑ 'ka.
2CO 6:10 ‑Wo yi wë 'gü ‑siö, "kɛɛ yi ꞊nii ‑yö ‑to ‑da ‑sü 'ka ‑kpɛawo, 'ö 'yi bhɔ mɛ ‑nu 'gü "flɛɛmɛ ‑nu ‑bha, "kɛɛ kö yi mɛ kpö 'gbɛ ꞊dede ‑zë kë sië pë ‑mɛ 'ka Atanna ‑wɔn "gblʋ "piʋ̈ "dhʋ̈ do. Yi ‑bhɔ mɛ ‑nu 'gü ‑kɔ 'gü "fiëmɛ ‑bha, "kɛɛ 'sa kö yi ꞊në pë ꞊gban "pɛpɛ 'dhö yi ‑gɔ tɛan‑ ꞊dede 'ka Atanna wëëdhö.
2CO 6:11 Kodhɛngtö ‑mɛ ‑nu, 'ya yi zuë" "dhiʋ̈ "pʋ ka ‑dhɛ, 'ya yi "gblʋ̈ʋ̈‑ ‑wɔn ꞊gban pö ka ‑dhɛ ꞊tɔn yi "taɔngdë ‑nu.
2CO 6:12 ‑A ‑gɛn ‑mü ꞊dhɛ yi ꞊në yi ‑zë yi ‑wɔn 'yaa ka ‑bha, 'yö 'ka ka zuë" "dhiʋ̈ ta ‑sü 'ka yi ‑ gɔ, "kɛɛ ka ‑zë ka ‑wɔn ‑yö yi ‑gɔ "gbɩɩ‑.
2CO 6:13 Yö ꞊në‑ ‑wɔn 'gü 'yö 'a‑ pö ka ‑dhɛ ꞊dhɛ mɛ‑ pë pö mɛa‑ 'në ‑dhɛ ꞊dhɛ: «'Ka ka "gblüdhɛ "pʋ yi ‑dhɛ 'pö ꞊dhɛ ‑kɔ 'yi yi ‑bha ‑pʋ 'ka ka ‑dhɛ bha‑ 'dhö, ‑ka dɔ "gbɩɩ‑.
2CO 6:14 'Mɛ 'ka bɔ Yesu 'ka bha kaa‑ 'mɛ 'waa 'dhang bho Yesu ‑wɔn "dhiʋ̈ bha ka kpö 'ya 'dho kë do. Ka bɔ "yɔɔ ‑nu 'waa kë "dhʋ̈. ‑A 'klɔɔ‑ ‑mü ꞊dhɛ pë ‑së waa‑ pë yaa 'ö 'dhö, ‑naa ‑ya ‑nu ꞊zinng 'gü. ‑Naa ‑yö ‑dhɛpuudhɛ waa‑ ‑dhɛtiidhɛ ‑a ‑nu ꞊zinng 'gü.
2CO 6:15 ‑Naa ‑yö Klisi waa‑ Sɔtraan ‑a ‑nu ꞊zinng 'gü. 'Mɛ 'wo 'dhang bho‑ "dhiʋ̈ waa‑ 'mɛ 'waa 'dhang bho‑ "dhiʋ̈ ‑a ‑nu ‑bha pë 'yaa do.
2CO 6:16 Atanna ‑dhɔkëgükɔ waa‑ ꞊gebhɔ ‑a ‑nu ‑duɛ 'yaa do. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kwa ꞊në 'kwa ꞊dhɛ Atanna "yaandhe bha‑ ‑dhɔkëgükɔ 'dhö ꞊dhɛ ‑kɔ 'ö yöö ꞊dede 'ö‑ pö‑ 'ka ‑a 'dhö ꞊dhɛ: «A ‑dho 'dho 'a n ꞊yië bho n dhɔɔbhaamɛ ‑nu kpö 'gü, 'ö 'a ‑tosɛa ‑kë mü, 'ö 'wo ‑kë n ‑ma ‑gɔ 'gü ‑mɛ ‑nu 'ka, 'ö 'a ‑kë ‑a ‑nu ‑bha Atanna 'ka 'pö.»
2CO 6:17 'Wɔn 'ö‑ ‑wɔn 'gü 'yö kwa Dëmɛ ‑yö dhiang zë 'ö‑ pö: «‑Ka 'go 'mɛ 'wo bha‑ ‑nu kpö 'gü, ‑ka "kan‑ ‑nu ‑bha, 'pë 'ö‑ ‑dhɔ 'yaa n kë, 'ka 'dho ka ‑kɔ zun‑ ‑bha tongtongdhö, ꞊ya kë "dhʋ̈ a ‑dho n ‑kɔ 'kpɔ ka ‑gɔ,
2CO 6:18 a ‑dho kë ka Dë 'ka, 'ö 'ka ‑kë 'pö n gbö ‑nu waa‑ n 'dhu ‑nu 'ka bha 'yö bha.» 'Yö go mü 'ö‑ pö: «Mang Atanna ‑mɛ 'ö n ‑kɔ ‑fië ‑bha ‑wɔn 'yaa 'dhö bha ma ꞊në 'a ‑wɩ bha.»
2CO 7:1 ꞊Dhɛ 'ö ‑kë ꞊dhɛ "plüün ‑së ‑nu 'ö‑ suu 'dhö bha Atanna ꞊yaa‑ bho kwa ‑dhɛ ꞊dhɛ ‑kɔ bha‑ 'dhö bha, n dheebhang dhɔɔbhaa ‑sü ‑nu, pë 'pɛpɛ 'ö ‑kë ꞊dhɛ ‑yö ‑mɔɔ ‑bha 'ö kwa kwi "ɛɛn kwa 'nii‑ ‑dhii kun bha ‑ka ‑kwaa bho kwa ‑bha, kö 'kwa kwa 'gü dɔ "gbɩɩ‑ 'kwa kë "slʋ̈ʋ̈slʋ̈ Atanna wëëdhö, kö 'kwa "suʋ̈‑ ‑gɔ kë "dhʋ̈ kö ‑ya ‑sü 'ö 'kwa‑ 'ka ‑a ‑bha ‑ya 'gü bha 'kwa‑ ‑gɔ ‑da 'plöö.
2CO 7:2 ‑Ka dɔ "gbɩɩ‑ kö 'ka ‑duɛ nu yi ‑dhɛ ka zuë" "piʋ̈, ‑a ‑gɛn ‑mü ꞊dhɛ 'yii ‑da mɛ 'bha "dhiʋ̈ ka kpö 'gü, 'yii ‑gɛn ‑da mɛ 'bha ‑bha ꞊naɔ 'gü kö ‑yö kë‑ ‑mɛ ‑pö ‑gɛn 'ka, "ɛɛn 'yii mɛ 'bha ‑ta ‑bhö.
2CO 7:3 Kö‑ kë ꞊dhɛ ‑a pö 'a‑ wo "dhʋ̈ bha za ꞊në 'a‑ dɔ‑ 'ka ka ‑bha 'yaa ‑mü. ‑A ‑gɛn ‑mü ꞊dhɛ 'ma‑ pö 'nu ka ‑dhɛ ꞊dhɛ ka ‑wɔn 'ö yi ‑gɔ "gbɩɩ‑ bha‑ "sima 'yaa 'dhö. Yö ꞊në‑ ‑wɔn 'gü 'yö 'kö 'zü 'ö ga 'ka oo, 'ɛɛn 'ö dha 'ka oo, 'yö 'kwa dho‑ wo kwa "kwëë.
2CO 7:4 Yi 'dhang bho ‑sü ‑yö ka "dhiʋ̈ 'kpakpadhö, "sika 'bha 'yaa yi 'gü ka ‑wɔn 'gü. ‑A ‑kë "dhʋ̈ ‑sü bha‑ 'gü, 'wɔn "gbɩɩ‑ suu "ʋʋ suu 'ö ‑wɔ yi ‑ta, 'yaa yi 'gü ga, ‑yö yi faan ꞊në‑ dɔ ‑kpɛawo, 'yö yi ꞊nii ‑da 'ö dho‑ 'ka.
2CO 7:5 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ "tʋ̈ng 'yi ꞊loo‑ 'ka Maseduanö ‑sɛ 'gü bha kö zuëwaanusü ‑tangga ‑zian 'yaa yi ‑gɔ. ‑Gblü ‑yö ‑gun yi ‑bha "kpɛnng, 'ö "suʋ̈ ‑yö gun yi 'gü.
2CO 7:6 "Kɛɛ Atanna 'ö kpa 'mɛ 'ö‑ ‑nu ‑din 'dhö yën sië‑ ‑nu ‑zʋ ‑ta bha ꞊në ‑gasitɛ 'yii‑ ꞊slɔɔ, 'yö kpa yi ‑zʋ ‑ta Titö ‑bha ‑loo yi ‑dhɛ 'gü ‑sü 'ka. 'Yö faan ‑sɛa ‑da yi 'gü.
2CO 7:7 Faan ‑sɛa ‑zian 'ö ‑da yi 'gü "dhʋ̈ bha‑ ‑gɛn 'yii kë Titö ‑bha nu ‑sü yöö do‑ 'ka, "kɛɛ yöö ‑dɩ 'pö‑ zuë" 'ö gun 'waannu ‑sü 'ka ka ‑wɔn 'gü bha ꞊në yi ‑bha zuë" 'waanu ‑sü ‑ta pa. ꞊Dhɛ 'ö ꞊ya nu ꞊ya ꞊loo yö, 'wɔn "pɛpɛ 'ö ka ‑zʋ "piʋ̈ 'yö ‑ziö ꞊gban ‑gɛn 'gü yi ‑dhɛ. ‑Kɔ ‑nu 'ö ka "piʋ̈ ꞊dhɛ 'ka "yan ‑kpan 'ka n ‑bha oo, ‑kɔ ‑nu 'ö ‑wëë 'dhö bɔ sië‑ 'ka ka ‑ta ‑da 'ka‑ wo n "dhiʋ̈ bha‑ ‑wɔn 'gü bha oo, n ‑ta ‑ko zë ‑pɛng 'ö ka ‑ta ‑kɔ ‑nu 'ö‑ 'gü, 'yö‑ ꞊gban ‑gɛn ‑dɔ yi ‑dhɛ. 'Wɔn 'ö‑ ‑wɔn 'gü 'yö 'ma ‑ya ꞊niidadhe "yi ꞊bhaa bha 'yö bha.
2CO 7:8 'Kö 'zü ‑wʋ 'ö gun 'sëëdhɛ 'a‑ bɔ ka ‑dhɛ bha‑ 'gü 'ö "yua ‑zian ꞊në‑ wo ka ‑bha, "kɛɛ 'yaa bhɔ n 'gü 'wɔnyaa ‑bha 'zü. ‑Yö kë ‑bhɔ n 'gü 'wɔn yaa ‑bha ‑blɛɛsü ꞊naa kö 'ma‑ ma ꞊dhɛ ‑yö kë ‑yua ka ‑bha "tʋ̈ng ꞊në 'bha 'ka.
2CO 7:9 "Kɛɛ "tʋ̈ng 'dhɛ 'kwa dɔ‑ 'ka ya ‑yö n zuë" ꞊nii ‑da. N zuë" ꞊nii 'ö‑ ‑da bha‑ 'klɔɔ‑ 'yaa ‑mü 'ma 'ö‑ wo ka ‑bha bha‑ 'ka. "Kɛɛ 'ma 'ö‑ wo ka ‑bha "dhʋ̈ bha ꞊në‑ ‑wɔn 'gü 'yö 'ka ‑bhɛa Atanna ‑dhɛ. 'Wɔn 'ö‑ ‑wɔn 'gü 'yö n ꞊nii ‑da bha 'yö bha. ꞊Ya kë "dhʋ̈ kö 'sëëdhɛ 'a‑ bɔ ka ‑dhɛ bha Atanna ‑dhidhɛ ‑wɔn ꞊në gun‑ 'ka, 'wɔn 'ö‑ ‑wɔn 'gü 'yö ka 'bha 'yii "kan ka "dhiʋ̈ bha 'yö bha.
2CO 7:10 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ wëëgüsiödhe 'dhɛ 'ö ‑dhi Atanna ‑dhɛ bha ‑yö mɛ ‑bha ‑tosɛa "gla ꞊në‑ wo 'yö dha ‑zian bho mɛ 'ka. Wëëgüsiödhe 'dhɛ 'kö bha 'yaa mɛ kɔngga ‑da mɛ "dhi ‑gɛn bho. "Kɛɛ ‑a 'dhɛ 'ö 'mɛ 'waa Atanna dɔ ‑a ‑nu ‑gɔ bha ꞊në 'yaa ‑së. ‑A ‑gɛn ‑mü ꞊dhɛ yö ‑zë ‑yö mɛ "dhiʋ̈ ꞊në‑ bho ga ‑dhɛ.
2CO 7:11 Wëëgüsiödhe 'dhɛ 'ö Atanna ‑dhidhɛwɔn 'ka bha ‑kaa ‑ga bha, kö 'ka‑ "dhiʋ̈ ‑ya ‑dhɛ ‑ga. Yö ꞊në pa ka ‑bha 'yö 'ka ‑ya ka ‑dɩ ‑wɔn zuën ‑ta, kë "dhʋ̈ kö pö 'a 'dho kë ka ‑bha Atanna wëëdhö, 'yö 'ka‑ 'wɔn dɔ ꞊dhɛ ka ꞊bhlë ꞊ya ‑pö, 'yö "suʋ̈ 'dhö ‑da ka 'gü, 'yö ka zuë" ‑yö ꞊wlü ꞊dedewo Atanna ‑wɔn 'gü, 'yö‑ ‑zian mɔɔ‑ ‑sü ‑pɛng dɔ ka ‑ta, 'yö 'ka 'wɔn bho 'wɔnyaakëmɛ bha‑ 'gü 'kpakpadhö, 'yö 'ka‑ ‑zɔn ‑kɔ ꞊gban "pɛpɛ suu 'gü ꞊dhɛ ka ‑kɔ 'yaa gun 'wɔn bha‑ 'gü.
2CO 7:12 'Sa 'sëëdhɛ 'a‑ ‑bɛn zë "dhʋ̈ 'a‑ bɔ ka ‑dhɛ bha 'mii‑ bɔ 'mɛ 'ö "si bha‑ bho, "ɛɛn 'mɛ 'wo‑ bho‑ ‑gɔ ‑a ‑nu 'bha 'ko ‑sɔn. A‑ ‑bɔ "dhʋ̈ kö ꞊bhlë ‑ya yi ‑bha ‑pɛng 'ö ka ‑ta bha ꞊në 'ka‑ 'gü ‑wɔn kë ‑dhɛ yö Atanna wëëdhö.
2CO 7:13 'Wɔn 'ö‑ ‑wɔn 'gü 'yö yi zuë" ꞊ya 'waannu ‑tɛkpɛ ‑tɛkpɛdhö, "kɛɛ 'yö ‑ya mü 'zü, 'yö Titö ‑bhaa zuëniidadhe 'ö go‑ 'ka ka "piʋ̈ mü 'ö‑ ‑zʋ ‑gban ‑sü 'ka, 'ö ‑gban ‑a faan 'ka‑ dɔ‑ ‑bha bha‑ "dhia ‑yö ma yi 'gü "dhiʋ̈ ziö 'ka 'pö bha 'yö bha.
2CO 7:14 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ n 'tɔ 'a‑ kun ka ‑wɔn 'gü Titö ‑dhɛ ꞊kö 'yii nu ꞊kö ka ‑dhɛ 'gü mü, (꞊dhɛ ka ‑dhio ‑ma n ‑ta) bha, 'kii 'yiʋ̈‑ dɔ n ‑bha ‑a ‑dhɛ. "Kɛɛ ꞊dhɛ 'ö ‑kë 'pö ꞊dhɛ dhiang "pɛpɛ 'yi‑ zë ka ꞊dhɛ ‑a 'bha 'yaa ꞊sua 'ka bha, 'wɔn 'ö‑ ‑wɔn 'gü 'yö 'wɔn 'a n 'tɔ kun‑ 'gü Titö ‑dhɛ ka ‑bu 'gü ‑a 'bha 'yii kë ꞊sua 'ka 'pö bha 'yö bha.
2CO 7:15 ‑A ‑kë "dhʋ̈ ‑sü bha‑ 'gü, Titö ‑zʋ ꞊ya ‑bö 'ka ö ‑dhɛang ‑wɔn "dhia ma ‑kɔ 'ö‑ 'gü, waa‑ "suʋ̈ ‑nu 'ka‑ wo‑ "yan ‑gɔ 'ö 'ka ꞊bhlë ‑ya ‑wʋ ‑bha ‑kɔ ꞊gban ‑kɔ ꞊gban 'gü bha‑ ‑ta ‑kɔ 'ö‑ 'gü 'do 'do, ka ‑dhɔ ‑bha ‑a kë ‑sü 'bha ꞊në ‑da 'gü do 'ö dho‑ 'ka.
2CO 7:16 'Dhang 'a‑ bho ka "dhiʋ̈ 'wɔn ꞊gban ‑wɔn ꞊gban 'gü 'ö 'kii 'yiʋ̈‑ dɔ n bha 'pö tongtongdhö bha 'wɔn 'ö n zuë" ꞊nii ‑da ꞊dedewo 'yö bha.
2CO 8:1 ꞊Ya 'go yö ‑zë 'gü, n dheebhang ‑nu, 'yaa n "piʋ̈ ꞊dhɛ ‑gasitɛ 'ö Atanna ‑ya ‑kë ö ‑bha 'kɔdhigümɛ ‑nu 'wo Maseduanö ‑sɛ 'gü ‑a ‑nu ‑dhɛ bha ka kë‑ ‑wɔn 'gü ka tii ‑bha.
2CO 8:2 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ "pɛpɛ 'wo 'dhang bho Yesu ‑wɔn "dhiʋ̈ "sɛ bha‑ 'gü ‑a ‑nu ‑wëëdhɛ 'wo‑ bho, ‑a ‑dhiang 'yaa zë. "Kɛɛ yö ‑zë ꞊gban 'gü, ‑a ‑nu zuë" ‑yö ‑gun ‑da ‑sü 'ka ‑tɛkpɛ ‑tɛkpɛdhö, 'ö‑ ‑wɔn 'gü ‑a ‑nu ‑bha ‑kë "flɛɛsü ‑sü ꞊gban waa‑ ‑bha ‑bha, 'ö‑ ‑nu ‑kɔ ‑yö ‑wo ꞊dedewo.
2CO 8:3 A‑ ‑pö ka ‑dhɛ tɛan‑ ꞊dede 'ka ꞊dhɛ ‑a 'dhɛ ‑a ‑nu ‑kɔ ‑yö ꞊mɔɔ‑ ‑bha ‑wo kë‑ ‑kë yi ‑dhɛ, 'ö 'wo ‑ziö 'ka wo ‑dɩ "dhiʋ̈ ‑zianwo, "kɛɛ 'sa ‑wa ‑bho wo ‑dɩ 'gü, mɛ 'bha 'yii‑ pö‑ ‑nu ‑dhɛ ꞊dhɛ ‑wa kë "dhʋ̈.
2CO 8:4 ‑Wo kë ‑bhɛa yi ‑dhɛ 'wo ‑gban yi ‑bha ‑kɔ ꞊gban ‑kɔ ꞊gban 'gü ꞊dhɛ, 'yi dɔ "gbɩɩ‑ kö 'wo yi ‑kɔ "pʋ pë 'bha 'ka kö 'yi‑ ‑da 'pë 'ö yii‑ bɔ 'mɛ ꞊wa bɔ Atanna 'ka 'wo Zude ‑sɛ 'gü‑ ‑nu ‑dhɛ bha‑ "piʋ̈.
2CO 8:5 ‑A ‑kë "dhʋ̈ ‑sü bha‑ 'gü, 'pë 'wo‑ nu "dhʋ̈ bha ‑yö kë ‑ziö ‑a 'dhɛ ‑zian 'ö yi ‑zë yi ‑zʋ gun‑ ‑bha ꞊dhɛ ‑wo ‑dho ‑a ‑nu bha‑ ‑ta pongpongdhö, ‑a 'klɔɔ‑ ‑mü ꞊dhɛ ‑wo wo ‑dɩ ꞊në‑ "kplëng bho kwa Dëmɛ ‑dhɛ ꞊kö ‑blɛɛsü, 'yö 'wo dho 'wo‑ "kplëng bho 'pö yi ‑dhɛ ꞊dhɛ ‑kɔ 'ö gun‑ 'ka Atanna "piʋ̈ ꞊dhɛ ‑yö kë‑ 'ka ‑a 'dhö.
2CO 8:6 'Wɔn 'ö‑ ‑wɔn 'gü 'yi Titö bɔ ka ‑dhɛ bha 'yö bha. Kë "dhʋ̈ kö ‑gbaɔ Atanna ‑bha 'kɔdhigümɛ ‑nu ‑gɔ ‑sü 'ö ka ꞊klang kë ‑sü zü bho‑ 'ka bha ‑yö ka faan dɔ kö 'ka‑ ‑gɔ ‑da 'plöö.
2CO 8:7 ‑A ‑kë "dhʋ̈ ‑sü bha‑ 'gü, 'pë 'a‑ pö ka ‑dhɛ yö ‑mü ꞊dhɛ kö "ta ‑sü Atanna ‑bha zian ‑ta ‑sü 'ö dhi ‑sü 'ka ka ‑gɔ ‑kɔ 'ö‑ 'gü 'ö‑ ‑dhiang ‑zian 'yaa zë, 'ö ‑zʋ ‑yö ‑a ‑dhɛ ‑sü 'ö ka ‑gɔ, 'ö dho 'ö ‑wɔ 'ka ‑a 'gü "dhi kan ‑sü ‑ta, 'ö 'ka Atanna dɔ ‑kɔ ꞊gban ‑kɔ ꞊gban 'gü, 'ö ‑ya mü 'zü 'ö‑ ‑bha yë kë ‑sü ‑pɛng 'dhö ka ‑ta 'böbödhö, 'ö yi ‑dhɔ 'dhö ka ‑kë 'pö bha 'ka dɔ "gbɩɩ‑ kö ka ‑kɔ ‑yö ‑wo 'pö Atanna ‑bha mɛ ‑nu ‑dhɛ ‑kɔ do bha ꞊në‑ 'gü.
2CO 8:8 'Yii kë 'tɔng‑ 'ka kö 'yi‑ dɔ, "kɛɛ 'wɔnsë kë ‑pɛng 'dhö ka "tayɔɔ ‑nu ‑ta ‑kɔ 'ö‑ 'gü ‑a ‑dhiang 'yi‑ zë ka ‑dhɛ bha, 'yi‑ kë "dhʋ̈ kö ‑dhɔ 'ö ka 'gü ‑naa 'ö‑ ‑ta Atanna ‑bha 'ka, "ɛɛn mɛ ‑nu ‑bha 'ka kö 'yi yö ꞊në‑ dɔ.
2CO 8:9 ‑A ‑gɛn ‑mü ꞊dhɛ kwa Dëmɛ Yesu Klisi ‑kɔ 'dhö ‑wo kwa ‑dhɛ ‑kɔ 'ö‑ 'gü ka yö ‑zë ‑dɔ. Yö 'ö pë 'bha ‑pë 'bha ‑saan 'yaa gun‑ ‑bha (‑a ‑bha ‑kë Atanna 'ka ‑sü 'gü) bha ‑yö kë ö ‑dɩ ‑kë "flɛɛmɛ 'ka ka ‑wɔn 'gü, kë "dhʋ̈ kö pë 'bha ‑saan 'ya 'dho kë ka ‑zë ka bha‑ ‑bha ‑kë "flɛɛsü ‑sü bha‑ zian‑ ‑ta.
2CO 8:10 ‑A ‑kë "dhʋ̈ ‑sü bha‑ 'gü, n ‑bha 'a n ‑zʋ gɔn‑ 'ka 'wɔn bha‑ 'gü ‑ka dɔ kö 'a‑ pö ka ‑dhɛ: Yö ‑mü ꞊dhɛ kö ‑gbaɔ Atanna ‑bha mɛ ‑nu ‑gɔ ‑sü 'ö 'ka‑ zü bho ‑kwɛ 'ö ‑ziö ya‑ 'ka bha 'ka‑ 'kun "gbɩɩ‑ kö 'ka 'dho‑ 'ka "dhiʋ̈. ‑Yö ‑dho kë ‑së ka ‑bha 'ka. ‑A 'klɔɔ‑ ‑mü ꞊dhɛ ka ꞊në 'ka mɛ ‑blɛɛsü ‑nu 'wo 'wɔn bha‑ ‑kë ‑a 'ka, "kɛɛ 'ö ‑ya mü 'zü ka ꞊në 'ka mɛ ‑blɛɛsü 'ö‑ ‑nu zuë" ‑yö zun 'wɔn bha‑ ‑bha ‑a 'ka.
2CO 8:11 ‑A ‑kë "dhʋ̈ ‑sü bha‑ 'gü, ‑kaa 'kun "gbɩɩ‑ kö 'ka 'dho‑ 'ka "dhiʋ̈ kö 'ka‑ ‑gɔ ‑da 'plöö‑. 'Ka‑ zü bho zuëga ‑së 'ka ‑kɔ do 'ö‑ 'gü ‑blɛɛsü bha, ‑kaa 'kun "gbɩɩ‑ kö 'ka‑ ‑gɔ ‑da 'ka 'plöö ‑a 'dhɛ ka ‑kɔ ‑yö ꞊mɔɔ‑ ‑bha ‑a kë ‑sü 'ka.
2CO 8:12 ‑A ‑gɛn ‑mü ꞊dhɛ 'pë 'ö mɛ ‑ya ꞊gbaɔ Atanna ‑gɔ bha‑ "dhia 'ö ma‑ 'gü bha ‑yö ‑gban 'pë 'ö‑ ‑mɛ ‑gɔ ꞊në‑ ‑bha. ‑A 'dhɛ 'yaa 'mɛ 'ö‑ ‑gɔ 'yaa‑ "pɔ kë‑ ‑mɛ "dhiʋ̈.
2CO 8:13 'Yii kë ꞊dhɛ ꞊ya kë "dhʋ̈ kö a‑ ‑pö 'ka ka ‑dɩ ‑da ‑kpla 'gü ka "tɛabɔ ‑nu ‑bho ‑kpla 'gü ‑wɔn ‑zë 'gü. "Kɛɛ ‑a pö 'a‑ wo "dhʋ̈ bha kë "dhʋ̈ kö ꞊zinng ꞊gblɛɛn ꞊në 'ya 'dho kë ka ꞊zinng 'gü, kö mɛ ꞊gban ‑bha ‑mawɔn ꞊yaɔn ‑kɔ ꞊në ‑yö ꞊mɔɔ "kwëë.
2CO 8:14 "Kɛɛ 'ma‑ pö "dhʋ̈ kö a‑ ‑pö 'mɛ 'ö 'ka pë ‑mɛ 'ka dɔ ‑kɔ ya‑ 'gü bha, ‑a 'dhɛ ka ‑mawɔn ‑yö zun‑ ‑bha 'ka bo‑ ‑sü mü ‑sü 'ka, kö‑ ‑kpɛa 'ö to bha 'ka ka "tɛabɔ ‑nu ‑ta 'kun‑ 'ka. ꞊Ya kë "dhʋ̈ 'yö kaa ‑dɩ 'pö 'ka ‑kpla yi 'bha 'ka kö pë ‑ya wo ‑zë ‑a ‑nu ‑gɔ, 'yö 'wo ka ‑ta kun, ꞊ya kë "dhʋ̈ kö 'ka ꞊mɔɔ "kwëë ꞊naa bha.
2CO 8:15 'Ka‑ kë "dhʋ̈ kö 'pë 'ö Atanna ‑wʋ ‑ya pö 'ö ‑bɛn zë ‑sü 'ka ꞊dhɛ: «'Mɛ 'ö‑ ‑wlö 'gbɛ ‑a ‑bha 'yii ziö ‑naa 'gü, "kɛɛ 'sa mɛ 'yii‑ ‑wlö 'gbɛ bha‑ ‑bha 'yii 'kɔn‑ ‑ta bha ꞊në 'ka‑ 'gü ‑wɔn ‑kë bha.»
2CO 8:16 ‑Gasitɛ 'yaa Atanna ‑bha, ‑a ‑gɛn ‑mü ꞊dhɛ ka ‑gla ‑a ‑bha zian ‑ta ‑sü ‑pɛng 'ö yi ‑ta bha ‑ya dɔ ‑sü 'ka Titö ‑ta 'pö.
2CO 8:17 'Yi bo‑ pö ‑sü ‑zë 'ka‑ ‑dhɛ ꞊dhɛ ‑yö 'dho zun ka ‑dhɛ 'gü 'yii za 'bha kë‑ 'gü, ‑yö "wɩ ꞊në‑ 'wo‑ ‑bha do. Aa" ꞊ni 'ö gun kö 'yii‑ pö ‑zian wo‑ ‑dhɛ ꞊kö, ‑nu zun ka ‑dhɛ 'gü ‑sü 'ö‑ ‑dɩ ꞊nii ‑bha bha ‑yö ‑gun dɔ sië‑ ‑zʋ ‑bha.
2CO 8:18 Yi dheebhang do 'ö Atanna ‑bha 'kɔdhigümɛ "pɛpɛ 'wo "sɛ ya‑ 'gü 'wo‑ ‑dhiang ‑së zë ‑a ‑bha Atanna ‑bha naɔ ‑së bha‑ dɔ ‑dhɔ ‑wɔn 'gü bha ꞊në 'yi‑ ꞊nëng‑ ‑bha 'yö 'yi‑ ‑nu bɔ bha.
2CO 8:19 'Sa Atanna ‑bha mɛ ‑nu ꞊në 'wo wo ‑kɔ ‑yɛ ‑bha 'yö 'wo‑ ‑da yi keng‑ kö‑ "yan‑ kë pë ‑nu 'wo‑ ꞊gbaɔ sië Atanna ‑bha mɛ ‑nu ‑gɔ bha‑ ‑dhɛ 'gü. 'Sa "ta 'ö "dhʋ̈ bha 'pö‑ 'sü 'yi‑ wo bha, yi‑ ‑wo "dhʋ̈ kö kwa Dëmɛ ꞊në‑ 'tɔ ‑yö bhɔ, ꞊ya 'go mü 'zü kö mɛ ꞊gban "pɛpɛ ‑wa 'wɔn dɔ ꞊dhɛ 'wɔn bha yi ‑sɔbhɛɛ ‑bha ‑wɔn ‑mü.
2CO 8:20 ‑Kɔ 'yi‑ ‑ya ‑bha 'pö 'ö yi keng‑ "dhʋ̈ bha kë "dhʋ̈ kö 'wëë ‑zii ‑sü ‑nu 'wo‑ bho 'wo‑ ‑wɔ yi ꞊kwɛng kö 'yi 'dho‑ 'ka Atanna ‑bha mɛ ‑nu ‑dhɛ bha, pö 'a 'dho ‑ya yi ‑bha ‑a 'kun ‑kɔ ‑wɔn ꞊në‑ 'gü.
2CO 8:21 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔn "pɛpɛ 'yi‑ kë, ‑yö yi "piʋ̈ ꞊dhɛ ‑a "dhia ‑yö 'ma kwa Dëmɛ 'gü, "kɛɛ kö mɛ ‑nu ‑dɩ 'pö ‑wa dɔ 'wɔn ‑së 'ka.
2CO 8:22 ꞊Ya 'go mɛ ꞊plɛ bha‑ ‑nu 'gü, kwa dheebhang do 'bha ‑ya ‑nu keng‑ 'pö, yi ꞊në 'yi‑ bɔ. Yöö ‑dɩ 'pö ‑yö 'dhang ‑bho "dhiʋ̈ ‑mɛ ꞊dede 'ka, 'ya‑ 'gü dan ‑gɛn ‑yan kpö ꞊dede 'ka 'ya‑ ‑dhɛ yö. Atanna ‑wɔn ‑pɛng ‑ya ‑ta ꞊dedewo. "Kɛɛ ‑a 'dhɛ 'ö "tʋ̈ng ya‑ 'gü bha‑ "dhiʋ̈ ꞊ya ziö ‑blɛɛsü ‑bha ‑ta ꞊gblɛɛn, ‑a ‑bha 'dhang ‑bho ka "dhiʋ̈ ‑sü 'ö 'kpakpadhö bha‑ ‑wɔn 'gü.
2CO 8:23 ꞊Ya 'to Titö ‑zë ‑bha ‑bha, yö ꞊në n "tayɔɔ 'ka Atanna bha yë ya‑ "kplü "dhiʋ̈, 'yö n ‑kɔ "dhiʋ̈ nu ‑mɛ 'ka 'pö ka ‑dhɛ. "Kɛɛ mɛ 'dhɛ 'kö wɛng‑ ‑nu 'wo nu sië bha, wo ‑zë Atanna ‑bha 'kɔdhigümɛ ‑nu ꞊në 'wo‑ ‑nu ‑bɔ, nu 'wo‑ wo sië bha wo ꞊në 'wo 'mɛ 'ö mɛ ‑yö Klisi ‑bha mɛdhɛ bha‑ "blɛɛn‑ yö‑ ‑nu ‑bha ‑a 'ka.
2CO 8:24 ꞊Dhɛ 'ö "dhʋ̈, ‑kaa ‑zɔn ‑nu ‑dhɛ ꞊dhɛ ‑a ‑nu ‑dhɔ ‑yö ka kë ꞊dedewo, kë "dhʋ̈ kö Atanna ‑bha mɛ ‑nu 'wo‑ ‑nu bɔ bha ‑wa ‑dhɛ yö, kö ‑wa 'wɔn dɔ ꞊dhɛ "plüün 'yi‑ bho ka ‑wɔn 'gü bha‑ ‑dhɛ ‑mü.
2CO 9:1 (N dheebhang ‑nu), ‑a ‑dhɛ ‑zian 'yaa‑ ‑bha ꞊dhɛ 'wɔn 'ö ‑gban pë 'wo‑ bho 'wo‑ bɔ Atanna ‑bha mɛ ‑nu 'wo Zude ‑sɛ 'gü‑ ‑nu ‑dhɛ bha 'a 'sëëdhɛ bɔ ka ‑dhɛ ‑a ‑wɔn 'gü.
2CO 9:2 ‑A ‑gɛn ‑mü ꞊dhɛ a 'dhang bho‑ "dhiʋ̈ 'kpakpadhö ꞊dhɛ ka ‑ya ‑sü 'ka ‑a ‑bha mɛ ‑nu ‑wɔn zuën ‑ta. ‑A ‑wɔn 'gü a n 'tɔ 'kun ‑sü ‑zian 'ka Maseduanö ‑mɛ ‑nu ‑ta 'a‑ pö kwa dheebhang ‑nu 'wo Akai ‑sɛ 'gü wo ‑zë ‑zianwo 'pë woo‑ ꞊gbaɔ Atanna ‑bha mɛ ‑nu ‑gɔ ꞊waa‑ ꞊gban baa‑ 'nu ‑kwɛ 'ö ꞊ziö ya‑ 'ka. Gbaɔdhe bha‑ ‑pɛng ‑dɔ ka ‑ta ‑kɔ 'ö "dhʋ̈ bha‑ ‑dhiang 'a‑ zë‑ ‑nu ‑dhɛ bha ꞊në‑ ‑nu 'kpiidhɛ ꞊gban faan dɔ ‑sü 'ka ‑a wo ‑sü ‑bha.
2CO 9:3 "Kɛɛ yö ꞊në‑ ꞊gban 'gü 'a kwa dheebhang ‑nu bha‑ ‑nu ‑bɔ "dhʋ̈, kë "dhʋ̈ kö ka ‑dhiang ‑së 'yi‑ zë Maseduanö ‑mɛ ‑nu ‑dhɛ bha 'ya 'dho kë "wlaawɔn 'ka. ‑A ‑kë "dhʋ̈ ‑sü bha‑ 'gü ‑yö n "piʋ̈ ꞊dhɛ 'ka ka baa ꞊dedewo 'wɔn ‑së bha‑ kë ‑sü ‑gɔ kö ‑yö kë ꞊dhɛ ‑kɔ 'a‑ pö‑ 'ka bha‑ 'dhö tɛan‑ 'ka.
2CO 9:4 ‑A ‑gɛn ‑mü ꞊dhɛ 'yaa yi "piʋ̈ ꞊dhɛ yaa Maseduanö ‑mɛ ‑nu 'ya nu mü yi 'ö‑ 'ka, 'yi ‑kpan ka ‑bha kö 'kaa baa‑ ‑sü 'ka. Yö ‑zë ꞊ya kë "dhʋ̈ kö 'yiʋ̈‑ 'ö dɔ yi ‑bha bha ꞊ya kë ‑ziisü. 'Sa kö yi ‑zë yi ‑bha fië‑ ‑dhö ka ‑bha 'ka.
2CO 9:5 'Wɔn 'a zë‑ ‑dhɛ 'yö 'a kwa dheebhang ‑nu bha‑ ‑nu bɔ ꞊kö ‑blɛɛsü ka ‑dhɛ 'gü kö ‑wo gbaɔdhe 'ka‑ "plüün bho bha‑ ‑gɔ 'kpɔ bha 'yö bha. Kë "dhʋ̈ kö yi 'a dho nu‑ 'ka bha kö 'ma nu, kö 'a ‑da ka ‑kɔ ‑së ‑ta, kö ꞊gbaɔsü bha 'ya 'dho kë ꞊dhɛ 'wɔn 'ö mɛ ‑ya ‑kë kö‑ "sɩ 'yaa mɛ ‑dhɛ ‑a 'dhö, "kɛɛ kö ‑yö kë ꞊dhɛ pë 'ö ga ꞊në‑ wo ka 'gü ‑a 'dhö.
2CO 9:6 ‑Yö kë ka "yaan ꞊dhɛ 'mɛ 'ö 'kee‑ 'kpii‑ ‑kë 'yö‑ ꞊trɔɔn 'kpii‑ ꞊slɔɔ, 'mɛ 'ö 'kee‑ 'dɛdɛ ‑kë ‑a ꞊trɔɔn 'yaa kë 'kpii‑ 'pö.
2CO 9:7 ‑A ‑kë "dhʋ̈ ‑sü bha‑ 'gü, ‑a ‑dhɛa ‑bha ꞊dhɛ pë 'dhɛ 'ka‑ ‑ya ka ‑zʋ "piʋ̈ ꞊dhɛ yö ꞊në kaa‑ ꞊gbaɔ bha 'ka yö ‑zë ꞊gban ꞊gbaɔ, "kɛɛ kö 'ya 'dho kë wë 'gü ‑siö 'ka "ɛɛn ꞊dhɛ 'pë faan ꞊në‑ ‑wɔ ka ‑ta ‑a 'dhö, ‑a 'klɔɔ‑ ‑mü ꞊dhɛ 'mɛ 'ö pë ꞊gbaɔ zuëniida 'ka bha ꞊në‑ ‑dhɔ ‑yö Atanna ‑kë.
2CO 9:8 Atanna 'ö 'ka‑ "piʋ̈ bha‑ 'gü ‑yö "gbɩɩ‑. ‑A "sɩ ‑ya ‑dhɛ kö ‑yö ka ‑kɔ pa pë ‑së ꞊gban "pɛpɛ suu 'do 'do 'ka kë "dhʋ̈ kö pë "pɛpɛ 'ö ka ‑mawɔn ‑yö zun‑ ‑bha yi "pɛpɛ ꞊gban 'ka ‑yö kë ka ‑gɔ, kö 'ka ka ‑mawɔn bho‑ 'gü, kö‑ ‑kpɛa ‑yö 'to ka ‑gɔ ‑babadhö, kö 'ka 'wɔnsë kë‑ 'ka ꞊dhɛ ‑kɔ 'ö ‑bɛn zë ‑sü 'ka‑ ‑a ‑gɔ 'sëëdhɛ 'gü ‑a 'dhö ꞊dhɛ:
2CO 9:9 «Atanna ‑yö ö ‑bha mɛ ‑nu ‑bho 'wɔn 'gü, 'yö gbaɔ "gblʋ̈gblʋ̈ wo "flɛɛmɛ ‑nu ‑gɔ. ‑A ‑bha 'wɔn ‑së kë ‑sü "dhiʋ̈ 'yaa 'to tongtongdhö.»
2CO 9:10 Yö 'ö pë suu nu pëtamɛ ‑dhɛ, 'ö dho 'ö‑ ‑bhöpë ‑wɔ ‑ta bha ‑yö ‑dho ka ‑bha kë, 'ö dho 'ö kaa‑ pë suu ‑pɛ ‑ta, 'ö‑ ‑kë 'ö kaa‑ "klʋsëdhɛ ꞊trɔɔn 'dhö ‑kë 'gbɛ ꞊dedewo.
2CO 9:11 ‑Yö ‑dho ka kë pë ‑mɛ ꞊dede 'ka "tʋ̈ng ꞊gban ‑tʋ̈ng ꞊gban 'gü, 'ö 'mɛ 'ka bɔ sië yi ‑ta ka pë ꞊gbaɔ‑ ‑nu ‑gɔ bha 'wo‑ nuɛ" bho 'pë ‑nu 'ka‑ ꞊gbaɔ‑ ‑nu ‑gɔ bha‑ ‑wɔn 'gü.
2CO 9:12 ‑A 'klɔɔ‑ ‑mü ꞊dhɛ 'wɔn ‑së 'ka‑ kë sië "dhʋ̈ bha 'kii‑ kë ‑a ‑bha mɛ ‑nu ('wo Zude) woo do ‑a ‑nu ‑dhɛ, ‑yö ‑ya mü 'zü 'ö‑ ‑bha) mɛ 'gbɛ ꞊dede ('wo ‑dhɛ "wɛɛ 'gü ‑a ‑nu) ‑kë ‑a nuɛ" bho ‑mɛ 'ka 'wɔn ‑së 'ka‑ ‑kë bha‑ ‑wɔn 'gü.
2CO 9:13 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ka këwɔn ‑së bha ꞊në dho 'pë 'ka‑ 'ka ‑a ‑zɔn mɛ ꞊gban "pɛpɛ ‑dhɛ, 'yö 'wo Atanna 'tɔ bhɔ ka ‑bha ‑zʋ ‑yö ‑a ‑dhɛ ‑sü bha‑ ‑zɔn ‑kɔ 'ka‑ ‑zɔn 'ka Klisi ‑bha naɔ ‑së bha‑ ꞊bhlë ‑ya ‑sü 'ka bha‑ 'gü, 'yö 'wo‑ 'tɔ bhɔ 'zü "gblü ‑së ‑dhɛ suu 'ö 'ka ka ꞊slɔɔpë ‑nu 'gü ‑gblü 'ka ‑a ‑nu ‑ta, "ɛɛn mɛ "wɛɛ ꞊gban ‑ta bha‑ 'gü.
2CO 9:14 ‑Wo ‑dho bhɛa" 'pö Atanna ‑dhɛ ka ‑wɔn 'gü ‑gasitɛ ‑ziisü 'ö‑ ‑kë ka ‑dhɛ ‑kpɛa wo bha ꞊në‑ ‑wɔn 'gü ka ‑dhɔ 'ö‑ ‑nu ‑kë bha‑ 'ko ‑sɔn.
2CO 9:15 ‑A ‑kë "dhʋ̈ ‑sü bha‑ 'gü, ‑ka ‑kwa Atanna nuɛ" bho 'ö gbaɔ‑ ‑ziisü 'ö‑ wo mɛ ‑nu ‑gɔ (Yesu Klisi ‑bɔ kwa ‑dhɛ ‑sü 'ka) bha‑ ‑wɔn 'gü.
2CO 10:1 ‑A 'dhɛ 'kö mang Pɔdhö ‑mɛ 'a‑ pö sië ya n ‑dɩ ‑gɔ ‑dhiang ꞊në 'a‑ zë sië ka ‑dhɛ. ‑A ‑gɛn ‑mü ꞊dhɛ ‑wa ‑pö ꞊dhɛ mang ꞊dede ‑zë 'ma kë ka kpö 'gü a ‑kë ꞊dhɛ 'mɛ 'ö‑ zun "dhiʋ̈ ‑bhlɔ 'bhaa 'dhö ꞊në‑ 'dhö. "Kɛɛ 'ma kë ‑dhɛ "wɛɛ 'gü 'yö 'a gɔɔn‑ ‑dhɛ ‑dhiang zë ka ‑dhɛ. ‑A ‑kë "dhʋ̈ ‑sü bha‑ 'gü, bhɛa" ꞊në 'a‑ wo sië ka ‑dhɛ Klisi ‑bha ‑wʋ "nɛɛnɛɛ ‑dhɛ waa‑ ‑bha "klʋsëdhɛ bha‑ 'ka,
2CO 10:2 kö 'ka dɔ "gbɩɩ‑ 'ka‑ 'bha pö 'mɛ 'wo ka kpö 'gü 'wo‑ pö sië n ‑bha ꞊dhɛ pë "pɛpɛ 'a‑ kë bha a‑ ‑kë n ‑dɩ faan ‑bha, ‑a 'bha 'yii 'go Atanna "piʋ̈ bha‑ ‑nu ‑dhɛ, kö 'ma ‑nu nu ka "piʋ̈ mü yi 'ö‑ 'ka, kö 'ma 'dho kë dhiang ‑zë ka ‑dhɛ faan ‑bha ‑mɛ 'ka kö‑ "sɩ 'yaa n ‑dhɛ. 'Sa yö ‑zë "slë 'bhaa 'dhö, 'ma nu mü yi 'ö‑ 'ka a ‑dho tɛanwɔn pö 'mɛ 'wo "dhʋ̈ bha‑ ‑nu ‑dhɛ, ‑a "sika 'bhaa n 'gü.
2CO 10:3 "Kpʋng ꞊taa ‑kwi ꞊në yi ‑bha ‑zë wo "dhʋ̈ tɛan‑ 'ka "kɛɛ Atanna ‑wʋ ‑ta ‑ko 'kö 'yi‑ zë bha 'yaa‑ zë yi ‑dɩ faan ‑bha.
2CO 10:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'ko ‑zë 'ka ‑kwɛɛ ‑nu 'yi ko zë‑ 'ka bha 'wii 'go "kpʋng ꞊taa yö. Atanna ‑bha ko ‑zë 'ka ‑kwɛɛ ‑nu 'ö‑ ‑nu ‑fië ‑bha ‑pë 'yaa 'dhö bha yö ‑mü. 'Wɔn 'ö‑ ‑wɔn 'gü 'yö 'yi mɔɔ‑ ‑bha 'yi "yina yaa ‑nu zü ‑ya 'gü "bü ꞊gban bho‑ 'ka bha 'yö bha.
2CO 10:5 ꞊Kwɛɛ‑ ‑nu bha ꞊në 'yi‑ sü 'yö 'yi 'mɛ 'wo ꞊sua ‑nu ‑kë 'ö 'wo mɛ wë bho‑ 'ka Atanna dɔ ‑sü ‑ta ‑dɩ ‑sü 'kpii‑ ‑bha bha‑ ‑nu züyagüpë ꞊gban wü‑ 'ka, 'yö 'yi ‑zʋgɔndhe suu "pɛpɛ 'ö 'yaa Atanna ꞊bhlë ‑ya bha‑ ꞊gban bho‑ 'ka ‑dhidha 'gü 'yö 'yi yi ‑gɛn zun‑ ‑ta, kë "dhʋ̈ kö ‑wo 'dhang bho Yesu Klisi ‑wɔn ꞊në‑ "dhiʋ̈ kö ‑wa ꞊bhlë ‑ya.
2CO 10:6 ‑A ‑kë "dhʋ̈ ‑sü bha‑ 'gü, ꞊ya kë ꞊dhɛ ka ‑zë 'ka bo ‑dhio ‑ma yi ‑ta ‑sü 'ka "pɛɛpɛdhö ‑së 'ka, mɛ "pɛpɛ 'dhɛ 'kö 'wo ka kpö 'gü 'ö 'wii ‑dhio ma yi ‑ta yi ‑dho 'wɔn bho‑ ‑nu 'gü 'kpakpadhö.
2CO 10:7 'Ö ꞊ya kë 'zü ꞊dhɛ 'ka mɛ ‑ga ꞊në‑ wo 'yö 'ka‑ ‑mɛ ꞊bhlë ‑ya aa, ‑ɛɛ! Kö mɛ 'ö ka kpö 'gü 'ö‑ pö 'ö ‑dɩ ‑dhɛ ꞊dhɛ 'ö Klisi ‑bha 'ka 'kpakpadhö, ‑yö kë‑ ‑mɛ "yaan ꞊dhɛ yi Klisi ‑bha 'ka 'pö ꞊dhɛ ‑a 'dhö.
2CO 10:8 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'kö 'zü ꞊ya kë ꞊dhɛ 'ya yi 'tɔ 'kun mɛdhɛkë ‑faan 'ö Atanna ‑ya nu yi ‑dhɛ kö 'yi ka 'gü bho‑ 'ka kö 'ka dɔ yi ‑kɔ ‑bha ‑a ‑bha zian ‑ta bha‑ ‑wɔn 'gü, 'yiʋ̈‑ 'yii 'dho dɔ yi ‑bha, ‑a ‑gɛn ‑mü ꞊dhɛ ‑ya ‑nu yi ‑dhɛ "dhʋ̈ kö 'yi ka faan ꞊në‑ dɔ‑ 'ka, 'yii nu yi ‑dhɛ kö 'yi ka 'gü ‑zë see‑ 'ka.
2CO 10:9 ‑A pö 'a‑ wo "dhʋ̈ bha kö 'ya 'dho kë ka 'gü ꞊dhɛ a 'sëëdhɛ ‑nu bha‑ ‑bɔ ka ꞊dhɛ "dhʋ̈ kö 'a "suʋ̈ ꞊në‑ ‑da ka 'gü.
2CO 10:10 ‑A ‑gɛn ‑mü ꞊dhɛ ‑wa pö ꞊dhɛ "sëëdhɛ ‑nu 'a‑ bɔ mɛ ‑dhɛ bha ‑wʋ ‑nu 'wo ‑kë 'gü bha ‑wo ‑kë gɔɔndhɛ ‑wʋ ꞊në‑ 'ka. "Kɛɛ mang ꞊dede ‑zë 'ma kë‑ ‑nu kpö 'gü 'yö 'a ‑kë ꞊dhɛ 'mɛ 'ö "sɩ 'yaa‑ ‑dhɛ ‑a 'dhö, 'yö 'ma dhiang zë 'yö n ‑wʋ 'yaa mɛ 'kun.
2CO 10:11 ‑Yö kë mɛ 'ö dhiang zë "dhʋ̈ bha‑ "yaan ꞊dhɛ ‑kɔ do 'yi dhiang zë‑ 'ka 'sëëdhɛ 'gü bha ꞊në 'yi dho‑ kë‑ ‑kɔ ‑bha kö 'ya nu 'ya ꞊loo mü.
2CO 10:12 Yi ‑zë 'yaa ꞊mɔɔ‑ ‑bha kö 'yi yi ‑dɩ ‑dan mɛ 'bha ‑nu 'wo wo ‑dɩ ꞊gɔɔn sië bha‑ ‑nu 'ka. ‑A ‑gɛn ‑mü ꞊dhɛ "yaaki ꞊në 'yaa wo ‑zë ‑a ‑nu ‑bha 'yö 'wo wo ‑dɩ ‑dan ‑bha ‑pë ‑pëkë 'yö 'wo wo ‑dɩ dan‑ ‑bha bha.
2CO 10:13 "Kɛɛ yi ‑zë 'yii 'dho yi ‑bha kë "dhʋ̈, 'yii 'dho yi ‑dɩ ꞊gɔɔn kö 'yi ziö‑ 'ka ‑naa 'gü. Yi "dhiʋ̈‑ ‑dho 'to‑ 'dhɛ 'ö Atanna ‑ya kë ‑sü "sɩ ‑kë yi ‑dhɛ nu ‑nu 'yi‑ wo ka "piʋ̈ mü bha‑ 'gü bha ꞊në‑ ‑ta.
2CO 10:14 ‑Yö n 'gü ꞊dhɛ 'ma‑ pö "dhʋ̈ kö 'mii ziö‑ 'ka ‑naa 'gü. ‑A ‑gɛn ‑mü ꞊dhɛ ꞊ya kë 'nu ꞊dhɛ Klisi ‑bha naɔ 'a‑ dɔ 'a ‑da 'ka "sɛ "piʋ̈ bha 'mii ‑nu 'nu "dhʋ̈ kö 'a ꞊loo 'nu‑ 'ka ka ‑dhɛ 'gü ꞊naa, kö 'ma ziö‑ 'ka ‑naa 'gü. "Kɛɛ a kë ‑nu "dhʋ̈ 'a ꞊loo‑ 'ka mü.
2CO 10:15 ‑A ‑kë "dhʋ̈ ‑sü bha‑ 'gü, kö ‑a 'dhɛ 'ö Atanna ‑ya kë ‑faan ‑da yi 'gü ꞊në 'yi yi ‑dɩ ꞊gɔɔn‑ 'gü, ‑a 'dhɛ 'ö mɛ "wɛɛ ‑ya ‑kë 'yii yö ‑zë pö. 'Sa yi 'dhang bho ‑sü ‑ya "dhiʋ̈ 'kpakpadhö ꞊dhɛ ka ‑bha ‑zʋ ‑yö ‑a ‑dhɛ ‑sü 'bha‑ ‑dho ‑da 'gü 'ö ‑kë yi ‑bha 'ö‑ ‑ya yi ‑kuu "dhiʋ̈ bha‑ ‑da "dhiʋ̈ ‑kɔ 'ka, 'yö‑ ꞊bhlë ‑yö ‑kë 'kpii‑.
2CO 10:16 'Yö 'yi ‑ziö 'ka ka ‑ta 'yi dho‑ ka ꞊taama mü ꞊yën, 'yö ‑kë yi ‑dɩ ꞊gɔɔn ‑gɛn 'ka, 'yö 'yaa yi ‑dɩ gɔɔn ‑a 'dhɛ 'ö mɛ "wɛɛ ‑nu ‑wa ‑kë bha‑ 'gü,
2CO 10:17 'Yö ‑kë ‑wʋ 'ö ‑bɛn zë ‑sü 'ka Atanna ‑wʋ 'sëëdhɛ 'gü ꞊dhɛ: «'Mɛ 'ö‑ "piʋ̈ ꞊dhɛ 'ö ö 'tɔ 'kun ‑a ‑mɛ ‑yö ö 'tɔ 'kun ‑wɔn ‑nu 'ö kwa Dëmɛ ‑ya ‑kë ꞊në‑ 'gü» bha‑ 'gü ‑wɔn kë ‑kɔ 'ka.
2CO 10:18 ‑A ‑gɛn ‑mü ꞊dhɛ 'mɛ 'ö kwa Dëmɛ ‑ya 'tɔ ‑dhi bha kö‑ ‑mɛ ꞊në‑ ꞊bhlë 'dhö 'dhö, "kɛɛ 'mɛ 'kö ö 'tɔ kun bha kö‑ ‑mɛ "wlaa‑ ꞊në‑ zë.
2CO 11:1 "Eke, slaadhɛ ‑dhiang 'ö maa‑ zë bha ‑kaa 'kun ka ‑bha ‑dhe n dheebhang ‑nu. 'Kaa ‑dɔ "gbɩɩ‑ kö 'ka n ‑wʋ 'kun ka ‑bha ‑ee!
2CO 11:2 ꞊Drɔ ꞊ya ‑da n 'gü ka ‑wɔn 'gü ‑wa! 'Sa ꞊drɔ 'ö "dhʋ̈ bha 'yii kë ꞊drɔ yaa 'ka, ‑yö ‑go Atanna "piʋ̈. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ka n ‑gɔ ꞊dhɛ ‑dhaagadhee 'ö ꞊waa‑ dɔ gwaan‑ ‑bha mɛ doseng ꞊në‑ ‑gɔ ꞊në‑ 'dhö, 'mɛ 'a ka dɔ‑ ‑gɔ "dhʋ̈ bha 'yö ‑kë Klisi 'ka.
2CO 11:3 "Kɛɛ "suʋ̈ ‑yö n 'gü, ‑a 'klɔɔ‑ ‑mü ꞊dhɛ 'yaa n "piʋ̈ ꞊dhɛ ‑wo ka ‑gɔ 'gü see‑ ‑zʋ 'gɔn ‑kɔ yaya ‑nu 'ka kö ka "ta ‑kɔ ‑së 'ö pö 'aa gun‑ ‑bha, 'ö‑ "dhia‑ gun Klisi 'gü bha 'ka ka bo‑ 'ka ꞊dhɛ ‑kɔ 'ö ꞊mlɛ ‑yö "kpënng‑ ‑kë 'ka 'Ɛvö ‑gɔ yi 'bha 'ka 'ö‑ ‑pö bha‑ 'dhö.
2CO 11:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊wa nu kö ‑wo Yesu do bha‑ ‑dhiang zë ‑kɔ "wɛɛ 'bha, 'ö yi ‑zë 'yii zë bha‑ zë ka ‑dhɛ, ‑yö 'kun ‑bho ka 'gü, 'ö ꞊wa nu 'nii‑ suu "wɛɛ 'bha 'ö waa‑ 'dhɛ 'ka‑ ꞊slɔɔ Atanna ‑wʋ 'yi‑ pö ka ‑dhɛ bha‑ "gblʋ "piʋ̈ bha 'waa do, waa Atanna ‑wʋ ‑dee 'bha 'ö waa‑ yi ‑bha 'waa do ‑a 'ka ka "piʋ̈ mü 'ö 'kun bho ka 'gü.
2CO 11:5 'Sa kö 'mɛ 'kö 'ka‑ ‑nu sü ꞊dhɛ Yesu ‑bha bɔmɛ tantan ‑sü ‑nu 'dhö ma ‑zë n ‑bha "dhʋ̈ bha 'waa dɔ n ‑gɔ ‑dhɛ 'bha 'gü Atanna ‑bha yë "gblʋ "piʋ̈.
2CO 11:6 'Kö 'zü n "dhi ‑zë 'yii "kan plɛɛ" dhö ꞊dhɛ‑ ‑nu 'dhö, "kɛɛ 'wɔn kö ‑gban Atanna ‑wɔn ‑bha a‑ ‑dɔ. Kaa ꞊dede ka "yan‑ ‑gun ‑dhɛ 'gü, yi kë yö ‑zë ‑zɔn ka ‑dhɛ ‑kɔ ꞊gban ‑kɔ ꞊gban 'gü 'wɔn ꞊gban "pɛpɛ suu 'do 'do 'gü.
2CO 11:7 "Ɛɛn 'wɔntaɔngsë 'ö go Atanna "piʋ̈ bha‑ pö 'a‑ wo ka ‑dhɛ ka ‑gɔ "sɛ 'gü mü bha ka kë n ‑gba ‑më ꞊dede 'pö‑ 'ka ‑a ꞊saa 'ka? 'Mii n ‑dɩ ꞊bhlë ꞊gban ‑pö kpɛkpɛdhö 'wɔn bha‑ 'gü kë "dhʋ̈ kö ka ‑zë ka ꞊bhlë ‑yö kë ‑ee? "Ɛɛn ‑a kë 'a‑ wo "dhʋ̈ bha 'wɔn yaa ꞊në 'a‑ ‑kë bha ‑ee?
2CO 11:8 Gun 'a‑ wo mü bha Atanna ‑bha 'kɔdhigümɛ ‑nu 'wo "sɛ "wɛɛ 'gü 'aa mü 'wo gun n ꞊saa bho sië ‑ee? ꞊Ya kë "dhʋ̈ kö 'yii kë ꞊dhɛ 'ma wo ‑zë ‑a ‑nu faa bho, kë "dhʋ̈ kö 'a ka ‑ta 'kun ‑ee?
2CO 11:9 "Ɛɛn 'a gun ka "piʋ̈ mü bha n ‑kwɛɛ ‑gun de ꞊dede 'pö‑ 'ta 'ö gun 'wëëga ‑kpla bho sië n ‑bha? Kwa dheebhang ‑nu 'wo go Maseduanö ‑sɛ 'gü 'aa mü 'wo nu n ‑dhɛ pë "pɛpɛ 'ö‑ ‑kpla gun n ‑bha ‑a 'ka ‑ee? 'Mii n ‑dɩ 'kun ‑kɔ ꞊gban ‑kɔ ꞊gban suu 'gü "ɛɛn 'wɔn ꞊gban "pɛpɛ suu 'gü kë "dhʋ̈ 'a ‑kë ꞊kwɛɛ 'ka ka ‑ta 'wɔn 'bha 'gü ‑ee? 'Sa a ‑dho 'to n ‑dɩ 'kun ‑sü ‑bha "dhʋ̈ 'ö‑ 'wɔn‑ yën.
2CO 11:10 'A‑ zë ka ‑dhɛ tɛanwɔn ꞊dede 'ö go Klisi "piʋ̈ 'ö n 'gü bha‑ ‑ta ꞊dhɛ: ꞊Bhlë 'dhɛ 'kö bha‑ ‑bho n ‑bha ‑mɛ 'yaa kaa‑ Akai ‑sɛ 'to "dhʋ̈ ‑sü ‑zian 'gü ‑dhɛ 'bha ‑dhɛ 'bha 'gü.
2CO 11:11 ꞊Ya kë "dhʋ̈ kö ka ‑dhɔ 'pö 'yaa n kë 'yö 'a‑ pö "dhʋ̈ bha ‑ee? ‑Abin! Ka ‑dhɔ ‑yö n ‑kë 'kpakpadhö, Atanna ‑zian ꞊në n "sɛɛ‑ 'ka yö ‑zë 'gü.
2CO 11:12 "Kɛɛ 'mii 'dho n ‑kɔ ‑ya ka ꞊kwɛɛ ‑naɔ ‑bha, 'sa a 'dho‑ kë "dhʋ̈ ‑kpɛawo 'a dho‑ 'ka, kë "dhʋ̈ kö 'mɛ 'wo 'wɔn ‑dɔ 'gü ‑gɔ mɔɔ‑ sië kë "dhʋ̈ kö ‑wa pö wo ‑bha ꞊dhɛ yɛng‑ ‑nu yi yë kë ‑kɔ do bha ꞊në 'yiʋ̈‑ ‑yö dɔ‑ ‑nu ‑bha kö 'wa 'dho‑ ‑dɔ 'gü ‑gɔ bha‑ ꞊slɔɔ.
2CO 11:13 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'kö 'wo bha ꞊flümɛ ‑nu ‑mü, "kpënng‑ ꞊në 'wo‑ ‑kë mɛ ‑nu ‑gɔ kö 'wo‑ ‑nu wë bho Atanna ‑ta. ‑A ‑nu ‑bha yë 'wo‑ ‑kë bha ‑wa ‑kë ꞊sua ꞊në‑ 'ka 'yö 'wo wo ‑dɩ ꞊gla Klisi ‑bha bɔmɛ ‑nu 'gü.
2CO 11:14 'Sa ‑a kë 'wo‑ wo "dhʋ̈ bha 'yaa mɛ 'kɔn ‑gɛn bho, ‑a 'klɔɔ‑ ‑mü ꞊dhɛ Sɔtraan yöö ꞊dede ‑zian ‑yö ‑gla Atanna ‑bha "kië ‑nu 'ö‑ ‑nu bhü‑ bhɔ ꞊dhɛ 'yën‑ 'dhö bha‑ 'gü.
2CO 11:15 ꞊Ya kë "dhʋ̈ kö Sɔtraan ‑bha gwëëzë ‑nu ‑zë ‑a ‑nu "gla ‑sü kö ‑wo kë ꞊dhɛ Atanna ‑bha gwëëzë ‑nu 'dhö kö bha‑ mɛ 'kɔn ‑gɛn 'yaa 'dhö. 'Sa 'mɛ 'wo "dhʋ̈ bha‑ ‑nu ‑bha ‑tosɛa "dhiʋ̈ ‑ya ‑kɔ ‑dho 'sü‑ ‑nu këwɔn ‑nu bha ꞊në‑ ‑bha.
2CO 11:16 'Sa a‑ ‑pö 'zü ka ‑dhɛ ‑dee wo ꞊dhɛ 'ka 'dho n ‑ga slaamɛ 'ka tongtongdhö. ‑Ɛɛ! ꞊Ya kë 'zü ꞊dhɛ 'ka n 'sü ꞊dhɛ slaamɛ 'dhö, kö 'ka ka ‑kɔ ‑ya n ‑bha ꞊dhɛ slaamɛ bha‑ 'dhö mü "dhʋ̈, kë "dhʋ̈ kö 'a n ‑dɩ 'në 'bha 'sü 'pö 'kpii‑ ‑zë bho ꞊dhɛ 'mɛ 'ka‑ ‑nu 'sü sië ꞊dhɛ mɛ ꞊deedhe ‑nu 'dhö bha‑ ‑nu 'dhö.
2CO 11:17 'Sa n ‑dɩ 'a dho‑ 'sü 'kpii‑ "dhʋ̈ bha a‑ ‑bho ‑kpla "dhiʋ̈. ‑A ‑gɛn ‑mü ꞊dhɛ 'pë 'ö kwa Dëmɛ "piʋ̈ ꞊dhɛ 'a‑ pö 'yaa kë "dhʋ̈, "kɛɛ a‑ ‑bho 'pö ꞊dhɛ 'pë 'ö slaa" ꞊në ꞊ya n 'kun tɛan‑ 'ka ‑a 'dhö.
2CO 11:18 Kë 'ö‑ wo ꞊dhɛ mɛ ꞊gban ‑wo 'tɔ 'kun sië 'wɔn ‑nu 'wo‑ ‑kë mɛdhɛkwi 'gü bha‑ 'gü ‑nu wo bha ꞊në‑ ‑kë 'yö mang ‑dɩ 'pö 'a n ‑bha bho.
2CO 11:19 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ka ‑zë ka‑ ‑pö ka ‑dɩ ‑dhɛ ꞊dhɛ slaa" 'yaa ka ‑ta "kɛɛ 'wɔn ꞊gban "pɛpɛ ꞊në 'kun bho ka 'gü, 'ö slaamɛ ‑nu ꞊gban 'wo wo ‑bha 'ö ‑dhi ‑nu ‑dhɛ ‑a ‑wɔ ka ‑ta.
2CO 11:20 ‑Wo ‑ya ka ‑gɔ "dhiʋ̈ ꞊dhɛ mɛ‑ dɔ ꞊dhuëng 'ka, 'ö 'wo ka ‑ta ‑nu ‑bhö, 'ö 'wo "kpënng‑ ‑nu ‑kë ka ‑gɔ, 'ö 'wo ka ‑ga "wlaamɛ 'ka, 'ö 'wo ꞊bhlë bho ka ‑bha mɛ ꞊zinng 'gü 'ö 'kaa "wɩ.
2CO 11:21 ‑A ‑dhiang zë ‑sü 'yiʋ̈‑ ‑zian ‑yö n ‑kë. Yi zë 'yii ꞊mɔɔ‑ ‑bha kö 'yi‑ kë ka 'ka "dhʋ̈. "Kɛɛ yö ‑zë ꞊gban 'gü, a‑ ‑pö ‑zë wo ꞊dhɛ slaamɛ ‑yö pë pö, "kɛɛ mɛ ꞊ya ꞊slɔɔ kö ‑yö ö ‑dɩ 'sü 'kpii‑ 'wɔn 'bha 'gü "ɛɛn 'wɔn 'bha ‑bha, a ‑dho n ‑bha bho 'pö.
2CO 11:22 ‑A ‑gɛn ‑mü ꞊dhɛ ꞊wa kë Eblö 'ka, kö mang ‑dɩ 'pö a‑ 'ka, ꞊wa kë Izraɛdhö mi 'ka, kö mang ‑dɩ 'pö a‑ 'ka, ꞊wa kë Ablamö suu ‑nu 'ka, kö mang ‑dɩ 'pö a‑ 'ka,
2CO 11:23 Klisi ‑bha gwëëzë ‑mü ‑a ‑nu 'ka ‑ee? A‑ 'ka 'pö, ‑a 'dhɛ 'kö maa‑ pö bha yö ‑zë ‑yö ‑dho kë ka 'gü ‑zianwo ꞊dhɛ 'pë 'ö ‑gɔ ga ‑zian ꞊në 'yaa n "piʋ̈ 'zü tongtongdhö ‑a 'dhö, "kɛɛ mang ‑zian ‑zë ‑a Klisi ‑bha gwëëmi 'ka 'a ‑ziö ‑a ‑nu ‑ta. ‑A ‑gɛn ‑mü ꞊dhɛ yë 'a‑ ‑kë ‑yö ‑ziö ‑a ‑nu ‑bha ‑ta. N ‑ma 'wo‑ wo ‑a ‑dhiang 'yaa zë, ‑kaso suu 'a‑ ‑kë 'wii‑ suu kë, dha 'a‑ wo ga ‑gɔ, 'wii‑ suu wo.
2CO 11:24 Zuifö ‑nu ꞊wa ‑sabhlü ‑yan ‑kaɔng ‑yaaga ga "sɛisiö bho n 'gü ‑gɛn ‑yan 'ka "sɔɔdhu.
2CO 11:25 ꞊Wa n ‑ma "dhü 'ka ‑gɛn ‑yan 'ka ‑yaaga Wlɔmö ‑mɛ ‑nu ‑gɔ, ꞊wa n ‑zuö ‑blɛɛsü wo ‑gwë 'ka kö ‑wo n zë, "yitagɔ ꞊ya ‑pö n 'ka ‑gɛn ‑yan 'ka ‑yaaga, 'ma 'dho 'ma ꞊gloo ‑blɛɛsü wo ‑kɔɔyi ꞊bhaa 'ma wɔ mü.
2CO 11:26 "Ta 'kpɔ ‑sü 'ko ‑sɔn, 'ma dha "yi ‑gɔ ꞊gwaan ‑ta ‑gɛn ‑yan kpö ꞊dede 'ka, 'ma dha mɛzëmɛ ‑nu ‑gɔ 'pö ‑kɔ do bha‑ 'gü, 'ö n ‑dɩ ‑gɔ "sɛgümɛ ‑nu ‑zian 'wo ‑kë Zuifö ‑nu 'ka waa‑ 'mɛ 'waa Zuifö 'ka 'wo n zë ‑zian ꞊mɔɔ, 'ö 'a dha ga ‑gɔ 'pö‑ 'gbɛgbɛ ‑nu 'gü, "wlatadhɛ ‑nu 'gü, ꞊weeyi ‑tadhɛ ‑nu 'gü, 'mɛ 'wo‑ pö wo ‑dɩ ‑dhɛ ꞊dhɛ kwa dheebhang ‑mü ‑wo 'ka Klisi ‑bha zian ‑ta, "kɛɛ 'ö 'waa‑ "gblʋ ‑zian ‑bha bha‑ ‑nu kpö 'gü ‑dhɛ ‑nu 'gü.
2CO 11:27 Yë ‑nu 'ö ꞊gbaɔn n ‑ta, n ‑wëëdhɛ ‑nu 'ö bho, 'to 'gbɛ ‑nu 'a‑ wo "yaan, diin‑ ‑nu 'ö n ‑kë, "yi mü ‑dhɔ ‑nu 'ö n ‑kë, 'sunng‑ 'ma ‑sü ‑nu 'a‑ ‑ya 'ko ꞊taa kö‑ "sɩ 'yaa n ‑dhɛ, "nɛnɛ ‑nu 'ö n ‑kë, waa‑ sɔ ‑nu 'ö yën n ‑gɔ ‑a ‑dhiang 'yaa zë.
2CO 11:28 'Wɔn "wɛɛ ‑dhɛ ‑nu 'wo ‑wɔ n ‑ta 'mii 'dho yö ‑zë pö, "kɛɛ ‑ya Atanna ‑bha 'kɔdhigümɛ ‑nu "pɛpɛ 'wo 'dhö ‑a ‑nu ‑zʋgɔndhe ‑ta ‑sü bha ‑yö ꞊dhɛ ꞊kwɛɛ 'gbiin‑ ꞊në‑ 'dhö 'yö n ‑ta ‑kpɛawo ‑a 'dhɛ ‑nu 'ö 'mii‑ pö bha wo ‑zë ‑a ‑nu zian 'gü.
2CO 11:29 De ‑mü 'ka 'yö Atanna ‑bha zian ‑ta 'yö "sɩ 'yaa‑ ‑dhɛ 'yö 'yaa "yɛ n ‑bha, "ɛɛn de ‑mü 'ka 'zü Atanna ‑bha zian ‑ta 'yö ꞊ya 'wɔn yaa kë, 'yö‑ pɛng 'yaa n 'sü.
2CO 11:30 ꞊Ya kë ꞊dhɛ ꞊ya 'to 'tɔ 'kun ‑sü ‑bha, kö ma ‑zë a ‑dho n 'tɔ 'kun n ‑ma "sɩ 'yaa n ‑dhɛ ‑sü ꞊në ‑bha.
2CO 11:31 Atanna 'ö kwa Dëmɛ Yesu Dë 'ka bha ‑yö n "sɛɛ‑ 'ka yö ‑zë 'gü. ‑Ya 'wɔn ‑dɔ ꞊dhɛ ‑a pö 'a‑ wo "dhʋ̈ bha 'yaa ꞊sua 'ka tongtongdhö. 'Sa yö ꞊në‑ 'tɔ ‑së 'dhö 'dhö ‑kwɛ ꞊gban ‑kwɛ ꞊gban ‑ta.
2CO 11:32 "Tʋ̈ng 'a gun‑ 'ka Damasö bha, "sɛ bha‑ 'gü ‑gblüdë 'wo‑ Adhetakö ‑kë bha‑ ‑kɔ "dhiʋ̈ ‑mɛ 'kpii‑ 'ö gun 'pö‑ bha‑ 'gü bha, ‑yö kë‑ "slë ‑mɔɔ ‑kɔ ꞊gban ‑kɔ ꞊gban 'gü, 'ö mɛ ‑ya "saan ‑gaɔ ‑dhɛ ‑nu 'gü kë "dhʋ̈ kö 'ö n 'kun.
2CO 11:33 "Kɛɛ 'yö 'wo n ‑ya töö do 'gü 'wo n bɔ "saan 'wo‑ ꞊klëën 'pö‑ ‑zü bha‑ ꞊dhongga do 'ka 'yö 'wo n ꞊lɔɔ ‑a ꞊zlöö, 'yö 'a dha‑ ‑gɔ.
2CO 12:1 Ka‑ ‑pö 'a n 'tɔ ꞊në‑ 'kun (kö ‑ya ‑zɔn ꞊dhɛ Yesu ‑bha bɔmɛ ‑mü n 'ka) "kɛɛ kö 'tɔ 'kun ‑sü 'yaa ‑së ‑ee? ꞊Ya 'to yö ‑zë ‑bha, kö n "yan 'gü ‑nu 'ö ‑da waa‑ 'wɔn ‑nu 'ö kwa Dëmɛ ‑ya ‑zɔn n ‑dhɛ bha ꞊në maa‑ ‑dhiang zë.
2CO 12:2 Mɛ 'bha 'a‑ dɔ Atanna ‑bha zian ‑ta bha "gbʋʋ‑ kë‑ ‑sü yi do 'ka 'ö dho‑ 'ka dhang‑ ‑to ꞊taamasü 'gü, 'wɔn 'ö ‑kë ‑mɛ 'ka "dhʋ̈ bha kö 'ö ‑kë kö‑ ‑mɛ ‑yö ꞊dhɛ ‑kɔ do 'kwa‑ ‑bha ya 'dhö ‑ee "ɛɛn kö‑ "yan 'gü 'pö ‑da ‑ee, 'mii yö ‑zë 'wɔn dɔ, "fɔn Atanna doseng ꞊në‑ dɔ. "Kɛɛ 'wɔn bha 'ö ‑kë "dhʋ̈ ‑a ‑kwɛ ꞊ya kë ‑kaɔng do ga ‑yiisiö.
2CO 12:3 'Sa a‑ ‑pö a‑ 'wɔn ‑dɔ 'kpakpadhö ꞊dhɛ mɛ 'ö "dhʋ̈ bha, (kö i "yan 'gü 'pö ‑da ‑ee, "ɛɛn kö ‑yö ‑kë "dhʋ̈ kö ‑yö "kpʋng ꞊taa ‑kwi ya‑ 'gü ‑ee, 'maa yö ‑zë 'wɔn ‑dɔ, Atanna yöö do ꞊në‑ dɔ,)
2CO 12:4 "kɛɛ 'gbʋ‑ kë‑ ‑mɛ 'sü ‑zë ‑wo 'ö dho‑ 'ka ‑yɛa ‑së 'ö Atanna "piʋ̈ dhang‑ 'gü bha‑ 'gü, 'yö‑ "tʋ ‑yö ‑da ‑wʋ ‑sɛngbɔ ‑nu 'ö mɛ 'yaa ꞊mɔɔ‑ pö ‑sü ‑bha mɛ "dhi "dhiʋ̈,
2CO 12:5 "dhabhliwɔn 'ö Atanna ‑ya ‑kë 'mɛ bha‑ ‑dhɛ bha ꞊në 'a dho ꞊mɔɔ‑ ‑bha 'a "plüün bho‑ 'gü, "kɛɛ 'mii 'dho ꞊mɔɔ‑ ‑bha kö 'a‑ bho n ‑dɩ ‑wɔn ‑zë 'gü. ‑Ɛɛ! 'Ma kë 'zü‑ ‑bho n ‑dɩ ‑wɔn 'gü ‑pë 'ka, kö a ‑dho ‑a bho n ‑ma "sɩ 'yaa n ‑dhɛ ‑sü bha ꞊në‑ 'gü.
2CO 12:6 ꞊Ya kë ꞊dhɛ "plüün bho ‑dhɔ ‑zë ‑yö n ‑bha 'nu, 'ma‑ pö 'a "plüün bho, kö 'mii 'dho kë 'nu ꞊dhɛ slaamɛ 'dhö, kö tɛanwɔn ꞊në 'a dho‑ pö 'nu. "Kɛɛ ‑a ‑dhɔ 'yaa n kë, kë "dhʋ̈ kö 'pë 'wo n yö‑ kë ‑dhɛ 'gü, "ɛɛn 'wo‑ ma n ‑ta bha 'wa 'dho‑ "dhiʋ̈ ‑ziö ‑ta pö n ‑bha.
2CO 12:7 'Sa 'wɔn 'ö‑ ‑wɔn 'gü 'yö pë "yua ‑sü 'ö ꞊dhɛ "glɛnga 'dhö 'ö n kwi 'gü bha 'yö bha, kë "dhʋ̈ kö 'ma 'dho n ‑dɩ ꞊në 'sü 'kpii‑ 'wɔn ‑së ‑ziisü 'ö‑ ‑mɔɔ 'ka 'yaa 'dhö, 'ö Atanna ‑ya ‑zɔn n ‑dhɛ bha‑ ‑wɔn 'gü. 'Sa pë "yua ‑sü 'ö "dhʋ̈ bha ‑yö ꞊dhɛ Sɔtraan ‑bha "kië 'ö‑ bɔ kö ‑yö 'wɔn bho n 'gü, kë "dhʋ̈ kö 'ma 'dho n ‑dɩ 'sü 'kpii‑ ꞊në‑ 'dhö.
2CO 12:8 'Ma bhɛa" kwa Dëmɛ ‑dhɛ ‑gɛn ‑yan 'ka ‑yaaga kö ‑yö pë "yua ‑sü 'ö "dhʋ̈ bha‑ bho n ‑bha,
2CO 12:9 "kɛɛ ꞊dhɛ 'a‑ pö‑ ‑dhɛ "dhʋ̈ 'yö‑ pö n ‑dhɛ «‑Gasitɛ 'a‑ ‑kë i ‑dhɛ bha ꞊ya i ‑bha bho, ‑a ‑gɛn ‑mü ꞊dhɛ 'mɛ 'ö "sɩ 'yaa‑ ‑dhɛ ‑a ‑mɛ ‑kɔ "dhiʋ̈ 'kun ‑kɔ 'a‑ kun‑ 'ka bha ꞊në 'wo‑ dɔ ꞊dedewo ‑bha ꞊dhɛ n 'gü ‑yö "gbɩɩ‑.» ‑A ‑kë "dhʋ̈ ‑sü bha‑ 'gü, 'wɔn 'a dho‑ "plüün bho 'yö ‑mü n ‑ma "sɩ 'yaa n ‑dhɛ ‑sü bha ꞊në‑ 'ka, kë "dhʋ̈ kö Klisi ‑bha 'gügbɩɩdhɛ ‑yö ‑yɛa 'kun n 'gü.
2CO 12:10 'Wɔn 'ö‑ ‑wɔn 'gü 'yö "sɩ 'yii kë n ‑dhɛ oo, ꞊wa "si bho n ‑gɔ oo, 'ma kë ‑kpla 'gü oo, 'wo n ‑wëëkë wo oo, n "gblüdhɛ 'dhö "muu bho oo, 'ö ꞊ya kë Klisi ‑wɔn ‑zë 'gü 'ö ‑dhi n ‑dhɛ 'yö 'a n "dhia bho‑ "dhiʋ̈ bha 'yö bha. ‑A ‑gɛn ‑mü ꞊dhɛ "tʋ̈ng 'ö "sɩ 'yaa 'ka n ‑dhɛ bha 'yö Atanna ‑yö n gba faan 'ka 'yö n 'gü 'dhö ‑kë "gbɩɩ‑.
2CO 12:11 ‑Ka ‑dhɛ ‑ga ꞊tɔn bha, ka ꞊në 'ka‑ ‑kë "dhʋ̈ 'yö 'a dhiang zë sië ꞊dhɛ 'mɛ 'ö ‑gɔ ga 'yaa‑ "piʋ̈ ‑a 'dhö bha. 'Sa ‑a ‑dhɛa ‑bha 'nu ꞊dhɛ ka ꞊në 'ka n ‑ta ‑za dɔ. ‑A 'klɔɔ‑ ‑mü ꞊dhɛ 'kö 'zü n ‑zun "dhiʋ̈ ‑bhlɔ 'yii kë tongtongdhö, "kɛɛ mɛ 'kö 'wo wo ‑dɩ kë sië Yesu ‑bha bɔmɛ tantansü ‑nu 'ka bha‑ 'bha fië‑ 'yaa 'dhö n 'ka 'wɔn 'bha ‑wɔn 'bha 'gü.
2CO 12:12 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'ö Atanna ‑bha yëkëmɛ ꞊dede 'ka, ‑wa ‑dɔ ‑wɔn mɛ 'kɔn ‑wɔn ‑nu, "dhabhliwɔn ‑nu, waa‑ ‑kianwɔn ‑nu 'ö‑ ‑mɛ ‑ya ‑kë Atanna ‑bha 'gügbɩɩdhɛ ‑kɔ 'ka bha ꞊në‑ ‑bha. 'Sa 'wɔn 'dhɛ 'kö bha‑ 'bha 'kö Atanna 'yii‑ kë n ‑kɔ ‑ta kö a ka kpö 'gü 'yaa 'dhö, 'sa kö a "yënng ꞊gbaɔndhe 'gü, kö a‑ 'kun sië n ‑bha zuësɛadhɛ 'ka "dhʋ̈ do. ‑Yö n 'gü 'nu ꞊dhɛ ka ‑mɔɔ ‑bha 'ka n dɔ "yi ‑dɔ Yesu ‑kɔ ‑bha ‑mɛ ꞊dede 'ka yö ꞊në‑ ‑bha.
2CO 12:13 ‑Më ‑wɔn ꞊dede 'pö Atanna ‑ya "dhia ma ö ‑bha mɛ "wɛɛ ‑kpɛa 'ö to‑ ‑nu 'gü n ‑kɔ ‑ta 'yö 'mii ka ‑bha kë? "Ɛɛn 'wɩ 'ö 'mii‑ wo‑ ‑bha kö n ‑kwɛɛ 'gbiin‑ ‑yö kë ka ‑ta (kö 'a pë yö ka 'gü) ꞊në ‑kë 'wɔn yaa 'ka 'wɔn bha‑ 'gü ‑ee? Kö ‑ka n ‑ma ‑wɔn 'to 'sa yö ‑zë 'gü.
2CO 12:14 N ‑nu zun ka ‑dhɛ 'gü ‑sü ‑gɛn ‑yan ‑yaaga ‑naa ꞊në maa nu‑ 'ka bha, "kɛɛ 'mii 'dho n ‑wɔn ‑kwɛɛ ‑ya ka ꞊gbin‑ ‑a 'bha 'gü tongtongdhö, ‑a ‑gɛn ‑mü ꞊dhɛ n ‑ma ‑wɔn ‑yö kaa ꞊dede ꞊në ka ‑bha, n "tʋ 'yaa ka ꞊slɔɔpë ‑bha. ‑A ‑gɛn ‑mü ꞊dhɛ 'në dë ꞊në pë ꞊mɔɔ ö ‑bha 'në ‑nu ‑dhɛ, 'në ‑nu ‑zë 'waa pë mɔɔ‑ wo 'kpɔmɛ ‑dhɛ.
2CO 12:15 Ma ‑zë n ‑bha 'ka, n pë ‑see ka ‑bha ‑sü ‑yö ga ‑sü 'ka n 'gü "pɛɛpɛdhö, 'ö ꞊ya kë n ‑gɔ ‑to 'gü ‑wɔn ‑zian 'ka, 'ö n "piʋ̈ ꞊dhɛ n ‑gɔ 'to‑ 'gü kë "dhʋ̈ kö ka 'nii‑ dha. ꞊Ya kë "dhʋ̈, ka ‑dhɔ "sima bha ꞊ya n kë ꞊dhɛ ‑kɔ bha‑ 'dhö kö yö ꞊në ‑yö kë ma ‑zë n ‑dhɔ ‑bha ka kë ‑sü 'bha ‑kan "dhiʋ̈ ‑gɛn 'ka ‑ee?
2CO 12:16 'Sa ka 'dhang bho ‑sü ‑ya "dhiʋ̈ 'kpakpadhö ꞊dhɛ n ‑mawɔn 'yaa gun ka kwɛng ‑pë ‑bha tongtongdhö, "kɛɛ mɛ 'bha ‑nu ‑zë ‑wa pö sië ꞊dhɛ "kpënng‑ ꞊në 'a‑ ‑kë ka ‑gɔ.
2CO 12:17 "Kɛɛ ma ‑zë n 'dhang bho ‑sü ‑ya "dhiʋ̈ 'kpakpadhö ꞊dhɛ, mɛ ‑zian 'a‑ ‑nu bɔ ka ‑dhɛ bha‑ ‑nu 'bha 'wii ka ‑ta ‑bhö.
2CO 12:18 Ma ꞊në 'a ꞊bhɛa Titö ‑dhɛ kö ‑yö nu zun ka ‑dhɛ 'gü, 'yö 'a kwa dheebhang do ꞊nëng‑ ‑bha. "Ɛɛn yö ꞊në ka ‑ta ‑bhö ‑ee? ‑Abin! ‑A ‑gɛn ‑mü ꞊dhɛ a 'dhang bho‑ "dhiʋ̈ 'kpakpadhö ꞊dhɛ yaa Titö yi ‑zʋ "piʋ̈ ‑wɔn ‑yö do, yi "ta ‑kɔ ‑yö do, ‑yö ö 'ta ‑kɔ ‑sü n ‑bha ꞊në‑ bha. "Ɛɛn 'yaa "dhʋ̈ ‑ee?
2CO 12:19 'Sa ka ‑ya ‑zʋ 'gɔn ‑sü ‑bha ‑yi ꞊ya ꞊gwëë ꞊dhɛ yi yi ‑dɩ ‑bha ‑dhiang ꞊në‑ zë sië. "Kɛɛ 'yaa "dhʋ̈. Dhiang "pɛpɛ 'yi‑ zë ka ‑dhɛ "dhʋ̈ bha yi‑ ‑zë Klisi ꞊në‑ ‑bha zë 'gü, Atanna wëëdhö. 'Sa ‑a zë 'yi‑ wo "dhʋ̈ bha, 'yi‑ ‑zë ka 'gü bho kɛan ꞊në‑ 'ka yi dhɔɔbhaamɛ ‑nu, kë "dhʋ̈ kö ka ‑bha ‑zʋ ‑yö Atanna ‑dhɛ ‑sü bha ‑yö 'dho "dhiʋ̈.
2CO 12:20 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'yaa n "piʋ̈ ꞊në‑ wo ꞊dhɛ 'ma nu 'a ‑kpan ka ‑bha ‑kɔ 'ö n ‑zʋ 'yaa‑ ‑bha 'nu bha‑ 'gü, "ɛɛn 'zü kö kaa ‑dɩ 'pö 'ka 'dho n yö ‑kɔ 'ö 'yaa ka "piʋ̈ 'nu ꞊dhɛ 'ka n yö‑ ‑bha bha‑ 'gü. N "suʋ̈ ‑gɛn ‑mü ꞊dhɛ kö 'ma 'dho nu 'a ‑kpan "dhinaa ‑nu oo, ꞊drɔ bho ‑sü ‑nu oo, yaa ‑dhɛ kë ‑sü ‑nu oo, ‑duɛ kɔɔ‑ ‑sü ‑nu oo, "si ‑bho 'ko ‑gɔ ‑sü ‑nu waa‑ 'ko ‑nu ‑dhiang yaa zë ‑sü ‑nu, "ɛɛn ‑dɩ ‑sü 'kpii‑ ‑sü waa‑ "bhluubhludhɛ ‑bha ka kpö 'gü.
2CO 12:21 A ‑suʋ̈ kö 'yiʋ̈‑ 'ya 'dho dɔ n ‑bha Atanna ‑dhɛ ka ‑wɔn 'gü kö 'ma nu mü, 'ö 'a ‑ya 'zü "gbʋ bɔ ‑sü ‑bha mɛ kpö 'dhɛ 'wo ka kpö 'gü mü 'ö ꞊wa ‑da Atanna "dhiʋ̈, "yënng dɔ ‑sü ‑nu, ‑zua zë ‑sü ‑nu, waa‑ 'wɔn ‑ma 'koo ‑sü ‑nu kë ‑sü 'ka, 'ö 'waa "wɩ‑ ‑bha kö ‑wo wo kwa‑ ‑zü bha‑ ‑nu ‑dhɛ.
2CO 13:1 N ‑nu ka ‑dhɛ 'gü ‑kɔ ‑yaaga ‑naa ꞊në yöö kë bha. ‑Yö ‑bɛn zë ‑sü 'ka Atanna ‑wʋ 'sëëdhɛ 'gü ꞊dhɛ: «꞊Wa 'wɔn ‑ya mɛ ‑bha, 'kö ‑kë 'wɔn "ʋʋ 'wɔn 'ö‑ suu 'ka, "sanni ‑wa ‑gɔ bho, ‑a ‑dhɛa ‑bha ꞊dhɛ "sɛɛ‑ ꞊plɛ "ɛɛn ‑yaaga ꞊në‑ ‑nu ‑wʋ ‑yö kë‑ ‑bha do kö ‑wo gun ‑na ‑a ‑gɔ bho.»
2CO 13:2 'Sa "tʋ̈ng 'a nu ꞊plɛ ‑naa wo‑ 'ka ka "piʋ̈ mü bha, a kë‑ ‑pö ka ‑dhɛ, 'ö ‑ya mü 'zü 'maa ka "piʋ̈ mü ꞊dɛɛ "kɛɛ a ‑go mü 'zü 'a‑ pö ka ‑dhɛ ꞊dhɛ: Nu 'dhɛ 'ö maa‑ wo ya 'mii 'dho ka 'kun "yɔn ‑kɔ ‑zë 'ka 'zü, ‑a ‑gɛn ‑mü ꞊dhɛ nu ꞊plɛ ‑naa 'a‑ wo mü bha a kë ‑dhio ‑dɔ 'mɛ 'ö gun "dhʋ̈ kö ꞊wa ‑da Atanna "dhiʋ̈ bha‑ ‑nu ‑ta, 'sa 'mɛ 'wo "dhʋ̈ bha ꞊në 'a dhiang ya‑ zë sië‑ ‑nu ‑dhɛ bha, 'yö 'a gun ‑na mɛ ‑kpɛa ‑da ‑a ‑nu "piʋ̈.
2CO 13:3 ‑A pö 'ka‑ wo ꞊siö ꞊dhɛ "ni ꞊ya kë ꞊dhɛ Klisi ꞊në ö ‑wʋ kpɔ n ‑bha ꞊dedewo tɛan‑ 'ka 'ka‑ ‑dhɛ yö bha ꞊në kaa‑ ‑dhɛ yö bha. 'Sa ka‑ 'wɔn ‑dɔ 'kpakpadhö ꞊dhɛ "sɩ ‑ya ‑dhɛ. ‑Yö ö ‑bha 'gügbɩɩdhɛ ‑zɔn ka ‑dhɛ ‑kpɛawo 'ö 'ka‑ ‑dhɛ yö.
2CO 13:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'kö 'zü ꞊waa‑ dɔ "dhü ‑bha ꞊dhɛ 'mɛ 'ö "sɩ 'yaa‑ ‑dhɛ ‑a 'dhö, "kɛɛ ‑yö ‑bö 'ö go ga 'gü Atanna ‑bha 'gügbɩɩdhɛ ꞊në‑ ‑bha, 'yö ‑tosɛa kë sië ꞊dɛɛ bha. Yii ‑dɩ 'pö yi ‑bha ‑kë ‑a ‑bha 'ka ‑sü ‑wɔn 'gü, "sɩ 'yaa yi ‑dhɛ dɔ ‑kɔ ya‑ 'gü ꞊dhɛ ‑a 'dhö 'pö, "kɛɛ ka 'kun ‑kɔ 'yi dho ka 'kun‑ 'ka bha ꞊në 'ka dho‑ 'wɔn dɔ‑ ‑bha ꞊dhɛ ‑tosɛa 'yi‑ kë sië ‑a "piʋ̈ bha Atanna ꞊në‑ ‑faan ‑da yi 'gü.
2CO 13:5 ꞊Dhɛ 'ö "dhʋ̈, kaa ꞊dede ‑ka ka ‑dɩ ‑ga ‑së 'ka kö ꞊ya kë ꞊dhɛ 'ka 'dhang ‑bho Yesu "dhiʋ̈ ‑zian ‑ta ꞊dedewo tɛan‑ 'ka kö 'ka‑ 'wɔn dɔ. 'Sa ka‑ 'wɔn ‑dɔ 'kpakpadhö ꞊dhɛ Yesu Klisi ‑yö ka zuë" "piʋ̈, "ɛɛn 'yaa "dhʋ̈ ‑ee? 'Sa 'yii kë ‑zë wo "dhʋ̈ kö ꞊fië ꞊në 'ka‑ wo ‑sü 'ka 'dhang bho ‑a "dhiʋ̈ ‑sü ‑bha bha.
2CO 13:6 "Kɛɛ 'sa ‑yö n 'gü ꞊dhɛ ka‑ 'wɔn ‑dɔ 'kpakpadhö ka zuë" "piʋ̈ ꞊dhɛ yi ‑zë 'yii ꞊fië‑ ‑bha.
2CO 13:7 Yi ‑zë yi ‑bhɛa Atanna ‑dhɛ kö 'ka 'dho 'sɔngyaa ꞊në‑ kë tongtongdhö, kë "dhʋ̈ kö ka ꞊në ka këwɔn ‑yö kë ‑së, 'yii‑ kë "dhʋ̈ yi 'tɔ ‑wo ‑wɔn 'gü. "Kɛɛ kë "dhʋ̈ kö 'kö 'zü ꞊waa‑ pö yi ‑bha ꞊dhɛ "sɩ 'yaa yi ‑dhɛ, kö‑ bhlɔ 'ya 'dho 'to yi 'gü.
2CO 13:8 ‑A ‑gɛn ‑mü ꞊dhɛ faan 'ö Atanna ‑ya ‑da yi 'gü bha ‑ya ‑da yi 'gü kö 'yi tɛanwɔn ‑ta ‑ko ꞊në‑ zë‑ 'ka, yii‑ ‑da yi 'gü kö 'yi 'ko zë‑ 'ka tɛanwɔn ‑zë 'ka.
2CO 13:9 Faan ꞊ya kë ka ‑zë ka 'gü Atanna ‑bha zian ‑ta kö 'yii kë yi ‑zë yi 'gü, ‑a fië‑ ‑dhö 'ö ‑ziö 'ka faan ‑kë yi ‑zë yi 'gü ‑sü 'ö ka ‑zë ka ‑bha bha‑ ‑bha. 'Wɔn 'yi ꞊bhɛa Atanna ‑dhɛ ‑a ‑wɔn 'gü ‑kpɛawo 'yö bha, kë "dhʋ̈ kö ‑yö ka ‑ta 'kun kö ‑ta ‑a ‑bha zian ‑ta ‑sü 'ka‑ zü bho bha 'ka‑ ‑gɔ ‑da 'plöö.
2CO 13:10 N ‑ya 'ö Atanna ‑ya wo ö ‑bha mɛ ‑nu faandɔmɛ 'ka 'ö 'yii n ‑ya ‑a ‑nu 'gü see‑ ‑mɛ ‑zë 'ka bha ꞊në 'a zë‑ ‑dhɛ, 'yö 'a 'sëëdhɛ ya‑ ‑kë ꞊kö ‑blɛɛsü 'yö 'a‑ bɔ n "dhiʋ̈, kë "dhʋ̈ kö 'ma ꞊loo mü yi 'ö‑ 'ka, kö 'ma 'dho 'wɔn bho ka 'gü faan 'ö Atanna ‑ya ‑da n 'gü bha‑ 'ka, "kɛɛ kö 'yii‑ nu n ‑dhɛ yö ‑zë ‑wɔn 'gü.
2CO 13:11 'Ma ‑wo 'sëëdhɛ ya‑ "dhiʋ̈ ‑ya ‑dhɛ 'gü ꞊tɔn n dheebhang ‑nu! ꞊Dhɛ 'ö "dhʋ̈, a‑ pö 'ka ka "dhia bho, "kɛɛ ‑kaa kë ‑së kö pö ꞊në 'ya 'dho kë ka ‑bha tongtongdhö, ‑ka kpa ka 'ko ‑nu ‑zʋ ‑gɔn, ka ‑wʋ ‑yö kë do, ‑ka kë ka 'ko "piʋ̈ ‑së 'ka, ꞊ya kë "dhʋ̈, Atanna 'ö mɛbhɩɩdhe ‑dhɔ ‑ya ‑kë, "kɛɛ 'ö yö ꞊në mɛ zuë" 'waanu bha ‑yö ‑dho kë ka "piʋ̈.
2CO 13:12 ꞊Ya 'go yö ‑zë 'gü, ‑ka ꞊loo ka 'ko ‑nu ‑bha ꞊dhɛ ‑kɔ 'ö Atanna ‑bha 'në ‑nu ‑wa ‑kë 'ka ‑a 'dhö kö 'ka ka 'ko ‑nu ꞊tua bho. Atanna ‑bha mɛ ‑nu ꞊gban "pɛpɛ ꞊wa ka ꞊tua bho.
2CO 13:13 Kö kwa Dëmɛ Yesu Klisi ‑bha ‑gasitɛ waa‑ kwa (Dë) Atanna ‑bha ‑dhɔ bha ‑wo kë ka ‑dhɛ. Kö‑ ‑bha 'në ‑nu ‑bha ‑kë 'ko "piʋ̈ ‑sü 'ö‑ ‑bha 'Nii‑ "slʋ̈ʋ̈slʋ̈ 'saa‑ 'gü bha ‑yö kë ka kpö 'gü bha 'aa ‑yö kë.
GAL 1:1 Mang Pɔdhö ‑mɛ 'ö mɛ 'bha 'yii n ‑ya ma ‑kë Yesu ‑bha bɔmɛ 'ka ‑sü ya‑ 'gü, "ɛɛn 'ö Atanna 'yii bɔ 'zü mɛ 'bha ‑ta kö ‑yö n ‑ya, "kɛɛ 'ö ga yöö ꞊dede waa‑ ö Gbö Yesu Klisi 'ö‑ ‑bö 'ö‑ bho ga 'gü bha ꞊në‑ ‑nu 'gü 'yö 'wo n ‑ya bha,
GAL 1:2 yaa‑ ‑bha mɛ "pɛpɛ 'yi ‑dhɛ ya‑ 'gü ꞊në 'yi 'sëëdhɛ ya‑ bɔ ‑a ‑bha 'kɔdhigümɛ ‑nu 'ka‑ ‑bha 'ka Gadhatö ‑sɛ 'gü bha ka ‑dhɛ.
GAL 1:3 Kwa Dë Atanna waa‑ kwa Dëmɛ Yesu Klisi 'ö ö ‑dɩ nu kwaa‑ 'wɔn yaa ‑nu ‑wɔn 'gü, kë "dhʋ̈ kö 'ö kwa dha ‑tosɛa yaa 'ö "kpʋng ya‑ ꞊taa ‑a ‑gɔ ꞊dhɛ ‑kɔ 'ö gun‑ 'ka kwa Dë, kwa ‑bha Atanna zuë" "piʋ̈ ‑a 'dhö bha, ‑wo ‑gasitɛ waa‑ zuë" 'waanu ‑sü nu ka ‑dhɛ.
GAL 1:5 Kwa Dë Atanna 'ö "dhʋ̈ bha kö yö ꞊në‑ 'tɔ‑ bhɔ ‑todhʋ̈ 'ka bha 'aa ‑yö kë!
GAL 1:6 (N dheebhang ‑nu,) ‑a ‑kë kö 'ka 'to 'ka "kan Atanna ‑bha 'piö‑ "dhʋ̈, kö 'ka 'dhang bho 'wɔn ‑taɔng ‑së ‑dee 'bha "dhiʋ̈ "kɛɛ kö yö ꞊në ka ‑dhɛ kö 'ka bɔ 'ö 'ka Klisi ‑bha ‑gasitɛ 'ö‑ ‑kë kwa ‑dhɛ bha‑ 'saa‑ 'gü ‑sü ‑zë 'wɔn ꞊në n kɔn.
GAL 1:7 Kö‑ kë ꞊dhɛ ‑a pö 'a‑ wo "dhʋ̈ bha 'wɔn ‑taɔng ‑së bha‑ suu "wɛɛ 'bha ꞊në 'dhö ‑a 'dhɛ 'a‑ pö ka ‑dhɛ bha‑ zian 'gü 'yö 'ka ‑da 'zü‑ 'gü 'yaa ‑mü. "Kɛɛ mɛ ꞊në ‑da sië ka ‑gɔ 'gü 'yö ka zuë" kaan‑ sië "kwëë. Kë "dhʋ̈ kö naɔ ‑së 'ö go Klisi "piʋ̈ 'ö 'ka‑ ma bha‑ ‑wɔn ‑yö 'ma ‑zukplü ‑bha.
GAL 1:8 "Kɛɛ a‑ ‑pö ka ‑dhɛ ꞊dhɛ ‑yö ‑kë yi ‑zian ꞊në yi 'ka oo, ‑yö ‑kë Atanna ‑bha "kië ‑zian ꞊në‑ 'ka 'ö go dhang‑ 'gü 'ö nu, 'ö 'wɔn ‑taɔng ‑së suu "wɛɛ 'bha pö ka ‑dhɛ ‑a 'dhɛ 'yi‑ pö ka ‑dhɛ bha‑ zian 'gü, ‑a ‑mɛ ‑bha "dhang ꞊në bha!
GAL 1:9 'Ya‑ ‑blɛɛsü pö ka ‑dhɛ, 'yö 'a‑ 'bha pö sië 'zü bha. A‑ ‑pö ꞊dhɛ kö mɛ "wɛɛ 'bha ‑yö nu kö ‑yö 'wɔn ‑taɔng ‑së suu "wɛɛ 'bha pö ka ‑dhɛ ‑a 'dhɛ kö 'yi‑ pö ka ‑dhɛ bha‑ zian 'gü, ‑a ‑mɛ ‑bha "dhang ꞊në bha!
GAL 1:10 ‑A pö 'a‑ wo "dhʋ̈ bha 'yii kë ꞊dhɛ a mɛ "bhɩɩ‑ ‑nu ‑bha "dhɛ ‑ya n ‑ta ‑dhɛ ꞊në‑ mɔɔ‑ sië. 'Mii n ‑dɩ ‑dhi mɛ ‑dhɛ ‑dhɛ mɔɔ‑. ꞊Ya kë ꞊dhɛ a yö ꞊në ‑dhɛ mɔɔ‑ sië 'nu, kö 'mii 'dho kë Klisi ‑bha gwëëmi 'ka.
GAL 1:11 N dheebhang ‑nu, a‑ ‑pö ka ‑dhɛ kö ‑yö 'to ka "yaan ꞊dhɛ naɔ ‑së 'ö go Atanna "piʋ̈ 'a‑ pö ka ‑dhɛ bha 'yii 'go mɛbhɩɩdhe 'gü.
GAL 1:12 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mii‑ ma mɛ 'bha ‑ta, "ɛɛn 'mii‑ draan‑ mɛ 'bha "piʋ̈, Yesu Klisi yöö ꞊dede ꞊në "sɛ bho‑ ‑ta n ‑dhɛ.
GAL 1:13 'Sa n "ta ‑kɔ 'kö gun Zuifö ‑nu ‑bha Atanna ‑dhɔkë ‑kɔ 'gü (kö 'mii kë ꞊kö 'dhang ‑bho Yesu "dhiʋ̈ ‑mɛ 'ka) ka yö ‑zë ‑dɔ. ‑Kɔ 'a gun 'wɔn bho sië‑ 'ka Atanna ‑bha 'kɔdhigümɛ ‑nu 'gü n ‑sɔbhɛɛ ꞊dede 'ka, kë "dhʋ̈ kö‑ ‑wɔn bho‑ ‑bha bha ka‑ ‑dɔ.
GAL 1:14 "Yi 'yaa gun zun sië Zuifö ‑nu yi ‑bha Atanna ‑dhɔkë ‑kɔ ‑bha n ‑gɔ ‑kɔ ‑nu 'ö‑ 'gü, 'ö 'a ‑ziö 'ka n "tɩma ‑nu 'wo yi ‑gɔ "sɛ 'gü ‑a ‑nu 'gbɛ ꞊dede ‑ta bha ka‑ ‑kɔ ‑dɔ. Yi dë ‑nu wɔ ‑kɔ ‑pɛng 'ö gun dɔ sië n ‑ta ‑kɔ ‑nu 'ö‑ 'gü "dhiʋ̈ ziö 'ka bha ka‑ ‑kɔ ‑dɔ.
GAL 1:15 "Kɛɛ ꞊dhɛ 'ö ga 'mɛ 'ö n ‑ya ‑dɩ ‑ta kö 'a kë ö ‑bha yëkëmɛ 'ka, kö 'mii bhɔ ‑zianwo ꞊kö, 'ö n ‑dhɛ ö ‑bha ‑gasitɛ bha‑ ‑bha bha‑ 'gü,
GAL 1:16 kö 'ö‑ ‑zɔn n ‑dhɛ ꞊dhɛ Yesu Klisi bha ö Gbö ‑mü, 'yö‑ ‑ta ‑pʋ n ‑dhɛ, kë "dhʋ̈ kö 'a‑ ‑dhiang zë mɛ 'waa Zuifö 'ka‑ ‑nu ‑dhɛ, (mang ‑dɩ 'pö 'mii za 'bha dɔ‑ 'gü,) 'mii mɛ 'bha dhɛɛ" 'kpɔ.
GAL 1:17 'Sa 'mii "wlü 'kaa 'dho 'mɛ 'wo gun Yesu ‑bha bɔmɛ ‑nu 'ka n "dhiʋ̈ 'wo gun Zedhizadhɛmö bha‑ ‑nu ‑dhɛ 'gü, kö 'a n ‑dɩ ‑zɔn ‑nu ‑dhɛ "ɛɛn kö ‑wo n ꞊klang kë, a ‑wlü 'a dho Adhabi ‑sɛ ('ö 'mɛ 'wo bha‑ 'bha 'yaa mü bha) ꞊në‑ 'gü do. ꞊Dhɛ 'a go mü, 'yö 'a n yee ‑kë 'a dho Damasö ‑pö 'gü.
GAL 1:18 ꞊Dhɛ 'ö ‑kwɛ ‑yaaga ꞊ya ziö, 'yö 'a gun ‑na 'dho Zedhizadhɛmö kö 'a Piɛdhö dɔ, 'yö 'a ‑dhɛkpaɔyi ‑kaɔng do ga "sɔɔdhu ‑kë ‑a ‑dhɛ 'gü.
GAL 1:19 "Kɛɛ ‑dhɛkpaɔyi ‑zian 'a‑ ‑kë mü "dhʋ̈ bha 'mii kwa Dëmɛ ‑bha bɔmɛ ‑nu bha‑ 'bha yö, kö 'yii kë‑ 'zlaa‑ Zakö ‑zë 'ka.
GAL 1:20 Dhiang 'a‑ zë sië ka ‑dhɛ ya, a‑ ‑zë ꞊sii ꞊dede ‑ta, 'yaa ꞊sua 'ka.
GAL 1:21 ꞊Dhɛ 'a go Zedhizadhɛmö, 'yö 'a dho "sɛgɔ "wɛɛ 'dhɛ ‑nu 'wo ‑kë Siidhi ‑sɛ waa‑ Sidhisi ‑sɛ ‑nu 'ka bha‑ ‑nu 'gü.
GAL 1:22 "Tʋ̈ng "pɛpɛ 'a‑ ‑kë 'a ‑ziö 'ka "sɛ ‑nu 'gü "dhʋ̈ bha, kö Atanna ‑bha 'kɔdhigümɛ 'dhɛ ‑nu 'kö 'wo Zude ‑sɛ 'gü bha ꞊waa‑ ma ꞊në wo wo "tʋ 'ka ꞊dhɛ 'mɛ 'ö gun Atanna ‑bha mɛ ‑nu kwa ‑wëë ‑kë wo sië "tʋ̈ng 'bha 'gü bha ꞊ya zun ‑zʋ ‑yö ‑a ‑dhɛ ‑sü 'ö gun 'wɔn ꞊gban "pɛpɛ suu kë sië kö 'ö‑ 'gü see‑ bha‑ ‑dhiang zë ‑sü ‑bha, "kɛɛ kö 'wii n dɔ ꞊kö.
GAL 1:24 "Kɛɛ kö ‑wa nuɛ" ‑zë bho sië n ‑wɔn 'gü.
GAL 2:1 ꞊Dhɛ 'ö ‑kwɛ ‑kaɔng do ga ‑yiisiö ꞊ya ziö, 'yö 'a dho 'zü ‑deewo Zedhizadhɛmö, yaa‑ Baanabasö waa‑ Titö ‑nu 'dhö.
GAL 2:2 'Dho ‑zian 'a‑ wo mü "dhʋ̈ bha, Atanna yöö ꞊dede ꞊në‑ ‑zɔn n ‑dhɛ. ꞊Dhɛ 'ma 'dho 'ma ꞊loo mü, 'yö ‑kɔ 'a‑ ‑bha naɔ ‑së 'ö‑ bɔ mɛ "bhɩɩ‑ ‑nu ‑dhɛ bha‑ ‑dhiang zë sië‑ 'ka 'mɛ 'waa Zuifö 'ka‑ ‑nu kpö 'gü bha 'a ‑ziö ‑gɛn 'gü‑ ‑nu ‑dhɛ, "kɛɛ 'yö 'a‑ ‑ya ‑a mɛ 'dhɛ 'wo ‑gɔmɛ ‑nu 'ka bha‑ ‑nu ‑kuu "dhiʋ̈ ꞊plɛ 'gü, kë "dhʋ̈ kö yë bha‑ 'dhɛ 'a‑ kë sië waa‑ 'dhɛ 'ma‑ kë 'nu bha ('wa 'dho‑ pö‑ ‑bha ꞊dhɛ wo ‑kɔ 'yaa‑ 'gü ö‑) "gbaa ‑yö to.
GAL 2:3 'Dho 'yi‑ wo bha n "tayɔɔ 'ö ‑kë Titö 'ka, 'ö Glɛkö 'ka, ('ö 'yaa Zuifö 'ka kö yöö 'go 'gbannë 'gü, "kɛɛ 'ö ꞊ya 'dhang bho 'pö Yesu ‑wɔn "dhiʋ̈) bha, ‑gɔmɛ ‑nu bha 'wii ‑gban ‑a ‑dho 'gbannë 'gü ‑wɔn 'gü, (yë 'a‑ ‑kë bha‑ "dhia ‑zian ꞊në kë ma‑ ‑nu 'gü).
GAL 2:4 "Kɛɛ 'sa kö ‑dɩ ‑kë kwa dheebhang 'ka Yesu ‑bha ziantamɛ ‑nu ‑wo yi kpö 'gü mü 'ö gun wo ‑zë ‑nu "piʋ̈ ꞊dhɛ ‑yö 'dho 'gbannë 'gü gbonggbongdhö. Mɛ 'wo "dhʋ̈ bha ‑wo ‑kaan yi 'ka ꞊dhɛ 'wɔnsuanbhomɛ ‑nu 'dhö yi tii' 'ka, kö ‑ya ‑dɩ 'flëë‑ 'gü ‑sü 'kwa‑ ꞊slɔɔ Yesu Klisi 'saa‑ 'gü bha 'wo‑ dɔ. 'Sa ‑yö ‑gun wo ‑zë ‑a ‑nu "piʋ̈ 'nu ꞊dhɛ 'wo yi "gan ꞊në‑ wo 'zü ‑deewo kö 'wo yi ‑da ꞊dhuëngdhɛ bha‑ 'gü wo "piʋ̈.
GAL 2:5 "Kɛɛ ‑a ‑nu ‑bha ‑nëng 'gü ‑sü 'ö "dhʋ̈ bha‑ ꞊gban 'gü 'yii‑ "wɩ‑ ‑nu ‑gɔ ‑bha tongtongdhö, kë "dhʋ̈ kö tɛan‑ ‑zian 'yi‑ ‑zɔn 'mɛ 'kaa Zuifö 'ka ka ‑dhɛ 'ö ‑gban Atanna ‑bha naɔ ‑së ‑bha bha 'ya 'dho 'go "gblʋʋ.
GAL 2:6 'Sa 'mɛ 'wo ‑kë "yan ‑to Atanna ‑bha 'kɔdhigümɛ ‑nu ‑bha ‑mɛ ‑nu 'ka ‑a ‑bha zian ‑ta 'ö 'wo gun ‑gɔmɛ ‑nu 'ka bha, ‑a ‑nu ‑bha ‑kë "dhʋ̈ ‑sü ꞊gban waa‑ ‑bha ‑bha 'wii 'tɔng‑ ‑dee 'bha dɔ yi ‑dhɛ, "kɛɛ n "tʋ ‑zian 'yaa gun‑ ‑nu ‑bha ‑kë ‑gɔmɛ 'ka ‑sü ‑bha, ‑a ‑gɛn ‑mü ꞊dhɛ Atanna 'yaa mɛ ‑zë 'gü zë kö ‑yö mɛ 'bha fië‑ bho mɛ 'bha ‑bha.
GAL 2:7 "Kɛɛ woo ‑zian ‑zë, ꞊dhɛ 'kö 'wo‑ 'wɔn ‑zë dɔ ꞊dhɛ Atanna ꞊në n ‑ya ö ‑bha naɔ ‑së bha‑ ‑dɔ mɛ 'waa Zuifö 'ka ‑a ‑nu ‑gɔmɛ 'ka, ꞊dhɛ ‑kɔ 'ö Piɛdhö 'dhö‑ 'ka Zuifö ‑nu kpö 'gü 'pö ‑a 'dhö, ‑a "dhia ꞊në ma‑ ‑nu 'gü.
GAL 2:8 'Sa mɛ do 'ö Piɛdhö ‑ya Yesu ‑bha bɔmɛ 'ka Zuifö ‑nu kpö 'gü bha ꞊në n ‑ya 'pö 'mɛ 'waa Zuifö 'ka‑ ‑nu kpö 'gü.
GAL 2:9 ꞊Dhɛ 'ö ꞊waa‑ 'wɔn dɔ ꞊dhɛ Atanna yöö ꞊dede ꞊në ‑gasitɛ bha‑ ‑kë n ‑dhɛ, Zakö waa‑ Piɛdhö waa‑ Zan 'wo ꞊dhɛ ꞊kaɔ 'ö ‑ya ‑sü 'ka ‑a ‑bha mɛ ‑nu 'wo Zedhizadhɛmö ‑a ‑nu ‑gɔ ‑a 'dhö bha, ‑wo wo ‑kɔ ꞊në‑ ‑da yaa‑ Baanabasö yi ꞊kwɛng, 'yö yi ‑wʋ ‑yö ‑kë do ‑a ‑bha yë bha‑ kë ‑sü 'gü ꞊dhɛ: yi ‑zë 'yi 'dho yi ‑bha 'ka 'mɛ 'waa Zuifö 'ka‑ ‑nu kpö 'gü, kö wo ‑zë 'wo 'to wo ‑bha 'ka Zuifö ‑nu kpö 'gü.
GAL 2:10 ‑Dhio 'wo‑ dɔ yi ‑ta 'yö 'wo‑ pö ꞊dhɛ yi ‑zʋ 'ya 'dho bhɔ "flɛɛmɛ ‑nu 'wo‑ ‑nu kpö 'gü bha ꞊në‑ ‑nu 'ka doseng kö 'yi‑ ‑nu ‑ta 'kun. 'Sa yii ‑dɩ 'pö yi kë pë ꞊gban ‑pë ꞊gban ‑kë kö 'ya 'dho ꞊fië ‑dhio 'ko bha ꞊në‑ ‑bha tongtongdhö.
GAL 2:11 "Kɛɛ ꞊dhɛ 'ö Piɛdhö ꞊ya nu Angtiɔsö yi do 'ka, 'mii ‑kpla ‑gɔ, a kë ꞊sua ‑yɛ "yan‑ mɛ kpö 'gü. ‑A ‑gɛn ‑mü ꞊dhɛ 'ö gun "dhʋ̈ kö ꞊ya zian 'to.
GAL 2:12 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'ö gun kö 'mɛ 'wo go Zakö ‑dhɛ 'gü Zedhizadhɛmö 'wii nu ꞊kö kwa ‑dhɛ 'gü, Piɛdhö waa‑ 'mɛ 'waa Zuifö 'ka 'ö ꞊wa bɔ Yesu 'ka ‑wo ‑gun pë ‑bhö sië wo "kwëë, "kɛɛ ꞊dhɛ 'ö 'mɛ 'wo bha ꞊wa nu ꞊wa ꞊loo mü, 'yö ö bo pë ‑bhö ‑a ‑nu "piʋ̈ ‑sü 'ka, kö ‑yö "suʋ̈ sië 'mɛ 'wo ꞊nëng mɛ ꞊gban ‑go 'gbannë 'gü ‑wɔn 'gü bha‑ ‑nu ‑gɔ.
GAL 2:13 ꞊Dhɛ 'ö kwa dheebhang Zuifö ‑nu 'dhɛ 'wo gun mü bha 'wo‑ ‑dhɛ yö, 'yö 'wo wo zü bɔ Piɛdhö 'ka, 'yö 'wo ‑kan 'pö 'mɛ 'waa Zuifö 'ka bha‑ ‑nu ‑bha. 'Yö Baanabasö yöö ‑dɩ 'pö 'ö ‑da ꞊flü bha‑ 'gü‑ ‑nu "piʋ̈.
GAL 2:14 ꞊Dhɛ 'a 'wɔn bha‑ ‑dhɛ yö, 'ö 'a‑ 'wɔn dɔ ꞊dhɛ tɛan‑ ‑zian 'ö Atanna ‑bha naɔ ‑së bha 'ö kwa ꞊klang ‑kë 'ka bha 'waa‑ ‑ta 'zü, 'yö 'a‑ pö Piɛdhö ‑dhɛ mɛ ꞊gban "yaan mü 'a‑ pö: «Piɛdhö, bhi 'ö bhi ‑zë 'i Zuifö 'ka, 'bha ‑tosɛa kë 'mɛ 'waa Zuifö 'ka‑ ‑nu kpö 'gü yö ꞊dhɛ 'pë 'bhaa Zuifö 'ka ‑a 'dhö, 'bhii‑ ‑nu ‑bha 'tɔng‑ 'kun bha ‑oo, i ‑mɔɔ ‑bha 'zü ‑deewo i zun 'mɛ 'waa Zuifö 'ka bha‑ ‑nu "dhiʋ̈ kö ‑wo ‑tosɛa kë ꞊dhɛ Zuifö ‑nu 'dhö ‑kɔ ‑kë ꞊dhɛ?»
GAL 2:15 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yi ‑zë yi ‑bhɔ Zuifö 'ka, 'wii yi 'kpɔ Atanna ‑bha 'tɔngbhomɛ 'ka ꞊dhɛ mɛ "wɛɛ ‑kpɛa 'dhö.
GAL 2:16 "Kɛɛ yö ‑zë ꞊gban 'gü yi‑ 'wɔn dɔ ‑sü 'ka 'kpakpadhö ꞊dhɛ za ‑yö ‑dhi mɛ ‑gɔ Atanna ‑kuu "dhiʋ̈ 'dhang ‑bho Yesu Klisi "dhiʋ̈ ‑sü doseng ꞊në‑ 'gü, 'yaa dɔ ‑a ‑bha 'tɔng‑ ‑kun ‑së ‑sü ‑bha. 'Wɔn 'ö‑ ‑wɔn 'gü 'yö yii ‑dɩ 'pö 'yi 'dhang bho Yesu Klisi ‑wɔn "dhiʋ̈ kë "dhʋ̈ kö 'yi dha bha 'yö bha, kë "dhʋ̈ kö 'yi dha yö ꞊në‑ ‑bha, ꞊dhɛ 'ö ‑kë ꞊dhɛ mɛ 'bha ‑mɛ 'bha 'yii 'dho dha ‑a ‑bha Atanna ‑bha 'tɔng‑ ‑kun ‑së ‑sü ‑bha bha‑ ‑wɔn 'gü.
GAL 2:17 ꞊Ya kë "dhʋ̈ 'mɛ 'yi Zuifö 'ka bha 'ya yi ‑dɩ kë ꞊dhɛ 'mɛ 'waa Zuifö 'ka‑ ‑nu 'dhö kë "dhʋ̈ kö 'yi dha Klisi ꞊në‑ 'saa‑ 'gü 'dhang ‑bho ‑a "dhiʋ̈ ‑sü "gblʋ̈ "piʋ̈ bha ‑oo, kö Klisi ꞊në yi ‑kë 'wɔnyaakëmɛ 'ka bha ‑ee? ‑Abin! ꞊Ya kë ꞊dhɛ 'ya yi ‑dɩ ‑da 'zü ‑deewo 'tɔng‑ ‑gɔ ꞊dhuëngdhɛ 'gü kö 'yi ‑tosɛa kë ꞊dhɛ 'mɛ Atanna 'yii ‑gasitɛ kë‑ ‑dhɛ, 'ö ö ‑dɩ ‑dhi ‑a ‑dhɛ ‑dhɛ mɔɔ‑ sië 'tɔng‑ 'kun ‑sü ꞊në‑ 'ka ‑a 'dhö kö 'ya "gla 'zü ‑deewo 'wɔnyaakëmɛ 'gü ꞊naa bha.
GAL 2:18 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ pë 'dhɛ 'kö mɛ ꞊ya bo‑ see‑ ‑sü 'ka, ꞊yaa‑ baa‑ ‑dee wo kö yö ꞊në ö ‑dɩ ‑da 'wɔn 'gü.
GAL 2:19 ‑A ‑gɛn ‑mü ꞊dhɛ Atanna ‑bha 'tɔng‑ ‑zë 'ma ga 'nu‑ ‑gɔ, "kɛɛ 'sa 'tɔng‑ bha yöö ꞊dede ꞊në‑ ‑kë "dhʋ̈ 'yö 'a ga bha‑ wo, kë "dhʋ̈ kö 'a ‑tosɛa kë Atanna ‑bha ‑kë 'gü, ‑a ‑gɛn ‑mü ꞊dhɛ ga 'ö Klisi ‑ya wo "dhü ‑bha bha ‑yö ‑ga ma ꞊në n ‑wɔn 'gü, ꞊ya kë "dhʋ̈ kö ma ꞊në 'a ga bha.
GAL 2:20 ‑A kë "dhʋ̈ ‑sü bha‑ 'gü kö mang ꞊dede ‑zë 'maa ‑tosɛa kë sië 'zü, 'kö Klisi ꞊në ‑tosɛa kë sië n 'gü, kö ma ‑tosɛa a‑ kë sië ꞊taamasü ya‑ 'gü bha a‑ ‑kë 'dhang ‑bho Atanna ‑bha 'në 'ö n ‑dhɔ ‑ya ‑kë 'ö ö ‑dɩ nu n ‑wɔn 'gü bha ꞊në‑ 'saa‑ 'gü 'dhang ‑bho ‑a "dhiʋ̈ ‑sü "gblʋ̈ "piʋ̈.
GAL 2:21 ‑A ‑kë "dhʋ̈ ‑sü bha‑ 'gü, 'mii 'dho "wɩ‑ ‑bha kö 'a n ‑kɔ bho ‑gasitɛ 'ö Atanna ‑ya ‑kë n ‑dhɛ bha‑ 'gü. ‑A ‑gɛn ‑mü ꞊dhɛ ꞊ya kë ꞊dhɛ dha ‑sü 'ö‑ "piʋ̈ ‑a ‑gɛn ꞊ya kë ‑a ‑bha 'tɔng‑ 'kun ‑sü ‑zë 'ka, kö Klisi ga ‑gɛn 'yii kë.
GAL 3:1 'Aa, Gadhatö ‑mɛ ‑nu, ka ‑ta ‑ma ‑sü ꞊tɔn ‑kɛɛ! "Ɛɛn pë ꞊në 'wo‑ ‑da ‑sü 'ka ka "yan 'gü ꞊zɔɔ ‑ee? "Kɛɛ 'sa ga 'ö Yesu ‑ya wo "dhü ‑bha bha a kë‑ ‑gɛn bho ka ‑dhɛ 'ö 'a‑ bho ka ‑dhɛ 'ko ‑ta 'kpakpadhö.
GAL 3:2 ‑Yö n "piʋ̈ ꞊dhɛ dhɛɛ" 'kpɔ do 'ö maa‑ kë ka ‑gɔ bha 'ka‑ ‑yɔ bɔ n ‑gɔ. Atanna ‑bha 'tɔng‑ 'ö Moizö ‑ya ‑bɛn zë bha‑ 'kun ꞊në 'ka‑ wo ‑së 'yö ö ‑bha 'Nii‑ "slʋ̈ʋ̈slʋ̈ nu ka ‑dhɛ, "ɛɛn ‑ya ‑nu ka ‑dhɛ ‑a ‑bha naɔ ‑së 'ka‑ ma 'ö 'ka 'dhang bho‑ "dhiʋ̈ bha ꞊në‑ ‑wɔn 'gü?
GAL 3:3 ‑Tama ‑dhɛ suu 'dhɛ 'kö 'ka‑ kë sië bha‑ kë ‑gɛn ‑mü ‑më 'ka "kɛɛ kö ka "ta ‑sü Atanna ‑bha zian ‑ta ‑sü zü ‑bho ‑a ‑bha 'Nii‑ "slʋ̈ʋ̈slʋ̈ faan ꞊në‑ 'ka? "Ɛɛn ‑yö ka "piʋ̈ ꞊dhɛ 'ka‑ "dhiʋ̈ ‑ya ka ‑dɩ faan 'ka ‑ee?
GAL 3:4 "Ɛɛn kö 'wɔn "gblʋ̈gblʋ̈ ‑nu 'ka ‑ziö 'gü bha‑ ꞊gban‑ kë "wlaawɔn 'ka ‑ee? ‑A yö ‑zë yaa‑ dɔ ꞊gblɛɛn.
GAL 3:5 "Ɛɛn ‑yö ka 'gü ꞊dhɛ "dhabhliwɔn ‑nu 'ö Atanna ‑ya ‑kë ka kpö 'gü ö ‑bha 'Nii‑ "slʋ̈ʋ̈slʋ̈ faan 'ka bha ‑ya kë "dhʋ̈ "ta 'ka‑ sü ‑a ‑bha 'tɔng‑ 'ka ꞊në‑ ‑wɔn 'gü ‑ee? ‑Abin! ‑Ya ‑kë "dhʋ̈ 'dhang 'ka‑ bho‑ ‑bha naɔ ‑së ('yi‑ dɔ ka ‑gɔ) bha‑ "dhiʋ̈ bha ꞊në‑ ‑wɔn 'gü.
GAL 3:6 Yö ꞊në‑ ‑wɔn 'gü 'yö ‑bɛn zë ‑sü 'ka ‑a ‑bha 'tɔng‑ 'sëëdhɛ 'gü Ablaamö ‑bu 'gü ꞊dhɛ: «‑Yö kë 'dhang ꞊në‑ bho Atanna "dhiʋ̈ 'yö‑ pö‑ ‑bha ꞊dhɛ pö 'aa‑ ‑bha.»
GAL 3:7 ‑A ‑kë "dhʋ̈ ‑sü bha‑ 'gü, ‑a ‑dhɛa ‑bha ꞊dhɛ 'ka‑ 'wɔn dɔ ꞊dhɛ 'mɛ 'wo 'dhang bho Atanna "dhiʋ̈ bha ꞊në 'wo Ablaamö suu ꞊dede 'ka.
GAL 3:8 'Sa 'mɛ 'waa Zuifö 'ka za 'ö dho dhi‑ ‑nu ‑gɔ Atanna wëëdhö ‑a ‑nu ‑bha 'dhang ‑bho Yesu "dhiʋ̈ ‑sü 'saa‑ 'gü bha‑ ‑bɛn ‑yö ‑gun zë ‑sü 'ka 'pö Atanna ‑wʋ 'gü. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑ya yi ‑to "dhiʋ̈ 'ö‑ pö Ablaamö ‑dhɛ 'ö‑ pö: «'Dhuë‑ ‑dho "sɛgɔ "pɛpɛ ꞊gban 'gü ‑mɛ ‑nu 'kun bhi ꞊në i 'saa‑ 'gü!»
GAL 3:9 'Wɔn 'ö‑ ‑wɔn 'gü 'yö 'mɛ 'wo 'dhang bho‑ "dhiʋ̈ ꞊dhɛ Ablaamö 'dhö, 'yö‑ ‑bha 'dhuë‑ ‑ya ‑nu kun bha 'yö bha.
GAL 3:10 "Kɛɛ mɛ "pɛpɛ 'kö 'wo‑ pö wo ‑dɩ ‑dhɛ ꞊dhɛ wo ‑zë woo dha ‑sü ꞊slɔɔ‑ ‑bha 'tɔng‑ 'kun ‑sü ꞊në‑ ‑bha bha "dhang ‑dho ‑a ‑nu 'kun. ‑A 'klɔɔ‑ ‑mü ꞊dhɛ ‑yö ‑bɛn zë ‑sü 'ka‑ ‑wʋ 'sëëdhɛ 'gü ꞊dhɛ mɛ "ʋʋ mɛ 'ö 'tɔng‑ "pɛpɛ 'ö Atanna ‑gɔ 'sëëdhɛ 'gü ‑a doseng ‑zian to, ‑a "dhang ‑dho ‑mɛ 'kun.
GAL 3:11 Za ‑dhi mɛ ‑gɔ ‑sü 'ö Atanna ‑kuu "dhiʋ̈ ‑a ‑bha 'tɔng‑ 'kun ‑sü ‑bha 'yaa ‑to ‑bha ‑wɔn 'ka ‑zianwo 'wɔn 'ö‑ 'gü yö ‑mü ꞊dhɛ, ‑yö ‑bɛn zë ‑sü 'ka‑ ‑wʋ 'sëëdhɛ 'gü ‑dhɛ 'bha 'gü mü 'zü ꞊dhɛ: «'Mɛ 'ö dho kë Dhamɛ 'ka, 'ö Atanna dho‑ pö‑ ‑bha ꞊dhɛ pö 'aa‑ ‑bha, ‑yö ‑dho 'sü ‑a ‑mɛ ‑bha 'dhang ‑bho ‑a "dhiʋ̈ ‑sü ꞊në‑ ‑bha.»
GAL 3:12 'Sa 'mɛ 'ö‑ "piʋ̈ ꞊dhɛ 'ö dha ‑a ‑bha 'tɔng‑ 'kun ‑sü ꞊në‑ ‑bha, kö‑ ‑mɛ 'yii "wɩ ꞊në‑ wo 'dhang ‑bho ‑a "dhiʋ̈ ‑wɔn ‑bha ö zuë" "piʋ̈ bha. ‑A ‑gɛn ‑mü ꞊dhɛ ‑yö ‑bɛn zë ‑sü 'ka ‑a ‑gɔ 'sëëdhɛ 'gü ꞊dhɛ: «'Mɛ 'ö pë 'ö 'tɔng‑ ‑ya pö‑ 'gü ‑wɔn ‑kë, ‑a ‑mɛ ‑dho dha yö ꞊në‑ ‑bha.»
GAL 3:13 "Kɛɛ Klisi ꞊ya kwa dha 'tɔng‑ 'kun ‑sü ‑bha "dhang bha‑ ‑gɔ. ‑A 'klɔɔ‑ ‑mü ꞊dhɛ "dhang 'ö yöö kwa 'kun 'nu 'tɔng‑ bho ‑wɔn 'gü bha Atanna yaa‑ ‑da ‑a "piʋ̈, ꞊yaa‑ kë kwa ‑gɔ ‑ta 'dhɔ ‑pë 'ka. ‑A ‑gɛn ‑mü ꞊dhɛ ‑yö ‑bɛn zë ‑sü 'ka Atanna ‑gɔ 'sëëdhɛ 'gü ꞊dhɛ: «Mɛ "ʋʋ mɛ 'wo‑ dun "dhü ‑zë ‑bha, kö "dhang ꞊në‑ ‑mɛ ‑bha.»
GAL 3:14 Kë "dhʋ̈ kö 'dhuë‑ 'ö Atanna ‑ya "plüün bho Ablaamö ‑dhɛ ('ö ‑gban dha ‑sü 'ö 'dhang ‑bho Yesu "dhiʋ̈ ‑sü 'saa‑ 'gü bha‑ ‑bha) bha ‑yö kë 'pö 'mɛ 'waa Zuifö 'ka‑ ‑nu ‑dhɛ Yesu Klisi ꞊në‑ 'saa‑ 'gü, kë "dhʋ̈ kö Atanna ‑bha 'Nii‑ "slʋ̈ʋ̈slʋ̈ 'ö‑ "plüün bho bha 'kwa‑ ꞊slɔɔ 'dhang ‑bho "dhiʋ̈ ‑sü ꞊në‑ "gblʋʋ "piʋ̈.
GAL 3:15 N dheebhang ‑nu, a ‑dho 'wɔn zaɔn 'sü mɛ "bhɩɩ‑ ‑nu kwa wɔ ‑kɔ ꞊në‑ ‑ta 'yö 'a 'wɔn bha‑ 'klɔɔ‑ pö‑ 'ka ka ‑dhɛ. ‑Yö n 'gü ꞊dhɛ kö mɛ ‑yö 'to "yaan ‑yö ö 'kɛan‑ ‑gblü ‑kɔ pö, ꞊ya ga yi 'ö‑ 'ka, ‑kɔ do 'ö‑ pö‑ 'ka bha 'yö 'wo‑ ‑kë 'ka, 'waa‑ bho‑ ‑bha "ɛɛn 'waa‑ 'bha ‑da ‑ta. "Ɛɛn 'yaa "dhʋ̈ ‑ee?
GAL 3:16 Atanna ‑yö "plüün ‑bho 'pö Ablaamö ‑dhɛ ‑kɔ do bha ꞊në‑ 'gü waa‑ suu 'dhö. 'Yaa ‑bɛn zë ‑sü 'ka ‑a ‑wʋ 'sëëdhɛ 'gü ꞊dhɛ: «Kaa‑ i suu ‑nu», ꞊dhɛ pë 'ö 'gbɛ ‑a 'dhö, "kɛɛ ‑ya ‑pö: «Kaa‑ i suu». Kë "dhʋ̈ kö ‑ya ‑zɔn kwa ‑dhɛ ꞊dhɛ ‑yö ‑wɩ Klisi yöö do ꞊në‑ 'ka.
GAL 3:17 'Ma‑ pö "dhʋ̈ kö a‑ ‑pö Atanna ꞊ya ö bo 'nu 'wɔn 'ö yöö kë dhia" bha‑ "kplëng bho ‑sü 'ka Ablaamö ‑bha 'nu yi 'bha 'ka ꞊dhɛ ‑kɔ 'wo 'kɛan‑ ‑gblü 'ka bha‑ 'dhö, 'yaa ‑bho ‑bha ‑pë 'ka 'zü, ‑a 'klɔɔ‑ ‑mü ꞊dhɛ 'ö 'tɔng‑ ‑zë dɔ "tʋ̈ng 'ö‑ 'gü bha kö 'ö 'wɔn bha‑ "plüün bho Ablaamö ‑dhɛ ‑a ‑kwɛ ꞊ya kë ‑kwɛ këng ‑yiisiö waa‑ ‑kwɛ ‑kaɔng ‑yaaga. ꞊Ya kë "dhʋ̈ kö 'tɔng‑ 'kö bha 'yii 'dho pë 'bha bho "plüün 'kö Atanna ‑ya bho bha‑ ‑bha 'zü ꞊naa bha.
GAL 3:18 ‑A ‑kë "dhʋ̈ ‑sü bha‑ 'gü, ꞊ya kë ꞊dhɛ 'wɔn ‑së 'ö Atanna ‑ya "plüün bho "dhʋ̈ bha mɛ ꞊yaa‑ ꞊slɔɔ‑ ‑bha 'tɔng‑ 'kun ‑sü ‑zë ‑bha, kö 'yii kë "plüün 'kö‑ bho bha‑ 'gü ‑wɔn kë ‑sü 'ka ꞊naa bha. "Kɛɛ 'sa kö ‑yö ‑gasitɛ ‑ziisü bha‑ ‑kë Ablaamö ‑dhɛ "dhʋ̈ "plüün 'ö‑ bho‑ ‑dhɛ bha ꞊në‑ ‑wɔn 'gü.
GAL 3:19 'Sa ꞊ya 'to yö ‑zë ‑bha kö Atanna ‑bha 'tɔng‑ dɔ ‑gɛn ꞊në kë ‑kë ‑më 'ka? 'Tɔng‑ dɔ 'ö‑ wo bha ‑ya ‑wo "dhʋ̈ kö 'ö‑ ‑da ("plüün 'ö‑ bho Ablaamö ‑dhɛ bha ꞊në‑ ‑ta) kö 'wɔn 'dhɛ 'ö 'yaa‑ ‑dhidhɛwɔn 'ka bha mɛ "bhɩɩ‑ ‑nu ‑wa dɔ ꞊në‑ wo, kö ‑yö 'to‑ 'ka "dhʋ̈ ‑yö zun‑ 'ka Klisi 'ö Ablaamö suu 'ka 'ö Atanna ‑ya ‑dhiang zë bha‑ nu ‑sü ‑bha. Atanna ‑bha "kië ‑nu ‑wa "dhiʋ̈ ‑loo Moizö ꞊në‑ ‑bha 'yö‑ ꞊loo kwa ‑bha.
GAL 3:20 ("Kɛɛ "plüün 'kö‑ bho Ablaamö ‑dhɛ bha) yöö ꞊dede ꞊në‑ ꞊loo‑ ‑bha, 'yii bɔ‑ 'ka mɛ 'bha ‑ta.
GAL 3:21 'Ka 'dho ka ‑zʋ 'gɔn ꞊dhɛ ꞊ya kë "dhʋ̈ kö "plüün 'ö‑ bho "dhʋ̈ bha ꞊ya bho‑ ‑bha ꞊naa bha. ‑A 'klɔɔ‑ ‑mü ꞊dhɛ mɛ‑ ‑dha 'nu 'tɔng‑ 'kun ‑sü ‑zë ‑bha Atanna wëëdhö kö 'yii 'dho mɛ ‑mawɔn 'to 'dhang ‑bho Yesu "dhiʋ̈ ‑sü ‑zë ‑bha. "Kɛɛ 'yaa "dhʋ̈. ‑A ‑gɛn ‑mü ꞊dhɛ ‑a ‑wʋ 'sëëdhɛ ‑ya ‑pö kwa ‑dhɛ ꞊dhɛ mɛ ꞊gban "pɛpɛ ‑wo 'wɔn yaa ‑gɔ ꞊dhuëngdhɛ 'gü, kë "dhʋ̈ kö 'wɔn 'ö‑ "plüün bho bha 'mɛ ꞊wa 'dhang bho Yesu Klisi "dhiʋ̈ ꞊në ‑wa ꞊slɔɔ.
GAL 3:23 'Ö gun kö dha ‑zian 'ö bɔ 'dhang ‑bho Yesu "dhiʋ̈ ‑sü ‑ta bha‑ "dhiʋ̈ 'yii "pʋ ꞊kö kwa ‑gɔ, mɛ ꞊gban "pɛpɛ kwa ‑gun ꞊dhuëngdhɛ 'gü 'tɔng‑ ꞊në‑ ‑gɔ, 'mɛ 'ö yöö zian bha‑ "pʋ kwa ‑dhɛ bha‑ "dhiʋ̈ "gan kian 'ka.
GAL 3:24 ‑A ‑kë "dhʋ̈ ‑sü bha‑ 'gü, 'tɔng‑ ꞊në gun "yan 'to sië kwa ‑bha 'ö dho 'ö zun‑ 'ka Klisi nu ‑yi ‑bha, kë "dhʋ̈ kö kwa ‑kë "slʋ̈ʋ̈slʋ̈ ‑sü 'ö Atanna wëëdhö bha‑ ‑gɛn ‑yö ‑gban 'dhang ‑bho Yesu "dhiʋ̈ ‑sü ꞊në‑ ‑bha.
GAL 3:25 "Tʋ̈ng 'kwa gun dɔ sië‑ ‑gɔ "dhʋ̈ bha ꞊ya ꞊loo, kwa ‑gɔdhiʋ̈mɛ 'ö gun bha kwa ‑kɔ 'yaa‑ ‑gɔ ‑gwë ꞊wlöö 'zü.
GAL 3:26 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'dhang 'ka‑ bho Yesu Klisi ‑wɔn "dhiʋ̈ bha ka ‑kë Atanna ‑bha 'në 'ka yö ꞊në‑ ‑wɔn 'gü.
GAL 3:27 Mɛ "pɛpɛ 'ö ꞊wa ka ‑bɔ Yesu 'ka ‑zu bho bha‑ "dhiʋ̈ ‑bha ꞊ya kë ꞊dhɛ 'pë 'ka "bhɛɛ ‑dee ‑da ‑a 'dhö. ‑A "bhɛɛ ‑dee 'ö "dhʋ̈ bha ꞊në Klisi 'ka.
GAL 3:28 ‑A ‑kë "dhʋ̈ ‑sü bha‑ 'gü, Zuifö ‑mü i 'ka "ɛɛn 'bhaa Zuifö 'ka, ꞊dhuëng ‑mü i 'ka "ɛɛn 'bhaa ꞊dhuëng 'ka, ‑a 'bha 'yaa‑ 'gü 'zü. Dhebhɔ ‑mü i 'ka "ɛɛn gɔɔn‑ ‑mü i 'ka, ‑a ꞊gbaan yën, ‑a 'klɔɔ‑ ‑mü ꞊dhɛ mɛ ꞊gban 'ka kë do ka ‑bha ‑kplü Yesu Klisi ‑bha ‑sü 'saa‑ 'gü.
GAL 3:29 ‑A ‑kë "dhʋ̈ ‑sü bha‑ 'gü, ꞊ya kë ꞊dhɛ 'ka kë Klisi ‑zë ‑bha 'ka, kö 'ka kë Ablaamö suu 'ka ꞊naa bha, kö Atanna ‑bha ‑gasitɛ bha ‑yö ‑dho kë ka ‑dhɛ ꞊dhɛ ‑kɔ 'ö‑ "plüün bho‑ 'ka Ablaamö ‑dhɛ bha‑ 'dhö.
GAL 4:1 'Pë 'ö n "piʋ̈ ꞊dhɛ 'a‑ pö bha ‑kaa ‑ga 'ö ya: Yö ‑mü ꞊dhɛ 'në 'ö‑ ‑dhɛ 'dhö‑ ‑bha ꞊dhɛ yö ꞊në ‑yö ö dë 'kɛan‑ 'sü ‑dhɛ 'bha ꞊kpaɔ ‑yi ‑bha bha, 'kö 'zü pë "pɛpɛ 'ö mü ‑a ꞊gban yöö kë‑ ‑bha 'ka, "kɛɛ "tʋ̈ng 'ö ‑tun 'ka 'në 'dɛdɛ 'ka bha kö ꞊zinng 'bha 'yaa waa‑ ꞊dhuëng 'ö 'kɔɔdhö 'mü bha‑ ‑nu ꞊zinng 'gü.
GAL 4:2 ‑A 'klɔɔ‑ ‑mü ꞊dhɛ 'ö ‑tun 'në ‑zë 'ka "dhʋ̈ "tʋ̈ng 'ö‑ 'gü bha kö ‑yö ‑tun 'mɛ 'wo "klʋ bho sië waa‑ ‑bha ꞊kwɛɛ‑ ‑nu bha‑ ‑nu ‑bha bha ꞊në‑ ‑nu ‑kɔ ‑bha, 'ö to‑ 'ka "dhʋ̈ 'ö zun‑ 'ka yi 'ö‑ dë ‑ya ‑ya bha‑ ‑bha.
GAL 4:3 ‑Kɔ do bha‑ 'gü, 'ö ‑gun kö kwa ‑tun 'në 'ka Atanna ‑wɔn "gblʋʋ "piʋ̈, kö kwa ‑tun ꞊dhuëng 'ka 'pö "kpʋng ꞊taa ‑wɔn ‑nu ‑gɔ.
GAL 4:4 "Kɛɛ ꞊dhɛ 'ö "tʋ̈ng 'ö Atanna ‑ya ‑ya ꞊ya ꞊loo, 'yö ö Gbö bɔ, 'yö dhebhɔ do ‑ya kpɔ, 'yö dho 'pö 'ö ‑da 'tɔng‑ 'ö‑ dɔ Zuifö ‑nu ‑dhɛ bha‑ ‑gɔ ꞊dhuëngdhɛ 'gü,
GAL 4:5 Kë "dhʋ̈ kö ö ‑kɔ ‑yö ꞊mɔɔ 'mɛ 'wo gun 'pö ꞊dhuëngdhɛ 'gü 'tɔng‑ bha‑ ‑gɔ bha‑ ‑nu dha ‑sü ‑bha, kë "dhʋ̈ kö 'kwa kë 'pö Atanna ‑bha 'në 'ka.
GAL 4:6 'Wɔn 'ö‑ ‑wɔn 'gü 'yö ö Gbö ‑bha 'Nii‑ "slʋ̈ʋ̈slʋ̈ bha‑ ‑ya kaa ‑dɩ 'pö 'gü bha 'yö bha, kë "dhʋ̈ kö ‑ya ‑zɔn ꞊dhɛ ö ‑bha 'në ‑mü ka 'ka. ‑A 'Nii‑ 'ö "dhʋ̈ bha ꞊në‑ ‑kë 'yö 'kwa‑ ‑dhɛ kwa baa".
GAL 4:7 ‑A ‑kë "dhʋ̈ ‑sü bha‑ 'gü, kö 'kaa ꞊dhuëng 'ka 'zü, kö 'ka kë Atanna ‑bha 'në 'ka, 'sa ꞊ya kë "dhʋ̈ kö 'pë 'ö‑ ‑ya ‑dhɛkpaɔ dhia" saan 'ka ö ‑bha 'në ‑nu ‑gɔ bha 'ka kë 'pö‑ ꞊slɔɔmɛ 'ka ꞊naa bha.
GAL 4:8 'Ö gun kö 'kaa Atanna dɔ, pë ‑nu 'ö 'waa Atanna ꞊dede 'ka bha ꞊në 'ka gun‑ ‑nu ‑bha ꞊dhuëng 'ka 'yö 'ka gun‑ ‑dhɔkë sië.
GAL 4:9 "Kɛɛ dɔ 'kwa‑ wo ꞊taamasü ya‑ 'gü 'ö 'ka‑ dɔ, ‑ɛɛ 'zü 'ö ꞊ya ka dɔ bha, ‑a ‑dhɛ 'yaa‑ ‑bha ꞊dhɛ 'ka ‑da 'zü ‑deewo ꞊dhuëngdhɛ 'gü "wlaapë ‑nu 'ö "sɩ 'yaa‑ ‑nu ‑dhɛ bha‑ ‑nu ‑gɔ.
GAL 4:10 'Sa ka ‑tun ꞊kö ‑dhɛkpaɔyi 'bha ‑nu, "ɛɛn "su 'bha ‑nu, "ɛɛn "tʋ̈ng 'bha ‑nu, "ɛɛn ‑kwɛ 'bha ‑nu 'wo mü ‑a ‑kian 'gü dɔ 'kwa‑ wo ya‑ 'gü.
GAL 4:11 ‑A ‑kë "dhʋ̈ ‑sü bha‑ "suʋ̈ ‑yö n 'gü ꞊dedewo. ‑A 'klɔɔ‑ ‑mü ꞊dhɛ 'yaa n "piʋ̈ ꞊dhɛ Atanna ‑bha yë 'a‑ ‑kë ka kpö 'gü bha ‑yö kë "wlaawɔn 'ka.
GAL 4:12 ‑A ‑kë "dhʋ̈ ‑sü bha‑ 'gü n dheebhang ‑nu, ‑ka dɔ "gbɩɩ‑, bhɛa" ꞊në 'a‑ wo ka ‑dhɛ kö 'ka bhɔ n ‑bha. (Ka ka ‑dɩ ‑da ‑kpla bha‑ 'gü 'zü ‑më ‑wɔn 'gü 'yö 'kaa ka kwaa‑ ‑zü.) "Ɛɛn ma ‑zë 'maa ꞊dhɛ ꞊në‑ wo ꞊dhɛ ka 'dhö ‑ee? ("Ɛɛn 'maa gun Zuifö 'ka 'mii n ‑dɩ kë ꞊dhɛ 'mɛ 'yaa Zuifö 'ka ‑a 'dhö ‑dha 'dhang ‑bho Yesu "dhiʋ̈ ‑sü 'ö 'yii ‑gban 'tɔng‑ 'kun ‑sü bha bha‑ ‑wɔn 'gü ‑ee?) ‑A pö 'a‑ wo "dhʋ̈ bha 'yii kë ꞊dhɛ 'ka 'wɔn yaa 'bha ꞊në kë n 'ka.
GAL 4:13 'Sa 'wɔn 'ö‑ ‑wɔn 'gü 'yö 'a Atanna ‑bha 'wɔn ‑taɔng ‑së bha‑ ‑blɛblɛsü pö ka ‑dhɛ ka‑ ‑dɔ. Ka‑ 'wɔn ‑dɔ 'kpakpadhö ꞊dhɛ 'ö gun "dhʋ̈ kö n 'gü ꞊në 'yaa ‑së.
GAL 4:14 'Sa n 'gü ‑siö ‑sü 'ö "dhʋ̈ bha yö ‑zë ꞊gban 'gü, ka ‑wëëdhɛ 'ö‑ "sinma ‑yö bho n "piʋ̈ bha "kɛɛ 'kii ‑yënng kë n ‑gɔ kö 'ka ka ‑kɔ "kan n "dhiʋ̈. Ka kë ka ‑kɔ ‑zian ꞊në‑ ‑ya n ‑dhɛng ‑bha ꞊dhɛ mɛ‑ pë ‑ya Atanna ‑bha "kië ‑dhɛng ‑bha, "ɛɛn ꞊dhɛ mɛ ‑dɔ Yesu Klisi yöö ꞊dede ‑a 'ka.
GAL 4:15 Ka ꞊nii "sinma 'ö ‑da n ‑wɔn 'gü "tʋ̈ng bha‑ 'gü bha ‑yö ‑kë mü ꞊dhɛ ꞊dɛɛ, ‑më ‑wɔn ꞊në ka "dhiʋ̈ ꞊slɔɔ? 'Sa a ‑mɔɔ ‑bha 'a‑ pö‑ "tʋ̈ng 'dhɛ 'kö bha‑ 'gü ꞊dhɛ ka ‑mɔɔ ‑bha 'nu 'ka ka "yanga ‑zian bho mü 'ka‑ nu n ‑dhɛ!
GAL 4:16 "Ɛɛn tɛanwɔn 'a‑ pö ka ‑dhɛ bha‑ ‑wɔn 'gü, 'ma kë ka 'yaɔ‑ 'ka ꞊dɛɛ ‑ee?
GAL 4:17 'Sa 'mɛ 'ka‑ ‑nu fië‑ bho sië n ‑bha ꞊dɛɛ bha a‑ ‑pö ka ‑dhɛ ꞊dhɛ "kpënng‑ ꞊në 'wo‑ kë sië ka ‑gɔ bha. ‑Së 'wo‑ kë sië ka ‑wɔn "dhʋ̈ 'ö 'wo ka ‑yanyan ‑ya sië bha 'yaa "gblʋ̈ʋ̈dhɛ "puu ‑ta. ‑Ya ‑nu "piʋ̈ ꞊dhɛ 'wo ka wë ꞊në bho n ‑ta kö 'ka ‑kplü wo ꞊në wo ‑bha.
GAL 4:18 "Kɛɛ 'sa mɛ ‑wɔn ‑kë mɛ ‑gɔ "gbɩɩ‑ ‑sü bha 'yaa 'wɔn yaa 'ka, "kɛɛ kö yö "dhʋ̈ 'wɔn ‑së ꞊në‑ 'gü, 'ö "dhʋ̈ 'pö "tʋ̈ng ꞊gban 'gü. "Kɛɛ ka ‑bha bha 'yaa "dhʋ̈, 'a ka kpö 'gü ꞊naa 'yö n ‑wɔn ‑yö ‑kë ka ‑gɔ.
GAL 4:19 N bhang ‑nu, 'wɔn 'ö‑ ‑wɔn 'gü 'yö n "gblʋ̈ʋ̈dhɛ 'dhö ‑tun n piʋ̈‑ 'zü ‑deewo ka ‑wɔn 'gü ꞊dhɛ dhebhɔ 'ö yöö 'në 'kpɔ ‑a 'dhö, 'ö dho to‑ 'ka "dhʋ̈ 'ö zun‑ 'ka yi 'ö mɛ ꞊gban dho‑ 'wɔn dɔ‑ 'ka ꞊dhɛ Klisi ꞊ya ‑wɛɛ ꞊dede 'kun ka kpö 'gü ‑a ‑bha bha 'yö bha.
GAL 4:20 ‑A "sɩ ꞊në 'yaa n ‑dhɛ "kɛɛ ‑kë ka ‑dhɛ 'gü ‑sü 'ö "tʋ̈ng ya‑ 'gü 'nu kö 'a dhiang bha‑ zë ka ‑dhɛ ‑kɔ "wɛɛ 'bha 'gü 'nu bha‑ ‑dhɔ 'ö n ‑bha ‑a "sinma 'yaa 'dhö, ‑a 'klɔɔ‑ ‑mü ꞊dhɛ ka ‑wɔn "suʋ̈ ꞊dede ‑yö n 'gü "tʋ̈ng ya‑ 'gü.
GAL 4:21 'Mɛ ka‑ "piʋ̈ ꞊dhɛ 'ka 'to 'tɔng‑ ꞊gban ꞊wlöö bha 'ö ꞊ya kë ꞊dhɛ 'pë 'ö 'tɔng‑ ‑ya pö 'kaa‑ 'gü ꞊në‑ ma kö 'ka‑ pö n ‑dhɛ.
GAL 4:22 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'tɔng‑ ‑ya ‑pö ꞊dhɛ Ablaamö bha ‑yö 'nëgɔɔn ꞊plɛ ꞊në‑ kpɔ. Waa‑ ‑bha ꞊dhuëngdhe ('wo‑ ‑dhɛ Agaa) ꞊në 'wo‑ do kpɔ, 'yö waa‑ ‑dɩ "sɔn 'gü "pɛ ‑dhe 'ö yö ‑zë 'ö 'wlɔɔ‑ 'ka ('wo‑ ‑dhɛ Saadha) bha 'wo‑ do kpɔ.
GAL 4:23 'Në 'dhɛ 'ö‑ kpɔ ꞊dhuëngdhe "dhiʋ̈ bha ‑ya ‑kpɔ ꞊dhɛ ‑kɔ do 'wo 'në kpɔ‑ 'ka 'wo ‑bhɔ 'ka zii 'nu bha ꞊në‑ 'dhö. "Kɛɛ mɛ 'dhɛ 'ö‑ kpɔ‑ mɛ 'dhɛ 'ö 'wlɔɔ‑ 'ka, 'ö‑ "sɔn 'gü "pɛ ‑dhe 'ka bha‑ "dhiʋ̈ bha yö ‑zë ‑yö ‑bhɔ Atanna ‑bha "plüün 'ö‑ bho‑ ‑dhɛ bha ꞊në ꞊yënng 'gü.
GAL 4:24 Kë 'ö‑ wo "dhʋ̈ bha ‑yö ‑kë "dhʋ̈ kö ‑yö kë 'wɔn zaɔn ꞊në‑ 'ka: ‑A dhebhɔ ‑nu ꞊plɛ 'wo bha ‑wo ꞊dhɛ ‑mlɛɛ ꞊plɛ 'ö Atanna ‑ya ‑da waa‑ mɛ "bhɩɩ‑ ‑nu ‑a ‑nu ꞊zinng 'gü bha ꞊në‑ 'dhö. ‑Mlɛɛ bha‑ ‑blɛɛsü 'ö‑ ‑da waa‑ Izraɛdhö ‑mɛ ‑nu ‑a ‑nu ꞊zinng 'gü Sinai ‑tɔn ꞊gbin‑ bha‑ ‑zɔn 'ka ꞊në Agaa 'ka. 'Në "pɛpɛ 'dhɛ 'kö bhɔ ‑mlɛɛ bha‑ 'gü kö ‑wo ꞊dhuëng ꞊në‑ 'ka.
GAL 4:25 Agaa bha ꞊në ꞊dhɛ Sinai ‑tɔn 'ö Adhabi ‑sɛ 'gü bha‑ 'dhö, waa‑ Zedhizadhɛmö ‑dhɛ 'dhɛ 'ö "kpʋng ꞊taa ꞊dɛɛ 'ö waa‑ 'gü ‑mɛ ‑nu ꞊gban 'wo (Moizö ‑bha 'tɔng‑ ‑nu ‑gɔ ꞊dhuëngdhɛ 'gü) bha ꞊në 'wo do.
GAL 4:26 "Kɛɛ kwa ‑zë Zedhizadhɛmö ‑pö 'dhɛ 'ö dhang‑ 'gü, 'ö 'wlɔɔ‑ ‑pö 'ka bha, yö ꞊në ꞊dhɛ kwa dhe 'dhö.
GAL 4:27 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑wʋ ‑ya ‑pö ꞊dhɛ: «Dhebhɔ 'ö 'në 'yaa gun i ‑gɔ bha i ꞊nii ‑yö ‑da, bhi 'ö 'bhii 'në 'kpɔ "gblʋ̈ʋ̈dhɛ piʋ̈‑ dɔ bha, ‑bhö "yʋʋ 'sü zuë" ꞊nii ‑da 'ka! ‑A 'klɔɔ‑ ‑mü ꞊dhɛ ꞊saandhe 'ö ꞊wa gun ꞊wa wo kwaa‑ ‑zü bha ‑yö ‑dho 'në 'gbɛ ꞊slɔɔ 'ö ‑ziö 'ka ꞊dhɔɔdhe ‑ta.»
GAL 4:28 Ka ‑zë, n dheebhang ‑nu, ka ꞊dhɛ Izaakö 'wo‑ kpɔ "plüün 'ö Atanna ‑ya bho ‑a ꞊yënng 'gü bha ꞊në‑ 'dhö.
GAL 4:29 'Ö gun zii 'kpa, 'në 'dhɛ 'ö bhɔ ꞊dhɛ "kpʋng ꞊taa ‑në ‑nu 'dhö bha ‑yö ‑gun Izaakö suu 'gü ‑në 'ö yö ‑zë 'ö bhɔ Atanna ‑bha 'Nii‑ "slʋ̈ʋ̈slʋ̈ dhɔɔbhaa 'ka bha‑ ‑wëë ‑kë "dhiʋ̈ bho sië. 'Sa ‑yö ‑tun "dhʋ̈ ꞊dɛɛ.
GAL 4:30 "Kɛɛ yö ‑zë ꞊gban 'gü, Atanna ‑wʋ ‑ya ‑pö 'ö‑ pö: «‑Bhö ꞊dhuëngdhe bha waa‑ gbö bha‑ ‑nu kë kö ‑wo 'dho, ‑a 'klɔɔ‑ ‑mü ꞊dhɛ ‑a ‑dhɛ 'yaa‑ ‑bha ꞊dhɛ waa‑ dhebhɔ 'dhɛ 'ö 'wlɔɔ‑ 'ka bha‑ gbö ‑wo ‑ya 'kɛan‑ do ‑ta.»
GAL 4:31 ‑A ‑kë "dhʋ̈ ‑sü bha‑ 'gü n dheebhang ‑nu, kwa ‑zë 'kwii kë ꞊dhuëngdhe bha‑ 'gü ‑në 'ka (kö 'kwa kë 'tɔng‑ ‑gɔ 'kun 'gü), 'wlɔɔdhe bha ꞊në 'kwa‑ ‑bha 'në 'ka, (‑a ‑wɔn 'gü, Atanna ‑mɔɔ ‑bha 'ö ö ‑kɔ ‑ya kwa ‑bha kwa ‑bha 'dhang ‑bho ‑a Gbö "dhiʋ̈ ‑sü ‑wɔn 'gü.)
GAL 5:1 Kwa bho 'ö Klisi ‑ya wo ꞊dhuëngdhɛ 'gü bha ‑ya kë "dhʋ̈ kö 'kwa ‑ya ꞊dede ꞊në‑ wo kwa 'flëë‑ 'gü. ‑A ‑kë "dhʋ̈ ‑sü bha‑ 'gü, ‑ya ‑dɩ 'flëë‑ 'gü ‑sü 'ka‑ ꞊slɔɔ bha ‑kaa 'kun "gbɩɩ‑ kö 'ka 'dho ‑da 'zü ‑deewo ꞊dhuëngdhɛ 'gü.
GAL 5:2 ‑Ka ‑dhɛ ‑ga, mang Pɔdhö ‑mɛ ma ꞊në 'a‑ pö ka ‑dhɛ. ꞊Ya kë ꞊dhɛ kö 'ka 'dho 'zü ‑deewo 'gbannë 'gü (꞊dhɛ Zuifö ‑nu 'dhö kë "dhʋ̈ kö 'ka dha), kö Klisi ‑ga ka ‑wɔn 'gü ‑gɛn 'yii kë.
GAL 5:3 A‑ ‑pö ka ‑dhɛ 'zü ‑deewo 'a n kɔngga ‑ziö 'ka ka ‑dhɛ "sɛɛ ꞊dhɛ mɛ "ʋʋ mɛ 'ö dho 'gbannë 'gü (kë "dhʋ̈ kö 'ö dha), kö‑ ‑dhɛa ‑bha ꞊dhɛ ‑a ‑mɛ 'ö 'dhö, Atanna ‑bha 'tɔng‑ 'ö ‑bɛn zë ‑sü 'ka bha ‑ya ꞊gban 'kun, 'ya 'dho‑ do ‑zian 'to.
GAL 5:4 Mɛ 'ka ka ‑dɩ "dhia ‑ma Atanna 'gü ‑dhɛ mɔɔ‑ sië‑ ‑bha 'tɔng‑ 'kun ‑sü ꞊në‑ 'ka bha, a‑ ‑pö ka ‑dhɛ ꞊dhɛ 'ka‑ kë "dhʋ̈ kö 'ka "kan Klisi ‑bha, 'sa kö ‑gasitɛ 'ö Atanna ‑ya ‑kë ka ‑dhɛ 'ö ka dha bha 'ka "kan‑ ꞊gban ꞊në‑ ‑bha bha.
GAL 5:5 Yi ‑zë yi ‑bha 'ka, yi ‑zʋ 'dhö‑ 'dhɛ 'ö‑ 'gü, 'ö 'yi ‑ya ‑sü 'ka‑ ‑gɔ, yö ‑mü ꞊dhɛ pö 'yii 'dho kë yi ‑bha Atanna wëëdhö yë 'ö‑ ‑bha 'Nii‑ "slʋ̈ʋ̈slʋ̈ ‑ya ‑kë kwa ‑bha ‑zʋ ‑yö ‑a ‑dhɛ ‑sü 'gü, ‑a ‑bha 'gügbɩɩdhɛ ‑bha bha ꞊në‑ ‑bha.
GAL 5:6 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë ꞊dhɛ 'kwa ‑kplü ‑sü ‑zë 'ka Yesu Klisi ‑bha, ‑dho 'gbannë 'gü ‑sü oo, ‑to ‑kplëë 'ka ‑sü oo, ‑a 'bha 'yaa 'wɔn 'bha 'ka, kö 'wɔn 'ö ꞊ya 'to 'wɔn ꞊bhlëësü 'ka yö ‑mü 'dhang ‑bho Yesu "dhiʋ̈ ‑sü 'ö ‑mɛ ‑ya 'gü ‑wɔn ꞊gban ‑kë ‑dhɔ 'gü bha ꞊në‑ 'ka.
GAL 5:7 'Wɔn bha‑ zü 'ka kë‑ bho "dhiadhiasü 'ka bha 'dee ka ‑kɔ bho‑ ‑bha? 'Dee‑ pö 'ka Atanna ‑bha tɛanwɔn bha‑ bho ka "tʋʋ?
GAL 5:8 ‑Yö kë ka "yaan ꞊dhɛ ‑wʋ 'wo‑ pö ka ‑dhɛ 'ö ka ‑zʋ kun bha 'yii 'go Atanna 'ö ka ‑dhɛ sië bha‑ "piʋ̈.
GAL 5:9 'Sa ‑a pö 'wo‑ wo ꞊dhɛ "sɛkɛ 'në 'dɛdɛ 'ö 'dhö ꞊waa‑ ‑da 'bluu‑ ‑bʋ̈ʋ̈ ‑bha ‑ya ‑da "dhiʋ̈ bha 'yaa ꞊sua 'ka. (‑A ‑wɔn 'gü kö mɛ do zian ‑ya kë "dhʋ̈ ka kpö 'gü ‑yö ‑mɔɔ ‑bha 'ö 'mɛ ꞊gban bho zian ‑ta.)
GAL 5:10 "Kɛɛ 'kö 'zü yöö kë "dhʋ̈, n Dëmɛ bha ‑yö n ‑zʋ ‑gban ka ‑wɔn 'gü, 'ö n 'dhang bho ‑sü 'dhö‑ "dhiʋ̈ 'kpakpadhö ‑a ‑wɔn 'gü ꞊dhɛ ka ‑dho ka ‑zʋ 'gɔn 'pö ꞊dhɛ ‑kɔ 'a‑ gɔn‑ 'ka ‑a 'dhö. 'Sa 'mɛ 'ö Atanna ‑wɔn 'ma sië ‑zukplü ‑bha ka ‑gɔ bha, kö 'zü 'ö ‑kë mɛ "ʋʋ mɛ 'ö‑ 'ka, Atanna ‑dho 'wɔn bho‑ 'gü.
GAL 5:11 Ma ‑zë n ‑bha 'ka, n dheebhang ‑nu, 'mii‑ pö ꞊dhɛ 'mɛ 'bha 'go 'gbannë ꞊në‑ 'gü 'yö 'i dha ‑sü ꞊slɔɔ. A‑ ‑pö 'mɛ 'bha bɔ Klisi 'ö ga "dhü ‑bha bha ꞊në‑ 'ka 'yö 'i‑ ꞊slɔɔ. 'Wɔn 'ö‑ ‑wɔn 'gü 'yö 'wo n ‑wëë ‑kë "dhiʋ̈ bho sië ‑kpɛawo bha 'yö bha. Yö ‑zë 'yaa "dhʋ̈ 'nu kö 'yii 'dho kë mɛ 'bha ‑siödhɛwɔn 'ka.
GAL 5:12 'Wɔn ‑zian 'ö n zuë" 'dhö bhɔ sië‑ ‑bha yö ‑mü ꞊dhɛ kö 'mɛ 'wo ka ꞊klang kë sië "dhʋ̈, 'ö 'wo ka zuë" kaan‑ sië "kwëë 'ö‑ ‑nu "piʋ̈ ꞊dhɛ 'ka 'dho 'gbannë 'gü bha (‑wa 'dhɛ ‑zian 'ö ‑ziö ‑a 'dhɛ bha‑ ‑ta bha‑ kë), kö ‑wo wo bho gɔɔndhɛ 'gü, kö‑ ‑nu 'gü ꞊në ‑yö see‑ do.
GAL 5:13 "Kɛɛ ka ‑zë, n dheebhang ‑nu, ka ‑dhɛ 'ö Atanna ‑ya wo bha ‑ya ‑kë "dhʋ̈ kö 'ka ‑da ka 'flëë‑ ꞊në‑ 'gü. ‑Kaa kë ꞊në‑ wo ‑së kö ‑a ‑ya ‑dɩ 'flëë‑ 'gü ‑sü 'ö "dhʋ̈ bha 'ka 'dho‑ kë 'wɔn ‑dɔ 'gü ‑gɔ 'ka kö 'ka ‑tosɛa kë ka ‑dɩ dhɔɔbhaa 'ka. Kaa ‑zian ‑zë ‑ka ‑tosɛa kë ‑dhɔ ꞊në‑ 'gü ka 'ko "piʋ̈ kö 'ka ka 'ko ‑nu ‑ta 'kun.
GAL 5:14 ‑A ‑gɛn ‑mü ꞊dhɛ Atanna ‑bha 'tɔng‑ "pɛpɛ bha‑ ꞊gban ‑yö ‑slɔɔ ‑a doseng ꞊në‑ 'gü. 'Yö ‑kë: «I këyɔɔ ‑dhɔ ‑yö i kë ꞊dhɛ i ‑dɩ 'dhö» bha‑ 'ka.
GAL 5:15 "Kɛɛ ꞊ya kë ꞊dhɛ 'kii "yan ‑zë dɔ ka 'ko ‑nu ‑bha, kö 'ka ka 'ko 'kun ꞊dhɛ "bü ‑wü ‑nu 'dhö, kö kaa ka 'ko ‑nu 'gü see‑ ꞊naa bha. ‑Ka ka ‑dɩ 'kun yö ꞊në‑ ‑gɔ.
GAL 5:16 'Ö "dhʋ̈ 'dhö ‑mü, (n dheebhang ‑nu,) ‑ka dɔ "gbɩɩ‑ kö 'ka ka "tʋ 'to Atanna ‑bha 'Nii‑ "slʋ̈ʋ̈slʋ̈ 'ö ka 'gü bha‑ ‑wʋ ‑bha kö 'ka‑ ꞊bhlëë ‑ya, kö yö ꞊në ‑yö zun ka ‑dhɛ "dhiʋ̈. 'Ka 'dho ‑tosɛa kë ka ‑dɩ ꞊nii ‑bha.
GAL 5:17 ‑A ‑gɛn ‑mü ꞊dhɛ ‑tosɛa 'dhɛ 'ö mɛ ‑ya ‑kë mɛ ‑dɩ ꞊nii ‑bha bha waa‑ 'dhɛ 'ö go Atanna ‑bha 'Nii‑ bha‑ 'gü bha‑ ‑nu kë ‑kɔ 'yaa do, 'yaa bhɔ ‑zianwo 'kwëë‑. 'Wɔn 'ö‑ ‑wɔn 'gü 'yö 'kii 'dho ka ‑bha 'ö ‑dhi ka ‑dhɛ ꞊në‑ kë bha 'yö bha.
GAL 5:18 ꞊Ya kë ꞊dhɛ Atanna ‑bha 'Nii‑ 'kö bha 'ö ka ‑dhɛ "dhiʋ̈, kö‑ ‑bha 'tɔng‑ 'yaa ka ‑ta 'zü ꞊naa bha.
GAL 5:19 'Sa mɛ ‑dɩ ‑dhidhɛwɔn ‑nu 'ö 'dhö 'yaa ꞊dhɛng. Yö ‑mü "yënng dɔ ‑sü ‑nu oo, ‑zua zë ‑sü ‑nu oo, 'wɔn "bhluubhlu ‑nu kë ‑sü ‑nu oo,
GAL 5:20 ꞊gebhɔ ‑nu ‑dhɔkë ‑sü ‑nu oo, "zʋʋdhɛ kë ‑sü ‑nu ꞊në‑ 'ka, 'yö 'wo ‑ya wo 'ko ‑san 'ka, 'yö 'wo "dhinaa ‑nu ma, 'yö 'wo ꞊drɔ ‑nu ‑kë wo "kwëë, 'yö bhlɔɔ ꞊në ma mɛ 'gü 'wɔn ꞊gban ‑wɔn ꞊gban 'gü, 'yö 'wo ‑kë ‑duɛ 'kɔɔ‑ ‑mɛ ꞊në‑ 'ka, 'yö 'wo zaɔdhe ‑da wo "kwëë, 'yö 'wo wo 'ko ‑nu ‑pɛ 'gü.
GAL 5:21 Zuë" ‑bhɔ pë ‑bha ‑sü ‑nu, we "gblʋ̈gblʋ̈ mü ‑sü ‑nu, waa‑ "gblʋ̈ʋ̈dhɛ "gbɛadhɛ kë ‑sü ‑nu 'wo bha, "ɛɛn 'zü 'wɔn ‑nu 'wo bhɔ ‑a 'dhɛ ‑nu bha‑ ‑nu ‑bha bha‑ kë ‑sü ‑nu bha ꞊në‑ 'ka. 'Sa 'ma‑ ‑blɛɛsü pö 'nu ka ‑dhɛ, 'yö 'a‑ 'bha pö sië 'zü bha: A‑ ‑pö ꞊dhɛ mɛ "pɛpɛ 'wo ‑tosɛa ‑kë ꞊dhɛ ‑kɔ bha‑ 'dhö ‑a 'bha 'wii 'dho ‑duɛ ꞊slɔɔ Atanna ‑bha ‑gblüdëdhɛ bha‑ 'gü.
GAL 5:22 "Kɛɛ Atanna ‑bha 'Nii‑ "slʋ̈ʋ̈slʋ̈ ‑zë ‑yö ‑dhɔ ꞊në‑ ‑da mɛ ‑zʋ ‑bha, 'yö mɛ ꞊nii ‑yö ‑da, 'yö mɛ zuë" ‑yö 'waanu, 'yö mɛ zuë" ‑yö ‑kë 'zü ‑sɛa, 'yö mɛ "klʋ 'dhö ‑dhi, 'yö mɛ 'dhö ꞊gbaɔ mɛ ‑nu ‑gɔ, 'yö mɛ 'yaa ‑wʋ ꞊plɛ pö, 'yö mɛ 'dhö ‑kë dhɔngdhɔngsü mɛ "pɛpɛ ꞊gban ‑dhɛ, 'yö mɛ ‑kɔ ‑yö ꞊mɔɔ mɛ ‑dɩ ꞊sɔng ‑bha.
GAL 5:23 'Sa ‑tosɛa ‑kë ‑kɔ suu 'dhɛ 'kö bha Atanna ‑bha 'tɔng‑ 'yaa ‑kɔ 'ka.
GAL 5:24 Mɛ "pɛpɛ 'ö ꞊wa kë Yesu Klisi ‑bha 'ka, wo ‑zë ꞊wa wo bo wo ‑dɩ 'ka, 'wɔn yaa ‑nu 'wo gun‑ ‑nu ‑dhidhɛwɔn 'ka, 'ö‑ ‑nu zuë" gun bhɔ sië‑ ‑bha bha ꞊wa "kan‑ ‑bha, ꞊wa kë ꞊dhɛ mɛ ꞊ya ga ‑zian ꞊në‑ wo 'pë 'ö‑ ‑gɔ ‑a 'dhö.
GAL 5:25 ꞊Dhɛ 'ö ‑kë ꞊dhɛ Atanna ‑bha 'Nii‑ bha ꞊në ꞊sii ‑kë kwa ‑dhɛ bha, ‑a ‑dhɛa ‑bha 'pö ꞊dhɛ yö ꞊në ‑yö zun kwa ‑dhɛ "dhiʋ̈ kwa "ta ‑kɔ ‑nu 'gü.
GAL 5:26 'Kwa 'dho kwa ‑dɩ 'sü 'kpii‑, 'ö 'kwa kwa 'ko ‑nu ‑wʋ ga ‑wo 'ka‑ ‑nu ‑bha, "ɛɛn 'zü 'ö kwa "tɛado ‑san ‑yö kwa ‑kë ‑a ‑dɩa pë "piʋ̈.
GAL 6:1 N dheebhang ‑nu, ꞊ya kë ꞊dhɛ 'ka "kan ka ‑bɔ Yesu 'ka "yɔɔ 'bha 'gü kö ‑yö 'wɔn yaa suu "ʋʋ suu 'ö kë sië, 'mɛ 'ö ka ‑zë Atanna ‑bha 'Nii‑ bha 'ö ka 'gü bha, ‑kaa "slë mɔɔ‑ kö ‑yö ‑da zian ‑së ‑ta, ‑ka ‑dhio dɔ‑ ‑ta, "kɛɛ ‑ka ka zuë" ꞊zɔɔ kö 'ka‑ dɔ ‑wʋ "nɛɛnɛɛ 'ka. 'Mɛ 'i dho‑ ‑dhio bha‑ dɔ "dhʋ̈ bha bhii ‑dɩ 'pö ‑bhö i ‑dɩ 'kun, kö 'bha 'dho ‑da 'wɔn yaa bha‑ 'gü 'pö.
GAL 6:2 ꞊Ya 'go yö ‑zë 'gü, 'wɔn "pɛpɛ 'ö yaa‑ ‑da ka ‑ta, ‑ka ka 'ko ‑nu ‑ta 'kun‑ 'gü. 'Ka‑ kë sië "dhʋ̈ kö ka Klisi ‑bha 'tɔng‑ bha ꞊në‑ ꞊bhlëë ‑ya sië bha.
GAL 6:3 Mɛ 'ö 'yaa pë 'bha 'ka, ꞊yaa‑ pö ö ‑dɩ ‑dhɛ 'ö pë 'bha 'ka, kö ‑yö "kpënng‑ ꞊në‑ ‑kë sië ö ‑dɩ ‑gɔ "wɛɛwɛɛ.
GAL 6:4 'Mɛ 'ö 'dhö ‑yö ö ‑dɩ "ta ‑kɔ ‑ga, "ni 'ö ꞊mɔɔ‑ ‑bha 'ö ö ‑dɩ ꞊gɔɔn, kö ‑yö ö ‑dɩ ꞊gɔɔn 'ö këwɔn ‑bha, kö 'ya 'dho‑ ‑ya mɛ ‑kpɛa ‑nu ‑bha "dhiʋ̈ 'ö ö ‑dɩ fië‑ bho‑ ‑nu ‑bha.
GAL 6:5 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'ö "dhʋ̈ ‑yö ‑dho dɔ Atanna ‑kuu "dhiʋ̈ ö ꞊sɔng ꞊në‑ 'ka.
GAL 6:6 Mɛ 'wo‑ ꞊klang kë sië Atanna ‑wʋ 'ka, ‑a ‑dhɛa ‑bha ꞊dhɛ ‑a ‑mɛ ‑yö ö ꞊slɔɔpë bha‑ 'bha ꞊gbaɔ 'mɛ 'ö‑ draan‑ sië bha‑ ‑gɔ.
GAL 6:7 'Ka 'dho ka ‑dɩ ‑tama, mɛ 'bhaa "kpënng‑ kë Atanna ‑gɔ. "Dhü 'ö mɛ ‑ya ta 'yö mɛ ‑ya bhɛ bho.
GAL 6:8 'Mɛ 'bha ‑tosɛa kë i ‑dɩ ꞊nii ‑bha, ‑a ꞊trɔɔn 'ö ga 'ka bha ꞊në 'i dho‑ ꞊slɔɔ. "Kɛɛ 'bha ‑tosɛa kë ꞊dhɛ ‑kɔ 'ö Atanna ‑bha 'Nii‑ "slʋ̈ʋ̈slʋ̈ ‑ya ‑zɔn 'ka i ‑dhɛ ‑a 'dhö, i ‑dho ꞊sii 'ö 'yaa yën bha‑ ꞊slɔɔ ‑a 'saa‑ 'gü.
GAL 6:9 Kwa 'gü 'ya 'dho ga 'wɔn ‑së kë ‑sü 'ka. ‑A 'klɔɔ‑ ‑mü ꞊dhɛ kwa 'gü 'yii ga 'wɔn ‑së kë ‑sü 'ka, kwa ‑dho ‑a ꞊trɔɔn ꞊slɔɔ Atanna ‑bha zadɔyi 'ka.
GAL 6:10 ‑A ‑kë "dhʋ̈ ‑sü bha‑ 'gü, 'wɔn ‑së kë "sɩ ‑zë 'ö ‑tun kwa ‑dhɛ, ‑ka ‑kwaa kë "tʋ̈ng ꞊gban ‑tʋ̈ng ꞊gban 'gü, "kɛɛ ‑ka ‑kwaa kë kwa dheebhang ‑nu 'wo Yesu ‑bha 'ka bha ꞊në‑ ‑nu ‑dhɛ 'kpiisü.
GAL 6:11 Mang ꞊dede ꞊në 'a 'sëëdhɛ ya‑ ‑bɛn zë n ‑dɩ ‑kɔ "dhɛ 'ka ꞊dhɛ ‑kɔ 'ö kaa ꞊dede ka "yan 'dhö‑ ‑bha 'ka 'ö‑ "yanga ꞊gban 'dhö "gblʋ̈gblʋ̈ bha‑ 'dhö 'yö 'a‑ bɔ ka ‑dhɛ bha.
GAL 6:12 A‑ ‑pö ka ‑dhɛ ꞊dhɛ 'mɛ 'wo ‑gban sië ka ‑bha ‑dho 'gbannë 'gü ‑wɔn 'ka bha ‑wo wo ‑dɩ ‑dhi mɛ ‑nu ‑dhɛ ‑dhɛ ꞊në‑ mɔɔ‑ sië, kë "dhʋ̈ kö 'wa 'dho‑ ‑nu ‑wëëdhɛ bho ‑a pö ‑sü 'ö ꞊dhɛ Klisi ‑bha ga 'ö‑ wo "dhü ‑bha bha 'mɛ 'bha 'dhang bho yö ꞊në‑ "dhiʋ̈ kö 'bha dha bha‑ ‑wɔn 'gü.
GAL 6:13 'Mɛ 'wo "dhʋ̈ bha wo ‑zë 'waa Atanna ‑bha 'tɔng‑ ‑kpɛa ꞊bhlëë ‑ya, ‑wa ‑kë "dhʋ̈ kö 'wo wo 'tɔ ꞊në‑ 'kun ('dho 'ö kaa‑ bho 'gbannë 'gü kö 'ka bɔ‑ ‑nu 'ka bha‑ ‑wɔn 'gü).
GAL 6:14 "Kɛɛ ma ‑zë 'wɔn 'ö n "piʋ̈ 'a n 'tɔ 'kun‑ 'gü yö ‑mü kwa Dëmɛ Yesu Klisi ‑bha ‑dɔ "dhü ‑bha ‑wɔn bha ꞊në‑ 'ka. ‑A 'klɔɔ‑ ‑mü ꞊dhɛ ‑a ‑dɔ "dhü ‑bha ‑sü bha ꞊në‑ ‑wɔn 'gü, 'yö 'ma kë ꞊dhɛ 'mɛ ꞊ya ga ꞊në‑ wo ‑a 'dhö "kpʋngtaapë ‑nu ‑gɔ, 'yö (mɛ ‑dɩ dhɔɔbhaawɔn "pɛpɛ 'ö "kpʋng ꞊taa yö bha), ꞊wa kë 'pö ꞊dhɛ 'pë ꞊ya ga ꞊në‑ wo‑ 'dhö n ‑gɔ.
GAL 6:15 ‑A ‑kë "dhʋ̈ ‑sü bha‑ 'gü, ‑dho 'gbannë 'gü ‑sü oo, ‑to ‑kplëë 'ka ‑sü oo, ‑a ꞊gban ‑yö "wlaawɔn ꞊në‑ 'ka. 'Wɔn 'ö ꞊bhlëëwɔn 'ka yö ‑mü (‑tosɛa ‑kë Atanna ‑bha ‑zian ‑ta ‑sü kö 'i kë) ꞊dhɛ 'mɛ 'ö ꞊ya bhɔ ‑dee wo ꞊në‑ 'dhö bha ꞊në‑ 'ka.
GAL 6:16 A ‑bhɛa Atanna ‑dhɛ kö mɛ "pɛpɛ wo ‑tosɛa kë sië ꞊dhɛ ‑kɔ 'a‑ pö‑ 'ka bha‑ 'dhö, ‑yö zuëwaanusü nu wo ꞊në‑ ‑nu ‑dhɛ, kö ‑yö ö "klʋ‑ dhi‑ ‑nu ‑bha, waa‑ mɛ "pɛpɛ 'ö ꞊wa bɔ‑ 'ka ‑a ‑nu 'dhö.
GAL 6:17 ꞊Ya 'go yö ‑zë 'gü, ꞊ya 'go ꞊dɛɛ 'gü mɛ 'bha ‑mɛ 'bha 'ya 'dho‑ pö 'ö zuëdhiʋ̈tɛɛ ‑ya n ‑bha 'zü tongtongdhö, ‑a 'klɔɔ‑ ‑mü ꞊dhɛ "kpaa ‑nu 'wo n ‑bha ya ꞊në‑ ‑zɔn ꞊dhɛ 'maa mɛ "wɛɛ 'bha ‑bha ꞊dhuëng 'ka kö 'yii kë Yesu ‑zë 'ka (‑a ‑gɛn ‑mü ꞊dhɛ ma ‑nu 'wo‑ bho‑ ‑wɔn 'gü ꞊në‑ "kpaa 'dhö n ‑bha ya!).
GAL 6:18 'Ö "dhʋ̈ n dheebhang ‑nu, kö kwa Dëmɛ Yesu Klisi ‑yö ‑gasitɛ kë mɛ ꞊gban "pɛpɛ ka ‑dhɛ bha 'aa ‑yö kë.
EPH 1:1 Mang Pɔdhö ‑mɛ 'ö ga Atanna 'gü kö 'ö n ‑ya Yesu Klisi ‑bha bɔmɛ 'ka bha, ma ꞊në 'a 'sëëdhɛ ya‑ bɔ 'mɛ 'ö 'ka bɔ Yesu Klisi 'ka, 'ö 'ka ‑ya ‑sü 'ka Atanna ‑bha ‑ya 'gü Efɛzö ‑pö 'gü, 'ö 'kii 'go ka ‑wʋ ‑ta bha ka ‑dhɛ.
EPH 1:2 Kö kwa Dë Atanna waa‑ kwa Dëmɛ Yesu Klisi ‑wo zuë" 'waanu ‑sü waa‑ ‑gasitɛ kë ka ‑dhɛ bha 'aa ‑yö kë.
EPH 1:3 ‑Ka ‑kwa kwa Dëmɛ Yesu Klisi Dë Atanna bha‑ nuɛ" bho! ‑A ‑gɛn ‑mü ꞊dhɛ ꞊ya 'wɔn ‑së "pɛpɛ 'ö dhang‑ 'gü bha‑ ꞊gban 'do 'do kë kwa ‑dhɛ ‑a ‑bha 'Nii‑ "slʋ̈ʋ̈slʋ̈ bha‑ ‑kɔ 'ka Yesu Klisi 'saa‑ 'gü, "wɩ 'kwa‑ wo‑ ‑wɔn ‑bha bha‑ ‑wɔn 'gü.
EPH 1:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑yö kwa ‑sü 'ö kwa ‑ya ö ‑bha ‑ya 'gü Klisi 'saa‑ 'gü "dhʋ̈ kö 'yii "kpʋngtaadhɛ ‑zian ‑da ꞊kö. Kë "dhʋ̈ kö 'kwa kë 'mɛ 'ö "slʋ̈ʋ̈slʋ̈, 'ö pö ‑tangga ‑zian 'yaa‑ ‑bha ‑a 'ka ö wëëdhö.
EPH 1:5 ‑Yö ‑ga Atanna do bha ꞊në‑ 'gü "dhiʋ̈ yi 'bha 'ka, kwa ‑dhɔ ‑bha ‑a kë ‑sü ‑wɔn 'gü, 'yö kwa ‑kë ö ‑bha 'në 'ka Yesu Klisi 'saa‑ 'gü.
EPH 1:6 Kë "dhʋ̈ kö ‑a ‑bha ‑gasitɛ ‑ziisü 'ö‑ ‑kë kwa ‑dhɛ ‑a Gbö dhɔɔbhaa ‑sü bha‑ 'saa‑ 'gü bha ‑a 'tɔ ‑yö bhɔ‑ ‑wɔn 'gü.
EPH 1:7 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Klisi ꞊yɔɔn 'ö ꞊wɛnng‑ zë ‑dhɛ 'gü bha ꞊në kwa ‑gɔta dhɔ, 'yö Atanna ‑yö kwaa‑ 'wɔn yaa ‑nu ‑mawɔn to. ‑Yö ö ‑bha "klʋsëdhɛ ‑ziisü bha‑ ‑zɔn kwa ‑dhɛ ‑kɔ bha ꞊në‑ 'gü,
EPH 1:8 'wɔndɔdhe waa‑ ‑gleng 'gbɛ ꞊dede ꞊gban suu 'do 'do ‑nu kwa ‑dhɛ ‑sü 'ka.
EPH 1:9 'Wɔn 'ö gun ‑bin ‑sü 'ka Atanna zuë" "piʋ̈ yi 'bha 'ka, 'ö yöö do ꞊në gun ö ‑bha pë dɔ sië bha, ꞊yaa‑ ‑zɔn kwa ‑dhɛ dɔ 'kwa‑ wo ꞊dɛɛ ya‑ 'gü.
EPH 1:10 'Wɔn 'ö "dhʋ̈ bha yö ‑mü ꞊dhɛ ‑yö ‑gun Atanna "piʋ̈ ꞊dhɛ pë "pɛpɛ 'ö dhang‑ 'gü, "ɛɛn 'ö "kpʋng ꞊taa, 'ö‑ ꞊gban "pɛpɛ ꞊loo 'ko ‑ta kö ‑a "tʋ̈ng ꞊ya ꞊loo, kö‑ ‑gɔmɛ ‑yö kë doseng, kö ‑yö kë Klisi ꞊në‑ 'ka.
EPH 1:11 'Mɛ 'kwa 'dhang bho Klisi "dhiʋ̈ Zuifö ‑nu kpö 'gü bha kwa kwa ‑bha 'wɔn ‑së ‑nu 'ö Atanna ‑ya "plüün bho kwa ‑dhɛ bha‑ ‑slɔɔ kwa ‑bha 'dhang ‑bho ‑a "dhiʋ̈ ‑sü bha ꞊në 'saa‑ 'gü; ‑a ‑gɛn ‑mü ꞊dhɛ Atanna ‑yö kwa ‑ya bha‑ ‑wo ‑dɩ ‑ta "dhʋ̈ yi 'bha 'ka ꞊dhɛ ‑kɔ 'ö gun‑ 'ka‑ zuë" "piʋ̈ ꞊në‑ 'dhö, "kɛɛ 'sa 'wɔn "ʋʋ 'wɔn 'ö‑ ‑ya ö ‑zʋ "piʋ̈, ‑ya ‑kë 'pö yö ꞊në‑ ‑kɔ ‑bha.
EPH 1:12 Kë "dhʋ̈ kö 'mɛ 'kwa ‑kë mɛ ‑blɛɛsü 'wo 'dhang bho Klisi ‑wɔn "dhiʋ̈ ‑a ‑nu 'ka bha 'kwa kë‑ 'tɔ ‑bhɔbhamɛ 'ka.
EPH 1:13 ‑Kɔ do bha‑ 'gü, 'mɛ 'ö 'kaa Zuifö 'ka kaa ‑dɩ 'pö, ꞊dhɛ 'ö 'ka bo tɛanwɔn 'ö ‑gban Atanna ‑bha, 'ö ‑kë 'wɔn ‑taɔng ‑së 'ö ‑gban Klisi ‑wɔn ‑bha, 'ö dhasü nu ka ‑dhɛ bha‑ bha‑ ma ‑sü 'ka, 'yö 'ka 'dhang bho Yesu bha‑ "dhiʋ̈, 'yö Atanna ‑yö ö ‑bha 'Nii‑ "slʋ̈ʋ̈slʋ̈ 'ö‑ "plüün bho mɛ "bhɩɩ‑ ‑nu ‑dhɛ, 'ö ꞊dhɛ‑ ‑kɔ "gblʋʋ 'dhö bha‑ ‑ya ka 'gü.
EPH 1:14 'Nii‑ 'ö "dhʋ̈ bha ꞊në ꞊dhɛ 'wɔn ‑së ‑nu 'ö Atanna ‑ya "plüün bho kwa ‑dhɛ bha‑ taɔng 'dhö, 'yö 'dhang bho ‑sü 'ö‑ "dhiʋ̈ ꞊dhɛ ‑yö ‑dho 'wɔn ‑së ‑nu bha‑ kë mɛ "pɛpɛ 'ö kwa ‑ya ö 'tɔbhɔbhamɛ 'ka bha kwa ‑dhɛ dhasü bha‑ ‑gɔ ‑da 'plöö ‑yi 'ka bha‑ nu kwa ‑dhɛ.
EPH 1:15 'Wɔn 'ö‑ ‑wɔn 'gü 'yö ꞊dhɛ 'ö mang ‑dɩ 'pö 'ma ka 'dhang ‑bho kwa Dëmɛ Yesu "dhiʋ̈ ‑kɔ bha‑ ma, 'ö 'ma‑ ma 'zü ꞊dhɛ mɛ "pɛpɛ 'wo bɔ Atanna 'ka ‑a ‑nu ‑dhɔ ‑yö ka ‑kë ꞊dedewo,
EPH 1:16 'yö n 'gü 'yaa ga Atanna nuɛ" bho ‑sü 'ka ka ‑wɔn 'gü, 'yö 'a bhɛa" sië‑ ‑dhɛ ‑kɔ "ʋʋ ‑kɔ 'ö‑ 'gü 'yö 'a ka ‑bha ‑da 'gü bha 'yö bha.
EPH 1:17 Kë "dhʋ̈ kö kwa Dëmɛ Yesu Klisi ‑bha Atanna 'ö kwa Dë 'ka 'ö‑ ‑bha 'tɔbhɔdhe 'dhö ‑ziisü bha ‑yö ka gba 'wɔndɔdhe 'ka, kö ‑yö ö dɔ ‑sü bha‑ ‑bhɔdhɛ bhɔ ka ‑dhɛ,
EPH 1:18 kö ‑yö ka zuë" "dhiʋ̈ "pʋ, kö 'wɔn 'ö ‑zʋgɔndhɛwɔn 'ka ‑a ‑bha kwa ‑dhɛ 'ö‑ wo bha‑ 'gü bha, 'ka‑ yö kö 'ka‑ ꞊bhlëë dɔ, kö 'tɔbhɔdhe 'ö 'wɔn ‑së ‑nu 'ö‑ ‑ya mɛ "pɛpɛ 'wo bɔ Yesu Klisi 'ka ‑a ‑nu ‑gɔ bha‑ ‑kë ‑ziisü ‑kɔ bha 'ka‑ dɔ 'pö
EPH 1:19 kö 'ka‑ 'wɔn dɔ 'pö 'kpakpadhö ꞊dhɛ ‑a ‑bha 'gügbɩɩdhɛ bha ‑yö ‑ziisü, ‑a "dhiʋ̈todhɛ 'yaa 'dhö 'mɛ 'kwa bɔ‑ 'ka bha kwa ‑dhɛ, "kɛɛ ‑yö ‑kë "dhʋ̈ faan 'ö‑ 'gü bha ꞊në‑ ‑wɔn 'gü.
EPH 1:20 "Kɛɛ 'sa 'gügbɩɩdhɛ 'ö "dhʋ̈ bha ‑ya ‑zɔn kwa ‑dhɛ Klisi ꞊në‑ 'saa‑ 'gü, ‑a ‑bho ga 'gü ‑sü kö ‑ya ‑bö, kö ‑ya 'sü ‑ya ‑ya ‑yɛa ‑së 'ö‑ "piʋ̈ dhang‑ 'gü bha‑ 'gü,
EPH 1:21 ‑ziömɛgɔpë ‑nu oo, 'gügbɩɩdhɛ ‑pë ‑nu waa‑ faanpë ‑nu oo, ꞊bhlëë ‑pë ‑nu waa‑ 'tɔ suu "pɛpɛ 'wo ꞊mɔɔ‑ ‑bha 'wo‑ kpɔ "tʋ̈ng 'kwa dɔ‑ 'ka ya‑ 'gü, "ɛɛn ‑dhɛ 'bha ꞊kpaɔ ‑yi ‑zian ‑bha bha‑ ‑nu ‑gɔ "dhiʋ̈ ‑sü ꞊në‑ 'ka.
EPH 1:22 Klisi bha ꞊në Atanna 'dhö pë ꞊gban "pɛpɛ suu ‑da ‑sü 'ka‑ ‑gɛn ꞊wlöö, 'yö‑ 'sü ‑sü 'ka 'yö‑ ‑ya mɛ "pɛpɛ 'wo bɔ‑ 'ka ‑a ‑nu ‑gɔmɛ 'kpii‑ ‑sü 'ka.
EPH 1:23 "Kɛɛ 'sa Atanna ‑bha mɛ "pɛpɛ ꞊gban ‑loo 'ko ‑ta ‑sü 'ö "dhʋ̈ bha ꞊në ꞊dhɛ yöö Klisi ‑mɛ 'ö "kpʋngtaadhɛ ‑todhʋ̈sü pa ‑sü 'ka bha‑ ‑dhü 'ö ‑tosɛa ‑kë 'gü waa‑ ö ‑bha 'gügbɩɩdhɛ ꞊gban 'dhö ‑a 'ka.
EPH 2:1 'Ö gun ‑blɛɛsü kö 'kii Yesu dɔ ꞊kö, 'wɔn yaa ꞊në 'ka gun‑ kë sië, 'ö ka Atanna ‑siödhɛwɔn ‑nu ‑kë. ‑A ‑wɔn 'gü ka ‑gun ‑gɔ ꞊dhɛ 'mɛ ꞊ya ga ꞊në‑ 'dhö.
EPH 2:2 Ka ‑gun ‑tosɛa kë sië‑ "tʋ̈ng bha‑ 'gü ꞊dhɛ ‑kɔ 'ö 'mɛ 'waa Atanna dɔ 'wo "kpʋng ya‑ ꞊taa 'wo ‑tosɛa ‑kë 'ka bha ꞊në‑ 'dhö, 'yö 'ka "yina ‑nu ‑bha ‑gblüdë 'ö ‑ya ‑sü 'ka 'tëng‑ ‑ta "sɛ waa‑ dhang‑ ‑a ‑nu ꞊zinng 'gü bha ꞊në‑ ‑dhidhɛwɔn ‑kë. "Kɛɛ 'sa ‑a "yina 'ö "dhʋ̈ bha ꞊në ‑da 'mɛ 'wo gɔɔgbɩɩdhɛ kë sië Atanna ‑gɔ "tʋ̈ng ya‑ 'gü bha‑ ‑nu ‑gɔ 'gü 'yö 'wo‑ kë sië "dhʋ̈ bha.
EPH 2:3 Mɛ "pɛpɛ ꞊gban kwa gun ꞊dhɛ wo ꞊në‑ ‑nu 'dhö, 'ö 'kwa ‑tosɛa ‑kë ‑kɔ 'ö ‑dhi kwa ‑dhɛ ꞊në‑ 'ka, 'ö 'wɔn yaa suu "ʋʋ suu 'ö nu kwa ‑gɔ 'gü ꞊në 'kwa‑ ‑kë, 'ö‑ ‑kë "dhʋ̈ ‑sü bha‑ ‑wɔn 'gü, 'ö gun ‑bɛn zë ‑sü 'ka kwa ‑bha ꞊dhɛ Atanna ‑dho 'wɔn bho kwa 'gü kwa suu bha‑ ‑wɔn 'gü ꞊dhɛ mɛ ‑kpɛa ꞊gban 'dhö.
EPH 2:4 "Kɛɛ 'yö kwa ‑wëë 'ö Atanna ‑kë ‑a "sinma 'yii kë, 'yö kwa ‑dhɔ 'ö‑ ‑kë ‑a ‑naa 'yii kë.
EPH 2:5 Yö ꞊në‑ ‑wɔn 'gü, 'yö 'mɛ 'kwa gun ꞊dhɛ 'mɛ ꞊wa ga Atanna ‑gɔ ‑a ‑nu 'dhö kwa kë ‑sɔng yaa ‑nu ‑wɔn 'gü bha, 'yö kwa ꞊nëng Klisi ‑bha, 'yö kwa ‑kë ‑tosɛa ‑dee 'bha këmɛ 'ka. ‑Gasitɛ ꞊dede ꞊në Atanna ‑ya ‑kë ka ‑dhɛ 'yö ka dha.
EPH 2:6 Kwa ‑bha ‑kplü Yesu Klisi ‑bha ‑sü bha‑ ‑wɔn 'gü ꞊dhɛ 'ö kwaa Klisi ‑nu kwa ‑bö, 'yö kwa gba ‑yɛa 'ka ö "piʋ̈ dhang‑ 'gü kö kwɛng‑ ‑nu 'kwa mɛdhɛ ‑kë.
EPH 2:7 Kë "dhʋ̈ kö ‑ya ‑zɔn ‑dhɛ 'bha ꞊kpaɔ ‑yi ‑bha ꞊dhɛ ‑gasitɛ 'ö‑ ‑kë kwa ‑dhɛ bha ‑yö ‑ziiziisü, ‑a ‑zɔn 'ka 'bha ‑zian ꞊në 'yaa 'dhö ‑a "klʋ 'ö‑ ‑dhi kwa ‑dhɛ Yesu Klisi 'saa‑ 'gü bha‑ ‑wɔn 'gü.
EPH 2:8 ‑A ‑gɛn ‑mü ꞊dhɛ ‑gasitɛ ꞊dede ꞊në Atanna ‑yö ka dha‑ ‑bha, 'dhang 'ö 'ka‑ bho Yesu "dhiʋ̈ bha‑ ‑wɔn 'gü, 'yii 'sü ka ‑bha, ‑yö ka gba ꞊dede ꞊në‑ wo‑ 'ka "wɛɛwɛɛ.
EPH 2:9 'Yii 'sü ka këwɔn ‑së ‑nu ‑bha, kë "dhʋ̈ kö mɛ 'bha 'ya 'dho‑ pö 'ö ö 'tɔ 'kun.
EPH 2:10 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yö ꞊në kwa ‑kë, 'yö kwa ꞊nëng Yesu Klisi ‑bha. Kë "dhʋ̈ kö këwɔn ‑sɛngbɔ ‑nu 'ö yöö ꞊dede 'ö‑ ‑pë ‑kë ‑yi 'bha 'ka kö 'kwa‑ kë bha 'kwa‑ kë.
EPH 2:11 'Wɔn 'ö‑ ‑wɔn 'gü, 'yö‑ ‑dhɛ 'yaa‑ ‑bha ꞊dhɛ 'mɛ 'ö 'kaa gun Zuifö 'ka, 'ö Zuifö ‑nu gun ka ‑dhɛ sië ‑kplëë ‑nu, "kɛɛ kö ‑a ‑nu ‑bha ‑go 'gbannë 'gü ‑sü ‑yö ‑kë mɛbhɩɩdhe ‑nu 'gü "slë "wɛɛwɛɛdhe ꞊në‑ 'ka bha ka ‑zʋ ‑yö bhɔ bha 'yö bha.
EPH 2:12 Kö ka ‑zʋ ‑yö ‑bö ꞊dhɛ 'ö gun "dhʋ̈ "tʋ̈ng bha‑ 'gü kö Klisi 'yaa ka ‑gɔ, kö ka ꞊dhɛ ‑dhɛng 'dhö, kö "sɛgɔ 'ö Atanna ‑ya sü ö ‑bha 'ka bha 'kaa‑ 'gü ‑mɛ 'ka, kö ‑mlɛɛ 'ö‑ "plüün bho ö ‑bha "sɛgɔ bha‑ 'gü ‑mɛ ‑nu ‑dhɛ bha, 'kaa‑ "sɔɔ ‑zianwo, kö ka ‑tun ‑tosɛa kë ꞊dhɛ 'mɛ 'ö Atanna 'yaa‑ ‑gɔ, 'ö‑ ‑zʋgɔndhɛwɔn 'yaa 'dhö ꞊në‑ 'dhö.
EPH 2:13 "Kɛɛ kö ka ‑zʋ ‑yö ‑bö ꞊dhɛ ka 'ö 'ka gun Atanna 'ka ꞊gblɛɛn yi 'bha 'ka "dhʋ̈ bha 'ka ꞊yɔɔn‑ "sɔɔ ꞊dɛɛ Klisi 'saa‑ 'gü ‑a ꞊yɔɔn 'ö ꞊wɛnng kwa ‑wɔn 'gü ‑a ga ‑dhɛ 'gü bha‑ ‑wɔn 'gü.
EPH 2:14 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yöö Klisi ‑mɛ bha ꞊në ‑ya ‑dɩ 'flëë‑ 'gü ‑sü 'ö Atanna "piʋ̈ bha‑ nu kwa ‑dhɛ, yö ꞊në Zuifö ‑nu waa‑ 'mɛ 'waa Zuifö 'ka 'ö‑ ‑nu suu ‑yö gun 'do 'do bha‑ ‑nu ‑kë mɛ do 'ka, 'yö 'yaɔdhɛ 'ö gun kwaa Zuifö ‑nu kwa ꞊zinng 'gü bha‑ bho mü.
EPH 2:15 Yöö do bha 'zü ꞊në Zuifö ‑nu ‑bha 'tɔng‑ waa‑ ‑nu ‑bha 'wluu‑ ‑nu 'ö gun ‑naa ‑da sië kwɛng‑ ‑nu kwa ꞊zinng 'gü bha‑ bho‑ ‑bha. Kë "dhʋ̈ kö 'ö mɛ ‑gaɔ ꞊plɛ bha‑ ‑nu kë mɛ do 'ka ‑a ‑nu ‑bha ‑kplü ö ‑bha ‑sü 'gü, 'yö kwa ‑kɔ wü‑ 'ka 'koo.
EPH 2:16 ‑A ‑bha ga 'ö‑ wo "dhü ‑bha bha ꞊në ‑saanmɛkë 'ö gun ‑gaɔ ꞊plɛ bha‑ ‑nu ꞊zinng 'gü bha‑ bho mü, 'yö‑ ‑nu ‑kë mɛ do 'ka, 'yö waa‑ Atanna ‑nu ‑a ‑nu ‑kɔ wü 'koo.
EPH 2:17 ‑A ‑kë "dhʋ̈ ‑sü bha‑ 'gü, kö Klisi ‑yö ‑nu kö 'ö ‑dhikodhɛ ‑naɔ bha ꞊në‑ dɔ 'mɛ 'kaa Zuifö 'ka 'ö 'ka gun Atanna 'ka ꞊gblɛɛn ‑blɛɛsü bha waa‑ Zuifö ‑nu 'ö yi ‑zë 'yi gun‑ 'ka klöö‑ bha mɛ ꞊gban yi ‑gɔ.
EPH 2:18 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'yi Zuifö 'ka waa‑ 'mɛ 'kaa Zuifö 'ka, mɛ ꞊gban kwa ‑mɔɔ ‑bha ꞊dɛɛ 'ö 'kwa ‑wo Atanna wëëdhö ‑a ‑bha 'Nii‑ "slʋ̈ʋ̈slʋ̈ 'ö "dhʋ̈ doseng bha‑ ꞊yënng 'gü Klisi bha ꞊në‑ 'saa‑ 'gü.
EPH 2:19 ‑A ‑kë "dhʋ̈ ‑sü bha‑ 'gü kö 'mɛ 'ka bha, 'kaa ‑dhɛng 'ka Atanna ‑gɔ 'kɔɔdhö 'zü, "ɛɛn 'kaa "kpɛnngmɛ ‑nu 'ka 'zü 'dhang 'ka‑ bho Klisi ‑wɔn "dhiʋ̈ bha‑ ‑wɔn 'gü, "kɛɛ 'ka kë Atanna ‑gɔ 'pö‑ 'gü ‑mɛ ‑nu ꞊në‑ 'ka, ‑a ‑gɔ 'kɔɔ ‑në ‑nu ‑zian ꞊në‑ 'ka, ‑a ‑bha 'në ‑nu "piʋ̈.
EPH 2:20 Kaa ‑dɩ 'pö 'ka kë 'kɔ 'ö Atanna ‑ya dɔ, 'ö Yesu Klisi 'dhö‑ "kpan ‑ya ‑ta ‑gwë 'ka, 'ö Atanna ‑wʋdhiʋ̈loomɛ ‑nu waa‑ Yesu ‑bha bɔmɛ ‑nu 'wo‑ "kpan ‑ya bha‑ ‑kplü 'ka ꞊naa bha.
EPH 2:21 Yöö Yesu Klisi ‑mɛ bha ꞊në 'kɔ bha‑ ‑kë "gblʋ̈ʋ̈gblʋ̈, 'yö ꞊kpɛa 'yö ‑kë Atanna ‑dhɔkëgükɔ 'ö‑ "dhia ‑yö ma‑ 'gü, 'ö ‑dhii 'yaa‑ ‑bha ‑a 'ka.
EPH 2:22 Ka ‑bha ‑kplü Yesu Klisi ‑bha ‑sü bha‑ 'saa‑ 'gü, 'ka ‑da 'pö Atanna ‑bha 'në ‑nu ‑bhiëë 'gü, 'yö 'ka kë 'kɔ 'ö yöö ꞊dede ꞊ya bɔ ö ‑bha 'Nii‑ "slʋ̈ʋ̈slʋ̈ ‑ta kö ‑yö ‑ya 'gü bha‑ 'ka.
EPH 3:1 'Wɔn 'ö‑ ‑wɔn 'gü 'yö mang Pɔdhö ‑mɛ 'ö 'a Yesu Klisi ‑bha gwëëmi 'ka, 'a ‑kaso 'gü ‑a pö 'a‑ wo 'mɛ 'kaa Zuifö 'ka 'ka kë Atanna ‑bha 'në 'ka ‑a ‑wɔn 'gü, 'a ꞊bhɛa‑ ‑dhɛ ka ‑wɔn 'gü bha 'yö bha.
EPH 3:2 ‑Yö n 'gü ꞊dhɛ n ‑ya 'ö Atanna ‑ya wo ö ‑bha "klʋsëdhɛ bha‑ 'gü ka "dhiʋ̈ ‑ziö wo ‑mɛ 'ka bha, 'yaa ka tii' 'ka ‑wɔn ‑zë 'ka.
EPH 3:3 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Klisi ‑wɔn 'ö Atanna yöö do ꞊në gun‑ dɔ sië, 'ö mɛ 'bha 'yaa gun‑ 'gü yö sië bha, yöö ꞊dede ꞊në‑ ‑ta ‑pʋ n ‑dhɛ. "Kɛɛ 'sa 'wɔn 'ö "dhʋ̈ bha ꞊në 'a go‑ 'gü pö ka ‑dhɛ ‑wʋ 'dengdeng 'në 'ka bha.
EPH 3:4 ‑Wʋ ‑nu 'wo "dhʋ̈ bha ꞊në 'ka dho‑ 'wɔn dɔ‑ ‑bha ꞊dhɛ Klisi ‑wɔn 'ö gun ‑bin ‑sü 'ka "dhʋ̈ bha a 'wɔn 'në bha ‑dɔ 'gü.
EPH 3:5 'Wɔn bha‑ ‑ta "pʋ ‑kɔ 'ö Atanna ‑ya ‑pʋ 'ka ö ‑bha 'Nii‑ "slʋ̈ʋ̈slʋ̈ ‑kɔ 'ka Klisi ‑bha bɔmɛ ‑nu waa‑ ö ‑wʋdhiʋ̈loomɛ ‑nu "slʋ̈ʋ̈slʋ̈ 'wo ꞊dɛɛ ya‑ 'gü ‑a ‑nu ‑dhɛ bha 'yii‑ ‑blɛɛsü kë 'nu "dhʋ̈ mɛ 'bha ‑mɛ 'bha ‑dhɛ do.
EPH 3:6 "Kɛɛ 'sa 'wɔn 'ö‑ ‑ta ‑pʋ "dhʋ̈ bha yö ‑mü ꞊dhɛ naɔ ‑së 'ö ‑gban Yesu Klisi ‑bha 'wo‑ dɔ ka ‑gɔ bha‑ 'saa‑ 'gü, 'mɛ 'ö 'kaa Zuifö 'ka bha, kaa Zuifö ‑nu 'ka kë do, ‑dhɛkpaɔ dhia" saan 'ö Atanna ‑ya ‑ya 'nu ö ‑bha 'në ‑nu bha‑ ‑nu ‑gɔ bha ka ‑bha ꞊ya ‑da 'gü, kɛng‑ ‑nu 'ka kë mɛ do ꞊në‑ 'ka. 'Wɔn do 'ö Atanna ‑ya "plüün bho‑ ‑nu ‑dhɛ bha, 'ka kë‑ ꞊slɔɔmɛ 'ka 'pö Yesu Klisi 'saa‑ 'gü.
EPH 3:7 Kë 'a‑ wo Atanna ‑bha naɔ ‑së bha‑ dɔ ‑mɛ 'ka bha, yöö ꞊dede ꞊në‑ ‑bhɔdhɛ bhɔ n ‑dhɛ ‑a ‑bha "klʋsëdhɛ 'ka ‑a ‑bha 'gügbɩɩdhɛ ‑kɔ 'ka.
EPH 3:8 'Maa ‑zɔn mɛ "pɛpɛ 'wo bɔ Atanna 'ka 'ö ꞊wa kë "slʋ̈ʋ̈slʋ̈ bha‑ mɛ 'dɛdɛ ‑sü ‑zian 'ö‑ 'gü ‑a 'ka ‑mɛ 'ka, "kɛɛ 'sa Atanna ‑yö ‑gasitɛ bha‑ kë ‑sü 'ka ma ꞊në n ‑dhɛ kö 'a 'wɔn ‑së ‑ziisü 'ö‑ ‑kë mɛ "bhɩɩ‑ ‑nu kwa ‑dhɛ Klisi ‑nu kwa ‑dhɛ ‑sü 'ka bha‑ ‑naɔ ‑pö 'mɛ 'waa Zuifö 'ka ‑a ‑nu ‑dhɛ.
EPH 3:9 Kë "dhʋ̈ kö 'wɔn 'ö‑ ‑zʋ "piʋ̈, 'ö‑ "piʋ̈ ꞊dhɛ 'ö‑ kë ‑dhɛ 'bha ꞊kpaɔ ‑yi ‑bha bha 'a‑ ‑zɔn mɛ ꞊gban "pɛpɛ ‑dhɛ kö ‑wa dɔ. "Kɛɛ 'sa 'wɔn bha ‑yö ‑bhɔ Atanna 'ö pë ꞊gban "pɛpɛ ‑da ‑mɛ 'ka bha‑ ‑zʋ "piʋ̈ 'nu yi 'bha ‑yi 'bha 'ka, "kɛɛ ‑ya ‑ta "pʋ ‑sü 'ka ma ꞊në n ‑dhɛ kwa dɔ ‑kɔ ya‑ 'gü kö 'a‑ ‑ta "pʋ 'pö mɛ ꞊gban "pɛpɛ ‑dhɛ kö 'a‑ 'gü ‑ta 'sü ‑kɔ ‑zɔn ‑nu ‑dhɛ.
EPH 3:10 Kë "dhʋ̈ kö 'gügbɩɩdhɛpë ‑nu waa‑ mɛdhɛkëpë ‑nu 'wo dhang‑ 'gü ‑wa 'wɔn dɔ ꞊dɛɛ ‑yën ya‑ 'gü ꞊dhɛ Atanna ‑bha 'wɔndɔdhe bha‑ ‑gaɔ ‑yö 'gbɛ ‑a ‑bha 'kɔdhigümɛ ‑nu ‑loo 'ko ‑ta ‑sü ꞊gban ‑bu 'gü.
EPH 3:11 "Kɛɛ 'sa 'wɔn bha 'ö gun Atanna ‑zʋ "piʋ̈ ‑kɔ do 'ö‑ ‑bha ‑kpɛawo bha ‑ya ‑kë kwa ‑dhɛ kwa Dëmɛ Yesu Klisi 'saa‑ 'gü yö ꞊në‑ ‑kɔ ‑bha.
EPH 3:12 ꞊Ya kë ꞊dhɛ 'kwa ‑kplü ‑sü ‑zë 'ka Yesu Klisi bha, kö kwa ‑zʋ 'gɔn ‑sü ‑ya ‑dhɛ, kwa ‑mɔɔ ‑bha 'kwa dho Atanna ‑kuu "dhiʋ̈ kwa ‑ta "puu 'ka kö "sika 'bha ‑zian 'yaa kwa 'gü.
EPH 3:13 ‑A ‑kë "dhʋ̈ ‑sü bha‑ 'gü, bhɛa" ꞊në 'a‑ wo sië ka ‑dhɛ kö saan" 'a‑ wo sië ka ‑wɔn 'gü bha 'ya 'dho kë ka 'gü ga ‑gɛn 'ka, "kɛɛ kö ‑yö kë ka "yaan ꞊dhɛ ‑yö ka ‑bha 'ka ‑së.
EPH 3:14 'Wɔn "pɛpɛ 'ö Atanna ‑ya ‑kë kwa ‑dhɛ "dhʋ̈ bha ꞊në‑ ‑wɔn 'gü 'yö 'a zun n kpiö 'gü kwa Dë Atanna 'ö 'kɔdhi "pɛpɛ 'wo "sɛ ‑ta "ɛɛn 'wo dhang‑ 'gü 'wo go‑ 'gü bha‑ ‑dhɛ, 'yö 'a ꞊bhɛa‑ ‑dhɛ ka ‑wɔn 'gü.
EPH 3:16 Kë "dhʋ̈ kö ‑ya zë ö ‑bha 'tɔbhɔdhe ‑ziisü bha ‑dhɛ kö ‑yö ö ‑bha ‑gasitɛ bha‑ kë ka ‑dhɛ kö ‑a ‑bha 'Nii‑ "slʋ̈ʋ̈slʋ̈ bha ‑yö ka 'gü ‑gban faan ‑ziisü 'ö‑ 'gü bha‑ 'ka,
EPH 3:17 kë "dhʋ̈ kö Klisi ‑wɔn ‑yö 'to ka zuë" 'gü ‑kpɛawo ka ‑bha ‑zʋ ‑yö ‑a ‑dhɛ ‑sü 'gü. 'Ö 'a ꞊bhɛa‑ ‑dhɛ kö ‑yö ‑to ‑a "piʋ̈ ‑sü bha‑ "sɩ kë ka ‑dhɛ, kö ka ‑gɛn ‑yö ‑gban ꞊dedewo ‑dhɔ 'ö go‑ "piʋ̈ bha‑ 'gü,
EPH 3:18 kë "dhʋ̈ kö ‑kɔ 'ö kwa ‑dhɔ ‑bha Klisi kë ‑kɔ 'dhö‑ ‑bha, ‑ya "sɩ kë ka ‑dhɛ kö kaa‑ mɛ "pɛpɛ 'wo Atanna ‑bha mɛ 'ka 'ka ‑dhɔ bha‑ daɔng ‑bha ‑kë ꞊gblɛɛn ‑sü oo, ‑a ‑bha ‑kë "gbɛa ‑sü oo, ‑a ‑bha ‑kë zong ‑sü ‑sü oo ‑a ‑dɔ ‑gɛan ‑sü ‑bha ‑kë ꞊gblɛɛn ‑kɔ ‑nu 'wo ‑kɔ 'ö‑ ‑bha, kö 'ka‑ dɔ 'kpakpadhö ‑së 'ka.
EPH 3:19 A ‑bhɛa ‑dhɛ 'zü "dhʋ̈ kö Klisi ‑bha ‑dhɔ 'ö‑ ‑kë kwa 'ka, 'ö ‑ziö mɛ "bhɩɩ‑ ‑nu ‑bha 'wɔn 'gü ma ‑naa ‑zë ꞊gban ‑ta bha 'ka‑ 'gü ma, ‑a ‑gɛn ‑mü ꞊dhɛ yö ꞊në ꞊ya kë "dhʋ̈ 'yö 'ka dho ꞊mɔɔ‑ ‑bha 'ka Atanna ‑wɔn ‑gɛn bho ‑kɔ ꞊gban dɔ "pɛpɛdhö 'yö ka zuë" pa ‑kɔ ꞊gban ‑kɔ ꞊gban 'gü.
EPH 3:20 "Sɩ ‑yö Atanna ‑dhɛ, ‑a ‑wɔn 'gü ‑yö ‑mɔɔ ‑bha 'ö yë ‑kë kwa 'gü ö ‑bha 'gügbɩɩdhɛ ‑bha, 'yö 'wɔn "pɛpɛ 'kwa ꞊bhɛa‑ ‑dhɛ ‑a ‑wɔn 'gü, waa‑ 'dhɛ ‑zian 'kwa kwa ‑zʋ ꞊në‑ gɔn‑ 'ka bha 'ö‑ "dhiʋ̈ ‑ziö ‑ta ‑kë kwa ‑dhɛ. 'Wɔn 'ö‑ ‑wɔn 'gü 'yö 'a‑ pö ꞊dhɛ yö ꞊në‑ 'tɔ ‑yö bhɔ Atanna ‑bha 'kɔdhigümɛ ꞊gban ‑loo 'ko ‑ta ‑sü kpö 'gü ‑kpɛawo Yesu ‑bu 'gü kö ‑yö 'to‑ 'to ‑kɔ 'ka bha 'yö bha. Kö ‑yö kë "dhʋ̈ bha 'aa ‑yö kë!
EPH 4:1 ‑A ‑kë "dhʋ̈ ‑sü bha‑ 'gü, ma 'ö ma ‑zë a ‑kaso 'gü kwa Dëmɛ ‑wɔn 'gü bha bhɛa" ꞊në 'a‑ wo sië ka ‑dhɛ kö 'ka "ta ꞊dhɛ ‑kɔ 'ö Atanna 'ö ka ‑dhɛ bha 'ö‑ "piʋ̈ ꞊dhɛ ‑wa wo‑ 'ka ‑a 'dhö.
EPH 4:2 Kö "klʋ ‑yö kë ka 'gü, kö 'ka kë zuë" ‑kun ka ‑bha ‑mɛ 'ka, kö ka zuë" ‑yö kë ‑sɛa, kö 'ka ka 'ko ‑nu ‑kwɛɛ bun ‑dhɔ 'gü,
EPH 4:3 kö ‑kë do ‑sü 'ö Atanna ‑bha 'Nii‑ "slʋ̈ʋ̈slʋ̈ ‑ya ‑da ka ꞊zinng 'gü bha 'ka ka 'gü dɔ "gbɩɩ‑ kö yö ꞊në 'ya 'dho "kan tongtongdhö, "kɛɛ kö 'ka 'to ka 'ko ‑dhɛ ‑së ‑kpɛawo.
EPH 4:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Klisi ‑dhü 'ö Atanna ‑bha mɛ ‑nu ‑loo 'ko ‑ta ‑sü 'ka bha, ‑yö "dhʋ̈ doseng, 'ö Atanna ‑bha 'Nii‑ "slʋ̈ʋ̈slʋ̈ bha 'ö "dhʋ̈ 'pö do, 'ö ‑dhɛkpaɔ dhia" saan 'ö Atanna ‑yö ka ‑dhɛ 'ka 'ö 'ka "yan 'to sië‑ ‑gɔ bha 'ö doseng.
EPH 4:5 Kwa Dëmɛ ‑yö "dhʋ̈ 'pö doseng, 'ö 'dhang ‑bho ‑a "dhiʋ̈ ‑kɔ 'ö "dhʋ̈ 'pö doseng, 'ö mɛ ‑bɔ ‑a 'ka ‑zu bho ‑kɔ 'ö "dhʋ̈ doseng 'pö.
EPH 4:6 Atanna 'ö mɛ ꞊gban "pɛpɛ kwa Dë 'ka bha ‑yö "dhʋ̈ 'pö doseng, yö ꞊në pë ꞊gban "pɛpɛ ‑gɔ ‑ta, 'yö 'wɔn ‑nu ‑kë mɛ ꞊gban "pɛpɛ ‑kɔ ‑ta, 'yö mɛ ꞊gban "pɛpɛ kwa 'gü.
EPH 4:7 "Kɛɛ ‑bhɔdhɛ 'kö Klisi ‑ya bhɔ kwa ‑dhɛ bha mɛ 'ö "dhʋ̈ ‑a ‑bha ‑yö ‑dhö, "kɛɛ 'sa ‑yö 'mɛ 'dhɛ "dhʋ̈ ‑a ‑bha ‑nu ‑dhɛ ‑kɔ 'ö ‑dhidhɛ ꞊në‑ 'gü,
EPH 4:8 ꞊dhɛ ‑kɔ 'ö ‑bɛn zë ‑sü 'ka‑ 'ka‑ ‑wʋ 'sëëdhɛ 'gü ‑a 'dhö ꞊dhɛ: ‑Yö ꞊dhuëng ‑nu ‑nëng ö ‑bha kö ꞊ya 'to‑ "gbɩɩ‑ 'ka 'ö dho‑ ‑nu 'ka 'tëng‑ ‑ta ꞊gblɛɛn, 'yö ‑bhɔdhɛ ‑nu bhɔ mɛ "bhɩɩ‑ ‑nu ‑dhɛ» bha‑ 'dhö.
EPH 4:9 "Kɛɛ ꞊waa‑ pö Klisi ‑yö kë ‑dho 'tëng‑ ‑ta kö ‑wa pö ꞊dhɛ? Kö ‑wa ‑pö ‑yö lɔɔ‑ ꞊në‑ wo ꞊kö ‑blɛɛsü 'yö dho "sɛ ꞊wlöö ꞊gblɛɛn, 'yö ‑ya mü 'yö gun ‑na ‑tɔn 'kun‑ 'yö dho dhang‑ 'gü.
EPH 4:10 ‑A ‑gɛn ‑mü ꞊dhɛ mɛ do 'ö ꞊lɔɔ bha ꞊në go mü 'zü 'ö ‑tɔn kun, 'yö dho dhang‑ ‑ta "dhʋ̈ng 'gü ‑dhɛ ‑nu ꞊gban 'gü. Kë "dhʋ̈ kö yöö do 'ö kë ‑dhɛ ꞊gban "pɛpɛ 'gü, kö 'ö ‑ya pë ꞊gban "pɛpɛ ‑gɔ "dhiʋ̈.
EPH 4:11 Yö 'ö bha ꞊në mɛ 'bha ‑nu nu ö ‑bha bɔmɛ ‑nu 'ka ö ‑bha mɛ ‑nu kpö 'gü kö ‑wa ‑nu ‑ta 'kun, 'yö mɛ 'bha ‑nu ‑ya ö ‑wʋdhiʋ̈loomɛ 'ka, 'yö mɛ 'bha ‑nu ‑ya ö ‑bha naɔ ‑së bha‑ dɔmɛ ‑nu 'ka, 'yö‑ mɛ 'bha ‑nu ‑ya "yan ‑to ö ‑bha mɛ ‑nu ‑bha ‑mɛ ‑nu "ɛɛn ‑a ‑nu ꞊klangkëmɛ ‑nu 'ka.
EPH 4:12 Kë "dhʋ̈ kö ‑wo 'mɛ 'wo bɔ ö 'ka bha‑ ‑nu draan‑ yë 'ö‑ nu‑ ‑nu ‑dhɛ ‑a ‑bha zian ‑ta bha‑ kë ‑sü ‑bha, kö ‑a ‑bha mɛ ‑nu ‑loo 'ko ‑ta ‑sü 'ö wo ꞊në 'wo ꞊dhɛ Klisi ‑dhü 'dhö bha ‑wa ‑nu 'dho "dhiʋ̈ ‑a ‑nu ‑bha ‑zʋ ‑yö ‑a ‑dhɛ ‑sü 'gü.
EPH 4:13 ‑A ‑gɛn ‑mü ꞊dhɛ ‑a ‑dhɛa ‑bha ꞊dhɛ 'mɛ 'kwa bɔ‑ 'ka bha 'kwa "gla kö 'kwa ‑da "dhiʋ̈ ‑kɔ bha ꞊në‑ 'gü. Kë "dhʋ̈ kö kwa ‑bha 'dhang ‑bho Atanna Gbö bha‑ "dhiʋ̈ ‑sü waa‑ kwa ‑bha ‑a dɔ ‑sü ꞊gban ‑yö kë pë do 'ka, kö 'kwa kë 'mɛ 'waa 'në 'ka 'zü, "kɛɛ 'ö ꞊wa ‑kian Atanna ‑bha zian ‑ta ꞊në‑ 'ka. ‑A yö ꞊në ꞊ya kë "dhʋ̈, kö kpɛa‑ ‑kɔ ‑së ꞊dede 'ö ꞊dhɛ Klisi ‑bha 'dhö bha 'kwa‑ wo.
EPH 4:14 ‑A yö ꞊në ꞊ya kë 'pö "dhʋ̈ kö 'kwa kë mɛ ‑gbang ‑dɩ "pʋ̈pʋ̈ 'ka Atanna ‑bha zian bha‑ ‑ta, kö 'kwaa 'në sɛɛnnë ‑nu 'ö mɛ ꞊klang kë ‑kɔ suu ꞊gban "pɛpɛ ‑ya ‑nu ‑zʋ kun bha‑ 'ka 'zü, kö mɛ "ʋʋ mɛ 'bha 'yaa ꞊mɔɔ‑ ‑bha 'zü kö ‑yö kwa ‑ta ma kö ‑yö kwa ‑pö Atanna ‑dhɔkë ‑sü 'gü.
EPH 4:15 "Kɛɛ kö 'kwa kë 'mɛ 'wo 'wɔn ꞊gban "pɛpɛ suu ‑kë tɛan‑ ‑ta, ‑dhɔ 'gü, 'ö ꞊ya kë ‑a ‑nu kë ‑yë 'ka ꞊në‑ 'ka. "Kɛɛ 'sa yö ꞊në ꞊ya kë "dhʋ̈, 'yö 'kwa dho "gla 'yö 'kwa ‑da "dhiʋ̈ 'wɔn suu ꞊gban "pɛpɛ kë ‑sü 'gü, 'yö 'kwa ‑kë ꞊dhɛ Klisi 'ö kwa ‑gɔ 'ka bha‑ 'dhö.
EPH 4:16 ‑A ‑gɛn ‑mü ꞊dhɛ Atanna ‑bha mɛ ‑nu ‑loo 'ko ‑ta ‑sü 'wo ꞊dhɛ Klisi ‑dhü 'dhö bha‑ daɔ ‑nu 'wo‑ ‑bha bha ‑wo zun ‑sü 'ka 'kwëë‑ ‑së 'ka yö ꞊në‑ 'saa‑ 'gü, 'yö 'wo ‑kë pë do 'ka. Yö ꞊në‑ ‑nu ꞊gban zun 'kwëë‑, 'yö faan 'dhɛ 'ö ꞊mɔɔ ‑a daɔ 'dhɛ 'ö‑ ‑bha ‑a nu‑ ‑dhɛ 'yö yë ‑kë 'ka 'yö‑ ‑dhü bha 'ö ‑gla 'ka 'yö ‑da "dhiʋ̈ ‑dhɔ 'gü.
EPH 4:17 ‑A ‑wɔn 'gü, ‑dhio 'a dho‑ dɔ ka ‑ta kwa Dëmɛ bha‑ 'tɔ 'gü 'ö 'a n kɔngga ‑ziö 'ka "sɛɛ ka ‑dhɛ yö ‑mü ꞊dhɛ: ‑A ‑dhɛ 'yaa‑ ‑bha 'zü kö 'ka ‑tosɛa kë ꞊dhɛ 'mɛ 'waa 'dhang bho Atanna "dhiʋ̈ ‑a ‑nu 'dhö. ‑A ‑gɛn ‑mü ꞊dhɛ wo ‑zë ‑wo ‑tosɛa ‑kë ‑kɔ 'ö ‑dhi ‑nu ‑dhɛ ꞊në‑ 'gü, "kɛɛ 'sa ‑tosɛa suu 'dhɛ 'kö bha‑ ‑zun "dhiʋ̈ bhlɔɔ 'yaa 'dhö
EPH 4:18 ‑A ‑nu ‑bha 'wɔndɔdhe ‑ta ‑yö trö ‑sü 'ka, ‑wo ꞊dhɛ ‑dhɛng 'dhö ‑tosɛa 'ö ‑gban Atanna ‑bha bha‑ ‑wɔn 'gü, ‑a ‑nu zuë" 'ö "glɔɔglɔ 'ö 'waa Atanna dɔ tongtongdhö bha‑ ‑wɔn 'gü.
EPH 4:19 ‑A ‑kë "dhʋ̈ ‑sü bha‑ 'gü 'waa 'yiʋ̈‑ ‑wɔn 'bha ‑zian dɔ 'zü, ꞊wa wo ‑gɔ ‑gban 'wɔn "bhluubhlu bha ꞊në‑ kë ‑sü 'gü, ‑zua suu yaya ꞊gban "pɛpɛ suu 'do 'do zë ‑sü bha ꞊në 'wo‑ ‑bha, waa‑ ꞊naɔ ‑dhɔ yaagü yaa bha‑ 'dhö 'yö 'waa "wɩ‑ ‑bha kö 'wo "kan‑ ‑bha.
EPH 4:20 "Kɛɛ ka ‑zë 'wɔn 'ka‑ ma Klisi ‑bu 'gü 'yaa kë "dhʋ̈.
EPH 4:21 ‑A ‑kë "dhʋ̈ ‑sü bha‑ 'gü, "ni 'ö ꞊ya kë ꞊dhɛ 'ka Klisi ‑wɔn ma ‑sü ‑zë 'ka tɛan‑ ꞊dede 'ka, 'ö 'wo "ta ‑sü Yesu ‑bha tɛan‑ ‑zian bha‑ ‑ta ‑kɔ ‑zë ‑zɔn ‑sü 'ka ka ‑dhɛ,
EPH 4:22 kö‑ 'wɔn kë ka "yaan ꞊dhɛ zuëga yaa 'ö gun ka "gblʋ̈ʋ̈‑ ‑blɛɛsü 'ö 'ka gun‑ 'gü ‑ta wo sië bha, ka ‑dho ka bo‑ 'ka. ‑A ‑gɛn ‑mü ꞊dhɛ zuëga 'dhɛ 'kö bha ꞊në gun 'wɔn yaa kë ‑dhɔ ‑da sië ka ‑zʋ ‑bha 'yö "kpënng‑ ‑kë 'ka ka ‑gɔ 'yö dho ka 'ka ꞊dhɛng ‑zian ‑ta.
EPH 4:23 ‑A ‑dhɛa ‑bha ꞊dhɛ dɔ 'dhɛ 'kwa‑ wo ꞊taamasü ya‑ 'gü ya, 'ka ka zuëga slëë‑ ‑kɔ ꞊gban ‑kɔ ꞊gban 'gü Atanna "piʋ̈ kö‑ ‑bha 'Nii‑ "slʋ̈ʋ̈slʋ̈ bha ‑yö ‑gleng ‑dee ꞊në‑ ‑da ka ‑bha.
EPH 4:24 Kö 'ka "gla 'ka kë mɛ suu ‑dee 'ö ꞊yaa‑ ‑da ö bhɔ ‑bha 'ka ꞊në‑ 'ka, kö ka ‑bha ‑tosɛa kë ‑sü 'gü, kö ꞊tɔɔ 'ya 'dho kë ka ‑bha 'wɔn 'bha ‑wɔn 'bha 'gü, kö 'ka kë "slʋ̈ʋ̈slʋ̈, kö 'ka 'wɔn ꞊gban "pɛpɛ kë taan‑ ‑ta.
EPH 4:25 ‑A kë "dhʋ̈ ‑sü bha‑ 'gü, ‑ka ka bo ꞊sua kë ‑sü 'ka kö 'ka tɛanwɔn ꞊në‑ pö ka 'ko ‑nu ‑dhɛ. ‑A ‑gɛn ‑mü ꞊dhɛ mɛ ꞊gban kwa ‑gban ‑sü 'ka kwa 'kwëë‑ ꞊dhɛ mɛ daɔ ‑nu 'wo ‑gban mɛ ‑dhü ‑bha ‑kɔ 'ö‑ ‑bha bha ꞊në‑ 'dhö.
EPH 4:26 ꞊Ya kë ꞊dhɛ 'wɔn ꞊ya ‑siö ka ‑dhɛ, ‑kaa 'kun ka ‑bha kö 'ka 'dho 'wɔn yaa kë tongtongdhö. "Bin ‑zian 'ya 'dho 'ma kö 'wɔn 'ö ‑siö ka ‑dhɛ bha ‑yö ‑tun ka zuë" "piʋ̈.
EPH 4:27 'Ka 'dho ka ‑dɩ ‑kun 'ka bhië" dɔ Sɔtraan ꞊kwɛɛ‑.
EPH 4:28 'Mɛ ‑a ‑bha pë ‑yö 'gü ‑pë ‑yö gun ꞊kwaan ꞊në‑ 'ka, ‑a ‑mɛ ‑yö ö bo‑ 'ka kö ‑yö ö 'gü dɔ "gbɩɩ‑ ‑yö yë kë kö ‑yö ö ‑bhöpë ꞊slɔɔ, kö ‑yö 'mɛ 'wo ‑kpla 'gü 'pö‑ ‑nu bho ‑kpla 'gü.
EPH 4:29 Dhiang yaa ‑zë do ‑zian 'ya 'dho ‑wo ka "dhi ‑ta mɛ 'bha ‑dhɛ, "kɛɛ "ni ‑a kë ‑dhɛ ‑zë ꞊ya kë, ‑wʋ ‑së 'ö dho 'mɛ 'ka dhiang zë sië‑ ‑dhɛ bha‑ faan dɔ ‑to Atanna "piʋ̈ ‑sü ‑bha, 'ö‑ zuë" ‑ya ‑yɛa 'gü bha ꞊në ‑kaa pö.
EPH 4:30 'Ka 'dho Atanna ‑bha 'Nii‑ "slʋ̈ʋ̈slʋ̈ ‑siö ‑dhɛ ‑wɔn kë 'ö 'ka‑ wë 'gü ‑siö ka ‑tosɛa kë ‑kɔ 'ka. ‑A ‑gɛn ‑mü ꞊dhɛ yö ꞊në 'klëë‑ 'ö Atanna ‑ya kpɔ ka ‑bha ‑a 'ka. Yö ꞊në‑ ‑zɔn kwa ‑dhɛ ꞊dhɛ ‑dhɛ 'bha‑ ‑dho kpaɔ, Atanna ‑dho kwa ‑bha dha ‑sü bha‑ ‑gɔ ‑da 'plöö.
EPH 4:31 ‑A ‑wɔn 'gü, ‑a ‑dhɛ 'yaa‑ ‑bha ꞊dhɛ 'ka 'wɔn 'kun ka ‑zʋ "piʋ̈ mɛ 'bha ‑bha, "ɛɛn kö 'ka kë "kakasü, "ɛɛn kö 'ka ‑zoo kë, "ɛɛn kö 'ka ‑dɔn bho, "ɛɛn kö 'ka ‑wʋ yaa pö mɛ ‑nu ‑dhɛ, "ɛɛn kö 'ka kë 'wɔnyaakëmɛ ka. ‑A suu 'dhɛ bha ‑yö 'go ka ꞊zinng 'gü.
EPH 4:32 Ka "klʋ ꞊në ‑yö dhi ka 'ko 'ka, kö 'ka ka 'ko ‑wëë ‑ga, kö ka "gblü ‑yö dhi ꞊dhɛ ‑kɔ 'ö Atanna ‑yö "gblü ‑së ‑kë 'ka ka 'ka Klisi 'saa‑ 'gü bha‑ 'dhö.
EPH 5:1 ꞊Dhɛ 'ö ‑kë ꞊dhɛ ka ꞊në 'ka Atanna ‑bha 'në ‑nu 'ö‑ ‑dhɔ ‑ya ‑kë ‑a 'ka bha, ‑ka ka 'gü dɔ "gbɩɩ‑ kö 'ka ka ‑bha 'wɔn kë ‑kɔ ‑nu 'sü yö ꞊në‑ ‑bha ‑bha.
EPH 5:2 Kö 'ka ‑tosɛa kë ‑dhɔ 'gü ꞊dhɛ Klisi 'dhö, kö ‑kɔ do 'ö kwa ‑dhɔ ‑ya ‑kë 'ka, 'ö ö ‑dɩ nu kwa ‑wɔn 'gü Atanna ‑dhɛ 'yö ‑kë kwa ‑bha "saapë 'ö‑ "dhia ‑yö ma‑ 'gü ‑a 'ka bha ka ‑dhɔ ‑yö ka 'ko kë "dhʋ̈. "Kɛɛ 'sa ö ‑dɩ nu 'ö‑ wo Atanna ‑dhɔkëkapë 'ka ꞊dhɛ ‑kɔ bha‑ 'dhö bha ꞊në‑ 'gü ‑wɔn ‑yö ‑dhi ‑dhɛ yaa 'gü yaa wo 'yö ‑kë ‑a ‑bha "saa‑ bha‑ "dhiʋ̈ "wɩ ‑gɛn 'ka.
EPH 5:3 'Mɛ 'wo Atanna ‑bha mɛ 'ka 'ö 'wo "slʋ̈ʋ̈slʋ̈ bha‑ ‑dhɛ 'yaa‑ ‑bha ꞊dhɛ pö ‑yö kë‑ ‑nu ‑bha. ‑A ‑kë "dhʋ̈ ‑sü bha‑ 'gü, ‑zua zë ‑sü ‑nu oo, "yan 'gü yaa ‑dhɛ ‑nu bha waa‑ zuë" ‑bhɔ ꞊naɔ ‑bha ‑sü ‑nu bha, ‑ka ka bo‑ 'ka. Mɛ 'bha "tʋ ‑zian ꞊në 'ya 'dho ‑da 'gü ka kwi ‑bha.
EPH 5:4 ‑A ‑dhɛ 'yaa‑ ‑bha 'zü ꞊dhɛ 'ka "dhidhɛyaadhɛ kë, "ɛɛn kö 'ka ‑tamadhɛ ‑dhiang ‑nu "ɛɛn "gbɛata yaa ‑nu zë. ‑A ‑dhɛa ‑bha ꞊dhɛ Atanna nuɛ" bho ‑wʋ ꞊në ‑yö kë ka "dhi ‑kpɛawo.
EPH 5:5 ‑A pö 'a‑ wo ka ‑dhɛ "dhʋ̈ bha‑ 'klɔɔ‑ ‑mü ꞊dhɛ ‑zuazëmɛ ‑nu oo, zuë" ‑bhɔ ꞊naɔ ‑bha ‑mɛ ‑nu oo, "yangüyaamɛ ‑nu oo, ‑a mɛ do ‑zian 'yii 'dho 'wɔn ‑së ‑nu 'wo Atanna waa‑ Klisi ‑a ‑nu ‑bha ‑gblüdëdhɛkëdhɛ bha‑ 'gü bha‑ ꞊slɔɔ. Yö ‑zë ‑yö 'to ka "yaan. (‑A ‑gɛn ‑mü ꞊dhɛ zuë" ‑bhɔ ꞊naɔ ‑bha ‑mɛ bha waa‑ ꞊gebhɔ ‑dhɔkëmɛ ‑a ‑nu ‑duɛ do.)
EPH 5:6 ‑A ‑wɔn 'gü, ‑kaa kë ‑së kö mɛ "ʋʋ mɛ 'bha 'ya 'dho ka "tʋ 'kun ꞊nɛɛ ‑dhɛ 'ö ‑tamadhɛ ‑dhiang ‑nu zë ka ‑dhɛ 'ö ka ‑zʋ kun. ‑A ‑gɛn ‑mü ꞊dhɛ Atanna ‑dho 'wɔn bho 'mɛ 'waa "tʋ 'to ö ‑wʋ ‑bha bha‑ ‑nu 'gü 'wɔn suu ‑nu bha ꞊në‑ kë ‑sü ‑wɔn 'gü.
EPH 5:7 ‑A ‑kë "dhʋ̈ ‑sü bha‑ 'gü, ‑kaa kë ‑së kö ka ‑gɛn 'ya 'dho ‑da 'wɔn suu ‑nu bha‑ kë ‑sü "yi ꞊bhaa ‑a ‑nu "piʋ̈.
EPH 5:8 ‑A ‑gɛn ‑mü ꞊dhɛ 'ö gun zii 'kpa ‑blɛɛsü kö 'kaa Atanna dɔ ka ‑gun 'wɔn ‑nu bha‑ kë sië 'pö ꞊dhɛ ‑a ‑nu 'dhö 'ö 'ka "ta sü ꞊dhɛ mɛ 'dhö ‑dhɛtiidhɛ 'gü, "kɛɛ dɔ 'dhɛ 'kwa‑ wo ꞊dɛɛ bha 'yaa "dhʋ̈ 'zü, 'ka bo Atanna dɔ ‑sü 'ka ‑kplü 'ka‑ wo kwa Dëmɛ ‑bha bha‑ ‑wɔn 'gü, 'ka kë ꞊dhɛ 'mɛ 'wo ‑dhɛpuudhɛ 'gü ‑a ‑nu 'dhö; ‑a ‑wɔn 'gü, ‑ka ‑tosɛa kë ꞊taamasü ya‑ 'gü ꞊dhɛ 'mɛ 'wo ‑dhɛpuudhɛ 'gü ꞊në‑ 'dhö.
EPH 5:9 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'kö ‑dhɛpuudhɛ 'gü kö‑ ‑mɛ ‑yö 'wɔn ‑së suu ꞊gban "pɛpɛ 'do 'do ꞊në‑ këmɛ 'ka, kö pö 'yaa‑ ‑bha 'wɔn 'bha ‑wɔn 'bha 'gü, kö ‑yö 'wɔn ꞊gban ‑wɔn ꞊gban kë tɛan‑ ‑ta.
EPH 5:10 ‑A ‑kë "dhʋ̈ ‑sü bha‑ 'gü, ‑ka ka ‑zʋ 'gɔn ‑së ꞊dede 'ka kö 'wɔn 'dhɛ 'ka‑ kë 'ö‑ "dhia‑ dho 'ma kwa Dëmɛ bha‑ 'gü ꞊në 'ka‑ kë.
EPH 5:11 Ka ‑zë ‑kaa kë ‑së kö "wlaawɔn ‑nu 'ö‑ ‑nu ‑zun "dhiʋ̈ ‑bhlɔɔ 'yaa kë, 'ö 'mɛ 'wo ‑dhɛtiidhɛ 'gü, 'wo‑ kë sië bha ka ‑gɛn 'ya 'dho ‑da "yi ꞊bhaa tongtongdhö, "kɛɛ kö ka ‑zë 'ka 'wɔn suu ‑nu bha‑ kë ‑sü ‑bha 'fang ꞊në‑ bho.
EPH 5:12 ‑A ‑gɛn ‑mü ꞊dhɛ 'wɔn ‑nu 'wo‑ ‑kë ‑gblɛn 'kpɔ 'gü "dhʋ̈ bha‑ pö ‑sü ‑zian ‑yö 'yiʋ̈‑ ‑sü.
EPH 5:13 "Kɛɛ ‑a ꞊gban 'klɔɔ‑ ꞊ya bo bho ‑sü 'ka kö mɛ ꞊gban ꞊waa‑ ‑kë pë yaa 'ka ‑dhɛ ꞊dede yö.
EPH 5:14 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ "ʋʋ mɛ 'ö‑ "yan 'gü ꞊ya bo "pʋ ‑sü 'ka, kö ꞊ya kë ö "tɛabɔ ‑nu "yan 'gü "pʋ ‑mɛ ꞊në‑ 'ka 'pö bha. 'Wɔn 'ö‑ ‑wɔn 'gü, 'yö 'wo‑ pö ꞊sië ꞊dhɛ: «'Mɛ 'i yi zë sië mɛ ꞊wa ga Atanna wëëdhö ‑a ‑nu kpö 'gü bha ‑bhö ‑bö, ‑bhö ‑bö kö 'i 'go gamɛ ‑nu ‑bhiëë 'gü. ꞊Ya kë "dhʋ̈ Klisi ‑dho ‑dhɛ "pʋ i ‑ta» bha 'yö bha.
EPH 5:15 ꞊Dhɛ 'ö "dhʋ̈, ‑ka "ta ka suan' 'ka. 'Ka 'dho ‑tosɛa kë ꞊dhɛ 'mɛ 'wo wo tii ‑bha ‑a ‑nu 'dhö, ‑kaa kë ‑glengdhɛ ‑bha.
EPH 5:16 'Kwa dɔ 'ya‑, 'wɔn ‑së kë "tʋ̈ng ꞊në ziö sië bha, ‑a ‑wɔn 'gü "tʋ̈ng "ʋʋ "tʋ̈ng 'ö‑ "sɩ ‑zë ꞊ya kë‑ 'ka ka ‑dhɛ, ‑kaa kë.
EPH 5:17 ‑A ‑kë "dhʋ̈ ‑sü bha‑ 'gü, ‑kɔ 'ka dho‑ kë‑ 'ka kö 'ka kwa Dëmɛ ‑dhidhɛwɔn ꞊në‑ kë ꞊në ‑kaa ‑dhɛ mɔɔ‑, 'ka 'dho ‑tosɛa kë ka ‑gɔ "piʋ̈.
EPH 5:18 'Ka dho‑ pö 'ka we mü 'ö ka kun, ‑a ‑gɛn ‑mü ꞊dhɛ 'ka‑ mü kö ka ‑kɔ ‑yö ziö‑ 'ka, kaa kë 'wɔnmakoomɛ ꞊në‑ 'ka. ‑Kaa "slë mɔɔ‑ kö Atanna ‑bha 'Nii‑ "slʋ̈ʋ̈slʋ̈ ꞊në ‑yö ka pa.
EPH 5:19 Kö 'ka Atanna 'tɔ bhɔ ‑tan ‑nu bho, kö 'ka "gbaɔ bho‑ ‑zü, kö 'ka "tan ‑dee 'ö‑ ‑bha 'Nii‑ "slʋ̈ʋ̈slʋ̈ 'ö ka 'gü bha 'ö dho "yi dɔ‑ 'ka ka ‑bɛan bha‑ bho. Kö ka Atanna nuɛ" bho sië "tan 'gü ka ‑sɔbhɛɛ ‑bha, kö yö ꞊në ‑yö kë ka 'ko ‑nu ‑zʋ ‑gban ‑kɔ 'ka.
EPH 5:20 ‑Ka kwa Dë Atanna nuɛ" bho ‑kpɛawo 'wɔn suu ꞊gban "pɛpɛ 'gü kwa Dëmɛ Yesu Klisi 'tɔ 'gü.
EPH 5:21 Kö 'ka ka ‑gɔ 'dho "sia‑ ka 'ko ‑nu ‑dhɛ Klisi ꞊bhlëë ‑bha ‑kë ka ‑gɔ ‑sü ‑wɔn 'gü.
EPH 5:22 Dhebhɔ ‑nu, ‑ka kaa‑ gɔɔn‑ ‑nu ꞊bhlëë ‑ya ꞊dhɛ ‑kɔ do 'ka kwa Dëmɛ ꞊bhlëë ‑ya 'ka bha‑ 'dhö.
EPH 5:23 ‑A ‑gɛn ‑mü ꞊dhɛ gɔɔn‑ ꞊në dhebhɔ ‑gɔ "dhiʋ̈ ꞊dhɛ Klisi 'ö ö ‑bha mɛ ‑nu 'wo ꞊dhɛ‑ ‑dhü 'dhö bha‑ ‑nu ‑gɔ "dhiʋ̈ ‑kɔ 'ö‑ ‑bha, 'ö‑ Dhamɛ 'ka bha‑ 'dhö.
EPH 5:24 ‑A ‑wɔn 'gü, Klisi ‑bha mɛ ‑nu ‑loo 'ko ‑ta ‑sü ꞊gban 'wo wo ‑gɔ dho‑ ‑dhɛ "sia‑ ‑kɔ do 'ö‑ 'gü bha, ‑a ‑dhɛa ‑bha ꞊dhɛ dhong ‑nu ‑wo wo ‑gɔn ꞊bhlëë ‑ya ‑kɔ do bha ꞊në‑ 'gü 'wɔn ꞊gban "pɛpɛ suu 'gü.
EPH 5:25 Dhemɛdë ‑nu kaa ‑dɩ 'pö, mɛ 'ö "dhʋ̈ ‑a ‑bha dhebhɔ ‑dhɔ ‑ya kë ꞊dhɛ ‑kɔ 'ö Klisi ‑bha mɛ ‑nu ‑dhɔ ‑ya ‑kë 'ka, 'yö ö ‑dɩ nu‑ ‑nu ‑wɔn 'gü bha‑ 'dhö.
EPH 5:26 "Kɛɛ 'sa ‑a kë 'ö‑ wo "dhʋ̈ bha ‑ya kë "dhʋ̈ kö 'ö‑ ‑ya ꞊në‑ wo ‑dɩ ‑ta, kö 'ö 'bɔn bho‑ ‑bha ‑a "zu ‑sü waa‑ ꞊klang ‑kë ‑a ‑wʋ 'ka ‑sü 'ka.
EPH 5:27 ‑A ‑gɛn ‑mü ꞊dhɛ ‑ya "piʋ̈ ꞊dhɛ ‑a ‑bha mɛ ‑nu bha ‑wo kë‑ ‑gɔ ꞊dhɛ 'nëdhiëngnë ‑së 'nënë 'ö yöö‑ 'sü, 'ö‑ kwi ‑bha ‑dhɛ ꞊gban 'dhö 'yɔ ‑sü 'ka drëngdrëngdhö, "ɛɛn 'ö‑ ‑zëkadhɛ do zian 'yaa‑ ‑bha ꞊në‑ 'dhö, kö ‑yö ‑wo ö wëëdhö "puu "slʋ̈ʋ̈slʋ̈ 'ka.
EPH 5:28 ‑A ‑dhɛa ‑bha ꞊dhɛ dhemɛdë 'ö 'dhö ‑a ‑bha dhebhɔ ‑dhɔ ‑ya kë ꞊dhɛ ‑kɔ 'ö‑ ‑dɩ kwi ‑dhɔ ‑ya ‑kë 'ka ‑a 'dhö. ‑A ‑gɛn ‑mü ꞊dhɛ 'mɛ 'ö‑ ‑bha dhebhɔ ‑dhɔ ‑ya ‑kë, kö‑ mɛ ‑dɩ ‑dhɔ ‑ya ‑dɩ ‑kë.
EPH 5:29 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ 'bha ‑dɩ ‑san 'yaa ö ‑dɩ kë tongtongdhö. ‑Yö ö ‑dɩ "dhiʋ̈ ‑zian ꞊në‑ gba 'yö ö ‑dɩ ‑wɔn kun ꞊dhɛ ‑kɔ 'ö Klisi ‑yö ö ‑bha mɛ ‑nu ‑bha ‑kë 'ka ‑a 'dhö.
EPH 5:30 ‑A pö 'a‑ wo 'ka‑ kë "dhʋ̈ bha‑ 'klɔɔ‑ ‑mü ꞊dhɛ Klisi daɔ ‑mü kwa 'ka.
EPH 5:31 'Wɔn 'ö‑ ‑wɔn 'gü 'yö Atanna ‑wʋ ‑ya pö ꞊dhɛ: «‑A ‑kë "dhʋ̈ ‑sü bha‑ ‑wɔn 'gü, ‑a ‑dhɛa ‑bha ꞊dhɛ gɔɔn‑ ‑yö "kan ö dhe waa‑ ö dë‑ ‑nu ‑bha kö ‑yö ‑kplü ö ‑bha dhebhɔ ‑bha kö wɛng ‑wo kë pë do 'ka bha 'yö bha.»
EPH 5:32 'Wɔn 'ö "dhʋ̈ bha‑ 'klɔɔ‑ 'ö‑ 'gü bha ‑yö ‑ziisü. ‑A pö 'a‑ wo "dhʋ̈ bha a‑ ‑sü Klisi waa‑ ‑bha mɛ ‑nu ꞊në‑ ‑nu ‑bha ‑bha.
EPH 5:33 ‑A ‑kë "dhʋ̈ ‑sü bha‑ 'gü, ‑a ‑dhɛa ‑bha 'pö ꞊dhɛ ka ‑bha ‑yö kë ꞊dhɛ Klisi ‑bha bha‑ 'dhö kö 'mɛ 'ö 'dhö ‑a ‑bha dhebhɔ ‑dhɔ ‑ya kë ꞊dhɛ ‑a ‑dɩ ‑dhɔ 'dhö‑ ‑dɩ ‑kë ‑kɔ 'ö‑ 'gü bha‑ 'dhö. Kö dhebhɔ yöö ‑dɩ 'pö ‑yö ꞊bhlëë ‑ya ö ‑gɔn ‑bha.
EPH 6:1 'Në ‑nu, ‑ka ka 'kpɔmɛ ‑nu ‑wʋ ma, yö ꞊në kwa Dëmɛ ‑dhidhɛwɔn 'ka, 'yö këwɔn 'ka 'pö.
EPH 6:2 Atanna ‑bha 'tɔng‑ 'ö ‑bɛn zë ‑sü 'ka bha‑ ‑blɛɛsü 'ö "plüün bho 'ö‑ ‑wɔ ‑ta yö ‑mü: «I dhe waa‑ i dë ‑a ‑nu ‑wʋ ma ‑sü bha ꞊në‑ 'ka» 'yö "plüün bho 'ö‑ ‑wɔ ‑ta 'ö‑ pö:
EPH 6:3 «Kë "dhʋ̈ kö 'i ‑tosɛa kë zuë" ꞊nii ‑da 'gü, kö i ꞊sii ‑yö kë ꞊gblɛɛn "kpʋng ꞊taa.»
EPH 6:4 'Në dë ‑nu kaa ‑dɩ 'pö, 'ka 'dho bhlɔɔ 'ma ka bhang ‑nu 'gü. ‑Kaa ‑nu "klʋ ꞊në bho ‑së 'ka kö 'ka‑ ‑nu draan "ta ‑sü kwa Dëmɛ ‑bha zian ‑ta ‑sü ‑bha, kö 'ka‑ ‑nu ꞊klang kë ‑a ‑wʋ 'ka.
EPH 6:5 ꞊Dhuëng ‑nu, ‑ka "suʋ̈ ka dëmɛ ‑nu ‑gɔ ꞊dedewo, kö 'ka‑ ‑nu ꞊bhlëë ‑ya "gblʋ̈ʋ̈dhɛ "puu ‑ta ꞊dhɛ 'pë 'ö 'ka‑ kë sië "dhʋ̈ Klisi ꞊në‑ ‑dhɛ ‑a 'dhö.
EPH 6:6 'Ka 'dho‑ kë "dhʋ̈ ‑a ‑nu "yan "dhiʋ̈ ka "dhia ‑ma ‑a ‑nu 'gü ‑dhɔ ‑bha. "Kɛɛ ‑kaa kë ꞊dhɛ Klisi ‑bha mɛ ‑nu 'wo‑ kë sië "dhʋ̈ wo zuë" ꞊gban 'ka kö wo "dhia ‑yö 'ma Atanna ꞊në‑ 'gü ‑a 'dhö.
EPH 6:7 ‑Ka ka ‑bha ꞊dhuëngdhɛ kë zuë" "puu 'ka ꞊dhɛ 'pë 'ka‑ kë sië Atanna ꞊në‑ ‑dhɛ ‑a 'dhö, kö 'ya 'dho kë ka 'gü ꞊dhɛ ka‑ kë sië "dhʋ̈ mɛ "bhɩɩ‑ ‑nu ‑dɩ ‑slɔɔ ꞊në‑ ‑dhɛ.
EPH 6:8 ‑Yö kë ka "yaan ꞊dhɛ 'mɛ 'ö 'wlɔɔ‑ 'ka oo, 'mɛ 'ö ꞊dhuëng ‑zian ꞊në‑ 'ka oo, 'mɛ 'ö "dhʋ̈ ‑a këwɔn ‑së ꞊në kwa Dëmɛ dho‑ ‑duɛ bho‑ ‑bha.
EPH 6:9 'Mɛ 'ö kaa ‑dɩ 'pö 'ka ꞊dhuëng dëmɛ ‑nu 'ka, ‑ka ka ‑bha ꞊dhuëng ‑nu 'kun ‑së 'pö ‑kɔ do bha‑ 'gü. 'Ka 'dho‑ pö 'ka "suʋ̈ ‑da ‑nu 'gü, ‑a ‑gɛn ‑mü ꞊dhɛ kɛng‑ ‑nu ꞊gban ka ‑gɔmɛ ‑yö do, yö ꞊në Atanna 'ka dhang‑ 'gü, yö 'ö "dhʋ̈ bha 'yaa bɔ mɛ 'bha 'ka ꞊flü ‑ta.
EPH 6:10 Dhiang ‑totaamasü 'a dho‑ zë ka ‑dhɛ kö ‑yö kë 'sëëdhɛ ya‑ "dhiʋ̈ ‑ya ‑dhɛ 'ka bha yö ‑mü ꞊dhɛ kö 'ka ka faan dɔ ‑kplü kwa Dëmɛ ‑bha ‑sü ꞊në‑ ‑bha, kö 'ka‑ ‑bha 'gügbɩɩdhɛ bha ꞊në‑ 'sü.
EPH 6:11 ‑Ka Atanna ‑bha ‑gblü ‑gɔɔn 'ka ‑kwɛɛ ꞊gban "pɛpɛ ‑ya ka ‑bha. Kë "dhʋ̈ kö Sɔtraan ‑bha "kpënng‑ ‑kɔ 'ya 'dho ꞊mɔɔ ka ‑bha.
EPH 6:12 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kwa ‑gblügɔɔn "yɔɔ ‑nu bha mɛ "bhɩɩ‑ ‑nu 'waa ‑mü. "Kɛɛ "yina ‑gblüdë ‑nu waa‑ ‑ziö mɛ ‑gɔ ‑pë ‑nu waa‑ ‑suʋ̈gɔpë ‑nu 'ö mɛ 'yaa yö 'ö 'wo "kpʋngtaadhɛ 'ö 'wɔn yaa ‑kɔ ꞊ya ziö‑ ‑gɔ ya‑ ‑gɔ "dhiʋ̈ bha waa‑ "yina "klʋ yaya ‑nu 'wo 'tëng‑ ‑ta bha ꞊në 'kwa 'ko zë sië‑ ‑nu 'ka.
EPH 6:13 'Wɔn 'ö‑ ‑wɔn 'gü, 'yö 'a‑ pö ꞊dhɛ 'ka ka ‑kɔ ‑da Atanna ‑bha ‑gblü ‑gɔɔn 'ka ‑kwɛɛ ꞊gban 'gü bha 'yö bha. Kë "dhʋ̈ kö 'ka 'to‑ "gbɩɩ‑ 'ka "tʋ̈ng yaa 'gü ‑gblü bha‑ gɔn ‑sü 'gü, kö 'ka 'dho 'go "gblʋʋ tongtongdhö.
EPH 6:14 ‑A ‑kë "dhʋ̈ ‑sü bha‑ 'gü, ‑ka kë dɔ ‑sü 'ka ‑gblü gɔɔn ‑yan 'gü ‑dhɛ ꞊gban ‑dhɛ ꞊gban 'gü, kö tɛanwɔn ꞊në ‑yö kë ka ‑gɔ ꞊dhɛ kwi "pɛn 'ö "sɔdha ‑nu ‑wa ‑ya sɔ ‑ta bha‑ 'dhö, kö "ta ‑kɔ ‑së 'ö pö 'aa kë mɛ ‑bha bha ꞊në ‑yö kë ꞊dhɛ ‑piö "bhɛɛ 'ö ‑gblügɔɔnmɛ ‑nu ‑wa ‑da ꞊sië bha ka ‑bha 'dhö.
EPH 6:15 Kö naɔ ‑së 'ö mɛ zuëwaanu bha‑ ‑pö mɛ ‑nu ‑dhɛ ‑sü ‑pɛng ‑dɔ ka 'ka ‑sü ꞊në ‑yö kë ꞊dhɛ ‑gblügɔɔn 'ka ‑sabha 'dhö ka ‑gɛn ‑bha.
EPH 6:16 ‑Zʋ ‑yö Atanna ‑dhɛ ‑sü ꞊në ‑yö kë ka ‑gɔ "tʋ̈ng ꞊gban "pɛpɛ 'gü. Yö ꞊në ‑yö kë ka ‑gɔ ꞊dhɛ dhɛga 'ö ‑kë "sɔdha ‑nu ‑gɔ bha‑ 'dhö. Kë "dhʋ̈ kö Sɔtraan ‑bha ꞊saaga ‑nu 'ö pɛng 'dhö‑ "dhiʋ̈ 'ö dho‑ ‑zuö ka ‑bha bha ‑yö 'to yö ꞊në‑ ‑bha kö 'ya 'dho zun ka ‑bha.
EPH 6:17 Kö dha ‑sü 'ka‑ ꞊slɔɔ bha‑ ‑wɔn ‑zʋgɔndhe ꞊në ‑yö kë ka ‑gɔ 'gü yi ꞊gban 'ka ꞊dhɛ ‑piö gblaa‑ 'ö ‑kë "sɔdha ‑nu ‑gɔ ‑bha bha‑ 'dhö. Kö Atanna ‑wʋ 'ö yö ꞊në ꞊dhɛ ‑a ‑bha 'Nii‑ 'ö ka 'gü bha‑ ‑bha 'ko ‑zë 'ka ‑piö 'dhö bha ‑yö kë ka ‑gɔ.
EPH 6:18 'Wɔn "pɛpɛ bha ‑kaa ꞊gban kë ‑bhɛa Atanna ‑dhɛ ‑kɔ suu "pɛpɛ 'ö‑ ‑bha 'Nii‑ ‑ya ‑zɔn ka ‑dhɛ ꞊në‑ 'ka kö ‑yö ka ‑ta 'kun, ‑kaa wo "tʋ̈ng ꞊gban "pɛpɛ 'gü. ‑Yö kë ka kë ‑yë 'ka ka 'gü 'ya 'dho ga‑ ‑bha. Kö 'ka bhɛa" 'pö mɛ "pɛpɛ 'wo ‑ya ‑sü 'ka Atanna ‑bha ‑ya 'gü ‑a ‑nu ‑wɔn 'gü ‑a ‑dhɛ.
EPH 6:19 ‑Ka bhɛa" 'pö n ‑wɔn 'gü, kë "dhʋ̈ kö 'ma n "dhi "pʋ kö naɔ ‑së 'ö gun ‑bin ‑sü 'ka 'ö Atanna ‑ya ‑ta ‑pʋ kwa ‑dhɛ bha 'a‑ ‑dhiang zë mɛ "bhɩɩ‑ ‑nu ‑dhɛ 'kpakpadhö kö "sɛ‑ 'go‑ ‑bha.
EPH 6:20 ‑A ‑gɛn ‑mü ꞊dhɛ ‑a ‑bha naɔdɔmɛ ‑mü n 'ka, 'yö 'a‑ ‑kaso 'gü ya, "kɛɛ kö 'ma‑ pö kö 'a‑ pö‑ pö ‑kɔ ꞊dede ꞊në‑ ‑ta kö "sika do ‑zian 'ya 'dho kë n 'gü ‑a ‑wɔn 'gü.
EPH 6:21 ‑A 'dhɛ 'kö ‑gban ma ‑zë n ‑bha waa‑ yë ‑nu 'a‑ kë sië‑ 'dhö, kwa dheebhang dhɔɔbhaa ‑sü 'wo‑ Tisikö ‑kë 'ö ‑kë 'pö kwa Dëmɛ ‑kɔdhiʋ̈mɛ 'ö to ö ‑wʋ ‑ta ‑a do 'bha 'ka bha ꞊në dho‑ pö ka ‑dhɛ kö 'ma ‑wo 'ka ‑dhɛ 'ö‑ 'gü 'ka‑ dɔ.
EPH 6:22 Ma ꞊në 'a‑ bɔ. A‑ ‑bɔ "dhʋ̈ ‑dɩ ‑wɔn "dhiʋ̈ kö ‑yö 'wɔn 'dhɛ 'ö yi ‑bha ꞊në‑ pö ka ‑dhɛ. Kë "dhʋ̈ kö ka zuë" ‑yö 'waanu.
EPH 6:23 Kö kwa Dë Atanna waa‑ kwa Dëmɛ Yesu Klisi ‑wo zuëwaanusü, ‑dhɔ waa‑ ‑zʋ ‑yö ‑a ‑dhɛ ‑sü nu kwa dheebhang ꞊gbang "pɛpɛ ‑dhɛ bha 'aa ‑yö kë
EPH 6:24 kö 'mɛ "pɛpɛ 'ö kwa Dëmɛ Yesu Klisi ‑wɔn 'dhö ka ‑gɔ, 'ö‑ ‑dhɔ 'yaa 'go ka ‑zʋ ‑bha tongtongdhö bha Atanna ‑yö ‑gasitɛ kë mɛ ꞊gban "pɛpɛ ka ‑dhɛ bha 'aa ‑yö kë.
PHI 1:1 Mang Pɔdhö ‑mɛ yaa‑ Timote 'yi ‑kë Yesu Klisi ‑bha gwëëmi 'ka bha yi ꞊në 'yi 'sëëdhɛ ya‑ bɔ, mɛ "pɛpɛ 'ka ‑ya ‑sü 'ka ‑dɩ ‑wɔn "dhiʋ̈‑ ‑bha 'ka Fidhipö ‑pö 'gü bha, kaa‑ ka ‑gɔmɛ ‑nu waa‑ ka "dhiʋ̈ziöwomɛ ‑nu ka ‑dhɛ.
PHI 1:2 A ‑bhɛa kwa Dë Atanna waa‑ kwa Dëmɛ Yesu Klisi ‑a ‑nu ‑dhɛ kö ‑wo ‑gasitɛ kë ka ‑dhɛ, kö ‑wo zuëwaanusü nu ka ‑dhɛ!
PHI 1:3 N ‑zʋ ‑ya ‑bö ka ‑wɔn 'ka ‑kɔ 'ö‑ 'gü 'do 'do, a (n Dë) Atanna ꞊në‑ nuɛ" ‑bho,
PHI 1:4 ‑a ‑gɛn ‑mü ꞊dhɛ 'ö sü‑ zü bho ‑yi bha 'ö nu 'ö zun‑ 'ka ꞊dɛɛ ‑bha, ka n ‑ta ‑kun 'wɔn ‑së 'ö go‑ "piʋ̈‑ bha‑ ‑naɔ dɔ ‑sü ‑bha ‑kpɛawo. Yö ꞊në‑ ‑wɔn 'gü 'yö 'ma bhɛa"‑ ‑dhɛ ‑kɔ 'ö‑ 'gü 'do 'do, mɛ ꞊gban "pɛpɛ ka ‑wɔn 'gü, 'yö 'a‑ wo zuëniida 'ka.
PHI 1:6 A 'dhang ‑bho "dhiʋ̈ n zuë" ꞊gban 'ka ꞊dhɛ yöö do 'ö yë ‑së 'ö "dhʋ̈ bha‑ zü bho ka zuë" "piʋ̈ bha, ‑yö ‑dho ‑a taa kë ‑kpɛawo 'ö dho‑ 'ka "dhʋ̈ 'ö zun‑ 'ka Yesu Klisi yee kë ‑yi ‑bha.
PHI 1:7 ‑A ‑dhɛa ‑bha ꞊dhɛ ‑zʋ 'gɔn ‑kɔ suu bha 'a‑ kë mɛ ꞊gban ka ‑wɔn 'gü, ‑a ‑gɛn ‑mü ꞊dhɛ ka ‑dhɔ ‑yö n ‑kë ꞊dedewo, ‑a ‑gɛn ‑mü 'zü ꞊dhɛ "klʋsë 'ö Atanna ‑ya ‑kë n 'ka bha ꞊yaa‑ kë ka 'ka 'pö. A ‑kë ‑kaso 'gü oo, "ɛɛn a ‑kë za ꞊gblü "dhiʋ̈ oo, a Atanna ‑bha naɔ ‑së bha‑ ‑takozë ‑kpɛawo kë "dhʋ̈ kö mɛ ꞊gban ‑wo 'dhang bho‑ "dhiʋ̈ ꞊dhɛ tɛan‑ ‑mü. ꞊Dhɛ ‑a "klʋ ‑yö ‑dhi kwa 'ka ‑kpɛawo.
PHI 1:8 N "sɛɛ‑ ‑mü Atanna ꞊në‑ 'ka, ꞊dhɛ mɛ ꞊gban "pɛpɛ ka ‑wɔn ‑yö n ‑gɔ "gbɩɩ‑ ‑dhɔ 'ö go Yesu Klisi "piʋ̈ bha‑ ‑wɔn 'gü.
PHI 1:9 'Wɔn 'ö ꞊ya kë 'a‑ ‑dhɛ ‑gɔ kö a bhɛa" sië‑ ‑dhɛ, yö ‑mü ꞊dhɛ kö ‑dhɔ 'ö ka 'gü bha ‑ya 'bha ‑da ‑ta ‑kpɛawo, kö ‑a dhɔɔbhaawɔn ‑nu ‑bho 'koo dɔ ‑sü 'ö 'kpakpadhö bha ‑yö kë ka ‑gɔ ‑dhɔ bha‑ 'gü.
PHI 1:10 A ‑bhɛa 'zü "dhʋ̈ kö 'ka 'wɔn ‑së ꞊dede 'ö ‑dhi ‑dhɛ ‑a dɔ, kö 'ka‑ kë, kë "dhʋ̈ kö 'ka kë "puu "slʋ̈ʋ̈slʋ̈ 'ka, kö pö 'a 'dho kë ka ‑bha tongtongdhö Klisi nu ‑yi 'ka.
PHI 1:11 Kë "dhʋ̈ kö 'wɔn ‑së "pɛpɛ 'ka‑ ‑kë Yesu Klisi faan 'ka bha‑ ꞊trɔɔn‑ ka ‑kɔ pa 'yi bha‑ 'ka, kö Atanna 'tɔ‑ bhɔ, kö mɛ ꞊gban ‑wa nuɛ" bho.
PHI 1:12 N dheebhang ‑nu, ‑yö n "piʋ̈ ꞊dhɛ 'a 'wɔn do pö ka ‑dhɛ kö ‑yö 'to ka "yaan. Yö ‑mü ꞊dhɛ 'wɔn 'ö n ꞊slɔɔ 'a dɔ‑ 'ka ya ‑yö kë ‑kë naɔ ‑së 'ö go Atanna "piʋ̈ ‑a ‑dho "dhiʋ̈ ‑gɛn ꞊në‑ 'ka.
PHI 1:13 "Kɛɛ 'sa ‑yö "dhʋ̈ tɛan‑ 'ka, ‑a ‑gɛn ‑mü ꞊dhɛ mɛ "pɛpɛ 'wo ‑gblüdë ‑kwɛandhö yö waa‑ 'mɛ 'wo ‑dhɛ "wɛɛ ‑zian 'gü, ‑wa 'wɔn ‑dɔ ꞊dhɛ bhië" 'ö n ‑bha ya, n ‑kë "dhiʋ̈ ‑gɛn ‑mü n ‑bɔ Klisi 'ka ‑wɔn ꞊në‑ 'ka.
PHI 1:14 N ‑kë ‑kaso 'gü ‑wɔn bha ‑yö kwa dheebhang ‑nu 'wo yö ‑a mɛ 'gbɛ ꞊dede ‑bha ‑to Atanna "piʋ̈ ‑sü ‑tapa ‑sü 'ka, 'ö‑ ‑nu ‑zʋ ‑gban ꞊dedewo. ‑A ‑kë "dhʋ̈ ‑sü ‑wɔn 'gü, ꞊wa Atanna ‑dhiang zë "tʋ̈ng ya‑ 'gü 'waa‑ zë ‑kɔ dɔ "piʋ̈ 'ka, ‑a ‑gɛn ‑mü ꞊dhɛ "suʋ̈ 'bha 'yaa‑ ‑nu 'gü 'zü.
PHI 1:15 ‑Yö "dhʋ̈ tɛan‑ 'ka ꞊dhɛ ‑a mɛ 'bha ‑nu ‑wo mü 'wo Klisi ‑wɔn ‑dhiang zë‑ zë ‑dhɔ ‑bha "wɛɛwɛɛ, ꞊drɔ 'ka (n ‑san ‑bha), "ɛɛn "dhinaa ‑da kian 'ka. "Kɛɛ mɛ 'bha ‑nu ‑zë 'pö ‑wa ‑zë wo zuë" "puu 'ka.
PHI 1:16 'Mɛ 'wo‑ ‑dhiang zë zuë" "puu 'ka "dhʋ̈ bha ‑wa ‑kë n ‑dhɔ ‑bha, ‑a ‑gɛn ‑mü ꞊dhɛ ‑wa 'wɔn dɔ ꞊dhɛ 'wɔn 'ö ‑gban Atanna ‑bha naɔ ‑së bha‑ ‑takozë ‑sü ‑bha bha yö ꞊në n ‑ya ‑a këmɛ 'ka,
PHI 1:17 "kɛɛ mɛ ‑kpɛa 'kö 'wo to 'ö 'wo wo ‑bha ‑kë "dhinaa ‑da kian 'ka, "ɛɛn mɛ ‑gɛn mɔɔ‑ kian 'ka bha ‑wa ‑kë "dhʋ̈ kö 'wo zuëdhiʋ̈tɛɛ 'ö n ‑bha ‑kaso 'gü bha ꞊në‑ 'bha ‑da ‑ta.
PHI 1:18 "Kɛɛ 'kö 'zü woo‑ kë "dhʋ̈ ꞊wɛ? ‑Wa ‑kë "gblʋ̈ʋ̈dhɛ "puu ‑ta oo, ‑wa ‑kë "gblʋ̈ʋ̈dhɛ tii ‑ta oo, 'yaa ‑siö n ‑dhɛ, ‑a ‑gɛn ‑mü ꞊dhɛ 'kö 'zü 'wo‑ ‑kë ‑kɔ "ʋʋ ‑kɔ 'ö‑ 'gü, ‑a ‑nu ꞊gban ‑wo Klisi ꞊në‑ ‑dhiang zë sië, ‑yö n ꞊nii ‑zian ꞊në‑ ‑da, "kɛɛ 'sa ‑yö ‑dho n ꞊nii ‑zian ꞊në‑ ‑da "dhʋ̈ ‑kpɛawo 'ö dho‑ 'ka.
PHI 1:19 ‑A ‑gɛn ‑mü ꞊dhɛ a‑ 'wɔn ‑dɔ ꞊dhɛ ‑a "dhiʋ̈‑ ‑dho ta n ‑gɔ ‑a ‑së ꞊në‑ ‑ta bhɛa" 'ka‑ wo sië Atanna ‑dhɛ n ‑wɔn 'gü bha waa‑ Yesu Klisi ‑bha 'Nii‑ "slʋ̈ʋ̈slʋ̈ ‑bha ‑kë n "piʋ̈ ‑sü ‑wɔn 'gü.
PHI 1:20 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ n 'dhang bho ‑sü ‑ya "dhiʋ̈ 'kpakpadhö 'ö n "tʋ̈ng 'dhö‑ 'gü ꞊dhɛ 'yiʋ̈‑ 'yii 'dho dɔ n ‑bha tongtongdhö, ‑a ‑gɛn ‑mü ꞊dhɛ a ‑to "yaan oo, "ɛɛn 'ö n zë ‑zian ꞊në 'wo‑ wo oo, "sika 'yaa n 'gü, Klisi 'tɔ ‑zë ‑dho bhɔ n ‑bha ‑kpɛawo 'ö dho‑ 'ka.
PHI 1:21 ‑A ‑gɛn ‑mü ꞊dhɛ Klisi ꞊në ma ‑zë ma ‑tosɛa 'ka, 'ma ga ‑zian ‑zë wo kö ꞊ya kë ꞊në‑ wo ‑së, kö maa n ꞊trɔɔn yö.
PHI 1:22 "Kɛɛ 'ö ꞊ya kë 'zü ꞊dhɛ 'ma 'to "yaan 'a dho ꞊mɔɔ‑ ‑bha 'a yë ‑së ‑kë, kö pë ꞊plɛ bha ꞊waa‑ pö 'a n ‑bha 'sü‑ 'gü, ‑a 'dhɛ maa‑ 'sü 'maa‑ dɔ.
PHI 1:23 'Ma dɔ 'wɔn ꞊plɛ bha‑ ꞊zinng 'gü. ‑Yö n "piʋ̈ ꞊dhɛ 'a 'go "kpʋngtaadhɛ ya‑ 'gü kö 'a 'dho Klisi "piʋ̈ dhang‑ 'gü, ‑a 'dhɛ bha‑ "dhia ‑yö n 'gü,
PHI 1:24 "kɛɛ 'ma zë 'zü ka ‑wɔn ‑dhɛ, 'ma n ‑zʋ 'bha 'gɔn, 'yö 'a‑ pö n ‑to "kpʋng ꞊taa ‑sü fië‑ ‑dhö n ga ‑sü ‑bha.
PHI 1:25 ꞊Dhɛ 'ö "dhʋ̈, n 'dhang bho ‑sü ‑za "dhiʋ̈ 'ö 'a‑ 'wɔn dɔ 'kpakpadhö ꞊dhɛ a ‑tun kö ka "piʋ̈ "kpʋng ꞊taa yö, a ‑tun kö ka "piʋ̈ yö kë "dhʋ̈ kö 'a ka faan dɔ kö ka ‑zʋ ‑yö ‑gban 'dhang ‑bho Atanna "dhiʋ̈ ‑sü 'gü, kö ka ꞊nii ‑yö ‑da 'pö.
PHI 1:26 ‑A ‑kë "dhʋ̈ ‑sü 'gü, a ‑dho n yee ‑dee 'bha kë 'a nu ka ‑dhɛ 'gü. ꞊Ya kë "dhʋ̈ ka ꞊nii‑ ‑dho ‑da ꞊dedewo n nu mü ‑sü bha‑ 'gü kwa Dëmɛ Yesu Klisi 'saa‑ 'gü.
PHI 1:27 "Kɛɛ 'wɔn do 'ö "gbɩɩ‑ mü, yö ‑mü ꞊dhɛ ka "ta ‑kɔ ꞊në ‑yö dhi, kö ka "ta ‑kɔ ‑yö bhɔ 'pë 'ö Klisi ‑bha naɔ ‑së ‑ya pö ‑a ‑bha. Kë "dhʋ̈ kö, 'kö 'zü 'ö ‑kë ꞊dhɛ a ‑nu mü oo, "ɛɛn 'mii nu mü oo, "kɛɛ kö ka ‑dhiang ‑së ‑zë ‑yö kë n "tʋʋdhö ‑kpɛawo ꞊dhɛ ka ‑ya ‑sü 'ka Klisi ‑bha ‑ya 'gü, ꞊dhɛ ka ‑kɔ ‑yö 'wɔn do ꞊në‑ ‑bha, ꞊dhɛ ka zuëpiʋ̈wɔn ꞊gban ‑yö do 'dhang ‑bho Atanna "dhiʋ̈ ‑sü 'ö 'wɔn ‑taɔng ‑së ‑ya nu ka ‑dhɛ bha‑ ‑takozë ‑sü 'gü ‑a 'yaɔ‑ ‑nu 'ka.
PHI 1:28 "Suʋ̈ 'ya 'dho ka kë ka 'yaɔ‑ ‑nu 'wo Atanna ‑wʋ ‑wɔn 'gü ‑a ‑nu ‑gɔ tongtongdhö. Yö ꞊në ꞊ya kë "dhʋ̈ 'yö‑ ‑zɔn ‑nu ‑dhɛ ꞊dhɛ ‑wo 'dho sië wo ‑dɩ ꞊dhɛng ‑zian ‑ta, 'yö dho‑ ‑zɔn 'pö ka ‑dhɛ ꞊dhɛ kaa ‑dɩ 'pö ka dha ‑zian ‑ta.
PHI 1:29 "Kɛɛ 'sa Atanna këwɔn ꞊në yö ‑zë 'ka, ‑a ‑gɛn ‑mü ꞊dhɛ yö ꞊në ‑gasitɛ ‑kë ka ‑dhɛ 'yö ka ‑kë Klisi dɔmɛ 'ka, 'yö 'yii 'to ka 'dhang ‑bho ‑a "dhiʋ̈ ‑sü ‑dɩ do ‑zian ‑bha, "kɛɛ 'yö 'ka dho 'ka saan" ‑nu ꞊gban wo ‑a ‑wɔn 'gü.
PHI 1:30 Saan" 'ka n yö kö a‑ 'sü sië, 'ö 'a ‑tun ꞊kö 'sü ꞊dɛɛ Atanna 'yaɔ‑ ‑nu ‑kɔ "dhiʋ̈ bha 'ka ‑da 'gü ꞊taamasü ya‑ 'gü n "piʋ̈.
PHI 2:1 ‑A ‑kë "dhʋ̈ ‑sü bha‑ 'gü, 'ö sü ka ‑bha ‑kplü Klisi ‑bha ‑yi ‑bha 'ö nu 'ö zun‑ 'ka ꞊dɛɛ ‑bha, ‑to "piʋ̈ ‑sü ‑faan ‑yö ka 'gü "wɛ ‑ee? ‑A ‑bha ‑dhɔ bha ‑yö kë ka faan ‑dɔ "wɛ ‑ee? Kaa‑ Atanna ‑bha 'Nii‑ "slʋ̈ʋ̈slʋ̈ ‑nu ka ‑kɔ ‑yö 'ko ꞊kwɛɛ‑ "wɛ ‑ee? Ka ‑wëë ‑yö ka 'ko ‑kë 'ö 'ka "klʋsë ‑kë ka "kwëë "wɛ ‑ee?
PHI 2:2 'Ö 'ka‑ ‑bha ‑zë wo "dhʋ̈ kö‑ ‑dhɛa ‑bha ꞊dhɛ ka ‑wʋ ‑yö kë do, kö ka ‑dhɔ ‑bha ka 'ko kë ‑sü bha ‑yö ꞊mɔɔ "kwëë, ka zuëpiʋ̈dhɛ ‑yö kë do, kö 'ka Klisi ‑wɔn do bha ꞊në‑ 'kun ka 'nii‑ 'ka, kë "dhʋ̈ kö ma zuëniidadhe "dhiʋ̈ ‑yö pa.
PHI 2:3 Kö 'wɔn "ʋʋ 'wɔn 'ka dho‑ kë, kö 'ka 'dho‑ 'bha kë ꞊drɔ 'ka, "ɛɛn ‑dɩ ‑sü 'kpii‑ ‑sü 'ö‑ ‑zundhiʋ̈bhlɔɔ 'yaa 'dhö bha‑ 'ka. "Kɛɛ kö 'ka ka ‑gɔ 'dho "sia‑ ka 'ko ‑dhɛ, kö 'ka mɛ "wɛɛ ‑nu fië‑ bho ka ‑dɩ ‑bha!
PHI 2:4 Kö 'mɛ 'dhɛ "dhʋ̈ ‑yö ‑ya ö "tɛado ‑mawɔn ꞊në‑ ‑wɔn zuën ‑ta, kö 'ka 'dho 'to ‑ya ‑sü 'ka ka ‑dɩ ‑wɔn zuën ‑ta doseng 'ka dho‑ 'ka.
PHI 2:5 ‑Zʋ 'gɔn ‑kɔ 'ö gun (kwa Dëmɛ) Yesu Klisi ‑gɔ bha ꞊në ‑yö kë ka ‑gɔ ‑kpɛawo.
PHI 2:6 ‑A ‑gɛn ‑mü ꞊dhɛ 'ö gun kö 'yii nu ꞊kö "kpʋng ꞊taa waa‑ Atanna ‑a ‑nu ‑duɛ ‑gun do, "kɛɛ 'yii ö ‑dɩ dan‑ 'ka.
PHI 2:7 ‑Yö ö ‑kɔ ꞊në ‑kan ö ‑dɩ ‑wɔn "dhiʋ̈, 'yö ꞊dhuëngdhɛ ‑kwi ‑da ö ‑bha, 'yö ö ‑dɩ ‑kë mɛ "bhɩɩ‑ 'ka 'yö nu "kpʋng ꞊taa ꞊dhɛ mɛ "bhɩɩ‑ ꞊dede 'dhö,
PHI 2:8 'yö ö ‑dɩ ‑da "sia‑, 'yö ö Dë Atanna ‑wʋ ‑ya ꞊bhlëë 'gü ꞊dedewo, 'yö dho 'ö ‑wɩ ö zë ‑wɔn ‑bha, ꞊ya 'to 'nu ga ‑sü "fië ‑zë ‑bha ‑zianwo 'nu kö‑ fië‑ ‑dhö, "kɛɛ 'yö ‑wɩ ‑bha kö ‑wo ö dɔ "dhü ‑bha 'yiʋ̈sü 'ka ꞊dhɛ mɛzëmɛ 'dhö.
PHI 2:9 Yö ꞊në‑ ‑wɔn 'gü 'yö Atanna ‑ya ‑gɔ "dhiʋ̈ ꞊wlü 'pö, 'yö dho 'yö‑ gba ‑yɛa 'ö ꞊bhlëësü ‑yɛa ꞊gban "pɛpɛ suu ‑bha bha‑ 'ka, 'yö dho 'yö 'tɔ 'ö ꞊bhlëësü 'tɔ suu ꞊gban "pɛpɛ ‑bha bha‑ nu‑ ‑dhɛ.
PHI 2:10 Kë "dhʋ̈ kö Yesu 'tɔ bha "tɛɛpë suu ꞊gban "pɛpɛ, ‑wo ‑kë dhang‑ 'gü oo, ‑wo ‑kë "kpʋng ꞊taa oo, "ɛɛn ‑wo kë "sɛ ꞊wlöö oo, kö ‑wo ‑gɔ 'dho‑ ‑dhɛ "sia‑, kö ‑wo zun wo kpiö 'gü ‑a ‑dhɛ.
PHI 2:11 Kë "dhʋ̈ kö "dhi ꞊gban "pɛpɛ ‑wa ‑dhiang zë yi do 'ka ‑wa pö Yesu Klisi ꞊në mɛ ꞊gban Dëmɛ 'ka ꞊dedewo tɛan‑ 'ka, kö kwa Dë Atanna 'tɔ ‑yö bɔ‑ ‑ta kö ‑yö bhɔ.
PHI 2:12 ‑A ‑kë "dhʋ̈ ‑sü bha‑ 'gü, n "taɔngdë ‑nu, 'ö gun kö a ‑tun ka kpö 'gü, ka ‑gun n ‑wʋ ꞊bhlëë ‑ya sië. 'Maa ka kpö 'gü dɔ 'kwa‑ wo ya‑ 'gü 'zü, "kɛɛ ‑a ‑dhɛa ‑bha ꞊dhɛ 'ka‑ kë "dhʋ̈ kö 'ka 'dho‑ 'ka "dhiʋ̈ ‑kpɛawo, kö ‑yö ziö‑ 'ka ‑a 'dhɛ 'ka‑ ‑kë kö a mü bha‑ ‑ta. ‑Ka ka 'gü dɔ "gbɩɩ‑ kö dha 'ka‑ wo bha 'ka‑ 'gü ‑yë kë ‑suʋ̈ Atanna ‑gɔ ‑sü 'ka. Kë "dhʋ̈ kö ka ‑bha dha ‑sü 'ö "dhʋ̈ bha‑ "dhiʋ̈ ‑yö ꞊mɔɔ "kwëë!
PHI 2:13 ‑A ‑gɛn ‑mü ꞊dhɛ ‑yö ‑dhi yöö ꞊dede 'ö "dhʋ̈ bha ꞊në‑ ‑dhɛ 'yö yë bha‑ kë ‑faan waa‑ kë zuëga ‑da ka "gblʋ̈ʋ̈‑.
PHI 2:14 ‑A ‑wɔn 'gü 'ka 'dho 'wɔn "ʋʋ 'wɔn 'bha kë ‑dɔn 'ka ka yun 'gü, "ɛɛn zaɔdhe 'ka.
PHI 2:15 Kë "dhʋ̈ kö 'ka kë "puu "slʋ̈ʋ̈slʋ̈ 'ka, kö pö 'a 'dho kë ka ‑bha, kö 'ka kë Atanna ‑bha 'në ‑nu ꞊dede 'ö pö 'aa‑ ‑nu bha‑ 'ka 'wɔnyaakëmɛ ‑nu 'wo "kpʋngtaadhɛ ya‑ 'gü ꞊dɛɛ, 'ö 'waa‑ dɔ bha‑ ‑nu kpö 'gü. Kö 'ka kë ꞊dhɛ "sɔng 'dhö kö 'ka ‑dhɛ "pʋ 'mɛ 'wo "dhʋ̈ bha‑ ‑nu ‑dhɛ "kpʋngtaadhɛ ꞊gban "pɛpɛ 'gü.
PHI 2:16 Kö 'ka ‑dhɛ "pʋ‑ ‑nu ‑ta Atanna ‑wʋ 'ö mɛ dha bha‑ 'ka. Yö ꞊në ꞊ya kë "dhʋ̈, 'yö 'a dho ꞊mɔɔ‑ ‑bha 'a ‑ba n ‑dɩ 'gü Klisi nu ‑yi 'ka, 'yö 'a‑ 'wɔn dɔ ꞊dhɛ yë 'a‑ ‑kë bha‑ ꞊trɔɔn‑ ‑dhö, ꞊dhɛ saan" 'a‑ wo bha 'mii‑ wo "wɛɛwɛɛ.
PHI 2:17 Saan" ka‑ wo sië ka ‑bha ‑zʋ ‑yö Atanna ‑dhɛ ‑sü 'gü bha ‑yö ꞊dhɛ "saa‑ ‑bho ‑dhɛ ‑sü ꞊në‑ 'dhö. 'Ö ꞊ya kë ‑zianwo ꞊dhɛ 'ma 'to ‑kaso 'gü Yesu Klisi ‑wɔn ya‑ 'gü ꞊wa n zë, 'yaa n 'gü 'wɔn 'bha 'ka, ‑a ‑gɛn ‑mü ꞊dhɛ kö n ga ‑sü bha ꞊ya kë ꞊dhɛ "saa‑ 'ka‑ bho bha‑ ꞊yɔɔn ‑bho "sia‑ ‑sü 'dhö, ‑yö ‑dho dhi n ‑dhɛ 'ö kwɛng‑ ‑nu ꞊gban 'kwa ꞊niidadhe 'ö n ‑gɔ bha‑ ‑kë kwa "kwëë.
PHI 2:18 Kaa ‑dɩ 'pö ka ꞊nii ‑yö ‑da ‑kɔ do bha‑ 'gü, kö kwa‑ ꞊niidadhe bha‑ kë kwa "kwëë.
PHI 2:19 ꞊Ya kë ꞊dhɛ ꞊ya kë kwa Dëmɛ Yesu ‑wɩ ‑bha ‑wɔn 'ka, ‑yö n "piʋ̈ ꞊dhɛ 'a Timote bɔ ka ‑dhɛ 'gü, kö ‑a yee kë ‑sü 'ka, naɔ ‑sɛngbɔ ‑nu 'ö yaa‑ go‑ 'ka mü bha ‑wo n faan dɔ.
PHI 2:20 ‑A ‑gɛn ‑mü ꞊dhɛ yöö do ꞊në ꞊ya kë, 'yö n ‑ta kun yë 'a‑ kë sië kwa Dëmɛ Yesu ‑dhɛ ya‑ 'gü. Yöö do ꞊në ꞊ya kë, 'yö ‑ya ka ‑wɔn zuën ‑ta ꞊dedewo n "piʋ̈, mɛ "wɛɛ 'bha kö yöö‑ kë "dhʋ̈ 'yaa 'dhö.
PHI 2:21 ‑A ‑gɛn ‑mü ꞊dhɛ mɛ ‑kpɛa 'wo to ‑wo wo ‑dɩ ‑gɔ ‑wɔn ꞊në‑ bha, ‑a "wɛɛ 'bha "tʋ 'yaa (kwa Dëmɛ) Yesu Klisi ‑gɔ ‑wɔn ‑nu ‑bha.
PHI 2:22 Kaa ꞊dede ka‑ 'wɔn ‑dɔ 'ö 'kaa‑ 'gü ka tiibha ꞊dhɛ Timote ‑yö ‑kplü ‑sü 'ka Atanna ‑bha 'kpakpadhö. ‑Yö ö ‑dɩ nu ‑sü 'ka naɔ ‑së 'ö go‑ "piʋ̈ bha‑ dɔ ‑sü ‑dhɛ ‑kɔ ꞊gban ‑kɔ ꞊gban 'gü n "piʋ̈ ꞊dhɛ 'në waa‑ dë 'dhö.
PHI 2:23 Yö ꞊në‑ ‑wɔn 'gü, 'yö n "piʋ̈ ꞊dhɛ ꞊ya kë ꞊dhɛ 'wɔn 'ö ma ‑kaso ‑wɔn ya‑ 'gü 'ma‑ dɔ, 'a yö ꞊në‑ bɔ ka ‑dhɛ "vaandhö.
PHI 2:24 "Kɛɛ 'sa n 'dhang bho ‑sü ‑yö n Dëmɛ "dhiʋ̈ 'kpakpadhö ꞊dhɛ ‑a 'gü 'yaa ꞊gblɛɛn 'zü kö mang ꞊dede 'ma ꞊loo ka "piʋ̈ mü.
PHI 2:25 Kwa dheebhang Epafloditö 'ö ‑kë n yëkëyɔɔ 'ka Atanna ‑bha zian ‑ta, 'ö 'yi‑ Atanna ‑wʋ ‑ta ‑ko zë sië, 'ö 'ka n saan dɔ‑ ‑gɔ 'ö nu‑ 'ka n ‑dhɛ kö 'a n ‑mawɔn kë‑ 'ka bha ‑yö n ‑zʋ ‑kun kö 'a n ‑kɔ bho‑ 'gü kö ‑yö ö yee kë ‑yö nu ka "piʋ̈.
PHI 2:26 ‑A ‑gɛn ‑mü ꞊dhɛ ka ‑dhɔ ꞊ya gun ꞊yaa‑ 'kun ꞊dedewo, ‑ya "piʋ̈ ꞊dhɛ 'ö ö "yan ‑kpan ka wëëdhɛ ‑bha 'do 'do 'ka, kë "dhʋ̈ kö ka zuë" ‑yö 'waanu, ‑a ‑gɛn ‑mü ꞊dhɛ ‑a ma 'ka‑ wo ꞊dhɛ "yua ꞊yaa‑ kë "gbɩɩ‑ bha ꞊ya gun ꞊yaa‑ zuë" kaan‑ "kwëë ꞊dedewo.
PHI 2:27 ‑Yö "dhʋ̈ tɛan‑ 'ka ꞊dhɛ "yua ‑ya kë ‑sü 'ka ‑ziisü, ‑yö kë ‑tëng ga ‑sü ‑ta ‑zianwo, "kɛɛ ‑a ‑wëë kë Atanna ‑kë, 'ö mang ‑dɩ 'pö n ‑wëë ‑ya ‑kë, ‑a ‑gɛn ‑mü ꞊dhɛ ‑yö ‑ga ‑zë wo 'nu kö a saan" 'gü ‑zë wo ‑blɛɛsü, "kɛɛ kö‑ ‑ta ‑kpɛa ꞊ya dɔ.
PHI 2:28 Yö ꞊në 'a‑ zë‑ ‑wɔn ‑dhɛ 'yö 'a‑ bɔ ka ‑dhɛ ‑bɛang 'ka, kë "dhʋ̈ kö 'ka‑ yö kö ka zuë" ꞊nii ‑yö ‑da, "kɛɛ kö mang ‑dɩ 'pö zuëdhiʋ̈tɛɛ 'ö n ‑bha bha‑ 'bha‑ "kan‑ ‑ta.
PHI 2:29 ꞊Dhɛ 'ö "dhʋ̈, ꞊ya nu kö ‑yö ꞊loo mü, ‑ka ‑së kë‑ ‑wɔn "dhiʋ̈, kö 'ka‑ ‑dhɔkë, kö 'ka 'wɔn "dhia ma‑ 'gü ꞊dedewo ‑a ‑kë ka dheebhang 'ka ‑sü 'ö kwa Dëmɛ Yesu ‑bha zian ‑ta bha‑ ‑wɔn 'gü. Mɛ suu 'wo "dhʋ̈ bha ‑ka ꞊bhlëë ‑ya ‑nu ‑bha.
PHI 2:30 ‑A ‑gɛn ‑mü ꞊dhɛ ‑ya ‑zë Klisi ‑wɔn ꞊në‑ ‑dhɛ 'yö ꞊tëng ga ‑sü ‑ta bha. N ‑takunkapë 'ö‑ ‑kpan n ‑bha ‑kɔ 'yaa gun (kwa ‑ya "kwëë ꞊gblɛɛn ‑sü ‑wɔn 'gü) bha ka‑ ‑dɔ yö ꞊në‑ ‑gɔ 'yö nu‑ 'ka n ‑dhɛ, yö ꞊në‑ ‑wɔn 'gü 'yö‑ ‑dhɛ to 'dɛdɛ kö‑ ‑gɔ ‑to 'gü.
PHI 3:1 ꞊Ya 'go yö ‑zë 'gü, n dheebhang ‑nu, a‑ ‑pö ka ‑dhɛ ꞊dhɛ 'ka ka "dhia bho ka ‑bha ‑kë kwa Dëmɛ ‑bha zian ‑ta ‑sü ‑wɔn 'gü. 'Ma‑ ‑blɛɛsü pö ka ‑dhɛ 'sëëdhɛ ‑blɛɛsü 'a‑ bɔ ka ‑dhɛ bha‑ 'gü, "kɛɛ n 'gü 'yii 'dho ga ‑a ‑pö ka ‑dhɛ "dhʋ̈ ‑sü 'ka, ‑a ‑gɛn ‑mü ꞊dhɛ yö ꞊në ꞊ya kë "dhʋ̈, 'yö 'kii 'dho ‑da mɛpömɛ ‑nu ‑wʋ "piʋ̈, 'ö 'ka ‑pö.
PHI 3:2 Atanna ‑bha yëseemɛ ‑nu bha ‑ka ka ‑dɩ 'kun‑ ‑nu ‑gɔ ‑së, ‑ka ka ‑dɩ 'kun 'gbɛn‑ ‑nu bha‑ ‑nu ‑gɔ, ‑a ‑gɛn ‑mü ꞊dhɛ mɛpömɛ ‑nu ‑mü. ‑Yö ‑kë ‑nu 'gü ꞊dhɛ ‑go 'gbannë 'gü ‑sü ꞊në mɛ dha Atanna wëëdhö, "kɛɛ "yaaki 'ö 'yaa‑ ‑nu ‑bha bha 'yö ‑kë.
PHI 3:3 A‑ ‑pö ka ‑dhɛ ꞊dhɛ ‑go 'gbannë 'gü ‑mɛ ꞊dede 'ö Atanna ‑ya dɔ, yö ‑mü kwa ꞊në kwa 'ka, ‑a ‑gɛn ‑mü ꞊dhɛ kwa ‑zë kwa Atanna ‑dhɔkë ‑a ‑bha 'Nii‑ "slʋ̈ʋ̈slʋ̈ bha ꞊në‑ ‑kɔ 'ka, 'ö 'kwa kwa "dhia bho kwa ‑bha ‑kë Yesu Klisi ‑bha 'ka ‑wɔn ꞊në‑ 'gü, 'ö 'kwaa kwa ‑zʋ 'gɔn mɛ "bhɩɩ‑ ‑nu wɔ ‑kɔ ‑dhɛ. 'Mɛ 'kwa "dhʋ̈ bha ꞊në 'kwa ‑go 'gbannë 'gü ‑mɛ ꞊dede 'ka Atanna ‑zë 'gü.
PHI 3:4 Mang ‑dɩ 'pö a ‑mɔɔ ‑bha 'nu 'a n ‑zʋ yö mɛ "bhɩɩ‑ ‑nu wɔ ‑kɔ ‑dhɛ 'a n ‑dɩ sü‑ 'gü 'kpii‑. ‑A ‑gɛn ‑mü ꞊dhɛ ‑yö ‑kë mɛ 'bha ‑nu 'gü ꞊dhɛ Zuifö ‑nu kwa ‑bha Atanna ‑bha 'tɔng‑ ‑nu ‑ya ꞊bhlëë 'gü ‑sü bha ꞊në dho‑ ‑nu dha. "Kɛɛ 'sa ꞊ya 'to 'nu‑ 'dhɛ 'kö bha‑ ‑bha kö ma ‑zë n ‑bha "dhiʋ̈‑ ‑ziö ‑nu ꞊gban "pɛpɛ ‑bha ‑ta ꞊gblɛɛn.
PHI 3:5 ‑A ‑gɛn ‑mü ꞊dhɛ ma ‑zë a ‑to 'në "blë ‑dee 'ka 'a dho 'gbannë 'gü, 'ö "dhʋ̈ kö 'a bhɔ ‑a ‑dhɛkpaɔyi ꞊ya kë "saaga. 'Ö ‑ya mü 'zü 'a ‑kë Izraɛdhö mi ꞊dede 'ka, Bɛnngzamɛ suu 'gü. N 'kpɔmɛ ‑nu ꞊gban ‑wo Eblö ꞊në‑ 'ka, ꞊ya kë "dhʋ̈ kö Eblö mi tüütüü ꞊dede ‑mü n 'ka. ꞊Ya zun 'zü Atanna ‑bha 'tɔng‑ ‑nu 'ö Zuifö ‑nu 'wo‑ 'kun sië bha yö ‑zë ‑bha kö ꞊ya ‑loo, ‑a ‑gɛn ‑mü ꞊dhɛ ‑a ‑takɔɔmɛ ‑nu 'wo‑ ‑nu Fadhiziɛn ‑nu ‑kë bha‑ mɛ do ‑mü n 'ka.
PHI 3:6 ꞊Ya 'to 'zü 'wɔn ‑pɛng ‑dɔ wo ꞊gbin‑ ‑sü ‑bha, kö mɛ‑ ‑dho kë n "dhiʋ̈, "kɛɛ kö 'waa 'gbɛ, ‑a ‑gɛn ‑mü ꞊dhɛ ꞊gbaɔn 'a‑ wo Atanna ‑bha 'kɔdhigümɛ ‑nu ‑ta, ‑a "sinma 'yaa 'dhö. ꞊Ya 'to 'zü Atanna ‑bha 'tɔng‑ 'kun ‑sü ‑zë ‑bha, n ‑mɔɔ 'ka 'yaa 'dhö.
PHI 3:7 "Kɛɛ 'wɔn "pɛpɛ 'wo gun n 'gü ꞊bhlëësü ‑blɛɛsü "dhʋ̈ bha‑ ꞊gbaan kë n 'gü "wlaawɔn ꞊në‑ 'ka "tʋ̈ng ya‑ 'gü Klisi ‑wɔn 'gü.
PHI 3:8 ꞊Ya 'to ‑zian wo‑ 'dhɛ 'kö 'a‑ pö bha‑ ‑bha kö‑ fië‑ 'bha‑ ‑dhö, "kɛɛ 'wɔn "pɛpɛ ꞊gban ꞊në ꞊ya kë n 'gü ꞊taamasü ya‑ 'gü "wlaawɔn 'ka, n Dëmɛ Yesu dɔ ‑sü ‑bha ‑kë ‑së ‑kɔ yaa 'gü yaa bha‑ ‑wɔn 'gü. Yö ꞊në‑ ‑wɔn 'gü 'yö 'ma n ꞊taa zun 'wɔn ꞊gban "pɛpɛ suu ‑gɔ ꞊dɛɛ, 'yö 'a‑ ‑ga sië ꞊dhɛ gbo 'dhö, kë "dhʋ̈ kö 'a 'to ‑kplü ‑sü 'ka Klisi ‑wɔn ꞊në‑ ‑bha (‑a ‑gɛn ‑mü ꞊dhɛ ‑a 'dhɛ 'kö bha 'bha 'yaa mɛ dha).
PHI 3:9 Kë "dhʋ̈ 'zü kö 'a 'to‑ ꞊kwɛɛ‑. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'maa n ‑zʋ 'gɔn ꞊taamasü ya‑ 'gü ꞊dhɛ Atanna ‑bha 'tɔng‑ 'kun ‑sü ꞊në n "sɛɛdhɛ ꞊gban bho n ‑bha ‑a wëëdhö, "kɛɛ 'dhang 'a‑ bho Klisi "dhiʋ̈ ꞊në n "sɛɛdhɛ ꞊gban bho n ‑bha, ‑a ‑gɛn ‑mü ꞊dhɛ mɛ "sɛɛdhɛ ‑bho mɛ ‑bha ‑kɔ 'dhɛ kö bha ‑yö ‑go Atanna ꞊në‑ 'gü, mɛ ‑dɩ faan 'yaa ‑mü, ‑ya ‑kë "dhʋ̈ 'mɛ 'ö 'dhang bho Klisi "dhiʋ̈ ꞊në‑ ‑dhɛ.
PHI 3:10 'Wɔn 'ö 'ma kë 'a n ‑zʋ gɔn‑ 'ka ‑yö doseng. Yö ‑mü ꞊dhɛ kö 'a Klisi dɔ, kë "dhʋ̈ kö 'gügbɩɩdhɛ 'ö Atanna ‑ya bho‑ 'ka ga 'gü bha ‑yö ‑da n 'gü, kö ‑wëëdhɛ 'ö‑ yö bha 'a n ‑bha yö 'pö, kö 'a n bo 'wɔn yaa kë ‑sü 'ka, (kö 'a kë‑ ‑gɔ ꞊dhɛ 'mɛ ꞊ya ga‑ 'dhö ꞊dhɛ ‑kɔ 'ö yöö ‑dɩ 'pö 'ö ga‑ 'ka bha‑ 'dhö).
PHI 3:11 Kë "dhʋ̈ kö ꞊ya kë ‑mɔɔ "kwëë ‑wɔn 'ka n ‑gɔ, kö 'a ‑bö 'pö (Yesu nu ‑yi 'ka).
PHI 3:12 ‑A pö 'a‑ wo "dhʋ̈ bha 'yii kë ꞊dhɛ ‑yɛa 'a‑ mɔɔ‑ sië bha 'ma‑ ꞊slɔɔ ꞊në‑ wo 'nu, "ɛɛn ꞊dhɛ 'ma Atanna dhɔɔbhaawɔn ꞊gban kë, ꞊dhɛ pö 'aa n ‑bha 'zü ‑a wëëdhö, ‑abin! "Kɛɛ ‑bɛang ꞊në 'a‑ 'sü sië, kë "dhʋ̈ kö 'a n 'gü dɔ "gbɩɩ‑ 'a ‑kpan ‑bha, ꞊dhɛ 'ö ‑kë ꞊dhɛ Yesu Klisi ꞊ya mang ‑dɩ 'pö n 'san n ‑kɔ ‑bha bha‑ ‑wɔn 'gü.
PHI 3:13 N dheebhang ‑nu, 'yii kë n 'gü ꞊dhɛ n ‑kɔ ꞊ya ꞊mɔɔ‑ ‑bha 'nu, "kɛɛ a‑ ‑dɔ ꞊dhɛ 'wɔn do 'bha ‑zë a‑ kë sië. 'Ö "dhʋ̈ bha kö a ‑dho n kwaa‑ 'dhɛ 'kö 'ma ziö‑ ‑ta 'nu bha‑ ‑zü, 'ö n ‑zʋ ‑zian ‑yö bhɔ yö ‑zë 'ka, kë "dhʋ̈ kö n "yaaki ‑yö 'to ‑a 'dhɛ 'ö n "dhiʋ̈ bha ꞊në‑ 'gü.
PHI 3:14 Yö ꞊në‑ ‑wɔn 'gü 'yö 'a ‑bɛang 'sü sië 'a dho n "dhiʋ̈ ꞊në‑ wo ‑kpɛawo, kë "dhʋ̈ kö 'a‑ ꞊la ꞊slɔɔ dhang‑ 'gü, kö Atanna 'dhö Yesu Klisi bɔ kwa ‑dhɛ ‑dhɛ 'gü ‑yɛa 'ö‑ ‑wɔn 'ka dhang‑ 'gü bha 'a‑ ꞊slɔɔ.
PHI 3:15 ꞊Dhɛ 'ö "dhʋ̈ ‑a ‑dhɛa ‑bha ꞊dhɛ mɛ "pɛpɛ 'dhɛ 'kö 'kwa ‑kian ‑a ‑bha zian ‑ta bha kwa ‑wʋ ‑yö kë‑ 'dhɛ 'kö bha‑ 'gü do. ꞊Ya kë 'zü ꞊dhɛ mɛ 'bha 'dhö ‑tun ka kpö 'gü 'ö ‑zʋtadhe suu bha 'yaa‑ ‑gɔ, Atanna ‑dho ‑a ‑ta "pʋ‑ ‑mɛ ‑dhɛ 'kpakpadhö.
PHI 3:16 "Kɛɛ kö 'zü 'ö ‑kë ‑kɔ "ʋʋ ‑kɔ 'ö‑ 'gü, ‑naa 'dhɛ 'kö 'kwa ‑wo ‑ta ya, kwa "ta ‑gɛn ‑yö kë do kö 'kwa 'dho‑ 'ka "dhiʋ̈.
PHI 3:17 N dheebhang ‑nu, ‑ka ka "ta ‑kɔ 'sü n ‑bha ‑bha. ‑Kaa 'suan‑ bho 'mɛ 'wo wo ‑bha "ta ‑kɔ sü yi ‑bha ‑bha 'wo ka kpö 'gü bha ꞊në‑ ‑nu ‑bha.
PHI 3:18 ‑A ‑gɛn ‑mü ꞊dhɛ mɛ 'gbɛ ‑wo ‑dhö 'ö‑ ‑nu "ta ‑kɔ 'yaa bhɔ Klisi ‑bha mɛ ‑nu ‑bha ‑bha, "kɛɛ ‑wo ‑kë ꞊dhɛ 'pë 'wo Klisi ‑bha ‑ga "dhü ‑bha ‑sü bha‑ 'yaɔ‑ ꞊në‑ 'ka ‑a 'dhö. 'Ma‑ pö ka ‑dhɛ "dhʋ̈ pinngdhö, yö ꞊në 'a ‑tun 'bha pö 'zü ka ‑dhɛ "gbʋ 'ka ꞊dɛɛ bha.
PHI 3:19 'Mɛ 'wo "dhʋ̈ bha‑ ‑nu "dhiʋ̈ ta ‑dhɛ ‑mü ‑dho pɛng 'gü ‑sü ꞊në‑ 'ka, ‑a ‑gɛn ‑mü ꞊dhɛ ‑a ‑nu ‑dɩ ‑dhidhɛwɔn ‑nu ꞊në 'wo‑ ‑dhɔkë (꞊dhɛ‑ ‑nu ‑bha ‑zlan 'dhö). 'Wɔn ‑nu 'ö ꞊waa‑ kë 'ö 'yiʋ̈‑ dho dɔ‑ ‑nu ‑bha bha ꞊në 'wo wo ‑dɩ 'tɔ bhɔ ‑zian mɔɔ‑ 'gü. 'Waa kë ‑a ‑nu ‑zʋ 'yaa ‑da pë "wɛwɛ 'bha ‑wɔn ‑ta kö 'yii kë "kpʋngtaapë ‑nu ‑wɔn 'ka.
PHI 3:20 "Kɛɛ kwa ‑zë kwa Dë ‑pö ꞊dede 'ö 'dhö, 'yö dhang‑ 'gü ‑dhɛ 'ka, kwa Dëmɛ Yesu Klisi 'ö kwa Dhamɛ 'ka 'ö 'kwa kwa "yan 'to sië‑ ‑gɔ bha ‑yö ‑dho 'go mü ꞊naa 'ö nu.
PHI 3:21 Yö ꞊në dho nu 'yö kwa kwi 'ö "sɛ 'ka 'ö ga ‑kwi 'ka 'ö "sɩ 'yaa‑ ‑dhɛ ya‑ ‑gla, 'yö‑ ‑kë ꞊dhɛ ‑a ‑dɩ kwi ꞊bhlëësü 'ö 'yaa ga 'ö mɛdhɛ kë sië‑ 'gü bha‑ 'dhö, faan 'ö Atanna ‑ya nu‑ ‑dhɛ 'ö‑ ‑kɔ ‑yö ‑ziö 'ka pë suu ꞊gban "pɛpɛ ‑gɔ bha‑ 'ka.
PHI 4:1 Yö ꞊në‑ ‑wɔn 'gü, 'yö 'a bhɛa" sië ka ‑dhɛ, n dheebhang ‑nu. 'Yö n zuë" 'yaa 'waanu "yan ‑kpan ka ‑bha ‑sü 'ö ka ‑dhɔ ‑bha n kë ‑sü ‑wɔn 'gü bha‑ 'gü, ‑a ‑gɛn ‑mü ꞊dhɛ ka ꞊në ka ‑wɔn ‑yö n ꞊nii ‑da, ka ꞊në 'ka ꞊dhɛ ‑bɛang 'a‑ 'sü sië bha‑ ꞊trɔɔn 'dhö. A ‑bhɛa ka ‑dhɛ yö ꞊në‑ ‑wɔn 'gü, kë "dhʋ̈ kö 'ka 'to ‑kplü ‑sü 'ka kwa Dëmɛ ‑bha ꞊dhɛ ‑kɔ 'a‑ pö‑ 'ka ka ‑dhɛ bha‑ 'dhö, n dhɔɔbhaamɛ ‑nu!
PHI 4:2 Evodi kaa‑ Sɛnngtisö, bhɛa" ꞊në 'a‑ wo ka ‑dhɛ kö mɛ ꞊plɛ bha 'ka dɔ "gbɩɩ‑ kö ka zuë" ‑yö kë do ka ‑bha ‑kë kwa Dëmɛ ‑bha 'ka ‑sü ‑wɔn 'gü (kö 'ka 'dho "dhinaa 'ma).
PHI 4:3 N "tɛado 'ö bhii ‑dɩ 'pö 'i n ‑takunmɛ ꞊dede 'ka bha, ‑bhö dɔ "gbɩɩ‑ kö 'i dhong ‑nu bha‑ ‑nu ‑ta 'kun, ‑a ‑gɛn ‑mü ꞊dhɛ woo ‑dɩ 'pö ‑wo kë n ‑ta ‑kun Atanna ‑bha ‑gblü 'ö ‑gban ‑a ‑bha naɔ ‑së dɔ ‑sü ‑bha bha‑ ‑a dɔ ‑sü ‑bha, ꞊dhɛ Klema waa‑ n yëkëyɔɔ ‑nu ‑kpɛa 'wo to, 'ö kwɛng‑ ‑nu ꞊gban kwa 'tɔ 'dhö Atanna ‑bha dhasü 'sëëdhɛ 'gü bha‑ ‑nu 'dhö.
PHI 4:4 A‑ ‑pö ka ‑dhɛ ꞊dhɛ 'ka ka "dhia bho ka ‑bha ‑kë kwa Dëmɛ ‑bha 'ka ‑sü ‑wɔn 'gü, yö ꞊në 'a‑ ziö 'bha wo sië 'zü ka ‑dhɛ mü bha, a‑ ‑pö ꞊dhɛ 'ka ka "dhia bho ꞊dede ꞊në‑ wo.
PHI 4:5 ‑Ka kë dhɔngdhɔngsü, kaa‑ ‑kë dhɔngsü ‑sü bha ‑yö mɛ ꞊gban "pɛpɛ ‑zʋ 'kun, ‑a ‑gɛn ‑mü ꞊dhɛ kwa Dëmɛ ꞊ya dun kwa ‑ta.
PHI 4:6 'Ka 'dho ‑ya pë "ʋʋ pë 'bha ‑wɔn zuën ‑ta, "kɛɛ pë "ʋʋ pë 'ö ka ‑mawɔn ‑yö zun‑ ‑bha, ‑kaa ‑gbadhɛ Atanna ‑gɔ, ‑bhɛa ‑dhɛ ‑sü waa‑ ‑gbɛʋʋ kë ‑sü, waa‑ nuɛ" bho ‑sü 'ka.
PHI 4:7 ꞊Ya kë ꞊dhɛ 'ka‑ kë "dhʋ̈, ‑yö ‑dho ka zuë" 'waanu 'ö ‑ziö mɛbhɩɩdhe ‑zʋgɔngüwɔn ‑zë ꞊gban "pɛpɛ "dhiʋ̈todhɛ ‑ta. Ka zuë" 'ö dho‑ 'waanu "dhʋ̈ bha ꞊në dho kë ka ‑zʋ ‑gban ‑gɛn 'ka, 'yö 'ka ꞊nëng Yesu Klisi ‑bha, 'yö ka ‑zʋ ‑gɔn 'ka ‑wɔn "wɛɛ 'bha 'yaa kë kö 'yii kë Yesu Klisi ‑wɔn ‑zë 'ka.
PHI 4:8 N dheebhang ‑nu, ꞊ya 'go yö ‑zë 'gü, 'wɔn "ʋʋ 'wɔn 'ö tɛanwɔn 'ka, 'ö ꞊bhlëësü, 'ö pö 'aa‑ ‑bha, 'ö "puu, 'wɔn "ʋʋ 'wɔn 'ö‑ "dhia‑ dho 'ma mɛ 'gü, 'ö mɛ ꞊bhlëë 'gü ‑wɔn 'ka, 'ö ‑së, 'ö mɛ 'tɔdhiwɔn 'ka yö ꞊në ‑yö kë ka ‑zʋ ‑gɔn 'ka ‑wɔn 'ka.
PHI 4:9 'Wɔn "pɛpɛ 'a ka ꞊draan‑ ‑bha, "ta ‑kɔ 'ka‑ ꞊slɔɔ n "dhiʋ̈, 'wɔn 'ka‑ ma n ‑ta, "ɛɛn 'ö 'ka‑ kë ‑dhɛ yö n ‑gɔ ꞊në‑ ‑kaa kë. 'Ka‑ kë "dhʋ̈, kwa ‑bha Atanna 'ö mɛ zuë" 'waanu bha ‑yö ‑dho 'to ka "piʋ̈.
PHI 4:10 'Ma n ‑zʋ 'gɔn ‑ya 'ka‑ wo n ‑wɔn zuën ‑ta 'zü ‑deewo, 'ö 'ka ꞊mɔɔ‑ ‑bha 'ka n ‑ta 'kun bha‑ 'ka, n zuë" ꞊nii ‑yö ‑da ꞊dedewo kwa ‑bha ‑kë kwa Dëmɛ ‑bha 'ka ‑sü ‑wɔn 'gü. ‑A ‑gɛn ‑mü ꞊dhɛ 'wɔn 'ka‑ ‑kë n ‑dhɛ bha ‑ya ‑zɔn n ‑dhɛ ꞊dhɛ ‑a yi ꞊ya ꞊gwëë kö ka ꞊kwɛng ‑pë 'yii ‑kpan n ‑bha, kö‑ "slë ꞊në 'yaa gun ka "yaan "kɛɛ kö ka ‑zʋ ‑zë 'yii bhɔ n ‑wɔn 'ka.
PHI 4:11 ‑A pö 'a‑ wo "dhʋ̈ bha 'yii kë ꞊dhɛ ꞊ya kë "dhʋ̈ kö n ‑mawɔn ꞊në ꞊ya zun pë 'bha ‑bha. ‑A ‑gɛn ‑mü ꞊dhɛ 'ma dhëë bho ‑tosɛa ‑kë ꞊nii ‑da 'gü ‑sü 'ö "tʋ̈ng suu ꞊gban 'gü bha‑ 'ka.
PHI 4:12 "Flɛɛ 'dhö n ‑bha, a ‑tosɛa 'kun ‑kɔ ‑dɔ, ꞊naɔ 'dhö n ‑gɔ a ‑tosɛa 'kun ‑kɔ ‑dɔ. 'Wɔn "ʋʋ 'wɔn 'ö ‑da n ‑ta ‑dhɛ "ʋʋ ‑dhɛ 'ö‑ 'gü, n ‑kɔ ‑yö ‑mɔɔ n ‑dɩ ‑bha. A din‑ 'gü ‑dɔ, 'ö 'a 'kën ‑sü 'gü dɔ, 'ö 'a ꞊naɔ 'gü dɔ, 'ö 'a "flɛɛ 'gü dɔ.
PHI 4:13 N ‑kɔ ‑yö ‑mɔɔ 'wɔn ‑nu bha‑ ꞊gban kë ‑sü ‑bha "dhʋ̈ n Dëmɛ ꞊në‑ 'saa‑ 'gü, ‑a ‑gɛn ‑mü ꞊dhɛ yö ꞊në n gba‑ ‑faan 'ka.
PHI 4:14 "Kɛɛ yö ‑zë ꞊gban 'gü, n ‑ta 'ka‑ kun 'ö 'ka n bho‑ 'ka ‑wëë 'gü bha 'wɔn ‑së ꞊në‑ 'ka‑ ‑kë.
PHI 4:15 Fidhipö ‑mɛ ‑nu, kaa ꞊dede ka yö ‑zë 'wɔn ‑dɔ 'kpakpadhö, ꞊dhɛ 'a go ka ‑gɔ Maseduanö ‑sɛ 'gü yi 'bha 'ka, kö 'kwa Atanna ‑bha naɔ ‑së ya‑ pö ‑sü zü bho ‑dee 'gü, mɛ "wɛɛ 'bha 'yii n saan bho do kö 'yii kë ka 'ka. "Kɛɛ 'sa Atanna ‑bha naɔ ‑së 'a‑ dɔ ka ‑gɔ bha ꞊në 'ka zë‑ ‑wɔn ‑dhɛ 'yö 'ka n ‑ta 'kun, "kɛɛ 'sa kö 'mii naɔ bha‑ dɔ kaa do ‑zë ka ‑gɔ.
PHI 4:16 Ka‑ zü ‑zian ‑bho kö a ‑tun Tesadhonikö. Ka n saan ‑bho ‑dhɛ bha‑ 'gü ‑gɛn ‑yan 'ka ꞊plɛ, kë "dhʋ̈ kö 'a n ‑mawɔn kë‑ 'ka.
PHI 4:17 "Kɛɛ 'ya 'dho kë ka 'gü ꞊dhɛ ꞊ya kë "dhʋ̈ kö a‑ ‑pö 'ka n saan ꞊në‑ bho ‑kpɛawo. ‑Abin! 'Wɔn 'a n ‑zʋ gɔn‑ 'ka yö ‑mü ꞊dhɛ kö 'wɔn ‑nu 'ka‑ kë sië n ‑dhɛ ‑kpɛawo bha‑ ꞊trɔɔn ꞊në ‑yö ‑da "dhiʋ̈ ka ‑gɔ Atanna wëëdhö.
PHI 4:18 Pë "pɛpɛ 'ka‑ dɔ Epafloditö ‑gɔ 'ö nu‑ 'ka n ‑dhɛ bha‑ ꞊gbaan ꞊loo, ꞊ya n ‑kpla ‑dhɛ "pɛpɛ 'ö gun n ‑bha ‑a ꞊gban bho n ‑bha, ‑a ‑kpɛa ‑zian ꞊ya 'to, pë "pɛpɛ 'ö n ‑mawɔn gun‑ ‑bha 'ma‑ ꞊gban ꞊slɔɔ Epafloditö ‑bha ‑wo yö ‑sü bha‑ zian 'gü. Ka ꞊kwɛng pë 'ö ‑kpan n ‑bha bha ‑yö ‑kë n ‑gɔ ꞊dhɛ ‑dhasiklɔɔ ꞊fii ‑së 'ö ꞊wa Atanna ‑dhɔ kë‑ 'ka 'ö‑ "dhia‑ ma‑ 'gü, 'ö‑ 'gü ‑wɔn ‑dhi ‑dhɛ bha ꞊në‑ 'dhö.
PHI 4:19 (‑A ‑kë "dhʋ̈ ‑sü bha‑ 'gü, ma ‑zë "sɩ 'yaa n ‑dhɛ kö 'a‑ ‑gɔ "yɔɔ dɔ ka ‑gɔ,) "kɛɛ ma Atanna 'a n ‑zʋ gɔn‑ ‑dhɛ bha ꞊në dho ‑kpla suu "ʋʋ suu 'ö ‑ya ka ‑bha ‑a bho ka ‑bha ‑a ‑bha ꞊sloodhɛ ‑bha kwa Dëmɛ Klisi Yesu 'saa‑ 'gü.
PHI 4:20 Kö kwa Dë Atanna 'tɔ ‑yö bhɔ "tʋ̈ng ꞊gban 'gü bha 'aa ‑yö kë!
PHI 4:21 Atanna ‑bha mɛ "pɛpɛ 'ka ‑kplü ‑sü 'ka kwa Dëmɛ Yesu Klisi ‑bha Fidhipö ‑pö 'gü 'ma ka ꞊tua bho 'gbɛ!
PHI 4:22 Mɛ "pɛpɛ 'wo bɔ kwa ‑bha Atanna bha‑ 'ka 'wo 'dhang bho kwa Dëmɛ Yesu "dhiʋ̈ 'wo ‑dhɛ ya‑ 'gü ꞊wa ka ꞊tua bho 'gbɛ. Kwa dheebhang ‑nu 'wo yö ‑a ‑nu ꞊gban "pɛpɛ ꞊wa ka ꞊tua bho, "kɛɛ 'mɛ "pɛpɛ 'wo ‑gblüdë 'kpii‑ ‑gɔ 'kɔɔdhö ‑a ‑nu ‑bha bha‑ ‑kɔ pa do ‑ya ‑ta.
PHI 4:23 Kwa Dëmɛ Yesu Klisi ‑bha ‑gasitɛ 'ö‑ ‑kë kwa ‑dhɛ bha ‑yö kë ka "piʋ̈ "tʋ̈ng ꞊gban 'gü.
COL 1:1 Mang Pɔdhö ‑mɛ 'ö ‑dhi Atanna ꞊në‑ ‑dhɛ 'yö n ‑ya Yesu Klisi ‑bha bɔmɛ 'ka bha yaa‑ Timote 'ö kwɛng‑ ‑nu ꞊gban 'kwa dheebhang do 'ka Yesu ‑bha zian ‑ta bha ꞊në 'yi 'sëëdhɛ ya‑ ‑bɛn zë.
COL 1:2 Yi 'sëëdhɛ ya‑ ‑bɛn ‑zë kö 'yi‑ bɔ 'mɛ 'ka yi dheebhang ‑nu 'ka 'ö 'ka ‑ya ‑sü 'ka ‑dɩ ‑wɔn "dhiʋ̈ Klisi ‑bha 'ka, 'ö 'ka ‑kplü ‑sü 'ka‑ ‑bha kpɛnngkpɛnngdhö Kodhɔsö ‑pö 'gü bha ꞊në‑ ka ‑dhɛ. Yi‑ ‑dhɛ Atanna ‑gɔ kö ‑yö ö ‑bha ‑gasitɛ waa‑ ‑bha zuëwaanusü bha‑ nu ka ‑dhɛ ‑kpɛawo.
COL 1:3 'Yi bhɛa" sië Atanna ‑dhɛ ka ‑wɔn 'gü, yö 'ö ‑kë kwa Dëmɛ Yesu Klisi Dë 'ka bha yi‑ nuɛ" bho ‑kpɛawo.
COL 1:4 ‑A ‑gɛn ‑mü ꞊dhɛ ka ‑bha ‑zʋ ‑yö Yesu Klisi ‑dhɛ ‑sü waa‑ ‑dhɔ 'ö 'ka‑ ‑kë Atanna ‑bha mɛ ‑nu "pɛpɛ ꞊gban 'ka bha 'ya‑ ma (Epaflasö ‑ta).
COL 1:5 ꞊Ya 'go mü 'zü yi‑ ma ‑sü 'ka ꞊dhɛ Atanna 'dhö ka ‑dhɛkpaɔ dhia" saan 'ö‑ ‑ya ‑sü 'ka dhang‑ 'gü bha, ka ka "yan 'to sië yö ꞊në‑ ‑gɔ. 'Sa ‑dhɛkpaɔ dhia" saan 'ö ‑ya ‑sü 'ka ka ‑gɔ "dhʋ̈ bha ꞊në 'ka zë‑ ‑wɔn ‑dhɛ 'yö 'ka ka "yan 'to sië Yesu ‑gɔ klöklödhö. 'Mɛ 'wo bɔ‑ 'ka ‑a ‑nu ‑dhɔ ‑yö ka ‑kë 'pö yö ꞊në‑ ‑wɔn 'gü. ‑A ‑gɛn ‑mü ꞊dhɛ ‑dhɛkpaɔ dhia" saan 'ö "dhʋ̈ bha 'ka‑ ‑wɔn ma 'nu naɔ ‑së 'ö go Atanna "piʋ̈ 'ö tɛanwɔn ‑ta ‑pʋ mɛ ‑dhɛ bha‑ ‑pö ka ‑dhɛ "tʋ̈ng 'gü.
COL 1:6 'Wɔn ‑taɔng ‑së 'ö "dhʋ̈ bha‑ ‑wɔn ‑yö sa ꞊në‑ wo sië "kpʋngtaadhɛ ꞊gban "pɛpɛ 'gü do 'ö dho‑ 'ka. ‑Yö ꞊trɔɔn ‑së kë sië ‑dhɛ 'ö "dhʋ̈ ‑a ꞊gban "pɛpɛ 'gü 'pö do 'ö dho‑ 'ka ꞊dhɛ ‑kɔ 'ö‑ kë sië‑ 'ka ka ‑gɔ "sɛ 'gü mü bha‑ 'dhö. Kë 'ö‑ wo sië "dhʋ̈ bha‑ zü 'yii bho ꞊dɛɛ, ‑a zü‑ ‑bho yi 'ö 'ka Atanna ‑bha ‑gasitɛ ‑naɔ bha‑ ꞊wlöö 'kpakpadhö ꞊dede ma‑ 'ka bha‑ 'ka.
COL 1:7 Epaflasö 'ö ‑kë yi "tayɔɔ dhɔɔbhaasü 'ka Atanna ‑bha yë ya‑ kë ‑sü 'gü bha ꞊nɛ naɔ ‑së bha‑ pö ka ‑dhɛ. Yë 'ö‑ kë sië mü bha ‑ya ‑kë yii‑ kë 'gü, ‑a ‑gɛn ‑mü ꞊dhɛ Klisi ‑bha yëkëmɛ 'ö mɛ‑ ꞊mɔɔ‑ ‑bha mɛ 'dhang bho‑ kë ‑yë "dhiʋ̈ yö ‑mü.
COL 1:8 Yö ꞊në nu 'yö ‑dhɔ 'ö Atanna ‑bha 'Nii‑ "slʋ̈ʋ̈slʋ̈ ‑ya ‑ya ka 'gü bha‑ ‑dhiang zë yi ‑dhɛ.
COL 1:9 Yö ꞊në‑ ‑wɔn 'gü 'yö yii ‑dɩ 'pö yi 'gü 'yaa ga ‑bhɛa Atanna ‑dhɛ ‑sü 'ka ka ‑wɔn 'gü. ‑A ‑gɛn ‑mü ꞊dhɛ 'ö sü yi 'yi‑ ma‑ 'ka bha‑ ‑bha 'ö nu 'ö zun ꞊dɛɛ ‑bha, yi ‑bhɛa ‑dhɛ "tʋ̈ng ꞊gban "pɛpɛ 'gü kö ‑yö ka pa 'wɔndɔdhe 'ö ‑gban ‑a dhɔɔbhaawɔn ‑nu kë ‑sü ‑bha bha‑ 'ka, kö ‑yö ka gba "yaaki waa‑ ‑gɔgüsëdhɛ 'ö‑ ‑bha 'Nii‑ ‑ya nu mɛ ‑dhɛ bha‑ 'ka.
COL 1:10 Kë "dhʋ̈ kö ka "ta ‑kɔ ‑yö bhɔ kwa Dëmɛ ‑bha mɛ ‑nu "ta ‑kɔ ‑bha, kë "dhʋ̈ 'zü kö ka "dhia ‑yö ma‑ 'gü ꞊dedewo ‑kɔ ꞊gban ‑kɔ ꞊gban 'gü, kö 'ka kë 'wɔn ‑së suu ꞊gban "pɛpɛ 'do 'do këmɛ 'ka kö ka ‑bha Atanna dɔ ‑sü bha‑ 'bha ‑da ‑ta ‑kpɛawo.
COL 1:11 Yi ‑bhɛa Atanna ‑dhɛ 'pö kö ‑yö ka faan dɔ ‑kɔ ꞊gban "pɛpɛ 'gü ‑a ‑bha 'gügbɩɩdhɛ 'ö‑ "dhiʋ̈todhɛ 'yaa 'dhö bha‑ 'ka, kö 'wɔn "gbɩɩ‑ ‑zian ꞊në ꞊ya kë ka 'ka ‑a ‑wʋ ‑wɔn 'gü, kö ka zuë" ‑yö kë‑ 'gü ‑sɛa.
COL 1:12 ‑Ka ka wëë' "pʋ kö 'ka kwa Dë Atanna 'ö ka ‑kë 'kɛan‑ pë 'ö‑ ‑ya 'mɛ 'wo bɔ ö 'ka ‑a ‑nu ‑gɔ ‑a ꞊slɔɔ ‑mɛ 'ka ‑dhɛpuudhɛ 'gü ‑a ‑bha zian ‑ta bha‑ nuɛ" bho "pɛpɛdhö.
COL 1:13 Yö ꞊në kwa "vlʋ dɔ 'wɔn yaa ‑gɔ 'yö kwa ‑kɔ bho Sɔtraan ‑gɔ kpö ꞊wlöö, 'yö kwa bɔ ö Gbö 'ö‑ ‑dhɔ ‑ya ‑kë "mlümlüsü bha‑ ‑bha mɛdhɛ 'gü,
COL 1:14 ‑A Gbö bha ꞊në 'kwa bɔ‑ ‑ta 'yö kwa kë ‑sɔng ‑nu ‑mawɔn 'to, ‑a ‑gɛn ‑mü ꞊dhɛ yö ꞊nɛ kwa fië bho Sɔtraan ‑gɔ.
COL 1:15 Atanna ‑zë mɛ 'bha "yan 'yaa ‑kpan ‑bha. 'Kwa‑ dɔ 'mɛ 'ö‑ "piʋ̈ yö ‑mü ‑a Gbö 'ö‑ ‑bhɔ ‑bha 'ka bha ꞊në‑ 'ka. ‑A Gbö bha ꞊në pë "pɛpɛ 'ö Atanna ‑ya ‑da ‑a ꞊gban ‑gɔmɛ 'ka.
COL 1:16 ‑A ‑gɛn ‑mü ꞊dhɛ pë "pɛpɛ 'ö‑ ‑da bha ‑ya ‑da yö ꞊në‑ ‑kɔ ‑ta. Pë "pɛpɛ 'wo dhang‑ 'gü oo, 'wo "kpʋng ꞊taa oo, ‑a 'dhɛ mɛ "yan ‑ya yö oo, ‑a 'dhɛ mɛ "yan 'yaa‑ yö oo, ‑ya ꞊gban "pɛpɛ ‑da yö ꞊në‑ ‑kɔ ‑ta. "Yina suu "pɛpɛ 'ö 'gügbɩɩdhɛ 'dhö‑ ‑nu ‑gɔ, "ɛɛn pë "pɛpɛ 'ö ‑blüdëdhɛ ‑gbloo 'dhö‑ ‑nu ‑gɔ, ꞊bhlëëpë ‑nu "ɛɛn ziömɛgɔpë ‑nu, "ɛɛn pë ‑nu 'ö "sɩ dhö‑ ‑nu ‑dhɛ bha, ‑yö ‑bɔ Yesu ꞊në‑ ‑ta 'yö‑ ‑nu ‑da. Klisi ꞊në pë "pɛpɛ bha‑ ꞊gban ‑da, 'yö‑ ‑nu ‑ya ö ‑bha ‑ya 'gü.
COL 1:17 Yö 'ö bha ‑yö ‑gun pë ꞊gban "pɛpɛ "dhiʋ̈. Pë "pɛpɛ 'ö Atanna ‑ya ‑da ‑a ꞊gban "pɛpɛ gën ‑yö ‑gban yö ꞊në‑ ‑bha. ‑A ‑bha 'gügbɩɩdhɛ ꞊në‑ ‑wɔn 'gü 'yö pë "pɛpɛ bha‑ ꞊gban 'wo wo "gblʋʋ 'gü ꞊dɛɛ, 'yö‑ 'bha 'yii bho "gblʋʋ do.
COL 1:18 Atanna ‑bha 'kɔdhigümɛ ‑nu ꞊gban "pɛpɛ ‑lookota ‑sü ‑kë ꞊dhɛ mɛ ‑dhü do ꞊në‑ 'dhö, Yesu bha ꞊në‑ ‑nu ‑gɔ 'ka, yö 'ö bha ꞊në ‑tosɛa ‑dee 'ö 'yaa yën bha‑ zübhodhɛ 'ka, yöö do bha ꞊në mɛ "pɛpɛ 'wo ‑bhɔ ga ‑sü 'ka 'yi bha‑ 'ka 'ö nu 'ö zun‑ 'ka ꞊dɛɛ ‑bha bha‑ mɛ ‑blɛɛsü 'ö ꞊ya ‑bö ‑a 'ka, kë "dhʋ̈ kö yö ꞊në ‑yö kë pë ꞊gban "pɛpɛ ‑gɔ 'ka.
COL 1:19 ‑A ‑gɛn ‑mü ꞊dhɛ ‑yö ‑dhi Atanna ‑dhɛ kö ö dɔ ‑kɔ ꞊gban "pɛpɛ suu ‑yö kë Klisi ‑gɔ.
COL 1:20 Atanna ‑bɔ Klisi do bha‑ ꞊në ‑ta 'yö waa ö këpë "pɛpɛ 'wo dhang‑ 'gü oo, 'wo "kpʋng ꞊taa oo, wo ‑kɔ wü 'koo, 'yö ö ‑siödhɛwɔn bho wo ꞊zinng 'gü ‑a ꞊yɔɔn 'ö ꞊wɛnng "dhü ‑bha bha‑ ‑wɔn 'gü.
COL 1:21 Yö ꞊në‑ ‑wɔn 'gü 'yö ka 'ö 'ka gun‑ 'ka ꞊gblɛɛn, 'ö 'ka gun‑ 'yaɔ‑ 'ka ka ‑zʋgɔngüwɔn ‑nu waa‑ ka këwɔn yaa ‑nu ‑wɔn 'gü bha,
COL 1:22 'yö ꞊ya kɛng‑ ‑nu ka ‑kɔ 'wü 'koo dɔ 'kwa‑ wo ya‑ 'gü, ga 'ö‑ wo mɛbhɩɩdhe ‑dhɛ ‑kwi 'gü bha‑ ‑wɔn 'gü. Kë "dhʋ̈ kö 'ka kë 'mɛ 'ö‑ ‑nu ‑ya ‑dɩ ‑ta, 'ö 'wo "slʋ̈ʋ̈slʋ̈, 'ö pö 'aa‑ ‑nu ‑bha ö wëëdhö ‑a 'ka.
COL 1:23 "Kɛɛ "sanni ‑yö kë "dhʋ̈, kö 'ka dɔ ꞊në wo ka ‑dɩ ‑gɔ gbɛnngdhö, kö ka ‑gɛn 'yii bho ka ꞊wlöö 'dhang ‑bho Yesu "dhiʋ̈ ‑sü 'ö 'ka‑ ꞊slɔɔ Atanna ‑wʋ 'ka‑ ma, 'ö 'wo‑ pö ‑sü 'ka ‑a ‑bha ‑da ‑pë suu "pɛpɛ 'ö "kpʋng ꞊taa yö ‑a ꞊gban ‑dhɛ, 'ö mang Pɔdhö ‑mɛ 'a‑ ‑yamɛ do 'ka bha‑ 'gü, kö 'kii ka ꞊taa zun‑ ‑gɔ.
COL 1:24 N ꞊nii ‑yö ‑da sië ꞊taamasü ya‑ 'gü sëë 'a‑ bho sië ka ‑wɔn 'gü bha‑ ‑wɔn 'gü. ‑A ‑gɛn ‑mü ꞊dhɛ 'ma‑ kë "dhʋ̈ kö Atanna ‑bha yë ꞊në a‑ kë sië. ‑A ‑kë "dhʋ̈ ‑sü ꞊bhlëë ‑yö 'kpii‑. A‑ 'wɔn ‑dɔ ꞊dhɛ 'ma saan" "dhʋ̈ kö a ‑saan mɛ "pɛpɛ 'wo Klisi ‑bha mɛ 'ka 'ö 'wo ꞊dhɛ‑ ‑dhü 'dhö bha ꞊në‑ ‑nu ‑wɔn 'gü. Kö saan" 'ö‑ ‑dhɛ 'dhö‑ bha ꞊dhɛ Yesu ‑bha mɛ ‑nu ‑wa wo bha ‑në mang ‑dɩ 'pö 'a n ‑bha wo sië bha.
COL 1:25 Atanna ‑yö n ‑sü kö 'ö n ‑ya ö ‑kɔdhiʋ̈mɛ ꞊në‑ 'ka ka kpö 'gü. Kë "dhʋ̈ kö 'a ö ‑wʋ ‑ta "pʋ mɛ "bhɩɩ‑ ‑nu ‑dhɛ kö ‑a ‑dhɛ 'bha 'ya 'dho 'to ‑bin 'gü. Yë bha ꞊në 'ö‑ dɔ ‑sü 'ka n ꞊kwɛɛ‑ kö 'a‑ kë ka kpö 'gü.
COL 1:26 ‑A ‑gɛn ‑mü ꞊dhɛ 'wɔn 'ö gun Atanna ‑zʋ "piʋ̈ 'ö ‑bhɔ 'ka yibha ‑yibha ‑yibha 'ka 'ö 'yii‑ ‑ta "pʋ 'nu mɛ 'bha ‑dhɛ do bha ꞊në ꞊yaa‑ ‑ta "pʋ 'mɛ 'wo bɔ ö 'ka ‑a ‑nu ‑dhɛ "tʋ̈ng ya‑ 'gü bha.
COL 1:27 ‑Yö ‑kë ‑zianwo ‑a ‑dhidhɛwɔn 'ka kö 'ö 'wɔn 'ö ‑bin ‑sü 'ka "dhʋ̈, 'ö‑ ‑bha ‑kë ‑së ‑sü waa‑ ꞊bhlëë ‑kë 'kpii‑ ‑sü ‑naa 'yaa 'dhö bha 'ö‑ ‑ta "pʋ 'mɛ 'kaa Zuifö 'ka, 'ö 'kaa‑ dɔ 'nu ‑blɛɛsü bha mɛ ꞊gban ka ‑dhɛ. 'Wɔn ‑së 'ö ka ‑zʋ 'yaa gun‑ ‑kë ka ‑dhɛ ‑wɔn ‑bha "kɛɛ 'ö Atanna ‑ya ‑ta ‑pʋ ka ꞊dhɛ "tʋ̈ng ya‑ 'gü bha yö ‑mü Klisi ‑bha nu ‑sü kö ‑yö ‑ya ka zuëpiʋ̈wɔn ꞊në‑ 'ka. Yö ꞊në ꞊ya kë "dhʋ̈ 'yö 'ka dho‑ 'wɔn dɔ ꞊dhɛ ka ‑dho mɛdhɛ kë‑ "piʋ̈ ‑dhɛkpaɔ dhia" 'gü tɛan‑ 'ka.
COL 1:28 'Wɔn 'ö‑ ‑wɔn 'gü 'yö 'yi Klisi ‑wɔn ‑dhiang zë mɛ ꞊gban "pɛpɛ ‑dhɛ, 'yö 'yi ‑dhio dɔ‑ ‑nu ‑ta 'do 'do 'ka, 'yö 'yi ‑ya mü 'zü 'yi‑ ‑nu ꞊draan Atanna ‑wɔn ‑bha 'wɔndɔdhe 'ka ‑kɔ ꞊gban ‑kɔ ꞊gban suu 'gü bha 'yö bha. Kë "dhʋ̈ kö mɛ "pɛpɛ 'wo ‑kplü ‑sü 'ka Klisi ‑bha kö 'yi ‑wo ‑nu 'ka Atanna ‑kuu "dhiʋ̈ kö ꞊wa ‑kian ‑a ‑wɔn 'gü.
COL 1:29 Yë 'ö "dhʋ̈ bha ꞊në 'a‑ kë sië faan 'kpii‑ 'ö Klisi ‑ya nu n ‑dhɛ bha‑ 'ka 'yö 'a‑ ‑ta ‑ko zë sië 'gügbɩɩdhɛ 'ö faan bha ‑ya nu n ‑dhɛ bha‑ 'ka.
COL 2:1 'Pë 'ö‑ ‑wɔn 'gü 'yö 'a‑ pö "dhʋ̈ bha‑ yö ‑mü ꞊dhɛ ‑yö n "piʋ̈ ꞊dhɛ 'mɛ 'wii "yan ‑kpan n wëëdhɛ ‑bha do ꞊dhɛ Kodhɔsö ‑mɛ ‑nu ka 'dhö, "ɛɛn ꞊dhɛ Dhaodise ‑mɛ ‑nu 'dhö bha, 'ka‑ 'wɔn dɔ ꞊dhɛ yë 'a‑ kë sië ka ‑wɔn 'gü bha ‑yö ꞊dhɛ ‑gblü ꞊në 'dhö n ‑bha.
COL 2:2 A ‑gblü bha‑ ‑gɔn "dhʋ̈ ‑bhɛa Atanna ‑dhɛ ‑sü 'ka kö ka ꞊në ka ‑zʋ ‑yö ‑gban ‑kɔ ꞊gban ‑kɔ ꞊gban 'gü, kö ka "yan "dhiʋ̈‑ ‑nu "pʋ "pɛpɛdhö, kö "sika 'bha ‑bha 'bha 'ya 'dho kë ka 'gü, kö Atanna ‑bha ‑bin 'gü ‑wɔn 'ö ‑kë Klisi ‑wɔn ('ö‑ 'gü 'dhö tii mɛ 'bha ‑nu 'gü) bha‑ 'ka bha 'ka‑ 'gü ma 'kpakpadhö, kö ka ‑dhɔ ka 'ko kë, kö ka ‑kɔ 'to ka 'ko ꞊kwɛng yi ꞊gban 'ka.
COL 2:3 ‑A ‑gɛn ‑mü ꞊dhɛ "yaaki waa‑ ‑gleng ‑së ‑zë ꞊gban "pɛpɛ suu‑ ‑slɔɔ Klisi ꞊në‑ 'gü.
COL 2:4 'Wɔn ‑nu bha‑ pö 'a‑ wo ka ‑dhɛ "dhʋ̈ bha‑ ‑gɛn ‑mü ꞊dhɛ kö mɛ 'bha 'ya 'dho nu 'ö "kpënng‑ ‑kë ka ‑gɔ "dhidhɛ "nɛɛnɛɛdhɛ ‑bha.
COL 2:5 ‑A ‑gɛn ‑mü ꞊dhɛ 'kö ꞊ya kë ꞊dhɛ n ꞊dede "yaandhe 'yii kë ka "piʋ̈ mü "kɛɛ a n ‑zʋ ‑gɔn 'ka ‑wɔn 'ka ‑kpɛawo, a‑ 'wɔn ‑dɔ ꞊dhɛ ka "ta ‑kɔ ‑yö ‑së Atanna ‑bha zian ‑ta, ka ‑kɔ ‑yö ka 'ko ꞊kwɛng, a‑ 'wɔn ‑dɔ ꞊dhɛ ka yun ꞊ya "sɛ 'kun 'dhang ‑bho Klisi "dhiʋ̈ ‑sü 'gü. ‑A kë 'ka‑ wo "dhʋ̈ bha‑ "yɔn ‑yö n ‑zu ꞊dedewo.
COL 2:6 ꞊Dhɛ 'ö "dhʋ̈, ꞊dhɛ 'ö ‑kë ꞊dhɛ 'ka "wɩ Klisi ‑bha ‑kë ka ‑bha Atanna, ka Dëmɛ 'ka ‑wɔn ‑bha bha, ‑a ‑dhɛa ‑bha ꞊dhɛ 'ka yö ꞊në‑ 'gü ‑ta 'sü kö ka ‑kɔ ‑ya ꞊kwɛng.
COL 2:7 Kö ka yun ‑yö "sɛ 'kun, kö 'ka dɔ gbɛnngdhö ‑zʋ ‑yö ‑a ‑dhɛ ‑sü 'gü 'wɔn "pɛpɛ 'wo ka ꞊draan‑ ‑bha kö 'ka kë‑ ‑bha 'ka bha‑ ‑kun "gbɩɩ‑ ‑sü 'gü, kö 'ka Atanna nuɛ" bho yi ꞊gban 'ka kö 'ka‑ 'badhika ‑ya ‑ta.
COL 2:8 ꞊Ya 'go yö ‑zë 'gü, ‑ka kë ka 'suan‑ 'ka kö mɛ 'bha ‑kɔ 'ya 'dho ꞊mɔɔ ka ‑bha 'ö "kpënng‑ ‑kë ka ‑gɔ 'wɔn ‑zunkodhiʋ̈ kë ‑kɔ 'ö go mɛ "bhɩɩ‑ 'gü 'ö‑ zü ‑gban 'gü 'yaa 'dhö bha‑ 'ka 'ö 'ka ‑kan Atanna ‑bha. ‑A ‑gɛn ‑mü ꞊dhɛ 'wɔn ‑nu 'wo‑ pö "dhʋ̈ bha ‑wo ‑gban "kpʋng ꞊taa ‑wɔn ‑nu ꞊në‑ ‑bha, ‑a 'bha 'yii 'go Klisi "piʋ̈, 'sa 'wɔn 'dhɛ 'kö ‑kë mɛ "bhɩɩ‑ ‑dɩ ‑zʋgɔngüwɔn 'ka, ‑a 'bha ‑zundhiʋ̈ ‑bhlɔɔ 'yaa 'dhö.
COL 2:9 Klisi bha ꞊në Atanna "yaandhe ꞊dede 'ö mɛbhɩɩdhe kwi ‑da 'ö ‑bha ‑a 'ka.
COL 2:10 Yö 'ö bha ꞊në 'ka pë ꞊gban "pɛpɛ ꞊slɔɔ‑ "dhiʋ̈ 'yö‑ "piʋ̈ 'yaa 'to. ‑A ‑gɛn ‑mü ꞊dhɛ yö ꞊në Atanna ‑ya ‑ya "yina suu ꞊gban waa‑ ‑kɔ ‑ziö mɛ "bhɩɩ‑ ‑gɔ ‑pë ꞊gban "pɛpɛ suu ‑gɔ "dhiʋ̈.
COL 2:11 ꞊Ya 'go yö ‑zë 'gü, ka ‑bha ‑bɔ Klisi 'ka ‑sü bha ꞊në ka go 'gbannë ꞊dede 'gü. 'Ö Zuifö ‑nu ‑gɔ "sɛ 'gü, 'mɛ ꞊ya 'go 'gbannë 'gü kö mɛ ꞊gban ꞊waa‑ 'wɔn dɔ ꞊dhɛ ꞊ya bɔ Atanna 'ka. "Kɛɛ ‑a ‑nu ‑bha ‑bɔ Atanna 'ka ‑kɔ 'ö "dhʋ̈ bha ‑wa ‑kë wo ‑kɔ 'ka. Ka ‑bha 'kö bha 'yaa ꞊dhɛ ‑a ‑nu ‑bha 'dhö, ka ‑bha 'kö bha Klisi ꞊në‑ ‑kë 'yö 'ka ka bo ‑tosɛa kë ‑kɔ yaya ‑nu bha‑ 'ka, 'yö ka kwi bho 'wɔn yaa kë ‑sü ‑gɔ ꞊dhuëngdhɛ 'gü.
COL 2:12 'Pë 'ö‑ ‑kë "dhʋ̈ bha yö ‑mü ꞊dhɛ: Ka ‑bɔ Yesu 'ka ‑zu 'wo‑ bho bha ꞊wa ka 'ma "yi ꞊wlöö, kö ꞊ya kë ꞊dhɛ kaa‑ Klisi ‑nu 'ka ga ka "kwëë ꞊wa ka bun bho, ka ‑go "yi ꞊wlöö ‑sü bha kö kaa‑ Klisi ‑nu 'ka ‑bö, kö faan 'ö Atanna ‑ya ‑da 'gü 'ö go‑ 'ka ꞊geebɔɔ 'ö ‑bö bha ꞊ya ‑da 'pö ka 'gü, 'dhang 'ka‑ bho‑ "dhiʋ̈ bha‑ ‑wɔn 'gü 'yö 'ka ‑tosɛa suu ‑dee ‑kë.
COL 2:13 Yö ꞊në‑ ‑wɔn 'gü 'yö 'mɛ 'ka kë 'nu Atanna ‑gɔ ꞊dhɛ mɛ ꞊gee 'dhö ꞊dhɛ 'ö ‑kë ꞊dhɛ 'kaa 'go 'gbannë 'gü ka kwi ‑bha ꞊dhɛ Zuifö ‑nu 'dhö, waa‑ ka këwɔn yaa ‑nu ‑wɔn 'gü bha, 'yö ꞊ya kaa‑ Klisi ‑nu ka bho ga 'gü ‑gasitɛ 'ö‑ ‑kë kwa ‑dhɛ 'ö kwa kë ‑sɔng yaa ‑nu ꞊gban "pɛpɛ ‑mawɔn 'to bha‑ ‑wɔn 'gü bha.
COL 2:14 "Wɩ 'ö Atanna ‑ya wo‑ ‑bha kö ‑wo Yesu dɔ "dhü ‑bha bha ꞊në 'ö zë‑ ‑wɔn ‑dhɛ 'yö kwa ‑zë za 'ka ‑wʋ 'ö gun ‑bɛn zë ‑sü 'ka ‑a ‑gɔ 'sëëdhɛ 'gü 'ö‑ ‑bha 'tɔng‑ yöö kwa 'kun 'nu‑ ‑wɔn 'gü, ‑a ‑bha zadɔyi 'ka bha 'yö ꞊yaa‑ ꞊gban bho‑ ‑bha, 'yö ꞊ya kë kwa ‑mawɔn 'to ‑kɔ 'ka, ‑a ‑gɛn ‑mü ꞊dhɛ ‑ya yö ꞊në‑ ꞊gban ‑kwɛɛ dhu Yesu ‑ta 'yö dɔ‑ 'ka "dhü ‑bha bha.
COL 2:15 "Wɩ 'ö Atanna ‑ya wo‑ ‑bha kö Klisi ‑yö ga "dhü ‑bha "dhʋ̈ bha ꞊në ‑kë "yina yaa "pɛpɛ 'ö "sɩ 'dhö‑ ‑nu ‑dhɛ waa‑ ‑ziö mɛ ‑gɔ ‑pë ꞊gban "pɛpɛ suu 'kpeebhodhɛ 'ka 'yö kpaɔ ‑pɛ 'ka‑ ‑nu ‑bha. ‑Ya ‑zɔn ("kpʋngtaapë "pɛpɛ ꞊gban ‑dhɛ) "tʋ̈ng bha‑ ꞊në‑ 'gü ꞊dhɛ ö ‑kɔ ꞊ya ziö‑ ‑nu ‑gɔ, ꞊dhɛ 'tɔbhɔdhe ‑yö ö ‑gɔ 'ö ‑ziö pë "pɛpɛ bha‑ ꞊gban ‑bha ‑ta.
COL 2:16 ‑A ‑kë "dhʋ̈ ‑sü bha‑ 'gü, 'ka 'dho "wɩ‑ ‑bha 'ö mɛ 'bha ‑ya pö 'wɔn ‑nu 'ö ‑gban ‑bhöpë ‑nu waa‑ müpë ‑nu ‑wɔn ‑bha bha‑ ‑wɔn 'gü ka ‑bha ꞊dhɛ: «‑Yö ‑kë mü ꞊dhɛ 'yö 'ka‑ ‑kë ꞊ni?» "ɛɛn: «'Yö 'kii‑ kë ꞊ni?» "ɛɛn 'wɔn ‑nu 'ö ‑gban troo kë ‑sü ‑nu oo, "su ‑dee ‑ta ‑gloo wo ‑sü ‑nu waa‑ Zuifö ‑nu ‑bha ꞊glooyi ‑wɔn ‑nu ‑bha bha 'ka 'dho "wɩ‑ ‑bha 'ö mɛ 'bha ‑ya pö ka ‑dhɛ ꞊dhɛ: «‑Yö ‑kë mü ꞊dhɛ 'yö 'kaa‑ wo?» "ɛɛn: «'Yö 'kaa‑ ‑nu ‑ya ꞊bhlëë 'gü?»
COL 2:17 ‑A ‑gɛn ‑mü ꞊dhɛ "kian 'kpɔ ‑sü bha ‑yö ‑gun 'wɔn 'ö Atanna yöö‑ kë ꞊në‑ "blɛɛn‑ 'ka, "kɛɛ 'wɔn 'ö "dhʋ̈ bha‑ tɛanwɔn ꞊dede 'ö‑ 'gü yö ‑mü Klisi ꞊në‑ 'ka.
COL 2:18 'Ka 'dho "wɩ‑ ‑bha 'ö 'ka ka ‑gɔ "gblëënu 'mɛ 'ö‑ pö ö ‑dɩ ‑dhɛ ꞊dhɛ ö Atanna ‑bha 'tɔng‑ ‑ya ꞊bhlëë 'gü, ö "kian ‑nu bha‑ ꞊gban ‑kun "ɛɛn 'ö Atanna ‑bha "kië ‑nu ‑dhɔkë, "ɛɛn ö "yan 'gü ꞊ya ‑da 'wɔn 'bha 'ka bha‑ ‑dhɛ 'ö 'ka 'dhang bho‑ "dhiʋ̈ ‑kɔ ꞊gban ‑kɔ ꞊gban 'gü 'ö tëë bho ka 'gü. ‑A ‑gɛn ‑mü ꞊dhɛ 'mɛ 'ö "dhʋ̈ bha kö "kpʋngtaadhɛ ya‑ 'gü zuëga ꞊në ‑tun "gblʋ̈ʋ̈‑, yö ꞊në‑ ‑wɔn 'gü 'yö ö ‑dɩ sü 'kpii‑ "wlaa‑ 'gü "wɛɛwɛɛ "dhʋ̈ bha.
COL 2:19 'Mɛ 'ö "dhʋ̈ bha 'yaa kë ‑kplü ‑sü 'ka Klisi 'ö ꞊dhɛ Atanna ‑bha mɛ ꞊gban "pɛpɛ ‑gɔ 'dhö bha‑ ‑bha. Mɛ suu 'ö "dhʋ̈ bha kö ‑yö ö ‑dɩ ‑zian ꞊në‑ kë sië. ‑A ‑gɛn ‑mü ꞊dhɛ Klisi ‑bha 'kɔdhigümɛ 'wo ꞊dhɛ‑ ‑dhü 'dhö, 'ö‑ ‑gɔ 'ka bha ‑yö ‑kpɛa ꞊dhɛ ‑kɔ 'ö 'në ‑yö ꞊kpɛa‑ 'ka bha ꞊në‑ 'dhö, ‑a ‑gɛn ‑mü ꞊dhɛ 'në ‑fasa ‑nu waa‑ ꞊miëë ‑nu bha ꞊në 'wo‑ daɔ ‑nu ‑gban 'kwëë‑ 'yö 'ko kun glengdhö. "Gla ‑kɔ 'ö Atanna ‑ya ‑ya ö ‑bha mɛ ‑nu ‑bha 'ka ‑yö ‑kë 'pö ‑kɔ do bha‑ ꞊në‑ 'gü 'yö ‑kë ‑a dhɔɔbhaa 'ka.
COL 2:20 ꞊Ya kë ꞊dhɛ kaa‑ Klisi ‑nu 'ka ga ka "kwëë ꞊dedewo tɛan‑ 'ka 'wluu‑ "vlanvlan ‑nu 'ö "kpʋngtaamɛ ‑nu ‑wa ‑ya bha‑ ‑gɔ, kö‑ ‑nu ‑zun ka "dhiʋ̈ ‑gɛn 'yaa 'dhö 'wɔn ‑nu bha‑ 'gü kö 'ka ‑tosɛa kë 'zü ‑deewo ꞊dhɛ 'mɛ 'waa Atanna dɔ ‑a ‑nu 'dhö.
COL 2:21 Kö ‑a ‑pö ka ‑dhɛ ‑gɛn 'yaa 'dhö 'zü ꞊dhɛ 'bha 'dho 'pë bha‑ 'sü, 'bha 'dho‑ din ga, "ɛɛn 'bha 'dho zun‑ ‑bha!
COL 2:22 ‑A ‑gɛn ‑mü ꞊dhɛ 'tɔng‑ ‑nu 'wo "dhʋ̈ bha mɛ "bhɩɩ‑ ‑nu ꞊në 'wo‑ ‑ya "kɛɛ Atanna ‑zë ‑yö pë ‑nu bha‑ ‑nu ‑da kö ‑wo kë kwa ‑bhöpë waa‑ kwa ‑mawɔn ‑kë 'ka ‑pë ꞊në‑ 'ka.
COL 2:23 'Tɔng‑ ‑nu 'wo "dhʋ̈ bha ‑yö "dhʋ̈ tɛan‑ 'ka ꞊dhɛ mɛ 'dhö‑ ‑nu ‑ya sië ꞊bhlëë 'gü ‑yö ‑kë mɛ "bhɩɩ‑ ‑nu 'gü ‑së, 'ö mɛ bhɔ Atanna ꞊bhlëëyamɛ ꞊dede ‑bha, 'ö mɛ ‑yö mɛ 'gü ‑siö mɛ ‑yö mɛ kwi ‑wëëdhɛ bho, 'ö ꞊ya kë 'ö ‑kë ꞊dhɛ ‑gleng ‑së 'dhö, "kɛɛ 'sa kö‑ ꞊trɔɔn 'bha ‑bha 'bha 'yaa 'dhö. ‑Yö ‑kë mɛ ‑dɩ këwɔn "dhia ‑ma mɛ 'gü ‑sü ꞊në‑ 'ka "wɛɛwɛɛ.
COL 3:1 ‑A ‑kë "dhʋ̈ ‑sü bha‑ 'gü, ꞊dhɛ 'ö ‑kë ꞊dhɛ Atanna ꞊ya kaa‑ Klisi ‑nu ka bho ga 'gü bha, pë ‑nu 'wo Atanna "piʋ̈, ‑yɛa 'ö Klisi 'dhö ‑ya ‑sü 'ka‑ 'gü ‑a ‑kɔ ‑së 'gü dhang‑ 'gü bha‑ 'gü bha ꞊në ‑kaa ‑ta kɔɔ‑.
COL 3:2 A‑ ‑pö ka ‑dhɛ ꞊dhɛ 'ka ‑ya pë ‑nu 'wo dhang‑ 'gü bha ꞊në‑ ‑nu zuën ‑ta kö 'ka ka kwaa‑ "kpʋngtaapë ‑nu bha‑ ‑wɔn ‑zü.
COL 3:3 ‑A ‑gɛn ‑mü ꞊dhɛ ka ꞊dhɛ 'mɛ 'ö ꞊ya ga ꞊në‑ 'dhö pë "pɛpɛ bha‑ ‑nu ‑gɔ. ‑Tosɛa ‑dee 'ö kaa‑ kë bha waa‑ Klisi ‑nu ‑wo ‑bin ‑sü 'ka Atanna ꞊në‑ 'gü.
COL 3:4 Yi 'ö Klisi 'ö kaa‑ ‑tosɛa ‑dee 'ka bha 'ö dho ‑wo 'ka "yɛa‑, 'yö kaa ‑dɩ 'pö 'ka ‑wo 'ka "yɛa‑ 'tɔbhɔdhe 'gü.
COL 3:5 ꞊Dhɛ 'ö "dhʋ̈, 'wɔn yaya 'ö‑ kë ‑dhɔ ‑yö mɛ ‑kë "kpʋngtaadhɛ ya‑ 'gü bha, ‑ka ka kwaa‑ ꞊gban "pɛpɛ kë ‑sü ‑zü kö 'ka ka wë bɔ Atanna "piʋ̈. ‑Zua zë ‑sü oo, "yënng dɔ waa‑ 'wɔn yaa kë ‑pɛng ‑dɔ mɛ ‑zʋ ‑bha ‑sü ‑nu, mɛ zuë" ‑bhɔ 'wɔn yaa ‑bha ‑sü ‑nu waa‑ ꞊naɔ ‑dhɔ ‑bha mɛ ‑kë "dhiʋ̈ ziö 'ka ‑sü ‑nu 'ö ꞊dhɛ 'pö ꞊dhɛ ꞊gebhɔ ‑dhɔkë ‑sü 'dhö bha, ‑ka ka ‑dɩ 'kun‑ ‑gɔ ‑së.
COL 3:6 ‑A ‑gɛn ‑mü ꞊dhɛ 'wɔn suu ‑nu bha ꞊në‑ këwɔn 'yaa dhi Atanna ‑dhɛ 'yö‑ ‑wɔn 'gü 'yö dho 'wɔn wɔ gɔɔgbɩɩmɛ ‑nu ‑ta.
COL 3:7 'Sa "tʋ̈ng 'ö 'wɔn yaa ‑kɔ ‑yö gun ziö ‑sü 'ka‑ 'ka kaa‑ ‑tosɛa ‑gɔ bha ka ‑gun "ta ‑kɔ suu bha ꞊në‑ kë sië 'pö.
COL 3:8 "Kɛɛ dɔ 'kwa‑ wo ꞊taamasü ‑ya 'gü ya ‑ka ka bo 'wɔn suu bha‑ ꞊gban "pɛpɛ kë ‑sü 'ka. Zuëdhiʋ̈dhɛ oo, bhlɔɔ ‑ma mɛ 'gü ‑sü ‑nu waa‑ "gblüyaadhɛ ‑nu bha ‑ka ka kwaa‑ ‑zü. ‑Kaa kë ‑së kö 'pë 'ö ‑gban "si bho ‑sü ‑bha, "ɛɛn mɛ ‑dhiang yaa zë ‑sü ‑bha kö 'ya 'dho ‑wo ka "dhi ‑ta mɛ 'bha ‑dhɛ tongtongdhö.
COL 3:9 ꞊Dhɛ 'ö ‑kë ꞊dhɛ ‑tosɛa kë ‑kɔ zii 'ka gun‑ 'gü ‑blɛɛsü 'ö ꞊ya gun ꞊ya kë ka 'tuʋ̈‑ 'ka bha 'ka ka bo‑ 'ka bha, 'ka 'dho‑ pö 'ka ꞊sua kë ka 'ko ‑nu ‑dhɛ 'zü (kë "dhʋ̈ kö 'ka bhɔ Atanna ‑bha).
COL 3:10 ‑A ‑gɛn ‑mü ꞊dhɛ ‑tosɛa ‑dee 'dhɛ 'ka ‑da 'gü bha ‑yö mɛ "gla ꞊në‑ wo ‑kpɛawo 'ö dho‑ 'ka "dhiʋ̈ 'wɔndɔdhe 'gü, ꞊dhɛ ‑kɔ 'ö Atanna 'ö kwa ‑da bha 'ö‑ 'ka bha‑ 'dhö.
COL 3:11 ‑Ya kë "dhʋ̈ kö 'mɛ 'kö ꞊wa bɔ Klisi 'ka, kö‑ ‑nu ꞊gban "pɛpɛ ꞊wa kë mɛ suu do ꞊në‑ 'ka, kö yö ꞊në‑ ‑nu ꞊gban "pɛpɛ 'gü, 'ö‑ ‑nu ‑bha 'wɔn ꞊gban ‑wɔn ꞊gban 'ka. Kö ‑a pö ‑sü 'ö ꞊dhɛ Zuifö ‑mü n 'ka, "ɛɛn ma ‑zë 'maa Zuifö 'ka, "ɛɛn yi ‑zë yi ‑go 'gbannë 'gü "kɛɛ 'mɛ 'kö 'wo ya ‑wo ‑kplëë 'ka, "ɛɛn 'zü 'mɛ 'wo ya ‑wɔbhlaamɛ ‑nu ‑mü, yi ‑zë yi "yan "dhiʋ̈ ꞊ya "pʋ, ‑ɛɛ 'zü 'wlɔɔ‑ ‑mü yi ‑zë yi 'ka, 'yö 'mɛ 'kö 'wo ya 'wo ꞊dhuëng 'ka bha kö‑ 'bhaa 'dhö 'zü. ‑A ‑gɛn ‑mü ꞊dhɛ kö Klisi ꞊në ꞊ya 'to 'wɔn bha‑ ꞊gban ‑gɔ 'ka mɛ ꞊gban 'gü.
COL 3:12 ‑A ‑kë "dhʋ̈ ‑sü 'gü n dheebhang ‑nu, ‑ka ‑tosɛa kë ꞊taamasü ya‑ 'gü ꞊dhɛ 'mɛ‑ ‑nu ‑dhɔ ‑yö Atanna ‑kë, 'ö ꞊yaa‑ ‑nu "zu 'ö ꞊wa kë "slʋ̈ʋ̈slʋ̈, 'ö ꞊yaa‑ ‑nu 'sü ꞊yaa‑ ‑nu ‑ya ‑dɩ ‑ta ‑a 'dhö. Kö mɛ "bhɩɩ‑ ‑nu ‑wëë ‑yö ka kë ꞊dedewo, kö 'ka "klʋ ‑yö dhi, kö 'ka ka ‑gɔ 'dho "sia‑ mɛ ꞊gban "pɛpɛ ‑dhɛ, kö 'ka kë dhɔngdhɔngsü, "kɛɛ kö ka zuë" ‑yö kë ‑sɛa.
COL 3:13 Ka ꞊sɔng ‑yö 'kun bho 'koo. ꞊Ya kë ꞊dhɛ mɛ 'bha ‑siödhɛwɔn ꞊ya kë ö "tɛado "piʋ̈, ‑ka ka 'ko ‑nu ‑mawɔn 'to ka 'ko ꞊zinng 'gü. ‑Ka ka 'ko ‑nu ‑mawɔn 'to ꞊dhɛ ‑kɔ do 'ö kwa Dëmɛ ‑yö ka ‑mawɔn to‑ 'ka bha‑ 'dhö.
COL 3:14 "Kɛɛ 'wɔn "pɛpɛ bha‑ ꞊gban ‑gɔ 'ö 'dhö, yö ‑mü ‑dhɔ ꞊në‑ 'ka. Ka ‑dhɔ ‑yö ka 'ko kë, ‑a ‑gɛn ‑mü ꞊dhɛ ‑dhɔ bha ꞊në ꞊ya kë ka ꞊zinng 'gü, 'yö ka ‑kɔ dho kë 'wɔn do ‑bha, 'yö ka ‑wʋ ‑yö ‑kë do, 'yö 'ka ‑kë mɛ do 'ka.
COL 3:15 Atanna ‑yö ka ‑dhɛ kö zuëwaanusü ꞊në ‑yö kë ka ‑gɔ, kö 'ka kë mɛ do 'ka, zuëyagblʋ̈ʋ̈‑ 'ö "dhʋ̈ 'ö go Klisi "piʋ̈ bha ‑yö ka pa. 'Wɔn ‑yö 'to ka "yaan kö 'ka Atanna nuɛ" bho‑ ‑wɔn 'gü ‑kpɛawo.
COL 3:16 ‑A ‑dhɛa ‑bha ꞊dhɛ Klisi ‑wʋ bha ‑yö kë ka "tʋʋdhö yi ꞊gban "pɛpɛ 'ka, kö yö ꞊në ‑yö kë kaa‑ 'wɔn ꞊gban "pɛpɛ zü ‑gban 'gü 'ka, kö 'ka ka 'ko ‑nu ꞊klang kë‑ 'ka, kö 'ka ‑dhio dɔ‑ 'ka ka 'ko ‑nu ‑ta 'wɔndɔdhe 'ö‑ nu ka ‑dhɛ bha‑ 'ka, kö 'ka Atanna 'tɔ bhɔ ‑tan ‑nu bho ka ‑sɔbhɛɛ 'ka ‑a nuɛ" bho ‑sü 'ka, kö 'ka "gbaɔ bho‑ ‑zü, kö "tan ‑dee 'ö‑ ‑bha 'Nii‑ "slʋ̈ʋ̈slʋ̈ dho "yi dɔ‑ 'ka ka ‑bɛan bha 'ka‑ bho ka faan ꞊gban 'ka.
COL 3:17 'Wɔn "ʋʋ 'wɔn 'ö 'ka dho‑ kë, "ɛɛn 'ö 'ka dho‑ pö, ‑kaa kë kwa Dëmɛ Yesu 'tɔ bhɔ ‑dhɔ ‑dhɛ kö 'ka bɔ kwa Dëmɛ bha ꞊në‑ ‑ta kö 'ka kwa Dë Atanna nuɛ" bho 'wɔn ‑së "pɛpɛ 'ö‑ kë ka ‑dhɛ bha‑ ‑wɔn 'gü.
COL 3:18 Dhong ‑nu 'ö 'ka gwaan‑ ‑bha, ‑ka ka ‑gɔ 'waanu kaa‑ gɔɔn‑ ‑nu ‑dhɛ. ‑A ‑gɛn ‑mü ꞊dhɛ dhong ‑nu 'dhɛ 'kö ꞊wa bɔ kwa Dëmɛ 'ka, ‑a ‑dhɛa ‑bha ꞊dhɛ ‑wo ‑tosɛa kë ‑kɔ bha ꞊në‑ 'gü.
COL 3:19 Gɔɔn‑ ‑nu kaa ‑dɩ 'pö, kaa‑ dhong ‑nu ‑dhɔ ‑yö ka kë, 'ka 'dho ꞊gbaɔn‑ ‑nu ‑ta 'ö ‑tosɛa din ‑yö ‑siö ‑nu 'gü.
COL 3:20 'Në ‑nu, ‑ka ka 'kpɔmɛ ‑nu ‑wʋ ma ‑kɔ ꞊gban ‑kɔ ꞊gban 'gü, 'mɛ 'ö 'bha ‑kplü kwa Dëmɛ ‑bha 'bha‑ kë ‑kɔ bha ꞊në‑ 'gü 'yö ‑dhi Atanna ‑dhɛ.
COL 3:21 'Nëdë ‑nu, 'ka 'dho 'wɔn din ‑siö kaa‑ 'në ‑nu 'gü 'ö‑ ‑nu 'gü ‑yö ga ka ‑wɔn 'ka 'ö ‑tosɛa din ‑yö ‑siö ‑nu 'gü.
COL 3:22 ꞊Dhuëng ‑nu, ‑ka ka dëmɛ ‑nu 'wo "kpʋng ꞊taa yö bha‑ ‑nu ‑wʋ ma ‑kɔ ꞊gban ‑kɔ ꞊gban 'gü. 'Ka‑ kë sië "dhʋ̈, ‑kaa kë "gblʋ̈ʋ̈dhɛ "puu ‑ta, ‑ka zë kwa Dëmɛ ‑wɔn ꞊në‑ ‑dhɛ kö 'ka‑ kë "dhʋ̈, kö 'ka 'dho zë ka ‑dhɔ ‑bha mɛbhɩɩdhe kë ‑sü ‑zë ‑dhɛ 'ö 'ka‑ ‑kë ‑a ‑nu "yandhiʋ̈ ꞊naa doseng.
COL 3:23 'Wɔn "ʋʋ 'wɔn 'ö 'ka‑ pö 'ka‑ kë, ‑kaa kë ka zuë" "puu 'ka ka faan ꞊gban 'ka ꞊dhɛ 'pë 'kii‑ kë mɛ "bhɩɩ‑ ‑zë ‑dhɛ 'ö 'ka‑ ‑kë kwa Dëmɛ ꞊në‑ ‑dhɛ ‑a 'dhö.
COL 3:24 ‑Ka 'dhang bho‑ "dhiʋ̈ ꞊dhɛ ka Dëmɛ ꞊dede 'ö 'dhö 'ö 'ka 'wɔn ‑nu bha‑ kë sië‑ ‑dhɛ bha yö ‑mü Klisi ꞊në‑ 'ka. ꞊Dhɛ ka ꞊trɔɔn ꞊dede 'ö 'dhö yö ‑mü ‑dhɛkpaɔ dhia" saan 'ö Atanna ‑ya ‑ya ‑bɔ ö 'ka ‑mɛ ‑nu ‑gɔ bha ꞊në‑ 'ka.
COL 3:25 ‑A ‑gɛn ‑mü ꞊dhɛ 'wɔn ꞊gban "pɛpɛ ꞊trɔɔn‑ ‑dhö. Mɛ "ʋʋ mɛ 'ö ꞊ya 'wɔn yaa kë, ‑a ꞊trɔɔn 'ö ꞊mɔɔ‑ ‑bha Atanna ‑dho nu‑ ‑dhɛ, ‑a ‑gɛn ‑mü ꞊dhɛ 'yaa bɔ mɛ 'bha 'ka ꞊flü ‑wɔn 'gü.
COL 4:1 ‑Gɔmɛ ‑nu, kaa ‑dɩ 'pö ‑a ‑naa kë ka "yaan ꞊dhɛ ka ‑gɔmɛ ‑mü Atanna 'ka 'pö dhang‑ 'gü, kö 'ka kaa‑ ꞊dhuëngzë ‑nu 'kun ‑së, kö 'wɔn 'ö ‑kë mɛ 'ka 'wɔn 'ka ꞊në‑ 'ka‑ kë‑ ‑nu 'ka.
COL 4:2 Ka 'gü 'ya 'dho ga ‑bhɛa Atanna ‑dhɛ ‑sü 'ka, ‑ka ‑ya ka "yaan ‑a kë "dhʋ̈ ‑sü 'gü yi ꞊gban "pɛpɛ 'ka kö ka‑ nuɛ" bho sië ‑kpɛawo.
COL 4:3 'Ka bhɛa" sië "dhʋ̈, ‑ka bhɛa" 'pö yi ‑wɔn 'gü kö ‑yö zian bho yi ‑gɔ kö 'yi‑ ‑wʋ "dhiʋ̈ ‑loo mɛ ‑nu ‑bha ‑dhɛ yö, kö Klisi ‑wɔn 'ö ‑bin ‑sü 'ka mɛ "bhɩɩ‑ ‑nu ‑gɔ 'ö 'waa‑ dɔ bha 'a‑ ‑ta "pʋ‑ ‑nu ‑dhɛ 'kpakpadhö, ‑a ‑gɛn ‑mü ꞊dhɛ a ‑kaso 'gü yö ꞊në‑ ‑wɔn 'gü ya,
COL 4:4 "kɛɛ kö 'ma‑ pö, kö 'a‑ pö "pɛɛpɛdhö, kö "yi 'ya 'dho kë‑ "piʋ̈, "kɛɛ kö ‑yö kë ꞊dhɛ ‑kɔ 'ö‑ ‑dhɛ 'dhö‑ ‑bha ꞊dhɛ 'a‑ kë‑ 'ka ꞊në‑ 'dhö, ‑a ‑gɛn ‑mü ꞊dhɛ ‑a "kplëng ꞊në Atanna ‑ya bho n ‑bha.
COL 4:5 ‑Ka ‑tosɛa kë ꞊kpaɔdhɛ ‑bha 'mɛ 'waa 'dhang bho Yesu ‑wɔn "dhiʋ̈‑ ‑nu "piʋ̈ (kö ka "klʋ‑ dhi‑ ‑nu ‑bha), kɛng‑ ‑nu 'ka kë ‑dhɛ do 'gü, ‑ka Klisi ‑wɔn ‑dhiang zë‑ ‑nu ‑dhɛ ‑kpɛawo, ‑a ‑gɛn ‑mü ꞊dhɛ "tʋ̈ng ꞊në ziö sië bha.
COL 4:6 Ka ‑wʋ ‑yö kë "nɛɛnɛɛ yi ꞊gban "pɛpɛ 'ka kö mɛ "ʋʋ mɛ 'ö ꞊yaa‑ ma, kö‑ din‑ 'to‑ ‑mɛ "tʋʋ, kö 'ka mɛ 'ö "dhʋ̈ ‑a ‑bha dhiang ‑yɔ bɔ ‑kɔ mɔɔ‑ kö 'ka‑ bɔ‑ 'ka‑ ‑mɛ ‑gɔ.
COL 4:7 Kwa dheebhang dhɔɔbhaa ‑sü Tisikö 'ö bhɔ ö ‑wʋ ‑bha, 'ö kwa Dëmɛ ‑ya ‑ya ö ‑kɔ "dhiʋ̈ 'pö, 'ö yɛng‑ 'yi‑ ‑bha yë kë sië bha ‑yö nu sië ka ‑dhɛ 'gü, yö ꞊në dho 'wɔn 'ö n ‑bha ‑a pö ka ‑dhɛ 'kpakpadhö.
COL 4:8 ‑A "dhiʋ̈ ꞊në 'a‑ ꞊wlü‑ ‑bha 'yö 'a‑ bɔ. Kë "dhʋ̈ kö 'wɔn 'ö yi ‑bha 'ka‑ dɔ, "kɛɛ kö ‑yö ka faan dɔ 'pö.
COL 4:9 A waa‑ Onezimö 'ö kë kwa dheebhang dhɔɔbhaasü 'ö bhɔ 'pö ö ‑wʋ ‑bha, 'ö ‑kë Kodhɔsö mi 'ka 'pö ꞊dhɛ ka 'dhö bha ꞊në‑ ‑nu bɔ. Wo ꞊në 'wo dho 'wɔn "pɛpɛ 'ö yi ‑bha ‑a ‑gɛn dɔ ka ‑dhɛ "pɛpɛdhö ‑së 'ka.
COL 4:10 Adhitakö 'ö ‑kaso 'gü 'pö n "piʋ̈ yö bha ꞊ya ka ꞊tua bho, Makö 'ö ‑kë Banabasö dë dheebhang bha 'në 'ka bha, ꞊ya ka ꞊tua bho 'gbɛ. Makö bha ꞊në 'a‑ nu ‑wɔn to "dhiʋ̈ 'a‑ pö ka ‑dhɛ bha, ꞊ya nu yi 'ö‑ 'ka kö ‑yö ꞊loo mü, ‑kaa ‑dhɛng 'kun ‑së 'ka.
COL 4:11 Yesu 'wo‑ 'tɔ ‑ya ‑ta ‑dhɛ Zutusö bha, ꞊ya ka ꞊tua bho 'pö. Zuifö ‑nu 'ö ꞊wa 'dhang bho Yesu ‑wɔn "dhiʋ̈ ‑a mɛ ‑yaaga bha ꞊në 'wo n ‑ta 'kun sië Atanna ‑bha yë kë ‑sü ‑bha (kë "dhʋ̈ kö mɛ ‑dee 'bha ‑nu ‑wo ‑da ‑a ‑bha ‑gblüdëdhɛ bha‑ 'gü). Wo ꞊në 'wo n faan dɔ ꞊dedewo Atanna ‑bha yë bha‑ kë ‑sü ‑bha.
COL 4:12 Epaflasö 'ö ‑kë 'pö ka 'gü 'në 'ka bha, ꞊ya ka ꞊tua bho 'gbɛ. Yesu Klisi ‑bha gwëëmi ꞊dede ‑mü. ‑A 'gü 'yaa ga ‑bhɛa ka ‑wɔn 'gü ‑sü 'ka, ‑yö ‑bhɛa Atanna ‑dhɛ ö faan ꞊gban "pɛpɛ 'ka ka ‑wɔn 'gü, kë "dhʋ̈ kö ka yun ‑yö "sɛ 'kun ‑a ‑bha zian ‑ta, kö 'ka ‑kian ‑a ‑wɔn 'gü ‑kɔ ꞊gban ‑kɔ ꞊gban suu 'gü, kö 'ka‑ dhɔɔbhaawɔn ꞊në‑ kë.
COL 4:13 A ‑mɔɔ ‑bha 'a‑ pö ka ‑dhɛ ꞊sii ꞊dede ‑ta ꞊dhɛ: Epaflasö bha ‑yö sëë bho sië 'mɛ 'ka bha oo, 'mɛ 'wo Dhaodise oo, 'mɛ 'wo Edhapodhi ka ‑wɔn 'gü ꞊dedewo, ‑a ‑gɛn ‑mü ꞊dhɛ ma ‑zë n "yan ‑ya ‑dhɛ 'gü.
COL 4:14 Kwaa‑ ‑dhɔtrɔɔgɔn dhɔɔbhaasü Dhukö waa‑ Demasö ꞊wa ka ꞊tua bho 'gbɛ.
COL 4:15 ‑Ka yii‑ ꞊tuabhonaɔ dɔ 'pö kwa dheebhang ‑nu 'wo Dhaodise ‑pö 'gü ‑a ‑nu ‑gɔ. Kö 'ka Nifasö 'ö mü bha‑ ꞊tua bho n ‑dhɛ, kö 'ka‑ pö Atanna ‑bha 'kɔdhigümɛ ‑nu 'wo ꞊loo sië wo 'ko ‑ta ‑a ‑gɔ 'kɔɔdhö bha‑ ‑nu ‑dhɛ 'ma‑ ‑nu ꞊gban "pɛpɛ ꞊tua bho 'gbɛ.
COL 4:16 ꞊Ya kë ꞊dhɛ 'sëëdhɛ ya 'ka‑ ꞊slɔɔ, 'ka ka bo‑ ‑wʋ pö ‑sü 'ka, ‑kaa bɔ Atanna ‑bha 'kɔdhigümɛ ‑nu 'wo Dhaodise ‑nu ‑dhɛ 'pö kö ‑wa ‑wʋ pö, kö‑ 'dhɛ 'a‑ bɔ‑ ‑nu ‑dhɛ 'pö 'ö dho 'go mü 'ö nu ka ‑dhɛ bha 'ka‑ ‑wʋ pö 'pö.
COL 4:17 ꞊Ya 'go mü ‑kaa pö 'pö Asipö ‑dhɛ ꞊dhɛ ‑yö yë 'ö kwa Dëmɛ ‑ya nu‑ ‑dhɛ bha‑ 'kun "gbɩɩ‑ ‑kɔ ꞊gban ‑kɔ ꞊gban 'gü kö ‑ya kë ö kë ‑kɔ ‑ta.
COL 4:18 ꞊Tuabhonaɔ ya mang ꞊dede ꞊në 'a yö ‑zë ‑bɛn zë. Ka ‑zʋ 'ya 'dho bhɔ n ‑kë ‑kaso 'gü ‑wɔn 'ka. Atanna ‑yö ‑gasitɛ kë ka ‑dhɛ ‑kpɛawo.
1TH 1:1 'Mɛ 'ka Atanna ‑bha 'kɔdhigümɛ ‑nu 'ka Tesadhonikö ‑pö 'gü, 'ö 'ka kwa Dë bha waa‑ kwa Dëmɛ Yesu Klisi ‑bha zian ‑ta, mang Pɔdhö ‑mɛ 'dhö, Sidhivɛn 'dhö, Timote 'dhö, yi ꞊në 'yi 'sëëdhɛ ya‑ bɔ ka ‑dhɛ. Yi ‑bhɛa ‑dhɛ kö ‑yö ka gba ö ‑bha ‑gasitɛ waa‑ zuëwaanusü 'ka.
1TH 1:2 'Yi bhɛa" sië Atanna ‑dhɛ, yi ‑zʋ 'yaa bhɔ ka 'ka tongtongdhö. Yi‑ nuɛ" ‑bho ka ‑wɔn 'gü yi ꞊gban "pɛpɛ 'ka.
1TH 1:3 'Dhang ‑bho "dhiʋ̈ ‑sü 'ö ka ‑gɔ 'ö 'ka‑ 'gü ‑yë kë sië‑ ‑dhɛ ‑kpɛawo bha yi ‑zʋ 'yaa bhɔ‑ 'ka. Yi‑ 'wɔn ‑dɔ ꞊dhɛ Atanna ‑dhɔ ‑yö ka ‑kë ‑kɔ ꞊gban ‑kɔ ꞊gban 'gü, yö ꞊në‑ ‑wɔn 'gü, 'yö 'ka sëë bho sië‑ ‑dhɛ "dhʋ̈ bha, yi‑ 'wɔn ‑dɔ kwa Dë Atanna wëëdhö ꞊dhɛ kwa Dëmɛ Yesu Klisi ‑dhɔ ‑yö ka ‑kë "pɛɛpɛdhö 'pö, ꞊dhɛ ka "yan ‑ya nu ‑sü ‑gɔ 'kpakpadhö. Yö ꞊në‑ ‑wɔn 'gü, 'yö yi ‑zʋ 'yaa bhɔ ka ‑wɔn 'ka, 'yö 'yi Atanna nuɛ" bho ka ‑wɔn 'gü ‑kpɛawo.
1TH 1:4 Yi 'dhang ‑bho "dhiʋ̈, yi dheebhang ‑nu, ꞊dhɛ Atanna yöö ꞊dede ꞊në ka ‑dhɔ ‑ya ‑kë 'yö ka sü 'ö ka ‑ya ö ‑bha ‑ya 'gü.
1TH 1:5 ‑A 'klɔɔ‑ ‑mü ꞊dhɛ ‑a ‑bha 'wɔn ‑taɔng ‑së 'yi‑ pö ka ‑dhɛ bha 'yii‑ pö yi "dhi "wɛɛwɛɛ. "Kɛɛ ‑a ‑bha 'Nii‑ ꞊dede ‑yö yi ‑ta ‑kun, 'ö 'yi‑ ‑dhiang zë ka ‑dhɛ faan 'ö go Atanna yöö ꞊dede ‑a 'gü bha‑ 'ka, kö yi 'dhang bho ‑sü ‑ya "dhiʋ̈ 'kpakpadhö 'pö ꞊dhɛ 'wɔn 'yi‑ pö sië ka ‑dhɛ bha 'yaa ꞊sua 'ka. Gun 'yi‑ wo ka kpö 'gü mü bha, ‑tosɛa kë ‑kɔ 'yi‑ ‑kë 'ka, kë "dhʋ̈ kö‑ ꞊trɔɔn 'yö kë ka ‑bha kaa ꞊dede ka‑ ‑dɔ.
1TH 1:6 Yö ꞊në‑ ‑wɔn 'gü, 'yö "ta ‑kɔ 'ka‑ ‑dhɛ yö yi ‑gɔ, 'ö kwa Dëmɛ "ta ‑kɔ 'ka bha, 'yö 'ka‑ wo sië bha. Yö ꞊në‑ ‑wɔn 'gü 'zü, 'yö ka ‑bha 'dhang ‑bho Atanna ‑wʋ "dhiʋ̈ ‑sü kö ‑wo ka ‑wëë ‑kë "dhiʋ̈ bho sië bha‑ ꞊gban waa‑ ‑bha ‑bha, 'yö 'ka‑ ‑wʋ kun ꞊niidadhe ꞊dede 'ö go ‑a ‑bha 'Nii‑ "slʋ̈ʋ̈slʋ̈ 'gü ‑a 'ka.
1TH 1:7 Yö ꞊në‑ ‑wɔn 'gü 'pö, 'yö mɛ "pɛpɛ 'wo 'dhang ‑bho kwa Dëmɛ "dhiʋ̈ ‑mɛ 'ka ꞊dɛɛ ka ‑bha Maseduanö ‑sɛ bha waa‑ Akai ‑sɛ ‑nu 'gü, 'wo ka ꞊në ka ‑gɛn ‑ga sië, 'yö 'wo "ta ‑kɔ sü ka ‑bha ‑bha bha.
1TH 1:8 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ kwa Dëmɛ ‑bha naɔ ‑së bha 'mɛ 'ka bha ꞊në 'ka‑ sa, 'yö Maseduanö ‑mɛ ‑nu ‑wa ꞊slɔɔ waa‑ Akai ‑mɛ ‑nu 'dhö, "kɛɛ 'yii 'to ‑zian wo‑ 'dhɛ 'kö bha yöö do‑ bha. Ka ‑bha 'dhang ‑bho Atanna "dhiʋ̈ ‑sü ꞊dede bha ꞊në‑ ‑taɔng ‑yö ꞊mɔɔ ‑dhɛ ꞊gban "pɛpɛ 'gü, 'yö‑ ‑dhiang zë ‑kɔ 'bha ‑zian 'yaa 'dhö yi ‑gɔ 'zü.
1TH 1:9 ‑A ‑gɛn ‑mü ꞊dhɛ ‑kɔ ‑ya yi ‑dhɛng ‑bha ‑kɔ 'ka‑ ‑ya 'ka kö 'ya nu ka ‑gɔ "sɛ 'gü mü bha waa‑ ‑kɔ 'ka 'dhang bho‑ 'ka Atanna "dhiʋ̈, 'ö 'ka ka ꞊taa zun‑ 'ka ‑dhɔkëpë ꞊gban "pɛpɛ suu ‑gɔ 'ö 'ka Atanna "yaandhe ꞊dede 'ö‑ ‑wɔn 'yaa ꞊sua 'ka ‑a ‑dhɔkë, ‑kɔ 'ka ‑ya ‑sü 'ka‑ 'ka ‑a Gbö 'ö‑ bho ga 'gü, 'ö ꞊ya 'dho dhang‑ 'gü 'ö nu sië, Yesu 'ö kwa dha‑ ‑bha ‑mawɔnsiödhe 'ö nu sië ‑dhɛkpaɔ dhia" 'gü ‑a ‑gɔ bha‑ nu ‑sü ‑gɔ ꞊niida 'ka bha mɛ ꞊gban "pɛpɛ ‑wa ‑dhiang ‑zë.
1TH 2:1 N dheebhang ‑nu, kaa ꞊dede ka‑ 'wɔn ‑dɔ ꞊dhɛ nu 'yi‑ wo ka ‑gɔ 'plöö mü bha, 'yii kë 'wɔn 'gü "klʋng 'ka.
1TH 2:2 'Ö gun kö yi ‑tun Fidhipö ‑pö 'gü kö 'yii ꞊loo ꞊kö ka ‑gɔ mü, ‑wo kë ‑gbaɔn yi ta 'ö 'wo yi ‑wëë ‑kë "dhiʋ̈ ꞊gban "pɛpɛ suu wo, "kɛɛ yö ‑zë ꞊gban 'gü, Atanna 'yi‑ ‑bha zian ‑ta bha ‑yö kë yi ‑zʋ ‑gban 'ö 'yi nu‑ ‑bha naɔ ‑së bha‑ dɔ ka ‑gɔ, "kɛɛ 'sa kö yi ‑gblü bha‑ 'gü "dhʋ̈ ka ‑gɔ mü 'pö.
1TH 2:3 ‑A ‑gɛn ‑mü ꞊dhɛ dhiang 'yi nu‑ zë ka ‑dhɛ bha tɛan‑ ‑dhiang ‑mü. 'Yii‑ ‑zë ka ‑dhɛ zian ‑dhɛng ka ‑gɔ ‑dhɔ ‑bha, "ɛɛn "bhluubhludhɛ 'yaa gun yi ‑kɔ "piʋ̈, kö yöö 'to mɛ ‑zian kë ‑sü ꞊në‑ ‑bha. 'Yii‑ ‑dhɛ mɔɔ‑ kö 'yi sɛɛ" 'kpɔ ka ‑dhɛ "yigblü ‑ta.
1TH 2:4 "Kɛɛ 'wɔn "pɛpɛ 'yi‑ ‑dhiang zë bha, 'wɔn 'ö ‑dhi Atanna yöö ꞊dede ꞊në‑ ‑dhɛ yö ‑mü. ‑A ‑gɛn ‑mü ꞊dhɛ ‑yö ‑dhi yöö ꞊dede bha ꞊në‑ ‑dhɛ, 'yö‑ dɔ yi ‑kɔ 'ka kö 'yi‑ pö mɛ "bhɩɩ‑ ‑nu ‑dhɛ. Yö ꞊në‑ ‑wɔn 'gü, 'yö 'yi‑ ‑dhiang zë sië, 'yö 'yaa‑ zë ‑kɔdɔ "piʋ̈ 'ka, ‑a ‑gɛn ‑mü ꞊dhɛ 'yii‑ zë kö yi "dhia ‑yö 'ma mɛ "bhɩɩ‑ ‑nu ‑zë 'gü, "kɛɛ yi ‑zë kö yi "dhia‑ ma Atanna ꞊në‑ 'gü. ‑A ‑gɛn ‑mü ꞊dhɛ yö ꞊në ‑dhɛ ‑yö yi zuë" "piʋ̈.
1TH 2:5 Kaa ꞊dede ka‑ 'wɔn ‑dɔ 'kpakpadhö ꞊dhɛ nu 'yi‑ wo mü bha 'yii "kpënng‑ ‑kë mɛ ‑gɔ ‑dhiang zë mɛ 'bha ‑dhɛ, "ɛɛn yi ‑nu mü ‑sü ‑gɛn 'yii ‑gban ꞊naɔ mɔɔ‑ ‑sü ‑bha, Atanna ꞊në yi "sɛɛ 'ka.
1TH 2:6 'Yii‑ ‑dhɛ mɔɔ‑ kö ‑yö ‑kë ka 'ka oo, "ɛɛn ‑yö ‑kë mɛ "wɛɛ 'bha ‑zian ꞊në‑ 'ka oo, kö ‑yö "dhɛ ‑ya yi ‑ta, "kɛɛ 'sa kö yi ‑mɔɔ ‑bha 'nu 'yi mɛdhɛ ‑faan ‑wɔ ka ‑ta kö 'ka yi ꞊bhlëë ‑ya; ‑a ‑gɛn ‑mü ꞊dhɛ Klisi ‑bha bɔmɛ ‑mü yi 'ka.
1TH 2:7 "Kɛɛ yö ꞊në ꞊gban 'gü, 'yii "wɩ‑ ‑bha kö 'yi‑ kë "dhʋ̈. Yi ‑zɔn ka ‑dhɛ 'ö 'yi ‑tosɛa ‑kë ka "piʋ̈ "yɛɛdhö ꞊dhɛ ‑kɔ 'ö 'në "blë ‑dee dhe ‑yö ‑kë 'ka ö ‑bha 'në "piʋ̈ bha‑ 'dhö.
1TH 2:8 Ka ‑dhɔ ‑bha yi kë ‑kɔ yaa 'gü yaa bha‑ ‑wɔn 'gü, 'yii kë yi "piʋ̈ ꞊dhɛ naɔ ‑së 'ö go Atanna "piʋ̈ bha 'yi yöö do‑ pö ka ‑dhɛ, "kɛɛ 'ya‑ ‑wʋ bha‑ pö ka ‑dhɛ 'yi yi ‑dɩ ‑bha ‑tosɛa ‑nu ꞊gban "kplëng ‑bho ka ‑dhɛ, ka ‑wɔn 'ö ‑kë yi ‑gɔ "gbɩɩ‑ 'ö ‑ziö ‑naa 'gü bha‑ ‑wɔn 'gü.
1TH 2:9 N dheebhang ‑nu, kaa ꞊dede ka‑ 'wɔn ‑dɔ ꞊dhɛ gun 'yi‑ wo ka "piʋ̈ mü bha yi yii‑ ‑kɔdhiʋ̈ ‑yë ‑nu ‑kë 'ö 'yi yi ‑mawɔn ‑kë 'gü, 'ö 'yi sëë bho "binma ‑dhɛkpaɔ, kë "dhʋ̈ kö 'ya 'dho kë ꞊kwɛɛ‑ 'gbiin‑ 'ka mɛ 'bha ka ‑ta. Atanna ‑wʋ ꞊në 'yi‑ pö ka ‑dhɛ doseng.
1TH 2:10 Atanna ‑yö yi "sɛɛ‑ 'ka, 'ö kaa ꞊dede 'ka yi "sɛɛ‑ 'ka 'pö ꞊dhɛ mɛ "pɛpɛ 'ka 'dhang ‑bho "dhiʋ̈ ‑mɛ 'ka Tesadhonikö ‑pö 'gü, yi ‑tosɛa ‑kë ka "piʋ̈ "puu 'ka ‑a dhɔɔbhaa 'ka, 'ö mɛ 'bha 'yii ꞊sɔng yö yi ‑bha.
1TH 2:11 Ka‑ 'wɔn ‑dɔ 'pö ꞊dhɛ gun 'yi‑ wo mü bha yi ka ‑wɔn ‑kun 'do 'do 'ka 'ö 'yi ‑kë ka ‑gɔ ꞊dhɛ ‑kɔ 'ö 'në dë ‑yö ‑kë 'ka 'në ‑gɔ ‑a 'dhö.
1TH 2:12 'Ö 'yi ka faan dɔ, 'ö 'yi kpa ka ‑zʋ ‑ta, 'ö 'yi ‑dhio dɔ ka ‑ta glɔglɔdhö kë "dhʋ̈ kö ka "ta ‑kɔ ‑yö dhi Atanna ‑dhɛ; ‑a ‑gɛn ‑mü ꞊dhɛ yö 'ö bha ꞊në ka ‑dhɛ sië ‑tosɛa ‑kë 'tɔbhɔdhe 'gü ‑sü 'ka ö ‑gɔ ‑gblüdëdhɛpö 'gü.
1TH 2:13 Yö ꞊në‑ ‑wɔn 'gü 'yö yi 'gü 'yaa ga‑ nuɛ" bho ‑sü 'ka, ‑a ‑gɛn ‑mü ꞊dhɛ ‑a ‑wʋ 'yi‑ pö ka ‑dhɛ 'ö 'ka 'dhang bho‑ "dhiʋ̈ bha, 'kii‑ ‑ga ꞊dhɛ mɛ "bhɩɩ‑ ‑nu 'gü ‑dhiang 'wo‑ zë ꞊kpaɔdhɛ ‑bha "wɛɛwɛɛ ‑a 'dhö, "kɛɛ ka‑ ‑sü ꞊dhɛ ‑kɔ 'ö‑ 'ka ꞊dedewo tɛan‑ 'ka Atanna ‑wʋ 'ka bha ꞊në‑ 'dhö. Yö ꞊në‑ ‑wɔn 'gü 'yö yë kë sië ka 'gü, 'yö ꞊ya 'mɛ 'ka 'dhang bho ‑a "dhiʋ̈ ka "gla ꞊dɛɛ bha.
1TH 2:14 ‑A ‑gɛn ‑mü ꞊dhɛ ka 'ö 'ka bha, n dheebhang ‑nu, ka ꞊dhɛ Atanna ‑bha 'kɔdhigümɛ ‑nu 'ö ꞊wa bɔ Yesu Klisi 'ka, 'wo Zude ‑sɛ 'gü bha ꞊në‑ ‑nu 'dhö ꞊dɛɛ. ‑A ‑gɛn ‑mü ꞊dhɛ 'wɔn do 'ö‑ ‑nu dheebhang Zuifö ‑nu 'wo‑ ‑wɔ ‑nu ‑ta Atanna ‑wʋ ‑wɔn 'gü bha ꞊në ka ‑gɔ "sɛgümɛ ‑nu 'wo‑ ‑wɔ 'pö ka ‑ta.
1TH 2:15 'Mɛ 'wo bha ꞊në 'wo kwa Dëmɛ Yesu zë, wo ꞊në 'wo Atanna ‑wʋdhiʋ̈loomɛ ‑nu zë, 'wo ꞊në 'wo yi ‑wëë ‑kë "dhiʋ̈ ꞊gban "pɛpɛ suu wo. Wo ‑zë ‑wo mɛ ꞊gban "pɛpɛ ꞊në‑ 'yaɔ‑ 'ka. Yö ꞊në‑ ‑wɔn 'gü 'yö‑ ‑nu ‑dhɔ 'yaa Atanna kë.
1TH 2:16 Wo ꞊në 'wo zun ‑sü 'ka yi ‑gɔ zian‑. 'Yaa‑ ‑nu "piʋ̈ ꞊dhɛ 'yi Atanna ‑wʋ pö 'mɛ 'waa Zuifö 'ka‑ ‑nu ‑dhɛ kö ‑wo dha. ‑Wo woo 'wɔn yaa ‑ta ꞊në pa sië do Atanna wëëdhö 'wo dho‑ 'ka. "Kɛɛ ꞊ya ö bhlɔɔ bho‑ ‑nu ‑gɔ ꞊gban wo ꞊ya bo.
1TH 2:17 Yi ‑zë yi ‑bha 'ka, n dheebhang ‑nu, kwa "yan ‑go 'kwëë‑ ‑yi 'yaa ꞊dɛɛ, 'kwaa ‑dhɛ do 'gü ‑a yi ꞊ya ꞊gwëë, "kɛɛ ka ‑dhɔ ‑zë ‑yö yi zuë" "piʋ̈ ‑kpɛawo. ‑A "sɩ ꞊në 'yaa yi ‑dhɛ, "kɛɛ "yan ‑kpan ka ‑bha ‑dhɔ "kakasü ‑yö yi ‑bha.
1TH 2:18 'Ya‑ "slë mɔɔ‑ ‑kɔ ꞊gban ‑kɔ ꞊gban 'gü kö 'yi nu mü, "kɛɛ mang Pɔdhö ‑mɛ ‑zë ‑yö n "piʋ̈ 'nu ‑zianwo ꞊dhɛ 'a nu ‑kɔ do "ɛɛn ꞊plɛ ‑zian kë 'nu ‑deewo ka "piʋ̈ mü, "kɛɛ yi ‑kɔ ꞊në 'yii ꞊mɔɔ‑ ‑bha. ‑A ‑gɛn ‑mü ꞊dhɛ Sɔtraan ꞊ya zun yi ‑gɔ zian‑.
1TH 2:19 "Ɛɛn ‑yö ka 'gü ꞊dhɛ yi ‑zʋ ‑yö ‑më ‑wɔn "wɛɛ 'bha ꞊në‑ 'gü, 'ö yi ꞊nii ‑da ‑wɔn 'ka, "ɛɛn 'ö yi 'tɔ bhɔ ‑wɔn 'ka kwa Dëmɛ Yesu nu ‑yi 'ka kö 'yii kë ka ‑zë ka 'ka?
1TH 2:20 Ka ꞊në 'ka yii‑ 'tɔbhɔdhe waa‑ yii‑ ꞊niidadhe ꞊gban 'ka.
1TH 3:1 Yö ꞊në‑ ‑wɔn 'gü 'yö ꞊dhɛ 'yi‑ ‑ga ꞊dhɛ 'ya‑ "slë mɔɔ‑ 'ya ꞊fië‑ ‑bha, "kɛɛ 'ö ka ‑dhɔ ‑kun yi ‑bha ‑sü "sɩ 'yaa yi ‑dhɛ 'zü, 'yö ‑dhi yi ‑dhɛ kö mɛ ꞊plɛ 'yi 'to Atɛnö yö,
1TH 3:2 kö 'yi kwa dheebhang Timote 'ö yɛng‑ ‑nu 'yi Atanna ‑bha yë bha‑ kë sië bha yö ‑zë bɔ, kö ꞊ya nu kö ‑yö ka faan dɔ, kö ka 'gü 'ya 'dho ga ‑zʋ ‑yö Atanna ‑dhɛ ‑sü 'ka. ‑A ‑gɛn ‑mü ꞊dhɛ yi 'dhang bho‑ "dhiʋ̈ ꞊dhɛ Atanna ꞊në‑ ‑ya kö ‑yö kwa Dëmɛ Klisi ‑bha naɔ ‑së bha‑ dɔ.
1TH 3:3 Yi‑ ‑bɔ "dhʋ̈ kë "dhʋ̈ kö ‑din yën 'ya 'dho 'ma ka ‑bha saan" 'kwa‑ wo sië Atanna ‑wʋ ‑wɔn 'gü bha‑ ‑wɔn 'gü. ‑A ‑gɛn ‑mü ꞊dhɛ ‑a 'wɔn‑ kaa ꞊dede ka "yaan ꞊dhɛ saan" 'dhɛ 'kö bha 'yaa 'kpɔ 'dhang ‑bho ‑a "dhiʋ̈ ‑mɛ 'bha 'ka tongtongdhö.
1TH 3:4 Ka‑ 'wɔn ‑dɔ ꞊dhɛ "tʋ̈ng 'yi gun‑ 'ka ka "piʋ̈ mü bha, 'yii 'wɔn bha‑ 'bha ‑bin ka ‑gɔ. 'Yi‑ ‑to "dhiʋ̈ 'yi‑ pö ka ‑dhɛ ꞊dhɛ 'wɔn‑ ‑dho ꞊gbaɔn kwa ‑ta, 'ö 'kwa sëë bho ꞊dhɛ ‑kɔ ꞊dede 'ö kë sië‑ 'ka bha‑ 'dhö.
1TH 3:5 'Wɔn 'ö‑ ‑wɔn 'gü, 'yö n ‑zʋ ‑yö dun 'yö 'a Timote bɔ kö ‑yö nu ‑wo ka ‑bha kö ‑naa 'ö ka ‑bha ‑zʋ ‑yö Atanna ‑dhɛ ‑sü 'dhö‑ ‑ta 'a‑ dɔ bha 'yö bha. ‑A ‑gɛn ‑mü ꞊dhɛ kë "dhʋ̈ 'ö Sɔtraan ‑yö "kpënng‑ ‑kë ka ‑gɔ 'ö ka ‑pö, 'ö yë "sinma 'yi‑ ‑kë ka ‑gɔ mü bha 'ö ‑kë saan" ‑sü "fië 'ka 'ö‑ ꞊trɔɔn 'yaa kë.
1TH 3:6 "Kɛɛ ꞊dhɛ 'ö Timote ꞊ya 'go mü ꞊ya nu ꞊ya ꞊loo yö, 'ö ꞊ya ka ‑dhiang zë yi ‑dhɛ, 'ö 'wɔn 'ö ‑gban ka ‑bha 'dhang ‑bho Yesu "dhiʋ̈ ‑sü waa‑ ‑dhɔ 'ö ka 'gü ‑bha bha ꞊ya ziö‑ yi ‑dhɛ ‑a ‑gɛn 'gü, 'ö ꞊yaa‑ pö 'zü yi ‑dhɛ ꞊dhɛ kaa ‑dɩ 'pö yi ‑dhɔ ꞊ya ka 'kun ꞊dhɛ ‑kɔ 'ö ka ‑dhɔ ‑yö yi kun‑ 'ka ‑a 'dhö, 'yö yi zuë" ‑yö 'waanu.
1TH 3:7 Ka ‑bha ‑zʋ ‑yö Atanna ‑dhɛ ‑sü bha ꞊në‑ ‑wɔn 'gü, n dheebhang ‑nu, 'yö sëëbhodhe ‑nu 'ö yi ‑bha waa‑ zuëdhiʋ̈tɛɛ ‑nu 'ö yi ‑bha ‑a ꞊gbaan "gla yi ‑gɔ ꞊niidadhe 'gü, 'yö yi faan ꞊në dɔ sië ꞊taamasü ya‑ 'gü do 'ö dho‑ 'ka.
1TH 3:8 ‑A ‑gɛn ‑mü ꞊dhɛ ‑a ma 'yi‑ wo ꞊dhɛ ka ‑kplü ‑sü 'ka kwa Dëmɛ bha‑ ‑bha kpɛnngkpɛnngdhö bha ꞊ya yi gba faan ‑dee 'ka, 'ya kë ꞊dhɛ "yua ‑kɔ ꞊ya gun ꞊ya ziö 'mɛ 'ö‑ ‑gɔ "kɛɛ 'ö ꞊ya dha‑ ‑gɔ ‑a 'dhö.
1TH 3:9 'Ya yi ‑zʋ 'gɔn, Atanna nuɛ" bho ‑kɔ ‑zian 'yi dho‑ bho‑ 'ka ka ‑wɔn 'gü kö ‑yö yi ‑zʋ 'kun 'yaa‑ ‑kɔ yö 'zü. ‑A ‑gɛn ‑mü ꞊dhɛ yi zuë" ꞊nii 'ö ‑da sië ka ‑taɔng 'yi‑ ma bha‑ ‑wɔn 'gü kwa ‑bha Atanna bha‑ wëëdhö bha, ‑a ‑dhiang zë ‑kɔ ‑zian 'yaa yi "yaan.
1TH 3:10 'Ya "wlü 'yënng‑ 'gü "ɛɛn gbeng 'gü, "tʋ̈ng "ʋʋ "tʋ̈ng 'ö 'yi bhɛa" ‑zë wo sië‑ 'ka Atanna ‑dhɛ, yi yi ‑kɔ "puu ‑kpɔ ‑dhɛ, 'ö yi ꞊nëng 'gü dɔɔndɔɔndhö kö ‑yö zian "pʋ yi ‑gɔ kö 'yi nu 'yi yi "yan ‑kpan ka ‑bha, 'ö 'yi ꞊bhɛa‑ ‑dhɛ kö ‑yö ka ‑ta 'kun 'zü ‑kɔ ꞊gban ‑kɔ ꞊gban 'gü kö pë 'dhɛ 'ö‑ ‑wɔn ꞊ya 'to ka ‑gɔ "tʋ̈ng ya‑ 'gü ka ‑bha 'dhang ‑bho ‑a "dhiʋ̈ ‑sü 'gü kö ‑yö ꞊mɔɔ "kwëë bha, kö ‑ya nu ka ‑dhɛ.
1TH 3:11 Yi ‑bhɛa ‑dhɛ kö yöö ꞊dede 'ö kwa Dë 'ka bha waa‑ kwa Dëmɛ Yesu ‑wo zian bho yi ‑gɔ kö 'yi ‑wo ka ‑dhɛ 'gü.
1TH 3:12 Yi ‑bhɛa ‑dhɛ kö ka 'ko ‑nu ‑dhɔ 'ö ka 'gü, 'ö dho 'ö ‑wɔ 'ka mɛ "pɛpɛ ꞊gban ‑dhɔ ‑bha ka kë ‑sü ‑ta bha ‑ya 'bha ‑da 'gü ‑kpɛawo kö ‑yö sa, kö ‑yö ꞊mɔɔ ‑dhɛ ꞊gban 'gü ꞊dhɛ ‑kɔ 'ö ka ‑dhɔ ‑yö yi ‑kë 'ka 'pö bha‑ 'dhö.
1TH 3:13 Kö ‑yö ka ‑zʋ ‑gban, kö pö 'ya 'dho kë ka ‑bha kwa Dë Atanna wëëdhö ka ‑ya 'ö‑ wo ‑dɩ ‑ta bha‑ 'gü 'wɔn 'bha ‑wɔn 'bha 'gü, yi 'ö kwa Dëmɛ Yesu waa‑ ‑bha ‑yamɛ ‑nu 'wo dho nu‑ 'ka bha‑ 'ka.
1TH 4:1 ꞊Ya 'go yö ‑zë 'gü, n dheebhang ‑nu, ‑a 'dhɛ 'kö ‑gban "ta ‑kɔ 'ö 'ka dho "ta‑ 'ka kö ka "dhia ‑yö 'ma Atanna 'gü ‑a ‑bha, 'ya ka ꞊klang kë yö ‑zë 'ka 'nu, ka yö ‑zë kë sië, "kɛɛ 'pë 'yi‑ "piʋ̈ 'yi‑ pö ka ‑dhɛ dɔ 'kwa‑ wo ya‑ 'gü, yö mü ꞊dhɛ kö "ta ‑kɔ ‑së 'ka‑ kë sië bha‑ 'bha ꞊në ‑yö ‑da 'gü kö ‑yö 'dho‑ 'ka ‑kpɛawo. 'Wɔn 'yi bhɛa" sië ka ‑dhɛ ‑a 'gü 'ö 'yi‑ 'gü ‑gbɛʋʋ kë sië kwa Dëmɛ Yesu 'tɔ 'gü bha 'yö bha.
1TH 4:2 ‑A ‑gɛn ‑mü ꞊dhɛ ‑dhio ‑wʋ 'ö kwa Dëmɛ Yesu ‑ya ‑wɔ yi "dhi 'yi‑ dɔ ka ‑ta bha ‑yö ka "yaan.
1TH 4:3 Yi‑ ‑pö ka ‑dhɛ ꞊dhɛ 'pë 'ö Atanna 'gü ‑së, 'ö‑ ‑dhidhɛwɔn 'ka, yö ‑mü ꞊dhɛ kö 'ka ka ‑dɩ 'kun ‑së, kö mɛ 'bha 'ya 'dho pö yö ka ‑bha 'wɔn 'bha ‑wɔn 'bha 'gü, "kɛɛ kö 'ka ka ‑dɩ 'kun "kwɛɛkwɛɛ kë ‑sü ꞊në‑ ‑gɔ.
1TH 4:4 Yö ‑mü ꞊dhɛ kö mɛ 'ö "dhʋ̈ ꞊yaa‑ pö 'ö dhe 'sü, kö‑ 'sü ‑kɔ ‑yö kë ꞊bhlëësü Atanna wëëdhö "ɛɛn mɛ "bhɩɩ‑ ‑nu wëëdhö.
1TH 4:5 kö 'ka 'dho ka ‑kɔ "kan ka ‑dɩ ‑wɔn "dhiʋ̈ 'ö 'wɔn 'ö ‑gban "kwɛɛkwɛɛ kë ‑sü ‑bha bha‑ ‑kɔ ‑yö ‑ziö ka ‑gɔ ꞊dhɛ 'mɛ 'waa Atanna dɔ‑ ‑nu 'dhö.
1TH 4:6 'Wɔn 'ö Atanna 'gü ‑së, yö ‑mü ꞊dhɛ kö mɛ 'bha 'ya 'dho kë ‑da ꞊sɔng yaa suu bha‑ 'ka wo 'ko ‑gɔ 'kɔɔmɛ 'ka, 'ö‑ ‑mɛ ‑bha dhe bho‑ ‑gɔ ‑a ‑bha faandhɛ 'ka, "ɛɛn 'ö ‑ziö ꞊keng‑. 'Wɔn suu bha 'ya‑ ‑dhio dɔ ka ‑ta 'nu 'ya yi kɔngga ziö‑ 'ka ka ‑dhɛ "sɛɛ glɔglɔdhö. ‑A ‑gɛn ‑mü ꞊dhɛ 'mɛ 'wɔn suu bha‑ ‑kë kwa Dëmɛ ‑dho 'wɔn bho‑ 'gü.
1TH 4:7 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna 'yii kwa ‑dhɛ kö 'kwa ‑tosɛa kë ꞊niësü ‑zë 'gü, "kɛɛ kö 'kwa kwaa‑ kwa kë ‑sɔng zizi ‑nu bha ꞊në‑ 'zü kö 'kwa ‑ya ‑a ‑bha ‑ya 'gü.
1TH 4:8 ‑A kë "dhʋ̈ ‑sü bha‑ 'gü, mɛ "ʋʋ mɛ 'ö 'yii ‑dhio 'a‑ dɔ ka ‑ta bha‑ ma, kö 'yii ‑kɔ mɛ "bhɩɩ‑ ‑zë ‑wʋ 'ka, kö Atanna 'ö ö ‑bha 'Nii‑ "slʋ̈ʋ̈slʋ̈ ꞊gbaɔ ka ‑gɔ bha ꞊në‑ ‑mɛ ‑yö ‑kɔ ‑wʋ 'ka bha.
1TH 4:9 ‑A 'dhɛ 'kö ‑gban ka 'ko ‑dhɔ ‑bha 'ka 'kö kë ‑sü 'ö Atanna ‑bha zian ‑ta bha‑ ‑bha, ‑yö n 'gü ꞊dhɛ yö ‑zë ‑pö ka ‑dhɛ ‑gɛn 'yaa 'dhö 'zü; ‑a ‑gɛn ‑mü ꞊dhɛ yöö ꞊dede ꞊ya ka ꞊klang kë yö ‑zë 'ka.
1TH 4:10 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kwa dheebhang ‑nu 'wo 'dhang bho 'pö Yesu "dhiʋ̈ ꞊dhɛ kwa 'dhö, 'wo ka ‑bha Maseduanö ‑sɛ ꞊gban "pɛpɛ 'gü ‑a ‑nu ‑dhɔ ‑yö ka ‑kë. "Kɛɛ 'wɔn 'ö yi "piʋ̈ ꞊dhɛ 'yi‑ pö ka ‑dhɛ dɔ 'kwa‑ wo ya‑ 'gü, yö ‑mü ꞊dhɛ kö ‑dhɔ 'ö ka ‑gɔ bha‑ 'bha ꞊në ‑yö ‑da 'gü kö ‑yö 'dho‑ 'ka "dhiʋ̈ ‑kpɛawo, n dheebhang ‑nu.
1TH 4:11 Kö 'ka ka 'gü dɔ "gbɩɩ‑ 'ka ‑tosɛa kë "yënng ꞊dhië 'gü, kö 'ka ‑ya ka ‑dɩ ‑gɔ ‑wɔn ‑nu ꞊në‑ zuën ‑ta, kö 'ka ka ‑dɩ ‑bha yë kë kö 'ka ka ‑bhöpë ꞊slɔɔ ꞊dhɛ ‑kɔ 'yi‑ ‑dhio dɔ‑ 'ka ka ‑ta bha‑ 'dhö.
1TH 4:12 Kë "dhʋ̈ kö 'ka kë ꞊bhlëësü 'mɛ 'waa 'dhang bho Yesu "dhiʋ̈ ‑a ‑nu 'gü, kö ka ‑kwɛɛ 'gbiin‑ 'ya 'dho mɛ 'bha kë.
1TH 4:13 N dheebhang ‑nu, 'yaa yi "piʋ̈ ꞊dhɛ 'wɔn 'dhɛ 'ö ‑gban 'mɛ 'wo ga Atanna ‑bha zian ‑ta ‑a ‑nu ‑bö ‑wɔn ‑bha bha 'ka kë‑ 'gü ka tii ‑bha, kö ‑wëë ‑yö bɔ ka ‑ta ꞊dhɛ 'mɛ‑ ‑nu ‑zʋ 'gɔn ‑sü 'yaa 'wɔn 'bha ‑wɔn 'bha ‑dhɛ ‑dhɛkpaɔ dhia" 'gü ‑a ‑nu 'dhö.
1TH 4:14 ‑A ‑gɛn ‑mü ꞊dhɛ ꞊ya kë ꞊dhɛ 'dhang ‑bho "dhiʋ̈ ‑sü ‑zë ꞊ya kë kwa ‑gɔ ꞊dhɛ ga 'ö Yesu ‑ya wo bha ‑yö kë ‑bö, kö ‑ka ‑kwa 'dhang bho‑ "dhiʋ̈ 'pö ꞊dhɛ Atanna ‑dho bɔ Yesu ‑ta 'ö waa‑ 'mɛ 'wo to‑ ‑bha zian ‑ta 'wo ga bha‑ ‑nu ‑bö 'pö.
1TH 4:15 ‑A 'klɔɔ‑ ‑mü ꞊dhɛ ‑wʋ 'ö kwa Dëmɛ ‑ya dɔ yi "dhi kö 'yi‑ pö ka ‑dhɛ ‑kaa ‑ga 'ö ya. ‑Ya ‑pö ꞊dhɛ ‑a nu "tʋ̈ng 'dhö dho ꞊loo 'mɛ 'ö kwa ‑bha kö kwa ‑tun "yaandhe 'ka ‑a ‑bha zian ‑ta bha, kwa ‑zë 'kwii 'dho ‑da 'mɛ ꞊wa ga 'nu ‑a ‑nu "dhiʋ̈ kö 'kwa 'dho‑ "piʋ̈.
1TH 4:16 "Kɛɛ kwa Dëmɛ yöö ꞊dede ‑a ‑bha ‑go dhang‑ 'gü ‑sü 'ka, Atanna ‑bha "kië ‑nu ‑gɔmɛ do‑ ‑dho ‑a "kwikan 'ö 'kwa‑ ma, 'ö‑ ‑bha "truu ‑yö ‑wɩ 'ö 'kwa‑ ma, 'yö gun ‑na 'go dhang‑ 'gü 'ö ꞊lɔɔ, 'yö 'mɛ 'wo to‑ ‑bha zian ‑ta 'wo ga bha 'wo ‑bö ꞊kö ‑blɛɛsü.
1TH 4:17 ꞊Ya 'go mü 'yö 'mɛ 'kwa dho 'to "yaandhe 'ka waa 'mɛ 'wo ‑bö bha mɛ ꞊gban 'kwa ‑tɔn kun kwa "kwëë, 'yö 'kwa dho dɔ kwa Dëmɛ ‑gɔ zian‑ dha 'kpong‑ 'gü, 'yö 'kwa ‑kpan ‑bha 'tëng‑ ‑ta, 'yö 'kwa gun ‑na ‑tosɛa kë ‑a "piʋ̈ ‑todhʋ̈ 'ka.
1TH 4:18 ‑A ‑kë "dhʋ̈ ‑sü bha‑ 'gü, ‑ka ka 'ko ‑nu ‑zʋ ‑gban ‑wʋ ‑nu bha ꞊në‑ 'ka.
1TH 5:1 ‑A 'dhɛ 'kö ‑gban yi 'ö kwa Dëmɛ dho nu‑ 'ka waa‑ ‑a "tʋ̈ng ‑zë ‑bha, n dheebhang ‑nu, ‑yö n 'gü ꞊dhɛ yö ‑zë ‑pö ka ‑dhɛ ‑gɛn ‑zian 'yaa 'dhö.
1TH 5:2 ‑A ‑gɛn ‑mü ꞊dhɛ ka yö ‑zë 'wɔn ‑dɔ 'kpakpadhö ꞊dhɛ ‑a nu ‑sü ‑dho "kan ꞊në‑ wo mɛ ꞊gban 'gü ꞊dhɛ ꞊kwaanmɛ ‑yö nu gbeng.
1TH 5:3 "Tʋ̈ng ꞊dede 'ö mɛ "bhɩɩ‑ ‑nu 'wo‑ pö sië‑ 'ka ꞊dhɛ: «'Aa "sɛ ꞊ya 'waanu, 'kwa ‑ya kwa ‑dɩ 'flëë‑ 'gü bha ꞊në 'güseedhe dho "kan‑ ‑nu 'gü ‑a 'ka ꞊dhɛ ‑kɔ 'ö 'në 'kpɔ "gblʋ̈ʋ̈dhɛpiʋ̈ ‑yö zun‑ 'ka 'gbiödhe ‑nu ‑bha bha‑ 'dhö, 'yö 'waa dha‑ ‑gɔ tongtongdhö.
1TH 5:4 "Kɛɛ ka ‑zë, n dheebhang ‑nu, 'kaa 'wɔn yaa 'gü kö yi 'ö bha ‑yö "kan ka 'gü ꞊dhɛ ꞊kwaanmɛ ‑yö ‑kan mɛ 'gü.
1TH 5:5 Ka ‑zë ka ‑tosɛa ‑së kë sië, kwa ‑zë 'wɔnyaakëmɛ 'yaa ‑mü kwa 'ka 'zü.
1TH 5:6 ‑A ‑kë "dhʋ̈ ‑sü bha‑ 'gü, 'kwa 'dho yi zë ꞊dhɛ mɛ ‑kpɛa 'dhö, ‑kwa ‑ya kwa "yaan kö 'kwa kwa ‑dɩ 'kun ‑së.
1TH 5:7 ‑A ‑gɛn ‑mü ꞊dhɛ yi 'ö mɛ ‑ya zë bha ‑ya ‑zë gbeng ꞊në‑ 'gü, 'yö 'mɛ woo ‑dɩ 'pö 'wo we kpɔ wo ‑dɩ ‑gɔ bha 'wo‑ kpɔ gbeng.
1TH 5:8 "Kɛɛ mɛ 'ö kwa ‑zë 'kwa ‑dhɛpuudhɛ 'gü ‑mɛ ‑nu 'ka bha, ‑ka ‑kwa kwa ‑dɩ 'kun ‑së, kö ‑dhɔ waa‑ ‑zʋ ‑yö Atanna ‑dhɛ ‑sü 'ö kwa ‑gɔ bha, 'kwa‑ ‑da kwa ‑bha ꞊dhɛ ‑piö "bhɛɛ 'dhö, kö dha ‑sü kö 'kwa ‑tosɛa ‑së kë Atanna "piʋ̈, 'ö kwa ‑zʋ 'dhö‑ 'gü bha ‑yö kë kwa ‑gɔ ꞊dhɛ ‑piö gblaa‑ 'dhö kö 'kwa‑ ‑ya kwa ‑gɔ ‑bha.
1TH 5:9 ‑A ‑gɛn ‑mü ꞊dhɛ Atanna ‑yö kwa ‑da "dhʋ̈ kö 'kwa dha ꞊në wo kwa Dëmɛ Yesu Klisi 'saa‑ 'gü. 'Yii kwa ‑da kö 'ö 'wɔn ‑zë wɔ kwa ‑ta.
1TH 5:10 ‑A 'klɔɔ‑ ‑mü ꞊dhɛ Yesu Klisi bha ꞊në ga kwa ‑wɔn 'gü, kë "dhʋ̈ kö ‑a nu "tʋ̈ng ꞊ya ꞊loo kö kwa kwa "yaan oo, "ɛɛn kö 'kwa ga 'zü oo, kö 'kwa ‑tosɛa kë ‑a ꞊yënng 'gü.
1TH 5:11 ꞊Dhɛ 'ö "dhʋ̈, ‑ka ka 'ko ‑nu ‑zʋ ‑gban, kö 'ka ka 'ko ‑nu faan dɔ yi ꞊gban 'ka ꞊dhɛ ‑kɔ 'ka‑ kë sië‑ 'ka bha‑ 'dhö.
1TH 5:12 Yi ‑bhɛa ka ‑dhɛ, n dheebhang ‑nu, kö 'mɛ 'wo Atanna ‑bha yë kë sië ka kpö 'gü, 'ö 'wo‑ ‑gleng ‑da sië ka ‑bha, 'ö 'wo ka "dhiʋ̈ ‑ziö wo sië bha 'ka‑ ‑nu ‑ya ꞊bhlëë 'gü,
1TH 5:13 ‑kaa ‑nu ꞊bhlëë ‑ya ꞊dedewo kö‑ ‑nu ‑dhɔ ‑yö ka kë yë ‑së 'wo‑ kë sië bha‑ ‑wɔn 'gü. ꞊Ya 'go mü, (ka zuë" ‑yö kë ka 'ko "piʋ̈ ‑sɛa,) kö 'ka dhi ka 'ko ‑dhɛ ‑kpɛawo.
1TH 5:14 Yi ‑bhɛa 'zü ka ‑dhɛ, n dheebhang ‑nu, kö "wlaamɛ ‑nu 'wo ‑tosɛa kë sië "bhluubhludhɛ 'gü ka kpö 'gü bha 'ka ‑ya ‑nu "yan 'gü kö 'ka ka ‑kɔ ‑ya 'mɛ 'ö‑ ‑nu ‑din ꞊ya yën bha‑ ‑nu zuë" ‑ta. Kö 'ka 'mɛ "sɩ 'yaa‑ ‑nu ‑dhɛ Atanna ‑bha zian ‑ta bha‑ ‑nu ‑ta 'kun, kö ka zuë" ‑yö kë ‑sɛa mɛ ꞊gban "pɛpɛ "piʋ̈.
1TH 5:15 ‑Kaa kë ‑së kö mɛ 'bha 'ya 'dho 'wɔn yaa "yɔɔ bho 'ö "tɛado ‑gɔ 'wɔn yaa 'ka, "kɛɛ ‑ka 'wɔn ‑së ꞊në‑ kë ‑dhɛ mɔɔ‑ yi ꞊gban "pɛpɛ 'ka ka 'ko ‑dhɛ, "ɛɛn mɛ ꞊gban "pɛpɛ ‑dhɛ.
1TH 5:16 Ka ꞊nii ‑yö ‑da yi ꞊gban "pɛpɛ 'ka.
1TH 5:17 Kö ka 'gü 'ya 'dho ga ‑bhɛa Atanna ‑dhɛ ‑sü 'ka tongtongdhö,
1TH 5:18 "ɛɛn kö 'ka‑ nuɛ" bho 'wɔn ꞊gban "pɛpɛ suu 'gü, ‑a ‑gɛn ‑mü ꞊dhɛ ‑ya "piʋ̈ ꞊dhɛ 'ka yö ꞊në‑ kë "tʋ̈ng ꞊gban 'gü ka ‑bha ‑kë Yesu Klisi ‑bha 'ka ‑sü ‑wɔn 'gü!
1TH 5:19 'Ka 'dho zian ta ‑a ‑bha 'Nii‑ 'ö ka 'gü bha‑ ‑gɔ 'ö ö bo ‑a ‑wɔn ‑pɛng ‑dɔ ka 'ka ‑sü 'ka.
1TH 5:20 Kë "dhʋ̈ 'ö 'ka ‑ya ‑wʋ 'ö‑ dɔ ö ‑wʋdhiʋ̈loomɛ "dhi bha‑ ‑san 'ka!
1TH 5:21 "Kɛɛ ‑ka 'wɔn "pɛpɛ bha‑ ꞊gban ‑ga 'kpakpadhö ‑së 'ka, kö‑ 'dhɛ 'ö ‑së, 'ka‑ 'sü ka ‑bha 'ka.
1TH 5:22 ‑Ka ka ‑dɩ 'kun ‑së kö 'ka 'dho 'wɔn yaa suu "ʋʋ suu 'bha kë.
1TH 5:23 Atanna 'ö zuëwaanusü nu mɛ ‑dhɛ bha ‑yö bian bho ka ‑bha ‑kɔ ꞊gban ‑kɔ ꞊gban 'gü kö ‑yö ka "zu, kö ka ‑dhü ‑to "dhʋ̈ ‑sü, ka 'nii‑ oo, ka ‑wü oo, ‑wo 'to "puu 'ka kö pö 'a 'dho kë‑ ‑bha kwa Dëmɛ Yesu Klisi nu ‑yi bha‑ 'ka!
1TH 5:24 Atanna 'ö ka ‑dhɛ kö 'ka kë ö ‑bha 'ka bha ꞊në dho‑ kë "dhʋ̈, ‑a ‑gɛn ‑mü ꞊dhɛ yö ‑zë 'yaa "plüün 'gü "fië bho.
1TH 5:25 N dheebhang ‑nu, ‑ka bhɛa"‑ ‑dhɛ yi ‑wɔn 'gü 'pö.
1TH 5:26 ‑Ka kwa dheebhang ‑nu "pɛpɛ 'wo Yesu ‑bha 'ka mü, ‑a ‑nu ꞊gban "pɛpɛ ꞊tua bho yi ‑dhɛ 'gbɛ, kö 'ka ꞊loo ka 'kwëë‑ ꞊dhɛ dheebhang ‑zë ‑nu 'dhö.
1TH 5:27 A ‑bhɛa ka ‑dhɛ kwa Dëmɛ 'tɔ 'gü kö 'ka dɔ "gbɩɩ‑ 'ka 'sëëdhɛ ya‑ ‑wʋ pö kwa dheebhang ‑nu "pɛpɛ 'wo ka ‑gɔ "sɛ 'gü mü bha‑ ‑nu ‑dhɛ.
1TH 5:28 Kwa Dëmɛ Yesu Klisi ‑bha ‑gasitɛ bha ‑ya kë ka ‑dhɛ (yi ꞊gban "pɛpɛ 'ka)!
2TH 1:1 'Mɛ 'ka Atanna ‑bha 'kɔdhigümɛ ‑nu 'ka "ɛ "pɛpɛdhö Tesadhonikö ‑pö 'gü, 'ö 'ka ‑ya ‑sü 'ka kwa Dë bha waa‑ kwa Dëmɛ Yesu Klisi ‑nu ‑bha ‑ya 'gü, mang Pɔdhö ‑mɛ 'dhö, Sidhivɛn 'dhö, Timote 'dhö, yi ꞊në 'yi 'sëëdhɛ ya‑ bɔ ka ‑dhɛ.
2TH 1:2 Atanna 'ö ‑kë kwa Dë 'ka bha waa‑ kwa Dëmɛ Yesu Klisi, ‑wo ka gba zuëwaanusü 'ka, kö ‑wo ‑gasitɛ kë ka ‑dhɛ yi ꞊gban "pɛpɛ 'ka.
2TH 1:3 ‑A ‑dhɛa ‑bha ꞊dhɛ 'yi Atanna nuɛ" bho yi ꞊gban 'ka ka ‑wɔn 'gü, n dheebhang ‑nu. "Kɛɛ 'sa ‑a kë ‑kɔ 'kö 'dhö 'yö bha, ‑a ‑gɛn ‑mü ꞊dhɛ ka ‑bha ‑zʋ ‑yö Atanna ‑dhɛ ‑sü 'bha ꞊në ‑da sië‑ ‑ta do 'ö dho‑ 'ka, waa‑ ka ‑dhɔ ‑bha ka 'ko kë ‑sü 'dhö.
2TH 1:4 Yö ꞊në‑ ‑wɔn 'gü 'yö yi ‑gɛn gbɔ 'dhö "gblʋ̈gblʋ̈ Atanna ‑bha 'kɔdhigümɛ ‑nu kpö 'gü ‑dhɛ 'gbɛ 'gü ꞊dɛɛ, ‑a ‑gɛn ‑mü ꞊dhɛ Atanna ‑wɔn 'ö ka ‑gɔ "yi 'yaa zun‑ ‑bha, ka 'dhang bho ‑sü ‑ya "dhiʋ̈ 'kpakpadhö. 'Wɔn ‑nu 'wo‑ ‑wɔ ka ‑ta ka ‑bha 'dhang ‑bho Yesu Klisi "dhiʋ̈ ‑sü ‑wɔn 'gü, saan" ‑nu 'ka‑ wo, ‑a 'bha 'yii ka ‑kɔ bho Atanna ‑wɔn ‑bha. ‑Yö yi zuë" ꞊nii ‑da ꞊dedewo.
2TH 1:5 Mɛ ‑ya 'wɔn ‑dɔ yö ꞊në‑ ‑bha ꞊dhɛ: ‑Yö ‑dɔ 'wɔn bho ‑dhɛ 'ka 'koo, ꞊dhɛ 'yaa du 'to 'wɔn 'bha ‑bha. ꞊Dhɛ ‑yö tɛanwɔn ‑dɔ ö ‑mɛ ‑gɔ. Yö ꞊në‑ ‑wɔn 'gü, 'yö ö ‑kɔ ‑ya ka ‑bha kö ‑a ‑bha ‑gblüdëdhɛ 'ö ka ‑wëëdhɛ 'dhö bho sië‑ ‑wɔn 'gü bha, 'ka ka ‑duɛ yö mü.
2TH 1:6 Yö ꞊në‑ ‑zɔn ꞊dhɛ 'wɔn 'ö Atanna dho‑ kë bha pö 'yaa‑ ‑bha; ‑a ‑gɛn ‑mü ꞊dhɛ ‑yö ‑dho 'wɔn "gbɩɩ‑ wɔ 'mɛ 'wo ka ‑wëëdhɛ bho sië bha‑ ‑nu ‑ta.
2TH 1:7 'Yö 'mɛ ka ‑wëëdhɛ ꞊ya bho bha ka gba ‑ya ‑dɩ 'flëë‑ 'gü ‑sü 'ka yi "piʋ̈ yi 'ö kwa Dëmɛ Yesu dho 'go‑ 'ka dhang‑ 'gü 'ö nu, waa‑ ‑bha "kië 'gü "gbɩɩ‑ ‑nu 'wo‑ ‑bha mɛdhɛ ‑gban ꞊wlöö ‑a ‑nu 'dhö bha‑ 'ka,
2TH 1:8 kö pɛng 'nɛɛ‑ ‑yö dɔ sië‑ ‑nu ‑ta ‑mlangmlangdhö (Atanna ‑bha 'gügbɩɩdhɛ 'ka), 'yö 'wo 'wɔn ‑wɔ 'mɛ 'waa Atanna dɔ, waa‑ 'mɛ 'waa wo ‑gɔ 'dho "sia‑ 'wɔn ‑taɔng ‑së 'ö ‑gban kwa Dëmɛ Yesu ‑bha bha‑ ‑dhɛ, 'ö 'waa 'dhang bho‑ "dhiʋ̈ bha‑ ‑nu ‑ta.
2TH 1:9 'Güseedhe 'ö‑ ‑naa 'to ‑dhɛ 'yaa 'dhö ꞊në dho wɔ‑ ‑nu ‑ta. ‑Wo ‑dho kë kwa Dëmɛ 'ka ꞊gblɛɛn, 'wii 'dho wo ‑gɛn ‑da ‑a ‑bha ‑gblüdëdhɛ ꞊bhlëësü 'ö‑ ꞊mɔɔ‑ 'ka 'yaa 'dhö bha‑ kë ‑dhɛ 'gü.
2TH 1:10 ꞊Ya kë ꞊dhɛ ‑a nu ‑yi bha ꞊ya ꞊loo, mɛ "pɛpɛ 'kwa "wɩ ‑sü 'ka‑ ‑wɔn ‑bha 'ö 'kwa ‑ya ‑sü 'ka‑ ‑bha ‑ya 'gü bha, kwa ‑dho ‑a 'tɔ bhɔ, 'ö 'kwa wɛa ꞊loo‑ ‑dhɛ. Kaa ‑dɩ 'pö ka ‑dho kë 'mɛ 'wo "dhʋ̈ bha‑ ‑nu kpö 'gü, ‑a ‑gɛn ‑mü ꞊dhɛ ka 'dhang bho ‑sü ‑yö Atanna ‑bha naɔ 'yi‑ dɔ ka ‑gɔ bha‑ "dhiʋ̈, 'ö 'ka ‑ya ‑sü 'ka‑ ‑bha ‑ya 'gü.
2TH 1:11 Yö ꞊në‑ ‑wɔn 'gü 'pö, 'yö yi 'gü 'yaa ga ‑bhɛa ka ‑wɔn 'gü ‑sü 'ka, kë "dhʋ̈ kö ‑yö ka ‑ta 'kun, kö 'wɔn ‑së 'ö ka ‑dhɛ 'ka bha 'ka ka ‑duɛ yö‑ ‑bha, kö‑ ‑dɩ ‑bha faan 'ö‑ 'gü bha, ‑ya 'bha ‑da ka 'gü, kö 'wɔn ‑së "pɛpɛ 'ö‑ kë ‑dhɔ 'dhö ka ‑bha kö ka ‑kɔ ‑yö ꞊mɔɔ‑ ꞊gban kë ‑sü ‑bha, kö ka 'dhang bho ‑sü 'ö‑ "dhiʋ̈ bha 'ka‑ 'gü ‑ta 'sü.
2TH 1:12 ꞊Ya kë "dhʋ̈, kwa Dëmɛ Yesu 'tɔ‑ ‑dho bhɔ ka ‑bha, 'yö kaa ‑dɩ 'pö ka 'tɔ 'dhö bhɔ ‑a 'saa‑ 'gü, ‑gasitɛ 'ö waa‑ kwa ‑bha Atanna 'wo‑ ‑kë ka ‑dhɛ bha‑ ‑wɔn 'gü.
2TH 2:1 ꞊Ya 'to‑ 'dhɛ 'kö ‑gban kwa Dëmɛ Yesu Klisi nu ‑sü waa‑ kwa ‑lookota ‑sü 'ö‑ ‑kuu "dhiʋ̈ bha yö ‑zë ‑bha, n dheebhang ‑nu, a ‑bhɛa ka ‑dhɛ kö
2TH 2:2 "suʋ̈ 'ya 'dho ‑da ka 'gü 'ö ka "gblʋ̈ʋ̈dhö ‑yan ꞊gban ‑yö wü "dhʋ̈ ‑bɛang 'ka ꞊dhɛ yi 'kpii‑ bha ꞊ya ꞊loo. ‑A ‑gɛn ‑mü ꞊dhɛ mɛ‑ ‑dho ꞊slɔɔ 'wo nu 'wo ka zuë" ꞊kaan "kwëë wo ‑wʋ 'ka 'wo ꞊suasua ‑nu ‑kë ka ‑dhɛ 'wo‑ pö wo ‑zë Atanna ‑bha 'Nii‑ ꞊ya dhiang zë wo ‑dhɛ, ꞊dhɛ kwa Dëmɛ ‑bha za dɔ ‑yi bha ꞊ya ꞊loo, ‑wo ‑dho ꞊mɔɔ‑ ‑bha 'wo‑ pö ꞊dhɛ mɛ‑ Atanna ‑wʋ "dhiʋ̈ ꞊loo mɛ ‑bha, "ɛɛn ꞊dhɛ mɛ ‑ya ‑wʋ pö mɛ ‑dhɛ, "ɛɛn 'wo‑ pö 'zü ꞊dhɛ yi ꞊në 'yi 'sëëdhɛ bɔ‑ ‑nu ‑dhɛ 'yi‑ pö ꞊dhɛ kwa Dëmɛ nu ‑yi bha ꞊ya ꞊loo. "Kɛɛ ꞊waa‑ pö ka ‑dhɛ "dhʋ̈, 'ka 'dho ka "tʋ 'to‑ ‑bha!
2TH 2:3 Mɛ 'bha 'ya 'dho "kpënng‑ kë ka ‑gɔ ‑kɔ 'bha ‑bha 'bha 'gü 'ö 'ka 'dhang bho‑ "dhiʋ̈. ‑A ‑gɛn ‑mü ꞊dhɛ "sanni yi 'ö "dhʋ̈ bha ‑yö ꞊loo, kö mɛ ꞊gban ꞊wa wo ꞊taa yö Atanna ‑gɔ, kö‑ ‑bha 'tɔng‑ ꞊bhlëësiömɛ 'ö‑ "dhiʋ̈todhɛ dho kë 'güseesü ꞊në‑ 'ka bha ꞊në ꞊ya nu.
2TH 2:4 Mɛ 'ö bha ‑yö ‑dho ö ‑dɩ fië‑ bho pë "pɛpɛ 'kö 'wo‑ ‑dhɛ ‑zlan "kpʋng ya‑ ꞊taa, 'ö 'wo‑ ‑dhɔ ‑zë ‑kë ‑a ꞊gban "pɛpɛ ‑bha. ‑Yö ‑dho 'dho‑ "dhiʋ̈ 'ka "dhʋ̈ 'ö dho 'ö ‑ya Atanna ‑dhɔkëgükɔ ‑nu ꞊gban ‑zian 'gü 'ö‑ pö yö ꞊në 'ö Atanna 'ka.
2TH 2:5 "Ɛɛn 'wɔn ‑nu bha‑ pö 'a gun‑ wo sië ka ‑dhɛ kö a ka "piʋ̈ mü bha ꞊ya 'go ka "yaan ‑ee?
2TH 2:6 'Sa 'pë 'ö‑ ‑wɔn 'gü 'yö 'wɔnmakoomɛ 'kpii‑ bha 'yii nu ꞊kö bha ka‑ ‑dɔ. ‑A ‑wɔn 'gü 'yii kë 'dho ꞊mɔɔ nu ‑sü ‑bha kö ‑a nu "tʋ̈ng 'ö Atanna ‑ya ‑ya 'yii ꞊loo ꞊kö.
2TH 2:7 'Sa ‑a 'wɔn yaa kë ‑faan 'ö ‑bin ‑sü 'ka bha, yö ‑zë ꞊ya ‑da ‑sü zü bho 'nu mɛ "bhɩɩ‑ ‑nu 'gü. 'Wɔn do 'ö ꞊ya 'to yö ‑mü ꞊dhɛ kö 'mɛ 'ö zun ‑sü 'ka‑ ‑gɔ zian‑ bha yö ꞊në ‑yö 'go‑ ‑gɔ zian‑.
2TH 2:8 Yö ‑zë ꞊ya 'go‑ ‑gɔ zian‑ yi 'ö‑ 'ka kö 'wɔn yaa ‑gɔdɔakpluu bha‑ nu "tʋ̈ng ꞊ya ꞊loo. "Kɛɛ ꞊ya kë ꞊dhɛ kwa Dëmɛ Yesu ꞊ya nu, "tɛɛ 'ö go‑ "dhi ‑yö ‑dho mɛ bha‑ zë, 'yö‑ ‑bha mɛdhɛ 'bhü 'ö dho nu‑ 'ka bha‑ ‑kë "gbɩɩ‑ ‑sü bha 'ö ‑kë 'wɔn yaa ‑gɔdɔakpluu bha‑ ‑bha ‑bho "dhiʋ̈ ‑sü 'ka.
2TH 2:9 'Wɔnmakoomɛ bha‑ ‑dho ö zü ‑gban Sɔtraan ꞊në‑ 'gü, 'yö nu 'yö "dhabhliwɔn "gblʋ̈gblʋ̈ ‑nu waa‑ 'wɔn ‑nu 'ö mɛ yaa‑ ‑dhɛ yö 'ö‑ 'wɔn ‑yö mɛ kɔn, 'ö tɛanwɔn ma mɛ "bhɩɩ‑ ‑gɔ 'koo bha‑ ꞊gban "pɛpɛ suu ‑kë, kë "dhʋ̈ kö 'ö‑ ‑nu ‑zian kë‑ ‑bha.
2TH 2:10 ‑Yö ‑dho "slë suu yaya ꞊gban 'do 'do kë mɛ "bhɩɩ‑ ‑nu ‑gɔ kë "dhʋ̈ kö 'ö zian ꞊dhɛng‑ ‑nu ‑gɔ. ‑A ‑kɔ ‑dho ꞊mɔɔ 'mɛ 'wo ꞊dhɛngmɛ ‑nu 'ka ‑a ‑nu ‑bha, tɛanwɔn 'ö dho‑ ‑nu dha 'nu bha‑ ‑dhɔ 'ö 'yii‑ ‑nu kë 'ö 'wii "wɩ‑ ‑wɔn ‑bha bha‑ ‑wɔn 'gü.
2TH 2:11 "Wɩ 'ö 'wii‑ wo tɛanwɔn bha‑ ‑bha "dhʋ̈ bha ꞊në ‑wɔn 'gü, 'yö Atanna dho 'dhang ‑bho ꞊sua ‑wɔn ‑nu "dhiʋ̈ zuëga ‑da ‑nu "gblʋ̈ʋ̈‑, kë "dhʋ̈ kö ꞊wa ꞊sua ‑zian kë‑ ‑nu ‑dhɛ kö ‑yö bhɔ‑ ‑nu 'gü tɛan‑ ‑bha.
2TH 2:12 Kö mɛ "ʋʋ mɛ 'ö 'wii 'dhang bho tɛanwɔn "dhiʋ̈ 'ö 'wɔn yaa kë ‑sü ꞊në‑ "dhia ‑yö gun‑ ‑nu 'gü bha Atanna ‑bha za ‑ya ‑nu zë.
2TH 2:13 N dheebhang ‑nu, ka ‑dhɔ ‑yö kwa Dëmɛ ‑kë ꞊dedewo, ‑a ‑wɔn 'gü ‑a ‑dhɛa ‑bha ꞊dhɛ 'yi Atanna nuɛ" bho yi ꞊gban "pɛpɛ 'ka ka ‑wɔn 'gü. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑yö ka ‑ya ‑dɩ ‑ta 'wɔn ꞊gban zübho "tʋ̈ng 'gü kö‑ ‑bha 'Nii‑ "slʋ̈ʋ̈slʋ̈ ‑yö ka "zu, kö 'ka 'dhang bho tɛanwɔn bha‑ "dhiʋ̈ kö 'ka dha.
2TH 2:14 'Wɔn ‑taɔng ‑së 'ö ‑gban Yesu ‑wɔn ‑bha, 'ö 'yi‑ pö ka ‑dhɛ bha ꞊në Atanna ‑yö bɔ‑ ‑ta, 'yö ka ‑dhɛ kö 'ka kë dha ‑mɛ 'ka, kö 'ka kë ‑tosɛakëmɛ 'ka kwa Dëmɛ Yesu Klisi ‑bha 'tɔbhɔdhe yi 'ka dhia".
2TH 2:15 ꞊Dhɛ 'ö "dhʋ̈, n dheebhang ‑nu, ‑ka dɔ kwa Dëmɛ ‑bha zian bha‑ ‑ta gbɛnngdhö, kö 'wɔn ‑nu 'yi ka ꞊klang ‑kë 'ka yi "dhi oo, ‑a 'dhɛ 'yi‑ ‑ya 'sëëdhɛ 'gü 'yi‑ bɔ ka ‑dhɛ oo, kö 'ka dɔ "gbɩɩ‑ ka ‑zʋ 'ya 'dho bhɔ‑ 'bha 'ka, "kɛɛ kö 'ka‑ ma kö 'ka‑ 'gü ‑wɔn kë.
2TH 2:16 Kwa Dëmɛ Yesu Klisi yöö ꞊dede, waa‑ kwa Dë Atanna, 'ö kwa ‑dhɔ ‑ya ‑kë, 'ö ‑gasitɛ ‑kë kwa ‑dhɛ 'ö kwa gba faan 'ö 'yaa yën ‑a 'ka, 'ö kwa saan ‑së ‑ya ‑sü 'ka ‑dhɛkpaɔ dhia" 'gü bha,
2TH 2:17 ‑wo ka ‑zʋ ‑gban kö ‑wo ka faan dɔ 'wɔn ‑së ‑dɩ ‑slɔɔ ꞊në‑ kë ‑sü ‑bha, kö ‑wo ka ‑ta 'kun kö ‑wʋ "pɛpɛ 'ö dho 'go ka "dhi ‑yö kë ‑wʋ ‑së ꞊në‑ 'ka.
2TH 3:1 'Ö "dhʋ̈ 'pö, n dheebhang ‑nu, ‑ka bhɛa" Atanna ‑dhɛ yii ‑dɩ 'pö yi ‑wɔn 'gü kö kwa Dëmɛ ‑wʋ yi‑ pö sië bha ‑yö sa kö ‑yö 'dho ‑dhɛ ꞊gban "pɛpɛ 'gü, "kɛɛ kö ‑wa ꞊bhlëë ‑ya 'pö ꞊dhɛ ‑kɔ 'ka‑ ꞊bhlëë ‑ya sië 'ka ka kpö 'gü bha‑ 'dhö.
2TH 3:2 ‑Ka bhɛa" 'pö yi ‑wɔn 'gü kö Atanna ‑yö yi dha "gblüyaamɛ ‑nu 'wo 'wɔnmakoomɛ ‑nu 'ka bha‑ ‑nu ‑gɔ. ‑A ‑gɛn ‑mü ꞊dhɛ mɛ ꞊gban "pɛpɛ ‑zë 'wii 'dho kë 'dhang bho kwa Dëmɛ Yesu "dhiʋ̈ ‑mɛ 'ka.
2TH 3:3 "Kɛɛ kwa Dëmɛ bha 'yaa ‑wʋ ꞊plɛ pö, ‑yö ‑dho ka gba faan 'ka 'ö ka dha Sɔtraan ‑gɔ.
2TH 3:4 ‑Yö yi ‑zʋ ‑gban ‑sü 'ka 'kpakpadhö ꞊dhɛ ‑dhio 'yi‑ dɔ ka ‑ta bha ka‑ 'gü ‑ta 'sü sië, ꞊dhɛ ka ‑dho ‑a kë "dhʋ̈ 'ka dho‑ 'ka "dhiʋ̈ ‑kpɛawo.
2TH 3:5 Kwa Dëmɛ bha ‑yö Atanna ‑dhɔ ‑da 'ka ‑zʋ ‑bha, kö zuësɛadhɛ 'ö gun‑ ‑gɔ bha ‑ya nu ka ‑dhɛ.
2TH 3:6 Yi ‑dhio ‑dɔ ka ‑ta, yi dheebhang ‑nu, kö 'ka "ta ‑kɔ ‑së kë, "kɛɛ mɛ 'dhɛ 'kö yö ‑zë 'ö ‑gleng 'yi‑ ‑da ka ‑bha bha‑ ꞊gban to 'ö ‑tosɛa ‑kë "fʋʋfʋʋdhɛ 'gü, yi‑ ‑dhɛ ka ‑gɔ kwa Dëmɛ Yesu Klisi 'tɔ 'gü kö 'ka "kan‑ ‑mɛ ‑bha.
2TH 3:7 ‑Tosɛa kë ‑kɔ 'yi‑ ‑kë 'ka ka kpö 'gü kaa ꞊dede ka‑ ‑dɔ. ‑A ‑wɔn 'gü, ‑a ‑pö ka ‑dhɛ ‑gɛn 'yaa 'dhö ꞊dhɛ ‑ka yi ‑gɛn ‑ga; ‑a ‑gɛn ‑mü ꞊dhɛ ka‑ 'wɔn ‑dɔ ꞊dhɛ 'yii ‑tosɛa kë "fʋʋfʋʋdhɛ 'gü.
2TH 3:8 'Yii ‑da mɛ 'bha 'gü köngga 'ka kö yi‑ ‑bha pë ‑bhö ‑gɔ "wɛɛwɛɛ, sëë ꞊në 'yi‑ bho, yë ꞊në 'yi‑ ‑kë yi ‑kɔ 'ka "binma ‑dhɛkpaɔ, saan" ꞊në 'yi‑ sü 'yö 'yi yi ‑gɔ ‑wɔn ‑nu ‑kë, kë "dhʋ̈ kö yi ‑kwɛɛ 'ya 'dho 'ma mɛ 'bha 'ka.
2TH 3:9 'Yii kë ꞊dhɛ ‑a kë 'yi gun‑ wo sië "dhʋ̈ bha, ꞊ya kë "dhʋ̈ kö 'yaa ꞊mɔɔ ꞊në‑ wo‑ ‑bha 'nu kö 'yi yi ‑kwɛɛ ‑ya ka ꞊gbin‑. Yi‑ ‑kë "dhʋ̈ kö 'ka yi ‑gɛn ꞊në‑ ‑ga kö 'ka ka ‑bha kë ꞊dhɛ yi ‑bha 'dhö.
2TH 3:10 ‑A ‑gɛn ‑mü ꞊dhɛ 'yi gun ka "piʋ̈ mü bha ‑dhio 'yi‑ dɔ ka ‑ta yö ‑mü ꞊dhɛ 'ka yë ꞊në‑ kë. ꞊Dhɛ mɛ "ʋʋ mɛ 'ö 'yaa "wɩ‑ ‑bha kö ‑yö yë kë, ‑a ‑dhɛ 'yaa ‑bha ꞊dhɛ‑ ‑mɛ ‑yö pë ‑bhö 'pö.
2TH 3:11 "Kɛɛ yö ‑zë ꞊gban 'gü, 'ya ‑ya yö, yi‑ ‑ma ‑nu wo ꞊dhɛ mɛ 'bha ‑nu ‑wo ka kpö 'gü 'ö 'waa "wɩ‑ ‑bha kö ‑wo yë ‑zë kë, 'ö 'wo "wlaa‑ ꞊në zë sië "wɛɛwɛɛ 'yö 'wɔn 'yaa‑ ‑nu ‑bha 'wɔn 'ka 'wo‑ ‑kë woo‑ 'wɔn 'ka.
2TH 3:12 'Mɛ 'wo "dhʋ̈ bha yi‑ ‑dhɛ ‑nu ‑gɔ 'ö 'yi‑ ‑dhio dɔ‑ ‑nu ‑ta glɔglɔdhö kö ‑wa zë wo ‑bha ‑kë kwa Dëmɛ Yesu Klisi ‑bha mɛ 'ka ‑sü ‑wɔn ‑dhɛ kö ‑wo dɔ "gbɩɩ‑ ‑wo wo ‑dɩa yë kë kö ‑wo wo ‑bhöpë ꞊slɔɔ ‑wa ‑bhö.
2TH 3:13 "Kɛɛ ka ‑zë ka 'gü 'ya 'dho ga 'wɔn ‑së kë ‑sü 'ka, n dheebhang ‑nu.
2TH 3:14 'Mɛ 'yii ‑dhio 'yi dɔ sië ka ‑ta 'sëëdhɛ ya 'gü ya‑ 'gü ‑ta wo, ‑ka ka "yan 'kpɔ‑ ‑mɛ "piʋ̈ kö 'ka "kan‑ ‑mɛ ‑bha kö 'yiʋ̈‑ ‑yö dɔ‑ ‑bha.
2TH 3:15 "Kɛɛ 'ka 'dho‑ 'sü ‑zë wo ꞊dhɛ ka 'yaɔ‑ 'dhö, ‑kaa 'sü ꞊dhɛ ka dheebhang 'dhö kö 'ka‑ ‑zʋ ‑bö ‑a ‑dɩ ‑wɔn 'ka ꞊siësië.
2TH 3:16 ꞊Ya 'go yö ‑zë 'gü, ('ma mɛ ꞊gban "pɛpɛ ka ꞊tua bho 'gbɛ,) kwa Dëmɛ 'ö zuëyagblʋ̈ʋ̈‑ ‑gɔ 'go ‑dhɛ 'ka bha ‑yö ka zuë" 'waanu "tʋ̈ng ꞊gban ‑tʋ̈ng ꞊gban 'gü, ‑kɔ ꞊gban "pɛpɛ suu 'gü! ‑Yö 'to mɛ ꞊gban "pɛpɛ ka "piʋ̈! 2th3 15
2TH 3:17 ꞊Tuabhonaɔ 'kö ya mang Pɔdhö ‑mɛ mang ꞊dede ꞊në 'a‑ yö ‑zë ‑bɛn zë n ‑dɩ kɔngga 'ka. N ‑kɔ "glʋʋ ‑ya ‑kɔ 'a‑ ‑ya 'ka 'sëëdhɛ "pɛpɛ 'a‑ ‑kë ‑a 'gü 'yö bha.
2TH 3:18 Kwa Dëmɛ Yesu Klisi ‑bha ‑gasitɛ bha ‑yö kë mɛ ꞊gban "pɛpɛ ka ‑dhɛ.
1TI 1:1 Mang Pɔdhö ‑mɛ 'ö Atanna 'ö kwa Dhamɛ 'ka bha 'ö n ‑ya Yesu Klisi 'ö kwa "yan 'dhö‑ ‑gɔ klöklödhö bha‑ ‑bha bɔmɛ 'ka bha ma ꞊në 'a 'sëëdhɛ ya‑ bɔ i ‑dhɛ.
1TI 1:2 A ‑bhɛa Atanna ‑dhɛ kö waa‑ kwa Dëmɛ Yesu Klisi 'ö 'dhö i ‑wëë ‑ya ‑nu kë, kö ‑wo ‑gasitɛ kë bhii Timote ‑mɛ 'i ‑kë n ‑dɩ 'kpɔ ‑në 'ka 'dhang ‑bho Yesu "dhiʋ̈ ‑sü 'gü bha i ‑dhɛ kö ‑wo i ‑gba zuëyagblʋ̈ʋ̈‑ 'ka.
1TI 1:3 'Ö gun kö maa 'dho Maseduanö ‑sɛ 'gü, a kë ‑wʋ ‑kpɔ i ‑bha 'a‑ pö 'i 'to Efɛzö ‑pö 'gü. 'Wɔn 'ö n "piʋ̈ 'a i ‑zʋ ‑bö 'ka ‑deewo 'zü bha 'yö bha. ‑A ‑gɛn ‑mü ꞊dhɛ mɛ ‑bho Atanna ‑bha ziantamɛ ‑nu ‑wo 'pö‑ bha‑ 'gü. A‑ kë "dhʋ̈ kö i ‑dhio dɔ 'mɛ 'wo bha wo ꞊në‑ ‑nu ‑ta kö ‑wo wo bo‑ ‑kë "dhʋ̈ ‑sü 'ka.
1TI 1:4 Kö 'i ‑dhio dɔ‑ ‑nu ‑ta kö 'wɔn 'ö ‑gban ‑kwɛzlan bho ‑sü ‑nu, waa‑ mɛ "bhɛma ‑nu ‑bhiëë dhʋng ‑sü dɔng ꞊gblɛɛn bha‑ ‑bha ‑nu wo bha ‑wo wo kwaa‑ ‑zü. ‑A ‑gɛn ‑mü ꞊dhɛ 'wɔn 'dhɛ ‑nu 'kö 'wo bha ‑wo ‑to zaɔdhe ‑da mɛ ꞊zinng 'gü ‑sü ꞊në‑ ‑bha. 'Waa mɛ ‑bha ‑zʋ ‑yö Atanna ‑dhɛ ‑sü 'dho "dhiʋ̈. 'Sa ꞊ya kë "dhʋ̈ ‑yö Atanna ‑bha yë ‑da ꞊në‑ wo ꞊taama.
1TI 1:5 ‑Dhio 'ö bhii‑ dɔ "dhʋ̈ bha‑ ga ꞊dede 'ö‑ 'gü 'yö ‑mü ꞊dhɛ zuëga 'ö "puu, 'ö 'yaa za dɔ ö ‑dɩ bha, 'ö 'dhang bho Yesu "dhiʋ̈ 'kpakpadhö ꞊në ‑dhɔ ‑yö go‑ 'gü.
1TI 1:6 "Kɛɛ mɛ 'bha ‑nu ‑wo "kan ‑sü 'ka 'wɔn ‑nu 'kö 'wo bha wo ‑zë ‑a ‑nu ‑bha 'ö 'wo wo ‑dɩ ꞊dhɛng ‑sü 'ka dhiang plëë‑, 'ö‑ ‑zun "dhiʋ̈ ‑bhlɔɔ 'bha 'yaa 'dhö bha ꞊në‑ zë ‑sü 'gü.
1TI 1:7 ‑Ya ‑nu "piʋ̈ ꞊dhɛ 'wo kë mɛ ‑nu ‑draan Atanna ‑bha 'tɔng‑ ‑bha ‑mɛ ‑nu 'ka, "kɛɛ 'sa 'pë 'wo‑ ‑dhiang zë 'dhang bho "dhiʋ̈ "sinma 'ka "dhʋ̈ bha 'waa‑ 'gü ‑zian ma wo ‑dɩ ‑gɔ.
1TI 1:8 Atanna ‑bha 'tɔng‑ ‑kë ‑së ‑wɔn ‑zë 'yaa kwa tii' 'ka ‑wɔn 'ka "ni kö ‑wa 'gü "ta ‑zë 'sü sië ‑së 'ka.
1TI 1:9 ‑A ‑gɛn ‑mü ꞊dhɛ Atanna ‑bha 'tɔng‑ bha 'wii‑ dɔ 'mɛ 'kö 'wo‑ dhɔɔbhaawɔn këmɛ 'ka wo ‑zë ‑a ‑nu ‑dhɛ. "Kɛɛ ‑wa ‑dɔ 'mɛ 'wo 'wɔnyaakëmɛ ‑nu 'ka, 'mɛ 'wo "gblang 'ka 'ö Atanna ‑san ‑ya ‑nu ‑kë, 'mɛ 'wo‑ ‑bha fangbho, 'ö 'wo "si bho‑ ‑gɔ, 'ö 'wo wo dhe waa‑ wo dë ‑nu zë, "ɛɛn 'ö 'wo mɛzëmɛ 'ka bha ꞊në‑ ‑nu ‑dhɛ.
1TI 1:10 'Tɔng‑ bha ‑wa ‑dɔ "dhʋ̈ kö 'mɛ 'wo "yënngdɔmɛ ‑nu 'ka, 'ö 'wo‑ ‑kë dhebhɔ 'ka ‑wɔn ꞊në‑ pö, "ɛɛn 'ö 'wo gɔɔn‑ ‑zian ‑kë woo‑ dhebhɔ 'ka, "ɛɛn 'zü gɔɔn‑ ‑nu 'ö 'wo wo ‑dɩ ‑kë dhebhɔ 'ka ‑nu wo bha waa‑ 'mɛ 'wo ꞊dhuëng go, ꞊suakëmɛ ‑nu "ɛɛn ‑sö ‑bhö ꞊flü ‑ta Atanna 'tɔ 'gü ‑mɛ ‑nu bha waa‑ 'mɛ 'wo 'pë 'ö naɔ ‑së 'ö ‑gban Atanna ꞊bhlëësü bha‑ ‑bha 'tɔbhɔdhe, 'a‑ ‑naɔdɔmɛ 'ka bha ‑ya pö 'wa 'dho‑ kë, 'wo‑ ‑kë bha ꞊në ‑wa ‑nu dɔ 'wɔnyaakëmɛ 'ka.
1TI 1:12 A kwa Dëmɛ Yesu Klisi nuɛ" ‑bho ꞊dedewo faan 'ö n gba‑ 'ka kö 'a‑ ‑bha "ta 'sü‑ 'ka bha‑ ‑wɔn 'gü. A‑ nuɛ" bho ‑kɔ ꞊gban ‑kɔ ꞊gban 'gü, ‑a ‑gɛn ‑mü ꞊dhɛ ma 'a ya 'ö gun ‑blɛɛsü, ma ꞊në 'a gun‑ ‑bha fangbho ‑sü ‑gɔ ‑bha, 'ö 'a‑ ‑bha mɛ ‑nu ‑wëë ‑kë wo, gɔɔgbɩɩdhɛ 'ka kö 'maa 'wɔn 'bha 'wɔn dɔ, 'ö 'wɔn 'ö ‑dhi n ‑dhɛ ꞊në 'a‑ ‑wɔ ‑nu ‑ta, "kɛɛ yö ‑zë ꞊gban 'gü 'ö n ‑wëë ‑yö Atanna ‑kë, 'ö yöö ‑dɩ 'pö 'ö n yö 'dhang ‑bho "dhiʋ̈ ‑mɛ 'ka 'ö n ‑ya ö ‑bha yëkëmɛ 'ka bha‑ ‑wɔn 'gü.
1TI 1:14 Kwa Dëmɛ Yesu Klisi bha ꞊në ‑gasitɛ ‑kë n ‑dhɛ ‑kɔ ꞊gban ‑kɔ ꞊gban 'gü, 'yö ‑dhɔ 'ö‑ 'gü waa‑ ‑zʋ ‑yö Atanna ‑dhɛ ‑sü nu n ‑dhɛ.
1TI 1:15 Yö ꞊në‑ ‑wɔn 'gü 'yö 'a‑ pö, ‑a pö 'wo‑ wo ꞊sië ꞊dhɛ Yesu Klisi ‑yö ‑nu "kpʋng ꞊taa kö ‑yö 'wɔnyaakëmɛ ‑nu dha bha 'yaa ꞊sua 'ka. 'Dhang ‑bho "dhiʋ̈ ‑wɔn ꞊dede ‑mü. Mɛ ‑zian 'ö nu‑ ‑nu dha "dhʋ̈ bha ma ꞊në 'a‑ mɛ ‑blɛɛsü 'ka.
1TI 1:16 "Kɛɛ ‑gasitɛ 'ö Yesu Klisi ‑ya ‑kë n ‑dhɛ "dhʋ̈ bha ‑ya ‑kë "dhʋ̈ kö ma ꞊në 'a kë mɛ ‑blɛɛsü 'ö dho bɔ‑ ‑ta kö 'ö‑ ‑zɔn mɛ ꞊gban "pɛpɛ ‑dhɛ ꞊dhɛ ö zuë" ‑yö ‑sɛa, ꞊dhɛ 'kö 'bha 'wɔn yaa suu "ʋʋ suu 'ö‑ kë, "kɛɛ 'bha 'dhang ‑zë bho ö "dhiʋ̈, kö ꞊sii 'ö 'yaa yën 'ö Atanna "piʋ̈ ‑yö i ‑bha 'ka 'pö bha‑ 'ka.
1TI 1:17 A‑ ‑pö yö ꞊në‑ 'gü ꞊dhɛ kö Atanna 'ö "dhʋ̈, 'ö yö ꞊në‑ ‑bha 'yënng‑ 'dhö dhang‑ ‑bha yi ꞊gban ‑yi ꞊gban 'ka, 'ö mɛ 'bhaa‑ yö "kɛɛ 'ö 'yaa ga tongtongdhö, 'ö yöö do ꞊në Atanna 'ka bha yö ꞊në ꞊bhlëë ‑yö ‑ya ‑bha, kö‑ 'tɔ‑ bhɔ ‑kpɛawo kö ‑yö 'to‑ 'ka "dhʋ̈ bha 'aa ‑yö kë.
1TI 1:18 'Wɔn ꞊dede 'ö n "piʋ̈ ꞊tɔn ꞊dhɛ 'a‑ pö i ‑dhɛ ‑a ‑ga 'ö ya, Timote, n gbö. Yö ‑mü ꞊dhɛ kö i ‑zʋ 'ya 'dho bhɔ Atanna "dhi ‑wʋ 'wo‑ pö i ‑bu 'gü (i ‑da ‑a ‑bha yë bha‑ 'gü "tʋ̈ng 'gü) bha ꞊në‑ 'ka. Kö yö ꞊në ‑yö kë i zü ‑gban 'gü 'ka kö 'i kë Atanna ‑bha ‑gblü bha‑ "kplëë 'ka,
1TI 1:19 kö ‑zʋ ‑yö ‑a ‑dhɛ ‑sü ‑yö kë i ‑gɔ ‑kpɛawo, kö 'wɔn 'i‑ dɔ ꞊dhɛ 'bha‑ kë i zuë" 'yii 'dho za dɔ i ‑bha bha 'i kë yö ꞊në‑ këmɛ 'ka. ‑A ‑gɛn ‑mü ꞊dhɛ mɛ 'bha ‑nu ‑wo ‑dhö 'ö‑ ‑nu zuëga 'yaa za ‑zian dɔ‑ ‑nu ‑bha 'zü. ‑A ‑wɔn 'gü, ‑a ‑nu ‑bha ‑zʋ ‑yö Atanna ‑dhɛ ‑sü ꞊ya kë ꞊dhɛ 'pë ꞊ya ga ‑a 'dhö.
1TI 1:20 'Mɛ 'wo "dhʋ̈ bha‑ mɛ 'bha ‑nu ‑mü Imene waa‑ Dhɛzandrö ‑nu 'ka. Yö ꞊në‑ ‑wɔn 'gü 'yö 'a‑ ‑nu "dhiʋ̈ dɔ ‑sü 'ka Sɔtraan ‑dhɛ, kö ‑yö 'wɔn bho‑ ‑nu 'gü, kö woo ꞊dede ‑wo 'yaanu ‑wa 'wɔn dɔ ꞊dhɛ Atanna ‑bhafang bho ‑sü bha 'yaa ‑së.
1TI 2:1 ꞊Ya 'go yö ‑zë 'gü, 'wɔn ‑blɛɛsü 'ö n "piʋ̈ 'a‑ pö i ‑dhɛ 'ö 'wɔn ‑blɛblɛsü 'ka, yö ‑mü ꞊dhɛ kö 'mɛ 'wo 'dhang ‑bho Yesu "dhiʋ̈ ‑mɛ ‑nu 'ka bha ‑wo bhɛa" Atanna ‑dhɛ ‑sɔbhɛɛ 'ka, kö ‑wo wo ‑kɔ "puu 'kpɔ‑ ‑dhɛ mɛ ꞊gban "pɛpɛ ‑wɔn 'gü, kö ꞊ya 'go mü kö ‑wa nuɛ" bho.
1TI 2:2 Kö ‑wo bhɛa" Atanna ‑dhɛ ‑gblüdë ‑nu waa‑ mɛ "pɛpɛ 'wo ‑duɛ "gblʋ̈gblʋ̈ 'gü ‑a ‑nu ‑wɔn 'gü, kë "dhʋ̈ kö 'kwa ‑tosɛa kë zuëyagblʋ̈ʋ̈‑ 'ka kwa ‑dɩ 'flëë‑ 'gü, ‑kplü Atanna ‑bha ‑sü 'ö kwa zuë" ꞊gban 'ka, waa‑ "ta ‑kɔ ‑së 'ö dho kwa ‑bha Atanna 'tɔ bhɔ bha‑ 'ka.
1TI 2:3 'Pë 'ö kwa ‑bha Atanna 'ö kwa dha bha‑ 'gü ‑së, 'ö‑ ‑dhɔ ‑ya ‑kë 'yö bha.
1TI 2:4 ‑A ‑gɛn ‑mü ꞊dhɛ 'yaa‑ "piʋ̈ ꞊dhɛ mɛ 'bha ‑mɛ 'bha 'gü ‑yö see‑, "kɛɛ mɛ "pɛpɛ ꞊gban ‑wo 'dhang ꞊në‑ bho tɛanwɔn "dhiʋ̈ kö ‑wo dha.
1TI 2:5 'Sa ‑a 'klɔɔ‑ 'yaa 'wɔn "wɛɛ 'ka, yö ‑mü ꞊dhɛ Atanna 'yaa ꞊plɛ, ‑yö doseng, 'yö 'mɛ 'ö Atanna waa‑ mɛ "bhɩɩ‑ ‑nu ꞊zinng 'gü 'ö "dhʋ̈ 'pö doseng, 'yö ‑kë Yesu Klisi 'ö ‑gla mɛ 'gü bha‑ 'ka.
1TI 2:6 Yö 'ö bha ꞊në ö ‑dɩ nu kö 'ö kë mɛ ꞊gban "pɛpɛ ‑gɔ ‑ta 'dhɔ ‑pë 'ka. Yö 'ö bha ꞊në, ꞊dhɛ 'ö "tʋ̈ng 'ö Atanna ‑ya ‑ya ꞊ya ꞊loo, 'yö nu ꞊dhɛ ‑kɔ bha‑ 'dhö kö 'ö‑ ‑zɔn ꞊dhɛ 'yaa Atanna "piʋ̈ ꞊dhɛ mɛ 'bha 'gü ‑yö see‑.
1TI 2:7 Atanna ‑yö n ‑ya yö ꞊në‑ ‑naɔdɔmɛ 'ka, kö 'a kë Yesu Klisi ‑bha bɔmɛ 'ka, kö 'a kë 'mɛ 'waa Zuifö 'ka ‑a ‑nu ꞊klang ‑kë 'wɔn 'ö ‑gban ‑zʋ ‑yö Atanna ‑dhɛ ‑sü, waa‑ tɛanwɔn 'ö ‑gban ‑bha ‑a 'ka ‑mɛ 'ka. ‑A pö 'a‑ wo "dhʋ̈ bha 'mii ꞊sua kë, tɛan‑ ꞊dede ꞊në 'a‑ pö.
1TI 2:8 ‑A ‑kë "dhʋ̈ ‑sü ‑wɔn 'gü, ‑yö n "piʋ̈ ꞊dhɛ ‑dhɛ "ʋʋ ‑dhɛ 'wo dho bhɛa"‑ ‑dhɛ ‑a 'gü. Gɔɔn‑ ‑nu ‑wo wo ‑kɔ "dhiʋ̈ "wlü kö ‑wo bhɛa" Atanna ‑dhɛ "gblʋ̈ʋ̈dhɛ "puu 'ka, kö bhɛa" 'wo dho‑ wo bha 'wa 'dho ‑zoo 'to wo "gblʋ̈ʋ̈‑ 'wo‑ wo, "ɛɛn 'zü kö 'wa 'dho‑ wo zaɔdhe 'ka.
1TI 2:9 Kö dhong ‑nu ‑dɩ 'pö ‑wo sɔ ‑da ‑a ‑da ‑kɔ ‑ta, kö‑ ‑nu sɔ ‑da ‑kɔ ‑yö dhi, kö 'wa 'dho‑ pö 'wo wo dhi ‑zian mɔɔ‑ wo kwi ‑bha ‑dhɛ ‑zë 'gü, ‑gɔ ‑bɔ kö ‑wa ‑sö wɔ wo ꞊taa ‑sü ‑nu, ‑zutakwɛɛ ‑nu 'wo "sënng 'ka "ɛɛn 'wo ‑zlɔɔ 'ka ‑a ‑ya wo ‑bha ‑sü 'ka 'ö 'wo ‑ya sɔ gɔngɔn ‑nu ꞊në‑ ‑nu ‑da ‑sü ‑wɔn zuën ‑ta ('ö 'wo mɛ ‑nu "yan bɔ‑ 'ka wo ‑ta).
1TI 2:10 "Kɛɛ kö‑ ‑nu ‑bha ‑kë 'dhang ‑bho Yesu "dhiʋ̈ ‑mɛ ‑nu 'ka ‑sü ‑wɔn 'gü, ‑wo ‑ya 'wɔn ‑së kë ‑sü ꞊në‑ zuën ‑ta kö ‑yö kë ꞊dhɛ ‑a ‑nu ‑bha ‑zutakwɛɛ 'dhö. ‑A ‑gɛn ‑mü ꞊dhɛ 'wɔn 'ö‑ ‑dɔ ‑yö ‑dhi dhong ‑nu 'wo‑ pö wo "dhi 'ka ꞊dhɛ wo Atanna ‑bha 'ka ‑a ‑nu 'ka 'yö bha.
1TI 2:11 ‑A ‑dhɛa ‑bha ꞊dhɛ 'wo mɛ ‑nu ꞊klang kë sië Atanna ‑wʋ 'ka ‑dhɛ 'ö 'gü bha dhong ‑nu ‑wa ꞊bhlëë ‑ya, kö ‑wo ‑ya "sɛnngdhö kö ‑wo wo "tʋ 'to, kö ‑wo wo ‑gɔ 'dho Atanna ‑dhɛ "sia‑ ‑kɔ ꞊gban ‑kɔ ꞊gban 'gü.
1TI 2:12 'Mii "wɩ‑ ‑bha kö dhebhɔ ‑zë ‑yö gɔɔn‑ ‑nu ꞊klang kë, "ɛɛn 'zü kö ‑yö ‑ya gɔɔn‑ ‑gɔ "dhiʋ̈. ‑A ‑dhɛa ‑bha ꞊dhɛ ‑yö ‑dhɛa ga ö ‑ta.
1TI 2:13 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ ꞊dhɛ 'ö Atanna yöö kwa ‑da, ‑yö kwa "bhɛma Adan ꞊në‑ ‑da ‑blɛɛsü 'yö gun ‑na Ɛvö ‑da.
1TI 2:14 ꞊Ya 'go yö ‑zë 'gü, "kpënng‑ 'ö Sɔtraan ‑ya ‑kë mɛ "bhɩɩ‑ ‑nu ‑gɔ 'yö 'wo ‑da Atanna "dhiʋ̈ bha ‑ya ‑kë dhebhɔ ꞊në‑ ‑gɔ 'yö Atanna ‑wʋ bho ö "tʋʋ, 'yii‑ kë Adan ‑zë ‑gɔ.
1TI 2:15 Yö ꞊në‑ ‑wɔn 'gü 'yö dhebhɔ dho dha ‑zë wo, "kɛɛ 'yö dho dha 'në ‑kë ‑gɔ ‑wɔn ꞊në‑ 'gü, "kɛɛ kö ꞊ya 'to ‑kplü ‑sü ꞊në‑ 'ka Atanna ‑bha, 'dhang ‑bho Yesu "dhiʋ̈ ‑sü 'gü, ‑dhɔ 'gü, ‑dɩ ‑kun ‑së ‑sü 'ö Atanna ‑bha zian ‑ta bha waa‑ zuësɛadhɛ 'wo ‑tosɛa ‑kë dhɔngdhɔngsü 'ka bha‑ 'gü.
1TI 3:1 Dhiang 'ö maa‑ zë bha 'yaa ꞊sua 'ka, 'dhang ‑bho "dhiʋ̈ ‑wɔn ‑mü ꞊dhɛ: Zuë" ‑bhɔ Atanna ‑bha yë kë ‑sü ‑bha ‑sü, 'wo‑ pö ‑yö n "piʋ̈ ꞊dhɛ 'a "yan 'to Atanna ‑bha 'kɔdhigümɛ ‑nu ‑bha bha 'yaa 'wɔn yaa 'ka.
1TI 3:2 "Kɛɛ ‑a ‑dhɛa ‑bha ꞊dhɛ mɛ suu 'ö "dhʋ̈ bha pö 'ya 'dho kë‑ ‑bha. Kö dhe doseng ꞊në ‑yö kë‑ ‑mɛ ‑gɔ, kö ‑yö kë 'mɛ 'ö ö zuë" kun ö ‑bha ‑a 'ka, kö ‑yö kë "yaakimɛ 'ka, kö‑ "ta ‑kɔ ‑yö kë ‑së, kö ‑yö kë 'mɛ 'ö ‑dhɛng ‑wɔn kun ‑së, 'ö‑ "yaaki 'dhö 'daɔnnu ‑sü 'ka 'ö ꞊mɔɔ‑ ‑bha 'ö mɛ ‑nu ꞊klang ‑kë ꞊në‑ 'ka.
1TI 3:3 Kö‑ ‑mɛ 'ya 'dho kë nëng ‑kë we ‑bha ‑mɛ 'ka, "ɛɛn "dhinaa 'ma ‑mɛ 'ka, "kɛɛ kö ‑yö kë dhɔngdhɔngsü, kö ‑yö kë zuësɛamɛ ꞊në‑ 'ka, kö 'ya 'dho kë mɛ 'ö ꞊naɔ ‑dhɔ ‑ya ‑kë "dhiʋ̈ ziö 'ka ‑a 'ka.
1TI 3:4 ‑A ‑dhɛa ‑bha ꞊dhɛ ‑a ‑mɛ ‑yö kë 'mɛ 'ö‑ ‑kɔ ‑yö ꞊mɔɔ ö ‑gɔ 'kɔɔ ‑wɔn ‑bha, 'ö‑ bhang ‑nu 'wo‑ ꞊bhlëë ‑ya ꞊dedewo ꞊në‑ 'ka.
1TI 3:5 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ 'mɛ 'ö‑ ‑kɔ 'yaa ꞊mɔɔ ö ‑dɩ ‑gɔ 'kɔɔmɛ ‑nu ‑zian ‑bha, ‑yö ‑mɔɔ ‑bha 'ö zian bho Atanna ‑bha 'kɔdhigümɛ ‑nu 'ka ‑kɔ ‑kë ꞊dhɛ?
1TI 3:6 ꞊Ya 'go mü 'zü, ‑a ‑mɛ 'ya 'dho kë 'mɛ 'ö 'dhang bho Atanna "dhiʋ̈ ‑dee 'gü ‑a 'ka, 'yii kë "dhʋ̈ ‑dɩ ‑sü 'kpii‑ ‑dho ‑mɛ pa, 'ö ‑da Atanna "dhiʋ̈ 'ö‑ ‑bha za ‑ya ‑mɛ kun ꞊dhɛ ‑kɔ 'ö Sɔtraan ‑bha 'dhö‑ 'ka ‑a 'dhö.
1TI 3:7 ‑A ‑dhɛa ‑bha 'pö ꞊dhɛ 'mɛ 'ö "dhʋ̈ bha 'mɛ 'waa 'dhang ‑bho Yesu "dhiʋ̈ ‑mɛ ‑nu 'ka ‑wa 'tɔ ‑së pö, kë "dhʋ̈ kö‑ ꞊bhlëë ‑yö kë "kpɛnngmɛ ‑nu ‑gɔ 'pö. Pö 'ya 'dho kë‑ ‑bha 'ö ‑kë ‑a ‑da Sɔtraan ‑gɔ ‑piö "dhiʋ̈ ‑gɛn 'ka.
1TI 3:8 ‑Kɔ do bha‑ 'gü, ‑a ‑dhɛa ‑bha ꞊dhɛ 'mɛ 'wo dho kë 'dhang ‑bho Yesu "dhiʋ̈ ‑mɛ ‑nu "dhiʋ̈ ‑ziö wo ‑mɛ ‑nu 'ka bha, ‑wo kë 'mɛ 'ö ꞊bhlëë 'dhö‑ ‑nu ‑bha, 'ö‑ ‑nu 'nɛɛga 'yaa ꞊plɛ ꞊në‑ 'ka, 'wa 'dho we mü 'ö 'wo wo ‑dɩ mü‑ 'ka, 'wa 'dho ꞊flüpë ‑bhö.
1TI 3:9 Kö ‑wo 'to ‑kplü ‑sü 'ka tɛanwɔn 'ö ‑gban Yesu ‑wɔn bha 'ö‑ ‑nu ‑zʋyödhɛ ‑wɔn 'ka, 'ö Atanna ‑yö "dhɛ bho‑ ‑ta kwa ‑dhɛ bha ꞊në‑ ‑bha kpɛnngkpɛnngdhö kö‑ ‑nu zuë" 'ya 'dho za dɔ‑ ‑nu ‑bha.
1TI 3:10 ꞊Dhɛ 'ö "dhʋ̈, "sanni ‑wa pö ‑wo mɛ ‑ya Atanna ‑bha 'në ‑nu "dhiʋ̈ziöwomɛ 'ka, ‑a ‑dhɛa ‑bha ꞊dhɛ ‑wa ‑mɛ 'gü dan ꞊kö ‑blɛɛsü. ꞊Ya kë ꞊dhɛ 'wii ꞊sɔng 'bha yö‑ ‑mɛ ‑bha kö ‑wo gun ‑na ‑a ‑ya Atanna ‑bha mɛ ‑nu "dhiʋ̈ziöwomɛ 'ka.
1TI 3:11 'Mɛ 'wo "dhʋ̈ bha‑ ‑dhɛa ‑bha ꞊dhɛ ‑a ‑nu ‑bha dhebhɔ ‑nu ‑dɩ 'pö ‑wo kë 'mɛ 'wo wo ‑dɩ ꞊bhlëë ‑ya, 'ö 'waa mɛ ‑nu ‑dhiang yaa zë, 'ö 'wo wo zuë" kun wo ‑bha ꞊në‑ 'ka. ‑Wo kë 'mɛ 'wo ꞊mɔɔ‑ ‑bha 'wo 'dhang bho‑ ‑nu "dhiʋ̈ 'wɔn ꞊gban "pɛpɛ suu 'gü ꞊në‑ 'ka.
1TI 3:12 ‑A ‑dhɛa ‑bha 'zü ꞊dhɛ dhe do ꞊në ‑yö kë‑ ‑nu ‑gɔ, kö ‑wo kë 'mɛ 'ö‑ ‑nu ‑bha 'në ‑nu 'wo‑ ‑nu ‑wʋ ma, 'ö‑ ‑nu ‑kɔ ‑yö ꞊mɔɔ woo 'kɔɔ ‑wɔn ‑bha ꞊në‑ 'ka.
1TI 3:13 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ Atanna ‑bha mɛ ‑nu "dhiʋ̈ziöwomɛ 'ö‑ ‑kë ö kë ‑kɔ ‑ta ꞊dedewo ‑së 'ka, mɛ ꞊gban "pɛpɛ ‑wa ꞊bhlëë ‑ya, 'ö‑ ‑duɛ ‑yö ‑da "dhiʋ̈, 'ö‑ ‑mɛ ‑bha 'dhang ‑bho Yesu Klisi "dhiʋ̈ ‑sü 'bha ꞊në ‑da 'gü ‑kpɛawo 'ö dho‑ 'ka, 'ö "sika 'bha ‑bha 'bha 'yaa kë‑ 'gü.
1TI 3:14 'Sëëdhɛ ya a‑ bɔ ‑zë wo sië i ‑dhɛ, "kɛɛ 'wɔn 'ö n ‑zʋ "piʋ̈ yö ‑mü ꞊dhɛ mang ꞊dede 'a "ta kö 'a nu 'a ‑wo ‑dhɛ 'i‑ ‑bha bha‑ 'gü.
1TI 3:15 "Kɛɛ a‑ ‑bɔ "dhʋ̈ kö ꞊ya kë ꞊dhɛ 'mii ‑nu nu 'piö‑, kö ‑kɔ 'kö 'wo ‑tosɛa ‑kë 'ka Atanna ‑gɔ 'kɔɔdhö yö ‑zë ‑yö kë i "yaan; ‑a ‑gɛn ‑mü ꞊dhɛ ‑a ‑bha 'kɔdhigümɛ ‑nu bha ꞊në 'wo ꞊dhɛ tɛanwɔn 'ö ‑gban Atanna "yaandhe bha‑ ‑wɔn ‑bha bha‑ 'kɔ ‑gɛn 'ö dɔ‑ ‑gɔ ‑a 'dhö.
1TI 3:16 ‑Yö "dhʋ̈ tɛan‑ 'ka ꞊dhɛ kwa ‑bha ‑zʋ ‑yö Atanna ‑dhɛ ‑sü bha‑ 'gü ‑wɔn 'ö gun ‑bin ‑sü 'ka‑ "piʋ̈, ('ö "dhɛ bho‑ ‑ta kwa ‑dhɛ ꞊dɛɛ 'ö ‑kë Yesu Klisi 'ka) bha ‑yö 'kpii‑ ‑ziisü. 'Yaa 'wɔn 'dɛdɛ 'ka, "ɛɛn zaɔpë ‑zian 'yaa ‑mü, ‑a ‑gɛn ‑mü ꞊dhɛ yö 'ö go Atanna "piʋ̈ bha ꞊në 'ö dho 'ö ‑gla mɛ "bhɩɩ‑ 'gü 'ö nu "kpʋng ꞊taa, "kɛɛ 'yö Atanna ‑bha 'Nii‑ ‑ya ‑zɔn kwa ‑dhɛ ‑a ‑bu 'gü ꞊dhɛ pö 'aa‑ ‑bha. 'Yö Atanna ‑bha "kië ‑nu ‑wa "dhiʋ̈ ‑ziö wo kö ‑yö "kpʋng ꞊taa, 'yö‑ ‑bha ꞊klang ‑nu 'wo dho 'wo‑ ‑wɔn ‑naɔ dɔ "sɛ ꞊gban "pɛpɛ 'gü, 'yö 'wo 'dhang bho‑ "dhiʋ̈ "kpʋng ꞊taa, 'yö Atanna ‑yö ö ‑kɔ ‑da 'gü 'yö ꞊wlü 'ö dho dhang‑ 'gü.
1TI 4:1 "Kɛɛ Atanna ‑bha 'Nii‑ "slʋ̈ʋ̈slʋ̈ ‑ya ‑pö ‑ta "puu 'ka 'ö‑ pö: «"Tʋ̈ng ‑totaamasü 'gü, mɛ 'bha ‑nu ‑dho wo ꞊taa zun Atanna ‑gɔ 'wo wo bo ‑zʋ ‑yö ‑a ‑dhɛ ‑sü 'ka, 'wo dho "yina yaa ‑nu 'wo "kpënng‑ ꞊në‑ ‑kë mɛ ‑nu ‑gɔ, 'wo‑ ‑nu wë bho Atanna ‑ta bha‑ ‑nu ꞊keng‑, 'yö 'wo 'dhang bho‑ ‑nu ‑wʋ "dhiʋ̈.
1TI 4:2 ‑A ‑gɛn ‑mü ꞊dhɛ 'mɛ 'wo dho‑ ‑nu ꞊klang kë 'wɔn ‑nu bha‑ 'ka bha ‑wo ‑dho kë 'mɛ 'ö "yina yaa ꞊në ‑wʋ kpɔ‑ ‑nu ‑bha, ‑kpa mɛ ‑dhɛ 'gu ‑ta ‑mɛ 'ö 'wo ꞊sua ꞊në‑ ‑kë ꞊në‑ 'ka, kö‑ ‑nu zuëga 'yaa za dɔ‑ ‑nu ‑bha 'zü.
1TI 4:3 'Mɛ 'wo bha ꞊në 'wo dho nu 'wo‑ pö ‑bɔ Atanna 'ka ‑mɛ ‑nu ‑dhɛ ꞊dhɛ dhe 'sü ‑sü 'yaa ‑së, (꞊dhɛ ‑yö mɛ ‑dhii ꞊në‑ kun Atanna wëëdhö). "Ɛɛn 'zü ꞊dhɛ ‑bhöpë suu 'bha ‑nu ‑wo mü 'wa 'dho‑ ‑bhö, "kɛɛ kö ‑yö ‑bhöpë ‑nu bha‑ ‑nu ‑da "dhʋ̈ kö 'mɛ ꞊wa 'dhang bho ö "dhiʋ̈, 'ö ꞊wa tɛanwɔn dɔ kö ‑wo ö nuɛ" ꞊në‑ bho‑ ‑wɔn 'gü kö ‑wa ‑bhö.
1TI 4:4 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ pë "pɛpɛ 'ö Atanna ‑ya ‑da ‑bhöpë 'ka ‑a 'bha 'yaa 'ya‑. 'Kwa bo‑ nuɛ" ‑zë bho ‑sü 'ka ‑a ‑wɔn 'gü, kwa ‑mɔɔ ‑bha 'kwa kwaa pë ‑bhö "yɩɩ 'ka.
1TI 4:5 ‑A 'klɔɔ‑ ‑mü ꞊dhɛ Atanna ‑wʋ 'kwa‑ ma bha waa‑ bhɛa" 'kwa‑ wo‑ ‑dhɛ pë ‑nu bha‑ ‑nu ‑wɔn 'gü bha ꞊në bian bho pë "pɛpɛ ꞊gban ‑bha ‑a wëëdhö.
1TI 4:6 ꞊Ya kë ꞊dhɛ 'wɔn ‑nu bha 'i‑ ‑nu ‑bho 'koo kë sië kwa dheebhang ‑nu ‑dhɛ ꞊dhɛ ‑kɔ 'a‑ pö‑ 'ka bha‑ 'dhö, kö 'bha kë Yesu Klisi ‑kɔdhiʋ̈dɔmɛ ‑së ꞊dede, 'ö‑ ‑zɔn ꞊dhɛ ‑wʋ 'ö mɛ faan dɔ ‑zʋ ‑yö Atanna ‑dhɛ ‑sü ‑bha ꞊në ꞊dhɛ ‑a ‑bhöpë 'dhö ‑a 'ka ꞊naa bha. 'Sa kö 'bha‑ ‑zɔn 'pö ꞊dhɛ tɛan‑ ‑zian ꞊dede 'yi‑ ‑zɔn i ‑dhɛ bha i‑ ‑ta 'kpakpadhö ꞊naa bha. Kö 'bhii‑ 'bha 'to.
1TI 4:7 ꞊Dhɛ 'ö "dhʋ̈, ‑kwɛzlan ‑nu 'ö‑ ‑zun "dhiʋ̈ ‑bhlɔɔ 'bha 'yaa 'dhö, "kɛɛ 'ö ꞊bhlëë ꞊në‑ bho Atanna ‑wʋ ‑bha bha 'bha 'dho i "tʋ 'to‑ ‑bha. ‑Kɔ 'i dho‑ kë‑ 'ka kö i 'gü 'ya 'dho ga Atanna ‑dhɔkë ‑sü 'ka ꞊në ‑bhö ‑a ‑zian mɔɔ‑ ‑kpɛawo.
1TI 4:8 ꞊Ya 'go yö ‑zë 'gü, troo ‑nu 'ö mɛ ‑ya ‑kë kö mɛ 'gü ‑yö "pʋ, "ɛɛn 'zü kö mɛ ‑yö "gla bha 'mii‑ pö 'yaa ‑së ‑zë wo "kɛɛ ‑a ꞊trɔɔn ꞊në 'yaa 'gbɛ. ‑Nëng Atanna ‑bha ‑sü bha ꞊në‑ ‑bha ‑kë ‑së ‑sü ‑mɔɔ 'ka 'yaa 'dhö. ‑A ‑gɛn ‑mü ꞊dhɛ yö ‑zë ‑yö ‑tosɛa ‑së 'ö "kpʋng ꞊taa yö ‑a "plüün bho kwa ‑dhɛ, 'ö dho 'ö‑ 'dhɛ 'ö Atanna ꞊plöö ‑dhɛkpaɔ dhia" 'gü bha‑ ‑wɔ ‑ta.
1TI 4:9 'Sa 'wɔn bha ‑yö tɛanwɔn ꞊dede ꞊në‑ 'ka, 'ö‑ ‑dhɛ 'dhö‑ ‑bha ꞊dhɛ mɛ ꞊gban ‑wa dɔ kö ‑wo 'dhang bho‑ "dhiʋ̈.
1TI 4:10 'Wɔn 'ö‑ ‑wɔn 'gü 'yi sëë bho sië, 'wɔn 'yi‑ ‑ta ‑ko zë sië ‑kpɛakpɛawo bha 'yö bha. ‑A ‑gɛn ‑mü ꞊dhɛ Atanna 'yi 'dhang bho‑ "dhiʋ̈, 'ö 'yi yi ‑zʋ yö‑ ‑dhɛ bha ꞊në "bhɩɩdhe 'ka, yö ꞊në mɛ ꞊gban "pɛpɛ Dhamɛ 'ka, "kɛɛ mɛ "pɛpɛ 'wo 'dhang bho Yesu "dhiʋ̈, yö ꞊në‑ ‑nu Dhamɛ 'ka.
1TI 4:11 ‑Wʋ 'i dho‑ pö Atanna ‑bha mɛ ‑nu 'wo mü bha‑ ‑nu ‑dhɛ 'i dho‑ ‑nu ꞊klang kë‑ 'ka 'yö bha.
1TI 4:12 ꞊Ya 'go yö ‑zë 'gü, mɛ 'bha 'ya 'dho‑ pö 'ö "yan ‑ziö 'gü dɔ i ‑bha i ‑bha ‑kë 'në "wlü ‑sü 'ka ‑sü ‑wɔn 'gü. "Kɛɛ ‑bhö i ‑dɩ 'kun ꞊në‑ wo ‑së i "wɩ ‑kɔ ‑nu oo, i "ta ‑kɔ ‑nu oo, Atanna ‑dhɔ ‑bha i kë ‑sü 'ö dho 'ö ‑wɔ 'ka mɛ "bhɩɩ‑ ‑nu ‑bha ‑ta bha waa‑ ‑zʋ ‑yö ‑a ‑dhɛ ‑sü ‑nu, "ɛɛn ‑dɩ ‑kun ‑së ‑sü 'ö 'wɔn yaa kë ‑sü ‑gɔ ‑a ‑nu 'gü kö 'i kë 'wɔn zɔɔn 'ka, kö Atanna ‑bha mɛ ‑nu ‑wa ‑dhɛ yö i ‑gɔ.
1TI 4:13 ꞊Ya kë ꞊dhɛ 'mii nu ꞊kö kö 'a ꞊loo mü, i 'gü 'ya 'dho ga Atanna ‑wʋ 'sëëdhɛ ‑wʋ ‑pö ‑a ‑bha mɛ ‑nu ‑dhɛ ‑sü 'ka. ‑Bhö ‑a ‑nu ‑zʋ ‑gban ‑a 'ka, kö 'i‑ ‑nu ꞊klang kë‑ 'ka.
1TI 4:14 ꞊Ya 'go yö ‑zë 'gü, gbaɔdhe 'ö Atanna ‑ya ‑kë i ‑gɔ 'ö‑ ‑wʋdhiʋ̈loomɛ ‑nu ‑wa pö, 'ö bɔ‑ 'ka‑ ‑wʋ ‑gɔmɛ ‑nu ‑ta 'ö 'wo wo ‑kɔ ‑ya i ‑ta 'wo ꞊bhɛa‑ ‑dhɛ 'i‑ ꞊slɔɔ 'ö i 'gü bha, 'bha 'dho‑ ‑wɔn ‑ga ‑bhaa 'gü 'i‑ ‑da i ‑gɛn ꞊wlöö.
1TI 4:15 'Wɔn ‑nu 'a ‑ziö 'gü 'dɔɔndhö bha ‑bhö wo ꞊në‑ ‑nu 'kun i faan 'ka, kö 'i i ‑dɩ nu‑ kë ‑sü ꞊dhɛ ‑kɔ ꞊gban ‑kɔ ꞊gban 'gü, kë "dhʋ̈ kö mɛ ꞊gban ‑wa 'wɔn dɔ ꞊dhɛ i ‑gɛn ‑yö "dhiʋ̈ ꞊gblɛɛn Atanna ‑wɔn bha‑ 'gü.
1TI 4:16 ‑Bhö ‑zʋ kë i ‑dɩ 'gü ‑kɔ ꞊gban 'gü, kö 'i i ‑zʋ 'kpɔ 'wɔn ‑nu 'i mɛ ‑nu ꞊klang kë sië‑ 'ka bha‑ 'gü ‑së 'ka. i 'gü 'ya 'dho ga‑ ‑bha. ‑A ‑gɛn ‑mü ꞊dhɛ 'bha‑ kë "dhʋ̈, i ‑dho i ‑dɩ dha, 'i dho 'i 'mɛ 'wo "tʋ 'to sië i ‑wʋ ‑bha bha‑ ‑nu dha 'pö.
1TI 5:1 'Bha‑ pö 'i ‑dhio dɔ ‑kwɛanë ‑nu ‑ta, 'bha 'dho "yangbha bho‑ ‑nu ‑bha, "kɛɛ ‑bhö ‑a zë‑ ‑nu ‑dhɛ "nɛɛnɛɛ 'ka ꞊dhɛ mɛ‑ pë zë mɛ dë ‑dhɛ. ꞊Ya kë 'zü 'nëglɔɔn ‑nu 'ka, ‑bhö ‑a zë‑ ‑nu ‑dhɛ ꞊dhɛ mɛ‑ pë zë mɛ dheebhang ‑nu ‑dhɛ.
1TI 5:2 Kö 'i‑ zë dhebhɔ zizi ‑nu ‑dhɛ ꞊dhɛ mɛ‑ pë zë mɛ dhe ‑nu ‑dhɛ, kö 'i‑ zë dhebhɔ "gbɔnggbɔng ‑nu ‑dhɛ ꞊dhɛ mɛ‑ pë zë mɛ dheebhang ‑nu ‑dhɛ kö i 'dhang bho ‑sü ‑yö i ‑dɩ "dhiʋ̈ 'kpakpadhö.
1TI 5:3 ꞊Gɛandhe ‑nu 'wo ꞊gɛan ꞊dede bho ‑sü 'ka tɛan‑ 'ka, ('ö mɛ 'bha 'yaa‑ ‑nu ‑gɔ kö ‑ya ‑nu ‑ta 'kun bha) ‑a ‑nu ꞊bhlëë ‑yö kë i ‑gɔ.
1TI 5:4 "Kɛɛ ꞊ya kë ꞊dhɛ 'në ꞊ya kë ꞊gɛandhe ‑gɔ, "ɛɛn kö‑ bhaanë ‑nu ‑wo ‑dhö, ‑a ‑dhɛa ‑bha ꞊dhɛ 'në ‑nu bha wo ꞊në ‑wo wo draan‑ ꞊kö ‑blɛɛsü Atanna dhɔɔbhaawɔn kë ‑sü ‑bha ꞊trɔɔn ‑kë ‑a ‑nu 'kpɔmɛ ‑nu ‑dhɛ ‑sü 'ka, ‑a ‑gɛn ‑mü ꞊dhɛ ‑a ‑kë "dhʋ̈ ‑sü ‑yö ‑dhi Atanna ‑dhɛ.
1TI 5:5 ‑A pö‑ ‑nu ‑dhɛ ꞊dhɛ dhebhɔ 'ö ꞊gɛandhe ꞊dede 'ka, 'ö mɛ 'bha ‑mɛ 'bha 'yaa‑ ‑gɔ kö ‑ya ‑ta 'kun ‑yö ö ‑zʋ ‑yö Atanna ꞊në‑ ‑dhɛ, 'yö ꞊bhɛa‑ ‑dhɛ "tʋ̈ng ꞊gban "pɛpɛ 'gü, 'yö ö ‑kɔ "puu kpɔ‑ ‑dhɛ, 'yö‑ 'gü 'yaa ga.
1TI 5:6 "Kɛɛ ꞊gɛandhe 'dhɛ 'kö yö ‑zë 'ö ‑ya ‑tosɛa ‑së 'ö mɛ dɔ yɛnngdhö "kpʋng ꞊taa yö ꞊në‑ kë ‑yan ‑ta bha, kö‑ 'tɔ ꞊në‑ ‑bha ꞊dhɛ ‑yö "yaan "kɛɛ kö mɛ ꞊gee ‑mü Atanna ‑zë "yan 'gü.
1TI 5:7 'Wɔn ‑nu bha ꞊në ‑bhö ‑a ‑nu ꞊klang kë‑ 'ka "pɛɛpɛdhö kö pö 'ya 'dho ‑ya ‑a ‑nu ‑bha.
1TI 5:8 Mɛ "ʋʋ mɛ 'ö 'yaa ö "tʋ̈ng kë ö ‑bha mɛ ‑nu ‑wɔn 'gü, "kɛɛ 'ö‑ "tʋ 'yaa ö ‑gɔ 'kɔɔmɛ ‑nu ‑wɔn ‑bha, kö‑ ‑mɛ ꞊ya ö bo 'dhang ‑bho Yesu "dhiʋ̈ ‑sü 'ka ꞊naa bha, kö mɛ ‑zian 'ö 'yaa Atanna dɔ ‑a fië‑ ‑dhö ‑a ‑mɛ 'ka.
1TI 5:9 ꞊Ya 'go yö ‑zë 'gü, 'bha‑ pö 'i ꞊gɛandhe ‑nu 'tɔ ‑bɛn zë ‑a ‑nu ‑bha 'sëëdhɛ bha‑ 'gü, (kö ‑wo ‑ya Atanna ‑bha 'kɔdhigümɛ ‑nu ‑bha ‑ya 'gü kö ‑wa ‑nu ‑kwɛɛ bun), ‑a ‑mɛ ‑kwɛ ‑yö ꞊mɔɔ ‑kaɔng "saɔdo ‑bha kö 'i gun ‑na ‑a 'tɔ ‑ya. ꞊Ya 'go mü 'zü ‑a ‑dhɛa ‑bha ꞊dhɛ ‑a ‑mɛ ‑yö kë 'mɛ 'ö ꞊ya gwaan‑ doseng ꞊në‑ 'kpɔ ö ‑bha ‑tosɛa 'gü,
1TI 5:10 "kɛɛ 'ö mɛ ꞊gban 'wo 'dhang bho‑ "dhiʋ̈ ꞊dhɛ ‑a këwɔn ‑yö ‑së, 'ö ꞊ya "klʋ bho ö ‑bha 'në ‑nu ‑bha ‑së 'ka, 'ö ‑dhɛng ‑wɔn kun, "ɛɛn 'ö Atanna ‑bha mɛ ‑nu ꞊bhlëë ‑ya, 'ö‑ ‑nu ‑wɔn kun, 'ö ꞊ya ‑wëëmɛ ‑nu ‑ta 'kun, 'ö ꞊ya 'wɔn ‑së suu ꞊gban "pɛpɛ 'do 'do kë ꞊në‑ 'ka.
1TI 5:11 "Kɛɛ 'bha 'dho‑ pö 'i ꞊gɛandhe ‑nu 'ö pɛng 'dhö ‑tun ‑a ‑nu kwi 'gü bha‑ ‑nu 'tɔ ‑ya. ‑A ‑gɛn ‑mü ꞊dhɛ 'mɛ 'wo "dhʋ̈ bha gwaan‑ ‑dee 'bha 'kpɔ ‑wɔn ꞊ya ‑da ‑nu ‑gɔ 'gü, 'yö‑ ‑nu ‑gɔ ‑yö dɔ ‑gɛan Klisi ‑gɔ.
1TI 5:12 'Yö "plüün ‑së 'wo‑ bho‑ ‑dhɛ (꞊dhɛ wo ‑dho wo ‑dɩ nu‑ ‑dhɛ 'ö 'waa gwaan‑ "wɛɛ 'bha 'kpɔ kö ꞊wa ꞊gɛan bho) bha 'wo ꞊fië‑ 'gü ‑wɔn kë ‑sü ‑bha 'yö 'wo "dhang sü‑ ‑bha.
1TI 5:13 "Kɛɛ 'yö 'yaa 'to ‑zianwo ‑a do 'dhɛ bha‑ ‑bha, 'yö 'wo ‑ya mü 'zü 'wo ‑kë "tʋʋ‑ 'kpɔ ‑mɛ ‑ziisü 'ka 'yö 'waa pë 'bha kë, ‑a yaadhɛ ꞊dede 'ö‑ 'gü, yö ‑mü ꞊dhɛ ꞊wa ‑da "tʋʋ‑ bha‑ ‑bhiëë ‑ta "dhʋ̈, 'yö 'waa ‑ya "sɛnngdhö, "ɛɛn 'yö 'waa ‑ya wo "dhi "tʋng, 'yö dhiang ‑yö pa‑ ‑nu ‑ta, 'yö dhiang 'ö 'yaa‑ ‑nu zë ‑dhiang 'ka 'wo‑ ꞊gban zë, 'yö 'wo wo ‑dɩ dɔ‑ 'ka mɛ ‑nu ‑bha 'wɔn 'gü.
1TI 5:14 ꞊Dhɛ 'ö "dhʋ̈, ‑yö n "piʋ̈ ꞊dhɛ 'mɛ 'wo to "wlü ‑mɛ ‑nu 'ka 'ö 'wɔn ‑yö ‑ya ‑nu "dhiʋ̈ bha ‑wo gwaan‑ ‑dee 'kpɔ kö ‑wo woo 'në ‑nu 'kpɔ, kö ‑wo woo gwaan‑ 'gü ‑wɔn ‑nu kë, kë "dhʋ̈ kö kwa 'yaɔ‑ ‑nu 'wa 'dho "dhi kë kwa 'gü.
1TI 5:15 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ ‑a ꞊gɛandhe ‑nu bha‑ mɛ 'bha ‑nu ‑wo mü 'ö wo ‑zë ꞊wa 'go Atanna ‑bha zian ‑ta "pɛɛpɛdhö 'ö ꞊wa ‑da Sɔtraan ꞊keng‑.
1TI 5:16 ꞊Ya 'go yö ‑zë 'gü, dhebhɔ 'ö ꞊gɛan 'dhö‑ "piʋ̈ Atanna ‑bha mɛ ‑nu kpö 'gü, ‑yö ö "tʋ̈ng kë ö ‑bha ꞊gɛandhe ‑nu bha ꞊në‑ ‑nu 'gü kö 'ya 'dho kë Atanna ‑bha mɛ ‑nu ꞊kwɛɛ 'ka, kë "dhʋ̈ kö ‑wo wo "tʋ̈ng kë mɛ 'dhɛ 'ö mɛ 'bha 'yaa‑ ‑nu ‑gɔ ‑bha ꞊në‑ ‑nu ‑wɔn 'gü.
1TI 5:17 ‑A ‑dhɛa ‑bha kö 'mɛ 'wo "dhiʋ̈ 'sü sië Atanna ‑bha mɛ ‑nu 'ka ‑së 'ka bha ‑wa ‑nu ꞊saa bho, "kɛɛ kö 'mɛ 'wo ‑kë Atanna ‑wʋ pö ‑mɛ ‑nu 'ka waa‑ 'mɛ 'wo mɛ ‑nu ꞊klang ‑nu ‑kë bha‑ ‑nu ‑bha "dhiʋ̈ ‑yö ziö.
1TI 5:18 ‑A ‑gɛn ‑mü ꞊dhɛ Atanna ‑wʋ ‑ya ‑pö 'ö‑ pö ꞊dhɛ: «'Bha 'dho ‑du "dhi ‑lö kö ‑yö i ‑bha ‑mlü slëë‑ sië» "ɛɛn: «‑A ‑dhɛa ‑bha ꞊dhɛ yëkëmɛ ‑yö ö ꞊saa 'sü.»
1TI 5:19 ꞊Ya 'go yö ‑zë 'gü, ꞊ya kë ꞊dhɛ mɛ 'bha ꞊ya 'wɔn 'bha ‑gɛn dɔ i ‑dhɛ 'mɛ 'wo "dhiʋ̈ 'sü sië Atanna ‑bha mɛ ‑nu 'ka bha‑ mɛ 'bha ‑bu 'gü, ꞊ya kë ꞊dhɛ "sɛɛ‑ ꞊plɛ "ɛɛn ‑yaaga 'yii kë‑ ‑ta, 'bha 'dho "wɩ‑ ‑bha.
1TI 5:20 ꞊Ya kë ꞊dhɛ mɛ ꞊ya ‑da Atanna "dhiʋ̈, 'bha 'dho‑ pö bhii ‑ya ‑a ‑mɛ "yan 'gü ꞊plɛ 'gü, ‑bhö ‑a kë "dhʋ̈ mɛ ꞊gban "yaan kö "suʋ̈‑ ‑nu ‑da mɛ ‑kpɛa 'wo to ‑a ‑nu 'gü.
1TI 5:21 'Wɔn ‑nu 'a‑ pö i ‑dhɛ 'dɔɔndhö bha Timote, 'a‑ zë i ‑dhɛ ꞊sii ꞊dede ‑ta, Atanna 'dhö, ‑a Gbö Yesu Klisi 'dhö, ‑a ‑bha "kië "slʋ̈ʋ̈slʋ̈ ‑nu 'wo‑ "piʋ̈ dhang‑ 'gü bha‑ ‑nu 'dhö, wo ꞊në 'wo n "sɛɛ‑ 'ka ꞊dhɛ n ‑sɔbhɛɛ ꞊dede ‑mü, ‑a ‑wɔn 'gü ‑bhö ‑a ꞊gban "pɛpɛ kë ꞊dhɛ ‑kɔ 'a‑ pö‑ 'ka bha ꞊në‑ 'dhö "kpʋ̈üdhö. 'Bha 'dho mɛ 'bha ‑ga ‑a ‑wëë ‑bha "ɛɛn 'bha 'dho‑ pö 'i bɔ mɛ 'ka.
1TI 5:22 ꞊Ya 'go yö ‑zë 'gü, i ‑zʋ 'ya 'dho dun ‑kɔ ‑kpa mɛ ‑ta ‑sü 'ö 'wo‑ ‑mɛ "dhiʋ̈ bhɛa" wo Atanna ‑dhɛ bha‑ ‑bha, kö 'bha 'dho i ‑kɔ ‑da mɛ ‑nu ‑bha 'wɔn yaa 'gü. ‑Bhö i ‑dɩ 'kun ‑së kö pö 'a 'dho ‑ya i ‑bha.
1TI 5:23 ꞊Dhɛ 'ö ‑kë ꞊dhɛ i 'gü ‑yö ‑siö ‑nu wo ꞊siësië ‑kpɛawo bha, ‑bhö we 'në 'dɛdɛ mü kö i "gblʋ̈ʋ̈dhɛ ‑yö ꞊zɔɔ, 'bha 'dho 'to "yi doseng mü ‑sü ‑bha.
1TI 5:24 Mɛ 'bha ‑nu 'wo mü ‑a ‑nu ‑bha 'wɔn yaa ‑nu 'wo‑ ‑kë bha 'yaa ‑bin. ‑Wa ‑dɔ kö 'wii za ‑zian dɔ‑ ‑nu ‑bha ꞊kö. 'Yö mɛ 'bha ‑nu ‑dɩ 'pö 'wo wo ‑zë ‑a ‑nu ‑bha ‑dhɛ yö kö‑ yi ꞊në ꞊ya ꞊gwëë.
1TI 5:25 'Wɔn ‑së kë ‑sü ‑yö ‑kɔ do bha ꞊në‑ 'gü 'pö. ꞊Waa‑ kë, ‑a ‑dhɛ 'yaa ꞊dhɛng. 'Kö 'zü 'wii‑ ‑dhɛ yö 'piö‑, "kɛɛ 'yaa 'to ‑bin 'gü tongtongdhö.
1TI 6:1 ‑Bhö ‑a "dhiʋ̈ ꞊loo mɛ "pɛpɛ 'wo ꞊dhuëng 'ka ‑a ‑nu ‑bha. ‑A pö‑ ‑nu ‑dhɛ ‑a ‑nu "yan 'ya 'dho ziö‑ ‑nu ‑gɔmɛ ‑nu 'gü tongtongdhö, ‑wa ‑nu ꞊bhlëë ‑ya ‑kɔ ꞊gban ‑kɔ ꞊gban 'gü, kë "dhʋ̈ kö mɛ 'bha 'ya 'dho Atanna 'tɔ ‑bhafang bho, "ɛɛn 'zü kö mɛ 'bha 'ya 'dho kwa ‑bha Atanna ‑bha mɛ ‑nu ꞊klang kë ‑kɔ bha‑ ‑dhiang yaa zë.
1TI 6:2 ꞊Ya kë 'zü ꞊dhɛ mɛ 'dhɛ ‑nu 'ö‑ ‑nu ‑gɔmɛ ꞊ya kë ‑bhɛa Atanna ‑dhɛ ‑mɛ 'ka, 'wa 'dho‑ pö 'wo zë yö ‑zë ‑wɔn ‑dhɛ kö ‑a ‑nu "yan‑ ziö wo Dëmɛ 'gü. "Kɛɛ woo ‑zian ‑zë ‑a ‑dhɛa ‑bha ꞊dhɛ ‑wa ‑nu ꞊bhlëë ꞊në‑ ‑ya kö ‑yö ziö 'mü, ‑a ‑gɛn ‑mü ꞊dhɛ 'mɛ 'wo yë kë sië‑ ‑nu ‑dhɛ bha wɛng‑ ‑nu ꞊wa kë dheebhang do 'ka Yesu ‑bha zian ‑ta, kö ‑wa kë‑ ‑nu ‑dhɔ ‑bha 'ko kë ‑sü ‑wɔn 'gü. ‑A ‑nu ꞊klang kë 'wɔn bha‑ 'ka kö 'i i kɔngga ziö‑ 'ka‑ ‑nu ‑dhɛ "sɛɛ glɔglɔdhö.
1TI 6:3 ‑A pö‑ ‑nu ‑dhɛ ꞊dhɛ mɛ "ʋʋ mɛ 'ö 'yii 'to ‑kplü ‑sü 'ka tɛanwɔn 'ö kwa Dëmɛ Yesu ‑ya pö kwa ‑dhɛ bha, waa ‑to Atanna "piʋ̈ ‑kɔ ‑së 'yi mɛ ‑nu ꞊klang ‑kë 'ka bha‑ ‑bha, 'ö ‑kan yö ‑zë ‑bha 'ö‑ pö 'ö mɛ ‑nu ꞊klang kë 'dhang ‑bho Atanna "dhiʋ̈ ‑kɔ "wɛɛ 'bha 'ka,
1TI 6:4 kö‑ ‑mɛ ‑bha ö ‑dɩ ‑sü 'kpii‑ ‑sü ꞊në‑ "yan wü, "kɛɛ kö 'yaa pë "ʋʋ pë 'bha ꞊në‑ dɔ, kö zaɔdhe ‑da ‑sü waa‑ 'ko ‑kun ‑wʋ 'në dengdeng 'në ‑nu ‑ta ‑sü ꞊në‑ ‑yua 'dhö‑ ‑mɛ ‑bha bha, 'sa ‑a kë "dhʋ̈ ‑sü ꞊në ꞊drɔ ‑da mɛ ꞊zinng 'gü 'yö zun "dhinaa ‑bha, 'yö 'wo "si ‑nu bho wo 'ko ‑nu ‑gɔ, 'yö 'wo ‑zʋ yaa gɔn wo "kwëë, 'yö 'wo dhiang 'sü ‑kɔ yaya ‑nu ‑kë wo 'ko "dhi ‑bha. 'Sa ꞊trɔɔn 'ö zaɔdhe ‑da ‑sü 'gü 'yö bha.
1TI 6:5 'Yö 'wo zaɔdhe 'ö‑ "dhiʋ̈todhɛ 'yaa 'dhö bha ꞊në‑ ‑da. "Kɛɛ 'mɛ 'ö 'wɔn yaa ꞊yaa‑ ‑nu ‑gɔ 'gü see‑, 'ö 'waa tɛanwɔn dɔ 'zü bha ꞊në 'wo 'wɔn ‑nu bha‑ ‑kë, 'yö ‑kë ‑a ‑nu 'gü ꞊dhɛ "ta ‑sü Atanna ‑bha zian ‑ta ‑sü bha pë ‑yö 'gü ‑wɔn ‑mü.
1TI 6:6 'Sa ‑yö pë ‑yö 'gü ‑wɔn 'ka "dhʋ̈ tɛan‑ 'ka, "kɛɛ ‑ya 'ka "dhʋ̈ zuë" ‑kun ‑bha ‑mɛ ‑nu ꞊në ‑nu ‑dhɛ.
1TI 6:7 ‑A ‑gɛn ‑mü ꞊dhɛ 'kwii nu pë 'bha 'ka "kpʋng ꞊taa, kwa 'dho ‑sü 'ka 'zü 'kwii 'dho 'dho pë 'bha 'ka.
1TI 6:8 ‑A ‑kë "dhʋ̈ ‑sü bha‑ 'gü, ‑a ‑dhɛa ‑bha ꞊dhɛ 'kwa kwa ‑bhöpë waa‑ kwa ‑dasɔ ‑zë ꞊slɔɔ, ‑yö kwa ‑zʋ 'kun.
1TI 6:9 "Kɛɛ 'mɛ 'ö‑ ‑nu "piʋ̈ ꞊dhɛ 'wo ꞊naɔ ꞊në‑ 'kpii‑ ꞊slɔɔ, 'yö 'wo wo ‑gɛn ‑da wo ‑dɩ bhɔ 'gü, ‑tama ‑dhɛ ‑wɔn ‑nu 'ö‑ ‑nu zuë" ‑yö bhɔ‑ ‑bha 'ö‑ 'bhaa ‑së bha‑ 'ka, 'yö‑ ‑nu ‑gɔ ‑yö to‑ ‑bha, 'yö ‑kë ‑nu 'gü see‑ ‑gɛn 'ka.
1TI 6:10 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ 'wëëga ‑dhɔ bha ꞊në 'wɔn yaa ꞊gban "pɛpɛ suu ‑gɛn 'go ‑dhɛ 'ka. 'Wëëga ‑dhɔ bha ꞊në mɛ 'bha ‑nu 'wo zë‑ ‑dhɛ 'yö 'wo wo ‑dɩ ‑dhɛng, 'yö 'wo bo ‑zʋ ‑yö Atanna ‑dhɛ ‑sü 'ka, 'yö 'wo ‑kan ‑bha, 'yö 'wo wo ‑dɩ ‑da ‑sü 'ka saan" ‑ziisü 'gü.»
1TI 6:11 ꞊Dhɛ 'ö "dhʋ̈, ꞊dhɛ 'ö ‑kë ꞊dhɛ bhi ‑zë i ‑kë Atanna ‑bha mɛ 'ka, ‑bhö ꞊dua 'wɔn ‑nu bha‑ ‑gɔ, kö ‑kɔ 'i dho‑ kë‑ 'ka kö pö 'a 'dho ‑ya i ‑bha, "kɛɛ kö 'i 'to Atanna ‑bha zian ‑ta kpengkpengdhö, kö ‑zʋ ‑yö ‑dhɛ ‑sü ‑yö kë i ‑gɔ, kö ‑dhɔ ‑yö kë i 'gü, kö zuësɛadhɛ ‑yö kë i ‑gɔ, kö 'i kë ꞊dhɛ ‑bhangglö 'dhö kö 'bha 'dho mɛ 'bha ‑bha ‑dhaa "dhiʋ̈ ‑siö bha ꞊në ‑bhö ‑a ‑dhɛ mɔɔ‑.
1TI 6:12 "Ta ‑sü Atanna ‑bha zian ‑ta ‑sü bha ‑yö ‑gblü ꞊në‑ 'ka, ‑bhö i 'gü dɔ "gbɩɩ‑ kö 'i ‑gblü ‑së bha ꞊në‑ gɔn i ‑sɔbhɛɛ 'ka, kö ꞊sii 'ö 'yaa yën 'ö Atanna "piʋ̈ 'ö i ‑dhɛ ‑a kë ‑dhɛ 'gü, 'ö 'i zë 'pö‑ ‑wɔn ‑dhɛ 'ö bhii ꞊dede i "dhi ‑ya pö mɛ 'gbɛ ꞊dede "yaan ꞊dhɛ 'bha 'dhang bho‑ "dhiʋ̈ bha, kö yö ꞊në 'i‑ 'kun "gbɩɩ‑ kö ‑yö 'to i ꞊kwɛɛ.
1TI 6:13 ‑Yö ‑dhio ꞊në‑ 'ka 'yö 'a‑ dɔ sië i ‑ta, Atanna 'ö pë ꞊gban "pɛpɛ ‑da bha waa‑ Gbö Yesu Klisi 'ö "sɛɛdhɛ ‑së ‑kë ö Dë ‑bha Pɔngsö Pidhatö ‑kuu "dhiʋ̈ bha ꞊në 'wo n "sɛɛ‑ 'ka.
1TI 6:14 A‑ ‑pö i ‑dhɛ ꞊dhɛ 'i 'wɔn 'ö ‑gban Atanna ‑wɔn ‑bha ‑a 'gü ‑dhio 'a‑ dɔ i ‑ta bha ꞊në‑ ‑wɔn 'kun ꞊dhɛ i "yanga 'dhö, kö ‑dhii 'ya 'dho ‑ya ‑bha, "ɛɛn kö pö a 'dho ‑ya ‑bha, kö ‑yö 'to‑ 'ka "dhʋ̈ ‑yö zun‑ 'ka kwa Dëmɛ Yesu Klisi nu ‑yi ‑bha.
1TI 6:15 ‑A yi 'ö "dhʋ̈ bha ‑yö Atanna, 'ö "dhʋ̈ ö doseng 'ka, 'ö ꞊niidadhe 'dhö‑ "piʋ̈ "tʋ̈ng ꞊gban 'gü, ‑gblüdë ‑nu ‑bha ‑gblüdë, Atanna ꞊gban ‑gɔ ‑ta Atanna 'ö yöö do ꞊në ga ‑kɔ 'yaa ꞊mɔɔ‑ ‑bha, 'ö ‑ya ‑sü 'ka ‑dhɛpuudhɛ 'ö‑ ‑zɔn 'ka 'yaa 'dhö, 'ö mɛ "bhɩɩ‑ ‑kɔ 'yaa ꞊mɔɔ‑ ‑bha kö ‑yö ‑wo mü bha ꞊në‑ 'gü, yö 'ö "dhʋ̈ 'ö mɛ 'bha 'yii‑ yö do, "ɛɛn 'ö mɛ 'bha ‑kɔ 'yaa ꞊mɔɔ‑ ‑bha kö ‑ya yö bha ꞊në‑ ‑gɔ, kö yö 'ö "dhʋ̈ bha ꞊bhlëë ‑yö 'to yö ꞊në‑ ‑bha, kö 'gügbɩɩdhɛ ‑yö 'to‑ ‑gɔ ‑todhʋ̈ 'ka bha 'aa ‑yö kë!
1TI 6:17 ‑A pö 'mɛ 'wo "kpʋng ꞊taa ‑naɔ ya‑ ‑mɛ ‑nu 'ka bha‑ ‑nu ‑dhɛ glɔglɔdhö ꞊dhɛ 'wa 'dho ‑wo ‑dɩ 'sü 'kpii‑ 'ö 'wo wo ‑zʋ gɔn woo ꞊naɔ bha‑ ‑dhɛ. ‑A ‑gɛn ‑mü ꞊dhɛ ꞊naɔ bha see‑ ‑pë ‑mü. "Kɛɛ ‑wo wo ‑zʋ 'gɔn Atanna ꞊në‑ ‑dhɛ, ‑a ‑gɛn ‑mü ꞊dhɛ yö 'ö bha ꞊në pë ꞊gban "pɛpɛ suu nu kwa ‑dhɛ ‑sɔbhɛɛ ‑bha kë "dhʋ̈ kö 'kwa kwa "dhiabho‑ bho‑ 'gü.
1TI 6:18 ‑Bhö ‑a pö‑ ‑nu ‑dhɛ ꞊dhɛ ‑wo 'wɔn ‑së kë, ‑wo kë ‑kɔwomɛ 'ka kö ‑wo gbaɔ‑, kö ‑wo ‑ya wo këwɔn ‑së ꞊në‑ "yi ꞊bhaa ꞊dhɛ ꞊naɔ 'dhö.
1TI 6:19 Kë "dhʋ̈ kö ꞊naɔ ‑së 'ö yö ‑zë 'yaa see‑ tongtongdhö 'ö ‑dhɛkpaɔ dhia" 'gü bha ‑wa yö ꞊në‑ ‑wlö kö ‑wa ꞊loo 'ko ‑ta, kö ‑wo ‑tosɛa ꞊dede kë yö ꞊në‑ ‑bha ‑dhɛkpaɔ dhia" 'gü.
1TI 6:20 Timote n dheebhang, ‑bhö i ‑zʋ kë mɛ ꞊klang ‑kë 'ka ‑wɔn ‑nu 'ö Atanna ‑ya ‑kɛfama bho i ‑bha bha ꞊në‑ 'gü kö i ‑zʋ 'ya 'dho bhɔ‑ 'ka tongtongdhö, kö 'i i bo dhiang ‑gɔ ꞊wlüwlü ‑nu 'wo‑ zë, 'ö 'wo Atanna ‑wʋ ‑bhafang bho‑ 'ka bha‑ 'ka, kö 'bha 'dho i "tʋ kë zaɔdhe "wlaasü 'ö ꞊waa‑ ‑da 'wo‑ pö‑ ‑mɛ ‑bha ‑yö 'wɔn ‑dɔ, "kɛɛ kö 'yaa pë 'bha dɔ bha‑ ‑da ‑sü 'ka.
1TI 6:21 ‑A ‑gɛn ‑mü ꞊dhɛ mɛ 'bha ‑nu ‑wo wo ‑dɩ ‑sü 'wɔndɔmɛ suu bha ꞊në‑ 'ka, 'yö ‑zʋ ‑yö Atanna ‑dhɛ ‑sü 'yaa‑ ‑nu ‑gɔ 'zü, 'yö ꞊wa wo ꞊taa zun‑ ‑gɔ. Kö Atanna ‑yö ‑gasitɛ kë ka ‑dhɛ bha 'aa ‑yö kë!»
2TI 1:1 Timote, i ‑dhɔ ‑yö n ‑kë ꞊dhɛ mɛ ‑dɩ 'kpɔ ꞊në‑ 'dhö. 'Yö‑ ‑wɔn 'gü 'a 'sëëdhɛ ya‑ bɔ i ‑dhɛ. Yesu Klisi ‑bha bɔmɛ ‑mü n 'ka, ‑a ‑gɛn ‑mü ꞊dhɛ ‑yö ‑dhi Atanna ‑dhɛ kö 'a kë‑ 'ka. Atanna ‑ya pö n ‑dhɛ ꞊dhɛ 'pë 'ö ö "piʋ̈ ꞊dhɛ 'ö‑ kë 'a‑ pö mɛ "bhɩɩ‑ ‑nu ‑dhɛ. Yö ‑mü ꞊dhɛ mɛ "ʋʋ mɛ 'ö ‑kplü Yesu Klisi ‑bha, ‑yö ‑dho ‑tosɛa 'ö 'yaa yën ‑a kë ‑sü ꞊slɔɔ. A ‑bhɛa kwa Dë Atanna ‑dhɛ kö waa‑ kwa Dëmɛ Yesu Klisi 'ö 'dhö i ‑wëë ‑ya ‑nu kë, kö ‑wo 'dhuë‑ ‑kë i ‑bha, kö ‑wo i gba zuëwaanusü 'ka.
2TI 1:3 Atanna 'a‑ ‑dhɔkë n zuë" "puu 'ka ꞊dhɛ n "bhɛma ‑nu 'dhö bha a‑ nuɛ" ‑bho, a ‑bhɛa ‑dhɛ 'a‑ nuɛ" bho bhii ‑dɩ 'pö i ‑wɔn 'gü ‑kpɛawo "binma ‑dhɛkpaɔ.
2TI 1:4 'Ma n ‑zʋ 'gɔn "tʋ̈ng 'kwa ‑kan 'ka kwa 'kwëë‑ bha‑ ‑ta waa‑ "gbʋ ‑nu 'i‑ bɔ "tʋ̈ng bha‑ 'gü bha‑ 'dhö, "yan ‑dee 'bha ‑kpan i ‑bha ‑dhɔ ꞊ya n 'kun. Kwa ‑kpan 'kwëë‑ ‑sü ‑dho n ꞊nii ‑da ꞊dedewo.
2TI 1:5 ‑Zʋ ‑yö Atanna ‑dhɛ ‑sü 'ö‑ "yi 'yaa‑ ꞊wlöö, 'ö gun i "na 'ö i dhe kpɔ 'wo‑ ‑dhɛ Dhoisö, waa‑ i dhe 'ö i kpɔ 'wo‑ ‑dhɛ 'pö Nisö ‑a ‑nu ‑gɔ bha‑ ‑bha ‑kë i ‑gɔ ‑sü bha, 'ma n ‑zʋ "ta‑ 'gü, a Atanna nuɛ" ‑bho ꞊dedewo.
2TI 1:6 Yö ꞊në‑ ‑wɔn 'gü 'yö 'a i ‑zʋ ‑bö sië kö 'wɔn kë ‑sü ‑faan 'ö Atanna ‑ya ꞊gbaɔ i ‑gɔ kö 'ma n ‑kɔ kpa i ‑ta kö a bhɛa" sië‑ ‑dhɛ bha 'i‑ 'kun "gbɩɩ‑, kö yë 'ö‑ kë ‑faan ‑da i 'gü "dhʋ̈ bha 'i‑ kë i faan 'ka.
2TI 1:7 ‑A ‑gɛn ‑mü ꞊dhɛ 'Nii‑ "slʋ̈ʋ̈slʋ̈ 'ö Atanna ‑ya nu kwa ‑dhɛ bha, "suʋ̈ 'nii‑ 'yaa ‑mü, yö ꞊në kwa gba faan 'ka, 'yö ‑dhɔ ‑ya kwa 'gü, 'yö kwa gba "yaaki 'ka.
2TI 1:8 ‑A ‑kë "dhʋ̈ ‑sü ‑wɔn 'gü, 'yiʋ̈‑ 'ya 'dho i kë 'wɔn 'ö ‑gban kwa Dëmɛ ‑bha ‑a ‑dhiang zë ‑sü 'gü. Ma 'ö mang ‑dɩ 'pö 'a ‑kasogümɛ 'ka 'wɔn do bha‑ 'gü bha, ‑nëng n ‑bha ‑sü 'yiʋ̈‑ 'ya 'dho i kë 'pö. "Kɛɛ bhii ‑zian ‑zë, ‑kɔ do 'a sëë bho sië‑ 'ka 'wɔn ‑së 'ö go Atanna "piʋ̈‑ ‑naɔ dɔ ‑sü ‑wɔn 'gü bha, ‑bhö "wɩ‑ ‑bha kö i ‑bha ‑yö kë ‑kɔ do bha ꞊në‑ 'gü faan 'ö Atanna ‑ya nu i ‑dhɛ bha‑ 'ka.
2TI 1:9 ‑A ‑gɛn ‑mü ꞊dhɛ yö ꞊në kwa dha, 'yö kwa ‑dhɛ, 'yö kwa ‑kë "slʋ̈ʋ̈slʋ̈ kö 'kwa kë ö ‑bha 'ka. Kwa ‑dhɛ 'ö‑ wo "dhʋ̈ bha‑ ‑gɛn 'yii ‑gban kwa këwɔn ‑së ‑nu ‑bha, "kɛɛ 'ö‑ "dhiʋ̈ ꞊wlü‑ ‑bha kö 'ö 'wɔn ‑së bha‑ kë kwa ‑dhɛ ‑a yi ꞊ya ꞊gwëë, ꞊dhɛ 'ö ꞊ya kë "dhʋ̈, 'yö bɔ ö Gbö Yesu Klisi ‑ta 'yö‑ ‑kë kwa ‑dhɛ kö 'yii "kpʋngtaadhɛ ‑zian ‑da ꞊kö.
2TI 1:10 ‑Gasitɛ 'ö Atanna ‑ya ‑ya ö ‑zʋ "piʋ̈ "dhʋ̈ yi 'bha 'ka kwa ‑dhɛ bha ꞊në 'ö‑ 'gü ‑wɔn ‑kë ꞊dɛɛ kwa Dhamɛ Yesu Klisi ‑bɔ kwa ‑dhɛ ‑sü 'ka bha. ‑A ‑gɛn ‑mü ꞊dhɛ yö 'ö bha ꞊në faan bho ga ‑bha. 'Yö‑ ‑kë kö 'kwa ga kö 'wɔn "gbɩɩ‑ 'ya 'dho wɔ kwa ‑ta. 'Yö ꞊sii 'ö 'yaa yën gbonggbongdhö ‑a ‑ta ‑pʋ kwa ‑dhɛ naɔ ‑së 'ö nu‑ dɔ mɛ "bhɩɩ‑ ‑nu ‑gɔ bha‑ 'ka ꞊dhɛ ('mɛ 'ö ꞊ya 'dhang bho ö "dhiʋ̈), Atanna ‑dho kwi ‑dee 'ö 'yaa "bu ‑a ‑da ‑bha 'ö ꞊sii bha‑ ꞊slɔɔ.
2TI 1:11 Atanna ‑yö n ‑ya naɔ ‑së bha ꞊në‑ "kplëng ‑bho mɛ "bhɩɩ‑ ‑nu ‑dhɛ ‑mɛ 'ka kö 'a kë‑ ‑bha bɔmɛ 'ka, kö 'a mɛ draan‑ kë ‑sü ‑bha.
2TI 1:12 Yö ꞊në‑ ‑wɔn 'gü 'yö sëë suu ‑nu ya 'a‑ bho sië (‑kaso 'gü ꞊dɛɛ ya). "Kɛɛ ‑a 'bha 'yiʋ̈‑ 'yaa n kë, ‑a ‑gɛn ‑mü ꞊dhɛ a Yesu Klisi dɔ, 'ö 'a 'dhang bho‑ "dhiʋ̈ ꞊dhɛ ‑a 'gü ‑yö "gbɩɩ‑, ꞊dhɛ yë 'ö‑ ‑kɛfama bho n ‑bha bha ‑yö ‑dho ö ‑zʋ kë‑ 'gü 'ö dho 'ö zun‑ 'ka yi 'ö dho za dɔ‑ 'ka mɛ "bhɩɩ‑ ‑nu ‑bha bha‑ ‑bha.
2TI 1:13 (Timote,) ‑bhö 'dhang bho Yesu ‑wɔn "dhiʋ̈! Tɛanwɔn ‑nu 'i‑ ma n ‑ta bha ‑bhö mɛ ‑nu ꞊klang kë‑ 'ka, kö ‑zʋ ‑yö Atanna ‑dhɛ ‑sü waa‑ ‑dhɔ 'ö kwa ‑gɔ, 'ö 'kwa‑ ꞊slɔɔ ‑kplü Yesu Klisi ‑bha ‑sü "gblʋʋ "piʋ̈ bha ‑yö kë i ‑gɔ 'pö.
2TI 1:14 ꞊Ya 'go yö ‑zë 'gü, ‑bhö 'to Atanna ‑bha 'Nii‑ "slʋ̈ʋ̈slʋ̈ 'ö kwa 'gü bha‑ ‑kɔ ꞊wlöö kö ‑yö i gba faan 'ka, kö naɔ ‑së 'ö go Atanna "piʋ̈ 'ö‑ ‑kɛfama bho i ‑bha bha 'i i ‑zʋ 'to‑ 'ka ‑a 'gü.
2TI 1:15 ‑A ‑naa ‑yö i "yaan ꞊dhɛ 'dhang ‑bho Yesu "dhiʋ̈ ‑mɛ ‑nu "pɛpɛ 'wo Azi ‑sɛ 'gü ꞊wa wo bo n 'ka. Fizɛdhö waa‑ Ɛmozɛnö ‑nu ꞊gban ‑wa ‑nu ‑bhiëë 'gü.
2TI 1:16 A ‑bhɛa kwa Dëmɛ ‑dhɛ kö Onezifɔɔ waa‑ ö ‑bha 'kɔɔmɛ ‑nu ‑wëë ‑ya kë. ‑A ‑gɛn ‑mü ꞊dhɛ ("sanni yö ‑zë ‑yö "kan n ‑bha), yö ꞊në kpa ‑zë wo n ‑zʋ ‑ta ‑blɛɛsü kö a ‑kaso 'gü Wlɔmö, ‑a 'yiʋ̈‑ 'yii‑ kë "ɛɛn ‑a "suʋ̈ 'yii‑ kë, yö ‑zë ‑yö ‑gun nu sië 'ö ‑wo n ‑bha 'ö n ꞊tua bho, 'ö n faan dɔ, 'ö ꞊ya nu Wlɔmö, 'ö ö 'gü ‑siö 'ö n ꞊mɔɔ 'ö ‑kpan n ‑bha.
2TI 1:18 ꞊Ya 'go yö ‑zë 'gü, 'ö 'wɔn ‑së "pɛpɛ 'dhɛ 'kö‑ ‑kë n ‑dhɛ Efɛzö bha yö ‑zë ꞊gban ‑yö i "yaan. A ‑bhɛa n Dëmɛ ‑dhɛ yö ꞊në‑ ‑wɔn 'gü kö ‑yö dɔ "gbɩɩ‑ kö ‑a ‑nu ‑wëë ‑ya kë ‑a ‑bha za ‑dɔ mɛ ‑bha ‑yi 'ka.
2TI 2:1 ꞊Dhɛ 'ö "dhʋ̈, bhi 'kö bhi ‑zë i ꞊dhɛ n gbö 'dhö 'dhang ‑bho Yesu "dhiʋ̈ ‑sü 'gü bha, ‑bhö 'to ‑kplü ‑sü 'ka ‑gasitɛ 'ö Yesu Klisi ‑ya ‑kë kwa ‑dhɛ bha‑ ‑bha kö ‑yö i gba faan 'ka.
2TI 2:2 Atanna ‑wʋ 'a i ꞊klang ‑kë 'ka mɛ 'gbɛ "yaan bha‑ ‑zɔn 'mɛ 'i 'dhang bho‑ ‑nu "dhiʋ̈ ꞊dhɛ ‑wo ‑mɔɔ ‑bha 'wo mɛ "wɛɛ 'bha ‑nu ꞊klang ‑kë 'ka bha ‑a ‑nu ‑dhɛ 'pö.
2TI 2:3 ‑Bhö "wɩ‑ ‑bha kö 'i sëë bho 'pö ꞊dhɛ n 'dhö, ‑a ‑gɛn ‑mü ꞊dhɛ Yesu Klisi ‑bha naɔ ‑së bha‑ dɔ ‑mɛ ‑nu ꞊gban "pɛpɛ ‑wo ‑dho sëë bho ꞊dhɛ ‑kɔ 'yi‑ bho sië‑ 'ka bha‑ 'dhö. I ‑wëëdhɛ ꞊në ꞊ya bho Yesu Klisi ‑wɔn 'gü, 'yö mɛ ꞊gban dho‑ 'wɔn dɔ ꞊dhɛ ‑a ‑bha "sɔdha 'ö ö ‑gɔ ‑dho ‑dhɛ "sia‑ yö ‑mü i 'ka.
2TI 2:4 ‑Bhö ‑a kë ꞊dhɛ ‑kɔ 'ö "sɔdha 'ö‑ "piʋ̈ ‑dhɛ ö ‑dhɔ ‑yö ö ‑gɔmɛ kë 'ö‑ ‑kë 'ka ‑a 'dhö. ‑A ‑gɛn ‑mü ꞊dhɛ "sɔdha 'ö‑ suu 'dhö "dhʋ̈ 'yaa ö ‑kɔ ‑da "kpʋng ꞊taa ‑wɔn "wɛɛ ‑zë 'bha 'gü. ‑Bhö Yesu ‑bha yë kë ‑kɔ do bha ꞊në‑ 'gü.
2TI 2:5 ‑Bɛangsümɛ 'yaa kë ‑bɛang ga 'ka "wɛɛwɛ kö 'yii ‑bɛang 'sü ö 'sü ‑kɔ ‑ta. (Yö ꞊në‑ ‑wɔn 'gü, 'yö 'i dho‑ kë ꞊dhɛ ‑kɔ 'ö Yesu Klisi ‑ya pö‑ 'ka bha‑ 'dhö kö 'i‑ ‑bha yë bha‑ kë ‑a kë ‑kɔ ‑ta kö 'i‑ ꞊trɔɔn yö!)
2TI 2:6 ꞊Ya 'go yö ‑zë 'gü, 'kekëmɛ 'ö ꞊saan ö ‑bha ‑dhɛ ‑bha ꞊në‑ ‑dhɛ 'dhö‑ ‑bha ꞊dhɛ ‑ya ‑blɛɛsü ‑bhö. (‑Bhö i faan dɔ yö ꞊në‑ ‑wɔn 'gü kö i yë kë Yesu Klisi ‑dhɛ kö 'i‑ ꞊trɔɔn yö.)
2TI 2:7 'Wɔn ‑nu 'a‑ pö i ‑dhɛ bha ‑bhö i ‑zʋ 'gɔn‑ 'gü kö 'i‑ 'gü ma, ‑a ‑gɛn ‑mü ꞊dhɛ kwa Dëmɛ ꞊në dho 'wɔn ꞊gban "pɛpɛ 'gü ma "yaaki nu i ‑dhɛ.
2TI 2:8 I ‑zʋ ‑yö ‑bö Yesu Klisi 'ö ‑kë Davi suu 'gü ‑në 'ka, 'ö ga 'ö Atanna ‑ya ‑bö bha‑ ‑wɔn 'ka ‑kpɛawo. ‑A ‑gɛn ‑mü ꞊dhɛ Atanna ‑bha naɔ ‑së 'a‑ dɔ sië mɛ ꞊gban "pɛpɛ ‑gɔ bha 'yö bha.
2TI 2:9 'Sa naɔ bha ꞊në 'a‑ dɔ 'yö 'wo n ‑wëëdhɛ bho sië 'yö ꞊wa lɔɔga ‑nu ꞊gban ‑zian ‑kplü n ‑bha ꞊dhɛ 'wɔnyaakëmɛ 'dhö ya. "Kɛɛ yö ‑zë ꞊gban 'gü, ma ꞊në 'wo n ‑da ‑kaso 'gü, 'wii Atanna ‑wʋ ‑zë ‑da ‑kaso 'gü, (‑wo mɛ ‑nu draan‑ sië‑ 'ka ‑kpɛawo).
2TI 2:10 'Pë 'ö ‑kë 'yö 'a 'wɔn "gbɩɩgbɩɩ‑ ‑nu bha‑ ꞊gban kun n ‑bha bha 'yö bha. Kë "dhʋ̈ kö 'mɛ 'ö Atanna ‑ya ‑nu ‑ya ö ‑bha 'ka bha ‑wo dha 'pö ‑zʋ ‑yö Yesu Klisi ‑dhɛ ‑sü "gblʋʋ "piʋ̈, kö ‑wo dhasü waa‑ ‑bha 'tɔbhɔdhe 'ö 'yaa yën 'ö Atanna "piʋ̈ bha‑ ꞊slɔɔ.
2TI 2:11 ‑A ‑gɛn ‑mü ꞊dhɛ ‑wʋ ('ö Atanna ‑bha 'kɔdhigümɛ ‑nu 'wo‑ pö) ꞊sië ꞊dhɛ: «꞊Ya kë ꞊dhɛ kwɛng‑ ‑nu 'kwa ga kwa "kwëë, kwɛng‑ ‑nu kwa ‑dho ‑tosɛa kë ‑dhɛ do 'gü.
2TI 2:12 ꞊Ya kë ꞊dhɛ kwa zuë" ꞊ya kë ‑sɛa kö ('kwa saan" Yesu ‑wɔn 'gü) kwɛng‑ ‑nu kwa ‑dho ‑gblüdëdhɛ kë. "Kɛɛ ꞊ya kë ꞊dhɛ 'kwa‑ pö ‑zë wo ꞊dhɛ 'kwaa‑ dɔ, yöö ‑dɩ 'pö ‑yö ‑dho ‑a pö 'yaa kwa dɔ.
2TI 2:13 ꞊Ya kë 'zü ꞊dhɛ 'kwa 'go kwa ‑wʋ ‑ta, yö ‑zë 'yaa 'go ö ‑wʋ ‑ta, ‑a ‑gɛn ‑mü ꞊dhɛ yö ‑zë ‑yö ö ‑dɩ ‑dɔ. Pë 'dhɛ 'kö ꞊yaa‑ pö ö "dhi 'ka ‑ya 'gü ‑wɔn ‑kë, 'yaa 'to‑ 'gü tongtongdhö» bha 'yaa ꞊sua 'ka.
2TI 2:14 'Wɔn ‑nu 'i dho mɛklangkëmɛ ‑nu bha‑ ‑nu ‑zʋ ‑bö 'ka ꞊në 'a‑ pö bha, "kɛɛ a ‑bhɛa i ‑dhɛ kö 'i i kɔngga ziö‑ 'ka‑ ‑nu ‑dhɛ "sɛɛ glɔglɔdhö ꞊dhɛ 'wa 'dho zaɔdhe ‑da 'wɔn ‑nu 'ö‑ ‑gɛn 'yaa 'dhö bha‑ 'gü, ‑a ‑gɛn ‑mü ꞊dhɛ ‑a ‑kë "dhʋ̈ ‑sü ‑yö 'mɛ 'wo "tʋ 'to sië‑ ‑nu ‑wʋ ‑bha bha‑ ‑nu ꞊dhɛng ꞊në‑ wo.
2TI 2:15 ‑Bhö i 'gü dɔ "gbɩɩ‑ kö 'i kë mɛdraanmɛ 'ö‑ ‑bha yë ‑yö Atanna ‑zʋ kun, 'ö 'yiʋ̈‑ 'yaa‑ kë ö ‑bha yë kë ‑sü 'gü, 'ö yë ‑kë ꞊dhɛ ‑kɔ 'wo‑ ‑zɔn 'ka‑ ‑dhɛ ‑a 'dhö ꞊në‑ 'ka, kö i mɛ draan‑ tɛanwɔn 'ö go Atanna "piʋ̈ bha‑ ‑bha.
2TI 2:16 'Mɛ 'wo dhiang ꞊wlüwlü ‑nu 'ö‑ ‑gɔ 'yaa 'dhö‑ zë sië, 'ö 'wo Atanna bho sië‑ 'ka ꞊fii "dhiʋ̈ bha, ‑bhö "kan‑ ‑nu ‑bha, ‑a ‑gɛn ‑mü ꞊dhɛ 'mɛ 'wo "dhʋ̈ bha ‑wo wo ‑dɩ bhɔ ꞊në‑ wo Atanna ‑dhɛ taa‑ ꞊gblɛɛn ‑kpɛawo.
2TI 2:17 ‑A ‑nu ‑bha mɛ draan‑ ‑wʋ ‑nu bha ‑wo mɛ see‑ ꞊naa ꞊dhɛ ‑kɔ 'ö bhië ‑yö ‑kan 'ka mɛ ‑bha bha‑ 'dhö. 'Mɛ 'wo "dhʋ̈ bha‑ ‑mɛ 'bha ‑nu ‑mü Imene waa‑ Filɛtö ‑nu 'ka.
2TI 2:18 ꞊Wa "kan tɛanwɔn ‑bha, 'yö 'wo ‑da sië mɛ ‑nu ‑gɔ 'gü 'wo‑ pö‑ ‑nu ‑dhɛ ꞊dhɛ Atanna ꞊ya 'mɛ 'wo ga ‑a ‑nu ‑bö 'nu, "kɛɛ ‑wo wo "tʋ̈ng 'go‑ 'gü, ('yö 'wo‑ ‑nu zuë" ꞊kaan ‑wʋ ‑nu bha‑ 'ka "kwëë, 'yö 'wo ‑kan Atanna ‑bha zian ‑bha).
2TI 2:19 "Kɛɛ 'kö 'zü 'ö ‑kë ꞊dhɛ ‑wa ‑pö "dhʋ̈ ꞊wɛ, 'yii 'dho Atanna ‑wʋ ꞊dede ‑zë bho ö "gblʋʋ ‑ta. ‑A ‑gɛn ‑mü ꞊dhɛ 'ö ö ‑bha 'kɔ "kpan 'kö‑ ‑ya bha 'yaa 'wü ‑pë 'ka, ‑yö 'klëë‑ ‑kpɔ ‑bha ö ‑wʋ 'ka 'ö‑ pö: «Kwa Dëmɛ ‑yö 'mɛ 'wo‑ ‑bha 'ka ‑a ‑nu ‑dɔ» "ɛɛn 'zü: «'Mɛ 'wo‑ pö wo ‑dɩ ‑dhɛ wo kwa Dëmɛ ‑dɔ, ‑wo wo ‑bo 'wɔn yaa kë ‑sü 'ka.»
2TI 2:20 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑bha 'kɔɔdhɛ ‑yö ‑kë ꞊dhɛ ‑gblüdë ‑gɔ 'kɔɔdhɛ 'dhö. Pë "fië 'ö ‑kë ‑gblüdë ‑gɔ 'kɔɔdhö ‑a suu 'yaa kë do. ‑A 'bha ‑nu ‑kë "sënng 'ka 'ö‑ 'bha ‑nu 'wo ‑kë 'wëë‑ 'ka, 'ö‑ 'bha ‑nu ‑dɩ 'pö 'wo ‑kë "dhü ‑nu waa‑ "sɛ gbɔ ‑nu 'ka. ‑A 'dhɛ ‑nu 'wo ‑kë "sënng waa‑ 'wëë‑ ‑nu 'ka bha 'yö 'wo ‑kë 'wɔn ꞊bhlëësü ‑nu ‑kë 'gü ‑pë 'ka. ‑A 'dhɛ ‑nu 'wo ‑kë "dhü ‑nu waa‑ "sɛgbɔ ‑nu 'ka bha, 'yö 'wo ‑kë 'pö "wlaawɔn ‑nu ‑kë 'gü ‑pë 'ka.
2TI 2:21 ‑Kɔ do bha‑ 'gü, 'mɛ 'ö yöö ‑dɩ 'pö 'ö ö ‑dɩ kun ‑së, 'ö "slʋ̈ʋ̈slʋ̈, ‑yö ‑dho kë yë ꞊bhlëësü ‑nu ‑kë 'ka ‑pë 'ka Atanna ‑gɔ ꞊dhɛ ‑kɔ 'ö "sënng waa‑ 'wëë‑ 'wo‑ 'ka bha‑ 'dhö; ‑a ‑gɛn ‑mü ꞊dhɛ kö ‑yö ö baa‑ ‑sü 'ka ö Dëmɛ ‑dhɛ kö yë ‑së suu "ʋʋ suu 'ö ‑dhi ‑dhɛ ‑ya kë ö 'ka.
2TI 2:22 ‑A ‑wɔn 'gü, 'wɔn yaa ‑nu 'ö 'nëglɔɔn ‑nu 'wo‑ kë sië bha, ‑bhö ꞊dua‑ ‑gɔ. Kö 'i i faan dɔ ‑zʋ ‑yö Yesu ‑dhɛ ‑sü ‑bha, kö ‑kɔ 'i dho‑ kë‑ 'ka kö pö 'a 'dho ‑ya i ‑bha ꞊në 'i‑ ‑kɔ mɔɔ‑, kö ‑dhɔ ‑yö kë i 'gü, kö kaa mɛ ꞊gban "pɛpɛ ka kë ka 'ko ‑dhɛ ‑së, kö mɛ 'ö‑ ‑nu "ta ‑kɔ 'dhö ‑së Atanna wëëdhö 'ö 'wo‑ ꞊bhlëë ‑ya bha kɛng‑ ‑nu 'ka yö ꞊në‑ ‑dhɛ mɔɔ‑; "kɛɛ kö 'ka ‑tosɛa kë ka 'ko "piʋ̈ zuë" 'waanu ‑sü 'ka.
2TI 2:23 ‑Bhö i bo zaɔdhe ꞊taamasü ‑nu 'ö‑ ‑zun "dhiʋ̈ ‑bhlɔɔ 'yaa 'dhö bha‑ ‑da ‑sü 'ka; ‑a ‑gɛn ‑mü ꞊dhɛ zaɔdhe ‑nu 'ö‑ suu 'dhö "dhʋ̈ bha ‑yö "dhinaa ꞊në‑ ‑da. Bhii ꞊dede i‑ 'wɔn dɔ ꞊dhɛ ‑a ‑da ‑mɛ ‑nu 'waa kë ꞊kpaɔsü.
2TI 2:24 ‑A ‑dhɛ 'yaa‑ ‑bha kö kwa Dëmɛ ‑bha yëkëmɛ ‑zë ‑yö "dhinaa 'ma, "kɛɛ ‑a ‑dhɛa ‑bha ꞊dhɛ ‑a ‑bha "klʋsëdhɛ ꞊në ‑yö mɛ ꞊gban "pɛpɛ "yan ‑ma kun, kö ‑yö dɔ mɛ ‑nu draandhɛ 'ka, kö‑ zuë" ‑yö kë ‑sɛa.
2TI 2:25 Kö 'mɛ 'wo zaɔdhe ‑da 'ka kö ‑ya ‑mɛ ‑nu dɔ ꞊zinng 'gü ‑wʋ "nɛɛnɛɛ ‑nu 'ka, 'bha mü "dhʋ̈ Atanna ‑dho ‑a "slë kë 'ö 'wo 'dhang bho tɛanwɔn 'ö go‑ "piʋ̈ bha‑ "dhiʋ̈ 'ö 'wo wo zuë" ꞊slëë 'gü ꞊wɛ?
2TI 2:26 ‑A yö ꞊në ꞊ya kë "dhʋ̈ 'yö 'wɔn 'gü ma ‑sü dho kë‑ ‑nu ‑gɔ 'yö 'wo dho 'go Sɔtraan ‑gɔ döng 'ö‑ ‑nu kun 'yö 'wo ‑da ‑gɔ ꞊dhuëngdhɛ 'gü bha‑ 'gü.
2TI 3:1 ꞊Ya 'go yö ‑zë 'gü, Timote n dheebhang, 'yaa n "piʋ̈ ꞊dhɛ 'wɔn "gbɩɩ‑ 'ö dho kë "kpʋngtaadhɛ yën "tʋ̈ng 'gü bha 'i kë‑ 'gü i tii ‑bha.
2TI 3:2 ‑A ‑gɛn ‑mü ꞊dhɛ ‑a "tʋ̈ng bha‑ 'gü, 'mɛ 'wo ‑ya wo ‑dɩ ‑wɔn ꞊në‑ zuën ‑ta doseng bha ‑wo ‑dho pa. ‑A ‑nu ‑bha 'wëëga ‑wɔn ‑dho kë "gbɩɩ‑ 'ö ‑ziö 'wɔn ꞊gban "pɛpɛ ‑ta. ‑Wo ‑dho wo ‑dɩ zë 'tɔ 'ka 'ö 'wo wo ‑dɩ sü 'kpii‑. ‑Wo ‑dho dhiang yaya ‑nu zë Atanna kwi ‑bha 'ö 'waa wo 'kpɔmɛ ‑nu ‑wʋ ma, 'ö 'waa 'wɔn ‑së dɔ. 'Wii 'dho "suʋ̈ Atanna ‑gɔ, "ɛɛn 'wii 'dho 'wɔn 'bha ꞊bhlëë ‑ya.
2TI 3:3 'Wii 'dho "wɩ mɛ 'bha ‑bha ‑bha. Pë 'bha ‑pë 'bha ‑wëë 'yii 'dho‑ ‑nu kë. ‑Wo ‑dho mɛ ‑nu yang kë 'ö waa‑ mɛ 'bha ‑mɛ 'bha 'waa ꞊mɔɔ‑ 'gü. ‑A ‑nu "gblü‑ ‑dho kë 'ya‑, 'ö 'wɔnsëkëmɛ ‑nu ‑san ‑ya ‑nu ‑kë.
2TI 3:4 ‑Wo ‑dho ‑da mɛ ‑nu ‑dhɛ pë "piʋ̈, woo do bha 'wɔn‑ ‑dho ‑siö ‑nu ‑dhɛ 'gü klöklö ‑bha, 'ö ‑dɩ ‑sü 'kpii‑ ‑ya ‑nu pa, 'ö 'wo wo ‑dɩ ‑gɔwɔn ‑nu fië‑ bho Atanna ‑dhidhɛwɔn ‑nu ‑bha. (‑Nëng ‑bha ‑mɛ ‑nu 'waa kë "dhʋ̈).
2TI 3:5 ‑A ‑gɛn ‑mü ꞊dhɛ mɛ ꞊yaa‑ ‑nu yö, mɛ ‑ya ‑nu ‑ga ꞊dhɛ Atanna ꞊bhlëëyamɛ ‑nu 'dhö, "kɛɛ kö 'gügbɩɩdhɛ 'ö Atanna ‑ya nu ö ꞊bhlëëyamɛ ꞊dede ‑nu ‑dhɛ bha 'waa "wɩ‑ ‑kë ‑a ‑nu 'gü ‑sü ‑bha. ‑Bhö "kan mɛ suu ‑nu bha‑ ‑nu ‑bha.
2TI 3:6 'Mɛ 'wo "dhʋ̈ bha‑ mɛ 'bha ‑nu ‑wo mü, ‑wo ‑dho 'wo ‑da mɛ ‑nu ‑gɔ 'kɔɔdhɛ ‑nu 'gü, 'ö dhong ‑nu 'ö 'waa 'wɔn 'bha dɔ 'wɔn 'ö Atanna ‑wɔn 'gü ‑a 'gü, 'ö 'wo pa ‑sü 'ka 'wɔn yaa 'ka, 'ö 'wo ꞊zii 'wɔn yaa suu "pɛpɛ 'ö‑ kë ‑dhɔ ‑ya ‑nu ‑kë ‑a kë ‑sü ‑bha bha 'wo ‑da ‑a ‑nu ‑gɔ 'gü, 'yö 'wo‑ ‑nu gɔɔ bho ꞊sua ‑dhiang ‑nu 'ka.
2TI 3:7 Dhong ‑nu bha ‑wo wo "tʋ ‑to tɛanwɔn 'ö go Atanna "piʋ̈ bha‑ ‑bha ‑kpɛawo "kɛɛ 'waa ꞊mɔɔ‑ ‑bha kö ‑wa 'klɔɔ‑ ꞊dede dɔ gbonggbongdhö.
2TI 3:8 'Ö‑ ‑gɛn 'dhö ‑kë ꞊dhɛ 'mɛ 'wo bha ‑wo 'ko ‑zë tɛanwɔn 'ö go Atanna "piʋ̈ bha‑ 'ka ꞊dhɛ ‑kɔ 'ö Zanɛsö waa‑ Zanblɛsö 'wo dɔ‑ 'ka Moizö ‑gɔ 'kpa bha‑ 'dhö. 'Mɛ 'wo "dhʋ̈ bha 'wɔn yaa ‑dɩ ‑slɔɔ ꞊në 'wo wo ‑zʋ gɔn‑ 'ka, ‑a ‑nu ‑bha ‑zʋ ‑yö Yesu ‑dhɛ ‑sü 'gü 'yaa 'dhö, (Atanna ꞊ya ö ‑kɔ "kan‑ ‑nu "dhiʋ̈).
2TI 3:9 "Kɛɛ 'wii 'dho mɛ 'gbɛ gɔɔ bho; ‑a ‑gɛn ‑mü ꞊dhɛ mɛ ꞊gban "pɛpɛ‑ ‑dho ‑a 'wɔn dɔ ꞊dhɛ "yaaki ꞊në 'yaa‑ ‑nu ‑bha ꞊dhɛ ‑kɔ do 'ö Zanɛsö waa‑ Zanblɛsö ‑nu ‑bha 'dhö ‑kë 'ka yi 'bha 'ka bha‑ 'dhö.
2TI 3:10 "Kɛɛ bhi ‑zë ‑kɔ 'a mɛ ꞊draan‑ 'ka i‑ ‑dɔ, 'ö 'i n "ta ‑kɔ dɔ, 'ö 'i n ‑zʋgɔngüwɔn ꞊gban dɔ, 'ö 'i ‑zʋ ‑yö Atanna ‑dhɛ ‑kɔ, zuësɛadhɛ 'ö n ‑gɔ, ‑dhɔ 'ö n 'gü waa‑ n 'wɔn ‑kun n ‑bha ‑kɔ ‑nu,
2TI 3:11 n ‑wëë ‑kë 'wo‑ wo waa‑ saan" ‑nu 'a‑ wo bha‑ ꞊gban ‑dɔ 'kpakpadhö. Sëë suu ‑mɛɛ ꞊në 'mii‑ bho Angtiɔsö ‑pö, "ɛɛn Ikɔnö ‑pö "ɛɛn Dhitrö ‑pö ‑nu 'gü? "Ɛɛn 'wɔn "gbɩɩ‑ suu ‑mɛɛ ꞊në 'yii wɔ n ‑ta ‑dhɛ ‑nu bha‑ 'gü? "Kɛɛ ‑gasitɛ 'yii kwa Dëmɛ ꞊slɔɔ, ‑yö kë n ‑dha ‑a ꞊gban "pɛpɛ ‑gɔ.
2TI 3:12 ‑A ‑dhɛa ‑bha kö 'kwa‑ 'wɔn dɔ ꞊dhɛ mɛ "pɛpɛ 'wo‑ "piʋ̈ ꞊dhɛ 'wo ‑kplü Yesu Klisi ‑bha kpɛnngkpɛnngdhö kö 'wo Atanna dhɔɔbhaawɔn kë bha ‑wo ‑dho ‑a ‑nu ‑wëëdhɛ bho,
2TI 3:13 "kɛɛ 'wɔnyaakëmɛ ‑nu waa‑ mɛ ‑nu ‑pö ‑mɛ ‑nu ‑zë, ‑wo ‑dho 'dho ꞊në‑ wo wo "dhiʋ̈ ‑kpɛawo 'wɔn yaa kë ‑zian ‑ta. ‑A ‑gɛn ‑mü ꞊dhɛ Sɔtraan ꞊yaa‑ ‑nu ‑pö, 'yö woo ‑dɩ 'pö 'wo mɛ ‑nu pö sië bha.
2TI 3:14 "Kɛɛ bhi ‑zë i ‑bha 'ka, 'wɔn ‑nu 'i‑ 'dhang bho‑ "dhiʋ̈, 'i‑ dɔ ꞊dhɛ tɛanwɔn ‑mü bha, ‑bhö ‑a ‑nu kë ‑kpɛawo kö 'i dho‑ 'ka. ‑A ‑gɛn ‑mü ꞊dhɛ 'mɛ 'wo i ꞊draan 'wɔn ‑nu bha‑ ‑bha bha i‑ ‑nu ‑dɔ, 'i‑ dɔ 'pö ꞊dhɛ ‑a 'bha 'yaa ꞊sua 'ka.
2TI 3:15 ‑Wʋ "slʋ̈ʋ̈slʋ̈ ‑nu 'wo ‑ya ‑sü 'ka Atanna ‑bha 'sëëdhɛ 'gü i‑ ‑dɔ 'i go‑ 'ka "dhʋ̈ i 'nëdhɛ 'gü, ‑wʋ ‑nu bha ‑wo ‑mɔɔ ‑bha 'wo i gba "yaaki 'ka kë "dhʋ̈ kö 'i dha i ‑bha ‑zʋ ‑yö Yesu Klisi ‑dhɛ ‑sü ‑wɔn 'gü.
2TI 3:16 ‑Wʋ "pɛpɛ 'kö ‑bɛn zë ‑sü 'ka Atanna ‑bha 'sëëdhɛ "slʋ̈ʋ̈slʋ̈ bha‑ 'gü bha‑ ꞊gban ꞊trɔɔn ‑së ‑yö ‑dhö, yö ꞊në‑ ‑ya mɛ "bhɩɩ‑ ‑nu zuë" "piʋ̈ 'yö 'wo‑ ‑ya 'sëëdhɛ 'gü, kö ‑wo kwa draan‑ pë 'ö kpengdhö ‑a 'ka, kö‑ 'dhɛ ‑nu 'ö 'waa ‑së kö 'kwa‑ dɔ. ‑Wʋ ‑nu bha ꞊në 'wo kwa zun zian 'ö ‑së ‑a ‑bha, 'yö 'wo kwa ꞊draan 'wɔn ‑së kë ‑sü ‑bha.
2TI 3:17 Kë "dhʋ̈ kö 'mɛ 'ö yë kë sië Atanna ‑dhɛ kö‑ ‑mɛ ‑kɔ ‑yö ꞊mɔɔ 'wɔn ‑së kë ‑sü ‑bha 'kpakpadhö.
2TI 4:1 A‑ ‑pö i ‑dhɛ glɔglɔdhö kwa ‑bha Atanna waa‑ Yesu Klisi 'ö dho za dɔ "yaanmɛ ‑nu waa‑ 'mɛ ꞊wa ga‑ ‑nu ‑bha, 'ö dho nu 'zü "kpʋng ꞊taa kö ‑yö ö ‑bha ‑gblüdëdhɛ kë bha‑ ‑nu wëëdhö ꞊dhɛ:
2TI 4:2 'I mɛ ‑nu draan‑ pë 'ö pö 'aa‑ ‑bha ‑a kë ‑sü 'ka, ‑bhö ꞊nëng Atanna ‑wʋ pö ‑sü 'gü ‑a ‑nu ‑dhɛ glüü" glüüdhö "tʋ̈ng ‑së waa‑ "tʋ̈ng yaa ꞊gban 'gü, kö 'i‑ ‑nu ꞊sɔng ‑nu pö, kö 'i‑ ‑nu faan dɔ 'wɔn ‑së kë ‑sü ‑bha, "kɛɛ i zuë" ‑yö kë ‑sɛa.
2TI 4:3 Pë ‑nu 'a‑ pö i ‑dhɛ bha, ‑bhö ‑a kë, ‑a ‑gɛn ‑mü ꞊dhɛ yi 'bha ‑dho ꞊loo 'ö mɛ "bhɩɩ‑ ‑nu 'waa "wɩ‑ ‑bha kö 'wo wo "tʋ 'to Atanna ‑bha mɛ draan‑ ‑kɔ ‑së bha‑ ‑bha, "kɛɛ ‑wo ‑dho mɛ 'dhɛ 'wo dho‑ ‑nu draan‑ ‑a ‑nu dhɔɔbhaawɔn ‑nu ꞊në‑ ‑bha bha ꞊në‑ mɔɔ‑, ‑a ‑gɛn ‑mü ꞊dhɛ ‑yö ‑dho kë‑ ‑nu "piʋ̈ ꞊dhɛ 'wo 'wɔn yaya ꞊në‑ kë ‑kpɛawo;
2TI 4:4 ‑a ‑gɛn ‑mü 'zü ꞊dhɛ 'yii 'dho kë‑ ‑nu "piʋ̈ ꞊dhɛ 'wo wo "tʋ 'to tɛanwɔn ‑nu 'wo go Atanna "piʋ̈ bha‑ ‑bha, "kɛɛ 'wɔn zii 'ö yi 'bha 'ka bha ꞊në‑ ma ‑dhɔ dho‑ ‑nu kë.
2TI 4:5 "Kɛɛ bhi ‑zë ‑bhö i zuë" 'kun i ‑bha ‑kɔ ꞊gban ‑kɔ ꞊gban 'gü, kö ꞊wa i ‑wëëdhɛ bho kö 'i‑ 'kun i ‑bha, kö 'i 'wɔn ‑taɔng ‑së 'ö ‑gban Yesu ‑bha bha‑ pö mɛ "bhɩɩ‑ ‑nu ‑dhɛ, kö yë ‑nu 'wo ‑gban Atanna ‑wɔn ‑bha 'i‑ kë sië bha 'i‑ ꞊gban "pɛpɛ kë ‑së 'ka!
2TI 4:6 ('Wɔn "pɛpɛ 'a‑ pö i ‑dhɛ "dhʋ̈ bha‑ ‑gɛn ‑mü ꞊dhɛ 'mii 'dho ꞊gwëë "kpʋngtaadhɛ ya‑ 'gü 'zü kö 'a ziö ‑deewo 'gü i ‑dhɛ.) ‑A "tʋ̈ng ꞊ya ꞊loo kö 'a (ma ‑tosɛa nu ꞊dhɛ "saapë 'dhö kö ‑yö kwa Dëmɛ) ꞊yɔɔn bho "sia‑. N ga "tʋ̈ng ꞊ya ꞊loo.
2TI 4:7 Yë 'ö Atanna ‑ya dɔ n ‑kɔ 'ka kö 'a‑ kë bha, a‑ kë ‑sü 'ka ö kë ‑kɔ ‑ta, ꞊dhɛ ‑kɔ 'ö ‑bɛangsümɛ ‑yö ‑bɛang sü‑ 'ka 'ö kë ‑bɛang ga 'ka bha‑ 'dhö 'ö 'a 'to ‑sü 'ka ‑kplü ‑sü 'ka 'dhang ‑bho ‑a "dhiʋ̈ ‑sü ‑bha klöklödhö 'ö dho 'ö zun‑ 'ka ‑a "dhiʋ̈toyi 'ö ꞊dɛɛ bha‑ ‑bha.
2TI 4:8 A‑ 'wɔn ‑dɔ ꞊dhɛ 'faan‑ 'ö kwa Dëmɛ 'ö za dɔ mɛ ‑bha tɛanwɔn ‑ta bha 'ö‑ ‑ya 'mɛ 'ö pö 'aa‑ ‑nu ‑bha ‑a ‑nu ‑gɔ bha n ‑bha ‑dhö. ‑Yö ‑dho ‑a nu n ‑dhɛ yi 'ö dho za dɔ‑ 'ka mɛ "bhɩɩ‑ ‑nu ‑bha bha‑ 'ka. 'Faan‑ 'ö "dhʋ̈ bha mang do n ‑bha 'yaa ‑mü ‑zianwo, ‑a ‑gɛn ‑mü ꞊dhɛ 'mɛ 'ö kwa Dëmɛ bha‑ nu ‑sü "dhia 'dhö‑ ‑nu 'gü ‑yö ‑dho ‑a ‑nu ‑bha nu 'pö.
2TI 4:9 ‑Bhö ‑a "slë mɔɔ‑ kö 'i nu n ‑dhɛ 'gü yö 'zodhö.
2TI 4:10 ‑A ‑gɛn ‑mü ꞊dhɛ Demasö ꞊ya 'go n ꞊keng‑ ‑ya 'dho Tesadhonikö ‑pö 'gü, ‑a 'klɔɔ‑ ‑mü ꞊dhɛ ‑yö ‑kplü "kpʋngtaapë ‑nu ‑bha 'ö ꞊ziö‑ 'ka Atanna "piʋ̈ ‑pë ‑nu ‑ta. Klesan ꞊ya 'dho Gadhatö ‑sɛ 'gü, Titö ‑dɩ 'pö ꞊ya 'dho Dadhömatö ‑sɛ 'gü.
2TI 4:11 Dhukö yöö do ꞊në ꞊ya 'to n "piʋ̈ yö n ‑takunmɛ 'ka "tʋ̈ng ya‑ 'gü. 'I nu sië, kaa‑ Makö ‑ka nu "kwëë, ‑a ‑gɛn ‑mü ꞊dhɛ n ‑mawɔn ‑dho zun‑ ‑bha kö ‑yö n ‑ta 'kun kwa Dëmɛ ‑bha yë kë ‑sü ‑bha.
2TI 4:12 'Ma Tisikö bɔ 'pö Efɛzö ‑pö 'gü.
2TI 4:13 ꞊Ya kë ꞊dhɛ 'i nu sië, 'i nu n ‑dhɛ ma ꞊gbauu‑ 'a‑ to Troasö, Kalipusö ‑gɔ 'kɔɔdhö bha‑ 'ka. Kö 'i nu 'pö n ‑dhɛ ma 'sëëdhɛ ‑be ‑nu bha‑ 'ka, "kɛɛ ‑a 'dhɛ ‑nu 'wo kwi ‑be 'ka bha ꞊në n ‑mawɔn 'dhö‑ ‑bha "gbɩɩsü.
2TI 4:14 ‑Piöbhomɛ Dhɛzandrö bha ‑yö 'wɔn yaa 'gbɛ ‑kë ‑sü 'ka n 'ka, kwa Dëmɛ ‑dho za dɔ‑ ‑bha 'wɔn yaa ‑nu 'ö‑ kë n 'ka bha‑ ‑wɔn 'gü.
2TI 4:15 ‑Bhö i ‑dɩ 'kun‑ ‑gɔ ‑së kö 'ya 'dho "slë yaa kë i 'ka 'pö. ‑A ‑gɛn ‑mü ꞊dhɛ Atanna ‑wʋ 'kwa‑ pö sië mɛ ‑nu ‑dhɛ bha‑ ‑san ‑ya ‑kë. ‑Ya "piʋ̈ ꞊dhɛ 'ö zun‑ ‑gɔ zian‑ ‑kpɛawo.
2TI 4:16 'Dho ‑blɛɛsü 'a‑ wo zadɔdhɛ 'gü bha mɛ 'bha 'yaa gun n "piʋ̈ mü kö ‑yö n ‑zʋ ‑gban, kwa dheebhang ‑nu ꞊gban "pɛpɛ ‑wo kë ‑kan n ‑zü 'kwëë‑. "Kɛɛ a ‑bhɛa Atanna ‑dhɛ kö 'ya 'dho‑ ‑nu 'kun tëë 'ka n 'to 'wo‑ wo do 'ka bha‑ ‑wɔn 'gü 'ö‑ ‑nu ‑wëëdhɛ bho.
2TI 4:17 ‑A ‑gɛn ‑mü ꞊dhɛ a‑ 'wɔn ‑dɔ ꞊dhɛ 'kö 'zü 'ö ‑kë ꞊dhɛ mɛ "bhɩɩ‑ ‑nu ‑zë ‑wo ‑kan n ‑zü 'kwëë‑ ꞊dhɛ ‑kɔ bha‑ 'dhö, "kɛɛ kwa Dëmɛ ‑zë ‑yö ‑to n "piʋ̈, 'ö n faan dɔ 'ö 'a Atanna ‑wʋ pö 'kpakpadhö 'ö 'mɛ 'waa Zuifö 'ka‑ ꞊gban "pɛpɛ 'wo‑ ma. 'Yö n ꞊kɔɔ 'wɔn "gbɩɩ‑ ‑gɔ ꞊dhɛ ‑kɔ 'wo mɛ sü‑ 'ka laabhölaa "dhi "dhiʋ̈ bha‑ 'dhö.
2TI 4:18 ‑Yö ‑dho n dha 'zü 'wɔn "gbɩɩ‑ suu "pɛpɛ 'ö dho nu n ‑ta ‑a ‑nu ‑gɔ ‑kɔ do bha ꞊në‑ 'gü, kë "dhʋ̈ kö 'a n ‑duɛ ꞊slɔɔ dhang‑ 'gü ‑dhɛ 'ö ö ‑bha ‑gblüdëdhɛ kë sië‑ ‑bha bha‑ 'gü. ‑A 'tɔ ‑yö bhɔ "tʋ̈ng ꞊gban "pɛpɛ 'gü! Kö ‑yö kë "dhʋ̈ bha 'aa ‑yö kë. ('Pë 'ö gun n "piʋ̈ 'a‑ pö i ‑dhɛ 'yö bha.)
2TI 4:19 ‑A pö Plisidhö waa‑ Akidhasö ‑nu ‑dhɛ 'ma‑ ‑nu ꞊tua bho, ma Onezifɔɔ ‑gɔ 'kɔɔmɛ ‑nu ꞊tua bho 'gbɛ.
2TI 4:20 Edhatö ‑yö kë ‑to Kodhɛngtö ‑pö 'gü, 'yö 'a Trofimö to Midhe ‑pö 'gü 'pö, ‑a ‑gɛn ‑mü ꞊dhɛ ‑a ‑bha 'yaa "pʋ ‑sü 'ka.
2TI 4:21 ‑Bhö i 'gü dɔ "gbɩɩ‑ kö 'i nu kö "nɛnɛ "tʋ̈ng 'yi ꞊loo ꞊kö. Ebudhusö 'dhöö, Pudɛnö 'dhöö, Dhinisö 'dhöö, Klodia waa‑ kwa dheebhang ‑nu 'wo 'dhang bho Yesu "dhiʋ̈ 'wo to ꞊wa i ꞊tua bho 'gbɛ.
2TI 4:22 Kwa Dëmɛ ‑yö i faan dɔ ‑kpɛawo, kö ‑yö dɔ "gbɩɩ‑ ‑yö ‑gasitɛ kë mɛ ꞊gban "pɛpɛ ka ‑dhɛ!
TIT 1:1 Titö, bhi 'ö 'i ‑kë ꞊dhɛ n gbö 'dhö, 'ö‑ ‑gɛn ‑kë ꞊dhɛ ma ꞊nɛ 'a Atanna ‑dhiang zë i ‑dhɛ 'yö 'i gun ‑na 'dhang bho‑ ‑wɔn "dhiʋ̈, "kɛɛ 'ö koo‑ ‑zʋ ‑yö ‑a ‑dhɛ ‑sü 'ö do bha, 'sëëdhɛ ya mang Pɔdhö ‑mɛ, 'a ‑kë Atanna ‑bha gwëëmi 'ka, 'ö 'a ‑kë Yesu klisi ‑bha bɔmɛ 'ka bha, ma ꞊në 'a‑ bɔ i ‑dhɛ. Atanna ‑yö n ‑bɔ kö 'mɛ ‑nu 'ö‑ ‑nu sü ö ‑bha 'ka bha 'a ‑zʋ ‑yö ö ‑dhɛ ‑sü ‑dhiang zë wo ꞊në‑ ‑nu ‑dhɛ kö ‑wo wo ‑zʋ yö ö ‑dhɛ kö ‑wo 'dho‑ 'ka "dhiʋ̈ ‑kpɛawo. ‑Yö n ‑bɔ 'pö kö 'a‑ ‑nu draan‑ tɛanwɔn ꞊dede 'ö‑ ‑gɛn ‑yö go ö "piʋ̈ bha ꞊në‑ ‑bha. Tɛanwɔn 'ö "dhʋ̈ bha ꞊në dho ‑kɔ 'ö 'kwa kë‑ 'ka 'yö dho ö ‑zʋ 'kun ‑a ‑zɔn kwa ‑dhɛ. A‑ ‑kë "dhʋ̈ kö mɛ "bhɩɩ‑ ‑nu ‑wo 'dhang bho ‑tosɛa 'ö 'yaa yën ‑a ‑kë 'dhö ‑sü ‑wɔn ꞊në‑ "dhiʋ̈. ‑A ‑gɛn ‑mü ꞊dhɛ Atanna 'ö 'yaa ꞊sua kë bha, ‑yö kë ‑tosɛa 'ö "dhʋ̈ bha‑ ‑wɔn "plüün ‑bho kwa ‑dhɛ kö 'yii "kpʋngtaadhɛ ‑zian ‑da ꞊kö. 'Yö "tʋ̈ng 'kwa dɔ‑ 'ka ꞊dɛɛ ya ꞊në‑ kpɔ kö 'pë 'ö‑ "plüün bho mɛbhɩɩdhe ‑dhɛ bha 'kwa‑ dɔ‑ 'ka. 'Wɔn ‑taɔng ‑së 'ö "dhʋ̈ bha Atanna 'ö kwa Dhamɛ 'ka bha ‑ya ‑wɔn ‑kplü ma ꞊në n ‑bha kö 'a‑ ‑dhiang zë mɛ ‑nu ‑dhɛ. A‑ ‑dhɛ Atanna 'ö kwa Dë 'ka, waa‑ Yesu Klisi 'ö kwa Dhamɛ 'ka bha‑ ‑nu ‑gɔ kö ‑wo 'dhuë‑ kë i ‑bha, kö ‑wo i gba zuëwaanusü 'ka.
TIT 1:5 A i ‑to n ꞊taama Klɛtö ‑sɛ 'gü "dhʋ̈ kö yë 'dhɛ n ‑kɔ 'yii ꞊mɔɔ‑ kë ‑sü bha mü (kö "tʋ̈ng 'yaa n ‑gɔ 'zü bha) 'i yö ꞊në‑ kë. Kö 'i mɛ ‑ya Atanna ‑bha 'kɔdhigümɛ ‑nu ‑gɔ "dhiʋ̈ 'do 'do 'ka 'pö‑ ‑nu 'gü. "Sanni 'i mɛ ‑ya ꞊dhɛ ‑kɔ bha‑ 'dhö, i ‑zʋ 'ya 'dho bhɔ 'wɔn 'a‑ pö i ‑dhɛ ‑blɛɛsü 'ö ‑gban 'mɛ 'wo dho kë‑ ‑bha 'kɔdhigümɛ ‑nu "dhiʋ̈ziöwomɛ 'ka ‑a ‑nu ‑wɔn ‑bha bha ꞊në‑ 'ka.
TIT 1:6 ꞊Dhɛ 'mɛ 'i dho‑ ‑ya bha ‑yö kë 'mɛ 'ö mɛ 'bha 'yii 'dho ꞊mɔɔ‑ ‑bha kö ‑yö "sɛɛdhɛ yaa kë‑ ‑bha ꞊në‑ 'ka, kö dhe do ꞊në ‑yö kë‑ ‑mɛ ‑gɔ, kö‑ ‑mɛ ‑bha 'në ‑nu ‑dɩ 'pö ‑wo kë 'dhang ‑bho Yesu "dhiʋ̈ ‑mɛ, 'ö mɛ 'bha 'yaa ꞊mɔɔ‑ ‑bha kö ‑yö "sɛɛdhɛ kë‑ ‑nu ‑bha ꞊dhɛ ‑a ‑nu "ta ‑kɔ 'yaa ‑së, "ɛɛn ‑a ‑nu gɔɔ ‑yö "gbɩɩ‑, 'waa wo 'kpɔmɛ ‑nu ‑wʋ ma ‑a 'ka.
TIT 1:7 ‑A ‑gɛn ‑mü ꞊dhɛ 'mɛ 'ö dho kë Atanna ‑bha 'kɔdhigümɛ ‑nu ‑gɔmɛ 'ka "dhʋ̈ bha‑ ‑dhɛ 'yaa‑ ‑bha ꞊dhɛ ‑yö kë 'mɛ 'wo "sɛɛdhɛ yaa ‑kë ‑bha, 'ö ö ‑dɩ sü 'kpii‑, 'ö "dhiʋ̈‑, 'ö we mü 'gbɛ, 'ö‑ ‑kɔ ‑ta 'dhö "fʋ̈ʋ̈fʋ̈ʋ̈ "ɛɛn 'ö ꞊naɔ ꞊mɔɔ ꞊flü 'ka ‑a 'ka.
TIT 1:8 "Kɛɛ ‑a ‑dhɛa ‑bha ꞊dhɛ ‑yö kë 'mɛ 'ö ‑dhɛng bun ‑së, 'ö 'pë 'ö ‑së ꞊në ‑dhɔ ‑ya ‑kë, 'ö ꞊kpaɔsü, 'ö pö 'aa‑ ‑bha, 'ö Atanna ꞊bhlëë ‑ya, "ɛɛn 'ö‑ ‑kɔ ‑yö ꞊mɔɔ ö ‑dɩ ‑bha ꞊në‑ 'ka.
TIT 1:9 Kö ‑yö kë 'mɛ 'ö ö ‑zʋ yö 'wɔn ‑taɔng ‑së 'ö tɛanwɔn 'ö go Atanna "piʋ̈ ꞊në‑ 'ka, 'ö 'yi ka ꞊draan‑ ‑bha bha‑ ‑dhɛ ꞊në‑ 'ka. ꞊Yaa‑ kë "dhʋ̈ ꞊naa 'yö dho mɛ ‑nu faan dɔ ö ‑bha mɛ draanwʋ ‑nu 'ö 'waa ꞊sua 'ka bha‑ ‑nu 'ka, 'yö dho ꞊mɔɔ‑ ‑bha 'ö ꞊sua ‑yɛ 'mɛ 'wo mɛ draan‑ ‑kɔ "wɛɛ kë sië bha‑ ‑nu "yan ‑bha, 'yö‑ pö‑ ‑nu ‑dhɛ ꞊dhɛ ‑wo wo ‑dɩ ‑pö ꞊në 'wo‑ wo sië.
TIT 1:10 (‑Bhö ‑a kë "slë 'ka kö Atanna ‑bha 'kɔdhigümɛ ‑nu ‑gɔmɛ ‑nu 'i dho‑ ‑ya bha ‑wo kë ꞊dhɛ ‑kɔ a‑ pö‑ 'ka bha ꞊në‑ 'dhö), ‑a ‑gɛn ‑mü ꞊dhɛ mɛ 'gbɛ ‑wo ‑dhö 'ö 'waa mɛ 'bha ꞊bhlëë ‑ya, 'ö 'wo dhiang ‑nu 'ö‑ ‑gɔ 'yaa 'dhö bha ꞊në‑ zë 'yö 'wo "kpënng‑ ‑kë 'ka mɛ ‑nu ‑gɔ. 'Mɛ 'wo "dhʋ̈ bha‑ mɛ 'gbɛ ‑dhɛ ‑wo ‑go Zuifö ‑nu 'wo wo zuë" ꞊slëë 'wo 'dhang bho Yesu ‑wɔn "dhiʋ̈ bha ꞊në‑ ‑nu kpö 'gü.
TIT 1:11 ‑Bhö ‑a kë "dhʋ̈ kö 'pë 'wo dho‑ pö 'ya 'dho ꞊slɔɔ‑ ‑nu ‑gɔ, kö ‑wo wo bo mɛ draan‑ ‑kɔ suu bha‑ 'ka, ‑a ‑gɛn ‑mü ꞊dhɛ ꞊wa 'gügblüdhe ‑da 'kɔ ‑nu 'gü 'do 'do 'ka ꞊waa‑ ‑nu ꞊draan ꞊suasua ‑nu bha‑ ‑nu 'ka kö 'wo 'wëë‑ ꞊slɔɔ ‑kɔ 'yiʋ̈‑ ‑sü bha ꞊në‑ kë‑ ‑nu 'gü.
TIT 1:12 ('Pë 'ö dho 'wɔn ‑nu 'a‑ pö bha‑ ‑nu bhɔ ka 'gü tɛan‑ ‑bha yö ‑mü ꞊dhɛ) ‑a ‑nu ‑dɩ ‑bha 'wɔndɔmɛ do 'ö ‑kë Klɛtö mi 'ka ꞊dhɛ‑ ‑nu 'dhö 'pö, 'ö gun ‑ya ‑sü 'ka yi 'bha 'ka Klɛtö ‑sɛ ꞊dede bha‑ 'gü bha ꞊në dhiang zë 'ö‑ pö: «Klɛtö ‑mɛ ‑nu ‑bha pë ‑mü ꞊sua kë ‑sü 'ka, 'yö 'wo 'wɔnyaakëmɛ 'ka ꞊dhɛ ‑kɔ 'ö wü "dhiʋ̈‑ ‑nu 'wo‑ ‑kë 'ka wü 'në ‑nu 'ka bha‑ 'dhö. ‑A ‑nu ‑kɔ 'yaa ꞊mɔɔ pë 'bha kë ‑sü ‑bha. ‑A ‑nu ‑zʋgɔngüwɔn doseng 'ö 'dhö 'yö pë ‑bhö ‑sü 'ka.»
TIT 1:13 Pë 'ö Klɛtö mi bha 'ö‑ pö bha tɛan‑ mü. ‑A ‑kë "dhʋ̈ ‑sü 'gü, ‑bhö ‑ya 'dhang ‑bho Yesu "dhiʋ̈ ‑mɛ ‑nu "yan 'gü kö 'wa 'dho wo "tʋ 'to ꞊suasua ‑nu 'wo mɛ ‑nu draan‑ sië‑ 'ka bha‑ ‑bha, "kɛɛ kö ‑wo 'dhang bho tɛanwɔn 'ö go Atanna "piʋ̈ bha ꞊në‑ "dhiʋ̈.
TIT 1:14 Kö 'wa 'dho 'dhang bho ‑kwɛzlan ‑nu 'ö Zuifö ‑nu 'wo‑ bho sië bha‑ "dhiʋ̈, 'ö 'wo ‑kplü 'zü 'mɛ 'ö ꞊wa wo ꞊taa ‑ya Atanna ‑bha tɛanwɔn ‑gɔ bha‑ ‑nu ‑bha 'tɔng‑ ‑nu ‑bha.
TIT 1:15 'Mɛ 'ö‑ zuë" 'dhö "puu, pë ꞊gban "pɛpɛ‑ ‑kë ‑mɛ 'gü "puu "slʋ̈ʋ̈slʋ̈ 'ka, 'yö 'mɛ 'wɔn yaa 'dhö‑ zuë" ‑bha, 'ö 'yaa 'dhang bho Yesu "dhiʋ̈ bha yö ‑zë 'ö pë ꞊gban ‑ga pë yaa 'ka, ‑a ‑gɛn ‑mü ꞊dhɛ kö 'wɔn yaa ‑ya "yaaki waa‑ zuëga ꞊gban ‑bha.
TIT 1:16 ('Mɛ 'wo "dhʋ̈ bha ‑bhö ‑a "slë mɔɔ‑ kö ‑wo wo bo‑ ‑kë "dhʋ̈ ‑sü 'ka; ‑a ‑gɛn ‑mü ꞊dhɛ) ‑wa ‑pö ‑wo ‑dɩ ‑dhɛ ꞊dhɛ wo Atanna ‑dɔ, "kɛɛ kö‑ ‑nu këwɔn ‑zë 'bha 'yaa bhɔ 'mɛ 'wo Atanna dɔ‑ ‑nu këwɔn ‑nu ‑bha. 'Mɛ 'wo "dhʋ̈ bha ‑wo ‑yënngsü Atanna 'gü, 'waa‑ ‑wʋ ma, 'pë 'ö‑ ‑dhɔ 'yaa‑ kë bha ꞊në wo ‑zë 'wo‑ ‑kë. ‑A ‑nu ‑kɔ 'yaa ꞊mɔɔ 'wɔn ‑së ‑zë doseng ‑zian kë ‑sü ‑bha.
TIT 2:1 Bhi ‑zë ‑bhö mɛ draan‑ mɛ draan‑ ‑kɔ ‑së 'ö "slʋ̈ʋ̈slʋ̈ 'ö go Atanna "piʋ̈ bha ꞊në‑ ‑bha.
TIT 2:2 ‑Bhö ‑a pö ‑kwɛazë ‑nu ‑dhɛ ‑wo kë ‑kɔ ‑mɔɔ wo ‑dɩ ‑bha ‑mɛ 'ka (we mü ‑sü 'gü), "kɛɛ ‑wo kë 'mɛ 'ö mɛ ‑nu dho‑ ‑nu ꞊bhlëë ‑ya, 'ö 'wɔndɔdhe 'dhö‑ ‑nu ‑gɔ ‑a ‑nu këwɔn ‑nu waa‑ ‑a ‑nu ‑zʋgɔngüwɔn ‑nu 'gü, "kɛɛ 'ö 'wo wo ‑zʋ yö Atanna ‑dhɛ ꞊dedewo, 'ö ‑dhɔ 'dhö‑ ‑nu 'gü ꞊në‑ 'ka, kö‑ ‑nu zuë" ‑yö kë ‑sɛa 'mɛ 'wo 'wɔn yaa ‑kë ‑nu 'ka ‑a ‑nu "piʋ̈.
TIT 2:3 ‑A pö 'pö dhong ‑nu ‑zʋgbansü ‑nu ‑dhɛ ‑wo ‑tosɛa 'ö pö 'aa‑ ‑bha ꞊në‑ kë, 'wa 'dho dhiang yaa zë mɛ ‑nu ‑bha 'wo‑ ‑nu kwi zë‑ 'ka, 'wa 'dho ꞊nëng we ‑ta, ‑wo kë ‑dhio ‑së ‑dɔ gwaangɔdhe "gbɔnggbɔng ‑nu ‑ta ‑mɛ ꞊në‑ 'ka.
TIT 2:4 Kë "dhʋ̈ kö ‑wa ‑zɔn ‑nu ‑dhɛ ꞊dhɛ ‑a ‑dhɛa ‑bha ꞊dhɛ ‑a ‑nu ‑bha gɔɔn‑ ‑nu ‑dhɔ ‑ya ‑nu kë waa‑ ‑nu ‑bha 'në ‑nu 'dhö.
TIT 2:5 ‑A ‑dhɛa ‑bha ꞊dhɛ ‑a ‑nu këwɔn ‑nu waa‑ ‑nu ‑zʋgɔngüwɔn ‑nu ‑wa ‑zɔn ꞊dhɛ ‑wo ꞊kpaɔsü. 'Wa 'dho ‑zua zë, ‑wo ‑ya woo‑ 'kɔ ‑wɔn zuën ‑ta kö ‑wo woo‑ yë ‑nu ‑wɔn 'kun "gbɩɩ‑, kö ‑wo woo‑ gɔɔn‑ ‑nu ꞊bhlëë ‑ya, kö ‑wo wo ‑gɔ 'dho‑ ‑nu ‑dhɛ "sia‑, kë "dhʋ̈ kö mɛ 'bha 'ya 'dho Atanna ‑wʋ ‑dhiang yaa zë.
TIT 2:6 ‑Bhö ‑a pö 'nëglɔɔn ‑nu ‑dhɛ ‑kɔ do bha‑ 'gü 'pö ꞊dhɛ ‑wo kë ꞊kpaɔsü ‑a ‑nu këwɔn ‑nu waa‑ ‑nu ‑zʋgɔngüwɔn ‑nu 'gü.
TIT 2:7 (꞊Dhɛ 'ö ‑kë ꞊dhɛ bhii ‑dɩ 'pö i ‑kë 'nëglɔɔnnë 'ka bha,) ‑bhö ‑gleng ‑dhɛ ‑wɔn kë kö i ‑mɔɔ "kwëë "yɔɔ ‑nu ‑wo ‑tosɛa kë ‑kɔ 'sü i ‑bha ‑bha. ‑Bhö mɛ ‑nu draan‑ tɛanwɔn ‑dɩ ‑slɔɔ ꞊në‑ 'ka, ‑kɔ 'i dho‑ kë‑ 'ka kö mɛ ‑nu ‑wo i ꞊bhlëë ‑ya ꞊në ‑bhö ‑a mɔɔ‑ "tʋ̈ng ꞊gban 'gü.
TIT 2:8 ‑Bhö ‑a kë ‑së kö 'wa 'dho "yi yö i zë ‑dhiang ‑nu "piʋ̈ 'ö 'wo i ꞊tɔɔ ‑kë 'ka, kë "dhʋ̈ kö 'yiʋ̈‑ ‑yö dɔ kwa ‑dhiang yaa zë ‑mɛ ‑nu ‑bha kö 'wa 'dho pë 'bha ꞊slɔɔ 'wo‑ pö kwa ‑bha.
TIT 2:9 ‑Bhö ‑a pö 'pö ꞊dhuëng ‑nu ‑dhɛ ‑wo wo dëmɛ ‑nu ꞊bhlëë ‑ya ‑kpɛawo kö 'pë 'ö dho‑ ‑nu ‑zʋ 'kun ꞊në ‑wa kë, ‑a ‑nu "yan 'ya 'dho ziö wo dëmɛ ‑nu 'gü ('ö 'wo dhiang zë‑ ‑nu ‑wʋ ꞊wlöö).
TIT 2:10 'Wa 'dho ꞊kwaan bho‑ ‑nu ‑ta, "kɛɛ ‑wa "slë mɔɔ‑ ‑kpɛawo kö‑ ‑nu dëmɛ ‑nu ‑wo 'dhang bho‑ ‑nu "dhiʋ̈ ‑a ‑nu këwɔn ‑nu "piʋ̈. Kë "dhʋ̈ kö mɛ ‑nu ꞊waa‑ ‑dhɛ yö kö ‑wo mɛ draan ‑wʋ 'ö go kwa Dhamɛ, kwa ‑bha Atanna "piʋ̈ bha‑ ‑dhiang ‑së zë.
TIT 2:11 (‑Kɔ 'ö 'dhang ‑bho Yesu "dhiʋ̈ ‑mɛ ‑nu dho ‑tosɛa kë‑ 'ka ꞊në bha.) ‑A ‑gɛn ‑mü ꞊dhɛ Atanna ‑ya ‑zɔn mɛ "pɛpɛ ꞊gban ‑dhɛ ꞊dhɛ ö ‑dho ö ‑bha ‑gasitɛ kë‑ ‑nu ‑dhɛ kö ꞊wa bɔ ö 'ka ‑wo dha ‑sü ꞊slɔɔ.
TIT 2:12 ‑Gasitɛ 'ö "dhʋ̈ bha ꞊në kwa ꞊klang ‑kë pë ‑nu 'ö‑ ‑dhɔ ‑yö Atanna ‑kë ‑a kë ‑sü 'ka, waa‑ ‑tosɛa kë ‑kɔ yaa 'ö "kpʋng ꞊taa yö bha‑ 'dhö. Yöö do bha 'zü ꞊në kwa ꞊klang ‑kë ‑ta "yaaki 'ka ‑sü 'ö pö 'aa kë mɛ ‑bha, "kɛɛ 'ö mɛ ‑yö Atanna ꞊bhlëë ‑ya bha‑ 'ka.
TIT 2:13 ‑Kɔ bha ꞊në 'kwa dho ‑tosɛa kë‑ 'gü 'ö dho‑ 'ka "dhʋ̈ 'ö zun‑ 'ka ‑dhɛkpaɔyi ‑së 'ö kwa ‑zʋ 'dhö‑ 'gü, 'ö nu sië, 'ö kwa ‑bha Atanna 'ö 'kpii‑, kwa Dhamɛ Yesu Klisi dho nu‑ 'ka ö ‑bha 'tɔbhɔdhe 'gü bha‑ ‑bha.
TIT 2:14 Yesu ‑yö ö ‑dɩ ‑nu mɛ "bhɩɩ‑ ‑nu kwa ‑dhɛ kö 'ö kwa dha ꞊në‑ wo 'wɔn yaa suu "pɛpɛ ꞊gban ‑gɔ, kö 'kwa kë "slʋ̈ʋ̈slʋ̈, kö 'kwa kë yöö do ꞊në ö ‑bha 'ka, kö 'wɔn ‑së ꞊në‑ kë ‑pɛng ‑yö dɔ kwa ‑ta.
TIT 2:15 'Wɔn suu bha ꞊në 'i dho mɛ ‑nu ꞊klang kë‑ 'ka kö 'dhang ‑bho Yesu "dhiʋ̈ ‑mɛ ‑nu ‑wa kë ꞊dhɛ ‑kɔ bha‑ 'dhö. 'Mɛ 'wii "wɩ‑ ‑bha kö ‑wa kë ꞊dhɛ ‑kɔ bha‑ 'dhö, ‑bhö ‑ya ‑nu "yan 'gü, ‑bhö ‑a pö glɔglɔdhö kö ‑yö 'to i ‑bha ‑bha, kë "dhʋ̈ kö mɛ 'bha 'ya 'dho ꞊slɔɔ‑ ‑nu kpö 'gü 'ö i ꞊bhlëë ‑siö, 'ö 'i ‑kë ‑bhaasü, 'ö‑ pö ꞊dhɛ 'bhaa mɛ ‑draan 'wɔn ‑nu bha‑ ‑bha ‑mɛ 'ka.
TIT 3:1 ‑Bhö ‑a pö 'dhang ‑bho Yesu "dhiʋ̈ ‑mɛ ‑nu ‑dhɛ ‑wo wo "tʋ 'to "sɛ ‑gɔmɛ ‑nu ‑wʋ ‑bha, kö 'pë 'wo‑ pö‑ ‑nu ‑dhɛ ‑wa kë. ‑A pö‑ ‑nu ‑dhɛ ‑wo kë 'wɔnsëkëmɛ 'ka,
TIT 3:2 'wa 'dho mɛ 'bha ‑dhiang yaa zë, 'wa 'dho "dhinaa 'ma, 'wa 'dho ‑dɔn bho. ‑Wo kë dhɔngsü mɛ ꞊gban "pɛpɛ "piʋ̈, kö ‑wo mɛ ꞊gban ꞊bhlëë ‑ya ‑kpɛakpɛawo.
TIT 3:3 ‑A ‑gɛn ‑mü ꞊dhɛ kwaa ‑dɩ 'pö kwa ‑gun ꞊dhɛng ‑sü 'ka ‑blɛɛsü 'ö 'wɔndɔdhe 'yaa gun kwa ‑gɔ, 'ö 'kwa mɛ ‑nu ꞊bhlëë ‑siö, kwa ‑gun ꞊dhuëngdhɛ 'gü kwa dhɔɔbhaa ‑pë ‑nu waa‑ kwa ‑zʋgɔngüwɔn ‑nu ‑gɔ, 'ö 'kwa ‑tosɛa ‑kë ‑mawɔn yaa ‑dhɛ waa‑ ‑ya pë ‑dhɔ 'ka ‑sü ‑nu 'gü, 'ö 'kwa ‑ya mɛ ‑nu ‑san 'ka, 'ö 'wo kwa ‑san ‑kë 'pö.
TIT 3:4 "Kɛɛ ꞊dhɛ 'ö Atanna 'ö kwa Dhamɛ 'ka bha‑ ‑bha ‑dhɔ 'ö‑ ‑kë kwa 'ka, waa‑ ‑bha "klʋsëdhɛ bha‑ ‑zɔn mɛ "bhɩɩ‑ ‑nu kwa ‑dhɛ "tʋ̈ng ꞊ya ꞊loo,
TIT 3:5 'yö kwa dha, "kɛɛ 'sa kwa ‑wëë ꞊dede ꞊në‑ ‑kë 'yö kwa dha bha‑ wo, 'yii kë ꞊dhɛ ‑a dhɔɔbhaawɔn ꞊në 'kwa‑ ‑kë 'yö 'kwa dha‑ ‑wɔn 'gü; "kɛɛ kwa 'kpɔ ‑dee 'ö‑ wo, 'ö 'kwa‑ 'gü ‑zu bho bha, waa‑ ‑bha 'Nii‑ "slʋ̈ʋ̈slʋ̈ 'ö kwa "gla 'ö‑ wo kö 'kwa kë mɛ ‑dee 'ka bha ꞊në kë ‑sü 'ka kwa dha ‑kɔ ‑dee bha‑ 'ka.
TIT 3:6 Atanna ‑yö ‑bɔ Yesu Klisi 'ö kwa Dhamɛ 'ka bha ꞊në‑ ‑ta 'yö 'Nii‑ "slʋ̈ʋ̈slʋ̈ 'gbɛ ꞊dede ꞊gbaɔ kwa ‑gɔ.
TIT 3:7 Kë "dhʋ̈ kö (kwa 'ö 'kwa ‑kë ‑a ‑bha 'në ‑nu 'ka bha) ꞊sɔng 'ya 'dho kë kwa ‑bha 'ö wëëdhö ‑a ‑bha ‑gasitɛ 'ö‑ ‑kë kwa ‑dhɛ bha‑ ‑wɔn 'gü, kë "dhʋ̈ kö 'kwa ‑tosɛa ‑së 'ö Atanna "piʋ̈ 'ö kwa ‑zʋ 'dhö‑ 'gü bha‑ ‑slɔɔ.
TIT 3:8 'Wɔn 'ö tɛan‑ 'ka 'yö 'a‑ pö bha. Yö ꞊në‑ ‑wɔn 'gü 'yö 'i dho mɛ ‑nu draan‑ 'ka glɔglɔdhö. Kë "dhʋ̈ kö 'dhang ‑bho Atanna "dhiʋ̈ ‑mɛ ‑nu ‑wo faan ꞊slɔɔ ꞊dedewo kö ‑wo 'wɔn ‑së ꞊në‑ kë ‑kpɛawo. ‑A ‑gɛn ‑mü ꞊dhɛ 'wɔn ‑së kë ‑sü ꞊në ‑së, yö ꞊në ꞊mɔɔ‑ ‑bha 'ö mɛ ‑nu ‑zʋ kun.
TIT 3:9 'Bha 'dho zaɔdhe "wlaasü ‑da mɛ ‑nu 'ka 'wɔn ‑nu 'ö‑ ꞊trɔɔn 'yaa 'dhö bha‑ 'gü. I "tʋ 'ya 'dho kë mɛ "bhɛma ‑nu ‑gɛngodhɛ ‑wɔn ‑bha. ‑Bhö i bo "dhinaa waa‑ "dhi ‑ko zë ‑sü 'ö ‑gban Zuifö ‑nu ‑bha 'tɔng‑ ‑nu ‑bha bha‑ 'ka. 'Bha 'dho‑ kë, ‑a ‑gɛn ‑mü ꞊dhɛ ‑a ꞊trɔɔn 'yaa 'dhö, ‑a ‑wɔn 'gü 'yii 'dho 'wɔn ‑së kë mɛ 'bha ‑dhɛ.
TIT 3:10 'Mɛ 'ö 'dhang ‑bho Yesu "dhiʋ̈ ‑mɛ ‑nu "pɛ sië‑ 'gü, ‑dhio dɔ‑ ‑mɛ ‑ta ꞊dhɛ do ꞊plɛ ‑nu 'dhö ꞊kö ‑blɛɛsü kö ‑yö ö bo‑ ‑kë "dhʋ̈ ‑sü 'ka. ꞊Ya kë ꞊dhɛ 'yii i ‑wʋ ma tongtongdhö, ‑bhö ‑a kë kö ‑yö 'go 'dhang ‑bho Yesu "dhiʋ̈ ‑mɛ ‑nu kpö 'gü.
TIT 3:11 ‑A ‑gɛn ‑mü ꞊dhɛ bhii ꞊dede i‑ ‑dɔ ꞊dhɛ 'mɛ 'ö suu 'dhö "dhʋ̈ bha kö ꞊ya ö ꞊taa ꞊në‑ zun tɛan‑ ‑zian ‑gɔ, 'yö‑ këwɔn ‑nu ‑wa ‑zɔn ꞊dhɛ ꞊ya 'go zian ‑ta bha.
TIT 3:12 ‑Wʋ ‑totaamasü 'a dho‑ 'kpɔ i ‑bha yö ‑mü ꞊dhɛ: a ‑dho Atemasö waa‑ Tisikö bha‑ mɛ do bɔ i ‑dhɛ. 'Mɛ 'ö "dhʋ̈ bha ꞊ya ꞊loo i ‑dhɛ 'gü kö bhi ‑zë 'i nu "vaandhö kö 'i ‑kpan n ‑bha Nikopodhi ‑pö 'gü, ‑a ‑gɛn ‑mü ꞊dhɛ ‑yö n "piʋ̈ ꞊dhɛ 'a "nɛnɛ "tʋ̈ng ya‑ kë mü.
TIT 3:13 ‑Bhö i 'gü dɔ "gbɩɩ‑ kö 'tɔngdɔmɛ Zenasö waa‑ Apodhɔsö 'wo 'dho sië "ta 'ö‑ 'gü bha 'i‑ ‑nu ‑ta 'kun kö 'wa 'dho ‑kpla pë 'bha ‑wɔn 'gü ‑a ‑nu ‑bha "ta ‑zian bha‑ "dhiʋ̈.
TIT 3:14 'Wɔn 'ö "dhʋ̈ bha bhii do 'bhii 'dho kë‑ këmɛ 'ka. ‑A ‑gɛn ‑mü ꞊dhɛ kwa ‑bha mɛ ‑nu 'wo mü 'pö bha‑ ‑dhɛa ‑bha kö ‑wo gbaɔ‑ ‑sü draan‑ 'pö kö ‑wo mɛ ‑nu ‑mawɔn 'dhɛ 'ö "vaandhö ‑wɔn 'ka ‑a ꞊yaɔn, kö‑ ‑nu ‑bha ‑tosɛa ‑yö mɛ ‑nu ‑zʋ 'kun 'pö.
TIT 3:15 'Dhang ‑bho Yesu "dhiʋ̈ ‑mɛ ‑nu 'wo ‑dhɛ ya‑ 'gü ꞊wa i ꞊tua bho. 'Ya 'dhang ‑bho Yesu "dhiʋ̈ ‑mɛ ‑nu 'ö yi ‑dhɔ ‑ya ‑nu ‑kë 'pö kwa ‑bha ‑kplü ‑a ‑bha ‑sü ‑kë do ‑sü ‑wɔn 'gü, 'wo i "piʋ̈ mü bha‑ ‑nu ꞊tua bho 'pö 'gbɛ. Atanna ‑bha 'dhuë‑ ‑yö mɛ ꞊gban ka 'kun!
PHM 1:1 Mang Pɔdhö ‑mɛ 'wo n ‑da ‑sü 'ka ‑kaso 'gü Yesu Klisi ‑dhiang 'a‑ zë ꞊në‑ ‑wɔn 'gü bha yaa‑ kwa dheebhang Timote ꞊në 'yi 'sëëdhɛ ya‑ bɔ bhii Fidhemɔ ‑mɛ 'i ‑kë yi dhɔɔbhaamɛ ꞊dede 'ka, "kɛɛ 'ö 'i ‑kë 'pö yi yë ‑kë Atanna "piʋ̈ "yɔɔ 'ka bha i 'dhö,
PHM 1:2 ‑A ‑bha 'kɔdhigümɛ "pɛpɛ 'wo bho 'ko ‑ta i ‑gɔ 'kɔɔdhö bha‑ ‑nu 'dhö, kwa dheebhang dhebhɔ 'ö i ‑bha dhebhɔ 'ka 'wo‑ Apia ‑kë bha waa‑ i gbö Asipö 'ö ‑kë Yesu ‑bha "sɔdha 'ka 'pö ꞊dhɛ n 'dhö bha ka ꞊në ka ‑dhɛ, 'ya ka ꞊tua bho 'gbɛ.
PHM 1:3 Yi ‑bhɛa kwa Dë Atanna ‑dhɛ kö waa‑ kwa Dëmɛ Yesu Klisi ‑wo ka gba 'dhuë‑ 'ka kö ‑wo zuëyagblʋ̈ʋ̈‑ nu ka ‑dhɛ.
PHM 1:4 Fidhemɔ n dheebhang, "tʋ̈ng "ʋʋ "tʋ̈ng 'a bhɛa" sië‑ 'ka Atanna ‑dhɛ, a‑ nuɛ" ‑bho i ‑wɔn 'gü ꞊dedewo.
PHM 1:5 ‑A ‑gɛn ‑mü ꞊dhɛ i ‑bha ‑zʋ ‑yö kwa Dëmɛ Yesu ‑dhɛ ‑sü bha waa‑ i ‑bha Atanna ‑bha mɛ ‑nu ‑dhɔ ‑wɔn ‑taɔng ‑yö ‑nu yi ‑ta yö ‑kpɛawo, 'ö yi "tʋʋdhö ‑kpɛawo.
PHM 1:6 "Kɛɛ a ‑bhɛa 'pö‑ ‑dhɛ kö i ‑bha ‑zʋ ‑yö ‑a ‑dhɛ ‑sü bha‑ 'bha ꞊në ‑yö ‑da 'gü ‑kpɛawo ‑yö 'dho‑ 'ka, kë "dhʋ̈ kö mɛ ‑kpɛa 'wo to ‑wo 'wɔn ‑së "pɛpɛ 'ö Klisi ‑ya kë ‑sü ‑faan ‑da kwa 'gü bha‑ kë ‑sü ‑dhɛ yö i ‑gɔ.
PHM 1:7 Atanna ‑bha mɛ ‑nu ‑dhɔ ‑bha i kë ‑sü 'ö 'i‑ ‑nu ‑ta kun "dhʋ̈ bha‑ ma 'a‑ wo, ‑yö ‑dhi n ‑dhɛ ꞊dedewo 'ö n zuë" dho n ko 'gü 'ö 'waanu ‑tɛkpɛ ‑tɛkpɛdhö, n dheebhang, ‑a ‑gɛn ‑mü ꞊dhɛ ‑a kë 'i‑ wo "dhʋ̈ bha 'yö Atanna ‑bha mɛ ‑nu zuë" ‑ya ‑a ‑nu "gblʋ̈ʋ̈‑.
PHM 1:8 Yö ꞊në‑ ‑wɔn 'gü 'yö 'wɔn 'a ꞊mɔɔ‑ ‑bha 'nu 'a i ‑kɔ kpɔ‑ 'ka Klisi 'tɔ 'gü 'i‑ ‑kë kö‑ "sɩ 'yaa i ‑dhɛ bha,
PHM 1:9 'yö mang Pɔdhö ‑mɛ 'ö 'ma kë ‑kwɛanë 'ka "kɛɛ 'ö 'a ‑kaso 'gü Yesu Klisi ‑wɔn 'gü ya 'ö n "piʋ̈ ꞊dhɛ 'a ꞊bhɛa ꞊në‑ wo i ‑dhɛ ‑a ‑wɔn 'gü ‑dhɔ 'gü bha.
PHM 1:10 Bhɛa" ꞊në 'a‑ wo i ‑dhɛ Onezimö 'a kwa Dëmɛ Yesu ‑dhiang zë‑ ‑dhɛ kö a ‑kaso 'gü 'ö 'dhang bho‑ "dhiʋ̈, 'ö ꞊ya kë ꞊dhɛ n gbö 'dhö ꞊dɛɛ Atanna ‑bha zian ‑ta bha‑ ‑wɔn 'gü, n dheebhang Fidhemɔ.
PHM 1:11 A‑ ‑dɔ ꞊dhɛ ‑a ꞊trɔɔn 'yii kë i ‑bha ‑a zü bho ‑sü 'gü, "kɛɛ ꞊taamasü ya‑ 'gü ‑a ꞊trɔɔn ‑dho kë mɛ ꞊gban ꞊plɛ ko ‑bha. ‑Yö ‑dho kë i ‑bha ꞊dhɛ 'ö n ‑bha ‑kɔ 'ö‑ 'gü ‑a 'dhö ꞊dhɛ ‑kɔ 'ö‑ 'tɔ 'dhö‑ 'ka 'pö ‑a 'dhö, ‑a ‑gɛn ‑mü ꞊dhɛ ꞊waa‑ pö Onezimö kö ‑wa pö 'në 'ö ꞊trɔɔn 'dhö‑ 'gü.
PHM 1:12 ‑A bɔ ꞊në 'a‑ wo sië i ‑dhɛ bha, "kɛɛ ‑a ‑wɔn ‑yö n ‑gɔ ꞊dhɛ n "yanga 'dhö.
PHM 1:13 'Yaa gun n "piʋ̈ ‑zianwo ꞊dhɛ 'a n ‑kɔ bho‑ 'gü, kë "dhʋ̈ kö ‑yö 'to i "gblʋʋ 'gü yö, kö ‑yö kë n ‑kɔ "dhiʋ̈ "tʋ̈ng 'a‑ 'ka ‑kaso 'gü 'wɔn ‑taɔng ‑së ‑wɔn 'gü ya‑ 'gü ꞊dhɛ ‑kɔ 'ö‑ ‑dhɛ 'dhö‑ ‑bha 'nu ꞊dhɛ 'i kë‑ 'ka ‑a 'dhö.
PHM 1:14 "Kɛɛ 'yaa n "piʋ̈ ꞊dhɛ a‑ ‑kë "dhʋ̈ kö 'mii‑ pö i "yaan. ‑A ‑gɛn ‑mü ꞊dhɛ 'yaa n "piʋ̈ ꞊dhɛ 'bha‑ pö 'i 'wɔn ‑së kë n ‑dhɛ, 'i‑ kë ꞊dhɛ 'wɔn 'ö‑ "sɩ ꞊në 'yaa i ‑dhɛ ‑a 'dhö, "kɛɛ ‑yö ga bhii ꞊dede ꞊në i 'gü, kö 'ya 'dho kë ꞊dhɛ ꞊wa faan wɔ mɛ ‑ta.
PHM 1:15 'Bha mü "dhʋ̈ "kan 'ka‑ wo ka 'kwëë‑ yi 'bha 'ka bha ‑yö ‑kë "dhʋ̈ kö ‑kpan 'dhɛ kaa‑ wo ka 'kwëë‑ ꞊taamasü ya‑ 'gü bha ‑yö 'to "dhʋ̈ "sɛ 'tuʋ̈‑ 'ka ꞊wɛ, 'dee‑ 'wɔn dɔ?
PHM 1:16 'Pë 'ö n "piʋ̈ ꞊dhɛ 'a‑ pö i ‑dhɛ yö ‑mü ꞊dhɛ kö ka ‑bha ‑kpan 'kwëë‑ ‑sü 'dhɛ 'ö dho kë ꞊taamasü ya‑ 'gü bha 'ya 'dho kë ꞊dhɛ ‑blɛɛsü ‑bha 'dhö, "kɛɛ kö‑ ‑bha ‑kë i ‑bha ꞊dhuëng 'ka ‑sü ꞊gban waa‑ ‑bha ‑bha, kö‑ ꞊bhlëë ‑yö kë i ‑gɔ ꞊taamasü ya‑ 'gü kö ‑yö ziö‑ 'ka ‑blɛɛsü ‑bha ‑ta, kö 'i‑ 'sü ‑zianwo ꞊dhɛ i dheebhang 'ö‑ ‑wɔn 'dhö i ‑gɔ "gbɩɩ‑, "kɛɛ 'ö‑ ‑dhɔ ‑yö ma ꞊në n ‑kë ‑blɛɛsü ꞊dedewo ꞊në‑ 'dhö kwa Dëmɛ Yesu Klisi ‑bha zian ‑ta.
PHM 1:17 'Ö ꞊ya kë ꞊dhɛ 'i n sü ꞊dede ‑zë wo ꞊dhɛ i "taɔngdë 'dhö tɛan‑ ꞊dede 'ka, kö ‑bhö i ‑kɔ ‑ya ‑a ‑dhɛng ‑bha ꞊dhɛ ‑kɔ do 'ö 'ma nu 'nu mü 'i dho ‑kɔ ‑ya 'ka n ‑dhɛng ‑bha bha ꞊në‑ 'dhö.
PHM 1:18 'Kö ꞊ya kë ‑zianwo ꞊dhɛ ꞊ya 'wɔn yaa suu "ʋʋ suu 'ö ꞊në‑ kë i 'ka, "ɛɛn 'ö kë pë 'bha ‑zian ꞊në ꞊kwaan i ‑ta, 'kö 'zü 'ö ‑kë pë suu "ʋʋ suu 'ö‑ 'ka, ‑bhö ‑a kë ma 'wɔn 'ka.
PHM 1:19 'Wɔn 'ö‑ ‑wɔn 'gü 'yö ‑wʋ 'ö ya mang ꞊dede ꞊në 'a‑ ‑bɛn zë ꞊dhɛ mang Pɔdhö ‑mɛ ma ꞊në 'a dho‑ "wɛɛ nu i ‑dhɛ bha 'yö bha. Kë "dhʋ̈ kö 'i 'dhang bho 'pë 'a‑ pö bha‑ "dhiʋ̈. ("Kɛɛ 'sa i‑ 'wɔn ‑dɔ 'kpakpadhö ꞊dhɛ bhii ꞊dede ‑zian 'i bha, i ma ꞊në n ‑bha 'ka i ‑bha ‑kë 'mɛ 'wo 'dhang bho Yesu "dhiʋ̈ ma ‑a ‑dhiang zë ‑sü 'saa‑ 'gü ‑a mɛ do 'ka ‑sü bha‑ ‑wɔn 'gü, "kɛɛ 'yaa n "piʋ̈ ꞊dhɛ 'a "dhi zun yö ‑zë ‑bha.)
PHM 1:20 Bhɛa" ꞊në 'a‑ wo sië i ‑dhɛ kö 'i dɔ "gbɩɩ‑ i zë kwa Dëmɛ ‑wɔn ‑dhɛ kö 'i 'wɔn do bha‑ kë n ‑dhɛ, kö ‑yö n faan ‑sɛa 'bha ‑da n 'gü Klisi ‑bha zian bha‑ ‑ta.
PHM 1:21 'Dhang 'a‑ bho i "dhiʋ̈ ꞊në‑ ‑wɔn 'gü, 'yö 'a 'sëëdhɛ ya‑ bɔ i ‑dhɛ, ‑a ‑gɛn ‑mü ꞊dhɛ a‑ 'wɔn ‑dɔ 'kpakpadhö ꞊dhɛ 'pë 'a‑ pö i ‑dhɛ bha 'bhii 'dho ‑kɔ 'ka, "ɛɛn i ‑dho ‑a "dhiʋ̈ ‑ziö ‑ta ‑zian kë.
PHM 1:22 'Bha kë, ‑bhö ‑dhɛ 'i dho n ꞊yëë bho‑ ‑bha ‑a mɔɔ‑ ꞊sië kö 'i‑ ‑ya i ‑kɔ "sɔɔ, ‑a ‑gɛn ‑mü ꞊dhɛ a 'dhang ‑bho "dhiʋ̈ ꞊dhɛ bhɛa" 'ka‑ wo sië Atanna ‑dhɛ n ‑wɔn 'gü bha ‑yö ‑dho ka ‑wʋ ma 'ö‑ "slë ‑kë 'ö 'wo n ꞊lɔɔ, 'ö 'a nu 'a ‑wo ka ‑dhɛ 'gü.
PHM 1:23 Epaflasö 'ö ‑kaso 'gü ‑dhɛ ya‑ 'gü 'pö ꞊dhɛ n 'dhö Yesu Klisi ‑wɔn 'gü bha ‑ya ‑pö 'ya ka ꞊tua bho.
PHM 1:24 Makö waa‑ Adhitakö, Demasö waa‑ Dhukö 'ö 'wo ‑kë n yëkëyɔɔ ‑nu 'ka bha ꞊wa ka ꞊tua bho 'pö.
PHM 1:25 Kö kwa Dëmɛ Yesu Klisi ‑bha ‑gasitɛ bha ‑ya kë ka ‑dhɛ yi ꞊gban "pɛpɛ 'ka bha 'aa ‑yö kë!
HEB 1:1 ‑Yö kë ka "yaan ꞊dhɛ 'ö gun yi 'bha 'ka, Atanna ‑yö kë ‑bɔ ö ‑wʋdhiʋ̈loomɛ ‑nu ꞊në‑ ‑nu ‑ta ‑gɛn ‑yan 'gbɛ ꞊dede 'ka "ɛɛn ‑kɔ 'gbɛ ꞊dede 'gü, 'yö dhiang zë kwa "bhɛma ‑nu ‑dhɛ.
HEB 1:2 "Kɛɛ ‑yö bɔ ‑sü 'ka ö Gbö ꞊dede ꞊në‑ ‑ta "tʋ̈ng ‑totaamasü 'kwa dɔ‑ 'ka ya‑ 'gü, 'yö dhiang zë kwa ‑dhɛ. ‑Yö ‑bɔ yö ꞊në‑ ‑ta 'yö ‑tosɛa ‑pë ‑kë, ‑yö yöö do bha 'zü ꞊në‑ ‑ya ‑sü 'ka pë ꞊gban "pɛpɛ ‑mɛ 'ka.
HEB 1:3 Yö 'ö bha ꞊në Atanna ‑bha 'tɔbhɔdhe 'ö dhang‑ 'gü bha‑ "blɛɛn‑ 'ka. Yö 'ö bha ꞊në Atanna ‑bhɔ bha ꞊dede 'ka "kpʋng ꞊taa. Yö 'ö bha ꞊në "kpʋngtaadhɛ ‑todhʋ̈sü 'dhö ‑tosɛa kë sië‑ ‑wʋ ‑bha 'gügbɩɩdhɛ ‑bha. Yö 'ö bha ꞊në ꞊dhɛ 'ö ꞊ya 'ö bo mɛ "bhɩɩ‑ ‑nu ‑dha ‑a ‑nu ‑bha 'wɔn yaa ‑gɔ ‑sü 'ka, 'yö dho 'ö ‑ya ‑yɛa ‑së 'ö‑ Dë Atanna "mlümlüsü bha‑ "sɔɔ dhang‑ 'gü bha‑ 'gü.
HEB 1:4 ‑A ‑kë "dhʋ̈ ‑sü bha‑ 'gü ‑a ‑duɛ 'ö 'dhö, 'waa‑ ‑zɔn ‑zianwo Atanna ‑bha "kië ‑nu ‑bha 'ka, 'wɔn 'ö‑ ‑wɔn 'gü 'yö 'tɔ 'ö ꞊bhlëësü 'ö ‑ziö ‑a ‑nu ‑bha ‑ta Atanna ‑ya nu‑ ‑dhɛ bha 'yö bha.
HEB 1:5 "Ɛɛn 'ka‑ ma 'mɛ do ꞊dhɛ Atanna ꞊yaa‑ pö ö ‑bha "kië 'bha ‑dhɛ ꞊dhɛ: «Bhi ꞊në 'i n Gbö 'ka, 'ma‑ pö n "dhi 'ka ꞊dɛɛ ꞊dhɛ ma ꞊në 'a i Dë 'ka?» "ɛɛn ꞊yaa‑ pö ö ‑bha "kië ‑mɛɛ ꞊në‑ ‑dhɛ do 'zü ꞊dhɛ: «A ‑dho kë i Dë 'ka, 'yö 'i ‑kë n Gbö 'ka.»
HEB 1:6 "Kɛɛ ꞊dhɛ 'ö Atanna yöö ö Gbö do 'ö‑ ‑bha 'në ‑blɛɛsü 'ka bha‑ bɔ "kpʋng ꞊taa 'yö‑ pö: «‑A ‑dhɛa ‑bha ꞊dhɛ ma "kië ‑nu ꞊gban "pɛpɛ ‑wo zun‑ ‑dhɛ kpiö 'gü.»
HEB 1:7 'Yö‑ pö 'zü ö ‑bha "kië ‑nu ‑bu 'gü ꞊dhɛ: «‑Yö ö ‑bha "kië ‑nu ‑kë "tɛɛ 'ka, 'yö‑ ‑nu ‑kë 'pö pɛng 'nɛɛ‑ 'ka.»
HEB 1:8 "Kɛɛ ꞊dhɛ 'ö zun ö Gbö ‑zë ‑bha 'yö‑ pö: «"Kɛɛ bhii Atanna ‑mɛ ‑zë i ‑bha ‑gblüdëdhɛ 'dhö ‑kɔ 'ö‑ ‑bha 'yö dho 'to‑ ‑bha, ‑a ‑bho "gblʋʋ ‑pë 'yii 'dho kë tongtongdhö, 'sa pö 'yii 'dho kë i ‑bha mɛdhɛ bha‑ ‑bha,
HEB 1:9 ‑a ‑gɛn ‑mü ꞊dhɛ 'wɔn 'ö pö 'aa‑ ‑bha ꞊në‑ kë ‑dhɔ ‑yö i ‑kë, 'wɔn yaa ‑dhɔ 'yaa i kë, 'wɔn 'ö‑ ‑wɔn 'gü, 'yö Atanna 'ö ‑kë i ‑bha Atanna 'ka bha 'ö i ‑ya ‑sü 'ka, 'yö i pa ‑sü 'ka zuëniida 'ka, 'yö ‑duɛ 'ö ꞊bhlëësü 'ö ‑ziö i "tayɔɔ ‑nu ‑bha ‑ta ‑a nu ‑sü 'ka i ‑dhɛ.» bha 'yö bha.
HEB 1:10 'Yö ‑ya mü 'zü 'ö‑ pö: «Bhi ꞊në bhi ‑zë 'i "sɛ ‑kë ‑a zübhoyi 'ka, 'yö 'i dhang‑ ‑pë ‑kë i ꞊dede ‑kɔ "dhɛ 'ka, n Dëmɛ.
HEB 1:11 'Sa 'pë 'i‑ ‑nu ‑kë "dhʋ̈ bha ꞊gban‑ ‑dho ziö, "kɛɛ bhi ‑zë, i ‑dho 'to "dhʋ̈ doseng. ‑Wo ‑dho kë zii ꞊dhɛ sɔ 'dhö,
HEB 1:12 'ö 'i‑ ‑nu ‑yɛ ꞊dhɛ sɔ 'dhö, 'ö‑ 'dhɛ ꞊ya "blë 'i‑ ‑dee ‑pë ‑kë, "kɛɛ bhi ‑zë, ‑kɔ do 'i‑ 'ka 'yö 'i dho 'to‑ 'ka, i ‑kwɛ 'bha 'yii 'dho "kan "dhiʋ̈ tongtongdhö.»
HEB 1:13 "Ɛɛn Atanna ꞊yaa‑ pö 'zü ö ‑bha "kië 'bha ‑dhɛ do ꞊dhɛ: «‑Bhö nu kö 'i ‑ya ‑yɛa ‑së 'ö n "sɔɔ ya‑ 'gü kö ‑yö 'dho ‑yö zun‑ 'ka yi 'a ‑dho i ‑kɔ ꞊mɔɔ‑ 'ka i 'yaɔ‑ ‑nu ‑bha ‑a ‑bha ‑ee?»
HEB 1:14 ‑A ‑kë "dhʋ̈ ‑sü bha‑ 'gü, kö Atanna ‑bha "kië ‑nu bha "yina "klʋ ‑së ‑nu ‑mü. Wo ꞊në 'wo‑ ‑kɔ "dhiʋ̈ 'yö‑ ‑nu bɔ ‑nu wo 'mɛ 'ö‑ ‑nu ‑ya ‑tosɛa ‑së këmɛ 'ka ‑a ‑bha ‑gblüdëdhɛpö 'gü dhia" ‑a ‑nu ‑ta 'kun ‑dhɛ 'gü. ("Kɛɛ Yesu Klisi ꞊në‑ ‑duɛ 'dhö 'kpii‑ Atanna wëëdhö.)
HEB 2:1 'Wɔn 'ö‑ ‑wɔn 'gü 'yö‑ ‑dhɛ 'dhö‑ ‑bha ꞊dhɛ tɛanwɔn 'kwa‑ ma 'ö ‑gban Yesu Klisi ‑wɔn ‑bha bha 'kwa 'to ‑kplü ‑sü 'ka‑ ‑bha kpɛnngkpɛnngdhö, kë "dhʋ̈ kö 'wa 'dho kwa gɔɔ bho 'wo dho kwa 'ka ꞊dhɛng ‑zian ‑ta bha 'yö bha.
HEB 2:2 ‑A ‑gɛn ‑mü ꞊dhɛ "sanni 'tɔng‑ 'ö Atanna ‑bha "kië ‑nu ‑wa dɔ yi 'bha 'ka Moizö ‑dhɛ kö ‑ya dɔ Izraɛdhö ‑mɛ ‑nu ‑dhɛ bha‑ 'gü ‑wɔn ‑yö kë, kö mɛ "ʋʋ mɛ 'ö 'yii‑ 'gü ‑wɔn kë kö Atanna ‑yö 'wɔn bho‑ ‑mɛ 'gü ‑a ‑naa ‑bha bha ‑oo,
HEB 2:3 'yö‑ 'dhɛ 'kö Klisi yöö ꞊dede 'ö‑ pö ꞊wɛ? ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ dha ‑sü 'kwa‑ ‑dhiang ma bha kwa Dëmɛ bha yöö ꞊dede ꞊në‑ ‑blɛɛsü pö, 'yö 'mɛ 'wo‑ ma bha, ‑a ꞊bhlëë 'dhö 'pë 'ö‑ 'ka 'wo‑ ‑dhiang zë kwa ‑dhɛ.
HEB 2:4 'Yö Atanna ‑dɩ 'pö 'ö ö ‑kɔ "gblʋʋ ‑ya ‑a ‑nu ‑bha "sɛɛ‑ ‑dhɛ bha‑ 'gü "dhabhliwɔn 'sɛɛnnë ‑nu waa‑ "gblʋ̈gblʋ̈ ‑nu kë ‑sü 'ka. Kë "dhʋ̈ kö 'kwa‑ 'wɔn dɔ‑ ‑bha ꞊dhɛ 'yaa ꞊sua 'ka. 'Yö dho 'zü 'ö ‑bhɔdhɛ 'ö‑ ‑bha 'Nii‑ "slʋ̈ʋ̈slʋ̈ ‑ya bhɔ mɛ ‑dhɛ bha‑ 'gü ‑gblü 'mɛ 'wo 'dhang bho 'wɔn bha‑ "dhiʋ̈ bha‑ ‑nu ‑ta ‑kɔ 'ö ‑dhi ‑dhɛ ‑a 'gü.
HEB 2:5 'Sa ‑yö kë ka "yaan ꞊dhɛ ‑dhɛkpaɔ dhia" yi‑ ‑dhiang zë sië bha, Atanna 'yii ö ‑bha "kië ‑nu ‑zë ‑a ‑nu ‑ya ‑a ‑gɔdhiʋ̈ ‑mɛ 'ka, ‑yö Yesu Klisi ꞊në‑ ‑ya.
HEB 2:6 ‑A ‑gɛn ‑mü ꞊dhɛ mɛ 'bha ‑ya pö ‑sü 'ka Atanna ‑wʋ 'gü ‑dhɛ 'bha 'gü mü ꞊dhɛ: «'Aa n Dë Atanna, mɛbhɩɩdhe ‑kë ‑më 'ka 'yö i ‑zʋ ‑yö ‑bö ‑a ‑wɔn ‑ta? "Ɛɛn mɛbhɩɩdhe ꞊dhɛ ‑më ꞊dede ꞊në‑ 'dhö 'yö 'i ‑ya ‑wɔn zuën ‑ta?
HEB 2:7 Yö ‑zë mɛ ꞊ya waa‑ i ‑bha "kië ‑nu ‑a ‑nu ‑ya 'ko "dhiʋ̈, 'bha‑ ‑bha 'tɔbhɔdhe bha‑ ‑da 'në 'bha ‑wo i ‑bha "kië ‑nu ‑bha ꞊wlöö "tʋ̈ng 'në 'bha 'ka, 'yö 'bha ‑ya mü 'zü 'bha‑ nu‑ ‑dhɛ, ꞊ya 'go mü 'zü 'bha ꞊bhlëë ‑ya ‑bha ꞊dhɛ ‑kɔ 'wo‑ ‑ya 'ka ‑gblüdë ‑bha ‑a 'dhö,
HEB 2:8 'ö go mü 'zü 'bha ‑kɔ ‑mɔɔ pë ꞊gban "pɛpɛ ‑bha ‑sü ‑faan nu‑ ‑dhɛ.» ꞊Waa‑ pö Atanna ꞊ya ‑kɔ ‑ziö pë ꞊gban "pɛpɛ ‑gɔ ‑sü ‑faan nu mɛ "bhɩɩ‑ ‑dhɛ, kö ‑wo ‑wɩ pë ꞊gban "pɛpɛ suu ꞊dede ꞊në‑ 'ka, kö 'wii pë 'bha ‑pë 'bha ‑gɔ 'sü‑ 'gü. "Kɛɛ 'sa yö ‑zë ꞊gban 'gü mɛ 'yaa‑ ‑dhɛ yö "tʋ̈ng 'kö 'kwa dɔ‑ 'ka ya‑ 'gü ꞊dhɛ ‑a ‑kɔ ‑yö ziö ‑sü 'ka pë ꞊gban "pɛpɛ ‑gɔ.
HEB 2:9 "Kɛɛ kwa‑ 'suan‑ ‑zë bho ꞊dhɛ Yesu bha ꞊në Atanna ‑ya ꞊bhlëë ‑da ö ‑bha "kië ‑nu ‑bha ꞊wlöö "tʋ̈ng 'ö ‑tosɛa kë‑ 'ka "kpʋng ꞊taa bha‑ 'ka. Kë "dhʋ̈ kö ‑yö ga mɛ ꞊gban "pɛpɛ ‑wɔn 'gü, ‑gasitɛ 'ö Atanna ‑ya ‑kë kwa ‑dhɛ bha‑ ‑wɔn 'gü, "kɛɛ 'yö 'kwa‑ yö sië 'zü ꞊dɛɛ 'tɔbhɔdhe waa‑ ꞊bhlëë ‑nu "yi ꞊bhaa ga 'ö‑ wo "dhʋ̈ bha‑ ‑wɔn 'gü bha.
HEB 2:10 'Sa ‑a ‑dhɛ ‑gun ‑bha 'nu ꞊dhɛ Atanna 'ö pë ꞊gban "pɛpɛ ‑da, 'ö pë ꞊gban "pɛpɛ 'wo 'dhö yö ꞊në‑ 'saa‑ 'gü bha, ‑yö Yesu bha ꞊në‑ kë ‑saan kwa ‑wɔn 'gü ‑mɛ 'ka. Kö ‑yö kë kwa dha ‑sü bha‑ ‑gɔ ‑da 'plöö ‑kɔ 'ka. Kë "dhʋ̈ kö ö bhang ‑nu bha‑ mɛ 'gbɛ 'kwa kë ‑da ‑a ‑bha ‑gblüdëdhɛpö 'gü ‑mɛ 'ka, ‑a ‑gɛn ‑mü ꞊dhɛ Yesu bha ꞊në ‑da ‑nu 'ka mü ‑mɛ 'ka.
HEB 2:11 Yesu bha ꞊në mɛ ꞊gban ‑bha 'wɔn yaa ‑bho ‑nu ‑bha ‑mɛ 'ka Atanna wëëdhö, 'yö 'mɛ 'ö ꞊ya bo ‑a ‑nu ‑bha 'wɔn yaa ‑bho ‑nu ‑bha ‑sü 'ka "dhʋ̈ bha wɛng‑ ‑nu 'wo ‑kë Dë do bhang ‑nu 'ka. 'Wɔn 'ö‑ ‑wɔn 'gü, 'yö‑ ‑nu ‑dhɛ 'ö dheebhang ‑sü 'yiʋ̈‑ 'yaa‑ kë bha 'yö bha.
HEB 2:12 ‑Ya ‑zë yö ꞊në‑ ‑wɔn ‑dhɛ 'yö dhiang zë 'ö‑ pö: «N Dë Atanna a ‑dho i ‑dhiang zë n dheebhang ‑nu ‑dhɛ, 'ö 'a "tan bho i ‑zü mɛ kpö 'gü.»
HEB 2:13 'Yö ‑ya mü 'zü 'ö‑ pö: «A ‑dho n ‑zʋ yö Atanna ‑dhɛ.» 'Yö go mü 'zü 'ö‑ pö: «Atanna ‑bha 'në ‑nu 'ö‑ nu n ‑dhɛ bha ꞊në yɛng‑ ‑nu 'yi ya.»
HEB 2:14 ꞊Dhɛ 'ö ‑kë ꞊dhɛ 'mɛ 'ö‑ ‑nu ‑dhɛ sië Atanna ‑bha 'në ‑nu bha mɛbhɩɩdhe "yaan‑ ‑dhe ‑nu ‑mü bha yö ꞊në‑ ‑wɔn 'gü, 'yö yöö ‑dɩ 'pö 'ö ‑gla mɛ "bhɩɩ‑ 'gü ꞊dhɛ ‑a ‑nu 'dhö. Kë "dhʋ̈ kö ga 'ö yöö‑ wo bha, ‑yö kë ö ‑kɔ ‑ziö Sɔtraan 'ö ‑ga ‑bha 'gügbɩɩdhɛ 'dhö‑ ‑gɔ bha‑ ‑gɔ ‑sü 'ka,
HEB 2:15 kö 'mɛ 'wo gun ꞊dhɛ mɛ 'dhö ꞊dhuëng 'ka ‑kpɛawo ‑a ‑nu ‑bha ‑suʋ̈ ga ‑gɔ ‑sü ‑wɔn 'gü bha, ‑yö kë‑ ‑nu dha ‑kɔ 'ka.
HEB 2:16 ‑A ‑gɛn ‑mü ꞊dhɛ nu 'ö‑ wo "kpʋng ꞊taa bha 'yii nu kö ‑yö Atanna ‑bha "kië ‑nu ‑zë ‑a ‑nu ‑ta 'kun. ‑Yö ‑nu kö ‑ya kë ꞊dhɛ ‑kɔ 'ö Atanna ‑wʋ ‑ya pö‑ 'ka ꞊në‑ 'dhö ꞊dhɛ: ‑Yö ‑nu Ablaamö suu 'gü ‑në ‑nu ꞊në‑ ‑nu ‑ta 'kun ‑dhɛ 'gü.
HEB 2:17 Yö ꞊në‑ ‑wɔn 'gü, 'yö‑ ‑dhɛ 'dhö gun‑ ‑bha ꞊dhɛ ‑yö kë ꞊dhɛ ö dheebhang ‑nu bha‑ ‑nu 'dhö ‑kɔ ꞊gban suu 'do 'do ꞊në‑ 'gü. Kë "dhʋ̈ kö 'ö kë ‑a ‑nu ‑bha "saabhomɛ 'kpii‑ 'ö 'yaa ö ‑wʋ 'to ‑a 'ka Atanna wëëdhö, ‑a ‑gɛn ‑mü ꞊dhɛ ‑a ‑dhɛa ‑bha ꞊dhɛ 'mɛ 'ö "saabhomɛ 'kpii‑ 'ka "dhʋ̈ bha ‑yö kë 'mɛ 'ö mɛbhɩɩdhe ‑wëë ‑ya ‑kë, "kɛɛ 'ö 'wo 'dhang bho‑ "dhiʋ̈ ‑a këwɔn ‑nu 'wo Atanna wëëdhö ‑a 'gü ꞊në‑ 'ka. Kë "dhʋ̈ kö Atanna ‑yö ꞊mɔɔ‑ ‑bha ‑yö ö ‑bha "sɛgümɛ ‑nu ‑mawɔn 'to.
HEB 2:18 'Sa ‑a kë 'ö‑ wo "dhʋ̈ bha ꞊në‑ ‑wɔn 'gü, 'yö ꞊mɔɔ‑ ‑bha "tʋ̈ng 'kwa dɔ‑ 'ka ya‑ 'gü, 'yö Sɔtraan 'dhö 'mɛ ‑a ‑nu 'gü dan sië bha, 'yö‑ ‑nu ‑ta kun, ‑a ‑gɛn ‑mü ꞊dhɛ ‑yö kë yöö ‑dɩ 'pö‑ 'gü ‑dan.
HEB 3:1 Yö ꞊në‑ ‑wɔn 'gü, n dheebhang "slʋ̈ʋ̈slʋ̈ ‑nu 'ö 'ka 'dhang bho Yesu Klisi ‑wɔn "dhiʋ̈, ka 'ö Atanna ꞊në ka ‑dhɛ 'pö bha, ‑ka Yesu Klisi 'ö‑ bɔ kö ‑yö kë kwa ‑bha ‑zʋ ‑yö ‑dhɛ ‑sü 'kwa‑ dhiang zë sië bha‑ "saabhomɛ 'kpii‑ 'ka bha ꞊në‑ ‑ga.
HEB 3:2 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yö ö bha ꞊në 'yii 'go ö ‑wʋ ‑ta Atanna 'ö‑ ‑ya 'wɔn bha‑ këmɛ 'ka bha‑ ‑dhɛ, ꞊dhɛ ‑kɔ 'ö Moizö ‑ya ‑kë 'ka 'pö Atanna ‑bha yë 'ö‑ dɔ‑ ‑kɔ 'ka ‑a ‑gɔ 'kɔɔdhö bha‑ 'gü yi 'bha 'ka bha‑ 'dhö.
HEB 3:3 ‑Ka ka "yan 'to yö ꞊në‑ ‑bha, ‑a ‑gɛn ‑mü ꞊dhɛ yö ꞊në‑ ꞊bhlëë 'dhö 'kpii‑ Moizö ‑bha ꞊dhɛ 'kɔdɔmɛ ‑zë ꞊bhlëë 'dhö 'kpii‑ 'kɔ 'ö‑ dɔ ‑a ‑bha ‑kɔ 'ö‑ 'gü bha‑ 'dhö.
HEB 3:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'kɔ "pɛpɛ kö 'dhö, mɛ ꞊në‑ ꞊gban dɔ, 'sa Atanna ꞊në pë ꞊gban "pɛpɛ ‑da.
HEB 3:5 Moizö 'yii pë "pɛpɛ 'ö Atanna ‑ya këwɔn pö‑ ‑dhɛ ö ‑gɔ 'kɔɔdhö ꞊në‑ do ‑zian 'to. Yö ‑zë Atanna ‑bha gwëëmi 'ö‑ ‑ya 'wɔn 'ö yöö‑ kë ‑a pö ‑mɛ 'ka ꞊në gun‑ 'ka.
HEB 3:6 "Kɛɛ Klisi ‑bha 'to 'ö‑ wo ö ‑wʋ ‑ta bha ‑ya ‑wo "dhʋ̈ ‑a ‑bha ‑kë Atanna Gbö 'ka ‑sü, kö ‑ya 'sü ‑ya ‑ya ö ‑bha 'kɔ ‑gɔ "dhiʋ̈ bha ꞊në‑ 'gü. 'Sa ‑a ‑bha 'kɔ 'ö "dhʋ̈ bha yö ‑mü kwa ꞊në kwa 'ka "ni kö 'kwa 'to ‑kplü ‑sü ‑zë 'ka 'wɔn 'ö kwa ‑zʋ 'dhö‑ 'gü 'ö kwa ꞊nii ‑da sië bha‑ ‑bha, kö kwa ‑bha 'dhang ‑bho ‑a "dhiʋ̈ ‑sü bha ꞊ya 'to kwa ꞊kwɛng.
HEB 3:7 'Wɔn 'ö‑ ‑wɔn 'gü, 'yö Atanna ‑bha 'Nii‑ "slʋ̈ʋ̈slʋ̈ ‑yö dhiang zë 'ö‑ pö:
HEB 3:8 «꞊Ya kë ꞊dhɛ 'ka n ‑wʋ ma ꞊dɛɛ 'ö ꞊dɛɛ 'ka ‑a 'gü, ‑ka 'to kö 'ka 'dhang bho‑ "dhiʋ̈, 'ka 'dho ꞊kɛgbaandhɛ kë ꞊dhɛ ‑kɔ 'ö ka "bhɛma ‑nu ‑wa ‑kë 'ka yi 'bha 'ka "wla ‑ta, 'ö 'wo n 'gü dan bha‑ 'dhö.
HEB 3:9 ‑A ‑gɛn ‑mü ꞊dhɛ ka "bhɛma ‑nu ‑wo kë n ‑gɛn ‑mɔɔ yi 'bha 'ka "wla ‑ta, 'ö 'wo n 'gü dan, 'sa kö‑ ‑nu "yan ‑yö 'wɔn ‑nu 'a‑ kë sië‑ ‑nu kpö 'gü bha‑ ‑bha "dhʋ̈ ‑kwɛ ‑kaɔng ‑yiisiö 'ka.
HEB 3:10 'Wɔn 'ö‑ bhlɔɔ ‑yö ma n 'gü, 'yö 'a‑ pö‑ ‑nu zuëga ‑ya ‑nu ‑zian ꞊në‑ ‑kë ‑kpɛawo ‑a ‑nu ‑zʋ 'gɔn ‑kɔ ‑nu 'gü, 'waa n dhɔɔbhaa ‑zian dɔ tongtongdhö bha 'yö bha.
HEB 3:11 A ‑sö ‑bhö yö ꞊në‑ 'gü, 'a‑ pö 'wii 'dho wo ‑gɛn ‑da ‑ya ‑dɩ 'flëë‑ 'gü ‑dhɛ 'ö n ‑yɛa ꞊bhaa bha‑ 'gü tongtongdhö.»
HEB 3:12 ‑A ‑kë "dhʋ̈ ‑sü bha‑ 'gü, n dheebhang ‑nu, ‑kaa kë ‑së kö mɛ 'bha zuëga 'ya 'dho kë yaa 'ka, "kɛɛ "gbɩɩ‑ 'ka ka kpö 'gü, 'ö‑ ‑mɛ ‑yö ‑kan Atanna "yaan ‑sü bha‑ ‑bha.
HEB 3:13 Kaa ‑zian ‑zë ‑ka ka 'ko ‑nu faan ꞊në‑ dɔ ‑kpɛawo kö 'ka 'dho‑ 'ka, kö ‑yö 'to‑ 'ka "dhʋ̈ ‑yö zun‑ 'ka ꞊dɛɛ 'ö Atanna ‑wʋ 'sëëdhɛ ‑yö ‑wɩ 'ka bha‑ ziö ‑sü ‑bha. Kë "dhʋ̈ kö mɛ 'bha 'ya 'dho kwaa ö ‑dɩ ‑zü 'ö 'wɔn yaa ‑yö "kpënng‑ ‑kë ‑gɔ 'ö‑ zuë" ‑yö ‑kë 'zü ‑deewo "glɔɔglɔ.
HEB 3:14 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë ꞊dhɛ ‑zʋ ‑gɔn ‑dhɛ ‑kɔ 'ö gun kwa ‑gɔ ‑a 'zü bho ‑yi 'ka bha, ꞊ya kwa ‑kɔ 'kun kö ‑yö 'to‑ 'ka "dhʋ̈ ‑yö zun‑ 'ka ‑a "dhiʋ̈toyi ‑bha, kö Klisi "tayɔɔ ‑nu ‑mü kwa 'ka.
HEB 3:15 'Wɔn 'ö‑ ‑wɔn 'gü, 'yö Atanna ‑wʋ ‑ya pö ꞊dhɛ: «'Ka‑ ‑wʋ ma ꞊dɛɛ 'ö ꞊dɛɛ 'ka‑ 'gü, 'ka "wɩ‑ ‑bha, 'ka 'dho ka "tʋ ta‑ ‑gɔ ꞊dhɛ ‑kɔ 'ö ka "bhɛma ‑nu ‑wo ꞊kɛgbaandhɛ ‑kë 'ka yi 'bha 'ka ‑a 'dhö» bha 'yö bha.
HEB 3:16 ‑A ‑gɛn ‑mü ꞊dhɛ de "wɛɛ 'bha ꞊në kë Atanna ‑wʋ ma 'yö ‑ya ‑gɔ ‑kɔɔ 'gü kö 'yii kë mɛ "pɛpɛ 'ö Moizö ‑yö zian bho‑ ‑nu 'ka 'ö go‑ ‑nu 'ka Ezitö ‑sɛ 'gü bha wo ‑zë ‑a ‑nu 'ka?
HEB 3:17 "Ɛɛn de "wɛɛ 'bha ꞊në 'wɔn ‑yö ‑siö Atanna ‑dhɛ ‑a ‑nu "piʋ̈ ‑kwɛ ‑kaɔng ‑yiisiö 'ka kö 'yii kë 'mɛ 'wo ‑da "dhiʋ̈ 'ö 'wo ga "tʋng ‑ta bha wo ‑zë ‑a ‑nu 'ka?
HEB 3:18 "Ɛɛn de 'bha ꞊në Atanna ‑yö ‑sö ‑bhö ‑nu ‑dhɛ 'ö‑ pö: «'Wii 'dho ‑da ‑ya ‑dɩ 'flëë‑ 'gü ‑dhɛ 'ö n ‑yɛa ꞊bhaa bha‑ 'gü tongtongdhö.» kö 'yii kë 'mɛ 'kö 'wo ‑ya ‑gɔ ‑kɔɔ 'gü bha‑ ‑nu 'ka?
HEB 3:19 "Kɛɛ 'sa kwa "yan ‑ya ‑dhɛ 'gü ꞊dhɛ 'wii ‑da ‑dhɛ 'ö Atanna ‑ya ‑dhiang zë "dhʋ̈ bha‑ 'gü tɛan‑ 'ka 'dhang 'wii‑ bho‑ "dhiʋ̈ bha ꞊në‑ ‑wɔn 'gü.
HEB 4:1 ‑A ‑kë "dhʋ̈ ‑sü bha‑ 'gü, ꞊dhɛ 'ö ‑kë ꞊dhɛ "plüün 'ö Atanna ‑ya bho kwa ‑dhɛ 'ö ‑gban ‑ya ‑dɩ 'flëë‑ 'gü ‑dhɛ 'ö‑ "piʋ̈ bha‑ ‑bha bha‑ "tʋ̈ng 'yii ziö ꞊kö bha, ‑ka ‑kwaa kë ‑së kö mɛ 'bha 'ya 'dho ꞊slɔɔ ka kpö 'gü 'ö to ꞊taama, 'ö ꞊fië 'wɔn bha‑ 'gü.
HEB 4:2 ‑A ‑gɛn ‑mü ꞊dhɛ ‑kɔ do 'wo ꞊naɔ ‑së bha‑ dɔ‑ 'ka ‑a ‑nu ‑gɔ yi 'bha 'ka bha ꞊në 'wo‑ dɔ sië‑ 'ka kwa ‑gɔ 'pö ꞊dɛɛ, ‑wʋ bha‑ ‑zun "dhiʋ̈ ‑bhlɔɔ 'ö 'yii kë 'mɛ ‑a ‑nu 'gü ‑yö ꞊see bha‑ ‑nu ‑gɔ bha‑ 'klɔɔ‑ ‑mü ꞊dhɛ 'wii kë 'dhang ꞊në‑ bho‑ "dhiʋ̈ kö ‑wo wo ‑zʋ 'gɔn Atanna ‑dhɛ.
HEB 4:3 "Kɛɛ mɛ 'kö kwa ‑zë 'kwa 'dhang bho ‑sü 'ka ‑wʋ bha‑ "dhiʋ̈ bha, kwa ‑dho ‑da ‑dhɛ 'ö Atanna ‑ya ‑dhiang zë 'ö‑ pö: «Bhlɔɔ ꞊ya 'ma n 'gü, 'ma ‑sö ‑bhö ꞊dhɛ 'wii 'dho ‑da ‑ya ‑dɩ 'flëë‑ 'gü ‑dhɛ 'ö n ‑yɛa ꞊bhaa bha‑ 'gü tongtongdhö» bha‑ 'gü. ‑A ‑gɛn ‑mü ꞊dhɛ "tʋ̈ng 'ö‑ pö sië‑ 'ka "dhʋ̈ bha kö 'ö pë "pɛpɛ kö‑ ‑da, kö ꞊yaa‑ ꞊gban kë 'nu yi 'bha 'ka ꞊waa‑ ‑yɛa ‑nu bha‑ ꞊gban 'dhö. ('Mɛ 'wo bha ‑da 'ö 'wii‑ wo mü bha ‑yö kë ‑to wo ꞊në‑ ‑nu ‑bha, ‑a 'dhɛ 'bha 'yii 'to Atanna ‑zë ‑bha.)
HEB 4:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔn 'ö ‑gban "kpʋngtaadhɛ waa‑ ‑tapë ‑nu ‑pë kë ‑sü ‑bha bha, ‑a ‑dhɛkpaɔyi "saɔplɛ ‑naa bha Atanna ‑ya ‑dhiang zë ‑dhɛ 'bha 'gü 'ö‑ pö: «꞊Dhɛ 'ö ꞊ya kë "dhʋ̈, 'yö Atanna ‑yö ö "tɛɛ pa ‑a ‑dhɛkpaɔyi "saɔplɛ ‑naa bha‑ 'ka, kö ꞊ya ö bo yë "pɛpɛ bha‑ ꞊gban kë ‑sü 'ka.»
HEB 4:5 'Sa 'wɔn do 'ö ‑gban ‑a pö 'ö Atanna ‑ya wo ꞊dhɛ: «'Wii 'dho ‑da ‑ya ‑dɩ 'flëë‑ 'gü ‑sü 'ö n ‑yɛa ꞊bhaa bha‑ 'gü ‑sü ‑bha» bha
HEB 4:6 mɛ ‑blɛɛsü ‑nu 'wo naɔ ‑së bha‑ ma bha, ‑da 'ö 'wii‑ wo ‑dhɛ bha‑ 'gü bha‑ 'klɔɔ‑ ‑mü ꞊dhɛ 'wii 'dhang ꞊në‑ bho‑ "dhiʋ̈, "kɛɛ dɔ 'kwa‑ wo ꞊dɛɛ, mɛ‑ ‑tun ꞊mɔɔ ‑bha 'ö ‑da mü.
HEB 4:7 'Wɔn 'ö‑ ‑wɔn 'gü, 'yö Atanna ‑yö ꞊dɛɛ ‑dee 'bha ‑ya bha 'yö bha. ‑Yö ‑bɔ Davi ꞊në‑ ‑ta 'yö yö ‑zë pö ꞊taama kö‑ yi 'në 'bha ꞊ya ꞊gwëë, 'yö‑ pö: «꞊Ya kë ꞊dhɛ 'ka Atanna ‑wʋ ma ꞊dɛɛ, ‑ka 'dhang bho‑ "dhiʋ̈, 'ka 'dho ka "tʋ ta‑ ‑gɔ.»
HEB 4:8 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë ꞊dhɛ Zozue 'ö kë dɔ Moizö "piʋ̈ ‑zun Izraɛdhö ‑mɛ ‑nu ‑dhɛ "dhiʋ̈ ‑sü 'gü bha ‑yö ‑da 'nu 'mɛ 'wo bha‑ ‑nu 'ka ‑dhɛ 'ö Atanna ‑ya pö bha‑ 'gü, kö 'yii 'dho ‑ya mü 'zü 'ö ꞊dɛɛ 'bha kpɔ.
HEB 4:9 ‑A ‑kë "dhʋ̈ ‑sü bha‑ 'gü, kö ‑ya 'flëë‑ 'gü ‑sü 'ö ꞊dhɛ ‑a 'dhɛ 'ö Atanna ‑ya wo ‑dhɛkpaɔyi "saɔplɛ ‑naa 'ka bha‑ 'dhö bha, ‑yö ‑tun 'mɛ 'wo 'dhang bho‑ ‑wʋ "dhiʋ̈ ‑a ‑nu ‑bha 'ka ꞊dɛɛ.
HEB 4:10 ‑A ‑gɛn ‑mü ꞊dhɛ 'mɛ 'ö ‑da ‑ya 'flëë‑ 'gü ‑dhɛ 'ö Atanna "piʋ̈ bha‑ 'gü, kö yë 'ö‑ ‑mɛ ‑ya kë bha 'yö dho‑ 'gü "tɛɛpadhɛ 'gü 'pö ꞊dhɛ ‑kɔ 'ö Atanna ‑ya ‑kë 'ka ‑a 'dhö.
HEB 4:11 ‑A ‑kë "dhʋ̈ ‑sü bha‑ 'gü, ‑ka ‑kwa kwa 'gü dɔ "gbɩɩ‑ kö 'kwa ‑da ‑dhɛ bha‑ 'gü. ‑Ka ‑kwaa kë ‑së kö mɛ 'bha 'ya 'dho gɔɔgbɩɩdhɛ kë 'zü kwa kpö 'gü ꞊dhɛ 'mɛ 'wo gun yi 'bha 'ka bha‑ ‑nu 'dhö, 'ö‑ ‑mɛ ‑yö ö ‑dɩ ꞊fië ‑yɛa bha‑ 'gü.
HEB 4:12 ‑A ‑gɛn ‑mü ꞊dhɛ Atanna ‑wʋ bha pë "yaandhe ‑mü, "sɩ ‑ya ‑dhɛ, ‑a ‑bha "dhiʋ̈dhɛ ‑zian ‑zë ‑yö ‑ziö ‑siangga 'ö‑ "dhiʋ̈ ‑zian 'dhö ꞊plɛ ‑a ‑ta. ꞊Ya "yɛ mɛ ‑bha ‑yö ‑dho 'ö zun mɛ zuëpiʋ̈wɔn waa‑ mɛ 'nii‑ ‑bha ‑wɔn ‑nu ‑bha, 'ö‑ ‑nu bho 'koo ꞊dhɛ ‑kɔ 'ö ‑dhaa ‑yö wü ꞊nëng bho‑ 'ka wü ga ‑bha 'ö zun‑ 'ka ‑a ga 'gü "yɔn ‑bha bha‑ 'dhö. Yö ꞊në kwa ‑zʋ ‑gɔn 'ka ‑wɔn bha‑ ‑së waa‑ yaa ‑a ‑nu ‑bho 'koo dɔ.
HEB 4:13 Pë "pɛpɛ 'kö Atanna ‑ya ‑da, ‑a 'bha 'kö yöö kë ‑bin 'gü ‑a wëëdhö 'yaa 'dhö. Yö 'ö kwa "kplëng bho ‑dhɛ ‑mɛ 'ka bha pë 'bha ‑pë 'bha 'yaa ‑bin ‑a ‑gɔ, ‑a ꞊gban "pɛpɛ ‑yö zang ‑ta klangklangdhö.
HEB 4:14 ‑A ‑kë "dhʋ̈ ‑sü bha‑ 'gü, ꞊dhɛ 'ö ‑kë ꞊dhɛ "saabhomɛ 'kpiki ‑kpiki 'ö kwaa Atanna ‑nu kwa ‑wʋ zun 'kwëë‑, 'ö ꞊ya ziö dhang‑ ‑nu ꞊gban 'gü ꞊ya ‑wo Atanna ‑kuu "dhiʋ̈, Yesu 'ö Atanna Gbö 'ka, 'ö 'kwa 'dhang bho‑ "dhiʋ̈ 'ö 'kwa‑ ‑dhiang zë sië bha ‑yö kwa ‑gɔ bha, ‑ka ‑kwa kwa 'gü dɔ "gbɩɩ‑ kö 'kwa 'to ‑kplü ‑sü 'ka 'dhang ‑bho ‑a "dhiʋ̈ ‑sü 'kwa‑ ‑dhiang zë sië bha‑ ‑bha.
HEB 4:15 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yö 'ö kwa ‑bha "saabhomɛ 'kpii‑ 'ka "dhʋ̈ bha ‑yö kwa ‑dɔ, ‑ya 'wɔn ‑dɔ ꞊dhɛ‑ "sɩ 'yaa kwa ‑dhɛ kö 'kwa 'dho 'wɔn yaa kë tongtongdhö. ‑A ‑gɛn ‑mü ꞊dhɛ ‑yö kë ‑tosɛa ‑kë 'pö kwi do ya‑ 'gü ꞊dhɛ ‑kɔ do 'kwa‑ kë sië‑ 'ka ya‑ 'dhö. 'Ö Sɔtraan ‑ya 'gü dan 'pö ꞊dhɛ ‑kɔ do 'ö kwa 'gü dan sië‑ 'ka bha‑ 'dhö. "Kɛɛ 'yö yö ‑zë 'yii 'wɔn yaa kë tongtongdhö. ‑A ‑wɔn 'gü, ꞊ya kë ꞊dhɛ faan 'yii kë kwa 'gü, ‑yö ‑mɔɔ ‑bha 'ö kwa ‑ta 'kun Atanna wëëdhö.
HEB 4:16 ‑A ‑kë "dhʋ̈ ‑sü bha‑ 'gü, "sika 'bha ‑zian 'ya 'dho kë kwa 'gü, ‑ka ‑kwa ꞊yɔɔn Atanna ‑bha ‑gblüdëdhɛ ‑gbloo 'ö ‑gasitɛ ‑kë kwa ‑dhɛ ‑dhɛ 'ka bha‑ "sɔɔ, ‑yö ‑dho kwa ‑wëë ‑ga, 'ö kwa ‑mawɔn to, 'ö kwa ‑ta kun‑ 'kun "tʋ̈ng 'gü.
HEB 5:1 ‑A ‑gɛn ‑mü ꞊dhɛ mɛ "pɛpɛ 'kö Atanna ‑ya ‑ya "saabhomɛ 'kpii‑ 'ka ö ‑gɔ 'kɔɔdhö bha ‑ya ‑ya "dhʋ̈ kö ‑yö mɛ ‑nu ‑wʋ "dhiʋ̈ ꞊në‑ ꞊loo ö ‑bha, "ɛɛn kö ‑ya ‑nu ‑bha "saa‑ ꞊në‑ bho.
HEB 5:2 "Kɛɛ "sɩ 'yaa kë 'ö‑ wo 'mɛ 'ö "dhʋ̈ bha‑ ‑dhɛ 'pö ꞊dhɛ mɛ ‑kpɛa ꞊gban 'dhö bha ꞊në‑ ‑wɔn 'gü, 'yö ꞊mɔɔ‑ ‑bha 'yö 'wɔn 'ö ‑gban 'mɛ 'waa 'wɔn 'bha dɔ, "ɛɛn 'ö ꞊wa ‑da Atanna "dhiʋ̈ ‑a ‑nu ‑wɔn ‑bha bha‑ 'gü ma ö 'klɔɔ‑ 'ka, 'yö‑ ‑nu ‑wëë ‑ga.
HEB 5:3 'Yö ‑ya mü 'zü 'yö ö ‑dɩ ‑bha 'wɔn yaa ‑nu ‑bha 'saa‑ bho 'pö ꞊dhɛ mɛ ‑kpɛa 'dhö.
HEB 5:4 ‑A ‑wɔn 'gü, mɛ 'bha 'yaa ꞊mɔɔ‑ ‑bha kö ‑yö ö ‑dɩ ‑ya "saabhomɛ 'kpii‑ 'ka kö Atanna ‑zë 'yii‑ ‑mɛ ‑ya ꞊dhɛ ‑kɔ 'ö Aadhɔn ‑ya 'ka yi 'bha 'ka ‑a 'dhö.
HEB 5:5 ‑A ‑kë "dhʋ̈ ‑sü bha‑ 'gü, Klisi ‑dɩ 'pö 'yii ö ‑dɩ ‑ya. Atanna ꞊në‑ ‑ya ꞊dhɛ ‑kɔ 'ö Aadhɔn ‑ya 'ka ‑a 'dhö, ‑a ‑gɛn ‑mü ꞊dhɛ ‑ya ‑pö ö ‑wʋ 'gü ꞊dhɛ: «N Gbö ‑mü i 'ka, 'ma kë i Dë 'ka ꞊dɛɛ.» 'Yö ‑ya mü 'zü 'ö‑ pö ‑dhɛ 'bha 'gü ꞊dhɛ:
HEB 5:6 «I ‑ya 'a‑ wo "saabhomɛ 'ka bha, i ‑dho 'to‑ 'ka "dhʋ̈ 'ö‑ 'wɔn‑ yën ꞊dhɛ Mɛɛsisedɛkö ‑bha 'dhö.»
HEB 5:7 Yesu bha ꞊në 'ö gun kö ‑yö ‑tun "kpʋng ya‑ ꞊taa, 'yö ö ‑wʋ "dhiʋ̈ ꞊wlü 'ö ꞊bhɛa "gbʋ waa‑ "yanyi 'ka, ‑gbɛ "ʋʋ kë ‑sü 'ka Atanna 'ö ꞊mɔɔ‑ ‑bha 'ö‑ dha ga ‑gɔ bha‑ ‑dhɛ, 'yö Atanna ‑yö ö "tʋ 'to 'pö‑ ‑wʋ ‑bha ‑dhio 'ö‑ ma‑ ‑wʋ ‑ta bha‑ ‑wɔn 'gü.
HEB 5:8 ‑A ‑bha ‑kë Atanna Gbö 'ka ‑sü ꞊gban waa‑ ‑bha ‑bha, ‑yö kë ‑wɩ ‑bha kö 'ö sëë suu ꞊gban "pɛpɛ 'do 'do bho. Kë "dhʋ̈ kö 'ö ‑gɔ ‑dho Atanna ‑dhɛ "sia‑ ‑sü draan‑.
HEB 5:9 ꞊Dhɛ 'ö ꞊ya bo saan" bha‑ wo ‑sü 'ka "dhʋ̈, 'ö Atanna ꞊yaa‑ 'wɔn dɔ ꞊dhɛ 'wɔn 'ö‑ ‑kë bha‑ du 'bhaa‑ ‑bha 'zü, 'yö‑ sü 'ö‑ ‑ya ‑tosɛa 'ö 'yaa yën ‑a ‑nu 'mɛ 'wo wo ‑gɔ dho‑ ‑dhɛ "sia‑ ‑a ‑nu ‑dhɛ ‑mɛ 'ka,
HEB 5:10 'yö‑ sü 'ö‑ ‑ya "saabhomɛ 'kpii‑ 'ka ꞊dhɛ Mɛɛsisedɛkö 'dhö.
HEB 5:11 'Wɔn 'gbɛ ꞊dede ‑pö ka ‑dhɛ ‑wɔn ‑yö yi ‑bha 'wɔn 'ö ‑gban Yesu Klisi ‑bha ‑kë kwa ‑bha "saabhomɛ 'kpii‑ 'ka ‑sü ‑bha ꞊dhɛ ‑kɔ bha‑ 'dhö bha‑ 'gü, "kɛɛ ‑a ‑ta ‑pʋ ka ‑dhɛ ‑kɔ 'bha ‑yö 'mɛ kö ka 'wɔn 'gü ma ‑dhɛ ‑yö 'ya‑.
HEB 5:12 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kö dɔ 'kwa‑ wo 'nu ꞊dɛɛ ya, ka ‑zë 'ka kë mɛ ‑nu ‑draan Atanna ‑wʋ ‑bha ‑mɛ ꞊në‑ 'ka. ‑A ‑gɛn ‑mü ꞊dhɛ ka ‑da ‑bha zian ‑ta ‑yi 'yaa ꞊dɛɛ, "kɛɛ 'yaa "dhʋ̈. Pë 'në ‑nu 'wo ‑gban Atanna ‑wʋ ‑bha 'ö 'wo 'mɛ ꞊wa ‑da ‑a ‑bha zian ‑ta ‑dee 'gü, ‑a ‑nu ꞊draan‑ ‑bha bha ꞊në ka bha ‑wɔn 'dhö ‑tun ‑bha 'zü kö ‑wo ka draan‑ ‑bha ꞊dhɛ ‑kɔ 'wo 'yɔn nu‑ 'ka 'në ‑dee ‑nu ‑dhɛ bha‑ 'dhö. 'Kaa ‑dho "dhiʋ̈ ‑wɔn ‑zë ‑bha kö 'ka ‑bhöpë "gblʋ̈ʋ̈gblʋ̈ ‑bhö.
HEB 5:13 'Sa ‑da Atanna ‑bha zian ‑ta ‑sü zü ‑bho ‑ta ‑wɔn ‑nu 'wo ꞊dhɛ 'yɔn 'ö mɛ ‑ya nu 'në ‑dee ‑dhɛ kö ‑yö "gla ‑a 'dhö bha 'mɛ 'kö‑ ‑bha ‑wɔn 'dhö ‑tun ‑bha, kö ‑yö ‑tun 'në ꞊në‑ 'ka Atanna ‑bha zian ‑ta bha, kö 'yii kë ꞊kö pë 'dhɛ 'ö 'mɛ ꞊wa kë mɛ "gblʋ̈gblʋ̈ 'ka ‑a ‑bha zian ‑ta 'wo‑ ‑bhö bha‑ ‑bhö ‑mɛ 'ka, kö 'yii kë ꞊kö 'mɛ 'ö 'wɔn ‑së waa‑ 'wɔn yaa ‑a ‑nu ‑bhokoo dɔ ‑a 'ka,
HEB 5:14 ‑a ‑gɛn ‑mü ꞊dhɛ ‑bhöpë 'dhɛ 'kö bha ‑yö 'mɛ ꞊wa ‑kian ‑a ‑bha "ta bha‑ 'sü ‑sü 'gü, 'ö‑ ‑nu zuë" ꞊ya 'wɔn ‑së waa‑ 'wɔn yaa ‑nu ‑bho 'ko "piʋ̈ ‑sü ‑yaki dɔ bha ꞊në‑ ‑nu ‑bha 'ka.
HEB 6:1 ‑A ‑kë "dhʋ̈ ‑sü bha‑ 'gü, ‑ka ‑kwa ‑dho "dhiʋ̈ ‑zian ꞊në‑ mɔɔ‑ kö 'kwa Atanna ‑wʋ 'dhɛ 'ö 'wɔn zü ‑bho ‑ta ‑wɔn ‑nu 'ka bha yö ‑zë ‑zuö kwa ꞊taama, kö‑ 'dhɛ 'ö mɛ "gblʋ̈gblʋ̈ ‑nu ‑bhöpë 'ka bha 'kwa yö ꞊në‑ ‑bhö. ‑A ‑gɛn ‑mü ꞊dhɛ Atanna ‑wɔn zü ‑bho ‑ta ‑wɔn ‑nu 'wo ꞊dhɛ ‑kɔ "kpan ‑ya ‑sü 'dhö, 'ö ‑kë ꞊dhɛ ‑kwaa "wlaawɔn ‑nu kë ‑sü ‑zü ‑sü kö 'i 'dhang bho Atanna "dhiʋ̈ ‑a 'dhö oo,
HEB 6:2 "ɛɛn mɛ "zu ‑sü ‑nu waa‑ mɛ "zu 'klɔɔ‑ ‑nu 'kö 'wo bha oo, ‑kɔ ‑ya mɛ ꞊gbin‑ ‑sü (kö ‑wa ‑mɛ "dhiʋ̈ bhɛa" wo Atanna ‑dhɛ) ‑sü ‑nu bha oo, 'mɛ ꞊wa ga 'nu ‑a ‑nu ‑bö ‑wɔn ‑nu bha oo, "ɛɛn Atanna ‑bha 'wɔn 'ö dho‑ bho mɛ 'gü ‑dhɛ 'bha ꞊kpaɔyi ‑bha 'ö‑ "dhiʋ̈todhɛ 'yii 'dho kë bha‑ ‑dhiang ‑nu bha 'kwii 'dho 'to yö ‑zë pö ‑sü ‑bha ‑kpɛawo. ‑A ‑gɛn ‑mü ꞊dhɛ 'ka yö ‑zë ꞊gban ma 'nu.
HEB 6:3 ‑Ka ‑dho "dhiʋ̈ ‑zian ꞊në‑ mɔɔ‑. Pë 'dhɛ 'kö kwa ‑mawɔn 'dhö‑ ‑bha kö 'kwa‑ kë "ni kö Atanna ‑zë ꞊ya "wɩ‑ ‑bha yö ‑mü ‑dho "dhiʋ̈ ‑sü bha ꞊në‑ 'ka.
HEB 6:4 ‑A ‑gɛn ‑mü ꞊dhɛ mɛ "ʋʋ mɛ 'ö Atanna ꞊ya bo 'wɔn ‑bho 'koo dɔ ‑sü nu ‑sü 'ka‑ ‑dhɛ 'ö ꞊ya bo‑ dɔ ‑sü 'ka, 'ö ‑bhɔdhɛ 'ö go‑ "piʋ̈ dhang‑ 'gü bha‑ ‑blɛɛsü ꞊ya bhɔ‑ ‑mɛ ‑dhɛ, 'ö‑ ‑bha 'Nii‑ "slʋ̈ʋ̈slʋ̈ bha ꞊ya ‑yɛa 'kun 'nu‑ ‑mɛ 'gü,
HEB 6:5 'ö ꞊yaa‑ 'wɔn dɔ ꞊dhɛ Atanna ‑wʋ bha pë "nɛɛnɛɛ ‑mü, 'ö 'wɔn "mlümlü ‑sü ‑nu 'ö Atanna dho‑ kë ‑dhɛkpaɔ dhia" 'gü bha ꞊yaa‑ din ‑blɛɛsü ‑ga,
HEB 6:6 "kɛɛ 'ö ꞊ya ‑ya mü 'zü ꞊ya "kan Atanna ‑bha bha kö ‑dhio ‑dɔ ‑mɛ ‑ta "slë "wɛɛwɛɛ 'bha kö yöö kë ꞊taamasü 'gü kö ‑yö 'go 'zü ‑deewo ö ꞊sɔng bha‑ 'gü kö ‑yö ‑da Atanna ‑bha zian ‑ta 'yaa 'dhö 'zü. ‑A ‑gɛn ‑mü ꞊dhɛ ꞊ya kë "dhʋ̈ kö ꞊ya Atanna Gbö bha‑ dɔ ꞊plɛ ‑naa ꞊në wo "dhü ‑bha kö ‑wo "si bho‑ ‑gɔ ꞊dhɛ ‑kɔ 'wo‑ ‑kë 'ka yi 'bha 'ka ‑a 'dhö bha.
HEB 6:7 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑bɔ Yesu 'ka ‑sü bha ‑yö ꞊dhɛ pë ta 'kwa‑ wo sië bha ꞊në‑ 'dhö. ꞊Wa pë ta kö dha ‑yö ban‑ ‑bha ‑wɛɛndhö kö 'pë 'wo‑ ta bha ‑yö dhi‑ ‑mɛ ‑nu ‑gɔ, kö ꞊waa‑ 'wɔn dɔ ꞊dhɛ "sɛ bha "sɛ ‑së 'ö Atanna ‑bha 'dhuë‑ 'dhö‑ "piʋ̈ yö ‑mü.
HEB 6:8 "Kɛɛ ꞊ya kë ꞊dhɛ "glɛɛn ‑kpɔɔ ‑nu waa‑ blëë yaya ‑nu ꞊në ꞊wa bhɔ ‑dhɛ bha‑ 'gü bha ‑oo, kö "sɛ ‑së ꞊në bha "wɛ ‑ee? Kö "dhang ‑da ‑bha ‑wɔn ꞊në ꞊ya 'to kö ‑wa "gʋ̈.
HEB 6:9 "Kɛɛ 'kö 'zü maa‑ zë "dhʋ̈ ‑kɔ "ʋʋ ‑kɔ 'ö‑ 'gü, n "taɔngdë ‑nu, n 'dhang bho ‑sü ‑yö ka ‑zë ka "dhiʋ̈ 'kpakpadhö, a‑ 'wɔn ‑dɔ ꞊dhɛ zian ‑së 'ö dha ‑zian 'ka bha ꞊në 'ka‑ ‑ta.
HEB 6:10 Atanna bha pö 'aa‑ ‑bha. ‑A ‑wɔn 'gü, ‑a ‑zʋ 'yii 'dho bhɔ 'wɔn ‑së ‑nu 'ka‑ ‑kë ‑a ‑dhɔ ‑bha, ‑a ‑bha mɛ ‑nu ‑dhɛ, 'ö 'ka‑ zü bho "dhʋ̈ 'yi bha‑ 'ka 'ka ‑tun 'ka "dhʋ̈ ꞊dɛɛ bha‑ 'bha 'ka.
HEB 6:11 "Kɛɛ 'wɔn 'ö‑ ‑wɔn 'gü 'yö 'a‑ pö "dhʋ̈ bha, kë "dhʋ̈ kö ‑a ‑wɔn ‑pɛng 'ö ka ‑ta bha ꞊në 'ka‑ 'kun "gbɩɩ‑ kö 'ka‑ ‑gɔ ‑da 'plöö. Kë "dhʋ̈ kö ‑a 'dhɛ 'ö ka ‑zʋ 'dhö‑ 'gü bha ‑yö kë ka ꞊dhɛ "dhiʋ̈ ꞊mɔɔ ‑sü 'ka.
HEB 6:12 'Yaa n "piʋ̈ ꞊në‑ wo ꞊dhɛ "fia ‑yö ‑da ka ga 'gü Atanna ‑bha zian bha‑ ‑ta, "kɛɛ kö 'ka 'mɛ 'ö‑ ‑nu 'gü 'yaa ga ‑zʋ ‑yö ‑a ‑dhɛ ‑sü bha‑ 'ka, 'ö to‑ 'ka "dhʋ̈ 'ö zun‑ 'ka 'wɔn 'ö‑ "plüün bho‑ ‑nu ‑dhɛ bha‑ 'gü ‑wɔn kë ‑yi ‑bha bha ꞊në‑ ‑nu ‑ga.
HEB 6:13 "Plüün 'ö Atanna ‑ya bho Ablaamö ‑dhɛ yi 'bha 'ka bha, ‑yö kë‑ 'gü ‑sö ‑bhö, "kɛɛ ꞊dhɛ 'ö ‑kë ꞊dhɛ mɛ 'bha kö yöö kë 'kpii‑ kö ‑yö ziö yöö Atanna ‑mɛ ö ‑ta kö 'ö ‑sö ‑bhö 'tɔ 'gü 'yaa 'dhö bha, 'yö‑ ‑bhö ö ‑dɩ 'tɔ 'gü 'ö‑ pö:
HEB 6:14 «Mang Atanna ‑mɛ ma ꞊në 'a‑ pö, a ‑dho 'dhuë‑ kë i ‑bha, 'ö i bhang ‑nu 'wo ‑kë 'gbɛ ꞊dedewo.»
HEB 6:15 ꞊Dhɛ 'ö ꞊ya "plüün bha‑ bho "dhʋ̈ Ablaamö ‑dhɛ, ‑yö kë ö zuë" ‑kë ‑sɛa 'ö ö "yan to‑ 'gü ‑wɔn kë ‑sü ‑gɔ, 'ö to‑ 'ka "dhʋ̈ ö zun‑ 'ka yi 'ö Atanna ‑ya 'gü ‑wɔn ‑kë 'ka bha‑ ‑bha.
HEB 6:16 ‑Sö ‑nu 'ö mɛ "bhɩɩ‑ ‑nu ‑wa ‑bhö ꞊sië bha, ‑wa ‑bhö "dhʋ̈ kö ‑wo 'dhang ꞊në bho wo "dhiʋ̈, kö zaɔdhe 'ö 'wɔn 'bha ö mü‑ 'gü bha ‑yö yën, 'sa ‑a ‑bhö 'wo‑ wo "dhʋ̈ bha, ‑wa ‑bhö 'mɛ 'ö 'kpii‑ 'ö ‑ziö ‑a ‑nu ‑ta ꞊në‑ 'tɔ 'gü.
HEB 6:17 ‑A ‑kë "dhʋ̈ ‑sü bha‑ 'gü, ‑sö 'ö Atanna ‑ya ‑bhö 'pö "plüün 'ö‑ bho 'mɛ 'ö 'wɔn ‑së 'ö‑ ‑dhiang zë bha 'ö dho‑ kë‑ ‑nu ‑dhɛ bha‑ ‑wɔn 'gü bha ‑ya ‑kë "dhʋ̈ kö ‑wa 'wɔn ꞊në‑ dɔ ꞊dhɛ ö ‑wʋ bha 'yii 'dho 'go "gblʋʋ tongtongdhö.
HEB 6:18 'Sa ꞊ya kë "dhʋ̈ kö 'wɔn ꞊plɛ ꞊në Atanna 'yaa ꞊mɔɔ‑ ‑bha kö ‑yö ꞊sua kë‑ ‑wɔn 'gü, "ɛɛn kö‑ ‑wɔn ‑yö bho "gblʋʋ tongtongdhö bha. Yö ‑mü "plüün 'ö‑ bho bha waa‑ ‑sö 'ö‑ ‑bhö bha ꞊në‑ 'ka. ‑A ‑kë "dhʋ̈ ‑sü bha‑ 'gü, 'mɛ 'ö kwa ‑zë 'kwa Atanna 'sü kwa zü ‑gban 'gü 'ka bha, ‑a ‑dhɛa ‑bha ꞊dhɛ 'kwa kwa faan ꞊në‑ dɔ kö 'kwa 'to ‑kplü ‑sü 'ka 'pë 'ö‑ "plüün bho kwa ‑dhɛ 'ö kwa ‑zʋ 'dhö‑ 'gü bha‑ ‑bha.
HEB 6:19 'Sa "plüün 'ö‑ bho kwa ‑dhɛ "dhʋ̈ bha ꞊në kwa ‑gɔ ꞊dhɛ ‑piö kpö 'ö ‑kë "yitagɔ ‑bha 'ö ꞊waa‑ ‑zuö "yi ꞊wlöö 'ö "tɛɛ 'yaa‑ 'sü bha‑ 'dhö, 'yö 'wɔn "gbɩɩ‑ suu 'bha ‑bha 'bha 'yaa kwa bho‑ ‑bha zian ‑ta, ‑a ‑gɛn ‑mü ꞊dhɛ "plüün do 'ö "dhʋ̈ bha ꞊në kwa 'dhang bho ‑sü 'dhö‑ "dhiʋ̈ 'kpakpadhö ꞊dhɛ ‑a 'gü ‑wɔn ‑dho kë. Yöö do bha 'zü ꞊në‑ ‑kë 'yö Yesu ‑yö dho 'ö ‑da Atanna ‑dhɔkëgükɔ 'ö dhang‑ 'gü bha‑ 'gü, sɔ "pɛn ꞊taama ‑dhɛ 'ö‑ ‑dhɔkëdhɛ ꞊dede 'ka, 'ö "saabhomɛ 'kpii‑ doseng ꞊në‑ ‑da ‑dhɛ 'ka,
HEB 6:20 'ö Yesu Klisi 'ö Atanna ‑ya ‑ya kwa ‑bha "saabhomɛ 'kpii‑ 'ka ‑todhʋ̈ 'ka ꞊dhɛ Mɛɛsisedɛkö 'dhö bha ꞊yaa‑ zian "dhi "pʋ kwa ‑gɔ, 'ö ꞊ya ‑da mü 'nu kwa ‑bha ‑da 'gü bha‑ 'gü.
HEB 7:1 ‑A Mɛɛsisedɛkö 'ö "dhʋ̈ bha ‑yö ‑gun Atanna "yaandhe 'ö dhang‑ 'gü bha ꞊në‑ ‑bha "saabhomɛ 'ka, 'yö gun ‑gblüdë 'ka 'pödhɛ 'wo‑ Sadhɛmö ‑dhɛ ‑kë bha‑ 'gü. ꞊Dhɛ 'ö Ablaamö gun 'go sië ‑gblü 'ö‑ ꞊gɔɔn yi 'bha 'ka ‑gblüdë ‑nu 'ka, 'ö‑ ‑kɔ ‑yö ‑ziö ‑nu ‑gɔ bha‑ gɔɔndhɛ 'gü, 'yö Mɛɛsisedɛkö bha 'ö nu‑ ‑gɔ zian‑, 'yö 'dhuë‑ ‑kë ‑bha.
HEB 7:2 ꞊Dhɛ 'ö ꞊ya kë "dhʋ̈ 'yö Ablaamö ‑yö pë "pɛpɛ 'ö gun‑ ‑gɔ ꞊dhɛ ꞊naɔ 'dhö bha‑ ‑pɛ 'gü ‑kaɔng do, 'yö‑ ‑kaɔng do ‑naa nu‑ ‑dhɛ ꞊dhɛ ö ꞊slɔɔpë bha‑ 'nii‑ 'dhö. ‑A Mɛɛsisedɛkö ‑tɔ bha waa‑ pö "dhʋ̈ kö ‑wa ‑pö «‑gblüdë 'ö pö 'aa‑ këwɔn ‑bha», 'yö 'pö‑ 'ö gun‑ 'gü ‑gblüdë 'ka bha‑ 'tɔ 'wo‑ Sadhɛmö ‑kë bha, ꞊waa‑ pö "dhʋ̈ kö ‑wa ‑pö: «‑ya ‑dɩ 'flëë‑ 'gü ‑sü».
HEB 7:3 Mɛ 'bha 'yii‑ Mɛɛsisedɛkö bha‑ dë dɔ, mɛ 'bha 'yii‑ dhe dɔ kö yöö to‑ "bhɛma ‑nu ꞊në‑ bha. Mɛ 'bha 'yii‑ bhɔ ‑yi dɔ, mɛ 'bha 'yii‑ ga ‑yi dɔ. ‑Yö ꞊dhɛ Atanna ‑bha 'në ꞊në‑ 'dhö. ‑A ‑bha ‑kë "saabhomɛ 'kpii‑ 'ka ‑sü zü bho ‑yi 'yaa 'dhö, ‑a "dhiʋ̈ ‑ya ‑dhɛ 'yaa 'dhö.
HEB 7:4 Kaa ꞊dede ‑ka Mɛɛsisedɛkö bha‑ ꞊bhlëë ‑kë 'kpii‑ ‑kɔ ‑ga bha. 'Mɛ 'ö kwa 'ziʋ̈‑ Ablaamö ‑zë 'ö 'pë 'ö ‑yö ‑gblü "piʋ̈ ‑a 'nii‑ bho sië‑ ‑dhɛ bha ‑yö ka 'gü ꞊dhɛ kö mɛ 'dɛdɛ ꞊në bha ‑ee?
HEB 7:5 Dhevi bhang ‑nu 'ö Atanna ‑ya ‑nu ‑ya Izraɛdhö ‑mɛ ‑nu ‑bha "saabhomɛ 'ka ö ‑dhɛ bha, ‑yö ‑bɛn zë ‑sü 'ka‑ ‑bha 'tɔng‑ ‑nu 'gü ꞊dhɛ Izraɛdhö ‑mɛ ‑nu ꞊gban "pɛpɛ ‑wo wo ꞊slɔɔpë ‑nu 'nii‑ bho wo ꞊në‑ ‑nu ‑dhɛ. 'Sa ꞊ya kë "dhʋ̈ kö ‑wa bho sië wo dheebhang ‑nu 'ö wɛng‑ ‑nu 'wo Ablaamö suu 'gü ‑në ‑nu 'ka bha ꞊në‑ ‑nu ‑dhɛ "dhʋ̈ bha.
HEB 7:6 "Kɛɛ Mɛɛsisedɛkö 'kö Ablaamö ‑yö ö ꞊slɔɔ ‑pë ‑nu 'nii‑ bho‑ ‑dhɛ 'ö 'dhuë‑ ‑kë ‑bha "dhʋ̈ bha wɛng‑ ‑nu ‑a ‑nu suu ‑zian 'yaa gun do. 'Sa 'ö gun "dhʋ̈ kö Atanna ꞊ya "plüün ‑së bha‑ bho 'nu Ablaamö ‑zë ‑dhɛ.
HEB 7:7 "Kɛɛ 'sa ka‑ 'wɔn ‑dɔ 'kpakpadhö ꞊dhɛ 'mɛ 'kö‑ ‑duɛ 'yaa 'kpii‑ 'mɛ 'ö‑ ‑gɔ, 'yaa ꞊mɔɔ‑ ‑bha kö ‑yö 'dhuë‑ kë‑ ‑mɛ ‑bha.
HEB 7:8 ꞊Ya kë ꞊dhɛ kö 'kwa kwa "yan kpɔ 'wɔn bha‑ "piʋ̈ ‑së ꞊dede 'ka, Dhevi suu 'gü ‑në ‑nu 'wo "saabhomɛ ‑nu 'ka ꞊dɛɛ Izraɛdhö ‑sɛ 'gü, 'ö Izraɛdhö ‑mɛ ‑nu 'wo wo ꞊slɔɔpë ‑nu 'nii‑ bho sië‑ ‑nu ‑dhɛ bha ‑wo ‑ga. "Kɛɛ Ablaamö ‑bha ‑zë 'ö‑ bho 'mɛ 'ö‑ ‑dhɛ bha ‑yö ‑bɛn zë ‑sü 'ka ‑a ‑bu 'gü Atanna ‑wʋ 'gü ꞊dhɛ yö ‑zë 'yaa ga.
HEB 7:9 ꞊Ya kë "dhʋ̈ kö Dhevi 'ö‑ 'gü ‑në ‑nu 'wo pë 'nii‑ 'kun sië ꞊dɛɛ Izraɛdhö ‑mɛ ‑nu ‑gɔ bha ‑yö kë ö ꞊slɔɔpë ‑nu 'nii‑ ‑bho 'pö Mɛɛsisedɛkö ‑dhɛ yi 'ö nu‑ 'ka Ablaamö ‑gɔ zian‑ yi 'bha 'ka 'ö ö ꞊slɔɔpë ‑nu 'nii‑ bho‑ 'ka‑ ‑dhɛ bha‑ 'ka ꞊naa bha.
HEB 7:10 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'kö 'zü Ablaamö ꞊yaa‑ bho kö Dhevi 'yii bhɔ ꞊kö, "kɛɛ 'ö gun "dhʋ̈ kö ‑yö Ablaamö 'gü. ꞊Ya kë "dhʋ̈ kö ‑ya ‑bho ‑a ‑nu ꞊gban ꞊në‑ ‑bha bho 'gü bha.
HEB 7:11 'Sa Atanna ‑bha 'tɔng‑ ‑nu 'ö‑ dɔ Izraɛdhö ‑mɛ ‑nu ‑dhɛ bha‑ zü ‑yö ‑bho Dhevi waa‑ ö bhang ‑nu ‑a ‑nu ‑ya 'ö‑ wo "saabhomɛ 'ka ö ‑gɔ 'kɔɔ dho bha ꞊në‑ ‑ta. ‑A ‑kë "dhʋ̈ ‑sü bha‑ 'gü, ꞊ya kë 'nu ꞊dhɛ Dhevi waa‑ ö gbö Aadhɔn ‑nu ‑a ‑nu ‑bha "saa‑ bho ‑sü 'ö Atanna ‑gɔ 'kɔɔdhö bha ‑yö mɛbhɩɩdhe ‑kë ꞊dhɛ ‑kɔ 'ö Atanna "piʋ̈ ꞊dhɛ ‑yö kë‑ 'ka ‑a 'dhö 'nu, kö pö 'a 'dho kë‑ ‑bha, kö "saabhomɛ ‑dee 'ö (Klisi) 'ka 'ö ꞊dhɛ Mɛɛsisedɛkö 'dhö bha‑ nu ‑wɔn 'yii 'dho kë. "Kɛɛ yö ꞊në 'yii kë "dhʋ̈ 'yö "saabhomɛ ‑dee ‑wɔn 'dhö ‑da.
HEB 7:12 'Sa "saabhomɛ ‑dee 'bha ‑zë ꞊ya nu 'pö, ‑kaa pö kö 'tɔng‑ ‑nu 'wo 'wɔn bha‑ 'gü bha woo slëë‑ ꞊naa bha.
HEB 7:13 ‑A ‑kë "dhʋ̈ ‑sü bha‑ 'gü, kwa Dëmɛ 'wo‑ zaɔn ‑zɔn Mɛɛsisedɛkö 'ka "dhʋ̈ bha ‑yö ‑gun 'kɔdhi "wɛɛ 'bha 'ö 'gü ‑në do ‑zian 'yii "saa‑ ‑blɛɛsü bho 'nu ꞊kö ‑gwë "klʋ 'wo "saa‑ bho‑ ‑ta Atanna ‑gɔ 'kɔɔdhö bha‑ ‑ta do ꞊në‑ 'ka.
HEB 7:14 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ ꞊gban ‑mɛ ꞊gban ‑wa 'wɔn dɔ ꞊dhɛ ‑yö ‑bhɔ Zuda suu ꞊në‑ 'gü. 'Sa 'mɛ 'kö 'wo bha ‑dhɛ 'bha 'kö mɛ yöö‑ yö 'sëëdhɛ 'ö Moizö ‑ya ‑bɛn zë bha‑ 'gü ꞊dhɛ ‑wo ‑gun "saabhomɛ 'ka 'yaa 'dhö.
HEB 7:15 'Wɔn 'ö dho 'wɔn bha‑ ‑ta "pʋ kwa ‑dhɛ 'zü 'kpakpadhö 'ö 'kwa‑ 'gü ma 'yö ‑mü "saabhomɛ ‑dee 'bha 'ö ꞊dhɛ Mɛɛsisedɛkö 'dhö ‑a ‑ya ‑sü bha ꞊në‑ 'ka.
HEB 7:16 ‑A ‑bha ‑ya ‑sü bha 'yii kë mɛ "bhɩɩ‑ ‑nu 'wo ga bha‑ ‑nu ‑bha 'tɔng‑ faan 'ka, ‑yö ‑kë "saabhomɛ 'kpii‑ 'ka "dhʋ̈ 'gügbɩɩdhɛ 'ö ꞊sii 'ö 'yaa yën 'ö gun‑ 'gü bha‑ 'gü bha ꞊në‑ 'saa‑ 'gü.
HEB 7:17 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑wʋ ‑ya ‑pö ‑a ‑bu 'gü 'ö‑ pö ꞊dhɛ: «I ‑dho kë "saabhomɛ 'ka "sɛ 'tuʋ̈‑ 'ka ꞊dhɛ Mɛɛsisedɛkö 'dhö.»
HEB 7:18 ꞊Ya kë "dhʋ̈ kö 'tɔng‑ ‑blɛɛsü 'ö ‑gban "saabhomɛ ‑nu ‑bha 'ö gun bha ‑yö ‑bho ‑bha "sɩ 'ö 'yii kë‑ ‑dhɛ, 'ö‑ ‑zun "dhiʋ̈ ‑bhlɔɔ 'yii kë bha ꞊në‑ ‑wɔn 'gü.
HEB 7:19 ‑A ‑gɛn ‑mü ꞊dhɛ Moizö ‑bha 'tɔng‑ ‑nu bha 'wii ka Atanna dhɔɔbhaa kë ‑sü bha‑ ‑gɔ ‑da 'plöö. "Kɛɛ ‑zʋgɔndhɛwɔn ‑dee 'bha 'ö‑ fië‑ 'dhö 'dhö Moizö ‑bha 'tɔng‑ ‑nu ‑bha bha ꞊në ꞊ya zun kwa ‑dhɛ zang ‑ta ꞊dɛɛ. Yö ‑mü Yesu Klisi ꞊në‑ 'ka. ‑Gasitɛ yö ꞊në‑ ‑bha 'yö 'kwa ꞊yɔɔn sië Atanna "sɔɔ, kwa ‑zʋ ‑ya yö ꞊në‑ 'gü.
HEB 7:20 ꞊Ya 'go mü 'zü, ‑sö 'ö Atanna ‑ya ‑bhö bha ‑yö mü. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ ‑kpɛa ‑nu ‑bha ‑zë mɛ 'bha 'yii ‑sö ‑bhö ‑a ‑nu ‑ya ‑sü 'gü.
HEB 7:21 "Kɛɛ Yesu ‑zë ‑ya "saabhomɛ 'ka ‑sü ‑zë Atanna ‑yö ‑sö ‑bhö 'ö‑ pö‑ ‑dhɛ: «Mang Atanna ‑mɛ ma ꞊në 'a ‑sö ‑bhö bha, 'mii 'dho 'go n ‑wʋ ‑ta tongtongdhö. A‑ ‑pö ꞊dhɛ i ‑dho 'to "saabhomɛ 'ka "dhʋ̈ "sɛ 'tuʋ̈‑ 'ka.»
HEB 7:22 ‑Sö 'ö Atanna ‑ya ‑bhö "dhʋ̈ bha‑ ‑wɔn 'gü, Yesu bha ꞊në ‑mlɛɛ ꞊bhlëësü 'dhɛ 'ö ‑da Atanna waa‑ mɛ "bhɩɩ‑ ‑nu ‑a ‑nu ꞊zinng 'gü bha 'ö ꞊slɔɔ‑ 'saa‑ 'gü.
HEB 7:23 'Ö go mü 'zü, "saabhomɛ ‑nu bha‑ mɛ ‑blɛɛsü ‑nu bha, gun 'wo‑ wo 'gbɛ bha‑ 'klɔɔ‑ ‑mü ꞊dhɛ wo ‑zë ‑wo ‑gun ga sië, 'ö‑ ‑wɔn 'gü 'waa ꞊mɔɔ‑ ‑bha kö ‑wo 'dho woo‑ "saa‑ bho ‑yë bha‑ 'ka "dhiʋ̈ ‑kpɛawo.
HEB 7:24 "Kɛɛ Yesu Klisi ‑bha ‑zë 'yaa "dhʋ̈. Yö ‑zë 'yaa ga, ‑a ‑wɔn 'gü ‑a ‑bha ‑kë "saabhomɛ 'ka ‑sü bha 'waa ꞊mɔɔ‑ ‑bha kö ‑wo mɛ ‑dee dɔ‑ "gblʋʋ 'gü.
HEB 7:25 'Wɔn 'ö‑ ‑wɔn 'gü, 'yö mɛ "ʋʋ mɛ 'ö ꞊yɔɔn Atanna "sɔɔ ‑a 'saa‑ 'gü 'ö ꞊mɔɔ‑ ‑bha 'ö‑ ‑nu dha "pɛɛpɛdhö, 'ö‑ ‑bha ‑a ‑nu dha ‑sü "dhiʋ̈todhɛ 'yaa 'dhö bha 'yö bha. ‑A ‑gɛn ‑mü ꞊dhɛ ‑yö "yaan "tʋ̈ng ꞊gban 'gü, ‑yö ‑bhɛa Atanna ‑dhɛ ‑a ‑nu ‑wɔn 'gü ‑kpɛawo.
HEB 7:26 ‑A ‑kë "dhʋ̈ ‑sü bha‑ 'gü, kö Yesu ꞊në "saabhomɛ 'kpii‑ 'ö kwa ‑mawɔn ‑yö gun‑ ‑bha, 'ö "slʋ̈ʋ̈slʋ̈, 'ö pö 'aa‑ ‑bha, 'ö 'yii 'wɔn yaa kë tongtongdhö, 'ö Atanna ‑ya ‑kan 'wɔnyaakëmɛ ‑nu ‑bha, 'ö‑ sü 'ö‑ ‑ya ‑dhɛ ꞊bhlëësü 'ö dhang‑ ‑ta "dhʋ̈ng 'gü bha‑ 'gü bha‑ 'ka.
HEB 7:27 ‑A ‑gɛn ‑mü ꞊dhɛ yö ꞊në 'yaa ꞊dhɛ "saabhomɛ 'kpii‑ ‑kpɛa 'wo to ‑a ‑nu 'dhö kö ‑wo wo ‑dɩ ‑bha 'wɔn yaa ꞊në‑ ‑bha "saa‑ bho ꞊kö ‑blɛɛsü yi ꞊gban 'ka kö ‑wo gun ‑na "sɛgümɛ ‑nu ‑bha bho. "Kɛɛ ‑a ‑bha ‑zë "saa‑ do 'ö‑ bho "dhʋ̈ 'yi bha‑ 'ka ö ‑dɩ nu ‑sü 'ka bha ꞊në to‑ ‑bha.
HEB 7:28 ‑A pö 'a‑ wo 'zü "dhʋ̈ bha‑ 'klɔɔ‑ ‑mü ꞊dhɛ mɛ "pɛpɛ 'kö 'wo ‑kë "saabhomɛ 'kpii‑ 'ka Moizö ‑bha 'tɔng‑ "gblʋʋ "piʋ̈ bha‑ 'bha këwɔn ‑nu 'wii Atanna ‑zʋ 'kun ‑së 'ka, "kɛɛ Yesu 'ö ‑kë Atanna Gbö 'ka, 'ö ‑sö ‑bhö ‑a ‑ya ‑sü 'gü kö ꞊ya bo 'tɔng‑ ‑zë dɔ ‑sü 'ka 'nu bha ꞊në pö 'aa‑ ‑bha ‑a wëëdhö. Yö ꞊në dho 'to "slʋ̈ʋ̈slʋ̈ 'ka "dhʋ̈ "sɛ 'tuʋ̈‑ 'ka.
HEB 8:1 'Wɔn "pɛpɛ 'a‑ pö sië bha‑ ‑gɔ 'ö‑ 'gü yö ‑mü ꞊dhɛ "saabhomɛ 'kpii‑ 'ö‑ suu 'dhö "dhʋ̈ bha ꞊në kwa ‑gɔ. Yö ꞊në ‑ya ‑sü 'ka ‑yɛa ꞊bhlëësü ö Atanna 'ö‑ ‑bha 'gügbɩɩdhɛ ‑dhiang 'yaa zë bha‑ ‑kɔ ‑së 'gü ‑dhɛ 'ö‑ ‑bha ‑gblüdëdhɛ ‑gbloo "sɔɔ bha‑ 'gü dhang‑ 'gü.
HEB 8:2 Yö ꞊në "saabhomɛ 'kpii‑ këwɔn ‑nu bha‑ kë sië Dëmɛ ‑yɛa ꞊dede 'ö‑ ‑dhɔkëgükɔ 'gü dhang‑ 'gü 'ö yöö ꞊dede ꞊në‑ ‑pë ‑kë, 'ö mɛ "bhɩɩ‑ ‑kɔ 'yii ‑da ‑a ‑yë 'gü ꞊dhɛ Dhevi bhang ‑nu ‑bha bha‑ 'dhö bha‑ 'gü.
HEB 8:3 ꞊Dhɛ ‑kɔ do 'ö "saabhomɛ 'kpii‑ 'wo Atanna ‑gɔ 'kɔɔdhö "kpʋngtaadhɛ ya‑ 'gü, 'wo pë ‑nu 'wo nu‑ 'ka‑ ‑gɔ 'kɔɔdhö waa‑ "saapë ‑nu ꞊në "dhiʋ̈ ꞊loo‑ 'ka ‑a 'dhö, ‑a ‑dhɛa ‑bha 'pö ꞊dhɛ kwa ‑bha bha pë 'bha ‑yö ꞊slɔɔ kö ‑ya "dhiʋ̈ ꞊loo 'pö Atanna ‑bha.
HEB 8:4 ꞊Ya kë 'nu ꞊dhɛ ‑yö ‑to "kpʋng ꞊taa yö kö 'yii 'dho dhang‑ 'gü, kö 'yii 'dho kë ‑zianwo 'nu "saabhomɛ 'ka. ‑A ‑gɛn ‑mü ꞊dhɛ kö mɛ 'wo "kpʋng ꞊taa yö 'ö Zuifö ‑nu ‑bha 'tɔng‑ ‑ya ‑nu ‑ya, 'ö 'wo yë do bha‑ kë sië bha ‑wo ‑dhö.
HEB 8:5 'Sa ‑a 'dhɛ 'kö 'mɛ 'wo "kpʋng ꞊taa yö 'wo‑ kë sië bha ‑ya 'dhɛ 'ö dhang‑ 'gü ‑a "blɛɛn‑ ꞊në‑ 'ka. ‑A ‑gɛn ‑mü ꞊dhɛ ‑wa ‑kë ꞊dhɛ ‑kɔ do 'wo‑ ‑kë 'ka dhang‑ 'gü ꞊në‑ 'dhö ꞊dhɛ ‑kɔ do 'ö Moizö ‑bha gun‑ 'ka ‑a 'dhö. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'ö gun kö Moizö yöö Atanna zü ‑ya 'gü ‑kɔ 'ö gun sɔ 'kɔ 'ka Izraɛdhö ‑mɛ ‑nu kpö 'gü bha‑ dɔ, 'yö Atanna ‑ya pö‑ ‑dhɛ: «Moizö, ‑bhö ‑a kë ‑së kö 'kɔ 'ö bhii‑ dɔ bha ‑yö kë ꞊dhɛ ‑kɔ 'a‑ ‑zɔn 'ka i ‑dhɛ ‑tɔn ꞊gbin‑ bha ꞊në‑ 'dhö "kpʋ̈üdhö.»
HEB 8:6 "Kɛɛ dɔ 'dhɛ 'kwa‑ wo ꞊dɛɛ ya, ‑duɛ bha‑ 'dhɛ 'ö Atanna ‑ya nu Yesu Klisi ‑zë ‑dhɛ bha ‑yö 'kpii‑ 'ö ‑ziö 'mɛ kö 'wo bha wo ‑zë ‑a ‑nu ꞊gban ‑bha ‑ta. ‑A ‑gɛn ‑mü ꞊dhɛ ‑mlɛɛ ‑dee 'dhɛ 'ö‑ ‑da kwa ꞊zinng 'gü ‑a 'saa‑ 'gü bha‑ ꞊bhlëë ‑yö 'kpii‑, 'yö ‑ya mü 'zü 'yö Atanna ‑yö "plüün ‑sɛngbɔ ‑nu 'wo ‑ziö Moizö ‑bha 'tɔng‑ ‑nu ‑ta bha‑ bho kwa ‑dhɛ.
HEB 8:7 ꞊Ya kë 'nu ꞊dhɛ ‑mlɛɛ ‑blɛɛsü 'ö Atanna ‑ya ‑kë kwa 'ka 'ö bɔ‑ 'ka Moizö ‑bha 'tɔng‑ ‑nu ‑ta bha‑ du 'yii 'to‑ ‑bha, kö 'yii 'dho‑ ‑dee 'bha ‑da kwa ꞊zinng 'gü 'nu ‑deewo.
HEB 8:8 "Kɛɛ yö ꞊në 'yii kë "dhʋ̈ 'yö Atanna ‑yö dhiang zë ö ‑bha mɛ ‑nu ‑dhɛ 'ö ‑gɔ 'sëëdhɛ 'gü 'ö‑ pö: «A ‑dho ‑mlɛɛ ‑dee 'bha ‑da yaa Zuda ‑gɔ 'kɔɔmɛ ‑nu waa‑ Izraɛdhö ‑mɛ ‑nu ‑kpɛa 'wo to bha yi ꞊zinng 'gü "tʋ̈ng 'bha 'gü, ‑a "tʋ̈ng ‑yö nu sië.
HEB 8:9 ‑Mlɛɛ 'dhɛ 'ö maa‑ kë‑ ‑nu 'ka bha 'yii 'dho kë ꞊dhɛ ‑a 'dhɛ 'a‑ ‑kë ‑nu "bhɛma ‑nu 'ka yi 'bha 'ka, 'ö 'a‑ ‑nu bho ꞊dhuëngdhɛ 'gü Ezitö ‑sɛ 'gü bha‑ 'dhö. ‑A ‑gɛn ‑mü ꞊dhɛ ‑mlɛɛ ‑blɛɛsü 'ö gun yi ꞊zinng 'gü bha, 'wii‑ 'gü ‑ta 'sü. Yö ꞊në‑ ‑wɔn 'gü 'yö mang ‑dɩ 'pö n "tʋ 'yii kë‑ ‑nu ‑wɔn ‑bha.
HEB 8:10 "Kɛɛ a ‑dho ‑mlɛɛ ‑dee 'bha ‑da yaa Izraɛdhö ‑mɛ ‑nu yi ꞊zinng 'gü. ꞊Ya kë ꞊dhɛ "tʋ̈ng 'dhɛ 'a "wɩ sië‑ 'ka bha ꞊ya ꞊loo, a ‑dho ma 'tɔng‑ ‑nu bha‑ ‑nu ‑da ‑a ‑nu 'nii‑ 'gü, 'ö 'a‑ ‑bɛn zë‑ ‑nu zuë" ‑bha. A ‑dho kë‑ ‑nu ‑bha Atanna 'ka, 'ö 'wo ‑kë 'pö n ‑bha 'ka.
HEB 8:11 ‑A "tʋ̈ng bha ꞊ya ꞊loo, mɛ 'bha 'yii 'dho‑ pö 'ö ö "tɛado ꞊klang kë, "ɛɛn mɛ 'bha 'yii 'dho‑ pö ö dheebhang ‑dhɛ ꞊dhɛ: ‹‑Bhö kwa Dëmɛ dhɔɔbhaawɔn ‑nu draan‑ kö 'i kwa Dëmɛ dɔ›; ‑A ‑gɛn ‑mü ꞊dhɛ ‑a 'në 'sɛɛnnë ‑nu oo, ‑a ‑mɛ "gblʋ̈gblʋ̈ ‑nu oo, ‑a ‑nu ꞊gban ‑dho n dɔ.
HEB 8:12 ‑Da ‑nu 'wo‑ wo n "dhiʋ̈ bha, a ‑dho ‑a ꞊gban ‑mawɔn 'to, 'ö n ‑zʋ ‑yö bhɔ‑ ‑nu këwɔn yaa ‑nu bha‑ 'ka.»
HEB 8:13 ꞊Ya kë ꞊dhɛ Atanna ꞊ya ‑mlɛɛ ‑dee 'bha ‑da kwa ꞊zinng 'gü ‑wɔn ‑dhiang zë ꞊dhɛ ‑kɔ bha‑ 'dhö bha ‑oo, kö‑ ‑blɛɛsü bha 'yii kë zii ꞊naa bha ‑ee? 'Sa 'wɔn 'dhɛ 'kö ꞊ya kë zii kö‑ ꞊dhɛng ‑wɔn ꞊në ꞊ya 'to.
HEB 9:1 ‑Mlɛɛ ‑blɛɛsü 'ö gun Atanna waa Izraɛdhö ‑mɛ ‑nu ‑a ‑nu ꞊zinng 'gü "dhʋ̈ bha, 'wluu‑ ‑nu 'wo‑ ‑ya 'ö 'wo gun "saa‑ bho sië Atanna "dhiʋ̈ ‑a ‑bha ‑yö ‑gun, 'yö ‑dhɛ 'ö mɛ "bhɩɩ‑ ‑nu ‑wa ‑pë ‑kë ‑a ‑dhɔkëdhɛ 'ka 'ö gun mü.
HEB 9:2 ‑Dhɛ 'ö "dhʋ̈ bha sɔkɔ 'ö gun 'mü ‑yö ‑gun "pɛ ‑sü 'ka 'ö 'gü 'kɔɔdhö sɔ 'ka ‑dhɛ ꞊plɛ ꞊në‑ 'gü. ‑A ‑blɛɛsü bha 'yö 'wo‑ ‑dhɛ Atanna ‑dhɔkë ‑dhɛ. ‑Dhangbha 'wo gun‑ dɔ sië‑ ‑gɔ 'kɔɔdhö bha oo, ‑tabɛdhi waa‑ 'bluu‑ 'wo gun‑ ‑dhɔkë sië‑ 'ka bha, ‑wo ‑gun ‑dhɛ 'dhɛ bha ꞊në‑ 'gü. 'Yö ‑dhɛ ꞊plɛ ‑naa 'ö gun 'kɔɔdhö ꞊yën bha 'wo‑ ‑dhɛ ‑dhɛ Atanna ‑dhɔkë ‑dhɛ ꞊dede.
HEB 9:4 "Saa‑ ‑bho ‑ta ‑pë 'wo‑ ‑pë ‑kë 'ö‑ ꞊gban gun "sënng 'ka, 'ö 'wo gun ‑dhasiklɔɔ "gʋ̈ sië‑ ‑ta bha oo, ꞊gbëë 'ö‑ ‑nu ‑zʋ ‑da ‑mlɛɛ bha‑ ‑ta 'ö "sënng ‑yö gun‑ 'pö‑ ‑bha bha, ‑wo ‑gun ‑dhɛ 'dhɛ bha ꞊në‑ 'gü. 'Yö 'pë 'ö kwa "bhɛma ‑nu ‑wa ‑bhö yi 'bha 'ka "tʋng ‑ta 'wo‑ manö ‑kë bha‑ 'bha‑ gun pë "fië 'ö‑ 'gü 'ö‑ ꞊gban gun "sënng 'ka bha oo, "dhü 'ö Aadhɔn gun‑ 'kun sië ö ꞊kwɛɛ‑ 'ö ka ö "bin ‑ya yi 'bha 'ka bha waa‑ ‑gwë "pɛn ‑nu 'ö ‑mlɛɛ bha‑ 'gü 'tɔng‑ ‑nu 'wo gun ‑bɛn zë ‑sü 'ka‑ ‑ta bha 'wo gun ꞊gbëë bha‑ 'gü.
HEB 9:5 'Yö 'wo Atanna ‑bha "kië ‑nu 'wo‑ ‑zɔn ꞊dhɛ ‑yö ‑dhɛ bha‑ 'gü bha‑ "blɛɛn‑ ‑kë ꞊gbëë bha‑ ‑ta "dhʋ̈ng 'gü. 'Yö 'wo‑ gban "dhiʋ̈ ‑pʋ ‑dhɛ 'dhɛ 'ö Atanna ‑yö mɛ ‑mawɔn to‑ ‑bha bha‑ ‑ta. "Kɛɛ 'wɔn 'dhɛ ‑nu 'kö 'wo bha‑ ‑nu ‑bho 'ko ‑ta "tʋ̈ng 'yaa kë ꞊ni.
HEB 9:6 Pë ‑nu bha‑ ‑nu ‑ya ‑kɔ 'wo gun ‑ya sië‑ 'ka Atanna ‑gɔ 'kɔɔdhö 'yö bha. 'Yö "saabhomɛ ‑nu 'wo gun ‑da sië sɔkɔ bha‑ 'gü ‑dhɛ ‑blɛɛsü bha‑ 'gü yi ꞊gban "pɛpɛ 'ka, 'yö 'wo wo ‑bha "saabhoyë bha‑ ‑kë.
HEB 9:7 'Yö‑ 'gü ‑dhɛ ꞊plɛ ‑naa 'ö 'kɔɔdhö ꞊yën bha "saabhomɛ 'kpii‑ bha yöö do ꞊në ‑da mü ‑kwɛ ‑bha 'do 'do, wü 'ö "saa‑ bho‑ 'ka Atanna ‑dhɛ ö ‑dɩ ‑bha 'wɔn yaa ‑nu waa‑ "sɛgümɛ ‑nu ꞊gban "pɛpɛ ‑bha ‑nu 'wo‑ ‑kë wo tii ‑bha ‑a ‑wɔn 'gü bha‑ ꞊yɔɔn bha‑ 'ka.
HEB 9:8 ‑Kɔ 'ö Atanna ‑bha 'Nii‑ "slʋ̈ʋ̈slʋ̈ ‑ya ‑zɔn 'ka kwa ‑dhɛ ꞊dhɛ kwa "yan 'dhö ‑tun ‑dhɔkë 'gü ‑kɔ ‑blɛɛsü 'kö bha‑ ‑bha, kö zian 'ö dho‑ ‑dhɔkë ‑dhɛ ꞊dede 'gü 'yii "pʋ ꞊kö bha 'yö bha.
HEB 9:9 'Sa 'wɔn 'dhɛ 'kö bha ‑yö ‑gun 'wɔn 'dhɛ 'kwa‑ ‑dhiang zë sië ka ‑dhɛ ꞊dɛɛ ya ꞊në‑ zɔn 'ka 'ka. Kë "dhʋ̈ kö 'kwa‑ 'wɔn dɔ ꞊dhɛ ‑tuʋ̈pë ‑nu waa‑ pë "wɛɛdhɛ ‑nu 'wo "saa‑ bho‑ 'ka ꞊sië Atanna ‑dhɛ bha‑ 'bha 'yaa ꞊mɔɔ‑ ‑bha kö ‑yö bɔn bho mɛ ‑bha ‑todhʋ̈ 'ka.
HEB 9:10 ‑A ‑gɛn ‑mü ꞊dhɛ "saa‑ ‑nu 'wo‑ bho "dhʋ̈ bha ‑wa ‑bho ‑bhöpë ‑nu oo, müpë ‑nu waa‑ ‑kë "slʋ̈ʋ̈slʋ̈ ‑zu bho ‑kɔ suu 'gbɛ ꞊në‑ 'ka "kpʋng ꞊taa 'dhu 'gü. Kë "dhʋ̈ kö "tʋ̈ng 'ö Atanna dho‑ ꞊gban "pɛpɛ "gla‑ 'ka bha ‑yö ꞊loo.
HEB 9:11 "Kɛɛ Klisi ‑zë ‑bha kë 'ö‑ wo "saabhomɛ 'kpii‑ 'ka bha, ‑yö ‑kë 'ka "dhʋ̈ "tʋ̈ng 'kwa dɔ‑ 'ka ya ꞊në‑ 'gü. Kë "dhʋ̈ kö 'ö kwaa‑ Atanna ‑nu kwa ‑kɔ 'wü 'koo ꞊dedewo "pɛɛpɛdhö. ‑A ‑wɔn 'gü, ‑a ‑bha "saa‑ ‑bho 'gü ‑kɔ 'ö ‑da 'gü bha‑ ꞊bhlëë ‑kë 'kpii‑ ‑kɔ ‑dhiang 'yaa zë, yöö do bha pö 'aa‑ ‑bha. Mɛ "bhɩɩ‑ ‑nu 'wii yö ‑zë dɔ. ꞊Ya kë "dhʋ̈ kö "kpʋngtaapë 'yaa ‑mü.
HEB 9:12 Klisi ‑bha ‑da ‑kɔ do 'ö‑ wo Atanna ‑dhɔkë ‑dhɛ ꞊dede bha‑ 'gü 'ö‑ 'bha 'yaa‑ "dhiʋ̈ "ɛɛn 'ö‑ 'bha 'yaa‑ ꞊taama 'zü bha, 'yii dho mü ‑bhʋ ꞊yɔɔn waa‑ ‑dunë ꞊yɔɔn 'ka ꞊dhɛ "saabhomɛ ‑blɛɛsü ‑nu ‑bha bha‑ 'dhö, ‑yö ‑da mü ö ‑dɩ ꞊yɔɔn ꞊në‑ 'ka, 'yö‑ ‑bha 'saa‑ "dhiʋ̈ "wɩ ‑sü bha Atanna ‑yö kwa ‑mawɔn to‑ ‑wɔn 'gü 'yö kwa gba ꞊sii 'ö 'yaa yën ‑a 'ka.
HEB 9:13 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ "sanni ‑du gɔn ꞊yɔɔn ‑nu, "ɛɛn ‑bhʋgɔn ꞊yɔɔn ‑nu, "ɛɛn ‑du ‑dhee ‑nu 'wo‑ ‑gʋ̈ 'ö 'wo‑ "yʋʋ "yi bho 'wo‑ ꞊wɛnng 'mɛ 'ö bian 'dhö‑ ‑nu ‑bha ‑a ‑nu ‑ta kö ‑wo kë "slʋ̈ʋ̈slʋ̈ ꞊dhɛ ‑kɔ 'ö‑ ‑nu ‑bha 'tɔng‑ ‑ya pö‑ 'ka ‑a 'dhö ‑a "dhiʋ̈ ‑yö "wɩ, kö Atanna ‑ya ‑nu ‑ma ‑wɔn 'to bha ‑oo,
HEB 9:14 'yö Klisi ꞊yɔɔn ‑zë ꞊wɛ? "Kɛɛ kö yö ꞊në yö ‑zë 'ö ö ‑dɩ nu "saapë 'ö pö 'aa‑ ‑bha ‑a 'ka Atanna ‑dhɛ 'Nii‑ "slʋ̈ʋ̈slʋ̈ 'ö 'yaa ga tongtongdhö 'ö Atanna ‑ya ‑ya 'gü bha‑ faan 'ka. ‑A ꞊yɔɔn bha ‑yö ‑mɔɔ ‑bha 'ö kwa ‑zu "wlaawɔn ‑nu 'kwa‑ ‑kë bha‑ ‑wɔn 'gü, 'ö 'kwa ‑kë "puu Atanna wëëdhö, 'ö kwa ‑zʋ 'yaa ‑bö ‑a ‑nu ‑wɔn ‑ta 'zü. Kë "dhʋ̈ kö 'kwa Atanna "yaandhe bha ꞊në‑ ‑dhɔkë.
HEB 9:15 'Wɔn 'ö‑ ‑wɔn 'gü, 'yö Klisi ꞊në ‑mlɛɛ ‑dee 'ö ‑da kwaa‑ Atanna ‑nu kwa ꞊zinng 'gü bha‑ ‑da ‑mɛ 'ka bha 'yö bha. Kë "dhʋ̈ kö 'mɛ 'ö‑ ‑nu ‑dhɛ kö ‑wo kë ö ‑bha 'ka bha ‑wo 'wɔn ‑së 'ö‑ "plüün bho‑ ‑nu ‑dhɛ 'ö‑ "dhiʋ̈todhɛ 'yaa 'dhö bha‑ ꞊slɔɔ. ‑A ꞊slɔɔ 'wo‑ wo "dhʋ̈ bha ‑wa ‑wo 'mɛ 'ö ga‑ ‑nu ‑wɔn 'gü, kë "dhʋ̈ kö 'ö‑ ‑nu ‑gɔ ‑ta 'dhɔ Atanna ‑gɔ 'wɔn yaa ‑nu 'wo‑ ‑kë kö ‑wo ‑tun ‑mlɛɛ zii bha‑ 'gü bha ꞊në‑ 'saa‑ 'gü.
HEB 9:16 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'waa mɛ 'bha 'kɛan‑ 'gü ‑dhiang zë kö‑ ‑mɛ 'yii ga.
HEB 9:17 'Kö 'zü‑ ‑mɛ ꞊ya 'to "yaan ꞊ya ö 'kɛan‑ ‑gblü ‑kɔ ꞊gban pö, "kɛɛ ‑a ‑mɛ ꞊ya ga ꞊në‑ wo 'yö ꞊bhlëë ‑yö ‑kë 'kɛan‑ 'gü ‑dhiang ‑bha. 'Ö ‑tun ‑zë bho "yaan ꞊bhlëë 'yaa kë‑ ‑bha.
HEB 9:18 'Wɔn 'ö‑ ‑wɔn 'gü, 'yö ‑mlɛɛ ‑blɛɛsü ‑zian 'ö Atanna ‑ya ‑kë kwa 'ka bha‑ zü 'yii bho "wɛɛwɛɛ kö wü 'bha ꞊yɔɔn 'yii ꞊wɛnng bha 'yö bha.
HEB 9:19 ‑A ‑gɛn ‑mü ꞊dhɛ ꞊dhɛ 'ö Moizö ꞊ya ö bo ‑ziö Atanna ‑bha 'tɔng‑ ‑nu 'ö‑ ‑bɛn zë Izraɛdhö ‑mɛ ‑nu ‑dhɛ yi 'bha 'ka bha‑ 'gü ‑sü 'ka‑ ‑nu ‑dhɛ ꞊dhɛ ‑kɔ 'ö‑ pö‑ 'ka ‑a 'dhö, 'yö ‑du 'në ꞊yɔɔn waa‑ ‑bhʋgɔn ꞊yɔɔn waa‑ "yi ‑a ‑nu sü, 'yö "dhü 'bha 'wo‑ ‑dhɛ izɔpö, ('ö‑ "dhɛ ‑yö bhɔ gënng "dhɛ ‑bha) bha‑ kwɛɛ" do sü, 'yö waa wü kaa‑ 'ö ꞊waa‑ kë ‑zaɔndhö ‑a ‑nu ‑da 'ko "piʋ̈, 'yö‑ ‑da ꞊yɔɔn bha‑ ꞊bhaa, 'yö‑ ‑fɛnfɛn ‑kë Atanna ‑bha 'tɔng‑ ‑nu bha 'wo gun ‑bɛn zë ‑sü 'ka 'sëëdhɛ 'ö‑ 'gü bha‑ ‑nu ‑ta, 'yö dho 'yö‑ 'bha ꞊wɛnng Izraɛdhö ‑mɛ ‑nu bha‑ ‑nu ‑ta ꞊dhɛ ‑kɔ do bha‑ 'dhö kö ‑ya pö sië:
HEB 9:20 «‑Mlɛɛ 'ö Atanna ‑ya ‑da kɛng‑ ‑nu ka ꞊zinng 'gü bha, ‑a zü ‑bho ‑ta ‑pë ꞊në ꞊yɔɔn 'a‑ ꞊wɛnng sië ka ‑ta bha‑ 'ka.»
HEB 9:21 'Yö dho 'ö Atanna ‑dhɔkëgükɔ 'ö sɔ 'ka, ('ö 'tɔng‑ ꞊gbëë 'dhö‑ 'gü) bha‑ ‑bha ‑kë "dhʋ̈ waa‑ 'gü ‑pë ꞊gban "pɛpɛ 'dhö.
HEB 9:22 ‑A ‑kë "dhʋ̈ ‑sü bha‑ 'gü, mɛ ꞊ya mɛ "yan kpɔ‑ "piʋ̈, mɛ ‑ya 'wɔn ‑dɔ Atanna ‑bha 'tɔng‑ ‑nu ‑bha ꞊dhɛ pë "pɛpɛ 'wo 'bɔn bho‑ 'ka mɛ ‑bha bha, ‑wa 'kpii‑ ‑dhɛ ꞊gban ‑bho ꞊yɔɔn ꞊në‑ 'ka. ꞊Ya kë "dhʋ̈ kö Atanna 'yaa 'wɔn yaa ‑zë 'bha ‑mawɔn 'to "wɛɛwɛɛ kö pë 'bha ꞊yɔɔn 'yii ꞊wɛnng.
HEB 9:23 'Bɔn ‑bho pë ‑nu 'wo "kpʋng ꞊taa yö‑ ‑nu ‑bha ‑kɔ ‑nu 'wo gun yi 'bha 'ka 'yö bha. 'Sa yö ‑zë ‑yö ‑gun 'wɔn ‑nu 'wo ‑kë dhang‑ 'gü ‑a ‑nu ‑zɔn 'ka 'ö Atanna ‑ya ‑zɔn kwa ‑dhɛ ꞊në‑ 'ka. ‑A ‑kë "dhʋ̈ ‑sü bha‑ 'gü, kö ‑a 'dhɛ 'ö dhang‑ 'gü 'ö yö ‑zë 'ö ꞊bhlëësü 'ö ‑ziö "kpʋng ꞊taa ‑bha ‑ta bha‑ ‑bha "saa‑ ‑bho 'ka ‑pë bha, ‑a ‑dhɛa ‑bha ꞊dhɛ ‑yö kë ꞊bhlëësü 'pö kö ‑yö ziö‑ 'ka "kpʋng ꞊taa ‑bha ‑nu bha‑ ‑nu ‑ta. ‑A 'dhɛ 'ö "dhʋ̈ bha yö ‑mü Klisi ꞊në‑ 'ka.
HEB 9:24 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑dhɔkëgükɔ 'dhɛ 'ö Klisi ‑yö ‑da 'gü dhang‑ 'gü bha mɛ ‑kɔ "dhɛ 'yii‑ dɔ, ‑a ‑gɛn ‑mü ꞊dhɛ ‑a 'dhɛ 'ö mɛ ‑ya dɔ bha ‑yö ‑gun ‑a ꞊dede ‑sü 'ö ‑da 'gü bha ꞊në‑ "blɛɛn‑ 'ka. ‑Yö ‑da ‑sü 'ka dhang‑ 'gü ‑dhɛ ꞊dede ꞊në‑ 'gü 'ö dɔ Atanna ‑kuu "dhiʋ̈. Kë "dhʋ̈ kö 'ö kwa 'gü ‑dhiang zë‑ ‑dhɛ ‑kpɛawo.
HEB 9:25 Zuifö ‑nu ‑bha "saabhomɛ 'kpii‑ 'kö 'wo gun bha ‑wo ‑gun ‑da sië Atanna ‑dhɔkë ‑dhɛ 'kpiisü bha‑ 'gü "dhʋ̈ ‑kwɛ ‑bha 'do 'do ‑kwɛ "pɛpɛ ꞊gban ꞊në‑ 'ka, 'yö 'wo‑ ‑nu ‑bha "saa‑ bho, "kɛɛ Klisi ‑zë ‑da 'ö‑ wo dhang‑ 'gü bha 'yii 'dho kö ‑yö ö ‑dɩ kë "saa‑ 'ka ‑dhɛ do 'gü kplɔnkplɔndhö.
HEB 9:26 'Yaa "dhʋ̈ 'nu kö ‑yö ‑dho saan" bha‑ wo ‑gɛn ‑yan 'gbɛ ꞊dede 'ka, 'ö‑ zü bho "kpʋng ꞊taa ‑dhɛ ‑da "tʋ̈ng 'gü. "Kɛɛ ‑yö nu ‑kɔ doseng 'ö‑ 'bha 'yaa‑ "dhiʋ̈ 'ö‑ 'bha 'yaa‑ ꞊taama bha‑ ‑wo "tʋ̈ng ‑totaamasü ya ꞊në‑ 'gü kö 'ö mɛ "bhɩɩ‑ ‑nu ‑bha 'wɔn yaa bho‑ ‑nu ‑bha ‑a ‑bha "saa‑ 'ö‑ bho bha‑ 'ka.
HEB 9:27 ꞊Dhɛ 'ö ‑kë ꞊dhɛ 'waa ga ꞊plɛ, 'ö ꞊wa ga ‑kɔ do bha‑ wo kö Atanna ‑bha za ‑dɔ mɛ ‑bha ‑wɔn ꞊në ꞊ya 'to bha,
HEB 9:28 Klisi ‑dɩ 'pö ‑yö ö ‑dɩ ‑nu ‑gɛn ‑yan doseng 'ka ‑kɔ do bha ꞊në‑ 'gü kö ‑yö kë 'bɔn ‑bho mɛ 'gbɛ ꞊dede ‑bha ‑gɛn 'ka, ‑yö ‑dho ‑ya mü 'zü 'ö nu ꞊plɛ ‑naa wo, "kɛɛ ‑yö ‑dho yö ‑zë wo "dhʋ̈ 'mɛ 'wo "yan 'to sië‑ ‑gɔ bha ꞊në‑ ‑nu ‑wɔn 'gü kö ‑ya ‑nu dha ‑sü bha‑ ‑gɔ ‑da 'plöö, 'yii 'dho‑ wo 'bɔn ‑dee 'bha ‑bho mɛ ‑bha ‑wɔn ‑zë 'gü.
HEB 10:1 'Wɔn ‑së ‑nu 'ö‑ nu ‑wɔn ‑yö gun bha Moizö ‑bha 'tɔng‑ ‑nu ‑zë ‑wo ‑gun "blɛɛn‑ ꞊në‑ 'ka, 'waa gun‑ ꞊dede 'ka. ‑A ‑gɛn ‑mü ꞊dhɛ 'ö gun "dhʋ̈ kö Atanna 'yii‑ 'bha kë ꞊kö. "Kɛɛ 'tɔng‑ ‑nu kö 'wo bha 'waa ꞊mɔɔ‑ ‑bha kö ‑wo 'mɛ 'wo‑ "piʋ̈ 'wo ꞊yɔɔn Atanna "sɔɔ ‑a ‑nu 'bha kë "slʋ̈ʋ̈slʋ̈ ‑a wëëdhö. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑wo ‑dho ꞊mɔɔ‑ ‑bha ‑kɔ ‑kë ꞊dhɛ kö "saa‑ do bha ꞊në 'wo‑ bho "dhʋ̈ ‑kpɛawo ‑kwɛ ꞊gban "pɛpɛ ‑ta.
HEB 10:2 ꞊Ya kë 'nu ꞊dhɛ Atanna mɔɔ‑ ‑kɔ suu 'dhɛ 'ö bha 'mɛ 'wo‑ ‑kë bha ‑ya ‑nu ‑kë "slʋ̈ʋ̈slʋ̈ ‑a wëëdhö "pɛɛpɛdhö, kö 'wii 'dho wo ‑dɩ yö 'nu 'wɔnyaakëmɛ 'ka, 'ö 'wo "saa‑ bha‑ bho ‑kpɛawo, kö ‑wo ‑dho wo bo "saa‑ bho ‑sü 'ka.
HEB 10:3 "Kɛɛ "saa‑ ‑zian 'wo‑ bho "dhʋ̈ bha ꞊në‑ ‑nu ‑zʋ ‑da ‑a ‑nu këwɔn yaa ‑nu ‑ta ‑kwɛ "pɛpɛ ꞊gban 'ka.
HEB 10:4 ‑A ‑gɛn ‑mü ꞊dhɛ ‑dugɔn ‑nu waa‑ ‑bhʋgɔn ‑nu ‑zë ‑kë "saa‑ 'ka ‑sü 'yaa ꞊mɔɔ‑ ‑bha kö ‑yö 'wɔn yaa bho mɛ ‑bha tongtongdhö.
HEB 10:5 'Wɔn 'ö‑ ‑wɔn 'gü, 'yö 'ö gun kö Klisi yöö nu "kpʋng ꞊taa 'yö‑ pö Atanna ‑dhɛ: «N Dë Atanna, wü ‑nu 'wo‑ ‑kë i ‑dhɛ "saapë 'ka, "ɛɛn pë ‑nu 'wo‑ ꞊gbaɔ i ‑gɔ bha‑ 'bha "dhia 'yii 'ma i 'gü, "kɛɛ mang ꞊dede ꞊në 'i n ‑dhü ‑pë ‑kë kö 'a kë 'wɔn bha‑ këmɛ 'ka.
HEB 10:6 'Wɔn yaa ‑nu ‑bha "saa‑ "pɛpɛ 'wo‑ bho, "ɛɛn ‑tuʋ̈ ‑pë "pɛpɛ 'wo‑ zë 'wo‑ ‑gʋ̈ i ‑dhɛ bha‑ 'bha 'yii i ‑zʋ 'kun.
HEB 10:7 'Wɔn 'ö‑ ‑wɔn 'gü, 'yö 'a‑ pö: Mang ꞊dede ꞊në maa nu kö 'a i dhɔɔbhaawɔn bha‑ kë ꞊dhɛ ‑kɔ 'ö ‑bɛn zë ‑sü 'ka‑ 'ka n ‑bu 'gü 'tɔng‑ 'sëëdhɛ 'gü ‑a 'dhö bha 'yö bha, ma Atanna.»
HEB 10:8 ‑A pö 'ö‑ wo bha ‑ya ‑pö ꞊kö ‑blɛɛsü ꞊dhɛ: «'Pë 'i‑ ꞊mɔɔ 'yaa ‑mü wü 'wo "saa‑ bho‑ 'ka i ‑dhɛ, "ɛɛn 'pë 'wo‑ ꞊gbaɔ i ‑gɔ bha‑ 'ka, "ɛɛn 'zü ꞊dhɛ wü ‑nu 'wo‑ ‑gʋ̈, "ɛɛn 'wo "saa‑ bho‑ 'ka 'wɔn yaa ‑wɔn 'gü bha‑ 'bha "dhia 'yii 'ma i 'gü», "kɛɛ 'sa kö 'tɔng‑ ꞊në‑ pö ‑wa kë.
HEB 10:9 'Yö ‑ya mü 'zü 'ö‑ pö: «Mang ꞊dede ꞊në maa nu kö 'a i ‑dhidhɛ ‑wɔn bha‑ kë, ma Atanna.» ꞊Ya kë "dhʋ̈ kö Atanna ꞊ya "saa‑ ‑blɛɛsü ‑nu bha‑ ‑nu ‑wɔn bho‑ ‑bha ꞊në‑ bho 'yö ꞊ya Yesu Klisi ‑bha bha dɔ‑ "gblʋ̈ 'gü bha.
HEB 10:10 'Wɔn 'ö‑ ‑wɔn 'gü 'yö 'a‑ pö ka ‑dhɛ ꞊dhɛ 'wɔn 'dhɛ 'ö‑ "dhia‑ gun‑ 'gü Yesu Klisi ‑ya kë 'ö‑ wo, 'ö ö ‑dɩ nu ‑kɔ do bha‑ ‑kë "saa‑ 'ka kö ‑yö kë "saa‑ bho ‑sü ꞊gban "dhiʋ̈ 'to ‑dhɛ 'ka bha ꞊në kwaa‑ 'wɔn yaa bho kwa ‑bha ‑todhʋ̈ 'ka bha 'yö bha.
HEB 10:11 ‑A ‑gɛn ‑mü ꞊dhɛ "saabhomɛ "pɛpɛ 'ö 'dhö, ‑a ‑nu ‑bha yë ꞊në "saa‑ bho ‑sü 'ka, 'ö ‑ya mü 'zü ‑wo "saa‑ do ‑bho ‑dhɛ do 'gü ‑kplɔn 'kɔn ‑kplɔn 'kɔndhö. "Kɛɛ 'sa 'yaa ꞊mɔɔ‑ ‑bha kö ‑yö 'wɔn yaa bho mɛ ‑bha tongtongdhö.
HEB 10:12 "Kɛɛ Klisi ‑zë ‑yö mɛ "bhɩɩ‑ ‑nu ‑bha 'wɔn yaa ‑bha "saa‑ bha‑ ‑bho "dhʋ̈ dosengseng, "kɛɛ ‑a ‑bha ‑zë "dhiʋ̈ "wɩ ‑sü "dhiʋ̈todhɛ 'yaa 'dhö, 'yö ‑ya mü 'zü, 'yö ‑ya ‑sü 'ka ‑duɛ ꞊bhlëësü 'ö Atanna "sɔɔ bha‑ 'gü.
HEB 10:13 ‑Yö ‑ya ‑sü 'ka ‑dhɛ bha ꞊në‑ 'gü dɔ 'kwa‑ wo ya‑ 'gü kö ‑yö 'to‑ 'ka "dhʋ̈ ‑yö zun‑ 'ka yi 'ö Atanna dho‑ 'yaɔ‑ ‑nu ‑gɔ ‑da 'ka‑ ‑gbe ꞊wlöö bha‑ ‑bha.
HEB 10:14 ‑A ‑kë "dhʋ̈ ‑sü bha‑ 'gü, ö ‑dɩ nu ‑kɔ do 'ö‑ ‑kë bha ꞊në‑ ‑kë, 'yö pö 'aa 'mɛ 'ö‑ ‑nu ‑bha 'wɔn yaa bho‑ ‑nu ‑bha bha‑ ‑nu ‑bha 'zü Atanna wëëdhö tongtongdhö.
HEB 10:15 Pë do bha ꞊në Atanna ‑bha 'Nii‑ "slʋ̈ʋ̈slʋ̈ ‑ya pö kwa ‑dhɛ 'pö 'ö‑ pö: «Kwa Dëmɛ ‑ya ‑pö:
HEB 10:16 "Tʋ̈ng 'a‑ pö sië bha ꞊ya ꞊loo yi 'ö‑ 'ka, ‑mlɛɛ ‑dee 'a dho‑ kë‑ ‑nu 'ka, ‑kaa ‑ga ya. A ‑dho ma 'tɔng‑ ‑nu ‑da ‑a ‑nu zuë" 'gü, 'ö 'a‑ ‑bɛn zë‑ ‑nu 'nii‑ 'gü.» 'Yö‑ 'bha ‑zuö ‑ta 'ö‑ pö:
HEB 10:17 «꞊Ya 'go mü 'zü n ‑zʋ 'yii 'dho ‑bö ‑a ‑nu këwɔn yaa ‑nu, "ɛɛn ma 'tɔng‑ ‑nu 'wo‑ bho bha‑ ‑ta 'zü tongtongdhö.»
HEB 10:18 ‑A ‑gɛn ‑mü ꞊dhɛ "saa‑ 'ö‑ bho bha‑ ‑wɔn 'gü, ꞊wa bo mɛ këwɔn yaa ‑nu ‑mawɔn 'to ‑sü ‑zë 'ka, kö 'wɔn yaa ‑bho mɛ ‑bha ‑saa bho ‑gɛn 'bhaa 'dhö 'zü.
HEB 10:19 ‑A ‑kë "dhʋ̈ ‑sü bha‑ 'gü, n dheebhang ‑nu, ‑da Atanna ‑dhɔkë ‑dhɛ ꞊dede bha‑ 'gü ‑sü 'ö 'dhö, ‑a zian "dhi ꞊ya "pʋ kwa ‑gɔ Yesu Klisi ꞊yɔɔn 'ö ꞊wɛnng bha‑ 'saa‑ 'gü. Kwa ‑mɔɔ ‑bha 'kwa ‑da mü kwa 'flëë‑ 'gü.
HEB 10:20 Yesu bha ꞊në zian ‑dee 'ö bɔ 'kɔ 'gü ‑kan 'gü ‑sɔ bha‑ 'gü, 'ö "saabhomɛ ‑nu ‑gɔmɛ 'kpii‑ gun bɔ sië‑ ‑ta ‑kwɛ ‑bha 'do 'do, 'ö dho Atanna ‑dhɔkëdhɛ ꞊dede 'gü bha kwa ‑bha 'ö kwa gba ꞊sii 'ö 'yaa yën‑ 'ka bha‑ 'ka. Sɔ bha ‑yö ‑gun ‑a ‑dhü 'ö sëë bho kwa ‑wɔn 'gü "dhü ‑bha bha ꞊në‑ "blɛɛn‑ 'ka.
HEB 10:21 Yö ꞊në Atanna ‑bha mɛ "pɛpɛ ꞊gban kwa ‑bha "saabhomɛ 'kpii‑ 'ka.
HEB 10:22 ꞊Dhɛ 'ö "dhʋ̈, ‑ka ‑kwa ꞊yɔɔn Atanna "sɔɔ kwa zuë" ꞊gban 'ka, kö "sika 'ya 'dho kë kwa 'gü ‑zʋ ‑yö ‑a ‑dhɛ ‑sü 'gü, kö 'kwa 'wɔn "pɛpɛ 'ö kwa zuë" ‑yö ꞊mɔɔ ‑bha 'ö za dɔ kwa ‑bha ‑a 'gü bha‑ bho kwa ‑bha. ‑A ‑gɛn ‑mü ꞊dhɛ ‑a ꞊yɔɔn 'ö ꞊dhɛ ꞊yɔɔn 'wo gun ꞊wɛnng sië Atanna ‑bha mɛ ‑nu ‑ta yi 'bha 'ka, 'yö 'wo ‑kë "slʋ̈ʋ̈slʋ̈ bha‑ 'dhö bha ꞊ya kwa "zu.
HEB 10:23 'Wɔn 'ö Atanna ‑ya "plüün bho kwa ‑dhɛ 'ö kwa ‑zʋ 'dhö‑ 'gü bha, ‑ka ‑kwaa 'kun "gbɩɩ‑. ‑A ‑gɛn ‑mü ꞊dhɛ kwa 'dhang bho ‑sü ‑ya "dhiʋ̈ 'kpakpadhö ꞊dhɛ ‑yö ‑dho 'to ö ‑wʋ ‑ta.
HEB 10:24 ‑Ka ‑kwa kwa "tʋ̈ng kë kwa 'ko 'gü kö 'kwa kwa 'ko ‑nu faan dɔ, kö mɛ ꞊gban ‑dhɔ ‑yö kwa kë kö kwa zuë" ‑yö bhɔ 'wɔn ‑së kë ‑sü ꞊në‑ bha.
HEB 10:25 ‑Bhɛa Atanna ‑dhɛ ‑mɛ ‑nu 'kwa bha ‑ya ‑nu 'kwa‑ wo sië ‑dhɛ do 'gü kö 'kwa‑ ‑wʋ ma bha mɛ 'bha ‑nu 'waa 'dho mü 'zü. 'Kwa 'dho‑ kë ꞊dhɛ ‑a ‑nu 'dhö, "kɛɛ kwa ‑zë ‑ka ‑kwa ‑ya ‑dhɛ do 'gü kö 'kwa kwa 'ko ‑nu faan dɔ ‑to "piʋ̈ ‑sü ‑bha ‑kpɛawo, ‑a ‑gɛn ‑mü ꞊dhɛ ka‑ 'wɔn ‑dɔ 'kpakpadhö ꞊dhɛ kwa Dëmɛ bha‑ nu "tʋ̈ng ꞊ya ꞊tëng ꞊dedewo.
HEB 10:26 ‑A pö 'a‑ wo "dhʋ̈ bha, n dheebhang ‑nu, ‑a 'klɔɔ‑ ‑mü ꞊dhɛ 'kwa bo tɛanwɔn 'ö ‑gban Yesu Klisi ‑bha bha‑ dɔ ‑sü 'ka, kö 'kwa ‑ya mü 'zü 'kwa "kan ‑deewo Atanna ‑bha tongtongdhö kö 'kwa kwa ‑gɔ ‑gban 'wɔn yaa kë ‑sü 'gü, kö "saa‑ 'ö yöö 'wɔn yaa bho kwa ‑bha 'yaa 'dhö 'zü.
HEB 10:27 Kö "suʋ̈ ꞊në yöö kwa kë ꞊taamasü 'gü 'wɔn 'ö dho kwa "dhiʋ̈ ꞊slɔɔ bha‑ ‑wɔn 'gü. ‑A ‑gɛn ‑mü ꞊dhɛ kö Atanna ‑bha za 'ö yöö kwa zë kö pɛng "dhiʋ̈‑ 'ö‑ ‑ya ö 'yaɔ‑ ‑nu ‑gɔ bha ‑yö kwa ‑bhö bha ꞊në‑ ‑wɔn ꞊ya 'to.
HEB 10:28 'Ö gun Moizö ‑kwɛ ‑ta, mɛ "ʋʋ mɛ 'ö ꞊yaa‑ ‑bha 'tɔng‑ bho, kö mɛ ꞊plɛ mɛ ‑yaaga ‑wa ‑dhɛ yö kö ‑wa "sɛɛdhɛ kë, ‑wa ‑mɛ zë ꞊në‑ wo, ‑a ‑wëë 'yaa mɛ 'bha kë.
HEB 10:29 ꞊Ya kë "dhʋ̈, 'yö 'mɛ 'kö yö ‑zë 'ö Atanna Gbö yöö ꞊dede ꞊në‑ ‑da ö ‑gɛn ꞊wlöö, 'ö‑ ꞊yɔɔn 'ö ‑mlɛɛ ‑dee, 'ö Atanna ‑yö bɔ‑ ‑ta 'ö‑ ‑ga mɛ "slʋ̈ʋ̈slʋ̈ 'ka bha‑ ‑ga "wlaa‑ 'pë 'ka, 'ö "yan ‑ziö 'gü 'ma Atanna ‑bha 'Nii‑ "slʋ̈ʋ̈slʋ̈ 'ö ‑gasitɛ ‑kë 'ka kwa ‑dhɛ bha‑ ‑bha ꞊wɛ, ‑a ‑mɛ ‑bha ‑dho kë mü ꞊dhɛ? Kaa ꞊dede ka ‑mɔɔ ‑bha 'ö 'wɔn 'ö‑ ‑dhɛ 'dhö‑ ‑bha ꞊dhɛ ‑yö wɔ mɛ 'ö "dhʋ̈ bha‑ ‑ta ‑a ‑bha ‑kë ‑ziisü ‑sü bha 'ka ka ‑zʋ 'gɔn‑ 'gü.
HEB 10:30 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ 'ö dhiang zë 'ö‑ pö ꞊dhɛ: «Mang ꞊dede ꞊në 'a dho n bhlɔɔ bho, ma ꞊në 'a dho 'wɔn bho 'wɔnyaakëmɛ ‑nu 'gü» bha kwa‑ ‑dɔ. "Kɛɛ 'sa yöö do bha ꞊në‑ pö 'zü ꞊dhɛ: «Kwa Dëmɛ ‑dho za dɔ ö ‑bha mɛ ‑nu ꞊gban "pɛpɛ ‑bha.»
HEB 10:31 ‑Da Atanna "yaandhe 'ö "dhʋ̈ ‑a ꞊kwɛng ‑sü bha ‑yö 'wɔn ‑ziisü ꞊në‑ 'ka, n dheebhang ‑nu.
HEB 10:32 ‑A ‑kë "dhʋ̈ ‑sü bha‑ 'gü, ka ‑zʋ 'ya 'dho bhɔ 'wɔn ‑nu 'ka ‑ziö 'gü ka ‑da Atanna ‑wʋ 'gü "tʋ̈ng 'gü, saan" ‑nu 'ka‑ wo kö 'ka bo ‑dhɛpuudhɛ 'ö go‑ "piʋ̈ ‑a ꞊slɔɔ ‑sü 'ka, 'ö 'wɔn "gbɩɩ‑ "gbɩɩ‑ ‑nu ‑wo ‑wɔ ka ‑ta, "kɛɛ 'ö kun bho ka 'gü bha‑ 'ka. ‑A ‑gɛn ‑mü ꞊dhɛ ‑wo kë "si ‑bho ka ‑gɔ,
HEB 10:33 'ö 'wo ka ‑wëë ‑kë "dhiʋ̈ wo mɛ ꞊gban ‑mɛ ꞊gban "yaan "ɛɛn 'zü 'ö 'ka dho 'ka bɔ 'mɛ 'wo‑ kë sië‑ ‑nu 'ka "dhʋ̈ 'pö bha‑ ‑nu 'ka.
HEB 10:34 'Ö ‑kasogümɛ ‑nu ‑wëë ‑yö ka ‑kë, 'ö 'ka‑ ‑nu ‑ta kun, 'wo faan ‑wɔ ka ‑ta 'wo ka ꞊slɔɔpë ‑nu sü ka ‑gɔ, 'ö 'kun bho ka 'gü 'ka‑ nu "yɩɩ 'ka, kö‑ ‑naa ka "yaan ꞊dhɛ ‑a 'dhɛ 'ö ꞊bhlëësü 'ö ‑ziö 'dhɛ bha‑ ‑ta, 'ö 'yaa yën tongtongdhö bha ‑yö ka ‑gɔ.
HEB 10:35 ꞊Dhɛ 'ö "dhʋ̈, n dheebhang ‑nu, 'dhang ‑bho Atanna "dhiʋ̈ ‑sü 'ö ka ‑gɔ bha 'ka 'dho ka kwaa‑ ‑zü tongtongdhö! ‑A ꞊trɔɔn 'kpikpi ‑yö ‑dhö 'ö ‑ya ‑sü 'ka ka ‑gɔ.
HEB 10:36 ‑A ‑dhɛa ‑bha ꞊dhɛ ka 'gü ꞊në ꞊ya 'dho ga, kë "dhʋ̈ kö 'ka ka bo Atanna ‑dhidhɛ ‑wɔn bha‑ kë ‑sü 'ka, kö 'pë 'ö‑ "plüün bho ka ‑dhɛ bha 'ka‑ ꞊slɔɔ. ‑A ‑gɛn ‑mü ꞊dhɛ ‑yö ‑bɛn zë ‑sü 'ka‑ ‑wʋ 'sëëdhɛ 'gü ꞊dhɛ:
HEB 10:37 «‑A "tʋ̈ng ꞊ya 'to 'dɛdɛ, 'dɛdɛ ꞊dedewo kö 'mɛ 'ö‑ nu ‑wɔn 'dhö 'dhö bha ‑yö nu, 'yii 'dho ꞊gwëë mü 'zü.
HEB 10:38 'Mɛ pö 'aa ‑bha n "yan 'gü 'ö dho ꞊sii 'ö n "piʋ̈ ‑a ꞊slɔɔ bha ‑a ‑mɛ ‑dho ‑a ꞊slɔɔ ‑a ‑bha ‑zʋ ‑yö n ‑dhɛ ‑sü ꞊në‑ 'saa‑ 'gü. "Kɛɛ ꞊ya kë ꞊dhɛ ‑a mɛ ꞊ya ö yee ‑zë kë kö ‑yö 'dho ö ꞊taama, ‑a "dhia 'yii 'dho 'ma n 'gü.»
HEB 10:39 ‑A ‑kë "dhʋ̈ ‑sü bha‑ 'gü, kwa ‑zë 'kwaa 'mɛ 'wo dho wo ꞊taama kö ‑a ‑nu 'gü ‑yö ꞊see bha‑ ‑nu kpö 'gü, kwa 'mɛ 'wo 'dhang bho Atanna "dhiʋ̈ kö 'wo wo 'nii‑ dha ꞊në‑ ‑nu kpö 'gü.
HEB 11:1 "Kɛɛ 'sa 'pë 'wo‑ ‑zʋ ‑yö Atanna ‑dhɛ ‑sü ‑kë bha yö ‑mü 'dhang‑ ‑bho 'wɔn ‑nu 'ö‑ kë ‑sü "plüün bho, "kɛɛ 'ö 'yii kë ꞊kö bha‑ "dhiʋ̈ ‑sü 'ö 'kpakpadhö ꞊dhɛ ‑yö ‑dho kë, ꞊dhɛ pë ‑nu 'ö mɛ 'bha 'yii‑ yö do, ‑wo ‑dhö tɛan‑ 'ka bha ꞊në‑ 'ka.
HEB 11:2 ‑A yö ꞊në gun 'mɛ 'wo gun "dhiʋ̈ ‑a ‑nu ‑gɔ 'yö Atanna ‑ya ‑nu ‑dhiang ‑së zë.
HEB 11:3 ‑Zʋ ‑yö Atanna ‑dhɛ ‑sü suu 'ö "dhʋ̈ bha ꞊në‑ ‑kë 'yö 'kwa‑ 'wɔn dɔ ꞊dhɛ ‑yö "kpʋngtaadhɛ ‑pë kë ö ‑wʋ ꞊në‑ 'ka, ꞊dhɛ pë ‑nu 'ö mɛ ‑ya yö bha ‑wo ‑go ‑a 'dhɛ 'ö mɛ 'yaa‑ yö ꞊në‑ 'gü.
HEB 11:4 ‑Zʋ ‑yö Atanna ‑dhɛ ‑sü suu do bha ꞊në gun Abɛdhö ‑gɔ 'yö "saa‑ 'ö waa‑ ꞊dhoo Kaɛn 'wo‑ bho bha, 'yö‑ ‑bha ‑zë ‑yö Atanna ‑zʋ kun 'ö ‑ziö Kaɛn ‑bha ‑ta. ‑A ‑bha ‑zʋ ‑yö Atanna ‑dhɛ ‑sü bha ꞊në‑ ‑wɔn 'gü, 'yö‑ pö‑ ‑bha ꞊dhɛ pö 'aa‑ ‑bha, 'yö pë ‑nu 'ö‑ ꞊gbaɔ Atanna ‑gɔ bha, 'yö‑ 'gü ‑wɔn ‑yö ‑dhi ‑dhɛ. Abɛdhö ꞊ya ga 'nu yi 'bha 'ka, "kɛɛ ‑a ‑bha ‑zʋ ‑yö Atanna ‑dhɛ ‑sü bha ꞊në ‑tun dhiang zë sië kwa ‑dhɛ ꞊dɛɛ.
HEB 11:5 Enɔkö ‑dɩ 'pö‑ ‑bha ‑zʋ ‑yö Atanna ‑dhɛ ‑sü ꞊në‑ ‑wɔn 'gü, 'yö‑ sü "yaandhe 'ka, 'yö dho dhang‑ 'gü 'yö 'pë 'wo‑ ‑dhɛ ga 'yii‑ dɔ. Mɛ 'bha 'yii‑ yö 'zü tongtongdhö, ‑a ‑gɛn ‑mü ꞊dhɛ kö Atanna yaa‑ 'sü ꞊ya 'dho‑ 'ka. 'Sa "sanni ‑ya 'sü kö ‑yö 'dho‑ 'ka "dhʋ̈, kwa‑ ‑ma ‑a ‑wʋ 'gü ꞊dhɛ kö ꞊yaa‑ pö‑ ‑dhɛ 'nu ꞊dhɛ ‑a "ta ‑kɔ bha‑ "dhia ‑yö ö 'gü.
HEB 11:6 'Sa mɛ 'bha "dhia 'yaa ꞊mɔɔ‑ ‑bha kö ‑yö 'ma Atanna 'gü "wɛɛwɛɛ kö ‑zʋ ‑yö ‑a ‑dhɛ ‑sü 'yaa‑ ‑mɛ ‑gɔ. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ "ʋʋ mɛ 'ö ꞊yɔɔn‑ "sɔɔ, ‑a ‑dhɛa ‑bha ꞊dhɛ ‑a ‑mɛ 'ö 'dhö ‑a 'dhang bho ‑sü kë‑ "dhiʋ̈ 'kpakpadhö ꞊dhɛ ‑yö ‑dhö, ꞊dhɛ 'mɛ 'wo‑ ꞊mɔɔ, ‑ya 'gü ‑wɔn ‑së ‑kë ‑a ‑nu ‑dhɛ.
HEB 11:7 ‑Zʋ ‑yö Atanna ‑dhɛ ‑sü bha ꞊në gun Noe ‑gɔ, 'yö 'wɔn 'ö‑ to "dhiʋ̈ 'ö‑ pö‑ ‑dhɛ bha 'ö 'dhang bho‑ "dhiʋ̈ kö 'yii‑ ‑dhɛ yö ꞊kö, 'yö‑ ‑wʋ bha‑ ꞊bhlëë ‑ya, 'yö 'wɔn bha‑ to "dhiʋ̈ 'yö "yitagɔ ‑pë ‑kë, 'yö ꞊dhɛ 'ö‑ "tʋ̈ng ꞊ya ꞊loo, 'yö waa‑ ‑gɔ 'kɔɔmɛ ‑nu 'wo ‑da 'gü, 'yö 'wo dha. ‑A ‑bha ‑zʋ ‑yö Atanna ‑dhɛ ‑sü bha ꞊në‑ ‑wɔn 'gü, 'yö‑ ‑bha za ‑yö ‑dhi ‑a ‑kuu "dhiʋ̈, 'yö Atanna ‑bha za ‑yö "kpʋngtaamɛ ‑nu zë "tʋ̈ng bha‑ 'gü ‑zʋ 'ö 'wii‑ yö‑ ‑dhɛ 'pö ꞊dhɛ Noe 'dhö bha‑ ‑wɔn 'gü.
HEB 11:8 Ablaamö ‑dɩ 'pö, ‑a ‑bha ‑zʋ ‑yö Atanna ‑dhɛ ‑sü ꞊në‑ ‑wɔn 'gü, 'yö‑ bɔ 'ö Atanna ‑ya wo "sɛgɔ 'ö dho‑ kë‑ 'kɛan‑ 'ka ‑a bhang ‑nu ‑dhɛ yi 'bha 'ka bha‑ 'gü bha 'yii ‑kɔ. 'Yö ꞊wlü ö ‑dɩ ‑gɔ "sɛ 'gü 'ö dho ö ‑gɔ "piʋ̈, kö 'yaa ö 'dhodhɛ ‑zian ‑zian dɔ.
HEB 11:9 ‑A ‑bha ‑zʋ ‑yö Atanna ‑dhɛ ‑sü bha ꞊në‑ ‑wɔn 'gü, 'yö ‑tosɛa ‑kë "sɛ 'ö‑ "plüün bho‑ ‑dhɛ bha‑ 'gü ꞊dhɛ ꞊dhɛng 'dhö. 'Yö ‑wɔ sɔ bɔɔ" ꞊wlöö, 'yö‑ bhang ‑nu, Izaakö waa‑ Zakɔbö 'ö Atanna ‑ya "plüün bho 'pö‑ ‑nu ‑dhɛ bha 'wo‑ ‑kë 'pö ꞊dhɛ ‑a 'dhö.
HEB 11:10 ‑A ‑gɛn ‑mü ꞊dhɛ 'ö gun "dhʋ̈ kö Ablaamö "yan ‑yö 'pödhɛ 'ö Atanna yöö ꞊dede ꞊në‑ dan, 'ö‑ dɔ 'ö 'yaa 'wü bha ꞊në‑ ‑gɔ.
HEB 11:11 ‑Zʋ ‑yö Atanna ‑dhɛ ‑sü 'ö "dhʋ̈ bha ꞊në‑ ‑kë, 'yö‑ ‑bha kë zii ‑sü kö 'yaa ꞊mɔɔ‑ ‑bha kö ‑yö 'në 'kpɔ 'zü ‑sü ꞊gban waa‑ ‑bha ‑bha, 'yö Atanna ‑yö waa‑ ‑bha dhebhɔ Saadha ‑a ‑nu ‑kë 'në 'kpɔmɛ 'ka. ‑A ‑gɛn ‑mü ꞊dhɛ 'ö gun "dhʋ̈ kö‑ 'dhang bho ‑sü ‑ya "dhiʋ̈ 'kpakpadhö ꞊dhɛ ꞊ya 'wɔn "ʋʋ 'wɔn 'kö‑ "kan ö "dhi 'ka, 'yaa 'to‑ 'gü tongtongdhö.
HEB 11:12 ‑Kɔ 'ö ‑kë 'ka, 'yö Ablaamö 'ö ꞊ya gun ꞊ya kë zii, 'ö 'yaa 'në 'kpɔmɛ 'ka 'nu 'zü tongtongdhö bha 'ö 'në kpɔ, 'yö 'waa ꞊mɔɔ‑ ‑bha kö ‑wa suu "dhi dɔ ꞊dhɛ "susëngga 'ö dhang‑ ‑bha, "ɛɛn ꞊dhɛ "yɛɛn 'ö ꞊weeyi "dhiʋ̈ ‑a 'dhö ꞊dɛɛ bha 'yö bha.
HEB 11:13 Ablaamö waa‑ bhang ‑nu bha 'wɔn "pɛpɛ 'ö Atanna ‑ya "plüün bho‑ ‑nu ‑dhɛ "dhʋ̈ bha‑ 'bha 'yii kë woo ꞊dede ‑zë ‑a ‑nu ‑dhɛ 'ö to‑ 'ka "dhʋ̈ 'wo ga. "Kɛɛ ‑a ‑nu 'dhang bho ‑sü gun 'ö‑ wo Atanna "dhiʋ̈ 'kpakpadhö ꞊dhɛ 'yaa ö ‑wʋ 'to bha‑ ‑wɔn 'gü, ‑wa 'gü ‑wɔn kë "tʋ̈ng ‑to ꞊gblɛɛn 'ö‑ ‑nu "yan ‑yö ‑da ‑a kë ‑dhɛ 'gü, 'ö 'wo wo "dhia bho‑ ‑wɔn "dhiʋ̈, ‑a ‑gɛn ‑mü ꞊dhɛ kö ‑wa 'wɔn ‑dɔ ꞊dhɛ ‑dhɛng ‑mü wo 'ka "kpʋng ya‑ ꞊taa, zian ꞊në 'wo‑ ziö sië.
HEB 11:14 'Sa mɛ "pɛpɛ 'wo dhiang zë "dhʋ̈ bha, mɛ ‑ya ‑dhɛ ‑yö ‑a ‑nu pö ‑wʋ bha ꞊në‑ ‑bha ꞊dhɛ ‑wo wo dë ‑yɛa ꞊dede bha ꞊në‑ mɔɔ‑ sië.
HEB 11:15 ‑A ‑gɛn ‑mü ꞊dhɛ ꞊ya kë ꞊dhɛ ‑a ‑nu ‑zʋ 'yii 'go 'nu "sɛ 'dhɛ 'wo go‑ 'gü bha‑ "piʋ̈, ‑wo ‑mɔɔ ‑bha 'ö 'wo wo yee ‑kë 'zü ‑deewo 'wo dho mü.
HEB 11:16 "Kɛɛ ‑a 'dhɛ 'ö dhang‑ 'gü 'ö ꞊bhlëësü 'ka 'ö ‑ziö ‑a ‑blɛɛsü bha‑ ‑ta bha ꞊në‑ ‑wɔn 'dhö gun‑ ‑nu ‑zʋ "piʋ̈. 'Wɔn 'ö‑ ‑wɔn 'gü, 'yö‑ ‑nu ‑bha Atanna ‑dhɛ ‑sü 'ö woo‑ Atanna bha‑ 'yiʋ̈‑ 'yaa Atanna kë bha 'yö bha. ‑A ‑gɛn ‑mü ꞊dhɛ yöö ‑zian ꞊në‑ ‑nu ‑bha 'pö‑ dɔ ‑sü 'ka.
HEB 11:17 Ablaamö ‑bha ‑zʋ ‑yö Atanna ‑dhɛ ‑sü bha ꞊në‑ ‑wɔn 'gü, 'yö ö gbö Izaakö 'ö‑ ‑gɔ "dhʋ̈ dosengseng bha‑ ‑kë "saa‑ 'ka kö Atanna yaa‑ 'gü dan kö 'ö 'dhang bho ö "dhiʋ̈ ꞊dedewo kö 'ö‑ ‑dhɛ yö, 'sa kö yöö Ablaamö ‑mɛ do bha ꞊në Atanna ‑yö "plüün bho‑ ‑dhɛ 'në do bha‑ ‑wɔn 'gü.
HEB 11:18 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'ö gun "dhʋ̈ kö ꞊yaa‑ pö 'nu‑ ‑dhɛ ꞊dhɛ ‑a gbö Izaakö bha ꞊në dho bɔ‑ ‑ta 'yö‑ suu ‑da "kpʋng ꞊taa.
HEB 11:19 "Wɩ 'ö‑ wo‑ ‑bha kö 'ö ö gbö kë "saa‑ 'ka "dhʋ̈ bha‑ 'klɔɔ‑ ‑mü ꞊dhɛ 'ö gun "dhʋ̈ kö‑ 'dhang bho ‑sü ‑ya "dhiʋ̈ 'kpakpadhö ꞊dhɛ 'ya ö gbö Izaakö zë, Atanna ‑mɔɔ ‑bha 'ö‑ ‑bö. 'Wɔn 'ö‑ ‑wɔn 'gü, 'yö Izaakö nu 'zü Ablaamö ‑dhɛ ‑deewo ꞊dhɛ 'mɛ ꞊ya ga 'nu 'ö ꞊ya ‑bö ꞊në wo‑ 'dhö bha 'yö bha.
HEB 11:20 ‑Zʋ ‑yö Atanna ‑dhɛ ‑sü do bha ꞊në gun Izaakö ‑gɔ 'yö to "yaan 'yö 'dhuë‑ ‑kë 'ö‑ gbö Zakɔbö waa‑ Ezau ‑a ‑nu ‑bha 'wɔn 'ö dho kë‑ ‑nu 'ka ‑dhɛ 'bha ꞊kpaɔyi ‑bha bha‑ ‑kɔ 'gü.
HEB 11:21 ‑Zʋ ‑yö Atanna ‑dhɛ ‑sü do bha ꞊në gun 'pö Zakɔbö ‑gɔ 'yö ꞊dhɛ 'ö‑ ga "tʋ̈ng ꞊ya ꞊tëng, 'yö 'dhuë‑ ‑kë ö gbö Zosɛfu bhang ‑nu ꞊plɛ bha‑ ‑nu ‑bha, 'yö ‑taadhü ‑gban ö ‑gɔ 'yö Atanna ‑dhɔkë, 'yö‑ nuɛ" bho.
HEB 11:22 Zosɛfu ‑dɩ 'pö‑ ‑bha ‑zʋ ‑yö Atanna ‑dhɛ ‑sü ꞊në‑ ‑wɔn 'gü, 'yö ꞊dhɛ 'ö yöö ga, 'yö Izraɛdhö ‑mɛ ‑nu ‑bha ‑go ꞊dhuëngdhɛ 'gü ‑sü 'ö Ezitö ‑sɛ 'gü bha‑ to "dhiʋ̈ 'yö‑ pö, 'yö ‑wʋ kpɔ‑ ‑nu ‑bha 'ö‑ pö‑ ‑nu 'dho "tʋ̈ng ꞊ya ꞊loo ‑wo ö ga ‑nu 'sü ‑wo 'dho‑ 'ka.
HEB 11:23 ‑Zʋ ‑yö Atanna ‑dhɛ ‑sü ꞊në gun 'zü Moizö 'kpɔmɛ ‑nu ‑gɔ, 'yö 'wo‑ "blë ‑dee ‑gblɛn kpɔ "su ‑yaaga 'ka kö 'wa 'dho‑ zë (꞊dhɛ ‑kɔ 'ö ‑gblüdë ‑ya pö ‑wa kë‑ 'ka Zuifö ‑nu 'ka "tʋ̈ng bha‑ 'gü ‑a 'dhö), 'yö 'wii "suʋ̈ ‑gblüdë 'ö gun "sɛ bha‑ ‑gɔ "dhiʋ̈ bha‑ ‑gɔ, kö ‑wa ‑wʋ ‑ya 'klɔɔ‑ "dhiʋ̈ kö ‑wa kë ꞊dhɛ ‑kɔ 'ö‑ pö‑ 'ka ‑a 'dhö 'në bha‑ ‑bha ‑kë ‑së ‑wɔn 'gü.
HEB 11:24 ‑Zʋ ‑yö Atanna ‑dhɛ ‑sü do bha 'zü ꞊në‑ ‑kë, 'yö ꞊dhɛ 'ö Moizö ꞊ya kë 'kpii‑, 'yö 'yii "wɩ‑ ‑bha kö ‑wo ö ‑dhɛ Fadhaɔn 'dhu ‑bha 'në, "kɛɛ 'sa kö yö ꞊në kë "klʋ bho‑ ‑bha ꞊dhɛ 'ö ‑dɩa 'në 'dhö.
HEB 11:25 'Yö ö ‑wëëdhɛ ‑bho Atanna ‑bha mɛ ‑nu "piʋ̈ ‑sü fië‑ bho "dhia ‑bho 'wɔn yaa 'gü ‑sü 'ö "tʋ̈ng kpö 'në 'bha 'ka bha‑ ‑bha.
HEB 11:26 'Yö 'yiʋ̈‑ ‑dɔ ö ‑bha ‑sü 'ö ꞊dhɛ Atanna ‑bha ‑Yamɛ 'ö‑ nu ‑wɔn ‑yö gun bha‑ ‑bha 'dhö bha‑ fië‑ bho ꞊naɔ "pɛpɛ 'ö Ezitö ‑sɛ 'gü ‑a ꞊slɔɔ ‑sü ‑bha, ‑a ‑gɛn ‑mü ꞊dhɛ kö‑ "yan ‑ya ꞊trɔɔn 'ö dhia" bha‑ ‑gɔ.
HEB 11:27 ‑Zʋ ‑yö Atanna ‑dhɛ ‑sü ꞊në gun Moizö ‑gɔ 'yö waa Izraɛdhö ‑mɛ ‑nu 'wo go Ezitö ‑sɛ 'gü, kö "suʋ̈ ‑tangga ‑zian 'yaa‑ 'gü ‑a ‑nu ‑go mü ‑wɔn bha‑ ‑siö ‑gblüdë Fadhaɔn ‑dhɛ ‑sü 'gü, ꞊dhɛ pë 'ö‑ "yan ꞊në Atanna 'ö mɛ 'bha 'yii‑ yö do bha‑ ‑bha ‑a 'dhö.
HEB 11:28 ‑Zʋ ‑yö Atanna ‑dhɛ ‑sü bha ꞊në gun‑ ‑gɔ, 'yö‑ pö Izraɛdhö ‑mɛ ‑nu ‑dhɛ kö ‑wo ‑tun ziö‑, 'yö‑ pö "bhlaanë ‑nu 'ö woo‑ zë bha ‑wa ꞊yɔɔn ziö 'kpong‑ ‑gɛn ‑nu ‑bha, kë "dhʋ̈ kö Atanna ‑bha "kië 'ö dho nu 'në ‑blɛɛsü ‑nu zë ‑dhɛ 'gü "saa‑ bha‑ zian‑ ‑ta bha 'ya 'dho zë bho Izraɛdhö ‑mɛ ‑nu "piʋ̈, 'yö ‑kë ‑a ‑nu ‑go ꞊dhuëngdhɛ 'gü ‑troo bha‑ ‑blɛɛsü 'wo‑ Pakö ‑kë bha‑ kë ‑kɔ 'ka.
HEB 11:29 ‑Zʋ ‑yö Atanna ‑dhɛ ‑sü bha ꞊në gun‑ ‑gɔ 'yö waa‑ Izraɛdhö ‑mɛ ‑nu 'wo ꞊weeyi ‑zaɔndhö ‑kan ‑dhɛ "kpɛadhɛ 'gü, 'yö Ezitö ‑mɛ ‑nu dho‑ kë ꞊dhɛ‑ ‑nu 'dhö, 'yö "yi ‑ya ‑nu ꞊gban zë "pɛɛpɛdhö.
HEB 11:30 ‑Zʋ ‑yö Atanna ‑dhɛ ‑sü ꞊në‑ ‑kë 'yö 'pö‑ 'kpii‑ 'ö Izraɛdhö ‑mɛ ‑nu ‑wo ‑gblü ‑da ‑ta yi 'bha 'ka 'wo‑ Zedhiko ‑dhɛ ‑kë bha, ‑a "saan 'ö gun "kan ‑sü 'ka‑ ‑zü bha 'ö ꞊loo ö ‑dɩ 'ka kö Izraɛdhö ‑mɛ ‑nu ꞊waa‑ kë ꞊dhɛ ‑kɔ 'ö Atanna ‑ya pö‑ 'ka ‑a 'dhö, kö ꞊waa‑ ‑zü bɔ ‑dhɛkpaɔyi "saɔplɛ 'ka.
HEB 11:31 ‑Zʋ ‑yö Atanna ‑dhɛ ‑sü ꞊në gun Dhaabö 'ö gun ‑zuadhe 'ka 'pö‑ bha‑ 'gü bha‑ ‑gɔ, 'yö ‑gblü 'wɔn 'suan‑ bho ‑mɛ ꞊plɛ 'ö Izraɛdhö ‑mɛ ‑nu ‑wa bɔ kö ‑wo ꞊nië "sɛ bha‑ 'gü bha‑ ‑nu ꞊yëë bho, 'yö‑ ‑nu kun ‑së 'yö 'yii‑ ‑nu 'sü ꞊dhɛ ö 'yaɔ‑ 'dhö, 'yö‑ ‑wɔn 'gü, 'mɛ 'wo gɔɔgbɩɩdhɛ ‑kë 'pö‑ bha‑ 'gü bha, ‑gblü ‑ya ‑nu zë, "kɛɛ 'yö 'wii yö ‑zë zë.
HEB 11:32 'A ‑më pö? Kö "tʋ̈ng 'yaa n ‑gɔ kö 'a Zedeɔn ‑nu oo, Badhakö ‑nu oo, Sansɔn ‑nu oo, Zɛfute ‑nu oo, Davi ‑nu oo, Samiɛdhö ‑nu waa‑ Atanna ‑wʋdhiʋ̈loomɛ ‑nu ‑bha pö.
HEB 11:33 'Mɛ 'wo bha‑ mɛ 'bha ‑nu ‑kɔ 'ö ꞊mɔɔ "sɛgɔ ‑todhʋ̈ ‑sü ‑nu ‑bha 'wo‑ kun ‑gblü 'ka, 'ö‑ mɛ 'bha ‑nu ‑wo 'wɔn 'ö pö 'aa‑ ‑bha Atanna wëëdhö ‑a ‑kë, 'ö 'pë 'ö Atanna ‑ya "plüün bho ‑a ‑nu ‑dhɛ 'wo‑ ꞊slɔɔ, 'ö Atanna ‑yö laabhölaa "dhi kun mɛ 'bha ‑nu ‑bha 'ö 'yii ꞊mɔɔ‑ ‑bha kö ‑ya ‑nu kë ‑kɔ 'bha 'gü,
HEB 11:34 'ö 'wo‑ mɛ 'bha ‑nu ‑da pɛng 'gü, 'ö pɛng ‑yö ‑kë ‑nu ‑bha ꞊dhɛ "yi 'dhö, 'ö 'yii 'wɔn 'bha bho‑ ‑nu ‑bha, 'ö‑ mɛ 'bha ‑nu ‑wo dha ‑siang ‑gɔ bha ‑wa ‑wo "dhʋ̈ ‑zʋ ‑yö Atanna ‑dhɛ ‑sü ꞊në‑ "saa‑ 'gü. "Sɩ 'yaa gun‑ ‑nu ‑dhɛ, "kɛɛ Atanna ‑yö kë faan ‑da ‑nu 'gü ‑a "tʋ̈ng ‑nu bha‑ 'gü 'ö 'wo ‑kë "kplëë 'ka 'yö 'wo dɔ ‑gblü ‑gɔ zian‑ 'wo‑ ‑kan.
HEB 11:35 ‑Zʋ ‑yö Atanna ‑dhɛ ‑sü bha ꞊në gun dhong ‑nu 'bha ‑nu ‑gɔ 'yö‑ ‑nu ‑bha mɛ ‑nu 'ö ꞊wa ga 'nu ‑a ‑nu ‑bö. 'Yö 'wo‑ mɛ 'bha ‑nu ‑wëë ‑kë "dhiʋ̈ wo 'yö 'wo‑ ‑nu zë‑ 'ka kö 'waa "wɩ‑ ‑bha kö ‑wo 'go wo ‑wʋ ‑ta kö ‑wo dha, kë "dhʋ̈ kö Atanna ‑ya ‑nu ‑bö ‑tosɛa 'dhɛ 'ö ‑së 'ö ‑ziö ‑a 'dhɛ 'ö "kpʋng ꞊taa yö‑ ‑ta bha ꞊në‑ yi 'ka.
HEB 11:36 'Yö 'wo ꞊wɛɛ dɔ‑ mɛ 'bha ‑nu ‑bha, 'yö 'wo‑ ‑nu ‑ma ꞊dedewo ‑zʋ ‑yö Atanna ‑dhɛ ‑sü bha‑ ‑wɔn 'gü. 'Yö 'wo‑ mɛ 'bha ‑nu ‑lö ‑piö lɔɔ" 'ka 'wo‑ ‑nu ‑da ‑kaso 'gü.
HEB 11:37 ‑Zʋ ‑yö Atanna ‑dhɛ ‑sü ꞊në‑ ‑wɔn 'gü, 'yö 'wo mɛ 'bha ‑nu ‑zuö ‑gwë 'ka, 'yö 'wo‑ ‑nu zë‑ 'ka, 'Yö 'wo‑ mɛ 'bha ‑nu "kplü bho "sii 'ka, 'yö 'wo‑ mɛ 'bha ‑nu zë ‑siang 'ka, 'yö‑ mɛ 'bha ‑nu 'wo ‑da "sɛ "piʋ̈ 'wo dho ‑dhɛ ‑nu 'gü kö "bhlaa kwi ‑nu "ɛɛn ‑bhʋ kwi ‑nu ꞊në‑ sɔ 'dhö‑ ‑nu ‑bha, pë 'bha ‑pë 'bha 'yaa gun‑ ‑nu ‑gɔ, kö ‑wa ‑nu ‑wëë ‑kë "dhiʋ̈ wo sië, 'ö 'wo 'wɔn ꞊gban ‑wɔn ꞊gban suu ‑wɔ ‑a ‑nu ‑ta.
HEB 11:38 ‑A ‑dhɛ 'yaa gun‑ ‑bha ꞊dhɛ ‑zʋ ‑yö Atanna ‑dhɛ ‑mɛ ‑nu 'wo "dhʋ̈ bha ‑wo ‑tosɛa kë 'wɔnyaakëmɛ ‑nu 'wo "kpʋng ꞊taa yö bha‑ ‑nu kpö 'gü, ‑a ‑nu "ta ‑kɔ ‑kë ‑së ‑wɔn bha ꞊në‑ 'gü 'yö 'wo‑ ‑nu ‑kë 'wo kpö 'gü, 'yö 'wo dho "tʋngtadhɛ ‑nu waa‑ ‑tɔn 'gü ‑dhɛ ‑nu 'gü, 'yö 'wo dho 'wo ‑wɔ ‑gwë ‑yɛ 'gü ‑dhɛ ‑nu waa‑ ‑yɛ "wɛɛ 'gü ‑dhɛ ‑nu 'gü.
HEB 11:39 Mɛ "pɛpɛ 'wo "dhʋ̈ bha‑ ‑nu "dhia 'ö ma Atanna 'gü bha ‑yö ‑ma 'gü ‑a ‑nu ‑bha ‑zʋ ‑yö ‑a ‑dhɛ ‑sü ꞊në‑ ‑wɔn 'gü. "Kɛɛ kö pë 'ö‑ "plüün bho‑ ‑nu ‑dhɛ 'wɔn bha‑ 'gü 'ö dhang‑ 'gü bha 'wii‑ ꞊slɔɔ ‑a "tʋ̈ng bha‑ 'gü.
HEB 11:40 ‑A ‑gɛn ‑mü ꞊dhɛ ‑yö ‑gun Atanna "piʋ̈ ꞊dhɛ 'mɛ 'kwa "tʋ̈ng ya‑ 'gü kwa ‑bha ‑yö kë ‑së ‑a ‑nu ‑bha ‑bha, yö ꞊në‑ ‑wɔn 'gü 'yö 'yii "wɩ‑ ‑bha kö ‑ya ‑nu ‑bha dha ‑sü bha ‑ya ‑gɔ ‑da 'plöö ‑a "tʋng bha‑ 'gü, kë "dhʋ̈ kö kwɛng‑ ‑nu 'kwa‑ ꞊slɔɔ kwa "kwëë.
HEB 12:1 ‑A ‑kë "dhʋ̈ ‑sü bha‑ 'gü, ꞊dhɛ 'ö ‑kë ꞊dhɛ kwaa ‑dɩ 'pö Atanna "sɛɛ‑ kpö 'kpii‑ 'wo "dhʋ̈ bha ‑wo ꞊klëën ‑sü 'ka kwa ‑zü, 'ö‑ ‑nu "yan 'dhö kwa ‑bha bha, ‑ka ‑kwa kwa kwaa‑ pë "pɛpɛ 'ö ꞊dhɛ ꞊kwɛɛ 'dhö 'ö ꞊mɔɔ‑ ‑bha 'ö "kang ‑da kwa ‑gɛn 'gü, 'ö 'kwaa "ta ‑sü Atanna ‑bha zian bha‑ ‑ta ‑dhɛ yö bha‑ ꞊gban ‑zuö, kö 'wɔn yaa 'ö kwa ‑da 'gü ‑dhɛ 'dhö ‑së ꞊dhɛ 'pë 'bha 'dhö bha 'kwa "kan‑ ‑bha, kö ‑bɛang 'ö Atanna ‑ya yi kpɔ kwa ‑gɔ bha 'kwa yö ꞊në‑ 'sü kwa ‑sɔbhɛɛ 'ka.
HEB 12:2 Yesu ö kwa ‑bha ‑zʋ ‑yö Atanna ‑dhɛ ‑sü zübhodhɛ waa‑ "dhiʋ̈yadhɛ 'ka bha ‑ka ‑kwa kwa "yan 'to yö ꞊në‑ ‑bha. ‑A ‑gɛn ‑mü ꞊dhɛ yö 'ö bha ꞊në 'ö ‑wɩ ‑bha kö ‑wo ö zë "dhü ‑bha, 'yö ga ‑kɔ 'yiʋ̈sü 'ö‑ suu 'dhö "dhʋ̈ bha‑ 'yiʋ̈‑ 'yii‑ kë, ꞊dhɛ 'ö ‑kë ꞊dhɛ zuëniidadhe 'kpii‑ ‑yö ‑ya ‑sü 'ka‑ ‑gɔ ‑a zian‑ ‑ta bha‑ ‑wɔn 'gü, 'yö dɔ 'kwa‑ wo ꞊dɛɛ ya 'ö ‑ya ‑sü 'ka ‑duɛ ꞊bhlëësü 'ö Atanna ‑bha ‑blüdëdhɛ ‑gbloo ‑ta ‑a "sɔɔ dhang‑ 'gü bha‑ 'gü.
HEB 12:3 ‑A ‑kë "dhʋ̈ ‑sü bha‑ 'gü, ka ‑zʋ 'ya 'dho bhɔ‑ 'ka, 'ö ka 'gü ‑yö ga "yan ‑to ‑a ‑gɔ ‑sü 'ka, "ɛɛn 'ö ka ‑din ‑yö yën Atanna ‑bha "ta bha‑ 'sü ‑sü ‑bha. ‑A ‑gɛn ‑mü ꞊dhɛ yö 'ö bha ꞊në 'wɔnyaakëmɛ ‑nu 'wo 'wɔn ꞊gban "pɛpɛ suu 'do 'do ‑wɔ ‑ta 'yö 'kun bho‑ 'gü.
HEB 12:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ, 'ö ꞊dhɛ 'ko ‑zë 'wɔn yaa 'ka ‑sü 'dhö kö 'ya 'dho ‑da kaa‑ ‑tosɛa 'gü, kö ka‑ ‑bha ꞊dedewo, "kɛɛ 'kii‑ zë ꞊kö kö 'ka zun‑ 'ka ka ‑gɔ ‑to 'gü ‑wɔn ‑nu ‑bha.
HEB 12:5 "Ɛɛn ka faan dɔ ‑wʋ 'ö Atanna ‑ya pö ka ‑dhɛ ꞊dhɛ mɛ‑ pë pö mɛ bhang ‑nu ‑dhɛ 'ö‑ pö: «N gbö, i Dëmɛ ꞊ya "wɩ‑ ‑bha kö 'wɔn ‑yö wɔ i ‑ta ‑yö 'kun bho i 'gü, 'ya 'dho i 'gü ga, kö ‑ya ‑kë "dhʋ̈ kö 'ö i "klʋ ꞊në‑ bho,
HEB 12:6 ‑A ‑gɛn ‑mü ꞊dhɛ 'mɛ 'ö‑ ‑dhɔ ‑yö kwa Dëmɛ ‑kë, "ɛɛn 'ö‑ sü ꞊dhɛ ö gbö 'dhö 'yö‑ "klʋ bho» bha ka ‑zʋ ꞊në ꞊ya bhɔ‑ 'ka ‑ee?
HEB 12:7 Saan" ‑nu 'ka‑ wo sië Atanna ‑bha zian ‑ta bha, ‑kaa 'kun ka ‑bha ꞊dhɛ 'pë 'ö ka dë ꞊në ka "klʋ bho sië‑ 'dhö. ‑A ‑gɛn ‑mü ꞊dhɛ sëë 'ka‑ bho "dhʋ̈ bha ꞊në‑ ‑zɔn ꞊dhɛ Atanna ‑yö ka ‑sü ꞊dhɛ ö bhang ‑nu 'dhö. "Ɛɛn 'në 'bha ‑yö ‑dhö 'yö‑ dë 'yaa‑ "klʋ bho ‑ee?
HEB 12:8 ꞊Ya kë ꞊dhɛ ka ‑zë 'yii ka "klʋ bho ꞊dhɛ mɛ ‑kpɛa ꞊gban 'dhö, kö 'kaa‑ ga 'gü ‑në ꞊në‑ 'ka. 'Yaa yö ‑zë 'ka, 'në dë "pɛpɛ ꞊gban ‑wo wo bhang ‑nu "klʋ ꞊në‑ bho.
HEB 12:9 ‑Kaa 'suan‑ bho kwa 'kpɔ ‑dë ‑nu 'wo "kpʋng ꞊taa ya‑ ‑nu ‑bha. ‑Wo kwa "klʋ ꞊në‑ bho kwa 'nëdhɛ 'gü 'yö 'kwa ꞊bhlëë ‑ya ‑nu ‑bha. ꞊Ya kë "dhʋ̈ 'yö kwa Dë 'kö dhang‑ 'gü ꞊wɛ? ‑A ‑dhɛa ‑bha ꞊dhɛ 'kwa kwa ‑gɔ 'dho‑ ‑dhɛ "sia‑ kö 'kwa dha.
HEB 12:10 ‑A ‑gɛn ‑mü ꞊dhɛ kwa dë ‑nu ‑gun kwa "klʋ bho sië ‑dhɛkpaɔyi "kɛɛ 'në 'bha ꞊në‑ 'ka, kë "dhʋ̈ kö 'kwa kë ꞊dhɛ ‑kɔ 'ö‑ ‑nu "piʋ̈ ꞊dhɛ 'kwa kë‑ 'ka ‑a 'dhö, "kɛɛ kwa Dë Atanna ‑zë ‑yö kwa "klʋ ‑bho kwa ‑dɩa 'wɔn ‑së 'gü, kë "dhʋ̈ kö 'kwa kë "slʋ̈ʋ̈slʋ̈ 'pö ꞊dhɛ ‑a 'dhö.
HEB 12:11 'Wo mɛ "klʋ bho sië "tʋ̈ng 'ö‑ 'gü "dhʋ̈ bha 'yaa dhi mɛ ‑dhɛ, ‑a ‑gɛn ‑mü ꞊dhɛ 'yaa bhɔ mɛ 'gü 'wɔn ‑së ‑bha. "Kɛɛ ꞊dhɛ 'ö‑ ꞊trɔɔn 'ö ‑kë zuëyagblʋ̈ʋ̈‑ waa‑ ‑tosɛa 'ö pö 'aa‑ ‑bha ‑a kë ‑sü 'ka bha ꞊waa‑ ꞊slɔɔ, 'yö 'wo‑ 'wɔn dɔ ꞊dhɛ mɛ "klʋ bho ‑sü bha 'wɔn ‑së ‑mü.
HEB 12:12 ꞊Dhɛ 'ö "dhʋ̈, ka ‑gbe ‑nu 'ö "sɩ 'yaa ‑nu ‑dhɛ 'zü bha ‑kaa "wlü, kö ka kpiögɔ ‑nu 'ö‑ ‑nu 'gü ꞊ya ga bha 'ka‑ gba faan 'ka.
HEB 12:13 Kö 'ka "ta Atanna ‑bha ‑zian 'ö‑ du 'yaa‑ ‑bha bha ꞊në‑ ‑ta kö 'ka 'dho‑ 'ka "dhiʋ̈, kë "dhʋ̈ kö 'mɛ 'ö‑ ‑nu ‑gɛn ‑dhɛ ꞊ya ‑ya ‑bha bha 'wa 'dho 'go zian ‑ta, "kɛɛ kö‑ ‑nu ‑gɛn ‑yö dɔ ꞊në‑ wo ꞊zinng 'gü.
HEB 12:14 ‑Ka ka 'gü dɔ "gbɩɩ‑ kö kaa mɛ ꞊gban "pɛpɛ ka kë 'flëë‑ 'gü ka 'ko "piʋ̈, kö 'ka ‑tosɛa ‑së 'ö pö 'aa‑ ‑bha ꞊në‑ kë. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑tosɛa 'ö suu 'dhö "dhʋ̈ bha 'yii kë mɛ 'ö‑ ‑gɔ, ‑a ‑mɛ 'yii 'dho ö "yan ‑kpan kwa Dëmɛ ‑bha.
HEB 12:15 ‑Kaa kë ‑së kö mɛ 'bha 'ya 'dho ö ꞊taa zun ‑gasitɛ 'ö Atanna ‑ya ‑kë kwa ‑dhɛ bha‑ ‑gɔ. ‑Kaa kë 'zü ‑së kö 'wɔn yaa 'ö ꞊dhɛ mɛ zëpë ‑bhong 'dhö 'ö gun ka zuë" "piʋ̈, 'ö Atanna ꞊yaa‑ ‑wo bha 'ya 'dho bhɔ 'zü ‑deewo ka 'gü 'ö 'ka ‑da 'ka mɛ 'gbɛ ‑gɔ 'gü 'ö tɛanwɔn 'ö ‑gban Atanna ‑bha bha‑ ꞊dhɛng‑ ‑nu ‑gɔ.
HEB 12:16 ‑Kaa kë ‑së kö mɛ 'bha 'ya 'dho kë ‑zuazëmɛ 'ka ka kpö 'gü, "ɛɛn 'ö‑ ‑mɛ ‑ya zë "wlaawɔn ‑nu 'wo "kpʋng ꞊taa yö bha‑ ‑wɔn ‑dhɛ, 'ö pë ꞊bhlëësü 'ö Atanna ‑ya nu‑ ‑dhɛ bha‑ ‑wɔn ‑ma "gbɔng 'ka ꞊dhɛ Ezau 'dhö, kö ‑ya zë pë ‑bhö ‑kɔ doseng ‑wɔn ‑dhɛ kö ‑yö ö ‑bha 'kpiidhɛ 'go ö 'zlaa‑ ‑gɔ.
HEB 12:17 Kaa ꞊dede ka‑ 'wɔn ‑dɔ ꞊dhɛ ꞊dhɛ 'ö ꞊yaa‑ kë "dhʋ̈, 'ö‑ ‑nu dë 'dhuë‑ ‑kë ‑a ‑nu ‑bha "tʋ̈ng ꞊ya ꞊loo kö yöö ga, ‑yö ‑gun Ezau "piʋ̈ ꞊dhɛ 'wɔn 'ö‑ ‑kë bha ‑yö 'ma ‑zukplü ‑bha kö ö dë ‑yö 'dhuë‑ bha‑ kë yö ꞊në ö ‑bha, 'ö‑ ꞊mɔɔ ö dë "dhiʋ̈ "gbʋ ‑nu ꞊gban 'ka, "kɛɛ 'ö 'yii‑ ꞊slɔɔ 'zü tongtongdhö.
HEB 12:18 'Wɔn "pɛpɛ 'a‑ pö bha‑ pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑bhɛa Atanna ‑dhɛ ‑mɛ ‑nu 'dhɛ 'ka ꞊dɛɛ bha 'kaa ꞊dhɛ Izraɛdhö ‑mɛ ‑nu 'wo gun yi 'bha 'ka bha‑ ‑nu 'dhö. ‑A ‑gɛn ‑mü ꞊dhɛ wo ‑zë ‑wo kë ‑yɔɔn ‑tɔn 'wo‑ Sinai ‑kë, 'ö mɛ‑ ꞊mɔɔ ‑bha mɛ‑ zun‑ ‑bha bha ꞊në‑ "sɔɔ, kö pɛng ‑ya ‑bha ‑yɛɛdhö, 'sa kö ‑dhɛ ‑yö trö ‑sü 'ka mü ‑blünblündhö "dhʋ̈ do, "kɛɛ kö "tɛɛ "gbɩɩ‑ ‑yö ziö sië,
HEB 12:19 kö "truu ‑yö "wɩ sië, kö ‑wo Atanna "gblawʋ ma sië mü ꞊dhɛ dha 'ö ‑wɩ ‑a 'dhö, 'ö ꞊dhɛ 'ö Izraɛdhö ‑mɛ ‑nu ꞊wa mɛ "gblawʋ bha‑ ma 'yö 'wo‑ pö 'wa 'dho 'wɔn "wɛɛ 'bha pö wo ‑dhɛ ‑a 'dhɛ bha‑ zian 'gü 'zü, ‑a 'dhɛ bha ꞊yaa‑ ‑nu ‑zʋ 'kun.
HEB 12:20 ‑A ‑gɛn ‑mü ꞊dhɛ kö 'pë 'ö ‑wʋ bha 'ö‑ pö sië 'wo‑ ma 'ö‑ pö ꞊dhɛ: «Pë "yaandhe suu "ʋʋ suu 'ö yaa‑ ‑zun ‑tɔn ya‑ ‑bha, kö 'zü ꞊ya kë wü ‑zian 'ka, ‑wa ‑zuö ‑gwë 'ka kö ‑wa zë‑ 'ka» bha‑ ma ‑sü ꞊ya kë‑ ‑nu 'gü ‑ziisü.
HEB 12:21 'Ö 'wɔn bha‑ ‑bha ‑kë ‑ziisü ‑kɔ yaa 'gü yaa bha‑ ‑wɔn 'gü, 'ö Moizö ‑yö 'daɔnnu 'ö‑ pö: «Dɔ 'a‑ wo ya ꞊zii ꞊në 'a‑ wo sië, "suʋ̈ 'ö ‑da n 'gü bha‑ ‑naa 'yaa 'dhö!»
HEB 12:22 "Kɛɛ ka ‑zë, Siɔn ‑tɔn waa‑ Zedhizadhɛmö ‑pö 'ö Atanna "yaandhe 'ö dhang‑ 'gü bha‑ ‑yɛa ꞊bhaa ‑dhɛ 'ka, waa‑ ‑a ‑bha "kië "gblü mɛɛ ‑nu bha‑ ‑nu 'dhö bha ꞊në 'ka ꞊yɔɔn ‑sü 'ka‑ "sɔɔ.
HEB 12:23 Ka ꞊yɔɔn ‑sü 'ka Atanna ‑bha 'në ‑blɛɛsü ‑nu kpö 'ö zuëniidadhe 'dhö‑ ‑nu ‑gɔ, 'ö‑ ‑nu 'tɔ ‑bɛn 'dhö zë ‑sü 'ka dhang‑ 'gü bha ꞊në‑ "sɔɔ. Atanna 'ö yö ꞊në dho za dɔ mɛ ꞊gban "pɛpɛ suu ‑bha bha ꞊në 'ka ꞊yɔɔn ‑sü 'ka‑ "sɔɔ. Waa‑ 'mɛ 'wo‑ dhɔɔbhaawɔn ‑kë kwa "dhiʋ̈ yi 'bha 'ka bha‑ ‑nu 'nii‑ 'ö 'bɔn ‑tangga ‑zian 'yaa‑ ‑bha 'zü 'ö 'wo‑ "piʋ̈ mü bha‑ ‑nu 'dhö.
HEB 12:24 Ka ꞊yɔɔn ‑sü 'ka Yesu 'ö ‑mlɛɛ ‑dee ‑da kwaa‑ Atanna ‑nu kwa ꞊zinng 'gü bha, waa‑ ꞊yɔɔn 'ö 'yaa ꞊dhɛ Abɛdhö ‑bha 'dhö kö ‑ya ‑dhɛ Atanna ‑gɔ kö ‑yö ö bhlɔɔ bho, "kɛɛ 'ö kwɛng‑ ‑nu kwa ‑kɔ ꞊në wü 'koo bha ꞊në‑ ꞊gban "sɔɔ bha.
HEB 12:25 ‑A ‑kë "dhʋ̈ ‑sü bha‑ 'gü, ‑kaa kë ‑së kö 'ka 'dho ‑kɔ Atanna 'ö dhiang zë sië ka ‑dhɛ bha‑ ‑wʋ 'ka. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ "sanni ‑yö 'wɔn bho 'mɛ 'wii wo "tʋ 'to dhiang 'ö‑ zë Sinai ‑tɔn ꞊gbin‑ "kpʋng ꞊taa yö yi 'bha 'ka bha‑ ‑bha bha‑ ‑nu 'gü bha ‑oo, 'yö 'ö ‑ya dhang‑ 'gü 'ö dhiang zë 'mɛ 'kö kwa ‑dhɛ ꞊dɛɛ ‑a Gbö Yesu Klisi 'saa‑ 'gü ꞊wɛ?
HEB 12:26 'Sa kö yö 'ö bha ꞊në "sɛ ‑yö ꞊zii ‑a ‑wʋ "dhiʋ̈ yi 'bha 'ka, "kɛɛ 'yö ‑ya mü 'zü 'ö‑ pö kwa ‑dhɛ ꞊dɛɛ 'ö‑ pö: «"Sɛ ꞊në n ‑wʋ ‑ya ꞊zii yi 'bha 'ka, "kɛɛ ‑a 'dhɛ 'kö yöö kë ꞊taamasü ya‑ 'gü kö ‑yö kë‑ "dhiʋ̈todhɛ 'ka bha dhang‑ ‑nu ꞊gban ‑dho ꞊zii!»
HEB 12:27 ‑Wʋ do 'dhɛ 'ö‑ pö 'ö‑ pö ꞊dhɛ: «‑A 'dhɛ 'ö yöö kë ꞊taamasü ya‑ 'gü,» bha ꞊në‑ ‑zɔn kwa ‑dhɛ ꞊dhɛ pë "pɛpɛ 'ö Atanna ‑ya ‑da ‑a ꞊gban‑ ‑dho ꞊zii 'ö ‑ziö, 'yö‑ 'dhɛ 'ö ‑todhʋ̈ ‑pë 'ka bha 'ö to.
HEB 12:28 ꞊Dhɛ 'ö "dhʋ̈, n dheebhang ‑nu, ꞊dhɛ 'ö ‑kë ꞊dhɛ Atanna ꞊ya kwa ‑ya ‑gblüdëdhɛ 'ö 'yaa yën ‑a këmɛ 'ka ‑dhɛ 'ö yö ‑zë 'yaa ꞊zii ‑a 'gü bha ‑yö 'to kwa "yaan, kö‑ ‑dhɔkë ‑kɔ waa‑ ‑bha yë kë ‑kɔ 'ö ‑dhi ‑dhɛ ꞊në 'kwa‑ kë‑ 'ka, ‑a ꞊bhlëë ‑ya ‑sü waa‑ ‑suʋ̈ ‑gɔ ‑sü 'ka.
HEB 12:29 ‑A ‑gɛn ‑mü ꞊dhɛ kwa ‑bha Atanna bha pɛng 'ö mɛ ‑bhö yö ‑mü, 'waa troo kë‑ ‑bha.
HEB 13:1 Ka ‑bha ‑kë dheebhangzë ‑nu 'ka ‑sü 'ö Klisi ‑bha zian ‑ta bha‑ ‑wɔn 'gü, ka ‑dhɔ 'ya 'dho bo ka 'ko kë ‑sü 'ka.
HEB 13:2 Ka ‑zʋ 'ya 'dho bhɔ ‑dhɛng ‑nu ‑kun ‑së ‑sü 'ka, ‑a ‑gɛn ‑mü ꞊dhɛ mɛ 'bha ‑nu kë Atanna ‑bha "kië ‑nu ꞊yëë ‑bho kö 'waa‑ 'wɔn dɔ ‑a ‑nu ‑bha ‑dhɛng ‑wɔn 'kun ‑sü bha ꞊në‑ ‑wɔn 'gü.
HEB 13:3 Ka ‑zʋ ‑yö ‑bö 'mɛ 'wo ‑kaso 'gü ‑a ‑nu 'ka, ꞊dhɛ 'pë ka ꞊në 'ka ‑kaso 'gü ‑a 'dhö. Kö 'ka ‑ya 'mɛ 'wo‑ ‑nu ‑wëë ‑kë "dhiʋ̈ wo sië‑ ‑nu ‑wɔn zuën ‑ta, ‑a ‑gɛn ‑mü ꞊dhɛ ꞊waa‑ ‑nu ‑ma ‑yö ‑ma ‑nu 'ka 'pö ꞊dhɛ ka 'dhö.
HEB 13:4 Dhe waa‑ gɔn ‑a ‑nu ‑bha ‑kë 'ko "piʋ̈ ‑sü 'ö‑ ‑nu ‑bha 'ko 'sü ‑sü 'gü bha‑ ꞊bhlëë ‑yö kë mɛ ꞊gban "pɛpɛ ka ‑gɔ, kö dhebhɔ 'ya 'dho ö ‑gɔn 'to 'ö ꞊nië, "ɛɛn kö gɔɔn‑ 'ya 'dho ö ‑bha dhebhɔ 'to 'ö ꞊nië. ‑A ‑gɛn ‑mü ꞊dhɛ Atanna ‑dho 'wɔn bho ‑zuazëmɛ ‑nu waa‑ ‑da mɛ ‑nu ‑bha dhe "piʋ̈ ‑mɛ ‑nu 'gü waa ‑ziö mɛ ‑nu ‑bha gɔn ꞊kengmɛ ‑nu 'dhö.
HEB 13:5 'Wëëga ‑dhɔ 'ya 'dho ka kë ka ‑bha ‑tosɛa 'gü 'ö ‑ziö 'ka ‑naa 'gü, pë 'dhɛ 'ö ka ‑gɔ ‑yö ka ‑zʋ 'kun, ‑a ‑gɛn ‑mü ꞊dhɛ Atanna ‑ya ‑pö 'ö‑ pö: «N ‑zʋ 'yii 'dho bhɔ i ‑wɔn 'ka, 'mii 'dho n ‑kɔ "kan i "dhiʋ̈ tongtongdhö.»
HEB 13:6 Yö ꞊në‑ ‑wɔn 'gü, 'yö 'kwa ꞊mɔɔ‑ ‑bha 'kwa‑ pö 'dhang ‑bho "dhiʋ̈ 'ka ꞊dhɛ: «N Dëmɛ bha ꞊në ‑nu n ‑dhɛ ‑mɛ 'ka, ‑a ‑kë "dhʋ̈ ‑sü bha‑ 'gü, "suʋ̈ 'yii 'dho n kë, ‑a ‑gɛn ‑mü ꞊dhɛ ‑më "wɛɛ 'ö mɛ "bhɩɩ‑ ꞊mɔɔ‑ ‑bha 'ö‑ ‑kë n 'ka?»
HEB 13:7 Ka ‑zʋ 'ya 'dho bhɔ 'mɛ ‑blɛɛsü ‑nu 'wo Atanna ‑wɔn ‑dhiang zë ka ‑dhɛ, 'wo zian bho ka 'ka bha‑ ‑nu 'ka. ‑Kɔ 'wo wo ‑zʋ yö‑ 'ka Atanna ‑dhɛ 'ö to‑ 'ka "dhʋ̈ 'ö zun‑ 'ka‑ ‑nu gayi ‑bha bha, ‑yö kë ka ‑gɔ kö 'ka ‑tosɛa kë 'pö ꞊dhɛ ‑kɔ 'wo‑ ‑kë 'ka bha‑ 'dhö.
HEB 13:8 ‑A ‑gɛn ‑mü ꞊dhɛ Yesu Klisi bha, ‑kɔ do 'ö gun‑ ‑bha yi 'bha 'ka 'yö‑ ‑bha ꞊dɛɛ, 'yö dho 'to‑ 'ka "dhʋ̈ ‑todhʋ̈ 'ka.
HEB 13:9 Atanna ‑dhɔkë ‑kɔ ‑dee 'gbɛ ꞊ya sɔ, "kɛɛ 'wa 'dho "kpënng‑ kë ka ‑gɔ ‑a 'bha 'ka 'ö ka ‑zʋ kun 'ö‑ ‑nu ‑kɔ ‑yö ꞊mɔɔ ka ‑bha. 'Wɔn 'ö ‑së kwa ‑bha 'ka yö ‑mü ꞊dhɛ kö kwa zuë" ‑yö bhɔ Atanna ‑bha ‑gasitɛ 'ö‑ ‑kë kwa ‑dhɛ bha ꞊në‑ ‑bha kö ‑yö kwa gba faan 'ka, pë ‑nu 'ö ‑gban ‑bhöpë ‑nu 'ö mɛ ‑ya ‑bhö "ɛɛn 'ö mɛ 'yaa‑ ‑bhö ‑a ‑wɔn ‑bha bha ka "tʋ 'ya 'dho kë‑ ‑bha. ‑A ‑gɛn ‑mü ꞊dhɛ mɛ "pɛpɛ 'wo wo ‑dɩ nu 'wɔn ‑nu bha‑ ‑dhɛ 'wo ‑bhɔ 'ka yi 'bha 'ka bha, 'wii‑ ꞊trɔɔn 'bha ꞊slɔɔ do.
HEB 13:10 'Mɛ 'ö 'kwa 'dhang bho kwa Dëmɛ Yesu Klisi 'ö ö ‑dɩ ‑kë "saa‑ 'ka mɛ "bhɩɩ‑ ‑nu ‑bha 'wɔn yaa ‑bho ‑a ‑nu ‑bha ‑wɔn 'gü bha‑ "dhiʋ̈ bha kwa ꞊në 'kwa dha ‑sü ꞊dede ꞊slɔɔ, "kɛɛ 'mɛ 'kö 'wo wo ‑dɩ nu "kian suu ‑nu bha‑ ‑nu 'kun ‑sü ‑dhɛ kö yö ꞊në ‑ya ‑nu dha bha 'waa‑ ꞊slɔɔ.
HEB 13:11 'Ö gun yi 'bha 'ka, wü ꞊yɔɔn 'ö "saabhomɛ 'kpii‑ gun‑ 'sü sië 'ö dho‑ 'ka 'ö "sɛgümɛ ‑nu ‑bha "saa‑ bho‑ 'ka Atanna ‑dhɔkëdhɛ ꞊dede 'gü, kë "dhʋ̈ kö ‑ya ‑nu ‑bha 'wɔn yaa ‑mawɔn 'to bha ꞊waa‑ kë "dhʋ̈, 'yö 'wo‑ wü ꞊dede ‑zë sü 'wo dho‑ 'ka "saan zlöö, 'yö 'wo‑ ‑gʋ̈ mü.
HEB 13:12 'Wɔn 'ö‑ ‑wɔn 'gü, 'yö Yesu ‑dɩ pö 'yii ga 'pö‑ yaan‑ ‑bha bha 'yö bha. ‑Yö ka ‑wɩ ‑bha 'ö ga "saan "dhiʋ̈ "kɛɛ kö yö ꞊në gun 'yiʋ̈‑ ‑wɔn 'ka. Kë "dhʋ̈ kö 'ö 'wɔn yaa bho mɛ "bhɩɩ‑ ‑nu ‑bha ö ‑dɩ ꞊yɔɔn 'ka.
HEB 13:13 ꞊Dhɛ 'ö "dhʋ̈, n dheebhang ‑nu, ‑ka ‑kwa 'go ‑yɛa zii bha‑ 'gü kö 'kwa 'dho Yesu ꞊keng‑, kö ‑kɔ do 'wo 'yiʋ̈‑ dɔ‑ 'ka‑ ‑bha 'ö‑ kun ö ‑bha bha 'kwa kwa ‑bha 'kun 'ka kwa ‑bha 'pö.
HEB 13:14 ‑A ‑gɛn ‑mü ꞊dhɛ "kpʋngtaadhɛ ya ‑yɛa 'ö dho kë kwa ‑yɛa 'ka 'ö dho 'to ‑todhʋ̈ 'ka 'yaa mü. ‑A ‑wɔn 'gü, ‑a 'dhɛ 'ö nu sië ‑dhɛkpaɔ dhia" 'gü bha ꞊në 'kwa‑ mɔɔ‑ sië.
HEB 13:15 ‑A ‑kë "dhʋ̈ ‑sü bha‑ 'gü, Atanna nuɛ" bho ‑sü kö 'kwa‑ 'tɔ bhɔ mɛ kpö 'gü bha ꞊në ‑yö kë kwa ‑bha yë 'ka ‑kpɛakpɛawo Yesu Klisi 'saa‑ 'gü, kö ‑yö kë ꞊dhɛ kwa ‑bha "saa‑ pë 'dhö.
HEB 13:16 Ka ‑zʋ 'ya 'dho bhɔ ka 'ko ‑ta ‑kun 'wɔn ‑nu 'gü ‑sü waa‑ 'wɔn ‑së kë ‑sü 'ka. ‑A ‑gɛn ‑mü ꞊dhɛ "saa‑ suu 'dhɛ 'ö bha ꞊në‑ "dhia ‑yö ma Atanna 'gü.
HEB 13:17 ‑Ka ꞊bhlëë ‑ya ‑zun ka ‑dhɛ "dhiʋ̈ ‑mɛ ‑nu ‑bha kö 'ka ka ‑gɔ 'dho‑ ‑nu ‑dhɛ "sia‑. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ wo ꞊në Atanna dho‑ ‑nu dhɛɛ" 'kpɔ ka 'nii‑ ‑wɔn 'ka. ‑A ‑wɔn 'gü, wo ꞊në 'wo "tʋ̈ng kë sië ka 'gü. ꞊Ya kë ꞊dhɛ 'ka‑ ‑nu ‑wʋ ꞊bhlëë ‑ya, yë 'ö Atanna ‑ya ‑ya ‑a ‑nu ꞊kwɛɛ "dhʋ̈ bha ‑wo ‑dho ‑a kë ꞊niida 'ka, "kɛɛ 'kii‑ ‑nu ‑wʋ ꞊bhlëë ‑ya ‑wo ‑dho ‑a kë wë 'gü ‑siö 'ka, 'sa ꞊ya kë "dhʋ̈ kö‑ ꞊trɔɔn 'yii 'dho kë ka ꞊në ka ‑bha.
HEB 13:18 Ka 'gü 'ya 'dho ga ‑bhɛa yi ‑wɔn 'gü ‑sü 'ka, ‑a ‑gɛn ‑mü ꞊dhɛ 'yaa 'yi "piʋ̈ ꞊dhɛ yi "ta ‑kɔ ‑yö ‑siö tongtongdhö. "Kɛɛ yö ‑zë ꞊gban 'gü, yi zuë" 'yaa za dɔ yi ‑bha, yi 'dhang bho ‑sü ‑yö yi ‑dɩ "dhiʋ̈ yö ‑zë 'gü.
HEB 13:19 A‑ ‑dhɛ ka ‑gɔ kö 'ka bhɛa" Atanna ‑dhɛ ‑dɩ ‑wɔn "dhiʋ̈ n ‑wɔn 'gü, kë "dhʋ̈ kö ‑yö "wɩ‑ ‑bha kö 'a n yee kë ka ‑dhɛ 'gü 'piö‑.
HEB 13:20 Kö Atanna 'ö ‑ya ‑dɩ 'flëë‑ 'gü ‑sü 'dhö yö ꞊në‑ ‑gɔ, 'ö yö ꞊në ‑tuʋ̈ ‑maakëmɛ ꞊gban 'kpii‑ ‑sü 'ka, 'ö yö ꞊në kwa Dëmɛ Yesu 'ö ‑mlɛɛ ‑dee 'ö‑ "dhiʋ̈todhɛ 'yaa 'dhö ‑a ‑da kwɛng‑ ‑nu kwa ꞊zinng 'gü ‑a ꞊yɔɔn 'ka bha‑ ‑bö, 'ö‑ ‑bho ga 'gü bha,
HEB 13:21 ‑yö "ta ‑kɔ ‑së suu ꞊gban "pɛpɛ 'do 'do kë ‑sü "sɩ kë ka ‑dhɛ, kë "dhʋ̈ kö‑ ‑dhidhɛwɔn ꞊në 'ka‑ kë, kö ‑yö 'pë 'ö‑ "dhia 'dhö ö 'gü ꞊në‑ ‑ya ka 'gü, Yesu Klisi 'saa‑ 'gü, "kɛɛ kö yö Yesu Klisi ꞊në‑ 'tɔ ‑yö bhɔ ‑kpɛawo bha 'aa ‑yö kë.
HEB 13:22 N dheebhang ‑nu, bhɛa" ꞊në 'a‑ wo ka ‑dhɛ kö 'ka dɔ "gbɩɩ‑ kö ka faan dɔ ‑wʋ ‑nu 'a‑ pö sië ka ‑dhɛ bha 'ka‑ 'kun zuësɛadhɛ 'ka, 'pë 'a‑ pö ka ‑dhɛ 'sëëdhɛ ya‑ 'gü bha‑ ‑bha ‑kë klöö‑ ‑sü ‑wɔn 'gü.
HEB 13:23 ‑Yö n "piʋ̈ ꞊dhɛ 'a‑ pö ka ‑dhɛ ꞊dhɛ kwa dheebhang Timote bha ꞊ya 'go ‑kaso 'gü, ꞊ya kë ꞊dhɛ ꞊ya nu kö ‑yö ꞊loo n "piʋ̈ yö 'piö‑, 'a nu sië ka ‑dhɛ 'gü yɛng yi ‑dho nu yi "kwëë.
HEB 13:24 Mɛ "pɛpɛ wo ‑zun ka ‑dhɛ "dhiʋ̈ ‑mɛ ‑nu 'ka bha, 'ma‑ ꞊gban ꞊tua bho 'gbɛ, mɛ "pɛpɛ 'wo Atanna ‑bha mɛ 'ka 'ma‑ ꞊gban ꞊tua bho 'gbɛ. Kwa dheebhang ‑nu 'wo Itadhi ‑sɛ 'gü ꞊wa ka ꞊tua bho 'gbɛ.
HEB 13:25 Kö Atanna ‑yö ‑gasitɛ kë mɛ ꞊gban "pɛpɛ ka ‑dhɛ bha 'aa ‑yö kë.
JAM 1:1 Mang Zakö ‑mɛ 'a ‑kë Atanna waa‑ kwa Dëmɛ Yesu Klisi ‑a ‑nu ‑bha gwëëmi 'ka bha, ma ꞊në 'a 'sëëdhɛ ya‑ bɔ ‑a ‑bha mɛ ‑nu "pɛpɛ 'ka ‑pɛn ‑sü 'ka "kpʋngtaadhɛ ꞊gban ‑dhɛ ꞊gban 'gü bha ka ‑dhɛ. 'Ma mɛ ꞊gban "pɛpɛ ka ꞊tua bho, 'ma ka ꞊tua bho 'gbɛ.
JAM 1:2 N dheebhang ‑nu, ka ꞊nii ‑yö ‑da ꞊dedewo 'wɔn "gbɩɩgbɩɩ‑ suu "pɛpɛ 'ö ‑wɔ ka ‑ta bha‑ ꞊gban 'gü.
JAM 1:3 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑a ‑dhɛa ‑bha ꞊dhɛ ‑yö kë ka "yaan ꞊dhɛ 'wɔn "gbɩɩgbɩɩ‑ ‑nu bha ꞊në‑ ꞊gban ꞊ya 'kun bho ka 'gü ka ‑bha 'dhang ‑bho Yesu "dhiʋ̈ ‑sü bha‑ 'gü, 'yö dho ka gba zuësɛadhɛ 'ka.
JAM 1:4 "Kɛɛ zuësɛadhɛ 'ö "dhʋ̈ bha‑ ‑dhɛa ‑bha ꞊dhɛ ‑yö kë zuësɛadhɛ 'ö‑ "dhiʋ̈ 'dhö pa ‑sü 'ka ꞊në‑ 'ka, kë "dhʋ̈ kö ka ‑bha ‑kë Yesu Klisi ‑bha mɛ 'ka ‑sü bha ‑yö kë 'wɔn ‑ta "puu 'ö pö 'aa‑ ‑bha ‑a 'ka 'pö, kö 'ka 'dho ‑pö 'wɔn yaa 'bha 'gü.
JAM 1:5 ꞊Ya kë 'zü ꞊dhɛ "yaaki 'yaa 'mɛ 'ö‑ ‑bha ꞊ya kë ka kpö 'gü, ‑a ‑mɛ ‑yö bhɛa" Atanna ‑dhɛ ‑a ‑wɔn 'gü, ꞊ya kë "dhʋ̈ ‑yö ‑dho ‑a ‑mɛ gba "yaaki 'ka. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑a ‑bha gbaɔ ‑sü bha 'yaa‑ wo ꞊döng ‑sü 'ka, 'ö ‑ya mü 'zü 'yaa‑ wo zuë" ‑totaama 'ka, ‑ya ‑wo ‑kɔ ‑wo ‑dhɛ ‑bha ö zuë" "puu 'ka.
JAM 1:6 "Kɛɛ 'mɛ 'ö pë ‑gbadhɛ sië "dhʋ̈ bha, ‑a ‑dhɛa ‑bha ꞊dhɛ ‑a ‑mɛ 'dhang bho ‑sü kë‑ "dhiʋ̈ 'kpakpadhö ꞊dhɛ Atanna ‑mɔɔ ‑bha 'ö‑ ‑kë ö ‑dhɛ. 'Ya 'dho‑ wo "sika 'ka, ‑a ‑gɛn ‑mü ꞊dhɛ 'mɛ 'ö pë ‑gbadhɛ "sika 'ka "dhʋ̈ bha, ‑a ‑mɛ ‑bha 'dhang ‑bho Atanna "dhiʋ̈ ‑sü "dhiʋ̈ ‑bha ‑kë ꞊dhɛ ꞊weeyi kpökpö ‑nu 'ö "tɛɛ ‑ya ‑blü 'ö dho‑ 'ka ꞊kwaa "piʋ̈, 'ö dho‑ 'ka ‑kɔ ‑së "piʋ̈, 'ö 'yaa dɔ "sɛnngdhö bha ꞊në‑ 'dhö.
JAM 1:7 'Mɛ 'kö‑ suu 'dhö "dhʋ̈ bha ꞊ya bhɛa" Atanna ‑dhɛ, 'ya 'dho ö ‑zʋ ‑zian 'gɔn ꞊dhɛ 'ö ‑dho pë 'bha ꞊slɔɔ kwa Dëmɛ bha‑ "dhiʋ̈.
JAM 1:8 'Pë 'ö‑ ‑kë "dhʋ̈ bha‑ 'klɔɔ‑ ‑mü ꞊dhɛ kö‑ ‑mɛ zuë" ‑yö "pɛ ‑sü 'ka‑ 'gü, 'yaa ‑kplü 'wɔn do ‑bha.
JAM 1:9 N dheebhang ‑nu, ‑a ‑dhɛa ‑bha ꞊dhɛ 'mɛ 'ö "flɛɛmɛ ‑zian ꞊në‑ 'ka (ka kpö 'gü), ‑a ‑mɛ ꞊nii ‑yö ‑da, ‑a ‑gɛn ‑mü ꞊dhɛ Atanna ꞊yaa‑ wë ‑ta "pʋ,
JAM 1:10 kö 'mɛ 'ö ꞊naɔmɛ 'ka ‑yö ö wë 'gü ‑siö, ‑a ‑gɛn ‑mü ꞊dhɛ Atanna ꞊yaa‑ ꞊bhlëë ‑pö (kë "dhʋ̈ kö waa‑ "flɛɛmɛ ‑duɛ kë do. ‑A 'klɔɔ‑ ‑mü ꞊dhɛ mɛ ꞊gban ꞊bhlëë ‑yö do Atanna ‑zë wëëdhö). ꞊Naɔmɛ bha ‑yö ‑ziö ꞊dhɛ blëë "bin 'dhö.
JAM 1:11 Blëë ꞊ya "bin ‑ya, 'yënng‑ ꞊ya ‑wo ö "tɛɛ "gbɩɩ‑ bha‑ 'ka, 'yö‑ ‑bhong zë, 'yö‑ "bin ꞊gban ‑yö ‑zuan, 'yö ꞊wɛnng, 'yö ‑kë ‑a ‑bha ‑sëdhɛ bha‑ "dhiʋ̈todhɛ 'ka. ꞊Naɔmɛ ‑yö ‑go 'pö ö këwɔn ‑nu ‑ta ‑kɔ do bha ꞊në‑ 'gü.
JAM 1:12 "Kɛɛ 'mɛ 'ö 'wɔn "gbɩɩ‑ ꞊gban "pɛpɛ suu 'do 'do ‑yö ‑wɔ ‑ta 'ö 'kun bho‑ 'gü (ka kpö 'gü), kö‑ ‑mɛ ‑bha ‑së, ‑a ‑gɛn ‑mü ꞊dhɛ ꞊ya bo ziö ‑sü 'ka‑ ꞊gban 'gü, ‑yö ‑dho ‑a ‑gloo 'faan‑ 'ö ꞊sii 'ö 'yaa yën‑ 'ka, 'ö kwa Dëmɛ ‑ya ‑ya 'mɛ 'ö‑ ‑dhɔ ‑ya ‑nu ‑kë ‑a ‑nu ‑gɔ bha‑ ꞊slɔɔ.
JAM 1:13 Mɛ "ʋʋ mɛ 'ö 'wɔn yaa kë zuëga ꞊ya ‑da "gblʋ̈ʋ̈‑, 'ya 'dho‑ pö ꞊dhɛ Atanna ꞊në zuëga suu bha‑ ‑da ö "gblʋ̈ʋ̈‑, ‑a ‑gɛn ‑mü ꞊dhɛ 'wɔn yaa 'yaa ꞊mɔɔ‑ ‑bha kö ‑yö ‑da ‑zian ꞊në‑ wo Atanna ‑zʋ "piʋ̈ kö yöö 'to yö ‑zë ‑a ‑bha ‑a ‑da mɛ 'bha zuëpiʋ̈wɔn ꞊në‑ ‑bha. Yö ‑zë 'yaa 'wɔn yaa ‑da mɛ 'bha zuë" "piʋ̈.
JAM 1:14 "Kɛɛ 'wɔn yaa ‑bha ‑da mɛ ‑zʋ "piʋ̈ ‑sü bha ‑yö ‑sü 'mɛ 'ö "dhʋ̈ ‑a zuë" ‑bhɔ ‑bha ‑pë ꞊në‑ ‑bha. Mɛ zuë" ‑bhɔ pë ‑bha ‑sü bha ꞊në mɛ ‑da 'wɔn yaa kë ‑sü 'gü.
JAM 1:15 Zuë" ‑bhɔ 'wɔn ‑bha ‑sü bha ꞊në ꞊ya ‑da mɛ 'gü, kö mɛ ‑ya gba ‑yɛa 'ka, 'yö ‑yaan ‑da mɛ zuë" ‑bha, 'yö dho 'yö bho‑ 'gü 'wɔn yaa kë ‑sü 'ka. ‑A 'wɔn yaa bha ꞊në mɛ ꞊ya 'to‑ kë ‑sü ‑bha, 'yö‑ ‑mɛ ‑gɔ ‑yö to‑ ‑bha.
JAM 1:16 ‑A ‑kë "dhʋ̈ ‑sü 'gü 'ka 'dho "kpënng‑ kë ka ‑dɩ ‑gɔ, n dheebhang ‑wɔngbɩɩsü ‑nu.
JAM 1:17 ꞊Ya 'go yö ‑zë 'gü ‑gasitɛ "pɛpɛ 'ö ‑kë mɛ "bhɩɩ‑ ‑nu ‑dhɛ, "ɛɛn pë "pɛpɛ 'ö mɛ "bhɩɩ‑ ‑ya ꞊slɔɔ ꞊dhɛ gbaɔdhe 'dhö bha, ‑a 'bha 'yii 'go ‑dhɛ "wɛɛ 'bha 'gü kö 'yii kë Atanna "piʋ̈ ‑dhɛ 'ö dhang‑ 'gü bha yö ‑zë 'ka. Atanna do 'ö 'bhüpë "pɛpɛ ꞊gban ‑da bha ꞊në‑ nu mɛ ‑dhɛ. "Kɛɛ 'sa yö 'ö "dhʋ̈ bha ‑kɔ do 'ö‑ ‑bha 'yö‑ ‑bha ‑kpɛawo. Pö 'aa ‑ya ‑a këwɔn ‑zë 'bha ‑bha 'bha ‑bha.
JAM 1:18 ꞊Sii 'ö bɔ‑ 'ka ö ‑wʋ 'ö 'yaa ꞊sua 'ka bha‑ ‑ta 'ö‑ ‑da kwa 'gü bha, ‑yö ‑ga yöö ꞊dede ꞊në‑ 'gü. Kë "dhʋ̈ kö 'kwa kë pë "pɛpɛ 'ö‑ ‑da bha‑ ‑blɛɛsü 'ka ö ‑gɔ.
JAM 1:19 'Wɔn bha‑ ‑dhɛa ‑bha ꞊dhɛ ‑yö 'to ka "yaan, ka ‑zʋ 'ya 'dho bhɔ‑ 'ka tongtongdhö, n dheebhang dhɔɔbhaasü ‑nu. ‑A ‑kë "dhʋ̈ ‑sü bha‑ 'gü, mɛ 'ö "dhʋ̈ ‑yö ‑ya ö "tʋ ‑ta, dhiang 'ya 'dho pa ka ‑ta, "ɛɛn ꞊wa 'wɔn kë ka 'ka 'ya 'dho 'to 'ö ‑yɛ ka ‑bha.
JAM 1:20 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔn ‑yɛ mɛ ‑bha ‑sü 'ö "dhʋ̈ bha 'yaa mɛ kë 'wɔn 'ö ‑dhi Atanna ‑dhɛ ‑a këmɛ 'ka.
JAM 1:21 'Wɔn 'ö‑ ‑wɔn 'gü 'yö 'a‑ pö ka ‑dhɛ ꞊dhɛ 'wɔn 'ö mɛ ‑dhii 'kun ‑wɔn 'ka Atanna wëëdhö, "ɛɛn "gblüyaadhɛ 'ö ka ‑kɔ "piʋ̈ bha 'ka ka kwaa‑ ‑zü kö 'ka ka ‑kɔ 'kpɔ ‑a ‑wʋ 'ö‑ ta ka 'gü, 'ö ꞊mɔɔ‑ ‑bha 'ö ka 'nii‑ dha bha ꞊në‑ ‑gɔ dhɔngdhɔngsü 'ka bha 'yö bha.
JAM 1:22 ꞊Ya 'go yö ‑zë 'gü, Atanna ‑wʋ bha ‑kaa 'gü ‑ta ꞊në‑ 'sü, 'ka 'dho‑ kë ka "tʋ ‑to ‑bha ‑sü 'ka "wɛɛwɛɛ kö 'ka 'go mü 'ka ka ‑dɩ ‑tama ꞊suasua ‑nu ‑zun 'ko "dhiʋ̈ ‑sü 'ka (꞊dhɛ ka 'dhang ‑bho "dhiʋ̈).
JAM 1:23 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'ö ö "tʋ 'to Atanna ‑wʋ ‑bha 'ö 'yaa‑ 'gü ‑wɔn ‑zë kë bha, ‑a "sinma ‑kë ꞊dhɛ 'mɛ 'ö ö ‑dɩ ‑ga ‑dhuangdhe 'gü 'ö‑ dɔ ꞊dhɛ ö wëëdhɛ ‑dhiisü,
JAM 1:24 "kɛɛ 'ö ꞊ya 'go mü kö‑ ‑zʋ ꞊ya 'to ꞊ya bhɔ 'ö ‑kɔ 'ö‑ ‑bha ‑a 'ka bha ꞊në‑ 'dhö.
JAM 1:25 "Kɛɛ mɛ 'ö ö "tʋ̈ng ‑kë Atanna ‑bha 'tɔng‑ 'ö pö 'aa‑ ‑bha, 'ö ꞊dhuëngdhɛ bhië" ‑kan kwa ‑bha bha‑ 'gü, 'ö‑ ‑wɔn kun ö 'nii‑ 'ka, 'ö‑ 'gü 'yaa ga ‑a 'gü ‑wɔn kë ‑sü 'ka, "ɛɛn 'ö ꞊yaa‑ ma 'ö‑ ‑zʋ 'yaa bhɔ‑ 'ka, kö‑ ‑mɛ ‑zë ‑bha ‑së. ‑A ‑gɛn ‑mü ꞊dhɛ 'mɛ 'ö "dhʋ̈ bha ꞊ya ö ‑kɔ ‑da 'wɔn "ʋʋ 'wɔn 'ö‑ 'gü, ‑a ꞊gban‑ ‑dho dhi ꞊në‑ wo‑ ‑mɛ ‑gɔ.
JAM 1:26 Mɛ "ʋʋ mɛ 'ö‑ pö ö ‑dɩ ‑dhɛ ꞊dhɛ ö ‑bhɛa Atanna ‑dhɛ "kɛɛ 'ö dhiang ‑yö pa‑ ‑ta, 'ö‑ "dhi 'yaa 'kun, kö‑ ‑mɛ ‑yö "kpënng‑ ꞊në‑ kë sië ö ‑dɩ ‑gɔ "wɛɛwɛɛ, kö‑ ‑bha ‑bhɛa Atanna ‑dhɛ ‑sü bha ‑yö "wlaasü.
JAM 1:27 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kwa Dë Atanna ‑dhɔkë ‑kɔ 'dhɛ 'ö ‑dhi ‑dhɛ, 'ö‑ ‑zʋ kun 'ö ‑dhii 'yaa‑ ‑bha ‑a "yan 'gü, yö ‑mü 'mɛ 'wo ꞊gɛandhe ‑nu 'ka "ɛɛn ‑tɩnë ‑nu 'ö "sɩ 'yaa‑ ‑nu ‑dhɛ bha‑ ‑nu ‑ta 'kun ‑sü ꞊në‑ 'ka. ꞊Ya 'go mü 'zü kö‑ ‑mɛ ‑yö ‑zʋ 'to ö ‑dɩ 'gü, kö ‑yö ö kwaa‑ 'wɔn yaa kë ‑sü 'ö "kpʋng ꞊taa yö bha‑ ‑zü.
JAM 2:1 N dheebhang ‑nu, ka 'ö ka ‑zë ka 'dhang bho ‑sü 'dhö kwa Dëmɛ ꞊bhlëëbhlëësü Yesu Klisi bha‑ "dhiʋ̈ bha, 'ka 'dho mɛ 'bha fië‑ ‑bho mɛ 'bha ‑bha.
JAM 2:2 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ ꞊ya kë ꞊dhɛ 'ka bho 'ko ‑ta, kö mɛ 'bha ‑yö ‑da 'kɔɔdhö kö "sënng kɔnggaapë ‑ya ‑kɔ ‑bha, kö sɔga ‑ya ‑bha, kö 'ka ‑yɛa ‑së nu‑ ‑dhɛ, kö 'ka 'to ‑dhɛ do bha‑ 'gü kö "flɛɛmɛ 'ö sɔ "blë 'dhö‑ ‑bha ‑yö ‑da 'pö 'kɔɔdhö, kö 'ka‑ pö yö ‑zë ‑dhɛ: «‑Bhö dɔ i ‑gɛan bha!» "ɛɛn «‑Bhö ‑ya ‑bobi 'gü yi ‑gɛn "piʋ̈ bha!»;
JAM 2:4 ꞊ya kë "dhʋ̈ kö 'ka ꞊naɔmɛ bha‑ fië‑ ꞊në‑ bho‑ "tɛado bha‑ ‑bha ka zuë" "piʋ̈ 'yö 'ka‑ ‑nu bho 'ko "piʋ̈ bha. "Kɛɛ 'sa 'ka‑ kë "dhʋ̈ kö 'wɔn ‑dan "kwëë ‑kɔ yaa ꞊në 'ka‑ ‑kë bha.
JAM 2:5 ‑Ka ‑dhɛ ‑ga, n dheebhang dhɔɔbhaasü ‑nu, 'mɛ 'wo "flɛɛmɛ ‑nu 'ka "kpʋng ꞊taa yö bha ꞊në Atanna ‑ya ‑nu sü 'ö‑ ‑nu ‑ya kö ‑wo kë ‑zʋ ‑yö ö ‑dhɛ ‑sü bha‑ ꞊naɔmɛ 'ka, kë "dhʋ̈ kö‑ ‑bha ‑gblüdëdhɛ 'ö‑ "plüün bho 'mɛ 'ö ö ‑dhɔ ‑ya ‑nu ‑kë ‑a ‑nu ‑dhɛ ‑dhɛ 'bha ꞊kpaɔyi ‑bha bha ‑wa ꞊slɔɔ.
JAM 2:6 Ka ꞊bhlëë ‑bho "flɛɛmɛ ‑zë ‑bha 'yö 'ka‑ ‑ya ꞊naɔmɛ ‑zë ‑bha ‑më ‑wɔn 'gü? "Ɛɛn 'yaa ka 'gü ꞊dhɛ ꞊naɔmɛ ‑nu bha ꞊në (mɛ 'dhɛ 'waa Atanna dɔ) 'wo ꞊gbaɔn ka ‑ta, 'yö 'wo ka ‑da ‑nu wo zadɔmɛ ‑nu ‑dhɛ bha ‑ee?
JAM 2:7 "Ɛɛn woo do bha 'zü 'aa mü 'wo 'tɔ ‑së 'ö ‑kë kwa Dëmɛ Yesu Klisi 'tɔ 'ka 'ö Atanna ‑ya ‑ya ka ‑bha bha‑ ‑bha fang bho ‑kpɛawo 'zü bha ‑ee? "Ɛɛn 'yaa "dhʋ̈ ‑ee?
JAM 2:8 ‑A ‑kë "dhʋ̈ ‑sü bha‑ 'gü, n dheebhang ‑nu, ꞊ya kë ꞊dhɛ Atanna ‑bha 'tɔng‑ 'ö‑ dɔ kwa ‑dhɛ 'ö ‑bɛn zë ‑sü 'ka‑ ‑gɔ 'sëëdhɛ 'gü ꞊dhɛ: «I këyɔɔ ‑dhɔ ‑yö i kë ꞊dhɛ ‑kɔ 'ö i ‑dɩ ‑dhɔ ‑yö i ‑dɩ ‑kë ‑bha ‑a 'dhö» bha 'ka yö ‑zë 'gü "ta 'sü, kö 'wɔn ‑së ꞊në 'ka‑ kë.
JAM 2:9 "Kɛɛ 'ka mɛ 'bha ‑zë fië‑ bho mɛ 'bha ‑bha, kö 'ka ‑da 'wɔn yaa 'gü. ꞊Ya kë "dhʋ̈ kö 'ka Atanna ‑bha 'tɔng‑ bha‑ bho ꞊naa bha.
JAM 2:10 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'i‑ ‑bha 'tɔng‑ bha‑ 'kpiidhɛ ꞊gban kun, "kɛɛ 'ö 'i‑ doseng ‑zian bho, kö 'bha‑ ꞊gban ꞊në‑ bho bha.
JAM 2:11 ‑A ‑gɛn ‑mü ꞊dhɛ yöö do 'ö‑ pö ꞊dhɛ: «'Ka 'dho ‑da mɛ ‑naadhe "piʋ̈ "ɛɛn 'ka 'dho ziö mɛ ‑nu ‑bha gɔn ꞊keng‑» bha, yöö do bha ꞊në‑ pö 'zü: «'Ka 'dho mɛ zë». ‑A ‑kë "dhʋ̈ ‑sü bha‑ 'gü, 'bhii ‑da mɛ ‑naadhe "piʋ̈ "kɛɛ kö i mɛ ‑zë zë, kö 'bha 'tɔng‑ bho ꞊naa bha.
JAM 2:12 ꞊Dhɛ 'ö "dhʋ̈ ‑ka ‑tosɛa kë ‑së 'ka, ‑a ‑gɛn ‑mü ꞊dhɛ Atanna dho ka dhɛɛ" 'kpɔ dhia". 'Ka‑ pö 'ka dhiang zë, "ɛɛn 'ka‑ pö 'ka 'wɔn 'bha kë ‑kaa kë ‑a ‑bha 'tɔng‑ 'ö ‑ya 'flëë‑ 'gü ‑sü nu kwa ‑dhɛ bha ꞊në‑ ꞊yënng 'gü.
JAM 2:13 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'ö mɛ 'bha ‑wëë 'yaa‑ kë, Atanna ꞊yaa‑ pö 'ö za dɔ‑ ‑bha yi 'ö‑ 'ka, ‑a ‑mɛ ‑wëë 'yii 'dho‑ kë 'pö, "kɛɛ kö ‑a ‑bha mɛ ‑wëëga ‑sü ‑zë ‑wɔn ‑ya ‑gɔ "gbɩɩ‑ 'ö ‑ziö ‑a ‑bha za ‑dɔ mɛ ‑bha ‑sü ‑zë ‑ta.
JAM 2:14 N dheebhang ‑nu, ‑a pö ‑sü 'ö mɛ "dhi "wɛɛwɛɛ ꞊dhɛ a 'dhang ‑bho Atanna "dhiʋ̈, "kɛɛ kö‑ ‑mɛ 'yaa‑ 'gü ‑ta ‑zë 'sü bha‑ ‑gɛn ‑mü ‑më 'ka? 'Dhang ‑bho Atanna "dhiʋ̈ ‑kɔ suu bha ‑yö ‑mɔɔ ‑bha 'ö‑ ‑mɛ dha "wɛ ‑ee? ‑Abin!
JAM 2:15 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑a "dhiʋ̈ ‑bha ‑kë ꞊dhɛ kö ka dheebhang 'ö 'dhang bho Atanna "dhiʋ̈ 'pö ꞊dhɛ ka 'dhö ‑yö kë ka kpö 'gü, ‑yö ‑kë dhebhɔ 'ka oo, ‑yö ‑kë 'zü gɔɔn‑ 'ka oo, "kɛɛ kö‑ ‑dasɔ 'yaa 'dhö, "ɛɛn pë ‑zian 'ö yöö‑ ‑bhö 'yaa‑ ‑gɔ;
JAM 2:16 kö 'ka‑ pö‑ ‑mɛ ‑dhɛ "dhi ‑dhɛ "nɛɛnɛɛdhɛ ‑bha ꞊dhɛ: «‑Bhö i ‑bha 'dho wo i 'flëë‑ 'gü, n dheebhang, kö 'i "nɛnɛ "bhɛɛ ‑da i ‑bha, kö 'i pë ‑bhö kpɛnngkpɛnngdhö 'i 'kën», "kɛɛ kö 'kii pë 'bha ‑pë 'bha ‑zë nu‑ ‑mɛ ‑dhɛ ‑a 'dhö. ꞊Ya kë "dhʋ̈ kö‑ ‑pö "dhʋ̈ ‑gɛn ‑mü ‑më 'ka?
JAM 2:17 ‑Kɔ 'ö ‑zʋ ‑yö Atanna ‑dhɛ ‑sü 'dhö‑ 'ka 'yö bha, ‑a ‑gɛn ‑mü ꞊dhɛ 'mɛ 'ö 'dhang bho‑ "dhiʋ̈ "kɛɛ 'ö 'yaa 'pë 'ö‑ ‑wʋ ‑ya pö‑ 'gü ‑wɔn ‑zë kë bha kö‑ ‑mɛ ‑yö 'wɔn 'gü "fië ꞊në‑ kë sië bha; kö‑ ‑mɛ ‑bha ‑zʋ ‑yö ‑a ‑dhɛ ‑sü bha ‑yö ꞊dhɛ 'pë ꞊ya ga ‑a 'dhö.
JAM 2:18 ‑A kë "dhʋ̈ ‑sü bha‑ 'gü, kö mɛ ‑ya pö n "yaan ꞊dhɛ: «A n ‑zʋ ‑yö Atanna ‑dhɛ», ꞊ya 'go mü kö mɛ "wɛɛ 'bha ‑ya pö ꞊dhɛ: «Ma ‑zë n ‑zʋ ‑yö 'wɔn ‑së kë ‑sü ꞊në‑ 'gü», ma ‑zë a ‑dho ‑a pö mɛ ‑blɛɛsü bha‑ ‑dhɛ 'a‑ pö: «I ‑zʋ 'dhö i ‑bha ‑zʋ ‑yö Atanna ‑dhɛ ‑kɔ suu 'ö‑ 'gü, "kɛɛ 'ö 'bhaa‑ 'gü ‑wɔn ‑së ‑zë kë bha‑ ‑zɔn n ‑dhɛ. 'Bha‑ ‑zɔn n ‑dhɛ kö ma ‑zë 'a n ‑bha ‑zɔn i ‑dhɛ n këwɔn ‑nu ‑bha.»
JAM 2:19 ‑A ‑gɛn ‑mü ꞊dhɛ i‑ ‑pö i ‑dɩ ‑dhɛ ꞊dhɛ «Atanna ‑yö doseng», 'ö "dhʋ̈ kö i 'dhang ‑bho "dhiʋ̈ ꞊naa bha. ꞊Iin ‑yö "dhʋ̈ tɛan‑ 'ka "kɛɛ ‑a ‑bha ‑kë doseng ‑wɔn ‑zë "yina yaa ‑nu ꞊gban ‑zian ‑wo 'dhang ‑bho yö ‑zë "dhiʋ̈ 'ö 'wo ꞊zii ‑zianwo ‑wɔn "dhiʋ̈.
JAM 2:20 A ‑tamamɛ! ‑Yö i "piʋ̈ ꞊dhɛ 'a‑ ‑zɔn i ꞊dhɛ ꞊dhɛ 'dhang ‑bho Atanna "dhiʋ̈ ‑sü 'ö mɛ "dhi "wɛɛwɛɛ 'ö 'waa‑ 'gü ‑wɔn ‑së ‑zë kë bha ‑yö "wlaasü ‑ee?
JAM 2:21 ‑Bhö ‑dhɛ ‑ga! ‑A pö 'ö Atanna ‑ya wo kwa "bhɛma Ablaamö ‑bha yi 'bha 'ka ꞊dhɛ pö 'aa‑ ‑bha bha‑ 'klɔɔ‑ ‑gun ‑më ꞊në‑ 'ka? ‑Yö ‑gun 'wɔn 'ö‑ ‑kë ꞊në‑ 'ka. "Wɩ 'ö‑ wo‑ ‑bha kö ‑yö "saa‑ bho ö gbö Izaakö 'ka Atanna ‑dhɛ ‑gwë "klʋ ‑ta bha ꞊në‑ ‑wɔn 'gü 'yö‑ pö 'pö "dhʋ̈ ‑a ‑bha.
JAM 2:22 I‑ ‑yö bha ‑ee? ‑A ‑bha bha ‑a ‑bha ‑zʋ ‑yö Atanna ‑dhɛ ‑sü waa‑ 'gü ‑wɔn 'ö‑ ‑kë ‑a ꞊gban‑ ‑gun 'ko ꞊keng‑ do. 'Wɔn 'ö‑ ‑kë bha ꞊në "sɛ bho‑ ‑bha ‑zʋ ‑yö Atanna ‑dhɛ ‑sü bha‑ ‑bha 'yö ‑kë "puu.
JAM 2:23 'Yö dho 'ö ‑kë 'pë 'ö gun ‑bɛn zë ‑sü 'ka Atanna ‑gɔ 'sëëdhɛ 'gü ꞊dhɛ: «Ablaamö kë 'dhang ‑bho Atanna "dhiʋ̈, ‑a ‑bha ‑zʋ ‑yö ‑a ‑dhɛ ‑sü ꞊në‑ ‑wɔn 'gü 'yö‑ pö‑ ‑bha ꞊dhɛ pö 'aa‑ ‑bha» bha‑ 'gü ‑wɔn kë ‑kɔ 'ka. 'Wɔn 'ö‑ ‑wɔn 'gü 'yö‑ ‑dhɛ ö "taɔngdë bha 'yö bha.
JAM 2:24 ‑Ka ‑dhɛ ‑ga bha, ꞊ya kë "dhʋ̈ kö ‑a pö 'ö Atanna ‑ya wo mɛ ‑bha ꞊dhɛ 'mɛ 'ö bha pö 'aa‑ ‑bha bha, 'yii 'sü‑ ‑mɛ ‑bha 'dhang bho‑ "dhiʋ̈ ‑sü ‑dɩ do ‑bha, kö ‑yö ‑gban ‑a ‑mɛ ‑bha 'dhang ‑bho ‑a "dhiʋ̈ ‑sü waa‑ 'gü ‑wɔn ‑së ‑nu 'ö‑ ‑kë bha ꞊në‑ ‑bha.
JAM 2:25 ꞊Ya 'go Ablaamö ‑bha bha‑ 'gü, ‑zuadhe 'wo gun‑ ‑dhɛ sië Dhaabö bha‑ ‑bha kë ‑kë 'pö ‑kɔ do bha ꞊në‑ 'gü. ‑A pö 'ö Atanna ‑ya wo‑ ‑bha yi 'bha 'ka ꞊dhɛ pö 'aa‑ ‑bha bha ‑yö kë Zuifö ‑nu 'wo dho 'wɔn 'suan‑ bho ‑dhɛ 'gü Kanaa ‑sɛ 'gü (kö ‑wo ‑gblü ‑pö ‑ta bha) ꞊në‑ ‑nu ꞊yëë bho, 'yö dho 'yö zian "wɛɛ 'bha ‑zɔn ‑nu ‑dhɛ, 'yö 'wo bɔ‑ ‑ta 'wo dho (kë "dhʋ̈ kö‑ ‑nu 'yaɔ‑ ‑nu ‑kɔ 'ya 'dho ꞊mɔɔ‑ ‑nu ‑bha).
JAM 2:26 'Wɔn 'ö ‑gban 'dhang ‑bho Atanna "dhiʋ̈ ‑sü ‑bha ‑a ‑dhiang 'a‑ zë "dhʋ̈ bha‑ 'klɔɔ‑ ‑mü ꞊dhɛ ‑kɔ do 'ö mɛ 'dhɛ 'ö 'yaa "tɛɛ 'zü 'wo‑ ‑dhɛ ‑bha mɛ ꞊gee bha ꞊në 'dhang ‑bho ‑a "dhiʋ̈ ‑sü 'ö‑ kë ‑yë 'yaa 'dhö bha 'ö‑ ‑bha 'pö.
JAM 3:1 N dheebhang ‑nu, 'ka kë ka zuë" 'ya 'dho bhɔ mɛ ꞊klang ‑kë Atanna ‑wʋ 'ka ‑sü ‑bha 'ö 'ka ka kpö dɔ‑ ‑bha ‑dungdhö; ‑a ‑gɛn ‑mü ꞊dhɛ kaa ꞊dede ka‑ 'wɔn ‑dɔ ꞊dhɛ 'mɛ 'yi mɛdraanmɛ ‑nu 'ka bha, za 'ö dho‑ dɔ yi ‑bha bha ‑yö ‑dho kë "gbɩɩ‑ 'ö ‑ziö mɛ ꞊gban ‑bha ‑ta.
JAM 3:2 Mɛ ꞊gban "pɛpɛ kwa ‑pö 'wɔn kë ‑sü 'gü ‑kɔ 'gbɛ ꞊dede 'gü, "kɛɛ mɛ 'dhɛ 'kö yö ‑zë 'yaa ‑pö dhiang zë ‑sü 'gü tongtongdhö bha kö‑ ‑mɛ ‑zë pö 'aa‑ ‑bha, "kɛɛ kö‑ ‑mɛ ‑zë ‑kɔ ‑mɔɔ ö ‑dɩ 'kun ‑sü ‑bha 'wɔn ꞊gban 'gü ꞊në‑ wo bha.
JAM 3:3 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑kafe 'kwa‑ ‑da sië ꞊soo "dhi bha‑ 'klɔɔ‑ ‑mü ‑më 'ka? ‑A 'klɔɔ‑ ‑mü ꞊dhɛ kö kwa ‑kɔ ‑yö ꞊mɔɔ‑ ‑bha kö 'kwa‑ pö ‑yö ö wë dɔ zian 'ö‑ 'ka, kö ‑yö ö wë dɔ‑ 'ka.
JAM 3:4 'Yii ‑kë "dhʋ̈ 'zü, ‑ka "yitagɔ "gblʋ̈gblʋ̈ ‑nu bha‑ ‑nu ‑ga. ‑A ‑nu ‑bha ‑kë 'kpii‑ ‑sü ꞊gban waa‑ ‑bha ‑bha, "ɛɛn "tɛɛ "gblʋ̈gblʋ̈ ‑nu 'wo ‑ya ‑a ‑nu ‑bha bha yö ‑zë ꞊gban 'gü, pë 'në 'dɛdɛ 'bha ꞊në mü ꞊ni 'yö‑ "dhiʋ̈ "ta 'sü ‑mɛ ‑ya wë ‑ya 'ka zian ‑bha, 'yö dho‑ 'ka ‑dhɛ 'ö ‑dhi ‑dhɛ 'gü.
JAM 3:5 Mɛ 'nɛɛga 'ö mɛ "dhi bha ‑yö ‑kɔ do bha ꞊në‑ 'gü. Mɛ daɔ 'në 'dɛdɛ ‑mü 'ka mɛ ‑bha, "kɛɛ ‑yö ‑mɔɔ ‑bha 'ö 'wɔn "gblʋ̈gblʋ̈ ‑nu "plüün bho. ‑Kɔ do 'ö "yɛ waa‑ pɛng 'wo‑ 'ka 'ö ꞊wa pɛng ꞊dhuuga do ‑ya ‑bha, 'ö ꞊mɔɔ‑ ‑bha 'ö "yɛga 'kpii‑ ‑bhö bha,
JAM 3:6 yö ꞊në mɛ 'nɛɛ‑ 'dhö‑ 'ka. 'Wɔn yaa ‑gbëë ‑mü 'yö kwa kwi 'gü, 'yö‑ ꞊mɔɔ mɛ ‑wü 'gü ‑dhɛ ꞊gban "pɛpɛ 'gü, 'yö pɛng 'ö ꞊geebɔɔ, 'ö Atanna ‑ya ‑ya Sɔtraan ꞊në‑ ‑gɔ bha, 'yö yö ‑zë 'ö ꞊gloo‑ ‑da ‑sü ‑bha kwa ‑bha ‑tosɛa 'ka 'yö to‑ 'ka "dhʋ̈ 'ö zun‑ 'ka kwa ga ‑yi ‑bha.
JAM 3:7 'Wɔn bha‑ 'gü, mɛbhɩɩdhe ‑kɔ ‑yö ‑mɔɔ "bü ‑wü ꞊gban "pɛpɛ suu ‑bha, ‑maa ‑nu oo, "sia‑ ‑pë ‑nu "ɛɛn 'yuʋ̈‑ ‑nu, 'ö‑ suu 'bha 'ö dho kë 'ö mɛ ‑kɔ 'yaa ꞊mɔɔ‑ ‑bha 'yaa 'dhö,
JAM 3:8 "kɛɛ mɛ 'bha ‑kɔ 'yii ꞊mɔɔ ö 'nɛɛga ‑zë ‑bha do, ‑yö ꞊dhɛ "yua yaa 'ö‑ ꞊bɛdhɛkëmɛ 'yaa 'dhö ꞊në‑ 'dhö mɛ "dhi. ‑A bhaa ‑ya pa ‑sü 'ka ꞊dhɛ ꞊mlɛɛ 'dhö 'ö mɛ zë.
JAM 3:9 Yö 'ö bha ꞊në ꞊slëë‑ 'gü kwa "dhi 'yö 'kwa kwa Dëmɛ, kwa Dë bha‑ nuɛ" bho, yöö do bha 'zü ꞊në 'kwa‑ sü 'kwa "dhang ‑da 'ka mɛ "bhɩɩ‑ ‑nu 'ö Atanna ‑ya ‑nu ‑kë ö ‑bhɔbha 'ka bha‑ ‑nu ‑bha.
JAM 3:10 Kwa "dhi ‑dhɛ do bha ꞊në 'dhuë‑ ‑yö go‑ 'gü, yöö do bha 'zü ꞊në "dhang‑ go‑ 'gü. N dheebhang ‑nu, ‑ka dɔ "gbɩɩ‑ kö ka ‑bha ‑zë 'ya 'dho kë "dhʋ̈.
JAM 3:11 "Ɛɛn ‑a ‑ga 'ka‑ wo bha ꞊wɛ, "yigɔ doseng ‑yö ‑mɔɔ ‑bha 'ö ‑kë "nɛɛnɛɛ 'ö ‑ya mü 'zü 'ö ‑kë "glüü ‑ee?
JAM 3:12 "Ɛɛn "dhü "wɛɛ‑ ‑mɔɔ ‑bha 'ö "dhü "wɛɛ bhɛ ‑ya ‑ee? ‑Abin! ‑Kɔ do bha‑ 'gü, "yigɔ 'ö ꞊weesü 'yaa ꞊mɔɔ‑ ‑bha kö ‑yö kë mü ‑yi 'ka.
JAM 3:13 ꞊Ya kë ꞊dhɛ "yaakimɛ, "ɛɛn 'wɔndɔmɛ 'dhö ka kpö 'gü, ka ‑dho ‑a ‑dhɛ yö‑ mɛ "ta ‑kɔ ꞊në‑ ‑bha. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'ö "dhʋ̈ bha ‑yö ö ‑bha 'wɔn ꞊gban ‑kë zuësɛadhɛ ꞊në‑ 'gü dhɔngdhɔngsü 'ka, "kɛɛ 'ö‑ ‑kë "yaaki ‑bha.
JAM 3:14 "Kɛɛ ꞊ya kë ꞊dhɛ ꞊drɔ yaa 'gü yaa ‑zë ꞊ya kë ka 'gü kö ‑duɛ kɔɔ‑ ‑wɔn ꞊në ‑yö kë ka ‑zʋ "piʋ̈, 'ka 'dho ka 'tɔ 'kun, "ɛɛn 'ka 'dho ka ‑dɩ ‑dhiang zë ('ö 'ka‑ pö ka ‑dɩ ‑dhɛ ꞊dhɛ "yaaki ꞊në ka ‑bha bha). ‑A ‑gɛn ‑mü ꞊dhɛ kö tɛanwɔn ꞊dede 'ö ka ‑zʋ "piʋ̈ 'ka yö ‑zë 'to, kö ka ꞊sua ꞊në‑ kë sië.
JAM 3:15 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ "yaaki suu 'dhɛ 'kö bha 'yii 'go Atanna "piʋ̈ dhang‑ 'gü. Kö "yaaki 'ö "kpʋngtaamɛ ‑nu ‑bha yö bha 'yö bha. Sɔtraan ꞊në yö ‑zë nu‑ ‑nu ‑dhɛ.
JAM 3:16 ‑A ‑gɛn ‑mü ꞊dhɛ ꞊drɔ kë ‑sü waa‑ ‑duɛ kɔɔ‑ ‑sü ‑zë 'wo ‑dhɛ 'kö‑ ‑bha, kö "bhluubhludhɛ waa‑ 'wɔn yaa suu ꞊gban 'do 'do ꞊në mü.
JAM 3:17 "Kɛɛ "yaaki 'dhɛ 'kö go Atanna "piʋ̈ dhang‑ 'gü bha yö ‑zë ‑yö ‑kë "slʋ̈ʋ̈slʋ̈ ꞊naa ꞊kö ‑blɛɛsü, 'ö pö 'aa kë‑ ‑bha, ꞊ya 'go mü 'yö ‑dhi 'ko ‑dhɛ ‑sü ꞊mɔɔ mɛ ꞊gban ‑mɛ ꞊gban "dhiʋ̈, 'yö mɛ ‑kë dhɔngdhɔngsü, 'yö mɛ "klʋ 'dhö ‑kë ‑së, 'yö mɛ ‑wëë ‑ga, 'yö mɛ ‑kë 'wɔnsëkëmɛ 'ka, ‑a ‑mɛ ‑yö tɛanwɔn ꞊në‑ pö, 'yaa bɔ mɛ 'ka ꞊flü ‑ta, "ɛɛn 'yaa kë "gblʋ̈ʋ̈dhɛ ꞊gblɛɛn mɛ 'ka.
JAM 3:18 Atanna dhɔɔbhaa këmɛ ‑nu bha ‑kɔ 'wo dho‑ kë‑ 'ka kö mɛ "pɛpɛ 'wo‑ ‑nu ‑züzü ‑dhɛ ‑nu 'gü wɛng‑ ‑nu ‑wo kë wo 'ko ‑dhɛ ‑së, "ɛɛn kö mɛ ꞊gban ‑wo dhi wo 'ko ‑dhɛ ꞊në 'wo‑ ‑dhɛ ꞊mɔɔ, 'yö‑ ‑kë "dhʋ̈ ‑sü bha 'ö ‑kë ‑nu ‑gɔ ꞊dhɛ pë ta ‑sü 'dhö, 'yö ‑kë 'ko ‑dhɛ ‑së ‑sü 'wo‑ ta wo ‑züzü ‑dhɛ ꞊gban ‑dhɛ ꞊gban 'gü "dhʋ̈ bha, bhɛ 'ö ꞊ya 'dho‑ ‑ya bha, 'yö ‑kë ‑tosɛa ‑së 'ö pö 'aa‑ ‑bha ‑a kë ‑sü 'ka.
JAM 4:1 'Ko ‑nu 'ka‑ zë waa‑ "dhinaa ‑nu 'ka‑ ma ‑nu wo bha‑ ‑gɛn ‑go 'mɛ? ‑Yö ‑go zuë" ‑bhɔ 'wɔn ‑bha ‑sü yaa 'gü yaa 'ö mɛ‑ dɔ 'wɔn 'gü ‑kpladhö bha ꞊në‑ 'gü.
JAM 4:2 Pë ‑dhɔ ‑bha ka kë ‑sü "kɛɛ kö 'pë bha‑ ꞊slɔɔ "sɩ 'yaa ka ‑dhɛ bha ꞊në ‑a ‑pë bha 'ö 'mɛ 'ö‑ ‑gɔ bha‑ ‑san ‑da ka 'gü, 'yö‑ zë ‑dhɔ ‑da ka ‑zʋ ‑bha. Zuë" ‑bhɔ pë ‑bha ‑sü "kɛɛ kö 'pë 'ö "dhʋ̈ 'kii 'dho ꞊mɔɔ‑ ‑bha kö 'ka‑ ꞊slɔɔ bha ꞊në ꞊ya kë "dhʋ̈ 'yö "dhinaa ‑nu ‑da ka ꞊zinng 'gü, 'yö 'ka 'ko zë ‑nu bho. "Kɛɛ 'pë 'kö ‑kë 'yö 'kaa 'pë 'ö ka zuë" ‑yö bhɔ‑ ‑bha ‑a ꞊slɔɔ bha ‑më ‑zë ‑mü? ‑A 'klɔɔ‑ ‑mü ꞊dhɛ 'kaa‑ ‑gbadhɛ Atanna ‑gɔ.
JAM 4:3 'Ka‑ ‑gbadhɛ 'zü 'kaa‑ ꞊slɔɔ, ‑a ‑gɛn ‑mü ꞊dhɛ ka‑ ‑gbadhɛ zuëga "wɛɛ 'ka, kë "dhʋ̈ kö 'ka ka ‑dɩ dhɔɔbhaawɔn ‑nu ꞊në‑ kë‑ 'ka.
JAM 4:4 'Mɛ 'kaa 'to ‑kplü ‑sü 'ka Atanna ‑bha ‑ya! 'Yaa ka 'gü ꞊dhɛ zuë" ‑bhɔ "kpʋngtaapë ‑nu ‑bha ‑sü bha ‑da 'yaɔdhɛ 'gü Atanna ‑bha ‑sü ‑mü ‑ee? ‑Yö kë ka "yaan ꞊dhɛ mɛ "ʋʋ mɛ 'ö‑ "piʋ̈ ꞊dhɛ ö ‑dhɔ ‑yö "kpʋngtaamɛ ‑nu kë, "ɛɛn 'ö ‑kplü "kpʋngtaapë ‑nu ‑bha bha kö ‑yö ö ‑dɩ ‑siö ꞊në‑ wo sië Atanna ‑dhɛ bha.
JAM 4:5 'Ya 'dho kë ka 'gü ꞊dhɛ ‑a pö 'ö Atanna ‑wʋ ‑ya wo ꞊dhɛ: «Atanna ‑bha 'Nii‑ 'ö‑ nu kwa ‑dhɛ bha ‑a ‑wɔn ‑ya ‑gɔ "gbɩɩ‑, ‑a ‑wɔn 'gü ‑ya 'gü ‑drɔɔ ‑kë kë "dhʋ̈ kö ‑dhii ꞊ya 'dho 'ma‑ ‑bha bha ‑ya pö "dhʋ̈ "wɛɛwɛɛ.»
JAM 4:6 "Kɛɛ 'kö 'zü yöö kë "dhʋ̈, "kɛɛ ‑gasitɛ 'dhɛ 'kö Atanna ‑ya ‑kë kwa ‑dhɛ ‑yö ‑ziö mü, ‑a 'klɔɔ‑ ‑mü ꞊dhɛ ‑yö ‑bɛn zë ‑sü 'ka ‑a ‑gɔ 'sëëdhɛ 'gü ꞊dhɛ: «Atanna ‑yö ‑dɔ ‑gɔn ‑yan 'gü ‑dɩ ‑sü 'kpii‑ ‑mɛ ‑nu ‑gɔ, "kɛɛ ‑yö ‑gasitɛ ꞊në‑ ‑kë 'mɛ 'kö 'wo wo ‑gɔ dho‑ ‑dhɛ "sia‑ bha‑ ‑nu ‑dhɛ.»
JAM 4:7 ꞊Dhɛ 'ö "dhʋ̈, ‑ka ka ‑gɔ 'dho Atanna ‑dhɛ "sia‑ kö 'ka dɔ Sɔtraan ‑gɔ ‑gɔn ‑yan 'gü. 'Ka‑ kë "dhʋ̈ ‑yö ‑dho ꞊dua ka ‑gɔ 'ö dho ka 'ka ꞊gblɛɛn.
JAM 4:8 ‑Ka ꞊yɔɔn Atanna "sɔɔ, yöö ‑dɩ 'pö ‑yö ‑dho ꞊yɔɔn ka "sɔɔ. ‑Ka ka bo 'wɔn yaa kë ‑sü 'ka, kö 'mɛ ka zuë" 'dhö "pɛ ‑sü 'ka‑ 'gü Atanna ‑wɔn 'gü bha, 'ka bo ‑dɔ 'kën 'gü ‑sü 'ka.
JAM 4:9 ‑Ka ka ‑dɩ dɔ 'wɔnyaakëmɛ 'ka kö‑ 'gü ‑wëë ‑yö bɔ ka ‑ta kö 'ka "gbʋ bɔ, kö 'ka kë ꞊dhɛ 'mɛ ga ꞊nɛ ꞊ya bhɔ‑ ‑bha ‑a 'dhö. ('Ka 'dho ka ‑bha 'wɔn yaa ‑ga ‑bhaa 'gü 'ö ‑kë ka 'gü "yɩɩwɔn 'ka) ‑a "yɩɩ 'dhɛ 'ö "dhʋ̈ bha ‑yö "gla ka ‑gɔ "gbʋ 'gü kö kaa‑ ꞊niidadhe ('dhɛ 'ö "dhʋ̈ bha 'pö) ‑yö "gla zuëdhiʋ̈tɛɛ 'gü.
JAM 4:10 ‑Ka ka ‑gɔ 'dho kwa Dëmɛ ‑dhɛ "sia‑ kö yö ‑zë ‑yö ka ‑ya ꞊bhlëë 'gü.
JAM 4:11 N dheebhang ‑nu, 'ka 'dho ka 'ko ‑nu ꞊tɔɔ kë 'ö 'ka ka 'ko ‑nu ‑dhiang yaa zë. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'ka‑ kë "dhʋ̈ kö Atanna ‑bha 'tɔng‑ ('ö‑ pö ꞊dhɛ kwa ‑dhɔ ‑yö kwa 'ko kë bha) ꞊në 'ka‑ ‑dhiang yaa zë sië 'ka‑ pö 'yaa ‑së bha. "Kɛɛ 'sa kö ka ‑zë ka ‑bha 'ö 'dhö yö ‑mü 'tɔng‑ bha‑ ꞊bhlëë ‑ya ‑sü ꞊në‑ 'ka, kö ‑a ‑kë ‑së ‑sü "ɛɛn ‑a ‑kë 'ya‑ ‑sü ‑zë, 'yaa ka ‑zë kaa‑ 'wɔn 'ka.
JAM 4:12 Bhi 'ö bhi ‑zë 'i i këyɔɔ ꞊tɔɔ kë sië, "ɛɛn 'i‑ ‑dhiang yaa ‑zë sië bha de ‑mü i 'ka, "kɛɛ kö Atanna 'kö yö ‑zë 'ö ö ‑bha 'tɔng‑ ‑ya bha ‑yö "dhʋ̈ doseng, kö yö 'ö bha yöö do ꞊në ꞊mɔɔ‑ ‑bha 'ö mɛ dhɛɛ" kpɔ, 'ö‑ ‑mɛ ‑bha za ‑dhi, "ɛɛn 'ö‑ ‑mɛ zë za 'ka?
JAM 4:13 'Mɛ 'ka‑ pö ‑nu wo ꞊dhɛ: «꞊Dɛɛ "ɛɛn 'zü dhia" yi ‑dho 'dho 'pö‑ 'kpii‑ 'ö ꞊ni‑ 'gü 'yi "dhɔɔ dɔ mü ‑kwɛ do "piʋ̈ 'yi ꞊naɔ yö» bha, ‑ka ka "tʋ "pʋ kö dhiang 'ö maa‑ zë bha 'ka‑ ma.
JAM 4:14 'Ö sü "tʋ̈ng 'ka‑ pö sië‑ 'ka "dhʋ̈ bha‑ ‑bha 'ö zun dhia" 'ka‑ pö sië bha‑ ‑bha 'wɔn 'ö yöö ka ꞊slɔɔ ka‑ ‑dɔ "wɛ ‑ee? ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ka ꞊dhɛ "dhuu 'në "faanfaan 'në ‑nu 'wo ‑ya ‑tɔn ‑bha 'ö 'yaa ꞊gwëë kö ꞊ya ziö 'nu bha ꞊në‑ 'dhö.
JAM 4:15 ‑A ‑kë "dhʋ̈ ‑sü bha‑ 'gü, 'ka‑ pö 'ka dhiang zë, ‑a ‑dhɛa ‑bha ꞊dhɛ 'ka‑ pö: «꞊Ya kë ꞊dhɛ kwa Dëmɛ ‑zë ꞊ya "wɩ‑ ‑bha kö ‑yö "tɛɛ ‑sü 'to n 'gü, a ‑dho 'wɔn 'ö ꞊ni "ɛɛn 'ö ꞊ni‑ kë.»
JAM 4:16 "Kɛɛ ka ‑zë 'kaa ka ‑bha pö "dhʋ̈, ‑dɩ ‑sü 'kpii‑ bha ꞊në ka 'gü 'yö 'ka ka 'tɔ kun‑ 'ka, "kɛɛ 'sa kö ‑dɩ ‑sü 'kpii‑ ‑kɔ suu 'dhɛ 'kö bha 'yaa ‑së Atanna wëëdhö.
JAM 4:17 ꞊Ya 'go yö ‑zë 'gü, ‑yö kë ka "yaan ꞊dhɛ 'wɔn ‑së kë ‑kɔ 'dhö 'mɛ 'ö‑ "yaan, "kɛɛ 'ö 'yaa "wɩ‑ ‑bha kö ‑ya kë bha kö ‑yö ‑da ꞊në‑ wo sië Atanna "dhiʋ̈ bha.
JAM 5:1 ꞊Naɔmɛ ‑nu 'ma zun ka ‑bha! 'Mɛ 'ka ꞊naɔmɛ ‑nu 'ka, ‑ka "gbʋ bɔ kö 'ka ‑wëë ‑wʋ 'kpɔ ka ‑dɩ ‑bha 'wɔn "gbɩɩ‑ ‑nu 'ö dho nu ka ‑ta bha‑ ‑wɔn 'gü!
JAM 5:2 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ka yö ‑naɔ bha ‑yö "bu ‑sü, ka ‑dasɔ 'ö ka ‑bha bha ꞊zɛ ꞊yaa‑ ‑bhö.
JAM 5:3 "Sënng waa‑ 'wëë‑ 'ö ka ‑gɔ bha "dhang ‑ya ‑bha, "kɛɛ 'sa kö "dhang 'ö "dhʋ̈ bha ꞊në dho ka 'kun ꞊dhɛ 'bha ꞊kpaɔ ‑yi 'ka Atanna wëëdhö 'yö ka ‑bhö ꞊dhɛ pɛng 'dhö. ‑A ‑gɛn ‑mü ꞊dhɛ ꞊naɔ 'ka‑ yö 'ka‑ ‑gɔ kpɔ "dhʋ̈ bha, ka‑ ‑gɔ ‑kpɔ ‑tosɛa yën "tʋ̈ng 'gü, "kɛɛ 'sa kö‑ yö ‑kɔ 'bha 'yaa ‑së.
JAM 5:4 ‑A ‑gɛn ‑mü ꞊dhɛ 'mɛ 'wo ꞊saan ka ‑dhɛ 'wo kaa‑ 'bhlaa‑ ‑nu ‑ke ‑kë 'ö 'kii‑ ‑nu ꞊saa bho, 'ö 'wo "gbʋ bɔ ka 'tɔ 'ka bha ‑ka ka "tʋ 'to‑ ‑nu "gbʋ ‑wʋ ‑bha. "Gbʋ 'wo‑ bɔ "dhʋ̈ bha‑ ‑nu ‑wʋ ꞊ya 'dho ꞊ya ‑da ‑tosɛa Atanna kwa Dëmɛ 'gügbɩɩsü bha‑ "tʋʋdhö.
JAM 5:5 'Ka ka "dhia ꞊gban "pɛpɛ suu bho ꞊naɔ 'gü "kpʋng ꞊taa yö, 'ka pë ‑së suu ꞊gban ‑bhö ka 'gu ꞊ya dɔ‑ 'ka. 'Ka ka dhɔɔbhaa ‑dhɛ ꞊gban kaa‑, 'ka ‑ba 'ka kë ꞊dhɛ ‑du 'wo‑ ‑kplü, 'ö 'wo‑ "dhiʋ̈ gba sië kö ‑wa zë ‑a 'dhö.
JAM 5:6 'Mɛ 'yii 'wɔn 'bha kë, 'ka‑ 'kun 'ka‑ zë, ꞊dhɛ 'ö ‑kë ꞊dhɛ ka faan‑ ‑yö ‑ziö ‑bha ‑ta, 'ö 'yaa ꞊mɔɔ‑ ‑bha kö ‑yö ö ‑bha "yɔɔ kë bha‑ ‑wɔn 'gü. ('Wɔn 'ö‑ ‑wɔn 'gü 'yö 'a‑ pö ꞊naɔmɛ ‑nu, 'ka "gbʋ bɔ kö 'ka ‑wëë ‑wʋ 'kpɔ bha 'yö bha, ‑a ‑gɛn ‑mü ꞊dhɛ Atanna ‑dho 'wɔn bho ka 'gü.)
JAM 5:7 "Kɛɛ 'mɛ 'ö ka ‑zë 'ka ‑ya ‑sü 'ka kwa Dëmɛ nu ‑sü ‑gɔ bha, ‑ka ka zuë" kë ‑sɛa, n dheebhang ‑nu. ‑Ka 'wɔn 'suan‑ bho 'kekëmɛ ‑nu ‑bha. ꞊Wa ‑mlü bɔ "bhlë 'kun ‑dha "yi 'ka, ‑wo wo zuë" kun wo ‑bha "dhʋ̈ "dhʋ̈ "dhʋ̈ 'ö dho 'ö zun‑ 'ka ‑mlü bha‑ ‑pë kë ‑yi ‑bha 'yö 'wo gun ‑na ‑a "kan.
JAM 5:8 Kaa ‑dɩ 'pö ‑ka ka zuë" kë ‑sɛa ‑kɔ do bha‑ 'gü kö 'ka ka faan dɔ 'ka 'dho‑ 'ka "dhiʋ̈, ‑a ‑gɛn ‑mü ꞊dhɛ kwa Dëmɛ nu "tʋ̈ng 'yaa ꞊gblɛɛn 'zü.
JAM 5:9 'Ka 'dho ka ‑siödhɛwɔn yö ka 'ko "piʋ̈, n dheebhang ‑nu, kö Atanna 'ya 'dho ka zë za 'ka, ‑a Gbö Yesu 'ö zadɔmɛ 'ka bha ꞊ya ꞊tëng kwa ‑ta.
JAM 5:10 Ka ‑zʋ 'ya 'dho bhɔ 'wɔn 'ö Atanna ‑wʋdhiʋ̈loomɛ ‑nu 'wo kwa Dëmɛ ‑bha dhiang zë bha 'wo‑ ‑kë bha‑ 'ka tongtongdhö. ‑Ka ka ‑bha kë ‑kɔ 'sü wo ꞊në‑ ‑nu ‑bha ‑bha ‑a ‑nu ‑bha zuësɛadhɛ waa‑ saan" 'wo‑ sü, "kɛɛ 'ö 'wii 'go zian ‑ta tongtongdhö bha‑ 'gü.
JAM 5:11 'Mɛ 'wo "dhʋ̈ bha ꞊në 'kwa‑ pö sië‑ ‑nu ‑bha ꞊dɛɛ ꞊dhɛ ‑a ‑nu ‑bha ‑së bha. ‑Yö n 'gü ꞊dhɛ 'wɔn 'ö ‑gban Zɔbö ‑bha 'wo‑ ‑dhiang zë bha ‑yö ka "tʋʋdhö: Zuësɛadhɛ 'ö‑ ‑kë "dhʋ̈ "fluudhö, 'ö‑ ‑gɔ dɔ ‑dhɛ 'ö‑ 'gü, kwa Dëmɛ 'dhö 'wɔn 'ö‑ ‑kë ‑dhɛ ka‑ dɔ. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kwa Dëmɛ bha‑ "gblü 'yaa 'ya‑, mɛ ‑wëë ‑ya ‑kë ꞊dedewo.
JAM 5:12 "Kɛɛ 'wɔn 'a‑ "piʋ̈ 'a‑ pö ka ‑dhɛ glɔglɔdhö kö ‑yö 'to ka "tʋʋdhö yö ‑mü ‑sö ‑bhö ‑sü ꞊në‑ 'ka, n dheebhang ‑nu. 'Ka 'dho ‑sö ‑bhö 'wɔn 'bha 'gü tongtongdhö. ‑Yö ‑kë dhang‑ 'ka oo, ‑yö ‑kë "sɛ 'ka oo, "ɛɛn ‑yö ‑kë pë "ʋʋ pë 'ö‑ 'ka, 'ka 'dho ‑sö ‑bhö ‑a 'bha ‑ta. "Kɛɛ 'wɔn "ʋʋ 'wɔn 'ka‑ pö‑ ‑bha ꞊iin, ‑yö kë ꞊iin ꞊në‑ 'ka, ‑a 'dhɛ 'ka‑ pö‑ ‑bha 'aa bhoo, ‑yö kë 'aabhoo 'ka kë "dhʋ̈ kö Atanna 'ya 'dho 'wɔn bho ka 'gü.
JAM 5:13 'Wɔn 'dhö ꞊gbaɔn sië 'mɛ 'ö‑ ‑ta ka kpö 'gü, ‑a ‑mɛ ‑yö bhɛa" Atanna ‑dhɛ. Mɛ 'dhɛ 'ö‑ ꞊nii 'dhö ‑da sië ‑yö "tan bho Atanna "piʋ̈.
JAM 5:14 "Yua 'dhö 'mɛ 'ö‑ kë sië, ‑a ‑mɛ ‑yö "dhiʋ̈ ‑sü Atanna ‑bha 'kɔdhigümɛ ‑nu 'ka ‑mɛ ‑nu ‑dhɛ kö ‑wa "dhiʋ̈ bhɛa" wo‑ ‑dhɛ, kö ‑wo "yɔn zun‑ ꞊gbin‑ kwa Dëmɛ 'tɔ 'gü.
JAM 5:15 ꞊Ya kë ꞊dhɛ ꞊wa bhɛa" bha‑ wo "dhʋ̈ kö‑ ‑nu 'dhang bho ‑sü ‑yö Atanna "dhiʋ̈ 'kpakpadhö, "yuëdhi bha‑ ‑dho dha. Kwa Dëmɛ ‑dho ‑a kë "klʋ̈ʋ̈klʋ̈, 'ö ꞊ya kë 'zü ꞊dhɛ 'wɔn yaa ꞊në‑ ‑mɛ ‑ya ‑kë, 'ö‑ ‑mawɔn to.
JAM 5:16 ꞊Dhɛ 'ö "dhʋ̈, ‑ka ka ꞊sɔng pö ka 'ko ‑dhɛ kö 'ka ka 'ko ‑nu "dhiʋ̈ bhɛa" wo Atanna ‑dhɛ, kë "dhʋ̈ kö 'ka kë "klʋ̈ʋ̈klʋ̈. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'ö pö 'aa‑ ‑bha ꞊ya bhɛa" Atanna ‑dhɛ faan ‑bha, "trüün ‑yö ‑kë ‑a ‑bha bhɛa" ‑wʋ bha‑ 'gü, 'ö ꞊yaa‑ ‑yɔ bɔ 'ö‑ 'wɔn ‑yö mɛ kɔn.
JAM 5:17 ‑Ka ‑dhɛ ‑ga! Edhi bha mɛ "bhɩɩ‑ ꞊në gun‑ 'ka ꞊dhɛ kwa 'dhö, "kɛɛ ꞊dhɛ 'ö ꞊bhɛa Atanna ‑dhɛ ö faan 'ka kö dha 'ya 'dho ban, dha 'yii ban tongtongdhö 'ö dho 'ö "dhiʋ̈ pa ‑kwɛ ‑yaaga waa‑ "su "saɔdo ‑bha.
JAM 5:18 ꞊Dhɛ 'ö ꞊ya kë "dhʋ̈, 'ö Edhi ꞊ya bhɛa" 'zü ‑deewo kö dha ‑yö ban, 'yö dha ‑yö ‑ya ban ‑sü ‑bha 'zü ‑deewo, 'yö 'wo zun pë ta ‑sü ‑bha, 'yö ‑dhi.
JAM 5:19 N dheebhang ‑nu, ꞊ya kë ꞊dhɛ mɛ ꞊ya "kan Atanna ‑wʋ 'ö tɛanwɔn 'ka bha‑ ‑bha ka kpö 'gü, kö 'mɛ 'ka bha mɛ "wɛɛ 'bha ‑yö ꞊slɔɔ kö ‑yö zun ‑deewo ‑a ‑mɛ 'ka ‑zian ‑bha
JAM 5:20 ‑yö kë ka "yaan ꞊dhɛ 'mɛ 'ö zun 'wɔnyaakëmɛ bha‑ 'ka zian ‑bha bha kö ꞊yaa‑ ‑mɛ 'nii‑ ꞊në‑ dha, 'ö ꞊ya ‑ya mü 'zü ꞊ya "dhɛ kpa 'wɔn yaa 'gbɛ ꞊dede ‑ta, ('ö Atanna ꞊ya "dhɛ 'to‑ ‑ta ꞊yaa‑ ‑mawɔn 'to bha).
1PE 1:1 Mang Piɛdhö ‑mɛ 'a ‑kë Yesu Klisi ‑bha bɔmɛ 'ka bha, ma ꞊në 'a 'sëëdhɛ ya‑ ‑bɛn zë kö 'a‑ bɔ mɛ "pɛpɛ 'ö Atanna ꞊ya ka 'sü ö ‑bha 'ka 'ö 'ka ꞊dhɛ ꞊dhɛng ꞊në‑ 'dhö "kpʋng ya‑ ꞊taa, 'ö 'ka ‑pɛn ‑sü 'ka Pɔn ‑sɛ waa‑ Gadhatö ‑sɛ ‑nu waa‑ Kapadɔsö ‑sɛ ‑nu waa‑ Azi ‑sɛ ‑nu waa‑ Bitini ‑sɛ ‑nu 'gü bha ka ‑dhɛ.
1PE 1:2 Ka 'sü 'ö kwa Dë Atanna ‑ya wo ö ‑bha 'ka bha ‑ya wo "dhʋ̈ ‑kɔ 'ö gun‑ 'ka‑ zuë" "piʋ̈ 'nu yi 'bha 'ka ꞊në‑ ‑bha. ‑Gasitɛ 'yaa‑ ‑bha 'Nii‑ "slʋ̈ʋ̈slʋ̈ 'ö ka 'gü bha ꞊në‑ ‑bha, 'yö 'ka Yesu Klisi ꞊bhlëë ‑ya, kë "dhʋ̈ kö 'ka kë "slʋ̈ʋ̈slʋ̈ ö wëëdhö ‑a ꞊yɔɔn 'ö ꞊wɛnng kwa ‑wɔn 'gü bha‑ 'saa‑ 'gü, 'wɔn 'ö‑ ‑wɔn 'gü 'yö 'Nii‑ 'ö "dhʋ̈ bha 'ö ka ‑ya ‑sü 'ka ‑a ‑bha ‑ya 'gü ꞊dɛɛ bha 'yö bha. Kö ‑yö ö ‑bha ‑gasitɛ waa‑ ö ‑bha zuëyagblʋ̈ʋ̈‑ bha‑ kë ka ‑dhɛ ‑kɔ ꞊gban ‑kɔ ꞊gban suu 'gü bha 'aa ‑yö kë.
1PE 1:3 Atanna 'ö kwa Dëmɛ Yesu Klisi Dë 'ka bha ‑ka ‑kwaa nuɛ" bho (꞊dedewo ‑sɔbhɛɛ 'gü)! ‑A ‑gɛn ‑mü ꞊dhɛ yö ꞊në ‑tosɛa ‑dee nu kwa ‑dhɛ ‑a ‑bha "klʋsëdhɛ ‑ziisü bha‑ 'gü, Yesu Klisi bho 'ö‑ wo ga 'gü 'ö ‑bö bha‑ 'saa‑ 'gü. 'Wɔn 'ö‑ ‑wɔn 'gü 'yö kwa zuë" ꞊nii 'dhö ꞊mɔɔ‑ ‑bha 'ö ‑da bha 'yö bha, ‑a 'klɔɔ‑ ‑mü ꞊dhɛ kwa 'dhang bho ‑sü ‑ya "dhiʋ̈ 'ö kwa "tʋ̈ng 'dhö‑ 'gü ꞊dhɛ ‑dhɛkpaɔ dhia" saan 'ö‑ ‑ya ‑sü 'ka ö ‑bha mɛ ‑nu ‑gɔ dhang‑ 'gü bha ‑yö kwa ‑bha 'ka 'pö. 'Sa kwa ‑dhɛkpaɔ dhia" saan 'ö "dhʋ̈ bha 'yaa "bu, "ɛɛn 'yaa ‑dhii 'kun, "ɛɛn ‑a "yan 'yaa ga tongtongdhö. Pë 'ö "dhʋ̈ bha Atanna ‑ya ‑ya 'mɛ 'ka bha ꞊në ka ‑dhɛ
1PE 1:5 ‑Yö ka 'ö 'ka ka ‑zʋ gɔn‑ ‑dhɛ, 'ö ka ‑maa kë sië ö ‑bha 'gügbɩɩdhɛ 'ka kö ‑yö 'to‑ 'ka "dhʋ̈ ‑yö zun‑ 'ka ‑da dha ‑sü bha‑ këdhɛ 'gü "tʋ̈ng 'ö "sɛ "dhiʋ̈ 'to "tʋ̈ng 'ka bha‑ ‑bha bha ꞊në ka ‑bha 'ka.
1PE 1:6 'Wɔn 'ö ka zuëniida ‑wɔn 'ka 'yö bha, 'sa kö ‑a ‑dhɛa ‑bha ꞊dhɛ 'wɔn suu ꞊gban 'do 'do ‑yö wɔ ka ‑ta "tʋ̈ng 'në 'bha 'ka dɔ 'kwa‑ wo ya‑ 'gü.
1PE 1:7 Kë "dhʋ̈ kö ‑naa 'ö ka ‑bha ‑zʋ ‑yö ‑a ‑dhɛ ‑sü 'dhö‑ ‑ta mɛ ‑ya dɔ, ‑A "dhiʋ̈ ‑bha ‑kë ꞊dhɛ "sënng 'wii‑ gbo bho 'gü 'nu ꞊kö 'wo‑ ‑ziö ꞊sië pɛng 'gü bha ꞊në‑ 'dhö. "Kɛɛ 'sa kö yö ‑zë see‑ ‑pë ‑mü. ‑Kɔ do 'wo "sënng ‑ziö 'ka pɛng 'gü bha‑ ‑dhɛa ‑bha 'pö ꞊dhɛ ‑wo ka ‑bha ‑zʋ ‑yö Atanna ‑dhɛ ‑sü 'ö yö ‑zë ꞊bhlëë 'dhö 'kpii‑ 'ö ‑ziö "sënng ‑zë ‑ta bha ‑wa 'gü dan 'pö, Atanna ‑ya kë "dhʋ̈ kö "tʋ̈ng 'ö Yesu Klisi ‑bha 'yënng‑ dho ‑ya 'ka dhang‑ ‑bha bha ‑wo ka dɔ 'dhang ‑bho ‑a "dhiʋ̈ ‑mɛ ꞊dede 'ka, kö ‑wo ka 'tɔ dhi, kö ‑wo ꞊bhlëë ‑ya ka ‑bha, kö ka 'bhü ‑yö bhɔ 'pö ꞊dhɛ ‑a 'dhö.
1PE 1:8 Yö 'ö "dhʋ̈ bha 'kii‑ yö, "kɛɛ ‑a ‑dhɔ ‑yö ka ‑kë. Ka "yan ‑zian 'yaa‑ ‑bha "kɛɛ yö ‑zë ꞊gban 'gü ka 'dhang ‑bho "dhiʋ̈. 'Wɔn 'ö‑ ‑wɔn 'gü 'yö ꞊niidadhe 'ö ka ‑gɔ bha 'ö ꞊bhlëëbhlëësü, "kɛɛ 'yö‑ ‑bha ‑kë 'kpiisü ‑sü ‑dhiang 'yaa zë bha 'yö bha.
1PE 1:9 'Yö‑ 'klɔɔ‑ 'dhö ‑kë ꞊dhɛ ka ‑bha 'dhang ‑bho "dhiʋ̈ ‑sü bha‑ ꞊trɔɔn 'ö ka ‑zʋ 'dhö‑ 'gü 'ö ꞊dhɛ ‑zʋ 'ka‑ gɔn‑ ‑dhɛ bha‑ ꞊saa 'dhö, 'ö ‑kë ka 'nii‑ dha ‑sü 'ka bha ka ‑dho ‑a ꞊slɔɔ.
1PE 1:10 Dha ‑sü 'ka‑ ꞊slɔɔ ꞊dɛɛ "dhʋ̈ bha, Atanna ‑wʋdhiʋ̈loomɛ ‑nu 'wo gun yi 'bha 'ka bha ‑wo ‑gun yö ꞊në‑ 'gü ma ‑dhɛ mɔɔ‑ sië 'yö 'wo wo "yan ‑ta 'gü, 'yö gbaɔdhe ‑së 'ö Atanna yöö‑ kë ka ‑gɔ bha 'wo‑ ‑dhiang zë.
1PE 1:11 ‑Wo ‑gun dɔ sië wo ‑dɩ ‑ta "gbɩɩ‑ 'wɔn bha‑ 'gü, kë "dhʋ̈ kö 'wɔn 'ö Atanna yöö‑ kë bha 'ö dho‑ kë "tʋ̈ng 'ö‑ 'gü, "ɛɛn 'ö dho‑ kë ‑kɔ 'ö‑ ‑bha 'ö Klisi ‑bha 'Nii‑ "slʋ̈ʋ̈slʋ̈ ‑ya ‑zɔn 'ka‑ ‑nu ‑dhɛ bha 'wo‑ dɔ. ‑A 'klɔɔ‑ ‑mü ꞊dhɛ 'ö gun "dhʋ̈ kö ‑a ‑bha 'Nii‑ 'ö gun‑ ‑nu 'gü bha saan" 'ö Klisi dho‑ wo, waa‑ 'tɔ 'ö dho bhɔ ‑a saan" ‑sü bha‑ zian‑ ‑ta bha ꞊yaa‑ ꞊gban 'to "dhiʋ̈ ꞊yaa‑ pö‑ ‑nu ‑dhɛ.
1PE 1:12 "Kɛɛ 'yö Atanna ‑ya ‑zɔn ö ‑wʋdhiʋ̈loomɛ ‑nu bha‑ ‑nu ‑dhɛ ꞊dhɛ naɔ 'ö‑ dɔ‑ ‑nu ‑gɔ kö ‑wa dɔ "dhʋ̈ bha 'yii kë‑ ‑nu ‑dɩ ‑bha naɔ 'ka, ‑yö ka ꞊në ka ‑bha 'ka. ‑A naɔ 'ö "dhʋ̈ bha ꞊në ꞊waa‑ dɔ ka ‑gɔ ꞊dɛɛ bha. Yö ꞊në ‑a ‑bha naɔ ‑së dɔ ‑mɛ ‑nu, 'wo dhiang zë‑ ‑bha 'Nii‑ "slʋ̈ʋ̈slʋ̈ 'ö‑ bɔ 'ö 'go dhang‑ 'gü ‑a ‑bha 'gügbɩɩdhɛ 'ka bha 'wo‑ pö ka ‑dhɛ bha. 'Sa 'wɔn 'ö "dhʋ̈ bha‑ "sɩ ꞊në 'yaa Atanna ‑bha "kië ‑nu ‑zian 'wo dhang‑ 'gü ‑a ‑nu ‑dhɛ, "kɛɛ ‑a 'gü ma ‑dhɔ "kakasü ‑ya ‑nu ‑bha.
1PE 1:13 'Wɔn 'ö‑ ‑wɔn 'gü 'yö‑ ‑dhɛ 'dhö‑ ‑bha ꞊dhɛ 'ka ka 'gü dɔ "gbɩɩ‑ kö ka ‑kɔ ‑yö ꞊mɔɔ ka zuë" ‑bha bha 'yö bha. ‑Ka ‑ya ka "yaan ‑kpɛawo kö 'ka ka "yan 'to ‑gasitɛ 'ö Atanna dho‑ kë ka ‑dhɛ Yesu Klisi "dhiʋ̈ yee ‑kë kö ‑yö nu "kpʋng ꞊taa ‑yi 'ka bha‑ ‑gɔ.
1PE 1:14 Ka zuë" 'ya 'dho bhɔ 'wɔn yaa ‑nu 'ka gun‑ kë sië ‑blɛɛsü kö ka ‑tun Atanna ‑wɔn 'gü ka tii ‑bha bha‑ ‑bha 'zü. ‑Ka ka ‑gɔ lɔɔ‑ ‑dhɛ kö 'ka‑ ‑wʋ ꞊bhlëë ‑ya.
1PE 1:15 ‑Ka ka ‑dɩ 'kun ‑së kö 'ka 'to "slʋ̈ʋ̈slʋ̈ 'ka ‑a wëëdhö ka ‑bha ‑tosɛa kë ‑kɔ ꞊gban "pɛpɛ 'gü ꞊dhɛ ‑kɔ 'ö yö 'ö ka ‑dhɛ bha 'ö‑ 'ka ‑a 'dhö.
1PE 1:16 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑wʋ ‑ya pö: «‑Ka kë "slʋ̈ʋ̈slʋ̈ ꞊dhɛ n 'dhö, ‑a ‑gɛn ‑mü ꞊dhɛ a "slʋ̈ʋ̈slʋ̈.»
1PE 1:17 'Ka bhɛa" sië Atanna bha‑ ‑dhɛ, ka‑ ‑dhɛ ka Dë, "Kɛɛ kö yö 'ö "dhʋ̈ bha ‑yö za ‑dɔ mɛ ꞊gban ‑bha ‑a ‑nu këwɔn ꞊në‑ ‑bha. ꞊Dhɛ 'ö "dhʋ̈, "tʋ̈ng 'dhɛ 'ö‑ këwɔn ꞊ya 'to ka ‑gɔ "kpʋng ꞊taa yö bha, ‑kaa wo "suʋ̈ 'ka ka "ta ‑kɔ ꞊gban 'gü, kë "dhʋ̈ kö 'ka‑ ꞊bhlëë ‑ya.
1PE 1:18 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑tosɛa 'ö‑ ‑zun "dhiʋ̈ ‑bhlɔɔ 'yaa gun 'ö 'ka gun‑ kë sië ‑blɛɛsü 'ö 'ka‑ sü ka "bhɛma ‑nu ꞊kwɛɛ‑ bha, pë 'ö Atanna ‑ya nu, kë "dhʋ̈ kö 'ka dha‑ ‑gɔ ka‑ ‑dɔ, 'ö 'ka‑ ꞊bhlëë dɔ. 'Yii ka ‑gɔta bha‑ 'dhɔ 'pë 'ö‑ ꞊bhlëë ‑yö ꞊mɔɔ‑ ‑bha 'ö ‑pö ꞊dhɛ 'wëë‑ ‑nu "ɛɛn "sënng ‑nu 'dhö bha‑ 'bha 'ka.
1PE 1:19 Ka‑ 'wɔn ‑dɔ 'kpakpadhö ꞊dhɛ "saa‑ 'ö‑ ‑mɔɔ 'ka 'yaa 'dhö 'ö Klisi ‑ya bho bha ꞊në ka dha ‑a ꞊yɔɔn 'ö‑ ꞊wɛnng bha‑ 'ka. Klisi bha ꞊në ꞊dhɛ "bhlaanë 'ö ‑dhii 'yaa‑ ‑bha, "ɛɛn 'ö pö 'aa‑ ‑bha 'ö 'wo‑ ‑kë 'saa‑ 'ka bha‑ 'dhö.
1PE 1:20 'Sa yö 'ö bha Atanna ꞊në ö ‑kɔ ‑yɛ ‑bha kö 'yii "kpʋngtaadhɛ ‑zian ‑da ꞊kö, 'yö gun ‑na nu "kpʋng ꞊taa kaa 'wɔn ‑së 'gü "sɛ yën "tʋ̈ng ya‑ 'gü ya.
1PE 1:21 Atanna 'ö‑ ‑bö 'ö go ga 'gü 'ö dho 'ö 'tɔbhɔdhe nu‑ ‑dhɛ bha ka 'dhang ‑bho "dhiʋ̈ Klisi bha ꞊në‑ 'saa‑ 'gü, 'yö‑ ‑wɔn 'gü 'yö ka ‑bha ‑zʋ ‑yö ‑a ‑dhɛ ‑sü waa‑ ka ‑bha "yan ‑to ‑a ‑gɔ ‑sü ꞊gban 'dhö yö ꞊në‑ 'ka.
1PE 1:22 ꞊Dhɛ 'ö ‑kë ꞊dhɛ ‑dhii ꞊ya 'go ka ‑bha ‑a wëëdhö ‑a ‑wʋ 'ö tɛanwɔn 'ka bha‑ ꞊bhlëë 'ka‑ ‑ya bha‑ ‑wɔn 'gü, "kɛɛ kë "dhʋ̈ kö 'mɛ 'wo bɔ‑ 'ka ꞊dhɛ ka 'dhö 'ö 'wo ka dheebhang ‑nu 'ka bha‑ ‑nu ‑dhɔ ‑yö ka kë 'kpakpadhö bha‑ ‑wɔn 'gü, ka ‑dhɔ ‑yö ka 'ko kë ꞊dedewo ka zuë" ꞊gban 'ka.
1PE 1:23 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'ka bhɔ ‑deewo. "Kɛɛ bhɔ 'ka‑ wo "dhʋ̈ bha 'kii‑ wo ꞊dhɛ "kpʋngtaadhɛ ‑bha 'dhö, Atanna ꞊në ka ‑gla, ‑a ‑wʋ 'ö "yaandhe 'ka, 'ö ‑todhʋ̈ 'ka bha‑ 'ka.
1PE 1:24 ꞊Dhɛ ‑kɔ 'ö‑ ‑wʋ ‑ya pö‑ 'ka ‑dhɛ "wɛɛ 'bha 'gü ‑a 'dhö ꞊dhɛ: «Mɛ ꞊gban "pɛpɛ ‑wo ziö ‑pë 'ka ꞊dhɛ blëë "dhɛ 'dhö, 'yö‑ ‑nu ‑bha 'tɔbhɔdhe 'ö ꞊dhɛ blëë "bin 'dhö, blëë ‑gɔ ꞊ya bo ga ‑sü ‑zë 'ka
1PE 1:25 kö‑ "bin ꞊ya ‑pö, "kɛɛ kwa Dëmɛ ‑wʋ ‑zë 'ö ‑kɔ 'ö‑ 'ka 'yö‑ 'ka» bha‑ 'dhö. Atanna ‑wʋ 'ö "dhʋ̈ bha ꞊në naɔ ‑së 'wo‑ pö ka ‑dhɛ bha‑ 'ka.
1PE 2:1 ‑A ‑kë "dhʋ̈ ‑sü bha‑ 'gü, ‑ka ka bo "gblüyaadhɛ kë ‑sü ‑nu oo, ꞊sua kë ‑sü ‑nu oo, ‑kpa 'ko ‑dhɛ 'gu ‑ta ‑sü ‑nu oo, ‑ya pë ‑dhɔ 'ka ‑sü ‑nu waa‑ 'ko ‑nu ‑dhiang yaa zë ‑sü bha‑ 'ka.
1PE 2:2 ‑Ka kë ꞊dhɛ 'në ‑dee 'ö bhɔ ‑a 'dhö kö ‑a dhe 'yɔn mü ‑dhɔ 'dhö‑ ‑kë ‑kɔ do 'ö‑ 'gü fʋʋdhö bha, "tʋ ‑to Atanna ‑wʋ "slʋ̈ʋ̈slʋ̈ bha‑ ‑bha ‑dhɔ ‑yö ka kë 'pö ꞊dhɛ ‑kɔ bha‑ 'dhö, kë "dhʋ̈ kö 'ka‑ ma sië, kö 'ka "gla kö ka ‑bha dha ‑sü bha‑ ‑gɔ ‑yö ‑da 'pödhö.
1PE 2:3 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'ka ka bo kwa Dëmɛ ‑bha "klʋsëdhɛ bha‑ din ‑ga ‑sü 'ka 'nu.
1PE 2:4 ꞊Dhɛ 'ö "dhʋ̈, ‑ka ꞊yɔɔn kwa Dëmɛ Yesu Klisi "sɔɔ. ‑A ‑gɛn ‑mü ꞊dhɛ yö 'ö bha ꞊në ꞊dhɛ ‑gwë "yaandhe 'ö mɛ "bhɩɩ‑ ‑nu 'wo wo ꞊kwaa‑ ‑zü kö ‑wo 'kɔ dɔ sië, "kɛɛ 'yö Atanna ‑zë 'ö‑ 'sü ꞊bhlëësü 'ka 'ö ö ‑kɔ ‑da 'gü 'ö ö ‑bha 'kɔ ‑gɛn ‑gban ‑ta ‑a 'dhö.
1PE 2:5 ‑Ka ꞊yɔɔn‑ "sɔɔ kë "dhʋ̈ kö kaa ‑dɩ 'pö 'ka kë ꞊dhɛ ‑gwë ꞊bhlëësü 'dhö, kö Atanna ka ‑da ö ‑bha 'kɔ ‑dɔ 'ka ‑gwë ‑nu ‑bhiëë 'gü kö 'ka kë mü ꞊dhɛ "saabhomɛ ‑nu 'ö‑ ‑nu ‑ya ‑sü 'ka kö ‑wo ö ‑dhɔkë Yesu Klisi 'saa‑ 'gü ‑a 'dhö.
1PE 2:6 ‑A ‑gɛn ‑mü ꞊dhɛ Atanna ‑ya ‑pö ö ‑wʋ 'gü Yesu bha‑ ‑bu 'gü ꞊dhɛ: «A ‑gwë ꞊bhlëësü do 'sü ‑sü 'ka, yö ꞊në 'a‑ ‑ya sië ma 'kɔ "kpan ‑ya ‑ta ‑gwë 'ka Siɔn ‑pö 'gü bha. Mɛ "ʋʋ mɛ 'ö yaa 'dhang ‑bho "dhiʋ̈, 'yiʋ̈‑ 'yii 'dho dɔ‑ ‑mɛ ‑bha.»
1PE 2:7 ‑Gwë 'ö "dhʋ̈ bha‑ ꞊bhlëë ‑yö 'kpii‑ 'mɛ 'ka 'dhang bho‑ "dhiʋ̈ bha ꞊në ka ‑gɔ, "kɛɛ 'mɛ 'kö 'waa 'dhang bho‑ "dhiʋ̈ bha, ‑gwë 'ö 'kɔdɔmɛ ‑nu 'wo wo ꞊kwaa‑ ‑zü bha ꞊në kë ‑sü 'ka 'kɔ "kpan ‑ya 'ka ‑gwë ꞊bhlëësü ꞊dede 'ka, 'yö kë ‑sü 'ka‑ ‑nu ‑gɛn "dhiʋ̈ ‑zuö ‑bha ‑gwë, ‑a ‑nu ‑pö ‑bha ‑gwë 'ka. ‑A ‑bɛn ‑yö zë ‑sü 'ka 'zü ‑dhɛ "wɛɛ 'bha 'gü ꞊dhɛ Atanna ‑ya ‑pö ꞊dhɛ: «‑Gwë bha ꞊në kë ‑sü 'ka ‑a ‑nu ‑gɛn "dhiʋ̈ ‑zuö ‑bha ‑gwë 'ka, yö ꞊në ꞊ya Atanna ‑bha zian ta‑ ‑nu ‑gɔ.»
1PE 2:8 (Atanna ꞊plöö ‑zian 'ö‑ ta‑ ‑nu ‑gɔ "dhʋ̈ bha‑ 'klɔɔ‑ ‑mü ꞊dhɛ) 'wii "wɩ‑ ‑bha kö ‑wo 'dhang bho‑ ‑wʋ "dhiʋ̈. 'Sa 'to ‑kɔ 'wo dho 'to‑ 'ka 'pö 'yö bha.
1PE 2:9 "Kɛɛ ka ‑zë yö ꞊në ka ‑ya, ka ꞊në 'ka yöö ‑gblüdë ‑ziisü bha‑ ‑bha "saabhomɛ ‑nu, ‑a ‑bha "sɛgɔ 'ö‑ ‑ya ‑dɩ ‑ta ‑a 'gü ‑mɛ ‑nu 'wo ‑ya ‑sü 'ka‑ ‑bha 'ka ‑a 'ka. 'Sa ‑yö ka ‑ya ꞊dhɛ ‑kɔ bha‑ 'dhö kö yö 'ö ka bho ‑dhɛtiidhɛ ‑bha 'ö ka bɔ ö ‑bha ‑dhɛpuudhɛ "dhiadhiasü bha‑ 'gü bha 'ka ö këwɔn ‑sɛngbɔ ‑nu bha‑ ‑nu ‑dhiang ꞊në‑ zë.
1PE 2:10 'Ö gun zii 'kpa ‑blɛɛsü Atanna 'yaa gun ka dɔ sië, "kɛɛ 'ka kë‑ ‑bha 'ka ꞊taamasü ya‑ 'gü. Ka ‑wëë 'yaa gun‑ kë sië, "kɛɛ ka ‑wëë ꞊yaa‑ kë dɔ 'kwa‑ wo ya‑ 'gü.
1PE 2:11 ‑A ‑kë "dhʋ̈ ‑sü bha‑ 'gü, n "taɔngdë ‑nu, ꞊dhɛ 'ö ‑kë ꞊dhɛ ka ‑dhɛng 'ka 'ö 'ka ꞊dhɛ 'mɛ 'ö nu "ta ꞊në‑ 'gü "kpʋng ya‑ ꞊taa ‑a 'dhö bha, ‑ka dɔ "gbɩɩ‑ bhɛa" ꞊në 'a‑ wo ka ‑dhɛ kö 'ka ka kwaa zuë" ‑bhɔ 'wɔn yaa ‑bha ‑sü ‑zü. ‑A ‑gɛn ‑mü ꞊dhɛ yö ‑zë ‑yö ‑tosɛa 'ö kaa‑ Atanna ‑nu ka ꞊zinng 'gü bha‑ dɔ ꞊në‑ wo "gʋ̈ng 'ka.
1PE 2:12 Ka "ta ‑kɔ ‑yö kë ‑së 'mɛ 'waa 'dhang bho Yesu "dhiʋ̈ bha‑ ‑nu kpö 'gü, ꞊ya kë "dhʋ̈ 'kö 'zü ꞊wa ka ‑dhiang yaa zë ꞊dhɛ 'wɔnyaakëmɛ ‑mü ka 'ka, "kɛɛ ‑a ‑nu "yan ꞊ya ‑da ka këwɔn ‑së ‑nu bha‑ ‑nu 'gü, ‑wo ‑dho kwa Dëmɛ 'tɔ bhɔ ‑a nu ‑yi 'ka kö‑ "sɩ 'yaa‑ ‑nu ‑dhɛ.
1PE 2:13 ‑Ka zë kwa Dëmɛ ‑wɔn ‑dhɛ kö 'ka ka ‑gɔ 'dho mɛ "pɛpɛ 'wo ‑yamɛ ‑nu 'ka "kpʋng ꞊taa ‑a ‑nu ‑dhɛ "sia‑.
1PE 2:14 ‑Yö ‑kë ‑gblüdë 'ka oo, ‑yö ‑kë ‑a ‑kɔdhiʋ̈mɛ 'ö‑ bɔ kö ‑yö 'wɔn bho 'wɔnyaakëmɛ ‑nu 'gü, kö ‑yö 'wɔnsëkëmɛ ‑nu ‑dhiang ‑së zë bha ꞊në‑ 'ka oo, ‑kaa ‑nu ꞊bhlëë ‑ya.
1PE 2:15 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔn 'ö Atanna ‑dhidhɛwɔn 'ka, yö ‑mü ꞊dhɛ kö 'mɛ 'ö "yaaki 'yaa‑ ‑nu ‑bha 'ö 'waa‑ ‑wɔn dɔ bha 'ka‑ ‑nu "dhi ta ka këwɔn ‑së ‑nu 'ka kö 'pë woo‑ pö 'ya 'dho ꞊slɔɔ‑ ‑nu ‑gɔ.
1PE 2:16 ‑Ka ‑tosɛa kë ka 'flëë‑ 'gü, ‑a ‑gɛn ‑mü ꞊dhɛ ‑pʋtaasü ‑yö ka ‑gɔ. "Kɛɛ ‑pʋtaasü 'ö ka ‑gɔ bha ꞊në ‑kaa kë ‑së kö 'ya 'dho kë ka ‑gɔ "dhɛ 'ka 'ö 'ka‑ kpa ka ꞊sɔng ‑ta. "Kɛɛ ‑ka ka ‑dɩ 'kun, kö 'ka ‑tosɛa kë ꞊dhɛ "yi ‑dɔ Atanna ‑kɔ ‑bha ‑mɛ ‑nu 'dhö.
1PE 2:17 Mɛ ꞊gban "pɛpɛ ꞊bhlëë ‑yö kë ka ‑gɔ. Ka dheebhang ‑nu 'wo 'dhang bho Yesu "dhiʋ̈ 'pö ꞊dhɛ ka 'dhö bha‑ ‑nu ‑dhɔ ‑yö ka kë, ‑ka "suʋ̈ Atanna ‑gɔ, ‑ka ‑gblüdë ‑nu ꞊bhlëë ‑ya.
1PE 2:18 Gwëëzë ‑nu, ‑ka ka ‑gɔ 'dho ka dëmɛ ‑nu ‑dhɛ "sia‑ kö 'ka‑ ‑nu ꞊bhlëë ‑ya ‑kɔ ꞊gban ‑kɔ ꞊gban 'gü. ‑Kaa kë "dhʋ̈ mɛ 'dhɛ 'ö‑ "klʋ 'dhö ‑së 'ö‑ zuë" 'dhö dhɔngsü waa‑ mɛ 'dhɛ 'ö "kakasü ‑a ‑nu ꞊gban ‑dhɛ.
1PE 2:19 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'wɔn ‑nu 'wo‑ ‑wɔ mɛ ‑ta "wɛɛwɛɛ kö‑ ‑gɛn 'bhaa 'dhö ‑a 'kun ‑bho mɛ 'gü ‑sü 'ö ꞊bhlëë ‑ya Atanna ‑bha ‑sü 'ko ‑sɔn bha ‑yö ‑gasitɛ 'ö‑ ‑kë mɛ ‑dhɛ ꞊në‑ 'ka.
1PE 2:20 ‑A ‑gɛn ‑mü ꞊dhɛ 'mɛ 'bha 'wɔn yaa ‑zë kë kö ‑wo 'wɔn bho i 'gü, ꞊ya 'kun bho i 'gü kö 'wɔn 'i‑ ‑kë 'yö 'i‑ ꞊trɔɔn yö, "kɛɛ 'bha 'wɔn ‑së kë kö ‑wo ‑ya mü 'zü ‑wo 'wɔn bho i 'gü kö ‑yö 'kun bho i 'gü, Atanna ꞊bhlëë ‑ya ‑wɔn 'gü, kö 'wɔn ‑së ꞊dede ꞊në 'i‑ ‑kë ‑a wëëdhö bha.
1PE 2:21 'Wɔn 'ö‑ "piʋ̈ ꞊dhɛ 'ka‑ kë ka ‑ya 'ö‑ wo bha‑ 'gü 'yö bha, ‑a 'klɔɔ‑ ‑mü ꞊dhɛ saan" ꞊në Klisi yöö ꞊dede 'ö‑ wo ka ‑wɔn 'gü 'pö 'yö‑ ‑zɔn 'ka bha‑ to ka ‑gɔ kë "dhʋ̈ kö 'ka‑ kë 'pö ꞊dhɛ ö 'dhö.
1PE 2:22 'Yii 'wɔn yaa ‑tangga ‑zian kë, "ɛɛn ꞊sua ‑dhiang do ‑zian 'yii ‑wo ‑a "dhi ‑ta kö ‑wa ma.
1PE 2:23 "Tʋ̈ng 'ö gun‑ 'ka "kpʋng ꞊taa bha, ꞊wa "si bho‑ ‑gɔ 'yaa‑ ‑yɔ bɔ "si 'ka, saan" 'ö‑ wo bha 'ö gun kö ‑ya wo sië, 'yii "suʋ̈ ‑da mɛ 'bha 'gü, "kɛɛ ‑yö ö ‑dɩ ‑wɔn ‑wɔ Atanna 'ö za dɔ mɛ ‑bha tɛan‑ ꞊në‑ ‑ta 'ö 'yaa bɔ mɛ 'ka ꞊flü ‑ta bha ꞊në‑ ꞊kwɛng.
1PE 2:24 'Yö go mü 'zü 'ö kwa ‑bha 'wɔn yaa ‑nu ‑kwɛɛ sü 'ö dɔ‑ 'ka "dhü ‑bha, kë "dhʋ̈ kö 'kwa ga 'wɔn yaa ‑gɔ kö 'kwa ‑tosɛa 'ö pö 'aa‑ ‑bha ꞊në‑ kë. ‑Gi ‑nu 'ö‑ wo bha ꞊në‑ ‑wɔn 'gü 'yö 'ka ‑kë "klʋ̈ʋ̈klʋ̈.
1PE 2:25 ‑A ‑gɛn ‑mü ꞊dhɛ ka ‑gun ꞊dhɛ "bhlaa ‑nu 'ö ꞊wa ꞊dhɛng ꞊në‑ 'dhö, "kɛɛ Atanna ꞊ya ka 'sü ꞊ya nu ka 'ka dɔ 'kwa‑ wo ya‑ 'gü 'mɛ 'ö ‑tuʋ̈ ‑maakëmɛ 'ka, 'ö ka 'nii‑ ‑maa kë bha‑ "piʋ̈ (꞊dhɛ ‑kɔ 'ö ‑tuʋ̈ ‑maakëmɛ ‑së ‑yö ö ‑zʋ ‑kë 'ka ‑tuʋ̈ ‑nu "piʋ̈ bha‑ 'dhö).
1PE 3:1 Dhebhɔ ‑nu, kaa ‑dɩ 'pö ‑ka ka ‑gɔ 'dho "sia‑ kaa‑ gɔɔn‑ ‑nu ‑dhɛ, kë "dhʋ̈ kö gɔɔn‑ ‑nu bha‑ mɛ 'dhɛ 'wii 'dhang bho ꞊kö Yesu Klisi "dhiʋ̈ bha ‑wo 'dhang bho‑ "dhiʋ̈ ka "ta ‑kɔ ‑së bha‑ ‑wɔn 'gü kö ‑wo bɔ Yesu 'ka kö 'kii dhiang 'bha zë‑ ‑nu ‑dhɛ.
1PE 3:2 ‑A pö 'a‑ wo "dhʋ̈ bha‑ ‑gɛn ‑mü ꞊dhɛ kö‑ ‑nu "yan ‑yö ka "ta ‑kɔ ‑së 'ö Atanna ꞊bhlëë ‑ya bha‑ 'gü.
1PE 3:3 'Ka 'dho ka dhi ‑zian mɔɔ‑ ka kwi ‑bha "kpɛnng, ‑gɔ bɔ ‑kɔ ‑nu oo, ‑da "tʋʋ ‑pë "ɛɛn ‑kɔ ‑bha ‑pë ‑sɛngbɔ ‑nu, "ɛɛn ‑dasɔ ‑sɛngbɔ ‑nu ‑da ka ‑bha ‑sü 'ka mɛ ‑nu "yan ‑mɔɔ ka "dhiʋ̈ kian 'ka.
1PE 3:4 "Kɛɛ ‑ka ka dhi ‑zian mɔɔ‑ ka zuëpiʋ̈dhɛ ꞊në‑ 'gü, kö ‑sëdhɛ 'dhɛ 'ö‑ ꞊bhlëë 'dhö 'kpii‑ Atanna wëëdhö, 'ö 'yaa see‑ tongtongdhö 'ö ‑kë ‑kë dhɔngsü ‑sü 'ka, 'ö mɛ zuë" ‑yö ‑kë ‑ta ‑sɛa ‑a 'ka bha ꞊në ‑yö kë ka ‑gɔ.
1PE 3:5 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑dhɔkëdhe ‑nu 'wo gun yi 'bha 'ka bha ‑wo ‑gun wo ‑bha dhi wo sië ‑kɔ bha ꞊në‑ 'gü, ‑gɔ ‑dho wo ‑gɔn ‑nu ‑dhɛ "sia‑ ‑sü 'ka.
1PE 3:6 Saadha ‑gun ö ‑gɔ 'dho sië Ablaamö ‑dhɛ "sia‑ ‑kɔ bha ꞊në‑ 'gü 'yö gun ö ‑gɔn ‑dhɛ sië ö dëmɛ. ꞊Ya kë ꞊dhɛ 'ka 'wɔn ‑së kë ‑kpɛawo kö 'wɔn 'bha ‑wɔn 'bha kë ‑sü "suʋ̈ 'yii kë ka 'gü, kö 'ka kë Saadha bha ꞊në‑ 'dhu ‑nu 'ka bha.
1PE 3:7 ‑Kɔ do bha‑ 'gü gɔɔn‑ ‑nu kaa ‑dɩ 'pö ‑ka "ta ‑kɔ ‑së kë kaa‑ dhebhɔ ‑nu 'ka kö 'ka ka "yaaki ‑ya 'gü, ‑yö kë ka "yaan ꞊dhɛ kɛng‑ ‑nu ka ‑da ‑kɔ 'yaa do, ‑a ‑nu 'gü 'yaa ‑gban ‑sü 'ka kö "sɩ‑ kë‑ ‑nu ‑dhɛ ꞊dhɛ ka 'dhö. ‑A ‑nu ꞊bhlëë ‑yö kë ka ‑gɔ ꞊dhɛ ka "tayɔɔ ‑nu 'ö Atanna 'dhö ‑gasitɛ kë ‑sü 'ka‑ ‑nu ‑dhɛ 'pö ꞊sii 'ö 'yaa yën ‑a ꞊slɔɔ ‑sü 'gü ꞊në‑ 'dhö. ‑Kaa kë "dhʋ̈ kë "dhʋ̈ kö pë 'bha ‑pë 'bha 'ya 'dho ö ‑gɛn ‑da kɛng‑ ‑nu ka ‑bha ‑bhɛa Atanna ‑dhɛ ‑sü ‑gɛn 'gü ('ö 'yaa‑ ‑yɔ bɔ ka ‑gɔ).
1PE 3:8 ‑Ka dɔ "gbɩɩ‑ kö mɛ "pɛpɛ ꞊gban ka ‑wʋ ‑yö kë do, kö ka zuëpiʋ̈wɔn ‑yö kë do, ka ‑dhɔ ‑yö ka 'ko kë ꞊dhɛ dheebhangzë ‑nu 'dhö, ka "klʋ ‑yö dhi ka 'ko ‑nu ‑bha, kö 'ka ka 'ko ‑nu ꞊bhlëë ‑ya.
1PE 3:9 'Ka 'dho 'wɔn yaa "yɔɔ bho 'wɔn yaa 'ka, "ɛɛn 'ka 'dho "si "yɔɔ bho "si 'ka, "kɛɛ 'mɛ 'ö "si bho ka ‑gɔ, ‑ka 'dhuë‑ kë‑ ‑mɛ ‑bha, ‑a ‑gɛn ‑mü ꞊dhɛ ka 'ö 'ka bha 'dhuë‑ ꞊në Atanna ‑ya "plüün bho ka ‑dhɛ ka ‑dhɛ 'ö‑ wo bha‑ 'gü
1PE 3:10 ꞊dhɛ ‑kɔ 'ö‑ ‑wʋ ‑ya pö‑ 'ka‑ 'dhö ꞊dhɛ: «'Ö mɛ "ʋʋ mɛ 'ö‑ "piʋ̈ ꞊dhɛ 'ö ‑tosɛa ‑së ‑dhɛ yö, kö 'ö ‑ya ꞊niidadhe "yi ꞊bhaa, ‑a ‑mɛ ‑yö ö ‑dɩ 'kun dhiang yaa zë ‑sü ‑gɔ, kö ‑yö ö bo ꞊sua kë ‑sü 'ka.
1PE 3:11 ‑A ‑dhɛa ‑bha ꞊dhɛ ‑a ‑mɛ 'ö 'dhö ‑yö "kan 'wɔn yaa ‑bha kö ‑yö 'wɔn ‑së ꞊në‑ kë ‑kpɛawo, kö ‑yö mɛ ‑nu ‑dhi 'ko ‑dhɛ ‑dhɛ ꞊në‑ mɔɔ‑ ‑kpɛawo kö ‑yö 'dho‑ 'ka.
1PE 3:12 ‑A 'klɔɔ‑ ‑mü ꞊dhɛ 'mɛ 'ö pö 'aa‑ ‑nu ‑bha bha ꞊në kwa Dëmɛ ‑yö ö "yan ‑kë ‑nu "dhiʋ̈, 'yö ö "tʋ 'to‑ ‑nu ‑bha bhɛa" ‑wʋ ‑bha, "kɛɛ 'yaa ö "yan dɔ 'wɔnyaakëmɛ ‑nu ‑zë ‑nu ‑bha» bha‑ 'dhö.
1PE 3:13 ꞊Ya kë ꞊dhɛ 'wɔn ‑së kë ‑pɛng ꞊ya kë ka ‑ta 'ka‑ kë sië, mɛ 'bha 'yii 'dho ꞊mɔɔ‑ ‑bha kö ‑yö 'wɔn yaa kë ka 'ka.
1PE 3:14 "Kɛɛ 'kö 'zü ꞊wa 'wɔn wɔ ka ‑ta ‑zianwo 'wɔn ‑së 'ka‑ ‑kë ‑a ‑wɔn 'gü, kö ka ‑bha ‑së. "Sika 'ya 'dho kë ka 'gü 'ö 'ka ‑suʋ̈ mɛ 'bha ‑gɔ.
1PE 3:15 ‑Ka Klisi ꞊në‑ ꞊bhlëë ‑ya ka zuë" "piʋ̈ doseng ꞊dhɛ ka Dëmɛ 'dhö kö 'ka kë baa‑ ‑sü 'ka "tʋ̈ng ꞊gban 'gü kö ꞊wa ka dhɛɛ" 'kpɔ 'wɔn 'ö ka ‑zʋ 'dhö‑ 'gü bha‑ 'ka, kö 'ka‑ ‑gɛn bho‑ ‑mɛ ‑dhɛ 'kpakpadhö. "Kɛɛ 'ka‑ pö 'ka‑ ‑gɛn bho, ‑kaa ‑gɛn bho dhɔngdhɔngsü 'ka "nɛɛnɛɛ 'ka ‑a ‑nu ꞊bhlëë 'gü,
1PE 3:16 "kɛɛ kö ka zuë" 'yaa za dɔ sië ka ‑bha, kë "dhʋ̈ kö 'yiʋ̈‑ dɔ 'mɛ 'wo ka këwɔn ‑së ‑nu ‑dhiang yaa zë ka ‑bha ‑kplü Klisi ‑bha ‑sü ‑wɔn 'gü bha‑ ‑nu ‑bha.
1PE 3:17 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë Atanna ‑dhidhɛwɔn 'ka kö ‑wo ka ‑wëëdhɛ bho 'wɔn ‑së kë ‑sü ‑wɔn 'gü, ‑a fië‑ ‑dhö ‑a ‑kë "dhʋ̈ ‑sü 'ö 'wɔn yaa kë ‑sü ‑wɔn 'gü bha‑ ‑bha.
1PE 3:18 ‑A ‑gɛn ‑mü ꞊dhɛ Klisi yöö ꞊dede ‑yö ‑ga ka ꞊në ka ‑wɔn 'gü. Yö 'ö yö ‑zë 'ö "slʋ̈ʋ̈slʋ̈ 'ö ‑dhii 'yaa‑ ‑bha Atanna wëëdhö bha ‑yö kë ga ‑kɔ doseng bha‑ ‑bho "dhʋ̈ 'mɛ 'ö ꞊sɔng 'dhö‑ ‑nu ‑bha bha ꞊në‑ ‑nu ‑wɔn 'gü, kë "dhʋ̈ kö 'ö zian 'ö dho Atanna "piʋ̈ ‑a bho ka 'ka. ‑A ‑dhü ꞊në wo‑ zë 'yö‑ 'nii‑ ‑zë 'ö go ga 'gü Atanna ‑bha 'Nii‑ "slʋ̈ʋ̈slʋ̈ faan 'ka.
1PE 3:19 'yö dho Atanna ‑wʋ pö 'mɛ 'wo ‑kaso 'gü ꞊geebɔɔ 'ö 'wo‑ ꞊bhlëë ‑siö yi 'bha 'ka Noe ‑kwɛ ‑ta kö ‑yö ö zuë" kë sië ‑sɛa ‑a ‑nu "piʋ̈ kö Noe ‑yö "yitagɔ ‑pë kë bha‑ ‑nu ‑dhɛ 'Nii‑ "slʋ̈ʋ̈slʋ̈ do bha‑ 'saa‑ 'gü. 'Sa "yitagɔ 'ö Noe ‑ya ‑pë ‑kë "dhʋ̈ bha mɛ ga "kɛɛ 'në bha ꞊në 'wo kë ‑da 'gü 'yö 'wo dha "yi bha‑ ‑gɔ. ‑Wo ‑gun mɛ "saaga.
1PE 3:21 ‑A "yi 'ö gun "dhʋ̈ bha ‑yö ‑gun ‑bɔ Yesu 'ka‑ ‑zu 'ka bho sië ꞊dɛɛ ya ꞊në‑ "blɛɛn‑ 'ka. ‑A kë 'wo‑ wo sië "dhʋ̈ ꞊dɛɛ bha 'wii‑ "dhiʋ̈ "wlü ‑dhii ‑bho mɛ kwi ‑bha ‑sü ‑bha, "kɛɛ ‑yö gba 'ö‑ mɛ ‑ya ‑dhɛ Atanna ‑gɔ, kö ‑ya gba zuëwaanusü 'ka ö wëëdhö ꞊në‑ 'ka. ‑Bɔ Atanna 'ka ‑zu bho ‑sü bha ‑yö ka ‑dha Yesu Klisi 'ö ꞊ya 'dho dhang‑ 'gü 'ö ‑ya ‑sü 'ka ‑dhɛ ꞊bhlëësü 'ö Atanna ‑kɔ ‑së 'gü bha‑ 'gü, ‑a ‑bha "kië ‑nu waa‑ ‑kɔ ‑ziö mɛ ‑gɔ ‑pë ‑nu waa‑ 'gügbɩɩdhɛ ‑pë ‑nu 'wo mü ‑a ‑nu ‑gɔ "dhiʋ̈ bha ‑a ‑bha ‑go ga 'gü ‑sü bha ꞊në‑ 'saa‑ 'gü.
1PE 4:1 ‑A ‑kë "dhʋ̈ ‑sü bha‑ 'gü, ꞊dhɛ 'ö ‑kë ꞊dhɛ 'wɔn 'wo‑ bho Klisi ‑dhü 'gü 'ö ma‑ 'ka "dhʋ̈ bha ‑yö kë‑ ‑kun ö ‑bha ‑kɔ ꞊gban ‑kɔ ꞊gban 'gü bha, ‑a ‑dhɛa ‑bha 'pö ꞊dhɛ kaa ‑dɩ 'pö ka zuë" ‑yö "wɩ‑ ‑bha kö ‑wo ka ‑wëëdhɛ bho "dhʋ̈. ‑A ‑gɛn ‑mü ꞊dhɛ 'mɛ 'ö‑ ‑dhü ꞊ya bo sëë bho ‑sü 'ka ꞊dhɛ ‑kɔ bha‑ 'dhö kö ꞊ya ö bo 'wɔn yaa kë ‑sü 'ka.
1PE 4:2 ꞊Ya 'go ꞊dɛɛ 'gü, ‑a ‑dhɛa ‑bha ꞊dhɛ kaa‑ ‑tosɛa 'dhɛ 'ö‑ këwɔn ꞊ya 'to "kpʋng ꞊taa yö bha 'ka‑ kë Atanna dhɔɔbhaa 'ka, 'ka 'dho‑ kë ‑kɔ 'ö ‑dhi ka ‑dhɛ ‑a 'ka.
1PE 4:3 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ "tʋ̈ng 'dhɛ 'ka‑ ‑kë yi 'bha 'ka ꞊dhɛ 'mɛ 'waa Atanna dɔ ‑a ‑nu 'dhö 'ö 'ka‑ ‑kë 'wɔn "bhluubhlu ‑nu kë ‑sü ‑bha, zuë" ‑bhɔ 'wɔn yaa ‑bha ‑sü ‑nu 'ka, we "gblʋ̈gblʋ̈ mü ‑sü ‑nu 'ka, 'ö 'ka‑ mü ‑yi ‑nu ‑da 'ö 'ka‑ mü, 'ö 'ka gun "gblʋ̈ʋ̈dhɛ "gbɛadhɛ ‑nu kë sië waa‑ ꞊gebhɔ ‑dhɔkë ‑sü 'ö 'wɔn yaa "nɛnɛga ‑sü ꞊në‑ 'ka bha‑ kë ‑sü ‑nu 'dhö bha 'yaa 'dɛdɛ.
1PE 4:4 Dɔ 'kwa‑ wo ꞊taamasü ya‑ 'gü ya 'mɛ 'waa 'dhang bho Atanna "dhiʋ̈ 'ö kɛng‑ ‑nu 'ka gun‑ 'wɔn yaa suu bha‑ kë ‑sü 'gü "dhʋ̈ bha, 'go 'ka‑ wo‑ ‑nu ‑bhiëë 'gü 'ö 'kaa‑ kë 'zü ꞊dhɛ ‑a ‑nu 'dhö bha ꞊wa ka ‑ga, ‑a 'wɔn ꞊në‑ ‑nu kɔn, 'yö wo ka ‑dhiang yaa zë.
1PE 4:5 "Kɛɛ ‑a kë 'wo‑ wo sië "dhʋ̈ bha Atanna 'ö za ‑dɔ 'mɛ ꞊wa ga waa‑ 'mɛ 'wo "yaan ‑a ‑nu ‑bha ‑mɛ 'ka bha ‑yö nu sië ‑a "tʋ̈ng 'yaa ꞊gblɛɛn 'zü, kö ‑ya ‑nu dhɛɛ" 'kpɔ‑ 'ka kö ‑wa ‑gɛn dɔ.
1PE 4:6 'Wɔn 'ö‑ ‑wɔn 'gü 'yö 'wo Atanna ‑bha naɔ ‑së bha‑ dɔ ‑sü 'ka 'pö 'mɛ ꞊wa ga ‑a ‑nu ‑gɔ bha 'yö bha, kë "dhʋ̈ kö za ꞊yaa‑ ‑nu "kpʋng ꞊taa ‑kwi kö ya‑ zë 'pö ꞊dhɛ mɛ ꞊gban 'dhö kö ‑wo ga, "kɛɛ kö‑ ‑nu 'nii‑ ‑zë ‑yö ‑tosɛa ‑dee kë Atanna ‑bha 'gügbɩɩdhɛ 'ka.
1PE 4:7 'Wɔn ꞊gban "pɛpɛ "dhiʋ̈ 'to "tʋ̈ng ꞊ya ꞊loo ꞊gban bho. ‑Ka ‑tosɛa kë "yaaki ‑bha kö 'ka ka zuë" 'kun ka ‑bha 'wɔn ꞊gban 'gü, kë "dhʋ̈ kö ka ‑kɔ ꞊mɔɔ ‑bhɛa Atanna ‑dhɛ ‑sü ‑bha "tʋ̈ng ꞊gban 'gü.
1PE 4:8 "Kɛɛ ‑a 'dhɛ 'ö‑ ‑gɔ 'ka ꞊në ka ‑dhɔ ‑bha ka 'ko kë ‑sü 'ka, ka ‑dhɔ ꞊në ‑yö ka 'ko kë ꞊kö ‑blɛɛsü kö ka ‑kɔ ‑ya 'kun. ‑A ‑gɛn ‑mü ꞊dhɛ ‑dhaɔmɛkë bha ‑yö 'wɔn yaa 'gbɛ ꞊dede ‑ta ‑kpa.
1PE 4:9 ‑Ka ‑kɔ ‑ya ka 'ko ‑dhɛng ‑bha, 'ka 'dho‑ kë wë 'gü ‑siö 'ka,
1PE 4:10 kö gbaɔdhe 'ö Atanna ‑ya ‑kë ka ‑gɔ bha 'ka ka 'ko ‑nu ‑ta 'kun‑ 'ka 'do 'do kö ‑yö kë ꞊dhɛ pë ‑gaɔ 'gbɛ 'ö‑ ꞊gbaɔ ka ‑gɔ bha 'ka‑ 'kun ‑së.
1PE 4:11 Kö 'mɛ 'ö‑ ‑bha dhiangzëmɛ 'ka ‑ya kë ö kë ‑kɔ ‑ta, kö mɛ 'ö yë ‑kë ‑a ‑bha mɛ ‑nu ‑dhɛ ‑mɛ 'ka ‑ya kë faan 'ö‑ nu‑ ‑dhɛ bha‑ 'ka, kë "dhʋ̈ kö Atanna 'tɔ‑ bhɔ Yesu Klisi 'tɔ 'gü ka këwɔn "pɛpɛ ꞊gban 'gü. ‑A ‑gɛn ‑mü ꞊dhɛ yö ꞊në‑ 'gü 'dhö "gbɩɩ‑ ‑kpɛawo, yö ꞊në‑ 'tɔ bhɔ ‑dhɛ 'dhö‑ ‑bha ‑kwɛ ꞊gban ‑kwɛ ꞊gban ‑ta, kö ‑yö kë "dhʋ̈ bha 'aa ‑yö kë.
1PE 4:12 N dhɔɔbhaamɛ ‑nu, ‑wëëdhɛ bhodhe pɛng gɔn 'ka ziö sië‑ 'gü bha‑ 'wɔn 'ya 'dho ka 'kɔn, "ɛɛn 'ya 'dho bhɔ ka 'gü "dhabhliwɔn ‑bha.
1PE 4:13 ‑A ‑dhɛa ‑bha ꞊dhɛ ‑yö ka ꞊nii ‑zian ꞊në‑ ‑da. ‑A 'klɔɔ‑ ‑mü ꞊dhɛ saan" 'ö Klisi ‑ya wo bha ka ‑bha ꞊në 'ka‑ wo sië bha. ꞊Ya kë "dhʋ̈ 'pö 'yö‑ ‑bha ‑gblüdëdhɛ bha ꞊ya ‑ya ‑bha yi 'ö‑ 'ka 'yö ka ꞊nii 'dhö ‑da 'pö.
1PE 4:14 ꞊Ya kë ꞊dhɛ ꞊wa "si bho ka ‑gɔ ka ‑bha ‑kë Klisi ‑bha 'ka ‑sü ‑wɔn 'gü, kö ka ‑bha ꞊ya kë ‑së. ‑A 'klɔɔ‑ ‑mü ꞊dhɛ ꞊ya kë "dhʋ̈ kö 'Nii‑ 'ö ꞊bhlëëbhlëësü, Atanna ‑bha 'Nii‑ bha kö ‑yö ka 'gü ꞊naa bha.
1PE 4:15 ‑Kaa kë ‑së kö 'mɛ 'ka bha mɛ 'bha 'ya 'dho sëë bho ‑a ‑bha ‑kë mɛzëmɛ 'ka ‑sü, "ɛɛn ꞊kwaanmɛ 'ka ‑sü, "ɛɛn 'wɔnyaakëmɛ 'ka ‑sü, "ɛɛn 'zü ‑a ‑bha ‑da 'wɔn 'yaa‑ ‑bha 'wɔn 'ka ‑a 'gü ‑sü ꞊në‑ 'gü doseng.
1PE 4:16 "Kɛɛ mɛ "ʋʋ mɛ 'ö sëë bho ‑a ‑bha ‑bɔ Yesu 'ka ‑sü ‑wɔn ‑zë 'gü, ‑a ‑dhɛ 'yaa‑ ‑bha ꞊dhɛ ‑a 'yiʋ̈‑ ‑ya ‑mɛ kë. ‑A ‑mɛ ‑zian ‑zë ‑yö Atanna nuɛ" ꞊në‑ bho Klisi 'tɔ 'ö ‑ya ‑bha bha‑ ‑wɔn 'gü.
1PE 4:17 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑bha za bha‑ dɔ ‑yi ꞊ya ꞊loo, "kɛɛ ‑a zü‑ ‑dho bho ‑a ‑bha mɛ ‑nu ꞊në‑ ‑ta. 'Yö ꞊ya kë ꞊dhɛ za bha‑ zü ꞊ya bho 'mɛ 'kö yi ‑zë 'ya bɔ‑ 'ka yi ‑ta bha ‑oo, 'yö ꞊ya zun 'mɛ 'kö 'waa "wɩ 'dhang bho 'wɔn ‑taɔng ‑së 'ö go‑ "piʋ̈ ‑a "dhiʋ̈ ‑wɔn ‑bha bha‑ ‑nu ‑bha ꞊wɛ? (‑A "dhiʋ̈ ‑dho ‑ya mü ꞊dhɛ?)
1PE 4:18 'Yö ꞊ya kë ꞊dhɛ 'mɛ 'ö yö ‑zë ꞊sɔng 'yaa‑ ‑bha Atanna wëëdhö ꞊ya dha ‑klüklüdhö bha ‑oo, 'yö 'mɛ 'kö 'wo‑ ‑wʋ bho wo "tʋʋ waa‑ 'wɔnyaakëmɛ ‑nu ‑zë ꞊wɛ?
1PE 4:19 ‑Dhɛ 'ö "dhʋ̈, 'mɛ‑ ‑nu sëë bho ‑sü 'dhö Atanna ‑dhidhɛwɔn 'ka bha ‑wa 'kun "gbɩɩ‑, ‑wo 'wɔn ‑së kë kö ‑wo 'dho‑ 'ka "dhiʋ̈, kö ‑wo wo ‑dɩ "kplëng bho Atanna 'ö‑ ‑nu ‑da bha‑ ‑dhɛ; ‑a ‑gɛn ‑mü ꞊dhɛ yö 'ö bha ꞊në 'yaa "plüün "fië bho tongtongdhö.
1PE 5:1 ‑A 'dhɛ 'ö maa‑ zë bha a‑ ‑zë 'mɛ ꞊wa kë "dhiʋ̈ ‑sü Atanna ‑bha mɛ ‑nu 'ka ‑mɛ 'ka ‑a ‑bha 'kɔdhigümɛ ‑nu kpö 'gü bha ꞊në‑ ‑nu ‑dhɛ. Mang ‑dɩ 'pö "dhiʋ̈ ‑sü ‑a ‑nu 'ka ‑mɛ ‑mü n 'ka ꞊dhɛ ‑a ‑nu 'dhö, saan" 'ö Klisi ‑ya wo bha mang ꞊dede n "yan ‑gun ‑dhɛ 'gü, ꞊ya 'go mü 'zü ‑a ‑bha ‑gblüdëdhɛ 'ö nu sië bha‑ 'gü ‑mɛ do ‑mü n 'ka 'pö.
1PE 5:2 'Mɛ 'ka ‑zun Atanna ‑bha mɛ ‑nu ‑dhɛ "dhiʋ̈ ‑mɛ ‑nu 'ka "dhʋ̈ bha ‑ka ka ‑zʋ kë ‑a ‑bha 'në ‑nu 'ö‑ ‑nu ‑kɛfama bho ka ‑bha bha‑ ‑nu 'gü ꞊dhɛ ‑kɔ 'ö ‑tuʋ̈ ‑maakëmɛ ‑yö ö ‑zʋ ‑kë 'ka ‑tuʋ̈ "piʋ̈ ‑a 'dhö, 'ka 'dho‑ kë ‑kpla "dhiʋ̈, ‑yö ga ka 'gü "pɛpɛdhö ‑së 'ka kö 'ka‑ kë ꞊dhɛ ‑kɔ 'ö‑ "piʋ̈ ꞊dhɛ ‑yö kë‑ 'ka ‑a 'dhö. 'Ka 'dho‑ kë ꞊naɔ ‑dhɔ ‑bha, ‑kaa kë "gblʋ̈ʋ̈dhɛ "puu ‑ta.
1PE 5:3 'Ka 'dho‑ pö 'ka ‑ya ‑a ‑nu ‑ta ꞊dhɛ ꞊zang 'dhö, ‑ka kë ꞊naa ꞊dhɛ ‑a ‑nu ‑bha ‑taadhü 'dhö.
1PE 5:4 ꞊Ya kë ꞊dhɛ 'ka‑ kë "dhʋ̈, kwa Dëmɛ 'ö 'mɛ 'ka ꞊dhɛ ‑tuʋ̈ ‑maakëmɛ 'dhö bha ka ‑gɔmɛ ꞊dede 'ka bha ꞊ya nu yi 'ö‑ 'ka, ‑yö ‑dho ‑gblüdëdhɛ 'faan‑ 'ö‑ ꞊bhlëë 'yii 'dho ‑pö tongtongdhö bha‑ ‑ya ka ‑gɔ ‑bha.
1PE 5:5 ‑Kɔ do bha‑ 'gü 'mɛ 'ka "wlü ‑në ‑nu 'ka, ‑ka mɛ zizi ‑nu bha‑ ‑nu ꞊bhlëë ‑ya ꞊dedewo. Mɛ ꞊gban "pɛpɛ ‑ka ka ‑gɔ 'dho ka 'ko ‑nu ‑dhɛ "sia‑ ka ‑bha ‑kë 'ko "piʋ̈ ‑sü 'gü. ‑A ‑gɛn ‑mü ꞊dhɛ ‑yö ‑bɛn zë ‑sü 'ka Atanna ‑wʋ 'gü ꞊dhɛ ‑yö ‑dɔ ‑gɔn ‑yan 'gü 'mɛ 'wo wo ‑dɩ sü 'kpii‑ ‑a ‑nu ‑gɔ, "kɛɛ ‑yö "gbɛbho 'mɛ 'kö 'wo‑ ꞊bhlëë ‑ya bha‑ ‑nu ‑dhɛ.
1PE 5:6 ‑A ‑kë "dhʋ̈ ‑sü bha‑ 'gü, ‑ka ka ‑gɔ 'dho "sia‑ ‑a ‑dhɛ kö 'ka dɔ‑ ‑bha 'gügbɩɩdhɛ ‑kɔ bha‑ ꞊wlöö kë "dhʋ̈ kö ‑yö ka ‑ya ꞊soo ‑ta "tʋ̈ng 'ö ‑dhi ‑dhɛ ‑a 'gü.
1PE 5:7 ‑Ka ka ‑ta bho ka ‑bha ‑zʋgɔndhe ‑nu ‑kwɛɛ 'ka‑ ‑ta, ‑a ‑gɛn ‑mü ꞊dhɛ ‑a "tʋ̈ng‑ ‑yö ka 'gü.
1PE 5:8 ‑Ka ka zuë" 'kun ka ‑bha. ‑Ka ka ‑dɩ 'kun! ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Sɔtraan 'ö ka 'yaɔ‑ 'ka bha ‑yö ꞊nië sië ka ‑züzü ‑vëvëdhö ꞊dhɛ laa 'ö ꞊gblan sië, 'ö ‑bhöpë mɔɔ‑ sië kö ‑ya ‑bhö ‑a 'dhö.
1PE 5:9 ‑Ka dɔ‑ ‑gɔ ‑gɔn ‑yan 'gü ‑zʋ ‑yö Atanna ‑dhɛ ‑sü 'ö pë 'bha 'yaa‑ bho "gblʋʋ bha‑ 'ka. ‑Yö kë ka "yaan ꞊dhɛ saan" 'ö "dhʋ̈ bha kaa do 'kaa‑ wo sië, ‑wa wɔ sië ka dheebhang ‑nu ‑ta 'pö "dhʋ̈ "kpʋngtaadhɛ ꞊gban 'gü.
1PE 5:10 "Kɛɛ ꞊ya kë ꞊dhɛ 'ka saan" bha‑ wo "dhʋ̈, "tʋ̈ng 'në 'bha ꞊ya ziö, Atanna 'ö ‑gasitɛ ‑kë "kpʋngtaamɛ ꞊gban "pɛpɛ ‑dhɛ "dhʋ̈, 'ö yö ꞊në ka ‑dhɛ kö 'ka kë ö ‑bha ‑gblüdëdhɛ 'ö‑ "dhiʋ̈todhɛ 'yaa 'dhö ‑a 'gü ‑në 'ka, ka ‑bha ‑kplü Klisi ‑bha ‑sü 'saa‑ 'gü bha, yöö ꞊dede ꞊në dho ka "gla ‑kɔ ‑dee kë, 'yö ka ‑gɛn ‑gban, 'yö ka gba faan 'ka 'yö pë 'bha ‑pë 'bha 'yaa vin ka ‑bha Atanna ‑bha zian ‑ta 'zü do 'yö 'kaa vin.
1PE 5:11 Kö Atanna 'ö 'gügbɩɩdhɛ 'dhö yö ꞊në‑ ‑gɔ "tʋ̈ng ꞊gban ‑tʋ̈ng ꞊gban 'gü bha ꞊në‑ ‑bha 'to‑ ‑bha bha 'aa ‑yö kë!
1PE 5:12 N dheebhang Sidhasö 'a‑ 'sü ꞊dhɛ ‑to ‑wʋ ‑ta ‑mɛ 'dhö Atanna ‑bha zian ‑ta bha ꞊në 'a‑ pö‑ ‑dhɛ 'yö 'sëëdhɛ dengdeng 'në ya‑ ‑bɛn zë kö 'a‑ bɔ ka ‑dhɛ. Atanna ‑bha ‑gasitɛ 'ö‑ ‑kë kwa ‑dhɛ bha‑ ga ꞊dede bha ꞊në gun n "piʋ̈ ꞊dhɛ 'a‑ ‑zɔn ka ‑dhɛ, kö 'a ka faan dɔ ‑a 'gü ‑ta 'sü ‑sü ‑bha, kë "dhʋ̈ kö 'ka 'to ‑kplü ‑sü 'ka‑ ‑bha. 'Wɔn 'ö‑ ‑wɔn 'gü 'yö 'a 'sëëdhɛ ya‑ bɔ ka ‑dhɛ bha 'yö bha.
1PE 5:13 N gbö Makö waa‑ Atanna ‑bha 'kɔdhigümɛ ‑nu 'wo Babidhɔnö yö, 'ö Atanna 'dhö‑ ‑nu ‑ya ‑sü 'ka ö ‑bha 'ka 'pö ꞊dhɛ ka 'dhö bha ꞊wa ka ꞊tua bho 'gbɛ.
1PE 5:14 ‑Ka ꞊loo ka 'ko ‑nu ‑bha kö 'ka ka 'ko ‑nu ꞊tua bho ‑së 'ka, ‑dhɔ 'gü, dheebhangdhɛ 'gü. Kö mɛ "pɛpɛ 'ka bɔ Klisi 'ka bha Atanna ‑yö zuëyagblʋ̈ʋ̈‑ nu ka ‑dhɛ bha 'aa ‑yö kë!
2PE 1:1 Mang Simɔ Piɛdhö ‑mɛ 'a ‑kë Yesu Klisi ‑bha bɔmɛ 'ka, 'a ‑ya mü 'zü 'a ‑kë "yi ‑dɔ ‑a ‑kɔ ‑bha ‑mɛ 'ka bha ma ꞊në 'a 'sëëdhɛ ya‑ bɔ, mɛ "pɛpɛ 'ka bɔ‑ 'ka, 'ö kwɛng‑ ‑nu kwa ‑bha 'dhang bho ‑a "dhiʋ̈ ‑sü ꞊bhlëë 'dhö ꞊dhɛ 'ko 'dhö, kwa ‑bha Atanna kwa Dhamɛ Yesu Klisi 'ö 'yaa bɔ mɛ 'ka ꞊flü ‑wɔn 'gü bha‑ 'saa‑ 'gü bha ka ‑dhɛ.
2PE 1:2 Kö Atanna ‑yö ö ‑bha ‑gasitɛ waa‑ ‑bha zuëyagblʋ̈ʋ̈‑ 'ö‑ ‑kë 'mɛ 'wo waa‑ ö Gbö Yesu 'ö kwa Dëmɛ 'ka bha‑ ‑nu dɔ ‑a ‑nu ‑dhɛ bha‑ kë ka ‑dhɛ, kö ‑ya 'bha ‑da 'gü ‑kpɛawo bha 'aa ‑yö kë.
2PE 1:3 Faan 'ö go Atanna "piʋ̈ 'ö Yesu Klisi ‑gɔ bha ꞊në pë "pɛpɛ 'ö kwa ‑mawɔn ‑yö zun‑ ‑bha, ‑kwa ‑bha ‑kplü ‑a ‑bha ‑sü 'gü ‑a nu kwa ‑dhɛ, kë "dhʋ̈ kö 'kwa ‑da 'ka dha ‑zian 'ö‑ dhɔɔbhaa ‑zian 'ka bha‑ ‑ta. Yesu Klisi bha ꞊në Atanna do 'ö kwa ‑dhɛ ö ‑bha 'tɔbhɔdhe waa‑ ‑bha "klʋsëdhɛ ‑bha bha‑ ‑zɔn kwa ‑dhɛ, 'yö ‑kë dha ‑zian "dhi ‑pʋ kwa ‑gɔ ‑kɔ 'ka.
2PE 1:4 'Wɔn 'ö‑ ‑wɔn 'gü 'yö 'wɔn ‑së ꞊bhlëësü ‑nu 'ö‑ ‑zɔn 'ka 'yaa 'dhö ‑a "plüün "gblʋ̈gblʋ̈ ꞊dede bho kwa ‑dhɛ bha 'yö bha. Kë "dhʋ̈ kö 'wɔn ‑nu 'ö‑ "plüün bho kwa ‑dhɛ bha ꞊yaa‑ kë ka ‑dhɛ, kö 'ka ꞊dua 'wɔn yaya ‑nu 'wo mɛ 'gü ꞊në ꞊see "kpʋng ya‑ ꞊taa bha‑ ‑gɔ kö 'ka bhɔ Atanna ‑bha.
2PE 1:5 ‑A ‑kë "dhʋ̈ ‑sü bha‑ 'gü, ‑ka ka 'gü dɔ "gbɩɩ‑ kö ka "ta ‑kɔ ‑yö dhi ka ‑bha ‑zʋ ‑yö Atanna ‑dhɛ ‑sü bha‑ 'gü, kö 'wɔndɔdhe ‑yö kë ka ‑gɔ ‑a ‑ta.
2PE 1:6 ꞊Ya 'go yö ‑zë 'gü, kö 'ka ka 'gü dɔ "gbɩɩ‑ kö ‑kɔ ‑mɔɔ ‑dɩ ‑bha ‑sü ‑yö kë ka ‑gɔ 'wɔndɔdhe bha‑ ‑ta, kö zuësɛadhɛ ‑yö kë‑ "piʋ̈, kö 'ka 'to ‑kplü ‑sü 'ka Atanna ‑bha.
2PE 1:7 ꞊Ya 'go mü kö ka ‑bha ‑kplü ‑a ‑bha ‑sü bha ka ‑kɔ ‑yö kë ka 'ko ꞊kwɛng ‑a ‑ta ꞊dhɛ dheebhangzë ‑nu 'dhö, kö ‑dhɔ ‑yö kë ka 'gü.
2PE 1:8 ꞊Sɔng ‑nu bha ꞊në‑ ‑dhɛ 'dhö‑ ‑bha ꞊dhɛ ‑yö kë ka ‑bha, ꞊ya kë ꞊dhɛ wo ‑zë ꞊wa kë ka ‑bha ꞊dhɛ ‑kɔ 'a‑ pö‑ 'ka bha‑ 'dhö, kö‑ 'bha ꞊në ‑yö ‑da 'gü ‑kpɛawo ‑yö 'dho‑ 'ka, ‑yö ‑dho ‑a ‑bha yë kë ‑sü ‑pɛng dɔ ka ‑ta, 'ö 'ka kwa Dëmɛ Yesu Klisi dɔ 'kpakpadhö ‑a ‑wɔn 'gü.
2PE 1:9 "Kɛɛ ꞊sɔng 'dhɛ 'kö bha 'yaa 'mɛ 'kö‑ ‑bha, kö‑ ‑mɛ ꞊tɛni ꞊dhɛ "yangütiimɛ 'dhö, kö 'yaa ‑dhɛ yö ꞊gblɛɛn, kö‑ ‑zʋ ꞊ya bhɔ 'pö ꞊dhɛ 'wɔn yaa ‑nu 'ö‑ ‑kë ‑blɛɛsü bha ꞊ya 'go‑ ‑bha 'nu, ꞊ya kë "slʋ̈ʋ̈slʋ̈.
2PE 1:10 ‑A ‑kë "dhʋ̈ ‑sü bha‑ 'gü, n dheebhang ‑nu, ‑ka ka 'gü dɔ "gbɩɩ‑ ꞊dedewo kö ka ‑dhɛ 'ö Atanna ‑ya wo 'ö ka ‑ya ö ‑bha ‑ya 'gü kö 'ka kë ö dhɔɔbhaamɛ 'ka bha 'ka 'to ‑kplü ‑sü 'ka‑ ‑bha. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë ꞊dhɛ 'ka‑ kë sië "dhʋ̈, ka ‑kɔ 'yii 'dho ‑da 'wɔn yaa 'gü tongtongdhö.
2PE 1:11 'Sa 'ka‑ kë "dhʋ̈ ꞊naa 'yö dho zian 'ö dho kwa Dëmɛ, kwa Dhamɛ Yesu Klisi ‑bha ‑gblüdëdhɛpö 'gü bha‑ "dhiʋ̈ ‑pʋ ka ‑gɔ "gbɛa 'ka, 'yö 'ka ‑da ‑bha mɛ ‑dhɛ 'ö 'yaa yën tongtongdhö bha‑ 'gü.
2PE 1:12 'Wɔn 'ö‑ ‑wɔn 'gü 'yö 'a dho ka ‑zʋ ‑bö 'wɔn ‑nu bha‑ 'ka yi ꞊gban "pɛpɛ 'ka bha 'yö bha. 'Yaa "dhʋ̈, a‑ 'wɔn ‑dɔ 'kpakpadhö ꞊dhɛ ka‑ ‑dɔ 'nu ‑blɛɛsü, ꞊dhɛ ka yun ‑zian ꞊ya ziö kpɛnngkpɛnngdhö tɛanwɔn 'ö "dhʋ̈, 'ö 'ka 'dhang bho‑ "dhiʋ̈ bha‑ 'gü, "kɛɛ yö ‑zë ꞊gban 'gü a ‑dho ka ‑zʋ ‑bö 'ka ‑kpɛawo.
2PE 1:13 ‑A ‑gɛn ‑mü ꞊dhɛ 'yaa n "piʋ̈ ꞊dhɛ "tʋ̈ng 'dhɛ 'kö 'a ‑tun 'ka "yaan, 'ö 'a ‑tun kö n "yan zë‑ 'ka ya ka ‑zʋ ‑yö bhɔ 'wɔn bha‑ 'ka. 'Wɔn 'ö‑ ‑wɔn 'gü 'yö‑ ‑dhiang 'yii 'dho 'go n "dhi 'ö to "dhʋ̈ 'a ga bha 'yö bha.
2PE 1:14 ‑A ‑gɛn ‑mü ꞊dhɛ n ga "tʋ̈ng 'yaa ꞊gblɛɛn 'zü ꞊dhɛ ‑kɔ 'ö kwa Dëmɛ Yesu Klisi ‑ya ‑zɔn 'ka n ‑dhɛ ‑a 'dhö.
2PE 1:15 ‑A kë "dhʋ̈ ‑sü bha‑ 'gü, a ‑dho pë ꞊gban "pɛpɛ suu 'do 'do kë, kë "dhʋ̈ kö 'ma 'dho yi 'ö‑ 'ka, kö ka ‑zʋ ‑yö ‑bö 'wɔn ‑nu bha‑ ‑nu 'ka "tʋ̈ng ꞊gban ‑tʋ̈ng ꞊gban 'gü. 'Wɔn 'ö‑ ‑wɔn 'gü 'yö 'a 'sëëdhɛ ya‑ ‑bɛn zë sië ka ‑dhɛ bha 'yö bha.
2PE 1:16 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kwa Dëmɛ Yesu Klisi ‑bha 'gügbɩɩdhɛ waa‑ nu ‑sü ‑dhiang 'yi‑ zë ka ‑dhɛ bha, 'yii‑ zë ꞊dhɛ ‑kɔ 'ö ꞊wa 'yaanu ꞊sië ‑nu wo, 'wo wo ‑zʋ gɔn 'wo 'wɔn ‑nu zun 'ko "dhiʋ̈ 'ö ‑kë ‑kwɛzlan "nɛɛnɛɛ 'në ‑nu 'ka 'wo‑ bho bha‑ 'dhö, "kɛɛ 'wɔn 'ö yii ꞊dede yi "yan ‑yö ‑da 'gü ꞊në 'yi‑ ‑dhiang zë.
2PE 1:17 Yi 'ö kwa Dë Atanna ‑yö 'tɔbhɔdhe waa‑ ꞊bhlëë 'kpii‑ nu‑ 'ka‑ ‑dhɛ bha yi ‑gun mü. Atanna ‑yö dhiang ‑zë 'yi bha ꞊në‑ 'ka 'yö‑ pö: «'Mɛ 'ö ya, n Gbö (do) 'ö n ‑gɔ ꞊në bha, ‑a ‑dhɔ 'ö n ‑kë ‑a "sinma 'yaa 'dhö.»
2PE 1:18 Yii ꞊dede yi "tʋ‑ ‑da ‑wʋ 'ö go dhang‑ 'gü "dhʋ̈ bha‑ 'gü kö yi Atanna ‑bha ‑tɔn 'ö ('wɔn 'ö "dhʋ̈ bha 'ö ‑kë ꞊gbin‑) bha‑ ꞊gbin‑.
2PE 1:19 ‑Wʋ "pɛpɛ 'ö‑ ‑wʋdhiʋ̈loomɛ ‑nu gun‑ pö sië yi 'bha 'ka Izraɛdhö ‑mɛ ‑nu ‑dhɛ bha yi kë 'dhang ‑bho "dhiʋ̈ 'kpakpadhö 'pö 'yi bha ꞊në‑ 'ka. ‑A ‑kë "dhʋ̈ ‑sü bha‑ 'gü, ꞊ya kë ꞊dhɛ 'ka 'dhang bho‑ ‑nu ‑wʋ bha‑ "dhiʋ̈, kö 'ka ‑gasitɛ kë ka ‑dɩ ꞊në‑ ‑dhɛ. ‑A 'klɔɔ‑ ‑mü ꞊dhɛ ‑wʋ bha ‑yö ꞊dhɛ ‑dhangbha 'ö dɔ ‑sü 'ka ‑dhɛtiidhɛ 'gü ꞊në‑ 'dhö. ‑A 'bhü‑ ‑dho 'to dɔ ‑sü 'ka "dhʋ̈ 'ö to‑ 'ka "dhʋ̈ 'ö ‑dhɛ ‑yö ꞊kpaɔ ‑sü zü bho, 'yö Yesu Klisi 'ö Atanna ‑bha 'gödhuu 'ka bha ꞊ya ‑wo yi 'ö‑ 'ka, 'yö ‑dhɛ ‑pʋ ka zuë" "piʋ̈, 'yö 'ka 'wɔn bha‑ 'gü ‑kpɛa ma do.
2PE 1:20 "Kɛɛ ‑a ‑dhɛa ‑bha ꞊kö ‑blɛɛsü ꞊dhɛ ‑yö kë ka "yaan ꞊dhɛ mɛ 'bha ‑mɛ 'bha ‑kɔ 'yaa ꞊mɔɔ‑ ‑bha kö ‑yö ‑wʋ 'ö Atanna ‑wʋdhiʋ̈loomɛ ‑nu ‑wa pö 'ö ‑bɛn zë ‑sü 'ka ‑a ‑wʋ 'gü bha‑ 'klɔɔ‑ pö ‑kɔ 'ö ‑dhi ‑dhɛ ‑a 'gü (kö 'yii kë‑ ‑bha 'Nii‑ "slʋ̈ʋ̈slʋ̈ ‑zë faan 'ka).
2PE 1:21 ‑A 'klɔɔ‑ mü ꞊dhɛ ‑a ‑wʋ "pɛpɛ 'wo‑ "dhiʋ̈ ꞊loo bha mɛ 'bha 'yii‑ bho ö ‑dɩ 'gü do tongtongdhö, "kɛɛ ‑a ‑bha 'Nii‑ "slʋ̈ʋ̈slʋ̈ ꞊në zun‑ ‑nu ‑dhɛ "dhiʋ̈ 'yö 'wo‑ ‑bha naɔ dɔ‑ faan 'ka.
2PE 2:1 'Ö gun yi 'bha 'ka, Atanna ‑wʋ "dhiʋ̈ ꞊loo ꞊flü 'ka ‑mɛ ‑nu ‑gun Izraɛdhö ‑mɛ ‑nu kpö 'gü, ꞊flümɛ ‑nu 'wo mɛ ‑nu ꞊klang ‑kë ꞊suasua 'ka bha ‑wo ‑dho ‑da ka kpö 'gü 'pö ‑kɔ do bha‑ 'gü ꞊dɛɛ. ‑Wo ‑dho nu Atanna ‑dhɔkë ‑kɔ "wɛɛ 'ö mɛ wë ꞊në‑ bho‑ ‑ta, 'ö mɛ 'gü ꞊në ꞊see bha‑ 'ka ka kpö 'gü 'yö 'wo wo ꞊taa yö‑ ‑nu Dëmɛ 'ö‑ ‑nu dha bha yö ‑zë ‑gɔ, 'yö 'wo 'wɔn 'ö dho wɔ‑ ‑nu ‑ta gbluu" dhö ‑a ‑nu tii' 'ka bha ꞊në‑ ‑gan wo ‑dɩ ‑ta.
2PE 2:2 Mɛ 'gbɛ ꞊dede ‑dho ziö‑ ‑nu ꞊keng‑ 'ö 'wo wë dɔ‑ ‑nu 'ka 'wɔn "bhluubhlu kë ‑zian ‑ta. Mɛ ‑nu ‑dho 'dhang ‑bho Atanna "dhiʋ̈ ‑sü 'ö yö ꞊në tɛanwɔn 'ka bha‑ ‑dhiang yaa zë ‑a ‑nu "ta ‑kɔ ꞊në‑ ‑wɔn 'gü.
2PE 2:3 'Mɛ 'wo "dhʋ̈ bha ‑wo ‑dho zë ꞊naɔ ‑wɔn ‑dhɛ 'ö 'wo ꞊suasua ‑nu zun 'ko "dhiʋ̈ kë "dhʋ̈ kö 'wo ka ‑ta ‑bhö. "Kɛɛ ‑a ‑nu ‑bha zadɔmɛ ‑bha ‑ya za ‑dɔ ‑a ‑nu ‑bha ‑dhɔ 'ka ‑yi ꞊ya ꞊gwëë. ‑A ‑nu 'güseemɛ bha 'yaa yi zë.
2PE 2:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑kɔ do 'ö Atanna 'yii ö ‑bha "kië ‑nu 'wo ‑da "dhiʋ̈ yi 'bha 'ka bha‑ ‑nu ‑mawɔn 'to‑ 'ka, 'ö‑ ‑nu ‑lö lɔɔ" 'ka kpɛnngkpɛnngdhö, 'ö‑ ‑nu ‑zuö ‑klɔng züziösü 'gü 'ö 'wo ‑ya ‑sü 'ka zadɔyi ‑gɔ,
2PE 2:5 'ö 'yii 'mɛ 'wo gun "kpʋng ꞊taa Noe ‑bha "tʋ̈ng 'gü ‑a ‑nu ‑mawɔn 'to, 'ö "yi pa 'wɔnyaakëmɛ ‑nu bha‑ ‑nu ‑bha, 'ö Noe 'ö ‑kë Atanna ‑bha zian 'ö pö 'aa‑ ‑bha bha‑ ‑zɔn mɛ ‑nu ‑dhɛ ‑mɛ 'ka bha waa‑ mɛ "saɔplɛ "gbeng ꞊në 'wo ‑kë dhamɛ 'ka,
2PE 2:6 'ö 'yii Sodɔmö waa‑ Gomɔɔ ‑pö ‑nu ‑mawɔn 'to 'pö, 'ö‑ ‑nu ꞊pia kë "dhʋ̈ kö 'ö 'wɔn 'ö ‑ya ‑sü 'ka 'wɔnyaakëmɛ ‑nu ‑gɔ ‑a "blɛɛn‑ ‑zɔn ‑nu ‑dhɛ,
2PE 2:7 'ö Dhɔtö 'ö gun "klʋsëmɛ 'ka 'mɛ 'wo bha‑ ‑nu kpö 'gü, 'ö 'mɛ 'wo bha‑ ‑nu kë ꞊sɔng yaa ‑nu gun‑ wë 'gü ‑siö sië ‑kpɛawo bha yöö do ꞊në dha bha, ('yii 'dho‑ ‑nu ‑mawɔn 'to 'pö) ‑kɔ do bha‑ 'gü.
2PE 2:8 Dhɔtö bha zuëga ‑së ‑gun "gblʋ̈ʋ̈‑, yö 'mɛ 'wo bha Atanna ‑bha 'tɔng‑ bho 'wo gun‑ wo sië "bin ma ‑dhɛkpaɔ bha‑ "yan 'dhö gun‑ ‑dhɛ 'gü, 'yö‑ "tʋ 'dhö‑ ‑dhiang ‑nu ma, "kɛɛ gun 'ö yö ‑zë 'ö‑ wo 'wɔnsëkëmɛ 'ka bha‑ zuë" "dhiʋ̈‑ ‑gun "tɛɛ sië ‑kpɛakpɛawo 'mɛ 'wo bha‑ ‑nu bhɔ ‑kɔ yaa ‑nu bha‑ ‑wɔn 'gü.
2PE 2:9 ‑A ‑kë "dhʋ̈ ‑sü bha‑ 'gü, Atanna bha mɛ "pɛpɛ 'wo ‑kplü ‑sü 'ka‑ ‑bha bha ‑ya ‑nu ‑bho 'wɔn "gbɩɩ‑ ‑gɔ ‑kɔ ‑dɔ, 'ö 'wɔnyaakëmɛ ‑nu ‑dɔ bhië" "dhiʋ̈ ‑kɔ dɔ, kö 'ya‑ ‑nu zë za 'ka yi 'ö‑ 'ka kö 'ö 'wɔn bho‑ ‑nu 'gü.
2PE 2:10 "Kɛɛ 'mɛ 'wo ‑tosɛa ‑kë wo ‑dɩ ꞊nii ‑bha 'ö "sika 'yaa ke‑ ‑nu 'gü 'wɔn "bhluubhlu kë ‑sü 'gü, 'ö 'wo Atanna ‑bha ‑gblüdëdhɛ ‑wɔn ‑da ‑bhaa 'gü bha, ‑yö ‑dho 'wɔn bho wo ꞊në‑ ‑nu 'gü 'kpiisü. Mɛ ꞊klang ‑kë ꞊sua 'ka ‑mɛ ‑nu 'wo "dhʋ̈ bha 'waa mɛ 'bha yö‑ 'gü, ‑a ‑nu ‑bha 'ö ‑dhi ‑nu ‑dhɛ ꞊në 'wo‑ pö, 'yö 'waa "suʋ̈ 'gügbɩɩdhɛ ‑pë ‑nu ‑zian 'wo dhang‑ 'gü ‑a ‑nu ‑gɔ, 'yö 'wo‑ ‑nu ‑dhiang yaa zë.
2PE 2:11 "kɛɛ kö Atanna ‑bha "kië ‑nu ‑zian 'kö wo ‑zë faan 'dhö‑ ‑nu 'gü 'ö‑ ‑nu 'gü 'dhö "gbɩɩ‑ 'ö ‑ziö mɛ ꞊klang ‑kë ꞊sua 'ka ‑mɛ ‑nu kö 'wo bha‑ ‑nu ‑ta bha, 'waa ꞊mɔɔ‑ ‑bha kö ‑wo 'gügbɩɩdhɛ ‑pë ‑nu bha‑ ‑nu ‑dhiang yaa zë Atanna ‑kuu "dhiʋ̈ kö ꞊wa 'dho‑ ‑nu ‑da ‑dhɛ 'gü ‑a ‑dhɛ.
2PE 2:12 "Kɛɛ 'mɛ 'wo "dhʋ̈ bha ‑wo ꞊dhɛ "bü ‑wü ‑nu 'ö‑ ‑nu "yaaki 'yaa 'dhö bha ꞊në‑ 'dhö, yö ꞊në‑ ‑wɔn 'gü 'yö 'wo "si bho 'pë 'waa dɔ ‑a ‑gɔ "dhʋ̈ bha. ‑A ‑wɔn 'gü, ‑kɔ do 'ö Atanna ‑yö wü ‑nu ‑da 'ka kö ‑wa ‑nu 'kun ‑wa ‑nu zë ꞊në‑ wo bha, ‑a ‑nu ‑gɔ ‑dho 'to 'pö‑ ‑nu këwɔn ‑bha ‑kɔ do bha ꞊në‑ 'gü.
2PE 2:13 ‑Kɔ do 'wo 'wɔn yaa ‑kë 'ka bha ꞊në Atanna dho‑ "pɔ bho‑ 'ka‑ ‑nu ‑gɔ 'pö. 'Wɔn yaa ‑kë 'yënng‑ "gbɩɩ‑ 'gü ‑sü ꞊dhɛ mɛ‑ dɔ gbeng bha ꞊në‑ ‑nu ‑dhidhɛwɔn 'ka, kɛng‑ ‑nu ka ‑bha ‑dhië ‑kë "kwëë ‑sü bha ‑yö 'yiʋ̈‑ ‑sü, ‑yö ‑dhii ꞊në‑ ma Atanna ‑bha mɛ ‑nu ‑bha. ‑A ‑gɛn ‑mü ꞊dhɛ kö ‑wo wo "dhia ꞊në bho sië ꞊flü ‑pë ‑bhö ka ‑gɔ ‑sü "dhiʋ̈ bha.
2PE 2:14 ‑Zua zë ‑yan "tɛɛn ꞊dede ꞊në‑ ‑nu ‑gɔ ‑bha, 'wɔn yaa ‑san 'yaa zun‑ ‑nu 'gü tongtongdhö. 'Mɛ 'ö‑ ‑nu ‑zʋ 'yii ‑gban ꞊kö Atanna ‑bha zian ‑ta bha ꞊në 'wo‑ ‑nu ꞊mɔɔ kö 'wo ‑da ‑a ‑nu ‑gɔ 'gü kö 'wo‑ ‑nu ‑gɔ 'gü see‑, kö 'wo‑ ‑nu ‑da pë ꞊kwɛɛ ‑wʋ "nɛɛnɛɛ ‑nu 'ka, woo‑ do bha ‑wo ꞊naɔ mɔɔ‑ ‑sü ‑bha ꞊dhuëng 'ka. 'Wɔn 'ö‑ ‑wɔn 'gü 'yö Atanna ‑bha "dhang dho‑ ‑nu 'kun bha 'yö bha.
2PE 2:15 ‑A 'klɔɔ‑ ‑mü ꞊dhɛ ꞊wa "kan tɛan‑ ‑zian ‑bha ꞊wa ‑da "bü, zian 'ö Atanna ‑wʋdhiʋ̈loomɛ Badhaamö, Beɔɔ gbö ‑ya sü yi 'bha 'ka, 'ö zë ꞊naɔ ‑wɔn ‑dhɛ 'ö 'wɔn yaa ‑ga ꞊ni, 'ö‑ ‑kë bha ꞊në ꞊waa‑ 'sü.
2PE 2:16 "Kɛɛ ‑a kë 'ö Badhaamö ‑ya wo "dhʋ̈ bha 'yii ꞊fië‑ 'gü. ‑A 'klɔɔ‑ ‑mü ꞊dhɛ ‑a kë 'ö‑ wo "dhʋ̈ bha ꞊në‑ ‑wɔn 'gü 'yö Atanna ‑ya bho‑ "yan 'gü, 'yö ꞊soofëng ‑yö dhiang zë‑ ‑dhɛ ꞊dhɛ mɛ "bhɩɩ‑ 'dhö, kë "dhʋ̈ kö slaadhɛ ‑wɔn 'ö gun‑ kë sië bha ‑yö ö bo‑ 'ka.
2PE 2:17 Mɛ ꞊klang ‑kë ꞊sua 'ka ‑mɛ ‑nu bha ‑wo ꞊dhɛ "yi ‑gɔ 'ö ꞊ya "bhʋ̈ʋ̈, "ɛɛn dha 'kpong‑ 'ö "tɛɛ ‑ya ‑pɛn 'ö‑ bho dhang‑ ‑bha bha ꞊në‑ 'dhö. ‑Dhɛtiidhɛ 'ö‑ 'gü‑ ꞊tröö 'sënsëndhö bha ꞊në Atanna 'dhö‑ ‑ya ‑sü 'ka‑ ‑nu saan 'ka.
2PE 2:18 ‑Wo mɛ ‑nu "dhiʋ̈ ‑dɔ pë ‑dhɛ "plüün 'gü "fië "gblʋ̈gblʋ̈ ‑nu 'wo‑ bho "dhi "gbɩɩ‑ ‑dhɛ bha glaa" glaadhö bha ꞊në‑ ‑bha, 'yö 'wo 'mɛ 'wo go ꞊dhɛng ‑zian ‑ta ‑dee 'gü 'wo ‑da Atanna ‑bha zian ‑ta bha‑ ‑nu ‑zian ‑kë 'wo‑ pö 'wɔn "bhluubhlu ‑nu 'wo‑ ‑kë ꞊dhɛ ‑zua zë ‑sü ‑nu 'dhö bha yö ‑zë 'yaa 'wɔn 'bha 'ka.
2PE 2:19 'Yö 'wo ‑ya ‑dɩ 'flëë‑ 'gü ‑sü "plüün bho‑ ‑nu ‑dhɛ "kɛɛ 'sa kö wo ‑zë 'wɔn yaa 'ö mɛ "dhiʋ̈ dɔ ga ‑dhɛ bha‑ kë ‑sü ꞊ya kë‑ ‑nu 'tuʋ̈‑ 'ka, 'sa kö pë 'dhɛ kö‑ ‑kɔ ꞊ya ziö i ‑gɔ kö 'bha kë‑ ‑pë ‑bha ꞊dhuëng 'ka ꞊naa bha.
2PE 2:20 Pë "pɛpɛ 'a‑ pö "dhʋ̈ bha‑ 'klɔɔ‑ ‑mü ꞊dhɛ kö mɛ "ʋʋ mɛ 'ö ‑yö bo kwa Dëmɛ kwa Dhamɛ Yesu Klisi dɔ ‑sü 'ka, kö‑ ‑mɛ ‑yö ö bo 'wɔn "bhluubhlu ‑nu kë ‑sü 'ka, kö‑ mɛ ‑yö ö yee kë 'zü ‑deewo ‑yö ‑da 'wɔn ‑nu bha‑ kë ‑sü 'gü, kö ‑yö 'dho 'zü ‑yö kë‑ ‑bha ꞊dhuëng 'ka, ‑a ‑mɛ ‑bha ‑tosɛa 'dhɛ 'ö to ꞊taama bha ‑yö ‑kë ‑wëësü 'ö ‑ziö 'ka ‑a ‑blɛɛsü 'ö‑ ‑kë kö 'yii Klisi dɔ ꞊kö bha‑ ‑ta.
2PE 2:21 ‑A ‑mɛ ‑nu ‑todhʋ̈sü 'ö ‑zianwo 'nu kö 'wa 'dho Atanna ‑bha zian 'ö pö 'aa‑ ‑bha bha‑ dɔ ‑sü fië‑ ‑dhö, ‑a dɔ ‑sü kö ‑wo 'dho ‑wo "kan‑ ‑wʋ 'wo‑ dɔ bha‑ ‑bha ‑sü ‑bha.
2PE 2:22 'Sa ꞊ya kë "dhʋ̈ kö "gwënng 'wo‑ ‑da 'wo‑ pö ꞊dhɛ: «‑Pɩ 'ö 'gbɛn‑ ‑ya wo bha ꞊ya ‑ya 'zü mü ꞊ya nu ꞊yaa‑ ‑bhö, 'yö ‑bhɔ ‑dhee 'ö ꞊wa gun ꞊waa‑ "zu bha ꞊ya nu 'zü ‑deewo ꞊ya ziö böö‑ 'ka» bha 'yaa ꞊sua 'ka.
2PE 3:1 N dhɔɔbhaamɛ ‑nu, 'ma 'sëëdhɛ bo ka ꞊dhɛ ‑a ꞊plɛ ‑naa ꞊nɛ. "Kɛɛ 'sëëdhɛ ꞊plɛ 'a‑ bɔ "dhʋ̈ bha‑ 'bha 'klɔɔ‑ 'yaa 'wɔn "wɛɛ 'ka. A‑ ‑kë "dhʋ̈ kö tɛanwɔn 'ö go Atanna "piʋ̈ bha ꞊në 'ya 'dho 'go ka "yaan, "kɛɛ kö 'ka‑ dɔ 'kpakpadhö.
2PE 3:2 Kë "dhʋ̈ kö 'wɔn 'ö‑ ‑wʋdhiʋ̈loomɛ ‑nu ‑wa to "dhiʋ̈ 'wo‑ pö yi 'bha 'ka bha waa‑ kwa Dëmɛ, kwa Dhamɛ ‑bha 'tɔng‑ ‑nu 'ö‑ ‑bha bɔmɛ ‑nu 'wo ka ꞊klang ‑kë 'ka bha ꞊në ka ‑zʋ 'ya 'dho bhɔ‑ 'ka tongtongdhö.
2PE 3:3 "Kɛɛ 'wɔn ‑blɛblɛsü 'ö n "piʋ̈ ꞊dhɛ ‑yö 'to ka "yaan yö ‑mü ꞊dhɛ "tʋ̈ng ꞊taamasü 'gü, ꞊wɛɛ ‑dɔ Atanna ‑wɔn ‑bha ‑mɛ ‑nu ‑dho kë 'gbɛ, 'ö 'waa wo "tʋ kë ‑a ‑wʋ ‑bha, "kɛɛ 'ö 'wo woo‑ ‑tosɛa ‑kë wo ‑dɩ ꞊nii ꞊në‑ ‑bha. ‑Wo ‑dho ꞊wɛɛ dɔ ka ‑bha
2PE 3:4 'wo‑ pö: «Ka Dhamɛ bha 'yii‑ pö ꞊dhɛ 'ya 'dho ö ‑dho ö yee kë 'ö nu ‑ee? ‑Yö 'mɛ ꞊tɔn? 'Ö go kwa "bhɛma ‑nu 'ö ꞊wa ga 'nu yi 'bha 'ka bha‑ ‑nu ‑kwɛ ‑ta, 'ö nu 'ö zun‑ 'ka ꞊dɛɛ ‑bha, ‑kɔ do 'ö Atanna ‑yö "kpʋngtaadhɛ ‑da 'ka 'yö‑ ‑bha, ‑a 'bha 'yii 'go "gblʋʋ do.»
2PE 3:5 "Kɛɛ ‑a "dhiʋ̈ ꞊në 'wo‑ ꞊wlü‑ ‑bha kö‑ ‑nu ‑zʋ bhɔ ꞊dhɛ "sɛ waa‑ dhang‑ 'ö Atanna ‑ya ‑da yi 'bha 'ka bha ‑ya ‑da ö ‑wʋ ꞊në‑ 'ka, 'yö "sɛ sü "yi ꞊bhaa 'yö dho 'yö‑ ‑pë ‑kë "yi 'ka.
2PE 3:6 ꞊Dhɛ "kpʋngtaadhɛ 'gü 'ö Atanna ‑ya ꞊see 'zü yi 'bha 'ka bha ‑ya ‑see "yi do bha ꞊në‑ 'ka, "yi do bha ꞊në pa.
2PE 3:7 ꞊Dhɛ "sɛ waa‑ dhang‑ 'dhɛ 'wo ꞊dɛɛ ‑yën ya‑ 'gü ya ‑wo ‑tosɛa kë sië Atanna ‑wʋ do bha ꞊në‑ ‑bha kö ‑wo kë pɛng "kɔng 'ka yi 'bha 'ka. ‑Wo ‑ya ‑sü 'ka yi 'ö Atanna ‑ya ‑ya kö ‑yö za dɔ‑ 'ka 'wɔnyaakëmɛ ‑nu ‑bha kö ‑ya ‑nu 'gü see‑ bha ꞊në‑ ‑gɔ. (‑A 'dhɛ 'ö mɛ "bhɩɩ‑ ‑nu ‑zʋ bhɔ‑ 'ka 'yö bha).
2PE 3:8 "Kɛɛ ‑a ‑gɔ do ‑ya 'gü 'ö dho 'to ka "yaan n dhɔɔbhaamɛ ‑nu, yö ‑mü ꞊dhɛ ‑dhɛkpaɔyi do ziö ‑sü ‑yö kwa Dëmɛ ‑zë ‑gɔ ꞊dhɛ ‑kwɛ "gblü do 'dhö, 'yö ‑kwɛ "gblü do ziö ‑sü 'dhö ꞊dhɛ 'pö ꞊dhɛ ‑dhɛkpaɔyi do 'dhö.
2PE 3:9 ‑A ‑wɔn 'gü, 'ya 'dho kë ka 'gü ꞊dhɛ kwa Dëmɛ ‑yö ö ‑bha nu ‑sü kö ‑yö za dɔ mɛ ‑bha 'ö‑ "plüün bho bha‑ ‑da ꞊në wo sië ꞊taama ‑kpɛakpɛawo 'ö dho‑ 'ka ꞊dhɛ ‑kɔ 'ö mɛ 'bha ‑nu 'wo wo ‑zʋ 'gɔn sië‑ 'ka ‑a 'dhö. "Kɛɛ ‑yö 'ö zuë" ꞊në‑ kë sië ‑sɛa ka "piʋ̈, ‑a ‑gɛn ‑mü ꞊dhɛ 'yaa‑ "piʋ̈ ꞊në‑ wo ꞊dhɛ mɛ 'bha ‑mɛ 'bha 'gü ‑yö see‑. 'Wɔn 'ö‑ 'gü ‑së, yö ‑mü ꞊dhɛ kö mɛ "pɛpɛ ꞊gban ‑wo "tʋng ꞊slɔɔ kö ‑wo "kan 'wɔn yaa ‑bha kö ‑wo wo wë bɔ Atanna ‑ta.
2PE 3:10 "Kɛɛ yö ‑zë ꞊gban 'gü, kwa Dëmɛ Yesu nu ‑yi bha ‑yö ‑dho ‑wo ꞊dhɛ ꞊kwaanmɛ 'ö nu ‑a 'dhö, 'yii dho yi 'kpɔ. Dhang‑ ‑nu ‑dho ꞊dhɛng 'yi bha ꞊në‑ 'ka 'yö‑ vin ‑yö "suʋ̈ ‑da mɛ ꞊gban 'gü, 'yö pë ‑nu 'wo mü bha pɛng ‑ya ꞊gban ‑bhö "pɛɛpɛdhö, 'yö "sɛ waa‑ pë "pɛpɛ 'wo‑ ‑ta ‑a ‑nu "dhiʋ̈ ‑yö to.
2PE 3:11 ꞊Dhɛ 'ö ‑kë ꞊dhɛ pë ꞊gban "pɛpɛ 'gü‑ ‑dho see‑ ‑kɔ bha ꞊në‑ 'gü, kö ka "ta ‑kɔ ‑zë ‑yö ‑dho kë ka "yaan. (‑Ka ka ‑zʋ 'to ka ‑dɩ 'gü, ‑a ‑gɛn ‑mü ꞊dhɛ) ‑a ‑dhɛa ‑bha ꞊dhɛ 'ka 'to ‑kplü ‑sü 'ka Atanna ‑bha, kö pö 'a 'dho kë ka "ta ‑kɔ ‑bha,
2PE 3:12 kö ‑yö 'to‑ 'ka "dhʋ̈ ‑yö zun‑ 'ka yi 'ö Atanna ‑zʋ "piʋ̈ bha‑ ‑bha, kö ka ka faan dɔ sië ‑kɔ ꞊gban ‑kɔ ꞊gban 'gü kö yi 'kpii‑ 'ö "dhʋ̈, 'ö dhang‑ dho "gʋ̈‑ 'ka 'ö pë ‑nu 'wo dhang‑ 'gü ‑a ‑nu ꞊gban ‑wo ꞊söng‑ 'ka ‑a pɛng 'bhü 'gü bha ‑yö ‑wo ka ‑bha kö ka‑ ‑bha zian ‑ta, "kɛɛ kö ‑yö ‑wo "vaandhö.
2PE 3:13 "Kɛɛ 'kö 'zü "sɛ waa‑ dhang‑ ‑nu ꞊wa "gʋ̈ ꞊dhɛ ‑kɔ bha‑ 'dhö, Atanna ‑ya ‑dee "plüün bho ‑sü 'ka kwa ‑dhɛ. ‑A ‑dee 'ö "dhʋ̈ bha ꞊në 'wɔn yaa 'yii 'dho kë mü. "Kɛɛ 'sa pë 'ö 'kwa "yan 'to sië‑ ‑gɔ 'yö bha.
2PE 3:14 Yö ꞊në‑ ‑wɔn 'gü, 'yö 'ka dho ka 'gü dɔ "gbɩɩ‑, "sanni yi 'ö bha‑ ‑wo ‑sü ꞊zinng 'gü, kö 'ka kë "slʋ̈ʋ̈slʋ̈, kö pö 'a 'dho kë ka ‑bha ‑a wëëdhö, kö 'wɔn 'bha ‑wɔn 'bha 'ya 'dho kë kɛng‑ ‑nu ka ꞊zinng 'gü, n "taɔngdë ‑nu.
2PE 3:15 Zuë" 'ö kwa Dëmɛ 'dhö‑ kë sië ka "piʋ̈ ‑sɛa ('ö 'yii nu ꞊kö) bha ‑kaa 'sü ꞊dhɛ "tʋ̈ng 'ö‑ nu ka ‑dhɛ kö 'ka ka ‑dɩ baa‑ 'ka kö 'ka dha ꞊në‑ 'dhö, ꞊dhɛ ‑kɔ 'ö kwa dheebhang ‑wɔngbɩɩsü Pɔdhö ‑ya ‑bɛn zë‑ 'ka ka ‑dhɛ "yaaki 'ö Atanna ‑ya nu‑ ‑dhɛ ‑a 'ka bha‑ 'dhö.
2PE 3:16 'Pë 'ö‑ ‑bɛn zë 'sëëdhɛ "pɛpɛ 'ö‑ ‑kë, 'ö 'wɔn 'ö ‑gban kwa Dëmɛ nu ‑sü ‑bha ‑a ‑dhiang zë‑ 'gü ‑a ꞊gban 'gü 'yö bha. ‑Wʋ 'bha ‑nu ‑wa ‑bha 'sëëdhɛ ‑nu bha‑ 'gü 'ö‑ ‑nu 'gümadhɛ 'yaa ‑së. ‑A ‑wʋ kpö ‑nu 'wo "dhʋ̈ bha ꞊në 'mɛ 'waa 'wɔn ‑nu 'wo ‑gban Atanna ‑bha bha‑ 'gü ma, 'ö‑ ‑nu ‑gɛn 'yaa ‑gban ‑sü 'ka‑ ‑bha zian ‑ta bha 'wo‑ 'klɔɔ‑ ꞊slëë‑ ‑ta ꞊dhɛ ‑kɔ 'wo‑ ‑kë 'ka ‑zianwo ‑a ‑wʋ 'ö ‑bɛn zë ‑sü bha‑ 'bha ‑nu 'ka bha‑ 'dhö. "Kɛɛ ‑wo wo ‑dɩ ‑bha ‑wɔn ꞊në‑ see‑ sië bha.
2PE 3:17 "Kɛɛ ka ‑zë, n dhɔɔbhaamɛ ‑nu, 'ma yö ꞊në‑ pö ka ‑dhɛ bha. ꞊Dhɛ 'ö "dhʋ̈, ‑ka ka ‑dɩ 'kun, kö 'ka 'dho ‑da 'mɛ ꞊wa zian 'to bha‑ ‑nu "piʋ̈, 'ö 'ka ‑da këwɔn yaa ‑nu bha‑ 'gü 'ö ka ꞊dhɛng, 'ö ka "ta ‑kɔ ‑së 'ö ka ‑kɔ ꞊yaa‑ 'kun 'nu bha 'ka ꞊kwaa‑ ‑zü.
2PE 3:18 Ka ‑zë ka ‑bha kwa Dëmɛ kwa Dhamɛ Yesu Klisi dɔ ‑sü waa‑ ‑bha ‑gasitɛ 'ö‑ ‑kë ka ‑dhɛ bha ‑ka "gla ꞊në‑ wo‑ 'gü ‑kpɛawo kö 'ka 'dho‑ 'ka "dhiʋ̈. Kö yö ꞊në‑ 'tɔ ‑yö bhɔ "tʋ̈ng ya‑ 'gü kö ‑yö 'to‑ 'ka "dhʋ̈ ‑kpɛawo bha 'aa ‑yö kë.
1JO 1:1 'Sëëdhɛ ya yi‑ ‑bɔ ka ‑dhɛ 'mɛ 'ö ‑tosɛa ‑kë ‑bha ‑wʋ 'ka, yö 'ö gun kö pë "ʋʋ pë 'bha 'yaa 'dhö kö yö ‑zë ‑yö ‑dhö bha ꞊në‑ ‑wɔn 'gü, Kë "dhʋ̈ kö 'ka‑ dɔ. Yi 'ö 'yi 'sëëdhɛ bɔ sië ka ‑dhɛ "dhʋ̈ bha yi ‑zë yi kë‑ ‑wʋ ‑ma yi "tʋ 'ka, 'ö yi "yanga ꞊plɛ ‑ya yö, 'ö 'yi‑ ‑ga, 'ö yi ‑kɔ ‑yö zun‑ ‑bha. 'Mɛ 'ö bha ꞊në 'ö 'mɛ 'ö Atanna ‑wʋ 'ö ꞊sii 'ö 'yaa yën ‑a ‑da mɛ 'gü ‑a 'ka.
1JO 1:2 ꞊Sii 'ö "dhʋ̈ bha ꞊dhɛ 'ö ‑wo "yɛa‑, yi ‑zë yi "yanga ꞊plɛ ‑yö kë ‑kpan ‑bha, 'wɔn 'ö‑ ‑wɔn 'gü 'yö 'yi‑ ‑dhiang zë ka ‑dhɛ bha 'yö bha. Yö 'ö bha ꞊në gun ꞊sii 'ö 'yaa yën 'ö gun kwa Dë Atanna "piʋ̈ 'ö nu ö ‑dɩ ‑zɔn kwa ‑dhɛ ‑a 'ka.
1JO 1:3 Mɛ do 'yi‑ yö 'ö 'yi‑ ‑wʋ ma bha ꞊në 'yi‑ ‑dhiang zë sië kaa ‑dɩ 'pö ka ‑dhɛ, kë "dhʋ̈ kö yii‑ Atanna waa‑ Gbö Yesu Klisi ‑nu yi ‑bha ‑mlɛɛ 'ö‑ "dʋng 'dhö dɔ sië bha 'ka ‑da 'gü 'pö yi "piʋ̈.
1JO 1:4 'Wɔn ‑nu bha yi‑ 'sëëdhɛ ‑bɔ ka ‑dhɛ "dhʋ̈ kö kwa ‑bha zuëniidadhe "dhiʋ̈ ꞊në ‑yö pa.
1JO 1:5 ‑Wʋ 'yi‑ ma Yesu Klisi ‑ta 'yi‑ pö sië ka ‑dhɛ bha ‑kaa ‑ga 'ö ya. Yö ‑mü ꞊dhɛ Atanna bha ‑yö "puu "slʋ̈ʋ̈slʋ̈ 'ka ö këwɔn ꞊gban 'gü, pö 'aa ‑ya këwɔn 'bha ‑bha 'bha ‑bha.
1JO 1:6 ‑A kë "dhʋ̈ ‑sü bha‑ 'gü, ꞊ya kë ꞊dhɛ 'kwa‑ pö ꞊dhɛ kwɛng‑ ‑nu kwa ‑kɔ ‑yö 'ko ꞊kwɛng "kɛɛ kö pö ‑yö kwa këwɔn ‑nu ‑zë ‑bha ‑kpɛawo, kö ꞊sua ‑në 'kwa‑ ‑kë. Kö 'kwaa tɛan‑ ‑zian ‑ta tongtongdhö.
1JO 1:7 "Kɛɛ ꞊ya kë ꞊dhɛ kwaa‑ ‑tosɛa bha pö 'yii kë‑ ‑bha ꞊dhɛ ‑kɔ 'ö‑ ‑bha 'dhö‑ 'ka ‑a 'dhö, kö kwa ‑kɔ ‑yö 'ko ꞊kwɛng ꞊dedewo tɛan‑ 'ka. Yö ꞊në ꞊ya kë "dhʋ̈ 'pö 'yö‑ Gbö Yesu Klisi ꞊yɔɔn 'ö ꞊wɛnng kwa ‑wɔn 'gü bha 'ö kwaa‑ 'wɔn yaa ꞊gban "pɛpɛ bho kwa ‑bha.
1JO 1:8 ꞊Ya kë ꞊dhɛ 'kwa‑ pö kwa ‑dɩ ‑dhɛ ꞊dhɛ ꞊sɔng 'yaa kwa ‑bha, kö "kpënng‑ ꞊në 'kwa‑ kë sië kwa ‑dɩ ‑gɔ. Kö tɛanwɔn 'yaa kwa "piʋ̈.
1JO 1:9 "Kɛɛ ꞊ya kë ꞊dhɛ 'kwa kwaa‑ 'wɔn yaa ‑nu pö Atanna ‑dhɛ, kwa ‑mɔɔ ‑bha 'kwa kwa ‑zʋ gɔn‑ ‑dhɛ ꞊dhɛ ‑yö ‑dho kwaa‑ 'wɔn yaa ‑nu bha‑ ‑nu ‑mawɔn 'to, 'ö kwa ‑zu 'ö kwa ‑kë "slʋ̈ʋ̈slʋ̈ ‑a "yan 'gü. ‑A ‑gɛn ‑mü ꞊dhɛ pö 'aa ‑ya ‑a këwɔn ‑nu ‑bha, "ɛɛn 'yaa ‑wʋ ꞊plɛ 'pö.
1JO 1:10 ꞊Ya kë ꞊dhɛ 'kwa‑ pö ꞊dhɛ ꞊sɔng 'yaa kwa ‑bha, kö 'kwa Atanna kë ꞊suakëmɛ 'ka, ‑a ‑gɛn ‑mü ꞊dhɛ yö ‑zë ‑ya ‑pö mɛ 'bha 'yaa 'dhö kö ꞊sɔng 'ya 'dho kë‑ ‑bha "kɛɛ 'sa ꞊ya kë "dhʋ̈ kö‑ ‑wʋ 'yaa kwa "tʋʋdhö ꞊naa bha.
1JO 2:1 N bhang ‑nu, 'wɔn ‑nu ya a‑ ‑bɛn ‑zë 'a‑ bɔ ka ꞊dhɛ "dhʋ̈ kö 'ka 'dho 'wɔn yaa ꞊në‑ kë tongtongdhö. ‑Ɛɛ! Kö mɛ 'bha ꞊ya 'wɔn yaa kë 'zü, kö‑ ‑mɛ 'dhang bho ‑sü kë‑ "dhiʋ̈ ꞊dhɛ Yesu Klisi 'ö pö 'aa‑ ‑bha tongtongdhö bha ꞊në kwa ‑mawɔn pö ‑mɛ 'ka kwa Dë Atanna ‑kuu "dhiʋ̈.
1JO 2:2 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yö 'ö bha ꞊në Atanna ‑yö "saa‑ bho‑ 'ka kwa ‑wɔn 'gü, kë "dhʋ̈ kö 'ö ꞊mɔɔ‑ ‑bha 'ö kwa këwɔn yaa ‑nu ‑mawɔn 'to. "Kɛɛ 'sa ‑a kë 'ö‑ wo "dhʋ̈ bha 'yii‑ kë kwaa do kwa ‑dhɛ. ‑Ya ‑kë "dhʋ̈ "kpʋngtaamɛ ‑nu ꞊gban "pɛpɛ ꞊në‑ ‑nu ‑bha 'wɔn yaa ‑wɔn 'gü.
1JO 2:3 ꞊Ya kë ꞊naa ꞊dhɛ 'kwa Atanna ‑wʋ ‑ya ꞊bhlëë 'gü kö 'kwa‑ 'wɔn dɔ ꞊tɔn ꞊dhɛ kwa‑ ‑dɔ.
1JO 2:4 ꞊Ya kë ꞊dhɛ mɛ ꞊yaa‑ pö ꞊dhɛ a‑ ‑dɔ, "kɛɛ kö ‑a ‑mɛ 'yaa ‑dhio ‑zë ma‑ ‑ta, kö ꞊suakëmɛ ꞊në bha, kö‑ ‑mɛ 'yaa tɛanwɔn pö tongtongdhö.
1JO 2:5 "Kɛɛ 'mɛ 'kö‑ ‑wʋ ma, 'ö‑ ꞊bhlëë ‑ya, kö Atanna ‑dhɔ ‑bha ‑a ‑mɛ kë ‑sü bha‑ "dhiʋ̈ ‑yö pa ‑sü 'ka "pɛɛpɛdhö. ‑A ‑gɛn ‑mü ꞊dhɛ ‑a ‑kë "dhʋ̈ ‑sü bha ꞊në 'kwa‑ 'wɔn dɔ‑ ‑bha ꞊dhɛ kwɛng‑ ‑nu kwa ‑kɔ ‑yö 'ko ꞊kwɛng.
1JO 2:6 'Mɛ 'ö‑ pö ꞊dhɛ 'ö ‑kplü ‑sü 'ka Atanna ‑bha, ‑a ‑dhɛa ‑bha ꞊dhɛ ‑a ‑mɛ ‑yö ‑tosɛa kë ꞊dhɛ ‑kɔ 'ö Yesu Klisi ‑ya kë‑ 'ka‑ ꞊në‑ 'dhö.
1JO 2:7 N dhɔɔbhaamɛ ‑nu, 'ya 'dho kë ka 'gü ꞊dhɛ 'tɔng‑ ‑dee 'bha ꞊në 'a‑ dɔ sië, "Kɛɛ 'tɔng‑ zii do 'ö 'ka‑ dɔ, 'ö ‑kë Atanna ‑wʋ 'ka‑ ma ka 'dhang ‑bho ‑a "dhiʋ̈ "tʋ̈ng 'gü ‑a 'ka bha ꞊në 'a ziö sië ka ‑dhɛ ‑a 'gü ‑deewo.
1JO 2:8 "Kɛɛ 'sa ‑yö ‑tun ‑dhio ‑dee ꞊në‑ 'ka "dhʋ̈ do 'yö 'a‑ ‑bɛn zë sië ka ‑dhɛ bha. ‑A ‑bha ‑kë tɛan‑ 'ka ‑sü bha mɛ ‑ya 'suan‑ ‑bho Klisi ꞊në‑ ‑bha, 'yö mɛ ‑ya 'suan‑ 'bha bho 'pö ka ‑bha. ‑A 'klɔɔ‑ ‑mü ꞊dhɛ mɛ ꞊yaa‑ 'wɔn dɔ ꞊dhɛ gbeng ꞊ya ziö ꞊gban wo, ‑dhɛ 'gü ꞊dede ꞊ya zun "pʋ ‑sü ‑bha.
1JO 2:9 Mɛ "ʋʋ mɛ 'ö‑ pö ö ‑dɩ ‑dhɛ ꞊dhɛ ö ‑tosɛa "puu 'ö pö 'aa‑ ‑bha ꞊në‑ kë sië, "kɛɛ kö‑ dheebhang 'ö bɔ Yesu 'ka 'pö ꞊dhɛ‑ 'dhö ‑a ‑san ‑tun kë bha kö pö ‑yö ‑tun ‑a ‑mɛ ‑bha ‑tosɛa ‑bha.
1JO 2:10 'Mɛ 'ö‑ dheebhang 'ö "dhʋ̈ bha‑ ‑dhɔ ‑ya ‑kë bha kö yö ꞊në‑ ‑mɛ ‑bha ‑tosɛa ꞊ya kë "puu, ‑a ‑gɛn ‑mü ꞊dhɛ kö pë "ʋʋ pë 'bha 'yaa‑ ‑mɛ ‑bha ‑tosɛa 'gü 'zü do kö ‑yö kë mɛ "wɛɛ 'bha ‑zian ‑bha 'wɔn yaa kë ‑sü 'suan‑ ‑bho ‑bha ‑pë 'ka.
1JO 2:11 "Kɛɛ mɛ "ʋʋ mɛ 'ö‑ dheebhang ‑san ‑ya ‑kë, kö‑ ‑mɛ ‑yö ‑tun ꞊dhɛ 'mɛ 'ö ‑dhɛ tii 'gü, 'ö "ta 'sü sië ‑dhɛ tii 'gü, 'ö ‑dhɛtiidhɛ ꞊yaa‑ "yënng trö 'ö 'yaa ö dho ‑zian dɔ ꞊në‑ 'dhö.
1JO 2:12 N bhang ‑nu, 'sëëdhɛ ya‑ kë 'a‑ wo 'a‑ bɔ ka ‑dhɛ bha‑ 'klɔɔ‑ ‑mü ꞊dhɛ Atanna ꞊ya kaa‑ 'wɔn yaa ‑nu ‑mawɔn 'to Klisi 'saa‑ 'gü.
1JO 2:13 'Në dë ‑nu, 'sëëdhɛ ya‑ ‑bɔ ka ‑dhɛ ‑gɛn ‑mü ꞊dhɛ 'mɛ 'ö gun "dhʋ̈ "kpʋngtaadhɛ zü bho "tʋ̈ng 'gü bha ka kë‑ ‑dɔ. 'Nëglɔɔn ‑nu, 'sëëdhɛ ya‑ ‑bɔ ka ‑dhɛ ‑gɛn ‑mü ꞊dhɛ ka ‑kɔ ꞊ya ziö Sɔtraan ‑gɔ.
1JO 2:14 'Në 'sɛɛnnë ‑nu, 'sëëdhɛ ya‑ ‑bɔ ka ‑dhɛ ‑gɛn ‑mü ꞊dhɛ ka kwa Dë ‑dɔ. A‑ ‑pö 'sëëdhɛ ya‑ bɔ 'a‑ wo ka ‑dhɛ bha, 'në dë ‑nu, ‑a ‑gɛn ‑mü ꞊dhɛ 'mɛ 'ö gun "dhʋ̈ pë ꞊gban "pɛpɛ zü bho ‑yi 'ka bha ka‑ ‑dɔ. 'Në wlüüsü ‑nu, a‑ ‑pö 'sëëdhɛ ya‑ ‑bɔ ka ‑dhɛ 'klɔɔ‑ ‑mü ꞊dhɛ ka 'gü ‑yö "gbɩɩ‑, Atanna ‑wʋ bha‑ ‑bhong ‑yö ka zuë" "piʋ̈, 'yö ka ‑kɔ ꞊ya ziö Sɔtraan ‑gɔ.
1JO 2:15 Ka Zuë" 'ya 'dho bhɔ "kpʋngtaadhɛ waa‑ ‑tapë suu 'bha ‑bha 'bha ‑bha. Mɛ 'ö "kpʋngtaadhɛ ‑dhɔ ‑ya ‑kë bha kö kwa Dë bha‑ ‑dhɔ 'yaa‑ kë.
1JO 2:16 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ pë "pɛpɛ 'ö "kpʋng ꞊taa, 'ö ‑kë zuë" ‑bhɔ pë ‑bha ‑sü 'ö kwa zuë" "piʋ̈, "ɛɛn 'ö kwa "yan 'gü, "ɛɛn ‑dɩ ‑sü 'kpii‑ ‑sü 'ö mɛ ‑bha ‑tosɛa 'gü ‑a ‑bha bha, ‑a 'bha 'yii 'go kwa Dë Atanna "piʋ̈ tongtongdhö; ‑yö ‑go "kpʋng ya ꞊në‑ ꞊taa.
1JO 2:17 "Kɛɛ 'sa "kpʋngtaadhɛ waa‑ 'gü ‑pë ‑nu 'wo mɛ zuë" ‑bhɔ ‑bha ‑pë 'ka bha ziö ‑pë ‑nu ‑mü, ‑a ‑dhɔ ꞊ya 'mɛ 'ö‑ kë kö ‑yö 'to‑ "dhia "piʋ̈ ‑yö ‑dho fië‑ 'gü, "kɛɛ 'mɛ 'ö Atanna ‑zë ‑a ‑dhidhɛwɔn ‑kë, ‑a ‑mɛ ‑dho ‑tosɛa kë ‑kpɛawo ‑a "piʋ̈.
1JO 2:18 N bhang ‑nu, ‑wɔn ꞊gban "dhiʋ̈ 'to "tʋ̈ng 'yaa ꞊gblɛɛn 'zü. 'Ka‑ ma ka "tʋ 'ka 'nu ꞊dhɛ Klisi 'yaɔ‑ 'kpii‑ ‑yö nu sië, dɔ 'kwa‑ wo ꞊dɛɛ ya‑ 'yaɔ‑ ‑nu bha ꞊wa kë 'gbɛ. 'Pë 'ö 'kwa‑ dɔ‑ ‑bha ꞊dhɛ "sɛ "dhiʋ̈ 'to "tʋ̈ng ꞊ya ꞊tëng bha 'yö bha.
1JO 2:19 'Mɛ 'wo bha ‑wo ‑go kwa kpö 'gü, "kɛɛ kwɛng‑ ‑nu kwa zuë" ꞊në 'yaa do, 'wɔn 'ö‑ ‑wɔn 'gü 'yö 'wo ‑kan kwa ‑bha bha 'yö bha. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë 'nu ꞊dhɛ kwa zuë" ‑yö do, kö 'wii 'dho "kan kwa ‑bha. "Kɛɛ kë 'ö‑ wo "dhʋ̈ bha ‑yö ‑kë "dhʋ̈ kö mɛ ꞊gban ‑wa 'wɔn dɔ ꞊dhɛ 'mɛ 'wo bha kwaa‑ mɛ do ‑zian kwa zuë" 'yaa gun do.
1JO 2:20 "Kɛɛ ka ‑zë, 'Nii‑ "slʋ̈ʋ̈slʋ̈ 'ö Klisi ‑ya bɔ ka ‑dhɛ ꞊dhɛ ‑kɔ 'wo gun "yɔn zun sië‑ 'ka Atanna ‑bha mɛ ‑nu ꞊gbin‑ yi 'bha 'ka ‑a 'dhö bha 'ka‑ ꞊slɔɔ. ‑A ‑wɔn 'gü, tɛanwɔn 'ö ‑gban Klisi ‑bha bha mɛ ꞊gban ka‑ ‑dɔ.
1JO 2:21 Kö‑ ‑kë ꞊dhɛ 'kaa‑ dɔ ꞊në wo 'yö‑ ‑wɔn 'gü 'yö 'a 'sëëdhɛ bɔ ka ‑dhɛ 'yaa ‑mü. A‑ ‑bɔ ka ‑dhɛ ‑a dɔ ‑zian 'ö 'ka‑ wo, 'ö ‑ya mü 'zü 'ö 'ka‑ 'wɔn ‑dɔ 'kpakpadhö ꞊dhɛ ꞊sua 'yaa ꞊mɔɔ‑ ‑bha kö ‑yö kaan‑ tɛanwɔn 'ka bha ꞊në‑ ‑wɔn 'gü.
1JO 2:22 De "wɛɛ 'bha ꞊në ꞊suakëmɛ 'ka, "ɛɛn 'ö Klisi 'yaɔ‑ 'ka kö 'yii kë mɛ "pɛpɛ 'wo‑ pö ꞊dhɛ Yesu bha Atanna Gbö 'yaa ‑mü, "ɛɛn 'yaa ‑mü 'pö 'mɛ Atanna ‑ya ‑ya ‑Yamɛ 'ka ‑a 'ka bha‑ ‑nu 'ka? 'Mɛ 'ö‑ pö "dhʋ̈ bha kö yö ꞊në ꞊suakëmɛ "ɛɛn Klisi 'yaɔ‑ bha‑ 'ka, ‑a 'klɔɔ‑ ‑mü ꞊dhɛ ꞊waa‑ pö "dhʋ̈ kö 'wii 'në yöö do‑ ‑wɔn zaɔ‑, kö ‑wo waa‑ ö Dë ꞊në‑ ‑nu ‑wɔn ꞊zaɔ bha.
1JO 2:23 Mɛ "ʋʋ mɛ 'ö Atanna Gbö bha‑ ‑wɔn ꞊zaɔ, kö waa‑ Dë Atanna ‑a ‑nu ‑kɔ 'yaa 'ko ꞊kwɛng. Mɛ "ʋʋ mɛ 'ö dɔ 'pö mɛ kpö 'gü 'ö‑ pö Yesu bha Atanna Gbö ‑mü, kö‑ ‑mɛ ‑kɔ ‑ya De Atanna ꞊kwɛng.
1JO 2:24 ‑A ‑kë "dhʋ̈ ‑sü bha‑ 'gü, ka ‑zë Atanna ‑wʋ 'wo‑ pö ka ‑dhɛ ‑a zü bho "tʋ̈ng 'gü bha ‑yö 'to ka "yaan "tʋ̈ng ꞊gban 'gü. ꞊Ya kë "dhʋ̈ kö ka ‑kplü ‑sü 'ka ‑a Gbö bha waa‑ ö Dë ‑a ‑nu ‑bha ꞊naa bha.
1JO 2:25 "Kɛɛ 'sa 'pë 'ö‑ "plüün bho ka ‑dhɛ 'wɔn bha‑ 'gü yö ‑mü ꞊sii 'ö 'yaa yën ꞊në‑ 'ka. Yö ꞊në ꞊ya kë "dhʋ̈ 'yö 'ka‑ ꞊slɔɔ.
1JO 2:26 'Wɔn ‑nu bha a‑ ‑bɛn ‑zë 'a‑ bɔ ka ‑dhɛ "dhʋ̈ 'mɛ 'wo ka bho sië Atanna ‑bha zian ‑ta bha ꞊në‑ ‑nu ‑wɔn 'gü.
1JO 2:27 "Kɛɛ ka ‑zë, Klisi ꞊ya ö ‑bha 'Nii‑ "slʋ̈ʋ̈slʋ̈ bha‑ ‑ya ka 'gü. ‑A ‑kë "dhʋ̈ ‑sü bha‑ 'gü, ka ‑zë ka ‑mawɔn 'yaa‑ ‑bha kö 'mɛ 'wo bha ‑wo ka ꞊klang kë. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑bha 'Nii‑ bha ꞊në ka ꞊klang ‑kë pë ꞊gban "pɛpɛ 'ka, "kɛɛ 'sa tɛanwɔn ꞊në 'ö ka ꞊draan‑ bha. ‑A ‑kë "dhʋ̈ ‑sü bha‑ 'gü, 'pë 'ö ka ꞊draan‑ ‑bha bha ‑kaa kë, kö 'ka 'to ‑kplü ‑sü 'ka Klisi ‑bha.
1JO 2:28 N bhang ‑nu, a‑ ‑pö ka ‑dhɛ ꞊dhɛ 'ka 'to ‑kplü ‑sü 'ka Klisi ‑bha kë "dhʋ̈ kö yi 'ö dho nu ‑dee wo‑ 'ka kö ‑a ‑bha 'yënng‑ ꞊ya ‑ya dhang‑ ‑bha bha kwa zuë" ‑yö kë‑ 'gü ‑sɛa, kö 'yiʋ̈‑ 'ya 'dho dɔ kwa ‑bha 'ö 'kwa dɔ‑ 'ka ꞊gblɛɛn.
1JO 2:29 Ka‑ 'wɔn ‑dɔ 'kpakpadhö ꞊dhɛ Klisi bha pö 'aa‑ ‑bha. ‑Kɔ do bha‑ 'gü, 'mɛ 'ö 'wɔn 'ö pö 'aa‑ ‑bha ‑a ‑kë bha, ‑yö kë ka "yaan ꞊dhɛ kö Atanna ‑bha 'në ꞊në bha.
1JO 3:1 Kwa ‑dhɔ 'ö‑ "sinma ‑yö kwa Dë Atanna ‑kë, 'ö‑ ‑wɔn 'gü 'wo kwa ‑dhɛ ‑zianwo ‑a bhang ‑nu bha kaa ꞊dede ‑kaa ‑ga bha. "Kɛɛ 'sa kwa‑ 'ka "dhʋ̈ tɛan‑ ꞊dede 'ka. ꞊Ya kë ꞊dhɛ "kpʋngtaamɛ ‑nu 'wii kwa dɔ‑ ‑bha, kö Atanna dɔ 'ö 'wii‑ wo 'yö ‑kë.
1JO 3:2 N dhɔɔbhaamɛ ‑nu, ‑yö kë ka "yaan ꞊dhɛ 'kwa kë Atanna ‑bha 'në 'ka dɔ 'kwa‑ wo ya‑ 'gü. 'Pë 'kö 'kwa dho kë‑ 'ka ‑dhɛkpaɔ dhia" 'gü ꞊në 'kwii‑ dɔ ꞊kö 'kpakpadhö ‑së 'ka, "kɛɛ kwa‑ 'wɔn ‑zë ‑dɔ ꞊dhɛ ‑dhɛkpaɔyi 'ö Klisi ‑bha 'yënng‑ dho ‑ya 'ka dhang‑ ‑bha bha kwa ‑dho kë ꞊dhɛ ‑a 'dhö, ‑a ‑gɛn ‑mü ꞊dhɛ kwa ‑dho "yan ‑kpan ‑bha kö 'ö ‑kɔ do 'ö‑ ‑bha ꞊në 'ö‑ ‑bha.
1JO 3:3 Mɛ "ʋʋ mɛ 'ö ö ‑zʋ gɔn ꞊dhɛ ‑kɔ bha‑ 'dhö, ‑yö ö ‑dɩ ‑kë "slʋ̈ʋ̈slʋ̈ ‑zian ꞊në‑ ꞊mɔɔ kë "dhʋ̈ kö 'ö kë ꞊dhɛ ‑a 'dhö.
1JO 3:4 Mɛ "ʋʋ mɛ 'ö ö ‑gɔ ‑gban 'wɔn yaa kë ‑sü 'gü kö ‑yö Atanna ‑bha 'tɔng‑ ꞊në‑ bho sië bha, ‑a 'klɔɔ‑ ‑mü ꞊dhɛ ‑a ‑bha 'tɔng‑ bho ‑sü bha ꞊në 'wɔn yaa kë ‑sü 'ka.
1JO 3:5 "Kɛɛ 'sa ka ‑zë ka‑ 'wɔn ‑dɔ 'kpakpadhö ꞊dhɛ Yesu Klisi 'ö yö ‑zë 'wɔn yaa ‑tangga ‑zian 'yaa‑ ‑bha bha, ‑yö ‑nu "kpʋng ꞊taa kö 'ö kwa ꞊sɔng ‑nu ꞊në‑ bho kwa ‑bha.
1JO 3:6 ‑A ‑wɔn 'gü, mɛ "ʋʋ mɛ 'ö‑ pö ö ‑dɩ ‑dhɛ ꞊dhɛ wɛng wo ‑kɔ ‑yö 'ko ꞊kwɛng, ö ‑ya yö ꞊në‑ ‑bha ‑ya 'gü, ‑yö ö bo ꞊në‑ wo 'wɔn yaa kë ‑sü 'ka tongtongdhö, ‑a ‑gɛn ‑mü ꞊dhɛ 'mɛ 'ö ö ‑gɔ ‑gban 'wɔn yaa kë ‑sü 'gü kö 'yii‑ yö ꞊në‑ wo "ɛɛn 'zü kö 'yii‑ dɔ.
1JO 3:7 N bhang ‑nu, mɛ 'bha 'ya 'dho‑ pö 'ö ka ‑tama 'ö ka bho Atanna ‑bha zian ‑ta. 'Mɛ 'ö 'wɔn ‑së ‑kë, kö‑ mɛ ꞊në pö 'aa‑ ‑bha Atanna wëëdhö ꞊dhɛ ‑kɔ 'ö Yesu Klisi 'dhö‑ 'ka ‑a 'dhö.
1JO 3:8 "Kɛɛ 'mɛ 'ö 'wɔn yaa kë ‑sü ‑yö ‑kë ‑bha yë 'ka bha kö Atanna ‑bha mɛ 'yaa ‑mü. Kö Sɔtraan ‑bha mɛ ꞊në bha. ‑A ‑gɛn ‑mü ꞊dhɛ yö ꞊në‑ ‑bha yë 'dhö ‑mü 'wɔn yaa kë ‑sü 'ka. ‑Ya zü ‑bho "sɛ kë ‑yi 'ka. Atanna Gbö ‑zë ‑yö ‑nu "kpʋng ꞊taa kö ‑yö Sɔtraan ꞊në‑ kë ‑yë ‑nu 'gü see‑.
1JO 3:9 Mɛ "ʋʋ mɛ 'ö‑ pö ö ‑dɩ ‑dhɛ ꞊dhɛ Atanna ‑bha 'në ‑mü ö 'ka, ‑yö ö bo ꞊në‑ wo 'wɔn yaa kë ‑sü 'ka, ‑a ‑gɛn ‑mü ꞊dhɛ kö 'gügbɩɩdhɛ 'ö ꞊sii 'ö Atanna ‑ya ‑da ‑a ‑mɛ 'gü bha‑ 'gü bha ‑ya ‑mɛ 'gü. ꞊Ya kë "dhʋ̈ ‑a ‑mɛ 'yaa ꞊mɔɔ‑ ‑bha kö ‑yö 'wɔn yaa kë ‑kpɛawo ‑yö 'dho‑ 'ka, ‑a ‑gɛn ‑mü ꞊dhɛ kö Atanna ꞊në‑ Dë 'ka.
1JO 3:10 Atanna ‑bha 'në ‑nu waa Sɔtraan bhang ‑nu ‑a ‑nu ‑bho 'ko "piʋ̈ ‑dhɛ ꞊në bha. Mɛ "ʋʋ mɛ 'ö 'yaa ö ‑gɔ ‑gban 'wɔn ‑së ‑zë kë ‑sü 'gü 'ö 'wɔn yaa ꞊në‑ ‑kë, "ɛɛn 'ö‑ dheebhang ‑dhɔ 'yaa‑ kë, kö Atanna ‑bha mɛ 'yaa kë "dhʋ̈.
1JO 3:11 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑wʋ 'wo‑ pö ka ‑dhɛ ‑a zü bho ‑yi 'ka 'ka‑ ma bha yö ‑mü ꞊dhɛ ‑a ‑dhɛa ‑bha ꞊dhɛ kwa ‑dhɔ ‑yö kwa 'ko kë,
1JO 3:12 kö 'kwa 'dho kë ꞊dhɛ (kwa "bhɛma Adan gbö) Kaɛn 'ö gun Sɔtraan ‑bha mɛ 'ka 'ö ö 'zlaa‑ zë yi 'bha 'ka bha‑ 'dhö. ‑A 'zlaa‑ zë 'ö‑ wo bha‑ ‑gɛn ꞊në gun ‑më 'ka? ‑A ‑gɛn ꞊në gun ꞊dhɛ yö ‑zë këwɔn 'yaa gun ‑së, 'yö‑ 'zlaa‑ ‑zë pö 'aa gun‑ këwɔn 'bha ‑bha.
1JO 3:13 N dheebhang ‑nu, ꞊ya kë ꞊dhɛ ka ‑san ꞊ya 'mɛ 'waa 'dhang bho Yesu "dhiʋ̈ ‑a ‑nu kë, ‑a 'wɔn 'ya 'dho ka 'kɔn.
1JO 3:14 ‑Kɔ 'ö 'kwa ꞊mɔɔ‑ ‑bha 'kwa‑ dɔ 'kpakpadhö ꞊dhɛ 'kwa dha 'güseedhe ‑gɔ, 'kwa ꞊sii 'ö Atanna "piʋ̈ bha‑ ꞊slɔɔ yö ‑mü kwa dheebhang ‑nu ‑dhɔ 'ö kwa ‑kë bha ꞊në‑ 'ka. "Kɛɛ 'mɛ 'ö‑ dheebhang ‑dhɔ 'yaa‑ kë kö‑ ‑mɛ ‑zë ‑yö ‑tun 'güseedhe bha‑ 'gü ꞊naa bha.
1JO 3:15 Mɛ "ʋʋ mɛ 'ö‑ dheebhang ‑san ‑ya ‑kë, kö mɛzëmɛ ‑mü. "Kɛɛ 'sa ka‑ 'wɔn ‑dɔ ꞊dhɛ mɛzëmɛ ‑zë ꞊sii 'ö 'yaa yën 'ö Atanna ‑ya ‑da kwa 'gü bha 'yaa‑ 'bha 'gü tongtongdhö.
1JO 3:16 ꞊Ya 'go yö ‑zë 'gü, 'pë 'wo‑ ‑dhɛ ‑dhɔ bha‑ dɔ 'kwa‑ wo bha, kwa‑ ‑dɔ Yesu Klisi ‑bha ‑tosɛa nu 'ö‑ wo kwa ‑wɔn 'gü bha ꞊në‑ ‑bha. ‑A ‑kë "dhʋ̈ ‑sü bha‑ 'gü, ‑a ‑dhɛa ‑bha ꞊dhɛ kwaa ‑dɩ 'pö 'kwa kwa ‑dɩ nu kwa dheebhang ‑nu ‑wɔn 'gü.
1JO 3:17 ꞊Ya kë ꞊dhɛ 'mɛ 'ka bha 'mɛ 'ö ꞊naɔ 'dhö‑ ‑gɔ ꞊ya ö dheebhang yö kö‑ ‑bha ‑wɔn ‑yö pë 'bha ‑bha, ꞊ya ö ꞊taa zun ö dheebhang bha‑ ‑gɔ 'yii‑ ‑ta 'kun, kö Atanna ‑dhɔ ‑bha ‑a kë ‑dhɛ ꞊në 'mɛ?
1JO 3:18 ꞊Dhɛ 'ö "dhʋ̈ n bhang ‑nu, mɛ ‑dhɔ 'ya 'dho kwa kë kwa "dhi "ɛɛn kwa 'nɛɛ‑ "dhiʋ̈ "wɛɛwɛɛ, "kɛɛ ‑ka ‑kwaa ‑zɔn kwa këwɔn ‑nu ‑bha ꞊dhɛ mɛ ‑dhɔ ‑bha kwa kë ‑sü bha tɛan‑ ꞊dede ‑mü.
1JO 3:19 Yö ꞊në ꞊ya kë "dhʋ̈ 'yö 'kwa dho‑ dɔ‑ ‑bha ꞊dhɛ kwa tɛan‑ ‑zian ꞊dede ‑ta, 'yö kwa ‑zʋ 'dhö ‑kë ‑gban ‑sü 'ka Atanna wëëdhö.
1JO 3:20 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë ꞊dhɛ kwa ‑dɩ zuëga ‑zë ꞊ya kwa zë za 'ka, 'yö Atanna ‑zë ꞊wɛ "kɛɛ kö yö ‑zë ‑yö 'kpii‑ kwa zuëga ‑zë ‑ta 'ö ‑ya mü 'zü 'ö 'wɔn ꞊gban dɔ?
1JO 3:21 ‑A kë "dhʋ̈ ‑sü bha‑ 'gü n ‑sëmɛ ‑nu, ꞊ya kë ꞊dhɛ kwa zuëga ‑zë 'yii kwa zë za 'ka kö kwa ‑bha ‑yö ‑së, kö "sika 'bha 'yaa kwa 'gü Atanna wëëdhö.
1JO 3:22 ꞊Ya kë "dhʋ̈, pë "ʋʋ pë 'ö 'kwa‑ ‑wɔn pö‑ ‑dhɛ kwa‑ ‑slɔɔ ‑a "dhiʋ̈, ‑a ‑gɛn ‑mü ꞊dhɛ kö kwa ‑dhio ‑ma ‑a ‑gɔ 'ö 'kwa‑ dhɔɔbhaawɔn ‑kë.
1JO 3:23 "Kɛɛ 'sa ‑dhio 'ö‑ dɔ kwa ‑ta yö ‑mü ꞊dhɛ kö 'kwa 'dhang bho ö Gbö Yesu Klisi ‑wɔn "dhiʋ̈, kö ꞊ya 'go mü kö kwa ‑dhɔ ‑yö kwa 'ko kë ꞊dhɛ ‑kɔ 'ö‑ pö‑ 'ka kwa ‑dhɛ ‑a 'dhö.
1JO 3:24 'Mɛ 'ö ‑dhio ma Atanna ‑ta kö‑ ‑mɛ ‑kɔ ‑ya ꞊kwɛng, kö Atanna ‑kɔ ‑ya ‑mɛ ꞊kwɛng 'pö. "Kɛɛ 'sa ‑a ‑bha 'Nii‑ 'ö‑ ‑ya kwa 'gü bha ꞊në 'kwa‑ dɔ‑ ‑bha ꞊dhɛ yöö ꞊dede ‑yö kwa 'gü.
1JO 4:1 N "taɔngdë ‑nu, 'ka 'dho 'to 'ö ka 'dhang bho 'mɛ 'wo dhiang zë Atanna ‑bha 'Nii‑ 'tɔ 'gü bha‑ ꞊gban "dhiʋ̈, "kɛɛ ‑kaa ‑nu 'gü dan kö‑ ‑bha 'Nii‑ 'dhö‑ ‑nu 'gü ꞊dede wo tɛan‑ 'ka 'ka‑ ‑dhɛ yö. ‑A ‑gɛn ‑mü ꞊dhɛ ‑a ‑wʋ "dhiʋ̈ ‑loo ꞊flü 'ka ‑mɛ ‑nu 'gbɛ ꞊dede ꞊wa ‑da "kpʋng ꞊taa dɔ 'kwa‑ wo ya‑ 'gü.
1JO 4:2 Mɛ "ʋʋ mɛ 'ö 'dhang bho‑ "dhiʋ̈ ꞊dhɛ Yesu Klisi bha ‑yö ‑bhɔ mɛbhɩɩdhe kwi 'gü ꞊dedewo tɛan‑ 'ka, 'ö dɔ mɛ kpö 'gü 'ö‑ ‑dhiang zë bha kö Atanna ‑bha 'Nii‑ ‑ya ‑mɛ 'gü.
1JO 4:3 "Kɛɛ mɛ "ʋʋ mɛ 'ö 'yaa 'dhang bho 'wɔn bha‑ "dhiʋ̈, 'ö 'yaa ꞊mɔɔ‑ ‑bha kö ‑ya ‑dhiang zë mɛ kpö 'gü, kö 'Nii‑ 'ö‑ ‑mɛ 'gü bha 'yii 'go Atanna "piʋ̈. Kö ‑yö ‑go Klisi 'yaɔ‑ 'ö 'ka‑ ma ꞊dhɛ ‑a nu ‑wɔn ‑dhö "kpʋng ꞊taa bha ꞊në‑ "piʋ̈, 'sa ꞊ya nu 'nu.
1JO 4:4 "Kɛɛ ka ‑zë, n bhang ‑nu, ka Atanna ꞊në‑ ‑bha 'ka, ka ‑kɔ ꞊ya ziö 'nu ‑a ‑wʋ "dhiʋ̈ ‑loo ꞊flü 'ka ‑mɛ ‑nu bha‑ ‑nu ‑gɔ. ‑A 'klɔɔ‑ ‑mü ꞊dhɛ 'Nii‑ 'dhɛ 'ö ka ‑zë ka 'gü bha, faan ‑ya ‑bha 'ö ‑ziö 'ka ‑a 'dhɛ 'ö 'mɛ 'waa Atanna dɔ‑ ‑nu 'gü bha‑ ‑ta.
1JO 4:5 'Mɛ 'wo "dhʋ̈ bha 'mɛ 'waa Atanna dɔ ‑wo wo "tʋ ‑to wo ‑zë ‑a ‑nu ‑wʋ ‑bha. ‑A ‑gɛn ‑mü ꞊dhɛ ꞊zinng 'yaa wɛng‑ ‑nu ‑a ‑nu ꞊zinng 'gü, ‑wo dhiang ‑zë ꞊dhɛ ‑kɔ 'ö woo ‑dɩ 'pö 'wo‑ zë‑ 'ka ꞊në‑ 'dhö. ‑A ‑nu "tʋ ‑to ‑a ‑nu ‑wʋ ‑bha ‑gɛn ꞊në bha.
1JO 4:6 "Kɛɛ kwa ‑zë kwa Atanna ꞊në‑ ‑bha 'ka. 'Mɛ 'ö‑ dɔ 'yö ö "tʋ 'to kwa ‑wʋ ‑bha, 'mɛ 'yaa‑ ‑bha 'në 'ka 'yaa ö "tʋ 'to kwa ‑wʋ ‑bha. 'Nii‑ 'ö go Atanna "piʋ̈ 'ö tɛanwɔn pö 'Nii‑ 'ka bha, ꞊zinng 'ö waa‑ 'nii‑ 'ö "kpënng‑ ‑kë mɛ ‑gɔ bha‑ ‑nu ꞊zinng 'gü kwa‑ ‑dɔ ‑kɔ bha ꞊në‑ 'gü.
1JO 4:7 ꞊Dhɛ 'ö "dhʋ̈, n "taɔngdë ‑nu, kwa ‑dhɔ ‑yö kwa 'ko kë. ‑A ‑gɛn ‑mü ꞊dhɛ ‑dhɔ bha ‑yö ‑go Atanna ꞊në‑ "piʋ̈. Mɛ "ʋʋ mɛ 'ö mɛ "bhɩɩ‑ ‑dhɔ ‑ya ‑kë kö Atanna ‑bha 'në ‑mü, kö ‑yö Atanna ‑dɔ.
1JO 4:8 "Kɛɛ 'mɛ 'ö mɛ 'bha ‑dhɔ 'yaa‑ kë bha kö 'yaa Atanna dɔ ꞊në‑ wo. ‑A ‑gɛn ‑mü ꞊dhɛ waa‑ pö ‑dhɔ, kö ‑wo ‑wɩ Atanna ꞊në‑ 'ka.
1JO 4:9 Kwa ‑dhɔ ‑bha Atanna kë ‑sü bha‑ ‑zɔn ‑kɔ 'ö‑ ‑zɔn 'ka kwa ‑dhɛ yö ‑mü ꞊dhɛ ‑a ‑bha 'në ga doseng 'ö‑ ‑gɔ bha 'yö‑ sü 'yö‑ bɔ kwa ‑dhɛ "kpʋng ꞊taa, kë "dhʋ̈ kö 'kwa ꞊sii 'ö‑ "dhiʋ̈todhɛ 'yaa 'dhö bha‑ ꞊slɔɔ ‑a 'saa‑ 'gü.
1JO 4:10 'Yii kë ꞊dhɛ yö ꞊në‑ ‑dhɔ ‑yö kwa ‑kë ‑blɛɛsü. ‑Abin! Yö ꞊në kwa ‑zë kwa ‑dhɔ ‑ya ‑kë, 'yö‑ ‑wɔn 'gü 'yö ö Gbö bɔ ꞊dhɛ "saa‑ pë 'dhö kë "dhʋ̈ kö 'ö kwaa‑ 'wɔn yaa ‑nu ‑mawɔn 'to ‑a 'saa‑ 'gü. ‑Kɔ 'ö kwa ‑dhɔ ‑ya ‑kë 'ka 'yö bha.
1JO 4:11 N dheebhang ‑nu, kwa ‑dhɔ ꞊ya Atanna kë ꞊dhɛ ‑kɔ bha‑ 'dhö, ‑a ‑dhɛa ‑bha ꞊dhɛ kwa ‑dhɔ ‑yö kwa 'ko kë 'pö.
1JO 4:12 Mɛ 'bha 'yii Atanna yö do. ꞊Ya kë ꞊dhɛ kwa ‑dhɔ ꞊në ꞊ya kwa 'ko kë kö 'kwa‑ ‑zɔn ꞊dhɛ ‑yö kwa 'gü, ꞊dhɛ ‑a ‑dhɔ 'ö kwa ‑kë bha 'duɛ‑ 'yaa‑ ‑bha.
1JO 4:13 ‑A 'wɔn ‑yö kwa "yaan ꞊dhɛ ‑a ‑kɔ ‑yö kwa ꞊kwɛng, kwaa ‑dɩ 'pö kwa ‑kɔ ‑ya ꞊kwɛng. 'Pë 'ö kwa ‑kɔ ‑da 'koo "dhʋ̈ bha yö ‑mü ‑a ‑bha 'Nii‑ 'ö‑ ‑ya kwa 'gü bha ꞊në‑ 'ka.
1JO 4:14 Yi ‑zë yi "yan ‑yö kë‑ ‑dhɛ ‑yö. Yö ꞊në‑ ‑wɔn 'gü 'yö 'yi‑ pö ꞊dhɛ kwa Dë Atanna ꞊ya ö Gbö bɔ "kpʋng ꞊taa kö ‑yö kë kwa Dhamɛ 'ka.
1JO 4:15 'Mɛ 'ö‑ ‑dhiang zë "dhɛɛ ‑ta ꞊dhɛ Yesu bha Atanna Gbö ‑mü tɛan‑ ꞊dede 'ka, kö Atanna ‑kɔ ‑ya ‑mɛ ꞊kwɛng, kö‑ ‑mɛ ‑dɩ 'pö‑ ‑kɔ ‑yö Atanna ꞊kwɛng.
1JO 4:16 Kwa ‑zë ‑dhɔ 'ö‑ ‑kë kwa 'ka bha kwa‑ ‑dɔ, 'ö 'kwa 'dhang bho‑ "dhiʋ̈. Atanna bha ꞊në ‑dhɔ kpu 'ka, ‑a ‑wɔn 'gü mɛ "ʋʋ mɛ 'ö ‑dhɔ 'dhö‑ 'gü, kö‑ ‑mɛ ‑kɔ ‑ya ꞊kwɛng, kö yöö ‑dɩ 'pö‑ ‑kɔ ‑ya ‑mɛ ꞊kwɛng.
1JO 4:17 ‑Kɔ do 'ö ‑dhɔ kpu 'ka‑ ‑bha bha ꞊në 'kwa dho kë‑ 'ka 'pö "kpʋng ꞊taa, 'pë 'ö dho‑ ‑zɔn ꞊dhɛ ‑a ‑dhɔ 'ö kwa 'gü bha 'duɛ‑ 'yaa‑ ‑bha 'yö bha. ꞊Ya kë "dhʋ̈ 'yö "suʋ̈ 'yaa kë kwa 'gü ‑a ‑bha za bha‑ dɔ ‑yi 'ka.
1JO 4:18 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑dhɔ ꞊ya kë mɛ 'gü "suʋ̈ 'yaa mɛ kë, dhaɔmɛkë ꞊dede ‑zë ‑yö "suʋ̈ bho ꞊në‑ wo mɛ 'gü. ‑A ‑gɛn ‑mü ꞊dhɛ mɛ "suʋ̈ ‑gɛn ‑mü ꞊dhɛ kö woo 'wɔn wɔ mɛ ‑ta. ‑A ‑kë "dhʋ̈ ‑sü bha‑ 'gü, "suʋ̈ ꞊ya kë mɛ 'ö‑ 'gü kö ‑dhɔ 'ö‑ mɛ 'gü bha‑ "dhiʋ̈ ꞊në 'yaa pa ‑sü 'ka.
1JO 4:19 Kwa ‑zë ‑a ‑dhɔ 'ö kwa ‑kë bha‑ 'klɔɔ‑ ‑mü ꞊dhɛ yö ꞊në kwa ‑dhɔ ‑ya ‑kë ‑blɛɛsü.
1JO 4:20 ꞊Ya kë "dhʋ̈, mɛ "ʋʋ mɛ 'ö‑ pö ꞊dhɛ Atanna ‑dhɔ ‑yö ö ‑kë, "kɛɛ kö‑ dheebhang ‑zë ‑san ‑ya ‑kë, kö 'mɛ bha ꞊suakëmɛ ‑mü; ‑a ‑gɛn ‑mü ꞊dhɛ i dheebhang kö i "yan 'dhö‑ ‑bha yö ‑zë ‑dhɔ 'yii i kë, Atanna 'kö 'bhaa‑ yö ‑a ‑dhɔ ‑dho i kë ‑kɔ ‑kë ꞊dhɛ?
1JO 4:21 "Kɛɛ 'sa ‑yö ‑dhio do 'bha ‑dɔ kwa ‑ta 'ö‑ pö: «Mɛ "ʋʋ mɛ 'ö Atanna ‑dhɔ ‑ya ‑kë, ‑a ‑dhɛa ‑bha 'pö ꞊dhɛ ‑a dheebhang ‑dhɔ ‑ya kë.»
1JO 5:1 A‑ ‑pö ka ‑dhɛ ꞊dhɛ mɛ "ʋʋ mɛ 'ö 'dhang bho‑ "dhiʋ̈ ꞊dhɛ Yesu bha 'mɛ 'ö Atanna ‑ya ‑ya kwa Dhamɛ 'ka 'yö bha, kö Atanna ‑bha 'në ‑mü ‑a ‑mɛ 'ka. "Kɛɛ 'sa mɛ "ʋʋ mɛ 'ö Atanna 'ö kwa Dë 'ka bha‑ ‑dhɔ ‑ya ‑kë, kö‑ bhang ‑nu 'wo kwa dheebhang ‑nu 'ka bha‑ ‑nu ‑dhɔ ‑ya ‑mɛ ‑kë 'pö.
1JO 5:2 'Pë 'kwa‑ dɔ‑ ‑bha ꞊dhɛ Atanna ‑bha 'në ‑nu bha‑ ‑nu ‑dhɔ ‑yö kwa ‑kë bha yö ‑mü ꞊dhɛ kö Atanna ‑dhɔ ‑yö kwa kë sië, kö kwa kwa "tʋ 'to sië ‑dhio 'ö‑ dɔ kwa ‑ta bha‑ ‑bha 'ö 'kwa‑ 'gü ‑wɔn ‑kë.
1JO 5:3 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑dhɔ ‑bha mɛ kë ‑kɔ "wɛɛ 'bha 'yaa 'dhö kö 'yii kë ‑dhio ‑ma ‑a ‑ta ‑sü ‑zë 'ka. "Kɛɛ 'sa ‑dhio ‑nu 'ö‑ dɔ kwa ‑ta bha kö ‑yö kë ꞊dhɛ ‑a 'bha ‑yö "gbɩɩ‑ 'yaa ‑mü.
1JO 5:4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ "ʋʋ mɛ 'ö Atanna ‑bha 'në 'ka, kö‑ ‑mɛ ‑kɔ ꞊ya ziö "kpʋngtaapë ‑nu ‑gɔ. 'Sa kwa ‑bha ‑zʋ ‑yö Atanna ‑dhɛ ‑sü bha ꞊në kwa ‑bha "kplëëdhɛ 'ö kwa ‑gɔ bha‑ ga 'ka.
1JO 5:5 ‑A ‑wɔn 'gü, 'mɛ "ʋʋ mɛ 'ö 'dhang bho‑ "dhiʋ̈ ꞊dhɛ Yesu bha Atanna Gbö ‑mü, kö‑ ‑mɛ ꞊në‑ ‑kɔ ꞊ya ziö "kpʋngtaadhɛ ‑gɔ.
1JO 5:6 Yesu Klisi bha ꞊në nu ö ‑bha ‑bɔ ö 'ka ‑zu bho ‑sü 'ö "yi 'ka bha waa‑ ga 'ö‑ wo 'ö‑ ꞊yɔɔn ‑yö ꞊wɛnng bha‑ 'ka. Nu 'ö‑ wo "dhʋ̈ bha 'yii nu "yi bha yöö do‑ 'ka. ‑Yö ‑nu "yi bha waa‑ ö ꞊yɔɔn bha ꞊në‑ 'ka. "Kɛɛ 'sa Atanna ‑bha 'Nii‑ 'ö kwa 'gü bha ꞊në‑ "sɛɛdhɛ ‑kë ꞊dhɛ 'wɔn bha 'yaa ꞊sua 'ka, ‑a ‑gɛn ‑mü ꞊dhɛ 'Nii‑ bha ꞊në tɛanwɔn kpu 'ka.
1JO 5:7 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ pë ‑yaaga ꞊në 'wo "sɛɛdhɛ bha‑ ‑kë.
1JO 5:8 'Nii‑ bha‑ 'dhö, "yi bha‑ 'dhö, ‑a ꞊yɔɔn bha‑ 'dhö, "kɛɛ 'sa pë ‑yaaga bha‑ ‑nu ꞊gban ‑wʋ ‑ya 'gü do ꞊dhɛ Yesu bha Atanna Gbö ‑mü.
1JO 5:9 ꞊Ya kë "dhʋ̈ "sanni 'kwa 'dhang bho mɛ "bhɩɩ‑ ‑nu bha "sɛɛdhɛ 'wo‑ ‑kë ‑nu wo 'wɔn ‑nu 'gü bha‑ "dhiʋ̈ bha ‑oo, 'yö Atanna ‑zë ꞊wɛ? "Kɛɛ 'sa kö "sɛɛdhɛ 'ö‑ ‑kë ö Gbö bha‑ ‑bha 'yö bha!
1JO 5:10 ‑A ‑kë "dhʋ̈ ‑sü bha‑ 'gü, 'mɛ 'ö 'dhang bho Atanna Gbö bha‑ "dhiʋ̈ kö "sɛɛdhɛ bha ‑ya ‑mɛ 'gü. "Kɛɛ 'mɛ 'ö 'yaa 'dhang bho‑ "dhiʋ̈ kö‑ ‑mɛ ꞊yaa‑ kë ꞊suakëmɛ 'ka ꞊naa bha, ‑a ‑gɛn ‑mü ꞊dhɛ kö 'yii 'dhang bho "sɛɛdhɛ 'ö Atanna ‑ya ‑kë ö Gbö ‑bha bha‑ "dhiʋ̈.
1JO 5:11 'Sa "sɛɛdhɛ 'ö "dhʋ̈ bha yö ‑mü ꞊dhɛ Atanna ꞊ya ꞊sii 'ö‑ "dhiʋ̈todhɛ 'yaa 'dhö ‑a nu kwa ‑dhɛ, ꞊dhɛ ‑a ꞊sii bha ‑yö ‑slɔɔ ‑a Gbö bha ꞊në‑ 'saa‑ 'gü.
1JO 5:12 ꞊Dhɛ mɛ 'ö Atanna Gbö bha 'ö‑ ‑gɔ, kö ꞊sii bha ‑ya ‑mɛ 'gü, "kɛɛ 'mɛ 'kö Atanna Gbö bha 'yaa‑ ‑gɔ, kö ꞊sii bha 'yaa‑ ‑mɛ 'gü.
1JO 5:13 'Wɔn ‑nu bha a‑ ‑bɛn ‑zë 'a‑ bɔ ka ‑dhɛ "dhʋ̈ kë "dhʋ̈ kö mɛ "pɛpɛ 'ka 'dhang bho Atanna Gbö bha‑ "dhiʋ̈ bha 'ka‑ 'wɔn ꞊në‑ dɔ ꞊dhɛ 'ka ꞊sii bha‑ ꞊slɔɔ.
1JO 5:14 ‑A ‑wɔn 'gü, kwa 'dhang bho ‑sü ‑ya "dhiʋ̈ 'kpakpadhö ꞊dhɛ 'pë 'ö‑ ‑wɔn 'dhö ga ‑sü 'ka ‑a 'gü 'kwa‑ ‑gbadhɛ ‑gɔ, ‑yö ‑dho ö "tʋ 'to kwa ‑wʋ ‑bha. 'Wɔn 'ö‑ ‑wɔn 'gü 'yö "sika 'bha 'yaa kwa 'gü bha 'yö bha.
1JO 5:15 ‑A ‑kë "dhʋ̈ ‑sü bha‑ 'gü, kwa 'dhang bho ‑sü ‑ya "dhiʋ̈ 'pö 'kpakpadhö ꞊dhɛ pë suu "ʋʋ suu 'ö 'kwa‑ ‑gbadhɛ ‑gɔ kö ‑yö kwa ‑gɔ.
1JO 5:16 ꞊Ya kë ꞊dhɛ 'mɛ 'ka bha mɛ 'bha ꞊ya ö "tɛado yö kö ‑yö 'wɔn yaa 'ö 'yaa mɛgɔtogüwɔn ‑zë 'ka ‑a kë sië, ‑a ‑mɛ ‑yö bhɛa" Atanna ‑dhɛ 'ö "tɛado bha‑ ‑wɔn 'gü, ‑yö ‑dho ‑a ‑wëë ‑ga 'ö‑ ‑mawɔn to, 'ö‑ gba ꞊sii 'ka. "Kɛɛ a‑ ‑pö ka ‑dhɛ ꞊dhɛ ‑yö ‑dho ‑a kë "dhʋ̈ 'mɛ 'ö 'wɔn yaa 'ö 'yaa mɛgɔtogüwɔn 'ka tongtongdhö ‑a ‑kë ꞊në‑ ‑dhɛ. ‑A ‑gɛn ‑mü ꞊dhɛ 'wɔn yaa bha‑ 'bha ‑yö mü 'ö‑ ꞊bɛdhɛ 'yaa 'dhö. 'Mii "wɩ yö ‑zë 'ka.
1JO 5:17 'Wɔn "pɛpɛ 'kö 'yaa Atanna ‑zʋ 'kun ‑a ꞊gban ꞊në 'wɔn yaa 'ka, "kɛɛ ‑a 'bha ‑nu ‑wo mü 'ö 'waa mɛgɔtogüwɔn 'ka.
1JO 5:18 ‑A 'wɔn‑ kwa "yaan ꞊dhɛ 'mɛ 'kö Atanna ‑bha 'në 'ka 'yaa ö ‑gɔ ‑gban 'wɔn yaa ‑zë kë ‑sü 'gü 'yaa 'dho‑ 'ka, ‑a ‑gɛn ‑mü ꞊dhɛ ‑a Gbö bha ‑ya ‑maa kë. 'Sa ꞊ya kë "dhʋ̈ Sɔtraan ‑kɔ 'yaa ꞊mɔɔ‑ ‑mɛ ‑bha.
1JO 5:19 Kwa‑ 'wɔn ‑dɔ 'pö ꞊dhɛ kwa Atanna ꞊në ‑bha 'në 'ka, ꞊dhɛ "kpʋngtaadhɛ ‑todhʋ̈sü ꞊gban ‑yö Sɔtraan ꞊në‑ ‑bha ‑gɔ 'gü.
1JO 5:20 Kwa‑ 'wɔn ‑dɔ 'zü ꞊dhɛ Atanna Gbö ꞊ya nu, ꞊dhɛ 'ö nu 'ö‑ wo bha ꞊ya kwa gba "yaaki 'ka, kë "dhʋ̈ kö 'kwa Atanna 'dhɛ 'ö‑ ꞊dede 'ka ‑a dɔ, kö 'kwa‑ ꞊flee ‑sü dɔ. 'Sa ‑a Atanna ꞊dede 'ö "dhʋ̈ bha ꞊në 'kwa‑ ‑bha 'ka ‑a Gbö Yesu Klisi 'saa‑ 'gü. Yö 'ö bha ꞊në Atanna ꞊dede 'ka, yöö do bha 'zü ꞊në ꞊sii 'ö‑ "dhiʋ̈todhɛ 'yaa 'dhö ‑a ‑gɛngodhɛ 'ka.
1JO 5:21 ‑A ‑kë "dhʋ̈ ‑sü bha‑ 'gü, n bhang ‑nu, ‑ka ka ‑dɩ 'kun pë ‑nu 'wo ꞊mɔɔ‑ ‑bha 'wo‑ ‑dhɔkë Atanna "gblʋ̈ 'gü bha‑ ‑nu ‑gɔ.
2JO 1:1 Mang Zan ‑mɛ 'a ‑kë Atanna ‑bha 'kɔdhigümɛ ‑nu "dhiʋ̈ziöwomɛ ‑nu bha‑ mɛ zii do 'ka bha ma ꞊në 'a 'sëëdhɛ ya‑ bɔ, bhii dhebhɔ 'ö Atanna ‑yö i ‑ya bha kaa‑ i bhang ‑nu ka ‑dhɛ ka ‑dhɔ ‑bha. Ka ‑dhɔ ꞊dede ꞊në n ‑kë. 'Sa kö ‑yö kë ꞊dhɛ ka ‑dhɔ ‑yö mang do ꞊në n ‑kë "dhʋ̈ 'yaa ‑mü. Mɛ "pɛpɛ 'wo tɛanwɔn dɔ bha ka ‑dhɔ ‑ya ‑nu ꞊gban ‑kë ꞊dhɛ n 'dhö.
2JO 1:2 ‑A 'klɔɔ‑ ‑mü ꞊dhɛ tɛanwɔn bha ‑yö kwa 'gü, ‑yö ‑dho 'to kwa "piʋ̈ ‑kpɛawo.
2JO 1:3 Kö kwa Dë Atanna waa‑ ö Gbö Yesu Klisi 'ö 'dhö kwa ‑wëë ‑ya ‑nu kë, kö ‑wo ‑gasitɛ kë kwa ‑dhɛ, kö kwa zuë" ‑yö 'waanu, "kɛɛ kö ‑yö kë kwa ‑dhɛ "dhʋ̈ tɛanwɔn 'ö bha waa‑ ‑dhɔ ‑a ‑nu 'gü bha 'aa ‑yö kë!
2JO 1:4 ꞊Dhɛ 'a‑ 'wɔn dɔ ꞊dhɛ i bhang ‑nu bha‑ mɛ 'bha ‑nu ‑wo "ta 'sü sië tɛanwɔn "gblʋʋ ‑ta ꞊dhɛ ‑kɔ 'ö kwa Dë Atanna ‑ya ‑dhio dɔ‑ 'ka kwa ‑ta ‑a 'dhö, ‑a "dhia‑ kë ‑ma n 'gü ꞊dedewo.
2JO 1:5 'Sëëdhɛ ya‑ bɔ 'a‑ wo sië i ‑dhɛ bha‑ 'klɔɔ‑ ‑mü ꞊dhɛ kö kwa ‑dhɔ ‑yö kwa 'ko kë. Kwa ‑dhɔ ‑bha kwa 'ko kë ‑sü bha 'yii kë ‑dhio ‑dee 'ka kö 'a‑ dɔ i ‑ta. ‑Dhio do 'wo dɔ kwa ‑ta 'wɔn ya‑ zü bho "tʋ̈ng 'gü bha yö ‑mü.
2JO 1:6 ‑Dhɔ 'ö "dhʋ̈ bha‑ kë ‑kɔ ‑mü ꞊dhɛ kö 'kwa ‑dhio 'ö Atanna ‑ya dɔ kwa ‑ta bha‑ ‑ya ꞊bhlëë 'gü, kö 'kwa‑ 'gü ‑ta 'sü. ‑Dhio 'ö 'ka dho‑ 'gü ‑ta 'sü ꞊dhɛ ‑kɔ 'wo ka ꞊klang ‑kë 'ka ‑a zü bho ‑yi 'ka ‑a 'dhö "dhʋ̈ bha 'yö ‑mü ꞊dhɛ kö ka ‑dhɔ ꞊në ‑yö ka 'ko kë.
2JO 1:7 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊suakëmɛ ‑nu ꞊wa kë 'gbɛ ꞊dɛɛ "kpʋng ꞊taa. 'Mɛ 'wo "dhʋ̈ bha ꞊në 'waa 'dhang bho‑ "dhiʋ̈ ꞊dhɛ Yesu Klisi bha ‑yö kë ‑kë mɛ "bhɩɩ‑ 'ka 'ö 'wo‑ ‑dhiang ‑nu ꞊gban zë bha. 'Mɛ 'ö "dhʋ̈ bha kö mɛ ‑bho Atanna ‑bha ziantamɛ, "ɛɛn Klisi 'yaɔ‑ 'wo ‑wɩ 'ka bha 'yö bha.
2JO 1:8 ‑A ‑kë "dhʋ̈ ‑sü bha‑ 'gü, ‑ka ka ‑dɩ 'kun ‑së kö yë 'ka‑ ‑kë bha 'ka 'dho‑ kë "wɛɛwɛɛ, "kɛɛ kö‑ ꞊trɔɔn 'ö ꞊mɔɔ‑ ‑bha ꞊në 'ka‑ ꞊slɔɔ.
2JO 1:9 Mɛ "ʋʋ mɛ 'ö 'yii 'to 'wɔn ‑nu 'ö Klisi ‑yö kwa ꞊klang ‑kë 'ka bha‑ "gblʋʋ ‑ta 'ö ö ‑bha dɔ‑ "dhiʋ̈, kö Atanna 'yaa‑ ‑mɛ zuë" 'gü tongtongdhö. "Kɛɛ 'mɛ 'ö to‑ "gblʋʋ bha‑ ‑ta, kö Atanna waa‑ ö Gbö ‑wa ‑mɛ ‑gɔ.
2JO 1:10 Mɛ "ʋʋ mɛ 'ö nu Atanna ‑dhɔkë ‑kɔ "wɛɛ bha ‑dhiang zë ka ‑dhɛ kö 'yii kë Klisi ‑bha 'wo ka ꞊draan‑ ‑bha bha‑ 'ka, 'ka 'dho‑ ‑mɛ ꞊tua ‑zian bho kö yöö 'to‑ ꞊yëë bho ‑sü ꞊në‑ bha.
2JO 1:11 ‑A ‑gɛn ‑mü ꞊dhɛ 'mɛ 'ö‑ ‑mɛ ꞊tua bho kö ꞊ya ‑da ‑a këwɔn yaya ‑nu bha‑ 'gü ꞊naa bha.
2JO 1:12 Dhiang 'gbɛ ‑yö n ‑gɔ kö 'a‑ zë 'nu ka ‑dhɛ 'sëëdhɛ ya‑ 'gü, "kɛɛ 'mii 'dho‑ ꞊gban ‑bɛn zë. ‑A ‑gɛn ‑mü ꞊dhɛ ‑yö n "piʋ̈ ꞊dhɛ mang ꞊dede ꞊në 'a "ta kö 'a zun ka ‑dhɛ 'gü kö 'a‑ zë ka ‑dhɛ, kë "dhʋ̈ kö kwa ‑bha ꞊niidadhe bha‑ "dhiʋ̈ ‑yö pa.
2JO 1:13 ꞊Ya 'go yö ‑zë 'gü, i dheebhang ‑dhebhɔ 'ö Atanna ꞊yaa‑ 'sü 'pö ö ‑bha 'ka bha‑ bhang ‑nu ꞊wa ka ꞊tua bho 'gbɛ.
3JO 1:1 Mang Zan ‑mɛ 'a ‑kë Atanna ‑bha 'kɔdhigümɛ ‑nu "dhiʋ̈ziöwomɛ bha‑ mɛ zii do 'ka bha ma ꞊në 'a 'sëëdhɛ ya‑ bɔ bhii Gausö ‑mɛ i ‑dhɛ; ‑a ‑gɛn ‑mü ꞊dhɛ i ‑wɔn ‑yö n ‑gɔ "gbɩɩ‑ i ‑dhɔ 'ö n ‑kë ꞊dedewo bha‑ ‑wɔn 'gü.
3JO 1:2 N ‑sëmɛ, 'wɔn 'ö 'ma 'yaanu 'a‑ ‑dhɛ Atanna ‑gɔ kö ‑ya kë i ‑dhɛ yö ‑mü ꞊dhɛ kö 'wɔn ꞊gban ‑wɔn ꞊gban ‑yö dhi i ‑gɔ, kö ‑kɔ 'ö i 'nii‑ 'dhö 'ka "klʋ̈ʋ̈klʋ̈ 'ka Atanna ‑bha zian ‑ta bha, kö i ‑dhü ꞊dede ‑bha ‑yö kë "dhʋ̈ 'pö.
3JO 1:3 Kwa dheebhang 'bha ‑nu 'wo go ka ‑dhɛ 'gü, nu 'wo‑ wo kö ‑wa pö yi ‑dhɛ ꞊dhɛ i ‑kplü ‑sü 'ka tɛanwɔn 'ö go Atanna "piʋ̈ bha‑ ‑bha ꞊dhɛ ‑kɔ 'ö‑ ‑dhɛ 'dhö‑ ‑bha ꞊dhɛ ‑yö kë‑ 'ka‑ 'dhö bha‑ "dhia ‑yö kë ‑ma n 'gü ꞊dedewo.
3JO 1:4 'Wɔn 'bha ‑wɔn 'bha din 'yaa dhi n 'gü kö ‑yö ziö‑ 'ka ‑a ma ‑sü 'ö ꞊dhɛ mɛ 'wo 'dhang bho Yesu ‑wɔn "dhiʋ̈ n ‑wʋ "dhiʋ̈ bha‑ ‑nu ꞊gban ‑wo tɛan‑ ‑zian ‑ta bha‑ ‑ta.
3JO 1:5 N ‑sëmɛ, 'wɔn ‑së ‑nu 'i‑ ‑kë 'mɛ 'wo 'dhang bho Yesu "dhiʋ̈ 'ö 'ka ‑dhɛ do 'gü bha‑ ‑nu ‑dhɛ, 'ö 'i‑ kë "dhʋ̈ 'mɛ 'wo ‑dhɛng 'ka ‑a ‑nu ‑dhɛ 'pö bha 'wɔn ‑së ꞊dede ꞊në 'i‑ ‑bha bha.
3JO 1:6 Mɛ 'dhɛ 'wo ‑dhɛng 'ka 'i‑ ‑kë ‑nu ‑dhɛ "dhʋ̈ bha ꞊në 'wo nu 'wo ‑dhɔ 'ö i 'gü bha‑ ‑gɛn dɔ n ‑dhɛ Atanna ‑bha 'kɔdhigümɛ ‑nu 'wo ‑dhɛ ya‑ 'gü‑ ‑nu ‑kuu "dhiʋ̈. ꞊Dhɛ 'ö "dhʋ̈, ‑bhö dɔ "gbɩɩ‑ kö‑ ‑nu ‑ta 'kun ‑kɔ 'ö 'bha‑ 'kun‑ 'ka 'ö dho dhi Atanna ‑dhɛ bha kö 'i‑ 'kun‑ 'ka kö ('pë 'ö‑ ‑nu ‑mawɔn dho zun‑ ‑bha 'i‑ nu‑ ‑nu ‑dhɛ) kö ‑wo 'dho woo‑ "ta bha‑ ‑kpɛa 'ka "dhiʋ̈.
3JO 1:7 ‑A 'klɔɔ‑ ‑mü ꞊dhɛ "ta 'wo‑ 'kpɔ sië bha Yesu Klisi ‑bha "ta ‑mü. 'Wɔn 'ö‑ ‑wɔn 'gü 'yö 'waa 'mɛ 'waa 'dhang bho Yesu ‑wɔn "dhiʋ̈ ‑a ‑nu ꞊kwɛng ‑pë 'sü bha 'yö bha.
3JO 1:8 ‑A ‑kë "dhʋ̈ ‑sü bha‑ 'gü, 'mɛ 'kwa Yesu Klisi ‑bha mɛ 'ka bha‑ ‑dhɛa ‑bha ꞊dhɛ 'kwa 'mɛ 'wo "dhʋ̈ bha‑ ‑nu ‑kwɛɛ bun, kö ‑yö kë 'pö kwa ‑bha ‑kɔ ‑da yë 'wo‑ kë sië tɛanwɔn "gblʋʋ "piʋ̈ bha‑ 'gü ‑kɔ 'ka.
3JO 1:9 A 'sëëdhɛ "kplü 'në 'bha kë ‑sü 'ka 'a‑ bɔ Atanna ‑bha 'kɔdhigümɛ ‑nu wo i "piʋ̈ mü bha‑ ‑nu ‑dhɛ, "kɛɛ Diotrɛfö 'ö ‑dɩ ‑kë ‑a ‑nu ‑gɔmɛ 'ka ‑dhɔ ‑ya ‑kë bha 'yii "wɩ‑ ‑bha kö ‑wʋ 'a‑ pö‑ ‑nu ‑dhɛ bha ‑ya "dhiʋ̈ ꞊loo‑ ‑nu ‑bha.
3JO 1:10 ‑A ‑wɔn 'gü, 'ma nu yi 'ö‑ 'ka 'kaa ꞊loo mü, a ‑dho 'wɔn yaa "pɛpɛ 'ö‑ kë sië bha‑ ꞊gban pö, 'ö 'a kwa 'tɔ ‑nu 'ö‑ zë sië waa‑ ꞊sua ‑nu 'ö‑ ‑ya sië kwa ‑bha bha‑ ꞊gban ‑gɛn dɔ. ‑Yö ‑to ‑zian wo‑ 'dhɛ 'kö bha‑ ‑bha kö 'yaa "gbɩɩ‑ 'gbɛ, "kɛɛ yöö do bha 'yaa ö ‑kɔ ‑ya kwa dheebhang ‑nu ‑dhɛng ‑bha, "kɛɛ 'sa yöö do bha 'yaa "wɩ‑ ‑bha kö mɛ "wɛɛ 'bha ‑zian ‑yö ö ‑kɔ ‑ya ‑a ‑nu ‑dhɛng ‑bha, 'yö‑ ‑kë "dhʋ̈ ‑sü ‑dhɔ ꞊ya kë 'mɛ ‑zian 'ö‑ ‑bha 'yö‑ bho Atanna ‑bha 'kɔdhigümɛ ‑nu kpö 'gü.
3JO 1:11 N "taɔngdë Gausö, 'bha 'dho i "ta ‑kɔ 'sü 'wɔnyaakëmɛ ‑nu ‑bha ‑bha. ‑Bhö i ‑bha 'sü 'wɔnsëkëmɛ ‑nu ꞊në‑ ‑nu ‑bha ‑bha; ‑a ‑gɛn ‑mü ꞊dhɛ 'mɛ 'ö‑ këwɔn 'dhö ‑së bha kö yö ꞊në Atanna ‑bha mɛ 'ka, "kɛɛ 'mɛ 'kö‑ këwɔn 'yaa ‑së, kö 'yaa Atanna dɔ.
3JO 1:12 Mɛ ꞊gban "pɛpɛ ‑wo Demetrisö bha‑ 'tɔ ‑së ꞊në‑ pö. 'Sa mɛ ‑ya ‑dhɛ ‑yö ‑a "ta ‑kɔ ‑bha. Mang ꞊dede ‑zian a‑ 'tɔ ‑së ‑pö. 'Sa i‑ 'wɔn dɔ 'kpakpadhö ꞊dhɛ 'wɔn 'dhɛ 'kö 'a‑ "sɛɛdhɛ kë sië bha kö 'yaa ꞊sua ꞊në‑ 'ka.
3JO 1:13 'Wɔn 'gbɛ ꞊dede ‑yö n ‑zʋ "piʋ̈ 'ö‑ ‑pö i ‑dhɛ ‑dhɔ 'dhö n ‑bha. "Kɛɛ 'yaa n "piʋ̈ ꞊dhɛ 'a‑ ꞊gban kë 'sëëdhɛ 'ka kö 'a‑ bɔ i ‑dhɛ.
3JO 1:14 ‑Yö n "piʋ̈ ꞊dhɛ mang ꞊dede ꞊në 'a "ta kö 'a nu 'a ‑wo i ‑yɛa ꞊bhaa kö ‑yö kë "dhidhö ‑dhiang 'ka.
3JO 1:15 Kö zuëwaanusü ‑yö kë i ‑gɔ bha 'aa ‑yö kë! I "taɔngdë ‑nu "pɛpɛ 'wo ‑dhɛ ya‑ 'gü ꞊wa i ꞊tua bho 'gbɛ. N "taɔngdë ‑nu 'wo mü bha 'ma‑ ‑nu ꞊gban 'sü 'do 'do 'ma‑ ‑nu ꞊tua bho 'pö 'gbɛ!
JUD 1:1 Mang Zudë ‑mɛ 'a ‑kë yë ‑kë Yesu Klisi ‑dhɛ ‑mɛ 'ka, 'ö 'a ‑kë Zakö 'zlaa‑ 'ka bha ma ꞊në 'a 'sëëdhɛ ya‑ bɔ mɛ "pɛpɛ 'ö ka ‑dhɔ ‑yö kwa Dë Atanna ‑kë, 'ö ka ‑dhɛ kö 'ka kë ö ‑bha mɛ 'ka, 'ö ka ‑maa kë sië Yesu Klisi ‑dhɛ bha ka ‑dhɛ.
JUD 1:2 Kö‑ ‑bha mɛ ‑wëëga ‑sü bha waa‑ ‑bha zuëyagblʋ̈ʋ̈‑, waa‑ ‑bha ‑dhɔ bha ‑ya 'bha ‑da 'gü ka ‑dhɛ ‑kpɛawo bha 'aa ‑yö kë!
JUD 1:3 N "taɔngdë ‑nu, ‑yö gun n "piʋ̈ 'nu ꞊dhɛ 'a n 'gü dɔ "gbɩɩ‑ kö 'wɔn 'ö ‑gban kwa dha 'ö Yesu Klisi ‑ya wo bha‑ ‑bha bha 'a 'sëëdhɛ bɔ ka ‑dhɛ yö ꞊në‑ ‑wɔn 'gü. "Kɛɛ 'yö 'wɔn 'dhɛ 'ö ‑gban "gblüyaamɛ ‑nu 'ö 'waa "suʋ̈ Atanna ‑gɔ 'ö ꞊wa ‑da kwa kpö 'gü bha‑ ‑nu ‑wɔn ‑bha bha 'ö dɔ n ‑gɔ 'ya‑ 'ö ‑ziö ‑a 'dhɛ 'kö bha‑ ‑ta. Kë "dhʋ̈ kö 'a ka faan dɔ 'ko ‑zë 'mɛ 'wo bha‑ ‑nu 'ka ‑sü ‑bha 'dhang ‑bho Yesu "dhiʋ̈ ‑sü 'ö "dhʋ̈ doseng 'ö 'yaa ꞊plɛ, 'ö Atanna ‑ya nu 'mɛ 'wo bɔ ö 'ka ‑a ‑nu ‑dhɛ bha‑ ‑wɔn 'gü. ‑A ‑gɛn ‑mü ꞊dhɛ 'mɛ 'wo bha ‑wo ‑da ‑sü 'ka kwa kpö 'gü 'ö 'kaa‑ 'wɔn dɔ. 'Mɛ 'wo bha ‑gasitɛ 'ö kwa Dë Atanna ‑ya ‑kë kwa ‑dhɛ bha‑ ‑wʋ bha ꞊në wo ‑zë 'wo‑ sü 'yö 'wo‑ ‑kë 'wɔn "bhluubhlu kë‑ 'ka ‑wʋ 'ka, 'yö 'waa 'dhang bho kwa Dëmɛ Yesu Klisi 'ö "dhʋ̈ doseng, 'ö kwa ‑gɔmɛ 'ka bha‑ "dhiʋ̈. "Kɛɛ ‑a 'wɔn‑ kwa "yaan ꞊dhɛ 'mɛ 'wo "dhʋ̈ bha 'wɔn 'ö Atanna yöö‑ wɔ‑ ‑nu ‑ta ꞊yaa‑ ‑bɛn zë ö ‑wʋ 'sëëdhɛ 'gü 'nu yi 'bha 'ka.
JUD 1:5 A‑ 'wɔn ‑dɔ ꞊dhɛ ‑kɔ 'ö kwa Dëmɛ ‑yö Izraɛdhö ‑mɛ ‑nu dha‑ 'ka yi 'bha 'ka Ezitö ‑sɛ 'gü, "kɛɛ 'yö ‑ya mü 'zü 'ö‑ gɔɔgbɩɩmɛ ‑nu 'ö 'wii 'dhang bho‑ "dhiʋ̈ ‑a ‑nu zë bha ‑yö ka "yaan "pɛɛpɛdhö. "Kɛɛ ka ‑zʋ ꞊në 'a‑ ‑bö sië ‑deewo. Kë "dhʋ̈ kö ka ‑zʋ 'ya 'dho bhɔ 'wɔn ‑nu bha‑ ‑nu 'ka.
JUD 1:6 ꞊Dhɛ Atanna ‑bha "kië ‑nu 'dhɛ 'ö ‑duɛ 'ö‑ nu‑ ‑nu ‑dhɛ 'yii‑ ‑nu ‑zʋ 'kun 'ö 'wo ꞊kwaa‑ ‑zü yi 'bha 'ka, 'ö 'wo wo bo wo ‑yɛa 'ka bha Atanna ‑ya ‑nu ‑ya ‑sü 'ka ‑dhɛtiidhɛ 'ö "sɛ ꞊wlöö bha‑ 'gü, ‑ya ‑nu ‑kplü ‑sü 'ka lɔɔ" 'ka mü, ‑wo ‑dho 'to lɔɔ" bha‑ 'gü "dhʋ̈ 'ö zun‑ 'ka Atanna ‑bha za dɔ ‑yi ‑bha.
JUD 1:7 Ka‑ 'wɔn ‑dɔ 'zü ꞊dhɛ Sodɔmö waa‑ Gomɔɔ ‑dhɛ waa‑ 'pö‑ ‑nu 'wo gun ‑a ‑nu ‑züzü bha ‑wo kë‑ ‑kë 'pö ꞊dhɛ ‑kɔ 'ö Atanna ‑bha "kië ‑nu bha 'wo‑ ‑kë 'ka bha‑ 'dhö, 'ö 'wo wo ‑gɔ "kpaa bho ‑zua zë ‑sü ‑dhɛ, 'yö 'wɔn "bhluubhlu suu 'ö mɛ 'bha 'yii‑ suu kë do 'wo‑ ‑kë. "Kɛɛ ꞊dhɛ 'ö ꞊waa‑ kë "dhʋ̈, Atanna kë 'wɔn bho‑ ‑nu 'gü 'ö pɛng 'ö 'yaa "dhuu bha 'ö‑ ‑nu ‑bhö. Kë "dhʋ̈ kö ‑yö kë mɛ ‑kpɛa ‑bha 'wɔn suan‑ ‑bho ‑bha ‑pë 'ka kö ‑wo "suʋ̈ Atanna ‑gɔ.
JUD 1:8 "Kɛɛ yö ꞊në‑ ꞊gban 'gü, 'wɔnmakoomɛ ‑nu bha wo ‑zë ‑wo ‑tosɛa kë sië ‑kɔ do bha ꞊në‑ 'gü, 'yö 'wo ‑zʋ gɔn "yɛɛn ‑nu 'wo‑ bho bha‑ ‑dhɛ, 'yö 'wo ꞊bhlëë bho wo ‑dɩ ‑bha ‑a 'ka, 'yö‑ ‑nu "yan 'dhö ‑ziö Atanna 'gü, 'yö 'wo "sɩ ‑nu ꞊gban bho 'tɔ bhɔ ‑pë ‑nu 'wo dhang‑ 'gü‑ ‑nu ‑gɔ.
JUD 1:9 "Kɛɛ 'sa Atanna ‑bha "kië 'wo‑ Misɛdhö ‑kë, 'ö‑ ‑bha "kië ꞊gban ‑gɔmɛ 'ka bha, yöö ‑zian 'yii yö ‑zë suu kë. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Misɛdhö bha waa‑ Sɔtraan 'wo "dhinaa 'ö‑ ma Moizö ꞊gee ‑ta yi 'bha 'ka kö ‑wa ‑ta za dɔ sië bha, 'yii ꞊mɔɔ‑ ‑bha kö‑ ‑wʋ ‑yö ziö‑ "dhiʋ̈ ‑zianwo Sɔtraan ‑dhɛ ꞊dhɛ mɛ ‑yö "si bho mɛ ‑gɔ. "Kɛɛ ‑ya pö ‑dhɛ doseng ꞊dhɛ: «Kwa Dëmɛ ꞊në dho ‑a bho i 'gü!»
JUD 1:10 "Kɛɛ wo ‑zë 'wɔn ‑zian 'ö 'waa‑ 'gü ma bha ‑wa ‑dhiang ‑zë "dhidhɛ yaa 'ka. ‑Wo wo ‑gɔ ꞊gban wo ‑zʋgɔngüwɔn ‑nu bha ꞊në‑ 'gü ꞊dhɛ "bü wü ‑nu 'ö 'waa 'wɔn ‑ya 'klɔɔ‑ "dhiʋ̈ bha‑ ‑nu 'dhö. "Kɛɛ 'sa yö ꞊në dho kë‑ ‑nu ‑gɔtobhawɔn 'ka.
JUD 1:11 ‑A ‑nu ‑bha ‑yö ‑wëësü. ‑A ‑gɛn ‑mü ꞊dhɛ zian do 'ö Kaɛn ‑ya sü yi 'bha 'ka bha ꞊në 'wo‑ sü bha. ꞊Wa wo ‑gɔ ‑gban ꞊flü kë ‑sü 'gü, kë "dhʋ̈ kö 'wo ꞊naɔ ꞊slɔɔ ꞊dhɛ ‑kɔ 'ö Badhaamö ‑ya ‑kë 'ka yi 'bha 'ka ‑a 'dhö. ‑A ‑nu 'gü ꞊ya see‑, ‑a ‑gɛn ‑mü ꞊dhɛ ꞊wa ‑ya ‑kɔɔ 'gü Atanna ‑gɔ ꞊dhɛ ‑kɔ 'ö Koodhe ‑ya ‑kë 'ka 'pö yi 'bha 'ka ‑a 'dhö.
JUD 1:12 'Mɛ 'wo bha ‑wo ꞊dhɛ ka ‑gɛn "dhiʋ̈ ‑zuö ‑bha ‑gwë ꞊në‑ 'dhö, kɛng‑ ‑nu ka ‑bha ‑dhië kë ‑sü 'ö dheebhang ‑dhɛ 'gü Atanna ‑gɔ 'kɔɔdhö bha‑ 'gü. ‑A ‑gɛn ‑mü ꞊dhɛ ‑wa ‑bhö 'niiyaadhɛ ‑bha "gblʋ̈ʋ̈dhɛ "gbɛadhɛ ‑bha, ‑a 'yiʋ̈‑ 'yaa‑ ‑nu kë, ‑wo ꞊dhɛ dha 'ö ‑ziö "dhuu 'gü ꞊në 'dhö, ‑wo ꞊dhɛ 'zü ꞊dhɛ "dhü 'ö "tɛɛ ꞊yaa‑ bho "sɛɛ 'ö ꞊ya ga, 'ö 'yaa ꞊mɔɔ‑ ‑bha kö ‑yö bhɛ ‑ya 'zü aa" ꞊ni kö‑ "tʋ̈ng ꞊ya ꞊loo ꞊në‑ 'dhö.
JUD 1:13 ‑Wo ꞊dhɛ 'zü ꞊dhɛ "yi 'ö ꞊ya dunng bho ꞊në‑ 'dhö, 'yö‑ ‑nu këwɔn yaa ‑nu bha 'wo ‑wo "yɛa‑ ꞊dhɛ 'yi dunng ‑sü bha‑ "vuu 'ö ‑kë ‑ta bha‑ 'dhö. ‑Wo ꞊dhɛ 'zü ꞊dhɛ "susëng ‑nu 'wo zian ‑kan ꞊sië dhang‑ ‑bha ‑dhɛ ‑nu 'gü bha ꞊në‑ 'dhö. ‑Dhɛtiidhɛ 'ö ‑dhɛ 'yaa yö‑ 'gü bha ꞊në Atanna ‑ya ‑ya 'mɛ 'wo bha‑ ‑nu ‑gɔ ‑a ‑nu 'dho ‑dhɛ 'ka. ‑Wo ‑dho 'to ‑dhɛ bha ꞊në‑ 'gü 'ö to "dhʋ̈ "sɛ 'tuʋ̈‑ 'ka.
JUD 1:14 'Mɛ 'wo bha ꞊në Enɔkö 'ö ‑kë 'mɛ 'wo dɔ Adan "piʋ̈ ‑a ‑nu "saɔplɛ ‑naa 'ka bha ‑yö dhiang zë‑ ‑nu ‑bu 'gü Atanna ‑wʋ "dhiʋ̈ ꞊loo ‑sü 'ka yi 'bha 'ka 'ö‑ pö: «‑Ka ‑dhɛ ‑ga, kwa Dëmɛ ‑yö nu sië waa‑ ö ‑bha "kië "slʋ̈ʋ̈slʋ̈ ‑nu bha‑ "gblü ‑kaɔng dunng 'gbɛ 'dhö,
JUD 1:15 kö ‑yö za dɔ mɛ ꞊gban "pɛpɛ ‑bha, kö 'mɛ 'wo "yan ‑ziö 'gü ‑wɔn ‑nu ‑kë ‑a 'ka bha ‑ya ‑nu dhɛɛ" 'kpɔ, kö 'mɛ 'wo ‑ya ‑gɔ ‑kaɔ 'gü 'ö 'wo gɔɔgbɩɩdhɛ ‑dhiang ‑nu zë‑ ‑dhɛ bha ‑ya ‑nu dhɛɛ" 'kpɔ 'pö.
JUD 1:16 'Wɔnmakoomɛ ‑nu 'wo "dhʋ̈ bha 'wɔn 'bha ‑wɔn 'bha 'yaa‑ ‑nu ‑zʋ 'kun, ‑wo ‑to ‑dɔn ‑bho wo yun 'gü ‑sü ꞊në‑ ‑bha "dhʋ̈ ‑kpɛawo, 'wɔn 'dhɛ 'ö‑ ‑nu ‑gɔ 'gü ꞊në 'wo‑ ‑kë, 'yö 'wo wo "dhiʋ̈ ‑ziö ‑ta ‑dhiang ‑nu zë, ꞊ya 'go mü 'yö 'wo ‑wʋ "nɛɛnɛɛ ‑nu pö mɛ ‑nu ‑dhɛ, kë "dhʋ̈ kö 'wo‑ ‑nu ‑ta ‑bhö.
JUD 1:17 "Kɛɛ ka ‑zë, n ‑sëmɛ ‑nu, ka ‑zʋ 'ya 'dho bhɔ 'pë 'ö kwa Dëmɛ Yesu Klisi ‑bha bɔmɛ ‑nu ‑wa pö ka ‑dhɛ yi 'bha 'ka bha‑ 'ka.
JUD 1:18 ‑Wo kë‑ ‑pö ka ‑dhɛ ꞊dhɛ: «"Kpʋngtaadhɛ "dhiʋ̈ 'to "tʋ̈ng 'dhö ‑wo sië, "yɩɩ ‑to ka ‑bha ‑mɛ ‑nu ‑dho 'sɔ‑, 'ö 'wo "yan ‑ziö 'gü dɔ Atanna ‑bha, 'ö‑ ‑nu ‑bha 'ö ‑dhi ‑nu ‑dhɛ ꞊në 'wo‑ ‑kë.»
JUD 1:19 'Mɛ 'wo "dhʋ̈ bha ꞊në 'wo nu 'gügblüdhe 'ka, Atanna ‑bha 'Nii‑ 'yaa‑ ‑nu 'gü. ‑A ‑nu ‑dhidhɛwɔn ꞊në‑ ‑kɔ ꞊ya ziö‑ ‑nu ‑gɔ.
JUD 1:20 "Kɛɛ ka ‑zë, n "taɔngdë ‑nu, ka ‑bha ‑zʋ ‑yö Atanna ‑dhɛ ‑sü "slʋ̈ʋ̈slʋ̈ 'ö pö 'aa‑ ‑bha bha, ‑kaa 'kun "gbɩɩ‑, ‑a ‑da 'gü ꞊në ‑kaa ‑da kö 'ka 'dho‑ 'ka "dhiʋ̈, kö 'ka bhɛa" Atanna ‑dhɛ ‑a ‑bha 'Nii‑ "slʋ̈ʋ̈slʋ̈ bha‑ ‑bha 'gügbɩɩdhɛ 'ka.
JUD 1:21 Kö 'ka 'to ‑kplü ‑sü 'ka‑ ‑bha ‑dhɔ bha‑ ‑bha kö ‑yö 'to‑ 'ka "dhʋ̈ ‑yö zun‑ 'ka yi 'ö kwa Dëmɛ Yesu Klisi dho kwa ‑wëë ‑ga 'ka 'ö kwa gba ꞊sii 'ö 'yaa yën‑ 'ka bha‑ ‑bha.
JUD 1:22 'Mɛ 'wo ‑tun dɔ ‑sü 'ka 'kën 'gü Yesu Klisi ‑wɔn 'gü bha ‑kaa ‑nu ‑wëë ‑ga
JUD 1:23 kö 'ka‑ ‑nu ‑ta 'kun kö ‑wo dha pɛng ‑gɔ. Mɛ ‑kpɛa 'wo 'dhö ‑a ‑nu ‑wëë ‑yö ka kë, "kɛɛ ‑yö ka kë "suʋ̈ 'ka, ‑a ‑gɛn ‑mü ꞊dhɛ bian ‑ya ‑nu ‑bha 'ö‑ ‑nu ‑bha ‑sɔ ‑nu ꞊gban ‑bha. 'Ka‑ kë ‑së kö ka ‑kɔ 'ya 'dho ‑da ‑a 'bha 'gü.
JUD 1:24 Atanna 'ö "dhʋ̈ 'ö doseng, 'ö kwa dha kwa Dëmɛ Yesu Klisi 'saa‑ 'gü bha ꞊në‑ 'tɔ ‑yö bhɔ, ‑a ‑gɛn ‑mü ꞊dhɛ yö ꞊në 'kpii‑, yö ꞊në "sɩ 'dhö‑ ‑dhɛ, ‑kɔ ‑mɔɔ 'wɔn ‑bha ‑sü ‑yö ‑gun ‑gɔ yi 'bha 'ka, 'ö ‑tun ‑gɔ ꞊dɛɛ, 'ö dho 'to‑ ‑gɔ ‑todhʋ̈ 'ka. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yö ꞊në‑ ‑kɔ dho ꞊mɔɔ‑ ‑bha kö ‑yö ka ‑maa kë kö ka ‑gɛn "dhiʋ̈ 'ya 'dho ‑zuö 'ö 'ka ‑pö ‑bha zian bha‑ ‑ta 'ö to‑ 'ka "dhʋ̈ 'ö zun‑ 'ka yi 'ka dho ‑da 'ka ‑a ‑bha ‑gblüdëdhɛkëdhɛ 'gü, kö pö 'aa ka ‑bha, "kɛɛ ꞊niidadhe ‑ziisü ka bha‑ ‑bha. Kö‑ 'tɔ ‑yö bhɔ "dhʋ̈ tɛan‑ 'ka bha 'aa ‑yö kë!
REV 1:1 'Sëëdhɛ 'dhɛ ya 'wɔn 'ö yöö kë ‑dhɛ 'bha ꞊kpaɔyi 'ka ꞊në Yesu Klisi ‑ya to "dhiʋ̈ 'yö‑ ‑zɔn Atanna ‑bha gwëëzë ‑nu ‑dhɛ 'yö 'wo‑ ‑bɛn zë‑ 'gü. Atanna ꞊në ö ‑wʋ kpɔ‑ ‑bha 'yö‑ pö ‑ya kë "dhʋ̈, 'yö Klisi ‑yö ö ‑bha "kië do bɔ kö ‑yö 'wɔn bha‑ ‑zɔn ‑a ‑bha gwëëmi 'dhɛ 'wo‑ Zan ‑kë bha‑ ‑dhɛ.
REV 1:2 'Wɔn 'ö Zan "yan ‑ya yö 'yö‑ ‑gɛn dɔ ya. Naɔ 'ö go Atanna "piʋ̈ waa‑ tɛanwɔn 'ö Yesu Klisi ‑ya ‑zɔn kwa ‑dhɛ bha ꞊në 'ö‑ ‑dhiang zë 'sëëdhɛ ya‑ 'gü.
REV 1:3 'Wɔn dho kë dhia", 'ö Atanna ‑ya to "dhiʋ̈ 'ö‑ pö mɛ "bhɩɩ‑ ‑nu ‑dhɛ, 'ö ‑bɛn zë ‑sü 'ka 'sëëdhɛ ya‑ 'gü ya 'mɛ 'ö‑ ‑wʋ pö, 'ö ö "tʋ to‑ ‑bha, 'ö‑ 'gü ‑wɔn ‑kë kö‑ ‑mɛ ‑bha ‑së! ‑A ‑gɛn ‑mü ꞊dhɛ "tʋ̈ng 'ö Atanna ‑ya ‑ya 'wɔn ‑nu bha‑ kë "tʋ̈ng 'ka bha 'yaa ꞊gblɛɛn 'zü.
REV 1:4 Atanna ‑bha 'kɔdhigümɛ ‑nu kpö "saɔplɛ 'ka Azi ‑sɛ 'gü bha 'ma ka ꞊tua bho 'gbɛ. Mang Zan ‑mɛ ma ꞊në 'a 'sëëdhɛ ya‑ bɔ ka ‑dhɛ. Kö Atanna 'ö gun, 'ö 'dhö, 'ö yö ꞊në dho 'to ‑todhʋ̈ 'ka waa‑ 'nii‑ "saɔplɛ 'wo dɔ sië‑ ‑bha ‑gblüdëdhɛ ‑gbloo wëëdhö bha, waa‑ Yesu Klisi 'ö‑ "sɛɛ‑ 'ö 'yaa ‑wʋ ꞊plɛ pö, 'ö‑ ‑wʋ "dhiʋ̈ ꞊loo kwa ‑bha ꞊dhɛ ‑kɔ 'ö ö ‑wʋ kpɔ‑ 'ka‑ ‑bha ‑a 'dhö, 'ö yö ꞊në 'mɛ ꞊wa ga ‑a mɛ ‑blɛɛsü 'ö go ga 'gü 'ö ‑bö ‑a 'ka, 'ö yö ꞊në ‑gblüdë "pɛpɛ 'wo "kpʋng ꞊taa ‑a ‑nu ꞊gban ‑bha ‑gblüdë 'ka bha ‑wo ‑gasitɛ kë ka ‑dhɛ, kö ‑wo zuëwaanusü nu ka ‑dhɛ bha 'aa ‑yö kë. Yesu Klisi bha ꞊në kwa ‑dhɔ ‑ya ‑kë, 'yö dho 'yö ga kwa ‑wɔn 'gü kë "dhʋ̈ kö 'ö kwa bho 'wɔn yaa kë ‑sü ‑gɔ ꞊dhuëngdhɛ 'gü 'ö ꞊yɔɔn 'ö ꞊wɛnng kwa ‑wɔn 'gü bha‑ 'ka.
REV 1:6 'Yö dho 'yö kwa ‑kë ö ‑bha ‑gblüdëdhɛ 'gü ‑mɛ ‑nu 'ka, 'yö dho 'ö kwa ‑kë ö Dë "saabhomɛ 'ka, kö Yesu Klisi 'ö "dhʋ̈ bha ꞊në‑ 'tɔ ‑yö bhɔ "tʋ̈ng ꞊gban "pɛpɛ 'gü, kö yö ꞊në‑ ‑bha 'yënng‑ ‑yö 'to dhang‑ ‑bha ‑kpɛawo bha 'aa ‑yö kë!
REV 1:7 ‑Ka ‑dhɛ ‑ga, yö 'ö bha ‑yö nu sië dha 'kpong‑ ‑ta. Mɛ "pɛpɛ ꞊gban‑ ‑dho ‑a yö, aa" ꞊ni mɛ ‑zian 'ö 'wii 'dhang bho‑ "dhiʋ̈. "Sɛgɔ "pɛpɛ 'wo "kpʋng ꞊taa ‑a ꞊gban ‑dho "gbʋ bɔ wo ‑dɩ ‑bha ‑a ‑wɔn 'gü. A‑ ‑pö ka ‑dhɛ ꞊dhɛ tɛan‑ ‑mü, ‑yö ‑dho kë! 'Sa ‑yö ‑dho kë!
REV 1:8 Kwa Dëmɛ Atanna 'ö‑ ‑bha 'gügbɩɩdhɛ ‑mɔɔ 'ka 'yaa 'dhö, 'ö gun, 'ö 'dhö ꞊dɛɛ, 'ö yö ꞊në dho 'to bha ꞊në dhiang zë 'ö‑ pö: «Ma ꞊në 'a 'wɔn ꞊gban zübhodhɛ waa‑ "dhiʋ̈todhɛ 'ka.»
REV 1:9 Mang Zan ‑mɛ 'a ka dheebhang 'ka, 'ö kwɛng‑ ‑nu 'kwa ‑kplü ‑sü 'ka Yesu ‑bha ꞊dhɛ 'ko 'dhö, 'ö 'a saan" sië 'pö ꞊dhɛ ka 'dhö ‑a ‑wɔn 'gü, 'ö kwɛng‑ ‑nu 'kwa‑ ‑bha ‑gblüdëdhɛ 'gü ‑mɛ 'ka ꞊dhɛ 'ko 'dhö, 'ö 'kwa ‑ya sië‑ nu ‑sü ‑gɔ zuë" ‑sɛadhɛ 'gü ꞊dhɛ 'ko 'dhö bha ma ꞊në 'a 'sëëdhɛ ya‑ ‑bɛn zë. ‑Ya 'a‑ wo Patömɔsö ‑sɛ 'ö ꞊weeyi ꞊zinng 'gü ya‑ 'gü ꞊dɛɛ ya 'mii ‑ya mü "wɛɛwɛɛ. Atanna ‑wʋ 'ö yö ꞊në tɛanwɔn 'ka 'ö Yesu ‑yö "dhɛ bho‑ ‑ta kwa ‑dhɛ bha ꞊në 'a‑ ‑dhiang zë 'yö 'wo n kun 'wo nu n 'ka ‑dhɛ ya‑ 'gü.
REV 1:10 ꞊Dhɛ 'ö ‑dhɛkpaɔyi do 'ka Patömɔsö ‑sɛ ya‑ 'gü, kwa Dëmɛ ‑dhɔkë ‑yi bha‑ 'ka, 'yö Atanna ‑bha 'Nii‑ ‑yö ‑da n 'gü, 'yö 'a mɛ 'bha ‑wʋ ma n ꞊taama ‑zian 'ka, "kɛɛ ‑a ‑wʋ bha ‑yö ‑kë "gbɩɩ‑ 'ka ꞊dhɛ 'pë "truu ꞊në 'wo‑ ‑piö ‑a 'dhö.
REV 1:11 Kö ‑wʋ bha ‑ya pö sië n ‑dhɛ ꞊dhɛ: «'Pë i "yan yöö ‑da ‑dhɛ 'gü bha‑ ‑bɛn zë 'sëëdhɛ do 'gü kö 'i‑ bɔ Atanna ‑bha 'kɔdhigümɛ ‑nu 'wo bɔ‑ 'ka 'wo Efɛzö oo, Simiidhö oo, Pɛɛgamö oo, Tiatii oo, Saadö ‑dhɛ waa‑ 'mɛ 'dhɛ 'wo Fidhadɛfi ‑dhɛ waa‑ Dhaodise ‑dhɛ ‑nu 'gü bha‑ ‑nu ‑dhɛ.»
REV 1:12 'A dho‑ pö 'a slëë‑ n 'gü kö 'a ‑dhɛ ‑ga n ꞊taama kö 'mɛ 'ö dhiang zë sië n ‑dhɛ bha 'a‑ yö, 'a dho ‑dhɛ ‑ga kö ‑dhangbha ‑dɔtapë "saɔplɛ 'ö‑ ꞊gban 'dhö "sënng 'ka, 'ö pɛng 'dhö‑ ꞊gban "dhiʋ̈ ꞊në ‑dhɛ bha‑ 'gü,
REV 1:13 'yö pë 'bha 'ö ꞊dhɛ mɛ "bhɩɩ‑ 'dhö, 'ö dɔ sië‑ ‑nu kpö 'gü mü. Mɛ 'ö bha ‑tɔyang ꞊në gun‑ ‑bha, "kɛɛ ‑tɔyang 'ö gun‑ ‑bha bha ‑yö ‑zun ‑gɛn "piʋ̈. 'Yö kwi "pɛn 'ö "sënng 'ka 'ö gun ‑ya ‑sü 'ka sɔ bha‑ ‑ta ‑a ‑kuu ‑ta.
REV 1:14 ‑A ‑gɔdhɛ 'ö gun‑ ‑gɔ ‑bha bha ‑yö ‑flʋ̈ ‑papadhö ꞊dhɛ "bhlaa kaa‑ 'dhö, "ɛɛn 'zü ꞊dhɛ yɩɩ" "vië 'dhö, kö‑ "yan 'bhü‑ dɔ sië ꞊dhɛ pɛng 'dhö.
REV 1:15 Kö‑ ‑gɛn 'ö‑ ꞊wlöö bha‑ "yan‑ bhɔ sië blöngblöngdhö ꞊dhɛ zën 'ö waa‑ ꞊söng, 'ö waa‑ ‑pë ‑dee kë 'ö waa‑ ‑bha 'yɔ bha‑ 'dhö, kö‑ ‑wʋ 'ö‑ "dhi ‑yö ‑zuö sië ꞊dhɛ "yi 'ö ‑zuö ‑a 'dhö.
REV 1:16 Kö "susëngga "saɔplɛ ‑wa ‑kɔ ‑së 'gü, kö ‑siangga "zɔzɔsü do 'ö‑ "dhiʋ̈ ‑zian 'ö ꞊plɛ ‑ya "dhi. Kö‑ wëëdhɛ 'bhü‑ bhɔ sië ꞊dhɛ ‑kɔ 'ö 'yënng‑ 'bhü ‑yö bhɔ‑ 'ka kö ꞊ya ‑ya mɛ ‑gɔ ꞊zinng 'gü bha‑ 'dhö.
REV 1:17 ꞊Dhɛ 'a‑ yö, 'yö 'a ‑pö ꞊wlöö ꞊dhɛ 'mɛ ꞊ya ga‑ 'dhö "suʋ̈ ‑ziisü 'ö ‑da n 'gü bha‑ ‑wɔn 'gü. ꞊Dhɛ 'ö ꞊ya kë "dhʋ̈, 'yö ö ‑kɔ ‑së ‑ya n ‑bha, 'yö‑ pö n ‑dhɛ: «'Bha 'dho "suʋ̈! Ma ꞊në 'a 'wɔn ꞊gban "pɛpɛ zübhodhɛ 'ka, mang do bha ma ꞊në 'a‑ ‑nu "dhiʋ̈ ‑ya ‑dhɛ 'ka.
REV 1:18 Ma ꞊në 'a 'mɛ 'ö "yaan ‑kpɛawo ‑a 'ka, ma ꞊në 'a kë ga, "kɛɛ 'yö a "yaan dɔ 'kwa‑ wo ya‑ 'gü, 'yö 'a dho 'to "dhʋ̈ ‑kpɛawo. 'Pë 'wo‑ ‑dhɛ ga waa‑ ꞊geebɔɔdhɛ ‑nu bha ‑wo ma ꞊në n ‑gɔ.
REV 1:19 ‑A ‑kë "dhʋ̈ ‑sü bha‑ 'gü, 'wɔn ‑nu 'ö i "yan 'dhö ‑da sië‑ 'gü waa‑ 'dhɛ 'ö i "yan‑ dho ‑da 'gü bha‑ ꞊gban ‑bɛn zë.
REV 1:20 Pë ‑nu 'i i "yan ‑kpan ‑bha bha‑ 'klɔɔ‑ ‑ga 'ö ya. "Susëngga "saɔplɛ 'i‑ yö 'ö n ‑kɔ ‑së 'gü bha, Atanna ‑bha yëkëmɛ ‑nu 'wo‑ ‑bha mɛ kpö "saɔplɛ 'wo Azi ‑sɛ 'gü bha‑ ‑nu "dhiʋ̈ziöwomɛ 'ka bha‑ ‑nu ‑zɔn 'ka ꞊në bha. 'Yö‑ Atanna ‑bha 'kɔdhigümɛ ‑nu bha‑ ‑nu ‑zɔn 'ka 'dhö ‑dhangbha "saɔplɛ bha‑ 'ka.»
REV 2:1 ꞊Dhɛ 'ö 'mɛ bha ꞊ya 'wɔn ‑nu bha‑ ‑nu 'klɔɔ‑ pö n ‑dhɛ "dhʋ̈, 'yö‑ pö: «‑Bhö 'sëëdhɛ ‑bɛn zë kö 'i‑ bɔ Atanna ‑bha yëkëmɛ 'ö‑ ‑bha 'kɔdhigümɛ ‑nu 'wo Efɛzö ‑a ‑nu "dhiʋ̈ ‑ziö wo sië bha‑ ‑dhɛ kö 'i‑ pö: 'Mɛ 'ö "susëngga "saɔplɛ 'wo‑ ‑kɔ ‑së 'gü, 'ö "ta sü ‑dhangbha ‑dɔtapë "saɔplɛ 'ö 'pu sië 'wo "sënng 'ka bha ꞊në‑ ꞊zinng 'gü bha ‑ya ‑pö:
REV 2:2 «'Wɔn ‑së ‑nu 'ka‑ ‑kë oo, sëë ‑nu 'ka‑ bho, "ɛɛn 'wɔn ‑nu 'ka‑ kun ka ‑bha n ‑wɔn 'gü bha‑ ꞊gban ‑yö n "yaan. ‑A 'bha 'yaa n tii' 'ka. A‑ 'wɔn ‑dɔ 'zü ꞊dhɛ kaa 'wɔnyaakëmɛ ‑nu 'kaa 'kun bho 'koo, ꞊dhɛ 'mɛ 'wo‑ pö wo ‑dɩ ‑dhɛ ꞊dhɛ Yesu ‑bha bɔmɛ ‑mü wo 'ka, "kɛɛ kö 'waa‑ 'ka bha ka‑ ‑nu 'gü dan ‑sü 'ka 'ö 'ka‑ dɔ ꞊dhɛ ꞊sua ꞊në 'wo‑ ‑kë, 'waa‑ 'ka.
REV 2:3 A‑ 'wɔn ‑dɔ 'kpakpadhö 'zü ꞊dhɛ ka zuë" ‑yö ‑sɛa, ꞊dhɛ ka saan" ꞊gban suu 'do 'do wo ‑sü 'ka n ‑wɔn 'gü, 'ö ka 'gü 'yii ga ‑tosɛa ‑kë n ‑bha 'ka ‑sü 'ka,
REV 2:4 "kɛɛ 'wɔn do 'bha ‑yö n ‑zʋ "piʋ̈ ka ‑bha: Yö ‑mü ꞊dhɛ ‑kɔ 'ö n ‑dhɔ gun 'ka ka kë sië‑ ‑bha kö 'ka ‑da n ꞊keng‑ ‑dee 'gü bha 'yaa‑ ‑bha 'zü.
REV 2:5 ꞊Dhɛ 'ö "dhʋ̈, ka "gblʋʋ zii 'ka gun‑ ‑ta bha ka ‑zʋ 'ya 'dho bhɔ‑ 'ka, ‑ka ka bo 'wɔn yaa kë ‑sü 'ka kö 'ka ‑tosɛa kë ꞊dhɛ ‑kɔ 'ka gun‑ kë sië‑ 'ka ‑blɛɛsü bha‑ 'dhö, "kɛɛ ꞊ya kë ꞊dhɛ 'kii ka bo 'wɔn yaa ‑zë kë ‑sü 'ka, a ‑dho nu 'a ka ‑bha ‑dhangbha bha‑ bho mü,
REV 2:6 "kɛɛ 'sa kö Nikodha "piʋ̈ ‑mɛ ‑nu këwɔn ‑nu ‑san ‑bha ka kë ‑sü 'kö ꞊dhɛ n 'dhö bha yö ‑zë "dhia ‑yö n 'gü.
REV 2:7 «'Wɔn 'ö Atanna ‑bha 'Nii‑ 'dhö‑ pö sië ‑a ‑bha 'kɔdhigümɛ ‑nu ‑dhɛ bha, 'mɛ 'wɔn 'gü ma ‑tʋ 'dhö‑ ‑gɔ ‑bha ‑mɛ ‑ya ma. 'Mɛ waa‑ ‑to "kplëë 'ka Atanna ‑bha 'ko bha‑ zë ‑sü 'gü, a ‑dho ‑nu kë ‑tosɛa ‑kë ‑bha ‑dhü 'ö‑ ‑gɔ ‑gblüdëdhɛpö 'gü bha‑ ‑bhö ‑mɛ 'ka.»
REV 2:8 'Yö 'mɛ bha 'ö‑ pö 'zü n ꞊dhɛ ‑bhö 'sëëdhɛ bha‑ do 'bha ‑bɛn zë kö 'i‑ bɔ Atanna ‑bha yëkëmɛ 'ö "dhiʋ̈ 'sü sië ‑a ‑bha 'kɔdhigümɛ ‑nu 'wo Simiidhö ‑a ‑nu 'ka bha‑ ‑dhɛ kö 'i‑ pö ꞊dhɛ: «'Mɛ 'ö 'wɔn ꞊gban zübhodhɛ 'ka, 'ö 'wɔn ꞊gban "dhiʋ̈todhɛ 'ka, 'mɛ 'ö kë ga "kɛɛ 'ö ꞊ya ‑bö bha ‑ya pö:
REV 2:9 Saan" 'ka‑ wo sië n ‑wɔn 'gü bha a‑ ‑dɔ, ka ‑bha "flɛɛdhɛ bha a‑ ‑dɔ, 'sa 'kaa "flɛɛmɛ 'ka tɛan‑ ꞊dede ‑zë 'ka! Ka ‑dhiang yaa 'ö Sɔtraan ‑bha mɛ ‑nu 'wo‑ pö wo ‑dɩ ‑dhɛ ꞊dhɛ wo ‑bɔ Atanna 'ka "kɛɛ kö 'waa bɔ‑ 'ka bha 'wo‑ zë bha‑ ꞊gban ‑yö n "yaan!
REV 2:10 ‑Dhɛ ‑ga, 'wɔn "gbɩɩ‑ 'ö kaa ziö‑ 'gü bha 'ka 'dho "suʋ̈‑ ‑gɔ. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Sɔtraan ‑dho ka 'gü dan 'ö 'mɛ 'ka bha mɛ 'gbɛ ‑da ‑kaso 'gü, 'ö 'ka saan" sü ‑dhɛkpaɔyi ‑kaɔng do 'ka, "kɛɛ 'kö 'zü 'ö ‑kë ka ‑gɔtogüwɔn 'ka, ‑ka 'to ka ‑wʋ ‑ta. ꞊Ya kë ꞊dhɛ 'ka‑ kë "dhʋ̈, ‑gbloo 'faan‑ 'wo ‑tosɛa 'ö 'yaa yën ‑a ‑kë ‑bha bha a ‑dho ‑a nu ka ‑dhɛ.
REV 2:11 'Wɔn 'gü ma ‑tʋ 'dhö 'mɛ 'ö‑ ‑gɔ ‑bha, 'wɔn 'ö Atanna ‑bha 'Nii‑ 'dhö‑ pö sië‑ ‑bha 'kɔdhigümɛ ‑nu ‑dhɛ bha‑ ‑mɛ ‑ya 'gü ma! 'Mɛ 'ö yaa‑ ‑to ‑a "gbɩɩ‑ 'ka, 'yii 'dho ga ꞊plɛ ‑naa 'ö Atanna "piʋ̈ bha‑ bho.»
REV 2:12 'Yö 'mɛ 'a‑ yö bha 'ö go mü 'zü 'ö‑ pö n ‑dhɛ: «‑Bhö 'sëëdhɛ bha‑ do 'bha ‑bɛn zë kö 'i‑ bɔ Atanna ‑bha yëkëmɛ 'ö "yan 'to sië ‑a ‑bha 'kɔdhigümɛ ‑nu 'wo Pɛɛgamö ‑a ‑nu ‑bha bha‑ ‑dhɛ. ‑A pö‑ ‑dhɛ: «'Mɛ 'ö ‑siangga "zɔsü, 'ö‑ "dhiʋ̈ ‑zian 'ö ꞊plɛ bha 'ö‑ ‑gɔ bha ‑ya ‑pö:
REV 2:13 «A ka ‑yɛa ꞊bhaa ‑dhɛ ‑dɔ, a‑ 'wɔn ‑dɔ 'kpakpadhö ꞊dhɛ Sɔtraan ‑bha ‑blüdëdhɛ ‑gbloo ‑yö mü ꞊naa, "kɛɛ yö ‑zë ꞊gban 'gü ka ‑kplü ‑sü 'ka n ‑bha kpɛnngkpɛnngdhö, 'kii ka bo ‑zʋ ‑yö n ‑dhɛ ‑sü 'ka, aa" ꞊ni "tʋ̈ng ‑zian 'wo Angtipa 'ö ‑kë n "sɛɛ‑ 'ö to ö ‑wʋ ‑ta ‑a 'ka bha‑ zë‑ 'ka bha‑ 'gü.
REV 2:14 "Kɛɛ yö ‑zë ꞊gban 'gü, 'wɔn do 'bha ‑yö n ‑zʋ "piʋ̈ ka ‑bha. Yö ‑mü ꞊dhɛ mɛ 'bha ‑nu ‑wo ka kpö 'gü mü 'ö 'wo zian 'ö Badhaamö ‑ya sü yi 'bha 'ka bha‑ 'sü ‑sü 'ka. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Badhaamö bha ꞊në ‑da Izraɛdhö ‑mɛ ‑nu ‑dhɛ pë "piʋ̈ yi 'bha 'ka, kë "dhʋ̈ kö ‑wo ‑da Atanna "dhiʋ̈, 'yö Badhakö 'ö ‑kë ‑a ‑nu 'yaɔ‑ 'ka bha‑ ꞊klang ‑kë, "slë ‑nu 'ö ꞊yaa‑ kë 'ö Izraɛdhö ‑mɛ ‑nu dho ‑da Atanna "dhiʋ̈ ꞊dhɛ ‑bhöpë ‑nu 'wo‑ ‑kpa ‑dhɔkëpë ‑nu ‑dhɛ ‑a ‑bhö ‑sü ‑nu waa‑ ‑zua zë ‑sü ‑nu 'dhö bha‑ 'ka.
REV 2:15 ‑Kɔ do bha‑ 'gü mɛ 'bha ‑nu ‑wo ka kpö 'gü mü 'ö 'wo ‑kplü ‑sü 'ka ꞊sɔng 'ö Nikodha "piʋ̈ ‑mɛ ‑nu ‑bha bha‑ ‑bha.
REV 2:16 ‑A pö‑ ‑nu ‑dhɛ ‑wo wo bo 'wɔn yaa kë ‑sü 'ka. "Kɛɛ 'yii kë "dhʋ̈, a ‑dho nu ka ‑ta mü ‑dede ya‑ 'gü 'ö 'a 'ko zë 'mɛ 'wo bha‑ ‑nu 'ka (n ‑wʋ 'ö ꞊dhɛ) ‑siangga 'dhö 'ö go n "dhi bha‑ 'ka.
REV 2:17 'Wɔn 'gü ma ‑tʋ 'dhö 'mɛ 'ö‑ ‑gɔ ‑bha, dhiang 'ö Atanna ‑bha 'nii‑ 'dhö‑ zë sië ‑a ‑bha 'kɔdhigümɛ ‑nu ‑dhɛ bha‑ ‑mɛ ‑ya 'gü ma! 'Mɛ 'ö yaa‑ ‑to ‑gblü bha‑ "kplëë 'ka, 'bluu‑ 'ö Atanna ‑ya lɔɔ yi 'bha 'ka Izraɛdhö ‑mɛ ‑nu ‑dhɛ kö ‑wo "tʋng ‑ta bha a ‑dho ‑a 'dhɛ 'ö ‑bin ‑sü 'ka bha‑ nu‑ ‑mɛ ‑dhɛ, 'ö 'a ‑ya mü 'a ‑gwë "puu do 'ö 'tɔ ‑dee 'ö mɛ 'bha ‑mɛ 'bha 'yaa‑ dɔ, kö 'yii kë mɛ 'kö 'a‑ nu‑ ‑dhɛ bha‑ 'ka bha‑ nu‑ ‑mɛ ‑dhɛ.»
REV 2:18 ꞊Dhɛ 'ö ꞊ya kë "dhʋ̈, 'yö 'mɛ bha 'ö‑ pö 'zü n ‑dhɛ: «‑Bhö 'sëëdhɛ bha‑ do "wɛɛ 'bha kë kö 'i‑ bɔ Atanna ‑bha yëkëmɛ 'dhɛ 'ö‑ ‑bha 'kɔdhigümɛ ‑nu 'wo Tiatii ‑pö 'gü ‑a ‑nu kpö 'gü bha‑ ‑dhɛ. ‑A pö‑ ‑dhɛ mɛ 'ö yö ꞊në Atanna Gbö 'ka, 'ö‑ "yan 'gü‑ bhü ꞊dhɛ pɛng 'dhö, 'ö‑ ‑gɛn 'ö‑ ꞊wlöö ‑a 'bhü‑ bhɔ ꞊dhɛ zën 'ö ꞊waa‑ ‑bha 'yɔ ‑a 'dhö bha ‑ya ‑pö:
REV 2:19 Ka këwɔn "pɛpɛ ꞊gban ‑yö n "yaan, a‑ 'wɔn dɔ 'kpakpadhö ꞊dhɛ ‑dhɔ ‑yö ka 'gü, ꞊dhɛ ka ‑to ka ‑wʋ ‑ta, ꞊dhɛ ka Atanna ‑bha yë ‑kun ka 'nii‑ 'ka, ꞊dhɛ ka zuë" ‑yö ‑sɛa. A‑ 'wɔn ‑dɔ ꞊dhɛ yë 'dhɛ 'ka‑ kë sië ꞊taamasü ya‑ 'gü Atanna ‑dhɛ bha ‑yö 'kpii‑ 'ö ‑ziö ‑a ‑blɛɛsü 'ka gun‑ kë sië bha‑ ‑ta.
REV 2:20 "Kɛɛ 'wɔn do 'bha ‑yö mü 'ö 'yaa n ‑zʋ 'kun ‑sü 'ka ka ‑bu 'gü. 'Yö ‑mü ꞊dhɛ ka ka ‑kwaa dhebhɔ 'ö ka kpö 'gü mü 'ö ꞊dhɛ Zezabɛdhö 'dhö, 'ö‑ pö ö ‑dɩ ‑dhɛ ꞊dhɛ Atanna ‑wʋ "dhiʋ̈ ꞊loo ‑dhe ‑mü ö 'ka bha‑ ‑zü, 'ö 'ka‑ ‑ga mü "dhʋ̈ 'ö Atanna ‑bha mɛ ‑nu ꞊klang ‑kë wü 'wo ‑dhɔkëpë ‑nu ‑dhɔkë 'ka bha‑ ‑bhö ‑sü ‑nu waa‑ ‑zua zë ‑sü ‑nu 'ka, 'yö‑ ‑nu ‑da Atanna "dhiʋ̈.
REV 2:21 A kë "tʋ̈ng 'në 'bha ‑nu ‑dhɛ kë "dhʋ̈ kö ‑yö ö kwaa‑ 'wɔn yaa kë ‑sü ‑zü "kɛɛ 'yii "wɩ‑ ‑bha kö ‑yö ö bo ‑zua zë ‑sü 'ka.
REV 2:22 'Wɔn 'ö‑ ‑wɔn 'gü 'yö maa‑ ‑zuö "yua sɛɛ" ‑ta bha 'yö bha, ꞊ya 'go mü kö 'a 'wɔn bho mɛ "pɛpɛ 'wo ‑da sië‑ "piʋ̈ 'pö ‑kpɛawo 'ö 'waa "wɩ‑ ‑bha kö ‑wo wo bo‑ 'ka bha‑ ‑nu 'gü.
REV 2:23 ꞊Ya 'go mü 'zü, mɛ "pɛpɛ 'wo ‑ziö ꞊keng‑ bha a ‑dho ‑a ꞊gban zë "pɛɛpɛdhö, kë "dhʋ̈ kö mɛ "pɛpɛ 'wo Atanna ‑bha 'kɔdhigümɛ ‑nu 'ka bha ‑wa 'wɔn dɔ ꞊dhɛ ma ꞊në 'a mɛ "bhɩɩ‑ ‑nu ‑zʋgɔnkawɔn ‑nu waa‑ ‑a ‑nu zuëbhɔbhawɔn ꞊gban dɔ. 'Mɛ 'dhɛ "dhʋ̈ a ‑dho ‑a ꞊saa bho ‑a kë ‑sɔng ‑nu ꞊në‑ ‑bha.
REV 2:24 Mɛ ‑kpɛa 'ka to 'ö ka ‑zë 'kii ka ‑kɔ ‑da ‑tosɛa suu 'ö "dhʋ̈‑ kë ‑sü 'gü, 'ö ka ‑zë 'kii 'pë 'ö 'mɛ bha 'wo‑ ‑dhɛ Sɔtraan ‑bha ‑gleng 'kɔnë 'gü ‑dhɛ bha‑ dɔ bha a‑ ‑pö ka ‑dhɛ ꞊dhɛ 'mii 'dho ꞊kwɛɛ 'gbiin‑ 'bha ‑ya ka ꞊gbin‑.
REV 2:25 Ka ‑zë 'pë 'a dho‑ pö ka ‑dhɛ yö ‑mü ꞊dhɛ kö ka ‑bha 'ö 'ka ‑kplü ‑sü 'ka‑ ‑bha bha 'ka‑ 'kun "gbɩɩ‑ kö ‑yö zun‑ 'ka n nu ‑yi ‑bha.
REV 2:26 Mɛ 'ö yaa‑ ‑to ‑bɛang bha‑ ga 'ka, 'ö yaa‑ ‑to n dhɔɔbhaa ‑zian ‑ta 'ö to "dhʋ̈ 'ö‑ "dhiʋ̈ 'to "tʋ̈ng ‑yö ꞊loo, mɛdhɛ kë ‑faan 'a‑ ꞊slɔɔ n Dë "dhiʋ̈ bha a ‑dho ‑a ‑bha nu 'ö ‑ya 'ka "sɛgɔ ‑nu ‑gɔ "dhiʋ̈, 'ö mɛdhɛ ‑kë ‑a ‑nu ‑ta ‑piöga ‑sabhlü 'ka, 'ö‑ ‑nu 'gü wü‑ 'ka ꞊dhɛ mɛ‑ "sɛ gbɔ wü, 'ö ma 'ö ma ꞊në 'wo n ‑dhɛ ‑dhɛkpaɔ "dhiʋ̈ "susëng bha 'a dho 'a ‑tosɛa ‑kë ‑a ‑mɛ "piʋ̈ 'pö.
REV 2:29 ‑A ‑kë "dhʋ̈ ‑sü bha‑ 'gü, 'wɔn 'gü ma ‑tʋ 'dhö 'mɛ 'ö‑ ‑gɔ ‑bha, ‑a ‑mɛ ‑yö "tʋ 'to 'wɔn 'ö Atanna ‑bha 'Nii‑ 'dhö‑ pö sië ‑a ‑bha 'kɔdhigümɛ ‑nu ‑dhɛ bha‑ ‑bha ‑së 'ka kö ‑ya 'gü ma.»
REV 3:1 'Yö go mü 'zü 'ö‑ pö n ‑dhɛ: «Zan, ‑bhö 'sëëdhɛ bha‑ do 'bha ‑bɛn zë 'zü kö 'i‑ bɔ Atanna ‑bha yëkëmɛ 'ö zun sië‑ ‑bha 'kɔdhigümɛ ‑nu 'wo Saadö ‑a ‑nu ‑dhɛ "dhiʋ̈ bha‑ ‑dhɛ kö 'i‑ pö:: «'Mɛ 'ö Atanna ‑bha 'nii‑ "saɔplɛ bha 'wo‑ ‑kɔ ‑bha waa‑ ‑a ‑bha "susëngga "saɔplɛ 'dhö bha ‑ya ‑pö: Ka këwɔn ‑nu bha‑ 'bha 'yaa n tii' 'ka. ‑A ‑naa ‑yö n "yaan ꞊dhɛ ‑yö mɛ "bhɩɩ‑ ‑nu ‑zë ‑a ‑nu 'gü ꞊dhɛ ka "yaan, "kɛɛ 'sa kö mɛ ꞊gee ꞊në ka 'ka.
REV 3:2 ‑Ka ‑bö kö‑ 'dhɛ 'në 'ö to ka ‑gɔ 'ö yö ‑zë 'yii "dhuu ꞊kö bha 'ka‑ ‑fɔɔ bho kö‑ ‑kpɛa 'ya 'dho "dhuu do. ‑A ‑gɛn ‑mü ꞊dhɛ ka këwɔn ‑nu bha‑ 'bha 'yaa ma Atanna ‑zʋ 'kun ‑së 'ka.
REV 3:3 ‑A ‑kë "dhʋ̈ ‑sü bha‑ 'gü, ka ‑zʋ ‑yö ‑bö 'wɔn ‑nu 'wo ka ꞊klang ‑kë 'ka bha‑ 'ka kö ka ‑zʋ ‑yö ‑bö 'pö ‑kɔ 'ka‑ ma‑ 'ka bha‑ 'ka, kö 'ka‑ ‑ya ꞊bhlëë 'gü, kö 'ka ka ꞊taa zun 'wɔn yaa kë ‑sü ‑gɔ. "Kɛɛ 'kii ‑bö ‑zë wo kö 'ka ‑ya ka "yaan, a ‑dho nu 'a ‑kan ka 'gü ꞊dhɛ ꞊kwaanmɛ 'dhö, 'ö 'kaa n ‑nu "tʋ̈ng dɔ.
REV 3:4 "Kɛɛ 'sa ka ‑bha ‑kë "dhʋ̈ ‑sü ꞊gban waa‑ ‑bha ‑bha, kaa‑ mɛ ‑nu 'wo Saadö mü bha‑ mɛ 'bha ‑nu ‑wo mü 'ö wo ‑zë 'wii wo ‑bha ‑sɔ ‑dhii 'kun. Yɛng‑ ‑nu yi ‑dho "ta yi "kwëë kö sɔ "puu ‑ya ‑nu ‑bha, ‑a ‑gɛn ‑mü ꞊dhɛ ‑wo ꞊mɔɔ ‑sü 'ka sɔ "puu bha‑ ‑da ‑sü ‑bha.
REV 3:5 Mɛ 'ö dho ‑bɛang bha‑ ga 'sü, ‑yö ‑dho sɔ "puu ꞊në‑ ‑da 'pö ꞊dhɛ ‑kɔ bha‑ 'dhö, 'mii 'dho‑ 'tɔ bho Atanna ‑bha 'sëëdhɛ 'ö 'mɛ 'wo dho ‑tosɛa kë‑ "piʋ̈ ‑a ‑nu 'tɔ 'dhö‑ 'gü bha‑ 'gü. 'Ö ‑ya mü 'zü 'a dɔ n Dë Atanna waa‑ ‑bha "kië ‑nu ‑a ‑nu wëëdhö 'a‑ pö ꞊dhɛ ma mɛ ‑mü.
REV 3:6 'Mɛ 'ö‑ 'wɔn 'gü ma ‑tʋ 'dhö 'dhö ‑yö 'wɔn 'ö Atanna ‑bha 'Nii‑ 'dhö‑ pö sië ‑a ‑bha 'kɔdhigümɛ ‑nu ‑dhɛ bha‑ 'gü ma.»
REV 3:7 'Yö 'mɛ bha 'ö‑ pö 'zü n ‑dhɛ 'ö‑ pö: «Zan, ‑bhö 'sëëdhɛ bha‑ do 'bha ‑bɛn zë kö 'i‑ bɔ 'mɛ 'ö Atanna ‑bha yëkëmɛ 'ka ‑a ‑bha 'kɔdhigümɛ ‑nu 'wo Fidhadɛfi ‑pö 'gü bha‑ ‑dhɛ kö 'i‑ pö: 'Mɛ 'ö "slʋ̈ʋ̈slʋ̈, 'ö ꞊sɔng 'yaa‑ ‑bha, 'ö ꞊waa‑ pö tɛanwɔn, kö ‑wo ‑wɩ yö ꞊në‑ 'ka, 'ö Davi ‑bha ‑gblüdëdhɛ ‑dhaklɩ 'dhö yö ꞊në‑ ‑gɔ, 'ö ꞊yaa‑ "pʋ 'ö mɛ "wɛɛ 'bha 'yaa ꞊mɔɔ‑ ‑bha kö ‑ya ta, "ɛɛn 'ö ꞊yaa‑ ta, 'ö mɛ "wɛɛ 'bha 'yaa ꞊mɔɔ‑ ‑bha kö ‑ya "pʋ bha ‑ya pö:
REV 3:8 «Pë "pɛpɛ 'ka‑ ‑kë, ‑a ꞊gban ‑yö n "yaan. A‑ 'wɔn ‑dɔ ꞊dhɛ "sɩ 'gbɛ 'yaa ka ‑dhɛ. "Kɛɛ 'sa yö ‑zë ꞊gban 'gü ka kë n ‑wʋ bha‑ ꞊bhlëë ‑ya "pɛpɛdhö 'ö 'ka to ka ‑wʋ ‑ta n ‑dhɛ. ‑A ‑wɔn 'gü, zian 'a‑ "dhi ‑pʋ ka ‑gɔ bha‑ tamɛ 'yaa 'dhö.
REV 3:9 ꞊Suakëmɛ ‑nu 'wo‑ pö wo ‑dɩ ‑dhɛ wo ‑bɔ Atanna 'ka, "kɛɛ kö ‑wo Sɔtraan ꞊në‑ ‑bha ‑gɔ 'gü bha 'wɔn 'a dho‑ kë‑ ‑nu 'ka ‑kaa ‑ga 'ö ya: A ‑dho n faan wɔ‑ ‑nu ‑ta 'ö 'wo nu 'wo zun ka ‑dhɛ wo kpiö 'gü, 'ö 'wo ‑gbɛʋʋ ‑kë ka ‑dhɛ, 'ö 'wo‑ 'wɔn dɔ ꞊dhɛ ka ‑dhɔ ꞊dede ‑yö n ‑kë.
REV 3:10 ꞊Dhɛ 'ö ‑kë ꞊dhɛ ‑a pö 'a‑ wo ka ‑dhɛ 'ka ka zuë" ꞊në‑ kë ‑sɛa kö 'wɔn ꞊gban ‑wɔn ꞊gban ‑yö 'kun bho ka 'gü bha, ka kë‑ ‑kë ꞊dhɛ ‑kɔ 'a‑ pö‑ 'ka ka ‑dhɛ ‑a 'dhö bha, mang ‑dɩ 'pö a ‑dho ka ‑maa kë "tʋ̈ng "gbɩɩ‑ 'ö nu sië, 'ö 'a dho 'wɔn wɔ‑ 'ka "kpʋngtaadhɛ ‑todhʋ̈sü ‑ta bha‑ 'ka 'ö 'a ka ‑zë ka dha‑ ‑gɔ.
REV 3:11 N nu "tʋ̈ng 'yaa ꞊gblɛɛn 'zü. ‑A 'kun ꞊në ‑kaa wo "gbɩɩ‑ kö mɛ 'bha pia" 'ya 'dho dhi ka ‑bha ‑bhɔ 'gü 'faan‑ bha‑ 'ka.
REV 3:12 'Mɛ 'ö yaa‑ ‑to ‑a "gbɩɩ‑ 'ka, a ‑dho ‑a ‑mɛ kë ma Atanna ‑dhɔkëgükɔ bha‑ ‑gɛn do 'ka, 'ö 'yaa zun "kpɛnng 'zü tongtongdhö, 'ö 'a ma Atanna waa‑ ‑bha Zedhizadhɛmö ‑pö ‑dee 'ö dho 'go‑ "piʋ̈ dhang‑ 'gü 'ö ‑lɔɔ bha‑ ‑nu 'tɔ ‑ya ‑a ‑mɛ ‑bha. 'Ö 'tɔ ‑dee 'ö n ‑bha bha 'a‑ ‑ya ‑mɛ ‑bha 'pö.
REV 3:13 ꞊Dhɛ 'ö "dhʋ̈, 'mɛ 'ö‑ "tʋ 'dhö 'dhö, ‑ya dɔ dhiang 'ö Atanna ‑bha 'Nii‑ 'dhö‑ zë sië ‑a ‑bha 'kɔdhigümɛ ‑nu ‑dhɛ bha‑ ‑bha 'kpakpadhö kö ‑ya 'gü ma!»
REV 3:14 'Yö‑ pö: «‑Bhö 'sëëdhɛ bha‑ 'bha kë kö 'i‑ bɔ 'mɛ 'ö zun sië Atanna ‑bha 'kɔdhigümɛ ‑nu 'wo Dhaodise ‑a ‑nu ‑dhɛ "dhiʋ̈ bha‑ ‑dhɛ. ‑A pö‑ ‑dhɛ 'mɛ 'ö Atanna "sɛɛ‑ 'ka, 'ö tɛanwɔn ꞊në‑ pö, "kɛɛ 'ö 'yaa ‑wʋ ꞊plɛ pö, 'ö yö ꞊në pë "pɛpɛ 'ö Atanna ‑ya ‑da ‑a ꞊gban kpu ‑sü ‑bha ‑kpu 'ka, 'ö 'wo yö ꞊në ‑dhɛ ‑yö kë "dhʋ̈ bha ‑ya ‑pö:
REV 3:15 A ka këwɔn ꞊gban dɔ. 'Kaa "yi "wɔsü 'ka, "ɛɛn 'kaa "yi ‑sɛa 'ka. 'Ka dho kë "wɔsü ‑ka kë "wɔsü do, 'ka dho kë 'zü ‑sɛa ‑ka kë ‑sɛa do, "kɛɛ 'ka 'to 'zɔzɔ 'ka a ‑dho ‑pe ka 'ka.
REV 3:17 Ka‑ ‑pö ka ‑dɩ ‑dhɛ ꞊dhɛ ꞊naɔ ‑yö ka ‑gɔ, 'ka ꞊mɔɔ, ka ‑ma ‑wɔn 'yaa pë 'bha ‑bha 'zü, 'kaa‑ 'wɔn dɔ ꞊dhɛ ‑wëëmɛ 'ö "sɛ ya‑ 'gü ‑a ‑gɔ ‑mü ka ꞊në ka 'ka, ꞊dhɛ "flɛɛmɛ 'bha 'yaa ka ‑zë ka zian‑ 'gü, ꞊dhɛ ka ka 'kpee‑ ‑zian 'ka 'ö ka "yan ‑nu ꞊gban 'wo ꞊wlü 'ka‑ ‑ta.
REV 3:18 ‑A ‑kë "dhʋ̈ ‑sü bha ꞊në‑ ‑wɔn 'gü, 'yö 'a‑ pö ka ‑dhɛ ꞊dhɛ 'ka nu, kö 'ka "sënng 'ö ꞊waa‑ gbo ꞊gban bho‑ 'gü "pɛpɛdhö bha‑ 'dhɔ n ‑gɔ, kö 'ka kë ꞊naɔmɛ ꞊dede 'ka, kö 'ka sɔ "puu 'dhɔ kö 'ka ka 'kpee‑ ‑ta kpa‑ 'ka kö 'yiʋ̈‑ 'ya 'dho ka kë, kö 'ka "yan kë ꞊bɛdhɛ 'dhɔ kö 'ka‑ kë ka "yan ‑bha kö 'ka ‑dhɛ yö.
REV 3:19 ‑A pö 'a‑ wo ka ‑dhɛ "dhʋ̈ bha‑ 'klɔɔ‑ ‑mü ꞊dhɛ 'mɛ 'ö‑ ‑dhɔ ‑yö n ‑kë ꞊në 'a ‑dhio dɔ‑ ‑ta 'yö 'a‑ "klʋ bho. ‑A ‑kë "dhʋ̈ ‑sü bha‑ 'gü, ‑ka ka 'gü dɔ "gbɩɩ‑ kö 'ka bo 'wɔn yaa kë ‑sü 'ka.
REV 3:20 ‑Ka ‑dhɛ ‑ga, a dɔ sië ka ‑gɔ "kwɛɛ ‑bha, a‑ ‑tama sië. 'Mɛ 'ö ꞊ya n ‑wʋ ma kö ‑yö "kwɛɛ "pʋ n ‑gɔ, a ‑dho ‑da ‑mɛ ‑gɔ 'kɔɔdhö 'ö yaa‑ ‑mɛ 'yi pë ‑bhö yi "kwëë.
REV 3:21 ‑Gɔn bha 'mɛ 'ö yaa‑ ‑gɔn kö ‑ya ga 'sü, a ‑dho ‑a ‑mɛ ‑ya n "sɔɔ ma ‑blüdëdhɛ ‑gbloo ‑ta, ꞊dhɛ ‑kɔ 'ö mang ‑dɩ 'pö 'a‑ ga sü‑ 'ka, 'ö 'a dho 'a ‑ya n Dë "sɔɔ, ‑a ‑bha ‑blüdëdhɛ ‑gbloo ‑ta bha‑ 'dhö.
REV 3:22 ‑A ‑kë "dhʋ̈ ‑sü bha‑ 'gü, mɛ "ʋʋ mɛ 'ö‑ 'wɔn ma ‑tʋ 'dhö 'dhö, ‑yö dhiang 'ö Atanna ‑bha 'Nii‑ 'dhö‑ zë sië ‑a ‑bha 'kɔdhigümɛ ‑nu ‑dhɛ bha‑ ma.
REV 4:1 ꞊Dhɛ 'ö 'wɔn 'dhɛ ‑nu bha ꞊wa bo kë ‑sü 'ka ꞊dhɛ ‑kɔ ‑nu bha‑ 'dhö, 'a dho "kan n ‑ta kö dhang‑ "dhi ꞊ya "pʋ, kö mɛ do 'ö gun dhiang zë sië n ‑dhɛ, 'ö‑ ‑wʋ ‑kë ꞊dhɛ "truu ‑wʋ 'dhö bha ‑ya pö sië n ‑dhɛ 'ö‑ pö: «‑Bhö ‑tɔn 'kun kö 'i nu yö kö 'wɔn 'dhɛ ‑nu 'wo dho kë ‑a 'dhɛ bha‑ zian‑ ‑ta bha 'a‑ ‑nu ‑zɔn i ‑dhɛ.»
REV 4:2 'Ö ö bo‑ ‑pö n ‑dhɛ "dhʋ̈ ‑sü 'ka bhoo, 'yö 'Nii‑ "slʋ̈ʋ̈slʋ̈ ‑yö n sü ꞊dhɛ 'gbʋ‑ ‑yö mɛ sü, 'yö dho n 'ka dhang‑ 'gü. ‑Dhɛ 'ö dho n 'ka‑ 'gü bha 'a dho ‑dhɛ ‑ga mü kö ‑blüdëdhɛ ‑gbloo do ‑yö ‑ya sü 'ka mü, kö mɛ do 'bha ‑yö ‑ya ‑sü 'ka‑ ‑ta.
REV 4:3 "Kɛɛ 'mɛ 'ö gun ‑ya ‑sü 'ka‑ ‑ta "dhʋ̈ bha‑ wëëdhɛ "yan‑ ‑bhɔ ‑glënglëndhö ꞊dhɛ ‑gwë ꞊bhlëësü ꞊gblɛyidhe suu 'bha 'wo‑ Zasipö ‑kë bha waa‑ ‑zaɔndhö 'wo‑ Saaduanö ‑kë bha‑ ‑nu "yan bhɔ ‑kɔ bha‑ 'dhö. Kö ꞊kpöng 'ö dɔ dha ‑gɔ bha‑ 'dhɛ 'ö ꞊klëën ‑sü 'ka ‑gbloo bha‑ ‑zü bha‑ "yan‑ bhɔ sië 'pö ‑glënglëndhö ꞊dhɛ gënng' ‑gwë bha‑ 'dhɛ 'wo‑ ‑dhɛ Medhodö bha‑ 'dhö.
REV 4:4 Kö ‑gbloo "wɛɛ ‑kaɔng ꞊plɛ ga ‑yiisiö 'bha ‑wo ꞊klëën ‑sü 'ka 'zü ‑a 'kpiisü bha‑ ‑zü, 'ö mɛ zizi ‑nu ‑kaɔng ꞊plɛ ga ‑yiisiö 'ö sɔ "puu 'dhö‑ ‑nu ‑bha bha 'wo ‑ya ‑sü 'ka‑ ‑ta 'dɔɔndhö, kö "sënng faan‑ ‑ya ‑nu ‑gɔ ‑bha.
REV 4:5 Kö dha ‑yö "yan 'kun sië ‑dhɛ 'ö ‑gbloo 'kpiisü bha 'ö gun ‑ya sië‑ ‑bha bha‑ 'gü, 'ö ‑gbla, 'ö pë 'bha ‑nu ‑wo ‑wɩ mü ‑nu wo 'ö mɛ "tʋ‑ ‑da ‑wʋ 'gü ‑wuudhö. Kö "sɔng "saɔplɛ ‑wo 'pu sië ‑gbloo 'kpiisü bha‑ wëëdhö. 'Nii‑ "saɔplɛ 'ö go Atanna "piʋ̈ bha ꞊në 'wo gun 'pu sië "dhʋ̈ bha.
REV 4:6 Kö ‑gbloo 'kpiisü bha‑ wëëdhɛ "yan‑ bhɔ sië ‑mina ‑minadhö ‑dhɛ ꞊gban 'gü mɔɔdhö ꞊dhɛ 'pë 'ö gënng' ‑gwë "puu 'ö ꞊dhɛ "dënggbɔ 'dhö bha ꞊në ꞊waa‑ zun 'kwëë‑ ‑dhɛ ꞊gban 'gü 'ö ꞊ya kë ꞊dhɛ "yitagbɛa 'bha 'dhö ‑a 'dhö. Kö pë "yaandhe 'bha ‑nu 'ö‑ ‑nu "yan 'dhö ꞊loo ‑sü 'ka‑ ‑nu kwi ‑bha ‑yëën 'këëndhö ‑a ‑nu "dhiʋ̈ ‑dhɛ waa‑ ‑nu ꞊taama ‑dhɛ ‑nu ꞊gban 'gü bha‑ ‑yiisiö ‑wo ꞊klëën ‑sü 'ka ‑gbloo bha‑ ‑zü "pɛan ꞊gban "piʋ̈.
REV 4:7 Pë "yaandhe ‑nu 'wo "dhʋ̈ bha‑ ‑blɛɛsü 'a‑ yö bha ‑yö ‑bhɔ laa ꞊në‑ ‑bha. 'Yö‑ ꞊plɛ ‑naa ‑yö bhɔ ‑du 'në ‑bha. 'Yö‑ ‑yaaga ‑naa wëëdhɛ ‑yö bhɔ mɛbhɩɩdhe ‑bha ‑bha. 'Yö‑ ‑yiisiö ‑naa ‑yö bhɔ "gblëë‑ 'ö ‑wlö sië‑ ‑bha.
REV 4:8 Pë "yaandhe ‑yiisiö 'wo "dhʋ̈ bha‑ do gban‑ ‑gun "saɔdo, 'yö‑ ‑nu "yan 'dhö gun ꞊mɔɔ ‑sü 'ka‑ ‑nu kwi 'gü ‑dhɛ ꞊gban "pɛpɛ 'gü. ‑Yö ‑gun ‑nu kwi 'gü 'kɔɔdhö 'ö gun‑ ‑nu ‑bha "kpɛnngdhɛ ‑nu ꞊gban 'gü. ‑A ‑nu ‑bha yë 'ö 'dhö, 'ö 'wo ꞊gloo‑ ‑bha 'wo ‑wɔ 'gü "yaan yö ‑mü 'tɔ ‑loo 'mɛ 'ö ‑ya ‑sü 'ka ‑gbloo 'kpiisü bha‑ ‑ta bha ꞊në‑ ‑bha ‑sü 'ka 'wo‑ pö: «'Mɛ 'ö "slʋ̈ʋ̈slʋ̈, 'ö "slʋ̈ʋ̈slʋ̈, 'ö "slʋ̈ʋ̈slʋ̈, yö ‑mü kwa Dëmɛ, kwa ‑bha Atanna 'gü "gbɩɩsü 'ö gun, 'ö 'dhö ‑kpɛawo, 'ö dho 'to ‑todhʋ̈ 'ka bha ꞊në‑ 'ka.»
REV 4:9 'Mɛ 'ö ‑ya ‑sü 'ka ‑gbloo 'kpiisü bha‑ 'gü 'ö‑ bhɔ ‑yi 'yaa 'dhö kö yöö ‑nu 'to ga ‑yi ꞊në‑ ‑bha bha, pë "yaandhe ‑yiisiö bha ꞊wa "wɩ‑ "piʋ̈, ꞊wa 'tɔ ꞊loo‑ ‑bha kö ‑wa nuɛ" bho ‑kɔ 'ö‑ 'gü 'do 'do,
REV 4:10 'Yö mɛ zizi ‑nu ‑kaɔng ꞊plɛ ga ‑yiisiö bha 'wo zun wo kpiö 'gü 'mɛ 'ö ‑ya ‑sü 'ka ‑gbloo 'kpii‑ bha‑ 'gü, 'ö 'dhö ‑todhʋ̈ 'ka bha‑ ‑kuu "dhiʋ̈, 'yö 'wo‑ ‑dhɔkë. 'Yö 'wo woo‑ "sënng 'faan‑ ‑nu 'ö‑ ‑nu ‑gɔ ‑bha bha‑ bho mü 'yö 'wo‑ ‑zuö ‑gbloo 'kpiisü bha‑ wëëdhö kö ‑wa pö sië:
REV 4:11 «'Aa! Yi Dëmɛ, yi ‑bha Atanna, ‑a ‑dhɛ ‑mü ꞊dedewo. ‑A ‑dhɛ ‑mü kö bhi ꞊në i 'tɔ ‑yö bhɔ, kö ꞊bhlëë ‑yö ‑ya i ‑bha, kö 'gügbɩɩdhɛ ‑yö kë i ‑gɔ. ‑A ‑gɛn ‑mü ꞊dhɛ bhi ꞊në 'i pë suu ꞊gban "pɛpɛ ‑da. ‑A ‑nu ‑bha kë ‑sü 'ö 'wo ‑tosɛa ‑kë bha ‑yö ‑ga bhi ꞊në i 'gü.»
REV 5:1 'Ö go mü 'yö 'a 'sëëdhɛ do 'bha yö 'mɛ 'ö gun ‑ya ‑sü 'ka ‑gbloo bha‑ 'gü bha‑ ‑kɔ ‑së 'gü, kö ‑yö ‑be kë ‑sü 'ka, "kɛɛ kö ‑yö ‑bɛn zë ‑sü 'ka ö 'gü 'kɔɔdhɛ waa‑ "kpɛnngdhɛ ‑nu ꞊gban 'gü, kö‑ "dhiʋ̈ ‑yö ta ‑sü 'ka gɔgɔtɔdhö kö 'klëë‑ ‑yö 'kpɔ ‑sü 'ka‑ ‑bha ‑dhɛ "saɔplɛ bha‑ ꞊gban 'gü.
REV 5:2 'A dho "kan n ‑ta 'zü kö Atanna ‑bha "kië 'gü "gbɩɩ‑ do 'bha bha ‑yö "gbla sië "gbɩɩ‑ 'ka 'ö‑ pö: «'Dee 'dhö, 'ö 'klëë‑ ‑kpɔ 'sëëdhɛ ya‑ ‑bha ‑pë ya‑ 'wü ‑sü kö ‑wa "dhiʋ̈ "pʋ bha‑ "sɩ 'dhö‑ ‑dhɛ, 'ö ꞊mɔɔ‑ ‑bha 'ö‑ ‑kë.»
REV 5:3 "Kɛɛ 'yö mɛ 'yii ꞊slɔɔ dhang‑ ‑zian 'gü kö yöö 'to "kpʋngtaadhɛ waa‑ "sɛ ꞊wlöö ꞊dhɛ ꞊në‑ ‑bha, kö ‑yö 'sëëdhɛ bha‑ "pʋ kö ‑yö ‑dhɛ ‑ga 'gü.
REV 5:4 'Yö 'a zun "gbʋ bɔ ‑sü ‑bha ꞊dedewo ‑sɔbhɛɛ 'ka mɛ 'yii ꞊slɔɔ 'ö‑ wo kö ‑yö 'sëëdhɛ bha‑ "pʋ kö ‑yö ‑dhɛ ‑ga 'gü bha‑ ‑wɔn 'gü.
REV 5:5 "Kɛɛ 'yö mɛ zizi ‑nu bha‑ mɛ do ‑ya pö n ‑dhɛ 'ö‑ pö: «'Bha 'dho "gbʋ bɔ, ‑a ‑gɛn ‑mü ꞊dhɛ Davi suu 'gü ‑në 'ö "kplëëmi 'ka Zuda ‑kɔdhi 'gü bha ꞊në "sɩ 'dhö‑ ‑dhɛ, yö ꞊në‑ ‑kɔ ꞊ya ziö pë ꞊gban "pɛpɛ ‑gɔ, yö ꞊në ꞊mɔɔ‑ ‑bha 'ö 'klëë‑ ‑kpɔ 'sëëdhɛ bha‑ ‑bha ‑pë "saɔplɛ bha‑ ꞊gban wü 'yö ‑dhɛ ‑ga 'gü.»
REV 5:6 ꞊Dhɛ 'ö ꞊ya kë "dhʋ̈, 'a dho ‑dhɛ ‑ga kö "bhlaanë do 'ö "kpaa 'dhö‑ ‑bha ‑yö dɔ ‑sü 'ka ö ‑gɛan ‑gbloo 'kpiisü 'ö pë "yaandhe ‑yiisiö bha waa‑ mɛ zizi ‑nu bha 'wo ꞊klëën ‑sü 'ka‑ ‑zü bha‑ wëëdhɛ ꞊dede 'gü. "Bhlaanë bha ‑yö ‑gun ꞊dhɛ 'pë 'wo kë‑ zë ꞊në‑ bho "kɛɛ 'yö "yaan 'zü ‑deewo 'dhö. ‑A ‑sö ‑gun "saɔplɛ, 'yö‑ "yanga ‑yö gun 'pö "saɔplɛ. ‑A "yanga bha ꞊në gun Atanna ‑bha 'nii‑ "saɔplɛ 'ö‑ ‑nu bɔ "sɛ ‑ta ‑dhɛ ꞊gban "pɛpɛ 'gü bha‑ 'ka.
REV 5:7 ꞊Dhɛ 'ö ꞊ya kë "dhʋ̈ 'yö "bhlaanë bha 'ö "ta sü 'yö ꞊yɔɔn 'mɛ 'ö gun ‑ya ‑sü 'ka ‑gbloo 'kpii‑ bha‑ 'gü bha‑ "sɔɔ, 'yö ö ‑kɔ ‑da 'sëëdhɛ ‑be 'ö gun‑ ‑kɔ ‑së 'gü bha‑ 'gü.
REV 5:8 ꞊Dhɛ 'ö ö ‑kɔ ‑da 'sëëdhɛ bha‑ 'gü "dhʋ̈, 'yö pë "yaandhe ‑yiisiö bha waa‑ mɛ zizi ‑kaɔng ꞊plɛ ga ‑yiisiö bha 'wo zun‑ ‑dhɛ wo kpiö 'gü, kö mɛ zizi ‑nu bha ‑kɔ 'wo‑ ‑bha 'do 'do, kö kɔnng ‑ya ‑nu ꞊gban ꞊kwɛɛ‑, waa‑ "sënnggbɔnë ‑nu 'ö ‑dhasiklɔɔ 'dhɛ 'wo‑ ‑gʋ̈ bha 'ö‑ 'gü ‑a 'dhö. Atanna ‑bha mɛ ‑nu ‑bha bhɛa" ‑wʋ ‑nu 'ö dho‑ "piʋ̈ bha ꞊në gun ‑dhasiklɔɔ bha‑ 'ka.
REV 5:9 'Yö 'wo "tan ‑dee do bho 'wo‑ pö: «I ‑bha 'sëëdhɛ bha‑ 'sü ‑sü kö 'i‑ "dhiʋ̈tadhɛ ꞊gban "pʋ kö 'i ‑dhɛ ‑ga 'gü ‑dhɛ ‑mü tɛan‑ ꞊dede 'ka. ‑A ‑gɛn ‑mü ꞊dhɛ ‑wo kë bhi ꞊në i zë, 'yö 'i mɛ 'gbɛ ꞊dede ‑gɔ ‑ta dhɔ Atanna ‑dhɛ ga 'i‑ wo bha‑ 'saa‑ 'gü, 'yö 'i "siya ꞊gban suu 'do 'do sü waa‑ mɛ suu ꞊gban "pɛpɛ 'do 'do 'dhö "sɛ suu 'do 'do ꞊gban 'gü kë "dhʋ̈ kö ‑wo kë Atanna ‑bha 'ka.
REV 5:10 'Yö 'i‑ ‑nu ‑kë kwa ‑bha "saabhomɛ ‑nu 'ka kö ‑wa ‑bha yë kë, 'yö 'wo dho ‑ya "kpʋngtaadhɛ ‑gɔ "dhiʋ̈.»
REV 5:11 A ‑to ‑dhɛ 'dhɛ bha‑ ‑ga ‑dhɛ 'gü, 'yö n "tʋ 'dhö ‑da Atanna ‑bha "kië kpö 'gbɛ ꞊dede ‑wʋ 'gü, ‑wo ‑gun "gblü mɛɛ ‑ta ‑mɛɛ, dhʋng 'yaa gun‑ ‑bha, kö ‑wo ꞊klëën ‑sü 'ka Atanna ‑bha ‑blüdëdhɛ ‑gbloo bha‑ ‑züzüdhɛ ꞊gban "pɛpɛ 'gü waa‑ pë "yaandhe ‑nu bha waa‑ mɛ zizi ‑nu bha‑ 'dhö.
REV 5:12 Kö ‑wo "tan bho sië "gbɩɩ‑ 'ka 'wo‑ pö: «"Bhlaanë 'wo‑ zë kö ‑yö kë mɛ "bhɩɩ‑ ‑nu ‑bha "saa‑ 'ka bha, 'gügbɩɩdhɛ oo, mɛdhɛ ‑nu oo, 'wɔndɔdhe waa‑ faan ‑nu oo, ꞊bhlëë waa‑ 'tɔbhɔdhe ‑nu ‑wa yö ꞊në‑ ‑gɔ. ‑A ‑dhɛa ‑bha ꞊dhɛ mɛ ꞊gban "pɛpɛ ‑wa yö ꞊në‑ ‑dhɔkë, kö ‑wa nuɛ" bho.»
REV 5:13 ꞊Dhɛ 'ö ꞊ya kë "dhʋ̈, 'yö n "tʋ 'dhö ‑da 'pö Atanna ‑bha ‑da ‑pë ‑nu 'wo dhang‑ 'gü 'wo "kpʋng ꞊taa, 'wo "sɛ ꞊wlöö waa‑ ‑a 'dhɛ ‑nu 'wo ꞊weeyi ꞊bhaa, 'pë "pɛpɛ 'kö Atanna ‑ya ‑da ‑a ‑nu ꞊gban ‑wʋ 'gü kö ‑wo "tan bho sië 'pö 'wo‑ pö: «'Mɛ 'ö ‑ya ‑sü 'ka ‑gbloo 'kpiisü ‑ta waa‑ "bhlaanë bha ꞊në‑ ‑dhɛ 'dhö‑ ‑bha ꞊dhɛ ‑wa ‑nu nuɛ" bho, kö ‑wo ꞊bhlëë ‑ya ‑nu ‑bha, kö ‑wa ‑nu 'tɔ bhɔ, kö 'gügbɩɩdhɛ ‑yö kë‑ ‑nu ‑gɔ ‑todhʋ̈ 'ka.»
REV 5:14 ꞊Waa‑ "tan bha‑ bho "dhʋ̈, 'yö pë "yaandhe ‑yiisiö bha 'wo‑ ‑yɔ bɔ 'wo‑ pö: «Kö ‑yö kë "dhʋ̈ bha 'aa ‑yö kë.» 'Yö mɛ zizi ‑nu bha 'wo zun wo kpiö 'gü, 'yö 'wo‑ ‑dhɔkë.
REV 6:1 A ‑to ‑dhɛ bha‑ ‑ga ‑dhɛ 'gü, 'a dho "kan n ‑ta kö "bhlaanë bha ꞊ya 'sëëdhɛ "dhiʋ̈ ‑ta 'ka ‑pë "saɔplɛ bha‑ ‑blɛɛsü "pʋ. 'A dho n "tʋ 'to kö pë "yaandhe ‑yiisiö bha‑ do ‑ya pö sië ‑wʋ "gbɩɩ‑ 'ka ꞊dhɛ dha 'ö ‑wɩ ‑a 'dhö 'ö‑ pö: «‑Bhö nu!»
REV 6:2 'A dho "kan n ‑ta 'zü kö ꞊soo "puu do ꞊ya ‑wo, kö mɛ do ‑ya ‑ta, "kɛɛ kö 'mɛ 'ö‑ ‑ta bha 'saɔ‑ ‑ya ꞊kwɛɛ‑, 'yö 'wo mɛ ‑dhɛ 'faan‑ ‑ya ‑a ‑gɔ ‑bha, 'yö dho ꞊dhɛ "kplëë 'kpii‑ 'ö 'dho sië ‑gblü ‑bha ‑a 'dhö, kö ‑yö "sɛ kun ‑gblü 'ka.
REV 6:3 'Yö "bhlaanë bha 'ö 'pë bha‑ ꞊plɛ ‑naa ‑pʋ. 'Yö pë "yaandhe ‑yiisiö bha‑ ꞊plɛ ‑naa ‑ya pö: «‑Bhö nu!»
REV 6:4 'A dho ‑dhɛ ‑ga 'zü kö ꞊soo ‑zaɔndhö do 'ö ꞊yɔɔn ꞊wɛnng ‑sü "blɛɛn‑ 'ka bha ‑yö nu sië. 'Mɛ 'ö gun‑ ‑ta bha 'yö 'wo‑ gba ‑gblü ‑da ‑faan 'ka kö ‑ya ‑da "kpʋng ꞊taa, kö mɛ "bhɩɩ‑ ‑nu ‑wo wo 'ko zë. 'Yö 'wo dho 'wo‑ gba ‑siangga 'kpii‑ do 'ka.
REV 6:5 'Yö "bhlaanë bha 'ö 'pë bha‑ ‑yaaga ‑naa ‑pʋ, 'yö pë "yaandhe bha‑ ‑yaaga ‑naa ‑ya pö: «‑Bhö nu!» 'Yö 'a ꞊soo tii do yö kö ‑yö nu sië. Kö 'mɛ 'ö‑ ‑ta bha pë ‑dan 'ka ‑tɛa do ‑ya ꞊kwɛɛ‑.
REV 6:6 'Yö 'a ‑wʋ do 'bha ma kö ‑yö 'go sië pë "yaandhe ‑yiisiö bha‑ ‑nu kpö 'gü 'ö‑ pö "gbɩɩ‑ 'ka 'ö‑ pö: «‑Bhö ‑mlüga waa‑ "klëënga bha‑ ‑nu dan kö 'i‑ "dhɔɔ ‑siö. ‑Wo ‑mlü 'tɛa‑ ‑yan do 'dhɔ 'wëëga 'wo ‑dhɛkpaɔyi do ‑yë ꞊saa bho‑ 'ka bha‑ 'ka, kö ‑wo "klëën 'tɛa‑ ‑yan ‑yaaga 'dhɔ "dhʋ̈ 'pö, "kɛɛ 'bha 'dho "yɔn waa‑ we ‑zë ‑a ‑nu "dhɔɔ ‑siö.»
REV 6:7 'Yö "bhlaanë bha 'ö 'pë bha‑ ‑yiisiö ‑naa ‑pʋ. 'Yö pë "yaandhe bha‑ ‑yiisiö ‑naa ‑ya pö: «‑Bhö nu!»
REV 6:8 'A dho ‑dhɛ ‑ga kö ꞊soo do 'ö‑ kwi‑ ‑kë ꞊dhɛ gamɛ kwi 'dhö bha ‑yö nu sië, 'mɛ 'ö ‑ya ‑sü 'ka‑ ‑ta bha ‑wa ‑dhɛ ‑ga, kö ꞊geebɔɔdhɛ ‑ya ꞊keng‑. 'Yö 'wo "sɛ ‑pɛ 'gü ‑yiisiö, 'yö 'wo‑ "pɛn do nu‑ ‑dhɛ, kö ‑wa 'gü ‑mɛ ‑nu ꞊gban ‑gɔ ‑ya ‑siang ‑ta, kö ‑wa mɛ 'bha ‑nu zë din‑ 'ka, kö ‑wo "yua ‑da mɛ 'bha ‑nu 'gü kö ‑ya ‑nu zë, kö ‑wa mɛ 'bha ‑nu "dhiʋ̈ dɔ "bü ‑wü ‑nu ‑gɔ kö ‑wa ‑nu zë 'pö.
REV 6:9 'Yö "bhlaanë bha 'ö 'pë bha‑ "sɔɔdhu ‑naa ‑pʋ. 'A dho ‑dhɛ ‑ga kö 'mɛ 'wii 'go wo ‑wʋ ‑ta, 'ö 'wo‑ ‑nu zë ‑a ‑nu ‑bha ‑kë Atanna "sɛɛ‑ 'ka ‑sü ‑wɔn ꞊në‑ 'gü bha‑ ‑nu 'nii‑ ‑yö ꞊loo sië "saa‑ ‑bho ‑ta ‑gwë "klʋ 'wo‑ ‑kan mü bha‑ ꞊wlöö.
REV 6:10 Kö ‑wo "gbla sië "gbɩɩ‑ 'ka 'wo‑ pö: «Yi Dëmɛ 'i "slʋ̈ʋ̈slʋ̈ 'ö 'bhaa ꞊sua kë, ‑më yi ꞊në 'i dɔ sië‑ ‑gɔ ꞊tɔn kö 'i 'wɔn wɔ "kpʋngtaamɛ ‑nu ‑ta, kö 'i bhlɔɔ bho yi 'gü yi zë 'wo‑ wo bha‑ ‑wɔn 'gü?»
REV 6:11 'Yö 'wo ‑tɔyang "puu ‑da 'mɛ 'wo bha‑ ꞊gban ‑bha 'yö 'wo ‑kɔ ‑ya ‑nu zuë" ‑ta 'wo‑ pö ‑wo wo zuë" 'në 'dɛdɛ ‑da mü kö ‑wa ‑nu dheebhang ‑nu, ‑a ‑nu Atanna ‑bha yëkëyɔɔ ‑nu ‑kpɛa 'wo to ‑a ‑nu zë 'pö ꞊dhɛ‑ ‑nu 'dhö, kö‑ ‑nu "dhiʋ̈ ‑yö pa.
REV 6:12 ꞊Dhɛ 'ö ꞊ya kë "dhʋ̈, 'yö 'sëëdhɛ "dhiʋ̈ ‑ta 'ka ‑pë bha‑ "saɔdo ‑naa 'ö to bha 'yö "bhlaanë bha 'ö‑ ‑pʋ. 'Yö "sɛ 'dhö ‑ya ꞊zii ‑sü ‑bha, 'yö 'yënng‑ ‑gɔ ‑yö ꞊tröö ‑blünblündhö ꞊dhɛ ꞊gla "yi 'dhö, kö "su ‑zë ꞊ya kë ꞊dhɛ ꞊yɔɔn 'dhö.
REV 6:13 'Yö "susëngga ‑nu 'wo ‑ya 'go ‑sü ‑bha dhang‑ ‑bha 'wo ꞊wɛnng ‑blubludhö ꞊dhɛ mangglo ‑kpo ‑nu 'wo ꞊wɛnng kö "tɛɛ "gbɩɩ‑ ꞊ya ziö bha‑ 'dhö.
REV 6:14 'Yö dhang‑ ‑yö dho ꞊dhɛng ‑sü 'ka ꞊dhɛ ‑kɔ 'wo sɛɛ" ‑be ‑kë 'ka ꞊sië bha‑ 'dhö, kö ‑tɔn ‑nu waa‑ "sɛ ‑nu 'wo "yi ꞊zinng 'gü ‑dhɛ ‑nu 'gü ‑wo 'dho sië ‑go "gblʋʋ ‑sü 'ka 'pö.
REV 6:15 "Tʋ̈ng 'ö kë sië‑ 'ka "dhʋ̈ bha kö ‑gblüdë ‑nu 'wo "kpʋng ꞊taa oo, "sɛgɔ "dhiʋ̈ ‑mɛ ‑nu oo, "sɔdha ‑gɔmɛ "gblʋ̈gblʋ̈ ‑nu oo, ꞊naɔmɛ ‑nu oo, 'gügbɩɩdhɛ 'dhö mɛ "pɛpɛ 'ö‑ ‑gɔ waa‑ mɛ "pɛpɛ ‑kpɛa 'wo to, ꞊dhuëng ‑nu, waa‑ 'wlɔɔ‑ ‑nu 'wo 'dhö kö ‑a ‑nu ꞊gban ‑wo wo ‑gblɛn 'kpɔ sië ‑tɔn ꞊zinng 'gü ‑dhɛ ‑nu waa‑ ‑gwë ‑yɛ 'gü ‑dhɛ ‑nu 'gü,
REV 6:16 'wo‑ pö ‑tɔn ‑nu waa‑ ‑gwë 'gbɔng ‑nu ‑dhɛ ‑ka nu kö 'ka kpa yi ‑ta kö 'mɛ 'ö ‑ya 'sü 'ka ‑blüdëdhɛ ‑gbloo 'kpiisü ‑ta bha 'ya 'dho yi yö 'ö nëng 'ö "bhlaanë yöö‑ ‑ya yi ‑bha bha 'ö yi ꞊slɔɔ.
REV 6:17 ‑A pö 'wo‑ wo "dhʋ̈ bha‑ 'klɔɔ‑ ‑mü ꞊dhɛ kö "bhlaanë waa‑ Dë bha‑ ‑nu ‑bha ‑mawɔnsiödhe "tʋ̈ng "gbɩɩ‑ bha ꞊ya ꞊loo, kö ‑dɔ "tɛɛ ‑gɔ ‑mɛ 'yaa 'dhö.
REV 7:1 ꞊Dhɛ 'ö 'wɔn bha ꞊ya bo ‑kë "dhʋ̈ ‑sü 'ka, 'a dho ‑dhɛ ‑ga, kö Atanna ‑bha "kië ‑yiisiö ‑wo dɔ sië "sɛ "gwënng 'gü ‑dhɛ ‑yiisiö bha‑ ꞊gban 'gü, kö "tɛɛ ‑gɔ ‑yiisiö 'wo "kpʋng ꞊taa bha ꞊waa‑ 'kun kö ‑ya ‑nu ‑gɔ, Kë "dhʋ̈ kö "tɛɛ 'ya 'dho ziö "kpʋng ꞊taa, "ɛɛn ꞊weeyi ‑ta ‑dhɛ "ɛɛn "dhü ‑zian 'bha ‑bha tongtongdhö.
REV 7:2 'Yö 'a‑ ‑bha "kië "wɛɛ do 'bha yö kö ‑yö 'go sië 'yënng‑ ‑wo ‑zian 'ka 'ö nu "kɛɛ kö Atanna "yaandhe bha‑ ‑bha 'klëë‑ ‑kpɔ pë ‑bha ‑pë ‑ya ꞊kwɛɛ‑. 'Yö‑ pö Atanna ‑bha "kië ‑nu 'ö "sɛ waa‑ ꞊weeyi ‑nu 'gü see‑ ‑faan nu‑ ‑nu ‑dhɛ bha‑ ‑nu ‑dhɛ "gbɩɩ‑ 'ka 'ö‑ pö:
REV 7:3 «'Ka 'dho 'wɔn yaa 'bha kë "kpʋngtaadhɛ "ɛɛn ꞊weeyi waa‑ "dhü ‑nu 'bha 'ka ꞊kö kö 'yi 'klëë‑ 'kpɔ mɛ "pɛpɛ 'wo kwa ‑bha Atanna ‑bha gwëëzë ‑nu 'ka Izraɛdhö ‑sɛ 'gü bha‑ ‑nu ‑kpong 'gü ‑dhɛ ‑bha.»
REV 7:4 ꞊Dhɛ 'ö ꞊ya kë "dhʋ̈, 'yö 'mɛ 'wo 'klëë‑ kpɔ‑ ‑nu ‑bha "dhʋ̈ bha 'wo‑ ‑nu "dhi pö n ‑dhɛ. 'Yö 'wo ‑kë mɛ "gblü këng do ‑kɔ ‑yiisiö waa‑ mɛ "gblü ‑yiisiö. 'Mɛ 'wo go Izraɛdhö ‑sɛ ‑todhʋ̈sü 'gü ꞊në 'wo gun bha.
REV 7:5 ‑A mɛ "gblü ‑kaɔng do ga ꞊plɛ‑ ‑go Zuda ‑kɔdhi 'gü, 'yö‑ ‑kaɔng do ga ꞊plɛ ‑yö go Dhubɛn ‑gɔ 'kɔɔdhö, 'yö‑ mɛ "gblü ‑kaɔng do ga ꞊plɛ 'bha ‑yö go Gadö ‑kɔ 'gü,
REV 7:6 'yö‑ ‑kaɔng do ga ꞊plɛ 'bha ‑yö go Asɛɛ ‑gɔ 'kɔɔdhö, 'yö‑ ‑kaɔng do ga ꞊plɛ ‑yö go Nɛfutadhi ‑gɔ 'kɔɔdhö, 'yö‑ ‑kaɔng do ga ꞊plɛ 'bha ‑yö go Manase ‑gɔ 'kɔɔdhö,
REV 7:7 'yö‑ ‑kaɔng do ga ꞊plɛ 'bha ‑yö go Simeɔn ‑kɔ 'gü, 'yö‑ 'bha ‑yö go "dhʋ̈ Dhevi ‑gɔ 'kɔɔdhö, 'yö‑ 'bha ‑yö go "dhʋ̈ Isakaa ‑gɔ 'kɔɔdhö,
REV 7:8 'yö‑ 'bha ‑yö go "dhʋ̈ Zabidhɔng ‑gɔ 'kɔɔdhö, 'yö‑ 'bha ‑yö go "dhʋ̈ Zosɛfu ‑gɔ 'kɔɔdhö, 'yö‑ 'bha ‑yö go "dhʋ̈ Bɛnngzamɛ ‑gɔ 'kɔɔdhö, 'yö 'wo 'klëë‑ kpɔ‑ ‑nu ‑bha.
REV 7:9 ꞊Dhɛ 'ö ꞊ya kë "dhʋ̈, a ‑dho ‑dhɛ ‑ga 'zü kö mɛ kpö ‑ziisü 'ö mɛ 'bha 'yaa ꞊mɔɔ‑ dhʋng ‑sü ‑bha, 'ö go "sɛgɔ 'do 'do ꞊gban 'gü, "siya suu 'do 'do ꞊gban 'gü, mɛ suu ꞊gban "pɛpɛ 'do 'do, waa‑ ‑wʋ suu 'do 'do ꞊gban pö ‑mɛ ‑nu bha ‑wo dɔ sië ‑gbloo 'kpiisü bha waa‑ "bhlaanë bha‑ ‑nu wëëdhö, kö sɔ "puu ‑ya ‑nu ‑bha, kö "sɔɔndhɛ ‑ya ‑nu ꞊kwɛɛ‑.
REV 7:10 Kö ‑wo "gbla sië "gbɩɩ‑ 'ka 'wo‑ pö: «Kwa ‑bha dha ‑sü ‑yö ‑ga kwa ‑bha Atanna 'ö ‑ya ‑sü 'ka ö ‑bha ‑blüdëdhɛ ‑gbloo ‑ta bha waa‑ "bhlaanë bha ꞊në‑ ‑nu 'gü.»
REV 7:11 Kö Atanna ‑bha "kië ‑nu "pɛpɛ 'wo 'dhö, ꞊wa ꞊klëën‑ ‑bha ‑gbloo bha waa‑ mɛ zizi ‑nu bha waa‑ pë "yaandhe ‑yiisiö bha‑ ‑nu ‑zü. 'Yö 'wo zun wo kpiö 'gü, kö ‑wo Atanna ‑dhɔkë sië
REV 7:12 'wo‑ pö: «‑Yö kë "dhʋ̈, yi Dë Atanna, bhi ꞊në 'i 'dhö, ‑a ‑dhɛa ‑bha ꞊dhɛ mɛ ꞊gban ‑wo bhi ꞊në i ‑dhiang ‑së zë, kö ‑wo i 'tɔ bhɔ, kö ‑wo i nuɛ" bho, kö ‑wo ꞊bhlëë ‑ya i ‑bha ‑kpɛawo. ‑A ‑gɛn ‑mü ꞊dhɛ 'wɔndɔdhe waa‑ 'gügbɩɩdhɛ waa‑ faan ‑wo bhi ꞊në i ‑gɔ 'ö‑ zübhoyi 'yaa 'dhö 'ö‑ "dhiʋ̈todhɛ 'yaa 'dhö. Kö ‑yö kë "dhʋ̈ bha 'aa ‑yö kë!»
REV 7:13 ꞊Dhɛ 'ö ꞊ya kë "dhʋ̈, 'yö mɛ zizi ‑nu bha‑ mɛ do ‑yö n dhɛɛ" kpɔ 'ö‑ pö: «'Mɛ 'ö sɔ "puu 'dhö‑ ‑nu ‑bha bha de‑ ‑nu ‑mü "ɛɛn ‑wo ‑go 'mɛ?»
REV 7:14 'Yö 'a‑ ‑yɔ bɔ‑ ‑gɔ 'a‑ pö: «Bhi ꞊në 'i‑ ‑nu dɔ, 'i‑ ‑nu 'godhɛ ‑nu ꞊gban dɔ ‑wa n Dëmɛ.» ꞊Dhɛ 'ö ꞊ya kë "dhʋ̈ 'yö‑ pö n ‑dhɛ: «'Mɛ 'ö 'wɔn "gbɩɩ‑ ꞊gban suu 'do 'do ‑yö ‑wɔ ‑nu ‑ta Atanna ‑wɔn 'gü bha ꞊në 'wo bha. ‑A ‑nu ‑bha ‑tɔyang bha‑ "zu ꞊në 'wo‑ wo "bhlaanë ꞊yɔɔn 'ka 'yö "puu 'ka bha.
REV 7:15 'Wɔn 'ö‑ ‑wɔn 'gü 'yö 'wo dɔ sië Atanna wëëdhö yi ꞊gban 'ka ‑a ‑bha ‑blüdëdhɛ ‑gbloo wëëdhö, 'yö 'wo‑ ‑dhɔkë sië‑ ‑dhɔkëgükɔ 'gü bha 'yö bha. 'Mɛ 'ö ‑ya ‑sü 'ka ö ‑bha ‑blüdëdhɛ ‑gbloo ‑ta bha ꞊në dho‑ ‑nu ‑maa kë.
REV 7:16 Din‑ 'yii 'dho zun‑ ‑nu ‑bha 'zü, "ɛɛn "yi mü ‑dhɔ 'yii 'dho‑ ‑nu kë 'zü, "ɛɛn 'yënng‑, "ɛɛn ‑yua mɛ ‑bha ‑pë 'bha ‑zian 'yii 'dho "yua‑ ‑nu ‑bha 'zü tongtongdhö.
REV 7:17 ‑A ‑gɛn ‑mü ꞊dhɛ "bhlaanë 'ö dɔ sië 'mɛ 'ö ‑gbloo 'kpiisü ‑ta bha‑ wëëdhɛ ꞊dede 'gü bha ꞊në dho‑ ‑nu ‑maa kë ꞊dhɛ ‑tuʋ̈ ‑maakëmɛ 'dhö, 'yö dho‑ ‑nu 'ka "yigɔ ‑nu 'ö 'waa "bhʋ̈ʋ̈, "kɛɛ 'ö ꞊sii 'ö 'yaa yën ‑a ‑kë mɛ ‑dhɛ bha‑ ‑dhɛ 'gü. 'Yö Atanna ‑dɩ 'pö 'ö‑ ‑nu "yanyi ꞊gban bho‑ ‑nu "yan "dhiʋ̈ "pɛɛpɛdhö.
REV 8:1 ꞊Dhɛ 'ö‑ 'dhɛ bha ꞊ya kë "dhʋ̈, 'yö "bhlaanë bha 'ö 'klëë‑ ‑kpɔ 'sëëdhɛ ‑bha ‑pë bha‑ "saɔplɛ ‑naa bha‑ ‑pʋ. ꞊Dhɛ 'ö ꞊yaa‑ "pʋ, 'yö ‑dhɛa ‑yö ga dhang‑ 'gü dingdhö "tʋ̈ng 'ö ꞊mɔɔ "tʋ̈ng do ‑pɛ 'gü ‑sü ‑bha bha‑ 'ka.
REV 8:2 ꞊Dhɛ 'ö ꞊ya kë "dhʋ̈, 'a dho ‑dhɛ ‑ga, kö ꞊wa "truu "saɔplɛ 'gü ꞊gblü Atanna ‑bha "kië "saɔplɛ 'wo dɔ sië‑ wëëdhö bha‑ ‑nu ‑ta.
REV 8:3 Kö‑ ‑bha "kië ‑nu bha‑ "wɛɛ do 'bha ꞊ya nu ꞊ya dɔ ‑dhɔkëtagwë "klʋ bha‑ "sɔɔ, kö pë "fië 'wo ‑dhasiklɔɔ ‑gʋ̈ 'gü bha‑ do 'ö "sënng 'ka ꞊ya ꞊kwɛɛ‑. 'Yö 'wo ‑dhasiklɔɔ 'dhɛ 'wo‑ ‑gʋ̈ bha‑ 'gbɛ ꞊dede nu‑ ‑dhɛ kö ‑ya "gʋ̈ ‑gwë "klʋ 'ö "sënng 'ka bha‑ ‑ta, kö ‑yö 'mɛ 'wo bɔ Yesu 'ka bha‑ ‑nu ‑bha ‑bhɛa Atanna ‑dhɛ ‑wʋ ‑nu bha‑ ‑nu "dhiʋ̈ ꞊loo 'mɛ 'ö ‑ya ‑sü 'ka ‑gbloo 'kpiisü ‑ta bha‑ ‑bha.
REV 8:4 'Yö ‑ya 'pë bha‑ "gʋ̈ ‑sü ‑bha, 'yö‑ "gbiën ‑së 'ö go‑ ꞊kwɛɛ bha 'ö ‑ya Atanna ‑gɔ waa‑ Yesu ‑bha mɛ ‑nu ‑bha ‑bhɛa Atanna ‑dhɛ ‑wʋ ‑nu 'ö‑ "dhiʋ̈ ꞊loo sië‑ ‑bha bha‑ 'dhö.
REV 8:5 'Yö Atanna ‑bha "kië bha 'ö ‑dhasiklɔɔ ‑gʋ̈ 'gü ‑pë bha‑ pa pɛng 'ö go "saa‑ ‑bho ‑ta ‑gwë "klʋ bha‑ ‑ta bha‑ 'ka, 'yö‑ ꞊wɛnng "kpʋng ꞊taa. 'Yö dha ‑yö ‑ya "wɩ ‑sü ‑bha, 'yö wɔɔdhö 'dhö ‑ya "wɩ ‑sü ‑bha "kpʋngtaadhɛ ꞊gban 'gü, kö dha ‑yö "yan 'kun sië, kö "sɛ ‑yö ꞊zii sië.
REV 8:6 'Yö Atanna ‑bha "kië "saɔplɛ 'ö "truu ‑yö gun‑ ‑nu ‑gɔ bha 'wo ‑ya wo baa‑ 'sü bha kö 'wo "truu bha‑ ‑piö. 1
REV 8:7 'Yö‑ mɛ ‑blɛɛsü ‑yö ö ‑bha ‑piö. 'Yö mëngga waa‑ pɛng waa‑ ꞊yɔɔn ‑nu ‑kaan "kwëë ‑sü bha 'wo ‑ya ꞊wɛnng ‑sü ‑bha "kpʋng ꞊taa. 'Yö "kpʋngtaadhɛ ‑yö 'pɛ 'gü ‑yaaga, 'yö‑ "pɛan do ‑yö ‑gʋ̈, 'yö "dhü ‑nu ‑dɩ 'pö‑ ‑nu ‑bha ‑yö ‑kë "dhʋ̈, 'yö blëë "dhɛ ꞊gban ‑yö ‑gʋ̈.
REV 8:8 'Yö Atanna ‑bha "kië ‑nu bha‑ mɛ ꞊plɛ ‑naa ‑yö ö ‑bha ‑piö. 'Yö 'wo ‑tɔn suu bha 'ö ꞊dhɛ ꞊wa pɛng ‑da pë 'ka bha‑ ‑zuö ꞊weeyi ꞊bhaa. 'Yö ꞊weeyi ‑yö ‑pɛ 'gü ‑yaaga, 'yö‑ "pɛan do ‑yö ‑gla ꞊yɔɔn 'gü,
REV 8:9 'yö pë "pɛpɛ 'ö Atanna ‑ya ‑da, 'ö "yaandhe 'ka ꞊weeyi ꞊bhaa, 'yö ‑pɛ 'gü ‑yaaga, 'yö‑ "pɛan do ‑yö ga, 'yö "yitagɔ "pɛpɛ 'ö gun ꞊weeyi ‑ta 'wo ‑pɛ 'gü ‑yaaga, 'yö‑ "pɛan do ‑yö ꞊see.
REV 8:10 'Yö Atanna ‑bha "kië ‑nu bha‑ mɛ ‑yaaga ‑naa ‑yö ö ‑bha ‑piö, 'yö "susëngga 'kpii‑ do 'bha 'ö gun 'pu sië ꞊dhɛ "sɔng 'dhö bha 'ö go dhang‑ ‑bha 'ö ‑pö. 'Yö ‑pö ꞊gwaan "pɛpɛ 'wo "kpʋng ꞊taa ‑a ‑nu ‑pɛ 'gü ‑yaaga ‑sü ‑yaaga ‑naa ‑ta waa‑ "yi 'në sɛɛnnë ‑nu 'dhö.
REV 8:11 ‑A "susëngga bha‑ 'tɔ 'ö gun 'yö 'wo‑ ‑dhɛ «pë "gügüsü». 'Yö "yi "pɛpɛ 'ö "susëngga bha ö ‑pö ꞊bhaa "dhʋ̈ bha 'wo ‑kë "gügüsü, 'yö mɛ 'gbɛ ꞊dede 'wo "yi ‑nu bha‑ mü bha 'wo ga.
REV 8:12 'Yö Atanna ‑bha "kië ‑nu bha‑ mɛ ‑yiisiö ‑naa ‑yö ö ‑bha "truu bha‑ ‑piö. 'Yö 'yënng‑ oo, "su oo, ‑a sëng' ‑nu oo, ‑a ‑nu 'bhü ‑sü bha 'ö ‑pɛ 'gü ‑yaaga, 'yö‑ "pɛan do ‑yö bo 'bhü ‑sü 'ka. 'Yö 'yënng‑ 'gü ‑yö ‑pɛ 'gü 'pö ‑yaaga, 'yö‑ "pɛan do ‑yö ‑gla gbeng 'gü, 'yö gbeng 'gü ‑yö ‑pɛ 'gü ‑yaaga, 'yö‑ "pɛan do ‑yö ‑gla 'yënng‑ 'gü 'gü.
REV 8:13 A ‑to ‑a ‑dhɛ ‑ga ‑dhɛ 'gü 'yö n "tʋ ‑yö ‑da "gblëë‑ do ‑wlö ‑vin 'gü kö ‑yö ziö sië, kö ꞊ya dhang‑ 'kun "kɛɛ kö ‑ya pö sië "gbɩɩ‑ 'ka 'ö‑ pö: «‑Wëëwɔn ‑wa! ‑Wëëwɔn ‑wa! Atanna ‑bha "kië ‑yaaga 'dhɛ 'wo to ya ꞊wa wo ‑bha "truu ya‑ ‑piö ‑yö ‑dho kë ‑wëësü "kpʋngtaamɛ ‑nu ‑gɔ ꞊tɔn ‑kɛɛ!»
REV 9:1 ꞊Dhɛ 'ö ꞊ya kë "dhʋ̈, 'yö Atanna ‑bha "kië ‑nu bha‑ mɛ "sɔɔdhu ‑naa ‑yö ö ‑bha ‑piö. 'Yö 'a "susëngga do yö kö ꞊ya 'go dhang‑ 'gü ꞊ya ‑pö "kpʋng ꞊taa. 'A 'dho ‑dhɛ ‑ga kö ‑klɔng züziösü bha ꞊waa‑ ‑dhaklɩ nu "susëngga bha‑ ‑dhɛ.
REV 9:2 'Yö "susëngga bha 'ö ‑klɔng bha‑ "dhi ‑pʋ, 'yö pɛng "gbiën ‑yö ‑ya 'go ‑sü ‑bha ‑a 'gü 'bu 'bu 'budhö ꞊dhɛ "gɛa 'kɔ pɛng "gbiën 'dhö, 'yö 'yënng‑ ‑gɔ waa‑ 'tëng‑ ‑ta ‑dhɛ ꞊gban ‑wo ꞊tröö tii 'ka mlumɛngdhö.
REV 9:3 'Yö ‑kpaa ‑nu 'wo ‑ya 'go ‑sü ‑bha pɛng "gbiën bha‑ 'gü 'yö 'wo ‑pɛn "kpʋng ꞊taa. 'Yö 'wo mɛ ‑wëë ‑kë wo ‑faan 'ö gɛan"‑ ‑nu ‑gɔ kö ꞊wa mɛ 'kun bha‑ nu‑ ‑nu ‑dhɛ.
REV 9:4 'Yö 'wo ‑dhio dɔ ‑kpaa ‑nu bha‑ ‑nu ‑ta 'wo‑ pö 'wa 'dho 'wɔn bho blëë "dhɛ ‑nu waa‑ "dhü ‑nu "ɛɛn tapë ‑nu ‑zë 'bha 'gü, "kɛɛ ‑wo mɛ "pɛpɛ 'ö Atanna ‑bha 'klëë‑ 'yaa 'kpɔ ‑sü 'ka‑ ‑nu ‑bha ‑a ‑nu ‑kpong "dhiʋ̈ bha ꞊në‑ ‑nu ‑wëë ‑kë "dhiʋ̈ bho.
REV 9:5 'Yö 'wo‑ pö ‑kpaa ‑nu bha‑ ‑nu ‑dhɛ ꞊dhɛ 'wa 'dho 'mɛ 'wo "dhʋ̈ bha‑ 'bha zë tongtongdhö, "kɛɛ ‑wa ‑nu ‑wëë ‑kë ꞊në‑ bho "su "sɔɔdhu 'ka. ‑Kpaa ‑nu bha‑ ‑nu ‑bha mɛ ‑wëë ‑kë "dhiʋ̈ bho ‑sü ‑yö ‑kë ꞊dhɛ gɛan" ‑bha mɛ 'kun ‑sü 'ö ‑kë ‑kɔ 'ö‑ ‑bha bha‑ 'dhö.
REV 9:6 "Su "sɔɔdhu 'ö ‑kpaa ‑nu bha 'wo dho mɛ "bhɩɩ‑ ‑nu ‑wëë ‑kë wo‑ ‑ka bha mɛ "bhɩɩ‑ ‑nu ‑dho ‑a "slë mɔɔ‑ kö 'wo ga, 'ö 'wo ‑ya ga ‑dhɔ 'ka, "kɛɛ 'wii 'dho ga, ga‑ ‑dho ꞊dua‑ ‑nu ‑gɔ 'ö dho‑ ‑nu 'ka ꞊gblɛɛn.
REV 9:7 ‑Kpaa ‑nu 'wo "dhʋ̈ bha ‑wo ꞊dhɛ ꞊soo 'ö ꞊waa‑ ‑ta 'kun kö ‑yö 'dho ‑gblü ‑bha ꞊në‑ 'dhö. Pë 'bha ‑ya ‑nu ‑gɔ ‑bha ꞊dhɛ "sënng 'faan‑ 'dhö, 'yö‑ ‑nu wëëdhɛ ‑yö bhɔ mɛ "bhɩɩ‑ ‑bha ‑bha.
REV 9:8 ‑A ‑nu ‑gɔ "dhɛ 'ö‑ ‑nu ‑gɔ ‑bha ‑yö ꞊dhɛ dhong ‑nu ‑bha 'dhö 'yö‑ ‑nu "sɔn ‑yö bhɔ laabhölaa ‑bha ‑bha.
REV 9:9 'Yö‑ ‑nu ‑kuutadhɛ ‑yö ‑kë ꞊dhɛ ‑piö "bhɛɛ 'wo ‑da mɛ ‑bha bha‑ 'dhö. 'Yö‑ ‑nu ‑wlö ‑vin ‑yö ‑kë ꞊dhɛ gɔ suu 'bha ‑nu 'ö ꞊soo ‑nu ‑wa ‑gan bha‑ kpö 'gbɛ 'ö 'dho sië ‑gblü bha ‑a 'dhö.
REV 9:10 ‑Kpaa ‑nu bha‑ ‑nu weng ‑yö ‑gun ꞊dhɛ ‑kɔ do 'ö gɛan" ‑nu ‑bha 'dhö‑ 'ka bha‑ 'dhö, 'yö‑ ‑nu "plüün ‑yö gun. ‑A ‑nu weng bha ꞊në 'wo gun mɛ ‑wëë ‑kë "dhiʋ̈ bho sië‑ 'ka "su "sɔɔdhu bha‑ 'ka.
REV 9:11 Sɔtraan ‑bha "kië 'ö ‑klɔng züziösü bha‑ ‑gɔ "dhiʋ̈ bha ꞊në gun ‑kpaa ‑nu bha‑ ‑nu ‑gɔmɛ 'ka 'ö gun‑ ‑nu ‑dhɛ "dhiʋ̈. "Yina 'ö "dhʋ̈ bha ‑wa ‑dhɛ Eblö ‑wʋ 'gü «Abadɔn». 'Yö 'wo‑ ‑dhɛ glɛkö ‑wʋ 'gü «Apodhiɔn» ‑a 'tɔ bha waa‑ pö "dhʋ̈ kö ‑wa pö «mɛgüseemɛ».
REV 9:12 Nëng bha‑ ‑gɔ ‑blɛɛsü ꞊në ꞊ya ziö bha, "kɛɛ ‑a ꞊plɛ ꞊në‑ nu ‑wɔn ꞊ya 'to‑ 'dhɛ bha‑ zian 'gü.
REV 9:13 'Yö Atanna ‑bha "kië ‑nu bha‑ mɛ "saɔdo ‑naa ‑yö "truu ‑piö. Maa n "tʋ 'to kö "saabhotagwë "klʋ 'ö Atanna ‑kuu "dhiʋ̈ bha ‑wʋ do 'bha ‑yö 'go sië‑ "gwënng ‑ta ‑dhɛ ‑yiisiö ꞊gban 'gü.
REV 9:14 'Yö ‑wʋ bha 'ö‑ pö Atanna ‑bha "kië "saɔdo ‑naa 'ö "truu bha 'ö gun‑ ‑gɔ bha‑ ‑dhɛ 'ö‑ pö: «‑Bhö "yina ‑yiisiö 'wo ‑kplü ‑sü 'ka lɔɔ" 'ka ꞊gwaanga 'wo‑ Öflatö ‑kë bha‑ "kpʋng "dhiʋ̈ bha‑ ‑nu "pʋ!»
REV 9:15 'Yö 'wo "yina ‑nu bha‑ ‑nu ‑pʋ. 'Sa ‑a ‑nu ‑kplü 'wo‑ wo mü bha ‑wa ‑nu ‑kplü "dhʋ̈ kö "tʋ̈ng ꞊dede bha ꞊në ꞊ya ꞊loo ‑dhɛkpaɔyi bha‑ 'ka, "su bha‑ 'gü, ‑kwɛ bha‑ ‑ta, kö ‑wa "pʋ, kë "dhʋ̈ kö ‑wo "kpʋngtaamɛ ‑nu "pɛ‑ 'gü ‑yaaga, kö ‑wa "pɛando ꞊gban zë.
REV 9:16 ꞊Dhɛ 'ö‑ 'dhɛ bha ꞊ya kë "dhʋ̈, 'yö n "yan 'gü 'dhö ‑da 'zü ‑deewo, 'yö "sɔdha ‑nu 'ö woo 'dho ‑gblü bha‑ ‑bha 'ö 'wo ꞊soo ‑ta bha 'yö 'a‑ ‑nu yö. 'Yö 'wo‑ ‑nu "dhi pö n ‑dhɛ. ‑wo ‑gun mɛ "gblü mɛɛ këng ꞊plɛ.
REV 9:17 ‑Kɔ 'a‑ ‑nu yö‑ 'ka ‑kaa ‑ga 'ö ya: "Sɔdha ‑nu 'wo gun ꞊soo ‑nu bha‑ ‑nu ‑ta bha‑ ‑nu ‑bha ‑piö "bhɛɛ ‑nu 'wo gun‑ ‑nu ‑bha bha‑ 'bhü‑ ‑gun dɔ sië ꞊dhɛ pɛng 'nɛɛ‑ 'dhö, 'yö‑ 'bha ‑nu "yan ‑yö ‑kë ꞊dhɛ sɔ 'ö ꞊waa‑ ‑da ꞊gla 'gü ‑a "yan 'dhö, 'yö‑ 'bha ‑nu "yan ‑yö gun ꞊dhɛ 'song‑ "yi 'dhö. 'Yö‑ ‑nu ‑bha ꞊soo ‑nu bha‑ ‑nu ‑gɔ ‑yö gun ꞊dhɛ laabhölaa ‑gɔ 'dhö. 'Yö pɛng ‑nu oo, pɛng "gbiën ‑nu waa‑ blɔɔn" ‑nu 'wo gun 'go sië‑ ‑nu "dhi.
REV 9:18 'Yö pë ‑gaɔ ‑yaaga 'ö ‑kë pɛng bha waa‑ "gbiën waa‑ blɔɔn" 'ö gun 'go sië‑ ‑nu "dhi bha 'wo "kpʋngtaadhɛ ‑pɛ 'gü ‑yaaga ‑sü "pɛando ꞊gban 'gü see‑.
REV 9:19 ꞊Soo ‑nu bha‑ ‑nu ‑bha mɛ zë ‑faan 'ö gun‑ ‑nu 'gü bha ‑yö ‑gun ‑a ‑nu "dhi bha waa‑ ‑nu weng ꞊në‑ 'gü. ‑A ‑nu weng ‑nu bha ‑wo ꞊dhɛ ꞊mlɛɛ 'dhö, ‑a ‑nu ‑gɔ ‑yö ‑dhö 'pö 'wo mɛ ‑nu ‑wëë ‑kë "dhiʋ̈ bho‑ 'ka.
REV 9:20 "Kɛɛ 'wɔn ‑nu bha‑ ‑nu ‑kë "dhʋ̈ ‑sü ꞊gban waa‑ ‑bha ‑bha, "kpʋngtaamɛ ‑nu ‑kpɛa 'wo to 'ö 'wii ga 'wɔn bha‑ "dhiʋ̈ bha 'wii wo bo wo këwɔn yaa ‑nu 'ka tongtongdhö. ‑Wo ‑to woo‑ "yina ‑nu oo, woo‑ ‑dhɔkëpë ‑nu 'wo‑ ‑pë ‑kë "sënng 'ka bha oo, ‑a 'dhɛ ‑nu 'wo‑ ‑pë ‑kë 'wëë‑ ‑nu oo, zën ‑nu oo, ‑gwë ‑nu waa‑ "dhü ‑nu 'ka bha‑ ‑dhɔkë ‑sü ‑bha, "kɛɛ 'sa kö pë ‑nu bha 'waa ‑dhɛ yö, ‑a ‑nu "tʋ 'yaa 'wɔn ma, kö yöö ‑nu 'to‑ ‑nu "ta 'sü ‑sü ꞊në‑ ‑bha.
REV 9:21 'Wii wo bo‑ ‑nu ‑bha mɛ zë ‑sü ‑nu oo, "zʋʋdhɛ kë ‑sü ‑nu, ‑zua zë ‑sü ‑nu waa‑ ꞊kwaan‑ bho ‑sü ‑nu 'ka.
REV 10:1 ꞊Dhɛ 'ö ꞊ya kë "dhʋ̈, 'yö Atanna ‑bha "kië 'gü "gbɩɩ‑ do ‑yö go dhang‑ 'gü 'ö ꞊lɔɔ, kö "dhuu ‑yö ꞊klëën ‑sü 'ka‑ ‑zü, kö ꞊kpöng ‑yö ꞊klëën ‑sü 'ka‑ ‑gɔ ‑zü 'pö, kö‑ wɔ 'gü ‑yö 'bhü sië ꞊dhɛ 'yënng‑ 'dhö, kö‑ ‑gɛn 'ö‑ ꞊wlöö ‑a ꞊gban‑ kë sië ꞊dhɛ pɛng gɔn 'nɛɛ‑ 'ö këng ꞊sië 'dhö.
REV 10:2 Kö 'sëëdhɛ ‑be 'në 'dɛdɛ 'në do 'bha ‑yö "pʋ ‑sü 'ka kö ‑ya ꞊kwɛɛ‑. 'Yö Atanna ‑bha "kië bha 'ö ö ‑kɔ ‑së 'gü ‑gɛn ‑ya ꞊weeyi ‑ta, 'yö ö ꞊kwaa 'gü ‑gɛn ‑gban "kpʋng ꞊taa.
REV 10:3 'Yö ꞊gbla "gbɩɩ‑ 'ka ꞊dhɛ laabhölaa 'ö ‑wɩ ‑a 'dhö. ꞊Dhɛ 'ö bo "wɩ ‑sü 'ka "gbɩɩ‑ 'ka ꞊dhɛ ‑kɔ bha‑ 'dhö, 'yö dha ‑ya "dhiʋ̈ kun‑ ‑gɔ, 'yö ‑wɩ ‑ta ‑gɛn ‑yan 'ka "saɔplɛ.
REV 10:4 ꞊Dhɛ 'ö dha ‑yö bo "wɩ ‑sü 'ka, 'yö 'a‑ pö 'a 'wɔn 'ö ‑kë bha‑ ‑bɛn zë, "kɛɛ 'yö ‑wʋ do 'bha ‑yö bɔ dhang‑ 'gü 'ö‑ pö n ‑dhɛ: «"Wɩ 'ö dha ‑ya wo ‑gɛn ‑yan 'ka "saɔplɛ bha ‑wʋ 'ö‑ pö bha‑ 'to i ‑dɩ ‑gɔ, 'bha 'dho‑ ‑bɛn zë.»
REV 10:5 ꞊Dhɛ 'ö ꞊ya kë "dhʋ̈, 'yö Atanna ‑bha "kië 'dhɛ 'a‑ yö, 'ö‑ ‑gɛn do‑ gun ꞊weeyi ‑ta 'ö‑ do‑ gun "kpʋng ꞊taa bha 'ö ö ‑kɔ ‑së "dhiʋ̈ ꞊wlü dhang‑ 'gü,
REV 10:6 'Yö ‑sö ‑bhö Atanna 'ö 'dhö ‑todhʋ̈ 'ka 'ö‑ bhɔ ‑yi 'yaa 'dhö 'ö‑ ga ‑yi 'yaa 'dhö, 'ö yö ꞊në dhang‑ waa‑ 'gü ‑pë ‑nu, "sɛ waa‑ ‑tapë ‑nu, ꞊weeyi waa‑ ꞊bhaapë ‑nu ‑da bha‑ wëëdhö 'ö‑ pö: «Atanna ‑bha yi ‑kpɔ "kpʋngtaadhɛ ‑gɔ ‑sü ꞊ya bo,
REV 10:7 ‑a ‑gɛn ‑mü ꞊dhɛ ‑a ‑bha "kië "saɔplɛ ‑naa 'kö bha ‑ya zun ö ‑bha "truu bha‑ ‑piö ‑sü ‑zë ‑bha bhoo, Atanna yöö zun ꞊në‑ wo 'wɔn 'ö ‑bhɔ ‑zʋ "piʋ̈ yi 'bha ‑yi 'bha 'ka 'ö‑ to "dhiʋ̈ 'ö‑ ‑dhiang zë ö ‑wʋdhiʋ̈loomɛ ‑nu ‑dhɛ bha‑ kë ‑sü ‑bha.»
REV 10:8 ꞊Dhɛ 'ö ꞊ya kë "dhʋ̈, 'yö ‑wʋ do 'ö go dhang‑ 'gü 'a‑ ma ‑blɛɛsü bha 'ö‑ pö 'zü n ‑dhɛ 'ö‑ pö: «‑Bhö 'dho kö 'sëëdhɛ ‑be 'në 'ö "pʋ ‑sü 'ka 'ö Atanna ‑bha "kië 'ö dɔ ꞊weeyi waa‑ "sɛ ‑a ‑nu ‑ta bha‑ ꞊kwɛɛ‑ bha 'i‑ 'sü.»
REV 10:9 'Yö 'a dho Atanna ‑bha "kië bha‑ "piʋ̈, 'yö 'a‑ pö‑ ‑dhɛ ‑yö n gba 'sëëdhɛ bha‑ 'ka. 'Yö‑ pö n ‑dhɛ: «‑Bhö ‑a 'sü kö 'i‑ ‑bhö. ‑Yö ‑dho kë "gügüsü i "gblʋ̈ʋ̈dhɛ ‑zë 'gü, "kɛɛ ‑yö ‑dho kë i "dhi ꞊dhɛ "zɔyɔn 'dhö.»
REV 10:10 'Yö 'a n ‑kɔ ‑da 'sëëdhɛ ‑be 'në 'ö gun‑ ꞊kwɛɛ‑ bha‑ 'gü 'yö 'a‑ ‑bhö. 'Yö ‑kë n "dhi 'pö ꞊dhɛ "zɔyɔn 'dhö tɛan‑ 'ka, "kɛɛ ꞊dhɛ 'a bo‑ "mëng ‑sü 'ka, 'yö ‑kë "gügü ‑sü 'ka n ‑bong ‑zë 'gü.
REV 10:11 ꞊Dhɛ 'ö ꞊ya kë "dhʋ̈, 'yö 'wo‑ pö n ‑dhɛ: «‑A ‑dhɛa ‑bha ꞊dhɛ 'i ‑wʋ 'ö Atanna ‑ya dɔ i "dhi kö 'i‑ "dhiʋ̈ ꞊loo "sɛgɔ 'gbɛ, mɛ suu 'gbɛ, ‑wʋ suu 'gbɛ waa‑ ‑gblüdë 'gbɛ ‑bha bha 'i‑ pö ‑kɔ ‑dee do 'bha kë.»
REV 11:1 ꞊Dhɛ 'ö go‑ 'gü, 'yö 'wo n gba ‑kaa "dhü "kplü do 'bha ö ‑dhɛ ‑dan 'ka ‑pë 'ka, 'ö bhɔ "dhü ‑bha bha‑ 'ka 'yö 'wo‑ pö n ‑dhɛ: «‑Bhö "wlü kö 'i Atanna ‑dhɔkëgükɔ waa‑ ‑bha "saa‑ ‑bho ‑ta ‑gwë "klʋ bha‑ dan, kö 'mɛ 'wo‑ ‑dhɔkëmɛ ‑nu 'ka 'kɔ bha‑ 'gü bha 'i‑ ‑nu dhʋng.
REV 11:2 "Kɛɛ ‑a ‑bha 'kɔ ‑züdhɛ 'dhɛ 'ö "wasi 'dhö "kan ‑sü 'ka‑ ‑zü 'ö "kpɛnngdhö bha 'i yö ‑zë 'to "dhʋ̈, 'bha 'dho‑ dan, ‑a ‑gɛn ‑mü ꞊dhɛ ꞊wa yö ‑zë nu 'mɛ 'waa 'dhang bho Atanna "dhiʋ̈ 'wo go "sɛ "wɛɛ 'gü, 'ö 'wo dho ‑gblü ‑da Zedhizadhɛmö ‑pö ya‑ ‑ta bha‑ ‑nu ‑dhɛ kö ‑wa 'kun ‑gblü 'ka, kö ‑wo ‑ya ‑gɔ "dhiʋ̈ ‑kwɛ ‑yaaga waa‑ "su "saɔdo 'ka.
REV 11:3 'Yö 'a n ‑wʋdhiʋ̈loomɛ ‑nu ꞊plɛ bɔ kö ꞊wa bhɔɔ sɔ ‑da wo ‑bha, kö ‑wa ‑zɔn "kpʋngtaamɛ ‑nu ‑dhɛ ꞊dhɛ ‑a ‑dhɛa ‑bha ꞊dhɛ ‑wo ‑wëëwʋ 'kpɔ wo ‑dɩ ‑bha ‑a ‑nu këwɔn yaa ‑nu ‑wɔn 'gü kö ‑wo wo wɔ slëë‑ Atanna "piʋ̈, 'yö 'wo Atanna ‑wʋ "dhiʋ̈ ꞊loo‑ 'ka 'mɛ 'wo bha‑ ‑nu ‑bha ‑dhɛkpaɔyi "gblü do ö ‑ta ꞊plɛ waa‑ ‑dhɛkpaɔyi ‑kaɔng "saɔdo 'wo dho ‑ya 'ka 'pö‑ bha‑ ‑gɔ "dhiʋ̈ bha‑ 'ka.»
REV 11:4 "Dhü 'wo‑ odhivö ‑dhü ‑kë bha‑ ꞊plɛ waa‑ ‑dhangbha ꞊plɛ 'wo dɔ ‑sü 'ka Atanna 'ö "kpʋngtaadhɛ dëmɛ 'ka bha‑ ‑kuu "dhiʋ̈ bha ꞊në 'wo‑ "sɛɛ‑ ‑nu 'wo dho nu "dhʋ̈ bha‑ ‑nu 'ka.
REV 11:5 'Mɛ 'wo "dhʋ̈ bha mɛ 'bha ꞊yaa‑ pö 'ö 'wɔn yaa kë‑ ‑nu 'ka, 'yö pɛng ‑yö go‑ ‑nu "dhi 'yö‑ ‑nu 'yaɔ‑ ‑nu bha‑ ‑nu ‑bhö. ‑Kɔ 'ö 'mɛ 'wo dho‑ pö 'wo 'wɔn yaa kë‑ ‑nu 'ka, 'wo dho‑ ‑mɛ ‑nu zë‑ 'ka 'yö bha.
REV 11:6 ꞊Ya 'go yö ‑zë 'gü, mɛ ꞊plɛ bha ‑kɔ ‑kpa dhang‑ ‑bha "sɩ ‑ya ‑nu ‑dhɛ kö "tʋ̈ng 'wo Atanna ‑wʋ pö sië‑ 'ka bha dha 'ya 'dho ban‑ 'ka, 'ö "yi ‑gla ꞊yɔɔn 'gü "sɩ 'dhö‑ ‑nu ‑dhɛ 'pö, 'ö ‑ya mü 'zü 'ö 'wɔn suu "ʋʋ suu 'ö‑ ‑wɔ "kpʋngtaadhɛ ‑ta ‑dhɔ ꞊yaa‑ ‑nu kë, 'ö‑ kë "sɩ ‑yö ‑kë ‑nu ‑dhɛ kö ‑wa kë "dhʋ̈ "tʋ̈ng 'ö ‑dhi ‑nu ‑dhɛ ‑a 'ka.
REV 11:7 "Kɛɛ yi 'ö mɛ ꞊plɛ bha 'wo dho wo bo‑ 'ka ‑wʋ 'ö Atanna ‑ya kpɔ‑ ‑nu ‑bha bha‑ pö ‑sü 'ka ‑a 'ka bha, wü "dhabhli ‑sü 'bha 'ö go ‑klɔng züziösü bha‑ 'gü bha ‑yö ‑dho ‑gblü ‑da ‑a ‑nu ‑ta 'ö‑ ‑kɔ ‑yö ‑ziö ‑nu ‑gɔ 'ö‑ ‑nu zë,
REV 11:8 'ö‑ ‑nu ꞊gee ‑yö to ‑kpinng ‑ta 'pö‑ 'kpii‑ 'wo‑ ‑nu Dëmɛ dɔ "dhü ‑bha ‑a 'gü bha‑ 'gü. ‑A 'pödhɛ bha ꞊në 'wo‑ 'tɔ ‑da ꞊gla 'gü 'wo‑ ‑dhɛ Sodɔmö "ɛɛn Ezitö bha.
REV 11:9 Mɛ suu 'gbɛ, 'wo go "sɛgɔ 'gbɛ ꞊dede 'gü, 'ö 'wo ‑wʋ 'gbɛ ꞊dede pö, 'ö 'wo go "sɛ suu 'gbɛ ꞊dede 'gü ‑wo ‑dho ‑a ‑nu ꞊gee bha‑ ‑ga ‑dhɛkpaɔyi ‑yaaga waa‑ 'gbu 'ka kö 'waa "wɩ‑ ‑bha kö ‑wa ‑nu ꞊gee bho.
REV 11:10 Mɛ ꞊plɛ bha‑ ‑nu ga ‑wɔn ‑dho dhi "kpʋngtaamɛ ‑nu ‑dhɛ, 'ö‑ ‑nu ꞊nii ‑da ꞊dedewo 'ö 'wo pë ‑nu ꞊gbaɔ ‑zianwo wo 'ko ‑nu ‑gɔ ‑a ‑wɔn 'gü, ‑a ‑gɛn ‑mü ꞊dhɛ kö mɛ ꞊plɛ bha ꞊wa ꞊gbaɔn ꞊dedewo "kpʋngtaadhɛ ‑ta.
REV 11:11 "Kɛɛ ‑dhɛkpaɔyi ‑yaaga waa‑ 'gbu bha ꞊ya bho‑ "dhiʋ̈, "tɛɛ ‑sü ‑dee 'bha‑ ‑dho 'go Atanna "piʋ̈ 'ö ‑da 'zü‑ ‑nu 'gü 'wo ‑bö, 'yö mɛ "ʋʋ mɛ 'ö ꞊ya ö "yan ‑kpan ‑nu ‑bha, 'yö "suʋ̈ ‑ziisü ‑yö ‑da 'gü.
REV 11:12 'Yö ‑wʋ do 'bha 'yö bɔ dhang‑ 'gü 'ö ‑wɩ Atanna ‑wʋdhiʋ̈loomɛ ‑nu ꞊plɛ bha‑ ‑nu ‑dhɛ 'ö‑ pö: «‑Ka nu yö!» 'Yö 'wo ꞊wlü kö dha 'kpong‑ ꞊ya kpa‑ ‑nu bha 'yö 'wo dho dhang‑ 'gü, kö‑ ‑nu 'yaɔ‑ ‑nu bha ‑wa ‑nu ga sië.
REV 11:13 'Yö "sɛ ‑yö zun ꞊zii ‑sü ‑bha "tʋ̈ng do bha‑ 'gü, 'yö 'pö‑ 'kpii‑ bha 'ö ‑pɛ 'gü ‑kaɔng do, 'yö‑ "pɛan do ‑yö ꞊wɛnng, 'yö mɛ ‑dhü "gblü "saɔplɛ ‑wo ga "sɛ ꞊zii ‑kɔ do bha‑ 'gü, 'yö mɛ ‑kpɛa 'wo to bha "suʋ̈ 'dhö ‑da ‑nu 'gü, 'yö 'wo ‑ya Atanna 'ö dhang‑ 'gü bha‑ 'tɔ bhɔ ‑sü ‑bha.
REV 11:14 Kö nëng bha‑ ꞊plɛ ‑naa ꞊në ꞊ya ziö bha, "kɛɛ ‑ka ka ‑dɩ 'kun, ‑a ‑yaaga ‑naa ‑yö nu sië.»
REV 11:15 'Yö Atanna ‑bha "kië ‑nu bha‑ "saɔplɛ ‑naa ‑yö ö ‑bha "truu ‑piö. 'A dho n "tʋ 'to kö ‑wʋ 'gbɛ ‑yö "wɩ sië dhang‑ 'gü ‑yuudhö 'ö‑ pö: «‑Gblüdëdhɛ ‑kë "kpʋng ꞊taa "sɩ ꞊ya 'to 'mɛ 'ö‑ ‑dhɛ, dɔ ‑kɔ ya‑ 'gü yö ‑mü kwa Dëmɛ Atanna waa‑ ‑bha ‑Yamɛ bha ꞊në‑ ‑nu 'ka, yö ‑zë ‑a ‑bha mɛ ‑dhɛ bha‑ "dhiʋ̈todhɛ 'yii 'dho kë tongtongdhö, ‑yö ‑dho ‑a kë ‑todhʋ̈ 'ka!»
REV 11:16 ꞊Dhɛ 'ö ꞊waa‑ pö "dhʋ̈, 'yö mɛ zizi ‑nu ‑kaɔng ꞊plɛ ga ‑yiisiö 'wo ‑ya ‑sü 'ka wo ‑bha ‑blüdëdhɛ ‑gbloo ‑ta Atanna wëëdhö bha 'wo zun wo kpiö 'gü, 'yö 'wo zun Atanna ‑dhɔkë ‑sü bha 'wo‑ pö:
REV 11:17 «Yi Dëmɛ, yi ‑bha Atanna 'gügbɩɩsü, bhi i gun yi 'bha 'ka, 'i ‑tun ꞊dɛɛ bha, 'ya i nuɛ" bho ‑kɔ 'i‑ ‑da i ‑bha 'gügbɩɩdhɛ 'gü 'ö 'bha zun ‑gblüdëdhɛ kë ‑sü ‑bha bha‑ ‑wɔn 'gü,
REV 11:18 "sɛ ꞊gban "pɛpɛ 'gü ‑mɛ ‑nu zuë" ‑gun "wlü ‑sü 'ka, "kɛɛ i ‑bha bhlɔɔ bho i 'gü "tʋ̈ng ꞊ya ꞊loo ꞊tɔn, i ‑bha za ‑dɔ 'mɛ ꞊wa ga ‑a ‑nu ‑bha "tʋ̈ng ꞊ya ꞊loo, kö 'mɛ 'wo i ‑wʋdhiʋ̈loomɛ ‑nu 'ka 'i‑ ‑nu ꞊saa bho waa‑ mɛ "gblʋ̈gblʋ̈ ‑nu "ɛɛn 'nësɛɛnnë ‑nu 'wo ‑suʋ̈ i ‑gɔ, 'wo i ꞊bhlëë ‑ya bha‑ ‑nu 'dhö. I ‑bha 'wɔn ‑bho "sɛ seemɛ ‑nu 'gü "tʋ̈ng ꞊ya ꞊loo!»
REV 11:19 ꞊Dhɛ 'ö ꞊ya kë "dhʋ̈, 'yö Atanna ‑dhɔkëgükɔ 'ö dhang‑ 'gü bha‑ "dhi ‑yö ‑pʋ, 'yö mɛ ꞊gban 'wo wo "yan ‑kpan 'tɔng‑ 'ö ‑mlɛɛ ‑dee ‑da waa‑ mɛ "bhɩɩ‑ ‑nu ‑a ‑nu ꞊zinng 'gü bha‑ ꞊gbëë bha‑ ‑bha. 'Yö dha ‑yö ‑ya "yan 'kun ‑sü ‑bha kö ‑yö "wɩ sië, 'yö pë 'bha ‑nu 'wo ‑ya "wɩ ‑sü ‑bha, 'yö "sɛ 'dhö ‑ya ꞊zii ‑sü ‑bha, 'yö mëngga 'dhö ‑ya ꞊wɛnng ‑sü ‑bha.
REV 12:1 ꞊Dhɛ 'ö ꞊ya kë "dhʋ̈, 'yö "dhabhli 'dhö ‑da dhang‑ 'gü, 'yö 'a dhebhɔnë do yö kö ꞊ya 'yënng‑ kë sɔ 'ka ꞊yaa‑ ‑da ö ‑bha, kö ‑yö dɔ ‑sü 'ka "su ‑ta, kö 'faan‑ 'ö‑ ‑gɔ ‑bha bha "susëngga ‑kaɔng do ga ꞊plɛ ꞊në ‑ya ‑sü 'ka‑ ‑bha.
REV 12:2 "Kɛɛ kö‑ 'gu ‑ya bhɔ ‑klɛklɛdhö, kö‑ 'në 'kpɔ "tʋ̈ng ꞊ya ꞊loo, kö ‑yö "gbla ‑zianwo sië‑ "gblʋ̈ʋ̈dhɛ 'ö‑ piʋ̈ sië bha‑ ‑wɔn 'gü.
REV 12:3 'Yö "dhabhli bha‑ ‑dee 'bha ‑yö ‑da 'zü dhang‑ 'gü ‑a 'dhɛ bha‑ zian 'gü. 'Yö 'a "yina ‑ziisü do yö, "yinagɔn bha ‑yö ‑gun ‑zaɔndhö, 'yö‑ ‑gɔ gun "saɔplɛ, 'yö‑ ‑söga gun ‑kaɔng do, 'yö ‑gbloo 'faan‑ ‑yö gun‑ ‑gɔ "saɔplɛ bha‑ ꞊gban ‑bha. 'Yö‑ weng ‑yö gun.
REV 12:4 'Yö ö weng bha‑ sü, 'yö "susëng 'ö dhang‑ ‑bha bha‑ ‑pɛ 'gü ‑yaaga ‑sü "pɛan do bho 'mü 'yö‑ ꞊wɛnng "kpʋng ꞊taa, 'yö dho 'ö dɔ dhebhɔ 'ö‑ "gblʋ̈ʋ̈dhɛ 'dhö‑ kë sië bha‑ wëëdhö, kë "dhʋ̈ kö ꞊ya 'në 'kpɔ kö 'ö 'to "sia‑ mü 'ö‑ ‑bhö.
REV 12:5 'Yö dhebhɔ bha 'ö 'nëglɔɔn do kpɔ, ‑a gbö bha ꞊në dho ‑ya "sɛ ꞊gban "pɛpɛ ‑gɔ "dhiʋ̈, 'ö‑ ‑bha mɛdhɛ ‑yö ‑ziö ‑gblüdë "pɛpɛ 'wo "kpʋng ꞊taa ‑a ꞊gban "pɛpɛ ‑bha ‑ta, "kɛɛ 'yö "yina gɔn bha‑ ‑kɔ 'yii ꞊mɔɔ‑ ‑bha. 'Yö 'në bha 'wo‑ sü 'wo dho‑ 'ka Atanna "piʋ̈ dhang‑ 'gü, ‑a ‑bha ‑blüdëdhɛ ‑gbloo "sɔɔ.
REV 12:6 'Yö dhebhɔ bha 'ö ꞊dua 'yö dho "tʋng ‑ta, ‑dhɛ 'ö Atanna ‑ya ‑yɛa ꞊baa‑ ‑bha bha‑ 'gü, kö ‑wa "dhiʋ̈ gba mü ‑dhɛkpaɔyi "gblü do ‑ta ꞊plɛ waa‑ ‑dhɛkpaɔyi ‑kaɔng "saɔdo 'ka.
REV 12:7 ꞊Dhɛ 'ö ꞊ya kë "dhʋ̈, 'yö ‑gblü ‑yö ‑da dhang‑ 'gü. 'Yö Atanna ‑bha "kië 'kpiisü 'wo‑ Misɛdhö kë bha waa‑ ‑bha ‑mɛ ‑nu 'wo ‑ya 'ko zë ‑sü ‑bha "yina bha‑ 'ka 'yö wɛng‑ ‑nu 'wo ꞊gɔɔn waa‑ ‑bha "kië ‑nu 'dhö 'pö.
REV 12:8 "Kɛɛ 'yö Misɛdhö waa‑ ‑bha ‑mɛ ‑nu ‑a ‑nu ‑kɔ ‑yö ‑ziö "yina bha waa‑ ‑bha ‑mɛ ‑nu ‑a ‑nu ‑gɔ, 'yö 'wo‑ ‑nu ‑kë dhang‑ 'gü 'wo‑ ‑nu bɔ "kpʋng ꞊taa.
REV 12:9 'Yö ‑zuzugwɛ 'wo yö ꞊në‑ ‑dhɛ ꞊mlɛɛ 'ö gun yi 'bha 'ka, 'wo‑ ‑dhɛ 'zü "yina yaa, "ɛɛn Sɔtraan, 'ö "kpënng‑ ‑kë "kpʋngtaadhɛ ‑todhʋ̈sü ‑gɔ bha 'wo waa‑ ‑bha ‑mɛ ‑nu ‑a ‑nu ‑zuö "kpʋng ꞊taa.
REV 12:10 'Yö 'a ‑wʋ "gbɩɩ‑ do 'bha ma dhang‑ 'gü kö ‑ya pö sië: «Atanna ‑bha mɛ dha ‑sü bha‑ ‑gɔ ꞊ya ‑da 'plöö ꞊tɔn ꞊dɛɛ! ‑A ‑bha ‑gblüdëdhɛ waa‑ ‑bha 'gügbɩɩdhɛ 'bha 'yaa ‑bin 'gü 'zü! ‑A ‑bha Klisi 'ö‑ ‑ya bha ꞊ya 'ö ‑bha mɛdhɛ ‑faan bha‑ ‑zɔn! ‑A ‑gɛn ‑mü ꞊dhɛ 'mɛ 'ö gun dɔ sië Atanna wëëdhö 'ö ‑za dɔ kwa dheebhang ‑nu ‑bha 'yënng‑ 'gü waa‑ gbeng ‑nu ꞊gban 'gü bha ꞊yaa‑ ‑zuö "kpʋng ꞊taa ꞊dɛɛ.
REV 12:11 Kwa dheebhang ‑nu ‑kɔ ꞊ya ziö ‑gɔ "bhlaanë ꞊yɔɔn 'ö ꞊wɛnng ‑nu ‑wɔn 'gü bha waa‑ Yesu ‑wɔn ‑dhiang 'wo gun‑ zë sië mɛ ‑nu ‑dhɛ bha‑ 'saa‑ 'gü. ‑A ‑gɛn ‑mü ꞊dhɛ kwa dheebhang ‑nu bha ‑wo kë ‑we ‑bha 'wo woo‑ tosɛa nu, 'ö 'wo ‑we ‑bha 'wo ga Yesu ‑wɔn 'gü.
REV 12:12 ‑A ‑kë "dhʋ̈ ‑sü bha‑ 'gü, dhang‑ waa‑ 'gü ‑mɛ ‑nu ꞊gban "pɛpɛ ‑ka ka "dhia bho, "kɛɛ "kpʋngtaadhɛ waa‑ ꞊weeyi ‑nu ꞊në ka ‑bha ꞊ya kë ‑wëësü. ‑A ‑gɛn ‑mü ꞊dhɛ Sɔtraan ꞊në bhlɔɔ ꞊yaa‑ pa 'ö nu sië‑ 'ka ka ‑ta bha, ‑a 'wɔn ꞊ya kë‑ "yaan ꞊dhɛ "tʋ̈ng 'wo‑ ‑ya ‑gɔ 'yaa 'gbɛ 'zü.»
REV 12:13 ꞊Dhɛ 'ö "yinagɔn ‑ziisü bha 'ö‑ 'wɔn dɔ ꞊dhɛ ꞊wa ö ‑zuö "kpʋng ꞊taa, 'yö zun dhebhɔ 'ö 'nëgɔɔn bha‑ kpɔ bha‑ "piʋ̈ kë ‑sü ‑bha.
REV 12:14 "Kɛɛ 'yö dhebhɔ bha 'wo‑ gba "gblëë‑ 'kpii‑ do gban ꞊plɛ 'ka kö ‑ya dɔ ö ‑bha, kö ‑yö ‑wlö 'ka ‑yö 'dho ö ‑yɛa 'wo‑ ꞊baa "tʋng ‑ta bha‑ 'gü kö ‑yö ‑ya mü kö ‑wa "dhiʋ̈ gba ‑kwɛ ‑yaaga waa‑ 'gbu 'ka, kö ꞊mlɛɛ bha 'ya 'dho ö ‑kɔ zun‑ ‑bha.
REV 12:15 'Yö ꞊mlɛɛ bha 'ö "yi bho ö "dhi 'yö‑ ꞊wɛnng dhebhɔ bha‑ ꞊keng‑, 'yö ‑kë ꞊gwaan 'ka, kë "dhʋ̈ kö‑ "tɛɛ ‑ya 'sü,
REV 12:16 "kɛɛ 'yö "sɛ ‑yö dhebhɔ bha‑ ‑ta kun, 'yö ö "dhi ‑pʋ, 'yö "yi 'ö "yina bha 'ö‑ ꞊wɛnng bha‑ ꞊gban mü "pɛɛpɛdhö.
REV 12:17 'Yö dhebhɔ bha‑ ‑wɔn bhlɔɔ ‑yö ma "yina bha‑ 'gü 'yö‑ pa kpɛnngkpɛnngdhö, 'yö ꞊dhɛ 'ö ‑kë ꞊dhɛ ‑a bhlɔɔ bha‑ bho ‑dhɛ "wɛɛ 'bhaa 'dhö dhebhɔ 'kö bha‑ ‑gɔ bha, 'yö dho 'yö ‑ya 'ko zë ‑sü ‑bha dhebhɔ bha‑ suu 'gü ꞊në "pɛpɛ 'dhɛ 'kö to, 'ö 'wo gun Atanna ‑bha 'tɔng‑ 'kun sië, 'ö 'wo to ‑kplü ‑sü 'ka tɛanwɔn 'ö ‑gban Yesu Klisi ‑wɔn ‑bha bha‑ ‑bha bha‑ ‑nu 'ka.
REV 12:18 'Yö dho 'ö dɔ ꞊weeyi "kpʋng "dhiʋ̈.
REV 13:1 'Yö 'a wü do 'bha yö kö ‑yö 'go sië ꞊weeyi ꞊bhaa. Wü bha‑ ‑sö ‑gun ‑kaɔng do, 'yö‑ ‑gɔ ‑zë 'ö gun "saɔplɛ. 'Yö ‑gblofaan ‑yö gun kpa ‑sü 'ka‑ ‑sö ‑kaɔng do bha‑ ꞊gban ‑bha 'do 'do. 'Yö Atanna ‑bha 'fang bho ‑tɔ ‑nu 'wo gun ‑bɛn zë ‑sü 'ka‑ ‑gɔ ‑nu bha‑ ‑bha.
REV 13:2 Wü 'a‑ yö bha ‑yö ‑gun ꞊dhɛ gwee 'dhö, 'yö‑ ‑gɛn ‑nu 'wo gun ꞊dhɛ "sluku ‑bha 'dhö, 'yö‑ "dhi ‑yö gun ꞊dhɛ laabhölaa ‑bha 'dhö. 'Yö "yina bha 'ö ö ‑bha mɛdhɛ oo, ‑a ‑bha ‑blüdëdhɛ ‑gbloo waa‑ ‑bha 'gügbɩɩdhɛ ꞊gban nu wü bha‑ ‑dhɛ.
REV 13:3 "Kɛɛ kö wü bha‑ ‑gɔ ‑nu bha‑ do ꞊ya kë ꞊dhɛ pë 'ö ꞊waa‑ ‑gi 'ö yöö 'to‑ bhië ‑gɔ ‑a 'dhö. "Kɛɛ 'yö‑ bhië ‑ziisü bha 'ö dho 'ö ga. 'Yö wü bha‑ "dhia ‑yö ma "sɛ ‑ta ‑mɛ ꞊gban "pɛpɛ 'gü 'yö 'wo ‑ziö ꞊keng‑.
REV 13:4 'Yö 'wo ‑ya "yina bha‑ ‑dhɔkë ‑sü ‑bha ö ‑bha mɛdhɛ nu 'ö‑ wo wü bha‑ ‑dhɛ bha‑ ‑wɔn 'gü. 'Yö 'wo ‑ya 'pö wü bha‑ ‑dhɔkë ‑sü ‑bha kö ‑wa pö sië: «'Dee ꞊dhɛ ‑zuzugwɛ ya‑ 'dhö? 'Dee dho ꞊mɔɔ‑ ‑bha 'ö 'ko zë‑ 'ka?»
REV 13:5 'Yö 'wo Atanna ‑bha 'fang bho ‑wʋ ‑nu waa‑ ‑dɩ ‑sü 'kpii‑ ‑dhiang ‑nu zë ‑faan ‑da wü bha‑ 'gü. 'Yö‑ ‑kë "dhʋ̈ "su ‑kaɔng ‑yiisiö ga ꞊plɛ 'ka.
REV 13:6 'Yö ‑ya "si ‑bho Atanna ‑gɔ ‑sü waa‑ ‑yɛa ‑bha 'fang bho ‑sü ‑bha waa‑ mɛ "pɛpɛ 'wo‑ "piʋ̈ dhang‑ 'gü ‑a ‑nu 'dhö.
REV 13:7 'Yö‑ ‑ga 'ka mü 'yö ‑ya 'ko zë ‑sü ‑bha ‑a ‑bha mɛ ‑nu 'ka, 'yö‑ ‑kɔ ‑yö ꞊mɔɔ‑ ‑nu ‑bha, 'yö‑ ‑kɔ ‑yö ‑ziö "siya ꞊gban "pɛpɛ suu ‑gɔ, 'yö ‑ya "sɛ ꞊gban "pɛpɛ waa‑ ‑wʋ suu "pɛpɛ 'ö‑ ‑ta ‑a pö ‑mɛ ‑nu ꞊gban ‑gɔ "dhiʋ̈.
REV 13:8 Mɛ "pɛpɛ kö 'wo "kpʋng ya‑ ꞊taa, 'ö‑ ‑nu 'tɔ ‑zë 'yaa ‑bɛn zë ‑sü 'ka "bhlaanë 'wo‑ zë bha‑ ‑bha ‑tosɛa ‑kë ‑bha 'sëëdhɛ 'ö 'mɛ 'wo dha ‑mɛ ‑nu 'ka ‑a ‑nu 'tɔ 'dhö‑ 'gü, "sɛ waa‑ dhang‑ ‑nu kë "tʋ̈ng 'gü bha‑ 'gü, ‑a ‑nu ꞊gban "pɛpɛ‑ ‑dho "gblëënu wü bha‑ ꞊wlöö 'wo‑ ‑dhɔkë:
REV 13:9 'Mɛ ka 'wɔn ma ‑tʋ 'dhö 'dhö, ‑kaa dɔ ‑së 'ka kö 'ka 'wɔn ma!
REV 13:10 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ "pɛpɛ 'kö 'wo bɔ Yesu 'ka 'wo Atanna ‑bha mɛ 'ka, ‑a mɛ 'dhɛ 'ö ‑dho ‑kaso 'gü 'dhö‑ ‑bha, ‑yö ‑dho 'dho ‑kaso 'gü, 'ö‑ mɛ 'dhɛ 'ö ‑gɔkanmɛ 'ka 'wo‑ ‑gɔ ‑kan. 'Wɔn 'ö‑ ‑wɔn 'gü, 'yö Atanna ‑wʋ ‑ya pö ꞊dhɛ 'mɛ 'wo‑ ‑bha mɛ 'ka ‑a ‑dhɛa ‑bha ꞊dhɛ ‑wo wo zuë" kë ‑sɛa kö ‑wo wo ‑zʋ yö‑ ‑dhɛ bha 'yö bha.
REV 13:11 ꞊Dhɛ 'ö‑ 'dhɛ bha ꞊ya kë "dhʋ̈, 'yö 'a go mü 'a wü bha‑ do 'bha yö kö ‑yö 'go sië "sɛɛdhö, kö‑ ‑söga ‑yö ꞊plɛ ꞊dhɛ "bhlaa ‑bha 'dhö, "kɛɛ ꞊ya "wɩ ‑a ‑wʋ ‑kë ꞊dhɛ "yina ‑wʋ 'dhö.
REV 13:12 'Wɔn suu "ʋʋ suu 'ö wü ‑blɛɛsü bha 'ö gun‑ kë sië, ‑a 'dhɛ bha‑ ‑kɔ ‑gun ꞊mɔɔ sië‑ ‑bha 'pö 'ö‑ ‑kë wü ‑blɛɛsü bha‑ ‑bha kë 'gü, 'ö ö faan ‑wɔ "kpʋngtaamɛ ‑nu ꞊gban "pɛpɛ ‑ta kö ‑wo wü ‑blɛɛsü 'ö bhië ‑ziisü ‑yö gun‑ ‑bha 'ö ga bha‑ ‑dhɔkë.
REV 13:13 Wü ꞊plɛ ‑naa bha ‑yö gun "dhabhliwɔn "gblʋ̈gblʋ̈ ꞊dede kë sië, 'ö pɛng go dhang‑ 'gü 'ö‑ ꞊lɔɔ mɛ ꞊gban "yaan.
REV 13:14 ‑Yö ‑gun "kpʋngtaamɛ ꞊gban "pɛpɛ gɔɔ bho sië 'wɔn 'ö Atanna ‑ya kë ‑sü "sɩ ‑kë ‑dhɛ 'ö gun‑ kë sië wü ‑blɛɛsü bha‑ ‑bha kë 'gü bha ꞊në‑ 'ka, 'yö‑ pö "kpʋngtaamɛ ‑nu ‑dhɛ ꞊dhɛ ‑wo wü ‑blɛɛsü 'wo‑ ‑gi ‑siang 'ka "kɛɛ 'ö dha‑ ‑gɔ bha‑ "blɛɛn‑ do ‑pë ‑kë.
REV 13:15 'Yö Atanna ‑yö "tɛɛ ‑sü ‑da mɛ 'gü ‑sü "sɩ ‑kë wü ꞊plɛ ‑naa bha‑ ‑dhɛ 'yö "tɛɛ ‑sü ‑da wü ‑blɛɛsü bha‑ "blɛɛn‑ 'wo‑ ‑pë ‑kë bha‑ 'gü, kë "dhʋ̈ kö ‑yö dhiang zë kö mɛ "ʋʋ mɛ 'ö 'yii "wɩ‑ ‑bha kö ‑ya ‑dhɔkë, kö ‑ya zë.
REV 13:16 'Yö wü do bha 'ö ö faan ‑wɔ 'zü 'në 'sɛɛnnë ‑nu oo, mɛ "gblʋ̈gblʋ̈ ‑nu oo, ꞊naɔmɛ ‑nu oo, "flɛɛmɛ ‑nu oo, ꞊dhuëng ‑nu waa‑ 'wlɔɔ‑ ‑nu ꞊gban "pɛpɛ ‑ta 'yö 'wo 'klëë‑ kpɔ wo ‑kɔ ‑së 'gü ‑kɔdhɛ ꞊taa ‑dhɛ ‑nu waa‑ ‑nu ‑kpong "dhiʋ̈ ‑dhɛ ‑nu 'gü.
REV 13:17 'Yö mɛ 'bha ‑mɛ 'bha 'yaa ꞊mɔɔ‑ ‑bha kö ‑yö pë 'dhɔ, "ɛɛn kö ‑yö pë 'go, kö 'klëë‑ 'ö wü bha‑ 'tɔ ‑yö gun‑ 'gü bha, "ɛɛn "nimlɔɔ 'ö ꞊dhɛ‑ "blɛɛn‑ bha‑ 'dhö bha 'yaa‑ ‑mɛ ‑bha.
REV 13:18 'Mɛ 'ö 'wɔndɔmɛ 'ka ‑a 'wɔn ‑bho 'koo dɔ "tʋ̈ng ꞊në dho kë bha. 'Mɛ 'ö 'wɔndɔmɛ 'ka 'ö‑ "gblʋ̈ʋ̈dhɛ ‑yö 'daɔnnu, ‑a ‑mɛ ‑dho wü bha‑ "nimlɔɔ bha‑ dɔ, ‑a ‑gɛn ‑mü ꞊dhɛ ‑yö ‑dho kë mɛ 'bha ꞊në‑ 'tɔ 'ka. ‑A "nimlɔɔ bha ꞊në këng "saɔdo ‑kɔ "saɔdo waa‑ pë "saɔdo 'ka.
REV 14:1 'A dho ‑dhɛ ‑ga kö "bhlaanë bha ‑yö dɔ sië ‑tɔn 'ö Zedhizadhɛmö bha‑ ꞊gbin‑ waa‑ mɛ "gblü këng do ‑kɔ ‑yiisiö waa‑ mɛ "gblü ‑yiisiö 'ö waa‑ Dë ‑a ‑nu 'tɔ ‑yö gun ‑ya ‑sü 'ka‑ ‑nu ‑kpong "dhiʋ̈ bha‑ ‑nu 'dhö.
REV 14:2 'Yö n "tʋ ‑yö ‑da ‑wʋ 'bha 'gü dhang‑ 'gü kö ‑yö "wɩ sië ‑wuudhö ꞊dhɛ "yi 'kpii‑ 'ö ‑zuö sië‑ 'dhö, "ɛɛn ꞊dhɛ ‑kɔ 'ö dha ‑yö ‑wɩ 'ka bha‑ 'dhö. ‑Wʋ bha ‑yö ‑kë 'zü ꞊dhɛ mɛ kpö 'gbɛ ‑bha kɔnng zë ‑vin bha‑ 'dhö.
REV 14:3 Kö mɛ "gblü drun bha ‑wo dɔ sië 'mɛ 'ö ‑gbloo 'kpiisü ‑ta bha waa‑ pë "yaandhe ‑yiisiö bha waa‑ mɛ zizi ‑nu bha‑ ‑nu wëëdhö kö ‑wo "tan ‑dee do bho sië. "Tan 'wo gun‑ bho sië "dhʋ̈ bha mɛ "wɛɛwɛɛ 'bha 'yaa ꞊mɔɔ‑ ‑bha kö ‑ya bho kö 'yii kë mɛ "gblü këng do ‑kɔ ‑yiisiö waa‑ mɛ "gblü ‑yiisiö 'ö "bhlaanë bha 'ö‑ ‑nu ‑gɔta dhɔ yi 'bha 'ka kö ‑wo ‑tun "kpʋng ꞊taa bha wo ‑zë ‑a ‑nu 'ka.
REV 14:4 'Mɛ 'wo "dhʋ̈ bha ꞊në 'wo wo ‑dɩ kun ‑së 'yö 'wo to "slʋ̈ʋ̈slʋ̈ 'ka, 'yö 'wii zun dhebhɔ ‑bha tongtongdhö. ‑Dhɛ "ʋʋ ‑dhɛ 'ö "bhlaanë bha 'ö gun 'dho sië‑ ‑bha wɛng‑ ‑nu ꞊në 'wo gun 'dho sië wo "kwëë, ‑a ‑gɛn ‑mü ꞊dhɛ wo ꞊në "bhlaanë bha 'ö‑ ‑nu ‑gɔta dhɔ kö ‑wo kë waa‑ Dë ‑a ‑nu ‑bha 'në ‑blɛɛsü ‑nu 'ka mɛ "bhɩɩ‑ ‑nu kpö 'gü.
REV 14:5 'Wii ꞊sua kë do tongtongdhö, pö ‑tangga ‑zian 'yaa‑ ‑nu ‑bha.
REV 14:6 ꞊Dhɛ 'ö ꞊ya kë "dhʋ̈, 'yö 'a Atanna ‑bha "kië do 'bha yö kö ‑yö ziö sië 'tëng‑ ‑ta ‑dhɛ ꞊gblɛɛn ꞊dede 'gü. Naɔ ‑së 'ö go Atanna "piʋ̈ 'ö 'yaa 'go "gblʋʋ tongtongdhö bha ꞊në 'ö nu‑ dɔ ‑dhɛ 'gü, mɛ "pɛpɛ 'wo "kpʋng ꞊taa ‑a ‑nu ‑gɔ, kö ‑ya pö mɛ suu ‑gaɔ ꞊gban 'do 'do, "sɛgɔ ꞊gban 'do 'do "ɛɛn ‑wʋ suu ꞊gban 'do 'do pö ‑mɛ ‑nu ‑dhɛ
REV 14:7 kö ‑ya pö sië "gbɩɩ‑ 'ka 'ö‑ pö: «‑Ka "suʋ̈ Atanna ‑gɔ kö 'ka‑ 'tɔ bhɔ! ‑A ‑gɛn ‑mü ꞊dhɛ ‑a ‑bha za ‑dɔ mɛ "bhɩɩ‑ ‑bha "tʋ̈ng ꞊ya ꞊loo. ‑Ka 'mɛ ö "sɛ ‑kë 'ö dhang‑ ‑kë, 'ö ꞊weeyi ‑kë waa‑ "yigɔ ‑nu 'dhö bha ꞊në‑ ‑dhɔkë!»
REV 14:8 'Yö Atanna ‑bha "kië bha‑ ꞊plɛ ‑naa ‑yö dɔ‑ 'dhɛ bha‑ ꞊keng‑ kö ‑ya pö sië 'pö 'ö‑ pö: «Babidhɔnö ‑pö 'kpii‑ 'ö gun ö ‑bha "yënngdɔ bha‑ 'kpɔ sië "kpʋngtaamɛ ‑nu ꞊gban "pɛpɛ ‑gɔ ꞊dhɛ we 'dhö 'wo‑ mü bha ꞊ya 'wü, ꞊ya 'wü ‑trukpɛ ‑trukpɛdhö.»
REV 14:9 'Yö Atanna ‑bha "kië bha‑ ‑yaaga ‑naa ‑yö dɔ‑ 'dhɛ bha‑ ꞊keng‑ 'pö kö ‑ya pö sië 'ö‑ pö: «Mɛ "ʋʋ mɛ 'ö yaa‑ wü bha‑ ‑dhɔkë "ɛɛn 'ö yaa‑ "blɛɛn‑ bha‑ ‑dhɔkë, 'ö‑ ‑bha ‑bɛn bha‑ ‑ya ö ‑kɔdhɛ ‑bha, "ɛɛn ö ‑kpong "dhiʋ̈,
REV 14:10 ‑a ‑mɛ ‑dho Atanna ‑bha ‑mawɔnsiödhe 'ö "yi 'yaa‑ "piʋ̈ bha‑ mü ꞊dhɛ ‑kɔ 'wo we "dhiʋ̈‑ mü‑ 'ka bha‑ 'dhö. Mɛ "pɛpɛ 'ö waa‑ ‑kë "dhʋ̈, ‑a ‑mɛ ‑nu ‑dho ‑wëëdhɛ yö pɛng 'ö 'yaa "dhuu bha waa‑ blɔɔn" pɛng ꞊në‑ 'gü Atanna ‑bha "kië "slʋ̈ʋ̈slʋ̈ ‑nu bha waa‑ "bhlaanë ‑a ‑nu ‑kuu "dhiʋ̈.
REV 14:11 Pɛng 'ö "dhʋ̈ bha pɛng 'ö‑ "gbiën ‑yö bhɔ ‑todhʋ̈ 'ka, 'ö "tɛɛpadhe 'yaa‑ 'gü, 'ö‑ 'yënng‑ 'gü 'yaa 'dhö 'ö‑ gbeng 'gü 'yaa 'dhö yö ‑mü. 'Sa yö ꞊në mɛ "pɛpɛ 'wo dho wü bha‑ ‑dhɔkë waa‑ "blɛɛn‑ bha‑ 'dhö, "ɛɛn 'ö dho 'klëë‑ 'kpɔ‑ ‑nu ‑bha bha wo dho 'dho‑ 'gü.
REV 14:12 'Wɔn 'ö‑ ‑wɔn 'gü 'yö Atanna ‑bha mɛ ‑nu 'ö pö 'aa‑ ‑nu ‑bha, 'ö 'wo‑ ‑bha 'tɔng‑ kun "ɛɛn 'wo ‑zʋ yö Yesu ‑dhɛ bha 'wo dho‑ 'kun "gbɩɩ‑ bha 'yö bha.
REV 14:13 ꞊Dhɛ 'ö ꞊ya kë "dhʋ̈, 'yö ‑wʋ 'bha ‑yö bɔ dhang‑ 'gü 'ö‑ pö n ‑dhɛ 'ö‑ pö: «'Wɔn 'ö maa‑ pö bha ‑bhö ‑a ‑bɛn zë! ‑A pö mɛ "pɛpɛ 'wo dho ga Atanna ‑bha zian ‑ta 'ö go ꞊dɛɛ bha 'ö dho‑ 'ka "dhiʋ̈ bha‑ ‑nu ‑dhɛ ‑a ‑nu ‑bha ‑së! 'Wɔn 'ö‑ ‑wɔn 'gü 'yö 'Nii‑ "slʋ̈ʋ̈slʋ̈ yöö ꞊dede 'ö‑ ‑ziö ‑ta ‑ziö 'ö‑ pö: «‑Yö "dhʋ̈ tɛan‑ 'ka, ‑a ‑gɛn ‑mü ꞊dhɛ sëë 'wo‑ bho bha ‑wo ‑dho wo 'gü ꞊dhië‑ zian‑ ‑ta bha 'yö bha. ‑A ‑gɛn ‑mü ꞊dhɛ 'wɔn ‑sɛngbɔ ‑nu 'wo‑ ‑kë kö ‑wo ‑tun "yaan bha ‑wo ‑dho ‑kpan ꞊gban ‑bha Atanna ‑kuu "dhiʋ̈.»
REV 14:14 A ‑to ‑dhɛgadhɛ 'gü, 'a dho "kan 'zü n ‑ta kö dha 'kpong‑ "puu do 'bha ꞊ya ‑wo "yɛa‑, kö pë 'bha ‑yö ‑ya ‑sü 'ka‑ ‑ta ꞊dhɛ mɛ "bhɩɩ‑ 'dhö. Kö "sënng faan‑ ‑ya ‑gɔ ‑bha, kö ‑dhaa "gang "dhiʋ̈‑ do ‑ya ꞊kwɛɛ‑.
REV 14:15 'Yö Atanna ‑bha "kië do 'bha ‑yö go‑ ‑dhɔkëgükɔ 'ö dhang‑ 'gü bha‑ 'gü 'yö zun‑ pö ‑sü bha 'mɛ 'ö gun ‑ya ‑sü 'ka dha 'kpong‑ ‑ta bha‑ ‑dhɛ "gbɩɩ‑ 'ka 'ö‑ pö: «‑Bhö i ‑bha ‑dhaa "gang bha‑ 'sü kö 'i "kpʋngtaadhɛ ‑mlü "kan‑ 'ka, ‑a ‑gɛn ‑mü ꞊dhɛ ꞊ya kë ꞊dhɛ ‑mlü ‑pë kë ‑sü ‑bhlaa ꞊në‑ 'dhö, Atanna ‑bha za dɔ mɛ "bhɩɩ‑ ‑nu ‑bha "tʋ̈ng ꞊ya ꞊loo.»
REV 14:16 'Yö 'mɛ 'ö gun ‑ya ‑sü 'ka dha 'kpong‑ ‑ta bha 'ö ‑kɔ ‑da ö ‑bha ‑dhaa bha‑ 'gü, 'yö "kpʋngtaadhɛ ‑mlü ‑kan.
REV 14:17 'Yö Atanna ‑bha "kië do 'bha ‑yö go 'zü‑ ‑dhɔkëgükɔ 'ö dhang‑ 'gü bha‑ 'gü kö ‑dhaa "gang "dhiʋ̈‑ bha‑ do 'bha ꞊ya ꞊kwɛɛ‑ 'pö 'yö zun "kpɛnng.
REV 14:18 'Yö Atanna ‑bha "kië "wɛɛ do 'bha 'ö ‑kɔ ‑ziö pɛng ‑gɔ ‑sü "sɩ 'dhö‑ ‑dhɛ bha 'ö go‑ ‑dhɔkëtagwë "klʋ bha‑ 'gü, 'yö‑ pö mɛ 'dhɛ ‑dhaa "gang gun‑ ꞊kwɛɛ‑ bha‑ ‑dhɛ "gbɩɩ‑ 'ka 'ö‑ pö: «‑Bhö i ‑bha ‑dhaa "gang bha‑ 'sü kö 'i ‑drɔɔ ‑dhü ‑nu 'wo "kpʋng ꞊taa bha‑ ‑nu ‑kpaa "kan‑ 'ka, ‑a ‑gɛn ‑mü ꞊dhɛ 'ö ꞊dhɛ ‑drɔɔ ‑dhü 'dhö kö‑ ga ꞊gbaan ‑pë kë.
REV 14:19 'Yö Atanna ‑bha "kië bha 'ö ö ‑bha ‑dhaa "dhiʋ̈‑ bha‑ sü 'ö‑ ‑ziö "kpʋngtaadhɛ ꞊gban 'gü, 'yö ‑drɔɔ ga bha‑ ꞊gban bho, 'yö‑ ꞊loo ‑gwë "wlʋ̈ 'kpii‑ do 'ö ꞊dhɛ 'wɔn 'ö Atanna dho‑ wɔ ('mɛ 'wii ö ꞊bhlëë ‑ya) ‑nu ‑ta ‑a ‑zɔn 'ka 'dhö bha‑ 'gü, 'pö‑ ꞊taama ‑dhɛ 'bha 'gü mü.
REV 14:20 'Yö 'wo ‑drɔɔ ga bha‑ zɔn "wlʋ̈ 'kpii‑ bha‑ 'gü 'pö‑ ꞊taama ‑dhɛ bha‑ 'gü, 'yö ꞊yɔɔn 'ö go "wlʋ̈ bha‑ 'gü 'yö‑ ‑gböng ‑yö ‑ziö 'yö "kidhʋng këng ‑yaaga "ta sü, 'yö‑ ‑bha ‑kë ꞊gblɛɛn ‑sü 'gü, ꞊soo ꞊ya ‑da ꞊bhaa 'yö ‑ya ‑kafe 'ö‑ "dhi bha‑ ‑naa ‑ta.
REV 15:1 'Yö n "yan ‑yö ‑da 'zü "dhabhliwɔn ‑ziisü 'ö‑ 'wɔn ‑yö mɛ kɔn ‑a ‑dhɛ 'gü dhang‑ 'gü. 'Yö 'a Atanna ‑bha "kië "saɔplɛ yö kö nëng "saɔplɛ ‑ya ‑nu ‑gɔ 'do 'do 'ka. Nëng ‑totaamasü 'ö dho ‑ya "kpʋngtaadhɛ "dhiʋ̈ kö ‑yö kë Atanna ‑bha ‑mawɔnsiödhe "dhiʋ̈todhɛ 'ka bha ꞊në gun bha.
REV 15:2 'A dho ‑dhɛ ‑ga kö pë 'bha 'ö mɛ "yan ‑yö ꞊ziö‑ 'gü ꞊dhɛ "dënggbɔ 'dhö bha ‑yö wɔ ‑sü 'ka mü mɔɔdhö ‑dhɛ ꞊gban 'gü, "kɛɛ kö pɛng ‑yö kaan‑ ‑sü 'ka‑ 'ka. 'Yö 'mɛ 'wii wo ‑gɔ 'dho "sia‑ wü bha‑ ‑dhɛ tongtongdhö 'ö 'wo to‑ "gbɩɩ‑ 'ka‑ ‑ta waa‑ "blɛɛn‑ bha waa‑ 'tɔ ‑bɛn 'ö "nimlɔɔ 'ka bha‑ 'dhö bha 'a‑ ‑nu yö kö ‑wo dɔ sië "yi ꞊gblü bha‑ "sɔɔ, kö kɔnng ‑nu 'ö Atanna ‑ya nu‑ ‑nu ‑dhɛ bha ‑ya ‑nu ꞊kwɛɛ‑.
REV 15:3 Kö ‑wa 'tɔ bhɔ ‑tan 'ö Moizö 'ö ‑kë ‑a ‑bha yëkëmɛ 'ka bha 'ö‑ bho yi 'bha 'ka bha waa‑ "bhlaanë bha‑ ‑bha bho sië 'wo‑ pö: «'Gü "gbɩɩ‑ Atanna, i këwɔn ‑nu ‑wo "mlümlüsü 'ö 'wo ꞊bhlëësü ꞊dedewo. Bhi ꞊në 'i ‑gblüdë "pɛpɛ 'wo "sɛ ‑gɔ "dhiʋ̈, ‑a ‑nu ꞊gban ‑bha ‑gblüdë 'ka, i këwɔn 'bha 'yaa ꞊sua 'ka, 'yö pö 'aa‑ 'bha ‑bha tongtongdhö.
REV 15:4 'Dee 'yii 'dho "suʋ̈ i ‑gɔ, yi Dëmɛ? 'Dee 'yii 'dho "wɩ‑ ‑bha kö ‑yö i 'tɔ bhɔ? ‑A pö 'yi‑ wo "dhʋ̈ bha‑ 'klɔɔ‑ ‑mü ꞊dhɛ bhii dosengseng ꞊në pö 'aa i ‑bha tongtongdhö, ‑a ‑wɔn 'gü "sɛ ꞊gban "pɛpɛ suu‑ ‑dho nu 'wo zun wo kpiö 'gü bhi ꞊në i ‑dhɛ 'yö 'wo i ‑dhɔkë, ‑a ‑gɛn ‑mü ꞊dhɛ i këwɔn ‑nu 'ö pö 'aa‑ 'bha ‑bha bha‑ 'bha 'yaa ‑bin ‑sü 'ka mɛ 'bha ‑gɔ 'zü.»
REV 15:5 ꞊Dhɛ 'ö‑ 'dhɛ bha ꞊ya kë "dhʋ̈, 'yö 'a Atanna ‑dhɔkëgükɔ 'ö dhang‑ 'gü, 'ö bɔɔ" 'ö‑ ‑yɛa 'ka bha 'ö‑ 'gü bha‑ yö kö‑ "dhi ꞊ya "pʋ.
REV 15:6 'Yö‑ ‑bha "kië "saɔplɛ 'ö nëng "saɔplɛ bha 'ö gun‑ ‑nu ‑gɔ bha 'wo go 'kɔ bha‑ 'gü 'wo zun "kpɛnng, kö sɔ "puu 'ö 'bha‑ ‑ga 'ö dɔ i "yan 'gü ‑glanglandhö bha ‑ya ‑nu ‑bha, kö "sënng kwipɛn ‑yö ‑ya ‑sü 'ka‑ ‑nu ‑bha sɔ bha‑ ‑ta ‑a ‑nu ‑kuu 'gü ‑dhɛ "tʋ̈ng 'gü.
REV 15:7 'Yö pë "yaandhe ‑yiisiö 'wo Atanna ‑kuu "dhiʋ̈ bha‑ mɛ do ‑yö "sënnggbɔnë "saɔplɛ, 'ö pa ‑sü 'ka Atanna 'ö 'dhö ‑todhʋ̈ 'ka bha‑ ‑bha ‑mawɔnsiödhe 'ka bha‑ nu ‑a ‑bha "kië "saɔplɛ bha‑ ‑nu ‑dhɛ.
REV 15:8 'Yö Atanna ‑dhɔkëgükɔ bha 'ö pa ‑a ‑bha 'tɔbhɔdhe waa‑ ‑bha 'gügbɩɩdhɛ pɛng "gbiën 'ka, 'yö mɛ 'bha 'kɔ 'yaa gun ꞊mɔɔ sië‑ ‑bha kö ‑yö ‑da ‑a ‑dhɔkëgükɔ 'gü ‑a "tʋ̈ng 'dhɛ 'kö bha‑ 'gü kö nëng "saɔplɛ 'ö‑ ‑bha "kië "saɔplɛ bha‑ ‑nu ‑gɔ bha 'yii ziö ꞊kö.
REV 16:1 ꞊Dhɛ 'ö ꞊ya kë "dhʋ̈, 'yö 'a ‑wʋ do 'bha ma kö ‑yö 'go sië Atanna ‑dhɔkëgükɔ 'ö dhang‑ 'gü bha‑ 'gü 'ö‑ pö‑ ‑bha "kië "saɔplɛ bha‑ ‑nu ‑dhɛ "gbɩɩ‑ 'ka 'ö‑ pö: «‑Ka 'dho kö 'ka Atanna ‑bha ‑mawɔnsiödhe gbɔnë "saɔplɛ bha‑ 'gü ‑pë ꞊wɛnng "kpʋng ꞊taa.»
REV 16:2 ꞊Dhɛ 'ö ‑wʋ bha 'ö ‑wɩ "dhʋ̈, 'yö Atanna ‑bha "kië ‑nu bha‑ mɛ ‑blɛɛsü ‑yö dho 'yö ö ‑bha 'gü ‑pë ꞊wɛnng "kpʋng ꞊taa. 'Yö bhië ‑ziiziisü ‑nu, "kɛɛ ‑nɛnɛsü ‑nu 'wo ‑ya "kan ‑sü ‑bha mɛ 'wo kë wü bha waa‑ "blɛɛn‑ bha‑ ‑dhɔkë bha‑ ‑nu ‑bha.
REV 16:3 'Yö‑ mɛ ꞊plɛ ‑naa ‑yö ö ‑bha 'gü ‑pë ꞊wɛnng ꞊weeyi ꞊bhaa. 'Yö ꞊weeyi ꞊gban ‑yö ‑kë ꞊dhɛ ꞊yɔɔn 'ö ꞊ya kpö 'kun ‑a 'dhö, 'yö pë "yaandhe "pɛpɛ 'ö‑ ꞊bhaa 'yö‑ ꞊gban ‑yö ga.
REV 16:4 'Yö‑ ‑yaaga ‑naa ‑yö ö ‑bha 'gbɔnë 'gü ‑pë ꞊wɛnng ꞊gwaan ‑nu waa‑ "yi 'sɛɛnnë "pɛpɛ 'ö "kpʋng ꞊taa ‑a ꞊gban ꞊bhaa, 'yö‑ ꞊gban ‑yö ‑kë ꞊yɔɔn 'ka.
REV 16:5 'Yö n "tʋ ‑yö ‑da Atanna ‑bha "kië 'dhɛ 'ö‑ ‑kɔ ‑yö ‑ziö "yi ‑nu ‑gɔ "dhʋ̈ bha‑ ‑wʋ 'gü kö ‑ya pö sië: «Bhii Atanna 'i gun yi 'bha 'ka, 'i ‑tun ꞊dɛɛ, 'ö 'i "slʋ̈ʋ̈slʋ̈, 'ö 'wɔn yaa 'yaa zun i ‑bha tongtongdhö bha i ‑bha 'wɔn ‑bho mɛ "bhɩɩ‑ 'gü ‑sü 'ö ꞊dhɛ ‑kɔ bha‑ 'dhö bha‑ ‑dhɛ ‑mü.
REV 16:6 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'mɛ 'wo bha ꞊në 'wo i ‑bha yëkëmɛ ‑nu zë waa‑ i ‑wʋdhiʋ̈loomɛ ‑nu 'dhö, 'wɔn 'ö‑ ‑wɔn 'gü 'yö 'i ꞊yɔɔn 'kpɔ sië‑ ‑nu ‑gɔ bha 'yö bha, 'sa ‑a ‑dhɛ ꞊dede ꞊në 'wo‑ ꞊mɔɔ.»
REV 16:7 'Yö 'a ‑wʋ do 'bha ma 'zü kö ‑yö 'go sië Atanna ‑dhɔkëtagwë "klʋ bha‑ 'gü 'ö‑ pö: «‑Yö "dhʋ̈ tɛan‑ 'ka, n Dëmɛ ma Atanna, 'ö i ‑bha 'gügbɩɩdhɛ ‑dhiang 'yaa zë, i ‑bha 'wɔn ‑bho mɛ "bhɩɩ‑ ‑nu 'gü ‑sü 'ö ꞊dhɛ ‑kɔ bha‑ 'dhö bha‑ ‑dhɛ ‑mü, pö 'yaa i ‑bha!»
REV 16:8 'Yö Atanna ‑bha "kië ‑nu bha‑ mɛ ‑yiisiö ‑naa ‑yö ö ‑bha gbɔnë 'gü ‑pë bha‑ ꞊wɛnng 'yënng‑ ‑bha, 'Yö 'yënng‑ ‑yö zun 'ma ‑sü ‑bha mɛ "bhɩɩ‑ ‑nu 'ka wʋʋʋdhö ꞊dhɛ pɛng 'dhö.
REV 16:9 'Yö 'yënng‑ bha 'ö ma mɛ "bhɩɩ‑ ‑nu 'ka ꞊dedewo 'yö‑ ‑yënngdhɛ kpɔ‑ ‑bha, "kɛɛ yö ‑zë ꞊gban 'gü, 'wii wo ‑kɔ "kan wo kë ‑sɔng yaa ‑nu "dhiʋ̈. "Si ‑zian ꞊në 'wo‑ bho Atanna 'ö yöö do ꞊në ꞊mɔɔ‑ ‑bha 'ö nëng suu bha‑ ‑ya mɛ "dhiʋ̈ "ɛɛn 'ö‑ bho mɛ ‑ta bha‑ ‑gɔ.
REV 16:10 'Yö Atanna ‑bha "kië ‑nu bha‑ mɛ "sɔɔdhu ‑naa ‑yö ö ‑bha gbɔnë 'gü ‑pë bha‑ ꞊wɛnng wü "dhabhli ‑sü bha‑ ‑bha ‑gblüdëdhɛ ‑ta. 'Yö ‑dhɛ 'gü ‑yö ꞊tröö tii 'ka ‑blünblündhö ‑bha "sɛ "pɛpɛ 'ö gun‑ ‑gɔdhiʋ̈ bha‑ ‑ta. Pë ‑ma ‑a ‑nu 'ka ‑kɔ yaa 'gü yaa bha‑ ‑wɔn 'gü, 'yö‑ ‑nu "sɔn ‑yö ‑ya ‑a ‑nu 'nɛɛ‑ zë ‑sü bha‑ ‑nu ꞊zii ‑kɔ yaa 'ö‑ "dhiʋ̈ bha‑ ‑wɔn 'gü.
REV 16:11 'Wɔn ‑ziisü ‑ziisü ‑nu 'wo gun kë sië‑ ‑nu 'ka, 'ö bhië ‑nu ‑wo ‑kan ‑a ‑nu ‑bha "dhʋ̈ bha 'yii "sika ‑zë ‑da ‑nu 'gü kö ‑wo wo ‑gɔ 'dho "sia‑ Atanna ‑dhɛ, kö ‑wa ꞊bhlëë ‑ya. "Si ‑zian ꞊në 'wo‑ bho‑ ‑gɔ ‑a ‑nu ‑bha bhië ‑nu bha‑ ‑wɔn 'gü, 'yö 'wo wo 'gü ‑siö woo‑ 'wɔn yaa kë ‑sü ‑bha 'wo dho‑ 'ka.
REV 16:12 'Yö Atanna ‑bha "kië ‑nu bha‑ mɛ "saɔdo ‑naa ‑yö ö ‑bha gbɔnë bha‑ 'gü ‑pë ꞊wɛnng ꞊gwaanga 'kpii‑ 'wo‑ ‑dhɛ Öflatö bha‑ ‑ta. 'Yö "yi bha 'ö ꞊bhʋ̈ʋ̈ 'yö to "yɛɛn 'ö‑ ꞊bhaa bha ꞊në‑ ‑bha, kë "dhʋ̈ kö ‑yö zian bho ‑gblüdë ‑nu 'ö‑ ‑nu ‑go 'yënng‑ ‑wo ‑zian 'ka ‑wɔn ‑yö gun bha‑ ‑nu ‑gɔ.
REV 16:13 'Yö 'a "yina yaa ‑yaaga 'wo ꞊dhɛ "tʋ̈ng 'dhö ‑a ‑nu yö kö ‑wo 'go sië wü "dhabhli ‑sü bha waa‑ Atanna ‑wʋdhiʋ̈loomɛ ꞊suasü bha‑ ‑nu "dhi.
REV 16:14 "Dhabhliwɔn ‑nu kë "yina yaa ‑nu ꞊në gun‑ ‑nu 'ka. 'Yö "yina yaa ‑yaaga bha 'wo ‑ziö 'wo dho ‑gblüdë "pɛpɛ 'wo gun "kpʋngtaadhɛ ꞊gban ‑gɔ "dhiʋ̈ bha‑ ‑nu "piʋ̈ kö ‑wa ‑nu ꞊loo 'ko ‑ta kö ‑wo 'dho ‑gblüdadhɛ 'gü. 'Sa ‑gblü bha woo 'dho‑ ‑da "tʋ̈ng ꞊dede 'ö‑ 'gü bha ꞊në dho kë Atanna 'ö‑ ‑fiëbhawɔn 'yaa 'dhö bha‑ ‑bha ö ‑bha 'gübgɩɩdhɛ ‑zɔn "kpʋngtaadhɛ ‑dhɛ "tʋ̈ng "gbɩɩ‑ ꞊dede 'ka.
REV 16:15 ‑A ‑gɛn ‑mü ꞊dhɛ ‑dhɛkpaɔyi bha ꞊në Atanna ‑ya zë‑ ‑wɔn ‑dhɛ 'yö‑ pö ö ‑wʋ 'gü 'ö‑ pö: «‑Dhɛ ‑ga, n nu ‑sü ‑dho kë ꞊dhɛ ꞊kwaanmɛ nu ‑sü 'dhö (mɛ 'bha 'yii 'dho‑ "tʋ̈ng dɔ)! 'Mɛ 'ö yaa‑ ‑to "yaan ‑kë kö ‑yö zun‑ 'ka "tʋ̈ng bha‑ ‑bha Atanna ‑bha zian ‑ta, 'ö ö ‑bha ‑sɔ kun ‑së 'ö 'yaa "blë, kë "dhʋ̈ kö 'ya 'dho ziö ö 'kpee‑ 'ka 'ö 'yiʋ̈‑ ‑yö dɔ‑ ‑bha, kö‑ ‑mɛ ‑bha ‑së.»
REV 16:16 ‑Dhɛ 'ö "yina yaa ‑nu bha 'wo ‑gblüdë ‑nu bha‑ ‑nu ꞊loo 'ko ‑ta ‑a ‑bha bha ‑wa ‑dhɛ ‑dhɛ eblö ‑wʋ 'gü Aamagedɔn.
REV 16:17 'Yö Atanna ‑bha "kië "saɔplɛ 'a‑ ‑nu yö ‑a ‑bha ‑mawɔnsiödhe gbɔnë 'ka wo ꞊kwɛɛ‑ bha‑ mɛ "saɔplɛ ‑naa ‑yö ö ‑bha 'gü ‑pë ꞊wɛnng 'tëng‑ ‑ta "sɛ waa‑ dhang‑ ‑nu ꞊zinng 'gü. 'Yö 'a ‑wʋ do 'bha ma kö ‑yö 'go sië Atanna ‑dhɔkëgükɔ 'ö dhang‑ 'gü bha‑ 'gü ‑gbloo 'kpiisü bha‑ ‑dhɛ 'gü 'ö‑ pö "gbɩɩ‑ 'ka 'ö‑ pö: «‑A ‑bha ꞊ya ꞊yën ꞊tɔn!»
REV 16:18 'Yö dha ‑yö ‑ya "yan 'kun ‑sü ‑bha, kö ‑yö "wɩ sië, 'yö ‑wʋ 'bha ‑nu bha 'wo ‑ya "wɩ ‑sü ‑bha kö "sɛ ‑yö ꞊zii sië "gbɩɩ‑ ꞊dede 'ka. "Sɛ 'dhɛ 'ö ꞊zii 'yi bha‑ 'ka bha‑ ‑bha ‑kë "gbɩɩsü bha, ‑a "sinma ‑blɛɛsü 'yii kë do 'ö sü‑ 'ka "sɛ kë ‑yi ‑bha 'ö dho 'ö zun‑ 'ka 'yi bha‑ ‑bha.
REV 16:19 ‑A ‑kë "dhʋ̈ ‑sü bha‑ 'gü, 'pö‑ 'kpii‑ 'wo‑ Babidhɔnö ‑dhɛ ‑kë bha ‑yö kë ‑pɛ 'ö 'gü ‑yaaga, 'ö 'pö‑ "gblʋ̈gblʋ̈ "pɛpɛ 'wo "kpʋng ꞊taa ‑a ꞊gban ‑yö wü trëntrëndhö. Atanna ‑zʋ ‑yö ‑bö Babidhɔnö ‑pö 'wo‑ ‑gɔɔ ‑pö ‑kë bha‑ ꞊sɔng ‑nu ‑ta ‑kɔ bha ꞊në‑ 'gü 'yö 'wɔn 'ö‑ ‑kɔn din 'yaa ‑së bha‑ ‑wɔ ‑ta.
REV 16:20 'Yö "sɛ "pɛpɛ 'ö "yi ꞊zinng 'gü ꞊zinng 'gü ‑dhɛ ‑nu 'gü ‑a ꞊gban ‑yö ꞊dhɛng waa‑ ‑tɔn ‑nu 'dhö 'yö 'wo to‑ 'gü.
REV 16:21 'Yö mëngga 'ö‑ do ‑yö ꞊mɔɔ‑ ‑bha 'ö "kidhʋng ‑kaɔng ‑yiisiö bho bha 'ö ‑ya 'go ‑sü ‑bha dhang‑ 'gü 'ö ꞊wɛnng mɛ "bhɩɩ‑ ‑nu ‑ta. 'Yö 'wo ‑ya "si bho ‑sü ‑bha Atanna ‑gɔ nëng 'ö ‑ya ‑a ‑nu "dhiʋ̈ mëngga ‑dha ban ‑sü 'ka bha‑ ‑wɔn 'gü, ‑a ‑gɛn ‑mü ꞊dhɛ ‑yö ‑gun ‑ziisü "dhiʋ̈ ziö 'ka.
REV 17:1 ꞊Dhɛ 'ö ꞊ya kë "dhʋ̈, 'yö Atanna ‑bha "kië "saɔplɛ 'ö gbɔnë "saɔplɛ bha 'ö gun‑ ‑nu ꞊kwɛɛ bha‑ mɛ do ‑yö ꞊yɔɔn n "sɔɔ 'yö‑ pö n ‑dhɛ 'ö‑ pö: «‑Bhö nu kö ‑kɔ 'ö Atanna dho 'wɔn bho‑ 'ka ‑zuadhe 'kpii‑ 'ö ‑ya ‑sü 'ka "yi "gblʋ̈gblʋ̈ ‑nu ‑gɔ "dhiʋ̈ bha‑ 'gü bha 'a‑ ‑zɔn i ‑dhɛ.
REV 17:2 ‑A ‑gɛn ‑mü ꞊dhɛ ‑gblüdë "pɛpɛ 'wo "kpʋng ꞊taa ‑wo wo ‑dɩ ‑da ‑sü 'ka yö ꞊në‑ "piʋ̈ 'yö 'wo ‑da ‑sü 'ka ‑zua zë ‑sü 'gü, 'yö‑ ‑nu ‑bha "yënng dɔ ꞊ya kë ꞊dhɛ we 'dhö 'yö‑ ‑nu zë sië bha.»
REV 17:3 ꞊Dhɛ 'ö‑ pö n ‑dhɛ "dhʋ̈, 'yö Atanna ‑bha 'Nii‑ ‑yö pa n 'ka, 'yö‑ ‑bha "kië bha 'ö n sü 'yö dho n 'ka "tʋngtadhɛ do 'bha bha‑ 'gü. A dho ‑dhɛ ‑ga kö dhebhɔ 'bha bha ‑yö ‑ya ‑sü 'ka wü ‑zaɔndhö 'bha 'ö‑ ‑bha ‑dhɛ ꞊gban 'dhö ‑bɛn zë ‑sü 'ka, "kɛɛ 'ö ‑bɛn 'ö‑ ‑bha bha‑ ꞊gban 'dhö "si ‑bho Atanna ‑gɔ ‑wʋ ꞊në‑ 'ka bha‑ ‑ta. Wü bha‑ ‑gɔ ‑gun "saɔplɛ, 'yö‑ ‑sö ‑yö gun ‑kaɔng do.
REV 17:4 Sɔ ‑nu 'wo gun dhebhɔ bha‑ ‑bha bha‑ 'bha ‑nu ‑gun ‑zaɔndhö ꞊dede 'ka ‑gbangbandhö, 'yö‑ 'bha ‑nu ‑bha ‑zaɔndhö ‑dhɛ "dhiʋ̈ 'yii pa ‑së 'ka, kö ‑zutapë ‑nu 'wo‑ ‑gɔ ‑a ꞊gban "pɛpɛ ‑yö "sënng ꞊në‑ 'ka, waa‑ ‑gwë ꞊bhlëësü ‑nu waa‑ ‑zlɔɔga ꞊bhlëësü ‑nu 'dhö. Kö "sënng gbɔnë do 'bha 'ö pa ‑sü 'ka ‑a kë ‑sɔng yaya ‑nu 'ö ‑gban ‑bha ‑zua zë ‑sü ‑bha bha‑ 'ka bha‑ 'ka.
REV 17:5 Kö 'tɔ 'ö mɛ 'bhaa‑ 'klɔɔ‑ dɔ bha ‑yö ‑ya ‑sü 'ka‑ ‑kpong "dhiʋ̈ 'ö‑ pö: «Babidhɔnö ‑pö 'ö ‑zuazëmɛ "pɛpɛ ꞊gban waa‑ 'wɔn yaa "pɛpɛ 'ö‑ ‑yënng ‑yö Atanna ‑kë ‑a ꞊gban dhe 'godhɛ 'ka.»
REV 17:6 'A dho ‑dhɛ ‑ga kö Atanna dhɔɔbhaamɛ ‑nu waa‑ Yesu "sɛɛ‑ ‑nu 'ö‑ ‑nu ꞊yɔɔn ꞊wɛnng bha‑ bian yaa‑ 'kun, 'a‑ yö, ‑a 'wɔn ꞊dede kë n ‑kɔn.
REV 17:7 'Yö Atanna ‑bha "kië bha 'ö‑ pö n ‑dhɛ: «‑A 'wɔn ‑yö i ‑kɔn ‑më ‑wɔn 'gü? Dhebhɔ bha waa‑ wü 'ö ‑ya ‑ta 'ö‑ ‑gɔ 'dhö "saɔplɛ "kɛɛ 'ö‑ ‑sö 'dhö ‑kaɔng do bha a ‑dho ‑a 'klɔɔ‑ pö i ‑dhɛ.»
REV 17:8 'Yö‑ pö n ‑dhɛ: «Wü 'i‑ ‑ga bha ‑yö ‑gun "yaan yi 'bha 'ka "kɛɛ 'yaa 'dhö 'zü. ‑Yö ‑dho 'go ‑klɔng züziösü bha ꞊në‑ 'gü "kɛɛ kö‑ 'gü ꞊në ‑yö see‑. Mɛ "pɛpɛ 'wo "kpʋng ꞊taa 'ö‑ ‑nu 'tɔ ‑bɛn 'yaa zë ‑sü 'ka Atanna ‑bha dha ‑sü 'sëëdhɛ 'gü "sɛ waa‑ dhang‑ ‑nu kë "tʋ̈ng 'gü bha ꞊wa wü bha‑ yö, ‑a 'wɔn ‑dho ‑nu 'kɔn. ‑A 'klɔɔ‑ ‑mü ꞊dhɛ ‑yö ‑gun, "kɛɛ 'yaa 'dhö 'zü, "kɛɛ ‑yö ‑dho ‑ya mü 'zü 'ö bhɔ ‑deewo.
REV 17:9 Mɛ ‑mawɔn dho kë 'wɔn ‑bho 'koo dɔ ‑sü waa‑ "gblʋ̈ʋ̈dhɛ 'daɔnnu ‑sü ‑bha "tʋ̈ng 'ö‑ 'ka ‑a do 'bha ꞊në bha, kö mɛ ‑yö 'wɔn bha‑ 'klɔɔ‑ dɔ. ‑A ‑gɛn ‑mü ꞊dhɛ wü bha‑ ‑gɔ "saɔplɛ bha ‑yö ‑tɔn "saɔplɛ 'ö dhebhɔ bha 'ö ‑ya ‑sü 'ka‑ "dhiʋ̈ bha ꞊në‑ "blɛɛn‑ 'ka, 'yö ‑ya mü 'zü 'ö ‑gblüdë "saɔplɛ 'ka.
REV 17:10 ‑A ‑gblüdë "saɔplɛ bha‑ mɛ "sɔɔdhu ‑zë ‑a ‑nu ‑bha ꞊ya bo 'nu, 'yö‑ mɛ do 'ö ö ‑bha kë sië "tʋ̈ng ya‑ 'gü, 'yö‑ mɛ do 'bha 'dhö nu sië. ‑A mɛ 'dhɛ 'ö nu sië bha yö ‑zë ‑yö ‑dho nu kö "tʋ̈ng 'yaa 'gbɛ 'zü.
REV 17:11 'Yö wü 'ö gun yi 'bha 'ka, "kɛɛ 'ö 'yaa 'dhö 'zü bha 'ö ‑gblüdë ‑nu bha‑ ‑nu "saaga ‑naa 'ka, 'sa ‑yö ‑gun mɛ "saɔplɛ ‑blɛɛsü bha‑ ‑nu kpö 'gü, 'yö‑ 'gü see‑ "tʋ̈ng 'dhö ꞊loo sië bha.
REV 17:12 ‑A ‑sö ‑kaɔng do 'i‑ yö bha ‑wo ‑gblüdë ‑kaɔng do ꞊në‑ 'ka 'pö, "kɛɛ wo ‑zë 'wii wo ‑bha ‑gblüdëdhɛ zü bho ꞊kö, "kɛɛ ‑wo ‑dho "sɛ nu‑ ‑nu ‑dhɛ 'ö wo ‑gblüdëdhɛ ‑kë "tʋ̈ng 'në 'bha 'ka waa‑ wü bha‑ ‑nu 'dhö.
REV 17:13 ‑A ‑gblüdë ‑nu ‑kaɔng do bha‑ ‑nu zuëpiʋ̈wɔn ‑dho kë do, 'ö 'wo woo‑ mɛ ‑dhɛ waa‑ ‑nu ‑bha 'gügbɩɩdhɛ sü 'wo‑ dɔ wü bha‑ ‑gɔ.
REV 17:14 'Yö 'wo 'ko zë Atanna ‑bha "bhlaanë 'ka, "kɛɛ ‑a ‑nu ‑kɔ 'yii 'dho ꞊mɔɔ‑ ‑bha, "bhlaanë bha‑ ‑kɔ ‑dho ziö‑ ‑nu ‑gɔ, ‑a ‑gɛn ‑mü ꞊dhɛ yö ꞊në mɛ ‑gɔdhiʋ̈mɛ ꞊gban ‑bha ‑gɔdhiʋ̈mɛ 'ka, 'yö ‑gblüdë ꞊gban ‑bha ‑gblüdë 'ka. "Bhlaanë bha 'ö ö ‑bha mɛ ‑nu 'ö‑ ‑nu ‑dhɛ, 'ö‑ ‑nu ‑ya, 'ö 'wii 'go wo ‑wʋ ‑ta tongtongdhö, "ɛɛn 'ö 'wii "kan‑ ‑bha bha ꞊në wɛng‑ ‑nu ‑a ‑nu ‑kɔ dho ziö ‑gblüdë ‑nu bha‑ ‑nu ‑gɔ "dhʋ̈ bha.»
REV 17:15 'Yö Atanna ‑bha "kië bha 'ö‑ pö 'zü n ‑dhɛ 'ö‑ pö: «"Yi ‑nu 'ö dhebhɔ bha 'ö gun ‑ya sië‑ ‑gɔ "dhiʋ̈ bha, "siya ‑nu oo, mɛ kpö ‑nu oo, "ɛɛn "sɛgɔ ‑nu waa‑ ‑wʋ suu "pɛpɛ 'ö "kpʋng ꞊taa ‑a pö ‑mɛ ‑nu ꞊gban ꞊në‑ ‑nu ‑zɔn 'ka 'dhö bha.
REV 17:16 ‑A wü bha waa‑ ‑sö ‑kaɔng do 'i‑ yö bha ‑wo ‑dho wo zü kë do 'wo ‑da ‑zuadhe bha‑ ‑dhɛ pë "piʋ̈, 'wo‑ ꞊slɔɔpë ꞊gban "pɛpɛ sü‑ ‑gɔ 'wo sɔ ꞊gban bho‑ ‑bha 'ö to ö 'kpee‑ 'ka, 'ö ‑ya mü 'wo‑ ‑wü 'bha ‑bhö, 'wo‑ ‑kpɛa dɔ pɛng "dhiʋ̈.
REV 17:17 ‑A ‑gɛn ‑mü ꞊dhɛ Atanna yöö ꞊dede ꞊në ö ‑wʋ kpɔ‑ ‑nu ‑bha kö 'wɔn 'ö‑ ‑zʋ "piʋ̈ ꞊dhɛ 'ö‑ kë 'nu ‑zuadhe bha‑ 'ka bha wo ‑zë ‑wa kë, ꞊dhɛ waa wü ‑nu bha ‑wo wo zü kë do, kö ‑wo wo ‑bha mɛdhɛ ꞊gban 'sü ‑wa dɔ‑ ‑kɔ 'ka kö ‑yö 'to‑ 'ka "dhʋ̈ ‑yö zun‑ 'ka ‑wʋ 'ö Atanna ‑ya pö yi 'bha 'ka ꞊dhɛ ‑yö ‑dho kë bha‑ ꞊gban 'gü ‑wɔn kë ‑yi ‑bha.
REV 17:18 'Yö go mü 'ö‑ pö: «꞊Ya 'go yö ‑zë 'gü, dhebhɔ 'i‑ yö bha ꞊në 'pö 'kpii‑ 'ka, yö ꞊në ‑gblüdëdhɛpö "pɛpɛ 'wo "kpʋng ꞊taa ‑a ꞊gban ‑gɔ 'ka.»
REV 18:1 ꞊Dhɛ 'ö ꞊ya kë "dhʋ̈, 'yö 'a Atanna ‑bha "kië "wɛɛ do yö kö ‑yö 'go sië dhang‑ 'gü 'ö ꞊lɔɔ, "kɛɛ kö Atanna ꞊yaa‑ gba 'gügbɩɩdhɛ ꞊dede 'ka, 'yö‑ 'bhü ‑yö ꞊mɔɔ "kpʋngtaadhɛ ꞊gban 'gü.
REV 18:2 'Yö Atanna ‑bha "kië bha 'ö ‑gbla "gbɩɩ‑ 'ka 'ö‑ pö: «'Pö‑ bha ꞊ya 'wü, Babidhɔnö ‑pö bha ꞊ya 'wü, ꞊ya 'wü ‑trukpɛ ‑trukpɛdhö. ‑A ‑dhɛ ꞊ya kë "yina yaa suu ꞊gban "pɛpɛ 'do 'do ‑yɛa ꞊bhaa ‑dhɛ ꞊në‑ 'ka dɔ 'kwa‑ wo ya‑ 'gü. ‑Maa ‑yënngsü ‑nu 'ö‑ ‑nu ‑dhɔ 'yaa mɛ 'bha kë bha ꞊në 'wo 'kɔ dɔ sië‑ 'gü ꞊taamasü ya‑ 'gü.
REV 18:3 Kë 'ö‑ wo "dhʋ̈ bha‑ 'klɔɔ‑ ‑mü ꞊dhɛ Babidhɔnö ‑pö bha ꞊ya ꞊gbaɔn "gbɩɩ‑. Yö ꞊në ‑kaa dha kë ‑sü bha‑ we kpɔ "kpʋngtaamɛ ꞊gban "pɛpɛ ‑gɔ, 'yö ‑gblüdë "pɛpɛ 'wo "kpʋng ꞊taa 'wo ‑da ‑zua zë ‑sü 'gü‑ "piʋ̈, 'yö mɛ "pɛpɛ 'wo "dhɔɔdɔmɛ ‑nu 'ka "kpʋng ꞊taa 'wo wo zü ‑gban ‑a ‑bha ꞊naɔ "yan bhɔ ‑sü ‑ziisü bha‑ 'gü 'yö 'wo ‑kë ꞊naɔmɛ 'ka.»
REV 18:4 'Yö 'a ‑wʋ "wɛɛ do 'bha ma dhang‑ 'gü 'zü kö ‑ya pö sië 'ö‑ pö: «Mɛ "pɛpɛ 'ka bɔ n 'ka ‑ka 'go 'pö‑ bha‑ 'gü, kö ka ‑kɔ 'ya 'dho ‑da ‑a ‑bha 'wɔn yaa bha‑ 'gü, 'ö 'wɔn "gbɩɩgbɩɩ‑ ‑nu 'ö Atanna yöö‑ wɔ‑ ‑ta bha 'ö ka ꞊slɔɔ.
REV 18:5 ‑A ‑gɛn ‑mü ꞊dhɛ 'wɔn yaa ‑nu 'ö‑ ‑kë bha‑ ‑gɔn 'ö dɔ 'ko ‑ta ꞊ya 'dho ꞊ya zun dhang‑ ‑bha, ‑a ‑wɔn 'gü, Atanna ‑zʋ ꞊ya ‑da ‑a këwɔn yaa ‑nu bha‑ ‑nu ‑ta.
REV 18:6 'Yö ‑wʋ do bha 'ö‑ pö: «‑Ka 'wɔn bho‑ 'gü ꞊dhɛ ‑kɔ do 'ö 'wɔn bho‑ 'ka 'pö ka 'gü bha‑ 'dhö. ‑A ‑bha ‑zian ‑zë "dhiʋ̈‑ ziö‑ 'dhɛ 'ö‑ ‑kë ka 'ka bha‑ ‑ta. ‑Kaa ‑bha wemükakɔɔ pa we "dhiʋ̈‑ 'ö‑ ‑bha "dhiʋ̈dhɛ ‑yö ‑ziö ‑a 'dhɛ 'ö‑ nu ka ‑zë ka ‑dhɛ bha‑ ‑ta bha ꞊në‑ 'ka.
REV 18:7 'Ö gun 'tɔ 'kun sië ‑kɔ do 'ö‑ 'gü, 'ö ꞊naɔ ‑yan ‑kë ‑kɔ do 'ö‑ ‑bha "kpʋng ꞊taa bha ‑ka 'wɔn bho‑ 'gü ‑kɔ do bha ꞊në‑ 'gü. ‑A ‑gɛn ‑mü ꞊dhɛ ‑ya ‑pö ö ‑dɩ ‑dhɛ ꞊dhɛ ö ‑ya ꞊dhɛ ‑gblüdëdhe ‑ya, 'yaa ꞊gɛandhe 'ka, "ɛɛn 'pë 'wo‑ ‑dhɛ ga, 'yii 'dho bhɔ ö ‑bha tongtongdhö 'ö to‑ ‑bha.
REV 18:8 'Wɔn 'ö‑ ‑wɔn 'gü 'yö 'wɔn "gbɩɩ‑ "pɛpɛ 'ö dho kë‑ 'ka 'yö‑ ꞊gban dho kë ‑dhɛkpaɔyi do ꞊në‑ 'ka bha 'yö bha. Din‑ ‑dho ‑a kë, 'ö ga ‑yö bhɔ‑ ‑bha, 'ö ‑ya ꞊gɛan sɛɛ" ‑ta, 'ö pɛng ‑ya ‑bhö, "kɛɛ ‑a ꞊gban‑ ‑dho kë "dhʋ̈ ‑dhɛkpaɔyi do ꞊në‑ 'ka, ‑a ‑gɛn ‑mü ꞊dhɛ Atanna 'ö 'wɔn bho sië‑ 'gü "dhʋ̈ bha kwa Dëmɛ, kwa ‑bha Atanna 'ö‑ ‑bha 'gügbɩɩdhɛ ‑dhiang 'yaa zë bha‑ yö ‑mü.»
REV 18:9 ‑A ‑kë "dhʋ̈ ‑sü bha‑ 'gü, ‑gblüdë ‑nu 'wo kë wo ‑gɛn ‑da ‑zua zë ‑sü "yi ꞊bhaa ‑kaadhadhe bha‑ "piʋ̈, 'ö 'wo gun ꞊naɔ ‑yan kë sië 'pö ꞊dhɛ‑ 'dhö bha ‑wo ‑dho "gbʋ bɔ, 'ö 'wo ‑wëë ‑wʋ ꞊gban "pɛpɛ suu 'do 'do kpɔ‑ ‑bha, kö ꞊wa pɛng 'ö dho‑ ‑bhö bha‑ "gbiën yö.
REV 18:10 ‑Wo ‑dho dɔ‑ 'ka ꞊gblɛɛn, kö "suʋ̈ ꞊ya ‑da ‑nu 'gü 'wɔn 'ö wɔ sië 'pö‑ bha‑ ‑ta bha‑ ‑wɔn 'gü 'ö 'wo "kaabho 'wo‑ pö: «"Eke, n dhee" ‑nu, ‑më ‑pë ‑wëëwɔn ꞊në ꞊ni? Babidhɔnö ‑pö, bhi 'ö 'i gun 'pö‑ ‑ziisü 'ka i ‑bha ‑kë 'kpiisü waa‑ i ‑bha 'gügbɩɩdhɛ ‑nu 'gü ya bhi ꞊në 'wɔn ‑yö ‑wɔ i ‑ta 'yënng‑ "tɛɛ doseng ‑ta ꞊ni ‑ee?»
REV 18:11 "Dhɔɔdɔmɛ ‑nu 'wo "kpʋng ꞊taa‑ ꞊gban‑ ‑dho "gbʋ bɔ 'wo ga ‑ya wo‑ ‑wɔn 'gü, ‑a ‑gɛn ‑mü ꞊dhɛ 'kö "dhɔɔ ꞊kwɛɛ‑ ‑nu 'ö gun‑ ‑nu ‑gɔ 'ö ‑kë
REV 18:12 "sënng ‑nu oo, 'wëë‑ "puu ‑nu oo, ‑gwë ꞊bhlëësü ‑nu oo, ‑zlɔɔ ‑sɛsɛngbɔ ‑nu oo, sɔga "kpɛakpɛa ‑nu waa‑ "gblan "bhɛɛ ‑nu oo, ‑a sɔ 'trëngtrëng 'dhɛ 'wo‑ "gla ‑kë bha waa‑ 'gɔ‑ "yi sɔ ‑nu oo, "ɛɛn "dhü suu "pɛpɛ 'ö‑ ‑wɔn 'dhö "gbɩɩ‑ ‑nu wo 'ö‑ ꞊fii 'dhö ‑së bha waa‑ biö "sɔn ‑nu oo, "dhü ꞊bhlëësü ‑nu waa‑ pë 'dhɛ 'wo‑ ‑pë ‑kë zën ‑nu waa‑ ‑piö ‑nu waa‑ gënng' ‑gwë ‑nu 'ka bha oo,
REV 18:13 pëdindhipë ‑nu waa‑ "tʋʋ "dhiʋ̈ ‑pë ‑nu oo, ‑dhasiklɔɔ yi ‑nu waa‑ "yɔn ‑nu 'wo‑ 'miidhö ‑kë bha oo, ‑a 'dhɛ 'ö "gʋ̈ ‑bha 'ka bha waa‑ ‑drɔɔ ‑nu bha oo, "yɔn ‑nu, 'bluu‑ ‑bi ‑nu waa‑ ga ‑nu, ‑du ‑nu waa‑ "bhlaa ‑nu, ꞊soo ‑nu waa‑ gɔ 'dhɛ 'ö ꞊soo ‑ya ‑gan ‑nu wo bha waa‑ ꞊dhuëng ‑nu bha‑ 'bha 'dhɔ mɛ 'yaa 'dhö 'zü.
REV 18:14 'Ö "dhɔɔdɔmɛ ‑nu bha 'wo dɔ 'pö‑ bha‑ 'ka ꞊gblɛɛn ꞊dhɛ ‑kɔ bha‑ 'dhö 'wo‑ pö: «‑A ‑ga bha, Babidhɔnö ‑pö, pë "pɛpɛ 'ö‑ ‑wɔn "dhia‑ gun i 'gü, 'ö gun i "piʋ̈ ꞊dhɛ ‑yö kë i ‑gɔ, "ɛɛn pë "nɛɛnɛɛ ‑nu waa‑ pë ‑sɛngbɔ ‑nu 'ö gun i ‑gɔ bha‑ ‑ga 'ö‑ ꞊gbaan ‑töng "dhiʋ̈ "kan i ‑bha, 'ö‑ ꞊gban 'gü ꞊ya see‑ i ‑gɔ 'ö 'bhii 'dho‑ 'bha yö 'zü tongtongdhö bha.»
REV 18:15 'Mɛ 'wo gun "dhɔɔ dɔ sië 'pö‑ bha‑ 'gü 'wo kë ‑sü 'ka ꞊naɔmɛ 'ka ‑a 'saa‑ 'gü bha, ‑wo dho dɔ‑ 'ka ꞊gblɛɛn 'wɔn 'ö dho wɔ 'pö‑ bha‑ ‑ta bha‑ "suʋ̈ 'ka 'wo "gbʋ bɔ 'wo ‑wëë ‑wʋ ꞊gban suu 'do 'do kpɔ
REV 18:16 'wo‑ pö: «"Eke, n dhee" ‑nu! "Eke! Babidhɔnö ‑pö 'kpiki ‑kpiki 'ö sɔ ga ‑yö gun‑ ‑bha, 'ö 'gɔ‑ "yi sɔ ‑yö gun‑ ‑bha, 'ö dho ö "gblan "bhɛɛ ‑da ‑ta, 'ö gun ö ‑bha 'dhu ‑sü 'ka "sënng waa‑ ‑gwë ‑wɔn "gbɩɩ‑ ‑nu waa‑ ‑zlɔɔga ‑së ꞊gban suu 'do 'do 'ka bha ꞊në‑ 'gü ꞊ya see‑ ꞊dhɛ mɛ‑ mɛ "yan zë bha ‑wa!
REV 18:17 'Ö 'mɛ 'wo ‑kë "yitagɔ "dhiʋ̈ "ta ‑sü ‑mɛ ‑nu 'ka waa‑ ‑nu ‑bha gɔ 'gü ‑mɛ ‑nu waa‑ mɛ 'dhɛ 'wo yë ‑kë "yitagɔ bha‑ 'gü, waa‑ mɛ "pɛpɛ 'kö 'wo wo ‑bhöpë ꞊slɔɔ "yi ‑zë ‑ta, 'wo dɔ‑ 'ka ꞊gblɛɛn
REV 18:18 'wo ꞊gbla "gbʋ ‑bha kö ꞊wa pɛng 'ö 'pö‑ bha ‑bhö sië bha‑ "gbiën yö 'wo‑ pö: «'A! 'pö‑ ya‑ ‑mɔɔ 'ka 'yaa 'dhö "sɛ waa‑ dhang‑ ‑nu ꞊zinng 'gü!»
REV 18:19 'Ö 'wo ‑wëë ‑ya wo, kö ‑wo ‑bobi ‑nu dɔ sië wo ꞊gbin‑ ‑wëë 'ö ‑da sië‑ ‑nu ‑ta bha‑ ‑wɔn 'gü, 'wo "gbʋ bɔ 'wo‑ pö: «"Eke! ‑Wëëwɔn ‑wa! N dhee" ‑nu! 'Pö‑ 'kpii‑ 'ö yö ꞊në gun 'mɛ 'wo ꞊naɔmɛ 'ka 'ö "yitagɔ ‑nu 'wo‑ ‑nu ‑gɔ "yi ‑ta ‑a ‑nu kë sië ꞊naɔmɛ 'ka ya ꞊në ꞊ya 'wü 'yënng‑ "tɛɛ doseng ‑ta ya ‑wa! ‑Wëëwɔn ‑mɛɛ ꞊në ya?»
REV 18:20 'Yö Atanna ‑bha "kië ‑nu bha 'wo zun wo "dhia bho ‑sü ‑bha kö ‑wa pö sië 'wo‑ pö: «'Mɛ 'ka dhang‑ 'gü ‑ka ka "dhia bho 'pö‑ bha‑ 'wü ‑wɔn "dhiʋ̈, kö mɛ "pɛpɛ 'ka bɔ Atanna 'ka, Yesu ‑bha bɔmɛ ‑nu waa‑ Atanna ‑wʋdhiʋ̈loomɛ ‑nu 'ka ka "dhia bho 'pö. ‑A ‑gɛn ‑mü ꞊dhɛ Atanna ꞊ya 'wɔn bho 'pö‑ bha‑ 'gü 'wɔn yaa 'ö‑ ‑kë ka 'ka bha‑ ‑wɔn 'gü.
REV 18:21 ꞊Dhɛ 'ö ꞊ya kë "dhʋ̈, 'yö 'a Atanna ‑bha "kië 'gügbɩɩ do 'bha yö kö ꞊ya ‑gwë 'gbɔng ‑mɔɔ ‑bha ‑sü 'bha bha‑ 'sü kö ꞊yaa‑ ‑zuö ꞊weeyi ꞊bhaa kö ‑ya pö sië: «Babidhɔnö ‑pö 'kpii‑ bha ‑wo ‑dho ‑a ‑zuö baandhö ‑kɔ ya ꞊në‑ 'gü faan 'ka 'yö mɛ 'bha 'yaa‑ yö 'zü tongtongdhö.
REV 18:22 Mɛ 'bha "tʋ 'yii 'dho ‑da kɔnng zë ‑wʋ, "tan bho ‑wʋ "ɛɛn "truu suu "ʋʋ suu 'bha ‑piö ‑wʋ 'gü i yaan‑ ‑bha 'zü, 'wii 'dho yë suu "ʋʋ suu 'bha këmɛ ꞊slɔɔ mü 'zü, "ɛɛn mɛ 'bha 'yii 'dho pë zɔn ‑vin ma i 'gü 'zü tongtongdhö.
REV 18:23 ‑Dhangbha 'bhü 'yii 'dho dɔ mü 'zü, "ɛɛn mɛ 'bha 'yii 'dho dhe 'sü ‑wɔn, "ɛɛn gwaan‑ 'kpɔ ‑wɔn ‑dhiang ‑zian zë i 'gü 'zü. ‑A ‑gɛn ‑mü ꞊dhɛ 'tɔmɛ "gblʋ̈gblʋ̈ ꞊në 'wo gun "dhɔɔ dɔ sië i 'gü, 'yö 'i ‑da "kpʋngtaamɛ ꞊gban "pɛpɛ ‑gɔ 'gü i ‑bha "zʋʋdhɛ kë ‑sü 'ka.»
REV 18:24 ꞊Ya 'go mü 'zü Atanna ‑wʋdhiʋ̈loomɛ ‑nu waa‑ dhɔɔbhaamɛ ‑nu waa‑ mɛ "pɛpɛ 'wo‑ ‑nu zë ‑a ‑nu ‑san ‑bha bha‑ ‑nu ‑bha "dhang bha ꞊në ꞊ya Babidhɔnö ‑mɛ ‑nu ꞊gban ka 'kun bha.»
REV 19:1 ꞊Dhɛ 'ö ꞊ya kë "dhʋ̈, 'yö n "tʋ 'dhö ‑da ꞊gbang dɔ ‑wʋ 'bha 'gü dhang‑ 'gü ꞊dhɛ mɛ kpö ‑ziisü 'wo "wɩ sië‑ 'dhö kö ‑wo "kwi "kan sië 'wo ‑ya mü 'wo‑ pö: «‑Ka Atanna 'tɔ bhɔ, yöö do ꞊në kwa Dhamɛ 'ka, 'tɔbhɔdhe waa‑ 'gügbɩɩdhɛ ‑wo kwa ‑bha Atanna bha ꞊në‑ ‑bha 'ka.
REV 19:2 ‑A dɔ ‑za bha pö 'aa‑ ‑bha, ‑a ‑gɛn ‑mü ꞊dhɛ 'yaa za dɔ mɛ 'bha ‑bha ꞊flü ‑ta. Yö ꞊në‑ ‑wɔn 'gü 'yö 'wɔn bho ‑zuadhe 'kpii‑ 'ö "kpʋngtaadhɛ see‑ ‑sü 'ka ö ‑bha ‑zua zë ‑sü 'ka bha‑ 'gü. ‑A 'wɔn ‑bho 'gü ‑gɛn ‑mü ꞊dhɛ yö ꞊në kë Atanna ‑bha yëkëmɛ ‑nu ‑zë.»
REV 19:3 'Yö 'wo "kwi bha‑ ꞊plɛ ‑naa ‑kan 'zü ‑deewo 'wo‑ pö: «‑Ka Atanna nuɛ" bho! ‑A ‑gɛn ‑mü ꞊dhɛ pɛng 'ö‑ ‑da 'pö 'kpii‑ bha‑ 'ka 'ö‑ "gbiën 'dhö bhɔ sië bha ‑yö ‑dho 'to "dhʋ̈ "sɛ 'tuʋ̈‑ 'ka!»
REV 19:4 ꞊Dhɛ 'ö ꞊waa‑ pö "dhʋ̈, 'yö mɛ zizi ‑nu ‑kaɔng ꞊plɛ ga ‑yiisiö bha 'wo zun wo kpiö 'gü waa‑ pë "yaandhe ‑yiisiö bha‑ ‑nu 'dhö 'yö 'wo Atanna ‑dhɔkë kö ‑wa pö sië: «Kö ‑yö kë "dhʋ̈ bha 'aa ‑yö kë! Atanna nuɛ"!»
REV 19:5 ꞊Dhɛ 'ö ꞊ya kë "dhʋ̈, 'yö 'a ‑wʋ do 'bha ma kö ‑yö 'go sië ‑gbloo 'kpiisü bha‑ ‑yɛa bha‑ 'gü 'ö‑ pö: «Mɛ "pɛpɛ 'ka kwa ‑bha Atanna bha‑ ‑bha gwëëzë ‑nu 'ka ‑kaa nuɛ" bho! Mɛ "pɛpɛ 'ka ‑suʋ̈ ‑gɔ, 'mɛ 'ka mɛ ‑tiandhö 'ka oo, mɛ 'kaa‑ 'ka oo, mɛ ꞊gban ‑kaa nuɛ" bho!»
REV 19:6 'Yö 'a mɛ kpö ‑ziisü 'bha bha‑ ‑wʋ ma kö ‑wo "wɩ sië ‑yuudhö ꞊dhɛ "yi 'kpii‑ ‑zuö ‑wʋ 'dhö, ꞊dhɛ dha "gbɩɩ‑ 'ö "wɩ sië‑ 'dhö 'wo‑ pö: «‑Ka ‑kwa kwa ‑bha Atanna 'tɔ bhɔ! ‑A ‑gɛn ‑mü ꞊dhɛ yö 'ö kwa Dëmɛ 'ka 'ö‑ ‑bha 'gügbɩɩdhɛ "dhiʋ̈todhɛ 'yaa 'dhö bha ꞊ya zun ö ‑bha mɛdhɛ kë ‑sü ‑bha ꞊tɔn!»
REV 19:7 ‑A ‑wɔn 'gü, ‑ka ‑kwa "gɛɛ kë ‑bha ‑gblüdëdhɛ bha‑ ‑wɔn "dhiʋ̈ kö 'kwa‑ ‑bha bhoo 'kun, kö 'kwa kwa dhia" bho. ‑A ‑gɛn ‑mü ꞊dhɛ Atanna ‑bha "bhlaanë bha‑ ‑bha dhe dɔ "tʋ̈ng ꞊ya ꞊loo, ‑a ‑bha dhebhɔ ꞊ya ö bo ö baa‑ ‑sü 'ka.
REV 19:8 ꞊Ya sɔ "puu "pepe 'bhü ‑yö dɔ mɛ "yan 'gü, 'ö ‑dhii ‑tangga ‑zian 'yaa‑ ‑bha bha‑ ‑da ö ‑bha.» 'Sa 'wɔn ‑së ‑nu 'ö Atanna ‑bha mɛ ‑nu 'wo‑ ‑kë bha ꞊në sɔ "puu bha‑ 'ka.
REV 19:9 'Yö Atanna ‑bha "kië ‑ya pö n ‑dhɛ: «‑Bhö ‑a ‑bɛn zë kö 'i‑ pö mɛ "pɛpɛ 'ö Atanna ‑ya ‑nu ‑dhɛ ö ‑bha "bhlaanë bha‑ ‑bha dhe dɔ ‑dhɛ 'gü bha‑ ‑nu ‑dhɛ ‑a ‑nu ‑bha ‑së.» 'Yö ‑ya mü 'zü 'ö‑ pö: «‑Wʋ 'ö Atanna yöö ꞊dede 'ö‑ pö ꞊në bha, 'yaa ꞊sua 'ka.»
REV 19:10 ꞊Dhɛ 'ö ꞊yaa‑ pö "dhʋ̈, 'yö 'a zun n kpiö 'gü‑ ‑dhɛ kö 'a‑ ‑dhɔkë, "kɛɛ 'yö‑ pö n ‑dhɛ: «I ‑dɩ 'kun! 'Mɛ 'ö bhii‑ kë‑ ‑dhɛ "dhʋ̈ ‑a ‑mɛ 'yaa ‑mü ma ‑zë n 'ka. ‑A ‑gɛn ‑mü ꞊dhɛ bhi 'dhö, ma 'dhö, mɛ "pɛpɛ 'wo i dheebhang ‑nu 'ka 'wo 'dhang bho tɛanwɔn 'ö Yesu Klisi ‑ya pö bha‑ "dhiʋ̈ bha‑ ‑nu 'dhö, mɛ ꞊gban kwa gwëë" ꞊në‑ 'ka ꞊dhɛ 'ko 'dhö. Mɛ ꞊gban kwa Atanna ꞊në ‑gɔ, ‑bhö ‑a yö ꞊në‑ ‑dhɔkë!» Tɛanwɔn 'ö Yesu ‑ya ‑dhiang zë "dhʋ̈ bha ꞊në 'wɔn "pɛpɛ 'ö Atanna ‑wʋdhiʋ̈loomɛ ‑nu ‑wa pö bha‑ ga ꞊dede 'ö‑ 'gü ‑a 'ka.
REV 19:11 ꞊Dhɛ 'ö ꞊ya kë "dhʋ̈, 'yö 'a dhang‑ yö kö‑ "dhi ꞊ya "pʋ. 'Yö 'a dho 'a ꞊soo "puu do yö kö mɛ ‑ya ‑ta. 'Mɛ 'ö gun ꞊soo bha‑ ‑ta bha ‑wa ‑dhɛ ‑towʋtamɛ, 'ö 'wo‑ ‑dhɛ 'zü tɛanwɔn pömɛ. ꞊Yaa‑ pö 'ö za dɔ mɛ ‑bha ‑ya ‑dɔ tɛanwɔn ‑ta, ꞊yaa‑ pö 'ö 'ko zë, ‑ya ‑zë tɛanwɔn 'gü.
REV 19:12 Kö 'mɛ 'ö bha‑ "yan 'bhü ‑yö dɔ sië ꞊dhɛ "sɔng 'bhü 'dhö "kɛɛ kö ‑gblüdëdhɛ 'faan‑ 'gbɛ ‑ya ‑gɔ ‑bha. 'Tɔ 'ö gun‑ ‑bha 'ö gun ‑bɛn zë ‑sü 'ka bha mɛ 'bha 'yaa‑ dɔ kö 'yii kë yöö ꞊dede ‑zë 'ka.
REV 19:13 Kö sɔ 'ö‑ ‑bha bha ꞊yɔɔn ‑ya zë ‑sü 'ka ‑gbëndhö. Mɛ 'ö bha ‑wa ‑dhɛ ‹Atanna ‑wʋ›
REV 19:14 kö Atanna ‑bha "sɔdha ‑nu "pɛpɛ 'wo dhang‑ 'gü ‑a ‑nu ꞊gban ‑wa ꞊keng‑, kö sɔ "puu "pepe, "kɛɛ 'ö ꞊bhlëësü ꞊dedewo, 'ö ‑dhii ‑tangga ‑zian 'yaa‑ ‑bha ‑ya ‑nu ꞊gban "pɛpɛ ‑bha kö ‑wo ‑ya ‑sü 'ka‑ 'ka 'pö ꞊soo "pupu ‑nu ‑ta.
REV 19:15 Kö 'mɛ 'ö bha ‑siangga "zɔ ‑sü 'ö yöö ö ‑bha ‑gblüdëdhɛ kë‑ 'ka, kö ‑yö 'wɔn bho‑ 'ka "kpʋngtaamɛ ꞊gban "pɛpɛ 'gü bha ‑ya "dhi. ‑A ‑gɛn ‑mü ꞊dhɛ ‑yö ‑dho ‑ya "sɛgɔ "dhiʋ̈ ‑piöga ‑sabhlü ꞊në‑ 'ka, 'yö‑ ‑nu ‑kɔn zɔn ꞊dhɛ mɛ‑ sö zɔn ‑gwë "wlʋ̈ 'gü, 'yö bhlɔɔ ‑ziisü 'ö ma Atanna 'ö‑ ‑bha 'gügbɩɩdhɛ ‑dhiang 'yaa zë bha‑ 'gü bha 'ö go‑ 'gü.
REV 19:16 'Mɛ 'a‑ yö ꞊soo "puu bha‑ ‑ta 'ö ‑gblüdëdhɛ 'faan‑ 'gbɛ ‑yö gun ‑gɔ ‑bha "dhʋ̈ bha 'tɔ 'bha ‑yö ‑gun ‑bɛn zë ‑sü 'ka 'zü ‑a ‑bha sɔ 'ö gun‑ ‑bha bha waa‑ "gban ‑bha ꞊dhɛ ‑wa ‑dhɛ ‹‑Gblüdë ‑nu ‑bha ‑gblüdë, gɔɔn‑ ‑nu ‑bha gɔɔn‑›.
REV 19:17 ꞊Dhɛ 'ö ꞊ya kë "dhʋ̈, 'yö 'a Atanna ‑bha "kië do 'bha yö kö ‑yö dɔ sië 'yënng‑ 'gü. 'Yö ꞊gbla "gbɩɩ‑ 'ka ‑maa "pɛpɛ 'wo gun ziö sië "sɛ waa‑ dhang‑ ‑a ‑nu ꞊zinng 'gü bha‑ ‑nu ‑dhɛ 'ö‑ pö: «Mɛ ꞊gban "pɛpɛ ka nu kö 'ka ꞊loo 'ko ‑ta kö 'ka pë ‑bhö, Atanna yöö ka ‑dhɔkë!»
REV 19:18 'Yö‑ pö: «‑Ka nu kö 'ka ‑gblüdë ‑nu ‑wü ‑bhö, waa‑ "sɔdha ‑gɔmɛ ‑nu waa‑ ‑nu ‑bha "sɔdha ‑nu 'dhö, kö 'ka ꞊soo ‑nu ‑wü ‑bhö waa‑ ‑nu ‑ta ‑mɛ ‑nu 'dhö, kö 'ka mɛ suu ꞊gban "pɛpɛ, ‑a ꞊dhuëng ‑zë ‑nu oo, ‑a 'wlɔɔ‑ ‑nu oo, ‑a mɛ "gblʋ̈gblʋ̈ ‑nu oo, ‑a 'nësɛɛnnë ‑nu oo, kö 'ka‑ ‑nu ‑wü ‑bhö!»
REV 19:19 'Yö 'a n "yan ‑kpan wü ‑ziisü bha‑ ‑bha waa‑ ‑gblüdë ‑nu 'wo "kpʋng ꞊taa waa‑ ‑nu ‑bha "sɔdha ‑nu 'dhö, kö ꞊wa ꞊loo 'ko ‑ta kö ‑wo 'ko zë 'mɛ 'ö ‑ya ‑sü 'ka ꞊soo "puu ‑ta bha waa‑ ‑bha "sɔdha ‑nu ‑nu 'ka.
REV 19:20 "Kɛɛ 'yö 'wo wü bha‑ kun, waa‑ ‑wʋdhiʋ̈loomɛ 'ö gun Atanna ‑wʋ pö sië ꞊sua 'ka 'ö "dhabhliwɔn "gblʋ̈gblʋ̈ ‑nu kë bha‑ 'dhö. ‑Yö "kpënng‑ ‑kë ‑a ‑bha "dhabhliwɔn ‑nu 'ö gun‑ kë sië bha ꞊në 'ka mɛ "pɛpɛ 'ö‑ ‑nu daɔ dɔ wü bha‑ ‑bha dɔ 'gü, 'ö 'wo gun‑ "blɛɛn‑ ‑dhɔkë sië bha‑ ‑nu ‑gɔ. 'Yö 'wo wü bha waa‑ ‑kɔdhiʋ̈mɛ 'ö gun Atanna ‑wʋ pö sië ꞊sua 'ka bha‑ ‑nu to "yaan 'yö 'wo‑ ‑nu ‑zuö pɛng "yi ꞊gblü 'ö 'gbʋ‑ 'dhö ‑da sië‑ 'gü "kɛɛ 'ö blɔɔn" ‑nu ꞊gban 'wo pu‑ 'gü "kɛɛ 'ö 'yaa "dhuu bha‑ bha‑ 'gü.
REV 19:21 'Yö 'wo mɛ ‑kpɛa zë ‑siang 'ö gun 'mɛ 'ö ꞊soo ‑ta bha‑ "dhi bha‑ 'ka, 'yö ‑maa ꞊gban "pɛpɛ 'wo‑ ‑nu ‑wü ‑bhö.
REV 20:1 ꞊Dhɛ 'ö ꞊ya kë "dhʋ̈, 'yö 'a Atanna ‑bha "kië do 'bha yö kö ‑yö 'go sië dhang‑ 'gü 'ö ꞊lɔɔ. "Kɛɛ kö ‑klɔng züziösü bha‑ ‑dhaklɩ waa‑ ‑piö lɔɔ" 'kpii‑ do ‑wa ꞊kwɛɛ‑.
REV 20:2 'Yö "yina ‑gblüdë, ꞊mlɛɛ zii 'ö yi 'bha 'ka 'wo‑ Sɔtraan ‑kë bha‑ kun, 'yö‑ ‑kplü lɔɔ" bha‑ 'ka kö ‑yö ‑kwɛ "gblü do kë mü.
REV 20:3 'Yö Atanna ‑bha "kië ‑ya sü 'yö‑ ‑zuö ‑klɔng züziösü bha‑ 'gü, 'yö‑ "dhiʋ̈ ta ‑dhaklɩ 'ö gun‑ ‑gɔ bha‑ 'ka, 'yö 'klëë‑ kpɔ‑ ‑bha, kë "dhʋ̈ kö 'ya 'dho ‑da mɛ 'bha ‑mɛ 'bha ‑gɔ 'gü 'ö dho 'ö zun‑ 'ka ‑kwɛ "gblü do bha‑ "dhiʋ̈ pa ‑yi ‑bha. ‑Kwɛ "gblü do bha ꞊ya bo ziö ‑sü 'ka, ‑wo ‑dho ‑a "pʋ 'në 'dɛdɛ 'bha wo 'zü.
REV 20:4 ꞊Dhɛ 'ö ꞊ya kë "dhʋ̈, 'yö 'a n "yan ‑kpan ‑blüdëdhɛ ‑gbloo 'gbɛ ꞊dede ‑bha kö mɛ ‑ya ‑ta. 'Mɛ 'wo gun ‑ya ‑sü 'ka‑ ‑ta "dhʋ̈ bha 'yö 'wo za dɔ ‑sü dɔ‑ ‑nu ‑kɔ 'ka. 'Yö go mü 'zü 'yö 'a mɛ "pɛpɛ 'wo‑ ‑nu zë tɛanwɔn 'wo‑ ma Yesu "dhi ‑a pö 'wo‑ wo, 'ö 'wo Atanna ‑wɔn ‑dhiang zë mɛ ‑nu ‑dhɛ ‑a ‑wɔn 'gü bha‑ ‑nu 'nii‑ ‑nu yö. 'Mɛ 'wo "dhʋ̈ bha ꞊në 'wii zun wü bha‑ ‑dhɛ kpiö 'gü kö ‑wa ‑dhɔkë, "ɛɛn kö ‑wa "blɛɛn‑ ‑dhɔkë. 'Yö 'wii‑ ‑nu daɔ dɔ wü bha‑ ‑bha dɔ 'gü ‑a ‑nu ‑kpong "dhiʋ̈ ‑dhɛ ‑nu waa‑ ‑nu ‑kɔ ‑bha ‑dhɛ ‑nu 'gü. 'Mɛ 'wo bha 'yö 'wo go ga 'gü 'wo ‑bö, 'yö waa‑ Klisi ‑nu 'wo ‑gblüdëdhɛ ‑kë ‑kwɛ "gblü do 'ka.
REV 20:5 ‑Mɛ ‑kpɛa "pɛpɛ 'dhɛ 'wo to, ‑a ‑nu 'bha 'wii ‑bö 'ö to‑ 'ka "dhʋ̈ 'ö zun ‑kwɛ "gblü do bha‑ yën ‑yi ‑bha. ‑A 'dhɛ 'wo‑ ‑go ga 'gü ‑kɔ ‑blɛɛsü ‑kë bha 'yö bha.
REV 20:6 'Mɛ 'wo dho ‑bö ‑kɔ ‑blɛɛsü bha‑ kë bha kö‑ ‑nu ‑bha ‑së ꞊dedewo, ‑a ‑gɛn ‑mü ꞊dhɛ kö wo ꞊në 'wo Atanna dhɔɔbhaamɛ ꞊dede 'ka. 'Mɛ 'wo "dhʋ̈ bha ga ꞊plɛ ‑naa ‑kɔ 'yii 'dho ꞊mɔɔ‑ ‑nu ‑bha. Wo ꞊në 'wo dho kë Atanna waa‑ Klisi ‑a ‑nu ‑bha "saabhomɛ ‑nu 'ka 'ö wɛng‑ ‑nu 'wo ‑gblüdëdhɛ ‑kë ‑kwɛ "gblü do bha‑ 'ka.
REV 20:7 ꞊Ya kë ꞊dhɛ ‑kwɛ "gblü do bha ꞊ya bo ziö ‑sü 'ka, ‑wo ‑dho Sɔtraan bho 'zü ‑deewo ‑kaso 'gü.
REV 20:8 'Yö dho 'zü ‑deewo 'ö ‑da "sɛ "pɛpɛ ꞊gban 'gü ‑mɛ ‑nu ‑gɔ 'gü, kö mɛ 'wo "dhʋ̈ bha "sɛ 'dhɛ 'wo‑ Gɔgö waa‑ Magɔgö ‑kë bha wɛng‑ ‑nu ꞊wa wo zü kë do. 'Yö‑ ‑nu ꞊loo 'ko ‑ta 'ko zë ‑yan 'gü. 'Mɛ 'wo "dhʋ̈ bha‑ ‑nu ‑loo 'ko ‑ta ‑sü ‑dho kë ꞊dhɛ ꞊weeyi "dhiʋ̈ "yɛɛn 'dhö, 'wii 'dho ꞊mɔɔ‑ ‑nu dhʋng ‑sü ‑bha.
REV 20:9 'A dho ‑dhɛ ‑ga kö ‑wo nu sië ‑yɛɛdhö "kpʋngtaadhɛ ꞊gban "pɛpɛ 'gü, 'wo ꞊klëën ‑dhɛ 'ö Atanna ‑bha mɛ ‑nu kpö ‑yö gun‑ ‑bha bha‑ ‑zü waa‑ ‑bha 'pödhɛ 'ö‑ ‑dhɔ ‑ya ‑kë bha‑ 'dhö. "Kɛɛ 'yö pɛng ‑yö go dhang‑ 'gü 'ö‑ ‑nu ‑bhö.
REV 20:10 'Yö 'wo Sɔtraan 'ö gun ‑da sië‑ ‑nu ‑gɔ 'gü bha‑ kun, 'yö 'wo‑ ‑zuö pɛng "yi ꞊gblü 'ö blɔɔn" 'dhö 'pu sië‑ 'gü 'ö 'wo kë wü bha waa‑ Atanna ‑wʋ ‑pö ꞊sua 'ka ‑mɛ ‑zuö 'gü bha‑ 'gü. ‑Dhɛ bha ꞊në‑ ‑nu ‑wëëdhɛ dho 'to bho ‑sü ‑bha mü "dhʋ̈ "dhʋ̈ 'yënng‑ 'gü waa‑ gbeng ‑nu ꞊gban 'gü 'ö‑ "dhiʋ̈todhɛ 'yaa kë.
REV 20:11 ꞊Dhɛ 'ö ꞊ya kë "dhʋ̈, 'yö 'a ‑blüdëdhɛ ‑gbloo "puu 'kpiki ‑kpiki do yö kö mɛ ‑yö ‑ya ‑sü 'ka‑ ‑ta. 'Yö "sɛ waa‑ dhang‑ ‑nu 'wo ꞊dua 'mɛ bha‑ wëëdhö 'yö mɛ 'bha 'yii‑ yö 'zü 'ö to‑ ‑bha.
REV 20:12 ꞊Dhɛ 'ö ꞊ya kë "dhʋ̈, 'yö 'a mɛ "pɛpɛ 'wo ga 'ö 'wo gun ꞊geebɔɔ bha‑ ‑nu ꞊gban yö kö ‑wo dɔ sië mɛ 'ö gun ‑ya ‑sü 'ka ‑gbloo 'kpii‑ bha‑ ‑ta bha‑ ‑kuu "dhiʋ̈. 'Mɛ 'wo "dhʋ̈ bha 'në sɛɛnnë ‑gun mü, 'yö mɛ "gblʋ̈gblʋ̈ ‑nu ‑wo gun mü. ꞊Dhɛ 'ö ꞊ya kë "dhʋ̈, 'yö 'wo 'sëëdhɛ 'gbɛ "dhiʋ̈ ‑pʋ. 'Yö 'wo dho 'wo‑ do 'bha 'ö mü, 'ö mɛ 'wo dho ‑tosɛa kë Atanna "piʋ̈‑ ‑nu 'tɔ 'dhö‑ 'gü bha‑ "dhiʋ̈ ‑pʋ. 'Yö 'mɛ 'wo gun ꞊geebɔɔ, ‑a ‑nu kë sɔng ‑nu 'wo gun 'sëëdhɛ 'ö‑ 'gü bha 'wo‑ ‑ga, 'yö 'wo‑ ‑nu ‑bha za ‑gɔ "yɛ ‑kɔ sü‑ ‑bha 'dɔɔndhö.
REV 20:13 'Yö 'mɛ 'wo ga ꞊weeyi ꞊bhaa, 'yö nu 'yö ‑pe ‑nu 'ka, 'yö ꞊geebɔɔdhɛ yöö ‑dɩ 'pö 'ö nu 'ö ‑pe ö ‑bha 'ka. 'Yö 'wo 'mɛ 'ö "dhʋ̈‑ ‑bha za ‑gɔ ‑yɛ ‑kɔ 'ö 'mɛ 'ö "dhʋ̈ 'ö ‑tosɛa ‑kë 'ka "kpʋng ꞊taa ‑a ‑bha 'do 'do 'ka.
REV 20:14 'Yö 'wo ga waa‑ ꞊geebɔɔdhɛ ‑a ‑nu sü 'wo‑ ‑nu ‑zuö pɛng "yigblü bha‑ ꞊bhaa. (‑A 'dhɛ bha ꞊në 'wo‑ ga ꞊plɛ ‑naa ‑kë.)
REV 20:15 'Yö 'wo mɛ "pɛpɛ 'dhɛ 'kö‑ ‑nu 'tɔ 'yii ꞊slɔɔ 'sëëdhɛ 'ö ‑tosɛa ‑kë ‑bha 'sëëdhɛ 'ka bha‑ 'gü bha‑ ‑nu ꞊gban "pɛpɛ ‑zuö pɛng "yigblü bha‑ ꞊bhaa 'pö.
REV 21:1 ꞊Dhɛ 'ö ꞊ya kë "dhʋ̈, 'yö 'a "sɛ waa‑ dhang‑ ‑dee 'ö Atanna ‑ya kë bha‑ yö kö‑ ‑blɛɛsü ‑nu 'kö 'wo gun bha ꞊wa ꞊dhɛng, kö ꞊weeyi ‑dɩ 'pö 'yaa 'dhö 'zü.
REV 21:2 'Yö 'a 'pödhɛ "slʋ̈ʋ̈slʋ̈ 'ö ‑dhii 'yaa‑ ‑bha, Zedhizadhɛmö ‑pö ‑dee bha‑ yö kö ‑yö 'go sië Atanna "piʋ̈ dhang‑ 'gü 'ö ꞊lɔɔ. Kö ‑yö baa‑ ‑sü 'ka "pɛpɛdhö ꞊dhɛ dhe ‑dee 'wo 'dho sië‑ dɔ ‑a 'dhö.
REV 21:3 'Yö 'a ‑wʋ do 'bha ma kö ‑yö 'go sië ‑gbloo bha‑ ‑dhɛ 'gü 'ö ‑wɩ "gbɩɩ‑ 'ka 'ö‑ pö: «‑Ka ‑dhɛ ‑ga, Atanna yöö ꞊dede ꞊ya nu 'pö‑ dɔ mɛ "bhɩɩ‑ ‑nu 'ka ꞊tɔn! Wɛng‑ ‑nu woo ‑tosɛa kë wo 'ko "piʋ̈ kö ‑wo kë‑ ‑bha "sɛgümɛ ‑nu 'ka, kö ‑yö 'to‑ ‑nu "piʋ̈ ‑kpɛawo, kö yö ꞊në ‑yö kë‑ ‑nu ‑bha Atanna 'ka.
REV 21:4 ‑Yö ‑dho ö ‑kɔ ziö‑ ‑nu "yan "dhiʋ̈, 'ö‑ ‑nu "yanyi ꞊gban bho mü "pɛɛpɛdhö. Ga 'yii 'dho bhɔ 'zü, "ɛɛn ‑wëë ‑ya wo ‑sü 'bha 'yii 'dho kë 'zü, ‑wëë ‑wʋ 'kpɔ ‑sü waa‑ pë ‑ma mɛ 'ka ‑sü ꞊gbaan yën. ‑A ‑gɛn ‑mü ꞊dhɛ 'wɔn "pɛpɛ 'dhɛ 'kö gun kë sië zii ‑blɛɛsü bha‑ ꞊gbaan ziö.»
REV 21:5 ꞊Dhɛ 'ö ꞊ya kë "dhʋ̈, 'yö 'mɛ 'ö gun ‑ya ‑sü 'ka ‑gbloo 'kpii‑ bha‑ ‑ta bha 'ö‑ pö n ‑dhɛ: «‑Dhɛ ‑ga, 'ma pë ꞊gban "pɛpɛ kë ‑dee.» 'Yö go mü 'ö‑ pö: «‑A ‑bɛn zë, ‑a ‑gɛn ‑mü ꞊dhɛ 'pë 'a‑ pö bha 'yaa ꞊sua 'ka, ‑a ‑dhɛa ‑bha ꞊dhɛ ‑wo 'dhang bho‑ "dhiʋ̈.
REV 21:6 'Yö ‑ya mü 'zü 'ö‑ pö: «꞊Ya bo! Ma ꞊në 'wo n ‑dhɛ 'wɔn ꞊gban zübhodhɛ, 'yö 'wo n ‑dhɛ 'wɔn ꞊gban "dhiʋ̈yadhɛ. 'Mɛ 'ö "yi mü ‑dhɔ ꞊yaa‑ 'kun, a ‑dho ‑a ‑mɛ gba ‑tosɛa ‑kë ‑bha "yi 'ö ꞊waa‑ mü 'waa ga 'zü bha‑ 'ka "wɛɛwɛɛ.
REV 21:7 'Mɛ 'ö yaa‑ 'ko bha‑ ‑zë kö ‑ya ga 'sü, a ‑dho pë ‑nu bha‑ ꞊gbaɔ‑ ‑mɛ ‑gɔ "wɛɛwɛɛ, 'ö 'a ‑kë ‑mɛ ‑bha Atanna 'ka, 'ö ‑kë n bhang 'ka 'pö.
REV 21:8 "Kɛɛ mɛ "pɛpɛ 'kö 'wo "suʋ̈mɛ 'ka, "ɛɛn 'ö 'wo zaɔdhedamɛ ‑nu 'ka, "ɛɛn 'ö 'wo ‑kë 'wɔn "bhluubhlu këmɛ ‑nu 'ka, "ɛɛn mɛzëmɛ ‑nu, "ɛɛn "yënngdɔmɛ ‑nu, "ɛɛn "zʋʋdhɛ këmɛ ‑nu, "ɛɛn ꞊gebhɔ ‑dhɔkëmɛ ‑nu "ɛɛn mɛ "pɛpɛ 'dhɛ 'kö 'wo ꞊suakëmɛ ‑zë 'ka, ‑a ‑nu ꞊gban "pɛpɛ‑ ‑dho 'dho pɛng "yigblü 'ö blɔɔn" 'dhö‑ 'gü, 'ö ga ꞊plɛ ‑naa 'ka bha ꞊në‑ ꞊bhaa.»
REV 21:9 ꞊Dhɛ 'ö ꞊ya kë "dhʋ̈, 'yö Atanna ‑bha "kië "saɔplɛ 'ö ꞊nëng "saɔplɛ 'ö to ꞊taama bha 'ö‑ gbɔnë "saɔplɛ bha 'ö gun‑ ‑nu ‑gɔ bha‑ mɛ do ‑ya pö n ‑dhɛ: «‑Bhö nu kö dhebhɔ 'ö‑ gwaan‑ 'kpɔ ‑wɔn 'dhö 'dhö, 'ö "bhlaanë bha‑ ‑bha dhebhɔ 'ka bha 'a‑ ‑zɔn i ‑dhɛ.»
REV 21:10 ꞊Dhɛ 'ö‑ pö n ‑dhɛ "dhʋ̈, 'yö 'a to n "yan 'gü ‑da ‑sü bha‑ 'gü mü 'yö n sü 'ö dho n 'ka ‑tɔn ꞊gblɛɛn do 'bha ꞊gbin‑, 'yö 'pödhɛ "slʋ̈ʋ̈slʋ̈ 'ö‑ Zedhizadhɛmö ‑dhɛ 'dhö ‑mü, 'ö gun 'go sië Atanna "piʋ̈ dhang‑ 'gü 'ö ꞊lɔɔ bha‑ ‑zɔn n ‑dhɛ.
REV 21:11 Kö Atanna ‑bha mɛ ‑dhɛ 'bhü ‑yö dɔ sië‑ ‑bha ‑plöng ‑plöng ‑plöngdhö ꞊dhɛ ‑gwë ‑wɔn ‑dɔ yaa 'ka ‑sü ‑nu 'wo‑ 'zasipö ‑kë, 'ö mɛ "yan ‑yö ‑ziö 'gü 'ö ‑dhɛ yö‑ ꞊taama ꞊dhɛ "dënggbɔ 'dhö bha‑ 'dhö.
REV 21:12 Kö "saan 'kpii‑, ꞊gblɛɛn do 'bha ‑yö ꞊klëën ‑sü 'ka‑ ‑zü. "Saan bha‑ "dhi‑ ‑gun ‑kaɔng do ga ꞊plɛ. 'Yö Atanna ‑bha "kië ‑kaɔng do ga ꞊plɛ 'wo gun ‑ya ‑sü 'ka ‑a "dhi ‑nu bha‑ ‑nu ‑maa ‑gɔ 'do 'do 'ka. ‑A "dhi ‑kaɔng do ga ꞊plɛ 'ö "dhʋ̈ bha, Izraɛdhö ‑sɛ ‑gɔ 'dhö ö 'gü ‑kaɔng do ga ꞊plɛ ‑kɔ 'ö‑ 'gü, ‑a ꞊gban 'tɔ‑ ‑gun ‑a "dhi ꞊gban ‑bha 'do 'do.
REV 21:13 ‑A "saan bha‑ "dhi ‑yaaga ꞊në gun 'pö‑ bha‑ ‑kɔ "pɛan 'do 'do ꞊gban "piʋ̈. ‑A ‑yaaga ‑gun 'yënng‑ ‑wo ‑zian 'ka, 'yö‑ ‑yaaga gun 'yënng‑ ‑pö ‑zian 'ka, 'yö‑ ‑yaaga 'bha‑ gun mɛ ꞊kwaa 'gü, 'yö‑ ‑yaaga 'bha‑ gun mɛ ‑kɔ ‑së 'gü.
REV 21:14 "Saan 'ö gun 'pö‑ bha‑ ‑zü "dhʋ̈ bha‑ ‑gɛn ‑gun ‑gban ‑sü 'ka ‑gwë ‑kaɔng do ga ꞊plɛ ꞊në‑ ‑ta, 'yö "bhlaanë ‑bha bɔmɛ ‑nu ‑kaɔng do ga ꞊plɛ 'wo gun bha‑ ‑nu 'tɔ 'dhö ‑gwë bha‑ ‑bha 'do 'do 'ka.
REV 21:15 Atanna ‑bha "kië 'ö gun dhiang zë sië n ‑dhɛ "dhʋ̈ bha pë ‑dan 'ka pë do, 'ö "sënng 'ka, "kɛɛ 'ö bhɔ ‑kaadhü ‑bha ‑yö ‑gun ‑kɔ "dhiʋ̈, kö ‑yö 'pö‑ bha‑ 'dhö, ‑a "dhi ‑nu bha‑ 'dhö, ‑a "saan bha‑ 'dhö, ‑a ‑nu dan‑ 'ka.
REV 21:16 'Pö‑ bha ‑yö gun ꞊dhɛ 'kɔ suu 'ö "gwënng 'dhö ‑kë ‑yiisiö bha ꞊në‑ 'dhö, "kɛɛ ‑a ‑bha bha‑ "gwënng ꞊gban‑ ‑mɔɔ "kwëë. 'Yö Atanna ‑bha "kië bha 'ö‑ 'pö‑ bha‑ dan ‑dhɛ ‑dankapë 'ö gun‑ ꞊kwɛɛ bha‑ 'ka. 'Yö‑ "gwënng do ‑yö ‑kë "kidhʋng "gblü ꞊plɛ waa‑ "kidhʋng këng ꞊plɛ, 'yö‑ ‑bha ‑kë "gbɛa ‑sü ‑yö ‑gun "dhʋ̈, 'yö‑ ‑bha ‑kë ꞊gblɛɛn ‑sü 'ö go‑ 'ka "sɛ ‑bha 'ö dho‑ 'ka "dhʋ̈ng 'gü 'ö gun ‑kɔ do bha‑ 'gü.
REV 21:17 'Yö dho 'zü 'ö "saan bha‑ dan ‑dhɛ ‑dankapë do 'ö gun‑ ‑gɔ bha‑ 'ka, 'yö dho 'ö ‑kë ‑a ‑yan ‑kaɔng "saɔplɛ ga ꞊plɛ 'ka, ‑a ‑bha ‑go "sɛ ‑bha ‑sü 'ö dho "dhʋ̈ng 'gü ‑a 'gü. ‑Ya ‑dan ꞊dhɛ ‑kɔ do 'ö mɛ "bhɩɩ‑ ‑nu 'kwa kwa ‑bha dan‑ 'ka bha ꞊në‑ 'dhö.
REV 21:18 "Saan 'ö gun 'pö‑ bha‑ ‑zü bha ‑yö gun dɔ ‑sü 'ka ‑gwë ‑wɔn "gbɩɩ‑ 'wo‑ 'zasipö ‑kë bha ꞊në‑ 'ka, 'yö 'pö‑ 'kö bha 'ö gun dɔ ‑sü 'ka "sënng ꞊dede ꞊në‑ 'ka, 'yö‑ "yan ‑yö bhɔ klëklëdhö ꞊dhɛ "dënggbɔ 'dhö.
REV 21:19 'Yö‑ "saan bha‑ ‑gɛn ‑dɔ ‑ta ‑gwë ‑nu bha 'wo gun‑ ‑bɛn zë ‑sü 'ka ‑gwë ꞊bhlëësü ‑nu bha‑ ꞊gban "pɛpɛ suu 'do 'do ꞊në‑ "pɛn 'ka. ‑A ‑blɛɛsü ‑gun suu 'dhɛ 'wo‑ zasipö ‑kë bha ꞊në‑ 'ka, 'yö‑ ꞊plɛ ‑naa ‑yö gun‑ 'dhɛ 'wo‑ safii‑ ‑kë bha‑ 'ka, 'yö‑ ‑yaaga ‑naa ‑yö gun‑ 'dhɛ 'wo kaseduanö kë bha‑ 'ka, 'yö‑ ‑yiisiö ‑naa ‑yö gun‑ 'dhɛ 'wo‑ medhodö ‑kë bha‑ 'ka;
REV 21:20 'Yö‑ "sɔɔdhu ‑naa ‑yö gun‑ 'dhɛ 'wo‑ saadonisö ‑kë bha‑ 'ka, 'yö‑ "saɔdo ‑naa ‑yö gun‑ 'dhɛ 'wo‑ saaduanö ‑kë bha‑ 'ka, 'yö‑ "saɔplɛ ‑naa ‑yö gun‑ 'dhɛ 'wo‑ klisodhitö ‑kë bha‑ 'ka, 'yö‑ "saaga ‑naa ‑yö gun‑ suu 'dhɛ 'wo‑ ‑dhɛ bedhidö bha‑ 'ka, 'yö‑ "sueisiö ‑naa ‑yö gun‑ 'dhɛ 'wo‑ topazö ‑kë bha‑ 'ka, 'yö‑ ‑kaɔng do ‑naa ‑yö gun‑ 'dhɛ 'wo‑ ‑dhɛ klizoplazö bha‑ 'ka, 'yö‑ ‑kaɔng do ga do ‑naa ‑yö gun‑ 'dhɛ 'wo‑ yasɛnngtö ‑kë bha‑ 'ka, 'yö‑ ‑kaɔng do ga ꞊plɛ ‑naa ‑yö gun‑ 'dhɛ 'wo‑ ‑dhɛ metitö bha‑ 'ka.
REV 21:21 'Pö‑ bha‑ 'kpong ‑kaɔng do ga ꞊plɛ bha ‑wo ‑gun ‑zlɔɔ suu 'bha 'ö "yi 'yaa zun‑ ‑wɔn ‑bha bha ꞊në‑ ‑dɩ ‑slɔɔ 'ka. 'Kpong do ‑zlɔɔga do. ‑Kpinngga 'ö gun 'pö‑ bha‑ 'gü ‑yö gun "sënng ꞊në‑ 'ka, 'ö‑ 'bhü ‑yö bhɔ ꞊dhɛ ‑dhuangdhe 'bhü 'dhö.
REV 21:22 'Mii Atanna ‑dhɔkëgükɔ 'bha yö 'pö‑ bha‑ 'gü, ‑a ‑gɛn ‑mü ꞊dhɛ kwa Dëmɛ kwa ‑bha Atanna 'ö‑ ‑bha 'gügbɩɩdhɛ ‑dhiang 'yaa zë bha waa‑ ‑bha "bhlaanë bha ꞊në 'wo gun 'pö‑ bha‑ ‑bha Atanna ‑dhɔkë ‑dhɛ ꞊gban 'ka.
REV 21:23 'Pö‑ bha‑ ‑mawɔn 'yaa gun ‑dhɛpuudhɛ ‑bha, ‑a ‑wɔn 'gü 'yënng‑ 'yaa gun ‑wo sië mü, kö yöö 'to "su ꞊në‑ ‑bha. ‑A 'klɔɔ‑ ‑mü ꞊dhɛ "bhlaanë bha ꞊në gun‑ ‑bha ‑dhangbha 'ka, 'yö Atanna ‑bha mɛdhɛ 'bhü ‑yö gun ꞊dhɛ ‑a ‑bha 'yënng‑ 'dhö.
REV 21:24 ‑A ‑bha ‑dhɛpuudhɛ bha ꞊në mɛ "pɛpɛ 'wo "kpʋng ꞊taa 'wo dho "ta 'sü‑ 'bhü "dhiʋ̈, 'yö ‑gblüdë "pɛpɛ ꞊gban 'wo nu wo ꞊slɔɔ ‑pë ꞊gban 'ka mü.
REV 21:25 'Pö‑ bha‑ "saan "dhi‑ ‑dho 'to "pʋ ‑sü 'ka ‑kpɛawo 'ö to "dhʋ̈, ‑a ‑gɛn ‑mü ꞊dhɛ "bin 'yii 'dho 'ma mü tongtongdhö kö woo‑ "kwɛɛ ta.
REV 21:26 "Sɛ ꞊gban "pɛpɛ‑ ‑dho 'dho woo‑ 'tɔ ‑pë ‑nu waa‑ woo‑ pë ꞊bhlëësü ‑nu 'ka ‑dhɛ bha ꞊në‑ 'gü.
REV 21:27 "Kɛɛ pë ‑dhiisü ‑zë 'bha ꞊dede ꞊në 'yii 'dho ‑da 'pö‑ bha‑ 'gü tongtongdhö kö yöö ‑nu 'to 'wɔn "bhluubhlu këmɛ ‑nu waa‑ ꞊suakëmɛ ‑nu ꞊në‑ ‑bha. 'Mɛ 'ö‑ ‑nu 'tɔ 'dhö "bhlaanë bha‑ ‑bha ‑tosɛa ‑kë ‑bha 'sëëdhɛ bha‑ 'gü bha woo do ꞊në 'wo dho ‑da 'pö‑ bha‑ 'gü.
REV 22:1 'Yö Atanna ‑bha "kië bha 'ö dho 'ö ‑tosɛa 'ö 'yaa yën ‑a ‑kë ‑bha "yi bha‑ ꞊gwaan ga 'ö 'pö‑ ‑bha 'gü bha‑ ‑zɔn 'pö n ‑dhɛ. "Yi bha‑ ‑gun ꞊söng ‑sü 'ka 'ö mɛ‑ ‑dhɛ yö‑ ꞊bhaa ꞊dhɛ ‑kɔ 'ö 'mɛ‑ ‑dhɛ yö‑ 'ka "dënggbɔ 'gü bha‑ 'dhö, kö‑ ‑gɔ ‑yö 'go sië Atanna ‑bha ‑blüdëdhɛ ‑gbloo bha waa‑ "bhlaanë ‑bha bha‑ ‑nu 'gü
REV 22:2 'ö ‑ziö 'pö‑ bha‑ ꞊zinng 'gü ‑dhɛ ꞊dede 'gü. "yi bha ‑tosɛa 'ö 'yaa yën ‑a ‑kë ‑bha "dhü ꞊në gun ta ‑sü 'ka‑ "kpʋng ꞊gban ꞊plɛ "dhiʋ̈. "Dhü bha ‑yö bhɛ ‑dɔ ‑kwɛ do 'gü ‑kaɔng do ga ꞊plɛ, "su do ‑bha do. 'Yö‑ "dhɛ bha 'ö gun "sɛ "pɛpɛ ꞊gban 'gü ‑mɛ ‑nu ‑bha ꞊bɛdhɛ 'ka.
REV 22:3 Pë "pɛpɛ kö Atanna ꞊ya "dhang ‑da ‑bha, ‑a do ‑zian 'yii 'dho kë 'pö‑ bha‑ 'gü. Atanna waa‑ "bhlaanë bha‑ ‑nu ‑bha ‑gblüdëdhɛ ‑kë ‑ta ‑gbloo ‑dho kë 'pö‑ bha ꞊në‑ 'gü, 'yö‑ ‑bha gwëëzë ‑nu 'wo‑ ‑dhɔkë mü.
REV 22:4 ‑Wo ‑dho wo "yan ‑kpan ‑a wëëdhɛ bha, 'yö‑ 'tɔ ‑yö ‑kë ‑ya ‑sü 'ka‑ ‑nu ‑kpong "dhiʋ̈.
REV 22:5 "Bin 'yii 'dho 'ma 'zü, "ɛɛn ‑a ‑nu ‑bha ‑wɔn 'yii 'dho kë ‑dhangbha ‑bha, "ɛɛn 'yënng‑ ‑zian ‑bha, ‑a ‑gɛn ‑mü ꞊dhɛ ‑a ‑nu Dë Atanna ꞊në dho ‑dhɛ "pʋ‑ ‑nu ‑ta, 'yö 'wo mɛdhɛ ‑kë ‑todhʋ̈ 'ka.
REV 22:6 'Yö Atanna ‑bha "kië bha 'ö‑ pö 'zü n ‑dhɛ: «‑Wʋ ‑nu 'i‑ ma bha‑ ꞊gban ‑yö 'dhang ‑bho "dhiʋ̈ ‑pë ꞊në‑ 'ka, ‑a ‑gɛn ‑mü ꞊dhɛ ‑a 'bha 'yaa ꞊sua 'ka. 'Wɔn 'ö‑ ‑wɔn 'gü 'yö kwa Dëmɛ, kwa ‑bha Atanna ‑yö ö ‑bha 'Nii‑ "slʋ̈ʋ̈slʋ̈ ‑ya ö ‑wʋdhiʋ̈loomɛ ‑nu 'gü 'yö 'wo‑ ‑wʋ "dhiʋ̈ ꞊loo‑ 'ka, 'yö ö ‑bha "kië bɔ kö 'wɔn 'ö dho kë ‑dhɛ 'bha ꞊kpaɔ ‑yi 'ka ‑ya ‑ta "pʋ 'ö ‑bha gwëëzë ‑nu ‑dhɛ bha 'yö bha.»
REV 22:7 'Yö Yesu yöö ꞊dede ‑a ‑wʋ ‑yö ‑da 'pö n "tʋʋdhö Atanna ‑bha "kië ‑bha bha‑ ‑zian ‑ta 'yö‑ pö: «‑Bhö ‑dhɛ ‑ga, a nu sië ‑dede ya‑ 'gü. Mɛ "pɛpɛ 'ö 'wɔn 'ö yöö kë dhia", 'ö ‑bɛn zë ‑sü 'ka 'sëëdhɛ ya‑ 'gü ya 'wo‑ ma, 'ö 'wo‑ 'gü ‑wɔn ‑kë ‑a ‑nu ‑bha ‑së!»
REV 22:8 Mang Zan ‑mɛ mang ꞊dede ꞊në n "tʋ ‑yö ‑da 'wɔn bha‑ 'gü, 'ö n "yan ‑ya ‑dhɛ yö. 'Yö ꞊dhɛ 'ö ꞊ya kë ꞊dhɛ ‑kɔ bha‑ 'dhö, 'yö 'a‑ pö 'a zun n kpiö 'gü kö Atanna ‑bha "kië 'ö 'wɔn ‑nu bha‑ ‑zɔn n ‑dhɛ bha‑ ‑dhɔkë.
REV 22:9 "Kɛɛ 'yö‑ pö n ‑dhɛ: «‑Bhö i ‑dɩ 'kun! 'Mɛ 'ö‑ ‑kë ‑dhɛ "dhʋ̈ ‑mɛ 'ka ꞊në Atanna 'ka. Ma ‑zë ‑a bhi oo, i dheebhang ‑nu 'wo‑ ‑wʋdhiʋ̈loomɛ 'ka bha waa‑ mɛ "pɛpɛ 'wo ‑wʋ 'ö 'sëëdhɛ ya‑ 'gü ya‑ ꞊bhlëë ‑ya bha kwa mɛ do ꞊në‑ 'ka.»
REV 22:10 'Yö go mü 'zü 'ö‑ pö n ‑dhɛ: «'Bha 'dho 'wɔn ‑nu 'wo dho kë dhia" 'wo ‑bɛn zë ‑sü 'ka 'sëëdhɛ ya‑ 'gü ya‑ 'to i ‑dɩ ‑gɔ. ‑A ‑gɛn ‑mü ꞊dhɛ "tʋ̈ng 'ö Atanna ‑ya ‑ya 'wɔn ‑nu bha‑ kë "tʋ̈ng 'ka bha 'yaa ꞊gblɛɛn ‑tangga ‑zianwo 'zü.
REV 22:11 ꞊Dhɛ 'ö "dhʋ̈, 'mɛ 'ö‑ këwɔn 'dhö 'ya‑, ‑yö ö faan dɔ kö ‑yö 'dho‑ 'ka "dhiʋ̈, kö 'mɛ 'ö 'wɔn "bhluubhlu këmɛ 'ka ‑yö ö 'gü ‑siö kë ‑sü ‑bha ‑yö 'dho‑ 'ka. Kö 'mɛ 'ö‑ këwɔn 'dhö ‑së ‑yö ö ‑bha bha‑ 'kun "gbɩɩ‑ 'pö, kö 'mɛ 'ö "slʋ̈ʋ̈slʋ̈ ‑yö ö ‑dɩ 'kun ‑së ‑yö 'dho‑ 'ka "dhiʋ̈.»
REV 22:12 'Yö Yesu yöö ‑dɩ 'pö 'ö‑ pö n ‑dhɛ: «‑Bhö ‑dhɛ ‑ga, a nu sië, ‑a "tʋ̈ng 'yaa ꞊gblɛɛn 'zü, n nu ‑sü 'ka 'mɛ 'ö "dhʋ̈‑ ꞊saa 'ö ꞊mɔɔ yë 'ö‑ ‑kë ‑a ‑bha ‑yö ‑dho kë n ‑gɔ 'a nu‑ 'ka, 'ö 'a 'mɛ 'ö "dhʋ̈‑ ꞊saa bho‑ kë ‑yë ‑bha.
REV 22:13 Ma ꞊në 'a 'wɔn ꞊gban zübhodhɛ 'ka, 'a 'wɔn ꞊gban "dhiʋ̈yadhɛ 'ka, 'a mɛ ‑blɛɛsü 'ka, 'a mɛ ‑totaamasü 'ka 'zü.
REV 22:14 Mɛ "ʋʋ 'mɛ 'wo dho wo ‑bha ‑sɔ "zu, ‑a ‑nu ‑bha ‑së, ‑wo ‑dho kë ‑tosɛa ‑kë ‑bha ‑dhü bha‑ bhɛ ‑bhö ‑mɛ 'ka, "ɛɛn 'ö 'wo dho kë ‑da 'pö‑ bha‑ 'gü ‑mɛ 'ka wo ‑bha ‑sɔ 'wo‑ ‑zu bha‑ ‑wɔn 'gü, kö‑ ‑mɛ ‑nu ‑bha ‑së.
REV 22:15 "Kɛɛ mɛ "pɛpɛ 'dhɛ 'kö 'wo 'wɔn yaa ‑yënngsü ‑nu këmɛ 'ka, 'ö 'wo "zʋʋdhɛkëmɛ ‑nu 'ka, "ɛɛn 'ö 'wo "yënngdɔmɛ ‑nu 'ka, "ɛɛn 'ö 'wo mɛzëmɛ ‑nu 'ka, "ɛɛn 'wo ꞊gebhɔ ‑dhɔkëmɛ ‑nu 'ka waa‑ mɛ "pɛpɛ 'dhɛ 'kö 'wo ‑tosɛa ‑kë ꞊sua 'ka ‑a ‑nu këwɔn ‑nu waa‑ ‑nu ‑zë ‑dhiang ‑nu 'gü, ‑a mɛ do zian 'yii 'dho ‑da 'pö‑ bha‑ 'gü!
REV 22:16 Mang Yesu ‑mɛ ma ꞊në 'a ma "kië bɔ kö ‑yö 'wɔn bha‑ pö mɛ "pɛpɛ 'ka n ‑bha 'ka ka ‑dhɛ. Davi suu 'gü ‑në 'ö‑ ‑ding 'ka bha yö ‑mü ma ꞊në n 'ka. Mang do bha 'zü ma ꞊në 'a 'gödhuu 'ö bhü ‑dhɛkpaɔ "dhiʋ̈ 'ö‑ ‑zɔn ꞊dhɛ ‑dhɛ ꞊ya ꞊kpaɔ ꞊gbanwo bha‑ 'ka.»
REV 22:17 Atanna ‑bha 'Nii‑ waa‑ ‑gblüdë ‑bha dhebhɔ ‑wa pö sië: «‑Bhö nu!» Mɛ "ʋʋ mɛ 'ö 'bha ‑wʋ bha‑ ma ‑bhö ‑a pö 'pö: «‑Bhö nu!» 'Mɛ 'ö "yi mü ‑dhɔ ꞊ya i 'kun, ‑bhö nu, mɛ "ʋʋ mɛ 'ö ‑tosɛa ‑kë ‑bha "yi bha‑ ‑dhɔ 'dhö‑ ‑bha, ‑yö nu kö ‑ya mü "wɛɛwɛɛ!
REV 22:18 Mang Zan ‑mɛ ma ꞊në 'a‑ pö, 'a‑ pö ka ‑dhɛ ꞊sii ꞊dede ‑ta ꞊dhɛ mɛ "ʋʋ mɛ 'ö ö ‑bha dɔ 'wɔn ‑nu 'ö dho kë ‑dhɛkpaɔ dhia" 'gü 'ö ‑bɛn zë ‑sü 'ka 'sëëdhɛ ya‑ 'gü ya‑ ‑ta, 'wɔn 'ö Atanna dho‑ bho‑ ‑mɛ 'gü bha ‑yö ‑dho ‑a ‑mɛ taa kë 'wɔn ‑nu "klɩng 'a ‑ziö 'gü 'sëëdhɛ ya‑ 'gü ya‑ 'ka.
REV 22:19 Mɛ "ʋʋ mɛ 'ö ꞊yaa‑ 'bha ‑bho ‑ta 'zü, Atanna ‑dho ‑a ‑mɛ ‑bha ‑tosɛa ‑kë ‑bha ‑dhü bhɛ 'ö‑ ‑bhö ‑wɔn 'dhö 'dhö bha‑ 'sü‑ ‑mɛ ‑gɔ, waa‑ ‑yɛa 'ö dho kë 'nu 'pödhɛ "slʋ̈ʋ̈slʋ̈ 'ö‑ ‑dhiang 'dhö 'sëëdhɛ ya‑ 'gü bha‑ 'dhö.
REV 22:20 Yesu 'ö 'wɔn "pɛpɛ bha‑ ꞊gban ‑kë tɛan‑ 'ka ‑sü "sɛɛ‑ 'ka bha ‑ya ‑pö: «'Yaa ꞊sua 'ka, a nu sië ‑dede ya‑ 'gü.» Kö ‑yö kë "dhʋ̈ bha 'aa ‑yö kë! N Dëmɛ Yesu, ‑bhö nu!
REV 22:21 Kö kwa Dëmɛ Yesu ‑bha ‑gasitɛ bha ‑yö kë mɛ ꞊gban "pɛpɛ ka ‑dhɛ bha 'aa ‑yö kë!
