﻿Matiö.
28.
꞊Dhɛ 'ö Zuifö ‑nu ꞊glooyi bha ꞊ya ziö 'ö‑ ‑tadhɛ ꞊ya ꞊kpaɔ, 'yö Madhi 'ö go Madadha bha waa‑ Madhi 'dhɛ 'ö 'dhö 'wo ‑suʋ̈ 'piö‑ 'yö 'wo dho wo bhɔɔ" bho Yesu bun ‑bha. 
‑Wo ‑to mü 'yö "sɛ 'dhö ‑ya ꞊zii ‑sü ‑bha ꞊dhɛ mɛ‑ ‑më ‑kë. "Sɛ 'ö ꞊zii ‑ziisü 'ka "dhʋ̈ bha‑ ‑gɛn ‑mü ꞊dhɛ 'ö gun "dhʋ̈ kö Atanna ‑bha "kië do ꞊ya 'go dhang‑ 'gü ꞊ya nu kö ꞊ya ‑gwë 'ö gun Yesu bun "dhiʋ̈ bha‑ bho 'mü kö ꞊yaa‑ glün‑ ꞊ya ‑ya ‑ta. 
Atanna ‑bha "kië bha‑ 'bhü‑ ‑gun ꞊dhɛ dha 'ö "yaan kun‑ 'dhö, 'yö‑ ‑bha ‑sɔ ‑yö ‑flʋ̈ ‑papadhö. 
'Yö 'mɛ 'wo gun bun ‑maa kë sië bha "suʋ̈ 'dhö ‑da ‑nu 'gü, 'yö 'wo ‑ya ꞊zii ‑sü ‑bha 'yö 'wo ‑pö "sia‑ 'yö 'wo ‑kë ꞊dhɛ 'pë ꞊wa ga ꞊në‑ wo 'dhö. 
"Kɛɛ 'yö Atanna ‑bha "kië bha 'ö dhiang zë dhong ‑nu 'kö 'wo bha‑ ‑nu ‑dhɛ 'ö‑ pö: «"Suʋ̈ 'ya 'dho ka ‑zë ka kë, ‑a ‑gɛn ‑mü ꞊dhɛ a‑ 'wɔn ‑dɔ ꞊dhɛ Yesu 'wo‑ dɔ "dhü ‑bha bha ꞊në 'ka nu‑ mɔɔ‑ ‑dhɛ 'gü yö. 
"Kɛɛ 'yaa yö 'zü ꞊ya 'go ga 'gü ꞊ya ‑bö ꞊dhɛ ‑kɔ 'ö‑ pö‑ 'ka ka ‑dhɛ kö 'yii ga ꞊kö bha‑ 'dhö. ‑Ka nu kö ‑dhɛ 'ö gun wɔ sië‑ ‑bha bha 'ka‑ ‑dhɛ ‑ga, 
kö 'ka 'dho 'ka‑ pö‑ ‑bha ꞊klang ‑nu ‑dhɛ ꞊dhɛ ꞊ya ‑bö, ꞊ya ‑da ka "dhiʋ̈ ꞊ya 'dho Gadhidhe. Ka ‑dho ‑kpan ‑bha mü ꞊naa. 'Wɔn 'ö gun n "piʋ̈ 'a‑ pö ka ‑dhɛ 'yö bha.» 
'Yö 'wo dɔ ‑bɛang ‑bha 'wo dho kö "suʋ̈ ‑ya ‑nu kë sië, "kɛɛ kö ‑a ‑nu ꞊nii ‑yö ‑da sië 'pö ꞊dedewo. 'Yö 'wo dho kö 'wo‑ ‑gɛn dɔ Yesu ‑bha ꞊klang ‑nu bha‑ ‑nu ‑dhɛ. 
꞊Dhɛ 'wo 'dho sië 'wo dho "kan wo ‑ta kö Yesu ꞊ya nu dɔ‑ ‑nu ‑gɔ zian‑ ꞊yaa‑ pö‑ ‑nu ‑dhɛ: «'Ka ꞊boo mü!» ꞊Dhɛ 'ö ꞊waa‑ yö, 'yö 'wo dho 'wo zun wo kpiö 'gü‑ ‑dhɛ. 
꞊Dhɛ 'ö ꞊ya kë "dhʋ̈, 'yö Yesu ‑ya pö‑ ‑nu ‑dhɛ 'ö‑ pö: «"Suʋ̈ 'ya 'dho ka kë, ‑ka 'dho 'ka‑ pö n dheebhang ‑nu ‑dhɛ ꞊dhɛ ‑wo 'dho Gadhidhe ‑sɛ 'gü, ‑wo ‑dho ‑kpan n ‑bha ‑dhɛ bha ꞊në‑ 'gü.» 
"Tʋ̈ng 'ö dhong ‑nu bha 'wo 'dho sië‑ 'ka 'wɔn bha‑ ‑gɛn dɔ ‑dhɛ 'gü Yesu ‑bha ꞊klang ‑nu ‑dhɛ bha, kö bun ‑maakëmɛ ‑nu ‑dɩ 'pö‑ mɛ 'bha ‑nu ‑wo ‑da sië 'plöö 'wo ‑ziö Yesu ‑bö ‑kɔ zü bho ‑kɔ waa‑ "dhiʋ̈ ‑ya ‑kɔ ꞊gban 'gü "saabhomɛ ‑nu ‑gɔmɛ ‑nu bha‑ ‑nu ‑dhɛ. 
'Mɛ 'wo bha ꞊dhɛ 'ö ꞊wa ziö 'wɔn bha‑ ‑gɛn 'gü‑ ‑nu ‑dhɛ "pɛɛpɛdhö, 'yö 'wo dho "slën 'gü, 'yö 'wo wo ‑bha ‑ya 'kwëë‑ ‑kë waa‑ ‑kwɛagbö ‑nu 'dhö. ꞊Dhɛ 'ö‑ ‑nu ‑wʋ ꞊ya 'to do, 'yö 'wo nu 'wo 'wëë‑ 'gbɛ ꞊dede sü 'wo‑ nu "sɔdha ‑nu bha‑ ‑nu ‑dhɛ. 
'Yö 'wo‑ pö‑ ‑nu ‑dhɛ 'wo‑ pö: «‑Kaa pö 'ö gun kö yi yi zë sië gbeng, 'yö‑ ‑bha ꞊klang ‑nu 'wo nu 'wo‑ ꞊kwaan, 'yö 'wo dho‑ 'ka.» 
꞊Ya kë ꞊dhɛ "sɛdë ꞊ya 'wɔn bha‑ ma kö ‑ya pö 'ö 'wɔn 'bha kë ka 'ka ‑a ‑wɔn 'gü, yi ꞊në 'yi dho kpa‑ ‑zʋ ‑ta, 'yö 'yaa ka kë ‑kɔ 'bha 'gü. 
꞊Dhɛ 'ö ꞊waa‑ pö "sɔdha ‑nu bha‑ ‑nu ‑dhɛ "dhʋ̈, 'yö 'wo wo ‑kɔ ‑da 'wëë‑ bha‑ 'gü, 'yö 'wo‑ ‑kë ꞊dhɛ ‑kɔ 'wo ‑wʋ kpɔ‑ 'ka‑ ‑nu ‑bha bha‑ 'dhö. "Kɛɛ 'yö ‑wʋ 'ö ‑gɔmɛ ‑nu ‑wa kpɔ bun ‑maakëmɛ ‑nu ‑bha bha‑ ‑wʋ ‑yö sɔ "sɛ bha‑ 'gü ‑dhɛ ꞊gban "pɛpɛ 'gü, 'ö nu 'ö zun‑ 'ka ꞊dɛɛ ‑bha. 
꞊Dhɛ 'ö Yesu ‑bha ꞊klang ‑nu bha ꞊wa 'wɔn bha‑ ma, 'yö 'wo dho Gadhidhe ‑sɛ 'gü, ‑tɔn 'ö Yesu ‑ya ‑dhɛ ‑zɔn ‑nu ‑dhɛ bha‑ ꞊gbin‑. 
꞊Dhɛ 'ö ꞊wa 'dho ꞊wa ꞊loo mü, 'yö 'wo ‑kpan ‑bha, 'yö 'wo zun‑ ‑dhɛ wo kpiö 'gü, "kɛɛ yö ‑zë ꞊gban 'gü, 'mɛ 'wo bha‑ mɛ 'bha ‑nu ‑gun mü 'ö 'waa gun 'dhang bho sië Yesu ‑go ga 'gü ‑wɔn bha‑ "dhiʋ̈. 
꞊Dhɛ 'ö ꞊wa zun‑ ‑dhɛ kpiö 'gü "dhʋ̈, 'yö Yesu ‑yö ꞊yɔɔn‑ ‑nu "sɔɔ 'yö ö ‑wʋ kpɔ‑ ‑nu ‑bha 'ö‑ pö: «‑Kɔ ‑ziö "sɛ waa‑ dhang‑ ‑nu 'gü ‑pë ꞊gban "pɛpɛ ‑gɔ ‑faan bha Atanna ꞊yaa‑ nu n ‑dhɛ. 
꞊Dhɛ 'ö "dhʋ̈ ‑ka 'dho 'ka n ‑wɔn ‑dhiang zë "sɛ "pɛpɛ ꞊gban 'gü mɛ ‑nu ‑dhɛ kö ‑wo wo zuë" slëë‑ n "piʋ̈ kö 'ka‑ ‑nu ‑bɔ n 'ka ‑zu bho n Dë 'tɔ 'gü, ‑a Gbö 'tɔ 'gü, ‑a ‑bha 'Nii‑ "slʋ̈ʋ̈slʋ̈ 'tɔ 'gü. 
Kö 'ka‑ ‑nu ꞊klang kë ‑zʋ ‑kë pë "pɛpɛ 'a‑ ‑bɛn zë 'a‑ to ka ‑gɔ bha‑ "piʋ̈ ‑sü 'ka. ‑Yö kë ka "yaan ꞊dhɛ a ka "piʋ̈ yi ꞊gban 'ka 'ö to‑ 'ka "dhʋ̈ 'ö zun‑ 'ka "sɛ "dhiʋ̈toyi ‑bha.»
