GEN 1:1 Bab-Dummadi, gebe-negasailaunni, nibneg, napneg obinnisad.
GEN 1:2 Deunni, napneg gwen nabir-daklesulid, neg olloo-dakleged, unnila dii-wilasailad-birgi negsichidbi naid. Bab-Dummad-Burbadi dii-birgi aibannaid.
GEN 1:3 Geb degine, Bab-Dummad sogded: “Neg-meegwad nagu.” Agi, neg-meegwad nagunonikid.
GEN 1:4 Geb Bab-Dummad dakded, neg-meegwad, ibnuedi. Agi, Bab-Dummad neg-meegwad, negsichid-ebo bachikii imaknonikid.
GEN 1:5 Bab-Dummad neg-meegwad ibginedye onug-imaksad. Negsichiddi mutikidye onug-imaksad. Weyob neg osedosad, geb neg oibosbalid. Deyob, ibagwenadgi neg gusad.
GEN 1:6 Geb degine, Bab-Dummad sogdebalid: “Neg-ollor-dummad nagu, adi, diimar bachikii naguegar.”
GEN 1:7 Deyobi, Bab-Dummad neg-olloled-dummad nasiksad. Neg-ollor-dummad-birgi dii nagunonikid, degi, neg-ollor-dummad-urba dii nagunonibalid. Deyob gunonikid.
GEN 1:8 Bab-Dummad a-neg-olloled-dummad mogir-aradye onugsasad. Weyob neg osedosad, geb neg oibosbalid. Deyob, ibabogwadgi neg gusad.
GEN 1:9 Geb degine, Bab-Dummad sogdebalid: “Dii-mogir-arad-urba-naid bachiki nagu, adi, neg-dinnagwad naguegar.” Deyob gunonikid.
GEN 1:10 Bab-Dummad, neg-dinnagwad, napaye onugsasad. Geb diidina, demarye onugsanonikid. Geb Bab-Dummad dakded, we-ibmar bela nueganbi.
GEN 1:11 Agi, Bab-Dummad sogdebalid: “Bela ibmar-durbamar napagi nagu: Gaganmar-gwag-nikad ambikumar, degine, akar-akar sapi-sunna-sanmakmalad, e-sangi gwag-nika gusun. Ibmar-durbamar akar-akar bela na egad-egad-balibimaladba ambikumarsun.” Deyob gunonikid.
GEN 1:12 Geb napagi ibmar-durbamar nagunonikid: Gaganmar-gwag-nikamalad bela na akar-akar egad-egad-balibimaladba, degi, sapimar-e-sangi-gwag-nikumalad bela akar-akar na egad-egad-balibimaladba ambikunonimalad. Bab-Dummad dakdebalid, we-ibmar bela nueganbi.
GEN 1:13 Weyob neg osedosad, geb neg oibosbalid. Deyob, ibapaagwadgi neg gusad.
GEN 1:14 Geb degi, Bab-Dummad sogdebalid: “Nibneggi gwallumar nagu, adi, neg-mutikid, neg-ibgined-ebo bachikii guegar. Adi, ibagan-nagumaid, yolamar-nagumaid, birgamar-nagumaid magar daklegegar.
GEN 1:15 Degi, gwallumar-niba-naid napneg-mee saegar.” Deyob gunonikid.
GEN 1:16 Bab-Dummad gwallu-dummagan gwabo obinyenonikid: Gwallu-dummad, neg-ibginedgi negdaknai guegar. Gwallu-senigwaddi, neg-mutik negdaknai guegar. Degine, niisgwamar obinnisbalid.
GEN 1:17 Bab-Dummad napneg-mee-imakega, gwallumar, niisgwamar, nibneggi nasiksad.
GEN 1:18 Adi, neg-ibginedgi negdaknai guegar, degi, neg-mutikidgi negdaknai gubaligar. Adina, neg-meegwad, negsichid-ebo bachikii imakegar. Bab-Dummad dakded, we-ibmar bela nueganbi.
GEN 1:19 Weyob neg osedosad, geb neg oibosbalid. Deyob, ibabakegwadgi neg gusad.
GEN 1:20 Geb degi, Bab-Dummad sogdebalid: “Diigi ibmar-dulamar bela akar-akar ambikumar, degine, nuumar ambikumar, we-napneggi nabir niba gukudii gumalagar.”
GEN 1:21 Bab-Dummad demargi ibdula-dummagan obinnisad, degine, diigi belagwapa ibmar-dulamar obinnisbalid. Bela na egad-egad-balibimaladba obinnisad. Degine, Bab-Dummad bela nuumar na egad-egad-balibimalad obinnisbalid. Bab-Dummad dakded, we-ibmar bela nueganbi.
GEN 1:22 Bab-Dummad a-ibmar-durgangi ise-nued-binsaedgi amarga sogded: “Bemar dula-mergumai gumarsun. Demargi bukidar-dula-mergumai gumarsun. Degine, nuumar, bemar we-napneggi bukidar-dula-mergumai gumarmosun.”
GEN 1:23 Weyob neg osedosad, geb neg oibosbalid. Deyob, ibataledgi neg gusad.
GEN 1:24 Geb degi, Bab-Dummad sogdebalid: “Napagi bela ibmar-durgan na egad-egad-balibimaladba ambikumar: Ibmar-durgan-sunna-akwilemalad, ibmar-durgan-napagi-garmakdimalad, ibmar-durgan-sapurbarmalad, bela na egad-egad-balibimaladba ambikumar.” Deyob gunonikid.
GEN 1:25 Bab-Dummad bela ibmar-durgan-sapurbarmalad na egad-egad-balibimaladba obinnisad. Ibmar-durgan-sunna-akwilemalad bela na egad-egad-balibimaladba obinnisbalid. Degine, ibmar-durgan-napagi-garmakdimalad bela na egad-egad-balibimaladba obinnisbalid. Bab-Dummad dakded, we-ibmar bela nueganbi.
GEN 1:26 Geb degi, Bab-Dummad sogdebalid: “Emisgindi, anmar, dule-obinyesun, anmar-sunnague anmar imakoed. Dulede, we-ibmar-durganmargi gangued-nika guoed: Uamargi, nuumargi, ibmar-durgan-sunna-akwilemaladgi, ibmar-durgan-sapurbarmaladgi, ibmar-durgan-napagi-garmakdimaladgi, bela we-ibmarmargi we-napneggi gangued-nika guoed.”
GEN 1:27 Bab-Dummad dule-obinyenonikid, na e-sunnague obinyenonikid. Bab-Dummad e-sunnague na imaksad. Machered, ome-ebo obinnisad.
GEN 1:28 Bab-Dummad we-dulemargi ise-nued-binsasadba, ega sogded: “Bemar mimmigan-bukidar nikumar. We-napneggi dula-bukidar urbemar, degi, bela we-napneg-ugakaase ambikumar. Bemar we-napneggi be gangued-nikadba bela we-ibdurganmargi be obindii gumarsun: Uamargi, nuumargi, degi, ibmar-durgan-napagi-garmakdimaladgi.”
GEN 1:29 Geb degi, Bab-Dummad dulega sogdebalid: “We-napneggi bela gagan-nabir-gwag-nikumalad, degi, bela sapimar-e-sangi-gwag-nikumalad, an bemarga uked. A-ibmar-durba bela bemar-masga guoed.”
GEN 1:30 Bab-Dummad we-napneggi bela we-ibmar-durganga sogdebalid: “Bela ibdula-unimaladga, bela nuumarga, bela ibdurgan-napagi-garmakdimaladga, bela gagan-ara-aramalad e-masga-guega an ega uked.” Deyob gunonikid.
GEN 1:31 Geb degine, Bab-Dummad dakded, bela ibmar-na-obinnisadi, bela-bela nueganbi. Weyob neg osedosad, geb neg oibosbalid. Deyob, ibanergwadgi (6) neg gusad.
GEN 2:1 Deyobi, nibneg obinnilesad, napneg obinnilesad, amargi ibmar-akar-akar obinnilesad, bela deyob ambikunonikid.
GEN 2:2 Ibanergwadgi (6) Bab-Dummad bato bela ibmar-obinnissoggu, ibagugled-nagunonigu (7), Bab-Dummad obunnosad, bar arbassulid.
GEN 2:3 Geb degine, Bab-Dummad ibagugledgi (7) ise-nued binsasad. Bela ibmar-obinnisad-bergusgu, obunnosad. A-ulale, a-iba, iba-islidikidye onugsasad.
GEN 2:4 Deyob napneg obinnilesad, degi, nibneg obinnilesad. 1b. Dule abirgunagwar Edénʼgi gwisgunonikid (2:4-25) Bab-Dummad-Jehová, we-napneg, degi, nibneg obinnisgua,
GEN 2:5 amba sapimar napneggi sated, amba yoo gaganmar-aragana ainidabalid. Ar ade, Bab-Jehová amba yoo dii napagi owidaged, degi, dule napagi-arbaega satebalid.
GEN 2:6 Unnila napagi dii-bupurmakmaid, bergwapa napa ogegar.
GEN 2:7 Geb degine, Bab-Dummad-Jehová napa susgu, a-napagi dule-sobsad. Bab-Jehová dule-sobsagu, dule-asugi buu imaksad. Geb agi, dule burba-nika gunonikid. Agine, dule dula-gunonisunnad.
GEN 2:8 Geb degine, Bab-Dummad-Jehová dad-nakwedsik, Edénʼgi nainu-nued nasiksad. Agi, Bab-Dummad-Jehová we-dule-obinnisad ogwisnonikid.
GEN 2:9 Agine, Bab-Dummad-Jehová sapimar akar-akar bela yeerdaklemalad ainiega imaksad. A-sapimar-e-san bela yeer-gulle imaksad. Nainu-nued-abargi, sapi-wargwen gwichid. Dule we-sapi-e-san guchale, dula-gudii guoed, gwen burgosulid. Degine, sapi-baid gwichibalid. Dule we-sapi-e-san guchardina, wisguoed, ibu ibnuedi, ibu ib-isganabali.
GEN 2:10 Degine, Edénʼgi diwar maid. Agi, e-saila-siid. A-diwar nainu-nued ogmaid. A-diwar ana-sogabake nikad.
GEN 2:11 Gebe-ana-gwensakgadi Pisónʼye nugad. A-diwar bela Havila-yalaganba bipirmakmaid. Aginbali, a-yargi or nikad.
GEN 2:12 Havila-yargine or-nikadi, or-nuedid. Agi sapi-nued-gichi-nikad-bedelioʼye-nugad nikad. Degi, akwa-nued-óniceʼye-nugad nikabalid.
GEN 2:13 Diwar-ana-sogbogwaddi Gihón-diwarye nugad. A-diwar bela Cus-yalaganba bipirmakmaimogad.
GEN 2:14 Diwar-ana-sogapaagwaddi Hidekelʼye nugad. A-diwar, Asiria-dad-nakwedsik maid. Diwar-sogabakegwaddi Éufratesʼye nugad.
GEN 2:15 Nainu-nued-Edén-akwega, Bab-Dummad-Jehová, dule-ogwisnonikid, agi arbaegar.
GEN 2:16 Agine, Bab-Dummad-Jehová dulega igar-uksad: “We-nainu-nuedgi sapimar-bukwad-e-sanmar sunna bela be gunned.
GEN 2:17 Unnila sapi-wargwen-e-sandi melle be gunno. We-sapi, ibmar-nued-wisi, ibmar-isgana-wisi dule-saed. A-sapi-e-san be guchale, a-ibagi be burgoed.”
GEN 2:18 Geb degine, Bab-Dummad-Jehová sogded: “Dule wargwen-gudiir, akuu dakleged. Degisoggu, dulega e-abirgined an imakoed, adi, e-bendaked-nuedga guegar.”
GEN 2:19 Bab-Dummad-Jehová napagi bela ibmar-durgan, bela nuumar obinnisad. Bab-Jehová we-ibdurganmala Adánʼse senonikid. Adi, Adán ega nug amiegar. Dule ibmar-durganga nug-amisad, abali, ibmar-durgan nugnanaed.
GEN 2:20 Weyobi dule bela we-ibmar-durgan: Ibmar-durgan-sunna-akwilemaladga, bela nuumarga, bela ibmar-durgan-sapurbarmaladga, nug amisad. Degi-inigwele, Adánʼgardi e-bendaked sate gusad.
GEN 2:21 Geb degine, Bab-Dummad-Jehová Adán-ise-nue-gabega imaksad. Adán nue-gabmaigu, Bab-Jehová Adán-e-dikargar-wargwen onosad. Geb Bab-Dummad-Jehová gannar Adán-e-san edisad.
GEN 2:22 Bab-Dummad-Jehová we-dikargargi ome-obinnisad. Agi, macheredga ome-senonikid.
GEN 2:23 Adán ome-dakdegu, sogded: “Ar wedi an-galado, ar ade, an-gargi obinnilealedid. Wedi an-sanado, ar ade, an-sangi obinnilealedid. Ar Bab-Dummad we-ome macheredgi obinnisad. We nugguodo, Omeye.”
GEN 2:24 A-ulale, machered e-babgi bangudoed, e-nangi bangudoed. Geb machered e-ome-ebo garmakdii guoed. Ebogwadi, san-wargwennagwadga gunonikoed.
GEN 2:25 Deunni, Adán, Eva-ebogwa, uka-swili garmakdimalad, gwen binged nikasurmalad.
GEN 3:1 Bab-Dummad-Jehová we-napneggi bela ibmar-durgan obinnisad. Amar-abargi, naibedi ibmar-durgan-baiganba dule-binsaed-gaedgi bur buledid. Naibe omega sogded: —¿Etto, Bab-Dummad bemarga sogsa: ‘We-nainu-nuedgi sapimar-gwichid-e-san melle bipisaale gunmaloye?’
GEN 3:2 Ome naibe-abin sogded: —Ar igid-sapi-e-san anmar we-nainu-nuedgi gunbimala, sunna bela anmar gunmalad.
GEN 3:3 Unnila nainu-nued-abargi sapi-wargwen-gwichid-e-sanbi geg anmar gunned. Bab-Dummad anmarga sogsado: ‘Melle a-sapi-e-sandi be gunmaloye, degine, melle be ebumarbaloye. Ar bemar guchale, bemar burgwemaloye.’
GEN 3:4 Ar naibedi omega sogded: —Suli, degisuli. Bemar gwen burgosuli.
GEN 3:5 Ar Bab-Dummad nue-wisid, bemar we-sapi-e-san guchale, ibmar-wisii gudmaloed. Geb agine, bemar Bab-Dummadyob ibmar-wisi gudmaloed, ibi ibnuedi, ibi ib-isganabali.
GEN 3:6 Ome sapi-san-dakdegu, dakalid, sapi-san yeerdaklege, nued-gulle-daklege, degine, nue-ibmar-wisi sunna dule-imake daklege. Degisoggu, ome sapi-san-gwachagu, guchad. Geb ome e-suiga uksamogad. E-suide guchamogad.
GEN 3:7 Geb agine, na ebobela neg-ittos nadmalad, emarde uka-swili garmakdii. Geb degine, saburega gagan-urwagiid-higueraʼye-nugad maksamalad. Agi, na saburusmalad.
GEN 3:8 Dule, e-omebogwa, neg-sedogudanikidgi itoarmalad, Bab-Dummad-Jehová, nainu-nued-abargi garmakdii. Dule, e-omebo deyob itosmargu, Bab-Dummad-Jehováʼgi nainu-nuedgi sapimar-bukwad-imbaba dukunadmalad. Adi, mer Bab-Jehová emar-dakegar.
GEN 3:9 Bab-Dummad-Jehováʼdi macheredse goted, ega sogded: —¿Bia be gudii?
GEN 3:10 Dule abin-sogded: —An be-itosad, nainu-nued-imbaba be gudii. Ar an uka-swili-gudisoggu, an be-dobee itoged. A-ular, an be-idu dukusad.
GEN 3:11 Geb degine, Bab-Dummad macheredse egichialid: —¿Ar doa bega sogsa, be uka-swilii gudiiye? An bega sogsad: ‘Sapi-wargwen-e-san mer be gunnoye.’ ¿A-sapi-e-sande be guchasi?
GEN 3:12 Dule Bab-Dummad-abin sogded: —Ome-anbo-garmakdiguega be anga-uksadi, a, anga sapi-e-san uksad. Geb an guchasunnad.
GEN 3:13 Geb degine, Bab-Dummad-Jehová omese egichided: —¿Ibiga deyob be imaksa? Ome abin-sogded: —Ar naibe an-yardaksad. A-ular, sapi-e-san an guchad.
GEN 3:14 Geb degine, Bab-Dummad-Jehová naibega sogded: “Ar weyob be imaksasoggu, ibmar-durgan-akwilemaladba, degi, ibmar-durgan-sapurbarmalad-baiganba, bedi bur bule be ukabsalesun. Emi-iba-onodedgi, be napagi unimakdii gusun, degine, be-burgwedse, napa-madii be gusun.
GEN 3:15 Ome-ebogwa na be isdar-dakdii an be-imakoed. Ome-e-wagwa, be-wagwa-ebo na isdar-dake gumaloed. Ome-e-wagwa be-nonogi annaoed. Bedina e-mali-gasigi onakliksaoed.”
GEN 3:16 Bab-Dummad omega sogded: “Be sikwi-bakalile, nunmaked-dummad an bega ukoed, nunmakedgi be ugakguoed. Be-suibina be sogdii guoed. Be-sui be-iduedga guoed.”
GEN 3:17 Bab-Dummad macheredga sogdemogad: “Ar be-ome-sogedba, sapi-e-san-mer-gunnoye an bega sogsadi, be guchasoggu: Deyob be imaksad-ular, we-napa iwiles nagusun. Be burgwedse ise-arbaar-alamakdiidgi, be masgunned-amidii gusun.
GEN 3:18 Napa bega ikomar nikuoed, napa bega gagan-ikobiid nikuoed. Gagan-nainuginmalad-gunne be guoed.
GEN 3:19 Be-wimaked-osuurmakedgi na be masgunned-amidii guoed. Deyob be guoed, be napaga gannar guedse. Ar ade, napagi be danikid. Ar be napasoggu, be burgwisale, napaga gannar be binyoed.”
GEN 3:20 Ar omede bela dulemar-dula-gunonikoed-e-nanga guosoggu, Adán na e-ome Evaʼye onugsasad.
GEN 3:21 Bab-Dummad-Jehová, macheredga, degi, omega ibmar-durgan-uka morga imaksad. Geb macheredga, degi, omega mor yossunnad.
GEN 3:22 Geb degine, Bab-Dummad-Jehová sogded: “Emigindi, dule anmar-sunnaa gunonimogad. Dulemarde ibmar-nued-wisi, degine, ibmar-isgana-wisi gunonikid. Ar dule sapi-e-san-dula-dule-imaked-guchale, degisadegu dula-gudii guoed. Degisoggu, melle dulemar we-sapi-e-san gwanegala, degi, melle gunnegala, dulemar-nainu-nuedgi-gudiid, an onogoed.”
GEN 3:23 Degisoggu, a-ular, Bab-Dummad-Jehová, nainu-nued-Edénʼgi dule-gudiid onossunnad. Degine, napagi-arbaega dule-imaksad. Ar ade, napagi dulede danikid.
GEN 3:24 Bab-Jehová, Adán nainu-nuedgi-gudiid onosgua, nainu-nued-dad-nakwedsik baliwiturmar-querubinʼye-nugad ogwichisad. Degine, es-suid-gwabunye-gwichid bela bipirmakgwichi imaksabalid. Adi, melle dule-wargwensaar sapi-dula-dule-imakedse warmakmalagar.
GEN 4:1 Adán e-ome-Evaʼse-gochagu, Eva gurgin-nika gunonikid. Evaʼga susugwa uklenonikid, Caínʼye onugsasad. Ar Eva sogded: “Bab-Jehová na e-sogedba susugwa anga uksad.”
GEN 4:2 Geb a-sorba, Evaʼga Abel uklenonikid, Caín-e-urba. Abel sibad-wawaad-edarbedga gusad. Caínʼdi sapurba-arbaed-dulega gusad.
GEN 4:3 Ibagan-nasad-sorbali, Caín na e-ibmar-sanmaksamalad wesad. Geb Bab-Jehováʼga-ukega senonikid.
GEN 4:4 Abelʼdi na Bab-Jehováʼse sibad-wawaad-gebegwalulesmalad senonimogad, geb oburgwisad. A-sibad-wawaad-e-gwallu ogumakar Bab-Jehováʼga uksad. Bab-Jehová Abel-yeer-daksad, degine, ega-ibmar-uksad yeer daksabalid.
GEN 4:5 Bab-Jehová Caín-yeer-daksasulid, degine, ega-ibmar-senonikid amba yeer daksasurbalid. A-ulale, Caín bela-bela sae-itoalid. E-wagar-daklegedi magar-dakleged, nue sae-itoged.
GEN 4:6 Geb degine, Bab-Jehová Caínʼga sogded: “¿Ibiga sae be itoge? ¿Ibiga be-wagar urwakwaa daklege?
GEN 4:7 Ar ibmar-nued be imakele, ¿an be-abingassurmogar be insae? Eye, an be-abingasmogale. Ar emigindi, be ibmar-nued imaksursoggu, isgued begi-aibinega guakwaa be-edarbediid. Degi-inigwele, sunna isguedgi be obined.”
GEN 4:8 Ibagwengi, Caín e-urbaga sokalid, sapurba wis-garmakdii sanamarye. Geb ebo-sapurba-gudiidgi, Caín e-urba-Abel-sarsosad, geb oburgwisad.
GEN 4:9 Geb degine, Bab-Jehová Caínʼse egichided: —¿Bia be-urba-Abel nade? Caín, Bab-Jehová-abin sogded: —An wissuli. ¿Ar ande an-urba-edarbedsi?
GEN 4:10 Bab-Jehová Caínʼga sogded: —Ar wede, ¿ibi be imaksa? Be-urba-ablis be eosad. Emide, a anga sogeyob an itoged: ‘Anga be igar-naboye.’
GEN 4:11 Be be-urba oburgwisadba, napa be-urba-e-ablis gobsad. A-ulale, be ukabsalessunnad.
GEN 4:12 A-ular, be nainugi arbaoen-inigwele, bega ibmar sanmakosulid. Be we-napneggi dule-wakindiiyob negsuli gudii guoed.
GEN 4:13 Geb degine, Caín, Bab-Jehová-abin sogded: —Weyob sabsur be an-odurdakele, gwen guo an itosulid.
GEN 4:14 Ar emi-ibagi, nainugi-arbaedgi be an-ononaisoggu, we-napneggi garmakdii, dikasur begi bangus gudii, dule-wakindiiyob negsuli, obunnoged-sate an gudii gudoed. Degisoggu, doa-dule an-dakalile, an-oburgoed.
GEN 4:15 Bab-Jehová Caín-abin sogded: —Suli, deyob guosuli. Ar dule be-oburgwele, we-dule-be-oburgwisad ilagugle (7) bur bule sabsur-odurdaklegoed. Geb degine, Bab-Jehová Caínʼgi wilub nasiksad, adi, dule-gwensak Caín-dakalile, melle oburgwegar.
GEN 4:16 Caín Bab-Jehováʼgi bangudgu, Nod-yargi megidapid. Nod-yarde Edén-dad-nakwedsik naid.
GEN 4:17 Caín e-omese-gochagu, e-ome gurgin-nika gunonikid. Machigwa-ega-uklesad, Enocʼye onugsasad. Caín, neggwebur urbenonikid. E-machi-nugba, we-neggwebur Enocʼye onugsanonikid.
GEN 4:18 Enoc, Irad-e-babad. Iradʼdi, Mehujael-e-babad. Mehujaelʼdi, Metusael-e-babad. Metusaelʼdi, Lamec-e-babmogad.
GEN 4:19 Lamecʼdi ome-warbo-nikusad: Wargwen Adaʼye nugad, baiddi Zilaʼye nugad.
GEN 4:20 Ada machi-nikusad, Jabalʼye onugsasad. Jabal-inse dordoneg-sobed onoded. A-inse ibmar-durgan-akwedgi-arbaed onodbalid.
GEN 4:21 Jabal urba nikusad, Jubalʼye nugad. Jubal-inse gar-arpa-ogoled onoded. A-inse gammu-ogoled onodbalid.
GEN 4:22 Zilaʼdi machigwa-nikunonimogad. Tubal-Caínʼye a-machigwa onugsasad. Tubal-Caín-inse esgoro-gordikidgi-ibmar-sobed onoded, degi, esgorogi-ibmar-sobed onodbalid. Tubal-Caín bun-wargwen nikusad. E-bunde, Naamaʼye nugad.
GEN 4:23 Ibagwengi, Lamec e-omemarga sokalid: “Ada, Zila, an bemarga ibmar-sogoedi, nue be an-itomalo: Dule naibi-an-imaksad-ular, an oburgwisad. Machigwa an-sarsosad-ular, an oburgwisad.
GEN 4:24 Ar dule Caín-oburgwisale, we-dule ilagugle (7) buged-mai, sabsur-odurdaklegoye sogleged. Ar dule an-oburgwisardi, we-dule an-oburgwisad-ular, dulapaa-gakambe-gakagugle (77), bur bule sabsur-odurdaklegergebed.”
GEN 4:25 Adán e-omese gochabargu, Eva susugwa-nikunonikid. Geb Eva sogded: “Caín, e-urba-Abel-oburgwissoggu, Bab-Dummad susugwa anga Abel-anar uknonikid.” A-ular, Eva a-susugwa Setʼye onugsasad.
GEN 4:26 Set machigwa-nikusmogad, Enósʼye onugsasad. A-ibagan-akar, dulemar Bab-Jehováʼse gotemalad.
GEN 5:1 We, Adán-e-wagan-nugmar-narmakar-mamaid-e-gardad. Bab-Dummad dule-obinnisgua, deunni na e-sunnague dule-imaksad.
GEN 5:2 Bab-Dummad machered ome-ebogwa obinnisad. Wemargi ise-nued binsasad. Bab-Dummad dulemar-obinnisgua, amarga sogsad: “Bemar, duleye nugguoye.”
GEN 5:3 Adán birga-dulanergwa-gakambe-nikadgi (130), e-machi gwalulesad, Setʼye onugsanonikid. Setʼde bela Adánʼsun-dakleged, degine, bela e-bab-daeyobi dabalid.
GEN 5:4 A-sorba, Adán birga-dulataled-ilabaabak (800) napi-gudii gusad. Adán, machimala-baigan nikusbalid, degine, bunamala nikusbalid.
GEN 5:5 Degisoggu, Adán bela birga-dulataled-ilabakebak gaka durgwen-gakambe (930) dula-gudii gusad. Degi-birga-nika Adán burgwisad.
GEN 5:6 Set birga-dulatar-gakatar-nikadgi (105), e-machi-Enós gwalulesad.
GEN 5:7 A-sorba, Set birga-dulataled-ilabaabak gakagugle (807) napi-gudii gusad. Set, machimala-baigan nikusbalid, degine, bunamala nikusbalid.
GEN 5:8 Degisoggu, Set, bela birga-dulataled-ilabakebak gakambe-gakabo (912) dula-gudii gusad. Degi-birga-nika Set burgwisad.
GEN 5:9 Enós birga-dulabake-gakambe-nikadgi (90), e-machi-Cainán gwalulesad.
GEN 5:10 A-sorbali, Enós, birga-dulataled-ilabaabak gakambe-gakatar (815) napi-gudii gusad. Enós, machimala-baigan nikusbalid, degine, bunamala nikusbalid.
GEN 5:11 Degisoggu, Enós, bela birga-dulataled-ilabakebak gakatar (905) dula-gudii gusad. Degi-birga-nika Enós burgwisad.
GEN 5:12 Cainán, birga-dulapaa-gakambe-nikadgi (70), e-machi-Mahalaleel gwalulesad.
GEN 5:13 A-sorbali, Cainán, birga-dulataled-ilabaabak gaka dulabo (840) napi-gudii gusad. Cainán, machimala-baigan nikusbalid, degine, bunamala nikusbalid.
GEN 5:14 Degisoggu, Cainán, bela birga-dulataled-ilabakebak gakambe (910) dula-gudii gusad. Degi-birga-nika Cainán burgwisad.
GEN 5:15 Mahalaleel, birga-dulapaa-gakatar-nikadgi (65), e-machi-Jared gwalulesad.
GEN 5:16 A-sorba, Mahalaleel, birga-dulataled-ilabaabak gaka dulagwen-gakambe (830) napi-gudii gusad. Mahalaleel, machimala-baigan nikusbalid, degine, bunamala nikusbalid.
GEN 5:17 Degisoggu, Mahalaleel, bela birga-dulataled-ilabaabak gaka dulabake-gakambe-gakatar (895) dula-gudii gusad. Degi-birga-nika Mahalaleel burgwisad.
GEN 5:18 Jared, birga-dulabaabak-gakabo-nikadgi (162), e-machi-Enoc gwalulesad.
GEN 5:19 A-sorba, Jared, birga-dulataled-ilabaabak (800) napi-gudii gusad. Jared, machimala-baigan nikusbalid, degine, bunamala nikusbalid.
GEN 5:20 Degisoggu, Jared, bela birga-dulataled-ilabakebak gaka dulapaa-gakabo (962) dula-gudii gusad. Degi-birga-nika Jared burgwisad.
GEN 5:21 Enoc, birga-dulapaa-gakatar-nikadgi (65), e-machi-Matusalén gwalulesad.
GEN 5:22 Matusalén-gwalulesad-sorba, Enoc, birga-dulataled-ilapaa (300) Bab-Dummad-walikaa nanadii gusad. Enoc, machimala-baigan nikusbalid, degine, bunamala nikusbalid.
GEN 5:23 Degisoggu, Enoc, bela birga-dulataled-ilapaa gaka dulapaa-gakatar (365) dula-gudii gusad.
GEN 5:24 Ar Enoc, Bab-Dummad-walikaa nanadii gussoggu, ibagwengi sate daklealid, ar ade, Bab-Dummad na-sesad.
GEN 5:25 Matusalén, birga-dulabakebak-gakagugle-nikadgi (187), e-machi-Lamec gwalulesad.
GEN 5:26 A-sorba, Matusalén, birga-dulataled-ilagugle gaka dulabake-gakabo (782) napi-gudii gusad. Matusalén, machimala-baigan nikusbalid, degine, bunamala nikusbalid.
GEN 5:27 Degisoggu, Matusalén, bela birga-dulataled-ilabakebak gaka dulapaa-gakabakebak (969) dula-gudii gusad. Degi-birga-nika Matusalén burgwisad.
GEN 5:28 Lamec, birga-dulabakebak-gakabo-nikadgi (182), e-machi gwalulesad.
GEN 5:29 Noéʼye e-machi-onugsasad. Ar ade, sogded: “Bab-Jehová we-napa-ukabsassoggu, a-ular, anmar ise-alamaknai arbaergebed. Ar emigindi, we-machigwa anmarga obunnoged ukoed.”
GEN 5:30 Noé-gwalulesad-sorba, Lamec, birga-dulataled-ilatar gaka dulabake-gakambe-gakatar (595) napi-gudii gusad. Lamec, machimala-baigan nikusbalid, degine, bunamala nikusbalid.
GEN 5:31 Degisoggu, Lamec, bela birga-dulataled-ilagugle gaka dulapaa-gakambe-gakagugle (777) dula-gudii gusad. Degi-birga-nika Lamec burgwisad.
GEN 5:32 Noé, bato birga-dulataled-ilatar (500) nikagua, e-masmala gwalulenonikid: Sem, Cam, degi, Jafet.
GEN 6:1 Dulemar we-napneggi merguarmargu, degi, ega bunormala gwalulemaiguargu,
GEN 6:2 masmala-Bab-Dummadba-nanamalad dakalid, dulemar-yagan yeer daklemala. Degisoggu, masmala-Bab-Dummadba-nanamalad dulemar-yagana-ebo-nikuega na e-abegedba susdamalad.
GEN 6:3 Agi, Bab-Jehová sokalid: “Ar dulemar unnila dule-gumarsoggu, An-Burba dule-dula-imaked degisadegu eba gudii guosulid. Degisoggu, dulemar burgoed. A-ular, unnila birga-dulanergwa (120) dula-bukwa gumaloed.”
GEN 6:4 Masmala-Bab-Dummadba-nanamalad, dulemar-sisgan-nikudmargu, mimmigan-baknonimalad. A-burwigan dule-mas-bipisuli gusmalad. Wemala, epennegwa dule-gala-ibegan, degi, dule-nuga-nika gusmaladid. A-akale, dule-masdummagan we-napneggi-nika gunonikid.
GEN 6:5 Bab-Jehová dakalid, we-napneggi dogdar dulemar-isgued mergugusa, degine, we-dulemar unnila ibmar-isgana-imakedginbi binsadimala.
GEN 6:6 Degisoggu, Bab-Jehová ulubgi nue bukib-binsaedba, sogded: “Dulemar an we-napneggi urbissulina, bur nabirinad.”
GEN 6:7 A-ular, Bab-Jehová sogded: “An dule-obinnisad we-napneggi an obelogodo. Degine, bela ibmar-durgan, bela ibmar-durgan-napagi-garmakdimalad, degi, nuumar an obelobalodo. An we-ibmarmar-obinnisadgi, nue-nunmak an itoged.”
GEN 6:8 Ar degi-inigwele, Bab-Jehová Noéʼbi nued-gudii daksad.
GEN 6:9 Noé-igar weyob maid: Noé ibmar-inniki-imaked-duled. A-ibagangine, dule Noéʼgi akar-ibmar-soged sated. Noé Bab-Dummad-walikaa nanadii gusad.
GEN 6:10 Noé machimala-walapaa nikusad: Sem, Cam, Jafet.
GEN 6:11 Deunni, bela-dulemar, Bab-Dummad-asabin, we-napneggi nue-isgus gudidiid. Deginbali, dulemar na sabsur-imakbukwamarbalid.
GEN 6:12 Bab-Dummad-dakded, bela-dulemar we-napneggi dogdar nue-isgus gudidimala, degisoggu, neg nue-isgus naisunnad.
GEN 6:13 A-ulale, Bab-Dummad Noéʼga sogded: “Bela dulemar an osulosokalid. Dulemar galagwensulidaed, muchub-muchub sabsur-imakmaladi yaisulid. A-ulale, dulemar an obelogoed, degine, we-napneg-naid an obelobaloed.”
GEN 6:14 Bab-Dummad sogdebalid: “Noé, ur-dummad na be sobo. Suar-goferʼye-nugad-e-urgomar be ebugoed. Ur-soboedgi gwardumar be sioed. Ur-dummad-be-soboeddi magaba, degine, yaba baryagi bela be magoed.
GEN 6:15 Weyob ur-dungu be soboed: E-sugued, dali-dulapaa-gakambe-gakatar (75) be imako. E-matardungueddi, daliambe-gakabo-abala (12½) be imako. E-nibgued, daligugle-abala (7½) be imakbalo.
GEN 6:16 Ur ailapaa-nika be soboed, e-uas-urba e-yawagak-bipigwad achabogi urba be sioed, degine, e-dikarba yawagak be ogwisbaloed.
GEN 6:17 ”We-napneg-odogega muusaila an barmidagoed. Bela we-napneggi ibmar-dula-gudidimalad an obelogoed, bela burgoed.
GEN 6:18 ”An bebo igar-meso. We-ur-dummadyaba be dogo: Be, be-ome, be-masmala, degi, be-balamar.
GEN 6:19 Be-sunnaa durgumogoed. Ur-dummadyaba, bela we-napneggi ibmar-durgan-nikadi, abirgunagwar-abirgunagwar be oubogo.
GEN 6:20 Bela ibmar-dula na egad-egad balibimaladba, abin-abin war-warbo ur-dummadyaba beba ubomogo: Bela nuumar, bela ibmar-durgan, bela ibmar-durgan-napagi-garmakdimalad, adi, bela amar durgumarmogagar.
GEN 6:21 ”Degine, bela mas akar-akar be onmakbalo, degi, nue sabobalo, adi, we-mas be gunnegar. Degine, ibmar-dula-gudidimalad we-mas gunmogagar.”
GEN 6:22 Ar igi Bab-Dummad Noéʼga sogsa, aba bela Noé ibmar imaksad.
GEN 7:1 Geb a-sorba, Bab-Jehová Noéʼga sogded: “Emi-ibagangi, dulemar-bukwad-abargi, unnila bebi an-asabin inniki nanadiid. Degisoggu, be, be-gwenadganmala ur-dummadyaba be doge.
GEN 7:2 Geb bela ibmar-durgan-swilidikmalad: Machered-walagugle (7), ome-walagugle, ur-dummadyaba be oubogo. Ibmar-durgan-swilidiksurmaladdi unnila machered-wargwen, ome-wargwen be oubogo.
GEN 7:3 Nuumala amba deyob be imakbaloed: Nuumar-swilidik-akar-akar-nikadi, gwagugle-gwagugle (7-7), abirgunagwar-abirgunagwar ur-dummadyaba be oubogo. Adi, we-napneggi bela ibmar-durgan, nuumarse-bakar, egad-egad balibimalad mer e-dula berguegar.
GEN 7:4 ”Ar ade, ibaguglese (7) dii an owioed, iba-dulabo (40) mutikidba, degi, ibginedba dii-winai an imakoed. ¡We-napneggi bela ibmar-dula-obinnilesad, bela an obelogoed!”
GEN 7:5 Ar igi Bab-Jehová Noéʼga sogsa, aba bela Noé ibmar imaksad.
GEN 7:6 We-napneggi muusaila-nosgua, deunni, Noé birga-dulataled-ilanergwa (600) nikad.
GEN 7:7 Noé-ur-dummad-sobsadyaba-dogsamaladi, wemalad: Noé, e-ome, e-masmala, degi, e-balamar, adi, muusailaba melle burgwemalagar.
GEN 7:8 Ibmar-durgan-swilidikmalad, ibmar-durgan-swilidiksurmalad, nuumar, ibmar-durgan-napagi-garmakdimalad,
GEN 7:9 a-ibmar-durgan, igi Bab-Dummad Noéʼga sogsadyobi, Noéʼba ur-dummadyaba war-warbo abirgunagwar-abirgunagwar dogsamalad.
GEN 7:10 Ibagugle-gusgu (7), muusaila napneggi muluded.
GEN 7:11 Noé birga-dulataled-ilanergwa-nikadgi (600), nii-warbogwad-ibambe-gakagugledgi, dii-wilasailadgi bela napa-urba-dii-sailagan-mamaid utuded, degine, nibneggi-dii-sailagan-mamaid argaded.
GEN 7:12 Napneggi iba-dulabo (40) bane-bane mutikidba, ibginedba, dii-winai gusad.
GEN 7:13 Noé, ur-dummadyaba-dogsad-ibagi, wemar eba dogsamarmogad: E-ome, e-machi-Sem, e-machi-Cam, e-machi-Jafet, degi, e-masmala-omegan. We-dulemarbi ur-dummadyaba dogsamalad.
GEN 7:14 Wemarba bela ibmar-durgan-na-egad-egad-balibimalad dogsamarbalid. A-ibdurgan wemalad: Ibmar-durgan-sapurbarmalad, ibmar-durgan-sunna-akwilemalad, ibmar-durgan-napagi-garmakdimalad, nuumar, degi, bela ibmar-sakan-nikamalad. We-ibmar-durgan, Noéʼba ur-dummadgi dogsamarmogad.
GEN 7:15 Bela ibmar-dula-gudidimalad Noéʼba ur-dummadyaba war-warbo dogsamalad.
GEN 7:16 Bab-Dummad Noéʼga-sogsadba bela ibmar-durgan-akar-akar na abirgunagwar-abirgunagwar dogsamalad. Geb a-sorba, Bab-Jehová ur-dummad-yawagak edisad.
GEN 7:17 Iba-dulabo (40) napneggi dii-winai gusad. Dii-muludgu, ur muamakded. Degisoggu, ur-dummad dii-birgi muamaknai gusad.
GEN 7:18 Dii sabsur-muremai-muremai guded. Ur-dummaddi dii-birgi muamaknai gussunnad.
GEN 7:19 Dii bela-bela mulussoggu, napneggi-yar-dummagan-bukmalad bela dogsad.
GEN 7:20 Bela yarmar dogsa-sigisgu, amba dii dalipaa-abala-wilub (3½) muremai gusad.
GEN 7:21 Weyob bela ibmar-durgan-we-napneggi-bukwad burgwisad: Nuumar, ibmar-durgan-sunna-akwilemalad, ibmar-durgan-sapurbarmalad, ibmar-durgan-unimalad, degi, bela dulemar burgwismarmogad.
GEN 7:22 We-napneggi ibmar-dula-gudimalad, bela burgwisad.
GEN 7:23 Weyob bela we-napneggi we-ibmarmar obelolesad: Dulemar, ibmar-durgan, ibmar-durgan-napagi-garmakdimalad, degi, nuumar, amar bela burgwismalad.
GEN 7:24 Unnila, Noé, degi, ur-dummadyaba-bukwamaladbi durgusmalad. Dakargu, iba-dulagugle-gakambe (150) bela napneggi dii-saila mulus nagusad.
GEN 8:1 Geb degine, Bab-Dummad Noéʼgi, degi, ibmar-durgan-sapurbarmaladgi, ibmar-durgan-sunna-akwilemaladgi, bela ur-dummadyaba-bukwadgi binsaded. Bab-Dummad we-napneggi burwa ogornonikid. Geb degi, dii ilided.
GEN 8:2 Deginbali, demar-wilasailadgi dii-sailagan-mamaid atided, degine, nibneggi dii-sailagan-mamaid atidmogad. Dii bar wissulid.
GEN 8:3 Agine, dii binna-binna ilided. Iba-dulagugle-gakambe-gusgu (150), dii nue ilided.
GEN 8:4 Geb nii-walagugled-ibambe-gakagugledgi, ur-dummad Ararat-yalagangi megidapid.
GEN 8:5 Dii nue-iremai gualid. Nii-warambed-gebe-iba-onodedgi bato yar-dummagan-e-mullumar noalid.
GEN 8:6 Iba-dulabogwad-sorba (40), Noé ur-dummadgi yawagak-bipi-soblesad egasad.
GEN 8:7 Geb agi, sikwisichid barmisad. Sikwisichiddi gannar-gannar gukudii gusad, dii-dingued edarbedii gusad.
GEN 8:8 Noé sikwisichid-barmisad-sorba, nuu barmisad, adi, dakega sana napa dingudibeye.
GEN 8:9 Ar napa amba yoo dingusoggu, nuu siged amissurgusad. Degisoggu, gannar ur-dummadse nonikid. Noé e-argan onosgu, nuu-gasad, ur-dummadyaba gannar nuu-odosad.
GEN 8:10 Noé ibagugle (7) napi edarbisbalid, a-sorba gannar nuu barmisbalid.
GEN 8:11 Bato nue neg-mutikguali, nuu gannar nonikid. E-nugargi olivo-gagan senonikid. Agi, Noé nabir neg-nue-dingumaid mag daksad.
GEN 8:12 Noé amba ibagugle (7) napi edarbisbalid, geb agi, gannar Noé nuu barmisbalid. Agindi, nuu Noéʼse bar gannar nonisulid.
GEN 8:13 Degidgine, Noé birga-dulataled-ilanergwa-gakagwensak-nikadgi (601), napneg nue dingusad. Nii-gebe-gwisguded-ibagwenadgi, Noé ur-dummad-e-uas earisad. Geb agi dakded, napa dingusnai.
GEN 8:14 Nii-warbogwad-iba-dulagwen-gakagugledgi, napa nue-dingusad.
GEN 8:15 Geb degi, Bab-Dummad Noéʼga sogded:
GEN 8:16 “Ur-dummadyaba-be-gudiid be nodago. Be-ome, be-masmala, degi, be-balagan beba nodamarmogo.
GEN 8:17 Ibmar-dula-gudidimalad ur-dummadyaba-bukwad bela be onobalo: Nuumar, ibmar-durgan, degi, ibmar-durgan-napagi-garmakdimalad, adi, amar bela we-napneg-naid-ugakaase mimilemalagar. Deginbali, dula ichesur mergumalaga, we-napneg-naidgi bela ambikumalagar.”
GEN 8:18 Geb degine, ur-dummadyaba-bukwadgi nosmarsunnad: Noé, e-ome, e-masmala, degi, e-balamar.
GEN 8:19 Bela ibmar-durgan ur-dummadyaba-bukmaladi na-egad-egad-balibimaladba, ainismarmogad: Bela ibmar-sapurbarmalad, degi, bela ibmar-durgan-akwilemalad, bela ibmar-durgan-napagi-garmakdimalad, bela nuumar, ur-dummadgi ainismalad.
GEN 8:20 Geb agine, Noé, Bab-Jehová-nug-odummogega, ibmar-ogumakar-ukleged-aila sobsad. Geb Noé bela ibmar-durgan-swilidikmalad, degi, nuumar-swilidikmalad akar-akar-ugakaase susad. Geb degine, ailagi ogumakar Bab-Jehováʼga uksad.
GEN 8:21 Ibmar-ogumakaled-yeer-yapanned Bab-Jehováʼse-mosgu, Bab-Jehová sogded: “We-napneg dulemar-isgued-ular, bar an ukabsaosulid. Ar dulemar gusgu na sapingwagwad-akar e-gwagegi unnila isguedginbi binsadimalad. Degine, an emi-imaksadyob, muusailaba bela ibmar-dula-gudidiid bar an ogilogosulid.
GEN 8:22 Amba we-napneg-naidgi, ibmar diglegoed, ibmar welegoed, neg uere guoed, neg diopii guoed, yola-nii naguoed, dii-wied-nii naguoed, neg-ibgined naguoed, neg-mutikid nagubaloed. Bela wemar-ibmar nikagu guoed, sate guosulid.”
GEN 9:1 Bab-Dummad Noéʼgi, degi, e-masmalagi ise-nued binsasad. Weyob ega sogsad: “Mimmigan-bukidar be nikumar, we-napneggi dula be omelomar, bela we-napneg-ugakaase ambikumar.
GEN 9:2 Bela we-napneggi ibmar-dula-gudidimalad be-dobedba bemar-asabin gwakidmaloed: Bela ibmar-durgan-gukumalad, bela ibmar-durgan-napaginmalad, bela ibmar-durgan-napagi-garmakdimalad, bela ibmar-durgan demarginmalad. Bela-a-ibmar-durgangi be obine gumaloed.
GEN 9:3 ”Bela ibmar-dulamalad, degi, gagan-araragana-sunna-gullemalad sunna bemar gunmaloed. Ani an bela bega uknaid.
GEN 9:4 ”San-abebiid, melle be gunmalo. Ar abegi burba-dulagued danikid.
GEN 9:5 Ar ibmar-durgan be-oburgwisale, an we-ibdurgan oburgwemogoed. Dule, dule-oburgwismogale, amba oburgwilemogoed.
GEN 9:6 Ar Bab-Dummad dule e-sunnague-obinnissoggu, dule-gwensak dule-oburgwisale, dule-baid a-dule-oburgwemogoed.
GEN 9:7 ”Bemardi mimmigan-bukidar nikumar. Be-mimmigan we-napneggi mergumai gusun.”
GEN 9:8 Bab-Dummad Noéʼga, degi, e-masmalaga sogdebalid:
GEN 9:9 “Nabir, ani an bemarbo, degi, be-waganmarbo an igar mesoed.
GEN 9:10 Degine, bela ibmar-dulamalad bemarba ur-dummadyagi-bukwa-ainisad: Nuumar, ibmar-durgan-sunna-akwilemalad, ibmar-durgan-sapurbarmalad. ”Bela we-ibmar-durgan-we-napneggi-bukmaladbo an igar mesoed.
GEN 9:11 An-bemar-ebo-igar-mesoedi gwen gwagosulid: Bela dulemar, degine, bela ibmar-durgan muusailagi bar an ogilogosulid. We-napneg obelogega bar muusaila murosulid.
GEN 9:12 ”An bemar-ebo, degine, an bela ibmar-durganbo-igar-mesnaidi, degisadegu maiguoed. A-e-wilubgan weyob maiguoed: Sue maiguoed.
GEN 9:13 Mogir-imbaba an sue-mesoedi, we-napnegbo an igar-mesoed-e-wilubga guoed.
GEN 9:14 We-napneggi mogirmar-gutumakalile, an-sue mogir-imbaba megnonikoed.
GEN 9:15 Geb an nue-ebinsaoed, an bemarbo, degi, bela ibmar-durganbo igar mesisad. Bela ibmar-dulamalad-ogilogega, baid-muusaila-weyobid bar murosulid.
GEN 9:16 Mogir-imbaba sue megnonikile, an dakoed. Agi, ani, Bab-Dummad, bela dulemarbo, degine, bela ibmar-durgan-we-napneggi-bukmaladbo degisadegu-igar-mesisad an ebinsaoed.
GEN 9:17 ”We-napneggi bela dulemarbo, degi, ibmar-durganbo an igar-mesisadi, sue, e-wilubga guoed.” Deyob Bab-Dummad Noéʼga ibmar sogsad.
GEN 9:18 Noé-machimala ur-dummadyaba-nosmaladi, wemardo: Sem, Cam, Jafet. Camʼde, Canaán-e-babad.
GEN 9:19 Wemar-warbaagwad Noé-masmala gumalad. We-napneggi dulemar-bukmalad, belagwapa wemargi danimalad.
GEN 9:20 Noé napagi arbadgua, uva digsad.
GEN 9:21 Ibagwengi, Noé vino gobsagu, mumgusad. Noé e-dordonegyaba uka-swiri meremai gusad.
GEN 9:22 Canaán-e-bab-Cam, e-bab-Noé uka-swiri-mai-daksagu, nodegusad. E-iamar-warbogwad-magaba-gwichidga sogdapid.
GEN 9:23 Geb degi, Sem, Jafet-ebo e-bab-edugega mor-dummad amismalad. Geb gukinba mor-dummad-gani sorsik-sorsik nadegusmalad. Baidsik ataknadapi gusmalad, adi, mer e-bab uka-swiri-maid dakegar. Geb a-mor-dummadgi e-bab-edusmalad.
GEN 9:24 Noé nue-wibamasgu, atakalid. E-machi-bipigwad igi e-imaksa deyob, wisgusgu sogded:
GEN 9:25 “¡Canaán, be iwigusun! Be-iamar-e-mai-mesagwaledga be gusun.”
GEN 9:26 Geb degi, Noé sogdebalid: “Sem-e-Bab-Dummad-Jehová, a-e-nug odummolesun. Sem-maiga Canaán gudii gusun.
GEN 9:27 Bab-Dummad, Jafet-neg gatik nasgumai imakena gadin. Jafet, Sem-e-dordoneggi gudii gusun, degine, Canaán Jafet-maiga gusun.”
GEN 9:28 Muusaila-mulusad-sorba, Noé amba birga-dulataled-ilapaa gaka dulabo-gakambe (350) dula-gudii gusad.
GEN 9:29 Degisoggu, Noé, birga-dulataled-ilabakebak gaka dulabo-gakambe-nikadgi (950) burgwenonikid.
GEN 10:1 Noé-masmala, wemalad: Sem, Cam, Jafet. Wemarde muusaila-mulusad-sorba, na mimmigan nikusmalad. Noé-masmala-e-wagan ambikusmalad, wemalad:
GEN 10:2 Jafet-masmala, wemalad: Gomer, Magog, Madai, Javán, Tubal, Mesec, degi, Tiras.
GEN 10:3 Gomer-masmaladi, wemalad: Askenaz, Rifat, Togarma.
GEN 10:4 Javán-masmaladi, wemalad: Elisa, Tarsis, Quitim, degi, Dodanim.
GEN 10:5 Wemar, Jafet-wagan gumalad. Wemar, demar-gakaba ambikusmalad. Gaya emar-emarbi sunmakmalad. Degine, na e-dadgan-e-dadganba, dulemar na emar-emar ambikusmalad.
GEN 10:6 Cam-masmala, wemalad: Cus, Mizraim, Fut, degi, Canaán.
GEN 10:7 Cus-masmaladi, wemalad: Seba, Havila, Sabta, Raama, degi, Sabteca. Raama-masmaladi, wemalad: Seba, Dedán.
GEN 10:8 Cus, Nimrod-e-babad. Nimrod-insega we-napneggi nuga-nikad gusad, dule-dutusulid gusad.
GEN 10:9 Nimrod, Bab-Jehová-nabir-egi-binsasadba sapurba ibmar-maked-dule gusad. A-ulale, weyob-sogleged: “Dule-Nimrodʼyob ibmar-maked-duleye.”
GEN 10:10 Nimrod, we-neggweburmargi negsemai gusad: Babelʼgi, Erecʼgi, Acadʼgi, degi, Calneʼgi. We-neggweburmar, Sinar-yargi bukwagusad.
GEN 10:11 Geb Nimrod Sinar-yargi-nodegusgu, Asiria-yarse nadegusad. Agi, we-neggweburmar urbidapid: Nínive, Rehobot, Cala, degi, Resén.
GEN 10:12 Resén-neggwebur-dummad, Nínive, Cala-ebo-abingunaid-abargi siid.
GEN 10:13 Mizraim-wagan, wemalad: Ludim, Anamim, Lehabim, Naftuhim,
GEN 10:14 Patrusim, Casluhim, degi, Caftorim. Casluhim-dulegi Filistea-dulemar danikid.
GEN 10:15 Canaánʼdi, Sidón-e-babad. Sidónʼde, Canaán-machi-sailaginedid, geb degine, Hetʼye-nugad, baksabalid.
GEN 10:16 Canaán-wagan, wemalad: Jebuseo-dulemar, Amorreo-dulemar, Gergeseo-dulemar,
GEN 10:17 Heveo-dulemar, Araceo-dulemar, Sineo-dulemar,
GEN 10:18 Arvadeo-dulemar, Zemareo-dulemar, Hamateo-dulemar. Geb sorbali, Canaán-dulemar na e-dadgan-e-dadganba aisakidmalad.
GEN 10:19 Canaán-dulemar e-yar-gasadi, wemalad: Sidón-neggweburgi onoded, Gerar-yalasik, Gaza-neggweburse warmaksad. We-yar-e-neggweburmarde, wemalad: Sodoma, Gomorra, Adma, degine, Zeboimʼsik, Lasa-neggweburse.
GEN 10:20 Wemar, Cam-e-wagan gumalad. E-dadgan-e-dadganba, degine, gaya emar-emarbi-sunmake ambikusmalad. Yar-egad-egad, degine, dulemar emar-emarbi ambikusmalad.
GEN 10:21 Deginbali, Jafet-e-ia-Sem, machimala-nikusmogad. Heber-masmala, bela Sem-wagan gumalad.
GEN 10:22 Sem-masmala, wemalad: Elam, Asur, Arfaxad, Lud, degi, Aram.
GEN 10:23 Aram-masmaladi, wemalad: Uz, Hul, Geter, Mas.
GEN 10:24 Arfaxad, Sala-e-babad. Salaʼdi, Heber-e-babad.
GEN 10:25 Heber machimala-warbo nikusmogad: Machi-sailagined Pelegʼye nugad. Ar ade, a-ibagangi dulemar aisakided. Peleg-e-urba, Joctánʼye nugad.
GEN 10:26 Joctán-masmala, wemalad: Almodad, Selef, Hazarmavet, Jera,
GEN 10:27 Adoram, Uzal, Dicla,
GEN 10:28 Obal, Abimael, Seba,
GEN 10:29 Ofir, Havila, degi, Jobab. Wemar belagwapa, Joctán-machimala gued.
GEN 10:30 Wemar Sefar-yalagansik, Mesa-nadedgi, bukwagusmalad. We-yalagande dad-nakwedsik naid.
GEN 10:31 Wemar Sem-e-wagan gumalad. E-dadgan-e-dadganba, degine, gaya emar-emarbi-sunmake ambikusmalad. Yar-egad-egad, degine, dulemar emar-emarbi ambikusmalad.
GEN 10:32 Wemar, Noé-machimala, e-gwenadgan-e-gwenadganba ambikusmalad. Na e-wagan-e-wagan yar gasmalad. Wemar muusaila-mulusad-sorba, bela we-napneggi-aisakis ambikusmalad.
GEN 11:1 Epennegwa, bela dulemar unnila gaya-gwennaa sunmakmalanad.
GEN 11:2 Dad-nakwedsik dulemar nadgua, Sinarʼgi nebabi-nai dakdapid. Agi ambikudapmalad.
GEN 11:3 Ibagwengi, na ga muchub-muchub sokarmalad: “Anmar dakebinne, anmar napa-ginnid akwayob dutusuli sobe, geb degine, anmar soogine ogumakar imakoed.” Weyob akwa-anar napa-ginnid-akwayob-dutusuli-sobaled ebusmalad, degine, barya ebusmarbalid, ebo acha-acha imakegar.
GEN 11:4 Geb a-sorba, sogdemarbalid: “Anmar dakebinne, anmar neggwebur-dummad sobmala. Geb neg-matusulid nibnegse-warmakedse, anmar sobbaloed. Anmar deyob imakele, bela anmar nug-nika gumaloed, dule-dummaganga anmar gumaloed, degine, adi, mer anmar we-napneggi aisakimalagar.”
GEN 11:5 Geb Bab-Jehováʼdi, dulemar-neggwebur-dummad-sobnanaid, degine, dulemar-neg-matusulid-sobnanaid-dakega aidenonikid.
GEN 11:6 Geb Bab-Jehová binsaded: “Wemar, unnila dulemar-soggwenna gued, unnila gaya-soggwenna sunmakmalad. We-arbaedgebe-imaklenaid-obelosmalale, sogdamarbaloed, arbaed-baid anmar imakmarbarye. Degisoggu, bar galegosurmalad.
GEN 11:7 A-ulale, anmar aidenaergebed, ei gaya oburnaegar, adi, na aku itomaloed.”
GEN 11:8 Deyobi, Bab-Jehová belagwapa we-napneggi dulemar-osakisad. Degisoggu, we-neggwebur bar sobsasurmalad.
GEN 11:9 We-neggweburgine, Bab-Jehová weyob dulemar gaya-akar-akar-sunmakega imaksad. A-ulale, we-neggwebur Babelʼye nuggusad. Geb wegine, Bab-Jehová bela dulemar we-napneg-ugakaase osakisad.
GEN 11:10 Wemar, Sem-e-wagan gumalad: Birgabogus muusaila-nasad-sorba, Sem-machi-Arfaxad gwalulesad. Deunni, Sem birga-dulatar (100) nikad.
GEN 11:11 A-sorbali, Sem birga-dulataled-ilatar (500) napi-gudii gusad. Sem machimala-baigan nikusbalid, degine, bunamala nikusbalid.
GEN 11:12 Arfaxad birga-dulagwen-gakambe-gakatar-nikadgi (35), e-machi-Sala gwalulesad.
GEN 11:13 A-sorbali, Arfaxad birga-dulataled-ilabake-gakapaa (403) napi-gudii gusad. Arfaxad machimala-baigan nikusbalid, degine, bunamala nikusbalid.
GEN 11:14 Sala birga-dulagwen-gakambe-nikadgi (30), e-machi-Heber gwalulesad.
GEN 11:15 A-sorbali, Sala birga-dulataled-ilabake-gakapaa (403) napi-gudii gusad. Sala machimala-baigan nikusbalid, degine, bunamala nikusbalid.
GEN 11:16 Heber birga-dulagwen-gakambe-gakabake-nikadgi (34), e-machi-Peleg gwalulesad.
GEN 11:17 A-sorbali, Heber birga-dulataled-ilabake gaka dulagwen-gakambe (430) napi-gudii gusad. Heber machimala-baigan nikusbalid, degine, bunamala nikusbalid.
GEN 11:18 Peleg birga-dulagwen-gakambe-nikadgi (30), e-machi-Reu gwalulesad.
GEN 11:19 A-sorbali, Peleg birga-dulataled-ilabo-gakabakebak (209) napi-gudii gusad. Peleg machimala-baigan nikusbalid, degine, bunamala nikusbalid.
GEN 11:20 Reu birga-dulagwen-gakambe-gakabo-nikadgi (32), e-machi-Serug gwalulesad.
GEN 11:21 A-sorbali, Reu birga-dulataled-ilabo-gakagugle (207) napi-gudii gusad. Reu machimala-baigan nikusbalid, degine, bunamala nikusbalid.
GEN 11:22 Serug birga-dulagwen-gakambe-nikadgi (30), e-machi-Nacor gwalulesad.
GEN 11:23 A-sorbali, Serug birga-dulataled-ilabo (200) napi-gudii gusad. Serug machimala-baigan nikusbalid, degine, bunamala nikusbalid.
GEN 11:24 Nacor birga-dulagwen-gakabakebak-nikadgi (29), e-machi-Taré gwalulesad.
GEN 11:25 A-sorbali, Nacor birga-dulatar-gakambe-gakabakebak (119) napi-gudii gusad. Nacor machimala-baigan nikusbalid, degine, bunamala nikusbalid.
GEN 11:26 Taré bato birga-dulapaa-gakambe-nikadgi (70), e-masmala Abram, Nacor, degi, Harán gwalulesad.
GEN 11:27 We, Taré-e-igar: Taré, Abram-e-babad. Nacor, degi, Harán amba Taré-masmalamogad. Haránʼde, Lot-e-babad.
GEN 11:28 Harán e-bab-Taré-iduar Caldea-dulemar-yargi, Ur-neggweburgi burgwisad. Urʼde Harán-gwalulesad-neggweburad.
GEN 11:29 Abram, Sarai-nikusad. Nacorʼdi, Milca-nikusad. Milcaʼde, degi, Isca, Harán-e-sisgan gumalad.
GEN 11:30 Saraiʼdi geg mimmi nikued, ar ade, gusgu muu-neggi geg mimmi-bake danikid.
GEN 11:31 Taré Canaán-yarse-naega Caldea-dulemar-yargi Ur-neggweburgi noar gusad. Taré na eba wemar sear gusad: E-machi-Abram, e-wagwa-Lot Harán-machi, degine, e-bala-Sarai e-machi-Abram-ome. Degi-inigwele, Taré, Harán-neggweburse-mosgu, agi megidapmalad.
GEN 11:32 Geb Taré, Harán-neggweburgi birga-dulataled-ilabo-gakatar-nikadgi (205) burgwisad.
GEN 12:1 Ibagwengi, Bab-Jehová Abramʼse gornonikid, ega sognonikid: “Be-neggweburgi be noe, be-gwenadgangi be bangu, be-bab-neggi-be-gudiid be nae. An bega neg-oyogoedse be nae.
GEN 12:2 Begine, dulamar bukidar-mergue an imakoed. An begi ise-nued-binsaedgi, an bega ibmar imakoed. Dule-nue-nug-nikadga an be-imakoed. Degine, be-nuggi dulemargi ise-nued binsalemarmogoed.
GEN 12:3 Dulemar-ise-nued-begi-binsamaladgi, an ise-nued egi binsamogoed. Dulemar-be-ukabsamaladgi, an ukabsaar sunmakmogoed. Be-nuggi, bela dula-we-napneggi-bukwamaladgi ise-nued an binsaoed.”
GEN 12:4 Abram, Bab-Jehová-ega-sogsadba Harán-neggweburgi-maid nodegusad. Lot, Abramʼba nadegusmogad. Abram birga-dulapaa-gakambe-gakatar-nikadgi (75), Haránʼgi-mai noalid.
GEN 12:5 Abram Canaán-yalase-argua, wemar eba sealigusad: E-ome-Sarai, e-niga-Lot, e-maimar-Haránʼgi-amisad. Degine, na ibmar-nikad bela sealigusbalid. Abram, degi, eba-nadapmalad Canaán-yarse modapmarsunnad.
GEN 12:6 Geb Abram Canaán-yalagi dogded. Siquem-neggweburse warmakdapid, bia sapi-islidikid-Moreʼye-nugad-gwichidse. Deunni, a-yalagangine, Canaán-dulemala bukwamalad.
GEN 12:7 Agine, Bab-Jehová Abramʼse magarosad, ega sogded: “We-yar an be-waganga ukoed.” Agine, Abram Bab-Jehováʼga-ibmar-ogumakar-ukleged-aila sobsad, ar ade, Abram soged, Bab-Jehová wegi anse magarosaddeeye.
GEN 12:8 Geb agine, Abram yalagansik naded. We-yalagande Betel-neggweburgi dad-nakwedsik siid. Agi, dordoneg sidapid. Degisoggu, Betel-neggwebur egi dad-argwanedsik signonikid. Hai-neggweburdi dad-nakwedsik egi signonikid. Abram agi Bab-Jehováʼga-ibmar-ogumakar-ukleged-aila-baid sobsabalid. Geb degine, Bab-Jehováʼse agi gochasunnad.
GEN 12:9 Geb a-sorba, Abram Neguev-yalagansik binna-binna nadap gusad.
GEN 12:10 Deunni, a-ibagangine, bela Canaán-yargi ukud-dummad nagunonikid. Ar Abram na e-maidgi mas-satesoggu, Abram Egipto-yarse sikwas megnad gusad.
GEN 12:11 Abram Egipto-yarse warmakdanigu, e-ome-Saraiʼga sogded: “Omegwa, an wisdo, be yeerdakleged.
GEN 12:12 Degisoggu, Egipto-dulemar be-dakalile, sogdamaloed: ‘We-omegwa, we-machered-e-omeye.’ Andi an-oburgwemaloed, bedi be-oburgosurmalad.
GEN 12:13 Degisoggu, mer an-oburgwemalaga be sogodo, be an-bunye. Adi, be-ular anga ibmar bela nueganbi guegar.”
GEN 12:14 Abram Egipto-yarse modapgu, Egipto-dulemar dakalid, Sarai bela-bela yeerdaklege.
GEN 12:15 Dummagan-Faraónʼga-arbamalad daksamarmogad, Sarai yeerdaklege. Amar Faraónʼse nadegusmalad, ega sogdapmalad, ome bela-bela yeerdakleye. Wemar-dummagan Faraón-negse Sarai-sesa gusmalad.
GEN 12:16 Sarai-ulale, Faraón Abram-nued-akwisad. Sibad-wawaadmar, moli-bebe-nikamalad, moli-uayasuid-machergan, moli-uayasuid-omegan, mai-machergan, mai-omegan, degine, moli-yargan-muremalad Abramʼga uksad.
GEN 12:17 Degine, Faraón e-negse Abram-e-ome-Sarai-sesad-ulale, Bab-Jehováʼdi Faraón, degi, e-negyaginmalad-sabsur-odurdaksad, boni-dummagan ega uksad.
GEN 12:18 A-ulale, Faraón Abramʼse gochad, ega sogded: “¿Ibiga wede deyob be an-imaksa? ¿Ibiga be anga sogsasuli, we-omegwa an-omeye?
GEN 12:19 Emide, be anga sogsad, we-ome, an-bunye. Ar emide sunna an-omega an imaked-nagad. ¡Be-ome na be sede! ¡Be nae!”
GEN 12:20 Geb degine, Faraón na e-sordamarga igar-uksad, Abram, e-ome, degi, bela ibmar-nikad sedoye, Egipto-yargi-naed imakoye.
GEN 13:1 Abram Egipto-yargi-noargu, e-ome, degi, bela na ibmar-nikadi sealid. E-niga-Lot eba aligusmogad. Amar Neguev-yalaganse gannar nonimalad.
GEN 13:2 Ar Abram ibmar-durgan-bukidar-nika nonikid, mani-bukidar, degi, or-bukidar-nika nonikid. Degisoggu, dule-mani-ibedga gusad.
GEN 13:3 Neguev-akar, Abram gannar binna-binna alid. Betel-neggweburse geb warmakdapid. Geb degi, gannar naded, bia gebe na dordoneg sisagusadse. We-negde Betel-negabargi, degi, Hai-negabargi siid.
GEN 13:4 Agine, deunni, Abram Bab-Jehováʼga-ibmar-ogumakar-ukleged-aila sobsa gusad. Agine, Abram Bab-Jehováʼse gocha gusad.
GEN 13:5 Lot amba dule-mani-ibedmogad. E-gilor-Abramʼyob sibad-wawaadmar, moli-bebe-nikamalad, degi, dordonegmar nikamogad.
GEN 13:6 Ar emar-mamaidgi, ibmar-durgan bukidar nikamarsoggu, ibmar-durganga mas unnisuli gualid. A-ular, Abram, Lot-ebogwa geg na walikaa gudigue guarmalad.
GEN 13:7 Molimarga mas unnisulidba, Abramʼga-dule-moli-bebe-nikad-akwemalad, Lotʼga-dule-moli-bebe-nikad-akwemalad-ebo na uluardamalad. Aginbali, a-ibagangine, Canaán-dulemar, degi, Ferezeo-dulemar a-yargine amba bukwamarmogad.
GEN 13:8 Ibagwengi Abram Lotʼga sokalid: “Anmar na gwenadgan gumalad. Degisoggu, anmar na boni-nika gudiile, ibnuedsulid. Degi, anga-moli-bebe-nikad-edarbemalad, bega-moli-bebe-nikad-edarbemarmogadbogwa urwemarmogale, we ibnuedsurbalid.
GEN 13:9 Emi be dakena, napa unniguar be-asabin naid. Degisoggu, be-abegedba na be sudo, igid bur be suoe. Degisoggu, angi be bangusun. Ar be argan-sapiledsik naye be sogele, andi argan-nuedsik naoed. Argan-nuedsik be naye sogele, andi argan-sapiledsik naoed.”
GEN 13:10 Lot bela Jordán-diwarsik Zoar-neggweburse neba-naid dakded. A-nebagi dii nue-nika, degine, Bab-Jehová-nainu-nuedyob-daklege dakalid. E-daklegedde Egipto-yaryob daklebalid. Ar Bab-Jehová Sodoma-neggwebur, degi, Gomorra-neggwebur-obelogoed-iduale, we-neggweburmar yeer daklegenad.
GEN 13:11 Geb degine, Lot bela Jordán-diwarsik-neba-naid susad. Na e-maidgi dad-nakwedsik nade gusad. Weyobi, Abram, Lot-ebogwa, na bangud gusmalad.
GEN 13:12 Abramʼdi, Canaán-yalagi besad. Lotʼdi, nade gusad. Nebagi neggweburmar-bukwadse megnade gusad. Geb Lot Sodoma-neggwebur-waliksaar e-dordornegmar sisad.
GEN 13:13 Sodomaʼgi dulemar-bukwad bela-bela isgana nanaed, isgued-dummagan Bab-Jehová-asabin imakdimalad.
GEN 13:14 Lot Abramʼgi-bangusad-sorba, Bab-Jehová Abramʼga sokalid: “Be-maidgi be dad-nakwedsik, dad-argwanedsik, dad-nakwed-argan-nuedsik, dad-nakwed-argan-sapiledsik nue be neg dako.
GEN 13:15 We-napnegmar be dakedi, bela bega an ukoed. We-yalagan begadga degi, be-wagangadga degisadegu guoed.
GEN 13:16 Ukubyob be-wagan yaisur-mergu, an imakoed. Ar igi ukub geg ebislege, deyobi, be-wagan geg ebisle gumogoed.
GEN 13:17 Degisoggu, emisgindi, bela we-yalaganba be nae, ar we-yala an bega ukoed.”
GEN 13:18 Geb degine, Abram nade gudsunnad, e-dordonegmar-siid sesa gusad. Abram Hebrón-neggwebur-walik megnaded, sapi-islidikmalad-Mamreʼgi-bukwadse. Agi, Abram Bab-Jehová-nuggi, Bab-Jehováʼga-ibmar-ogumakar-ukleged-aila sobsad.
GEN 14:1 Deunni, we-reymar negdakmamaid: Sinar-e-rey-Amrafel, Elasar-e-rey-Arioc, Elam-e-rey-Quedorlaomer, degi, Goim-e-rey-Tidal, wemar, neg-dakmaid.
GEN 14:2 A-ibagangi, deunni, we-reymar-walabakegwad, baigan-reymar-ataled-ebo bila-onogega na atosmalad. We-reymar-walataled atosmarmogad: Sodoma-e-rey-Bera, Gomorra-e-rey-Birsa, Adma-e-rey-Sinab, Zeboim-e-rey-Semeber, degi, Bela-e-rey. We-Bela-neggweburde, Zoarʼye nugbalid.
GEN 14:3 Wemar-e-ataled, e-sordamar Sidim-nebagi urbisad, Demar-Gagbidye-nugad-walik.
GEN 14:4 Rey-Quedorlaomer birgambe-gakabogus (12) we-reymar-walataled-e-dummadga-gudigu, we-reymar-walataled birgambe-gakapaagusgu (13), sogdemalad: “Anmar we-rey-Quedorlaomerʼgi gwisguergeboye.”
GEN 14:5 Birgagwen-nasad-sorba, Quedorlaomer, degine, reymar-eba-nanaimalad Astarot-Karnaim-yalagansik bila-ononadmalad. Agine Refa-dulemargi nakwismalad. A-sorba, Hamʼgi Zuz-dulemargi nakwismalad. Geb Save-Quiriataimʼgi Emita-dulemargi nakwismalad.
GEN 14:6 Seir-yalagangindi Horí-dulemargi nakwismalad, Parán-nebase baregichamalad. We-Paránʼde nega-dulesulid-walik naid.
GEN 14:7 Quedorlaomer, degine, reymar-eba-gudidimalad we-dulemar-sogabakegwadgi-nakwisgu, gannar aibiris armalad. Geb Enmispatʼye-neg-nugadse nonimalad. We-Enmispatʼde, Cadesʼye nugbalid. Rey-Quedorlaomer, degi, reymar-eba-gudidimalad Amalec-dulemar-yalaganba bela ibmar obelonadap gusmalad. Deyob Amorreo-dulemar-imaksamarbalid. We-Amorreo-dulemarde Hazezon-Tamar-yalagangi bukwamalanad.
GEN 14:8 Geb degine, Sodoma-e-rey, Gomorra-e-rey, Adma-e-rey, Zeboim-e-rey, Bela-e-rey, bila-onomalaga, Sidim-nebase nonimalad. Bela-neggweburde, Zoarʼye nugbalid.
GEN 14:9 Agi, we-reymar-e-ataled, baigan-reymar-warbakegwadbo uludmalad. Ebo-ulusmaladi, wemalad: Elam-e-rey-Quedorlaomer, Goim-e-rey-Tidal, Sinar-e-rey-Amrafel, degi, Elasar-e-rey-Arioc, we-reymar ulusmaladid.
GEN 14:10 Dakargua, bela Sidim-nebagi yaa-dummagan-bukidar-bukwa nanaed. We-yaa-dummagande barya-yaisur nikad. Sodoma-e-rey, degi, Gomorra-e-rey urwenanaigua, wakite gusmalanad. Degi-inigwele, yaa-dummadgi argwatapmalad. E-sordamar-baigandi yalaganba wakitemalad.
GEN 14:11 Reymar-nakwismaladi, Sodoma-neggweburgi, degi, Gomorra-neggweburgi, bela masgullemalad, degi, bela ibmar-nuegan sesmalad.
GEN 14:12 Ar Abram-niga-Lot, Sodomaʼgi-maimosoggu, reymar-nakwisad Lot-sesa gusmarmogad, degi, bela e-ibmar-nikad e-ibe sesa gusmarbalid.
GEN 14:13 Ar dule-wargwen nabir wakichasoggu, Abramʼga bela ibmar sognonikid. Abramʼde Hebreo-duled. Abramʼde Amorreo-dule-e-sapi-dummagan-walik maid. We-Amorreo-dulede Mamreʼye nugad. Mamreʼdi, gwenadgan nikad, amarde wemalad: Escol, Aner. Wemala, Abramʼba naimaladid.
GEN 14:14 Abram itoargu e-niga gales-selesye, geb e-maimar-e-neg-yagi-gwalulesmaladse gochad. Wemarde bila-onomaladid. Belagwapa dulataled-ilapaa gakambe-gakabaabak (318) mergued. Amarmala, Dan-neggweburse reymar-Lot-gasa-sesmalad-balegitemalad.
GEN 14:15 Abram, dulemar-eba-nadapmalad danar-danar oambikusgu, mutikidba ukiar reymargi ubodapmalad. Abram, degi, e-sordamarmala, emargi nakwismargu, we-reymar-wakitemalad Hoba-neggweburse balegichamalad. Hobaʼde Damasco-neggwebur-dad-nakwed-argan-sapiledsik siid.
GEN 14:16 We-reymar-ibmar-sesadi, Abram bela gannar susad. Deyobi, Abram e-niga-Lot-galesad onosad, degi, bela gannar Lot-e-ibmar susbalid. Deginbali, omegan-onosbalid, degi, bela dule-baigan-galesmalad amba onosbalid.
GEN 14:17 Abram Quedorlaomerʼgi, degi, Quedorlaomerʼba-reymar-gudidimaladgi nakwis-danigua, Sodoma-e-rey, Save-neba-naidgi Abram-abindakega abin noalid. Save-nebade Rey-Nebaye nugbalid.
GEN 14:18 Geb degine, Salem-e-rey-Melquisedec, madu, degi, vino Abramʼga senonikid. We-Melquisedecʼde dule-irwa-Bab-Dummad-Bur-Biriginedse-goledid.
GEN 14:19 Geb degine, Melquisedec, Abramʼgi ise-nued-binsaedgi, weyob sogded: “Abram, Bab-Dummad-Bur-Birigined begi ise-nued binsaoed. We-Bab-Dummad, nibneg, degi, napneg bela obinnisadid.
GEN 14:20 Bab-Dummad-Bur-Birigined-e-nug odummolesun. A-Bab-Dummad be-isdarmaladgi-nakwega be-imaksad.” Geb degine, Abram bela ibmar-gannar-susadi, yopira-emarbi-sogambegi (10) mamarisad. A-gwensak Melquisedecʼga uksad (10%).
GEN 14:21 Geb degine, Sodoma-e-rey Abramʼga sogded: —Dulemarbi be anga udage. Ibmarmardi be sue.
GEN 14:22 Ar Abramʼdi abin-sogded: —Suli. Bab-Dummad-Bur-Birigined-Jehováʼga ise-sogar an imaksad. We-Bab-Dummadde nibneg, degi, napneg bela obinnisad.
GEN 14:23 Aga, an sogsad: ‘Bipisaale ibmar an be-ibe suosurye, dubamar, degi, sapat-dubse-bakar, an-nag-uka-edinnega gwen an bei suosurye. Adi, melle be an-annik sogega, an we-dule mani-ibedga imaksaye.’
GEN 14:24 Andi an ibmar abesulid. Unnila sapingana-anba-gudidimalad-e-mas-guchamaladbi anga unnigualed. Degine, dule-anba-arbimalad, Aner, Escol, degi, Mamre, amardi igar-maidba ibmar sumaloed.
GEN 15:1 Weyob-gusad-sorbali, Abram negburgan-daksad. Agi, Bab-Jehová ega sunmakded, ega sogded: “Abram, melle be dobguo, ar sigu-abgaedyobi, an be-irwa gwisgudioed. Degine, bega-ibmar-nued-uklegoedi, bega ibmar-dummadga guoed.”
GEN 15:2 Abram Bab-Jehová-abin sogded: —Bab-Jehová-Bela-Negsemaid, ar be wisid, an mimmigan-sated, degite, ibmar-dummad be anga ukoye sogedi, ¿ar wede ibi-nuedga anga guosunna? Degisoggu, bela-an-ibmar-nikadi, we-anga-neg-daked-Damasco-dule-Eliezer, an-sorba bela ibmar gaoed.
GEN 15:3 Abram sogdebalid: —Ar be anga mimmi-uksasursoggu, anga-arbaed-dule an-sorba bela ibmar gasunnoed.
GEN 15:4 Bab-Jehová Abram-abin sogded: —Suli, degisuli. Be-sorba ibmar-bela-gaoedi, be-machi-sunnad bela be-ibmar gaoed. We-Eliezerʼdi suli.
GEN 15:5 Geb degine, Bab-Jehová magaba Abram-sesad, ega sogded: —Nue be niba atake, be niisgwamar ebise, ar sunna be ebisodibe. Weyob-mergu wagan be nikuoed.
GEN 15:6 Abram, Bab-Jehová-ega-ibmar-soged gwen bengussulid. Degisoggu, a-ulale, Bab-Jehová, dule-isgussulidyob Abram-daknonikid.
GEN 15:7 Bab-Jehová Abramʼga sogded: —Ani an Bab-Jehová gued. Caldea-dulemar-yargi Ur-neggweburgi be-maigu, ani an be-onosad, adi, we-yar an bega ukega, degi, begadga guegar.
GEN 15:8 Abram Bab-Jehová-abin sogded: —Bab-Jehová-Bela-Negsemaid, degite, ¿igi nue an wisguosunna, we-yarde nue angadga guoe?
GEN 15:9 Bab-Jehová abin-sogded: —Anga be we-ibmar sedagoed: Moli-bebe-nikad-ome-birgapaagwad, sibad-birgapaagwad, sibad-wawaad-machered-birgapaagwad, sapur-nuu-gwagwen, degi, wagnuu-e-mimmi-gwagwen be anga sedabalo.
GEN 15:10 Abram bela we-ibmar-durgan Bab-Jehováʼga senonikid. Geb amar negabala-daasa marisad. Geb degi, asabin-asabin mesisad. Nuumardi marissulid, gwagwar mesisad.
GEN 15:11 Geb mulamala we-ibmar-durgan-burgwarmaladse duurmaknonikid. Ar Abramʼdi we-mulamar-ononnonai gualid.
GEN 15:12 Neg-mutikguargu, Abramʼgi bela-bela gabed gwichigunonikid. Ukiar, negsichid bela Abram-ebilis nagusad. Agine, nue dobe itoalid.
GEN 15:13 Geb degine, Bab-Jehová Abramʼga sogded: —Nue be wisguergebed, be-wagan e-yarsulidgi gudii gumaloed. Agi maiganga gumaloed, degine, a-yargi birga-dulataled-ilabake (400) sabsuli be-wagan-wiomaloed.
GEN 15:14 Dulemar-be-wagan-maiga-imakoedi, ani, an sabsur-odurdakoed. Agi, be-wagan ainidamalogu, ibmarmar-nuegan nue-nika ainidamaloed.
GEN 15:15 Ar bedina nue-sered-mai be burgoed, degine, nue-bogidikidgi be diglegoed.
GEN 15:16 Ar emigindi, amba yoo Amorreo-dulemala bela-bela isgumarsoggu, be-wagan ilabakegus-gwagedgi, geb we-yarse be-wagan gannar nonikoed.
GEN 15:17 Bato neg-mutikgusgu, bela-bela bato negsichinadedgi, sianargi waa bupurmaksii daklealid. Degine, acha-gwallu-gamai daklearbalid. A-sianar, degi, a-gwallu ibmar-durgan-negabar-maraled-bukwad-abargi nadapid.
GEN 15:18 A-ibagi, Bab-Jehová Abram-ebo igar mesisad. Agi Abramʼga sogded: —We-yala be-waganga an ukoed, Egipto-diwar-maid-akar, diwar-dummad-Éufrates maidse.
GEN 15:19 Yarmar an bega sogedi, wemardo: Ceneo-dulemar-bukwad-yala, Cenezeo-dulemar-bukwad-yala, Cadmoneo-dulemar-bukwad-yala,
GEN 15:20 Het-dulemar-bukwad-yala, Ferezeo-dulemar-bukwad-yala, Refa-dulemar-bukwad-yala,
GEN 15:21 Amorreo-dulemar-bukwad-yala, Canaán-dulemar-bukwad-yala, Gergeseo-dulemar-bukwad-yala, Jebuseo-dulemar-bukwad-yala, bela we-yalamala an be-waganga ukoed.
GEN 16:1 Sarai e-sui-Abramʼga geg mimmi bake gusad. Saraiʼde e-mai-Egiptoʼgined nikad, Agarʼye nugad.
GEN 16:2 Geb Sarai, Abramʼga sogded: —Bab-Jehová geg goe-bake an-imaksad. Degisoggu, an bese wilesakwaa egissundo, bunagwa an-maiga-gudiidse be gole. Abakale a-omebali, an mimmi nikualile. Abram Sarai-ega-soged nabir itosad.
GEN 16:3 Deunni, Abram birgambegus (10) Canaán-yargi maid. Geb a-ibagangine, Sarai bunagwa-Egiptoʼgined-Agarʼye-nugad, Abramʼga urmaksad, ese golegar.
GEN 16:4 Abram Agarʼse-gochagu, Agar gurgin-nika gunonikid. Agar gurgin-nikagudi-itoargu, e-dummad-Sarai-ibgwensur dakded.
GEN 16:5 Geb degine, Sarai Abramʼga sogded: —¡Be-ular, emide, Agar ibgwensur an-dakalid! An-sunnad an bega Agar-urmaksad, ese be golegar. Ar emide, mimmi-nikuo-itogedba, anba bur dummarba san-imaked. Emigindi, Bab-Jehová sogoed, wede doagi ataklegoe: Begine, igi angine.
GEN 16:6 Geb degine, Abram Sarai-abin sogded: —Be-itoleged, be-mai begi siid. Ar igi be Agar imakbie, be imakodo. Geb degine, Sarai sabsur Agar-imakalid. Degisoggu, a-ular, Agar wakitesunnad.
GEN 16:7 Ar Bab-Jehová-e-baliwitur nega-dulesulidganba, Shur-igar-maidsik dii-saila-siidgi Agar-abingualid.
GEN 16:8 Bab-e-baliwitur Agarʼse egichialid: —Sarai-e-mai-Agar, ¿bia be daniki? ¿Bia be nae? Agar abin-sogded: —An-dummad-Sarai-idu an wakinmai.
GEN 16:9 Geb degine, Bab-Jehová-baliwitur ega sogded: —Be-dummadse gannar be nae. Ar igi bega sogdagoe, bela aba be ibmar imako.
GEN 16:10 Aginbali, Bab-Jehová-baliwitur Agarʼga sogdebalid: “Be-wagan bela-bela an omelogoed. Degisoggu, geg dule ebise guoed.”
GEN 16:11 Bab-Jehová-baliwitur sogdebalid: “Be bonigwar-gudiidi, susugwa be nikuoed. Bab-Jehová be-wilediid itossoggu, we-machigwa Ismaelʼye be onugsaoed.
GEN 16:12 We-machigwade yaisurdae guoed, moli-uayasuid-sapurbalidyob guoed. We-machi dulemar-baiganbo bela urwoed, degi, bela-dulemar-baigan ebo urwemarmogoed. Degine, e-gwenadgangi gwisgubalo-inigwele, e-gwenadgan-abargi-mai guoed.”
GEN 16:13 Ar Agarʼde Bab-Jehová-ebo sunmaksasoggu, Bab-Dummad an-dakmaidye neg onugsasad. Ar ade soged, Bab-Dummad-an-daksaye. Degite, amba an dula-gudiiye.
GEN 16:14 A-ulale, dia nugad, Dia-Dule-Dulad-An-Dakmaidye. We-diadega Cades, degi, Bered-ebo-abingunaid-abargi siid.
GEN 16:15 Geb degine, omegwa-Agar, Abramʼga machigwa baknonikid. Geb Abram, a-machigwa Ismaelʼye onug-imaksad.
GEN 16:16 Ismael gwalulenonigua, deunni, Abram birga-dulabake-gakanergwa (86) nikad.
GEN 17:1 Abram birga-dulabake-gakambe-gakabakebak-nikadgine (99), Bab-Jehová ese magarononikid, ega sognonikid: —Ani, an Bab-Dummad-Bela-Gangued-Nikadid. An-sogedba be nue-innikii nanadii guo.
GEN 17:2 An bebo igar-mesisad, gannar an bega sogbar: ‘Wagan-bukidar-nikuega an be-imakoed.’
GEN 17:3 Geb degine, Abram Bab-Dummad-asabin napase e-bebe-ebulegedse dulluu imaksad. Bab-Dummaddi ega sogdebalid:
GEN 17:4 —Weyob an bebogwa igar-mesoed: Be, dule-yar-baid-baidgi-ambikumaloed-e-dad-dummadga an be-imakoed.
GEN 17:5 Ar dulemar-yar-baid-baidgi-ambikumaloed-e-dad-dummadga an be-imakosoggu, be bar Abramʼye nugguosulid. Emi-onodoedgine, Abrahamʼye be nugguoed.
GEN 17:6 Wagan-bukidar-nikuega an be-imakoed. Begine, reymar ainidagoed, degine, yar-baid-baidgi be-waganmar-bukwa an imakoed.
GEN 17:7 Degisadegu, an bebo igar-mesoed, degine, yoedse be-wagan-ebo an igar mesbaloed. Ani, an degisadegu be-Bab-Dummadga guoed. Degine, be-sorba be-wagan-e-Bab-Dummadga degisadegu an gubaloed.
GEN 17:8 Emi, Canaán-yala be-yalasur-inigwele, degite, a-yalagi be garmakdiid. We-Canaán-yalade, bela degisadegu an bega uked, degi, be-sorba, be-waganga an ukbaloed. A-yalade, degisadegu bemargadga guoed. Deginbali, ani, an be-wagan-e-Bab-Dummadga gubaloed.
GEN 17:9 Deginbali, Bab-Dummad Abrahamʼga sogdebalid: —Be, degi, bela be-wagan degisadegu anbo-igar-mesnaidba be nanamalo.
GEN 17:10 Weyob an bebogwa igar-mesnaid, be-wagan we-igar-mesnaidba imakmarmogoed: ‘Bela bemar-abargine, masmala e-abgan-uka-duku sikmaloed.’
GEN 17:11 ”Bemala be-abgan-uka-duku sikergebed. Weyob we-ibmar-imakedgi bemar-anbogwa-igar-mesisad mag daklegoed.
GEN 17:12 Emi-ibagan-onodoedgi, bela masmala, ibabaabakgus (8) gwalulegedgi e-abgan-uka-duku ega siklegoed. Deyob degibi be-wagan be imakmarmogoed. Be-wagansurmalad amba deyob imakmarmogoed. Be-mai be-neggi gwalulesaddibe, be-mai manigi be dule-baidse baksaddibe, amba deyob be imakbaloed.
GEN 17:13 Be-mai be-neggi-gwalulesaddibe, be-mai manigi be dule-baidse baksaddibe, wemar e-abgan-uka-duku-siksuli be imakosulid. Weyob an bemar-ebo igar-mesnaid be-abgangi degisadegu mag daklegoed.
GEN 17:14 ”Ar dule e-abgan-uka-duku siksulile, we-dule bemar-abargi onolegergebed. Ar bemarbo an-igar-mesisad-sogedba imaksasulid agala onolegergebed.”
GEN 17:15 Geb degine, Bab-Dummad Abrahamʼga sogdebalid: —Be-ome bar Saraiʼye nugguosulid. Emi-onodoedgine, Saraʼye nugguoed.
GEN 17:16 Be-omegi ise-nued an binsaoed. Bemarga machigwa an ukoed. Eye, napiragwa, be-omegi ise-nued an binsaoed. Sara dulemar-yar-baid-baidgi-ambikumaloed-e-nanaga guoed, degine, e-wagana dulemar-e-reyga gumaloed.
GEN 17:17 Abraham napase e-bebe-ebugedse dulluu imaksad, geb allided. Agi, binsaded: “¿Ar wede dule-birga-dulatar-nikad (100) sunna babga gusi? ¿Ar wede Sara birga-dulabake-gakambe-nikadgi (90) sunna nanga gusi?”
GEN 17:18 Geb degi, Abraham Bab-Dummadga sogded: —¡Bitigi Ismaelʼgi be nued binsaena gadin! An-sorba bela an-ibmarmar Ismaelʼgadga guena gadin.
GEN 17:19 Bab-Dummad Abraham-abin sogded: —Suli. Deyob guosuli. Ar an bega soged, be-ome-Sara bega mimmi bakoye. A-machigwa Isaacʼye be onugsao. An bebo-igar-mesisadi, be-machigwa-Isaac-ebo gannar we-igar an obinogoed. Ar degisadegu Isaac-e-wagan-ebo we-igar mai guoed.
GEN 17:20 ”Emi, be-machi-Ismaelʼga be ibmar-egichisadi, an be-itosbalid. Be-machi-Ismaelʼgine ise-nued an binsamogoed. Mimmigan-bukidar-nikuega an imakoed, degine, wagan-bukidar-merguega an imakbaloed. Ismael, dule-dummagan-nuga-nikamalad e-ambe-gakabogwad-e-dadga (12) an imakoed, degine, e-dulamar ichesur an imakoed.
GEN 17:21 An-bebo-igar-mesisaddina, Isaac-ebogwa igar-maigu an imakoed. Sara birgagwense we-ibaganse bega mimmi bakoed.”
GEN 17:22 Bab-Dummad Abraham-ebo-sunmaknaid-bergusgua, nade gusad.
GEN 17:23 A-ibagi-gines, Abraham e-machi-Ismael-e-abgan-uka-duku siksad. Ar igi Bab-Dummad ega sogsa, bela e-maimar-e-neggi-gwalulesmalad, bela e-maimar manigi-baklesad, degi, belagwable machergan-e-neguyagi-gudidimalad e-abgan-uka-duku-sikega imaksad.
GEN 17:24 Abraham birga-dulabake-gakambe-gakabakebak-nikadgi (99), e-abgan-uka-duku siksad.
GEN 17:25 Ismaelʼdi birgambe-gakapaa-nikadgi (13), e-abgan-uka-duku ega siksamalad.
GEN 17:26 Abraham, degi, e-machi-Ismael-ebo iba-galagwen abgan-uka-duku-siked-igar imaksamalad.
GEN 17:27 Machergan-bela-Abraham-neguyagi-gudidimalad, e-maimar-e-neg-yagi-gwalulesmalad, dule-baidse maimar-manigi-baklesad, amar Abrahamʼba belagwable abgan-uka-duku-siked-igar imaksamalad.
GEN 18:1 Bab-Jehová sapimar-islidikmalad-Mamreʼgi-gwichid-dikarba Abrahamʼse magarosad. Deunni, yorukudba, Abraham e-dordoneg-yawagakgi siid.
GEN 18:2 Abraham atakdegu, dakded, machergan-walapaa gwichi. Deyob dakdegu, Abraham abindaknaega gwichibin imaksad. Ese modapgu, a-dulemar-abin napase e-bebe-ebulegedse dulluu imaksad.
GEN 18:3 Abraham amarga sogded: —An-dummad, an bese ise-wilesakwaa egised, melle be bakar nao. An-negse be obunnoda.
GEN 18:4 Ar be nabir-itogele, an bemarga dii aminao, adi, bemar nag-enukegar. Geb a-sorba, bemar sapi-urba obunnonamaloed.
GEN 18:5 Ar bemar an-neg-maid-walik-nadapsoggu, an bemar-ogannogega bemar-naed-idu an bemarga masgunned sunaoed. Dule-warbaagwad abin-sogdemalad: —Nueddo. Be-sogedbardo.
GEN 18:6 Abraham gwae-gwae e-dordonegyaba-dogdegu, e-ome-Saraʼga sogded: —¡Gwaegwa! Madubur-bur-nued, nued-mergu madu-sobega be sue.
GEN 18:7 Geb degi, Abraham, moli-bebe-nikamalad-bukwadse abarmakdebalid. Moli-senigwad-bur-nued, bur-san-dutugwad susad. Geb degine, dule-ega-arbaedgala uksad. Geb a-dulede, gwae yog duar-imaksad, adi, mas-gunmalagar.
GEN 18:8 Abraham we-dulemar-warbaagwadga moli-san uksad, moli-nunis uksabalid. Geb degine, moli-nunis-gwamakaled ega uksabalid. Abrahamʼdi amar-sapi-urba-mas-gunbukwad, daksii gusad. Abakalegi ibmar-baigan abearbalirye binsaed.
GEN 18:9 Geb dulemar-warbaagwadi Abrahamʼse egichiarmalad: —¿Bia be-ome-Sara nade? Abraham abin-sogded: —Dordonegyaba gunai.
GEN 18:10 Geb degi, warbaagwad-wargwen sogded: —Baid-birgase gannar an bese nonibaloed. A-ibagangi, be-ome-Sara bato susugwa-nika gudioed. Ar Saraʼdi, neg-dogedyaba Abraham-yarganba dulemar-Abraham-ebo-sunmaknanaid bela itogwichid.
GEN 18:11 Dakleargua, Abraham, degi, Sara, bato nue selebagusmalad. Deginbali, Sara bato wagub-guchabalid.
GEN 18:12 A-ulale, Sara allided, ulubgi binsaded: “Bato ande selebagusad, degi, an-suide selebagusmogad. Wegiid an bar dakosur-itole. ¿Ar wede sunna an bar mimmi nikuosi? Geg bar an nikued.”
GEN 18:13 Ar Bab-Jehováʼdi, Abrahamʼga sogded: —¿Ar ibiga Sara alle? ¿Ar ede seredgussoggu, geg bar mimmi-nikuye binsade?
GEN 18:14 ¿Ar Bab-Jehováʼga ibmar-geg-gued nikasi? Suli. Baid-birgase gannar an bese ataknonibaloed. A-ibagangine, Sara machi-wargwen bato nikuoed.
GEN 18:15 Sara Bab-Jehová-weyob-ibmar-soge-itoargu, Sara dobe-itoded. A-ular, osuloded, sogded: —An alle-gwissuli. Ar Bab-Jehováʼdi abin-sogded: —¡Suli! Be allisa.
GEN 18:16 Geb a-sorba, dulemar-warbaagwad gwisgusmargu, Sodoma-neggwebursik atakdemalad. Geb degi, asik nadmarsunnad. Abraham sikwas eba nade gusmogad, adi, amarga sogega, degimaloye.
GEN 18:17 Geb degine, Bab-Jehová binsaded: “¿Ar an ibmar-imaksokalid Abrahamʼgi an odukuode?
GEN 18:18 Abrahamʼde dulemar-bukidarad-e-babga guosoggu, degine, dulemar-dutusulid-e-babga gubalosoggu, an ibmar-imaksokalid an ega sogergebed. Deginbali, an ega sogsabalid: ‘Begi bela we-napneggi yar-baid-baidgi-bukmaladgi an ise-nued binsaoye.’
GEN 18:19 Deginbali, Abraham an susbalid, adi, an-igar-maidba e-mimmigan-odurdakega, degi, e-wagan-odurdakega, adi, igar-nueganba nanamalaga, degine, igar-innikigwadbi imakdii gumalagar. ”Adi, an Abrahamʼga ibmar-imakoye-sogsadba, an imakegar.”
GEN 18:20 Degisoggu, Bab-Jehová Abrahamʼga sogded: —Dulemar-e-isgued doggus wilub-obichagusad, anse binnasur gorbukmalad, sogdemalad: Sodoma-neggweburgi-bukwamaladi, degi, Gomorra-neggweburgi-bukmaladi, nue-galagwensur damalad, degine, nue-bela-belad isgus bukmalad.
GEN 18:21 Degisoggu, neggweburse an amar-daknadapid, ar bule anga nabir sogmala. Ar degisulile, an-sunnad an nue-dakoed.
GEN 18:22 Atakdimaladi, warbogwa Sodoma-neggweburse nadmalad. Abrahamʼdi Bab-Jehová-asabin gwisgusad.
GEN 18:23 Geb degine, Abraham Bab-Jehováʼse walikaa naded, ega sogded: —¿Ar dule-isgudisurmalad, dule-isgudimaladba be obelogode?
GEN 18:24 ”Ar dule-nuegan dulabo-gakambe (50) we-neggweburgi gudidiile, ¿amba be we-neggwebur obelogode? Ar we-dule-nuegan dulabo-gakambe (50) gudidimalad-sabed-ular, ¿we-neggwebur melle obelogodeeye be sogosurde?
GEN 18:25 Dogdar-itole, dule-ibmar-isgana-imakdisulid, dule-ibmar-isgana-imakdiidba be oburgwer. Ebobela emarbi isgusadyob be imako itole. Mer deyob be sae. Bee be, bela dule-we-napneggi-bukmaladga, igar-naboged-e-dummadsoggu, ¿igar-innikii maidba be imakosurde? Eye. Be igar-innikii maidba imakoed.”
GEN 18:26 Geb degine, Bab-Jehová abin-sogded: —Ar e-dulabo-gakambe (50) dule-nuegan Sodoma-neggweburgi gudidiile, amar-ular Sodoma-neggwebur an obelogosulid.
GEN 18:27 Ar Abrahamʼdi gannar Bab-Jehováʼga sogdebalid: —Dummad, bese nue-wilesakwaa an egised, ar bedi Dummadid, andi dule-binsaledid.
GEN 18:28 Igidibe, dule-nuegan dulabo-gakambe-guega (50), e-walatar-napile. ¿Amba walatar-napid-ular, bela Sodoma-neggwebur be obelogode? Bab-Jehová Abraham-abin sogded: —Ar we-neggweburgi dulabo-gakatar (45) dule-nuegan amba wis gudiile, an obelogosulid.
GEN 18:29 Gannar Abraham sogdebalid: —¿Ar unnila dulabo (40) dule-nuegan gudiile, bela Sodoma-neggwebur be obelogode? Bab-Jehová abin-sogded: —A-dule-nuegan-dulabogwad-ular (40), we-neggwebur an obelogosulid.
GEN 18:30 Ar Abrahamʼdi gannar Bab-Jehováʼga sogdebalid: —Dummad, gannar-gannar an bega ibmar-sognaidgi, melle be isdar an-itogo. Ar unnila dulagwen-gakambe (30), dule-nuegan gudidiile, ¿bela Sodoma-neggwebur be obelogode? Bab-Jehová gannar abin-sogdebalid: —Ar we-neggweburgi unnila dulagwen-gakambe-gudidimalad-ular (30) an obelogosulid.
GEN 18:31 Abraham sogdebalid: —Dummad, weyob an bega sunmakewilubsulinad, degi-inigwele, ¿we igi-balile, unnila dulagwen (20) dule-nuegan we-neggweburgi gudiir? Bab-Jehová Abraham-abin sogdebalid: —Amar-dulagwenad-ular (20), we-neggwebur an obelogosulid.
GEN 18:32 Amba Abraham gannar sogdebalid: —Dummad, wis an bese egis, melle be isdar an-itogo. Napi an bega soge. A-sorba, bar an bega ibmar sogosulid: ¿Igi be imaksale, unnila warambe (10) dule-nuegan gudiir? Bab-Jehová Abraham-abin sogded: —Ar dule-warambegwad-ulale (10), an we-neggwebur obelogosulid.
GEN 18:33 Bab-Jehová, Abraham-ebo-sunmaked-bergusgu, na naded. Abrahamʼdi gannar e-dordoneg-siidse nonikid.
GEN 19:1 Nue neg-gutulesa, baliwitur-warbogwad Sodoma-neggweburse modapmalad. Deunni, Lot, neggwebur-doged-yawagakgi siid, ar ade, agi gusgu dummagan ambikunonidamalad. Lot, a-dulemar-warbogwad-daksagua, abin nadegusad. Lot dulemar-warbogwad-asabin napase e-bebe ebulegedse dulluu imaksad.
GEN 19:2 Lot amarga sogded: —Dummagan, an bese wilesakwaa wis egisdo, emi-mutik an-neggi bemar obunnobi an abedo. An-neggi sunna bemar nag enukmalad. Geb oibosar, wakudaryala bemar sunna naed. Geb amar-warbogwad Lot-abin sogdemalad: —Suli, nued be anmargi binsaendo. Anmardi neg-magaba gaboe.
GEN 19:3 Degi-inigwele, Lot amargi alamaknai gusad. Geb a-warbogwad sogdemarsunnad: “Eye, anmar beba naoe.” Geb Lot-negse modapmargu, Lot amarga mas-nued imaksad, ega madu-inasulid imaksad. Ebogwad nue-mas guchamalad.
GEN 19:4 Amba yoo megmaladgine, bela machergan-Sodoma-neggweburginmalad, sergan, degine, sapinganse-bakale, neg-ebilis ambikunonimalad.
GEN 19:5 Lotʼga binnasur sogdemalad: —¿Bia machergan emi-mutik be-negse-nonimalad nade? ¡Anmarga be onoge! ¡Anmar we-machergangi dodobied!
GEN 19:6 Geb agi, Lot magaba dulemarse nononikid, e-sorba yawagak ise-ediar imaksad.
GEN 19:7 Geb Lot dulemarga sogded: —Aimar, an bemarse wilesakwaa egismar. Melle bemar galagwensuli neg-imakmalo.
GEN 19:8 An walabo sisgan nikad, amba yagan-nanaed. Amar an bemarga onogoed. Ar igi bemar amar-imakbimala, be-itolegedmardo. Wemar-warbogwad-anse-nonimaladdi melle bemar oakalomalo, ar ade, wemar an-negse ubononisoggu, we-dulemar an nue-akwergebed.
GEN 19:9 Dulemar-oimakbukwad Lot-abin sogdemalad: —¡Be ainire! Be anmar-neggweburginedsulid. ¿Be anmar-dummadsi? Be anmar-dummadsuli. Emigindi, we-machergan-warbogwadba bur bule anmar be-imakoed. Geb degine, sabsur Lot-imakarmalad. Agine, yawagak-omukumalaga, yawagakse duurmakdemalad.
GEN 19:10 Lotʼse-atakdimaladdi yawagak-imbaba argan-onosmargu, Lotʼgadebin imaksamalad, negyaba odosmalad, geb degine, yawagak edismalad.
GEN 19:11 Geb wemar-warbogwad dulemar-bela-magaba-bukwad geg-atake imaksamalad. Belagwapa, sapinganse, degine, serganse-bakale, geg-atake gusmalad. Yawagak acha-acha-aminanaid, budar-itoarmalad.
GEN 19:12 Geb degine, dule-warbogwad Lotʼga sogdemalad: —¿Amba gwenadgan-baigan be nika? Be-sapingan, be-masmala, be-bunamala, bela we-neggweburgi gwenadgan-be-nikadi be sede. Bela be-gwenadgan we-neggweburgi be onogo, degine, dikasur be sede.
GEN 19:13 Ar ade, anmar we-neggwebur obelosokalid. Ar we-neggweburgi-dulemar-bukmalad bela-bela nue-isgus galagwensulidamalad Bab-Jehováʼse warmaksad. A-ular, Bab-Jehová we-neggwebur-obelogega anmar-barmialid.
GEN 19:14 Geb degine, Lot e-sapinganga-gumaloed daknaded. Amarga sogdapid: —¡Gwisgumar, be nomar, ar ade, Bab-Jehová we-neggwebur obelosokalid! Ar e-sapingandi Lot-ega-ibmar-soged baisur-itosmalad.
GEN 19:15 Ar bato neg-oibodanigussoggu, baliwiturmar Lotʼga sokalid: —¡Gwaegwa! Be nae. Be-ome, degine, be-sisgan-warbogwad be sede. Ar be sedsulile, anmar we-neggwebur-sabsur-odurdaksokalidba, bemar burgwemarmogoed.
GEN 19:16 Ar Lot binnaa gunaisoggu, baliwitur-warbogwad, Lot, e-ome, degi, e-sisgan-warbogwad argangi gadebin imaksamalad. Geb neggweburgi wemar-onosmalad, adi, bendaklemalagar. Ar Bab-Jehováʼdi nue Lot-wiledaksoggu, baliwiturmar a-ular, weyob Lot-imaksamalad.
GEN 19:17 Bato neggweburgi nosmargua, baliwitur Lotʼga sokalid: —¡Be abarmakdemar, mer be burgwemalagar! Mer bar yarganba gannar atako, deginbali, yalaganba be wakinmalo. Melle nebagi be obunnobalo. Ar degisulir, bemar burgwemaloed.
GEN 19:18 Lotʼdi abin-sogded: —¡Suli dummagan, deyob suli! Ar bese wis wilesakwaa an egised.
GEN 19:19 Emide, ibmar-nuegan bukidargus bemar anga imakdanikid. Degine, nued bemar angi binsasad, bemar an-bendaknonigu. Degi-inigwele, yalaganba geg an wakinned. Ar neg-bergudele, an sunna igarba bargalesaled. Ar degiile, an burgwemogo-itole.
GEN 19:20 Wegi itakasaale neggwebur-bipigwad-siidse an sunna wakichaled. ¡Ase naed be an-imake, adi, an bendaklegegar, an melle burgwegar! A-neggweburdi nue bipigwad.
GEN 19:21 Geb dule abin-sogded: —An be-itos. Be anse egisnaidba an bega imakoed. We-neggwebur-bipigwad be anga obaredi, adi, an obelogosulid.
GEN 19:22 ¡Be nae! Gwae be a-neggwebur-bipigwadse be nae. Be neggwebur-bipise-warmakedse geb an neg obelogoed. A-ulale, a-neggwebur-bipigwad, Zoarʼye onugsalesad.
GEN 19:23 Bato neg-oibosadgi, Lot, Zoar-neggweburse modapid.
GEN 19:24 Geb degi, Bab-Jehová nibneg-akar Sodoma-neggweburgi, degine, Gomorra-neggweburgi soo, degi, azufre egi odesad.
GEN 19:25 Bab-Jehová wemar-neggwebur, degi, agi bela gudidimalad, degi, bela a-nebagine gaganse-bakale, obelosad.
GEN 19:26 Ar Lot-e-omedi, yarganba atakded. Agi, yog balu-warga binyale-naded.
GEN 19:27 A-bangine, wakudaryalaba Abraham nadegusad, bia Bab-Jehová-ebo sunmakgwichigusa, ase naded.
GEN 19:28 Abraham, Sodomaʼsik, degi, Gomorraʼsik, degi, bela nebasik atakdegu, dakded, bela-bela waa bupurmagwichi. Soo-yagi waa bupurmakgwichiyobi daked.
GEN 19:29 Weyobi, Bab-Dummad Lot-maigusadgi neggweburmar-nebagi-bukwad obelosad. Bab-Dummad Abrahamʼgi nued-binsaed-ular, Lot-onosad, melle Lot dule-baiganba burgwegar.
GEN 19:30 Weyob neg-gusad-sorbali, Lot Zoar-neggweburgi dobe-mege gualid. Aga, Lot, e-sisgan-warbogwadmala yalaganba nade gusad. Na e-warbaagwa akwasaila-ollorsiidyaba megidapmalad.
GEN 19:31 Ibagwengine, ior na urbaga sokalid: —Anmar-bab bato nue-selebagusad. Wegi machergan sated, adi, igar-maidba anmarse golegar.
GEN 19:32 Degisoggu, anmar-bab anmar omumsamalo. Geb agi, anmar ese goloed, adi, anmar ega anagan-urbegar.
GEN 19:33 A-mutikidba, vinoʼgi e-bab-ogobsamalad. E-sisgwa-dummad e-babse gochad. Ar e-babdi gwen itossulid, sana e-sisgwa e-yarba megisa, degine, sana gannar gwisgusbali.
GEN 19:34 A-bangine, ior urbaga sokalid: —Sae-mutik bab-yarba an megisad. Degisoggu, emi-mutik anmar bab-omumsabalo, adi, bab-yarba megmogagar. Geb degiir, anmar geb ega anagan urboed.
GEN 19:35 A-mutiki, vinoʼgi gannar e-bab ogobsamarbalid. Geb degine, urba e-babse gochamogad. Ar Lot gwen itossurbalid, sana e-sisgwa-bipigwad e-yarba megisa, degine, sana gannar gwisgusbali.
GEN 19:36 Weyob Lot-e-sisgan-warbogwad bonigwar e-babgadga gunonikid.
GEN 19:37 E-sisgwa-dummadga susugwa uklenonikid. A Moabʼye onugsasad. Agi, Moab-dulemar-bukwadi danikid.
GEN 19:38 E-sisgwa-bipigwadga susugwa uklenonimogad. Adi, Benammiʼye onugsasad. Agi, Amón-dulemar-bukwadi danimarmogad.
GEN 20:1 Abraham e-maidgi bangud gusad. Neguev-nebaganba nade gusad. Gerar-neggweburgi megidapid. We-neggweburde Cades, degi, Shur, amar-negabargi siid.
GEN 20:2 Agi Abraham maigua, sogsagusad, e-ome-Sara, e-bunye. Gerar-neggwebur-e-rey-Abimelec, Sara-nikuega Saraʼbina gochad.
GEN 20:3 A-mutikidba, Bab-Dummad Abimelecʼse gabgi nonikid, ega sognonikid: —Be we-ome-sealid-ular, be burgo. Ar we-omede sui nikad.
GEN 20:4 Ar Abimelec amba yoo Saraʼse gorsoggu, Abimelec Bab-Dummad-abin sogded: —Dummadye, ¿ar bede dule-neg-oakalossulid oburgoye be sogde?
GEN 20:5 Ar Abraham-sunnad anga sogsad: We-ome, an-bunye. Degine, omegwa anga sogsamogad: We-machered, an-susye. Ar degisoggu, gwen ichakwa-binsasulidgi an ibmar imaksad. Ibmar-isgana an imaksasulid.
GEN 20:6 Bab-Dummad Abimelecʼga gabgi sogsad: —An nue be-wisid, ichakwa-binsasulidgi be imaksad. A-ulale, omese-golega an be-imaksasulid, adi, melle be angi noegar.
GEN 20:7 Ar emigindi, ome e-suiga gannar be berbena. Ar we-machered Bab-Dummad-gayaburba-barsogedsoggu, be-ular Bab-Dummadse goloed, adi, mer be burgwegar. Ar omegwa gannar e-suiga be berbenasulirdi, be, degi, be-gwenadgan burgwemaloed.
GEN 20:8 Oibosgu, wakudaryalaba Abimelec gwisgusgu, bela e-maiganse gochad, amarga bela sogsad, igi ede gabdaksa. Itosmargua, bela nue-dobe itodmalad.
GEN 20:9 Geb a-sorbali, Abimelec, Abrahamʼse-gochagu, ega sogded: —¡Emi, be-neg-oakalosad be dake! ¿Ibigi an begi nosa? Emisgi isgued-dummad be angi, degi, an-sordamargi senonigu. Weyob be ibmar imakewilubsulinad.
GEN 20:10 Abimelec Abrahamʼga sogdebalid: —¿Ar ibiga deyob be imakye be binsaali?
GEN 20:11 Abraham, Abimelec-abin sogded: —Wegi dule-Bab-Dummad-dobee-nanaed sateye an biendo. Degisoggu, an-ome-ular an-oburgwemaloeddeeye an binsasad.
GEN 20:12 Ar nabiri, we-omegwa an-bunad. An-bab-e-sisgwad, an-nandi e-nansulid. Deginbali, we-ome, an-omebalid.
GEN 20:13 Bab-Dummad anga igar-uknonigu: Be-bab-neggi-be-gudiid be naye. Geb an we-omega sogsad: ‘Bia anmar modapile, nue be an-sabele, be sogoye, be an-bunye.’
GEN 20:14 Geb degine, Abimelec, Abrahamʼga e-ome-Sara gannar uksasunnad. Geb aginbali, Abrahamʼga sibad-wawaadmar, moli-bebe-nikamalad, mai-machergan, degi, mai-omegan, uksabalid.
GEN 20:15 Abimelec, Abrahamʼga sogdebalid: —Be dake, we an-yala. Bia be megbie be-itolegedba be yar sue.
GEN 20:16 Saraʼga sogdemogad: —An be-susgala mani-miligwen-aidikue (1,000) uksad. We-mani dule-beba-gudidimalad-asabin be oyogo, adi, oyogega bedi gwen nossurye. Dule-wargwensaale gege begi sunnasur sunmaked.
GEN 20:17 Geb degine, Abraham Bab-Dummadse goted, geb Bab-Dummad Abimelec-onugusad, degi, e-ome-onugusbalid. Deginbali, e-maimar-omegan-onugusbalid, adi, nabir sunna mimmi-bake gumalagar.
GEN 20:18 Ar ade, Abraham-e-ome-Sara-ulale, Bab-Jehová omegan-Abimelec-negginmalad geg mimmi-bakega imaksanad.
GEN 21:1 Bab-Jehová e-sogsadba Saraʼgi ise-nued binsasad. Saraʼga ise-sogar-imaksadba ega ibmar imaknonikid.
GEN 21:2 Degisoggu, Sara bonigwar gunonikid. Deunni, Abraham bato nue seredgusad. Bab-Dummad Abrahamʼga-sogsadyobi, a-ibagangi Sara susugwa baknonikid.
GEN 21:3 Abraham, Sara-ega-susugwa-baksadi Isaacʼye onugsasad.
GEN 21:4 Isaac ibabaabakgus-gwalulesadgi (8), Abraham Bab-Dummad-ega-sogsadba, Isaacʼga abgan-uka-duku siksad.
GEN 21:5 Abraham birga-dulatar (100) nikadgi, Isaac gwalulenonikid.
GEN 21:6 Geb degine, Sara sogded: “Bab-Dummad an-oallisad, bela dulemar susugwa-nikusye an-wisguarmalale, anba weligwaledba allemarmogoed.”
GEN 21:7 Sara sogdebalid: “¿Ar wede doa Abrahamʼga sogoen be insae, ani, Sara, ega mimmi bakoye? Dule sogosulina. Ar emigindi, be dakena, ar Abraham bato seredgus-inigwele, degite, anga machigwa baksad.”
GEN 21:8 Machigwa-Isaac dunguded, degine, mam-iargunonikid. Mam-iargusad-ibagi, Abraham iba-dummad onosad.
GEN 21:9 A-iba-ononaidgi Sara dakded, Agar-e-machi-Ismael Isaacʼgi dodonai. We-machide Agar Abraham-ebo baksadid. Agarʼde Egipto-duled.
GEN 21:10 A-ular, Sara Abrahamʼga sogded: —¡We-mai, degine, e-machi we-neggi be onoge! We-mai-e-machi an-machi-sunnagwadyob geg an-machi-Isaacʼba, be-ibmar-beoedi abingamogad.
GEN 21:11 Ar Ismael Abraham-machi-sunnad gusoggu, Sara weyob Abrahamʼga ibmar-sogsadi, Abraham nue-nunmak itosad.
GEN 21:12 Ar Bab-Dummaddi Abrahamʼga sogded: “Melle be-machigi, degine, be-maigi nunmak be itoge. Ar ibi Sara bese egichialile, aba be ibmar sae. Ar ade, Isaac-waganbi be-wagan-sunnadga gumaloed.
GEN 21:13 Ar be-mai-machidi be-machibarsoggu, amba deyob an imakbaloed, dule-bukidar-guega an imakmogoed.”
GEN 21:14 Neg-oibosadgi, wakudaryalaba, Abraham Agarʼga madu, degi, buglugi dii ega uksad. Abraham Agar-gukingi bela ega ibmar nasiksad. Geb degi, Agarʼga e-machi-Ismael-uksagu, barmisad. Agar nadegusad, Beersebaʼsik nega-dulesulidganba bipirmakdii gusad.
GEN 21:15 Buglugi dii-siid bergusgu, Agar sapi-urba e-machi sisad.
GEN 21:16 Agarʼdi bannabasaar wilubba-banguedgi signaded. Ar ade, binsasad: “Machi burgwialir, an dakbisulid.” Agar sigidapgu, machi boalid.
GEN 21:17 Bab-Dummad, machigwa bosiid itosad. Bab-Dummad-e-baliwitur nibneg-akar Agarʼse gornonikid, ega sogded: “¿Agar, igi be itoge? Mer be bukib itoge, ar Bab-Dummad be-machi-bosiid itosad.
GEN 21:18 Be nae, be-machi be suna. Nue be-argangi be gao, mer indako. Ar ade, an we-machigwagi dule-bukidar-gued an imakoed.”
GEN 21:19 Geb degine, Bab-Dummad Agar dia-siid-dakega imaksad. Agar diase nade gusad. Geb buglugi dii enosad. Geb degine, diigi Ismael-ogobsad.
GEN 21:20 Ismael-dungumaidba Bab-Dummad Ismael-bendaksad. A-machigwade nega-dulesulidgi maigusad. Agi, yeer sigu-mie gunonikid.
GEN 21:21 Sapingwagusgu, Parán-nega-dulesulidgangi-maidgi, e-nan ega ome-Egiptoʼgined uksad.
GEN 21:22 A-ibagangine, deunni, Abimelec Abrahamʼga sunmaknade gusad. Ficol eba nade gusmogad. Ficolʼde Abimelec-e-sordamar-e-dummadga gudiid. Abimelec, Abrahamʼga sogdapid: —Bela be ibmar-imakdele, Bab-Dummad nue-be-bendake anmar daked.
GEN 21:23 Degisoggu, weyob, Bab-Dummad-nuggi ise-sogar be anga soge, akar be an-imakosurye, degine, an-mimmigan, degi, an-wagan akar be imakosurbarye. Igi-nued an be-imaksamoga, deyob be an-imakmogoed, degine, emi we-yargi-be-gudiid-e-dulemar deyob be imakbaloed.
GEN 21:24 Abraham, Abimelec-abin sogded: —Napira-Bab-Dummad-nuggi ise-sogar an bega soged: ‘Eye, an imakosuli.’
GEN 21:25 Geb degine, Abraham, Abimelecʼga sogded, igi Abimelec-e-maimala e-ibe dia susmala.
GEN 21:26 Abimelec Abraham-abin sogded: —An wissulid wede doa deyob imaksa. Ar bede anga sogsasulid. Ar emi geb an itogwichid.
GEN 21:27 Geb degine, Abraham sibad-wawaadmar, moli-bebe-nikamalad susad, geb degine, Abimelecʼga uksad. A-ibagine, Abimelec Abraham-ebo igar mesismalad.
GEN 21:28 Ar Abrahamʼdi e-sibad-wawaad-bukwadgi sibad-wawaad-ome-senigana walagugle (7) susad. Geb degine, amar bachikii urbisad.
GEN 21:29 A-ulale, Abimelec Abrahamʼse egichialid: —¿Ar ibiga-wede be sibad-wawaad-ome-senigana walagugle (7) be bachikii urbisa?
GEN 21:30 Abraham abin-imakded: —Ar we-sibad-wawaad-ome-senigana walagugle (7) an bega uked, adi, soglegegalad, we-dia, ani an akwisye.
GEN 21:31 A-ulale, emar-gunanaidgi Beersebaʼye onugsasmalad. Ar ade, na ebogwa sogsamalad, anmar ibmar-sogsamaladi imakedseye, geg anmar imaksuli guye.
GEN 21:32 Beersebaʼgi na igar-nabosmargu, Abimelec, degine, e-sordamar-idued-Ficolʼmala gannar Filistea-neggweburmarse nadmalad.
GEN 21:33 Abrahamʼdi Beersebaʼgi ingwa-soled-sapi digsad. Agine, Bab-Dummad-Jehová-Degisadeguadse gochad.
GEN 21:34 Abraham birga-suitii Filistea-dulemar-yargi maigusad.
GEN 22:1 Undar birgamar nasadgine, Bab-Dummad Abraham-wilub-dakesokalid, bule egi nue bensurdibeye. Bab-Dummad nugba Abrahamʼse gornonikid: —¡Abraham! Abraham Bab-Dummad-abin sogded: —Na, degite, an be-itomai.
GEN 22:2 Bab-Dummad Abrahamʼga sogded: —Isaac, be-machi-wargwennagwad be nue-sabedi, Moriah-yalaganse be sede. A-yalagan-mosale, an bega yar-oyogoedgi be-machi be anga ogumakoed.
GEN 22:3 Oibosgu, wakudaryalaba Abraham gwisgusad, e-moli-uayasuid guakwaa nasiksad. Sapan amisbalid, machigwa-ogumakar-uklegoedgi ogaegar. Abraham bia Bab-Dummad ega-naoye-sogsadse nadegusad. E-machi-Isaac, degi, e-maimar-warbo eba nadmarmogad.
GEN 22:4 Abraham ibapaagus-nanaedgi yar egi dikasur-noe dakalid.
GEN 22:5 Geb degine, Abraham e-maimarga sogded: —Wegi bemar moli-uayasuidmala an-edarbemalo. Machigwa-anbogwa Bab-Dummad-e-nug-odummogega andi naoed. Geb degine, gannar anmar bese nonikoed.
GEN 22:6 Abraham ibmar-ogumaklegoed-ogaegala sapan susad, geb Isaac-e-gukingi mesisad. Abrahamʼdi es, degi, acha-gwallu-ogaar sesad. Geb degidgine, Abraham e-machi-ebo nade gusad.
GEN 22:7 Sikwas nanaedgine, Isaac Abrahamʼga sogded: —¡Baba! Abraham abin-sogded. —Degite machi, soge. Isaac sogded: —Anmar sapan, degi, acha-gwallu-ogaar sedanikid, degite, ¿bia sibad-wawaad-senigwad anmar Bab-Dummadga-ogumakar-ukoedde? Abraham Isaac-abin sogded:
GEN 22:8 —Machi, Bab-Dummad anmarga sibad-wawaad-senigwad udagoed, anmar ega ogumakar ukegar. Deyob, ebogwa imakenadap gusmalad.
GEN 22:9 Abraham, degi, e-machi-Isaac-ebo Bab-Dummad-ega-yar-sogsadse modapmargu, Abraham Bab-Dummadga-ibmar-ogumakar-ukleged-aila sobsad. Geb a-aila-birgi sapan urbisad. Geb degine, e-machi-Isaac-edichagu, we-aila-birgi sapan-birgi Isaac-mesisad.
GEN 22:10 Abraham e-machi-oburgwegala es susgua,
GEN 22:11 Bab-Jehová-e-baliwitur niba ese gollalid: —¡Abraham! ¡Abraham! Abraham Bab-Jehová-e-baliwitur-abin sogded: —Degite. Wegi an gunai.
GEN 22:12 Bab-Jehová-e-baliwitur Abrahamʼga sogded: —Melle machigwa be oakaloge. Melle be naibi-imake. Ar bato an wisid, be Bab-Dummad-dobee nanadiid. Ar be gwen sogsasulid, an-machi-wargwensakad melle be anga ukodeeye.
GEN 22:13 Abraham dakded, sibad-wawaad-machered sapi-imbaba e-bebegi galesnai. Abraham agi sunaded. Sibad-wawaad-machered-susgua, ogumakar e-machi-anar Bab-Dummadga uksad.
GEN 22:14 Geb a-sorbali, Abraham weyob we-neg onugsasad: Bab-Jehová ibmar-unnitiba-ukedye. A-ulale, amba we-garda narmaklenaidse sogleged: Bab-Jehová-yargine ibmar-unnitiba-uklegoedye.
GEN 22:15 Bab-Jehová-e-baliwitur gannar irbogi niba Abrahamʼse gornonibalid,
GEN 22:16 ega sogded: —Bab-Jehová soged: ‘Ani, an bega ise-sogar soged: Ar be-machi-wargwensakad mer be anga ukodeeye be sogsasursoggu,
GEN 22:17 an bela-bela ise-nued begi binsaoed. Be-wagan bela-bela-mergu an imakoed, niisgwamar-niba-nanaidyob, degi, ukub-demar-gakagi-nikadyob an imakoed. Deginbali, be-wagan e-isdarmaladgi nakwedii guoed, degi, e-neggweburgan ei sudii guoed.
GEN 22:18 Deginbali, ar an bega-ibmar-sogsadyob be imaksasoggu, bela dula-we-napneggi-bukwamalad be-waganba an egi ise-nued binsamogoed.’
GEN 22:19 Abraham bia-e-maimar-obesa, ase gannar nonikid. Degine, bela Beerseba-neggweburse nade gusmalad. Agine, Abraham megidapid.
GEN 22:20 Degi-undaradgine, Abrahamʼga soglenonikid, e-urba-Nacor machimala-nikamoye, Milca ega baksaye.
GEN 22:21 Gebe-machigwa ega gwalulesad, Uzʼye nugad. A-sorba, e-urba-Buz gwalulesad. Degi, Kemuel gwalulesad. Kemuelʼde, Aram-e-babad.
GEN 22:22 Deginbali, Nacor-e-masmala-baigan, Milcaʼbo-baksabalid, wemalad: Quesed, Hazo, Pildas, Jidlaf, degi, Betuel.
GEN 22:23 We-Betuelʼde Rebeca-e-babad. Wemar-walabaabakadi (8) Nacor-machimalad, Milca-ebo baksadid. Nacorʼde Abraham-e-urbad.
GEN 22:24 Deginbali, Nacor, Reúma-ebo baid-machimala nikusbalid. Reúmaʼde e-ome-dikarbalidid. We-ebogwa machimala-baksadi, wemalad: Teba, Gaham, Tahas, degi, Maaca.
GEN 23:1 Sara birga-dulanergwa-gakagugle-nikadgi (127) burgwisad.
GEN 23:2 Sara Canaán-yalagangi, Quiriat-Arba-neggweburgi burgwisad. Quiriat-Arbaʼde, Hebrónʼye bilebalid. Abraham Sara-burgwisadba nue-bosad, degine, nue-Sara-ebinsadii gusbalid.
GEN 23:3 Geb degine, Abraham Sara-burgwar-maid-obes nade gusad. Het-dulemarse naded.
GEN 23:4 Geb Abraham Het-dulemarga sogded: —Ar an bemar-abargine weginedsur-inigwele, anga wis be neg-uan manigi ukmala, adi, an-ome-mui agi an digegar.
GEN 23:5 Het-dulemar Abraham-abin sogdemalad:
GEN 23:6 —¡Dummad, bega an sogmardo! Ar Bab-Dummad anmar-abargine, dule-dummadga be-susad. Degisoggu, be-ome-mui anmar-neg-uan-bur-nuedgi be dige. Ar anmar-wargwensaar bega sogosulid: Melle be-ome-e-mui be anmar-neg-uangi digye.
GEN 23:7 Geb degine, Abraham gwisgusad, Het-dulemar-bukmalad-asabin dulluu imaksad.
GEN 23:8 Geb degi, amarga sogded: —Ar bemar wegi an-ome-burgwisad nue-digbi abegele, an bemarse wilesakwaa egisdo, an-nuggi bemar Zohar-machi-Efrónʼse egismar:
GEN 23:9 ‘Anga, e-nainu-dikarba-akwasaila-ollor-siid, Macpelaʼye-nugad, manigi ukye.’ Ar e-mani-gargeguedba, an bennukoed. Ar degiir, geb an neg-uan wegi nikuoed.
GEN 23:10 Ar Het-dule-Efrón emar-abargi simosoggu, bela Het-dulemar, degi, dule-bela-neggweburse-ubomamaid e-itomalaga, Abraham-abin sogded:
GEN 23:11 —¡Dummad, degisuli! An-nainu, degine, akwasaila-ollor-siid binsa an bega ukoed, maniginsuli. An-sordamar-bukwad anmar-daksiid, amar-asabin an bega we-akwasaila-ollor-siid binsa uknaid. Agi be-ome-mui be dige.
GEN 23:12 Abrahamʼdi Het-dulemar-asabin gannar na dulluu imakded.
GEN 23:13 Abraham bela dulemar-e-itobukwad-abargi Efrón-abin sogded: —¡Bemar bela nue an-itogo! An bega soged, mani be sue. Nainu an bese bakoed. Geb a-sorba, an-ome-mui an digoed.
GEN 23:14 Geb degi, Efrón abin-sogded:
GEN 23:15 —Dummad, nue be an-itogo: Nainu-e-gargegued mani-dulataled-ilabake-aidikued-wilub (400) gargegued. Wegindi anmar na abin-abin imakosurmalad. Degisoggu, be-ome be dignado.
GEN 23:16 Abraham, Efrón Het-dulemar-abargi ega nainu-gargegued-sogsad nabir-itosad. Degisoggu, dule-ibmar-ukmalad-igar-maidba mani-dulataled-ilabake-aidikued-wilub (400) mie-mie bennuksad.
GEN 23:17 Weyobi, Mamre-dad-nakwedsik Efrón-nainu-Macpelaʼgi-naidi, Abrahamʼgadga gunonikid. A sogleged, nainu, akwasaila-ollor-siid, bela sapimar, Abrahamʼgadga gunoniye.
GEN 23:18 Het-dulemar, degi, dule-bela-neggweburgi-dogmamaid, nue-amar-daksii gusmarmogad.
GEN 23:19 Geb agine, Abraham akwasaila-ollor-siidgi e-ome-Sara-mui-digsa gusad. We akwasaila-ollor-dummad, Macpela-nainugi siid, Mamre-dad-nakwedsik. Mamre-neggweburde Hebrónʼye nugbalid, Mamre-neggwebur Canaán-yargi siid.
GEN 23:20 Weyob we-nainugi akwasaila-ollor-siid, Abrahamʼgadga gunonikid. We-nainude Het-dulemar Abrahamʼga manigi uksad, adi, Abraham we-nainu e-neg-uanga imakegar.
GEN 24:1 Abraham bato nue selebagusad. Bab-Jehová Abrahamʼgi bela ise-nueganbi binsadii gusad.
GEN 24:2 Ibagwengine, Abraham e-mai-bur-undargus-arbadiidse gochad. We-mai bela ega ibmar-dakega gudiid. Abraham a-maiga sogded: —Be anga ise-sogar-ibmar-sogegala, an-dua-urba be-argan be mese.
GEN 24:3 Bab-Dummad-Jehová-Nibneg-Dakmaid-nuggi, degi, napneg-dakmaid-nuggi ise-sogar be anga soge. Wegi, an Canaán-dulemar-abargi an maid. A-Canaán-yagan-wargwensaar mer an-machi-Isaac-onikued be sao.
GEN 24:4 Bur be an-yarse nao. Agine, an-gwenadgan-e-sisgan-wargwen, an-machi-Isaacʼga be aminao, adi, a-yagwa Isaac-nikuegar.
GEN 24:5 E-mai abin-sogded: —Nued, dummad. Ar yagwa we-negse yapa anba dagele, ¿igi an imakosunna? ¿Ar degiile, be-yargi be aligusadse, an be-machi sedsunnode?
GEN 24:6 Abraham abin-sogded: —¡Suli, mer an-machi ase be sedo!
GEN 24:7 Bab-Dummad-Jehová-Nibneg-Dakmaidi an-bab-neggi an-onosad, degi, an-babgan-yalagi an-onosbalid. A anga sogsad: ‘Napira ise-sogar an bega sogye: Emi-be-maidgi we-yala an be-waganga ukoye.’ Degisoggu, a-Bab-Dummad e-baliwitur be-idu barmidoed, adi, weba an-machiga ome be sedagegar.
GEN 24:8 Ar ome beba dagbisulile, be ise-sogar anbo igar-mesisadgi be ollorguodo. Unnila an bega soged, ¡bipisaale melle an-machi be weba sedo!
GEN 24:9 Geb degine, Abraham-e-mai, e-dummad-Abraham-dua-urba e-argan mesisgu, Abrahamʼga ise-sogar imakded, eyeye, an be-sogedba an imakoye.
GEN 24:10 Geb a-sorbali, Abraham-e-mai moli-yargan-mureged-warambe (10) susad. Abraham-ibmar-nuegan-nikad binsa-ukega susbalid. Geb degine, Mesopotamia-yarse, Nacor-neggweburse naded.
GEN 24:11 Abraham-e-mai Nacor-neggwebur-magaba modapgu, deun bato neg-sedogualid. A-wachigi omegan dii-weenad damalad. Abraham-e-mai moli-yargan-muremalad dia-naba-obunnogega sindigar osisad.
GEN 24:12 Geb degine, Abraham-e-mai Bab-Dummadse goted: “Bab-Jehováʼye, an-dummad-Abraham-e-Bab-Dummadye, emi-ibagi nued anga ibmar-gued be imakena yeerban, degine, an-dummadgi nued be binsabalina gadin.
GEN 24:13 Wegi dia-naba an siidgi, yagana-we-neggweburginmalad wese dii wedanimaloed.
GEN 24:14 A-yagwa-wargwenga an sogoedga, ‘wis be-buglu be odeye, adi, an dii gobegarye.’ A-yagwa weyob an-abinsaalile: ‘Dii be gobye, be-moli-yargan-muremaladga dii an ukmogoye.’ Agi an wisguoed, a-yagwa be-mai-Isaac-e-omega-guega be susa. Degi, be an-dummadgi-ise-nued-binsasad an wisgubaloed.”
GEN 24:15 Abraham-e-mai amba yoo Bab-Dummadse-goled bergue, dakded, yagwa-gwensak e-gukingi buglu-sii daniki. Dakleargua, we-yagwade Betuel-e-sisgwad, Rebecaʼye nugad. Betuelʼde Milca-e-machid. Milcaʼdi Nacor-e-omed. Nacorʼdi Abraham-e-urbad.
GEN 24:16 Rebeca yeer dakleged, amba yagwad, sui-sated. Rebeca diase aideded, e-buglu enosad, geb gannar nakwialid.
GEN 24:17 Agine, Abraham-e-mai gwae yagwa-abin naded. Yagwase modapgu, ega sogded: —Be-buglugi be dii-semaidi wis be anga udage.
GEN 24:18 Yagwa abin-sogded. —Dummad, be gobe. Geb degi, yog e-buglu-odear imaksad. E-argangi buglu-ganiki, diigi ogobsad.
GEN 24:19 Abraham-e-mai nue-gobsagua, Rebeca ega sogded: —Moli-yargan-muremaladga an dii weemogoed, adi, bela na dii-gobbimaladba gobmalagar.
GEN 24:20 Geb degine, yagwa e-buglugi-dii-semaidi dii-siedgi eodapid. Deyobi ichesuli nanasad, bela moli-yargan-muremalad unniguar dii gobsamaladse.
GEN 24:21 Ar Abraham-e-maidi unnila daksigusad, ar ade, nue wisgubied, e-nonikidgi bule Bab-Jehová egi nued binsasdibeye.
GEN 24:22 Bela moli-yargan-muremalad dii gobsamargua, Abraham-e-mai, yagwa-e-asugi olasu yosad. We-olasude gramo-nergwa (6) aidikued. Deginbali, sakwagi-nasikleged-olobiid, gwabo ega uksabalid. We-sakwagi-nasiklegedde gramo-dulatar (100) obinesaar aidikued.
GEN 24:23 Geb degine, Abraham-e-mai yagwaga sogded: —¿Be doa-sisgwa? Degi, anmar obunnogega, ¿be-bab-walik neg-nika be dake?
GEN 24:24 Yagwa abin-sogded: —An Betuel-sisgwa. An-babde Nacor-machid, Milcaʼbo baksadid.
GEN 24:25 Anmar-neggine bemar gabmalaga unniguar neg-nikad. Deginbali, molimar-yargan-muregedga unniguar gagan, degi, mas-maed nikabalid.
GEN 24:26 Geb degine, Abraham-e-mai yokorgi sindigar sigisad. Geb Bab-Jehováʼse goted, e-nug odummoded,
GEN 24:27 sogded: “¡Bab-Jehováʼye be-nug odummolesun! Bedi an-dummad-e-Bab-Dummadid. Bedi an-dummadgi be-sabgued, degi, be-napiragwad gwen galakudisulid. Degine, Bab-Jehováʼye be an-sealid. Be anga igar-oyosad, adi, an-dummad-e-gwenadgan-negse an warmakegar.”
GEN 24:28 Rebeca, bela ibmar-gusad e-nan-negginmaladga-sogega e-nan-negse abarmakded.
GEN 24:29 Rebecaʼde sus-nikad, Labánʼye nugad. Labán Abraham-e-mai-aminaega dia-siidse abarmakded.
GEN 24:30 E-sus e-bun-Rebeca olasu-yoi, degi, sakwagi-nasikleged-nai daksad. Degine, Labán itosbalid, igi e-bun-Rebeca machered-ega-ibmar-sogsagusadi, e-nanga sognai. Geb Labán, Abraham-e-maise naded. Abraham-e-mai, degi, moli-yargan-muremalad amba dia-walik bukwamalad.
GEN 24:31 Geb Labán Abraham-e-maiga sogded: —Bedi dule-nuedid. Begi Bab-Jehová ise-nued binsasad. ¿Ar ibiga magaba be mellesii? Be anba dage. Ar bato neg guakwaa an bemarga nudaksad, degi, be-moli-yargan-muremaladga guakwaa an neg nudaksabalid.
GEN 24:32 Geb degine, Abraham-e-mai Labánʼba negse alid. Agi, moli-yargan-muremaladgi ibmarmar-bukwad odesad. Degine, Labán a-molimarga masgunned uksad. Deginbali, Abraham-e-maiga, degi, eba-danimaladga dii senonikid, adi, nag enukmalagar.
GEN 24:33 Abraham-e-maiga mas guakwaa sisgu, Abraham-e-mai sogded: —Mas-inse an gunnosuli. Bina an bega ibmar-sogbied soggwelergebed. Labán abin-sogded: —Degite, sogdo.
GEN 24:34 Abraham-e-mai sogded: —Ani, an Abraham-e-maid.
GEN 24:35 Bab-Jehová ibiba nued an-dummadgi binsasa, mani-ibedga imaksad. We-ibmarmar ega uksad: Sibad-wawaadmar, moli-bebe-nikamalad, ormar, manimar, mai-machergan, mai-omegan, moli-yargan-muremalad, degi, moli-uayasuigan-bukidar ega uksad.
GEN 24:36 ”Aginbali, e-ome-Sara, deun bato nue seleba-gusadgi, ega mimmi-baksad. An-dummad bela e-machiga ibmar uksad.
GEN 24:37 An-dummad ise-sogar-ibmar-imakega an-imaksad, anga sogsad: ‘Anmar we-Canaán-yargi-maidgi, melle an-machi e-yagan-nikuega be imakoye.
GEN 24:38 Bur an-bab-e-gwenadganse be naoye, an-gwenadgan-e-sisgan-wargwen an-machi-nikuega be aminaoye.’
GEN 24:39 ”An-dummad-abin an sogsad: ‘Dummad, ¿ar yagwa yapa anba dagele, igi an saoe?’
GEN 24:40 ”Geb degine, an-dummad an-abin sokalid: ‘Ani an, Bab-Jehová-igarba nanadiiye. A-Bab-Jehová e-baliwitur beba barmidoye, adi, be-naoedba bega nueganbi ibmar guegarye. Weba an-machiga an-gwenadgan-e-sisgwa be amioye, adi, nikuegarye.
GEN 24:41 Ar an-gwenadgan yapa bega e-sisgwa-ukerdina, adi, be ise-sogar-anga-sogsadi, bar beginsurye, adi, be ollorguoye.’
GEN 24:42 ”Emi, deyob an diase nonisunnad. An Bab-Jehováʼse gotegu, an sogded: Bab-Jehováʼye, an-dummad-Abraham-e-Bab-Dummadye. We an nonikidse, ar napira be anga ibmar-imakoye be nue-sogele,
GEN 24:43 Bab-Jehováʼye, an wilesakwaa an bese egisye. Emi dia-naba an siidgi, weyob ibmar-gubi an abeye: Yagwa-gwensak dii-weenonikoedi, an ega sogoedga, ‘wis be-buglu be odeye, adi, an dii gobegarye.’
GEN 24:44 A-yagwa weyob an-abinsaalile: ‘Dii be gobye, be-moli-yargan-muremaladga dii an ukmogoye.’ Agi an wisguoed, a-yagwa be-mai-Isaac-e-omega-guega be susye.
GEN 24:45 ”Bab-Dummadga weyob an sogsiid amba yoo an obeloge, Rebeca e-gukingi buglu-sii-daniki an dakalid. Dii-weegala diase aideded. Rebeca dii-wesgu, an ega sokalid: ‘Wis be anga dii udaye.’
GEN 24:46 “Rebeca yog e-buglu odear imaksad. Geb degi, anga sogded: ‘Dii be gobe, degine, be-moli-yargan-muremaladga dii an ukmogoed.’ Rebeca anga dii uksad, degine, an-molimarga dii uksabalid.
GEN 24:47 ”Geb degine, an ese egichided: ‘¿Be doa-sisgwa?’ ”Bunagwa an-abin imaksad: ‘An Betuel-sisgwaye. An-babde Nacor-machiye, Milcaʼbo baksadye.’ ”Geb degine, an ega e-asugi olasu yosad, geb deginbali, e-sakwamargi sakwagi-nasikleged an ega nasiksabalid.
GEN 24:48 Geb degi, yokorgi sindigar an sigisad. Geb degine, Bab-Jehováʼse an goted, Bab-Jehová-nug an odummoded. Bab-Jehová an-dummad-Abraham-e-Bab-Dummadga gumogad. A-e-nug an odummoded, igar-nuedba an-senonikidba an e-nug odummoded. Adi, an-dummad-e-urba-e-sisgwa an-dummad-machi-e-omega guegar.”
GEN 24:49 Abraham-e-mai sogdebalid: —Ar emigindi, be anga nue sogmalo, an-dummadgi bemar nued, degi, napiragwadgi binsaodibe. Ar deyobsulile, bemar nue anga sogmarbalo, adi, an wisgubaloed, igi an imakoe.
GEN 24:50 Geb degine, Labán, Betuel-ebo abin-sogdemalad: —We-ibmar bela Bab-Jehováʼgi danikid. Degisoggu, geg anmar bega soged eyeye, geg an bega sogbalid surye.
GEN 24:51 Wegi Rebeca gwichi, be sede. Bab-Jehová-sogsadba, Rebeca be sedo, adi, be-dummad-machi-e-omega guegar.
GEN 24:52 Abraham-e-mai deyob-ega-soge-itosgu, Bab-Jehová-asabin yokorgi sindigar sigided, napase e-bebe-ebulegedse dulluu imaksabalid.
GEN 24:53 Geb degine, Abraham-e-mai ibmar-bukidar onosad: Olomar, manimar, degi, mormar. Geb Rebecaʼga uksad. Deginbali, Abraham-e-mai Rebeca-e-susga, degi, e-nanga ibmar-bukidar binsa uksabalid.
GEN 24:54 A-sorbali, Abraham-e-mai, degi, eba-gudidimalad mas guchamalad, gobsamalad, degine, geb gabismalad. Oibosgua, Abraham-e-mai gwisgusgua, sogded: —Emi, anmar gannar an-dummad-negse-naega be anmar-imaksun.
GEN 24:55 Ar Rebeca-e-sus, degi, e-nana, sogdemalad: —Bunagwa anmar-walik napi-ibambe (10) gudii guoye. Geb a-sorbali, naoye.
GEN 24:56 Abraham-e-maidi abin-sogded: —Melle bar an-igar gamalo. We-an-bese-nonikidi Bab-Jehová bela ibmar-nueganbi-guega imaksad. Degisoggu, gannar an-dummad-negse-naed be an-imakmarsun.
GEN 24:57 Geb degine, Abraham-e-mai-abin sogdemalad: —Anmar bunagwase gormalo, ar bunagwade igi sogdamogodibe.
GEN 24:58 Rebecaʼse gochamalad, ese egisdemalad: —¿Emisgwa we-macheredba be nabie? Bunagwa abin-sogded. —Eye, an nabie.
GEN 24:59 Geb degine, Rebeca-barmismarsunnad, degi, ome-gusgu-Rebeca-akwedidaedi eba nadmogad. Abraham-e-mai, degi, eba-gudidimalad nadmarmogad.
GEN 24:60 Rebeca-e-gwenadgan Rebecaʼgi ise-nued binsadmalad, weyob ega sogdemalad: “Buna, bela-bela-dulemar-mergued-nanga be gusun. Be-wagana, e-isdarmalad-neggwebur egadgaguega imaksun.”
GEN 24:61 Geb degine, Rebeca, degi, Rebeca-e-maimar moli-yargan-muregedgi nakwismarsunnad, Abraham-e-mai-sorba nadap gusmalad. Weyobi, Abraham-e-mai Rebeca-sesa nadsunnad.
GEN 24:62 Deunni, Isaacʼdi dia-Lajay-Roíʼye-nugadse-gudii danikid, ar ade, Neguevʼye-neg-nugadgi maid.
GEN 24:63 Isaac deunni sedogidbali binsa sapurba wis garmakdii sanaded. Agi dakalid, moli-yargan-muremalad daniki.
GEN 24:64 Rebeca atakdemogu, Isaac-dani dakalid. Agine, Rebeca, moli-yargan-mureged-birgi-siidgi aideded.
GEN 24:65 Geb degine, Abraham-e-maise egichided: —Dule sapurba anmarsik-danikidi, ¿we doa-dule? Abraham-e-mai Rebeca-abin sogded. —We an-dummadi. Geb degi, Rebeca e-muswe susad. Geb e-wagar odukusad.
GEN 24:66 Geb degine, Abraham-e-mai e-ibmar-imaksad bela Isaacʼga sogsad.
GEN 24:67 Geb degi, Isaac e-nan-dordonegyaba Rebeca-sesad. Agi, na nikusmalad. Geb degine, Isaac Rebeca-nue-sabe gusad. Isaac, Rebeca-nikadba yeer-itodii gusad, a-ulale, e-nan-Sara-burgwisadgi wis baisur-itosad.
GEN 25:1 Abraham ome-baid-nikusbalid, a-ome Ceturaʼye nugad.
GEN 25:2 A-omebogwa, mimmigan-nikusad wemalad: Zimram, Jocsán, Medán, Madián, Isbac, Súa.
GEN 25:3 Jocsán-e-masmala, wemalad: Seba, Dedán. Dedán-e-waganmar, wemalad: Asurim-dulemar, Letusim-dulemar, Leumim-dulemar.
GEN 25:4 Madián-e-masmaladi, wemalad: Efa, Efer, Hanoc, Abida, degi, Elda. Bela-wemala Cetura-e-wagan gumalad.
GEN 25:5 Abraham bela ibmar-nikadi e-machi-Isaacʼga bela uksad.
GEN 25:6 Abraham omegan-baiganba-mimmi-nikusmaladgardi, unnila ibmar ega wis ichesaar binsa uksad. Amba Abraham dula-gudigua, e-mimmigan-baigan e-machi-Isaacʼgi dikasur dad-nakwedsik barmisad.
GEN 25:7 Abraham birga-dulabaabak-gakambe-gakatar-sergu (175) megisad.
GEN 25:8 Nue-selebaa-mai burgwisad, ar ade, bato burgwedginmogad. Deyob na e-sergan-burgwarmamaidse megidapmogad.
GEN 25:9 E-masmala, Isaac, degi, Ismael, Mamre-dad-nakwedsik akwasaila-ollor-siid-Macpelaʼye-nugadgi, Abraham-digsamalad. A-nainude, Efrónʼgadinad. Efrónʼde Zohar-machid, Het-duled.
GEN 25:10 We-nainu, Abraham Het-dulemarse baksad. We-akwasaila-ollor-siidgi e-ome-Sara-dikarba Abraham diglesad.
GEN 25:11 Abraham-burgwisad-sorba, Bab-Dummad Isaacʼgi ise-nued binsasad. Isaacʼde dia-naba megidapid. We-diade Lajay-Roíʼye nugad.
GEN 25:12 Ismael, Abraham Agarʼbo-machi-baksadid. Agarʼde, Sara-e-maid, Egipto-duled.
GEN 25:13 Ismael-e-masmala e-gwalulesadba ilemakar naid. Weyob nugmalad: Nebaiot. A e-machi-dummad, geb a-yarba, Cedar, Adbeel, Mibsam,
GEN 25:14 Misma, Duma, Massa,
GEN 25:15 Hadar, Tema, Jetur, Nafis, degi, Cedema.
GEN 25:16 Wemala, Ismael-e-masmala-warambe-gakabogwad-e-nugmalad (12). Na megismaladgi, e-nugba neg onugsasmalad. Ar wemala, e-sordamar-e-dummadga gusmarbalid.
GEN 25:17 Ismael birga-dulanergwa-gakambe-gakagugle-nikadgi (137) burgwisad. Deyob e-sergan-burgwarmamaidse megidapmogad.
GEN 25:18 Ismael-e-wagana Egipto-yar-asabin, Havila-yar, degi, Shur-yar-abargi, Asiria-yar-igarba, ambikudapmalad. Amba e-gwenadgan egi gwisgunanaigus-inigwele, agi megidapmalad.
GEN 25:19 Abraham-machi-Isaac-e-igar weyobdo. Abrahamʼga e-machi-Isaac gwalulenonikid.
GEN 25:20 Isaac birga-dulabo-nikadgine (40), Rebeca-nikunonikid. Rebecaʼde, Betuel-sisgwad. E-susdi, Labánʼye nugad. Amarde, Arameo-dulemalad, Padan-Aram-neggweburgi bukwamalad.
GEN 25:21 Rebeca geg mimmi-baked. Degisoggu, Isaac Bab-Jehováʼse ega gochad. Bab-Jehová Isaac-ese-gochad itosad. Agi, Rebeca gurgin-nika gunonikid.
GEN 25:22 Ar warbogwadi amba sapidukugi-mamaiunni, bato gaemamaid. Agi, Rebeca binsaded: “¿Ar ibiga anga weyob gunai? Degisoggu, a-ular, Bab-Jehováʼse igar-aminad gusad.”
GEN 25:23 Bab-Jehová Rebeca-abin sogded: “Be-sapi-dukugine, neggwebur-sogabo danikid, amba yoo napnegse-aideged-idu, bato neggwebur-sogabogwad na ebo gae-nanaid. Gwensak, baidba bur-dutusur guoed, ia, urba-sogedba nanadii guoed.”
GEN 25:24 Rebeca-e-nugued-ibagan warmaknonikid. Susugwa ega warbo uklenonikid.
GEN 25:25 Gebe-aidenonikidi saila gisii nikad, bela wawaadikid. A-susugwa Esaúʼye onugsasmalad.
GEN 25:26 Geb a-sorba, e-urba e-argan-nailikgi e-ia-maligi-akanai aidenonikid. A-ulale, Jacobʼye onugsasmalad. Deunni, Isaac birga-dulapaa (60) nikad.
GEN 25:27 Masmala-warbogwad dungudmalad. Esaú ibmar-make-duledid. Sapurba-gudiile, yeer-itodaed. Jacobʼdi dule-boo-daedid. Neggi-gudiile, bur-yeer-itodaed.
GEN 25:28 Isaac bur bule Esaú-sabed, ar ade, Esaú-ibmar-maked-gunned yeer-itodaed. Ar Rebecaʼdina bur bule Jacob-sabmogad.
GEN 25:29 Ibagwengine, Esaú sapurba-gudii, nue-geggus nonigua, Jacob ingwa-burwi-gisi-dunai daknonikid.
GEN 25:30 Geb Esaú, Jacobʼga sokalid: —An ukudmaada itoged, wis be anga we-ibmar-gisi-dunaid be udage. (A-ulale, Esaú, Edomʼye bilebalid).
GEN 25:31 Jacob abin-sogded: —Nabirdo. Degiile, ar be machi-sailaginedsoggu, bela-bega-ibmar-uklegoed, be anga udagodo.
GEN 25:32 Esaú abin-sogded: —An ukudba burgwedanisoggu, anga-bela-ibmar-uklegoed, an bega ukodo. ¿Ar ibiga bar an we-ibmar abesunna? An abesuli.
GEN 25:33 Geb Jacob sogded: —Emisbinne, ise-sogar be anga sogdo, deyob an bega ibmar ukedseye. Esaú abin-sogded: —Ise-sogar an bega sogye, deyob an bega ibmar ukedseye. Esaú, machi-sailagined-guedgi-bela-ega-ibmar-uklegoed e-urba-Jacobʼga uksad.
GEN 25:34 Geb degine, Jacob, Esaúʼga ingwa-burwi-gisi-dualed madubo ega uksad. Esaú masgunned-bergusgua, degi, gobsabargua, gwisgusad, geb nadegusad. Weyob, Esaú na machi-sailagined-guedgi bela-ega-ibmar-uklegoedi, baisur-daksad.
GEN 26:1 A-ibagangine, ukud-dummad nagunonikid, igi Abraham-ibagangi nagusmoga deyob nagunonimogad. A-ulale, Isaac Gerar-neggweburse nade gusad. Deunni, Filistea-dulemar-e-rey-Abimelec, agi maimogad.
GEN 26:2 Agine, Bab-Jehová Isaacʼse magarosad, ega sogded: “Melle be Egipto-yarse nao. Bia an bega sogoe, agi be megoed.
GEN 26:3 Ar emigindi, wegi sikwas be mego. An beba gudii guoed, degine, ise-nued an begi binsaoed. Ar ade, begala, degine, be-wagangala we-yar an ukoed. Ar igi be-bab-Abrahamʼga ise-sogar an sogsa, deyob an imakedsegad.
GEN 26:4 Be-wagan ichesur niisgwamar-nibneggi-merguedyob an imakoed. Be-wagangala bela we-yar ega an ukoed. Deginbali, bela dulemar-we-napneggi-bukmalad be-wagwaba ise-nued an egi binsaoed.
GEN 26:5 Ar ade, Abraham an-sogedba, an-igar-maidba, an ega ibmar-sogsadba, an-ibmar-odurdakedba nanadii gusad.”
GEN 26:6 Geb degine, Isaac Gerarʼgi bessunnad.
GEN 26:7 Dulemar-Gerarʼgi-bukmalad ese egichiarmargu, we-Rebeca, doaye, Isaac dobe-soggusad, Rebeca e-omeye. Degisoggu, sogdedaed, Rebeca e-bunye. Ar Rebeca yeerdaklesoggu, Isaac binsaed, abakalegi machergan-we-yarginmalad Rebeca-ular an-oburgwiarmalarye.
GEN 26:8 Ibagan-nasad-sorbali, ibagwengi Isaac Gerar-neggweburgi-maidgine Filistea-dulemar-e-rey-Abimelec yawagak-bipigi-atakgwichidgi dakalid, Isaac e-ome-Rebeca-ibe wagar unai.
GEN 26:9 Geb degine, Abimelec, Isaacʼbina gochad, ega sogded: —Etto, ¿Rebeca, we be-ome? ¿Ar ibiga be anmarga sogsa, Rebeca an-bunye? Isaac abin-sogded: —Ar ade, an binsasad, abakalegi we-ome-ular an-oburgwiarmalarye.
GEN 26:10 Ar Abimelecʼdi abin-sogded: —¿Ar ibiga-wede deyob be anmar-imaksa? Machered-gwensak, we-neggweburgined ar be-omese gochana, isguega be anmar-imaksanad.
GEN 26:11 Geb degine, Abimelec bela e-sordamarga igar mesisad: —Ar dule-wargwen we-machered-ibgwensur-imakalile, igidibe, e-omese achaalile, we-dule oburgwilegoye.
GEN 26:12 A-birgagine, Isaac na e-maidgi ibmar-gwag-digsadi bela-belad nue wesad, ar ade, Bab-Jehová ise-nued egi binsasad.
GEN 26:13 Isaac mani-ibed gunonikid, ibmar-bukidar-nika gunonibalid:
GEN 26:14 Sibad-wawaadmar, moli-bebe-nikamalad, degi, maigan ichesur-nika gunonikid. A-ulale, Filistea-dulemar egi nobguarmalad.
GEN 26:15 A-ular, Filistea-dulemar diamar omulusmalad, napa egi eosmalad. A-diamarde, Isaac-e-bab-Abraham dula-gudigua, Abraham-e-maimar akwismalad.
GEN 26:16 Geb degine, Abimelec, Isaacʼga sogdesunnad: —Ar be anmarba bur gannarbasoggu, wegi-maid be nae.
GEN 26:17 Geb Isaac Gerar-nebase nade gusad. Geb agi megidapsunnad.
GEN 26:18 Abraham dula-gudigua, diamar akwisad. A-diamar Abraham-burgwisgu, Filistea-dulemar omulusad. A-diamar gannar Isaac akwisad. Isaac a-diamar e-bab-onugsasadba gannar onugsasmogad.
GEN 26:19 Ibagwengine, Isaac-e-maimar nebagi dia-akwinanaigua, dii-aryomai amismalad.
GEN 26:20 Ar Gerar-nebagi-sibad-wawaad-edarbedimaladdi Isaac-sibad-wawaad-edarbemalad-ebo uluarmalad, ar ade, sogmalad: We-dii anmargadye. A-ulale, Isaac we-dia Esekʼye onugsasad. A-sogleged: Urwedye. Ar ade, a-diabina ulusmalad.
GEN 26:21 A-sorbali, Isaac-e-maimar dia-baid akwismarbalid. Gerar-dulemar a-diabina uluarmarbalid. A-ular, Isaac a-dia Sitnaʼye onugsasad. A-sogleged: Na isdar-dakmaladye.
GEN 26:22 Agi, Isaac dikasur nadsunnad. Agi, dia-baid akwidapid. Ar we-dia-binardi ulussurmarsoggu, Isaac Rehobotʼye dia-onugsasad. A-sogleged: Na e-itoleged-gudiguedye. Ar ade, soged: “Ar emigindi, Bab-Jehová anmar nabir-itodiguega, anmarga we-neg uksad, adi, anmar wegi nasguegar.”
GEN 26:23 Isaac agi-mai, Beersebaʼse nade gusad.
GEN 26:24 A-mutikidgine, Bab-Jehová Isaacʼse magarosad, ega sogded: “Ani, an be-bab-Abraham-e-Bab-Dummadid. Melle be dobguo, an beba gudiguad. An-mai-Abraham-ulale, begi ise-nued an binsaoed, wagan-bukidar an bega ukoed.”
GEN 26:25 Agine, Isaac ibmar-ogumakar-ukleged-aila sobsad. Geb Bab-Jehováʼse gochad. Beersebaʼgi Isaac megidapid. Geb e-maimar agi dia akwismalad.
GEN 26:26 Ibagwengine, Abimelec Isaacʼbo sunmakega Gerar-akar nonikid. Eba e-ai-Ahuzat nonimogad, degi, Abimelec-e-sordamar-e-dummad-Ficol nonimogad.
GEN 26:27 Isaac Abimelecʼga sogded: —¿Ibiga be an-dakdanimala? Ar bemar an-abesulid, degine, bemar-yargi be an-ononnosmalad.
GEN 26:28 Abimelec Isaac-abin sogded: —Bab-Jehová beba gudigu anmar daked. Emigi, anmar bega sogbied, anmarbo be igar mesye. Weyob anmar igar mesmalodo:
GEN 26:29 Be anmargi ichakwa daosulid. Anmar begi ichakwa daosurmogad. Ar anmar gusgu nued begi damalad, anmar nuedgi be-barmiarmalad. Ar emide, Bab-Jehová begi ise-nued binsamaid.
GEN 26:30 Geb degine, Isaac Abimelecʼga iba-dummad onosad. Emar nue-mas guchamalad, degi, nue-gobsamarbalid.
GEN 26:31 Oibosgua, wakudaryalabali gwisgusmalad, ise-sogar na ega sogsamalad, anmar we-ibmar-sognaid imakedseye. Geb agine, Isaac Abimelecʼga sogded, degimaloye, geb Abimelec-e-sordamala Isaacʼga sogdemarmogad, degimaloye. Degine, aigwale na egi bangudmalad.
GEN 26:32 Amba a-ibagine, Isaac-e-maimar Isaacʼga gaya-nued senonimalad, ega sognonimalad: Anmar dia-akwinanaidgi dii amismarye.
GEN 26:33 Isaac a-dia Sebaʼye onugsasad. A-ulale, a-neggwebur deyob Beersebaʼye nugad.
GEN 26:34 Esaú birga-durbo-nikadgine (40), Judit-nikusad. Juditʼde Beeri-sisgwad, Het-duled. Esaú, Basemat-nikusbalid. Basematʼde Elón-sisgwad, amba Heteo-dulemogad.
GEN 26:35 We-omegan-warbogwad, Isaacʼga, degi, Rebecaʼga nunmaked-dummad onosad.
GEN 27:1 Isaac bato nue selebagusad, degi, aku-atakgusbalid. Ibagwengine, Isaac, e-machi-dummad-Esaúʼse gochad. Geb ega sogded: —¡Machi! Esaú abin-sogded: —Degite. ¿Ibua?
GEN 27:2 Geb Isaac sogdebalid: —Mag be an-daked, an nue-selebagusad. Ukiar sunna an burgwed.
GEN 27:3 A-ular, sapurba-nabi an be-abedo. Anga ibmar-maknaega warsi be sedo, sigu be sedbalo.
GEN 27:4 Ibmar be maksale, an mas-gunbidaedyob ise-nue-imakar be anga mas saoed. Geb we-mas-gunnega be anga sedagoed. A-sorba, an-burgwed-iduar, ise-nued-an-begi-binsaedgi an bega ibmar sogoed.
GEN 27:5 Isaac-Esaúʼga-ibmar-sogsadi, Rebecaʼdi bela itosad. A-ular, Esaú sapurba e-babga ibmar-maknadgu,
GEN 27:6 a-sorba, Rebeca e-machi-bipigwad-Jacobʼga sogded: —Nue be an-itogo. Be-bab, be-ia-Esaúʼga sunmakgwisgu, ega-soge an itosad:
GEN 27:7 ‘Sapurba be ibmar-maknaye, a-mas ise-nue-imakar anga be saoye. Geb an burgwed-iduar Bab-Jehová-asabin, an-begi-ise-nued-binsaedgi an bega ibmar sogoye.’
GEN 27:8 Machi, degisoggu, nue be an-itogo. An-ibmar-bega-sogoedba, bela be imako.
GEN 27:9 Degisoggu, sibadmar-bukwadse be nae, sibad-mimmi-senigwad-warbo-bur-nuedid be anga sedago. Be-bab mas-gunbidaedyob an ise-nue-imakar an ega mas saoed.
GEN 27:10 Geb degine, be-bab a-mas-gunnega ega be sedoed. Adi, be-bab e-burgwed-iduar, ise-nued-binsaed bega sogoed.
GEN 27:11 Ar Jacobʼdi e-nan-Rebecaʼga sogded: —Ar nabir be sogendo. Ar an-iadi wawaad. Andi degisulid.
GEN 27:12 Ar an-bab an-abagan-ebualile, mag an-itogoed, ande an Jacobʼad. Geb angi binsaoed, an egi dodonaiye. Ar bur an-ukabsaoed, ise-nued-angi-binsaed bar anga sogosulid.
GEN 27:13 Ar e-nandi Jacob-abin sogded: —Machigwa, be ukabsaleye sogele, ani an ukabsalegoed, bedi ollordo. Degisoggu, an-ibmar-bega-sognaidba be imake. Sibad-mimmi-senigana-warbo be anga sedage.
GEN 27:14 Jacob sibad-mimmi-seniganabina naded. Geb e-nanga senonikid. Agi e-nan Isaac-mas-abedaedyob sibad-e-san ise-nue-imakar imaksad.
GEN 27:15 Geb degine, Rebeca, e-machi-dummad-Esaú-e-mor onosad. A-morde bur mor-nuedid, e-neggi ise-nue-saboar bukwad. Agine, Rebeca e-machi-bipigwad-Jacobʼga a-mor-yoega uksad.
GEN 27:16 Geb deginbali, Rebeca sibad-bipi-e-uka-wawaadgi Jacob-e-surgan, degine, e-dukarba obipirmaksad, bia absarsuli-nanaedgi nasiksad.
GEN 27:17 Geb degine, Rebeca mas ise-nue-saale Jacobʼga uksad, adi, Jacob e-bab-Isaacʼga ukegar. Geb madu-imaksadi ega uksabalid.
GEN 27:18 Geb degine, Jacob, e-bab-siidse dogdapid, ese gordapid: —¡Baba! Isaac abin-sogded: —An wegi sii. ¿Be biti-an-machi?
GEN 27:19 Jacob abin-sogded: —An, Esaú, be-machi-dummad. Be anga-sogsadba bato an imaksad. Baba, be-dage. Wis wese be sigdage. An-ibmar-maksad be gundage. Geb be ise-nued-angi-binsaed be anga sogoed.
GEN 27:20 Geb degine, Isaac e-machiga sogded: —Machi, ¿igi nabir bato be ibmar abingusbinne? Jacob e-bab-abin sogded. —Bab-Dummad-Jehová gwae-gwae ibmar-abinguega an-bendaksad.
GEN 27:21 Ar e-bab-Isaacʼdi abin-sogded: —Anse be dage, an be-ebubie, bule be an-machi-Esaú-sunnaddibe.
GEN 27:22 Jacob e-bab-walikaa naded, adi, e-ebugegar. Geb degine, Isaac sogded: —Be-sunmaked Jacobʼyob be sunmaked. Be-sakwamardi Esaú-sakwamar an itoged.
GEN 27:23 Isaac Jacob-e-sakwamar e-ia-Esaú-sakwamaryob absar yaisur-itossoggu, Isaac magar-itossulid. A-ular, Isaac ise-nued-binsaed Jacobʼga soged-iduale,
GEN 27:24 gannar Jacobʼga sogded: —¿Ar nue be an-machi-Esaú-sunnadi? Jacob abin-sogded: —Eye, an Esaú-sunnadi.
GEN 27:25 Geb degine, e-bab Jacobʼga sogded: —Machi, anga be mas dake, adi, be-ibmar-maksad an gunnegar. Geb a-sorba, an-ise-nued-begi-binsaed an bega sogoed. Jacob e-babga mas daksasunnad, degi, ega vino senonibalid. Isaac nue-mas-guchad, degi, nue-gobsabalid.
GEN 27:26 Geb degine, Isaac Jacobʼga sogded: —Machi, anse be dage, be an-wagar udage.
GEN 27:27 Jacob e-bab-wagar-uega e-bab-walikaa nonigua, e-bab, Jacob-mor-yoid usad. Geb degine, Isaac, Jacobʼgi-nued-ise-binsadedba, ega weyob sogded: “Eye, weyob an-machi-Esaú yapanned. E-yapannedi sapuryob yapanned Bab-Jehová sapurgi ise-nued binsasadyob yapanned.
GEN 27:28 Bab-Dummad bega nibneggi dii-boo-mimai saoed. We-napneggi nainumar-nuegan bega ukoed, orosgi-dakleged-e-gwag-bukidar bega ukoed, vino-bukidar bega ukoed.
GEN 27:29 Dulemar-yar-baid-baidgi-bukmaladi bukidar bega arbamalaga gumaloed, dulemar-akar-akar-soga-iliba be-asabin yokorgi-sindigar sigmaloed. Be-gwenadgan-e-iduedga be guoed. Be-nan-e-masmala be-asabin bela sindigar sigmaloed. Dulemar-be-ukabsamalale, amar ukabsalemogoed. Dulemar-ise-nued-begi-binsamalale, amargi ise-nued binsalemogoed.”
GEN 27:30 Isaac, ise-nued-binsaed-Jacobʼga-sognaid bergusgua, Jacob nodeyalaba, Esaúʼdi sapurba-ibmar-makdiid dognonikid.
GEN 27:31 Esaú mas nued-gulle e-babga imaksamogad. Geb e-babga sesa gusad, ega sogdapid: —Baba, be gwisgu. Be-machi, bega ibmar-maksad be gunne, be-angi-ise-nued-binsaed be anga sogsun.
GEN 27:32 Geb degine, Isaac, Esaúʼga sogded: —¿Be doa-dule? Esaú abin-sogded. —Ani, an Esaú, be-machi-gebesailagined.
GEN 27:33 Isaac geger-itoged, nue-wawanmake sogded: —Degite, ¿wede doa be-iduar ibmar-maksad, yeer-gulle anga senonisunna? Be-nonikid-iduar, dule-anga-mas-senonikid bela an guchad. Bato be-iduar-dule-arbidga, egi ise-nued-binsaed bela an ega sogsad. Ar emigindi, bato egi ise-nued binsalessunnad. Geg bar an oakaloged.
GEN 27:34 Esaú, e-bab weyob ega soge itosgu, nue-nunmak binnasur ise-ogormakar boded. Geb e-babga sogded: —¡Baba, ise-nued-binsaed be anga sogmoga!
GEN 27:35 Ar Isaacʼdi e-machi-abin sogded: —Be-urba bato anse arbid. An-yardaksad. Ise-nued-binsaleged begadinad, be-ibe atursasad.
GEN 27:36 Geb Esaú sogded: —¡Ar nabir ega Jacobʼye nug nasiksamala! ¡Ar emide ilabogus an-yardakdanikid! Gebe unni, an machi-sailagined-guedba anga ibmar-uklegoenad an-ibe susad. Emide, angi ise-nued-binsaleged an-ibe susbalid. Esaú sogdebalid: —Baba, degite, angi ise-nued-binsaleged, ¿wis be anga obessuli?
GEN 27:37 Geb degi, e-bab-Isaac abin-sogded: —Be-dummadga-gued-igar Jacobʼga an uksad. Bela e-gwenadgan e-maiga-gued-igar, an ega uksabalid. ”An-ise-nued-egi-binsaedba, an ega sogsabalid: Bitigi orosgi-dakleged-bukidar nikuena gadinye, degine, vino-bukidar nikubalina gadinye. Ar emigindi, machi, ¿igi-bar-an-saosunna?”
GEN 27:38 Esaú e-babgi alamaknai gusad: —¿Baba, be-ise-nued-binsaed wis soggwensaar geg be anga soge? ¡Be angi ise-nued binsamoga! Degine, Esaú gannar ise-ogormakar bodbalid.
GEN 27:39 Geb, Isaac na e-machi-Esaúʼga sogded: “Napaneg-nuedgi be megosulid, degine, nibneggi-boo-batedi sate be gubaloed.
GEN 27:40 Be-es-suidgi na be san bendakdii guoed. Degine, be-urba-e-maiga be gubaloed, ar be dutusur-gusale, geb be-urbagi be nooed.”
GEN 27:41 Weyob-gusad-akale, Esaú, Jacob-sae-dakded, ar ade, e-annik ise-nued-egi-binsaleged egwachad. Degisoggu, Esaú binsadisunnad: “Emisgwasaar an-bab-burgosoggu, aba anmar bukib-binsadii guoed. A-sorbali, an-urba-Jacob anse oburgwilegoye.”
GEN 27:42 Rebeca wisgusgu igi e-machi-dummad-Esaú binsadii, e-machi-bipigwad-Jacobʼse gochad, ega sogded: —Be-ia-Esaú be-oburgwebi gudiid. Yamo baisur-itogeyob gudiid.
GEN 27:43 Degisoggu, machi, nue be an-itogo: Emisbinne, Harán-neggweburse an-sus-Labán-e-negse be wakinne.
GEN 27:44 Agi, be-ia sae-itoged baisur-ito-gusadse be undar gudii guoed.
GEN 27:45 Be-ia-Esaú ibmar-iegedse be gudii guoed. A-sorba, be gannar-dagega an be-owisogoed. Ar iba-galagwengi an-masmala-warbobela an surgubisulid.
GEN 27:46 Geb degine, Rebeca e-sui-Isaacʼga sokalid: —Esaú, Het-dule-e-sisgwa-nikusad-ular, an budar-itogusad. We-Canaán-yargi Het-dulemar-bukwad-e-sisgwa-wargwen-weyob-damogadi Jacob nikusale, ar an bur burgwed, nabirid.
GEN 28:1 Geb degine, Isaac Jacobʼse gochad, geb egi ise-nued binsasad. Geb ega sogded: —Melle we-yar-Canaánʼgined-ome be nikuo.
GEN 28:2 Padan-Aram-neggweburse, be-nan-e-bab-Betuel-negse be nao. Agi, be-nan-e-sus-Labán-e-sisgwa be nikuo.
GEN 28:3 Bab-Dummad-Bela-Gangued-Nikad ise-nued begi binsaena gadin, degine, bukidar-mimmigan bega ukbalina gadin, adi, begi dulamar-bukidar ainiegar.
GEN 28:4 Bab-Dummad Abrahamʼgi ise-nued binsasad, begi, degi, be-wagangi ise-nued binsamogana gadin. Adi, we-yar-anmar-egi-gudiid begadga guegar. We-yarde, Bab-Dummad, Abrahamʼga uksad.
GEN 28:5 Weyobi, Isaac Padan-Aram-neggweburse Jacob-barmisad. Jacob, Labán-negse modapid. Labánʼde Arameo-dule-Betuel-e-machid, Rebeca-e-susud. Rebecaʼde Jacob, degi, Esaú-e-nanad.
GEN 28:6 Esaú daksad, e-bab-Isaac Jacobʼgi ise-nued-binsaleged ega sogsa. Geb degine, Padan-Aram-neggweburse ome-nikuega Jacob-barmisbali. Esaú daksabalid, e-bab Jacobʼgi ise-nued-binsasgu, ega sogsagusad, melle Canaán-ome be nikuoye.
GEN 28:7 Jacob, e-bab, degi, e-nan ega sogsadba imaksad. Jacob Padan-Aram-neggweburse nade gusad.
GEN 28:8 Weyob-gusadba, Esaú magar daksad, e-bab Canaán-omegan-nabir gwen daksuli,
GEN 28:9 a-ulale, Esaú Ismael-daknadgusad. Ismaelʼde Abraham-e-machid. Esaú Ismael-e-sisgwa-Mahalatʼye-nugad nikusad. Mahalatʼde Nebaiot-e-bunad. A-iduale, Esaú bato Canaán-omegan nikumaibalid.
GEN 28:10 Jacob, Haránʼse naega Beersebaʼgi node gusad.
GEN 28:11 Nadapgu, bia ega neg-mutikgude, agi gabided. Nono nakwis-megegala akwa amisad, e-nono-urba siegar. Agi, gabided.
GEN 28:12 Geb Jacob, gabdakargu, dakalid, arsan napagi-gwichidi nibnegse-warmakgwichi. A-arsangi Bab-Dummad-baliwiturmar nakwemamai, degine, aidemamai daksad.
GEN 28:13 Jacob daksabalid, Bab-Jehová arsan-birgi gwichi. Bab-Jehová ega sogded: “Ani, an Bab-Jehová, be-dad-Abraham-e-Bab-Dummad, be-bab-Isaac-e-Bab-Dummad. Begala, degine, be-wagangala, be-gabmaid-napanega an ukoed.
GEN 28:14 Be-wagan we-napneg-ukub-merguedyob bela-bela mergu guoed. Degine, be-wagan dad-nakwedsik, dad-argwanedsik, dad-nakwed-argan-nuedsik, dad-nakwed-argan-sapiledsik bela aisakis ambikuoed. Degine, bebali bela dule-yar-baid-baidgi-bukwamalad, degi, be-waganbali, egi ise-nued binsalegoed.
GEN 28:15 An beba gudiguad. Bia be nade sogele, an beba gudii guoed. Gannar we-yarse be daged, an be-imakoed. An be-metosulid, bela an bega-ibmar-sogsad an imakoed.”
GEN 28:16 Jacob gabdakmaid-ataksagua, binsaded: “Nue-napiragwad. Bab-Jehová wegi gudiid an wissulinad.”
GEN 28:17 Jacob nue-dobe itoded, binsaded: “We-nega, nega-islidikidid. Wegi Bab-Dummad maid. ¡Wegi, nibnegse-doged-yawagak gwichid!”
GEN 28:18 Oibosgu, wakudaryalaba Jacob gwisgusad. E-nono-megega-akwa-ebusad susad. A-akwa ogwichisad. Geb, gwallu-wawa egi eosad, adi, oyogega, wede nue-islidikidye.
GEN 28:19 Iduale, agi neggwebur-siidi, Luzʼye nuganad. Jacobʼdi a-neggwebur Betelʼye onugsasad.
GEN 28:20 Agi, Jacob weyob ise-sogar sogsad: “Ar Bab-Dummad anba gudiguale, an emi-nadapidgi an-edarbele, anga masgunned ukele, degi, anga mor-yoed ukbalile,
GEN 28:21 degine, an-bab-negse nuedgi, ise-bendaklegaledgi gannar an aibilisale, ar deyobile, Bab-Jehová an-Bab-Dummadga an imakoed.
GEN 28:22 ”We-akwa an ogwichisad, we Bab-Dummad-e-negga guoed. ”Bab-Dummad, bela ibmar-be-anga-ukoedi, ambegi gwensak (10%) an bega ukoed.”
GEN 29:1 Jacob dulemar-dad-nakwedsik-bukmaladse nade gusbalid.
GEN 29:2 Sapurba-nadapidgi dia sii dakalid. Ar sibad-wawaadmar a-dii gobdamarsoggu, a-dikarba sibad-wawaadmar-danapaa obunnobukwa dakdapid. Dia-birgindi, akwa-dummad siid.
GEN 29:3 Bela sibad-wawaadmar danar ase ambikunonikile, sibad-wawaad-edarbemalad akwa-dummad onir damalad, adi, diigi sibad-wawaad-ogobmalagar. Geb a-sorbali, gannar akwa-dummad dia-birgi sidamalad.
GEN 29:4 Jacob sibad-wawaad-edarbemaladse egichided: —¿An-aimar, bemar biarmaladi? Abin-imaksamalad: —Anmar Harán-neggweburginedi.
GEN 29:5 Jacob amarga sogdebalid: —¿Bemar, Nacor-e-machi-Labán-mag-dake? Abin-imakdemalad: —Eye, anmar mag dake.
GEN 29:6 Jacob ese egisdebalid: —¿Labánʼde nued gudii? Sibad-wawaad-edarbemalad abin-imakdemalad: —Eye, Labán nued gudii. Be dakena, e-sisgwa-Raquel e-sibad-wawaadmar sedanikid.
GEN 29:7 Geb degine, Jacob sogded: —Sibad-wawaad e-urbilegedgi-urbelegegala amba dad-dikasulid. ¿Ar ibiga bemar geg sibad-wawaadmarga dii ukmala? Geb sorbali, bemar sibad-wawaadmar-gagan-mamalaga gannar sedmaloed.
GEN 29:8 Ar sibad-wawaad-edarbemaladdi abin-sogdemalad: —Geg anmar deyob imakmalad. Anmar gusgu bela sibad-wawaadmar-danar-ambikued edarbedamalad. Adi, anmar akwa-dummad-dia-edisiid oniregar. Geb anmar sibad-wawaadmar diigi ogobmaloed.
GEN 29:9 Jacob, dulemar-ebo sunmakgwisgua, Raquel e-bab-sibad-wawaadmar senonikid. Ar Raquel e-babga sibad-wawaadmar-edarbedga gudiid.
GEN 29:10 Raquelʼde, Labán-e-sisgwad. Labánʼdi, Rebeca-e-susud. Jacob, e-gilor-Labán-sisgwa Labán-sibad-wawaadmar-sedani-daksagu, dia-birgi akwa-dummad-siid-onirega nade gusad. Geb onirisgua, sibad-wawaadmarga dii uksad.
GEN 29:11 Geb degine, Jacob Raquel-wagar-udapid, ega sogega, be nued sogeye. Geb degine, Jacob binnasur boded.
GEN 29:12 Jacob Raquelʼga sogdesun, ede Rebeca-machiye. Labánʼdi e-gilorye. Geb Raquel deyob itosgu, e-babga-sogega abarmakde gusad.
GEN 29:13 Labán itoargu, e-bun-Raquel-machi-Jacobʼgi ega sunmake, agi Labán abarmakded, Jacob-abin-daknaegar. Modapgu, Jacob e-nigasoggu, ise-angaagwar Jacob-imakdapid, ei-wagar usbalid, ega sogega, be nued sogeye. Geb agine, e-negse Jacob-sesad. Geb degine, Jacob bela e-gusad-igar Labánʼga sogsad.
GEN 29:14 Labán Jacobʼga sogded: “Ar be nue anbo ablis-mesadid.” Jacob Labán-walik nii-walagwen gudii gualid.
GEN 29:15 Niigwen-gusad-sorbali, Labán Jacobʼga sokalid: —Be an-gwenad-inigwele, binsa geg be anga arbaed. Anga be soge, igi-mani be-bennukbi be an-abege.
GEN 29:16 Dakargu, Labán sisgan-warbo-nikad: Dummad, Leaʼye nugad. Bipigwaddi, Raquelʼye nugad.
GEN 29:17 Lea e-ibya mommoo dakleged. Raquelʼdi bela-bela yeer dakleged.
GEN 29:18 Ar Jacob Raquel-abearsoggu, Labán-abin sogded: —Be-sisgwa-bipigwad-Raquel an nikuegala, an bega birgagugle (7) arbaoed.
GEN 29:19 Geb degine, Labán Jacob-abin sogded: —Ar an-sisgwa dule-baidga-ukedba bur an bega uked nabirid. Degisoggu, be an-walik beedo.
GEN 29:20 Ar weyob Jacob Raquel-nikuegala birgagugle (7) arbasad. Ar Jacob nue-Raquel-abesoggu, dogdar birga-suitii itossulid.
GEN 29:21 Birgaguglegus (7) Jacob arbaedgine, Labánʼga sokalid: —Ar an bega sogsadyob Raquel-nikuega bato birgaguglegus (7) an bega arbadanisoggu, anga be Raquel-udage.
GEN 29:22 Geb degi, Labán e-neg-dikarba-neg-baidsik-mamaidse gochad, adi, e-sisgwa-sui-nikued-ibase dagmalagar.
GEN 29:23 A-mutiki, Labánʼdi e-sisgwa-Lea-sesad, Jacobʼga ukdapid. Jacobʼdi Raquelʼye biensoggu, aga Leaʼse gochasunnad.
GEN 29:24 Aginbali, Labán e-sisgwa-Leaʼga e-mai-wargwen uksad, adi, Leaʼga ibmar-imakegar. A-mai, Zilpaʼye nugad.
GEN 29:25 Neg-oibosgu, Jacob dakalid, Lea e-dikarba mai. Degisoggu, Jacob Labánʼga sokalid: —¿Igi be an-imaksa? Be angi dodo-soge. ¿Ar ande Raquelʼbina an bega arbassursi? ¿Ibiga degite be an-yardake?
GEN 29:26 Labán Jacob-abin sogded: —Wegine, anmarga-igar-maisulid, urba e-ior-idu sui-nikuoye.
GEN 29:27 Degisoggu, igar-maidba Lea bebogwa itoged-irgwen gudii guodo. Geb a-sorbali, an bega Raquel-ukbaloed, ar be soger, Raquelʼbina birgagugle (7) an bega arbabaloye.
GEN 29:28 Jacob sogsado, eyeye, ede arbaoye. Lea-nikusad-itoged-irgwenad-bergusgu, Labán Jacobʼga Raquel-uksabalid, adi, Jacob Raquel-nikuegar.
GEN 29:29 Labán e-mai-wargwen Raquelʼga uksamogad, adi, Raquelʼga ibmar-imakegar. A-mai, Bilhaʼye nugad.
GEN 29:30 Jacob Raquelʼse gochad. Jacob, Leaʼba-bur bule Raquelʼbina sogsasoggu, degidbali, amba birgagugle (7) Labánʼga arbadii gusbalid.
GEN 29:31 Bab-Jehová dakdegu, Jacob bur Lea-baisur-dake, Lea mimmi-nikuega imaksad, Raquelʼdi geg mimmi-bake imaksad.
GEN 29:32 Lea bonigwar gunonikid. Bab-Jehová-machigwa-ega-uksadi, Rubénʼye onugsasad, ar ade, soged: “Bab-Jehová wile-itodiid an-daksad. Ar emigindi, an-sui an-sabguoed.”
GEN 29:33 A-sorbali, Lea machigwa-baid-nikunonibalid. Adi, Simeónʼye onugsasad. Geb agi sogded: “Bab-Jehová an-sui-baisur-an-daked daksad. A-ular, Bab-Jehová machigwa-baid anga uksabalid.”
GEN 29:34 Lea gannar machigwa-baid-nikunonibalid. Adi, Levíʼye onugsanonikid. Ar ade, Lea soged: “An-suiba machimala-walapaagus an bakdanisoggu, ar emigindi, an-sui bur bule an walikaa guoed.”
GEN 29:35 Lea amba machigwa-baid-nikunonibalid. Adi, Judáʼye onugsasad, ar ade, Lea soged: “Ar emigindi, Bab-Jehová-nug an odummogoed.” A-sorbali, Lea mimmigan-nikued galesad.
GEN 30:1 Raquel geg Jacobʼga mimmi-bake-itoargu, e-ior-Leaʼgi nobgualid. Raquel e-sui-Jacobʼga sogded: —¿Ibiga geg be anga mimmi bake? Mimmi an abege. Be anga baksulile, an burgoed.
GEN 30:2 Jacobʼdi Raquelʼse uluded, ega sogded: —¿Ar ani an Bab-Dummadsi? Ar Bab-Dummad geg mimmi-bake be-imaksad. Ani an deyob be-imaksasulid.
GEN 30:3 Geb degine, Raquel Jacobʼga sogded: —An-mai-Bilhaʼse be gole. A-omegwa mimmigan-nikusale, an-sunnad mimmigan-nikusadyob an guoed.
GEN 30:4 Weyob Raquel e-sui-Jacobʼga e-mai-Bilha-uksad, adi, Jacob Bilhaʼse golegar. Geb degine, Jacob Bilhaʼse gochad.
GEN 30:5 Agi, Bilha bonigwar gunonikid, Jacobʼba machi-wargwen baknonisunnad.
GEN 30:6 Geb degine, Raquel sogded: “Ar Bab-Dummad anga igar-nued imaksad. Ar Bab-Dummad an ese-gordiid an-itosadba, anga machigwa uknonikid.” A-ular, we-machigwa Danʼye nugguoed.
GEN 30:7 A-sorbali, Raquel-e-mai-Bilha machigwa-baid Jacob-ebo baknonibalid.
GEN 30:8 Agi, Raquel sogded: “An-iorbo an nue-urwedii gusad, emidi an egi obichad. A-ular, we-machigwadi Neftalíʼye nugguoed.”
GEN 30:9 Lea geg bar mimmigan-bake-itoargu, e-mai-Zilpaʼye-nugad, Jacobʼga uksad, adi, Jacob Zilpaʼse golegar.
GEN 30:10 Agi, Zilpa Jacobʼba machigwa baknonikid.
GEN 30:11 Geb degi, Lea sogded: “¡Ibiyob nued angi binsalesa!” A-ulale, a-machigwa Gadʼye onugsasad.
GEN 30:12 Geb a-sorbali, Lea-e-mai-Zilpa Jacob-ebo machigwa-baid baknonibalid.
GEN 30:13 Geb agine, Lea sogded: “¡Yeer-itoleged! Emigindi, omegan sogmaloed, ande weligwar-itoye.” A-ulale, machigwa Aserʼye onugsasad.
GEN 30:14 Ibagwengine, orosgi-dakleged-trigo-weed-ibagangine, Rubén sapurba naded. Agi, sapi-bipi-sanmar mandrágoraʼye-nugad amisad. A-sapi-bipi-sanmar e-nan-Leaʼga sesad. Raquel a-sanmar-daksagu, Leaʼga sogded: —Mandrágora-e-sanmar be-machi-bega-senonikid, wis be anga udamoga.
GEN 30:15 Ar Leaʼdi abin-sogded: —¿Ar emide, be angi-sui-egwachad, unni be itosursi? Ar emide, mandrágora-sanmar an-machi-anga-senonikid be abebalid. Raquel abin-sogded: —Be-machi-mandrágoraʼmar-bega-senonikid be anga ukele, emi-mutik Jacob bese goloed.
GEN 30:16 Sedogidba, Jacob sapurba-gudidanigu, Lea Jacob-abin noded, ega sogded: —Emi-mutik be anse goloed, ar ade, an-machi mandrágora-e-san-anga-senonikidbo an be-ogwasad. A-mutik, Jacob, Leaʼse gochasunnad.
GEN 30:17 Bab-Dummad Lea-ese-goled-itosadba, Lea bonigwar gunonisunnad. Lea wesega Jacobʼga masmala walatargus bakdanikid.
GEN 30:18 Geb degine, Lea sogded: “Ar an-suiga an-machi an uksadbali, Bab-Dummad nabir angi binsasad.” Lea we-machigwa Isacarʼye onugsasad.
GEN 30:19 Geb a-sorbali, Lea baid-machigwa Jacob-ebo nikunonibalid. Agi, machimala walanergwa (6) guded.
GEN 30:20 Lea sogded: “Bab-Dummad ibmar-nued anga uksad. Emigindi, an-sui bur-yeer an-dakoed, ar ade, an ega masmala walanergwagus (6) nikudanikid.” A-ulale, we-machigwa Zabulónʼye onugsasad.
GEN 30:21 Napidgine, Lea bunolo nikunonikid. A-bunolo, Dinaʼye onugsasad.
GEN 30:22 Bab-Dummad Raquelʼgi nued binsadmogad. Bab-Dummad Raquel-ese-goledi itosad, mimmigan-nikuega imaksad.
GEN 30:23 Geb degine, Raquel bonigwar gunonisunnad, machigwa ega uklenonikid. Agi, Raquel sogded: “An geg-mimmi-bakedba an-bingegudiidi, Bab-Dummad anga osulosad.
GEN 30:24 Bitigi Bab-Jehová baid-machigwa anga ukbalina gadin.” A-ulale, machigwa Joséʼye onugsasad.
GEN 30:25 Raquel goe-José-baksad-sorbali, Jacob Labánʼga sogded: —An-yarse gannar an naega be anga igar uke.
GEN 30:26 Ar be nue-wisid, igi an-omegan-ular an bega arbasa. Degisoggu, an-omeganga, degi, an-mimmiganga be igar uke, anba namalagar.
GEN 30:27 Ar Labánʼdi abin-sogded: —Ar nued be angi binsaele, mer be nagwele, wis be napi-begwele. Ar an nerse-oyosadba an wisgusad, be-nukad, Bab-Jehová ise-nued angi binsamaid. Labán Jacobʼga sogdebalid:
GEN 30:28 —Anga be sogdo, igi-manigi anga be arbaoe. An be-bennukoed.
GEN 30:29 Geb degine, Jacob ega sogded: —Ar nue be wisid, igi an bega arbasa, igi an bega be-ibmar-durgan an akwisa.
GEN 30:30 An-nonikid-idu ibmar-ichee-be-nikadi, bega napiragwad merguded, ar ade, an bese nonikid-akar Bab-Jehová ise-nued begi binsasad. Degite, ¿emide, sana an-mimmiganga an na arbadmogosunna?
GEN 30:31 Geb Labán Jacobʼse egisdesunnad: —Degite, ¿igi-mani be-bennukbi be an-abesunna? Jacob weyob abin-sogded: —Mer be an-bennuke. Ar ibmar an bega sogoed nabir be itogele, napi an bega be-sibad-wawaadmar an edarboed.
GEN 30:32 Emi an be-sibadmar-abargi, bela sibad-wawaadmar-gutu-nanaimalad, mata-matamalad, sibad-wawaad-senigan-sichigana egwaoed. Deginbali, sibadmar-gutu-nanaimalad, mata-matamalad an egwabaloed, adi, weyob-daklemalad angadga guegar. We-ibmar-durgangi be an-bennukodo.
GEN 30:33 Degisoggu, ibagwengi be dakdanikogu, be dakoed, an bule ibmar-inniki-imaked-duledibe. An-sibadmar-abargi, sibad-gutu-nanaisurmalad, mata-matasurmalad, sibad-wawaad-senigan-sichiganasurmalad gudiile, an bei atursasdo.
GEN 30:34 Labán Jacob-abin sogded: —Nueddo. Be-sogedba an imakodo.
GEN 30:35 Degi-inigwele, aka Labánʼdi, a-ibagi, e na sibad-machergan bara-baramalad, mata-matamalad, sibad-omegan gutu-nanaimalad, wis sipu-sipu nanaimalad, degine, sibad-wawaad-sichigana, bachikii urbisad. Geb degine, Labán e-masmalaga uksad, adi, ega akwemalagar.
GEN 30:36 Geb Jacobʼgi we-sibadmar-obanguegala, ibapaa-bangu-nanalege-wilub sesad. Jacobʼdina, sibad-baigan Labánʼga akwedii gusad.
GEN 30:37 Jacob we-sapi-e-anagan siksad: Álamo-e-ana, almendro-e-ana, degi, castaño-e-ana. Degine, amar-sapi-anagan bara-bara-daklegegala, a-e-uka saguar-saguar esisad.
GEN 30:38 Geb degine, sibadmar-dii-gobnonidamaladgi sibadmar-asabin, a-sapi-anagan-bara-bara-dakleged urbisad. Ar ade, agi sibad-machergan sibad-omegangi nakwenonidamalad.
GEN 30:39 Ar suarmar-bara-barad-asabin sibadmar nakwedamarsoggu, e-mimmigan bara-bara, gutu-gutu, degine, mata-mata gwalulemamaid.
GEN 30:40 Geb degine, Jacob a-sibadmar Labán-e-sibadmar-bukwad-asabin bachikii urbisdaed. Weyob Jacob Labán-sibadmargi na e-sibad bachikii urbemai gusad.
GEN 30:41 Sibadmar-bur-wardadamalad omegi-nakwed-irbali, Jacob sibadmar-dii-gobedgi suarmar-bara-barad urbisdaed, adi, omegi nakwialile, suarmar-bara-barad dakegar.
GEN 30:42 Ar sibadmar-garagana-nakwialirdi, Jacob suarmar-bara-barad urbedasulid. A-ulale, sibadmar-garagandi, Labánʼgad daed. Sibad-wardummagandi, Jacobʼgad daed.
GEN 30:43 Weyob Jacob mani-ibedga gunonikid, ichesur sibadmar-wawaad, maigan-machergan, maigan-omegan, moli-yargan-muremalad, degine, moli-uayasuigan-nika gunonikid.
GEN 31:1 Jacob wisgualid, Labán-e-masmala weyob sunmakdiiye: “Jacob bela anmar-bab-e-ibmar susye. Agi, mani-ibedga gunoniye.”
GEN 31:2 Deginbali, Jacob daksabalid, Labán idualeyobi bar nued e-daksuli.
GEN 31:3 Geb degine, Bab-Jehová Jacobʼga sogded: “Be-babgan-yarse, be-gwenadgan-bukwadse be nae. Ani, an beba gudii guoed.”
GEN 31:4 Jacob sapurba e-sibad-wawaad edarbe-maidgi, Raquelʼse, degi, Leaʼse gochad, ese dagmarye.
GEN 31:5 Jacob Raquelʼga, degi, Leaʼga sogded: —An mag daked, bemar-bab idualeyob bar nued an-daksulid. Ar degi-inigwele, an-bab-e-Bab-Dummad gusgu anba gudiguad.
GEN 31:6 Ar bemar-sunnad nue wismalad, igi an be-babga an arbadii.
GEN 31:7 Emidi, be-bab an-yardakdiguad. An-bennuked anga irambegus (10) ogwadanikid. Deginbali, Bab-Dummad be-bab-an-naibi-saegala gwen imaksasulid.
GEN 31:8 Ar be-bab anga sogsale: ‘Ibmar-durgan-gutu-nanaimaladgi an be-bennukoye,’ degidbali, sibadmar-e-mimmigan-gwalulemamaid, bela gutu-nanaimaladbi gwalulenonidaed. Degi, be-bab anga sogsabalile: ‘Ibmar-durgan-bara-baramaladgi an be-bennukoye,’ degidbali, e-mimmigan-gwalulemamaid bela bara-baradbi gwalulenonidabalid.
GEN 31:9 Weyob, Bab-Dummad anga-ukegala, be-bab-ibe e-ibmar-durgan susad.
GEN 31:10 ”Ibagwengine, ibdurgan-idudigu, an gabdaksad. An dakalid, sibad-machergan omegi-nakwenanaid bara-bara-nanaed, gutu-gutu-nanaed, degine, mata-mata-nanaed.
GEN 31:11 An we-gabdakedgine, Bab-Dummad-e-baliwitur an-nugba anse gochad. An abin-imaksad: ‘An be-itomai.’
GEN 31:12 Geb degine, Bab-Dummad-e-baliwitur anga sokalid: ‘Nue be dako. Be dakena, sibad-machergan omegi-nakwenanaid bela bara-bara-nanaed, gutu-gutu-nanaed, degine, mata-mata-nanaed. Ar ade, an bela wisid, igi Labán be-imakdii.
GEN 31:13 Ani an Bab-Dummad, Betelʼgi bese magarosadid. Agi, be akwagi gwallu-wawa eosad, adi, oyogega, we-negde nue-islidikidye. Degine, anga ise-nue-sogar be imaksabalid, an imakedseye. ¡Be gwisgu! ¡Wegi-maid be nae! Be-gwalulesad-yarse gannar be nae.’ ”
GEN 31:14 Geb degine, Raquel, Leaʼbogwa Jacob-abin sogdemalad: —An-bab-neggine bar anmar ibmar nikasulid.
GEN 31:15 Ar anmar-bab dulemar-baidyob anmar-imaksad, e-sisganyob gwen anmar-daksulid, bur manigi anmar-uksad. Degine, be anmar-nikuega ega be manigi-arbasad, bela a-mani biin imaksad.
GEN 31:16 Ar napiragwad, Bab-Dummad bela an-babgi ibmar-susadi, ¿ar wede anmargadsursi? Eye, anmargadi, degi, anmar-mimmigangadi. Degisoggu, bela Bab-Dummad bega ibmar-sogsadba be imakdo.
GEN 31:17 Degine, Jacob Canaán-yarse e-bab-Isaac-maidse, gannar dagega, guakwaa ibmar dakalid. Jacob moli-yargan-muregedgi e-mimmigan, degi, e-omegan-onakwisgu, ali gusad.
GEN 31:18 Degine, Jacob Padan-Aramʼgi e-arbasadgi bela ibmar-nikusadi sealid, bela ibmar-durgan-nikadse-bakale, searbalid.
GEN 31:19 Deunni, Labánʼdi baidsik naded, e-sibad-wawaadmar-e-absar esinaded. Raquelʼdi e-bab-naded-sorba, e-bab-ibe nuchu-mimmimar atursasad.
GEN 31:20 Weyob Jacob, Arameo-dule-Labán yardaksad. Jacob, Labánʼga gwen sogsasulid, ede naesokarye.
GEN 31:21 Jacob wakitedo, bela ibmar-nikadi, sesagusad. Nadedgi, Éufrates-diwargi bato obaksabinned, degine, Galaad-yarmarsik nade gusad.
GEN 31:22 Ibapaagwad-sorbali, geb Labán wisgualid, Jacob wakiteye.
GEN 31:23 Geb degine, Labán e-gwenadgan-abalagine, Jacob-baregite gusad. Ibagugle-gusgu (7), Galaad-yalagangi Jacob-bargadapid.
GEN 31:24 A-mutikidgine, Bab-Dummad Arameo-dule-Labánʼse gabgi magarosad, ega sogsad: “Nue be an-itogo, melle Jacobʼga urwedgi sabsur be ibmar sogo.”
GEN 31:25 Labán Galaad-yalaganba Jacob-bargadapid, ar ade, agi Jacob obunnodapid. Agi, Labán e-gwenadganmala obunnodapmogad.
GEN 31:26 Labán wis gannadginsaar Jacobʼga ibmar sogded: —¿Igi be anga gude? ¿Ibiga be an-yardaksa? ¡Emide, be an-sisgan bila-onoedgi-galesdamaladyob sealid!
GEN 31:27 ¿Ibiga be an-yardaksa? ¿Ibiga an-arbak an-owisossuli be wakinnali? Be an-owisosana, weligwaledgi an bega sogsanad, nuedgi be naye. Degine, namakedgi, gar-tambor, degi, gar-arpa goled-abalagi be alinad.
GEN 31:28 Emide, bipisaale, be an-sisgan, degi, an-wagan-e-wagar-uega gwen be an-imaksasulid, degimaloye amarga sogega be an-imaksasurbalid. ¡Emide, dule-binsaedsulidyob be anga gusad!
GEN 31:29 Ar emide, sunna an bela bemar-onailiksaed. Degi-inigwele, mutik be-bab-e-Bab-Dummad anga sunmaksad, weyob anga sogsad: ‘Nue be an-itogo, melle Jacobʼga urwedgi sabsur be ibmar sogoye.’
GEN 31:30 Ar emide, bela-bela be-bab-negse be gannar dagbiedde, degite, ¿ibiga an-nuchu-an-bab-dummagan be ani atursassunna?
GEN 31:31 Geb degine, Jacob, Labán-abin sogded: —Ar ade, an dobgusad. An binsasad, abakalegi be-sisgan be angi ise-urwedgi be sualirye.
GEN 31:32 Ar wegi dule-wargwen be-ibe nuchu-be-bab-dummagan ganikile, ¡a-dule oburgwilegodo! Anmar-gwenadgan anmar-barsogega guoed: Be-ibmar be amie, ar an be-ibe ibmar-ganidibe, be sedodo. Ar ade, Jacob, Raquel nuchumar-atursasad wissulid.
GEN 31:33 Labán Jacob-e-dordonegyaba dogsad. Geb a-sorba, Lea-dordonegyaba, degine, maimar-warbogwad-dordonegyaba dogsabalid. Degi-inigwele, nuchumar-gwen-amissur gusad. Labán, Lea-dordonegyaba-noargu, geb Raquel-dordonegyaba dognonikid.
GEN 31:34 Ar ade, Raquel nuchumar-susadi, moli-yargan-mureged-e-gan-urba odukusad. Geb degine, a-birgi Raquel sigisad. Labánʼdi nuchumar bela negyaba amidigus-inigwele, amissur gusad.
GEN 31:35 Geb degine, Raquel e-babga sogded: —Baba, an gwisgusulir, mer be anse urwo, ar ade, an emi mor-enukdiid.
GEN 31:36 Ar Labánʼdi nuchumar-amidiid amissursoggu, a-ulale, Jacob uluded, Labánʼga binnasur weyob sogded: —Ar emide, ¿ibigi an begi nosa? ¿Ibigi an begi isgus be an-daksunna? Ar emide, ise-aporsaar be an-baregindigu.
GEN 31:37 An-ibmar bela be argasad. ¿Ar ibi-be-ibmar be an-neggi be amissunna? Be ibmar-amisad, be-gwenadgan-asabin, an-gwenadgan-asabin be urbedo, adi, sogmalaga, ar doa-anbogwadi bur-nabir ibmar soge.
GEN 31:38 ”Birga-dulagwen (20) an bega arbasad. Bipisaale be-sibadmar, degi, sibad-wawaadmar, mimmi-nikudanikir, igarba gwen melledsulid. Be-sibadmar-abargi, bipisaale be-ibe sibad-wawaad-machered-wargwensaar an guchasulid.
GEN 31:39 Ibmar-durgan-sapurbarmalad bei sibad-oburgwisale, an bennukewilubsulinad, aka an bur bennukdedaed. Mutikidbardibe, ibginedbardibe, bei-sibad-aturimaklesale, be angi mani gadaed.”
GEN 31:40 Jacob Labánʼga sogdebalid: —An bega arbadigusgu, ibgine, neg-diopisulidba an burgwebidaed. Neg-mutikdi, neg-diopigwadba an burgwebidabalid. ¡Ar gabedse-bakar, gwen gabbi an-itodasulid!
GEN 31:41 Birga-dulagwen (20) an be-neggi gudii gusad. Unnila, wemarbi an nikusad: Be-sisgan-warbogwadbina birgambe-gakabake (14) an bega arbasad. Be-sibadmarbina birganergwa (6) an bega arbasad. Degine, be-an-bennukedi, be anga irambe (10) ogwadii gusad.
GEN 31:42 ”Ar Bab-Dummad Abraham-e-Bab-Dummadga maid, degine, an-bab-Isaac a-Bab-Dummad-dobekwaa nanadii gusad. A-Bab-Dummad anba gudisulina, arganagwabi be an-barmialinad. Napira an bega soged: Ar Bab-Dummad, wile-an-itodiid magar-daksad, degine, an-arbadiid magar-daksabalid. A-ulale, mutik bese magarosad, ibmar binnasur bega sogsad.”
GEN 31:43 Geb degine, Labán Jacob-abin sogded: —Be-omegan, an-sisganad. Burwigana, an-waganad. Sibad-wawaadmar, an-sibad-wawaadmalad. ¡Bela we-ibmarmar be dakedi, bela angadbiid! Ar an-sisgansoggu, ¿igi an bar saosunna? Degine, an-sisgan-mimmiganbarsoggu, ¿igi an imakbalosunna?
GEN 31:44 Degisoggu, a-ular be dage, be anbogwa igar-mesdo, adi, agi be anbo igar-mesnaid-wilubgan mag daklegegar.
GEN 31:45 Geb degine, Jacob akwa-dummad susad, a-akwa ebo igar-mesnaid-wilubgan-oyogega ogwichisad.
GEN 31:46 Geb degine, e-gwenadganga sogded: —¡Akwa-onmakmar! Bela akwa-ichesur-urbegala, akwa-onmaksamalad. Agine, akwa-ichesur-bukwad-walik mas-guchamalad.
GEN 31:47 Labán e-gayaba a-neg Jegar-Sahadutaʼye onugsasad. Jacobʼdi e-gayaba a-neg Galaadʼye onugsasmogad.
GEN 31:48 Geb degine, Labán sogded: —Emi-ibagi, we-akwa-dunnumakbukwad anmar-igar-mesnaid-e-wilubgan-oyogega gued. A-ular, a-nega Galaadʼye nuggusad.
GEN 31:49 Deginbali, a-neg Mizpaʼye nuggusbalid, ar ade, Labán sogsad: —Anmar na gi yoggudmalo-inigwele, Bab-Jehová anmar-dakdii guoed.
GEN 31:50 Degine, an-sisgan sabsur be imakalile, igidibe, omegan-baid be nikuarbalile, ar dule-baigan amba-be-daksur-inigwele, be ebinsao, Bab-Dummaddi anmar-dakoed, a anmar-barsogega guoed.
GEN 31:51 Degine, Labán Jacobʼga sogdebalid: —Nue be dake, akwamar-odunnumakbukwad, degi, akwa-dummad-gwichid, anmar-deyob-igar-mesisad, anmarga-oyogega gued.
GEN 31:52 We-akwa-sogbogwadi anmarga-sogega guoed, bedi be ansik obakosurye, degine, anmoga an besik obakosurmoye, adi, melle na anmar sabsur imakmalagarye.
GEN 31:53 Be-dad-Abraham-e-Bab-Dummad, degi, an-dad-Nacor-e-Bab-Dummad, anmarga igar-nabogega guoed. Geb degine, Jacob e-bab-Isaac-Bab-Dummad na e-Bab-Dummadga-imakdimogad-nuggine ise-sogar sogded, ede deyob imakedseye.
GEN 31:54 Geb degine, Jacob yar-birgine Bab-Dummadga ibmar-ogumakar uksad. Geb Jacob agi mas-gunmalaga e-gwenadganse gochad. Agi bela e-gwenadgan mas-guchamalad. Degine, a-yar-birgi gabismarbalid.
GEN 31:55 Oibosgu, wakudaryalaba Labán gwisgusad, degimaloye-sogega bela e-wagan-wagar usad, degine, e-sisgan-wagar usbalid. Geb a-sorbali, bela amargi ise-nued-binsaedgi ega ibmar sogsad. Geb degine, Labán gannar e-negse ali gusad.
GEN 32:1 Jacob e-maidgi nadegusbalid. Nadapgu, Bab-Dummad-baliwiturmar Jacob-abin noalid.
GEN 32:2 Jacob, baliwiturmar-daksagu, sogded: “We-nega, Bab-Dummad-e-sordamar-neg gued.” A-ulale, Jacob a-nega Mahanaimʼye onugsasad.
GEN 32:3 Jacob e-iduale, Edom-yalaganba, dule e-barsogega Seir-neggweburse barmisad. Adi, e-ia-Esaúʼga sogega, ede daniye.
GEN 32:4 Jacob sogded: “An-dummad-Esaúʼga weyob be sogo: ‘Be-mai-Jacob soged: Ede emi-ibadse Labán-walik-gudii gusye.
GEN 32:5 Emidi, ede bukidar we-ibmarmar nikaye: Molimar-bebe-nikad, moli-uayasuigan, sibad-wawaadmar, sibadmar, maigan-omegan, maigan-machergan. ” ’Dummad, we-gayaburba an bese barmisiid. Degisoggu, bitigi nued be an-abin-daksana yeerban.’ ”
GEN 32:6 Dule-gayaburba-sesmalad gannar aibilismargu, Jacobʼga sognonimalad: —Anmar be-ia-Esaúʼse arbimalad. Na e-sunnad be-abin danikid, degine, machergan e-dulataled-ilabake (400) eba danimarmogad.
GEN 32:7 Jacob dulemar-weyob-ega-soge itoargu, bela-bela dobe-itonaded, degi, nue bukib-binsaded. Jacob dulemar-eba-danimalad danabo urbisad. Amba deyob sibad-wawaadmar, moli-bebe-nikamalad, degi, moli-yargan-muremalad imaksabalid.
GEN 32:8 Ar ade, Jacob binsasad: “Ar Esaú dulemar-danagwenadgi-gwisgualile, danagwenad-baid sunna wakinneddeeye.”
GEN 32:9 Geb degine, Jacob Bab-Dummadse goted, ega sogded: “Bab-Jehováʼye, be an-dad-Abraham-e-Bab-Dummad-gued, degi, an-bab-Isaac-e-Bab-Dummad-gubalid. Be anga sogsad: ‘Be-yarse, degi, be-gwenadganse be naye. An bega bela ibmar-nueganbi-gued an imakoye.’
GEN 32:10 An wisi, be angi nued binsamaid, gwen be angi nodisulid, ar deyob be an-imake-wilubsulinad. We-Jordán-diwar an obaksagua, deunni, ibmar-bipisaar gwen an semaigussulid, unnila, gaapoledbi an semai gusad. Ar emigindi, ibmar-dummagan-danabo an nikad.
GEN 32:11 Bab-Jehováʼye, ¡an-ia-Esaúʼgi wis be an-bendake! An dobe-itoged. Abakalegi an-oburgwialile, degi, an-omemar, an-mimmimar-oburgwiarbalile.
GEN 32:12 Ar bede nue anga sogsad: ‘Bela ibmar-nueganbi-gued an bega imakoye. Be-wagan bela-bela ukub-merguedyob-guosoggu, geg dule ebise guoye.’ ”
GEN 32:13 A-mutiki, Jacob agi gabisad. Geb bangine, e-ibmar-bur-nuegan susad, adi, e-ia-Esaúʼga ukegar:
GEN 32:14 Sibad-omegan, waladulataled-ilabo (200), sibad-machergan, waladulagwen (20), sibad-wawaad-omegan, waladulataled-ilabo (200), sibad-wawaad-machergan, waladulagwen (20).
GEN 32:15 Moli-yargan-mureged-e-omemar-emisgwa-mimmi-nikusmalad, e-mimmiganse-bakar, waladulagwen-gakambe (30), moli-bebe-nikad-e-omegan, waladulabo (40), moli-bebe-nikmalad-machergan, warambe (10), moli-uayasuid-omegan, waladulagwen (20), degi, moli-uayasuid-machergan, warambe (10).
GEN 32:16 Geb degine, Jacob ega-arbamaladga ibmar-durgan danar-danar-uksagu, ega sogded: “Bemar an-idu namar. Bemar na gi undar bangu-bangu danar-danar-nadapi be imakmalo.”
GEN 32:17 Jacob gebe-dulemar-barmisad-e-iduedga weyob sogsad: “An-ia-Esaú be-abingualile, degi, bega sokardibe: ‘¿Doa be-dummadye? ¿Bia be nadapye? Degine, be ibmar-durgan-semaidi, ¿we doagadye?’
GEN 32:18 Abin be sogoed: ‘We-ibmar-durgan, be-mai-Jacobʼgadye. Dummad-Esaú, an-dummad-Jacob bega we-ibmar-durgan barmiarye. Degi, Jacob e-sunnad anmar-sorba danimoye.’ ”
GEN 32:19 Degine, dulemar-baid-sogbogwad danar-barmisbalid. Degine, dulemar-sogbaagwad amba deyob danar-barmisbalid. Degine, Jacob bela danar-danar-ibmar-durgan-semamaidga sogsad: “An-ia-Esaú bemar-abingualile, bemar degibi sogmarmogoye.
GEN 32:20 Deginbali, ega sogbaloye: ‘Be-mai-Jacob, an-sorba daniye.’ ” Ar ade, Jacob binsaed: “An-ia sae-itogedi, we-ibmarmar-an-ega-uknaidgi an binsaed-gaoeddeeye. Geb a-sorbali, an-sunnad an-ia an dakoye. Ar wegii saedgi nued an-abingaaliirye.”
GEN 32:21 Degisoggu, Jacob na e-iaga-ibmar-uknaid e-idu barmisad. Na edi e-neggi besad, agi mutik gabegar.
GEN 32:22 A-mutiki, Jacob e-omegan-warbogwad, e-maigan-omegan-warbogwad, degi, e-masmala-warambe-gakagwensakad (11), Jaboc-diwar-dinnagwadsik-obakega imaksad.
GEN 32:23 Deginbali, bela ibmar-durgan-nikadi diwargi-obakega imaksabalid.
GEN 32:24 Jacob walagwen besgua, dule-wargwen ese nonikid. We-dule Jacob-ebo neg-oibogedse gala-maada urwenai gusad.
GEN 32:25 Ar dule Jacobʼgi geg obin-itosoggu, duagar-dikar-gwadilenaidgi sarsosad. Degisoggu, Jacob urwenaigu, e-duagar nosad.
GEN 32:26 Geb degine, dule Jacobʼga sogded: —Be an-indake. Bato neg-oibodanikid. Jacob abin-sogded: —Be angi ise-nued-binsaedgi be anga ibmar-sogsulile, an be-indakosulid.
GEN 32:27 Dule Jacobʼse egichided: —¿Igi be nuga? Jacob abin-sogded: —Jacobʼye, an nuga.
GEN 32:28 Geb degine, dule ega sogded: —Jacobʼye bar be nugguosulid. Ar ade, be Bab-Dummadbo-galitosadgi, degi, dulemarbo-galitosadgi be obichasoggu, be Israelʼye nugguoed.
GEN 32:29 Jacob dulese egisdemogad: —Emigi, be-nug anga be sogmoga, ¿igi be nugmoga? Dule abin-imakded: —¿Ibiga be anse an-nug egise? Geb degine, dule Jacobʼgi ise-nued-binsaedgi ega sogded. “Bela bega ibmar-nueganbi gusunno.”
GEN 32:30 Geb Jacob a-nega Penielʼye onugsasad. Ar ade, Jacob soged: “Bab-Dummad-wagar nue an daksad, degite, amba an dula gudiid.”
GEN 32:31 Jacob bato Penielʼgi nue-bangumaigua, dad-nakwialid. Ar ade, Jacob dikargi naibigussoggu, muya-muya nanagusad.
GEN 32:32 A-ulale, emi-ibase Israel-dulemar ibdurgan-e-duagar-dikar-gwadilenaid-e-dub-wardummad-maid-sinnigwad wissur gunmalad, ar ade, agi Israel sarsolesad, a-dub-wardummad sinni gusad.
GEN 33:1 Jacob dakdegu, Esaúʼba machergan e-dulataled-ilabake-mergu (400) daniki, mimmigan danar-danar Leaʼba, Raquelʼba, degi, e-maigan-omegan-warbogwadba mimisad.
GEN 33:2 Gebedgi, Jacob e-maigan-omegan e-mimmiganmala iduega imaksad. Geb a-sorba, Lea e-mimmiganmala nasiksad. Geb napidgine, Raquel e-machi-Joséʼbo nasiksad.
GEN 33:3 Geb degine, Jacobʼdi bela wemar-idusad, dulluu e-bebe napase ebulegedse ilagugle (7) e-iase warmaksadse imaknadapi gusad.
GEN 33:4 Ar Esaúʼdi e-urba-Jacobʼse abarmakded, bela angaagwar Jacob-gadapid, degi, e-wagar udapbalid, ebobela ise-boale bodmalad.
GEN 33:5 Geb a-sorbali, Esaú, omegan-dakargu, degi, mimmigan-dakargu, egichided: —Wemardi, ¿we doamala? Jacob abin-sogded. —We-mimmigan Bab-Dummad angi-nabir-binsaedba anga uksadid.
GEN 33:6 Geb degine, e-omegan-maigan na e-mimmiganmala Esaúʼse warmaknonimalad. Geb degine, dulluu e-bebe napase ebulegedse imaksamalad.
GEN 33:7 Geb a-sorbali, Lea e-mimmiganmala deyob dulluu imaknonimarmogad. Geb napidgine, José e-nan-Raquelʼbo nonikid, amba deyob dulluu imaknonimarmogad.
GEN 33:8 Geb degine, Esaú egichidbalid: —¿Ar ibiga we-ibmar-durgan danar-danar be anga barmiali? Jacob ega sogded: —Be angi-nued-binsaega, an bega barmialid.
GEN 33:9 Esaú sogded: —Urba, deyobsuli. An ibmar-durgan unniguar-nikamogad. Be-ibmar-durgan begadid. Na be sue.
GEN 33:10 Degi-inigwele, Jacobʼdi e-iagi alamaknai gusad: —Suli ia, degisuli. An we-ibmar-bega-sedanikidi, bitigi be abingasana yeerban. Ar be nued be anmar-abindaksasoggu, an be-dakdedgine, Bab-Dummad-wagar-dakdeyob an itonaded.
GEN 33:11 Degisoggu, nue-wilesakwaa an bese egised, we an bega-ibmar-durgan-uknaid be sue, ar ade, Bab-Dummad mani-ibedga an-imaksad. Ibmar-durgan unniguar an nikad. Ar Jacob e-ia-Esaúʼgi alamaknaigusoggu, Esaú ibmar-durgan-abingassunnad.
GEN 33:12 Geb degine, Esaú sogded: —Nabir. Anmar namarsundo. An be-idugoed.
GEN 33:13 Jacob e-ia-abin sogded: —Ia, nabirindo. Ar be nue wisid, mimmigan binnaa nanamalad. Degisoggu, geg anmar darekwaa naed. Degine, sibad-wawaadmar-e-mimmigangi, degi, moli-bebe-nikamalad-e-mimmigangi an binsaergebbalid. Ar sibad-wawaadmar geggusmalale, sunna ibagwen bela giir gued.
GEN 33:14 Ar bur-nuediled be an-idu naer. Ar andi binnale be-sorba nadapoed. Ibmar-durgan-nanaed-e-ganguedba, degi, mimmigan-nanaed-e-ganguedba an be-sorba nadapoed. Anmar Seir-yargi abingumalodo.
GEN 33:15 Esaú abin-sogded: —Nabirdo. Machergan-anba-nonimaladi, abala an bega obego. Jacobʼdi e-ia-abin sogded: —¿Ar ibiga be obegoe? Bato unniguar nued be angi binsasad.
GEN 33:16 Ar aka a-ibagi Esaú Seir-yarse gannar naded.
GEN 33:17 Ar Jacobʼdi Sucotʼse naded. Agi, e-neg sobsad, degine, e-ibmar-durganga galu sobsabalid. A-ulale, Jacob a-nega Sucotʼye onugsasad.
GEN 33:18 Jacob Padan-Aram-neggweburgi-mai Canaán-yarse-nonigu, bonisuli nuedgi nonikid. Jacob Siquem-neggwebur-asabin megnonikid.
GEN 33:19 Jacob Hamor-e-masmalase mani-gwadulatargi (100) nainu baksad. Hamorʼde Siquem-e-babad. A-nainugi Jacob dordoneg sisad. Jacob agi megnonikid.
GEN 33:20 Geb a-sorbali, Jacob Bab-Dummadga-ibmar-ogumakar-ukleged-aila sobsad. A-aila Jacob El-Elohe-Israelʼye onugsasad.
GEN 34:1 Ibagwengine, Dina, neggweburse bunamalase ataknad gusad. Dinaʼde Lea-sisgwad, Jacobʼbo-baksadid.
GEN 34:2 Siquem a-bunagwa-dakargu, gadebin imaksad, egi nue-dodosad. Siquemʼde Hamor-e-machid. Hamorʼdi, Heveo-duled, neggweburgi nue-nug-nikagwadid.
GEN 34:3 Ar bela-bela Siquem Jacob-sisgwa-Dinaʼbina nue-sogsoggu, e-abegega egi alamaknai gusanad.
GEN 34:4 Degi, Siquem, e-bab-Hamorʼga sogded: “Jacobʼse be anga Dina egisnae. An nue-nikubied.”
GEN 34:5 Jacob wisgusad, e-sisgwa-Dinaʼgi Siquem nue-dodosye. Ar e-masmala sapurba e-ibmar-durgan-edarbedimarsoggu, Jacob e-masmala-negse-nonikidse geb ibmar sogsad.
GEN 34:6 Degidgine, Siquem-e-bab-Hamor, Jacobʼbo-sunmakega Jacobʼse nade gusad.
GEN 34:7 Jacob-masmala-sapurba-gudidimalad neggusad-wisgusmargu, gannar negse nonimalad. Ar ade, e-bab-Israel-nug nue-gagalesad. Aginbali, Siquem e-bungi-dodosad-ular, nue-gwage-nunmak-itomalad, degi, nue-sae-itomarbalid. Ar ade, Siquem weyob imakewilubsulinad.
GEN 34:8 Ar Hamorʼdi Jacob-e-masmala-ebo sunmaksad, ega sogded: —An-machi-Siquem bela-bela bemar-bun abeged. Bemar be-bun an-machi-ebo-nikued wis be imakmala.
GEN 34:9 Bemar anmar-gwenadga gumardo, adi, anmar nabir bemar-sisgan-nikue gumaloed, degine, bemar nabir anmar-sisgan-nikue gumarmogoed.
GEN 34:10 Wegi bemar megmarmoga. Anmar-yar guakwaa bemar-idu naid, bemar anmar-walik megdo, be arbamardo, degine, nainu be bakmardo.
GEN 34:11 Ar Siquemʼmoga Dina-e-babga, degi, Dina-e-susmarga sogdemogad: —Anmar-ibmar-bega-sognaid be abingamala. Ar ibu be anse egismardibe, an bega ukmaloed.
GEN 34:12 Ome-nikuega ar gusgu igar-maidba ibmar-ukleged, aba bur dumma be anse ibmar-egisele, degi, ibmar-bukidar bega ukbi be an-abegele, an bemarga ibmar ukoed. Be-bun an nikuega bemar an-imakmala.
GEN 34:13 Degi-inigwele, ar Siquem Dinaʼgi nue-dodossoggu, Jacob-e-masmala Siquemʼga, degi, Hamorʼga, yamo-yardakar
GEN 34:14 ega sogdemalad: —Suli, degisuli. Geg anmar dule-abgan-uka-duku-sikarsulidga anmar-bun uked. Anmar deyob imakele, binged-dummad itole.
GEN 34:15 Bela bemar-machergan abgan-uka-duku be sikmalardi, nabirdo. Ar weyob be-machergan anmaryob imakerdi, nabirdo.
GEN 34:16 Ar deyob bemar imakele, bemar sunna anmar-sisgan nikumaloed, degine, anmar sunna bemar-sisgan-nikumarmogoed. Anmar sunna bemar-abargi megmaloed. Anmar bemarbogwa dule-wargwennayob gumaloed.
GEN 34:17 Bemar anmar-sogedba abgan-uka-duku-siksurmalale, wegi-anmar-gudiid anmar naoed. Anmar-bun anmar sedmaloed.
GEN 34:18 Hamor, degi, e-machi-Siquem Jacob-e-masmala-ega-ibmar-sogsamalad nued itosmalad.
GEN 34:19 Dogdar nadsuli, Siquem Jacob-e-sisgwabina nue-sogsoggu, e-abgan-uka-duku siksad. Ar Siquem e-gwenadgan-abargi bur nue-nug-nikagwadsoggu,
GEN 34:20 Siquem, e-bab-Hamor-ebogwa neggwebur-doged-yawagakse nade gusmalad, ar ade, agi igar-naboleged-negad. Agi, Siquem, e-bab-Hamorʼbo dulemarga sogdemalad:
GEN 34:21 —We-dulemar, anmar-aimalad. Anmar-abargi megmaloed, degi, wegi arbamaloed, ar ade, unniguar napa naid. Sunna anmar wemar-sisgan nikumalad, degi, wemar sunna anmar-sisgan nikumarmogad.
GEN 34:22 Ar anmar unnila dule-wargwennayob-guegala, sogmardo, emarde anmar-abargi megmalagala, emar imakdamarmogadyob, anmarde anmar-abgan-uka-duku sikmaloye.
GEN 34:23 Bela ibmar-nikmalad, degi, bela e-ibmar-durgan anmargadga gumogoed. Unnila anmar sogergebed, eyeye. Deyob anmar sogele, anmar-abargi megmalodo.
GEN 34:24 Bela machergan a-neggweburginmalad, Hamor, degi, e-machi-Siquem-ega-soged nabir-itosmalad. Degisoggu, bela e-abgan-uka-duku siksamarsunnad.
GEN 34:25 Ibapaagusgu, Jacob-e-masmala-warbogwad, Simeón, degi, Leví, Dina-e-susmar, e-es-suid-sesmargu, neggweburse nade gusmalad. Amba deun, machergan e-abgan-uka-duku-siksadba nunmak-itomaidgi modapmalad. Geb degine, Simeón, degi, Leví bela we-machergan es-suidgi oburgwismalad.
GEN 34:26 Simeón, Levíʼbo, es-suidgi-ewarar, Hamor, degi, e-machi-Siquem-oburgwismalad. Geb degi, e-bun-Dina Siquem-neggi-gudiid onosmalad. Agine, nade gusmalad.
GEN 34:27 Geb degine, Jacob-masmala-baigan nonimarmogad, burgwar-mamaidgi nasmargua, e-bun-Dinaʼgi Siquem nue-dodosad-ular, neggweburgi-ibmar-nikad bela sesa gusmalad.
GEN 34:28 Jacob-masmala we-ibmarmar sesa gusmalad: Sibad-wawaadmar, moli-bebe-nikamalad, moli-uayasuidmar, bela neggweburgi-ibmar-nikad, degi, sapurba-ibmar-nikamarbalid.
GEN 34:29 Neggi-ibmar-nikamalad bela atursasmalad, omegan, mimmigan, degi, bela ibmarmar-negyagi-bukmalad sesa gusmalad.
GEN 34:30 Geb degine, Jacob, Simeónʼga, degi, Levíʼga sogded: —Ar emigindi, boni-dummad bemar anga uksamalad. Dulemar-we-yargi-mamaimalad, Canaán-dulemar, Ferezeo-dulemar, isdar an-dakdamaloed. Emar, anmargi bila-onomalaga atodmaloed. Ar anmar machergan-ichee gumarsoggu, ani, degi, an-gwenadgan bela oburgwilemaloed.
GEN 34:31 Ar e-masmaladi, e-bab-abin sogdemalad: —¿Ar wede Siquem anmar-bun-Dina omegambanuchuyob imakoye soge? Suli, degisuli.
GEN 35:1 Bab-Dummad Jacobʼga sogded: “Be nae, Betel-neggweburse be megnae. Deun, be-ia-Esaúʼgi be wakinmaigu, ani, Bab-Dummad, an bese magarosadid. Betel-neggweburgi be anga-ibmar-ogumakar-ukleged-aila be sobo.”
GEN 35:2 Geb degine, Jacob bela e-neguyaginmaladga, degi, bela eba-gudimaladga sogded: “Bemar be-bab-dummadga-imakdiid be sedidimalad, bela be metemalo. Bemar bela islidikidguega, be obmarbalo, degine, bela mor ogwamarbalo.
GEN 35:3 Anmar emisgwasaar Betelʼse naoed. Agine Bab-Dummad anse magaros gusad. A-Bab-Dummad-e-nug-odummogega an ibmar-ogumakar-ukleged-aila ega sobdapoed. A-Bab-Dummadde an wile-itodigu, an-bendaksad. A-Bab-Dummad an-naddaedba anba gudiguad.”
GEN 35:4 Degisoggu, bela e-bab-dummadga-imakdimalad Jacobʼga senonimalad. Degine, e-uaya-dukugi olua-nanaid Jacobʼga uksamarbalid. Geb degi, Siquem-neggwebur-itakasaar Jacob bela a-ibmarmar sapi-encinaʼye-nugad-urba digsad.
GEN 35:5 Emar noarmargu, Bab-Dummad dulemar-neggweburmar-dikarbarmalad bela-bela Jacob-dobgumalaga imaksad. A-ulale, dulemar bar Jacob, degi, e-masmala-baregichasurmalad.
GEN 35:6 Jacob, degi, bela Jacobʼba-nadapmalad Luz-neggweburse modapmalad. A-neggweburde Canaán-yargi siid, degi, Betelʼye nugbalid.
GEN 35:7 Agi, Jacob Bab-Dummadga-ibmar-ogumakar-ukleged-aila sobsad. Jacob e-iagi wakinmaigua, agi Bab-Dummad ese magaros gusad. A-ular, Jacob a-neg El-Betelʼye onugsasad.
GEN 35:8 Agi, Débora burgwisad. Déboraʼde Rebeca-akwisadid. Betel-waliksaar sapi-encinaʼye-nugad-urba digsamalad. Jacob Débora-digsad-neg Alón-Bacutʼye onugsasad. A-sogleged, Sapi-encina-bosadye.
GEN 35:9 Jacob Padan-Aramʼgi-mai gannar Betel-neggweburse nonibargu, Bab-Dummad ese gannar Betelʼgi magarononibalid. Bab-Dummad Jacobʼgi ise-nued-binsaedgi gannar ega sogded:
GEN 35:10 “Be Jacobʼye nuganad. Emigindi, bar deyob be nugguosulid. Be Israelʼye nugguoed.”
GEN 35:11 Bab-Dummad Jacobʼga sogdebalid: “Ani, an Bab-Dummad-Bela-Gangued-Nikadid. Mimmigan-bukidar, degine, wagan-bukidar be nikuo. Begi dulemar-sogagwen nodagoed, degine, dulemar-sog-akar-akar begi nodabaloed. Be-waganmala reymarga gumaloed.
GEN 35:12 Abrahamʼga, degi, Isaacʼga, yar-an-ukoye sogsadi, a-yar an bega ukmogoed. Be-sorbali, be-waganga a-yar an ukbaloed.”
GEN 35:13 Bab-Dummad Jacob-ebo-sunmaksad-bergusgua, niba nade gusad.
GEN 35:14 Geb degine, Jacob akwa susad, Bab-Dummad-ega-sunmaksadgi a-akwa ogwichisad. Geb a-sorbali, a-akwagi gwallu-wawa, degi, vino egi eosad, oyogega, we-akwa, Bab-Dummadgadye.
GEN 35:15 A-neggi Bab-Dummad Jacob-ebo sunmaksad. A-ular, Jacob a-neg Betelʼye onugsasad.
GEN 35:16 Geb a-sorbali, Jacob, degi, bela eba-gudimalad Betelʼgi nade gusmalad. Amba Efrata-neggweburgi-yeer-banguedgi, Raquel goe-nikunonikid. Goe-nikuegala, undar-boniganba galitosad.
GEN 35:17 Raquel bur bule bonigan-itonaidgi, muu-sikwigaed ega sogded: “Melle be dobgu, machigwa-baid bega uklesbalid.”
GEN 35:18 Ar Raquelʼdi napi-iche-iche-maidgi e-goe Benoniʼye onugsasad. Ar e-bab-Jacobʼdi machi-bipi Benjamínʼye onugsanonikid.
GEN 35:19 Weyob Raquel burgwisad. Efrataʼse-naed-igarba Raquel-mui digsamalad. Emigindi, a-neggwebur, Belénʼye nugad.
GEN 35:20 Jacob Raquel-neg-uan-birgi akwa-dummad ogwichisad. A-akwa amba we-garda narmaklesmaidse Raquel-digar-maid oyonaid.
GEN 35:21 Israel nade gusad. Neg-suid-Migdal-Edarʼdaksik megidapid. Agi, Israel e-dordoneg sidapid.
GEN 35:22 Israel bato Migdal-Edarʼgi nue-mai, Rubén e-bab-ome-Bilha-maidse nade gusad. Agi, Rubén Bilhaʼse gochad. Jacob wisgusgu, Rubén Bilhaʼse gochaye, Jacob nue-sae itosgusad.
GEN 35:23 Jacob masmala-warambe-gakabo (12) nikusad: Jacob-Leaʼbo-masmala-nikusadi, wemalad: Rubén, e-machi-sailagined, Simeón, Leví, Judá, Isacar, degi, Zabulón.
GEN 35:24 Jacob-Raquelʼbo-masmala-nikusadi, wemarmogad: José, degi, Benjamín.
GEN 35:25 Jacob Raquel-e-mai-Bilhaʼbo-masmala-nikusadi, wemarmogad: Dan, degi, Neftalí.
GEN 35:26 Jacob Lea-e-mai-Zilpaʼbo-masmala-nikusadi, wemarmogad: Gad, degi, Aser. Wemala, Jacob-machimala gumalad, Padan-Aramʼgi gwalulesmaladid.
GEN 35:27 Jacob Mamre-neggweburse e-bab-Isaac-daknade gusad. Mamre-neggweburde, Arba-neggwebur-walik siid. Mamre-neggweburde, Hebrónʼye bimarbalid. A-neggweburgine, Abraham, degi, Isaac mai gusad.
GEN 35:28 Isaac nue seleba-mai birga-dulabakebak-nika (180) burgwisad.
GEN 35:29 E-sergan-abargi mesismalad. E-masmala Esaú, degi, Jacob, e-bab-Isaac-digsamalad.
GEN 36:1 Esaú, Edomʼye nugbalid. Esaú e-anagan nikusad.
GEN 36:2 Esaú Canaán-yargined-omegan-nikusadi, wemalad: Gebesailagine, Ada-nikusad. Adaʼde Elón-e-sisgwad, Het-duled. Esaú, Aholibama-nikusbalid. Aholibamaʼde Aná-e-sisgwad, Zibeón-e-wagwad. Zibeónʼde Heveo-duled.
GEN 36:3 Degine, Esaú, Basemat-nikusbalid. Basematʼde Ismael-e-sisgwad, Nebaiot-e-bunad.
GEN 36:4 Esaú Canaán-yargi-maigu, machimala-nikusadi, wemalad: Adaʼbo baksadid, Elifaz. Basematʼbo baksadid, Reuel,
GEN 36:5 Aholibamaʼbo baksadid Jeús, Jaalam, degi, Coré.
GEN 36:6 Esaú, e-omemar, e-masmala, e-bunamala, degi, bela eba-gudidimalad yar-baidse sesa gusad. Deyob, e-urba-Jacob-idu bangud gusad. Bela e-ibmar-durgan, degi, bela e-ibmar-Canaán-yargi-nikusad sesa gusad.
GEN 36:7 Ar Esaú, Jacob-ebo bela ibmar-durgan-ichesur-nikamarsoggu, geg ebo walikaa-gudii gumalad. Ar e-mamaidgine, ibmar-durgan mas-mamalaga napa unniguarsulid.
GEN 36:8 A-ulale, Esaú Seir-yalaganba megnad gusad. Esaúʼde, Edomʼye nugbalid.
GEN 36:9 Edom-dulemar-e-dadgan Seir-yalaganba bukwagusmalad. Wemala, Esaú-wagan gumalad.
GEN 36:10 Esaú-e-masmala weyob nugmalad: Ada-e-machi-Elifaz.
GEN 36:11 Wemardi, Elifaz-e-masmala gumarmogad: Temán, Omar, Zefo, Gatam, degi, Cenaz.
GEN 36:12 Esaú-machi-Elifaz, ome-dikarbalid nikagusad, Timnaʼye nugad. Elifaz Timnaʼbo machi-nikusad, Amalecʼye nugad. Wemar, Ada-e-wagan-gumalad.
GEN 36:13 Reuel-e-masmaladi, wemalad: Nahat, Zera, Sama, degi, Miza. Wemar, Esaú-ome-Basemat-e-wagan-gumalad.
GEN 36:14 Aholibama, Esaú-ome-baid gubalid. Aholibamaʼde Aná-e-sisgwad, Zibeón-e-wagwad. A-ome Esaúʼbo masmala-baksadi, wemalad: Jeús, Jaalam, degi, Coré.
GEN 36:15 Esaú-e-wagan dule-idumaladga-gusmaladi, wemalad: Esaú-machi-gebesailagined, Elifaz. Elifaz-e-masmala dule-idumaladga-gusmarmogadi, wemalad: Temán, Omar, Zefo, Cenaz,
GEN 36:16 Coré, Gatam, degi, Amalec. Wemar, Elifaz-e-masmala, Edom-yalagangi dule-idumaladga gusmalad. Bela wemar. Esaú-e-ome-Ada-wagan gumalad.
GEN 36:17 Esaú-machi-Reuel-e-masmala, dule-idumaladga-gusmarmogadi, wemalad: Nahat, Zera, Sama, degi, Miza. Wemar, Reuelʼsik, Edom-yalagangi dule-idumaladga gusmarmogad. Wemala, Basemat-wagan gumalad. Basematʼde Esaú-e-ome-baid gued.
GEN 36:18 Esaú-ome-Aholibamaʼdi Aná-sisgwad. Aholibama-e-masmala dule-idumaladga-gusmaladi, wemalad: Jeús, Jaalam, degi, Coré.
GEN 36:19 Bela wemala, Esaú-e-wagan gumalad. Esaúʼde, Edomʼye nugbalid. Bela wemala, e-dulemar-idumaladga gusmalad.
GEN 36:20 Seir-e-masmala amba Edom-yalagi bukwa gusmarmogad. Seirʼde, Horí-duled. Seir-e-masmaladi, wemalad: Lotán, Sobal, Zibeón, Aná,
GEN 36:21 Disón, Ezer, degi, Disán. Wemala, Seir-e-wagan, Edom-yalaganba Horí-dulemar-e-idumaladga gusmalad.
GEN 36:22 Lotán-e-masmala, wemalad: Hori, Hemam. Lotán-e-bundi, Timnaʼye nugad.
GEN 36:23 Sobal-e-masmaladi, wemalad: Alván, Manahat, Ebal, Sefo, degi, Onam.
GEN 36:24 Zibeón-e-masmaladi, wemalad: Aja, degi, Aná. We-Aná e-bab-Zibeónʼga nega-dulesulidganba moli-uayasuid-edarbedigu, dian-diopisulid amisad.
GEN 36:25 Aná mimmigan-warbo-nikusadi, wemalad: Machigwa nugad, Disón. Bunagwa nugad, Aholibama.
GEN 36:26 Disón-e-masmaladi, wemalad: Hemdán, Esbán, Itrán, degi, Querán.
GEN 36:27 Ezer-e-masmaladi, wemalad: Bilhán, Zaaván, degi, Acán.
GEN 36:28 Disán-e-masmaladi, wemalad: Uz, degi, Arán.
GEN 36:29 Horí-dulemar-e-dummaganga gusmaladi, wemalad: Lotán, Sobal, Zibeón, Aná,
GEN 36:30 Disón, Ezer, degi, Disán. Wemala, Seir-yalaganba Horí-dulemar-idumaladga e-gwenadgan-e-gwenadganba gusmalad.
GEN 36:31 Israel-dulemar amba yoo rey-nikumargu, deun we-reymar Edom-yargi negsemai gusmalad.
GEN 36:32 Beor-machi-Belaʼye-nugadi, Edom-yargi reyga megisad. E-neggweburga-gusadi, Dinabaʼye nugad.
GEN 36:33 Rey-Bela burgwisgua, a-sorba, Jobab negdaknonikid. Jobabʼde, Zera-e-machid, Bosra-neggweburginedid.
GEN 36:34 Jobab burgwisgua, a-sorba, Husam negdaknonikid, Husamʼde, Temán-yalaginedid.
GEN 36:35 Husam burgwisgua, a-sorba, Hadad negdaknonimogad. Hadadʼde, Bedad-e-machid. Hadad, Moab-yargi Madián-dulemargi nakwisad. Hadad-e-neggweburga-gusadi, Avitʼye nugad.
GEN 36:36 Hadad burgwisgua, a-sorba, Samla negdaknonikid. Samlaʼde, Masreca-neggweburginedid.
GEN 36:37 Samla burgwisgua, a-sorba, Saúl negdaknonikid. Saúlʼde, Rehobotʼginedid. Rehobot-neggweburde, Éufrates-diwar-gakaba siid.
GEN 36:38 Saúl burgwisgua, a-sorba, Baal-Hanán negdaknonikid. Baal-Hanánʼde, Acbor-e-machid.
GEN 36:39 Acbor-machi-Baal-Hanán burgwisgua, a-sorba, Hadar negdaknonikid. Hadar-e-omedi, Mehetabelʼye nugad. Mehetabelʼde, Matred-e-sisgwad, Mezaab-e-wagwad. Hadar-e-neggweburga-gusadi, Pauʼye nugad.
GEN 36:40 We-dulemar, Esaú-e-wagan-dummaganga gumalad. E-gwenadganmarba ilemakar danikid, e-yarmarba ilemakar danikid, degi, e-negmar-megismaladba ilemakar danikid. We, e-nugmalad: Timna, Alva, Jetet,
GEN 36:41 Aholibama, Ela, Pinón,
GEN 36:42 Cenaz, Temán, Mibzar,
GEN 36:43 Magdiel, degi, Iram. Wemala e-yargi bia-megismaladgi, Edom-dulemar-idumaladga gusmalad. Esaúʼdi, Edom-dulemar-e-dad-sailad. Esaúʼde, Edomʼye nugbalid.
GEN 37:1 Jacob e-bab-maigusmogadgi-megega, Canaán-yargi besad.
GEN 37:2 Jacob-e-igar weyob maid. José sapingwaunni, birgambe-gakagugle-nikagua (17), e-iamarmala sibad-wawaad-edarbedii daed. E-iamardi Bilha, degi, Zilpa-e-masmalad. Bilhaʼde, degi, Zilpaʼde Jacob-e-omeganad. José negse-modapir, e-iamar-sunnasurdaed e-babga sogdapdaed.
GEN 37:3 Ar Israel nue-selebagusadgi José gwalulessoggu, Israel, e-masmala-baiganba bur bule José-sabed. Israelʼde, Jacobʼye nugbalid. Degisoggu, Israel, Joséʼga mor-suid yeerdakleged-akar-akar maksad.
GEN 37:4 E-iamar dakarmargu, e-bab bur bule emarba José-sabdae, degidbali, e-iamar José-sae-dakdemalad, degi, bipisaar ese bar-gordii gussurmalad.
GEN 37:5 Ibagwengi, José gabdaksad. Na e-gabdaksad e-iamarga sogsad. A-ular, e-iamar bur bule José-sae-dakarmalad.
GEN 37:6 Ar ade, José e-iamarga weyob sogsad: —Bemar nue-an-itomalo, an-gabdaksad an bemarga soggwelo.
GEN 37:7 An gabdaksad: Bela-anmar sapurba gudiiye. Orosgi-dakleged-trigo duk-dukgwen-imaknaigu, ukiagwar an-trigoʼdi gannaa gwisguded. Ar bemargaddi angad-dikarba bela ebilis ambikusmalad, degine, bela angad-abin dulluu imakdemalad.
GEN 37:8 Geb degine, e-iamar abin-sogdemalad: —Ar be sogsunde, ¿be anmar-reyga guoye? ¿Be anmar-dummadga megoye? Adi surbali. We deyob-gabdaksadba degi, e-iamarga e-gabdaksad-sogsadba e-iamar bur bule José-sae dakdemalad.
GEN 37:9 A-sorbali, José gabdaksabalid. A-gabdaksad e-iamarga sogsabalid. Weyob ega sogded: —An-gabdaksad be nue-itomarbalo: An dakalid, dad-ibeler, nii, degi, niisgwamar-gwaambe-gakagwensak (11) bela an-asabin dulluu imakdemalad.
GEN 37:10 José weyob-gabdaksadi, e-babga, degi, e-iamarga sogsagua, e-bab Joséʼga sabsur-ibmar sokalid, ega sogded: —We deyob be gabdaksadi, ¿wede ibu be obare? ¿Ar ade, ani, be-nan, degi, be-iamar, anmar be-nug-odummonai gumalode? Adi surbali.
GEN 37:11 E-iamar bur bule José-isdar dakdemalad. Ar e-babdi José-gabdaksadgi nue-binsadii gualid.
GEN 37:12 Ibagwengine, José-e-iamar e-bab-sibad-wawaadmar gagangi-omaega, Siquem-neggwebursik nade gusmalad.
GEN 37:13 Geb degine, Israel Joséʼga sokalid: —Be-iamar Siquem-neggwebur-naba sibad-wawaad-edarbedimalad. Be-iamar-daknabi an be-abedo. José abin-sogded: —Nuedgi an naodo.
GEN 37:14 Israel sogded: —Nueddo. Be nae, be-iamar be daknae, igi gudimardibe, degi, sibad-wawaadmar nued bukwadibe. Be gannar anse nonikoed. Be anga sognonikoed, be-iamarde nueganbidibe. Israel Hebrón-neba-akar José-barmis gusad.
GEN 37:15 José Siquemʼse modapgu, dule-wargwen, José sapurba-bipirmadii abingualid. Joséʼse egichialid: —¿Ibu be amidii?
GEN 37:16 José abin-sogded: —An-iamar an amidii. ¿Sunna be anga sogsale, bia an-iamar sibad-wawaadmar edarbedimala?
GEN 37:17 Dule abin-sogded: —Bato wegi nadmalad. Be-iamar soge an itosad, emarde Dotán-neggweburse naye. Geb degine, José e-iamar-aminadap gusad. Dotán-neggwebur-dikarba abingudapid.
GEN 37:18 E-iamar, José-danikid bato dikasuli daksabinmalad. José amba yoo ese warmake, idu igar amismalad, José-oburgwemaloye.
GEN 37:19 Geb sogdemalad: —¡Be dakmalana, dule-gabdakegwa dani!
GEN 37:20 Ginebinne, anmar oburgwenae. Geb a-sorba anmar dia-yaagi metemaloed. Anmar sogmaloed, ibmar-sapurbalid-ursirmalad guchaye. ¡Anmar dakodo, bule-nabir e-gabdaksad ega guodibe!
GEN 37:21 Rubén e-urbamar weyob-sunmaknanai-itosgua, José-bendakbi gualid. Degisoggu, e-urbamarga sogded: —Melle anmar José-oburgwemalo.
GEN 37:22 Melle bemar José-ablis eomalo. Wegi nega-dulesulidganba dia-siid-yaba be odomalo. Melle be oburgwemalo. Rubén José-bendakbiedba, deyob sogsad, adi, e-babga gannar José-dula-ukegar.
GEN 37:23 José e-iamar-bukwadse modapgu, e-iamar José-gasmalad. Geb ei mor-suid-yeerdakleged-akar-akar-makaled esusmalad.
GEN 37:24 Geb dia-yaba José-metemalad. We-diade ollobi dinna siid.
GEN 37:25 Geb a-sorbali, e-iamardi mas-gunnega sigismalad. Geb agine, Ismael-dulemar danagwen Galaad-akar danimalad. E-moli-yargan-muregedgi gwallu-wawadikmalad, ina-wawadikmalad, sapi-gunnugiid-wawadikmalad-mirraʼye-nugad, Egipto-yarse semamaid.
GEN 37:26 Geb degine, Judá, e-gwenadganga sogded: —Ar anmar anmar-urba-oburgweye-soger, ¿ibi-nued anmar egi amiosunna? Ibmar-nued anmar egi amiosulid. Ar a-sorbali, anmar neg-oakalosad odukubalirgebed.
GEN 37:27 Deginbali, José anmar-urbabalid, bab mesamaladid. Bur-nuediled anmar bur Ismael-dulemarga manigi-uker. Judá-ibmar-soged bela e-gwenadgan yeer-itosmalad.
GEN 37:28 Ismael-dule-ibmar-ukmalad José-e-iamar-bukwadse mosmargu, José-e-iamala José-dia-yaagi-siid-onosmalad. Ismael-dulemarde Madiánʼginmaladid. Degine, mani-gwadulagwengi (20) José-uksamalad. Weyobi Ismael-dulemar Egiptoʼse José-sesmalad.
GEN 37:29 Rubén dia-siidse gannar nonigu, José-sate dakalid. Geb agi, Rubén e-mor esirmaksad, oyogega, ede, nue-nunmak itoye.
GEN 37:30 Geb a-sorbali, e-urbamar-bukwadse nonikid, amarga sognonikid: —¡Machigwa bar dia-yaba sisulid! Ar emigindi, ¿igi an gudoe?
GEN 37:31 Geb degine, e-iamar José-mor-suid-susmargu, sibad-bipi-oburgwisad-abegi mor dudismalad.
GEN 37:32 Geb degine, e-babse José-mor senonimalad. Degine, weyob Israelʼga sognonimalad: “Anmar we-mor amismala. Nue be dake, ¿we be-machi-e-mor-suid be dake?”
GEN 37:33 Jacob dakdegu e-machi-mola, weyob sogded: “¡Eye, we an-machi-mor-suidi! An-machi ibmar-dula-sapurbalid-ursilidse gullesad.”
GEN 37:34 Geb degine, Jacob e-mor esirmakded. Geb wile-itogedba mor-sommed yosad, degine, iba-ichesuli e-machi-burgwisad-ular bodii gusad.
GEN 37:35 Bela e-masmala, degi, e-bunamala aisaale Jacob-gwage-baisur-itoge-imaknaidaenad, ar Jacobʼdi e-gwage-baisur-itoged abesurdaed. Aka bur bule e-machibina bodii daed, sogdii daed: “An-machi-burgwisad-ular, an burgwedse bodii guoye.”
GEN 37:36 Ismael-dulemar Egiptoʼgi dule-Potifarʼye-nugadga manigi José-uksamalad. We-Potifarʼde Egipto-rey-Faraónʼga, arbaed-duled. Potifarʼde Faraón-sordamar-daked-e-dummadbalid.
GEN 38:1 A-ibagangine, Judá e-gwenadgangi bangud gusad, dule-Hiraʼye-nugadse naded. Hiraʼde Adulam-neggweburginedid.
GEN 38:2 Agine, Judá Canaán-dule-Súaʼye-nugad-e-sisgwa abealid. Judá a-bunagwa nikusad.
GEN 38:3 Nikusgua, e-ome bonigwar-gunonikid. Susugwa ega uklenonikid, Erʼye onugsasad.
GEN 38:4 Gannar ome bonigwar gunonibalid. Susugwa ega uklenonibalid. Adi, Onánʼye onugsasad.
GEN 38:5 Judá-e-ome baid-machi nikunonibalid, Selaʼye onugsanonikid. A-machigwa gwalulesgu, deunni, Judá-ome, Quezibʼgi gudiid.
GEN 38:6 Judá e-machi-dummad-Erʼga ome-uksad. A-omede Tamarʼye nugad.
GEN 38:7 Ar Bab-Jehováʼdi Er-e-daed gwen nabir daksursoggu, Er-oburgwisad.
GEN 38:8 Geb degine, Judá, Onánʼga sogded: “Igar-maidba be imakega, be-ia-burgwisad-e-ome be nikuo. Adi, be-ia beba mimmi nikumogagar.”
GEN 38:9 Ar Onán wisid, e-mimmi-gwalulegoedi egadye soglegosulid. A-ulale, e-ia-omese-goled-irba napagi e-burba midaed, adi, melle e-ia eba mimmi-nikuegar.
GEN 38:10 Onán-weyob-imakedi, Bab-Jehová gwen nabir daksasulid. Degisoggu, Bab-Jehová Onán-oburgwismosunnad.
GEN 38:11 Geb degidgine, Judá e-bala-Tamarʼga sogdesunnad: “An-machi-Sela-dummad-guedse be-bab-neggi suisuli be gudii gusun.” Ar ade, Judá binsabalid, e-machi-Sela e-iamaryob sunna burgwemogaddeeye. Deyobi, Tamar e-bab-negse nadegudsunnad.
GEN 38:12 Ibagan nadedgi, Judá-ome-Súa-sisgwa burgwenonikid. Judá e-ome-burgwisadba bukib-itodiid wis baisur-itogusgu, Timnat-neggweburse nade gusad. Agi, Judá e-sibad-wawaadmar-e-absar-imminanaidse naded. E-ai-Hira Adulam-neggweburgined eba nade gusmogad.
GEN 38:13 Tamar wisgusad, e-saka-Judá Timnat-neggweburse sibad-wawaad-e-absar imminadye.
GEN 38:14 Deyob wisgusgu, Tamar e-sui-burgwisad-ular mor-bukib-binsaed-yoid esusad. Geb mor-baid yosad. Geb degine, dunwegi e-wagar odukusad, adi, melle dulemar magar e-dakmalagar. Geb degine, Enaim-neggwebur-dogedgi sigisad, ar ade, Timnatʼse-naega, agi igar maid. Tamar weyob imaksad, ar ade, Sela bato dummad-gusa daksad. Degine, Tamar, gwen Sela e-suigaguega, ega uksurmala daked.
GEN 38:15 Judá ome-muswegi-na-wagar-eduar-siid-daksagua, binsaded, we-ome gambanuchurgebye.
GEN 38:16 Geb degine, Judá igarba-nadapidgi omese-naega aibatesunnad. Ar Judá wissulid, we-omede, e-bala gue. Omese-modapgu, ega sogded: —¿Sunna be anbo megisale? Ome abin-sogded: —Be anbo-megbiele, ¿ibu be anga ukoe?
GEN 38:17 Judá abin-sogded: —An sibad-bipi-wargwen an bega barmidagoed. Ome abin-sogded: —Eye. Be-ibmar-sediid be anga udagwerdo. Be anga sibad-bipi-barmidagedse we-ibmar an bega gannar ukoed.
GEN 38:18 Judá omese egichided: —Degite, ¿ibi bega ukbi be an-abesunna? Ome abin-sogded: —Be-goo-burba-wilub, degi, e-dub, degine, suar-gaapoled-be-ganikidi, be anga udado. Judá omega bela a-ibmar uksad. Geb degine, ese gochad. Degidbali, ome bonigwar gunonisunnad.
GEN 38:19 Geb a-sorbali, Tamar naded. E-wagargi muswe-naid unnusad. Geb degine, gannar e-sui-burgwisad-ular mor-bukib-binsaed-yoidaed yosad.
GEN 38:20 Geb a-sorbali, Judá e-ai-Adulam-neggweburginedba sibad-bipi barmisad, adi, ome e-ibe-ibmar-obesad ega gannar ukegar. E-ai ome-amissurgusad.
GEN 38:21 Degisoggu, Adulam-dule Enaim-neggweburginmaladse egichided: —¿Bia ome-gambanuchu Enaim-neggweburgined, igargi-sidaed nade? Abin-sogdemalad: —Wegi ome-gambanuchu sidasulid.
GEN 38:22 Geb degine, e-ai Judáʼse gannar nonisunnad, ega sognonikid: —Ome an daksasur gusad. Deginbali, Enaim-neggweburginmalad anga sogmarbalid, ome-gambanuchu bipisaar wegi gudidasurye.
GEN 38:23 Judá e-ai-abin sogded: —Ome an-ibmar-ganikid egadga gusunnodo, adi, melle dulemar anmargi dodomalagar. Ar wedi dulemar wisgumalargebed, an ega sibad-bipi barmisanad, ar be a-ome-amis-inigwele, degite, be daksasur gusad.
GEN 38:24 Nii-walapaagwad-sorba Judáʼga sognonimalad: —Be-bala-Tamar machergan-baiganba yootee gudiiye. Degisoggu, bonigwar-gudsunye. Judá binnasur sogded: —¡Bemar we-ome onomala, bemar ogumakar oburgwemala!
GEN 38:25 Tamar-magaba-onolenaigu, e-sakaga gaya-barmisad: “We-ibmarmar-e-ibed bonigwar an-imaksad. We-goo-burba-wilub, e-dub, degi, we-gaapoled, we-ibmar, ¿doagad be dake?”
GEN 38:26 Judá e-ibmarmar magar-daksagu, sogded: “Ar ani an Tamarʼga an-machi-Sela uksasursoggu, Tamar nabir imaksad. Andina, igar-maidgi bur nue-dummad-nosad.” Judá bar e-balase bipisaar gochasulid.
GEN 38:27 Tamar mimmi-nikunonigu, warbo ega uklenonikid.
GEN 38:28 Gwalulenaimargu, machi-wargwen e-argan onosad. Geb degine, muu-sikwigaed machi-bipi-e-argangi dub-ginnid edichad, geb sogded: “We-inse aidenonikid.”
GEN 38:29 Degidgine, machi-bipi gannar e-argan odosad. E-gwenad-inse aidenonikid. A-ulale, muu-sikwigaed Faresʼye goe-onugsasad. Ar ade, soged: “¡Be-inse be idusadid!”
GEN 38:30 Geb degine, baid-machi-bipi e-argangi dub-ginnid-atinnale aidenonimogad. A-machidi Zaraʼye onugsalesad.
GEN 39:1 José Egipto-yarse-selesgu, Egipto-dule-Potifarʼye-nugad Ismael-dulemarse José-baksad. Potifarʼde Faraónʼga arbaedid, degi, Faraón-sordamar-daked-e-dummadid. Faraónʼdi Egipto-e-reyd.
GEN 39:2 Ar Bab-Jehováʼdi Joséʼba gudiguad. Degisoggu, José e-dummad-Egipto-dule-neggi-gudigu, bela Joséʼga ibmar nueganbi nadegusad.
GEN 39:3 E-dummad-Potifar dakalid, Bab-Jehová Joséʼba nue-gudii. A-ulale, Joséʼga bela ibmar nueganbi guddae.
GEN 39:4 Degisoggu, e-dummad José-yeer-dake gunonisunnad. Potifar José e-bendakega onugsanonikid, degine, e-neggi ega-ibmar-daked-dummadga onugsasbalid. Degisoggu, Potifar bela e-ibmar-nikadi, José bela ega ibmar-dakega nugsasad.
GEN 39:5 Potifar e-neg-dakega José-onugsasgu, degi, bela e-ibmar-nikad ega dakega imaksabargu, a-ibagan-onoded-akar, Bab-Jehová Egipto-dule-Potifarʼgi ise-nued binsaded. E-neggi, degi, sapurba bela e-ibmar-nikadgi, ise-nued binsaded.
GEN 39:6 José Potifarʼga bela ibmar-dakdisoggu, Potifar dogdar bar e-ibmargi ise-binsaar gudisulid, ar wisid, José bela ega ibmar nue-akwediid. Degisoggu, unnila masginbi binsadisunnad. José, sapingwa-nued-itoged yeer dakleged.
GEN 39:7 Degisoggu, ibagan-nanamaidgi, Potifar-e-ome, Joséʼbina-sokalid. Ibagwengi Joséʼga sogded: —José, dage. Anmar anbo mege.
GEN 39:8 Joséʼdi yapa gusad. José, ome-abin sogded: —An-dummad bela-ibmar-nikad ega-dakega an-nug-imaksad. Emigi, an-wegi-gudiidgi an-dummad bar gwen dogdar ibmargi bukib binsadisulid.
GEN 39:9 We-neguyagi, dule-baid anba-bur-dummad sulid. An-dummadse ibi an egisdedibe, surye gwen anga sogdisulid. Unnila bebi geg an be-ebuged, ar ade, bedi e-omed. Degisoggu, ¿ar igi we-ibmar-isgana an imakosunna? Bab-Dummadgi an nue-dummad-nosar-itole.
GEN 39:10 Ar Potifar-e-ome bane-bane Joséʼgi alamakdidaed, ebo megega, degine, e-walikaa-gudii guegar. Ar Joséʼdi gwen eba ibsadisulid.
GEN 39:11 Ibagwengine, José arbaegala negyaba dogded.
GEN 39:12 Ar dule satesoggu, ome, José-mordukugi gadebin-imaksad, ega sogded: “¡Anbo be mege!” Ar Joséʼdi ise-abarmakar noded. Degisoggu, e-mor ome-argangi-obes abarmakded.
GEN 39:13 Ome José-abarmakde-dakdegu, degi, e-argangi mor mide-nade dakdegu,
GEN 39:14 neggi-ega-arbamaladse gochad. Amarga sogded: “Nue be dakmala. An-sui anmarga Hebreo-dule-senonikidi, emigindi, anmargi dodoalid. An-dakega negyaba dogsad, anse gorbigualid. Ar andi binnasur goted.
GEN 39:15 Ar bela-bela binnasur-gole an-itoargu, e-mor-obesa abarmakded.”
GEN 39:16 Geb degine, ome José-mor urbisad, geb e-sui-negse-nonigua ega oyosad.
GEN 39:17 Geb degine, ome dule-baiganga-sogsadyob e-suiga sogdebalid: “Hebreo-mai-be-anmarga-senonikidi, angi dodogega an-gabedyaba dogsad.
GEN 39:18 Ar an bela-bela binnasur gotesoggu, e-mor-obes abarmakded.
GEN 39:19 Weyob, be-mai an-imaksad.” José-e-dummad e-ome-ega-ibmar-sogsadba bela-bela nue-sae itoded.
GEN 39:20 Degisoggu, Potifar José-gasgu, igar ukded, reymar-sordamar esgaryagi-mellesiidyaba José-metoye. Amba esgaryagi José mellesi-inigwele,
GEN 39:21 Bab-Jehováʼdi, Joséʼba amba gudii gusad. E-sabgued amba Joséʼga oyomai gusad. Degisoggu, Bab-Jehová esgarya-daked-dummad José-nued-dakega imaksad.
GEN 39:22 Esgarya-daked-dummad, bela dulemar-mellebukwad-dakega José-onugsasad. Esgaryagi bela ibmar-imakleged José-sogedba imaklemai gualid.
GEN 39:23 Esgarya-daked-dummad José-ibmar-imaked bar sorba daknonidasulid, bule nabir imaksadibeye. Ar ade, Bab-Jehová Joséʼba-gudigusoggu, bela Joséʼga ibmar-nueganbi-gued imakdaed.
GEN 40:1 Weyob ibmar-gusad-sorbali, nogdaked-e-dummad, degi, madusobed-e-dummad, e-dummad-Egipto-e-reygi nosgusmalad.
GEN 40:2 Degidbali, Rey-Faraón we-dulemar-ega-arbamalad-warbogwadse nue-uluded.
GEN 40:3 Degisoggu, Faraón nogdaked-e-dummad, degi, madusobed-e-dummad esgaryagi meted. Esgaryade sordamar-e-dummad-neggi siid. José amba a-esgaryagi mellesimogad.
GEN 40:4 Sordamar-e-dummad Joséʼga we-dulemar-warbogwad urmaksad, adi, José wemar-dakegar. We-dulemar undar esgaryagi mellesii gusmalad.
GEN 40:5 Ibagwengi, mutikidba, wemar-warbogwad-esgaryagi-mellesiid gabdakar gusad. We-gabdaksamalad-e-oduloleged, akar-akar nanaed.
GEN 40:6 José wakdaradba, we-dulemar-warbogwadse-ataknonigu, nue-bukib-binsabukwa daknonikid.
GEN 40:7 Agala, José we-Faraónʼga-arbamalad-dummagan-mellesimaladse egisdesunnad: —¿Ibiga emi bemar nue-bukib-binsabukwa?
GEN 40:8 Amar abin-sogdemalad: —Anmar-gabdaksadi, dule-anmarga-oduloged sated. José abin-sogded: —¿Ar ade, Bab-Dummad gabdaked-odulogedsursi? Bemar anga soge, igi bemar gabdaksamala.
GEN 40:9 Geb degine, nogdaked-e-dummad Joséʼga e-gabdaksad sogded: —An gabdakmaigu, uva-dub an dakalid.
GEN 40:10 Uva-dub e-dub-giapaa-nika an dakalid. Uva-dub sanmakali, e-dutumar naguali, degi, gwagde an dakalid. Uvaʼmar dukar-enagude, degi, gorede an dakarbalid.
GEN 40:11 An-argangi Faraón-e-noga an ganiki an dakalid. Geb uva noggi-egurega an susdaed. Geb a-sorba, Faraónʼga an nog ukdedaed.
GEN 40:12 Geb degi, José ega sogded: —Be gabdaksadi, we obardo: Uva-dub-giapaagwadi, ibapaagwadye.
GEN 40:13 Ibapaase, Faraón bega igar amioed. Geb gannar be-arbaed bega ukoed. Gannar Faraónʼga nog-uknai be guoed.
GEN 40:14 ”Deyob bega gunonikile, melle be an-iego, an-ebinsao. Wis an-ular Faraónʼga be sunmako, adi, we-esgaryagi-an-mellesiid an-onogegar. ¡Wile be an-dako!
GEN 40:15 Ar Hebreo-dulemar-e-yalagangi an-atursasmalad. Ar an esgaryagi mellesiwilubsulinad, ar ade, ibmar-ichakwa gwen an imaksasulid.”
GEN 40:16 Madusobed-e-dummad, José, e-gabdaksad nued-odulosa-daksagu, Joséʼga sogdemogad: —An gabdaksamogad, garba-burwigana-gwapaagi madu-ochigana an nono-birgi sii an daksad.
GEN 40:17 Garba-birginedgi galagwensuli madu-ochigana Faraónʼga-bukwa an daksad. Agine, sikwimar garba-an-nonogi-siidse madu-ochigan gunnonidamala an daksad.
GEN 40:18 Geb degine, José abin-sogded: —Be gabdaksadi, we obardo: Garba-burwigana-gwapaagwadi, ibapaagwadye.
GEN 40:19 Ibapaase, Faraón bega igar amioed. Geb sapidukugi gammu-gaale be-oburgoed, degi, mulamar be-san gunnoed.
GEN 40:20 A-ibapaagwadgi, Faraón-gwalulesad-iba nonikid. Faraón iba-dummad ega-arbamaladga onosad. Faraón, e-ibase-nonimalad-asabin, ega nogdaked-e-dummad-mellesiid-sedagega, degi, madusobed-e-dummad-mellesiid-sedagega imaksad.
GEN 40:21 Faraón, nogdaked-e-dummad gannar e-arbaedgi odosad. Nogdaked, gannar Faraónʼga nog-dakega gunonikid.
GEN 40:22 Faraón, José gabdaksad-odulosadyob, madusobeddi, sapigi gammu-gaale oburgwisad.
GEN 40:23 Degi-inigwele, nogdaked-e-dummad bipisaale Joséʼgi gwen bar binsassulid.
GEN 41:1 Ibagwengi, birgabo nasad-sorba, Faraón gabdakalid, ede Nilo-diwar-gakagi gwichiye.
GEN 41:2 Diwargi moli-bebe-nikad-omegan-yeerdaklege, degi, wardada-wardada-daklege walagugle (7) nakwiali daksad. A-molimarde, masarmaryob-dakleged-imbaba gagan-mananai daksad.
GEN 41:3 A-molimar-sorbali, walagugle (7) molimar-bebe-nikad-omegan-baigan, sunnasur-dakle, degi, gara-gara-dakle, diwargi nakwiar daksabalid. A-molimar, molimar-baigan-naba diwar-gakagi ambikunonimala daksabalid.
GEN 41:4 Geb degine, moli-bebe-nikad-omegan-garagana, moli-bebe-nikad-omegan-wardadagan-guchamala daksabalid. Agi, Faraón atakalid.
GEN 41:5 Faraón gannar gabidbalid, degi, gabdakarbalid: Dakalid, orosgi-dakleged-sargwengi gagugle (7) e-durbagan-yeerdaklege nue-sanmaknanai daksad.
GEN 41:6 Wemar-sorba, orosgi-dakleged-baid-sargwengi gagugle-ainiarbali (7) daksabalid. Amardi gara-gara, degi, dad-nakwedsik-burwa-goledse dinna-dinnagusa daksad.
GEN 41:7 We orosgi-dakleged-durbagan-gara-garagwad-gagugledi (7), durbagan-baigan-nue-sanmaknanaid-gagugled (7) guchad. Faraón atakargu, gabdakmai itoalid.
GEN 41:8 Oibosgu, wakdaradgine, Faraón nue-suli-suli itoalid. Degisoggu, Faraón igar-uksasunnad, bela Egiptoʼgi nelemar, degi, nue-ibmar-wisimalad, ese dagmaloye. Faraón amarga e-gabdaksad bela sogsad. Amar wargwensaale, bipisaar ega gwen odulossurmalad, wede ibi-obare.
GEN 41:9 Geb degine, nogdaked-e-dummad José-e-binsaded. Agi, Faraónʼga sogded: “Dummad, nue-dummad-nosa an-itoged.
GEN 41:10 Emi an ebinsado, madusobed-e-dummad, degi, ani, an bega-arbaed-dule, be sae-itogedba anmarse-uludgu, sordamar-e-dummad-neggi-esgarya-siidse be anmar-warbobela mete gusad.
GEN 41:11 Deunni, ibagwengine, mutikidbali, madusobed-e-dummad gabdaksad, degi, an gabdaksamogad. We-gabdaked anmargi-ibmar-guoed, anmar egad-egad gabdaksamalad.
GEN 41:12 A-esgaryagine, Hebreo-sapingwa-wargwen anmar-abargi mellesii gusmogad. We-sapinde sordamar-e-dummad-e-maid. A-sapingwaga, anmar-gabdaksad anmar sogsa gusad. A-sapinde, anmarga odulosad igi an-gumaloe.
GEN 41:13 ¡Igi anmarga odulosa, bela deyob gusad! An-arbaedse gannar an dogsad. Baiddi dukar-gaar oburgwilesad.”
GEN 41:14 Geb degine, Faraón Joséʼse gochad. Agi, esgaryagi-mellesiidgi, yog-onoar imaksamalad. José nue saila-siksad, mola-nued yosad. Geb degine, Faraónʼse nonikid.
GEN 41:15 Geb degine, Faraón ega sogded: —An gabdaksad. Emide, dule-anga-oduloged sated. Emide an itoged, dule bega gabdaked sogsale, bedi sunna oduloye.
GEN 41:16 José, Faraón-abin sogded: —Dummad, we-oduloged angi sisulid. Ar Bab-Dummad bega odulogoed. We-odulolegoed bega ibnuedga guoed.
GEN 41:17 Faraón Joséʼga sogded: —Nilo-diwar-gakagi gwichiye an gabdakalid.
GEN 41:18 Diwargi moli-bebe-nikad-omegan-yeerdaklege, degi, wardada-wardada-daklege walagugle (7) nakwiali an dakalid. A-molimarde, masarmaryob-dakleged-imbaba gagan-mananai an dakalid.
GEN 41:19 A-molimar-sorbali, walagugle (7) molimar-bebe-nikad-omegan-baigan, sunnasur-dakle, degi, gara-gara-dakle, diwargi nakwiar an dakarbalid. ¡Bipisaale bela Egipto-yargi weyob molimar-sunnasur-dakleged an dakdisulid!
GEN 41:20 Geb degine, moli-bebe-nikad-omegan-garagana, moli-bebe-nikad-omegan-wardadagan-guchamala an dakarbalid.
GEN 41:21 Ar moli-garagana moli-wardadagana-guchamar-inigwele, amba gara-gara-dakleged. Agi, attaas an naded.
GEN 41:22 ”Gannar an gabidbargu, an gabdakarbalid: An dakalid, orosgi-dakleged-sargwengi gagugle (7) e-durbagan-yeerdaklege, nue-sanmaknanai an dakalid.
GEN 41:23 Wemar-sorba, orosgi-dakleged-baid-sargwengi gagugle-ainiarbali (7) daksabalid. Amardi gara-gara, degi, dad-nakwedsik-burwa-goledse dinna-dinnagusa an dakarbalid.
GEN 41:24 We orosgi-dakleged-durbagan-gara-garagwad-gagugledi (7), durbagan-baigan-nue-sanmaknanaid-gagugled (7) guchad. Deyob an gabdaksad nermarga an sogsanad. Amar wargwensaale, gwen anga odulossurgusmalad.”
GEN 41:25 Geb degine, José Faraón-abinsaded: —Dummad, be-sogbo-gabdaksadi, we unnila soggwenna gued. Bab-Dummad e-ibmar-imaksokalid be-owisonaid.
GEN 41:26 Moli-bebe-nikad-omegan-nuegan-walagugled (7) obardo, birgagugledye (7). Orosgi-dakleged-e-durbagan-nuegan-gagugled (7) amba birgagugledye (7) obarbalid. Be-sogbo-gabdaksadi, ebobela soggwennagwad.
GEN 41:27 Moli-bebe-nikad-omegan-walagugle (7) sunnasur-gara-gara-dakleged, baigan-sorba-ainialidi, amba obarbalid, birgagugledye (7). Amba deyobbalid, orosgi-dakleged-durbagan-gagugled (7) gara-garagwad, degi, dad-nakwedsik-burwa-goledse-dingusadi, we obared, birgagugle (7) ibmar sate guoye.
GEN 41:28 ”Ar igi an bega sogsa, ar deyobdo: Faraón, Bab-Dummad e-ibmar-imaksokalid be-owisonaid.
GEN 41:29 Bela Egipto-yalagi birgagugle (7) ibmar ise-obinagwar welenai guoed.
GEN 41:30 Geb a-sorbali, birgagugle (7) ukud-dummad nagunonikoed. Dulemar, Egiptoʼgi iduar-ibmar-yaisur-nikusadi, gwen bar ebinsaosurmalad, ar ade, ukud-dummadi Egipto-yar-obelogoed.
GEN 41:31 Ar ibmar bela-bela sate-guosoggu, iduar ibmar bela-bela-nikusadgi bar binsaosurmalad.
GEN 41:32 Faraón, ilabo-be-gabdaksad, obared, Bab-Dummad weyob ibmar-imaksokalidi, bato emisgwasaar imaksokarye.
GEN 41:33 ”Degisoggu, Faraón, Egipto-yargi dule-gwensak, dule-binsaed-ibed, dule-nue-ibmar-wisid ibmar-dakega be amiele, nuediled.
GEN 41:34 Faraón, weyob be imake: Dummagan-negdakmalad be onugsae, adi, amar bela Egipto-yargi ibmar-gwag weemalagar. Amar ibmar-gwag-welesad sagu-walatargi gwensak sumaloed. Weyob ibmar birgagugle-sanmakoedi (7) sumaloed.
GEN 41:35 Birga-nued-naguoedgi orosgi-dakleged-weemaloed bela danakwaa urbemaloed. Faraón, we-ibmar-urbilegoed, bee be dakoed, degine, neggwebur-dummagangi we-mas be sabogoed.
GEN 41:36 Deyobi, orosgi-dakleged bela Egipto-yarga sabolegoed, adi, Egiptoʼgi ukud-dummad birgagugle-nagunonikir (7), melle dulemar burgwemalagar.”
GEN 41:37 José Faraónʼga sognaid, weyob be ibmar imakye. Faraón, degi, dummagan-ega-arbamalad, nued José ega-ibmar-soge itosmalad.
GEN 41:38 Degisoggu, Faraón sogdesunnad: —¿Bemar insagua, dule-baid weyobi Bab-Dummad-burba-nikad anmar amio be insae? Anmar amiosuli.
GEN 41:39 Geb Faraón Joséʼga sogded: —Ar Bab-Dummad bela we-ibmarmar-wisguega be-imaksadsoggu, a-ulale, dule-baid beba dule-binsaed-ibed, dule-nue-ibmar-wisid sulid.
GEN 41:40 Degisoggu, bee, wegi an-reyneg-dakega be guoed. Degine, an-dulemar bela be-sogedba ibmar imake gumaloed. Ar ani, an reysoggu, unnila anbi begi bur dumma guoed.
GEN 41:41 Geb degine, Faraón Joséʼga sogdebalid: —Bela Egipto-yar-daked-dummadga, ani, an be-onugsanaid.
GEN 41:42 Geb degine, Faraón e-argangi olargan-yoid unnusad. A-olargan-yoidgi e-wilub naid. Geb degine, olargan Joséʼga yosad. Geb a-sorbali, Faraón igar-ukded, sogded: Mor-nued-linoʼye-nugad, a-mola Joséʼga yomarye, degine, e-dukargi ordub ega nasikmarbarye.
GEN 41:43 Geb a-sorbali, Faraón e-ur-napagined-gusgu-e-sorba-naidaedgi José-onakwisad. Degine, Faraón igar-uksabalid, binnasuli José-iduar gornadap-imakmaloye: “¡Igar egamar!” Weyobi, José dummadga Egiptoʼgi nuggunonikid.
GEN 41:44 Geb degine, Faraón Joséʼga sogdebalid: —Ar ani, an dummad-inigwele, bela Egipto-yargi bipisaale dule be-wissuli ibmar imakosulid.
GEN 41:45 Faraón Egipto-gayaba José-onugsanonikid, Zafnat-Paneaʼye. Degine, Faraón Potifera-e-sisgwa-Asenatʼye-nugad, José-nikuega ega uksad. We-Potiferaʼde On-neggweburgi dule-irwa-e-bab-dummadse-goledid. Weyobi, José bela Egipto-yargi dummadga gunonikid.
GEN 41:46 José birga-dulagwen-gakambe-nikadgi (30), Egipto-e-rey-Faraónʼse seles gusad. José Faraónʼga degimaloye sogsagu, Egipto-yargi bela atakdii gualid.
GEN 41:47 Egiptoʼgi birgagugle (7) bela-bela nue-ibmar sanmaksad.
GEN 41:48 José we-birgagugledgi (7) bela orosgi-dakleged Egipto-yargi-nikadi wesad. Bela-amar neggwebur-dummagangi sabosad. Neggwebur-dummagan-dikarba nainu-nanaidgi orosgi-dakleged-welesadi, neggwebur-dummagan-irba sabosad.
GEN 41:49 José orosgi-dakleged ukub demar-gakaba-merguedyobi, bela-bela-mergu wesad. Ar orosgi-dakleged bela-bela mergusoggu, geg wilubsalegusad, ar wisgulessurgusad igi mergue.
GEN 41:50 Ukud-dummad-nagued-idu, José e-ome-Asenatʼbo machimala-warbo nikusad. Asenatʼde Potifera-e-sisgwad. Potiferaʼde On-neggweburgi dule-irwa-e-bab-dummadse-goledid.
GEN 41:51 José e-machi-gebesailagined Manasésʼye onugsasad, ar ade, José soged: “Bela-nunmaked-dummad-an-itosad, iegega Bab-Dummad an-imaksad, degine, an-gwenadgan-iegega an-imaksabalid.”
GEN 41:52 José baid-e-machidi Efraínʼye onugsasad, ar ade, José soged: “An yar-wilesadgi Bab-Dummad mimmimar-nikuega an-imaksad.”
GEN 41:53 Egiptoʼgi birgagugle (7) ibmar-yaisur-sanmaksad bergudapid.
GEN 41:54 Degine, José iduakwaa sogsadyob, ukud-dummad nagudmogad. Bela yar-baigangindi ukud-dummad nagusad. Egiptoʼgindi masgunned nika gusad.
GEN 41:55 Egipto-yarginmalad ukur-itoarmargua, Faraónʼse masgunned egisnadmalad. Geb degine, Faraón, bela Egipto-dulemarga sogded: “José be daknamala. A-sogedba bemar ibmar saoed.”
GEN 41:56 Ukud bela-bela Egipto-yargi nagunonigu, José orosgi-dakleged-sabolebukwad-negmar bela eganonikid. Geb degine, José Egipto-dulemarga manigi ukded, ar ade, bela-Egiptoʼgi ukud bur bule naguded.
GEN 41:57 Bela dule-yar-baigangi-bukmaladdi, Joséʼse orosgi-dakleged-bakmalaga Egiptoʼse nonidamalad. Ar ade, yar-baigangindi masgunned satemalad.
GEN 42:1 Jacob wisgusgu, Egipto-yargi orosgi-dakleged-nikaye, e-machimalaga sogded: “Anga sogmalad, Egipto-yargi orosgi-dakleged nikaye. ¿Ar ibu be abdakmarsunna, emide, be muchub-muchub nuu na be dakbukmargu?
GEN 42:2 Degisoggu, bemar Egiptoʼse namala, ase orosgi-dakleged baknamala, adi, anmar mer burgwemalagar.”
GEN 42:3 Geb degine, José-e-iamar-warambegwad (10) Egiptoʼse orosgi-dakleged baknadmarsunnad.
GEN 42:4 Jacob José-e-urba-Benjamín, e-iamarba barmissulid. Ar ade, binsaed: “Abakalegi, Benjamín igarba nailikgualirye.”
GEN 42:5 Ar bela Canaán-yargi ukud-dummad naimosoggu, Israel-masmala dulemar-baigan-mas-baknadmarmogadba nadmarmogad.
GEN 42:6 José Egipto-yargi dummadga maid. A-ular, bela dulemar-neggwebur-baidginmalad orosgi-dakleged bakdanikile, José ega ukdaed. E-iamar Joséʼse-nonigua, bela José-abin dulluu e-bebe napase ebulegedse imakdemalad.
GEN 42:7 José e-iamar-dakdeyalaba bato magar-daksad, e-iamalad. José yamo aku-e-iamar-dakeyob imaksad. Degi, apor e-iamarse egichided: —¡Bemar! ¿Bia be danimala? E-iamar abin-sogdemalad: —Anmar Canaán-yalagi danimalad, orosgi-dakleged bakegar.
GEN 42:8 Ar Joséʼdi e-iamar-mag-daksad. E-iamardi José-aku daked.
GEN 42:9 Geb degidgine, José e-iamargi-gabdaksad insaas naded. Geb degine, e-iamarga sogded: —Bemar dule-argamalad gumalad. Bemar unnila dakdanimalad, bia anmar-yargi baisursunna-doglemalad sii.
GEN 42:10 Abin-sogdemalad: —¡Dummad! Suli, degisuli. Anmar, be-maimar gued. Anmar orosgi-dakleged-bakega nonikid.
GEN 42:11 Bela anmar bab-galagwenad gumalad. Anmar dulemar-yardakedsurmalad. Anmar bipisaale dulemar-argaega gudisurmalad.
GEN 42:12 José bur bule sogded: —Binsa bemar gordii. Bemar unnila dakdanimalad, bia anmar-yargi baisursunna-dogleged sii.
GEN 42:13 E-iamar José-abin sogdemalad: —Anmar be-maimar gued. Bela anmar bab-wargwengi gwenadgan-ambe-gakabo (12) gumalanad. Anmar Canaán-yargi maimalad. Anmar-urbadi, anmar-bab-walik besad. Baiddi burgwisad.
GEN 42:14 Degi-inigwele, José, e-iamarga gannar sogdebalid: —An bemarga sogsamalad, bemar dule-argamalad gumarye.
GEN 42:15 Weyob, an bemar-wilubdakoed: Faraón-nuggi napira an bemarga soged: Bemar be-urba anga wese sedagedse, geb be nomaloed.
GEN 42:16 Ar bemar-wargwen be-urba be sunamardo. Bemar-baigandi wegi gales-sigmaloed. Anmar dakmalodo, bule-nabir bemar anga sogmala. Ar nabirsulile, Faraón-nuggi napira an bemarga soged: Ar bemar dule-argamaladdo.
GEN 42:17 Geb degine, José ibapaa esgaryagi e-iamar-meted.
GEN 42:18 Ibapaagusgu, e-iamarga sogded: —An Bab-Dummad-dobee nanadiid-duled. Ar bemar an-yardaknaisurmalale, be-gwenad-wargwen esgaryagi be obes namardo.
GEN 42:19 Ar deyob bemar imakele, an bemar-oburgosulid. Bemar-baigandi namalo, orosgi-dakleged be sedmalo, adi, be-gwenadgan nabir mas gunmalagar.
GEN 42:20 Geb be anga be-urba-bipigwad be sedamaloed. Agi, an dakoed, bule-nabir be anga sogmala. Ar degisulile, be oburgwilemaloed. E-iamar José-ega-ibmar-sogedba imaksamalad.
GEN 42:21 José-e-iamar na ga muchub-muchub sogdemalad: —Anmar anmar-urbagi nue-dummad nosmalad. Ar anmarga weyob sognai-gusan-inigwele, bemar wile an-dakye. Anmar itossurmalad. A-ulale, wede, emi anmarga nunmaked-dummad nonimosunnad.
GEN 42:22 Rubén e-gwenadgan-abin sogded: —An bemarga sognaigusanad, melle bemar machigwa naibisamarye. Ar bemar an-itossurmalad. Degisoggu, emigindi machigwa-burgwisad anmarginsoggu, anmar emigindi wilenaimosundo.
GEN 42:23 José-e-iamar wissurmalad, José bela mag e-itoged. Ar ade, José e-iamarbo-sunmaknaigua, dule-baid ega odulos gusad.
GEN 42:24 José e-iamargi banguded. Geb degine, José boded. José gannar e-iamar-bukwadse-nonigu, ega sunmakdebalid. Geb José, Simeón e-gwenadgan-abargi-gwichid onosad. Geb e-gwenadgan-wagab edichad.
GEN 42:25 Geb a-sorba, José ega-arbamaladga igar-uksad, orosgi-dakleged sagu ena-ena imakoye. Degine, gannar ega mani ukoye, e-sagu-e-sagu-yaba ega mani urboye. Degine, igarba mas-gunmaloed ega ukbaloye. Ar José-sogsadyob bela imaksamalad.
GEN 42:26 Geb degine, José-e-iamar e-moli-uayasuidgi orosgi-dakleged urbismargu, nadmarsunnad.
GEN 42:27 José-e-iamar gabmaloedse modapmargu, wargwen e-moli-uayasuid-masgi-omaega e-sagu egaded. Sagu-egadgu, dakalid, e-mani bukwa.
GEN 42:28 Geb degine, e-gwenadganga sogded: —¡Be dakmalana, gannar anga mani uksamalad! ¡Be dakmalana, an-sagu-yaba mani bukwad! José-e-iamar belagwable bela-bela nue-dobe-itonadmalad, dobedba wawanmakdemargu, na ga muchub-muchub sogdemalad: —¿Wede igi Bab-Dummad anmar-imaknai?
GEN 42:29 Canaán-yarse warmakdapmargu, bela e-bab-Jacobʼga sogdapmalad, emar igi gusmala. E-babga sogdemalad:
GEN 42:30 —Dule-Egipto-yar-dakmaid anmarga nue-apor sunmaksad. Anmarga soged: ‘Bemar an-yarse-nonimaladi yamo an-yar-argaega nonimarye.’
GEN 42:31 Ar anmardi abin-imaksamalad: ‘Anmar dule-yardakedsurmarye, degi, anmar bipisaale dule-argamalaga gudisurmarbarye.
GEN 42:32 Bela-anmar bab-wargwengi gwenadgan-ambe-gakabo (12) gumalanye. Wargwendi bato burgwisye. Bipigwaddi Canaán-yargi be-walik besye.’
GEN 42:33 ”Geb degine, Egiptoʼgi-dummadga-maid anmarga weyob soged: ‘An-walik be-gwenad-wargwen be obemarye, adi, agi an magar bemar-dakoye, bemarde bule dule-yardakedsurmardibeye. Bemar-baigandi orosgi-dakleged be-gwenadganga be sedmarye.
GEN 42:34 Degi-inigwele, be-urba-bipigwad be anse sedamaloye. Deyob bemar imakele, an magar dakoed, bemar dule-yardakedsurmalad, degine, bemar dule-argaedsurmarbalid. Geb degine, be-gwenad-esgaryagi-siid an onogoye. Geb bemar be-itoleged, bia bemar we-yargi nabiedba be nanadii gumaloye.’ ”
GEN 42:35 José-e-iamar orosgi-dakleged, sagu-yaba-bukwad-onodmargu, dakarmalad, e-sagu-e-sagu-yaba sagu-bipigi bela mani bukwadbi. Deyob dakarmargu, José-e-iamar, degi, e-babse-bakar, dobe itodmalad.
GEN 42:36 Geb degine, Jacob e-masmalaga sogded: —Bemar, masmala-sate be an-imakmaloed. José bato burgwis, degi, Simeón anmarba bar gudisurbalid. ¡Emigindi, bemar Benjamín an-ibe nidesokarbalid! ¡An emarba bur ibitodiid!
GEN 42:37 Geb degine, Rubén e-babga sogded: —Ani an bega Benjamín-dakoed. Ani an gannar bega Benjamín senonikoed. Bega an gannar senonisulile, an-masmala-warbogwad be oburgodo.
GEN 42:38 Ar Jacob e-machi-abin sogded: —An-machi-Benjamín bemarba naosuli. Benjamín-e-ia-José burgwisad. Unnila Benjamínʼbi napi-anga gudiid. Ar bemar nasokalidba, igarba Benjamín akar-gusale, ar bemargindo. Ar an seredgusad, bukib-binsaedba an burgwisar, bemargindo.
GEN 43:1 Canaán-yargine bur bule ukud-dummad-naid gangumai gusad.
GEN 43:2 Degisoggu, Jacob, degi, e-masmala Egipto-yargi-orosgi-dakleged-senonimalad bergudanigu, Jacob e-masmalaga sogded: —Gannar Egipto-yarse bemar namar, anmarga orosgi-dakleged wis ichesaar be baknamar.
GEN 43:3 Ar Judá, e-bab-abin sogded: —Dummad-mas-dakmaid nue anmarga ise-sogar imaksad: ‘Be-urba-bipi bemar sedanisurmalale, bur melle be anse dagmaloye.’
GEN 43:4 Degisoggu, Benjamín be anmarba barmidele, anmar bega orosgi-dakleged baknaodo.
GEN 43:5 Ar be anmarba barmisulirdi, anmar bega baknaosurmodo. Ar dule anmarga sogsad: ‘Ar bemar be-urba-bipigwad anga sedasurmalale, bemar gwen an-dakosurmarye.’
GEN 43:6 Geb degine, Israel sogded: —¿Ibiga bemar sunnasur angi damala? ¿Ibiga bemar we-dulega sogsamala: ‘Anmar, urba-baid nikabarye?’
GEN 43:7 Masmala e-bab-abin sogdemalad: —Ar ade, dummad-mas-dakmaid anmarse nue-ibmar egichisad, degi, anmarse nue-anmar-gwenadgan egichisbalid. Anmarse egichisad: ‘¿Be-babde amba dula? ¿Bemar urba-baid nikamarbali?’ Ar anmarse ibmar-egisnaidbi ega an sogsamalad. Ar igi anmar wisguosunna, weyob anmarse egisdagoed: ‘Be-urba be anga sedamaloye.’ Anmar wissurdo.
GEN 43:8 Judá e-bab-Israelʼga sogded: —Ar anmar ukudba burgwebisurmalale, Benjamín be anmarba barmiddo. Ani, an bega dakoed. Eyeye be sogele, anmar yog-naar imakoed. Ar deyob be imakele, geb anmar, be, degi, anmar-mimmigan burgosurmalad.
GEN 43:9 Be-machi-an-sedoedi, angi siido. Ar machigwa igi-gusdibe, an-nukindo. Ar wese gannar an bega senonisulile, an-burgwedse angi ataklegodo.
GEN 43:10 Weyob anmar yoggunaisulina, ¡bato ilabogus anmar Egipto-yarse arbi-wilubbinad!
GEN 43:11 Geb degine, e-bab-Israel Judá-abin sogded: —Ar geg an oakalosoggu, ar weyob bemar imakmarsundo. Be-sagu-yaba macheredga binsa ibmar-ukega be sedmar. Bemar-ibmar-sedoedi, bur-ibmar-nuegan-we-yargi-nikad ega be sedmalo: Sapi-gunnugiid-wawadikmalad, achanis, gwallu-wawadikmalad, ina-wawadikmalad, nur-nuezʼgiimalad, degine, nur-almendroʼmar be sedmalo.
GEN 43:12 Deginbali, mani-ilabo-mergu be sedmarbalo. Ar abakalegi, emar bemarga mani-uksadi wis noar-odosale, a-mani bemar-sunnad ega be gannar ukmalo.
GEN 43:13 ¡Be namar! Be-urba be sedmar. Dummad-mas-dakmaidse gannar be namar.
GEN 43:14 Bab-Dummad-Bela-Gangued-Nikad wile be-dakmalana gadin, adi, be-gwenad-galesiid onogegar, degine, Benjamín nabir gannar barmidabaligar. Andi, machimala-sate an gudele, igi an barsaosunna, machimala-sate an guodo.
GEN 43:15 Jacob-machimala Egiptoʼgi-dummadga-maidga ibmar-binsa-ukdapmaloed sesmalad. Mani-ilabo-bur-bule-mergu sesmalad, degi, Benjamín-sesmarbalid. Geb degine, Egipto-yarse nadmarsunnad.
GEN 43:16 Joséʼse modapmargu, José dakded, Benjamín e-iamarba nonimoga. Geb José ega-neg-akwedga sogded: “We-dulemar an-negse be sede. Moli-bebe-nikad-wargwen be oburgo. Mas-sao, ar ade, we-dulemar emi yoruku anba mas gunmaloed.”
GEN 43:17 Ar Joséʼga-neg-akwed José-ega-sogsadyob imaksad, e-sunnad José-e-gwenadgan-sesad.
GEN 43:18 Agine, José-e-gwenadgan José-negse selemamaigu, dobe-itonadmalad, sogdemalad: “Iduar anmar-sagu-yaba mani-urbismalad-ular, yamo e-negse anmar-semaid. ”Wese anmar-senonikid, adi, sabsur-anmar-odurdakega, e-maiga anmar-imakega, degine, anmar-moli-uayasuidmar anmar-ibe suegar.”
GEN 43:19 Degisoggu, José-neg-yawagak-mosmargu, Joséʼga-neg-akwedbo-sunmakmalagala ese walikaa nadmalad.
GEN 43:20 Geb Joséʼga-neg-akwedga sogdemalad: —¡Dummad! Iduale, anmar orosgi-dakleged-bakega arbimalad.
GEN 43:21 Gannar anmar nadedgi, neg-gaboedse anmar modapgu, anmar sagu egad-egad-egadmargu, anmar-sagu-yaba, bela-sogedba anmar-mani-senonikid bukwa dakalid. Emigi, a-mani bega-ukega anmar sedanikid.
GEN 43:22 Ar anmar wissulid, iduale doa anmar-sagu-yaba mani urbisa. Deginbali, orosgi-dakleged-bakega anmar mani sedanibalid.
GEN 43:23 Joséʼga-neg-akwed abin-sogded: —Mer be bukib-binsamar, mer be dobgumar. Ar bemar-Bab-Dummad, be-bab-e-Bab-Dummad, a bemar-sagu-yaba mani-urbisargebed. Ar ade, bemar-mas-baksad-mani anga uklesad. Joséʼga-neg-akwed Simeón-esgaryagi-mellesiid onosad. Geb degi, e-gwenadgan-bukwadse sesad.
GEN 43:24 Geb degine, Joséʼga-neg-akwed bela negyaba José-e-gwenadgan-odosad. Geb ega dii uksad, adi, na nag enukmalagar. Deginbali, e-moli-uayasuidmarga mas uksabalid.
GEN 43:25 José-e-iamar guakwaa Joséʼga-ibmar-ukmaloed urbismalad. José-yorukudba-nonikoedi edarbesigismalad. Ar ade, wisgusmalad, emarde agi mas gunmaloye.
GEN 43:26 José e-negse-nonigu, e-iamar ega ibmar-ukega-senonikid ukdemalad, bela José-abin dulluu e-bebe napase ebulegedse imakdemalad.
GEN 43:27 Geb degine, José egisded: —Bemarde nueganbimar sogeye. José egisdebalid: —Degite, be-babde, be-anga-egi-sunmaksamalad, nue-selebagusye, ¿amba dula gudii? ¿Nued gudii?
GEN 43:28 José-e-iamar bela napase dulluu José-abin imakdemalad. Geb degine, ega sogdemalad: —Anmar-bab, be-mai, nued gudii. Amba dula gudii.
GEN 43:29 José bela dulemar-dakdegu, dakalid, e-urba-galagwenad-Benjamín simoga. Geb degine, José sogded: —¿We, bemar-urba-bipigwad bemar anga egi sunmaksamaladi? Geb degine, José, Benjamínʼga sogded: —¡Machi, Bab-Dummad ise-nued begi binsaena gadin!
GEN 43:30 José weyob sogsagua, e-urba-dakedba bela-bela ulubgi-yeer-itoged, geb bela-bela bobi gualid. Degidbali, José gwae-gwae e-gabedyaba dogsad. Agi, nue-bosii gusad.
GEN 43:31 José bosiid na bargasgu, e-wagar-enuksagu, noalid. Geb degine, sogded: “¡Mas wemar!”
GEN 43:32 Joséʼga mese-gwagwengi mas ega urbismalad. Jacob-e-masmalagardi baid-mesegi, degine, Egipto-dulemar-eba-mas-gunmaladga baid-mesegi urbismarmogad. Ar ade, Egipto-dulemar Hebreo-dulemarbo geg mas gunned, ega ised-dummad gued.
GEN 43:33 José e-gwenadganga igar-uksagu, mese-naba e-serguedba sigismalad, dummad-inse, geb bipigwadse. Agala, bela geger-dakmalad, muchub-muchub, nuu-nuu dakbukwa guarmalad.
GEN 43:34 José e-mesegi-mas-bukwad e-iamarga uksad. Benjamínʼgardi bur bule ilatar-mergu uksad. José, e-gwenadganmala gobsamalad, weligwar itosmalad.
GEN 44:1 Mas-guchamalad-sorbali, José dule-ega-neg-akwedga weyob igar-uksad: “We-dulemar-saguyaba orosgi-dakleged nue-ise-enamakar be balo. Degine, mani egad-egad e-sagu-yaba ega be urbebalo.
GEN 44:2 Deginbali, an-mani-nog e-urba-bipigwad-sagu-yaba be odogo. Degine, orosgi-dakleged-baksad-e-mani agi be odobalo. Nog, mani-ebo walikaa be sio.” Joséʼga-neg-akwed José-ega-sogedba imaksad.
GEN 44:3 Geb dad-nakwialiyalaba, José negse e-gwenadgan-barmialid. José-e-gwenadgan e-moli-uayasuid egad-egadgi armalad.
GEN 44:4 José-e-gwenadgan neggweburgi amba itakasaar-nadapidgine, José ega-neg-akwedga sogded: “We-machergan-naded be bareginna. Be bargasale, ega be sogo: ‘¿Ibiga dule-ibmar-nued-bega-imaksadgi be isdar binsasmala? ¿Ibiga be e-mani-nog atursasmala?
GEN 44:5 We-mani-nog an-dummad gobega ebuged, degi, Bab-Dummadse-idakega ebubalid. ¡Bemar nue-dummad nosmalad!’ ”
GEN 44:6 Joséʼga-neg-akwed José-e-gwenadgan-bargasgu, bela deyob ega sogdapid.
GEN 44:7 Agi, José-e-gwenadgan abin sogdemalad: —Dummad, ¿ibiga weyob be anmarga soge? ¡Anmar weyob geg ibmar imaked!
GEN 44:8 Anmar-sagu-yaba mani-bukwa anmar dakargusadi, a-mani Canaán-yar-akar anmarde bega ukega gannar sear gusad. Degite, ¿igi anmar be-dummad-neggi, mani, degi, olo atursaosunna? Geg anmar atursaed.
GEN 44:9 ¡Ar doa-saguyaba nog-sii dakledagoe, a-dule oburgwilegodo. Geb degine, anmarmoga bela be-dummad-maiga gumarmogodo!
GEN 44:10 Geb degine, Joséʼga-neg-akwed sogded: —Bemar-sogedyob imaklegodo. Degi-inigwele, unnila ar doa nog-ganiki, abi unnila an-maiga guoed. Ar bemar-baigandi akarsurdo. Na be namalodo.
GEN 44:11 Belagwable na egad-egad yog sagu napase odedmalad, degi, egadmalad.
GEN 44:12 Joséʼga-neg-akwed sagu wargwen-wargwengi nog-amided. Ia-dummadgi onoded, geb bipigwadse warmaksad. Geb Benjamín-sagu-yaba nog sii daklealid.
GEN 44:13 Bela mor esirmakdemalad, oyogega, emarde nunmak-itomarye. Geb a-sorbali, e-sagu moli-uayasuid-birgi-onakwismargu, bela gannar neggweburse armalad.
GEN 44:14 Judá, degi, e-gwenadgan José-negse-nonimargu, amba José e-neggi-sii daknonimalad. Geb degine, bela José-asabin dulluu e-bebe napase ebulegedse imakdemalad.
GEN 44:15 Ar Joséʼdi amarga sogded: —¿Ar igi be anga gudmala? ¿Ar bemar wissurmarsi, dule-anyobidi Bab-Dummadse-idakedba sunna ibmar wisgued?
GEN 44:16 Judá abin-sogded: —¿Ar igi anmar be-abin-imakosunna? ¿Ar igi anmar sogosunna, anmar deyob ibmar imaksasurye? Ar Bab-Dummadde anmar-daksad, anmar nue-dummad nosad. Degisoggu, wegi anmar, degi, dule-sagu-yaba be-nog-amilesad, be-maiga gumarsunnodo.
GEN 44:17 Ar José abin-sogded: —Suli, deyob geg gue. Unnila doa-sagu-yaba an-nog amilesa, abi an-maiga guoed. Baigandi sunna be-bab-negse gannar baisur-itogedgi namalad.
GEN 44:18 Geb degine, Judá Joséʼse naded, ega sogded: —Dummad, bese wilesakwaa an egised, begarbi an sogbied. Dummad, ar be Faraón-sunnadyobmosoggu, mer be anse urwo.
GEN 44:19 Be anmarse egichisgusad, anmarde bab-nikamar-sogeye, degi, be urba-baid-nikamarbar-sogeye.
GEN 44:20 Anmar be-abin-imaksagusad, anmar-bab selebagusye. Anmar urba-bipigwad nikabarye. We-machi anmar-bab selebagusadgine nikusye. Degine, anmar bega sogsabalid, anmar-bab bela-bela we-machigwa-sabye. Ar ade, unnila nan-wargwengi webi-walagwenad, e-ia-nan-galagwenad burgwisad.
GEN 44:21 ”Geb degine, be anmarga sogsagusad: ‘Be-urba be anga sedamaloye,’ ar ade, be dakbigusad.
GEN 44:22 Anmar bega sogsagusad: ‘Dummad, machigwa geg e-babgi banguye. Ar e-babgi bangudele, e-bab burgwisarye.’
GEN 44:23 Ar bede anmarga sogsagusad: ‘Machigwa bemarba danisulile, an bemar-abingaosurye.’
GEN 44:24 ”Anmar gannar anmar-babse warmakdapgu, be-anmarga-sogsadi, bela anmar ega sogdapid.
GEN 44:25 ”Geb degine, anmar-bab anmarga weyob igar-uksad: ‘Gannar bemar Egiptoʼse orosgi-dakleged wis baknamarbarye.’
GEN 44:26 Ar anmardi abin-imaksad: ‘Anmar-urba anmarba nasulir, anmar geg naye. Ar anmarba nasulir, dule-dummad-mas-uked anmar-abindakosurye.’
GEN 44:27 ”Anmar-bab anmarga sogsagusad: ‘An-ome-Raquelʼbo an masmala-warbo-nikusad be wismarye.
GEN 44:28 A-wargwenadi angi bangusad-akar bar an gwen dakdisurye. Ibmar-durgan-sapurbalid an-machi-ichimaksad an bensurye.
GEN 44:29 Ar an-machi-baid bemar angi sedbalile, igarba-akar-gunonikile, bemarginye. An dule-selebagusad, bukib-binsaedba-burgwider, bemarginbarye.’ ”
GEN 44:30 Judá Joséʼga sogdebalid: —Ar an-bab we-machigwa-ebo bela-bela walikasoggu, anmarba gannar nasulile,
GEN 44:31 sate dakalile, anmar-bab burgoed. Degisoggu, anmar-bab-selebagusad, bukib-binsaedba burgwider, anmargindo.
GEN 44:32 An-babga an sogsad: ‘Ani an bega machigwa nue-dakoye.’ Deginbali, an ega sogsabalid: ‘Machigwa gannar an bega senonisulile, an-burgwedse angi atakledii guoye.’
GEN 44:33 ”A-ulale, wilesakwaa an bese egised, ani an machigwa-anar be-maigaguega be an-imaksundo. Machigwa e-iamarba-naega be imake.
GEN 44:34 Ar degisulile, ¿igi an machigwasuli gannar an-babse an naosunna? An-bab nue-dummad-wilegoed an dakbisulid.”
GEN 45:1 José bela-dulemar-ega-arbamalad-asabin geg na san bargagussoggu, binnasur goted: “¡Bela bemar-wegi-bukmalad ainimar!” A-ulale, Joséʼga-arbamalad ainidmalad, wargwensaale bukwa gussulid. Agine, José e-gwenadganga sogsad, ede doawa.
GEN 45:2 Geb degine, José binnasur boded. Degisoggu, bela Egipto-dulemar itosmalad, degi, Faraón-negginmaladse-bakar neg-gunaid wisgusmalad.
GEN 45:3 José, e-gwenadganga sogded: —Ani, an José. ¿An-bab amba dula? E-gwenadgan José-asabin-bukwadi, bela-bela dobe-itomarsoggu, geg abinsagusmalad.
GEN 45:4 Ar Joséʼdi e-gwenadganga sogded: —Wis be anse walikaa dagmala. José-e-gwenadgan José-walik-gunonimargu, José ega sogded: —Ani an be-urba-José gued. Epenne bemar Egipto-dulega an-uksa gusmaladid.
GEN 45:5 ”Degi-inigwele, ar be an-uksamaladba, mer bemar surbinsa-itomalo, mer sae be dukin itomarbalo. Ar ade, Bab-Dummad bemar-idu dulemar-baigan-bendakega an-barmialid, adi, melle ukudba burgwemalagar.
GEN 45:6 Emide, we-yargi ukud-naid-akar birgabogusad. Amba birgatar napid. Ar dulemar ibmar-digmaloen-inigwele, ibmar-weosurmalad.
GEN 45:7 Degi-inigwele, we-napneggi bemar mer berguega, Bab-Dummad bemar-idu an-barmialid, adi, bemar mer ukudba burgwegar. Degine, Bab-Dummad ibmar-gegerdaklegedgi bemar-bendakega, degi, be-mimmigan-nue-bendakega, an-imaksad.
GEN 45:8 ”Degisoggu, Bab-Dummad wese an-barmialid, bemar an-barmiarsulid. Bab-Dummad Faraónʼga binsaed-dakedgaguega an-onugsasad. Bela Faraón-negdakega, degine, bela Egipto-yargi negdaked-dummadga-megega an-onugsasbalid.
GEN 45:9 Gwae an-babse gannar be namar. Ega be sognamar: ‘Be-machi-José sogye: Bab-Dummad bela Egipto-yar-dakega an-onugsasye. Gwae be an-dakdagoye, mer be yogguoye.
GEN 45:10 Gosén-yalaganba be-mimmigan-abargi, be-wagan-abargi, bela be-ibmar-durgan-abargi, degi, bela be-ibmar-nikad-abargi be megoye. Deyobi, be an-walikaa megoye.
GEN 45:11 Ar ade, amba birgatar ukud-dummad naguosoggu, ani, an bega, be-neguyaginmaladga, degi, bela beba-gudidimaladga an mas ukoye, adi, melle ibmar-sate bemar gumalagarye.’
GEN 45:12 ”An-urba-Benjamín, degi, bemar-sunnagwad an bemarga bela-ibmar-sognaid be nue an-itosmalad.
GEN 45:13 Bela an-babga be sogmalo, ani an Egipto-yargi bela-bela gangued-nika maiye. Degine, bela wegi be ibmar-daksamalad an-babga be sogmarbalo. ¡Gwae be namar! ¡Gwae an-bab be sedamalo!”
GEN 45:14 José e-urba-Benjamín angaagwar-imakdegu, boded. Benjamín e-ia-Joséʼgi-akas-nai bonai gusmogad.
GEN 45:15 Geb degine, José bela e-iamar-angaagwar-gadgu, ise-boar e-iamar-wagar-unai gusad. Bela bonanai gusmalad. Weyob-gusad-sorba, geb e-iamar Joséʼga nabir sunmakded.
GEN 45:16 Faraón-e-negyagi bela José-e-gwenadgan-nonimarye wisgusmalad. Faraón weligwar itosad, degine, dummagan-ega-arbamalad weligwar itosmarmogad.
GEN 45:17 Geb degine, Faraón Joséʼga sogded: “Be-gwenadganga be sogo: ‘Be-moli-uayasuid-birgi ibmar-nasikye, Canaán-yarse gannar be namarye.’ ”
GEN 45:18 Faraón Joséʼga sogdebalid: “Be-iamarga be sogo: ‘Anga be-bab, degi, be-gwenadgan-Canaánʼgi-bukwad be sedagoye. Egipto-yargi napa-bur-nued an ega ukoye, degine, we-yargi mas-nued gunmaloye.’
GEN 45:19 ”Deginbali, José, be-gwenadganga be igar-ukbalo: ‘We-Egiptoʼgi urmar-napagined-ibmar-seed sedmarye, adi, be-omegan, be-mimmigan, degi, bemar-bab sedagegarye. Be-gwenadgan-Canaánʼgi-bukwadga be sogmaloye: Be dagmarye.
GEN 45:20 Deginbali, melle ibmar-nikmaladgi binsamaloye, ar ade, Egipto-yargi bur-ibmar-nued-nikadi bemargadga guoeddeeye.’ ”
GEN 45:21 Israel-e-masmala deyob imaksamalad. José, Faraón-ega-sogsadba, e-gwenadganga urmar-napagined-ibmar-seed uksad, degine, igarba mas-gunnega ega mas uksabalid.
GEN 45:22 Deginbali, José, mor-binigan e-iamarga uksabalid. Benjamínʼgardi mani-dulataled-ilapaa-aidikue-wilub (300) ega uksad, degine, mor, goatar ega uksabalid.
GEN 45:23 E-babgardi ibmar-nuegan-Egiptoʼgi-nikad moli-uayasuid-warambe (10) ena-ena barmisad. Degine, e-bab igarba mas-gunnega, moli-uayasuid-omegan-warambe (10), orosgi-dakleged, madumar, degi, masgullemalad, ena-ena barmisbalid.
GEN 45:24 José nuedgi e-gwenadgan-barmisgu, amarga sogsad: “Melle igarba be urwenadapi gumalo.” Geb degine, e-iamar nadsunnad.
GEN 45:25 José-e-gwenadgan Egipto-yargi nadsunnad. Canaán-yarse e-bab-maidse modapmalad.
GEN 45:26 Jacobʼga sogdapmargu: “José amba dula-gudiiye, Egipto-yargi dummadga negdakmaiye.” Jacob, e-masmala ega ibmar-sognaid geg itoged, geg ibmar-soge naded. Ar ade, e-masmala-bened.
GEN 45:27 Ar e-masmala José-ibmar-sogsad bela Jacobʼga sogsamalad. Jacob dakdebalid, Egiptoʼse e-sedega urmar-napagined-ibmar-seed José ega barmiali, Jacob bela-bela yeer itonaded.
GEN 45:28 Geb degine, Jacob sogded: “¡Emigindi, an nue bensurdo, an-machi-José amba dula-gudiid! Burgwed-idu an daknaoed.”
GEN 46:1 Israel Egipto-yarse nadegusad, bela ibmar-nikad sesa gusad. Israelʼde Jacobʼye nugbalid. Beerseba-neggweburse mosgu, e-bab-Isaac-e-Bab-Dummadga ibmar-ogumakar uksad. We-Bab-Dummadde e-bab-Isaac-e-Bab-Dummadmogad.
GEN 46:2 A-mutikidba Bab-Dummad Israelʼga gabdakedba sunmaksad. Jacobʼse e-nugba gornonikid: —¡Jacob! Jacob Bab-Dummad-abin sogded: —Wegi an be-itomai.
GEN 46:3 Geb degi, Bab-Dummad sogded: —Ani, an Bab-Dummadid, be-bab-e-Bab-Dummadmogad. Egipto-yarse-be-naed mer dobguo, ar ade, agi be-wagan bukidar-merguega an imakoed.
GEN 46:4 Ani, an beba Egiptoʼse naoed, degi, an-sunnad gannar we-yarse-dagega an be-imakoed. Deginbali, be burgwiar-sogele, José be-dikarba-gwichi guoed.
GEN 46:5 Geb a-sorbali, Jacob, Beersebaʼgi-maid naded. Israel-machimala, Faraón-urmar-napagined-ibmar-seed-barmialidgi, e-bab, e-bab-e-omegan, degi, e-mimmigan-onakwis sesmalad.
GEN 46:6 Jacob, degi, e-gwenadgan, bela Egipto-yarse nadmalad. We-ibmar sesmalad: E-molimar-bebe-nikad, e-sibad-wawaadmar, degi, bela Canaán-yargi ibmar-nikad sesad.
GEN 46:7 Bela wemar Jacobʼba Egipto-yarse nade gusmalad: E-masmala, e-sisgan, degi, e-wagan.
GEN 46:8 Jacobʼde Israelʼye nugbalid. Israel-masmala Egipto-yarse-nadegusmalad-e-nugmar, wemalad: Rubén, Jacob-machi-gebesailagined.
GEN 46:9 Rubén-e-masmaladi, wemalad: Hanoc, Falú, Hezrón, Carmi.
GEN 46:10 Simeón, Rubén-yarbalidid. E-masmaladi, wemarmogad: Jemuel, Jamín, Ohad, Jaquín, Zohar, Saúl. Saúl-e-nande Canaán-dolad.
GEN 46:11 Leví, Simeón-yarbalidid. E-masmaladi, wemarmogad: Gersón, Coat, Merari.
GEN 46:12 Judá, Leví-yarbalidid. E-masmaladi, wemarmogad: Er, Onán, Sela, Fares, Zara. Ar Erʼdi, Onán-ebogwa Canaán-yargi burgwismalad. Fares-e-masmaladi, wemarmogad: Hezrón, Hamul.
GEN 46:13 Isacar, Leví-yarbalidid. E-masmaladi, wemarmogad: Tola, Fúa, Job, Simrón.
GEN 46:14 Zabulón, Isacar-yarbalidid. E-masmaladi, wemarmogad: Sered, Elón, Jahleel.
GEN 46:15 Jacob, we-masmala Padan-Aram-neggweburgi Leaʼbo baksa gusad. Agi, e-bunagwa-Dina baksabalid. Bela-e-wagan: Omegan, degi, macherganse-bakar, dulagwen-gakambe-gakapaa-mergu (33) gusad.
GEN 46:16 Jacob masmala-Zilpaʼbo-baksad, wemalad: Gwensak, Gadʼye nugad. E-masmaladi, wemalad: Zifión, Hagui, Ezbón, Suni, Eri, Arodi, Areli.
GEN 46:17 Baiddi, Aserʼye nugad. E-masmaladi, wemarmogad: Imna, Isúa, Isúi, Bería. Degine, amar-e-bundi Seraʼye nugad. Bería-e-masmaladi, wemarmogad: Heber, Malquiel.
GEN 46:18 We-masmala-ebogwad, Zilpa Jacobʼbo baksad. Zilpaʼde Labán-e-mai guenad. Labán na e-sisgwa-Leaʼga Zilpa-uksa gusad. Bela Zilpa-masmala e-mimmiganse-bakale, warambe-gakanergwa-mergu (16) gusad.
GEN 46:19 Raquel Jacobʼbo-baksaddi, wemalad: José, Benjamín.
GEN 46:20 José Egipto-yargi Asenatʼbo-masmala-baksadi, wemalad: Manasés, Efraín. Asenatʼde, Potifera-e-sisgwad. Potiferaʼde, On-neggweburgi dule-irwa-e-bab-dummadse-goledid.
GEN 46:21 Benjamín-e-masmaladi, wemarmogad: Bela, Bequer, Asbel, Gera, Naamán, Ehi, Ros, Mupim, Hupim, degi, Ard.
GEN 46:22 Wemala, Raquel, degi, Jacob-wagan-gumalad. Bela warambe-gakabake-mergu (14) gusad.
GEN 46:23 Jacob masmala-Bilhaʼbo-baksad, wemalad: Gwensak, Danʼye nugad. E-machidi, wedid: Husim.
GEN 46:24 Baiddi, Neftalíʼye nugad. E-masmaladi, wemalad: Jahzeel, Guni, Jezer, degi, Silem.
GEN 46:25 We-masmala-ebogwad, Bilha Jacobʼbo baksad. Bilhaʼde Labán-e-mai guenad. Labán e-sisgwa-Raquelʼga Bilha-uksa gusad. Bela Bilha-masmala e-mimmiganse-bakale, walagugle-mergu (7) gumalad.
GEN 46:26 Dulemar-ablis-galagwenmalad Jacobʼba Egipto-yarse nonimaladi, bela dulapaa-gakanergwa (66) mergued. E-masmala-e-omegandi gwen obarilesulid.
GEN 46:27 José-e-masmala Egipto-yargi warbo gwalulesmalad. Degisoggu, Jacob, e-masmala, degi, e-waganse-bakale, bela dulapaa-gakambe (70) Egipto-yargi megidapmarsundo.
GEN 46:28 Jacob e-idu José-daknaega Judá-barmisad, adi, José Gosén-yalaganse e-abindakdagegar. Jacob, degi, eba-danimalad Gosén-yarse nonimarsunnad.
GEN 46:29 Geb degi, José e-bab-abindaknaega igar-ukded, ega guakwaa ur-napagined nasikye. José Gosén-yargi e-bab-abinguargua, angaagwar e-bab-gasad. E-bab-gukingi undar bonai gusad.
GEN 46:30 Geb degine, Israel Joséʼga sogded: —An gannar be-daksadba, degine, amba-dula an be-daknonikidba, emigindi, ¡an burgwer, akarsulid!
GEN 46:31 José e-iamarga, degi, e-bab-neguyaginmaladga sogded: —An Faraón-owisogega, Faraón-daknagwelo. An ega sogdapoed: ‘An-iamar, degi, an-bab-e-wagan Canaán-yalagi-mamaiye, wese Egipto-yargi-megega anse nonimarye.
GEN 46:32 Amarde, sibad-wawaad-akwedgi, degi, moli-bebe-nikmalad-akwedgi arbamarye. Na e-sibad-wawaadmar, e-moli-bebe-nikmalad, degi, bela e-ibmarmar-nikamalad senonimarye.’
GEN 46:33 Faraón bemarse gollalir, degine, bemarse egichialir, ibigi bemar arbamarye,
GEN 46:34 bemar abin-sogoed, bemarde gusgu be-dadganyobi sibad-wawaad-akwedgi arbamarye. Deyob be sogele, adi, nabir bemar Gosén-yalaganba megmaloed, ar ade, Egipto-dulemarga igar maisulid, dule-sibad-wawaad-akwemalad-ebo megmalad.
GEN 47:1 José, Faraón-owisonaded, ega sogdapid: —An-bab, degine, an-iamar-Canaán-yargi-mamaid, emi bato Gosén-yarse nonimalad, bela ibmar-nikad, sibad-wawaadmar, degi, moli-bebe-nikmalad senonimarbalid.
GEN 47:2 José, Faraónʼse e-iamar-walatar sesad, adi, Faraón amar-mag-dake guegar.
GEN 47:3 Geb degine, Faraón José-e-iamarse egichialid: —¿Ibigi bemar arbamala? Amar abin-imakdemalad: —Dummad, anmar-be-maigan-gumaladi, anmar-dadganyob anmar sibad-wawaad-edarbemalad gumalad.
GEN 47:4 Anmar we-yarse megega nonikid, ar ade, Canaán-yalagi ukud yaisulid, anmar-sibad-wawaad gagan-maed sate gualid. Degisoggu, Dummad, Gosén-yargi-megega wis be anmar-imake.
GEN 47:5 Geb degine, Faraón, Joséʼga sogded: —José, be-bab-nonikidi, be-iamar-nonikidi, be-walik-megega nonimalad.
GEN 47:6 Egipto-yala bega guakwaa naid. Be-gwenadgan-megega Gosén-yar ega be uke, ar ade, a-napa, napa-baiganba bur nuedid. Ar be-gwenadgan-abargi machergan-nue-yeer-ibmar-durgan-akwemalad-nikadibe, amar an-ibmar-durgan-akwega be onugsaodo.
GEN 47:7 José, Faraónʼse e-bab-sesa gusbalid, adi, Faraón Jacob-mag-dake guegar. Jacob, Faraón-argan-gadgua, ise-nued-egi-binsaedgi ega sogsad, be undarsaar megena gadinye.
GEN 47:8 Geb Faraón Jacobʼse egichialid: —¿Birgabigwa be nika?
GEN 47:9 Jacob Faraón-abin sogded: —Birga-dulanergwa-gakambegus (130), we-napneggi an bipirmakdiid. Doggus ibagan-nuegan an daksasurgusad. Ibagan-isganagi bur bule an gudii gusad. An-dadgan-sergu-megisadyob yoo an ese warmaked.
GEN 47:10 Geb a-sorbali, Jacob Faraónʼga sogded, degimaloye. Geb Jacob noded.
GEN 47:11 Degidgine, Joséʼdi, e-bab-Jacob, degi, e-iamar, Egipto-yargi-megega imaksad. Geb degine, José Faraón-ega-igar-uksadba, Ramesés-yargi, e-babga, degi, e-gwenadganga, nainumar-bur-nued uksad.
GEN 47:12 Deginbali, José e-gwenadgan-mas-abegedba, bela e-gwenadganga mas-ukmai gusad.
GEN 47:13 Bela neggweburmargi bur bule ukud nasgumaid. Abali, mas sategusad. Egiptoʼgi, degi, Canaán-yargi ukudba dulemar burgwemamaid.
GEN 47:14 Egiptoʼginmalad, degi, Canaánʼginmalad orosgi-dakleged Joséʼse-bakega bela e-mani ebusmalad. A-mani, José, Faraón-neggi bela sabosad.
GEN 47:15 Egiptoʼgi, degi, Canaán-yargi mani-sategussoggu, Egipto-dulemar Joséʼga sognadmalad: —¡Be anmarga masgunned udage! Mani-satedba, ukudba be anmar-oburgwer, igar maisulid, wedi noaled.
GEN 47:16 José dulemar-abin sogded: —Ar bemar mani bergusale, be-ibmar-durgan be sedamalo. A-muchub, an bemarga orosgi-dakleged ukoed.
GEN 47:17 Egipto-dulemar Joséʼse we-ibmar-durgan senonimalad: Molimar, sibad-wawaadmar, sibadmar, moli-bebe-nikamalad, degi, moli-uayasuidmar senonimalad. A-birgagi, José, a-muchub ega orosgi-dakleged uksad.
GEN 47:18 A-birga-bergusgua, birga-baid nagunonikid. Geb Egipto-dulemar Joséʼga sognonimalad: —Dummad, anmar mani-satedi, geg anmar begi odukued. Deginbali, anmar-ibdurgan bela begadga gusbalid. Anmar mas-bakega, ibmar-baigan-bega-uked sated. Degisoggu, anmar-nainu, degi, anmar begadga gumalargebed.
GEN 47:19 Be anmar-nainu baksundo, be anmar-bakbarsundo, adi, masgi be anmar-ogundii guegar. Anmar Faraón-e-maiga gumaloed, degine, ibmar-gwaggi anmar-nainugi-anmar-arbaoedi, Faraónʼgadga guoed. Mer anmar burgwega, degi, melle napa binsa wilenai-gubaliga, be anmarga ibmar-gwag udado. ¿Ar ibiga burgwega be anmar-imakoe? ¿Ibiga binsa nainu wilenai-guega be imakbaloe? Melle deyob be imake.
GEN 47:20 Geb degine, José Egipto-yargi Faraónʼga bela nainu baksad, ar ade, Egipto-dulemala ukudba na e-nainu ukdemalad. Weyobi Faraónʼgadga nainumar gunonikid.
GEN 47:21 Degisoggu, Egipto-dulemala bela Egipto-yargi Faraón-maiga gunonimarsundo.
GEN 47:22 José unnilagwa Egipto-dule-irwa-bab-dummaganse-gormalad-e-nainubi baksasulid, ar ade, Faraón amarga orosgi-dakleged ukdaed. Degisoggu, amardi e-nainu uksasurmalad.
GEN 47:23 Geb degine, José dulemarga sogded: —Emigindi, be-nainumar, degi, bemar, Faraónʼgadga gunonikid. Ar ade, ibmarmar-an-baksadi, Faraónʼga an baksad. Emigindi, an bemarga ibmar-gwag digmalaga an uked.
GEN 47:24 Bemar ibmar-weemaloedi, sagu-walatargi gwensak Faraónʼga be ukmaloed. Sagu-warbakegwaddi, be digega ebumaloed. Adi bemar, be-mimmigan, degi, bela dulemar-beba-gudidimalad a-ibmar gunmalagar.
GEN 47:25 Dulemar José-abin sogdemalad: —Be nued anmargi daed. Nue be anmar-bendaksad. Degisulina, anmar burgoenad. ¡Anmar Faraón-maiga gumalodo!
GEN 47:26 Weyobi José igar-mesnonikid, bela Egipto-yalagi ibmar-durbagan-welegedi, sagu-atargi gwensak Faraónʼga ukoye. José weyob igar-mesisadi, amba we-garda-narmaklenaidse, deyob, we-igar maid. Ar Egipto-dule-irwa-bab-dummadyob-imakdimaladse-gormaladdi bennuksurmalad, ar ade, e-nainumala Faraónʼgadga gussurgusad.
GEN 47:27 Israel-dulemala Egipto-yargi-yoggunonimaladi, Gosén-yargi megnonimalad. Agi, nainumar na nikudmalad, dula-ichesur-mergu gudmalad.
GEN 47:28 Jacob birgambe-gakagugle (17) Egipto-yargi megisad. Jacob birga-dulagugle-gakagugle (147) gudii gusad.
GEN 47:29 Ibagwengine, Israel e-burgwed warmaksa itoalid. A-ulale, e-machi-Joséʼse gochad, ega sogded: —Ar ibmar-nued be anga nue-imakbiele, be-argan an-dua-urba be mese. Weyobi be anga oyogoed, an bese ibmar-egisoed, be anga imakedseye. Degisoggu, an bese egised, melle Egipto-yargi be an-mui-digo.
GEN 47:30 An-babganyob an burgwenonimogale, Egipto-yargi be an-mui sedo. Bia an-babgan-muimar digar mamai, agi be an-mui digmogo. José e-bab-abin sogded: —An deyob imakodo.
GEN 47:31 E-bab Joséʼgi alamaknai gusad: —¡Ise-sogar be anga soge, deyob an imakoye! José ise-sogar abin-sogded: —Eye, deyob an imakoe. Geb degine, Israel e-gabed-nono-onakwedsik, e-nono yollee imaksad.
GEN 48:1 Iche-naded-sorbali, Joséʼga sokarmalad, be-bab uellemaiye. Geb degine, José e-bab-daknaded. José, e-masmala-warbogwad, Manasés, degi, Efraín, eba sesa gusad.
GEN 48:2 Jacob-owisosmargu, be-machi-José be-dakdaniye, Jacob na gandik imaksad, degi, e-gabedgi sigisad.
GEN 48:3 Geb degine, Jacob Joséʼga sogded: —Bab-Dummad-Bela-Gangued-Nikad, Canaán-yargi, Luz-neggweburgi, anse magaros gusad. Agi, angi ise-nued-binsaedgi anga sogsa gusad:
GEN 48:4 ‘Nue be an-itoye, mimmigan-bukidar-nikuega an be-imakoye. Degine, begi dulemar-bukidar-galagwensuli-ainiega an imakoye. Deginbali, be-waganga we-yala an ukoye. We-yalade be-wagangadga degisadegu guoye.’
GEN 48:5 ”Nabir, be-machi-Efraín, degi, be-machi-Manasés, an bese we-Egipto-yarse-nonikid-iduar, we-yargi gwalulesmalad. We-masmalade angadid. Igi Rubén, degi, Simeón an-masmala-sunnadi, wemarde deyob gunonimarmogad.
GEN 48:6 We-masmala-warbogwad-sorba be mimmigan-nikuoedi, adi, begadga guoed. Amardi Efraín, degi, Manasés-e-urbamarsoggu, e-iamarba ibmar nikumarmogoed.
GEN 48:7 An Padan-Aramʼgi danigua, Canaán-yargi be-nan-Raquel Efrata-neggweburse-warmakdanikidgi angi burgwisad. A-igarba an e-mui digsad. Emigindi, Efrata-neggweburde Belénʼye nugad.”
GEN 48:8 Israel ukiar José-e-masmala-dakargu, egichided: —Wemardina, ¿we doamala?
GEN 48:9 José e-bab-abin sogded: —We-masmala, Bab-Dummad anga we-Egipto-yargi uksadid. Geb degine, e-bab Joséʼga sogded: —Be-masmala wis gatik anse walikaa be nidage, adi, ise-nued-an-egi-binsaedgi ibmar ega sogegar.
GEN 48:10 Israel bato nue selebagusad, nue-aku atakgusad. Bar nue-ataksursoggu, José e-masmala e-babse walikaa sesad. Israel masmala-angaagwar-gasgua, ei wagar usad.
GEN 48:11 Geb degine, Israel Joséʼga sogded: —Bar-be-dakosurye an bienad. Degi-inigwele, Bab-Dummad be-masmala-dakega an-imaksad.
GEN 48:12 José e-masmala e-bab-Israel-yokor-imbaba-gwichidi onosad. Geb degine, José e-bab-asabin e-bebe napase-warmakedse imaksad.
GEN 48:13 Geb degine, José e-masmala-warbogwad e-argangi gasad, Efraín, e-argan-nuedsik, degi, Manasés, e-argan-sapiledsik gasad. Geb agine, gannar e-bab-Israelʼse walikaa sesad. Agala, Efraín Israel-argan-sapiledsik gwisgusad, degi, Manasésʼdi Israel-argan-nuedsik gwisgusmogad.
GEN 48:14 Israel, e-argan masmalagi-mesidgu, e-argan muchub biir imaksad. Degisoggu, Israel e-argan-nued machi-bipigwad-Efraín-nonogi mesisad. Manasés-bur-dummad-inigwele, Israel e-argan-sapileddi, Manasés-nonogi mesisad.
GEN 48:15 Geb degine, Jacob Joséʼgi ise-nued-binsaedgi ega sogded: “Bab-Dummad-sogedba, an-dad-Abraham, degi, an-bab-Isaac, nanadii gusad. A-Bab-Dummad, an gwalulesad-akar an-edarbediguad.
GEN 48:16 Bab-Dummad-e-baliwitur bela bonigangi an-bendakdii gusad. A-baliwitur we-masmalagi ise-nued binsasun. We-masmalaba an-nug ebinsaledii gusun. Degine, Abraham-e-nug, degi, Isaac-e-nug ebinsaledii wemarba gumarsun. Wemala mimmigan-ichesuli nikumarsunno, degine, we-napneggi bemar dula-ichesur-mergu gumarsun.”
GEN 48:17 Ar Joséʼdi, e-bab Efraín-nonogi e-argan-nued-mesisadi, gwen nabir daksursoggu, José e-bab-argan-nued gasad, Efraín-nonogi-maidgi onirisad. Geb José e-bab-argan-nued Manasés-nonogi mesnaigu, e-babga sognaid:
GEN 48:18 —¡Baba, suli, weyobsuli! We, bur-dummadid. Be-argan-nued we-nonogi be mese.
GEN 48:19 Ar e-bab-Jacobʼdi yapa deyob imakgusad. Geb José-abin sogded: —¡Machi, bato an wisi! Ar Manasés amba dule-nue-nug-nikadga gumogoed. Degi-inigwele, e-urba-Efraínʼdi bur bule nug-nika guoed, degi, e-wagangi dulamar-bukidar akar-akar ainidagoed.
GEN 48:20 A-ibagi, Jacob we-masmalagi ise-nued-binsaedgi ega sogded: “Israel-dulemar dulemargi ise-nued-binsadmalale, bemar-nug obarmaloed. Weyob sogmaloed: ‘Bab-Dummad, igi Efraín, degi, Manasés-imaksa, deyob bemar-imakmosun.’ ” Weyobi Israel, Efraín bur Manasésʼba nug-dummarba imaksad.
GEN 48:21 Geb degine, Israel Joséʼga sogded: —Nue be itogo. An burgoed. Ar degi-inigwele, Bab-Dummad bemarba gudii guoed. Bab-Dummad bemar-dadgan-yarse gannar bemar-sedoed.
GEN 48:22 Be-gwenadganba an bega bur bule ibmar uked. An bega Siquem-yala uked. We-Siquem-yarde Amorreo-dulemargi an bila-onosgu, an-egi-nakwisadba an ei susad.
GEN 49:1 Jacob e-machimalase gochad. Ese nonimargu, ega sogded: “Anse walikaa be dagmar. An bega sogoed, igi bemar yoedse guoe.
GEN 49:2 Masmala, be an-itomalagala, anse be dagmar, be-bab-Israel be nue itodamar.
GEN 49:3 ”Rubén, be an-machi-sailaginedid, be an-ganguedid, be-inse an-san-burbagi danikidid. Be-inse bur nug-dummarba-nika guedid, be-inse bur gangued-nika guedid.
GEN 49:4 Ar ade, be diwar-nomaidyob gued, geg be galeged. Ar an-omese be gornonigu, an-gabedgi be dodosad. A-ulale, bur dummadga bar be guosulid.
GEN 49:5 ”Simeón, Leví, gwenadgan gumalad. Es-suidmargi dulemar-sabsur-imakdamalad.
GEN 49:6 E-onmakbukwadse, gwen an dogbisulid. E-igar-itobukmalad-abargi, gwen an sigbisulid. Ar ade, sae-itodmargu, dulemar-oburgwismalad. Yogasaar moli-bebe-nikad-e-dua-dub-wardummad siksamalad.
GEN 49:7 Be-doggus-urwed bela-bela isdar-itolegega gusun. Degine, be-sabsur-ibmar-imaked, bela-bela isdar-daklegega gusun. Jacob-yalaganba an bemar-oaisakioed, Israel-neggweburmargi bela aisakiega an bemar-imakoed.
GEN 49:8 ”Judá, be-gwenadgan be-nug odummomaloed. Be-gwenadgan be-abin dulluu e-bebe napase ebulegedse imakmaloed. Be-isdarmaladgi be obindii guoed.
GEN 49:9 Judá, be achumigur-sapingwagwadyob gued, Masgasa-gunnaid bergusale, obunnomegisdaed. ¿Doa ese achaoe? Dule geg ese achaed.
GEN 49:10 Judá-dulemar-abargi dule-negsemaid gwen surguosulid, degine, gaapoled-e-ibed danikidse e-gaapoled-ganikid egi suosurmarbalid. Ar ade, dulemar-yar-baid-baidgi-bukmalad e-rey-Siloh-nonikoed, a-rey-sogedba nanamaloed.
GEN 49:11 Judá mani-ibedga gunonikosoggu, uva-bukidar-nikadba e-moli-uayasuid uva-sailagi edinnoed, e-moli-bipi bur uva-e-wardummadgi edinnoed. Degi, Judá vino-obine-nikadba, e-mor vinoʼgi enukoed. ¡Vinoʼgi, e-mordummad enukbaloed!
GEN 49:12 E-ibya vinoʼba bur gudureged. E-nugarmar moli-nunisba bur sibudikid. Ar Judá, mani-ibedid.
GEN 49:13 ”Zabulón, demar-gakagi megoed. Agi, urmar-nagued-neg nika guoed. E-ambikuoed, Sidón-yalase warmakoed.
GEN 49:14 ”Isacar, moli-uayasuid-dutusulidyob gued. Geg-gwisgue e-neg-yagi sagumar-imbagi obunnomaid.
GEN 49:15 Isacar, obunnogega, yar-nued-dakargua, degi, yeerdaklege dakargua, ibmar-berbegega na san imaksad, emar-maiga gunonikid.
GEN 49:16 ”Dan, Israel-masmala-ambe-gakabogwad-baiganyobmogad (12). Dan, e-sordamarga igar-nudakedga guoed.
GEN 49:17 Dan, naibe-buled igargi-maidyob guoed, a-naibe moli-maligi warmaksale, dule-moli-birgi-siid argwatedaed.”
GEN 49:18 Jacob sogdebalid: “¡Bab-Jehováʼye, bela-bela be an-abonoged, an-edarbediid!”
GEN 49:19 Geb degine, Jacob e-masmalaga sogdebalid: “Gadʼgi sordamar-urwemalad bukidar gwisgunonimaloed. Degi-inigwele, Gadʼdi, a-sordamar-baregitoed.
GEN 49:20 ”Aser mas-yaisur-nika guoed. We-masmar reymar-mas-gunnedyob yeer-gulle itomaloed.
GEN 49:21 ”Neftalí, igi goe-ome sapurba e-itolegedba gudidae, degi, e-mimmigan yeerdakle nikabali, deyob gued.
GEN 49:22 ”José, dian-dikarba sapi-gwichiyob gued, sapi-yaisur-sanmakedyobid, e-anagan galu-birgi obakmamaid.
GEN 49:23 Joséʼga nunmaked-dummad uksamalad, sigu-mimalad isdar be-dakmaladba begi sigu mismalad.
GEN 49:24 Degi-inigwele, bedi sikirmaksasulid, be-garganguedba be-warsi be gachii ganigwichi gusad. ¡Jacob-e-Bab-Dummad-Gandik-Maid, dog-nuedye an bega soged! Bedi sibad-wawaad-edarbedyob emar-idumaid, bedi, akwasaila-dule-odukuedyob gued, be Israel-bendakedid.
GEN 49:25 ¡Ar ade, be-bab-e-Bab-Dummad be-bendakoed! Bab-Dummad-Bela-Gangued-Nikad, ise-nued begi binsaoed. ¡Nibneggi ise-nued begi binsaoed! ¡Demar-uluba ise-nued begi binsaoed! Bemala, ichesur mimmigan-nika gumaloed, degi, be-mimmigan masgi be-omadii gumaloed.
GEN 49:26 An-babgan angi ise-nued-binsasadba, be-bab ise-nued bur begi binsanaid. José, we ise-nued begi binsalesadi, yarmar-epenneganagi ibmar-sanmakedba bur nueganad, sapur-epenneganagi ibmar-sanmakedba bur nueganad. José, we-ise-nued-binsaleged, begadid. Ar be-gwenadgan-abargi be sulesad.
GEN 49:27 ”Benjamín, achu-sapur-gadi-urwedyob gued. Wakdar e-masgasad gundaed. Sedodi, e-mas-obichadi, e-sordaganmala gundaed.”
GEN 49:28 Wemala, Israel-dulemar-sogambe-gakabo-ambikusadid (12). Weyob e-bab-Jacob ise-nued-binsaedgi e-masmala-war-wargwenga na emar-guoedgi ega napi sunmaksad.
GEN 49:29 Ibagwengi, Jacob weyob e-masmalaga igar uksad: “An-burgwed warmaksad. An burgwisale, Canaán-yalagi, Het-dule-Efrón-nainugi, akwasaila-ollor-siidgi, an-dadgan-dikarba an-mui be digmalo.
GEN 49:30 A-akwasaila-ollor-siid an bega obared: Mamre-asabin Macpelaʼgi akwasaila-ollor-siid. Deunni, Abraham Het-dule-Efrónʼse nainu-baksagu, we-akwasaila-ollor-siid baksa gusbalid. Adi, agi e-gwenadgan-e-muimar digegar.
GEN 49:31 Agi, Abraham, degi, e-ome-Sara digsamalad. Agi, Isaac, degine, e-ome-Rebeca digsamarbalid. Deginbali, agi, Lea an digsamogad.
GEN 49:32 We-nainude, degine, akwasaila-ollor-siidde Het-dulese bakles gusad.”
GEN 49:33 Jacob weyob e-masmalaga igar-uksad-bergusgu, gannar megided. Geb degine, burgwissunnad.
GEN 50:1 Geb degine, José e-bab-mui angaagwale gasad, geb nue-bonai, napi e-bab-wagar usad.
GEN 50:2 Geb a-sorbali, José nermar-ega-arbamaladga igar-ukded: “E-bab-Israel-e-muigi ina-wawadikmalad eoye, adi, melle e-mui nunguegarye.” Ar nermar deyob imaksamarsunnad.
GEN 50:3 Ina-wawadikmalad Jacob-muigi-eogegala iba-dulabo (40) gagasmalad. Ar ade, muigi ina-eomalaga, deyob ibagan abeleged. Egipto-dulemala iba-dulapaa-gakambe (70) Jacobʼba bukib-itobukwa gusmalad.
GEN 50:4 Degine, ibagan-bukib-binsaed-bergusad-sorba, José dulemar-Faraón-neggi-gudidimaladga sunmakalid. Ega sogded: —Ar an bemargi nuedile, Faraónʼga wis be anga sognamar:
GEN 50:5 ‘An-bab burgwedani-maigu, ega ise-sogar an-imakega an-imaksad, ande e-neg-uan-guakwa-sisadgi e-mui-digoye. We-neg-uan Canaán-yalagi siiye. Degisoggu, an begi wileye, an-bab-mui-dignaega be an-imakye. An-bab-mui-digsayalaba gannar an nonikoye.’
GEN 50:6 Geb degine, Faraón Joséʼga sogsad: —Be nao. Igi be-bab ise-sogar-be-imakega be-imaksa, deyob be be-bab dignao.
GEN 50:7 Geb José e-bab-dignad gusad. Eba bela dule-dummagan-Faraónʼga-arbamalad, Faraón-neggi dule-dummagan-nug-nikamalad, Egipto-yargi dule-dummagan-nug-nikamalad, eba nade gusmalad.
GEN 50:8 Deginbali, José-e-negginmalad, José-e-iamar, Jacob-e-negginmaladse-bakar, nade gusmarmogad. Unnila mimmiganbi, degi, ibmar-durganbi Gosén-yargi obesmalad.
GEN 50:9 Deginbali, dulemar-bukidar ur-napaginedgi, degi, dulemar-bukidar moli-birgi-sii eba nade gusmalad. Degisoggu, dulemar-ichesur Joséʼba nade gusmalad.
GEN 50:10 Atadʼye-neg-nugadse, ibmar-gwag-omukued-negse modapmargu, bela nue-bukib itosmalad, degi, nue-dummad bosmalad. Atadʼde, diwar-Jordán-dad-nakwedsik naid. Agi, igar-maidba José e-babba ibagugle (7) bukib-binsadii gusad.
GEN 50:11 Canaán-dulemar-agi-bukmalad, dakdemargu Egipto-dulemar ise-boar-gunanai, sogdemalad: “Egipto-dulemar-ibe dule-dummad burgwis-dakleye.” A-ulale, a-neg bismalad, Abel-Misraimʼye. A sogleged, Egipto-dulemar-bosmalad-nebaye. We-nebade Jordán-diwar-dad-nakwedsik naid.
GEN 50:12 Jacob-e-masmala, ar igi e-bab ese egichisgusa, deyob bela imaksamalad:
GEN 50:13 E-bab-mui Canaán-yarse sesa gusmalad. Macpela-nainugi akwasaila-ollor-siidgi digsamalad. We-nainude Abraham, Het-dule-Efrónʼse baksa gusad. Adi, agi e-gwenadgan digegar. We-nainude, degine, akwasaila-ollor-siidde Mamre-dad-nakwedsik naid.
GEN 50:14 José, e-bab-digsad-sorba, e-gwenadganmala, degi, bela eba-gudimalad Egipto-yarse gannar nonimalad.
GEN 50:15 Jacob burgwissoggu, José-e-iamar binsadmalad: “Anmar Joséʼgi nue-dododii gusad. A-ulale, abakalegi José isdar anmar-dakalile, buged-mai anmar-imakalile, wede, ¿igi anmar gudoe?”
GEN 50:16 Degidbali, e-iamar Joséʼga weyob gayaburba barmismalad: “Anmar-bab burgwed-idu anmarga weyob sogsad, bega weyob sogoye:
GEN 50:17 ‘Be-iamar-dummad-begi-nosadi, sabsur-be-imaksamaladi, wis be iegoye, begi-nossuliyob be dakoye.’ ”Degisoggu, anmar bese egised, anmar dummad-begi-nosadi, begi nossuliyob be anmar-dake. Ar anmarde be-bab-e-Bab-Dummad-e-mai gumalad.” Ar Joséʼga-gaya-berbedimalad weyob ega sognanaigua, Joséʼdi ise-boar naded.
GEN 50:18 Geb degine, José-e-iamar-sunnad nonimalad, José-abin e-bebe dulluu napase ebulegedse imaksamalad, geb ega sogdemalad: —Anmar nonimalad. Anmar be-mai gumalad.
GEN 50:19 Ar Joséʼdi e-iamar-abin sogded: —Mer dobgumar. ¿Ar an Bab-Dummadsi? Suli. E-ibmar-imaked geg an imaked.
GEN 50:20 Ar bemar sabsur-an-imaksa-inigwele, emi bemar negdakedi, Bab-Dummaddi dulemar-bukidar-bendakega, mer burgwemalaga, we-ibmar-isgana-gusadi, ibmar-nuedga obinnisad.
GEN 50:21 Degisoggu, mer dobgumar. Ani, an bemarga, degi, be-mimmiganga mas ukoed. Weyob, José e-iamar-dobee-itogedi, baisur-itogega imaksad. Ar ade, José nue-sabedgi e-iamarga sunmaksad.
GEN 50:22 José, degine, e-bab-e-gwenadgan Egipto-yargi amba maigusmalad. José birga-dulatar-gakambe (110) gudii gusad.
GEN 50:23 José Efraín-wagan daksad. Degine, e-wagwa-Maquir-e-mimmigan egadga imaksad. Maquirʼde e-machi-Manasés-e-machid.
GEN 50:24 Ibagwengine, José e-gwenadganga sogded: “An-burgwed warmaksad. Bab-Dummaddi bemar-bendakdanikoed, we-yargi bemar-onogoed. Bab-Dummad bia Abrahamʼga, Isaacʼga, degi, Jacobʼga yar-ukoye-sogsagusadse bemar-sedoed.”
GEN 50:25 Geb degine, José Israel-dulemar ega ise-sogar-imakega imaksad, anmar bega deyob imakedseye. Geb degine, José ega sogded: “Ar nue-napiragwad, Bab-Dummad bemar-bendaknonikoed. Ar deyob gunonikile, bemar an-garmar wegi be sedmalo.”
GEN 50:26 Geb José Egipto-yargi-maid birga-dulatar-gakambe-nikadgi (110) burgwenonikid. José-e-muigi ina-wawadikmalad eosmalad, adi, melle e-mui nunguegar. Geb degine, mui-e-ulugi Egipto-yargi mesismalad.
EXO 1:1 Wemar-Israel-masmala na e-babba Egipto-yarse nonigusmalad:
EXO 1:2 Rubén, Simeón, Leví, Judá,
EXO 1:3 Isacar, Zabulón, Benjamín,
EXO 1:4 Dan, Neftalí, Gad, degi, Aser.
EXO 1:5 Jacob-e-gwenadgan bela dulapaa-gakambe-mergu (70), Egiptoʼse nonimalad. Joséʼdi bato Egipto-yargi maid.
EXO 1:6 Ibagan-nadedba José, e-gwenadgan, degine, bela na e-unni-sergumaladi burgwismalad.
EXO 1:7 Ar Israel-dulemar mimmigan-ichesur-nikussoggu, yaisur merguded. Degisoggu, dutusur gunonimalad. Egipto-yargi Israel-dulemar bela-bela-mergu ambikunonimalad.
EXO 1:8 Undar birgamar nasad-sorba, Egipto-yargi rey-baid megnonikid. A-rey wissulid, José doa-dule gusa. A-reyde e-dulemarga sogded:
EXO 1:9 “Be dakmar, Israel-dulemar anmarba bur melumalad, degine, anmarba bur dutusurmarbalid.
EXO 1:10 ”Degisoggu, anmar ise-itoar igar-amiergebed, adi, melle bar sordamar ega merguegar. Ar degisulile, anmar bila-onoalile, abakalegi anmar-isdarmaladba-akadele, anmargi aibinnalile, ar degiile, dule-dummaganga gudmaloed.”
EXO 1:11 A-ulale, Egipto-dulemar dummagan-onugsasmalad, adi, Israel-dulemar arbaed-dutusulidgi oarbamalagar. Egipto-dulemala Faraónʼga-mas-sabogega neggweburmar-sobega Israel-dulemar-imaksad. We-neggweburmarde, Pitónʼye, degine, Ramesésʼye nugad.
EXO 1:12 Ar Egipto-dulemar bur bule Israel-dulemar-sabsur-imakmaidba, aka bur bule Israel-dulemar mergumaid. Degisoggu, Egipto-dulemala bela-bela Israel-dulemar-nue-dobguarmarsunnad.
EXO 1:13 Egipto-dulemala e-maiga Israel-dulemar bela-bela sabsuli imaksad.
EXO 1:14 Nue wiosmalad, arbaed-dutusulid ega ukdamalad, napsa-obured, degi, napsa-ginnid akwayob-sobega, deginbali, bela sapurba-arbaleged amarga uksabalid. Bela wemargine, Israel-dulemala sabsur imakledamalad.
EXO 1:15 Deginbali, Egipto-e-rey Hebreo-omeganga-sikwigamaladga sunmaksad. A-mukwa-gwensak Sifraʼye nugad, baiddi, Fúaʼye nugad. Amarga Faraón sogded:
EXO 1:16 —Bemar Hebreo-omeganga sikwigaarmalale, nue be dakmalo, wede machigwadibe, bunolodibe. Machigwale, oburgwemalo. Bunolordina, melle oburgwemalo.
EXO 1:17 Degi-inigwele, mukwamar-sikwigamalad Bab-Dummad-dobe itosmalad. A-ulale, Egipto-rey-ega-sogedba imaksasurmalad, machimala-oburgwissurmalad.
EXO 1:18 Geb degine, Egipto-rey mukwamarse gochad, amarga sogded: —¿Ar ibiga wede bemar machimala-oburgwedasurmala?
EXO 1:19 Mukwamar Faraón-abin sogdemalad: —Ar ade, Hebreo-omegan Egipto-omeganyobsulid. Ar Hebreo-omegandi dutusulid, amba yoo anmar ese warmake, bato ugakgusdaed.
EXO 1:20 Bab-Dummad mukwamar-sikwigamaladgi nued-binsasad. Israel-dulemardi mergumai, degine, bur bule dutusurgumai gusad.
EXO 1:21 Ar mukwamar-sikwigamalad Bab-Dummad-dobe-itosmarsoggu, Bab-Dummad egi nued-binsasad, bukidar-mimmigan-nikuega imaksad.
EXO 1:22 Ar Faraónʼdi na e-dulemarga igar-mesisad: “Hebreo-dule-gwalulesale, machigwadibe, bela diwarse metemalo. Bunolordina, melle oburgwemalo.”
EXO 2:1 Leví-wagwa-wargwen ome-nikusad. E-ome amba Leví-wagwasikidmogad.
EXO 2:2 A-ome, gurgin-nika gunonikid. Geb degine, susugwa ega uklenonikid. E-nan machi-bipi-yeerdakle-dakargu, nii-walapaa odukusad.
EXO 2:3 Ar geg bar-dikasurgus odukugussoggu, sargi-garba susad. Geb a-garba-e-yaa-ollo-ollogwad baryagi enir-enir imaksad. Geb degine, e-nan sargi-garbagi machi-bipi-mesisgu, nargammugiid-diwar-gakaba-bukwad-imbaba nasiksad.
EXO 2:4 E-bun bannabaa gwisgusad, dakega, igi-e-susde gudodibeye.
EXO 2:5 Geb degine, Faraón-e-sisgwa diwarse obnonikid. Ar yagan-ega-arbamaladdi diwar-gakaba garmakdimargua, Faraón-e-sisgwa nargammugii-dakleged-imbaba garba-nai dakalid. Geb degine, ega-arbaed-ome-wargwen-barmisad, adi, ega garba sedagegar.
EXO 2:6 Garba-egadgu, machi-bipi-bomai dakalid. Faraón-e-sisgwa machi-bipi-nue-wiledakde, sogded: —We-machi-bipi, Hebreo-dule-e-goed.
EXO 2:7 Geb degine, machi-bipi-e-bun Faraón-e-sisgwaga sogded: —Hebreo-ome-wargwen we-machi-bipi-akwega an bega aminaer, ¿nued be itoge?
EXO 2:8 Faraón-e-sisgwa bunagwaga sogded: —Eye, be aminae. Geb degine, bunagwa machi-bipi-e-nanse gornaded.
EXO 2:9 Faraón-e-sisgwa machi-bipi-e-nanga sogded: —We-machi-bipi be anga-akwega be sede. Anga-be-akoedi, an be-bennukoed. Agine, e-nan goe-sesad. Geb degine, akwedii gusad.
EXO 2:10 Machi-bipi mam-iargusgu, e-nan Faraón-sisgwaga uksad. Geb agi, Faraón-sisgwa na e-mimmiga machi-bipi-imaksad. Geb Moisésʼye machi-bipi-onugsasad, ar ade, sogded: “Ar ande diigi onosaddeeye.”
EXO 2:11 Moisés bato machered-gusgu, ibagwengine, e-gwenadgan-ablis-emaladse ataknade gusad. Agi dakalid, e-gwenadgan arbaed-dummad imaknanai. Geb degine, Moisés dakdebalid, Egipto-dule-wargwen Hebreo-dule-sabsur-sarsonai. Hebreo-dule Moisés-ebogwa na ablis emaladid.
EXO 2:12 Geb degine, Moisés bela e-dikarba ataksagu, dulemar-sate daksagua, Egipto-dule-oburgwisad. Geb degine, odukuegala, ukubyaba digsad.
EXO 2:13 A-banedgine, Moisés gannar e-gwenadganse nade gusbalid. Agi dakalid, Hebreo-dulemar na ebo-urwenanai. Dule-sabsur-imaknaidse Moisés egichided: —¿Ibiga na be-ablis-emalad be sabsur sarsonai?
EXO 2:14 We-Hebreo-dule Moisés-abin sogded: —¿Ar doa anmar-dummadga, degi, anmarga-igar-nabogedga be-onugsasa? ¿Egipto-dule-oburgwisadyob be an-oburgwebimoga? Moisés weyob ega soge itoargu, dobe-itonaded, ar ade, mag itoged, ede Egipto-dule-oburgwisad, degine, binsaded, ede wisgulesye.
EXO 2:15 Ar inso, Faraón wisguargu, Moisés Egipto-dule-oburgwisye, agi Faraón, Moisés-oburgwebi-gualid. Ar Moisésʼdi wakitegu, Madián-yalaganba megnaded. Warmakdapgu, dia-gwagwen-naba sigidapid.
EXO 2:16 Madiánʼgi dule-irwa-Bab-Dummadse-goled-wargwen maid. We-dulede, Reuelʼye-nugad, degi, Jetroʼye nugbalid. We-dulede, sisgan-walagugle (7) nikad. A-ibagi, we-bunamala e-bab-sibad-wawaad diigi-ogobega, dii-sied-enogega, diase dii sunaded.
EXO 2:17 Ar sibad-wawaad-edarbemalad-baigan nonimogad. Amar, bunamala-ononnosmalad. Moisés we-bunamala-walagugled-bendakega ulusad. Geb degine, Moisés bunamala-sibad-wawaadmar diigi ogobsad.
EXO 2:18 Bunamala e-bab-Reuelʼse gannar modapmargu, e-bab ese egichialid: —¿Ar ibiga, emigindi bur bemar gwae-gwae nonimala?
EXO 2:19 Bunamala e-bab-abin sogdemalad: —Sibad-wawaad-edarbemalad-baigan anmarse uluargu, Egipto-dule-wargwen anmarbina ulusad. Geb a-sorba, anmarga dii wesad. Geb deginbali, diigi sibad-wawaadmar ogobsabalid.
EXO 2:20 Geb degine, Reuel e-sisganga sogded: —Emide, ¿bia we-dulede? ¿Ar ibiga we-dule be wargwen obesmala? Bemar ese gornamala, adi, anmarse mas-gundagegar. Geb Moisésʼse gorapmargu, mas-gunbukwadgi Reuel Moisésʼga sogded: “Be an-walik megoye.”
EXO 2:21 Moisés, Reuel-ega-ibmar-sogsad yeer-itosgu, sogded: “Nabirdo, be-walik an gudiguodo.” Degisoggu, Moisés Reuel-neggi megnonisunnad. Geb degidbali, Reuel na e-sisgwa-Séfora Moisésʼga uknonikid, adi, Moisés nikuegar.
EXO 2:22 Degidgine, Séforaʼga susugwa uklenonikid. Moisés a-susugwa Gersónʼye onugsasad, ar ade, Moisés sogded: “Yar-baidgi, an-yarsulidgi an gudiid.”
EXO 2:23 Birgamar naded, geb Egipto-e-rey burgwenonikid. Degi-inigwele, Israel-dulemardi amba maiga gudidimalad-ular, naibi-itodidimalad. A-ular, bodidimalad. Geb degine, Bab-Dummad we-Israel-dulemar-bodidimalad itosad.
EXO 2:24 Degine, Bab-Dummad Israel-dulemar-nunmak-itodidimalad nue mag daksabalid. Agi, Bab-Dummad Abrahamʼbo, Isaacʼbo, Jacobʼbo, igar-mesisad insaded.
EXO 2:25 Agine, Bab-Dummad Israel-dulemar-dakded, degine, nue mag itosbalid, igi-Israel-dulemar wilebukwa.
EXO 3:1 Moisés e-saka-Jetroʼga sibad-wawaad edarbediid. Jetroʼde, Madiánʼgi dule-irwa-Bab-Dummadse-goledid. Ibagwengine, Moisés nega-dulesulidganba sibad-wawaadmar sesagusad. Bab-Dummad-yar-dummadse modapid. A-yar-dummadde Horebʼye nugad.
EXO 3:2 Agi Bab-Jehová-e-baliwitur sapi-bula-abargi, soo-gwabunye-gwichidgi, Moisésʼse magarosad. Moisés sapi-bula nue-nuu dakdegu, dakalid, sapi-bula gummakgwichi, degite, bergusuli.
EXO 3:3 Geb degi, Moisés binsaded: “¿Ar wedi igidi? An daknaoed, wede ibiga sapi-bula geg bergue.”
EXO 3:4 Bab-Jehová dakdegu, Moisés e-dakega ese warmakdaniki, agi sapi-bula-abargi Moisésʼse goted: —¡Moisés! ¡Moisés! Moisés Bab-Dummad-abin sogded: —Degite, wegi an be-itogwichi.
EXO 3:5 Geb degine, Bab-Dummad Moisésʼga sogded: —Melle anse be warmako. Degine, be-naggi nag-uka-yoid be unge. Ar be napa-annagwichidi, napa-nuedid, nega-isligwaled-napad.
EXO 3:6 Bab-Dummad sogdebalid: —Ani an be-babgan-e-Bab-Dummadid. Ani an Abraham, Isaac, degi, Jacob-e-Bab-Dummadid. Geb degi, Moisés dobe-Bab-Dummad-wagar-dakedba na e-wagar edusad.
EXO 3:7 Ar Bab-Jehováʼdi Moisésʼga sogdebalid: —Ar nue an daksad, igi an-dulamar Egipto-yargi nue wilebukwa. Ar ade, Egipto-dulemar sabsur an-Israel-dulemar-wiodidimalad, na e-bodidimalad, na nunmak-itodidimalad, an itosbalid.
EXO 3:8 A-ulale, we-napnegse an aidenonikid, adi, Israel-dulemar Egipto-dulemarse-wilebukwadgi an onogegar. An-dulamar yar-nued-naidse, an sedoed. A-yarde, dummad-naid, napa-nuedid, gadi ibmar sanmaked. ”A-yargine, we-dulemar bukwad: Canaán-dulemar, Het-dulemar, Amorreo-dulemar, Ferezeo-dulemar, Heveo-dulemar, degi, Jebuseo-dulemar bukwad.
EXO 3:9 ”Israel-dulemar nunmak-itodimaladba bobukwad an itosad. Degine, an daksabalid, Egipto-dulemala dogdar sabsur-Israel-dulemar imakbukwad.
EXO 3:10 Degisoggu, be nae, ani an Faraónʼse be-barmidoed, adi, an-Israel-dulemar Egipto-yargi-bukwad be ononaegar.”
EXO 3:11 Geb degine, Moisés, Bab-Dummadga sogded: —Ar an Faraón-asabin-gwisgunaega, ¿an doasunna? Israel-dulemar Egipto-yargi-wilebukwad an ononaega, ¿an doasunna?
EXO 3:12 Bab-Dummad Moisés-abin sogded: —Ani an beba gudiguoed. Wegi be dakoed, ani an be-barminaid: An-dulamar-Egipto-yargi-bukwad be onosale, bela bemala we-yargi be an-nug-odummobukwa gumaloed.
EXO 3:13 Ar Moisésʼdi, Bab-Dummad-abin sogded: —Israel-dulemarse an naele, an ega sogele: Be-dadgan-e-Bab-Dummad bemarse an-barmiarye, Israel-dulemar anse egisdamaloed: ‘¿Ar Bab-Dummadde igi nugsunna?’ Degite, ¿igi an abin-sogosunna?
EXO 3:14 Bab-Dummad, Moisés-abin sogded: —ANI AN, AN-GUED. Israel-dulemarga be sogo: ‘AN-GUED bemarse an-barmialid.’
EXO 3:15 Geb degine, Bab-Dummad Moisésʼga sogdebalid: —Israel-dulemarga be sogbalo: ‘Bab-Dummad-Jehová, be-dadgan Abraham, Isaac, degi, Jacob, amar-e-Bab-Dummad bemarse an-barmialid.’ Weyob an nugaguad. We degibi an-nug degisadegu nugad.
EXO 3:16 Moisés be nae, Israel-girmar-dummagan-ebo be ambikuo, ega be sogo: ” ‘Bab-Jehová, be-dadgan Abraham, Isaac, degi, Jacob, amar-e-Bab-Dummad anse magarosad. A-Bab-Dummad anga sogsad, ede bemar-daksaye, degine, bemar-itosbarye, igi Egipto-yargi bemar-wiobukmala.’
EXO 3:17 Ega be sogbalo: ‘Bab-Dummad anga sogsabarye, ede bemar Egipto-yargi-wilebukwad bemar-onogoye. Degine, ede bemar-sedoye: Canaán-dulemar-bukwadse, Het-dulemar-bukwadse, Amorreo-dulemar-bukwadse, Ferezeo-dulemar-bukwadse, Heveo-dulemar-bukwadse, degi, Jebuseo-dulemar-bukwadse, amar-dulemar-yalaganse bemar-sedoye. ” ’A-yalagine napa-nuedid, gadi ibmar sanmakedid.’
EXO 3:18 ”Israel-girmar-dummagan be-itogoed. Geb degine, amala bebo Egipto-e-reyse namaloed. Egipto-e-reyga bemar sogoed: ‘Hebreoʼmar-e-Bab-Dummad-Jehová, a anmarse magarosad. Degisoggu, ibapaa-naedgi nega-dulesulidganba, naedse be anmar-imakye, adi, anmar agi anmar-Bab-Dummad-Jehováʼga, ibmar ogumakar ukegar.’
EXO 3:19 ”Degi-inigwele, ar an nue-wisid, Egipto-e-rey baisursunnagwadgi bemar-onogosulid. Ar Egipto-e-rey ise-gandikidgi geb bemar-onogoed.
EXO 3:20 Degisoggu, an-gangued an oyogoed, degine, Egipto-dulemar sabsur an odurdakoed, burgwed-nagase an imakoed. Ibmar-dakledisulid Egipto-yargi an imakoed. A-sorbali, geb Egipto-e-rey-Faraón bemar-onogoed.
EXO 3:21 ”Deginbali, an imakbaloed, Egipto-dulemar Israel-dulemargi nued-binsaed, adi, Israel-dulemar Egipto-yargi nodmalale, mer arganagwabi nodmalagar.
EXO 3:22 Bela omegan wargwen-wargwen na e-neg-dikarba-mamaidsedibe, Egipto-dule-negyagi gudiidsedibe, ibmar egisoed: Ibmar-manigi-sobaled, ibmar-orgi-sobaled, mormar. We-ibmarmar be-masmalaga, degi, be-bunamalaga be yooed. Ar weyob Egipto-dulemar-ibe bemar ibmar suoed.”
EXO 4:1 Geb degi, Moisés Bab-Dummad-abin sogded: —Israel-dulemar an-itogosurmalad, an-bengumaloed. Anga bur sogdamaloed: ‘Bab-Jehová bese magarossuli.’
EXO 4:2 Bab-Jehová Moisés-abin sogded: —Ar nabir be sogendo. Degite, ¿ibu be-argangi be ganisunna? Moisés, Bab-Jehová-abin sogded: —Gaapoled.
EXO 4:3 Bab-Jehová apor Moisésʼga sogded: —Gaapoled napase be mete. Moisés gaapoled napase meted. Geb degine, gaapoled yog naibega binyar-naded. Moisés dobedba idu abarmakdenad.
EXO 4:4 Ar Bab-Jehováʼdi Moisésʼga sogded: —Be-argangi naibe e-bunnugi be gae. Moisés achadgu, naibe-gasgu, naibe gannar gaapoledga binyeded.
EXO 4:5 Bab-Jehová Moisésʼga sogded: —Weyob be imakoed-ulale, Israel-girmar-dummagan be-benguosurmalad, be-dadgan Abraham, Isaac, Jacob, amar-e-Bab-Dummad-Jehová, bese magarosye.
EXO 4:6 Bab-Jehová Moisésʼga sogdebalid: —Be-argan be-moryaba be-binasgargi be mese. Moisés na e-binasgargi e-argan mesisad. E-argan gannar onoargu, naibe-buna-yaa-maleged nika, ise-sibudiki, dakuu-dakle onoalid.
EXO 4:7 Geb degine, Bab-Jehová Moisésʼga sogdebalid: —Gannar be-argan be-binasgargi be mesbali. Moisés deyob imaksabalid. Gannar na e-argan onoargu, e-argan bato e-san-baidyobi nued noalid.
EXO 4:8 Geb degine, Bab-Jehová Moisésʼga sogdebalid: —Gebe be ibmar-imakoedgi Israel-dulemar be-itosurmalale, beba ibmar imaksurmalale, ibmar-sogbogwad ega be oyogoed. Abakalegi ibmar-sogbogwad-be-oyogoedgi be-itoarmalale.
EXO 4:9 Ar Israel-dulemar amba be-ibmar-sogbogwad-oyosad itosurmalale, beba ibmar-imaksurmalale, dii diwargi be suoed. A-dii napagi be eogoed. Dii-diwargi-be-susad napagi aryogogua, dii abega binyidoed.
EXO 4:10 Moisés Bab-Jehová-abin sogded: —¡Dummad, yeergangu-itole! Aku an itodaed, ibu an sogoe. Gusgu degibi an daniguad, emisginbisulid. An gale-gale sunmaked, an baisursunna sunmaksulid.
EXO 4:11 Ar Bab-Jehováʼdi Moisés-abin sogded: —¿Ar wede doa, dulega gaya sisa? ¿Wede doa, dule-geg-sunmaked imaksa? ¿Wede doa, dule-uaya-yalliled imaksa? ¿Wede doa, dule-aku-ataked imaksa? ¿Wede doa, dule-mag-ataked imaksasunna? ¿Ani an Bab-Jehová-guedgi imaksasursi?
EXO 4:12 ”Degisoggu, be nae. Be sunmakder, ani an beba gudiguoed. Degine, be-ibmar-sogoed, ani an be-odurdakoed.”
EXO 4:13 Moisésʼdi sogdebalid: —¡Dummad, yeergangu-itole! An bega guosulid. Bese wilesakwaa an egise, bur be dule-baid barmide.
EXO 4:14 Geb degidgine, Bab-Jehová Moisésʼse uluded, ega sogded: —¿Ar ande Leví-wagwa-be-ia-Aarón, magar daksursi? ¿Ar a-dulede nued sunmaksursi? Deginbali, be-ia-Aarón be-abin nodagoed. Be-dakdagogua, Aarón ulubgi weligwar itogoed.
EXO 4:15 Aarónʼga bela be sogoed, igi sunmakoe. Bemar sunmakalile, ani an be-bendakoed, degine, ani an Aarón-bendakbaloed, adi, bemar nuekwaa sunmakmalagar. Degine, an bemarga sogoed, igi bemar ibmar imakmaloe.
EXO 4:16 Aarón be-anar dulemarga sunmakoed, Aarónʼde bega be-gwabinyob guoed. Deginbali, be, Aarónʼga Bab-Dummadyobiyob ega be gumogoed.
EXO 4:17 We-gaapoled-be-ganikid be sede, ar ade, we-gaapoledgi ibmar-gegerdaklemalad be oyogoed.
EXO 4:18 Moisés gannar e-saka-Jetro-negse nonikid, agi e-sakaga sogded: —Gannar an Egipto-yarse nabied, bia an-gwenadgan-ablis-mesamalad bukwadse. An daknabied, amba an-gwenadgan dulamardibe. Jetro Moisés-abin sogded: —Be nae, bitigi-nuedgi be modapina yeerban.
EXO 4:19 Moisés Madián-yalaganba amba gudigua, agi Bab-Jehová Moisésʼga sogsad: —Egipto-yarse gannar be nae, ar ade, bela dulemar-be-oburgwebimaladi bato bela burgwismalad.
EXO 4:20 Agi Moisés moli-uayasuidgi na e-ome, degi, e-machimala-onakwisgu, sesagusad, Egipto-yarse gannar aligusad. Moisés Bab-Dummad-gaapoled e-argangi-ganiki nadegusad.
EXO 4:21 Geb a-sorbali, Bab-Jehová Moisésʼga sogded: —Egiptoʼse be modapile, Faraón-asabin bela ibmar-gegerdaklemalad be imakoed. We-ibmar-gegerdaklemalad sunna-imakega an bega gangued uksad. Ar andi aka bur bule Faraón-burguega an imakoed, adi, Faraón melle Israel-dulemar-onogegar.
EXO 4:22 ”Geb degine, Faraónʼga be sogoed: ‘Bab-Jehová weyob soged: Israel an-machi-sailaginedid.
EXO 4:23 Bato an bega sogsad, an-machi be onoye, adi, anse gormalagar, an-nug odummogegar. Ar bede yapa an-machi onosoggu, be-machi-sailaginedi an oburgoed.’ ”
EXO 4:24 Moisés igarba nadapgua, bia na-e-gwenadganmala mutik gaboedgi, Bab-Jehová, Moisés-abin noalid. Bab-Jehová, Moisés-oburgwebigualid.
EXO 4:25 Geb degine, Séfora estin-akwa susad. Geb agine, e-machi-abgan-uka-duku siksad. Geb Séfora Moisés-nag-dukugi e-machi-abgan-uka-duku sikaa imaksad. Geb degi, Moisésʼga sogded: “Be an-sui-nue-napiragwadid, sui-ablis-eoged-duled.”
EXO 4:26 Geb degine, Bab-Jehová Moisés-naega imaksasunnad. Séfora e-machi-abgan-uka-duku-siksad-ular, sogsagusad, “Moisésʼde sui-ablis-eoged-duleye.”
EXO 4:27 Ar Bab-Jehováʼdi Aarónʼga sogded: “Nega-dulesulidganba be nae, ase be Moisés-abin be nae.” Geb agine, Aarón naded, Bab-Dummad-yargi Moisés-abingudapid. Agi, Moisés-e-wagar udapid, ega sogegar, be nued sogeye.
EXO 4:28 Geb degine, Moisés Aarónʼga bela ibmar sogsad, igi Bab-Jehová ega ibmar-sogoye sogsadba. Degine, ega sogsabalid, ibmar-gegerdaklemalad-imakega e-barmiarbarye.
EXO 4:29 Geb degi, Moisés, Aarónʼbogwa Israel-girmar-dummagan-ebo ambikunaded.
EXO 4:30 Geb degine, Aarón bela Israel-girmar-dummaganga sogded, igi Bab-Jehová Moisésʼga sogsa. Deginbali, Moisés dulemar-asabin Bab-Jehová ega imakoye sogsadba ibmar-gegerdaklemalad imaksabalid.
EXO 4:31 Dulemar Aarón-ega-ibmar-sogsad bengussurmalad. Emar itoarmargu, Bab-Jehová nue e-itosmarye, degi, na e-wilebukmalad e-daksamarbarye, bela na e-nono napase dulluu imakdemalad, oyogega, Bab-Jehová-e-nug emarde odummomarye.
EXO 5:1 Weyob gusad-sorbali, Moisés, Aarónʼbo Faraónʼga sognadmalad: —Weyob Israel-e-Bab-Dummad-Jehová soged: ‘An-dulamar nega-dulesulidganse be barmid, adi, anga iba-ononamalagar.’
EXO 5:2 Ar Faraónʼdi abin-sogded: —¿Bab-Jehováʼde doasunna? ¿Ibiga an a-sogedba ibsaoe? ¿Ibiga an Israel-dulemar onodagoe? We-Bab-Jehová an wissuli. Degine, Israel-dulemar an onogosurbali.
EXO 5:3 Geb degine, Moisés, Aarón-ebogwa Faraónʼga sogdemalad: —Hebreoʼmar-e-Bab-Dummad anmarse magarosad. Degisoggu, anmar nega-dulesulidganba ibapaa-nanalegedse naoed, Agi, anmar Bab-Dummad-Jehováʼga ibmar-ogumakar ukoed. Ar degisulile, abakalegi Bab-Jehová uelleged-dummadgi anmar-oburgwialile, igidibe, es-suidgi anmar-oburgodibe.
EXO 5:4 Ar Egipto-reydi, Moisés-abin, degi, Aarón-abin sogded: —¿Ibiga bemar yamo dulemar-melle-arbaega deyob gordanimala? ¡Be namala, be arbanamala!
EXO 5:5 Faraón sogdebalid: —Emigindi, Israel-dulemar bukidar Egipto-yargi bukmalad. Ar bemarde, ¿bar-arbasuli amar imakode? Deyobsulirgebed.
EXO 5:6 Aka a-ibagine, Faraón dulemar-arbananaid-dummagan-e-dummaganga igar uksad. Degi, danar-danar-arbananaimalad-e-dummaganga igar uksabalid:
EXO 5:7 —Israel-dulemar napsa-ginnid-akwayob-sobegala anmar ega gusgu bula-dinnaganagiid ukdaedyob melle ega bar ukmalo. ¡Na emar-sunnad bula-dinnaganagiid aminamalodo!
EXO 5:8 Degi-inigwele, napsa-ginnid-akwayob-sobaled amba gusgu e-mergu-sobmaladyob, sobmarbalodo. Napa-ginnid-akwayob-sobaled bipisaale gwagwen-akuar sobosurmalad. Ar wemarde, wiegala nanaed. A-ular, binnasur gordanimalad: ‘Anmar, ibmar-ogumakar anmar-Bab-Dummadga uknabimarye.’
EXO 5:9 Gatik bur bule Israel-dulemar-arbaega be imakmalo. Gatik bur oarbamalo, adi, melle dule-ega-gakansadanikid itomalagar.
EXO 5:10 Dummagan-sabsur-dulemar-oarbananaimalad, degine, danar-danar-arbananaid-e-dummagan nadegusmalad, dulemar-arbananaimaladga sogdemalad: —Faraón apor igar-uksad, melle bemarga bula-dinnaganagiid bar ukmaloye.
EXO 5:11 Degisoggu, bemar-sunnad bula-dinnaganagiid aminamalargebed. Degi-inigwele, napa-ginnid-akwayob-bemar-sobedi, bemarga aidegosulid, gusgu mergu sobedyobi amba bemar sobmaloed.
EXO 5:12 Israel-dulemala oros-gagangiid-e-warmar aminamalaga bela Egipto-yalaganba duurmakdemalad. Adi, bula-dinnaganagiid-muchub ebumalagar.
EXO 5:13 Dummagan-sabsur-dulemar-oarbananaimalad dulemarse sabsur uluarmalad: —Bemarga bula-dinnaganagiid-ukledagu, igi-mergu bemar gusgu napa-ginnid-akwayobid imakdamala, deyob-mergu bemar imakmarbalodo.
EXO 5:14 Faraón-dummagan, Israel-dulemar-e-dummagan-onugsalesad sabsur-bibyoddamalad. We-Israel-e-dummagan danar-danar-arbamalad-e-dummaganad. Geb Israel-dummaganga sogdedamalad: —¿Ar ibiga bemar idualedba emi, degi, sae, napa-ginnid-akwayobid bur ichee sobsamala?
EXO 5:15 Israel-dulemar-danar-danar-arbananaid-dummadga-gunanaid Faraónʼse nadmalad, ega binnasursaar ibmar sogdemalad: —Dummad, ¿ibiga be be-maimar-bega-arbamalad weyob be imake?
EXO 5:16 Emide, bar anmarga bula-dinnaganagiid uksurmalad, degite, napsa-ginnid-akwayobid sobbi be anmar-abeged. Deginbali, anmar-sarsoardamarbalid. Degisoggu, Dummad, bar anmarginsurdo, be-sordamargindo.
EXO 5:17 Ar Faraónʼdi abin-sogded: —¡Ar bemar unnila dule-wiegala nanaed! A-ular, bemar sogdidimalad: ‘Anmar ibmar-ogumakar Bab-Jehováʼga uknamaloye.’
EXO 5:18 ¡Be arbanamala! Ar bemarga bula-dinnaganagiid uklegosurmar-inigwele, amba gusgu mergu ibagwengi-sobedyobi napsa-ginnid-akwayob-sobaled be sobmalo.
EXO 5:19 Israel-dulemar-danar-danar-arbananaid-dummaganga soglesgu, bemarga gwagwensaar aidegosurye, igi ibagwenadgi gusgu mergu napsa-ginnid-akwayob-sobaled bemar sobe, deyob be sobmaloye. Deyob ega soglesgu, na nue nunmak itosmalad.
EXO 5:20 Israel-dule-arbananaimalad-e-dummagan, Faraón-ebo-sunmakdii noarmargu, dakarmalad, Moisés, degi, Aarónʼbo e-edarbebukmala.
EXO 5:21 Amar, Moisésʼga, Aarónʼga sogdemalad: —Bab-Jehová begi gwisgumalana yeerban, sabsur-be-odurdakmalana gadin. Ar bemar-nukined, Faraón, degi, dummagan-ega-arbamalad isdar anmar-dakarmalad. Ar bemar Faraónʼga, degi, e-dummaganga es-suid-uksamalayobi gued, adi, anmar-oburgwemalagar.
EXO 5:22 Geb degine, Moisés Bab-Jehováʼse gornadgu, ega sogded: —Dummadye, ¿ibiga be we-dulemar sabsur odurdake? ¿Ibiga wese be an-barmiali?
EXO 5:23 Faraónʼse be-nuggi an sunmaknonikid-akar, we-Faraón bur bule be-dulamar-wioalid, degite, bedi be-dulamar gwen be bendaksulid.
EXO 6:1 Bab-Jehová Moisés-abin sogded: —Emigindi be dakodo, igi an Faraón-imakoe. Emide, an-dutusur-ganguedgine an ibmar-imakedba, Faraón bemarga sogdagoed, ‘bemar namarye.’ Ar an-dutusur-ganguedgine an ibmar-imakedba, Faraón bemarga sogdabaloed, ‘bemar an-yargi nomarye.’
EXO 6:2 Bab-Dummad Moisésʼga sunmakdebalid, ega sogded: —Ani an Bab-Jehová gued.
EXO 6:3 Ani an Bab-Dummad-Bela-Gangued-Nikadid. We-nugba Abrahamʼse, Isaacʼse, Jacobʼse, an magarosad. An-nug-Jehováʼye-nugadbardi, an ese magarossulid.
EXO 6:4 Deginbali, amar-ebogwa an igar-mesisad, an sogsad, bemarga Canaán-yala an ukoye. A-yargi, Abraham, Isaac, Jacob, e-yarsulidgi sikwas gudigusmalad.
EXO 6:5 Emide, Israel-dulemar nunmakedba bodidimalad. Degine, Egipto-dulemar na e-maiga gandikidgi-be-imakdidimalad an itosad. Be-dadganbo an igar-mesisad an iessulid.
EXO 6:6 “Degisoggu, Israel-dulemarga be sogna: ‘Ani, an Bab-Jehová gued. Egipto-dulemar-maiga be gubukmaladgi, sabsur be-imakdimaladgi an bemar-onogoed. An-gangued-nikadba an Egipto-dulemar sabsur-odurdakoed. Aba an be-bendakoed.
EXO 6:7 Ani an be-sumaloed, an-dulamarga an be-imakmaloed. Ani an be-Bab-Dummadga guoed. ” ’Deyobi, bemar wisgumaloed, ani an be-Bab-Dummad-Jehová gued. Deginbali, bemar wisgumarbaloed, ani an Egipto-dulemar sabsur-bemar-oarbananaimargu an bemar-onosad.
EXO 6:8 Abrahamʼga, Isaacʼga, Jacobʼga an sogsagusad, Canaán-yala an bemarga ukedseye. A-yalase an be-nidmaloed. A-yala, degisadegu an bemarga ukoed. Ani an Bab-Jehová gued.’ ”
EXO 6:9 Moisés bela weyob Israel-dulemarga sogsad. Degi-inigwele, Israel-dulemar maiga-gudidimalad-ular, nue bukib-itodidimalad-ular, Moisésʼba ibsassurmalad.
EXO 6:10 Geb degine, Bab-Jehová Moisésʼga sogded:
EXO 6:11 —Egipto-rey-Faraónʼga be sogna, Israel-dulemar-Egipto-yargi-bukwad be onogoye.
EXO 6:12 Ar Moisésʼdi Bab-Jehová-abin sogded: —Israel-dulemarbela anba ibsassurmalad, ar Faraón-bulesunna. Ar ande nued sunmaksurbalid.
EXO 6:13 Geb degine, Bab-Jehová Moisésʼga, degi, Aarónʼga, Israel-dulemargi, degi, Egipto-rey-Faraónʼgi sunmakded. Geb Bab-Jehová Israel-dulemar-Egipto-yargi-bukwad-onogega, Moisésʼga, degi, Aarónʼga igar uksad.
EXO 6:14 Israel-dulemar-e-dadgansik wemar e-gwenadgan-iduedga gumalad: Israel-machi-sailagined-Rubén-e-masmala, wemalad: Hanoc, Falú, Hezrón, Carmi. Wemar Rubén-e-masmala gumalad.
EXO 6:15 Simeón-e-masmaladi, wemalad: Jemuel, Jamín, Ohad, Jaquín, Zohar, Saúl. We-Saúlʼde, ome-Canaánʼgined-e-machid. Wemala, Simeón-e-masmala gumalad.
EXO 6:16 Leví-e-masmaladi, machi-dummad-inse, geb bipigwadse, wemalad: Gersón, Coat, degine, Merari. Levíʼdi birga-dulanergwa-gakambe-gakagugle-nika (137) burgwisad.
EXO 6:17 Gersón-e-masmaladi, degi, e-gwenadgandi, wemalad: Libni, degine, Simei.
EXO 6:18 Coat-e-masmaladi, wemalad: Amram, Izhar, Hebrón, Uziel. Coatʼdi birga-dulanergwa-gakambe-gakapaa-nika (133) burgwisad.
EXO 6:19 Merari-e-masmaladi, wemalad: Mahli, degine, Musi. Wemar, garda-maidba Leví-e-gwenadgan gumalad.
EXO 6:20 Amram e-ammor-Jocabed nikusad. Amarga Aarón, degi, Moisés uklenonikid. Amram birga-dulanergwa-gakambe-gakagugle-nika (137) burgwisad.
EXO 6:21 Izhar-e-masmaladi, wemalad: Coré, Nefeg, Zicri.
EXO 6:22 Uziel-e-masmaladi, wemalad: Misael, Elzafán, Sitri.
EXO 6:23 Aarónʼdi, Elisabet nikusad. Elisabetʼde Aminadab-e-sisgwad, Naasón-e-bunad. Geb Aarónʼga, degi, Elisabetʼga machimala-uklenonikid: Nadab, Abiú, Eleazar, Itamar.
EXO 6:24 Coré-e-masmaladi, wemalad: Asir, Elcana, Abiasaf. Wemala, Coré-dulemar-idumaladga gusmalad.
EXO 6:25 Aarón-e-machi-Eleazar, Futiel-e-sisgwa-wargwen nikunonikid. Machigwa ega uklenonikid, Finees. Wemala, Levita-e-gwenadgan gumalad, na e-idumaladid.
EXO 6:26 Ar Bab-Jehová Aarónʼga, degi, Moisésʼga wemar-sunnadga sogsagusad, Israel-dulemar-Egipto-yargi-bukwadi danar-danar na e-gwenadgan-e-gwenadganba be onogoye.
EXO 6:27 Amba Moisés, degi, Aarón, Israel-dulemar-Egiptoʼgi-wilebukwad-onogega, Egipto-rey-Faraón-ebo sunmakap gusmalad.
EXO 6:28 Bab-Jehová Egipto-yargi Moisésʼbo sunmaksagua, ega sogsad:
EXO 6:29 —Ani an Bab-Jehová gued. Bela an bega ibmar sogoedi, Egipto-rey-Faraónʼga bela be ibmar-sogmogoed.
EXO 6:30 Ar Moisésʼdi Bab-Jehová-abin sogded: —Bab-Jehová, ar ande gale-gale sunmaksoggu, ¿igi Faraón an-ibmar-ega-sogedba ibmar-imakosunna? An-sogedba ibmar imakosuli.
EXO 7:1 Geb degine, Bab-Jehová Moisésʼga sogded: “Emi be dakena, Faraón-asabin Bab-Dummadyob be guoed. Be-ia-Aarónʼdi bega gayaburba-barsogedga gumogoed.
EXO 7:2 Bela an-bega-ibmar-sogoedi, bela Aarónʼga be sogmogoed. Geb degine, Aarón Faraónʼbo sunmakoed, adi, Faraón na e-yargi Israel-dulemar-bukwad onogegar.
EXO 7:3 Ar andi gatik aka bur bule Faraón-burguega an imakoed, adi, mer an-dulamar-onogegar. Deyob an imakoed, adi, Egipto-yargi ibmar-dummagan, ibmar-gegerdaklemalad an gatik imakegar.
EXO 7:4 Faraónʼga-bemar-ibmar-sogoedi, be-itogosurmalad. Ar andi Egipto-yargi an-gangued an oyogoed, ar sabsur Egipto-dulemar an odurdakoedgi, an-dulamar-Israel-dulemar, Egipto-yargi an onogoed.
EXO 7:5 An-gangued Egiptoʼgi an oyosale, degi Israel-dulemar Egipto-yargi-bukwad an onosale, agi Egipto-dulemar wisgumaloed, ani an Bab-Jehová gue.”
EXO 7:6 Moisés Aarón-ebogwa ar igi Bab-Jehová ega sogsa, aba bela imaksamalad.
EXO 7:7 Moisés, degi, Aarón, Faraónʼbo sunmaksamargua, deunni, Moisés birga-dulabake (80) nikad. Aarónʼdi deunni, birga-dulabake-gakapaa (83) nikad.
EXO 7:8 Bab-Jehová Moisésʼga, degi, Aarónʼga sogded:
EXO 7:9 “Faraón bemarga sokardibe, ibmar-gegerdakleged anga be imakye, Aarónʼga be sogoed, be-gaapoled be suye, napase Faraón-asabin be meteye, adi, gaapoled naibega binyegar.”
EXO 7:10 Moisés Aarón-ebogwa Faraón daknadgusmalad. Igi Bab-Jehová ega sogsa, aba imaksamalad. Aarón Faraón-asabin, degi, Faraónʼga-arbamalad-asabin napase e-gaapoled meted. Geb degine, gaapoled naibega binyided.
EXO 7:11 Ar Faraónʼdi e-dulemar-nue-ibmar-wisimaladse, nelemarse gochad. Wemala, ibmar-burba-wisimaladba bela deyob imaksamarmogad.
EXO 7:12 Na wargwen-wargwen e-gaapoled napase metemalad, bela gaapoled naibega binyidmalad. Degi-inigwele, Aarón-gaapoleddi dulemar-ibmar-nue-wisimalad-e-gaapoled, degi, nelemar-e-gaapoled dosad.
EXO 7:13 Bab-Jehová bato iduar Moisésʼga sogsadyob, Faraón aka burguded. Faraón Moisés-ega-sogedba ibmar gwen imaksasulid.
EXO 7:14 Geb degine, Bab-Jehová Moisésʼga sogded: “Moisés, Faraón bela-bela aka bur bule burguded, Israel-dulemar-Egipto-yargi-bukwad yapa onoged.
EXO 7:15 Oibosale, wakudaryalaba Faraón diwarse aidenadapile, abin be naoed. Diwar-gakagi be edarboed, degine, be-gaapoled-naibega-binyisad be sedoed.
EXO 7:16 Agi, Faraónʼga be sogoed: ‘Hebreoʼmar-e-Bab-Dummad-Jehováʼye-nugad an-barmiarye, bega sogega: An-dulamar be onoye, adi, nega-dulesulidganba anse gornamalagarye, an-nug odummogegarye. Ar emidse an-ibmar-bega-sogedba be imaksursoggu,
EXO 7:17 emigi be wisguoye, ani an Bab-Jehová guye.’ ”Moisés, emide, we-gaapoled-argangi-ganikidgi be diwar bibyodele, dii abega binyidoed. Agi Faraón wisgusunnoed, ani an Bab-Jehová gued.
EXO 7:18 Uamardi burgwidoed, diwar sunnasur yapandagoed. Degisoggu, Egipto-dulemala ima we-dii gobe gudamaloed.”
EXO 7:19 Deginbali, Bab-Jehová Moisésʼga sogdebalid: “Aarónʼga be sogo, be-gaapoled be suye. Degine, be-argan diwarmargi, dianmargi, mata-nanaidmargi, degi, dii-sabolesimaladgi be oyoye, gwidu-urgomargi-dii-bukwadse-bakar, degi, gwidu-akwamargi-dii-bukwadse-bakar, bela Egipto-yargi abebi guoye.”
EXO 7:20 Moisés Aarón-ebogwa igi Bab-Jehová ega sogsa, ayob imaksamalad. Aarón e-gaapoled onakwisad. Geb degine, Faraón-asabin, ega-arbamalad-asabin diwar bibyosad. Geb degine, bela dii abega binyided.
EXO 7:21 Uamardi burgwisad, diwar bela sunnasur yapansoggu, Egipto-dulemar geg dii gobe guarmalad. Bela Egipto-yargi abe yaisur-nika gunonikid.
EXO 7:22 Ar Egipto-nelemar ibmar-burbamar-wisidba amba deyob imaksamarmogad. Bab-Jehová bato iduar Moisésʼga sogsadyob, Faraón aka bur bule burguded, Moisés, degi, Aarónʼbo-ibmar-sogedba, Faraón imaksasulid.
EXO 7:23 Faraón na e-neg-gabedse nonikid, we-ibmar-gusadi bai gwen itossulid.
EXO 7:24 Degine, ar diwar-diidina geg goblegussoggu, Egipto-dulemala dii-nued-sumalaga bela diwar-naba dia akwismalad.
EXO 7:25 Bab-Jehová diwar-bibyosad-sorba, ibagugle (7) ibagan nasad.
EXO 8:1 Bab-Jehová Moisésʼga sogded: “Be Faraón daknao, ega be sogo: ‘Bab-Jehová weyob soged: An-dulamar be onogo, adi, anse gornamalagar, an-nug odummogegar.
EXO 8:2 Ar an-dulamar be onosulile, sabsur an be-odurdakoed, bela be-yargi ammanoo yaisur-nika an imakoed.
EXO 8:3 Diwargi bukidar ammanoo gwalulegoed. Agi, nakwidagoed. Be-negyagi ubogoed, bia be gabmaidgi dogoed, be-gabed-birgi ambikuoed. Bega-arbamalad-neggi, be-sordamar-neggi ubogoed. Be-madu-sobedyaba, degine, be-madu-omukuedgi, agi ammanoomar-bukidar ambikuoed.
EXO 8:4 Ammanoomar begi, bega-arbamaladgi, degi, be-sordamargi ichomakdii guoed.’ ”
EXO 8:5 Bab-Jehová Moisésʼga sogded: “Aarónʼga be soge, be-gaapoled diwarmargi, dianmargi, matamargi oyoye, adi, agi ammanoomar ainidamalagar. Degine, Egipto-yargi bukidar ammanoo nika gusun.”
EXO 8:6 Aarón na e-gaapoled Egipto-diwarmargi oyoded. Geb degine, agi bukidar ammanoomar ainialid. Egipto-yargi bela ammanoomar yaisur nika guded.
EXO 8:7 Ar nelemar ibmar-burba-wisidba deyob imaksamarmogad. Egipto-yargi ammanoo bukidar-nika imaksamarmogad.
EXO 8:8 Geb degine, Faraón, Moisésʼbina, Aarónʼbina gochad, amarga sogded: —Bab-Jehováʼga be soge, anga, degi, an-sordamarga ammanoo osuloye. Geb degine, be-dulemar naega an imakoed, adi, Bab-Jehováʼga ibmar-ogumakar uknamalagar.
EXO 8:9 Moisés Faraón-abin sogded: —Anga be soge, ¿sana bega, bega-arbamaladga, degi, be-sordamarga, Babse-gorbi be an-abege? Adi, ammanoomar begi banguega, degi, be-neggwebur-negmargi berguegar. Unnila diwarginbi nika guegar.
EXO 8:10 Faraón Moisés-abin sogded: —Bane-bakas be imako. Moisés Faraón-abin sogded: —Ar deyob guodo, adi, be wisguegar, dule-baid anmar-Bab-Dummad-Jehováʼyobid sated.
EXO 8:11 Ammanoomala, begi bangudmaloed, be-neggi bar-gudiguosurmalad. Bega-arbamaladgi, degi, be-sordamargi bar-gudiguosurmarbalid, unnilagwa diwarginbi gudigumaloed.
EXO 8:12 Moisés, Aarón-ebogwa Faraónʼgi bangudgu, Moisés Bab-Jehováʼse egichided, ammanoomar-ichesur-Faraónʼse-be-barmialid osuloye.
EXO 8:13 Bab-Jehová Moisés-ese-egisnaidba imaksad. Ammanoomar, neggi, galu-imbagi, degi, sapurba-garmakdimalad, burgwismalad.
EXO 8:14 Dulemar ammanoo-burgwismalad wesmalad. Bela danar oambikusmalad. Geb degine, bela neg-nunudbi yapated.
EXO 8:15 Degi-inigwele, Faraón ammanoo-bergus-dakargu, ar igi Bab-Jehová bato iduar sogsadyob, Faraón aka bur bule burguded. Faraón, Moisés-ega-ibmar-sogedba, degi, Aarón-ega-ibmar-sogedba gwen imaksasulid.
EXO 8:16 Bab-Jehová Moisésʼga sogdebalid: “Aarónʼga be soge, be gaapoled be onakye, agi ukub be bibyoye, adi, ukub gwiiga binyegar, adi, bela Egipto-yargi gwii yaisur nikuegar.”
EXO 8:17 Deyob imaksamalad. Aarón na e-gaapoled onakwided. Geb agine, ukub bibyosad, geb degine, bela Egipto-yargi ukub gwiiga binyided. We-gwiimala, dule-gutemalad, degi, ibdurgan-gutemalad.
EXO 8:18 Nelemar aisaar gwii-yaisur-nikuega na ibmar-burbamar-wisimaladba imaknanai guarmarmoganad. Degi-inigwele, ukub gwiiga obinnissurmalad. Ar degidgine, gwiimardi, dule-gunnanai, degi, ibdurgan-gunnanai guarmalad.
EXO 8:19 Geb degine, nelemar Faraónʼga sogdemalad: “¡Wedi Bab-Dummad-ganguedi!” Bab-Jehová bato iduar sogsadyob, Faraónʼdi aka bur bule burguded. Moisés-ega-ibmar-sogedba gwen imaksasulid.
EXO 8:20 Bab-Jehová Moisésʼga sogdebalid: “Oibosale, be gwisguo. Wakudaryalaba Faraón-diwarse-naoedse Faraón-abin be nao. Faraónʼga be sogo: ‘Bab-Jehová weyob soged: An-dulamar be onogo, adi, anse gornamalagar, an-nug odummogegar.
EXO 8:21 Ar be onosulile, gukurmar-galagwensulid an begi, bega-arbamaladgi, degi, be-sordamargi, deginbali, be-negyagi an barmidoed. Egipto-dulemar-neggi gukurmar-galagwensulid ena ubogoed. Deginbali, ar bia Egipto-dulemar-gudidimala, a-napagi amba gukurmar-galagwensulid nika gubaloed.
EXO 8:22 Ar weyob gunonikile, Gosén-yalagindi, bia an-dulamar bukwa, gukurmar nikuosulid. Gosén-yalaginbi gukurmar-galagwensulid gwagwensaale nika guosulid. Agi be wisguoed, ani an Bab-Jehová gued. We-Egipto-yargi an gudiid.
EXO 8:23 An-dulamar, be-dulemar-ebogwa akarsaila an dakoed. Oibosale, an bega sognaidyob, we-ibmar-dakledisulid an imakoed.’ ”
EXO 8:24 Bab-Jehová deyob imaksad, gukurmar-galagwensulid yaisur Faraón-neggi, Faraónʼga-arbamalad-neggi ubononikid. Degine, bela Egipto-yalagi bukidar gukur-galagwensulid-nika gunonikid. We-gukurmar Egipto-yala nue-oichosad.
EXO 8:25 Geb degine, Faraón Moisésʼse, degi, Aarónʼse gochad, amarga sogded: —Be namar, be-Bab-Dummadga ibmar-ogumakar be uknamar. Ar Egipto-yargindi mer be nomalo.
EXO 8:26 Moisésʼdi Faraón-abin sogded: —Suli, anmar deyob imakele, nuedsuli. Ar ade, anmar-Bab-Dummad-Jehováʼga, anmar ibmar-ukedi, we Egipto-dulemarga ibmar-isganad, ibmar-sunnasulidid. Egipto-dulemar a-ibmarmar-ogumakar-uknai anmar-daksale, ar an wisid, akwagi-makar anmar-oburgwismalaled.
EXO 8:27 Anmar nega-dulesulidganba, ibapaa-nanaedse anmar naergebed. Agi, anmar-Bab-Dummad-Jehováʼga ibmar-ogumakar anmar ukoed. Ar igi anmarga Bab-Dummad-Jehová sogoe, aba anmar ibmar ukoed.
EXO 8:28 Geb degine, Faraón sogded: —Nega-dulesulidganba-naed an bemar-imakoed, adi, na bemar, bemar-Bab-Dummad-Jehováʼga, ibmar-ogumakar uknamalagar. Naega an bemar-imakoedi, dikasurdi melle be namalo. Deginbali, anga be Bab-Dummadse gormarmogo.
EXO 8:29 Moisésʼdi Faraón-abin sogded: —An wegi nodele, Bab-Jehováʼse an egisoed, oibosale, gukurmar-galagwensuli-nikadi begi, bega-arbamaladgi, degi, be-dulemargi banguye. Deyob an imakoed, be anga soger, bar an be-yardakosurye, degine, be-dulemar an onogoye, onosuli bar an imakosurye, adi, Bab-Jehováʼga bemar ibmar-ogumakar uknamalagarye.
EXO 8:30 Moisés, Faraónʼgi bangudgu, Bab-Jehováʼse goted.
EXO 8:31 Bab-Jehová Moisés-ese-ibmar-egichisadba imaksad. Gukurmar-galagwensuli-nikadi, Faraónʼgi, Faraónʼga-arbamaladgi, degi, Faraón-sordamargi banguded.
EXO 8:32 Ar Faraónʼdi gannar aka bur bule burguded, Israel-dulemar-onogega gwen imaksasulid.
EXO 9:1 Geb degine, Bab-Jehová Moisésʼga sogdebalid: “Faraón be daknao, ega be sogo: ‘Hebreoʼmar-e-Bab-Dummad-Jehová weyob sogye: An-dulamar be onogo, adi, anse gornamalagar, an-nug odummogegar.
EXO 9:2 ” ’Ar be an-dulamar-onosulile, amba be gaele,
EXO 9:3 Bab-Jehová be-molimar-be-nainugi-gudidimaladgi e-gangued oyogoed. Degine, boni-dummad we-be-ibdurgangi odegoed: Molimargi, moli-uayasuidmargi, moli-yargan-muremaladgi, moli-bebe-nikamaladgi, sibad-wawaadmargi, degi, sibadmargi, odegoed. Bela we-ibdurgan burgwemaloed.’
EXO 9:4 ”Weyob be Faraónʼga sogo: ‘Ar Bab-Jehováʼdi Israel-dulemar-ibdurgan, Egipto-dulemar-ibdurganbo akarsaila dakoed, adi, melle Israel-dulemar-e-ibdurgan burgwemalagarye.’ ”
EXO 9:5 Degine, Bab-Jehová iba nasiksad. Geb sogded: “Neg-oibosale, we-ibmar an deyob imakoed.”
EXO 9:6 Neg-oibosgu, Bab-Jehová deyob imaksad. Egipto-dulemar-e-ibmar-durgan bela burgwismalad. Israel-dulemar-e-ibmar-durgandi, wargwensaale gwen burgwissulid.
EXO 9:7 Faraón Israel-dulemar-e-ibmar-durgan-daknamalaga, e-dulemar barmisad. Dakleardo, Israel-dulemar-e-ibmar-durgan wargwensaale gwen burgwissuli. Degi-inigwele, Faraón aka bur bule burguded, Israel-dulemar-onossulid.
EXO 9:8 Geb degine, Bab-Jehová Moisésʼga, degi, Aarónʼga sogdebalid: “Madu-sobedyaba buru-bukwadi nukgwen be-argan-warbogi be weemalo. Geb agine, Moisés Faraón-asabin buru niba midoed.
EXO 9:9 Geb buru ukubga binyidoed, degine, bela Egipto-yalaganba mimiledoed. We-ukub, dulemar-yaa-nikadbi, degi, ibmar-durgan-yaa-nikadbi imakoed.”
EXO 9:10 Moisés Aarónʼbogwa madu-sobedyaba buru-bukwad-wesmargua, Faraón-daknadmalad. Agine, Moisés buru niba-mided, degi, dulemar, ibmar-durganse-bakale, bela yaa-nikadbi gunonimalad.
EXO 9:11 Nelemar Moisés-asabin geg gwisgu gusmalad, ar ade, amarse-bakale, bela yaa-nikadbi gusmarmogad.
EXO 9:12 Ar Bab-Jehováʼdi, aka bur bule Faraón-burguega imaksad. Ar igi Bab-Jehová bato iduar Moisésʼga sogsa, deyob gunonikid. Degisoggu, Faraón Moisés-gwen-bar-wisgubisuli, degi, Aarón-gwen-bar-wisgubisuli gusad.
EXO 9:13 Geb degine, Bab-Jehová Moisésʼga sogdebalid: “Neg-oibosale, wakudaryalaba be gwisguo, Faraónʼga be sognao: ‘Hebreoʼmar-e-Bab-Dummad-Jehová weyob sogye: An-dulamar be onogo, adi, anse gornamalagar, an-nug odummogegar.
EXO 9:14 ” ’Ar emigindi, an-boni-dummagan an begi, bega-arbamaladgi, degi, bela be-sordamargi an barmidoed, adi, be wisguegar, bela we-napneggi dule-anyobid surye.
EXO 9:15 Emi-gunaidgi, bur bule sabsur an be-odurdaknaina, boni-dummad-gwensakgi an be-dulemar-sabsur-odurdakena, bato be bela burgwismalanad.
EXO 9:16 Ar emigindi, wis dula-gudiguega an be-imaksad, adi, an-gangued be dakegar, adi, bela we-napneg-naidgi an-wisgumalagar, an doa-dule gue.
EXO 9:17 Ar aka emigindi, be an-dulamar-onobisulidba an-dulamargi amba be gwisgudiid.
EXO 9:18 ¡Degir nued! Neg-oibosar, we-wachigi, dii-akwaga-binyaled, Egipto-dulemar-bukualid-akar, emisgwadse, Egipto-yargi deyob-gwen-babatedisulidi, bela-bela babated an imakoed.
EXO 9:19 Degisoggu, be-ibmar-durgan, degi, bela be-ibmar-nainugi-nikadi, bela nuekwaa be sabogo. Ar ade, dii-akwaga-binyaled, babatidagogu, bela dulemar, degi, ibmar-durgan neg-uas-yaba dukuarsuli-bukwamaladi, bela ese burgoed.’ ”
EXO 9:20 Abala-Faraónʼga-arbamalad, Bab-Jehová-idu-owisonaid dobe-itosmalad. A-ular, uas-urba e-maimar-odosmalad, degine, e-ibmar-durgan odosmarbalid.
EXO 9:21 Ar baigandi, Bab-Jehová-idu-e-owisonaid baisur-itosmalad. Degisoggu, magaba e-maimar-obesmalad, degi, e-ibmar-durgan obesmarbalid.
EXO 9:22 Geb degine, Bab-Jehová Moisésʼga sogded: “Be-sakwa niba be onak, adi, bela Egipto-yargi dii-akwaga-binyaled bela dulemargi, ibmar-durgangi, degi, e-nainugi-ibmar-nikadgi babategar.”
EXO 9:23 Moisés niba e-sakwa onakwisad. Geb agine, Bab-Jehová mar-golega imaksad. Mar-dakarmakded, degine, dii-akwaga-binyaled bela napase babatialid. Bab-Jehová bela Egipto-yargi dii-akwaga-binyaled babatega imaksad.
EXO 9:24 Dii-akwaga-binyaled babatemai gusad, degine, mar-dakarmakmaid aidemai gusbalid. Ar Egipto-yargi-dule-ambikuded-akar, Egipto-yargine bipisaale dii-akwaga-binyaled weyob-gangu babatedisulid.
EXO 9:25 Dii-akwaga-binyaled bela Egipto-yargi, ibmarmar nainumargi-nanaid, ogilosad. Dulemar, degi, ibmar-durganse-bakar uas-urba-dukubuksurmaladi, ogilosad. Deginbali, bela Egipto-yargi-ibmar-digarmalad, sapi-dummaganse-bakale, ese bibichisad.
EXO 9:26 Ar degite, Gosén-yargindi, Israel-dulemar-bukwadgindi, bipisaale dii-akwaga-binyaled gwagwensaar argwachasulid.
EXO 9:27 Geb degine, Faraón Moisésʼse, degi, Aarónʼse gochad. Amarga sogded: —Mag an itodo, ani an nosad. Angindo, an-dulemarginbardo, Bab-Jehováʼginsurdo.
EXO 9:28 Bar an bemar-gaosulid. Be namarsun. Ar mar doggus-wilub-obicha gollomakmaisoggu, dii-akwaga-binyaled doggus wilub-obicha babatemaisoggu, wis be Bab-Jehováʼse be anmarga gole, adi, we-ibmarmar anmarga osulogegar.
EXO 9:29 Moisésʼdi Faraón-abin sogded: —An we-neggweburgi nodeyalaba Bab-Jehováʼse golega argan an onakdoed. Geb agine, dii-akwaga-binyaled bar babatosulid, degine, mar bar gollomakosurbalid, adi, be wisguegar, we-napneg Bab-Jehováʼgadid.
EXO 9:30 Degi-inigwele, an nue wisid, be, degi, bega-arbamalad, degite, amba Bab-Dummad-Jehová-dobsurmalad.
EXO 9:31 ”We-ibmarmardi bela burgwisad: Gagan-linoʼye-nugad, orosgi-dakleged-cebadaʼye-nugad, Ar ade, bato cebadaʼde sanmaksad, degi, gagan-linoʼye-nugad bato durbamaksabalid.
EXO 9:32 ”Degi-inigwele, we-ibmarmardi akargussulid: Orosgi-dakleged-trigoʼye-nugad, orosgi-daklebalid-centenoʼye-nugad, amardi, akargussulid, Ar ade, amardi amba yoo ainidagedgined.”
EXO 9:33 Moisés Faraónʼbo-sunmaksad-sorba, neggweburgi nodgu, e-argan onakded, Bab-Jehováʼse goted. Deyob imaksagu, dii-akwaga-binyaled yog berguar naded, bar babatissulid. Degine, mar bar gollomaksasurbalid, yog berguar nadbalid.
EXO 9:34 Ar Faraónʼdi deyob dakdegua, bar dii wisuli, dii-akwaga-binyaled bar babatesurbali, degi, mar bar gollomakmaisurbali, Faraón gannar isgudbalid. Faraónʼga-arbamalad e-dummadyob burgudmarmogad.
EXO 9:35 Ar igi Bab-Jehová bato iduar Moisésʼga sogsa gusa, deyob gunonikid. Faraón gannar bela-bela burgunonikid, degisoggu, Israel-dulemar-onogega gwen imaksasulid.
EXO 10:1 Bab-Jehová Moisésʼga sogdebalid: “Faraónʼse be nae, Faraón be dakna. Ar an-sunnad an Faraón bur bule burguega an imaksad, ega-arbamalad bur bule burgumalaga an imaksad. Ar an ibmar-gegerdaklemalad-imaked-ese-an-oyogegala, an ibmar-dummagan-imaked-ese-an-oyogegala, an deyob imaksad.
EXO 10:2 Deyob an imaksad, adi, be-mimmiganga be sogegar, be-waganga be sogegar, igi an Egipto-dulemar-sabsur-imaksa, degine, igi an ibmar-gegerdaklemalad amar-abargi imaksabali. Adi, agi bemar wisgumaloed, ani an Bab-Jehová gued.”
EXO 10:3 Moisés Aarónʼbogwa Faraón-daknadgusmalad. Faraónʼga sogdapmalad: “Weyob Hebreoʼmar-e-Bab-Dummad-Jehová soged: ‘¿Ar wede sanagwadsega bede an-asabin san bipii imakoe? An-dulamar noega be imako, adi, anse gornamalagar, an-nug odummonamalagar.
EXO 10:4 ” ’Ar amba be yapa an-dulamar-onogele, neg-oibosale, sesmar-bukidar be-yarse an sedagoed.
EXO 10:5 We-sesmar we-napneggi yaisur-mergu-nikuosoggu, napa gwen daklegosulid. We-sesmar, dii-akwamarga-binyaled-babatisad ibmar-wis-obesad bela gunnoed, degi, bela sapi-sapurba-bukmalad gunbaloed.
EXO 10:6 Be-negmaryaba, bega-arbamalad-negmaryaba, degi, bela Egipto-dulemar-negmaryaba, ena ubononikoed. Ar we-ibmar, be-babgan-we-yarse-nonikid-akale, degi, be-dadgan-we-yarse-nonikid-akale, e-ibagangi, emi-iba-naidse, weyob gwen dakledisulid.’ ” Moisés Faraónʼga-sunmakgwichid-bergusgu, biir imaksad, geb Faraónʼgi banguded.
EXO 10:7 Geb degine, Faraónʼga-arbamalad Faraónʼga sogdemalad: “¿Ar wede sanagwadsega we-dulede anmarga boni-dummad-onodiid berguoe? Degisoggu, Dummad, we-Hebreo-dulemar-naed be imake, e-Bab-Dummad-Jehováʼse gornamalagar. Dummad, ¿ar bede amba Egipto-yar-nue-bergus-naid be daksursi?”
EXO 10:8 Geb degine, Faraón gannar Moisésʼse, Aarónʼse gochad. Amarga sogded: —Be namar. Be-Bab-Dummad-Jehováʼse be gornamar. Bemar-naed-idu anga sogmalo, ¿doamar nadmalale?
EXO 10:9 Moisés Faraón-abin sogded: —Anmarba-namaloedi, wemalad: Anmar-mimmiganmar, anmar-serganmar, anmar-machimala, anmar-bunamala, anmar-sibad-wawaadmar, degi, anmar-moli-bebe-nikadmar. Ar ade, anmar, anmar-Bab-Jehováʼga iba-dummad onogoed.
EXO 10:10 Faraónʼdi dodoalegi ega sogded: —¡Eye, be-Bab-Jehová beba naoe! Ar bemar, unnila wakinnedgi binsananaisoggu, ¿ar ande, be-mimmigan bemarba-barmido be an-insae?
EXO 10:11 Suli. Deyob gued sate. Ar bemar Bab-Jehováʼse gornabimalale, e-nug-odummonabimalale, bemar-macherganbi namalodo. Ar deyob bemar egichismalad. Agi, Faraón Moisés-e-asabin-gwichid, degi, Aarón-e-asabin-gwichid, gandikidgi-onomalaga igar ukded.
EXO 10:12 Geb degine, Bab-Jehová Moisésʼga sogded: “Egipto-yargi sesmar-dagega be-argan be oyo, adi, bela Egipto-nainugi-ibmar-nikad obelogegar. Degine, dii-akwaga-binyaled-babatisad ibmar-obelossulidi, we-sesmar bela amar-obelogegar.”
EXO 10:13 Moisés Egipto-yar-naidgi e-argan-oyodgua, Bab-Jehová dad-nakwedsik Egipto-yargi-burwa-golega imaksad. Burwa ibgi-gormai osedosad, degine, mutik-gormai oiboarbalid. Oiboargu, burwa-dad-nakwedsik-gochadi, sesmar-senonikid.
EXO 10:14 A-sesmala, bela Egipto-yargi ubononikid. We-ibagangi sesmar-ichesur-ubononikidyob iduale weyob neg gudisulid. Degine, we-sorbali, weyob guosurbalid.
EXO 10:15 Ar ade, sesmarde bela-bela mergusoggu, napa gwen magar daklessulid. Degine, dii-akwaga-binyaled gagan-obesad, degi, sapi-durbamar-sapigi-obesad, sesmar amar bela guchamalad. Egipto-yargi bipisaale nainu-e-gaganmar, sapi-e-gaganmar, gwen bessulid.
EXO 10:16 Faraón, Moisésʼse, degi, Aarónʼse yog-gollar imaksad. Geb, amarga sogded: “Be-Bab-Dummad-Jehováʼba an nue-nosad. Bemargi an nue-nosbalid.
EXO 10:17 An wis bemarse egised, an-begi-yolesadi begi-nossuliyob be an-dake. We-boni-dummad-anga-osulogega, be-Bab-Dummad-Jehováʼse be anga gole.”
EXO 10:18 Moisés Faraónʼgi bangudeyalaba Bab-Jehováʼse Faraónʼga goted.
EXO 10:19 Geb, Bab-Jehová burwa-gormaid obilisad. Burwa dad-argwanedsik binnasur-golega imaksad. A-burwa bela sesmar-sesad, Demar-Ginnidye-nugadse obatedapid. Ses Egipto-yargi gwagwensaale gwen bessulid.
EXO 10:20 Ar Bab-Jehováʼdi aka bur bule Faraón-burguega imaksad. Degisoggu, Faraón Israel-dulemar-naega imaksasulid.
EXO 10:21 Geb degine, Bab-Jehová Moisésʼga sogded: “Bela Egipto-yargi negasichidbi naguegala, be-argan niba be oyoge. We-negsichidi bela-bela gudure guosoggu, acha-acha gudii gumaloed.”
EXO 10:22 Agi Moisés e-argan niba onakdegusad. Geb bela-bela negasichid bela-Egipto-yargi ibapaa nagunonikid.
EXO 10:23 Bela-bela ibapaa-wilub negasichid-nagussoggu, dule, dule-e-dikarba-gwichidi akudaksa gusad. Degine, geg aineba nale gusbalid. Degi-inigwele, Israel-dulemar-neggindina bela neg-mee naid.
EXO 10:24 Geb degine, Faraón Moisésʼse gochad, ega sogded: —Be namalo. Be-Bab-Jehováʼse be gornamar, e-nug odummonamar. Be be-mimmigan sedmarbalo. Degi-inigwele, moli-bebe-nikamalad, degi, sibad-wawaadmar, amardi be obemalo.
EXO 10:25 Moisésʼdi Faraón-abin sogded: —¡Adi surbali! Ar be bur anmarga ibmar-durgan ukoed. Adi, a-ibmar-durgan Bab-Jehová-anmar-Bab-Dummadga ogumaklegar uklegegar.
EXO 10:26 Deginbali, anmar-moli-bebe-nikamalad anmarba naergebbalid. Ar ibmar-durgan-wargwensaale wegi beosulid. Ar ade, anmar, anmar-Bab-Dummad-Jehováʼse golegala, e-nug odummogegala, na anmar-ibdurgan suergebed. Degisoggu, anmar amba wissulid, igid anmar Bab-Jehováʼga-ukoe. Geb anmar weba sudapoed, ibimar anmar abegoe.
EXO 10:27 Ar Bab-Jehováʼdi aka bur bule Faraón-burguega imaksad, Israel-dulemar-mer-onogega imaksad.
EXO 10:28 Deginbali, Faraón Moisésʼga sogsabalid: —Wegi be an-asabin-gwichidi, be nae. Mer be anse gannar-dagedgi be binsao. Ar be ibagwengi an-asabin be gwisgunonikile, anse be burgoed.
EXO 10:29 Moisés Faraón-abin sogded: —Napira be anga soged. Ar bar be-wagar an dakosulid.
EXO 11:1 Bab-Jehová Moisésʼga sogded: “Napi boni-dummad-gwensak Faraónʼga, degi, Egipto-dulemarga an barmidagoed. A-sorbali, Faraón e-sunnad bemar-onogoed. Bar wegi-gudiguega bemar-imakosulid.
EXO 11:2 Ar emigindi, Israel-dulemar-macherganga, degi, Israel-dulemar-omeganga be sogo, na e-neg-dikarba-mamaidse, ibmar-manigi-sobaled, degi, ibmar-orgi-sobaled egismaloye.”
EXO 11:3 Dakargua, Bab-Jehová Egipto-dulemar Israel-dulemar-nued-dakega imaksad. Deginbali, Faraónʼga-arbamalad dakmalad, Moisésʼde dule-dummadi, dule-nug-nikagwadi. Amba Egipto-yargi bela dulemala deyob Moisés-dakmarmogad.
EXO 11:4 Geb agine, Moisés Faraónʼga sogded: “Bab-Jehová weyob soged: ‘Nega-gabigwengi bela Egipto-yargi an nasoed.
EXO 11:5 Egipto-dulemar-e-machi-sailagined burgwemaloed. Egipto-yar-dakmaid-Faraón, be-machi-dummadgi onodoed. Degine, mai-ome-obnagedgi-arbaed-e-machi-sailaginmalad burgwemarmogoed. Deginbali, ibmar-durganse-bakar, sailagi-gwalulesmalad, burgwemarmogoed.’
EXO 11:6 ”A-ibagi, bela Egipto-yargi binnasur gormaloed, na nunmak-itomaladba bomaloed. Weyob iduale, binnasur-gordisurmalad, degine, weyob a-sorba bar binnasur-golosurmarbalid.
EXO 11:7 Ar Israel-dulemar-abargi wis bipisaale achu dulese urwosulid, ibmar-durganse gwen urwosurbalid. Geb agi, bemar wisgumaloed, Bab-Jehová, Israel-dulemar Egipto-dulemarbo akarsaila dakye.” Geb Moisés Faraónʼga sogdebalid:
EXO 11:8 “Bela dule-bega-arbamalad anse duurmaknonikoed, yokorgi-sindigar-sii anga sogdamaloed: ‘Be naye, degine, bela be-sordamar-beba-nanaimalad, bela be namarye.’ Agi geb an naoed, iduardi an naosulid.” Bela-bela Moisés nue-urwe Faraón-asabin-gwichi noalid.
EXO 11:9 Bab-Jehová Moisésʼga sogded: “Egipto-yargi gatik bur bule an-ibmar-gegerdaklemalad an imakega, Faraón bemar-ibmar-sogedba imakosulid.”
EXO 11:10 Moisés Aarónʼbogwa bela we-ibmar-gegerdaklemalad Faraón-asabin imaksad. Ar Bab-Jehováʼdi aka bur bule Faraón-burguega imaksasoggu, Faraón Israel-dulemar-Egipto-yargi-bukwad onossulid.
EXO 12:1 Bab-Jehová Egipto-yargi Moisésʼga, degi, Aarónʼga sunmaksad, amarga sogsad:
EXO 12:2 “We-nii, bemarga bur nii-sunsoged guoed. Gebe birga-onoded-e-niiga guoed.
EXO 12:3 ”Bemar bela weyob Israel-dulemarga sogo: ” ‘We-nii-ibambegi (10) bemar wala-walagwen, e-gwenadgan-e-gwenadganba, degi, neg-iliba, sibad-wawaad-sapingwagwad-war-wargwen na sumalo.
EXO 12:4 Ar dule e-gwenadgan-ichegwale, sibad-wawaad-sapingwagwad geg bela gunnele, dule-neg-ibed e-neg-dikarba-itaka-maidbo na bulakwaa gunmalo. E-dule-merguedba na mimimalo, adi, sogedba gunmalagar.
EXO 12:5 Sibad-wawaad-sapingwagwad-amilegoedi, machered amilegergebed, birgagwen-nikadirgebed, bonisulid. Deyob be sumaloed, sibad-wawaaddibe, sibaddibe.
EXO 12:6 ” ’Bemar a-sibad-wawaad we-nii-ibambe-gakabakedse (14) sabomaloed. A-ibagi, neg-sedogusale, Israel-dulemar-belagwable, wala-walagwen, we-sibad-wawaad oburgwemaloed.
EXO 12:7 Geb degine, bemar we-sibad-wawaad-abe weoed. Geb degine, bia bemar sibad-wawaad-gunmaloedgi, yawagak-e-dikargi-urgomar-gwichidgi, degi, yawagak-niba-urgo-maidgi, we-abe be magoed.
EXO 12:8 A-mutiki, a-sibad-wawaad-e-san narar, gagan-gagbidba, degine, madu-inasulidba be gunmaloed.
EXO 12:9 We-sibad-wawaad melle bipisaale maki gunmalo, amba duar mer be gunmarbalo. Bela we-sibad-wawaad, nonose-bakale, e-malimarse-bakale, degi, e-samurse-bakale, soogi narar imakmalo.
EXO 12:10 Melle we-sibad-wawaad-e-san sabogo. Ar wis obichale, banedse bemar bela ogumakmalo.
EXO 12:11 Bemar weyob sibad-wawaad gunmaloed: Bato mor-yoi, sapat-yoi, degi, gaapoled be-argangi-gani, bemar we-ibmar gwae-gwae gunmaloed, ar ade, Oburgwilegoenad-Iba an-nuggi onolegoed. We sogleged, bemar Egipto-yargi-wilebukwa Bab-Jehová bemar-ollor-imaksaye.
EXO 12:12 ” ’A-mutikidgi bela Egipto-yargi an nasoed. Deginbali, an Egipto-dulemar-e-machi-sailaginmalad oburgoed, degi, e-ibmar-durgan-sailagi-gwalulesmalad amba deyob an oburgwebaloed. An bela Egipto-dulemar-e-bab-dummagan wiogoed, an sabsur-odurdakoed. Ani, an Bab-Jehová, ani an weyob soged.
EXO 12:13 ” ’Sibad-wawaad-e-abe bemarga-oyogega guoed, biti bemar-neg gumala. An abe-dakdogua, bemargi an bakar nasoed. Degisoggu, an Egipto-dulemar-oburgwidogua, bemardi wargwensaar burgosurmalad.
EXO 12:14 ” ’We-iba bemar insaewilubmalad. Bemar we-iba, iba-dummad Bab-Jehováʼga onogewilubmalad. Bemar igar mesoed, adi, be-waganmar, we-iba igar-maidba degisadegu onodii gumalagar.
EXO 12:15 Bemar ibagugle (7) madu-inasulid gunmaloed. Degisoggu, iba gebe-onodeyalaba bemar-neggi madubur-ina sate guergebed. Ar doa-dule, we-ibagugledgi (7) madu e-ina-nika guchale, we-dule, Israel-dulemar-abargi onolegoed.
EXO 12:16 Gebe-iba-onodoedgi, degi, ibagugledgi (7), na bemar danar islidikidgi ambikumalargebed. We-ibabogwadgine bemar arbaosurmalad. Unnila na be mas-gunmalagala, masgullegoedbi bemar dumaloed.
EXO 12:17 ” ’Madu-E-Inasulid-Iba bemar onogewilubmalad, ar ade, a-ibagi, Egipto-yargi-bukwa danar-danar an bela bemar-onosad. Igar-maidbali, bemar we-iba be-wagan degisadegu onodii gumaloed.
EXO 12:18 Bemar madu e-inasuli gunmaloed, gebe-nii-onoded-ibambe-gakabake-nagunonikir (14), a-sedogidgi, geb degine, amba a-nii-iba-durgwen-gakagwensakadse (21), a-sedogidse gunmaloed.
EXO 12:19 Bemar-neggine, we-ibagugledgi (7) madu-ina gwen daklegosulid. Ar ade, doa-dule madu-e-ina-nika guchale, ar we-dule Israel-duledibe, Israel-dulesurdibe, we-dule Israel-dulemar-abargi onolegoed.
EXO 12:20 Degisoggu, melle madu-ina-nika ibmar gunmalo. Ar bia bemar na mamaimardibe, bemar madu e-inasuli gunmalargebed.’ ”
EXO 12:21 Geb degine, Moisés bela Israel-girmar-dummaganse gochad. Amarga sogded: “Be namar. Bemar be-gwenadganga, sibad-wawaad-birgagwen-nikad sunamar. A-sibad-wawaad be oburgwemaloed, adi, Oburgwilegoenad-Iba be onomalagar.
EXO 12:22 Bemar sibad-wawaad-e-abe bormogi weoed. Geb gagan-hisopoʼye-nugad-e-gagan be gwannoed. A-e-gagan danakwaa be gaogu, abegi be owardikuoed. Geb degine, a-abe bela neg-yawagak-e-dikarmar-gwichidgi, degi, yawagak-niba-urgo-maidgi be magoed. Bemar wargwensaale melle be-neggi be nomalo. Neg-oibogedse geb be nomaloed.
EXO 12:23 Bab-Jehová Egipto-dulemar-oburgwe-danikile, bela neg-yawagak-dikargi abe-nai-dakalile, a-neggi bakar nasoed. Bab-Jehová, dulemar-oburgwed-baliwitur-danikid be-negyaba-dogega gwen imakosulid. Bab-Dummad gwen-burgwega be-imakosulid.
EXO 12:24 ”Bab-Dummad-bemarga-we-igar-mesisadi, bemar, degi, be-wagan, degisadegu imakdii gumaloed.
EXO 12:25 Bab-Jehová bemarga-yar-ukoye-sogsadgi bemar dogdapile, bemar we-iba deyob-onodii degisadegu gumarbaloed.
EXO 12:26 Be-mimmigan bemarse egichialile: ‘Wede weyob anmar iba-onoged, ¿ibi obarye?’
EXO 12:27 Bemar abin-soge-wilubmalad: ‘Bab-Jehová Egipto-dulemar-oburgwenaigusgu, anmargindi bakar-nasye. Degisoggu, Bab-Jehová-nuggi we-sibad-wawaad oburgwileye. Degine, Israel-dulemar Egipto-yargi bukwagu, Bab-Jehová Israel-dulemar-neggi bakar-nadegusye, Egipto-dulemardi oburgwilesye. Weyobi, Bab-Jehová, anmar-gwenadgan-bendaksaye, anmardi oburgwilessurye.’ ” Moisés sunmaked-bergusgua, Israel-dulemala dulluu imaksamalad, oyogega, emarde Bab-Jehováʼse gornanaiye, Bab-Dummad-nug odummonanaiye.
EXO 12:28 Agi, geb nadmalad. Igi Bab-Jehová Moisésʼga, degi, Aarónʼga igar-uksa, aba bela deyob imaksamalad.
EXO 12:29 Nega-gabigwenadbali, Bab-Jehová Egipto-dulemar-gwenadgan-iliba e-machi-sailagined-oburgwisad. Amba deyob Faraón-Egipto-yar-dakmaid-e-machi-sailagined, degi, dule-esgaryagi-mellesiid-e-machi-sailaginedse-bakar oburgwisad. Degine, ibmar-durgan-gebegwalulesmalad oburgwisbalid.
EXO 12:30 Faraón, degi, ega-arbamalad, degine, bela Egipto-dulemar a-mutik gwisgusmalad, geb bela Egipto-yargi, binnasur ise-gormakar bosmalad, ar ade, neg-ilibali e-machi-sailagined burgwenai gusad.
EXO 12:31 Abga-a-mutikidgi Faraón Moisésʼse, degi, Aarónʼse gochad. Amarga sogded: “Be namar. Bemar-Israel-dulemar, an-dulemargi be bangumar. Bemar Bab-Jehová-e-nug odummonamar. Igi bemar sogsa gusa, deyob imaknamar.
EXO 12:32 Bemar be-sibad-wawaadmar, degine, moli-bebe-nikamalad be abemaladba sedmarbalo. Deginbali, bemar anga Bab-Jehováʼse gormarmogo, angi nued binsamogagar.”
EXO 12:33 Egipto-dulemala gwae-gwae Israel-dulemar-ononai gualid. Ar ade, binsamalad, emarde bela burgwemaloye.
EXO 12:34 Israel-dulemala madu-omukuar-siid, amba yoo egi madu-ina-eoleged, e-omukuedgi-siid susmalad. Bela e-morgi obipirmaksagu, e-gukingi-sii sesmalad.
EXO 12:35 Deginbali, Moisés-ega-igar-uksadba imaksamalad. Egipto-dulemarse ibmarmar-orgi-sobaled, degi, ibmarmar-manigi-sobaled egichismalad, degi, mormar egichismarbalid.
EXO 12:36 Bab-Jehová Egipto-dulemar Israel-dulemar-nued-dakega imaksad. A-ular, Egipto-dulemar bela Israel-dulemar-ese-ibmar-egichisad, ega nue-ukbi itogunonimalad. Weyobi, Israel-dulemala Egipto-dulemargi bela-bela ibmar-nuegan susmalad.
EXO 12:37 Israel-dulemala neggwebur-Ramesésʼye-nugadgi nodmalad, neggwebur-Sucotʼye-nugadse nadmalad. Machergan-sunna-bato-bila-onomaladbi, nagab-ainiarmaladi, mili-dulataled-ilanergwa (600,000) mergued. Omegan, degi, mimmigandi obarilesulid.
EXO 12:38 Israel-dulemarba dule-baigan-yar-baid-baidginmalad eba-bukidar ainiarmarmogad. Deginbali, bukidar sibad-wawaadmar, degi, moli-bebe-nikamalad searmarbalid.
EXO 12:39 Israel-dulemar gwae-gwae-itoarmaladba amba yoo mas-due ainiarmalad, ar ade, Egipto-dulemala, e-yargi gandikidgi Israel-dulemar-onosmalad. Degisoggu, madu-omukualed-Egiptoʼgi-searmaladgi madu-olo e-inasuli sobsamalad.
EXO 12:40 Israel-dulemala Egipto-yargi birga-dulataled-ilabake gaka-dulagwen-gakambe (430) gudii gusmalad.
EXO 12:41 Birga-dulataled-ilabake gaka-dulagwen-gakambegi (430), Bab-Jehová-e-sordamar Egipto-yargi-bukwad danar-danar ainiarmalad.
EXO 12:42 A-mutiki, Bab-Jehová, Egipto-yargi Israel-dulemar-onogega, Israel-dulemargi nue nakulenai gusad, adi, bonisuli nomalagar. Agala, bela Israel-dulemar-wagan-danimaloedi, Bab-Jehová-ega-ibmar-imaksad-ular, a-mutikidgi atakbukwa gumaloed. Deyob, degisadegu imakdii gumaloed.
EXO 12:43 Bab-Jehová Moisésʼga, degi, Aarónʼga sogded: “Oburgwilegoenad-Iba-onogegala, weyob igar mai guoed: ‘Israel-dulesulid we-ibagi-mas-gulleged gunnosur guoed. Ar wede ega ised.
EXO 12:44 ” ’Ar mai-manigi-baklealiddi, idu bato e-abgan-uka-duku-siklesale, we-ibagi-mas-gulleged sunna gunnoed.
EXO 12:45 ” ’Dule-Israel-dulesulidi, unnila sikwas be-yargi nadapdibe, na mani-onogega arbadibe, a-dule bipisaale we-ibmar gunnosulid.
EXO 12:46 ” ’We-sibad-wawaad unnila neg-gwagwengi gullegoed. We-ibmar-oburgwilesad-e-sana, baid-negse sedega neg-gwagwengi bipisaale onolegosulid, degine, bipisaale be sibad-wawaad-e-gar bisgosurbalid.
EXO 12:47 ” ’Bela Israel-dulemala weyob imakergebmalad.
EXO 12:48 ” ’Degi-inigwele, Israel-dulesulid bemar-abargi gudiile, we-dule Oburgwilegoenad-Iba, degi, Bab-Jehová-nug-odummogega onobiele, iduale, bela machergan-e-neguyaginmalad e-abgan-uka-duku sikmalargebed. Geb a-sorbardi, sunna iba onogodo, ar we-dulemala be-yargi-gwalulesadyob gunonikoed. ” ’Dule-wargwensaale, e-abgan-uka-duku-sikarsulid, we-ibagi-mas-gulleged gunnosur guoed.
EXO 12:49 ” ’Bela dulemar-be-yargi-gwalulesmaladi, degi, dulemar-be-yarginsurmalad-be-abargi-gudidimaladi, ebobela deyob we-igar imakmaloed.’ ”
EXO 12:50 Israel-dulemala, Bab-Jehová igi Moisésʼga, degi, Aarónʼga igar-uksa, aba bela deyob imaksamalad.
EXO 12:51 A-ibagine, Bab-Jehová Egipto-yargi Israel-dulemar danar-danar onosad.
EXO 13:1 Bab-Jehová Moisésʼga sunmakded, ega sogded:
EXO 13:2 “Machi-sailaginmalad anga be udago. Ar bela Israel-dulemar-e-machi-gebesailaginmalad, angadid. Degi, e-ibmar-durgan-gebe-gwalulemalad, amba deyobbalid.”
EXO 13:3 Geb degine, Moisés Israel-dulemarga sogded: “We-iba nue be insamalo. Bab-Jehová, bemar Egipto-yargi maiga-wilebukwadgi gandikidba bemar-ononaid. Melle bemar madu e-ina-nika gunmalo.
EXO 13:4 Emi bemar nonanaidi, Abib-niigi be nonanaid.
EXO 13:5 Ar Bab-Jehová bemar-dadganga ise-sogar sogsa gusad, we-yala an bemarga ukedseye: Canaán-dulemar-yar, Het-dulemar-yar, Amorreo-dulemar-yar, Heveo-dulemar-yar, degi, Jebuseo-dulemar-yar. A-yarmar napa-nuedid, gadi ibmar sanmaked. ”Degisoggu, Bab-Jehová we-dulemar-yarse bemar-odononikile, we-Abib-niigi bemar we-iba onomaloed.
EXO 13:6 Ibagugle (7) madu e-inasuli bemar gunnoed. Ibagugledgi bemar iba-onogoedi, we-iba, Bab-Jehováʼgadid.
EXO 13:7 Ibagugle (7) bemar madu e-inasuli gunmaloed. Bipisaale bemar madu-ina, madu e-inabardibe, be-yargine be nikuosurmalad.
EXO 13:8 Ibagugle-gusadgine, be-machiga be sogmaloed: ‘An Egipto-yargi noargu, Bab-Jehová anga ibmar-dummagan imaksad, a-ular, an we-iba onoged.
EXO 13:9 Deginbali, we-iba, bemar-sakwagi, bemar-bebegindibe, wilub-naiyob guoed. We, bemar-insaega imakoed, bemar Bab-Jehová e-igar-maidgi sunmakdiguewilubbid, ar ade, Bab-Jehová gandikidba Egipto-yargi bemar-onosad.
EXO 13:10 A-ulale, we-iba birga-irba e-iba-sekalaa bemar onogewilubmalad.’
EXO 13:11 ”Bab-Jehová, ar igi bemarga, degi, be-dadganga sogsagusa, we-yala an bemarga ukedseye, deyob, Canaán-dulemar-yarse bemar-nisale, degi, bemarga uksale,
EXO 13:12 bela be-machi-sailagined Bab-Jehováʼga be nugsaergebmalad. Amba deyob be-ibmar-durgan-machered-gebe-gwaluleged Bab-Jehováʼga bemar ukbaloed, ar ade, bela wemala, Bab-Jehováʼgadid.
EXO 13:13 ”Moli-uayasuid-ome gebe-mimmi-machered-nikued, a-mimmi-muchub sibad-wawaad-sapingwa, ebo be ogwaoed. Ar be sibad-wawaad muchub uksulile, adi, moli-uayasuid-mimmi-e-dukar be bisgoed. Deginbali, machi-gebesailagined-ular, Bab-Jehová be bennuknaiyobi ega be ibmar ukoed, adi, machi-sailagined onogegar. Machi-sailagined-ular, degibi be imakoed.
EXO 13:14 ”Ar ibagwengi be-machi bese egichialile, ar wede ibi obarye. Be-machiga bemar sogoed: ‘Bab-Jehová gandikidba Egipto-yargi deun anmar maiga wilebukwagua, anmar-onosgusye.
EXO 13:15 Faraón bur bule burgudgua, yapa anmar-onogeguargua, Bab-Jehová bela Egipto-dulemar-e-machi-sailagined-oburgwisye, degi, ibmar-durgan-e-mimmi-machered-gebegwalulesmalad amba deyob oburgwisbarye. A-ulale, anmar ibmar-mimmi-machered-gebegwaluleged bela Bab-Jehováʼga ukdamarye, degine, anmar-machi-sailagined-anar anmar Bab-Jehová bennuknaiyobi, ega ibmar-ogumakar ukdaye, adi, anmar-machi-sailagined-onogegarye.
EXO 13:16 Degisoggu, anmar weyob ibmar-imaked, bemar-sakwagi, bemar-bebegindibe, wilub-naiyob guegarye. We be insaega gumaloye, Bab-Jehová gandikidba Egipto-yargi anmar-onosgusye.’ ”
EXO 13:17 Faraón Israel-dulemar-onosgua, Bab-Dummad Filistea-dulemar-yarsik-igar-maidsik Israel-dulemar-sessulid. A-igar bur-itakagwanad. Ar ade, Bab-Jehová binsasad, Israel-dulemar bila-onosogele, yapa bila-ono gudamaloye, bur gannar Egipto-yarse dagbi-gudamaloeddeeye.
EXO 13:18 A-ulale, Bab-Dummad Israel-dulemar nega-dulesulidganba-bipirmakega sesa gusad, Demar-Ginnidye-nugad-naid-igarba sesad.
EXO 13:19 Deyobi, Israel-dulemala guakwaa urwenadapiyob Egipto-yargi noarmalad. Moisés, eba José-garmar sesa gusad. Ar ade, José burgwesokargu, Israel-dulemar-ega-ise-sogar-sogega imaksad, anmar be-garmar sededseye. Deunni, José, Israel-dulemarga weyob sognai gusad: “Napiragwad, Bab-Dummad bemar-bendaknonikoed. Ar deyob gunonikile, bemar an-garmar bemarba sedmalo.”
EXO 13:20 Israel-dulemala neggwebur-Sucotʼye-nugadgi noarmalad. Geb Etamʼye-neg-nugadse ambikudapmalad. Agi, nega-dulesulidgan onoded.
EXO 13:21 Ibgine, Bab-Jehová mogir-bubawaryob-gwichidba Israel-dulemar-idu-nadap gusad, adi, ega igar-oyonadap guegar. Mutikdina, soo-bubawaryob-gwichid-gwabunyemaidba idu-nadap gusad, adi, ega neg-mee saegar. Aga, nabir sunna ibginedba, degine, mutikidba, Israel-dulemar nadap gusmalad.
EXO 13:22 Mogir-bubawaryob-gwichid gusgu Israel-dulemar-iduar ibgi nadap gusad. Soo-bubawaryob-gwichid-gwabunyemaiddi, mutik Israel-dulemar-idu-nadap gusbalid.
EXO 14:1 Bab-Jehová Moisésʼga sunmakded, ega sogded:
EXO 14:2 “Israel-dulemarga be sogna, be gannar igar-baidba aibirmar. Pi-Hahirotʼye-neg-nugad-asabin bemar ambikunonimaloed. Pi-Hahirotʼde, Demar-naidi, degi, Migdolʼye-neg-nugad-naidi, amar-abargi naid. Baal-Zefónʼye-neg-nugad-asabin naid. A-asabin demar-gakagi bemar ambikunonimaloed.
EXO 14:3 Adi, Faraón binsaegar: ‘Israel-dulemar wissurmarye, emarde bia namaloye. Emar nega-dulesulidganba yoggus gudimarye.’
EXO 14:4 ”Andi an, aka bur bule Faraón-burguega imakoed, degine, Faraón bemar-bareginnega an imakbaloed. Geb degine, Faraónʼgi, degi, e-sordamar-bila-onomaladgi an-gargangued an oyogoed. Deyob, Egipto-dulemala wisgumaloed, ani an Bab-Jehová guye.” Israel-dulemala deyob imaksamardo.
EXO 14:5 Geb degi-gunaidgine, Egipto-e-reyga soglealid, Israel-dulemar wakitemarye. Egipto-e-rey, degi, ega-arbamalad, binsaed-gwagdemalad, weyob sogdemalad: “¿Ar wede, ibiga anmar Israel-dulemar-onosa? Emide, anmar we-dulemar-naega imaksagu, gwen bar anmarga arbaosurmalad. Degisulirgebed.”
EXO 14:6 Geb degine, Faraón igar-ukdesunnad, urmar-bila-onoged-napagined ega guakwaa nasikye. Geb degine, Faraón e-sordamar-bila-onomalad sesad.
EXO 14:7 Faraón urmar-napagined-bur-nuegan dulataled-ilanergwa (600) susad, deginbali, bela Egiptoʼgi urmar-napaginmalad-baigan sesbalid. Faraón, e-dummagan a-urmar war-wargwen-sedega imaksad.
EXO 14:8 Bab-Jehováʼdi aka bur bule Egipto-rey-Faraón-burguega imaksad. A-ular, Faraón Israel-dulemar-baregite gusad. Israel-dulemardi dobsulidba nadap gusmalad.
EXO 14:9 Bela Egipto-dule-e-sordamar-bila-onomalad, e-urmar-napagined, moli-birgi-sii-urwemaladi, Israel-dulemar-bareginnega ainidgusmalad. Egipto-sordamar, Israel-dulemar demar-gakaba Pi-Hahirotʼgi-danar-bukwa bargadapmalad, Baal-Zefón-asabin.
EXO 14:10 Israel-dulemar dakdemargu, Faraón, degi, Egipto-dulemar egi daniki, bela-bela dobe-itodmalad. A-ular, Bab-Jehováʼse gandikidba bendakleged egisdemalad.
EXO 14:11 Geb Moisésʼga sogdemalad: —¿Ar wede Egipto-yargi neg-uande sursi? Emide, nega-dulesulidganba anmar-oburgwega weba be anmar-onosgu. Ar wede, ¿ibiga deyob be anmar-imaksa? Ar wede, ¿ibiga Egipto-yargi be anmar-onosa?
EXO 14:12 Ar anmar Egipto-yargi-gudigu bega sogsasursi, ‘¡Anmar bur Egipto-dulemar-e-maiga-gued bur nuedye! ¡Ar anmar nega-dulesulidganba-burgwedba Egipto-dulemar-maiga-gued bur nuedye!’
EXO 14:13 Moisésʼdi Israel-dulemar-abin sogded: —Melle be dobgumar. Gandik be imakmar. Bab-Jehová bemar-bendakega-ibmar-imakoed be nue dakmar. Ar ade, emi bemar Egipto-dulemar-dakedi, bipisaale gwen bar-dakosurmalad.
EXO 14:14 Ar Bab-Jehová bemar-ular-urwosoggu, bemar mer bukib binsamalo.
EXO 14:15 Geb degine, Bab-Jehová Moisésʼga sogded: “¿Ar ibiga be anse bendakleged egise? ¡Israel-dulemarga gandikidba be soge, be namarye!
EXO 14:16 Bedina, be-gaapoled be onakwe, be-sakwa demarsik be oyoge, demar negabar be egae. Ar deyobi, Israel-dulemar demar-argasadgi neg-dinnagwadgi obakmaloed.
EXO 14:17 Ar andi, Egipto-dulemar be-bareginmalaga, aka bur bule burguega an imakoed. Geb agine, Faraónʼgi, bela e-sordamar-bila-onomaladgi, e-ur-napaginmaladgi, e-sordamar-moli-birgi-sii-urwemaladgi, an egi-ibmar-imakoedi, an-nug bur odummolegega an imakoed.
EXO 14:18 An Faraónʼgi, e-urmar-napaginmaladgi, e-sordamar-moli-birgi-sii-urwemaladgi an-gangued an oyosale, agi Egipto-dulemar wisguoed, ani an Bab-Jehová gued.”
EXO 14:19 Agine, Bab-Dummad-e-baliwitur, Israel-sordamar-idu-nadapidi, gwagded, Israel-sordamar-sorba nagusad. Deyobi, mogir-bubawaryob-gwichidi, Israel-dulemar-idu-nadapidi, gwagdemogad, Israel-sordamar-sorba nagusmogad.
EXO 14:20 Degisoggu, mogir-bubawaryob-gwichid Israel-sordamar-sorba nagussunnad, Egipto-sordamar-idu. Egipto-sordamargala, we-mogir gorosur-dakleged. Israel-sordamargardi, we-mogir ega neg-mee imaknaid. A-ulale, mutikidba Egipto-sordamar geg Israel-sordamar-barga gusmalad.
EXO 14:21 Degine, geb Moisés e-argan demarse oyoded. Geb agine, Bab-Jehová dad-nakwedsik burwa-binnasur ogochad. A-burwa degi-gormai oiboalid. Weyobi, a-burwa demar negabar-egaega imaksad. Deyob, Bab-Jehová, demar-abargi neg odinnosad.
EXO 14:22 We-napa-dinnagwadba Israel-dulemar obaksamalad. Demar gasdibir-matusulidyob e-dikar-nuedsik-mai, degi, e-sapiledsik-mai gusad.
EXO 14:23 Egipto-dulemar Israel-dulemar-sorba, ubodmalad: Bela Faraón-e-molimar, bela e-urmar-napaginmalad, degi, bela e-sordamar-moli-birgi-sii-urwemalad ubodmalad. Amala, demar-neg-abaladse Israel-dulemar-baregichamalad.
EXO 14:24 Bolegoedbali, Bab-Jehová mogir-bubawaryob-gwichid-akar, degi, soo-bubawaryob-gwichid-akar Egipto-sordamar-ise-nue-dakdegu, Egipto-sordamar ber suli-suli-itogega imaksad.
EXO 14:25 Deginbali, Bab-Jehová, Egipto-sorda-e-ur-e-nagmar-bipirmaknanaid bela oichosbalid. Degisoggu, ugak wis binnaa nadap gusmalad. Geb Egipto-sordamala sogdemalad: “Ar ade, Bab-Jehová Israel-dulemar-anar urwenaid. Bab-Jehová anmargi gwisgunaid. Degisoggu, Israel-dulemargi anmar wakinmarsun.”
EXO 14:26 Ar Bab-Jehováʼdi Moisésʼga sogded: “Demar-birgi be-argan be oyoge, adi, demar gannaryob guegar. Geb degine, Egipto-sordamargi, e-urmar-napaginmaladgi, degi, e-sordamar-moli-birgi-sii-urwemaladgi demar arweoed.”
EXO 14:27 Moisés e-argan demar-birgi oyoded. Oiboargu, demar gusgu-maidyob gannarse gunonikid. Egipto-dulemala wakinye sokarmalan-inigwele, ar demardi egi gwichigunonikid. Weyobi, Bab-Jehová, Egipto-dulemar demargi ogundisad.
EXO 14:28 Demar gusgu-maidyob gannarse gunonigu, urmar-napagined, sordamar-moli-birgi-sii-urwemalad, degi, bela Faraón-e-sordamar-bila-onomalad, wemala, Israel-dulemar-bareginnega-demargi-dogsamaladi, bela egi demar arwenonikid. Faraón-sordamar bela burgwismalad, wargwensaale gwen durgussulid.
EXO 14:29 Ar Israel-dulemardi demargi obaksamalad, napa-dinnagwadgi nadapgusmalad. Demar gasdibir-matusulidyob e-dikar-nuedsik-mai, degi, e-sapiledsik-mai gusad.
EXO 14:30 A-ibagine, Bab-Jehová, Egipto-dulemar-ganguedgi Israel-dulemar-abonosad. Israel-dulemala Egipto-sordamar-e-muimar demar-gakaba-omilede daksamalad.
EXO 14:31 Israel-dulemar dakdegu, Bab-Jehová e-gangued Egipto-dulemargi sabsur-yolesa, nue Bab-Jehová-dobee itonadmalad, degine, Bab-Jehováʼgi bensuli gunonimalad. Amba deyob Bab-Jehová-mai-Moisésʼgi, bensuli gunonimarbalid.
EXO 15:1 Geb degidgine, Moisés, degi, Israel-dulemar we-namaked, Bab-Jehová-nug-ogannogega namakdemalad: “Bab-Jehová-nug-odummogega an namakoed, ar ibibayobi Bab-Jehová-emargi-nakwisad geger-daklege, deunni, molimar, degi, e-birgi-sigmalad, demargi ogundisgu.
EXO 15:2 An-namaked, Bab-Jehováʼga an namaked. Ar Bab-Jehová an-ogannogedid, an-abonogedid. Bab-Jehová an-Bab-Dummadid, an a-e-nug odummogoed. We-Bab-Jehová an-bab-e-Bab-Dummadid, an a-e-nug ogannoged.
EXO 15:3 Bab-Jehová, dule-bila-onoged-sunsogedid. ¡Bab-Jehováʼye e-nug nugad!
EXO 15:4 Bab-Jehová Faraón-e-urmar-napaginmalad, degi, Faraón-sorda-bila-onomalad demargi odosad. Faraónʼga-sorda-semalad-e-dummagan-bur-nuegan, Demar-Ginnidye-nugadgi gundilesad.
EXO 15:5 Akwayobi wilasailase argwachamalad, degi, muu-wilasailad egi mulus nagusad.
EXO 15:6 ”Bab-Jehová, be-gargangued dutusulid, be-gargangued gandikidba maid. Bab-Jehová, be-garganguedba be be-isdarmalad ogilosad.
EXO 15:7 Be-gangued-dutusulidgi dulemar-begi-gwisgusmalad be ogilosad. Be-uluded be barmisgu, be-isdarmalad gaganyob gummakded.
EXO 15:8 Be-bunnogedgi be dii danar oambikunonikid. Demar-billigan gasdibir-matusulidyob megisad, muu-wilasailad bogidik nagusad.
EXO 15:9 ”Anmar-isdarmalad binsasmalad: ‘An bargaedse bareginnoye. An e-ibmar-suoedi, an mimioye, an egi yeer-itogedse, an mimioye. An es-suid, an egi onogoye, an-sunnagwad an wemar ogilogoye.’
EXO 15:10 Bab-Jehová, ar be burwa-ogochadba, be demarse-dolegega imaksad. Gingwayobi dii-gandikidba-nukamakmaidgi dogdemalad.
EXO 15:11 Bab-Jehová, ¡bab-dummad-baid bebo wilubdaked sated! ¡Beyob-isligwaled, baid sated! ¡Beyob-dummadid, satebalid! ¡Be ibmar-gegerdakleged-imakedi, dobe-ito anmar-imaked! ¡Ar nabirid, be-nug odummolegergebed!
EXO 15:12 ¡Be-gangued be oyodgu, napa we-dulemar-dosad!
EXO 15:13 ”We-dulemar be abonosadi, be-sabedbali na be semaid. Be-ganguedbali, we-dulemar be-neg-swilidikidse na be sedoed.
EXO 15:14 Dulemar-yar-baid-baidgi-bukmalad wisguarmalale, wawanmakdemaloed. Filistea-dulemar sulibinsa itodmaloed.
EXO 15:15 Edom-e-dummagan bela-bela dobgudmaloed. Moab-e-dummagan dobedbali, wawanmakdemaloed. Bela Canaán-dulemar dobedba duurmakdemaloed.
EXO 15:16 Bab-Jehová, be-surgan-ganguedba we-dulemar bela-belad-gwakidmalodo. Bela we-dulemar dobgudmalodo. Bab-Jehová, be-gangued-abin we-dulemar akwayob geg sunmak sigmaloed. Bela be-dulemar-na-begadga-imaksad bela-obaksadse, we-dulemar bogidik ambikumaloed.
EXO 15:17 Bab-Jehová, be-megega na be yar-susadse, be-dulamar be sedoed. A-yargi, degisadegu-megega be anmar-imakoed. A-yar na be sisadid. Agi be megega, be-neg be sisad.
EXO 15:18 ¡Bab-Jehová degisadegu negsemai guoed!”
EXO 15:19 Faraón-urmar-napaginmalad, degi, moli-birgi-sii-urwemalad, Israel-dulemar-bargaega demargi-dogdemargu, Bab-Jehová amargi demar-arwega imaksad. Israel-dulemardi demargi napa-dinnagwadgi nadapi obaksamalad.
EXO 15:20 Bab-Dummad-gayaburba-barsoged-bundor-María, Aarón-e-bunad. We-Maríaʼde, gar-panderetaʼye-nugad susad, geb namakded. Bela omegan-baigan gar-pandereta ogornadap gusmarmogad, eba dodonadap gusmarmogad.
EXO 15:21 María ega weyob namaknadapid: “Bab-Jehová-nug-odummogega namakmar. Molimar, degi, e-birgi-sigmalad demargi ogundisa. Ibibayobi, Bab-Jehová Egipto-dulemargi-nakwisad geger-daklege.”
EXO 15:22 Moisés, Israel-dulemar Demar-Ginnidye-nugadgi-bukwad sesa gusad. Nega-dulesulidgan-Shurʼye-nugadse sesad. Agine, ibapaa nanasmalad, gwen dii amissurgusmalad, ar dii sated.
EXO 15:23 Maraʼye-neg-nugadse modapmargu, agi-dii-nikadi, geg gobe gusmalad, ar ade, dii gagbisailad. A-ulale, a-neg Maraʼye onugsasmalad. Maraʼde sogleged, “gagbisailadye.”
EXO 15:24 Dulemar Moisésʼgi ichakwa sunmakarmalad, sognanai guarmalad: “¿Ar wede ibi anmar goboe?”
EXO 15:25 Geb degine, Moisés Bab-Jehováʼse bendakleged egichided. Agi, Bab-Jehová Moisésʼga sapi-bipi oyosad. A-sapi-bipi Moisés diise meted. Agine, dii sayee naded. Agine, Bab-Jehová Israel-dulemar-wilubdaksad. Deginbali, agi igi-na-nanamaloed-igar ega uksabalid.
EXO 15:26 Bab-Jehová Israel-dulemarga weyob sogded: “Ani an bemar-Bab-Dummad-Jehová gued. Ar bemar, an bemarga-ibmar-soged be nue itomalale, an-ibmar-abegedba be imakele, degi, an igar-bemarga-uksad be imakmalale, degine, an-igar-mamaidba be damalale, Egipto-dulemargi bonigan-dummagan-an-barmialidi, bemargi a-bonigan an barmidagosulid. Ar ade, ani an Bab-Jehová gued. Ar ani an bemar-nudakedid.”
EXO 15:27 Geb a-sorbali, Elimʼye-neg-nugadse modapmalad. Agi ambe-gakabo (12) dian ariomaid, degine, sapi-ogobgi-dakleged dulapaa-gakambe (70) bukwabalid. Agine, Israel-dulemar dii-naba ambikudapmalad.
EXO 16:1 Bela Israel-dulemar Elimʼye-neg-nugadgi node gusmalad, geb nega-dulesulidganba-Sinʼye-nugadse warmakdapmalad. Sinʼde Elimʼye-neg-nugad-naid, degi, Sinaíʼye-neg-nugad-naid, amar-negabargi naid. Deunni, Egiptoʼgi nii-warbogus gaka-ibambe-gakatargus (15) noarmalad-akalad.
EXO 16:2 A-nega-dulesulidgangi dulemar bela Moisésʼgi, degi, Aarónʼgi uluarmalad.
EXO 16:3 Israel-dulemar sogdemalad: “Ar Bab-Jehová Egipto-yargi anmar-oburgwismalana bur nabirinad. Webardi, anmar bormo-ebiris bormo san-ena, nue-immelegedse mas-gundaenad. Ar emidi, bemar we-nega-dulesulidganse bela ukudba-anmar-oburgwega be anmar-nialid.”
EXO 16:4 Geb degine, Bab-Jehová Moisésʼga sogded: “Bemarga an madu niba batedaged an imakoed. Degine, dulemar, unnila emigadbi madu-weemalaga, bane-bane neg-magaba nomalargebed. Adi, an wilubdakegalad, doamar an-ibmar-sogedba imakmalodibe, doamar imakosurbardibe.
EXO 16:5 Ibanergwadgindina (6) dulemar ilabo-mergu e-negse-sedega madu weemaloed.”
EXO 16:6 Moisés, Aarónʼbogwa Israel-dulemarga sogdemalad: “Sedogidba be wisgumaloed, Bab-Jehová, na e, Egipto-yargi bemar-onosye.
EXO 16:7 Degine, wakdaradbali, Bab-Jehová-e-gangued-yeerdakleged be dakmaloed, ar ade, Bab-Jehová bemar-egi-oimakbukmalad bemar-itosad. ¿Ar anmardi doasunna, ar emide, be anmargi oimakbukmargu?”
EXO 16:8 Degine, Moisés sogdebalid: “Sedogi Bab-Jehová bemarga san ukoed, adi, a-san be gunmalagar. Wakdardi madu ise-obinagwar bemarga ukoed, ar ade, Bab-Jehová egi be ulusmalad be-itosmalad. ¿Ar anmardi doasunna, anmargi be urwenaimargu? Ar bemar anmargi ulussulid, Bab-Jehováʼgi be ulusmalad.”
EXO 16:9 Geb degine, Moisés, Aarónʼga sogded: “Israel-dulemarga be soge: ‘Bela Bab-Jehová-asabin ambikudamar, ar ade, Bab-Jehová bemar egi-oimakbukwad bemar-itosad.’ ”
EXO 16:10 Aarón Israel-dulemarga sunmakgwisgua, bela dulemar nega-dulesulidganba atakdemalad, agi mogir-imbaba Bab-Jehová-e-gangued-yeerdakleged nononikid.
EXO 16:11 Geb degine, Bab-Jehová Moisésʼga sunmakded, ega sogded:
EXO 16:12 “Israel-dulemar angi oimakbukwad an itosad. Amar-ebo be sunmak, ega be soge: ‘Emi-sedogi be san gunmaloye, wakdardina, be madu gunmaloye, nue-immelegedseye. Adi, be wisgumalagarye, ani an Bab-Jehová guye, ani an bemar-Bab-Dummadye.’ ”
EXO 16:13 A-sedogidgine, nuumar-codornizʼye-nugad nonimalad, bia Israel-dulemar-bukwadgi ena ambikunonimalad. Degine, wakdaradbali, Israel-dulemar-bukwad-dikarba dii bominonikid.
EXO 16:14 Dii-bomisad-dingudgu, sorba daklealid nega-dulesulidgan-napagi ibmar-dataragwad, dii-akwaga-binnisadyob-daklege omilede.
EXO 16:15 Ar Israel-dulemar wissurmarsoggu, wede ibua, a-ular, a-dakarmalale, na muchub-muchub egisdedamalad: “¿Wede ibua?” Geb Moisés ega sogded: “We madu, Bab-Jehová bemarga uked, adi, be mas-gunmalagar.
EXO 16:16 Bab-Jehová bemarga soged, weyob bemar imakoye: Na be mergu-gunmaladba, wargwen-wargwen weenamaloye. Degine, na be be-neggi mergu-dule-nikadba, wala-walagwengi nibirbo-wilub-mergu weemaloye.”
EXO 16:17 Israel-dulemala deyob imaksamalad. Gwen-gwen bur ichesur wesmalad, gwen-gwen bur ichee wesmalad.
EXO 16:18 Deyob weemaloye-soglesadba wesmalad. Ar dule-ichesur-wesadga obichasulid, dule-ichee-wesadga akussurmogad. Na e-mergu gunnedba, wala-walagwen egad-egad wesmalad.
EXO 16:19 Geb degine, Moisés Israel-dulemarga sogded: “Bemar bipisaale melle banedga we-masgunned be sabomalo.”
EXO 16:20 Degi-inigwele, dulemar abala Moisés-sogedba imaksasurmalad, abar banedga sabosmalad. Banedga-sabosmaladi, ei nusbiin gusad, bela nunu-yapan oiboalid. Geb degine, Moisés amargi nue-sae-itoded, ese uluded.
EXO 16:21 Na e-mergu-gunmaladbali, wakdaradba egad-egad weenaddamalad, ar ade, dad-diopisurgudele, dad-abin diree naddaed.
EXO 16:22 Ibanergwadgindi (6), ilabo-wilub mas wesmalad. A sogledo, wala-walagwengi nibirbake-wilub wesmarye. Geb degine, neg-danar-danar-bukmalad-e-dummagan ibmar-gusad Moisésʼga sognadmalad.
EXO 16:23 Agi, Moisés amarga sogded: “Ar weyob Bab-Jehová igar uksad. Oibosale, obunnoged-ibad. We-iba, Bab-Jehováʼgadid. Emi bemar mas-yobiedi, emi be yomalodo. Emi mas-dulebiedi, emi be mas dumalodo. Bemarga-mas-obinoedi, banedga be sabomaloed.”
EXO 16:24 Ibmar-obichadi, Moisés-igar-uksadba sabosmalad, adi, oibosar gunmalagar. We-ibmar nungussulid, nusbiin gussurbalid.
EXO 16:25 Geb degine, Moisés sogded: “Emi obunnoged-ibad, Bab-Jehová-ibad. We-ibmar emi be gunmar. Ar emi-ibagi, we-ibmar, babatenai, degi, napagi-mellemai gwen be dakosurmalad.
EXO 16:26 Bemar sunna ibanergwa (6) we-ibmar weemaloed. Ar ibagugledgindina (7), obunnoged-ibad. A-ibagi, we-ibmar sate guoed.”
EXO 16:27 Degite, gwenna-gwennagwa ibagugledgine (7) wis ibmar-weenamalaga, node gusmalad. A-ibmar wessurgusmalad, ar ade, a-ibagi a-ibmar gwen daksasurgusmalad.
EXO 16:28 Geb degine, Bab-Jehová Moisésʼga sogded: “¿Ar wede sanagwadse an-igar-mamaidba, an bemarga-ibmar-sogedba be nanamaloye soge?
EXO 16:29 Ani, Bab-Jehová, an bemarga ibagwen-obunnoged-iba uksanad. Agala, ibanergwadgine (6), an bemarga masgunned ibabo-wilub uksad. Degisoggu, ibagugledgine (7), bemar na e-neg-e-neggi megewilubmalanad, bemar na be-neggine noewilubsurmalanad.”
EXO 16:30 Geb degine, dulemar ibagugledgine (7) obunnosmalad.
EXO 16:31 Israel-dulemala we-ibmar-weemaladi, bismalad: “Manáʼye.” We-ibmarde, e-gwag sipugwad, gagan-wawadikid-culantroʼye-nugad-e-gwagyobid, degi, madu-dibyaled achanis egi eoaledyob gulleged.
EXO 16:32 Geb sorbali, Moisés sogded: “Weyob Bab-Jehová bemarga igar uked: ‘Bormogi nibirbake be maná enomalo. Bemar be-waganga be nue sabomalo, adi, be-wagan dakmalaga, Egipto-yargi an bemar-onosmargu, igid-mas an bemarga nega-dulesulidganba uksa gusa.’ ”
EXO 16:33 Geb degine, Moisés Aarónʼga sogded: “Bormo gwagwen be sue, agi nibirbake be maná urboed. A-sorbali, Bab-Jehová-asabin be sioed, adi, bemar-waganga-oyogega be sabogoed.”
EXO 16:34 Igi Bab-Jehová Moisésʼga igar-uksa, deyob, Aarón, we-maná sabogega, bormogi Bab-Jehová-Dadganbo-Igar-Mesisad-Ulu-asabin sisad.
EXO 16:35 Israel-dulemala birga-dulabo (40) maná-gundii gusmalad. Canaán-yargi dulemar-bukwadse-mosmaladse we-maná gundii gusmalad.
EXO 16:36 Ibmar-wilubsaed-gomerʼgwensak nibirbake gued. Gomer-gwambeddi (10) ibmar-wilubsaed-efa-gwensak gued.
EXO 17:1 Bela Israel-dulemar nega-dulesulidgan-Sinʼye-nugadgi nodegusmalad, Bab-Jehová-ega-igar-ukmaidba, obunnomai-obunnomai nadapgusmalad. A-sorbali, Israel-dulemar dii-gobega Refidimʼye-neg-nugadgi ambikudapmalad. Agi dii sated.
EXO 17:2 Degisoggu, Moisésʼse sabsur egisdemarsunnad, ega sogdemalad: —¡Anmarga gobega be dii udage! Moisés dulemar-abin sogded: —¿Ibiga sabsur be anse dii egise? ¿Ibiga Bab-Jehová-wilubdakye be sogmala?
EXO 17:3 Ar Israel-dulemar uku-uku itomarsoggu, Moisésʼgi uludmalad, sogdemalad: —¿Ibiga Egipto-yargi be anmar-onosa? ¿Ukudba-burgwega be anmar-onosa? ¿Anmar-mimmigan-oburgwega be anmar-onosa? ¿Anmar-ibdurganmar-oburgwega be anmar-onosa?
EXO 17:4 Geb degine, Moisés Bab-Jehováʼse binnasur goted, ega sogded: —Ar we-dulemarde, ¿igi an imakergebe? ¡Ar iche-napinad akwagi-makar an-oburgwemalanad!
EXO 17:5 Bab-Jehová Moisés-abin sogded: —Israel-dulemar-idu be nae. Israel-girmar-dummagan gwenna-gwenna beba be sedoed. Nilo-diwar-bibyosad-gaapoled, be sedbaloed. Emigi be nadeen.
EXO 17:6 Horeb-yargi, akwa-dummad-walik an be-asabin gwisguoed. Akwa-dummad be bibyosale, agi dii aryodagoed, adi, dulemar a-dii gobmalagar. Moisés, Israel-girmar-dummagan-e-dakbukwad-asabin deyob imaksad.
EXO 17:7 Moisés a-neg Meribaʼye onugsasad, ar ade, agi Israel-dulemar ulusad. Degine, a-neg Masahʼye onugsasbalid, ar ade, agi Israel-dulemar Bab-Jehová-wilubdaksamalad, deun sogsamargu: “¿Ar wede Bab-Jehová anmarba gudii, anmarba gudisuli?”
EXO 17:8 Amalec-dulemar, Israel-dulemargi bila-onogega Refidimʼye-neg-nugadse nadmalad.
EXO 17:9 Agine, Moisés Josuéʼga sogded: “Bila-ononaega, machergan war-wargwen sue-sue be imake. Be nae, Amalec-dulemar-ebo be urwenae. Banedsega andi yar-dummad-birse Bab-Dummad-gaapoled argangi-gani an naoed.”
EXO 17:10 Josué igi Moisés ega soge, aba imaksad, Amalec-dulemarbo urwenaded. Ar degidgine, Moisés, Aarón, degi, Hur, yar-dummad-birse nadmalad.
EXO 17:11 Moisés, e-sakwa onakwidele, Israel-dulemar-urwenanaidi, e-isdarmaladgi obitedamalad. Ar Moisés e-sakwa-odedele, Amalec-dulemar obitedamalad.
EXO 17:12 Ar Moisés-e-sakwa geggusdaed, degi, Moisés-sigega ega akwa amismalad. Moisés-sigisgua, Aarón, Hur-ebogwa Moisésʼga sakwa-gasmalad, wargwen sakwa-gwensaksik, baiddina sakwa-baidsikmo. Weyobi, dad-argwanedse, Moisés-sakwa onakwar, nue-innikii gasmalad.
EXO 17:13 Weyob Josué, Amalec-dulemar-sordamargi es-suidgi-oburgwar nakwisad.
EXO 17:14 Geb degine, Bab-Jehová Moisésʼga sogded: “We-bila-onolesad gardagi narmak, adi, insadii gumalagar. Degine, Josuéʼga be sogbalo: ‘Amalec-dulemargi mer bar binsamalagala, an bela obelogoed.’ ”
EXO 17:15 Agi, Moisés Bab-Jehováʼga-ibmar-ogumakar-ukleged-aila sobsad. A-aila, “Bab-Jehová an-banderye onugsasad.”
EXO 17:16 Agi, Moisés sogded: “Bab-Jehová-negdakmaidgi Amalec-dule gwisgunonisoggu, Bab-Jehová, degisadegu, Amalec-e-wagan-danikidbali, egi bila-ononai gudoed.”
EXO 18:1 Jetro Moisés-e-saka, Madiánʼgi dule-irwa-Bab-Dummadse-goledga maid. We-Jetroʼde, igi Bab-Dummad Moisés-bendaksa, bela wisgusad. Degine, igi Bab-Dummad Israel-dulemar-bendaksabali, bela wisgusbalid. Deginbali, wisgusbalid, igi Bab-Jehová Israel-dulemar Egipto-yargi onosbali.
EXO 18:2 Moisés Faraónʼse-nadapidgi, e-saka-Jetroʼse e-ome-Séfora barmisgusad. Jetro na e-sisgwa-Séfora e-neggi abingasad,
EXO 18:3 degine, Moisés-masmala-warbogwad abingasbalid. Wargwen Gersónʼye nugad, ar ade, Moisés sogsa gusad: “We-yar-baidgi an we-yarginedsulid gudiiye.”
EXO 18:4 Baid-machigwadi, Eliezerʼye nugad, ar ade, Moisés sogsa gusbalid: “An-bab-e-Bab-Dummad an-bendaknonikid, Faraón-es-suidgi an-onosad.”
EXO 18:5 Moisés nega-dulesulidganba Bab-Dummad-yar-walik dulemar-oambikudapid. Ase, Jetro, Moisés-e-ome, degi, e-masmala-warbogwad nade gusmalad.
EXO 18:6 Jetro, Moisés-owisos gusad: “Ani, an be-sak-Jetro, be-ome, degi, be-masmala-warbogwadmala, anmar be-dakdanimalad.”
EXO 18:7 Moisés e-saka-abin noar gusad. E-abin dulluu imaksad, degine, degiteye-sogega ei-wagar usad. Sunmaksamargua, e-dordoneggi dogdemalad.
EXO 18:8 Agi, Moisés e-sakaga bela sogsad, igi Bab-Jehová Israel-dulemar-bendakega Faraón-imaksa, degine, igi Bab-Jehová Egipto-dulemar-imaksabali. Degine, igi igarba Israel-dulemar wiledani-gusmarbargua, Bab-Jehová Israel-dulemar-bendaksabali.
EXO 18:9 Jetro Bab-Jehová Israel-dulemargi e-sabgued-nue-oyosgusadba, degine, Egipto-dulemar-ganguedgi Israel-dulemar-bendaksagusadba, bela-bela weligwar-itosad.
EXO 18:10 Jetro sogded: “Bab-Jehová Faraónʼgi, degi, Egipto-dulemar-ganguedgi, bemar-bendaksad. Degine, bemar-Israel-dulemar Egipto-dulemar-be-wiodimaladgi, Bab-Jehová bemar-onosad. A-ular, Bab-Jehová-e-nug odummolesun.
EXO 18:11 ”Deginbali, Faraón dulemar-baisursunnagwadiyob bemar-imaksabalid. Ar emigindi, Bab-Jehová Egipto-dulemar-sabsur-imaksadba nue an wissunnad, we-Bab-Jehová, baigan-bab-dummadye-sogmaladba bur-dummadid.”
EXO 18:12 Agi, Jetro ibdurgan-wargwen Bab-Dummadga-ogumakar-ukega susa gusad. Deginbali, Bab-Dummadga-ukbaliga, ibmar-baigan senonibalid. Geb a-sorbali, Aarón, degi, bela Israel-girmar-dummagan, Moisés-e-sakaba Bab-Dummad-asabin mas-gunnadmalad.
EXO 18:13 Banedgine, Moisés Israel-dulemarga igarmar-gwatirnanaid-nabogega signonikid. Ar ade, dulemar na gwatirismalale, Moisésʼse wakdaradba degi-iirmakmai osedoddaed.
EXO 18:14 Jetro dakargu, Moisés arbaed-dummad imake, Moisésʼga sogded: —¿Ar ibiga be bela we-arbaed be imake? Emide, dulemar bese wakudaryalaba iirmakmai osedoddamalad. ¿Ar ibiga bebi walagwen we-dulemarga be igar naboge?
EXO 18:15 Moisés e-saka-abin sogded: —Ar ade, dulemar Bab-Dummadse igar-amimalaga anse nonidamalad.
EXO 18:16 Na-ebo gachimakarmalale, anse nonidamalad, dakega, doa bur-nabir soge. Geb an Bab-Dummad-igargan-mamaid ega an sogdaed, degine, igi-Bab-Dummad we-igargangi anmar-odurdakmai an ega sogdabalid.
EXO 18:17 Geb degine, e-saka-Jetro Moisésʼga binsaed ukded: —We-be-deyob-imakedi, nuedsulid.
EXO 18:18 Ar ade, be geggus daed, dulemar-bese nonidamarmogad geggus damarmogad. Be-arbaed-imakedi begi obined. Bebi-wargwen bela be imakosurguoed.
EXO 18:19 Binsaed-an-bega-ukoedi, nue be itogo. Bab-Dummad beba gudiguoed. Be-dulemar-anar Bab-Dummad-asabin be gwisguoed, bonigan-mamaid ega be sogoed.
EXO 18:20 Be-dulemar igar-mamaidgi be odurdako, degi, igar-mamaidba-imaked be odurdakbalo. Deginbali, ega be sogbalo, igi nanamalargebe, degi, ibumar imakmarbaloe.
EXO 18:21 Bedina, deyob be imakegala, neggweburgi dulemar-nabir-ibmar-imakmalad be suo: Dulemar Bab-Dummad-dobee-nanadimalad, dulemar wagar-darbodasurmalad, dulemar ibmar-atursaaledgi mani-onosurmalad, a-dulemar be suoed. Amar gwenna-gwennagwa, dulemar-miligwenad-e-dummadga (1,000) be imakoed, baigan dulemar-dulataled-e-dummadga (100) be imakoed, baigan dulemar-dulabo-gakambegwad-e-dummadga (50) be imakoed, degi, baigandi e-ambegwad-e-dummadga (10) be imakmogoed.
EXO 18:22 ”Wemala, dulemarga igar-nabodii gudoed. Igar-dummadile, bese senonikoed. Igar-bipigwardi, emar na nabomaloed. Weyobile, arbaed-dummad be imakosulid, ar wemala be-bendakmaloed.
EXO 18:23 Ar Bab-Dummad bega sogdibe, an bega-ibmar-sognaid be imakye, ar weyob be imakele, be unniguoed, degine, dulemarmoga, weligwaledgi na e-negse namarmogoed.”
EXO 18:24 Moisés e-saka-ega-soged itosad, a-sogedba bela imaksad.
EXO 18:25 A-ular, Moisés Israel-dulemar-bur-nabir-ibmar-imakmalad susad. Amar, dulemar-miligwenad-e-dummadga (1,000) onugsasad, baigan, dulemar-dulataled-e-dummadga (100) onugsasad, baigan, dulemar-dulabo-gakambegwad-e-dummadga (50) onugsasad, degine, baigandi, dulemar-e-ambegwad-e-dummadga (10) onugsasmogad.
EXO 18:26 We-dulemar Israel-dulemarga igar-nabogedga degisadegu gudmalad. Igar-bur-dummagan Moisésʼse sesdamalad. Igar-burwiganadi, emar na igar nabodamalad.
EXO 18:27 Degi-neggusad-sorbali, Moisés e-sakaga sognai gualid, degimaloye. Degi, geb e-saka na e-negse gannar aligusad.
EXO 19:1 Israel-dulemala Egipto-yargi nii-warbaagus noalid-akale, nega-dulesulidgan-Sinaíʼye-nugadse modapmalad.
EXO 19:2 Refidimʼye-neg-nugadgi-bukwa-noargu, nega-dulesulidgan-Sinaíʼye-nugadse modapmalad. Agi, yar-asabin ambikudapmalad.
EXO 19:3 Agine, Moisés Bab-Dummadbo-abinguega yar-birse nakwisad. Agi, Bab-Jehová ese goted, ega sogded: “Weyob Jacob-e-waganga be sogoed, Israel-dulemarga:
EXO 19:4 ‘Be-sunnad be daksamalad, igi an Egipto-dulemar-imaksa, degine, igi an wese bemar-seali. Igi sulubagi e-mimmigan-ogukuega, sabedgi e-mimmigan-sakanba-gasa sesdae, deyobiyob an wese bemar-senonikid.
EXO 19:5 Degisoggu, ar bemar bela an-sogedba nanaele, degine, an bemar-ebo igar-mesnaidba be daele, bemar dulemar-baiganba bur angadga guoed. Ar bela we-napneg angadsoggu, bemarbina-bur-itogerba an guoed.
EXO 19:6 Bela bemar dule-irwa-Bab-Dummadse-gormaladga gumaloed, be-dulemar islidikidbi angadga gumaloed.’ Deyob Israel-dulemarga be sogoed.”
EXO 19:7 Moisés gannar Israel-dulemarse nonikid. Agi, Israel-girmar-dummaganse gochad. Geb degine, Moisés bela ega sogded, igi-Bab-Jehová ega igar uksa.
EXO 19:8 Geb degine, Israel-dulemar bela na balibi sogdemalad: “Bab-Jehová anmarga-igar-uksad, a-sogedba bela anmar imakodo.” Moisés dulemar-ega-sogsad Bab-Jehováʼga sognai gusad.
EXO 19:9 Agi, Bab-Jehová ega sogded: “Nue be an ito, an bese mogir-guduregedba nonikoed, adi, an-bebo-sunmaknaid dulemar itogega. Adi, deyob dulemar degisadegu begi bensuli gumalagar.” Moisés dulemar-ega-sogsad gannar Bab-Jehováʼga sognai gusad.
EXO 19:10 Bab-Jehová Moisésʼga sogded: “Emi, be Israel-dulemarse nao. Emi, degi, banedgi, Israel-dulemar an-nug-odummomalaga guakwaa isligwar-bukwa be imako. Deginbali, swilidik-guega mor na enukmarbalo,
EXO 19:11 degi, bela guakwaa ibapaagwadga ambikumalo, ar ade, ani, Bab-Jehová, ibapaase Sinaí-yargi an aidegoed. Bela Israel-dulemar an-dakmaloed.
EXO 19:12 ”Melle dulemar yarse nakwemalaga, yar-dikarba be galu bela ebiris nasikoed. Deginbali, ega be sogo, we-yargi nue-binsaed-nikaa be damaloye, degine, melle a-yarse nakwemarbaloye, degine, melle a-yar-walikaa namaloye. Ar doa-dule a-yarse warmaksale, oburgwelegoye.
EXO 19:13 Dule-wargwensaale dule-oburgwilegoedse achaosulid. Ar dule-oburgwilegoedi, akwagi-makar oburgwilegoed, sigugi-makar imaklegodibe. Ar duledibe, ibmar-durgandibe, wede dula-gudii imaklegosulid, oburgwilegedsegad. Unnila, dulemar sibad-wawaad-machered-e-bebe-gollalirbi, yarse nakwenamaloed.”
EXO 19:14 Moisés yar-birgi-gudiid aidenonikid. Agi, Moisés, Bab-Dummad-e-nug-odummomalaga, guakwaa isligwale dulemar-urbisad. Dulemardina, na e-mor enuksamalad.
EXO 19:15 Agi, Moisés dulemarga sogded: “Guakwaa ibapaagwad-idu ambikumalo, degine, melle na be be-omese gormalo.”
EXO 19:16 Ibapaa-gusadgi neg-oiboargu, mar-goledi bela-bela itoleged, degine, mar-dakarmakmaidi bela-bela daklebalid. Yar-birgi, mogir-gudure naid. Gar-trompeta-binnasur-goted-itosmargua, bela-dulemar-bukwadi dobedba wawanmakdemalad.
EXO 19:17 Geb degine, Moisés bela-dulemar-bukwadi Bab-Dummad-ebo-abingunamalaga yarse sesad.
EXO 19:18 Sinaí-yalagi bela waa bupurmakmaid, ar ade, agi Bab-Jehová soo-abargi aidenonikid. Bela-bela waa yargi bupurmakmaisoggu, soo-saila-gasiiyob dakleged. Bela yar-siidi binnasur giglimaksiid.
EXO 19:19 Gar-trompeta-goledi aka bur bule gangumai gualid. Moisés sunmakdele, Bab-Dummaddi mar-goledyob abinsadaed.
EXO 19:20 Bab-Jehová bur Sinaí-yar-matusulidse aidenonikid. Geb degine, Bab-Jehová Moisésʼga sogded, we-yar-matusulidse ese dagye. Agi, Moisés nakwisad.
EXO 19:21 Geb degine, Bab-Jehová Moisésʼga sogdebalid: —Moisés, be aidenae. Dulemarga be sogna, galu-nagusadgi melle obakmalo, melle an-dakedgi binsamalo. Ar dulemar, deyob-obakele, bukidar burgwemaloed.
EXO 19:22 Ar dule-irwa-anse-gormalad amba anse warmakmar-inigwele, na e-san ise-bagagwar urukmalargebed. Ar degisulile, anse ogilolemogoed.
EXO 19:23 Moisés Bab-Jehová-abin sogded: —We-dulemar we-Sinaí-yarse nakwebiguosurmalad, ar be anmarga igar uksad, ‘galu be emakmaloye, ar ade, wede neg-islidikidga imaklegoye.’
EXO 19:24 Bab-Jehová Moisésʼga sogdebalid: —Be nae, be aidenae. Aarónʼga be sogna, beba yar-birse nakwedaye. Dule-irwa-anse-gormaladdi, degi, dulemar-baigandi, melle anse nakwedgi binsamaloye. Ar nakweye-sogmalale, anse sabsur-imaklemaloed, anse ogilolemaloed.
EXO 19:25 Moisés yar-birgi-gudiidgi aidenonisunnad. Geb bela Bab-Jehová-ega-sogsad Israel-dulemarga sognonikid.
EXO 20:1 Bab-Dummad sunmakded, weyob sogded:
EXO 20:2 “Ani an be-Bab-Dummad-Jehová gued. Bemar Egipto-yargi maiga-wilebukmargu, ani an bemar-onosadid.
EXO 20:3 Melle bab-dummad-baid an-asabin be nikumalo.
EXO 20:4 Melle be ibmar-wilubgan sobmalo, nibneggi ibmar-nikad-wilubgandibe, napneggi ibmar-nikad-wilubgandibe, demargi ibmar-nikad-wilubgandibe.
EXO 20:5 A-ibmar-wilubgan-asabin dulluu be imakosurmalad, degine, Bab-Dummadyob ese be golosurmalad. Ar ade, ani an be-Bab-Dummad-Jehová gued. An be-Bab-Dummad gadi-nobguedid. Ar an dule-isganamar-isdarsunna-dakmalad sabsur-odurdakedid. Degi, e-mimmigan, e-wagan, e-wagan-yokorbarmaladsega an sabsur-odurdakbalidid.
EXO 20:6 Ar dulemar-an-sabmaladdi, dulemar-an-Igarmar-Mamaidba-nanamaladdi, an bela-e-waganmar-danimaloed e-ibe nue-sabguedid.
EXO 20:7 Melle be-Bab-Dummad-Jehová-nug yogasaar be obaro. Ar dule yogasaar Bab-Dummad-nug obarisale, a-dule, Bab-Dummad-Jehováʼse sabsur-odurdaklegedsegad.
EXO 20:8 Obunnoged-ibagi be obunnogo, adi, a-ibagi, be Bab-Dummad-e-nug odummogegar. Igi be-Bab-Dummad-Jehová bega Igar-uksa, aba be imako.
EXO 20:9 Ibanergwa (6) be arbaoed. A-ibagangi bela ibmar-imakbied be imakoed.
EXO 20:10 Ibagugledgindi (7), obunnoleged-ibad, be-Bab-Dummad-Jehová-e-nug-odummolegedid. A-ibagi bipisaale be arbaosulid. Be-machi, be-bunagwa, bega-arbaed-machered, bega-arbaed-ome, be-moli-bebe-nikad-alugwasualed, be-moli-uayasuid, be-ibdurgan, a-ibagi, arbaosurmarmogad. Deginbali, dule-be-yarginedsulid be-negyagi-gudiid, a-ibagi, arbaosurmarmogad. Ar obunnoged-ibagi igi be obunnomoga, beyobi bega-arbaed-machered, degine, bega-arbaed-ome, obunnomarmogoed.
EXO 20:11 Ar ade, Bab-Jehová ibanergwa (6) arbasad. A-ibagangi we-ibmarmar obinnisad: Nibneg obinnisad, napneg obinnisad, demar obinnisad, degi, bela agi ibmarmar-bukwadi obinnisbalid. Geb degi, ibagugledgindi (7), Bab-Jehová obunnosad. A-ulale, Bab-Jehová, ibagugledgi (7) ise-nued-binsasad. A-ibagi sogsad, we-iba, iba-islidikidye.
EXO 20:12 Be-daedbali, be-bab-nug-odummodii, degi, be-nan-nug-odummodii be nanamalo. Adi, be-Bab-Dummad-Jehová we-napneg-bega-uknaidgi sereddii be megegar, degi, bela bega ibmar-nueganbi gubaligar.
EXO 20:13 Melle be dule-oburgo.
EXO 20:14 Melle be be-abirginsulid-ebo galagwensuli nanao.
EXO 20:15 Melle be ibmar-atursao.
EXO 20:16 Melle be gakansaar aimargi sunmako.
EXO 20:17 Melle be dule-baid-ibmarbina be sogo: Dule-baid-negbina, dule-baid-omebina, dule-baid-mai-macheredbina, dule-baid-mai-omebina, dule-baid-moli-bebe-nikad-alugwasualedbina, dule-baid-moli-uayasuidbina. Bipisaale dule-baid-ibmarbina be sogosulid.”
EXO 20:18 Bela Israel-dulemala e-sunnagwad mar-gollomakmaid itosmargua, degine, gar-trompeta-binnasur-goled itosmarbargua, deginbali, mar-dakarmakmaid daksamarbargua, degi, yar waa-moodo-siid daksamarbargua, Israel-dulemar nue-dobee itodmalad, wawanmakdemalad. Degisoggu, yargi bannabaa ambikusmalad.
EXO 20:19 Agi, Moisésʼga sogdemalad: —Be anmarga sunmake, anmar be-itogoed. Bab-Dummaddi melle anmarga sunmako, abakale, anmar burgwialile.
EXO 20:20 Moisés Israel-dulemar-abin sogded: —Melle be dobgumar. Bab-Dummad bemar-wilubdakega bemarse nonikid, adi, bemar, degisadegu Bab-Dummad-dobee nanamalagar, adi, melle be isgumalagar.
EXO 20:21 Israel-dulemardi, Moisés mogir-guduregedgi-Bab-Dummad-maidse-nadedi bannabaa dakbuk gusad.
EXO 20:22 Bab-Jehová Moisésʼga sogded: “Israel-dulemarga weyob be soge: ‘Nibneg-akale an bemarbo sunmaksad bato be daksamalad.
EXO 20:23 Melle bemar orgi-ibmar-sobaled, manigi-ibmar-sobaleddibe, be-bab-dummadga anyob be imakmalo.
EXO 20:24 ” ’Bab-Dummadga-ibmar-ogumakar-ukleged-aila-sobega, anga be napa sobmaloed. A-ailagi be we-ibmarmar ukmaloed: Be-sibad-wawaadmar, sibadmar, degi, be-moli-bebe-nikamalad, anga be ogumakar ukmaloed. A-ailagi be anga ibmarmar-ukmaloedi, dulemar-e-isgued-eliedga uklegoed. Deginbali, a-ailagi be anga ibmarmar-ukmaloedi, bemar-anbogwa gwenatigwar-gudii gumalaga, degi, bemar na gwenatigwar-gudii gumalaga uklebaloed. ” ’Bia an-nug ebinsalebi an abegoe, ase an nonikoed, agi ise-nued an begi binsanonikoed.
EXO 20:25 Ar bemar anga ibmar-ogumakar-ukleged-aila-akwa be sobbiele, unnila be akwamar-sobarsulid urbe-urbe be imakmalo, ar ade, bemar, akwa esgorogi sobdele, wede bar ibmar-ogumakar-ukleged-aila-nuedga guosulid.
EXO 20:26 Degine, anga ibmar-ogumakar-ukleged-aila melle arsan-nika imako. Ar bemar agi nakwialile, be-abgan daklego-itole.’ ”
EXO 21:1 Bab-Jehová Moisésʼga sogdebalid: “We-Igarmar Israel-dulemarga be ukoed:
EXO 21:2 ‘Be Hebreo-dule-mai baksale, unnila, bega birganergwa-arbaega (6) be imakoed. Birgagugledgi (7) be ollor-imakoed. We-dule, e-arbasadgi, bipisaale gwen bennuklegosulid.
EXO 21:3 ” ’We-mai-baklesadi, bese omesuli nonikile, walagwen gannar naoed. Ar bese ome-nika-nonikile, e-omebo gannar naoed.
EXO 21:4 ” ’Mai-e-ibed e-maiga ome-uksale, ome ega machimala-baksale, bunamala-baksardibe, ome, degi, e-mimmigan, e-mai-ibedgadga guoed. Maidina, walagwen gannar naoed.
EXO 21:5 ” ’Ar mai, na e-ibed-sabedbali, na e-ome-sabedbali, degi, na e-mimmigan-sabedbali, sogele, an yapa naye,
EXO 21:6 ar adi, e-ibed, dummagan-igar-nabomaladse e-mai-sedoed Geb yawagaksedibe, yawagak-dikarsedibe, sedoed. Agi esgoro-swichwigwadgi e-uaya udgoed. Geb agi, a-dule ibed-e-maiga degisadegu gunonisunnoed.
EXO 21:7 ” ’Ar dule-wargwen na e-bunagwa maiga-guega manigi uksale, we-bunagwa-ollor-imaklegega, mai-macherganyob imaklegosulid.
EXO 21:8 ” ’Dule-wargwen-bunagwa-baksad eginsur-bunagwa-dakele, nikubisulile, sunna Israel-dule-baid nabir manigi bunagwa-onogega imakoed. Nikubisurgussoggu, bipisaagwale, Israel-dulesulidga manigi ukosulid.
EXO 21:9 ” ’Dule bunagwa-baksadi, e-machi-ebo-nikuega ega ukele, na e-sisgwayob we-bunagwa-sedii guoed.
EXO 21:10 ” ’Dule bunagwa-maiga-baksadi, a-bunagwa-nikusale, a-sorba, geb ome-baid-nikunonibalile, we-bunagwa-idualedga: Mas-ega-uklegedi, amba deyob ega ukdii guoed. Mor-ega-uklegedi, amba deyob ega ukdii gubaloed. Degine, amba ebo gudiidgine, ese gordii gubaloed.
EXO 21:11 ” ’Ar e-sui bunagwaga we-ibmar-sogbaagwad imaksulile, bunagwa sunna na e-itolegedba nabier naoed. Onolegega, bipisaale dule-baid we-bunagwa-anar bennukosulid, maniginsuli binsa na e-itolegedba nooed.’ ”
EXO 21:12 Bab-Jehová Moisésʼga sogdebalid: “Dule-wargwen dule-baid-sabsur-naibisasadba oburgwisar, we-dule, oburgwilegoed.
EXO 21:13 ”Ar dule-emar-oburgwisad yamo-imaksasulile, Bab-Dummad-sogedba burgwisale, we-dule, bega an neg-sorba-sogoedse, dukunaoed.
EXO 21:14 ”Ar dule, sae-itogedba dule-baid-oburgwisale, anga-ibmar-ogumakar-ukleged-ailase dukunadele, we-dule, amba be sunaedsegad, degine, oburgwilegoed.
EXO 21:15 ”Dule e-bab-naibisasale, e-nan-naibisasdibe, we-dule, oburgwilegoed.
EXO 21:16 ”Dule, dule-baid-gasale, dule-baidga manigi dule-galesad-uksale, igidibe, amba e-walik-gales-sii daklesdibe, we-dule-emar-gasad oburgwilegoed.
EXO 21:17 ”Dule e-bab-ukabsasale, e-nan-ukabsasale, we-dule, oburgwilegoed.
EXO 21:18 ”Na ebo-urwenaidgi, dule akwagi-makar dule-baid-naibisasale, igidibe, argangi sabsur-sarsosadgi naibisasdibe, oburgwissulile, ar gasgindi mesisale,
EXO 21:19 we-dule-naibigusad suar-gaapoledgi nabir nanagusardina, geb agi soglegoed, we-emar-naibi-imaksadi oburgwilegosurye, baisurye. Deyob soglego-inigwele, dule-emar-naibi-imaksad, bela ega inadi bennukoed, degine, arbassulid-nukad bela bennukbaloed.
EXO 21:20 ”Dule suargi na e-mai-machered-sarsosale, e-mai-ome-sarsosdibe, degidba oburgwisale, we-dule sabsur-odurdaklegoed.
EXO 21:21 Ar e-mai-sarsolesad, ibagwenadgi, ibabogindibe, nabir ugakgusale, we-mai, e-ibedgadsoggu, e-ibed sabsur-odurdaklegosulid.
EXO 21:22 ”Machergan urwenanaidgi ome-gurgin-nikad-naibisasale, ei igarba-mellegega imaksale, ar omedi dogdar akar-gussulile, e-sui igi-mani egi gadagoedba, dule-ome-sarsosad deyob bennukergebed. Dulemar-ega-igar-nabomalad e-sui-mani-nug-egisnaid nabir-itomalale, deyob imaklegoed.
EXO 21:23 ”Ar ome apor-naibigusardi, weyob imaklegoed: Ome-burgwisar, dule oburgwilemogoed.
EXO 21:24 Dule, ome-ibe ibya-nailik naibisasale, ibya-nailik ei naibisalemogoed. Dule, ome-ibe nugar-gagwen bichisalnugar-gagwen ei bichilemogoed. Dule, ome-ibe argan-nailik naibisasale, argan-nailik ei naibisalemogoed. Dule, ome-ibe nag-wargwen naibisasale, nag-wargwen ei naibisalemogoed.
EXO 21:25 Dule ome-ogumaksale, ogumaklemogoed. Dule, ome-naibisasale, deyob naibisalemogoed. Dule, ome-sarsosale, deyob sarsolemogoed.
EXO 21:26 ”Dule na e-mai-machered ibyagi-sarsosale, e-mai-omegwa-ibyagi-sarsosdibe, ei ibya onosale, e-ibed ei-ibya-gwagwen-onosad-ular, e-mai-ollor-imakoed.
EXO 21:27 ”Ei nugar-gagwen-bichisale, e-ibed ei-nugar-bichisad-ular, e-mai-ollor-imakoed.”
EXO 21:28 “Moli-bebe-nikad-machered dule-macheredgi-yolesale, omegindibe, degidba, dule-oburgwisale, we-moli, akwagi-makar oburgwilegoed. E-san, gullegosulid. Moli-e-ibeddi oakalolegosulid.
EXO 21:29 ”Ar moli-ibed bato wisilegusgu moli-bebe-nikad-machered dulemargi-yoledigua, degine, e-ibed gwen edichasuli, we-moli dulegi yolesdibe, dule-oburgwisale, we-moli akwagi-makar oburgwilegoed. Geb moli-ibed, akwagi-makar oburgwilemogoed.
EXO 21:30 ”Degi-inigwele, moli-bebe-nikad-ibed na san-bendakegala, mer oburgwilegega, egi-mani-galegoed, bennukoed.
EXO 21:31 ”Moli-bebe-nikad machi-gwensakgi-yolesdibe, bunolo-gwensakgindibe, amba we-igar-maidba imaklegoed.
EXO 21:32 ”Ar moli-bebe-nikad-machered mai-macheredgi yolesdibe, mai-omegindibe, we-moli, akwagi-makar oburgwilegoed. Degine, moli-ibed mani-gwadulagwen-gakambe (30) mai-ibed-bennukoed.
EXO 21:33 ”Dule-wargwen dia egaar sisale, igidibe, yaa-dummad dii-sigega akwisdibe, a-yaa edissuli sisale, agi moli-bebe-nikad-alugwasualed argwachale, moli-uayasuid-argwachadibe,
EXO 21:34 dia-ibed moli-ibed-bennukoed, geb degi, ibmar-dula-burgwisad suoed.
EXO 21:35 ”Moli-bebe-nikad-wargwen baid-moli-bebe-nikad-machered-oburgwisdibe, moli-dulad manigi uklegoed, we-mani na ebo negabar mimioed, degine, moli-burgwisad-e-san negabar mimimarbaloed.
EXO 21:36 ”Ar dule wisirdi, we-moli-bebe-nikad-machered gadi-urwe, degite, e-ibed moli-gwen-edichasuli, moli-gadi-urwed-ibed, moli-bebe-nikad-machered-burgwisad-ibedga moli-bebe-nikad-machered-dulad ega wargwen ukoed. Moli-gadi-urwed-ibed, moli-burgwisaddi susunnoed.”
EXO 22:1 “Dule, moli-bebe-nikad-alugwasualed-wargwen atursasale, sibad-wawaad-atursasdibe, geb oburgwisdibe, igi, manigi-uksadibe, moli-atursasad-ular, moli-bebe-nikad, walatar e-ibedga ukoed. Sibad-wawaad-anardi, sibad-wawaad-walabake ukoed.
EXO 22:2 ”Dule-atursaed mutik ibmar-atursanai-daklesale, agi onaibisalesale, degi, burgwenonikile, we-dule-ibmar-e-ibed, dule-oburgwissuliyob daklegoed.
EXO 22:3 ”Ar ibmar-ibed ibgin dule-atursaed-oburgwisardi, egi ataklegoed, we-dule, dule-oburgwisye. ”Dule-ibmar-atursasadi, ibmar-atursasad-wilub bennukergebed. Ar ibmar-atursasad-bennukega mani satele, bennukega, maiga-guega na dukin manigi ukoed.
EXO 22:4 ”Ibdurgan-atursalesad amba-dula dule-atursasad-neggi-gudii daklealile, dule-ibdurgan-atursasad ilabo-wilub ukoed: Moli-bebe-nikad-machered-alugwasualeddibe, moli-uayasuiddibe, sibad-wawaaddibe, ilabo-wilub e-ibedga ukoed.
EXO 22:5 ”Dule, e-ibdula gagan-maega nainuse sesale, uva-digalesse sesdibe, geb e-ibdurgan, dule-baid-nainugi gagan-masale, ibdula-ibed, e-nainugi-gwagmar-weleged-bur-nuegangi nabogoed.
EXO 22:6 ”Dule-wargwen ikomar-ogumakega soo-ogasale, we-soo orosgi-dakleged-trigo-digar-naidse warmaksale, igi, trigo-danar-weles-bukwadse warmaksale, igi, nainugi-ibmar-digarnaid ogumaksadibe, dule-soo-ogasad, bela dule-baid-ibe-ibmar-ogumaksad bennukoed.
EXO 22:7 ”Dule, nuedgi dule-baidga na e-mani, ega-sabogega uksadibe, e-ibmar-nued-gargerbad ega-sabogega uksadibe, we-dule-baid-neggi we-ibmar atursalesale, dule-ibmar-atursasad-galesadi, ilabo-wilub bennukoed.
EXO 22:8 ”Ar dule-ibmar-atursasad-daklessulirdina, dule-neg-ibed dummagan-igar-nabomalad-asabin seledoed, adi, daklegega, abakale e ibmar-atursasdibe, atursassurdibe.
EXO 22:9 ”Dulemar-ebogwad sogmalale, we-ibmar angadye: Moli-bebe-nikad-alugwasualeddibe, moli-uayasuiddibe, sibad-wawaaddibe, mordibe, ibi-ibmar-yoggusaddibe. We-dulemar-ebogwad, dummagan-igar-nabomalad-asabin namaloed. Ar doa bur ibmar-atursas dakledagoe, a-dule, ilabo-wilub dule-baid-bennukoed.
EXO 22:10 ”Dule-wargwen bensulidgi dule-baidga ibdurgan uksale: Moli-uayasuid ega akwega uksadibe, moli-bebe-nikad-alugwasualeddibe, sibad-wawaaddibe, we-ibmar-ega-uksad burgwenonikile, naibigunonidibe, dule-gwen-daksasuli ei atursalenonidibe,
EXO 22:11 we-dule ibmar-e-ibedga-sogoed: ‘Napira Bab-Jehová-nuggi ise-sogar an bega sogye, ibmar-bega-akwega-be-anga-uksadi, an be-ibe gwen oakalossurye.’ ”Ibdula-ibedi, dule-ega-ibmar-soged nabir itogele, we-dule-ibmar-akwisad ibmar-bennukosulid.
EXO 22:12 ”Ar dule-ibmar-akwed-wagab ibmar-atursalesardi, adi, na e, ibdula-ibed-bennukoed.
EXO 22:13 ”Ibdula-ega-uklesad ibdula-sapurbalidse ichimaklesale, mer-bennukegala, ibdula-burgwisad-e-goa ibdula-ibedga oyogergebed.
EXO 22:14 ”Dule-wargwen dule-baidse egichisdibe, ega ibdula-wargwen wis udagwerye, ibdula burgwenonikile, igi, e-ibed-daklesulidgi ibdula-naibi-gunonikile, dule-ibmar-wis-egichisadi, e-ibed-bennukergebed.
EXO 22:15 ”Ar e-ibed-wagab ibdula burgwisale, naibigusdibe, adi, bennukosulid. ”Manigi-bennus ebunairdi, bar bennukosulid, ar a-mani bato ega bennuksayob gusad.”
EXO 22:16 “Dule-wargwen yagwa-amba yoo-sui-niku-gudiidgi dodosale, ar gusgu ome-nikued-igar-maidba ome-e-babga-mani-ukleged ukoed, degine, nikubaloed.
EXO 22:17 Bunagwa-e-bab yapa ega sui-ukele, amba degite, we-dule gusgu yagwa-bennukleged-igar-maidba manigi yagwa-e-bab-bennukergebed.
EXO 22:18 ”Melle be ome-ina-isgana-imaked, dula-gudii imako, oburgwemalo.
EXO 22:19 ”Dule ibdurganbo galagwensur guele, we-dule, oburgwilegoed.
EXO 22:20 ”Bab-Jehováʼgarbi ibmar-ogumakar be ukoed. Ar degisulile, dule bab-dummad-baiganga ibmar-ogumakar-ukele, a-dule, oburgwilegoed.
EXO 22:21 ”Dule-be-yarginsulid melle sabsur be imako, degine, melle be wiobalo, ar ade, bemar Egipto-yargi be-yarsulidgi be gudii gusmogad.
EXO 22:22 ”Omegan-ei-sui-burgwismalad, degine, mimmigan-babgan-sated, melle be sabsur-imakmalo.
EXO 22:23 Ar be amar sabsur-imakmalale, e-bendakega anse gollarmalale, an amar-bendakega ese naoed.
EXO 22:24 Degine, an nue-ise-urwedgi, es-suidgi sabsur-be-odurdakar an be-oburgwemaloed. Ar agine, be-omegandi sui-sate gumaloed, be-mimmigandi bab-sate gumaloed.
EXO 22:25 ”Dule-wileged-an-dulamar-abargi-gudiid begi mani-gasale, gannar bega ukbaloye sogsale, melle be dulemar-mani-ukmaladyob damalo, degine, melle egi be mani-onakmai gumarbalo.
EXO 22:26 ”We-dule-wileged ega be mani-uksad-anar bega e-mordummad uksale, sedogusale, gannar ega e-mordummad be ukoed.
EXO 22:27 Ar ade, neg-diopigwadgi yoega, unnila we-morbi-nikad. Ar degisulile, ¿ibi-morgi atuosunna? Dule-wileged e-bendakega anse gollalile, bendakega an ese naoed, ar ade, an dulemar-wiledakdaed.
EXO 22:28 ”Melle bela-bela sabsur Bab-Dummadgi ichakwaa sunmako, degine, melle dule-be-neggwebur-semaid be ukabsao.
EXO 22:29 ”Melle be ibmar-gwag-gebe-welemalad, degine, vino-gebe-egurelemalad Bab-Dummadga-uksuli gumalo. ”Be-machi-sailagined anga be ukmarbalo.
EXO 22:30 ”Amba deyobbalid, moli-bebe-nikad-macheredsailagined, degine, sibad-wawaad-macheredsailagined, amba anga be ukmarbaloed. We-ibmar-durgan sunna ibagugle (7) na e-nan-walik gudii gued, ibabaabakgus-gwalulesad-sorbardi (8), anga be ukoed.
EXO 22:31 ”Bemala dulemar-islidikid-anga-uklesmaladga guoed. Ibdula-sapurbarmalad be-ibe sapurgi ibdula-oichimaksale, melle a-ibdula-e-san gunmalo. A-e-sanmala achuga be ukmaloed.”
EXO 23:1 “Mer gakansaar be ibmar sogo. Emargi gakansaar yolegega melle dule-isgana-ebo be igar nabogo.
EXO 23:2 ”Melle dulemar-bukidar-ibmar-isgana-imakmaladyob be ibmar imako. Igar-nabolenaidgi dule-bukidar-sogmaladba melle be binsaed galemalo. Dule-bukidar igar-innikisulidgi-yolenai be dakele, melle eba be dao. Bedi igar-innikigwadba be imako.
EXO 23:3 ”Dule-wilegedga-igar-itolenaile, wileged-ular, melle be, e-ibmar-sognaidba, eba be nai guo.
EXO 23:4 ”Moli-bebe-nikad-alugwasualed yoggus-gudii be dakalile, moli-uayasuiddibe, amba be-isdaradgadile, gannar e-ibedga be uko.
EXO 23:5 ”Melle be dule-isdar-be-daked-bendaksuli be guo. E-moli-uayasuid ibmar-ichesur-semaidba aimukud be dakele, e-moli be bendakoed, ibmar-e-birgi-bukwad ega be odegoed.
EXO 23:6 ”Dule-wilegedga igar-nabolenaidgi, ega igar-maidba be imako, melle egi be yogasaar yoledii guo.
EXO 23:7 ”Binsa-dulemargi-gakansaar-yolemaladgi be bangumar. ”Degine, melle binsa dule-ibmar-oakalossulid-oburgwega be imako. Degi, melle dule-nued-daed okalobalo. Ar ade, dule-ibmar-oakalosad an sabsur-odurdakedsegad.
EXO 23:8 ”Melle dulemarse manigi be binsaed galego. Ar ade, manigi-bakleged be-binsaed gaoed, bar inniki-binsae be-imakosulid. Deginbali, dule-igar-nabomalad, igar-itonaidgi, dule-ibmar-oakalossulidgi-aibinega imakbalid.
EXO 23:9 ”Melle be dule-be-yarginsulid sabsur-imako, ar ade, bemarmoga, Egipto-yargi, be-yarsulidgi be gudii gusmogad. Ar bato bemar wismalad, yar-baidgi-gudiir, wede igi-itolege.”
EXO 23:10 “Birganergwa (6) be ibmar digoed, degi, birganergwa (6) be ibmar webaloed.
EXO 23:11 Birgagugledgindina (7) melle be ibmar bar digo. Napa-obunnogega be imakoed, adi, dule-wilemalad a-ibmar gunmalaga, degi, ibmar-durgan-sapurbarmalad, a-ibmar-obinoed gunmarmogagar. ”Amba deyob, be-uva-digaled, degi, be-olivoʼmar-digaled, be imakbaloed.
EXO 23:12 ”Ibanergwa (6) bela be-ibmar-imaked be imako, ibagugledgindina (7), be obunnogoed, adi, be-moli-bebe-nikad-alugwasualed, degi, be-moli-uayasuid, obunnomalagar. Deginbali, be-maigan, degi, dule-be-yarginedsulid, gannar gangumalagar.
EXO 23:13 ”Bela an bemarga ibmar-sogsadba be nanamalo. ”Melle bab-dummagan-baiganse be gormalo, melle bipisaale baid-bab-dummad-nug be bimalo.”
EXO 23:14 “An-nug-odummogega, birgagi sogapaa be anga iba onogoed.
EXO 23:15 ”Madu-Inasulid-Iba be onogoed. A-ibagi, ibagugle (7) madu e-inasuli be gunnoed. Ar igi bato idu an bemarga sogsa gusa, deyob be gunmaloed. Abib-niigi be iba onogoed, ar ade, a-niigi Egipto-yargi be noar gusmalad. Dule anse arganagwabi gwen nonikosulid. Anga ibmar sedagergebmalad.
EXO 23:16 ”Gebe be ibmar-gwag-wealir, Ibmar-Gwag-Gebe-Weleged-Iba be onogoed. ”Deginbali, bela be-nainugi be arbasad, na be bela-ibmar-wesadgi, birga-bergusar, Ibmar-Gwag-Napi-Weleged-Iba be onobaloed.
EXO 23:17 ”Bela machergan, birgagi ilapaa, Bab-Jehová-Bur-Dummad-asabin ambikunonimaloed.
EXO 23:18 ”Bemar anga ibdurgan-ogumakar-ukalile, melle e-abe madu-ina-nikad-ebo-mesa be anga ukmalo. Degine, ibmar-gwallu ibagi-be-anga-ukmalad, melle banedga be osabogo.
EXO 23:19 ”Be-nainugi be-ibmar-gebe-weleged-bur-nuegan, be-Bab-Dummad-Jehová-negse be sedergebed. Sibad-e-mimmi melle e-nan-nunisgi be duo.”
EXO 23:20 “Israel-dulemar, nue be itomalo. An-baliwitur bemar-iduega an barminaid, adi, igarba bemar-edarbenadapguega, degine, yar-guakwa-an-bemarga-nasiksadse bemar-sedegar.
EXO 23:21 A-baliwitur nue be itomalo, a-sogedba bemar nanadii guo. Ar ade, an-nuggi ibmar-imakdisoggu, melle a-baliwiturgi be gwisgudii gumalo. Ar ade, bemar-isgued, a-baliwitur, igi-barsaye bemarga sogosulid.
EXO 23:22 Ar nue a-sogedba be nanadimalale, an-bemarga-bela-ibmar-sogsadba be damalale, dule-be-isdardakmalad-e-isdaradga an gumogoed, degine, dule-begi-gwisgumaladgi an gwisgumogoed.
EXO 23:23 ”An-baliwitur bemar-idu nadapguoed: Amorreo-dulemar-yalaganse, Het-dulemar-yalaganse, Ferezeo-dulemar-yalaganse, Canaán-dulemar-yalaganse, Heveo-dulemar-yalaganse, degi, Jebuseo-dulemar-yalaganse, bemar-sedoed. We-dulemala bela an obelogoed.
EXO 23:24 ”Melle we-dulemar-sunnasurdamaladba be damarmogo. Melle e-bab-dummagan-asabin be yokorgi-sindigar sigmalo, degine, melle e-nug odummomarbalo. Bur e-bab-dummagan-e-wilubgan-sobarmalad be osulogoed. E-akwa-e-bab-dummadganga-imakmalad ei be mamaroed.
EXO 23:25 ”Be-Bab-Dummad-Jehová-e-nug be odummogo. Geb degine, Bab-Jehová bega mas-obinagwar, degi, dii-obinagwar ukoed. ”Bemar uellesuli an be-imakmaloed.
EXO 23:26 ”Degine, sereddii-mai an be-imakmarbaloed. Be-yargine, siamar gurgin-nika-gudiir mellegega an imakosulid. Bela omegan sikwi-bakedbi gumaloed.
EXO 23:27 ”Neggweburmargi-bemar-naoedgi, e-dulemar bemar-asabin bela-belad-gwayemalaga, surbinsa-itomalaga, degi, be-asabin-duurmakega, an imakoed.
EXO 23:28 ”Bemar-nadapid-idu bulu-barminaiyob an imakoed, adi, igi bulu-idu dulemar-duurmakdedamala, deyob bemar-asabin Heveo-dulemar, Het-dulemar, degi, Canaán-dulemar bemar-idu duurmakdemaloed.
EXO 23:29 We-dulemar, birgagwengi yog-onoar an bemarga imakosulid, adi, melle napa binsa-wilenai guegar, degi, ibdurgan-sapurbarmalad melle yaisur mergumai gubaligar. Ar degiile, bemar-naibisamalo-itole.
EXO 23:30 Geb bemar dula-bukidar-gusadse, degi, yar-akwegala na be unnigus-itomaladse an we-dulemar binna-binna bemarga onomai an imakoed.
EXO 23:31 ”Be-yar-abingumaloedi, weyob an bemarga nasikoed: Demar-Ginnidye-nugad-naid-akar, Filistea-dulemar-demar-naidse, degine, Nega-dulesulid-akar, diwar-Éufrates-maidse, an nasikoed. Dulemar-we-yargi-bukwamaladgi-nakwed an be-imakoed. We-dulemar bela be-asabin be onogoed.
EXO 23:32 ”Melle we-dulemar-ebo be igar-mesdii nanamalo, degine, e-bab-dummagan-ebo be igar-mesosurmarbalid.
EXO 23:33 ”Deginbali, be-yargi we-dulemar be obegosurbalid. Ar be obesmalardi, angi isguega be-imakmaloed. E-bab-dummagan-e-nug-odummogega be-imakmaloed.”
EXO 24:1 Bab-Jehová Moisésʼga sogded: “An-maidse anse be nakweda. Beba be Aarón, Nadab, degi, Abiú be sedago. Degi, Israel-girmar-dummagan-dulapaa-gakambe (70) beba be sedabalo. Wemar angi bannaba ambikumaloed, agi yokorgi-sindigar ambikumaloed.
EXO 24:2 Bebi unnila be anse warmakoed. Israel-dulemar-selearsurmaladdi, nakosurmalad, degi, anse warmakosurmarbalid.”
EXO 24:3 Moisés nade gusad. Bab-Jehová-bela-ega-ibmar-sogsad, degi, igarmar-ega-uksabalid, bela dulemarga sogdapid. Bela dulemala dule-wargwennayobi Moisés-abin-imakdemalad: “Bela Bab-Jehová-ibmar-sogsadba anmar ibmar imakmaloye.”
EXO 24:4 Geb degine, Moisés bela Bab-Jehová-ibmar-sogsadi narmaksad. Moisés wakudaryalaba gwisgualid. Yar-dummad-naba Bab-Dummadga-ibmar-ogumakar-ukleged-aila sobsad, degine, akwamar-islidikid-gwaambe-gakabo (12) urbisbalid. A oyonaid, gwa-gwagwenadi, Israel-dulemar-sogambe-gakabogwad-e-wilubgan (12) guye.
EXO 24:5 Geb, Moisés moli-bebe-nikad-machergan-oburgwemalaga Israel-sapingan barmisad. A-molimar Bab-Jehováʼga ogumakar uksamalad, degi, gwenatigwar-guega molimar-sapingana ega uksamarbalid.
EXO 24:6 Moisés molimar-abe-negabar susad, nog-dummagangi sisad, baid-negabaladdi Bab-Dummadga-ibmar-ogumakar-ukleged-ailagi misad.
EXO 24:7 A-sorbali, Moisés dulemar-Bab-Dummad-ebo-Igar-Mesisad-garda susad, geb, dulemarga absoded. Dulemar abin-sogdemalad: “We-igar-maid-sogedba, degi, bela we-Bab-Jehová-anmarga-sogsadba anmar daoye.”
EXO 24:8 Geb degine, Moisés abe susad, dulemar-bukwadgi misad. Geb sogded: “Bab-Jehová weyob bemarga sogsadbali, we-abe, Bab-Jehová-bemar-ebo-Igar-Mesnaid-e-wilubganad.”
EXO 24:9 Moisés, Aarón, Nadab, Abiú, amar yar-birse nakwidmalad. Wemarba Israel-girmar-dummagan-dulapaa-gakambe (70) eba yar-birse nakwidmarmogad.
EXO 24:10 Agi, amar Israel-e-Bab-Dummad daksamalad: E-nag-urbali, zafiro-akwabir-nuedyob, bela swilidik mogir-ara-ara-daklegedyob napa naid.
EXO 24:11 Degite, wemar-Israel-girmar-dummagan Bab-Dummad-daksamar-inigwele, Bab-Dummaddi oakalossulid. Amba dula gudii gusmalad.
EXO 24:12 Geb degine, Bab-Jehová Moisésʼga sogded: “Yar-birse anse be naknao, agi be an-edarbo. Agi an-Igarmar, degi, anba-bemar-nanamaloed-Igar an bega akwa-matargwagi-narmakar ukoed, adi, a-Igarmargi be dulemar-odurdakegar.”
EXO 24:13 Geb degine, Moisés, Josué-ebo Bab-Dummad-yarse nakwid gusad. Josuéʼde Moisés-bendakedid.
EXO 24:14 Moisés Israel-girmar-dummagangardi sogded: “Anmar bemarse-gannar-nonikidse, wegi be anmar-edarbemalo. Aarón, Hur-ebogwa bemar-abargi gudii gumaloed. Ar bemar ibmar-egisbimalale, wis bemar boni-nikuardibe, wemar-ebogwadse be idakmaloed.”
EXO 24:15 Geb degine, Moisés yar-birse-nakwidgua, a-yala mogir-ena signonikid.
EXO 24:16 Agine, Bab-Jehová-e-gangued-yeerdakleged yar-Sinaíʼgi aidenonikid. A-yala, ibanergwa (6) mogir-ena sigisad. Ibagugledgine (7), Bab-Jehová mogir-imbaba Moisésʼse gornonikid.
EXO 24:17 Israel-dulemar Bab-Jehová-e-gangued-yeerdaklegedi, yar-birgi-soo-binnasur-gwabunyemaiyob dakmalad.
EXO 24:18 Moisés mogir-imbaba dogded, yar-birse nakwided. Moisés yar-birgi iba-dulabo (40) ibginedba, degi, mutikidba gudii gusad.
EXO 25:1 Bab-Jehová Moisésʼga sunmakded, ega sogded:
EXO 25:2 “Israel-dulemarga be sogo, anga-ibmar-ukega be ibmar weemaloye. Bela na e-ulubgi-ibmar-ukbi-itogedba, na ukmaloye.
EXO 25:3 We-ibmarmar-uklegoed be abingaoed: Olo, mani, esgoro-gordikid,
EXO 25:4 nirbadub-arad, nirbadub-suir-akwagiid, nirbadub-ginnid, linoʼdub-nued, sibad-e-absarmar,
EXO 25:5 sibad-wawaad-machered-e-ukamar-ginnidgi-odolegaled, ibdurgan-uka-nuegan, urgomar-acaciaʼye-nugad.
EXO 25:6 Olivo-gwallu gwallumar-ogaegar. Ina-wawadikid, olivo-gwallu-nugsalegedgi-ebulegedba oburegar. Ina-wawadikid, ina-wawadikid-obupurmaklegedba oburegar.
EXO 25:7 Akwamar-nuegan-óniceʼye-nugmalad, degi, akwa-nuegan-bamalad, mor-efodʼye-nugad-birgi nasikegar, degi, mor-binasgargi-nasiklegedgi nasikegar.
EXO 25:8 Geb anga anse-goled-neg be sobmalo. ”A-abargine an gudii guoed.
EXO 25:9 Ar igi bela an bega oyogoe, a-sunnagwad be dulemar-anse-goled-neg-sunna-seleged be soboed, degi, a-yagi bela ibmar-ebuleged a-sunnagwad be sobbaloed.”
EXO 25:10 “Deginbali, ulu be sobbaloed. We-ulu-sobega, urgo-acaciaʼye-nugad be ebugoed. E-sugued, achaatar-nika be soboed, e-matardungued, achapaa, degi, e-nibgued, achapaabar.
EXO 25:11 Olo-sunnabi uluyaba ebiris be nasikoed, degi, ulu-asgine, olo-sunnabi ebiris egi be nasikbaloed. Deginbali, birgi, bela-ebiris e-mullugwad olobi be nasikbaloed.
EXO 25:12 ”Agala, olua-dummagan-gwabake-sobega or be duoed. Ulu-e-dikar-bergunaid-sogbakegwadgi gwa-gwagwen be nasikoed.
EXO 25:13 ”Urgo-acaciaʼye-nugad-walagana suitii be soboed. We-suarmargi or egi bela be nasikoed.
EXO 25:14 Suarmar-walagana-suid, ulugi-olua-dummagan-nanaid-yaba be odogoed, adi, a-suarmargi ulu nabir selegegar.
EXO 25:15 Suarmar-walagana-suigan, ulu-e-olua-dummagan-nanaid-yaba-dogar-mai degisadegudoed, bar be ungosulid.
EXO 25:16 A-uluyagi Igar-narmakar-an-bega-ukoedi be mesoed.
EXO 25:17 A-sorbali, ulu-eduged or-nuedgi be imakoed. E-sugued, achaatar-nika be imakoed, e-matardungueddi, achapaa-nika be imakoed.
EXO 25:18 ”Degine, baliwiturmar-dummagan-querubinʼye-nugmalad-walabo orbi be sobbaloed. Be soboedi, mardogi-binna-binna-sarsoar-sobnai be imakoed. Baliwiturmar-querubinʼmar-warbogwad ulu-eduged-birgi e-duku-dukusik-gwichi be soboed.
EXO 25:19 Degisoggu, querubin-wargwen ulu-eduged-birgi e-dukusik be soboed, degi, baid-querubin-wargwen e-duku-baidsik be sobbaloed. Ulu-edugedba-mesa be querubin-warbogwad soboed.
EXO 25:20 Querubin-e-sakanmala ulu-eduged-birgi nallaa gwichioed, adi, e-sakan ulu-eduged-odukunai guegar. We-querubinʼmala asabin-asabin gwisgumaloed, degi, ulu-edugedsik e-wagar-atakgwichi be imakoed.
EXO 25:21 ”Geb a-sorbali, ulu-edugedi, ulu-birgi be mesoed, geb ulu-yagi dulemar-ebo-an-Igar-Mesnaid narmakar-an-bega-ukoedi be mesoed.
EXO 25:22 An besega, querubinʼmar-warbogwad-gwichid-abargi, ulu-eduged-birgi, magarogoed. Agi an bebo sunmakoed. Agi an bega-Israel-dulemarga-ibmar-sogoed, an bela bega sogoed.”
EXO 25:23 “Deginbali, mese be soboed. Urgo-acaciaʼye-nugad be ebugoed. E-sugued, achabake, e-matardungued, achabo, e-nibgueddi, achapaa-nika guoed.
EXO 25:24 ”Olobi egi be nasikoed, degi, e-dikar-bela-ebilis olo mulluu be mesoed.
EXO 25:25 Deginbali, e-dikar-bela-ebilis wis-nibakwaa be imakbaloed. E-matardungued, argan-matagwen be imakoed. We-wis-nibakwaa-be-imakoedgi, or ebiris be nasikoed.
EXO 25:26 ”Deginbali, oluaduk-dummagan, gwabake be soboed. Mese-e-nag-sogbakegwad-iliba gwa-gwagwen be nasikoed.
EXO 25:27 Oluaduk-dummagan-gwabakegwad, mesegi-mulluu-mesilesad-urba nai guoed. A-oluaduk-dummagan-yaba suar-suid dogoed, adi, mese nabir semalagar.
EXO 25:28 ”Suar-acaciaʼye-nugad-walagana suitii be soboed. A-suar-walagana-ebilis or be matak-matak nasikoed, degi, a-suar-walaganagi mese be semaloed.
EXO 25:29 Degine, e-batemar, e-bate-dummagan, degi, e-nog-dummagan, orbi be sobbaloed. ”E-bormomar be sobbaloed, adi, agi Bab-Dummadga-ibmar-uknaid eogegar. Wemala olo-nuedbi be imakoed.
EXO 25:30 Madu-Bab-Dummad-asabin-ukleged, mese-birgi-maigu be imakoed.”
EXO 25:31 “Deginbali, gwallu-sied olobi be soboed. Gwallu-sied mardogi-binna-sarsoar be soboed. E-nag, e-war, e-nogmar, e-abingaed, e-dutumar, bela wemar egi-nanai soggwenna soblegoed.
EXO 25:32 ”Gwallu-siedgi, e-sakwa walanergwa-nika (6) be imakoed. Nailik, e-sakwa walapaa be soboed, baidsik, e-sakwa walapaa be sobbaloed.
EXO 25:33 E-sakwa-war-wargwengi nur-matargana-e-dutuyob nog be soboed, dutu-abingaed-gwagwen, degi, e-dutu be soboed. Degine, e-sakwa-baidgi nur-matargana-e-dutuyob nog be sobbaloed, dutu-abingaed, degi, e-dutu be sobbaloed. Gwallu-sigedgi e-sakwa-walanergwagi (6) degibi be imakoed.
EXO 25:34 Gwallu-sied-wargi nog-gwabake nur-matargana-dutugii-dakleged be imakoed, e-abingaedmar, degi, e-dutumar egi be sobbaloed.
EXO 25:35 E-sakwa-warbogwad e-wargi-yolenaidgi abingaed-gwagwen be soboed, degi, abingaed-baid e-sakwa-warbogwad-baid-urba be sobbaloed, deginbali, abingaed-baid e-sakwa-warbogwad-baid-urba be sobbaloed. Bela deyobi e-sakwa-walanergwad (6) be imakoed.
EXO 25:36 E-abingaedmala, degi, e-sakwamala, unnila bela gwennaa be imakoed. Bela-wemala soggwennaa mardogi-binna-sarsoar be soboed, bela we olo-sunnabi be imakoed.
EXO 25:37 Geb degine, ega gwallu gwagugle (7) be soboed. A-gwallumala be ogaoed, adi, asabin neg-mee imakegar.
EXO 25:38 Deginbali, e-gwillodub-sikmalad, degi, e-bate-burwigana, bela olobi be imakbaloed.
EXO 25:39 Gwallu-sied be sobegala, degi, bela e-ibmar-burwigana-sobegala, or-nued nibir-dulapaa-gakambe-gakabake-aidiku (74) be ebugoed.
EXO 25:40 ”Nue be dako, be imakoedi, igi yar-birgi bega e-dakleged oyolesa, a-sunnagwad be imakoed.”
EXO 26:1 Bab-Jehová Moisésʼga sogdebalid: “Anse-goled-neg-sunna-seleged be soboed. Be sobega, lino-mor-nued goambe (10) be ebugoed. Deginbali, be nirbadub-arad, nirbadub-suir-akwagiid, degi, nirbadub-ginnid be ebubaloed. Agine, baliwitur-dummagan-querubinʼye-nugad, bela nue-yeerdakle-imakar, a-morgi be sobbaloed.
EXO 26:2 Bela mormar-e-suguedi, daligugledbi (7) be imakoed. E-matardungueddi, daligwenadbi be imakoed. Mormala bela emarbi-dungu be imakoed.
EXO 26:3 Mor-dummagan-goatale be gwadi-gwadi imakoed. Baid-mormar-goataledi amba gwadi-gwadi be imakbaloed.
EXO 26:4 Degine, mor-goataled-gwadialed-e-dikargi e-uayamar dub-aradgi ega be nasikoed. Amba deyob mormar-baigan-goataled gwadiarmalad-e-dikargi be imakbaloed.
EXO 26:5 Mormar-goataled-gwadiarmaladgi e-uayamar gwadulabo-gakambe (50) be nasikoed. Degine, baigan-goataled-gwadiarmaladgi amba gwadulabo-gakambe (50) be nasikbaloed. E-uayamar abin-abin be nasikoed.
EXO 26:6 Mor-nasiked orbi dulabo-gakambe (50) be imakbaloed, adi, mormar-goataledi, baigan-mormar-goataledbo be oatogegar, adi, anse-goled-neg-sunna-seleged-e-mor unnila gogwenayob guegar.
EXO 26:7 Sibad-absar mor-dummaganga be imakbaloed, adi, anse-goled-neg-sunna-seleged-birgi anwegar. A-mormar-dummagan goambe-gakagwensak (11) be imakoed.
EXO 26:8 Mormar-e-sugued, daligugle-gaka-abala sugue (7½) be imakoed, e-matardungueddi, daligwen be imakoed. Mormar-dummagan goambe-gakagwensakad (11) bela emarbi-dungu be imakoed.
EXO 26:9 We-mormar-dummagan, goatar be gwadioed, degine, baid goanergwa (6) be gwadibaloed. Geb anse-goled-neg-sunna-seleged-e-yawagak-asabin, mormar-dummagan-goanergwad-e-gogwenad-napid be nubyar nasikoed.
EXO 26:10 Geb a-sorbali, mor-dummad-dikarba gwadulabo-gakambe (50) e-uayamar be nasikoed. Amba deyob baigan-gwadilesmalad-dikarba e-uayamar be nasikbaloed.
EXO 26:11 Deginbali, esgoro-gordikid-dulabo-gakambe (50) mor-gamalad be imakbaloed. Wemala mor-dummad-e-uaya-yaba be odogoed, adi, mor-dummagan danar-danaled unnila goa-gwennagwadyob guegar.
EXO 26:12 Mormar-dummagan, ar bur-suidsoggu, anse-goled-neg-sunna-seleged-e-dikarmargi batenai guoed.
EXO 26:13 We-batenanaidi, anse-goled-neg-sunna-seleged-edugoed, gwensaksik, achabo batenai be imakoed, baidsik, amba achabo batenai be imakbaloed.
EXO 26:14 Sibad-wawaad-machered-e-ukamar-ginnidgi-odolegaled, anse-goled-neg-sunna-seleged-edugega be imakbaloed. Geb degine, ibdurgan-uka-nuegan, be ebubaloed, adi, agi anse-goled-neg-edugegarbar.
EXO 26:15 ”Deginbali, anse-goled-neg-sunna-selegedga urgomar-acaciaʼye-nugad be sobbaloed. We-urgomar nue inniki-inniki be imakoed.
EXO 26:16 We-urgomar dalibo-abala-sugu be imakoed, e-matardungueddi achapaa be imakoed.
EXO 26:17 Deginbali, urgomargi e-nagmar war-warbo-nika be soboed, adi, nabir urgomar naga-nagaba matak-matak gwisguegar. Weyob bela urgomar be anse-goled-neg-sunna-selegedga be imakoed.
EXO 26:18 Degisoggu, urgomar mata-dulagwen (20) anse-goled-neg-sunna-selegedga, dad-nakwed-argan-nuedsik ogwichega be imakoed.
EXO 26:19 Urgomar-mata-dulagwenad-urba e-sigmalad gwadulabo (40) manibi be soboed. Urgomar-irbali gwa-gwabo e-sigmalad be imakoed, adi, urgo-e-nagmar e-sigmaladgi dogegar.
EXO 26:20 Anse-goled-neg-sunna-selegedga urgomar-mata-dulagwen (20) dad-nakwed-argan-sapiledsik ogwichega be imakbaloed.
EXO 26:21 Be e-sigmalad-manibiid gwadulabo (40) be imakbaloed. Urgomar-iliba gwa-gwabo e-sigmalad be imakoed.
EXO 26:22 Anse-goled-neg-sunna-seleged-sorsik, dad-argwanedsiki urgo-matanergwa (6) be sobbaloed.
EXO 26:23 Deginbali, e-abingunaid-yarganbalidgala, urgo-matabo be soboed. Deyobi, e-abingunaid-yarganbalid-baidga, urgo-matabo be sobbaloed.
EXO 26:24 We-urgo-matabogwad-e-nagmar, e-sigmalad-birgi darbo abingunaidgi gwisguoed. Geb nibalidse or-dummad-naidgi be urgo darbobela be odogoed. Weyob urgo-matabogwad niba ebo-atonai be imakoed.
EXO 26:25 Degisoggu, urgo-matabaabakgi (8) e-sigmalad-manibiid gwaambe-gakanergwa (16) be sioed. A-sogleged, urgo-matagwengi e-urba e-siged be gwa-gwabo sioye.
EXO 26:26 Deginbali, urgo-warakwagana-acaciaʼye-nugad-biir-megmalad be imakbaloed. We-urgo-warakwagana anse-goled-neg-sunna-seleged-e-dikar-soggwensikidga walatar be imakoed.
EXO 26:27 Urgo-warakwagana anse-goled-neg-sunna-seleged-e-dikar-baidsikidga, walatar be imakbaloed. Degine, dad-argwaned-yarganbalidga urgo-warakwagana walatar be imakbaloed,
EXO 26:28 Neg-abargi-urgo-warakwa-megoed bela-baksa urgomar-abargi megoed.
EXO 26:29 Bela urgomar-ebilis or be matak-matak nasikoed. Degine, e-olua-dummagan orbi be imakbaloed, adi, a-yaba urgo-warakwagana-odogegar. Bela we-urgo-warakwagana-biir-megmalad-birgi or be nasikbaloed.
EXO 26:30 ”Igi-dakle yar-birgi bega oyolesa, ayobi, anse-goled-neg-sunna-seleged be soboed.
EXO 26:31 Deginbali, mor-dummad be imakoed. We-dubmargi be imakoed: Nirbadub-aradgi, nirbadub-suir-akwagiidgi, nirbadub-ginnidgi, linoʼdub-nuedgi be soboed. We-morde nue-yeerdakle-imakar, baliwiturmar-querubinʼye-nugad, egi-ise-nue-sobale be imakoed.
EXO 26:32 Buarmar-acacia-walabakegwadgi we-mor-dummad-yeerdakleged be nasikoed. We-buarmarde or egi nasiklealed. E-siged-manibiid-birgi we-buarmar gwisguoed.
EXO 26:33 We-mor-dummadde mor-nasikmaladgi be nasikoed. Degisoggu, we-mor-dummad Neg-Islidikid, Neg-Ise-Islidikid-ebo bachiki-imakega guoed. We-mor-dummad-daksik Dulemarbo-An-Igar-Mesisad-Ulu be sioed.
EXO 26:34 Geb degine, Dulemar-Ebo-An-Igar-Mesisad-Ulu-birgine, e-eduged be mesoed. E-edugedde, Isgued-Elileged-E-Wilubye, sogleged. We-ulude, Neg-Ise-Islidikidyaba sioed.
EXO 26:35 Neg-Islidikidgi, mor-naid-magabali, dad-nakwed-argan-sapiledsik, mese be sioed. We-mese an-asabin madu-ukleged-mesed. A-mese-asabinni, dad-nakwed-argan-nuedsik gwallu be sibaloed.
EXO 26:36 Anse-goled-neg-sunna-seleged-e-yawagakgala, we-dubmargi mor-dummad be soboed: Nirbadub-aradgi, nirbadub-suir-akwagiidgi, nirbadub-ginnidgi, linoʼdub-nuedgi be soboed. Ise-nue-sobar, bela-bela-nue-yeerdakle-imakale, be we-mor-dummad imakoed.
EXO 26:37 Degine, we-mor-dummadgala, acacia-buarmar walatale ega be imakoed. We-buarmar-ebilis or be matak-matak nasikoed, degine, mor-gamalad olobi ega be imakbaloed. Deginbali, wemar-buarmar-ataled-abingaega, esgoro-gordikidgi gwaatale e-sigmalad be soboed.”
EXO 27:1 Bab-Jehová Moisésʼga sogdebalid: “Anga-ibmar-ogumakar-ukleged-aila, be imakbaloed. A-aila, urgo-acaciaʼye-nugadgi emarbi yaa-dungu be imakoed. E-sugued, daligwen-gaka-achabo, e-matardungued, daligwen-gaka-achabobar. E-nibgueddi, bisgipaa.
EXO 27:2 Degine, moli-bebegii aila-e-dikar-abingunanaid-birgi be ogwisbaloed. We-moli-bebegiidmala, ailagi bato eba-mese-sobale be imakoed. Anga-ibmar-ogumakar-ukleged-aila-birgi, esgoro-gordikid be nasikoed.
EXO 27:3 ”Deginbali, bela ibmarmar-we-ailagi-ebuleged esgoro-gordikidgi be soboed: Buru-simalad-bormomar. Buru-weemalad-wesar-dummagan, Abe-bomied-nog-dummagan. San-obin-obin-saed-iko-dummagan. Soo-seed-bormomar.
EXO 27:4 Deginbali, esgoro-gordikidgi san-nared-saki-sakid be sobbaloed. A-saki-sakidga, e-uaya, e-dikar-abingunanaidgi esgoro-gordikidgi be sobbaloed.
EXO 27:5 Degine, san-nared-saki-sakid anga-ibmar-ogumakar-ukleged-ailagi, negabaladgi be nasikoed.
EXO 27:6 Deginbali, anga-ibmar-ogumakar-ukleged-ailaga, suar-warakwagana be imakbaloed. We-suar-warakwaganaga urgo-acaciaʼye-nugad be ebugoed. We-suar-warakwagana-birgi esgoro-gordikid egi be nasikoed.
EXO 27:7 Suarmar we-aila-e-oluaduk-dummagan-nanaid-yaba be odogegalad. We-suarmar, anga-ibmar-ogumakar-ukleged-aila seledsokalile, dikarba-nai guoed.
EXO 27:8 Anga-ibmar-ogumakar-ukleged-aila be ollor imakoed, degine, we-aila urgomargi be soboed. Ar igi bega yar-birgi oyolesa, deyob dakle be soboed.”
EXO 27:9 Bab-Jehová Moisésʼga sogdebalid: “Deginbali, anse-goled-neg-sunna-selegedga neg-imba be nasikbaloed. Dali-dulagwen-gakatar-sugu (25) guoed, dad-nakwed-argan-nuedsik be nasikoed. Degine, we-neg-imba-e-galugi lino-mor-nued naguoed.
EXO 27:10 E-buarmardi, waladulagwen (20) nikuoed, degi, e-buar-sigmalad, amba gwadulagwenbar (20). Bela wemar-sobegala, esgoro-gordikid be ebugoed. E-gamalad-sobegala, degi, buar-e-nonomar-sobegala, mani be ebugoed.
EXO 27:11 Amba deyob anse-goled-neg-sunna-seleged-imba dad-nakwed-argan-sapiledsik, lino-mor-nued dali-dulagwen-gakatar-sugu (25) be nasikbaloed. E-buarmardi, dulagwen (20), degi, e-buar-sigmalad amba dulagwenbar (20). E-buar-sigmalad-imakegala, esgoro-gordikid be ebugoed. E-mor-gamaladgardi, degi, e-buar-nonomargardi, mani be ebugoed.
EXO 27:12 ”Anse-goled-neg-sunna-seleged-imba dad-argwanedsik, mor-dummad daliambe-gakabo-gaka-abala-matardungu (12½), be nasikoed. E-buarmardi, warambe (10), degi, e-buarmar-sigmalad, gwaambebar (10).
EXO 27:13 Anse-goled-neg-sunna-seleged-imba dad-nakwedsikid e-matardungued, daliambe-gakabo-gaka-abala (12½) guoed.
EXO 27:14 Yawagak-doged-dikarba mor-dummad naguoedi, dalipaa-gaka-bisgipaa, doged-e-dikar-gwensaksik sugu naguoed. E-buarmardi, walapaa, degi, e-sigmalad amba gwapaabar.
EXO 27:15 Degine, doged-e-dikar-baidsiki, mor-dummad, dalipaa-gaka-bisgipaa nagubaloed. E-buarmardi, walapaa, degi, e-sigmalad amba gwapaabar.
EXO 27:16 ”Yawagak-dogedgi mor-dummad daliatar be nasikoed. We-mor-dummad be imakoedi, nirbadub-aradgi be imakoed, nirbadub-suir-akwagiidgi be imakoed, nirbadub-ginnidgi be imakoed, linoʼdub-nuedgi, ise-nue-sobar, bela-bela-nue-yeerdakle be imakoed. Degine, e-buarmardi, walabake, degi, e-sigmalad amba gwabakebar.
EXO 27:17 Bela we-neg-imba-e-buarmar-ebiroedi, e-buar-nonomar, manigi soblegoed, e-gamalad, manigi soblebaloed. E-sigmaladdi, esgoro-gordikidgi soblegoed.
EXO 27:18 ”Neg-imba dali-dulagwen-gakatar-sugu (25) guoed, e-matardungued, daliambe-gakabo-abala (12½) guoed. E-mor-naguoed, daligwen-bisgise sugu naguoed. We-mor-dummagan-naguoedi, lino-mor-nued guoed. E-sigmaladdi, esgoro-gordikidgi soblegoed.
EXO 27:19 Anse-goled-neg-sunna-selegedgi belagwapa-ibmarmar-ebulegoedi, bela esgoro-gordikidbi guoed. Degine, we-a-neg-bargamalad, degi, e-galumar-bargamalad, bela esgoro-gordikidmarbi be imakbaloed.”
EXO 27:20 Bab-Jehová Moisésʼga sogdebalid: “Israel-dulemarga be sogo: ‘Olivo-e-gwallu ibmar-baidba-oburarsuli be sedamalo, adi, gwallu-ogamalagar. Degisadegu gwallu gasii guegar.
EXO 27:21 Aarón, degi, e-machimala, gwallu guakwaa simaloed, adi, gwallu gasigu oibodagegar. We-gwallu Bab-Jehová-dulemarbo-ambikued-neggi, mor-dummad-Bab-Ulu-irwa-naid-magaba sigoed. We-igar-an-ukedi, Israel-dulemarga, degine, e-waganga, degisadegu guoed.’ ”
EXO 28:1 Bab-Jehová Moisésʼga sogdebalid: “Be-ia-Aarón, degi, e-machimala Nadab, Abiú, Eleazar, Itamar, amala bese warmaked be imako. Wemar, anga Israel-dulemar-abargi dule-irwa-anse-gormaladga gumaloed.
EXO 28:2 Be-ia-Aarónʼgala dule-irwa-anse-goled-bur-dummad-mormar be imako, adi, oyogega, be-ia-Aarónʼde dule-dummadye, nue-nug-nikadye.
EXO 28:3 Bela dulemar-mormaked-wisimaladbo be sunmako. We-dulemar Aarónʼga mor-makmalaga an ega gurgin-nuegan uksad. Deyobi, Aarón dule-irwa-anse-goledga an nug-imakegar.
EXO 28:4 ”Aarónʼga mormar-maklegoedi, wemalad: Mor-binasgargi-nagued, mor-efodʼye-nugad, mor-dummad-suitigwad, mor-dummad-dubgi-ise-nue-sobaled, mor-gurgin, degine, morgo-dub-saderba-nagued. ”Degisoggu, be-ia-Aarónʼga, degi, e-masmalaga, dule-irwa-anse-goled-mormar be imakoed, adi, amala dule-irwa-anse-gormaladga gumalagar.
EXO 28:5 ”We-mormar-makegala, we-dubmar ebulegoed: Ordub, nirbadub-arad, nirbadub-suir-akwagiid, nirbadub-ginnid, linoʼdub-nued.”
EXO 28:6 Bab-Jehová Moisésʼga sogdebalid: “Mor-efodʼye-nugad be imakoed. Mor-efodʼye-nugad nue-yeerdakle be makoed. Agala, we-dubmar ebulegoed: Ordub, nirbadub-arad, nirbadub-suir-akwagiid, nirbadub-ginnid, linoʼdub-nued.
EXO 28:7 ”E-mor-gukinmar ebo atogegala, morgo warakwaa be imakoed, e-duku-e-dukugi ebo gwadiegar.
EXO 28:8 Mor-efodʼye-nugad-e-mordub-sadergi-naid, nue-yeerdakle be imakoed. We-mordub mor-efodʼgi gwadiar-nai guoed. We-mordub-makega, be we-dubmar ebugoed: Ordub, nirbadub-arad, nirbadub-suir-akwagiid, nirbadub-ginnid, linoʼdub-nued.
EXO 28:9 ”Degine, akwa-óniceʼye-nugad gwabo be suoed. A-akwa-gwabogwadgi Israel-masmala-warambe-gakabogwad-e-nugmar (12) be narmakoed.
EXO 28:10 Gwagwengi masmala-walanergwad-e-nugmar (6) be narmakoed, degine, akwa-baidgine, baigan walanergwad-e-nugmar (6) be narmakbaloed. Be-narmakoedi, machi-dummadgi be onodagoed, geb machi-bipigwadse, e-gwalulesmaladba be narmakoed.
EXO 28:11 Dule-orgi-arbaedi we-nugmar we-akwamar-birgi narmakoed, igi wilub-nasikega imakdamala, deyob imakoed. We-akwamar-dikargi or be nasikoed, adi, akwamar agi galegegar.
EXO 28:12 We-akwamar-gwabogwad mor-efodʼye-nugad-gukinmargi be nasikoed. Weyob, Aarón, Israel-dadgan-warambe-gakabogwad-e-nug (12) an-asabin nai gudioed, adi, ani Bab-Jehová, an we-dulemar insaegar.
EXO 28:13 Akwamar-gwabogwad-gaegala, or be imakoed. A-birgi akwamar be sioed.
EXO 28:14 Degine, e-dub-orbiid giabo be imakoed, akwa-gwabogwad-sigoed agi be edinnoed.”
EXO 28:15 Bab-Jehová Moisésʼga sogdebalid: “Geb degine, mor-binasgargi-nagued, igar-nabolegedgi-ebulegega, nue-yeerdakle be imakoed. Mor-efodʼye-nugad-imaksadyob be imakbaloed. ”We-dubmar be ebugoed: Ordub, nirbadub-arad, nirbadub-suir-akwagiid, nirbadub-ginnid, linoʼdub-nued.
EXO 28:16 E-sugued, degi, e-matardungued emarbi be imakoed, achagwen-sugu, achagwen-matardungu be imakoed. We-mor darbo be saoed.
EXO 28:17 We-mor-birgi akwa-nuegan ile-ile be urboed. Degiid ilebake be urboed: Ile-soggwengi be urboed: Akwa-sárdicaʼye-nugad, akwa-topacioʼye-nugad, akwa-carbuncloʼye-nugad.
EXO 28:18 Ile-sogbogi be urboed: Akwa-esmeraldaʼye-nugad, akwa-zafiroʼye-nugad, akwa-diamanteʼye-nugad.
EXO 28:19 Ile-sogbaagi be urboed: Akwa-jacintoʼye-nugad, akwa-ágataʼye-nugad, akwa-amatistaʼye-nugad.
EXO 28:20 Ile-sogbakegi be urboed: Akwa-beriloʼye-nugad, akwa-óniceʼye-nugad, akwa-jaspeʼye-nugad. Or-gaega-imaklesad-birgi bela we-akwamala be sioed.
EXO 28:21 ”Akwa-nuegana gwaambe-gakabo (12) guoed, Israel-masmala-warambe-gakabogwad-iliba (12). Igi wilub-nasikega imakdamala, deyob, akwa-gwa-gwagwengi, Israel-dulemar-dadgan-sogambe-gakabogwad-e-nugmar iliba be nasikoed.
EXO 28:22 ”Mor-binasgargi-naguedga ordub-nued sinni-sinni be soboed.
EXO 28:23 Geb degine, be olua-gwabo-olobiid mor-binasgargi-nagued-e-dukumargi be nasikoed.
EXO 28:24 Geb ordubmar-sinni-sinnid-giabogwad mor-binasgargi-nagued-e-dukugi olua-gwabogwad-naidgi be nasikoed.
EXO 28:25 Mor-efodʼye-nugad-nasikegala, ordubmar-sinni-sinnid-giabogwad be akwa-nuegan-e-gukingi-siidgi-edinnar nasikoed.
EXO 28:26 ”Deginbali, be olua-gwabo-olobiid be imakbaloed. We-ormar mor-binasgargi-naguedyaba, e-dukumargi be nasikoed. Be nasikoedi, mor-efodʼgi naguegalad.
EXO 28:27 Deginbali, napi be olua-gwabo-olobiid be imakbaloed. We-ormar mor-efodʼye-nugad-e-dikarnagaba be nasikoed. E-abingunaidgi yaba-dogar be nasikoed.
EXO 28:28 Geb degine, mor-binasgargi-nagued-e-olua-gwabogwad, mor-efodʼye-nugad-e-olua-gwabo-naimogad-ebo dub-aradgi edillegoed. Adi, mor-efodʼye-nugad dub-saderba-naidgi naguegar. Deyob guoed, adi, mor-binasgargi-nagued melle mor-efodʼgi bachikii guegar.
EXO 28:29 ”Weyobi, Aarón, anse-goled-neg-islidikidyaba dogdele, igar-nabogega mor-binasgargi-nagued-ebulegedgi Israel-e-masmala-e-nug naigu guoed. Adi, an wemar-e-binsadigu guegar.
EXO 28:30 ”Deginbali, mor-binasgargi-nagued, igar-nabogega-ebulegedgi, be Urim, degi, Tumim sioed. Adi, Aarón an-asabin-dogder, e-binasgargi-nai dogegar. Weyobi, Aarón, an-asabin-gwisgudaged-ilibali, e-binasgargi Israel-dulemarga igar-nabogega sedigu guegar.”
EXO 28:31 Bab-Jehová Moisésʼga sogdebalid: “Mor-dummad-efodʼye-nugad, bela mor-aradbi be imakoed.
EXO 28:32 Nono-odogega, abargine mor-gammu be sikoed. Mor-gammu-e-dikar bela-ebilis be ebayoed, adi, melle achirmakegar.
EXO 28:33 ”Mor-dummad-e-nag-dukugi bela-ebirar yeerdakle be soboed. Be soboedi, sapi-granada-e-sanyob-dakleged be soboed, nirbadub-aradgi, nirbadub-suir-akwagiidgi, nirbadub-ginnidgi be soboed. Degine, amar-imba-imbagi gapan-burwigana-olobiid, bela e-nag-duku-ebilis be nasikoed.
EXO 28:34 Weyob be nasikoed: Gapan-bipigwad-olobiid, a-nagaba, sapi-granada-e-sanyob-sobaled be nasikoed, geb a-nagaba gapan-bipigwad-olobiid be nasikbaloed, geb sapi-granada-e-sanyob-sobaled be nasikbaloed. Deyob, muchub-muchub bela-ebilis mor-dummad-e-nag-dukugi be nasikoed.
EXO 28:35 ”Aarón, dule-irwa anse-gorsokalile, we-mola-yoi dogoed. Adi, e-gapan-burwigana-goled mag itolegegar. Aarón an-asabin Neg-Islidikidse-dogder, degine, agi noarbalir, gapan-burwigana-goled mag itolebaloed. Deyob imakele, Aarón burgosulid.
EXO 28:36 ”Deginbali, or-nued matarkwaa be imakbalo. Geb a-birgine, wilub-nasikega-imakdamaladyob be we-gayaburba nasikoed:
EXO 28:37 ”We-olo-matargwagwad dub-aradgi-edinnar mor-gurgin-ebirmakaled-asabinnidgi be nasikoed.
EXO 28:38 Weyobi, Aarón-bebegi nai guoed. We-olo-matargwagwad sogleged: Aarón ibmar-ukleged-swilidikid-anga-ukalile, Israel-dulemar-nosasogele, Aarónʼgi gwisgulegoye, degine, an e-isgusmalad elioye, geb an anga-ibmar-ukleged-swilidikid-ukarmalar, abingaoye.
EXO 28:39 ”Degine, mor-dummad-dubgi-ise-nue-sobaled lino-morye-nugadgi be imakoed, degine, mor-gurgin-ebirmakaled amba lino-morgi be imakbaloed. Deginbali, morgo-dub-sadergi-nagued ise-nue-sobar, bela-bela nue-yeerdakle be imakbaloed.
EXO 28:40 Deginbali, Aarón-e-masmalaga mor-dummad-dubgi-ise-nue-sobaled, degi, morgo-dub-sadergi-nagued, degine, mor-gurgin ega be imakmogo. Adi, oyolegegar, wemarde dule-dummaganye, nue-nug-nikamaladye.
EXO 28:41 ”We-mormar be imaksadi, be-ia-Aarónʼga, degine, e-masmalaga be yooed. Geb degine, gwallu-wawa amar-nonogi be eogoed. Geb degi, dule-irwa-anse-gormaladga-gumalaga be onugsaoed.
EXO 28:42 Deginbali, lino-mor garson-bipi-urba-yolegedga be imakoed, adi, wemar melle uka-swiri gumalagar. We-garson-bipi saderse, geb duase-sugu yooed.
EXO 28:43 Aarón, degi, e-masmala, dulemar-anbo-ambikued-negse-dogdemalale, we-garson-bipi-yoi dogmaloed. Degine, anga-ibmar-ogumakar-ukleged-ailase nadmalale, amba we-garson-bipi-yoi dogbaloed. Adi, wemala melle isgumalagar. Ar isgumalale, wemala burgwemaloed. Aarónʼgala, degi, e-masmalagala, we-igar degisadegu-mai guoed.”
EXO 29:1 Bab-Jehová Moisésʼga sogdebalid: “Aarón, degi, e-masmalabo, anga dule-irwa-anse-gormaladga-gumalaga, weyob be imakoed: Be-molimar-abargi moli-bebe-nikad-sapingwa-wargwen, degi, sibad-wawaad-machered-warbo be suoed. Amar, swilidikid be suoed, bonikwasulid be suoed.
EXO 29:2 ”Deginbali, trigo-madubur-bur-nuedgi be we-madumar imakoed: Madu-inasulid, madu-olo-olivo-gwallugi-omukualed-inasulid, madu-matargwa olivo-gwallugi-magaled-inasulid.
EXO 29:3 ”We-madumala anse-gorleged-negse sedegala, garba-senigwadgi be urboed. Geb degine, moli-bebe-nikad-sapingwagwad, degi, sibad-wawaad-machered-warbogwad, anga ukega be sedoed.
EXO 29:4 ”Geb be, Aarón, degi, e-masmalamala, dulemar-anbo-ambikued-neg-yawagakse be sedoed. Agi be, Aarón, degi, e-masmala, be diigi ogoed.
EXO 29:5 Agine, we-mormar-maklesad Aarónʼga be yooed: Mor-dummad-dubgi-ise-nue-sobaled, mor-dummad-suitigwad, mor-efodʼye-nugad, mor-binasgargi-nagued. ”Geb degine, mor-efodʼye-nugad morgo-dub-sadergi-naguedgi ega be edinnoed.
EXO 29:6 Deginbali, mor-gurgin-ebirmakaled e-nonogi ega be sioed. We-mor-gurgin-ebirmakaled-birgi or-nued-matargwagwad-islidikid ega be nasikoed.
EXO 29:7 Geb degine, olivo-gwallu be suoed. Geb we-olivo-gwallu Aarón-nonogi be eogoed. Adi, dule-irwa-anse-goledga onugsalegegar.
EXO 29:8 ”Deginbali, Aarón-e-masmala bese-dagega be imakmogoed. Geb, ega be mor-dummagan-maklesad yomogoed.
EXO 29:9 Degi, ega be gurgin simogoed. Deginbali, Aarónʼga, degi, e-masmalaga nuekwa mor-dub-saderba-nagued be edinnoed. Weyobi, Aarón, degi, e-masmala, angarbi-arbamalaga be onugsaoed. Weyobi, dule-irwa-anga-goledga degisadegu gumaloed.
EXO 29:10 ”A-sorbali, moli-bebe-nikad-sapingwagwad dulemar-anbo-ambikued-neg-yawagakse be sedoed. Geb Aarón, degi, e-masmala, we-moli-e-nono-birgi e-argan mesmaloed.
EXO 29:11 Geb agi, dulemar-anbo-ambikued-neg-yawagakgi be an-asabin we-moli oburgoed.
EXO 29:12 Geb we-moli-e-abe be suoed. Degine, we-abe be-googi anga-ibmar-ogumakar-ukleged-ailagi moli-bebegiid-gwichidgi be mage-mage imakoed. Geb degine, Abe-gwabgusaddi, bela ibmar-ogumakar-ukleged-aila-nagaba be eogoed.
EXO 29:13 Deginbali, bela we-ibmarmar be weoed: E-samurgi-gwallu-nanaid, e-bina-dukugi-gwallu-nanaid, e-mirwa-gwabogwadgi-gwallu-nanaid, degi, e-mirwa-gwabogwad. ”Geb a-gwallumala anga ibmar-ogumakar-ukleged-aila-birgi be ogumakoed.
EXO 29:14 Moli-bebe-nikad-e-sandi, e-ukadi, e-saadi, soogi dulemar-danar-danar-bukmalad-magaba be ogumakoed. Ar we-ibmardi isgued-anar uklegoed.
EXO 29:15 ”Geb degine, sibad-wawaad-machered-warbogwad be wargwen suoed. ”Aarón, degi, e-masmala, a-sibad-e-nono-birgi e-arganmar mesmaloed.
EXO 29:16 We-sibad-wawaad-machered be oburgoed, degine, ibmar-ogumakar-ukleged-aila-e-dikarmargi we-sibad-wawaad-e-abe be bomi-bomi imakoed.
EXO 29:17 We-sibad-wawaad be goamakoed. Geb e-samur, degi, e-malimar, nue be enukoed. Geb degine, wemar-enukaled e-nonoba, e-sanmar-goamakaledba, mesa be urboed.
EXO 29:18 Geb a-sorbali, sibad-wawaad-machered ibmar-ogumakar-ukleged-aila-birgi bela be ogumakoed. We-ibmar-ogumakar-anga-ukleged, an yeer-yapan itogoed. We anga soogi ogumakar uklenaid.
EXO 29:19 ”Geb degine, sibad-wawaad-machered-baid be subaloed. Aarón, degi, e-masmala, a-sibad-wawaad-e-nono-birgi e-arganmar mesmarbaloed.
EXO 29:20 We-sibad-wawaad be oburgoed. Geb e-abe be abala suoed. Geb Aarón-e-uaya-duku-argan-nuedsikidgi we-abe be magoed. Degine, e-goo-dummad-e-argan-nuedsikidgi, e-nag-goo-dummad-nuedsikidgi we-abe be magbaloed. Amba deyob be Aarón-e-masmala imakbaloed. ”Geb anga-ibmar-ogumakar-ukleged-aila-e-dikarmargi we-abe be bomi-bomi imakbaloed.
EXO 29:21 Anga-ibmar-ogumakar-ukleged-ailagi-abe-siidi, degi, dule-nugsalenair-olivo-gwallu-ebulegedi, Aarónʼgi be bomi-bomi imakoed, degi, e-mormargi be bomi-bomi imakbaloed. Geb Aarón-e-masmalagi, degi, e-masmala-morgi be bomi-bomi imakbaloed. ”Weyobi, Aarón, e-mormala, e-masmala, degi, e-masmala-mormala, an-asabin anga islidiki guoed.
EXO 29:22 ”Geb degine, we-sibad-wawaad-machered-e-gwallu be suoed: E-samurgi-gwallu-nanaid, e-bina-dukugi-gwallu-nanaid, e-mirwa-gwabogwadgi-gwallu-nanaid, degi, e-mirwa-gwabogwad be suoed, degine, e-dua-argan-nuedsikid be subaloed. Ar ade, we-sibad-wawaad dule-irwa-Bab-Dummadse-goled-onugsalegega uklegaledid.
EXO 29:23 ”Deginbali, madu-e-inasurmalad garba-bipi-Bab-Dummad-asabin-siidgi be suoed: Madu-olo, gwagwen, madu-olivo-gwallugi-omukualed, gwagwen, degi, madu-matargwagwad, matagwen.
EXO 29:24 ”Bela we-madumala, Aarónʼga, degi, e-masmalaga, be ukoed. Geb an-asabin bana-bana imakmaloed, adi, anga-ibmar-ukledaedga guegar.
EXO 29:25 ”Geb a-sorbali, Aarón e-argangi-madumar-ganikid bega ukoed. Geb ibmar-ogumakar-ukleged-ailagi be ogumakoed, anga-ibmar-ogumakar-uklesad-ebo mesa be ogumakoed, adi, an nued-yapan itogegar. Ar wede, anga soogi-ogumakar-uklegaledid.
EXO 29:26 ”Deginbali, be anga Aarón-anga-arbaega-onugsalegega, sibad-wawaad-machered-e-binasgar be suoed. Geb we-binasgar be bana-bana imakoed, adi, anga-ibmar-ukledaedga guegar. We-sibad-wawaad-e-binasgar begadga guoed.
EXO 29:27 ”Sibad-wawaad-machered-uklesad-e-binasgar anga-bana-bana-uklegaled, bachikii be imakoed, degi, e-dua-sabolesad anga-bana-bana-uklesad, bachikii be imakbaloed. Wemala, Aarónʼga, degi, e-masmalaga uklegoed. Ar we-ibmarmar, Aarón, degi, e-masmala, anga-arbaega-onugsalenaidgi sulesad.
EXO 29:28 We-ibmarmala Aarónʼga, degi, e-masmalaga uklegoed. Weyob Israel-dulemarga degibi-sadegu igar-maigu guoed. We-ibmar-uklegedi, Israel-dulemar ukdii guoye sogleged. We-uklegedi, gwenatigwar-guega-ibmar-ukleged guoed.
EXO 29:29 ”Aarón-mormar-islidikmalad, anse-dule-irwa-gorsokalir-yoleged, Aarón-sorba, e-wagan sumaloed, adi, a-mormar-yoi anga dule-irwa-Bab-Dummadse-gormaladga-nugsalemalagar.
EXO 29:30 Aarón-e-wagan-wargwen, e-bab-sorba dule-irwa-anse-golega-sulesar, anga Neg-Islidikidgi-arbaega, dulemar-anbo-ambikued-negse nonikile, we-mola yooed. Ibagugle (7) we-mola-yoi gudii guoed.
EXO 29:31 ”Anga-arbaega-dule-onugsalesadgi sibad-wawaad-machered-uklegaled-e-sana be suoed. A-e-sana nega-islidikidgi be duoed.
EXO 29:32 Aarón, degi, e-masmala, we-sibad-wawaad-machered-uklegaled-e-san, degi, garbagi-madu-siid, dulemar-anbo-ambikued-neg-yawagakgi gunmaloed.
EXO 29:33 We-ibmarmar-uklesadbali, an wemar isgussuliyob daknonikid, degi, anga-arbaega dule-irwa-golega-gumalaga nugsalesmalad. Degisoggu, we-ibmarmar Aarónʼbi, degi, e-masmalabi gunmaloed. Ar we-ibmarmar anga uklegaledsoggu, dule-baigandi gunnosurmalad.
EXO 29:34 We-sanmar-anga-uklegaled, degi, we-madumar-anga-uklegaled, obichale, be soogi ogumakoed. Ar we-ibmarmar ibmar-swilidikmaladsoggu, oibosadgine melle bar gunno.
EXO 29:35 ”Degisoggu, an-bela-bega-sogsadba, deyob be, Aarón, degi, e-masmala be imakoed. Wemala anga-arbaega-onugsalegega, ibagugle (7) egi be arbaoed.
EXO 29:36 E-isgumalad-elilegegala, anga be bane-bane moli-bebe-nikad-sapingwagwad ukoed. Degidbali, ibmar-ogumakar-ukleged-aila anga-uklegega guagwar signonikoed. We-aila anga-uklegoedi, olivo-gwallu egi be mage-mage imakoed.
EXO 29:37 Deyob isgued-elilegegala, degi, angadga-aila-guegala, ibagugle (7) be imakoed. Degine, deyob aila angadga sii guoed. Degi, ibu-ibmar we-aila-ebusale, bela-ibmar angadga gunonimogoed.”
EXO 29:38 Bab-Jehová Moisésʼga sogdebalid: “Bab-Dummadga-ibmar-ogumakar-ukleged-ailagi bane-bane wemar be ukoed: Sibad-wawaad-sapingwa-birgagwen-nikad walabo be ukoed.
EXO 29:39 Wakdar we-sibad-wawaad wargwen be oburgoed, sedogi be baid oburgwebaloed.
EXO 29:40 Deginbali, we-sibad-wawaad-gebe-oburgwilegoedba be we-ibmar ukoed: Madubur-bur-nued, nibiratar, olivo-gwallu, bute-wargwen eba be oburoed. Degine, anga be egi vino, bute-wargwen-mergu eobaloed.
EXO 29:41 Geb sedogi, sibad-wawaad-baid be oburgwebaloed. Wakdar-imaksadyob be imakbaloed. We-ibmar-soogi-ogumakar-ukleged an yeer-yapan itodaedid.
EXO 29:42 ”Anse-goled-neg-dogedgi an bebo-sunmakega bebo-abinguoedgi, be-wagan degisadegu, an-asabin, anga we-ibmar-ogumakar-ukmai gumaloed.
EXO 29:43 Deginbali, agi an, Israel-dulemarbo abingubaloed. A-nega, an-egi-gandikidba-gudii guoedbali, neg-islidikidga guoed.
EXO 29:44 ”Dulemar-anbo-ambikued-neg, degi, anga-ibmar-ogumakar-ukleged-aila angadga an imakoed. Deginbali, Aarón, degi, e-masmala, angadga an imakbaloed, adi, dule-irwa-anse-gormaladga gumalagar.
EXO 29:45 Ani an Israel-dulemar-abargi gudii guoed, degine, e-Bab-Dummadga an gubaloed.
EXO 29:46 Adi, deyob Israel-dulemar wisgumaloed: Ani an, e-Bab-Dummad-Jehová guye. Ani an, emar-Egipto-yargi-wilebukwamargu, onosye, adi, emar-abargi an gudii guegarye. Ar ani an, Bab-Jehová gued, ani an, e-Bab-Dummadid.”
EXO 30:1 Bab-Jehová Moisésʼga sogdebalid: “Deginbali, anga ina-wawadikid-ogumaked-aila be sobbaloed. Agi ina-wawadikid obupurmaklegegar. We-aila-sobegala, urgomar-acaciaʼye-nugad be ebugoed.
EXO 30:2 We-aila, achabo-sugu imaklegoed, e-matardungued, achabobar. E-sugued, e-matardunguedbo emar-dungu guoed. E-nibgueddi, dali-abala. E-moli-bebegiid ailaba-mesa be soboed.
EXO 30:3 Birgi be or-nued nasikoed: E-birgi-akinnar-maidgi, bela e-dikarmargi, e-moli-bebeyob-daklegedgi, bela amargi, or be nasikoed. E-dikarbali, ormar-mullu-ebirar be mesbaloed.
EXO 30:4 Deginbali, ormar-mullugalad-urba olua-bela-olobiid gwabo, e-dikarmargi be nasikoed, adi, nabir suarmar-suitigwad egi dogega, aba nabir selegegar.
EXO 30:5 We-suarmar-suitigwad-imakega urgo-acaciaʼye-nugad be ebugoed. Degine, we-suarmargi or egi be ebiris nasikoed.
EXO 30:6 ”Geb degine, ina-wawadikid-ogumakleged-aila sigoed, bia mor-dummad Dulemar-Anbo-Igar-Mesisad-Ulu-Eduged-Maid-Irwa nai, a-asabin, bia an bebo-abinguoe, agi be sioed.
EXO 30:7 ”Aarón bane-bane, wakudaryalaba, gwallumar guakwaa imakalile, ina-wawadikid-ogumakleged-ailagi anga ina-wawadikmalad ogumakoed.
EXO 30:8 Deginbali, neg-sedogusale, Aarón, sedo-gwallu-ogaalile, anga ina-wawadikidmalad ogumakbaloed. Degibi-sadegu, an-asabin be-wagan we-ina-wawadikidmalad obupurmakdii gudoed.
EXO 30:9 We anga-ina-wawadikmalad-ogumakleged-ailagi: Ina-wawadikmalad-baid uklegosulid, ibmar-durgan ogumaklegar uklegosurbalid, degine, anga-ibmar-gwag-ukleged agi uklegosurbalid, degine, a-birgi egi be ibmar eogosurbalid. Unnila ina-wawadikidmaladbi be ogumakoed, an bega sogsadyob.
EXO 30:10 ”Aarón, birgagine, isgued-eliega, we-ina-wawadikmalad-ukleged-ailagi, e-moli-bebeyob-daklegedgi, anga-ibmar-ogumakar-uklesad-e-abe egi mage-mage imakoed. Birgagine, irgwennaa deyob imakoed. Be-wagan, degisadegu imakdii gudoed. We-aila angadga guoed.”
EXO 30:11 Bab-Jehová Moisésʼga sunmakdebalid, ega sogdebalid:
EXO 30:12 “Israel-dulemar be ebichidele, na san-bendakmalagala, wala-walagwen an-bennukmaloed. Ebichilesadba bennukmaloed, adi, melle bemargi boni-dummagan ainiegar.
EXO 30:13 ”Bela dulemar-ebislesmalad mani-gramo-atar (5) bennukoed: We-mani anse-goled-neggi-mani-aidikued-wilub-negabar gued. ”We-mani anga ibmar-uklegedga guoed.
EXO 30:14 Bela dulemar-birga-dulagwen-nikamalad (20), degi, bela aba-obine-birga-nikamalad-ebislesmaladi, anga we-mani ukoed.
EXO 30:15 ”Dulemar, na san-bendakmalaga anga mani-ukarmalale, dule-mani-ibed mani gwen-obine ukosulid. Dule-wileged gwen mani-ichee ukosurmogad. Anga we-mani ukarmalar, bela mani-gramo-atar ukmaloed.
EXO 30:16 Degisoggu, be-sunnagwad be Israel-dulemar-we-mani-ukarmalar, be suoed. Geb a-mani, dulemar-anbo-ambikued-neggi-arbalegega-ebulegega be ukoed. ”Weyobi, an insaegalad, Israel-dulemar na e-san-onogegala, a-anar mani uksamarye.”
EXO 30:17 Bab-Jehová Moisésʼga sogdebalid:
EXO 30:18 “Deginbali, dii-sied esgoro-gordikidbi be soboed. E-sigedga-guoedi, esgoro-gordikidbi be imakoed. A-dii-sied argan-enukega-ebulegega be imakoed. We-dii-sied be sioedi, dulemar-anbo-ambikued-neg-siid, degi, anga-ibmar-ogumakar-ukleged-aila-siid, amar-imbagi be sioed. Geb egi be dii enogoed.
EXO 30:19 A-diigi, Aarón, e-masmalamala, e-arganmar, degi, e-malimar, enukmaloed.
EXO 30:20 Wemala, dulemar-anbo-ambikued-neggi-dogdedibe, degi, anga-ibmar-ogumakar-ukleged-ailase warmaknadele,
EXO 30:21 e-arganmar, degi, e-malimar enukmaloed. Ar degi-imaksulile, burgwemaloed. We degisadegu, weyob Aarónʼga, degi, e-waganga we-Igar maigu guoed.”
EXO 30:22 Bab-Jehová Moisésʼga sogdebalid:
EXO 30:23 “Ina-nuegan-yeer-yapanmalad be suo: Mirraʼye-nugad-diregwad, nibirambe-gakapaa (13). Canelaʼye-nugad-yeer-yapanned, nibirnergwa-abala (6½). Cálamoʼye-nugad-yeer-yapanned, nibirnergwa-abala (6½).
EXO 30:24 Casiaʼye-nugad, nibirambe-gakapaa (13), degi, olivo-gwallu, galón-gwagwen. Anse-goled-neggi ibmar-oaidikued-wilubsiidgi be wilubsaoed.
EXO 30:25 ”We-inamar olivo-gwalluba bela be oburoed, anga olivo-gwallu-wawadikidga guegar. We-gwallu-wawadikid be imakoedi, dule-gwallu-wawadikid-imakdaedyob be imakoed. We-gwallu-wawad angadga guoed.
EXO 30:26 We-gwallu-wawadgine be wemar magoed: Dulemar-anbo-ambikued-neg, Dulemar-Anbo-Igar-Mesisad-Ulu,
EXO 30:27 mese, degi, bela eba-ibmarmar-ebulemalad, gwallu-sied, degi, bela eba-ibmarmar-ebulemalad, ina-wawadikmalad-ogumakleged-aila.
EXO 30:28 Anga-ibmar-ogumakar-ukleged-aila, degi, bela eba-ibmarmar-ebulemalad, degine, dii-sied esgoro-gordikidgi-sobaled, bela e-malise-bakar. Amar bela we-gwallu-wawadgine be magoed.
EXO 30:29 ”Weyobi anga-ibmar-uklegaledga guoed. Bela we-ibmarmala angadgarbi guoed. Ibu-ibmar we-ibmarmar-ebusale, bela angadgarbi gunonimogoed.
EXO 30:30 ”Deginbali, Aarónʼgi, degi, e-masmalagi, be we-gwallu-wawad eogoed, adi, anga dule-irwa-anse-gormaladga gumalagar.
EXO 30:31 Israel-dulemarga be sunmakoed, ega be sogoed: ‘We gwallu-wawad, degisadegu, gwallu-wawa-eoleged-islidikidga guoye.
EXO 30:32 We-gwallu-wawad dule-bamaladgi eolegosulid, degine, we-gwallu-wawad-imakaledyobi, baid-gwallu-wawad be imakosulid. We-gwallu-wawad, gwallu-wawad-islidikidid. Degisoggu, gwallu-wawad angadgarbi-gued be dako.
EXO 30:33 ” ’Ar doa-dule, we-gwallu-wawad-imakaledyob baid-gwallu-wawad-imaksale, dulemar-irwa-anse-goledsulidgi eosdibe, e-dulemar-abargi ononnolegoed.’ ”
EXO 30:34 Degine, Bab-Jehová Moisésʼga sogdebalid: “We-gagan-yeer-yapanmalad-e-gichi be weo: Estacteʼye-nugad-e-gichi, ámbarʼye-nugad-e-gichi, gálbanoʼye-nugad-e-gichi, ina-wawadikid-incienso-nued. We-gagan-yeer-yapanmalad-e-gichi bela emarbi-mergu be weo.
EXO 30:35 ”Bela-we-gagan-yeer-yapanmalad-e-gichi be oburoed. Igi ina-wawadikid-sobed-dule ina-wawadikid sobe, deyob be ina-wawadikid-inciensoʼye-nugad be soboed. Gagan-yeer-yapanmaladi ise-nue-oburar be imakoed. Balu egi be mesbaloed. Baid-ibmar egi be oburosulid. We-ina-wawadikid-inciensoʼye-nugad, angadgarbi guoed.
EXO 30:36 We-ina-wawadikid bela ise-nagar, ise-ubimakar be imakoed. We-ina-wawadikid, Dulemar-Anbo-Igar-Mesisad-Ulu-siid-asabin, dulemar-anbo-ambikued-neggi be sioed. Agi, an bese magarogoed. We-ina-wawadikid bela-bela bemarga angadgarbi-ebulegega guoed.
EXO 30:37 We-ina-wawadikid be imakoedi, baid-ina-wawadikid weyob-oburale, be imakosulid. We-ina-wawadikid Bab-Jehováʼgadgarbi be dakoed.
EXO 30:38 ”Ar doa-dule weyob ina-wawadikid-e-yapanned-uega imakalile, we-dule, e-dulemar-abargi ononnolegoed.”
EXO 31:1 Bab-Jehová Moisésʼga sunmakded, ega sogded:
EXO 31:2 “Nue be an-itogo. Hur-e-wagwa-Judá-yargined Uri-machi-Bezaleelʼye-nugad an susad.
EXO 31:3 We-Bezaleelʼga An-Burba an ega nue-uksad. Nue-binsaed-nikagued an ega uksad, nue-ibmar-magar-itogued an ega uksad, nue-ibmar-wisigued an ega uksad, degine, nabir-ibmar-obinyemaigued an ega uksad.
EXO 31:4 Adi, nabir ibmar yeerdakle-sobegar, nabir orgi-arbaegar, nabir manigi-arbaegar, nabir esgoro-gordikidgi-arbaegar.
EXO 31:5 Degine, nabir akwa-nuegangi-arbaegar, nabir akwa-nuegan ibmar-birgi siegar, nabir urgomargi-arbaegar, degine, nabir-galagwensuli ibmar-yeerdakle-imakegar.
EXO 31:6 ”Deginbali, Bezaleel-bendakega, Dad-dummad-Dan-wagwa Ahisamac-machi-Aholiab an susbalid. Dule-nue-ibmar-wisimalad, gatik-ibmar-wisguega an imaksad, adi, bela an-ibmar-sogsadba bega imakmalagar, we-ibmargi arbamalagar:
EXO 31:7 Dulemar-anbo-ambikued-neggi, Dulemar-Anbo-Igar-Mesisad-Ulugi, Dulemar-Anbo-Igar-Mesisad-Ulu-edugedgi, degi, anse-goled-neg-sunna-selegedgi bela-ibmar-ebuleged sobegar.
EXO 31:8 Degine, mese, geb bela-eba-ibmarmar-ebulemalad. Gwallu-sied-bela olobiid, geb bela eba-ibmarmar-ebulemalad. Anga-ina-wawadikid-inciensoʼye-nugad-ogumakleged-aila.
EXO 31:9 Anga-ibmar-ogumakar-ukleged-aila, geb bela-eba-ibmarmar-ebulemalad. Dii-sied-esgoro-gordikidgi-sobaled, geb bela e-malise-bakar, sobegarbar.
EXO 31:10 Degine, we-mormar makmarbaloed: Aarón-mor-islidikmalad, degi, e-masmala-mor-anse-dulemar-irwa-gorsokalir-yodamalad.
EXO 31:11 Olivo-gwallu-magega-ebuleged, degi, ina-wawadikid Neg-Islidikidgi-ebuleged sobegarbar. Wemala, Bezaleel, degi, Aholiab-ebogwa bela sobmaloed. ”Ar igi bela an bega sogsa, deyob sogedba imakmaloed.”
EXO 31:12 Bab-Jehová Moisésʼga sogdebalid:
EXO 31:13 “Israel-dulemarga be sunmakoed, ega be weyob sogo: ‘Napira an bemarga soged, an-obunnoged-ibagi be obunnomalo, ar ade, wede bemar-ebo an-Igar-Mesnaid e-wilubga gued. Be-waganga we-Igar degisadegu mai guoed, adi, be wisgumalagar, ani an Bab-Jehová gued. Ani an be-sunonimalad, anga arbadii gumalagar.
EXO 31:14 Degisoggu, obunnoged-ibagi mer arbamalo, ar ade, a-iba bemargala iba-islidikidid. A-ibagi, dule obunnogergebed. A-ibagi, dule wis arbasale, we-dule e-dulemar-abargi Israel-dulemar-abargi-onolegoed.
EXO 31:15 Ibanergwa (6) arbalegoed, ibagugledgindina (7), obunnoged-ibad. We-iba Bab-Jehováʼgadid. Ar doa-dule we-ibagi arbaye-sogele, napira an bega soged, we-dule oburgwilegedsegad.’
EXO 31:16 ”Degisoggu, Israel-dulemala obunnoged-ibagi arbaosurmalad. E-waganmargala we-Igar degisadegu-mai guoed.
EXO 31:17 Israel-dulemar-anbo-we-Igar-Mesnaid e-wilubga guoed, degisadegu-maigu guoed. Ar Bab-Jehová, nibneg-nasikegala, napneg-nasikegala, ibanergwa (6) arbasad. Ibagugledgindi (7), bar arbassulid. Bab-Dummad a-ibagi obunnosad.”
EXO 31:18 Bab-Jehová, Sinaí-yargi Moisésʼbo-sunmaknaid-bergusgua, Israel-Dulemarbo-Igar-Mesnaid-e-wilubga-guega, Moisésʼga akwa-matargwagwad-matabo uksad. We-akwagi-Igarmar-narmaklesadi, Bab-Dummad na e-sunnad e-googi narmaksad.
EXO 32:1 Israel-dulemar dakdegu, Moisés yar-birgi-gudiid gwen aidedasuli, Aarónʼse nade gusmalad. Ega sogdemalad: —¡Aarón! Be anmarga bab-dummagan sobe, adi, anmar-idu-nadap gumalagar. Ar Moisés-Egipto-yargi-anmar-onosad, anmar wissulid, wede igi-gusa.
EXO 32:2 Aarón dulemar-abin sogded: —Be-omegan-uaya-dukugi-ormar-nanaid, be-bunamala-uaya-dukugi-ormar-nanaid, be-masmala-uaya-dukugi-ormar-nanaid be ungemardo. Geb be anse sedamalo.
EXO 32:3 Geb degine, bela dulemar uaya-dukugi olua-nanaid unnusmalad, geb bela Aarónʼse senonimalad.
EXO 32:4 Aarón bela we-ormar abingasad. Geb soogi or dusad. Binna-binna sobe-sobe imaksad, moli-bebe-nikad-sapingwagwadga obinnisad. Geb degine, bela sogdemalad: “¡Israel-dulemar! Wemar be-bab-dummagan-dake. Wemar, Egipto-yargi bemar-onosad-dake.”
EXO 32:5 Aarón weyob dulemar-daksagu, moli-bebe-nikad-asabin ibmar-ogumakar-ukleged-aila sobsad. Geb binnasur sogded: “¡Oibosale, Bab-Jehováʼga iba-dummad anmar onomaloed!”
EXO 32:6 Oibosgu, wakudaryalaba dulemar ailagi ibdurgan-ogumakar uksamalad, degine, gwenatigwar-guegala, ibmar uksamarbalid. Geb mas gutemalad, gobdemalad. Bela galagwensuli wergudmalad.
EXO 32:7 Geb degine, Bab-Jehová Moisésʼga sogded: —Be nae, be aidena. Ar be-dulemar, Egipto-yargi be onosadi, nue-isgudmalad.
EXO 32:8 An-ega-Igar-uksadgi bato bangudmalad. Emide, or dusmalad, moli-bebe-nikad-sapingwagwadyob sobsamalad. A-molise Bab-Dummadyob ese gornanaid, Bab-Dummadyob ega ibmar-ogumakar uknanaid. Sogdemalad: ‘Israel-dulemar, we be-bab-dummagan-dake, we Egipto-yargi bemar-onosad-dake.’
EXO 32:9 Bab-Jehová Moisésʼga sogdebalid: —We-Israel-dulemar an dakedi, nue dulemar-non-dutusurmaladid.
EXO 32:10 Degisoggu, emigindi be an-dako. An sae-itoged. We-dulemar an obelogoed. Bedina, wagan-bukidar-nikuega an be-imakoed.
EXO 32:11 Geb degine, Moisés e-Bab-Dummad-Jehová-urwed-bargaegala, ega sogded: —Bab-Jehová, ¿ar ibiga sae-itogedba be-dulamar be obelodagoe? ¿Ar na be Egipto-yargi be-gangued-dutusulidba onossursi?
EXO 32:12 Ar ibiga Egipto-dulemar-weyob-sogega be imakoe: ‘Emide be dake, Bab-Dummad Egipto-yargi we-dulemar-onosad, yala-imbaba-oburgwega onosad. Bela we-napneggi-obelogega onosad.’ Melle be sae-itoge. Melle we-dulemar-obelogedgi binsae.
EXO 32:13 Be-maimar Abraham, Isaac, degi, Jacob, amar be ebinsae. Ar amarga be sogsa gusad, an ise-sogar sogye: ‘Niisgwamar-nibneggi-nanaidyob be-wagan an bega omelogoye. Degine, be-waganga we-yarmar-nanaid degisadegu egadga guoye.’
EXO 32:14 Geb degine, Bab-Dummad e-dulemar-obelogoye-sogsagusadi, emisgi sogdesunnad, bar obelogosurye.
EXO 32:15 Geb degine, Moisés yar-birgi-gudiidi aidealid. Moisés akwa-matabogwad Bab-Dummad-Israel-Dulemarbo-Igar-Mesnaid-narmakaledi e-argangi-sedani aidealid. Igar-Mesilesad akwa-matabogwadgi abinbela narmakaled.
EXO 32:16 Bab-Dummad akwa-matabogwad imaksad, degi, e-sunnad egi narmaksabalid.
EXO 32:17 Geb degine, Josué dule-bukidar oimake-itoargu, Moisésʼga sogded: —Dulemar danar-bukwadgi urwe-nana an itodo.
EXO 32:18 Moisés, Josuéʼga sogded: —We-oimak-an-itogedi, bilagi-nakwisadyob gwen oimake an itosulid. Bilagi-galakusadyob gwen oimake an itosurbalid. An itogedi, dulemar namakmar an itodo.
EXO 32:19 Moisés dulemar-bukwadse-aidenonigua, moli-bebe-nikad-sapingwagwad-sobaled dakded, degine, dulemar-dodonanai dakdebalid. Moisés deyob dakdegu, sae-itoded. E-argangi-akwa-matabogwad-ganikid binnasur meted. Yar-dikarba we-akwa-matabogwad mamarisad.
EXO 32:20 Geb degi, Moisés, moli-bebe-nikad-sapingwagwad-soblesad susad, geb ogumakega soogi balimeted. Geb doo-doo imaksad, bela ubi-ubi-imakedse sasad. Geb degine, diigi mie-mie imaksad. A-diigi Israel-dulemar-ogobsad.
EXO 32:21 Geb Moisés Aarónʼga sogded: —¿Igi we-dulemar be-imaksa? Emide be, we-dulemar dummad-isguega be imaksad.
EXO 32:22 Aarón Moisés-abin sogded: —Dummad, mer be anse urwe. Ar be wisid, we-dulemar unnila isguedginbi binsadidamalad.
EXO 32:23 Ar we-dulemar anga sokarmalad: ‘Anmar-idu-nadap-guegala anmarga bab-dummagan be sobye. Ar ade, anmar wissuliddeeye, we-dule-Moisés Egipto-yargi-anmar-onosadi, igi-gusdibeye.’
EXO 32:24 Geb degine, an ega sogdesunnad: ‘Dule or-nikadi, anga sedamalo.’ Agi anga or uksamarsunnad. Geb soogi an ormar meted. Geb degine, we-moli-bebe-nikad-sapingwagwad noarsunnad.
EXO 32:25 Moisés dakdegu, dulemar geg na san-bargamala, Aarón, gwen we-dulemar-san-bargaega imaksasuli, deginbali, we-Israel-dulemala, e-isdarmalad-dodogedga gudoe,
EXO 32:26 degidbali, Moisés dulemar-danar-bukwad-dogedgi gwisgusad, amarga sogded: “Ar doamar Bab-Jehováʼba nanai-itomala, anse dagmalo.” Agi bela Levita-dulemar Moisésʼba akadmalad.
EXO 32:27 Moisés amarga sogded: “Weyob Israel-e-Bab-Dummad-Jehová soged: ‘Bela bemar na es-suid nasikmalo, dulemar-danar-danar-bukwadse gannar be namalo, dulemar-e-dordo-e-dordonegse be namalo. Be-gwenaddibe, be-aidibe, be-neg-dikarba-mamaiddibe, be oburgwemalo.’ ”
EXO 32:28 Levita-dulemar Moisés-ega-sogsadba bela imaksamalad. A-ibagi, dulemar-milipaa-gubin (3,000) oburgwismalad.
EXO 32:29 Geb degine, Moisés Levita-dulemarga sogded: “Emi-ibagi, bemar, be-masmalagi-aibichad-ular, be-gwenadgangi-aibichad-ular, Bab-Jehováʼga-arbaega be gunonimalad. Degisoggu, Bab-Jehová, emi-ibagi, ise-nued bemargi binsanonimalad.”
EXO 32:30 Degidgine, oibosgua, Moisés Israel-dulemarga sogded: “Bemala nue-dummad-isgusmalad. Degi-inigwele, Bab-Dummadbo-igar-nabogegala, Bab-Jehováʼse an nakwenaoed, abakalegi, Bab-Dummad nabir bemarga isgued-elialile.”
EXO 32:31 Geb degine, Moisés Bab-Jehováʼse gannar nonikid, ega sogded: —Ar we-Israel-dulemar or-sobaled bab-dummadga-imaknonimargu, nue-dummad-isgunonimalad.
EXO 32:32 Degisoggu, Bab-Dummadye, we-dulemar-e-isgusad ega be eliena gadin. Ar degisulile, be-gardagi an-nug-narmakar-naid be elisunna.
EXO 32:33 Bab-Jehová Moisés-abin sogded: —Ar dule-angi-isgusadbi an-gardagi-e-nug-narmakar-naid an ei elioed.
EXO 32:34 Degisoggu, bedi be nae. We-dulemar an-bega-sogsad-yarse be sede. An-baliwitur be-idumai guoed. Ar dulemar-angi-isgusmaladdi, e-odurdakleged-ibagan-nonikile, e-isgusmaladba an a-dulemar sabsur-odurdakoed.
EXO 32:35 Geb deyobi, Bab-Dummad-Jehová Aarón-moli-bebe-nikad-sapingwagwad-sobsad-ular, Israel-dulemargi boni-dummad barmialid.
EXO 33:1 Geb Bab-Jehová Moisésʼga sogded: “Emigindi, wegi be nae. Be Egipto-yargi-dulemar-onosadmala be nae. Abrahamʼga, Isaacʼga, degi, Jacobʼga an ise-sogar-sogsad, ‘we-yala an be-waganga ukedseye’, a-yarse be namala.
EXO 33:2 Be-idugega an-baliwitur an bega barmidoed. Degine, we-dulemar an be-idu onioed: Canaán-dulemar, Amorreo-dulemar, Het-dulemar, Ferezeo-dulemar, Heveo-dulemar, Jebuseo-dulemar. We-dulemar bela an be-iduar onogoed.
EXO 33:3 ”Yar-gadi-ibmar-sanmakedse, napa-nuedse, be nao. Andi an bemarba barnaosulid. Ar bemardi uaya-gwen-niksurmaladsoggu, abakalegi igarba an bemar-obeloalile.”
EXO 33:4 Israel-dulemar Bab-Dummad-weyob-soge itosmargu, bela bukib-itodmalad, ogormakdemalad. Degine, ormar-yeerdaklemalad bar nasissurmalad.
EXO 33:5 Ar Bab-Jehová Moisésʼga sogsad: “Israel-dulemarga be sogoye: ‘Bemar dulemar-uaya-gwen-niksurmaladye, non-dutusurmaladye. Ar wis sikwas an bemarba naye sogele, anse bemar osulolesmalarye.’ ” Bab-Jehová sogdebalid: “Israel-dulemarga be sogbalo: ‘Ormar-yeerdaklemalad ungemaloye. Sorba an dakoye, igi an bemar-imakodibeye.’ ”
EXO 33:6 Degidbali, Horeb-yar-akar Israel-dulemar ormar-yeerdaklemalad bar yossurmalad.
EXO 33:7 Moisés dordoneg sesagusad, geb dulemar-danar-danar-bukwad-magaba sisad. A-dordoneg onug-imaksad: “Bab-Dummad-dulebo-sunmaked-dordonegye.” Ar dule Bab-Jehováʼse idakbiele, dulemar-danar-danar-bukwadgi noergebdaed, geb Bab-Dummad-dulebo-sunmaked-negse naddamalad.
EXO 33:8 Moisés we-dordonegse nadele, bela dulemar e-dordoneg-yawagak-magaba gwisgusdamalad, Moisés Bab-Dummad-dulebo-sunmaked-dordonegse dogedse egi atakgwichidamalad.
EXO 33:9 Moisés dordoneggi dogdele, mogir-bubawaryob-gwichidi aideardaed, dordoneg-yawagakse aidenonidaed. Agine, Bab-Jehová Moisésʼbo sunmakdedaed.
EXO 33:10 Israel-dulemar dakdele, mogir-bubawaryob-gwichidi dordoneg-yawagakgi aidenoniki, bela na e-neg-yawagakgi dulluu napase imakdedamalad, deyob Bab-Dummad-nug-ogannoddamalad.
EXO 33:11 Igi-dule na e-ai-ebo sunmake, deyobi Bab-Jehová Moisésʼbo asabin-asabin sunmakdaed. Geb Moisés, Bab-Dummad-ebo-sunmaksale, dulemar-danar-danar-bukwadse nonidaed. Degine, Moisés-e-bendaked-sapingwa Nun-machi-Josuéʼye-nugad, we-dordoneggi gwen bangudisulid.
EXO 33:12 Moisés Bab-Jehováʼga sogded: —Emide be anga sognagu: ‘We-dulemar be sedye.’ Degite, be anga sogsulid, doa be anba barmidoe. Emide be anga sogbalid: ‘An be-wisi be doa-gue, yeer an be-dake, be angi nueddae.’
EXO 33:13 Ar degite, begi-nueddae be an-dakedde, emigindi, an bese wilesakwaa egissundo, be-ibmar-abeged be anga oyodo. Adi, an begi mer benguegar, nued be an-dakegar. Be insao, we-dulemar be-dula gumalad.
EXO 33:14 Bab-Jehová Moisésʼga sogded: —An-sunnad an beba gudioed. Ani an baisur-ito-gudii be-imakoed.
EXO 33:15 Moisés Bab-Dummad-abin sogded: —Ar be anmarba nasulile, melle wegi-naye be anmarga sogdo.
EXO 33:16 Ar be anmarba dagsulile, ¿ar igi-degite anmar wisguosunna, be anga ibmar-sogsadi nue-napiraye? ”Ar be anmarba gudiirdi, adi, anmar magar daklemaloed, anmardi emaryobsurye, dulemar-bamaladbo akarsailaye.”
EXO 33:17 Bab-Jehová Moisés-abin sogded: —Be-anga-sognaidi an bega imakodo. Ar an be-sabed, an be-wisid be doa-gue, ar be an-ai gued.
EXO 33:18 Geb degine, Moisés Bab-Jehováʼga sogded: —An bese wilesakwaa wis egised, be-gangued-yeerdakleged be anga oyoge.
EXO 33:19 Bab-Jehová Moisés-abin sogded: —Bela an-nueddaed an bega oyogoed. An-nug-Jehová-wisguega an be-imakoed. Ar doagi an nued binsabie, an egi nued binsaoed. Ar doa an wiledakbie, a-dule an wiledakoed.
EXO 33:20 Bab-Jehová sogdebalid: —Degi-inigwele, an-wagardi be dakosulid. Ar dule bipisaale an-wagar dakosurguoed. Dule an-wagar daksale, bar dula-gudii guosulid, burgoed.
EXO 33:21 Geb degine, Bab-Jehová sogdebalid: —Wegi, an-nagabasaar-akwasiid-birgi be gwisgue.
EXO 33:22 An-gangued-yeerdakleged be-asabin-nadapidgi, akwa-mararmaid-gullugwadgi an be-ogwisguoed. An-argangi an be-ibya edugoed. Geb an begi-nasale, an-argan an oniroed.
EXO 33:23 Geb an-argan an onirisale, an-yarganbi be dakoed. An-wagardi, be dakosurguoed.
EXO 34:1 Bab-Jehová Moisésʼga sogded: “Be akwa-madareged-matabogwad iduar-be-marisgusadyob, be gannar sobbalo. A-akwa-matabogwadgi, an iduar-narmaksayob, gannar an narmakbaloed.
EXO 34:2 Degisoggu, banedse wakudaryalaba be Sinaí-yar-bur-birise naknao. A-yar-birse be anse nonikoed.
EXO 34:3 Dule-baid bipisaale beba nakosulid, dule-baid bipisaale, a-yargine, gudii guosurbalid. Deginbali, sibad-wawaadse-bakar, degi, moli-bebe-nikamaladse-bakale, bipisaale a-yar-walikaa gagan-manai guosurmalad.”
EXO 34:4 Moisés gebe-idualedyobi akwa-matargwa-matabo-nued sobsad. Geb degine, Moisés, Bab-Jehová-ega-sogsadba, wakudaryalaba gwisgualid, agi, Moisés akwa-matabogwad-semai Sinaí-yar-birise nakwided.
EXO 34:5 Geb degine, Bab-Jehová mogirba aidenonikid, Moisésʼse walik-gunonikid. Geb Bab-Jehová e-nug-wisguega Moisés-imaksad.
EXO 34:6 Bab-Jehová Moisés-asabin-nadapgua, binnasuli weyob sogded: “¡Ani an Bab-Jehová gued! ¡Ani an Bab-Jehová gued! Ani an Bab-Dummad-dutusulidid. Ani an dulemar-wiledaked-dummarbadid, Ani an nue-dulemar-wiledakedid. Ani an wissur-gwae-gwae urwedid, Ani an nue-dulemar-saberbadid. An-ibmar-soged, napiragwadid.
EXO 34:7 Ani an degisadegu dulemar-sabgumaiguadid. Dule-ibmar-isgana-imaked ibmar-isgana-imaksuliyobi an dakedid. Dule-angi-gwisgued, angi gwisgusuliyobi an dakedid. Dulega an e-isgued elibalidid. ”Degi-inigwele, dule-nue-e-isgusadba, sabsur-odurdakleged-igardi an ega mesedsegad. Babgan-isgusar, e-mimmiganse-bakar, e-wagan, e-wagan-yokorsegadse-bakar, an sabsur-odurdakedsegad.”
EXO 34:8 Geb degine, Moisés e-bebe-ebulegedse napase yog-e-wagar dulluu imaksad. Geb Bab-Jehová-nug-odummoded, weyob sogded:
EXO 34:9 “Dummad, ar nue-napiragwale, an begi nueddae be an-dakele, be anmar-abargi be gudii imake. Dummad, an wisi, we-dulemar nue-uaya-gwen-niksurmaladid, nono-dutusurmaladid. Degi-inigwele, anmar-ibmar-isgana-imakmalad, anmar-isgued, anmarga be elie. Be-dulamarga be anmar-imake.”
EXO 34:10 Bab-Jehová Moisésʼga sogded: “Nue be itogo. Ani an bemarbo igar mesoed. Ani an bemar-abargi, dulemar-baiganga-gwen-ibmar-oyoledisulid, we-napneggi-ibmar-dakledisurmalad, an imakoed. Degine, bia be dulemar-baigan-abargi be gudii gumaloe, a-dulemar ibmar-dakledisurmalad-an-bemarga-imakoed nue-dakmaloed. Ani, Bab-Jehová, ani an imakoed.
EXO 34:11 ”Emi an-bega-ibmar-sognaidba be nanadii guo. Be-asabinni an we-dulemar onogoed: Amorreo-dulemar, Canaán-dulemar, Het-dulemar, Ferezeo-dulemar, Heveo-dulemar, Jebuseo-dulemar, an onogoed.
EXO 34:12 ”Canaán-yarse be dogsokalir, dulemar-a-yargi-bukmalad-ebo melle be igar-mesdii nanamalo. Ar deyob be imakmalale, sunna ese be yardaklemalad.
EXO 34:13 Dulemar-bukmalad-ibe e-bab-dummadgan-e-ailamar be earmalo, e-akwamar-bab-dummadga-sobarmalad e-ibe be omukumalo, degine, e-bab-dummad-bundor-Asera-sobaledi, bela e-ibe be osulomalo.
EXO 34:14 ”Ar ani Bab-Jehová gadi-nobgusoggu, baid-bab-dummagan-asabin be dulluu imakosurmalad. Ar Bab-Jehová, e-nug-nugadi Gadi-Nobguedye nugad.
EXO 34:15 ”Degisoggu, we-yargi dulemar-bukmalad-ebo melle be igar-mesdii nanamalo. Ar wemala, galagwensuli na e-bab-dummadba-nanaarmalar, eba-damalaga be imakdamaloed. Degi, e-bab-dummaganga ibmar-ogumakar-ukarmalar, ega be ukmarmoye, bega sogdamaloed. Degine, a-ibmar-e-bab-dummadga-uklesad-gunnega be imakdamaloed.
EXO 34:16 Degine, bemarga sogdamaloed: ‘Anmar-sisgan be-masmalaga be ukye.’ Ar we-omegan, galagwensuli e-bab-dummaganba-nanaarmalar, be-masmala galagwensuli e-bab-dummaganba-nanaega imakdamarmogoed.
EXO 34:17 ”Melle be, or-dualed, mani-dualed, degi, esgoromar-soogi-dualed, bab-dummadga imakdii gumalo.”
EXO 34:18 “Madu-E-Inasuli-Gulleged-Iba be onogoed. Ibagugle (7), madu e-inasuli, an-bega-sogsadba, an-bega-ibagan-uksadba be gunnoed. We-iba be Abib-niigi onogoed, ar ade, Abib-niigi bemar Egipto-yargi noargusmalad.
EXO 34:19 ”Be-machi-gebesailagined, we angadga gued. Degine, moli-bebe-nikad-macheredsailagined, sibad-wawaad-macheredsailagined angadga gubalid.
EXO 34:20 Moli-uayasuid-macheredsailagined angadga gubalid. Degi-inigwele, a-muchubdi, sibad-wawaad-sapingwagwad be anga ukoed. A-moli-uayasuid-sailagined-muchub sibad-wawaad be uksulile, moli-uayasuid-sailagined-dukar be bisgoed. Be-masmala-gebesailaginmalad-muchub mani be ukoed. ” ‘Dule-wargwensaale arganagwabi anse dagosulid, anga ibmar-sedagergebed.’
EXO 34:21 ”Ibanergwa (6) be arbaoed, ibagugledgindina (7) be obunnogoed. Amba ibmar-digedgindibe, ibmar-weedgindibe, amba be obunnogoed.
EXO 34:22 ”Deginbali, be Itoged-ibaganga iba-dummad onobaloed. A-sogleged, orosgi-dakleged-trigo gebe-weleged-ibaye. Degine, birga-bergunai napi-ibmar-weleged-iba be onobaloed.
EXO 34:23 ”Birgagi ilapaa bela-machergan, an-asabin nonimaloed. Ani an, Dummad, Bab-Jehová, Israel-e-Bab-Dummad soged.
EXO 34:24 An bemar-idu dulemar-bukwadi, an bemarga onogoed, adi, bemar gatik yar-dummad nikuegar. Deyobi, birgagi ilapaa an-nug-odummogega be an-asabin-nanagwismalar, dulemar bemar-annik be-nainumar suosulid.
EXO 34:25 ”Melle ibmar-ogumakar-ukleged-e-abe, madu-ina-nikad-ebo-mesa be anga ukmalo. Degine, bemar Oburgwilegoenad-Iba-onogedgi mas-gwabgusad banedga be sabogosurmarbalid.
EXO 34:26 ”Be-Bab-Dummad-Jehováʼse-goled-negse be-nainugi-gebe-ibmar-welesad be sedoed. ‘Melle sibad-e-mimmi e-nan-nunisgi be dumalo.’ ”
EXO 34:27 Bab-Jehová Moisésʼga sogded: “We an-bega-sogsad be narmake. Ar we-an-bega-sogsadba an bebogwa, degine, Israel-dulemarbogwa, an Igar mesnaid.”
EXO 34:28 Geb Moisés Bab-Jehováʼbogwa iba-dulabo (40) ibginedba, mutikidba gudii gusad. Moisés a-ibagangi mas-guchasulid, gobsasurbalid. Agi, Moisés akwa-matargwagwadgi Bab-Dummad-Israel-dulemarbo-Igar-Mesnaid-Ambegwadi (10) narmaksad.
EXO 34:29 A-sorbali, Moisés Sinaí-yargi-gudiidgi-aideargu, akwa-matargwagwad-matabogwadgi Bab-Dummad-Israel-dulemarbo-Igar-narmakar-mesisad e-argangi sedanigusad. Ar Moisésʼdi, Bab-Dummadbo-sunmaksadbali, yar-birgi-aidedanigu, e-wagar dakar-dakar-gadanikid wissulid.
EXO 34:30 Aarón, degi, bela Israel-dulemala, Moisés-dakdemargu, Moisés-wagar dakar-dakar-daklege, bela dobee-itonadmalad, bar ese warmakbi guarsurmalad.
EXO 34:31 Geb degine, Moisés Israel-dulemarse gochad. Aarón, degi, bela Israel-dulemar-danar-danar-bukwad-e-dummagan Moisésʼse warmaknonimalad. Geb agi, Moisés amarga sunmaksad.
EXO 34:32 Geb degine, bela Israel-dulemar Moisésʼse nonimarmogad. Agine, Moisés bela Bab-Jehová-Sinaí-yargi-ega-ibmar-sogsad amarga sogsamogad.
EXO 34:33 Moisés Israel-dulemar-ebo-sunmaknaid-bergusgua, na e-wagar muswegi edusad.
EXO 34:34 Moisés Bab-Jehová-ebo-sunmakega ese nadele, e-wagargi muswe-naidi ungedaed. Geb noalile, gannar muswe e-wagargi nasikdaed. Geb degine, Moisés Israel-dulemarga sogdedaed, igi Bab-Dummad ega ibmar sogsad.
EXO 34:35 Israel-dulemar Moisés-wagar-dakdele, dakdedamalad, Moisés-wagar dakar-dakar gae. Geb degine, Moisés Bab-Dummad-ebo-sunmakedse gannar muswegi na e-wagar eduddasunnad.
EXO 35:1 Moisés bela Israel-dulemarse gochad, geb degine amarga sogded: “Weyob Bab-Jehová igar uksad, weyob be imakmaloye:
EXO 35:2 Ibanergwa (6) arbalegoed, ibagugledgindi (7), iba-islidikidid. A-ibagi, Bab-Jehováʼga obunnolegoed. Ar doa-dule a-ibagi arbaele, we-dule oburgwilegoed.
EXO 35:3 Bemar-neg-yagine, bipisaale obunnoged-ibagi soo be ogaosurmalad.”
EXO 35:4 Moisés, bela Israel-dulemar-danar-ambikunonikidga weyob sunmaksad: “Bab-Jehová sogsad: ‘Weyob be imakmaloye:
EXO 35:5 Bemar ibmar-nikadi Bab-Jehováʼga be sedamaloed. Dulemar na e-gwagegi ibmar Bab-Jehováʼga ukbi-itomaladba ibmar sedagoed. We-ibmarmar sedagoed: Olo, mani, esgoro-gordikid.
EXO 35:6 Nirbadub-arad, nirbadub-suir-akwagiid, nirbadub-ginnid, linoʼdub-nued, sibad-e-absarmar,
EXO 35:7 sibad-wawaad-machered-e-ukamar-ginnidgi-odolegaled, ibdurgan-uka-nuegan, urgomar-acaciaʼye-nugad.
EXO 35:8 Olivo-gwallu gwallu-ogaegar. Gwallu-wawad ibmar-magega guegar, degi, olivo-gwallu ina-wawadikmaladgi ebulegegar.
EXO 35:9 Akwa-nuegan-óniceʼye-nugmalad, akwa-nuegan mor-efodʼye-nugad-birgi nasikegar, degi, mor-binasgargi-nasiklegedgi nasikegarbar.’ ”
EXO 35:10 Moisés Israel-dulemarga sogdebalid: “Bela Bab-Jehová-ibmar-sogsad-sobmalaga, bela dulemar bemar-abargi nue-ibmar-wisi-sobemalad nonimalo.
EXO 35:11 Amar we-ibmarmar sobmaloed: Bab-Dummadse-goled-neg-sunna-seleged, e-neg-sunnad, e-uas-mormar, e-mor-gamalad, e-urgomar, e-suarmar, e-buarmar, e-sigmalad.
EXO 35:12 ”Deginbali, sobmarbaloed: Bab-Dummad-Israel-Dulemarbo-Igar-Mesisad-Ulu, e-suarmar, e-eduged, mor-dummad-Ulu-walik-naguoed.
EXO 35:13 ”Deginbali, sobmarbaloed: Mese, mese-suarmar, bela mesegi-ibmar-ebulemalad, degi, madu-Bab-Dummadga-ukleged.
EXO 35:14 ”Sobmarbaloed: Gwallu-sied, degi, bela eba ibmarmar-ebulegoed. E-gwallumar, degi, olivo-gwallu gwallu-ogaegar.
EXO 35:15 ”Sobmarbaloed: Ina-wawadikid-inciensoʼye-nugad-ogumakleged-aila, degi, e-suarmar. Gwallu-wawa ibmar-magega ebuleged, ina-wawadikmalad. Mormar-dummagan Neg-Sunna-Seleged-e-yawagak-dogedgi-naguoed.
EXO 35:16 ”Sobmarbaloed: Bab-Dummadga-ibmar-ogumakar-ukleged-aila, e-esgoro-gordikmalad-biir-biir-megoed, degi, e-suarmar, bela eba-ibmarmar-ebulegoed. Dii-sied-esgoro-gordikidbiid, degi, a-e-malimar.
EXO 35:17 ”Sobmarbaloed: Bab-Dummadse-goled-neg-sunna-seleged-e-galugi mormar-dummagan-ebirmaloed, e-buarmar, e-sigmalad. We-neg-sunna-seleged-e-neg-e-galu-dogedgi mor-dummad-naguoed.
EXO 35:18 We-neg-e-bargamalad, e-galu-bargamalad, e-dubmar sobmaloed.
EXO 35:19 Aarónʼga, degi, Aarón-masmalaga, Bab-Dummadse-goled-neggi-mormar-ebulemaloed sobmarbaloed. Bela we-ibmarmar sobmaloed.”
EXO 35:20 Degidgine, bela Israel-dulemar Moisés-asabin-bukmaladi ainiarmalad.
EXO 35:21 Bela dulemala, bela na e-gwagegi-ibmar-ukbi-itosmaladi, Bab-Dummad-dulemarbo-ambikued-neg-sobmalaga, agi-bela-ibmarmar-ebulemalad-sobmalaga, degine, dule-irwa-Bab-Dummadse-goledgi mor-islidikid-yomalad-sobmalaga, Bab-Jehováʼga ibmar searmalad.
EXO 35:22 Bela ibmar-ukbi-itosmaladi, machergan, degi, omegan-ugakse, we-ibmarmar senonimalad: Ordub, oluamar, sakwagi-ormar-nagumalad, argangi-or-yolemalad, degi, bela ormar-galagwensuli senonimalad. Belagwable Israel-dulemala Bab-Jehováʼga or senonimalad.
EXO 35:23 Bela dulemar nirbadub-arad-nikamalad, nirbadub-suir-akwagiid, nirbadub-ginnid, linoʼdub-nued, sibad-e-absarmar, sibad-wawaad-machered-e-ukamar-ginnidgi-odolegaled, ibdurgan-uka-nuegan, senonimalad. Bela-dulemar we-ibmar-nikamaladi, Bab-Dummadga-ukega senonimalad.
EXO 35:24 Bab-Dummadse-goled-neg-sunna-selegedgi ebulegega, dulemar mani-nikamaladi, esgoro-gordikid-nikamaladi, Bab-Jehováʼga ukdemalad. Degine, urgomar-acaciaʼye-nugad-nikamaladi, ukdemarmogad.
EXO 35:25 Deginbali, omegan-ibmar-nue-wisimalad, e-argangi-dub-sobsamaladi, Bab-Dummadga senonimalad: Nirba-dub-aradgi-sobsamalad, nirbadub-suir-akwagiidgi-sobsamalad, nirbadub-ginnidgi-sobsamalad, degi, linoʼdub-nuedgi-sobsamalad, senonimalad.
EXO 35:26 Bela omegan ibmar-nue-imakmaladi, e-gwagegi nue-imakbi-itosmaladi, sibad-e-absarmar sobsamarmogad.
EXO 35:27 Israel-dulemar-dummaganga-gudidimaladi, akwa-nuegan-óniceʼye-nugad, degi, akwamar-nuegan, mor-efodʼye-nugadgi-nasikmalaga, degi, mor-binasgargi-nasikleged-birgi-nasikmalaga, senonimalad.
EXO 35:28 Deginbali, we-ibmarmar senonimarbalid: Ina-nuegan, olivo-gwallu gwallu-ogaegar, gwallu-wawad ibmar-magegar, degi, ina-wawadikmalad obupurmakegar.
EXO 35:29 Bela Israel-dulemar, machergan, degi, omeganse-bakale, na gwagegi-ibmar-ukbi-itosmaladi, Bab-Jehováʼga na e-itogedba-ibmar-ukega senonimalad, adi, Bab-Jehováʼga ibmarmar sobegar. Ar igi Bab-Jehová-Moisésʼga-sogsagusa, deyob imaksamalad.
EXO 35:30 Geb degine, Moisés Israel-dulemarga sogded: “Nue be an-itomalo. Bab-Jehová, Uri-machi-Bezaleel onugsasad. Bezaleelʼde, Hur-e-wagwad. E-dad-dummad-Judáʼgi danikidid.
EXO 35:31 Bab-Dummad Bezaleelʼga E-Burba uksad, nue-binsaed-nikaa guegar, nue-ibmar-mag-ito guegar, nue-ibmar-wisi guegar, degi, ibmar-akar-akar-obinyegar.
EXO 35:32 Adi, ibmar-yeerdakle orgi-sobegar, manigi-sobegar, esgoro-gordikidgi-sobegar.
EXO 35:33 Deginbali, nabir akwa-nuegangi-arbaegar, akwa-nuegan ibmar-birgi siegar, nabir urgomargi-arbaegar, degi, galagwensuli ibmar-yeerdakle imakegar.
EXO 35:34 ”Bab-Dummad Bezaleelʼga, degi, Aholiabʼga nabir-dulemar-odurdaked-gurgin uksad. Aholiab Ahisamac-e-machid, e-dad-dummad-Danʼgi danikidid.
EXO 35:35 Bab-Dummad Bezaleelʼga, degi, Aholiabʼga, we-gurginmar uksad: Nabir baisursunna-ibmar-imaked, nabir-ibmar-onoged, nabir nirbadub-aradgi-ibmar-sobed, nabir-nirbadub-suir-akwagiidgi-ibmar-sobed, nabir-nirbadub-ginnidgi-ibmar-sobed, nabir-linoʼdub-nuedgi-ibmar-sobed-gurgin, uksabalid. We-dulemala, ibmar-yeerdakle sobmaladid, mormargi arbamaladid, degi, nabir na-e-itolegedba sunna ibmar-akar-akar onomaladid.”
EXO 36:1 Moisés sogdebalid: “Degisoggu, Bezaleel, Aholiabʼbogwa, Bab-Jehová-sogsagusadba Bab-Dummadse-goled-neg-sunna-selegedgi ibmar-ebulemalad bela imakmaloed. Deginbali, bela dulemar, Bab-Jehová nue-wisi-ibmar-sobega-imaksamarmogadi, degi, ega baisursunna-ibmar-imakega-imaklesbalidi, Bab-Dummadse-goled-neg-sunna-seleged-sobega, wemar-ebogwadba arbamarmogoed.”
EXO 36:2 Moisés, we-dulemarse gochad: Bezaleelʼse, Aholiabʼse, degi, bela dule-ibmar-nue-wisi baisursunna-ibmar-imakmaladse gochad. We-dulemar na e-itolegedba arbaega nonimalad.
EXO 36:3 Moisés we-dulemarga Israel-dulemar-ibmarmar-senonikid uksad. Adi, agi we-dulemar Bab-Dummadse-goled-neg-sunna-selegedgi ibmar-ebulemaloed sobegar. Israel-dulemala na e-itolegedba bane-bane wakudaryalaba Bab-Dummadga-ibmar-ukega ibmarmar senonidamalad.
EXO 36:4 Bela-dulemar-ibmar-sobnanaid deyob dakdegua, e-arbaed indaksamalad.
EXO 36:5 Geb Moisésʼga sognadmalad: “Dulemar Bab-Jehová-sogsadba-ibmar-sobega ibmar-berbelemaid doggus wilub-obichagusad. Emide, ibmar ise-obinagwaled.”
EXO 36:6 Degisoggu, Moisés dulemar-bukwadse gaya-barmisad: “Machergan, degi, omegan, Bab-Dummad-neg-sobega melle bar ibmar amimalo, melle bar Bab-Jehováʼga ibmar sedamalo.”
EXO 36:7 Ar ibmar-sobmalaga, bato ibmarmar unnigualed. Ar ise-obinagwarsoggu, dulemar ibmar-baid bar senonisurmalad.
EXO 36:8 Bela dulemar-arbananaid, napiragwad-bur-ibmar-sobmalad, Bab-Dummadse-goled-neg-sunna-seleged sobsamalad. We-dulemar, linoʼdub-nuedgi, nirbadub-aradgi, nirbadub-suir-akwagiidgi, degi, nirbadub-ginnidgi mor-dummagan-goambe (10) sobsamalad. Agi baliwitur-dummagan-querubinʼye-nugad bela nue-yeerdakle-imakar mor-dummagangi-nai sobsamarbalid.
EXO 36:9 Mormar-e-sugued, daligugledbi (7) imaksamalad, e-matardungueddi, daligwenadbi imaksamalad. Mormala bela emarbi-dungu imaksamalad.
EXO 36:10 Mormar-dummagan goatale gwadismalad, amba deyob baid goatale gwadismarbalid.
EXO 36:11 Degine, mor-goataled-gwadialed-e-dikargi e-uayamar dub-aradgi ega nasiklesad. Amba deyob mormar-baigan goatarmalad-gwadiarmalad-e-dikargi nasiklesbalid.
EXO 36:12 Mormar-gebedgi gwadulabo-gakambe (50) e-uayamar nasiksamalad. Degine, baigan-goatar-gwadiarmaladgi gwadulabo-gakambe (50) e-uayamar nasiksamarbalid. Degisoggu, e-uayamar na abin-abin nasiklesad.
EXO 36:13 Deginbali, mor-gaed-orbiid dulabo-gakambe (50) sobsamarbalid. Agi mormar oatosmalad. Degisoggu, Bab-Dummadse-goled-neg-sunna-seleged-e-mor-dummagan unnila gogwenayob gunonisunnad.
EXO 36:14 We-dulemar, Bab-Dummadse-goled-neg-sunna-seleged-edugega, sibad-absarmargi mor-dummagan sobsamalad. Sibad-absarmar mor-dummaganga goambe-gakagwensak (11) imaksamalad.
EXO 36:15 Mormar-dummagan-goambe-gakagwensakad (11) bela na-emarbi-dungu imaksamalad. Mormar-e-sugued, daligugle-gaka-abala (7½) sugued. E-matardungueddi, daligwenad.
EXO 36:16 We-mormar-dummagan, goatar gwadismalad. Degine, baiddi, goanergwa (6) gwadismalad.
EXO 36:17 Geb a-sorba, mor-dummagan-goatar-gwadilealed-dikarba, gwadulabo-gakambe (50) e-uayamar nasiksamalad. Amba deyob baigan-gwadilesmalad-dikarba, gwadulabo-gakambe (50) e-uayamar nasiksamarbalid.
EXO 36:18 Deginbali, esgoro-gordikidgi mor-gaed dulabo-gakambe (50) soblesbalid, adi, agi bela neg-edugegar, unnila gogwennayob gunonisunnad.
EXO 36:19 Geb degine, Bab-Dummadse-goled-neg-sunna-seleged-edugega, sibad-wawaad-machered-e-ukamar-ginnidgi-odolegaled, gwadi-gwadi imaksamarbalid. Adi, sibad-absarmor-dummagan-birgi ogillegegar. Geb sibad-wawaad-machered-e-ukamar-ginnidgi-odolegaled-birgi ogillegega, ibdurgan-uka-nuegan gwadi-gwadi imaksamarbalid.
EXO 36:20 Deginbali, Bab-Dummadse-goled-neg-sunna-selegedga urgomar-acaciaʼye-nugad sobsamalad. We-urgomala, bela nue-innikii ogwichismalad.
EXO 36:21 We-urgomar, dalibo-abala-sugu imaksamalad. E-matardungueddi, achapaa-nika imaksamalad.
EXO 36:22 We-urgomargi, e-nagmar war-warbo-nika imaksamalad, adi, nabir urgomar naga-nagaba matak-matak gwisguegar. Bab-Dummadse-goled-neg-sunna-selegedga bela degibi urgomar imaksamalad.
EXO 36:23 Weyob Bab-Dummadse-goled-neg-sunna-selegedga urgomar-mergu imaksamalad: Mata-dulagwen (20) dad-nakwed-argan-nuedsik-ebugegar.
EXO 36:24 We-urgomar-dulagwenad-urba (20), dulabo (40) e-sigmalad manibi sobsad. Urgomar-irbali gwa-gwabo e-sigmalad imaksamalad, adi, urgomar-e-nagmar agi odogegar.
EXO 36:25 Bab-Dummadse-goled-neg-sunna-seleged dad-nakwed-argan-sapiledsik-ebugegala, urgomar-dulagwen (20) sobsamarbalid.
EXO 36:26 E-sigmalad, manibii gwadulabo (40) sobsamarbalid. Urgomar-iliba, gwa-gwabo e-sigmalad sobsamalad.
EXO 36:27 Bab-Dummadse-goled-neg-sunna-seleged dad-argwanedsikidga urgomar-matanergwa (6) sobsamalad.
EXO 36:28 Bab-Dummadse-goled-neg-sunna-seleged na abingunanaidga urgomar-matabo sobsamarbalid.
EXO 36:29 We-urgomar darbo oatosmalad. Geb birgi e-nonogi or-dummad-naid yosmalad, adi, melle bar urgo-matabogwad-ungega, weyobi imaksamalad.
EXO 36:30 Degisoggu, urgomar bela matabaabak (8) sobsamalad, e-siged-mani-biid gwaambe-gakanergwa (16) sobsamalad. Bela urgomar-iliba, e-sigmalad gwa-gwabo sobsamalad.
EXO 36:31 Deginbali, urgo-warakwagana-acaciaʼye-nugad sobsamarbalid: Urgo-warakwagana-walatar Bab-Dummadse-goled-neg-sunna-seleged-e-dikar-soggwensikidga sobsamalad.
EXO 36:32 Degine, baid-dikarsikidga, walatar sobsamarbalid, degine, e-dikar-yargansikid-dad-argwanedsikidga urgo-warakwagana walatar sobsamarbalid.
EXO 36:34 Urgomar-ebilis egi ormar matak-matak nasiksamalad, degine, e-olua-dummagandi orbi sobsamalad. Degine, Urgo-warakwagana-ebilis egi ormar matak-matak nasiksamarbalid.
EXO 36:35 Deginbali, mor-dummad nirbadub-aradgi, nirbadub-suir-akwagiidgi, nirbadub-ginnidgi, degi, linoʼdub-nuedgi sobsamalad. We-mor-dummadde nue-yeerdakle-imakar, baliwiturmar-querubinʼye-nugad egi-sobar imaksamalad.
EXO 36:36 We-mor-dummad-nasikegala, acacia-buarmar-walabake ogwichismalad. A-buarmar-ebilis, egi ormar matak-matak nasiksamalad. Degine, mor-gamalad bela orbi sobsabalid. Deginbali, buarmar-e-gaed, adi, gwabake manibi sobsad.
EXO 36:37 Deginbali, Bab-Dummadse-goled-neg-sunna-seleged-yawagakga mor-dummad imaksamarbalid, nirbadub-aradgi, nirbadub-suir-akwagiidgi, nirbadub-ginnidgi, degi, linoʼdub-nuedgi imaksamalad. We-mor-dummadde, nue-yeerdakle imakaled.
EXO 36:38 A-yawagakgindi, buarmar-walatar ogwichismalad, degine, mor-gamalad sobsabalid. A-buarmar-ebilis egi ormar matak-matak nasiksad, degine, e-siged-gwaataledi, esgoro-gordikidgi sobsad.
EXO 37:1 Bezaleel, Bab-Dummad-Dulemarbo-Igar-Mesisad-Ulu urgomar-acaciaʼye-nugadgi sobsad. E-suguedi, achaatar, e-matardungued, achapaa, degine, e-nibgued, achapaa-nibgu sobsad.
EXO 37:2 Yaba, olo-nued-sunnabi nasiksad. Birgi, deyob olo-sunnabi egi nasiksabalid. Birgi, bela-ebiris e-mullugwad olobi nasiksabalid.
EXO 37:3 Deginbali, olua-dummagan-gwabake-sobega or dusbalid. Adi, ulu-e-dikar-bergunaid-sogbakegwadgi gwa-gwagwen nasikegar. Olasu-gwabo dikar-gwensaksik-nasikega sobsad. Baid-dikarba, gwabo-nasikega sobsabalid.
EXO 37:4 Deginbali, urgo-acaciaʼye-nugad suitii warbo imaksabalid. We-suarmar-walaganagi or ebiris nasiksad.
EXO 37:5 Degine suarmar-walagana-suid ulugi olasu-dummagan-nanaid-yaba odosmalad, adi, nabir ulu selegegar.
EXO 37:6 Deginbali, ulu-edugedga or-nued imaksabalid. E-sugued, achaatar-nika imaksad, e-matardungueddi, achapaa-nika imaksad.
EXO 37:7 Degine, ulu-eduged-birgi, e-dukusik-e-dukusik-ogwisguega, baliwitur-dummagan-querubinʼye-nugad walabo orbi mardogi binna-binna sobsad.
EXO 37:8 Baliwitur-dummagan-querubin ulu-eduged-birgi gwensak e-dukusik sobsad. Baid e-dukusik, deyob sobsabalid. Ulu-edugedba-mesa querubin-warbogwad, ulu-eduged-e-duku-dukusik gwigwichi sobsad.
EXO 37:9 Querubinʼmala ulu-eduged-birgi asabin-asabin sakan-nallaa gwismalad. E-sakangine, ulu-eduged odukunanaid. E-wagardi, ulu-edugedgi ataknanaid.
EXO 37:10 Deginbali, Bezaleel, urgo-acaciaʼye-nugadgi mese-sobsabalid. E-sugued, achabake-nika imaksad, e-matardungued, achabo, e-nibgueddi, achapaa-nika imaksabalid.
EXO 37:11 Bela we-mesegi or-nued nasiksad, degine, bela e-dikarba ebilis or mulluu mesisbalid.
EXO 37:12 Deginbali, mese-e-dikar-bela-ebilis wis-nibakwasaar e-matardungued argan-matagwen imaksad. Nibakwaa-imaksad-birgi, or mulluu mesisad.
EXO 37:13 Deginbali, oluaduk-dummagan-gwabake-sobega, ormar dusbalid. We-oluaduk-dummagan-gwabakegwadi, mese-dikar-sogabake-abingunanaidgi nasiksad. E-malimar-walabakegwad-iliba nasiksad.
EXO 37:14 Mese-gakuli-mulluu-mesilesad-urba, oluaduk-dummagan-gwabake-nasiksadgi suarmar-suid ododamalad, adi, nabir mese selegegar.
EXO 37:15 Mese-selegega, suar-acaciaʼye-nugad-walagana suitii imaksamalad. A-birgi, bela ebiris or nasiksamalad.
EXO 37:16 Deginbali, Bezaleel, mese-birgi ibmarmar-sigoedi, or-sunnabi sobsabalid: Batemar, bate-dummagan, bormomar. Degine, nog-dummagan Bab-Dummadga-ibmar-diregwad-uklegega sobsabalid.
EXO 37:17 Deginbali, gwallu-sied orbi sobsabalid, mardogi binna-sarsoar sobsad. E-mali, e-sakwamar, e-nogmar, e-abingamalad, e-dutumar, bela-wemar unnila soggwenna gued.
EXO 37:18 Gwallu-siedgi e-dikarba walanergwa (6) e-sakwamar nonanaid. Gwensaksik, e-sakwa-warbaa nonaid. Baidsik, e-sakwa warbaa nonaibalid.
EXO 37:19 E-sakwa-wargwengi e-nogmar-gwapaa nur-matargana-e-dutuyob-dakle imaksad. Degine, dutu-abingaed-nika, geb, e-dutu-nika imaksad. Deyob, e-sakwamar-bamaladgine imaksabalid.
EXO 37:20 Gwallu-sied-e-wargi, nogmar gwabake nur-matargana-e-dutudaklegeyob sobsad. Degi, e-noggi e-dutu-abingamalad, degi, e-dutumar sobsabalid.
EXO 37:21 Gwallu-sied-e-sakwa-warbogwad e-wargi-yolenaidgi e-abingaed-gwagwen, sobsad, deginbali, e-abingaed-baid-gwagwen, e-sakwa-warbogwad-baid-urba sobsabalid, deginbali, amba abingaed-baid-gwagwen e-sakwa-warbogwad-baid-urba sobsabalid. Degibi gwallu-sied e-sakwa-walanergwad-urba imaksad.
EXO 37:22 E-dutu-abingamalad, degi, e-sakwamala, unnila bela gwennaa or-nuedbi-imakaled. Soblesadi, mardogi binnaa-sarsogar soblesad.
EXO 37:23 Deginbali, e-gwallu-gwagugled (7) bela or-nuedbi imaksabalid. E-gwillodub-sikmalad, degi, e-bate-burwigana bela or-nuedbi imaksabalid.
EXO 37:24 Or-nued-aidikued nibir-dulapaa-gakambe-gakabake (74) ebusad, bela e-ibmar-burwiganase-bakar deyob aidiku imaksad.
EXO 37:25 Deginbali, Bezaleel ina-wawadikid-ogumaked-aila sobsabalid. A-aila-sobegala, urgomar-acaciaʼye-nugad ebusad. E-sugued achabo, e-matardungued achabo-nika sobsad. E-suguedi, e-matardunguedbo, emar dungued. E-nibgueddi, dali-abala nibgued. E-moli-bebegiid-gwichid ailaba-mesa imakaled.
EXO 37:26 Or-nued aila-birgi, aila-dikarba, degi, e-moli-bebegiidgi nasiksad, degine, e-dikar-ebilis or mulluu mesisad.
EXO 37:27 Deginbali, or-mullugalad-urba, olua-dummagan gwabo e-dikarmargi nasiksad. Deyob abinbela nasiksad, adi, agi nabir suarmar-suitigwad odogegar, nabir selegegar.
EXO 37:28 We-urgomar-suitigwad urgo-acaciaʼye-nugadgi sobsamalad. Geb a-birgine, or nasiksamalad.
EXO 37:29 Deginbali, gwallu-wawa-islidikid ibmar-magega-ebuleged imaksabalid. Degine, ina-wawadikmalad-ibmarba-oburarsulid, yeer-yapanmalad, dule-ina-wawad-sobmaladyob imaksamalad.
EXO 38:1 Deginbali, Bezaleel urgo-acaciaʼye-nugadgi Bab-Dummadga-ibmar-ogumakar-ukleged-aila sobsabalid. E-sugued, daligwen-gaka-achabo, e-matardungued, daligwen-gaka-achabo-nika sobsad. E-sugued, degi, e-matardungued, emarbi imaksad. E-nibgueddi, bisgipaa-nika imaksad.
EXO 38:2 We-aila mullugwad-sogabake-abingunaidgi moli-bebegiid ogwichisad. We-moli-bebegiid ailaba-mesa sobsad. Bab-Dummadga-ibmar-ogumakar-ukleged-aila-birgi esgoro-gordikid egi nasiksad.
EXO 38:3 Deginbali, bela Bab-Dummadga-ibmar-ogumakar-ukleged-ailagi we-ibmar-ebulemaloed sobsabalid: Buru-simalad-bormomar. Buru-weemalad-wesar-dummagan, Abe-bomied-nog-dummagan. San-obin-obin-saed-iko-dummagan. Soo-seed-bormomar. Bela-wemala esgoro-gordikidgi sobsad.
EXO 38:4 Bab-Dummadga-ibmar-ogumakar-ukleged-ailaga, san-nared-saki-sakid esgoro-gordikidgi sobsad. We-san-nared-saki-sakid Bab-Dummadga-ibmar-ogumakar-ukleged-aila-yagi, negabaladgi nasiksad.
EXO 38:5 Deginbali, olua-dummagan-sobega esgoro-gordikid dusbalid. Deyob imaksad, adi, san-nared-saki-sakidgi we-olua-dummagan-gwabake nasikega, adi, agi suarmar-suigan odogegar.
EXO 38:6 Urgo-acaciaʼye-nugad-walagana suitii sobsad. Geb a-suarmar-birgi, esgoro-gordikid nasiksad.
EXO 38:7 Geb degine, Bab-Dummadga-ibmar-ogumakar-ukleged-aila-dikarba oluaduk-dummagan-nanaid-yaba suarmar-walagana odosad, adi, nabir aila selegegar. Bab-Dummadga-ibmar-ogumakar-ukleged-aila ollor sobaled. We-aila urgomargi sobaled.
EXO 38:8 Bezaleel, dii-sied, degi, e-sigedga-gued, esgoro-gordikidgi sobsabalid. We-sobegala, omegan-Bab-Dummadse-goled-neggi-arbamalad e-isbemar-esgoro-gordikidgi-sobaled ebusad.
EXO 38:9 Bezaleel, Bab-Dummadse-goled-neg-sunna-seleged-e-neg-imba, degi, e-galu sobsabalid. Dad-nakwed-argan-nuedsik, a-neg-imba-e-galuga, mor-dummagan imaksad: Lino-mor-nued dali-dulagwen-gakatar-sugu (25), sobsad.
EXO 38:10 E-buarmar, dulagwen (20) mergued. Egi-sigmalad, dulagwen (20) mergubalid, bela esgoro-gordikidgi sobaled. Buarmar-e-nonomar, e-gamalad, bela manibi sobaled.
EXO 38:11 Bab-Dummadse-goled-neg-sunna-selegedgi dad-nakwed-argan-sapiledsik, mor-dummad dali-dulagwen-gakatar-sugu (25) naibalid. E-buarmar, dulagwen (20) gwigwisbalid. Degi, e-sigmalad esgoro-gordikidgi dulagwen (20) imakarbalid. E-gamalad, degine, e-buar-nonomar, manigi sobarbalid.
EXO 38:12 Dad-argwanedsik mor-dummad-naidi, daliambe-gakabo-abala (12½) sugued. E-buarmar, warambe (10) gwigwichid, degi, e-siged, gwaambebalid (10). E-gamalad, degi, e-buar-nonomar, manigi sobarbalid.
EXO 38:13 Dad-nakwedsik mor-dummad-naidi, daliambe-gakabo-abala (12½) sugued.
EXO 38:14 E-yawagak-dikarsiki, mor-dummad-naidi, dalipaa-gaka-bisgipaa sugued. E-buarmar walapaa, degine, e-sigmalad, gwapaa sobarbalid.
EXO 38:15 Degine, yawagak-baid-dikarbali, mor-dummad dalipaa-gaka-bisgipaa-sugu naid. Degi, buarmar, walapaa, degi, e-sigmarmogad, gwapaa sobarbalid.
EXO 38:16 Mor-dummagan neg-galugi-nanaidi, bela lino-mor-nuegan naed.
EXO 38:17 E-buarmar-sigmalad bela esgoro-gordikidgi sobaledbiid. E-gamaladi, degi, e-olua-dummagandi, manibi sobaled. Deginbali, e-buar-nonomargi, bela manibi matak-matak ebiris naid. Bela Babse-goled-neg-e-buarmar-bukwad-e-olua-dummagan bela manibiid.
EXO 38:18 Yawagakga neg-imba-dogedgi mor-dummad-naidi, mor ise-nue-sobar, bela-bela nue-yeerdakle-imakar naid. We-mor-dummad-sobaledi, we-dubmargi sobaled: Nirbadub-aradgi, nirbadub-suir-akwagiidgi, nirbadub-ginnidgi, degi, linoʼdub-nuedgi sobaled. E-suguedi, daliataled. E-nibgueddi, daligwen-gaka-bisgise nibgued. We-mor-dummagan mor-dummagan-neg-imbagi-nanaidyob-dungu imaklesad.
EXO 38:19 E-buarmar, walabake gued, e-sigmalad, gwabakebalid. Wemar, esgoro-gordikidgi sobaled. E-gamalad, e-olua-dummagan manigi sobaled, degi, e-buar-nonomargi, bela manibi matak-matak ebiris naid.
EXO 38:20 Bab-Dummadse-goled-neg-sunna-seleged-e-bargamalad, degi, neg-imba-e-galu-ebirnaid-e-bargamalad, bela esgoro-gordikidgi sobaled.
EXO 38:21 Bab-Dummad-dulemarbo-Igar-Mesisad-neg-sunna-selegedgi ibmarmar-ebulesad ebislesgusad. Leví-e-wagan, Moisés-sogedba ibmar-ebismalaga arbasmalad. Geb Aarón-dule-irwa-Bab-Dummadse-goled-machi-Itamar, ibmarmar-ebislesad narmaksad.
EXO 38:22 Uri-machi-Bezaleel, bela Bab-Jehová igi Moisésʼga sogsagusa, deyob ibmar imaksad. Bezaleel Hur-e-wagwad, dad-dummad-Judáʼgi danikidid.
EXO 38:23 Ahisamac-machi-Aholiab, Bezaleel-bendakega gusad. Aholiab, dad-dummad-Danʼgi danikidid. Aholiabʼde, esgorogi-ibmar-sobed-duled, nabir-ibmar-akar-akar-onogedbalid. Deginbali, nabir we-dubmargi ibmar-sobedbalid: Nirbadub-aradgi, nirbadub-suir-akwagiidgi, nirbadub-ginnidgi, degi, linoʼdub-nuedgi mor-yeerdakle sobedid.
EXO 38:24 Israel-dulemar Bab-Dummad-neg-sunna-selegedgi-ebulegega, Bab-Dummadga-or-uksamalad, bela ebusmalad. Nibir-milibo gaka dulabakebak-gakambe-gakatar (2,195), ebusmalad. Bab-Dummad-neggi nibirgi-ibmar-wilubsalegedba imaksamalad.
EXO 38:25 Dulemar-bukwad-ebislesadba, e-mani, nibir-miligugle gaka dulataled-ilatar gaka dulabo-gakambe (7,550) gusad. Bab-Dummad-neggi nibirgi-ibmar-wilubsalegedba imaksamalad.
EXO 38:26 Bela-dulemar-birga-dulagwen-gaka-nikmaladi (20+), mili-dulataled-ilanergwa-gakapaa gaka dulataled-ilatar gaka dulabo-gakambe-mergu (603,550) daklealid. Wemala, e-dule-irba mani-gramo-nergwa uksamalad. Bab-Dummad-neggi nibirgi-ibmar-wilubsalegedba imaksamalad.
EXO 38:27 Deginbali, Bab-Dummadse-goled-negga e-sigmalad-sobega, degi, mor-dummad-naidga e-sigmalad-sobega, mani, nibir-miligugle gaka dulataled-ilatar (7,500) ebulesbalid. E-siged-dulatargi (100), mani, nibir-miligugle gaka dulataled-ilatar (7,500) ebulesad. Degisoggu, e-siged-iliba nibir-dulapaa-gakambe-gakatar (75) ebulesad.
EXO 38:28 Mani-gwabgusadgindi buarmar-gamalad sobsad, Degine, buar-e-nonomar, degi, e-olua-dummagan sobsabalid.
EXO 38:29 Dulemar esgoro-gordikid nibir-miliatar gaka dulataled-ilapaa gakambe (5,310) uksamalad.
EXO 38:30 We-esgoro-gordikidgi Bab-Dummadse-goled-neg-sunna-seleged-e-yawagak-siged, degine, Bab-Dummadga-ibmar-ogumaker-ukleged-aila, sobsamarbalid. Agine, san-nared-saki-sakid sobsamarbalid, degine, a-ailagi-ibmar-ebulemalad bela sobsamarbalid.
EXO 38:31 Amba Bab-Dummadse-goled-neg-sunna-seleged-e-sigmalad, e-yawagak-e-sigmalad esgoro-gordikidgi sobsamalad. Degine, bela a-neg-bargamalad, degi, bela e-galu-bargamalad-dikarba-gwigwismalad, esgoro-gordikidgi sobsamarbalid.
EXO 39:1 Dule-irwa-Bab-Dummadse-gormalad-mormar nirbadub-aradgi, nirbadub-suir-akwagiidgi, nirbadub-ginnidgi, mor sobsamalad. We-mor-yoi, Bab-Dummadse-goled-negse dogdedamalad. Amba deyobi, Aarónʼga mor-islidikid imaksamarbalid. Igi Bab-Jehová, Moisésʼga sogsagusa, deyob imaksamalad.
EXO 39:2 Bezaleel mor-efodʼye-nugad amba deyob imaksabalid. A-imakega, we-dubmar ebusad: Ordub, nirbadub-arad, nirbadub-suir-akwagiid, nirbadub-ginnid, degi, linoʼdub-nued.
EXO 39:3 Or-matargwa-matargwa imaksamalad, degine, gara-gara dubga siksamalad, adi, nirbadub-aradgi, nirbadub-suir-akwagiidgi, nirbadub-ginnidgi, degi, linoʼdub-nuedgi, ise-nue-yeerdakle imakegar.
EXO 39:4 Degine, mor-efodʼye-nugad-e-gukingi nabir-atinned imaksamarbalid, adi, agi e-dukugi abin atogegar.
EXO 39:5 Mor-molidubga-gunaidi, mor-efodʼba-baka-mesa naid. We-mor-molidub amba deyob we-dubmargi imakarmogad: Ordubgi, nirbadub-aradgi, nirbadub-suir-akwagiidgi, nirbadub-ginnidgi, degine, linoʼdub-nuedgi imakaled. Igi Bab-Jehová Moisésʼga sogsagusa, deyob imaksamalad.
EXO 39:6 Akwamar-óniceʼye-nugad-nue-sobsamaladi, or-birgi sismalad. Agine, wilub-nasikega-imakdamaladyob imaksamalad. Agi Israel-masmala-e-nug nasiksamalad.
EXO 39:7 Mor-efodʼye-nugad-e-gukingi nasiksad, adi, a-akwamargi Israel-dulemar-sogambe-gakabogwad (12) insaledii guegar. Igi Bab-Jehová Moisésʼga sogsagusa, deyob imaksamalad.
EXO 39:8 Bezaleel, mor-binasgargi-nagued, nue-yeerdakle, mor-efodʼye-nugad-imakaledyob imaksabalid. We-dubmargi imakaled: Ordubgi, nirbadub-aradgi, nirbadub-suir-akwagiidgi, nirbadub-ginnidgi, linoʼdub-nuedgi, imaksad.
EXO 39:9 Deginbali, mor-binasgargi-nagued-e-sugued, degi, e-matardungued, bela emarbiid, degi, darbobalid. We-mor nubyaa-imaksale, e-sugued, degi, e-matardungued, achagwenad.
EXO 39:10 We-mor-birgine, akwamar-nuegan-ilemakar-sogabake osismalad: Ile-soggwengine, we-akwamar osismalad: Akwa-sardioʼye-nugad, akwa-topacioʼye-nugad, akwa-carbuncloʼye-nugad. Weyob ile-soggwengi bukwad.
EXO 39:11 Ile-sogbogine, we-akwamar osismarbalid: Akwa-esmeraldaʼye-nugad, akwa-zafiroʼye-nugad, akwa-diamanteʼye-nugad. Weyob ile-sogbogi bukwad.
EXO 39:12 Ile-sogbaagi, we-akwamar osismarbalid: Akwa-jacintoʼye-nugad, akwa-ágataʼye-nugad, akwa-amatistaʼye-nugad. Weyob ile-sogbaagi bukwad.
EXO 39:13 Ile-sogbakegi, we-akwamar osismarbalid: Akwa-beriloʼye-nugad, akwa-óniceʼye-nugad, akwa-jaspeʼye-nugad. Weyob ile-sogbakegi bukwad. Bela we-akwamar-mor-birgi-bukwadi, or-ega-imaklesad-imbaba osismalad.
EXO 39:14 Akwa-nuegana gwaambe-gakabo (12) gued, Israel-masmala-merguedba, degi, akwa-gwa-gwagwengi e-nugmar ilibali narmakar nanaid. Igi wilub-nasikega imakdamala, deyob Israel-dulemar-sogambe-gakabogwad-e-nugmar (12) egi narmakar nanaid.
EXO 39:15 Mor-binasgargi-naguedga ordub-nued sinni-sinni imaksamarbalid.
EXO 39:16 Deginbali, akwamar-e-sigoed gwabo orbi imaksamalad, degine, olua-gwabo orbi imaksamarbalid. Oluamar-gwabogwad mor-binasgargi-nagued-e-dukumar-sogbogwadgi nasiksamalad.
EXO 39:17 Geb degine, ordubmar-sinni-sinnid-giabogwad mor-binasgargi-nagued-e-dukugi-olua-gwabogwad-naidgi odosad.
EXO 39:18 Geb deginbali, amba ordubmar-sinni-sinnid-e-duku-sogbogwad ormar-sigedgi, mor-efodʼye-nugad-e-gukingi asabin nasiksamalad.
EXO 39:19 Deginbali, orbi olua-gwabo imaksamarbalid. Mor-binasgargi-nagued e-dukumar-bergunaidgi, asabin-urbalidgi nasiksamarbalid.
EXO 39:20 Deginbali, olua-gwabo orbi imaksamarbalid, mor-efodʼye-nugad-gukingi asabin urbali makaled-waliksaar, mor-sadergi-nagued-birgi-nasikega imaksamalad.
EXO 39:21 Deyobi, mor-binasgargi-nagued-e-oluamargi mor-efodʼye-nugad-e-oluamar-ebo dub-aradgi edichamalad, adi, mor-efodʼye-nugad-e-mor-sadergi-nagued-birgi, mor-binasgargi-naguedgi, mer bachikii guegar. Igi Bab-Jehová-Moisésʼga-sogsa, deyob imaksamalad.
EXO 39:22 Deginbali, mor-dummad-efodʼye-nugad bela mor-aradgi nue-sobar imaksamalad.
EXO 39:23 E-negabargi, yaa-olloo nono-odogega mor-gammuga imaksamalad. Mor-gammu-e-dikarba, melle achirmakega, bela-ebilis dubgi sobsamalad.
EXO 39:24 Mor-dummad-e-nag-dukugi sapi-granada-e-sanyob-dakleged nirbadub-aradgi, nirbadub-suir-akwagiidgi, nirbadub-ginnidgi, linoʼdub-nuedgi-sobar imaksamalad.
EXO 39:25 Deginbali, gapan-burwigana olobiid imaksamarbalid. We-gapan-burwigana, bela mor-e-nag-duku-ebilis sapi-granada-e-sanyob-dakleged imba-imbagi nasiksad.
EXO 39:26 Gapan-bipigwad-gwensak, a-dikarba sapi-granada-e-sanyob-dakleged nasiksad. Deyob bela muchub-muchub mor-dummad-suitigwad e-nag-ebilis nasiksamalad. We-mor, dule-irwa-Bab-Dummadse-goled, Bab-Dummadse-gornadele, ebuged. Igi Bab-Jehová Moisésʼga sogsa, deyob imaksamalad.
EXO 39:27 Deginbali, Aarónʼga, degi, e-masmalaga mor-dummad-suitigwad lino-mor-nuedgi-sobar imaksamarbalid.
EXO 39:28 Deginbali, mor-gurgin-ebirmakaled lino-mor-nuedgi, e-yeerdaklemalad imaksamarbalid. Amba linoʼdub-nuedgi garson-bipi-urba-yoleged imaksamarbalid.
EXO 39:29 Deginbali, morgo-dub-sadergi-nagued we-dubmargi sobsamarbalid: Linoʼdub-nuedgi, nirbadub-aradgi, nirbadub-suir-akwagiidgi, nirbadub-ginnidgi, ise-nue-sobar, bela-bela-nue-yeerdakle imaksamalad. Igi Bab-Jehová Moisésʼga sogsa, deyob imaksamalad.
EXO 39:30 Deginbali, or-nued-matarkwaa sobsamarbalid. We-or-nued-matargwagwadgi wilub-nasikega-imakdamaladyob we-gayaburba nasiklesad: “BAB-JEHOVÁʼGA SWILIDIK-NUGSALEGALED.”
EXO 39:31 We-or-matargwagwadga dub-arad nasiksamalad. Adi, we-dub mor-gurgin-birgi atinegar. Igi Bab-Jehová Moisésʼga sogsa, deyob imaksamalad.
EXO 39:32 Weyob Bab-Dummadse-goled-neg-sunna-seleged, sobsa gusmalad. We-nega bilebalid, Bab-Dummad-dulemarbo-ambikued-negye. Ar igi Bab-Jehová Moisésʼga sogsa, deyob Israel-dulemar sobsamalad.
EXO 39:33 Bab-Dummadse-goled-neg-soblesad Moisésʼga uksamalad, degi, we-ibmarmar-egi-ebulegoed bela ega uksamarbalid: Bela mor-gamalad, e-urgomar, e-suar-walagana, e-buarmar, degi, e-sigmalad.
EXO 39:34 E-sibad-wawaad-machered-e-ukamar-ginnidgi-odolegaled, ibdurgan-uka-nuegan, degi, mor-dummad Bab-Dummad-Dulemarbo-Igar-Mesisad-Ulu-naba-naguoed.
EXO 39:35 Bab-Dummad-Dulemarbo-Igar-Mesisad-Ulu, e-suarmar-suigan, degi, e-eduged.
EXO 39:36 Mese, bela eba-ibmarmar-ebuleged, degi, Bab-Dummad-asabin-madu-ega-ukleged.
EXO 39:37 Gwallu-sied-olobiid-imakaled, e-gwallumar, gwallumar-bela-ilekwaa-silegoed, bela-ibmarmar-gwalluba-ebulemalad, degi, e-gwallu-diimar.
EXO 39:38 Bab-Dummadga-ibmar-wawadik-ogumakar-ukleged-aila-olobiid, gwallu-wawad magega-ebuleged, ina-wawadikid, degi, mor-dummad Bab-Dummadse-goled-neg-sunna-seleged-yawagak-dogedgi naguoed.
EXO 39:39 Bab-Dummadga-ibmar-ogumakar-ukleged-aila esgoro-gordikidgi sobaled, esgoro-gordikidgi san-nared-saki-sakid sobaled, e-suarmar-walagana, degi, bela eba-ibmar-ebulemalad, E-dii-sied, degi, e-siged.
EXO 39:40 Mor-dummagan e-galugi naguoed, e-buarmar, egi-sigmaloed, degine, e-mor-dummad neg-imba-dogedgi naguoed. E-dubmar, e-bargamalad, degi, bela Bab-Dummadse-goled-neg-sunna-seleged dulemarbo-danar-ambikued-neggi ibmar-ebulemalad.
EXO 39:41 Deginbali, Bab-Dummadse-goled-neggi dule-irwa-Bab-Dummadse-golega e-mormar-ebulemaloed. Dule-irwa-Bab-Dummadse-goled-Aarón-mormar-islidikid-ebugoed, degi, Aarón-e-masmala dulemar-irwa-Bab-Dummadse-gorsokalir, mormar-ebumaloed. We-ibmarmar Moisésʼga uksamalad.
EXO 39:42 Ar igi Bab-Jehová Moisésʼga igar-uksa, bela deyobi Israel-dulemar ibmar imaksamalad.
EXO 39:43 Moisés bela ibmar-imaksamalad argasad. Ar Moisés daksagua, Israel-dulemar Bab-Jehová-sogsadba bela ibmar-imaksamala, a-dulemargi ise-nued binsasad.
EXO 40:1 Geb degine, Bab-Jehová Moisésʼga sunmakded, ega sogded:
EXO 40:2 “Gebe-nii-onoded ibagwengi, anse-goled-neg-sunna-seleged be sioed. We-negde, dulemar-anbo-ambikued-negad.
EXO 40:3 A-negyabali, Bab-Jehová-Dulemarbo-Igar-Mesisad-Ulu be sioed. Geb we-Ulu-idu, mor-dummad be nasikoed.
EXO 40:4 Mor-naid-idu, mese be sioed, a-mese, nue-ise-nudakar be sioed. Degine, gwallumar-sied be sibaloed, degine, e-gwallumar ega be ogaoed.
EXO 40:5 Anga-ina-wawadikmalad-ogumakar-ukleged-aila-olobiidi, Bab-Jehová-Dulemarbo-Igar-Mesisad-Ulu-irwa mor-naid-asabin, be sioed. Degine, anse-goled-neg-sunna-seleged-doged-asabin, mor-dummad be nasikoed.
EXO 40:6 ”Geb a-sorbali, anse-goled-neg-sunna-seleged dulemar-anbo-ambikued-negye bilebalid, a-asabin, anga-ibmar-ogumakar-ukleged-aila be sioed.
EXO 40:7 Geb degine, dulemar-anbo-ambikued-neg, degi, anga-ibmar-ogumakar-ukleged-aila, amar negabargi dii-sied be sioed. Geb degine, dii-siedgi dii be enogoed.
EXO 40:8 Geb napidgine, e-dikarba galu be imakoed. Geb a-galu-dogedgi mor-dummad be nasikoed.
EXO 40:9 ”Geb a-sorbali, gwallu-wawad-magega-ebuleged, a-gwallu-wawadgi anse-goled-neg-sunna-seleged, degi, bela-agi-ibmarmar-bukwadi be magoed. Adi, deyob we-ibmarmar angadgarbi guoed.
EXO 40:10 Deginbali, anga-ibmar-ogumakar-ukleged-aila, degi, bela e-ibmarmar, gwallu-wawad-magega-ebulegedgi be mage-mage saoed. Adi, deyob we-ibmarmar angadgarbi guoed.
EXO 40:11 Amba deyobi, dii-sied, degine, e-siged, gwallu-wawad-magega-ebulegedgi be magbaloed. Adi, deyob we-ibmarmar angadgarbi guoed.
EXO 40:12 ”Geb a-sorbali, Aarón, degi, e-masmala, dulemar-anbo-ambikued-neg-e-yawagakse be sedoed. Geb amar diigi be ogoed.
EXO 40:13 Geb Aarónʼga be e-mor-islidikmalad yooed. Geb gwallu-wawad egi be eogoed. Geb anga-arbaega be Aarón-onugsaoed, adi, dule-irwa-anse-goledga guegar.
EXO 40:14 Geb a-sorbali, Aarón-e-masmala bese warmakega be imakoed. Geb degine, ega mor-dummad-suitigwad be yooed.
EXO 40:15 Ar igi gwallu-wawad e-babgi be eosa, deyob e-masmalagi be eomogoed. Geb amala dulemar-irwa-goledga anga gumaloed. Gwallu-wawad egi eolesad-ulale, e-wagan degisadegu anse-dule-irwa-goledga gumaloed.”
EXO 40:16 Moisés, Bab-Jehová-bela-ega-igar-uksadba sogedba imaksad.
EXO 40:17 Birgabogwadgi, gebe-nii-onoded-ibagwenadgi, Bab-Dummadse-goled-neg-sunna-seleged osisgusad.
EXO 40:18 Moisés, Bab-Dummadse-goled-neg-sunna-seleged osisad, e-sigmalad urbisad, e-urgomar ogwichisad, e-suarmar-biir-megmalad mesisad, degine, e-buarmar ogwichisbalid.
EXO 40:19 Moisés, Bab-Dummadse-goled-neg-sunna-seleged-birgi mor-dummagan ogichad. Moisés, igi Bab-Jehová ega igar-uksa, sogedba imaksad.
EXO 40:20 Geb a-sorbali, Moisés, Bab-Dummad-Dulemarbo-Igar-Mesisad akwagi-narmakar-maid susad, geb Bab-Dummad-Uluyaba mesisad. Degine, a-Ulu seegala, e-suarmar egi yosad. Geb degine, a-Ulu-birgi, Ulu-eduged mesisad.
EXO 40:21 Geb Moisés, Bab-Dummadse-goled-neg-sunna-selegedyaba Ulu odosad. Geb mor-dummad Ulu-idu nasiksad, adi, dulemar mer a-Ulu dakmalagar. Moisés, igi Bab-Jehová ega igar-uksa, sogedba imaksad.
EXO 40:22 Moisés, Bab-Dummad-dulemarbo-ambikued-negyaba, mor-dummad-naid-dad-nakwed-argan-sapiledsik, mese sisbalid.
EXO 40:23 A-mese-birgi madumar ilekwaa urbisad. Moisés, igi Bab-Jehová ega igar-uksa, sogedba imaksad.
EXO 40:24 Moisés, Bab-Dummad-dulemarbo-ambikued-neggi, dad-nakwed-argan-nuedsik mese-asabin, gwallu-sied sisad.
EXO 40:25 Degine, Bab-Jehová-asabin gwallumar-ogasad. Moisés, igi Bab-Jehová ega igar-uksa, sogedba imaksad.
EXO 40:26 Deginbali, Moisés, Bab-Dummad-dulemarbo-ambikued-neggi, mor-dummad-naid-asabin, Bab-Dummadga-ina-wawadikid-ukleged-aila-olobiid sisbalid.
EXO 40:27 A-aila-birgine, Moisés, ina-wawadikmalad ogumaksad. Moisés, igi Bab-Jehová ega igar-uksa, sogedba imaksad.
EXO 40:28 Deginbali, Moisés, Bab-Dummadse-goled-neg-dogedgi mor-dummad nasiksabalid.
EXO 40:29 Deginbali, Moisés, Bab-Dummad-dulemarbo-ambikued-neg-sunna-seleged-doged-asabin, Bab-Dummadga-ibmar-ogumakar-ukleged-aila sisbalid. Agi, Bab-Dummadga-ibmar-ogumakar uksad, degine, Bab-Dummadga-ibmar-gwagmar-ukleged uksabalid. Moisés, igi Bab-Jehová ega igar-uksa, sogedba imaksad.
EXO 40:30 Deginbali, Moisés, Bab-Dummad-dulemarbo-ambikued-neg, degi, Bab-Dummadga-ibmar-ogumakar-ukleged-aila, wemar-abargine, dii-sied sisbalid. Degine, agi dii enosbalid, adi, agi argan, degi, nag enukegar.
EXO 40:31 Agine, Moisés, Aarón, degi, Aarón-e-masmala, argan, degi, e-nagmar na enuksamalad.
EXO 40:32 Amar, Bab-Dummad-dulemarbo-ambikued-negse dogdemalar, Bab-Dummadga-ibmar-ogumakar-ukleged-ailase warmaknadmalar, e-argan, degine, e-nag enukdamalad. Ar igi Bab-Jehová Moisésʼga igar-uksa, deyob enukdamalad.
EXO 40:33 Geb napidgine, Moisés, Bab-Dummadse-goled-neg-sunna-seleged-e-galumar nasiksad, Bab-Dummadga-ibmar-ogumakar-ukleged-aila, degi, Bab-Dummadse-Goled-Neg-Islidikid, amar-ebilis we-galumar nasiksad. Degine, we-galu-dogedgi mor-dummad nasiksad. Weyob Moisés Bab-Dummadse-goled-neg-sunna-seleged sobsad. Bela Moisés weyob obelosad.
EXO 40:34 Bab-Dummadse-goled-neg-sunna-selegedgi, dulemar-ambikuedgi mogir nagunonikid. Geb a-neggi bela-bela-ena Bab-Jehová-e-gangued-yeerdakleged aidenonikid.
EXO 40:35 Moisés, Bab-Dummadse-goled-negse geg-doge-gualid, ar ade, a-birgi mogir-naid, degine, Bab-Jehová-e-gangued-yeerdakleged bela agi ena naibalid.
EXO 40:36 Israel-dulemar Bab-Dummadse-goled-neggi bubawaryob mogir-naid-nakwidele, e-neg-bubukwad weeddamalad. Geb agi banguddamarmogad.
EXO 40:37 Ar mogir Bab-Dummadse-goled-neggi-bangusulile, Israel-dulemar-na-danar-danar-bukwadgi geg bangudamalad. Mogir Bab-Dummadse-goled-neggi-bangudele, geb agi banguddamalad.
EXO 40:38 Ar ade, Bab-Jehová-e-mogir neg-ibgine, ese-goled-neg-birgi naidaed, degine, neg-mutikdi, ese-goled-neg-birgi bubawaryob soo ganaidaed. Bela Israel-dulemar bubawaryob we-mogir dakedbidamalad. Weyobi, Israel-dulemar bangued-irba gusdaed.
LEV 1:1 Bab-Jehová dulemarbo-ambikued-neg-akar Moisésʼse gochad. Agi ega sunmaksad, ega sogsad:
LEV 1:2 “Israel-dulemarga be sunmake, ega be soge: ‘Bemar Bab-Jehováʼga ibmar-ukleged ukega sedanimalale, sunna moli-bebe-nikad-sedamalad, igi, sibad-wawaaddibe.
LEV 1:3 Ar dule-gwensak Bab-Jehováʼga moli-bebe-nikad ogumakar ukele, we-moli-bebe-nikad machered guergebed, swilidik, gwen boni-nikasuli guergebed. We-ibmar-uklenaid, Bab-Jehová-dulemarbo-ambikued-neg-e-yawagak-dogedgi uklegoed, adi, Bab-Jehová nabir we-ibmar abingaegar.
LEV 1:4 Dule, moli-bebe-nikad-sapingwagwad-ogumakar-uklegoed-e-nonogi na e-argan mesoed. Deyobi, dule-e-isgued-elilegegala, Bab-Jehová we-moli-bebe-nikad abingaoed.
LEV 1:5 Geb degine, dule, Bab-Jehová-asabin we-moli-bebe-nikad-sapingwagwad-e-dukar egwannoed. Geb Aarón-masmala-dule-irwa-Bab-Dummadse-gormalad, Bab-Jehováʼga we-moli-e-abe ukoed. Geb sorbali, moli-abe ibmar-ogumakar-ukleged-aila-e-dikarmargi bomi-bomi imakoed. We-ailade, Bab-Dummad-dulemarbo-ambikued-neg-yawagak-dogedgi siid.
LEV 1:6 A-sorbali, moli-bebe-nikad-sapingwagwad-e-uka edaroed, geb e-san goa-goa imakoed.
LEV 1:7 Aarón-masmala-dule-irwa-Bab-Dummadse-gormalad, ibmar-ogumakar-ukleged-aila-birgi sapanmar urboed, geb soo ogamaloed.
LEV 1:8 Geb Aarón-masmala-dule-irwa-Bab-Dummadse-gormalad, moli-e-san-goamakaled, e-nono, degi, e-samurgi-gwallu-nanaid ibmar-ogumakar-ukleged-ailagi soo-gasiid-birgi urboed.
LEV 1:9 Dule-ibmar-uknaid, moli-e-samurmar, degi, e-malimar, diigi enukoed. Geb dule-irwa-Bab-Dummadse-goled ibmar-ogumakar-ukleged-aila-birgi bela ogumakoed. We, ibmar-ogumakar-uklegedid, Bab-Jehováʼga soogi-ogumakar ibmar-ukleged yeer-yapannedid.’ ”
LEV 1:10 Bab-Jehová Moisésʼga sogdebalid: “Ar dule-gwensak anga sibad-wawaad, igi, sibaddibe ogumakar ukele, we-ibdurgan-machered swilidik, gwen boni-nikasuli guergebed.
LEV 1:11 We-dule, Bab-Jehová-asabin ibmar-ogumakar-ukleged-aila-dad-nakwed-argan-sapiledsik, sibad-wawaad-machered-e-dukar egwannoed. Geb Aarón-masmala-dule-irwa-Bab-Dummadse-gormalad, sibad-wawaad-e-abe, ibmar-ogumakar-ukleged-aila-e-dikarmargi bomi-bomi imakoed.
LEV 1:12 Geb sorbali, we-dule, sibad-wawaad-e-san goa-goa imakoed. Geb dule-irwa-Bab-Dummadse-gormalad, sibad-wawaad-e-san-goamakaled, e-nono, degi, e-samurgi-gwallu-nanaid ibmar-ogumakar-ukleged-ailagi, soo-gasiid-birgi urboed.
LEV 1:13 Dule-ibmar-uknaid, sibad-wawaad-e-samurmar, degi, e-malimar, diigi enukoed. Geb dule-irwa-Bab-Dummadse-goled ibmar-ogumakar-ukleged-aila-birgi bela ogumakoed. We, ibmar-ogumakar-uklegedid, Bab-Jehováʼga soogi-ogumakar ibmar-ukleged yeer-yapannedid.”
LEV 1:14 Bab-Jehová Moisésʼga sogdebalid: “Israel-dulemarga be sogo: ‘Dule-gwensak Bab-Dummadga nuumar-ogumakar-ukele, sunna sapur-nuu, igi, wagnuu-mimmidibe, Bab-Jehováʼga uked.
LEV 1:15 Dule-irwa-Bab-Dummadse-goled ibmar-ogumakar-ukleged-aila-birgi nuu mesoed, geb agi e-ibe dukar ungoed. Geb nuu-abe ibmar-ogumakar-ukleged-aila-dikarba eogoed.
LEV 1:16 Dule-irwa-Bab-Dummadse-goled, nuu-e-masgammu, degi, e-samurmar onioed. Geb bia buru milege, ibmar-ogumakar-ukleged-aila-dikarba, dad-nakwedsik mioed.
LEV 1:17 Agine, nuu-saban egaoed, geb sakangi-gani negabar onaboed. Geb degine, dule-irwa-Bab-Dummadse-goled, we-nuu, ibmar-ogumakar-ukleged-aila-birgi soo-gasiidgi ogumakoed. We, ibmar-ogumakar-uklegedid, Bab-Jehováʼga soogi-ogumakar ibmar-ukleged yeer-yapannedid.’ ”
LEV 2:1 Bab-Jehová Moisésʼga sogdebalid: “Israel-dulemarga be soge: ‘Dule-gwensak anga ibmar-gwag-gulleged ukele, e-madubur-bur-nued sedagoed. A-madubur-birgine, olivo-gwallu, degi, ina-wawadikid eogoed.
LEV 2:2 A-sorbali, we-dule, Aarón-masmala-dule-irwa-Bab-Dummadse-gormaladse we-madubur sedoed. Geb dule-irwa-Bab-Dummadse-goled, argan-nukgwen, we-madubur-olivo-gwallubo-oburaled, degi, ina-wawadikidmala suoed. Geb dule-irwa-Bab-Dummadse-goled, we-madubur ibmar-ogumakar-ukleged-ailagi ogumakoed, adi, ebinsamalaga we-ibmar-gwagmar Bab-Jehová bemarga ukmaid. We, ibmar-ogumakar-uklegedid, Bab-Jehováʼga soogi-ogumakar ibmar-ukleged yeer-yapannedid.
LEV 2:3 Ibmar-ukleged-obichaddi, Aarónʼgadga, degi, e-masmalagadga guoed. Bab-Jehováʼga soogi-ogumakar-ibmar-uklemalad-bamaladba we-ibmar-ukleged bur-ise-islidikidid.
LEV 2:4 ” ’Ar be Bab-Jehováʼga ibmar-gwag-gulleged soogi-yoar uknaile, ega be madu-olo bur-madubur-nuedgi-imakaled-inasulid, olivo-gwalluba-omukualed be ukoed, madu-dibyaled-inasulid, olivo-gwallugi-magaled be ukoed.
LEV 2:5 ” ’Ar be Bab-Jehováʼga ibmar-gwag-gulleged dibyar ukele, bur-madubur-nuedgi-imakaled-inasulid, olivo-gwalluba-omukualed be ukoed.
LEV 2:6 We-madu-dibyaled, be bisge-bisge imakoed, geb olivo-gwallu be egi eogoed. We, Bab-Jehováʼga ibmar-gwag-gulleged ibmar-uklegedid.
LEV 2:7 ” ’Ar be Bab-Jehováʼga ibmar-gwag-gulleged bormogi-duar ukele, bur-madubur-nuedgi-imakaled, olivo-gwalluba-omukualed be ukoed.
LEV 2:8 Weyobi, ibmar-gwag-gulleged we-ibmarmarba guagwar-imaklesad, Bab-Jehováʼga be sedoed, degi, dule-irwa-Bab-Dummadse-goledga be ukoed. Geb agine, dule-irwa-Bab-Dummadse-goled ibmar-ogumakar-ukleged-ailase sedoed.
LEV 2:9 Agi, dule-irwa-Bab-Dummadse-goled, argan-nukgwensaar we-ibmar-ukleged ogumakoed, adi, bemar ebinsamalaga: Ani, Bab-Jehová, an bemarga bela ibmar uked. We, ibmar-ogumakar-uklegedid, Bab-Jehováʼga soogi-ogumakar ibmar-ukleged yeer-yapannedid.
LEV 2:10 Ibmar-ukleged-obichaddi, Aarónʼgadga, degi, e-masmalagadga guoed. Bab-Jehováʼga soogi-ogumakar-ibmar-uklemalad-bamaladba we-ibmar-ukleged bur-ise-islidikidid.
LEV 2:11 ” ’Be Bab-Jehováʼga ibmar-gwag-gulleged-ukleged-ukedi, bipisaale madu-inaba, degi, achanisba be oburosulid. Ar ade, Bab-Jehováʼga soogi-ibmar-ogumakar-ukleged bipisaar madu-ina-nika, degi, achanis-nika ogumaklegosulid.
LEV 2:12 Bab-Jehováʼga gebe-ibmar-sanmaksamalad-uklegedbali, achanis, degi, madu-ina be ukoed. Degi-inigwele, Bab-Jehováʼga ibmar-ogumakar-ukleged-ailagi ibmar-ukleged-yeer-yapannedyobi be ukosulid.
LEV 2:13 ” ’Bela ibmar-gwag-gulleged-ukleged, baluba be imakoed. Ar balu Bab-Dummad-bebo-igar-mesisad-e-wilub gued. Degisoggu, bela be-ibmar-uklegedgi balu be mesoed.
LEV 2:14 ” ’Bab-Jehováʼga ibmar-gwag-gulleged-gebe-sanmaklesad be ukele, soogi e-warmarbela be yooed, degi, e-gwagmar-nagale be ukoed. We, be-ibmar-gwag-gulleged-gebe-sanmaklesad-uklegedid.
LEV 2:15 A-birgine, olivo-gwallu, degi, ina-wawadikid be eogoed. We, ibmar-gwag-gulleged-uklegedid.
LEV 2:16 Dule-irwa-Bab-Dummadse-goled, argan-nukgwensaar, we-ibmar-gwag-nagaled-olivo-gwalluba-oburaled, degi, bela ina-wawadikidmala ogumakoed, adi, bemar ebinsamalaga: Ani, Bab-Jehová, an bemarga bela ibmar ukmaid. We, Bab-Jehováʼga soogi-ogumakar-ibmar-uklegedid.’ ”
LEV 3:1 Bab-Jehová Moisésʼga sogdebalid: “Israel-dulemarga be soge: ‘Dule-gwensak gwenatigwar-guega anga moli-bebe-nikad ukele, we-moli machereddibe, omedibe, swilidik, gwen boni-nikasulid anga ukoed.
LEV 3:2 We-dule, moli-bebe-nikad-ogumakar-uklegoed-e-nonogi na e-argan mesoed. Bab-Dummad-dulemarbo-ambikued-neg-yawagak-dogedgi we-moli-e-dukar egwannoed. Geb sorbali, Aarón-masmala-dule-irwa-Bab-Dummadse-gormalad, moli-e-abe ibmar-ogumakar-ukleged-aila-dikarmargi bomi-bomi imakoed.
LEV 3:3 ” ’Geb dule-gwenatigwar-guega Bab-Jehováʼga we-moli-ibmarmar soogi-ogumakar ukoed: Samurgi-gwallumar-nanaid, bela samur-bukwad-e-dikarmargi-gwallumar-nanaid,
LEV 3:4 e-mirwa-gwabogwad, mirwa-birgi-gwallumar-nanaid, e-dikarmargi-gwallumar-nanaid, bina-dutugwadgi-gwallumar-nanaid. We-bina-dutugwad mirwa-gwabogwadba-mesa onolegoed.
LEV 3:5 Geb degine, Aarón-masmala bela we-ibmarmala ibmar-ogumakar-ukleged-ailagi ogumakoed. We-ibmarmar, soo-gasiid-birgi ibmar-ogumakar-ukleged-bukwadmala ogumaklegoed. We, Bab-Jehováʼga soogi-ibmar-ukleged, Bab-Jehová yeer-yapanne itogedid.
LEV 3:6 ” ’Ar dule-gwenatigwar-guega Bab-Jehováʼga sibad-wawaad-ukele, we-sibad-wawaad machereddibe, omedibe, swilidik, gwen boni-nikasulid ukoed.
LEV 3:7 Ar sibad-wawaad-sapingwagwad ukele, Bab-Jehováʼga uknaidgi
LEV 3:8 dule-ibmar-uknaidi, sibad-wawaad-sapingwagwad-e-nonogi na e-argan mesoed. Geb Bab-Dummad-dulemarbo-ambikued-neg-yawagak-asabin we-sibad-wawaad-e-dukar egwannoed. Geb sorbali, Aarón-masmala ibmar-ogumakar-ukleged-aila-e-dikarmargi sibad-wawaad-e-abe bomi-bomi imakoed.
LEV 3:9 ” ’Dule-gwenatigwar-guega Bab-Jehováʼga we-sibad-wawaad-ibmarmar ogumakar ukoed: E-gwallu, e-bunnusaila-nagase-sikaled, samur-birgi-gwallumar-nanaid, degi, bela samur-bukwad-e-dikarmargi-gwallumar-nanaid,
LEV 3:10 e-mirwa-gwabogwad, degi, mirwa-birgi-gwallumar-nanaid, e-dikarmargi-gwallumar-nanaid, deginbali, bina-dutugwadgi-gwallumar-nanaid. We-bina-dutugwad mirwa-gwabogwadba-mesa onolegoed.
LEV 3:11 Geb degine, dule-irwa-Bab-Dummadse-goled bela we-ibmarmar ibmar-ogumakar-ukleged-ailagi ogumakoed. We-ibmar-ogumaklegedi, Bab-Jehováʼga masga gued.
LEV 3:12 ” ’Ar dule Bab-Jehováʼga sibad ukele, Bab-Jehováʼga we-sibad uknaidgine,
LEV 3:13 na e-argan sibad-e-nonogi mesoed. Geb Bab-Dummad-dulemarbo-ambikued-neg-asabin sibad-e-dukar egwannoed. Sorbali, Aarón-masmala ibmar-ogumakar-ukleged-aila-e-dikarmargi sibad-e-abe bomi-bomi imakoed.
LEV 3:14 ” ’Dule-gwenatigwar-guega Bab-Jehováʼga we-sibad-ibmarmar soogi ogumakar ukoed: Samur-birgi-gwallumar-nanaid, bela samur-bukwad-e-dikarmargi-gwallumar-nanaid,
LEV 3:15 e-mirwa-gwabogwad, mirwa-birgi-gwallumar-nanaid, e-dikarmargi-gwallumar-nanaid, bina-dutugwadgi-gwallumar-nanaid. We-bina-dutugwad mirwa-gwabogwadba-mesa onolegoed.
LEV 3:16 ” ’Geb degine, dule-irwa-Bab-Dummadse-goled bela we-ibmarmar ibmar-ogumakar-ukleged-ailagi ogumakoed. We-ibmar-ogumaklegedi, Bab-Jehováʼga masga gued, yeer-yapannedid. Bela we-gwallumala Bab-Jehováʼgadid.
LEV 3:17 ” ’Ar bia bemar ambikuoe, bemarga, degi, be-waganga, degisadegu weyob igar megoed: Bemar bipisaale, ibmar-e-gwallu, degi, ibmar-abe gunnosurmalad.’ ”
LEV 4:1 Bab-Jehová Moisésʼga sunmakded, ega sogded:
LEV 4:2 “Israel-dulemarga be sunmak, amarga be soge: ‘Dule-gwensak na wissulidba Bab-Jehová-Igar-Maidgi annasale, ibmar-ise-imakleged imaksale, weyob ibmar imaklegoed:
LEV 4:3 ” ’Ar dule-irwa-Bab-Dummadse-goled-e-dummad isgusale, bela Israel-dulemar-oichononikoed. A-ulale, Bab-Jehováʼga moli-bebe-nikad-sapingwagwad-swilidikid, gwen boni-nikasulid na e-isgusad-ular, ukoed.
LEV 4:4 Dule-irwa-Bab-Dummadse-goled Bab-Dummad-dulemarbo-ambikued-neg-yawagak-dogedse, Bab-Jehováʼse we-moli-sapingwagwad sedoed. Agi, we-moli-e-nonogi na e-argan mesoed. Geb Bab-Jehová-asabin we-moli-dukar egwannoed.
LEV 4:5 Geb sorbali, dule-irwa-Bab-Dummadse-goled-e-dummad moli-sapingwagwad-e-abe ichesaar suoed. Geb we-abe, Bab-Dummad-dulemarbo-ambikued-negse sedoed.
LEV 4:6 Dule-irwa-Bab-Dummadse-goled na e-goo moli-abegi owardikuoed, geb Bab-Dummadse-goled-neg-Ise-Islidikid-idu atued-dummad-naidsik, Bab-Jehová-asabin, ilagugle (7) we-abe bomi-bomi imakoed.
LEV 4:7 Geb sorbali, dule-irwa-Bab-Dummadse-goled, we-abe Bab-Dummadga-ina-wawadikid-obupurmakleged-ailagi moli-bebeyob-gwigwichidgi magoed. We-galu, Bab-Dummad-dulemarbo-ambikued-neggi, Bab-Jehová-asabin siid. Geb bela abe-gwabguoedi, Bab-Dummad-dulemarbo-ambikued-neg-yawagak-dogedgi ibmar-ogumakar-ukleged-aila-siid-nagagi eogoed.
LEV 4:8 Geb we-dule-irwa-Bab-Dummadse-goled, isgued-ular, we-moli-bebe-nikad-sapingwagwad-ibmarmar Bab-Jehováʼga ogumakar ukoed: E-samurgi-gwallumar-nanaid, degi, bela samur-bukwad-e-dikarmargi-gwallumar-nanaid weoed.
LEV 4:9 Deginbali, e-mirwa-gwabogwad, mirwa-birgi-gwallumar-nanaid, e-dikarmargi-gwallumar-nanaid, bina-dutugwadgi-gwallumar-nanaid webaloed. We-bina-dutugwad mirwa-gwabogwadba-mesa onolegoed.
LEV 4:10 ” ’Ar igi dule-gwenatigwar-guega moli-bebe-nikad-uklenaid-e-gwallumar weedae, deyobi, we-moli-sapingwagwad-e-gwallumar weemogoed. Geb degine, dule-irwa-Bab-Dummadse-goled we-ibmarmala ibmar-ogumakar-ukleged-ailagi ogumakoed.
LEV 4:11 ” ’Ar moli-bebe-nikad-sapingwagwad-e-uka, bela e-san, e-nonoba-mesa, e-malimar, e-samurmar, degi, e-saamar, Israel-dulemar-danar-danar-bukwad-magaba onogoed.
LEV 4:12 Bela we-moli-e-ibmarmar dulemar danar-danar-bukwad-magaba, ar bia burumar-milegedse, neg-swilidikidse onolegoed. Geb agi, soo-gasiid-birgi be ogumakoed. Buru-milegedgi ogumaklegoed.’ ”
LEV 4:13 Bab-Jehová Moisésʼga sogdebalid: “Israel-dulemarga be sogo: ‘Ar bemar ibmar-wissulidba Bab-Jehová-Igar-Maidgi annasale, ibmar-ise-imakleged imaksale, bela Israel-dulemar Bab-Jehováʼgi nue-dummad-isgusmalad.
LEV 4:14 Ar Israel-dulemar na e-isgusad wisgunonimalale, e-isgusad-anar moli-bebe-nikad-sapingwagwad anga ukega senonimaloed. We-moli-sapingwagwad Bab-Dummad-dulemarbo-ambikued-negse sedmaloed.
LEV 4:15 Israel-girmar-dummagan Bab-Jehová-asabin moli-sapingwagwad-e-nonogi e-arganmar mesmaloed. Geb Bab-Jehová-asabin we-moli-sapingwagwad-dukar egwanmaloed.
LEV 4:16 Geb sorbali, dule-irwa-Bab-Dummadse-goled-e-dummad, moli-sapingwagwad-abe Bab-Dummad-dulemarbo-ambikued-neg-yase sedoed.
LEV 4:17 Dule-irwa-Bab-Dummadse-goled na e-goo moli-sapingwagwad-abegi owardikuoed. Geb Bab-Dummadse-goled-neg-Ise-Islidikid-idu atued-dummad-naidsik, Bab-Jehová-asabin, ilagugle (7) we-abe bomi-bomi imakoed.
LEV 4:18 Geb sorbali, dule-irwa-Bab-Dummadse-goled, we-abe ichesaar ibmar-ogumakar-ukleged-ailagi moli-bebeyob-gwigwichidgi magoed. We-galu, Bab-Dummad-dulemarbo-ambikued-neggi, Bab-Jehová-asabin siid. Geb bela abe-gwabguoedi, Bab-Dummad-dulemarbo-ambikued-neg-yawagak-dogedgi ibmar-ogumakar-ukleged-aila-siid-nagagi eogoed.
LEV 4:19 Geb dule-irwa-Bab-Dummadse-goled-e-dummad bela moli-bebe-nikad-sapingwagwad-e-gwallu weoed, geb ibmar-ogumakar-ukleged-ailagi ogumakoed.
LEV 4:20 ” ’Ar dule-irwa-Bab-Dummadse-goled-isgusad-anar igi moli-bebe-nikad-sapingwagwad imakledae, deyobi, Israel-dulemar-e-isgusad-anar we-moli-bebe-nikad-sapingwagwad imaklemogoed. Deyobi, dule-irwa-Bab-Dummadse-goledi Israel-dulemarga e-isgusad Bab-Dummad-ega-osulogega imakoed. Geb Bab-Dummad Israel-dulemar egi nossuliyob dakoed.
LEV 4:21 Geb sorbali, dule-irwa-Bab-Dummadse-goled Israel-dulemar-danar-danar-bukwad-magaba moli-onogoed. Geb igi moli-bebe-nikad-sapingwagwad-idualed ogumaksagusa, deyobi, we-moli-bebe-nikad-sapingwagwad ogumakbaloed. Ar Israel-dulemar-e-isgusad-anar we-moli-bebe-nikad oburgwilenaid.’ ”
LEV 4:22 Bab-Jehová Moisésʼga sogdebalid: “Israel-dulemarga be sogo: ‘Ar dule-dummadga-maid na wissulidba isgusale, na e-Bab-Dummad-Jehová-igar-maidgi annasale, ibmar-ise-imakleged imaksale, we-dule-dummadga-maid Bab-Jehováʼgi nue-dummad-isgusad.
LEV 4:23 We-dule na e-isgusad wisgunonikile, sibad-machered-swilidikid, gwen boni-nikasulid na e-isgusad-anar Bab-Jehováʼga-ukega senonikoed.
LEV 4:24 We-dule sibad-nono-birgi na e-argan mesoed. Geb bia ibmar-durgan-ogumakar-ukleged-e-dukar egwallege, agi Bab-Jehová-asabin sibad-e-dukar egwannoed. We-sibad dule-isgusad-anar oburgwilenaid.
LEV 4:25 Geb degine, dule-irwa-Bab-Dummadse-goled we-sibad-e-abegi e-goo owardikuoed. Geb we-abe ibmar-ogumakar-ukleged-ailagi-moli-bebeyob-gwigwichidgi mage-mage imakoed. Geb bela abe-gwabguoedi ibmar-ogumakar-ukleged-aila-siid-nagagi eogoed.
LEV 4:26 Geb dule-irwa-Bab-Dummadse-goled bela sibad-e-gwallu ibmar-ogumakar-ukleged-ailagi ogumakoed, ar igi dule-gwenatigwar-guega ibmar-ukleged-e-gwallu ogumakdae, deyob imakmogoed. Deyobi, dule-irwa-Bab-Dummadse-goledi dule-dummadga-maid-e-isgusad Bab-Dummad-ega-osulogega imakoed. Geb Bab-Dummad dule-dummadga-maid egi nossuliyob dakoed.’ ”
LEV 4:27 Bab-Jehová Moisésʼga sogdebalid: “Israel-dulemarga be sogo: ‘Ar Israel-dule-wargwen, na wissulidba isgusale, na e-Bab-Dummad-Jehová-igar-maidgi annasale, ibmar-ise-imakleged imaksale, we-dule Bab-Jehováʼgi nue-dummad-isgusad.
LEV 4:28 We-dule na e-isgusad wisgunonikile, sibad-ome-swilidikid, gwen boni-nikasulid na e-isgusad-anar Bab-Jehováʼga-ukega senonikoed.
LEV 4:29 We-dule sibad-nono-birgi na e-argan mesoed. Geb bia ibmar-durgan-ogumakar-ukleged-e-dukar egwallege, agi, sibad-e-dukar egwannoed.
LEV 4:30 Geb degine, dule-irwa-Bab-Dummadse-goled na e-goo sibad-e-abegi owardikuoed. Geb ibmar-ogumakar-ukleged-ailagi-moli-bebeyob-gwigwichidgi abe mage-mage imakoed. Geb bela abe-gwabguoedi ibmar-ogumakar-ukleged-aila-siid-nagagi eogoed.
LEV 4:31 Geb sorbali, dule-irwa-Bab-Dummadse-goled sibad-e-gwallu bela weoed, ar igi dule-gwenatigwar-guega ibmar-ukleged-e-gwallu weedae, deyob imakbaloed. Geb dule-irwa-Bab-Dummadse-goled ibmar-ogumakar-ukleged-ailagi sibad-e-gwallu ogumakoed. We-ibmarde Bab-Jehováʼga-ibmar-ukleged yeer-yapannedid. Deyobi, dule-irwa-Bab-Dummadse-goledi dule-e-isgusad Bab-Dummad-ega-osulogega imakoed. Geb Bab-Dummad dule egi nossuliyob dakoed.
LEV 4:32 ” ’Ar dule-isgusad na e-isgusad-anar sibad-wawaad-sedanikile, sibad-wawaad-ome-bipi nue-swilidikid, gwen boni-nikasulid Bab-Jehováʼga senonikoed.
LEV 4:33 We-dule, we-sibad-wawaad-e-nono-birgi e-argan mesoed. Geb bia ibmar-durgan-ogumakar-ukleged-e-dukar egwallege, agi we-sibad-wawaad-e-dukar, e-isgued-anar egwannoed.
LEV 4:34 Geb sorbali, dule-irwa-Bab-Dummadse-goled e-goo sibad-wawaad-e-abegi owardikuoed. Geb ibmar-ogumakar-ukleged-ailagi-moli-bebeyob-gwigwichidgi abe mage-mage imakoed. Geb bela abe-gwabguoedi ibmar-ogumakar-ukleged-aila-siid-nagagi eogoed.
LEV 4:35 Geb sorbali, sibad-wawaad-e-gwallu bela weoed, ar igi dule-gwenatigwar-guega sibad-wawaad-mimmi-ukleged-e-gwallu weedae, deyob imakbaloed. Geb dule-irwa-Bab-Dummadse-goled ibmar-ogumakar-ukleged-ailagi, sibad-wawaad-e-gwallu ibmar-ogumakar-ukleged-bamaladba-mesa ogumakoed. Deyobi, dule-irwa-Bab-Dummadse-goledi dule-e-isgusad Bab-Dummad-ega-osulogega imakoed. Geb Bab-Dummad dule egi nossuliyob dakoed.’ ”
LEV 5:1 Bab-Jehová Moisésʼga sogdebalid: “Israel-dulemarga be sogo: ‘Ar dule-gwensakse gorlenonikile, be ibmar-daksad, be ibmar-itosad sogdaye. Ar we-dule yapa sogdagele, we-dule, dummad-nosad, degisoggu, sabsur-odurdaklegergebed.
LEV 5:2 Dule-gwensak ibmar-swilidiksulid ebusale: Ibmar-durgan-ised-burgwisaddibe, ibmar-durgan-ised-sunna-akweleged-burgwisaddibe, ibmar-ised-napagi-garmakdimalad-burgwisaddibe, we-dule, ibmar-isedgi-warmaksad itossur-inigwele, swilidiksuli gunonikoed. Degisoggu, we-dule, nue-dummad-nosad.
LEV 5:3 ” ’Dule-gwensak wissulidgi ibmar-isgana-dulegi-danikid ebusale, we-dule, swilidiksuli gunonikoed. Geb sorba, deyob ibmar-imaksaye-wisgunonikile, we-dule, nue-nosadga gunonikoed.
LEV 5:4 ” ’Dule-gwensak, ibmar-nued-imakega, ibmar-isgana-imakegardibe, ibmar-ise-sogar-sogleged, nue-binsassuli sogsadibe, geb degine, sorba, magar itononikile, ede, deyob sogewilubsulinye, we-dule, nue-nosadga gunonikoed.
LEV 5:5 ” ’Dule-gwensak we-ibmarmar-soggwenadgi isgusale, e-isgusad dukin na barsogergebed.
LEV 5:6 Geb Bab-Jehováʼga na e-isgusad-anar sibad-wawaad-ome, sibad-omedibe, oburgwega ukoed. Weyobi, dule-irwa-Bab-Dummadse-goled, Bab-Dummad we-dulega-isgusad-osulogega imakoed.’ ”
LEV 5:7 Bab-Jehová Moisésʼga sogdebalid: “Israel-dulemarga be sogo: ‘Dule-isgusad sibad-wawaad-mimmi-bakega mani galakuele, sapur-nuu-gwabo, wagnuu-mimmi-gwabodibe, na e-isgusad-ular Bab-Jehováʼga ukoed. Nuu-gwagwen e-isgusad-ular oburgwelegega ukoed, baiddi, ogumaklegega ukoed.
LEV 5:8 We-dule, dule-irwa-Bab-Dummadse-goledse we-nuumar sedoed. We-Bab-Dummadse-goled gebedgine isgusad-ular nuu-gwagwen weyob ukoed: E-dukar obipirmakoed, degi-inigwele, e-nono dukargi ungosulid.
LEV 5:9 Geb sorbali, isgued-ular nuu-uklenaid-e-abe ibmar-ogumakar-ukleged-aila-dikargi bomi-bomi imakoed. Geb nuu-abe-obichadi, ibmar-ogumakar-ukleged-aila-nagagi mioed. We-ibmar-uklegedi isgued-ular ibmar-uklegedid.
LEV 5:10 Dule-irwa-Bab-Dummadse-goled nuu-baiddi igar-maidba ogumakar ukoed. Weyobi, dule-irwa-Bab-Dummadse-goled, Bab-Dummad we-dulega-isgusad-osulogega imakoed. Geb Bab-Dummad dule egi nossuliyob dakoed.
LEV 5:11 ” ’Ar dule-isgusad sapur-nuu-gwabo-bakega, wagnuu-mimmi-gwabo-bakegardibe, mani galakubalile, madubur-bur-nued nibiratar na e-isgusad-ular Bab-Jehováʼga ukoed. We-maduburgi, olivo-gwallu, degi, ina-wawadikid eogosulid. Ar we-madubur isgued-ular ibmar-uklegedid.
LEV 5:12 Geb we-madubur dule-irwa-Bab-Dummadse-goledse sedoed. Bab-Jehová bemarga bela we-ibmar-ukmaid be ebinsamalaga, dule-irwa-Bab-Dummadse-goled madubur na argan-nukgwen suoed. Geb we-madubur Bab-Jehováʼga-ibmar-bamalad-soogi-ogumakar-uklegedba-mesa ibmar-ogumakar-ukleged-ailagi ogumakoed. We-ibmar-uklegedi, isgued-ular ibmar-uklegedid.
LEV 5:13 Weyobi, dule-irwa-Bab-Dummadse-goled ibmar-ukleged Bab-Jehováʼga ukoed. Adi, Bab-Jehová, dulega e-isgusad eliega, egi nossuliyob dakegar. Ibmar-ukleged-gwabgusaddi, dule-irwa-Bab-Dummadse-goledgadga guoed. Ar igi ibmar-gwag-ukleged obichale, a-dulemarga ukledae, deyob uklemogoed.’ ”
LEV 5:14 Bab-Jehová Moisésʼga sunmakdebalid, ega sogded: “Israel-dulemarga be sogo:
LEV 5:15 ‘Dule-gwensak na wissulidba Bab-Jehová-ibmar-islidikidgi isgusale, Bab-Jehováʼga e-isgued-ular sibad-wawaad-machered-swilidikid, gwen boni-nikasulid ukoed. We sibad-wawaad-macheredga e-mani-gargegued mani-aidikuedba nasiklegoed. Ar igi Bab-Dummadse-goled-neggi mani-aidikued-wilub-ebislege, deyob ebislegoed. We-ibmar-uklegedi, isgued-ular ibmar-uklegedid.
LEV 5:16 Dule-isgusad we-ibmar-islidikidgi-isgusad-ulale, gannar a-wilub ibmar ukoed, degine, napi ibmar-atargi gwensak ukbaloed. We-ibmardi dule-irwa-Bab-Dummadse-goledga ukoed. Weyobi, dule-irwa-Bab-Dummadse-goled dule-isgusad-ular Bab-Dummadga sibad-wawaad-machered oburgoed, geb Bab-Dummad dule egi nossuliyob dakoed.
LEV 5:17 ” ’Ar dule-gwensak na wissulidba Bab-Jehová-Igar-Maidgi annanonikile, amba we-dule isgusye soglegoed, sabsur-odurdaklegergebed.
LEV 5:18 Degisoggu, dule-irwa-Bab-Dummadse-goledse sibad-wawaad-machered-swilidikid, gwen boni-nikasulid sedoed. We sibad-wawaad-macheredga dule-isgusadba mani-soglesadba e-mani-gargegued nasiklegoed. Weyobi, dule-irwa-Bab-Dummadse-goled we-dule ibmar-wissulidba-isgusad Bab-Dummad ega osulogega imakoed, geb Bab-Dummad dule egi nossuliyob dakoed.
LEV 5:19 We-ibmar-uklegedi, isgued-ular ibmar-uklegedid. Ar we-dule, Bab-Jehová-Igar-Maidgi annasad, Bab-Jehováʼgi nue-dummad nosad.’ ”
LEV 6:1 Bab-Jehová Moisésʼga sunmakded, ega sogded: “Israel-dulemarga be sogo:
LEV 6:2 ‘Dule-gwensak dule-baid ega ibmar-sabogega-uksadi, a-ibmar gannar yapa e-ibedga ukele, mer-ukega yardaksadibe, ei ibmar atursasdibe, gannadgi annik ibmar-susdibe, we-dule weyob-imaksadbali, Bab-Jehováʼgi nue-dummad nosad.
LEV 6:3 Deginbali, ibmar-yoggusad amisale, degite, amissurye sogdibe, dule-gusgu-isgudaedgi, isgussurye gakansaar ise-sogar-sogdibe,
LEV 6:4 we-dule we-ibmargi nosad, egi ataklegoed. Degisoggu, gannar we-ibmarmar ukergebed: Ibmar-atursasad, emar-annik gandikidgi ibmar-susad, dule-baid ega ibmar-sabogega-uksanad, ibmar-yoggusad amissurye-soged,
LEV 6:5 ibmar-bamaladgi-gakansaar-sogsad-imakoye. We-dule, a-ibmarmar bela e-ibedga gannar ukoed, deginbali, napi ibmar-atargi gwensak ega ukbaloed. Ar e-isgued-ular, ibmar-uknaid-ibagi, ibmar-ibedga bela we-ibmarmar gannar ukoed.
LEV 6:6 ” ’Na e-isgusad-ular, Bab-Jehováʼga sibad-wawaad-machered-swilidikid, gwen boni-nikasulid sedoed. Dule-isgusadba mani-soglesadba we-sibad-wawaad-macheredga mani-gargegued nasiklegoed. Geb dule, we-sibad-wawaad-machered na e-isgusad-ular, dule-irwa-Bab-Dummadse-goledga ukoed.
LEV 6:7 Geb degine, dule-irwa-Bab-Dummadse-goled we-dule-e-isgued-ular, Bab-Jehováʼga sibad-wawaad ukoed. Geb Bab-Jehová bela we-dule-e-isgusad osulogoed.’ ”
LEV 6:8 Bab-Jehová Moisésʼga sunmakdebalid, ega sogded:
LEV 6:9 “Aarónʼga, degi, e-masmalaga be soge: ‘Ibmar-ogumakar-uklealir, weyob be imakmaloye: ” ’Ibdurgan-ogumakar-ukleged bela gummakegala, ibmar-ogumakar-ukleged-aila-birgi mutiki gamai oibodagoed. Ibmar-ogumakar-ukleged-aila-birgi soo-gasiid ginnosulid.
LEV 6:10 ” ’Dule-irwa-Bab-Dummadse-goled e-linoʼmor yooed, degi, lino-morsangi-garson-bipi-makaled yobaloed. Ibdurgan-ogumaklenaid bela gummaksale, dule-irwa-Bab-Dummadse-goled ibmar-ogumakar-ukleged-aila-birgi buru-bukwad weoed. Geb we-aila-dikarba buru urboed.
LEV 6:11 Sorbali, dule-irwa-Bab-Dummadse-goled e-mor esugoed, geb mor-baid yooed. Geb degine, Israel-dulemar-danar-danar-bukwad-magaba, neg-swilidikidse buru sedoed.
LEV 6:12 ” ’Ibmar-ogumakar-ukleged-aila-birgi soo-gasiid ginnosulid. Dule-irwa-Bab-Dummadse-goled bane-bane wakudaryalaba soo-gasiid-birgi sapan urboed. A-soo-birgine, Bab-Jehováʼga-ibmar-ogumakar-uklenaid mesoed, deginbali, a-birgi dule-gwenatigwar-guega ibmar-uklenaid-e-gwallu ogumaklebaloed.
LEV 6:13 Ibmar-ogumakar-ukleged-aila-birgi soo-gasiid bipisaar ginnosulid, degisadegu gasii guoed.’ ”
LEV 6:14 Bab-Jehová Moisésʼga sunmakdebalid, ega sogded: “Aarónʼga, degi, e-masmalaga be sogoed: ‘Bab-Jehováʼga ibmar-gwag-uklegoed-e-igar weyob mai-guoye: Bemar ibmar-ogumakar-ukleged-aila-asabin Bab-Jehováʼga ibmar-gwag ukoed.
LEV 6:15 ” ’Dule-irwa-Bab-Dummadse-goled-wargwen Bab-Jehováʼga-ibmar-ukleged-madubur-bur-nued olivo-gwalluba-mesa argan-nukgwen weoed, deyobi, ibmar-gwag-ukleged-birgi bela ina-wawadikid-bukwad subaloed. Bela we-ibmarmar-susadi, ibmar-ogumakar-ukleged-aila-birgi ogumakoed. Adi, bemar ebinsamalaga, Bab-Jehová bela bemarga ibmar ukmaid. Bab-Jehová we-ibmar-ukleged yeer-yapan itodaed.
LEV 6:16 ” ’Bemar, we-ibmar-ukleged-gwabguoed gunmaloed. Madubur-e-inasuli, Bab-Dummad-dulemarbo-ambikued-neg-imbagi, neg-islidikidgi gunmaloed.
LEV 6:17 ” ’We-ibmar madubur-e-inaba dulegosulid. Ar ade, we-ibmar-ogumakar-uklesad-gwabgusadi, ani, Bab-Jehová, Aarónʼga, degi, e-masmalaga uksad. Ar we-ibmar igi isgusad-ular-ibmar-ukleged islidikid gue, degi, igi dule-baidgi-nosar-ibmar-ukleged islidikid gue, deyobi, we-ibmar bur-ise-islidikidid gumogad.
LEV 6:18 ” ’Bela Aarón-e-wagan-machergan we-ibmar sunna gunmaloed. Weyobi, Bab-Jehováʼga-ibmar-ogumakar-ukleged be-waganga degisadegu igar maiguoed. Ibu-ibmar Bab-Dummadga-ibmar-uklegedgi warmaksale, we-ibmar-warmaksad ibmar-swilidikidga gunonikoed.’ ” Weyob Bab-Jehová Moisésʼga sunmaksad.
LEV 6:19 Bab-Jehová Moisésʼga sunmakdebalid, ega sogded: “Aarónʼga, degi, e-masmalaga be soge:
LEV 6:20 ‘Bemar, Bab-Jehováʼga arbaega-nugsalegoed-ibagi, we-ibmar-ukleged ukmaloed: Madubur-bur-nued, nibiratar anga ukoed. Wakdara negabar ukoed, baid negabaladdi sedo ukoed. Degisadegu na ukdii gumaloed.
LEV 6:21 We-ibmar-uklenaid ibmar-dibyedgine olivo-gwalluba be dibyoed. Degine, nue-omukuar burwi-burwi-dibyale anga be ukoed. We, ani, Bab-Jehová, yeer-yapanne itodaed.
LEV 6:22 Amba deyobi, dule-irwa-anse-goled e-bab-Aarón-sorba-arbaega nugsalenonikir, imakmogoed. Bab-Jehová we-igar degisadegu maiguega uksad. We-ibmar-ukleged bela ogumaklegoed.
LEV 6:23 Dule-irwa-Bab-Dummadse-goled Bab-Jehováʼga na e-ibmar-uked gunnosulid, bela ogumaklegoed.’ ”
LEV 6:24 Bab-Jehová Moisésʼga sunmakdebalid, ega sogded:
LEV 6:25 “Aarónʼga, degi, e-masmalaga be soge: ‘Isgued-ular Bab-Jehováʼga-ibmar-ogumakar-ukleged-igar weyob mai-guoye: Bia ibdurgan-ogumakar-ukleged-e-dukar-egwallege, agi, Bab-Jehová-asabin isgued-ular-ibmar-uklenaid-e-dukar egwallemogoed. We-ibmarde ibmar-bur-ise-islidikidid.
LEV 6:26 Dule-irwa-Bab-Dummadse-goled isgued-ular-ibdurgan-uknaid, sunna we-san gunnoed. Bab-Dummad-dulemarbo-ambikued-neg-e-imbagi neg-islidikidgi gunnoed.
LEV 6:27 We-sangi ibu warmaksadibe, bela we-ibmar-egi-warmaksad islidikidga gunonikoed. We-ibdurgan-abe, morgi milesale, we-mor nega-nue-islidikidgi enuklegoed.
LEV 6:28 Deginbali, san-ukleged, biti-napsa-bategi-dulesa, we-napsa-bate mamarilegoed. Ar esgoro-gordikid-bormogi-dulesardi, we-bormo diigi nue enuklegoed.
LEV 6:29 ” ’We-san Bab-Dummadga-uklenaid unnila dule-irwa-Bab-Dummadse-gormalad-e-gwenadgan-machergan gunmaloed. We-ibmar bur-ise-islidikidid.
LEV 6:30 Ar isgued-ular ibdurgan-uklenaid-abe Bab-Dummad-dulemarbo-ambikued-negse, neg-islidikidse isgued-osulogega-selesgusadi, e-sandi gullegosulid. Bela we-san soogi ogumaklegoed.’ ”
LEV 7:1 Bab-Jehová Moisésʼga sogdebalid: “Israel-dulemarga be sogo: ‘Dule-gwensak dule-baidgi-nosad-ular Bab-Dummadga-ibmar-uked bur-ise-islidikid gued. Weyobi, ega igar megoed:
LEV 7:2 Bia ibmar-durgan-ogumakar-ukleged-e-dukar egwallege, agi dule-baidgi-nosad-ular-ibmar-uklenaid-e-dukar egwallemogoed. Geb e-abe ibmar-ogumakar-ukleged-aila-e-dikarmargi bomi-bomi imakoed.
LEV 7:3 Geb sorbali, bela ibmar-uklenaid-e-gwallu Bab-Jehováʼga uklegoed: E-bunnugi-gwallumar-nanaid, e-samur-birgi-gwallumar-nanaid,
LEV 7:4 e-mirwa-gwabogwad, a-birgi e-gwallumar-nanaid, e-dikarmargi-gwallumar-nanaid, degi, bina-dutugwadgi-gwallumar-nanaid. We-bina-dutugwadgi-gwallumar-nanaid mirwa-gwabogwadba welegoed.
LEV 7:5 ” ’Geb sorbali, dule-irwa-Bab-Dummadse-goled bela wemar ibmar-ogumakar-ukleged-ailagi ogumakar Bab-Jehováʼga ukoed. We-ibmala, isgued-ular ogumakar-uklegedid.
LEV 7:6 We-ibmar bela dule-irwa-Bab-Dummadse-gormalad-e-gwenadgan-machergan nabir gunmaloed. We-ibmar nega-islidikidgi gunmaloed. We, ibmar-bur-ise-islidikidid.’ ”
LEV 7:7 Bab-Jehová Moisésʼga sogdebalid: “Israel-dulemarga be sogo: ‘Isgued-ular-ibmar-uklegedga, degi, dule-baidgi-nosad-ular-ibmar-uklegedga, unnila igar-soggwenna megoed. Dule-baidgi-nosad-ular ibmar-uklenaidi, dule-irwa-Babse-goled-ibmar-imaknaidgadga guoed.
LEV 7:8 We-ibdurgan-uklenaid-e-uka dule-irwa-Babse-goled-ibmar-imaknaidgadga guoed.
LEV 7:9 Amba deyobbali, madubur soogi-yoaled, madubur bormogi-dualed, degi, madubur bormogi-dibyaled, dule-irwa-Babse-goled-ibmar-imaknaidgadga gubaloed.
LEV 7:10 Bela ibmar-gwag-Bab-Dummadga-ukleged, olivo-gwalluba-omukualeddibe, dinnagwaddibe, Aarón, e-masmalamala, na emarbi-mergu sumaloed.’ ”
LEV 7:11 Bab-Jehová Moisésʼga sogdebalid: “Israel-dulemarga be sogo: ‘Dule-gwenatigwar-guega ibmar-ukleged-e-igar weyob megoed:
LEV 7:12 Dule Bab-Jehováʼga dog-nuedye-sogega ibmar-uknaile, we-ibmar-uknaid-ukine, madu-olo-e-inasuli-olivo-gwalluba-omukualed, madu-matargana-e-inasuli-olivo-gwallugi magaled, degi, madubur-bur-nuedgi-madu-ologana-dibyar olivo-gwalluba-omukualed ukbaloed.
LEV 7:13 Bab-Jehováʼga-dog-nuedye-sogega ibmar-uklenaidmala, degi, gwenatigwar-guega ibmar-uklenaidmala, madu-ologana e-inaba-imakar Bab-Jehováʼga uklebaloed.
LEV 7:14 Bab-Jehováʼga ukegala, bela we-ibmarmar-uklegedi, sog-soggwen sulegoed. Geb gwenatigwar-guega dule-irwa-Babse-goled ibmar-e-abe bomi-bomi-imaksadga we-ibmarmar guoed.
LEV 7:15 ” ’Bab-Jehováʼga-dog-nuedye-sogega we-san uklesadi, a-ibagi gullegoed, banedgala bipisaar san sabolegosulid.
LEV 7:16 ” ’Ar Bab-Jehováʼga-ibmar-ogumakar-uklenaidi, dule ibmar-imakedseye sogsagusad-ular uklenadibe, igi Bab-Jehováʼga na ibmar-ukbiedba uklenadibe, adi, a-ibagi a-san gullegoed. Ar san-obichardi, sunna bangi gullebaloed.
LEV 7:17 Ar ibapaagi, we-san amba bukwale, bela soogi ogumaklegoed.
LEV 7:18 ” ’Ar dule ibapaagi gwenatigwar-guega ibmar-ukleged-e-san guchale, we-ibmar-uklesadi, Bab-Jehová bar abingaosulid, bar ega igarga guosulid. Ar ade, we-san swilidiksuli gunonikoed. Dule we-san-guchadi, nue-dummad-isgusye soglegoed.
LEV 7:19 ” ’We-sangi ibmar-swilidiksulid warmaksale, we-san bar gullegosulid, soogi ogumaklegoed. San-baiddi, bela dule-san-swilidik-gudimalad sunna gunmaloed.
LEV 7:20 ” ’Dule-san-swilidiksuli-gudiid, gwenatigwar-guega ibmar-uklenaid-e-san guchale, e-dulemar-abargi onolegoed. Ar we-sande, Bab-Jehováʼgadid.
LEV 7:21 ” ’Deginbali, dule ibmar-isgana-dulegad-ebusale, ibdurgan-e-ibmar-isgana-ebusale, ibmar-ised-isgana-ebusale, geb a-sorbali, gwenatigwar-guega ibmar-uklesad-e-san gunnele, we-dule, e-dulemar-abargi onolegoed. Ar we-sande, Bab-Jehováʼgadid.’ ”
LEV 7:22 Bab-Jehová Moisésʼga sunmakdebalid, ega sogded:
LEV 7:23 “Israel-dulemarga be soge: ‘Moli-bebe-nikad-machered-e-gwallu, sibad-wawaad-bipigwad-e-gwallu, degi, sibad-ome-e-gwallu, bemar bipisaar gunmalosulid.
LEV 7:24 Ibdurgan-sapurbalid-ursirmarse ibmar-burgwisad-e-gwallu, ese oichimaklesad-e-gwalludibe, mer be gunmalo. A-gwallumardi sunna ibmar-bamaladga be ebumaloed.
LEV 7:25 ” ’Dule Bab-Jehováʼga-ibmar-ogumakar-ukleged-e-gwallu guchale, we-dule, e-dulemar-abargi onolegoed.
LEV 7:26 ” ’Deginbali, bia bemar maigumaloe, agi bemar bipisaar nuumar-abe, baid-ibdurgan-abedibe, gunmalosulid.
LEV 7:27 Ar doa-dule ibu-abe guchale, we-dule, e-dulemar-abargi onolegoed.’ ”
LEV 7:28 Bab-Jehová Moisésʼga sunmakdebalid, ega sogded:
LEV 7:29 “Israel-dulemarga be soge: ‘Dule, gwenatigwar-guega ibmar-ukleged-ukele, we-dule, Bab-Jehová-asabin we-ibmar-ukleged abar sedoed.
LEV 7:30 Deginbali, we-dule, e-sunnad ibmar-ogumakar-uklegoedi, Bab-Jehová-asabin sedbaloed. Ibmar-e-gwallu, degi, e-binasgar sedoed. Geb binasgar Bab-Jehová-asabin bana-bana-imaklear ukoed.
LEV 7:31 Dule-irwa-Bab-Dummadse-goled ibmar-e-gwallu ibmar-ogumakar-ukleged-ailagi ogumakoed. Moli-e-binasgardi Aarónʼga, degi, e-masmalaga uklegoed.
LEV 7:32 Dule-gwenatigwar-guega ibmar-ukleged-e-dua-nuedsikidi, dule-irwa-Babse-goled-ibmar-imaknaidga uklegoed.
LEV 7:33 Dule-irwa-Babse-goled dule-gwenatigwar-guega ibmar-ukleged-e-abe-uknaidi, degi, e-gwallu-uknaidi, we-ibmar-e-dua-nuedsikid suoed.
LEV 7:34 Israel-dulemar gwenatigwar-guega ibmar-ukleged-e-binasgar-bana-bana-imakleged, degi, e-dua, dule-irwa-Babse-goled-Aarónʼga, degi, e-masmalaga, ani Bab-Jehová, an uksad. We-igala, degisadegu Israel-dulemarga mai guoed.’ ”
LEV 7:35 Bab-Jehová dule-irwa-ese-goledga, Aarón, degi, e-masmala-nug-imaksad-iba-akale, we-ibmar-Bab-Jehováʼga-ogumakar-uklegedi, Aarónʼga, degi, e-masmalaga ukleged-igar megnonikid.
LEV 7:36 We-dulemar-nug-imaklesad-ibagi, Bab-Jehová Israel-dulemarga igar-uksad, Aarónʼga, degi, e-masmalaga we-ibmarmar ukmaloye. We-igar, degisadegu Israel-waganga mai guoed.
LEV 7:37 Deginbali, Bab-Jehováʼga-ibmar-ogumakar-uklegedsik, Bab-Jehováʼga-ibmar-gwag uklegedsik, isgued-ular ibmar-ogumakar-uklegedsik, weyob igar megisad. Deginbali, dule-baidgi-nosar ibmar-uklegedsik, dule-irwa-Bab-Dummadse-golega nugsalenair ibmar-uklegedsik, degi, gwenatigwar-guega ibmar-uklegedsik, weyob igar megisad.
LEV 7:38 Bab-Jehová Moisésʼga we-igar Sinaí-yalagi uksa gusad. Deunni, Israel-dulemar Sinaí-nega-dulesulidganba gudimargu, Bab-Jehová Moisésʼga ega-ibmar-ukleged-igar uksagusad.
LEV 8:1 Bab-Jehová Moisésʼga sogded:
LEV 8:2 “Aarón, degi, e-masmala beba be sedo. Dule-irwa-Bab-Dummadse-gormalad-e-mormar, degi, nugsalenaidgi-olivo-gwallu-ebuleged be sedbalo. Deginbali, isgued-ular moli-bebe-nikad-sapingwagwad-oburgwileged be sedo, sibad-wawaad-machered-warbo be sedbalo, degi, garba-bipigwadgi madu-inasulid be sedbalo.
LEV 8:3 Degine, bela Israel-dulemar Bab-Dummad-dulemarbo-ambikued-neg-yawagakgi be oambikuoed.”
LEV 8:4 Moisés Bab-Jehová-ega-igar-uksadba ibmar-imaksad. Geb Bab-Dummad-dulemarbo-ambikued-neg-yawagakgi Israel-dulemar-oambikusad.
LEV 8:5 Agi, Moisés Israel-dulemarga sogded: “Bab-Jehová anga igar-uksad, weyob ibmar imakoye.”
LEV 8:6 Geb degine, Moisés, Aarónʼse, degi, Aarón-e-masmalase gochad, ese dagmalagar. Geb diigi amar-ogsad.
LEV 8:7 Aarónʼga mor-dummad-suid yosad. Geb mor-dub sadergi ega edichad. Deginbali, mor-dummad-suitigwad ega yosbalid, geb a-birgi, mor-sakwasulid-efodʼye-nugad ega yosbalid, geb efod-molidubgi mor-dummad-suitigwad nue edichad.
LEV 8:8 Geb sorbali, a-birgi mor-binasgargi-nagued ega nasiksad, geb mor-binasgargi-naguedyabali Urim, degi, Tumim ega sisad.
LEV 8:9 Deginbali, e-nonogi mor-gurgin-ebirmakaled ega sisbalid, geb mor-gurgin-ebirmakaled-birgi, e-bebegi or-matargwagwad ega nasiksad. We-or-matargwagwad oyonaid, Aarón, Bab-Jehováʼga-ibmar-imakega nugsalesye. Ar igi Bab-Jehová ega igar-uksagusa, deyobi Moisés ibmar imaksad.
LEV 8:10 Sorbali, Moisés, nugsalenaidgi-olivo-gwallu-ebuleged susad. Geb we-olivo-gwallugi Bab-Dummadse-goled-neg-sunna-seleged mage-mage imaksad, degi, bela a-yaba ibmar-bukwad mage-mage imaksabalid. Weyobi, we-ibmarmar unnila Bab-Dummadgarbi ebulegega imaksad.
LEV 8:11 Ibmar-ogumakar-ukleged-aila-birgi, ilagugle (7) olivo-gwallu bomi-bomi imaksad. Ibmar-ogumakar-ukleged-birgi, degi, bela we-ailagi ibmar-ebulemalad-bukwad-birgi, olivo-gwallu eosad, adi, we-ibmarmar unnila Bab-Dummadgarbi ebulegegar. Deginbali, dii-sied-birgi, degi, dii-sied-e-nagmargi olivo-gwallu mage-mage imaksabalid, adi, unnila Bab-Dummadgarbi we-ibmarmar ebulegegarbar.
LEV 8:12 Sorbali, Moisés, dule-irwa-Bab-Dummadse-goledga Aarón-nugsaega, Aarón-nonogi olivo-gwallu eosad.
LEV 8:13 Moisés, Aarón-e-masmala-ese-dagega imaksabalid. Geb mor-dummadgan-suitimalad ega yosad, mor-dub sadergi ega edichad. Deginbali, mor-gurgin-ebirmakaled ega sisbalid. Ar igi Bab-Jehová ega igar-uksagusa, deyobi, Moisés ibmar imaksad.
LEV 8:14 Geb a-sorbali, Moisés, moli-bebe-nikad-sapingwagwad-isgued-ular-ukleged ega sedadega imaksad. Geb Aarón, degi, e-masmala, moli-bebe-nikad-sapingwagwad-e-nono-birgi e-argan mesismalad.
LEV 8:15 Geb degine, Moisés moli-bebe-nikad-e-dukar egwachad. Geb e-googi moli-abe-wesgua, ibmar-ogumakar-ukleged-ailagi moli-bebeyob-gwigwichidgi, degi, aila-dikarmargi moli-abe mage-mage imaksad, adi, a-aila, swilidik imakegar. Abe-gwabgusaddi ibmar-ogumakar-ukleged-aila-nagagi eosad. Weyobi, ibmar-ogumakar-ukleged-aila swilidik gunonikid, degi, unnila Bab-Dummadgarbi ebulegega gunonikid.
LEV 8:16 Moisés we-moli-bebe-nikad-uklenaid-e-samur-birgi gwallumar-nanaid, e-bina-dutugi gwallumar-nanaid, mirwa-gwabogwad, degi, mirwa-birgi-gwallumar-nanaid bela susad. Geb bela we-ibmarmar ibmar-ogumakar-ukleged-ailagi ogumaksad.
LEV 8:17 Ar Moli-bebe-nikad-sapingwagwad-e-ukadi, e-sandi, degi, e-saadi, bela Israel-dulemar-danar-danar-bukwad-magaba ogumaksad, ar igi Bab-Jehová ega igar-uksagusa, deyobi Moisés ibmar imaksad.
LEV 8:18 A-sorbali, Moisés, sibad-wawaad-machered Bab-Jehováʼga-ogumakar-uklegoed ega sedagega imaksad. Geb Aarón, degi, e-masmala we-sibad-wawaad-machered-e-nono-birgi e-argan mesismalad.
LEV 8:19 Geb degine, Moisés we-sibad-wawaad-machered-e-dukar egwachad, geb sibad-wawaad-abe ibmar-ogumakar-ukleged-aila-dikarmargi bomi-bomi imaksad.
LEV 8:20 A-sorbali, Moisés sibad-wawaad-machered-e-san goa-goa imaksad. Geb sibad-wawaad-e-nono, e-san-goamaksad, degi, e-gwallu soogi ogumaksad.
LEV 8:21 E-samurmar, degi, e-nagmar diigi enuksad. Geb a-sorbali, igi Bab-Jehováʼga-ibmar-soogi-ogumakar-ukleged-yeer-yapanned ogumakledae, deyobi, Moisés we-sibad-wawaad ibmar-ogumakar-ukleged-ailagi ogumaksad, ar igi Bab-Jehová ega igar-uksa gusa.
LEV 8:22 A-sorbali, Moisés sibad-wawaad-machered-baid ega sedagega imaksad. We-sibad-wawaadi Bab-Jehováʼga-arbaega-nugsalenair ukledaedid. Aarón, degi, e-masmala sibad-wawaad-machered-e-nono-birgi na e-argan mesismalad.
LEV 8:23 A-sorbali, Moisés sibad-wawaad-e-dukar egwachad. Geb Moisés na e-googi sibad-wawaad-e-abe wesgua, Aarón-e-uaya-duku-argan-nuedsikidgi, abe mage-mage imaksad, degi, e-goo-dummad-argan-nuedsikidgi, degine, e-goo-dummad-nag-nuedsikidgi, abe mage-mage imaksabalid.
LEV 8:24 Deginbali, Moisés, Aarón-e-masmala-ese-dagega imaksabalid. Moisés e-googi sibad-wawaad-e-abe-wesgua, amar-uaya-duku-argan-nuedsikidgi, abe mage-mage imaksad, degi, amar-goo-dummagan-argan-nuedsikidgi, degine, amar-goo-dummagan-nag-nuedsikidgi, abe mage-mage imaksabalid. Geb sibad-wawaad-e-abe-obichadi ibmar-ogumakar-ukleged-aila-dikarmargi eosad.
LEV 8:25 Geb Moisés sibad-wawaad-machered-e-gwallu, e-bunnu, e-samurgi gwallumar-nanaid, e-bina-dutugwadgi-gwallumar-nanaid susad. Deginbali, mirwa-gwabogwad, e-gwallumarse-bakale, degi, sibad-wawaad-machered-e-dua-nuedsikid susbalid.
LEV 8:26 Moisés, Bab-Jehová-asabin madu-inasulid garbagi-bukwadi susad, degi, madu-olo-inasulid susbalid. Deginbali, madu-olo-olivo-gwalluba-oburaled, degi, madu-matar susbalid. Geb we-madumala, sibad-wawaad-e-gwallu-birgi, degi, sibad-wawaad-e-dua-nuedsikid-birgi urbisad.
LEV 8:27 Geb bela-we-ibmarmar Aarón-e-argangi, degi, e-masmala-argangi urbisad. Geb Aarón, degi, e-masmala, we-ibmarmar Bab-Jehováʼga-ukega, Bab-Jehová-asabin bana-bana imaksamalad.
LEV 8:28 Moisés, Aarón-annik, degi, e-masmala-annik gannar we-ibmarmar susad. Geb ibmar-ogumakar-ukleged-ailagi, ibmar-Bab-Jehováʼga-uklenaidba-mesa ogumaksad. We-ibmar Bab-Jehováʼga-arbaega nugsalenaidgi-ukleged yeer-yapannedid, Bab-Jehováʼga soogi ogumakar ibmar-uklegedid.
LEV 8:29 Geb degine, Moisés sibad-wawaad-machered-e-binasgar susad. Geb Bab-Jehováʼga-ukega, Bab-Jehová-asabin bana-bana imaksad. We-binasgar Bab-Jehováʼga-arbaega-nugsalenaidgi-ukleged Moisésʼga uklesadid. Ar igi Bab-Jehová ega igar-uksagusa, deyobi, Moisés ibmar imaksad.
LEV 8:30 A-sorbali, Moisés, nugsalenaidgi-olivo-gwallu-ebuleged, degi, ibmar-ogumakar-ukleged-ailagi abe-siid susad, geb Aarónʼgi, degi, e-masmalagi bomi-bomi imaksad. Deginbali, wemar-e-mormargi bomi-bomi imaksabalid. Weyobi, Moisés, Aarón, degi, e-morse-bakale, Bab-Jehováʼga swilidik imaksad. Deginbali, Aarón-masmala, degi, e-morse-bakale, swilidik imaksabalid.
LEV 8:31 Geb Moisés Aarónʼga, degi, Aarón-e-masmalaga sogded: “Bab-Dummad-dulemarbo-ambikued-neg-yawagak-dogedgi, bemar san dunamar. Agi, Bab-Jehováʼga-arbaega-nugsalenaidgi madu-ukleged-garbagi-siidba be san gunmaloed. Igi Bab-Jehová anga igar-uksagusgu, anga sogsagusa: ‘Aarón, degi, e-masmala we-san gunmaloye.’
LEV 8:32 Geb san-obichad, madu-obichad, be ogumakmaloed.
LEV 8:33 Ibagugle (7) Bab-Jehováʼga-arbaega-nugsaleged-iba naguoed. We-ibagan-gwinmakedse, bemar Bab-Dummad-dulemarbo-ambikued-neggi bukumaloed.
LEV 8:34 Ar igi emi ibmar-imaklesa, deyobi, Bab-Jehová bemar-isgued-ular ibmar-imakoye sogsagusad.
LEV 8:35 Degisoggu, ibagugle (7) mutikidba, degi, ibginedba bemar Bab-Dummad-dulemarbo-ambikued-neg-yawagakgi bukumaloed, ar igi Bab-Jehová-bemarga-sogsagusa, adi, bemar melle burgwemalagar. Ar deyob Bab-Jehová anga sogsad.”
LEV 8:36 Aarón, degi, e-masmala, ar igi Bab-Jehová Moisésʼga ibmar-sogsagusa, bela deyobi ibmar imaksamalad.
LEV 9:1 Ibabaabakgi (8), Moisés, Aarónʼse, Aarón-e-masmalase, degi, Israel-girmar-dummaganse gochad.
LEV 9:2 Moisés Aarónʼga sogded: “Isgued-ular-oburgwilegega moli-bebe-nikad-sapingwagwad Bab-Jehováʼga be ukoed, deginbali, Bab-Jehováʼga sibad-wawaad-machered ogumakar-ukega be ukbaloed. We-ibdurgan-warbogwad swilidik, gwen-boni-nikasulid, Bab-Jehová-asabin be ukoed.
LEV 9:3 ”A-sorbali, Israel-dulemarga be sunmakoed, amarga be sogoed: ‘Isgued-ular-oburgwilegega sibad-machered be sedamaloye. Deginbali, Bab-Jehováʼga ogumakar-ukega moli-bebe-nikad-sapingwagwad, degi, sibad-wawaad-sapingwagwad be sedamarbaloye. We-ibdurgan-warbogwad birgagwen nikamaloed, degi, swilidik, gwen-boni-nikasulid guoed.
LEV 9:4 Deyobbali, dule-gwenatigwar-guega moli-bebe-nikad-machered, degi, sibad-wawaad-machered be sedamarbaloed. We-ibdurgan Bab-Jehová-asabin ogumakar be ukmaloed. Deginbali, ibmar-gwag-gullemalad olivo-gwalluba-oburar be sedamarbaloed. Ar emi-ibagi, Bab-Jehová bemarse e-gangued oyogoed.’ ”
LEV 9:5 Israel-dulemar, Moisés-ese-ibmar-egichisadi, bela Bab-Dummad-dulemarbo-ambikued-neg-yawagakse sesmalad. Bela Israel-dulemar Bab-Jehováʼga-ibmar-ogumakar-ukleged-ailase nonimalad. Geb Bab-Jehová-asabin gwichi gusmalad.
LEV 9:6 Geb degine, Moisés sogded: “Bab-Jehová bemarga igar uknaid: ‘Weyob, bemar ibmar imakmaloye.’ Ar deyob be imakmalale, Bab-Jehová na e-gangued-yeerdakleged bemarse oyogoed.”
LEV 9:7 Geb a-sorbali, Moisés Aarónʼga sogded: “Ibmar-ogumakar-ukleged-ailase be dage. Agi, be-isgued-ular, Bab-Jehováʼga-ibmar-ukleged be ukdage. Degi, be-ibdurgan-ogumakar-ukleged Bab-Jehováʼga be ukdabali. Bab-Jehová bebo-igar-naboged, degi, Bab-Jehová e-dulamarbo-igar-naboged be imake. Deginbali, Israel-dulemar-e-ibmar-uked Bab-Jehováʼga be ukbali, adi, Bab-Jehová e-dulamarga e-isgued osulogega, ar igi Bab-Jehová na igar-uksa gusa.”
LEV 9:8 Geb degine, Aarón ibmar-ogumakar-ukleged-ailase naded. Geb e-isgued-ular, moli-bebe-nikad-sapingwagwad-uknaid-e-dukar egwachad.
LEV 9:9 Geb e-masmala we-moli-abe ega uksamalad. Aarón abegi na e-goo owardikusgua, ailagi-moli-bebeyob-gwigwichidgi abe mage-mage imaksad. Abe-gwabgusaddi ibmar-ogumakar-ukleged-aila-nagagi eosad.
LEV 9:10 A-sorbali, moli-oburgwilesad-e-gwallu, e-mirwamar, degi, e-binagi-gwallumar-nanaid, ibmar-ogumakar-ukleged-ailagi ogumaksad. Ar igi Bab-Jehová Moisésʼga igar-uksagusa, deyobi, Aarón ibmar imaksad.
LEV 9:11 Ar moli-e-sandi, degi, e-ukadi Israel-dulemar-danar-danar-bukwad-magaba ogumaksad.
LEV 9:12 Deginbali, Aarón Bab-Jehováʼga-ibdula-ogumakar-ukleged-e-dukar egwachad. Degine, e-masmala a-abe ega uksad. Geb Aarón ibmar-ogumakar-ukleged-aila-e-dikarmargi abe bomi-bomi imaksad.
LEV 9:13 A-sorbali, Aarón-masmala e-bab-Aarónʼga moli-bebe-nikad-e-san-goa-goad uksad. Deginbali, e-nono ega uksabalid. Geb Aarón bela we-ibmarmar ibmar-ogumakar-ukleged-ailagi ogumaksad.
LEV 9:14 Geb moli-samurmar, degi, e-duamar enuksad. Geb san-ogumaklenaidba-mesa ibmar-ogumakar-ukleged-ailagi ogumaksad.
LEV 9:15 Deginbali, Aarón, Israel-dulemar-e-isgued-osulogega Bab-Jehováʼga ibdurgan uksabalid. Dulemar-isgusad-ular sibad-machered-uklenaid susad, degi, e-dukar-egwachad. Geb degine, dulemar-isgued-ular Bab-Jehováʼga uksad, ar igi iduar e-isgued-ular ibmar imaksagusa, deyobi imaksabalid.
LEV 9:16 Ar igi igar-mai, aba Aarón Bab-Jehováʼga ibdurgan ogumakar uksad.
LEV 9:17 Degi, ibmar-gwag-gullemalad uksabalid. Geb Aarón, a-ibmar-gwag argan-nukgwen susad, geb wakdar-ibmar-ogumakar-uklegedba-mesa ibmar-ogumakar-ukleged-ailagi ogumaksad.
LEV 9:18 Geb sorbali, dule-gwenatigwar-guega moli-bebe-nikad-machered-uklenaid-e-dukar egwachad, degi, sibad-wawaad-machered-uklenaid-e-dukar egwachabalid. Aarón-masmala e-bab-Aarónʼga a-abe uksad, geb Aarón ibmar-ogumakar-ukleged-aila-dikarmargi a-abe bomi-bomi imaksad.
LEV 9:19 Deginbali, Aarón-masmala e-bab-Aarónʼga moli-machered-e-gwallu, degi, sibad-wawaad-machered-e-gwallu, e-bunnumar, e-samurgi-gwallumar-nanaid, e-mirwamar, degi, e-binamargi gwallumar-nanaid uksabalid.
LEV 9:20 Geb we-gwallumar moli-machered-e-binasgargi, degi, sibad-wawaad-machered-e-binasgargi urbisad. Geb degine, we-gwallumar ibmar-ogumakar-ukleged-ailagi ogumaksad.
LEV 9:21 We-ibdurganmar-e-binasgardi, degi, e-duamar-nuedsikiddi, Aarón Bab-Jehová-asabin bana-bana imaksad. Ar igi Bab-Jehová Moisésʼga sogsagusa, deyobi imaksad.
LEV 9:22 Israel-dulemar-bukwadsik Aarón e-argan oyoded, geb amargi ise-nued-binsaedgi sunmaksad. Dulemar-isgued-ular ibmar-durgan-uksagu, Bab-Jehováʼga ibmar-ogumakar-uksagu, degi, dule-gwenatigwar-guega ibmar-uksagu, Aarón ibmar-ogumakar-ukleged-aila-naba-gwichidgi banguded.
LEV 9:23 Geb sorbali, Moisés, Aarónʼbo, Bab-Dummad-dulemarbo-ambikued-negse dogsamalad. Agi gannar noarmargua, Israel-dulemargi ise-nued-binsaedgi sunmakdemalad. Geb Bab-Jehová na e-gangued-yeerdakleged Israel-dulemarse oyosad.
LEV 9:24 Degidgine, Bab-Jehová soo barmialid. Geb ibmar-ogumakar-ukleged-aila-birgi ibdurgan-gummakega-bukwad, degi, ibdurgan-gwallumar-bukwad bela soose gummaksad. Ar deyob daksamargua, bela Israel-dulemar weligwaledba oimakdemalad. Geb Bab-Jehová-nug-odummogega napase e-wagar dulluu imaksamalad.
LEV 10:1 Aarón-masmala Nadab, degi, Abiú, na egad-egad sianar susmalad. Geb sianargi soo ogasmalad, deginbali, sianargi ina-wawadikid urbismarbalid. Degi-inigwele, Bab-Jehová-ega-igar-uksadba imaksasurmalad.
LEV 10:2 Degisoggu, Bab-Jehová Nadabʼgi, degi, Abiúʼgi soo barmialid. Geb wemala, Bab-Jehová-asabin burgwismalad.
LEV 10:3 Geb Moisés, Aarónʼga sogded: “Bab-Jehová we, sogsa gusad. Deun sogsagusgu: ‘Dule anse warmakmaladga, an-islidik-gued an ega oyogoed. Bela dulemarga an-gangued-yeerdakleged an oyogoed.’ ” Agine, Aarón bar sunmaksasulid.
LEV 10:4 Geb a-sorbali, Moisés Uziel-masmalase gochad, Misaelʼse, degi, Elzafánʼse. Uzielʼde Aarón-e-gilor gued. Geb Moisés we-masmalaga sogded: “Be dagmar. Bab-Jehováʼse-goled-neggi be-gwenadgan-warbogwad-burgwismaid be onodamar. Israel-dulemar-danar-danar-bukwad-magaba be sedmar.”
LEV 10:5 Geb degine, Misael, Elzafánʼbo e-gwenadgan-burgwismalad-ononadmalad. Geb dule-burgwismalad-e-mor-dummad-yoidgi bipirmakar Israel-dulemar-danar-danar-bukwad-magaba onosmalad. Ar igi Moisés ega igar-uksa, deyob imaksamalad.
LEV 10:6 Geb degine, Moisés, Aarónʼga, degi, Aarón-masmala-warbogwad Eleazarʼga, degi, Itamarʼga sogded: “Be bukib-itoged-oyomalaga, melle be gwiarsuli-gudii gumalo, degi, melle be-mor be esirmakmarbalo. Degisulile, be burgwemaloed, degine, Bab-Jehová bela-Israel-dulemargi uludbaloed. Ar be-gwenadgan-Israel-dulemardi, Bab-Jehová-soo-odesad-ular, akarsuli bukib-itomaloed.
LEV 10:7 Bab-Dummad-dulemarbo-ambikued-neg-yawagakgi mer be bangumalo, adi, mer be burgwemalagar. Na bemar ebinsao, ar Bab-Jehováʼga-arbaega bemar-nonogi Bab-Jehováʼga-nugsalenaidgi-olivo-gwallu-ebuleged eolesad.” Eleazar, degi, Itamar, Moisés-ega-sogsadba ibmar imaksamalad.
LEV 10:8 Geb degine, Bab-Jehová Aarónʼga sunmakded, ega sogded:
LEV 10:9 “Be, degi, be-masmala dulemar-anbo-ambikued-negse dogsokarmalale, bemar bipisaale vino, degi, sisa gobosurmalad. Ar degisulile, bemar burgwemaloed. We-igar be-waganga degisadegu-mai guoed.
LEV 10:10 Ar bemar nue-mag-dake gumalargebed, igid ibmar-nuedi, igid ibmar-isgana, degi, igid ibmar-swilidikidi, igid ibmar-swilidikidsuli.
LEV 10:11 Deginbali, ani, Bab-Jehová, an bemarga Moisésʼba igar-uksagusad, bemar Israel-dulemar-odurdakoed.”
LEV 10:12 Moisés, Aarónʼga, degi, Aarón-masmala-dula-besmalad-Eleazarʼga, degi, Itamarʼga sogded: “Bab-Jehováʼga-ibmar-gwag-gullemalad-e-madubur-uklenaid-gwabgusad be sumala. Geb we-madubur, e-inasuli, ibmar-ogumakar-ukleged-aila-naba be gunmar, ar we-ibmarde bela-bela ibmar-islidikidid.
LEV 10:13 Neg-islidikidgi be gunmaloed. Ar we-ibmar Bab-Jehováʼga-soogi-ogumakar-uklegedid, bega, degi, be-masmalaga uklesad. Ar weyobi anga igar uklesad.
LEV 10:14 ”Deginbali, be, be-masmala, degi, be-bunamala ibmar-e-binasgar-bana-bana-imaklesad, degi, e-dua-Bab-Jehováʼga-uklesad sunna neg-islidikidgi gunmarbalid. We-ibmarmar Israel-dulemar gwenatigwar-guega Bab-Jehováʼga ibmar-uklegedid. Bab-Jehová sogsad: ‘Bega, degi, be-mimmiganga degisadegu uklegoye.’
LEV 10:15 Bab-Jehováʼga ibmar-ogumakar-uklenaid-e-gwallu-ogumaklegoedba-mesa, ibmar-dua-uklegoed, degi, binasgar-bana-bana-imaklegoed Bab-Jehováʼga uklegoed. We-ibmarmar bega, degi, be-mimmiganga degisadegu uklegoed, ar igi Bab-Jehová igar-uksa gusa.”
LEV 10:16 Geb degine, Moisés, isgued-ular-sibad-machered-uklenaid egichided. Ar Moisés wisguargu, bato bela gummaksaye, Aarón-masmala-warbogwad Eleazarʼse, degi, Itamarʼse uluded, amarga sogded:
LEV 10:17 —¿Ar ibiga bemar neg-islidikidgi dule-isgusad-ular-Bab-Jehováʼga-ibmar-uklenaid guchasurmala? Ar we-ibmar nue-islidikid gued. Bab-Jehová dulemar-e-isgued-osulogega bemarga uksanad. Ar we-ibmar-uklegedgi Bab-Jehová dulemar-e-isgued osuloged.
LEV 10:18 Ar sibad-machered-e-abe Bab-Dummadse-goled-Neg-Islidikidyaba seledsursoggu, bemar sibad-machered-e-san neg-islidikidgi guchawilubmalanad, ar igi an bemarga igar-uksa gusa.
LEV 10:19 Geb Aarón, Moisés-abin sogded: —Emi, an-masmala Nadab, degi, Abiú, na e-isgued-ular ibmar uksamalanad, degi, Bab-Jehováʼga ibmar-ogumakar uksamarbalinad. Degi-inigwele, we-masmala-ebogwad an surgunonikid. Ar emi, isgued-ular-ibmar-ukleged an guchana, ¿Bab-Jehováʼde nabir an-dakoen be insae? Suli. Nabir an-dakosulinad.
LEV 10:20 Moisés, weyob Aarón-e-abin-imaksa-itosgua, yeer itosad.
LEV 11:1 Bab-Jehová, Moisésʼga, degi, Aarónʼga sogded:
LEV 11:2 “Israel-dulemarga be sogmar: ‘Bela we-napneggi ibdurgan-bukwamalad-abargi, wemar be gunmaloed:
LEV 11:3 Ibdurgan-e-goonasi-darbo-mamararmalad, gagan-masar, gannar-mabaliga sabanyagi mas saboged, Wegiid-ibdurganmar be nabir gunnoed.
LEV 11:4 ” ’Degi-inigwele, ibdurgan-gagan-masar, gannar-mabaliga sabanyagi mas saboged, amar-abargi goonasi-darbo-mararsurmalad gudidimogad. Amardi be gunnosulid. A-ibdurganmala, wemalad: Moli-yargan-mureged, we-moli gagan-masar, gannar-mabaliga sabanyagi mas saboged, ar e-gonasidi, mararsulid. We-ibdurgan bemarga ibmar-swilidiksulidga guoed.
LEV 11:5 Deginbali, nubi, gannar-mabaliga sabanyagi mas saboged, ar e-gonasidi, mararsulid. We-ibdurgan bemarga ibmar-swilidiksulidga guoed.
LEV 11:6 Amba deyobi, ugdun, gannar-mabaliga sabanyagi mas saboged, ar e-gonasidi, mararsulid. We-ibdurgan bemarga ibmar-swilidiksulidga guoed.
LEV 11:7 Deginbali, sina, goonasi-darbo-marar-nika-inigwele, gannar-mabaliga sabanyagi mas sabosulid. We-ibdurgan bemarga ibmar-swilidiksulidga guoed.
LEV 11:8 ” ’We-sanmar be gunnosurmalad, deginbali, a-ibmar-burgwarmalad be ebugosurmarbalid. Bemar we-ibmarmar swilidiksuli dakoed.
LEV 11:9 Ibdurgan-dii-yagi-gudidimalad-see-nikamalad, degi, uka-nikamalad, demargineddibe, diwargineddibe, be sunna gunmaloed.
LEV 11:10 Ar ibmar-dummagan, degi, ibmar-senigan-see-nikasurmalad, degi, uka-nikasurmalad, demargineddibe, diwargineddibe, bemar we-ibdurgan swilidiksuli dakoed.
LEV 11:11 ” ’E-san bemar gunnosulid, deginbali, we-ibmar-burgwarmalad bemar ima-dakbaloed, ar ade, bemarga ibmar-swilidiksulidga guoed.
LEV 11:12 Bela ibmarmar-diigi-gudidimalad-see-nikasurmalad, degi, uka-nikasurmalad, bemarga ibmar-swilidiksulidga guoed.
LEV 11:13 ” ’Bemar we-nuumar ima-dakoed, be gunnosurmalad, ar ade, we-nuumar bemarga swilidiksuli gued: Sulubagi, sulubagi-garmar-bisge-bisge-imaked, uabu,
LEV 11:14 mula, degi, bela sulubagi-senigan akar-akar-daklemalad,
LEV 11:15 bela abgokor akar-akar-daklemalad,
LEV 11:16 nuu-dummad-dukar-suid avestruzʼye-nugad, irmon-senigan, bela dilli-dilli akar-akar-daklemalad,
LEV 11:17 irmon, diidod, badu-cisneʼye-nugad,
LEV 11:18 noo-mutikid, gorgi, mula-dummad,
LEV 11:19 dabgala, bela dabgala-dummagan-akar-akar-daklemalad, sikwi-nugar-suid-abubillaʼye-nugad, degine, uksir.
LEV 11:20 ” ’Bela ibsenigan-gukumalad mali-walabakegwadgi-nanamalad, bemarga ibmar-swilidiksulidga guoed.
LEV 11:21 Degi-inigwele, ibsenigan-gukumalad mali-walabakegwadgi-nanamalad, ukinbali, ichomakega e-nag-sorbalid-bur-suigan nikamalad, be sunna gunmaloed.
LEV 11:22 Bemar we-ibmarmar sunna gunmaloed: Bela ses-dummagan-akar-akar-daklemalad, sesmar, degi, ses-senigan.
LEV 11:23 Ar bela ibsenigan-gukumalad-bamalad mali-walabakegwadgi-nanamalad, bemarga ibmar-swilidiksulidga guoed.’ ”
LEV 11:24 Bab-Jehová, Moisésʼga, degi Aarónʼga sogdebalid: “We-ibmarmar-ulale, bemar swilidiksuli gunonikoed. Ar doa-dule we-ibdurgan-burgwarmalad ebusdibe, neg-mutikidse swilidiksuli gudii guoed.
LEV 11:25 Ar doa-dule we-ibdurgan-burgwaled ebusale, na e-mor enukoed. We-dule mutikidse swilidiksuli gudii guoed.
LEV 11:26 Bela ibdurgan goonasi-mamararsulid, degi, mas gannar-mabaliga sabanyagi mas-sabosulidi, bemar swilidiksuli dako. Bemar we-ibdurgan-ebusale, swilidiksuli be guoed.
LEV 11:27 Bela ibdurgan-mali-walabake-nikamalad e-goo-nasigi-nanasurmalad, bemarga ibmar-swilidiksulidga guoed. Doa-dule we-ibmar-burgwaled ebusale, neg-mutikidse swilidiksuli gudii guoed.
LEV 11:28 Dule we-ibmarmar-burgwaled ebusale, e-mor enukoed. We-dule mutikidse swilidiksuli gudii guoed. We-ibmarmar ibmar-swilidiksuli be dakoed.
LEV 11:29 Napagi ibmar-durgan-garmakdii-abargi, bemar we-ibdurgan swilidiksuli dakoed: Diachugiid-comadrejaʼye-nugad, nusa, ammanoomar-akar-akar-daklemalad,
LEV 11:30 akwa-nuku, daim, isgin, asbanmar, degi, gwanurgiid-camaleónʼye-nugad.
LEV 11:31 Napagi ibdurgan-garmakdii-abargi, we-ibdurgan bemar swilidiksuli dakoed. Ar doa-dule we-ibmar-burgwaled-ebusale, neg-mutikidse swilidiksuli gudii guoed.”
LEV 11:32 Bab-Jehová, Moisésʼga, degi, Aarónʼga sogdebalid: “We-ibdurganmar-burgwaled we-ibmarmargi argwachale: Ibmar-urgogi-sobaledgi, ibmar-ibdurgan-ukagi-sobaledgi, morgi, sagugi, degi, ibmar-arbaedgi-ebulegedgi, argwachale, we-ibmarmar mutikidse swilidiksuli guoed. Ar gannar we-ibmarmar swilidik-guega, diigi enuklegergebed. Geb deyobi gannar swilidik gunonikoed.
LEV 11:33 ”Napsa-bormo-yagi we-ibmarmar-burgwaled argwachale, we-napsa-bormo-yagi bela ibmar-bukwadi ibmar-swilidiksulidga gunonikoed. Degisoggu, we-napsa-bormo mamarilegoed.
LEV 11:34 We-napsa-bormogi-dii-siid ibmar-gullegedgi dedemaksale, we-ibmar-gulleged swilidikidsulidga gunonikoed. Deyobbalid, we-napsa-bormogi-dii-siid gobedgi dedemaksale, we-gobed swilidiksuli gunonikoed.
LEV 11:35 ”We-ibmar-burgwaled ibmar-bamaladgi argwachale, we-ibmarmar bela ibmar-swilidiksulidga gunonikoed. Madu-yoedgi argwachadibe, soogi argwachadibe, we-ibmarmar swilidiksulidga gunonikoed. Degisoggu, we-madu-yoed mamarilegoed, degi, we-soo obelolegoed. We-ibmarmar swilidiksuli gunonikid. Degisoggu, bemar deyobi, we-ibmar dakoed.
LEV 11:36 ”Degi-inigwele, unnila dian, degi, dii-sailagi bia dii-sulege, amarbi amba ibmar-swilidikidga guoed, gwen isguosulid. Ar dule we-ibmar-burgwaled-ebusaddi, swilidiksuli gunonikoed.
LEV 11:37 ”Ar we-ibmar-burgwaled ibmar-gwag-diglesokalidgi argwachale, we-ibmar-gwag amba swilidik guoed.
LEV 11:38 Ar ibmar-gwaggi dii eolesardi, geb agi, we-ibmar-burgwaled egi argwachale, adi, we-ibmar-gwag swilidiksuli gunonikoed.
LEV 11:39 ”Ibdurgan-nabir-gulleged burgwisale, ar doa-dule we-ibmar-burgwaled-ebusale, neg-mutikidse swilidiksuli gudii guoed.
LEV 11:40 Dule we-ibmar-burgwisad-e-san guchale, na e-mor enukoed. We-dule mutikidse swilidiksuli gudii guoed. Doa-dule we-ibmar-burgwisad magaba-onosale, na e-mor enukoed. We-dule mutikidse swilidiksuli gudii guoed.”
LEV 11:41 Bab-Jehová, Moisésʼga, degi Aarónʼga sogdebalid: “Bemar napagi-ibdurgan-garmakmalad gunnosulid, ar ade, ibmar-swilidiksurmaladid.
LEV 11:42 ”Ibdurgan-unimakar-nanamalad, e-mali-walabakegwadgi-nanamalad, degi, e-malimar-ichesulidgi-nanamalad, bemar gunnosurmalad, ar ade, swilidiksurmaladid.
LEV 11:43 Ibdurgan-unimakar-nanamalad-gunnedba mer be swilidiksuli gumalo, mer be isgumalo, ar we-ibdurganmar swilidiksuli gumalad.
LEV 11:44 ”Ani, an-bemar-Bab-Dummad-Jehová gued. Ar an dule-isligwaledsoggu, bemar gwage-swilidik imakmalo, deyobi, bemar gwage-swilidik gudimalo. Ibdurgan-unimakar-nanamalad-gunnedba, degi, ebugedba, mer be swilidiksuli gumalo.
LEV 11:45 Ani an Bab-Jehová gued. Ani an Egipto-yargi bemar-onosad, adi, an be-Bab-Dummadga guegar. Degisoggu, bemar gwage-swilidik imakmala, ar an dule-islidikidid.
LEV 11:46 ”Ibdurgansik, nuumarsik, bela ibdurgan-dii-yagi-gudidimaladsik, degi, bela ibdurgan-napagi-garmakdidimaladsik, weyob igarmar megisad.
LEV 11:47 Adi, bemar magar-dakega, igid ibmar-isgana-gue, igid ibmar-nuegan-gue. Deginbali, igid-ibdurgan nabir gullege, igid-ibdurgan ise gullebali.”
LEV 12:1 Bab-Jehová, Moisésʼga sogded:
LEV 12:2 “Israel-dulemarga be weyob sogo: ‘Ome-wargwen gurgin-nika gunonikile, geb machigwa baknonikile, ibagugle (7) san-swilidiksuli gudii guoed. Ar igi na e-igar-dakdiir gudidae, deyobi gudiguoed.
LEV 12:3 Ibabaabakgi (8) machi-bipi-ibe e-abgan-uka-duku siklegoed.
LEV 12:4 Ar e-nandi iba-dulagwen-gakambe-gakapaa (33) e-boni-itosad-ulale, san-urukdii guoed. San-urukdiid-e-ibagan-berguedse, geb ibmar-swilidikmalad ebugoed, degi, Bab-Dummad-goled-negse dogoed.
LEV 12:5 ” ’Ar bunolo-baksardi, adi, itoged-ilabo san-swilidiksuli gudii guoed. Ar igi na e-igar-dakdiir gudidae, deyobi gudii guoed. Geb iba-dulapaa-gakanergwa (66) e-boni-itosad-ulale, san-urukdii guoed.
LEV 12:6 ” ’Ome, machigwa-nikusad-ulardibe, bunolo-nikusad-ulardibe, san-urukdiid-e-ibagan-bergunonikile, ome sibad-wawaad-bipigwad Bab-Jehováʼga-ogumakar-ukega sedoed. Degi, e-isgued-ular, wagnuu-gwagwendibe, sapur-nuu-gwagwendibe, Bab-Dummad-dulemarbo-ambikued-neg-yawagakse oburgwilegega sedoed. Agi dule-irwa-Bab-Dummadse-goledga ukoed.
LEV 12:7 Geb dule-irwa-Bab-Dummadse-goled we-ome-e-isgued-eliega Bab-Jehová-asabin a-ibmar ogumakar ukoed. Deyobi, we-ome, e-burba-milesadgi nue-swilidik gunonikoed. ” ’Omega machigwa-uklesdibe, bunolo uklesdibe, weyob ega igar-mai guoed.
LEV 12:8 Ar ome sibad-wawaad-bipigwad-bakega mani galakuele, sunna wagnuu-gwabodibe, sapur-nuu-gwabodibe, sedoed. Gwagwen ogumakar-uklegega guoed. Baiddi, e-isgued-ular-uklegega guoed. Dule-irwa-Bab-Dummadse-goled we-ome-e-isgued-eliega Bab-Jehováʼga ukoed. Deyobi, ome nue-swilidik gunonikoed.’ ”
LEV 13:1 Bab-Jehová, Moisésʼga, degi, Aarónʼga sogded:
LEV 13:2 “Dule-gwensak e-ukagi ukamar-mullu-mullu-bukwale, duuled-siidibe, e-ukagi ibmar-sipuu naidibe, yaa-siid naibe-bunayob-dakledibe, we-dule, dule-irwa-anse-goledse seledoed, Aarónʼsedibe, e-masmalasedibe.
LEV 13:3 Dule-irwa-anse-goled dule-ukagi-yaa-siid dakoed. Yaa-siidgi e-siga sipuu naile, degi, yaa ise-nue-gulluu daklegele, wedi, naibe-buna-yaa gued. Geb dule-irwa-anse-goled uka-daksad-sorbali, sogoed: ‘We-dule, swilidiksurye.’
LEV 13:4 ”Ar dule-ukagi ibmar-sipu-naid, unnila asginbi-nai daklegele, deginbali, e-siga sipuu daklesurbalile, dule-irwa-anse-goled, ibagugle (7) we-dule dule-baigangi bachikii mesoed.
LEV 13:5 Geb ibagugledgine (7), dule-irwa-anse-goled, we-dule-e-uka gannar dakbaloed. Ar amba gannar deyob yaa daklegele, degi, ega bar nasgusulile, dule-irwa-anse-goled, gannar ibagugle (7) we-dule mesbaloed.
LEV 13:6 Geb ibagugle-nasad-sorbali (7), dule-irwa-anse-goled, we-dule-e-uka gannar dakbaloed. Ar yaa bar nasgussulile, degi, aka bur bergumai daklegele, dule-irwa-anse-goled sogoed: ‘We-dule, swilidik guye.’ Ar ade, unnila binsa uka ainisad. Geb degine, dule na e-mor enukoed, geb dule swilidik gunonikoed.
LEV 13:7 ”Uka-oyoapid-sorbali, we-dulega yaa nasgudele, dule-irwa-anse-goledse gannar e-uka oyonabaloed.
LEV 13:8 Dule-irwa-anse-goled we-dule-e-uka dakoed. Ar yaa-siid nasgumai-dakele, we-dule swilidiksurye sogoed, ar we-yaade, naibe-buna-yaa gued.”
LEV 13:9 Bab-Jehová, Moisésʼga, degi, Aarónʼga sogdebalid: “Dule ukagi yaa siile, dule-irwa-anse-goledse seledoed.
LEV 13:10 Dule-irwa-anse-goled dule-e-uka dakoed. Ar uka-engunaid, degi, e-sigamar, sipuu naile, deginbali, e-san-gisigwad magar-daklebalile,
LEV 13:11 wedi, naibe-buna-yaa bur buledid. Dule-irwa-anse-goled sogoed: ‘We-dule, swilidiksuli guye, nue-boni-nikaye.’ Degisoggu, bar bachikii we-dule-mesosulid, ar ade, bato wismalad, we-dule, swilidiksuli gued.
LEV 13:12 ”Ar dule-irwa-anse-goled dule-uka bela nonose-bakale, nagadukuse-nasgumai dakele,
LEV 13:13 geb we-dule-e-uka argaoed. Ar dule-irwa-anse-goled, bela binsa-uka-nika dakele, sogoed: ‘We-dule, swilidik guye.’ Ar e-uka bela sipuu naded-ulale, we-dule swilidik gunonikid.
LEV 13:14 Ar e-ukagi e-san-gisigwad daklealirdi, adi, soglegoed, we-dule, swilidiksurye.
LEV 13:15 Dule-irwa-anse-goled we-san-gisigwad dakoed, geb sogoed: ‘We-dule, swilidiksurye.’ Ar san-gisigwad, swilidiksulid. We-boni naibe-buna-yaa gued.
LEV 13:16 ”Ar san-gisi-dakleged sipuu daklenadele, dule-naibe-buna-yaa-nikadi dule-irwa-anse-goledse naoed,
LEV 13:17 adi, ega yaa-siid dakegar. Ar yaa sipuu daklenadele, dule-irwa-anse-goled sogoed: ‘We-dule, swilidikye.’ Deyobi, dule swilidik gunonikoed.”
LEV 13:18 Bab Jehová, Moisésʼga, degi, Aarónʼga sogdebalid: “Ar dule-gwensak e-ukagi dusi siile, degi, sorba nugunonikile,
LEV 13:19 geb dusi-sigisadgi ega uka-enguardibe, gutu-gisi-sipusaar naguardibe, dule-irwa-anse-goledse oyonaoed,
LEV 13:20 adi, ega uka dakegar. Ar dusi-sigisadgi ise-nue-gulluu daklegele, degi, e-siga sipuu nadele, dule-irwa-anse-goled sogoed: ‘We-dule swilidiksurye.’ Ar ade, dusi-sigisadgi naibe-buna-yaa signonikid.
LEV 13:21 Ar dule-irwa-anse-goled we-dusi-sigisadgi siga sipuu daksulile, degi, ise-nue-gulluu daksulile, aka bur dulega yaa bergumai-dakele, ibagugle (7) dule-baigangi bachikii we-dule-mesoed.
LEV 13:22 Ar yaa-siid bela uka-ugakaase nasgudele, dule-irwa-anse-goled sogoed: ‘We-dule, swilidiksurye.’ Ar ade, naibe-buna-yaa nikad.
LEV 13:23 Ar yaa-siid bar dungusulile, deginbali, uka-sipu-naid bar nasgusurbalile, aka bur nugumaile, dule-irwa-anse-goled sogoed: ‘We-dule, swilidikye.’ ”
LEV 13:24 Bab-Jehová, Moisésʼga, degi, Aarónʼga sogdebalid: “Dule-gwensak gummaksale, geb gummakaledgi uka sipuu naguardibe, igi, gisii naguardibe,
LEV 13:25 dule-irwa-anse-goled we-gummakaled dakoed. Ar gummakaledgi e-siga sipuu naile, degi, yaa ise-nue-gulluu daklegele, wedi gummakaledgi naibe-buna-yaa signonikid. Dule-irwa-anse-goled sogoed: ‘We-dule, swilidiksurye.’ Ar ade, we-dule naibe-buna-yaa nikad.
LEV 13:26 ”Ar dule-irwa-anse-goled gummakaled-daksadgi, dakalile, siga sipuu gussuli, deginbali, yaa ise-nue-gulluu daklesurbali, aka bur bergumai dakele, dule-irwa-anse-goled ibagugle (7) dule-baigangi bachikii we-dule-mesoed.
LEV 13:27 Ibagugle-gusale (7), dule-irwa-anse-goled gannar ega uka dakbaloed. Ar yaa-siid bela uka-ugakaase nasgudele, dule-irwa-anse-goled sogoed: ‘We-dule, swilidikidsurye.’ Ar ade, naibe-buna-yaa nikad.
LEV 13:28 Ar yaa-siid nasgusulirdi, unnila gummaksad-e-gannar gued. Degisoggu, dule-irwa-anse-goled sogoed: ‘We-dule, swilidikye.’ Ar ade, unnila gummaksad-e-wilub gued.”
LEV 13:29 Bab-Jehová, Moisésʼga, degi, Aarónʼga sogdebalid: “Machered-wargwengi, igi, omegindibe, e-nonogi yaa sigialile, igi, e-akugi yaa sigialile,
LEV 13:30 dule-irwa-anse-goled we-yaa dakoed. Ar we-yaa ise-nue-gulluu daklegele, e-sigamar gordik, degi, ichee daklegele, dule-irwa-anse-goled sogoed: ‘We-dule, swilidiksurye.’ Ar wedi nono-yaa, degi, aku-yaa nikad.
LEV 13:31 Ar dule-irwa-anse-goled we-yaa-daksadgine, dakele, yaa gulluu daklesuli, deginbali, e-sigamar sichii daklesuli, ibagugle (7) dule-boni-nikad dulemar-baigangi bachikii mesoed.
LEV 13:32 Ibagugledgine (7), dule-irwa-anse-goled we-dule nue, argaoed. We-yaa-maleged nasgussulile, degine, a-yaagi e-sigamar gordiksulile, degine, yaade dogdar-gulluu daklesulile,
LEV 13:33 geb agi, e-siga-emiega we-dule-imakoed. Unnila yaa-siidgi e-siga emiosulid. Geb degi, dule-irwa-anse-goled we-dule-yaa-nikad gannar ibagugle (7) dulemar-baigangi bachikii mesoed.
LEV 13:34 Ibagugledgine (7), dule-irwa-anse-goled gannar nue-argabaloed. We boni-nikad e-ukagi nasgussulile, degine, yaa asginegwale, dule-irwa-anse-goled sogoed: ‘We-dule, swilidikye, boni nikasurye.’ We-dulede na e-mor enukoed, degi, soglegoed, we swilidikye.
LEV 13:35 ”San uruksad-sorba boni-nikad ega nasgudele,
LEV 13:36 dule-irwa-anse-goled nue-argaoed. Boni-nikad ukagi nasgudele, dule-irwa-anse-goled siga-gordikid bar amiosulid. We-dule boni-nikad, burbar swilidiksulid.
LEV 13:37 Ar boni nasgumai daklesulile, degine, siga-sichigana ainialile, we-dule-bonigwaledi nugusad. We-dule, bonigwarsulid. Dule-irwa-anse-goled sogoed: ‘We-dule swilidikye.’ ”
LEV 13:38 Bab-Jehová, Moisésʼga, degi, Aarónʼga sogdebalid: “Amba deyobbalodo, machered-gwensak, igi, ome-gwensakdibe, na e-ukagi uka sipuu naguardibe,
LEV 13:39 dule-irwa-anse-goled ega uka argaoed. Dule-ukagi uka-sipu-naid wis sichisaar daklegele, adi, we binsa uka siid. We-dule, swilidik gued.”
LEV 13:40 Bab-Jehová, Moisésʼga, degi, Aarónʼga sogdebalid: “Ar dule-gwensak-ibe sailagia babatialile, degi, sailagia-sate gunonikile, we-dule, swilidikidye soglegoed.
LEV 13:41 Ar dule-ibe sailagia-bebegined babatialile, degi, e-bebe swiri gunonikile, we-dule swilidikidye soglegoed.
LEV 13:42 Ar e-nono-swirigwad-dakasik, igi, e-bebegindibe, yaa gisisaar siile, wedi naibe-buna-yaa siid.
LEV 13:43 Geb degine, dule-irwa-anse-goled ega yaa dakoed. Ar dakalile, we-yaa-dule-nono-swiregedgi-siid gisisaar daklege, ar igi ukagi naibe-buna-yaa-siir dakledae,
LEV 13:44 deyob daklegele, we-dule, naibe-buna-yaa nikad. Degisoggu, dule-irwa-anse-goled sogoed: ‘We-dule, swilidiksurye.’ Ar ade, dule, e-nonogi yaa siid.”
LEV 13:45 Bab-Jehová, Moisésʼga, degi, Aarónʼga sogdebalid: “Dule-yaa-maleged-nikadi mor-achirmakaled yooed, gwiosurbalid, degi, e-wagar-negabar-odukuar-nadapi binnasuli gornadapoed: ‘¡An swilidiksuli! ¡An swilidiksuli!’
LEV 13:46 Dule yaa-maleged-nika-gudiidgine, enik soglegoed: ‘We-dule, swilidiksurye.’ We-dule, swilidiksursoggu, na walagwen mai guoed. Dulemar-danar-danar-bukwad-magaba mai guoed.”
LEV 13:47 Bab-Jehová, Moisésʼga, degi, Aarónʼga sogdebalid: “Sibad-wawaad-absargi-mor-makaledgine, degi, lino-dubgi-mor-makaledgine, gutu-nai daklealile,
LEV 13:48 degi, lino-dubgi-mor-sobaledgine, sibad-wawaad-absargi-mor-sobaledgine, ibmar-ukagine, degi, ibmar-ukagi-ibmar-sobaledgine, gutu-nai daklealile,
LEV 13:49 ar we-gutu-naid gwili-absargii-dakledibe, igi, gisisaar-dakledibe, wedi, boni-dummad gued. Degisoggu, dule-irwa-anse-goledse oyogoed.
LEV 13:50 ”Dule-irwa-anse-goled we-gutu-naid dakoed. Geb we-ibmar-gutu-naid ibagugle (7) bachikii urboed.
LEV 13:51 Dule-irwa-anse-goled ibagugledgi (7) gannar we-gutu-naid argaoed. Ar we-gutu-naid, morgi, mor-sobaledgi, ibmar-ukagi, degi, ibmar-ukagi-ibmar-sobaledgi nasgusale, wedi, boni-dummad gued. We-ibmarmar bar nuedsulid.
LEV 13:52 Degisoggu, mor, mor-sobaled, ibmar-uka, degi, ibmar-ukagi-ibmar-sobaled, deyob-gutu-nikamalad, bela ogumaklegoed. Ar ade, boni-dummad gued. Ibmarmar bela ogumaklegoed.
LEV 13:53 ”Ar dule-irwa-anse-goled ibmar-nue-arganaidgi, we-gutu-naid, morgi, mor-sobaledgi, ibmar-ukagi, degi, ibmar-ukagi-ibmar-sobaledgi nasgussuli dakele,
LEV 13:54 dule-irwa-anse-goled sogoed: ‘Ibmar-gutu-nikad enukmarye.’ Geb we-ibmarmar gannar ibagugle (7) bachikii urbebaloed.
LEV 13:55 ”Ibmar-gutu-nikad enuklesad-sorba, dule-irwa-anse-goled gannar ibmar-dakbaloed. Ar dakele, gutu-naid bergussuli, amba gannar nai, gutu nasgussur-inigwele, soglegoed: ‘We, ibmar-nuedsurye, bela ichakwaye.’ Degisoggu, we-ibmar ogumaklegoed.
LEV 13:56 ”Ar dule-irwa-anse-goled ibmar-enuklesad-sorba we-gutu-naid boree-nai dakalile, morgi-gutu-naid, ibmar-ukagi-gutu-naid, degi, mor-sobaledgi-gutu-naid sikoed.
LEV 13:57 Ar we-gutu-naid gannar morgi-nai, mor-sobaledgi-nai, ibmar-ukagi-nai, degi, ibmar-ukagi-ibmar-sobaledgi-nai daklealile, wedi, gannar boni-dummad nagualid. Ar gutu-naid ogumaklegoed.
LEV 13:58 ”Ar mor, mor-sobaled, ibmar-uka, degi, ibmar-ukagi-ibmar-sobaled enuklesadgine gutu-naid allisale, we-ibmarmar gannar enuklebaloed, geb we-ibmarmar swilidik gunonikoed.
LEV 13:59 Sibad-wawaad-absargi-mor-makaledgi boni-gutu-naidga, lino-dubgi-mor-makaledgi boni-gutu-naidga, mor-makaledgi boni-gutu-naidga, degi, ibmar-ukagi-ibmar-sobaledgi boni-gutu-naidga, weyobi igar megoed. Adi, soglegega, we-ibmar swilidikye, igi, swilidiksurye.”
LEV 14:1 Bab-Jehová Moisésʼga sogded:
LEV 14:2 “Dule-naibe-buna-yaa-nikusad na e-san-urukega, weyob ega igar-mai guoed: Dule-irwa-anse-goledse we-dule seledoed.
LEV 14:3 Geb dule-irwa-anse-goled, we-dule-e-uka-dakega, dulemar-danar-danar-bukwad-magaba nodoed. Ar dule-irwa-anse-goled, naibe-buna-yaa-siid nugusa dakele,
LEV 14:4 we-dule-e-san-urukega, nuu-dulad-swilidikid-gwabo, urwar-urgo, morgo-ginnid, degi, hisopo-ana, sedagoye sogoed.
LEV 14:5 Geb a-sorbali, dule-irwa-anse-goled ibe-dii napsa-noggi-sioed. Geb a-birgi nuu-gwagwen oburgoed.
LEV 14:6 Geb degine, nuu-dulad, urwar-urgo, morgo-ginnid, degi, hisopo-ana suoed. Geb we-ibmarmar nuu-duladba-mesa, nuu-oburgwilesad-e-abegi owardikuoed.
LEV 14:7 Dule-irwa-anse-goled dule-naibe-buna-yaa-nika-gusadgi ilagugle (7) abe bomi-bomi imakoed. Geb dule-swilidikgusye sogsad-sorbali, dule-irwa-anse-goled nuu-dulad indakoed, adi, nuu e-itolegedba sapurba gukumai guegar.
LEV 14:8 ”Dule-san-uruknaid e-mor enukoed, bela e-sailagia, e-siga swiri-imakoed, degi, diigi nue oboed, adi, swilidik guegar. Geb a-sorbali, dule-nugusad, sunna dulemar-danar-danar-bukwadse dogoed. Degi-inigwele, ibagugle (7) e-dordonegyaba gabosulid.
LEV 14:9 Ibagugledgine (7), gannar e-sailagia, e-aku-siga, e-ibya-siga bela swiri imakoed. Na e-mormar enukoed, ise-obar imakbaloed. Deyobi, we-dule swilidik gunonikoed.
LEV 14:10 ”Geb dule-nugusad ibabaabakgine (8) we-ibmarmar-ukleged senonikoed: Sibad-wawaad-ome-senigwad-swilidikid boni-nikasulid, warbo, sibad-wawaad-ome-birgagwen-nikad-swilidikid boni-nikasulid, wargwen, degi, ibmar-gwag-uklegedga madubur-nued nibirambe-gakatar (15) olivo-gwalluba-omukuar sedabaloed, deginbali, olivo-gwallu bute-abala ukbaloed.
LEV 14:11 ”Dule-irwa-anse-goled dulega-san-uruknaidi, we-dule, degi, e-ibmarmar-ukleged dulemar-anbo-ambikued-neg-yawagakse an-asabin bana-bana imakoed, ar ade, wemar bana-bana-ibmar-uklegedid.
LEV 14:12 Geb sorbali, dule-irwa-anse-goled sibad-wawaad-sapingwagwad-wargwen olivo-gwallu-litro-abalad-mesa suoed, geb a-ibmar-sulesad dule-isgusad-ular Bab-Jehováʼga ukoed. Geb Bab-Jehová-asabin bana-bana imakoed, ar ade, wemar bana-bana ibmar-uklegedid.
LEV 14:13 Dule-irwa-anse-goled neg-islidikidgi bia isgued-ular ibdurgan-e-dukar-egwallege, degi, bia ibdurgan-ogumakar-ukleged-e-dukar-egwallege, agi sibad-wawaad-bipigwad-e-dukar egwannoed. Ar isgued-ular-ibdurgan-ukleged, degi, na-dukin-isgusad-ular-ibdurgan-ukleged dule-irwa-anse-goledgadga gued, ar ade, we-ibmarmar nue-islidikidid.
LEV 14:14 ”Geb dule-irwa-anse-goled dule-isgusad-ular, ibdurgan-uklenaid-e-abe weoed. Geb dule-san-uruklenaid-e-uaya-nuedsikidgi, e-goo-dummad-nuedsikidgi, degi, e-nag-goo-dummad-nuedsikidgi, a-abe magoed.
LEV 14:15 ”Amba deyobi, dule-irwa-anse-goled olivo-gwallu-bute-abalad subaloed. Geb e-argan-nuku-sapiledsikidgi eogoed.
LEV 14:16 Geb degine, e-goo-dummad-nagabalid-nuedsikid olivo-gwallu-e-argan-nuku-sapiledsik-siidgi owardikuoed. Geb olivo-gwallu-owardikusad an-asabin ilagugle (7) bomi-bomi imakoed.
LEV 14:17 ”Geb dule-irwa-anse-goled e-argan-nukugi olivo-gwallu-ganikid-obichadi, dule-san-uruknaidgi magoed: E-uaya-duku-nuedsikidgi, abe-magaled-birgi magoed, e-argan-goo-dummad-nuedsikidgi, abe-magaled-birgi magbaloed, degi, e-nag-goo-dummad-nuedsikidgi, abe-magaled-birgi magbaloed.
LEV 14:18 Deginbali, olivo-gwallu-ganikid-obichadi, dule-san-uruknaid-e-nonogi eobaloed. Dule-irwa-anse-goled dule-san-uruknaid-e-isgued-elilegegala, an-asabin weyob ibmar imakoed.
LEV 14:19 ”Geb sorbali, dule-irwa-anse-goled dule-san-uruknaid-e-isgued-ular anga ibdurgan ogumakar ukoed. Deyobi, dule-san-swilidiksuli-gudiid, san swilidik gunonikoed. ”Agine, dule-irwa-anse-goled ibdurgan-ogumakar-uklegoed-e-dukar egwannoed.
LEV 14:20 Geb we-ibdurgan ibmar-ogumakar-ukleged-ailagi anga ibmar-gwag-uklegedba-mesa ogumaklegoed. Dule-irwa-anse-goled dule-san-uruknaid-e-isgued-elilegegala, weyob ibmar imakoed. Geb we-dule san swilidik gunonikoed.
LEV 14:21 ”Ar dule-san-uruknaid dule-wilegedirdi, sibad-wawaad-warbaagwad-bakega mani satele, adi, sibad-wawaad-sapingwagwad-wargwen e-isgusad-ular ukoed. We-sibad-wawaad-sapingwagwad, dule-e-isgued-elilegegala, bana-bana-imaklegar uklegoed. Deginbali, madubur-bur-nued-nibiratar olivo-gwalluba-omukualed, degi, olivo-gwallu-bute-abala, ibmar-gwag-uklegedyob sedbaloed.
LEV 14:22 Amba deyobi, wagnuu-gwabo, sapur-nuu-gwabodibe, e-mani-nikadba sedbaloed. Nuu-gwagwena, e-isgued-ular ukoed, baiddi, ogumakar ukoed.
LEV 14:23 We-ibmar, ibabaabakgine (8), dule-irwa-anse-goled-asabin sedagoed, adi, san swilidik guegar. Dulemar-anbo-ambikued-neg-yawagakgi an-asabin uknonikoed.
LEV 14:24 Dule-irwa-anse-goled sibad-wawaad-sapingwagwad-isgued-ular-uklenaid, degi, olivo-gwallu-bute-abala suoed. Geb an-asabin bana-bana-ibmar-uklegedyob ukoed.
LEV 14:25 Geb sorbali, sibad-wawaad-sapingwagwad-isgued-ular-uklenaid-e-dukar egwannoed. Dule-irwa-anse-goled, a-abe weoed. Geb dule-san-uruknaid-e-uaya-duku-nuedsikidgi, e-argan-goo-dummad-nuedsikidgi, degi, e-nag-goo-dummad-nuedsikidgi, a-abe magoed.
LEV 14:26 ”Geb a-sorbali, dule-irwa-anse-goled olivo-gwallu na e-argan-nuku-sapiledsikidgi eogoed.
LEV 14:27 ”Geb e-argan-nuedsikid-e-goo-dummad-nagabalid we-olivo-gwallu-ganikidgi owardikuoed. Geb an-asabin olivo-gwallu ilagugle (7) bomi-bomi imakoed.
LEV 14:28 ”Geb dule-irwa-anse-goled e-argan-nukugi olivo-gwallu-ganikid-obichadi, dule-san-uruknaidgi magoed: E-uaya-duku-nuedsikidgi, abe-magaled-birgi magoed, e-argan-goo-dummad-nuedsikidgi, abe-magaled-birgi magbaloed, degi, e-nag-goo-dummad-nuedsikidgi, abe-magaled-birgi magbaloed.
LEV 14:29 ”Dule-irwa-anse-goled e-argangi-olivo-gwallu-ganikid-obichadi dule-san-uruknaid-e-nonogi magoed, adi, deyobi, an we-dule-e-isgued ega elioed.
LEV 14:30 Geb a-sorbali, wagnuu-gwabo, sapur-nuu-gwabodibe, e-mani-nikadba ukoed.
LEV 14:31 Nuu-gwagwenad dule-isgued-ular uklegoed. Baiddi, ibmar-gwag-uklegedba-mesa ogumakar uklegoed. Dule-irwa-anse-goled dule-san-uruknaid-e-isgued-elilegega, an-asabin weyob ibmar imakoed.”
LEV 14:32 Dule-naibe-buna-yaa-nikusad san-urukegala, ibmar-baid geg-ukele, weyob ega igar mai guoed.
LEV 14:33 Bab-Jehová, Moisésʼga, degi, Aarónʼga sogded:
LEV 14:34 “An bemarga Canaán-yar-uknaidse be dogsamalale, agi an bemar-neggi digwar nasikdemalale,
LEV 14:35 e-neg-ibed dule-irwa-anse-goled-owisonaoed, ega sogoed: ‘An-neg-galugi digwaryob nai an dakye.’
LEV 14:36 ”Geb degine, dule-irwa-anse-goled neg-argaed-iduale, bela negyaba-ibmar-bukwad oniega imakoed, adi, bela negyaba-ibmar-bukwad melle isguegar. Deyob imaklesale, geb dule-irwa-anse-goled neg-argaega negyaba dogoed.
LEV 14:37 ”Ar dule-irwa-anse-goled neg-arganaidgi neg-galugi digwar gordik, igi, gisii nai dakele, deginbali, we-gutu-nanaid yaa-bubukwayob daklebalile,
LEV 14:38 dule-irwa-anse-goled, a-neggi nodagoed. Geb ibagugle (7) a-neg ediar sioed.
LEV 14:39 Ibagugledgine (7), dule-irwa-anse-goled gannar neg-arganabaloed. Ar galugi-digwar-naid nasgusale,
LEV 14:40 dule-irwa-anse-goled igar-ukoed, akwamar-digwar-nikad ungemarye. Geb a-akwamar ibmar-isganamar-milegedgi, neggwebur-magaba minamaloed.
LEV 14:41 Deginbali, igar-ukbaloed, bela negyabali, galugi-napsa-magaled baad-baad imakmarye. Geb napsa-babatisadi ibmar-isgana-milegedgi, neggwebur-magaba minamaloed.
LEV 14:42 Geb degine, akwamar-onolesad-muchub, akwamar-binigan sioed, geb we-galu-birgi napsa-binid magoed.
LEV 14:43 ”Ar galugi akwamar-onosad-sorba, galu-adarisad-sorba, degi, galu-maglesad-sorba, a-neggi gannar digwar nagualile,
LEV 14:44 dule-irwa-anse-goled we-neg gannar arganaoed. Ar a-neggine, digwar bela nasgusale, we-digwar ibmar-oichogedid. A-ulale, neg swilidiksuli gued.
LEV 14:45 Degisoggu, we-negde earilegoed, bela e-akwamar, e-urgomar, degi, bela we-neg-sobega-ibmar-ebulesmalad ibmar-isgana-milegedgi, neggwebur-magaba milegoed.
LEV 14:46 ”Doa-dule, dule-irwa-anse-goled we-neg-edisad-ibagangine, we-negyaba dogsadibe, we-dule neg-mutikguedse swilidiksuli gudii guoed.
LEV 14:47 Dule a-neggi gabisale, mas-guchale, e-mor enukoed.
LEV 14:48 ”Ar dule-irwa-anse-goled neg-argaega negyaba-dogsadgi dakalile, neg-maglesad-sorba bar digwar nasgussuli, sogoed: ‘We-neg, swilidik guye.’ Ar ade, digwar bar a-neggi naisulid.
LEV 14:49 ”Dule-irwa-anse-goled neg-urukegala, nuu-gwabo-sedoed, deginbali, urwar-urgo, morgo-ginnid, degi, hisopo-ana sedbaloed.
LEV 14:50 Geb a-sorbali, dule-irwa-anse-goled ibe-dii napsa-noggi-sioed. Geb a-birgi nuu-gwagwen oburgoed.
LEV 14:51 Geb a-sorbali, urwar-urgo, hisopo-ana, morgo-ginnid, degi, nuu-dulad nuu-burgwisad-abegi, degi, dii-siidgi owardikuoed. Geb dule-irwa-anse-goled ilagugle (7) abe neggi bomi-bomi imakoed.
LEV 14:52 ”Weyobi dule-irwa-anse-goled nuu-abegi, diigi, nuu-duladgi, urwar-urgogi, hisopo-anagi, degi, morgo-ginnidgi neg urukoed.
LEV 14:53 Geb degine, nuu-dulad neggwebur-magaba indakoed, adi, e-itolegedba sapurba gukumai guegar. Weyobi, neg urukoed, geb we-neg swilidik gunonikoed.
LEV 14:54 ”Weyobi naibe-buna-yaa-maleged akar-akar-daklemaladga,
LEV 14:55 morgi-gutu-naguedga, neggi-digwar-naguedga,
LEV 14:56 uka-enguedga, yaa-sigedga, degi, ukagi-gutu-sipu-naguedga igar mai guoed.
LEV 14:57 Adi, bemar dulemar-odurdakega, sana wede ibmar swilidik gue, degi, sana wede ibmar swilidiksuli gue. Deyobi, naibe-buna-yaa-maleged-nikuedga igar mai guoed.”
LEV 15:1 Bab-Jehová Moisésʼga, degi, Aarónʼga sogded:
LEV 15:2 “Israel-dulemarga be sunmakmar, ega be sogmar: ‘Machered-gwensak, e-abgangi boni-nikale, we-dule swilidiksuli gunonikoed.
LEV 15:3 Ar ega duled-bupunmaksadibe, bupunmaksasurdibe, we-dule swilidiksuli guoed. Weyob ibmar swilidiksuli gunonikoed:
LEV 15:4 We-dule-boni-nikad bia megoe, a-ibmar swilidiksuli gunonikoed. Amba deyobbalid, we-dule ibugi sigoe, bela a-ibmar swilidiksuli gunonibaloed.
LEV 15:5 Ar doa-dule, dule-boni-nikad-e-meged-ebusale, e-mor enukoed, degi, obbaloed. Dule-ibmar-ebusad neg-mutikguedse swilidiksuli gudii guoed.
LEV 15:6 Ar doa-dule, bia dule-boni-nikad-sigisadgi sigisale, e-mor enukoed, degi, obbaloed. Dule-sigisad neg-mutikguedse swilidiksuli gudii guoed.
LEV 15:7 Amba deyobbalid, ar doa-dule, dule-boni-nikad-ebusale, e-mor enukoed, degi, obbaloed. We-dule neg-mutikguedse swilidiksuli gudii guoed.
LEV 15:8 Ar dule-boni-nikad dule-baidgi wii-agsale, dulegi-wii-aglesad e-mor enukoed, degi, obbaloed. Dulegi-wii-aglesad neg-mutikguedse swilidiksuli gudii guoed.
LEV 15:9 Dule-boni-nikad moli-e-gangi-sigisale, we-moli-e-gan swilidiksuli gunonikoed.
LEV 15:10 Ar doa-dule, dule-boni-nikad-urba-ibmar-sigisad-ebusale, dule-ibmar-ebusad neg-mutikguedse swilidiksuli gudii guoed. Ar dule-we-ibmar-sedoed e-mor enukoed, degi, obbaloed. Geb we-dule neg-mutikguedse swilidiksuli gudii guoed.
LEV 15:11 Ar dule-boni-nikad e-argan-enuksasuli dule-ebusale, we-dule-ebulesad e-mor enukoed, degi, obbaloed. Dule-ebulesad neg-mutikguedse swilidiksuli gudii guoed.
LEV 15:12 Ar dule-boni-nikad ibmar-napsagi-sobaled-ebusale, we-ibmar-napsagi-sobaled marilegoed. Ar ibmar-urgogi-sobaled-ebusale, we-ibmar diigi nue enuklegoed.
LEV 15:13 Dule-bonigwaled nugusdibe, san-uruked-igar-imakegala, ibagugle (7) edarboed. E-mor enukoed, diigi nue-oboed, geb deyobi, swilidik gunonikoed.
LEV 15:14 ” ’We-dule-nugusadi, ibabaabakgine (8), wagnuu-gwabo, sapur-nuu-gwabodibe, Bab-Jehováʼga Bab-Dummad-dulemar nugusdibe boo-ambikued-neg-yawagakse sedoed. Agi dule-irwa-Bab-Dummadse-goledga nuumar ukoed.
LEV 15:15 Dule-irwa-Bab-Dummadse-goled nuu-gwagwen dule-isgued-ular ukoed, nuu-baiddi ogumakar Bab-Jehováʼga ukoed. Deyobi, dule-irwa-Bab-Dummadse-goled Bab-Jehová-asabin swilidik-imakega dule-bonigwaled-saoed.
LEV 15:16 ” ’Machered-gwensak e-san-burba misale, oboed. Geb neg-mutikguedse swilidiksuli gudii guoed.
LEV 15:17 Ar ibi-morgindibe, ibi-ibmar-ukagindibe, dule-burba milesale, we-ibmar diigi nue enuklegoed. Geb neg-mutikguedse swilidiksuli guoed.
LEV 15:18 Dule-gwensak omebo-gabisadgi, e-san-burba misale, ebobela nue obmaloed. Geb neg-mutikguedse swilidiksuli gudii gumaloed.’ ”
LEV 15:19 Bab-Jehová, Moisésʼga, degi, Aarónʼga sogdebalid: “Israel-dulemarga be sunmakmar, ega be sogmar: ‘Ome-gwensak na e-igar-dakdiile, ibagugle (7) swilidiksuli gudii guoed. Ar doa-dule we-ome ebusale, we-dule mutikguedse swilidiksuli gudii guoed.
LEV 15:20 Ar we-ome ibugi megoe, bela we-ibmar swilidiksuli gunonikoed. Ar we-ome na igar-dakdiid-ibagangi ibugi sigbalodibe, amba deyobi, a-ibmar swilidiksuli gunonibaloed.
LEV 15:21 Ar doa-dule we-ome-gabed-ebusale, we-dule e-mor enukoed, degi, nue obbaloed. Geb neg-mutikguedse swilidiksuli gudii guoed.
LEV 15:22 Ar doa-dule we-ome-ibmar-birgi-sigisad ebusale, e-mor enukoed, degi, nue obbaloed. Geb neg-mutikguedse swilidiksuli gudii guoed.
LEV 15:23 Ar doa-dule we-ome-gabisad-birgi-ibmar-bukwad-ebusdibe, we-ome-gangi-sigisad-birgi-ibmar-bukwad-ebusdibe, we-dule neg-mutikguedse swilidiksuli gudii guoed.
LEV 15:24 Ar machered-gwensak we-omebo-gabisale, ibagugle (7) swilidiksuli gunonikoed. Deginbali, we-machered bia gaboe, bela a-ibmar swilidiksuli gunonimogoed.
LEV 15:25 Ome-gwensak na e-igar-daked-e-ibagan-sogedba e-igar-dakdiid ega bergusulile, igidibe, e-igar-dakdiid-e-ibagan ega suitii nadele, we-ome weyob-gudiid-berguedse swilidiksuli gudii guoed.
LEV 15:26 We-ome na e-igar-dakdiid-ibagangi ibigi gaboe, we-ibmar ome-igar-dakdiid-berguedse swilidiksuli gunonikoed. Deginbali, we-ome ibugi sigoe, bela we-ibmar ome-igar-dakdiid-berguedse swilidiksuli gunonibaloed.
LEV 15:27 Ar doa-dule we-ibmarmar-ebusale, swilidiksuli gunonikoed. E-mor enukoed, degi, nue obbaloed. Geb neg-mutikguedse swilidiksuli gudii guoed.
LEV 15:28 ” ’Ome na-e-igar-dakdiid-bergunonikile, san-uruked-igar-imakegala, ibagugle (7) edarboed. Geb a-sorbali, swilidik gunonikoed.
LEV 15:29 We-ome ibabaabakgine (8), wagnuu-gwabo, sapur-nuu-gwabodibe, Bab-Jehováʼga Bab-Dummad-dulemarbo-ambikued-neg-yawagakse sedoed. Agi dule-irwa-Bab-Dummadse-goledga nuumar ukoed.
LEV 15:30 Dule-irwa-Bab-Dummadse-goled we-nuu-gwagwen dule-isgued-ular ukoed, nuu-baiddi Bab-Jehováʼga ogumakar ukoed. Deyobi, dule-irwa-Bab-Dummadse-goled, Bab-Jehová-asabin ome-igar-dakdiid swilidik-imakega saoed.’ ”
LEV 15:31 Bab-Jehová, Moisésʼga, degi, Aarónʼga, sogdebalid: “Deyobi, bemar, Israel-dule-swilidiksurmalad e-dulemargi bachikii imakmaloed. Adi, anse-goled-neg bemar-abargi-siid-oichosmalad-ulale, mer wemar burgwemalagar.”
LEV 15:32 Deyobi, machered-e-abgangi-boni-nikadga, degi, machergan-san-burba-mimaladga igar mai guoed. Ar ade, weyob-gued-ulale, swilidiksuli gunonidamalad.
LEV 15:33 Deyobi, ome-igar-dakdiidga, machered-e-burba-misadga, degi, machered-ome-igar-dakdiidse-gochadga, igar mai guoed.
LEV 16:1 Aarón-masmala-warbogwad-burgwismalad-sorbali, Bab-Jehová, Moisésʼga sunmaksad. Ar we-masmala Bab-Jehováʼga-ibmar-ogumakar-ukleged-ailase yogasaar-warmaksadba burgwismalad.
LEV 16:2 Bab-Jehová, Moisésʼga sogded: “Be-ia-Aarónʼga be soge: ‘Bab-Dummadse-goled-neggi mor-dummad-naid-daksik, Neg-Ise-Islidikidse wachi-yogasaar mer be dogo. Deginbali, Bab-Dummad-Ulu-birgi-eduged-maid-asabin mer be yogasaar dogbalo, adi, mer be burgwegar. Ar ade, ulu-eduged-birgi mogir-imbaba, Bab-Jehová magarononidaed.’ ”
LEV 16:3 Bab-Jehová, Moisésʼga sogdebalid: “Anse-goled-Neg-Ise-Islidikidse Aarón dogsokalile, e-isgued-ular moli-bebe-nikad-sapingwagwad anga sedoed, deginbali, sibad-wawaad-machered ogumakar-ukega anga sedbaloed.
LEV 16:4 Aarón nue obsad-sorbali, we-mor-nue-islidikmalad yooed: Lino-mor-islidikid, lino-garson-bipi-urbalid, lino-morgo-dub-sadergi-nagued, deginbali, lino-mor-gurgin-ebirmakaled sibaloed. Wemarde mor nue-islidikmaladid.
LEV 16:5 ”Aarón, Israel-dulemar-e-isgued-ular, sibad-machered-warbo anga ukoed, deginbali, ogumakar-ukega sibad-wawaad-machered-wargwen anga ukbaloed.
LEV 16:6 ”Aarón, e-isgued-ular moli-bebe-nikad-sapingwagwad sedagoed. Geb e-isgued-eliega, degi, e-gwenadgan-e-isgued-eliega, we-moli-sapingwagwad anga ukoed.
LEV 16:7 Geb sorbali, Aarón sibad-machered-warbogwad suoed, geb dulemar-anbo-ambikued-neg-yawagakgi anga ukoed.
LEV 16:8 Geb degine, Aarón we-sibadmar wilub-dakoed, adi, dakega, igid Bab-Jehováʼgad guoe, igid Azazelʼgad guoe.
LEV 16:9 Sibad-machered Bab-Jehováʼgadga-gunonikid, isgued-ular oburgwilegoed.
LEV 16:10 Ar sibad-machered Azazelʼgadga-gunonikiddi, isgued-eliegala, an-asabin dula uklegoed. Geb a-sorbali, we-sibad Azazelʼga nega-dulesulidganba barmidoed.
LEV 16:11 ”Aarón e-isgued-ular, moli-bebe-nikad-sapingwagwad sedagoed. Geb e-isgued-eliega, degi, e-gwenadgan-e-isgued-eliega, we-moli-sapingwagwad anga ukoed. Geb Aarón, e-isgued-ular, we-moli-sapingwagwad-e-dukar egwannoed.
LEV 16:12 Geb a-sorbali, Aarón an-asabin ibmar-ogumakar-ukleged-ailagi-soo-gasiid sianar-ena weoed. Deginbali, ina-wawadikid-nagaled-yeer-yapanned argan-nukbo subaloed. Geb Aarón, we-ibmarmar atued-dummad-naid-daksik sedoed.
LEV 16:13 Geb agine, an-asabin soo-yagi ina-wawadikid eogoed, adi, a-waa-bupurmakdoedi Dulemar-Anbo-Igar-Mesisad-Ulu-edugedgi daasa sigoed. Deyob imakoed, adi, Aarón melle burgwegar.
LEV 16:14 ”Geb a-sorbali, Aarón, moli-bebe-nikad-sapingwagwad-e-abegi, e-goo owardikuoed. Geb Ulu-Eduged-dad-nakwedsikidgi, a-abe bomi-bomi imakoed. E-googi abe-naid ilagugle (7) ulu-asabin bomi-bomi imakoed.”
LEV 16:15 Bab-Jehová, Moisésʼga sogdebalid: “Aarón, Israel-dulemar-isgued-eliegala, sibad-machered-e-dukar-egwannoed. A-abe, atued-dummad-naid-daksik sedoed. A-abede, igi moli-bebe-nikad-sapingwagwad-e-abe imaksa, deyobi imakbaloed: A-abe, Dulemar-Anbo-Igar-Mesisad-Ulu-eduged-birgi, degi, Ulu-asabin, bomi-bomi imakoed.
LEV 16:16 Deyobi, Aarón, anse-goled-neg bela ibmar-isganagi, angi yolesmaladgi, degi, Israel-dulemar-e-isgusmaladgi urukoed. Amba deyobi dulemar-anbo-ambikued-neg, dulemar-isgusmalad-abargi-siid, imakbaloed.
LEV 16:17 ”Aarón Neg-Ise-Islidikidyaba isgued-ular ibmar-uknaidgine, degi, gannar nodagedse, dule-wargwensaale dulemar-anbo-ambikued-neggi gudiguosulid. Aarón, e-isgued-ular, e-gwenadgan-isgued-ular, degi, Israel-dulemar-isgued-ular, ibmar-uksale,
LEV 16:18 An-asabin ibmar-ogumakar-ukleged-aila-gwichid-urukega nodagoed. Moli-bebe-nikad-sapingwagwad-e-abe, degi, sibad-machered-e-abe weoed. Geb ibmar-ogumakar-ukleged-aila-dikarba moli-bebeyob-gwigwismaladgi magoed.
LEV 16:19 Aarón e-googi-abe-naid ibmar-ogumakar-ukleged-ailagi ilagugle (7) bomi-bomi imakoed. Aarón Israel-dulemar-isgusad-ulale, deyobi, ibmar-ogumakar-ukleged-aila urukoed.
LEV 16:20 ”Aarón Neg-Ise-Islidikid, dulemar-anbo-ambikued-neg, degi, ibmar-ogumakar-ukleged-aila swilidik-imaksad-sorbali, sibad-machered-dulad anga sedagoed.
LEV 16:21 Aarón sibad-machered-dulad-nono-birgi e-arganmar mesoed. Geb degine, bela Israel-dulemar-ibmar-isgana-imaksamalad, angi-bela-yolesmalad, degi, bela e-isgusmalad barsogoed. Deyobi, we-sibad-macheredgi Israel-dulemar-e-isgusmalad naguoed. Geb dule-ega-igar-uklesadi, we-sibad, nega-dulesulidganba sedoed.
LEV 16:22 Dule, we-sibad-machered nega-dulesulidgangi indakoed. Geb we-sibad bela Israel-dulemar-e-isgusad nega-dulesulidganba sedoed.
LEV 16:23 ”Geb a-sorbali, Aarón dulemar-anbo-ambikued-negse dognonikoed. Agine, Neg-Ise-Islidikidse-dogega lino-mor-yosadi esugoed. Geb agi a-mormar urboed.
LEV 16:24 Geb Aarón e-neg-obed-islidikidgi oboed. Agine, gannar e-mor-binsaled yooed. Geb a-sorbali, nodagoed. Geb e-isgued-ular, degi, Israel-dulemar-e-isgued-ular ibmar ogumakar ukoed. Deyobi, e-isgued-eliega, degi, Israel-dulemar-e-isgued-eliega, ibmar ogumakar ukoed.
LEV 16:25 Deginbali, isgued-ular ibdurgan-uklenaid-e-gwallu ibmar-ogumakar-ukleged-ailagi ogumakbaloed.
LEV 16:26 ”Dule, nega-dulesulidganba Azazelʼse sibad-machered berbeapid, e-mor enukoed, degi, obbaloed. Geb weyob-imaksad-sorbali, nabir Israel-dulemar-danar-danar-bukwadse gannar nonikoed.
LEV 16:27 ”Moli-bebe-nikad-sapingwagwad, degi, sibad-machered-isgued-ular-oburgwilesad, isgued-eliega amar-abe Neg-Ise-Islidikidse selesgusad. We-ibdurganmar, Israel-dulemar-danar-danar-bukwad-magaba seledoed. We-ibdurganmar-e-ukadi, e-sanmardi, degi, e-saamardi, soogi ogumaklegoed.
LEV 16:28 ”Dule-we-ibmarmar-ogumakoedi, e-mor enukoed, degi, obbaloed. Geb weyob-imaksad-sorbali, nabir Israel-dulemar-danar-danar-bukwadse gannar nonikoed.”
LEV 16:29 Bab-Jehová, Moisésʼga sogdebalid: “Israel-dulemarga, degi, Israel-dulesurmaladga, weyobi degisadegu igar mai guoed: Nii-walagugled-ibambegi bemar mas-gunsuli gudii guoed. Deginbali, bemar bipisaale arbaosurbalid.
LEV 16:30 Ar a-ibagi, an-asabin bemar-isgued elilegoed, degi, bemar bela we-isgumaladgi swilidik gunonimaloed.
LEV 16:31 A-iba, bemarga obunnoged-iba guoed, agi bemar mas-gunsuli gudii guoed. We-igar, degisadegu-mai guoed.
LEV 16:32 ”Dule, e-bab-sorba-gan-suega dule-irwa-anse-goled-bur-dummadga-nugsalesad ega-bela-gangued-uklesadi, isgued-ular ibmar-uked imakoed. We-dule, lino-mor-nue-islidikid yooed.
LEV 16:33 We-dule, Neg-Ise-Islidikid, dulemar-anbo-ambikued-neg, degi, ibmar-ogumakar-ukleged-aila, swilidik imakoed. Deginbali, dule-irwa-anse-gormalad-e-isgued-ular, degi, bela Israel-dulemar-e-isgued-ular anga ibmar-ukbaloed.
LEV 16:34 ”Bemarga weyob degisadegu we-igar mai guoed: Israel-dulemar-e-isgued-eliegala, bemar birgagi irgwen we-igar imakdii gumaloed.” Ar igi Bab-Jehová ega sogsa, deyob Moisés bela imaksad.
LEV 17:1 Bab-Jehová, Moisésʼga sogded:
LEV 17:2 “Aarónʼga, degi, e-masmalaga, degine, bela Israel-dulemarga be soge: ‘Bab-Jehová weyob bemarga igar-uked:
LEV 17:3 ” ’Ar Israel-dule-gwensak moli-bebe-nikad, sibad-wawaaddibe, sibaddibe, Bab-Jehováʼga ukbigualile,
LEV 17:4 Bab-Jehová-dulemarbo-ambikued-neg-yawagakgi oburgwergebed. Ar dule, danar-danar-bukwadgi ibdurgan-oburgwisale, igi danar-danar-bukwad-magaba oburgwisale, we-dule, dummad-nosad. A-ulale, we-dule, Israel-dulemar-abargi onolegoed.
LEV 17:5 We-igar weyob-maid, adi, Israel-dulemar neg-swiregedgi-ibdurgan-oburgwedamaladi Bab-Jehováʼga sedmalagar. Dule-irwa-Bab-Dummadse-goledse Bab-Jehová-dulemarbo-ambikued-neg-yawagakse sedmaloed. Geb agi dule-irwa-Bab-Dummadse-goled Israel-dulemar gwenatigwar-guega we-ibdurgan Bab-Jehováʼga ukoed.
LEV 17:6 Geb a-sorbali, dule-irwa-Bab-Dummadse-goled, Bab-Dummad-dulemarbo-ambikued-neg-dogedgi ibmar-ogumakar-ukleged-aila-gwichidgi, we-ibdurgan-e-abe bomi-bomi imakoed. Geb Bab-Jehová-yeer-yapanne-itogega, ibdurgan-e-gwallu ega ogumakoed.
LEV 17:7 Bemar niamarga bar ibmar ogumakar ukosurmalad. Bemar a-niamar-nug odummodii gusmalad, eba isgudii gusmalad. Degisoggu, be-waganga weyob degisadegu igar-mai guoed.’
LEV 17:8 ”Dulemarga be sogbaloed: ‘Ar Israel-dule-gwensakdibe, Israel-dulesulid-bemar-abargi-gudiiddibe, ibmar ogumakar-uknaile, igi, ibmar-baid uknadibe,
LEV 17:9 we-ibmar Bab-Dummad-dulemarbo-ambikued-neg-yawagakse Bab-Jehováʼga-ukega sedergebed. We-ibmar sessulile, we-dule Israel-dulemar-abargi onolegoed.’ ”
LEV 17:10 Bab-Jehová sogdebalid: “Israel-dulemarga be sogbaloed: ‘Ar Israel-dule-gwensakdibe, Israel-dulesulid-bemar-abargi-gudiiddibe, san-abebi guchale, we-dulegi an sabsur-gwisguoed, degi, we-dule e-dulemar-abargi an onogoed.
LEV 17:11 Ar ade, bela ibdurgan-dula-gued, degi, dule-dula-gued abegi danikid. Ani an ibdurgan-e-abe bemarga uksad, adi, bemar ibmar-ogumakar-ukleged-ailagi a-abe bemar-isgued-ular anga ukegar. Ar ade, abegi dule-isgued elileged.’
LEV 17:12 ”Degisoggu, Israel-dulemarga an soged: ‘Bemar bipisaale san abebi gunnosurmalad, deginbali, Israel-dulesulid bipisaale san abebi gunnosurmogad.’
LEV 17:13 ”Ar Israel-dule-gwensakdibe, Israel-dulesulid-bemar-abargi-gudiiddibe, ibmar-durgan-nabir-gulleged-maksale, nuudibe, a-abe eogoed, geb a-abegi ukub mioed.
LEV 17:14 Ar ade, abegi bela ibdurgan-dula-gued danikid. A-ulale, an bemarga sogsad: ‘Bemar bipisaale san abebi gunmalosurye, ar ade, abegi bela ibdurgan-dula-gued danikid. Ar doa-dule san abebi guchale, we-dule e-dulemar-abargi onolegoed.
LEV 17:15 ” ’Bela Israel-dulemardibe, Israel-dulesuliddibe, ibdurgan-achu-sapurse-burgwisad guchale, igi ibdurgan-san-ichimaklesad guchale, e-mor enukoed, degi, nue obbaloed. Geb we-dule neg-mutikguedse swilidiksuli gudii guoed. Geb a-sorbali, swilidik gunonikoed.
LEV 17:16 Ar e-mor enuksulirdi, degi, obsurbalirdi, e-isgued na dukin sedii guoed.’ ”
LEV 18:1 Bab-Jehová Moisésʼga igar uksad:
LEV 18:2 “Weyob be Israel-dulemarga sogo: ‘Ani an be-Bab-Dummad-Jehová gued.
LEV 18:3 ” ’Bemar Egipto-dulemar-damaladyob, melle be damalo. A-yargi bemar bukwagusmalad. ” ’Bemar Canaán-dulemar-damaladyob, melle be damalo. A-yarse an bemar-sedsokalid. Deginbali, e-damaladba, melle be nanamarbalo.
LEV 18:4 An-bemarga-igar-uksadba be ibmar imakmalo, degi, an-Igar-Mamaidba be nanamalo. Ani an be-Bab-Dummad-Jehová gued.
LEV 18:5 Degisoggu, an-Igarmar-Mamaidba, an-bemarga-igar-uksamaladba be nanamalo. Ar doa-dule we-igar-mamaidba ibmar-imakele, dula-gudii guoed. Ani an Bab-Jehová gued.’ ”
LEV 18:6 Bab-Jehová Moisésʼga sogdebalid: “Dule-wargwensaale e-gwenadbo negsichigi galagwensuli nanadii guosulid. Ani an Bab-Jehová gued.
LEV 18:7 Melle be-nanbo negsichigi galagwensuli be nanadii guo. Ar degiile, be-babgi be dododii itole. Melle be deyob nanao, ar be-nan gued.
LEV 18:8 Melle be-bab-omebo negsichigi galagwensuli be nanadii guo. Ar degiile, be-babgi be dododii itole.
LEV 18:9 Melle be-bun-gargwenadbo negsichigi galagwensuli be nanao. Deginbali, melle be-bun-be-babsikidbo, be-bun-be-nansikidbo, negsichigi galagwensuli be nanadii guo. Ar amba we-be-bunmar be-negyagi gwalulesdibe, igi, be-negyagi gwalulessurdibe, mer deyob ebo be nanao.
LEV 18:10 Melle be-waganbo negsichigi galagwensuli be nanadii guo. Ar degiile, na be dukin be-nug oichogoed.
LEV 18:11 Melle be-bab-ome-e-sisgwabo negsichigi galagwensuli be nanadii guo. Ar be-bab-sisgwayob gued. Degisoggu, be-bungi be dododiiyob gued.
LEV 18:12 Melle be-ammorbo negsichigi galagwensuli be nanadii guo, ar ade, be-bab-e-bun gued.
LEV 18:13 Melle be-nan-e-iorbodibe, be-nan-e-urbabodibe negsichigi galagwensuli be nanadii guo, ar ade, be-nan-e-gwenadgan gued.
LEV 18:14 Melle be-gilor-e-omebo negsichigi galagwensuli be nanadii guo. Ar be-gilor-ome be-ammorga gunonikid.
LEV 18:15 Melle be-balabo negsichigi galagwensuli be nanadii guo. Ar ade, be-machi-ome gued.
LEV 18:16 Melle be-ia-omebodibe, be-urba-omebodibe, negsichigi galagwensuli be nanadii guo. Ar degiile, be-ia-e-nug, be-urba-e-nug be oichogoed.
LEV 18:17 Melle ome-wargwenbo, degi, e-sisgwabo, deginbali, e-waganbo negsichigi galagwensuli be nanadii guo. Ar ade, wemar na gwenadgan gumalad. Ar deyob be gudiile, nue-dummad be isgudiid.
LEV 18:18 Ar amba be-ome-dula-gudiidgine, be-ambe be nikuosulid, deginbali, ebo be negsichigi galagwensuli nanadii guosurbalid. Ar degiile, omegan na ebo e-isdarmaladga gunonimaloed.”
LEV 18:19 Bab-Jehová Moisésʼga sogdebalid: “Ome igar-dakdidibe, melle ese be golo. Ar ade, ome swilidiksuli gudiid.
LEV 18:20 Deginbali, melle dule-baid-e-omebo negsichigi galagwensuli be nanadii guo. Ar degiile, be swilidiksuli guoed.
LEV 18:21 Melle bab-dummad-Molocʼga be-mimmigan be ogumakar uko. Ar deyob be imakele, be-Bab-Dummad-nug be oichogoed. Ani an Bab-Jehová gued.
LEV 18:22 Omebo-megeyob mer be macherganbo mego. Ar wede ibmar-isgana gued.
LEV 18:23 Bipisaale ibdurganbo galagwensuli be guosulid. Ar wede, ibmar-isgana gued. Ome-wargwensaale ibdurganbo galagwensuli guosulid. Ar wede, ibmar-isgana gued.”
LEV 18:24 “We-ibmar-imakedba mer be swilidiksuli gumalo. Ar an bemar-idu-dulemar-onosokalid, we-ibmar-imakedba swilidiksuli gunonimalad.
LEV 18:25 Deginbali, e-napase-bakale, nue-isgus nagunonimogad. E-ibmar-isgana-imaksad-ulale, an we-dulemar sabsur-odurdaksad, geb e-dulemar e-yar-isgusadgi ononnolesmalad.
LEV 18:26 Degisoggu, an bemarga an-igargan-uksadba, degi, an bemarga an-igargan-sogsadba be ibsamala. Israel-dulemar, degi, Israel-dulesulid-bemar-abargi-mamaid, we-ibmar-isganamar mer be imakmala.
LEV 18:27 Ar we-yargi bemar-idu dulemar-ambikusmalad we-ibmar-isganamar imaksamalad. Degisoggu, e-yar nue-isgus nagussunnad.
LEV 18:28 Ar bemar we-yar oichosmalale, igi bemar-idu we-yargi dulemar-bukwagusad onilesgusa, deyobi, bemar we-yargi ononnolemogoed.
LEV 18:29 ”Ar doa-dule we-ibmar-isgana imakele, we-dule e-dulemar-abargi onolegoed.
LEV 18:30 Degisoggu, an-igar-mamaidba be nanamala. Dulemar we-yargi bemar-idu we-ibmar-isgana-imaksamaladba, mer be nanamala. Mer be we-ibmar-imakedba isgumala. Ani an be-Bab-Dummad-Jehová gued.”
LEV 19:1 Bab-Jehová Moisésʼga weyob igar uksad:
LEV 19:2 “Bela Israel-dulemar-bukwadga be sunmako, ega be sogo: ‘Bemar gwage-swilidik-gudii gumalo, ar ande be-Bab-Dummad-Jehová gwage-swilidik gued.
LEV 19:3 Bemar be-babgi, degi, be-nangi, binsaed-nikaa nanamalo. An-obunnoged-ibagi, be obunnodii nanamalo. Ani an bemar-Bab-Dummad-Jehová gued.
LEV 19:4 Melle bab-dummadsurmalad-e-nug be odummomalo, deginbali, melle ibmar-esgoro-dualedgi-sobaled be-bab-dummadga be imakmalo. Ani an be-Bab-Dummad-Jehová gued.
LEV 19:5 ” ’Gwenatigwar-guega be Bab-Jehováʼga ibmar uksokalile, nuedgi ega be ukoed, adi, Bab-Jehová we-ibmar-uklenaid nuedgi abingaegar.
LEV 19:6 Uklesad-ibagi we-ibmar-uklesad be gunnoed, deginbali, sunna banedgine be gunbalid. Ar amba ibapaagi we-ibmar gwabgusale, adi, soogi be ogumakoed.
LEV 19:7 Ar we-ibmar ibapaagi gullegele, we-ibmar isganaga guoed. Bab-Jehová we-ibmar abingaosulid.
LEV 19:8 Ar dule-we-ibmar-guchad, na e-isgued dukin-sedii guoed, ar ade, Bab-Jehováʼga-ibmar-swilidikid-uklesad, ibmar-isgana imaknonikid. We-dule, e-dulemar-abargi onolegoed.’ ”
LEV 19:9 Bab-Jehová Moisésʼga sogdebalid: “Israel-dulemarga be sogo: ‘Be-nainugi ibmar-gwag be wealile, melle be-nainugi bela ibmar-gwag be weo, deginbali, ibmar-gwag-napagi batisad, melle bar be subalo. Ar we-ibmar-gwag-argwachamalad dule-wileganaga, degi, Israel-dulesulidmarga be obegoed.
LEV 19:10 ” ’Melle be-uva bela ise-wear be imako, deginbali, uva-napagi-argwachamalad, melle bar be subalo. Ar we-uva-argwachamalad dule-wileganaga, degi, Israel-dulesulidmarga be obegoed. Ani an be-Bab-Dummad-Jehová gued.
LEV 19:11 Melle ibmar be atursao. Melle be gakansao. Melle na be muchub-muchub yardakmalo.
LEV 19:12 Melle an-nuggi be ise-sogar-sogo: An ibmar imakoye. Ar degiile, be-Bab-Dummad-nug be oichogoed. Ani an Bab-Jehová gued.
LEV 19:13 Melle be-dulemar be aporsao, deginbali, melle e-ibe be ibmar atursabalo. Dule-bega-arbaed yog be bennukar imako, melle banedse e-ibe be mani gao.
LEV 19:14 Melle dule-uaya-yalliled be ukabsao. Deginbali, melle dule-ibyasulid ibmargi-yolegega be imako. Bur be be-Bab-Dummad-dobee nanadii guo. Ani an Bab-Jehová gued.
LEV 19:15 Igar-nabolenaile, igar-innikigwadba be imako. Melle dule-wilegedba be nai guo. Deginbali, melle dule-mani-nikadba be nai gubalo. Dulemarga igar-innikigwadba be igar-nabogo.
LEV 19:16 Melle be dulemargi yogasaar sunmako. Melle dule-baid-oburgwedgi be binsao. Ani an Bab-Jehová gued.
LEV 19:17 Melle be-gwenad be isdar dako. Dule-baid isgusale, ega be bakar ibmar soge, adi, melle e-isgusadba be nagumogagar.
LEV 19:18 Melle be-dulemar be buged-mai imako, deginbali, melle isdar-dakdii be gubalo. Ar igi na be san-sabgue, deyobi dule-baid be sabgumogoed. Ani an Bab-Jehová gued.’ ”
LEV 19:19 Bab-Jehová Moisésʼga sogdebalid: “Israel-dulemarga be sogo: ‘Bab-Jehová-Igar-Mamaidba be nanadii gumalo. Melle be-moli-bebe-nikadmar ibdurgan-baidbo be onakdii guo. Melle be-nainu-gwensakgine, ibmar-gwag be akar-akar digo. Melle dub-baid-baidgi-oburar-mor-makaled be yoo.
LEV 19:20 ” ’Ar dule-gwensak, ome-maiga-gudiid-sui-nikusokalidbo negsichigi galagwensuli nanasale, ar amba we-ome yoo manigi onolegele, deginbali, amba yoo maiga-gudiidgi ollorgubalile, ebobela sabsur-odurdaklemaloed. Degi-inigwele, oburgwilegosurmalad, ar ade, ome, amba yoo maiga-gudiidgi ollorgued.
LEV 19:21 We-machered, na e-isgusad-ular, sibad-wawaad-machered Bab-Jehováʼga ukoed. We-sibad-wawaad-machered Bab-Dummad-dulemarbo-ambikued-neg-yawagakse sedoed.
LEV 19:22 Geb dule-irwa-Bab-Dummadse-goled, we-sibad-wawaad-machered isgusad-ular-uklenaidgi, Bab-Jehováʼga sogoed, we-dulega isgued eliye. Weyobi, dulega, e-isgued elilenonikoed.
LEV 19:23 ” ’An-bemarga-yar-uknaidse bemar dogsale, agi bemar sapi-nabir-gullemalad-digsale, gebe we-sapimar-sanmakoed birgapaa be gunnosurmalad, ar ade, we-sapi-e-san bemarga isganaga guoed.
LEV 19:24 Birgabakegwadgine, bela we-sapi-e-san Bab-Jehová-nug-odummogega Bab-Jehováʼga nugsalegoed.
LEV 19:25 Geb birgataledgine, sunna bemar we-sapi-e-san gunmaloed. Deyobi, we-sapi bela-bela bemarga sanmakdoed. Ani an bemar-Bab-Dummad-Jehová gued.
LEV 19:26 Melle san abebi be gunmalo. Melle ibmar-wilubgan-dakedgi yoedse-ibmar-guoed-sogdii be gumalo. Melle nia-igar-dule-oichogedgi arbao.
LEV 19:27 Melle sailagia orokwaa be sikmalo. Deginbali, melle be-siga-e-duku be sikbalo.
LEV 19:28 Dule-burgwisad-ular, melle be-san na be daas-daas imako, deginbali, melle be-sangi ibmar yogasaar narmakar be sobo. Ani an Bab-Jehová gued.
LEV 19:29 Melle be-sisgwa gambanuchuga be imako, adi, melle be-sisgangi we-igar-isgana dogega. Ar degiile, be-yala bela-bela isgudoed.’ ”
LEV 19:30 Bab-Jehová Moisésʼga sogdebalid: “Israel-dulemarga be sogo: ‘An-obunnoged-ibagi be obunnomalo, degi, anse-goled-neg melle neg-isganayob be dakmalo, egi be binsaed-nikaa damalo. Ani an Bab-Jehová gued.
LEV 19:31 ” ’Melle dule-burwarmaladbo-sunmakmarye-sogmaladse be idakmalo. Deginbali, melle burba-isganase-gormaladse be idakmarbalo. Ar deyob be imakmalale, eba be isgumarmogoed. Ani an be-Bab-Dummad-Jehová gued.
LEV 19:32 Dador begi danikile, iduale be gwichibin imako. Dadormargi be binsaed-nikaa dao. Be-Bab-Dummad-dobee be nanao. Ani an Bab-Jehová gued.
LEV 19:33 ” ’Dule-yar-baidsikid bemar-yargi-megnonikile, melle be sabsur-imakmalo.
LEV 19:34 We-dule-bemar-abargi-maidi, be-negginedyob be dakmalo. Ar bemaryobgusoggu, be nue sabgumalo. Be insamalo, Egipto-yargi, be-yarsulidgi, be deyob gudii gusmarmogad. Ani an bemar Bab-Dummad-Jehová gued.
LEV 19:35 Igar-nabolenaidgi, igar-maidba inniki be imako: Melle napaneg-wilubsalenaidgi, be galakuar wilubsao. Melle ibmar-oaidikunaidgi, be galakuar oaidikuo. Melle ibmar-mergu-urbilegedgi, be galakuar urbo.
LEV 19:36 Ibmar-wilubdaked-nued, nibir-nued, degi, ibmar-wilubsaed-nued be ebumalo. Ani an be-Bab-Dummad-Jehová gued. An Egipto-yargi be-onosadid.
LEV 19:37 ” ’Degisoggu, bela an-igar-mamaidba be ibsamalo. Bela an bemarga igar-uksadba be ibmar imakmalo. A-sogedba be nanadii gumalo. Ani an Bab-Jehová gued.’ ”
LEV 20:1 Bab-Jehová Moisésʼga sunmakded, ega sogded:
LEV 20:2 “Israel-dulemarga weyob be sogo: ” ‘Ar Israel-dule-gwensakdibe, Israel-dulesulid-bemar-abargi-maiddibe, e-mimmi bab-dummad-Molocʼga ogumakar uksale, we-dule oburgwilegoed. Dulemar, we-dule akwagi-makar oburgoed.
LEV 20:3 An-sunnad we-dulegi an yolemogoed. An we-dule e-dulemar-abargi obelogoed. Ar bab-dummad-Molocʼga e-mimmi-ogumakar-uksad-ulale, an-nug-islidikid oichosad, degi, anse-goled-neg oichosbalid.
LEV 20:4 Ar dulemar, we-dule na-e-mimmi bab-dummad-Molocʼga ogumakar-uksad baisur-dakele, degi, we-dule-oburgwesurmalale,
LEV 20:5 ani an we-dule, degi, e-gwenadgan sabsur-odurdakoed. We-dule, degi, bela dulemar-bab-dummad-Moloc-nug-odummosmaladmala, an e-dulemar-abargi obelogoed.
LEV 20:6 ” ’Dule-wargwen dule-burgwarmaladbo-sunmakmarye-sogmaladse idakele, degi, burba-isganase-gormaladse idakele, deginbali, amarba-nai guarbalile, we-dulegi an gwisguoed. We-dule, e-dulemar-abargi an obelogoed.
LEV 20:7 ” ’Degisoggu, angarbi be gudii gumalo, gwage-swilidik be imakmarsun, ar ade, ani an be-Bab-Dummad-Jehová gued.
LEV 20:8 An-igarmar-mamaidba be ibsamala, degi, eba be ibmar imakmala. Ani an Bab-Jehová, bemar-gwage-swilidik-imakedid.
LEV 20:9 ” ’Ar dule-gwensak e-bab-ukabsasale, e-nan-ukabsasale, we-dule oburgwilegoed, ar ade, e-bab, degi, e-nan-ukabsasad. We-dule, na dukin burgwed amisad.
LEV 20:10 ” ’Ar dule-gwensak dule-baid-omebo negsichigi galagwensuli nanasale, wemar, ebobela oburgwilemaloed.
LEV 20:11 ” ’Ar dule-gwensak e-bab-omebo negsichigi galagwensuli nanasale, e-babgi nue dodosad. A-dule, e-bab-omebo oburgwilegoed. Wemar, na dukin burgwed amismalad.
LEV 20:12 ” ’Ar dule-gwensak e-bala-ebo negsichigi galagwensuli nanasale, wemar, ebobela oburgwilegoed. Nue-dummad isgusmalad. Wemar, na dukin burgwed amismalad.
LEV 20:13 ” ’Ar machered-wargwen machered-baidbo galagwensuli gusale, ebobela oburgwilegoed, ar ade, nue-dummad isgusmalad. Wemar, na dukin burgwed amismalad.
LEV 20:14 ” ’Ar dule-wargwen ome-nikusadgi, e-ome-e-nan-nikunonibalile, we-dule, nue-dummad isgusad. Degisoggu, we-dule, degi, we-omegan-warbogwadmala, ogumakar oburgwilemaloed, adi, bemar-abargi dulemar melle we-ibmar-isgana-imakdii gumalagar.
LEV 20:15 ” ’Ar machered-gwensak ibdurganbo galagwensuli-gusale, we-dule, oburgwilegoed, deginbali, ibdurgan oburgwilemogoed.
LEV 20:16 ” ’Ome-gwensak ibdurganbo galagwensuli-gusale, we-ome, degi, ibdurgan oburgwilegoed. Wemar, na dukin burgwed amismalad.
LEV 20:17 ” ’Ar dule-gwensak e-bun-e-babsikidbodibe, e-nansikidbodibe, negsichigi galagwensuli nanasale, ibmar-isgana imaksad. Degisoggu, e-dulemar-wagab ebobela oburgwilemaloed. E-bun-e-nug dummad-oichosad. We-dule, e-isgusad-ular, oburgwilegoed.
LEV 20:18 ” ’Ar dule-gwensak ome-e-igar-dakdiidgi ese gochale, degi, ome-igar-dakdiid eyeye sogsamogale, wemar, ebobela e-dulemar-abargi onolegoed.
LEV 20:19 ” ’Melle be-ammor-babsikidbodibe, be-nansikidbodibe, negsichigi be galagwensuli nanao. Ar degiile, be-sergan-nug be oichogoed. Wemar, ebobela na e-isgusad-ular, sabsur-odurdaklemaloed.
LEV 20:20 ” ’Ar dule-gwensak e-gilor-omebo negsichigi galagwensuli nanasale, e-gilor-nug oichosad. Wemar, ebobela e-isgued-sedii gumaloed, mimmi-nikussuli burgwemaloed.
LEV 20:21 ” ’Ar dule-gwensak, e-iagindibe, e-urbagindibe ome-egwanele, we-dule nue-dummad isgusad. E-ia-nug, degi, e-urba-nug oichosad. We-dule, e-ambebo mimmigan-nikuosuli gudii gumaloed.
LEV 20:22 ” ’Degisoggu, an bemarga bela an-igarmar-uksadba, an bemarga bela an-igarmar-sogsadba be ibsamalo. A-sogedba, be ibmar-imakdii gumalo. Adi, an-bemar-odosokalid-yargi an melle bemar-onogegar.
LEV 20:23 An bemar-sabed-ular, bemar-idu we-yargi-dulemar-bukmalad an onisokalid-e-damaladba, mer be damalo. Ar we-dulemarde, bela we-ibmar-isganamar-imakdii gusmalad. A-ulale, an wemar bela-bela isdar-daknonikid.
LEV 20:24 Ar bemargardi an sogdo: We-dulemar-be-idu-bukwad-e-yala bemargadga guoed, an bemarga ukoed, adi, degisadegu bemargadga guegar. A-yargi bela-bela ibmar-gulleged obinebaka nikad. ” ’Ani an be-Bab-Dummad-Jehová gued. Bemar an-dulamarga-guega, ani an dulemar-baigangi bachikii bemar-urbisad.
LEV 20:25 Degisoggu, ibdurgan-swilidikid, ibdurgan-swilidiksulidbo, bemar magar-dake gumalargebed. Deginbali, nuumar-swilidikid, nuumar-swilidiksulidbo, bemar magar-dake gumarbalirgebed. Bemar we-ibdurgan-swilidiksulid-ebuged-ular, nuumar-swilidiksulid-ebuged-ular, ibmar-napagi-garmakdimalad-swilidiksulid-ebuged-ular, melle be swilidiksuli gumalo. Ar ade, we-ibmarmar an bemarga swilidik gusurye sogsa gusad.
LEV 20:26 Bemar anga islidik damalargebed, ar ade, ani an Bab-Jehová islidik gued. Ani an dulemar-baigangi bachikii bemar-urbisad, adi, bemar an-dulamarga guegar.
LEV 20:27 ” ’Machered-gwensakdibe, ome-gwensakdibe, dule-burgwaled-e-burbase idakele, igi, ibmar-wisguega burba-isganase-gordiile, we-dule, akwagi-makar oburgwilegoed. We-dule, na dukin burgwed amisad.’ ”
LEV 21:1 Bab-Jehová, Moisésʼga sogded: “Dule-irwa-Bab-Dummadse-gormalad-Aarón-e-masmalaga be soge: ‘Melle dule-burgwisad ebumalo. Ar degiile, swilidiksuli gumaloed.
LEV 21:2 Aarón-masmala, unnila e-gwenad-walikagwad-burgwismaladbi ebugoed: E-nan, e-bab, e-machi, e-bunolo, e-ia, e-urba,
LEV 21:3 degi, e-bun sui-satedba amba be-walik-gudiid, sunna na ebumaloed.
LEV 21:4 ” ’Dule-yogasaaledyob melle swilidiksuli gumalo, deginbali, mer isgumarbalo.
LEV 21:5 ” ’Dule-irwa-Bab-Dummadse-gormalad nono swire imakmalosulid, e-siga-duku sikmalosulid, deginbali, e-san daas-daas imakosurmarbalid.
LEV 21:6 Wemar, e-Bab-Dummadga gwage-swilidik gudigumaloed, degi, e-Bab-Dummad-nug oichomalosulid. Ar we-dulemar, Bab-Jehováʼga ibmar-ogumakar ukmaladid, degi, e-Bab-Dummad-madu ukmarbalidid. A-ulale, dule-irwa-Bab-Dummadse-gormalad gwage-swilidik gudigumaloed.
LEV 21:7 Dule-irwa-Bab-Dummadse-goled, ome-gambanuchu-imaked nikuosulid, ome-machered-egi-dodosad nikuosulid, deginbali, ome-sui-meted nikuosurbalid, ar ade, dule-irwa-Bab-Dummadse-goled Bab-Dummadga-arbaega nug-imaklesad.
LEV 21:8 ” ’Degisoggu, bemala dule-irwa-Bab-Dummadse-goled swilidik dakoed. Ar we-dulede, be-Bab-Dummadga madu ukedid. Ar we-dule, begala dule-swilidik guoed. Ar ani an-Bab-Jehová dule-swilidikid gued. Ani an dule-swilidikidga bemar-imaked.
LEV 21:9 ” ’Ar dule-irwa-Bab-Dummadse-goled-e-sisgwa gambanuchuga-gudiile, we-bunagwa e-bab-nug oichodiid. Degisoggu, we-bunagwa, ogumakar oburgwilegoed.’ ”
LEV 21:10 Bab-Jehová Moisésʼga sogdebalid: “Dule e-gwenadgan-abargi dule-irwa-Bab-Dummadse-gormalad-e-dummadga sulenonikidi, degi, Bab-Dummadga-arbaega e-nonogi olivo-gwallu eolesadi, degi, dule-irwa-Bab-Dummadse-goled-bur-dummad-e-mor-yoega ega gangued uklesbalid, e-sailagia gwiarsuli gudii guosulid, degi, dule-burgwisad-ular, e-mor esirmakosulid.
LEV 21:11 We-dule, dule-burgwisad-negse dogosulid. Amba e-babdibe, e-nandibe, burgwisar, a-negse amba dogosurbalid, adi, melle swilidiksuli guegar.
LEV 21:12 ”Bab-Dummad-Neg-Islidikid mer oichogega, Bab-Dummadse-Goled-Neg-Islidikidgi noosulid. Ar ade, e-nonogi ina-wawadikid eolesad, adi, soglegegar: ‘We-dule, Bab-Dummadgarbi-arbaega nug-imaklesye.’ Ani an Bab-Jehová gued.
LEV 21:13 ”Dule-irwa-Bab-Dummadse-gormalad-e-dummad, unnila ome-yagwabi nikuoed.
LEV 21:14 Ome-ei-sui-burgwisad, degi, ome-sui-meted nikuosulid, deginbali, ome-gambanuchu-imaked nikuosurbalid. Unnila e-dule-bunagwa-yagwad nikuoed,
LEV 21:15 adi, melle e-dulemar-abargi e-wagan-danikoed-e-nug isguegar. Ani an Bab-Jehová, we-dule-islidik imaked.”
LEV 21:16 Bab-Jehová, Moisésʼga sunmakded, ega sogdebalid:
LEV 21:17 “Aarónʼga sogo: ‘Be-wagan-bonikwagwad bipisaale Bab-Dummadga-madu-ukleged ukosulid, ese warmakosulid. Degisadegu, be-waganga weyob igar maiguoed.
LEV 21:18 Bab-Dummadga-ibmar-ukedse weyob-bonigwamalad bipisaale warmakosulid: Dule-ibya-sated, dule-muya-muya-nanaed, dule-nag-sikaled, dule-sakwa-sikaled, dule-asu-bonikwagwad, dule-uaya-bonikwagwad,
LEV 21:19 dule-nag-bisgaled, dule-argan-bisgaled,
LEV 21:20 dule-yargan-mureged, dule-geg-dungumalad, dule-ibya-sibudikid, dule-ukagi-yaa-siid, dule-ukagi-boni-nikad, dule-alugwaggi-boni-nikad.
LEV 21:21 ” ’Aarón-e-wagan-bonikwagwad, bipisaale Bab-Jehováʼga-ibmar-ogumakar-ukleged-ukega, Bab-Jehováʼse warmakosulid. Ar bonikwaa-gued-ulale, bipisaale Bab-Dummadga-madu-ukleged-ukega, Bab-Jehováʼse warmakosulid.
LEV 21:22 Ar Bab-Dummadga-madu-uklegeddi sunna gunmaloed, deginbali, mas-nued-islidikid, degi, mas-nued-bur-islidikid sunna gunmarbaloed.
LEV 21:23 Degi-inigwele, bonikwaa-gued-ulale, mor-dummad-naid-daksik dogosulid, deginbali, Bab-Dummadga-ibmar-ogumakar-ukleged-ailase warmakosurbalid, adi, anse-goled-neg mer oichogegar. Ani an Bab-Jehová, dule-irwa-anse-gormalad islidik an imaked.’ ”
LEV 21:24 Weyobi, Moisés, Aarónʼga, Aarón-e-masmalaga, degi, bela Israel-dulemarga sunmaksa gusad.
LEV 22:1 Bab-Jehová Moisésʼga sunmakded, ega sogded:
LEV 22:2 “Aarónʼga, degi, e-masmalaga be sogo: ‘Israel-dulemar anga ibmar-islidik-uksamaladgi melle dodomalo, adi, bemar mer an-nug-islidikid oichomalagar. Ani an Bab-Jehová gued.’
LEV 22:3 ”Amarga be sogbalo: ‘Bela be-wagan, degi, be-wagan-sorba-danimarbaloed, nue-swilidiksuli-gudiidgi Israel-dulemar anga ibmar-islidikmalad-uksadse warmakdele, we-dule, an-asabin yog-onolegar guoed. Ani an Bab-Jehová gued.
LEV 22:4 ” ’Aarón, ar be-wagan-gwensak naibe-buna-yaa nikale, igi, e-abgangi boni-nikale, na san-swilidik-guedse geb sunna Bab-Dummadga-ibmar-islidikmalad-ukleged gunnoed. Aarón, ar be-wagan-gwensak, ibu-ibmar-burgwaled ebusale, dule-na-e-burba-misad ebusale,
LEV 22:5 ibmar-napagi-garmakdimalad ebusale, dule-swilidiksulid ebusale, ibmar-baigan-swilidiksulid ebusale,
LEV 22:6 a-dule, neg-mutikguedse swilidiksuli gudii guoed. ” ’Ar e-abgan enuksulile, a-dule, Bab-Dummadga-ibmar-islidikmalad-ukleged gunnosulid.
LEV 22:7 Dad-argwatele, a-dule, swilidik gunonikoed. Geb a-sorba, Bab-Dummadga-ibmar-islidik-ukleged nabir gunnoed, ar ade, we-ibmar e-masgunned gued.
LEV 22:8 Dule-irwa-Bab-Dummadse-gormalad ibdurgan-burgwaled, degi, achu-sapurse ibdurgan-san-ichimaklesad gunnosulid. Ar degiile, dule swilidiksuli gunonikoed. Ani an Bab-Jehová gued.’ ”
LEV 22:9 Bab-Jehová, Moisésʼga sogdebalid: “Degisoggu, dule-irwa-Babse-gormalad an-igar-uknaidba ibsamalo. An-igar-uknaidba ibsasulid-ulale, melle isgumalo, adi, wemar melle burgwemalagar. Ani an Bab-Jehová, wemar angarbi-arbaega an nug-imaksad.
LEV 22:10 ”Dule-irwa-Babse-goled-e-gargwenadsulid we-ibmar-islidikmalad gunnosulid. Deginbali, dule-e-neggi-maid, degi, dule-ega-arbaed, we-ibmar-islidikid gunnosurmarmogad.
LEV 22:11 ”Ar dule-irwa-Babse-goled manigi mai-wargwen-baksale, a-duledi, sunna we-ibmar-islidikmalad gunnoed. Deginbali, dule-irwa-Bab-Dummadse-goled-neggi mai-gwalulesmalad amba sunna we-ibmar-islidikid gunmarmogoed.
LEV 22:12 ”Dule-irwa-Babse-goled-e-sisgwa, dule-irwa-Babse-goledsulidbo-nikusale, we-ome, Bab-Dummadga-we-ibmar-islidikid-ukleged gunnosulid.
LEV 22:13 Ar dule-irwa-Babse-goled-e-sisgwa ei-sui burgwenonidibe, mimmi-nikussuli e-sui-metedibe, na e-bab-negse gannar nonikile, ar igi yoo-sui-nikugu, e-bab-masgunned gundii gusa, deyobi, gannar e-bab-masgunned gundii gubaloed. Ar dule-baigandi, bipisaale we-mas gunnosulid.
LEV 22:14 ”Ar dule-gwensak wissulidgi ibmar-islidikid guchale, we-dule, we-ibmar-guchad-wilub gannar dule-irwa-Bab-Dummadse-goledga ibmar ukoed. A-ukinbali, ibmar-atargi-gwensak napi ukbaloed.
LEV 22:15 ”Degisoggu, dule-irwa-Babse-gormalad Israel-dulemar Bab-Jehováʼga-ibmar-islidikidmalad-ukleged-oichogega imakosulid.
LEV 22:16 Ar dule-wargwen, we-ibmar-islidikid-ukleged-guchale, na dukin e-isgued sedii guoed. Ani an Bab-Jehová, wemar angarbi-arbaega an nug-imaksad.”
LEV 22:17 Bab-Jehová, Moisésʼga sogdebalid:
LEV 22:18 “Aarónʼga, degi, e-masmalaga, deginbali, bela Israel-dulemarga be sogo: ‘Ar Israel-dule-wargwendibe, Israel-dulesulid-bemar-abargi-maiddibe, ibmar-imakoye-sogsad-ular, igi, na e-itoleged ibmar-ukbied-ular, Bab-Jehováʼga ibmar ogumakar ukele,
LEV 22:19 we-ibmar, Bab-Jehová-nabir-abingaegala, ibmar-durgan-machered-swilidikid, boni-nikasulid ukoed. Sunna moli-bebe-nikad-machered, sibad-wawaad-machereddibe, sibad-machereddibe, ukoed.
LEV 22:20 ” ’Ibdurgan-wis-boni-nikad bipisaale Bab-Jehováʼga be ukosulid, ar ade, Bab-Jehová we-ibmar bei abingaosulid.
LEV 22:21 ” ’Amba deyobbardo, ar dule-gwensak ibmar-imakoye-sogsad-ular, igi, na e-itoleged-ibmar-ukbied-ular, gwenatigwar-guega, Bab-Jehováʼga moli-bebe-nikad, sibad-wawaaddibe, sibaddibe, ukele, we-ibdurgan-swilidikid, boni-nikasulid ukoed, adi, nabir Bab-Jehová we-ibmar-uknaid abingaegar.
LEV 22:22 Bab-Jehováʼga ibdurgan-aku-atakmalad, muya-muya-nanamalad, nag-sikarmalad, yaa-nikamalad, uka-sensenmalad, uka-muru-murumalad, be ukosulid. ” ’Deginbali, we-ibmarmar ibmar-ogumakar-ukleged-ailagi, Bab-Jehováʼga be ogumakar ukbalosulid.
LEV 22:23 Sunna be-itoleged ibmar-ukbiedba anga be moli-bebe-nikad, igi, sibad-wawaad-wis-bonigwaled uked. Ar ibmar-imakoye-sogsad-ular, ibdurgan-degiid be ukerdi, Bab-Jehová bei abingaosulid.
LEV 22:24 Bab-Jehováʼga ibdurgan alugwag-bonigwaled, alugwag-madareged, alugwag-gwasualed, degi, alugwag-sikaled be ukosulid. Be-yalagi ibdurgan-degimalad Bab-Jehováʼga be ukosurmalad.
LEV 22:25 ” ’Deginbali, ibdurgan-degimalad be-Bab-Jehováʼga-ukega, Israel-dulesulid-abin be abingabalosulid, ar ade, we-ibdurganmar bonigwaledid. Degisoggu, be-ibe abingalegosulid.’ ”
LEV 22:26 Bab-Jehová, Moisésʼga sogdebalid:
LEV 22:27 “Moli-bebe-nikad-e-mimmi gwalulesdibe, sibad-wawaad-e-mimmi-gwalulesdibe, igi sibad-e-mimmi-gwalulesdibe, na e-nan-walik ibagugle (7) gudii guoed. Geb ibabaabakgine (8) sunna bemar anga we-ibdurgan ogumakar ukoed.
LEV 22:28 ”Melle iba-galagwena moli-bebe-nikad-ome, e-mimmi-ebo, igi, sibad-wawaad-ome, e-mimmi-ebo e-ibe be e-dukar egwanno.
LEV 22:29 ”Be anga dog-nuedye-sogega, ibmar uknaile, nue igar-maidba-imakar be ukoed. Adi, an nabir abingaegar.
LEV 22:30 We-ibmar-be-anga-uknaid, a-ibagi be gunnoed. Banedga, we-ibmar be sabogosulid. Ani an Bab-Jehová gued.
LEV 22:31 ”An-igarmar-mamaidba be ibsamala, eba be ibmar-imakdii gumala. Ani an Bab-Jehová gued.
LEV 22:32 ”An-nug-islidikidgi melle be dodomalo, adi, Israel-dulemar-abargi an-nug islidik guegar. Ani an Bab-Jehová bemar islidik imaked.
LEV 22:33 Ani an Egipto-yargi bemar-onosad, adi, an bemar-Bab-Dummadga gumalagar. Ani an Bab-Jehová gued.”
LEV 23:1 Bab-Jehová, Moisésʼga sogdebalid:
LEV 23:2 “Israel-dulemarga be weyob sogo: ‘Bab-Jehová we-itoakwaa-ibamar-onoleged mesisad. Bemar Bab-Jehová-nug-odummogega, a-ibamar islidikid-onmakedye bimaloed. Bab-Jehová we-ibamar omesisad.’ ”
LEV 23:3 Bab-Jehová, Moisésʼga sogdebalid: “Israel-dulemarga be weyob sogo: ‘Bemar ibanergwa (6) arbamaloed. Ar ibagugledgindi (7), bemar obunnomaloed. A-iba, an-nug-odummogega itoakwaa-iba-onoleged-iba gued. A-ibagi, bemar bipisaale arbaosurmalad. A-ibagi, bemar na bia maimalodibe, Bab-Jehová-nug-odummogega bemar obunnogoed.’ ”
LEV 23:4 Bab-Jehová, Moisésʼga sogdebalid: “Israel-dulemarga be weyob sogo: ‘Bab-Jehová we-itoakwaa-ibamar-onoleged mesisad. Bemar Bab-Jehová-nug-odummogega we-itoakwaa-ibamar-onolegedgi islidikidgi onmaknonimaloed. An bemarga iba-mesnaid-sekalaagi, bemar na onmaknonimaloed:
LEV 23:5 ” ’Gebe-nii-onodoed-ibambe-gakabakegi (14), a-sedogidba, bemar Bab-Jehová-nug-odummogega Egipto-yargi bemar Oburgwilegoenad-Iba onomaloed.’ ”
LEV 23:6 Bab-Jehová, Moisésʼga sogdebalid: “Israel-dulemarga be weyob sogo: ‘A-nii-ibambe-gakatargi (15), Bab-Jehová-nug-odummogega Madu-E-Inasulid-Iba onodoed. Madu-e-inasulid ibagugle (7) be gunmaloed.
LEV 23:7 Gebe-iba-onodoedgine, bemar islidikidgi danar ambikumaloed. A-ibagi, bipisaale bemar arbaosurmalad.
LEV 23:8 Ibagugle (7) bane-bane, bemar Bab-Jehováʼga ibmar ogumakar ukmaloed. Geb ibagugledgi (7), bemar Bab-Jehová-e-nug-odummogega islidikidgi danar ambikunonimaloed. A-ibagi, bemar bipisaale arbaosurmalad.’ ”
LEV 23:9 Bab-Jehová, Moisésʼga sogdebalid:
LEV 23:10 “Israel-dulemarga be sogo: ‘Yar-an-bemarga-uknaidse bemar dogsamalale, agi bemar ibmar-gwag-digaled wearmalale, bemar gebe-ibmar-gwag-wesad-dukgwen, dule-irwa-Bab-Dummadse-goledse sedoed.
LEV 23:11 Dule-irwa-Bab-Dummadse-goled Bab-Jehová-asabin we-ibmar-gwag bana-bana imakoed, adi, Bab-Jehová we-ibmar-gwag abingaegar. Obunnoged-iba-banedgine, we-ibmar-gwag Bab-Jehováʼga bana-bana imakoed.
LEV 23:12 We-ibmar-gwag-dukgwenad Bab-Jehováʼga be uknaid-ibagi, sibad-wawaad-sapingwagwad-birgagwen-nikad, swilidikid, boni-gwen-nikasulid, Bab-Jehováʼga be ogumakar ukoed.
LEV 23:13 Deginbali, madubur-bur-nued nibirbake olivo-gwalluba-omukuar, be ukbaloed. We-ibmar-ogumakar-ukleged Bab-Jehová yeer-yapanne itodaed. Degine, vino bute-gwagwen eba eolegoed.
LEV 23:14 Be-Bab-Dummadga-inse be we-ibmar-gwag uksasulile, bemar madu gunnosulid. Bemar ibmar-gwag-dibyaled, igi, ibmar-gwag-biniddibe, gunnosurmarbalid. Bia be mai-guoe, bega, degi, be-waganga, we-igar degisadegu mai guoed.’ ”
LEV 23:15 Bab-Jehová, Moisésʼga sogdebalid: “Israel-dulemarga be sogo: ‘Obunnoged-banedgine, orosgi-dakleged-trigoʼye-nugad-dukgwen Bab-Jehováʼga be bana-bana-uksad-sorbali, itoged-ilagugle (7) be ebisoed.
LEV 23:16 Obunnoged-ilagugled (7), geb a-banedgine, bela iba-dulabo-gakambe (50) guoed. Geb degine, Bab-Jehováʼga ibmar-gwag-binidi bemar ukoed.
LEV 23:17 Be-neggine, madu-gwabo madubur-nuedgi-e-inaba-sobaled, Bab-Jehováʼga bana-bana-ukega be sedoed. We-madu-gwagwen madubur-nibirbake-imakaled, baid amba deyob imakarbalid. We-madumar Bab-Jehováʼga gebe-ibmar-sanmaked-uklegedid.
LEV 23:18 Maduba-mesa sibad-wawaad-sapingwagwad-birgagwen-nikad, swilidik, boni-nikasulid, walagugle (7) be ukoed. Deginbali, moli-bebe-nikad-sapingwagwad-wargwen, degi, sibad-wawaad-machered walabo be ukbaloed. Wemala, Bab-Jehováʼga ogumakar be ukoed. Degine, ibmar-gwag eba be ukbaloed, degine, vino-egi-eolemalad be ukbaloed. Wemarde, Bab-Jehováʼga soogi ogumakar-uklegedid, Bab-Jehová yeer-yapanne itodaed.
LEV 23:19 ” ’A-ukinbali, isgued-ular sibad-machered-wargwen be ukbaloed, degi, gwenatigwar-guega sibad-wawaad-sapingwagwad-birgagwen-nikad, warbo be ukbaloed.
LEV 23:20 Dule-irwa-Bab-Dummadse-goled, sibad-wawaad-sapingwagwad-warbogwad madu-gebe-uklegedba-mesa Bab-Jehová-asabin bana-bana imakoed. We-ibmarmala, Bab-Jehová-asabin ibmar-ukleged-bana-bana guedid. Wemar, Bab-Jehováʼga ibmar-islidik-uklegedid, dule-irwa-Bab-Dummadse-goledga uklegoedid.
LEV 23:21 ” ’A-ibagi, bela bemar Bab-Jehová-nug-odummogega islidiki danar ambikunonimaloed. A-ibagi, bemar bipisaale arbaosurmalad. Be-wagan bia maimardibe, we-igar degisadegu ega maigu guoed.
LEV 23:22 ” ’Ibmar-gwag-weed-ibagan mosale, melle bela be-nainu-dikar-nagase be weo. Deginbali, ibmar-gwag napase batisale, melle a-ibmar-gwag be bar suo. Ar ade, wemala dulemar-wileganaga, degi, Israel-dulesurmaladga be obegoed. Ani an be-Bab-Dummad-Jehová gued.’ ”
LEV 23:23 Bab-Jehová, Moisésʼga sogdebalid:
LEV 23:24 “Israel-dulemarga be sunmake, ega be soge: ‘Nii-walagugled-gebe-iba-onodedgi, bemar obunnogoed. A-ibagi, gar-trompeta-ogolale, bemar iba onogoed. Deginbali, bemar Bab-Jehová-nug-odummogega danar ambikunonimarbaloed.
LEV 23:25 A-ibagi, bemar bipisaale arbaosurmalad. Agine, bemar, Bab-Jehováʼga ibmar ogumakar ukoed.’ ”
LEV 23:26 Bab-Jehová, Moisésʼga sogdebalid:
LEV 23:27 “Israel-dulemarga be sunmake, ega be soge: ‘Nii-walagugled-ibambegi Isgued-Elied-Iba guoed. A-ibagi, bemar Bab-Jehová-nug-odummogega, islidik danar ambikunonikoed. A-ibagi, bemar mas-gunsuli gudigumaloed, deginbali, bemar Bab-Jehováʼga ibmar ogumakar ukmarbaloed.
LEV 23:28 A-ibaginbali, bemar bipisaale arbaosurmalad, ar ade, a-iba, Isgued-Elileged-Ibad, agine, be-Bab-Dummad-Jehová bemarga isgued elioed.
LEV 23:29 Ar dule-wargwen a-ibagi mas-guchale, we-dule, e-dulemar-abargi onolegoed.
LEV 23:30 Ar dule-wargwen a-ibagi arbasale, we-dule, e-dulemar-abargi an obelogoed.
LEV 23:31 ” ’Degisoggu, a-ibagi, bemar bipisaale arbaosurmalad. Be-wagan bia maimardibe, we-igar degisadegu ega maigu guoed.
LEV 23:32 A-iba, bemarga obunnogoed-iba guoed. A-ibagine, bemar mas-gunsuli gudiguoed. We-obunnoged-iba, bemar nii-walagugled-ibabakebak-sedodedgi onodoed. Geb banedgi, sedogidse bergudapoed.’ ”
LEV 23:33 Bab-Jehová, Moisésʼga sogdebalid:
LEV 23:34 “Israel-dulemarga be sogo: ‘Nii-walagugled-ibambe-gakaatargine, Neg-Matargana-Sobaled-E-Iba Bab-Jehová-e-nug-odummogega be onodoed. We-iba, ibagugle (7) onolenai guoed.
LEV 23:35 Gebe-iba-onodedgine, bemar Bab-Jehová-e-nug-odummogega islidiki danar ambikunonimaloed. A-ibagi, bemar bipisaale arbaosurmalad.
LEV 23:36 Bemar ibagugle (7) Bab-Jehováʼga ibmar-ogumakar-uknai guoed. Ibabaabakadgine (8), bemar Bab-Jehová-e-nug-odummogega islidiki danar ambikunonimaloed. Agine, amba bemar Bab-Jehováʼga ibmar ogumakar ukbaloed. A-iba, iba-dummadid. Degisoggu, bemar a-ibagi, bipisaale arbaosurmalad.
LEV 23:37 ” ’We-ibamala Bab-Jehováʼga iba-itoakwaa-onolemaladid. A-ibagi, Bab-Jehová-e-nug-odummogega bemar islidiki danar ambikunonimaloed, adi, Bab-Jehováʼga we-ibmarmar-ogumakar ukegar: Ibdurgan-ogumakar-ukleged, ibmar-gwagmar-ukleged, ibmarmar-ukleged, degi, vino-ukleged. We-ibmarmar e-ibagan-uklegoed-maidba be ukmaloed.
LEV 23:38 We-ibamala, Bab-Jehová-obunnoged-iba-ukine, Bab-Jehováʼga ibmar-uklegoye-ise-sogar-sogsad-ukine, degi, ibmar-ukbiedba-ukleged-ukine, be onobaloed.
LEV 23:39 ” ’Nii-walagugled-ibambe-gakatargi, bemar ibmar-gwag-wesmalad-sorbali, Bab-Jehováʼga ibagugle (7) bemar iba onomaloed. Gebe-iba-onodoedgi, degi, ibabaabakgi (8) bemar arbaosurmalad.
LEV 23:40 Gebe-iba-onodoedgine, bur sapimar-nuegangi e-sanmar-nuegan-nanaid, ogobgi-dakleged-e-gagan, sapimar-dummagan-e-anagan, degi, sosgamar bemar amimaloed. Ibagugle (7) bemar be-Bab-Dummad-Jehová-asabin wergumaloed.
LEV 23:41 Birga-iliba, nii-walagugledgi (7), ibagugle (7) bemar Bab-Jehová-nug-odummogega iba-onodii gumaloed. We-igar bemar-waganga degisadegu maigu guoed.
LEV 23:42 Ibagugle (7) bemar neg-matargan-sobaledgi-mai gumaloed. Bela bemar Israel-dulemar Israel-yargi-gwalulesmalad we-neg-matargan-sobaledgi-mai gumaloed,
LEV 23:43 adi, be-wagan wisgumalaga, an Egipto-yargi Israel-dulemar-onosgu, ani an neg-matargan-sobaledgi-megega bemar-imaksaye. Ani an bemar-Bab-Dummad-Jehová gued.’ ”
LEV 23:44 Weyobi, Moisés, Israel-dulemarga Bab-Jehováʼga-ibamar-itoakwaa-onolegedgi sunmaksad.
LEV 24:1 Bab-Jehová, Moisésʼga sogdebalid:
LEV 24:2 “Israel-dulemarga be soge: ‘Olivo-gwallu-bur-swilidikid ibmarba-oburarsulid, be sedamalo. Adi, Bab-Dummadse-goled-neggi gwallu ogaegar. Deyobi, a-gwallumar degisadegu gasii guoed.
LEV 24:3 Aarón Bab-Dummad-dulemarbo-ambikued-neggi gwallumar ogaoed, bia Bab-Dummad-Israel-dulemarbo-Igar-Mesisad-Ulu-siid-iduar, mor-dummad-naid magaba ogaoed. Adi, we-gwallumar Bab-Jehová-asabin gasii oibodagegar. We-igar, be-waganga degisadegu maigu guoed.
LEV 24:4 Gwallu-sied-olobiid-birgi gwallumar-bukwad degisadegu Bab-Jehová-asabin gasii guoed.’ ”
LEV 24:5 Bab-Jehová, Moisésʼga sogdebalid: “Israel-dulemarga be sogo: ‘Madubur-nuedgi madu-ologana gwaambe-gakabo (12) be soboed. Madu-gwagwengi madubur nibirbo be ebugoed.
LEV 24:6 Bab-Jehová-asabin mese-olobiid-birgi, ilebo be madu-ologana urboed. Ilegwengi gwanergwa (6) be urboed, baid ilegwengi deyob mergu be urbebaloed.
LEV 24:7 Deginbali, ina-wawadikid-ibmar-baidba-oburarsulid madu-ilegwen-ilegwen-bukwad-dikarba be urbebaloed. We-ina-wawadikid madu-anar ebinsalegega-ibmar-uklegedyob gued. We-ina-wawadikid Bab-Jehováʼga ogumakar uklegoed.
LEV 24:8 Obunnoged-iba-iliba, Israel-dulemar-nukine, we-madu Bab-Jehová-asabin be urbedii guoed. Israel-dulemar weyob degisadegu we-igar imakdioed.
LEV 24:9 We-madu Aarónʼgadga, degi, e-masmalagadga degisadegu guoed, neg-islidikidgi gunmaloed. Ar ade, we-ibmar bur bule Bab-Jehováʼga ibmar-ogumakar-ukleged-baiganba, islidikid gued. Weyob we-igar degisadegu maigu guoed.’ ”
LEV 24:10 A-ibagangine, Israel-dulemar-abargi dule-gwensak maigusad. E-nande Israel-duled, e-babdi Egipto-duled. Ibagwengine, we-dulede Israel-dule-wargwen-ebo danar-danar-bukwadgi uluar gusad.
LEV 24:11 Agine, ome-Israelʼgined-e-machi galagwensuli sunmakdegu Bab-Dummad-nug obarisad. Degisoggu, we-dule, Moisésʼse sesagusmalad.
LEV 24:12 Geb Bab-Jehová Israel-dulemarga we-dule-imaklegoed-sogedse, esgaryagi we-dule-metemargweled. We-dule-e-nande Selomitʼye nugad, Dibri-sisgwad. Dibriʼdi Dan-wagwad.
LEV 24:13 Geb degine, Bab-Jehová Moisésʼga sogded:
LEV 24:14 “We-dule-galagwensuli-sunmaksad bemar-danar-danar-bukwad-magaba be onomalo. Bela dule-itosmalad we-dule-nono-birgi e-argan mesoed. Geb bela Israel-dulemar akwagi we-dule-makoed.
LEV 24:15 Israel-dulemarga weyob be sogoed: ‘Ar doa-dule e-Bab-Dummadgi galagwensuli-sunmaksale, e-isgusad egi aibinoed.
LEV 24:16 Ar doa-dule e-gwenad-ukabsanaidgi Bab-Jehová-nug bisale, we-dule oburgwilegoed. Bela Israel-dulemar akwagi we-dule-makoed. Ar Israel-duledibe, Israel-dulesurdibe, Bab-Jehováʼgi-galagwensuli-sunmaksale, we-dule oburgwilegoed.’ ”
LEV 24:17 Bab-Jehová, Moisésʼga sogdebalid: “Ar doa-dule, dule-baid-oburgwisale, we-dule oburgwilemogoed.
LEV 24:18 Ar doa-dule, dule-baid-ibe ibdurgan-oburgwisale, we-dule ibdurgan-oburgwisad-anar ibdurgan-baid ega ukoed.
LEV 24:19 Ar doa-dule, dule-baid-naibi-imaksale, we-dule, deyob naibi-imaklemogoed.
LEV 24:20 Ar doa-dule, dule-baid-ibe gar-bichisale, we-dule-ibe gar bisgelemogoed. Ar doa-dule, dule-baid-ibe ibya-naibisasale, we-dule-ibe ibya naibisalemogoed. Ar doa-dule, dule-ibe nugar-bichisale, we-dule-ibe nugar bisgelemogoed. Ar doa-dule, igi-dule-baid-naibisaoe, we-dule deyob naibisalemogoed.
LEV 24:21 Ar doa-dule, dule-baid-ibe ibdurgan-oburgwisale, we-dule-ibe ibdurgan-oburgwisad-anar ibdurgan-baid ega ukoed. Ar doa-dule, dule-baid-oburgwisardi, we-dule deyob oburgwilemogoed.
LEV 24:22 Israel-dulega, degi, Israel-dulesulidga unnila igar-soggwenna maigu guoed. Ani an bemar-Bab-Dummad-Jehová gued.”
LEV 24:23 Moisés Israel-dulemarga bela we-ibmar sogsa gusad. Geb Israel-dulemar, dule-galagwensuli-Bab-Jehováʼgi-sunmaksad danar-danar-bukwamalad-magaba onosmalad. Geb agi, akwagi-makar oburgwismalad. Ar igi Bab-Jehová, Moisésʼga sogsa gusa, deyobi, Israel-dulemar ibmar imaksamalad.
LEV 25:1 Bab-Jehová, Moisésʼga Sinaí-yargi sunmakded, ega sogded:
LEV 25:2 “Israel-dulemarga be sogo: ‘Bab-Jehová bemarga-yar-uknaidse be ambikudapmalale, Bab-Jehová-nug-odummogega a-yargi birgagwen nainu obunnonai guoed.
LEV 25:3 ” ’Birganergwa (6) bemar be-nainumargi ibmar digmaloed. Birganergwa (6) be-uva-dub be nue sike-sike imakmaloed, degi, e-san be weemarbaloed.
LEV 25:4 Birgagugledgindina (7), Bab-Jehová-nug-odummogega, bar be nainugi arbaosurmalad. A-birgagine, be-nainugi be ibmar-digosulid, deginbali, be-uva-dub be sike-sike imakosurbalid.
LEV 25:5 Be-nainugi wargwengi ibmar-gwag-ainidagoedi be bela weosulid, deginbali, uva be digsasulid wargwengi-sanmakdagoedi be bela weosurbalid. Birgagwen nainugi be arbaosulid.
LEV 25:6 Degi-inigwele, a-birgagi nainugi bela ibmar-sanmakoedi bemarga unniguar gunnega guoed. Be-mai-machered, be-mai-ome, dule-bega-arbaed, degi, Israel-dulesulid-be-yargi-gudiid sunna gunmarmogoed.
LEV 25:7 Deginbali, be-molimar-bebe-nikad, degi, ibdurganmar be-yargi-nikamalad we-ibmarmar-sanmakoedi, sunna gunmarmogoed.’ ”
LEV 25:8 Bab-Jehová, Moisésʼga sogdebalid: “Israel-dulemarga be sogo: ‘Birgagugled, ilagugle (7) be ebisoed. A sogleged, birga-durbo-gakabakebakye (49).
LEV 25:9 Geb a-birga-nasadgine, nii-walagugled-ibambegi, isgued-osuloged-ibagi binnasuli gar-trompeta bela be-yalagi be ogoloed.
LEV 25:10 Weyobi, birga-durbo-gakambegidi (50), Bab-Jehováʼga birga-islidikidga be imakoed. A-birgagi, bela Israel-yargi Israel-dulemar maiga-gudiile, ollorgunonikoed. A-birga, bemarga Gannar-Ibmar-Ukleged-Birgaga guoed. Degine, bemar na gannar e-nainu-e-nainu sumaloed, gannar na e-gwenadganse namaloed.
LEV 25:11 Birga-dulabo-gakambegid (50) bemarga Gannar-Ibmar-Ukleged-Birgaga guoed. A-birgagi, bemar nainugi ibmar-digosurmalad, nainugi ibmar-ainioed be weosurmarbalid, degine, uva be weosurmarbalid.
LEV 25:12 Ar ade, a-birga, Gannar-Ibmar-Ukleged-Birgad. A-birgade bemarga birga-islidikidid. A-birgagi unnila ibmar-e-itolegedba-ainied-sanmakoedi be gunmaloed.
LEV 25:13 ” ’Gannar-Ibmar-Ukleged-Birgagi bela bemar na gannar e-nainu-e-nainuse namaloed.
LEV 25:14 ” ’Dule-baidga be nainu manigi-uksadibe, dule-baidse be nainu-baksadibe, melle bemar be-gwenadgan mesagwar imako.
LEV 25:15 Igi birga Gannar-Ibmar-Ukleged-Birga-napi, a-birga-napiwilub be dule-baidse nainu bakoed. Dule-nainu-ukoeddi, Gannar-Ibmar-Ukleged-Birga-napiwilub nainu gargegu ukoed.
LEV 25:16 ” ’Gannar-Ibmar-Ukleged-Birga amba undar napile, mani-dummad nainu be ukoed. Gannar-Ibmar-Ukleged-Birga ichee napile, adi, nainu mani-bipii be ukoed, ar ade, ibmar-welegoedba, we-nainu gargegu be ukoed.
LEV 25:17 ” ’Melle be dule-baid mesagwar imako. Bur be-Bab-Dummad be dobee nanadii gumalo, ar ade, ani an bemar-Bab-Dummad-Jehová gued.’ ”
LEV 25:18 Bab-Jehová, Moisésʼga sogdebalid: “Israel-dulemarga be sogo: ‘Bab-Jehová-e-igar-bemarga-uksadba be nanamarsun, Bab-Jehová-Igar-Mamaidba be damarsun. A-sogedba bemar gudii gumarsun. Geb degine, bemar bogidik gudii gumaloed.
LEV 25:19 Nainu bemarga ibmar-osanmakoed. A-ibmarmar nue-immedik bemar gunmaloed, degine, a-yalagi, nue-bogidik bemar bukwa gumaloed.
LEV 25:20 ” ’Ar bemar egisdamalodibe: ¿Ar wede birgagugledgi (7), ibi anmar gunmalosunna? Ar ade, ibmarde anmar digosurmalad, degine, anmar weosurmarbalid.
LEV 25:21 ” ’Birganergwadgine (6) Bab-Jehová bemargi ise-nued binsamaloed. Bab-Jehová birgapaa-wilub nainugi ibmar-osanmakoed.
LEV 25:22 Birgabaabakgine (8), be ibmar-digmaloed. A-birgagine, ibmar-gwagmar-sabosmalad bemar gunmaloed. Birgabakebakse (9), ibmar-sabosad be gunmaloed. Geb a-birgagine, ibmar-sanmakded be gutemaloed.’ ”
LEV 25:23 Bab-Jehová, Moisésʼga sogdebalid: “Israel-dulemarga be sogo: ‘Dule-nainu-baksadi degisadegu egadga guosulid, ar ade, nainu Bab-Jehováʼgadid. Ar bemar unnila sikwas we-yargi gudimalad. Bemar we-yargi degisadegu gudiguosurmalad.
LEV 25:24 Degisoggu, bemar-nainu-baksamaladi, be wisgumalargebed, gannar-nainu-obirileged-igar bemarga maigu guoed.
LEV 25:25 ” ’Be-gwenad mani-sate-gudele, na e-nainu uksale, e-gwenad-bur-walikagwad nainu-uklesad ega onononikoed.
LEV 25:26 ” ’Dule ega e-anar nainu-onoged-satele, ar na dukin e-nainu-onogega, unniguar mani amisale,
LEV 25:27 nainu-uklesad-akar birga ebisoed. Geb Gannar-Ibmar-Ukleged-Birga igi-napi, a-wilub mani bennukoed. Geb degine, we-nainu gannar na egadga gunonikoed.
LEV 25:28 Ar unniguar mani amissulile, dule ese nainu-baksadi we-nainu Gannar-Ibmar-Ukleged-Birgase gani guoed. Geb agine, we-nainu Gannar-Ibmar-Ukleged-Birgagi gannar e-ibedgadga guoed.
LEV 25:29 ” ’Dule-gwensak neggwebur-sakdigar-siidyaba na e-neg manigi uksale, we-dule, sunna a-neg birgagwengi gannar obiroed. Ega birgagwen naguoed gannar neg-obiregar.
LEV 25:30 Birgagwengi we-neg obiridsulile, neggwebur-sakdigar-siidyaba we-neg-siidi, dule-neg-baksadgadga, degi, e-wagangadga degisadegu guoed. Gannar-Ibmar-Ukleged-Birgagi we-neg e-ibedga bar uklegosulid.
LEV 25:31 ” ’Neggwebur-sakdigarsulidgi negmar-siidi nainuyob guoed. A-negmardi sunna gannar obirilegoed, Gannar-Ibmar-Ukleged-Birgagi a-nega e-ibedga uklegoed.
LEV 25:32 ” ’Levita-dulemardi e-neggweburmargi e-neg-siidi manigi uksale, sunna gannar obire guoed.
LEV 25:33 Dule-gwensak Levita-dulemar-neggweburgi Levita-dulese neg baksale, we-dule, Gannar-Ibmar-Ukleged-Birgagi gannar ega neg maniginsuli ukoed. Ega gannar obiroed, ar ade, e-neggweburmargi-neg-bukwadi Israel-dulemar-abargi Levitaʼmarga uklesadid.
LEV 25:34 Levita-dulemar-e-gagan-nainumardi bipisaale manigi uklegosulid. Ar ade, we-gagan-nainu Levita-dulemargadga degisadegu guoed.
LEV 25:35 ” ’Be-dule wilegedga gudele, bese danikile, be bendakoed. Be-neggi dule-neggwebur-baidginedyob gudii guoed.
LEV 25:36 We-dulegi, melle ega be mani-nug meso, degi, melle ei ibmar be sumarbalo. Suli, degisuli. Be-Bab-Dummad-dobee be nanamaloed. We-be-dule be-walik gudii guoed.
LEV 25:37 Deginbali, bese mani egichisale, egi mani onogegala, melle egi mani-obine be gao, degi, melle masgunned ega mani-obine be ukbalo.
LEV 25:38 Ani an be-Bab-Dummad-Jehová gued. Ani an Canaán-yala bemarga ukega, Egipto-yargi bemar-onosad, adi, an be-Bab-Dummadga guegar.
LEV 25:39 ” ’Be-dule be-walik-gudii wilegedga gudele, manigi bese na dukin ukdele, melle dule-mai-imaklegedyob be imako.
LEV 25:40 Nabir binsa bega dule-arbaedyob, Israel-dulesulid-be-walik-gudiidyob be imakoed. We-dule, Gannar-Ibmar-Ukleged-Birgase bega arbaoed.
LEV 25:41 Geb a-birgagine, e-mimmiganmala nabir be-neggi nodoed. Geb e-gwenadganse gannar naoed, na e-dadgan-nainu gannar egadga gunonikoed.
LEV 25:42 Deyob guoed, ar ade, Israel-dulemar anga-arbamalad-gumalad, ani an wemar Egipto-yargi onosad. A-ular, Israel-dulemala maiga-guega manigi uklegosurmalad.
LEV 25:43 Melle Israel-dulemar sabsuli-imakdii be gumalo. Suli, degisuli. Be-Bab-Dummad-dobee-nanadii be gumaloed.
LEV 25:44 ” ’Dulemar-be-yar-dikarba-mamaid, machereddibe, omedibe, amala sunna be-maiga gumaloed. Amala, machereddibe, omedibe be-maiga-gumalagala, manigi be bakmaloed.
LEV 25:45 Deginbali, Israel-dulesurmalad-bemar-abargi-mamaid, e-mimmigan-be-yargi-gwalulesmaladi, be-maiga-guegala, sunna manigi be bakmaloed, adi, bemargadga guegar.
LEV 25:46 Be burgwisale, we-be-maimala sunna be-mimmiganga be obemalad, adi, degisadegu be wagangadga guegar. Amala, degisadegu be-maiga gumaloed. Bemar, be-gwenadgandi, Israel-dulemardi, sabsuli gwen imakosurmalad.
LEV 25:47 ” ’Israel-dulesulid bemar-abargi-maid mani-ibedga gudele, Israel-dule a-dikarba-maid wilegedga gudele, we-dule, dule-mani-ibed-e-maiga-guega na san-ukdele, igidibe, Israel-dulesulid-e-gwenadga na san-ukdele,
LEV 25:48 dule-na-san-uksad sunna gannar onoleged. E-gwenad-wargwen sunna manigi onogoed.
LEV 25:49 E-gilordibe, e-gilor-machidibe, a sunna manigi a-dule-onogoed. E-gwenad-walikagwad sunna onomogad. Ar e-sunnad sunna nabir na onogele, ar na dukin manigi onogodo.
LEV 25:50 Dule, degi, dule-mani-ibed na ebogwa itomaloed, birgabigwa-gusa dule-manigi-uklesa, degi, igi-birga, Gannar-Ibmar-Ukleged-Birga napi. Agine, itogoed, dule-wargwen-arbaed igi-mani bennuklesale, abali, mani-nasiklegoed, igi-manigi dule-onolegoe.
LEV 25:51 Gannar-Ibmar-Ukleged-Birga amba ichesur-napile, a-wilub, uklesadgi-ollorguega mani-dummad bennukoed.
LEV 25:52 Gannar-Ibmar-Ukleged-Birga ichenapile, itomaloed, a-birgamarde igi-mani-wilub gue. Geb ollorguega, a-wilub bennukoed.
LEV 25:53 We-dule, unnila dule-birgagwen-manigin-arbaedyob imaklegoed. We-dule nue be dakmaloed, melle dule-baksad sabsuli we-dule-imaked be imakmalo.
LEV 25:54 ” ’We-dule Gannar-Ibmar-Ukleged-Birga-idu ollorgussulile, Gannar-Ibmar-Ukleged-Birgagi e-mimmiganmala ollorguoed.
LEV 25:55 ” ’Israel-dulemar anga-arbamalad gumalad. We-Israel-dulemar, ani an Egipto-yargi onosad. Ani an be-Bab-Dummad-Jehová gued.’ ”
LEV 26:1 Bab-Jehová, Moisésʼga sogdebalid: “Melle ibmar-sobarmalad bab-dummadyob-imakegala, be sobmalo. Ibmaryob-daklemalad-wilubgan, degi, akwa-islidikmalad, melle be sobmarbalo. Deginbali, akwa-sobaled bemar-yargi be siosurmarbalid, adi, melle bemar a-asabin dulluu imakegar. Ar ani an be-Bab-Dummad-Jehová gued.
LEV 26:2 ”An-obunnoged-ibagi, bemar obunnomarmogoed. Degine, anse-goled-neggi nue-binsaed-nikaa be damaloed. Ani an Bab-Jehová gued.
LEV 26:3 ”An bemarga igarmar-uksadba, igarmar-mesisadba, be nanamalale, a-igarmar-sogedba be inniki damalale,
LEV 26:4 ani an bemarga e-ibagan-sekalaa dii-owioed. Nainumargi-ibmar-digaled na e-ibagan-sekalaa sanmake an imakoed, degine, sapimar deyob an imakbaloed.
LEV 26:5 Uva-san-weledagoed-ibaganse, ibmar-gwag-welegoed bemar nikagu gumaloed. Degi, ibmar-gwag-diged-ibagan-nagunonikoedse, bemar uva-san amba wenanai guoed. Immediki be gudii gumaloed. Degine, bogidik be-yalagi bemar bukwa gumaloed.
LEV 26:6 ”Ani an bemar-yargi neg-bogidikid nasikoed. Degine, dobsulidba nue-gabbukwa, an bemar-imakoed. Ibdurgan-sapurbarmalad-ursirmar an bemarga osulogoed. Degine, bar be-yalagi bila-onolegega an imakosulid.
LEV 26:7 Bemar be-isdarmalad-bareginmaloed, amar es-suidgi bemarse burgwemaloed.
LEV 26:8 Bemar-walatale, dulemar-dulatar-mergued (100) bareginmaloed. Bemar-dulatale (100) dulemar-miliambe-mergued (10,000) bareginmaloed. Be-isdarmalad bemarse es-suidgi burgwemaloed.
LEV 26:9 ”An ise-nued bemargi binsaoed. An bemar-omelogoed, dulemar-ichesuli-guega an bemar-imakoed. Degine, an-bemarbo-igar-mesisadi maiguguega an imakoed.
LEV 26:10 Ibmar-gwagmar-sabolesmalad bemar gunmaloed, degine, ibmar-gwag-binid-wesmalad-sabogega, birga-nasadgi ibmar-gwag-gwabgusad be midmaloed.
LEV 26:11 ”An bemar-abargi maigu guoed. An isdar bemar-dakosulid.
LEV 26:12 An bemar-abargi gudii guoed. Ani an bemar-Bab-Dummadga guoed. Bemarmoga, be an-dulamarga gumarmogoed.
LEV 26:13 Ani an bemar-Bab-Dummad-Jehová gued. Ani an Egipto-yargi bemar-onosad, adi, bemar Egipto-dulemar-e-maiga mer bar-guegar. Bemar mer bingegudii gumalaga, maiga-gudiidgi an bemar-onosad.”
LEV 26:14 Bab-Jehová, Moisésʼga sogdebalid: “Ar bemar an-itosurmalale, degi, an-negseleged-igarmar-mamaidba be dasurmalale, an sabsur bemar-odurdakoed.
LEV 26:15 An-igarmar-mamaid be baisur dakmalale, an-igarmar-bemarga-uksadba be nanasurmalale, bela an-sogedba be dasurmalale, degine, an bemarbo-igar-mesisadgi be annadmalale,
LEV 26:16 an weyob bemar-sabsur-imakoed: Ukiar dobed-dummad bemargi nagunonikoed, bonigan-dummagan, degi, uellemalad-dummagan begi an barmidagoed. Wemala, be-ibyamar oichogoed, degi, be-sanmar nolloo imakoed. Be-ibmar-gwag bemar binsa digmaloed, ar ade, dule-baigan bemar ibmar-gwag-digmaloedi gunmaloed.
LEV 26:17 Bemargi nue-dummad an yolegoed, degine, bemar be-isdarmaladse galakuega an bemar-imakoed. Be-isdarmaladse bemar ebipiledii gumaloed, degine, dulemar bemar-bareginnosurmar-inigwele, degite, bemar wakinmamai gumaloed.
LEV 26:18 ”Deyob an sabsur-bemar-odurdaked-sorbali, amba bemar an-sogedba dasurmalale, be-isgumalad-ular, ilagugle (7) bur bule sabsur an bemar-odurdaknonisunnoed.
LEV 26:19 Bemar be-san-dummarba-imakmaladi, an san-bipii bemar-imakoed. Nibneg esgoroyob, an bega imakoed, degi, napadi esgoro-gordikidyob an bega imakbaloed, ar ade, dii wiosulid, degi, napagi ibmar-sanmakosulid.
LEV 26:20 Binsa dummad-arbanai be guoed, ar ade, napa isguosoggu, ibmar-gwag-be-digsale, bega sanmakosulid. Degine, be-sapimar bega sanmakosurbalid.
LEV 26:21 ”Ar amba a-sorba, bemar angi yolenanaimalale, an-sogedba bemar dasurmalale, be-isgumalad-ular, ilagugle (7) bur bule boni-dummagan bemargi an barmidagoed.
LEV 26:22 Degine, bemargi ibdurgan-sapurbarmalad-ursilimalad an barmidabaloed, adi, be-mimmigan ese bergumalaga, degi, be-moli-bebe-nikamalad bei oburgwemalagar. Degisoggu, bemar ichee-gudmalosoggu, dule-be-igarba-nanamalad sate gudmaloed.
LEV 26:23 ”Weyob an bemar-sabsur-odurdaknanaidgine, amba bemar nugusurmalale, amba bemar angi-yolenanaile,
LEV 26:24 ani an bemargi yolemarmogoed, be-isgumalad-ular, ilagugle (7) bur bule boni-dummagan bemargi an barmidabaloed.
LEV 26:25 An bemar-ebo-igar-mesisadba bemar dasurmalale, bemar urwenanaidgi, es-suidgi-burgwega an bemar-imakoed. Ar bemar bemar-neggweburgi be dukunadmalale, uelleged-dummad begi an barmidoed, degine, bemar, be-isdarmaladse be galakumaloed.
LEV 26:26 ”Mas-sate an bemar-imakoedgi, soo-gwagwengi omegan-warambe (10) bemarga mas-dunai guoed. Mas ise-wilubsaar-mimidmalogu, mas ichee-gusoggu, immelegosurmalad.
LEV 26:27 ”Ar deyob sabsur an bemar-odurdaknaid, amba be an-itosurmalale, amba angi bemar yolenanaile,
LEV 26:28 agine, bemargi ise-yolegar nue an sae-itogedgi, an-sunnad bemargi yoledsunnoed, be-isgumalad-ular, ilagugle (7) bur bule boni-dummagan bemargi an barmidabarsunnoed.
LEV 26:29 Be-masmala be gutemaloed, be-bunamala be gutemaloed.
LEV 26:30 Be-bab-dummad-baiganse-gormalad-e-aila-matusurmalad bei an osulogoed, be-bab-dummad-baiganse-gormaladga ina-wawadikid-e-aila-sobarmalad bei an bibisgoed. Be-bab-dummadyob-imakmalad-burgwarmaladgi, be-muimar an mesoed. Isdar an bemar-dakoed.
LEV 26:31 Be-neggweburmar an bibisgoed, be-bab-dummad-baiganse-gormalad-negmar an bibisgebaloed, degine, be anga ibmar-ogumakar-ukmalad bei an abingaosulid, ar ade, isdar-yapanne anga guoed.
LEV 26:32 ”Be-yala bei an bibisgoed. Be-isdarmalad be-yarse nonimalogua, amarbela geger be-yar dakmaloed.
LEV 26:33 Bemar dule-baid-baid-bukwamaladse-aisakiega an be-imakmaloed, degine, be-isdarmalad es-suid-gani bemar-bareginnega an imakoed. Be-yala, dulemar-sate guoed, degi, be-neggweburmar bela bibisgar guoed.
LEV 26:34 Geb degine, be-isdarmalad-yargi be bukwamaloedgine, be-yardi olloo mellesii guoed. Geb agine, be-yala wis obunnogoed.
LEV 26:35 Ar igi be maidgi, be-yala obunnoged-birgagi obunnosawilubbina, deyobi, bemar maiosurmaladgine, be-yala obunnogoed.
LEV 26:36 ”Bemar-dula-bemaloedi, be-isdarmalad-yargi bela-belad dobed an begi nasikmaloed. A-ular, binsa sapi-gagan-argwanedgi bemar gwakiar wakinmamai gumaloed. Ar igi dule es-suid-idu wakitedamala, deyob bemar wakitemaloed. Ar dule bemar-bareginnosurmar-inigwele, degite, bemar aimukudmaloed.
LEV 26:37 Es-suid-idu wakinmamaiyob, dule bemar-bareginnanai-guosurmar-inigwele, na be muchub-muchub yolenanai gumaloed. Be-isdarmalad-abin bemar gwisguosurmarbalid.
LEV 26:38 ”Dulemar-baigan-yargi be burgwemaloed, be-isdarmalad-yala be-obelomaloed, agi, be diglemaloed.
LEV 26:39 Bemar-burgosurmaladdi, be-isdarmalad-yargi aka bur bule wiledmaloed. Bemar isgusmalad-ular, degi, be-babgan-isgusmalad-ular, be deyob gumaloed.
LEV 26:40 ”Ar bemar-isgusadba, degi, be-babgan-isgusadba, be angi bangudigumalad, be angi yoledigumalad.
LEV 26:41 Ar a-ular, be-isdarmalad-yarse an bemar-barmidoed. A-yargi-gudiidgi bemar-isgusmalad na be magar-itononimalale, be anga sokarmalale, anmar bukib-itomarye,
LEV 26:42 geb agi an, Jacob-ebo, Isaac-ebo, degi, Abraham-ebo-igar-mesisad an ebinsaoed. Deunni, amarga an sogsad, yar an bemarga ukoye. A-yargi ise-nued an egi binsaoed.
LEV 26:43 A-yargi bemar bangudogua, bar egi be megmalosulidgi, a-yala obunnonai guoed. Bemardi, be-isgusmalad-ular be sabsur-odurdaklemaloed. Ar ade, an-igar an bemarga uksamaladi, bemar abingassurmalad, an-igar an-bemarga-mesismaladi, isdar be daksamalad.
LEV 26:44 ”Ar be-isdarmalad-yargi be gudigumalo-inigwele, amba an be-iegosurmalad. Degine, bela be-obelogedse an be-imakosurmalad. Ar an deyob imakdele, degiile, bemar-dadgan-ebo-an-igar-mesisadgi an annao-itole. Ar ade, ani an be-Bab-Dummad-Jehová gued.
LEV 26:45 Be-dadgan-ebo-an-igar-mesisad, an iegosulid. Deun, an bemar-Bab-Dummadga-guega, Egipto-yargi dulemar-baigan-wagab an bemar-onosad. Ani an Bab-Jehová gued.”
LEV 26:46 We-igar-uklesmalad, degine, dulemar-odurdakega-igar-uklesmalad, deun, Bab-Jehová Sinaí-yargi Moisésʼba Israel-dulemar-ebo igar mesis gusad.
LEV 27:1 Bab-Jehová, Moisésʼga sunmakdebalid, ega sogdebalid:
LEV 27:2 “Israel-dulemarga be sunmake, amarga be sogo: ‘Dule Bab-Jehováʼga sogsadibe, dule-gwensak-anar an mani bennukoye, we-dule-onogega, weyob imakoed:
LEV 27:3 Machergan birga-durgwen-nikad (20), birga-dulapaa-nikadse (60) onogega, mani-dulabo-gakambe-aidiku (50) be bennukoed, Bab-Dummadse-goled-neggi mani-wilub-saed-siidba bennukoed.
LEV 27:4 Omegan-onogegardina, mani-dulagwen-gakambe-aidiku (30) be bennukoed.
LEV 27:5 Masmala birgatar, birga-dulagwenadse-nikale (20), onogega, mani-dulagwen-aidiku (20) be bennukoed. Bunamala-onogegardi, mani-ambe-aidiku (10) be bennukoed.
LEV 27:6 Susmala nii-wargwen-nikale, birgatar-nikadse, onogega, mani-atar-aidiku be bennukoed. Bunormala-onogegardi, manipaa-aidiku be bennukoed.
LEV 27:7 Machergan-birga-dulapaa (60), degi, birga-dulapaa-obine-nikale, onogega, mani-ambe-gakatar-aidiku (15) be bennukoed. Mukwamar-onogegardi, mani-ambegi-aidiku (10) be bennukoed.
LEV 27:8 ” ’Ar dule nue-wilegediile, we-igar-maidba geg bennukele, dule-irwa-Bab-Dummadse-goledse seledoed, adi, ega mani-nug nasikegar. Dule-irwa-Bab-Dummadse-goled, we-dule e-ganguedba na bennuko-itogedba, ega mani-nug nasikoed.’ ”
LEV 27:9 Bab-Jehová, Moisésʼga sogdebalid: “Israel-dulemarga be sogo: ‘Bab-Jehováʼga ibdurgan sunna uklegedile, a-ibdurganmar Bab-Jehováʼga uklesale, bela we-ibdurganmala ise-nue-islidikidga guoed.
LEV 27:10 Degisoggu, we-ibdurgan bipisaale ibdurgan-baidbo ogwalegosulid, ibdurgan-baid-bur-nueddibe, ibdurgan-baid-bur-ichakwagwaddibe, bipisaale muchub ogwalegosulid. Ar we-ibdurgan-muchub baid-ibdurgan be ukye sogele, we-ibdurgan-warbobela ise-nue-islidikidga guoed.
LEV 27:11 ” ’Ibdurgan-Bab-Dummadga-ukleged, swilidiksulidile, dule-irwa-Bab-Dummadse-goled-asabin seledoed.
LEV 27:12 Geb dule-irwa-Bab-Dummadse-goled we-ibdurgan nue dakoed, adi, sogega, igi-mani-gargegu naguoe. We-mani-naguoedi, dule-baid bipisaale ogwaosulid.
LEV 27:13 Ibdurgan-e-ibed we-ibdurgan-onobiele, mani-soglesadba bennukoed, degine, a-ukine, a-mani-atargi-gwensak napi bennukbaloed.’ ”
LEV 27:14 Bab-Jehová, Moisésʼga sogdebalid: “Israel-dulemarga be sogo: ‘Ar dule-wargwen Bab-Jehováʼga na e-neg-uksale, dule-irwa-Bab-Dummadse-goled we-neg nue dakoed. Nue dakogu, geb dulega mani-nug-nasikoed. We-mani-nug-naguoedi, dule-baid bipisaale ogwaosulid.
LEV 27:15 Ar dule Bab-Jehováʼga na neg-uksad gannar neg abegele, mani-nug-nagusadba bennukoed. A-ukinbali, a-mani-atargi-gwensak napi bennukbaloed. Geb agine, we-neg gannar egadga gunonikoed.’ ”
LEV 27:16 Bab-Jehová, Moisésʼga sogdebalid: “Israel-dulemarga be sogo: ‘Dule-wargwen na e-nainu-e-dad-ega-uksad, Bab-Jehováʼga ukele, we-nainu ibmar-gwag-diglegedba e-mani-nug ega naguoed. Orosgisaar-dakleged-cebadaʼye-nugad galón-gwadulabo-gakambe-gakatar (55) sunna diglegele, mani dulabo-gakambe (50) aidikued-wilub ega naguoed.
LEV 27:17 Dule na e-nainu Gannar-Ibmar-Ukleged-Birgagi Bab-Jehováʼga uksale, nainu-gargegued-soglesadba e-mani-nug naguoed.
LEV 27:18 Gannar-Ibmar-Ukleged-Birga-sorba Bab-Jehováʼga e-nainu ukerdina, dule-irwa-Bab-Dummadse-goled ebisoed, birgabigwa Gannar-Ibmar-Ukleged-Birga-baidse-warmaked napi. Geb a-wilub ega mani-nug bur-bipi nasikoed.
LEV 27:19 ” ’Ar dule na e-nainu-uksadi gannar obirbiele, nainuga mani-nug-nagusadba bennukoed, degine, a-ukinbali, a-mani-atargi-gwensak napi bennukbaloed. Geb agine, we-nainu gannar egadga gunonikoed.
LEV 27:20 Ar dule we-nainu gannar obirsulile, we-nainu dule-baidga manigi uklesale, we-nainu dule bar obirosulid.
LEV 27:21 We-nainu Gannar-Ibmar-Ukleged-Birgagi ollorgunonikogu, we-nainu Bab-Jehováʼgadga gunonikoed. Degine, nainu-islidikidga gunonisunnoed. Geb degine, we-nainu dule-irwa-Bab-Dummadse-gormaladgadga gunonikoed.
LEV 27:22 ” ’Ar dule-wargwen, nainu-e-dad-ega-uksasulid-baksadi, Bab-Jehováʼga ukbiele,
LEV 27:23 dule-irwa-Bab-Dummadse-goled Gannar-Ibmar-Ukleged-Birga-napiwilub ega mani-nug nasikoed. Geb a-ibagine, a-mani-nug-nagusadba dule mani bennukoed. Ar wede Bab-Jehováʼga ibmar-swilidik uklegaledid.
LEV 27:24 Gannar-Ibmar-Ukleged-Birga-nagunonikir e-ibed-sunnadga we-nainu gannar uklegoed.
LEV 27:25 ” ’Bela ibmarga be mani nasikalile, Bab-Dummadse-goled-neggi mani-wilub-saed-siidba ega be nasikoed. We-mani-e-wilubde gramo-ambe (10) aidikued.’ ”
LEV 27:26 Bab-Jehová, Moisésʼga sogdebalid: “Israel-dulemarga be sogo: ‘Ar ibdurgan-gebe-gwalulemaladdi, gusgu bato Bab-Jehováʼga uklegaledsoggu, gege be Bab-Jehováʼga uked, ar bato egadid. Ar moli-bebe-nikaddibe, sibad-wawaaddibe, wemarde bato Bab-Jehováʼgadid.
LEV 27:27 Ar ibdurgan swilidiksulile, e-ibed we-ibdurgan-onobiele, mani-nug-nagusadba bennukoed, degine, a-ukinbali, a-mani-atargi-gwensak napi bennukbaloed. We-ibdurgan-onosulirdi, e-mani-nug-nagusadba dule-baidga manigi uklegoed.’ ”
LEV 27:28 Bab-Jehová, Moisésʼga sogdebalid: “Israel-dulemarga be sogo: ‘Dule-gwensak Bab-Jehováʼga ibmar-ilagwen-ukar-imaksale, gege bar manigi uked, gwen onogosurbalid: Duledibe, ibdurgandibe, nainu-e-dad-ega-uksaddibe, manigi ukosulid, gwen onogosurbalid. Bela Bab-Jehováʼga-ibmar-uklesadi, nue-islidikidga gunonikoed.
LEV 27:29 Dule-wargwen-oburgwilegega ukabsalesgudiidi, manigi onolegosulid. We-dule, oburgwilegergebed.’ ”
LEV 27:30 Bab-Jehová, Moisésʼga sogdebalid: “Israel-dulemarga be sogo: ‘Nainugi-ibmar-sanmakmalad, ibmar-gwag sanmakoeddibe, sapimar-sanmakoed-e-sanmardibe, bela wemala ambegi-gwensakad (10%) Bab-Jehováʼgadid. Wemala bela Bab-Jehováʼga nugsalegaledid.
LEV 27:31 Dule-wargwen we-ibmar-ambegi-gwensakad (10%) wis ebubiele, ega mani-nug-nagusadba bennukoed, degine, a-ukinbali, a-mani-atargi-gwensak napi bennukbaloed.
LEV 27:32 ” ’Moli-bebe-nikamalad, igi sibad-wawaadmardibe, bela wemar-merguedba warambegi-gwensak (10%) Bab-Jehováʼgadid, ar ade, Bab-Jehováʼga uklegergebed.
LEV 27:33 We-ibdurganmala be dakosulid, wede nueddibe, ichakwadibe, unnila Bab-Jehováʼga bemar uksa-imakmaloed. Deginbali, we-ibdurganmala ibmar-baidbo be muchub ogwaosurbalid. Be ogwaye sogele, we-ibdurgan, degi, ebo be ogwanaid, warbobela Bab-Jehováʼga islidikidga guoed. We-ibdurgan-warbogwadi be gwen manigi onogosulid, Bab-Jehováʼgadga guoed.’ ”
LEV 27:34 Bab-Jehová we-igarmala Sinaí-yalagi Moisésʼga uksad, adi, Moisés Israel-dulemarga we-igarmar ukmogagar.
NUM 1:1 Israel-dulemar birgabogus gaka nii-warbo-ibagwengusa Egipto-yargi-bukwa ainisgusmaladgine, Bab-Jehová Sinaí-nega-dulesulidganba, dulemarbo-ambikued-neggi, Moisésʼga sunmaksad. Weyob ega sogded:
NUM 1:2 “Bela Israel-dulemar be ebiso, na e-dadgan-e-dadganba, na e-gwenadgan-e-gwenadganba be ebiso. Bela machergan-irba e-nug be meso.
NUM 1:3 Bee be, be-ia-Aarónʼbo, dulemar-ilekwaa na e-sordamar-bukwadba machergan birga-durgwen (20) nikamalad, degi, birga-durgwen-obine (20+) nikamalad, sunna dule-bila-onogedse-namalad be ebiso.
NUM 1:4 Bemar-bendakega bemar-dadgan-warambe-gakabogwad-war-wargwengi, neguyagi-dummadga-gudiid be suoed.”
NUM 1:5 Bab-Jehová Moisésʼga sogdebalid: “We-dulemala, bemar-bendakmaloedid: Rubén-e-wagansik, Sedeur-machi-Elisur.
NUM 1:6 Simeón-e-wagansik, Zurisadai-machi-Selumiel.
NUM 1:7 Judá-e-wagansik, Aminadab-machi-Naasón.
NUM 1:8 Isacar-e-wagansik, Zuar-machi-Natanael.
NUM 1:9 Zabulón, e-wagansik, Helón-machi-Eliab.
NUM 1:10 José-e-masmalasikdi: Efraín-e-wagansik, Amiud-machi-Elisama. Manasés-e-wagansik, Pedasur-machi-Gamaliel.
NUM 1:11 Benjamín-e-wagansik, Gedeoni-machi-Abidán.
NUM 1:12 Dan-e-wagansik, Amisadai-machi-Ahiezer.
NUM 1:13 Aser-e-wagansik, Ocrán-machi-Pagiel.
NUM 1:14 Gad-e-wagansik, Deuel-machi-Eliasaf.
NUM 1:15 Neftalí-e-wagansik, Enán-machi-Ahira.”
NUM 1:16 Wemala, dule-dummagan-nuga-nikamalad Israel-dulemar-dadgan-warambe-gakabogwad-abargi (12) onugsalesmalad-dake. Wemala, Israel-dulemar-idumaladga nugsalesmaladid.
NUM 1:17 Degisoggu, Moisés, degi, Aarón, we-dulemar-nugsalesmaladse e-nugba ese gochasunnad.
NUM 1:18 Nii-warbogwad gebe-iba-onodedgi, Moisés bela dulemar-danar urbisad. Geb degine, machergan na e-dadgan-e-dadganba, na e-gwenadgan-e-gwenadganba bela e-nugmar mesisad. Bela machergan birga-dulagwen-nikad (20), degine, birga-dulagwen-obine-nikamaladi (20+), e-nugmar narmaklesad.
NUM 1:19 Ar Bab-Jehová igi Moisésʼga-sogsagusa, deyob, Moisés Sinaí-nega-dulesulidganba dulemar-ebichisad.
NUM 1:20 Rubén, Israel-e-machi-sailagined, a-e-wagan, na e-dadgan-e-dadganba, degine, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:21 Rubén-wagan, mili-dulabo-gakanergwa gaka dulataled-ilatar-mergu (46,500) dakleardo.
NUM 1:22 Simeón-wagan, na-e-dadgan-e-dadganba, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:23 Simeón-wagan, mili-dulabo-gakambe-gakabakebak gaka dulataled-ilapaa-mergu (59,300) dakleardo.
NUM 1:24 Gad-wagan, na e-dadgan-e-dadganba, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:25 Gad-wagan, mili-dulabo-gakatar gaka dulataled-ilanergwa gaka dulabo-gakambe-mergu (45,650) dakleardo.
NUM 1:26 Judá-wagan, na e-dadgan-e-dadganba, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:27 Judá-wagan, mili-dulapaa-gakambe-gakabake gaka dulataled-ilanergwa-mergu (74,600) dakleardo.
NUM 1:28 Isacar-wagan, na e-dadgan-e-dadganba, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:29 Isacar-wagan, mili-dulabo-gakambe-gakabake gaka dulataled-ilabake-mergu (54,400) dakleardo.
NUM 1:30 Zabulón-wagan, na e-dadgan-e-dadganba, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:31 Zabulón-wagan, mili-dulabo-gakambe-gakagugle gaka dulataled-ilabake-mergu (57,400) dakleardo.
NUM 1:32 José-masmaladi, Efraín-wagansik, na e-dadgan-e-dadganba, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:33 Efraín-wagan, mili-dulabo gaka dulataled-ilatar-mergu (40,500) dakleardo.
NUM 1:34 Manasés-wagansikdi, na e-dadgan-e-dadganba, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:35 Manasés-wagan, mili-dulagwen-gakambe-gakabo gaka dulataled-ilabo-mergu (32,200), dakleardo.
NUM 1:36 Benjamín-wagan, na e-dadgan-e-dadganba, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:37 Benjamín-wagan, mili-dulagwen-gakambe-gakatar gaka dulataled-ilabake-mergu (35,400), dakleardo.
NUM 1:38 Dan-wagan, na e-dadgan-e-dadganba, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:39 Dan-wagan, mili-dulapaa-gakabo gaka dulataled-ilagugle-mergu (62,700) dakleardo.
NUM 1:40 Aser-e-wagan, na e-dadgan-e-dadganba, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:41 Aser-wagan, mili-dulabo-gakagwensak gaka dulataled-ilatar-mergu (41,500) dakleardo.
NUM 1:42 Neftalí-wagan, na e-dadgan-e-dadganba, na e-gwenadgan-e-gwenadganba, na wala-walagwen, bela machergan birga-durgwen-nikad (20), degine, birga-durgwen-obine-nikamaladi (20+), sunna dule-bila-onogedse-namalad-e-nugmar mesilesad.
NUM 1:43 Neftalí-wagan, mili-dulabo-gakambe-gakapaa gaka dulataled-ilabake-mergu (53,400) dakleardo.
NUM 1:44 Moisés, Aarón, degi, Israel-dummagan-na-e-dadgangi-war-wargwen-sulearmalad, we-dulemar-ebichismalad.
NUM 1:45 Bela Israel-dulemar birga-durgwen-nikad (20), degine, birga-durgwen-obine-nikamalad (20+), sunna dule-bila-onogedse-namalad-e-nugmar, na e-gwenadgan-e-gwenadganba bela mesilesad.
NUM 1:46 Bela Israel-dulemar-e-nug, mili-dulataled-ilanergwa-gakapaa gaka dulataled-ilatar gaka dulabo-gakambe-mergu (603,550) mesilesad.
NUM 1:47 Leví-wagandi, na e-gwenadgan-e-gwenadganba, amardi Israel-dulemar-baiganba ebislessurmalad.
NUM 1:48 Ar ade, Bab-Jehová Moisésʼga sogsagusad:
NUM 1:49 “Unnila Leví-waganbi Israel-dulemar-abargi be ebisosulid.
NUM 1:50 Be, Levita-dulemar Dulemar-Anbo-Igar-Mesisad-E-Neg-dakega be imakoed. Degine, a-neggi-ibmar-ebulemalad, degi, bela a-negga-ibmar-ebulemalad-dakega, be imakbaloed. Levita-dulemala, anse-goled-neg-sunna-seleged, degine, bela e-ibmarmar-agi-ebulemalad semaloed. Degine, Levita-dulemarbi agi arbamaloed. Degine, a-neg-dikar-ebilis megmaloed. A-ular, Leví-e-wagan be ebisosulid.”
NUM 1:51 Bab-Dummad Moisésʼga sogdebalid: “Anse-goled-neg-sunna-seleged seledsokalile, Levita-dulemar a-neg earoed. A-neg gannar osisokarmalale, Levita-dulemar osimarbaloed. Dule-baid, Levita-dulesulid a-negse warmaksale, oburgwilegoed.
NUM 1:52 Israel-dulemar na danar-danar, degine, na e-bander-e-bander-urba ambikumaloed. E-sordamar-bila-onomalad-ilemakar ega soglesadba ambikumaloed.
NUM 1:53 Levita-dulemardi, Dulemar-Anbo-Igar-Mesisad-E-Neg-dikar-ebilis ambikumaloed, adi, melle an-urwed Israel-dulemargi yolegegar. Levitaʼmar, Dulemar-Anbo-Igar-Mesisad-E-Neg edarboed.”
NUM 1:54 Israel-dulemala bela Bab-Jehová-Moisésʼga-ibmar-sogsadba imaksamalad. Ar deyob bela imaksamardo.
NUM 2:1 Bab-Jehová Moisésʼga, degi, Aarónʼga sunmakded, amarga sogded:
NUM 2:2 “Israel-dulemala dulemar-anbo-ambikued-neg-ebilis ambikumaloed, na egad-egad, e-dadgan-e-dadgan-e-bander-urba bukwa gumaloed.
NUM 2:3 ”Wemala, dulemar-anbo-ambikued-neg-siid-dad-nakwedsik ambikumaloed: Gebedgi, Judá-wagan, na e-bander-urba e-sordamarba ambikumaloed. Judá-wagan-e-dummad Naasónʼye nugad. Naasónʼde Aminadab-e-machid.
NUM 2:4 E-sordamar ebislesmaladba, mili-dulapaa-gakambe-gakabake gaka dulataled-ilanergwa (74,600) mergued.
NUM 2:5 ”Judá-wagan-dikarba, Isacar-wagan ambikuoed. Isacar-wagan-e-dummad Natanaelʼye nugad. Natanaelʼde Zuar-e-machid.
NUM 2:6 E-sordamar ebislesmaladba, mili-dulabo-gakambe-gakabake gaka dulataled-ilabake (54,400) mergued.
NUM 2:7 ”Baid-dikarsik Zabulón-wagan ambikumarmogoed. Zabulón-wagan-e-dummad Eliabʼye nugad. Eliabʼde Helón-e-machid.
NUM 2:8 E-sordamar ebislesmaladba, mili-dulabo-gakambe-gakagugle gaka dulataled-ilabake (57,400) mergued.
NUM 2:9 ”Bela Judá-wagan-bukwamaladgi, sordamar-sogapaa-ebislesmaladba, bular mili-dulabakebak-gakanergwa gaka dulataled-ilabake (186,400) mergued. Judá-wagan, na e-sordamar-nanadapmalad idunadapi gumaloed.
NUM 2:10 ”Rubén-wagan, na-e-bander-urba, e-sordamarba dulemar-anbo-ambikued-neg-siid-dad-nakwed-argan-nuedsik ambikumaloed. Rubén-wagan-e-dummad Elisurʼye nugad. Elisurʼde Sedeur-e-machid.
NUM 2:11 E-sordamar ebislesmaladba, mili-dulabo-gakanergwa gaka dulataled-ilatar (46,500) mergued.
NUM 2:12 ”Rubén-wagan-dikarba, Simeón-wagan ambikuoed. Simeón-wagan-e-dummad Selumielʼye nugad. Selumielʼde Zurisadai-e-machid.
NUM 2:13 E-sordamar ebislesmaladba, mili-dulabo-gakambe-gakabakebak gaka dulataled-ilapaa (59,300) mergued.
NUM 2:14 ”Baid-dikarsik Gad-wagan ambikumarmogoed. Gad-wagan-e-dummad Eliasafʼye nugad. Eliasafʼde Reuel-e-machid.
NUM 2:15 E-sordamar ebislesmaladba, mili-dulabo-gakatar gaka dulataled-ilanergwa gaka dulabo-gakambe (45,650) mergued.
NUM 2:16 ”Bela Rubén-wagan-bukwamaladgi, sordamar-sogapaa-ebislesmaladba, bular mili-dulagugle-gakambe-gakagwensak gaka dulataled-ilabake gaka dulabo-gakambe (151,450) mergued. Rubén-wagan, Judá-sordamar-sorba, na e-sordamar-nanaimaladba nadapi gumaloed.
NUM 2:17 ”Geb degine, a-sorbali, Levita-dulemar, dulemar-anbo-ambikued-neg semai gumaloed. We-negde, Israel-dulemar-negabargi siidaed. Ar igi Levita-dulemar na bukwa-daniki, deyob na e-bander-e-bander senadapi gumaloed.
NUM 2:18 Efraín-wagan e-bander-urba, dulemar-anbo-ambikued-neg-siid-dad-argwanedsik ambikumaloed. Efraín-wagan-e-dummad Elisamaʼye nugad. Elisamaʼde Amiud-e-machid.
NUM 2:19 E-sordamar ebislesmaladba, mili-dulabo gaka dulataled-ilatar (40,500) mergued.
NUM 2:20 ”Efraín-wagan-dikarba, Manasés-wagan ambikuoed. Manasés-wagan-e-dummad Gamalielʼye nugad. Gamalielʼde Pedasur-e-machid.
NUM 2:21 E-sordamar ebislesmaladba, mili-dulagwen-gakambe-gakabo gaka dulataled-ilabo (32,200) mergued.
NUM 2:22 ”Baid-dikarsik Benjamín-wagan ambikumarmogoed. Benjamín-wagan-e-dummad Abidánʼye nugad. Abidánʼde Gedeoni-e-machid.
NUM 2:23 E-sordamar ebislesmaladba, mili-dulagwen-gakambe-gakatar gaka dulataled-ilabake (35,400) mergued.
NUM 2:24 ”Bela Efraín-wagan-bukwamaladgi, sordamar-sogapaa-ebislesmaladba, bular mili-dulatar-gakabaabak gaka dulataled (108,100) mergued. Efraín-wagan, na e-sordamar-nanaimaladba danakwaa-nadapmalad-sogapaagi nadapi gumaloed.
NUM 2:25 ”Dan-wagan e-bander-urba, dulemar-anbo-ambikued-neg-siid-dad-nakwed-argan-sapiledsik ambikuoed. Dan-wagan-e-dummad Ahiezerʼye nugad. Ahiezerʼde Amisadai-e-machid.
NUM 2:26 E-sordamar ebislesmaladba, mili-dulapaa-gakabo gaka dulataled-ilagugle (62,700) mergued.
NUM 2:27 ”Dan-wagan-dikarba, Aser-wagan ambikuoed. Aser-wagan-e-dummad Pagielʼye nugad. Pagielʼde Ocrán-e-machid.
NUM 2:28 E-sordamar ebislesmaladba, mili-dulabo-gakagwensak gaka dulataled-ilatar (41,500) mergued.
NUM 2:29 ”Degine, baid-dikarsik Neftalí-wagan ambikumarmogoed. Neftalí-wagan-e-dummad Ahiraʼye nugad. Ahiraʼde Enán-e-machid.
NUM 2:30 E-sordamar ebislesmaladba, mili-dulabo-gakambe-gakapaa gaka dulataled-ilabake (53,400) mergued.
NUM 2:31 ”Bela Dan-wagan-bukwamaladgi, sordamar-sogapaa-ebislesmaladba, bular mili-dulagugle-gakambe-gakagugle gaka dulataled-ilanergwa (157,600) mergued. Dan-wagan, napi-solaba na e-bander senadapi gumaloed.”
NUM 2:32 Wemala, Israel-dulemar na e-gwenad-e-gwenadganba ebislesmaladid. Bela danar-danar-bukwamaladgi, na e-sorda-e-sordamar-ebislesmaladba, mili-dulataled-ilanergwa-gakapaa gaka dulataled-ilatar gaka dulabo-gakambe (603,550), bela mergued.
NUM 2:33 Ar igi Bab-Jehová Moisésʼga igar-uksadba, Leví-wagandi we-Israel-dulemarba ebislessurmalad.
NUM 2:34 Israel-dulemala bela Bab-Jehová-Moisésʼga-igar-uksadba imaksamalad. Bela na e-bander-e-bander-urba ambikusmalad, degine, na e-dadgan-e-dadganba, na e-gwenad-e-gwenadganba nadapi gusmalad.
NUM 3:1 Deun, Bab-Jehová Sinaí-yargi Moisésʼga sunmaksagusgu, weyobi, Aarón-wagan, degi, Moisés-wagan gardagi-narmaklegar mesilesad.
NUM 3:2 Weyobi, Aarón-masmala nugmalad: Nadab, Abiú, Eleazar, Itamar. Nadabʼde, e-machi-sailaginedid.
NUM 3:3 We-Aarón-masmala, dule-irwa-Bab-Dummadse-gormaladga sulesmalad. Wemarde, Bab-Dummadse-dule-irwa-goledga-gumalaga nug-imaklesmalad.
NUM 3:4 Sinaí-nega-dulesulidganba Nadab, degi, Abiúʼbo, igar-maisulidba Bab-Jehováʼga ibmar-ogumakar uksamalad. A-ular, amar Bab-Jehová-asabin burgwismarsunnad. Wemar-warbogwad mimmi-nikussurmalad. Unnila, Eleazar, degi, Itamar, wemarbi e-bab-Aarón-asabin dule-irwa-Bab-Dummadse-goledga arbananai gusmalad.
NUM 3:5 Bab-Jehová Moisésʼga sunmakded, ega sogded:
NUM 3:6 “Leví-wagan, dule-irwa-anse-goled-Aarón-asabin be sedage. We-Leví-waganmar, Aarón-ibmar-imakedgi Aarón-bendakmaloed.
NUM 3:7 Amala, dulemar-anbo-ambikued-neggi Aarónʼga, degi, bela Israel-dulemarga arbananai gumaloed.
NUM 3:8 We-Leví-wagan dulemar-anbo-ambikued-neggi bela ibmarmar-ebulemalad akwemaloed. Degine, anse-goled-neg-sunna-selegedgi Israel-dulemar-ular ibmar imakoed.
NUM 3:9 We-Leví-wagan, Aarón, degi, e-masmala-bendakega be imakoed. Wemala, Israel-dulemar-abargine bachikii sulesmalad, anga arbaegar.
NUM 3:10 Aarón, degi, e-masmaladi, dule-irwa-anse-goledga be imakoed. Ar dule-baid, dule-irwa-anse-goledsulid anse-goled-negse warmakele, oburgwilegoed.”
NUM 3:11 Bab-Jehová Moisésʼga sunmakded, ega sogded:
NUM 3:12 “Ani an Israel-dulemar-abargi Leví-wagan-baigan bela Israel-machi-sailaginmalad-anar an susad. Ar bela machimala-sailaginmalad angadsoggu, Leví-wagan-baigan angadga gusunnodo.
NUM 3:13 Egipto-yalagi bela machi-sailaginmalad an oburgwisgua, ani an Israel-machi-sailaginmalad angadga-guega an susad. Deyob dulemar, degi, ibdurganse-bakale, an imaksad. Ar we-ibdurgan, bela angadid. Ani an Bab-Jehová gued.”
NUM 3:14 Bab-Jehová Sinaí-nega-dulesulidganba, Moisésʼga sunmaksad, ega sogded:
NUM 3:15 “Leví-wagan-baigan na e-dadgan-e-dadganba, degi, na e-gwenad-e-gwenadganba be ebiso. Bela-machergan be ebisoed, susmar-nii-wargwen-nikamaladse-bakar, be ebisoed.”
NUM 3:16 Moisés, Bab-Jehová-ega-igar-uksadba, bela Leví-wagan-baigan ebichisad.
NUM 3:17 Leví-masmala, wemalad: Gersón, Coat, degi, Merari.
NUM 3:18 Gersón-masmaladi, wemarmogad: Libni, Simei.
NUM 3:19 Coat-masmaladi, wemarmogad: Amram, Izhar, Hebrón, degi, Uziel.
NUM 3:20 Merari-masmaladi, wemarmogad: Mahli, Musi. Leví-wagan-baigan na e-dadgan-e-dadganba weyob gumalad, na e-gwenad-e-gwenadganba ebislesad.
NUM 3:21 Libni-wagan-danaled, degi, Simei-wagan-danaled Gersónʼgi danimalad. Wemala, Gersón-wagan gumardo.
NUM 3:22 We-e-sordamar bela machergan-ebislesmalad, susmala-nii-wargwen-nikamaladse-bakar-ebislesmaladi, miligugle gaka dulataled-ilatar (7,500) mergued.
NUM 3:23 Gersón-wagan dad-argwanedsik Bab-Dummadse-goled-neg-sunna-seleged-yarganba, bukusmalad.
NUM 3:24 Gersón-wagan-e-dummad Eliasafʼye nugad. Eliasafʼde Lael-e-machid.
NUM 3:25 Gersón-wagan we-ibmar-imakmalaga gumalad: Bab-Dummad-dulemarbo-ambikued-neg-dakedga. Ibmar-ukamar Bab-Dummadse-goled-neg e-uasga-gunaid-dakedga. A-yawagak-dogedgi-mor-dummad-naid-dakedga.
NUM 3:26 Mor-dummad bela Bab-Dummadse-goled-neg, degi, ibmar-ogumakar-ukleged-aila-ebirnaid-dakedga. Degine, e-yawagakgi mor-dummad-naid, bela urdubmar-agi-ebulemaladse-bakar-dakedga gumalad.
NUM 3:27 Amram-wagan-danaled, Izhar-wagan-danaled, Hebrón-wagan-danaled, degi, Uziel-wagan-danaled Coatʼgi danimalad. Wemar, Coat-wagan gumalad.
NUM 3:28 We-e-sordamar bela machergan-ebislesmaladi, degi, susmala-nii-wargwen-nikamaladse-bakar-ebislemaladi, milibaabak gaka dulataled-ilanergwa (8,600) mergued. Wemala, Bab-Dummadse-goled-neg-dakmaladga gumalad.
NUM 3:29 Coat-wagan, dad-nakwed-argan-nuedsik Bab-Dummadse-goled-neg-sunna-seleged-dikarba, bukusmalad.
NUM 3:30 Coat-wagan-e-dummad Elizafánʼye nugad. Elizafánʼde Uziel-e-machid.
NUM 3:31 Coat-wagan we-ibmar-imakmalaga gumalad: Bab-Dummad-Israel-Dulemarbo-Igar-Mesisad-Ulu-dakedga. Mese-dakedga. Gwallumar-sied-dakedga. Ibmar-ogumakar-uklemalad-ailamar-dakedga. Bab-Dummadse-goled-neggi-ibmar-ebulemalad-dakedga. Mor-dummagan-dakedga. Degi, bela agi ibmarmar-ebulesiid dakedga gumalad.
NUM 3:32 Leví-wagan-baigan-e-dummad Eleazarʼye nugad Aarón-e-machid. Aarónʼde dule-irwa-Bab-Dummadse-goledid. Eleazarʼde Bab-Dummadse-goled-neg-sunna-seleged-dakmalad-e-dummadid.
NUM 3:33 Mahli-wagan-danaled, degi, Musi-wagan-danaled, Merariʼgi danimalad. Wemar, Merari-wagan gumalad.
NUM 3:34 We-e-sordamar, bela machergan-ebislesmalad, susmar-nii-wargwen-nikamaladse-bakar-ebislesmaladi, milinergwa gaka dulataled-ilabo (6,200) mergued.
NUM 3:35 Merari-wagan, dad-nakwed-argan-sapiledsik Bab-Dummadse-goled-neg-sunna-seleged-dikarba bukusmalad. Merari-wagan-e-dummad Zurielʼye nugad. Zurielʼde, Abihail-e-machid.
NUM 3:36 Merari-wagan we-ibmar-dakmalaga gumalad: Bab-Dummadse-goled-neg-sunna-seleged-e-urgomar-dakmaladga, e-suarmar-dakmaladga, e-buarmar-dakmaladga, e-sigmalad-dakmaladga, bela e-ibmarmar-dakmaladga, degine, bela ibmar-egi-ebulemalad-dakmaladga.
NUM 3:37 Bab-Dummadse-goled-neg-e-galu-bubamar-dakmaladga, e-sigmalad-dakmaladga, e-bargamalad-dakmaladga, e-dubmar-dakmaladga gumalad.
NUM 3:38 Moisés, Aarón, degi, a-e-masmala, Bab-Dummadse-goled-neg-sunna-seleged-asabin mamaigusmalad. A-sogleged, Bab-Dummad-dulemarbo-ambikued-neg-dad-nakwedsik mamaigusmarye. Aarón, degi, e-masmala, Israel-dulemar-nuggine, Bab-Dummadse-goled-neg-sunna-seleged dakega gumalad. Dule-baigan dule-irwa-Babse-goledsulile, Bab-Dummadse-goled-negse warmaksale, oburgwilegoed.
NUM 3:39 Moisés, degi, Aarón, Bab-Jehová-ega-sogsadba, bela Leví-wagan, machergan, degi, bela susmar-nii-wargwen-nikamaladse-bakar, na e-dadgan-e-dadganba ebichismargua, daklealid, mili-dulagwen-gakabo (22,000) mergue.
NUM 3:40 Bab-Jehová Moisésʼga sogded: “Israel-dulemar-e-masmala-sailaginmalad, nii-wargwen-nikamaladse-bakale, bela ebiso, degine, e-nugmar be narmakbalo.
NUM 3:41 ”Geb degine, Israel-masmala-gebesailaginmalad-anar bela Leví-wagan be suo. Geb deginbali, bela Israel-dulemar-e-ibdurgan-gebemalad-anar, Leví-wagan-e-ibdurgan be subalo. Ani an Bab-Jehová gued.”
NUM 3:42 Moisés Bab-Jehová-ega-sogsadba imaksad, bela Israel-masmala-gebesailaginmalad ebichisad.
NUM 3:43 Bela masmala-sailaginmalad-nii-walagwen-nikamaladse-bakar-ebislesadi, a-e-nugmar-mesilesadi, mili-dulagwen-gakabo gaka dulataled-ilabo gaka dulapaa-gakambe-gakapaa (22,273) mergu daklealid.
NUM 3:44 Geb degine, Bab-Jehová Moisésʼga sunmakded, ega sogded:
NUM 3:45 “Bela Israel-masmala-gebesailagined-anar, Leví-wagan be suo. Degine, Israel-dulemar-e-molimar-anar, Leví-wagan-e-molimar be subalo. Leví-wagan angadga guoed. Ani an Bab-Jehová gued.
NUM 3:46 ”Ar Israel-dulemar-e-masmala-gebesailaginmalad, Leví-wagangi dulataled-ilabo gaka dulapaa-gakambe-gakapaa (273) egi-obinedba, Israel-masmala burgoenad. Amar-onogega,
NUM 3:47 dule-war-wargwengi mani-sibu-gwaatar be suo. A-mani Bab-Dummadse-goled-neggi-aidikuedba be suo. We-manide, gera-dulagwen (20) aidikued.
NUM 3:48 We-manimala, bela Aarónʼga, degi, e-masmalaga be uko. We-manide Israel-masmala-gebesailaginmalad-onolesad-e-manid.”
NUM 3:49 Moisésʼde Israel-masmala-gebesailaginmalad, Leví-wagan-obinedba manigi-onolesadi susad.
NUM 3:50 Moisés we-mani abingasad, mani-sibu-miligwen gaka dulataled-ilapaa gaka-dulapaa-gakatar (1,365) aidikued. Bab-Dummadse-goled-neggi-mani-oaidikuedba we-mani oaidikusmalad.
NUM 3:51 A-sorbali, Moisés, we-dule-onolesmalad-mani Aarónʼga, degi, a-e-masmalaga uksad. Moisés, ar Bab-Jehová-ega-sogsadba imaksad.
NUM 4:1 Bab-Jehová Moisésʼga, degi, Aarónʼga sunmakded, ega sogded:
NUM 4:2 “Leví-wagan-abargi, Coat-wagan na e-dadgan-e-dadganba, na e-gwenad-e-gwenadganba, be ebiso.
NUM 4:3 Bela machergan birga-durgwen-gakambe-nikamalad (30), degi, birga-durbo-gakambe-nikamaladse (50), dulemar-anbo-ambikued-neggi sunna-arbamaloed, be ebiso.
NUM 4:4 ”Coat-wagan dulemar-anbo-ambikued-neggi, ibmarmar-ise-islidikid akwega be imakoed:
NUM 4:5 Bemar danar-danar-bukwamaladgi baid-negse-naesokarmalale, Aarón, degi, e-masmala nonimaloed, anse-goled-negse dogmaloed, mor-dummagan Nega-Ise-Islidikid-idu-nanaid weemaloed. A-morgi, Dulemar-Anbo-Igar-Mesisad-Ulu anwoed.
NUM 4:6 A-birgine, ibdurgan-uka-nuegan oginmaloed. Geb agi, Aarón, degi, e-masmala, a-uka-birgi mor-aradbiid oginmarbaloed. Geb degine, Ulu-sedmalaga egi e-suarmar yomaloed.
NUM 4:7 ”Madu-anga-ukleged-mese-birgi mor-arad oginmaloed. Geb agi, batemar, wesarmar, nogmar, degi, bormo-dukwa-ibmar-eogega-ebuleged urbemaloed. Madude a-mesegi bukwagu guoed.
NUM 4:8 A-ibmarmar-birgine, mor-ginnid oginmaloed. Geb birgine, ibdurgan-uka-nuegan oginmarbaloed. Geb a-sorbali, mese-sedmalaga egi e-suarmar yomaloed.
NUM 4:9 ”Geb degine, Aarón, degi, e-masmala mor-arad sumaloed. A-mor-aradgi gwallumar-sied anwemaloed, degi, e-gwallumar, gwallu-gwillodub-sikmalad-e-disla, e-bate-burwigana, degine, bela olivo-gwallu-simalad-e-nogmar agi anwemarbaloed.
NUM 4:10 Geb degine, gwallumar-sied, degi, bela egi-ibmar-ebulemaladi, ibdurgan-uka-nuegangi anwemaloed. Geb degi, nabir-sedmalaga suar-wargwengi be nasikoed.
NUM 4:11 ”Ibmar-ogumakar-ukleged-aila-olobiidi mor-aradgi anwemaloed, geb, ibdurgan-uka-nuegan e-birgi anwebaloed. Geb degine, nabir-sedmalaga e-suarmar egi yomarbaloed.
NUM 4:12 ”Aarón, degi, e-masmala, bela ibmar-anse-goled-neggi-ebulemalad weemaloed. Geb mor-aradgi anwemaloed, degi, ibdurgan-uka-nuegangi anwemarbaloed. Geb degine, nabir-sedmalaga suar-wargwengi be nasikoed.
NUM 4:13 ”Ibmar-ogumakar-ukleged-ailagi buru-bukwad weemaloed. Geb a-aila mor-suir-akwagiidgi anwemarbaloed.
NUM 4:14 A-aila-birgi, bela e-ibmar-ebulemalad urbemarbaloed: Buru-weemalad, iko-san-obin-obin-imakmalad, sianarmar, degi, nog-dummagan. A-ibmarmar-birgine, ibdurgan-uka-nuegan oginmaloed, degine, nabir-sedmalaga suarmargi nasikmaloed.
NUM 4:15 ”Aarón, degi, e-masmala, bela anse-goled-neggi, degi, anse-goled-neggi-ibmar-ebulemalad-bukwad bela morgi anwisale, geb agi Israel-dulemar naega guakwagusale, Coat-wagan nonimaloed, a-ibmarmar sedmalagar. Degi-inigwele, ibmar-angadga-gusadi na e-argangi ebugosurmalad. Ar ebusmalale, burgwemaloed. Bela we-ibmarmar dulemarbo-an-ambikued-neggi-bukwadi, Coat-wagan sedmaloed.
NUM 4:16 ”Eleazarʼdi, dule-irwa-anse-goled Aarónʼye-nugad-e-machid. We-Eleazarʼde gwalluga gwalludii-baloedid, degi, ina-wawadikmalad, ibmar-gwag-gusgu-ukleged, degine, olivo-gwallu-ibmarmargi-eolegega-ebuleged dakoedid. Deginbali, Eleazar bela anse-goled-neg, degine, agi bela-ibmarmar-bukwad dakbaloed. Deginbali, bela agi-ibmarmar-ebulesimalad dakbaloed.”
NUM 4:17 Bab-Jehová Moisésʼga, degi, Aarónʼga sunmakdebalid, ega sogdebalid:
NUM 4:18 “Leví-wagan-abargi, melle Coat-wagan-obelogega be imako.
NUM 4:19 Coat-wagan ibmar-anga-nugsalesmaladse nonisogele, dula-gudigumalagala, melle burgwemalaga, weyob be imako. ”Aarón, degi, e-masmala Coat-waganga sogoed, ibu-ibmar imakmaloe, degi, ega sogbaloed, ibu-ibmarmar sedmarbaloe.
NUM 4:20 ”Aarón, degi, e-masmala ibmar-anga-nugsalesmalad anwelenaile, Coat-wagan dogosurmalad, degine, bipisaale dakosurmarbalid. Ar dogmalale, burgwemaloed.”
NUM 4:21 Bab-Jehová Moisésʼga sunmakdebalid, ega sogdebalid:
NUM 4:22 “Gersón-wagan, e-dadgan-e-dadganba, na e-gwenad-e-gwenadganba be ebiso.
NUM 4:23 Bela machergan birga-dulagwen-gakambe-nikamalad (30), degi, birga-dulabo-gakambe-nikamaladse (50), dulemar-anbo-ambikued-neggi sunna-arbamaloed be ebiso.
NUM 4:24 Gersón-wagana we-ibmarmar-seedgi arbamaloed:
NUM 4:25 Anse-goled-neg-sunna-seleged, a-e-mor-dummagan, Dulemar-anbo-ambikued-neg-e-mormar-anwemalad, ibdurgan-uka-nuegan-a-neggi-akinnarmamaid, dulemar-anbo-ambikued-neg-yawagakgi mor-dummad-naid,
NUM 4:26 mor-dummagan-bela-neg-imba-ebirnanaid sedmarbaloed. Degi, ibmar-ogumakar-ukleged-ailase mor-dummagan warmaknaid, degine, anse-goled-neg-yawagakgi mor-dummagan-warmaknanaibalid sedmarbaloed. Geb a-e-dubmar, degi, bela agi-ibmarmar-ebulemalad sedmarbaloed.
NUM 4:27 ”Gersón-wagan bela na e-arbamaladgi, na ibmar semamaidgindibe, anse-goled-neggi arbananaidgindibe, bela Aarón, degi, e-masmala-sogedba ibmar imakmaloed. Gersón-waganga be sogoed, we-ibmarmar sedsokarmalale, nue salakarmaloye.
NUM 4:28 Gersón-wagan dulemar-anbo-ambikued-neggi weyob ibmar imakmaloed. Amarde, Itamar-ibmar-sogedba arbanai gumaloed. We-Itamarʼde, Aarón-e-machid. Aarónʼdi, dule-irwa-anse-goledid.”
NUM 4:29 Bab-Jehová Moisésʼga sogdebalid: “Merari-wagan, e-dadgan-e-dadganba, na e-gwenad-e-gwenadganba, be ebiso.
NUM 4:30 Bela machergan birga-dulagwen-gakambe-nikamalad (30), degi, birga-dulabo-gakambe-nikamaladse (50), sunna dulemar-anbo-ambikued-neggi arbamaloed be ebisoed.
NUM 4:31 We-dulemar dulemar-anbo-ambikued-neggi urgomar-ebulesad sedmaloed. A-urgomardina, wemalad: E-suarmar, e-buarmar, e-sigmalad,
NUM 4:32 galu-ebirar buarwar-gwigwichid, e-sigmalad, e-bargamalad, e-dubmar, degi, bela e-ibmar-abelemalad sedmarbaloed. ”Dule-war-wargwenga be sogoed, ibu-ibmarmar sedmaloe.
NUM 4:33 We-arbaedi Merari-wagan, na e-dadgan-e-dadganba, degisadegu na e-arbaedgi dulemar-anbo-ambikued-neggi arbamaloed. Itamar-ega-igar-ukedba arbamaloed. We-Itamarʼde Aarón-e-machid. Aarónʼdi, dule-irwa-anse-goledid.”
NUM 4:34 Moisés, Aarón, degi, Israel-dulemar-danar-danar-bukwamalad-e-dummaganmala, Coat-wagan, na e-dadgan-e-dadganba, na e-gwenad-e-gwenadganba ebichismarsunnad.
NUM 4:35 Bela machergan birga-durgwen-gakambe-nikamalad (30), degi, birga-durbo-gakambe-nikamaladse (50) bela sunna Bab-Dummad-dulemarbo-ambikued-neggi-arbamaloed ebichilesad.
NUM 4:36 Weyob Coat-wagan na e-dadgan-e-dadganba ebislesmargu, milibo gaka dulataled-ilagugle gaka dulabo-gakambe (2,750) mergu daklealid.
NUM 4:37 Weyob bela Coat-wagan e-dadgan-e-dadganba ebislesmalad. A-dulemarde bela sunna Bab-Dummad-dulemarbo-ambikued-neggi arbamaloed. Weyob Moisés, degi, Aarón, Coat-wagan ebichismalad. Bab-Jehová-Moisésʼga-igar-uksadba imaksamalad.
NUM 4:38 Moisés, Aarón, degi, Israel-dulemar-danar-danar-bukmalad-e-dummaganmala, Gersón-wagan e-dadgan-e-dadganba, na e-gwenad-e-gwenadganba ebichismarmogad.
NUM 4:39 Bela machergan birga-durgwen-gakambe-nikamalad (30), degi, birga-dulabo-gakambe-nikamaladse (50), sunna Bab-Dummad-dulemarbo-ambikued-neggi arbanonimaloed ebichilesad.
NUM 4:40 Weyob Gersón-wagan e-dadgan-e-dadganba, degine, na e-gwenad-e-gwenadganba ebislesmargu, milibo gaka dulataled-ilanergwa gaka dulagwen-gakambe (2,630) mergu daklealid.
NUM 4:41 Weyob bela Gersón-wagan, e-dadgan-e-dadganba, ebislesmalad. A-dulemarde bela sunna Bab-Dummad-dulemarbo-ambikued-neggi arbamaloed. Weyob Moisés, degi, Aarón, Gersón-wagan-ebichismalad. Bab-Jehová-Moisésʼga-igar-uksadba imaksamalad.
NUM 4:42 Moisés, Aarón, degi, Israel-dulemar-danar-danar-bukwamalad-e-dummaganmala, Merari-wagan, na e-dadgan-e-dadganba, na e-gwenad-e-gwenadganba ebichismarmogad.
NUM 4:43 Bela machergan birga-durgwen-gakambe-nikamalad (30), degi, birga-dulabo-gakambe-nikamaladse (50) sunna Bab-Dummad-dulemarbo-ambikued-neggi arbanonimaloed ebichilesad.
NUM 4:44 Weyob Merari-wagan na e-dadgan-e-dadganba ebislesmargu, milipaa gaka dulataled-ilabo (3,200) mergu daklealid.
NUM 4:45 Weyobi Moisés, degi, Aarón, bela Merari-wagan, na e-dadgan-e-dadganba-mergue ebichismalad. Amar Bab-Jehová-Moisésʼga-igar-uksadba imaksamalad.
NUM 4:46 Moisés, Aarón, degi, Israel-girmar-dummagan bela Leví-wagan na e-dadgan-e-dadganba, na e-gwenad-e-gwenadganba ebichismaladi,
NUM 4:47 machergan birga-durgwen-gakambe-nikamalad (30), degi, birga-durbo-gakambe-nikamaladse (50) sunna Bab-Dummad-dulemarbo-ambikued-neggi arbanonimaloedi, degine, sunna we-negsemaloedi,
NUM 4:48 bela we-dulemar milibaabak gaka dulataled-ilatar gaka dulabake (8,580) mergu daklealid.
NUM 4:49 Moisés, Bab-Jehová-igi-ega-igar-uksadba, dulemarga ibmar-imaked-igar uksad, degine, ibmar-sedmaloed-igar uksabalid. Moisés, Bab-Jehová-ega-igar-uklesadba, weyob dulemar-ebichisad.
NUM 5:1 Bab-Jehová Moisésʼga sunmakded, ega sogded:
NUM 5:2 “Israel-dulemarga be soge: ‘Bemar-danar-danar-bukwadgi bela Israel-dulemar ukagi-boni-yaa-akar-akar-nikamalad be onomalo. Dule-na-e-burba-daksamalad, degi, dule-burgwisad-ebusmalad, be onomarbalo. Ar ade, dule-burgwisad-ebussoggu, swilidiksuli gunonikid.
NUM 5:3 Bemar-bukwadgi dule-boni-nikamalad, omedibe, igi, machereddibe, be onomaloed. Adi, wemar melle bemar-bukwadgi an-bemar-abargi-maid-neg oichogegar.’ ”
NUM 5:4 Israel-dulemala Bab-Jehová-Moisésʼga-sogsadyobi imaksamalad: Dulemar-boni-nikamalad emar-bukwadgi onosmalad.
NUM 5:5 Bab-Jehová Moisésʼga sunmakdebalid, ega sogded:
NUM 5:6 “Israel-dulemarga be soge: ‘Dule-machereddibe, igi, omedibe, dule-baid-ibe-ibmar-oakalosale, we-dule angi nue dummad-nosdo. Degisoggu, nue-odurdakleged ega igar mego.
NUM 5:7 We-dulede e-isgusad na dukin barsogo. Degine, dule-baidgi-nosad-ular, ibmar-oakalosawilub ega ibmar-uko. A-ukine, ibmar-atargi gwensak napi ega ukbalo.
NUM 5:8 Ar dule-naibi-gusad bato burgwisale e-gwenad-walikagwad-satele, ega-ibmar-uklegoenad anga uklego, degi, dule-irwa-anse-goledga uklemogo. Deginbali, dule-aimar-naibisasadi, e-isgusad-ular, sibad-wawaad-machered-ukbalo, adi, dule-irwa-anse-goled we-ibmar anga ogumakar ukegar.
NUM 5:9 ” ’Israel-dulemar bela-ibmarmar-dule-irwa-anse-goledse-sedmaloedi, dule-irwa-anse-goledgadga guo.
NUM 5:10 Ar dule anga ibmar-uksardi, we-ibmar na egadga guo. Ar dule-irwa-anse-goledga uksardi, adi, we-ibmar we-dule-irwa-anse-goledgadga guo.’ ”
NUM 5:11 Bab-Jehová Moisésʼga sogdebalid:
NUM 5:12 “Israel-dulemarga be sunmak, ega be soge: ‘Binsa sogmalo, ome-gwensak abirgunagwar-gudiid-igargi yoledsunnad,
NUM 5:13 we-ome e-sui-dikarba dukuar machered-baidbo negsichigi yoledsunnad, degi, bipisaale a-ome negsichigi-yolenai daklessulid.
NUM 5:14 ” ’Degi-inigwele, e-sui e-omegi nue-nobe-itogele, degi, egi dodosye binsaele, igi amba e-ome egi nossurdibe,
NUM 5:15 e-sui dule-irwa-anse-goledse e-ome-sedoed. Agi, madubur-cebadaʼye-nugad, nibiratar e-omegi nobed-ular anga we-ibmar ukoed. Ar we-ibmar, omegi-nobe-itoged-ular uklenaisoggu, we-ibmar-birgine olivo-gwallu eogosulid, degine, ibmar-wawadikmalad eogosurbalid. Deginbali, we-ibmar-uklesadi, isgusad wisguegalad.
NUM 5:16 ” ’Dule-irwa-anse-goled, an-asabin we-ome ogwisoed.
NUM 5:17 Geb degidgine, dule-irwa-anse-goled dii-nued-ditirmakaled napsa-noggi eogoed. Geb anse-goled-neg-sunna-seleged-e-napa-buru weoed, agine, we-olli dii-ebo oburoed.
NUM 5:18 Geb degi, dule-irwa-anse-goled, we-ome an-asabin ogwisguoed, geb ome-e-sailagia ei esikoed, agine, ome-argangi ome-wisguega-nobedba-ibmar-uklegaledi, sioed. Dule-irwa-anse-goleddi, e-argangine dii-gagbid gani-gwisguoed. We-dii-gagbidye dule-ukabsaed-diid.
NUM 5:19 Geb degidgine, dule-irwa-anse-goled ome ega ise-sogar-imaked saoed. A-omega sogoed: Dule bebo gabissulile, degine, be-suigi be nossulile, degine, egi be dodossulile, we-dii-gagbireged-iwir-dule-imakedgi be ollorguoed.
NUM 5:20 Ar be-suigi be nosardi, egi be dodosardi, machered-baidbo be akar-akar-gusardi, be ukabsalegoed.
NUM 5:21 ” ’Degidgine, dule-irwa-anse-goled we-ome-ukabsaoed, weyob ega sogoed: Bab-Jehová iwiguega be-imaksun, degine, be-dulamar-abargi dulemar sunnasuli-be-dakega be-imaksun. Degine, we-dii-gagbid anagan-nikusuli be-imaksun, deginbali, saban-muega be-imakbarsun.
NUM 5:22 We-dii-dule-iwisaed begi ubodele, be-saban odunguega-imaksun, geg-anagan-nikuega be-imaksun. ” ’Ome, dule-irwa-anse-goled-abin sogdoed: ¡Ar deyob gudo! ¡Ar deyob gudo!
NUM 5:23 ” ’Dule-irwa-anse-goled iwisalesad-soglesad, gardagi narmakoed. Geb degine, a-gardagi-narmakaledi, dii-gagbiregedgi elioed.
NUM 5:24 Geb a-dii-gagbiregedgi ome-ogoboed. Adi, ome nue-dummad-wiledii guegar.
NUM 5:25 ” ’Geb a-sorbali, ome dule-irwa-anse-goledga ibmar-nobedba-uklenaid ukoed. Geb degine, dule-irwa-anse-goled, an-asabin ibmar-orosgi-dakleged-cebadaʼye-nugad bana-bana imakoed. Agine, ibmar-ogumakar-ukleged-ailase sedoed.
NUM 5:26 Degine, dule-irwa-anse-goled argan-nukgwen orosgi-dakleged-cebada suoed. We sogleged, ebinsalegegaye. Geb degi, we-ibmar, ibmar-ogumakar-ukleged-aila-birgi ogumakoed. ” ’Dule-irwa-anse-goledi, we-diigi ome-ogoboed.
NUM 5:27 Ar we-ome, e-suigi nosale, we-dii-dule-iwisaed gobogu, ome-e-saban mudoed, geg-bar-mimmi-bake gudoed. Deyobi, we-ome na e-dulemar-abargi iwilesgudii gusunnoed.
NUM 5:28 Ar we-ome e-suigi nossulile, galagwensuli-gussulile, adi, iwiguosulid, degisoggu, akar-guosulid sunna mimmi-bake guoed.
NUM 5:29 ” ’Ome e-sui-dikarba nosa-sogele, e-suigi dodosale, weyobi nobgued-igar ega mai guoed.
NUM 5:30 Machered nue e-omegi nobe-itoalile, an-asabin e-ome-sedoed. Geb degine, dule-irwa-anse-goled we-igar-maidba ega imakoed.
NUM 5:31 Ome na e-isgusadba sabsur-odurdaklegodo, machereddi nosdeeye egi soglegosulid.’ ”
NUM 6:1 Bab-Jehová Moisésʼga sunmakded, ega sogded:
NUM 6:2 “Israel-dulemarga be sunmak, ega be soge: ‘Machered-gwensak-sokardibe, igi, ome-gwensak-sokardibe, Bab-Jehováʼgarbi an ibmar-imakdii guega Bab-Jehováʼga bela an-san an na ukoye, we-dule Nazareoʼye soglegoed.
NUM 6:3 Deyob na imakele, vino gobosulid, degi, sisamar gobosurbalid. Deginbali, vinagre-vinoʼgi-danikid, degi, vinagre-sisamargi-danikid, gobosurbalid. Deginbali, uva-nis gobosurbalid, degine, uvaʼmar, degi uva-odinnolegarmalad gunnosurbalid.
NUM 6:4 Dule Nazareoʼga-gudiid-ibagangine, e-ibagan-sogsad-berguedse bipisaale, uva-san, e-gwag, degi, e-ukase-bakale, gunnosulid.
NUM 6:5 ” ’Ar dule na Nazareoʼga-gudiidgine, e-ibagan-sogsad-berguedse sailagia sikosulid. Unnila Bab-Jehováʼgarbi-ibmar-imakdii guoed, degine, e-sailagia suitii imakoed, ar ade, e-sailagia sikosulid. Geb ibagan-bergunonikile, a-sorba, sunna na e-sailagia sikoed.
NUM 6:6 ” ’A-ukinbali, a-dule Bab-Jehováʼga na-san-uksad-ibagangine, dule-burgwaledse warmakosurbalid.
NUM 6:7 Amba e-babdibe, igi, e-nan burgwisdibe, igi, e-urbadibe, igi, e-ia-burgwisdibe, igi, e-bundibe, ase-bakale, ese warmakosulid, ar ade, Bab-Jehováʼgarbi-ibmar-imakdiguega Bab-Jehováʼga na san-uksa gudiid.
NUM 6:8 Dule Bab-Jehováʼga na san-uksad-ibagangine, unnila Bab-Jehováʼgarbi ibmar-imakdii guoed.
NUM 6:9 ” ’Dule-Bab-Jehováʼga-na-san-uksad-walik, dule-wargwen ukiar burgwenonikile, we-dule-Nazareoʼga-gudiid-e-igar-maid oichogoed. Degisoggu, ibagugledgi (7), na san-uruked-e-ibagan-mosale, non-swirii imakoed.
NUM 6:10 Degine, ibabaabakadgi (8) sapur-nuu-gwabo, igi, wagnuu-e-mimmi-gwabodibe, sedagoed. Bab-Dummad-dulemarbo-ambikued-neg-yawagakse, dule-irwa-Bab-Dummadse-goledse sedagoed.
NUM 6:11 ” ’Ar dule-Bab-Jehováʼga-na-san-uksad, dule-burgwisad-ular isgunonisoggu, we-nuu-gwabo-ukoedi, dule-irwa-Bab-Dummadse-goled, we-nuu-gwagwen dule-isgued-osulogega Bab-Dummadga ukoed. Nuu-baiddi, ogumakar Bab-Dummadga ukbaloed. A-ibagangine, gannar na e-sailagia osuguoed, Bab-Dummadga sogegar, gannar an bega an-san ukbarye.
NUM 6:12 Geb degi, we-dule Bab-Jehováʼga-na-san-uksad-ibagangi, Bab-Jehováʼgarbi nanadii guoed. E-isgusad-ular, sibad-wawaad-sapingwagwad-birgagwen-nikad Bab-Dummadga sedagoed, adi, e-isgusad ega osulogegar. Idu Bab-Jehováʼgarbi-arbadigusad-ibagan bar ebislegosulid. Ar dule-burgwisadi, ei ibagan oichossoggu, e-ibagan gannar onodoed.
NUM 6:13 ” ’Weyobi, dule-Nazareoʼga-gudiid e-ibagan-sogsad bergunonikile, ega-igar-maidba imakoed. Bab-Dummad-dulemarbo-ambikued-neg-yawagakse na dagoed.
NUM 6:14 Agi, Bab-Jehováʼga ibmar-ukleged sedagoed: Sibad-wawaad-sapingwagwad-birgagwen-nikad uknonikoed. We-sibad-wawaad swilidik, gwen boni-nikasuli ogumakar-uklegega senonikoed. Degine, sibad-wawaad-ome-birgagwen-nikad-swilidikid, gwen boni-nikasulid, e-isgued-anar ukega senonibaloed. Deginbali, dule gwenatigwar-guega, sibad-wawaad-machered-swilidikid gwen boni-nikasulid ukbaloed.
NUM 6:15 Deginbali, Nazareo-dule ibmar-gwag-Bab-Jehováʼga-ukleged, degine, e-gobed-ega-uklebalid, sedabaloed. Deginbali, garba-bipigi madu-inasulid, sedabaloed. We-madude, madu-ologana madubur-nuedgi olivo-gwalluba-omukualedid, degine, madu-matargana olivo-gwallugi-magaledid. We-ibmarmar, we-Nazareo-dule sedagoed.
NUM 6:16 ” ’Geb degine, dule-irwa-Bab-Dummadse-goled, we-Nazareo-dulega-isgued-osulogega, we-ibmar Bab-Jehováʼga ukoed. A-ukinbali, we-ibmar ogumakar Bab-Jehováʼga ukbaloed.
NUM 6:17 Deginbali, gwenatigwar-guega, sibad-wawaad-machered oburgwebaloed. We-sibad-wawaadba-mesa garba-bipigi-madu-inasuli-bukwad dule-irwa-Bab-Dummadse-goled Bab-Jehováʼga ukbaloed. Deginbali, ibmar-gwagmar, degi, ibmar-eolemalad Bab-Jehováʼga ukbaloed.
NUM 6:18 ” ’Geb degidgine, dule-na-Bab-Jehováʼga-san-uksad, Bab-Dummad-dulemarbo ambikued-neg-e-yawagak-walik na-e-sailagia ioed. Geb agine, e-sailagia soogi-ogumakega Bab-Dummadga-ibmar-uklenaid-urba soo-gasiidgi urboed. We-ibmarde gwenatigwar-guega uklenaid.
NUM 6:19 ” ’Dule-Bab-Jehováʼga-san-uksad-sailagia-siksad-sorbali, dule-irwa-Bab-Dummadse-goled sibad-wawaad-machered-e-gukin-matar-dualed suoed, degine, garbagi madu-olo-inasulid-siid, madu-matar-e-inasulid-siid subaloed. Agi, geb Nazareo-dulega ukoed.
NUM 6:20 Geb we-ibmar-ukoedi, gannar suoed. Geb dule-irwa-Bab-Dummadse-goled, bana-bana-imakar Bab-Jehováʼga ukoed. We-ibmar dule geg yogasaar sued, unnila dule-irwa-Bab-Dummadse-goledga uklegoed. Deginbali, sibad-wawaad-e-binasgar, degi, e-dua Bab-Jehováʼga-uklearbalid dule-irwa-Bab-Dummadse-goledga uklebaloed. Geb deyobi, a-sorbali, dule-Bab-Jehováʼga-na-san-uksad, sunna vino-gobe gunonisunnoed.
NUM 6:21 ” ’Dule Bab-Jehováʼga-san-uksad-Nazareoʼye-bileged Bab-Jehováʼgarbi-ibmar-imakdigubiele, weyob ega igar-mai guoed. Weyobi, Bab-Jehováʼga ibmar-ukoed, degi, na ibmar-nikadba ukbaloed. Dule-Bab-Jehováʼga-na-san-urmaksadi igar-maidba na imakergebed, imaksuli guosulid, imakedsegad.’ ”
NUM 6:22 Bab-Jehová Moisésʼga sunmakdebalid, ega sogdebalid:
NUM 6:23 “Aarónʼga, degi, e-masmalaga be sunmak. Ega be soge: ‘Israel-dulemargi ise-nued be sunmakalile, weyobi, be sogoed:
NUM 6:24 Bab-Jehová ise-nued begi binsadii gusun, nue be-akwedii gusun.
NUM 6:25 Bab-Jehová bela-bela nued be-dakdii gusun. Bela-bela nue-be-sabgudii gusun.
NUM 6:26 Bab-Jehová nued-begi-binsaed bega-oyodii gusun. Degi, ulubgi bogidikid bega ukdii gusun.’
NUM 6:27 ”Weyobi Aarón, degi, e-masmala, Israel-dulemarga an-nuggi sogoed. Geb degine, Israel-dulemargi nued an binsaoed.”
NUM 7:1 Moisés Bab-Dummadse-goled-neg-seleged-sobsad-obelosgu, ina-wawadikid a-neggi bomi-bomi imaksad. Degine, bela agi ibmarmar-bukwad Bab-Dummadga nug-imaksad. Agi, we-neg Bab-Dummadgarbi-ebulegega nug-imaksasunnad. Geb ibmar-ogumakar-ukleged-ailagi ina-wawadikid egi bomi-bomi imaksabalid, degine, bela ailagi-ibmarmar-ebulemalad Bab-Dummadga nug-imaksabalid. Agi, we-ibmar bela Bab-Dummadgarbi-ebulegega nug-imaksad.
NUM 7:2 Geb degine, Israel-dulemar-e-dummagan, a sogleged, na e-gwenad-e-gwenadgan-e-dummaganye, amala, e-dadgan-dummaganba-dulemar-ebislesmalad-e-dummagan gumalad. Amala, Bab-Jehováʼga ibmar uknonimalad.
NUM 7:3 We-ibmarmar senonimalad: Dummagan ebo-ebo ur-napagined-ibmar-seed-wargwen senonimalad, degine, dummagan-iliba moli-bebe-nikad-alugwasualed-war-wargwen senonimalad. Degisoggu, bela ur-napagined-ibmar-seed walanergwasundo (6), degine, moli-bebe-nikad-alugwasualed warambe-gakabosundo (12). We-ibmarmala, Bab-Jehováʼga-ukega Bab-Dummadse-goled-neg-sunna-selegedse senonimalad.
NUM 7:4 Bab-Jehová Moisésʼga sunmakded, ega sogded:
NUM 7:5 “We-ibmarmar-bega-uknanaid e-abin be sue, adi, dulemar-anbo-ambikued-neggi ebulegegar. We-ibmarde Leví-wagan-baiganga, na e-ibmar-ebulegedba ega be ukoed.”
NUM 7:6 Geb Moisés, we-urmar, degi, moli-alugwasuarmalad sussunnad. Geb degine, Leví-wagan-baiganga uksasunnad.
NUM 7:7 Gersón-e-waganga urmar-napagined-ibmar-seed walabo ega uksad, degine, moli-bebe-nikad-alugwasualed walabake ega uksabalid, arbagedgi-ibmar-abemaladba ebugegar.
NUM 7:8 Merari-e-waganga urmar-napagined-ibmar-seed walabake ega uksad, degine, moli-bebe-nikad-alugwasualed walabaabak (8) uksabalid, arbagedgi ibmar-abemaladba ebugegar. We-Leví-wagan-baigande dule-irwa-Bab-Dummadse-goled-Aarón-machi-Itamar-sogedba arbananai gusmalad.
NUM 7:9 Moisés, Coat-wagangardi we-ibmarmar uksasulid, ar ade, wemala e-gukingi ibmarmar-Bab-Dummadgadga-gusadi, semamai gumaloed.
NUM 7:10 Ibmar-ogumakar-ukleged-aila Bab-Dummadga nugsalesgu, we-dummagan ibmar-ogumakar-ukleged-aila-asabin, Bab-Dummadga ibmarmar uksamalad.
NUM 7:11 Ar ade, Bab-Jehová, Moisésʼga sogsagusad: “Ibmar-ogumakleged-aila-anga-nugsalesadga-ibmar-ukegale, iba-ibagwengi dummagan-war-wargwen anga ibmar ukoed.”
NUM 7:12 Iba-gebe-onodedgine, Aminadab-machi-Naasón-inse Bab-Jehováʼga ibmar senonikid. We-Naasónʼde, e-dad-dummad-Judáʼgi danikid.
NUM 7:13 Naasón Bab-Jehováʼga-ibmar-uksadi, wemalad: Mani-bate-gwagwen, dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:14 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:15 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:16 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:17 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Aminadab-machi-Naasón, Bab-Jehováʼga senonikid.
NUM 7:18 Ibabogi, Zuar-machi-Natanael, Bab-Jehováʼga ibmar-senonimogad. We-Natanaelʼde dad-dummad-Isacarʼgi-danimalad-e-dummadid.
NUM 7:19 Natanael Bab-Jehováʼga-ibmar-uksadi, wemalad: Mani-bate-gwagwen, dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:20 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:21 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:22 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:23 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Zuar-machi-Natanael, Bab-Jehováʼga senonikid.
NUM 7:24 Ibapaagine, Helón-machi-Eliab, Bab-Jehováʼga ibmar senonimogad. We-Eliabʼde dad-dummad-Zabulónʼgi-danimalad-e-dummadid.
NUM 7:25 We-Eliab Bab-Jehováʼga-ibmar-uksadi wemalad: Mani-bate-gwagwen dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:26 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:27 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:28 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:29 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Helón-machi-Eliab, Bab-Jehováʼga senonikid.
NUM 7:30 Ibabakegine, Sedeur-machi-Elisur, Bab-Jehováʼga ibmar senonimogad. We-Elisurʼde dad-dummad-Rubénʼgi-danimalad-e-dummadid.
NUM 7:31 We-Elisur Bab-Jehováʼga-ibmar-uksadi wemalad: Mani-bate-gwagwen, dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:32 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:33 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:34 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:35 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Sedeur-machi-Elisur, Bab-Jehováʼga senonikid.
NUM 7:36 Ibatargine, Zurisadai-machi-Selumiel, Bab-Jehováʼga ibmar senonimogad. We-Selumielʼde dad-dummad-Simeónʼgi-danimalad-e-dummadid.
NUM 7:37 We-Selumiel Bab-Jehováʼga-ibmar-uksadi wemalad: Mani-bate-gwagwen, dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:38 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:39 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:40 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:41 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Zurisadai-machi-Selumiel, Bab-Jehováʼga senonikid.
NUM 7:42 Ibanergwadgi (6), Deuel-e-machi-Eliasaf, Bab-Jehováʼga ibmar senonimogad. We-Eliasafʼde dad-dummad-Gadʼgi-danimalad-e-dummadid.
NUM 7:43 We-Eliasaf Bab-Jehováʼga-ibmar-uksadi wemalad: Mani-bate-gwagwen dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Mani-bate-gwagwen, dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:44 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:45 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:46 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:47 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Deuel-machi-Eliasaf, Bab-Jehováʼga senonikid.
NUM 7:48 Ibagugledgi (7), Amiud-machi-Elisama, Bab-Jehováʼga ibmar senonimogad. We-Elisamaʼde dad-dummad-Efraínʼgi-danimalad-e-dummadid.
NUM 7:49 We-Elisama Bab-Jehováʼga-ibmar-uksadi wemalad: Mani-bate-gwagwen, dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:50 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:51 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:52 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:53 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Amiud-machi-Elisama, Bab-Jehováʼga senonikid.
NUM 7:54 Ibabaabakadgi (8), Pedasur-machi-Gamaliel, Jehováʼga ibmar senonimogad. We-Gamalielʼde dad-dummad-Manasésʼgi-danimalad-e-dummadid.
NUM 7:55 We-Gamaliel Bab-Jehováʼga-ibmar-uksadi wemalad: Mani-bate-gwagwen, dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:56 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:57 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:58 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:59 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Pedasur-machi-Gamaliel, Bab-Jehováʼga senonikid.
NUM 7:60 Ibabakebakadgi (9), Gedeoni-machi-Abidán, Bab-Jehováʼga ibmar-senonimogad. We-Abidánʼde dad-dummad-Benjamín-e-dummadid.
NUM 7:61 We-Abidán Bab-Jehováʼga-ibmar-uksadi wemalad: Mani-bate-gwagwen, dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:62 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:63 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:64 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:65 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Gedeoni-machi-Abidán, Bab-Jehováʼga senonikid.
NUM 7:66 Ibambegi (10), Amisadai-machi-Ahiezer, Bab-Jehováʼga ibmar senonimogad. We-Ahiezerʼde dad-dummad-Danʼgi-danimalad-e-dummadid.
NUM 7:67 We-Ahiezer Bab-Jehováʼga-ibmar-uksadi wemalad: Mani-bate-gwagwen, dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:68 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:69 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:70 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:71 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Amisadai-machi-Ahiezer, Bab-Jehováʼga senonikid.
NUM 7:72 Ibambe-gakagwensakgi (11), Ocrán-machi-Pagiel, Bab-Jehováʼga ibmar senonimogad. We-Pagielʼde dad-dummad-Aserʼgi-danimalad-e-dummadid.
NUM 7:73 We-Pagiel Bab-Jehováʼga-ibmar-uksadi wemalad: Mani-bate-gwagwen, dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:74 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:75 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:76 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:77 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Ocrán-machi-Pagiel, Bab-Jehováʼga senonikid.
NUM 7:78 Ibambe-gakabogi (12), Enán-machi-Ahira, Bab-Jehováʼga ibmar senonimogad. We-Ahiraʼde dad-dummad-Neftalíʼgi-danimalad-e-dummadid.
NUM 7:79 We-Ahira Bab-Jehováʼga-ibmar-uksadi wemalad: Mani-bate-gwagwen, dulanergwa-gakambe-aidikued (130) senonikid. E-aidikuedi, Bab-Dummadse-goled-neggi mani-aidikued-ebislegedyobid. Degine, mani-nog-dummad, dulapaa-gakambe-aidikued (70) senonibalid. E-aidikuedi, Bab-Dummadse-goled-neggi mani-aidikued-ebislegedyobid. A-ibmargi, madubur-olivo-gwalluba-omukuar Bab-Dummadga-uklegedi, Bab-Dummadga-ukega senonikid.
NUM 7:80 Degine, or-wesar-dummad gagwen, mani-sibugan-gwaambe-aidikue-wilub (10) senonibalid. A-or-wesargi, ina-wawadikid ena senonibalid.
NUM 7:81 Deginbali, Bab-Dummadga ibmar-ogumakar-ukega we-ibmarmar senonibalid: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikad, wargwen.
NUM 7:82 Deginbali, e-isgued-osulogega, sibad-machered wargwen, Bab-Dummadga-ukega senonibalid.
NUM 7:83 Deginbali, gwenatigwar-guega, we-ibdurgan senonibalid: Moli-bebe-nikad-alugwasualed, warbo. Sibad-wawaad-machered, walatar. Sibad-machered, walatar. Degi, sibad-wawaad-sapingwagwad-birgagwen-nikad, walatar senonikid. We-ibmarmala, Enán-machi-Ahira, Bab-Jehováʼga senonikid.
NUM 7:84 Weyobi, Israel-dulemar-e-dummagan Bab-Jehováʼga ibmar-ogumakar-ukleged-aila nug-imaknanaigusgu ibmarmar senonigusmalad: Mani-bate, gwaambe-gakabo (12), mani-nog-dummad, gwaambe-gakabo (12), or-wesar, warambe-gakabo (12) senonigusmalad.
NUM 7:85 Mani-bate gwa-gwagwengi, mani-dulanergwa-gakambe-aidiku (130) nanaed. Degine, nog-dummad gwa-gwagwengi, mani-dulapaa-gakambe-aidiku (70) nanaed. Bela batemar, degine, nogmar, Bab-Dummadse-goled-neggi mani-aidikued-ebislegedyobi, mani-nibir-milibo gaka dulataled-ilabake-aidiku (2,400) daklealid.
NUM 7:86 Or-wesar-warambe-gakabo (12) egi ina-wawadikid-ena-senonimaladi, a-or-wesar-ga-gagwengi mani-ambe-aidiku (10) nanaed. Bela or-wesar Bab-Dummadse-goled-neggi mani-aidikued-ebislegedyobi, mani-nibir-dulanergwa-aidikue (120) gussundo.
NUM 7:87 Bab-Jehováʼga ibdurgan-ogumakar-ukega senonimaladdina, weyob mergued: Molimar-bebe-nikmalad-sapingwagwad, warambe-gakabo (12), sibad-wawaad-machered, warambe-gakabo (12), sibad-wawaad-sapingwagwad-birgagwen-nikad, warambe-gakabo (12). We-sibad-wawaad-birgagwenadba ibmar-gwag-ukleged senonimarbalid. Degine, isgued-eliega sibad-machered, warambe-gakabo (12) senonimarbalid.
NUM 7:88 Gwenatigwar-guega, ibdurgan-senonimalad, weyob mergued: Molimar-bebe-nikad-alugwasuarmalad, waladulagwen-gakabake (24), sibad-wawaad-machered, waladulapaa (60), sibad-machered, waladulapaa (60), degine, sibad-wawaad-sapingwagwad-birgagwen-nikad, waladulapaa (60) mergued. We-ibmarmala ibmar-ogumakar-ukleged-aila-nug-imaklenaigusgu Bab-Jehováʼga uklesad.
NUM 7:89 Moisés Bab-Jehová-ebo-sunmakega, Bab-Jehová-dulemarbo-ambikued-negse dogdegu, Moisés, Bab-Jehová-ega-sunmake itosad. Bab-Jehová-Dulemarbo-Igar-Mesisad-Ulu-e-atued-birgi, baliwitur-warbo-querubinʼye-nugad-gwichimalad-imbagi ega sunmake itosad. Weyobi, Bab-Jehová Moisés-ebo sunmakdaed.
NUM 8:1 Bab-Jehová Moisésʼga sunmakded, ega sogded:
NUM 8:2 “Aarónʼga be soge: ‘Gwallu-gwagugled (7) be ogaalile, e-siedgi be sialile, e-gwallu-gaedi asabin be obiroed, adi, e-mee-gaedi asabinbi gaegar.’ ”
NUM 8:3 Aarón, Bab-Jehová-Moisésʼga-sogsadyobi imaksad: Gwallu-sied-birgi gwallumar asabin-nasiksad, adi, e-mee-gaedi asabinbi gaegar.
NUM 8:4 Gwallu-sied bela olobiid, e-mali, degine, e-dutumar mardogi-binna-sarsolegar sobaled. Ar igi Bab-Jehová Moisésʼga oyosa, deyobi, inniki gwallu-sied sobaled.
NUM 8:5 Bab-Jehová Moisésʼga sunmakdebalid, ega sogdebalid:
NUM 8:6 “Israel-dulemar-abargi Leví-wagan-baigan bachikii be anga urbo, degine, a-dulemar be anga abaluko.
NUM 8:7 Be Leví-wagan-baigan-abalukega weyob be imako: Isgued-eliega-dii-ebuleged be egi bomi-bomi imakoed, degi, bela e-abagangi-siga-nikad enioed. Degine, na e-mormar enukmaloed. Weyob imaksale, geb na san-swilidik gumaloed.
NUM 8:8 Geb a-sorbali, moli-bebe-nikad-machered-sapingwagwad sumaloed, degine, ibmar-gwag-uklegedi madubur-nued olivo-gwalluba-bato-omukualed, sumarbaloed. Deginbali, bedina, dule-isgued-eliega moli-bebe-nikad-sapingwagwad-baid anga ukega be suoed.
NUM 8:9 Geb degidgine, Leví-wagan-baigan dulemar-anbo-ambikued-neg-asabin be sedoed. Agine, bela Israel-dulemar a-asabin-ambikued be imakoed.
NUM 8:10 Be, Leví-wagan-baigan Bab-Jehová-asabin senonikoed, geb Israel-dulemar we-Leví-wagan-baigangi na e-argan mesmaloed.
NUM 8:11 Geb degidgine, Aarón Israel-dulemar-nuggi a-Leví-wagan-baigan anga ibmar-bana-bana-ukledaedyobi, imakoed. Weyobi, Leví-wagan-baigan Bab-Jehováʼga-arbaega gudii gumaloed.
NUM 8:12 ”Geb a-sorbali, Leví-wagan-baigan moli-bebe-nikad-sapingwagwadmar-e-nonogi e-arganmar mesoed. Geb agine, an amarga isgued-eliega, bedi moli-bebe-nikad-wargwen anga be ukoed. Moli-bebe-nikad-baiddina, ogumakar anga be ukoed.
NUM 8:13 Geb degidgine, be, Leví-wagan-baigan Aarón-asabin, degi, e-masmala-asabin, be urboed. Geb degine, anga ibmar-bana-bana-imakledaedyobi, Leví-wagan-baigan anga be nugsaoed.
NUM 8:14 Weyobi, Leví-wagan-baigan Israel-dulemar-abargi bachikii anga be imakoed, adi, we-Leví-wagan-baigan angadga guegar.
NUM 8:15 ”Geb degine, be, bela Leví-wagan-baigan-uruksad-sorbali, degine, anga-ibmar-bana-bana-imakledaedyobi, be anga imaksad-sorbali, geb wemar dulemar-anbo-ambikued-neggi arbanonimaloed.
NUM 8:16 Ar ade, Israel-dulemar-abargi, bela Leví-wagan-baigan anga nugsalearmaladid. We-Leví-wagan-baigan Israel-masmala-gebesailagined-anar an susad.
NUM 8:17 Ar ade, bela Israel-dulemar-abargi masmala-gebe-gwalulemalad angadid. Duledibe, ibdurgandibe, bela wemala angadid. Egipto-dulemar-e-masmala-sailaginmalad an ogilosgua, we-ibmarmala bachikii angadga-guega an na imaksad.
NUM 8:18 ”Degi-inigwele, Israel-masmala-gebegwalulesmalad-ular, Leví-wagan-baigan an susad.
NUM 8:19 We-Leví-wagan-baigan, Aarónʼga, degi, e-masmalaga, ibmar-binsa-ukledaedyobi an ega uksad, adi, dulemar-anbo-ambikued-neggi arbamalagar. Leví-wagan-baigan Israel-dulemar-anar Bab-Dummad-dulemarbo-ambikued-neggi arbamaloed, degi, emarga isgued-elileged-igar imakoed, adi, melle Israel-dulemar anse-goled-neg-asabin-nonikoedgi boni-dummad-nika guegar.”
NUM 8:20 Deyobi, Moisés, Aarón, degine, bela Israel-dulemar-danar-bukwamaladi, Bab-Jehová-Moisésʼga-ibmar-sogsadba, Leví-wagan-baigan-imaksamalad.
NUM 8:21 Leví-wagan-baigan na abaluksamalad, degine, bela na e-mormar enuksamarbalid. Geb agine, Aarón Bab-Jehováʼga we-Leví-wagan-baigan ibmar-bana-bana-imakledaeyobi uksad, degine, we-dulemar-isgued-eliega ibmar-uksad, adi, we-dulemar swilidik guegar.
NUM 8:22 Geb a-sorbali, we-Leví-wagan-baigan Bab-Dummad-dulemarbo-ambikued-neggi, Aarón-wagab, degi, e-masmala-wagab arbananai gusmalad. Ar igi Bab-Jehová Moisésʼga igar-uksa, deyobi, Aarón, degi, e-masmala, Leví-wagan-baigan-imaksamalad.
NUM 8:23 Geb deginbali, Bab-Jehová Moisésʼga sunmakdebalid, ega sogdebalid:
NUM 8:24 “Weyob Leví-wagan-baiganga igar maiguoed: ‘Leví-wagan birga-durgwen-gakatar-nikad (25), degine, birga-durgwen-gakatar-obine-nikamaladi (25+), sunna dulemar-anbo-ambikued-neggi arbamaloye.
NUM 8:25 We-Leví-wagan-baigan birga-dulabo-gakambe-nikunonikile (50), e-arbaedgi noergebed. A-sorbali, e-arbaed bar imakosurmalad.
NUM 8:26 We-Leví-wagan-baigan anbo-ambikued-neggi sunna e-gwenadgan-bendakega gumaloed, e-sunnaddi bar we-arbaed imakosurmalad. Weyobi, Leví-wagan-baigan e-arbaed-imake be imakoed.’ ”
NUM 9:1 Israel-dulemar Egipto-yargi birgabogusa, gebe-nii-onoded-ibagwengus-noaligusadgi, Bab-Jehová Moisésʼga Sinaí-nega-dulesulidganba sunmaksagusad. Weyob Moisésʼga sogded:
NUM 9:2 “Israel-dulemala Oburgwilegoenad-Iba iba-sekalaa onomaloed.
NUM 9:3 E-iba-maidba ibambe-gakabakegi (14), osedodedgi, we-iba be onomaloed. We-iba-be-onogoedi bela igar-maidba-imaked be imako, degine, bela e-igarmar-sogmaidba be iba onogo.”
NUM 9:4 Geb degine, Moisés Israel-dulemarga sogded: “Oburgwilegoenad-e-Iba bemar onomar.”
NUM 9:5 Geb agine, Israel-dulemar gebe-nii-onoded-ibambe-gakabakegi nega-dulesulidgan-Sinaíʼye-nugadgi, sedogidba Oburgwilegoenad-e-Iba onosmarsunnad. Ar igi Bab-Jehová Moisésʼga igar-uksa, aba bela Israel-dulemar imaksamalad.
NUM 9:6 Dakleargua, dule-gwenna-gwenna, dule-e-mui-ebusad-ular, san-swilidiksuli gunonigusmalad. A-ulale, a-ibagi Oburgwilegoenad-e-Iba onossurmalad. A-ibagi, dule-swilidiksurmalad Moisésʼse, degi, Aarónʼse nonigusmalad, amala ega sogdemalad:
NUM 9:7 —Anmar dule-mui ebusad, agala anmar swilidiksurmalad. ¿Ibiga geg anmar Israel-dule-baiganyobi Bab-Jehováʼga Iba-sekalaa ibmar-uke guosunna?
NUM 9:8 Moisés we-dulemar-abin sogded: —Bemar an-edarbemargwelo. An itogweloed, igi Bab-Jehová bemargi anga igar-ukoe.
NUM 9:9 Geb degine, Bab-Jehová Moisésʼga sogded:
NUM 9:10 “Israel-dulemarga be sunmak, amarga be soge: ‘Ar doa-dule, igi, e-wagandibe, dule-burgwisad-ebusad-ular, na san-swilidiksur-gunonimalale, igi, dikasuli e-yarginsuli gudimalale, bemar nabir Oburgwilegoenad-e-Iba Bab-Jehováʼga onomaloed.
NUM 9:11 Degi-inigwele, we-dule, a-Iba, geb sorba nii-warbo-ibambe-gakabakegi, sedogidbali onomaloed. A-Ibagi madumar-e-inasulid, degi, gaganmar-gagbiremaladba sibad-wawaad-sapingwagwad gunmaloed.
NUM 9:12 We-sibad-wawaad-Bab-Dummadga-ukaled-e-san-obichad, melle banedga be sabogo, degine, a-sibad-wawaad-e-garmar be bisgosurbalid. Oburgwilegoenad-e-Iba be onoarmalale, bela igar-maidba be imako.
NUM 9:13 ” ’Ar dule san-swilidikindibe, igi, neg-baidsik gudisulindibe, Oburgwelegoenad-Iba onossulile, we-dule, e-dulemar-abargi onolegoed. Ar anga ibmar-ukleged Iba-sekalaa-uksasursoggu, we-dule na e-isgusadba oburgwilegodo.
NUM 9:14 ” ’Dule-be-yarginsulid bemar-abargi maile, we-dule anga Oburgwilegoenad-Iba onobiele, igar-maidba imakoed. Ar iba-e-igar-mamaidba inniki imakoed. Israel-duledibe, igi, Israel-yarginsuliddibe, amba igar-maidba imakmogoed.’ ”
NUM 9:15 Bab-Dummadse-goled-neg-sunna-seleged gannar osilesgu, mogir we-Bab-Dummad-dulemarbo-ambikued-neg-birgi nagunonikid. Sedogidbali, neg-oibogedsega, we-neg-birgi mogir-naidi sooyobi-dakle nagusad.
NUM 9:16 Gusgu mogir weyobi nai gusad: Neg-ibgine, mogir neg-birgi-naidaed. Mutikdi, mogir sooyobi we-neg-birgi-naidaed.
NUM 9:17 Mogir Bab-Dummadse-goled-neg-birgi-naid-nakwided-iliba, Israel-dulemar na-e-danar-danar-bukwadgi banguddamalad. Bia mogir nagudapoe, agi Israel-dulemala gannar danar ambikudapdamalad.
NUM 9:18 Bab-Jehová-igar-ukedba Israel-dulemar banguddaed, degi, Bab-Jehová-sogedba Israel-dulemar danar ambikudapdabalid. Ar mogir bane-bane Bab-Dummadse-goled-neg-birgi naile, Israel-dulemar bangudasurmalad.
NUM 9:19 Ar mogir Bab-Dummadse-goled-neg-birgi iba-bukidar-naile, Israel-dulemar Bab-Jehová-sogedba imakdamalad, gwen bangudasurmalad.
NUM 9:20 Mogir Bab-Dummadse-goled-neg-sunna-seleged-birgi iba-ichesaar-naile, Bab-Jehová-sogedba Israel-dulemar danar-danar-ambikusdamalad, degine, Bab-Jehová-sogedba banguddamarbalid.
NUM 9:21 Ar mogir, sedogidbali, degi, oibogedse nagusale, a-wakdar mogir nakwidele, Israel-dulemar banguddamarmogad. Ar mogir ibagwen-nagusale, mutikidba mogir nakwidele, Israel-dulemar naddamarmogad.
NUM 9:22 Ar mogir bangusulile, Bab-Dummadse-goled-neg-sunna-seleged-birgi ibabo-naidibe, nii-wargwendibe, birgagwen-naidibe, Israel-dulemar geg bangudamarmogad, danar-danar bukwagu damalad. Ar mogir nakwiderdi, Israel-dulemar naddamarmogad.
NUM 9:23 Israel-dulemar Bab-Jehová-sogedba danar-danar-ambikudapdamalad, Bab-Jehová-sogedba naddamarbalid. Weyobi, Bab-Jehová-sogedba Bab-Jehová-Moisésʼba-Igar-Uksadba ibmar-imakdii gusmalad.
NUM 10:1 Bab-Jehová Moisésʼga sunmakded, ega sogded:
NUM 10:2 “Gar-trompeta, walabo manigi be sobo. We-garmarde mardogi binnaa sarsoar be soboed. We-gar-trompetaʼde dulemarse golega be ebugoed. Degine, dulemar-danar-danar-bukwad baid-negsik-sedesokalile be ebubaloed.
NUM 10:3 We-gar-trompeta warbobela be ogotele, bela dulemar be-asabin dulemar-anbo-ambikued-neg-yawagak-abin ambikunonimaloed.
NUM 10:4 Ar unnila gar-trompeta-wargwen be ogochardi, Israel-dulemar-e-dummaganbi bese nonimaloed.
NUM 10:5 Gebegi gar-trompeta binnasur be ogotele, degi, dulemar-oimaknadapmalale, dulemar-e-dad-sailaganba dad-nakwedsik-danar-danar-bukmalad-inse namaloed.
NUM 10:6 ”Irbogi gar-trompeta binnasur be ogotele, dulemar-e-dad-sailaganba dad-nakwed-argan-nuedsik-danar-danar-bukwamaladi bangudmaloed. Gar-trompeta binnasuli ogormaloed, degi, dulemar-oimaknadapmaloed, adi, namalaga guoed.
NUM 10:7 Dulemar danar-oambikuegardi unnila gar-trompetaʼbi be ogoloed.
NUM 10:8 ”Aarón-masmala-dule-irwa-Bab-Dummadse-gormalad, amar gar-trompetaʼmar ogormaloed. Weyob degisadegu, bemarga, degi, be-waganga be igar mesoed.
NUM 10:9 ”Dule-be-isdarmalad bemar-yargi begi-yoledanimalad-abin bemar bila-ononamalagala, gar-trompeta binnasuli be ogormaloed. Weyobi adi ani, Bab-Jehová, bemar-Bab-Dummad bemar-insamaloed, degine, be-isdarmaladgi an be-abonomaloed.
NUM 10:10 ”Bemar weligwar-itoged-ibagangi, iba-itoakwaa-onolemalad-ibagindibe, igi, nii-gwapid-gwisgued-ibagindibe, gar-trompeta bemar ogormarbaloed. Bemar ibmar-ogumakar-anga-ukarmalar, gwenatigwar-guega ibmar-ukarmalar, agi, bemar gar-trompeta ogormarbaloed, adi, an bemar-insamalagar. Ani an be-Bab-Dummad-Jehová gued.”
NUM 10:11 Birgabogwadgi, a-nii-walabogwad-iba-dulagwengi, mogir Bab-Dummad-Israel-Dulemarbo-Igar-Mesisad-neg-birgi-naid nakwided. Geb mogir Israel-dulemar-idu nadegusad.
NUM 10:12 Agi, Israel-dulemar, nega-dulesulidgan-Sinaíʼye-nugadgi bangudmalad. Mogir-e-idu-nadapid, ega nega-dulesulidgan-Paránʼye-nugadgi nagudapid.
NUM 10:13 We-Israel-dulemar, Bab-Jehová-Moisésʼba-ega-Igar-uksadba, gebe nadegusmalad.
NUM 10:14 Judá-wagan-inse, igar-uklesadba e-sorda-e-sordamarba, danar-danar-bukwamaladba e-bander-senadapi gusmalad. E-dummadgala, Aminadab-machi-Naasón nadapi gusad.
NUM 10:15 Zuar-machi-Natanael, Isacar-wagan-danar-danaled-e-dummadga nadapi gusad.
NUM 10:16 Helón-machi-Eliab, Zabulón-wagan-danar-danaled-e-dummadga nadapi gusad.
NUM 10:17 Bab-Dummadse-goled-neg-sunna-seleged bela earilesgua, Gersón-wagan, degi, Merari-wagan a-neg semamai gusmalad.
NUM 10:18 Geb a-sorba, Rubén-wagan igar-uklesadba e-sorda-e-sordamarba danar-danar-bukwamaladba e-bander-senadapi gusmalad. E-dummadgala, Sedeur-machi-Elisur nadapi gusad.
NUM 10:19 Zurisadai-machi-Selumiel, Simeón-wagan-danar-danaled-e-dummadga nadapi gusad.
NUM 10:20 Deuel-machi-Eliasaf, Gad-wagan-danar-danaled-e-dummadga nadapi gusad.
NUM 10:21 Geb a-sorbali, Coat-wagan ibmar-Bab-Jehováʼga-nugsalesmalad semamai gusad. We-dulemar omoged-iduale, Leví-wagan-baigan bato guakwa Bab-Dummadse-goled-neg madar-madar onakwismalad.
NUM 10:22 Geb degidgine, Efraín-wagan igar-uklesadba e-sorda-e-sordamarba danar-danar-bukwamaladba e-bander-senadapi gusmalad. E-dummadgala, Amiud-machi-Elisama nadapi gusad.
NUM 10:23 Pedasur-machi-Gamaliel, Manasés-wagan-danar-danaled-e-dummadga nadapi gusad.
NUM 10:24 Gedeoni-machi-Abidán, Benjamín-wagan-danar-danaled-e-dummadga nadapi gusad.
NUM 10:25 Geb degine, bela dulemar-baigan-solaba Dan-wagan ega igar-uklesadba e-sorda-e-sordamarba danar-danar-bukwamaladba e-bander-senadapi gusmalad. E-dummadgala, Amisadai-machi-Ahiezer nadapi gusad.
NUM 10:26 Ocrán-machi-Pagiel, Aser-wagan-danar-danaled-e-dummadga nadapi gusad.
NUM 10:27 Enán-machi-Ahira, Neftalí-wagan-danar-danaled-e-dummadga nadapi gusad.
NUM 10:28 Weyobi, Israel-dulemar e-bukwadgi bangudmalale, danar-danar e-sorda-e-sordamarba igar-uklesadba nadapi gusmalad.
NUM 10:29 Geb degine, Moisés, Reuel-machi-Hobabʼga sunmakded. Reuelʼde Madián-duled, Moisés-e-sakad. Moisés Hobabʼga sogded: —Bab-Jehová anmarga sogsad, yar an bemarga ukoye. Emide, a-yalase anmar naesokalid. Anmarba be dage, anmar nued be-akwemaloed. Ar ade, Bab-Jehová Israel-dulemarga sogsad, ise-nued an bemargi binsamaloye.
NUM 10:30 Hobab, Moisés-abin sogded: —An bemarba naosuli, an-negse bur an naoe, an-babganse bur an naoe.
NUM 10:31 Ar Moisésʼdi egi alamaknaigusad: —Melle be anmargi nae, ar be, be wisid bia sunna anmar nega-dulesulidgangi nabir ambikudapoe. Be anmar-idugega be guoed.
NUM 10:32 Ar be anmarba alile, Bab-Jehová anmarga-ibmar-nuegan-ukoye-sogsad anmarga-uknonikile, a-ibmarmar anmar bega ukmarmogoed.
NUM 10:33 Weyobi, Israel-dulemar ibapaa-nanae-wilub Bab-Jehová-yalagi-bukwadi bangud gusmalad. Leví-wagan-baigan Bab-Jehová-Dulemarbo-Igar-Mesisad-Ulu-senadapmaladi, ibapaa Israel-dulemar-idu-nadapi gusad. Adi, ega danar-danar-ambikued-neg amiegar.
NUM 10:34 Israel-dulemar bukwamaladgi bangudmargua, ibginedba Bab-Jehová-e-mogir Israel-dulemar-birgi nadapigusad.
NUM 10:35 Bab-Dummad-Israel-dulemarbo-Igar-Mesisad-Ulu seledele, Moisés sogdedaed: “¡Bab-Jehováʼye, be anmar-bendake! Be-isdarmalad bela aisakisun. Dule-isdar-be-dakmalad bela be-idu duurmakmarsun.”
NUM 10:36 Bab-Jehová-Ulu siledapile, agindi Moisés sogdedaed: “Bab-Jehová, gannar be-Israel-dulemar-mili-milibalidse be dage.”
NUM 11:1 Ibagwengine, Israel-dulemar igar-bulegan-itonaidgi sae-itoarmalad. Bab-Jehová deyob daksagua, nue-uluded. Agine, Bab-Jehová e-soo barmialid, dulemar-bukwad-dikarba odesad.
NUM 11:2 Geb degine, Israel-dulemar Moisésʼse bela-bela wilenai gusmalad. Geb agine, Moisés Bab-Jehováʼse gotesunnad. Geb degidgine, soo akitesunnad.
NUM 11:3 Agala, Taberaʼye a-neg onugsasmarsunnad, ar ade, agi Bab-Jehová e-soo odesgusad.
NUM 11:4 Israel-dulesurmalad Israel-dulemarba-apurusmaladi, unnila mas-gunnedginbi binsadimalad. We-dulemarba Israel-dulemar akadmarmogad. Geb binnasuli-bodmalad, sogdemalad: “¿Wede doa anmarga san-gunnega ukoe?
NUM 11:5 Anmar ebinsaed, Egipto-yargi anmarga binsa ua-ukleardaed. Agindi anmar akar-akar ibmar-gunnardaed: Pepinoʼmar, melónʼmar, puerroʼmar, ajoʼmar, degi, agumar anmar nue-gundaed.
NUM 11:6 Ar emigindi, unnila we-manáʼbi anmar dakdiid, ibmar-baigan sated. Degisoggu, anmar ukudbargudmaloed.”
NUM 11:7 Manáʼde gagan-ina-wawadikid-culantroʼye-nugad-e-gwagyobid. E-dakleged, gorosdikii sapi-gichiyob dakleged.
NUM 11:8 Israel-dulemar maná-weega ainiddaed. Geb akwamuugi nagdamalad, igi, orsargi ollimakodibe. Geb esmedgi dudamalad. Sulile, madu-maná-ologanaga imakodibe. E-gullegedi madu-olivo-gwalluba-imakaleyob gulleged.
NUM 11:9 E-bukwamaladgi mutikidba boo babatialile, maná batiardamogad.
NUM 11:10 Moisés, Israel-dulemar na e-neg-e-neg-yawagak-naba sabsur-bobukwa itosad. Agidbali, Bab-Jehová nue uluded, degine, Moisésʼmoga nue-sae itosmogad.
NUM 11:11 Agi, Moisés, Bab-Jehováʼga sogded: —Ande be-maid, degite, ¿ibiga be angi ichakwaa binsae? ¿Ibiga be bar an-bendaksuli? Emide, bela we-dulemar-niega be an-imaksad. Ar ade, we-dulemar-seleged dutusulid.
NUM 11:12 ¿Ar we-dulemarde angi danisi? ¿Ani an we-dulemar-baksasi? Emide be anga soggu: ‘We-dulemar be sede, igi dule na e-goe-mam-nunaid argangi semaidae, deyobi, e-dadganga an yala-ukoye-sogsadse, be sede.’
NUM 11:13 An we-dulemarga-san-ukega, ¿bia an ega san amioe? Bela we-dulemar anse-ise-boale anga sognonimalad: ‘San be anmarga amie, adi, anmar a-san gunnegar.’
NUM 11:14 Bela we-dulemar an sedye-sogele, anbi wargwen geg an gued. Anbi wargwenale, angi dutusur noed.
NUM 11:15 Ar weyob arbaed be anga ukele, bur be an-oburgwesunna. Be an-oburgwisar, bur nabirid, adi, nunmaked-dummad-itodii bar an guosulid.
NUM 11:16 Geb degine, Bab-Jehová Moisésʼga sogded: “Israel-girmar-dummagan dulapaa-gakambe (70) be anga onmako. Be girmar-dummaganga-gudidiid-wisidi, degi, dule-dummaganga-mamaid-wisbalidi be sedago. A-girmar-dummagan dulemar-anbo-ambikued-negse be sedago. Agi, be an-edarbemaloed.
NUM 11:17 Agi, an bebo-sunmakega an aidegoed. Be An-Burba-nikadyobi, a-dulemar An-Burba-nikuega an imakmogoed. Deyob an imakoed, adi, a-dulemar be-bendakegar, melle wargwen alamaknai be guegar.”
NUM 11:18 Bab-Jehová Moisésʼga sogdebalid: “Israel-dulemar-baigangardi be soge: ‘Oibosale, na be abalukmalo, ar ade, san be gunmaloed. Bemar Bab-Jehováʼse boapmargua, ega be sogsamalad: Dule anmarga san gunnega ukmalana gadinye. Ar anmar Egipto-yargi bur-nued gudimalanad. ” ’Degisoggu, Bab-Jehová be-boed itosad, bemarga san ukoed, adi, bemar a-san gunmaloed.
NUM 11:19 Bemar unnila ibagwen, ibabo, ibatar, ibambe (10), iba-durgwen (20) san-gundii guosurmalad. Bemar nii-walagwen san gunmaloed.
NUM 11:20 ” ’Bemar san-gunnoedi budar-gungusadse be gunmaloed, ar ade, bemar be-Bab-Jehová-bemar-abargi-gudiid nabir gwen daksasurmalad. Deunni, ese bemar boapmalad, ega be sogsamalad: ¿Ar ibiga wese-dagega be Egipto-yargi be anmar-onosmala?’ ”
NUM 11:21 Geb degine, Moisés, Bab-Jehováʼga sogded: “Sordamar-mili-dulataled-ilanergwad-abalagi (600,000) an gwichid. Emide be soged: ‘We-dulemarga san an ukoye. We-dulemar nii-walagwen san gunmaloye.’
NUM 11:22 We-dulemarga sibad-wawaad, degi, moli-bebe-nikamalad ega ichesuli-oburgweye-sogele, amba unnigussuliled. Ar wemarga bela-uamar-gudidiid ega somalale, amba unnigussuliled.”
NUM 11:23 Geb degine, Bab-Jehová Moisés-abin sogded: “¿An geg imak be-ebinsae? Emigindi be dakodo, an-bega-ibmar-soged an imakodibe, igi, an imakosurdibe.”
NUM 11:24 Geb degine, Moisés Israel-dulemarse naded, Bab-Jehová-ega-ibmar-sogsad sognaded. Agine, Moisés Israel-girmar-dummagan dulapaa-gakambegwadse (70) gochad. Moisés Bab-Dummadse-goled-negse amar-sesad, agi oambikudapid.
NUM 11:25 Degidgine, Bab-Jehová mogir-abalagi aidenonikid, Moisésʼga sunmaksad. Geb degine, Bab-Jehová Israel-girmar-dummaganga Moisés-Bab-Burba-nikad ukdemogad. Bab-Dummad-Burba amargi aidenonimogu, amala Bab-Burbaba sunmakdemalad. Deyob-gusadi, a-sorba we-dummagangi bar deyob gussulid.
NUM 11:26 Israel-girmar-dummagan-warbo dulemar-danar-danar-bukwamaladgi besmalad. Amardi girmar-dummaganba-sulesmarmo-inigwele, Bab-Dummadse-goled-negse arbisurmalad. Amar-warbogwadi gwensak Eldadʼye nugad, baiddi Medadʼye nugad. Amargine, Bab-Dummad-Burba aidenonimogad. Amala Bab-Burbaba dulemar-danar-bukwamaladgi sunmakdemarmogad.
NUM 11:27 Machi-sapin-gwensak Moisés-owisogega abarmakded, ega sogdapid: —Eldad, degi, Medad, dulemar-danar-danar-bukwadgi Bab-Dummad-Burbaba sunmakdimarye.
NUM 11:28 Agine, Nun-machi-Josué, sapingwagwad-akar Moisés-bendakdiid, Moisésʼga sogded: —Dummad-Moisés, melle we-dulemar Bab-Dummad-Burbaba-sunmaked be imake.
NUM 11:29 Moisés Josué-abin sogded: —Mer be nobgue. Bab-Jehová bela e-dulemargi E-Burba odegena yeerban. Bitigi bela Bab-Jehová-dulamar Bab-Dummadga-gayaburba-barsogmaladga gumalana gadin.
NUM 11:30 Geb a-sorbali, Moisés Israel-girmar-dummaganmala, dulemar-danar-danar-bukwamaladse nonimalad.
NUM 11:31 Geb degidgine, Bab-Jehová burwa ogornonikid. Abali, nuu-demargi-nikad-codornizʼye-nugad burwaba nonikid. We-codornizʼmarde Israel-dulemar-bukwadgi batenonikid. Codornizʼmar bela-bela mergued. Bela Israel-dulemar-bukwad-ebiris, argan-nuedsik ibagwen-dummad-nanae-wilubbi nuumar babatisad, degi, argan-sapiledsik ibagwen-dummad-nanae-wilubbi babatisbalid. Deginbali, dali-abala napagi-nibgu odunnumakbukwa gusbalid.
NUM 11:32 A-ibagine, Israel-dulemar nuu-codorniz-wenanai osedosad, degi, oibosbalid. Degine, banedgine deyob nuu-codorniz-wenanai gusmarbalid. Dulemar bur nuu-ichee-wesmaladi garba-dummagan-gwadulatar (100) wesmalad. Emar-bukwamalad-dikarba dad-abin narismalad.
NUM 11:33 Israel-dulemar geb san e-gayayaba ododmaladgine, amba yoo sakumake, Bab-Jehová we-dulemargi isdar-binsaded, amargi boni-dummad ogwisnonikid.
NUM 11:34 A-yargi dulemar-yaisur-ibmarbina-sogmalad-digsamaladba a-neg Kibrot-Hataavaʼye onugsasmalad.
NUM 11:35 Israel-dulemar Kibrot-Hataava-akar Hazerotʼse nadegusmalad. Agi danar ambikudapmalad.
NUM 12:1 Moisés ome-Cus-yargined-nikusad-ular, e-bun-María, degi, e-ia-Aarón, egi isdar sunmakarmalad.
NUM 12:2 María, Aarón-ebogwa sokarmalad: “¿Unnila Bab-Jehová Moisésʼgarbi sunmaksasi? ¿Anmarga Bab-Jehová sunmaksasurmosi? Anmarga sunmaksamoga.” María, Aarónʼbo-deyob-sogmaladi, Bab-Jehová itosad.
NUM 12:3 Ar Moisésʼdi, dule-na-san-dummarba-imaksulidid. We-napneggi-dulemar-baiganba bur na san-maikwaa imakdiid.
NUM 12:4 Geb degine, Bab-Jehová Moisésʼga, Aarónʼga, degi, Maríaʼga sogded: “Bemar-warbaagwad dulemar-anbo-ambikued-negse namar.” Degine, wemar-warbaagwad Bab-Dummad-dulemarbo-ambikued-negse nadmarsunnad.
NUM 12:5 Agine, Bab-Jehová mogir-bubawaryob-gwichidba, ese-goled-neg-seleged-yawagakse aidenonikid. Geb Aarónʼse, degi, Maríaʼse gochad. Amar-ebogwad nonimargua,
NUM 12:6 Bab-Jehová ega sogded: “An bemarga-ibmar-sogoed, nue be itomalo: Bemar-abargi an-gayaburba-barsoged gudiile, negburgan-dakedba an ese magaroged, gabdakedba an ega ibmar soged.
NUM 12:7 An-mai-Moisésʼsedi, deyob an ese magarosulid. Ar Moisésʼdi anga-arbamalad-baiganba bur inniki gudiid-duled.
NUM 12:8 Moisés-anbo asabin-asabin an sunmaked, odukuar an ega ibmar sogdasulid. Moisés, an-dakleged-e-wilub dakdaed. Emide, ¿ibiga an-mai-Moisésʼgi be isdar sunmakmala?”
NUM 12:9 Geb degine, Bab-Jehová Maríaʼgi, degi, Aarónʼgi sae-itogedba uluded. Geb a-sorbali, Bab-Jehová nadsunnad.
NUM 12:10 Bab-Dummadse-goled-neggi mogir-naid-bangudeyalaba, María naibe-buna-yaa-maleged nikuded, bela e-uka sibudik-dakle naded. Aarón Maríaʼsik atakdegu, dakded María naibe-buna-yaa-maleged nika.
NUM 12:11 Aarón, Moisésʼga sogded: “Dummad, anmar yogasaar-binsaedsuli-begi-sunmaksadba anmar begi isgusad. A-ulale, melle be sabsur-anmar-odurdake.
NUM 12:12 Melle María, mimmi muu-neggi-burgwar-aidenonidaed-daklegedyobi be obego.”
NUM 12:13 Geb degine, Moisés wilesagwa Bab-Jehováʼse gochad: “Bab-Dummadye, wilesakwaa an bese egised, María be emisbinne be nudake.”
NUM 12:14 Bab-Jehová Moisés-abin sogded: “E-bab, María wagargi-wiaksana, ¿María ibagugle (7) bingegudiguosulin be insae? Bingegudii guoenad. Degisoggu, ibagugle-wilub (7) María dulemar-danar-danar-bukwad-abargi be onogo. A-ibagan-sorbali, sunna gannar dulemar-danar-danar-bukwadse nonibaloed.”
NUM 12:15 Weyobi, María dulemar-danar-danar-bukwad-abargi ibagugle-wilub (7) onolesad. A-ibagangine, María-gannar-nonikidse Israel-dulemar e-danar-danar-bukwamaladgi gwen baid-yarse bangussurmalad.
NUM 12:16 Geb a-sorbali, Israel-dulemar Hazerotʼgi-bukwamaladgi nadmalad, nega-dulesulidgan-Paránʼye-nugadse modapmalad. Agi, Israel-dulemar danar-danar ambikudapmarsunnad.
NUM 13:1 Bab-Jehová Moisésʼga sunmakded, ega sogded:
NUM 13:2 “Canaán-yar Israel-dulemarga an ukesokarsoggu, dulemar a-yar arganaega be barmide. Israel-dadgan-warambe-gakabogwad-irba (12), sapin-dummagan-war-wargwen be barmidoed.”
NUM 13:3 Geb degine, Moisés Bab-Jehová-ega-sogsadba nega-dulesulidgan-Paránʼye-nugad-akar dulemar-barmisad. We-dulemarde, bela Israel-dulemar-abargi dule-dummagan gumalad.
NUM 13:4 We-dulemarde, wemalad: Dad-dummad-Rubénʼgi-danikidi: Samúa Zacur-e-machi.
NUM 13:5 Dad-dummad-Simeónʼgi-danikidi: Safat Horí-e-machi.
NUM 13:6 Dad-dummad-Judáʼgi-danikidi: Caleb Jefone-e-machi.
NUM 13:7 Dad-dummad-Isacarʼgi-danikidi: Igal José-e-machi.
NUM 13:8 Dad-dummad-Efraínʼgi-danikidi: Oseas Nun-e-machi.
NUM 13:9 Dad-dummad-Benjamínʼgi-danikidi: Palti Rafú-e-machi.
NUM 13:10 Dad-dummad-Zabulónʼgi-danikidi: Gadiel Sodi-e-machi.
NUM 13:11 Dad-dummad-Joséʼgi-danikidi, Dad-dummad-Manasésʼsik-danikid: Gadi Susi-e-machi.
NUM 13:12 Dad-dummad-Danʼgi-danikidi: Amiel Gemali-e-machi.
NUM 13:13 Dad-dummad-Aserʼgi-danikidi: Setur Micael-e-machi.
NUM 13:14 Dad-dummad-Neftalíʼgi-danikidi: Nahbi Vapsi-e-machi.
NUM 13:15 Dad-dummad-Gadʼgi-danikidi: Geuel Maqui-e-machi.
NUM 13:16 Moisés dulemar-yar-arganaega-barmisgusadi, weyob nugmalad. Moisés, Nun-machi-Oseasʼgala nug ogwasad, Josuéʼye onugsasad.
NUM 13:17 Moisés, dulemar-Canaán-yar-arganaega-barmidsokalidga sogded: “Neguevʼgi bemar nasmaloed, geb yalaganse bemar modapoed.
NUM 13:18 Nue be yar argamalo, negde igidibe, dulemar-agi-bukmalad, bule nollosurmardibe, igi, nollomardibe, bule mergumardibe, igi, ichemardibe.
NUM 13:19 Dule-bukmaladgi, neg nueddibe, igi neg ichakwadibe. E-neggweburmar-bukwadgi, galu-matusulid-dummagan mamaidibe, igi, galu-matusurmalad mamaisurdibe.
NUM 13:20 Napade, igidibe, gadi ibmar-sanmakdibe, igi, ibmar-geg-sanmakdibe. A-napaginde, sapimar-nikadibe, sapimar satedibe. Melle be dobgumalo. A-yargine sapi-sanmar-nikadi, bemar sedamalo.” A-ibagangi, uva gebe-goroleged-ibad.
NUM 13:21 Dule-barmilesmaladi, nega-dulesulidgan-Zinʼye-nugad-akar Hamat-neggwebur-dogedse neg-argaapmalad, Rehob-neggweburse warmakapmalad.
NUM 13:22 Neguevʼgi nasmargu, Hebrón-neggweburse warmaksamalad. Hebrónʼgine, Anac-e-wagan Ahimán, Sesai, degi, Talmai mamaimalad. Hebrón-neggwebur bato birga-guglegus-siid (7), geb Zoán-neggwebur Egipto-yargi bukunonikid.
NUM 13:23 Dule-barmilesmalad Escol-dianse-modapmargu, uva-dubgi uva-dukgwen-naid siksamalad. Geb dulemar ebo suar-abargi uva-nai searmalad, degi, gusebyob-dakleged-granadoʼmar, degine, higo-sanmar searmarbalid.
NUM 13:24 Israel-dulemar uva-dukgwen-gwachadgine, neg-naid Escol-nebaye onugsasmalad.
NUM 13:25 Dule-neg-argadimaladi iba-dulabogusgu (40), gannar nonimalad.
NUM 13:26 Dule-neg-argaapmalad nega-dulesulidgan-Paránʼse nonimalad, Cadesʼye-neg-nugadse. Agine, Moisésʼga, Aarónʼga, degi, bela Israel-dulemarga, bela neg-argasmaladba sunmaksamalad. Geb degine, sapi-san-senonimalad oyosmarbalid.
NUM 13:27 Deginbali, Moisésʼga weyob sogsamarbalid: —Neg-argaega be anmar-barmisadse anmar modapmalad. Ar nue-napiragwad, inso agi gadi-ibmar-sanmaked, napa-nuedid. Bemar dakegala, sapi-san an bega senonimalad.
NUM 13:28 Degi-inigwele, dulemar-a-yargi-bukwamaladi dutusur nanaed. E-neggweburmar dummagan nanaed, degine, e-neggweburmar nue-sakdigar bukwananabalid. Deginbali, Anac-e-wagan anmar daksamarbalid.
NUM 13:29 Neguevʼgi Amalec-dulemar bukwananaed. Yalaganbali, Het-dulemar, Jebuseo-dulemar, degi, Amorreo-dulemar bukwananaed. Canaán-dulemardi demar-gakaba, degi, Jordán-diwar-gakaba bukwananamalad.
NUM 13:30 Geb degine, Caleb Moisés-asabin dulemar-bar-sunmakega imaksasulid, geb sogded: —Anmar we-yarse ubonae. Anmargadga anmar we-yar-imaknae. Ar an wisid, anmar we-dulemar-bukwadgi nakwemaloed.
NUM 13:31 Ar dulemar-Calebʼba-arbimaladdi sogdemalad: —We-dulemar-bukwamaladi anmarba bur dutusursoggu, anmar geg we-dulemarse bila-onogega namalad.
NUM 13:32 We-dulemarde Israel-dulemarga yar-daksamaladgi neg-sunnasurye sogdemalad. Geb sogdemarbalid: —Anmar-negmar-dakapidgi, yarmar-argaapidgi bela dule-bukmaladi bemar-obelogoed. A-yarmargine, anmar dulemar-bukwa-daksamaladi, bela dule-masdummagan-nanaed, dule-bipisurmaladid.
NUM 13:33 Aginbali, anmar Anac-e-wagan-dule-masdummagan daksamarbalid. Anmar, a-dulemarba sesyob-dakle-nanaed, emar burwii emarba anmar-dakmaloed.
NUM 14:1 Geb degine, Israel-dulemar-bela-bukwamaladi oimakdemalad. A-mutiki, bela boedibi gusmalad.
NUM 14:2 Bela Israel-dulemala Moisésʼgi, degi, Aarónʼgi uludmalad. Amar sogdemalad: “¿Ar ibiga Bab-Jehová we-yarse anmar-senoniki? ¿We-yargi es-suidgi anmar-oburgwega anmar-senoniki? Wede, ¿bila-onogedgi anmar-omegan, degi, anmar-mimmigan anmar-isdarmaladse-seledega guode? Sulirgebed.
NUM 14:3 Egipto-yalagi anmar burgwismalana, bur gadinad. We-nega-dulesulidgangi anmar burgwebalina, bur gadindo. ¿Anmar gannar Egipto-yarse bur naer nuedirsursi? A bur nuediled.”
NUM 14:4 Na muchub-muchub sokarmalad: “Anmar dule-wargwen anmar-iduega amido. Adi, gannar anmar Egipto-yarse naegar.”
NUM 14:5 Moisés, Aarón-ebogwa Israel-dulemar-bukidar-bukwad-asabin dulluu napase e-nono imakdemalad.
NUM 14:6 Nun-machi-Josué, degi, Jefone-machi-Caleb, amala neg-argaapmaladba arbigusmarmogad. Amar mor siir-siir imakdemalad, oyogega, emarde nue-nunmak itomarye.
NUM 14:7 Josué, Caleb-ebo, bela Israel-dulemar-bukwamaladga sogdemalad: “Anmar-yar-argaapidi, anmar egi-nanasadi, yar-nuedid.
NUM 14:8 Ar Bab-Jehová yeer anmar-dakele, e, anmar-nidoed, a-yala anmarga ukoed. A-yalagi napade gadi-ibmar sanmaked, napa-nuedid.
NUM 14:9 Degisoggu, melle bemar Bab-Jehováʼba uayasuli gumalo. Melle Bab-Jehováʼgi yolemalo. Bemar dule-a-yargi-bukmalad melle dobgumarbalo, ar ade, we-dulemargi bemar baisursunna nakwemaloed. We-dulemardina dule-e-bendaked sated. Anmarbardina Bab-Jehová gudiid. Degisoggu, melle we-dulemar be dobgumar.”
NUM 14:10 Ar bela dulemar-danar-bukwadi, Josué, Caleb-ebo akwagi-makedgi-binsabuksoggua, Bab-Jehová-e-gangued-yeerdakleged Bab-Dummad-dulemarbo-ambikued-neggi Israel-dulemar-bukwadse magarononikid.
NUM 14:11 Geb degine, Bab-Jehová Moisésʼga sogded: “Israel-dulemar-abargi bela ibmar-dummagan-dakledisurmalad an imakdii-inigwele, degite, ¿sanagwadse we-dulemar isdar-an-dakdii guoe? ¿Ar wede sana angi bensuli gumaloe? An wesesun. Bar an bendakosur.
NUM 14:12 Aka bur boni-dummagan ega an barmidoed, bela wemar an ogilogoed. Moisés, ar begine anagan-baigan ainidagega an imakoed. Amar, dule-burgwemaloedba bur bukidar gumaloed, degi, dutusuli gumarbaloed. A-iduega an be-imakoed.”
NUM 14:13 Ar Moisésʼdi Bab-Jehováʼga sogded: “Bab-Jehová mer deyob be imake. Ar Israel-dulemar be obelogele, Egipto-dulemar be-wisgumaloed. Geb Egipto-dulemar Canaán-yargi-bukmaladga sogoed. Ar Canaán-dulemar bato wismalad bede Egipto-dulemar-abargine, we-Israel-dulemar be-gangued-nikadba be onosad.
NUM 14:14 Deginbali, wismarbalid bede Israel-dulemar-abargi gudiiye, be-dulamarse be magarodiiye, degine, be-mogir dulemar-birgi naidaye. Ibginedgine, Israel-dulemar be-mogir-bubawaryob-gwichidba nadapdamarye. Mutikdina, be-soo-bubawaryob-gwichid-gwabunyemaidba nadapdamarye.
NUM 14:15 Ar bela Israel-dulemar be oburgweye-sogele, dulemar-be-nug-dummarba-itosmaladi sogdamaloed:
NUM 14:16 ‘Jehováʼde epenne we-Israel-dulemarga sogsagusad, Canaán-yar an bega ukedseye. Emide, Bab-Jehová a-yarse we-dulemar geg odogussoggu, agala, we-Israel-dulemar nega-dulesulidganba ogilosye.’ ”
NUM 14:17 Moisés Bab-Jehováʼga sogdebalid: “Ar emigindi, bese wilesakwaa an egised, be-gangued-dummarbad be oyoge. Ar be-sunnad bato be sogsad:
NUM 14:18 ‘An wissur gwae-gwae urweye. Bela-bela dulemar-sabye. Degine, dule-begi-isgusad, ega be elidaye. Deginbali, dule-begi-gwisgued ega be elidabarye. Degi-inigwele, be sogdasulid, dule-isgusad an sabsur-odurdakosurdeeye. Ar babgan-isgusad-ular, be, e-mimmigan, e-wagan, degi, e-wagan-yokorgined, degine, e-wagan-yarganbalid be sabsur odurdakdaed.’
NUM 14:19 Ar be-sabgued dummarbasoggu, wilesakwaa an bese egised, we-dulemar-begi-nosad-e-isgued ega be elie. Ar igi Egipto-akar we-Israel-dulemar-begi-nosale, be, ies-imakdanidae, deyob be imake.”
NUM 14:20 Geb degine, Bab-Jehová Moisésʼga sogded: “Ar be anse egichisadba, we-dulemar-e-isgued bato an elisad.
NUM 14:21 Emi, napira an bega soged: An nue-dula-gudiid-ular, degi, bela napneg-naidgi an-gangued-yeerdakleged mag-dakleged-ular,
NUM 14:22 an bega soged: ‘We-dulemar Egiptoʼgi, degi, nega-dulesulidgangi an-ibmar-imaksad-daksamaladi, degine, an-gangued-yeerdakleged daksamarbalidi, bipisaale wargwensaale yar-an-ega-ukoye-sogsad dakosurmalad. Amar bali-bali nega-dulesulidganba an-wilubdakdani gusmalad, an-sogedba ibmar imaksasurmalad.
NUM 14:23 Amar wargwensaale, Canaán-yar-e-babganga-an-ukoye-sogsad dakosurmalad. A-dulemar baisur-an-daksamalad. Degisoggu, wargwensaale a-yar gwen dakosurmalad.
NUM 14:24 ” ’Ar an-mai-Calebʼdi, a-dulemaryob gwen binsadisursoggu, anba nanadii guoeye sogsasoggu, yar-argaapidse-doged an imakoed, degi, e-wagan a-yala-egadga-guega, an imakbaloed.
NUM 14:25 Ar emide, Amalec-dulemar, degi, Canaán-dulemar, nebagi bukwamalad. Oibosale, bemar Demar-Ginnidye-nugad-igarba nega-dulesulidganse namalo.’ ”
NUM 14:26 Bab-Jehová Moisésʼga, degi, Aarónʼga sogdebalid:
NUM 14:27 “¿Ar wede sanagwadse dule-isganamar-angi-urwedimalad an baisur-itodii guoe? Israel-dulemar-angi-gwisgudimalad, angi-sunmakdimalad bato an itosad.
NUM 14:28 ”Israel-dulemarga be soge: ‘Bab-Jehová sogye, nue-napira an dula-gudisoggu, ar igi angi sunmaksamala, deyob an bemar-imakoye.
NUM 14:29 Be-muimar we-nega-dulesulidganba omilede gumaloed. Bela bemar birga-dulagwen (20), degi, obine-nika-ebislesmalad (20+) burgwemaloed.
NUM 14:30 Jefone-machi-Calebʼdi, degi, Nun-machi-Josuéʼdi, Canaán-yar-an-bemarga-ukedseye-sogsadse dogmaloed. Bela dule-baigandi bipisaale a-yarse dogosurmalad.
NUM 14:31 ” ’Be, mimmigangi sunmaksamalad: Bila-onogedgi anmar-mimmigan gandikidgi anmargi sulegoye. A-mimmigandi, Canaán-yarse dogmaloed, a-yala dakmaloed. Ar bemardi a-yar baisur-daksamalad.
NUM 14:32 ” ’Ar be-muimardi we-nega-dulesulidganba omilede gumaloed.
NUM 14:33 Bemar-isgusmalad-ular, bemar we-nega-dulesulidgangi bela-burgwemaladse, be-mimmigana birga-dulabo (40) nega-dulesulidganba bipirmakdii gumaloed.
NUM 14:34 ” ’Bemar yar-argaega iba-dulabo (40) bipirmakdii gusmalad. A-iba-ibagwenad, birgagwen-wilub be-mimmiganga guoed. Degisoggu, be-isgusmalad-ular, birga-dulabo (40) nega-dulesulidganba bipirmakdii gumaloed. We-sogleged, ibagwenad, birgagwen-wilubye. Agi bemar wisgumaloed, ani an sabsur-bemar-odurdaknaid.
NUM 14:35 ” ’Ani, an Bab-Jehová gued. Ani an sogsad. Weyob bela dule-isganamar-angi-gwisgudimaladi, an imakoye. We-nega-dulesulidgangine we-dulemala bela bergumaloye, agi bela burgwemaloye.’ ”
NUM 14:36 Canaán-yar-argaega dulemar-Moisésʼse-barmilesgusmaladi, gannar aibilismargua, Moisésʼgi uludgusmalad, degine, Moisésʼgi-urwega bela dulemar-imaksamarbalid. Yar-argaapmaladgi neg-sunnasurye sognonigusmalad.
NUM 14:37 Amardi, Bab-Jehová-asabinni boni-dummagangi burgwismalad.
NUM 14:38 Ar Nun-machi-Josuéʼdi, degi, Jefone-machi-Calebʼdi, dulemar-Canaán-yar-argaapmaladba burgwissurmalad.
NUM 14:39 Moisés, Israel-dulemarga we-ibmar-gusad-sogsagua, bela Israel-dulemar nue-bukib itosmalad.
NUM 14:40 Israel-dulemar wakudaryalaba gwichigusmalad, yalaganba nakwidmalad. A-dulemala sokarmalad: —Anmar, inso nue Bab-Jehováʼgi nosmalad. Degisoggu, Bab-Jehová-yar-anmarga-ukoye-sogsadse anmar nae. A-yar anmar sunamala.
NUM 14:41 Moisés Israel-dulemar-abin sogded: —¿Ibiga bemar Bab-Jehová-igar-uksadba ibsassurmala? Weyob bemar ibmar-imaksokarmaladi, bemarga igarga guosurmalad.
NUM 14:42 Melle be namar. Ar Bab-Jehová bemarba bar gudisursoggu, bemar be-isdarmaladse galakumaloed.
NUM 14:43 Ar Amalec-dulemar, degi, Canaán-dulemar bemar-idu bukwamalad. Amarse bemar galakumaloed. Bemar Bab-Jehováʼba yapa ibmar-imakgussoggu, Bab-Jehová bemarba gudiosulid.
NUM 14:44 Ar Bab-Jehová-Dulemarbo-Igar-Mesisad-Ulu, degi, Moisés, Israel-dulemar-danar-danar-neg-ambikuedgi gwen bangussurmar-inigwele, Israel-dulemardi aka yala-birse nakwidmalad.
NUM 14:45 Geb degidgine, Amalec-dulemar, degine, Canaán-dulemar-a-yargi-bukwamaladi, bila-onogega Israel-dulemar-abin ainiarmalad. Amala Israel-dulemargi nakwismalad. Geb Horma-neggweburse Israel-sordamar-baregichamalad.
NUM 15:1 Bab-Jehová Moisésʼga sunmakded, ega sogded:
NUM 15:2 “Israel-dulemarga be sunmak, ega be soge: ‘Canaán-yar-Bab-Jehová-bega-uksokalidse bemar dogdemalale, egi, bemar megidmalale,
NUM 15:3 agi, bemar Bab-Jehováʼga moli-bebe-nikaddibe, igi, sibad-wawaaddibe, ogumakar-ukye binsaarmalale, na be ukoed. Igi-barsundibe, ar na be Bab-Jehováʼga-sogsadba, we-ibmar-an-ukedseye, a-ular, na be ukbidibe, na be ukoed. Igi-barsundibe, be-itolegedba Bab-Jehováʼga-ibmar-ukbiedba-ukbidibe, na be ukoed. Igi-barsundibe, iba-itoakwaa-onolegedgi na be ibmar-ukbiedba-ukbidibe, na be ukoed. We-ibmar-ogumaklegar-uklegedde Bab-Jehová, yeer-yapanne itodaed.
NUM 15:4 ” ’Ar dule Bab-Jehováʼga ibmar-ukbiele, napi-ibmar-baid ega ukega sedabaloed, nibiratar-mergu madubur-bur-nued sedagoed. A-madubur be omukuoed. Geb olivo-e-gwallu bute-warbo eba be oburoed.
NUM 15:5 Sibad-wawaad-wargwen ogumakar-ukleged-iliba, igi ibmar-negabar-ogumaklegodibe, igi bela ogumaklegodibe, a-iliba, vino-bute-warbo egi be eogoed.
NUM 15:6 ” ’Sibad-wawaad-machered-iliba, Bab-Dummadga be ukoed, madubur-bur-nued nibirbaa olivo-e-gwalluba oburar be omukoed.
NUM 15:7 Vino bute-walatar egi eolegoed. We-ibmarmar Bab-Jehováʼga ogumakar be ukoed. Ar Bab-Jehová yeer-yapanne itodaed.
NUM 15:8 ” ’Dule Bab-Jehováʼga ibmar-ukbiele, sunna uked: Moli-bebe-nikad sapingwagwa bela-ogumakardibe, igi abala-ogumakar Bab-Jehováʼga be ukodibe, igi na be ibmar-ukbiedba be ukodibe, igi gwenatigwar-guega ukodibe.
NUM 15:9 We-moli-bebe-nikadbali madubur-bur-nued, nibiratar Bab-Jehováʼga be ukoed. We-be-ukoedi olivo-e-gwalluba galón-negabar eba oburar be omukuoed.
NUM 15:10 Degine, vino galón-negabala egi eolegoed. We-ibmarmar ogumakar-uklegoed, ar Bab-Jehová yeer-yapanne itodaed.
NUM 15:11 Weyobi ibmar-anga-uklegarmalad: Moli-bebe-nikad-sapingwagwaddibe, sibad-wawaad-machereddibe, sibad-wawaad-birgagwen-nikaddibe, sibad-sapingwagwaddibe, bega igar-uklesadba be imakoed.
NUM 15:12 ” ’Ar ibdurgan igi mergudibe, akarsulid. Bega-igar-uklesadba bela be imakoed.
NUM 15:13 Israel-dule-wargwen Bab-Jehováʼga ibmar-ogumakar-ukleged-nue-yeer-yapanned uked-ilibali, Bab-Dummad ega-igar-uksadba bela imakergebed.
NUM 15:14 ” ’Dule-ainebalid bemar-abargi maile, Bab-Jehováʼga ibmar-ogumakar-nue-yeer-yapanned ukbiele, amba bemaryob Bab-Dummadga ibmar-ukmarmogoed. Be-wagan degisadegu deyob imakmogoed.
NUM 15:15 ” ’Bemarga, degi, dule-yar-baidginmalad-bemar-abargi-mamaimaladga, unnila igar-wargwenna maiguoed, ar ade, bemar-neggweburgine unnila igar-wargwenna mai guoed. Bemar-waganga we-igar degisadegu mai guoed. Bemar, degi, dule-yar-baidginmalad Bab-Jehová-asabinni, bela emarbiid.
NUM 15:16 Degisoggu, Israel-dulemarga, degi, dule-yar-baidginmalad-bemar-abargi gudiidmarga, bela unnila igar-gwennagwa an bemarga uksad, a-igarbi bemar nika gumaloed.’ ”
NUM 15:17 Bab-Jehová Moisésʼga sogdebalid:
NUM 15:18 “Israel-dulemarga be sunmake, ega be soge: ‘Bab-Jehová yala-bemarga-uknaidse be dogsamalale,
NUM 15:19 agi ibmar-sanmakmalad bemar gutemalale, Bab-Jehováʼga be ibmar ukmarmogo.
NUM 15:20 Gebe-madu-olo-bur-nued be imakoedi, a-madu-olo Bab-Jehováʼga be ukoed.
NUM 15:21 Wegibi degisadegu be-wagana gebe-madu-olo-imaklegedi Bab-Jehováʼga ukdii gumaloed.’ ”
NUM 15:22 Bab-Jehová Moisésʼga sogdebalid: “Israel-dulemarga be soge: ‘Bab-Jehová-Moisésʼga-Igarmar-Uksad, be, degi, bemar-wagan degisadegu imakdii guoed.
NUM 15:23 Ar bemar, igi be-wagan a-igarmar-wissuli yolediile, a sogleged, we-isguedgi be igar-wissulidba be isgusye.
NUM 15:24 Bela dule-mamaimalad wissulidba isgunonimogale, bela amar moli-bebe-nikad-sapingwagwad ogumakar, nue-yeer-yapanned Bab-Jehováʼga ukoed. Degine, madubur-bur-nued Bab-Jehováʼga ukbaloed, degine, vino egi eobaloed. Geb degine, igar-soglesad-maidba dulemar-mamaid e-isgued-eliega sibad-machered ukbaloed.
NUM 15:25 Geb a-sorbali, dule-irwa-Bab-Dummadse-goled bela Israel-dulemar-isgued-eliega ibmar-ogumakar ukoed. ” ’Geb degidgine, Bab-Jehová we-Israel-dulemar-e-isgusad bergusa dakoed, ar ade, igar-wissulidba isgusadga ibmar-ogumakar anga uksamalad, degi, e-isgued-eliegala ibmar uksamalad.
NUM 15:26 Bela dule-igar-wissulidba-isgusmaladba Bab-Jehová bela Israel-dulemar, degi, dule-ainebarmalad isgussuliyobi dakoed.
NUM 15:27 ” ’Dule-wargwen igar-wissulidba-isgusale, e-isgusad-osulogega Bab-Jehováʼga sibad-ome-birgagwen-nikad ukoed.
NUM 15:28 Dule-irwa-Bab-Dummadse-goled, dule-igar-wissulidba-isgusadga-isgued-osulogega Bab-Jehová-asabin ibmar oburgoed. We-dule Bab-Jehová-ebo igar-nabogoed, geb degine, Bab-Jehová we-dulega isgued obergunonikoed.
NUM 15:29 Israel-duledibe, igi dule-ainebaliddibe, igar-wissulidba isgusmalale, wemarga unnila igar-wargwenna maiguoed.
NUM 15:30 ” ’Ar Israel-duledibe, igi-dule-ainebaliddibe, igar-maid-wisidba-isgusale, Bab-Jehováʼgi nue-isgusdo. We-duledi bemar-abargi oburgwilegoed.
NUM 15:31 Ar we-dule na dukin imakodo, ar ade, Bab-Jehová-ega-ibmar-sogsad baisur-itosad, Bab-Jehová-Igar-Maidgi annasad.’ ”
NUM 15:32 Israel-dulemar nega-dulesulidgangi-gudidimargua, dule-wargwen obunnoged-ibagi sapan-aminai daksamalad.
NUM 15:33 We-dulemar dule-sapan-aminaidi, Moisés-asabin, degi, Aarón-asabin, degine, bela dulemar-neggweburginmalad-asabin senonimalad.
NUM 15:34 Ar wissurmarsoggu, igi a-dule-imakmaloe, esgaryagi metemalad.
NUM 15:35 Geb degine, Bab-Jehová Moisésʼga sogded: “We-dule oburgwilegergebed. Bela dulemar e-danar-danar-ambikued-neg-magaba we-dule akwagi maknamalo.”
NUM 15:36 Degisoggu, ar igi Bab-Jehová Moisésʼga-igar-uksa, deyobi, dulemala, we-dule e-danar-danar-ambikued-neg-magaba sesmalad. Geb we-dule-oburgwedse, akwagi maksamalad.
NUM 15:37 Bab-Jehová Moisésʼga sunmakded, ega sogded:
NUM 15:38 “Israel-dulemarga be sunmako, ega be soge: ‘Bemar dub-suir-akwagiidgi be-morduku durbamakar be imakmalo. Degibi be-wagan degisadegu imakmaloed.
NUM 15:39 We-morduku-durbamakaled be dakarmalale, Bab-Jehová bemarga-Igargan-uksad-insamalaga be-imakoed. Adi, a-Igarganba bemar nanamalagar, melle ibmar-dakedba wargwengi ibmar-imakbiedba nanamalagar, degi, melle Bab-Jehováʼgi be bangumalagar.
NUM 15:40 Adi weyobi, igargan bemar insaoed, degine, a-igargan-sogedba bemar nanaoed. Weyob be imakele, bemar be-Bab-Dummadga dule-swilidikmaladga gumaloed.
NUM 15:41 Ani an Bab-Jehová, be-Bab-Dummad gued. Ani an Egipto-yalagi an bemar-onosad, adi, be-Bab-Dummadga guegar. Ani an bemar-Bab-Dummad-Jehová gued.’ ”
NUM 16:1 We-dulemar Moisésʼgi gwisgusmalad: Leví-wagwa-yarganbalid Coat-wagwa-Izhar-machi-Coréʼye-nugad, Degi, Dad-dummad-Rubénʼgi-danimalad: Eliab-masmala Datán, degi, Abiram. Deginbali, Pelet-machi-Onʼye-nugad.
NUM 16:2 Israel-dule-dummagan-dulataled-ilabo gaka dulabo-gakambe (250) Coréʼba akadmalad, Moisésʼgi gwisgudmarmogad. We-dummagande dulemar-binsaed-dakmalad-yagi bukwamaladid, dule-nue-nug-nikamaladid.
NUM 16:3 We-dulemar bulakwa-ambikunonimargua, Moisésʼgi, degi, Aarónʼgi isdar-sunmakdemalad. Geb Moisésʼga, degi, Aarónʼga sogdemalad: —¡Bemar, wese be ugakmalo! Ar bela Israel-dulemar bato Bab-Jehováʼgadid, degite, ¿ibiga be binsamala, bemarde Bab-Jehová-sordamar-e-dummadye? Bemar a-sordamar-e-dummagansulid.
NUM 16:4 Moisés we-dulemar-degii-ega-sognanaid itosgua, amar-asabin dulluu imakded.
NUM 16:5 Geb degidgine, Moisés Coréʼga, degi, Coréʼba-nanaimaladga sunmakded, amarga sogded: —Oibosale, Bab-Jehová sogoed, ede doa-susa, doa-egadi, doa sunna ese warmakoe. Ar Bab-Jehová na dule-suoedi, a-dulebi, Bab-Jehováʼga nabir-ibmar-uke guoed.
NUM 16:6 Coré, be oibosale, degi, be-sordamar-beba-nanaimalad weyob bemar imakmalo: Bemar sianar sedmalo.
NUM 16:7 A-sianargi bemar soo urbemalo, geb degine, a-sianargi ina-wawadikmalad bemar Bab-Jehová-asabin urbemarbalo. Ar Bab-Jehová doa-dule-suoe, a-dule, dule-irwa-Bab-Dummadse-goledga guoed. ¡Bemar Leví-wagan, emigindi bemar igar-maidgi-obitemalad!
NUM 16:8 Geb degine, Moisés Coréʼga sogdebalid: —¡Leví-wagan, an-ibmar-bemarga-sogoed, nue be an-itomalo!
NUM 16:9 Israel-e-Bab-Dummad Israel-dulemar-abargi bemar-susad, adi, ese-goled-neggi ega be arbamalaga, degine, Israel-dulemarga arbamalagarba, degite, ¿unniguar be itosurmarde?
NUM 16:10 ”Bab-Dummad bemar-abesad, bemar e-walikaa gudigued, degine, bela bemar-Leví-wagan e-walikaa gudigued abesad. ¿Emide, bemar dule-irwa-Bab-Dummadse-goledga gubimarbarde?
NUM 16:11 Degisoggu, be, degi, beba-nanaimalad, bemar Bab-Jehováʼgi-beedse-yolegegala na atosmalad. Ar ¿Aarónʼde doasunna, emide bemar egi gwisgunanaimargu? Degisulirgebed.”
NUM 16:12 Geb degine, Moisés, Datánʼse, degi, Abiramʼse gochad, ese dagmaloye. We-warbogwadde, Eliab-e-masmala-gumalad. Ar wemardi Moisés-abin sogdemalad: —¡Anmar bese naed-sate!
NUM 16:13 ¿Ar unnisur be itode, napa-gadi-ibmar-sanmakedgi, napa-nuedgi be anmar-onosad? Emigindi, we-nega-dulesulidgangi be anmar-oburgwebied. Anmar-dummadga be gubibalid. Adi sulirgebed.
NUM 16:14 Emide yala gadi-ibmar-sanmakedse, amba napa-nuedse yoo be anmar-odoged. Degine, amba yoo be anmarga nainumar, degi, nainu-uva-digarmalad be ukbalid. ¿Bela dulemar aku-atakeyobi beba bipirmakdii be abede? ¡Anmar bese naed, satemala!
NUM 16:15 Geb degine, Moisés nue-uluded, Bab-Jehováʼga sogded: —¡We-dulemar bega ibmar-ukalile, melle annik be suo! Ar wemar-ibe moli-uayasuid wargwensaale an sussulid, degine, an we-dulemar bipisaale gwen oakalossulid.
NUM 16:16 Geb a-sorbali, Moisés Coréʼga sogded: —Oibosale, bedi, degi, be-sordamar Bab-Jehová-asabin nonimaloed. Aarón ase nonimogoed.
NUM 16:17 Bemar wala-walagwengi Bab-Jehová-asabin, be esgoro-gordikid-sianargi ina-wawadikmalad ena sedamaloed. A sogleged, esgoro-gordikid-sianar dulataled-ilabo gaka dulabo-gakambe (250), ina-wawadikmalad-egi-bukwa senonimaloye. Be, degi, Aarón, bemar esgoro-gordikid-sianar sedamarmogoed.
NUM 16:18 Degine, dulemar egad-egad esgoro-gordikid-sianar-ganikidgi, soo urbismalad, degine, ina-wawadikmalad egi eosmarbalid. Geb agine, we-dulemar, Moisésʼmala, degi, Aarónʼmala, Bab-Dummadse-goled-neg-sunna-seleged-e-yawagakgi ambikunonimalad.
NUM 16:19 Coré Bab-Dummadse-goled-neg-sunna-seleged-yawagakgi bela dulemar-Moisésʼgi-yolenanaid oambikusgua, Bab-Jehová-e-gangued-yeerdakleged bela dulemar-bukwadgi magarononikid.
NUM 16:20 Agine, Bab-Jehová Moisésʼga, degi, Aarónʼga sunmakded, amarga sogded:
NUM 16:21 —¡Bemar, we-dulemar-abargi be bangumar! Emiskwaa bela we-dulemar an obelogoed.
NUM 16:22 Moisés Aarón-ebogwa na e-wagar napase dulluu imakdemalad, geb sogdemalad: —Bab-Dummad, ar bee be, bela dulemarga san-burba-dulad-ukmaid. ¿Unnila dule-wargwenbi begi isgusad-ular, bela dulemar sabsur be odurdakode? Sulirgebed.
NUM 16:23 Bab-Jehová Moisésʼga sunmakded, ega sogded:
NUM 16:24 —Bela Israel-dulemarga be sunmake, ega be soge: ‘Bemar Coré-neggi, Datán-neggi, degi, Abiram-neggi bangumar. Melle a-dikarba bemar gudii gumalo.’
NUM 16:25 Moisés, degi, Israel-girmar-dummaganmala, Datán-maidse, degi, Abiram-maidse nadegusmalad.
NUM 16:26 Geb degine, Moisés Israel-dulemarga sogded: —We-dulemar-isgana-neggi bemar bangumar, degine, melle e-ibmar be ebumalo, ar degiile, wemar-isgusmaladba be burgwemarmogoed.
NUM 16:27 Geb degine, Israel-dulemar, Coré-e-neggi, Datán-e-neggi, degi, Abiram-e-neggi bangudmalad. Datanʼdi, degi, Abiramʼdi e-neggi noalid, e-yawagak-asabin, e-omemala, e-mimmiganmala ambikunonimalad.
NUM 16:28 Agine, Moisés dulemarga sogded: —Wegine geb bemar wisguoed, bela-we-ibmarmar-imakega Bab-Jehová an-barmialid. Wargwen an-na-ibmar-imakbiedba an imaksasulid.
NUM 16:29 We-machergan, ar igi-dulemar-baigan-burgwemala deyob burgwemarmogale, we-soglegodo, Bab-Jehová an-barmiarsurye.
NUM 16:30 Ar Bab-Jehová ibmar-dakledisulid-imakele, napa egaele, agi bela we-dulemar, degi, e-ibmarmala obatele, geb bemar wisgumaloed, we-dulemar Bab-Jehováʼgi nue-dummad-nosmarye.
NUM 16:31 Moisés bela-weyob-ibmar-soggwichid-bergusgua, we-dulemar-bukwadgi napa yog-argaar naded.
NUM 16:32 Napa argadegusad, bela Coréʼba-nanaimalad, degi, e-mimmigan, e-negmar, e-ibmarmar, a-napa-yaba babatided.
NUM 16:33 We-dulemar, dula napa-yaba babatidmalad, degi, bela e-ibmar-nikamalad napa-yaba babatidmarmogad. A-napa gannar atidegusad. Weyob we-dulemar Israel-dulemar-abargi bar-daklessurmalad, yoggudegusmalad.
NUM 16:34 Bela Israel-dulemar-dikarba-bukwamalad a-dulemar-binnasur-boe-itoarmargu, duurmakdemalad, sogdemalad: —¡Anmar wakinmala! ¡Abakalegi napa anmar-doarmogale!
NUM 16:35 Dulemar dulataled-ilabo gaka dulabo-gakambe (250) Bab-Jehováʼga ina-wawadikid-obupurmaknanaid, soogi-gummakar burgwismalad, ar ade, Bab-Jehová we-dulemargi soo barmialid.
NUM 16:36 Bab-Jehová Moisésʼga sunmakdebalid, ega sogdebalid:
NUM 16:37 “Eleazarʼga be soge: ‘Ar esgoro-gordikid-sianar bato ibmar-nue-islidikidga an imaksasoggu, esgoro-gordikid-sianar be sue. A-sianargi soo-gabukwad dikasur be mio. We-Eleazarʼde Aarón-e-machid. We-Aarónʼde dule-irwa-Bab-Dummadse-goledid.
NUM 16:38 We-dulemar-isgusmaladba-burgwismalad-e-sianar be sue. A-sianarmala matargwa-matargwa be imakoed, adi, amar Bab-Jehováʼga-ibmar-ogumakar-ukleged-ailagi matak-matak nasikegar. Ar ade, we-sianarmarde bato Bab-Jehováʼga uklesad. We-ibmarmala Israel-dulemar-oinsaega guoed.’ ”
NUM 16:39 Geb degine, dule-irwa-Bab-Dummadse-goled-Eleazar Bab-Jehová-ega-sogsadba we-sianar-esgoro-gordikidgi-sobaledi matargwa-matargwa imaksad. Agine, Bab-Dummadga-ibmar-ogumakar-ukleged-ailagi matak-matak nasiksad.
NUM 16:40 Esgoro-gordikid-sianar-matargwa-matargwa-imaklesadi, Bab-Dummadga-ibmar-ogumakar-ukleged-aila-birgi matak-matak-nasiklesadi, adi, Israel-dulemarga oyogegalad, degi, Aarón-e-wagansurmaladga oyogegalad, degine, dule-ega-igar-uklearsurmaladga oyogegalad melle Bab-Jehováʼga ina-wawadikid ukoye. Ar degisulile, Coré, degi, eba-nanaigusmarmogadyob gumarmogoed, ar igi Bab-Jehová bato iduakwaa Israel-dulemarga Moisésʼba sogsagusa, deyobi gumarmogoed.
NUM 16:41 Deginbali, a-oibosadgine, bela Israel-dulemar gannar Moisésʼgi, degi, Aarónʼgi isdar-sunmakarmarbalid, sogdemalad: “Bemar Bab-Jehová-e-dulemar oburgwismalad.”
NUM 16:42 Ar Israel-dulemar Moisésʼgi, degi, Aarónʼgi sunmakarmarsoggu, a-ular, Moisés, degi, Aarón Bab-Dummad-dulemarbo-ambikued-negse nadmalad. Agine, dakdemalad, Bab-Dummadse-goled-neggi Bab-Jehová-e-gangued-yeerdakleged aidenoniki.
NUM 16:43 Geb Moisés, degi, Aarón dulemar-Bab-Jehováʼbo-ambikued-neg-walik gwisgudapmalad.
NUM 16:44 Agine, Bab-Jehová Moisésʼga sogded:
NUM 16:45 “¡We-dulemar-abargi bemar bangumar, adi, we-dulemar yoga-obeloar an imakegar!” Degidgine, Moisés Aarón-ebo napase dulluu na e-nono imakdemalad.
NUM 16:46 Degine, Moisésʼdi Aarónʼga sogded: “Sianar be sue, Bab-Dummadga-ibmar-ogumakar-ukleged-aila-soo-gasiid egi be urbe. Geb degine, ina-wawadikid agi be eogoed. Geb degidgine, Israel-dulemar-bukwadse gwae be nao, adi, we-dulemar-isgusad-anar we-ina-wawadikid Bab-Dummadga be ukegar. Deyob be imakoed, ar ade, Bab-Jehová bato uluded, dulemar bato nue-nailikguar nanaed.”
NUM 16:47 Aarón, ar igi Moisés-ega-sogsadba sianar sussunnad. Degine, dulemar-bukwad-abarse abarmakded. Israel-dulemar bato yaisuli burgwiarmalad. Agi, Aarón Israel-dulemar-isgusad-anar Bab-Jehováʼga ina-wawadikid ukdesunnad.
NUM 16:48 Geb degine, dule-burgwismalad-mamaid-asabin Aarón gwisgusad. E-yarganbardi, dule-dulamalad bukwad. Geb agine, Bab-Dummad-boni-dummad-barmialid galenonikid.
NUM 16:49 We-boni-dummadgi dulemar miliambe-gakabake gaka dulataled-ilagugle-mergu (14,700) burgwismalad. Coré-e-sordamar Moisésʼgi-yolesmaladba-burgwismaladi, adi, obarlesulid.
NUM 16:50 Geb a-sorbali, boni-dummad galenonigua, Aarón gannar Moisésʼse Bab-Dummad-dulemarbo-ambikued-neg-yawagakse aligusad.
NUM 17:1 Bab-Jehová Moisésʼga sunmakded, ega sogded:
NUM 17:2 “Israel-dulemarga be sunmakna, ega be sogna: ‘Na e-dadgan-dummagan-warambe-gakabogwad-irba (12) gaapoled wargwen-wargwen sedamaloye. Degisoggu, gaapoled warambe-gakabo (12) sedamaloed. Wemar-gaapoledgi dummagan-e-nugmar bela be narmakoed.
NUM 17:3 Dad-dummad-Leví-gaapoledgine, Aarón-nug be narmakoed, ar ade, dadgan-dummagan-iliba gaapoled nikadbi gumaloed.
NUM 17:4 ” ’We-gaapoledmar dulemar-anbo-ambikued-neggi Dulemar-Anbo-Igar-Mesisad-Ulu-asabin, bia an bebo-sunmakdae, agi be mesoed.
NUM 17:5 Gaapoled-aramakoedi, an a-e-ibed an suoed. Adi, Israel-dulemar-begi-gwisguardamaladi, melle bar begi sunmakmalagar.’ ”
NUM 17:6 Degidgine, Moisés Israel-dulemarga sunmaksagu, dadgan-dummagan-warambe-gakabogwad-e-dummagan-iliba gaapoled senonimalad. Degisoggu, gaapoled warambe-gakabo (12) senonimarsundo. We-gaapoledmar-wargwenad, Aarón-gaapoled gued.
NUM 17:7 Agine, Moisés Bab-Jehová-asabin gaapoledmar Bab-Dummad-Israel-Dulemarbo-Igar-Mesisad-Ulu-siid-asabin urbisad.
NUM 17:8 Degidgine, Moisés banedgine Bab-Dummad-Israel-Dulemarbo-Igar-Mesisad-Ulu-siidse-dogdegu, dakalid, Leví-wagwa-Aarón-gaapoled aradik-mai, e-dutumar-nanai, e-madumar nagusnanai, degine, almendroʼmar sanmaksananai daksad.
NUM 17:9 Geb degine, Moisés, bela-Israel-dulemar we-gaapoledmar-dakmalaga, Bab-Jehová-asabin-gaapoled-bukwadi onosad. Amar bela we-gaapoledmar daksamalad, degine, dummagan na egad-egad susmarsunnad.
NUM 17:10 Agine, Bab-Jehová Moisésʼga sogdebalid: “Gannar Aarón-gaapoled an-bemarbo-Igar-Mesisad-Uluse be mesna, adi, dulemar-anba-dasurmaladga wilubga guegar. Adi, a-dulemar melle begi bar urwemalagar. Ar urwemalale, we-dulemar burgwemaloed.”
NUM 17:11 Moisés bela Bab-Jehová-ega-ibmar-sogsadba imaksad.
NUM 17:12 Geb degine, Israel-dulemar Moisésʼga sogdemalad: “¡Anmar bela oitolemaloed! ¡Bela anmar burgwemaloed!
NUM 17:13 Ar dule Bab-Jehová-goled-negse-nadele, burgwemaloed. Degisoggu, bela anmar burgwemarsunnoed.”
NUM 18:1 Bab-Jehová Aarónʼga sogded: “Israel-dulemar anse-goled-neggi isgusale, begi, be-masmalagi, degi, be-dad-dummad-Leví-e-wagangi ataklegoed. Ar bemar dule-irwa-anse-gormalad na be-arbanaidgi isgusardi, begi, degi, be-mimmigangi ataklegoed.
NUM 18:2 ”Aarón, igi, be-masmaladibe, anse-goled-neggi bemar arbananaile, be-gwenadgan-Leví-wagan-baigan bemar-bendakega be imakmalo.
NUM 18:3 Wemala bemar-ibmar-imakedgi be-bendakmaloed, dulemar-anbo-ambikued-neg-akwega gumarbaloed. Degi-inigwele, ibmar-anga-uklesmaladse warmakosurmalad, degine, melle burgwemalaga anga-ibmar-ogumakar-ukleged-ailase warmakosurmarbalid.
NUM 18:4 We-Leví-dulemala bemar-bendakedga gumaloed. Degine, we-Leví-dulemar dulemar-anbo-ambikued-neg dakmaloed, degine, bela agi-ibmar-imaklemalad imakmarbaloed. Degisoggu, agi bemar ibmar-imaknaigusale, Leví-dulemarbi bemarse warmakmaloed, dule-baigandi bemarse warmakosurmalad.
NUM 18:5 ”Unnila bemarbi An-Neg-Islidikid, degine, anga-ibmar-ogumakar-ukleged-aila dakmaloed, adi, melle bar Israel-dulemar sabsur an odurdakegar.
NUM 18:6 Ar Israel-dulemar-abargi, ani an be-gwenadgan-Leví-dulemar an-sunnad an bemarga ukega susad, adi, dulemar-anbo-ambikued-neggi arbamalagar.
NUM 18:7 Unnila be, degine, be-masmalabi dule-irwa-anse-gormaladga gumaloed. A sogleged, anga-ibmar-ogumakar-ukleged-aila, degine, mor-dummad-naid-yarganba-ibmar-bukwad unnila bemarbi dakoye. Ani an bemarga dule-irwa-anse-goled-e-arbaed an uknaid. Ar dule-baid a-ibmar imakye-sogele, adi, oburgwelegoed.”
NUM 18:8 Bab-Jehová Aarónʼga sogdebalid: “Deginbali, dulemar anga-ibmar-ukmaloed-akwega an be-imakbalid. Ar bemar anga ibmar-akwemaladsoggu, bela Israel-dulemar anga ibmar-ukmalad, an bega, degi, be-masmalaga an ukoed. We-igarde degii-maigua sadeguoed.
NUM 18:9 Ibmar-anga-uklegaled-ogumaklessurmalad, begadga gumaloed. Israel-dulemar ibmar-bela-anga-ukmalad, ibmar-gwagmar, isgued-ular ibmar-ukmalad, degi, e-nosad-ular ibmar-ukmalad, bela we-ibmarmala bega, degi, be-masmalaga ibmar-islidikidga guoed.
NUM 18:10 We-ibmarmala bemarga ibmar-islidikid gumalad. Anse-goled-neggi we-ibmarmar be gunmaloed. Bela machergan we-ibmarmar nabir gunmaloed.”
NUM 18:11 Bab-Jehová Aarónʼga sogdebalid: “Deginbali, bela Israel-dulemar anga-ibmar-bana-bana-ukmaloedi, begala, degi, be-masmalagala, be-bunamalagala, we-ibmarmar an ukbaloed. Ar be-neguyagi bela islidik-gudimaladi sunna we-mas gunmarmogoed. We-igala degisadegu maiguoed.
NUM 18:12 ”Deginbali, ibmar-gebe-sanmakmalad, ibmar-bur-nuegan Israel-dulemar anga-senonimaloedi, olivo-gwallu, vino-binid, degi, ibmar-gwagmala, wemar bemarga an ukbaloed.
NUM 18:13 Israel-dulemar na e-nainugi gebe-ibmar-sanmakmalad-anga-sedamaloedi, an bemarga ukbaloed. Ar dule be-neguyagi bela islidik-gudimaladi we-ibmarmala nabir gunmaloed.
NUM 18:14 ”Israel-dulemar bela anga ibmar-ukmaladi, bela an bemarga ukbaloed.”
NUM 18:15 Bab-Jehová Aarónʼga sogdebalid: “Machigwa-gebegwaluleged, ibdurgan-gebe-gwalulemalad-anga-ukleged amba begadga gubaloed. Degi-inigwele, machigwa-gebegwaluleged sunna manigi onolegoed. A-sogleged, a-machigwa-anar mani uklegoye. Ibdurgan-sailagined-swilidiksulid anga-uklegosulid, degisoggu, a-anar mani uklebaloed.
NUM 18:16 Duledibe, igi, ibdurgandibe, nii-wargwen-nikadgi onolegegala, mani-sibu-gwaatar-anse-goled-neggi-mani-aidikued-ebislegedyob a-anar uklegoed. We-manimala, gera-dulagwen (20) nanaed.
NUM 18:17 ”Moli-bebe-nikaddi, sibad-wawaaddi, degi, sibaddi manigi onolegosulid. Ar ade, we-ibmarmardi anga uklegaledid. We-ibmarmar-e-abedi ibmar-ogumakar-ukleged-aila-dikarba be eogoed, degine, we-ibmarmar-gwallumardi ogumakar anga be ukoed. We-gwallumar-gummakaled yeer-yapan an itodaed.
NUM 18:18 Degi-inigwele, we-ibmarmar-e-sandi, e-binasgardi, e-dua-nued-sikiddi be suo, begadga be imako.
NUM 18:19 Israel-dulemar anga bela-ibmar-ukmalad, bela bega, be-masmalaga, be-bunamalaga an uked. Weyob we-igar degimaigu sadeguoed.”
NUM 18:20 Bab-Jehová Aarónʼga sogdebalid: “Israel-dulemar-abargi bega nainumar an ukosulid, ar ade, ani we-Israel-dulemar-abargi an begadga gued.
NUM 18:21 ”Bela Israel-dulemar-ibmar-ambegi-gwensak-anga-ukedi (10%), Leví-dulemarga we-ibmarmala an bela ega ukoed. Ar wemar dulemar-anbo-ambikued-neggi-arbamarsoggu, a-bennukega an ega bela ukoed.
NUM 18:22 Israel-dulemar dulemar-anbo-ambikued-negse warmakosurmalad. Ar warmaksale, angi-isgusadba burgwemaloed.
NUM 18:23 A-ulale, Leví-dulemar dulemar-anbo-ambikued-neggi arbamaloed. Ar Israel-dulemar anse-goled-neggi isgunonimalale, Leví-dulemargi a-isgusad nagunonikoed. We-igar degisadegu dulemar-danimaloedga maigu guoed. Leví-dulemar e-gwenadgan-Israel-dulemar-baiganba yar nikuosurmalad.
NUM 18:24 Ar ade, ani an Leví-dulemarga Israel-dulemar-ambegi-gwensak (10%) anga-ibmar-uklegedi, an uksad. A-ulale, Israel-dulemar-abargine, we-Leví-dulemarga yar an uksasulid.”
NUM 18:25 Bab-Jehová Moisésʼga sogded:
NUM 18:26 “Leví-dulemarga be sunmako, ega be sogo: ‘Israel-dulemar ibmar-ambegi gwensak (10%) anga-ukega senonikile, we-ibmar Bab-Jehová-bega-sogsadba begadga guoed. Bela ibmar-begadga-guoedi ambegi gwensak (10%) Bab-Jehováʼga be ukmogoed.
NUM 18:27 ” ’Igi Israel-dulemar-baigan anga ibmar-gwag-bur-nued-ukmoga, degi, vino-ukmoga, deyobi, bemar anga uksamarmoye soglemogoed.
NUM 18:28 Weyobi, Israel-dulemar be-Bab-Jehováʼga ambegi-gwensak-ibmar-ukedi (10%), a-ibmar be-Bab-Jehováʼga be ukmogoed. Dule-irwa-Bab-Dummadse-goled-Aarónʼye-nugadga be ukoed. We soglegoed, be-Bab-Jehováʼga we-ibmar be uksaye.
NUM 18:29 Bela bega-ibmar-uklegoedi, abala be ibmar-bur-nuegan Bab-Jehováʼga ukoed.’ ”
NUM 18:30 Bab-Jehová Moisésʼga sogdebalid: “Leví-dulemarga be sogbalo: ‘Ibmar-bur-nuegan Bab-Jehováʼga be uksale, soglegoed, na be Bab-Dummadga ibmar-gwag, degi, vino uksaye.
NUM 18:31 We-ibmar-gwabguoedi bia na bemar gunbimala, na be gunmalodo, degine, be-gwenadgan gunmarmogoed. Ar ade, we-ibmargi Bab-Dummad-dulemarbo-ambikued-neggi-be-arbaedgi be bennuklesiid.
NUM 18:32 We-ibmar Bab-Jehováʼga be uksale, a-sorba, a-ibmar-gwabguoedi sunna be gunnoed. Be guchale, be isguosulid. ” ’We-ibmar Bab-Jehová-bega-sogedba be imakoed. Melle be Bab-Jehováʼgi yolemalo. Ar degiile, be burgwemaloed.’ ”
NUM 19:1 Bab-Jehová Moisésʼga, degi, Aarónʼga sunmakded, ega sogded:
NUM 19:2 “We-igala, ani, Bab-Jehová an igar uked. Israel-dulemarga be soge: ‘Moli-bebe-nikad-ome-ginnid, swilidikid, bonigan-nikasulid, degi, bipisaale gwen amba yoo oarbaleged be sedamaloye.
NUM 19:3 We-moli-bebe-nikad dule-irwa-anse-goled Eleazarʼye-nugadga ukmaloed. Eleazar bemar-danar-danar-bukwadgi we-moli-bebe-nikad-ome onogega imakoed. Geb degine, agi a-moli-bebe-nikad-e-nono egwannega imakoed.
NUM 19:4 ” ’Geb degidgine, dule-irwa-anse-goled-Eleazar, e-goo moli-bebe-nikad-abegi owardikuogu, geb agi ilagugle (7) dulemar-anbo-ambikued-neg-e-yawagaksik bomi-bomi imakoed.
NUM 19:5 Deginbali, moli-bebe-nikad e-asabin-ogumakega imakbaloed. We-ibmarmar ogumaklegoed: Moli-bebe-nikad-e-uka, e-san, e-abe, degi, e-saa.
NUM 19:6 Geb degine, dule-irwa-anse-goled, urwar-e-anagan, hisopo-e-ana, degi, mor-ginnid suoed. Geb degine, soo-yagi moli-ogumaknaidba-mesa a-ibmar ogumakoed.
NUM 19:7 ” ’A-sorbali, dule-irwa-anse-goled na e-mor enukoed, degi, obbaloed. Geb a-sorbali, mutikguedse nabir Israel-dulemar-danar-danar-bukwadse naoed. Mutikguedse swilidiksuli-gudii guoed.
NUM 19:8 Amba deyobmogoed, dule-moli-bebe-nikad-ogumaksad, na e-mor enukmogoed, degi, obmogoed. We-dulegi neg-mutikguedse swilidiksulidye soglegoed.
NUM 19:9 ” ’Geb agine, dule-gwensak-igar-maidba-swilidik-gudiid moli-bebe-nikad-ogumaklesad-e-buru weoed. Geb dulemar-danar-danar-bukwad-magaba, neg-swilidikidgi urboed. Agi, Israel-dulemarga sabolegoed. Israel-dulemar we-buru dii-ibmar-urukedgi-ebulegega imakoed. Wede anga isgued-anar uklenaid.
NUM 19:10 Dule-moli-buru-wesad na e-mor enukmogoed. We-dule neg-mutikguedse swilidiksurye soglegoed. Israel-dulemar, degi, Israel-dulesurmaladga weyob ega igar maigu guoed. A-igar degisadegu maigu guoed.’ ” Bab-Jehová Moisésʼga, degi, Aarónʼga sogdebalid: “Israel-dulemarga be soge:
NUM 19:11 ‘Dule-gwensak dule-burgwisad-ebusale, ibagugle (7) Bab-Dummad-asabin swilidiksuli guoed.
NUM 19:12 Dule-burgwisad-ebusad-ibapaagine dii-nued-islidikidgi na san urukoed, degi, ibagugledgine (7), we-dii-nued-islidikidgi na san urukbaloed. Geb agine, san swilidik gunonikoed. We-dule, a-ibapaagine, igi, a-ibagugledgine (7) san uruksulile, swilidiksuli-gudii guoed.
NUM 19:13 ” ’Dule-gwensak dule-burgwisad-ebusad-ular, san uruksulile, we-dule anse-goled-neg oichogoed. A-dule, Israel-dulemar-abargi onolegoed, ar ade, dule-uruked-diigi san uruksasulidba, egi isgued naigu guoed.
NUM 19:14 ” ’Dule-wargwen negyagi burgwisale, weyob ega igar-mai guoed. A-negyase dule dogsale, degine, ar doamala a-negyagi bukwamala, we-dulemala ibagugle (7) Moisés-Igar-Maidba burbar-swilidiksuli gumaloed.
NUM 19:15 Deginbali, bormo argasiidibe, igi, nue-atuarsurdibe, we-bormo swilidiksurye soglegoed.
NUM 19:16 ” ’Dule-gwensak sapurba dule-yamo-oburgwilesad-ebusale, dule-nuedgi-burgwisad ebusale, igidibe, neg-uangindibe, igi dule-burgwaled-e-gar-ebusdibe, we-dule ibagugle (7) swilidiksuli-gudii guoed.
NUM 19:17 ” ’Dule-swilidiksuli-gusad swilidik-guegala, moli-bebe-nikad-dule-ular-ogumaklesad-e-buru bormogi eogoed. Geb, agi dii eogoed.
NUM 19:18 A-sorbali, dule-Moisés-Igar-Maidba-swilidik-gudiid, sapi-bipi-hisopoʼye-nugad suoed. Geb agine, diigi owardikuoed. Geb a-dii neggi bomi-bomi imakoed, bela mesemargi bomi-bomi imakbaloed. Dulemar-negyagi-bukmaladgi, dule-garburba-ebusmaladgi, dule-yamo-oburgwilesad-ebusadgi, dule-neg-uan-ebusadgi bomi-bomi imakbaloed.
NUM 19:19 ” ’Dule-swilidikid dule-isgusadgi ibapaagi, degi, ibagugledgi (7) dii bomi-bomi imakoed. Ibagugledgi (7) Moisés-Igar-Maidba-imaksadgi, dule swilidik-guogua, e-mor enukoed, degi, obbaloed. Geb degine, we-dule neg-mutikguedse burbar swilidiksuli-gudii guoed.
NUM 19:20 Dule-wargwen Moisés-Igar-Maidba san-swilidik-imaked-igar imaksulile, we-dule Israel-dulemar-abargi onolegoed, ar ade, anse-goled-neg oichosad. We-dule dii-dule-swilidik-imaked egi bomi-bomi-imaklessulidba burbar-dule-swilidiksuli gudiid.
NUM 19:21 We-igar degimaigu Israel-dulemarga sadeguoed. ” ’Dule-wargwen, dule-baidgi dii-islidikid bomi-bomi-imakele, na e-mor enukoed. Dule-wargwen a-dii-islidikid-ebusale, isgusye soglegoed. Neg-mutikguedse geb we-dule burbar-swilidik gunonikoed.
NUM 19:22 Dule-isgusad, ar ibi ebugoe, bela a-ibmar swilidiksurye soglemogoed. Degine, dule-gwensak we-dule-swilidiksulid-ebusale, swilidiksurye egi soglemogoed. Geb neg-mutikguedse we-dule burbar-swilidik gunonikoed.’ ”
NUM 20:1 Gebe-nii-onodedgi, bela Israel-dulemar Zin-nega-dulesulidganse warmakdapmalad. Agi, bela dulemar danar-danar Cadesʼye-neg-nugadse ambikudapmalad. Agine, María burgwisad. Agi, diglesbalid.
NUM 20:2 A-yargi, dii satesoggu, dulemar bela Moisésʼgi, degi, Aarónʼgi gwisguarmalad.
NUM 20:3 Bela dulemar Moisésʼgi oimakdemalad, sogdemalad: “Anmar-gwenadgan Bab-Jehová-asabin-burgwismargu, anmar burgwismarmogana gadindo.
NUM 20:4 ¿Ar ibiga Bab-Jehová-e-dulemar we-nega-dulesulidganse be senoniki? ¿Wegi anmar-oburgwega, an-ibdurgan-oburgwega be anmar-senoniki?
NUM 20:5 ¿Ar ibiga Egipto-yargi be anmar-onosa? ¿We-neg-sunnasulidse be anmar-sedagega be anmar-onosa? Wegine, ibmar-gwagmala, higuera-sanmar, uva-sanmar, granado-sanmar sated. Degine, diise-bakale satebalid.”
NUM 20:6 Moisés, Aarón-ebogwa, dule-bukidar-bukwad-abargi nodmalad, Bab-Dummad-dulemarbo-ambikued-neg-e-yawagakse nadmalad. Agine e-wagar napase dulluu imaksamalad. Geb Bab-Jehová-e-gangued-yeerdakleged ese magarononikid.
NUM 20:7 Agi, Bab-Jehová Moisésʼga sogded:
NUM 20:8 “Gaapoled be sue. Be, degi, be-ia-Aarón-bebogwa dulemar-danar be urbemalo. A-dulemar-asabin akwa-dummadga be sunmakmaloed. We-akwa-dummad bega dii ukoed. A-akwa-dummadgi dii ega be onogoed, adi, dulemar, degi, ibdurgan, a-dii gobmalagar.”
NUM 20:9 Geb degine, Moisés Bab-Jehová-ega-sogsadba, gaapoled susad.
NUM 20:10 Moisés Aarón-ebogwa akwa-dummad-asabin Israel-dulemar-danar oambikusad. Geb degine, sogded: “¡Bemar dule-uayasulidamalad, nue itomar! ¿We-akwa-dummadgi anmar bemarga dii-onobi be abemala?”
NUM 20:11 Moisés e-sakwa-onakwidgu, ilabo akwa-dummad e-gaapoledgi bibyosad. Agi, dii binnasuli aryoalid, dule-bukidar-bukmalad, degi, ibdurgan a-dii gobsamalad.
NUM 20:12 Bab-Jehová, Moisésʼga, degi, Aarónʼga, sogded: “Ar ibmar-an-bega-sogsad be bengusmarsoggu, Israel-dulemar-asabin be an-nug-odummossurmarsoggu, we-dulemarga-yar-an-uknaidse we-dulemarba be dogosurmalad.”
NUM 20:13 A-dii, Meriba-dii-aryogwichidye bilenonikid. Ar ade, agine Israel-dulemar Bab-Jehováʼgi oimaksagusmalad. Degine, Bab-Jehová oyosad, ede dule-isligwaledye.
NUM 20:14 Israel-dulemar Cades-neggweburgi bukwamargua, Moisés Edom-dulemar-e-reyse dulemar-gaya-berbemalad-barmisad, weyob ega sogsiid: “Be-gwenadgan-Israel-dulemar, weyob sogmalad: ‘Be nue-wisid igi anmar wiledanimala.
NUM 20:15 Anmar-dadgan Egipto-yarse nadegusmalad, agi yolabirgaba bukwagusmalad. Deunni, Egipto-dulemar anmar-dadgan nue-wiobukwa gusmalad, degi, nue anmar-wiosgusmarmogad.
NUM 20:16 Agine, Bab-Jehováʼse anmar gotegusmalad. Bab-Jehová anmar-itosad. Anmarga na e-baliwitur-barmiargusad. A-baliwitur Egipto-yargi anmar-onosgusad. ” ’Emigindi, anmar Cades-neggweburgi be-yar-abingunaid-dikarba bukwamalad.
NUM 20:17 Anmar bese egised, be-yargi anmar nabimarye. Bemar-ibmarmar-digaledgi, uvaʼmar-digaledgi anmar naosurmalad. Degine, anmar be-diamar-bukwad-e-dii gobosurmarbalid. Anmar unnila igar-dummadbarbi namaloed, bipisaale a-igargi anmar banguosurmalad. Unnila anmar be-yargi nasmaloed.’ ”
NUM 20:18 Edom-e-reydi Israel-dulemar-abin imaksad: “Melle an-yargi naedgi be binsamalo. An-yargi dogeye be sogmalale, an-sordamar begi bila-ononaega an bese barmidoed.”
NUM 20:19 Israel-dulemar abin-sogdemalad: “Unnila anmar igar-dummadbarbi namaloed. Anmar, degi, anmar-ibdurgan be-dii gobele, anmar be-bennukmaloed. Unnila anmar be-yargi nabimalad.”
NUM 20:20 Edom-e-rey Israel-dulemar-abin sogded: “An-yargi be naosurmala.” Edom-e-rey, e-sordaganmala ichesuli Israel-dulemargi bila-onogegala ainiarmalad.
NUM 20:21 Degisoggu, Edom Israel-dulemar-e-yargi-naega imaksasulid. A-ulale, Israel-dulemar a-yar-ebirar nadegusmalad.
NUM 20:22 Bela Israel-dulemala Cades-neggweburgi-bukwa ainiarmalad, Hor-yar-nugadse warmakdapmalad.
NUM 20:23 Bab-Jehová Moisésʼga, degi, Aarónʼga, Horʼye-yar-nugadgi Edom-yar-abingunaidgi sogded:
NUM 20:24 “Aarón burgwesokalid. Israel-dulemarga-yar-an-uksadse dogosulid, ar ade, Meriba-akwasaila-nugadgi diibina-oimakbukwagusmargu, an-ega-igar-uksadba ibmar-imaksasurgusad.
NUM 20:25 Moisés, Aarón be sede, degi, e-machi-Eleazar be sedbali. Hor-yar-birse be nide.
NUM 20:26 Agi Aarón burgoed. Aarón-burgwisale, dule-irwa-anse-goledga-mor-yoidaed ega be ungoed, geb e-machi-Eleazarʼga a-mor be yooed.”
NUM 20:27 Igi Bab-Jehová ega sogsa, deyob Moisés imaksad. Bela Israel-dulemar-wagab, Moisés, Aarón, degi, Eleazar, Hor-yarse nakwidmalad.
NUM 20:28 Geb degine, agi Aarón yar-birgi burgwisad. Moisés, Aarón-Bab-Dummadse-goled-mor-yoleged-yoidi ega esusad. A-mormala, e-machi-Eleazarʼgala yosad. Geb degine, Moisés, Eleazar-ebogwa yar-birgi-gwichi aidearmarsunnad.
NUM 20:29 Israel-dulemar wisguarmargu, Aarón burgwisye, iba-dulagwen-gakambe (30) ega bosmalad.
NUM 21:1 Canaán-dule Neguev-yalagi Arad-neggweburgi-reyga-maigua, wisgusad, Israel-dulemar Atarim-igarba danimarye. Agine abin bila-onogega nadegusad. Geb Arad-e-rey Israel-dulemar-gwenna-gwenna gasa sesagusad.
NUM 21:2 Degidgine, Israel-dulemar Bab-Jehováʼse gotemalad, ise-sogar sogdemalad: “Bab-Jehováʼye, we-dulemargi-nakwega be anmar-imaksale, anmar we-dulemar-e-neggweburmar bela obelogoed.”
NUM 21:3 Bab-Jehová Israel-dulemar-ese-gochadi itosad. Degine, Israel-dulemar Canaán-dulemargi-nakwega imaksad. Israel-dulemar bela Canaán-dulemar-ogilogega imaksad, degine, e-neggweburmar bela osulogega imaksabalid. A-ulale, a-yar Hormaʼye onugsasmalad. Ar ade, Horma sogleged: “Bela obelolealedye.”
NUM 21:4 Geb degine, Israel-dulemar Hor-yargi bangudmalad, Edom-dulemar-bukwad-ebirar-namalaga, Demar-Ginnidye-nugad-igarba nadmalad. Dulemar igarba-nadapmargua, surbinsa-itoarmalad.
NUM 21:5 Agi, Bab-Dummadgi, degi, Moisésʼgi sunnasur sunmakarmalad: “¿We-nega-dulesulidganba be anmar-oburgwega, Egipto-yargi-bukwa be an-niarmala? Ar weginde, mas sated, degi, dii satebalid, deginbali, anmar budar mas-isgana gungusmalad.”
NUM 21:6 Geb degidgine, Bab-Jehová dulemargi naibe-nuegan barmialid. A-ulale, Israel-dulemar-bukidar naibegi-warmaksadba burgwismalad.
NUM 21:7 Geb degine, Israel-dulemar Moisésʼse nadegusmalad, ega sogdapmalad: “Anmar begi, degi, Bab-Jehováʼgi sunmaksad-ular, anmar nue-isgusmalad. Bab-Jehováʼse wilesakwaa be egise, we-naibemar anmarga osuloye.” Moisés Bab-Jehováʼse dulemar-ular goted,
NUM 21:8 Degine, Bab-Jehová Moisés-abin sogded: “Naibe be sobe. A-naibe suar-dukugi be nasiko. Ar doa-dule naibegi warmaksale, we-naibe-suargi-naidse-atakdele, durguoed, gwen burgosulid.”
NUM 21:9 Agi, Moisés esgoro-gordikidgi naibe-sobsad, degine, suar-dukugi nasiksad. Dulemar naibe-nuedgi warmasdibe, suar-dukugi-naibe-sobar-naidgi atakdedaed, degidbali, burgwedasulid.
NUM 21:10 Israel-dulemar nadegusmarbalid, Obotʼye-neg-nugadse modapmalad.
NUM 21:11 Geb degine, Obotʼgi nadmarbalid, Moab-dad-nakwedsik nega-dulesulidgan-naidgi, Ije-Abarimʼye-neg-nugadgi danar-danar ambikudapmalad.
NUM 21:12 Agi-bukwa, Israel-dulemar nadegusmarbalid, Zered-nebagi danar-danar ambikudapmarbalid.
NUM 21:13 Agi-bukwa nadmarbalid, Arnón-diwar-obakar danar-danar ambikudapmalad. We-diwar nega-dulesulidganba maid. Arnón-diwar Amorreo-dulemar-e-yar, Moab-dulemar-ebo-yar-abingunaidga maid.
NUM 21:14 A-ulale, Bab-Jehová-bila-onoged-e-gardagi sogmaid: “Anmar Demar-Ginnidgi nasad, degine, Arnón-diangangi nasbalid.
NUM 21:15 Diangi diimar-aryomamaidba nasbalid. A-diimar, Arʼye-neg-nugadse bergumaid, Moab-yar-abingunaidse warmakmaid.”
NUM 21:16 Agine, nadegusmarbalid, Beerʼse warmakdapmalad. Agi dia-siidgi Bab-Jehová Moisésʼga sogsagusad, Israel-dulemar danar be oambikuye. Agi, Bab-Jehová Israel-dulemarga dii-gobed uksagusad.
NUM 21:17 Agine, Israel-dulemar weyob namaksagusmalad: “¡Dii be aryoge! ¡Diaga namakmala!
NUM 21:18 Dule-dummagan, na e-gaapoledgi, degi, na e-negsemamaid-gaapoledgi, we-dia akwismalad.” Nega-dulesulidgangine bangudmalad, Matanaʼye-neg-nugadse warmakdapmalad.
NUM 21:19 Matanaʼgi nadmalad, Nahalielʼye-neg-nugadse modapmalad. Nahalielʼgi nadmalad, Bamotʼye-neg-nugadse warmakdapmalad.
NUM 21:20 Bamotʼgi nadmalad, Moab-neba-naidse, degi, Pisga-yala-dukuse warmakdapmalad. Agine, nega-dulesulidgan-naid magar dakleged.
NUM 21:21 Israel-dulemar gaya-berbenaega dule-gayaburba-berbemalad Sehónʼse barmisad. Sehónʼde Amorreo-dulemar-e-reyd. Weyob ega garda barmisad:
NUM 21:22 “Anmar be-yargi nasmaloed. Be-ibmarmar-digaledgi, be-uvaʼmar-digaledgi anmar naosurmalad. Degine, dii-gobega bemar-dia anmar ebugosurbalid. Unnila anmar be-yargi-noedse igar-dummadbarbi namaloed.”
NUM 21:23 Degi-inigwele, Sehón, Israel-dulemar e-yargi-naega imaksasulid, aka bur e-sordamar nega-dulesulidganse sealid, Israel-dulemarbo urwegar. Sehón-sordamar, Jahazaʼye-neg-nugadse modapmalad. Agi, Israel-dulemar-ebo uludmalad.
NUM 21:24 Israel-sordamar, Sehón-sordamargi nakwismalad, ei-yar Arnón-diwar-akar, Jaboc-diwarse susmalad. A-sogledo, Amón-dulemar-e-yar-abingunaidse susmarye. Amón-sordamar e-yargi nue-nakulebukmarsoggu, Israel-dulemar agindi dogsasurmalad.
NUM 21:25 Israel-dulemar bela Amorreo-neggweburmar susad. Agi, na ambikudmalad, Hesbón-neggweburgi, degi, bela a-neggweburmar-burwiganagi ambikusmalad.
NUM 21:26 Amorreo-dulemar-e-rey-Sehón Hesbón-neggweburgi maigusad. We-Sehónʼde epenne Moab-e-reyga-gusanad-ebo ulusad. Deunni, Rey-Sehón egi nakwisgua, bela e-yarmar Arnón-diwarse susagusad.
NUM 21:27 A-ulale, dule-sunmakmalad soged: “¡Hesbónʼse dagmar! ¡Gannar Hesbón-neggwebur sobdamar! Gannar Sehón-e-neggwebur nudakdamar.
NUM 21:28 Hesbón-akar soo-gwabunyealid, Sehón-e-neggwebur-akar soo gwichigualid. Ar-neggwebur-Moab-yargi-siid bela ese gummaksad. Arnón-yarse-bakar, bela ese gummaksa gusad.
NUM 21:29 ¡Moab-dulemar, be duledar-wilesmar! Bab-dummad-Quemosʼye-nugad-e-dulemar, ¡Ibiyobi be nue-wilesmala! Be-bab-dummad-Quemos be-masmala-wakinnega imaksad, degi, Amorreo-dulemar-e-rey-Sehónʼse be-bunamala-galegega imaksabalid.
NUM 21:30 ”Anmar bela be-neggweburmar oitosad, Hesbón-akar Dibónʼse bela bergusad. Nofaʼse, degine, Medebaʼse, anmar bela obelosad.”
NUM 21:31 Weyob-gusadba Israel-dulemar Amorreo-yargi ambikusmalad.
NUM 21:32 A-ukinbali, Moisés dulemar-barmisbalid, Jazer-neggwebur arganaegar. Israel-dulemarde we-neggwebur-burwiganagi nakwismalad, degine, agi Amorreo-dulemar-bukmalad onosmarbalid, adi, emar agi ambikumalagar.
NUM 21:33 Israel-dulemar gannar armargua, Basán-yala-igarba nadegusmalad. Rey-Og, degi, e-sordamar belagwapa Edrei-neggweburse Israel-dulemar-abin noarmalad, adi, ebo urwemalagar.
NUM 21:34 Geb degine, Bab-Jehová Moisésʼga sogded: “Melle we-dulemar be dobguo, ar ade, we-sordamargi-nakwega an be-imakoed. Degi, e-ibe be yar subaloed. Igi Amorreo-dulemar-e-rey-Sehón be imaksa, deyobi, Og be imakbaloed. Rey-Sehónʼde Hesbón-neggweburgi negsemaid.”
NUM 21:35 Israel-dulemar deyobi, Og, e-machimala, degi, bela e-dulemar-imaksad, bela amar-oburgwisad. Degine, Israel-dulemar Og-yala na egadga imaksagusmalad.
NUM 22:1 Israel-dulemar e-bukwadgi nade gusmalad. Jordán-diwar-naba Moab-nebagan-naidgi Jericó-neggwebur-asabin danar-danar ambikudapmalad.
NUM 22:2 Zipor-machi-Balac, wisgusad, igi Israel-dulemar Amorreo-dulemar-imaksa.
NUM 22:3 A-ulale, Moab-dulemar bela-bela Israel-dulemar-dobee itoalid. Ar ade, Israel-dulemar sordamar-yeer-mergu nikamalad. Degidbali, Moab-dulemar bela-belad nue dobe itodmalad.
NUM 22:4 A-ulale, Moab-dulemar Madián-girmar-dummaganga sogded: “We-dulemar bela anmar-ibmar-nikadi anmar-ibe obelogoed. Ar igi moli-bebe-nikad-alugwasualed nainu-gagan obelodae, deyobi we-dulemar anmar-ibe ibmar obelogoed.” Deunni, a-ibagangine, Zipor-machi-Balac, Moab-dulemar-e-reyga maid.
NUM 22:5 Geb Balac, Balaamʼbina gochad, ese dagoye. Balaamʼde Beor-e-machid, Petorʼye-neggwebur-nugadgi maid. We-neggweburde Petor-yalagi, Éufrates-diwar-gakaba siid. Rey-Balac weyob Balaamʼga gayaburba barmisad: “Dulemar-Egipto-yalagi-noalidi, yeer mergued. Emide, we-dulemar anmar-yargi ambikunonimalad.
NUM 22:6 Degisoggu, Balaam, anse be dage, we-dulemar be anga ukabsadage. Ar ade, we-dulemar bur anmarba dutusulid. Abakalegi be anmarga-ukabsaoedba anmar we-dulemargi obinnalile. Degiir, geb anmar we-dulemar-anmar-yargi-bukwad onioed. Ar an wisid, ar doagi nued be sunmaksale, we-dulega ibmar nuedbi naddaed. Ar doa-dule be ukabsasale, a-dule iwigusdaed.”
NUM 22:7 Moab-girmar-dummagan, degi, Madián-girmar-dummagan, Balac-Balaamʼga-gayaburba-barminaid Balaamʼse berbenad gusmalad. Degine, Balaamʼga mani sesmarbalid, adi, Israel-dulemar-ukabsaoed bennukegar.
NUM 22:8 Mosmargu, Balaam girmar-dummagan-abin sogded: —Bemar wegi emi-mutik gabmalo. Bab-Jehová-anga-ibmar-sogedba an bega sogmaloed. Degisoggu, Moab-girmar-dummagan Balaam-walik gabismalad.
NUM 22:9 Degidgine, a-mutiki Bab-Dummad Balaamʼse magarononikid, ega sogded: —¿Doa-dulemar be-walik mamai?
NUM 22:10 Balaam, Bab-Dummad-abin sogded: —Moab-e-rey-Zipor-machi-Balacʼga gayaburba-berbemalad an-walik mamaid. Balac anse weyob gayaburba barmialid:
NUM 22:11 ‘Dulemar-Egipto-yalagi-noalidi, yeer merguye. Anse be dagye, we-dulemar be anga ukabsadaye. Abakalegi be anmarga-ukabsaoedba anmar we-dulemargi obinnalirye. Degiir, geb anmar we-dulemar-anmar-yargi-bukwad onioye.’
NUM 22:12 Degi, Bab-Dummad Balaamʼga sogded: —Melle we-dulemarba be nao. Melle Israel-dulemar-ukabsanao. Ar ani an Israel-dulemargi ise-nued binsamaid.
NUM 22:13 Balaam oibosgu, wakudaryala gwisgusad. Geb Balacʼga-gayaburba-berbemaladga sogded: —Be-yarse be namar, Bab-Jehová bemarba nabisur an-abeged.
NUM 22:14 Geb Balacʼga-gayaburba-berbemaladi gannar Balacʼse aligusmalad, ega sognonimalad: —Balaam yapa anmarba dagye.
NUM 22:15 Geb Balac e-dummagan-baigan ichesur barmisad. Idualedba bur nue-nug-nikamaladid.
NUM 22:16 A-dulemar Balaamʼse nade gusmalad, ega sogdapmalad: —Weyob Zipor-machi-Balac soged: ‘An bega wilesakwaa soged, melle dagsuli be guo, anse-daged be sao.
NUM 22:17 An bega ibmar-buged ukoed, degine, ibi be anse egisoe, be-sogedba an bega imakoed. Degisoggu, be anse dage, anga we-dulemar be ukabsadage.’
NUM 22:18 Balaam we-dulemar-abin sogded: —Ar amba anga Balac e-neg-ena olo, degi, mani ukye sogele, gege an, an-Bab-Dummad-Jehová anga-sogsulidba an ibmar saed.
NUM 22:19 Degi-inigwele, emi-mutik bemar an-walik gabmalo. Bab-Jehováʼse an egisgweloed, igi anga sogdabalodibe.
NUM 22:20 A-mutiki Bab-Dummad Balaamʼse magarononikid, ega sogded: “We-dulemar bebina danimarsoggu, eba be nao. Degi-inigwele, ibmar-an-bega-sogedba be imakoed.”
NUM 22:21 Balaam wakudaryalaba gwichigusad, e-moli-uayasuid-ome guakwaa nasiksagu, Balaam Moab-dulemar-girmar-dummaganba nade gusad.
NUM 22:22 Balaam e-moli-uayasuid-ome-birgi-sii nadapgusad, geb ega-arbamalad-warbo eba nadapi gusmogad. Degi-nadapidgine, Bab-Dummad Balaamʼse ulualid. Dulemarba-nadapidba ese uluded. Degisoggu, Bab-Jehová-e-baliwitur Balaam-idu igargi gwisgus imaksad, adi, melle egi naegar.
NUM 22:23 Moli-uayasuid Bab-Jehová-e-baliwitur-daksagu e-idu-igargi-gwichi, degi, guagwar es-suid gani-gwichi, igargi banguded, sapurba doge-doge naded. Geb Balaam moli-bibyoded, adi, gannar ega igarse naegar.
NUM 22:24 Ar Bab-Jehová-e-baliwitur uva-nainumar-abinbela-akwagi-emakaled-imbagi, igar-garagwadba, Balaam-idu gwisgusad.
NUM 22:25 Moli-uayasuid-ome Bab-Jehová-e-baliwitur-daksagua, galugi matak nagusad. Degidba Balaam-e-mali sarwilesad. Agine, Balaam gannar moli-bibyosbalid.
NUM 22:26 Geb Bab-Jehová-e-baliwitur gwae moli-idusa imaksad, igar-bur-garagwadgi idu gwisgudapid. Ar a-igargi geg dule sapiledsik, degi, nuedsik geg naed, ar ade, igar bur garagwad.
NUM 22:27 Moli-uayasuid Bab-Jehová-e-baliwitur-daksagua, napagi megisa imaksad. Agine, Balaam sae-itoded, suargi moli-bibyosad.
NUM 22:28 Degine, Bab-Jehová moli-uayasuid-sunmakega imaksad. Moli Balaamʼga sogded: —¿Igi an be-imaksa be an-dake? Emide, ilapaagus be an-bibyodanikid.
NUM 22:29 Balaam moli-uayasuid-abin sogded: —¡Angi be nue-dodosad! Es-suid an ganikina, emisbinne be anse oburgwilegoendo.
NUM 22:30 Moli-uayasuid Balaam-abin sogdebalid: —¿An be-molisursi? Be an-ibed-gued-akar, emi-ibadse be angi sigdiguad. ¿Emisgwa an be-imaknaidyob an be-imakdii? Balaam moli-abin sogded: —Nabir be soge. Weyob be an-imakdisuli.
NUM 22:31 Geb degine, Bab-Jehová, e-baliwitur-mag-dakega Balaam-imaksad. Balaam, Bab-Jehová-e-baliwitur e-idu igargi es-suidyalaba-gwichi dakalid. Agine, Balaam napase e-wagar-dulluu imaksad.
NUM 22:32 Geb Bab-Jehová-e-baliwitur Balaamʼga sogded: —¿Ibiga be be-moli-uayasuid ilapaa bibyosa? Ar ani an be-abin noalid. Balacʼse-naed an be-abesulid. An be-dakedi, be nadapidi, igar-nuedsulid.
NUM 22:33 Moli-uayasuidi an-daksad. A-ulale, ilapaa angi bangusad. We-moli an-idu bangusulina, bato be anse oburgwilesanad. Molidi, an oburgosulinad.
NUM 22:34 Geb degine, Balaam, Bab-Jehová-e-baliwiturga sogded: —An begi dummad-nosa. Andi be an-idu igargi gwisgudasurye an bied. Degiir nabirdo, gannar an-negse an nasunnodo.
NUM 22:35 Bab-Jehová-e-baliwitur Balaam-abin sogded: —Baisuli, we-dulemarba be nae. Unnila an-bega-ibmar-sogoedbi be sogoed. Weyobi Balaam, Balac-e-dummaganba nadsunnad.
NUM 22:36 Balac itoargu, Balaam ese daniye, Balac, Balaam-abin Moab-neggwebur-gwensakse abindaknad gusad. We-neggweburde Arnón-diwar-gakaba yar-abingunaidgi siid.
NUM 22:37 Mosgua, Balac, Balaamʼga sogded: —An bebina gochagu be anse dagoye, ¿ibiga be anse arsuli? ¿Ibmar-buged an bega ukosurye be binsa?
NUM 22:38 Balaam, Balac-abin sogded: —Emidi bato an bese nonikid. Degi-inigwele, an-ibmar-sogoedi, unnila Bab-Dummad-anga-ibmar-sogoedbi an bega sogoed.
NUM 22:39 Geb agine, Balaam, Balacʼbo Quiriat-Huzotʼye-neg-nugadse nade gusad.
NUM 22:40 Geb degine, Balac, moli-bebe-nikamalad, degi, sibad-wawaadmar oburgwisad. Agine, Balaamʼga, degi, dummagan-Balaam-suapmaladga iba-dummad onosad.
NUM 22:41 A-bangine, Balac, Bamot-Baal-yarse Balaam-sesad. A-yargi-gwichi, Balaam Israel-dulemar-danar-danar-bukwad abar-daksad.
NUM 23:1 Geb degine, Balaam, Balacʼga sogded: “Wegi be anga ibmar-ogumakar-ukleged-aila gwagugle (7) be sobo. Degi, moli-bebe-nikad-machered walagugle (7) be anga guakwaa amio, degine, sibad-wawaad-machered walagugle (7) be anga guakwaa amibalo.”
NUM 23:2 Geb Balac, Balaam-ega-igi-sogsa, deyob imaksad. Balac, Balaam-ebogwa ibmar-ogumakar-ukleged-aila-irba moli-bebe-nikad-wargwen, degine, sibad-wawaad-machered-wargwen ogumakar uksamalad.
NUM 23:3 Degi, Balaam, Balacʼga sogded: “Na be-ibmar-ogumakar-uknaid-nagaba be gwisguo, andi nagwelo, abakalegi an Bab-Jehová abingualile. Anga-ibmar-sogoedi geb an bega sogmogoed.” Geb Balaam dulemarsulidse yar-mullu-siidse nadsunnad.
NUM 23:4 Agine, Bab-Dummad Balaamʼse magarononikid. Geb Balaam, Bab-Dummadga sogded: —Ibmar-ogumakar-ukleged-aila gwagugle (7) an sobsad. Amar-aila-iliba an bega moli-bebe-nikad-machered-wargwen, degi, sibad-wawaad-machered-wargwen ogumakar uksad.
NUM 23:5 Bab-Jehová Balaamʼga gayaburba ukded, ega weyob sogded: —Balac-gwichidse be nae, an bega-ibmar-sogsad ega be sogna.
NUM 23:6 Balaam, Balac-gwichidse nonikid, daknonikid, Balac, Moab-dulemar-dummaganmala e-moli-bebe-nikad-ogumakar-uknaid-nagaba gwichi.
NUM 23:7 Geb Balaam, Bab-Jehová-ega-ibmar-sogsadba sunmakded: “Dad-Ibeler-nakwiardaed-yalagansiki, Aram-yar-akar, Moab-dulemar-e-rey-Balac an-sealid. Ese dagye anga sogsad. Ega Jacob-wagan ukabsadaye, degi, Israel-dulemar ega iwisadaye, anga sogsad.
NUM 23:8 ¿Ande ibiga, dulemar Bab-Dummadse-ukabsalessulid, ukabsadagoe? ¿Ande ibiga, dulemar Bab-Jehová-egi-ichakwa-binsassulidgi ichakwa-binsadagoe?
NUM 23:9 Ar ade, akwasailagan-birgi-gwichid-akar an we-dulemar-dakgwichid, yar-mullugan-birgi-gwichid-akar an we-dulemar-argagwichid. We-dulemarde, bachiki bukwamalad, we-dulemarde, baigan-dulemarba akarsailad.
NUM 23:10 ¿Wede doa Jacob-wagan ebisoe? ¿Israel-dulemar danabake urbilesar, a-gwensakde sunna dule ebichisar, be insae? Suli, ebichissulile. Bitigi we-dule-ibmar-innikii-imakmalad-burgwedyobi, an burgwemogana gadin. Bitigi wemar-gumaloedyobi, an gumogana yeerban.”
NUM 23:11 Balac, deyob-soge Balaam-itosgu, ega sogded: —¿Ibiga weyob be sunmaknai? ¿An-isdarmalad-ukabsaega an be-searsursi? Emide, we-dulemargi ise-nued be sunmaknaid. ¿Ar wede be igidi?
NUM 23:12 Balaam, Balac-abin sogded: —Unnila Bab-Jehová-anga-ibmar-sogedbarbi an sunmakergebed.
NUM 23:13 Geb degine, Balac, Balaamʼga sogded: —An bese wilesakwaa egis, baidsik be anba dage, adi, agi Israel-dulemar-bukwad be dakbaloed. Ar amar bela be dakosulid. Unnila abala be dakoed. Agi-gwichi be anga a-dulemar ukabsaoed.
NUM 23:14 Balac, Pisga-yala-dukuse, Zofim-nainuse Balaam-sesad. Agine, ibmar-ogumakar-ukleged-aila gwagugle (7) sobsad. Geb ibmar-ogumakar-ukleged-aila-irba moli-bebe-nikad-wargwen, degine, sibad-wawaad-machered-wargwen ogumakar uksad.
NUM 23:15 Degi, Balaam, Balacʼga sogded: —Na be-ibmar-ogumakar-uknaid-nagaba be gwisguo, andi Bab-Dummad-ebo abingunagwelo.
NUM 23:16 Agine, Bab-Jehová Balaamʼse magarononikid. Ega gayaburba ukded. Ega weyob sogded: “Balac-gwichidse be nae, an bega-ibmar-sogsad ega be sogna.”
NUM 23:17 Balaam, Balac-gwichidse nonigua, daknonikid, Balac, Moab-dulemar-dummaganmala e-moli-bebe-nikad-ogumakar-uknaid-nagaba gwichi. Agi, Balac, Balaamʼga sogded: —¿Bab-Jehováʼde, igi bega sogsa?
NUM 23:18 Geb Balaam, Bab-Jehová-ega-ibmar-sogsadba sunmakded: “Zipor-machi-Balac, nue be an-itogo.
NUM 23:19 Bab-Dummad dulemaryobsulid, gege dulemaryob gakansaed, Bab-Jehová, e-binsaedi gege ogwaed. Bab-Dummad na-ibmar-sogsadba bela imaked, Na ibmar-imakoye sogsale, imakedsegad. Geg-imaksuli gued.
NUM 23:20 Bab-Jehová anga soged: ‘Israel-dulemargi ise-nued be sunmakoye.’ Degisoggu, ise-nued an egi sunmakergebed, geg an sogsuli gued, sogergebed.
NUM 23:21 ”Bab-Dummad Jacob-wagan-isgusye sogsulid. Bab-Jehová Israel-dulemar nosa gwen daksulid. Ar Israel-dulemarba Bab-Dummad-Jehová gudiid. Israel-dulemar na sogmalad, Bab-Dummad e-reyye.
NUM 23:22 Ar Bab-Dummad Egipto-yargi onosad. Israel-dulemar-e-ganguedi, moli-bebe-nikad-sapurbalidyobid.
NUM 23:23 Ar ade, Jacob-wagan-ukabsaye be sogele, geg be bayoged, Israel-dulemargi sunnasuli-sunmakye be sogele, geg be oakaloged. Ar Jacobʼgi, Israelʼgi soglegoed: ‘¡Bab-Dummad-ega-ibmar-imaksad be dake!’
NUM 23:24 Israel-dulemar, achumiguryob gwichiguardaed, achumiguryob yargan-baasmakardaed. We-achumigurde e-ibmar-oburgwisad-e-san-obelogedse, geb megdaed. E-ibmar-oburgwisad-e-abe gobedse, geb obunnomegdaed.”
NUM 23:25 Geb degine, Balac, Balaamʼga sogded: —Ar be Israel-dulemar-ukabsasursoggu, melle egi be ise-nued sunmakbardo.
NUM 23:26 Geb Balaam, Balac-abin sogded: —Ar ande an bega sogsad, Bab-Jehová-anga-ibmar-sogoedba, an ibmar sogoye.
NUM 23:27 Geb degine, Balac, Balaamʼga sogded: —An bese wilesakwaa egis, anba be dage, neg-baidse an be-sedo. Adi, abakalegi agindi Bab-Dummad sokalile, we-dulemar be ukabsaye.
NUM 23:28 Agi, Balac, Peor-yala-dukuse Balaam-sesad. Agine, nega-dulesulidgan-naid bela mag dakleged.
NUM 23:29 Geb agine, Balaam, Balacʼga sogded: —Wegi be anga ibmar-ogumakar-ukleged-aila gwagugle (7) be sobo. Degi, moli-bebe-nikad-machered walagugle (7) be anga guakwaa amio, degine, sibad-wawaad-machered walagugle (7) be anga guakwaa amibalo.
NUM 23:30 Geb Balac, Balaam-ega-igi-sogsa, deyob imaksad. Balac, Balaam-ebogwa ibmar-ogumakar-ukleged-aila-irba moli-bebe-nikad-wargwen, degine, sibad-wawaad-machered-wargwen ogumakar uksamalad.
NUM 24:1 Balaam dakargu, Bab-Jehová bur Israel-dulemargi-ise-nued-binsaed bur yeer-itodae, Balaam bar idualedyob Bab-Dummadbo abingunadsulid. Ilagwen-nega-dulesulidgansik atakdeguad.
NUM 24:2 Balaam Israel-dulemar-bukwad-dakdegu, dakded, Israel-dulemar na e-dadgan-e-dadganba danar-danar bukwamala. Agine, Bab-Dummad-Burba Balaamʼgi aidenonikid.
NUM 24:3 Geb Balaam, Bab-Jehová-ega-ibmar-sogsadba sunmakded: “Ani, Beor-machi-Balaam-guedi weyob soged, ani, dikasur-ataked-dule-guedi weyob soged.
NUM 24:4 Ani, Bab-Dummad-ibmar-soge-itosad-guedi soged, Bab-Dummad-Bela-Gangued-Nikad ibmar-guoed-oyoged dakedid, dule negoesayob an megisdaedid, negburgan-dakdegudaedid, weyob an soged:
NUM 24:5 ”¡Jacob-dulemar, ibibayobi be-negmar yeerdaklege, Israel-dulemar, ibibayobi be-danar-danar-bukmalad yeerdaklege!
NUM 24:6 Yala-imbaba neba-nuegan-yeerdaklegeyobi, Israel-dulemar-danar-danar-bukwad dakleged. Nainu-nuegan diwar-gakaba-naiyobi, Israel-dulemar-bukwad dakleged. Degi, Bab-Jehová bii-áloeʼye-nugad-digsadyobi Israel-dulemar yeerdakleged. Degine, sapi-urwarmar diwar-gakaba-bubukwayobi yeerdakleged.
NUM 24:7 Israel-dulemar-e-gwidumala dii ena-ena bubukwad, e-ibmar-digarmaladi dii unniguar nikad. Israel-dulemar-e-rey, Rey-Agagʼba bur-dutusulid. Na e-yar-ganikid bur-dummad.
NUM 24:8 ”Ar Bab-Dummad Egipto-yargi onosad. Israel-dulemar-e-ganguedi, moli-bebe-nikad-sapurbalidyobid. Israel-dulemar e-isdarmaladgi nakoed, e-isdarmalad-e-garmar bela bibisgoed. Degine, e-sigumargi e-isdarmalad-naibi-saoed.
NUM 24:9 Israel-dulemar, achumigur-macheredyobi obunnomeged. Achumigur-omeyobi megisdaed. ¿Wede doa ese achaoe? Gege dule ese achae. ¡Dulemar-begi-ise-nued-sunmakmaladi egi nued sunmaklemogoed. Dulemar-be-ukabsamaladdi, ukabsalemogoed!”
NUM 24:10 Geb degidgine, Balac, Balaamʼse uluded. Sae-itogedba e-argan-sarsodgu, Balaamʼga sogded: —An-isdarmalad-ukabsaega an bese gochad. Emide, wese ilapaagus egi be ise-nued sunmakdanikid.
NUM 24:11 Emis-emis be-negse gannar be nae. An bega ibmar-nuegan ukoye sogsanad, ar Bab-Jehová ibmar-nikubisuli be-abesad.
NUM 24:12 Balaam, Balac-abin sogded: —Ar be-dulemar-be-anse-barmismaladga iduakwaa weyob an sogsad:
NUM 24:13 ‘Ar amba anga Balac e-neg-ena olo, degi, mani ukye sogele, gege an, an-Bab-Dummad-Jehová anga-sogsulidba an ibmar saye. Ar Bab-Jehová anga ibmar-sogedbarbi an ibmar saergebye.’
NUM 24:14 Degir nabir. Gannar an-negse an naed-iduale, an bega soggwelo, igi we-dulemar ibagan-danikoedgi be-imakmaloe.
NUM 24:15 Geb Balaam, Bab-Jehová-ega-ibmar-sogsadba sunmakded: “Ani, Beor-machi-Balaam-guedi weyob soged, ani, dikasur-ataked-dule-guedi weyob soged.
NUM 24:16 Ani, Bab-Dummad-ibmar-soge-itosad-guedi soged, Bab-Dummad-Bur-Birigined e-ibmar-wisguega an-imaksadid. Bab-Dummad-Bela-Gangued-Nikad ibmar-guoed-oyoged dakedid, dule negoesayob an megisdaedid, negburgan-dakdegudaedid, weyob an soged.
NUM 24:17 Yoedse-ibmar-guoed an daked, ibmar-guoedi amba dikasulid. An nue-daked, degi-inigwele, itakasulid. Israelʼgi rey-wargwen gwisgudagoed, Jacob-wagan-abargi niisgwayobi nodagoed, We-rey, Moab-uaya-matar-sagamakoed, bela we-reyse Set-wagan-nono-sagamakoed.
NUM 24:18 We-rey, Edom-yala-suoed, e-isdarmalad-Seir-yala ese sulebaloed. Israel-dulemar bur-dule-buleganga gumaloed.
NUM 24:19 Jacob-wagangi rey-wargwen nodagoed. We-rey, dulemar-neggweburgi-oburgwilessurmalad-obelogoed.”
NUM 24:20 Degine, Balaam Amalec-dulemarsik atakded, geb Bab-Jehová-ega-sogsadba weyob sunmakded: “Amalec-dulemarde dulemar-baiganba bur dutusulid, degi-inigwele, obelolegoed.”
NUM 24:21 Geb degi, Balaam Ceneo-dulemar-bukwadsik atakdegua, Bab-Jehová-ega-sogsadba weyob sunmakdebalid: “Be-neggweburde dutusulid. Be-uumar akwasaila-imbaba bukwayobid.
NUM 24:22 Asiria-dulemar e-maiga-guega be-sedmaloed, bemar, Ceneo-dulemar, bela girgumaloed.”
NUM 24:23 Berguegala, Balaam, Bab-Jehová-ega-sogsadba weyob napi sogded: “¡Wilesdakle! Bab-Dummad weyob neg-imakdele, ¿doa san-onogoe? Dule geg san-onoge.
NUM 24:24 Quitim-yar-demar-gakaba ur-dummagande danikoed, Asiria-yala-obelogoed, degi, Heber-yala-obelogoed. Degi-inigwele, Quitim-dulemarde bela bergumarmogoed.”
NUM 24:25 Geb we-ibmar-sogsad-sorbali, Balaam e-negse gannar nade gusad. Balacʼdi e-yarse nade gusmogad.
NUM 25:1 Israel-dulemar Sitimʼye-neg-nugadgi danar-danar bukwamargua, Israel-machergan Moab-dulemar-omeganba galagwensuli nanaarmalad.
NUM 25:2 A-omegande, Israel-dulemarse gollardaed. Adi, e-bab-dummaganga-ibmar-uknaidse emarba dagegar. Israel-dulemarde, a-omegan-e-bab-dummagan-asabin mas-gundamalad, degine, a-nug-odummogega asabin dulluu imakdedamalad.
NUM 25:3 Weyobi Israel-dulemar bab-dummad-Baal-Peor na e-bab-dummadyob dakdemalad. A-ulale, Bab-Jehová Israel-dulemargi bela-belad sae-itoalid.
NUM 25:4 Agi, Bab-Jehová Moisésʼga sogded: “Israel-dulemar-e-girmar-dummagan be gao, neg-ibgi an-asabin gammu-gaar be oburgo, adi, an-sabsur-Israel-dulemargi-urwemaid osulogegar.”
NUM 25:5 Moisés, Israel-dulemarga-igar-nabomaladga sogded: “Be-sapin-dummagan, bab-dummad-Baal-Peorʼba-ibmar-imaksamalad be oburgwemalo.”
NUM 25:6 Deunni Israel-dulemar, Bab-Dummad-dulemarbo-ambikued-neg-yawagak-dogedgi bobukmaladgine, Israel-dule-wargwen e-gwenadganse bingedsulid ome-Madián-dule sedani gusad. Moisés-wagab, degi, bela-dulemar-bukwad-wagab ome-sedani gusad.
NUM 25:7 Eleazar-machi-Finees, deyob daksagua, dulemar-bukwad-abargi gwichibin imaksad, degi, eswar gadebin imaksabalid. Fineesʼde dule-irwa-Bab-Dummadse-goled-Aarón-e-wagwad.
NUM 25:8 Geb Finees a-dule-e-neg-siidse sorba nade gusad. Agine, Finees, machered-omebo-mesa sabangi eswar ogwisdapid. Finees degii imaksagua, Bab-Jehová-e-bela-belad-urwed galesad.
NUM 25:9 Degi-inigwele, a-iduale, mili-dulagwen-gakabakegus (24,000) bonigi bato burgwedanimalad.
NUM 25:10 Geb degine, Bab-Jehová, Moisésʼga sunmakded, ega sogded:
NUM 25:11 “Finees-Eleazar-e-machi, Aarón-e-wagwad. Finees an-bela-belad-Israel-dulemargi-urwed onollomaksad. Ar ade, an-ibmar-bela-bela-imakbiedyobi, we-Fineesʼde bemarga imaksad. A-ulale, bar an Israel-dulemar obelossulid.
NUM 25:12 Degisoggu, Fineesʼga be sogo: ‘Bogidik-anbo-nanaed-igar, an ebo mesoye.’
NUM 25:13 Fineesʼga, degi, e-waganga, dule-irwa-anse-goled-e-igar degisadegu maiguoye. Ar Finees an-ibmar-abegedyob abesmogad, Israel-dulemarga igar-nabossoggu, deyob guoed.”
NUM 25:14 Machered-Israel-dule, ome-Madián-dulebo-oburgwilesadi, Zimriʼye nugad. Zimriʼde Salu-e-machid. We-Zimriʼde Simeón-e-wagan-dummadga gudinad.
NUM 25:15 Ome-Madián-dule-oburgwilesadi Cozbiʼye nugad, Zur-e-sisgwad. Zurʼde Madián-dulemar-e-dummadmogad.
NUM 25:16 Bab-Jehová Moisésʼga sunmakded, ega sogdebalid:
NUM 25:17 “Madián-dulemargi be bila-onona, a-dulemar bela be ogilogo.
NUM 25:18 Ar Madián-dulemarde, gakansaar-be-yardaksamalad. Ar amarde, Baal-Peor be-bab-dummadga-imakega bemar-imaksamalad. Deun, Sitimʼye-neg-nugadgi bemar bukwamargu, boni-dummad Israel-dulemargi an barmiar gusad. Deun, ome-Madián-dule Cozbiʼye-nugad, an oburgwis gusad. Cozbiʼde Madián-dulemar-e-dummad-e-sisgwad.”
NUM 26:1 Bukidar-Israel-dulemar-burgwismalad-sorbali, Bab-Jehová Moisésʼga, degi, Eleazarʼga sunmakded. Eleazarʼde dule-irwa-Bab-Dummadse-goled-Aarón-e-machid. Amarga weyob sogded:
NUM 26:2 “Israel-dulemar birga-dulagwen-nikamalad (20), degi, birga-dulagwen-obine-nikamalad (20+) sunna nabir bila-onomalad be ebismalo. Amar be na e-gwenad-e-gwenadganba ebismaloed.”
NUM 26:3 Moisés, dule-irwa-Bab-Dummadse-goled-Eleazarʼbogwa Jordán-diwar-naba Moab-nebagan-naidgi Jericó-neggwebur-asabin, Israel-dulemarga igar-uksamalad. Ega weyob sogsamalad:
NUM 26:4 “Machergan birga-dulagwen-nikamalad (20), degi, birga-dulagwen-obine-nikamalad (20+) be ebismaloye, igi-Bab-Jehová, Moisésʼga igar-uksagusa, deyob imakmaloye.” Ebichismargu, Israel-machergan Egipto-yalagi-noarmalad wemalad:
NUM 26:5 Israel-machi-sailagined-Rubén, a-wagan e-dadganba-ebislesmalad, wemalad: Enoc-wagan, Falú-wagan,
NUM 26:6 Hezrón-wagan, degi, Carmi-wagan.
NUM 26:7 Wemala dad-dummad-Rubénʼgi danimalad. Mili-dulabo-gakapaa gaka dulataled-ilagugle gaka dulagwen-gakambe (43,730) mergued.
NUM 26:8 Falú unnila machigwa wargwenna nikusad, Eliabʼye nugad.
NUM 26:9 Eliab-masmala, wemalad: Nemuel, Datán, Abiram. We-Datán, Abiram-ebogwa Israel-dulemarga binsaed-dakega gusmaladid. Wemala, Coré, Moisésʼgi, Aarónʼgi, degi, Bab-Jehováʼgi gwisgusgu, Coréʼba akas-gusmalad. Wemarde Bab-Jehováʼgi gwisgusmogad.
NUM 26:10 Degidbali napa-argadgu, Coréʼmala napa-yaba ammurud gusmarmogad. Dulemar-dulataled-ilabo gaka dulabo-gakambe (250) Coréʼba-nanaimalad soogi-gummakar burgwis gusad. Bela Coréʼba-nanaimalad burgwisgusmalad. We-ibmar-gusadi, Israel-dulemar-odurdakega deyob gusad, adi, Bab-Dummad-dobee nanamalagar.
NUM 26:11 Coré-wagandi burgwissurmalad.
NUM 26:12 Dad-dummad-Simeónʼgi-danimalad-ebislesmalad wemalad: Nemuel-wagan, Jamín-wagan, Jaquín-wagan,
NUM 26:13 Zera-wagan, degi, Saúl-wagan.
NUM 26:14 Wemala, dad-dummad-Simeónʼgi danimalad. Mili-dulagwen-gakabo gaka dulataled-ilabo (22,200) mergued.
NUM 26:15 Dad-dummad-Gadʼgi-danimalad-ebislesmalad wemalad: Zefón-wagan, Hagui-wagan, Suni-wagan,
NUM 26:16 Ozni-wagan, Eri-wagan,
NUM 26:17 Arod-wagan, degi, Areli-wagan.
NUM 26:18 Wemala, dad-Gadʼgi danimalad. Mili-dulabo gaka dulataled-ilatar (40,500) mergued.
NUM 26:19 Judá-masmala Canaán-yalagi mimmi-nikussuli-burgwismalad, wemalad: Er, degi, Onán.
NUM 26:20 Dad-dummad-Judáʼgi-danimalad-ebislesmaladi, wemalad: Sela-wagan, Fares-wagan, degi, Zera-wagan.
NUM 26:21 Faresʼgi-danimaladdi, wemalad: Hezrón-wagan, degi, Hamul-wagan.
NUM 26:22 Bela wemala, dad-dummad-Judáʼgi danimalad. Mili-dulapaa-gakambe-gakanergwa gaka dulataled-ilatar (76,500) mergued.
NUM 26:23 Dad-dummad-Isacarʼgi-danimalad-ebislesmalad, wemalad: Tola-wagan, Fúa-wagan,
NUM 26:24 Jasub-wagan, degi, Simrón-wagan.
NUM 26:25 Bela wemala, dad-dummad-Isacarʼgi danimalad. Mili-dulapaa-gakabake gaka dulataled-ilapaa (64,300) mergued.
NUM 26:26 Dad-dummad-Zabulónʼgi-danimalad-ebislemalad, wemalad: Sered-wagan, Elón-wagan, degi, Jahleel-wagan.
NUM 26:27 Bela wemala, dad-dummad-Zabulónʼgi danimalad. Mili-dulapaa gaka dulataled-ilatar (60,500) mergued.
NUM 26:28 Dad-dummad-Joséʼgi-danimalad-ebislesmalad, wemalad: Manasés-wagan, degi, Efraín-wagan.
NUM 26:29 Manasés, wargwenna machi nikusad. A-machigwade, Maquirʼye nugad. Agine, Maquir-wagan danikid. Maquir, wargwenna machi nikusmogad. A-machigwade, Galaadʼye nugad. Agine, Galaad-wagan danikid.
NUM 26:30 Dad-Galaadʼgi-danimalad-ebislesmalad, wemalad: Jezer, degi, e-wagan, Helec-wagan,
NUM 26:31 Asriel-wagan, Siquem-wagan,
NUM 26:32 Semida-wagan, degi, Hefer-wagan.
NUM 26:33 Hefer-machi-Zelofehad masmala-nikussulid, unnila bunamalabi nikusad. A-bunamala-ebislesmalad, wemalad: Maala, Noa, Hogla, Milca, degi, Tirsa.
NUM 26:34 Bela wemala, dad-dummad-Manasésʼgi danimalad. Mili-dulabo-gakambe-gakabo gaka dulataled-ilagugle (52,700) mergued.
NUM 26:35 Dad-dummad-Efraínʼgi-danimalad-ebislesmalad, wemalad: Sutela-wagan, Bequer-wagan, degi, Tahán-wagan.
NUM 26:36 Sutelaʼgi-danimalad, wemalad: Erán-wagan.
NUM 26:37 Bela wemala, dad-dummad-Efraínʼgi danimalad. Mili-dulagwen-gakambe-gakabo gaka dulataled-ilatar (32,500) mergued. Bela wemala sogabobela, dad-dummad-Joséʼgi danimalad.
NUM 26:38 Dad-dummad-Benjamínʼgi-danimalad-ebislesmalad, wemalad: Bela-wagan, Asbel-wagan, Ahiram-wagan,
NUM 26:39 Sufam-wagan, Degi, Hufam-wagan.
NUM 26:40 Belaʼgi-danimalad, wemalad: Ard-wagan, degi, Naamán-wagan.
NUM 26:41 Bela wemala, dad-dummad-Benjamínʼgi danimalad. Mili-dulabo-gakatar gaka dulataled-ilanergwa (45,600) mergued.
NUM 26:42 Dad-dummad-Danʼgi-danimalad-ebislesmalad, wemalad: Súham-wagan.
NUM 26:43 Wemala, dad-dummad-Danʼgi danimalad. Mili-dulapaa-gakabake gaka dulataled-ilabake (64,400) mergued.
NUM 26:44 Dad-dummad-Aserʼgi-danimalad-ebislesmalad, wemalad: Imna-wagan, Isúi-wagan, degi, Bería-wagan.
NUM 26:45 Beríaʼgi-danimalad wemalad: Heber-wagan, degi, Malquiel-wagan.
NUM 26:46 Dad-dummad-Aser, bunagwa wargwen nikusbalid, a-bunagwa Seraʼye nugad.
NUM 26:47 Bela wemala dad-dummad-Aserʼgi danimalad. Mili-dulabo-gakambe-gakapaa gaka dulataled-ilabake (53,400) mergued.
NUM 26:48 Dad-dummad-Neftalíʼgi-danimalad-ebislesmalad, wemalad: Jahzeel-wagan, Guni-wagan,
NUM 26:49 Jezer-wagan, degi, Silem-wagan.
NUM 26:50 Wemala, Dad-dummad-Neftalíʼgi danimalad. Mili-dulabo-gakatar gaka dulataled-ilabake (45,400) mergued.
NUM 26:51 Belamakar-machergan-ebislesmaladi weyob mergued: Mili-dulataled-ilanergwa gaka gwensak gaka dulataled-ilagugle gaka dulagwen-gakambe (601,730) mergued.
NUM 26:52 Bab-Jehová Moisésʼga sunmakded, ega sogded:
NUM 26:53 “Be dulemar-ebichismaladga, na e-dula-mergumaladba we-yarmar be mimioed.
NUM 26:54 Na dadgan-wargwengi dulemar-bur-melu-nikale, amarga yala bur dumma be ukoed. Na dulemar-bur-ichee-nikardi, amarga yala senii be ukoed. Na emar-mergu-ebislesmaladba ega yala be ukoed.
NUM 26:55 Degi-inigwele, wilubdakar ega yarmala be mimioed. Na e-dad-dummaganba-ebislesmaladba yarmar nikumaloed.
NUM 26:56 Dulemar-mergumaladba ega yarmar wilub-daklear uklegoed.”
NUM 26:57 Dad-dummad-Levíʼgi-danimalad-ebislesmalad, wemalad: Gersón-wagan, Coat-wagan, degi, Merari-wagan.
NUM 26:58 Dad-dummad-Leví-wagangi-danimarmogad, wemarmogad: Libni-dulemar, Hebrón-dulemar, Mahli-dulemar, Musi-dulemar, degi, Coré-dulemar. Coat, machi-wargwen-Amramʼye-nugad nikusad.
NUM 26:59 Amramʼde Leví-wagwa-Jocabedʼye-nugad nikusad. Jocabedʼde, Egipto-yalagi gwalulesad. Amram, Jocabedʼbo mimmigan warbaa nikusmalad. Amala, wemalad: Aarón, Moisés, degi, e-bun-María.
NUM 26:60 Aarón masmala-nikunonimogad. Amar, wemalad: Nadab, Abiú, Eleazar, degi, Itamar.
NUM 26:61 Degi-inigwele, Nadab, Abiú-ebogwa Bab-Jehová-ega-igar-uksasulidba soo-isgana Bab-Jehováʼga-ogasmargu, burgwismalad.
NUM 26:62 Wemala Dad-dummad-Levíʼgi danimalad, mili-dulagwen-gakapaa (23,000) mergued. Nii-wargwen-nikamaladse-bakar ebislesad. Wemardi, Israel-dulemar-baiganba bular ebislessulid. Ar we-dulemargardi yar uklessulid.
NUM 26:63 We-nugmala Moisés, dule-irwa-Bab-Dummadse-goled-Eleazarʼbogwa ebichismaladid. Deunni, Jordán-diwar-naba Moab-nebagan-naidgi Jericó-neggwebur-asabin-bukwamargu ebislesad.
NUM 26:64 Degine, Moisés, dule-irwa-Bab-Dummadse-goled-Aarónʼbogwa, Sinaí-nega-dulesulidgangi, gebe-dulemar-ebichisgusad-nugmardi wemar-ebislesmalad-imbagi naisulid.
NUM 26:65 Ar ade, Bab-Jehová sogsagusad: We-dulemala, nega-dulesulidganba burgwemaloye. Unnila Jefone-machi-Calebʼbi, degi, Nun-machi-Josuéʼbi dula-gudii gusad. Baigandi bela burgwisad.
NUM 27:1 Israel-yalagine dule-wargwen maigusad. We-dulede, Zelofehadʼye nugad. We-dule, sisgan walatar nikad. E-sisgana weyob nugmalad: Maala, Noa, Hogla, Milca, degi, Tirsa. We-bunamala, Moisésʼse nonigusad. E-bab-Zelofehadʼde Hefer-machid. Galaad-wagwad. Maquirʼdi e-dad-dummadid. Bela wemala, dad-dummad-Manasésʼgi danikid. Dad-dummad-Manasésʼdi, José-machid.
NUM 27:2 We-bunamala-walataledi Bab-Dummad-dulemarbo-ambikued-neg-yawagakse nonimalad, adi, Moisésʼbo, dule-irwa-Babse-goled-Eleazarʼbo, degi, Israel-girmar-dummaganbo, degine, bela Israel-dulemarbo sunmakegar. Weyob sognonimalad:
NUM 27:3 “Anmar-bab nega-dulesulidganba burgwisad. Anmar-baba Coré-sordamar-Bab-Jehováʼgi-gwisgusmaladba akassulid. Ar anmar-baba na dukin e-isgusadba burgwisad. Degidbali, anmar-baba gwen machimala-nikussulid.
NUM 27:4 ¿Anmar-bab machimala-nikusulidba e-gwenadgan-abargi e-nugde elilegode? Adi sulirgebed. Ar anmar e-sisgan gued. Degisoggu, wis anmar-gilormarba be anmarga nainumar udabi an abemodo.”
NUM 27:5 Moisés, we-bunamala-ega-sogsadi, Bab-Jehováʼse idaknad gusad.
NUM 27:6 Bab-Jehová, Moisés-abin sogded:
NUM 27:7 “Nabir Zelofehad-sisgan bega soged. E-gilormarba ega nainu be uko. Nainu-e-babga-uklegoenad ega be uko.
NUM 27:8 ”Degine, Israel-dulemarga be sogo: ‘Dule-wargwen masmala-sate burgwisale, e-nainu e-sisgwaga uklegoye.
NUM 27:9 Sisgwa-sate burgwisardi, adi, na e-iamargardibe, igi, e-urbamargardibe, e-nainu uklegoye.
NUM 27:10 Ar iamar, igi, urbamar saterdi, adi, e-gilormarga uklegoye.
NUM 27:11 Gilormar satebalirdi, adi, e-gwenadgan bur-walikagwadga nainu uklegoye.’ Weyob Israel-dulemarga igar-mai guoed, ar igi an Moisésʼga igar-uksa, aba deyob imaklegoed.”
NUM 27:12 Bab-Jehová Moisésʼga sogdebalid: “We-Abarim-yalase be nakwena. Agi, Israel-dulemarga an yar-ukesokalid be dakoed.
NUM 27:13 A-yar-daksad-sorbali, be burgoed. Be-sergan-abargi na be megnaoed, igi be-ia-Aarón na e-sergan-abargi mai, deyob be megnamogoed.
NUM 27:14 Ar ade, bemar-bebogwadi Zin-nega-dulesulidganba an-igar-uksadba ibmar imaksasurmalad. Deunni, dulemar dii-abearmargu, binnasuli angi uurmakarmargu, bemar Israel-dulemar-asabin an-nug odummosurmalad.” We-dii-onolesadi, Zin-nega-dulesulidganba Cadesʼgi Meriba-akwasailagi-onolesadid.
NUM 27:15 Geb degine, Moisés Bab-Jehováʼga sogded:
NUM 27:16 “Bab-Jehová, bela be ibmar-dulamalad-e-Bab-Dummadid. Dule-wargwen Israel-dulemarga be onugsae,
NUM 27:17 adi, we-dule, be-dulamar-idugegar. Deyob be imakele, bila-onolear-sogele, be-sordamar-idudii guoed, degine, gannar negse danimar-sogele, sordamar-idudani guoed. Adi, be-dulamar melle sibad-wawaad-e-iduedsulidyob gudii gumalagar.”
NUM 27:18 Bab-Jehová, Moisésʼga sogded: “Nun-machi-Josué be suo. Ar Josué dule-gandikidid, an-sogedba daedid. Israel-dulemar-iduedga-onugsaega egi be-argan be mese.
NUM 27:19 Geb a-sorbali, dule-irwa-Bab-Dummadse-goled-Eleazar-asabin, degi, dulemar-danar-bukwad-asabin be sedoed. Geb amar-asabin dummadga be Josué-onugsaoed.
NUM 27:20 Moisés, be dummad-guedgine gargangued-nika-gudiid-abala, Josuéʼga be ukoed. Adi, bela Israel-dulemar Josué-ibmar-sogedba ibsamalagar.
NUM 27:21 Josué, dule-irwa-Bab-Dummadse-goled-Eleazar-asabin nonikoed, adi, ega Urimʼye-nugadba Bab-Jehováʼse idakegar. Josué-sogedba bela Israel-dulemar ibmar imakmaloed.”
NUM 27:22 Moisés, Bab-Jehová-ega-sogsadba imaksad. Dule-irwa-Bab-Dummadse-goled-Eleazar-asabin, degi, bela dulemar-danar-bukmalad-asabin, Josué-sesad.
NUM 27:23 Moisés, Josué-nonogi e-argan-mesisad. Geb dummadga Josué-onugsasad. Moisés, Bab-Jehová-ega-sogsadba imaksad.
NUM 28:1 Bab-Jehová, Moisésʼga sunmakded, ega sogded:
NUM 28:2 “Israel-dulemarga igar be uko, ega be sogo: ‘Ibagan-maid-sekalaa anga-ibmar-ukleged anga ukoye. We-ibmar-ogumakar-uklegoed-yeer-yapandaedi anga an-masga gued.’ ”
NUM 28:3 Bab-Jehová, Moisésʼga sogdebalid: “Israel-dulemarga be sogbalo: ‘Weyob soogi anga ibmar ogumakar be ukmaloye: Bane-bane degisadegu sibad-wawaad-sapingwagwad-warbo birgagwen-nikamalad bonisulidi be anga ukoye.
NUM 28:4 Wakdar, we-sibad-wawaad-wargwen be oburgoed. Sedodi, baid be oburgwebaloed.
NUM 28:5 Madubur-bur-nued nibiratar, olivo-gwalluba-mesa-omukuar be anga ukoed. We-olivo-gwallu bute-wargwen be ebugoed.
NUM 28:6 Degisadegu, Bab-Jehová Sinaí-yargi na igar-uksadba ega ibmar-ogumakar uklemai guoed. We-ibmarde yeer-yapanne Bab-Jehová itodaed.
NUM 28:7 Sibad-wawaad-irba bute-wargwen vino be ukoed. We-vinoʼde ibmar-ogumakar-ukleged-ailagi be eogoed.
NUM 28:8 Sedogusale, sibad-wawaad-baid ogumakar be anga ukbaloed. Ibmar-gwagba-mesa be anga ukoed. Degine, igi wakdar vino-bute-wargwen aila-birgi-eogega be uksabali, deyob, be sedo ukbaloed. We-ibmarde, Bab-Jehováʼga-ibmar-ogumakar-uklegedid, yeer-yapanne Bab-Jehová itodaed.’ ”
NUM 28:9 Bab-Jehová Moisésʼga sogdebalid: “Israel-dulemarga be soge: ‘Obunnoged-ibagindi, sibad-wawaad-sapingwagwad-warbo, birgagwen-nikamalad, bonisulidi, be anga ogumakar ukoye. Degine, vino egi-eolegega be ukbaloye. Madubur-nued nibirambe (10) olivo-gwalluba-mesa-omukuar anga be ukbaloye.
NUM 28:10 We-ibmar-ogumakar-uklegedi, obunnoged-ibagi uklegedid. Ukinbali, bane-bane ibmar-ogumakar-ukleged be ukbaloed, degine, vino egi-eolegega-ebuleged be ukmarbaloed.’ ”
NUM 28:11 Bab-Jehová Moisésʼga sogdebalid: “Israel-dulemarga be sogo: ‘Gebe-nii-onodedgi, anga moli-bebe-nikad-sapingwagwad-walabo bonisulidi, sibad-wawaad-machered-wargwen bonisulidi, degi, sibad-wawaad-sapingwagwad-birgagwen-nikad bonisulidi, walagugle (7), ogumakar be anga ukoye.
NUM 28:12 Degine, moli-bebe-nikad-iliba, madubur-nued nibirambe-gakatar (15) olivo-gwalluba-omukuar be anga ukoed. Sibad-wawaad-macheredgindi madubur-nued nibirambe (10) olivo-gwalluba-omukuar be anga ukoed.
NUM 28:13 Degine, sibad-wawaad-birgagwen-nikad-ilibardi madubur-nued nibiratar, olivo-gwalluba-omukuar be anga ukoed. We-ibmar-ogumakar-uklegedi, yeer-yapanne Bab-Jehováʼga gued.
NUM 28:14 E-vino-egi-eolegoed be ukbaloed: Moli-bebe-nikamalad-iliba, bute-warbo. Sibad-wawaad-machered-iliba, bute-wargwen-abala. Degi, sibad-wawaad-birgagwen-nikad-iliba, bute-wargwen. Weyobi birgagi nii-iliba ibmar-ogumakar be anga ukoed.
NUM 28:15 ” ’Nii-iliba-ibmar-ukleged-ukinbali, bane-bane-ibmar-ogumakar-ukleged be ukbaloed, degi, e-nis-egi-eoleged be ukbaloed. A-ukinbali, be-Bab-Dummad, bemarga isgued-osulogega sibad-wargwen Bab-Jehováʼga ogumakar be ukbaloed.’ ”
NUM 28:16 Bab-Jehová Moisésʼga sogdebalid: “Israel-dulemarga be sogo: ‘Gebe-nii-onoded-ibambe-gakabakegi Bab-Jehováʼga Oburgwilegoenad-Iba nagudoye.
NUM 28:17 A-bangine, iba-itoakwaa-onoleged be onodoye: Ibagugle (7) madu e-inasuli be gunnoed.
NUM 28:18 Gebe-iba-onodoedgi bela an-nug-odummogega anse nonimaloed. Bipisaale, a-ibagi dule gwen arbaosulid.
NUM 28:19 Bab-Jehováʼga ibmar ogumakar be ukoed. Wemar be ukoed: Moli-bebe-nikad-sapingwagwad, warbo. Sibad-wawaad-machered, wargwen. Degi, sibad-wawaad-birgagwen-nikad, walagugle (7). We-ibdurgan, bela bonisulid be ukoed.
NUM 28:20 Moli-bebe-nikad-irba, madubur-nued nibirambe-gakatar (15), olivo-gwalluba-omukuar be anga ukoed. Sibad-wawaad-machered-irba, madubur-nued nibirambe (10), olivo-gwalluba-omukuar be anga ukoed.
NUM 28:21 Degine, sibad-wawaad-sapingwagwad-birgagwen-nikad-irbardi, madubur-nued nibiratar, olivo-gwalluba-omukuar be anga ukoed.
NUM 28:22 Degine, isgued-ulale, sibad-machered-wargwen ogumakar be ukbaloed, adi, bega isgued-nabogegar.
NUM 28:23 We-ibmarmala, bela be anga, wakdar-ibmar-ogumakar-ukleged-ukine ukoed.
NUM 28:24 ” ’A-ukine, bane-bane ibagugle (7) weyobi masi, degi, ibmar soogi-ogumakar be anga ukoed. Wede, anga ibmar-yeer-yapannedga guedid. Gusgu ibmar-bane-bane-anga-uklegedi, degi, egi-eoleged-uklegedi uklebaloed.
NUM 28:25 Ibagugledgine (7), an-nug-odummogega anse bela bulakwaa nonimaloed. A-ibagine, bipisaale dule gwen arbaosulid.’ ”
NUM 28:26 Bab-Jehová, Moisésʼga sogdebalid: “Israel-dulemarga be sogo: ‘Gebe be ibmar-gwag-weedmalale, a-ibagine, ibmar-gwag-weleged-iba onodoed. A-ibagine, bipisaale dule gwen arbaosulid.
NUM 28:27 A-ibagi, ibmar-ogumakar yeer-yapanne-itogega be anga ukoed. Wemar be anga ukoed: Moli-bebe-nikad-sapingana, walabo. Sibad-wawaad-machered, wargwen. Degi, sibad-wawaad-sapingwagwad-birgagwen-nikamalad, walagugle (7)
NUM 28:28 Ibmar-ogumakar-uklegoed-irba, madubur-nued olivo-gwalluba-omukuar be anga ukoed. Moli-bebe-nikad-sapingwagwad-irba, madubur-nued nibirambe-gakatar (15), be anga ukoed. Degi, sibad-wawaad-machered-irba, madubur-nued nibirambe (10), be anga ukoed.
NUM 28:29 Degine, sibad-wawaad-sapingwagwad-birgagwen-nikamalad-irba, madubur-nued nibiratar, be anga ukoed.
NUM 28:30 Degine, be-isgued-ular bega isgued-nabogega sibad-machered-wargwen ogumakar be ukbaloed.
NUM 28:31 ” ’Bane-bane weyob be anga ukoed, vino-egi-eolemaloedse-bakar, be anga ukoed. Gusgu ibmar-bane-bane-anga-uklegedi, degi, egi-eoleged-uklegedi uklebaloed. Ibdurgan-be-anga-ukoedi, bonisulid be anga ukoed.’ ”
NUM 29:1 Bab-Jehová, Moisésʼga sogdebalid: “Israel-dulemarga be sogo: ‘Nii-walagugled-gebe-iba-onodedgi, bemar Bab-Jehová-nug odummogegala, bulakwaa nonimaloed. A-ibagi, bipisaale dule gwen arbaosulid. A-ibagi Gar-Trompeta-Ogoled-Iba naguoed.
NUM 29:2 ” ’Bab-Jehováʼga ibdurgan yeer-yapanne ogumakar be ukoed. Wemar be ukoed: Moli-bebe-nikad-sapingwagwad, wargwen. Sibad-wawaad-machered, wargwen. Sibad-wawaad-sapingwagwad-birgagwen-nikamalad, walagugle (7). A-ibdurgan bonisulid Bab-Jehováʼga be ukoed.
NUM 29:3 We-ibdurgan-irba, madubur-bur-nued olivo-gwalluba-omukuar be ukoed: Moli-bebe-nikad-sapingwagwad-irba, madubur-nued nibirambe-gakatar (15) olivo-gwalluba-omukuar be ukoed. Sibad-wawaad-machered-irba, madubur-nued nibirambe (10) olivo-gwalluba-omukuar be ukoed.
NUM 29:4 Sibad-wawaad-machered-birgagwen-nikamalad-irba, madubur-nued nibiratar olivo-gwalluba-omukuar be ukoed.
NUM 29:5 Degine, isgued-nabogegala, sibad-machered-wargwen ogumakar be ukbaloed.
NUM 29:6 Nii-irba gusgu ibmar-ogumakar-ukleged-ukine, eba-ibmar-gwag-gusgu-ukleged-ukine, degi, vino-egi-eolegega-ukleged-ukine, wemar Bab-Jehováʼga be ukoed. Gusgu-igar-uklesadba be imakoed. Bela we-ibmar-uklemalad soogi-ogumakar Bab-Jehováʼga be ukoed. Wede Bab-Jehová yeer-yapanne itodaed.’ ”
NUM 29:7 Bab-Jehová, Moisésʼga sogdebalid: “Israel-dulemarga be sogo: ‘Nii-walagugled-ibambegi bela bemar an-nug-odummogegala, anse bulakwaa nonimaloye. A-ibagi, bipisaale dule gwen arbaosulid, degine, bemar mas-gunsuli gudigumaloed.
NUM 29:8 Bab-Jehováʼga ibmar-yeer-yapanned-ukegale, we-ibdurgan be ukoed: Moli-bebe-nikad-sapingwagwad, wargwen, sibad-wawaad-machered, wargwen. Degi, sibad-wawaad-sapingwagwad-birgagwen-nikamalad, walagugle (7). We-ibdurgan bonisulid Bab-Jehováʼga be ukoed.
NUM 29:9 We-ibdurgan-irba, madubur-bur-nued olivo-gwalluba-omukuar be ukoed: Moli-bebe-nikad-sapingwagwad-irba, madubur-nued nibirambe-gakatar (15) olivo-gwalluba-omukuar be ukoed. Sibad-wawaad-machered-irba, madubur-nued nibirambe (10) olivo-gwalluba-omukuar be ukoed.
NUM 29:10 Sibad-wawaad-machered-birgagwen-nikamalad-irba, madubur-nued nibiratar olivo-gwalluba-omukuar be ukoed.
NUM 29:11 Deginbali, gusgu ibmar-ogumakar-ukleged-ukine, gusgu ibmar-gwag-ukleged-ukine, gusgu vino-egi-eoleged-ukleged-ukine, isgued-nabogegala, sibad-machered-wargwen ogumakar be ukbaloed.’ ”
NUM 29:12 Bab-Jehová Moisésʼga sogdebalid: “Israel-dulemarga be sogo: ‘Nii-walagugled-ibambe-gakaatargine bela bemar an-nug-odummogegala, anse bulakwaa nonimaloye. A-ibagi, bipisaale dule gwen arbaosulid. Degine, Bab-Jehováʼga ibagugle (7) iba-itoakwaa-onoleged be onogoed.
NUM 29:13 Bab-Jehováʼga ibmar-yeer-yapanned-ukegala, we-ibdurgan be ukoed: Moli-bebe-nikad-sapingana, warambe-gakapaa (13), sibad-wawaad-machered, warbo. Degi, sibad-wawaad-sapingwagwad-birgagwen-nikamalad, warambe-gakabake (14). We-ibdurgan bonisulid Bab-Jehováʼga be ukoed.
NUM 29:14 We-ibdurgan-irba, madubur-bur-nued olivo-gwalluba-omukuar be ukoed: Moli-bebe-nikad-sapingwagwad-irba, madubur-nued nibirambe-gakatar (15) olivo-gwalluba-omukuar be ukoed. Sibad-wawaad-machered-irba, madubur-nued nibirambe (10) olivo-gwalluba-omukuar be ukoed.
NUM 29:15 Sibad-wawaad-machered-birgagwen-nikamalad-irba, madubur-nued nibiratar olivo-gwalluba-omukuar be ukoed.
NUM 29:16 Deginbali, gusgu ibmar-ogumakar-ukleged-ukine, gusgu ibmar-gwag-ukleged-ukine, gusgu vino-egi-eoleged-ukleged-ukine, isgued-nabogegala, sibad-machered-wargwen ogumakar be ukbaloed.
NUM 29:17 ” ’Ibabogwadgine, we-ibdurgan be ukoed: Moli-bebe-nikad-sapingana, warambe-gakabo (12). Sibad-wawaad-machered, warbo. Degi, sibad-wawaad-sapingwagwad-birgagwen-nikamalad, warambe-gakabake (14). We-ibdurgan bonisulid Bab-Jehováʼga be ukoed.
NUM 29:18 Moli-bebe-nikamalad-sapinganaba, sibad-wawaad-macherganba, sibad-wawaad-birgagwen-nikamaladba, gusgu eba-ibmar-gwag-uklemalad, gusgu vino-egi-eoleged-ukleged be ukoed. Gusgu-igar-uklesadba be imakoed.
NUM 29:19 Deginbali, gusgu ibmar-ogumakar-ukleged-ukine, gusgu ibmar-gwag-ukleged-ukine, gusgu vino-egi-eoleged-ukleged-ukine, isgued-nabogegala, sibad-machered-wargwen ogumakar be ukbaloed.
NUM 29:20 ” ’Ibapaagwadgine, we-ibdurgan be ukoed: Moli-bebe-nikad-sapingana, warambe gakagwensak (11). Sibad-wawaad-machered, warbo. Degi, sibad-wawaad-sapingwagwad-birgagwen-nikamalad, warambe-gakabake (14). We-ibdurgan bonisulid Bab-Jehováʼga be ukoed.
NUM 29:21 Moli-bebe-nikamalad-sapinganaba, sibad-wawaad-macherganba, sibad-wawaad-birgagwen-nikamaladba, gusgu eba-ibmar-gwag-uklemalad, gusgu vino-egi-eoleged-ukleged be ukoed. Gusgu-igar-uklesadba be imakoed.
NUM 29:22 Deginbali, gusgu ibmar-ogumakar-ukleged-ukine, gusgu ibmar-gwag-ukleged-ukine, gusgu vino-egi-eoleged-ukleged-ukine, isgued-nabogegala, sibad-machered-wargwen ogumakar be ukbaloed.
NUM 29:23 ” ’Ibabakegwadgine, we-ibdurgan be ukoed: Moli-bebe-nikad-sapingana, warambe (10). Sibad-wawaad-machered, warbo. Degi, sibad-wawaad-sapingwagwad-birgagwen-nikamalad, warambe-gakabake (14). We-ibdurgan bonisulid Bab-Jehováʼga be ukoed.
NUM 29:24 Moli-bebe-nikamalad-sapinganaba, sibad-wawaad-macherganba, sibad-wawaad-birgagwen-nikamaladba, gusgu eba-ibmar-gwag-uklemalad, gusgu vino-egi-eoleged-ukleged be ukoed. Gusgu-igar-uklesadba be imakoed.
NUM 29:25 Deginbali, gusgu ibmar-ogumakar-ukleged-ukine, gusgu ibmar-gwag-ukleged-ukine, gusgu vino-egi-eoleged-ukleged-ukine, isgued-nabogegala, sibad-machered-wargwen ogumakar be ukbaloed.
NUM 29:26 ” ’Ibataledgine, we-ibdurgan be ukoed: Moli-bebe-nikad-sapingana, walabakebak (9). Sibad-wawaad-machered, warbo. Degi, sibad-wawaad-sapingwagwad-birgagwen-nikamalad, warambe-gakabake (14). We-ibdurgan bonisulid Bab-Jehováʼga be ukoed.
NUM 29:27 Moli-bebe-nikamalad-sapinganaba, sibad-wawaad-macherganba, sibad-wawaad-birgagwen-nikamaladba, gusgu eba-ibmar-gwag-uklemalad, gusgu vino-egi-eoleged-ukleged be ukoed. Gusgu-igar-uklesadba be imakoed.
NUM 29:28 Deginbali, gusgu ibmar-ogumakar-ukleged-ukine, gusgu ibmar-gwag-ukleged-ukine, gusgu vino-egi-eoleged-ukleged-ukine, isgued-nabogegala, sibad-machered-wargwen ogumakar be ukbaloed.
NUM 29:29 ” ’Ibanergwadgine (6), we-ibdurgan be ukoed: Moli-bebe-nikad-sapingana, walabaabak (8). Sibad-wawaad-machered, warbo. Degi, sibad-wawaad-sapingwagwad-birgagwen-nikamalad, warambe-gakabake (14). We-ibdurgan bonisulid Bab-Jehováʼga be ukoed.
NUM 29:30 Moli-bebe-nikamalad-sapinganaba, sibad-wawaad-macherganba, sibad-wawaad-birgagwen-nikamaladba, gusgu eba-ibmar-gwag-uklemalad, gusgu vino-egi-eoleged-ukleged be ukoed. Gusgu-igar-uklesadba be imakoed.
NUM 29:31 Deginbali, gusgu ibmar-ogumakar-ukleged-ukine, gusgu ibmar-gwag-ukleged-ukine, gusgu vino-egi-eoleged-ukleged-ukine, isgued-nabogegala, sibad-machered-wargwen ogumakar be ukbaloed.
NUM 29:32 ” ’Ibagugledgine (7), we-ibdurgan be ukoed: Moli-bebe-nikad-sapingana, walagugle (7). Sibad-wawaad-machered, warbo. Degi, sibad-wawaad-sapingwagwad-birgagwen-nikamalad, warambe-gakabake (14). We-ibdurgan bonisulid Bab-Jehováʼga be ukoed.
NUM 29:33 Moli-bebe-nikamalad-sapinganaba, sibad-wawaad-macherganba, sibad-wawaad-birgagwen-nikamaladba, gusgu eba-ibmar-gwag-uklemalad, gusgu vino-egi-eoleged-ukleged be ukoed. Gusgu-igar-uklesadba be imakoed.
NUM 29:34 Deginbali, gusgu ibmar-ogumakar-ukleged-ukine, gusgu ibmar-gwag-ukleged-ukine, gusgu vino-egi-eoleged-ukleged-ukine, isgued-nabogegala, sibad-machered-wargwen ogumakar be ukbaloed.
NUM 29:35 ” ’Ibabaabakgine (8), bela bemar Bab-Jehová-nug-odummogegala, ese bulakwaa nonimaloed. A-ibagi, bipisaale dule gwen arbaosulid.
NUM 29:36 Bab-Jehováʼga ibmar-yeer-yapanned-ukegale, we-ibdurgan be soogi-ogumakar ukoed: Moli-bebe-nikad-sapingwagwad, wargwen. Sibad-wawaad-machered, wargwen. Degi, sibad-wawaad-sapingwagwad-birgagwen-nikamalad, walagugle (7). We-ibdurgan bonisulid Bab-Jehováʼga be ukoed.
NUM 29:37 Moli-bebe-nikad-sapingwagwadba, sibad-wawaad-macheredba, sibad-wawaad-birgagwen-nikamaladba gusgu eba-ibmar-gwag-uklemalad, gusgu vino-egi-eoleged-ukleged be ukoed. Gusgu-igar-uklesadba be imakoed.
NUM 29:38 Deginbali, gusgu ibmar-ogumakar-ukleged-ukine, gusgu ibmar-gwag-ukleged-ukine, gusgu vino-egi-eoleged-ukleged-ukine, isgued-nabogegala, sibad-machered-wargwen ogumakar be ukbaloed.
NUM 29:39 ” ’Bela we-ibmarmala, e-ibagan-maidba Bab-Jehováʼga be ukmaloed. De-ukinbali, bemar Bab-Dummadga-ibmar-ukdii-nanaoye-sogsamalad-ibmar sunna ega be ukmaloed. Degine, na be-itogedba-ibmar-ukbimalad sunna be ukmarbaloed: Ibdurgan-ogumakar-uklegeddibe, ibmar-gwagmardibe, vino-ibmargi-eolemaladdibe, degine, igar-nabogega-ibmar-ukmaladdibe, amar sunna be ukmarbaloed.’ ”
NUM 29:40 Moisés, bela Israel-dulemarga Bab-Jehová-ega-igar-uksad sogsad.
NUM 30:1 Moisés, Israel-dadgan-ambe-gakabogwad-e-dummaganga sogded: “Bab-Jehová weyob bemarga igar ukmalad:
NUM 30:2 ‘Dule-gwensak Bab-Dummadga sogsadibe, sogedba an imakedseye, igi ise-sogar ebo igar-omesisdibe, bipisaale e-ibmar-sogsadi gwen gakansaosulid, sogsadba imakedsegad.
NUM 30:3 ” ’Degi, yagwa-gwensak amba e-bab-neggi-gudiidgi, e-bab-wissuli Bab-Jehováʼga ise-sogar-sogsale, an bega ibmar-imakedseye, igi, ibmarsik ebo-igar-mesisdibe,
NUM 30:4 geb e-bab wisgualile, e-sisgwa deyob sogsaye, degi, Bab-Dummad-ebo igar-mesisye. Ar e-bab akar-sogsulile, bunagwa Bab-Dummadga-ibmar-imakedse-saoye-sogsad bela imakedsegad.
NUM 30:5 ” ’Ar bunagwa-e-bab, e-sisgwa-ibmar-sogsadba naisulile, bunagwa na e-ibmar-sogsad bar-imakosulid. Yog-berguar guoed. Degidbali, Bab-Jehová bunagwaga bar akar sogosulid. Ar ade, bunagwa-e-bab, e-sisgwa-ibmar-sogsadba naisulid.
NUM 30:6 ” ’Ar bunagwa, nue-binsassuli ukurmakar Bab-Dummadga sogsale, deyob an saedseye, igi ibmar an bega imakedseye, Degid-sorba, sui-nikunonikile,
NUM 30:7 e-sui wisgunonikile, e-ome, deyob Bab-Dummadga-ibmar-imakoye sogsaye, e-sui akar itossulile, omegwa Bab-Dummadga-ibmar-imakoye-sogsad imakedse saoed.
NUM 30:8 Ar e-sui, e-ome-ibmar-sogsadba naisulile, e-ome na nue-binsassuli ukurmakar e-ibmar-sogsad, ede imakedseye, bar imakosulid. Yog-berguar guoed. Degidbali, Bab-Jehová omegwaga bar akar sogosulid.
NUM 30:9 ” ’Ome-ei-sui-burgwisaddibe, sui-meteddibe, Bab-Dummadga sogsale, deyob an imakedseye, degi, Bab-Dummad-ebo igar-mesisale, imakedse saoed.
NUM 30:10 ” ’Ome-sui-nikad, Bab-Dummadga sogsale, deyob an imakedseye, igi Bab-Dummadbo ibmarsik ise-sogar igar mesisale,
NUM 30:11 e-sui wisgunonikile, e-ome, deyob Bab-Dummadga-ibmar-imakoye sogsaye, e-sui akar itossulile, omegwa Bab-Dummadga-ibmar-imakoye-sogsad imakedse saoed.
NUM 30:12 Ar e-sui, e-ome-ibmar-sogsadba naisulile, ome Bab-Dummadga-ise-sogar-sogsadi, degi, ebo-ibmarsik-igar-mesisadi, bar imakosulid. Yog-berguar guoed. Degidbali, Bab-Jehová omegwaga bar akar sogosulid. Ar ade, e-sui, e-ome-ibmar-sogsadba naisulid.
NUM 30:13 ” ’Ar machered-sogedba, e-ome-ibmar-imakoye-sogsadi, igi mas-gunsuli-gudii-guoye-sogsadi, sunna imakleged. Degi, machered-sogedba, e-ome-we-ibmar-sogsadi, sunna bergubalid.
NUM 30:14 Ar e-sui, e-ome-ibmar-sogsad-wisile, e-omega akar sogsulile, soglegoed, e-sui, e-ome-ibmar-sogsadba naiye.
NUM 30:15 Ar wisgusad-sorba, e-sui, e-omega sokalile, be-ibmar-sogsad bar be imakosurye. Degidbali, e-macheredgi ataklegoed. Bab-Dummadi, omegi bar atakosulid.’ ”
NUM 30:16 Weyobi, Bab-Jehová, Moisésʼga igar-uksad: Ome e-sui-ebogwa, degi, baba na e-sisgwa-yoo-sui-nikuedbogwa, weyob ega igar mai guoye.
NUM 31:1 Bab-Jehová, Moisésʼga sunmakded, ega sogded:
NUM 31:2 “We-napneggi be naed-iduale, be-sergan-abargi be megnaed-iduale, be-dulemar-nuggine be Madián-dulemargi buged-mai be imakergebed. Geb a-sorbali, be burgoed.”
NUM 31:3 Geb degine, Moisés Israel-dulemarga sogded: “Bemar Madián-dulemargi bila-ononamalaga be-sordamar be guakwa urbemalo. Anmar Bab-Jehová-nuggine, egi buged-mai imakmaloed.
NUM 31:4 Bela Israel-dulemala, na dadgan-ambe-gakabogwad-iliba (12), miligwen-miligwen (1,000-1,000) bila-ononaega sordamar-barmidoed.”
NUM 31:5 Weyobi, Israel-dulemar, na dadgan-ambe-gakabogwad-iliba (12), miligwen-miligwen welesad. Degisoggu, bela miliambe-gakabo-mergu (12,000) bila-ononaega sordamar-amilesad.
NUM 31:6 Moisés, we-sordamarbali dule-irwa-Babse-goled-Eleazar-machi-Finees barmisad. A-Fineesʼde Bab-Dummadse-goled-neggi nog-ebulemalad-semai gusad, degi, gar-trompeta semai gusbalid, adi, bila-onolealir ogolegar.
NUM 31:7 Bab-Jehová-Moisésʼga-sogsadba Israel-sordamar Madián-sordamargi bila-onodmargu, egi nakwismalad, bela ogilosmalad.
NUM 31:8 Israel-sordamar wemar-ogilosad-ukine, es-suidgi Madián-e-reymar-walataled oburgwismarbalid. A-reymarde, wemalad: Evi, Requem, Zur, Hur, degi, Reba. Deginbali, es-suidgi Beor-machi-Balaam oburgwismarbalid.
NUM 31:9 Deginbali, Israel-sordamar Madián-omegan, degi, Madián-mimmigan gasmalad. De-ukinbali, bela e-moli-bebe-nikamalad, e-sibad-wawaadmar, e-sibadmar, e-ibmar-nuegan e-ibe susmarbalid, bela ei searmalad.
NUM 31:10 Degi, Israel-sordamar bela Madián-dulemar-neggweburmar, e-neggwebur-burwiganse-bakar, ogumaksamalad.
NUM 31:11 Bela Madián-dulemar-galesadi, degi, e-ibmar-durgan-e-ibe-sulesadi,
NUM 31:12 bela Moisésʼse, dule-irwa-Bab-Dummadse-goled-Eleazarʼse, degine, bela Israel-dulemarse searmalad. Deunni, Israel-dulemar Jordán-diwar-naba Moab-nebagan-naidgi Jericó-neggwebur-asabin danar-danar bukwamalad.
NUM 31:13 Moisés, dule-irwa-Bab-Dummadse-goled-Eleazar, degi, Israel-dulemar-sapin-dummagan, danar-danar-bukwadgi ainiar gusmalad. Adi, danar-danar-bukwad-magaba sordamar-abindakegar.
NUM 31:14 Moisés, omegan-seledani dakargu, sordamar-idumaladse uluded, sordamar-miligwenad-e-dummaganse (1,000), sordamar-dulataled-e-dummaganse (100) uluded.
NUM 31:15 Ega sogded: “¿Ar ibiga bemar omegan-oburgwissuli?
NUM 31:16 We-omegan, Baal-Peorʼgi Balaam-ega-binsaed-uksadba, Israel-machergan-Bab-Jehováʼgi-isguega imaksamalad. A-ulale, Israel-machergan bukidar burgwisad.”
NUM 31:17 Moisés sogdebalid: “Degisoggu, bela masmala-oburgwemalo, degine, bela omegan-machergan-nikusmalad be oburgwemarbalo.
NUM 31:18 Unnila, omegan-yoo-macherganbo-gabmaladbi be odulomalo, adi, melle oburgwemalo.”
NUM 31:19 Moisés, Israel-sordamarga sogded: “Bemardina, be dule-wargwen-oburgwisale, igi, mui-ebusale, ibagugle (7) dulemar-danar-danar-bukwad-magaba gudii guoed. Ibapaagwadgi, degi, ibagugledgi (7) bemar san-urukmaloed, degi, dulemar-galesmalad san-urukmarmogoed.
NUM 31:20 Deginbali, bela be-mormala, be-ibmar-ukamar, be-sibad-e-absarmar, degi, be-ibmarmar-urgogi-sobarmalad be enukbaloed.”
NUM 31:21 Dule-irwa-Bab-Dummadse-goled-Eleazar, sordamar-bila-onodidanimaladga sogded: “Bab-Jehová Moisésʼga weyob igar-uksad:
NUM 31:22 ‘Olo, mani, esgoro-gordikid, esgoro, esgoro-estañoʼye-nugad, gingwa,
NUM 31:23 degine, bela ibmarmar soo-abin geg-akargumalad, soogi be ogoed. Adi, a-ibmarmar swilidik guoed. Geb degi, ibmar-uruked-diigi be urukbaloed. Ibmarmar soo-abin-gummakdedamaladdi unnila ibmar-uruked-diigi be urukoed.
NUM 31:24 Ibagugledgine (7), bemar, be-mormar enukoed. Geb agi, be swilidik gumaloed. Geb dulemar-danar-danar-bukwadse gannar be dogmaloed.’ ”
NUM 31:25 Bab-Jehová, Moisésʼga sogdebalid:
NUM 31:26 “Dule-irwa-anse-goled-Eleazarʼga, degi, Israel-dule-danar-danar-bukmalad-e-dummaganga ibmar-ebisega be-bendakmarye be sogo. Dulemar-gales-selenonimalad be ebismalo, degi, bela ibdurganmar-gales-selenonimalad ebismarbalo.
NUM 31:27 Geb degine, sordamar-bila-onoapmaladga negabar ibmar be ukoed, Israel-dulemar-baiganga negabar be ukmogoed.
NUM 31:28 Sorda-bila-onoapmaladga-ibmar-uklegoedi, anga be sumogoed. Ibmarmar-dulataled-ilataled-iliba (500) war-wargwen be suoed: Dulemar-gales-selenonikid, moli-bebe-nikad, moli-uayasuid, sibad-wawaad, degi, sibad.
NUM 31:29 We-ibmarmala dule-irwa-anse-goled-Eleazarʼga be ukoed, adi, anga ukegar.
NUM 31:30 ”Baid-negabalad Israel-dulemarga-uklegoedi, anga be subaloed. Ibmarmar-dulabo-gakambegwad-iliba (50) war-wargwen be suoed: Dulemar-gales-selenonikid, moli-bebe-nikad, moli-uayasuid, sibad-wawaad, degi, sibad. Geb we-ibmarmala, Leví-wagan-anse-goled-neggi-arbamaladga be ukoed.”
NUM 31:31 Moisés, dule-irwa-Bab-Dummadse-goled-Eleazarʼbo Bab-Jehová-ega-igar-uksadba imaksamalad.
NUM 31:32 Ibmar-weyob-mergu senonimalad, sordamar-dukin-ibmar-amismaladdi obarilesulid: Sibad-wawaad, mili-dulataled-ilanergwa gaka dulapaa-gakambe-gakatar (675,000).
NUM 31:33 Moli-bebe-nikad, mili-dulapaa-gakambe-gakabo (72,000).
NUM 31:34 Moli-uayasuid, mili-dulapaa gakagwensak (61,000).
NUM 31:35 Degi, yagana-amba-macherganse-gordisulid, mili-dulagwen-gakambe-gakabo (32,000).
NUM 31:36 Sorda-bila-onoapmaladga weyob-mergu we-ibmarmar uklesad: Sibad-wawaad, mili-dulataled-ilapaa gaka dulagwen-gakambe gakagugle gaka dulataled-ilatar (337,500).
NUM 31:37 Geb Bab-Jehováʼga dulataled-ilanergwa-gakadulapaa-gakambe-gakatar (675) we-sibad-wawaad uklesmogad.
NUM 31:38 Moli-bebe-nikad, mili-dulagwen-gakambe-gakanergwa (36,000). Geb Bab-Jehováʼga dulapaa-gakambe-gakabo (72) we-moli-bebe-nikad uklesmogad.
NUM 31:39 Moli-uayasuid, mili-dulagwen-gakambe gaka dulataled-ilatar (30,500). Geb Bab-Jehováʼga dulapaa-gakagwensak (61) we-moli-uayasuidmar uklesmogad.
NUM 31:40 Degi, yagana, miliambe-gakanergwa (16,000). Geb Bab-Jehováʼga dulagwen-gakambe-gakabo (32) we-yagana uklesmogad.
NUM 31:41 Moisés, Bab-Jehová-ega-igar-uksadba dule-irwa-Bab-Dummadse-goled-Eleazarʼga ibmarmar-Bab-Jehováʼga-uklegoed uksad.
NUM 31:42 Degi, sordamar-bila-onoapmalad-ibmar-senonimaladi, Moisés negabala Israel-dulemarga uksamogad.
NUM 31:43 Degisoggu, Israel-dulemarga weyob-mergu we-ibmarmar uklesmogad: Sibad-wawaad, mili-dulataled-ilapaa gaka dulagwen-gakambe gakagugle gaka dulataled-ilatar (337,500).
NUM 31:44 Moli-bebe-nikad, mili-dulagwen-gakambe-gakanergwa (36,000).
NUM 31:45 Moli-uayasuid, mili-dulagwen-gakambe gaka dulataled-ilatar (30,500).
NUM 31:46 Degi, yagana, miliambe-gakanergwa (16,000).
NUM 31:47 We-ibmar-Israel-dulemarga-uklesadi, Moisés dulemar-dulabo-gakambegwad-iliba (50) war-wargwen susad. Degi, ibdurgan-dulabo-gakambegwad-iliba (50) war-wargwen susbalid. Bab-Jehová-ega-igar-uksadba imaksad. Geb bela Moisés we-ibmarmala Leví-wagan-Bab-Dummadse-goled-neggi-arbamaladga uksad.
NUM 31:48 Degidgine, sordamar-idumaladi, sordamar-miligwenad-e-dummagana (1,000), sordamar-dulataled-e-dummagana (100), Moisésʼse nonimalad.
NUM 31:49 Ega weyob sognonimalad: “Anmala bega-arbamaladi, anmar na egad-egad sordamar-sediid ebichismalad. Dakleargu, wargwensaale anmar-sordamar bilagi burgwissulid.
NUM 31:50 A-ulale, anmar na ibmar-orbiid-amismaladi Bab-Jehováʼga sedanimalad, adi, anmar-isgued-ular ukegar. A-ibmarmala wemalad: Ormar-sakwagi-nagumalad, ordudmar, olarganmar, oluamar, degi, ormar-baigan.”
NUM 31:51 Degine, Moisés, dule-irwa-Bab-Dummadse-goled-Eleazarʼbo sorda-bila-onomalad-e-dummagan ega-ibmar-orgi-sobarmalad-senonimalad abin susmalad.
NUM 31:52 Sordamar-idumaladi, sordamar-miligwenad-e-dummagana (1,000), sordamar-dulataled-e-dummagana (100) belagwapa Bab-Jehováʼga or-uksamaladi, nibir-dulataled-ilabake gaka dulagwen-aidiku (420) uksamalad.
NUM 31:53 Sorda-bila-onomaladi, na egad-egad wala-walagwen ibmarmar susgusmalad.
NUM 31:54 Moisés, dule-irwa-Bab-Dummadse-goled-Eleazarʼbo sorda-bila-onomalad-e-dummagan ega-or-uksamaladi, Bab-Dummad-dulemarbo-ambikued-negse sesad, adi, Bab-Jehová Israel-dulemar-ibmar-imaksad ebinsaegar.
NUM 32:1 Rubén-wagan, degi, Gad-wagan, moli-bebe-nikmalad ichesuli nikamalad. Amar dakarmalad, Jazer-yala, degi, Galaad-yala, moli-bebe-nikamalad-akwemalaga nega-nuedi.
NUM 32:2 Degisoggu, Gad-wagan, degi, Rubén-wagan, Moisésʼse, dule-irwa-Bab-Dummadse-goled-Eleazarʼse, degi, Israel-dulemar-e-dummaganse nadmalad. Amarga sogdapmalad: —We-neggweburmar napa-nuegan nikananaed:
NUM 32:3 Atarot-neggwebur, Dibón-neggwebur, Jazer-neggwebur, Nimra-neggwebur, Hesbón-neggwebur, Eleale-neggwebur, Sebam-neggwebur, Nebo-neggwebur, degi, Beón-neggwebur.
NUM 32:4 ”Bab-Jehová Israel-dulemarga we-neggwebur-yarmala susad. Emide, we-yarmala moli-bebe-nikamalad-akwed-nueganad. Anmarde bukidar molimar nikad.
NUM 32:5 Degisoggu, be nued itogele, anmarga we-yarmar be udado, adi, anmargadga guegar. Mer Jordán-diwar-obakar-megega be anmar-imake.”
NUM 32:6 Geb Moisés, Gad-wagan-abin, degi, Rubén-wagan-abin sogded: —¿Ar be-gwenadgan bila-ononadmalale, bemardi wegi bemalode? Degisulirgebed.
NUM 32:7 Bemar bilase nasulile, bemar-ular Israel-dulemar-baigan Bab-Jehová-yar-uknaid yapa sunae gudamaloed.
NUM 32:8 Be-babgan deyob imaksamarmogad, deun an Cades-Barnea-akar we-yar-argadagega barmiargu.
NUM 32:9 Escol-nebase warmaksamalad. Gannar aibirismargua, Israel-dulemar-niga egwachagusmalad. Adi, melle Israel-dulemar, Bab-Jehová-ega-yar-uknaidse dognamalagar.
NUM 32:10 A-ibagine, Bab-Jehová ulud gusad, degine, ise-sogar sogsagusad:
NUM 32:11 ‘Abrahamʼga, Isaacʼga, Jacobʼga, yar an ukedsegoye sogsagusad. A-yarse machergan-Egiptoʼgi-noarmalad birga-durgwen-nikamalad (20), degi, birga-dulagwen-obine-nikamaladi (20+), a-yarse dogosurmarye, ar ade, angi bengusmaladdeeye.
NUM 32:12 Unnila Cenezeo-dule-Jefone-machi-Calebʼbi, degi, Nun-machi-Josuéʼbi, we-yarse dogmaloye. Ar wemardi angi bengussurmaladdeeye.’
NUM 32:13 A-ulale, Bab-Jehová Israel-dulemargi ulusgusad, birga-dulabo (40) nega-dulesulidganba gaamakdii imaksad. Degidbali, Israel-dulemar Bab-Jehováʼgi-bengusmaladi nega-dulesulidganba gaamakdimaladgi burgwismalad.
NUM 32:14 ”Emide, bemardemoga, be-serganyob dulemar-isganamalad, amar-sunnaa be damarmogad. ¿Emide bemar, Bab-Jehová-ourwebimarmode?
NUM 32:15 Bemar Bab-Jehováʼgi bangudmalale, nega-dulesulidganba gaamakdii bemar-imakmarmogoed. Bemar-ular Israel-dulemar burgwemaloed.”
NUM 32:16 Geb agine, Gad-wagan, degi, Rubén-wagan gannar Moisésʼse nonimalad, ega weyob sognonimalad: —Anmar wegi anmar-mimmiganga neggweburmar urboed, degi, anmar-moli-bebe-nikamaladmarga anmar moli-galumar sobbaloed.
NUM 32:17 Degine, anmar bila-onogedse namarmogoed. Anmar-gwenadgan na e-yarse dogmaladse idunadapi anmar gumarmogoed. Anmar-mimmigandi anmar-neggwebur-sakdigar-soboedgi bukwa gumaloed. Adi, melle dulemar-anmar-dikarba-bukwamaladi, anmar-mimmigan-oakalogegar.
NUM 32:18 Anmar-gwenadgan bela-yar-nikusmaladse anmar aibiroed. Degisulirdi, anmar amba aibirosulid.
NUM 32:19 Anmar, anmar-gwenadganbo Jordán-diwar-dad-argwanedsik ambikuosulid. Ar anmar-yala Jordán-diwar-dad-nakwedsik nai guoed.
NUM 32:20 Geb Moisés amar-abin sogded: —Ar bemar deyob sogele, nabirdo. Bila-ononaega guakwamalo, Bab-Jehová-sogedba be nadapi gumalo,
NUM 32:21 bela bemar-bila-onomalad Bab-Jehová-sogedba be-gwenadgan-idunadapi Jordán-diwar-obakmalo. Bela Bab-Dummad be-isdarmalad-obelogedse be imakmalo.
NUM 32:22 Bela be-Bab-Jehová bemarga-yar-suedse geb be-negse be dagmaloed. Deyob be-ibmar-sogsamaladba be imaksamalale, Bab-Jehová-asabin, degi, be-gwenadgan-Israel-dulemar-asabin napiragwadba be ibmar-imakmalodo. Geb degine, Bab-Jehová-bemarga-yar-uksadi nue bemargadga gumarmogoed.
NUM 32:23 ”Ar bemar ibmar-sognaidba imaksasurmalale, adi, bemar Bab-Jehováʼgi nue-nomalodo. Agindi nue insamalo, na be isgusmaladgi san-onogosurmalad.
NUM 32:24 Degirdi, bemar be-mimmiganga neggwebur-urbemar, degine, be-molimarga moli-galu be sobmar. Degine, na be ibmar-sogsamaladba ibmar imakmarbalo.”
NUM 32:25 Geb degi, Gad-wagan, Rubén-wagan Moisés-abin sogdemalad: —Anmar bega arbamaladid. Bab-Jehová-sogedba anmar ibmar imakoed.
NUM 32:26 Wegine, Galaad-neggweburmargi anmar-mimmigan, anmar-omegan, anmar-moli-bebe-nikamalad, degi, bela anmar-ibdurgan bemaloed.
NUM 32:27 Anmar-bega-arbamaladdi, bila-ononamaloed, Bab-Jehová-sogedba anmar nadapi gumaloed, be-anmarga-ibmar-sogedba anmar imakmaloed.
NUM 32:28 Geb degine, Moisés, dule-irwa-Bab-Dummadse-goled-Eleazarʼga, degi, Nun-machi-Josuéʼga, degine, Israel-dadgan-warambe-gakabogwad-e-dummaganga (12) igar-uksad.
NUM 32:29 Weyob amarga sogded: —Gad-wagana, Rubén-wagana, Bab-Jehová-sogedba bemarba bila-ononaegala, Jordán-diwar-obaksamalale, degi, Bab-Jehová bemarga-yar-uknonimalale, geb bemar ega Galaad-yala ukmarmogoed, adi, a-yala emargadga guegar.
NUM 32:30 Ar bila-ononaega bemarba Jordán-diwar obaksasurmalardi, bemarba Canaán-yala nikumarmogoed.
NUM 32:31 Gad-wagan, Rubén-wagan, Moisés-abin sogdemalad. —Anmar bega arbamaladid. Bab-Jehová-sogedba anmar ibmar imakoed.
NUM 32:32 Anmar Bab-Jehová-sogedba Canaán-yalase bila-ononamaloed. Ar anmar-yaladi, Jordán-diwar-dad-nakwedsik naiguoed.
NUM 32:33 Moisés, Gad-waganga, Rubén-waganga, degi, José-machi-Manasés-wagan-negabaladga, we-reymar-yar uksad: Amorreo-dulemar-e-rey-Sehón-yar degi, Basán-dulemar-e-rey-Og-yar Degine, bela ega neggweburmar-bukwad uksad, degi, amar-dikarba nainumar-nanaid bela uksabalid.
NUM 32:34 Gad-wagan gannar we-neggweburmar sobsamalad: Dibón-neggwebur, Atarot-neggwebur, Aroer-neggwebur,
NUM 32:35 Atarot-Sofán-neggwebur, Jazer-neggwebur, Jogbeha-neggwebur,
NUM 32:36 Bet-Nimra-neggwebur, degi, Bet-Arán-neggwebur. We-neggweburmar ise-sakdigar sobsamalad. Degine, sibad-wawaad-galumar sobsamarbalid.
NUM 32:37 Rubén-wagandi gannar we-neggweburmar sobsamarmogad: Hesbón-neggwebur, Eleale-neggwebur, Quiriataim-neggwebur,
NUM 32:38 Nebo-neggwebur, Baal-Meón-neggwebur, degi, Sibma-neggwebur. Rubén-wagan abala we-neggwebur-nugmar ogwasmalad.
NUM 32:39 Manasés-machi-Maquir-wagan, Galaadʼse bila-ononadgusmalad. Agine Galaad-yala susmalad. Geb Maquir-wagan Galaad-yalagi Amorreo-dulemar-bukwad onismalad.
NUM 32:40 Agine, Moisés, Manasés-machi-Maquir-waganga Galaad-yala uksad. A-yalagi Maquir-wagan bukusad.
NUM 32:41 Deginmoga, Manasés-wagwa-Jair, Galaad-neggwebur-burwiganase bila-ononadgusmogad. Agine, neggwebur-burwigana susmalad. Havot-Jairʼye a-neggwebur-onugsasad.
NUM 32:42 Amba deyob Noba imaksamogad. Kenat-neggwebur susmogad, degi, e-neg-burwigana susbalid. A-neggwebur na e-nugba Nobaʼye onugsasad.
NUM 33:1 Israel-dulemar Egipto-yargi noarmargu, Moisés-sogedba, degi, Aarón-sogedba nue-ilekwaa sorda-bila-onomalad-nanamaladyob aligusmalad.
NUM 33:2 Moisés, Bab-Jehová-sogedba Israel-dulemar-ambikusmalad ilemakar narmaksad. Bia-bukwa noarmala, degi, biase ambikunonidamarbali, bela Moisés narmakmai imaksad. Israel-dulemar we-igarba aligusmalad:
NUM 33:3 Gebe-nii-onoded-ibambe-gakatargi, Oburgwilegoenad-Iba-nasad-sorbali, Israel-dulemar Egipto-dulemar-wagab Ramesésʼye-neggwebur-nugadgi, gandikidgi ainiali gusmalad.
NUM 33:4 Agine, Egipto-dulemardi Bab-Jehová ei e-masmala-gebesailagined-oburgwisad-dignanai gusmalad. Degi, Bab-Jehová Egipto-dulemar-e-bab-dummagan-sabsur-odurdaksa gusad.
NUM 33:5 Israel-dulemar, Ramesés-neggweburgi ainialigusmalad, geb Sucotʼye-neg-nugadse danar-danar ambikunonimalad.
NUM 33:6 Sucotʼgi-bukwa ainidmargu, Etamʼye-neg-nugadgi danar-danar ambikudapmarbalid. Etamʼde nega-dulesulidgan-abingunaidgi naid.
NUM 33:7 Geb Etamʼgi-bukwa ainidmargu, Pi-Hahirotʼye-neg-nugadsik nade gusmalad. Pi-Hahirotʼde Baal-Zefón-asabin naid. Migdolʼye-neg-nugad-asabin danar-danar ambikudapmarbalid.
NUM 33:8 Pi-Hahirotʼgi-bukwa ainidmargu, demar-obaksamalad, nega-dulesulidganse warmaksamalad. Nega-dulesulidgan-Etamʼye-nugadgi ibapaa nanasmargu, Maraʼye-neg-nugadgi danar-danar ambikudapmarbalid.
NUM 33:9 Maraʼgi-bukwa ainidmargu, Elimʼye-neg-nugadse warmakdapmalad. Agi, dianmar-gwaambe-gakabo (12) bukwad, degine, ogobgi-daklemalad-sapimar dulapaa-gakambe (70) bukwad. Agi, Israel-dulemar danar-danar ambikudapmarbalid.
NUM 33:10 Elimʼgi-bukwa ainidmargu, Demar-Ginnidye-nugad-walik danar-danar ambikudapmarbalid.
NUM 33:11 Demar-Ginnidgi-bukwa ainidmargu, nega-dulesulidgan-Sinʼye-nugadgi danar-danar ambikudapmarbalid.
NUM 33:12 Nega-dulesulidgan-Sinʼgi ainidmargu, Dofcaʼye-neg-nugadgi danar-danar ambikudapmarbalid.
NUM 33:13 Dofcaʼgi-bukwa ainidmargu, Alúsʼye-neg-nugadgi danar-danar ambikudapmarbalid.
NUM 33:14 Alúsʼgi-bukwa ainidmargu, Refidimʼye-neg-nugadgi danar-danar ambikudapmarbalid. Agine, Israel-dulemar gobegala dii sate-guarmalad.
NUM 33:15 Refidimʼgi-bukwa ainidmargu, nega-dulesulidgan-Sinaíʼye-nugadgi danar-danar ambikudapmarbalid.
NUM 33:16 Nega-dulesulidgan-Sinaíʼgi-bukwa ainidmargu, Kibrot-Hataavaʼye-neg-nugadgi danar-danar ambikudapmarbalid.
NUM 33:17 Kibrot-Hataavaʼgi-bukwa ainidmargu, Hazerotʼye-neg-nugadgi danar-danar ambikudapmarbalid.
NUM 33:18 Hazerotʼgi-bukwa ainidmargu, Ritmaʼye-neg-nugadgi danar-danar ambikudapmarbalid.
NUM 33:19 Ritmaʼgi-bukwa ainidmargu, Rimón-Peresʼye-neg-nugadgi danar-danar ambikudapmarbalid.
NUM 33:20 Rimón-Peresʼgi-bukwa ainidmargu, Libnaʼye-neg-nugadgi danar-danar ambikudapmarbalid.
NUM 33:21 Libnaʼgi-bukwa ainidmargu, Rissaʼye-neg-nugadgi danar-danar ambikudapmarbalid.
NUM 33:22 Rissaʼgi-bukwa ainidmargu, Ceelataʼye-neg-nugadgi danar-danar ambikudapmarbalid.
NUM 33:23 Ceelataʼgi-bukwa ainidmargu, Sefer-yalagi danar-danar ambikudapmarbalid.
NUM 33:24 Sefer-yargi-bukwa ainidmargu, Haradaʼye-neg-nugadgi danar-danar ambikudapmarbalid.
NUM 33:25 Haradaʼgi-bukwa ainidmargu, Macelotʼye-neg-nugadgi danar-danar ambikudapmarbalid.
NUM 33:26 Macelotʼgi-bukwa ainidmargu, Tahatʼye-neg-nugadgi danar-danar ambikudapmarbalid.
NUM 33:27 Tahatʼgi-bukwa ainidmargu, Taraʼye-neg-nugadgi danar-danar ambikudapmarbalid.
NUM 33:28 Taraʼgi-bukwa ainidmargu, Mitcaʼye-neg-nugadgi danar-danar ambikudapmarbalid.
NUM 33:29 Mitcaʼgi-bukwa ainidmargu, Hasmonaʼye-neg-nugadgi danar-danar ambikudapmarbalid.
NUM 33:30 Hasmonaʼgi-bukwa ainidmargu, Moserotʼye-neg-nugadgi danar-danar ambikudapmarbalid.
NUM 33:31 Moserotʼgi-bukwa ainidmargu, Bene-Jaacánʼye-neg-nugadgi danar-danar ambikudapmarbalid.
NUM 33:32 Bene-Jaacánʼgi-bukwa ainidmargu, Gidgad-yargi danar-danar ambikudapmarbalid.
NUM 33:33 Gidgad-yargi-bukwa ainidmargu, Jotbataʼye-neg-nugadgi danar-danar ambikudapmarbalid.
NUM 33:34 Jotbataʼgi-bukwa ainidmargu, Abronaʼye-neg-nugadgi danar-danar ambikudapmarbalid.
NUM 33:35 Abronaʼgi-bukwa ainidmargu, Ezión-Geberʼye-neg-nugadgi danar-danar ambikudapmarbalid.
NUM 33:36 Ezión-Geberʼgi-bukwa ainidmargu, nega-dulesulidgan-Zinʼye-nugadgi danar-danar ambikudapmarbalid. Zinʼde Cadesʼye nugbalid.
NUM 33:37 Cadesʼgi-bukwa ainidmargu, Hor-yalagi danar-danar ambikudapmarbalid. Hor-yala, Edom-yala-abingunaidgi siid.
NUM 33:38 Dule-irwa-Bab-Dummadse-goled-Aarón, Bab-Jehová-sogedba Hor-yalase nakwisgusad. Agine, Aarón burgwisad. Nii-walatar-gebe-iba-onodedgi burgwisad. Deunni, birga-dulabogus (40) Israel-dulemar Egipto-yargi noalid-akaled.
NUM 33:39 Aarón, birga-dulanergwa-gakapaa-nikadgi (123), Hor-yalagi burgwisad.
NUM 33:40 Deun, agine, Arad-dulemar-e-rey-Canaán-dule, Canaán-yalagi-Neguevʼye-neg-nugadgi maigusad. A-dulede, wisguargusad, Israel-dulemar danimarye.
NUM 33:41 Israel-dulemar Hor-yargi-bukwa ainidmargu, Zalmonaʼye-neg-nugadgi danar-danar ambikudapmarbalid.
NUM 33:42 Zalmonaʼgi-bukwa ainidmargu, Punónʼye-neg-nugadgi danar-danar ambikudapmarbalid.
NUM 33:43 Punónʼgi-bukwa ainidmargu, Obotʼye-neg-nugadgi danar-danar ambikudapmarbalid.
NUM 33:44 Obotʼgi-bukwa ainidmargu, Moab-yar-abingunaidgi Ije-Abarimʼye-neg-nugadgi danar-danar ambikudapmarbalid.
NUM 33:45 Ije-Abarimʼgi-bukwa ainidmargu, Dibón-Gadʼye-neg-nugadgi danar-danar ambikudapmarbalid.
NUM 33:46 Dibón-Gadʼgi-bukwa ainidmargu, Almón-Diblataimʼye-neg-nugadgi danar-danar ambikudapmarbalid.
NUM 33:47 Almón-Diblataimʼgi-bukwa ainidmargu, Abarim-yalaganba, Nebo-asabin danar-danar ambikudapmarbalid.
NUM 33:48 Abarim-yalagangi-bukwa ainidmargu, Jordán-diwar-naba Moab-nebagan-naidgi Jericó-neggwebur-asabin danar-danar ambikudapmarbalid.
NUM 33:49 Napidgine, Bet-Jesimotʼye-neg-nugad-akar, Abel-Sitim-naidse, Jordán-diwar-naba Moab-nebagan-naidgi, danar-danar ambikusmalad.
NUM 33:50 Bab-Jehová Jordán-diwar-naba Moab-nebagangi Jericó-neggwebur-asabin Moisésʼga sunmakded, ega sogded:
NUM 33:51 “Israel-dulemarbo be sunmako, ega be sogo: ‘Bemar Jordán-diwar obaksamalale, Canaán-yalase dogdemalale,
NUM 33:52 bela dulemar-be-idu-bukwamalad be onimaloye. Degine, bela akwamar-e-bab-dummadga imakbukmalad, be mamarmaloye, degine, bela ibmar-wilubgan-soogi-duar-sobarmalad mamarmarbaloye, deginbali, bela e-bab-dummadga ibmar-ukleged-ailamar-bukwad, be obelomarbaloye.
NUM 33:53 A-yala bemargadga-guega an bemarga uksamalad. Degisoggu, dulemar-be-idu-bukmalad be onomalo, ar ade, a-yalagi bemar ambikumaloed.
NUM 33:54 Na be-dad-be-dadganba, yarmar wilubdakar be nikumaloed. Dad-gwensakgi bur dulemar-ichesulile, yar bur dumma ega uklegoed. Dad-baidgi bur dulemar-ichegwale, yar bur senii ega uklegoed. Yar-ega-wilubdakar-uklegoedba na yar nikumaloed. Na be-dadgan-warambe-gakabogwadba (12) na be yar nikumaloed.
NUM 33:55 ” ’Ar bemar yarse-dogesokalidgi dulemar-bukwad onissurmalale, we-dulemar bemarga boniga gunonikoed. Bemar-ibyagi suar-dargamakles-gwichiyob bemarga gunonikoed, degi, bemar-dikargi iko-yoiyobi bemarga we-dulemar gunonikoed. Degine, bemar-ambikuedgi we-dulemar bemarga naibid-dummad-ukdii gumaloed.
NUM 33:56 Ar bemar we-dulemar-onissulile, we-dulemar an igi-imakoye-binsadii, deyob an bemar-imaknonisunnoed.’ ”
NUM 34:1 Bab-Jehová Moisésʼga sunmakded, ega sogded:
NUM 34:2 “Israel-dulemarga be sogo, ‘Canaán-yalase bemar dogsamalale, we-yala-bemarga-uklegoedi, wese-wese bemarga abingunai guoye:
NUM 34:3 ” ’Dad-nakwed-argan-nuedsik-yar-abinguoedi, nega-dulesulidgan-Zinʼye-nugadbo, degi, Edom-yalabo abingunai guoed. ” ’Dad-nakwed-argan-nuedsik-yar-abinguoed-onodagoedi, dad-nakwedsik Demar-Gagbid-bergunaid-dukugi onodagoed.
NUM 34:4 Geb we-Demar-Gagbidye-nugad-duku-akar-onodagoedi, dad-nakwed-argan-nuedsik aidedagoed, Acrabimʼye-neg-nugad-nakwemaidsik naoed. Nega-dulesulidgan-Zinʼye-nugadba nasoed. Geb agine, Cades-Barneaʼse warmakoed. Geb Cades-Barneaʼgi nakwidogua, Hasar-Adarʼgi nasoed, geb Asmónʼse warmakdapoed.
NUM 34:5 Geb Asmónʼgi dukingudabalogu, Egipto-dian-maidse warmakdapoed, geb Demar-Dummad-naidse itirdapoed.
NUM 34:6 ” ’Dad-argwanedsik-yar-abinguoedi, Demar-Dummad-naidbo abingunai guoed.
NUM 34:7 ” ’Dad-nakwed-argan-sapiledsik-yar-abinguoedi, weyob abinguoed: Demar-Dummad-naid-akar baksa be gaoed, Hor-yalase.
NUM 34:8 Hor-yala-akar baksa be imakbaloed, Hamat dogedse. A-abingunaid nadeguoed, Zedadʼse.
NUM 34:9 Geb degine, Zifrónʼgi nasoed, Hazar-Enánʼse bergudapoed. Wese dad-nakwed-argan-sapiledsik-yar-abinguoedi naiguoed.
NUM 34:10 ” ’Dad-nakwedsik-yar-abinguoedi, Hazar-Enán-akar-baksa onodmogoed Sefamʼse warmakoed.
NUM 34:11 Geb Sefamʼgi aidedmogoed Aín-dad-nakwedsik-Riblaʼye-neg-nugad-naidse warmakdapoed. Geb agine, yar-abingunaidi aidedbaloed, Cineret-demar-gaka-dad-nakwedse. Ase warmakoed.
NUM 34:12 Geb agine, Jordán-diwarba aidedbaloed, Demar-Gagbid-bergunaid-dukuse. Ase yar-abingunaid bergudapoed. ” ’We, bemar-yalaga guoed. Degine, weyobi, bemarga yar abingunanai guoed.’ ”
NUM 34:13 Moisés weyob Israel-dulemarga igar-uksad: “We-yala na bemar wilubdakar mimimaloye. Bab-Jehová weyob soged, dadgan-dummagan-e-bakebakadga (9) uklegoye, degi, dad-dummad-Manasés-e-wagan-negabaladga uklemogoye.
NUM 34:14 Ar ade, bato dad-dummad-Rubén-waganga, na e-gwenad-e-gwenadganba yar uklesad. Degi, dad-dummad-Gad-waganga, degine, dad-dummad-Manasés-wagan-negabaladga bato na e-gwenad-e-gwenadganba ega yar uklesmogad.
NUM 34:15 A-sogleged, dad-dummagan-warbogwad-wagan, degine, dad-dummad-baid-e-wagan-negabalad Jericó-neggwebur-asabin Jordán-diwar-dad-nakwiardaedsik yar-gasmarye.”
NUM 34:16 Bab-Jehová Moisésʼga sunmakded, ega sogded:
NUM 34:17 “Wemala bemarga yar mimimaloed: Dule-irwa-Bab-Dummadse-goled-Eleazar, degi, Nun-machi-Josué.
NUM 34:18 Deginbali, dadgan-warambe-gakabogwad-iliba (12) e-dummaganga-gudimalad war-wargwen be subaloed. Amala bemarga yar mimimarmogoed.
NUM 34:19 We-dulemala, wemalad: Dad-Judá-wagan-e-dummad, Jefone-machi-Caleb.
NUM 34:20 Dad-Simeón-wagan-e-dummad, Amiud-machi-Semuel.
NUM 34:21 Dad-Benjamín-wagan-e-dummad, Quislón-machi-Elidad.
NUM 34:22 Dad-Dan-wagan-e-dummad, Jogli-machi-Buqui.
NUM 34:23 Dad-José-machi-Manasés-wagan-e-dummad, Efod-machi-Haniel.
NUM 34:24 Dad-José-machi-Efraín-wagan-e-dummad, Siftán-machi-Kemuel.
NUM 34:25 Dad-Zabulón-wagan-e-dummad, Parnac-machi-Elizafán.
NUM 34:26 Dad-Isacar-wagan-e-dummad, Azán-machi-Paltiel.
NUM 34:27 Dad-Aser-wagan-e-dummad, Selomi-machi-Ahiud.
NUM 34:28 Dad-Neftalí-wagan-e-dummad, Amiud-machi-Pedael.”
NUM 34:29 We-dulemargala Bab-Jehová igar uksad, adi, we-dulemala Israel-dulemarga Canaán-yar-mimiegar.
NUM 35:1 Bab-Jehová Jordán-diwar-naba Moab-nebagan-naidgi Jericó-neggwebur-asabin Moisésʼga sunmakded, ega sogded:
NUM 35:2 “Israel-dulemarga be soge: ‘Yar-gamaloedgine, Leví-waganga neggweburmar be ukmogoye, adi, agi na maigumarmogagar. A-neggweburmar-dikarba gagan-nainumar-nanaid ega be ukbalo.
NUM 35:3 We-Leví-wagana na neggweburmar-nikumaloedgi maigumaloed, degine, gagan-nainumar-ega-uklegoedgi na e-moli-bebe-nikamalad, e-sibadmar, e-sibad-wawaadmar, degi, bela e-ibdurgan ambikumaloed.
NUM 35:4 ” ’We-Leví-waganga gagan-nainumar-uklegoedi, neggwebur-galu-matusulid-dakasik bela neggwebur-ebiris ega uklegoed. Galu-matusulidgine, dali-dulataled-ilabo gaka dulabo-gakambe-banguedgi (250) ega be ukmaloed.
NUM 35:5 Weyob-dungu-dungu ega be gagan-nainumar ukoed: Dad-nakwedsik, dali-dulataled-ilatar-dungu (500). Dad-argwanedsik, dali-dulataled-ilatar-dungu (500). Dad-nakwed-argan-nuedsik, dali-dulataled-ilatar-dungu (500). Degi, dad-nakwed-argan-sapiledsik, dali-dulataled-ilatar-dungu (500). Degisoggu, neggwebur, we-nainumar-uklegoed-negabargi sii guoed. We-nainumar-uklegoedi, Leví-wagan-e-nainumarga guoed.
NUM 35:6 ” ’Leví-waganga-neggweburmar-uklegoedi, gwanergwa (6) dukumalad-neggweburga guoed. Adi, dule-gwensak emar-gindaksale, a-neggweburmarse dukunaoed. De-ukinbali, we-neggwebur-gwanergwad-uklegoed-ukine gwadulabo-gakabo (42) neggweburmar-baigan ega be ukbaloed.
NUM 35:7 Belamakale, ega gwadulabo gakabaabak (48) neggweburmar be ukoed. Degi, e-gagan-nainumar-nika-nika ega be ukoed.
NUM 35:8 Israel-dulemar Leví-waganga neggweburmar-ukarmalale, neggwebur-susmaladbali ega ukoed. Dule neggwebur-bukidar-susale, ega neggwebur ichesur ukmogoed. Ar dule ichee neggwebur-susardi, ichee ega ukmogoed. Bela Israel-dulemala na e-neggwebur-merguedba Leví-waganga neggweburmar-ukoed.’ ”
NUM 35:9 Bab-Jehová Moisésʼga sunmakded, ega sogded:
NUM 35:10 “Israel-dulemarga be sunmak, ega be soge: ‘Bemar Jordán-diwar-obaksamalale, Canaán-yalase-dogdapmalale,
NUM 35:11 dukued-neggweburmar be suo. Adi, dule, dule-baid-oburgwebiedba-oburgwidsulid, ase dukunaegar.
NUM 35:12 Degisoggu, we-dule, a-neggweburmargi dule-buged-e-imakbied-idu dukuoed. Adi, dule-gindakedi melle Israel-dulemar-abin ega igar-itolessuli oburgwilegegar.
NUM 35:13 ” ’Neggweburmar-uklegoedi, gwanergwa (6) dukued-neggweburga be imakoed.
NUM 35:14 Neggwebur-gwapaa Jordán-diwar-dad-nakwedsik bukwa guoed, neggwebur-baigan-gwapaa Canaán-yalagi bukwa gumogoed.
NUM 35:15 We-neggweburmar-gwanergwadi (6) Israel-dulemarga, dukued-negga guoed. Degi, dule-ainebarmaladga dukued-negga guoed. Ar we-dule-ainebalidi bemar-abargi mamaidibe, igi sikwas-bemar-walik gudimardibe, amarga dukued-negga guoed. Ar dule, dule-baid-oburgwebisulidba-oburgwisad, ase dukunaoed.
NUM 35:16 ” ’Dule-gwensak esgorogi dule-baid-sarsosale, dule-sarsolesad burgwisale, soglegoed, we-dule-gwensak dule-gindakedye. We-dule, oburgwilemogoed.
NUM 35:17 ” ’Dule-gwensak akwagi dule-baid-sarsosale, dule-sarsolesad burgwisale, soglegoed, we-dule-gwensak dule-gindakedye. We-dule, oburgwilemogoed.
NUM 35:18 ” ’Dule-gwensak suargi dule-baid-sarsosale, dule-sarsolesad burgwisale, soglegoed, we-dule-gwensak dule-gindakedye. We-dule, oburgwilemogoed.
NUM 35:19 ” ’Dule-gindaklesad-e-gwenadi, e-gwenad-gindaksad-abingualile, gindakoed, buged-mai imakoed.
NUM 35:20 ” ’Dule-gwensak yamo isdar-dakedba dule-baid-barmetele, igi, yamo egi ibmar-metele, dule burgwenonikile,
NUM 35:21 degi, yamo isdar-dakedba sabsur-sarsosale, we-dule burgwenonikile, soglegoed, we-dule-gwensak dule-gindakedye. We-dule, oburgwilemogoed. Ar dule-buged-mai-imakbied we-dule-gindaksad-abingualirdi, dule-gindaksad ese oburgwilegoed.
NUM 35:22 ” ’Dule-gwensak isdar-daksulidba dule-baid-barmetele, igi, baisur-binsaedgi egi ibmar-metele,
NUM 35:23 degi, baisur-binsaedgi egi akwa metele, we-dule burgwenonikile, degi-inigwele, we-dule-gwensak e-isdaradsulid, deginbali, gwen oburgwebisulidba-oburgwisad.
NUM 35:24 A-ulale, dulemala, we-dule-gwensakga, degi, dule-buged-mai-imakbiedga igar-maidba igar-itomaloed.
NUM 35:25 Israel-dulemar dule-gindaksad dule-buged-mai-imakbiedgi bendakoed. Dule-gindaksad na bia dukued-neggweburse-dukuapidse gannar naoed. We-dule-gwensak-dule-gindaksad, dule-irwa-Bab-Dummadse-goled-bur-dummadga-maid-burgwedse, na e-neggweburse dagoed. We-dule-irwa-Bab-Dummadse-goledi Bab-Dummadga-arbaega olivo-gwallu egi eolesad.
NUM 35:26 ” ’Ar dule-gindaksadi e-dukumaid-neggwebur-abingunaidgi nodele,
NUM 35:27 dule-buged-mai-imakbied dukued-neggwebur-abingunaidgi dule-gindaksad-abingualile, sunna dule-gindaksad-oburgwed. Ar dule-buged-imakedgi ataklegosulid.
NUM 35:28 Ar ade, dule-gwensak-dule-gindaksadi, dule-irwa-Bab-Dummadse-goled-bur-dummad-burgwedse, dukued-neggweburgi maigu-guewilubbid. Dule-irwa-Bab-Dummadse-goled-bur-dummad-burgwisale, geb dule-gindaksad na e-negse gannar nonikoed.’ ”
NUM 35:29 Bab-Jehová sogdebalid: “Bia be bukwamalale, bemarga, degi, be-waganga weyobi degisadegu we-igar mai guoed.
NUM 35:30 ”Dule-wargwen, dule-baid-oburgwisale, igi-e-daksamalad-sogoe, aba oburgwilegoed. Degi-inigwele, dule-wargwen-sogedbarbi dule-oburgwilegosulid.
NUM 35:31 ”Dule-gindaked manigi onolegosulid, ar ade, oburgwilegoye ega igar maid. Ar we-dulede, oburgwilegergebed.
NUM 35:32 ”Deginbali, dule dukued-neggweburse-dukunadedi gannar e-neggweburse-dagega mani-ukosulid. Dule-irwa-Bab-Dummadse-goled-bur-dummad-burgwisar, geb we-dule gannar na e-negse dagoed.
NUM 35:33 ”Bemar-ambikumaloed-yala, melle dule-gindaklegedgi oichogo. Ar dule-gindaklegedi yar-oichoged. Bur dule-emar-gindaked-obeloerdi nabirdo. Adi, degidbali, nueganbi yar nai guoed.
NUM 35:34 ”Ar an bemar-abargi gudisoggu, bemar-megmaloedgi melle napa oichomalo. Ar ade, ani, Bab-Jehová, Israel-dulemar-abargi an gudiid.”
NUM 36:1 Ibagwengine, Galaad-wagan-dummagan Moisésʼbo, degi, Israel-dulemar-e-dummaganbo sunmaknadmalad. Galaadʼde, Maquir-e-machid, Manasés-e-wagwad, degi, José-e-wagwa-yokorginedbalid.
NUM 36:2 Galaad-wagan, sogdemalad: —Bab-Jehová bega igar-uksad, Israel-dulemarga wilubdakar yarmar mimioye. Deginbali, Bab-Jehová bega igar-uksabalid, anmar-mesad-Zelofehad-e-nainumar e-sisganga ukoye.
NUM 36:3 Ar emide, bunamala anmar-dad-dummadsikidsulid-e-wagan nikudele, bunamala-e-nainumar anmar-yargi-naid e-ibe sulegoed, e-sui-nainumarse bunamala-nainu gwagoed. Deyob gudogua, nainu-anmarga-wilubdakar-uklesadi anmar-ibe bipiledoed.
NUM 36:4 Israel-dulemarga gannar-ibmar-obirileged-birga nonikile, Zelofehad-sisgan-nainumar e-suimar-dad-dummad-nainuga gudoed. Degisoggu, dad-dummaganba-nainu-anmarga-uklesadi anmar-ibe bipiledoed.
NUM 36:5 Geb Moisés, Bab-Jehová-ega-igar-uksadba, Israel-dulemarga igar uksamogad. Weyob sogded: —Nabir José-wagan soged.
NUM 36:6 Bab-Jehová, Zelofehad-sisgan-annik weyob soged: ‘Ar bunamala biti-machered-nikubimala, na nikumalado. Degi-inigwele, e-dad-dummad-Joséʼsik-danikid-wagan nikuergebed.
NUM 36:7 Ar bemarga egad-egad-nainumar-uklesadi dad-dummagan-baid-baidse gwage-gwage gudii guosulid. Ar Israel-dulemar na egad-egad nainumar akwergebed.
NUM 36:8 Israel-dulemar-abargi ome-wargwenga nainu uklesale, we-omegwa na e-dad-dummad-wagansikid machered-nikuoed. Adi, degidbali, Israel-dulemar na egad-egad nainumar-gaoed.
NUM 36:9 Ar bemarga egad-egad-nainumar-uklesadi dad-dummagan-baid-baidse gwage-gwage gudii guosulid. Ar Israel-dulemar na egad-egad nainumar akwergebed.’
NUM 36:10 Ar igi Bab-Jehová, Moisésʼga-igar-uksa, deyob Zelofehad-sisgan imaksamalad.
NUM 36:11 Zelofehad-sisgan, wemalad: Maala, Tirsa, Hogla, Milca, degi, Noa. We-bunamalade e-gilormar-e-babsikid-e-masmala nikusmalad.
NUM 36:12 We-bunamala, dad-dummad-Manasés-wagansik-danikid nikusmalad. Manasésʼde dad-dummad-José-machimogad. Degisoggu, bunamala na e-nainu-abingasmaladi, e-bab-dad-dummad-nainugi nagusad, bar aibachasulid.
NUM 36:13 We-igarmala, Bab-Jehová, Moisésʼba Israel-dulemarga uksa gusad. Deunni, Israel-dulemar Jordán-diwar-naba Moab-nebagan-naidgi Jericó-neggwebur-asabin danar-danar bukwamargu. Agine, ega we-igarmar uklesad.
DEU 1:1 Moisés weyobi Israel-dulemarga sunmaksa gusad. Deunni, Israel-dulemar Jordán-diwar-dad-nakwedsik nega-dulesulidganba bukwamargu. Israel-dulemar, Arabá-yargi, Suf-asabin, Parán-neggwebur, degi, we-neggweburmar: Tofel, Labán, Hazerot, Dizahab-abargi bukwagusmargu, Moisés ega sunmaksa gusad.
DEU 1:2 Horeb-yar-akale, Cades-Barneaʼse-moega, ibambe-gakagwensak (11) Seir-yala-imbaganba nanaleged.
DEU 1:3 Emide, dakleargu, birga-dulabogusgu (40), nii-warambe-gakagwensakgi (11), e-iba-gebe-onodedgi, Moisés, Bab-Jehová-bela-ega-igar-uksadba, Israel-dulemarga sunmakded.
DEU 1:4 A-iduale, Moisés, Amorreo-dulemar-e-rey-Sehónʼgi nakwis gusad. Rey-Sehónʼde Hesbón-neggweburgi mainad. Deginbali, Moisés, Basán-yar-e-rey-Ogʼye-nugadgi nakwisbalid. Rey-Ogʼde Edrei-yar Astarot-neg-nugadgi maimoganad.
DEU 1:5 Deunni, Israel-dulemar, amba Jordán-diwar-dad-nakwedsik Moab-yargi-bukwamargu, Moisés weyob igar ukded, Israel-dulemarga sogded:
DEU 1:6 “Anmar Horeb-yargi-bukwamargua, anmar-Bab-Dummad-Jehová weyob anmarga sunmaksad: ‘Bemar we-yargi dikasurgus bukwad.
DEU 1:7 Degisoggu, be namar, be-ibmar be weemar. Amorreo-dulemar-yalaganba be namar, degine, bela Amorreo-dulemar-yalagan-dikarba-nanaidba be namar: Arabá-yar-naidba, yalaganba, nebagan-dad-argwanedsik-nanaidba, Neguev-yalaba, demar-gakaba, Canaán-dulemar-bukwadba, Líbano-yar-naidba, degine, diwar-dummad-Éufrates-maidse be namar.
DEU 1:8 ” ’Ani an bemarga we-yarmar uksad. Egi be megmalo, mer sikirmakmalo. Ar ani, Bab-Jehová, ise-sogar bemar-dadganga-ukoye an sogsad: Abrahamʼga, Isaacʼga, degi, Jacobʼga. An we-yar bemarga ukedseye, degi, bemar-sorba bemar-waganga-ukedsebarye an sogsad.’ ”
DEU 1:9 Moisés Israel-dulemarga sogdebalid: “Deunni, epenne an bemarga sunmaksad, an sogsa gusad: ‘Geg anbi wargwen an bemar-nidii guye.
DEU 1:10 Be-Bab-Dummad-Jehová bela-bela bemar-omergusad. Emide, niisgwamar-nibneggi-nanaidyob bela-bela bemar mergued.
DEU 1:11 Be-dadgan-e-Bab-Dummad-Jehová, bitigi bemar-emi-merguedba bur bule miliba (1,000) gatik-mergu bemar-imakmalana gadin. Bitigi bemarga-ibmar-imakoye-sogsagusadba, ise-nued bemargi binsabalina gadin.
DEU 1:12 ¿Ar wede, sunna an bemar-bonigan walagwen an seosi? ¿Ar wede, sunna an bemar-ibmar-nunmak-itodimalad, na be muchub-muchub-urwedimalad, walagwen an bemarga igar nabogosi? Geg an wargwen gued.
DEU 1:13 Degisoggu, bemar-abargi dule-war-wargwen be-dadgan-iliba be amimala: Dule-binsaed-ibegan, dule-mag-neg-itomalad, dule-ibmar-nue-wismalad, adi, a-dulemar an be-dummaganga nug-imakegar.’
DEU 1:14 ”Deunni, bemar, weyob an-abin-imaksamalad: ‘Be anmarga ibmar-sogedi, nued an itomarye.’
DEU 1:15 ”Degisoggu, bemar-dadgan-warambe-gakabogwad-abargi (12), an dule-nue-binsaed-nikamalad, degi, dule-ibmar-nue-wismalad sunonikid. Wemar, bemar-dummaganga an onugsasad: Dule-miliba-mergued-e-dummadga (1,000), dule-dulatar-mergued-e-dummadga (100), dule-dulabo-gakambe-mergued-e-dummadga (50), degine, dulemar-e-ambe-mergued-e-dummadga (10). Deginbali, dadgan-danar-danar-bukwad-e-dummaganga an onug-imaksabalid.”
DEU 1:16 Moisés Israel-dulemarga sogdebalid: “Deginbali, a-ibagangi bemarga-igar-nabomaladga an weyob ega igar uksabalid: ‘Bemar, be-gwenadgan na e-gwenadgan-ebo igar-gwatirnanaid, ega be nue nabomaloye. Deyob be imakmaloye, Israel-dulemargardibe, dule-be-yarginedsulidgardibe, emarbi be dakoye.
DEU 1:17 Dulemarga be igar-nabonaile, melle be binsao, wedi dule-dummadiddeeye, wedi dule-wilegediddeeye. Suli. Dule-dummaddibe, dule-wilegeddibe, ega be innikigwadba igar-itogo. Ar igar-nabolegedi, Bab-Dummadgadid, degisoggu, melle dulemar be dobguo. Igar-naboleged-dutusurmalad geg be nabogele anse be sedamalo. Adi, ani an ega igar-nabogoed. Deyob an wemarga igar-uksa gusad.’
DEU 1:18 ”Deunni, a-ibagangine, an bemarga bela igar uksad, igi bemar imakmaloe.”
DEU 1:19 Moisés Israel-dulemarga sogdebalid: “Anmar Horebʼgi noarmargu, nega-dulesulidgan-sunnasulid-dummad be daksamaladba anmar gaamakdii gusad. Igi-anmar-Bab-Dummad-Jehová anmarga igar-uksagusa, deyobi, anmar Amorreo-dulemar-yalagan-igarba nadgusad. Geb degi, anmar Cades-Barneaʼye-neg-nugadse modap gusad.
DEU 1:20 Agi an bemarga sogsa gusad: Anmar Amorreo-yalaganse mosmaye. Anmar-Bab-Dummad-Jehová, we-yala anmarga uknaidye.
DEU 1:21 Be dake, bemar-Bab-Dummad-Jehová bemarga we-yala uksamalad. Ar bemar-dadgan-e-Bab-Dummad-Jehová, bemarga sogsa gusad: ‘Bemar we-yalase be dognamar, be sunamar. Melle dobgumar, melle galakumar.’
DEU 1:22 ”Ar degite, bemardi bela be anse armalad, be anga sognonimalad: ‘Anmar-iduar neg-arganaega anmar dulemar-barmide, adi, anmarga sognonimalagar, igid-igarba anmar namaloe, deginbali, ibi-neggweburse anmar dogdapmarbaloe.’
DEU 1:23 ”Bemar-ibmar-anga-sogsamaladi, an nabir itosad. A-ular, bemar-abargi bemar-dad-dummagangi wargwen-wargwengi an dulemar-warambe-gakabo (12) susad.
DEU 1:24 We-dulemar-warambe-gakabogwadi (12) nadegusmalad, yar-birse nakwid gusmalad. Escol-neba-naidse warmaksamargu, agi neg-argas gusmalad.
DEU 1:25 Na sapi-sanmar-gwachamaladi anmarga senoni gusmalad. Anmarga weyob sognoni gusmalad: ‘Anmar-Bab-Dummad-Jehová anmarga-yar-uknaidi, yala-nuedye.’ ”
DEU 1:26 Moisés Israel-dulemarga sogdebalid: “Degite, bemar, yapa a-yarse naegusmalad. Deyobi, bemar, bemar-Bab-Dummad-Jehová-sogedba gwen ibmar imaksasurmalad.
DEU 1:27 Aka bemar, be-neggi uurmakbukwa gusmalad, be sogbukwa gusmalad: ‘Ar Bab-Jehová isdar-anmar-daked-ular, Egipto-yargi anmar-onosad. Adi, Amorreo-dulemarga anmar-ukegar, degi, amar anmar-ogilogegar.
DEU 1:28 ¿Ar anmar bia naosunna? Emide, anmar-gwenadgan-neg-argaapmalad anmar-ogwayisad, anmarga weyob sogdemargu: We-dulemar bur anmarba dutusulid, anmarba bur dule-dummagan naed. E-neggweburmar burwisur namarbalid. E-galu-matusulid, nibnegse warmaknanaid. Agi anmar, Anac-e-wagan daksabalid.’
DEU 1:29 ”Geb agine, an bemarga sogsamalad: ‘Mer be gwayemar, we-dulemar mer be dobgumalo.
DEU 1:30 Ar anmar-Bab-Dummad-Jehová, anmar-idunadapid, anmar-ular urwoed. Ar igi Bab-Jehová Egipto-yargi, degi, nega-dulesulidganba, bela-ibmar-imaksad be daksamala, deyob bemarga imakbaloed.
DEU 1:31 Bela bemar igarba-nanasmaladba, degi, wese bemar nonikidsega be daksamalad, igi bemar-Bab-Dummad-Jehová be-searmala. Dule na e-machi-seeyob, Bab-Jehová igarba be-searmalad.’
DEU 1:32 ”Degite, bemar be-Bab-Dummad-Jehováʼba bengusmalad.
DEU 1:33 Ar Bab-Jehová, bemarga-neg-ambikued-amiega, bemar-idunadap gusad. Mutiki, bemarga-igar-oyogega bemar-idu soo-bubawar-oganadap gusad. Ibgindi, mogir-bubawarba bemar-idunadap gusad. Degi-inigwele, bemar Bab-Jehová-bengus gusmalad.”
DEU 1:34 Moisés Israel-dulemarga sogdebalid: “Bab-Jehová bemar-ibmar-soged-itosgua, uluded. Geb agi, weyob imakedseye sogsagusad:
DEU 1:35 ‘We-dule-isganamar, wargwensaale an be-dadganga-napneg-nued-ukoye-sogsadi, gwen dakosurmalad.
DEU 1:36 Unnila Jefone-machi-Calebʼbi Canaán-yar dakoed. Ar Calebʼgala, degi, e-masmalagala, bia-Caleb-egi-nanadii gusa, a, an ega ukoed. Ar Calebʼdi Bab-Jehováʼgi gwen bengussuli gusad.’
DEU 1:37 ”Degine, ar bemar-ular, Bab-Jehová anse ulusgusmogad. Anga sogsagusad: ‘Bemoga, we-yarse be dogosurmogad.
DEU 1:38 Be-anar, be-bendaked-Nun-machi-Josué dogoed. Degisoggu, gatik be Josué-ogannogo, ar a-dule, Israel-dulemarga napamar mimioed.
DEU 1:39 Ar be-mimmigana, amba aku-neg-itodimaladi, egi be sogsamaladi, anmar-isdarmalad anmar-ibe sumaloye, amala, we-yarse dogmaloedid, egi megmaloedid. Ar ani an we-yar ega uksad.
DEU 1:40 Ar bemardi, gannar nega-dulesulidganba Demar-Ginnidye-nugad-igarba be namar.’ ”
DEU 1:41 Moisés Israel-dulemarga sogdebalid: “Deunni, bemar an-abin-sogdemalad: ‘Anmar Bab-Jehováʼgi nue-dummad-nosmarye. Emisgindi, igi anmar-Bab-Dummad-Jehová anmarga igar-uksa, abali anmar namarsunnoye, anmar urwenamarsunnoye.’ Agi geb bemar guakwaa bila-onogedgi-ibmar-ebulemalad-amis gusmalad, ar ade, bemar binsasmalad, yalaganba baisursunna nalego-dakleye.
DEU 1:42 ”Ar Bab-Jehováʼdi anga sogsad: ‘Israel-dulemarga be sogo: Mer be urwenamarye. Ar Bab-Jehová bemar-abargi gudii guosulid. Ar bemar naye sogele, be-isdarmaladse bemar galakuoed.’
DEU 1:43 ”Bab-Jehová-soged an bemarga sogsamalad. Degite, bemar an-itossurmalad. Ar bemar bur bule uayasuli gusmalad. Bab-Jehová-sogedba be ibmar imaksasurmalad. Na bemar san-dummarba-imakedba yalaganba be urwenad gusmalad.
DEU 1:44 Agi, Amorreo-dulemar-a-yargi-bukwadi, bemar-abin noar gusmalad. Igi burmar dulemar-baleginne, deyob Amorreo-dulemar be-balegichamalad. Seir-yar-akale, Horma-neggwebur-warmaksadse be-balegichamalad, bemargi nakwenonimalad.
DEU 1:45 Geb degine, bemar Bab-Jehováʼse gannar nonigusmalad, bemar Bab-Jehová-asabin bobukwa gusmalad. Degi-inigwele, Bab-Jehová bar bemar-itossulid.
DEU 1:46 Agala, bemar, Cadesʼgi undar gudii gusmarsunnad.”
DEU 2:1 Moisés Israel-dulemarga sogdebalid: “Geb degine, gannar anmar arbalid. Anmar Bab-Jehová-sogsadba Demar-Ginnidye-nugad-igar-maidba nega-dulesulidganse nononikid. Dikasuli anmar Seir-yar-ebirdii gusmalad.
DEU 2:2 ”Geb agine, Bab-Jehová anga sokalid:
DEU 2:3 ‘Undargus bemar we-yargi bipirmakdanigusmalad. Bemar gannar dad-nakwed-argan-sapiledsik namar.
DEU 2:4 Israel-dulemarga be sogo: Esaú-e-wagan-bukwad-yargi be nasmalo. Esaú-e-wagan Seir-yargi-bukwamalad be-gwenadgan gued. We-dulemala bemar-dobe gudimalad. Degi-inigwele, nue salakarmar.
DEU 2:5 Mer amarbo be urwemalo. Ar an bemarga we-yar ukosulid, amba bia egi be annamaloe, soggwensaale an bemarga ukosulid. We-Seir-yala bato Esaú-waganga an uksad.
DEU 2:6 Mas-bemar-gunnoedi, manigi ese bemar bakmaloed. Deginbali, dii-bemar-goboedi, manigi ese bemar bakbaloed.’
DEU 2:7 ”Ar bemar-Bab-Dummad-Jehová bela bemar-ibmar-imakedgi ise-nued bemargi binsasad. Degine, we-neg-dulesulidgan-dummadba nued bemar-akwedii gusbalid. We-birga-dulabogwadgi (40), bemar-Bab-Dummad-Jehová, bemarba gudii gusad, degine, gwen ibmar-galakudii bemar-imaksasulid.
DEU 2:8 ”Geb anmar, anmar-gwenadgan-Esaú-wagan-Seir-yargi-bukwamalad ebirismalad. Degine, geb anmar Arabá-igarba, Elatʼsik igar-maidba, degi, Ezión-Geberʼsik igar-maidba nadgusmalad. Geb sorba, anmar aibirisad. Agi, Moab-e-neg-dulesulidgansik anmar naded.
DEU 2:9 ”Geb degine, Bab-Jehová anga sogsabalid: ‘Melle be Moab-dulemarse achamalo, melle ebo be bila-onomarbalo. Ar e-yar-naid soggwensaale an bemarga ukosulid. Ar bato an Lot-waganga Arʼye-neg-nugadi an uksad.’
DEU 2:10 ”Dakargua, iduale, a-yargi Emita-dulemar bukwagusmalanad. A-dulemar bukidarmalanad, dutusur nanaenad, degine, Anac-waganyobi, bela-bela masdummagananad.
DEU 2:11 Emita-dulemar, Anac-waganmala dule-masdummaganye e-annik-sogledaenad. Moab-dulemardi, Emita-dulemarye bimalad.
DEU 2:12 Degine, Seir-yargine, iduar Horí-dulemar bukwagusmalad. Esaú-wagan, we-Horí-dulemar-onos gusad, bela obelos gusmalad. Geb a-yargine, Esaú-wagan ambikusmalad. Igi Israel-dulemar Bab-Jehová-ega-yar-ukoye-sogsadgi, deyob Esaú-wagan imakmarmogoed, bela dulemar-obelomarmogoed.”
DEU 2:13 Moisés sogdebalid: “Bab-Jehová weyob igar uksabalid: ‘Ar emigindi, be namarsun. Bemar Zered-dian obakmarsun.’ Deyob geb anmar Zered-dian obaksamarsunnad.
DEU 2:14 ”Anmar Cades-Barneaʼgi-noalid-akale, Zered-diangi obaksamaladse birga-dulagwen-gakambe-gakabaabakgusad (38). We-birgamar-nasadbali, machergan-bila-onomalad bela burgwisad. Igi Bab-Jehová ise-sogar sogsagusa: ‘An-bemarga-sognaid-yar-ukoedgi we-machergan dogosurmarye,’ deyobi gusad.
DEU 2:15 Bab-Jehová we-machergangi yolenonigusad, geb, degidbali, bela we-dulemar-obelononi gusad.
DEU 2:16 ”Dulemar-nabir-bila-onomalad bela burgwismargua,
DEU 2:17 Bab-Jehová anga sunmaknonikid, anga sognonikid:
DEU 2:18 ‘Emi, be Moab-yargi Ar-neggwebur-walik nasaoye.
DEU 2:19 Amón-dulemar-bukwadse bemar modapile, melle be ese achamaloye, melle ebo be bila-onomarbaloye. Ar Amón-yar-naid, soggwensaale an bemarga ukosulid. Ar bato an Lot-waganga uksad.’
DEU 2:20 ”Dakargua, we-yarde dule-masdummagan-yarye bilesbalid. Ar epenne, dule-masdummagan agi bukwa gusmalad. Amón-dulemar, a-dulemar Zomzom-dulemarye bismalad.
DEU 2:21 We-dulemar ichesur-mergu gumalanad, dule-gala-ibegan nanaenad, Anac-waganmaryob dule-masdummagan nanaenad. Bab-Jehová a-dulemar, Amón-dulemarse-galakuega imaksad, geb deyob Amón-dulemar we-dulemar-obelos gusad. Geb agine, Amón-dulemar, Zomzomeo-dulemar-obelosgusmargu, e-yargi ambikude gusmalad.
DEU 2:22 Bab-Jehová, deyob Esaú-wagan Horí-dulemar-obelogega imaksagusmogad. Deunni, Horí-dulemar, Seir-yalagi bukwamalanad. We-garda-narmaklenaidse, Esaú-wagan, Horí-dulemar-obelosmargua, Seir-yargi ambikunonimalad.
DEU 2:23 Amba deyobi, Aveo-dulemar Gaza-neggwebur-burwiganagi-bukwamargu, gusmarmogad. Caftor-dulemar-Creta-dup-yargi-danigusmaladi, bela Aveo-dulemar obelolesmalad. Geb degidbali, Caftor-dulemar Aveo-dulemar-yargi muchub ambikunoni gusmalad.”
DEU 2:24 Moisés Israel-dulemarga sogdebalid: “Bab-Jehová anga sogsabalid: ‘Be namarbar, be Arnón-dian obakmalo. An Amorreo-dule-Sehón Hesbón-e-rey an bemarga urmaknaid. Egi-nakwega an bemar-imakoed. Be e-yar sunamar, egi be bila-ononamar.
DEU 2:25 Deginbali, emi-iba-akale, bemar-asabinni bela dulemar-yar-baid-baidgi-bukwadgi an dobed nasikoed. Ar a-dulemar be-gangued-nikad-itoarmalale, dobed egi nagunonikoed, degidba wawanmakdemaloed.’ ”
DEU 2:26 Moisés sogdebalid: “Nega-dulesulidgan-Cademotʼye-nugad-akar, Hesbón-e-rey-Sehónʼse an weyob gaya-nued barmisgusad: ‘Melle anbo urwemaloye.
DEU 2:27 Be-yalagangi igar-dummad-maidba an nasaoye. Bipisaale igar-maidgi an aibanosurye, unnila igarbarbi an nasaoye.
DEU 2:28 Anmar mas-gunnegala, bese manigi anmar bakoye, degine, anmar dii-gobegala, bese manigi anmar bakbaloye. Unnila bese an egisye, be-yargi-naed be anmar-imakye.
DEU 2:29 Igi Esaú-wagan-Seirʼgi-bukwamalad, degine, Moab-dulemar-Ar-neggweburgi-bukwamalad, e-yargi-naega anmar-imaksamala, deyob be anmar-imakmoye. Ar anmar Jordán-diwar-obaked abegeddeeye, anmar-Bab-Dummad-Jehová anmarga-yar-uknaidse dogegarye.’
DEU 2:30 ”Ar Hesbón-e-rey-Sehónʼdi, e-yargi-naega gwen anmar-imaksasulid. Ar ade, be-Bab-Dummad-Jehová, a-rey-burguega, mer anmarba-ibsaega imaksad, adi, anmarga urmakegar. Ar igi emi-ibadse, anmar-maiga-gudimala, deyob, gudii gumalagar.
DEU 2:31 ”Geb degine, Bab-Jehová anga sogded: ‘Emi, Rey-Sehónʼgi-nakwega an bemar-imak, e-yala an bega ukbar. Degisoggu, e-yala begadga-guega be sue.’
DEU 2:32 ”Degine, Rey-Sehón bela e-sordaganmala anmar-abin noalid, Jahazaʼye-neg-nugadgi anmarbo urwemalagar.
DEU 2:33 Ar anmar-Bab-Dummad-Jehováʼdi egi-nakwega anmar-imaksad. Rey-Sehón, e-masmala, e-sordamar, bela anmarse galakusad.
DEU 2:34 Degine, bela Sehón-e-neggweburmar anmar susad, deginbali, bela e-dulemar anmar obelosbalid: Bela e-machergan, e-omegan, degi, e-mimmigan anmar ogilosad. Bipisaagwale wargwensaar dula obessulid.
DEU 2:35 Unnilagwa anmar e-neggweburmarbi susmalad, e-ibmar-durganbi susmalad, e-ibmar-nueganbi susmarbalid.
DEU 2:36 Arnón-dian-dikarba Aroer-neggwebur-siid-akar, degi, neggwebur-nebagi-siid-akar, Galaad-yar-naidse, neggwebur-gwagwensaale sigissulid, bela anmar-Bab-Dummad-Jehová anmarga urmaksad.
DEU 2:37 Unnilagwa, igi anmar-Bab-Dummad-Jehová anmarga-sogsa, Amón-dulemar-bukwad-e-yala, Jaboc-diwar-naba-neggweburmar-bukwad, yalaganba-neggweburmar-bukwad, we-neggweburmar mer ebugoye. A-neggweburmarbi anmar ese achassulid.”
DEU 3:1 Moisés Israel-dulemarga sogdebalid: “Degine, anmar gannar arbalid, geb Basán-yarsik anmar nade gusad. Agine, Basán-e-rey-Og, bela e-sordamarmala anmarbo-urwegala, Edrei-neggweburgi anmar-abin noalid.
DEU 3:2 ”Degine, geb Bab-Jehová anga sogsad: ‘Melle be we-dule dobguo, ar ade, we-rey, e-dulemar, degi, e-yarse-bakale, bato an bega uksad. Ar igi Amorreo-dulemar-e-rey-Sehón, Hesbónʼgi-bukwagusmalad be imaksa, deyob be Og-imakbalo.’
DEU 3:3 ”Geb deyob gunonikid. Anmar-Bab-Dummad-Jehová anmarse Basán-e-rey-Og-galegega imaksad. Bela e-sordamarse-bakale, anmarga urmaksabalid. A-dulemargi anmar nakwisad, bela a-dulemar anmar ogilosad.
DEU 3:4 Agine, anmar e-neggweburmar bela sunonikid. E-neggwebur-gwagwensaale bessurgusad: Neggwebur-gwadulapaa (60) anmar susad. Anmar bela Argob-yar susad. Basánʼgi Rey-Og-negdakmaid-yalamar anmar bela e-ibe susad.
DEU 3:5 Bela a-neggweburmar, galu-matusulid-gandikmalad nue-ebiris nika-nika nanaed. Degine, e-yawagak esgoro nika-nika nanabalid. Deginbali, neggwebur-burwigana bukidar galu-matusulid-sate nanabalid, amar bela anmar susbalid.
DEU 3:6 Ar igi anmar Hesbón-e-rey-Sehón-imaksagusa, deyob, anmar Og-imaknonimogad. Anmar, Og-e-neggweburmar obelosad, e-machergan, e-omegan, degi, e-mimmiganse-bakale, anmar ogilosad.
DEU 3:7 Unnila e-ibmar-durgan, degi, e-ibmar-nuegan, e-neggweburgi-amislesmaladi anmar susad.
DEU 3:8 ”A-ibagangine, anmar Arnón-dian-akale, Hermón-yar-siidse yar sunonibalid. We-yarmar Amorreo-dulemar-e-reymar-warbogwad Jordán-obakar-dad-nakwedsik yar-semamainad.
DEU 3:9 We-Hermón-yala Sidón-dulemar Siriónʼye bimalad. Amorreo-dulemardi Senirʼye bimalad.
DEU 3:10 ”Deginbali, anmar bela neggweburmar-nebagi-bukwamalad susbalid. Bela Galaad-yar-naid, degine, bela Basán-yar-naid-akale, Salca-neggweburse, degine, Edrei-neggweburse susbalid. We-neggweburmar, Basán-yargi Rey-Og-negdakmaid-neggweburmalad.
DEU 3:11 Basán-e-rey-Og, abi napi dule-masdummad gudii gusad. E-gabedi, bela esgorobiid. E-gabed-suguedi, dalibo-bisgise sugued. E-matardungueddi, daligwen matardungued. Rey-Og-e-gabedi, Amón-dulemar-e-neggwebur-Rabáʼgi amba oyolemaid.”
DEU 3:12 Moisés Israel-dulemarga sogdebalid: “A-ibagangi, we-yarmar anmar susgua, dad-nakwed-argan-sapiledsik Aroer-neggwebur-Arnón-dian-walik-siid-akale, degi, Galaad-yarmar-negabala, e-neggweburmarse-bakale, Rubén-waganga, degi, Gad-waganga, an uksad.
DEU 3:13 ”Galaad-yarmar-abalad-baidi, bela Basán-yala, Rey-Og-negdakmai-gusadi, an Manasés-wagan-negabaladga uksad. ”Basán-yargi Argob-yar-naidi, dule-masdummagan-yarye bimalad.
DEU 3:14 Manasés-wagwa-Jair, bela Argob-yar, Gesur-abingunaidse, degi, Maaca-abingunaidse susad. A-yar, Basán-Havot-Jairʼye onugsasad. We-yala, we-garda-narmaklenaidse amba deyob nugad.
DEU 3:15 Maquir-wagangardi Galaad-yar an ega uksad.
DEU 3:16 ”Rubén-wagangardina, degi, Gad-wagangardina, Galaad-akar, Arnón-dianse an yar uksad. Arnón-dian-neba-negabaladse e-yar-abingunaidga gunaid. Degi, Jaboc-diwar, Amón-dulemar-e-yar-abingunaidga maid.
DEU 3:17 ”Deginbali, Rubén-waganga, degi, Gad-waganga dad-argwanedsik-e-yar-abingunaidi Jordán-diwar-maid, Cineret-demar-akar, Arabá-demar-Gagbidye-nugadse, Pisga-yar-nakwemaidse an ega yar uksad.
DEU 3:18 ”A-ibagangine, Rubén-waganga, Gad-waganga, degine, Manasés-waganga an weyob sogsa gusad: ‘Bemar-Bab-Dummad-Jehová we-yala degisadegu bemarga uknaiye. Degi-inigwele, bemar sordamar-dutusurmaladid, bila-onomaladid, Jordán-diwar obakmaloye, be-gwenadgan-Israel-dulemar-idumai be gumaloye.
DEU 3:19 Unnilagwa, bemarga an neggweburmar-uksadgi be-omeganbi, be-mimmiganbi, degi, be-ibdurgan-bukidar-nikad, amarbi bemaloed.
DEU 3:20 Bab-Dummad-Jehová igi bemarga neg-bogidik nasiksa, deyob be-gwenadganga neg-bogidikid-nasikedse geb bemar an-bega-yar-mimisadse aibiroed. Deginbali, be-gwenadgan Jordán-diwar-obakar ega-yar-uklegoed bela sunonimaladse geb be gannar aibirmaloed.’
DEU 3:21 ”Deunni, a-ibagangine, Josuéʼga weyob an igar-uksagusad: ‘Josué, be-sunnagwad bela be daksad, igi be-Bab-Dummad-Jehová reymar-warbogwad imaksa. Bela reymar-baigangi-be-nasaoedi, Bab-Jehová deyob imakbaloed.
DEU 3:22 Melle a-reymar be dobguo, ar ade, be-Bab-Dummad-Jehová, bemar-ular urwenaid.’ ”
DEU 3:23 Moisés Israel-dulemarga sogdebalid: “A-ibagangine, Bab-Jehováʼse an goted. An ega sogded:
DEU 3:24 ‘Bab-Dummad-Jehováʼye, emide, be-gangued be-maiga be oyoalid. Nibneggine, degine, napneggine, bab-dummad-baid beyobid sulid. Beyob ibmar-dummagan-imaked, degi, ibmar-dakledisurmalad-imaked sulid.
DEU 3:25 Bab-Dummadye, an bese wilesakwaa egised: Yala-nuegan-nanaid-daknaega, degine, Líbano-yar-naid daknabaliga, wis be Jordán-diwar-obakega be an-imake.’
DEU 3:26 ”Ar Bab-Jehováʼdi bemar-ular anse ulusad. Degisoggu, an-itossulid, ar anga bur sogded: ‘¡Gusa! We-igargi mer be bar anga sunmako.
DEU 3:27 Pisga-yar-dukuse be nakna. Dad-nakwedsik, degi, dad-argwanedsik be atako. Degine, dad-nakwed-argan-sapiledsik, degi, dad-nakwed-argan-nuedsik, be atakbalo. A-yar, be-ibyagwar be dakoed, Jordán-diwardi be obakosulid.
DEU 3:28 Degisoggu, Josuéʼga igar be uko, be ogannogo. Ar ade, Josué, we-dulemar-idumai guoed. Deginbali, we-yar-be-dakoedi, Josué, Israel-dulemarga mimibaloed.’
DEU 3:29 ”Geb degine, anmar Bet-Peor-asabin nebagi ambikusad.”
DEU 4:1 Moisés sogdebalid: “Israel-dulemar, Igar-Mamaidgi-an-bemar-odurdaksa-gusadi, be nue-itomalo, egi be nue nanadii gumalo. Ar deyobi, bemar nued-gudii gumaloed, degine, geb be-dadgan-e-Bab-Dummad-Jehová bemarga yar-ukoedgi nabir be dogmaloed.
DEU 4:2 Mer ibmar-an-bemarga-sognaid obulomalo, degi, mer abar-abar sogmarbalo. Bela be-Bab-Dummad-Jehová-Igar-uksadba, an-bemarga a-igar-sognaidba be nanamalo.
DEU 4:3 ”Bemar-sunnagwad na be-ibyagwar, Bab-Jehová Baal-Peorʼgi neg-imaksad be daksamalad. Deunni, be-Bab-Dummad-Jehová, bemar-abargi bela-dule-bab-dummad-Baal-Peorʼba-nadmalad ogilos gusad.
DEU 4:4 Ar bela bemar, be-Bab-Dummad-Jehováʼba-nagusmaladdi, emi-ibase amba dula-gudidimalad.
DEU 4:5 ”Nue be itomalo. Anga an-Bab-Dummad-Jehová igar-uksagusadgi an bemar-odurdaksamalad. Adi, bemar, yar-susokalidgi a-igarmarba be nue nanamalagar.
DEU 4:6 Degisoggu, we-Igarmarba nue be nanamalo, nue aba ibmar-imakdii gumalo. Ar deyobi, bemar, dulemar-yar-baid-baidginmalad-asabin nue-binsaed-nikadi be oyodii gumaloed, magar-nue-ibmar-itogedi be oyodii gumarbaloed. Ar wemar bela we-Igar-Mamaid itodamaloed. Geb degine, sogdamaloed: ‘Ar wede, nue-napiragwad, we-dulemar nue-binsaed-ibegan-nanaed, nue magar neg-itomaladid, degine, we-dulemar nue-nug-nikamalad nanamarbalid.’
DEU 4:7 ¿Ar biti-dulamar-baigan, anmar-dulamarba bur nug-nika gusunna? Igi anmar, anmar-Bab-Dummad-Jehováʼse-gotele, anmar-walikaa gunonidae, ¿biti-dulamar-baigan e-bab-dummaganse-gotele, ese walikaa gunonidamoga? Suli, sate. Ar anmar-Bab-Dummaddi anmar ese goted-ilibali, anmar-walikaa gunonidaed.
DEU 4:8 Degine, igi an bemarga igarmar-mesnai, deyobi, ¿biti-dulamar-baigan igarmar-innikigwad-nika gudimar be ebinsae? Ar dulamar-degiid nikasulid.
DEU 4:9 ”Degisoggu, nue salakarmar. Nue be itomar. Melle be ibmar-daksamaladi iemalo. Degine, bemar-gudiidgi ebinsadii be gumalo. Be-mimmigan be odurdakmalo, be-wagan be odurdakmarbalo.”
DEU 4:10 Moisés Israel-dulemarga sogdebalid: “Deunni, bemar, Horeb-yargi be-Bab-Dummad-Jehová-asabin-bukwagusmargu, Bab-Jehová anga sogsa gusad: ‘Dulemar an-gayaburba-itomalaga danar be urbe. Adi, we-napneggi-gudiidgi an-dobee-nanamalagar, an-nug-odummomalagar, degi, na e-mimmigan-odurdakmalagar.’
DEU 4:11 Deunni, bemar, Horeb-yar-nakwedse nonigusmalad. Geb agi bemar ambikunonimalad. A-yargine, soo bupurmakmai gusad, yala gummakmai gusad. Soo ginnitibi, matusur-ainakmai gusad, waa gudure-gudure nakwemai gusad, negasichid nagud gusad.
DEU 4:12 Geb degidgine, Bab-Jehová bemarga soo-abargi sunmaksad. Bemar e-gayaburba-sunmaked itosmalad. Unnila gayaburbabi bemar itosmalad, e-duledi gwen be daksasurmalad.
DEU 4:13 Deyobi, Bab-Jehová bemarbo-Igar-Mesnai gusad, we-Igarmar-Sogambegwad-bemarga-sogsagusadba be nanamaloye. We-Igarmar-Sogambegwad (10) akwa-matabogwadgi narmaksa gusad.
DEU 4:14 A-ibagangine, Bab-Jehová anga sogsa gusad, ande Igarmar-bemarga-soglesadgi bemar-odurdakoye, adi, Jordán-diwar-obaksamalar, bemar-yar-sunonikoedgi eba be nanamalagar.”
DEU 4:15 Moisés Israel-dulemarga sogdebalid: “Bab-Jehová bemarga soo-abalagi-sunmaksagua, bemar e-dakleged daksasurmalad. Degisoggu, nue salakarmar,
DEU 4:16 abakale, bemar yogasaar ibmar-e-wilubgan sobbarmalale: Machergan-e-wilubgandibe, omegan-e-wilubgandibe,
DEU 4:17 ibdurgan-napneggi-nikad-e-wilubgandibe, nuumar-niba-gukudimalad-e-wilubgandibe,
DEU 4:18 ibmar-napneggi-garmakdimalad-e-wilubgandibe, uamar-gudidimalad-e-wilubgandibe, amar-e-wilubgan melle be sobmalo. Degiile, bemar isgudmaloed.
DEU 4:19 ”Nue salakarmar. Ar be niba atakdemalale, we-ibmar be dakdele: Dad-ibeler, nii, niisgwamar, bela niisgwamar-akar-akar-nanaid be dakdele, abakale, ese be binsaed-galedamalar, e-nug-odummonai gudamalar, e-asabin dulluu sigdamalar. Ar ade, bemar-Bab-Dummad-Jehová, bela dulemar-we-napneggi-bukwamaladga we-niisgwamar obinnisad.
DEU 4:20 ”Ar Bab-Jehová bemar-sunonikid, Egipto-yala-esgoro-duleged-negyob-guedgi bemar-onononikid. E-dulamarga-guega bemar-sunonikid, igi emi-iba bemar e-dulaga gumala.
DEU 4:21 ”Degi-inigwele, bemar-nukad Bab-Jehováʼdi anse ulusad, anga ise-sogar sogsad: ‘Jordán-diwar be obakosurye, be-Bab-Dummad-Jehová yar-nued bemargadga-guega-uksokalidse be dogosurye.’
DEU 4:22 Degisoggu, Jordán-diwar-obakosuli an we-yargi burgoed. Ar bemardina, Jordán-diwar obakmaloed, degine, bemarga yar-nued-uklegoye-soglesadi, bemar sunonikoed.
DEU 4:23 ”Degisoggu, nue salakarmar, abakale, bemar-Bab-Dummad-Jehová bemarbo-Igar-Mesisad iedamalar. Be-Bab-Dummad-Jehová bemarga sogsad: ‘Melle ibmar-wilubgan be sobmaloye.’
DEU 4:24 Ar be-Bab-Dummad-Jehová, Bab-Dummad-noberbadid, soo-bela-ibmar-ogumakedyobidid. ”A-ulale, weobdo:
DEU 4:25 Ar bemar we-yargi-ambikunonimaladgi mimmigan-nikunonikile, wagan-nikunonikile, degine, sereddii be megnonimalale, melle bab-dummadyob-imaklemalad be sobmalo, deginbali, melle be e-nug odummomarbalo. Ar degiile, bemar be-Bab-Dummad-Jehová-asabin isgued-dummad imakoed. Degidbali, Bab-Jehová-ourwega be imakoed.
DEU 4:26 ”Degisoggu, inniki an emi bemarga soged, ar bemar Bab-Dummadba-ibsasurmalale, nibneg bemar-barsogega guoed, degi, napneg bemar-barsogega guoed. Ar bemar Jordán-diwar-obaksokalidgi, we-yar-susokalidgi bemar bergudmaloed. We-yargine, bemar undar-gudii guosurmalad, ar bemar Bab-Jehováʼse bela girgumaloed.
DEU 4:27 Ar Bab-Jehová yar-baid-baidse bemar-oaisakioed. Ar bia Bab-Jehová bemar-sedoe, agi bemar, wis ichesaar ambikumaloed.
DEU 4:28 ”Bemar dulemar-yamo-ibmar-e-wilubgan-sobsamalad-e-maiga be gunonimaloed. We-bab-dummagan: Suargi sobarmalad, Akwagi sobarmalad. Wemarde: Aku atakmalad, emar-itosurmarbalid, geg mas gunmarbalid, degine, geg ibmar umarbalid.” Wemarde, bab-dummadyob-imaklemaladid. Bab-Dummadsurmalad.
DEU 4:29 Moisés Israel-dulemarga sogdebalid: “Ar bemar, bia-bukwadgindibe, be-Bab-Dummad-Jehová be ulubgi napiragwadgi amiarmalale, bela-belagwadgi be amimalale, nabir be Bab-Jehová-aminonimaloed.
DEU 4:30 Ar igi an bemarga bela-ibmar-sogsa, deyob be wilearmalale, sulibinsa be itoarmalale, geb agi, napidgi be-Bab-Dummad-Jehováʼse be gannar dagmaloed, degi, Bab-Jehová-bega-ibmar-sogedba be ibsanonimaloed.
DEU 4:31 Ar be-Bab-Dummad-Jehová, dule-wiledaksoggu, bemar-dadgan-ebo-igar-mesisad iegosulid, ar ade, sogsad, ede a-igar imakedseye. A-ular, Bab-Jehová bemar-metosulid, bemar-obelogosurbalid.”
DEU 4:32 Moisés Israel-dulemarga sogdebalid: “Be-Bab-Dummad-Jehová ibmar-gegerdakleged-dummagan bemarga imaksad. Degisoggu, emigindi, be egismardo, Bab-Dummad we-napneggi dule-obinnisad-akale, bemar-idu ibagan-nasmaladgine, degine, bela we-napneg-dirbir-naidgine, ar Bab-Jehová bemarga ibmar-imaksadyob, ¿ibmar-gegerdakleged imaklesgusa? Ar Bab-Jehová bemarga ibmar-imaksadyob, ¿Bab-Dummad-ibmar-imaked itolesgusa? Ar weyobid bemar itodisurmalad.
DEU 4:33 Ar igi Bab-Dummad bemarga soo-abalagi-sunmaksa, degine, bemar ese gwen burgwissurmarbalid, ¿ar biti-dulemar deyob gusmarmo be ebinsae? Gwen deyobid itoledisulid.
DEU 4:34 Ar Bab-Dummad dulamar-bamalad-abargi dulamar-bukwad-gwensak-suegala, igar-bulegan-oyonai gualid, ibmar-wilubgan-oyonai gualid, ibmar-dakledisurmalad-oyonai gualid, bila-onoleged-ononai gualid. Degi, ibmar-gegerdaklemalad gandikidba-oyonai gualid, bela gargangued-oyonai gualid. ¿Biti-bab-dummad deyob ibmar-imaknai be daksamala? Suli. Deyob bab-dummad-baid ibmar-imaknai be daksasurmalad. Unnila be-Bab-Jehováʼbi bela-Egipto-yargi bemarga ibmar-imaksad be daksamalad.
DEU 4:35 ”Bela we-ibmar-bemarga-oyolesadi bemar wisguegalad, Bab-Jehová, Bab-Dummad gued, degine, ayobid, Bab-Dummad-baid sated.
DEU 4:36 Bab-Dummad-Jehová bemar-odurdakegala, nibneg-akale, e-gayaburba-itogega be-imaksad. Degine, napneggi, e-soo-gangued bemarga oyosbalid. Soo-abalagine e-gayaburba-itogega bemar-imaksabalid.
DEU 4:37 Ar Bab-Jehová bemar-dadgan-sabgussoggu, a-ulale, amar-burgwisad-sorba, e-wagan-sunonikid. Bab-Dummad bemarba-gudiidbali, deunni bemar Egipto-yargi-bukwamargu, na e-ganguedba bemar-onosad.
DEU 4:38 Bab-Jehová, bemar-idu dulamar-dummagan-bukwadi, bemarba bur-dutusurmaladi, bemar-wagab onosad. Adi, a-yarse bemar-odogega, a-yar bemarga-ukegar. Emide, bemar a-yar susokalid.
DEU 4:39 ”Degisoggu, emi be durdakmar, nue ebinsamalo: Bab-Jehová, Bab-Dummad gued. Nibneggi Bab-Dummad gued. Napneggi Bab-Dummad gubalid. Bab-Jehováʼyobid Bab-Dummad-baid sated.
DEU 4:40 Degisoggu, Bab-Jehová-Igar-sogedba, Bab-Jehová-Igar-Mamaidba be nanamar. A-Igarmar an bemarga uknaid, adi, bemarga bela nueganbi ibmar-gumalaga, degi, bemar-sorba bemar-waganga ibmar-nueganbi naegar. Degine, be-Bab-Dummad-Jehová, bemarga yar-degisadegu-uknaidgi, bemar, undar-suiti-gudii gumalagar.”
DEU 4:41 Geb degine, Moisés Jordán-diwar-dad-nakwedsik, neggwebur-gwapaa nug-imaksad,
DEU 4:42 adi, dule-oburgwisad a-neggweburmarse wakinnegar. We-dule, oburgwebisulidgi dule-oburgwisale, isdar-dakdisulidgi emar-oburgwisale, ebo-urwedisulidgi emar-oburgwisale, sunna we-neggwebur-gwapaagwad-nug-imaklesadse na bendaklegega wakinned.
DEU 4:43 We-neggweburmargi-dukulegega, Moisés, Rubén-wagangala, Beser-neggwebur nug-imaksad. We-neggwebur nega-dulesulidganba, neba-naidgi siid. Gad-wagangala, Ramot-neggwebur nug-imaksad. We-neggwebur, Galaad-yargi siid. Degine, Manasés-wagangala, Golán-neggwebur nug-imaksad. We-neggwebur, Basán-yalagangi siid.
DEU 4:44 Moisés, Bab-Jehová-Igala, Israel-dulemarga uksad.
DEU 4:45 Israel-dulemar Egipto-yargi aligusmargua, Jordán-diwar-dad-nakwedsik, Bet-Peor-neba-naid-asabin ambikunonimargu, Moisés, we-Igarmar-Islidikid, Bab-Dummad-Sogedba-Igar-Maid, degi, Igarmar-Mamaid, Israel-dulemarga uksad.
DEU 4:46 Deunni, Bet-Peor-neba-naidi, Amorreo-dulemargadinad. Sehón, Hesbón-yargi reyga mai gusanad. A-yargine, Moisés, Israel-dulemarmala, Rey-Sehónʼgi nakwisgusmalad.
DEU 4:47 Israel-dulemar, Rey-Sehón-e-yar susgusmalad, degi, Basán-e-rey-Ogʼye-nugad-e-yar susgusmarbalid. Deyob, Amorreo-dulemar-e-rey-warbogwad-e-yarmar, Jordán-diwar-dad-nakwedsik-nanaid sulesgusad.
DEU 4:48 Aroer-neggwebur-Arnón-diwar-gakaba-siid-akale, Sión-yar-siidse, we-yarmar sulesad. We-Sión-yar, Hermónʼye nugbalid.
DEU 4:49 Deginbali, Jordán-diwar-dad-nakwedsik, bela Arabáʼse-bakar, Arabá-demarsega, degine, Pisga-yar-nakwemaidsega, Israel-dulemargadga gunonikid.
DEU 5:1 Moisés bela Israel-dulemarse gochad, ega sogded: “Israel-dulemar, emi-ibagi an bemarga Igar-sognaid, degine, an Igar-uknaid nue be itomar. Be durdakmalo, nue be ebinsadii gumalo, adi, a-sogedba be nanamalagar.
DEU 5:2 ”Anmar-Bab-Dummad-Jehová, anmarbogwa Horeb-yargi Igar mesisad.
DEU 5:3 Bab-Jehová anmar-babganbo we-Igar mesissulid, anmarbo Igar-Mesisad. Emi anmar bela dula-bukwamaladbogwa igar mesisad.
DEU 5:4 Bab-Jehová bemar-asabin yar-birgi soo-abalagi bemarga sunmaksad.
DEU 5:5 A-ibagangine, ani an Bab-Jehová-ibmar-sognaid bemarga-sogegala, bemar-irwa an gwichigusad. Ar bemar, soo-dobgusmarsoggu, a-ular, bemar yarse nakwissurmalad. ”Deunni, Bab-Jehová weyob sogsad:
DEU 5:6 ‘Ani an be-Bab-Dummad-Jehová gued. Bemar Egipto-yargi maiga-wilebukmargu, ani an bemar-onosadid.
DEU 5:7 ” ’Melle bab-dummad-baid an-asabin be nikumalo.
DEU 5:8 Melle be ibmar-wilubgan sobmalo, nibneggi ibmar-nikad-wilubgandibe, napneggi ibmar-nikad-wilubgandibe, demargi ibmar-nikad-wilubgandibe.
DEU 5:9 A-ibmar-wilubgan-asabin dulluu be imakosurmalad, degine, Bab-Dummadyob ese be golosurmalad, ar ade, ani an be-Bab-Dummad-Jehová gued. An, be-Bab-Dummad gadi-nobguedid. Ar an dule-isganamar-isdarsunna-dakmalad sabsur-odurdakedid. Degi, e-mimmigan, e-wagan, e-wagan-yokorbarmaladsega an sabsur-odurdakbalidid.
DEU 5:10 Ar dulemar-an-sabmaladdi, dulemar-an-Igarmar-Mamaidba-nanamaladdi, an bela-e-waganmar-danimaloed e-ibe nue-sabguedid.
DEU 5:11 Melle be-Bab-Dummad-Jehová-nug yogasaar be obaro. Ar dule yogasaar Bab-Dummad-nug obarisale, a-dule, Bab-Dummad-Jehováʼse sabsur-odurdaklegedsegad.
DEU 5:12 Obunnoged-ibagi be obunnogo, adi, a-ibagi, be Bab-Dummad-e-nug odummogegar. Igi be-Bab-Dummad-Jehová bega Igar-uksa, aba be imako.
DEU 5:13 Ibanergwa (6) be arbaoed. A-ibagangi bela ibmar-imakbied be imakoed.
DEU 5:14 Ibagugledgindi (7) obunnoleged-ibad, be-Bab-Dummad-Jehová-e-nug-odummolegedid. A-ibagi bipisaale be arbaosulid. Be-machi, be-bunagwa, bega-arbaed-machered, bega-arbaed-ome, be-moli-bebe-nikad-alugwasualed, be-moli-uayasuid, be-ibdurgan, a-ibagi, arbaosurmarmogad. Deginbali, dule-be-yarginedsulid be-negyagi-gudiid, a-ibagi arbaosurmarmogad. Ar obunnoged-ibagi igi be obunnomoga, beyobi bega-arbaed-machered, degine, bega-arbaed-ome, obunnomarmogoed.
DEU 5:15 Egipto-yargi be maiga-gusmogad be ebinsao. Ar a-yargi be-Bab-Dummad-Jehová e-gangued-nikadba-be-onosadi, be ebinsao. A-ulale, be-Bab-Dummad-Jehová, bega igar-uksad: Obunnoged-ibagi be obunnogoye.
DEU 5:16 Be-daedbali be-bab-nug-odummodii, degi, be-nan-nug-odummodii be nanamalo. Adi, be-Bab-Dummad-Jehová we-napneg-bega-uknaidgi sereddii be megegar, degi, bela bega ibmar-nueganbi gubaligar.
DEU 5:17 Melle be dule-oburgo.
DEU 5:18 Melle be be-abirginsulid-ebo galagwensuli nanao.
DEU 5:19 Melle be ibmar-atursao.
DEU 5:20 Melle be gakansaar aimargi sunmako.
DEU 5:21 Melle be dule-baid-ibmarbina sogo: Dule-baid-omebina, dule-baid-negbina, dule-baid-nainubina, dule-baid-mai-macheredbina, dule-baid-mai-omebina, dule-baid-moli-bebe-nikad-alugwasualedbina, dule-baid-moli-uayasuidbina. Bipisaale dule-baid-ibmarbina be sogosulid.’ ”
DEU 5:22 Moisés Israel-dulemarga sogdebalid: “Bemar yar-dikarba bukwamargu, we-gayaburba Bab-Jehová bemarga binnasuli soo-abalagi sunmaksagusad, mogir-gudureged-abalagi, negasichid-abalagi sunmaksagusad. Ibmar-baid bemarga bar obarissulid. Geb Bab-Jehová akwa-matabogwadgi narmaksagusad. Agi anga uksad.
DEU 5:23 ”Ar bemar, negasichid-naigusgu, yargi soo-gwabunye-maigua, gayaburba itosmalad. Agine, bemar-danar-danar-bukwad-e-dummagan, degi, bemar-girmar-dummagan, bela anse noni gusmalad.
DEU 5:24 ”Geb agi anga sognoni gusmalad: ‘Anmar-Bab-Dummad-Jehová anmarga e-gangued-yeerdakleged, degine, e-dummarba-gued anmarga oyosye. Bab-Jehová soo-abalagi anmarga-sunmaksadi anmar itosbarye. Emi, anmar daksaye, Bab-Dummad sunna dulebo sunmakye, degine, dule amba sunna dula-gudii guye. Ar dule burgwewilubbinye.’
DEU 5:25 ”Ar anga sogsamarbalid: ‘Emide, ¿ibiga anmar binsarsunna we-soo-gwabunye-gwichidse burgwebimarsunye? Ar anmar Bab-Dummad-Jehová-anmarga-sunmaknaid gannar itononibalile, anmar ese oburgwilegoye.
DEU 5:26 Ar ade, ¿doa-dule anmaryob Bab-Dummad-e-gayaburba soo-abalagi-sunmaksad itosye, degi, gwen burgwissur be ebinsaye?’
DEU 5:27 ”Anga sogsamarbalid: ‘Moisés, be, anmar-Bab-Dummad-Jehováʼse be naye. Bela anmar-Bab-Dummad-Jehová-ibmar-sogoed be itogoye. Be, anmar-Bab-Dummad-Jehová bega-ibmar-sogoed bela be anmarga sogmogoye. Anmar geb itononimogoye. Geb Bab-Jehová-ibmar-sogedba anmar ibsaoye.’
DEU 5:28 ”Bemar anga ibmar-sognaigusgu, Bab-Jehová bemar-itosad. Agi, anga Bab-Jehová sogsad: ‘We-dulemar-bega-sunmaksamalad, an bela itosye. Bela-bega-sogsamalad an nueganbi itoye.
DEU 5:29 Bitigi ulubgi degibi an-dobee-nanamalana gadinye, degine, bela an-Igarmar-Mamaidba nanadigumalana yeerbanye, adi, we-dulemala, degine, e-mimmigana bela ega degisadegu ibmar-nueganbi gumalagarye.’
DEU 5:30 ”Anga Bab-Jehová sogdebalid: ‘Moisés, be naye, dulemarga be sognaye: Be-dordonegse be gannar namarye.
DEU 5:31 Bedina, wegi an-walik be beoye. An bega bela Igarmar-Mamaid an bega ukoye, adi, a-Igarmargi be Israel-dulemar-odurdakoye. Adi, bemarga-yar-uklesokalidgi, a-Igarmar-Mamaid-sogedba be nanadii gumalagarye.’
DEU 5:32 ”Degisoggu, Israel-dulemar, nue salakarmar. Ar igi bemar-Bab-Dummad-Jehová bemarga-sogsa, aba be nanadii gumarsun. A-Igargan mer be soggwensaale obemalo, bela eba be nanamalo.
DEU 5:33 Bemar, Igarmar-be-Bab-Dummad-Jehová-bemarga-uksadba degisadegu nanadii gumalo, adi, bemar dula-gudii gumalagar. Deyobile, bemarga ibmar-nueganbi gumaloed, adi, yar-bemargadga-gusokalidgi suitibaksaar be gudii gumalagar.”
DEU 6:1 Moisés Israel-dulemarga sogdebalid: “An bemar-odurdakmalaga, we-Igarmar-Mamaid, we-Igarmar-uklesad, be-Bab-Dummad-Jehová bemarga uksad. Bemar we-yar-bemarga-uklenaidse dogdele, a-Igarba be nanadii gumalo.
DEU 6:2 Be-mimmigan, be-wagan, bela-bemar we-napneggi-dula-gudiidgi be-Bab-Dummad-Jehová-dobee nanamalo. Bela Igarmar-Mamaid, Igarmar-an-bemarga-uked, aba be nanamalo, adi, we-napneggi suitibaksaar dula be gudii gumalagar.
DEU 6:3 Israel-dulemar, degisoggu be nue-itomar, gatik Bab-Dummad-sogedba be nanadii gumar. Adi, yar-gadi-ibmar-sanmakedgine, yar-napa-nuedgine, be nued gudii gudmaloed, egi be dula-bukidar-nikumai gudmaloed. Igi be-dadgan-e-Bab-Dummad-Jehová bemarga-yar-ukedseye sogsagusa, deyob guegar.
DEU 6:4 ”Israel-dulemar, nue be itomar: Anmar-Bab-Dummad-Jehová, unnila wargwenna gued.
DEU 6:5 ”Be-Bab-Dummad-Jehová bela-belad be-gwagegi, be-san-burbagi, degine, bela be-ganguedgi be sabguoed.
DEU 6:6 ”Emi-ibagi, we-gayaburba an bemarga-sognaid, nue be-gwage-ulubgi be sedii imakmalo.
DEU 6:7 We-gayaburbamar, be-mimmigangala, be gannar-gannar-sogdii nanamalo. Be-neggi be gudiile, igarba be gudiile, be megesokalile, degine, be gwisgualile, ega be sogdii nanao.
DEU 6:8 We-Igarmala be-argangi wilubganyob be atinnar-nasiko. Degine, be-bebegi wilubganyob be nasikbalo.
DEU 6:9 Degine, be-neg-buarmargi be narmakbalo, degi, be-yawagakmargi be narmakbalo.”
DEU 6:10 Moisés Israel-dulemarga sogdebalid: “Be-Bab-Dummad-Jehová, be-dadgan-Abrahamʼga, Isaacʼga, degi, Jacobʼga, yar-ukedseye sogsagusad. Bab-Jehová a-yargine be-odononimaloed. A-yalagi, neggwebur-dummagan bubukwad, neggweburmar-nue-nasgumamai nanaed. A-neggweburmar, gwen bemar sobsasurmaladid.
DEU 6:11 Degine, a-yargi negmar-bubukwad ibmarmar-nuegan-nika nanaed. A-ibmarmar, gwen bemar onmaksasurmaladid. Degine, dia-dummagan-bukwa nanabalid, gwen bemar akwissurmaladid. Uva-dubmar, degi, olivoʼmar digar nanaibalid, gwen bemar digsasurmaladid. ”Amar bela bemar gutemalale, nue immeledmalale,
DEU 6:12 nue salakarmar, melle Bab-Jehová-iedmalo. Ar bemar Egipto-yargi maiga-wilebukwamargua, Bab-Jehová bemar-onosgusad.
DEU 6:13 ”Be-Bab-Dummad-Jehová-e-nug be odummodii nanamalo, eba be ibsadii nanamalo. Be ibmar ise-sogar-imakbiele, Bab-Dummad-nugginbi be imako.
DEU 6:14 Melle be dule-be-dikarba-bubukwamalad-e-bab-dummaganba be namalo.
DEU 6:15 Ar be-Bab-Dummad-Jehová bemar-abargi-gudiidi, nue-noberbadid. Ar bab-dummad-baid be-Bab-Dummadga be imakalile, Bab-Jehová-sabsur-ourwega be imakoed. Ar degigudele, we-napneggi bela bemar-ogilogoed.
DEU 6:16 ”Bemar Masahʼye-neg-nugadgi Bab-Dummad-Jehová-wilubdaksayobi, melle be Bab-Jehová-wilubdakmalo.
DEU 6:17 Nue salakarmar, be-Bab-Dummad-Jehová-Igarmar-Mamaidba be nanadii gumalo. Igarmar-Islidikidba, Bab-Dummad-Sogedba-Igar-Maidba be nanadii gumalo.
DEU 6:18 Be-Bab-Jehová-asabin ibmar-innikimaladbi be imakdii gumar, ibmar-nueganbi be imakdii gumar, adi, bemar, nued gudii gumalagar. Degine, Bab-Jehová be-dadganga ise-sogar yar-nued-ukoye-sogsadi be sumalagar, adi, bemargadga guegar.
DEU 6:19 Deginbali, Bab-Jehová, bega-sogsadba, be-asabin be-isdarmalad-ononnogoed.”
DEU 6:20 Moisés Israel-dulemarga sogdebalid: “Yoedsega, be-mimmi bese egichialile: ‘Ar we-Igargan-Mamaid, Bab-Dummad-Jehová-Sogedba-Igargan-Mamaid, degi, Igargan-soglesad-uksad, ¿ibi obare?’
DEU 6:21 Weyob be-machiga be sogoed: ‘Anmar Egipto-yargi Faraón-e-maiga-gudigu, Bab-Jehová gandikidba Egipto-yargi anmar-onosad.
DEU 6:22 Bab-Jehová anmar-wagabsunna, ibmar-gegerdaklemalad, ibmar-dummagan-dakledisurmalad, degine, ibmar-dummagan-gegerdaklemalad Egipto-yargi imaksad. Bab-Jehová-Faraónʼgi-gwisgusad anmar daksad, degi, Faraón-e-neguyaginmaladgi-gwisgusad anmar daksabalid.
DEU 6:23 Bab-Jehová Egipto-yargi anmar-onosad. Ede, anmar-dadganga yar-ukedseye-sogsadse anmar-senonikid.
DEU 6:24 Bab-Dummad-Jehová anmarga sogsad, bela-e-Igar-uksadba anmarde nanamaloye. E-dobekwaa nanamaloye, adi, anmarga bela ibmar-nueganbi naegarye, degine, suiti-gudii guegarye, igi emi-ibadse anmar gudii.
DEU 6:25 Degine, anmar, anmar-Bab-Dummad-Jehová-anmarga-sogsadba-imakele, bela e-Igarmar-anmarga-uksadba-imakmalale, e-asabinni gwen galakussuli-nanamalale, anmar, dulemar-igar-innikii-imakmaladga guoed.’ ”
DEU 7:1 Moisés Israel-dulemarga sogdebalid: “Be-Bab-Dummad-Jehová be-yar-susokarmaladgi bemargadga-guega bemar-odogoed. Bab-Jehová, bemar-idu dule-bukidar-bukwamalad onogoed: Het-dulemar, Gergeseo-dulemar, Amorreo-dulemar, Canaán-dulemar, Ferezeo-dulemar, Heveo-dulemar, degi, Jebuseo-dulemar-bukwad, onogoed. ”We-dulemar-sogagugle-gumaladi (7), bemarba bur-melu sordamar nikamalad. Degine, bemarba bur dutusurmarbalid.
DEU 7:2 Degi-inigwele, be-Bab-Dummad-Jehová, bega we-dulemar-urmaksale, bemar egi nakwisale, be bela we-dulemar-ogilomaloed. Melle be we-dulemarbo igar-mesdii nanamalo. Melle be wiledakdii nanamarbalo.
DEU 7:3 Melle be we-dulemarbo nikumalo. Melle be be-sisgan a-dule-masmala-nikuega imako. Melle be e-sisgan be-masmala-nikuega be imakbalo.
DEU 7:4 ”Ar we-omegana, be-masmala-angi-banguega imakmaloed, bab-dummad-baiganba-nanamalaga be-imakmaloed. Ar deyob-gusale, Bab-Jehová bemargi sae-itononikoed. Degidbali, geb yog-bemar-ogilogar imakoed.
DEU 7:5 ”Weyob we-dulemar-e-ibmar be imako: E-bab-dummadse-ibmar-ogumakar-ukleged-aila ei be earo. E-akwamar-islidikmalad ei be mamaro. E-bab-dummad-bundor-Asera-e-wilub-sobaled be omukuo. Degine, e-suar-nuchumar-e-bab-dummadga-imakbukwad bela soogi be ogumako.
DEU 7:6 ”Ar ade, bemar, be-Bab-Dummad-Jehováʼba dule-islidikmalad gumalad. Ar be-Bab-Dummad-Jehová bemar-susad, adi, dulemar-baigan-we-napneggi-bukmaladba bur bule na egadga bemar-imakegar.”
DEU 7:7 Moisés Israel-dulemarga sogdebalid: “Ar Bab-Jehová bemarbina-sogsadi, bemar-sunonikidi, bemar-ichesulidba bemar-sunonisulid. Ar bemar, dulemar-baiganba bur-ichee gumalad.
DEU 7:8 Ar Bab-Jehová bemar-sabedba bemar-sunonikid. Deginbali, be-dadganga ise-sogar-ibmar-imakoye-sogsadba bemar-sunonikid. Agala, Bab-Jehová, Egipto-e-rey-Faraón-negsemaidgi bemar-onosad. Sabsur-odurdakle-bukwamargu, gandikidba bemar-onosad.
DEU 7:9 ”Degisoggu, be wisgumar, be-Bab-Dummad-Jehová, Bab-Dummad gued. Bab-Dummad-innikigwad-degisadeguadid. Bab-Dummad dule-e-sabgudimaladgala, e-Igar-Mamaidba-nanadimaladgala, e-wagan-danimaloed-ugakaasega, e-Igar-Mesisadi bela ega sogedba imaked. Degine, e-sabgued-degisadeguad ega oyoged.
DEU 7:10 ”Bab-Jehová dule-isdar-e-dakeddi, obelodaed. Bab-Dummad we-dule-isdar-e-daked-odurdakosurdeeye sogsulid, yog sabsur-odurdakar imakdaed.
DEU 7:11 Degisoggu, emi-ibagi, an bemarga Bab-Dummad-Igar-Mamaid-uknaidba be nanadii gumarsun.”
DEU 7:12 Moisés Israel-dulemarga sogdebalid: “Ar bemar we-Igarmar-uklesadba daele, degine, a-sogedba be nanamalale, be-Bab-Dummad-Jehová bemar-ebo-Igar-Mesisadba bemarga ibmar-imakoed. Degine, Bab-Jehová ise-sogar be-dadganga-sogsad, an bemarga-ibmar-sogsad-imakedseye, ar deyob imakoed. Degisadegu bemar-sabgubaloed.
DEU 7:13 ”Be-Bab-Dummad, bemar-sabguoed, bemargi ise-nued binsaoed. Degine, dula-bukib-omelomai, mimmigan-bukidar-nikumai, bemar-imakoed. Deginbali, Bab-Dummad be-dadganga-yar-ukoye-sogsadgi, be-ibmar-diged gadi-sanmak bega imakoed. Be-ibmar-gwag, be-vino, be-olivo-gwallumar gadi-niku bega imakoed. Be-moli-bebe-nikamalad, be-sibad-wawaadmar, be-sibadmar, gatik-mergumai bega imakoed.
DEU 7:14 ”Dulemar-baiganba bemargi bur bule ise-nued binsalegoed. Bemar-abargi-gudimalad, machereddibe, omedibe, anagan-nikusuli guosurmalad, bela anagan-nikadbi gumaloed, degine, amba be-ibdurganmoga, bela dula-nikuedbi gumarmogoed.
DEU 7:15 Be-Bab-Jehová uellegega bemar-imakosulid, degine, Bab-Dummad Egiptoʼgi boni-dummagan-onosad-be-daksamalad, bemargi a-bonigan-gwisguega imakosulid. Bab-Jehová, we-boni-dummagan dule-isdar-bemar-dakmaladginbi yolegega imakoed.
DEU 7:16 Bela Be-Bab-Dummad-Jehová bega-dulemar-uknaid be ogilogo. Melle be a-dulemar wile dako. Melle be e-bab-dummadga-na-imakbukwad, be-bab-dummadga be imako, ar ade, amar, be-Bab-Dummad-Jehováʼgi-aibanega bemar-imakoed.
DEU 7:17 ”Ar na be be-ulubgi sogdibe: ‘We-dulemar anmarba bur-ichesur mergued. Degisoggu, ar wede, ¿igi-saele anmar we-dulemar-onogosunna?’
DEU 7:18 ”Melle be we-dulemar dobguo. Nue be ebinsamalo, igi be-Bab-Dummad-Jehová, Faraón-imaksa, degine, igi bela Egipto-dulemar-imaksabali.
DEU 7:19 Be-ibyagwar be daksamalad, igi be-Bab-Dummad-Jehová Egipto-yargi-bemar-onogegala, ibmar-dummagan imaksa, ibmar-wilubgan-gegerdaklemalad imaksa. Ar na e-ganguedgi bemar-onos gusad. Ar amba, be-Bab-Dummad-Jehová, bela dulemar-be-asabin-bukwamalad-be-dobe-itomaladi, deyobi imakbaloed.
DEU 7:20 ”Deginbali, be-Bab-Dummad-Jehová a-dulemargi burmar barmidagoed, a-dulemar-gudimalad bela obelogoed. Ar amba, a-dulemar bemar-idu-dukuye-sogmalale, amba bela amar-obelogoed.
DEU 7:21 A-dulemar-abin, melle be gwayo, ar ade, be-Bab-Dummad-Jehová bemar-abargi gudiid. Be-Bab-Dummad, dule-dummadid, dulemar bela a-Bab-Dummad-dobdamalad.
DEU 7:22 Ar be-Bab-Dummad-Jehová bemarga we-dulemar-bemargi-gwisgudamaloed bela bega yog-obelogar imakosulid, binna-binna-obelomai imakoed. Adi, melle ibdurgan-sapurbarmalad-ursirmaladi bemargi obinmalagar.
DEU 7:23 ”Ar be-Bab-Dummad-Jehová we-dulemar bemarga-ukoed, bela wemar-berguedse sabsur-wiogoed.
DEU 7:24 Be-Bab-Dummad-Jehová we-dulemar-e-reymargi-nakwega be-imakoed. Degine, bela a-reymar be we-yargi ogilogo, adi, melle dulemar bar egi binsamalagar. Dulemar bipisaagwale bemar-asabin gwisguosurmalad, bela be a-dulemar obelogoed.
DEU 7:25 ”E-bab-dummagan-ibmargi-sobarmalad bela be soogi ogumako. Melle be e-birgi-mani-nasiklealedbina, degi, e-birgi-olo-nasiklealedbina be sogmalo, degine, melle be sumalo. Ar abakalegi, isguega be-imakarmalale, ar ade, be-Bab-Dummad-Jehováʼba we-ibmarmar ibmar-isgana gumalad.
DEU 7:26 Deginbali, we-ibmar-isganamar, melle bipisaagwale, be-negse be sedmalo. Ar degiile, be ukabsalegoed. Bela-bela we-ibmarmar be isdar-dako, degi, be sae-dakbalo. Ar ade, we-ibmarmala wede ukabsalegaledid.”
DEU 8:1 Moisés Israel-dulemarga sogdebalid: “An emi-ibagi bemarga bela-Igarmar-ukedi, bela be a-sogedba nanadii gumalo. Adi, bemar, nabir gudii gumalagar, gatik bemar ichesur-mergumai gumalagar. Degine, Bab-Jehová ise-sogar be-dadganga sogsagusad, we-yala an bemarga ukedseye, a-yarse bemar dogmalagar, bemargadga guegar.
DEU 8:2 ”Bemar-Bab-Dummad-Jehová nega-dulesulidganba birga-dulabo (40) bemar-semaigusadi be ebinsamalo. Agi sabsur-bemar-wiosgusad, sabsur-bemar-wilubdaksa gusad. Adi, wisguegar, bemar igi-ulubgi binsamardibeye. Degine, bemar-dakbaligar, bule-nabir e-igarmar-bemarga-uknaidba be damalodibeye.
DEU 8:3 ”Bab-Jehová sabsur bemar-wiosad, bemar-oukumechad. Geb degine, ibmar-manáʼye-nugad-gunnega bemar-imaksad. Bab-Jehová, we-mas-dakdisulidgi, be-babgan-oguchad, bemar-oguchabalid. ”Bab-Jehová bemarga we-mas uksad, adi, bemar wisguegar, ar dule unnila mas-gunnedginbi dula-gudii guosulid, bela Bab-Jehová-Gayaburba-itogedgi dule nabir dula-gudii gubalid.
DEU 8:4 ”Bemar birga-dulabo-nanasmaladgine (40), mormar-bemar-yoyoid be-ibe nungussurgusad, degine, be-nagmar bei engussurmarbalid.
DEU 8:5 Deginbali, be-ulubgi nue be magar neg-itomalo, ar igi baba e-mimmi-odurdake, deyobi, be-Bab-Dummad-Jehová bemar-odurdakmogad.
DEU 8:6 ”Degisoggu, be-Bab-Dummad-Jehová bemarga-Igar-uksadba be nanadii gumalo, Bab-Dummad-dobee be nanamarbalo.
DEU 8:7 Ar be-Bab-Dummad-Jehová yar-nuedse bemar-semaid: Yar-dianmar-nikadse, yar-dii-sailamar-nikadse, e-diimar nebagangi-ariomaidse, degi, yar-mullugangi diimar aryomamaidse bemar-semaid.
DEU 8:8 A-yargi orosgi-dakleged-trigo gadi sanmaked, orosgisaar-dakleged-cebada gadi sanmakbalid, gadi uva sanmakbalid, gadi sapi-higuera sanmakbalid, degi, gadi sapi-granadoʼmar sanmakbalid. A-yargi, olivo yaisulid, olivo-gwallu yaisurbalid, degi, achanis yaisurbalid.
DEU 8:9 ”Yarse-bemar-dogsokalidse, bemar mas-sate guosulid, bemar mas ise-obinagwar-nika guoed. Bemar bela ibmar-unniguar-nika guoed. A-yarginde, bemar e-akwamargi esgoro-onomai guoed, degine, e-yar-mullugangine, bemar esnon-onomai gubaloed.”
DEU 8:10 Moisés Israel-dulemarga sogdebalid: “A-yargi, bemar nue-mas-gundii gumaloed, be yeer-neg-itodii gumaloed. Geb bega napa-gadi-ibmar-sanmaked-uksad-nukad, be-Bab-Dummad-Jehová-nug be odummodoed.
DEU 8:11 ”Nue salakarmar, melle be-Bab-Dummad-Jehová be iemalo. Emi an bemarga bela Bab-Dummad-E-Igarmar-Mamaid-uknaidba be nanadii gumalo.
DEU 8:12 Nue salakarmar. Ar abakalegi, bemar nue-mas-gundimaladgi, neg-nuegan-sobsadgi be mamaidgi, Bab-Jehová-iedamalar.
DEU 8:13 Be-moli-bebe-nikamalad mergudele, be-sibad-wawaadmar mergudele, be-sibadmar mergudele, degi, be sabsur mani nikudele, be ormar nikudele, degine, bela be-ibmar-nikamalad mergudele, mer na be san-dummarbaa imakmalo.
DEU 8:14 ”Deginbali, mer be-Bab-Dummad-Jehová be iedmarbalo. Ar we-be-Bab-Dummad, deunni bemar, Egipto-yargi maiga-wilebukwamargu, bemar-onosad.
DEU 8:15 Be-Bab-Dummad-Jehová nega-dulesulidgan-sunnasulid-dummadba bemar-semai gusad. Naibe-nuegan-abalagi, diormar-abalagi, bemar-semai gusad. Bemar yala-dii-satedgi uku-uku-itodimargua, Bab-Jehová bemarga akwa-dummadgi dii onosad.
DEU 8:16 ”Nega-dulesulidganba, ibmar-manáʼye-nugadgi, be-dadgan-we-mas-gwen-daksasurmaladgi bemar-oguchad. Deyob, Bab-Jehová sabsur bemar-wiosad, bemar-wilubdaksad, adi, a-sorbali, bemarga ibmar-nuedga guegar.
DEU 8:17 ”Mer na be ulubgi weyob sogmalo: ‘We-ibmar-an-nikadi, an-ganguedgi an nikunonikid, an-arbasadgi an nikunonikid.’
DEU 8:18 Ar degisulid. Be-Bab-Dummad-Jehová be ebinsao, ar ade, e bega gargangued uked, adi, nabir be ibmar-nuegan nikuegar. ”Emide, Bab-Jehová be-dadgangabo-Igar-Mesisad ise-sogar-imaksad, bemarga imakedseye, emi-ibagi bemarga deyob ibmar-nued imaknaid.
DEU 8:19 ”Ar be-Bab-Dummad-Jehová be iedmalale, bab-dummagan-baiganba be nadmalale, ega be arbadmalale, amar-asabin be dulluu imakdemalale, emi-ibagi, inniki an bemarga soged, bemar Bab-Jehováʼse oburgwilemaloed.
DEU 8:20 Ar bemar, be-Bab-Dummad-Jehováʼba be ibsasurmalale, igi Bab-Jehová dula-akar-akar bemar-asabin-bukwamalad-ogilogoe, deyob bemar ese ogilolemogoed.”
DEU 9:1 Moisés Israel-dulemarga sogdebalid: “Israel-dulemar, nue itomar: Emi-ibagi, bemar-idu-neggweburmar-bukwad-sumalagala, bemar, Jordán-diwar obakesokalid. A-yargi, dulemar bur-bemarba ichesur-bukwad, bemarba bur dutusurmalad. E-neggweburmar dummagan nanaed, e-galu-matusulid-mamaid nibnegse-warmaknanaid.
DEU 9:2 ”A-dulemar dule-buleganad, dule-masdummaganad. Wemar, Anac-wagan gumalad. Ar we-dulemargi-sunmaklediid, bato be itodimalad: ‘Dule geg Anac-wagan-asabin gwisguye.’
DEU 9:3 Degisoggu, emi-ibagi be wisgumar, be-Bab-Dummad-Jehová bemar-idu nadapi guoed. Bab-Jehová, soo-ibmar-bela-ogumakedyob, bela dulemar-obelogoed. Bab-Jehová, we-dulemar be-urbaligwa-gudigumalaga imakoed. Ar bemar we-dulemar-onioed, bela be we-dulemar-obelogoed. Igi Bab-Jehová bemarga ise-sogar sogsa-gusa, deyob-imakedse guoed.
DEU 9:4 ”Ar be-Bab-Dummad-Jehová bemar-asabin we-dulemar-onosale, melle be sogmalo: ‘Ar Bab-Jehová, anmar-nued-ibmar-imaked-ular, we-yarse anmar-senoniye, adi, we-yar anmargadga guegarye.’ Suli, degisulid. Ar Bab-Jehová we-dulemar ibmar-isgana-imakmalad-ular, bemar-asabin onosokalid.
DEU 9:5 Degisoggu, bemar we-yar-susokalidi, be-ibmar-innikigwad-imaked-ularsulid, be-gwage-nued-nikad-ularsurbalid. Degisulid. ”Ar we-dulemar, ibmar-isgana-imaked-ulale, be-Bab-Dummad-Jehová bemar-asabin wemar-ononaid. Ar Bab-Jehová, bemar-dadganga ise-sogar sogsa gusad, Abrahamʼga, Isaacʼga, degi, Jacobʼga, an bemarga imakedseye. Degisoggu, Bab-Jehová deyob imakedsegad.
DEU 9:6 Degisoggu, be magar neg-itomar. Ar Bab-Dummad-Jehová bemarga we-yar-nued-uknaidi, bemar-ibmar-innikii-imaked-ular, uknaisulid, bemar-nueddamalad-ular, uknaisulid. Ar bemar, nono-dutusurmaladid.”
DEU 9:7 Moisés Israel-dulemarga sogdebalid: “Bemar ebinsamalo, melle iemalo, igi bemar nega-dulesulidganba be-Bab-Dummad-Jehová be oulusgusmala. Bemar Egipto-yargi-noalid-akale, emi-ibadse bemar-senonikidse, bemar, Bab-Jehováʼgi gwisgudanigumalad.
DEU 9:8 Bemar Horeb-yargi Bab-Jehová-oulusmalad. Agi, Bab-Jehová bemar-obelogegala, bela-bela bemargi ulud gusad.
DEU 9:9 ”Bab-Jehová-bemar-ebo-Igar-Mesisadi, akwa-matabogwadgi-narmakar-naid-abingaega, an Horeb-yar-birse nakwisgusad. Deunni, iba-dulabo-wilub (40), bane-bane, degi, mutik-mutik, mas-gunsuli an yar-birgi gudii gusad, dii-gobsuli an gudii gusbalid.
DEU 9:10 Agi, Bab-Jehová na e-googi akwa-matabogwad-narmaksad anga uksad. Bemar-bela-bukwadgi Bab-Jehová yar-birgi soo-abalagi, bemarga-sunmaksadi, agi bela narmakar naid.
DEU 9:11 ”Iba-dulabogwad-bergusgua (40), Bab-Jehová bemar-ebo-Igar-Mesnaid, akwa-matabogwadgi-narmaklesad anga uksad.
DEU 9:12 Deunni, Bab-Jehová anga sogsad: ‘We-yargi-gudiid gwae be aidege. Ar be-dulemar, be Egipto-yargi-onosadi, nue isgudmalad. Igargan-an-ega-uksadgi bato bangudmalad. Ibmar-sobmalaga, aka or-dudemalad, adi, e-bab-dummadga imakmalagar.’
DEU 9:13 ”Degine, Bab-Jehová anga sogdebalid: ‘We-Israel-dulemar an dakdaniguad, we-dulemar nono-dutusurmalad naed.
DEU 9:14 We-dulemar an bega obelogo. We-napneggi e-nugmar bar wisgulegosulid. Degisoggu, mer be anse golo. Ar bedi, wemarba bur dule-dutusurmalad-e-dummadga an be-imakoed, degine, wemarba bur dule-ichesurmalad-e-dummadga an be-imakbaloed.’
DEU 9:15 ”Geb degine, an gannar alid, yar-gwabunyemaidgi-an-gudiidgi an aidealid. Bab-Dummad-Israel-dulemarbo-Igar-Mesnaid, akwa-matabogwadgi-narmakaled, an-argangi-gani an aidenonikid.
DEU 9:16 Geb bemar Bab-Dummad-Jehováʼgi dummad-nonanai an bemar-dakded. Bemar or-dusa an daknonikid. Geb a-orgi be-bab-dummadga-imakega moli-bebe-nikad-sapingwagwad be sobsamalad. Bab-Jehová-bega-igar-uksadgi, baisursunna bemar bangudmalad.
DEU 9:17 Geb degine, akwa-matabogwad-an-argangi-an-sedanikid an sabsur-mete gusad. Geb bemar-asabinni bela goa-goa gusad.
DEU 9:18 ”Geb degidbali, bela bemar Bab-Jehováʼgi-sabsur-isgusadbali, Bab-Jehová-nue-oulusmaladbali, an Bab-Jehová-asabin iba-dulabo-wilub (40), an mas guchasuli, an dii gobsasuli, ese-golega an yokorgi sindigar sigisad.
DEU 9:19 Ar Bab-Jehová bela-bela bemargi-urwesoggu, an Bab-Jehová-bela-bela-e-urwed an dobgusad, e-sae-itoged an nue-dobgusad. Ar Bab-Jehová unnila bemar-obelogedgi binsanainad. Agala, an Bab-Jehováʼse gornai guarbalid, geb Bab-Dummad gannar an-itononibalid.
DEU 9:20 Bab-Jehová amba Aarónʼgi nue sae-itosbalid, Aarón-obeloged sokalinad. Amba an deyob, Aarónʼga an Bab-Jehováʼse gochabalid.
DEU 9:21 Geb degine, moli-bebe-nikad-sapingwagwad-bemar-sobsadi, a isguega-bemar-imaksadi, an sunonikid. Geb, a-moli-sobaled an soogi ogumaksad, degine, bela an ise-nagar imaksad, buruse guedse an ubi-ubi imaksad. Geb degine, a-buru dian-yar-birgi-ariomaidgi an mie-mie imaksad.
DEU 9:22 ”Deginbali, bemar, Taberaʼye-neg-nugadgi, Masahʼye-neg-nugadgi, Kibrot-Hataavaʼye-neg-nugadgi, Bab-Jehová-oulusmarbalid.
DEU 9:23 ”Geb Bab-Jehová Cades-Barnea-akale bemar-barmisgua, bemarga sogsa gusad: ‘Be namar, yar-an-bemarga-uknaid be sunamar.’ Degite, bemar, be-Bab-Dummad-Jehová bemarga-ibmar-sognaidba be ibmar-imaksasurmalad, be bengusmalad, gwen be itossurmalad.
DEU 9:24 An bemar-dakdanikid-akale, bemar, Bab-Jehováʼgi yoledigumalad.
DEU 9:25 ”Ar Bab-Jehová sogsasoggua, ede bemar-ogilogoye, a-ulale, an iba-dulabo-wilub (40), bemar-ular, Bab-Dummad-asabinni yokorgi sindigar an sigisad.
DEU 9:26 Agi, an Bab-Jehováʼse gornai gualid, weyob an ega sogded: ‘Bab-Dummad-Jehováʼye, be-dulamar melle be ogiloye. Be-dulamar Egipto-yargi-bukwa na be-ganguedgi be onosadi, melle be ogilogoye.
DEU 9:27 Bab-Jehová, be-mai-Abrahamʼga, Isaacʼga, degi, Jacobʼga ibmar-sogsadi be ebinsae. Melle be Israel-dulemar-e-gwage-dutusulid, e-ibmar-isgana-imaked, e-isgued, be dake.
DEU 9:28 Adi, melle anmar-onolesgusad-yargi, dulemar weyob sogmalagar: Ar Bab-Jehová ega yar-ukoye-sogsadse, a-dulemar-odossur gusye. Ar Bab-Jehová a-dulemar-sae-daksoggu, a-ular, Egipto-yargi onosye, adi, nega-dulesulidganba amar-oburgwegarye.
DEU 9:29 Bab-Jehová, ar we-dulemar be-dulamar-gumalad, be-ganguedgi be onosgusadid, gandikidba na be onos gusad.’ ”
DEU 10:1 Moisés Israel-dulemarga sogdebalid: “Deun a-ibagangine, Bab-Jehová anga sokalid: ‘Igi iduar be akwa matabo sobsagusa, deyobi, be gannar sobbalo. Deginbali, urgo-ulu be sobbalo. Geb a-sorbali, anse yar-birse be nakwedago.
DEU 10:2 Igi akwa-matabogwad-idualed-be-marisgusadgi narmaklesgusa, deyobi, akwa-matabogwadgi an gannar narmakoed. Geb degine, we-akwa-matabogwad ulu-yagi be mesoed.’
DEU 10:3 ”Geb degine, an acacia-urgogi ulu-sobsad. Deginbali, akwa-iduar-soblesadyob akwa matabo an imaksabalid. Geb degine, we-akwa-matabogwad an-argangi-gani an yar-birse nakwide gusad.
DEU 10:4 Epenne, bemar danar-bukwagusmargu, Bab-Jehová yar-birgi soo-gwabunyemaid-abalagi sunmaksagusadgi, Igar-sogambegwad-narmaklesad (10) anga uksa-gusad. Ar Bab-Jehová igi iduar we-Igar-Sogambegwad (10) akwa-matabogwadgi narmaksagusa, deyob, we-Igar-bemarga-ukega gannar narmaksabalid. Geb anga uksa gusad.
DEU 10:5 ”Geb agi, an gannar aligusad, an yar-birgi-gudii aidealid. Geb, we-akwa-matargwagwad an Ulu-sobsad-yagi mesisad. Emide, amba a-akwa-matabogwad, a-Uluyagi maid. Bab-Jehová-anga-Igar-uksagusadba imaklesad.”
DEU 10:6 Moisés, Israel-dulemarga sogdebalid: “A-sorbali, bemar Beerot-Bene-Jaacánʼgi ainiar gusmalad. Geb Moseraʼye-neg-nugadse modapmalad. Agi Aarón burgwisad, agi diglesbalid. Geb e-machi-Eleazar, e-bab-Aarón-sorba, dule-irwa-Bab-Dummadse-goled-e-gan sunonikid.
DEU 10:7 Geb agine, bemar Gudgodaʼye-neg-nugadse nadegusmarbalid. Geb Gudgoda-akar Jotbataʼye-neg-nugadse nadmarbalid. Agi dianmar-bukidar-nikad-negad.
DEU 10:8 A-ibagangine, Bab-Jehová Leví-wagan-susa gusad, adi, Bab-Jehová-Israel-Dulemarbo-Igar-Mesisad-Ulu seega, Bab-Jehová-asabin-gudii guega, ega-arbadii guega, Bab-Dummad-nuggi dulemar-baigangi ise-nued binsaegar. Emi-ibagi imakdimaladyob.
DEU 10:9 A-ulale, Leví-waganga e-gwenadgan-abargine, nainu ega uklegosulid, ar ade, Bab-Jehová e-sunnad Leví-wagangadga gunonikid.
DEU 10:10 ”An igi-gebe-yar-birgi gudigusa, deyobi, an bane-bane iba-dulabo (40) an Bab-Jehováʼse gordii gusbalid. Bab-Jehová amba an-itononibalid, agi, bar bemar-ogilobi gussulid.
DEU 10:11 Geb degine, Bab-Jehová anga sokalid: ‘Be nae. Dulemar-idu be guakwaa nadap-imako, adi, be-dadganga-an-yar-ukoye-sogsadse be dogmalagar, a-yala bemargadga guegar.’ ”
DEU 10:12 Moisés Israel-dulemarga sogdebalid: “Israel-dulemar, emigindi, be-Bab-Dummad-Jehová, ¿ar ibu-ibmar-imakbi bemar-abe be insae? We-ibmar-imakbi bemar-abeged: Be-Bab-Dummad-Jehová-dobee nanaed. Bela e-Igarmar-Mamaidba nanaed. Bela-belagwad Bab-Dummad-Jehová sabgued. Bela-belagwad e-nug odummoged.
DEU 10:13 E-Igarmar-bela-bemarga-uksadba nanaed. Emi-bega-sognaidba-imaked, be-abeged. Adi, bemarga bela igar-nueganbi-nadapi guegar.
DEU 10:14 ”Ar nibneg-naid, nibneg-bur-birigined-naid, napneg-naid, degi, bela agi-ibmar-bukwadi, Bab-Dummad-Jehováʼgadbiid.
DEU 10:15 Ar Bab-Jehová dule-bamalad-suewilubbinad, degi-inigwele, bemar-dadgangi unnila ataksad, amarbi-sabgusad. Ar bemarde, e-wagan-gumarsoggu, igi emi anmar bukwa, deyobi, dulemar-bamalad-akar-akar-bukmalad-abargi be-sunonimarmogad.
DEU 10:16 ”Degisoggu, be-gwagegi na be sogmarsun, Bab-Dummadgarbi an gudii guoye. Melle be uyasuli damar.
DEU 10:17 Ar ade, be-Bab-Dummad-Jehová, bab-dummaganba bur Bab-Dummadid, degine, dule-dummaganba bur-Dummadid. Bab-Jehová bur dule-dummadid, bur dule-dutusulidid, bela dulemar dobdamalad. Bab-Jehová bela dulemar-emarbi-daked, degine, dule-baiganse geg manigi binsaed-galeged.
DEU 10:18 Mimmigan-sergan-satedga, degi, ome-ei-sui-burgwismaladga, igar-innikigwad imaked. Degine, dule-ainebarmaladga e-sabed oyoged, ega mas ukdaed, degi, mor ukdabalid.
DEU 10:19 Degisoggu, bemar-abargi dule-ainebalid-gudiid be sabguo, ar Egipto-yargi be gudigusmargu, deyob be gusmarmogad.
DEU 10:20 ”Be-Bab-Dummad-Jehováʼba be ibsadii nanao, e-nug-odummodii be guo, asebi be gordii guo, aba be nanadii guo. Ar be, ibmar-ise-sogar-sogbidibe, Bab-Dummad-nuggi innikigwadba an ise-sogar-sogye, an deyob imakedseye be sogoed.
DEU 10:21 Ar bemar ise-dakarmalad, igi Bab-Dummad ibmar-dummagan, ibmar-gegerdaklemalad bemarga imaksa. Degisoggu, be gatik e-nug-odummomar. Ar Bab-Dummad, be-Bab-Dummadid.
DEU 10:22 Be-babgan dulapaa-gakambe-mergu (70) Egipto-yarse nonigusmalad. Ar emigindi, Bab-Jehová, nibneggi-niisgwamar-naidyob bemar-omelosad.”
DEU 11:1 Moisés Israel-dulemarga sogdebalid: “Degisoggua, bemar, be-Bab-Dummad-Jehová-sabguo, degi, bela Igarmar-bemarga-uklesad imakmalo. A-igarmarba be bane-bane ibsadii gumalo.
DEU 11:2 Emi, be nue ebinsamalo, be-Bab-Dummad-Jehová-be-sabsur-odurdaksad bemar-sunnad nue-itosmalad. Be-mimmigandi, be-sabsur-odurdaklesadi gwen daksasurmalad. Bab-Jehová-e-gangued-oyosad, e-ibmar-dummad-imaksad, be daksamalad.
DEU 11:3 Bab-Jehová, Egipto-yargi Faraónʼgi, degi, bela Egipto-neggweburmargi, ibmar-gegerdaklemalad-imaksad be daksamalad.
DEU 11:4 Egipto-dulemar bemar-baregindani-gusmargua, Bab-Jehová, wemargi, Demar-Ginnidye-nugad-arwega imaksagusad. Degidbali, e-molimar, e-ur-napaginmalad bela obelosgusad. A-ibmar-gusadi, bela be daksagusmalad. Bab-Jehová we-dulemar bela oburgwisad.
DEU 11:5 ”Bemar ebinsamarbalo, bemar nega-dulesulidganba-gudigua, bemar-wese-nonikidse igi-Bab-Jehová bemar-akwisa.
DEU 11:6 Deginbali, bemar daksamarbalid, igi Bab-Jehová Rubén-wagan-Eliab-masmala-Datán, degi, Abiram-imaksa. Agi, Bab-Dummad Israel-dulemar-asabin napa-egasad. Geb abali, we-dulemar, degi, e-gwenadganse-bakar, e-negmarse-bakar, degi, bela-e-ibdurganse-bakar, babatidmalad.
DEU 11:7 Bela Bab-Jehová-ibmar-dummagan-imaksad be-ibyagwar be daksamalad.”
DEU 11:8 Moisés Israel-dulemarga sogdebalid: “Degisoggu, bemar gangumalaga bela Bab-Dummad-Igargan an-emi-bemarga-uknaidba be nanamarsun. Adi, emi be yarse-dogesokarmalad bemargadga guegar.
DEU 11:9 Adi, Bab-Jehová we-yar be-dadganga-ukoye-sogsagusadgi, e-wagan-danimaloedga-ukoye ise-sogar-sogsagusadgi, bemar suitibaksaar-mai gumalagar. We-yar, napa-nuedid, gadi ibmar-sanmaked-yalad.
DEU 11:10 Ar we-yar-be-susokalidi, Egipto-yaryobsulid. Egipto-yargi-be-noargusmaladgindina, be ibmar-gwag-digegala, be dii eogar imakergebed. We-yargindina, deyob sulid. Egipto-yargindina be-neg-imbagi be ibmar-gwag-digega, be dii eogar imakergebed.
DEU 11:11 Yar-be-susokarmaladgindina, yalagan-bubukwadgi, nebagan-nanaidgi, dii winaigi daed.
DEU 11:12 A-yaladi, be-Bab-Dummad-Jehová, nue-akwediid. Ar a-yalagi, Bab-Jehová, egi bur nue-atakdiid, deyob birga-mesmaid.
DEU 11:13 ”Ar emi an-bemarga Bab-Dummad-Igarmar-Mamaid-uknaidba be ibsamalale, be-Bab-Dummad-Jehová ise-nue be sabgumalale, bela-bela be-gwagegi ega be arbamalale, degine, be-san-burbagi ega be arbamalale, Bab-Jehová soged:
DEU 11:14 ‘Ani an bemar-yargi dii owioed. E-ibagangi an gebe-dii-wied-owiega imakoed, degine, an napi-dii-wied-owiega imakbaloed. Adi, be ibmar-digsamalad nabir weegar, ibmar-gwag-gullemalad, vino, degi, olivo-gwallu nikumalagar.
DEU 11:15 Deginbali, be-ibdurganga be-nainugi gagan-ainiega an imakoed, adi, be-ibdurgan a-gaganmar maegar. Deyob geb bemar mas-bukidar gutemaloed, immee gudii gumaloed.’
DEU 11:16 ”Degisoggu, nue salakarmar, be yardakledamalar. Melle be-Bab-Dummadgi bangumalo. Melle bab-dummagan-baiganse-gordii gumalo. Melle be a-ibmarmar-asabin dulluu imakmalo.
DEU 11:17 Ar degisulile, Bab-Jehová bemarse urwoed, bemarga nibneg-akale bar dii owiosulid. Degisoggu, be-yargi ibmar-geg-sanmake gudoed, degine, bemar we-yala-nued-bemarga-uklenaidgi emiskwaa burgwidmaloed.
DEU 11:18 ”Degisoggu, we-gayaburba-an-bemarga-sognaidi, be-gwagegi, bela be-nonogi ise-gaar imakmalo. Degine, be-argangi wilubyob be edinmalo, degine, be-bebegi be wilubyob nasikmarbalo.
DEU 11:19 We-Igarmargi be-mimmigan be odurdakmaloed. Ega be gannar-gannar be-neggi-gudiidgine, igarba be nadapidgine, be gabsokalir, be gwisgualir, ega be sogdii gumaloed.
DEU 11:20 We-Igarmar be-neg-yawagakgi be narmakmalo, degi, be-neg-buarmargi be narmakmalo.
DEU 11:21 Deyob be imakele, Bab-Jehová bemar-dadganga we-yar-bemarga-ukedseye-sogsadgi, bemar, degi, bemar-wagan, nibneg-naid-berguedse suitii bukwa gumaloed.
DEU 11:22 ”Ar emi, an bemarga we-Igarmar-uknaidba be ibsamalale, ar be nue be-Bab-Dummad-Jehová be sabgumalale, bela e-Igarmar-Mamaidba be nanamalale, degi, be-Bab-Dummadbarbi be nanadii gumalale,
DEU 11:23 Bab-Jehová bemar-asabin-dulemar-bukidar-bukwadi, bega onogoed. Dulemar-baigan bemarba bur-ichesur-inigwele, degi, bur dutusurmar-inigwele, degite, bemar egi nakwemaloed.
DEU 11:24 Ar bia be yargi-dogoe, bela a-yarmala bemargadga guoed. Yala-begadga-guoedi: Nega-dulesulidgan-akar, Líbano-yarse, degine, Éufrates-diwar-akar, demar-Mediterráneoʼye-nugadse, bemargadga guoed.
DEU 11:25 ”Dulemar bese galakumaloed. Ar igi be-Bab-Dummad-Jehová bemarga sogsa gusa, deyobi, bia be nadele, Bab-Jehová, bela-bela dulemar-bemar-dobguega imakoed, dulemar-bukwad-gwayega imakoed.”
DEU 11:26 Moisés Israel-dulemarga sogdebalid: “Emi-ibagi an bemarga soged, biti be suoe: Ibmar-nued-abingalegedi, ibmar-isgana-abingalegedi.
DEU 11:27 ”An bemarga be-Bab-Dummad-Jehová-e-Igar-Mamaid-uknaidba be nanamalale, ibmar-nued-abingaleged bemarga uklegoed.
DEU 11:28 An bemarga be-Bab-Dummad-Jehová-e-Igarmar-Mamaid-uknaidba be nanasurmalardi, emi an bemarga igar uknaidgi be aibatemalardi, degine, bab-dummagan-baigan-akudakedse be gotemalardi, ibmar-isgana-abingaleged bemarga uklegoed.
DEU 11:29 ”Be-Bab-Dummad-Jehová bemarga-yar-ukoye-sogsadse bemar-odosale, bemar Gerizim-yarse namalo. A-yargi ibmar-nued-abingaleged-igar be soge-soge imakmalo. Degine, Ebal-yarse be namarbalo. A-yargi ibmar-isgana-abingaleged-igar be soge-soge imakmalo.
DEU 11:30 We-yarmar Jordán-diwar-obakar-dad-argwanedsik-igar-maidba bukwad. A-yarmar, Arabá-yalaganba bukwad, Canaán-dulemar-bukwadsik, sapur-Moreʼye-nugad-dikarba, Gilgal-neg-nugad-asabin bukwad.
DEU 11:31 ”Ar emide, bemar Jordán-diwar-obakesokarmalad. Bemar be-Bab-Dummad-Jehová-yar-bemarga-ukoye-sogsadi, bemargadga-guega susokalid. Ar bemar yar-sunonikile, egi bemar megnonikile,
DEU 11:32 nue salakarmar, bela an bemarga-emi-Igarmar-uknaidba be nanadii gumalo.”
DEU 12:1 Moisés Israel-dulemarga sogdebalid: “Bab-Dummad-Jehová be-dadganga we-yar-bemarga-ukoye-sogsadgi, be gudii gudmarsunnar, bemar, we-Igarmar-Mamaid be nue-dakdii gumalargebed, eba be ibsadii gumalargebed. A-yargi bemar dula-gudiidgi, wemar-Igargan-soglesadba bemar nue-nanadigued be imakmalo.
DEU 12:2 ”Bela neggweburmar be suesokalidgi e-bab-dummaganse-gormalad-e-aila-matusurmalad bela be osulogoed. We-aila-matusurmalad yar-dummagangi-bukwad, yar-mullugangi-bukwad, degi, sapimar-bulamakwichid-urba-bukwad, bela be osulogoed.
DEU 12:3 ”E-ibe e-bab-dummadga-ibmar-ogumakar-ukleged-ailamar be earo, e-ibe e-akwamar-islidikmalad be mamarbalo. E-bab-dummad-bundor-Aseraʼye-nugad-e-wilubgan-sobarmalad be ogumako. E-bab-dummagan-e-wilubgan-sobarmalad be mamaro, degi, e-bab-dummagan-e-nug bela be elio.
DEU 12:4 ”Bemardi, be-Bab-Dummad-Jehováʼse-golegala, melle we-dulemar-e-bab-dummaganse-goleyob be gormalo.
DEU 12:5 Ar be-Bab-Dummad-Jehová, bemar-danar-danar-bukwamalad-abargi neg sunonikoed, adi, agi e-nug naguega, egi gudii guegar. Bemar Bab-Jehováʼse-golegala, a-negse naoed.
DEU 12:6 Bemar a-negse be-Bab-Jehováʼga ibmar-ogumakar-ukleged be uknaoed, be-Bab-Dummadga-ibmar-ukleged be uknaoed, ibmar ambegi-gwensak-ukleged (10%) be uknaoed, Bab-Dummadga-ibmar-ukoye be ise-sogar-sogsad be sedoed. Na be-itolegedba be ibmar-ukbiedba-ukoed be sedoed. Be-moli-bebe-nikamalad-gebegwalulesad, degine, be-sibad-wawaadmar-gebegwalulesad be-Bab-Dummadga be uknaoed.
DEU 12:7 ”Agi, be-Bab-Dummad-Jehová-asabin, be-gwenadganmala be mas gunmaloed. Na be arbasmaladgi be-Bab-Dummad-Jehová bemargi ise-nued-binsasadba be wergudmaloed.
DEU 12:8 Emi, anmar, war-wargwengi na e-dakedba igi ibmar-imakbukwa, deyobi, melle be a-yargi ibmar-imakbukwa gumalo.
DEU 12:9 ”Ar amba yoo bemar obunnoged-negse dogmalad, amba yoo bemarga bemar-Bab-Dummad-Jehová ibmar-ukoye-soged uked.
DEU 12:10 Ar bemar Jordán-diwar obakoed. Degine, bemar-Bab-Dummad-Jehová-bemarga-yar-uknaidgi bemar bukwa gumaloed. Be-Bab-Dummad-Jehová be-isdarmalad-bemar-dikarba-bukwadgi obined bemar-imakoed. Agine, bemar dobsuli-bukwa gumaloed.
DEU 12:11 An bemarga bela-ibmar-sogsad, be-Bab-Dummad-Jehová e-nug-nasikega-neg-sunonikoedgi be uknonimaloed: Bab-Dummadga-ibmar-ogumakar-ukleged be ukoed, ibmar-ambegine gwensak be ukoed (10%), be-Bab-Dummadga be-itolegedgi ibmar-ukoye-sogsad be ukoed, Bab-Jehováʼga ibmar-bur-nued-ukedseye be ise-sogar-sogsadi, a-neggi be uknonikoed.
DEU 12:12 Be-Bab-Dummad-asabinni bela bemar wergumaloed: Be, be-masmala, be-bunamala, be-maigan-machergan, be-maigan-omegan, degi, Levita-dule-be-abargi-gudidimalad. Amala, be-Bab-Dummad-Jehová-asabin bela bemarba wergumaloed. Ar ade, Levita-dulemargardi bemarba nainu ega uklegosulid.
DEU 12:13 ”Nue salakarmar. Melle be Bab-Dummadga-ibmar-ogumakar-ukleged, neg-yogsaaledgi be ukmalo.
DEU 12:14 Unnila bia Bab-Jehová bemar-dadgan-ambe-gakabogwad-gwensakgi neg suoe, agi be ibmar-ogumakar-ukleged ukmaloed. Agi bela an bemarga Igar-uknaid be imakmaloed.
DEU 12:15 ”Degi-inigwele, ar na be san-gunbiedba be-ibdurgan oburgoed. Degine, ar ibu-neggweburgi be gudiile, agi na be san-gunbiedba be gunnoed, Bab-Dummad-Jehová bega ibmar-uksadba be deyob imakoed. Be, Bab-Jehová-asabin swilidik gudiidibe, swilidik gudisurdibe, we-san sunna be gunnoed. We-sande, goe-san-gunneyob be gunnoed.
DEU 12:16 Degi-inigwele, be san-gunnalile, abebi be gunnosulid. Ar e-abedi, diiyob be napagi eogoed.
DEU 12:17 ”Deginbali, be-neggweburmargi Bab-Dummadga be-ibmar-ambegi gwensak-uked (10%), be gunnosulid: Ibmar-gwag, olivo-gwallu, be-moli-bebe-nikamalad-gebegwalulesmalad, sibad-wawaadmar-gebegwalulesmalad, sibadmar-gebegwalulesmalad, degi, olivo be gobosulid. We-ibmarmar be-neggweburmargi be gunnosulid. Degine, be ise-sogar-ibmar-ukoye-sogsad, degi, be-itolegedba Bab-Jehováʼga-ibmar-ukoye-sogsad, be gunnosurbalid.
DEU 12:18 ”A-ibmarmala, be-Bab-Dummad-Jehová-neg-susadgi be-Bab-Dummad-Jehová-asabin be gunnoed. Agi gunmarmogoed: Be-masmala, be-bunamala, be-maigan-machergan, be-maigan-omegan, degi, Levitaʼmar-be-neggwebur-abargi-gudidimalad. Bela wemala, be-Bab-Dummad-asabin mas gunmaloed. Be-Bab-Dummad-Jehová-asabin bela be-ibmar-imaksadgi be werguoed.
DEU 12:19 ”Nue salakarmar. Ar we-napneggi be gudiidgine, melle be Levita-dule nue-akwesuli gumalo.
DEU 12:20 ”Ar be-Bab-Dummad-Jehová-bemarga-sogsadyob, bemarga be-yar-odummosale, geb agi be sokardibe: ‘An san gunbiendo.’ Ar be-abegedba be san gunnodo.
DEU 12:21 Ar be-Bab-Dummad-Jehová megega-na-neg-susadi, begi dikasur-sii be dakele, an bega Igar-uksadba sunna Bab-Jehová-bega-moli-bebe-nikad-uksad, bega-sibad-wawaadmar-uksad, degi, sibadmar-uksad, be oburgoed. Deginbali, ar be-neggweburgi san-gunbiedba be gunnoed.
DEU 12:22 We-sanmar be gunnalile, goe-sapurmar-e-san-gullegeyob be gunmaloed. Dule Bab-Jehová-asabin swilidik gudiidibe, swilidik gudisurdibe, we-san sunna gunnoed.
DEU 12:23 ”Unnila an bega soged, san-abebiiddi be gunnosulid. Ar ade, abegi dula-gued danikid. Dula-gued-abegi-danikid, san-ebogwa melle be gunno.
DEU 12:24 Degisoggua, ibdurgan-e-abedi diiyob be napagi eogoed.
DEU 12:25 Melle be san-amba-abebiid gunno, adi, be yeer-itodii guega, degine, be-sorbali, be-mimmigan yeer-itodii gumogagar. Ar deyob, be Bab-Jehová-asabin ibmar-nued be imakoed, eba be ibsaoed.
DEU 12:26 ”Ar be ibmar-Bab-Dummadga-nug-imaksaddi, degine, be Bab-Dummadga-ibmar-ukoye-sogsaddi, Bab-Jehová-na-neg-suoedse be sedoed.
DEU 12:27 Bab-Dummad-Jehováʼga-ibmar-ogumakar-ukleged-ailagi be be-Bab-Dummadga san, degi, e-abe, be ogumakar ukoed. Bab-Dummadga-ibmar-ukleged-e-abedi, be Bab-Dummad-Jehováʼga-ibmar-ogumakar-ukleged-ailagi eogoed. E-sandi, be gunmaloed.
DEU 12:28 ”We-Igargan-an-bega-uknaid nue be itomalo, degine, eba nue be nanamalo. Ar bemar, be-Bab-Dummad-Jehová-asabinni ibmar-nued imakdimalale, ibmar-innikii-imakdimalale, bemarga ibmar-nueganbi naoed. Deginbali, be-sorba be-mimmiganga, degibi degisadegu, ibmar-nueganbi-gumai gumogoed.”
DEU 12:29 Moisés Israel-dulemarga sogdebalid: “Be-Bab-Dummad-Jehová, bemar-yar-susokalidgi, bemar-wagab e-dulemar-bukwad obelononikile, degine, bela e-ibe be ibmar-susale,
DEU 12:30 nue salakarmar, melle be e-daedba damalo. Melle be weyob egisdii nanamalo: ‘We-dulemar, ¿igi e-bab-dummaganse gordamala? Adi, anmar deyob a-bab-dummaganse gormarmogagar.’
DEU 12:31 Mer be deyob-imakedgi binsamalo. Ar Bab-Jehová, we-dulemar e-bab-dummaganga ibmar-isgana-imaksamalad sae-daked. Ar we-dulemar, e-masmalase-bakar, degi, e-bunamalase-bakar e-bab-dummadga e-ibmar-ogumakleged-ailagi ogumakar imakdamalad.
DEU 12:32 ”Bela an bega-Igargan-uknaidba be ibmar-imakdii nanamalo. Melle an-bega-Igar-uknaid be obulomalo. Melle be igarmar-nanaid abar-abar sogmarbalo.”
DEU 13:1 Moisés Israel-dulemarga sogdebalid: “Be-abargi Bab-Dummad-gayaburba-barsoged-gwensakdibe, dule-negburgan-dakeddibe, bega sognonikile, ibmar-dakledisulid, ibmar-gegerdakleged deyob guoye.
DEU 13:2 ”Geb ibmar-bega-sogsad deyob gunonikile, geb agine, bega weyob sokarbalile: ‘Anmar bab-dummagan-baiganba namarye, bab-dummagan-akudakedse anmar gormarye.’
DEU 13:3 We-dule-Bab-Dummad-gayaburba-barsogeddibe, dule-negburgan-dakeddibe, mer be itogo. Ar be-Bab-Dummad-Jehová be-wilubdaknaid, bule be-Bab-Dummad-Jehová bela-bela ulubgi sabdibeye, bela-bela be-gwagegi be sabdibeye.
DEU 13:4 Unnila be-Bab-Dummad-Jehováʼbarbi be nanaoed. A-dobekwaa be nanaoed, A-bega-e-Igarmar-uksadba be nanaoed. Degine, bega-sunmaked be nue-itogoed, Bab-Dummad-Jehováʼsebi be goloed, agarbi be galakusuli nanaoed.
DEU 13:5 ”We-Bab-Dummad-gayaburba-barsogeddibe, we-negburgan-dakeddibe, be-Bab-Dummad-Jehováʼgi-banguega be-imakbied-ulale, be-Bab-Dummad-Jehová Egipto-yalagi be-onosgusadgi-banguega be-imakbied-ulale, be oburgwemalargebed. We-Bab-Dummad Egiptoʼgi maiga-wilebukwamargu be-onosadid. Ar we-dulede, Bab-Dummad-Jehová-bemarga-igar-uksagusadgi bemar-obanbi gusad. Ar deyobi, we-dule-oburgwilesadba, bemar-abargi ibmar-isgana be obelomaloed.
DEU 13:6 Deginbali, ar be-iadibe, be-urbadibe, be-machidibe, be-bunolodibe, be-ome-na-be-sabesailaddibe, be-ai-nueddibe, be-yardakbi-gualidgine, dukuakwaa begarbi sokalile: ‘Anmar namarye, bab-dummad-baiganse anmar gornamarye.’ Melle be itogo. We-bab-dummagan be aku dakmaladid. Be-dadganmoga aku dakmarmogadid,
DEU 13:7 A-bab-dummagan, begi neggweburmar-walik-walik-bukmalad-e-bab-dummaganga gudidiid, degi, neggweburmar-dikasur-bukmalad-e-bab-dummaganga gumarmogadid.
DEU 13:8 A-dule-deyob-bega-sogele, melle be itogo, melle eba be ibsao. Melle be a-dule sabguo, melle be wiledako. Melle be bina-sogo, melle be odukuo, be barsogo.
DEU 13:9 A-dule, be oburgwergebed. A-dule-oburgwelegegala, be-inse be nailiksaoed. Geb sorba, deyob bela dulemar nailiksamogoed.
DEU 13:10 Burgwedse be akwagi makoed. ”Be-Bab-Dummad-Jehová, Egipto-yargi be wilebukwamargu, bemar-onos gusad. A-dule, a-Bab-Dummadgi bemar-obanbi gusad.
DEU 13:11 A-dule be oburgo, adi, bela Israel-dulemar wisgumalaga, degine, dobgumalaga, adi, melle bemar-abargi bar deyob ibmar-isgana imakmalagar.
DEU 13:12 ”Ar bemar itononidibe, be-Bab-Dummad-Jehová-neggweburmar-bemarga-uksadgi,
DEU 13:13 dule-isganamar ainisye, emar-binsaed-gadidimarye, ega sogdidimarye: ‘Anmar namarye, bab-dummagan-baiganse anmar gornamarye,’ Ar we-bab-dummagan be aku dakmaladid.
DEU 13:14 ”Degisoggua, nue be igar-amioed, nue egisdii be guoed, wede bule nabirdibeye. Ar bemar-abargi we-ibmar-isgana nue-deyob-gusa be daknonikile,
DEU 13:15 mer be ilabo-binsao, yogabinne bela-dule-we-neggweburginmalad es-suidgi be oburgo. Bela a-neggweburginmalad-e-ibmarmar be obelogo, degine, e-ibdurganse-bakale, bela be oburgo.
DEU 13:16 Dulemar-ambikued-abargi bela e-ibmar-nuegan be urboed. Geb degine, bela neggwebur, degi, bela e-ibmar-nueganse-bakale, be soogi ogumakoed. We-ibmarmar be-Bab-Dummad-Jehováʼba bela ogumakar-ibmar-uknaidyob guoed. We-neggwebur degisadegu bergus sigoed, we-neggwebur bar gannar soblegosulid.
DEU 13:17 ”We-ibmar-obelolegega-ukabsalesad bipisaale be suosulid. Deyobi, be-Bab-Dummad-Jehová bar urwosulid. Geb degine, Bab-Jehová bemar-dadganga ise-sogar-sogsayobi, nue bemar-sabguoed, nue-wile bemar-dakoed, degine, gatik bemar-omelomai imakoed.
DEU 13:18 ”Ar bemar be-Bab-Dummad-Jehová-sogedba damalar, bela igarmar-an-emi-bemarga-uknaidba be nanamalar, be-Bab-Dummad-Jehová-asabin ibmar-innikigwadbi be imakmalar, deyob neg-guoed.”
DEU 14:1 Moisés Israel-dulemarga sogdebalid: “Bemar, be-Bab-Dummad-Jehová-mimmigan gumalad. Mer dule-burgwisad-ular, be-san-uka daas-daas imako, mer nono-swiri be ibalo.
DEU 14:2 Ar bemar be-Bab-Dummad-Jehováʼba uklegarmaladid. Ar Bab-Jehová unnila egadgarbi-guega, we-napneggi dulamar-bukidar-bukwad-abargi bemar-sunonikid.”
DEU 14:3 Moisés Israel-dulemarga sogdebalid: “Melle ibmar-ised gunmalo.
DEU 14:4 We-ibmar-durgandi sunna be gunmaloed: Moli-bebe-nikad, sibad-wawaad, sibad,
DEU 14:5 goe-ciervoʼye-nugad, goe-gacelaʼye-nugad, goe-corzoʼye-nugad, sibad-ome-sapurbalid, sibad-íbiceʼye-nugad, goe-antílopeʼye-nugad, degine, sibad-wawaad-sapurbalid.
DEU 14:6 ”Degine, sunna be ibdurgan e-goonasi-darbo-marar-nikamalad, geb, gagan-masar, gannar-mabaliga-sabanyagi-mas-saboged, be gunmaloed.
DEU 14:7 ”We-ibdurgandi be gunnosulid: Moli-yargan-mureged, nubi, ugdun. Ar wemar amba gagan-masar, gannar-mabaliga-sabanyagi-mas-saboged-inigwele, e-gonasidi negabar mararsulid. ”We-ibdurgandi be gunnosulid, ise-gullegedga gumaloed:
DEU 14:8 Sina, amba be gunnosurbalid, ar goonasi-darbo-marar-nika-inigwele, mas-masar, gannar-mabaliga sabanyagi mas sabosulid. ”Degisoggu, we-ibdurgan ise gullegoed. Sin-e-san bemar gunnosurmalad, sin-burgwaledbela gwen be ebuosurmalad.
DEU 14:9 Bela ibdurgan-diakinmalad e-see-nikamalad, degi, uayob-uka-nikamalad, nabir be gunmaloed.
DEU 14:10 Ar ibmar-durgan-diakinmalad e-see-nikasulile, degi, uayob-e-uka-nikasulile, be gunnosurmalad, ise gullegedga gumaloed.
DEU 14:11 Nuu-nuegan bela sunna be gunmaloed.
DEU 14:12 Degi-inigwele, ar wemardi be gunnosurmalad: Sulubagi, sulubagi-garmar-bisge-bisge-imaked, uabu,
DEU 14:13 mula, degi, bela sulubagi-senigan akar-akar-daklemalad, bela e-sordamar be gunnosulid.
DEU 14:14 Degine, abgokor, degi, abgokormar-akar-akar-daklemalad be gunnosurbalid.
DEU 14:15 Nuu-dummad-dukar-suid avestruzʼye-nugad, irmon-senigan, bela dilli-dilli akar-akar-daklemalad, noo-akar-akar-daklemalad be gunnosulid.
DEU 14:16 Irmon, dabgala-ibisʼye-nugad, badugiid-calamónʼye-nugad,
DEU 14:17 gorgi, mula-buitreʼye-nugad, diidod,
DEU 14:18 dabgala-dummad, garzaʼye-nugad, degi, garza-akar-akar-daklemalad, salligiid-abubillaʼye-nugad, degine, uksir, wemar be gunnosurbalid.
DEU 14:19 Gukur-akar-akar-nabir-gukumalad, ise gullegoed. We-ibmarmar-isemalad, melle be gunmalo.
DEU 14:20 Ar nuumar-nuegandi nabir be gunmaloed.
DEU 14:21 ”Ibdurgan be burgwar-mai amisale, melle be gunmalo. We-ibmar, dule-ainebarmalad-be-abargi-mamaidga be ukoed. Amardi, sunna we-ibmar-burgwaled gunmaloed. Sulile, dule-ainebarmalad-bese-atakdanimaladga manigi ega be ukoed. Ar bemardi, be-Bab-Dummad-Jehováʼba uklegarmaladid, unnila egadga nug-imaklesmaladid. ”Sibad-e-mimmi, melle e-nan-nunisgi be duo.”
DEU 14:22 Moisés Israel-dulemarga sogdebalid: “Birga-ilibali bela ibmar-gwagmar be-nainugi be wesmaladi, ambegi gwensak (10%) Bab-Dummadga be ukergebmalad.
DEU 14:23 Be-Bab-Dummad-Jehová-asabin, e-neg-susadgi, e-nug-nasiko-sogsadgi ibmar-ambegi-gwensak-ukleged (10%) be gunnoed. Amar wemalad: Be-ibmar-gwag-ukleged, be-vino-binid-ukleged, be-olivo-gwallu-binid-ukleged. Degine, be-moli-gebegwalulesmalad, be-sibad-wawaad-gebe-gwalulesmalad, be-sibad-gebe-gwalulesmalad, wemar, Bab-Jehová-neg-susadgi be gunnoed, adi, bemar bane-bane be-Bab-Dummad-Jehová-dobee nanamalagar.
DEU 14:24 ”Ar be-Bab-Dummad-Jehová megega-neg-susad begi dikasuli siile, ase geg be ibmar-sede-itogele, degidbali, geg be ibmar ambegi-gwensak-ukleged (10%) sede-itogele,
DEU 14:25 be we-ibmar maniga-obinyoed. Geb be be-Bab-Dummad-Jehová-neg-susadse we-mani be sedoed.
DEU 14:26 Agi, geb a-manigi be ibmar-bakbiedba we-ibmar be bakoed: Moli-bebe-nikad, sibad-wawaad, vino, degine, gobed-bamalad-sole-solemalad. ”Agi be-Bab-Dummad-Jehová-asabin, be, degine, be-gwenadganse-bakale, mas gunnoed, degi, weligwar itomaloed.
DEU 14:27 ”Levita-dulemar-bemar-neggweburgi-maid, nue be akwemalo, melle be obanmalo, ar ade, bemarga nainumar-uklesadyob, wemargardi uklessulid.
DEU 14:28 ”Birgapaagwad-iliba, bela be-ibmar-wesadi, ambegi-gwensak-ukleged (10%) be suoed, be-neggweburmargi be sabogoed.
DEU 14:29 A-neggweburmarse we-dulemar nonimaloed: Levita-dule-bemarba-nainu-nikudsulid, dule-be-yarginsurmalad, dule-sergan-sated, omegan-e-sui-burgwismalad be-neggweburgi-gudidimalad. ”Deyob, a-dulemar mas gunmaloed, nue-immee gudii gumaloed, adi, be-Bab-Dummad-Jehová bela-be-ibmar-nued-imakmaladgi ise-nued bemargi binsamalagar.”
DEU 15:1 Moisés Israel-dulemarga sogdebalid: “Birgagugled-ilibali (7), dule-begi-mani-ganikid, begi mani-ganisulidga be imakoed.
DEU 15:2 ”Birgagugled-ilibali (7), weyob be imako: Dule-begi-mani-ganonikile, mer bar be-bennukega be imako, igibarsaye be sogo. Ar be, dule-baidga be ibu uksadibe, be-gwenadga be ibu uksadibe, bar gannar ese be egisosulid. Ar ade, Bab-Jehová-nuggi Mani-Galesulid-Birgaye sogleged.
DEU 15:3 Dule-be-yarginsuliddi, gannar ibmar-bega-ukega be imakoed. Be-gwenadsedi gannar bar ese be ibmar egisosulid. Ega be sogoed: ‘Be angi-ibmar-gasad, bergusye.’
DEU 15:4 Ar deyob be imakele, bemar-abargi dule-wilegana nikuosulid. Ar Bab-Dummad-Jehová yala-bemarga-uknaidgi, ise-nued bemargi binsaoed, ise-obinagwar bemarga ibmar ukoed.
DEU 15:5 Ar bemar be-Bab-Dummad-Jehováʼba be nue ibsamalar, degine, bela igarmar-emi-an-bega-uknaidba innikigwadba be imaker, deyob gunonikoed.
DEU 15:6 Ar be-Bab-Dummad-Jehová, igi-bega-sogsagusadba ise-nued bemargi binsaoed. Ar dulemar-yar-baid-baidgi-bukwamalad begi-mani-gamalaga, bese egisdii gumaloed. Bemardi, mani-gaega, gwen dule-baiganse mani-egisdii guosulid. Aka bur bemardi dulemar-yar-baid-baidginmaladgi obinoed, dulemar gwen begi obinosulid.”
DEU 15:7 Moisés Israel-dulemarga sogdebalid: “Be-neggweburmargi, be-gwenadganmar-abargi, be-Bab-Dummad-Jehová-yar-bega-uknaidgi, dule-wileged-gudii be dakardibe, melle be wiledaksuli guo, melle egi be ibmar nalleguo.
DEU 15:8 Aka ega bur bule be ibmar ukoed, ibmar-nue-abegedba ise-obinagwar ega be ukoed.
DEU 15:9 Melle be-gwagegi sunnasuli be weyob binsao: ‘Mani-ganikid-elileged-birga iche-napsoggua, mer an dule-wilegedga ibmar ukoye.’ Abakalegi be-gwenad-wileged be isdar-dakedbali, yapa ega be ibmar uke gualile. Ar ade, we-dule, sunna begi Bab-Jehováʼga sunmaked. Deyob be daele, soglenonikoed, be isgusye.
DEU 15:10 Be-gwenad-wilegedga ibmar-uksuli melle be guo. Ega ibmar be ukalile, ise-obinagwar ega be ukoed. Mer be nalled-dulega guo. Ar obinagwar be ibmar-ukedbali, be-Bab-Dummad-Jehová, be-ibmar-imakedgi, degi, be-ibmar-imakbiedgi ise-nued binsaoed.
DEU 15:11 Ar ade, dule-wilemaladdi, we-napneggi gwen surguosulid. A-ulale, an bega igar uked: Be-yalagi be-gwenadga ise-obinagwar ibmar be ukergebed. Degine, dule-wilegedga be ibmar-ukergebbalid.”
DEU 15:12 Moisés Israel-dulemarga sogdebalid: “Ar be-gwenad-Hebreo-dule, machereddibe, omedibe, be-maiga-guega, manigi na san-uknonikile, birganergwa (6) bega arbaoed. A-dule, birgagugledgi (7) be onogoed, e-itolegedba naoed.
DEU 15:13 We-dule be onosale, arganagwabi be barmidosulid.
DEU 15:14 Ega be sibad-wawaadmar ise-obinagwar ukoed, deyob, be-ibmar-gwag-omukued-neggi ibmar-gwag-bukwad ega be ukbaloed, deyob, be-vino ise-obinagwar ega be ukbaloed. Ar igi Bab-Jehová ise-nued begi binsasa, abali ega be ibmar ukoed.
DEU 15:15 Be Egipto-yargi maiga-gudigusmogad be ebinsamalo. Degine, be-Bab-Dummad-Jehová Egipto-yargi-be-onosad be ebinsao. A-ulale, emi an deyob bega igar uked.
DEU 15:16 ”Ar be-mai bega sokalirdi: ‘Yapa an begi naye.’ Ar be-sabedba deyob bega soged. Ar be-neguyagi-gudimalad-sabbalidba bega soged. Deginbali, ar be-neggi nue-gudii itobalid.
DEU 15:17 Degisoggu, be, esgoro-swiswidikidgi e-uaya-duku yawagakba-mesa be udgoed. Deyob, we-dule be-maiga degisadegu gusunnoed. Amba deyob be, be-mai-omegwa imakbaloed.
DEU 15:18 ”Be-mai be onosokalile, melle nunmak be itogo, ar ade, we bega birganergwa-arbasadi (6), mani-negabala bega arbasad. Ar dule-baid bega arbasana, bur ilabo-wilub be mani-oesanad. Deyob be imakmalo. Ar adi, degidbali, be-Bab-Dummad-Jehová bela be ibmar-imakalir, ise-nued begi binsaoed.”
DEU 15:19 Moisés Israel-dulemarga sogdebalid: “Be-Bab-Dummad-Jehováʼba ibdurgan-machered-sailagi-gwalulesad be ukoed, moli-bebe-nikaddibe, sibad-wawaaddibe, sibaddibe. ”Be-moli-bebe-nikad-machered-sailagi-gwalulesad oarbaega be imakosulid, degine, be-sibad-wawaad-machered-sailagi-gwalulesad-ibe, be e-absar emiosulid.
DEU 15:20 Birga-irba, be, degi, be-gwenadganmala, Bab-Jehová-neg-suoye-sogsagusadgi, be-Bab-Dummad-Jehová-asabin we-ibmar-durgan be gunnoed.
DEU 15:21 ”Ar we-ibdurgan wis boni-nikale, ibya satedibe, muya-muya-nanadibe, ar boni-baid nikadibe, melle be-Bab-Dummad-Jehováʼba be ogumakar uko.
DEU 15:22 Ar we-ibdurgan deyobile, be-neggweburmargi be sunna gunnoed, goe-sapurmar-gullegeyob be gunnoed. Ar amba Bab-Jehová-asabin be swilidik-gudidibe, be swilidik-gudisurdibe, we-ibdurgan be nabir gunmaloed.
DEU 15:23 Ar we-ibdurgan-bonikwaamalad, e-san-abebi be gunnosulid. E-abedi, be napagi diiyob eogoed.”
DEU 16:1 Moisés Israel-dulemarga sogdebalid: “Abib-niigi bemar be-Bab-Dummad-Jehováʼba Oburgwilegoenad-Iba onogoed. Ar Abib-niigi, be-Bab-Dummad-Jehová Egipto-yargi-be-bukwamargua, mutikidba bemar-onosgusad.
DEU 16:2 ”Oburgwilegoenad-Ibagi be be-Bab-Dummad-Jehováʼba be-sibad-wawaad, be-moli-bebe-nikad oburgoed, bia Bab-Jehová-na-megoye-sogsadgi be oburgoed.
DEU 16:3 ”Oburgwilegoenad-Ibagi-san-gulleged madu-e-ina-nikadba be gunnosulid. Ibagugle (7) madu-e-inasulidba be gunnoed. We-madu, be-nunmak-itosad-madud. Ar Egipto-yargi be noargu, gwae-gwae be noar gusad. Ar be bane-bane, degisadegu, Egipto-yargi-nosagusad-e-iba be ebinsadii guega, weyob be iba onogoed.
DEU 16:4 Bela be-yargine ibagugle-naguoedgi (7) bipisaale gwen madu-ina daklegosulid. Gebe iba-onoded-sedogidgi, Bab-Dummadga-be-ibmar-oburgwisad-e-san melle be banedga sabogo.
DEU 16:5 ”Bemar Oburgwilegoenad-Ibagi sibad-wawaad-oburgwilegedi, be-Bab-Dummad-Jehová-neggwebur-bamalad-bemarga-ukoedgi be oburgosurmalad.
DEU 16:6 Unnila bia Bab-Dummad-Jehová na megega-neg-suoedgi, bemar sibad-wawaad oburgwemaloed. Agi sedogidba, dad-argwatele Oburgwilegoenad-Ibaga be sibad-wawaad oburgwemaloed. Ar we-wachigi, bemar Egipto-yargi be noar gusmalad.
DEU 16:7 ”Bia be-Bab-Dummad-Jehová na neg-suoedgi be san narmaloed, geb be a-san gunmaloed. Geb oibosale, wakdaradba gannar na be-negse be dagmaloed.
DEU 16:8 Ibanergwa (6) madu-inasulid be gunmaloed. Ibagugledgi (7) be-Bab-Dummad-Jehováʼba onmaked-dummad-islidikid be onomaloed. A-ibagi, bemar gwen arbaosurmalad.”
DEU 16:9 Moisés Israel-dulemarga sogdebalid: “Bemar ibmar-gwag-gulleged-gebe-welealid-akale, itoged-iba, ilagugle (7) be ebisdemaloed.
DEU 16:10 Geb degine, be-Bab-Dummad-Jehová-nuki we-itoged-ibaganga iba-dummad-islidikid be onomaloed. Bab-Jehováʼga be ibmar-ukbiedba ukoed, ar be-Bab-Dummad-Jehová ise-nued begi binsasadba, ega be ukoed.
DEU 16:11 Be-Bab-Dummad-Jehová megega-neg-susadgi be werguo. Degine, bebali, wemar wergumarmogo: Be-machi, be-bunolo, be-mai-machered, be-mai-ome, Levita-dule-be-neggweburgi-mamaid, dule-be-yarginsulid-be-abargi-maid, sergan-sated, omegan-ei-sui-burgwismalad, amala beba wergumaloed.
DEU 16:12 ”Na be ebinsamalo, igi-Egipto-yargi maiga be gudii gusmala. Degisoggu, we-igargan an bemarga uknaidba, nue a-sogedba be nanadii gumalo.”
DEU 16:13 Moisés Israel-dulemarga sogdebalid: “Neg-Matargana-E-Iba-Islidikid be ibagugle (7) onogoed. Be ibmar-gwag-gulleged-wesad-sorba, degi, be uva-nis-wesad-sorba, be we-iba onogoed.
DEU 16:14 Be we-iba-dummad-islidikidgi werguoed. Degine, bebali, wemar wergumarmogo: Be-machi, be-bunolo, be-mai-machered, be-mai-ome, Levita-dule-be-neggweburgi-mamaid, dule-be-yarginsulid-be-abargi-maid, sergan-sated, omegan-ei-sui-burgwismalad, amala beba wergumaloed.
DEU 16:15 ”Be-Bab-Dummad-Jehová-nuggi, ibagugle (7) iba-dummad-islidikid be onogoed. A-iba, Bab-Jehová-neg-suoedgi be onogoed. Ar be-Bab-Dummad-Jehová bemargi ise-nued-binsaedba, bela be-ibmar-gwag-weedgi be-bendakoed, degi, bela be ibmar-imakoedgi be-bendakoed. Agine, bela-belagwad be nue-weligwar itomaloed.
DEU 16:16 ”Birgagi ilapaa bela bemar-machergan be-Bab-Dummad-Jehová-asabin nonimaloed, ar bia Bab-Jehová na neg suoe, ase be nonimaloed. We-ibamar-onolegedgi be nonimaloed: Madu-Inasuli-Gulleged-Ibagi, Itoged-Ibagan-Islidikid-Ibagi, degine, Neg-Matargana-Ibagi, be nonimaloed. ”Dule-wargwensaale, Bab-Jehová-asabin arganagwabi nonikosulid.
DEU 16:17 Ar igi be-Bab-Dummad-Jehová ise-nued bemargi binsasa, aba be ibmar sedamaloed.”
DEU 16:18 Moisés Israel-dulemarga sogdebalid: “Be-Bab-Dummad-Jehová-neggweburmar-bega-ukoedgi-arbamalaga be dule-igar-nabomalad, degi, dule-dummagan, be onugsao. Be-dadgan-ambe-gakabogwad-iliba (12) be onugsao. We-dulemar igar-innikigwadba dulemarga igar nabomaloed.
DEU 16:19 Igarmar-Mamaidgi melle be annadii gumalo. ”Degine, melle dule-wargwenba be nagumarbalo, bela emarbi be dako. Dulemarga igar-nabogegala, melle dulemarse bakledii be gumalo, ar ade, dulemarse-baklemaladi, dulemar-binsaed-ibegan-e-binsaed-gaega imaked, degine, dulemar-nuegan-ichogega imaked.
DEU 16:20 Unnila igar-innikigwadginbi, a-igarbarbi be nanadii guo, adi, nabir be dula-gudii guegar, degine, be-Bab-Dummad-Jehová-bega-yar-uknaid, begadga guegar.”
DEU 16:21 Moisés Israel-dulemarga sogdebalid: “Be-Bab-Dummad-Jehováʼga-ibmar-ogumakar-ukleged-aila be sobsad-naba, melle bab-dummad-bundor-Aseraʼye-nugadga sapi be digo.
DEU 16:22 Degine, melle be e-nuggi akwa-dummad be sobo, ar ade, be-Bab-Dummad-Jehová we-ibmar nue bela-bela isdar daked.”
DEU 17:1 Moisés Israel-dulemarga sogdebalid: “Mer be be-Bab-Dummad-Jehováʼba moli-bebe-nikad-bonikwagwad uko. Deginbali, sibad-wawaad-sapingwagwad-bonikwagwad, degi, ibmar-ichakwagwad mer be ukbalo. Ar ade, be-Bab-Dummad-Jehováʼba we-ibmar, ibmar-nuedsulid, ibmar-isganad.”
DEU 17:2 “Be-dulemar-abargi machereddibe, omedibe, be-Bab-Dummad-Jehová bemarga-neggweburmar-uksadgi, Bab-Jehová-asabin ibmar-isgana-imaksale, a-dule, Bab-Dummad-Jehová-bemarga-Igar-uksadgi annasad.
DEU 17:3 Dule, bab-dummagan-baigan-e-nug-odummogega, dad-ibeler-e-nug-odummogega, sindigar-sigisale, nue isgusad. Deginbali, nii-e-nug-odummogega, niisgwamar-e-nug-odummogega, sindigar-sigisale, nue isgusad. ”Ar ade, Bab-Jehová gandik sogsagusad: ‘Mer bab-dummad-baiganse be goloye.’ Abali, ibsassulid.
DEU 17:4 Ar dule deyob gusye be wisgunonimalale, nue-ise-egisar be imakmalo. Ar Israel-dulemar-abargi we-ibmar-isgana nue-napira gusye be wisgunonimalale,
DEU 17:5 ome-wargwendibe, machered-wargwendibe, deyob ibmar-isgana-imaksaye, a-dule, neggweburyagi be onogoed, geb akwagi-makar we-dule be oburgoed.
DEU 17:6 ”Dule-e-daksamalad, walabodibe, walapaadibe, a-sogedba, sunna we-dule oburgweleged. Dule-wargwen-sogedbardi, geg oburgwileged.
DEU 17:7 Dulemar-daksamalad-inse akwagi we-dule-makoed. Geb a-sorba, bela dulemar-baigan egi akwa-mimaloed. Weyob isgued be-abargi be osulogoed.”
DEU 17:8 Moisés Israel-dulemarga sogdebalid: “Ar bega igar-nabolenaidgi we-igarmar dutusur-nudakle be dakele: Dule-oburgwismalad-igargindibe, ebo-urwemalad-igargindibe, sabsur-naibisamalad-igargindibe, be-neggweburgi galagwensuli-imakmalad-igargindibe, bemar be-Bab-Dummad-Jehová-neg-suoedse be namaloed.
DEU 17:9 ”Degine be, Levita-dule-irwa-Bab-Dummadse-gormalad-maidse be naoed, degine, dule-igar-nabogedga-maidse be naoed, ase be idaknaoed. A-dulemar bega sogoed, igi we-igar imaklegoe.
DEU 17:10 Ar igi-we-dulemar Bab-Jehová-neg-suoedgi bega igar-ukmaloe, bela aba be ibmar-imakoed. Degisoggu, nue salakarmar.
DEU 17:11 Ar igi bemarga igarmar-uklegoe, degi, igi bemarga soglegoe, aba bemar ibmar-imakmaloed. Ar igarmar-bemarga-uklesad bipisaale be ogwaosulid, bela a-sogedba bemar imakoed.
DEU 17:12 Ar dule-san-bule-bule-imakdiid dule-irwa-Bab-Dummadse-goled-sogsadba ibsasulile, dule-igar-nabogedga-maidba ibsasulile, we-dule oburgwilegoed. Ar we-dummagan Bab-Dummad-Jehováʼga arbamamaid. Weyobi, Israel-dulemar-abargi isgued be osulogoed.
DEU 17:13 Ar dule-oburgwilesye wisgunonimalale, bela dulemar dobee itonamaloed, magar na itononimaloed, san-bule-bule-imaked igar-nuedsurye.”
DEU 17:14 Moisés Israel-dulemarga sogdebalid: “Bemar, be-Bab-Dummad-Jehová bemarga yar-uknaidse dognonikile, a-yala bemargadga gunonikile, degine, agi bemar bukwadgi sokarmalale: ‘Anmar-sedii gumalaga anmar rey-onugsamarmogoye. Ar igi-neggweburmar-anmar-dikarba-bubukwad na rey-nikamala, deyob anmar gumogoye.’
DEU 17:15 Be-Bab-Dummad-Jehová na doa susa, a-dule be-reyga be mesmaloed. Be-dule-wargwen be-reyga be onugsamaloed. Dule-be-yarginsuliddi, be-reyga be imakosurmalad.
DEU 17:16 ”Dule-reyga-onug-imaklegoed gwen moli-ichesuli-nika guosulid. Deginbali, we-dule, gwen gannar Israel-dulemar Egipto-yarse-molimar-aminaega imakosulid, ar ade, Bab-Jehová sogsa gusad: ‘Melle bipisaale gannar we-igarba namaloye.’
DEU 17:17 Degine, dule-reyga-onug-imaklegoed ome-ichesuli nikuosurbalid, adi, melle amarse binsaed-galedii guegar. Adi, melle bab-dummagan-baiganse nanaegar. Deginbali, bukidar mani-onmakdii guosurbalid, bukidar ormar-onmakdii guosurbalid.
DEU 17:18 ”Rey-bemar-onug-imakoed, e-rey-ganagi signonikile, Igarmar-Maid-Garda garda-baidgi yopira-narmakega imakoed, adi, na ebi ebugegar. Igi Levita-dule-irwa-Bab-Dummadse-gormalad we-Igarmar-Maid-Garda-sedimala, a-yopira narmaklegoed.
DEU 17:19 ”Rey, Bab-Dummad-Jehová-dobee-nanaega, we-garda sedii guoed, degine, bane-bane absodii guoed. Adi, Bab-Jehová-igarmar-bemarga-uksadba nanaega, degine, a-sogedba gudii guegar.
DEU 17:20 Ar weyob rey e-dulemargi obichaa daosulid, degine, we-Igarmar-maidgi bipisaale gwen aibanosulid, unnila a-Igarba innikii nanadii guoed. Deyobi, rey, degi, e-waganmala, suitibaksaar Israel-dulemar-abargi gudii gumaloed.”
DEU 18:1 Moisés Israel-dulemarga sogdebalid: “Levita-dule-irwa-Bab-Dummadse-gormalad, Leví-waganye soglebalid, e-gwenadgan-Israel-dulemarba nainu nikuosurmalad. We-Leví-wagan unnila Bab-Jehováʼga ibmar-ogumakar-uklesmaladgi gudii gumaloed. Deginbali, ibmar-Bab-Dummadgadye-soglegedgi gudii gumarbaloed.
DEU 18:2 Degisoggu, Levitaʼmar na e-gwenadgan-abargi nainu nikuosurmalad. Ar Bab-Jehová ega sogsadba, Bab-Jehová e-nainuyob ega gunonikid.
DEU 18:3 ”Dulemar Bab-Dummadga moli-bebe-nikad ogumakar-ukarmalale, sibad-wawaad-ogumakar-ukarmalale, dule-irwa-Bab-Dummadse-gormaladga we-ibmar uklegoed: E-dua, e-aku, degine, e-samurmar.
DEU 18:4 Deginbali, ibmar-gwag-gebe-sanmaked, be-vino-binid, be-olivo-gwallu-binid, degine, be-sibad-wawaad-e-absar-gebe-siklesmalad, amala, dule-irwa-Bab-Dummadse-gormaladga be ukmaloed.
DEU 18:5 Ar ade, be-Bab-Dummad-Jehová baigan-dadganmar-abargi Leví-dulemar-sunonikid, degine, bela e-waganmarse-bakar sunonikid, adi, Leví, degi, e-wagan, Bab-Jehová-nuggi degisadegu arbadii gumalagar.
DEU 18:6 ”Ar Levita-dule-gwensak Israel-neggwebur-gwensakgi-mai noardibe, na e-itogedba Bab-Jehová-neg-susadse naddibe,
DEU 18:7 ar a-neg-mosale, igi e-gwenadgan-Levitaʼmar Bab-Dummad-Jehováʼga agi ibmar-imaknanaimala, deyob, Bab-Jehováʼga arbanai gunonimarmogoed.
DEU 18:8 Wemar, Levitaʼmar-baiganyobi ega ibmar-uklemogoed, deyob, ibmar nikunonimarmogoed. Deginbali, na e-ibmar-e-babgangi-danikidi, maniga-imaksadgi na wergudii gumarbaloed.”
DEU 18:9 Moisés Israel-dulemarga sogdebalid: “Bemar, be-Bab-Dummad-Jehová-yar-bemarga-uknaidse be dogsamalale, melle dulemar-a-yargi-bukmalad-sunnasurdamaladba be damalo.
DEU 18:10 Melle bemar-abargi dule-wargwensaale, e-machidibe, e-bunagwadibe, soogi-ogumakar uko. Degine, melle, dule, nermar-igarba, dule-ina-isganagi-arbamalad-igarba, ibmar-yoo-guoed-sogmalad-igarba, niamar-igargi-nanamaladba, ibmar-imakdii guo.
DEU 18:11 Deginbali, melle sunmakedgi dule-binsaed-gao, melle ibmar-burbaled-oyoged-dulega guo, melle dule-irwa-burba-isganase-goledga guo, melle burgwarmaladse-idaked-dulega guo.
DEU 18:12 ”Ar doa we-igar-isgana-imakdii gualile, Bab-Jehová we-dule bela-bela-isgus dakoed. Agala, we-ibmar-isgana-imakmalad-ular, be-Bab-Dummad-Jehová be-asabin we-dulemar-bukwamalad onioed.
DEU 18:13 Bab-Dummad-Jehová mer-begi-yolegega, e-asabinni be inniki-gudii gumalo.
DEU 18:14 Ar we-dulemar e-ibe-be-yar-suesokalid, wemar dule-ina-isganagi-arbamaladse idakdamalad, degine, dule-yoedse-ibmar-guoedgi-sunmakmaladse idakdamarbalid. Ar bemargardi, be-Bab-Dummad-Jehová bemarga soged, melle bipisaagwale deyob be damaloye.”
DEU 18:15 Moisés Israel-dulemarga sogdebalid: “Be-Bab-Dummad-Jehová e-gayaburba-barsoged-anyobid be-gwenadgan-abargi gwensak bemarga barmidagoed. A-dule, nue be itomalo.
DEU 18:16 We be egichis gusmalad, deunni, ar Horeb-yargi, dulemar-bukidar-bukwagusad-abargi, bemar be-Bab-Dummad-Jehováʼba be sogsa gusmargu: ‘Anmar yapa bar anmar-Bab-Dummad-Jehová-e-gaya itoye, anmar yapa bar we-soo-gwabunye-gwichid dakbarye. Ar anmar burgwebisuliddeeye.’
DEU 18:17 ”Agi, Bab-Jehová anga sogsagusad: ‘We-dulemar-ibmar-soged, an nabir itoye.
DEU 18:18 Agala, an, an-gayaburba-barsoged-beyobidi be-gwenadgan-abargi gwensak an ega barmidagoye. A-dulegala an-gayaburba an ega ukoye. A-dule, ar igi an ega sogoe, bela bemarga sogmogoye.
DEU 18:19 Ar doa-dule, we-dule-ibmar-sogedba ibmar-imaksulile, an-sunnad we-dulese ibmar egisoye.’
DEU 18:20 ”Bab-Dummad anga sogdebalid: ‘Ar Bab-Dummad-gayaburba-barsoged an-nuggi sunmakye-sogele, gwen an ega ibmar-sogsasulid-sogdele, we-dule oburgwilegoed. Ar dule bab-dummagan-nuggi sunmakdebalir, deyopira oburgwilemogoed.’
DEU 18:21 ”Ar be sogmardibe: ‘¿Igi an wisgumalosunna, wede Bab-Jehová-gayaburbasurye?’
DEU 18:22 Bab-Dummad-gayaburba-barsoged Bab-Jehová-nuggi sunmakele, e-ibmar-sogsad ega gusulile, we soglegoed: ‘Bab-Jehová-gayaburbasurye,’ ar we-Bab-Dummad-gayaburba-barsoged na e-itolegedba sunmaksad. A-dule, be melle dobgumalo.”
DEU 19:1 Moisés Israel-dulemarga sogdebalid: “Be-Bab-Dummad-Jehová bela dulemar-yar-bega-uksokalidgi-bukwad ogilosale, degine, bela be e-dulemar-ononnosale, geb e-neggweburmargi, degi, e-negmargi be megnonikile,
DEU 19:2 bemar neggwebur-negabarginmalad gwapaa be sunonikoed.
DEU 19:3 A-neggweburmarse nabir molegegala, igarmar be omesmaloed. Be sogapaa be-Bab-Dummad-Jehová-yar-bemarga-uknaid be mamaroed, adi, dule-emar-oburgwisad nabir ase wakinnegalad.
DEU 19:4 ”Dule-emar-oburgwisad na san-bendakega, we-neggweburse sunna wakinnoed. We-dule, dule-oburgwebisulidgi, ebo-urwedisulidgi, emar-oburgwisale, bendaklenonikoed.
DEU 19:5 Ar weyobsundo. Sogmalo, dule, dule-baidbogwa sapurba soo-siknaded. Agine, soo-siknaidgi, akan-e-nono egi-noded, dule-baidgi yoledapid, geb dule-oburgwenonisunnad. We-dule-emar-oburgwisad na san-abonogega, sunna we-neggweburse wakinned.
DEU 19:6 ”Dukued-neggweburse-nalegegala, dikasur-nanaleged abelesulid. Ar abakalegi dule-burgwisad-e-gwenad, sae-itogedba dule-emar-oburgwisad-baregitele, neg-dikasulidba bargadapile, agi sabsur-naibi-imaksadba abakale oburgwenonikile. Ar we-dulede oburgwilegewilubsulinad, ar ade, yamo gwenad-oburgwissulid, sae-dakedba oburgwissurbalid.
DEU 19:7 Degisoggu, an bega igar uked, agala, be neggwebur-gwapaa bachikii sabogoye.
DEU 19:8 ”Ar we-igarmar emi an-bega-sognaidba be ibsaele, degine, be-Bab-Dummad-Jehová be nue sabele, e-igarmarba bane-bane be nanamalale,
DEU 19:9 be-Bab-Dummad-Jehová igi-be-dadganga sogsagusadba bega-yar-uknaid bur bule bega onasgumai imakoed, bela bega yar-uknonikoed. Geb agine, dukued-neggweburga-guega neggwebur-baigan-gwapaa be sunonibaloed.
DEU 19:10 ”Deyobi be-Bab-Dummad-Jehová-bemarga-yar-uknaidgi dule-ibmar-oakalossulid-ibe ablis eolegosulid. Adi, dule-ibmar-oakalossulid-ibe-ablis-eolesadi, mer begi ataklegegar.
DEU 19:11 ”Ar dule-gwensak dule-baid-isdar-dakedba, naibisaega baleginnadibe, degi, geb gadapile, oburgwenonikile, geb dule-emar-oburgwisad neggweburmar-bamaladse wakitesunnale,
DEU 19:12 Israel-girmar-dummagan we-neggweburse ganamalaga dulemar-barmidoed. Geb degidgine, oburgwega, dule-bugeb-mai-imakbiedga ukoed.
DEU 19:13 Melle be dule-gindaked wiledako. Ar weyob Israel-neggweburgi dule-gindakmalad be osulogoed. Geb agine, bela ibmar-nueganbi bega guoed.
DEU 19:14 ”Be-Bab-Dummad-Jehová-yar-bega-uknaid begadga gusale, melle be be-gwenadga-nainu-uklesadgi dogdii nanao, ar ade, e-abingunaid bato dikasurgus ega uklesad.”
DEU 19:15 Moisés Israel-dulemarga sogdebalid: “Ar dule-wargwengi sogleardibe, dule ibmar-oakalosye, dule ibmar-isgana-imaksaye, dule nosye. Melle dule-wargwen-sogedba be ibmar-imako. Ar dule-walabo sogsundibe, walapaa sogsundibe, we-dule ibmar-oakalosye, adi, be itogoed.
DEU 19:16 ”Ar dule-wargwen binsa-gakansaar dule-baidgi-sunmaknonikile, ibmar-oakalosye.
DEU 19:17 Dule-ebogwad-na-gaenanaidi, Bab-Jehová-asabin nonimaloed. Dule-irwa-Bab-Dummadse-gormalad-asabin, degine, dulemarga-igar-nabomaladga-arbamamaid-asabin nonimaloed.
DEU 19:18 Dulemarga-igar-nabomalad nue-baramioed, wede, bule nabiri. Ar nabirsulile, we-dule, binsa-gakansaale e-gwenadgi sunmaksale,
DEU 19:19 we-dule, igi na e-gwenad-imakbigusa, deyob imaklegoed. Ar weyob isgued bemar-abargi be osulogoed.
DEU 19:20 Adi, dule-baigan-gakansaar-sunmakmalad itoarmalale, dobgudmaloed. Deyobi, we-ibmar-isgana bemar-abargi bar imaklegosulid.
DEU 19:21 Melle we-dulemar wile be dakmalo: Ar dule-gwensak dule-baid-oburgwisale, oburgwilemogodo. Dule-baid-ibe ibya-gwagwennaibi-imaksale, e-ibe ibya-gwagwen naibisalemogodo. Nugar-wargwen-bichisale, e-ibe e-nugar bisgilemogodo. Argan-naibi-imaksale, ei e-argan naibisalemogodo. Mali-naibi-imaksale, ei mali naibi-imaklemogodo.”
DEU 20:1 Moisés Israel-dulemarga sogdebalid: “Be-isdarmaladgi be bila-ononad-sogele, agi be molimar-dakalile, urmar-napaginmalad-dakalile, degine, dulemar-bur-bule-beba-mergu be dakalile, melle be dobgumalo. Ar ade, be-Bab-Dummad-Jehová, Egipto-yargi-bemar-onosadi, bemarba gudii guoed.
DEU 20:2 Ar nue bemar urwesokarmalale, dule-irwa-Bab-Dummadse-goled bemar-asabin gwisguoed, bemarga sunmakoed.
DEU 20:3 Weyob bemarga sogoed: ‘Israel-dulemar, nue itomar. Emi-ibagi, bemar be-isdarmaladbo-urwega bemar danar ambikunonimalad. Melle dobgumalo. Melle niga-galakumalo. Melle be be-isdarmalad-asabin suli-suli-itomalo.
DEU 20:4 Ar ade, be-Bab-Dummad-Jehová bemarba gudiid, bemar-ular-urwoed, degine, be-isdarmaladgi-be-onakwega bemar-imakoed.’
DEU 20:5 ”Geb degine, dummagan, sordamarga sunmakdoed, ega sogdoed: ‘Dule na neg-bini-sobsadgi-yoo-amba-mege-itogele, gannar na e-negse nabier, naodo. Ar abakalegi urwenaidgi, neg-binidgi-megissuli burgwialile. Ar burgwenonikile, dule-baid e-neg-binidgi megnonikoed.
DEU 20:6 Ar dule-gwensak na uva-digsad amba yoo gunne-itogele, gannar na e-negse nabier, naodo. Ar abakalegi urwenaidgi, uva-guchasuli burgwialile. Degiile, dule-baid e-uva-gunnai dakledagoed.
DEU 20:7 Ar dule-gwensak abirgin-nikuega igar-mesisale, gannar na negse nabier, naodo. Ar abakalegi, urwenaidgi burgwialile. Degiile, dule-baid, e-sorba, a-ome nikualile.’
DEU 20:8 ”Deginbali, dummagan gannar sunmakdebaloed, sordamarga sogdoed: ‘Dule dobee-itodibe, gannar na e-negse-nabier, naodo. Ar abakalegi, na e-dobee-itogedba, e-gwenadgan-e-niga egwannalile.’
DEU 20:9 Geb, dummagan-sunmaksad-sorba, bila-ononamalaga sordamar-idued e-sordagan-idu gwisgumaloed.
DEU 20:10 ”Bemar egi bila-onogega neggwebur-gwensakse-modapile, e-dulemarga be soggweloed: ‘Nuedgi an-maiga be gumarye.’
DEU 20:11 Ar a-neggweburginmalad be-abin-imakalile: ‘Nuedgi an be-maiga guoye.’ Degine, bemarga e-neggwebur-yawagak-egaele, bela e-dulemar-bukwad bemar-maiga guoed, degine, bega-arbamaladga gumarbaloed.
DEU 20:12 Ar bebo igar-nabosulirdi, bebogwa bila-onomarye-sogele, agindi, bemar a-neggwebur-ebilis ambikumaloed.
DEU 20:13 Geb degine, be-Bab-Dummad-Jehová we-dulemargi-nakwega bemar-imaknonikile, agindi, bela be e-dule-machergan es-suidgi oburgoed.
DEU 20:14 E-omegandi, e-mimmigandi, e-ibdurgandi, degine, bela ibmar-neggweburgi-nikamaladdi, bela e-ibmar-nuegandi, begadga be sumaloed. Degine, e-mas-nuegandi be gunmaloed, ar ade, be-Bab-Dummad-Jehová bemarga uksad.
DEU 20:15 Deyob neggweburmar-bemargi-dikasur-bukmalad be imakmaloed. A-neggweburmar, be-yar-walikaa-bukmalad e-neggwebursurmalad.
DEU 20:16 ”Ar be-Bab-Dummad-Jehová-bemarga-yar-uknaidgi dulemar-bukwamaladdi bela be oburgwemaloed, wargwensaagwale be dula obegosurmalad.
DEU 20:17 Ar be-Bab-Dummad-Jehová bemarga igar-uksadyob, we-dulemar bela be obelogoed: Het-dulemar, Amorreo-dulemar, Canaán-dulemar, Ferezeo-dulemar, Heveo-dulemar, degi, Jebuseo-dulemar.
DEU 20:18 ”Ar deyob bemar imaksulile, we-dulemar e-ibmar-isgana-imakmaladgi, e-bab-dummad-nug-odummomaladgi be-odurdakdemaloed. Geb degidbali, bemar be-Bab-Dummad-Jehováʼgi-isguega gunonimarsunnoed.
DEU 20:19 ”Bemar neggwebur-gwensakse-urwenadele, ebilis egi bemar ambikudapmalo. Dikasurgus agi bemar urwenanaigusale, melle akangi e-sapimar be oimalo. Ar ade, agi sunna bemar we-sapi-san gunmaloed. Melle a-sapimala mamarmalo. Ar ade, a-sapimala dulesurmarsoggu, bemar-abin-imakosurmalad.
DEU 20:20 Degi-inigwele, sunna be sapi-geg-sanmakeddi, degi, sapi-wissur-e-san-gullegeddi, be sikmaloed, adi, neggwebur-bebo-urwenaidgi be nakwedse, bila-onogedgi-ibmar-ebulemalad a-sapimargi be soboed.”
DEU 21:1 Moisés Israel-dulemarga sogdebalid: “Be-Bab-Dummad-Jehová-yar-begadga-guega-uknaidgi, dule-wargwen sapurba burgwar-meremai-daklealile, degine, dulemar wissurmalale, wede doa oburgwisa,
DEU 21:2 be-girmar-dummagan, degi, dule-bega-igar-nabomalad daknamaloed. Geb wilubsamaloed, biti-neggwebur bur dule-oburgwilesadgi walikaa sii.
DEU 21:3 Geb degine, girmar-dummagan neggwebur-bur-dule-burgwar-amilesad-walikaa-siidginmalad, moli-bebe-nikad-ome-wargwen amioed. We-moli amba yoo-oarbaleged, amba yoo-baid-ebo-suargi-atilleged, amioed.
DEU 21:4 Girmar-dummagan-a-neggweburginmalad, we-moli-bebe-nikad-ome nebase sedoed. Neba-gullugan-amba yoo-imulegedse, amba yoo egi ibmar diglegedse sedoed. Agi moli-e-dukar bisgoed.
DEU 21:5 ”Geb degine, Leví-wagan dule-irwa-Bab-Dummadse-gormalad, amar na e-arbaed-imakmaloed. Ar ade, we-Leví-wagangi Bab-Jehová-ise-nued-binsamaid-sogega, be-Bab-Dummad-Jehová amar-susad. Dulemar na ebo-urwenanaidgi, dule-naibi-imaksadgi, we-Leví-wagan-sogedba igar-nabolemai guoed.
DEU 21:6 Geb degine, girmar-dummagan neggwebur-bur-dule-burgwar-amilesadgi-itaka-siidginmalad, moli-bebe-nikad-ome-dukar-bichilesad-birgi na e-argan enukmaloed.
DEU 21:7 A-girmar-dummagan weyob sogmaloed: ‘Anmar, we-dule-oburgwissulid, anmar daksasurbalid, wede doa oburgwisa.
DEU 21:8 Bab-Jehováʼye, be-Israel-dulemar, begi isgussuliyob be-dako. Ar we-dulemar na be bendaksadid. Melle be be-Israel-dulemargi we-dule-burgwisad, binsa egi be nasiko. Bab-Jehováʼye, ar weyob be imaksale, we-dule-oburgwilesadgi ollor be anmar-imaknonikoed.’
DEU 21:9 Weyob, Bab-Jehová-asabin ibmar-nued be imaknonikoed. We-dule-burgwisad bemargi ataklegosulid.”
DEU 21:10 Moisés Israel-dulemarga sogdebalid: “Be-isdarmaladgi be bila-ononader, be-Bab-Dummad-Jehová be-isdarmaladgi-nakwega be-imaksale, degine, amar abala be gasale,
DEU 21:11 amar-abargi ome-wargwen yeerdakle be dakalile, be abealile, na bebo-nikuega be subiele,
DEU 21:12 a-ome be-negse be sedagoed. A-ome e-sailagia na swiri ioed, degine, e-goonasi na sikbaloed.
DEU 21:13 Galesadgi e-mor-yoi-gusadi ogwaoed. Degine, be-negyagi e-babgi-obanlesadba, degi, e-nangi-obanlesadba, nii-walagwen bodii guoed. Geb a-sorbali, sunna be we-ome-nikuoed.
DEU 21:14 Geb nikusad-sorbali, we-ome be baisur-dakalile, agi, na e-itoleged-naega be imakoed. We-ome manigi dule-baidga be ukosulid. Be-maiga be imakosurbalid. Ar ade, egi bato be dodosad.”
DEU 21:15 Moisés Israel-dulemarga sogdebalid: “Dule-wargwen, ome-warbo-nikad, gwensak bur sabed, baiddi baisur-daked. Degine, warbobela mimmigan-nikunonikid. Ome-baisur-dakedbo machigwa gebe nikunonikid.
DEU 21:16 We-dule, ibagwengi, na e-ibmar-nikad-mimialile, mer machi-sailagined-sunsogedgi-yolegega, ome-sabed-e-machiga machi-sailaginedga-ibmar-ukleged ukosulid. Ome-baisur-daked-e-machiga machi-sailaginedga-ibmar-ukleged ukoed.
DEU 21:17 ”We-dule, ome-baisur-daked-e-machi, na e-machi-sailaginedye sogoed. Ar ade, a-inse sapingwagwadgi nikusad. A-ular, e-urbamarba, igar-maidba, a-machigwa ilabo-mergu ibmar-nikuoed.”
DEU 21:18 Moisés Israel-dulemarga sogdebalid: “Dule-gwensak machi-uayasulid-nika gudiid. E-bab-ega-ibmar-soged, degi, e-nan-ega-ibmar-soged gwen itosulid. Amba e-babgan sabsur-odurdaked-inigwele, gwen e-babganba ibsasulid.
DEU 21:19 Degisoggu, e-bab, degi, e-nan, neggwebur-noed-yawagakse girmar-dummagan-asabin e-machi-sedoed.
DEU 21:20 Geb degine, girmar-dummaganga sogoed: ‘We-an-machi, uaya satedaye. Anmar-ega-ibmar-sogedba gwen dasurdaye. Unnila omeganbi wisgudiiye, mumguedbi wisgudibarye.’
DEU 21:21 ”Geb degidbali, bela-dulemar-neggweburginmalad we-machi akwagi-makmaloed, deyob oburgwilegoed. Ar deyob geb isgued bemar-abargi be osulogoed. Ar adi, Israel-dulemar bela weyob-ibmar-gusad-itoarmalale, bela dobgumaloed.”
DEU 21:22 Moisés Israel-dulemarga sogdebalid: “Dule-wargwen dummad-neg-oakalosadba, gammu-gaar be we-dule-oburgwisale,
DEU 21:23 e-mui, bannu-bannu-oibonai be nasikosulid. A-ibagi, yog-digar be imakoed. Ar ade, dule deyob sapigi bannu-bannu-gammu-galegar-burgwedi, Bab-Dummadgala, we-dule nue-ukabsalegaledid. Degisoggudina, we-yar-be-Bab-Dummad-Jehová-bega-uknaid, be mer oichogo.”
DEU 22:1 Moisés Israel-dulemarga sogdebalid: “Be-gwenad-e-moli-bebe-nikad-alugwasualeddibe, e-sibad-wawaaddibe, yoggus-gudii be dakalile, be bendakoed. Bendaksuli be guosulid. Be-gwenadga a-ibdurgan ega be berbenaoed.
DEU 22:2 E-ibed, be-neg-dikarba-maisulile, igidibe, ar be wissulile, doa ibdurgan-e-ibedi, e-ibed amidagedse we-ibdurgan be-neggi ega be akoed. Geb agi, ega be ukoed.
DEU 22:3 Ar e-moli-uayasuid yoggusdibe, e-mor-dummad-suitigwad yoggusdibe, ibu-ibmar be-gwenad-ibe yoggusdibe, ar amba be deyob imakbaloed. Melle bendaksuli be guo.
DEU 22:4 ”Igarba dule-baid-e-moli-uayasuid mellemai be dakardibe, moli-bebe-nikaddibe, egi bakar be naosulid. Moli-ogwisguega be imakoed.
DEU 22:5 ”Omegan, machergan-mor yosulid. Machergan, omegan-mor yosurmogad. Ar doa-dule deyob imakele, ibmar nuedsulid, ar be-Bab-Dummad-Jehová we-ibmar-imaked gwen nabir daksulid.
DEU 22:6 ”Igarba be nadapidgi, nuu-e-uu sapigi-sii be dakalile, igi, napagi-siidibe, melle yogasaar be ebuo, Ar a-uugi, nuu e-akwa-birgi-sii be dakalile, igi e-mimmigan-ebodibe, melle be e-nandi suo, unnila e-mimmiganbi be suoed.
DEU 22:7 Sikwi-e-nandi be ogukuoed, e-mimmigandi be suoed. Adi, bela bega ibmar nueganbi-guegar, degine, we-yalagi suitii be gudii guegar.
DEU 22:8 ”Neg-bini be sobsale, neg-uwas madaresoggu, melle-dule-argwanega uwas-gakaba, galu be nasikoed. Ar deyob be galu-nasiksulile, dule-wargwen uwasgi-argwatele, degi, burgwenonikile, begi ataklegoed.
DEU 22:9 ”Melle be-uva-nainugi ibmar-baid-baid be digo. Ar deyob be imaksale, bela be ibmar-gwag-weoedi, degi, uvaʼmar-weoedi, bela Bab-Dummadgadga guoed. Degidba be sate guoed.
DEU 22:10 ”Napa-imuega, melle be moli-bebe-nikad-alugwasualed, moli-uayasuidbo edinno.
DEU 22:11 ”Melle be mor, sibad-wawaad-e-absar, lino-dub-sobaledbo-oburar be yoo.
DEU 22:12 ”Mor-be-atuged-dummad-suitigwad e-dukumar-bakegwadgine, dubmar durba-durba be nasikoed.”
DEU 22:13 Moisés Israel-dulemarga sogdebalid: “Dule-wargwen ome-nikusale, bato ese-gochad-sorba isdar-dakalile,
DEU 22:14 gakansaar-sokalile: ‘An we-ome-nikusadi, an ese gotegua, an dakarye, we-ome yagwasurye.’
DEU 22:15 Geb, e-sergan, neggwebur-yawagak-dogedse, girmar-dummaganse, yagwagued-e-wilubgan oyonaoed.
DEU 22:16 Geb degine, ome-bab girmar-dummaganga sogoed: ‘We-dulega an-sisgwa-nikuega an ega uksanye. Emide, we-dule, an-sisgwa-isdar-dakarye.
DEU 22:17 Emide, we-dule, egi gakansaar weyob sunmakdiiye: We-bunagwa, yagwasurye. Ar emide, e-wilubgan be dakmardo, an-sisgwa bule-yagwasurdibeye.’ Geb degine, yagwa-e-babgan neggwebur-girmar-dummagan-asabin atued egaoed.
DEU 22:18 Agine, geb neggwebur-girmar-dummagan machered-gamaloed. Geb, sabsur-odurdakmaloed.
DEU 22:19 Deginbali, a-macheredgi mani-sibu-gwadulatar (100) egi galegoed. We-mani, ome-babga uklegoed, ar ade, Israel-yagwa-wargwen-ibe nug-oichosad. We-machered, we-yagwa-metosurbalid, degisadegu e-omega guoed.
DEU 22:20 ”Ar daklealirdi, inso-nabiri, ome yagwasuli.
DEU 22:21 Ar deyobirdi, ome e-bab-e-neg-yawagakse seledoed. Agi machergan-a-neggweburginmalad, akwagi-makar we-ome-oburgwemaloed. Ar ade, e-bab-neggi-gudigua, negsichidgi-yolesad, Israel-yargi nue-dummad-isgusad. Weyobi, bemar-abargi isgued be osulomaloed.
DEU 22:22 ”Ar dule-wargwen, ome-sui-nikadbo-mai daklesale, ebobela-burgwemaloed. We-machered oburgwilego, we-ome oburgwilemogo. Deyobi, geb bemar Israel-yargi isgued osulogoed.
DEU 22:23 ”Dule-wargwen, yagwa-bato-sui-nikuoye-ega-igar-maid neggweburgi dakalile, geb, a-yagwase-gochale,
DEU 22:24 ebobela neggwebur-yawagakse be sedoed. Ebobela akwagi-makar oburgwilemaloed. Ar ade, we-yagwa, e-bendakmalagala dulemar-neggweburginmaladse binnasuli-gochasulidba oburgwilegoed. Degine, machered dule-baid-e-omega-guoedgi-dodosadba oburgwilemogoed. Weyobi, bemar-abargi isgued be osulogoed.
DEU 22:25 ”Ar dule-wargwen, yagwa-bato-sui-nikuoye-ega-igar-maid sapurba-abinguardibe, geb a-yagwa gadebin imaksar, egi dodosar, unnila we-dulebi, yagwagi-dodosad-ular, oburgwilegoed.
DEU 22:26 A-yagwadi, melle oakalomalo. Ar ade, ibmar-isgana imaksasulid. Degisoggu, oburgwilegosulid. We-igar, dule, dule-baid-sabsur-imaksadba dule-oburgwisadyob gued.
DEU 22:27 Ar we-dule, sapurba yagwa-bato-sui-nikuoye-ega-igar-maid abingunoni gusad. We-yagwadina aisaar binnasuli dule-e-bendakega gochanad, ar ade, dule-e-bendaked sate-gusad. A-ulale, bemar we-yagwa-oakalogosurmalad.
DEU 22:28 ”Dule-wargwen yagwa-amba yoo-sui-nikuoye-ega-igar-meged abingualir, ese golega gadebin-imaksadibe, degidgine, deyob daklenonimarsunnad,
DEU 22:29 dule-we-yagwase-gochad, a-yagwa-e-babga mani-sibu-gwadulabo-gakambe (50) ega ukoed. We-dule, we-yagwagi-dodosadba nikuoed. Bipisaale we-ome-metosulid, degisadegu burgwedse nika guoed.
DEU 22:30 ”Dule bipisaale, e-bab-ome-ebo negsichigi nanaosulid. Ar degiile, e-babgi dummad-dodonai-itole. E-babgi dodogosurguoed.”
DEU 23:1 Moisés Israel-dulemarga sogdebalid: “Dule e-alugwag-matarkwaa nikale, igi, abgan sikardibe, Bab-Dummad-Jehováʼse-goled-negse gwen dogosulid.
DEU 23:2 ”Mimmi-dikarba-amilesad Bab-Jehováʼse-goled-negse gwen dogosulid. Ar amba e-waganmar-yokor-ambegidse (10) gwen Bab-Jehováʼse-goled-negse dogosulid.
DEU 23:3 ”Amón-dule, degi, Moab-dule Bab-Jehováʼse-goled-negse gwen dogosulid. Ar amba e-wagan-yokor-ambegid-sorbarmaladse-bakale (10), Bab-Jehováʼse-goled-negse gwen dogosulid. Ar bipisaagwale, we-dulemar Bab-Jehováʼse-goled-negse gwen dogosurmalad.
DEU 23:4 Ar ade, Israel-dulemar, deunni, Egipto-yargi-noarmargu, Amón-dulemar, degi, Moab-dulemar Israel-dulemar-abindaksasurmalad, gwen ega dii uksasurmalad, gwen ega mas uksasurmarbalid. Deginbali, aka bur Israel-dulemar-ukabsaega Beor-machi-Balaamʼga mani-uksamalad. Balaamʼde Petor-neggweburginedid, Petorʼde Mesopotamia-yalagi siid.
DEU 23:5 Ar be-Bab-Dummad-Jehová nue be-sabmarsoggua, Balaam-bemar-ukabsanaid itossulid. Be-Bab-Dummad-Jehová, Balaam-bemar-ukabsanaid bemarga bemargi-nued-binsalegega obinnisad.
DEU 23:6 Degisoggu, degisadegu, Amón-dulemarbo, Moab-dulemarbo, bipisaale melle igar-nabomalo, degine, melle egi be nued binsamarbalo.
DEU 23:7 ”Edom-dulemardi, melle be isdar dakmalo, ar ade, be-ia gued. Melle be Egipto-dulemar isdar dakmalo, ar ade, e-yargi bemar gudii gusad.
DEU 23:8 Wemar-e-mimmigan-e-wagan sunna Bab-Dummad-Jehováʼse-goled-negse dogmaloed.”
DEU 23:9 Moisés Israel-dulemarga sogdebalid: “Be-isdarmaladgi be bila-onodele, bela ibmar-isganagi be banguoed.
DEU 23:10 Ar be-sorda-wargwen, mutikidba ichakwa-gabdakmaidgine, na e-san-burba-misale, bemar-sordamar-danar-danar-bukwad-neggi nooed, ase bar dogosurgweled.
DEU 23:11 Geb sedogusale, oboed. Dad-argwater, geb sunna sordamar-danar-danar-bukwadse gannar dogoed.
DEU 23:12 ”Bemar-sordamar-danar-danar-bukwad-magaba bemar akued-neg simaloed.
DEU 23:13 Deginbali, agala, bemar suar-na-nika-gumaloed. Magaba bemar nodele, a-suargi bemar yaa akwimaloed. Akusad-sorbali, a-yaa bemar emurmaloed.
DEU 23:14 Ar ade, be-Bab-Dummad-Jehová be-isdarmaladgi-be-bendakega, amargi-bemar-onakwega, bemar-sordamar-danar-danar-bukwad-abargi gudiid. Degisoggu, bemar, be-sordamar-bukwad, neg-islidik imakmalargebed. Bab-Dummad-Jehová ibmar-isgana-nika bemar-dakalile, abakalegi bemargi banguarmalale.”
DEU 23:15 Moisés Israel-dulemarga sogdebalid: “Mai-gwensak e-ibedgi wakinmaile, bese dukuega-nonikile, e-ibedga be ukosulid.
DEU 23:16 Ar we-mai be-neggweburgi be-abargi-gudisabier, mer ese be golo. Ar bia na neggwebur-megbiedba, na e-yeer-itogedba-megbie, agi na megoed. Melle be a-dule-sabsur-imako.
DEU 23:17 ”Be-Israel-omegan, be-Israel-machergandibe, bab-dummaganse-goled-neggi gamba-imakedgi gwen arbadii guosulid.
DEU 23:18 ”Be-Bab-Dummadse-goled-negse omegan-gamba-imakedgi-mani-onolegedi, degi, machergan-gamba-imakedgi-mani-onolegedi, bipisaagwale mer be ukmalo. Ar be sogsadibe, Bab-Jehováʼga-ibmar-ukleged an deyob ukoye, a-manigi be we-ibmar-ukega bennukosulid. Ar ade, Bab-Dummad-Jehová a-manimar-deyob-amileged nue-isdar daked.
DEU 23:19 ”Be-gwenad bese ibmar egisdanidibe, manidibe, masgullegeddibe, ibu-ibmardibe, be-gwenadga be uksale, gannar bega sekalaa ibmar-ukoed, obichaa egi be ibmar suosulid.
DEU 23:20 Israel-dulesulid bese-ibmar-egichisadga be uksale, gannar bega ukdanikile, agindi, egi-wis-mani-onogega, sunna egi obichaa ibmar be suoed. Be-Israel-dulegindi, suli. Unnila gannar bega sekalaa ibmar-ukoed, mer egi be mani onogo. Ar deyobi, be-Bab-Dummad-Jehová, bela be yar-be-susokalidgi ibmar-imakoedgi nue-nabir begi binsaegalad.
DEU 23:21 ”Ar be-Bab-Dummad-Jehováʼba be ise-sogar sogsadibe, an bega ibmar imakedseye, deyob be sogsadi, gwae-gwae-imaked be sao. Ar be deyob imaksulile, be-Bab-Dummad-Jehová bega sognonikoed, be anga ise-sogar-sogsad imakoye. Ar be-sogsadba be imaksulile, Bab-Dummadgi be nue-dummad-isgussunye soglegoed.
DEU 23:22 Ar Bab-Dummadga be ise-sogar sogsulir, an bega imakedseye, adi, akarsulid, be isguosulid.
DEU 23:23 Ar na be wargwen be-itolegedba be-Bab-Dummad-Jehováʼba ise-sogar ibmar-sogele, ega be sogsadba be ibmar-imakergebed.
DEU 23:24 ”Be-gwenad-uva-digaled-nainugi be dogder, sunna immelegedse be uvaʼmar-gunnoed. Degi-inigwele, uva, bipisaagwale be-garbagi-sedega be imakosulid.
DEU 23:25 ”Be-gwenad-nainuse be dogder, ibmar-gwag-gulleged be-argangi be gwanoed. Degi-inigwele, be es-dopekwagwadgindi be sikosulid.”
DEU 24:1 Moisés Israel-dulemarga sogdebalid: “Dule-wargwen, ome-nikunonidibe, degine, ome-nikusad gwen nabir-egi-nosur-dakalile, abali, bar abesurgualile, ome-meted-garda narmakoed. Geb we-garda omega ukoed, deginbali, e-neggi-gudiid onobaloed.
DEU 24:2 We-ome, e-machered-neggi-nosad-sorba, sunna machered-baid nikuoed.
DEU 24:3 ”Dule, a-machered-sorba-nikusmogar, we-ome-isdar-dakarmogale, degine, ome-meted-garda ega narmakar-uksamogale, deginbali, e-neggi-onosbalile, igidibe, we-sui-sorbalid burgwenonisundibe,
DEU 24:4 machered-gebe-e-suiga-gusad, bar we-ome gannar nikuosulid. Ar ade, bato we-ome baid-sui-nikusad-ular, ome-e-nug-isgusad. Ar deyob gunonikile, Bab-Jehová-asabin we-ibmar igar-isgana gued. Mer be-Bab-Dummad-Jehová-yar-begadga-guega-bega-uknaid, be oichodii nanao.
DEU 24:5 ”Dule emis ome-nikusale, bila-ononaega naosulid. Degine, bipisaale ibmar-baid-imakega be imakosulid. Birgagwen na e-itolegedba e-neggi gudii guoed, adi, na e-omebo, wergudii guegar.
DEU 24:6 ”Dule begi mani-gasale, melle be a-muchub e-obnaged be suo, melle be a-muchub e-akwamuu be subalo. Ar e-ibe be susale, dummad be wiogo-itole, ar ade, agi na wis gudimogad.
DEU 24:7 ”Dule-daklenonikile, e-mesad-Israel-dule-gwensak manigi-ukega gasa, maiga-imakega gasdibe, dule-e-gwenad-gasad oburgwilegoed. Ar weyob isgued bemar-abargi be osulomaloed.
DEU 24:8 ”Emide, naibe-buna-yaa-malegedgindi nue salakarmar. Igar an bemarga uksadba be imakmalo. Degine, dule-irwa-Bab-Dummadse-gormalad-Leví-wagan-sogedba be imakmaloed. Ar igi an bemarga Igar-uksa, bela deyob be imakmaloed.
DEU 24:9 Nue insamalo, be-Bab-Dummad-Jehová igi-María-imaksa-gusa, deunni, Egiptoʼgi-bemar-noalid-sorba, igarba-be-bipirmakdimargu.
DEU 24:10 ”Be-ai begi-wis-ibmar-gaegala, gannar bega sorba ukbaliga ega be wis ibmar uksagwelele, a-muchub-ibmar-sied-suega, melle be e-negse dogo.
DEU 24:11 Be e-neg-magaba be edarbo, ar e-sunnagwad na e-ibmar-nikad bega ukoed.
DEU 24:12 Ar we-dule, dule-wilegeddibe, degidbali, ibmar-ega-be-uksad-muchub bega e-atued uksadibe, mutikgusale, e-atued-bega-uksad gannar ega be ukoed. Uksuli be gabosulid.
DEU 24:13 Dad-argwaned-iduar, we-atued-dummad be ukedsegad. Uksuli be guosulid. Adi, we-dule mutik na atuegar, degine, a-dule, begi nabir binsaegar. We-ibmar deyob be imaksadba, be-Bab-Dummad-Jehová dule-igar-innikigwad-imakedga be-dakoed.
DEU 24:14 ”Dule-wileged-arbaed, ibmar-sate-gudiid, a-dulegi mer be ichakwa-binsao. Igar-maidba sekalaa be-bennukoed, akuar be bennukosulid. We-dule-wileged, Israel-duledibe, Israel-dulesulid-be-neggweburgi-maiddibe, deyob be imakoed.
DEU 24:15 Arbasadgi yog bennukar be imakoed, dad-argwaned-idu be bennukergebed. Ar dule wilegedsoggu, na a-e-arbaedgi wis mas-gundiid. Ar degisulile, abakalegi a-dule Bab-Jehováʼse binnasuli begi sunmakalile. Degiile, Bab-Jehováʼgi be dummad-noo-itole.
DEU 24:16 ”Babgan e-mimmigan-isgusad-ular, oburgwilegosulid. E-mimmiganmoga, e-babgan-isgusad-ular, oburgwilegosurmogad. Ar na dukin e-isgusadba oburgwilemaloed.
DEU 24:17 ”Israel-dulesuliddibe, sergan-sateddibe, nue ega igar-nabogo. Melle amarga-igar-maidgi be annadii guo. Degine, melle be ome-ei-sui-burgwisad-ibe, ibmar-begi-susad-ular, e-atued-dummad sudii guo.
DEU 24:18 Be Egipto-yargi maiga-be-gudigusad ebinsadii guo. Be maiga-gudigu, be-Bab-Dummad-Jehová be-onos gusad. Degisoggu, a-ular, an bega soged: ‘Igar-innikigwadba be ibmar-imakdii guoye.’
DEU 24:19 ”Be-nainugi be ibmar-gwaggulleged-weenaile, be dukgwen iesale, melle gannar be sunaedgi binsao. We-dukgwenadde dulemar-Israel-dulesulidga guoed, dulemar-sergan-satedga, degi, ome-ei-sui-burgwismaladga guoed. Adi, bela be ibmar-imakedgi be-Bab-Dummad-Jehová begi nabir binsaegar.
DEU 24:20 ”Be-olivo be gwannaile, melle be e-anagangi-besmalad gannar gwano. Ar we-ibmar Israel-dulesurmaladga be obegoed, dulemar-sergan-satedga, degi, ome-ei-sui-burgwismaladga be obegoed.
DEU 24:21 ”Be-uva-nainugi be uva na weenaile, melle bela be ise-wear imako. Ar abar-beoedi, Israel-dulesurmaladga be obegoed, dule-sergan-satedga, degi, ome-ei-sui-burgwismaladga be obegoed.
DEU 24:22 ”Nue be ebinsao, Egipto-yargi be maiga wiledii gusmogad. Degisoggu, aga an bega soged, weyob be ibmar-innikii imakoye.”
DEU 25:1 Moisés Israel-dulemarga sogdebalid: “Dule na ebo gachimaknaidibe, dule-igar-nabomaladse namaloed, wemala ega igar-nabomaloed. Dule-nosa-daklenonikid sabsur-odurdaklegoed, baiddi odurdaklegosulid.
DEU 25:2 Dule-nosadga, bibyoleged-igar ega maile, dule-igar-naboged-asabin napagi meslegoed. Geb a-asabin bibyolegoed. E-isgusad-ganguedba deyob-mergu bibyolegoed.
DEU 25:3 Sunna ila-dulabogwadse (40) bibyolegoed, a-obichaa be bibyogosulid. Ar be wilub-obicha be-gwenad-be-bibyosale, nue mesagwar be imako-itole.
DEU 25:4 ”Moli-bebe-nikad ibmar-gwag-egwirmaknair, melle e-gaya edinno, adi, sunna ibmar-gwag maoed.
DEU 25:5 ”Na gwenadgan neg-yagi ebo-gudiile, gwensak e-omega mimmi-baksasuli-burgwisale, ome-ei-sui-burgwisad dule-baid nikuosulid, e-aisubogwa nikuoed, adi, e-aisu, ega igar-maidba imakegar.
DEU 25:6 A-ome, e-aisubo gebe-susugwa-nikunonikile, e-gwenad-burgwisad-e-nugba onug-imakoed. Adi, melle Israel-yargi we-dule-burgwisad-e-nug surguegar.
DEU 25:7 ”Ar e-aisu, yapa we-ome-nikuele, ome neggwebur-noed-yawagakse girmar-dummagan-bukwadse naoed, sognaoed: ‘An-aisu yapa Israel-yargi e-mesad-nug degisadegu-nika imakye. Emide, yapa an-nikuye.’
DEU 25:8 Geb degine, girmar-dummagan-a-neggweburginmalad we-machered-ese-dagega imakoed, adi, emarbo-sunmakdagegar. Ar we-dule sogdibe: ‘We-ome, an yapa nikuye.’
DEU 25:9 Geb deyob sogele, e-ambe girmar-dummagan-wagab e-aisu-asabin gwisgunonikoed. Geb ome, e-aisu-sapat-yoid ei ungoed, degine, e-aisu-wagargi wiakoed, geb weyob sogdoed: ‘Dule-e-gwenad-e-nug-degisadegu-meged-abesulid, weyob imakleye.’
DEU 25:10 Geb degine, Israel-yargi, we-dule, degi, e-gwenadganmala, ‘dule-sapatsurmaladye’ biledii gumarsunnoed.
DEU 25:11 ”Machergan-warbo urwenanaidgi, ome-gwensak na e-sui-bendakega dule-baid-machered-e-alugwaggi ganonikile, geb naibi-imaknonikile,
DEU 25:12 we-ome-e-argan be siko, melle be wiledako.
DEU 25:13 ”Melle be ibmar-bakedgi, degi, ibmar-ukedgi, nibir-sogbo-akar-akar nikuo. Nibir-ukugwaddibe, nibir-ukusuliddibe, mer be deyob nikuo.
DEU 25:14 Degine, melle be-neggi be ibmar-wilubsaed-akar-akar nikubalo. Ibmar-wilubsaed-senigwaddibe, ibmar-wilubsaed-dummaddibe, mer deyob nikubalo.
DEU 25:15 Unnila, nibir-innikigwad, nibir-napiragwad be nikuo. Ibmar-wilubsaed-innikigwad, ibmar-wilubsaed-napiragwad be nikubalo. Adi, be-Bab-Dummad-Jehová-bega-yar-uknaidgi suitii-mai be guegar.
DEU 25:16 Ar ade, be-Bab-Dummad-Jehová dule-ibmar-inniki-imaksurmalad gwen nabir daksulid.”
DEU 25:17 Moisés Israel-dulemarga sogdebalid: “Nue be ebinsamalo, Egipto-yargi-be-noarmargu, bemar igarba-danigua, igi Amalec-dulemar bemar-imaksa.
DEU 25:18 Ar deunni, bemar, igarba-danimargua, Amalec-dulemar be-yarganba noargusmalad, be-dulemar-geggus-danigusmalad-oburgwismalad, geg-bar-nanagusmalad-oburgwismalad. Bab-Dummad-gwen-dobgussurmalad.
DEU 25:19 Degisoggu, be-Bab-Dummad-Jehová yar-bemargadga-guega-uknaidgi, be-isdarmalad-bela-bemar-ebilis-bukwadgi-nakwega bemar-imaksale, bela Amalec-dulemar be obelomaloed. We-ibmar melle be iemalo, bela be Amalec-dulemar-ogilogedse be imakmalo.”
DEU 26:1 Moisés Israel-dulemarga sogdebalid: “Be-Bab-Dummad-Jehová-bega-yar-uksokalidse be dogsale, a-yar-begadga-sadeguoedgi be megnonikile,
DEU 26:2 bela be-Bab-Dummad-Jehová-bega-nainu-uksadgi ibmar-sanmakmalad be weoed. We-ibmar be wesadi, garbagi be urboed. Geb degine, ar bia be-Bab-Dummad-Jehová na megega-neg-suoe, a-negse be naoed.
DEU 26:3 Dule-irwa-Bab-Dummadse-goled-a-ibagi-negdakmaidse be naoed, ega be sogdapoed: ‘Emi, be-Bab-Dummad-Jehová-asabin an bega soged, an we-yarse dognonisunye, Bab-Jehová-anmar-dadganga-sogsa-gusadse, we-yar an bega ukedseye, a-yarse an megnonisunye.’
DEU 26:4 ”Dule-irwa-Bab-Dummadse-goled be-garba-ganikid be-annik suoed, degine, be-Bab-Dummad-Jehováʼga-ibmar-ogumakar-ukleged-aila-asabin sioed.
DEU 26:5 Geb degine, weyob be-Bab-Dummad-Jehová-asabin be sogoed: ” ‘An-dad, Arameo-dule, nega-sate-gudigusad. An-dadde, Egipto-yalase nadegusad. Agi, na e-gwenadgan-bokwagwad-abargi mai-gusad. Agi gudigusad, dulemar ega ichesuli mergudgusad, degine, dutusuli gunonibalid.
DEU 26:6 Egipto-dulemala sabsur-anmar-imaksamalad, anmar-wiosmalad, degi, sabsur-arbaega anmar-imaksamalad.
DEU 26:7 Geb anmar-dadgan e-Bab-Dummad-Jehováʼse, anmar binnasuli gotemalad. Geb Bab-Jehová anmar-ese-goled itosad. Degine, anmar-wilebukwad, anmar-arbaed-bipisuli-imaknaid, Egipto-dulemar-sabsur-anmar-imaknaid, Bab-Jehová anmar-daksad.
DEU 26:8 Bab-Jehová Egipto-yargi na e-gangued-dutusulidba, e-ibmar-dakledisulidgi, ibmar-gegerdaklemaladgi dulemar-dobee-imaksadgi anmar-onosad.
DEU 26:9 Bab-Jehová we-yalase anmar-senonikid. We-yala anmarga uksad. We-yalagi gadi ibmar-sanmaked, napa-nuedid.
DEU 26:10 Emigindi, Bab-Jehováʼye, ibmar-gebe-sanmaksad-an-wesad, bega an sedanikid.’ ”Ibmarmar-gebe-sanmaksad be-Bab-Dummad-Jehová-asabin be urboed. Degine, be-Bab-Dummad-Jehová-asabin e-nug-odummogega, be dulluu napase imakoed.
DEU 26:11 Geb degidgine, Levita-dulemar, degi, Israel-dulesurmalad-be-abargi-mamaid, be-Bab-Dummad-Jehová, bega-ibmar-nued-uksadba, degi, be-gwenadganga-ibmar-nued-uksadba, beba wergumarmogoed.
DEU 26:12 ”Birgapaagine, ambegi gwensak (10%) Bab-Dummadga-ibmar-ukleged-birgad. A-birgagi, bela gebe-ibmar-sanmaksamalad be bachikii urbisale, Levita-dulemarga, Israel-dulesurmaladga, dule-sergan-satedga, degi, ome-ei-sui-burgwismaladga be we-ibmarmala ukmogoed, adi, na e-neggwebur-e-neggweburgi mas ise-immelegar gunmalagar.
DEU 26:13 Geb be-Bab-Dummad-Jehová-asabin weyob be sogoed: ” ‘Bab-Dummad-Jehováʼye, bega-ibmar-nug-imaklesad an-negyagi an onosad. We-ibmarde Levita-dulega, Israel-dulesulidga, dule-sergan-satedga, degine, ome-ei-sui-burgwismaladga an uksamogad, ar igi be anga sogsa, bela aba an imaksad. Be-Igarmar-Mamaidgi an yolessulid, degi, we-dulemar an iessurbalid.
DEU 26:14 An bukib-itodigua, we-ibmarmala an guchasulid. Bab-Dummadye, an ise-bagagwar-gudisurgua, bega-ibmarmar-nug-imaklesad an ebussurbalid. Degine, dule-burgwarmaladga we-ibmarmala an uksasurbalid. An-Bab-Dummad-Jehováʼye, beba an ibmar-imaksad, degine, bela be-anga-ibmar-sogsadba an imaksad.
DEU 26:15 Bab-Dummad-Jehováʼye, be-nibneg-islidikidgi-maid-akar, be anmar-dake. Be-Israel-dulamargi, degi, yala-be-anmarga-uksadgi, be nued binsae. We-yala be anmar-dadganga be ise-sogar sogsad, an bemarga ukedseye. We-yalagine, gadi ibmar-sanmaked, napa-nuedid.’ ”
DEU 26:16 Moisés Israel-dulemarga sogdebalid: “Be-Bab-Dummad-Jehová emi-bega-soged: ‘Igarmar-Mamaidba, Igarmar-soglesadba be nanamarye. Degisoggu, nue salakarmar, bela be-gwagegi, bela be-san-burbagi, we-igarmarba be nanamar.’
DEU 26:17 ”Emide, emi-ibagi ise-sogar be imaksamalad, Bab-Jehová be-Bab-Dummadye. E-Igarmarba, e-Igarmar-Sogsadba, e-Igarmar-Mamaidba, be nanaoye. Degine, Bab-Dummad-bega-sunmaked be itogoye.
DEU 26:18 Bab-Jehová emi-ibagi bega soged: ‘Be an-dulamar-guye, unnila bemarbi angadye, ar igi bega ise-sogar sogsadyob.’ Degisoggu, bela e-Igarmar-Mamaidba be nanamalo.
DEU 26:19 Deyob, Bab-Jehová be-imaksad, adi, dulemar-baigan-imaksadba be-nug bur odummolegegar, be-nuggi bur sunmaklegegar, be-nug bur-bipisur guegar. Degine, adi, bemar unnila be-Bab-Dummad-Jehováʼgarbi-uklegaledga gumalagar, ar igi Bab-Jehová bato idu bemarga sogsadyob.”
DEU 27:1 Moisés, degine, Israel-girmar-dummagan, Israel-dulemarga sogdemalad: “Emi an bemarga bela-Igarmar-uknaidba be nanamalo.
DEU 27:2 Bemar be-Bab-Dummad-Jehová-yar-bemarga-uksokalidse-dogega Jordán-diwar-obaksamalale, a-ibagi, be akwa-dummagan onakmaloed. A-akwamar akwa-sipugwad-calʼye-nugadgi be magmaloed.
DEU 27:3 A-akwagi, bela Igarmar-Mamaid be narmakoed. Be Jordán-diwar-obaksamalar, be-Bab-Dummad-Jehová-yar-bemarga-uksokalidse-dogsamalar, deyob be imakoed. Igi be-dadgan-e-Bab-Dummad-Jehová bemarga sogsagusadyob, we-yar, napa-nuedid, gadi-egi-ibmar-sanmakedid.
DEU 27:4 ”Degisoggu, bemar Jordán-diwar-obaksale, emi an bemarga-igar-uknaidba be imakmaloed: Ebal-yarse be akwamar onakmaloed. A-akwamar akwa-sipugwad-calʼye-nugadgi be magmaloed.
DEU 27:5 Agi be-Bab-Dummad-Jehováʼba ibmar-ogumakar-ukleged-aila be soboed. We-aila-sobbalir, melle be akwamar esgorogi sobo. Unnila be akwamar-gwagwarmalad be ebugoed.
DEU 27:6 Unnila be be-Bab-Dummad-Jehováʼba ibmar-ogumakar-ukleged-aila-soboedi, akwamar-gwagwarmalad be ebugoed, akwamar-soblegarsurmalad. A-birgine, ibmar-ogumakar-ukleged ega be ukoed.
DEU 27:7 Degine, gwenatigwar-guega ibmar-ogumakar-ukleged ega be ukbaloed. Agi, be mas-gunmaloed. Be-Bab-Dummad-Jehová-asabin be wergumaloed.
DEU 27:8 A-akwamar-matargwagwad-birgi we-Igarmar-Mamaid bela ise-nue-narmakar be imakoed.”
DEU 27:9 Geb we-sorbali, Moisés, Leví-wagan-dule-irwa-Bab-Dummadse-gormaladmala, Israel-dulemarga sunmakdemalad, sogdemalad: “Israel-dulemar, boo ambikumar, nue itomar. Emi-ibagi be-Bab-Dummad-Jehová-e-dulamarga be gunonimalad.
DEU 27:10 Degisoggu, be-Bab-Dummad-Jehová-bega-sunmaked nue be itogo. Emi an bega e-Igarmar-Mamaid-uknaidba be nanamalo.”
DEU 27:11 A-ibagine, Moisés Israel-dulemarga weyob igar-uksad:
DEU 27:12 “Bemar Jordán-diwar-obaksa-sogele, dulemargi-ise-nued-binsaed-sogmalagala, wemar Gerizim-yargi ambikumaloed: Simeón-wagan, Leví-wagan, Judá-wagan, Isacar-wagan, José-wagan, degi, Benjamín-wagan ambikumaloed.
DEU 27:13 ”Geb degine, dulemar-ukabsaleged-sogmalagala, wemar Ebal-yargi ambikumarmogoed: Rubén-wagan, Gad-wagan, Aser-wagan, Zabulón-wagan, Dan-wagan, degi, Neftalí-wagan ambikumaloed.
DEU 27:14 ”Levita-dulemar bela Israel-dulemarga weyob binnasuli sogmaloed:
DEU 27:15 ‘Dule-gwensak ibmar-wilub e-bab-dummadga-imakega-sobsale, suargindibe, akwagindibe, esgoro-diregwadgindibe, geb agi, odukusbalile, we-dule, sabsur-odurdaklesun. Ar we-ibmar dule-imakedsoggua, Bab-Jehová we-ibmar isdar daked.’ Bela dulemar abin-sogoed: ‘Eye, sabsur-odurdaklesun.’
DEU 27:16 ‘Dule-gwensak e-bab-nugdibe, e-nan-nugdibe, oichosale, we-dule, sabsur-odurdaklesun.’ Bela dulemar abin-sogoed: ‘Eye, sabsur-odurdaklesun.’
DEU 27:17 ‘Dule-gwensak e-ai-gwensakgi nainu-odonaile, we-dule, sabsur-odurdaklesun.’ Bela dulemar abin-sogoed: ‘Eye, sabsur-odurdaklesun.’
DEU 27:18 ‘Dule-gwensak dule-ibyasulid igarba-yogguega imaksale, we-dule, sabsur-odurdaklesun.’ Bela dulemar abin-sogoed: ‘Eye, sabsur-odurdaklesun.’
DEU 27:19 ‘Dule-gwensak Israel-dulesulidga, dule-sergan-satedga, degi, ome-ei-sui-burgwisadga, igar-mamaidba ibmar-egadmogad ega nabosulile, we-dule, sabsur-odurdaklesun.’ Bela dulemar abin-sogoed: ‘Eye, sabsur-odurdaklesun.’
DEU 27:20 ‘Dule-gwensak e-bab-ome-ebo negsichigi-nanaele, e-bab-abirgunagwar-guedi galagwensuli oichonaid, we-dule, sabsur-odurdaklesun.’ Bela dulemar abin-sogoed: ‘Eye, sabsur-odurdaklesun.’
DEU 27:21 ‘Dule-gwensak ibdurganbogwa galagwensuli-gusale, we-dule, sabsur-odurdaklesun.’ Bela dulemar abin-sogoed: ‘Eye, sabsur-odurdaklesun.’
DEU 27:22 ‘Dule-gwensak na e-bun-ebo, e-bab-sisgwa-ebodibe, e-nan-sisgwa-ebodibe, galagwensuli negsichidgi-nanaele, we-dule, sabsur-odurdaklesun.’ Bela dulemar abin-sogoed: ‘Eye, sabsur-odurdaklesun.’
DEU 27:23 ‘Dule-gwensak na e-saka-ome-ebo galagwensuli negsichigi-nanaele, we-dule, sabsur-odurdaklesun.’ Bela dulemar abin-sogoed: ‘Eye, sabsur-odurdaklesun.’
DEU 27:24 ‘Dule-gwensak, yardakar dule-baid-oburgwisale, we-dule, sabsur-odurdaklesun.’ Bela dulemar abin-sogoed: ‘Eye, sabsur-odurdaklesun.’
DEU 27:25 ‘Dule-gwensak, dule-ibmar-oakalossulid-oburgwega, dule-baidse manigi-binsaed-galedibe, we-dule, sabsur-odurdaklesun.’ Bela dulemar abin-sogoed: ‘Eye, sabsur-odurdaklesun.’
DEU 27:26 ‘Dule-gwensak, we-Igarmar-Mamaid baisur-dakele, eba nanasulile, we-dule, sabsur-odurdaklesun.’ Bela dulemar abin-sogoed: ‘Eye, sabsur-odurdaklesun.’ ”
DEU 28:1 Moisés Israel-dulemarga sogdebalid: “Emi-daklegudina, be-Bab-Dummad-Jehová-bemarga-sunmaked nue be itomalale, emi-ibagi e-igarmar-an-bemarga-uknaid-sogedba be nanamalale, degine, eba be damalale, be-Bab-Dummad-Jehová dulemar-baigan-we-napneggi-bukmaladba bur bule be-nug odummogoed.
DEU 28:2 Be-Bab-Dummad-Jehová-bega-sunmaked be itogele, begine belagwapa we-ibmarmar-nuegana be-Bab-Dummad bega ukoed:
DEU 28:3 Be neggweburgi-gudidibe, bega bela ibmar-nueganbi naoed, be sapurba-gudidibe, bela bega ibmar-nueganbi nabaloed.
DEU 28:4 Be mimmigan-bukidar nikuoed. Be-napagi gadi-ibmar-sanmake guoed. Be-ibdurgan mimmigan-ichesuli nikuoed. Be-moli-bebe-nikamalad, degi, be-sibad-wawaadmar mimmigan-bukidar nikubaloed.
DEU 28:5 Be-garbagi ibmar-ichesuli be weoed, degine, be-madu-omukuedgi madu-ichesuli be soboed.
DEU 28:6 Be-neguya nueganbi guoed. Degine, bia be nadesogele, be-negse be nueganbi dognonikoed.
DEU 28:7 ”Bab-Jehová be-isdarmaladgi-nakwega be-imakoed. Be-isdarmalad begi gwisguar-sogele, begi ilekwaa danimalale, be-abin-gwakidedba yogasaar duurmakdemaloed.
DEU 28:8 ”Bab-Jehová be-ibmar-gwag-neg-saboged nasguega imakoed. Degine, bela be-ibmar-imakedgi, ise-nued binsaoed. Degine, be-Bab-Dummad-Jehová bega-yar-uknaidgi ise-nued begi binsabaloed.
DEU 28:9 ”Ar bemar Bab-Jehová-Igarmar-Mamaidba be nanamalale, Bab-Jehová e-dulamarga be-nug-imaknonikoed. Igi idu bega ise-sogar-imaksa, deyob gunonikoed.
DEU 28:10 Geb degine, bela dulemar we-napneggi-bukwamalad magar dakdemaloed, bemar Bab-Jehová-e-dulamar-gumarye. Geb degine, a-dulemar bemar-dobee nadmaloed.
DEU 28:11 Bab-Jehová ibmar-bukidar bega ukoed: Mimmigan-bukidar-nikuega bemar-imakoed. Be-molimar-akar-akaled mimmigan-bukidar-nikuega, imakoed. Degi, be-nainugi ibmar-diglemalad-bukidar-sanmakega, imakoed. Ar igi be-dadganga sogsa-gusa, we-yala an bemarga-ukedseye, deyob guoed.
DEU 28:12 ”Bab-Jehová, nibneg-akale, bega dii-owiega imakoed. Be-yargi, e-iba-sekalaa dii-owioega imakoed. Bab-Jehová bela be-ibmar-imakedgi, begi-ise-nued-binsaed bega oyononikoed. Dulamar-baigan bese mani-egisdii guoed. Bedi, dulamar-baiganse mani egisosurmalad. Ar ade, bemar mani-unniguar-nika guoed.
DEU 28:13 Be-Bab-Dummad-Jehová-Igarmar-Mamaid emi an-bega-uknaidba be nanaele, a-sogedba be daele, Bab-Jehová dulemar-iduega be-imakoed, dulemar-sorbalidga be-imakosulid. Dulemar-baigangi-obindii be guoed, dule-solabalidga be gudii guosulid.
DEU 28:14 Emi-iba an-bega-Igarmar-uknaidgi melle be aibanmalo. Abakalegi be dulamar-baigan-e-bab-dummagan-e-nug-odummoged-ular, we-igarmargi be banguarmalale.”
DEU 28:15 Moisés Israel-dulemarga sogdebalid: “Be wisgubalirgebed, be-Bab-Dummad-Jehová-bega-sunmakedba, bela-e-Igarmar-Mamaid-emi-an-bega-uknaidba, be dasurmalale, bela we-sabsur-odurdakleged-igarmar begi nonikoed:
DEU 28:16 Be neggweburgi-gudidibe, be ukabsalegoed. Be sapurba-gudidibe, be ukabsalegoed.
DEU 28:17 Be garbagi ibmar-weoedi, bela bega isgusunnoed. Degine, be-madu-omukuedgi ibmar-imakoedi, bela bega isgusunnoed.
DEU 28:18 Be-mimmigan, ukabsalegoed. Be-yargi ibmar-sanmaked, bela bega isgusunnoed. Be-moli-bebe-nikamalad-e-mimmigan, ukabsalegoed. Degine, be-sibad-wawaadmar-e-mimmigan, ukabsalegoed.
DEU 28:19 Be-neguya bela ukabsalesunnoed. Degine, bia be nadesogele, geb be-negse be dognonikoedsega, bela bega boniga gusunnoed.
DEU 28:20 Bab-Jehová bela bega we-ibmar barmidagoed: Ukabsaleged, suli-suli-itoged, degi, ibmar-geg-gued, bega barmidagoed. ”Bela be-obelogedse be-imakoed. Ar ade, be ibmar-isgana-imaked-ular, be Bab-Jehováʼgi-bangusadba, ukiar ibmar-sate be gunonisunnoed.
DEU 28:21 ”Bab-Jehová we-yar-begadga-gusokalidgi bela bemar-obelogedse boni-dummagan barmidagoed.
DEU 28:22 Bab-Jehová amba begi boni-dummagan-baigan barmidabaloed: Boni-dummagan-dule-ogilomalad, uellemalad-dummagan, degi, uka-engumalad, neg-diopisurmalad. Deginbali, bela-bela bega geg dii-wie guoed, Aginbali, be-ibmar-digarmaladgi, Bab-Jehová, bonigan-nue-nika imakoed. Bab-Jehová wemar-bonigangi bemar-obelogedse be-imakoed.
DEU 28:23 ”Degine, nibneggine dad esgoro-gordikidyob-bela-bela-ganai guoed. We-napadi esgoroyob dutusuli guoed. A-ular, bega ibmar sanmakosulid.
DEU 28:24 Bab-Jehová, dii-wied-anar be-napaga nibneg-akar ukub, degi, buru barmidagoed. Bemar-oburgwedse be-imakoed.
DEU 28:25 ”Bab-Jehová be-isdarmaladse galakuega be-imakoed. Be-isdarmaladgi ilekwaa be nadap gumaloed. Degi-inigwele, bemar e-idu duurmakdemaloed, bela akar-akar be aisakidmaloed. Dulemar-baigan-neggweburginmalad bela we-ibmar-isgana begi-gusad-ular, geger bemar-dakmaloed.
DEU 28:26 Be-muimala mulamar-masga, degi, ibdurgan-ursirmar-masga gumaloed. We-ibdurgan be-muimar-gunnanair, dule ogwayed satemaloed.
DEU 28:27 ”Igi Bab-Jehová Egipto-dulemargi we-bonigan barmiali: Uka-biin-gued, dusimar-yaisulid, dusimar-tumorʼye-nugad, uka-yaa-dummagan, uka-aimaked. Deyob, begi, bonigan-geg-nugumalad barmidagoed.
DEU 28:28 Bab-Jehová goellegedga, ibya-sate, degine, aku-na-san-ito be-imakoed.
DEU 28:29 ”Neg-daaledgi, igi dule-ibyasulid negsichigi acha-acha-gudidae, deyob be gumaloed. Ibmar be imakedi, bega nasguosulid. Bane-bane dulemar be-wiomaloed, bemar-ibe ibmar-atursamaloed, dule-be-bendaked-sate be guoed.
DEU 28:30 ”Ome-bebo-nikuoye-igar-maidi, machered-baid a-omegi sabsur-dodogoed. Be neg-soboedgi, be megosurguoed. Uvaʼmar be digoedi, be gunnosurguoed.
DEU 28:31 Be-wagab be-moli-bebe-nikad oburgwemaloed, a-e-san be gunnosurguoed. Be-moli-uayasuid be-wagab sabsur-ebipidmaloed, bega gannar bar ukosurmalad. Be-sibad-wawaad be-isdarmaladse sulegoed, gannar be be-sibad-wawaad-suegala, dule-be-bendaked sate guoed.
DEU 28:32 ”Be-masmala, degi, be-sisgan, dulemar-baiganga-uklegoed be-sunnad be dakoed. Aisaar be-mimmigan be gannar dakbi guoenad, gwen be bar gannar dakosurguoed.
DEU 28:33 Dule-baigan-aku-be-dakedi, bela be-arbasadgi be ibmar-nikuoed, be-ibe sumaloed. Degi, be-nainugi-ibmar-sanmakoed, be-ibe gunmaloed. Unnila bemardi, dulemarse bane-bane sabsur-imakledii, degi, wioledii gumaloed.
DEU 28:34 Ar be deyob neg-dakedbali, be goellegedga gudmaloed.
DEU 28:35 ”Bab-Jehová be-yokormargi, be-malimargi, degine, bela be-ukagi, be-nono-akar mali-nagase yaa-malemaladbi be-imakoed, degine, a-bonimarga ina-sate guoed.
DEU 28:36 ”Bab-Jehová, bemar-seledega, degi, na-be-reyga-dule-onugsasmalad-seledega imakoed. Be-babgan, degi, bemarmoga, dulemar-be-akudakmalad-e-yarse seledoed. Agine, we-dulemar-e-bab-dummaganse bemar gordii gudmaloed. E-bab-dummagan suarmargi, degi, akwamargi sobarmaladid.
DEU 28:37 Bab-Jehová bia dulemar-baigan-bukwadse bemar-sedoe, a-dulemar ibmar-isganayob be-dakmaloed. Begi-sunmakdemaloed, degi, begi-dododmarbaloed.
DEU 28:38 ”Be-nainugi ibmar-gwag-bukidar be digmaloed. Degi-inigwele, sesmar bela be-ibmar-gwag gunmaloed-ular, wis-ichee be ibmar-gwag weemaloed.
DEU 28:39 Bukidar be uva digmaloed, degine, uva-dub be nue-akwemarbaloed. Degi-inigwele, e-vinoʼdi be gobosurmalad, degine, e-uvaʼmar be gunnosurmarbalid, ar ade, nusmar bela be-ibe gunmaloed.
DEU 28:40 Bela be-yalagi olivo-sapimar be nikagumaloed. Degi-inigwele, e-gwallugindi na be san magosurmalad, ar ade, olivo-e-sanmar napase durbas babatidoed.
DEU 28:41 Masmala, degi, bunamala be nikumaloed. Degi-inigwele, begadga guosurmalad, ar ade, gales yar-baidse seledmaloed.
DEU 28:42 Bela be-sapimar, degi, bela e-sanmar, sesmar bela be-ibe gunmaloed.
DEU 28:43 ”Be-abargi dule-be-yarginedsurmalad-mamaimaladi, beba bur nasgumai gumaloed. Bemardi bur ege-gumai gumaloed.
DEU 28:44 Israel-dulesulidse be mani-egisdii gumaloed. Besedi emar mani-egisdii guosurmalad. Degine, a-dulemar, be-iduedga gumaloed, bedi, e-sorbalidga gumaloed.
DEU 28:45 ”Bela we-ibmarmar-ukabsalegar-bega-soglenaidi, be burgwedse begi bela deyob guoed, begi bela aibinoed. Ar be-Bab-Dummad-Jehová-bega-sunmaked, e-Igar-bega-uksad, e-Igar-bega-sogsad, aba be nanassulidba, a-sogedba be ibmar-imaksasulidba, deyob be guoed.
DEU 28:46 Begala, degi, be-wagangala, we-ibmarmar-gegerdaklemalad e-wilubganga degisadegu guoed.
DEU 28:47 ”Ar ade, ibmar-bukidar-obinagwar-be-nikagu, be-Bab-Dummad-Jehováʼse, be weligwaledgine, ise-yeer-itogedgine, e-nug-odummogega, gwen ese be gochasulid.
DEU 28:48 A-ulale, Bab-Jehová be-isdarmalad begi-barmidagoed. Bemar nue-uku-uku-itoged-abargi, ukudmaad-itoged-abargi, uka-swanad-abargi, degine, bela be ibmar-sated-abargi, be-isdarmaladga mailedii be-gumaloed. Be-isdarmaladi gammuba esgoro-dubgi be-edinmaloed, be-obelogedse sabsur be-imakmaloed.
DEU 28:49 ”Bab-Jehová dule-yar-dikasurmaladgined begi sedagoed. Igi sulubagi gwae-gwae-gukue, deyob be-isdarmalad ukiar begi nonikoed. Dulemar-e-gwabinduku-be-aku-itomaladi, begi nonikoed.
DEU 28:50 We-dulemarde, wagar-ursirmaladid. Girmar-sergan ese sabsur-imaklemaloed, degi, burwigana-wile-dakosurmarbalid.
DEU 28:51 We-dulemar, bemar-obelogedse be-ibdurgan-e-mimmigan gunmaloed, be-nainugi ibmar-sanmakmalad gunmaloed. We-dulemala, ibmar-gwag, vino, olivo-gwallu, degi, moli-bebe-nikad-e-mimmigan, degi, sibad-wawaadmar-e-mimmigan bemarga obegosurmalad. We-ibdurgan-bela-be-ibe-obelogedse imakmaloed.
DEU 28:52 ”Be-isdarmalad be-yalagi bela be-neggweburmar-ebilis ambikumaloed. Bela be-neggweburmar-galu-matusurmalad, galu-dutusurmalad, bela babatedsegad. We-neggwebur-galu-dutusurmaladgi bemar sogdimalad: ‘We-galumar anmar-bendakoye,’ agi bemar bensuli gudimalad. Be-Bab-Dummad-Jehová-bela-yar-bega-uksadgi, be-isdarmalad, be-neggweburmar bela ebilis ambikumaloed.
DEU 28:53 ”Ar dulemar-bela-be-neggweburmar-ebilis-ambikumaloedse bemar nue bela-bela-wilemalosoggu, na be dukin be-mimmigan-be-Bab-Dummad-Jehová-bega-uksad, be gutemaloed.
DEU 28:54 Dule-bela-bela-nueddaed, gadi-dule-wiledakedbela na e-gwenad, na e-ome-nue-sabed, degine, e-mimmimar-amba-dula-gudiid sae-dakdoed.
DEU 28:55 We-dule, amargala, yapa e-mimmi-san uke gudagoed, unnila na ebi-gunbi gudagoed, ar ade, unnila abi wis san-nika guoed. Be-isdarmalad bela be-neggweburmar ebilis bemargi ambikumalogu, deyob guoed.
DEU 28:56 ”Be-omegan bur nueddaed, degine, bur-gadi-dule-wiledaked, bipisaale e-nag gwen ollibi imakbisurdamaladi, na e-sui-nue-sabedse-bakale, e-masmalase-bakale, degi, e-bunamalase-bakale wiledakosurbalid.
DEU 28:57 We-ome, e-gwenadganmargi-nalledbali, na emiskwaa-goe-nikusad, degine, e-simu-dubse-bakale, dukuar gunnoed. Ar be-isdarmalad bela-be-neggwebur-ebilis ambikumalosoggu, bemar-wiomaloed, neggweburgi masgunned-sate gunonikoed.
DEU 28:58 ”Bela we-Igar-gardagi-narmakar-bega-uklenaid-sogedba be dasulile, boni-dummad begi nonikoed. Degine, be-Bab-Dummad-Jehová-e-nug-dummarbagued be dobee nanasurbalile, boni-dummad begi nonikoed.
DEU 28:59 Bab-Jehová, begi, degi, be-wagangi boni-dummagan barmidagoed. We-bonigande, boni-dutusurmaladid, degi, bonigan-muis-bergusurmaladid. Uellemalad-gandikmaladid, degi, geg nugumaladid.
DEU 28:60 ”Bab-Jehová, Egipto-yalagi Egipto-dulemarga boni-galagwensuli onosad. A-bonigan, dobee bemar itosmalad. A-bonigangi bemarde onogosurmalad. A-bonigan, Bab-Jehová bemarga ukmogoed.
DEU 28:61 ”Amba debayobi, we-garda-igarmargi-narmakar-naisurmalad-e-bonigan, e-uellemalad Bab-Jehová bemargi barmidabaloed, bela bemar-oburgwemaladse.
DEU 28:62 Degine, bemar niisgwamaryob ichesuli-mergu gumalanad. Degi-inigwele, bemar be-Bab-Dummad-Jehová-bemarga-sunmakedba ibsassurmalad-ulale, wis napi ichee be bedapmaloed.
DEU 28:63 Ar igi Bab-Jehová bemarga-ibmar-nuegan-imaksadba, bemar-ichesuli-omergusadba, weligwar-itosa, debayobi, Bab-Jehová bemar-sabsur-odurdakalir, bemar-ogiloalir, ede yeer itobaloed. Yarse-bemar-dogesokalidgi-bemargadga-guegar, a-yalagi, Bab-Jehová, sabsur bemar-onomaloed.
DEU 28:64 ”Bab-Jehová yar-baiganse dikasuli bemar-oaisakioed. Agine, dulemar-baigan-e-bab-dummaganse bemar gordii gumaloed. Bemarde, degi, be-dadgande, we-bab-dummagan-akudakmaladid. We-bab-dummagande, suargi, degi, akwagi sobarmaladid.
DEU 28:65 Ar we-dulemar-abargi bemar obunnogosurmalad, degine, be-malimarse-bakale, obunnoged-sate gumaloed. Agi, Bab-Jehová dobe-itoge bemar-imakoed, be ibmarbina-nue-sogedba be-ibya mommoledoed, degine, bendakleged-satedba ulubgi bela-bela bukib-binsae be itogoed.
DEU 28:66 Mutikidbali, degine, ibginedbali bemar suli-suli-itodii gudoed, bela dobedbi be itodii gudoed. Be wissurmaloed, bemarde dula gudiguodibeye, surdibeye.
DEU 28:67 ”Ar na be neg-dakoedbali, bela-bela dobe be itodagoed. A-ular, wakdaradba be sogdagoed: ‘¡Bato mutikina yeerban!’ Sedogidbardi, be sogdagoed: ‘¡Bato wakdarana yeerban!’
DEU 28:68 Be-Bab-Dummad-Jehová bemarga sogsamar-inigwele, bemar Egipto-yarse gannar bar aibirosurmarye, Bab-Jehová gannar Egipto-yalase urgi bemar-barmidoed. Agi, bemar be-isdarmaladga manigi na be ukdemaloed. Bemar manigi na be ukdamalogu, dulemar bemar-bakbi guosurmalad.”
DEU 29:1 Israel-dulemar Horeb-yargi-bukwamargu, Moisés, Bab-Jehová-Israel-Dulemarbo-Igar-Mesisgusadi, bela Israel-dulemarga sogsad. Degine, Moab-yargi-bukwamargu, Moisés gannar Bab-Jehová-Israel-Dulemarbo-Igar-Mesisad amarga sogsabalid.
DEU 29:2 Degidbali, Moisés, bela Israel-dulemarse gochad, ega sogded: “Bemala belagwable na be-ibyagwar be daksamalad, Bab-Jehová bela Egipto-yargi igi-Faraón-imaksagusa, igi Faraónʼga-arbamalad-imaksagusbali, degine, igi bela e-yar-naid-imaksagusbali, be daksamalad.
DEU 29:3 We-boni-dummagan-gusadi, ibmar-dakledisurmaladi, ibmar-gegerdaklemaladi be-sunnagwad na be daksamalad.
DEU 29:4 Degite, emi-ibadse, be-ibyagwar neggusad-daksadi, be-uayagwar-itosadi, Bab-Jehová magar-itogega bemar-imaksasulid.”
DEU 29:5 Moisés sogdebalid: “Bab-Jehová bemarga soged: ‘Birga-dulabogwa (40) an nega-dulesulidganba be-sedii gusad, degite, be-mormar nungussulid, bemar-nag-uka nungussurbalid.
DEU 29:6 Deginbali, unnila bemar manáʼbi guchamalad, degi, diibi gobsamalad. Madudi guchasurgusmalad. Vinoʼdi gobsasurgusmalad, degi, sisadi gobsasurgusmarbalid. Weyob an imaksad, adi, be wisgumalaga, ani an bemar-Bab-Dummad-Jehová guye.’
DEU 29:7 ”We-yarse be nonimargua, Hesbón-e-rey-Sehón bemar-abin noar gusad, degine, Basán-e-rey-Og bemar-abin noar gusmogad, adi, bemargi bila-onomalagar. Degi-inigwele, anmar egi nakwis gusmalad.
DEU 29:8 Anmar ei e-yar susgusad. A-yar, anmar Rubén-waganga, Gad-waganga, degi, Manasés-wagan-negabaladga uksa gusad.
DEU 29:9 ”Degisoggu, wegi bemarbo-Bab-Jehová-Igar-Mesnaidba be nanamalo, adi, bela bega be-ibmar-saedi nasgumai guegar.
DEU 29:10 ”Emide, emi-ibagi, bela bemar be-Bab-Dummad-Jehová-asabin bukwamalad: Bemar-ambe-gakabogwad-e-dummagan (12), bemar-idudimalad, bemar-girmar-dummagan, bemar-dummaganga-gudidimalad, degine, bela bemar-Israel-machergan-bukwad,
DEU 29:11 bela be-mimmigan, be-omegan, Israel-dulesurmalad-bemar-abargi bega sapan-amimaladga-gudidimalad, bega dii-weemaladga-gudidimalad bukwamarmogad.
DEU 29:12 ”Ar bemar be-Bab-Dummad-Jehováʼbo-Igar-Mesmalaga, bela wegi bukwamalad. Ar Bab-Dummad-Jehová bemarga ise-sogar Igar Mesnaid. Ar soged: ‘Ede deyob imakedseye.’
DEU 29:13 Bab-Jehová, emi-ibagine, weyob bemarga ise-sogar-imaknaid: ‘Bemar, e-dule-gumarye. Edi, be-Bab-Dummad-guye. Ar igi be-dadgan-Abrahamʼga, Isaacʼga, degi, Jacobʼga sogsagusa, deyob imaknaid.’
DEU 29:14 Anmar-Bab-Dummad-Jehová unnila anmar-e-asabin-bukwadbobi ise-sogar Igar-Mesnaisulid.
DEU 29:15 Dulemar-amba-anmar-abargi-bukwasurmaladbo Igar-Mesnaibalid.”
DEU 29:16 Moisés sogdebalid: “Ar bemar nue-wismalad, igi anmar Egipto-yargi gudigusmala, degi, igi anmar yar-baiganba-daniki gusmala, wese nonikidse.
DEU 29:17 Ar be we-dulemar-abargi, we-ibmar-isganamar nue-daksamalad: E-nuchu-mimmigan-suargi-sobarmalad, e-bab-dummagan-akwagi-sobarmalad, e-bab-dummagan-manigi-sobarmalad, degi, e-bab-dummagan-ologi-sobarmalad, be daksamalad.
DEU 29:18 ”Be nue dakmalo, abakalegi bemar-abargi, machered-gwensakdibe, ome-gwensakdibe, gwenad-gwensakdibe, bemar-dadgan-ambe-gakabogwad-gwensakgi-danimaladdibe (12), we-dulemar-baigan-e-bab-dummagan-nug odummonamalaga, anmar-Bab-Dummad-Jehováʼgi aibatemalale. ”Degisoggu, nue-salakarmar. Abakale, bemar ina-nusuyob gudamalar, ina-gagbidyob gudamalar.
DEU 29:19 ”Ar bemar-wargwen, we-ibmar-an-bemarga-ise-sogar-sognaid-itosad-sorba, binsaddibe: ‘An akar-guosurye.’ Degisoggu, na sogdedibe: ‘Ar an-itolegedba an ibmar-imakoe-inigwele, bela anga ibmar-nueganbi naoye.’ Ar we-dule-nukine, dulemar-baigan bela oitolemaloed.
DEU 29:20 Bab-Jehová dule-isgusadga e-isgued eliosulid. Bab-Jehová-bela-bela-e-urwed, we-dulegi gwichiguoed. We-gardagi bela sabsur-odurdakleged-narmakar-naidi, bela we-dulegi gwichigunonikoed. Deginbali, Bab-Jehová, bela we-dule-e-waganse-bakale, obelogoed.
DEU 29:21 Ar Bab-Jehová, Israel-dadgan-ambe-gakabogwad-abargi (12), we-dule-obanoed, adi, bela we-Igarmar-gardagi-narmakar-maidba imaklegegar, bela sabsur-odurdakleged-narmakar-maidba guegar.
DEU 29:22 ”Be-mimmigan, degi, be-wagan-yoedse-danimaloedi, degine, Israel-dulesurmalad dikasuli-neggwebur-baidgi-danimaloedi, be-Bab-Jehová we-boni-dummagan, degi, uellemalad, we-yargi-barmidagoed dakarmalale, sogdemaloed:
DEU 29:23 ” ‘Bela we-yarmala, balubi, degi, azufreʼbi gued. A-ulale, napagi ibmar-geg-digleged, gaganmarse-bakale, bar ainisulid. Ar igi Bab-Jehová uludgu, sae itodgu, Sodoma-neggwebur, Gomorra-neggwebur, Adma-neggwebur, degi, Zeboim-neggwebur, bela osulosgusa, ar deyob be-yar gumogoed.’
DEU 29:24 ”Geb, bela dulemar-yar-baid-baidginmalad egisdamaloed: ‘¿Ar wede, ibiga Bab-Jehová we-yar deyob imaksa? ¿Ar wede, ibiga Bab-Jehová na sae-itogedba bela we-dulemar nue-sabsur-odurdaksa?’
DEU 29:25 ”Geb degine, dulemar abin-sogdemaloed: ‘Ar Bab-Jehová-e-dadgan-e-Bab-Dummad, Egipto-yargi wemar-onosgusanad, emide, ebo-Igar-Mesisadgi bangudmalad.
DEU 29:26 Bab-dummagan-baiganse gotemalad, degi, bab-dummagan-akudakmalad-asabin dulluu imakdemalad, na e-bab-dummadyob dakdemalad. A-ulale, deyob gusmalad.
DEU 29:27 Degisoggu, a-ular, Bab-Jehová we-yargi sabsur-uluded, we-gardagi sabsur-odurdakleged-narmakar-nanaid bela egi yolegega imaksad.
DEU 29:28 Ar igi anmar emi dake, Bab-Jehová, nue-uludedgi, nue-sabsur-odurdakdedgi, bela-we-dulemar e-yargi-bukwad onossunnad, dikasuli baid-yarse sessunnad.’
DEU 29:29 ”Ibmarmar-dukuar-mamaiddi anmar-Bab-Dummad-Jehováʼgadid. Ar ibmarmar-anmarga-oyolesaddi, degisadegu anmargadid, anmar-mimmigangadid, adi, bela we-Igarmar-narmakar-mamaidba anmar nanadii guegar.”
DEU 30:1 Moisés Israel-dulemarga sogdebalid: “Emisgindi be wismalad, be an-sognaidba be damalale, an-sognaidyob Bab-Jehová begi ise-nued binsanonikoed. Ar be an-sognaidba ibsasurmalardi, bela sabsur-odurdakleged begi nonikoed. Ar Bab-Dummad-Jehová sabsur-be-odurdakarmalale, yar-baiganse seledega bemar-imaksale, agi bukwa, an-ibmar-sognaidgi be bela binsadii gumaloed.
DEU 30:2 ”Ar bemar, degi, be-mimmiganmala, gannar Bab-Dummadse-dagye sogmalale, degine, bela-belad be-ulubgi eba be nanamaloye sogmalale, degine, Igarmar-Mamaid-an-bemarga-uksadba be nanamalale,
DEU 30:3 be-Bab-Dummad-Jehová bega be-gudiid ogwaoed, wile be-dakoed, bemar-dikasur-yar-baid-baidse-selesmaladgi gannar we-yarse-dagega bemar-imakoed.
DEU 30:4 ”Amba be-dulemar yar-bur-dikasulidse oaisakiles-inigwele, be-Bab-Dummad-Jehová agi-bukwa gannar be-yarse bemar-sedagoed. Deyob gannar bemar-onmaknonikoed.
DEU 30:5 Be-Bab-Dummad-Jehová be-dadganga-yar-uksadse gannar bemar-senonikile, a-yala, gannar bemargadga gunonikoed. Bab-Jehová ibmar-nue-nika bemar-imakoed, degine, be-dadganba bur bule bemar-omerguoed.
DEU 30:6 ”Be-Bab-Dummad-Jehová be-gwagegi ibmar-isgana-imaked-iegega be-imakoed. Geb agi, bemar, be-wagan, bela-bela-e-sabguega, degine, deyob nued-gudiguega bemar-imakoed.
DEU 30:7 ”Deginbali, be-Bab-Dummad-Jehová, be-isdarmaladgi we-ibmar-sabsur-odurdaklemalad-yolegega imakoed, ar wemar nue-sae-itogedgi be-baregindii gusmalad.
DEU 30:8 ”Degidgine, be gannar Bab-Jehováʼse nonimaloed, degi, e-ibmar-soged be itomaloed. Emi, an bemarga Igarmar-Mamaid-bela-uknaidba be nanadmaloed.
DEU 30:9 ”Geb degine, be-Bab-Dummad-Jehová bela bemar-ibmar-imakmaladgi nasguega bemar-imakoed: Mimmigan-bukidar-nikuega, ibdurgan-bukidar-nikuega, degi, be-nainugi ibmar-yaisur-nikuega, bemar-imakoed. Ar igi be-dadgangi wergusa, deyobi, Bab-Jehová, yeer-be-dakedbali, begi wergumogoed.
DEU 30:10 Deyob bega ibmar guegala, unnila, e-Igarmar-Mamaidba be daergebed, we-gardagi-Igarmar-narmakar-nanaidba be nanaergebed, be-Bab-Dummad-Jehová-bega-ibmar-sogedba be daergebed, bela-belad be-binsaedgi, be-ulubgi, be-Bab-Dummad-Jehováʼse be aibirergebed, adi, deyob bega ibmar gunonikoed.”
DEU 30:11 Moisés Israel-dulemarga sogdebalid: “Ar ade, we-Igarmar-Mamaid emi-an-bega-uknaid, wede dogdar-dutusursulid, degine, begi dikasuli maisurbalid.
DEU 30:12 ”We-Igarmar-Mamaid nibneggi maisulid, adi, mer be sogegar: ‘Anmar we-Igarmar-itogega, a-sogedba anmar daega, ¿doa we-Igarmar-anmarga-sedagega, anmar-ular, nibnegse nakoe?’
DEU 30:13 Degine, demar-baid-obakar maisurbalid, adi, mer be sogegar: ‘We-Igarmar anmarga-sedagega, ¿doa anmar-ular demar-obakoe? Adi, anmar we-Igarmar-itogega, a-sogedba anmar daegar.’
DEU 30:14 ¡Suli, degisuli! Ar Gayaburba begi itakaa gudiid. Ar be-gwabindukugi naid, degi, be-gwagegi maibalid, adi, nabir be a-sogedba-nanamalagar.
DEU 30:15 ”Degisoggu, nue-salakarmar. Emi-ibagi an bemarga soged, biti-igar be sumaloe, dula-gudigued-igardibe, burgwed-igardibe. Ibmar-nued-igardibe, ibmar-isgana-igardibe.
DEU 30:16 Ar emi-iba an bega gandikidgi soged: Be-Bab-Dummad-Jehová be nue-sabgumar, e-Igarmar-Mamaidba be nanamar, degine, e-Igarmar-Sogmaidba be damar, adi, bemar dula-gudii guega, dula-mergumai be gumarbaligar. Adi, be-Bab-Dummad-Jehová yala-bega-uknaidse-be-dogesokalidgi ise-nued begi binsamalagar.
DEU 30:17 ”Ar be-gwagegi be-Bab-Jehováʼgi be banguder, a-sogedba be nanasulir, Igar-maidgi be noder, degine, dulemar-baigan-e-bab-dummaganse-golega asabin dulluu be imakdele,
DEU 30:18 ani, an napira emi an bega soged, bemar burgwemaloye. Bemar, Jordán-diwar-obaksar, yar-Bab-Jehová-bemarga-uknaidse-dogesokalidgi, be suiti-gudii guosurmarye.
DEU 30:19 ”Emi-ibagi, nibneg, degi, napneg bemar-daknaid. Amar, bemar-barsogoed. An bemarga igar uked, igid-igar be suoe, dula-gudigued-igardibe, burgwed-igardibe, begi ibmar-nued-gued-igardibe, begi ukabsaleged-igardibe. Degisoggu, dula-gudii-gued-igar be sumardo, adi, be dula-gudii gumalagar, degi, be-wagan dula-gudii gumarmogagar.
DEU 30:20 Bemar, be-Bab-Dummad-Jehová be sabgumar, e-sunmaked be itomar. A-sogedba, bane-bane be nanadii gumar. Ar ade, Bab-Jehováʼgi bemar dula-gudii guoed. Ar Bab-Jehováʼgi be suiti-gudii gumaloed. Adi, yar-be-Bab-Dummad-Jehová be-dadgan-Abrahamʼga, Isaacʼga, degi, Jacobʼga ise-sogar-sogsagusad, ede bemarga ukoye, a-yargi be nanadii gumalagar.”
DEU 31:1 Moisés bela Israel-dulemarga gannar sunmakdebalid. Sogded:
DEU 31:2 “Emide, ande birga-dulanergwa-nikad (120). Geg bar bemar-iduedga an gued. Deginbali, Bab-Jehová anga sogsad: ‘Jordán-diwar gwen be obakosurye.’
DEU 31:3 Be-Bab-Dummad-Jehová, bemar-idunadapi guoed. Be-Bab-Dummad-Jehová bega we-dulemar-bemar-idu-bukwamalad osulogoed. A-yalamar bemargadga gunonikoed. Josué, Bab-Jehová sogsagusadyob bemar-iduedga guoed.
DEU 31:4 Bab-Jehová igi Amorreo-dulemar-e-reymar, Sehón, degi, Og imaksagusa, igi e-yala ei osulosa, amba deyobi, Bab-Jehová, we-dulemar-bemar-idu-bukwad bega osulobaloed.
DEU 31:5 Bab-Jehová we-dulemargi-nakwega bemar-imaknonikoed. An-bemarga-igar-uksadba be a-dulemar osulogoed.
DEU 31:6 Degisoggu, ¡be gangumar! ¡Mer galakumar! Ar ade, be-Bab-Dummad-Jehová bemar-idunadapsoggu, melle be we-dulemar dobgumalo, melle ese be gwayemalo. Bab-Jehová walagwen bemar-metosulid, bemargi banguosulid.”
DEU 31:7 Degidgine, Moisés Josuéʼse gochad. Bela Israel-dulemar-bukwad-abargi, Josuéʼga sogded: “Josué, nue salakar. ¡Gatik gandik be imako! ¡Mer galakuo! Bab-Jehová be-dadganga sogsa gusad: ‘We-yar an bega ukedseye.’ Josué, a-yarse be we-dulemarbo dogoed. We-yar, egadga-gumalaga we-dulemarga be ukoed.
DEU 31:8 Bab-Jehová-sunnad be-idunadapi guoed, beba gudigu guoed, walagwen be-metosulid, begi banguosulid. Degisoggu, melle be dobguo, melle be galakuo.”
DEU 31:9 Moisés we-Igar narmaksad. Geb Moisés, dule-irwa-Bab-Dummadse-gormalad-Leví-waganga, degi, bela-Israel-girmar-dummaganga igar-narmakaled uksad. Leví-wagan, Bab-Jehová-Israel-Dulemarbo-Igar-Mesisad-Ulu semaladid.
DEU 31:10 Degine, Moisés Israel-dulemarga weyob igar-uksad: “Birgagugled-ilibali (7), mani-galesulid-birgagi, Neg-Matargana-Sobaled-E-Ibagi,
DEU 31:11 bemar, bela be-Bab-Dummad-Jehová-asabin, bia be-Bab-Dummad-neg-suoedse-bemarga-sogsadse nadele, we-Igarmar-Mamaid bela Israel-dulemarga binnasuli be absogo.
DEU 31:12 Bela be dulemar danar-oambikuo: Machergan, omegan, mimmigan, degine, Israel-dulesurmalad-be-abargi-mamaid oambikubalo. Adi, we-dulemar we-Igarmar itomalaga, be-Bab-Dummad-Jehová dobee nanamalaga, degine, bela we-Igarmar-Mamaidba nanadii gumalagar.
DEU 31:13 Deginbali, we-Israel-dulesurmalad-mimmigan, amba we-Igarmar-Mamaid wissurmalad, ega be absomaloed, adi, a-Igarmar-Mamaid itomalaga, bemar-Bab-Dummad-Jehová-dobee-nanaed durdakmalagar. Ar bemar Jordán-diwar-obakar-neg-susokalidgi gudii gumaloedgi, deyob be imakmaloed.”
DEU 31:14 Geb degidgine, Bab-Jehová Moisésʼga sogded: “Be-burgwed-ibagan bato omosad. Josuéʼse be gole, an bega igarmar-ukega dulemar-anbo-ambikued-neggi be an-edarbemalo.” Degisoggu, Moisés, Josuéʼbogwa Bab-Dummad-dulemarbo-ambikued-negse modapmarsunnad.
DEU 31:15 Degidgine, Bab-Jehová e-dulamarbo-ambikued-neg-yawagakgi mogir-bubawaryob-gwichid-abargi Moisésʼse, degine, Josuéʼse magarononikid.
DEU 31:16 Geb degine, Bab-Jehová Moisésʼga sogded: “Emide be burgwesokalid. Be-burgwisad-sorbali, sikwas-nadedgine, Israel-dulemar yar-susokalidgi, dule-baigan-e-bab-dummaganba nade gumaloed. Israel-dulemar angi bangudmaloed. An-ebo-Igar-Mesisadgi annadmaloed.
DEU 31:17 A-ibagangine, we-dulemargi an uludoed. An egi bangudoed, bar we-dulemar an-dakosulid. Baisursunna dulemarse-galakuega gudmaloed, nue-naibid-dummad itononimaloed, suli-suli-itoge gumaloed. A-ibagangine, sogdemaloed: ‘Ar anmar-Bab-Dummad bar-anmarba-gudisulid-ular, bela we-ibmar-isgana anmargi nonikid.’ ”
DEU 31:18 Bab-Jehová Moisésʼga sogdebalid: “Ar a-ibagangine, Israel-dulemar ibmar-isgana-imaksamalad-ular, degi, dulemar-baigan-e-bab-dummaganba-nadmalar-ular, bar an-dakosurmalad.
DEU 31:19 ”Degisoggu, we-namaked be narmake. Israel-dulemar we-namakedgi be odurdako. Adi, namakarmalale, an-ega-igarmar-uksad-ebinsadii gumalagar.
DEU 31:20 ”Ar ade, we-dulemar-e-dadganga an ise-sogar sogsad, we-yala-napa-nued-gadi-ibmar-sanmaked an bega ukedseye. A-yalase an we-dulemar-odosale, immelegedse ibmar gunmaloed, wardungudmaloed. Geb degine, we-Israel-dulemar dule-baigan-e-bab-dummaganba nadmaloed, we-ibmarse gotemaloed, e-nug odummodmaloed. Agi, we-Israel-dulemar, an-emarbo-Igar-Mesnaidgi annadmaloed, gwen bai bar an-dakosurmalad.
DEU 31:21 ”We-Israel-dulemargi ibmar-isgana-noni-sogele, sulibinsa-itoleged-noni-sogele, we-namaked ega ibmar-sogega guoed. E-wagan we-namaked-namakdemalale, ebinsadmaloed, nue nabir anmarga sogsa-itoleye. Ar Israel-dulemarga, we-yar-ukoye-an-ise-sogar-sogsadgi doged-iduale, bato an wisid, igi we-Israel-dulemar ibmar-imakmaloe.”
DEU 31:22 A-ibagi, Moisés, we-namaked narmaksagusad, degine, a-namakedgi Israel-dulemar-odurdaksa gusad.
DEU 31:23 Geb degine, Bab-Jehová Nun-machi-Josuéʼga, weyob igar-ukded: “¡Nue salakar, gatik gandik-sao! ¡Mer galakuo! Be, Israel-dulemar an yar-ega-ukoye-sogsadse be odogoed. An-sunnad, an beba-gudii guoed.”
DEU 31:24 Moisés bela we-Igar gardagi-narmaksad nue obelosgu,
DEU 31:25 Levita-dulemar-Bab-Jehová-Dulemarbo-Igar-Mesisad-Ulu-semaladga weyob igar ukded:
DEU 31:26 “We-Igar-Mamaid-garda be sue. Bemar-Bab-Dummad-Jehová-Ulu-naba be mese. We-Igar-Mamaid-garda bemar-barsogega guoed.
DEU 31:27 Ar an bemar-wisid, bemar non-dutusurmaladid, bemar uayasurmaladid. Ar amba an emi bemar-abargi-gudiid-inigwele, degite, bemar Bab-Jehováʼgi yoledimalad. An-burgwisar-bule-sunna, bur bule bemar gudmaloed.
DEU 31:28 Be-girmar-dummagan, be-idumalad, bela an-asabin ambikuega ese be gormar. Ibmar-an-sogoedi, wemar an-itomaloed. An-ibmar-sogedba be nanasurmalale, nibnega, degi, napnega bemar-barsogega guoed.
DEU 31:29 Ar an wisid, bemar an-burgwisad-sorbali, bela-bela be isgudmaloed. An-bemarga-Igar-uknaidgi be bangudmaloed. Degine, ar bemar Bab-Jehová-asabin ibmar-isgana-imakdemaloed-ular, bela bega ibmar isgudmaloed. Ar ade, bela-bela be isgudoed-ular, bemar Bab-Jehová-nue-ourwemaloed.”
DEU 31:30 Geb degine, Moisés we-namakedgi bela Israel-dulemar-bukwad-abargi, namaked-gebe-onoded-akale, degi, bergunaidse egi sunmakded:
DEU 32:1 “Nibneg-naid, nue an-sunmaked itomalo. Napneg-naid, nue an-ibmar-soged itomalo.
DEU 32:2 An-ibmar-odurdakoedi, dii-wiedyobi babatoed. An-sunmakoedi, booyobi babatoed. Gagan-gebe-aramakalidgi-dii-wiedyobi, an-ibmar-odurdakoedi, guoed. Gagan-dutuganagi-boomiedyobi, an-sunmakoed guoed.
DEU 32:3 ”An Bab-Jehová-nug soge-soge imakdii guoed. ¡Anmar-Bab-Dummad-nug be odummomar!
DEU 32:4 Bab-Dummad akwasailayob anmar-odukued, bela ibmar-nueganbi imaked, ar ade, bela e-igarmala igar-innikimaladbiid. Bab-Dummad napiragwadid, egi ibmar-isgana naisulid. Bab-Dummad ibmar-napiragwadbi imaked, ibmar-innikigwadbi imaked.
DEU 32:5 ”Israel-dulemar, be dule-isganamalad, Bab-Dummadgi be nue-dummad-yolesmalad, bemar bar e-mimmiganga gusurmalad, ar ade, bemar na dukin nug-oichosmalad.
DEU 32:6 Bemar, dulemar-gegeganad, bemar, dule-binsaedsurmaladid. ¿Ar weyob bemar be-Bab-Jehová-abin-imakmarde? ¿Ar Bab-Jehováʼde be-Bab-Dummadsursi? ¿Ar bemar-obinnisadsursi? ¡Ar Bab-Dummad we-napnegse bemar-senonikidid! ¡A wegi bemar-urbisadid!
DEU 32:7 ”Neg-epennemalad be ebinsao, birgamar-dikasurgus-nasmalad be ebinsao. Neg-epenne-gusmalad be-babse be egiso, be-bab bega sogoed. Be-girmar-seleganse be egiso, amar bega igar-onakoed.
DEU 32:8 Bab-Dummad-Bur-Birigined, yar-baid-baidgi, degi, neggwebur-baid-baidgi, dulemar-urbenaigua, amarga sogedba e-yar-abingumalad nasiksad. Israel-dulemargindina, nued binsanai gusad.
DEU 32:9 Ar ade, Israel-dulemar, Bab-Jehováʼgadid, ar ade, Jacob, Bab-Jehováʼgadga gunonikid.
DEU 32:10 ”Bab-Dummad, Israel-dulemar nega-dulesulidgangi-gudii daknonikid, neg-isganaganba, gwen ibmarga-guedsulidgi-gudii daknonikid. Bab-Dummad amar-angaagwar imaknonikid, amar-akwenonikid. Bela-bela, Bab-Jehová na e-ibya-akweyobi, Israel-dulemar-akwedii gusad.
DEU 32:11 Ar igi sulubagi na e-mimmi-ogukuega e-uu-siidgi onodae, ei-argwate-dakele, na e-sakangi-gasa gannar e-uuse-sesdae, deyobi, Bab-Dummad, Israel-dulemar-semai gusmogad.
DEU 32:12 Bab-Jehová na ebi Israel-dulemar-semaigusad, bab-dummad-baid eba gwen nadapi gussulid.
DEU 32:13 ”Bab-Dummad yalaganba Israel-dulemar onakwemaigusad. Nainugi-ibmar-welesadgi e-dulamar-oguchagusad. Achanisgi, degine, olivo-gwallugi na e-dulemar-oguchad. We-ibmarmar akwa-dutusulidgi ega onosgusad.
DEU 32:14 Moli-nunis-gwamakaledgi oguchagusad, degine, sibad-e-nunisgi ogobsagusad. Sibad-wawaad-senigana-gwallu-ibegangi, degi, sibad-senigana-gwallu-ibegangi, oguchagusad. Basán-yalagi sibad-wawaad-machergangi, degine, sibad-machergangi oguchagusbalid. Orosgi-dakleged-trigo-bur-nuegangi oguchagusad, degine, uva-nis-ginnidgi ogobsagusad.
DEU 32:15 ”Deyobi, Jesurún nue wardunguded, agidbali, Jesurún-dulemar Bab-Dummadgi banguded. Nue-mas-gundiidbali, nue-wardungussunnad. Geb degine, e-Bab-Dummad-e-obinnisadgi banguded, E-bendakdiid ieded.
DEU 32:16 Baigan-bab-dummaganse-gotemaladgi, Bab-Dummad-nobguega imakdemalad. E-bab-dummagan-e-ibmar-wilubgan-sunnasurmaladgi, Bab-Jehová-ouludmalad.
DEU 32:17 Niamarga ibmar-ogumakar ukdemalad, amardi, bab-dummadgansurmalad. Bab-dummadgan-dakdisurmaladga ibmar-ukdemalad. Bab-dummagan-binidganga, emis-nomaladgala, be-babgan we-bab-dummagan-e-nug-odummossurmaladgala, bemar ibmar-ogumakar ukdemalad.
DEU 32:18 Israel-dulemar, be-Bab-Dummad-be-ogwalulesad, be iedmalad. Bemar, be-Bab-Dummad-bega-san-burba-dulad-uksad, be iedmalad.
DEU 32:19 ”Bab-Jehová, e-mimmigan e-isdar-dake daksagua, sabsur-uluded. Degidbali, e-mimmigan-obachasunnad.
DEU 32:20 Agine, Bab-Dummad sogdesunnad: ‘We-dulemargi an banguoed, gi-na-gudmarsunnodibe. Ar wemar an-sogedba dasurmalad, dule-isganamalad, we-masmala geg-innikii nanamaladid.
DEU 32:21 Israel-dulemar, Bab-Dummadsulid e-bab-dummadga-imaksamalad. Degidbali, Israel-dulemar, nobguega an-imaksad. Nuchu-mimmi na e-bab-dummadga-imakdemaladgi an-oulusmalad. An-dulasurmalad an sabguoed, bemar, a-dulemargi nobgumaloed. An dule-binsaed-satemaladgi nabir binsaoed, bemar, a-dulemargi uludoed.
DEU 32:22 Ar bela-belagwad sae-sae-ito an-imaksamalad, an-urwedi soo-ginnitibi-siiyobid. An-urwedi, nega-uluse warmaked. Bela napaneggi-ibmar-sanmakmalad ese gummakoed. Bela-bela yar-e-sailamar ese gummakoed.
DEU 32:23 ” ’Ani an Israel-dulemargi boni-dummagan obulogoed. Bela an-sigumar Israel-dulemargi an mioed.
DEU 32:24 An Israel-dulemargi ukud-dummad barmidagoed. Uelleged-dummad, degine, bonigan-dummad, we-dulemar-obelogega an imakoed. Degine, Israel-dulemargi achu-sapur-ursilimar an barmidagoed, naibe-nuegan napagi-unimakdimalad egi an onioed.
DEU 32:25 E-mimmigan magaba-nodogu, es-suidgi burgwemaloed. Negyabardi, bela-bela dobe-itomaloed. Sapingana, bunamala, goemar, degi, dadormar, bela-burgwemaloed.
DEU 32:26 An binsasanad, Israel-dulemar an dikasuli oaisakioye, dulemar mer bar egi-binsaega an imakoye.
DEU 32:27 Degi-inigwele, mer deyob bar imakoye an binsasad, adi, an-isdarmalad mer angi dodomalagar. An-isdarmalad angi-burgued an abessulid, abakalegi sokarmalale: Ar we-ibmar Bab-Jehová imaksasulid. Ar anmar bela imaksad. We-dulemargi anmar nakwisad.’
DEU 32:28 ”Ar Israel-dulemar aku neg-itomalad, ibmar-magar-itoged satemalad.
DEU 32:29 Ar Israel-dulemar, wis binsaed-nikamalana, wis mag-neg-itomalana, na-bergumaloed nue magar itononimaloenad.
DEU 32:30 Ar wede, ¿igi-nabir dule-wargwenad sorda-miligwenad baregichasunna (1,000)? Ar wede, ¿igi-nabir dule-warbogwad sorda-miliambegwad oduurmaksasunna (10,000)? Ar Bab-Jehová eba-gudiidba deyob nabir gued. Ar Bab-Jehová eba-gudisulina, e-isdarmaladgi-nakwega imaksasulinad. Deyob e-isdarmaladgi obinosulinad.
DEU 32:31 Ar anmar-isdarmalad nue-wismalad, e-bab-dummagan-e-gargangued anmar-Bab-Dummadyobsulid.
DEU 32:32 E-uva-nainumala, Sodoma-neggweburyobi isgana-nanaed. E-uva-nainumala, Gomorra-neggweburyobi isgana-nanaed. E-uvaʼmala, ina-nusuyob-nanaed, ber gagbire-nanaed.
DEU 32:33 E-vino, naibe-e-gichiyobid, naibe-e-boniganyobi dule-oburgwed.
DEU 32:34 ” ‘Ar bela an-sae-itoged an sabodiid. An-ibmar-nuedyob an sediid.
DEU 32:35 Ar buged-mai-imakleged angadid, anse berguoed. E-ibagan-mosale, anse ibitomaloed, ar ade, na dummad-wilegoed bato warmakdanikid. E-sabsur-odurdaklegoed-ibagan warmaksad.’
DEU 32:36 ”Ar Bab-Jehová e-dulemar-gargangued-sate-dakalir, bendaknonikoed. Bab-Jehová maimar-bergus-dakalir, degine, dule-maiga-gudisurmalad-bergus-dakalir, Bab-Jehová e-dulemar-wile dakdoed.
DEU 32:37 Agi, Bab-Dummad Israel-dulemarga sogdagoed: ‘¿Bia be-bab-dummagan bemar-egi-bengussurmaladde nadmarsunna?
DEU 32:38 Be-bab-dummagan, ega be ibmar-ogumakar-uksad-e-gwallu-guchamalad, ¿bia nadmarsunna? Be-bab-dummagan, ega be gobed-uksad-gobsamalad, ¿bia nadmarsunna?’ Ar emigindi, a-bab-dummagan be-bendakmalaga, gwisgumardo. Ar emigindi, a-bab-dummagan be-bendakega, dagmardo.
DEU 32:39 ”Ar emigindi, Israel-dulemar, be dakmardo. ‘Anbi unnila Bab-Dummad gued. Bab-Dummad-baid sated. Ani, an dulemar-odulogedid, ani, an dulemar-oburgwedid. Ani, an dulemar-naibisaedid, ani, an dulemar-nudakedid. Dule angi wakinnosur guoed.
DEU 32:40 An surgan-onaksun. An-dula-degisadegu-maid-nukad. Ise-sogar an sogsun:
DEU 32:41 An-es-suid bela-bela-dakarmakaled an bela-bela e-nugar-ebitele, dulemarga-igar-nabogedgi an es-gadele, an-isdarmalad-buged-mai an imakoed, dulemar-isdar-an-dakmalad an sabsur-odurdakoed.
DEU 32:42 An-sigumar ablisbi gunonikoed, an-es-suid san-immi-immi imakoed. Dule-naibigusmalad-e-ablis ariogoed, dule-galesmalad-e-ablis milegoed, dule-isdarmalad-e-dummagan-e-nono anse egwallegoed.’
DEU 32:43 ”Dulemar-yar-baid-baidginmalad, Bab-Dummad-dulamarba be wergumar. Bab-Dummad, ega-arbamalad-e-ablis-eosmalad buged-mai imakoed. Ar deyob gunonikoed. E-isdarmalad-buged-mai imakoed. Bab-Dummad e-dulamarga isgued osulogoed, degi, e-yala-e-isgued ega osulobaloed.”
DEU 32:44 Moisés dulemar-bukwadse nadegusad, Nun-machi-Josué, eba nadgusmogad. We-namaked bela dulemarga sogsagusad.
DEU 32:45 Moisés bela Israel-dulemarga we-namaked sogsagua,
DEU 32:46 a-dulemarga sogded: “Emi we-ibmarmar-an-bemarga-sognaidba bela be nanamalo, degine, be-mimmiganga bela we-Igar-an-bemarga-sognaidba nanamaloye, be sogmalo.
DEU 32:47 Ar we-igarmar-an-bega-sognaid binsa bemarga soglesulid. Ar we-Igar-Maidba be damalale, be nabir dula-gudii gumaloed. Ar we-Igarmar-Maidba be damalale, Jordán-diwar-obakar-yar-be-susokarmaladgi nabir be suiti-gudii gumaloed.”
DEU 32:48 Amba a-ibagine, Bab-Jehová Moisésʼga sunmakdebalid, ega sogded:
DEU 32:49 “Abarim-yalaganse be naknae, agi Jericó-neggwebur-asabin Moab-yargi-Nebo-yala-siid be dakoed. Agi, be Canaán-yar Israel-dulemarga-an-uksokalid be dakoed.
DEU 32:50 Ar be yar-nakoedgi be burgwedapoed, Igi be-ia-Aarón Hor-yargi burgwismoga, degi, e-serganba megnonigusa, deyob, be-serganba be megmogoed.
DEU 32:51 Deyob be guoed, ar bemar bebogwa Israel-dulemar-wagab be angi yolesmalad, nega-dulesulidgan-Zinʼye-nugadgi, Cadesʼgi, Meriba-dii-naba be angi yolesmalad. Agi Israel-dulemar-abargi be an-nug odummossurmalad, be aku an-daksamalad.
DEU 32:52 Degisoggu, Israel-dulemarga-yar-an-ukesokalid be unnila dakoed. A-yarsedi be dogosulid.”
DEU 33:1 Bab-Dummad-e-dule-Moisés, burgwed-iduale, Israel-dulemargi ise-nued-binsanaidba weyob sogded:
DEU 33:2 “Bab-Jehová Sinaí-yalagi danikid, Seir-akar anmarga gwallu-oganonikid, Parán-Yalagi anmarga gwallu-mee imaknonikid. E-dule-islidikmalad-miliambed-abalagi (10,000) nonikid, Igar-narmakaled sooyobi gwabunyemai e-argan-nuedsik sedanikid.
DEU 33:3 Bab-Dummad, e-dulamar nue-sabed, e-argan-yaurgi bela dulemar-egadga-gued ganikid. Degisoggu, e-dulamar e-sogedba nadapi gumalad. Bab-Dummad, e-dulemarga Igar ukmaiguad.
DEU 33:4 Anmar Jacob-wagan-guedba, we-Igar, ani Moisés, an bemarga uksagusad.
DEU 33:5 Neggwebur-e-dummagan, Israel-dulemar-sogambe-gakabogwadmala (12) danar-ambikunonimargu, Bab-Jehová, Jesurúnʼgi reyga maigusad.”
DEU 33:6 Moisés, Rubén-waganga sogded: “Rubén-wagan, be ichegumar-inigwele, be degisadegu dula-gudii gumaloed. Be-dulamar mergumai gumarsun.”
DEU 33:7 Moisés, Judá-wagangi ise-nued sunmakdegu, weyob sogded: “Bab-Jehováʼye, Judá-wagan-bese-binnasuli-goled be itoge, e-dulemarse gannar be sede. Be-garganguedgi be Judá-wagan-bendakdage.”
DEU 33:8 Moisés, Leví-wagangindi sogded: “Bab-Jehováʼye, Tumim, degine, Urim begadid, Leví-wagangi-nued-binsasadga be uksad. Israel-dulemardi, Masahʼye-neg-nugadgi, Meriba-diigi bebo ulusgu, be-wilubdaksad.
DEU 33:9 Leví-wagan, e-babgi, e-nangi, sogsagusad: ‘Bipisaar an-babgandeeye an binsassurye.’ Leví-wagan, e-gwenadgan-akudake gusad, degine, e-mimmiganbela akudake gusbalid. Ar Leví-wagan be-gayaburbabardi nanasmalad, Be-Igar-Mesisad-sogedba gudigusmalad.
DEU 33:10 Leví-wagan, be-Igarmar-sogedba Jacob-wagan-odurdakoed, Be-Igar-Maidgi Israel-dulemar-odurdakoed. Leví-wagan, be-asabin ina-wawadikmalad obupurmakmaloed, degine, ibmar-ogumakar-ukleged-ailagi bega ibmar ogumakar ukmaloed.
DEU 33:11 Bab-Jehováʼye, Leví-wagan-ibmar-imakmaladgi ise-nued be binsae, e-ibmar-imakmalad nue-weligwaledgi be abingae. E-isdarmalad-e-gangued be obeloge, sae-e-dakmalad, mer bar egi-gwisguega be imake.”
DEU 33:12 Moisés, Benjamín-wagangindi sogded: “Bab-Jehová we-dule-na-nue-sabed, bensulidgi e-walikaa gudii imakoed. Bab-Dummad we-dule-edarbedii guoed, angaagwale sedii imakoed.”
DEU 33:13 Moisés, José-wagangindi sogded: “E-napagi Bab-Jehová ise-nued binsasun. Nibneggi dii-bomied bur-nued uksun, degine, napa-urba bur dii-nued-nika imaksun.
DEU 33:14 Birgagi, bur-ibmar-nued-sanmake gusun, degine, niigi, bur-ibmar-nued-sanmake gusun.
DEU 33:15 Yala-sergangi bur-ibmar-nued-sanmake gusun, yala-matusurmalad-degisadeguadgi bur-ibmar-nued-sanmake gusun.
DEU 33:16 Napagi ibmar-sanmakmalad bur-nuegan nikusun, degi, sapi-bipi-zarzaʼye-nugadgi-gusadid egi nued binsasun. Bela we-ibmar-nuegan José-waganga uklesun. We-José-wagande, na e-gwenadgan-abargi bur sulealidid.
DEU 33:17 Moli-bebe-nikad-machered-gebegwaluleged-yeerdaklegedyobi, we-José-wagande yeerdaklemogad. José-wagande, moli-búfaloʼye-nugad-e-bebeyob nikamogad. A-bebegine, bela neggweburmar-baigan ese ibitomaloed, amba dulemar nega-dikasur-bukmaladse-bakale, ese ibitomogoed. Wegiid-dulemar, Efraín-wagangi miliambeba (10,000) nodamaloed, degine, Manasés-wagangi miliba (1,000) nodamarmogoed.”
DEU 33:18 Moisés, Zabulón-wagangindi, degi, Isacar-wagangindi sogded: “Zabulón-wagan, be demarba node-sogele, be wergusunno. Isacar-wagan, bedi be-neggi be besa-sogele, be wergumosunno.
DEU 33:19 Bemarde dulemar-baiganse goloed, an-yarse nakwedamarye, adi, agi Bab-Dummadga ibmar-innikigwad-ukleged ukmalagar. Demargi-ibmar-nuegan-nikmaladgi nue-wergumaloed, Ukubyaba ibmar-nuegan-sabolebukmaladgi nue-wergumarbaloed.”
DEU 33:20 Moisés, Gad-wagangindi, sogded: “Gad-wagan-yala-ganikid-odummosad-dulegi ise-nued binsalesad. Gad-wagan achumiguryobi garmakdiid, dulemar-ibe arganmar, degine, nono ichimaked.
DEU 33:21 Gad-wagan bur yar-nued susad, yar-dule-idumaladgad-gued susad. E-dulemar-idumai gusad. Israel-dulemarmala igar-sogmaidba imaksad, ar igi Bab-Jehová igar-uksa, bela a-sogedba ibmar-imaksad.”
DEU 33:22 Moisés, Dan-wagangindi, sogded: “Dan-wagan achumigur-sapingwagwadyobid, Basán-yalagan-akar ichomakdanikid.”
DEU 33:23 Moisés, Neftalí-wagangindi, weyob sogded: “Neftalí-waganga ise-nueganbi ibmar-uklesad, ibiyobi, Bab-Jehová ise-nued ega ibmar imaksa. Neftalíʼde dad-argwanedsik, degine, dad-argwaned-nuedsik yar ganikid.”
DEU 33:24 Moisés, Aser-wagangindi, sogded: “¡Jacob-wagan-baiganba, Aser-wagangi bur ise-nued binsalesad! Bela e-gwenadgan Aser-wagan sabgumarsun. Olivo-gwallugi e-nag enuksun.
DEU 33:25 Esgoro, degine, esgoro-gordikidgi be-yawagakmar sobale guoed. Be-burgwedse be-gangued be nika guoed.
DEU 33:26 “Jesurún-dulemar-e-Bab-Dummadyobid, Bab-Dummad-baid sulid. A-Bab-Dummad be-bendakegala nibneg-akar gukudanikid, mogir-imbaba bela e-ganguedba danikid.
DEU 33:27 Bab-Dummad-degisadeguad, be-odukuedid. E-gangued-degisadeguad, be-ganikidid. Bab-Dummad be-isdarmalad be-asabin obelogoed. Bab-Dummad sogdegusad: ‘¡Be-isdarmalad bela be obelomar!’
DEU 33:28 Israel-dulemar dobsuli bukwagumaloed. Israel-dulemar bogidikidgi ambikumaloed. Ibmar-gwag-gulleged, degine, uvaʼmar, yaisuli be-nainumargi sanmakoed. Nibnega, yaisuli bega dii-bomimai saoed.
DEU 33:29 ¡Israel-dulemar, begi ise-nued binsalesad! ¿Ar doa bemaryobi gue? Bab-Jehová bemar-bendaksayobi dule-baid-bendaksasulid. Sigu-abgamaladyob, be-irwa gwisgudiid. Bab-Jehová be-es-suid-be-onakwedga gued. Degisoggu, be-isdarmalad bela bese galakumaloed, bese wilemaloed. Bela-bela bese bingegudii gumaloed.”
DEU 34:1 Moisés Moab-nebagangi-gudii Nebo-yarmaidgi, Pisga-yar-birise nakwided. We-Pisga-yar Jericó-neggwebur-asabin siid. Bab-Jehová Moisésʼga Galaad-yalagan-akar, Dan-yalaganse bela yalagan oyosad.
DEU 34:2 Degine, bela Neftalí-yalagan, Efraín-yalagan, Manasés-yalagan, bela Judá-yalagan, Demar-Dummadye-nugadse, oyosbalid.
DEU 34:3 Deginbali, Neguev-yalagan, degine, neba, Jericó-neba-akar Zoar-neggweburse oyosbalid. A-Jericó-neggweburde sapimar-ogobgi-dakleged yaisur nikad.
DEU 34:4 Bab-Jehová, Moisésʼga sogded: “An Abrahamʼga, Isaacʼga, degi, Jacobʼga ise-sogar an sogsad: ‘We-yala an be-waganga ukedseye.’ Moisés, be-sunnad we-yar be-ibyagwar be daksad. Ar ese be dogoeddi be dogosulid.”
DEU 34:5 Agi, Bab-Jehová-e-mai-Moisés, Bab-Jehová-ega-sogsadba, Moab-yalagangi burgwisad.
DEU 34:6 Bab-Jehová, Moab-yalagangi, Bet-Peor-neg-nugad-asabin neba-naidgi, Moisés-digsad. Ar emigidse amba dule wissurmalad, wede, bia Moisés nue-digar mai.
DEU 34:7 Moisés birga-dulanergwa-nika (120) burgwisad. E-dala mommolessulid, degine, e-gangued gwen galakussurbalid.
DEU 34:8 Israel-dulemala, Moisés-burgwisadba, Moab-yalagangi iba-dulagwen-gakambe (30) bosmalad. Weyobi, Moisés-burgwisadba e-igar-maidba, bukib-itodii gusmalad.
DEU 34:9 Dakargu, Moisés Josué-e-nonogi e-argan mesisgussoggu, Nun-machi-Josué, nue binsaed-nikaa gusad. Degidbali, Bab-Jehová-Moisésʼga-igar-uksadba, Israel-dulemala, Josué-sogedba nanadii gusmalad.
DEU 34:10 A-sorbali, bipisaale Israel-dulemar-abargi, Bab-Dummad-gayaburba-barsoged, Moisésʼyobid Bab-Jehová-ebo asabin-asabin-sunmaked megissulid.
DEU 34:11 Dule ayobidi gwen bar daklessulid. Unnila Bab-Jehová Moisésʼbi Egipto-yarse barmis gusad, Faraón-asabin, degine, bela e-maimar-asabin, bela Egipto-yargi-bukmalad-asabin ibmar-dummagan-imakega, ibmar-dakledisurmalad-imakega barmis gusad.
DEU 34:12 Moisésʼyobi, dule-baid bipisaale Israel-dulemar-abargi gargangued-yaisur-nika gussulid, degine, Israel-dulemar-asabin ibmar-dummagan-imaked bar-daklessurbalid.
JOS 1:1 Bab-Jehová na e-mai-Moisés-burgwisad-sorbali, Moisés-e-bendaked-Nun-machi-Josuéʼga sogded:
JOS 1:2 “An-mai-Moisés burgwisad. Degisoggu, be, degi, bela wegi dulemar-bukwadi Jordán-diwar obakmalargebed, adi, an Israel-dulemarga-yar-uknaidse be namalagar.
JOS 1:3 Ar igi Moisésʼga an sogsa-gusa, deyob an imakoed. Ar bia be gwisgudapmaloe, a-negmar bela an bemarga ukmaloed.
JOS 1:4 Bemar-yala dad-nakwed-argan-nuedsiki nega-dulesulidgan-naid-akale onodagoed, geb dad-nakwed-argan-sapiledsik-Líbano-yar-siidse berguoed. Dad-nakwedsikdi, Éufratesʼye-diwar-nugad-akale onodamogoed, degi, bela Het-dulemar-yarse-bakale yaba dogoed, geb dad-argwanedsik-demar-Mediterráneoʼye-nugadse bergunamogoed.
JOS 1:5 Be-dula-gudiidgi, dule bipisaale begi nakosulid. Ar an igi-Moisésʼba gudigusa, deyobi, an beba gudii gumogoed. An be-metosulid, walagwen an be-obegosurbalid.”
JOS 1:6 Bab-Jehová sogdebalid: “Gandik be sao, melle be dobguo. Ar bee be, an be-dadganga yar-ukoye-sogsagusadi, Israel-dulemargadga-guega be mimioed.
JOS 1:7 An-mai-Moisés bela bega Igar-Maid-sogsadba be nanadii-guegala, unnila an bega soged, gandik be sao, melle be galakuo. Melle be bipisaar we-Igargi banguo. Ar be we-Igar-Maidba be nanadiile, bela be-ibmar-imakedi bega nueganbi guoed.
JOS 1:8 Gardagi Igar-narmakar-maidi be gannar-gannar absodii guo. Mutikidba, degi, ibginedba egi be binsadii guo. Igi-gardagi Igar-narmakar-mai, abali be ibsadii guo. Deyob be imakele, be nasgumai guoed, degi, bela be-ibmar-imakedi bega nueganbi gudoed.
JOS 1:9 Bato an bega sogsad: ¡Gandik be sao, melle be galakuo. Melle be dobguo, melle be nig-argwanbalo! Ar bia be naoedba, ani an be-Bab-Dummad-Jehová, beba gudii guoed.”
JOS 1:10 Geb degine, Josué e-dule-dummagangala igar-uksad:
JOS 1:11 “Bela Israel-dulemar-danar-danar-bukwadse be namar, amarga be weyob sogmalo: ‘Mas guakwaa be urbemalo, ar ade, ibapaase bemar Jordán-diwar obaknamaloed, adi, Bab-Dummad-Jehová bemargadga-guega yar-bemarga-uknaidse be ubonamalagar.’ ”
JOS 1:12 Rubén-waganga, Gad-waganga, degi, Manasés-wagan-negabaladga, Josué weyob ega igar-uksad:
JOS 1:13 —Bab-Jehová-e-mai-Moisés bemarga weyob sogsagusadi, be ebinsamalo: ‘Bab-Dummad-Jehová bemar-obunnogega we-yala bemarga uksaye.’
JOS 1:14 Degisoggu, be-omegan, be-mimmigan, degi, be-ibmar-durgan, bemarga Moisés Jordán-diwar-dad-nakwedsik-yar-uksa-gusadgi be obemalo. Bemardi bila-onomalad-gumaladi, bemar-inse be-gwenadgan-idu gingi-gani-gani obakmaloed.
JOS 1:15 Bab-Jehová igi-bemarga obunnoged uksa, deyobi, Bab-Jehová be-gwenadganga obunnoged-ukedse, bemar be-gwenadgan bendakmaloed. Bab-Jehová ega yar-ukoye-sogsad-suedse, bemar be-gwenadgan bendakmaloed. Geb bela weyob ibmar-gusad-sorbali, sunna bemar napa-bega-uklesadse be gannar namalad, adi, degisadegu na be begadga imakmalagar. We-napamar Bab-Jehová-e-mai-Moisés bemarga Jordán-diwar-dad-nakwedsik uksagusadid.
JOS 1:16 Geb Josué-abin weyob sogsamalad: —Bela be anmarga igar-uksadba anmar ibsaoed. Bia be anmar-barmidoe, abali anmar naoed.
JOS 1:17 Ar igi-anmar Moisés-sogedba ibsasa, deyobi, anmar bela be-sogedba ibsamogoed. Unnila anmar egised, igi-Bab-Jehová Moisés-bendakdigusa, deyobi, bitigi Bab-Jehová be-bendakdii gusmogana gadinye.
JOS 1:18 Dule be-ibmar-sogsadba uayasulidaele, degi, be-igar-uksadba ibsasulile, oburgwilegoed. Josué, bedina, ¡gandik be sao! ¡Melle be galakuo!
JOS 2:1 Nun-e-machi-Josué, Sitim-akale dule-warbo arbakee barmisad. Amarga sogsad: “Yar-naid, degi, Jericó-neggwebur be arganamar.” A-dule-ebogwad Jericó-neggweburse mosmargua, ome-gambanuchu-saed-Rahabʼye-nugad-negse dogdapmalad.
JOS 2:2 Jericó-e-rey wisgusad, emi-mutiki Israel-dulemar arbak neg-argaegala neggweburse dogsamarye.
JOS 2:3 Degisoggu, Jericó-e-rey Rahabʼga weyob gayaburba barmisad: “Machergan be-negse-dogsamaladi be onoye, ar we-dulemar bela anmar-yar-naid-argaegala nonimarye.”
JOS 2:4 Degi-inigwele, omedi, we-dule-warbogwad e-negyaba odukusad. Geb rey-dulemar-barmiarmaladga sogded: “Ar napiragwa, machergan an-negse arbimala, degi-inigwele, an wissulid, wemar doamala, deginbali, bia danimarbali.
JOS 2:5 Neggwebur-yawagak-edilesokargu, bato neg-nue-sichiledgu nodmalad. An wissurbalid ar bia nadmala. Eba be sorba gwae-gwae namala, adi, be nabir bargamalaga.”
JOS 2:6 Ar omedi, e-neg-aila-niba dule-neg-argadimalad onakwisad. Agi, dubmar-linoʼye-nugad-bukwad-imbaba amar odukusad.
JOS 2:7 Jericó-e-rey-e-sordamar Israel-dulemar-warbogwad-sorba Jordán-diwar-obaklemaid-igarba nadmalad. Sordamar-bareginnedmalad neggweburgi nosmargua, e-sorbali, Jericó-e-yawagak edilesad.
JOS 2:8 Israel-dulemar-warbogwad-gabed-iduale, Rahab, ailase nakwisad.
JOS 2:9 Geb Rahab amarga sogsad: —Ar an wisid, Bab-Jehová we-yala bemarga uksad. A-ulale, anmar nue-dobe itobukwad. Bela dulemar-we-yalaginmalad nue-be-dobgubukmalad.
JOS 2:10 Ar anmar itosad, bemar Egipto-yargi nosmargua, igi Bab-Jehová bemar-asabin Demar-Ginnidye-nugad odingusgusa, adi, nabir bemar demargi obakmalagar. Deginbali, anmar itosbalid, Jordán-diwar-dad-nakwedsik, igi bemar Amorreo-reymar-warbogwad, Sehón, degi, Ogʼye-nugad, ogilos gusmarbali.
JOS 2:11 A-ulale, anmar bela niga-argwacha bukmalad, degi, dule-wargwensaale binsasulid bemar-abin gwisgumalodeeye. Ar an wisid, bemar-Bab-Dummad-Jehová, nibneg-e-Bab-Dummadid, degi, napneg-e-Bab-Dummadbalid.
JOS 2:12 Degisoggu, emigi an bemarse egissundo, Bab-Dummad-Jehová-nuggi be anga ise-sogar sogmala, igi an nue-wile bemar-daksa, deyobi, an-neguyaginmalad be nue-wile daksamarmogana gadin. Ar bemar anga wilub-oyobi an abedo, we, nue deyob guoye.
JOS 2:13 Ar bemar an-babgan, an-gwenadgan, degi, bela e-walik-gudimalad oburgosurmarye. Ise-sogar be anga sogmala, burgwedgi bemar anmar-bendakmaloye.
JOS 2:14 Israel-dule-warbogwad ome-abin sogdemalad: —¡Anmar bega ise-sogar-soged, bemar akar-guosurye! Ar dule-baiganga be anmar-barsogsulile, anmar wile-be-dakoed. Bab-Jehová we-yala anmarga uksale, anmar nued-bemar-akwemaloed, degi, anmar bega ise-sogar-sognaidba ibmar imakoed.
JOS 2:15 Geb degine, Rahab we-dulemar-warbogwad gasdubgi yawagak-bipigwadba odesad, ar ade, ome-neg neggwebur-galu-matusulid-maid-birgi siid.
JOS 2:16 Geb ome machergan-warbogwadga sogded: —Bemar yar-imbaba wakinmala, adi, dulemar-be-amidimalad mer bemar-amiega. Dulemar-be-amididimalad gannar negse nonikidse, bemar agi ibapaa dukumaloed. A-sorbali, na be gannar namaloed.
JOS 2:17 Geb Israel-dulemar-warbogwad Rahabʼga sogdemalad: —Ar anmar we-yarse ubononikile,
JOS 2:18 ar bia yawagak-bipigwadba be anmar-odenai, agi gasdub-ginnid naisuli anmar dakele, ar anmar bega ise-sogar-ibmar-sogsadgi ollorguoed. Deginbali, be-babgan, be-susmar, degi, bela be-gwenadgan, be-neggi bela bukumaloed.
JOS 2:19 Ar doa-dule a-ibagi be-negyagi nodele, ar burgwisdibe, na dukin imaksado, wedi anmarginsurdo. Ar dule-wargwen be-neg-yagi-bukmalad-oburgwenonikirdi, wedi anmargi ataklegodo.
JOS 2:20 Ar dule-baidga be anmar-barsogsale, ise-sogar-bega-sogega be anmar-imaksadgi anmar ollor guoed.
JOS 2:21 Rahab abin-sogded: —Nabirdo. Bemar-ibmar-sogsadyob guodo. A-sorbali, ome, machergan-warbogwad-naega imaksad. Machergan-warbogwad nadmargua, ome yawagak-bipigwadgi dub-ginnid edicha nasiksad.
JOS 2:22 Machergan-warbogwad yar-siidse nadmalad. Geb we-dule-warbogwadi dulemar-e-baregindimalad gannar na negse nonimaladse, yar-niba ibapaa dukudii gusmalad. Dule-baregindimalad dule-warbogwadbina bela igarba miamakdii gusmalanad, degi-inigwele, amissurgusmalad.
JOS 2:23 Geb degine, we-dule-warbogwad yar-niba-gudiidgi gannar aidearmarsunnad. Jordán-diwar obaksamalad, geb bia Nun-machi-Josué-gudiidse nonimalad. Agine, Josuéʼga bela sogsamalad, emarde igi gusmala.
JOS 2:24 Weyob Josuéʼga sogsamarbalid: “Bab-Jehová bela we-yala anmarga uksad. Bela e-dulemar dobedba wawanmakbukwad.”
JOS 3:1 Wakudaryalaba, Josué, degi, bela Israel-dulemar Sitimʼgi-bukwa Jordán-diwarse nade gusmalad. Ar Jordán-diwar-obaked-iduar, diwar-gakagi obunnodapmalad.
JOS 3:2 Geb ibapaagine, dummagan bela Israel-dulemar-danar-danar-bukwadgi, neg-dakapmalad.
JOS 3:3 Dummagan neg-dakdidigua, weyob Israel-dulemarga igar-uksad: “Ar bemar dakalile, Levita-dulemar-dule-irwa-Bab-Dummadse-gormalad be-Bab-Dummad-Jehová-Dadganbo-Igar-Mesisad-Ulu-semamai, bia na be bukwamaladgine be nodamaloed, geb, a-Ulu-sorba be namaloed.
JOS 3:4 Deyobi bemar wisguoed, bia be namaloe. Ar ade, iduar bemar we-igarba nanadisurmalad. Degi-inigwele, bemar Ulu-selemaidgi dali-dulataled-ilatale (500) bangue-wilub, egi nadapi-gumaloed. Uluse melle warmakmalo.”
JOS 3:5 Josué Israel-dulemarga sogded: “Bela bemar ise-bagagwar san-imakmalo, ar ade oibosale, Bab-Jehová ibmar-gegerdakleged bemar-abargi imakoed.”
JOS 3:6 Josué, dule-irwa-Bab-Dummadse-gormaladga sogdemogad: “Bab-Jehová-Dadganbo-Igar-Mesisad-Ulu na be gukingi mesmar, geb dulemar-idumai be namarsun.” Dule-irwa-Bab-Dummadse-gormalad Josuéʼba ibsasmalad, degi Israel-dulemar-idu nadapi gusmalad.
JOS 3:7 Geb sorbali, Bab-Jehová Josuéʼga sogsad: “Emi-iba-onodedgi Israel-dulemar-asabin an be-nug odummodoed. Deyobi, Israel-dulemar magar dakmaloed, igi an Moisésʼba gudigusa, deyobi an beba gudimogoed.
JOS 3:8 Josué, dule-irwa-anse-gormalad-An-Ulu-semamaidga weyob be igar-uke: ‘Jordán-diwar-gakase-warmaksamalale, Jordán-diwargi gwisgumaloye.’ ”
JOS 3:9 Geb degine, Josué Israel-dulemarga sogded: “Anse be dagmar, be-Bab-Dummad-Jehová bemarga-ibmar-soged be itodamar.”
JOS 3:10 Josué sogdebalid: “Emisgwa bemar wisguoed, Bab-Dummad-Dula-Maid bemar-abargi gudiid. We-Bab-Dummadi bemar-idu we-yargi we-dule-bukwamalad onioed: Canaán-dulemar, Het-dulemar, Heveo-dulemar, Ferezeo-dulemar, Gergeseo-dulemar, Amorreo-dulemar, degi, Jebuseo-dulemar onioed.
JOS 3:11 ”Bela-we-napneg-naid-e-ibed-e-Ulu, bemar-idu Jordán-diwar-obakoed.
JOS 3:12 Degisoggu, emigindi, dadgan-warambe-gakabogwad (12) war-wargwengi, bemar machergan warambe-gakabo (12) amimar.
JOS 3:13 Dule-irwa-Bab-Dummadse-gormalad Bab-Jehová-bela-we-napneg-naid-e-ibed-e-Ulu-semamaid, Jordán-diwargi annadapiyala diwar negabar argadoed, ar ade, nakwar-dii-aryodanikid galegoed, gasdibiryob megnonikoed.”
JOS 3:14 Dulemar Jordán-diwar-obakega na e-danar-danar-ambikusadgi ainidmargua, dule-irwa-Bab-Dummadse-gormalad-Bab-Jehová-Ulu-semamaidi dulemar-idumai gusmalad.
JOS 3:15 Jordán-diwar, ibmar-gwag-weleged-ibagangine ena-maigudaed. Degi-inigwele, dule-irwa-Bab-Dummadse-gormalad-Bab-Jehová-Ulu-semamaid-e-nagmar Jordán-diwargi warmakdapiyala,
JOS 3:16 nakwar-diimar-aryodanikidi galesad, geb gasdibiryob megisad. We-dii-gasdibiryob-megisad dikasuli megisad, Adam-neggwebur-walik megisad. Adam-neggweburde Saretán-neggwebur-gandiksiid-dikarba siid. Deginbali, diimar Demar-Arabáʼye-nugadse-aryomaidi bar-aryomai gussulid. We-demar, Demar-Gagbidye nugbalid. Deyob-gusadbali, bela Israel-dulemar Jordán-diwar obaksamalad. Jericó-neggwebur-asabin bukudapmalad.
JOS 3:17 Dule-irwa-Bab-Dummadse-gormalad-Bab-Dummad-Ulu-semamaiddi, bela Israel-dulemar Jordán-diwar-dinna-megisadba-obaksamaladse, Jordán-diwar-negabargi neg-dinnagwadgi-gwichi gusmalad.
JOS 4:1 Israel-dulemar bela Jordán-diwar-obaksamargua, Bab-Jehová Josuéʼga sogded:
JOS 4:2 “Israel-dadgan-warambe-gakabogwad-war-wargwengi, be machergan warambe-gakabo (12) sue.
JOS 4:3 Amarga weyob be igar-uko: ‘Bia dule-irwa-Babse-gormalad Jordán-diwar-negabargi, akwa-birgi annagwichi-gusmala, a-akwamar bemar gwaambe-gakabo (12) sumalo. A-akwamar bemar sedoed, geb bia bemar mutik gabdapmaloe, agi bemar we-akwamar urbemaloed.’ ”
JOS 4:4 Geb degine, Josué Israel-dadgan-warambe-gakabogwad-war-wargwengi, dulemar-warambe-gakabogwad-sulesmaladse gochad.
JOS 4:5 Geb Josué amarga sogded: “Bemar, Jordán-diwar-negabarse bia dule-irwa-Babse-gormalad be-Bab-Jehová-Ulu-ganigwichimaladse, be namar. Geb agi, bemar na wala-walagwena akwa-gwa-gwagwen diwargi sumaloed, geb be-gukingi-sii be sedmaloed. Israel-dulemar-e-dadgan-mergued-iliba be sedmaloed, a-akwamar bela gwaambe-gakabo (12) guoed.
JOS 4:6 We-akwamar bemar-wilubga guoed. Yoedsega be-mimmigan bemarse egichiarmalale: ‘We-akwamar bukwadi, ¿ibi-obare?’
JOS 4:7 Bemar abin-sogmaloed: ‘Bab-Jehová-Dadganbo-Igar-Mesisad-Ulu Jordán-diwargi-obakdegusgu, Jordán-diwar e-asabin negabar maridgusad, nakwar-dii-danikidi galesgusad. Anmar-Israel-dulemargala, we-akwamala Jordán-diwar-dingusad-ebinsadiguega gued.’ ”
JOS 4:8 Ar igi Bab-Jehová Josuéʼga ibmar sogsa-gusa, deyobi Josuéʼba Israel-dulemar ibmar imaksamalad. Na e-dadgan-warambe-gakabo-merguedba (12), Jordán-diwar-negabargi akwamar susmalad, geb na danar-danar-bukmaladse sesmalad, agi akwamar-urbedapmalad.
JOS 4:9 Deginbali, Josué Jordán-diwar-negabargi, bia dule-irwa-Babse-gormalad Bab-Jehová-Ulu-gani-gwichigusmala, agi akwamar-gwaambe-gakabo (12) urbisad. We-akwamar we-garda-narmaklenaidse, Israel-dulemar-bukwa-gusadgine amba bukwad.
JOS 4:10 Dule-irwa-Bab-Dummadse-gormalad Bab-Jehová-Ulu-semamaidi, Bab-Jehová Josuéʼga ibmar-sogsadba, Israel-dulemar bela ibmar-imaksamaladse Jordán-diwar-negabargi gwisgusmalad. Ar igi Moisés Josuéʼga sogsagusa, deyobi bela ibmar imaklesad. Israel-dulemar gwae-gwae Jordán-diwar-obaknanai gusmalad.
JOS 4:11 Ar bela Israel-dulemar obaksamargua, dule-irwa-Bab-Dummadse-gormalad-Bab-Jehová-Ulu-semamaidi, Israel-dulemar-wagab obaksamarmogad. Dule-irwa-Bab-Dummadse-gormalad dulemar-idu nadapi gusmalad.
JOS 4:12 Deginbali, Moisés ega igar-uksadba Rubén-wagan, Gad-wagan, degi, Manasés-wagan-negabalad, Israel-dulemar-idu gingimar-gani-gani nadapi gusmalad.
JOS 4:13 Bila-onomalad mili-dulabo (40,000) wilub, gingi-gani-gani Bab-Jehová-asabin nadapi gusmalad. Geb amar guagwar bila-onogega Jericó-nebaganse nade gusmalad.
JOS 4:14 A-ibagine, Bab-Jehová Israel-dulemar-asabin Josué-e-nug odummosad. Israel-dulemar, ar igi-Moisés-dulagudigu, Moisésʼgi binsaed-nikaa gusmala, deyobi Josué-dula-gudiidgine, egi binsaed-nikaa gunonimarmogad.
JOS 4:15 A-sorbali, Bab-Jehová Josuéʼga sogded:
JOS 4:16 “Dule-irwa-anse-gormalad-An-Ulu-semamaidga be igar-uke, bemar Jordán-diwargi nodamarye.”
JOS 4:17 Josué dule-irwa-Bab-Dummadse-gormaladga igar-uksad: “Jordán-diwargi be nodamala.”
JOS 4:18 Dule-irwa-Bab-Dummadse-gormalad-Bab-Jehová-Ulu-semamaid Josuéʼba ibsasmalad. Dule-irwa-Bab-Dummadse-gormalad Jordán-diwar-negabargi-gwichidgi napase nakwidapiyala diwar gannar suurmakded, gusgu engudaeyobi enguded.
JOS 4:19 Deyobi, Israel-dulemala gebe-nii-onoded-ibambegi Jordán-diwar-obaksamalad, geb Jericó-neggwebur-dad-nakwedsik Gilgalʼye-neg-nugadgi danar-danar ambikudapmalad.
JOS 4:20 Geb Gilgalʼgi Josué Jordán-diwargi akwamar-gwaambe-gakabo (12) sulesgusad urbisad.
JOS 4:21 Geb Josué Israel-dulemarga sogded: “Yoedse be-wagan bemarse egichiarmalar: ‘¿Wegi-akwamar-bukwad, ibi obare?’
JOS 4:22 Bemar ega sogoed: ‘Ar we oyoged, Israel-dulemala Jordán-diwar-obaksamargu, diwar ega dinnaa nadegusye.’
JOS 4:23 Bab-Dummad-Jehová, bemar-Bab-Dummad, igi Demar-Ginnidye-nugad, bela anmar-obaksadse dinnaa mesisgusa, deyobi Jordán-diwar dinnaa imaksamogad.
JOS 4:24 Weyobi ibmar-gusad, adi, bela dule-yar-baid-baidgi-bukmalad wisgumalaga, Bab-Jehová bela-bela gangued-nikadid. Adi, bemar degisadegu Bab-Jehová-dobee nanadii gumalagar.”
JOS 5:1 Bela Amorreo-reymar-Jordán-diwar-dad-argwanedsik-mamaid, degi, Canaán-yargi-reymar-demar-Mediterráneo-gakaba-mamaid itoarmargu, igi Bab-Jehová Israel-dulemar-bela-obakega, Jordán-diwar-odingusa, dobe-itonadmalad. Israel-dulemarbo bar bila-onobisuli guarmalad.
JOS 5:2 Geb agine, Bab-Jehová Josuéʼga sogded: “Akwa-swiswidikmalad esga be imake. Be Israel-machergan-e-abgan-uka-duku-yoo-sikmalad sikega be imako.”
JOS 5:3 Degisoggu, Josué esmar sobsasunnad, geb Aralot-yar-mullugi Israel-machergan-e-abgan-uka-duku siksad.
JOS 5:4 Ar Josué deyob imaksad, ade, bela Israel-machergan-nabir-bila-onomalad-e-abgan-uka-duku-sikarmalad Egipto-yargi-noargusmaladi, nega-dulesulidganba burgwismalad.
JOS 5:5 Bela machergan-Egipto-yargi-noargusmaladi e-abgan-uka-duku-sikar noargusmalad. Ar Egipto-yargi-nosmalad-sorba, Israel-dulemar nega-dulesulidganba-gaamakdanigusgu, agi masmala-gwalulesmaladdi, e-abgan-uka-duku sikarsurmalad.
JOS 5:6 Bab-Jehová Israel-dulemar-e-dadganga ise-sogar sogsagusad, an bega napa-mas-obinebaka-nikad, degi, gobed-obinebaka-nikad ukoye. Ar Israel-dulemar-Egipto-yargi-noargusmaladdi, Bab-Jehová-sogedba ibsassurmalad. A-ulale, Bab-Jehová ise-sogar sogsasunnad, we-dulemar a-yala dakosurmarye. Agala, Israel-dulemar yola-birga-dulabo (40), machergan-nabir-bila-onomalad-burgwismaladse, nega-dulesulidganba gaamakdii gusmalad.
JOS 5:7 We-machergan-e-masmala-ibe, Josué abgan-uka-duku-siked imaksad. Bab-Dummad we-masmala e-babgan-anar ogwalulesad. Ar igarba-danimargu, we-masmala-ibe, e-abgan-uka-duku siklessulid.
JOS 5:8 Bela we-masmala na e-abgan-uka-duku-siksamargua, na e-neg-danar-bukwamaladgi nuguedse obunnosmalad.
JOS 5:9 A-sorbali, Bab-Jehová Josuéʼga sogded: “Emi-ibagine, an bemarga Egipto-dulemargi be binge-itodamaladi an osulosad.” A-ulale, we-garda-narmaklenaidse, a-nega Gilgalʼye nugad.
JOS 5:10 Israel-dulemar Gilgalʼgi danar-danar-ambikusmalad. Gebe-nii-onoded e-ibambe-gakabakegi, sedogi, Jericó-nebagangi Oburgwilegoenad-Iba onosmalad.
JOS 5:11 Oburgwilegoenad-Iba-onosad-banedgine, Israel-dulemar a-napagi-ibmar-sanmakgwismalad gutemalad, madu-e-inasulid, degi, orosgi-dakleged-soogi-yoaled guchamarbalid.
JOS 5:12 A-iba-akale, manáʼye-bimalad bar batissulid. Israel-dulemar bar maná guchasurmalad. A-birgagine, unnila Canaán-yargi-ibmar-sanmakgwismalad guchamalad.
JOS 5:13 Ibagwengine, Josué Jericó-neggwebur-walik-gudigua, niba atakdegu, dule-wargwen e-asabin es-suid-gani-gwichi dakalid. Josué a-dulese naded, ese egisdapid: —¿Be anmar-sorda, be anmar-sordasuli?
JOS 5:14 Machered, Josué-abin sogded: —¡Suli, an dulemar-sordasuli! Andi an Bab-Jehová-e-sordamar-e-Dummadid. Geb Josué dule-asabin napase dulluu e-wagar imaksad, a-dulese egichided: —An-Dummad, be-maiga, ¿ibi igar be ukdanisunna?
JOS 5:15 Bab-Jehová-e-sordamar-e-Dummad, Josué-abin sogded: —Ar napa-be-annagwichidi, nega-islidikidsoggu, be-nag-uka-yoid be unge. Geb Josué eba ibsassunnad.
JOS 6:1 Jericóʼginmalad, Israel-dulemar-dobe-itomalad-ulale, Jericó-neggwebur-e-yawagakmar nue-atiar bukwad. Dule-wargwensaale a-neggweburse geg doged, geg nobalid.
JOS 6:2 Ar Bab-Jehováʼdi Josuéʼga sogded: “Jericó-neggwebur, e-rey, degi, e-sordamar-bila-onomalad an bega urmaksad egi be nakwegar.
JOS 6:3 Be, degi, be-sordamar-bila-onomalad irgwen Jericó-neggwebur-ebirmaloed. Deyobi bemar bane-bane ibanergwa (6) imakmaloed.
JOS 6:4 Dule-irwa-anse-gormalad walagugle (7) gar-trompeta-sibad-wawaad-machered-e-bebegi-sobaledi semamai guoed. Wemar an-be-dadganbo-Igar-Mesisad-Ulu-semamaid-idu nadapmaloed. Ibagugledgine (7), bemar ilagugle (7) Jericó-neggwebur-ebirmaloed. Agine, dule-irwa-anse-gormalad gar-trompeta-ogornadapi gumaloed.
JOS 6:5 ”Bela bemar gar-trompeta-sibad-wawaad-machered-e-bebegi-sobaled suitii gole itoarmalale, bemar binnasuli ise-gormakar gotemaloed. Geb degine, Jericó-neggwebur-e-galu-matusulid babatidoed, geb bemar war-wargwengi dule-gwen-be-abin-gannarba-gwisguosuli neggweburse be ubomaloed.”
JOS 6:6 Nun-machi-Josué, dule-irwa-Bab-Dummadse-gormaladse gochad, amarga igar-uksad: “Bab-Jehová-Dadganbo-Igar-Mesisad-Ulu bemar sedmar. Bemar walagugle (7) gar-trompeta-sibad-wawaad-machered-e-bebegi-sobaled sedmalo, bemar ulu-idu nadapi gumalo.”
JOS 6:7 Josué Israel-dulemargardi sogded: “¡Bemar namar! ¡Jericó-neggwebur-ebirnamar! Ar sordamar-bila-onomaladdi Bab-Jehová-Igar-Mesisad-Ulu-idu nadapi gumalo.”
JOS 6:8 Josué Israel-dulemarga igar-uknaid-bergusgua, dule-irwa-Bab-Dummadse-gormalad-walagugledi (7) gar-trompeta-ogornadapi Ulu-idu nade gusmalad. Bab-Jehová-Igar-Mesisad-Ulu we-dule-irwa-Bab-Dummadse-gormalad-sorbali selemai gusad.
JOS 6:9 Sordamar-bila-onomaladi, dule-irwa-Bab-Dummadse-gormalad-gar-trompeta-ogornadapmalad-idu nadapi gusmalad. Sordamar-bila-onomalad-baigandi, Bab-Jehová-Igar-Mesisad-Ulu-sorba nadapi gusmarmogad. Weyob-nadapi-gusmargu, gar-trompeta-goledi gwen bogiledisulid.
JOS 6:10 Ar Josué dulemargardi igar uksad, bemardi bogidik nadapmalo, melle sunmakmalo, degi, mer bipisaale oimakmarbalo. Geb an bemarga igar-ukedse, geb bemar ise-gormakar imakmaloed.
JOS 6:11 Josué Bab-Jehová-Igar-Mesisad-Ulu Jericó-neggwebur irgwen-ebired imaksad. Geb sorbali, dulemar na gabega gannar danar-danar-bukmaladse nonimalad.
JOS 6:12 Oibosgu, Josué wakudaryalaba gwichigusad. Dule-irwa-Bab-Dummadse-gormalad, Bab-Jehová-Igar-Mesisad-Ulu gukingi mesismalad.
JOS 6:13 Dule-irwa-Bab-Dummadse-gormalad-walagugled (7) gar-trompeta sibad-wawaad-machered-e-bebegi-sobaled-semamaidi emar-idu nadmalad. Geb Bab-Jehová-Igar-Mesisad-Ulu-idu gar-ogornadapi gusmalad. Sordamar-bila-onomaladi dule-irwa-Bab-Dummadse-gormalad-walagugled-idu (7) nadapi gusmalad. Sordamar-bila-onomalad-baigandi Bab-Jehová-Igar-Mesisad-Ulu-sorba nadap gusmarmogad. Gar-trompeta-goled gwen bogilessuli gusad.
JOS 6:14 Amba deyobi, ibabogwadgi, Israel-sordamar irgwen Jericó-neggwebur ebilismarbalid. Geb sorbali, gannar na danar-danar-bukmaladse nonimalad. Weyobi, bane-bane ibanergwa (6) Jericó-neggwebur ebirismalad.
JOS 6:15 Ibagugledgine (7) dad-ibeler-nakwialidgi Israel-dulemar gwisgusmalad. Ar igi iduar Jericó-neggwebur-ebilisdamala, deyobi imaksamarbalid. Ar we-ibagindi, ilagugle (7) Jericó-neggwebur ebilismalad.
JOS 6:16 Ilaguglegi (7) Jericó-neggwebur-ebipirismaladgine, dule-irwa-Bab-Dummadse-gormalad gar-trompeta-ogotemargua, Josué dulemarga sogded: “¡Emisgi, binnasuli be gormakmar! ¡Ar Bab-Jehová Jericó-neggwebur bemarga urmaksad!
JOS 6:17 Jericó-neggwebur, degi, bela agi ibmar-bukwadi, bela obelolegoed, a-ibmarmar Bab-Jehováʼga-ibmar-uklegedyob guoed. Unnilagwa ome-gambanuchu-imaked-Rahabʼbi, degi, bela a-neggi-dulemar-bukwadbi bendaklegoed, ar ade, we-ome, anmarga-neg-argagega anmar-dule-warbo-barmisgusadi odukus gusad.
JOS 6:18 Melle bemar we-ibmar-bela-obelolegoye-soglesad sumalo, adi, mer bemar, degi, Israel-dulemar-danar-danar-bukmalad ukabsalemalaga, degi, mer bela bergumalagarba.
JOS 6:19 Ar manidi, ormardi, ibmarmar-esgoro-gordikidgi-sobarmaladdi, degi, esgorogi-ibmarmar-sobarmaladdi bergwapa Bab-Dummad-Jehováʼga uklegoed. Bemar we-ibmar Bab-Jehováʼga mani-akwilesiidse sedoed.”
JOS 6:20 Geb degine, dule-irwa-Bab-Dummadse-gormalad gar-trompeta-ogotemalad, geb dulemar binnasuli gormakdemalad. Abali, Jericó-neggwebur-galu-matusulid babatided. Geb Israel-sordamar gwen sorsik sikirmaksuli neggweburgi ubodmalad. Geb neggwebur-susmalad.
JOS 6:21 Bela neggweburgi machergan, omegan, sapingana, degi, sergan es-suidgi ogilosmalad. Amba deyobi bela molimar-bebe-nikamalad, sibad-wawaadmar, degi, moli-uayasuidmar oburgwismarbalid. Bela ibmar-dulamalad ogilosmalad. Bela neggwebur yaar sigisad.
JOS 6:22 Josué machergan-warbo-neg-argaapmaladga sogsagusad: “Bemar, ome-gambanuchu-imaked-Rahab-negse be namar, ar igi bemar ega ise-sogar sogsagusa, deyobi, we-ome, degi, bela e-gwenadganmala be bendaknamala.”
JOS 6:23 Degisoggu, machergan-warbo-neg-argaapmalad negyaba dogsamalad, geb Rahab, e-bab, e-nan, e-susmar, bela e-gwenadgan negyaba-bukmalad, degi, bela e-ibmarmar onosmalad. Geb sordamar bela Rahab-e-gwenadgan Israel-dulemar-danar-danar-bukwad-walik, neg-bogidikidse sesmalad.
JOS 6:24 Geb a-sorbali, Israel-dulemar Jericó-neggwebur, degi, agi bela ibmar-bukwamalad ogumaksamalad. Unnilagwa mani, olo, esgoro-gordikidgi-ibmar-sobarmalad, degi, esgorogi-ibmar-sobarmalad, Bab-Jehová-neggi mani-sabolebukwadse senonimalad.
JOS 6:25 Deyobi, Josué, ome-gambanuchu-imaked-Rahab, e-babgan, e-gwenadgan-baigan, degi, e-ibmar bendaksad. Ar Rahab, Israel-dulemar-warbogwad-Jericó-neggwebur-argaapmalad-odukusad-ulale, bendaklesad. A-akale, Rahab, degi, e-gwenadganmala, we-garda-narmaklenaidse Israel-dulemar-abargi gudimalad.
JOS 6:26 A-ibagine, Josué weyob ise-nue-sogar imaksad: “Dule we-Jericó-neggwebur gannar sobe-sogele, Bab-Dummad-Jehová-asabin, we-dule nue-ukabsalegoed. We-dule Jericó-neggwebur-e-negsaila gannar mesidele, e-machi-sailagined burgoed. We-neggwebur-yawagak gannar nasikdele, e-machi-bipigwad burgoed.”
JOS 6:27 Bab-Jehová Josuéʼba gudii gusad. Bela Canaán-yargi Josué-e-nug nue-dummarbaa gusad.
JOS 7:1 Degi-inigwele, Israel-dulemala Bab-Jehová-ibmar-sogsadba ibsassurmalad. Ar ade, ibmar-obelogoye Bab-Dummad-sogsa-gusadi, Israel-dorgan na susa gusad. Ar Zera-e-wagwa-yokorgined, Zabdi-e-wagwa, Carmi-machi-Acánʼye-nugadi, ibmar-obelogoye Bab-Dummad-sogsa-gusadi, na sabosad. We-dule-Judáʼgined-Acán, Bab-Jehová Israel-dulemargi-urwega imaksad.
JOS 7:2 Josué, Jericó-akale, Hai-neggwebur-arganamalaga dulemar-barmisad. Hai-neggweburde Betel-neggwebur-dad-nakwedsik, Bet-Avén-walik siid. Josué a-dulemarga weyob sogsad: “Bemar Hai-neggwebur arganamar.” Degisoggu, dulemar Hai-neggwebur-arganadmarsunnad.
JOS 7:3 Geb sordamar gannar nonimargua, Josuéʼga sognonimalad: “Bila-ononamalagala melle be bela sordamar barmido. Anmar Hai-neggwebur-suega, unnila Milibodibe (2,000), milipaadibe (3,000), sordamar abeleged. We-neggwebur machergan-ichee nikad, degisoggu, melle bela dulemar binsa gegguega be imako.”
JOS 7:4 Degidbali, Israel-dulemala unnila sorda-milipaa (3,000) nadmalad. Degi-inigwele, we-Israel-sordamar, Hai-dulemarse galakusmalad.
JOS 7:5 Israel-sordamar dulagwen-gakambe-gakanergwa (36) burgwismalad. Israel-sordamar Hai-dulemarse neggwebur-yawagak-akale, Sebarimʼye-neg-nugadse balegillesmalad. Agi, yar-aidegedgine Israel-sordamar Hai-dulemarse galakusmalad. Deyob-gusadbali, Israel-dulemar nig-argwatemalad, bela nue-dobgudmalad.
JOS 7:6 Weyob-gusad-ulale, Josué, degi, Israel-girmar-dummagan na e-mor-yoid esirmaksamalad. Na bela-bela-nunmaked-oyomalaga e-nonomargi buru eosmarbalid. Geb sorbali, Bab-Jehová-Igar-Mesisad-Ulu-asabin, neg-osedogedse, asgunar napagi mellemamai gusmalad.
JOS 7:7 Josué, Bab-Dummadga sognai gualid: —¡Bab-Dummad-Jehováʼye! ¿Ibiga Israel-dulemar Jordán-diwar-obakega be imaksa? ¿Amorreo-dulemarga be anmar-urmakega, Jordán-diwar-obaked be anmar-imaksa? ¿Amorreo-dulemar anmar-obelogega Jordán-diwar-obaked be anmar-imaksa? ¡Ar anmar bur Jordán-diwar-obakar-besmalana nabirinad!
JOS 7:8 Bab-Jehováʼye, emide, ¿igi an sogosunna? Israel-sordamarde e-isdarmalad-abin wakitegusmalad.
JOS 7:9 Canaán-dulemar wisgudamaloed, degidbali, anmargi bila-onodamalagala dulemar-a-yargi-bukmaladse gormaloed. Geb bela anmar-ebiris bukunonimaloed, bela anmar-ogilomaloed. Be-nug-dummarba-gued-ulale, ¿ibu be imakosunna?
JOS 7:10 Bab-Jehová, Josué-abin sogded: —¡Be gwichigue! ¿Ar ibiga be asgunar napagi mellemai?
JOS 7:11 Israel-dulemar nue angi nosmalad. Anbo-igar-mesismaladgi nue-annasmalad. Aginbali, ibmar-obelolegoye-soglesadi susmarbalid, e-ibmarmar-abargine odukusmalad.
JOS 7:12 A-ulale, Israel-dulemar e-isdarmaladgi nakosurmalad. E-isdarmalad-idu wakitemaloed. Israel-dulemar na dukin obelogega imaksamalad. Ar bemar-abargi ibmar-obelolegoye-soglesad-bukwad be obelosurmalale, an bemarba gudii guosulid.
JOS 7:13 ¡Josué, be gwisgue! ¡Israel-dulemar-swilidik be imake! Ega be sognae: ‘Banedse an-asabin-bukunonimaloed-iduale, na be gwage-swilidik imakmarye. Ani an Israel-e-Bab-Dummad-Jehová soged: Israel-dulemar, bemar-abargine ibmar-obelolegoye-soglesad selediid. Ar we-ibmar-obelolegoye-soglesad bemar-abargi be osulosurmalale, bemar be-isdarmaladgi be nakosurmalad.’
JOS 7:14 Banedse, wakudaryalaba Israel-dulemar na e-dadgan-warambe-gakabogwad-guedba (12), danar-danar nonimaloed. Ar wilubdakar an doa-dadgan-warambe-gakabogwad-e-wagan-suoe, amala na e-dadgan-e-dadgan nonimaloed. Ar doa-e-dad Bab-Jehová suoe, amala, na e-gwenad-e-gwenadgan nonimaloed. Ar doa-e-gwenad Bab-Jehová suoe, amala na e-machergan war-wargwengi senonimaloed.
JOS 7:15 Ar doa-dule ibmar-obelolegoye-soglesad susa-dakledagoe, a-dule na e-gwenadganmala, degi, e-ibmarmarmala ogumaklegoed. Ar ade, Bab-Jehová-Igar-Mesisadgi annasad, degi, Israel-dulemar-obingegsaega imaksad.
JOS 7:16 Banedgine, wakudaryalaba, Josué Israel-dulemar-e-dadgan-warambe-gakabogwad-e-wagan na e-dadgan-e-dadganba ese dagega imaksad. Geb wilubdaklegar Judá-wagan sulenonikid.
JOS 7:17 Bela Judá-wagan na e-dadgan-e-dadganba Josuéʼse nonimalad, geb wilubdaklegar Zera-e-wagan sulenonikid. Geb Zera-e-gwenadgan-abargi wilubdaklegar Zabdi-e-gwenadgan sulenonikid.
JOS 7:18 Geb degine, Josué, Zabdi-e-gwenadgan-e-machergan war-wargwengi ese-dagega imaksad. Geb agine, wilubdaklegar Carmi-machi-Acán sulenonikid. Acánʼde, Zera-wagwa-yokorginedid, Zabdi-wagwabalid.
JOS 7:19 Geb degine, Josué, Acánʼga sogded: —Machi, Israel-dulemar-e-Bab-Dummad-Jehová-nug be odummoge, ar ede nued ibmar imakdiiye. Emigindi, be ibmar-imaksad anga soge. ¡Melle be angi odukue!
JOS 7:20 Acán, Josué-abin sogded: —Ar napiragwa, an Israel-e-Bab-Dummad-Jehováʼgi nue-dummad nosad. Weyob an ibmar-imaksad:
JOS 7:21 Ibmarmar-abargi Babilonia-yargi-mor-dummad-yeerdakleged-soblesad bukwa, an daksad. Deginbali, mani-sibu-dulatar-ilabo-aidikue (200), degi, or-suitigwad nibirgwen-negabar-aidikue an daksabalid. A-ibmarmarbina an bela-bela soge itoalid, degi, an susad. Geb an, a-ibmarmar an-dordoneg-negabargi an yaa-gwichadgi odukusad. Mani amar-urba bukwamogad.
JOS 7:22 Geb Josué dulemar-yog-barmiar imaksad. Amardi Acán-dordonegse abarmakdemalad. Agine, Acán bela ibmar-odukusad amismalad.
JOS 7:23 A-ibmarmar susmalad, geb Josuéʼse, degi, Israel-dulemarse sesmalad. Geb wemar Bab-Jehová-asabin bela urbedapmalad.
JOS 7:24 Geb degine, Josué, degi, bela Israel-dulemar Zera-wagwa-yokorgined-Acán gasmalad, geb Acor-nebase mani-susadmala, mor-dummad-susadmala, or-susadmala sesmalad. Deginbali, e-masmala, e-bunamala, e-moli-bebe-nikamalad, e-moli-uayasuigan, e-sibad-wawaadmar, e-dordoneg, degi, Acán bela-ibmar-nikad ei sesmarbalid. Acor-neba-mosmargua,
JOS 7:25 Josué, Acánʼga sogded: —¿Ibiga boni-dummad, be anmarga onosa? Emi-ibagi, Bab-Jehová boni-dummad bega ukmosun. Geb degine, bela Israel-dulemar akwagi Acán, degi, e-gwenadgan maksamalad, geb sorbali, soogi ogumaksamalad.
JOS 7:26 Geb Acán-birgine akwamar-ichesuli urbismalad. Emi we-garda narmaklenaidse, amba deyobi akwamar ichesuli bukwad. A-ulale, a-negde Acor-nebaye nugad. Weyobi Bab-Jehová na e-urwed bogi imaksad.
JOS 8:1 Bab-Jehová, Josuéʼga sogded: “¡Melle be dobguo, melle be sikirmakbalo! Beba be bela dulemar-bila-onomalad sede, Hai-neggweburse be bila-ononamala. Hai-neggwebur-e-reygi, degi, e-dulemar-bila-onomaladgi nakwega an be-imakoed. Bemar e-neggwebur, degi, bela e-yala be sumaloed.
JOS 8:2 Ar igi be Jericó-neggwebur, degi, e-rey imaksa-gusa, deyobi be Hai-neggwebur, degi, e-rey imakbaloed. Degi-inigwele, e-ibmar, degi, e-ibdurgan sunna be sumaloed. Israel-sordamar neggwebur-yarganba odukuar be urboed, adi, ukiagwar dulemargi gwisguega.”
JOS 8:3 Josué na e-sordaganmala guagwar bukusmalad, geb agi Hai-neggweburse bila-ononadmalad. Josué dulemar-bila-onomalad mili-dulagwen-gakambe (30,000) amisad. Geb a-sordamarga weyob igar-uksa,
JOS 8:4 mutiki barmisad: “Bemar Hai-neggwebur-yarganba dukumaloed, adi, bemar ukiagwar dulemargi gwisgumalaga. Bemar melle neggweburgi dikasuli bangumalo. Bela bemar guakwaa bukumalo.
JOS 8:5 Ani, degi, bela sordamar-anba-gudimalad, anmar neggweburse warmaknamaloed. Ar Haiʼginmalad anmargi bila-onogega ainiarmalale, ar igi-iduar anmar imaksa-gusa, deyobi anmar wemar-idu wakitemarbaloed.
JOS 8:6 Hai-sordamar anmar-baregitemaloed, ar ade, binsamaloed, idualeyobi anmar gannar wakinmamabarye, deyobi anmar a-dulemar e-neggweburgi banguega imakoed.
JOS 8:7 Geb bemar na be dukubukmaladgi ainidamaloed, geb Hai-neggwebur be sumaloed. Bab-Jehová we-dulemargi-nakwega be-imakmaloed.
JOS 8:8 Ar bemar Hai-neggwebur susmalale, ar igi Bab-Jehová anmarga igar-uksagusa, abali, bemar neggwebur-ogumakmaloed. Weyob an bemarga igar-uknaid.”
JOS 8:9 Josué weyob sogsagua, dulemar-bila-onomalad-dukuega barmisad. We-sordamardi Betel-neggwebur-siid, degi, Hai-neggwebur-siid, amar-negabargi Hai-dad-argwanedsik dukudapmalad. Josuéʼdi a-mutiki Israel-sordamar-abargi besa gusad.
JOS 8:10 Josué wakudaryalaba gwichigualid, degi, na e-sordamar urbisad. Geb Israel-girmar-dummaganmala na e-sordamar-idunadapi Hai-neggweburse bila-ononadmalad.
JOS 8:11 Josuéʼba bela dulemar-bila-onomalad-nadapmalad Hai-neggwebur-walikgusmargua, Hai dad-nakwed-argan-sapiledsik ambikudapmalad. Josué-e-sordamar-bukmalad, degi, Hai-neggwebur-siid, amar-negabargine neba-naid.
JOS 8:12 Josué sordamar miliatar (5,000) dukunaega barmisanad. Wemar Betel-neggwebur-siid, Hai-neggwebur-siid, amar negabargine, Hai-dad-argwanedsik dukudapmalad.
JOS 8:13 Deyobi abar-sordamar-bila-onomalad Hai-neggwebur-dad-nakwed-argan-sapiledsik bukusmalad, bamalad-sordamardi, Hai-neggwebur-dad-argwanedsik bukusmarmogad. A-mutiki, Josué na e-sordaganmala neba-naid-negabarse bukunonikid.
JOS 8:14 Hai-e-rey deyob neg-gunai dakargua, na e-sordaganmala Arabá-nega-dulesulidgan-asabin neba-naidgi Israel-dulemargi-bila-onogegala gwae-gwae e-neggweburgi ainidmalad. Hai-e-reydi, e-neggwebur-yarganba Israel-sorda-bamalad-dukubukwad na wissulid.
JOS 8:15 Josué na e-sordaganmala yamo galakudeyob imaksamargua, nega-dulesulidganse-igar-maidba wakitemalad.
JOS 8:16 Geb degine, Israel-sordamar-balegitemalaga bela Hai-neggweburgi-machergan-gudimaladse gorlesad. Deyobi, machergan Hai-neggweburgi bangudmalad.
JOS 8:17 Bela machergan-Hai-neggweburgi-gudimalad, degi, Betelʼgi-gudimalad Israel-sordamar-balegitemalad, wargwensaale bessulid. Deyob-ainidmaladbali, Hai-neggwebur-e-yawagak egaar-sii mete-nadmalad.
JOS 8:18 Geb degine, Bab-Jehová, Josuéʼga sogded: “Be eswar-ganikid, Hai-neggwebursik be oyoge, ar ade, Hai-neggwebur an bega urmakoed.” Geb Josué eswar-ganikid Hai-neggwebursik oyosad.
JOS 8:19 Ar Israel-sordamar-dukubukmalad, Josué deyobi imaksa daksamargua, na e-dukubukmaladgi yog-ainiar imaksamalad, geb neggweburgi ubodapmalad, ibmar-susmalad, geb yog-ogumakar neggwebur-imaksamalad.
JOS 8:20 Hai-sordamar sorsik neggwebursik atakdemargua, dakarmalad, e-neggweburgi waa bupurmakbukwa. Geb degine, Hai-sordamar na wakinned-sate dakarmalad. Ar ade, Josué-sordagan nega-dulesulidgansik-wakinnadapmaladi, emidi Hai-sordamar-e-balegindanimaladgi duurmakarmalad.
JOS 8:21 Ar Josué, degi, Israel-sordamar dakarmargua, na e-sordagan-dukubukmalad Hai-neggweburgi ubosmala, degi, ogumaksamarbali, Hai-sordamar-e-balegindanimaladgi duurmakdemalad.
JOS 8:22 Israel-sordamar-Hai-neggwebur-ogumaksamaladi, neggweburgi ainiarmalad, geb Hai-sordamar-balegitemalad. Degisoggu, Hai-sordamar negabargi bar-wakinned-sate gales-bukusmalad. Agi, Israel-sordamar bela Hai-dulemar-ogilosmalad, wargwensaale egi wakichasulid.
JOS 8:23 Hai-neggwebur-e-reydi gasmalad, geb Josuéʼse senonimalad.
JOS 8:24 Israel-sordamar, nebagi, degi, nega-dulesulidgangi, Hai-sordamar-balegitegusmalad bela es-suidgi oburgwisad-sorbali, Hai-neggweburse gannar nonimalad. Ar igi Hai-sordamar-oburgwismala, deyobi bela dulemar-Hai-neggweburgi-besmalad oburgwismarbalid.
JOS 8:25 A-ibagine, bela machergan, degi, omegan-Haiʼginmalad miliambe-gakabo (12,000) burgwisad.
JOS 8:26 Israel-sordamar bela Hai-dulemar-ogilosadse, Josué Hai-neggwebursik eswar-oyogwichi gusad.
JOS 8:27 Ar igi Bab-Jehová, Josuéʼga igar-uksagusa, deyobi Israel-sordamar bila-onosadgi-ibmar-sulesad, degi, bela moli-bebe-nikamalad na susmalad.
JOS 8:28 Geb sorbali, Josué Hai-neggwebur-ogumaksad, bela burubi-sii imaksad. We-garda-narmaklenaidse amba deyob siid.
JOS 8:29 Deginbali, Josué, Hai-neggwebur-e-rey sapigi dubgi dukar-gaar oburgwisad. Geb Josué igar-uksabalid, Hai-e-rey-e-mui neg-sedogidse sapigi nasikoye. Dad-ibeler-argwategua, Josué Hai-e-rey-e-mui sapigi-naid odegega imaksad, geb neggwebur-dogedgi metemalaga imaksad. Geb degine, Josué akwa-bukidar Hai-e-rey-e-mui-birgi urbega imaksad. We-garda-narmaklenaidse amba deyobi akwa-bukidar dunnumakbukwad.
JOS 8:30 Geb degine, Josué Israel-e-Bab-Dummad-Jehováʼga, Ebal-yargine, ibmar-ogumakar-ukleged-aila sobsad.
JOS 8:31 Ar igi Bab-Jehová-e-mai-Moisés Israel-dulemarga sogsa-gusa, abali imaksad. Ar igi Moisés-Igar-Mamaid-gardagi narmakar-nai, abali we-aila sobsad: “Ibmar-ogumakar-ukleged-aila-akwabiid yamo-soblegarsulid, we-aila-sobega ibmarmar gwen ebulessulid.” We-aila-birgine, Israel-dulemar ibmar-ogumakar-ukleged, degi, gwenatigwar-guega-ibmar-ukleged uksamalad.
JOS 8:32 Deginbali, Josué Israel-dulemar-wagab, Moisés-Igar-uksa-gusadi, ibmar-ogumakar-ukleged-aila-e-akwagine narmaksabalid.
JOS 8:33 Bela Israel-dulemar na e-girmar-dummaganmala, na e-sordamar-dummaganmala, degi, dulemar-igar-nabomaladmala, Bab-Jehová-e-Ulu-dikar-sogbogwad-walik, Levitaʼmar-dule-irwa-Bab-Dummadse-gormalad Bab-Jehová-e-Ulu-semamaid-asabin gwichi gusmalad. Ar igi Bab-Jehová-e-mai-Moisés gebe Israel-dulemargi nued-binsasgu igar-uksagusa, deyobi, Israel-dulemar, degi, dule-yar-baidginmalad mimiles bukusmalad, negabala Gerizim-yarsik bukusmalad, baid-negabaladdi Ebal-yarsik bukusmarmogad.
JOS 8:34 A-sorbali, Josué dulemargala bela Igarmar gardagi-narmakar-maidi absosad. Ar Moisés-Igar-Mamaid-gardagi narmakar-naidba, Josué Igarmar dulemargi-ise-nued-binsaleged-igar, degi, dulemar-ukabsaleged-igar absosad.
JOS 8:35 Josué bela Israel-dulemar-asabin, omegan-asabin, burwigana-asabin, degi, dule-yar-baidginmalad-asabin, we-Moisés-Igar-uksa-gusadi bela absosad, bipisaale soggwen obessulid.
JOS 9:1 Bela Het-reymar, Amorreo-reymar, Canaán-reymar, Ferezeo-reymar, Heveo-reymar, degi, Jebuseo-reymar, we-ibmarmar-gusadi itosmalad. We-reymar, Jordán-diwar-dad-argwanedsiki yalaganba, nebagangi, degi, bela Demar-Dummadye-nugad-gakaba, Líbano-yalaganse mamaid.
JOS 9:2 Geb degine, bela we-reymar Josuéʼgi, degi, Israel-dulemargi bila-onodamalaga na atosmalad.
JOS 9:3 Gabaón-dulemardi wisguarmargu, igi Josué, Jericó-neggwebur, degi, Hai-neggwebur imaksa-gusa, a-ulale, na igar amismalad.
JOS 9:4 Geb degine, Gabaón-dulemar Josuéʼse gayaburba-berbemalad barmiarmalad. Gayaburba-berbemalad-e-moli-uayasuid-birgi sagu-selegan nasiksamalad, degi, buglu-selegan-matumakarmaladgi vino balismarbalid.
JOS 9:5 A-ukinbali, mor-selegan, sapat-sergan, sapat-matu-matumalad yosmarbalid. Madu-gunnega-sedanimaladi bato dinna-dinna naed, degi, bato udubiin nanabalid.
JOS 9:6 Gabaón-dulemar, bia Josué-gudiidse, Gilgalʼgi Israel-dulemar-danar-bukwadse nadmalad. Geb Josuéʼga, degi, Israel-dulemarga sogdemalad: —Anmar dikasuli danimalad. Anmar bemarbo igar-mesbimalad.
JOS 9:7 Israel-dulemala ega sogdemalad: —Bemar wegi-itakagwad gumarsua. Deyobile, anmar bemarbo geg igar-mesmalad.
JOS 9:8 Gabaón-dulemar Josué-abin sogdemalad: —Anmar be-maiga-guega guakwamalad. Josué we-dulemarse egichided: —¿Ar bemarde doamarsunna, bia bemar danimala?
JOS 9:9 Gabaón-dulemala Josué-abin sogdemalad: —Anmar be-mai gumalad. Anmar yar-dikasuli danimalad, ar Be-Bab-Dummad-Jehová ibmar-dakledisurmalad-imaksadi anmar itosmalad. Be-Bab-Jehová bela Egipto-yargi igi ibmarmar imaksa, anmar wisgusmalad.
JOS 9:10 Deginbali, be-Bab-Jehová Jordán-diwar-dad-nakwedsik Amorreo-e-reymar-warbogwad-maigusad igi imaksagusa anmar wisgusbalid. We-reymar nugmalanad: Hesbón-e-rey-Sehón, degi, Basán-e-rey-Og. Ogʼde Astarot-neggweburgi mai gusad.
JOS 9:11 A-ulale, bela anmar-girmar-dummagan, degi, anmar-dulemar, anmarga sogsamalad: ‘Bemar dikasuli namalosoggu, na be igarba mas-gunnega mas sedmar. Bemar Israel-dulemar-abin namar. Amarga be sogmalo: Anmar be-mai mamargumarye. Emigindi, bemar anmarbo igar-mesmarye.’
JOS 9:12 Anmar bemarse argua, anmar-madumar bini-bini, degi, ue-ue nanaenad. ¡Ar emigindi be dakena! Anmar-madu bato dutusur-nanaed, udubiinbalid.
JOS 9:13 Anmar we-buglugi vino enosgu, we-buglumar bini-bini nanaenad. Emigindi be dake, buglude bato achirmakar nanaed. Anmar dikasurgus danikid-ulale, anmar-mor, degi, anmar-sapatmar nungud nanaed.
JOS 9:14 Israel-dulemar Bab-Jehováʼse gwen idaksasurmala, Gabaón-dulemar-ibmar-senonikid guchamalad.
JOS 9:15 Geb degine, Josué we-dulemar-ebogwa na muchub-muchub-bendakmalaga igar-mesisad. Geb ega sogsabalid, nue-napiraa an bemarga sogye, anmar bemar-oburgosurmarye. Israel-girmar-dummagan ise-nue-sogar sogdemarmogad: “Anmar deyob sogmarmoye.”
JOS 9:16 Israel-dulemar Gabaón-dulemarbo ibapaagus igar-mesisad-sorba, wisguarmalad, we-dulemarde e-dikarba-bukwamaladye, emar-walikaa bukmarye.
JOS 9:17 A-ulale, Israel-dulemar Gabaón-dulemar-aminadmalad, geb ibapaagwadgine, Gabaón-e-neggweburmarse modapmalad. We-neggweburmarde nugmalad: Gabaón, Cafira, Beerot, Quiriat-Jearim.
JOS 9:18 Ar Israel-dulemardi Gabaón-dulemar-oburgwissurmalad, ar ade, Israel-girmar-dummagan Israel-Bab-Dummad-Jehová-nuggi ise-sogar sogsagusmalad, anmar Gabaón-dulemar oburgosurmarye. Ar bela Israel-dulemar e-girmar-dummagangi oimaksamar-inigwele,
JOS 9:19 we-Israel-girmar-dummagan abin-sogdemalad: —Anmar Bab-Jehová-nuggi ise-nue-sogar sogsamalad: ‘Anmar we-dulemar-oburgosurmarye.’ Degisoggu, geg anmar we-dulemar oakaloged.
JOS 9:20 Weyob anmar Gabaón-dulemar-imakodo: Anmar we-dulemar-oburgosulid. Ar anmar wemar-oburgwisale, Bab-Dummad sabsur-anmar-odurdakoed, ar ade, anmar ise-nue-sogar sogsad: ‘Anmar bemar-oburgosurmarye.’
JOS 9:21 Geb dummagan sogdemarbalid: —Anmar Gabaón-dulemar dula gudii imakoed. Degi-inigwele, Israel-dulemarga sapan-mamarmalaga, degi, dii-weedga gumaloed. Weyobi, Israel-sapin-dummagana ise-sogar-ibmar-sogsa-gusadba Gabaón-dulemar-oburgwissurmalad.
JOS 9:22 Geb degine, Josué, Gabaón-dulemarse gochad, amarga weyob binnasuli sogded: —¿Ar ibiga wede be anmar-yardaksa, be anmarga sogsagu: ‘Anmar bemargi dikasur bukwamarye?’ Ar emide dakleargu, bemar anmargi itakaa bukwamalad.
JOS 9:23 A-ulale, emi-onoded-akale, bemar weyob ukabsalesun: Degisadegu bemar an-Bab-Dummadse-goled-neggi maiga-gudii gumaloed. Bemar sapan-amidii, degi, dii-wedii gumaloed.
JOS 9:24 Gabaón-dulemar, Josué-abin sogdemalad: —Anmar be-maimarga-guedi, bela-bela nue wismalad, igi be-Bab-Dummad-Jehová e-mai-Moisésʼga igar uksagusa, adi, bemarga we-yala ukega, degi, bela we-yargi-e-dulemar-bukwamalad ogilogegarba. Anmar burgwebisulidbali, wede deyob anmar bega gakansasad.
JOS 9:25 Emigindi, ar bemargi-siido, igi be anmar-imakbimala. Ar igid be nued dake, igid ibmar-innikigwad be dake, ar deyob be anmar-imakdo.
JOS 9:26 Deyobi, Josué, Gabaón-dulemar-bendaksad, Israel-dulemar mer-oburgwega imaksad.
JOS 9:27 A-ibagine, Josué, Gabaón-dulemar Israel-dulemarga, degi, Bab-Jehováʼga-ibmar-ogumakar-ukleged-ailaga sapan-amiega, degi, ega dii-weega imaksad. Ar bia Bab-Jehová maiguega na neg-susagusa, agine, amba we-garda-narmaklenaidse, Gabaón-dulemar deyob arbadimalad.
JOS 10:1 Jerusalén-e-rey-Adonisedec, Josué, Hai-neggwebur-susad, degi, bela-obelosad wisgusad. Ar Josué igi Jericó-neggwebur, degi, e-rey-imaksagusa, deyobi, Josué, Hai-neggwebur, degi, e-rey imaksabalid. Deginbali, Adonisedec wisgusbalid Gabaón-dulemar Israel-dulemar-ebo na muchub-muchub-bendakmalaga igar-mesismarye. Degine, Gabaón-dulemar Israel-dulemar-abargi emide gudidimarye, wisgusbalid.
JOS 10:2 Weyob itosgua, Adonisedec, degi, e-sordamarmala bela-bela nue dobe-itonaded, ar ade, Gabaón-neggwebur, Hai-neggweburba bur birigined gued, degi, bur dummarba gubalid. Rey-bamalad-neggweburmaryob Gabaón-neggwebur nue-nug nikabalid. Deginbali, e-sordamar-bila-onomalad dule-buleganbalid.
JOS 10:3 A-ulale, Adonisedec we-reymarse gayaburba barmisad: Hebrón-e-rey-Hohamʼse, Jarmut-e-rey-Pireamʼse, Laquis-e-rey-Jafíaʼse, degi, Eglón-e-rey-Debirʼse.
JOS 10:4 A-gayaburba weyob sognaid: “Anse be dagmala, Gabaón-dulemarbo-bila-onogegala be an-bendakdamala. Ar Gabaón-dulemardi Josuéʼbo, degi, Israel-dulemar-ebo na muchub-muchub-bendakmalad-igar mesisad.”
JOS 10:5 Geb degine, Amorreo-e-reymar-walataled na atosmalad: Jerusalén-e-rey, Hebrón-e-rey, Jarmut-e-rey, Laquis-e-rey, degi, Eglón-e-rey na atosmalad. Wemardi e-sordamar-bila-onomaladmala Gabaón-neggwebur-asabin-bukumalaga, degi, Gabaón-dulemarbo bila-onogega nadmalad.
JOS 10:6 Geb degidgine, Gabaón-dulemardi Gilgalʼse Josué-maidse weyob gayaburba barmismalad: “Be-maimar mer-bendakosurye be sogo. Gwae be dage, be anmar-bendakdage. Anmar-bendaked anmar be-abeged, ar ade, bela Amorreo-e-reymar-yalaganba-mamaid anmargi bila-onogegala na atosmalad.”
JOS 10:7 Josué na bela e-sordamar-bila-onomaladmala, degi, e-sordamar-bur buleganmala Gilgalʼgi noalid.
JOS 10:8 Bab-Jehová Josuéʼga sogsad: “We-dulemar mer be dobguo, ar ade, egi nakwega an be-imakoed. We-dulemar-wargwensaale be-asabin gwisguosurmalad.”
JOS 10:9 Josué na e-sordaganmala Gilgal-akale-daniki oibosmalad. Agine, ukiagwar Amorreo-dulemargi ubononimalad.
JOS 10:10 Bab-Jehová, Israel-sordamar-asabin, Amorreo-sordamar bela-bela dobguega imaksad. Degisoggu, Gabaónʼgi Israel-sordamar Amorreo-sordamar-bukidar oburgwismalad. Israel-sordamar Bet-Horón-igarba Amorreo-sordamar-wakichamalad balegichamalad. Degine, Azeca-neggweburse-naed-igarba, Maceda-neggweburse-naed-igarba Israel-dulemar bela Amorreo-dulemar-oburgwismalad.
JOS 10:11 Amorreo-sordamar Israel-dulemar-idu wakinmamaigua, Bet-Horón-aidegedgi aidedmargu, Bab-Jehová nibneg-akale Azeca-neggweburse dii-akwamarga-binnisad Amorreo-dulemargi obatisad. Israel-dulemar Amorreo-sordamar-es-suidgi-oburgwisadba, bur bule dii-akwamarga-binnisad-batisad dule-oburgwisad.
JOS 10:12 Bab-Jehová, Israel-dulemar Amorreo-dulemargi-nakwega imaksad-ibagine, Josué Bab-Jehováʼse gochad, degi, Josué Israel-dulemar-wagab binnasur sogded: “Dad-ibeler, Gabaón-neggweburgi be boo nagu, bedi nii, Ajalón-nebagi be boo nagumo.”
JOS 10:13 Degidgine, dad-ibeler bar nanassulid, nii bar nanassurmogad, Israel-dulemar e-isdarmalad-bela-oburgwisadse geb dad nanaded, degi, nii nanadmogad. We-ibmar-gusadi Jaser-gardagi narmakar naid. Nibneg-negabargi dad-ibeler bogidik naigusad. Ibagwen-wilub dad-ibeler bar nanassulid.
JOS 10:14 We-ibayobi iduale, degi, sorbali, baid-iba deyobi nagudisulid. A-ibaginbi, Bab-Jehová dule-wargwen-ibmar-sogedba ibmar-imaksad. Ar ade, Bab-Jehová Israel-dulemar-anar urwenaid.
JOS 10:15 Bila-onosad-sorbali, Josué, degi, bela Israel-sordamarmala Gilgalʼgi danar-danar-bukwamaladse nonimalad.
JOS 10:16 Amorreo-e-reymar-walataled wakichamalad, Macedaʼgi akwasaila-olloledyaba dukusmalad.
JOS 10:17 Josué, reymar-walataled-akwasaila-olloledyaba-dukubukmalad, amilesye wisguargua,
JOS 10:18 weyob igar-uksad: “Akwasaila-olloled-yaa-iduar akwa-dummagan urbemar, deginbali, a-yawagak-naba nakulegega sordamar urbemarba.
JOS 10:19 Bemardi agi mer bemalo. Be-isdarmalad be baleginnamalo, degine, wakinmamaid-idu be bukumalo, adi, mer e-neggweburse dogmalagar. Ar be-Bab-Dummad-Jehová we-dulemargi-nakwega bemar-imaksad.”
JOS 10:20 Josué, degi, Israel-sordaganmala bela e-isdarmalad-ogilosad. We-dulemar ichesaar neggwebur-galu-matusulid-nikadgi dukusmalad.
JOS 10:21 Geb bela Israel-sordamar nueganbi, gwen akar-gussuli, Maceda-neggweburse gannar nonimalad. Neggwebur-baigan-dikarba-bukwamalad bipisaale, Israel-dulemargi ibmar-soged sate-gusmalad.
JOS 10:22 Geb degine, Josué akwasaila-ollo-siid-e-yaa-egaega imaksad, geb Amorreo-e-reymar-walataled ese-sedagega igar-uksad.
JOS 10:23 Geb akwasaila-ollo-siidyaba reymar-walataled-dukubukmalad onosmalad: Jerusalén-e-rey, Hebrón-e-rey, Jarmut-e-rey, Laquis-e-rey, degi, Eglón-e-rey.
JOS 10:24 Josuéʼse we-reymar-senonimargua, Josué bela Israel-sordamarse gochad. Geb sordamar-e-dummagan-eba-arbimaladga igar uksad: “Be dagmar, we-reymar-gammugi be annadamar.” Israel-sordamar-e-dummagan Josué-ega-ibmar-sogsadba imaksamalad.
JOS 10:25 Geb degine, Josué na e-sordamar-dummaganga sogded: “Mer dobgumalo, mer sorsik sikirmakmalo. Aka bur bemar na be dutusur imakmar, na be gandik imakmar. Bela be-isdarmaladgi be bila-onomaloedi, Bab-Jehová weyob imakoed.”
JOS 10:26 Josué weyob sogsad-sorbali, reymar-walataled-oburgwisad. Geb sapimar-walataledgi bannu-bannu nasiksad. Agine, sapigi bannu-bannu-nanai neg-osedodmalad.
JOS 10:27 Bato dad-argwanmaigua, Josué reymar-sapigi-bannu-bannu-nanaid-odemalaga igar-uksad. Geb we-reymar na bia iduar akwasaila-olloledyaba dukubuk gusmala, a-yaba-metemalaga Josué imaksad. Geb degine, akwasaila-olloled-yaa-dogedgi akwa-dummagan urbismalad. Amba we-garda-narmaklenaidse, a-akwamar deyob bukwad.
JOS 10:28 A-ibagi, Josué Maceda-neggwebur sunonikid. Geb Maceda-rey, degi, bela e-dulemar es-suidgi oburgwisad, dule-wargwensaale dula bessulid. Ar Josué igi Jericó-e-rey-oburgwisa, deyopira Maceda-e-rey-oburgwisbalid.
JOS 10:29 A-sorbali, Josué, degi, Israel-dulemarmala Maceda-neggwebur-bukwa Libna-neggweburse nadmalad. Geb Libna-dulemargi bila-onodapmalad.
JOS 10:30 Bab-Jehová Israel-dulemarga Libna-e-rey, degi, e-dulemarse-bakale urmaksad. Josué bela Libna-dulemar es-suidgi ogilosad, dule-wargwensaale dula bessulid. Ar Josué igi Jericó-e-rey-oburgwisa, deyopira Libna-e-rey-oburgwisbalid.
JOS 10:31 A-sorbali, Josué, degi, Israel-dulemarmala Libna-neggweburgi-bukwa Laquis-neggweburse nadegusmarbalid. Israel-sordamar bela Laquis-neggwebur-ebilis ambikudapmalad, geb Laquis-dulemargi bila-onosmalad.
JOS 10:32 Bab-Jehová Israel-dulemarga Laquis-neggwebur urmaksad, geb ibabogus bila-ononanaidgine Laquis-dulemargi nakwismalad. Ar igi Libna-dulemar es-suidgi burgwisgusmala, deyopira, bela Laquis-dulemar es-suidgi burgwismarmogad.
JOS 10:33 Deginbali, Gezer-e-rey-Horam, Laquis-dulemar-bendakega nonigusadi, bela na e-sordaganmala Josuéʼse galakusmogad. Josué bela wemar es-suidgi oburgwisad.
JOS 10:34 Josué, degi, bela Israel-dulemarmala Laquis-neggweburgi-bukwa Eglón-neggweburse nadegusmarbalid. Eglón-neggwebur-ebiris-bukudapmalad, geb Eglón-dulemargi bila-onosmalad.
JOS 10:35 Ibagwen-akale Israel-sordamar Eglón-neggwebur susmalad. Ar igi Laquis-dulemar es-suidgi oburgwisgusmala, deyopira bela Eglón-dulemar es-suidgi oburgwismarbalid.
JOS 10:36 Josué, degi, bela Israel-dulemarmala Eglón-neggweburgi-bukwa Hebrón-neggweburse nadmarbalid. Geb Hebrón-dulemargi bila-onosmalad.
JOS 10:37 Israel-sordamar Hebrón-neggwebur susmalad. Geb Israel-sordamar Hebrón-dulemar es-suidgi ogilosmalad. Degisoggu, Hebrón-dule-wargwensaale, degi, e-reyse-bakale, deginbali, e-neggwebur-burwigangi-dule-bukmaladse-bakale, dula bessulid. Ar igi Eglón-neggweburgi ibmar gusa, deyopira Hebrón-neggwebur bela obelolesmogad.
JOS 10:38 A-sorbali, Josué, degi, bela Israel-dulemarmala Debir-neggweburse nadmarbalid. Geb Debir-dulemargi bila-onosmalad.
JOS 10:39 Israel-sordamar Debir-e-reygi nakwismalad. Geb Debir-neggwebur, degi, bela e-neggwebur-burwiganase-bakale, susmarbalid. Josué bela Debir-dulemar es-suidgi oburgwisad. Dule-wargwensaale dula bessulid, bela oitolesmalad. Ar igi Hebrón-neggwebur, Libna-neggwebur, degi, e-reymar-imaklesgusa, deyopira Debir-neggwebur gusmogad.
JOS 10:40 Deyobi Josué bela we-yalagan susad: Yar-dummagan-mamaid, Neguev-yar, nebamar, yarmar-nakwemaidgi-napaneg-nanaid susad. Josué, bela amar-reymargi nakwisad, wargwensaale dula obessulid. Bela ibmar-dula-gudimaladi giir imaklesad. Josué Israel-e-Bab-Dummad-Jehová ega igar-uksadba, weyobi imaksad.
JOS 10:41 Josué, bela we-yarmar susad: Cades-Barnea-akale, Gazaʼse. Deginbali, Gosén-yalagan-akale, Gabaónʼse.
JOS 10:42 Josué, irgwen-bila-onoar we-reymargi nakwisad, degi, irgwen-suar bela e-yalagan susbalid, ar ade, Israel-e-Bab-Dummad-Jehová Israel-dulemar-anar urwenai gusad.
JOS 10:43 Geb a-sorbali, Josué, degi, bela Israel-sordamarmala, Gilgalʼgi danar-danar-bukwadse gannar nonimalad.
JOS 11:1 Hazor-e-rey-Jabín, Israel-dulemar bela weyob reymar-imaksaye wisguargua, we-reymarse gayaburba barmisad: Madón-e-rey-Jobabʼse, Simrón-e-reyse, Acsaf-e-reyse,
JOS 11:2 reymar dad-nakwed-argan-sapiledsik yalagangi-mamaidse, reymar Arabáʼgi, Cineret-dad-nakwed-argan-nuedsik-mamaidse, reymar nebagangi-mamaidse, reymar Dor-yalagangi dad-argwanedsik-mamaidse gayaburba barmisad.
JOS 11:3 Amba deyobi, Rey-Jabín, Canaán-dulemar dad-nakwedsik-bukwamaladse, degi, dad-argwanedsik-bukwamaladse gayaburba barmisbalid: Amorreo-dulemarse, Het-dulemarse, Ferezeo-dulemarse, Jebuseo-dulemar yalagangi bukwamaladse, Heveo-dulemar Hermón-yar-nakwedsik Mizpa-yargi-bukwamaladse gayaburba barmisbalid.
JOS 11:4 Bela we-reymar na e-sordamar-bila-onomalad-abargi, e-molimar-bukidar-abargi, degi, urmar-napagined-bila-onomalad-abargi armalad. Wemar bela-bela mergumarsoggu ukub-demar-gakaba-naidyobi, gege ebislemalad.
JOS 11:5 Bela e-sordamar-bila-onomalad na soggwenna atosmalad. Israel-dulemargi bila-onomalaga Merom-dian-dikarba danar-danar ambikunonimalad.
JOS 11:6 Geb degine, Bab-Jehová Josuéʼga sogded: “Mer be we-dulemar dobgue, ar ade, oibosale, we-wachigi we-dulemar bemar-asabin bela-burgwega an imakoed. Bemardi e-moli-mali-gasimar be sikoed, degi, e-urmar-napagined-bila-onomalad bela be ogumakmaloed.”
JOS 11:7 Degisoggu, Josué bela e-sordamar-bila-onomaladbo nadmalad, geb Merom-dian-dikarba ukiagwar we-reymargine ubodapmalad.
JOS 11:8 Bab-Jehová Israel-dulemarga we-dulemar urmaksad. Israel-dulemar bela we-dulemar nue-naibi-imaksad. Geb Sidón-neggwebur-dummadse, Misrefotmaimʼse, degi, dad-nakwedsik, Mizpa-neba-naidse baregichamalad. We-dulemar wargwensaale dula bessulid.
JOS 11:9 Ar igi Bab-Jehová Josuéʼga igar-uksagusa, deyobi Josué bela imaksad: E-isdarmalad-e-moli-mali-gasimar siksad, degi, e-ur-napaginmalad-bila-onomalad bela ogumaksad.
JOS 11:10 Josué gannar danigua, Hazor-neggwebur-sunonikid. Geb Hazor-e-rey es-suidgi oburgwisad. Ar Hazor-neggweburde, we-neggweburmar-e-sailaga gusiinad.
JOS 11:11 Israel-sordamar bela Hazor-dulemar-es-suidgi-oburgwisad, bipisaale dule-wargwen dula obessurmalad. Hazor-neggwebur bela obelosmalad, soogi ogumaksamalad.
JOS 11:12 Josué deyopira bela we-reymar-e-neggweburmar susbalid. Bela we-neggweburmar-e-rey es-suidgi ogilosad, degi, bela e-dulemar obelosbalid. Ar igi Bab-Jehová-e-mai-Moisés Josuéʼga igar-uksagusa, deyobi Josué eba bela ibmar-imaksad.
JOS 11:13 Israel-dulemardi bela neggweburmar-yar-mullugangi-bukmalad ogumaksasurmalad. Unnila Hazor-neggweburbi ogumaksamalad.
JOS 11:14 Israel-dulemar bela amar-neggweburmar-ibe ibmar-nuegan, degi, e-ibdurgan susmalad. E-dulemardi, bela-obelogedse es-suidgi ogilosmalad. Degisoggu, dule-wargwensaale dula bessulid.
JOS 11:15 Ar igi Bab-Jehová na e-mai-Moisésʼga igar-uksagusa, deyobi Moisés Josuéʼga igar-uksamogad. Josuéʼdi Bab-Jehová Moisésʼga-igar-uksadba bela ibmar-imaksad.
JOS 11:16 Josué bela we-yarmar susad: Yalagan-mamaid, bela Neguev-neg-naid, bela Gosén-yala, nebamar, Arabá-yala, Israel-e-yalagan, degi, e-nebaganse-bakale, susad.
JOS 11:17 Deginbali, Josué, we-yarmar susbalid: Halac-yar-siid-akale, we-yala Seirʼye-neg-nugadsik nakwemaid, Baal-Gad-neggwebur-siidse. We-neggwebur Líbano-nebagangi, Hermón-yar-nakwedgi siid.
JOS 11:18 Josué we-yarmar-e-reymargi undar bila-ononai-gusad-sorbali, a-reymar-gasad, geb oburgwisad.
JOS 11:19 Neggwebur-gwagwensaale, Israel-dulemarbo na muchub-muchub-bendakmalad-igar mesissulid. Unnila Heveo-dulemar-Gabaónʼginmaladbi Israel-dulemarbo igar mesisad. Josué bila-onosadgine bela we-neggweburmargi nakwisad.
JOS 11:20 Ar ade, Bab-Jehová we-reymar-e-gwagegi Israel-sordamargi-bila-onoged nasiksad. Adi, deyobi Israel-sordamar we-dulemar-wiledaksulidgi ogilogega, ar igi Bab-Jehová Moisésʼga igar-uksagusadyob.
JOS 11:21 A-ibagangine, Josué Anac-dulemar-obelosadi, wemalad: Hebrón-yalagangi bukmalad, Debir-yalagangi bukmalad, Anab-yalagangi bukmalad, bela Judá-yalagangi bukmalad, degi, bela Israel-yalagangi bukmalad, obelosad. Josué bela Anac-dulemar oburgwisad, deginbali, e-neggweburmar bela obelosbalid.
JOS 11:22 Israel-dulemar-bukusad-yargine, Anac-dulemar gwen bipisaale dula bessulid. Unnila Gaza-neggweburgi, Gat-neggweburgi, degi, Asdod-neggweburgi Anac-dulemar napi-bedapmalad.
JOS 11:23 Ar igi Bab-Jehová Moisésʼga igar-uksa, deyobi Josué bela we-yarmar susa gusad. Geb Josué, a-yarmar Israel-dulemargadga-guega e-dadgan-dummagan-warambe-gakabogwad-irba (12) mimisad. A-sorbali, a-yarmargi bar bila onolessulid.
JOS 12:1 Moisés-dula-gudiunni, Israel-dulemar Jordán-diwar-dad-nakwedsik rey-warbo-maidgi nakwis gusmalad. Israel-dulemar we-reymar-ibe dad-nakwed-argan-nuedsik Arnón-dian-akar dad-nakwed-argan-sapiledsik Hermón-yarse yar susmalad. Deginbali, bela Arabá-dad-nakwedsik-yar-naidi susa gusmarbalid.
JOS 12:2 We-rey-warbogwad, wargwena Sehónʼye-nugad, wedi Amorreo-dulemar-e-reyd, Hesbónʼgi mai gusad. We-reyde dad-nakwed-argan-nuedsik Arnón-diwar-gakaba Aroer-neggwebur-siid-akar, dad-nakwed-argan-sapiledsik Jaboc-diwar-maidse yar-gani gusad. We-diwar-Jaboc Amón-dulemarbo-yar-abingunaidga maid. Deginbali, Arnón-diwar-neba-naid-negabar, degi, Galaad-negabar Rey-Sehón gani gusbalid.
JOS 12:3 Amba deyobi, Arabá-dad-nakwedsik-yar-naidi, Cineret-demar-akar Demar-Gagbidye-nugadse yar gani gusbalid. Deginbali, Demar-Gagbidye-nugad-dad-nakwedsik-yar-naidi, Bet-Jesimot-neggweburse, degi, Pisga-yar-nakwemaidse Rey-Sehón gani gusbalid.
JOS 12:4 Baid-reydi Ogʼye-nugad, wedi Basán-e-reyd. We-reyde Refa-e-wagwa-napi-dula-besadid. Astarotʼgi, degi, Edreiʼgi mai gusad.
JOS 12:5 We-Rey-Og-e-yala dad-nakwed-argan-sapiledsik Hermón-yargi onoalid. Dad-nakwedsikdi Salca-neggweburgi onoalid, bela Basán-yar-naidse-bakale, yaba dogarbalid, dad-argwanedsik Gesur-yar-abingunaidse, degi, Maaca-yar-abingunaidse bergunaid. Deginbali, Rey-Og Galaad-negabar-akar, Hesbón-rey-Sehón e-yar-abingunaidse yar gani gusbalid.
JOS 12:6 Moisés, degi, Israel-dulemar we-rey-warbogwadgine nakwis gusmalad. Moisés we-reymar-yarmar Rubén-waganga, Gad-waganga, degi, Manasés-wagan-negabaladga uksa gusad.
JOS 12:7 Josué, degi, Israel-dulemar bela reymar-Jordán-diwar-dad-argwanedsik-mamaidgi nakwis gusmalad. We-reymar-yarmar Líbano-nebagangi, Baal-Gadʼgi onoalid, Seirʼsik nakwilemaidsik, Halac-yar-siidse bergunaid. Josué we-reymar-e-yala Israel-dulemarga na e-dadgan-warambe-gakabogwadba (12) uksa gusad, adi, na egadga imakmalagar.
JOS 12:8 We-yarmar-uklesadi, wemalad: Napaneg-yalaganba-nanaid, dad-argwanedsik nebagan-nanaid, Arabá-yar, neg-mullugan, nega-dulesulidgan, degi, Neguev-yar. We-yalamar, we-dulemargadinad: Het-dulemar, Amorreo-dulemar, Canaán-dulemar, Ferezeo-dulemar, Heveo-dulemar, degi, Jebuseo-dulemar.
JOS 12:9 Israel-dulemar we-neggweburmar-e-reymargi nakwisad: Jericó-e-reygi, Hai-e-reygi. Hai-neggweburde, Betel-naba siid.
JOS 12:10 Jerusalén-e-reygi, Hebrón-e-reygi,
JOS 12:11 Jarmut-e-reygi, Laquis-e-reygi,
JOS 12:12 Eglón-e-reygi, Gezer-e-reygi,
JOS 12:13 Debir-e-reygi, Geder-e-reygi,
JOS 12:14 Horma-e-reygi, Arad-e-reygi,
JOS 12:15 Libna-e-reygi, Adulam-e-reygi,
JOS 12:16 Maceda-e-reygi, Betel-e-reygi,
JOS 12:17 Tapúa-e-reygi, Hefer-e-reygi,
JOS 12:18 Afec-e-reygi, Sarón-e-reygi,
JOS 12:19 Madón-e-reygi, Hazor-e-reygi,
JOS 12:20 Simron-Merón-e-reygi, Acsaf-e-reygi,
JOS 12:21 Taanac-e-reygi, Meguido-e-reygi,
JOS 12:22 Cedes-e-reygi, Carmelo-yargi-Jocneam-neggwebur-siid-e-reygi.
JOS 12:23 Dor-yargi, Dor-neggwebur-siid-e-reygi. Gilgalʼgi-Goim-neggwebur-siid-e-reygi,
JOS 12:24 degine, Tirsa-e-reygi. Josué bela we-neggwebur-e-reymar-dulagwen-gakambe-gakagwensak-merguedgi (31) nakwisad.
JOS 13:1 Josué bato nue-seredgusadgine, Bab-Jehová ega sogded: “Josué, bato be nue-seredgusad, amba bukidar yarmar yoo suleged.
JOS 13:2 Bela Filistea-dulemar-yala, degi, Gesur-dulemar-yala an bega obared.
JOS 13:3 A-yardi, Egipto-yar-dad-nakwedsik, Sihor-diwar-akar, dad-nakwed-argan-sapiledsik Ecrón-yar-abingunaidse dungu naid. Ecrón-yala, Canaán-dulemargadid. A-yargine, Filistea-dulemar walatale dummaganga we-neggweburgi mamaid: Gaza-neggweburgi, Asdod-neggweburgi, Ascalón-neggweburgi, Gat-neggweburgi, degi, Ecrón-neggweburgi. ”Deginbali, dad-nakwed-argan-nuedsik Aveo-dulemar-e-yala amba yoo sulebalid.
JOS 13:4 Amba bela Canaán-dulemar-e-yala yoo sulebalid. A-yala, Sidón-dulemar-Meharaʼgi-bukwad-akar onoalid, Afecʼye-neg-nugadse, Amorreo-dulemar-e-yar-abingunaidse bergunaid.
JOS 13:5 Deginbali, Giblita-dulemar-e-yar, degi, bela dad-nakwedsik-Líbano-yar-naidi amba yoo sulebalid. A-yala, Hermón-yar-nakwedsik Baal-Gad-akar onoalid, Hamat-dogedse bergunaid.”
JOS 13:6 Bab-Jehová Josuéʼga sogdebalid: “An-sunnad Israel-dulemar-wagab bela dulemar-yalaganba-bukwad, Líbano-akar, Misrefotmaimʼse, an onioed. Deginbali, an bela Sidón-dulemar onibaloed. ”Ar bedi, ar igi an bega igar-uksagusa, deyobi Israel-dulemarga be we-yar mimioed, adi, na egadga imakmalagar.
JOS 13:7 Degisoggu, we-yarmar Israel-dulemar-dadgan-dummagan-bakebakad-e-wagan (9) yoo-yar-sumaladga, degi, Manasés-wagan-negabaladga be mimioed.”
JOS 13:8 Manasés-wagan-baid-negabalad, Rubén-wagan, degi, Gad-wagan, Jordán-diwar-dad-nakwedsik yar-egadga guega, bato Bab-Jehová-e-mai-Moisés iduar ega yar uksa gusad.
JOS 13:9 A-yala, Arnón-diwar-gakaba Aroer-neggwebur-siid-akar, Dibónʼse dungued. Deginbali, yarmar-imbagi-neba-naidgi neggwebur-siid, degi, bela Medeba-neba-naid, a-yaryaba dogarbalid.
JOS 13:10 Deginbali, Amorreo-dulemar-e-rey, Sehónʼye-nugad, Hesbónʼgi dummadga-maigusad bela e-neggweburmar, wemarga uklesbalid. Rey-Sehón-e-yala, Amón-dulemar-yar-abingunaidse dungued.
JOS 13:11 Deginbali, wemarga Galaad-yar uklesbalid. We-yala Gesur-dulemargadid, degi, Maaca-dulemargadid. Bela Hermón-yala, degi, bela Basán-yala Salcaʼse, wemarga uklesbalid.
JOS 13:12 We-yala, Basán-e-rey-Og Astarotʼgi, degi, Edreiʼgi dummadga-maigusad e-yalanad. We-Ogʼde, Refa-dule napi besa gusadid. Moisés we-dulemargi nakwis gusad. Deginbali, Refa-dulemar na e-yargi-bukwadgi Moisésʼse onolesbalid.
JOS 13:13 Ar Gesur-dulemardi, Maaca-dulemardi na e-yargi-bukwadgi Israel-dulemarse gwen onolessurmalad. We-garda narmaklenaidse, we-dulemar Israel-yargine amba gudimalad.
JOS 13:14 Moisés, Leví-wagangardi yar-egadga-guega yar-uksasulid. Ar ade, Israel-e-Bab-Dummad-Jehová-e-dulamar-ibmar-ogumakar-ukedi, Leví-wagangadid. Ar weyobi Bab-Jehová Leví-waganga sogsagusad.
JOS 13:15 Moisés, Rubén-waganga na e-dadgan-e-dadgan-merguedba yar uksa gusad.
JOS 13:16 A-yala, Arnón-diwar-gakaba Aroer-neggwebur-siid-akar Hesbónʼse dungued. Deginbali, yarmar-imbagi-neba-naidgi neggwebur-siid, degi, bela Medeba-neba-naid, a-yaryaba dogarbalid.
JOS 13:17 Hesbón, degi, bela neggweburmar-nebagi-bukmaladi, a-yaryaba dogarbalid: Dibón-neggwebur, Bamot-Baal-neggwebur, Bet-Baal-Meón-neggwebur,
JOS 13:18 Jahaza-neggwebur, Cademot-neggwebur, Mefaat-neggwebur,
JOS 13:19 Quiriataim-neggwebur, Sibma-neggwebur, Zaret-Sahar-neggwebur. Zaret-Saharʼde neba-yar-mullugwadgi siid.
JOS 13:20 Bet-Peor-neggwebur, degi, Bet-Jesimot-neggwebur. Deginbali, Pisga-yar-billimar-nakwemamaidi, a-yaryaba dogarbalid.
JOS 13:21 Bela neggweburmar-nebagi-bukmalad, degi, bela Amorreo-e-rey-Sehón Hesbónʼgi dummadga-maigusad-e-yala, a-yaryaba dogarbalid. Moisés we-Rey-Sehónʼgi, degi, Madiánʼgi dummaganga-negdakmamaigusadgi nakwisad. A-dummagan, wemalad: Evi, Requem, Zur, Hur, degi, Reba. Bela we-dummagan, Sehónʼba-nanai gusmalad. Madián-yalagi mai gusmalad.
JOS 13:22 Israel-dulemar bila-onolesadgi dulemar-bukidar es-suidgi oburgwismalad. Beor-machi-ner-Balaamʼye-nugadse-bakale oburgwismalad.
JOS 13:23 Jordán-diwar Rubén-wagangala e-yar-abinguedga gunonikid. Iduar-neggweburmar-bilesad, degi, e-neggwebur-burwiganase-bakale, na egadga-guega Rubén-waganga na e-dad-e-dadganba ega uklesad.
JOS 13:24 Moisés, Gad-waganga na e-dadgan-e-dadgan-merguedba yarmar uksagusmogad.
JOS 13:25 Gad-wagan-yaryabali, wemar dogaled: Jazer-yalagan, bela Galaad-yargi neggweburmar-bukmalad, Amón-dulemar-e-yar-negabar, Rabá-asabin neggwebur-Aroer-siidse.
JOS 13:26 A-yala, Hesbón-neggwebur-akar, Ramat-Mizpaʼse, degi, Betonimʼse naid. Nadbalid, Mahanaim-neg-naid-akar, Debir-yar-abingunaidse.
JOS 13:27 Nebagine, Bet-Aram, Bet-Nimra, Sucot, Zafón, degi, Hesbón-e-rey-Sehón-e-yar-napi-besad, Gad-waganga uklesbalid. Degisoggu, Gad-wagan-e-yala, Jordán-diwar-dad-nakwedsik-akar onoalid, Cineret-demar-dad-nakwed-argan-nuedsikidse bergunaid.
JOS 13:28 Iduar-neggweburmar-bilesad, degi, e-neggwebur-burwiganase-bakale, na egadga-guega Gad-waganga na e-dadgan-e-dadganba ega uklesad.
JOS 13:29 Moisés Manasés-wagan-negabaladga na e-dadgan-e-dadgan-merguedba we-yarmar uksagusad:
JOS 13:30 Mahanaim-akar, bela Basán-neg-naid. We-neg-naidi, bela Rey-Og-negdakmaigusad yalad. Deginbali, bela Jair-neggwebur-burwigana gwadulapaa-bukwadse-bakar (60), ega uklesbalid.
JOS 13:31 Manasés-machi-Maquir-wagan-negabaladga na e-dadgan-e-dadgan merguedba, Galaad-yar-negabar uklesad. Deginbali, Basán-e-Rey-Og negdakmai-gusad-e-neggweburmar Astarot, degi, Edrei, ega uklesbalid.
JOS 13:32 Moisés Moab-nebagi-gudigu, Jordán-diwar-obakar, Jericó-neggwebur-dad-nakwedsik, we-yarmala mimisad.
JOS 13:33 Degi-inigwele, Moisés, Leví-wagangardi, yar-egadga-guega yar uksasulid, ar ade, Israel-e-Bab-Dummad-Jehová-sunnad Leví-waganga unniguar ibmar-ukdii guoed. Ar weyobi, Bab-Jehová Leví-waganga sogsagusad.
JOS 14:1 Dule-irwa-Bab-Dummadse-goled-Eleazar, Nun-machi-Josué, degi, Israel-dulemar-e-dadgan-e-dadgan-e-dummaganga-gudimalad, Israel-dulemarga Canaán-yar-egadga-guega ega mimismalad.
JOS 14:2 Ar igi Bab-Jehová Moisésʼga igar-uksagusa, deyobi, ibmargi-wilubdaklealedba, yar-egadga-guega Israel-dulemar-dadgan-dummagan-bakebakad-e-waganga (9), degi, dad-dummad-wargwenad-e-wagan-negabaladga yar mimismalad.
JOS 14:3 Ar Moisésʼdi Jordán-diwar-dad-nakwedsik, Rubén-e-waganga, Gad-e-waganga, degi, Manasés-e-wagan-negabaladga, yar-egadga-guega bato yar uksa gusad. Ar Leví-wagangardi, yar uklessulid.
JOS 14:4 Ar José-e-wagandi, sogabo mimiles gusad: Manasés-wagan, degi, Efraín-wagan. Ar Leví-wagangardi yar uklessulid. Unnila neggweburmar egi gagan-nanaid ega uklesad, adi, e-molimar-bebe-nikad, degi, e-sibadmar, e-sibad-wawaadmar, a-gagan mamalagar.
JOS 14:5 Ar igi Bab-Jehová Moisésʼga sogsagusa, deyobi Israel-dulemar na yar mimismalad.
JOS 14:6 Judá-wagan Gilgalʼgi, Josuéʼse nade gusmalad. Cenezeo-dule Jefone-machi-Caleb, Josuéʼga sogded: “Be ebinsao, igi Bab-Jehová na e-dule-Moisésʼga Cades-Barneaʼgi anmar-warbogwadgi sogsa gusa.
JOS 14:7 Bab-Jehová-e-mai-Moisés, Cades-Barnea-akar yar-arganaega an-barmisgusgu, deunni an birga-dulabo (40) nikad. An bela ibmar-daksagusadi napiragwadgi an Moisésʼga sognoni gusad.
JOS 14:8 An-gwenadgan-anba-arbimaladdi, sordagan-ogwayismalad, e-ibe niga-egwachamalad. Ar andi, an-Bab-Dummad-Jehováʼgi gwen bengussulid.
JOS 14:9 A-ibagine, Moisés weyob ise-sogar anga sogsa gusad: ‘Ar bia be annadapoe, a-napa begadga, degi, be-wagangadga degisadegu guoed, ar bede an-Bab-Dummad-Jehováʼgi gwen bensuli gusad.’
JOS 14:10 ”Bab-Jehová Moisésʼba weyob ise-sogar ibmar-sogsagusadi, bato birga-dulabo-gakatargus (45) nasad. Deunni, Israel-dulemar nega-dulesulidganba gaamakdimalad. Emi-ibagindi, an birga-dulabake-gakatar (85) nika gwichid. Bab-Jehová amba dula an-sediid.
JOS 14:11 Moisés a-ibagi an-barmisgusadyobi, amba an dutusur gued. Amba epennegwayobi bila-onogegala, a-ibayobi amba an gangued nikabalid.
JOS 14:12 Degisoggu, a-ibagi, Bab-Jehová anga yar-ukoye-sogsagusadi, be anga uksunna. Josué, be nue-wisid, a-iba-akale, dule-masdummagan-Anac-wagan a-yargi bukwamalad. E-neggweburmala dummaganad, nue-ise-sakdigar bukwa nanabalid. Degi-inigwele, ar igi Bab-Jehová na ise-sogar sogsagusa, deyobi Bab-Jehová-an-bendakoedbali, an we-dulemar a-yargine onioed.”
JOS 14:13 Geb degine, Josué, Calebʼgi ise-nued-binsasad. Geb Hebrón-yala Calebʼga, degi, e-waganga degisadegu egadga-guega ega uksad.
JOS 14:14 A-iba-akale, we-garda-narmaklenaidse Hebrón-yala, Cenezeo-dule Jefone-machi-Calebʼgadga gunonikid. Ar ade, Caleb Israel-e-Bab-Dummad-Jehováʼgi gwen bensuli gusad.
JOS 14:15 Hebrón-yala, iduale Quiriat-Arbaʼye nuganad. Ar Arbaʼde, Anac-e-wagan-e-dad-nug-nikad megisad. Bela we-sorbali, Israel-dulemar gwen bar bila-onossulid, yar bogidik-nagunonikid.
JOS 15:1 Judá-waganga na e-dadgan-e-dadganba yar-uklesadi, Edom-yar-abingunaidse naid. Dad-nakwed-argan-nuedsik Zin-nega-dulesulidganse bergunaid.
JOS 15:2 Dad-nakwed-argan-nuedsik-yar-abingunaidi, Demar-Gagbidye-nugad-dad-nakwed-argan-nuedsik-sukun-siidgi onoded.
JOS 15:3 Sorbali, dad-nakwed-argan-nuedsik Acrabim-igar-nakwemaidba namaid, Zin-nega-dulesulidgangi obakmaid, geb Cades-Barnea-dad-nakwed-argan-nuedsik nakwidbalid. A-sorbali, Hezrón-neggweburse warmakmaid, geb Adarʼse nakwidbalid, degi, Carcaʼsik aibirided
JOS 15:4 Asmón-neggweburse. Agi onodbargua, Egipto-diwarse warmakmaid, geb Demar-Dummadye-nugadse bergunaid. We, Judá-yar-abingunaid dad-nakwed-argan-nuedsikidid.
JOS 15:5 Dad-nakwedsiki yar-abingunaidi, bela Demar-Gagbidye-nugad gued, Jordán-diwar-nakase. Dad-nakwed-argan-sapiledsik-yar-abingunaidi, Jordán-diwar-nakagi-sukun-siidgi onoded.
JOS 15:6 Geb Bet-Hoglaʼba nakwided, degi Bet-Arabá-dad-nakwed-argan-sapiledsik namaid, Rubén-machi-Bohánʼye-nugad-e-akwase warmakmaid.
JOS 15:7 A-sorbali, Acor-nebagan-akar, Debirʼse nakwided, geb dad-nakwed-argan-sapiledsiki Gilgalʼsik aibirided. Gilgalʼde Adumín-nakwemaid-asabin, dian-dad-nakwed-argan-nuedsik siid. Geb sorbali, En-Semes-dii-saila-siidgi namaid, geb Rogel-dii-saila-siidse warmakmaid.
JOS 15:8 We-yar-abingunaidi, Jebuseo-neggwebur-dad-nakwed-argan-nuedsik Ben-Hinom-nebaba namaid. Jebuseo-neggwebur, Jerusalénʼye nugbalid. Geb sorbali, Hinom-neba-dad-argwanedsik, Refaim-neba-dad-nakwed-argan-sapiledsik yar-mullu-siid-birgi nakwided.
JOS 15:9 A-yar-mullu-birgi-akar, yar-abingunaidi, Neftoa-diisaila-siidsik namaid, degi Efrón-yar-birgi-neggwebur-bukwadse warmakmaid, geb Baalaʼse aidemaid. Baalaʼde, Quiriat-Jearimʼye nugbalid.
JOS 15:10 Geb Baala-akar, we-yar-abingunaidi, dad-argwanedsiki Seir-yar-siidsik aibirided. Dad-nakwed-argan-sapiledsiki, Jearim-yar-e-dikargi namaid. Jearim-yardi, Quesalónʼye nugbalid. Geb A-yar-akar, yar-abingunaidi, Bet-Semesʼsik aidemaid, degi Timnaʼgi namaid.
JOS 15:11 Geb sorbali, dad-nakwed-argan-sapiledsiki Ecrón-yar-mulluganba namaid. Geb Sicrónʼsik aibirided, Baala-yar ebirided, degi Jabneelʼse warmakmaid. Yar-abingunaid-e-igar Demar-Dummadye-nugadse bergunaid.
JOS 15:12 Napidgi, dad-argwanedsik-yar-abingunaidi, Demar-Dummadye-nugad-e-gaka gued. Wemala, Judá-waganga na e-dadgan-e-dadganba yar-uklesad-e-abingunanaid gumalad.
JOS 15:13 Bab-Jehová ega igar-uksadba, Josué Jefone-machi-Calebʼga, Judá-waganga-yar-uklesad-abargi, Quiriat-Arba-neggwebur ega uksad. We-Quiriat-Arbaʼde, Hebrónʼye nugbalid. Arbaʼde, Anac-e-bab-gusad, dulemar-masdummagan e-dad.
JOS 15:14 Caleb, Hebrón-neggweburgi Anac-e-wagan-walapaa onosad: Sesai, Ahimán, degi, Talmai.
JOS 15:15 A-sorbali, Caleb, Debir-dulemarse bila-ononad gusbalid. Iduale, Debir-neggwebur Quiriat-Seferʼye nuganad.
JOS 15:16 Geb Caleb sogded: “Dule, Quiriat-Sefer-dulemargi-nakwisale, degi, e-neggwebur-susale, an-sisgwa-Acsa na ebo nikuega an ega ukoed.”
JOS 15:17 Geb degine, Cenaz-machi-Otoniel, Caleb-e-niga neggwebur-susa gusad. Geb Otoniel Acsa-nikusad.
JOS 15:18 Otoniel-negse nasokarmargua, Otoniel e-ome-Acsaʼgi alamaknai gualid: “Ibmar-digega, be-babse be nainu egisye.” Geb degine, Acsa moli-uayasuid-birgi-siidgi aidesad. Geb Caleb e-sisgwase egichided: —¿Ibu be abege?
JOS 15:19 E-sisgwa abin-sogded: —Wis be anga ibmar-soggwen udage. Ar be anga Neguev-yargi nainumar uksasoggu, anga be dii-sailagan-bukwad udabali. Deyobi, Caleb na e-sisgwaga dii-sailagan yar-mullugi-bukwad, degi, nebagi-bukwadi ega uksad.
JOS 15:20 Judá-waganga na e-dadgan-e-dadganba-yar-uklesad-abargi we-neggweburmar ega uklesad.
JOS 15:21 Dad-nakwed-argan-nuedsik, Neguevʼgi, Edom-yar-abingunaid-walik, we-neggweburmar ega uklesad: Cabseel, Edar, Jagur,
JOS 15:22 Cina, Dimona, Adada,
JOS 15:23 Cedes, Hazor, Itnán,
JOS 15:24 Zif, Telem, Bealot,
JOS 15:25 Hazor-Hadata, Queriot, Hezrón (Hazorʼye nugbalid),
JOS 15:26 Amam, Sema, Molada,
JOS 15:27 Hazar-Gada, Hesmón, Bet-Pelet,
JOS 15:28 Hazar-Sual, Beerseba, Bizotia,
JOS 15:29 Baala, Iim, Esem,
JOS 15:30 Eltolad, Quesil, Horma,
JOS 15:31 Siclag, Madmana, Sansana,
JOS 15:32 Lebaot, Silhim, Aín, degi, Rimón. Bela we-neggweburmar dulagwen-gakabakebak (29) mergued, degi, e-neggwebur-burwiganase-bakale, ega uklesbalid.
JOS 15:33 Nebagangi, we-neggweburmar Judá-waganga uklesad: Estaol, Zora, Asena,
JOS 15:34 Zanoa, En-Ganim, Tapúa, Enam,
JOS 15:35 Jarmut, Adulam, Soco, Azeca,
JOS 15:36 Saaraim, Aditaim, Gedera, degi, Gederotaim. Bela we-neggweburmar gwaambe-gakabake (14) mergued, degi, e-neggwebur-burwiganase-bakale, ega uklesbalid.
JOS 15:37 We-neggwebur-bamalad ega uklesbalid: Zenán, Hadasa, Migdal-Gad,
JOS 15:38 Dileán, Mizpa, Jocteel,
JOS 15:39 Laquis, Boscat, Eglón,
JOS 15:40 Cabón, Lahmam, Quitlis,
JOS 15:41 Gederot, Bet-Dagón, Naama, degi, Maceda. Bela we-neggweburmar gwaambe-gakanergwa (16) mergued, degi, e-neggwebur-burwiganase-bakale, ega uklesbalid.
JOS 15:42 Amba we-neggwebur-bamalad ega uklesbalid: Libna, Eter, Asán,
JOS 15:43 Jifta, Asena, Nezib,
JOS 15:44 Keila, Aczib, degi, Maresa. Bela we-neggweburmar gwabakebak (9) mergued, degi, e-neggwebur-burwiganase-bakale, ega uklesbalid.
JOS 15:45 Deginbali, Ecrón-neggwebur, degi, e-neggwebur-burwiganase-bakale, ega uklesbalid.
JOS 15:46 Ecrón-akar, Demar-Dummadye-nugadse bela Asdod-walik-yar-naid, degi, bela e-neggwebur-bukmalad, ega uklesbalid.
JOS 15:47 Asdod, degi, e-neggwebur-burwiganase-bakale, deginbali, Gaza-neggwebur, degi, e-neggwebur-burwiganase-bakale, Egipto-diwarse, degi, Demar-Dummadye-nugad-gakagi neggwebur-bukmalad ega uklesbalid.
JOS 15:48 Yalaganbali, Judá-waganga we-neggweburmar uklesbalid: Samir, Jatir, Soco,
JOS 15:49 Dana, Quiriat-Sana (Debirʼye-nugbalid),
JOS 15:50 Anab, Estemoa, Anim,
JOS 15:51 Gosén, Holón, degi, Gilo. Bela we-neggweburmar gwaambe-gakagwensak (11) mergued, degi, e-neggwebur-burwiganase-bakale, ega uklesbalid.
JOS 15:52 We-neggwebur-bamalad ega uklesbalid: Arab, Duma, Esán,
JOS 15:53 Janum, Bet-Tapúa, Afeca,
JOS 15:54 Humta, Quiriat-Arba (Hebrónʼye-nugbalid), degi, Sior. Bela we-neggweburmar gwabakebak (9) mergued, degi, e-neggwebur-burwiganase-bakale, ega uklesbalid.
JOS 15:55 Amba we-neggwebur-bamalad ega uklesbalid: Maón, Carmel, Zif, Juta,
JOS 15:56 Jezreel, Jocdeam, Zanoa,
JOS 15:57 Caín, Gabaa, degi, Timna. Bela we-neggweburmar gwaambe (10) mergued, degi, e-neggwebur-burwiganase-bakale, ega uklesbalid.
JOS 15:58 Deyobi, amba we-neggwebur-bamalad Judá-waganga uklesbalid: Halhul, Bet-Sur, Gedor,
JOS 15:59 Maarat, Bet-Anot, degi, Eltecón. Bela we-neggweburmar gwanergwa (6) mergued, degi, e-neggwebur-burwiganase-bakale, ega uklesbalid.
JOS 15:60 Deginbali, we-neggweburmar ega uklesbalid: Quiriat-Baal (Quiriat-Jearimʼye-nugbalid), degi, Rabá. We-neggweburmar-e-neggwebur-burwiganase-bakale, ega uklesbalid.
JOS 15:61 Nega-dulesulidganba we-neggweburmar ega uklesbalid: Bet-Arabá, Midín, Secaca,
JOS 15:62 Nibsán, Balu-neggwebur, degi, Engadi. Bela we-neggweburmar gwanergwa (6) mergued, degi, e-neggwebur-burwiganase-bakale, ega uklesbalid.
JOS 15:63 Judá-wagan, Jerusalénʼgi Jebuseo-dulemar gwen onossurmalad. A-ulale, we-garda-narmaklenaidse, Jerusalénʼgi Judá-wagan-abargi Jebuseo-dulemar gudimalad.
JOS 16:1 José-waganga-yar-uklesadi, Jericó-dii-sailamar-bukwad-dad-nakwedsik Jordán-diwargi onoded. Agine, nega-dulesulidganba Betel-yalaganba nakwided.
JOS 16:2 Betel, Luzʼye-nugbalid a-akale, onodbalid, geb bela Atarot-yargi namaid. Atarot-yargi, Arquita-dulemar-bukwad.
JOS 16:3 A-sorbali, dad-argwanedsik Jafleti-yargi aideded, urbalid-Bet-Horón-yar-abingunaidse. Agine, Gezerʼse warmakmaid, geb Demar-Dummadye nugadse bergunaid.
JOS 16:4 Weyobi, Manasés-wagan, degi, Efraín-wagan egadga-guega we-yarmar abingasad. Manasés, degi, Efraín, José-e-masmalad.
JOS 16:5 Efraín-wagan, na e-dadgan-e-dadganba we-yar abingasad: Dad-nakwedsiki e-yar-abingunaidi Atarot-Adar-akar onoded, nibalid-Bet-Horónʼse.
JOS 16:6 Agine yar-abingunaid onodbalid, Demar-Dummadye-nugadse. Dad-nakwed-argan-sapiledsik Micmetat-neggwebur-siidgi dad-nakwedsik Taanat-Siloʼse aibirided, geb agine Janoaʼse warmakmaid.
JOS 16:7 Janoa-akar Atarotʼse, degi, Naaratʼse aidemaid, degi Jericó-neggweburgi namaid, geb Jordán-diwarse nomaid.
JOS 16:8 Tapúa-akar, yar-abingunaidi dad-argwanedsik bilided Caná-dian-maidse, geb Demar-Dummadye nugadse bergunaid. We-yarmala, Efraín-wagan na e-dadgan-e-dadganba abingasmalad.
JOS 16:9 Deginbali, Efraín-waganga, Manasés-waganga-yar-uklesad-abargi neggweburmar, degi, e-neggwebur-burwigana-bukwamaladi, ega uklesbalid.
JOS 16:10 Efraín-wagan Canaán-dulemar-Gezer-yargi-bukmalad onossur gusad. A-ulale, Canaán-dulemar, Efraín-wagan-abargi, we-garda-narmaklenaidse amba gudimalad. Degi-inigwele, Israel-dulemar we-dulemar e-maiga imaksamalad, ega arbaega imaksamalad.
JOS 17:1 Manasés-wagangala amba yar uklesmogad, ar ade, Manasés José-e-machi-sailaginedid. Manasés-e-machi-dummadi Maquirʼye nugad. Maquirʼde Galaad-e-babad. Maquir dule-bila-onoged-buled gusad. Maquirʼga Galaad-yar, degi, Basán-yar uklesad.
JOS 17:2 Manasés-masmala-baiganga na e-mimmigan-merguedba ega yar uklesmogad. Masmalade, wemalad: Abiezer, Helec, Asriel, Siquem, Hefer, degi, Semida. Wemala, Manasés-e-masmalad, José-e-wagan.
JOS 17:3 Dakargua, Manasés-wagwa-yarganbalid, Galaad-wagwa-Hefer-machi-Zelofehad, unnila bunamalabi nikusad, machimaladi nikussulid. A-bunamalade weyob nugmalad: Maala, Noa, Hogla, Milca, degi, Tirsa.
JOS 17:4 We-bunamala dule-irwa-Bab-Dummadse-goled-Eleazarʼse, Nun-machi-Josuéʼse, degi, Israel-sapin-dummaganse nonimalad, ega sognonimalad: “Bab-Jehová Moisésʼga igar-uksagusad, anmar-gwenadganga-yar-uklegoed-abargi anmarga nainu ukmarmogoye.” Geb degine, Josué, Bab-Jehová ega igar-uksadba, we-bunamalaga e-gilormar-nainumar-abargi nainu ega uksad.
JOS 17:5 Degidbali, Manasés-wagan Jordán-diwar-dad-argwanedsik napaneg sogambe (10) abingasmalad. Deginbali, Jordán-diwar-dad-nakwedsik Galaad-yar-naid, degi, Basán-yar-naid abingasmarbalid.
JOS 17:6 Weyobi-dungu Manasés-wagan yar gasad, ar ade, Manasés-e-wagan-bunamalaga na e-gwenadgan-macherganga-nainumar-uklesayobi nainumar ega uklesmarmogad. Galaad-yala Manasés-e-wagan-baigangadga gusad.
JOS 17:7 Manasés-wagan-e-yala, Aser-wagan-e-yar-abingunaidgi onoalid, Micmetat-neggweburse. Micmetatʼde, Siquem-dad-nakwedsik siid. Agi yar-abingunaidi, dad-nakwed-argan-nuedsik nadbalid, Tapúa-dii aryogwichidse.
JOS 17:8 Tapúa-napanegmar, Manasés-wagangadbalid. Ar Manasés-wagan-e-yar-abingunaidgi Tapúa-neggwebur-siiddi, Efraín-wagangadid.
JOS 17:9 Yar-abingunaidi, dad-nakwed-argan-nuedsiki Caná-dian-dad-nakwed-argan-sapiledsik nadbalid, Demar-Dummadye nugadse. We-napaneg-naidgine, Efraín-wagan-e-neggweburmar-bukidar, Manasés-wagan-e-neggweburmarbo oburar bukwamalad.
JOS 17:10 Yarmar-dad-nakwed-argan-nuedsik-naidi, Efraín-wagangadid. Dad-nakwed-argan-sapiledsik-naiddi, Manasés-wagangadid. Manasés-wagan-e-yala, Demar-Dummadye-nugadse monaid. Geb dad-nakwed-argan-sapiledsiki, Aser-wagan-e-yarbo abingunaid. Dad-nakwedsikdi Isacar-wagan-e-yarbo abingunabalid.
JOS 17:11 Manasés-waganga, Isacar-wagan-e-yargi, degi, Aser-wagan-e-yargi, we-neggweburmar na e-neggweburmar-burwiganase-bakale, ega uklesad: Bet-Seán, Ibleam, Dor, Endor, Taanac, degi, Meguido. Sogbaagi-neggwebur-narmakar-naidi demar-gakagi siid.
JOS 17:12 Degi-inigwele, Manasés-wagan we-neggweburmar sussulid, ar ade, Canaán-dulemar mer ainiega ganna-bukusmalad. A-ulale, Canaán-dulemar amba agi bukwa gusmalad.
JOS 17:13 Israel-dulemar gangued nikudmargua, e-maiga Canaán-dulemar-imaksamalad. Degi-inigwele, a-yargine bela Canaán-dulemar-onossurgusmalad.
JOS 17:14 José-wagan, Josuéʼga sogdemalad: —¿Ibiga unnila be anmarga yar-saguar uksa? Emide, anmarde, dule-bukidar gued, deginbali, Bab-Jehová bela-belad anmargi ise-nued binsasbalid.
JOS 17:15 Geb degine, Josué abin-sogded: —Ar bemarde dule-bukidargusoggu, degi, bemarga Efraín-yar-mullugan-bukwad-uklesad unnisurgusoggu, bemar Ferezeo-dulemar-yargi sapurgan-nanaidse, degi, Refa-dulemar-yargi sapurgan-nanaidse be namar. Agi bemar na bukuega sapimar be oimalo.
JOS 17:16 José-wagan, Josué-abin sogdemalad: —Efraín-yar-mullugana anmarga unnisulid. Ar bela Canaán-dulemar-nebagi-bukwamaladi ur-bila-onomalad-esgorobiid nikamalad. Deyopira, Bet-Seán-dulemar, degi, e-neggwebur-burwiganagi-bukmaladi ur-bila-onomalad-esgorobiid nikamarmogad. Amba deyobi, Jezreel-nebagi dulemar-bukwamaladi ur-bila-onomalad-esgorobiid nikamarmogad.
JOS 17:17 Josuéʼdi, José-wagan Efraín-dulemarga, degi, Manasés-dulemarga sogded: —Bemar dule-bukidar gumalad, degi, bela-bela gangued nikamarbalid. Bemar unnila yar-saguar nikumalosulid.
JOS 17:18 Bemar napa-sapurbi-naid sumarbaloed. Agi bemar sapi oimaloed, geb bela we-sapur-naidi bemargadga guoed. Ar Canaán-dulemar ur-bila-onomalad-esgorobiid-nikamala-inigwele, degi, dutusur-gumarbar-inigwele, bemar we-dulemar onioed.
JOS 18:1 Israel-dulemar yar-sunonimargua, bela Israel-dulemar Silo-neggweburgi bia Bab-Dummad-dulemarbo-ambikued-neg-osismaladgi onmaknonimalad.
JOS 18:2 Deunni, Israel-dadgan-warambe-gakabogwad-gued-abargine (12), dadgan-walagugled-e-waganga (7) amba yoo yarmar ukleged.
JOS 18:3 Degisoggu, Josué Israel-dulemarga sogded: “Be-babgan-e-Bab-Dummad-Jehová bemarga yar-uksadi, ¿sanagwadse bemar abitogoe, a-yar-suega?
JOS 18:4 Bemar, dadgan-warambe-gakabogwad-war-wargwengi, dulemar-walapaa-walapaa nugsamala, adi, an napanegmar-arganamalaga barmidegar. Geb amala, igi-yarmar-daklege, na gardagi sobmaloed.
JOS 18:5 ”Geb gannar nonimalale, sogagugle (7) napanegmar mimimaloed. Judá-e-wagan dad-nakwed-argan-nuedsiki yar gamaloed. José-e-wagandi, dad-nakwed-argan-sapiledsiki yar gamarmogoed.
JOS 18:6 Sogagugle (7) yarmar-mimilegoed-sobsad-sorbali, anga be sedamaloed, geb an anmar-Bab-Dummad-Jehová-asabin ibmargi-wilubdaklegar an bemarga a-yarmar ukoed.
JOS 18:7 Bato bemar wissoggu, Leví-wagandi bemar-abargi napanegmar nikuosulid, ar amardi Bab-Jehová-asabin dule-irwa-goledgi arbadii gumaloed. Deginbali, Gad-wagan, Rubén-wagan, degi, Manasés-wagan-negabalad bato Jordán-diwar-dad-nakwedsiki yar abingasmalad. Bab-Jehová-e-mai-Moisés, amargala we-yarmar egadga-guega uksad.”
JOS 18:8 Dule-neg-arganaega-sulesmaladi, yar-arganaega nasokarmargua, Josué ega igar-uksad: “Bela yar-naid be arganamar, geb bela e-napanegmar-nanaid gardagi-sobale be anga senonimaloed. Bemar gannar Siloʼse nonimalale, an Bab-Jehová-asabin ibmargi-wilubdaklegar a-yar mimioed.”
JOS 18:9 We-dulemar ar igi Josué ega ibmar sogsa, deyobi imaksamalad. Bela yar-naidgi neggweburmar-bukwad sogagugle (7) danar-danar mimismalad, geb gardagi narmakar Silo-neggweburse Josuéʼse senonimalad.
JOS 18:10 Josué Silo-neggweburgi Bab-Jehová-asabin ibmargi-wilubdaklegar Israel-dulemarga na e-dad-dummad-e-dad-dummadba yar mimisad.
JOS 18:11 Benjamín-waganga na e-dadgan-e-dadganba yar-uklesad. We-yala, Judá-wagan-e-yar-naid, degi, José-wagan-e-yar-naid, amar-abargi nagusad.
JOS 18:12 Dad-nakwed-sapiledsik yar-abingunaidi, Jordán-diwargi onoded, geb Jericó-dad-nakwed-argan-sapiledsiki yar-mullu-siidba nakwemaid. Agine, dad-argwanedsiki, yarmar-bukwadsik namaid, geb Bet-Avén-nega-dulesulidganse momaid.
JOS 18:13 Yar-abingunaidi, Luz-neggwebur dad-nakwed-argan-nuedsik nadbalid. (Luz, Betelʼye-nugbalid). Geb Atarot-Adar-akale aidemaid, Urbalid-Bet-Horón dad-nakwed-argan-nuedsik yar-mullu-siidse.
JOS 18:14 Agi yar-abingunaid dad-nakwed-argan-nuedsik bilided, yar-mullu-Bet-Horón-abin siid dad-argwanedsik, geb Quiriat-Baalʼse momaid. (Quiriat-Baal, Quiriat-Jearimʼye nugbalid). We-Quiriat-Jearim-neggwebur, Judá-wagangadid. We dad-argwanedsik Benjamín-wagan-e-yar-abingunaidid.
JOS 18:15 Dad-nakwed-argan-nuedsik Benjamín-wagan-e-yar-abingunaidi Quiriat-Jearim-duku-akar onoded, geb dad-argwanedsik Neftoa-diisaila-aryogwichidse nomaid.
JOS 18:16 Geb sorbali, Ben-Hinom-neba-asabin yar-siid-dikargi aideded, Refaim-neba-dad-nakwed-argan-sapiledsik. Geb Hinom-nebaba aidedbalid, Jebuseo-neggwebur-dad-nakwed-argan-nuedsik. Agi Rogel-dii-sailase aideded.
JOS 18:17 Agi dad-nakwed-argan-sapiledsik bilided, geb En-Semesʼse nomaid. Agi Adumín-nakwemaid-asabin, Gelilot-siidba namaid. Geb Rubén-machi-Bohánʼye-nugad-e-akwase aidemaid.
JOS 18:18 Benjamín-wagan-e-yar-abingunaidi, Arabá-asabin yarmar-mullugan-siid-dad-nakwed-argan-sapiledsik nadbalid, geb Arabá-nebase aidemaid.
JOS 18:19 Agi nadbalid, Bet-Hogla-dad-nakwed-argan-sapiledsik, geb bergunaid demar-sukun-siidgi, bia Jordán-diwar-gaka-nomai, Demar-Gagbidye-nugad-dad-nakwed-argan-sapiledsik. We dad-nakwed-argan-nuedsik Benjamín-wagan-e-yar-abingunaidid.
JOS 18:20 Dad-nakwedsiki, Jordán-diwar Benjamín-wagan-e-yar abingunaidid. Wemala, Benjamín-waganga na e-dadgan-e-dadganba-yar-uklesad abingunanaidid.
JOS 18:21 Benjamín-waganga na e-dadgan-e-dadganba we-neggweburmar susmalad: Jericó, Bet-Hogla, Casis-neba,
JOS 18:22 Bet-Arabá, Zemaraim, Betel.
JOS 18:23 Avim, Pará, Ofra,
JOS 18:24 Quefar-Haamoni, Ofni, Geba. We-neggwebur-gwaambe-gakabogwad (12) e-neggwebur-burwiganase-bakale, ega uklesad.
JOS 18:25 Deginbali, we-neggweburmar susmarbalid: Gabaón, Ramá, Beerot,
JOS 18:26 Mizpa, Cafira, Mozah,
JOS 18:27 Requem, Irpeel, Tarala,
JOS 18:28 Zela, Elef, Jebús (Jerusalénʼye-nugbalid), Gabaa, degi, Quiriat. We-neggwebur-gwaambe-gakabakegwad (14) na e-neggwebur-burwiganase-bakale, ega uklesad. We-yarmar Benjamín-e-waganga na e-dadgan-e-dadganba ega uklesad.
JOS 19:1 Benjamín-wagan-sorbali, Simeón-waganga na e-dadgan-e-dadganba yar uklesad. Simeón-wagan-e-napanegmar Judá-wagan-yar-naid-yagi nagusad.
JOS 19:2 Simeón-waganga we-neggweburmar uklesad: Beerseba (Seba), Molada,
JOS 19:3 Hazar-Sual, Bala, Ezem,
JOS 19:4 Eltolad, Betul, Horma,
JOS 19:5 Siclag, Bet-Marcabot, Hazar-Susa,
JOS 19:6 Bet-Lebaot, degi, Saruhén. We-neggwebur-gwaambe-gakapaagwad (13) e-neggwebur-burwiganase-bakale, ega uklesad.
JOS 19:7 We-neggweburmar ega uklesbalid: Aín, Rimón, Eter, degi, Asán. We-neggwebur-gwabakegwad e-neggwebur-burwiganase-bakale, ega uklesad.
JOS 19:8 Deginbali, we-neggweburmar-dikarba bela neggwebur-burwigana-bukwadse-bakale, Baalat-Beerʼse ega uklesbalid. Baalat-Beerʼde Ramat-neggweburad, Neguev-yargi siid. We-napanegmar, Simeón-waganga na e-dadgan-e-dadganba ega uklesad.
JOS 19:9 Judá-wagan yar doggus-dummarba-nikusad. Degisoggu, e-dulemargi napaneg obine gusad. A-ulale, Simeón-waganga Judá-wagan-e-yargi napanegmar uklesad.
JOS 19:10 Simeón-wagan-sorbali, Zabulón-waganga na e-dadgan-e-dadganba yar-uklesad. E-yar-abingunaidi, Saridʼse dungue naid.
JOS 19:11 Dad-argwanedsik yar-abingunaidi, Maralaʼsik namaid, geb Dabesetʼse warmakmaid, Jocneam-asabin dian-maidse bergunaid.
JOS 19:12 Yar-abingunaidi, Sarid-akale dad-nakwedsik aibirided, bia dad-nakwiardaedsik, geb Quislot-Tabor-yar-abingunaidse momaid. A-sorbali, Daberatʼse warmakmaid, geb Jafíaʼse nakwemaid.
JOS 19:13 Agi yar-abingunaidi, dad-nakwedsik Gat-Heferʼsik nadbalid. Ita-Cazínʼgi namaid, degi Rimónʼse momaid. Geb Neaʼsik aibirided.
JOS 19:14 Geb agi yar-abingunaidi, dad-nakwed-argan-sapiledsik-aibirided, Hanatónʼse warmakmaid, geb Jefte-El-nebase bergunaid.
JOS 19:15 We-yar-yagi neggweburmar-gwaambe-gakabo (12), degi, e-neggweburmar-burwiganase-bakale, dogar bukwad. A-neggweburmar wemalad: Catat, Naalal, Simrón, Idala, degi, Belén.
JOS 19:16 We-yala Zabulón-waganga na e-dadgan-e-dadganba, ega uklesad. Deginbali, we-yar-yagi neggweburmar-bukwad, degi, e-neggwebur-burwiganase-bakale, ega uklesbalid.
JOS 19:17 Zabulón-wagan-sorbali, Isacar-waganga na e-dadgan-e-dadganba yar uklesad.
JOS 19:18 Isacar-waganga-yar-uklesad-yagi, we-neggweburmar bukwad: Jezreel, Quesulot, Sunem,
JOS 19:19 Hafaraim, Sihón, Anaharat,
JOS 19:20 Rabit, Quisión, Abez,
JOS 19:21 Remet, En-Ganim, En-Hada, degi, Bet-Pases.
JOS 19:22 We-yar-abingunaidi, Tabor-yarse, Sahazima-neggweburse, degi, Bet-Semes-neggweburse momaid, geb Jordán-diwarse bergunaid. Bela neggwebur-gwaambe-gakanergwa-mergue (16), degi, e-neggwebur-burwiganase-bakale,
JOS 19:23 Isacar-waganga na e-dadgan-e-dadganba, ega uklesad.
JOS 19:24 Isacar-wagan-sorbali, Aser-waganga na e-dadgan-e-dadganba yar uklesad.
JOS 19:25 Aser-waganga-yar-uklesadyagi, we-neggweburmar bukwad: Helcat, Halí, Betén, Acsaf,
JOS 19:26 Alamelec, Amad, degi, Miseal. E-yar-abingunaidi dad-argwanedsiki Carmelo-yarse, degi, Sihor-Libnatʼse warmakmaid.
JOS 19:27 Geb agi dad-nakwedsik aibirided, Bet-Dagónʼye-neg-nugadsik, geb Jefte-El-nebagi Zabulón-wagan-yarse warmakmaid. A-sorbali, dad-nakwed-argan-sapiledsiki Bet-Emecʼsik, degi, Neielʼsik namaid. Geb dad-nakwed-argan-sapiledsiki Cabulʼse nomaid.
JOS 19:28 Yar-abingunaidi, Hebrónʼsik, Rehobʼsik, Hamónʼsik, Canáʼsik nadbalid, Sidón-neggwebur-dummadse warmakmaid.
JOS 19:29 A-sorbali, Ramáʼsik bilided. Agi Tiro-neggwebur-sakdigar-siidse warmakmaid. A-sorbali, Hosaʼsik bilided, degi, Aczib-yar-akale, Demar-Dummadye-nugadse nomaid.
JOS 19:30 We-yar-yagi Uma, Afec, degi, Rehob, bukwamarbalid. Bela neggwebur-gwadulagwen-gakabo-mergue (22), degi, e-neggwebur-burwiganase-bakale, ega uklesbalid.
JOS 19:31 We-yala Aser-waganga na e-dadgan-e-dadganba ega uklesad. Deginbali, we-yar-yagi neggweburmar-bukwad, degi, e-neggwebur-burwiganase-bakale, ega uklesbalid.
JOS 19:32 Aser-wagan-sorbali, Neftalí-waganga na e-dadgan-e-dadganba yar uklesad.
JOS 19:33 Neftalí-wagan-e-yar-abingunaidi, Helef-neggwebur-akar, degi, Alón-Saananim-sapi-dummad-gwichidgi onoalid. Adami-Neceb-neggweburba, degi, Jabneel-neggweburba namaid, Lacumʼse. Geb Jordán-diwarse bergunaid.
JOS 19:34 Dad-argwanedsik, Neftalí-wagan-e-yar-abingunaidi, Aznot-Tabor-neggwebursik bilided. Agi, Hucoc-neggweburse warmakmaid. Geb dad-nakwed-argan-nuedsik, Zabulón-wagan-e-yar-abingunaidba namaid. Dad-argwanedsiki, Neftalí-wagan-e-yar, Aser-wagan-e-yarbo abingunaid. Dad-nakwedsiki, Neftalí-wagan-e-yar Jordán-diwarba Judá-wagan-e-yarbo abingunaid.
JOS 19:35 E-neggwebur-ise-sakdigar-bukwamaladi, wemalad: Sidim, Zer, Hamat, Racat, Cineret,
JOS 19:36 Adama, Ramá, Hazor,
JOS 19:37 Cedes, Edrei, En-Hazor,
JOS 19:38 Irón, Migdal-El, Horem, Bet-Anat, degi, Bet-Semes. Bela neggwebur-gwaambe-gakabakebak (19), degi, e-neggwebur-burwiganase-bakale, ega uklesad.
JOS 19:39 We-yala, Neftalí-waganga na e-dadgan-e-dadganba ega uklesad. Deginbali, we-yar-yagi neggweburmar-bukwad, degi, e-neggweburmar-burwiganase-bakale, ega uklesbalid.
JOS 19:40 Neftalí-wagan-sorbali, Dan-waganga na e-dadgan-e-dadganba yar uklesad.
JOS 19:41 Dan-waganga yar-uklesadgine, we-neggweburmar bukwad: Zora, Estaol, Ir-Semes,
JOS 19:42 Saalabín, Ajalón, Jetla,
JOS 19:43 Elón, Timnat, Ecrón,
JOS 19:44 Elteque, Gibetón, Baalat,
JOS 19:45 Jehúd, Bene-Berac, Gat-Rimón,
JOS 19:46 Mejarcón, Racón. Degi, Jope-asabin yar-naid ega uklesbalid.
JOS 19:47 Ar we-yar-ega-uklesad amba Dan-waganga galakussoggu, Lesem-neggwebur-suega ase bila-onoapgusmalad. Geb Lesem-neggweburgi-ubosmargua, bela e-dulemar es-suidgi ogilosmalad. A-sorbali, Dan-dulemar egi ambikusmalad. Geb e-dad-dummadba we-neggwebur Danʼye onugsasmalad.
JOS 19:48 Weyobi Dan-waganga na e-dadgan-e-dadganba ega yar uklesad. Deginbali, we-yar-yagi neggweburmar-bukwad, degi, e-neggweburmar-burwiganase-bakale, ega uklesbalid.
JOS 19:49 Israel-dulemar na e-dadgan-e-dadganba yar-mimismalad-sorbali, na emar-yar-abargi Nun-machi-Josuéʼga napaneg uksamarmogad.
JOS 19:50 Deyobi, Bab-Jehová igar-uksadba imaksamalad. Josué, Efraín-yalaganba Timnat-Sera-neggwebur-siid abingasad. Ar Josué we-neggwebur na egichagusad. Degisoggu, gannar a-neggwebur sobsa gusad. Geb agi megisad.
JOS 19:51 Weyobi, dule-irwa-Bab-Dummadse-goled-Eleazar, Nun-machi-Josué, degi, Israel-dadgan-warambe-gakabogwad-e-dummagan (12), Israel-dulemarga yar-mimied bergusmalad. Silo-neggweburgi, Bab-Dummad-dulemarbo-ambikued-neg-dogedgi, Bab-Jehová-asabin ibmargi-wilubdaklegar yar mimismalad.
JOS 20:1 Bab-Jehová Josuéʼga sogded:
JOS 20:2 “Ar igi ani, Bab-Jehová, Moisésʼba bega sogsa gusa, deyobi be Israel-dulemarga soge: ‘Bemala abar-neggweburmar dukuega nugsamarye.
JOS 20:3 Adi, dule-wargwen, dule-baid-yamo-oburgwebisuli oburgwisale, sunna dule-burgwisad-bugedmai-imaked-iduar, a-neggweburmarse dukunaed.
JOS 20:4 ” ’Dule-emar-oburgwisadi, a-neggwebur-gwagwense wakitele, a-neggwebur-dogedgi girmar-dummagan-igar-nabomaladga e-ibmar-imaksad sogoed. Geb deyobi girmar-dummagan a-neggweburgi we-dule-abingamaloed, geb emar-abargi-megega ega neg ukmaloed.
JOS 20:5 Ar dule-burgwisad-bugedmai-imaked a-neggweburse, dule-emar-oburgwisad-baleginnadele, girmar-dummagan dule-emar-oburgwisad ega ukosulid. Ar ade, dule-emar-oburgwisadi dule-baid-yamo-oburgwissulid, deginbali, isdar daksurbalid.
JOS 20:6 Dule-emar-oburgwisadi, bela dulemar-asabin ega-igar-itolegedse, degi, dule-irwa-Bab-Dummadse-goled-e-dummadga-maid-burgwedse, a-neggweburgi gudii guoed. Unnila a-sorbali, dule-emar-oburgwisadi na gannar e-negse, degi, biti-neggweburgi-wakinnar-gusadse sunna nonikoed.’ ”
JOS 20:7 Geb degine, Josué-igar-uksadba, Israel-dulemar, we-neggweburmar dukuega nug-imaksamalad: Neftalí-wagan-yarmar-bukwadgi, Galilea-yargi, Cedes-neggwebur. Efraín-wagan-yarmar-bukwadgi, Siquem-neggwebur. Judá-wagan-yarmar-bukwadgi, Quiriat-Arba-neggwebur. (Quiriat-Arba, Hebrónʼye nugbalid).
JOS 20:8 Jordán-diwar-dad-nakwedsik, we-neggweburmar-gwapaagwad nug-imaksamarbalid: Rubén-wagan-yargi, Jericó-dad-nakwedsik nega-dulesulidgan-naid-nebagi, Beser-neggwebur. Gad-wagan-yargi, Galaadʼgi Ramot-neggwebur. Manasés-wagan-yargi, Basánʼgi Golán-neggwebur.
JOS 20:9 Bela Israel-dulemar, degi, Israel-dulesurmalad, dule-baid-yamo-oburgwebisuli oburgwisale, sunna we-neggweburmar-gwagwense wakinned. Adi, amba yoo dulemar-asabin ega-igar-itoleged-iduar, mer dule-burgwisad-bugedmai-imakedse burgwegar.
JOS 21:1 Leví-wagan-e-dummagan, dule-irwa-Bab-Dummadse-goled-Eleazarʼse, Nun-machi-Josuéʼse, degi, Israel-dadgan-e-ambe-gakabogwad-e-wagan-dummaganse (12) nonimalad.
JOS 21:2 Wemarde, Canaán-yargi Silo-neggwebur-siidgi bukmalad. Geb ega sogdemalad: “Bab-Jehová Moisésʼba igar-uksagusad, anmar-megmalaga bemar anmarga neggweburmar ukoye, deginbali, anmar-ibdurgan-ambikumalaga napaneg anmarga ukbaloye.”
JOS 21:3 Degisoggu, Bab-Jehová-igar-uksadba, Israel-dulemar na e-yar-e-yargi, Leví-waganga neggweburmar, degi, ibmar-durgan-maega gagan-nanaid uksamalad.
JOS 21:4 Leví-waganga ibmargi-wilubdaklegar neggweburmar-ukleargua, gebedgi Coat-wagangar-inse uklesad. Coat-wagan, dule-irwa-Bab-Dummadse-goled-Aarón-wagan-gumalad. Amarga, Judá-wagan-yargi, Simeón-wagan-yargi, degi, Benjamín-wagan-yargi, neggwebur-gwaambe-gakapaa (13) ega uklesad.
JOS 21:5 Coat-wagan-baigangardi, Efraín-wagan-yargi, Dan-wagan-yargi, degi, Manasés-wagan-negabalad-yargi, neggwebur-gwaambe (10) ega uklesmogad.
JOS 21:6 A-sorbali, Gersón-wagangala, ibmargi-wilubdaklegar, Isacar-wagan-yargi, Aser-wagan-yargi, Neftalí-wagan-yargi, degi, Basánʼgi Manasés-wagan-negabalad-bukwad-yargi, neggwebur-gwaambe-gakapaa (13) ega uklesad.
JOS 21:7 Merari-wagangala, Rubén-wagan-yargi, Gad-wagan-yargi, degi, Zabulón-wagan-yargi, neggwebur-gwaambe-gakabo (12) ega uklesad.
JOS 21:8 Weyobi, Israel-dulemar, Bab-Jehová Moisésʼba igar-uksagusadba, Leví-waganga bela we-neggweburmar, degi, ibmar-durgan-maega e-gagan-nanaidse-bakale, uksamalad.
JOS 21:9 Neggweburmar-bilesokalid, Judá-wagan-e-yargi, degi, Simeón-wagan-e-yargi, Leví-waganga uklesad.
JOS 21:10 Leví-dulemar, Aarón-e-machi-Coatʼye-nugad-e-wagan we-neggweburmar abingasmalad. Ar ade, neggweburmar-ukega, ibmargi-wilubdakleargu, Coat-wagan-nug-inse sulenonikid.
JOS 21:11 Coat-wagangala, Judá-yar-mulluganba Quiriat-Arba-neggwebur (Hebrónʼye-nugbalid), degi, ibmar-durgan-maega e-gagan-nanaidse-bakale, ega uklesad. Arbaʼde, Anac-e-dad-dummad gusad.
JOS 21:12 Hebrón-yar-dikarba neggwebur-burwigana-bukwaddi, degi, sapurmar-nanaiddi, Leví-waganga uklessulid, ar ade, bato Jefone-machi-Calebʼga uklesad.
JOS 21:13 Dule-irwa-Bab-Dummadse-goled-Aarón-waganga Hebrón-neggwebur-ega-uklesad, (we-neggwebur dule-gindasmalad-dukuega nugsalesad). A-ukinbali, we-neggweburmar, degi, ibmar-durgan-maega e-gagan-nanaidse-bakale, ega uklesbalid: Libna,
JOS 21:14 Jatir, Estemoa,
JOS 21:15 Holón, Debir,
JOS 21:16 Aín, Juta, degi, Bet-Semes. We-neggwebur-gwabakebakad (9) Judá-wagan-e-yargi, degi, Simeón-wagan-e-yargi bukmalad.
JOS 21:17 Benjamín-wagan-e-yargi, we-neggweburmar, degi, ibmar-durgan-maega e-gagan-nanaidse-bakale, ega uklesbalid: Gabaón, Geba,
JOS 21:18 Anatot, degi, Almón. Bela neggwebur-gwabake ega uklesad.
JOS 21:19 Dule-irwa-Bab-Dummadse-goled-Aarón-e-waganga, bela neggwebur gwaambe-gakapaa (13), degi, ibmar-durgan-maega e-gagan-nanaidse-bakale, ega uklesad.
JOS 21:20 Leví-machi-Coatʼye-nugad-e-wagan-bamaladgardi, Efraín-wagan-e-yargi neggweburmar ega uklesad.
JOS 21:21 Efraín-yar-mulluganba Siquem-neggwebur uklesad. We-neggwebur, dule-gindasmalad-dukuega nugsalesad. Deginbali, we-neggweburmar ega uklesbalid: Gezer,
JOS 21:22 Kibsaim, degi, Bet-Horón. Bela neggwebur-gwabake, degi, ibmar-durgan-maega e-gagan-nanaidse-bakale, ega uklesad.
JOS 21:23 Dan-wagan-e-yargi we-neggweburmar ega uklesad: Elteque, Gibetón,
JOS 21:24 Ajalón, degi, Gat-Rimón. Bela neggwebur-gwabake, degi, ibmar-durgan-maega e-gagan-nanaidse-bakale, ega uklesad.
JOS 21:25 Manasés-wagan-negabalad-e-yargi, we-neggweburmar Leví-waganga uklesad: Taanac, degi, Gat-Rimón. Neggwebur-gwabo, degi, ibmar-durgan-maega e-gagan-nanaidse-bakale, ega uklesad.
JOS 21:26 Coat-wagan-baigangardi, bela neggwebur-gwaambe (10), degi, ibmar-durgan-maega e-gagan-nanaidse-bakale, ega uklesmogad.
JOS 21:27 Leví-machi-Gersónʼye-nugad-e-wagangardi, Manasés-wagan-negabalad-e-yargi, we-neggwebur-gwabo, degi, ibmar-durgan-maega e-gagan-nanaidse-bakale, ega uklesad: Basán-yalagagi, Golán-neggwebur. (We-neggwebur dule-gindasmalad-dukuega nugsalesad). Baiddi, Beestera.
JOS 21:28 Isacar-wagan-e-yargi, we-neggweburmar ega uklesad: Cisón, Daberat,
JOS 21:29 Jarmut, degi, En-Ganim. Bela neggwebur-gwabake, degi, ibmar-durgan-maega e-gagan-nanaidse-bakale, ega uklesad.
JOS 21:30 Aser-wagan-e-yargi, we-neggweburmar ega uklesad: Miseal, Abdón,
JOS 21:31 Helcat, degi, Rehob. Bela neggwebur-gwabake, degi, ibmar-durgan-maega e-gagan-nanaidse-bakale, ega uklesad.
JOS 21:32 Neftalí-wagan-e-yargi, we-neggwebur-gwapaa, degi, ibmar-durgan-maega e-gagan-nanaidse-bakale, ega uklesad: Galilea-yalagangi Cedes-neggwebur. (We-neggwebur dule-gindasmalad-dukuega nugsalesad). Hamot-Dor, degi, Cartán.
JOS 21:33 Gersón-waganga na e-dadgan-e-dadganba bela neggwebur-gwaambe-gakapaa (13), degi, ibmar-durgan-maega e-gagan-nanaidse-bakale, ega uklesad.
JOS 21:34 Leví-wagan-napi-besmalad, Merari-masmala-e-waganga, Zabulón-wagan-e-yargi, we-neggweburmar-gwabake, degi, ibmar-durgan-maega e-gagan-nanaidse-bakale, ega uklesad: Jocneam, Carta,
JOS 21:35 Dimna, degi, Naalal.
JOS 21:36 Rubén-wagan-e-yargi, we-neggweburmar-gwabake, degi, ibmar-durgan-maega e-gagan-nanaidse-bakale, ega uklesad: Beser, Jahaza,
JOS 21:37 Cademot, degi, Mefaat.
JOS 21:38 Gad-wagan-e-yargi, we-neggweburmar-gwabake, degi, ibmar-durgan-maega e-gagan-nanaidse-bakale, ega uklesad: Galaad-yalagi Ramot-neggwebur. (We-neggwebur dule-gindasmalad-dukuega nugsalesad).
JOS 21:39 Mahanaim, Hesbón, degi, Jazer.
JOS 21:40 Weyobi Leví-wagan-napi-besmalad Merari-masmala-e-wagan, bela neggwebur-gwaambe-gakabo (12) abingasmalad.
JOS 21:41 Leví-wagan, bela Israel-yargine neggwebur gwadulabo-gakabaabak (48), degi, ibmar-durgan-maega e-gagan-nanaidse-bakale, abingasmalad.
JOS 21:42 Bela we-neggweburmar-ebiris ibmar-durgan-maega gagan-nanaid.
JOS 21:43 Weyobi, Bab-Jehová Israel-dulemar-e-dadganga yar-ukoye sogsagusadi, Israel-dulemarga uksad. A-yargine, Israel-dulemar ambikusmalad.
JOS 21:44 Ar igi Bab-Jehová Israel-dulemar-e-dadganga neg-bogidikid-nasikoye-sogsagusa, deyobi, Bab-Jehová bela Israel-yargi neg-bogidikid nasiksad. Israel-dulemar-e-isdarmaladi, Israel-dulemargi gwen obichasurmalad, ar ade, Bab-Jehová, Israel-dulemar na e-isdarmaladgi-nakwega imaksad.
JOS 21:45 Bab-Jehová Israel-dulemarga-ibmar-sogsagusadi, bela ega imaksad. Wargwensaale, na ibmar-sogsagusad imaksasuli gussulid.
JOS 22:1 Geb Josué Rubén-waganse, Gad-waganse, degi, Manasés-wagan-negabaladse gochad.
JOS 22:2 Josué amarga sogded: “Bab-Jehová-e-mai-Moisés, bela bemarga-igar-uksadba bemar imaksamalad. Deginbali, bela an-bemarga-igar-ukedba bemar ibmar imakdibalid.
JOS 22:3 Bela ibagan-nasad-akale, emi-ibase bemar be-gwenadgan-bendakegala gwen egi be bangudisurmalad. Aka bur bemar bela Bab-Jehová-Igar-Mesisadba nanadimalad.
JOS 22:4 Ar igi be-Bab-Dummad-Jehová be-gwenadganga neg-bogidikid-nasikoye-sogsagusa, emidi, deyobi, Bab-Jehová be-gwenadganga neg-bogidikid nasiksad. Degisoggu, Jordán-diwar-dad-nakwedsik Bab-Jehová-e-mai-Moisés bemarga yar-uksa-gusadse, be-negse, be namarsun.
JOS 22:5 Unnila an bemarga sogdo, Bab-Jehová-e-mai-Moisés bemarga Igar-Mesisadba, Igar-Uksadba be innikigwadba nanadii imakmalo. A-igar weyob sogmaid: ‘Be-Bab-Dummad-Jehová be sabgumalo, a-sogedba be nanadii gumalo, Bab-Jehová-Igar-Maidba be ibsadii gumalo, egi be mer bipisaale bangumalo, degi, bela-bela be-gwage-ulubgi, be-sangi be Bab-Jehová-nug odummodii imakmalo.’ ”
JOS 22:6 Josué weyob ibmar-soged bergusgua, dulemarga sogdebalid: Bitigi Bab-Dummad bemargi nued binsasana gadinye. Geb a-sorbali, e-neg-e-negse dulemar-barmisad.
JOS 22:7 Moisés, Manasés-e-wagan-negabaladga bato Basán-yargi napamar uksagusad. Manasés-wagan-negabalad-baidgardi, Josué, Jordán-diwar-dad-argwanedsik, bia bur bule Israel-dulemar mergu-bukusa, agi ega yar uksamogad. Josué, Manasés-wagan-negabalad Basán-yargi napaneg-nikusmaladgi ise-nued-binsasad-sorbali, e-neg-e-negse barmisad.
JOS 22:8 Josué, weyob ega sogsagusad: “Bemar, we-ibmarmar-nuegan-nika be gannar be-negse namar: Or-nika, mani-nika, esgoro-gordikid-nika, esgoro-nika, mor-bukidar-nika, degi, moli-bebe-nikad-bukidar-nika be namar. Be be-isdarmalad-ibe we-ibmar-susmaladi, bemar be-gwenadganbo mimimalo.”
JOS 22:9 Deyobi Rubén-wagan, Gad-wagan, degi, Manasés-wagan-negabalad bela e-gwenadgan-Israel-dulemar-Canaán-yargi, Silo-neggweburgi-bukwamaladgi bangudmalad. Geb Galaad-yargi e-napaneg-nanaidse gannar nadmalad. We-yar, Bab-Jehová Moisésʼga-igar-uksagusadba wemarga uklesad.
JOS 22:10 Rubén-wagan, Gad-wagan, degi, Manasés-wagan-negabalad, amba Canaán-yargi, Jordán-diwar-gaka-mosmargua, ibmar-ogumakar-ukleged-aila-dummad sobsamalad.
JOS 22:11 E-gwenadgan-Israel-dulemar wisguarmalad, na emar-yargine Jordán-diwar-gakaba, Rubén-wagan, Gad-wagan, degi, Manasés-wagan-negabalad, ibmar-ogumakar-ukleged-aila sobsamarye.
JOS 22:12 Israel-dulemar deyob itoarmargua, bela Silo-neggweburgi ambikunonimalad, adi, Rubén-wagangi, Gad-wagangi, degi, Manasés-wagan-negabaladgi bila-ononamalagar.
JOS 22:13 Israel-dulemar Rubén-wagangi, Gad-wagangi, degi, Manasés-wagan-negabaladgi bila-ononaed-iduale, dule-irwa-Bab-Dummadse-goled-Eleazar-machi-Fineesʼye-nugad, Galaad-yarse barmismalad, adi, wemarbo sunmaknaegar.
JOS 22:14 Fineesʼba Israel-dulemar-e-dummagan-ambegi (10) nadmalad. We-dulemar, Israel-dadgan-dummagan-ambe-gued-war-wargwengi sulesmalad.
JOS 22:15 Finees, degi, dule-dummagan-eba-nadmalad, Galaad-yarse-mosmargua, Rubén-waganga, Gad-waganga, degi, Manasés-wagan-negabaladga sogdapmalad:
JOS 22:16 —Bela Bab-Jehová-dulamar wisgubimalad: ‘¿Ibiga bemar Israel-e-Bab-Dummadgi gwisgusmala? ¿Ibiga Bab-Jehováʼgi bemar bangude? Emide, bemar Bab-Jehováʼba-ibsabisurmalad-ulale, ibmar-ogumakar-ukleged-aila be sobsamalad.
JOS 22:17 Anmar Peor-yar-mullugi isgusgusadi, ¿be ebinsasurmarsi? A-isguedi amba anmargi-naid. Anmar-gwenadgan-bukidar-burgwisgusadgi, ¿anmar egi binsaed amissursi?
JOS 22:18 ¿Ibiga bemar Bab-Jehováʼgi nue-bangubimala? Emi, bemar, Bab-Jehováʼba ibsasurmalale, banedse bela Israel-dulemar Bab-Jehováʼse sabsur-odurdaklemaloed.
JOS 22:19 Ar bemarga-yar-uklesadi, nue-isgus-nai be dakmalale, bemar Bab-Jehová-yar-naidse dagmardo. Ar agi Bab-Jehováʼse-goled-neg siid. Be dagmala, anmar-abargi be megdamala. Ar degi-inigwele, unnila anmar bega soged, anmar-Bab-Jehováʼga ibmar-ogumakar-ukleged-aila, unnila wargwen-sobar-gwichi abeleged. Degisoggu, anmar bemarse egised ibmar-ogumakar-ukleged-aila-baid mer be sobmalo. Ar bemar sobsale, bemar Bab-Jehováʼgi, degi, anmargi yolemaloed.
JOS 22:20 Zera-machi-Acán-ibmar-imaksad melle iemala, ar a-dule ibmar-berguega-ukabsalesad atursasgusad. A-ulale, Bab-Dummad bela Israel-dulemar sabsur-odurdaksa gusad. Ebinsamalo, Acánʼbi e-isgued-ular burgwissulid, bukidar eba burgwis gusmarmogad.’
JOS 22:21 Geb degine, Rubén-wagan, Gad-wagan, degi, Manasés-wagan-negabalad Israel-dulemar-e-dummaganga sogdemalad:
JOS 22:22 —Anmar-Bab-Dummad-Jehová bab-dummadyob-ibmar-imaklemalad-e-Bab-Dummad, na nue-wisid, anmar egi-yolegega, degi, egi-aibanega, we-ibmar-ukleged-aila sobsasulid. Ar bemar we-wisgubi anmar abemogad. Ar deyobsulile, Bab-Jehová mer bar dula-gudii anmar-imakdo.
JOS 22:23 Ar anmar we-ibmar-ogumakar-ukleged-aila Bab-Jehováʼgi-banguega sobsale, igidibe, a-ailagi Moisés-sogsadba Bab-Jehováʼga ibmar-ukleged-ukegarbardibe, adi, na Bab-Jehová-sunnad anmar-sabsur-odurdaksundo.
JOS 22:24 ”Anmar yoedse ibmar-guoedgi-binsae we-aila sobsad. Anmar dobe-itoged, abakalegi yoedsega be-wagan, anmar-waganga sokalile: ‘Bemar Rubén-wagan, Gad-wagan,
JOS 22:25 Israel-e-Bab-Dummad-Jehová, ar bemar-Bab-Dummadsulid. Bemar anmargi-bachiki-bukumalaga Bab-Jehová Jordán-diwar mesisad.’ Degisoggu, Bab-Jehová, bemar-Bab-Dummadsulid. Ar deyobi bemar-wagan, mer bar Bab-Jehová-dobekwaa-nanaega anmar-wagan-imakoed.
JOS 22:26 ”Anmar weyob binsaed-ulale, anmar we-ibmar-ogumakar-ukleged-aila sobsamalad. We-aila anmar sobsasulid, agi ibmar-ogumakar ukega, degi, Bab-Jehováʼga ibmar-ukleged ukegarbar.
JOS 22:27 Anmar we-aila-sobsad, adi, anmarga, bemarga, degi, anmar-wagan-danimaloedga oyogega, sunna anmar Bab-Jehováʼse-goled-neggi Bab-Jehová-nug-odummomoye, degi, sunna anmar ibmar-ogumakar-ukleged-akar-akarad ega ukbarye. Deyobi, yoedse be-wagan, anmar-waganga sogosulid: ‘Bab-Jehová, bemar-Bab-Dummadsurye.’
JOS 22:28 ”Degisoggu, anmar binsamalad, ibagwengi be-wagan, anmarga, degi, anmar-waganga deyob sokarmalale, anmar weyob abinsaoed: ‘Be dakmala, anmar-babgan Bab-Jehováʼga-ibmar-ogumakar-ukleged-aila-sobsadi, ar bemar-yargi-gwichidbo daklemogad. We-aila soblessulid, e-birgi ibmar-ogumakar-ukleged-ukega, suli, unnila we-aila-soblesad, adi, anmarga, degi, bemarga oyogegar, anmarde Bab-Jehová-nug odummomarmoye.’
JOS 22:29 Napiragwadgi anmar bemarga soged, anmar Bab-Jehováʼgi gwen nossulid. Anmar Bab-Jehováʼga ibmar-ogumakar-ukega aila-gwagwen sobsasurbalid. Deginbali, Siloʼgi Bab-Jehováʼse-goled-neg-asabin-aila-gwichid-muchub, aila-baid anmar ogwisbisurbalid.”
JOS 22:30 Rubén-wagan, Gad-wagan, degi, Manasés-wagan-negabalad-weyob-ibmar-sogsamaladi, dule-irwa-Bab-Dummadse-goled-Finees, Israel-sapin-dummagan, degi, miliba (1,000) sordamar-e-dummaganga-gudidiid, nabir-itosmalad.
JOS 22:31 Geb degine, dule-irwa-Bab-Dummadse-goled-Eleazar-machi-Finees we-dulemarga sogded: —Emidi, anmar magar-itoged, Bab-Jehová anmar-abargi gudiid. Ar ade, bemar Bab-Jehováʼgi nobigussulid. Degisoggu, Bab-Jehová-anmar-sabsur-odurdakoenadgi bemar anmar-bendaksad.
JOS 22:32 A-sorbali, dule-irwa-Bab-Dummadse-goled-Eleazar-machi-Finees, degi, Israel-sapin-dummagan, Rubén-waganga, degi, Gad-waganga degimaloye sogsamalad. Geb gannar Canaán-yarse dagmalagala Galaad-yargi armalad, adi, Israel-dulemarga bela-ibmar-gusadi sogmalagar.
JOS 22:33 Bela Israel-dulemar, ega ibmar-sognonimaladi, nabir-itosmalad, degi, Bab-Dummad-nug odummosmalad. Degidbali, Israel-dulemar Rubén-wagangi, Gad-wagangi-bila-ononaedgi bar sunmaksasurmalad. Deginbali, Rubén-wagan-e-yar, degi, Gad-wagan-e-yar-oberguedgi bar sunmaksasurmarbalid.
JOS 22:34 Rubén-wagan, degi, Gad-wagan ibmar-ogumakar-ukleged-aila-sobsad onugsasmalad, Edʼye. Ar ade, sogmalad: “We-aila, anmarga, degi, emarga oyogoye, Bab-Jehová, Bab-Dummad guye.”
JOS 23:1 Dikasurgus, Bab-Jehová Israel-dulemarga e-isdarmalad-Canaán-dulemarbo neg-bogidikid-nasiksad-sorbali, Josué bato nue selebagusadgi,
JOS 23:2 bela Israel-dulemarse, Israel-girmar-dummaganse, Israel-sapin-dummaganse, Israel-igar-nabomaladse, degi, Israel-sordamar-idudimaladse gochad. Geb amarga Josué sogsad: “Bato an nue selebagusad. Bato birgamar angi obingusad.
JOS 23:3 Ar bemar-sunnad na be daksamalad, igi Bab-Jehová, bemargi nued-binsaed-ular, we-dulemar-yar-baidgi-bukwamalad imaksagusa. Ar Bab-Jehová bemar-anar bila-onosgusad.
JOS 23:4 We-yarmar an bemarga be-dadgan-dummagan-war-wargwengi ibmargi-wilubdaklegar mimisgusad. Unnila an bemarga bato yar-sulesmaladbi mimissulid. An bemarga Jordán-diwar-akar, dad-argwanedsik Demar-Dummadye-nugadse amba yoo-yarmar-sulenaid mimisbalid.
JOS 23:5 Anmar-Bab-Dummad-Jehová, dulemar-a-yargi-bukwamaladi bemar-idu onioed. Ar igi bemarga Bab-Dummad-Jehová-sogsagusa, deyobi bemar a-yarmar sumaloed.
JOS 23:6 ”Degisoggu, an bemarga sogsunnad, bela Moisés-Igar-Narmakar-Mamaidba, be sogedba ibsamalo. Melle bipisaale a-Igar-Maidgi be aibanmalo.
JOS 23:7 Melle dule-baigan-amba-bemar-abargi-besmaladba be apurmalo. Melle e-bab-dummagan-nug be odummomalo, melle e-bab-dummagan-nuggi be ise-sogar ibmar sogmarbalo, deginbali, melle bipisaale e-bab-dummagan-nug be obarmarbalo.
JOS 23:8 Ar igi bemar, emidse, Bab-Jehová-sogedba nanadii, deyobi bemar Bab-Dummad-Jehová-sogedba nanadii imakmalo.
JOS 23:9 Bab-Dummad-Jehová we-neggwebur-dummagan-bebo-ulusmaladi, bega onisad. Emi-ibasega, we-neggweburmar bemargi obindisurmalad.
JOS 23:10 Ar igi Bab-Jehová bemarga sogsagusa, deyobi be-dule-wargwen, sunna miligwen (1,000) be-isdarmalad-oduurmakega imaked. Ar Bab-Jehová bemar-ular urwed.
JOS 23:11 Degisoggu, na be san-bargaagwale nanadii gumalo, adi, be-Bab-Dummad-Jehová be nue sabgumalagar.
JOS 23:12 ”Ar bemar Bab-Dummad-Jehováʼgi bangudele, degi, dule-baigan-bemar-abargi-gudimaladba be akadmalale, deginbali, be a-dulemarbo na be muchub-muchub-nikudmaladbali apurudele,
JOS 23:13 bemar wisigarmar, Bab-Dummad-Jehová dule-baigan-amba-bemar-abargi-besmaladi, bemar-abargi bar oniosulid. Aka bur a-dulemala bemar-gaega sakiyob guoed, deginbali, bemar-yardakega gumarbaloed. Bab-Jehová bemar-yargan-bibyogega ebugoed, deginbali, be-ibyagi ikogan-maiyob ebubaloed. Anmar-Bab-Dummad-Jehová bemarga-yar-nued-uksadgi be-bela-bergumaladse, deyobi be gumaloed.
JOS 23:14 ”Andi bato burgwedmosad, bela dulemar we-igargi gwen onogosulid. Bemar na be gwagegi nue-wisid, anmar-Bab-Dummad-Jehová bela anmarga ibmar-nuegan-imakoye-sogsagusadi, bela anmarga imakmaid. Soggwensaale, ibmar-sogsagusadi na iemaisulid, bela anmarga imaksad.
JOS 23:15 Ar igi Bab-Dummad-Jehová bemarga ibmar-nuegan-ukoye-sogsagusadi, bela na sogedba imaksa, deyobi, ar bemar eba ibsasulile, bemargi boni-dummagan barmidabaloed. Anmar-Bab-Dummad-Jehová bemarga-yar-uksadgi bemar-war-wargwengi-bergumai-guedse, deyobi neg-guoed.
JOS 23:16 Ar bemar Bab-Dummad-Jehová-bemarbo-Igar-Mesisadba be dasurmalale, aka bur be bab-dummagan-baiganba nadmalale, e-nug odummodmalale, degi, e-asabin dulluu imakdemalale, be wisigarmar, Bab-Jehová-e-urwed bemargi gwisgunonikoed. Degidbali, bemar Anmar-Bab-Dummad-Jehová bemarga-yar-uksadgi bela bergumaloed, wargwensaale bemar beosulid.”
JOS 24:1 Josué Siquemʼgi bela Israel-dulemar-onmaksad. Agi, bela Israel-girmar-dummaganse, Israel-sapin-dummaganse, Israel-igar-nabomaladse, degi, sordamar-idumaladse gochad. Bela Israel-dulemar Bab-Dummadse-goled-neg-asabin ambikunonimalad.
JOS 24:2 Agine, Josué bela-dulemarga sogded: “Israel-e-Bab-Dummad-Jehová weyob soged: ‘Epenneunni, bemar-dad-dummad-Taré na e-machi-Abrahamʼmala, degi, Nacorʼmala, Éufrates-diwar-obakar mai gusmalad. Agi, be-dadgan bab-dummagan-baigan-e-nugmar odummodii gusmalad.
JOS 24:3 Ani an be-dad-Abraham Éufrates-diwar-obakar-gudiidgi susa gusad. An be-dad-Abraham Canaán-yalaganba sedani gusad. An ega e-dula omelosad. An ega e-machi-Isaac uksagusad.
JOS 24:4 Geb an Isaacʼgala machimala warbo uksagusad, Jacob, degi, Esaú. An Esaúʼgala Seir-yalagan uksad. Jacobʼdi na e-mimmiganmala Egipto-yarse nadegusmalad.
JOS 24:5 ” ’Birgamar-nasad-sorbali, ani an Egipto-yarse, Moisés, degi, Aarón barmisgusad. An boni-dummagangi Egipto-dulemar-sabsur-odurdaksa gusad. Geb agi, an bemar-onosgusad.
JOS 24:6 An Egipto-yargi be-dadgan-onosgua, bemar Demar-Ginnidye-nugadse nonigusad. Geb Egipto-dulemar ur-napagined-bila-onogedgi, degi, molimargi-sii be-dadgan-baregindani gusmalad.
JOS 24:7 Geb be-dadgan deyob-negdakarmargua, sabsur anse gotegusmalad. Geb an Egipto-dulemar-idu negasichid nasiksad, adi, mer bar be-dadgan-bareginmalaga. Geb an Egipto-dulemargi demar arwega imaksad, agi gundilesmalad. An igi-Egipto-dulemar-imaksagudi, bemar-sunnad na be daksamalad. Weyob-ibmar-gusad-sorbali, be-dadgan nega-dulesulidganba dikasuli-birgaba gaamakdii gusmalad.
JOS 24:8 ” ’Jordán-diwar-dad-nakwedsik, Amorreo-dulemar-e-yar-naidse an bemar-senoni gusad. A-dulemar bemargi bila-onosmargua, ani an bemarga urmaksa gusad. Bemar e-yar-sumalaga, an igi a-dulemar-obelosgusadi, bemar-sunnad na be daksamalad.
JOS 24:9 Moab-e-rey-Zipor-machi-Balac, bemargi bila-onodasokargua, bemar-ukabsaega an-gayaburba-barsoged-Beor-machi-Balaamʼse gocha gusad.
JOS 24:10 Ar andi, Balaam mer bemar-ukabsaega imaksad. A-ulale, Balaam bur bemargi ise-nued gannar-gannar sunmaknai gusad. Deyobi, Balaam-e-ganguedgi an bemar-bendaksad.
JOS 24:11 ” ’Napidgine, be-dadgan Jordán-diwar-obaksamalad. Geb Jericó-neggweburse nonigusmalad. Agine, bela Jericó-neggweburgi dulemar-gudidimalad bemargi bila-onosgusmalad: Amorreo-dulemar, Ferezeo-dulemar, Canaán-dulemar, Het-dulemar, Gergeseo-dulemar, Heveo-dulemar, degi, Jebuseo-dulemar, bela-wemar bemargi bila-onosgusmalad. Andi we-dulemar bemarga urmaksa gusad.
JOS 24:12 ” ’Bemar, be-es-suidgi, be-warsigi, Amorreo-rey-warbogwad ogalakussulid. Ar ani, an bemar-iduale, a-reymargi burmar barmiargusad. Degisoggu, a-reymar na e-yargi-bukwamaladgi bemar-iduar wakitemalad.
JOS 24:13 An bemarga nainumar-gwen-be-egi-arbassulid uksad. Deginbali, an bemarga neggweburmar-gwen-be-sobsasulid uksabalid. Emidi, agi bemar mamaid. Bemar uva-dubmar-gwen-digsasulid-e-san, degi, olivo-sapimar-gwen-digsasulid-e-san be gundimalad.’ ”
JOS 24:14 Josué, Israel-dulemarga sogdebalid: —Degisoggu, bemar Bab-Jehováʼgi binsaed-nikaa nanamarsun. Eba ibsadii gumarsun, deginbali, innikigwadgi e-nug-odummodii, ese-gordii gumarsun. Be-dadgan Éufrates-diwar-obakar, degi, Egipto-yargi bab-dummadyob-ibmar-imakleged-e-nug odummodii gusmalad. A-bab-dummagan be mimarsunna, unnila Bab-Jehová-nugbi be odummodii gumala.
JOS 24:15 Ar bemar Bab-Jehová-nug-odummobisurmalale, emi, na be sogmardo, ar doa-nug be odungumaloe: Éufrates-diwar-obakar be-dadgan bab-dummadyob-ibmar-imakleged-e-nug-odummodigusmaladdibe, emi bemar Amorreo-dulemar-yargi-bukwad-e-bab-dummagan-nugdibe, be sogmardo. Ar andina, an-neguyaginmaladmala, Bab-Jehová-nug odummomaloed.
JOS 24:16 Israel-dulemar, Josué-abin sogdemalad: —Anmar, bipisaale Bab-Jehová obanmalosulid. Anmar bab-dummadyob-ibmar-imakleged-baigan-e-nug-odummogega, Bab-Jehováʼgi banguosulid.
JOS 24:17 Anmar-Bab-Dummad-Jehová, Egipto-yargi anmar-dadgan, degi, anmar-onosadid. Anmar a-yargine, emar-maiga gudigusmalad. Bab-Jehová anmar-wagab ibmar-dummagan-gegerdaklemalad imaksagusad. Anmar nega-dulesulidganba-gaamakdanigu, degi, dulemar-yar-bamaladgi-bukwad-imbagi-nasmargua, Bab-Jehová anmar-edarbisad.
JOS 24:18 Bab-Jehová bela we-yargi-dulemar-bukwad onosad, amba Amorreo-dulemarse-bakale onosbalid. A-ulale, anmar Bab-Jehová-nug-odummomogoed, ar e anmar-Bab-Dummad gued.
JOS 24:19 Geb degine, Josué, Israel-dulemarga sogded: —Bemar Bab-Jehováʼga ibmar-imaked geg-be-gumalad, ar baisursunna imaklesulid. Ar Bab-Dummad dule-isligwaledid, deginbali, ibmar-bamalad-nug-odummoged abesulid, e-nugbi odummoged abeged. Be-uayasulidaed baisur-itogosulid, deginbali, bemar-isguedi baisursunna dakosurbalid.
JOS 24:20 Ar bemar Bab-Jehováʼgi bangudmalale, degidbali, baigan-bab-dummadyob-ibmar-imakleged-e-nug odummodmalale, Bab-Jehová amba bemargi nueganbi-binsas-inigwele, edi bemargi-bonigan-dummagan barmidagoed, bela bemar-giir imakoed.
JOS 24:21 Ar Israel-dulemardi, Josuéʼga gannar sogdemalad: —¡Anmar bipisaale deyob guosulid! Unnila anmar Bab-Jehová-nugbi odummodii guoed.
JOS 24:22 Josué, Israel-dulemarga gannar sogdebalid: —Bemar na sogmalad, anmar Bab-Jehová-nugbi odummodii guoye. Weyobi be sogmaladi, bemar na dukin barsogega gumalad. Bela Israel-dulemar abin-sogdemalad: —Eye, anmar na dukin barsogega gumaloed.
JOS 24:23 Josué sogdebalid: —Bemar amba bab-dummadyob-ibmar-imakleged-sedidimalad, be mimarsunna. Bemar, Israel-e-Bab-Dummad-Jehová bur bela-bela gwage-ulubgi amimala.
JOS 24:24 Israel-dulemar, Josué-abin sogdemalad: —Unnila anmar, anmar-Bab-Dummad-Jehová-nugbi odummomaloed. Unnila a-barbi, anmar ibsaoed.
JOS 24:25 A-ibagine, Siquem-neggweburgine, Josué, degi, Israel-dulemar na Bab-Jehováʼbo-Igar-Mesisgusadi gannar obinosmalad. Siquemʼgi, Josué Israel-dulemarga igarmar uksad.
JOS 24:26 Geb Josué we-igarmala, Bab-Dummad-Igar-Mamaid-e-gardagi narmaksad. Geb sorbali, Josué akwa-dummad susad. Geb we-akwa Bab-Jehováʼse-goled-neg-naba sapi-encina-gwichid-urba osisad.
JOS 24:27 Geb degine, Josué bela Israel-dulemarga sogded: “We-akwa, bemar-barsogega guoed. We-akwa, bela Bab-Jehová anmarga emi ibmar-sogsadi itosad. Bemar be-Bab-Dummadgi gakansaar sunmakarmalale, we-akwa bemar-barsogega guoed.”
JOS 24:28 Weyob-sogsad-sorbali, Josué Israel-dulemarga degimaloye sogsad. Geb Israel-dulemar na e-yar-e-yarse gannar nadmalad.
JOS 24:29 Weyob ibmar-gusad-sorbali, Bab-Jehová-e-mai-Nun-machi-Josué, birga-dulatar-gakambe-nikadgi (110) burgwenonikid.
JOS 24:30 Efraín-yar-mullugangi, Gaas-yar-dad-nakwed-argan-sapiledsik, Timnat-Seraʼye-neg-nugadgi, Josué-nainu-naidgi, Josué-digsamalad.
JOS 24:31 Josué-dula-gudigusadgine, Israel-dulemar Bab-Jehová-nugbi odummodii gusmalad. Josué-burgwisad-sorba, girmar-dummagan-Josuéʼba-gudigusmalad Israel-yar-semamaiunni, Israel-dulemar Bab-Jehová-nugbi odummodii gusmarbalid. Ar we-girmar-dummagan bela Bab-Jehová Israel-dulemarga-ibmar-imaksad wismalad.
JOS 24:32 Israel-dulemar Egipto-yargi-noargua, José-garmar-seargusmaladi Siquem-neggweburgi nainu-soggwengi digsamalad. We-nainu, Jacob, Hamor-machimalase, Siquem-e-babse, mani-sibu-dulatargi (100) baksad. A-ulale, we-nainu José-wagangadga gunonikid.
JOS 24:33 Aarón-machi-Eleazar burgwenonimogad. Geb Efraín-yar-mullugangi, e-machi-Finees-e-yar-mullu-siidgi, Guibeá-neggweburgi Eleazar-digsamalad.
JDG 1:1 Josué-burgwisad-sorba, Israel-dulemar Bab-Jehováʼga sogdemalad: —Canaán-dulemarbo bila-ononaega, ¿doa inse naoe?
JDG 1:2 Bab-Jehová abin-sogded: —Judá-wagan-inse naoe, ar ade bato a-yala amarga, an uksad.
JDG 1:3 Judá-wagan, e-gwenad-Simeón-waganga sogded: “Anmarga-yar-uklenaidse be anmarba namala, Canaán-dulemarbo anmar bila-onomaloed. Geb a-sorba anmar bemarba namarmogoed, Canaán-dulemarbo bila-onogegar.” Degi, Simeón-wagan Judá-waganba nadmarsunnad.
JDG 1:4 Judá-wagan bila-ononadmargu, Bab-Jehová Canaán-dulemargi, degi, Ferezeo-dulemargi Judá-wagan nakwega imaksad. Deun, Bezecʼye-neg-nugadgi miliambe (10,000) sordamar-ogilosmalad.
JDG 1:5 Agine, Judá-wagan, Adoni-Bezec-abingunonimargu, ebo-bila-onodmalad. Geb Canaán-dulemar, degi, Ferezeo-dulemar Judá-wagan-idu duurmakdemalad.
JDG 1:6 Adoni-Bezec wakite gusad. Geb Judá-wagan balegitemargu, bargadapmalad. Gasmargu, e-goo-dummagan, degi, e-nag-goo-dummagan e-ibe siksamalad.
JDG 1:7 Geb degi, Adoni-Bezec weyob sogded: “An reymar-dulapaa-gakambed (70) e-goo-dummagan, degi, e-nag-goo-dummagan an ei siksagusad. Degine, an-mese-urba mas-milemalad gundii damalad. Degisoggu, a-ulale, Bab-Dummad deyob an-imaksamogad.” Geb a-sorbali, Jerusalén-neggweburse Adoni-Bezec-sesmalad. Agine Adoni-Bezec burgwedapid.
JDG 1:8 Judá-wagan, Jerusalén-neggweburgi gwichigudapmalad, geb Jerusalén-neggwebur susmalad. Es-suidgi Jerusalén-dulemar ogilolesad. Geb a-sorbali, Jerusalén-neggwebur-ogumaksamalad.
JDG 1:9 Geb degi, Judá-wagan, Canaán-dulemar-yalaganba-bukwamaladgi bila-ononadmarbalid. Degi, Canaán-dulemar-Neguevʼgi-bukwamaladgi, degine, Canaán-dulemar dad-argwanedsik-nebaganba-bukwamaladgi bila-ononadmarbalid.
JDG 1:10 Deginbali, Judá-wagan, Canaán-dulemar-Hebrónʼgi-bukmaladgi duurmakdemarbalid, ebo-bila-onomalagar. Hebrón-neggweburde, Quiriat-Arbaʼye iduar nuganad. Agi, Judá-wagan, Anac-wagangi nakwismalad: Sesaiʼgi, Ahimánʼgi, degi, Talmaiʼgi.
JDG 1:11 Judá-wagan, Hebrón-akale, Debir-dulemargi duurmakdemarbalid, egi bila-onomalagar. Debir-neggweburde, Quiriat-Seferʼye iduar nuganad.
JDG 1:12 Degine, Caleb sogded: “Ar doa-dule Quiriat-Sefer-neggwebur-ogalakusale, degi, a-neggwebur-susale, egi nakwisale, a-dulega an-sisgwa-Acsa an ukoed, na nikuegar.”
JDG 1:13 Geb Otoniel, Quiriat-Sefer-neggwebur susad. Degisoggu, Caleb, Otonielʼga na e-sisgwa-Acsa-uksasunnad, na nikuegar. Otonielʼde Cenaz-e-machid. Cenazʼdi Caleb-e-urbad.
JDG 1:14 Acsa Otonielʼba nasokargu, Otoniel ega sogded: “Be-babse be nainu egise.” Agi, Acsa moli-uayasuid-birgi-siid aidesad. Geb e-bab-Caleb deyob daksagu, ega sogded: —¿Igi be itoge?
JDG 1:15 Acsa, e-bab-abin sogded: —Be anga ibmar-baid-udabi an abedo. Bato be anga napanegdi Neguevʼgi uksad, dii-gammumar-aryomamaid an abebalid. Degidgi, Caleb, dii-gammumar-nakwar-mamaid ega uksad, degi, dii-gammumar-dear-mamaid ega uksabalid.
JDG 1:16 Moisés-e-saka-e-wagan-Ceneo-dulemar, Judá-waganmarba Sapimar-Ogobgi-Dakleged-Neggwebur-akar, Judá-nega-dulesulidganse nade gusmalad. A-nega-dulesulidgande, Neba-Neguevʼye-nugadba naid, Arad-neg-nugadmobin. Agi megidapmalad.
JDG 1:17 Geb degine, Judá-wagan, Simeón-waganmala bila-ononadmarbalid. Degi, Canaán-dulemar-Sefatʼgi-bukmaladgi nakwismalad, bela swanga neggwebur imaksamalad. A-ulale, Sefat-neggwebur, Hormaʼye onugsasmalad.
JDG 1:18 Judá-wagan, Gaza-neggwebur susmalad, degi, Ascalón-neggwebur, Ecrón-neggwebur susmarbalid. Degine, bela e-nainumarse-bakale, ei-susmalad.
JDG 1:19 Bab-Jehová Judá-sordamarba nue-gudiid. Amarde, yalaganba dulemar-bukwad-onosmar-inigwele, ar nebagi-dulemar-bukwaddi ur-napagined-esgoromar-nikad nikasoggu, onossurmalad.
JDG 1:20 Igi-Moisés-sogsa-gusa, deyob Hebrón-neggwebur Calebʼga uklesad. Geb Caleb, a-neggweburgi Anac-e-masmala-walapaagwad onosad.
JDG 1:21 Degi-inigwele, Benjamín-e-wagandi, Jebuseo-dulemar-Jerusalénʼgi-bukwad onossurgusad. A-ulale, we-garda-narmaklenaidse, Jebuseo-dulemar, Benjamín-dulemar-ebo, bular Jerusalén-neggweburgi bukwagusmalad.
JDG 1:22 José-wagan Betel-neggweburgi bila-ononade gusmalad. Bab-Jehováʼdi, José-waganba nue-gudiid.
JDG 1:23 José-wagan dule-ega-neg-argamalad Betel-neggweburse barmisad. We-neggweburde Luzʼye iduar nuganad.
JDG 1:24 Degi, dule-neg-argamalad, dule-wargwen neggweburgi-nodani-daksamargu, ega sogdemalad: “Neggweburse-igar-doglemaid be anmarga oyogele, wile an be-dakmaloed.”
JDG 1:25 Geb a-dule, neggweburse-igar-doglemaid ega oyosad. Degi, na dogsamargu, bela dulemar-neggweburgi-bukwamalad es-suidgi ese-ogilolesmalad. Geb dule-ega-igar-oyosaddi, degi, e-gwenadgandi wiledaksamalad, ogilossurmalad.
JDG 1:26 Degine, a-dule, Het-dulemar-yarse nade gusad. Agi, neggwebur sidapid. Luzʼye e-neggwebur-onugsasad. We-garda narmaklenaidse deyob nuggusad.
JDG 1:27 Manasés-wagan, amba Canaán-dulemar-onissurmogad. Amarde, wemalad: Bet-Seánʼgi-bukmalad, degi, e-neggwebur-burwiganase-bakar, Taanacʼgi-bukmalad, degi, e-neggwebur-burwiganase-bakar, Dorʼgi-bukmalad, degi, e-neggwebur-burwiganase-bakar, Ibleamʼgi-bukmalad, degi, e-neggwebur-burwiganase-bakar, Meguidoʼgi-bukmalad, degi, e-neggwebur-burwiganase-bakar. Degisoggu, Canaán-dulemar, e-yargine, yapa-ainie na bukwa gusmalad.
JDG 1:28 Geb Israel-dulemar gangudmargu, Canaán-dulemarga arbaed-gandikid uksamalad. Degi-inigwele, Canaán-dulemar amba bela onilessurgusad.
JDG 1:29 Efraín-wagan, Gezerʼgi-Canaán-dulemar-bukwad-onissurmogad. Degisoggu, Canaán-dulemar amba Efraín-wagan-abargi bukwagusmalad.
JDG 1:30 Zabulón-wagan, Quitrón-neggweburgi-dulemar-bukwad onissurmarmogad, degi, Naalal-neggweburgi-bukwad onissurmarbalid. Degisoggu, Canaán-dulemar amba Zabulón-wagan-abargi bukwagusmalad. Degi-inigwele, Canaán-dulemarga arbaed-gandikid-uksamalad.
JDG 1:31 Aser-wagan, amba Canaán-dulemar-onissurmogad. Amarde, wemalad: Acoʼgi-bukmalad, Sidónʼgi-bukmalad, Ahlabʼgi-bukmalad, degi, Aczibʼgi-bukmalad, Helbaʼgi-bukmalad, Afecʼgi-bukmalad, degine, Rehobʼgi-bukmalad.
JDG 1:32 A-ulale, Aser-wagan, Canaán-dulemar-abargi bukwagusmalad.
JDG 1:33 Neftalí-wagan, amba Canaán-dulemar Bet-Semesʼgi-bukwad, degi, Bet-Anatʼgi-bukwad onissurmogad. Degisoggu, Neftalí-wagan, Canaán-dulemar-abargi bukwagusmalad. Degi-inigwele, Bet-Semes-dulemarga, degi, Bet-Anat-dulemarga arbaed-gandikid uksamalad.
JDG 1:34 Amorreo-dulemar, yalaganba Dan-wagan ise-barmiar-imaksad, degine, nebaganba-aidegega gwen imaksasulid.
JDG 1:35 Degisoggu, Amorreo-dulemar na Heres-yargi yapa-ainie gusmalad, degi, Ajalón-yargi, degine, Saalbim-yargi yapa-ainie gusmalad. Degi-inigwele, José-wagan gangudmargua, Amorreo-dulemarga arbaed-gandikid uksamalad.
JDG 1:36 Dakargu, Amorreo-dulemar-e-yar-abingunaid, Acrabim-yar-nakwialidgi onoded, Selaʼse, degi, niba nakwidbalid.
JDG 2:1 Bab-Jehová-e-baliwitur Gilgal-neggwebur-akar nadegusad Boquim-neg-nugadse, adi, Israel-dulemarga gayaburba sogegar: “Ani an Egipto-yargi bemar-onisad, be-dadganga-yar-ukoye an ise-sogar-sogsadse, an bemar-senonikid. Deun, be-dadganga ise-sogar an sogsa gusad, bipisaale, an bemar-ebo-Igar-Mesisad bar an osulogosurye.
JDG 2:2 Bemardi mer dule-we-yarginmaladbogwa igar-omesmaloye. Degi, an bemarga sogsad: A-e-bab-dummaganga-ibmar-ogumakar-ukleged-ailamar be osulomaloye. Degi-inigwele, bemar an-sogedba ibsassurmalad. ¿Ibiga be an-itossurmala? Deyobsulindo.
JDG 2:3 Degisoggu, an sogmosundo: We-dulemar-bemar-abargi-bukwadi, bar an obelogosurmogad. We-dulemar bemarga bonigan-ukdii gudmarsunnoed, degi, e-bab-dummagangi bemar binsaed-galedii gubarsunnoed.”
JDG 2:4 Bab-Jehová-e-baliwitur sunmaked-bergusgua, bela Israel-dulemar binnasuli-bodmalad.
JDG 2:5 A-ulale, Boquimʼye a-neg-onugsasmalad. Geb agine, Bab-Jehováʼga ibmar-ogumakar-ukleged uksamarbalid.
JDG 2:6 Josué onmaked-bergusadgi Israel-dulemar-barmisgua, Israel-dulemar ega-napaneg-uklesmaladse nadmalad.
JDG 2:7 Josué-ibagangi, degine, girmar-dummagan-ibagangine, Israel-dulemar, Bab-Jehová-sogedba nanadii gusmalad. A-girmar-dummagande, bela Israel-dulemarga Bab-Jehová-ibmar-gegerdaklemalad-imaksad daksamalad.
JDG 2:8 Nun-machi-Josué Bab-Jehová-e-mai, birga-dulatar-gakambe nika (110) burgwisad.
JDG 2:9 Geb Josué-e-nainu-Timnat-Sera-nugadgi Josué-digsamalad. Timnat-Seraʼde Efraín-yalagangi, Gaas-yar-dummad-dad-nakwed-argan-sapiledsik naid.
JDG 2:10 Degi, Israel-dulemar Josué-ibagangi-gudigusmalad bela burgwismarmogad. Geb sorba, wagan-baigan-ambikunonikiddi aku Bab-Jehová-daksamalad, degi, Bab-Jehová-Israel-dulemarga-ibmar-nuegan-imaksad wissurmarbalid.
JDG 2:11 Geb Israel-dulemar Bab-Jehová-asabin ibmar-isganabi imakdemalad. Ar ade, bab-dummadyob-imakleged-Baal-nugadse gordii gudmalad.
JDG 2:12 Israel-dulemar, Bab-Jehová-obachamalad. We-Bab-Jehováʼde Israel-dulemar-e-dadgan-e-Bab-Dummadid, Egipto-yalagi e-dadgan-onisgusadid. Degine, Israel-dulemar, bab-dummadyob-imaklemaladba nanadmalad, dulemar-baigan-e-bab-dummaganse gotemalad. Degidbali, Israel-dulemar, Bab-Jehová-ourwega imaksamalad.
JDG 2:13 Degi, Israel-dulemar Bab-Jehová-obachamargu, bab-dummadyob-imakleged-Baal-nugadse gordii gudmalad, degi, bab-dummadyob-imakleged-Astarot-e-nuchumarse gordii gudmarbalid.
JDG 2:14 A-ulale, Bab-Jehová Israel-dulemargi nue sae itoded. Degisoggu, dule-gandikidgi-ibmar-atursamaladga urmaksasunnad, adi, Israel-dulemar-ibe ibmar-atursamalagar. Degi, e-isdarmalad-dikarba-bukwadga urmaksabalid. Degisoggu, Israel-dulemar, e-isdarmalad-abin bila-onogedgi geg abingwisgue gusmalad.
JDG 2:15 Igi-Bab-Jehová Israel-dulemarga na ise-sogar-ibmar-sogsadba-guegala, weyob imaksad: Israel-dulemar bila-ononadmalale, Bab-Jehová egi gwichidaed, adi, ogalakuegar. Degisoggu, nue-suli-suli itodmarsunnad.
JDG 2:16 Degisoggu, Bab-Jehová Israel-dulemarga dummagan-igar-nabomalad urbissunnad. Amarde, dule-gandikidgi-ibmar-atursamaladgi Israel-dulemar-onosad.
JDG 2:17 Degi-inigwele, Israel-dulemar, dummagan-igar-nabomalad-sogedba dassurmarbalid, aka dule-baigan-e-bab-dummaganba nanadmalad, ase gotemalad. Degisoggu, e-dadgan-nanasad-igarba yog-banguar gusmalad. Ar e-dadgandi, Bab-Jehová-Igar-Maidba nanasmalad, emardi, Bab-Jehová-Igar-Maidba gwen nanassurmalad.
JDG 2:18 Ar Bab-Jehová, Israel-dulemarga dummad-igar-naboged-susale, eba-nai-daed. Degisoggu, dummad-igar-naboged amba dula-gudiile, Bab-Jehová, Israel-dulemar e-isdarmaladgi-onodaed. Ar ade, Bab-Jehová, Israel-dulemar-sabsur-wilebukmaladba ese-gorbukwad-itosale, na bendakdedaed.
JDG 2:19 Ar dummagan-igar-naboged-burgwisale, Israel-dulemar e-babganba bur bule isguddamalad, aka dule-baigan-e-bab-dummaganse gotedamalad, degi, ega ibmar-imakdedamarbalid, degine, e-nug odummoddamarbalid. Degidbali, e-isgumaladgi gwen bangudasurmalad, gannar igar-isgana-imakdedamalad.
JDG 2:20 A-ulale, Bab-Jehová, Israel-dulemargi sae-itoded, weyob sogded: “An e-dadganbo-Igar-Mesisadba we-Israel-dulemar gwen nanassurmalad, degi, an-sogedba ibsassurmarbalid.
JDG 2:21 Degisoggu, Josué, e-burgwed-iduar dulemar-baigan-onissulidi, bar an oniosurmogad.
JDG 2:22 We-dulemar Israel-dulemar-wilubdakega an imakoed, adi, an dakega, bule an-Igar-Maidba e-dadgan-nanasadyob Israel-dulemar nanamogodibe.”
JDG 2:23 A-ulale, Bab-Jehová dulamar-baigan yog-oniar imaksasulid, degine, Josué we-dulemar-obelogega, Bab-Dummad imaksasurbalid. Amba we-dulemar-bukuega Bab-Jehová imaksad.
JDG 3:1 Bab-Jehová dulemar-baigan Canaán-yargi onissurgusad. Adi, bela Israel-dulemar-bila-onolegedgi-gwen-urwedisurmalad wilubdakegar.
JDG 3:2 Weyob Bab-Dummad imaksadi, adi, Israel-wagan bila-onolegedgi-durdakarsurmalad, durdakmalaga, igi bila onolege.
JDG 3:3 Dulemar-baigan-bukusmaladi, wemalad: Filistea-e-dummagan walatar bukusad. Canaán-dulemardi amba bela bukusad. Sidón-dulemar-Líbano-yargi-bukwamaladi, bukusad. Degi, Heveo-dulemar-Líbano-yalaganba-bukwamarmogadi, Baal-Hermón-yar-akale, degine, Hamat-neg-nugadse-bukmaladi, amba bela bukusmarmogad.
JDG 3:4 Bab-Jehová Israel-dulemar-wilubdakega we-dulemar-obukusad. Adi, dakega, bule Israel-dulemar e-dadganga Moisésʼba-Igar-uklesadbali damalodibeye.
JDG 3:5 Israel-dulemar we-dulemar-abargi bukunonisunnad: Canaán-dulemar-abargi, Het-dulemar-abargi, Amorreo-dulemar-abargi, Ferezeo-dulemar-abargi, Heveo-dulemar-abargi, degine, Jebuseo-dulemar-abargi bukusmalad.
JDG 3:6 Degi, Israel-dulemar-e-masmala a-dulemar-e-bunamalabo nikudmalad, degine, e-sisgana a-dulemar-e-masmalabo nikudmarmogad. Deginbali, Israel-dulemar a-dulemar-e-bab-dummaganse gotemalad.
JDG 3:7 Israel-dulemar, Bab-Dummad-Jehová-asabin ibmar-isgana imakdemalad, e-Bab-Dummad-Jehová-iedmalad, bab-dummadyob-imakleged-Baalʼse gotemalad, degi, bab-dummad-bundoryob-imakleged-Aseraʼse gotemalad.
JDG 3:8 A-ulale, Bab-Jehová Israel-dulemargi bela-bela sae itoded. Degisoggu, Mesopotamia-e-rey-Cusan-Risataimʼye-nugadga urmaksad, adi, Israel-dulemargi nakwegar. Geb Israel-dulemar birgabaabak (8) Mesopotamia-dulemarga mailedii gusad.
JDG 3:9 Geb degidgine, Israel-dulemar ise-wilegar Bab-Jehováʼse gochamalad. Agine, Bab-Jehová, Israel-dulemarga dule-e-bendaked nug-imaksad. Geb a-dule Israel-dulemar-bendaksad. We-dulede, Otonielʼye-nugad, Cenaz-machid. Cenazʼdi, Caleb-e-urbad.
JDG 3:10 Bab-Jehová-Burba Otonielʼgi ubononikid. We-dule Israel-dulemar-e-idued-dummadga gusad, adi, Israel-dulemar Mesopotamia-e-rey-Cusan-Risataimʼgi bila-onogedgi nakwegar. Degidbali, Otoniel e-isdarmalad-ogalakusad.
JDG 3:11 Bela we-ibmarmar-gusad-sorbali, Cenaz-machi-Otoniel-burgwenonikidse birga-dulabo (40) Israel-yargi neg-bogidikid nagusad.
JDG 3:12 Israel-dulemar gannar Bab-Dummad-Jehová-asabin ibmar-isgana imakdemalad. Degidbali, Bab-Jehová, Moab-dulemar-e-rey-Eglón-ogannosad, adi, Israel-dulemargi bila-onogedgi nakwegar.
JDG 3:13 Moab-dulemar-e-rey, Israel-dulemargi gwisguegala, Amón-dulemarbo atosad, degi, Amalec-dulemarbo atosbalid. Degisoggu, Israel-dulemargi-gwichigudgu, Ogobgi-Dakleged-Neggwebur susmalad.
JDG 3:14 Geb Israel-dulemar birgambe-gakabaabak (18) Moab-dulemar-rey-Eglónʼga mailedii gusad.
JDG 3:15 Geb degidgine, Israel-dulemar ise-wilegar Bab-Jehováʼse gochamarbalid. Agine, Bab-Jehová, Israel-dulemarga dule-e-bendaked nug-imaksad. Geb a-dule Israel-dulemar-bendaksad. We-dulede Aodʼye nugad, Gera-machid. Aodʼde, Benjamín-wagansikidid, dule-sapiledid. Degi, Israel-dulemar, Moab-e-reyga-mani-uklegergebedi, Aodʼba barmisad.
JDG 3:16 Degine, Aod esbunyar abinbela ebichad. Esbunyar-suguedi, sakwa-bisgise-wilub sugued. Geb degi, e-mor-urba sasirba e-dua-nuedsiki esbunyar-nasiksa naded.
JDG 3:17 Geb Aod, Moab-dulemar-e-rey-Eglónʼse-modapgua, manimar-semaid ega ukdapid. Ar Rey-Eglónʼde dule-wardummadid.
JDG 3:18 Degi, Aod, Rey-Eglónʼga manimar-uksagua, dulemar-eba-nonimarmogadmala noded, degimaloye ega sogegar.
JDG 3:19 Degine, Aod, Gilgalʼgi ibmar-sobarmalad-bab-dummadyob-imaklemalad-bukwadse dulemar-obesgua bilisad, gannar Rey-Eglónʼse naded. Geb degi, Rey-Eglónʼga bannabaa ibmar-sogded: —Rey, an begarbi ibmar-arbakee soged nikando. Degi, rey sogded: —¡Abitogwelo! Geb rey, dule-ega-ibmar-imakmalad-e-nagaba-bukwad bela onisad, adi, mer e-itomalagar.
JDG 3:20 Degi, Eglón walagwen obunnoged-neg-nibalidgi siid. Aod ese nadgu, ega sogded: —Bab-Dummad-gayaburba-soggwen an bega sogdani. Eglón degi-itosgu, gangi-siid gwichibin imaksad.
JDG 3:21 Degidgi, Aod e-dua-nuedsik-esbunyar-naid e-argan-sapiledsik susad, geb Eglón-e-sadergi yaalu imaksad.
JDG 3:22 Bela e-saderyabali esbunyar-nonose-bakar dogsad, bela e-samurmar ainisad. Ar ade Eglón-war-bipisursoggu, e-gwallu-nikadba esbunyar bela e-saderyaba-dogsa megisad. Degisoggu, Aod, Eglón-e-saderyaba-esbunyar-yoid bar onossulid.
JDG 3:23 Geb a-sorbali, Aod, obunnoged-neg-nibalid-e-yawagak ise-eduar imaksad. Geb edi, yawagak-bipigwadba nosad.
JDG 3:24 Aod-nosad-sorba, reyga-arbamalad-nonimalad, yawagak ise-atuar-sii dakarmargu, sogdemalad: “Rey akusiirgebed.”
JDG 3:25 Geb undar magaba abitosmalad, rey yawagak-egasuli-dakarmargu, surbinsa-itoarmalad. Geb yabegi yawagak egasmalad. Yaa-egasmargu, e-dummad-Eglón burgwar-meremai dakarmalad.
JDG 3:26 Aodʼdi, reyga-arbamalad rey-abitobukwadgine, wakichad. Gilgalʼgi ibmar-sobarmalad-bab-dummadyob-imaklemalad-bukwadgi nasgua, Seiratʼye-neg-nugadse na obunnodapid.
JDG 3:27 Aod, Efraín-yalagan-mosgua, Israel-dulemarse-golega gar-trompeta ogordapid. Geb Israel-dulemar-yalaganba-bukmalad eba aidearmarmogad. Aod, Israel-dulemar-idu-nadapi gusad.
JDG 3:28 Degi, Aod Israel-dulemarga sogded: “¡Anba dagmalo! Bab-Jehová, anmarga Moab-dulemar-urmaksad.” Geb Israel-dulemar Aodʼba duurmakdemalad. Degi, Moab-dulemar-ibe Jordán-diwar-obakleged-igarmar susad, Moab-dulemar asik bar obakega imaksasulid.
JDG 3:29 Deun, Israel-dulemar miliambe-wilub (10,000) Moab-sordamar-ogilosmalad, wargwensaale durgussulid. Dule-burgwismaladde, bela dule-gandikmaladid, degine, bilagi-yeer-urwemaladid.
JDG 3:30 A-ibagine, Moab-dulemar, ise-wilegar Israel-dulemar-sogedba nanad gusmalad. Degine, birga-dulabake (80) Israel-yargi neg-bogidikid nagusad.
JDG 3:31 Aod-sorba, Samgar megnonikid. Samgarʼde Anat-machid. Samgar esgoro-swiswidikid-molimar-barmiedgi, dulataled-ilanergwa (600) Filistea-sordamar-ogilosad. Degidbali, Samgar, Filistea-dulemargi Israel-dulemar-bendaksad.
JDG 4:1 Aod-burgwisad-sorba, Israel-dulemar gannar Bab-Jehová-asabin ibmar-isgana imakdemarbalid.
JDG 4:2 Degisoggu, Bab-Jehová, Rey-Jabínʼga Israel-dulemar-urmaksad. Rey-Jabínʼde Canaán-dulemar-e-reyd, Hazor-neggweburgi yar-semaidid. E-sorda-bila-onomalad-e-dummaddi Sísaraʼye-nugad. A-dulede, Haroset-Goim-neg-nugadgi maid.
JDG 4:3 Rey-Jabínʼde ur-bila-onoged-napagined-esgorobiid, dulataled-ilabakebak (900) nikad, degine, birga-dulagwen (20) Israel-dulemar-wiosad, ise-mesagwar-imaksad. Degidbali, Israel-dulemar ise-wilegar Bab-Jehováʼse gochamalad.
JDG 4:4 Deunni, Israel-yargi, ome igar-nabogega maid. We-omede Déboraʼye nugad, Lapidot-e-omed, degi, Bab-Dummad-gayaburba-barsoged-bundor-balid.
JDG 4:5 Déboraʼde gusgu ogob-urba signaddaed, Ramá-neggwebur, Betel-neggwebur-ebo-abingunaid-imbagi, Efraín-yalaganba. A-ulale, Débora-sapiye bileged. Degi, Israel-dulemar na igar-nabiroga Déboraʼse naddamalad, ega igar-nudakegar.
JDG 4:6 Ibagwengi, Débora, Baracʼbina gochad, adi, ebo sunmakegar. Baracʼde Abinoam-machid. Ade, Neftalí-yargi Cedesʼye-neg-nugadgi maid. Barac nonigua, Débora ega weyob sogded: —Israel-e-Bab-Dummad-Jehová bega soged: ‘Tabor-yar-dummad-siidse be nae. Agine, Neftalí-sorda-bila-onomalad, degi, Zabulón-sorda-bila-onomalad, miliambe (10,000) be urbo.
JDG 4:7 Geb ani an Rey-Jabín-e-sorda-bila-onomalad-e-dummad-Sísara Cisón-dianba an sedagoed. Degi, e-ur-bila-onomalad-napaginmalad, degine, e-sorda-bila-onomalad an sedabaloed. Geb agine, we-dulemargi-obinega an be-imakoed.’
JDG 4:8 Barac abin-sogded: —Be anba naele, an naodo. Be anba nasulile, an naosurmodo.
JDG 4:9 Débora ega sogded: —Degiirdi, an beba naodo. Degi-inigwele, be-ibmar-imakoedgi be nug dunguo-sulid. Ar Bab-Jehová, omega Sísara-urmakoed. A-omegwa Sísara-oburgoed. Degidgi, Débora, Barac-ebo Cedesʼye-neg-nugadse nadsunnad.
JDG 4:10 Geb Barac, Cedesʼye-neg-nugadgine, Zabulón-sorda-bila-onomalad-urbisad, degi, Neftalí-sorda-bila-onomalad-urbisbalid. Bela miliambe (10,000) e-sogedba oambikusad. Débora, Baracʼba nadmogad.
JDG 4:11 Cedes-neggweburmobin Zaanaim-nebagi wag-ulu-war-gwichid-nagaba Heber-e-dordonegmar bukwad. Hobab-wagwa-Heberʼde, Ceneo-duled, e-dulemargi bangusgusad. Ceneo-dulemarde, Moisés-e-sak-e-waganad.
JDG 4:12 Sísara-owisosmargua, emi, Abinoam-machi-Barac, Tabor-yar-dummad-siidse noniye.
JDG 4:13 Sísara, ur-napagined-esgorobiid dulataled-ilabakebak (900) nikadi, bela guakwaa nasiksad, degi, bela e-sorda-bila-onomaladse-bakar, guakwaa urbisbalid. Geb Haroset-Goim-neggweburgi noarmalad, Cisón-dian-maidse.
JDG 4:14 Geb Débora, Baracʼga sogded: “¡Ogus! Ar Bab-Jehová be-sordamar-idu-nadapsoggu, emi-ibagi, Bab-Jehová bega Sísara-ukoed.” Degi, Barac, Tabor-yar-dummad-siidgine, e-sordamar-miliambedmala (10,000) noarmalad.
JDG 4:15 Barac-e-sordamar bila-onodmargu, Bab-Jehová, Sísara-e-sordamar, Barac-e-sordamarse-galakuega imaksad. Degidbali, Sísara-e-sordamar na duurmakdemalad. Ur-napaginmalad-onanamalad, degi, e-sorda-bila-onomalad bela es-suidgi ogilolesad. Sísaraʼbela ur-napaginedgi-siidgi ichomaksad, geb nagab wakite-gusad.
JDG 4:16 Barac, Haroset-Goimʼse Sísara-ur-napaginmalad-balegichad, degi, Sísara-e-sordamar-balegichabalid. We-ibagine, Sísara-e-sorda-bila-onomalad bela es-suidgi ogilolesad, wis wargwenad gwen bessulid.
JDG 4:17 Sísara nagab-wakitegu, Jael-e-dordoneg-siidse modapid. Ar Hazor-rey-Jabín, Jael-e-sui-e-ai-nuedsoggu, a-ulale, Sísara, Jael-negse dogdapid. Jaelʼde Heber-e-omed. Heberʼde, Ceneo-duled.
JDG 4:18 Jael, Sísara-abin-noargu, ega sogded: —Dage dummad, dogdage, mer dobgue. Sísara negyaba dognonigu, Jael, mor-dummadgi odukusad.
JDG 4:19 Sísara ega sokalid: —An uku-uku itoged, wis be anga dii udage. Jael, buglugi-moli-nunis-siid egasad, geb agi ogobsad. Degi, gannar Jael mor-dummadgi Sísara-odukusbalid.
JDG 4:20 Degidgi, Sísara Jaelʼga sogdebalid: —Yawagakgi be gwisguo. Dule bese danikile, bega sokalile: ‘¿Dule wegi mai?’ Ega be sogo: ‘Dule, sateye.’
JDG 4:21 Geb degine, Heber-e-ome-Jael, Sísaraʼbina dordoneg-abingaed-suar amisad, degi, mardo-dummad amisbalid. Geb binnalee ese naded, ar ade, Sísara yegusadbali gabided. Degidbali, ise-gabar-maidgine, Jael, dordoneg-abingaed-suar Sísara-uaya-matargi napaba-mesa bioksad, daksik-noedse imaksad. Deyob Sísara burgwisad.
JDG 4:22 Barac, Sísara-amidanigu, Jael abindakega abin noalid, ega sogded: “Dage, be we-dule-amidiid an bega oyogo.” Geb Barac, Jaelʼba nadgua, dakdapid, Sísara nue-imas-meremai, suargi napaba-mesa e-nono biokles-mai dakdapid.
JDG 4:23 Deyopira, Bab-Dummad Israel-dulemar-wagab, Canaán-dulemar-e-rey-Jabín-galakuega imaksad.
JDG 4:24 Degi, Israel-dulemar-e-gangued Canaán-e-rey-Jabínʼgi gannalemai-gannalemai gusad, bela Rey-Jabín-obelogedse imaksad.
JDG 5:1 A-ibagine, Débora, Abinoam-machi-Barac-ebo namaksad. Weyob namaksamalad:
JDG 5:2 “Israel-dummagan sordagan-idu-nadapile, dulemar e-binsaedba bila-onogedgi-urwenadele, Bab-Jehová-nug-odummodii guo.
JDG 5:3 ”¡Reymar, nue be an-itomar! ¡Dummagan, nue be an-itomar! An namaksokalid, Bab-Jehováʼga an namaksokalid. Israel-dulemar-e-Bab-Dummad-Jehováʼga an gar-ogorsokalid.
JDG 5:4 ”Bab-Jehová, be Seir-yalagangi nodgua, be Edom-nainugangi nadgua, napneg wawanmakde gusad, nibneg giglimakde gusad, mogirmar dii owide gusad.
JDG 5:5 Bab-Jehová Israel-dulemar-e-Bab-Dummad, be-abin Sinaí-yala wawanmaksagusadyobi, Be-abin yalamar wawanmaksad.
JDG 5:6 ”Dulemar Anat-e-machi-Samgar-ibagangi, degi, Jael-ibagangi, igarmar-dummaganba bar nanassurmalad, igar-burwiganba nanadii gusmalad, adi, melle boni-amimalagar.
JDG 5:7 Israel-yalagi neggwebur-burwigana ollo-ollo ambikusad, dule-sate ambikusad, an dummadga megnonikidse. Ani an Débora, dulemar-anar an gwichigusad, Israel-dulemar-e-nanayobi an gunonikid.
JDG 5:8 Bab-Dummadye, anmar-Israel-dulemar, bab-dummad-baigan-e-nug-odummosad-ulale, be anmar-neggweburmargi bila-onoleged barmiar gusad. Israel-sordamar mili-dulabo-bukwad-abargi (40,000), dule gwen sigu-abgaed-yoi bila-ononai daklessulid, dule gwen ilawar-swiswidik-annika bila-ononai daklesulid.
JDG 5:9 ”Israel-dummaganba an naid, dulemar na e-binsaedba bila-onogedgi-urwemaladba an naibalid. ¡Bab-Jehová-nug be odummomar!
JDG 5:10 ”Bemar moli-uayasuid-ome-sipugwadgi nanamaladi, e-birgi mor-nuegangi be sigmaladi, be nue dulemar-namaked itomar. Degine, bemar nagab-nanamalad, be nue dulemar-namaked itomarmo.
JDG 5:11 Dulemar molimar-dii-gobnonidaed-nagaba namakbukwadi, Bab-Dummad-e-igar-innikigwadba-ibmar-imakedgi namakmalad. Degi, Israel-sorda-bila-onomalad-igar-innikigwadba-ibmar-imakedgi namakmalad. ”Geb Bab-Jehová-e-dulamar, neggwebur-yawagakse nadmalad, sogdemalad:
JDG 5:12 ‘Débora, namake, namake, namaklegedgi be namake. Abinoam-machi-Barac, ogusa, dule-gasmalad be sede.’
JDG 5:13 ”Dule-besmaladi, dule-nuga-nikamaladba nonimalad. Bab-Jehová-e-sorda-bila-onomaladi, dule-gandikmaladba anse nonimalad.
JDG 5:14 Efraín-sordamar-Amalec-dulemargi-danikid nonimalad, a-sorbali, Benjamín-sordamar danigusmogad. Maquir-wagan-sorda-dummagan nonimalad, Zabulón-neg-akar dule-idumalad-gangued-nikamalad nonimarmogad.
JDG 5:15 Isacar-e-dummagan, Déboraʼba nadmarmogad. Baracʼba, Isacar-e-sordagan nadmarmogad, bila-onogedgi Baracʼba nebase duurmakdemalad. Rubén-e-sordamardi, mer-naega yamo arbaed-dummad onosmalad.
JDG 5:16 ¿Ibiga bemar sibad-wawaad-edarbemalad-e-goled-itogega, sibad-wawaad-e-galugi be besmala? Ar Rubén-e-sordamar nue-dobe itosmalad.
JDG 5:17 ”Galaad-e-sordagandi, Jordán-diwar-obakar besmalad. Dan-e-sordagandi, ur-dummagan-walik besmalad, Aser-e-sordagandi, demar-gaka-naba besmalad, sukunyaba e-urmar-edarbemamai gusmalad.
JDG 5:18 Zabulón-e-sordamala, bila-onogedgi burgwed-naga gusmalad. Neftalí-e-sordamala, bila-onogedgi burgwed-naga gusmarmogad.
JDG 5:19 ”Canaán-dulemar-e-reymar Taanac-neggweburse nonimalad, Meguido-dian-asabin bila-onosmalad. Degi-inigwele, manimala, degi, ibmar-nuegana gwen sessurmalad.
JDG 5:20 Nibaneg-akale, niisgwamar ulusad. Niisgwamar e-nanaid-akale, Sísaraʼgi gwichigusad.
JDG 5:21 Canaán-sordamar, Cisón-diwar obelolesmalad. Cisón-diwarde, gusgu dikasurgus-maid. Ani an Débora-gued, ¡Gandikidgi an naoed!
JDG 5:22 ”Sísara-e-molimar binnasuli abarmakmamaidba e-nagmar binnasuli-gornadapi gusad.
JDG 5:23 Bab-Jehová-e-baliwitur weyob sogded: ‘Meroz-dulemar be sabsur-ukabsasun. We-dulemar gwen Bab-Jehová-sordamar-bendakapsurmalad, degi, dule-gandikmaladgi gwen bendakapsurmarbalid.’
JDG 5:24 ”Israel-dulemar-omegan-abargi, Heber-e-ome-Jaelʼgi nued binsalesun, omegan-dordonegyaba-bukwamaladba bur bule egi nued binsalesun. Heberʼde Ceneo-duled.
JDG 5:25 Sísara, Jaelʼse dii-egichis gusad, Jaelʼdi moli-nunisgi ogobsad, dule-nuga-nikamaladbi-gobed-noggi moli-nunis-ollikwagwadgi ogobsad.
JDG 5:26 Jael e-argan-sapiledsik dordoneg-abingaed-suar susgusad, e-argan-nuedsik mardo-dummad susgusad. Geb a-ibmargi Sísara-sarsosad, e-nono daasa imaksad. Dordoneg-suargi uaya-matarba Sísara-bioksad, daksik-noedse imaksad.
JDG 5:27 Jael-asabin Sísara sinnii napagi-melleded, napagi meremai gusad, napagi-meremai burgwisad.
JDG 5:28 ”Sísara-e-nan, yawagak-bipigwad-dale-daledba atakalid, e-machi-yoggud-dakedbali sabsur sogded: ‘¿Ibiga an-machi-e-ur-napagined yoggumai? ¿Ibiga e-ur-napaginmalad-goled itolesuli?’
JDG 5:29 Omegan-binsaed-ibegan-e-walik-gudimalad ega sunmaksamalad. Geb e-nan omegan-sunmaksadba sogdemogad:
JDG 5:30 ‘Ibmarmar-nued amismarsua, a-miminanairgebed: Sordamar-iliba, yagan-war-wargwen mimilenairgebed, igi, war-warbodibe. Sísaraʼgardi, mor-nuegan-akar-akar-dakleged uklenairgebed. An-dukargi-nasikega mor-akar-akar-dubgi-sobarmalad, mor-yeerdakleged-bela-dubgi-sobarmalad uklenairgebed.’
JDG 5:31 ”Bab-Jehová, bela wegibi be-isdarmalad bergusun. Be-sabmaladdi dad-ibeler-gaardaedyob be imako, yorukudba dad-ibeler-gaedyob be sao.” Degi, bela we-ibmarmar-gusad-sorbali, birga-dulabo (40) Israel-yargi neg-bogidikid nagusad.
JDG 6:1 Israel-dulemar, gannar Bab-Dummad-Jehová-asabin ibmar-isgana imakdemalad. Degidbali, Bab-Jehová, Madián-dulemarga birgagugle (7) Israel-dulemar-urmaksad.
JDG 6:2 Israel-dulemar, Madián-dulemarse ise-mesagwar-wilebukwadgine, e-idu yalaganba akwasaila-mararmaladba dukunaddamalad, degine, akwasailagan-olloganba e-idu dukunaddamarbalid, deginbali, neg-gandikmaladba e-idu dukunaddamarbalid.
JDG 6:3 Israel-dulemar ibmar-gwag-digsamalale, Madián-dulemar, Amalec-dulemar, degi, dulemar-dad-nakwedsikmalad Israel-dulemarse gandikidgi ubononidamalad.
JDG 6:4 Wemar Israel-dulemar-yargi ambikunonidamalad, Israel-dulemar-ibe ibmar-digarmalad obelodamalad, Gaza-neggweburse-bakale, deyob imakdamalad. Bela Israel-dulemar-ibe, sibad-wawaadmar seddamalad, moli-uayasuidmar, degi, moli-bebe-nikmalad e-ibe seddamarbalid. Masgullemaladse-bakale, ega obedasurmalad, bela-e-ibe seddamalad.
JDG 6:5 Dule-ubononidamaladi, e-dordonegmarse-bakar, senonidamalad, degi, moli-bebe-nikad bukidar senonidamarbalid, sesmar-batedyob a-dulemar, degi, na e-moli-yargan-muremalad-abargi Israel-dulemargi ubononidamalad. Bukidar-mergumaladbali gege ebisledaed.
JDG 6:6 Wegiidbali, Israel-dulemar Madián-dulemarse sabsur-wilebukwa-gusmalad. Degidbali, Israel-dulemar Bab-Jehováʼse ise-wilegar gochamalad.
JDG 6:7 Israel-dulemar Madián-dulemarse-wilebukwadba Bab-Jehováʼse gochamargua,
JDG 6:8 Bab-Jehová e-gayaburba-barsoged barmialid. Weyob sogsad: “Israel-e-Bab-Dummad-Jehová weyob-soged: ‘Bemar Egipto-yargi-wilebukwa an bemar-onosad, degi, maiga-gubukwa an bemar-onosad.
JDG 6:9 Egipto-dulemar-e-ganguedgi an bemar-bendaksad. Degi, bela dulemar-bamalad-be-wiosmaladgi an bemar-bendaksabalid. Degine, bemar-nadapidbali, dulemar-bukmalad an bega onimai imaksad, adi, e-yarmar an bemarga ukegar.
JDG 6:10 An bemarga sogsabalid: Ani an bemar-Bab-Dummad-Jehová guye. Melle bemar Amorreo-dulemar-yargi-bukwadgi, e-bab-dummaganse-gormaloye an sogsad. Degi-inigwele, bemar an-itossurmalad.’ ”
JDG 6:11 Degidgi, Bab-Jehová-e-baliwitur Ofra-neggweburgi sapi-urba signonikid. We-sapide Joásʼgadid. Joásʼde Abiezer-wagwad. Deun, Joás-e-machi-Gedeón uva-egureleged-neggi, orosgi-dakleged-trigo egwanaid, adi, Madián-dulemar-idu odukuegar.
JDG 6:12 Gedeónʼse Bab-Jehová-e-baliwitur ukiar magar-gunonigu, ega sogded: —Be-dule, bila-onogedgi-niga-nollosulidid, Bab-Jehová beba naid.
JDG 6:13 Gedeón abin-sogded: —Dummad, ar Bab-Jehová anmarba naile, degite, ¿ibiga anmar sabsur-odurdakleddae? Degite, ¿Ibiga ibmar-gegerdaklemalad anmar-dadgan-anmarga-sogsagusad geg bar oyolesunna? Ar anmarga sogsagusad: ‘Bab-Jehováʼde Egipto-yargi anmar-onosye.’ Emisgindi, Bab-Jehová anmar-obachad, Madián-dulemarga anmar-urmaksad.
JDG 6:14 Bab-Jehová Gedeónʼgi-atakdegu, ega sogded: —Be-gangued-nikadgi be bila-onona. Bee, be Madián-dulemargi Israel-dulemar-bendakoed. Ani an be-barminaid.
JDG 6:15 Gedeón gannar ega sogdebalid: —Dummad, ¿igi an Israel-dulemar-bendakoe? Ar an dule-binsaledid. Ar an-gwenadgande Manasés-dulemar-abargi dule-wilemaladid, degi, ande an-neg-yaginmaladba bur-bipigwadid.
JDG 6:16 Bab-Jehová ega sogded: —Napira an bega soged: Bee, be Madián-dulemar dule-wargwennagwadyob ogalakuoed, ar ani, an beba gudii guoed.
JDG 6:17 Geb Gedeón abin-sogded: —Be dule-nued an-dakele, be anga ibmar-wilub-oyodo, adi, an magar-dakegar be-dule anbo-sunmaksadi.
JDG 6:18 Melle be an-idu nagwelo. Wegi be an-abitogo. An bega ibmar-ukleged senonikoed, adi, an be-asabin ukegar. Bab-Jehová abin-sogded: —Degiirdi, an be-abitogo.
JDG 6:19 Gedeón nadgu, sibad-senigwad ega dusad, degi, madubur-nibirambe-gakatargi (15) madu-inasulid sobsabalid. Geb bela akwigusgu, garbagi san mesisad, degi, e-nisdi bormogi sesad. Geb Gedeón, Bab-Jehová-e-baliwiturse-mosgua, sapi-urba ega ukdapid.
JDG 6:20 Degidgi, Bab-Dummad-e-baliwitur ega sogded: —We-akwa-dummad-birgi san be mesna, madu-inasulid be omesbalo. Geb a-birgi be e-nis-eogo. Gedeón Bab-Dummad-e-baliwitur-sogedba imaksad.
JDG 6:21 Geb Bab-Jehová-e-baliwitur e-gaapoledgi san ebusad, degi, madu-inasulid ebusbargu, yog akwa-birgi soo gaaled. Bela san-ogumaksad, degi, bela madu-inasulid-ogumaksabalid. Geb agine, Bab-Jehová-e-baliwitur Gedeón-wagab ukiar yogguded.
JDG 6:22 Agine, Gedeón magar-daksad, wede Bab-Jehová-e-baliwitur gue. Degidgine na sogded: —¡An duledar-wiles! ¡Bab-Jehová, an bela! Bab-Jehová-Bur-Birigined, be-baliwitur-e-wagar an nue-daksa.
JDG 6:23 Bab-Jehová ega sogded: —Melle be dobgu, be burgosuli. Be akar-guosuli.
JDG 6:24 Geb agine, Gedeón, Bab-Jehováʼga ibmar-ogumakleged-aila sobsad. Ar Gedeón sogded: “Bab-Jehová bogidikid-ukedid.” A-ulale, Gedeón a-aila Jehová-Salómʼye onugsasad. We-garda-narmaklenaidse amba Abiezer-wagan-bukwadgi Ofra-neggweburgi ibmar-ogumakleged-aila-soblesad siid.
JDG 6:25 Gines a-mutik, Bab-Jehová Gedeónʼga weyob sogsad: “Be-bab-molimar-bukwadgi moli-bebe-nikad-machered-baid be suo, birgagugle (7) nikad be suo. Geb be-bab bab-dummadyob-imakleged-Baalʼga ibmar-ogumakleged-aila-sobsad be omukuo. Degine, Baal-asabin bab-dummad-bundoryob-imakleged-Asera-e-wilub-gwichid be omukubalo.
JDG 6:26 Geb a-sorbali, be anga yar-mullu-birgi anga-ibmar-durgan-ogumakleged-aila be sobo. Geb be anga a-moli-bebe-nikad oburgo. Be Asera-e-wilub-omukusadi e-sapanga be imakoed.”
JDG 6:27 Gedeón Bab-Jehová-ega-ibmar-sogsadba imaksad. Gines, a-mutiki, Gedeón, dulemar-ega-arbamalad warambe (10) sesad. Ar Gedeónʼde e-gwenadgan-dobedba, degi, dulemar-neggweburginmalad-dobedba mutik-imaksad, ibgi-imaksasulid.
JDG 6:28 Dulemar-neggweburginmalad wakudar gwisguarmargu, dakarmalad, Baalʼga-ibmar-ogumakleged-aila eariles sii, degine, Asera-wilub omukules maibali. Geb degi, galu-binidgi moli-bebe-nikad-machered ogumakles dakarmarbalid.
JDG 6:29 Na muchub-muchub egichiarmalad: “¿Doa we imaksa?” Nuekwa-igar-amiarmargu, sogdemalad: “Joás-machi-Gedeón imaksa.”
JDG 6:30 Degidgi, neggweburginmalad Joásʼga sogdemalad: —Be-machi be onoge. Be-machi oburgwilegergebed. Ar Baalʼgad ibmar-ogumakleged-aila earisad, a-asabin, Asera-e-wilub omukusbalid.
JDG 6:31 Degi-inigwele, Joás dulemar-e-asabin-urwebukmaladga weyob sogded: —¿Bemar Baal-nuki urwemalode? ¿Ar bemarde bendako be itomala? Doa-dule Baalʼbina urwebiele, we-wakdaradba oburgwilegodo. Ar Baal na bab-dummad-itogele, na walagwengi dule-ei-galu-earisadbo urwodo.
JDG 6:32 A-ibagine, Gedeón, Jerobaalʼye nuggusad. We-sogleged: “Baal walagwengi dukin san-bendakoye.” Ar Gedeón Baalʼga-ibmar-ogumakleged-aila-earisad-ular, deyob nuggusad.
JDG 6:33 Geb degi, bela Madián-dulemar, Amalec-dulemarbo atosmalad, degi, dad-nakwedsikmaladbo atosmarbalid, neggwebur-soggwennadyob bela atosmalad. Geb Jordán-diwar-obaksamargu, Jezreel-nebagi ambikusmalad.
JDG 6:34 Geb degidgi, Bab-Jehová-Burba Gedeónʼgi ubononigua, Gedeón, Abiezer-wagan-ese-dagmalagala, gar-trompeta ogochad.
JDG 6:35 Gedeón, Manasés-dulemarse gayaburba-berbemalad barmisad, adi, bila-onogega, a-dulemar eba atomalagar. Degine, Aser-dulemarse, Zabulón-dulemarse, Neftalí-dulemarse, gayaburba-berbemalad barmisbalid. We-dulemar eba atosmarmogad.
JDG 6:36 Gedeón Bab-Dummadga sogded: “Be anga ibmar-sogsadyobi, Israel-dulemar-bendakega be an-imakoye sogele,
JDG 6:37 ibmar-gwag-egwalegedgi sibad-wawaad-uka an oginnoed. Unnila sibad-wawaad-ukaginbi boo batisale, napagindi boo batissulile, agi an wisguoed, be an-ganguedgi Israel-dulemar-bendakoye-anga-sogsad, nue-napiragwa.”
JDG 6:38 Ar bela-weyob-sogsadi, ega gusad. Banedgine, wakudaradba Gedeón sibad-wawaad-uka-ogichadi egurusad, adi, egi boo-batisad miegar. Degi, egurusadi ega nog-dummad-gwagwen nosad.
JDG 6:39 Geb degi, Gedeón Bab-Dummadga sogded: “Bab-Dummad, melle be isdar an-itogo, an bese napi-ibmar-wilub egisoed: Gannar sibad-wawaad-ukagi an bese ibmar-wilub egisoed. Emisgwadi, sibad-wawaad-uka be dinnaa meso, melle owardikuo. Bela napagindi, boo batega be imako.”
JDG 6:40 A-mutikidgine, Bab-Dummad deyob Gedeónʼga imaksad. Sibad-wawaad-uka dinnaa mesisad, degi, bela napagindi, boo batisad.
JDG 7:1 Gedeón, Jerobaalʼye-nugbalid. Bela-dule-eba-nanaidi bolegwa gwisguarmalad, degi, nadmargu, Harod-dian-siid-naba ambikudapmalad. Madián-dulemar-danar-danar-bukwaddi, egi dad-nakwed-argan-sapiledsik bukmalad, More-yar-nagaba, neba-naidgi bukmalad.
JDG 7:2 Bab-Jehová Gedeónʼga sogded: “Be dogdar-mergu sordamar-sediid. Madián-sordamar an bega urmak-sogele, ar Israel-sordamar san-dummarbaa sadamaloed, na sogdamaloed: ‘Anmar na dukin anmar-ganguedgi na bendaksamala.’
JDG 7:3 Emisgi, sordamarse be golo, ega be weyob sogo: ‘Doa-dule na dobe-itogele, Galaad-yar-akar, gannar e-negse naodo.’ ” Geb mili-dulagwen-gakabo (22,000) gannar armalad. Degi, napi miliambe (10,000) besmalad.
JDG 7:4 Bab-Jehová Gedeónʼga sogdebalid: “Amba dogdar be-sordamar mergue. Dii-maidse be sede, agi an dakoed, bitimala sulegoe. An bega sogele: ‘We-dule beba naoye,’ a-dule beba naodo. Ar an bega sogele: ‘We-dule beba naosurye,’ a-dule beba naosurdo.”
JDG 7:5 Gedeón dii-maidse sordamar-sessunnad. Agine Bab-Jehová Gedeónʼga sogded: “Dulemar-achumaryob-gwabingi-eloar-dii-gobmaloedi, dulemar-sindigar-dii-gobmaloedgi bachiki be urbo.”
JDG 7:6 Sordamar argangi-dii-gani gwabingi-eloar-gobsamaladi, dulataled-ilapaa (300) mergued. Sordamar-baigandi, bela yokorgi-sindigar dii-gobsamalad.
JDG 7:7 Geb degidgi, Bab-Jehová Gedeónʼga sogded: “We-dulemar-dulataled-ilapaa (300) dii-gwabingi-eloar-gobsamaladba an be-bendako, degi, Madián-sordamargi nakwega an be-imako. Sorda-baigandi e-neg-e-negse namalo.”
JDG 7:8 Degisoggu, Gedeón na sordamar-dulataled-ilapaagwadmala (300) bessunnad. Baigandi e-neg-e-negse barmisad. Unnila sordamar-nadmalad-e-mas-gullemaladbi, degi, e-gar-trompetaʼmarbi e-ibe wesad. Ar Gedeón-sordamar, Madián-sordamar-nebagi-bukwamalad-biriba bukwamalad.
JDG 7:9 A-mutikidba, Bab-Jehová Gedeónʼga sogded: “¡Gwichigue! Madián-sordamar-bukwadse be nae. Ani an bega we-dulemar-urmaked, egi be nakwemaloed.
JDG 7:10 Be dobe Madián-sordamargi gwichigu-naele, be-mai-Furaʼmala be nao.
JDG 7:11 Agi, dulemar-sunmaked nue be itogo. A-sorbali, na be Madián-dulemargi-gwichiguega niga-gannaledoed.” Degisoggu, Gedeón, e-mai-Fura-ebo Madián-dule-nakulemalad-bukwadse gwisgudapmalad.
JDG 7:12 Ar Madián-sordamar, Amalec-sordamar, degi, dule-dad-nakwedsikmalad, bela-ber-sesmar-batedaeyobi, nebagi aisakis bukmalad. Degi, e-moli-yargan-mureged bukidar demar-gakagi ukub-naidyob bukwad, geg-ebisleged.
JDG 7:13 Gedeón Madián-dule-nakulemalad-bukwadse-mosgua, sorda-wargwen e-aiga gabdaked-soggwichi itodapid. A-dule weyob soggwichid: —Emi an gabdaksado: Anmar-bukwadse, cebada-madu baparmakdani an daksad, binnasuli dordoneg-siidse yolenonigu, neg-ayaride an daksad.
JDG 7:14 Geb e-ai abin-sogded: —Sanar-ibmar-guoedi we anmarga obared. Israel-dule Joás-machi-Gedeón es-suidgi Madián-sordamar-obelogoed. Bab-Dummad Gedeón-argan-yaurgi Madián-sordamar-ukoed, degi, bela-sorda-baigan-bukmalad, Gedeónʼga urmakbaloed.
JDG 7:15 Gedeón gabdaked-itosgu, e-odulolesad-itosbargua, Bab-Dummad-nug-odummosad. Geb gannar Gedeón Israel-sordamar-danar-danar-bukwadse nonikid, gornonikid: “Gwisgumar, Bab-Jehová anmarga Madián-sordamar-urmaksad.”
JDG 7:16 Degi, Gedeón sordamar-dulataled-ilapaagwad (300), sogapaa mimisad, gar-trompeta bela sordamarga uksad, degi, buglu-olloganagi acha-gwallu-ogaar-yoyoi ega uksabalid.
JDG 7:17 Degidgi, Gedeón sordamarga sogded: “Nue be an-dakmalo. An-ibmar-imakedba be imakmalo. Madián-sordamar-danar-danar-bukwadse anmar mosale, be anyopira imakmalo.
JDG 7:18 An an-sordamarbo gar-trompeta-ogotele, bemar bela anmarba Madián-sordamar-bukwad-dikarba bemar gar-trompeta ogotemarmogo. Geb weyob ise-gormakar be gotemaloed: ‘¡Bab-Jehová-nuggi anmar urwemar! ¡Gedeón-nuggi anmar urwemar!’ ”
JDG 7:19 Degi, Gedeón, e-sordamar-dulataled-eba-nadapid (100), Madián-dulemar-danar-danar-bukwadse modapmalad. Mosmargua, deun nakulemalad-baigan neg-gabigwengi gwagsokalidgined. Degidgi, Gedeón-sordamar gar-trompeta ogotemalad, degi, buglumar mamaridmalad.
JDG 7:20 Sordamar dana-danad-sogapaagwad-baid gar-trompeta-ogotemargu, buglumar-mamarismarmogad. Degi, argan-sapiledsik acha-gwallu semamaid, argan-nuedsik gar-trompeta ogornadapmalad, degi, ise-gormakar gotemalad: “¡Dakebinne! ¡Bab-Jehová-nuggi anmar es-suidgi urwemar! ¡Gedeón-nuggi anmar es-suidgi urwemar!”
JDG 7:21 Degi, Israel-dulemar Madián-dulemar-bukwad-dikarba na e-bukwamaladgi amba bukusmalad. Madián-sordamar, dulemar-binnasuli-gormake-itoarmargu, bela binnasuli-oimaknadapi duurmakdemalad.
JDG 7:22 Gedeón-sordamar-dulataled-ilapaagwad (300) amba gar-trompeta-ogorbukwadgi, Bab-Jehová Madián-sordamar na muchub-muchub es-suidgi-earwarmalaga imaksad. Degi, Madián-sordamar Abel-Mehola-yar-abingunaidgi, Tabatʼye-neg-nugad-walik, Zereraʼsik, Bet-Sita-neggweburse wakitemalad.
JDG 7:23 Degidgine, Gedeón Israel-sordamarse gochad: Neftalí-sordamarse, Aser-sordamarse, degi, bela Manasés-sordamarse gochad. Geb Israel-sordamar Madián-sordamar-balegichamalad.
JDG 7:24 Gedeón, Efraín-yalaganba gayaburba-berbemalad-barmisbalid. Weyob gayaburba barmisad: “Madián-sordamar-abin be namalo. Jordán-diwar-obakleged-mamaidba e-idu be neg-gamalo, Bet-Baraʼye-neg-nugadse e-idu be neg-gamalo, adi, Madián-sordamar melle obakegar.” Efraín-sordamar ega-sogedba imaksamalad, bela Jordán-diwar-dinnalee-mamaidba e-idu neg-gasmalad, Bet-Baraʼye neg-nugadse.
JDG 7:25 Geb Efraín-sordamar, Madián-e-dummagan-walabo-gasmalad: Oreb, degi, Zeeb. Akwa-dummadgi Oreb-oburgwismalad. Emi, a-ulale, a-akwa Orebʼye bileged. Zeebʼdi uva-nis-eguruleged-neggi oburgwismalad. Emi, a-ulale, a-nega Zeebʼye nugad. Efraín-sordamar, Madián-sordamar-balegichad-sorba, Gedeónʼse Oreb-e-nono, degi, Zeeb-e-nono searmalad. Ar agine, Gedeónʼdi na e-sordaganmala Jordán-diwar-obakar bukwad.
JDG 8:1 Efraín-sordamar weyob Gedeónʼga urwedgi sogdemalad: —¿Ibiga be anmarga sogsasuli, anmar Madián-sordamargi bila-ononasokarye? ¿Ibiga be anmar-owisossuli? Be anmarse gochawilubbinad.
JDG 8:2 Geb Gedeón Efraín-sordamar-abin sogded: —Ar ibu wis-imaksa be an-dake. Bemar-Efraín-dulemar, bemar-uva-e-solagan-welegedi, anmar-Abiezer-dulemar-uva-welegedba, bur bule nuedid. Ar deyobi, bemar an-ibmar-imaksadba bur bule ibmar-nued-imaksamalad.
JDG 8:3 Ar Bab-Dummad bemarga Madián-sordamar-e-dummagan Oreb, degi, Zeeb urmaksad. Degitega, ¿ibu-imaksa be an-daksunna? Andi gwen-dogdar ibmar-nued imaksasulid. Efraín-sordamar deyob Gedeón ega-soge-itosmargu, bar-akar-sogsasurmalad.
JDG 8:4 Gedeón, degi, e-sordamar-dulataled-ilapaagwadmala (300) Jordán-diwarse mosgua, obaksamalad. Ar nue yegusmar-inigwele, deggines e-isdarmalad-balegichamalad.
JDG 8:5 Gedeón Sucot-neggweburse mosgua, Sucotʼginmaladga sogded: —Wis be an-sordamarga mas-uke, ar an-sordamar na nue-yegusmalad. Amba anmar Madián-reymar Zebaʼye-nugad, degi, Zalmunaʼye-nugad baleginadapmalad.
JDG 8:6 Sucot-e-dummagan abin-sogdemalad: —¿Ibiga anmar be-sordamar masgi-ogunnoe? Ar bemarde amba yoo Zeba-gamalad, amba yoo Zalmuna-gamarbalid. Bato be gasmalardi, nabirdo.
JDG 8:7 Geb Gedeón Sucot-e-dummagan-abin sogded: —Degir nabir. Ar Bab-Jehová an-argan-yaurgi anga Zeba-uksale, Zalmuna-uksabalile, bemar anse suar-ikobiidgi, degi, nega-dulesulidganba gagan-ikobiid-gannareged-nikadgi san dubamaklegoed.
JDG 8:8 Gedeón Sucotʼgi-nadgu, Peniel-neggweburse naded. Agi, Gedeón amba-deyob e-sordamarga mas egichidapbalid. Penielʼginmalad amba Sucot-e-dummagan-sogsadyob Gedeónʼga sogsamarmogad.
JDG 8:9 Degi, Gedeón, Penielʼginmaladga sogsamogad: “Nuedgi an gannar aibilisale, we-neg-matusulid an earnonikoye.”
JDG 8:10 Rey-Zeba, Rey-Zalmunaʼbogwa Carcorʼye-neg-nugadgi sordamar-miliambe-gakatar-gudimaladba (15,000) gudimalanad. Unnila napi-wemar sordamar-dad-nakwedsikmalad besmalad. Ar e-sordagan-baigandi es-suidgi-bila-onomaladi mili-dulanergwa (120,000) bila-onogedgi girgusmalad.
JDG 8:11 Gedeón, Nobaʼye-neg-nugad-dad-nakwedsik dulemar-bukmaladsik, degi, Jogbeha-neg-nugadsik naded. Geb Gedeón, ukiar Madián-sordamar baisur-binsabukwadgi egi gwichigudapid.
JDG 8:12 Madián-reymar Zeba, Zalmunaʼbogwa aisaar-wakitemalanad. Degi-inigwele, Gedeón balegitegusgu, warbobela-gadapid. Degidbali, Madián-sordamar na nue-dobe itodmalad.
JDG 8:13 Joás-machi-Gedeón, bila-onodiidgi-gannar-aibilisadgi, Jeresʼsik-aibinlemaid-igarba-danigua,
JDG 8:14 machi-sapingwa-Sucotʼgined-gasad. Ese dulemar-nugmar egichisad. Machi-sapingwa Sucot-e-dummagan-e-nugmar, degi, girmar-dummagan-e-nugmar dulapaa-gakambe-gakagugle-mergued (77) Gedeónʼga narmakar uksad.
JDG 8:15 Degidgi, Gedeón Sucotʼse naded. Gedeón modapgu, Sucotʼginmaladga sogded: “¿Be ebinsamala, bemar-angi-dodosmalad, bemar an-bendaksasurmalad? Bemar anga sogsamalad: ‘An be-sordamarga masgunned-ukosurye, ar bemarde amba yoo Zeba, degi, Zalmuna-gamaladdeeye, ar be bato-gasmalardi, nabirye. ¿Bemar anga deyob sogsad be ebinsamala? Emide, an we-dulemar-gasad be dakmardo.’ ”
JDG 8:16 Degidgi, Gedeón, suar-ikobiid, degi, nega-dulesulidganba-gagan-ikobiid-gannareged amisad. Geb a-ikogine, Sucot-girmar-dummagan-bibyosad.
JDG 8:17 Deginbali, Gedeón, Peniel-neggwebur-ibe neg-matusulid earisbalid. Degi, Gedeón, machergan-Penielʼginmalad-oburgwisbalid.
JDG 8:18 Geb Gedeón Zebaʼse, Zalmunaʼse egichided: —Bemar Taborʼgi dulemar-oburgwisadi, ¿igi daklemala? Geb Gedeónʼga sogdemalad: —Beyob-daklemala. Rey-machiyob daklemalad.
JDG 8:19 Degidgi, Gedeón binnasur sogded: —Bemar, an-gwenadgan-oburgwismalad. ¡Bab-Jehová nue-dula-mai dakledo! Ar bemar an-gwenadgan-oburgwissulina, emi-ibagi, an bemar-oburgwedgi-binsasulindo.
JDG 8:20 Geb Gedeón e-machi-dummad-Jeterʼga sogded: —Dakebinne, oburgwe. Ar machigwade sapingwasoggu, dobedba es-suid onossulid.
JDG 8:21 Zeba, degi, Zalmunaʼbo Gedeónʼga sogdemalad: —Ar dule-machered na be itogele, be anmar-oburgwedo. Gedeón gwichigudgu, Zeba-oburgwisad, degi, Zalmuna-oburgwisad, degine, e-moli-yargan-muremalad-dukargi-ibmar-nanaid ei susbalid.
JDG 8:22 Israel-dulemar Gedeónʼga sogdemalad: —Gedeón, Madián-sordamargi be anmar-bendaksasoggu, be anmarga negseedo. Geb be-sorba be-machi, degi, be-wagan anmarga negseemogoed.
JDG 8:23 Gedeón, Israel-dulemar-abin sogded: —Suli, an bemarga negseosuli, an-machi seosurmoga. Unnila Bab-Jehová bemarga negseoed.
JDG 8:24 Sogdebalid: —An bemarse ibmar-soggwen egisdo: Bemar Ismael-dulemar-ibe-oluamar-susad gwa-gwagwen be anga udamalo.
JDG 8:25 Israel-dulemar abin-sogdemalad: —Degiirdi, nuedgi an bega ukmalo. Degidgine, napagi mor-dummad-ogichamalad. Geb oluamar-amismalad na mor-dummadgi urbismalad.
JDG 8:26 Oluamarbi nibir-dulabo-gakapaa (43) aidikue-wilub welesad. Ibmar-baigan soglesulid: Ibmar-nuegan, ibmar-orgimalad, mor-suir-akwagiid-Madián-reymar-ebusmalad, amardi soglesulid. Degine, moli-yargan-muremalad-dukarmargi-ibmar-nagusmalad, soglesurbalid.
JDG 8:27 Gedeón we-ormargi efod-sobsad. We-efod-orbiid e-neggwebur-Ofraʼgi ogwichisad. Geb bela Israel-dulemar we-efod-orbiid Bab-Dummadyob dakdemaladba isgudmalad. Amba deyob Gedeónʼga, degine, e-gwenadganga ibmar-isganaga gunonimogad.
JDG 8:28 Weyob Madián-dulemar, Israel-dulemar-sogedba-nanadii gusmalad. Madián-dulemar bar Israel-dulemargi obindii gussurmalad. Gedeón-gudigusadgi, birga-dulabo (40) Israel-yalagi neg-bogidikid nagusad.
JDG 8:29 Geb degine, Joás-machi-Gedeón Jerobaalʼye-nugbalid e-neggweburse megnad gusad.
JDG 8:30 Agine, Gedeón omegan-ichesur-nikussoggu, dulapaa-gakambe (70) machimala-nikusad.
JDG 8:31 Geb Siquemʼgi ome-dikarbalid nikusbalid. A-omebali, machi-wargwen-nikusad. Abimelecʼye onugsasad.
JDG 8:32 Joás-machi-Gedeón, nue-sereddii burgwisad. Geb Abiezer-wagan-bukwadgi, Ofra-neggweburgi e-bab-Joás-neg-uangi diglesad.
JDG 8:33 Gedeón-burgwisad-sorba, gannar Israel-dulemar Bab-Dummad-Jehováʼgi isgudmalad. Geb Baal-Berit e-bab-dummadga imakde gusmalad.
JDG 8:34 Israel-dulemar e-Bab-Dummad-Jehová-iedmalad, e-isdarmaladgi e-bendaksasuliyob dakdemalad.
JDG 8:35 Deginbali, Israel-dulemar, Gedeón ega-ibmar-nuegan-imaksa-inigwele, e-gwenadgangi wis nued-binsassurmarbalid.
JDG 9:1 Jerobaal-machi-Abimelec Siquem-neggweburse nadegusad, adi, e-gilormar-ebo, degi, e-nan-e-gwenadgan-ebo sunmakegar. Modapgu, amarga weyob sogdapid:
JDG 9:2 “Siquemʼginmaladga be sogmar, bela Jerobaal-masmala-dulapaa-gakambegwad (70) bemarga negseebi be abege, igi, be unnila dule-wargwen bemarga negseebi be abege. Be ebinsamalo, anmar na ablis galagwenmaladid.”
JDG 9:3 E-gilormar, bela Siquem-dulemarga sunmaksamargu, Siquem-dulemar Abimelecʼba nagusmalad, ade, sogdemalad: “Ar anmar-gwenadid.”
JDG 9:4 Geb bab-dummad-Baal-Beritʼse-goled-neggi mani-sibu-dulapaa-gakambe aidiku-bukwad (70) Abimelecʼga uksamarbalid. A-manigi Abimelec dulemar-isgana-bennuksad, eba naegar.
JDG 9:5 Abimelec, Ofra-neggweburse e-bab-megisadse nadgua, e-gwenadgan Jerobaal-masmala-dulapaa-gakambegwad (70) akwa-dummad-gwagwenad-birgi ogilosad. Degi-inigwele, e-urba-bur-bipigwad-Jotamʼdi nabir dukusad.
JDG 9:6 Bela Siquemʼginmalad, Miloʼginmaladbo Siquemʼgi wag-ulu-war-asabin, degine, akwa-matusulid-siid-asabin na bukusmalad. Geb reyga Abimelec-onugsasmalad.
JDG 9:7 Jotam wisguargua, Abimelec reyga-megisye, Gerizim-yar-birise nakwided. Geb agine, binnasuli weyob goted: “Siquem-dulemar, an bemarga ibmar-soged be itomar, adi, Bab-Dummad bemar-itomogoed.
JDG 9:8 ”Ibagwengine, sapimar, e-dummad-nug-imakega nadmalad. Geb olivo-sapiga sogdapmalad: ‘Be anmar-reyga gue.’
JDG 9:9 Olivo-sapi abin-sogded: ‘An sapimar-e-dummadga-guega, ¿olivo-gwallu-an-ukdiid bergusunnode, adi, sapimar-baiganba dummarbaa guegar? Adi sulirgebed. Ar ade, an-olivo-gwallugi bab-dummagan-nug-odummolediid, degi, an-olivo-gwallugi dulemar-nug-odummoledibalid.’
JDG 9:10 ”Geb sapimar, higuera-sapiga sogdemalad: ‘Be anmar-reyga gue.’
JDG 9:11 Higuera-sapi abin-sogded: ‘An sapimar-e-dummadga-guega, ¿an-san-ochigwad-yeer-gullegedde bergusunnode? An sapimar-baiganba dummarbaa guega, ¿an-sanmar-nuegande bergubarsunnode? Adi sulirgebed.’
JDG 9:12 ”Geb sapimar, uva-dubga sogdemalad: ‘Be anmar-reyga gue.’
JDG 9:13 Uva-dub abin-sogded: ‘Sapimar-e-dummadga an guega, ¿an vino-ukdiid bergusunnode? Adi sulirgebed. Ar ade, an-vinoʼgi bab-dummagan-weligwar-imaklediid, degi, an-vinoʼgi dulemar-weligwar-imakledibalid.’
JDG 9:14 ”Napidgine, sapimar, bela sapi-bula-ikobiidga sogdemalad: ‘Be anmar-reyga gue.’
JDG 9:15 Sapi-bula-ikobiidi abin-sogded: ‘Ar bemar reyga an-onugsabiele, dagmardo, an-urba be dukudamardo. Ar be anse dagsurmalardi, sapi-bula-ikobiidgi soo gwabunye-dagoed, ese bela Líbano-urwar-sapimar ogumaklegoed.’ ”
JDG 9:16 Jotam sogdebalid: “Emide nued: ¿Bemarde nabiridba, degi, igar-maidba Abimelec reyga onug-imaksa be itomala? ¿Bemarde Jerobaalʼgi, degi, e-negginmaladgi igar-nued-imaksa be itomala? Degine, ¿Jerobaal-ibmar-imaksadba bemar ega ibmar-imaksamoga? Suli.
JDG 9:17 An-bab-Jerobaal, Madián-dulemar-ganguedgi bemar-bendakega bemar-nuki bila-onosad, degi, bemar-nuki na san-uksad.
JDG 9:18 Degite, emi-ibagi, an-bab-gwenadgangi be gwichigusmalad. E-masmala dulapaa-gakambegid (70) akwa-dummad-birgi be ogilosmalad. Jerobaal-ome-dikarbalid-e-machi-Abimelec bemar-gwenad-gued-ulale, bemar Siquem-reyga Abimelec-onug-imaksamalad.
JDG 9:19 Ar bemar Jerobaalʼgi, degi, e-gwenadgangi innikigwadba be igar-imaksamalale, degi, egi nued-binsaedgi be ibmar-imaksamarbalile, Abimelecʼba be weligwar-itomaloed. Degi, Abimelec bemarba weligwar itomogoed.
JDG 9:20 Ar degisulile, Siquem-dulemar-obelogega, degi, Milo-dulemar-obelogegarba, Abimelecʼgi soo-gwabunyeyobi boni-dummagan-nodasun. Degi, Abimelec-obelogega, Siquem-dulemargi, degi, Milo-dulemargi soo-gwabunyeyobi boni-dummagan-nodamosun.”
JDG 9:21 Geb Jotam deyob-sogsad-bergusad-sorbali, wakite gusad. Beerʼye-neg-nugadse nade gusad. A-neg-nugadgine na e-ia-Abimelec-dobedbali megidapid.
JDG 9:22 Abimelec birgapaagus Israel-dulemar-e-dummadga-maidgi,
JDG 9:23 Bab-Dummad, Siquem-dulemar Abimelecʼgi aibinnega imaksad.
JDG 9:24 Adi degidbali, Jerobaal-e-masmala-dulapaa-gakambegwad (70) oburgwilesmalad-ulale, Abimelec-oburgwilemogagar, degi, Siquem-dulemar oburgwilemogagar. Ar wemar, Jerobaal-e-masmala-ogilosadgi, Abimelec-bendaksamalad.
JDG 9:25 Degi, Siquem-dulemar Abimelecʼgi-gwisguega yar-birgi dukuar bukusdamalad. We-dule-isganamar dulemar-iirmakmaid-ibe ibmar-atursadamalad. We-ibmar-gunaid bela Abimelecʼga sogsamalad.
JDG 9:26 Ibagwengine, Ebed-machi-Gaal, e-gwenadganmala, Siquem-neggweburse modapgusmalad. Degi, Siquem-dulemar Gaal baisur-daksamalad, egi bensurgusmalad.
JDG 9:27 Gaal, e-gwenadganmala sapurba nadmargua, uva-san wesmala, egurusmala. Geb degine, e-bab-dummadse-goled-neggi iba-onosmalad. Gobbukmaladgine, degi, mas-gunbukmaladgine, Abimelec-ukabsasmalad.
JDG 9:28 Agine, Ebed-machi-Gaal weyob sogded: “¿Abimelecʼde doaye na wissoge? ¿Ar ibiga anmar e-maiga gumaloe? We-Abimelecʼde, ¿Jerobaal-machisursi? ¿E-bendakedde, Zebulʼsursi? ¿Ar ibiga anmar Abimelec-e-maiga bar gumarsunna? Bur be Siquem-e-bab-Hamorʼye-nugad a-e-dulemar-maiganga be gumala.
JDG 9:29 Ar ani an Siquem-neggwebur-e-dummadga-maina, an Abimelec-dummadga-maid onosaled. Weyob an ega sogsabaliled: ‘Abimelec, bela be-sordamar be oambikue, anmar anbo-bila-onomardo.’ ”
JDG 9:30 Neggwebur-saila-Zebul, deyob Ebed-machi-Gaal ibmar-sogsaye wisguargua, Zebul bela-bela sae-itoded.
JDG 9:31 Geb Zebul, Abimelecʼga gayaburba-berbemalad arbakee barmisad, ega weyob sogsad: “Ebed-machi-Gaal, e-gwenadganmala Siquem-neggweburse noni, neggwebur-ourwega begi nonimar.
JDG 9:32 Degisoggu, we-mutiki be-sordamar-abargi be nodamalo, sapurba-dukuar be nakulemalo.
JDG 9:33 Neg-oibosar, dad-nakwialile, neggweburgi be gwichigudmalo. Geb Gaal, e-sordaganmala begi gwichiguarmalale, be-dakedba na be imako, igi be imakbie.”
JDG 9:34 Degisoggu, a-mutiki belagwable Abimelec, e-sorda-bila-onomaladbo nadmalad. Na Siquem-neggweburmobin, sogabake danar-danar dukuar-nakulegega ambikudapmalad.
JDG 9:35 Dakargu, Ebed-machi-Gaal neggwebur-yawagak-dogedgi magaba gudiid. Degidgine, Abimelec bela e-sorda-bila-onomaladbo na dukubukmaladgi ainiarmalad.
JDG 9:36 Gaal, dulemar-ainialid-dakargua, Zebulʼga sogded: —¡Be dake, dulemar yarbirgi aidedani-nanaed! Zebul abin-sogded: —Suli. Yar-mullugan-e-burba dulemaryob be daked. Ar wede dulemarsulid.
JDG 9:37 Gaal gannar Zebulʼga sogdebalid: —Be nue dake, dulemar yar-abalallagi-aidedanimalad. Dule-bamaladdi, nermar gusgu ambikudaedsik, wag-ulusapi-gwichidsik-igarba, aidedanimalad.
JDG 9:38 Zebul abin-sogded: —¿Igi be iduar we-dulegi ulusgussunna? Bede weyob egi sogsagusad: ¿Abimelecʼde doaye wissoge? Ar deyob be we-dulegi dodosgussursi. ¡Emisgi be nae! ¡Egi be bila-ononae!
JDG 9:39 Degidgi, Gaal Siquem-sordamar-idumai gusad. Geb Abimelecʼgi bila-onosad.
JDG 9:40 Degi-inigwele, Abimelec, Gaal-wakitegu, balegite gusad. Bukidar Gaal-e-sordamar Abimelec-e-sordamarse igarba nailikgusad, Siquem-neggwebur-yawagak-dogedse deyob gusad.
JDG 9:41 Abimelec Aruma-neggweburgi megisad. Degine, Zebul, Siquem-neggweburgi Gaal-ononnosad, degi, a-e-gwenadgan-ononnosbalid, adi, mer we-dulemar Siquemʼgi ambikumalagar.
JDG 9:42 Banedgine, Abimelec-owisosmalad, Siquem-dulemar sapurba nasokarmarye.
JDG 9:43 Degidgi, Abimelec e-sordamar-urbisgua, sorda-danapaa urbisad. Geb degi, sapurba dukuar-ambikusmalad. Abimelec dakdegua, dakded, Siquem-dulemar neggweburgi-ainiarmala. Geb, Abimelec, e-sordaganmala-dukubukwadgi egi-bila-onogega ainiarmarmogad.
JDG 9:44 Abimelec, degi, e-sordaganmala Siquem-neggwebur-yawagak-dogedse gwae ambikudapmalad. Sordamar-danabogwaddi Siquem-sordamar-sapurba-gudimaladgi gwichigudmalad, bela-ogilosmalad.
JDG 9:45 A-ibagi, Abimelec ibagwen-dummad Siquem-neggweburgi bila-onosad. Degi, Abimelec Siquem-neggwebur-susgua, dulemar-gudidimalad bela-ogilosad. Geb a-sorbali, Siquem-neggwebur-earisbalid, degi, e-napa-oichogega egi balu mie-mie imaksabalid.
JDG 9:46 Dulemar Siquem-neg-matusulidgi-bukwamalad deyob wisgusmargua, bela bab-dummad-Baal-Beritʼse-goled-neg-gandikidse ubodmalad.
JDG 9:47 Abimelec wisguargua, Siquem-dulemar neg-gandikidyaba bukwamarye.
JDG 9:48 Abimelec e-sordamarbo bela Salmón-yar-siidse nadmalad. Degi, Abimelec akan-amisgua, sapi-e-anamar immisad. Geb e-gukingi sesgua, e-sordamar-eba-gudimaladga sogdemogad: “Igi-an-imaksa-be-an-dake, deyob be gwae-gwae imakmalo.”
JDG 9:49 Bela dulemar Abimelecʼba-gudimalad, sapi-ana siksamarmogad. Geb Abimelecʼba Baal-Beritʼse-goled-neg-gandikid-siidse nadmalad. A-dikarbali, sapi-anamar urbidapmalad. Geb egi soo-ogasmalad. Degidbali, dulemar-neg-matusulid-Siquemʼyaba-bukwamaladi burgwismalad. Deun, miligwen-wilub (1,000) dulemar-bukwadi bela gummaksamalad. Machergana, omeganse-bakar burgwismalad.
JDG 9:50 Geb a-sorbali, Abimelec, e-sordaganmala Tebes-neggweburbina nade gusad. Agine, bela neggwebur-ebilis egi-gwichiguega ambikudapid. Degidbali, a-neggwebur ese sulesbalid.
JDG 9:51 Tebes-neggwebur-abargine, neg-matusulid-gandikid-gwichidse, bela dulemar-neggweburginmalad duurmakdemalad. Machergan, omeganse-bakar, ase nadmalad. Yawagak-edusmaladgi, neg-uas-niba bukusmalad.
JDG 9:52 Degidgi, Abimelec neg-matusulidse modapgua, egi gwichiguded. Nue neg-ogumaksokali,
JDG 9:53 ome-wargwen Abimelec-nonogi obnaged-akwa-dummad egwannalid. E-nonogi argwannonigu, ei-nono marisad.
JDG 9:54 Geb a-gines Abimelec dule-ega-sigu-abgaedse gochad, ega weyob sogded: “Be-es-suid be onoge, be an-oburgwe, adi, mer an-annik soglegega: ‘Ome-wargwense burgwisye.’ ” Degidgi, dule-ega-sigu-abgaed, esbunyargi ewarisad. Agidbali, Abimelec burgwisad.
JDG 9:55 Israel-dulemar, Abimelec-burgwisad-daksamargua, e-neg-e-negse nadmarsunnad.
JDG 9:56 Abimelec, e-babgi-gwichigusad-ular, degi, e-gwenadgan dulapaa-gakambe (70) ogilosad-ular, Bab-Dummad weyob Abimelec-imaksamogad.
JDG 9:57 Deginbali, Bab-Dummad Siquem-dulemar, e-isgued-ular, egi buged-imaksad, adi degidbali, e-isgumalad-bennukegar. Degisoggu, Jerobaal-machi-Jotam dulemar-ukabsasadba, Siquem-dulemar sabsur-wilesad.
JDG 10:1 Abimelec-burgwisad-sorba, Isacar-dule Tolaʼye-nugad, Israel-dulemar-bendakega megnonikid. Tolaʼde, Fúa-e-machid, Dodo-e-wagwabalid. Tola, Efraín-yalaganba, Samir-neggweburgi maid.
JDG 10:2 Tola birga-dulagwen-gakapaa (23) Israel-yar-semai gusad. Burgwisgu, Samir-neggweburgi diglesad.
JDG 10:3 Tola-burgwisad-sorba, Jair-Galaadʼgined megnonikid. Birga-dulagwen-gakabo (22) Israel-yar-semai gusad.
JDG 10:4 Jair, masmala waladulagwen-gakambe (30) nikusad. Bela moli-uayasuidi nikadbimalad. Degi, Jair-masmala neggwebur gwadulagwen-gakambe (30) semaibalid. A-neggweburmar Galaad-yargi bukwad. We-garda-narmaklenaidse we-neggweburmar Jair-neggweburmarye nugad.
JDG 10:5 Jair burgwenonigua, Camón-neggweburgi diglesad.
JDG 10:6 Geb Israel-dulemar, gannar Bab-Jehováʼgi isgudmalad. Ar ade, bab-dummadyob-imaklemalad-Baalʼse gordii gudmalad, bab-dummad-bundoryob-imaklemalad-Astarotʼse gordii gudmalad. Degi, Siria-dulemar-e-bab-dummaganse, Sidón-dulemar-e-bab-dummaganse, Moab-dulemar-e-bab-dummaganse, Amón-dulemar-e-bab-dummaganse, degine, Filistea-dulemar-e-bab-dummaganse gordii gudmalad. Bab-Jehováʼdi obatemalad, bar a-sogedba nanadii gussurmalad.
JDG 10:7 Degidbali, Bab-Jehová Israel-dulemargi sae-itoded. Degisoggu, Filistea-sordamarga, degi, Amón-dulemarga urmaknonikid.
JDG 10:8 A-ibagangine, Israel-dulemar bar-gangued-nika gussurmalad, birgambe-gakabaabak (18) sabsur-wilebukwa gusmalad. Bela Israel-dulemar-Jordán-diwar-dad-nakwedsik Amorreo-dulemar-yargi, Galaadʼgi-bukwamaladi, Filistea-dulemarse, degi, Amón-dulemarse sabsur wilesmalad.
JDG 10:9 Amón-sordamar Jordán-diwar-obaksamarbalid. Judá-sordamargi, Benjamín-sordamargi, degi, Efraín-sordamargi bila-onosmalad. Deginbali, Israel-dulemar dummad-wilesmalad.
JDG 10:10 A-ulale, Israel-dulemar Bab-Jehováʼse e-bendakega ise-wilegar gotemalad: —Bab-Jehováʼye, anmar begi isgusmalad. Anmar be-obachamalad. Anmar bab-dummagan-Baalʼmar-e-nug-odummodii gudmalad.
JDG 10:11 Bab-Jehová, weyob Israel-dulemar-abin imaksad: —Bemar epenne, anse gocha-gusmalad. Deunni, we-dulemar be-wiosmargu: Egipto-dulemar, Amorreo-dulemar, Amón-dulemar, Filistea-dulemar,
JDG 10:12 Sidón-dulemar, Amalec-dulemar, degi, Maón-dulemar. Bemar we-dulemarse ise-mesagwar-wilebukwagua, be anse binnasuli gochamalad. ”Agine, ¿an bemar-bendaksasursi? An bemar-bendaksamala.
JDG 10:13 Degi-inigwele, bemar an-obachamalad, degi, bemar bab-dummagan-baiganba be ibsasmalad. Degisoggu, geg an bar bemar-bendake.
JDG 10:14 Bemar bab-dummad-baiganse be gornamardo, ar aa be, be-bab-dummadganga be susmalad. A-bab-dummagan bemar-wile-itogedgi bule bemar-bendakmalodibe.”
JDG 10:15 Israel-dulemar Bab-Jehová-abin sogdemalad: —Bab-Jehováʼye, suli. Anmar begi dummad-isgusad. Igi be anmar-imakbie, be-itolegedba be anmar-imakdo. Unnila anmar bese wilesagwa egisdo, we-ibagindi wis be anmar-bendakye.
JDG 10:16 Geb Israel-dulemar bab-dummadyob-imaklemalad-sedimaladi bela osulosmalad. Geb gannar Bab-Jehová-sogedba nanadmalad. Bab-Jehová, Israel-dulemar-wilebukwad nue-geger-dakgusadba na nue-wiledaksad.
JDG 10:17 Amón-dulemar guagwar bila-onogega Galaadʼgi ambikudapmalad. Israel-sordamardi na atosmarmogad, degi, Mizpa-neggweburgi ambikudapmarmogad.
JDG 10:18 Israel-dulemar Galaad-neggweburgi-gudimaladi, degi, sapin-dummagan na sokarmalad: “Dule Amón-dulemargi bila-onogega anmar-idugele, a-dule, bela-Galaadʼgi-dulemar-bukwamalad-e-dummadga guoed.”
JDG 11:1 Jefté, Galaad-neggweburginedid, bila-onogedgi dule-gandikidid. Galaadʼye e-bab-nugad, e-nandi gambasaedid.
JDG 11:2 Galaad, e-ome-sunnadbo masmala-nikusbalid. A-masmala dungusmargua, negyagi Jefté-ononnosmalad, ega sogsamalad: “Bipisaale be anmar-imbagi bab-burgwisad-sorba-ibmar-beoed-nikuosuli, ar bedi nan-baidid.”
JDG 11:3 Degidbali, Jefté e-gwenadgangi wakite gusad. Geb Tob-yarse megnad gusad. Agi, dulemar-gandikidgi-ibmar-atursamalad amisad, adi, e-sordaga-guegar. Amarbo ibmar-atursanaddaed.
JDG 11:4 Degi, ibagan-nasad-sorba, Amón-dulemar Israel-dulemargi bila-onononigua,
JDG 11:5 Galaad-sapin-dummagan Tob-yarse Jefté-sunad gusmalad.
JDG 11:6 Degi, ega sogdapmalad: —Anmarba be dage, Amón-dulemargi-bila-onogedgi be anmar-iduedga-guega, anmar be-abeged.
JDG 11:7 Jefté, Galaad-sapin-dummagan-abin sogded: —¿Bemarde isdar-an-daksamarsursi? An-bab-walik-gudii be an-ononnosmalad. ¿Ibiga emidi bemar suli-suli-itoalidgi be an-sudanimarsunna?
JDG 11:8 Galaad-sapin-dummagan, Jefté-abin sogdemalad: —Ar a-ulale, anmar bebina danimalad, be anmarba-naega, Amón-dulemargi bila-onogegar. Deyobi, bela anmar-Galaadʼgi-bukmalad-e-dummadga be guoed.
JDG 11:9 Jefté, Galaad-sapin-dummagan-abin sogded: —Amón-dulemargi bila-onogega be an-sedmalale, degi, Bab-Jehová Amón-dulemargi nakwega an-imaksale, ¿an bemar-dummadga gusunnode?
JDG 11:10 Geb Galaad-sapin-dummagan Jeftéʼga nue-sogdemalad: —Ar be-sogedba anmar ibmar-imakoed, ar Bab-Jehová anmar-barsogedga gued.
JDG 11:11 Geb Jefté, Galaad-sapin-dummaganba nadsunnad. Galaad-dulemar, e-dummadga Jefté-nug-imaksamalad, degi, sordamar-e-iduedga nug-imaksamarbalid. Degi, Jefté, Mizpaʼgi na e-ibmar-sogsadi gannar Bab-Jehová-asabin sogsabalid.
JDG 11:12 A-sorbali, Jefté, Amón-e-reyse gayaburba-berbemalad-barmisad, adi, ega sogega: —¿Ibu-boni be anmarbo-nika? Emide, be an-yargi gwichigunaigu.
JDG 11:13 Amón-dulemar-e-rey, Jefté-gayaburba-berbemalad-abin sogsad: —Bemar Egiptoʼgi ainiarmargua, bemar an-ibe Arnón-diwar-akale, Jaboc-diwarse yar-susmalad, degi, Jordán-diwarse-bakar, be susmarbalid. Emisgi, nuedgi bemar anga we-yar gannar ukmalargebed.
JDG 11:14 Jefté, Amón-dulemar-e-reyse gayaburba-berbemalad-barmisbalid.
JDG 11:15 Weyob Amón-dulemar-e-reyga sogsad: —Weyob Jefté soged: ‘Anmar, Moab-dulemar-ibe, Amón-dulemar-ibe yar sussuli,
JDG 11:16 Israel-dulemar Egiptoʼgi ainiarmargua, nega-dulesulidganba aligusmalad, Demar-Ginnidye-nugad-naidse. Geb Cadesʼye-neg-nugadse noni gusmalad.
JDG 11:17 Degidgi, Israel-dulemar, Edom-dulemar-e-reyse gayaburba-berbemalad barmis gusad, ega sogega: ” ’Wilesagwa an bese egisye, be-yargi wis naega be an-imakena gadinye. Degi-inigwele, Edom-e-rey e-yargi-naega Israel-dulemar-imaksasulid. Deyob gayaburba-berbemalad, Moab-e-reyse barmilesbalid. Amba Moab-e-rey e-yargi-naega Israel-dulemar-imaksasurmogad. Degisoggu, Israel-dulemar Cadesʼgi ambikus gusmarsunnad.
JDG 11:18 ” ’Geb degine, Israel-dulemar nega-dulesulidganba aligusmalad, Edom-yar-dikarba nasa gusmalad, degi, Moab-yar-dikarba nasa gusmarbalid. Geb, Moab-yar-dad-nakwedsik modapmargu, Arnón-diwar-obakar danar-danar ambikunoni gusmalad. Ar Arnón-diwar, Moab-yar-abingunaidga-gunaisoggu, Israel-dulemar Moab-yargi dogsasurmalad.
JDG 11:19 ” ’Amba deyob, Israel-dulemar Amorreo-dulemar-e-rey-Sehónʼse gayaburba-berbemalad barmis gusbalid. Sehón, Hesbónʼgi-negdakmaidgi, Israel-dulemar weyob ega gayaburba barmisad: Wis an bese egis, be-yargi-naega be an-imakena gadin, adi, an-yarse an moegar.
JDG 11:20 Degi-inigwele, Sehón, Israel-dulemar-akudaksad, e-yargi-naega imaksasulid. Aka e-sorda-bila-onomalad bela Jahazaʼye-neg-nugadgi urbisad. Geb Israel-dulemargi bila-onosad.
JDG 11:21 ” ’Degi-inigwele, Israel-e-Bab-Dummad-Jehová, Israel-dulemar bela Sehón-sordamargi-obinega imaksad. Weyob, Israel-sordamar Sehón-sordamar-ogalakusmalad. Degidbali, Israel-dulemar, Amorreo-dulemar-ambikusad-e-yar na susmalad,
JDG 11:22 Arnón-diwar-akar alid, Jaboc-diwarse. Degine, nega-dulesulidgan-akar arbalid, Jordán-diwar-maidse.
JDG 11:23 ” ’Emide, Bab-Jehová Amorreo-dulemargi yar susad, Israel-dulemarga-ukegar. ¿A-yarde, bede gannar anmar-ibe subisunde? Adi sulirgebed.
JDG 11:24 Ar be-bab-dummad-Quemos bemarga-yar-ukedi, bemargadid. Ar anmar-Bab-Dummad-Jehová anmarga-yar-ukmogadi, anmargadmogad.
JDG 11:25 ” ’Emi, Zipor-machi-Balac Moab-e-rey, abali ¿bede bur buledye sogsunde? Deyobsulirgebed. Ar we-reyde Israel-dulemargi gwen bila-ononai gussulid.
JDG 11:26 Ar bato Israel-dulemarde birga-dulataled-ilapaa-gusad-akale (300) Hesbónʼgi, degi, e-neggwebur-burwiganagi bukwamalad. Aroerʼgi, degi, e-neggwebur-burwiganagi, degine, bela Arnón-diwar-gakaba-neggweburmar-bukwadgi bukwamalad. Degite, ¿ibiga be a-ibagangi we-yar sussurmarsunna?
JDG 11:27 An gwen bemar-oakalossulid. Degite, bemardi angi gwichigu-nanaid. Degi-inigwele, Bab-Jehová, igar-naboged-dummad-gued. Emi-ibagi, Israel-dulemarga, Amón-dulemarga igar-nabogoed.’ ”
JDG 11:28 Degi-inigwele, Amón-dulemar-e-rey, Jefté-ega-gayaburba-barmisad gwen-itossulid.
JDG 11:29 Degine, Bab-Jehová-Burba Jeftéʼgi ubononigu, Jefté bela Galaad-yargi, degi, Manasés-yargi nasad. Galaad-yargi Mizpa-neggwebur-siidgi nasbalid. Geb Mizpa-akar, Amón-dulemar-bukwadse naded, egi gwisguegar.
JDG 11:30 Degidgi, Jefté Bab-Jehováʼga weyob ise-sogar sogsad: “Be anga Amón-dulemar-urmaksale,
JDG 11:31 degi, Amón-dulemargi an nakwis-danikile, doa-inse an-abindakega an-neg-yawagakgi-nodagoedi, begadga guoed, degine, ogumakar an bega ukoed.”
JDG 11:32 Geb Jefté, Amón-sordamargi bila-onogega gwichiguded. Degi, Bab-Jehová Jeftéʼga Amón-dulemar-urmaksad.
JDG 11:33 Jefté neggwebur gwadulagwen (20) susad. Aroer-akale, Minit-neggwebur-naidse Abel-Queramimʼmobin neggweburmar-susad. Degidbali, Amón-dulemar, Israel-dulemar-sogedba nanabukwa gusmalad.
JDG 11:34 Geb, Jefté bila-onodii gannar e-neggwebur-Mizpaʼse-danigua, e-abin, e-sisgwa dodoagwar pandereta-ogordanikid. Ar Jefté unnila wargwenna webi-nikad, ar mimmigan-baigan-sated.
JDG 11:35 Jefté deyob na e-sisgwa-daksagua, wile-itodedbali mor-yoid siir-siir imaksad. Geb weyob binnasur goted: —¡Bunor, be an-wiosdakle! Be anga nunmaked-dummad uksado. Ar Bab-Jehováʼga an ibmar-ise-sogar-imaksadi, an ega imakergebed.
JDG 11:36 Degi, e-bunagwa abin-sogded: —Baba, ar Bab-Jehováʼga be ibmar-ise-sogar-imaksadba be angi ibmar-imakodo, ar Bab-Jehová be-isdarmalad-Amón-dulemargi nakwega be-imaksad.
JDG 11:37 Degi, e-bunagwa ega sogdebalid: —Baba, unnila an bese ibmar-soggwen an egisbido: An sui-nikuosursoggu, wis nii-warbo be anga iba-udado, adi, an-aimarmala yalaganba an bodii sanaegar.
JDG 11:38 E-bab abin-sogded: —Degiir, nabirdo. Geb bunagwa e-aimarmala yalaganba nade gusad, ar agine sui-nikuosulidba bodii gusad.
JDG 11:39 Nii-warbo-gunonikidgine, bunagwa gannar e-babse nonikid. Degi, Jefté, Bab-Jehováʼga ibmar-ise-sogar-imaksadba ibmar-imaknonikid. Jefté-bunagwa bipisaale sui-nikussuli burgwisad.
JDG 11:40 Agala, Israel-yagana durdaksamalad, birga-irba Galaad-dule-Jefté-e-bunagwa-ebinsaega ibabake bonaddamalad.
JDG 12:1 Efraín-dulemar e-sordamar-guagwar-urbisad, Jeftéʼgi gwisguegar. Efraín-sordamar Jordán-diwargi obaksamargu, Zafón-neggweburse nonimalad. Agine, Jeftéʼga weyob sogdemalad: —¿Ibiga yogasaar be anmar-owisossuli Amón-dulemargi be bila-onosa? Ar anmar bemarba namarmogoenad ¡Anmarse be-neg ogumaklesunnoe, bese-bakar be-ogumaklegoed!
JDG 12:2 Jefté amar-abin sogded: —Ar anmar Amón-dulemarbo yeer-boni-nikunai-gusad. An bemarse gochamalanad. Degi-inigwele, bemar gwen anmar-bendaksasurmalad.
JDG 12:3 Gwen-anmar-bendakdasuli, anmar be-dakargua, anmarbi Amón-sordamargi gwisgussunnad. Ar Bab-Jehová we-dulemargi-nakwega an-imaksad. ¿Ibiga emide bemar anbo-urwebi gudanimarsunna?
JDG 12:4 Degidgi, Jefté Galaad-sordamar bela oambikusgu, degi, Efraín-sordamargi gwichigusmalad. Galaad-sordamar, Efraín-sordamar-ogalakusmalad, ar ade, Efraín-dulemar ega weyob sogsamalad: “Bemar Galaad-dulemar Efraín-neggweburmargi-gudii-wakichamaladid, degi, Manasés-neggweburmargi-gudii-wakichamaladid.” Weyob ega sogsad-ulale, Galaad-e-sordamar, Efraín-e-sordamar-ogalakusmalad.
JDG 12:5 Efraín-sordamar-mer-wakinmalaga, Galaad-sordamar Efraín-yarse-Jordán-diwarba-obaklemaid-dinnaganaba ambikusmalad. Efraín-sordamar wakinmamaile, gasdamalad, Galaad-sordamar ega sokardaed: “¿Be Efraín-neggweburginedi?” Ega a-neggweburginedsurye sogsale,
JDG 12:6 geb Galaad-sordamar ega sogdedamalad: “Degiirdi nabir. Emisgi be soge: ‘Shibolet.’ ” Siboletʼye-sogsale, soglegedyob bichulile, gasdamalad. Degi, Jordán-diwargi e-dukar-egwachadamalad. Deyob mili-dulabo-gakabo (42,000) Efraín-sordamar girgusmalad.
JDG 12:7 Jefté birganergwa (6) Israel-dulemarga negsemai gusad. Galaad-dule-Jefté burgwenonigu, Galaad-neggwebur-gwensakgi digsamalad.
JDG 12:8 Jefté-burgwisad-sorbali, dule-Belénʼgined-Ibzán-nugad, Israel-dulemarga negsemai gusad.
JDG 12:9 A-dulede, masmala waladulagwen-gakambe (30) nikusad, bunamala waladulagwen-gakambe (30) nikusbalid. E-bunamalaga machergan-e-dadgansikidsulid-uksad, degine, e-masmalaga omegan-e-dadgansikidsulid-uksabalid. Ibzán birgagugle (7) Israel-dulemarga yar-sesad.
JDG 12:10 Ibzán burgwisgua, Belén-neggweburgi diglesad.
JDG 12:11 Ibzán-burgwisad-sorbali, Zabulón-dule-Elón-nugad, Israel-dulemarga birgambe (10) negsemai gusad.
JDG 12:12 Zabulón-dule-Elónʼye-nugad burgwisgua, Zabulón-yargi diglesad, Ajalón-neggweburgi.
JDG 12:13 Elón-burgwisad-sorba, Hilel-machi-Abdón, Israel-dulemarga negsemai gusad. Abdónʼde Piratónʼginedid.
JDG 12:14 We-dulede waladulabo (40) masmala-nikusad, degi, dulagwen-gakambe (30) wagan-nikusbalid. Bela e-masmala, degi, e-waganmala moli-uayasuid-nikadbimalad. Abdón, Israel-yargi birgabaabak (8) yar-semai gusad.
JDG 12:15 Hilel-machi-Abdón-burgwisgu, Efraín-yargi, Piratón-neggweburgi diglesad. Piratón-neggweburde Amalec-yalaganba siid.
JDG 13:1 Israel-dulemar gannar Bab-Jehováʼgi isgudmarbalid. Degi, Bab-Jehová, Filistea-dulemarga birga-dulabo (40) urmaksasunnad.
JDG 13:2 A-ibagangine, Dan-wagan-abargi Zora-neggweburgi dule-gwensak-Manoaʼye-nugad maigusad. E-ome geg mimmigan-nikued, ade, dule-sailaledid.
JDG 13:3 Ibagwengine, a-omesega, Bab-Jehová-e-baliwitur magar-gunonikid, weyob ega sogded: “Be dule-sailaled, bipisaale mimmigan be nikudisulid. Degi-inigwele, be gurgin-nika gunoniko, bega goe susugwa uklenoniko.
JDG 13:4 Emisgindi, mer vino gobo, mer inna-gagbid gobbalo, ibmar-ised melle gunbalo.
JDG 13:5 Ar ade, be gurgin-nika guoed, degi, bega goe-susugwa uklegoed. Bipisaale, e-ibe sailagia siklegosulid. Ar machigwade, e-gwalulegoed-iduar bato unnila Bab-Dummadgarbi-arbaega nugsalegoed. A-ulale, Nazareoʼye bilegoed. Degi, be-machi Filistea-dulemar-e-ganguedgi Israel-dulemar-ollorsaoed.”
JDG 13:6 Omegwa nadgua, e-suiga weyob sogdapid: “Bab-Dummad-e-dule-gwensak an-gunaidse arbi. Geger an daked, ar nab Bab-Dummad-baliwitur an daked. An ese egichissulid, bia be daniye. E-dule anga e-nug sogsasurmogad.
JDG 13:7 Unnila anga weyob sogsad: ‘Be gurgin-nika gunonikoye, bega goe-susugwa uklegoye. Machigwa Nazareoʼye bilegoye, ar machigwa e-gwalulegoed-iduar, degi, e-burgwedse Bab-Dummadgarbi-arbaega nugsalegoye. Degisoggu, emisgindi, mer be vino goboye, mer be inna-gagbid gobbaloye, melle be ibmar-ised gunbaloye.’ ”
JDG 13:8 Agine, Manoa Bab-Jehováʼse goted. Weyob ega sogded: “Dummadye, an bese wilesagwa egised, be-dule-be-anmarse-barmiapid gannar be barmidabali, adi, anmar-odurdakega, goe-gwalulegogu, igi odummolegoe.”
JDG 13:9 Bab-Dummad Manoa-ese-gochad itosad. Gannar Manoa-e-ome sapurba-gudiidgi, Bab-Dummad-e-baliwitur ese magar-gunonikid. Deunni, e-sui-Manoa e-walik gunaisulid.
JDG 13:10 Geb omegwa gwae-gwae e-suise-gornaega abarmakded: “¡An-ai! ¡An-ai! Iduar-anse-machered-arbigusad be dakdage.”
JDG 13:11 Geb Manoa e-omeba naded. Dule-gwichidse modapgua, Manoa ega weyob sogded: —¿Deun be, be an-omebo sunmaksagusa? Geb dule abin-sogded: —Eye, ani an be-ome-ebo sunmaksagusa.
JDG 13:12 Degi, Manoa ega sogded: —Be-ibmar-sogsad sogedba-gunonikile, degite, ¿igi anmar goe-akoe? Degi, ¿igi machigwa daergebe?
JDG 13:13 Bab-Jehová-e-baliwitur, Manoa-abin sogded: —An be-omega-ibmar-sogsad, na be-ome sogedba-imakergebed.
JDG 13:14 Be-ome, uva-nisgi-ibmar-soblearmalad gunnosulid, degi, vino gobosurbalid, degi, inna-gagbid gobosurbalid, degine, ibmar-ised gunnosurbalid. Bela an-ega-ibmar-sogsadba imakergebed.
JDG 13:15 Manoa, Bab-Jehová-e-baliwiturga sogded: —Wis be anmar-walik-siggwele, anmar-abargi-mas-itogegar. Anmar bin bega sibad-bipi-imakgweloed.
JDG 13:16 Bab-Jehová-e-baliwitur ega sogded: —Amba an bemar-walik-siggwerye-sogele, amba an bemar-mas gunnosulid. Ar be ibmar-ogumakar-ukye-sogerdi, Bab-Jehováʼga be ukodo. Ar ade, Manoaʼde wissulid, we-dule, Bab-Jehová-e-baliwitur-gue.
JDG 13:17 Degisoggu, Manoa Bab-Jehová-e-baliwiturse nug-egichided: —¿Igi be nuga? Adi, be-ibmar-sogsad sogedba-gusale, anmar doggus-nuedye be-annik sogmaloed.
JDG 13:18 Bab-Jehová-e-baliwitur abin-sogded: —¿Ibiga be an-nug anse egise? An-nug ibidar-nuedid, geger-itolegedid.
JDG 13:19 Degidgi, Manoa sibad-bipigwa sesad, degi, ibmar-gwag-Bab-Dummadga-binsa-ukleged sesbalid. Geb akwa-dummad-birgi Bab-Jehováʼga ogumakar uksad. Manoa e-omemala, na e-ibmar-ogumakar-uknaid-dakgwisgua, Bab-Jehová ibmar-gegerdakleged ega oyosad.
JDG 13:20 Ibmar-ogumakar-ukleged-ailagi soo-duurmakgwichid-abargi, Bab-Jehová-e-baliwitur niba-nakwide daksamalad. Manoa e-omemala deyob daksagua, napa-nagase wagar dulluu imaksamalad.
JDG 13:21 Geb Manoaʼse, degi, Manoa-e-omese Bab-Jehová-e-baliwitur bar magarossulid. Agi, Manoa magar-daknonikid, we-dule, Bab-Jehová-e-baliwitur-gue.
JDG 13:22 Degi, Manoa e-omega sogded: —¡Anmar, bela! ¡Anmar Bab-Dummad-daksad! ¡Anmar burgoed!
JDG 13:23 E-ome ega sogded: —Ar Bab-Jehová anmar-oburgwebiena, anmar ega ibmar-ogumakar-uksadi, degi, ibmar-gwag-uksabalidi, anmar-abin sussulinad. Deginbali, anmarse-ibmar-oyosad, anmarga oyossurbalinad. A-ukine, anmarga ibmar-sogsasurbalinad.
JDG 13:24 Manoa-e-ome, e-ibagan-mosgu, susugwa ega uklenonikid. Sansónʼye onug-imaksad. Susugwa dungudgu, Bab-Jehová ise-nued egi binsasad.
JDG 13:25 Ibagwengine, Sansón Dan-sordamar-danar-danar-bukwadgi-gudiidgi, Bab-Jehová-Burba egi gebe oyoleded. Dan-sordamar-danar-danar-bukwadi Zora-neggwebur-imbagi, degi, Estaol-neggwebur-imbagi siid.
JDG 14:1 Sansón Timnat-neggweburse nadegusad. Agine, Sansón yagwa-Filistea-dule dakargusad.
JDG 14:2 Sansón gannar negse nonigu, e-serganga weyob sognonikid: —Timnatʼgi yagwa-Filistea-dule an daksad. Be anga we-yagwa-egisnamala, adi, an we-yagwa-nikuegar.
JDG 14:3 E-sergan ega sogded: —¿Ar weginde, anmar-gwenadgan-abargi omegan satesi? ¿Israel-dulemar-bukwad-abargi omegan satebarsi? Emide-be yagwa-Filistea-dule be nikubied, ar we-dulemarde, Bab-Dummad-akudakmaladid. Sansón, e-sergan-abin sogded: —Ar we-yagwa bur an abeged. Be we-yagwa be anga egisnamala.
JDG 14:4 Ar e-sergande we-ibmar-gunaidi, wissulid, Bab-Jehová-sogedba-gunaid. Degi, Bab-Dummadi Filistea-dulemargi-gwichiguega igar-aminaid wissurbalid. Ar ade, we-ibagangi, Israel-dulemar, Filistea-dulemar-sogedba nanabukwad.
JDG 14:5 Degi, Sansón, e-serganbo Timnat-neggweburse naded. Degi, Timnat-dulemar-e-uva-nainugan-mosgua, achumigur-senigwad egi urmakdani dakalid.
JDG 14:6 Geb degi, Bab-Jehová-Burba gandikidba Sansónʼgi ubononikid. Agine, Sansón achumigur-ogoamaksad, igi dule argangi-ibmar-ganisuli sibad-bipi-ogoamakdae, deyobi imaksad. Degi-inigwele, e-serganga achumigur-oburgwisad sogsasulid.
JDG 14:7 Geb Timnat-neggweburse modapmargua, Sansónʼdi yagwa-abesiidbo sunmaknaded.
JDG 14:8 Ibagan-nasad-sorba, Sansón yagwa-nikuega gannar Timnat-neggweburse nadbalid. Nadapidgi, achumigur-burgwar-maid-dakega baid-igarsik dogded. Agi, achumigur-e-sangi yada-duurmaknai dakalid. Agine, achanis-nai dakarbalid.
JDG 14:9 Sansón achanis e-argangi wesgua, igarba gunnadap gusad. Degi, Sansón igarba e-babgan-bargadapgu, ega achanis uksamogad. Geb e-sergan guchamogad. Degi-inigwele, Sansón e-serganga sogsasulid, achanis achumigur-burgwar-maidgi amisye.
JDG 14:10 Geb degine, Sansón-e-bab bunagwa-negse naded. Agine, Sansón iba-onosad. Ar ade, gusgu weyob sapingana ome-nikunaidgi iba-onodamalad.
JDG 14:11 Filistea-dulemar deyob Sansón-dakarmargu, dulagwen-gakambe (30) sapingan-amisad, adi, Sansónʼba gudii-gumalagar.
JDG 14:12 Sansón we-sapinganga sogded: —Emisgwa, an bemarga oeged-soggwen sogo. Bemar anga we-oeged, ibagugle (7) iba-naguoedgi be anga odalosmalale, mor-lino goadulagwen-gakambe (30) an bemarga ukoed, degi, mormar-ibagi-yoleged dulagwen-gakambe (30) an bemarga ukbaloed.
JDG 14:13 Degi-inigwele, be anga odalossurmalardi, bemar anga mor-lino dulagwen-gakambe (30) ukmaloed, degi, mor-ibagi-yoleged dulagwen-gakambe (30) bemar anga ukmarbaloed. Sapingan abin-sogdemalad: —Sogdeen. Ibmar-oeged be sogdo, anmar be-itobukwa.
JDG 14:14 Degi, Sansón amarga sogded: “Emar-gunnedgi masgulleged noalid, degi, gargandik-nikadgi osidikid noalid.” Ibapaagusgu, sapingana oeged geg odaloge gusmalad.
JDG 14:15 Ibabakegusgu, sapingana Sansón-omega sogdemalad: “Be-sui-binsaed be gae, anmarga oeged odalogega. Yapa be be-sui-binsaed-gaele, anmar soogi be-ogumakoed, degi, bela be-gwenadgan anmar ogumakbaloed. ¿Anmar-ibe ibmar-atursaega, be anmarse gochasi?”
JDG 14:16 Degidgi, e-omegwa ise-boale Sansónʼgi matak-nagusad, ega sogded: —¡Be anbina sogsulid! Isdar be an-daked. Be an-dulemarga-oeged-sogsadi, be anga odaloge. Sansón abin-sogded: —An-sergangarbela an sogsasulid. ¿Begardi nabir an sogode? Adi sula.
JDG 14:17 Ibagugle (7) omegwa Sansón-asabin bosii gusad. Degi, e-ome egi alamaknai gusad. Geb ibagugledgi (7) Sansón e-omega oeged odalossunnad. Geb degi, e-ome sapinganga sogsamogad.
JDG 14:18 Ibagugledgi (7), dad-argwaned-iduar, Filistea-neggweburginmalad Sansónʼga sogdemalad: “Ar achanisba-bur bule-ibmar-ochigwad sulid, unnila achanisbi-nikad. Ar achumigurba-bur bule-ibmar-gandikid sulid, unnila achumigurbi dutusulid.” Sansón abin-sogded: “An-moli-bebe-nikad-ome-bipigwadgi be alamaknaigussurmalana, An-oeged, bemar wisguosurmalanad.”
JDG 14:19 Geb agine, Bab-Jehová-Burba gandikidba Sansónʼgi ubononikid. Geb Ascalón-neggweburse naded. Agine, dulagwen-gakambe (30) dulemar-ogilosad. Degi, a-dulemar-ibe mormar-susad. Geb dulemar-ega-oeged-odalosmaladga a-mormar-uksad. A-sorbali, nue-sae-itogedgi e-sergan-negse naded.
JDG 14:20 Sansón-e-ome machered-baidga uksamalad. A-macheredde, Sansón na e-aiyobi dakdii gusad.
JDG 15:1 Deunni, ibagan-nasadgine, orosgi-dakleged-welenaidgi, Sansón sibad-bipi suar, e-omese nadegusad. Mosgua, weyob sogdapid: —An-ome-dakega e-gabedse an dognagwelo. Degi-inigwele, ome-e-bab Sansón-dogega gwen imaksasulid.
JDG 15:2 Degi, ome-e-bab ega sogded: —Andi sae-ome-dakye an be-bied. Aga an be-aiga uksad. ¿Degi-inigwele, ar e-urba-bipigwad bur-yeer daklesursi? A be nikusunna, e-ior-anar.
JDG 15:3 Degidgi, Sansón dulemarga sogded: —An Filistea-dulemar naibi-imaksar, bar angin-surdo.
JDG 15:4 Degidgi, Sansón nadgua, waladulataled-ilapaa (300) achu-bunnu-wawaad-asdubingiid-gasad, degi, abin-abin e-bunnumargi edichabalid. Geb degine, e-bunnumar-abin-abin-atinnar-nanaid-irbali egi war-wargwen acha-gwallumar nasiksad.
JDG 15:5 Geb agi, Sansón, asdubingiid-achu-bunnumargi-acha-gwallumar-nanaid ogasad. Geb degidgi Sansón, Filistea-dulemar-ibmar-digar-nanaidba achu-asdubingiid indaksad. Geb na duurmakdemargu, bela ibmar-gwag-welear-bubukwad ogumaksad, degi, amba ibmar-gwag-yoo-welemalad bela ogumaksabalid, degine, uva-nainumarse-bakar, olivo-nainumarse-bakar, ogumaksabalid.
JDG 15:6 Geb degine, Filistea-dulemar egichiarmalad: “¿Doa-we ogumaksa?” Ega sogdemalad: “Timnat-dule-e-sapin-Sansón, ogumaksa. Ar e-sakde, Sansón-ibe dule-baidga ome-uksad.” Geb degidbali, Filistea-dulemar nadegusmalad. Agine, Sansón-ome-ogumakar oburgwismalad, degi, ome-e-bab-ogumakar oburgwismarbalid.
JDG 15:7 Ar Sansón Filistea-dulemarga weyob sogsa gusad: “Weyob bemar an-imaksamarsoggu, inniki an bemarga soged: An bemar-buged-mai-imakedse geb an bogilegoed.”
JDG 15:8 Agala, Sansón urwedigi amargi gwichigusad. Bukidar a-Filistea-dulemar-ogilosad. Geb a-sorba, Sansón, Etam-akwasailagi yaa-ollor-siidse megnaded.
JDG 15:9 Filistea-sordamar Judá-yargi danar-danar ambikudapmalad, bela Lehiʼye-neg-nugadgi aisakis ambikusmalad
JDG 15:10 Judáʼginmalad Filistea-sordamarse egichiarmalad: —¿Ibiga be anmargi bila-onodanimala? Filistea-sordamar abin-sogdemalad: —Anmar Sansón-gaega danimala. Igi-anmar-imaksamoga, deyob anmar imakmogoed.
JDG 15:11 Judá-sordamar degi-itosmargua, milipaa (3,000) Etam-akwasaila-yaa-ollor-siidse nadmalad. Geb Sansónʼga sogdapmalad: —¿Filistea-dulemar anmargi-obined be wissursi? ¿Ibiga weyob be anmarga boni-onosa? Sansón amar-abin sogded: —Ar igi-Filistea-dulemar-an-imaksa, unnila deyob an imaksamogad.
JDG 15:12 Degidgi, Judá-sordamar ega sogdemalad: —Anmar be-gadanimar, Filistea-sordamarga be-ukegar. Sansón, Judá-dulemar-abin sogded: —Be anga ise-sogar-sogmalo, bemar an-iblogosurye.
JDG 15:13 Judá-dulemar abin-sogdemalad: —Suli, anmar be-iblogosuli. Unnila anmar be-gaogu, geb Filistea-sordamarga anmar be-ukoed. Degine, urdub-binid-gibogi edichamalad. Geb agi, Sansón akwasaila-yaba-siidgi onosmalad.
JDG 15:14 Lehiʼye-neg-nugadse mosmargu, Filistea-dulemar binnasur-oimakar abin ainiarmalad. Degidgine, Bab-Jehová-Burba gandiki Sansón-imaknonikid. E-argangi urdub-atinnaled e-abin dub-nunudyob itirided.
JDG 15:15 Sansón moli-uayasuid-e-aku-gar-bini-binid susgua, agi, miligwen (1,000) Filistea-sordamar-ogilosad.
JDG 15:16 Degidgi, Sansón sogded: “Moli-uayasuid-e-aku-gargine, an dulemar-oburgwisadi, dunnumaksii an imaksad, danabo an urbisad. Moli-uayasuid-e-aku-gargine, an miligwen (1,000) dulemar-iblosad.”
JDG 15:17 Sansón deyob-sognaid bergusgua, moli-uayasuid-e-aku-gar meted. Geb Ramat-Lehiʼye a-neg onug-imaksad.
JDG 15:18 Sansón bela-belad uku-uku itosoggua, Bab-Jehováʼse gandikidba goted: “Bab-Dummad, an-isdarmaladgi-nakwega be an-imaksad. Degite, ¿igi emisgindi, uku-uku-itogedba be an-oburgosunna? ¿Igi be dulemar-abgan-uka-duku-sikarsurmaladga an-ukbalosunna? Adi sulirgebed.”
JDG 15:19 Degidgine, Bab-Dummad Lehiʼye-neg-nugadgi yaa-dummad-maidgi yaa egasad. Agi, dii aryoalid. Geb Sansón dii-gobsagu, na gannaleded. Aga, we-dian En-Hacoreʼye nuggusad. Emi, we-garda-narmaklenaidse Lehiʼye-neg-nugadgi a-dian amba maid.
JDG 15:20 Filistea-dulemar-gandik-bukmalad-ibagangi, Sansón birga-dulagwen (20) Israel-dulemarga negsesad.
JDG 16:1 Ibagwengi, Sansón Gaza-neggweburse nadgua, ome-gambanuchusaed dakalid. Na dakargu, a-ome-negse dogded, adi, e-walik mutik gabegar.
JDG 16:2 Degidgi, Gaza-dulemarga sogsamalad: “Sansón wese noniye.” Degi, dulemar bela-neg-ebilis ambikusmalad, mutikidba neggwebur-yawagak-ebilis nakulesmalad. Bela mutikidba bogidik ambikusmalad, sogdemalad: “Neg-ibguder, anmar Sansón-oburgwemalo.”
JDG 16:3 Degi-inigwele, Sansón, neg-gabigwengi gwisgusad. Geb neggwebur-doglegedse naded. Agine, neggwebur-doged-yawagak unnusad, e-bargamaladse-bakar, degi, esgoro-e-yaa-edimaladse-bakar, unnusad. Geb Hebrón-neggwebur-asabin yar-mullu-siidse e-gukingi-mai sesad.
JDG 16:4 Ibagan-nasad-sorba, Sansón ome-Dalilaʼye-nugad abealid. Omede Sorec-nebaginedid.
JDG 16:5 Degi, Filistea-dulemar-e-dummagan omegwa-daknadmargu, ega weyob sogdapmalad: “Be anmarga Sansón-yardako. Be anmarga bar-amibaloe, ibugi e-gargangued nika. Degi, igi anmar egine obinergebe, adi, anmar nabir Sansón-gugmakoed, degine, adi, egi anmar obinmaloed. Be anmarga bela baramisale, anmar bega war-wargwengi mani-sibu miligwen gaka dulatar mergu (1,100) ukmaloed.”
JDG 16:6 Sansón Dalila-daknadgua, ese weyob Dalila egichided: —Be anga wis ibmar-sogbi an be-abedo. ¿Ibugi be gar-gangued sii? ¿Igi-dule nabir be-edichale? Adi mer be achikegar.
JDG 16:7 Sansón abin-sogded: —Dub-dutusulid-binid yoo-amba-dingued goagugledgi (7) dule an-gugmakele, an-gangued nollomakdoed, dulemar-yogasaaledyob an nolloo nadoed.
JDG 16:8 Geb degine, Filistea-dulemar-e-dummagan dub-dutusulid-binid-amba yoo-dingued, goagugle (7) Dalilaʼse searmalad. A-dubgi Dalila Sansón-gugmaksad.
JDG 16:9 Dalila-e-gabedneggi bato guakwaa Filistea-dulemar nakulegega bukwasoggu, Dalila Sansónʼse binnasur goted: —¡Sansón, Filistea-sordamar begi gwichigudani! Sansón gwichiguargu, e-gugmakaled dub-nunudyob itirisad. Degisoggu, Filistea-dulemar Sansón-e-gargangued-siid wisgussurmalad.
JDG 16:10 Degi, Dalila Sansónʼga sogded: —Be an-yardaksa. Be anga yamo gakansasad. Be anga inniki-soge, ¿igi-dule nabir be-gugmakergebe, adi, nabir be-gamalagar?
JDG 16:11 Sansón abin-sogded: —Urdub-bini-binidgi sabsur ise-gugmakar be an-edinnele, an-gangued nollomakdoed, dulemar-yogasaaledyob an nolloo nadoed.
JDG 16:12 Dalila-e-gabedneggi bato guakwaa Filistea-dulemar nakulebukwadgi, Dalila Sansón-gugmaksad. Agine, Dalila binnasur goted: —¡Sansón, Filistea-sordamar begi gwichigudani! Sansón gwichigudgu, e-gugmakaled dub-garagwadyob itirisad.
JDG 16:13 Geb Dalila Sansónʼga sogdebalid: —Gannar be an-yardaksa. Emi, be anga yamo gakansasbalid. Be anga nue-inniki soge, ¿igi-dule nabir be-gugmakergebe, adi, nabir be-gamalagar? Sansón ega sogded: —An-sailagia-sobarmalad giagugle (7) gwinni-dubba be sobele, degi, gwinni ise-digar e-bargamaladgi be imakele, an-gangued nollomakdoed, dulemar-yogasaaledyob an nolloo nadoed.
JDG 16:14 Geb Sansón gabidgua, Dalila Sansón-e-sailagia-sobarmalad giagugle (7) gwinni-dubba sobsad, degine, gwinni ise-digar e-bargamaladgi imaksabalid. Geb agine, Dalila binnasur goted: —¡Sansón, Filistea-sordamar begi gwichigudani! Sansón gabmai-gwichigudgu, ise-digar-gwinni-gwichid bibichisad, degi, bela e-bargamalad bibichisbalid.
JDG 16:15 Dalila Sansónʼga sogdebalid: —Degite, be an-abeye sogde, binsa be gordii. Unnila be anga gakansadiid. Wese ilapaagus be an-yardakdaged. Yoo be anga soged, be-gargangued ibugi sii.
JDG 16:16 Dalila, bane-bane Sansónʼgi alamakdidaed, adi, ega e-gangued-sogegar. Na Sansón budar-itogusadbali, na burgwebi-guarsunnad.
JDG 16:17 Degidbali, Sansón napise bela Dalilaʼga ibugi-e-gangued-siid sogdesunnad: —Bipisaale an-sailagia sikledisulid. An gwaluleged-iduar bato an Bab-Dummadga nugsales-danikid. Ar dule an-sailagia sikele, an-gargangued an bergusaled, nolloo an nadeled, dulemar-yogasaaledyob an gudeled. Ar ade, an Nazareo-igarba-nanadiid.
JDG 16:18 Dalila, Sansón-ega-bela-ibmar-sogsa daksagu, Filistea-dulemar-e-dummaganse weyob gayaburba barmisad: “Gannar be anse dagmar. Emisgindi, Sansón bela anga ibmar-sogsad, anga bar ibmar-odukussulid.” Geb, Filistea-dulemar-e-dummagan Dalilaʼga mani-ukoye-sogsad, guar senonimalad.
JDG 16:19 Degine, Dalila e-nuku-birgi Sansón-gabega-imaksad. Agine, Dalila dulese-gochad, adi, Sansón-e-sailagia-giagugle-sobarmalad (7) immiegar. Degidba, Sansónʼgi e-gangued bangudgu, Dalila sabsur-Sansón-imakded.
JDG 16:20 Geb degidgi, Dalila binnasur goted: “¡Sansón, Filistea-sordamar begi gwichigudani!” Sansón gabmai-gwichigudgu, iduar-wakindaedyob na wakinbaloye na binsaalinad. Bab-Jehová egi aibachadeeye na Sansón binsassulid.
JDG 16:21 Degidgi, Filistea-sordamar Sansón-gasmalad. Geb e-ibe gwabobela e-ibya onosmalad. Gaza-neggweburse sesmalad. Agine, esgoro-gordikid-dubgi edichamalad, esgaryagi ibmar-nagedgi-oarbaega imaksamalad.
JDG 16:22 Degi-inigwele, Sansón e-ibe sailagia-siklesad gannar ega sugumai gusad.
JDG 16:23 Filistea-dulemar-e-dummagan na e-bab-dummad-Dagónʼga ibmar-bukidar-ogumakar-ukmalaga, degi, wergumalaga na ambikusmalad. Weyob namakbukmalad: “Anmar-bab-dummad-Dagón anmarga anmar-argan-yaurgi anmar-isdarad-Sansón uksad.”
JDG 16:24 Filistea-dulemar Sansón-dakarmargu, bela na e-bab-dummad-Dagón-nug-odummodmalad, weyob namakdemalad: “Anmar-bab-dummad-Dagón anmarga anmar-argan-yaurgi anmar-isdarad-Sansón uksad. We-Sansónʼde anmar-ibe nainu-osulodii daed, degi, anmar-dulemar-bukidar osulosbalid.”
JDG 16:25 Filistea-dulemar na yeer-itobukmaladgi, sogdemalad: “Anmarga be Sansón-sedage, anmar egi dodogegar.” Geb Sansón-esgaryagi-siid onosmalad. Ibmar-dodolegedyob egi dodosmalad. Geb degi, neg-buarmar-gwichid-imbagi ogwichismalad.
JDG 16:26 Degidgi, Sansón, machigwa-argangi-e-semaidga sogded: “Buarmar-neg-abga-bukmalad-walik be an-ogwiche, adi, an nabir agi akaegar.”
JDG 16:27 A-ibagi, itogedneg ena-siid. Machergan omeganbo oburar bukwad, degi, bela Filistea-dulemar-e-dummagan, agi bukwamalad. Aila-nibalidgindi machergan, omeganbo oburar milipaa (3,000) bukmarbalid, Sansónʼgi-dodolenaid dakbukmalad.
JDG 16:28 Degidgi, Sansón Bab-Jehováʼse gandikidba-goted: “Bab-Jehováʼye, bebi Bela-Gangued-Nikad maid. Emi, napi be an-ogannoge. An bese goled, Filistea-sordamar an-ibya-gwabobela ani onosmalad. An buged-imakedse be an-imako.”
JDG 16:29 Sansón bur-buar-e-sailagan-warbogwad abinbela-gwichid-ebusgu, egi akasad. E-argan-sapiled buar-wargwengi akasad, e-argan-nueddi buar-baidsik akasbalid. Bela abinbela-akas gwisgusad.
JDG 16:30 Geb agine, Sansón binnasur goted: “¡Filistea-dulemarba an burgwesun!” Geb bela Sansón gandikidbali buarmar-balimeted. Filistea-dulemar-e-dummagangi bela neg marwenonikid, degi, bela dulemar-bukwadgi batenonikid. Sansón-burgwidgu, Filistea-dulemar eba bukidar burgwismogad. Dula-gudiidgi ese-oburgwilesadba bur-melu ese girgusad.
JDG 16:31 A-sorbali, Sansón-e-urbamar, degi, bela e-gwenadganbo e-mui suapmalad. E-mui-sesmargu, Zora-neggwebur, Estaol-neggweburbo-siid-imbagi, e-bab-Manoa-e-neg-uangi digsamalad. Sansón birga-dulagwen (20) Israel-dulemarga igar nabosad.
JDG 17:1 Dule-gwensak-Micaíaʼye-nugad Efraín-yalaganba maigusad.
JDG 17:2 Ibagwengi, e-nanga weyob sogded: —Nana, dule bei-mani nibir-durgwen-gakabaabak (28) atursasad-ukabsanai an be-itosad. Ani an be-ibe we-mani susad. Ani an ganikid. E-nan ega sogded: —¡Machi, Bab-Jehová begi nued binsasun!
JDG 17:3 Micaía e-nan-ibe mani-nibir-durgwen-gakabaabak-atursasad (28) gannar e-nanga uksad. Geb agi, e-nan weyob sogded: —We-mani Bab-Jehováʼga an nug-imaksad, adi, we-manigi dule-mani-sobed an-machiga bab-dummadyob-imakleged-ise-wagar-onoar sobega, degi, bab-dummadyob-imakleged-manibiid sobbaligar. Emisgindi, gannar an bega ukbalid.
JDG 17:4 Degisoggu, Micaía gannar e-nanga mani-uksagua, e-nan, mani-nibiratar-aidiku-wilub dule-mani-sobedga uksad. A-dule, bab-dummadyob-imakleged ise-wagar-onoar sobsad, degi, bab-dummadyob-imakleged-manibiid sobsabalid. Geb a-sorbali, Micaía-negse berbeapid.
JDG 17:5 Micaía e-neggi bab-dummadyob-imaklemalad-neg sii gusad. Degine, mor-suid-efodʼye-nugad maksabalid, degi, bab-dummadyob-imaklemalad-burwigana sobsabalid. Deginbali, e-machi-gwensak dule-irwa-bab-dummadyob-imaklemaladse-golega nug-imaksabalid.
JDG 17:6 Ar ade, a-ibagangine, Israel-yalagi rey sulid. Degisoggu, dulemar na e-itolegedba nanabukwad, degine, na e-dakedba ibmar-imakbukwad.
JDG 17:7 Deunni, Belén-neggweburgi machi-sapin-gwensak Levita-dule Judá-yalagined gudiid.
JDG 17:8 We-machigwade, Belén-neggweburgi-gudiid neg-baid-amiega aligusad. Degi, Efraín-yalaganba-nadapi, Micaía-negse modapid.
JDG 17:9 Micaía ega sogded: —¿Bia be daniki? Levita-dule abin-sogded: —Belén-neggweburgi an daniki. An Levita-dule. Emi, an megega neg-amidii.
JDG 17:10 Degi, Micaía ega sogded: —An-walik be mego, adi, be anga dule-irwa-bab-dummadse-goledga guegar, degi, anga-binsaed-ukedga be gubaloed. Birgagi, mani-sibu-miligwen gaka dulatar (1,100) aidiku-wilub, an be-bennukoed. Mor an bega ukbaloed, degine, an bega masgulleged ukbaloed. Degi, Levita-dule bessundo.
JDG 17:11 Levita-dule, Micaía-walik-megnonigu, nued itosad. E-machiyob Micaíaʼga gunonikid.
JDG 17:12 Geb Micaía dule-irwa-bab-dummadyob-imaklemaladse-goledga Levita-dule-nug-imaksad. Degisoggu, Levita-dule Micaía-neggi gudii gunonisunnad.
JDG 17:13 Micaía na weyob binsaalid: “Dule-irwa-bab-dummadse-goledga an Levita-dule-imaksasoggu, an wisi, emisgi Bab-Jehová an-bendakoe.”
JDG 18:1 A-ibagangi, Israel-yargi rey amba sulid. Aginmoga, Dan-wagan na ambikuega yar-amidimalad. Bela Israel-dulemar-danar-danar-bukmalad-abargi amba yoo Dan-waganga yar-ukleged.
JDG 18:2 Degidbali, Dan-wagan Zora-neggweburgi, degi, Estaol-neggweburgi e-sordamar-bur-gandikmalad walatar barmisad, adi, dulemar-arganaegar, degine, napa-nanaid-arganabaligar. Sordamar-e-ataledga sogdemalad: “Be namar, yar-arganamar.” E-ataled nadmargu, Efraín-yalaganba nadmalad. Micaía-e-negse modapmalad. Agi gabismalad.
JDG 18:3 Micaía-neg-mosmargu, sapingwa-Levita-e-sunmaked magar-itosmalad. Degi, ese ibmar egisnadmalad: —¿Doa wese be-senoniki? ¿Ibu be wegi sae? ¿Ibu be wegi amie?
JDG 18:4 Machi-sapingwa, Micaía-ega-ibmar-imaksad sogded, degi, ega sogded: —Micaía anbo igar-mesisad, degi, an ega dule-irwa-a-bab-dummadse-goledga an gued.
JDG 18:5 Degidgi, ega sogdemalad: —Wis be anmar-nuki Bab-Dummadbo sunmake, adi, anmar wisguega, anmar nadele, bule nueganbi anmar naoe.
JDG 18:6 Geb dule-irwa-bab-dummadse-goled amarga sogded: —Be nueganbi namaloe, ar Bab-Jehová bemarba namaloed.
JDG 18:7 Agine, sordamar-e-ataled nadmalad. Geb, Lais-neggweburse modapmalad. Dakdapmalad, Laisʼginmalad Sidón-dulemar-gudimaladyob gudimarmoga. Sidón-dulemarde nueganbi bonisuli bukwamalad, degi, gwayedsuli bukwamarbalid. We-yargi bela ibmar-nikadbi bukwamalad, ibmarsuli bukwasurmalad. Laisʼginmalad Sidón-dulemargi dikasur-bangu-bukwamalad, degi, dulemar-baiganbo igar-nikasur-bukwamarbalid.
JDG 18:8 Sordamar-e-ataled gannar Zora-neggweburse, degi, Estaol-neggweburse nonimargu, e-dulemar-neggweburginmalad ese egichiarmalad: —¿Degite, igi be gudmala?
JDG 18:9 Sordamar-e-ataled abin-sogdemalad: —Anmar ginebinne, egi anmar gwichigu-nae. Ar an neg-daksamaladi, napa-nuedid. ¿Degite, bemar naosuli? Mer geger be itomala. Anmar yar-suega nae.
JDG 18:10 Anmar nader, dulemar-baisur-binsa-bukwamaladse anmar modapmaloed. Degi, a-yar-bipisur-naid Bab-Dummad anmarga ukoed. A-yargi ibmar-bela-nikad, ibmar-soggwenad suli soglesulid.
JDG 18:11 Degidgi, Zora-neggweburgi, degi, Estaol-neggweburgi Dan-sordamar dulataled-ilanergwa (600) nadmalad. A-sordamar bila-onogedgi-ibmar-ebulemalad guar-guar sesmalad.
JDG 18:12 Nadmargu, Judá-yargi, Quiriat-Jearimʼye-neg-nugadgi danar-danar ambikudapmalad. A-ulale, we-garda-narmaklenaidse Quiriat-Jearim-dad-argwanedsik Dan-dulemar-ambikuedye bileged.
JDG 18:13 Agi bukwa, Efraín-yalagansik nadmalad, degi, Micaía-negse modapmalad.
JDG 18:14 Sordamar-e-atar-Lais-yar-argaapmaladi, e-sordaganga sogdemalad: —Be wismala, we-negyabali mor-efodʼye-nugad bukwad, degi, bab-dummad-negginmalad bukwabalid. Degine, bab-dummadyob-imakleged-ise-wagar-onoar-sobaled, degi, bab-dummadyob-imakleged-manigi-sobaled gwichibalid. Be-itolegedba be samalo, be-imakbimaladba be imakbalo.
JDG 18:15 Micaía-negse modapmargu, Levita-sapingwa-maidse dogdapmalad. Nued-sogeye ega sogsamalad.
JDG 18:16 Dan-sordamar-dulataled-ilanergwad (600), bila-onogedgi-ibmar-ebulemalad-guar-guar yawagak-dogedgi nakulebukmalad.
JDG 18:17 Sordamar-e-atar-yar-argaapmaladi ibmarmar-bukwadyaba dogsamalad. Geb bab-dummadyob-imakleged-ise-wagar-onoar-sobaled searmalad. Geb mor-efodʼye-nugad-bukwad searmarbalid, degi, bab-dummadyob-imaklemalad-negginmalad-bukwabalid searmarbalid. Degi, bab-dummadyob-imakleged-manigi-sobaled searmarbalid. Dule-irwa-bab-dummadyob-imaklegedse-goleddi yawagakgi sordamar-dulataled-ilanergwa-walik (600) gwichid.
JDG 18:18 Dule-irwa-bab-dummadyob-imaklemaladse-goledi neg-akala dakargu, egichided: —¿Ibu be imaknanai?
JDG 18:19 Abin-sogdemalad: —Boogwa-be. Mer-be-sunmake. Anmarba be dage, anmarga be dule-irwa-bab-dummadse-goledga guoed, degi, anmarga-binsaed-ukega be gubaloed. Bur-nabirsursi, dule-wargwenga-arbaedba be bela Israel-dulemarga Bab-Dummadse-goledga gued. A-bur-nuedi.
JDG 18:20 Dule-irwa-bab-dummadyob-imaklemaladse-goled na yeer-itosad. Geb na mor-efodʼye-nugad-bukwad sesad, degi, bab-dummadyob-imaklemalad-negginmalad sesbalid, degi, bab-dummadyob-imakleged-ise-wagar-onoar-sobaled sesbalid. Geb Dan-sordamarba nadsunnad.
JDG 18:21 Dan-sordamar nadmargu, burwigana e-idu-naega-imaksamalad, degi, ibmar-durgan, degine, e-ibmar-ebumalad e-idu sedega imaksamalad.
JDG 18:22 Dan-sordamar undargus nanamaladgine, Micaía, dulemar-e-neg-dikarba-mamaidbo atosad. Geb na Dan-sordamar-balegitemalad.
JDG 18:23 Micaía-sordamar binnasur gornadapmarsoggu, Dan-sordamar daksik-aibilidmalad. Geb agine, Micaíaʼga sogdemalad: —¿Ar ibu be itoge, be oimakdanimalad?
JDG 18:24 Micaía abin-sogded: —Igi be anga sogmala, ¡ibu-itoye be anga sogmala! Ar bemar an-bab-dummagan ani semaid, dule-irwa-bab-dummadse-goled ani be semaimarbalid. Bela be ani ibmar-obelosmalad, gwen be anga wis ibmar obessurmalad.
JDG 18:25 Dan-sordamar abin-sogdemalad: —Mer be anmar-abin ee-gwisgue. Degiile, an-sordamar-abala sae-itoalile, begi gwichigudmaloed, binsarsunna be burgwedagoed, be-gwenadgan binsa-burgwedamarmogoed.
JDG 18:26 Micaía egi-obin-dakargu, gannar e-negse nadsunnad. Dan-sordamardi na e-nadapmaladba na nadmalad.
JDG 18:27 Deyobi, Dan-sordamar, Micaía-ibmarmar-sobsad sesmalad, degi, e-dule-irwa-bab-dummadyob-imaklemaladse-goled sesmarbalid. Geb degi, Lais-neggweburse modapmalad, dulemar-bogi-bukwamaladse, degi, dulemar-akar-gwen-binsa-buksurmaladse. A-dulemargi gwichigusmalad, es-suidgi ogilosmalad, degi, e-ibe neggwebur ogumaksamarbalid.
JDG 18:28 Ar Lais-neggwebur Sidón-neggweburgi dikasur bukwasoggu, dulemar-baiganbo igar-nikasurbarsoggu, dule-e-bendaked sate-gusad. Lais-neggweburde nebagi siinad, Bet-Rehob-neg-nugad-walik. Geb a-sorba, Dan-dulemar a-nega gannar neggweburga urbisad, degi, na agi ambikusmalad.
JDG 18:29 Neggwebur, Laisʼye nugan-inigwele, Dan-wagan e-dad-dummad-Danʼba Danʼye onugsasmalad. Danʼde, Israel-e-machid.
JDG 18:30 Agi, Dan-wagan bab-dummadyob-imaklemalad ese-golega urbismalad. Degine, dule-irwa-bab-dummadyob-imaklemaladse-golega Jonatán-nug-imaksamalad. Jonatánʼde, Gersón-machid, Moisés-wagwabalid. Geb a-sorbali, Dan-dulemar-gales-selesmalad-ibaganse, Jonatán-wagan Dan-dulemar-irwa-bab-dummadyob-imaklemaladse-golega gusmalad.
JDG 18:31 Silo-neggweburgi Bab-Dummadse-goled-neg-siid-gusad-ibagangi, Micaía-ibmarmar bab-dummadyob-imakleged-sobsamalad Dan-neggweburgi amba ebudii gusmalad.
JDG 19:1 A-ibagangi, Israel-yargi rey amba-sulidgi, Levita-dule-wargwen Efraín-yalaganba dikasur e-negsulidgi maigusad. A-dule ome-dikarbalid nikusad. A-omede Judá-yargi Belén-neggweburginedid.
JDG 19:2 Ibagwengine, e-ome e-dikarba-yolesad-ular, gannar ome-neggwebur-Belénʼse, e-serganse nadegusad. Nii-walabakegus, omegwa e-sergan-walik-maidgine,
JDG 19:3 na e-machered e-ome-balimakde gusad, adi, nidagegar. Dule-ega-arbaedbo naded, degi, moli-uayasuigan walabo sesbalid. E-ome, nabir e-bab-neggi abingasad. Ome-e-bab machered-noniki dakargua, yeer-itosad.
JDG 19:4 Agine, e-saka e-walik-beega imaksad. Degine, e-sapin e-walik ibapaa bessunnad. Na nue-gobdii, nue-mas-gundii, degi, nue-gabdii gusad.
JDG 19:5 Ibabakegine, wakudaryala na gwisguarmalad, degi, Levita-dule naega guakwaa ibmar-amisad. Degi-inigwele, e-sak ega sogded: “Be naed-iduar, mas-gucha be nae, adi, wis mas-itos be naoed.”
JDG 19:6 Degi, na gobsamalad, degi, na ebo mas-guchamarbalid. Geb a-sorbali, e-sak ega sokalid: “Napi-ibagwen be an-walik gabe. Nueganbi be oibodagoed.”
JDG 19:7 Degi, na Levita-dule naega gwichigualinad. Degi-inigwele, e-saka gannar e-walik gabega egi alamaksad. Degidbali, na gannar gabissunnad.
JDG 19:8 A-bangine, ibatar-gusgu, wakudaryala-naega gwisgusad. Degi-inigwele, e-sak ega sogded: “Be naed-iduar, niga-gannogega, mas-gucha be nae. Sedo be naoed.” Degi, na ebo mas-guchamalad.
JDG 19:9 Degi, na mas-guchad-sorbali, Levita-dule, e-ome-dikarbalidmala-naega, degi, ega-arbaedmala-naega gwichigualid. Degi-inigwele, e-saka ega sogded: “Mer bar be nae, bato neg-sedosad, emiskwaa mutikgudoed. Napi-ibagwen be an-walik gabe. Nueganbi be oibodagoed. Geb oibosar wakudaryalaba, be-negse be naoed.”
JDG 19:10 Degi-inigwele, Levita-dule yapa bar-gabe-gusad. Degisoggu, Jebús-neggweburse, Jerusalénʼye bilebalid, asega ali gusad. Ebali, e-moli-uayasuigan-warbogwad sealid, degi, e-ome-dikarbalid, degine, dule-ega-arbaed eba ali gusmogad.
JDG 19:11 Jebús-neggwebur-modanimaladgi ega nue-neg-mutikguded. Degi, e-mai e-dummadga sogded: —Dage, Jebuseo-dulemar-bukwadse anmar nae. Agi anmar gaboed.
JDG 19:12 E-dummad abin-sogded: —Suli. Anmar neggwebur-dulemar-baigangadse naosuli. Ar Jebús-neggwebur Israel-neggwebursursoggu, Gabaa-neggweburse anmar naoe. Degi, Levita-dule ega sogdebalid:
JDG 19:13 —Dage, anmar neggwebur-baidse naoe, Gabaaʼsedibe, Ramáʼsedibe. Agi anmar gaboed.
JDG 19:14 Degisoggu, nadmarsunnad. Dad-buge Benjamín-yargi-Gabaaʼse modapmalad. Gabaaʼde Benjamín-wagan-neggweburad.
JDG 19:15 Degidgi, igargi aibatemargu, Gabaa-neggweburse gabega nadmalad. Degi-inigwele, ar dulemar-e-ogabed-satesoggu, dulemar-bukidar-ambikuedgi ambikusmalad.
JDG 19:16 Degidgi, dador-gwensak nue-osedos sapurba-arbadii danikid. We-dulede Efraín-yalaganginedid, Gabaa-neggweburgi maid. Dulemar-a-neggweburginmaladdi Benjamín-waganad.
JDG 19:17 Dador dulemar-ambikuedgi dule-neggwebur-baidse-nadapid-sii daksagu, ega sogded: —¿Bia be daniki? ¿Bia be nadapi?
JDG 19:18 Levita-dule abin-sogded: —Anmar Judá-yargi daniki, Belén-neggweburgi. Bur-dikasur anmar Efraín-yalaganba nadapmarsoggu, aga wegi anmar bukunonimalad. Ani an abalidi. Emisgindi, Bab-Jehováʼse-goled-negse an nadapi. Degi-inigwele, dule-an-ogabed sated.
JDG 19:19 Anmar bela ibmar-nikamalad: Moli-uayasuigan gagan-maega anmar gagan-nika, degi, gagan-dinnagana anmar nikabalid. Degine, anmar vino, degi, masgunned nikamarbalid. Unniguar anmar ibmar-nikad, anmar ibmar-galakusulid.
JDG 19:20 Dador ega sogded: —An-ai, bonisuli, an-negse an be-sedoe. Amba be ibmar-galakuele, ani an bega ukoed. Degisulile, mer wegi, dulemar-ambikuedgi be gabmalo.
JDG 19:21 Degisoggu, dador e-negse dule-sealid. Geb moli-uayasuigan ega masgi-omasbalid. Geb degi, na akwemaladdi nag-enuksamalad-sorba gobsamalad, degi, mas-guchamarbalid.
JDG 19:22 Na wergu-bukwamaladgi, dule-isganamar-a-neggweburginmalad, neg-ebilis ambikunonimalad. Yawagak sarsononimargu, dule-isganamar dador-neg-ibedga sogdemalad: —Dule be-negyaba-siid be onoge. Anmar e-sangi dodogoe.
JDG 19:23 Neg-ibed, dulemar-abin nodgu, ega sogded: —An-aimar, mer deyob be damar. Ar we-dule an akwedisoggu, mer yogasaar be deyob neg-oakalomalo.
JDG 19:24 Bur an bemarga an-sisgwa-onogo, amba yoo ani sui-nikued, degi, we-dule-ome-dikarbalid an onobaloed. Emiskwaa an bemarga onomalo. Adi, be-itolegedba be imakmaloed. Degi-inigwele, we-duledi mer be oakalomalo.
JDG 19:25 Degi-inigwele, dule-isganamar itossurmalad. Degisoggu, Levita-dule e-ome-dikarbalid a-dulemarga magaba onosad. Degi, machergan-isgana ome-e-sangi bela-bela mutikidba dodonanai-oiboarmalad, neg-ibguedse sabsur ome-imaksamalad. Degi, neg-ibgudgu, geb indaksamalad.
JDG 19:26 Degi, neg-oibodanikidgi, omegwa nonikid, yawagak-nagase aimukunonikid, deyob meremai oibosad.
JDG 19:27 Degi, e-sui gwisgusgu, yawagak egasad, naegar. Degidgi, neg-yawagak-dogedgi-nodgua, e-ome neg-dogedgi nue-imas aasaa meremai dakalid.
JDG 19:28 Degidgi, e-sui ega sogded: “Gwisgue, anmar nae.” Degi-inigwele, omedi abin-imaksasulid. Degine, a-machered ome-aidosgu, e-moli-uayasuid-birgi mesisad, degi, e-negse nadmarsunnad.
JDG 19:29 Levita-dule negse-mosgua, es amisad. Geb e-ome-dikarbalid-e-san olomaksad, degi, e-san sogambe-gakabo (12) olomaksad. Geb bela Israel-dulemar-mamaidba ome-e-sanmar-mimisad.
JDG 19:30 Degi, bela we-sanmar-mimilesad-dakarmalale, sogdedamalad: “Weyob ibmar-gudisulid, degi, weyob ibmar-dakledisurbalid. Israel-dulemar Egiptoʼgi aligusad-akar, emi-ibase, weyob neg oyoledisulid. Anmar igar-amiergebed. Anmar igar-amied-iduar, anmar nue-binsaergebed.”
JDG 20:1 Degidgi, Israel-dulemar belagwable nadegusmalad, Dan-yargi-alid, Beerseba-yarse, degi, Galaad-yar-akar, soggwenagwadyob Bab-Jehová-asabin Mizpaʼye-neg-nugadgi ambikunonimalad.
JDG 20:2 Bela Israel-dulemar-e-dummagan e-neggweburmar-ilibali sordamar-es-suidgi-bila-onomaladbo ambikusmalad. Sordamarde, mili-dulataled-ilabake mergu (400,000) bukwamalad.
JDG 20:3 Benjamín-e-sordamar wisgusmalad, Israel-sordamar Mizpaʼse nonimarye. Geb Israel-sordamar Levita-dulese egichidmalad: —Be anmarga soge: ¿Ibiga we deyopira ibmar-isgana gusa?
JDG 20:4 Levita-dule-ei-ome-burgwisad, sogded: —An-ome-dikarbalid-anbo Benjamín-wagan-bukwadse, Gabaa-neggweburse an modapmalad, adi, agi gabegar.
JDG 20:5 Degi-inigwele, mutikidba Gabaa-dulemar angi gwichigunonimalad, an-maid-neg-ebilis ambikunonimalad, an-oburgwegar. Degi, an-ome-dikarbalid-e-sangi dodosmalad. Degidbali, oburgwismalad.
JDG 20:6 Geb-sorba, an-ome-e-san an olo-olo imaksad, degi, an gwa-gwagwen Israel-dulemar-bukwadba mimisad, adi, bela wisgumalaga, we-dulemar bela-belad weyob Israel-yargi ibmar-isgana-imakledisulid omegwagi imaksamarye.
JDG 20:7 Ar bemarbela-Israel-dule-gumaladi, bemar-dakedba be imakmalodo, igi na be binsamaloe.
JDG 20:8 Israel-dulemar soggwenagwayob sogdemalad: —Anmar wargwensaar e-dordonegse naosuli, degi, anmar wargwensaar gannar e-negse naosurbali.
JDG 20:9 Emisgi, ¿igi anmar Gabaa-neggwebur imakoe? Anmar wilubdakar-imakoed, doa inse Gabaaʼgi gwichigudoe.
JDG 20:10 Bela Israel-wagan-iliba sordamar-dulatargi (100), ambe-ambe (10-10) sulegoed, miligwengi (1,000) dulatar-dulatar (100-100) sulegoed, degi, miliambegi (10,000) mili-miligwen (1,000-1,000) sulegoed. Wemar, masgullemalad amimaloed, geb sordamar-bila-onomaladga sedmaloed. Ar sordamar Benjamín-yarse, Gabaa-neggweburse mosmalale, Israel-yargi-ibmar-isgana-imakledisulid imaksamaladgi gwichiguoed.
JDG 20:11 Bela Israel-sordamar dule-gwennagwayob atosmalad, Gabaa-neggweburgi gwisguegar.
JDG 20:12 Degi, Israel-wagan, bela e-gwenadgan-Benjamín-waganse sordamar-barmisad, ega sogega: “¿Ibu-ibmar-isgana wede be imaksamala?
JDG 20:13 Dule-isganamar Gabaaʼgi-gudimalad be anmarga uda, adi, anmar-oburgwegar. Adi, Israel-yargi ibmar-isgana osulolegoed.” Degi-inigwele, Benjamín-sordamar, e-gwenadgan-Israel-sordamar-itossurmalad.
JDG 20:14 Aka Benjamín-sordamar, neggweburmar-baigangi-bukwamaladi, bela Gabaa-neggweburgi atosmalad, Israel-sordamargi gwichiguega.
JDG 20:15 A-ibagangine, Benjamín-wagan neggweburmar-baigangi-bukwamaladi ebislesgua, mili-dulagwen-gakanergwa mergu (26,000) daklealid, bela es-suidgi-bila-onomaladbi gumalad. Eba ebislessurmaladdi, dulataled-ilagugle (700) Gabaa-neggweburgi bukwamarmogad.
JDG 20:16 Bela sordamar-bukwad-abargi, dulataled-ilagugle (700) sordamar-sapirmalad bukwabalid, belagwable akwamied-dubgi bila-onomaladid. Sailagia-gagwengi akwa-metele, noar maksurmaladid.
JDG 20:17 De-ukinbali, Israel-dulemar-baigan sordamar-es-suidgi-bila-onomalad-bulegan mili-dulataled-ilabake (400,000) urbisad.
JDG 20:18 Geb Israel-sordamar Bab-Dummadse-goled-negse nadmalad, Bab-Dummadse egisega, ega sogega: —Anmar-sordamar, ¿doa-inse Benjamín-sordamargi bila-ononaoe? Bab-Jehová abin-sogded: —Judá-e-sordamar-inse onodoe.
JDG 20:19 Israel-sordamar wakudaryala gwichigusmalad, Gabaa-asabin ambikudapmalad.
JDG 20:20 Israel-sordamar Benjamín-sordamargi bila-onogega noarmalad. Geb Israel-dulemar Gabaa-asabin guakwa e-idu ambikusmalad.
JDG 20:21 Benjamín-sordamar Gabaa-neggweburgi ainiarmogu, a-ibagi bila-onolenaidgi Israel-sordamar-mili-dulagwen-gakabo (22,000) ogilosmalad.
JDG 20:22 Israel-sordamar muchub-muchub gannar na niga-ogannonanai-guarmalad. Degisoggu, a-bangine, gannar bila-onomarbaligala, iduar-gebe-bila-onosmaladse guakwa ambikudapmarbalid.
JDG 20:23 Ar ade, Israel-sordamar saegidbali, mutikguedse Bab-Jehová-asabin bosii gusmalad, degi, Bab-Jehováʼse idaksamalad, ega weyob sogsamalad: —¿Anmar gannar anmar-gwenadgan-Benjamín-dulemargi bila-onomaloe? Bab-Jehová amar-abin sogsad: —Egi be bila-ononamar.
JDG 20:24 Degisoggu, Israel-sordamar irbogi gannar Benjamín-sordamargi gwichiguapmalad.
JDG 20:25 Ibbogi Benjamín-sordamar Gabaaʼgi ainidmalad, Israel-sordamargi gwichiguega. Degi, Israel-sordamar-miliambe-gakabaabak (18,000) ogilolesmalad.
JDG 20:26 Israel-sordamar belagwable Betelʼse nonimalad. Agi ambikusmargu, Bab-Jehová-asabin bobukwa-gusmalad. A-ibagi, mutikguedse mas-guchasurmalad, degi, Bab-Jehováʼga ibmar-durgan-ogumakar-uksamalad, degi, Bab-Jehováʼga na ebo-igar-nabogega ibmar-uksamarbalid.
JDG 20:27 A-ibagangi, agi, Bab-Dummad-Israel-Dulemarbo-Igar-Mesisad-Ulu siisoggu, Bab-Jehováʼse idaksamalad.
JDG 20:28 Deunni, Aarón-wagwa-Fineesʼye-nugad, agi arbadiid. Fineesʼde Eleazar-e-machid. Geb Israel-dulemar egisdemalad: —¿Anmar gannar, anmar-gwenadgan-Benjamín-sordamargi bila-onogega namaloe, igi, bur negse an namala? Bab-Jehová abin-sogded: —Be bila ononamala. Neg-oibosar, Benjamín-sordamargi-nakwega an bemar-imakoed.
JDG 20:29 Degidgi, Israel-sordamar Gabaa-neggwebur-ebilis, sordamar-odukuar urbisad.
JDG 20:30 Ibapaagwadgi Israel-sordamar, Benjamín-sordamargi-gwichiguega nadmalad. Degine, Gabaaʼgi gwichiguega guakwa bila-onogega ambikusmalad, iduar imaksamaladyob.
JDG 20:31 Benjamín-sordamar, Israel-sordamar-abinguega nadmalad. Degi, neggweburgi bangumai-gudmalad. Israel-sordamar gwenna-gwenna-abingulemaidba, Benjamín-sordamar abin oburgwemai-oburgwemai imaksamalad, iduar imaksadyob. Bela dulagwen-gakambe (30) Betel-igarba, degi, Gabaa-igarba Israel-sordamar oburgwilesmalad.
JDG 20:32 Benjamín-e-sordamar sogdemalad: “Idualedyob anmar ogalakumaibali.” Degi-inigwele, Israel-sordamar sogdemalad: “Anmar duurmakdemalo, adi, neggweburgi bangudmaloed, igarmar-baigan-mamaidse anmar sedmaloed.”
JDG 20:33 Ukiar, Israel-sordamar bila-onoleged-igar-ogwasmalad, degi, sorda-bila-onomalad guakwaa Baal-Tamarʼgi ambikudapmalad. Geb Israel-sordamar-dukuar-bukwamalad Gabaa-dad-argwanedsik ainismarmogad, Gabaaʼgi gwichiguega.
JDG 20:34 Geb Israel-sordamar miliambe (10,000) sordamar-bur-gandikmalad Gabaa-asabin Gabaaʼgi gwichigudmalad. Degi, bela-bela bila-ononaisoggu, Benjamín-sordamar galakumamaid na itossurmalad.
JDG 20:35 Bab-Jehová Benjamín-sordamar, Israel-sordamar-asabin-galakuega imaksad. A-ibagi, Israel-sordamar, Benjamín-sordamar-mili-dulagwen-gakatar gaka dulatar (25,100) ogilosad, bela a-dulemar es-suidgi-bila-onomaladbiid.
JDG 20:36 Degidgi, Benjamín-sordamar dakarmalad, emar galakusmala. Geb degi, Israel-dulemar, Benjamín-sordamargi bangumai-bangumai gusmalad, ade, Israel-sordamar wisid, e-sordamar-dukuar-Gabaa-neggwebur-dikarba-bukwamaladi, Benjamín-sordamargi gwichiguoe.
JDG 20:37 Israel-sordamar-dukuar-bukwamaladi, ukiar Gabaa-neggweburgi gwichigudmalad. Egi duurmakdemargu, es-suidgi belagwable Gabaa-dulemar-neggweburgi-bukmalad ogilosad.
JDG 20:38 Israel-sordamar, e-sordamar-dukuar-neggwebur-dikarba-bukwamaladbogwa na igar mesismalad: Bemar neggweburgi waa bela-bela onakwiarmalale, agi anmar gannar uludmaloed.
JDG 20:39 Geb Israel-sordamar bila-onolenaidgi yamo wakitemargu, Benjamín-sordamar dulagwen-gakambe (30) Israel-sordamar-ogilosmalad. Geb Benjamín-sordamar sogsamalad: “Napira-we-dulemar anmarse galakumaid, gebe-anmarse-gusbalidyob.”
JDG 20:40 Degi-inigwele, neggweburgi waa gebe niba ainakwiargu, Benjamín-sordamar sorsik atakdemargu, dakdemalad, bela-neggweburgi waa niba-ainakmai.
JDG 20:41 Degidgi, Israel-sordamar gannar aibilismalad. Benjamín-sordamardi magar daksamalad emargi-boni-dummad-yolenonikoe. Degisoggu, nue-dobe-itodmalad.
JDG 20:42 Geb Benjamín-sordamar, Israel-sordamar-idu nega-dulesulidgan-igarba duurmakdemalad. Degi-inigwele, bila-onogedgi wakichasurmalad, sordamar-neggweburmargi-abin-danimalad ogilomai-ogilomai imaksamalad.
JDG 20:43 Weyob Israel-sordamar bela Benjamín-sordamar ebilis-ambikusmalad. Bela Menúha-akar, Gabaa-neggwebur-asabinse balegichamalad, degi, bela dad-nakwedsik bursursunna obelosmalad.
JDG 20:44 A-ibagi, Benjamín-sordamar miliambe-gakabaabak (18,000) girgusmalad. Bela we-dulemarde bila-onomaladbiid.
JDG 20:45 Degi-inigwele, abala nega-dulesulidganba akwasaila-dummad-Rimónʼye-nugadse wakichamalad. Igarba Israel-sordamar amar-miliatar (5,000) ogilosmalad. Geb Gidom-neg-nugadse balegitemarbalid. Agi, milibo (2,000) ogilosmarbalid.
JDG 20:46 Bela a-ibagi mili-dulagwen-gakatar (25,000) Benjamín-sordamar-es-suidgi-bila-onomalad girgusad. Amar belagwable bila-onomaladgi buleganad.
JDG 20:47 Degine, dulataled-ilanergwa (600), nega-dulesulidganba akwasaila-dummad-Rimónʼye-nugadse wakichamalad. Nii-walabake agi megismalad.
JDG 20:48 Israel-e-sordamar gannar Benjamín-dulemargi gwichigusmarbalid. Degi, neggweburmar-iliba es-suidgi bela dulemar-ogilosmalad. Degi, ibmar abingulemaidba, ibmar-dulase-bakar, ogilomai-gusmarbalid. Degi, neggweburmar bela soogi ogumaksamarbalid.
JDG 21:1 Israel-dulemar Mizpaʼgi, bato weyob ise-sogar igar mesismalad: “Anmar-wargwensaar melle Benjamín-dulemarga anmar-sisgan-ukmalo, adi, nikuegar.”
JDG 21:2 Dulemar bela Bab-Dummadse-goled-negse nadmalad. Agi ambikusmargu, mutikidse Bab-Dummad-asabin bukwa gusmalad. Degi, Bab-Dummad-asabin sabsur-gorbukwa, bela-bela asabin bobukwa gusmalad. Weyob sogdemalad:
JDG 21:3 “Bab-Jehováʼye, bede, Israel-e-Bab-Dummad gued. ¿Ibiga Israelʼgi weyob neg-gusa? ¿Ibiga emi-ibagi Israel-wagan-soggwen bergusa?”
JDG 21:4 Neg-oibosgu, wakudaradba dulemar gwisgusmalad. Degi, ibmar-ogumakar-ukleged-aila sobsamalad. Agi, Bab-Dummadga ibmar-durgan ogumakar uksamalad, degine, gwenatigwarguedga ibmar-ukleged Bab-Dummadga uksamarbalid.
JDG 21:5 Degi, Israel-dulemar na muchub-muchub egichiarmalad: “Israel-wagan-belagwable-bukwamaladi, ¿doa-wagan Bab-Jehováʼse-goled-negse arbisuli?” Ar dule Mizpaʼgi Bab-Jehováʼse arbisulile, ega igar ise-sogar megisad: “Oburgwilegoye.”
JDG 21:6 Israel-dulemar, Benjamín-wagan-e-gwenadgan-gusoggu, nue-nunmak-itodmalad, degi, sogdemalad: “Emi-ibagi, Israel-wagan-soggwen osulolesdo.
JDG 21:7 ¿Anmar igi e-masmalaga ome-ukosunna? Ar anmarde, Bab-Jehová-asabin ise-sogar imaksamalad, anmar-sisgan an ukosurmarye, e-omega imakega.”
JDG 21:8 Degidgi, egichiarmalad: “¿Biti Israel-wagan Mizpaʼgi Bab-Jehováʼse arbisuli?” Geb dakarmalad, bela Jabes-Galaadʼginmalad Bab-Dummadse-goled-neg-siidse igar-itogega nonisurmala.
JDG 21:9 Ar dulemar bela nug-bilesgu, Jabes-Galaadʼginmalad gwen-gochasurmalad.
JDG 21:10 Degisoggu, igar-itolebukwadgi-bukwamaladi, sordamar-gandikmalad miliambe-gakabo (12,000) barmismalad. Degi, ega sogdemalad: “Namalo, degi, Jabes-Galaadʼginmalad es-suidgi ogilonamalo, omeganse-bakar, degi, burwiganase-bakar be ogilomalo.
JDG 21:11 Weyopira be imakmalo: Bela machergan-oburgwemalo, omegan-sui-nikmalad belagwable ogilobalo.”
JDG 21:12 Jabes-Galaad-dulemar-abargi, yagana dulataled-ilabake bukwa (400) daklealid. A-bunamalade, amba yoo-machergan-ese-gormaladid. Degi, Canaán-yarse, Silo-neggweburse searmalad.
JDG 21:13 Degidgi, bela Israel-dulemar, akwasaila-dummad-Rimónʼye-nugadse gayaburba barmisad, Benjamín-wagan-bukwadse, ebo igar nuedgi nabogega.
JDG 21:14 Benjamín-sordamar gannar armalad. Agine, Israel-dulemar Jabes-Galaadʼgi-searmalad ega uksamalad, adi, yagan e-omega guegar. Degi-inigwele, amba yagana galakusad.
JDG 21:15 Ar Bab-Jehová Benjamín-wagan, Israel-wagan-abargi bar-oambikussursoggu, Israel-dulemar, Benjamín-wagan wile dakarmalad.
JDG 21:16 Ar Benjamín-wagan-e-omegandi bela ogilolessoggu, sordamar-bukwad-abargi girmar-dummagan egichialid: “¿Igi an imakmaloe, omesuli-bukwamaladga omegan-ukega?”
JDG 21:17 Degi, sogdemalad: “Benjamín-wagan-burgwissurmalad wagan-nikuewilubmogad, adi, Benjamín-wagan, Israel-wagan-abargi mer berguegar.
JDG 21:18 Degi-inigwele, anmar-sisgan anmar ega ukosulid. Ar anmar-Israel-dulemar ise-sogar an imaksamalad: ‘Anmar-sisgan an ukosurmarye.’ Ar anmar ukabsaleged-igar mesisad: ‘Dule e-sisgwa Benjamín-dulega uksale, iwigulego, dule-isganaga guo.’ A-ular, anmar geg an-sisgan Benjamín-waganga uke.”
JDG 21:19 Degi, sogdemarbalid: “Emisgi nued: Birga-irba Siloʼgi Bab-Jehová-e-iba onoleged. We-Siloʼde, Betel-dad-nakwed-argan-sapiledsik siid, degi, Lebonaʼgi dad-nakwed-argan-nuedsik siid. Degine, Betel-akar, Siquemʼse igar maid. A-igar-maid-dad-nakwedsik Silo siid.”
JDG 21:20 Degidgi, Israel-dulemar Benjamín-dulemarga sogdemalad: “Be namalo, uva-nainumar-imbaba dukuar be ambikumalo.
JDG 21:21 Itoakwaa be ambikumalo. Be dakmardibe, Silo-yagan dodogega danagwen ainiarmala, uva-nainu-imbaba be dukubukmalad nodamalo. Yagan-war-wargwen gadebin-gadebin be samalo, be-omega guegar. Degi, geb Benjamín-yarse be namaloed.
JDG 21:22 Ar e-babgan egisdanimalale, igi e-gwenadgandibe, anmar ega sogmaloed: ‘Anmar bega nuedgi soged, Benjamín-wagan wile be dakmala, ar bila-ononaidgi wemarga anmar omegan bela amissurmaladdeeye anmar ega sogmaloed. Ar bemar-sunnad be-sisgan we-dulemarga be uksasurmalad. A-ulale, bemargi ataklegosulid, degisoggu, bemar iwiguosulid.’ ”
JDG 21:23 Benjamín-dulemar ega soglesadyob imaksamarmogad, emar-merguedba na yagana-susmalad, dodolenaid-abargi atur-imaksamalad. Geb degine, bela Benjamín-dulemar gannar ega-yar-uklesadse nonimargu, gannar neggweburmar urbisad. Agi ambikusmalad.
JDG 21:24 Degidgi, Israel-dulemar-agi-bukwa nadmarmogad, degi, e-dulemarse gannar modapmalad. E-gwenadganse gannar modapmarbalid, na war-wargwengi e-nainuse na modapmalad.
JDG 21:25 A-ibagangi, amba Israel-yargi rey sulid. Dulemar war-wargwengi na e-dakedba ibmar-imakbukmalad.
RUT 1:1 Deunni, igar-nabomalad-dummagan Israel-yar-semamaid-ibagangi, ukud-dummad Judá-yargi nagunonikid. Agala, dule-gwensak Judá-yargined Belén-neggweburgined, na e-ome, degi, e-masmala-warbogwadmala Moab-yarse nadegusmalad.
RUT 1:2 A-dule, Elimelec nugad. E-omedi, Noemí. E-machi-wargwen Mahlón-nugad, baiddi Quelión-nugmogad. A-dulemar, Efrata-dulemalad, Belén-neggweburginmaladid. A-neggwebur Judá-yargi-siid. Wemar, Moab-yarse modapmargua, agi megidapmalad.
RUT 1:3 Agi, Noemí-e-sui-Elimelec burgwenonikid. Geb Noemí e-sui-sorba na e-masmala-warbogwadmala wargwen besmalad.
RUT 1:4 We-masmala-ebogwad Moabʼgined ome-nikunonimalad. Gwensak, Orfaʼye-nugad, baiddi Rut-nugmogad. Geb Mahlón, degi, Quelión birgambe (10) ome-nika-gudii gusmalad. Agi, burgwenonimarmogad.
RUT 1:5 Degisoggu, Noemí na e-bendaked-sate gunonisunnad, ei-sui burgwis, degi, ei-masmala burgwisbar.
RUT 1:6 Degine, Noemí wisgunonikid, Bab-Jehová e-dulemargi nued binsanoniye, ukud-dummad-naid bergusye, Bab-Jehová mas-bukib ukdeeye. Geb degidbali, Noemí e-balamarmala, Moab-yargi-mai armarsunnad.
RUT 1:7 Degisoggu, Noemí, degi, e-balamarmala Moab-yargi-e-neggi noargusmalad. Na e-warbaa Judá-yarse nagab nadegusmalad.
RUT 1:8 Geb degine, Noemí igarba-nadapgua, e-balamarga sogded: —¡Na bemar gannar be-nangan-negse namalo! Ar igi bemar dule-burgwismalad na be wiledaksamala, degine, igi be wile an-daksamarmoga, bitigi deyob Bab-Dummad wile-bemar-dakmogana gadin.
RUT 1:9 Bitigi Bab-Jehová gannar-sui-nikuega bemar-imaksana gadin, adi, bemar neguya-nuedgi wergudii-gumalagar. Geb degine, Noemí, na-e-balamar-wagar usad, adi, sogegar, degimaloye. Geb agi, e-balamar bela-bela bodmalad.
RUT 1:10 Degine, geb Noemíʼga sogdemalad: —Anmar beba be-dulemarse namarmogoed.
RUT 1:11 Noemí gannar amarga sogded: —Na be-negse be namala. ¿Ar ibiga be anba namalosunna? ¿Ar ande gannar mimmigan-nikubalosi, be-suimarga gumalagar? Ar geg deyob gued.
RUT 1:12 Bunamala, gannar be namala. An seredgus, an sui-bar-nikuosulid. Ar amba an bemarga sogdibe: ‘An emi-mutikidba sui-nikuoye, an mimmigan-nikubaloye,’
RUT 1:13 ¿ar bemarde, we-masmala-dunguedse abitomalosi? ¿Ar amar-ular, bemarde suisuli gudii gumalosi? Suli, geg bemar deyob gudii gumalad. Ar an bur bule bemarba nunmaked itonaid, ar Bab-Jehová bela-bela angi yolenaid.
RUT 1:14 Degine, e-balagan gannar bela-bela bodmarbalid. Geb Orfa e-saka-wagar napi-usad, adi, ega sogegar, degimaloye. Rutʼdi e-sakagi-bangubisulidba besad.
RUT 1:15 Agi, Noemí Rutʼga sogded: —Be-aisu-omega-gusadba be namoga, ar edi e-dulemarse naded, e-bab-dummaganmarse naded. Eba be namoga.
RUT 1:16 Rut ega sogded: —¡Mer be anga soge, an be-mete naye, be angi banguye! Ar bia be nadesogele, an beba naoed, ar bia be megidapoe, agi an megidapmogoed. Ar be-dulemar, an-dulemarga gumogoed. Ar be-Bab-Dummad, an-Bab-Dummadga gumogoed.
RUT 1:17 Ar bia be burgoe, agi an burgwemogoed, agi an diglemogoed. Ar unnila burgwedsega anmar na bangudmaloed. Ar degisulile, bitigi Bab-Jehová sabsur an-odurdaksunnana gadin.
RUT 1:18 Noemí deyob dakdegua, Rut eba nue-naye soge, agi, bar ega akar-sogsasulid.
RUT 1:19 Degine, geb Noemí, Rutʼbogwa nadmarsunnad, geb deyob Belén-neggweburse nonimalad. Belén-neggweburse nonimargua, bela dulemar-aginmalad geger dakdemalad, geb sogdemalad: —¿Wede, Noemíʼsursi?
RUT 1:20 Geb Noemí amar-abin sogded: —Mer bar Noemíʼye be an-bimalo, ar Bab-Dummad-Bela-Gangued-Nikad nunmaked-dummad anga uksasoggu, a-ular, be an-bimarsunno, Maraʼye.
RUT 1:21 An bela-ibmar-nika nadegusanad. Emisgindi, aka Bab-Jehová, ibmar-sate gannar an-obirisad. Ar Bab-Jehová-sogedba-gusad, degisoggu, ¿ibiga Noemíʼye anse bar gormalosunna? Ar emisgindi, Bab-Jehová sabsur an-odurdaksad. Ar Bab-Dummad-Bela-Gangued-Nikad boni-dummad angi barminonikid.
RUT 1:22 Deyob Noemí, e-bala-Rutʼmala Moab-akale, Belén-neggweburse nonimalad. Deunni, orosgisaar-dakleged-cebada gebe-weleded, a-ibagangi nonimalad.
RUT 2:1 Noemí-e-sui-Elimelec-e-gwenad Boozʼye nugad. Boozʼde dule-nug-nikadid, degi, dule-ibmar-ibedid.
RUT 2:2 Ibagwengi, Rut-Moabʼgined, Noemíʼga sogded: —An bese wilesagwa egisdo, sapurba naega wis be an-imaksana gadindo. Abakar nabir wile an-dakarmalale, dulemar-orosgisaar-dakleged-cebada-wenanaid-sorba sar-sargwen-bapatemamaid an weenaega. Geb Noemí ega sogded: —Eye. Bunagwa, be nae.
RUT 2:3 Rut nadsundo. Geb nainuse modapgua, dulemar-cebada-wenanaid-sorba weenai gussundo. A-nainu dakleardo, Boozʼgadi. Boozʼde Elimelec-e-gwenadid.
RUT 2:4 Agi, geb Booz, Belén-neggwebur-akar dule-ega-arbamaladse nonikid. Geb Booz dule-ega-arbamaladga sogded: —Bab-Jehová beba gudimalana gadin. Geb dule-ega-arbamalad sogdemarmogad: —Bab-Jehová be-bendakmogana gadin.
RUT 2:5 Booz, ega-arbamalad-dummadse, Rut-egichided: —¿We, doa-bunagwa?
RUT 2:6 Arbamalad-dummad abin-sogded: —We-bunagwa, Moabʼginedid, Noemíʼba Moab-akar danikid.
RUT 2:7 We-bunagwa wilesagwa wegii anga sogsagusad: ‘An bese wilesagwa egisye, wis be cebada-sar-sargwen-babatismamaid-weega an-imakena gadinye, be-sordamar-sorba an weenai guegarye.’ Geb agi arbadsundo. Emide, bunagwa wakdar-akar gunaid, neg-bipise unnila iche obunno danikid.
RUT 2:8 Geb Booz Rutʼga sogded: —Bunagwa, nue an-itogo: An bega sogo, mer dule-baid-nainuse cebada-sar-sargwen-babatismamaid weenao. Mer bangubalo. Wegi anga-omegan-arbamalad-walik be gunai guo. Melle eba be beo.
RUT 2:9 Anga-machergan-arbamalad cebada-wenanaidba, nue be atako. Omeganba be namogo. Emisgindi, anga-arbamaladga an sogsad: ‘Mer we-bunagwase gole-gole damaloye.’ Uku-uku be itoalile, dii bormomargi-siidse be gobnao, anga-arbamalad-siisadse.
RUT 2:10 Geb Rut Booz-abin napase wagar dulluu imaksagua, ega sogded: —¿Ibiga angi be nued-gusa? An weginedsulin-inigwele, nued be an-daksad.
RUT 2:11 Booz Rut-abin sogded: —An wisgusad, be-sui-burgwisad-sorba, igi be-saka-Noemíʼgi be nued gusa. Deginbali, be-babganse bar be nadsurbalid, be-yar-gwalulesadse. Aka be dulemar-gwapidse nonikid, gwen be dulemar-dakdisulidse.
RUT 2:12 Bab-Jehová bega ibmar-buged ukena gadin. We-ibmar Israel-e-Bab-Dummad-Jehová-nuggine be abingaoed. A-Bab-Dummadgi be bendakleged amis gusad.
RUT 2:13 Geb Rut, Boozʼga sogded: —Dummad, amba be nued an-dakdii-guena gadin. An be-maisur-inigwele, be-sabgued nue be anse oyosad. Be weligwar an-imaked, nue-ulubse be an-ebusdo.
RUT 2:14 Masgulleged-wachi-mosgu, Booz Rutʼse gochad, ega sogded: —Wegi be sige. Madu be sue. Vino-gagbidgi be madu owardikue. Degi, Rut arbamalad-walik sigwisgua, Booz ega cebada-yoaled uksad. Degi, nue-immelesgu, mas amba obichad.
RUT 2:15 Degi Rut, orosgisaar-dakleged-cebada gannar weenadbalid. Geb agi, Booz dule-ega-arbamaladga sogded: —Rut, cebada-duk-dukgwenad-abargi cebada-weenaimogale, mer obingegsamalo.
RUT 2:16 Bemar bular-bular-wenanaid wis egwanmai-egwanmai samalo, adi, Rut bemar-sorba bur bule weegarmo. Mer ega akar-sogmalo.
RUT 2:17 Rut, neg-nue-sedosadse orosgisaar-dakleged-cebada weenai gusad. Geb e-uka misbalid. Nibir-durbo-gakabake (44) ega gusad.
RUT 2:18 Geb Rut neggweburse nadgu, cebada sesad. Geb Noemí, e-bala cebada-senonikid bela daksad. Geb Rut cebada-mas-guchagu, e-sakaga gwabgusad uksad.
RUT 2:19 Geb e-saka ega sogded: —¿Be bia arbaapi? ¿Bia cebada ichesur be wesa? Bab-Dummad a-dule-bendakena gadin, dule-begi-nued-binsasad. Rut e-sakaga bela sogsad, doa-nainugi arbasa. Ega sogded: —Emi-ibagi, dule-e-nainugi-an-arbasad, Boozʼye nugad.
RUT 2:20 Geb Noemí e-balaga sogded: —Bab-Jehová a-dule-bendakena gadin. Bab-Jehová wile emi-ibagi anmar-dulamalad-daksad. Bab anmar-idu-dule-burgwismalad amba deyob daksabalid. Emisgindi, we-dule anmar-gwenad-bur-walikagwadid. Aga anmar-bendakoye igar-maid.
RUT 2:21 Degi, Rut-Moabʼgined, Noemíʼga sogded: —Anga sogsabardo: ‘Anga-arbamaladba be arbadii guoye, orosgisaar-dakleged-cebada-weleged berguedseye.’
RUT 2:22 Noemí, e-bala-abin sogded: —Bunagwa, bur-nued an dakdo, be bunamala-Boozʼga-arbamaladba beed, mer dule-baid-e-nainuse be naega, adi, melle be naibi-itogega.
RUT 2:23 Rut, Boozʼga-arbamaladba alamaknai gussundo, cebada-weleged, degi, orosgi-dakleged-trigo-weleged bergusadse. Degii e-saka-ebo na gudii-gudsunnad.
RUT 3:1 Ibagwengi, Noemí, Rutʼga sogded: —Bunagwa, an bega sui-amiergeboed, adi, neguyagi be nued gudii-guegar.
RUT 3:2 We-Boozʼye-nugadga omegan-arbamalad-abargi be arbanai-gusadi, a-dule, anmar-gwenadid. Emide Booz, we-mutikidba cebada-omukuleged-negse naoed, cebada-egwanaegar.
RUT 3:3 Degisoggu, an bega soged: Be nue obo, be-san-wawadik be sao, be-mor-bur-nued be yoo. Geb cebada-omukuleged-neg-siidse be nao. Degi-inigwele, mer Booz-be-daked be imako. Yoo gobed-obeloged-iduar, degi, masgunned-obeloged-iduar, be-dakega be imakosulid.
RUT 3:4 Booz-gabsokalir, nue be dako, bia megoe. Degine, geb be asik nao, e-nag-atualed be egao, e-dukuba be megoed. Degine, geb e-sunnad bega sogoed, ibu be imakergeboe.
RUT 3:5 Rut, Noemí-abin sogded: —Be-anga-ibmar-sogsad, bela an imakoed.
RUT 3:6 Geb agi Rut, sapurba cebada-omukuleged-neg-siidse nadegusad. E-saka-ega-bela-ibmar-sogsad imaksad.
RUT 3:7 Booz gobsagua, degi, mas-guchabargua, yeer-itonaded. Degine, geb cebada-bukwad-daksik gabnaded. A-sorba, Rut Booz-maidsik binnasdikii danigusad. Degi, Rut Booz-e-nag-atualed egasad, geb e-nag-dukuba megisad.
RUT 3:8 Neg-gabigwengusgua, Booz ataas-naded. Aibitegua, ome e-nag-dukusik-mai dakalid.
RUT 3:9 Geb Booz ese egisded: —¿Be doa? Rut abin-sogded: —Ani, an Rut, be-maiga-gudiidi. Be an-gwenad-walikagwad-gusoggu, be an-bendakergebed. A-ulale, be an-nikued an be-abedo.
RUT 3:10 Booz, Rutʼga sogded: —Bunagwa, Bab-Jehová be-bendakena gadin. Be we-ibmar-imaksadi, be ibmar-iduar-imaksadba bur bule nued be imaksad. Ar be-suiga guega dule-sapingwagwad be amiapi-wilubbinad, dule-mani-ibeddibe, igi mani-suliddibe. Emide, be deyob imaksasulid.
RUT 3:11 Degisoggu, bunagwa, mer be dobguo. Be-sogedba an imakoed. Ar dulemar-an-neggweburginmalad bela be-wismalad, be ome-innikigwadid.
RUT 3:12 Ar an be-gwenad-walikagwad-guendo nabir-be-bendakegar, degi-inigwele, dule-baid anba-bur bule-walikagwad gudibalid.
RUT 3:13 Emi-mutik be wegi gabgwelo. Neg-oibosar, gwenad-anba-bur-walikagwad be-bendakye-sogele, ar deyob guodo. Ar degisulile, Bab-Jehová-asabin ise-sogar an bega soged, ani, an igar-maidba be-bendakoed. Emisgindi, wegi be gabgwersunno, neg-oibogedse.
RUT 3:14 Rut a-mutiki Booz-nag-duksik gabidsunnad. Geb bolegoedbali, amba negsichi-sichigwadgi, dulemar-ataked-idu, Rut gwisgusad. Ar ade, Booz sogsa gusad: “Dulemar wisguosulid, cebada-omukuleged-negse ome-gwensak-arbid.”
RUT 3:15 Degi, Booz Rutʼga sogded: —Mor-dummad be unge. Rut mor-dummad nue-nallaa gasgua, Booz ega cebada nibir-dulabo-gakambe (50) urbisad. Geb Booz Rut-yargangi cebada-nasiksad. Agi Rut, neggweburse mor-dummadgi dukwaa cebada-sealid.
RUT 3:16 Rut e-saka-negse nonigua, e-saka ese egichialid: —Bunagwa, degite, ¿igi be gude? Rut e-sakaga bela sogsad, igi e-gwenad-walikagwad-Booz ega ibmar imaksa.
RUT 3:17 Geb a-ukinbali, Rut sogdebalid: —Anga cebada nibir-dulabo-gakambe (50) uksabalid. Ar anga sogsad: ‘Be-saka-negse mer ibmar-sedsuli gannar aibiroye.’
RUT 3:18 Geb Noemí, Rutʼga sogded: —Bunagwa, be abitogwelo, igi neg-gudodibe. Ar ade, Booz belagwa gudiosulid, igar-nudakedse indakoed.
RUT 4:1 Degidgine, geb Booz neggwebur-yawagakse signonikid. Booz agi-sii, e-gwenad-bur-walikagwad-obarisad-nadapi dakalid. Geb ese gochad, ega sogded: —Mesad, dage. Wegi be siggwer. Geb e-mesad ese nonikid, agi signonikid.
RUT 4:2 Degine, Booz, dador-neggweburginmalad-warambese (10) yog-gollar imaksad, ega sogded: —Wegi be sigmargwer. Geb wemar sigismarmogad.
RUT 4:3 Agi Booz e-gwenad-walikagwadga sogded: —Noemí Moab-yargi-mai-nonikidi, anmar-gwenad-Elimelec-nainuga-gusad uksokalid.
RUT 4:4 An binsasdo, an bega sogoye, abakale be nainu bakbiele. Ar degiile, we-dulemar-be-dakbukwad-wagab, degine, girmar-dummagan-bukwad-wagab be bakodo. Ar be bakbisulile, anga be sogo, an wisguegar. Ar be gwenad-Elimelec-bur-walikagwadsoggu, igar-maidba nainu be bakergebed. Geb be-sorbali, ani, an danimogad, nabir-nainu-baked. Geb e-gwenad-walikagwad sogded: —An bakoe.
RUT 4:5 Degi, Booz ega sogdebalid: —Ar Noemíʼse be nainu-bakyesogele, Rut Moabʼgined, e-ibe-sui-burgwisad be nikubalirgebed, adi, e-sui-burgwisad-e-nug mer berguegar, degine, e-nainumar amba a-nuggi naigubaligar.
RUT 4:6 Gwenad-walikagwad degi-itosgua, Boozʼga sogded: —Degiirdi, an nainu bar bakosuli. Ar an baksale, an ibmar-nikad ani oichogo-itole. Be, bur be bake, an bega urmaksundo. Andi geg gued.
RUT 4:7 A-ibagangine, Israel-yargi gusgu igar-maid, dule-wargwen e-mesad-nainu-bakegala, igi dule-baidbo igar mesbiele, dule-wargwenad, na e-nag-uka dule-baidga ukoye, igar-maidba. Deyobi na igar-mesismalad magar-daklenonikoed.
RUT 4:8 Degisoggu, Booz-e-gwenad Boozʼga sogdesundo: —Be, be nainu-baksunna. Geb e-gwenad Boozʼga nag-uka uksasunnad.
RUT 4:9 Degi, Booz dadormar-e-ambe (10) bukwadga, degi, dulemar-baigan-bukwadga sogded: —Bemar-bergwable-bukwad an-barsogega-gumarsunno. An Noemíʼse bela Elimelec-e-nainuga-gusad, Quelión-e-nainuga gusad, deginbali, Mahlón-e-nainuga gusad baksunnoed.
RUT 4:10 Deginbali, bemar an-barsogega-gumalad, Rut Moabʼgined, Mahlón-e-omega gusad an nikubaloed, adi, e-sui-burgwisad-e-nug, mer elilegegar, degine, e-nainumar mer e-gwenadgan-abargi, degi, neggweburgi yogguegar. Bemar we-igar-sogega gumarsunnad.
RUT 4:11 Bela dadormar-e-ambegid (10), degi, dulemar-bukwamalad gotemalad: —Eye, anmar be-dakbukwamalad. ”Bitigi Bab-Jehová, we-ome-Rut be-neggi-gwisguoedi, Raquelʼyob, degi, Leaʼyob imaksamogana gadin. Ar we-omegangi Israel-dulemar danimalad. ”Be Efrata-dulemar-abargi dule-dummadga guena gadin, degi, Belén-neggweburgi dule-nug-nikadga gubalina gadin.
RUT 4:12 ”Bitigi be we-ome-nikusadbali, Bab-Jehová, bega mimmigan-bukidar-ukena gadin, igi Fares Judá-machi na e-nan-Tamarʼga wagan-nikusa.” Judá Tamarʼga Fares-baksad.
RUT 4:13 Deyobi, geb Booz, Rut-nikunonisunnad. Geb Booz na e-ome-Rutʼse gochagua, Bab-Jehová-sogedba Rut gurgin-nikunonikid. Geb Rut machigwa nikunonikid.
RUT 4:14 Mimmi-gwalulesad-nukad Noemíʼga omegan sognanai-guarmalad: “Bab-Jehová-e-nug-dummarba-gusun, ar emi-ibagi wagwa bega uksad, adi, be-bendakdii guegar. Be-wagwa Israel-yargi nug-dummarba-nika megnonikoed.
RUT 4:15 We-mimmi weligwar-gudii be-imakoed, deginbali, be-sered-ugakgi be-bendakdii gubaloed, ar be-bala bela-bela-be-sabgued machi-nikusad. We-balade masmala-gugle (7) nikuedba bur bule bega ibnuedga gued.”
RUT 4:16 Degine, Noemí, goe-machi-susad, geb, na e-nukugi mesnonisunnad. Deyobi, muu-Noemí na e-wagwa-akwedii gualid.
RUT 4:17 Neg-dikarba-mamaid mimmi-dakarmargua, sogdemalad: “¡Noemíʼga goe-machi gwalulesye!” Geb a-dulemar mimmi-onuggusmalad, Obedʼye. We-Obed, Isaí-e-babad, degi, Isaí David-e-babad.
RUT 4:18 Wemar, Fares-e-waganad: Fares, Hezrón-e-babad.
RUT 4:19 Hezrón, Ram-e-babad. Ram, Aminadab-e-babad.
RUT 4:20 Aminadab, Naasón-e-babad. Naasón, Salmón-e-babad.
RUT 4:21 Salmón, Booz-e-babad. Booz, Obed-e-babad.
RUT 4:22 Obed, Isaí-e-babad. Isaí, David-e-babad.
1SA 1:1 Efraín-yalaganba, Ramataimʼgi Suf-dule-wargwen maigusad. A-dule, Elcanaʼye nugad, Jeroham-e-machid. Jerohamʼdi, Eliú-e-machid. Eliúʼdi, Tohu-e-machid. Tohuʼdi, Zuf-e-machid. Zufʼdi, Efrateo-duled.
1SA 1:2 Elcana ome-warbo nikad: Wargwendi, Anaʼye nugad, baiddi, Peninaʼye nugad. Peninaʼdi mimmigan nikad, ar Anaʼdi mimmigan sated.
1SA 1:3 Birga-irba, Elcana, Bab-Jehová-Bela-Gangued-Nikad-e-nug-odummogega, e-neggwebur-akar Silo-neggweburse ardaed. Agine, Bab-Jehováʼga ibdurgan-ogumakar-ukleged ukdaed. Deunni, Elí-e-machimala-warbogwad, Ofniʼye-nugad, degi, Fineesʼye-nugad, Siloʼgi dule-irwa-Bab-Dummadse-gormaladga mamaid.
1SA 1:4 Ar ibdurgan-ogumakar-ukleged-ibagan-mosale, Elcana, e-ome-Peninaʼga, degi, bela e-mimmiganga igar-soglesmaidba Bab-Jehováʼga-ibdurgan-ogumakar-ukleged-e-goamar ukdaed.
1SA 1:5 Bab-Dummad Ana-mer-mimmi-nikuega-imaksa-inigwele, Elcana amba Ana-nue-sabdaed. A-ulale, ega ibdurgan-ogumakar-ukleged-e-goa-bur-nued ukdaed
1SA 1:6 Ar Bab-Jehová Ana-mer-mimmi-nikuega-imaksadbali, e-isdarad-Penina, Ana-ourwega yamo egi dodoardaed.
1SA 1:7 Ar birga-irba, Bab-Dummadse-goled-negse nadmalale, Penina degibi Ana-imakardaed. Penina Anaʼgi dodoardasoggu, Anaʼdi boardasunnad, bar mas-gunbidasulid.
1SA 1:8 Geb degine, e-sui-Elcana ega sokardaed: “Ana, ¿ibiga be boardae? ¿Ibiga be mas-gunbisurdae? ¿Ibiga be nue-wile-itodae? ¿Ar ande, machimala-warambe-nikulegedba (10), bur bega nuedsursi?”
1SA 1:9 Ibagwengi, Ana, Silo-neggweburgi Bab-Dummadse-goled-neggi mas-guchad-sorbali, Bab-Dummadse-golega gwisguded. Agine, Anaʼdi bela-bela ulubgi-nunmak-itogedba, Bab-Jehováʼse isedar-boar gorsii gusad. Deunni, dule-irwa-Bab-Dummadse-goled Elíʼye-nugad, Bab-Dummadse-goled-neg-e-yawagak-dikarba siid.
1SA 1:11 Geb degine, Ana Bab-Jehováʼga ise-sogar sogded: “Bab-Jehová-Bela-Gangued-Nikadye, Andi be-mai-wilegedid. Be an-dake, an nue wile-itodiid, mer be an-iege. Bab-Jehováʼye, be anga machi-wargwen-ukele, na degisadegu bega-arbaega an imakoed. E-sailagia, bipisaale ei siklegosulid.”
1SA 1:12 Ar Ana, Bab-Jehováʼse suitii gorsigusad. Degisoggu, Elí, Ana-e-gaya nuu daksii gusad.
1SA 1:13 Ar ade, Ana binnasuli Bab-Dummadse-gorsisulid. Unnila e-gaya arbo-arbo imaksiid. Degidbali, Elí, Anaʼgi binsaded, mummu-an-dakye.
1SA 1:14 Geb Elí, Anaʼga sogded: —¿Ar sana be dadakguoe? ¡Vino-gobed ies be imake!
1SA 1:15 Ana abin-sogded: —Dummad, degisuli. Vino an gobsasulid, inna-gagbid an gobsasurbalid. Unnila gwage-naibi an itoged. A-ulale, an Bab-Jehová-asabin, ulubgi-naibi-itogedgi an gorsiid.
1SA 1:16 Mer ome-isganayob be an-dake. An-wile-itoged-ular, undar-suitisaar Bab-Jehováʼse an gorsii gusad.
1SA 1:17 Elí abin-sogded: —Mer bar be bukib-binsao, nuedgi be nae. Israel-e-Bab-Dummadse be ibmar-egichisadi, na e bega ukena gadin.
1SA 1:18 Ana abin-sogded: —Doggus-nuedi. Bitigi be nued angi-binsadigusana gadin. Weyob Ana sogsagu, nadegusad. Geb agi na mas-gundapid. Agine, Ana bar wile-itossulid.
1SA 1:19 A-bangine, Elcana na e-omeganmala wakudaryalaba gwisgusad. Geb Bab-Jehová-e-nug-odummosad-sorbali, na gannar e-negse Ramá-neggweburse nonimalad. Geb a-sorbali, Elcana, Anaʼse gochad. Agine, Bab-Jehová, Anaʼgi nued-binsasad.
1SA 1:20 Geb Ana gurgin-nika gunonikid. Na ugakgued-e-iba nagunonigua, ega machigwa uklenonikid. “Ar Ana Bab-Jehováʼse egichadbali, Samuelʼye onugsasad.”
1SA 1:21 Ar Elcana, e-ome-Penina, degi, e-mimmiganmala aligusmalad, Bab-Jehováʼga ise-sogar-sogsadba ibmar-ukega, degine, ibdurgan-ogumakar-birga-irba-ukleged ukbaligar.
1SA 1:22 Anaʼdi wemarba aligussulid, ar e-sui-Elcanaʼga sogsad: —Machi-bipi mam-iarguedse, Bab-Dummadse-goled-negse, Bab-Jehováʼga-oyogega an nidoed. Geb agine, machi-bipi Bab-Dummadga-arbaega degisadegu gudii guoed.
1SA 1:23 E-sui-Elcana abin-sogded: —Degirdi nabirdo. Be-sogedba be imakdo. Machi-bipi-mam-iarguedse be nasunnodo. Bab-Jehová bega-ibmar-imakoye-sogsad bega imaksun. Degisoggu, Ana e-neggi besad. Geb mam-iargusadse e-machi-bipi-odummosad.
1SA 1:24 Ana, Samuel-mam-oiar-imaksagua, Elcanaʼbo Silo-neggweburse Bab-Jehováʼse-goled-negse Samuel-sesmalad. Ana, moli-bebe-nikad-machered-birgapaa-nikad sesad. Deginbali, madubur nibir-dulagwen-gakabo (22) sesbalid, buglugi vino-sesbalid. Deunni, Samuel amba bipigwad.
1SA 1:25 Modapmargua, moli-bebe-nikad-selealid oburgwismalad. A-sorbali, Ana, Elíʼga machi-bipi sesmalad ega-oyogegar.
1SA 1:26 Geb Ana, Elíʼga sogded: “Dummad, inniki an bega soged, ar ani an be-walik Bab-Jehováʼse gorsigusadid.
1SA 1:27 We-machi-bipi Bab-Jehováʼse-an-egichisgusadi, emide, anga uksad.
1SA 1:28 Emisgindi, machi-bipi an Bab-Jehováʼga uked. Burgwedsega, Bab-Jehováʼga degisadegu ibmar-imakdii guoed.” Geb agine, Elí Bab-Jehová-nug-odummogega, napase wagar-dulluu imaksad.
1SA 2:1 Ana weyob Bab-Jehováʼga namaksad: “Bab-Jehováʼgi weligwar an itoged, Bab-Jehováʼgi an-gangued an nikad. E-an-abonosadgi an yeer-itoged, an-isdarmaladgi an burgusunnad.
1SA 2:2 ”Bab-Jehováʼyobid, dule-isligwaled sated, Bab-Jehováʼyob-anmar-odukued dule sulid. ¡Bab-Jehováʼyobid, dule sated!
1SA 2:3 ”¡Dulemar, mer bar san-dummarba-itogedgi sunmakmalo, mer bar san-bule-bule-imakedba ibmar-sogmalo! Bab-Jehováʼdi, Bab-Dummad-bela-ibmar-wisidid. A-ulale, Bab-Jehová, dulemar-ibmar-imaked nue wisid, ibmar-nued-imakdibe, ibmar-isgana-imakdibe.
1SA 2:4 ”Bab-Jehová dulemar-dutusulid-e-warsi bibisged, ar dulemar-nollomaladgardi gangued uked.
1SA 2:5 Dulemar mas-obine-nika-gudigusmaladi, emidi, mas-gunnega, manigi na e-san ukdemalad. Dulemar ukudmaad-itodigusmaladdi, emidi, immerbaa gudidimalad. Ome geg-mimmi-bake-gudigusadi, emidi, walagugle (7) na mimmi nikad. Ome-nabir-mimmi-bakeddi, geg na bar-mimmi-bake naded.
1SA 2:6 ”Bab-Jehováʼgi dulagudigued, degi, burgwed-igar danikid, Bab-Jehová dule-burgwega imaked, degi, mer dule-burgwega imakbalid.
1SA 2:7 Bab-Jehová, mani-ibedga, degi, mani-satedga dule-imaked, Bab-Jehová dule-binsaledga dule-imaked, degi, dule-dummadga dule-imakbalid.
1SA 2:8 Bab-Jehová, dule-wileged ibmar-satedba napayala-meremaidaed, dule-dummagan-abargi osiega imaked. Bab-Jehová, dule-wileged ibmar-durwa-milegedgi ibmar-amididaedi, dule-nug-nikamalad-e-gangi osiega imaked. Ar napneg-e-sailamar-neg-ganikidi, Bab-Jehováʼgadid, amar-birgi napneg-nasiksad.
1SA 2:9 Bab-Jehová eba-nue-nanaimalad na bendaked, adi, mer akar-guegar. Ar dule-isganamardi negsichidganba yoggudmaloed. ¡Dule wargwensaale, na e-ganguedba ibmargi obinsulid!
1SA 2:10 ”Bab-Jehová e-isdarmalad-obeloged, nibneg-akale egi mar-ogoled. Bab-Jehová we-napneg-ugakaase dule-bukmaladga igar-nabogoed. Bab-Jehová na rey-mesisadga gangued-uked, na e-rey-nug-imaksadga e-gangued ogannoged.”
1SA 2:11 Elcana, Anaʼbo Ramá-neggweburse gannar e-negse nadsunnad. Ar Samuelʼdi, Bab-Jehováʼga-ibmar-imakega Silo-neggweburgi dule-irwa-Bab-Dummadse-goled-Elíʼye-nugad-walik bessunnad.
1SA 2:12 Elí-masmala, dule-isganad, gwen Bab-Jehová-dobsuli gudii damalad.
1SA 2:13 Gusgu igar-maidba, dule-irwa-Bab-Dummadse-gormalad weyob ibmar-imakdamalad: Dule-wargwen Bab-Dummadga ibdurgan-uksale, geb san-dunagusale, dule-irwa-Bab-Dummadse-goled-e-mai iko-sangaed-nugar-warbaa-nikad sedanidaed.
1SA 2:14 Amba bormoyagi san dulenaidibe, bormo-eduged-nikadgindibe, esmedgindibe, egi iko-sangaed odosdaed, adi, san-suegar. Iko-sangaedgi igid-san-galegoe, a-san dule-irwa-Bab-Dummadse-goledi na susdaed. Dule-irwa-Bab-Dummadse-gormaladi, Israel-dulemar-Silo-neggweburse ibmar-senonikile, degibi imakdamalad.
1SA 2:15 Elí-masmaladi igar-maisulidba imakdamalad. Amardi, e-mai-barmiardaed dule ibmar-dula-ukleged dusokalidga sogega: “Dule-irwa-Bab-Dummadse-goledga san-narega san-makidbi be anga udage. Ar dule-irwa-Bab-Dummadse-goled san-dualed be-abin suosulid.”
1SA 2:16 Ar dule weyob abin-sogdele: “Be abitogwele, igar-maidba bin ibdula-e-gwallu ogumaklegweloed. A-sorbali, geb be na san-subiedba be suoed.” Dule-irwa-Bab-Dummadse-goled-e-mai abin-imakdedaed: “Suli, emisgwa be anga udage. Ar degisulile, gandikidgi an be-annik suoed.”
1SA 2:17 Ar Elí-masmala ibmar-uklegedi, Bab-Jehováʼgadsulidyob baisur-dakdamalad. Degisoggu, a-ular, Bab-Jehová-asabin bela-bela isgusgudimalad.
1SA 2:18 Machi-bipi-Samuelʼdi lino-mor-sakwasulid-yoi, Bab-Jehováʼga nuedgi ibmar-imakdii gualid.
1SA 2:19 E-nandi, birga-irba ega mor-suid-bipigwad makdaed. Geb na e-sui-Elcanaʼbo birga-irba gusgu ibdurgan-ogumakar-ukleged-ukega-danimalale, ega mor-maksad seardaed.
1SA 2:20 Geb degine, Elí, Elcanaʼga, Anaʼga sogded: “Bemar Bab-Jehováʼga machi-bipi-uksad-ulale, Bab-Jehová ise-nued bemargi binsasun, machi-bipi-anar bitigi mimmigan-bamalad bemarga ukbarsun.”
1SA 2:21 Ana, Bab-Jehová-egi-nued-binsasadbali, mimmigan nikunonikid. Samuel-sorba, machimala-walapaa nikusad, degi, bunamala-walabo nikusbalid. A-ibagangine, Samuelʼdi Bab-Jehováʼse-goled-neggi dungumai gusad.
1SA 2:22 Elí bato nue-seredgusad, degine, wisgusad, igi e-masmala bela Israel-dulemargi dododimala, degine, Bab-Dummad-dulemarbo-ambikued-neg-yawagak-dogedgi omegan-ibmar-imakdimaladbo gabdimarbali.
1SA 2:23 Geb Elí e-masmalaga sogded: “¿Ibiga be weyob damala? Bela dulemar bemar-galagwensuli-gudimaladgi anga sunmakmalad.
1SA 2:24 Masmala, we-ibmar ibnuedsulid. Bela Israel-dulemar gwen nabir bemargi sunmaksurmalad.
1SA 2:25 Ar dule-wargwen dule-baidgi nosale, Bab-Jehová ega igar nabir naboged. Ar dule-wargwen Bab-Jehováʼgi nosardi, e-bendakegala, ¿doa e-ular gwisguoe? Dule e-ular-gwisgued sate.” Ar Bab-Jehová, Elí-masmalaga burgwed-igar-mesissoggu, a-ular, e-bab-ega-ibmar-sogsadba gwen-ibsassurmalad.
1SA 2:26 Bab-Jehová yeer Samuel-dakdaed, dulemar yeerdakdamarmogad. Deyob Samuel nue-dungumai gusad.
1SA 2:27 Bab-Dummad-e-dule-gwensak Elí-daknaded, geb ega sogdapid: “Bab-Jehová weyob soged: ‘Be-dadgan Egipto-yargi Faraón-e-maiga-gudimargu, an-ese-magarosgusadi, be nue wisid.
1SA 2:28 Bela Israel-dulemar-dadgan-baid-baid-bukwamalad-abargi, Aarón, dule-irwa-anse-goledga-guega an susad, adi, anga ibmar-ogumakar-ukleged-ailagi ibmar-ukega, ina-wawadik-yapanmalad ogumakega, degi, mor-sakwasulid yoegar. Deginbali, Israel-dulemar-anga-ibmar-ukmalad-gundii-gumalaga an Aarón-e-gwenadganga igar-uksabalid.
1SA 2:29 Anga ibdurgan-oburgwileged, degi, anga ibmar-ukleged sedamaloye an sogsagusadi, ¿ibiga bemar we-ibmar ibmar-nuedsulidyob be dakdamala? ¿Ibiga be an-nugba be-machimala-nug bur be odummodisunna? Emide, Israel-dulemar-anga-ibmar-ukmalad-bur-nuegangi be ogundiidba be-masmala wardungumaid.’
1SA 2:30 ” ’Ani, Israel-e-Bab-Dummad-Jehová soged: Ar an sogsa gusad: Bela be-dadgan, degi, be-waganse-bakar degisadegu anga ibmar-imakdii gumaloye. Degi-inigwele, ar emidi anga-ibmar-ukleged ibnuedsulidyob be daksasoggu, be-wagan anga ibmar-imakega bipisaar an bar imakosulid. Dule-an-nug-odummoged, an e-nug odummomogad. Dule-baisur-an-dakeddi, an e-nug bipii imaked.
1SA 2:31 Degisoggu, emiskwaa an be-gangued obelogoed, degi, an be-wagan-e-gangued obelobaloed. Bela be-wagandi gwen selegan megosulid.
1SA 2:32 Anse-goled-negga boni-saila-nagunonikoed be dakoed. Israel-yargi ibagan-nuegan-nagualile, bela be-wagandi gwen selegan megosulid.
1SA 2:33 Ar be-gwenad-gwensak an-ibmar-ogumakar-ukleged-ailagi ibmar-imakega an obesale, be-obodiguega gudoed, degi, gwage-nunmak be-imakdii gudbaloed. Degine, bela be-wagan sapingwagwadgi burgwemaloed.
1SA 2:34 ” ’Be wisguega bela bega ibmar-soglesad napira guoed. Weyob bega ibmar-oyolegoed: Ofni, Finees-ebo iba-galagwengi burgwemaloed.
1SA 2:35 ” ’A-ulale, dule-irwa-anse-goled-innikidaed an suoed, adi, an-ibmar-abegedba ibmar-saega, degi, an-sogedba ibmar-imakegar. Anga-arbaega, bipisaar e-wagan berguosulid. An dule-nug-imaksad-asabin, we-dule-irwa-anse-goled undar-gudiguega an imakoed.
1SA 2:36 Be-gwenadgan dula-bemaloedi, we-dule-irwa-anse-goled-asabin yokorgi-sindigar signonimaloed, adi, ese wis mani-egisega, degi, wis mas-egisbaligar. Dule-irwa-anse-goled-innikidaedse weyob wilenai gumaloed: Wis mas-gunnega dule-irwa-Bab-Dummadse-goled-arbaedgi-arbaega be an-imakye.’ ”
1SA 3:1 Machi-bipi-Samuel, Elí-sogedba Bab-Jehováʼga ibmar-imakdiid. A-ibagangi, Bab-Jehová dogdar bar dulemarbogwa sunmakdisulid, deginbali, negburgan-dakleged dogdar bar dakledisurbalid.
1SA 3:2 Ibagwengi, Elí bato dala galakgumaidba geg bar nue atakgusadgi e-gabedneggi obunnomaid.
1SA 3:3 Bab-Dummadse-goled-neggi gwallumar amba yoo ginneunni, Samuelʼdi Bab-Dummadse-goled-neggi gabmaid. A-neggi Bab-Dummad-Israel-Dulemarbo-Igar-Mesisad-Ulu siid.
1SA 3:4 Degidgine, Bab-Jehová, Samuelʼse gollalid: —¡Samuel! Geb Samuel abin-sogded: —¡Degite!
1SA 3:5 Agine, Samuel, Elí-maidse yog-abarmakded. Geb Elíʼga sogded: —Naa, ¿ibiga be anse gole? Elí abin-sogded: —An bese gochasuli. Gannar be megnae. Geb Samuel gannar megnaded.
1SA 3:6 Degine, Bab-Jehová gannar Samuelʼse gornonikid: —¡Samuel! Geb Samuel gwichibinne-imaksad, Elí-maidse abarmakded. Ega sogdapid: —Naa, ¿ibiga be anse gole? Elí abin-sogded: —Machi, an bese gochasuli. Gannar be megnae.
1SA 3:7 Ar ade, Samuel amba Bab-Jehová akudaked, deginbali, amba yoo Bab-Jehová-e-gayaburba ega magarolebalid.
1SA 3:8 Bab-Jehová gannar Samuelʼse gollarbalid: —¡Samuel! Geb Samuel gannar gwichibin-imaksad, Elí-maidse abarmakded. Elíʼga sogdapbalid: —Naa, ¿ibiga be anse gole? Geb Elí magar-itononikid, Bab-Jehová, Samuelʼse gornaid.
1SA 3:9 Elí ega sogded: —Gannar be megnae. Dule gannar bese gollalile, ega be sogo: ‘Dummad, soge, an be-itomai.’ Geb degine, Samuel gannar megnadsunnad.
1SA 3:10 Geb Bab-Jehová, Samuelʼse gannar gornonikid: —¡Samuel! ¡Samuel! Samuel abin-imakded: —Dummad, soge, an be-itomai.
1SA 3:11 Geb Bab-Jehová ega sogded: —Nue itogo. An Israel-yargi ibmar-imaksokalid dulemar wisgualile, bela-bela gwakidmaloed.
1SA 3:12 A-ibagine, an Elíʼgi sabsur-ibmar-sogsagusadi bela an imakoed. An Elí-e-gwenadgan sabsur-odurdakoye-sogsabalid bela an imakbaloed.
1SA 3:13 Deunni, an Elíʼga sogsa gusad, be-machimala-e-isgusad-ulale, degisadegu an be-gwenadgan sabsur-odurdakdii guedseye. Ar Elí, e-machimala-angi-dododimalad nue-wisinad, degite, ese gwen-ulussulid.
1SA 3:14 ”Degisoggu, Elí-gwenadgangi an ise-sogar-sogsunnad: ‘Bipisaar anga-ibdurgan-oburgwileged, degi, anga-ibmar-ukleged, Elí-e-gwenadgan-e-isgued osulogosulid.’ ”
1SA 3:15 Geb a-sorbali, Samuel gabided. Oibosadgine, Samuel, Bab-Dummadse-goled-neg-yawagak egasad. Degi, Elíʼga negburgan-daksad dobe-soge gualid.
1SA 3:16 Geb Elíʼdi, Samuelʼse gochasunnad: —¡Machi, Samuel! Samuel abin-sogded: —Soge.
1SA 3:17 Geb Elí ese egichialid: —¿Ibu Bab-Jehová bega sogsa? Bab-Jehová-bega-ibmar-sogsad bela be anga sogo, mer be angi ibmar-odukuo. Ar ibmar-soggwen be angi odukusale, Bab-Dummadse be sabsur-odurdaklegoed.
1SA 3:18 Samuel, Elíʼga bela ibmar-sogsad, gwen bipisaale egi ibmar odukussulid. Geb Elí sogded: —Edi Bab-Jehováʼsoggu, na e-dakedba bur ibmar-nued imakodo.
1SA 3:19 Samuel dungumaidba, Bab-Jehová eba gudii gusad. Bab-Jehová, Samuelʼga-ibmar-sogsa-gusad, bela sogedba ega imaksad.
1SA 3:20 Bela Israel-dulemar Dan-yar-akale, Beersebaʼse wisgusmalad, Bab-Jehová e-gayaburba-barsogega Samuel-susye.
1SA 3:21 Deginbali, Bab-Jehová Silo-neggweburgi Samuelʼse gornonidaed, adi, e-gayaburba ega sogegar. Samuel, Bab-Jehová-ega-ibmar-soged, bela Israel-dulemarga sogdaed.
1SA 4:1 A-ibagangine, Israel-sordamar Filistea-sordamargi-bila-onogega nadmalad. Geb Israel-sordamar Eben-Ezerʼye-neg-nugad-dikarba ambikudapmalad. Filistea-sordamardi Afecʼye-neg-nugadgi ambikunonimarmogad.
1SA 4:2 Filistea-sordamar, Israel-sordamargi bila-onogega duurmakarmargua, Israel-sordamar e-abin duurmakdemarmogad. Agine, Filistea-sordamar, Israel-sordamargi nakwismalad. Bila-onogedgi, Israel-sordamar milibake (4,000) Filistea-sordamarse burgwismalad.
1SA 4:3 Israel-sordamar na danar-danar bukwadse gannar nonimargu, Israel-girmar-dummagan sogdemalad: “Emi-ibagi, ¿ibiga Bab-Jehová, Filistea-sordamarse-galakuega anmar-imaksa? Degisoggu, Silo-neggweburgi Bab-Jehová-Dadganbo-Igar-Mesisad-Ulu-siid anmar sunae, adi, anmarba gudii guoed, anmar-isdaradmaladgi anmar-bendakegar.”
1SA 4:4 Degisoggu, girmar-dummagan Silo-neggweburse na e-sordamar-barmisad, adi, Bab-Jehová-Bela-Gangued-Nikad querubinʼmar-abargi-negdakmaid-e-Ulu sunamalagar. Agine, Elí-masmala-warbogwad Ofni, degi, Finees, Bab-Jehová-Igar-Mesisad-Ulu-edarbedimaladi eba armarmogad.
1SA 4:5 Bab-Jehová-Dadganbo-Igar-Mesisad-Ulu Israel-sordamar-danar-bukwamaladse selenonigua, Israel-sordamar sabsur-oimakdemalad, neg-dulagwar naded. Abali, napaneg giglimakded.
1SA 4:6 Filistea-sordamar, Israel-sordamar-oimake itoarmargu, sogdemalad: “¿Ibiga Hebreo-dulemar oimakdemala?” Geb Filistea-dulemar, Bab-Jehová-Dadganbo-Igar-Mesisad-Ulu Israel-sordamar-danar-bukwamaladse selenoniye wisguarmargu, dobgudmalad.
1SA 4:7 Geb sogdemalad: “Israel-sordamar-danar-bukwadse bab-dummad-gwensak nonikid. ¡Anmar duledar-wilesmar, ar anmar weyob neg-dakdisulid!
1SA 4:8 ¡Anmar duledar-wilesmar! ¿Doa we-bab-dummadgan-bulegangi anmar-bendakoe? Ar we-bab-dummagan nega-dulesulidganba boni-bulegangi Egipto-dulemar-onaglik-gusmaladid.
1SA 4:9 Degisoggu, ¡Filistea-sordamar! Ar igi Hebreo-dulemar anmar-maiga-gusmala, deyob bemar yapa-gumalale, ¡na be gandik-samar, machered na be san-imakmar, melle-dobgumalo!”
1SA 4:10 Geb degine, Filistea-sordamar gannar Israel-sordamargi bila-onodmarbalid. Geb bila-onosadgi Israel-sordamargi nakwismarbalid. Agine, Israel-sordamar bukidar-burgwismalad, mili-dulagwen-gakambe (30,000) girgusmalad. Israel-sordamar-durgusmaladdi na e-neg-e-negse wakitemalad.
1SA 4:11 Degidbali, Filistea-sordamar Elí-masmala-warbogwad Ofni, degi, Finees-nugad, oburgwismalad. Degine, Bab-Jehová-Israel-Dadganbo-Igar-Mesisad-Ulu gasmarbalid.
1SA 4:12 Sorda-wargwen, Benjamín-yargined, bila-onolenaidgi wakinnargu, Silo-neggweburse mor siir-siir, degi, nono ukub-biini nonikid.
1SA 4:13 Agine, Elí, Bab-Jehová-Igar-Mesisad-Ulu-selesadba bukib-binsasiid. Degisoggu, gayaburba-wisguegala igar-nagaba gangi siid. A-sorda neggweburse nonigua, bela ibmar-gusad sognonikid. Bela dulemar wisguarmargua, oimakdemalad.
1SA 4:14 Ar Elí, dulemar-oimakde itoargu, egichialid: —¿Ibiga dulemar oimakdemala? Geb dule-nonikidi, Elíʼga gayaburba-sogega ese abarmakded.
1SA 4:15 Deunni, Elí birga-dulabake-gakambe-gakabaabak (98) nikad. E-daladi galakudsoggu, geg bar-atakgusad.
1SA 4:16 Dule-nonikidi, Elíʼga sogded: —Bila-onolenaidgi an emi wakicha-danikid. Elí, ega sogded: —Degite sogdeen, ¿igi ibmar-gusa?
1SA 4:17 Dule-gayaburba-senonikid abin-sogded: —Israel-sordamar Filistea-sordamar-abin duurmakde gusmalanad, degi-inigwele, bukidar girgusmalad. Be-machimala-warbogwad Ofni, degi, Finees burgwismarmogad. Deginbali, Bab-Dummad-Israel-dulemarbo-Igar-Mesisad-Ulu galesbalid.
1SA 4:18 Elí, Bab-Dummad-Igar-Mesisad-Ulu galesye itosgua, gangi-sii yargansik aimukuded, yawagak-nagaba melledapid. Elí, wardummadsoggu, degi, seredgusbarsoggu, aimukudgua, dukar bichisad, yog-burgwar gusad. Elí, birga-dulabo (40) Israel-yargine dulemarga-igar-nabogega megisad.
1SA 4:19 A-ibagine, Elí-e-bala Finees-ome, bonigwar-gudiid, ugakgued-e-ibagan bato ega warmakdanikid. Finees-ome wisguargua, Bab-Dummad-Igar-Mesisad-Ulu galesye, degi, e-sui burgwisye, e-sak burgwismoye, na e-bonigan itoalid. Na ugakgunaigua, undar-odurdaklenai-gusad.
1SA 4:20 Muugan-sikwigamalad nue egi-obin-dakarmargua, ega sogdemalad: “Gandik be sae, susugwa bega uklesad.” Finees-ome, muugan-ega-ibmar-sogedi, gwen ega ibmar-soge itosulid, abin-imaksasulid.
1SA 4:21 Finees-ome, Bab-Dummad-Ulu-galesad-ular, e-sak-burgwisad-ular, degi, e-sui-burgwisad-ular, Icabodʼye e-goe onugsasad. Adi soglegega, Bab-Jehová-e-gangued-yeerdakleged nadsunye.
1SA 4:22 Finees-ome goted: “¡Bab-Dummad-Israel-dulemarbo-Igar-Mesisad-Ulu galesad! Degisoggu, ¡Bab-Jehová-e-gangued-yeerdakleged nadsunnad!”
1SA 5:1 Filistea-dulemar, Bab-Dummad-Igar-Mesisad-Ulu gasmargua, Eben-Ezer-akale, Asdod-neggweburse searmalad.
1SA 5:2 Geb bab-dummad-Dagónʼse-goled-neggi, Dagón-akwagi-sobaled-gwichid-walik sismalad.
1SA 5:3 Neg-oibosgu, Asdod-dulemar dakarmalad, Dagón-akwagi-sobaled, Bab-Dummad-Igar-Mesisad-Ulu-asabin, asgunar napagi mellemai. Geb agi, gannar iduar-gwichidse Dagón-ogwichiapmalad.
1SA 5:4 Neg-oibosbargua, Asdod-dulemar dakarmarbalid, Dagón-akwagi-sobaled, Bab-Dummad-Igar-Mesisad-Ulu-asabin, e-sanbi napagi mellemai. E-nonodi, degi, e-arganmardi yawagak-dogedgi bisgar mellemamai.
1SA 5:5 A-ulale, emi we-garda-narmaklenaidse, Asdod-neggweburgi Dagónʼse-goled-neggi dulemar-dogmaladi, dule-irwa-Dagónʼse-gormaladse-bakale, a-yawagak-dogedgi bar annadisurmalad.
1SA 5:6 Bab-Jehová, Asdod-dulemar-sabsur-odurdaksad, degi, Asdod-neggwebur-dikarba-bukwamalad-sabsur-odurdaksabalid. Amargi boni-dusiyob-dakleged egi onisad.
1SA 5:7 Asdod-dulemar ibmar-gunaid magar daksamargu, sogdemalad: “Ar Israel-Bab-Dummad sabsur-anmar-odurdaknaid, degi, anmar-bab-dummad-Dagón sabsur-odurdaklenaibalid. Degisoggu, we-Bab-Dummad-Igar-Mesisad-Ulu geg anmar-abargi siged.”
1SA 5:8 A-ulale, Asdod-dulemar bela Filistea-e-dummaganse gochamalad, geb ese egichamalad: —Israel-Bab-Dummad-Igar-Mesisad-Ulu, ¿anmar igi imakoe? Filistea-e-dummagan abin-sogdemalad: —Gat-neggweburse be sedmala. Geb deyob Gat-neggweburse sesmalad.
1SA 5:9 Ar Bab-Dummad-Ulu Gat-neggweburse berbeleapid-sorbali, Bab-Jehová bela-Gat-dulemar, burwiganase-bakale, boni-dusiyob-daklegedgi sabsur-odurdaksad. A-ulale, Gat-neggweburgi dobed-dummad nagunonikid.
1SA 5:10 Geb degine, Gat-dulemar, Ecrón-neggweburse Bab-Dummad-Igar-Mesisad-Ulu barmismarmogad. Ecrón-neggweburse a-Ulu modapiyala, e-dulemar sabsur-gotemalad: “¡Bela anmar-oburgwemalaga Israel-Bab-Dummad-Ulu anmarse senonimalad!”
1SA 5:11 A-ulale, Filistea-dulemar bela e-dummaganse gochamalad, geb gandikidgi ega sogdemalad: “¡Israel-Bab-Dummad-Ulu be sedmar! ¡Israel-dulemarse be gannar berbenamar! Degisulile, anmar, degi, anmar-mimmiganse-bakar, burgwemaloed.” Ar Filistea-dulemar Bab-Dummadse sabsur-odurdaklenaisoggu, na dobe burgwemalad.
1SA 5:12 Filistea-dulemar boni-dusiyob-daklegedgi-burgwissurmaladdi amba a-boniba galitosmarmogad. Degisoggu, bendaklemalaga e-gormaknanaid nibnegse warmaksad.
1SA 6:1 Bab-Jehová-Igar-Mesisad-Ulu nii-walagugle (7) Filistea-yargi sigisad.
1SA 6:2 Geb Filistea-dulemar dule-irwa-bab-Dagónʼse-gormaladse, degi, nerganse gochamalad, adi, ese egismalagar: —Bab-Jehová-Igar-Mesisad-Ulu, ¿igi anmar imakoe? ¿Igi anmar gannar e-neg-siidse barmidoe? Be anmarga sogmala.
1SA 6:3 Bab-dummad-Dagónʼse-gormalad abin-sogdemalad: —Be gannar Bab-Jehová-Ulu barmidbimalale, mer be ibmar-sate barmidmalo. We-Ulu-Selealid-ular, igar-nudakega ibmar-ukleged Israel-e-Bab-Dummadga be ukmalargebed. Geb agine, bemar-boni-nikad bega surgudoed, degine, bemar wisgudmaloed, ibiga Bab-Jehová bemar-sabsur-odurdaked bemarga gwen osulosuli.
1SA 6:4 Filistea-dulemar sogdemalad: —Degite, ¿ibu an ega ukmaloe? Bab-dummad-Dagónʼse-gormalad abin-sogdemalad: —Ar bemala, degi, be-dummagana na bela emarbi boni-bulegan itonanaisoggu, Filistea-dummagan-merguedba, or gwaatar boni-dusiyob-daklegedyobi be sobmaloed, deginbali, or walatar nusayob-daklege be sobmarbaloed.
1SA 6:5 Degisoggu, boni-dusiyob-dakleged be sobmalo. Baiddi, nusayob-daklege be sobmalo. We-bonigande bemar-yar-wionaid. Geb Israel-e-Bab-Dummad-e-nug be odummomarbalo. Adi, abakale, Israel-e-Bab-Dummad, we-bonigi bemar-yar-wionaid bemarga osuloalile, be-bab-dummaganga osuloarmogale.
1SA 6:6 Ar ¿ibiga bemar Egipto-dulemaryobi, degi, Faraónʼyobi na be burgudmaloe? Bab-Dummad sabsur we-dulemar-odurdaksa gusad. Geb a-sorbali, ¿Egipto-dulemar Israel-dulemar-onossurmar be ebinsae? Eye, onosmala. A-ulale, melle na be burgumalo.
1SA 6:7 ”Emisgindi, be ur-napagined-ibmar-seed-binid be sobmalo. Deginbali, moli-bebe-nikad-ome mimmigan-burwi-nikad warbo be amimarbalo. Degi, a-moli-omegan bipisaale arbadisulid, e-dukargi suar-atinnar-nai arbadisulid be amimalo. Ur-napagined-ibmar-seedgi moli-bebe-nikad-omegan-warbogwad be edinmalo. Ar e-mimmigandi, moli-negyaba be odomaloed.
1SA 6:8 A-sorbali, Bab-Jehová-Ulu ur-napagined-birgi be onakmaloed. Geb Bab-Jehová-Ulu-sigoed-dikarba orgi-ibmar-sobarmalad be ulugwagi urbemaloed. We-ibmar Bab-Jehová-Ulu-galesad-ular, Bab-Jehováʼga-uklegoed. A-sorbali, molimar walagwengi ur-napagined-sedega be imakmaloed.
1SA 6:9 Geb be dakmaloed, molimar Israel-yargi-Bet-Semes-neggwebur-siidsik naodibe. Ar asik nadele, anmarga oyonado, Bab-Jehová na e-sunnad anmar-sabsur-odurdaknaiye. Ar baidsik naderdi, anmar wisguodo, Bab-Jehová sabsur-anmar-odurdaknasurye, binsa deyob neg-gunaiye.”
1SA 6:10 Weyob imaksamalad: Moli-bebe-nikad-ome mimmigan-burwi-nikad warbo amismalad. Geb ur-napagined-ibmar-seedgi edichamalad. Moli-e-mimmigandi moli-negyaba odosmalad.
1SA 6:11 A-sorbali, Bab-Jehová-Ulu, ur-napaginedgi onakwismalad. Degi, ulugwagi ibmar-nusayob-dakleged-orgi-sobaled-bukwad ur-napaginedgi onakwismarbalid.
1SA 6:12 Moli-bebe-nikad-omegandi igarba Bet-Semes-neggwebur-siidsik gornadapi gusmalad, gwen igar-baidsik aibachasulid. Filistea-e-dummagan ur-napagined-sorbali, Bet-Semes-e-nainumar-abingunaidse nadegusmalad.
1SA 6:13 Bet-Semes-dulemar, orosgi-dakleged-trigoʼye-nugad nebagi wenanaigu, Bab-Jehová-Igar-Mesisad-Ulu ese-dani dakarmargua, yeer-itodmalad.
1SA 6:14 Ur-napagined Bet-Semesʼgined-Josuéʼye-nugad-e-nainuse nonikid, akwa-dummad-siid-dikarba megnonikid. Geb agine, Bet-Semes-dulemar, ur-napagined sapanga imaksamalad. Deginbali, Bab-Jehováʼga-ukega molimar-bebe-nikad ogumaksamarbalid.
1SA 6:15 Levita-dulemar, Bab-Jehová-Igar-Mesisad-Ulu-odesmargua, degine, ibmar-orgi-sobaled-bukwad-e-ulugwa odesmarbargua, akwa-dummad-birgi sismalad. A-ibagine, Bet-Semes-dulemar, Bab-Jehováʼga ibdurgan-ogumakar-ukleged uksamalad, degine, ibmar-bamalad-ukleged ega uksamarbalid.
1SA 6:16 Filistea-e-dummagan-walataled bela we-ibmar-daksamalad. Geb a-ibagine, Ecrón-neggweburse gannar nonimalad.
1SA 6:17 Filistea-dulemar, Bab-Jehová ega igar-nudakegala, boni-dusiyob-dakleged-orgi-sobaled we-neggweburmar-iliba uksamalad: Asdod-neggwebur-nuggi, Gaza-neggwebur-nuggi, Ascalón-neggwebur-nuggi, Gat-neggwebur-nuggi, degi, Ecrón-neggwebur-nuggi.
1SA 6:18 Amba deyopira, Filistea-e-dummagan-walataled na e-neggweburmar-galu-matusulid-akwabiid-nikad-iliba, degi, e-neggwebur-burwigana-iliba, nusa-orgi-sobaled uksamarbalid. Ar Bab-Jehová-Ulu akwa-dummad-birgi sigissoggu, a-ulale, a-akwadi bela we-ibmargusad-ebinsaega siid. Emi, we-garda-narmaklenaidse, we-akwa-dummad Josué-Bet-Semesʼgined-nainugi siid.
1SA 6:19 Bet-Semesʼginmalad, abala Bab-Jehová-Igar-Mesisad-Ulu-dakbigualidba, Ulu-yagi ataksamalad. A-ulale, Bab-Dummad a-dulemar-oburgwisad. E-dulapaa-gakambe (70) dulemar burgwisad. Bab-Jehová-dulemar-oburgwisad-ulale, dulemar nue bosmalad.
1SA 6:20 Geb Bet-Semesʼginmalad sogdemalad: “Bab-Jehová, Bab-Dummad-Isligwaledid. Degisoggu, ¿doa e-asabin gwisguoe? Bab-Jehová-Igar-Mesisad-Ulu anmar-abargi mer sigega, ¿bia anmar barmidoe?”
1SA 6:21 Degisoggu, Quiriat-Jearimʼginmaladse we-gayaburba barmismalad: “Filistea-dulemar Bab-Jehová-Dadganbo-Igar-Mesisad-Ulu gannar barmiarye. Degisoggu, be sudamala.”
1SA 7:1 Quiriat-Jearimʼginmalad Bet-Semes-neggweburse nonimalad. Geb Bab-Jehová-Dadganbo-Igar-Mesisad-Ulu e-neggweburse searmalad, Abinadab-e-neg yar-mullugi-siidse sinonimalad. A-sorbali, Abinadab-machi-Eleazar, Bab-Jehová-Igar-Mesisad-Ulu-edarbedga onugsasmalad.
1SA 7:2 Quiriat-Jearim-neggweburgi Bab-Jehová-Israel-dadganbo-Igar-Mesisad-Ulu birga-dulagwen (20) sigisad. Geb agine, bela Israel-dulemar bela-bela ulubgi-bukib-itogedba Bab-Jehová-amidii guarmalad.
1SA 7:3 Aga, Samuel, Israel-dulemarga sogded: “Ar bemar bela-bela ulubgi gannar Bab-Jehová-sogedba nanabiele, dulemar-yar-baidsikid-e-bab-dummadyob-ibmar-imakleged be obelomalo, degi, bab-bundor-Astarot-e-wilub-sobarmalad be obelomarbalo. Unnila Bab-Jehová-e-nug-odummodii be gumala. Geb agine, Bab-Jehová, Filistea-dulemar-sabsur-negsemaidgi be-ollorsamaloed.”
1SA 7:4 Degisoggu, Israel-dulemar bab-dummad-Baal-e-wilubmar, degi, bab-bundor-Astarot-e-wilubmar obelosmalad, unnila Bab-Jehová-e-nugbi odummosmalad.
1SA 7:5 A-sorba, Samuel sogded: “An bemarga Bab-Jehováʼse golega Mizpa-neggweburgi bela Israel-dulemar be oambikumalo.”
1SA 7:6 Israel-dulemar Mizpa-neggweburgi ambikunonimargua, diagi dii wesmalad, geb Bab-Jehová-asabin eosmalad. A-ibagine, mas-guchasurmalad, na dukin-dukin barsogdemalad: “Anmar, Bab-Jehováʼgi isgusye.” Deunni, Samuel, Mizpa-neggweburgi Israel-dulemar-e-dummadga megided.
1SA 7:7 Filistea-sordamar wisguarmargua, Israel-dulemar-Mizpaʼgi-bukwaye, Filistea-e-dummagan Israel-sordamargi bila-onogega nadmalad. Ar Israel-dulemar deyob wisguarmargua, dobgudmalad,
1SA 7:8 geb Samuelʼga sogdemalad: “Anmarga Bab-Jehováʼse gatik be gole, mer be boggue, Filistea-dulemargi anmar-bendakega gatik be gole.”
1SA 7:9 Geb degine, Samuel sibad-wawaad-mimmi-amisgu, Bab-Jehováʼga gwagwar ogumakar uksad. Geb a-sorbali, Israel-dulemarga Bab-Jehováʼse gochad. Geb Bab-Jehová, Samuel-abin-imaksad.
1SA 7:10 Samuel sibad-wawaad-mimmi ogumakar uknaigua, Filistea-sordamar Israel-sordamargi bila-onogega armalad. A-ibagine, Bab-Jehová, Filistea-sordamargi binnasuli mar-gollomakmai imaksad. Filistea-sordamar binnasuli mar-gollomakmai itosmargua, gwakidmalad. Geb Israel-dulemarse galakusmalad.
1SA 7:11 Geb degine, Israel-sordamar Mizpa-akale, igarba Filistea-sordamar-oburgwenadapi gusmalad. Deyob Bet-Carʼse Filistea-sordamar-balegichagusmalad.
1SA 7:12 A-sorbali, Samuel akwa-dummad amisad. Geb Mizpa-neggwebur Sen-neggweburbo-abingunaidgi sisad. Ar Samuel sogded: “Bab-Jehová wesegus anmar-bendakdanikid.” A-ulale, Samuel Eben-Ezerʼye we-akwa-dummad onugsasad.
1SA 7:13 Filistea-dulemar Israel-dulemarse galakusmarsoggu, bar Israel-yarse ubossurmalad. Bab-Jehová, Samuel-burgwedse, Filistea-dulemargi gwisgudii gusad.
1SA 7:14 Weyobi, Israel-dulemar Ecrón-neggwebur-akale, Gat-neggweburse, e-neggweburmar-Filistea-dulemarse-sulesgusadi, gannar na sunonimalad. Degine, we-neggweburmar-dikarba nainumar-nanaid, gannar susmarbalid. Deginbali, Israel-dulemar Amorreo-dulemarbo bogidik-gudii gusmarbalid.
1SA 7:15 Deyob-neggusad-sorbali, Samuel, Israel-dulemarga amba igar-nabodii gusad.
1SA 7:16 Samuel, Israel-dulemarga-igar-nabogega birga-irba we-neggweburmarba bipirmaknaddaed: Betel-neggweburse, geb Gilgal-neggweburse, geb Mizpa-neggweburse.
1SA 7:17 Geb a-sorbali, gannar e-neggwebur-Ramáʼse nonidaed. Samuel, Ramá-neggweburgine, Israel-dulemarga igar-nabogega maidaed. Deginbali, a-neggweburgine Bab-Jehováʼga ibmar-ogumakar-ukleged-aila sobsabalid. Deyobi, Samuel e-burgwedse Israel-dulemarga igar-nabogedga maigusad.
1SA 8:1 Samuel seredgusgua, Israel-dulemarga-igar-nabogega, na e-machimala-onug-imaksad. We-machimala, Beerseba-neggweburgi igar-nabogedga maigusmalad.
1SA 8:2 E-machi-dummadi, Joelʼye-nugad, a-yarbaliddi, Abíasʼye-nugad.
1SA 8:3 Ar Samuel-e-machimaladi e-bab-daedba gwen nanassurmalad, igar-innikigwadba ibmar-imaksurdamalad. Unnila maniginbi bur bule binsadidamalad. Degisoggu, dule-ega-mani-ukoed bur bendakdedamalad.
1SA 8:4 A-ulale, Israel-girmar-dummagan na igar-itosmalad. Geb Samuelʼbo-sunmakega Ramá-neggweburse nadmalad.
1SA 8:5 Ega sogdapmalad: “Bedi bato seredgusad. Be-machimala be-daedba gwen-nanasurmalad. Degisoggu, igi dule-bamalad-yar-baid-baidgi-bukwamalad na rey-nikamala, deyob bur be anmarga rey-amisundo, anmar-dummadga megegar.”
1SA 8:6 Israel-girmar-dummagan rey-abeye Samuelʼga sogsamargu, Samuel abin isdar itosad. Degidbali, Samuel Bab-Jehováʼse gorsii gusad.
1SA 8:7 Agi, Bab-Jehová ega sogded: “Israel-dulemar isdar-be-daksurmalad, anbi-unnila isdar-an-dakmalad. Ar e-dummadga-gued an-abesurmalad. Degisoggu, bega-ibmar-sogedba ega be imako.
1SA 8:8 An Israel-dulemar Egipto-yargi-onosad-akale, emi-ibase, bab-dummagan-baiganse-goled-ulale, an-obacha gudimalad. Degisoggu, deyob be-imaknanaimarmogad.
1SA 8:9 Degisoggu, bega-ibmar-sogedba ega be imake. Ar degi-inigwele, iduakwaa ega nue be sogo, igi rey-megoed be-imakmaloe.”
1SA 8:10 Geb degine Samuel, igi-Bab-Jehová ega ibmar-sogsa, deyobi, dulemar-ese-rey-egisnanaidga sogsamogad.
1SA 8:11 Samuel ega weyob sogsad: —Rey-bemar-dummadga-megoedi, weyob bemar-imakoed: Rey be-machimala be-annik suoed, e-ur-napagined-bila-onogedgi-arbamalaga, e-moli-bila-onogedgi-arbamalaga, degi, e-ur-napaginedga-igar-egamalaga be-annik suoed.
1SA 8:12 Deginbali, we-rey, be-machimala-baigan sorda-miligwenad (1,000) e-dummadga-guega subaloed, sorda-dulabo-gakambe (50) e-dummadga-guega subaloed. Be-machimala-baigandi, rey-nainumargi napa-imuega, degi, e-ibmar-gwag-weega subaloed. Degi, rey, be-machimala-baigandi, bila-onoedgi-ibmar-ebumalad-sobega, degi, ur-bila-onoged-e-gingimar-sobega be-annik subaloed.
1SA 8:13 ”Deginbali, we-rey, be-bunamala be-annik subaloed, ega-gwallu-wawa-imakedga, ega-mas-duedga, degi, ega-madu-yoedga be-annik suoed.
1SA 8:14 ”Deginbali, we-rey, be-nainugan-bur-nuegan be-annik suoed, be-uva-nainumar-bur-nuegan, be-olivo-nainumar-bur-nuegan e-dule-dummaganga-ukega be-annik suoed.
1SA 8:15 Deginbali, be-ibmar-gwag-weemaloed, be-uvaʼmar-weemaloed, nibirambegi nibir-gwensak (10%) be-ibe suoed e-arbamaladga ukega, degi, e-dummaganga ukega be-ibe suoed.
1SA 8:16 ”Deginbali, be-mai-machergan, be-mai-omegan, be-moli-alugwasualed-sapingwad-bur-nuegan, be-moli-uayasuid-bur-nuegan ega arbamalaga be-ibe subaloed.
1SA 8:17 Degine, rey, be-sibad-wawaadmar-warambegi gwensak (10%) be-annik suoed, geb bemar-sunnad e-maiga gunonimarmogoed.
1SA 8:18 ”A-ibagan nagunonikile, na be rey-amismalad-ulale, be nunmak-itononimaloed. Geb degine, bemar Bab-Jehováʼgi wilearmalale, Bab-Jehová bemar-bendakosulid.”
1SA 8:19 Ar Samuel deyob ega sogsad-inigwele, Israel-dulemardi, Samuel-sogedba gwen-ibmar-imaksasurmalad, aka bur sogdemalad: —¡Baisuli! Anmar rey-abege, anmar-dummadga megegar.
1SA 8:20 Adi, anmar, dule-bamalad-yar-baid-baidgi-bukwamaladyob gumogoed. Anmar bila-ononadele, rey anmar-idugoed. A, anmarga negsemai guoed.
1SA 8:21 Samuel, dulemar-ibmar-abeged-itosgua, Bab-Jehováʼga bela sogsad.
1SA 8:22 Bab-Jehová, Samuel-abin sogded: —Israel-dulemar-sogedba be ibmar-imako. Ega be rey-onugsao. Geb degine, Samuel Israel-dulemarga sogdesunnad: —¡Degiirdi nabirdo! ¡Be-neggwebur-be-neggweburse gannar be namala!
1SA 9:1 Benjamín-dule-gwensak Quisʼye-nugad nue-nuga-nika maigusad. Quisʼde Abiel-machid, Zeror-e-wagwad. E-dad-dummad Afía-machi-Becoratʼye nugad. Bela wemala, Benjamín-e-waganad.
1SA 9:2 Quisʼde machi-nikad, Saúlʼye nugad. Saúl Israel-dule-bamaladba sapingwa-nued dakleged. De-ukinbali, mas-dummarbabalid, dule-bamalad ese gukinba warmaked.
1SA 9:3 Ibagwengine, Quis-ibe molimar-uayasuid yoggusad. Geb e-machi-Saúlʼga sogded: “Molimar-uayasuid be aminae. Bebo-naega, mai-wargwen be sede.”
1SA 9:4 Ar Saúl na e-maibo molimar-uayasuid-aminadmarsunnad. Efraín-yalaganba amiapmalanad. Gwen molimar-amisurmarsoggu, Salisa-yarse aibitemalad, agi amissurmarbalid. Geb, Saalim-yargi, Benjamín-yargi molimar-amiapmarbalinad, gwen amissurgusmalad.
1SA 9:5 Zuf-yarse mosmargua, Saúl na e-mai-ebo-gudiidga sogded: —Anmar gannar negse nae. Abakale, an-bab, moli-uayasuidmarba anmargi bur bukib-binsaalile.
1SA 9:6 E-mai abin-sogded: —Dummad, we-neggweburgi Bab-Dummad-e-dule-wargwen nuga-nikad maid. Bela ibmar-soged nue-napira sogdaed, gakansadasulid. Degisoggu, anmar daknae, abakale a anmarga sokalile, bia anmar molimar-uayasuid aminaoe.
1SA 9:7 Saúl ega sogded: —Nabir be sogendo. Ar anmar ese naele, ¿ibu anmar ega sedosunna? Madu saguyaba bar maisulid. Ibmar-ega-uked anmar satebalid.
1SA 9:8 E-mai abin-sogdebalid: —Wis mani an sediid. We-mani sunna an Bab-Dummad-e-dulega uked, adi, anmarga sogega, bia anmar moli aminaoe.
1SA 9:9 (Ar epennegwa, Israel-yargi dule-wargwen Bab-Dummadse ibmar-wisgunabiele, sogdedaed: “Anmar dule-negburgan-dakedse namala.” Ar epennegwa, Bab-Dummad-gayaburba-barsoged, dule-negburgan-dakedye bileged).
1SA 9:10 Saúl sogdesunnad: —Nabirdo, anmar daknae. Weyob Saúl sogsagua, Bab-Dummad-e-dule-maid-neggweburse nadmalad.
1SA 9:11 Saúl, e-maibo neggwebur-igar-maidba nakmamaigua, yagan-dii-weenadapi abinguarmalad. Amarse egichidmalad: —¿Wegi, dule-negburgan-daked mai?
1SA 9:12 Yagan abin-sogdemalad: —Eye, be-iduar mai. Gwae be daknamala. Emiskwaa neggweburse nonikid. Dule-negburgan-daked, yar-mullugi-aila-matusulid-siidgi Bab-Dummadga-ibdurgan-ukleged dulemarga ogumaksokalid.
1SA 9:13 Ar bemar neggweburgi dogsamalale, dule-negburgan-daked aila-matusulidse mas-gunnaed-iduar be nabir abingumaloed. A-dule, mas-gunned-iduar, dulemarga Bab-Dummadga doggus-nuedye sogergebed. Ar dulemar, dule-negburgan-daked-sate mas-gunnosurmalad. Geb a-sorbali, mas-gunnega-ese-gollesmalad nabir mas-gutemaloed. Degisoggu, be emiskwaa namar, adi, be nabir dakdapmaloed.
1SA 9:14 Geb degine, Saúl e-maibo neggweburse dognadmalad. Neggweburgi dognadapmaladgi, Samuel aila-matusulid-siidse-nadapi abinguarmalad.
1SA 9:15 Saúl-nonikoed-iduar, Bab-Jehová, Samuelʼga ibmar-guoed sogsad:
1SA 9:16 “Oibosale, we-wachigi, dule-Benjamín-yargined an bese barmidagoed. A-dule, Israel-dulemar-e-dummadga be nugsaoed, adi, Filistea-dulemar-sabsur-negsemaidgi Israel-dulemar-ollor-imakegar. Ar Israel-dulemar na wiles-gorbukwad anse warmaksasoggu, an wiledaked.”
1SA 9:17 Samuel, Saúl-dani-daksagua, Bab-Jehová, Samuelʼga sogded: “We-dulegi an bega sunmaksad. We-dule, Israel-dulemar-e-dummadga megoed.”
1SA 9:18 Saúl neggwebur-yawagak-mosgua, Samuel-abingunonikid, geb ese egichided: —Sunna be anga sogsale, ¿bia dule-negburgan-daked mai?
1SA 9:19 Samuel abin-sogded: —Ani an a-duled. Be anba yar-mullugi aila-matusulidse be dage. Emi bemar anba mas-gunmaloed. Oibosale, an be-barmidsokalile, be-anse-ibmar-egisbied an bega sogoed.
1SA 9:20 Ar molimar-uayasuid ibapaagus bei-yoggusadgindina, mer be bukib-binsae, bato amismalad. Samuel ega sogdebalid: —Israel-dulemar bur-ibmar-abedimalad, begadga guoed, degi, be-gwenadganga gumogoed.
1SA 9:21 Saúl abin-sogded: —¿Ibiga deyob be anga soge? ¿Ar ande, Benjamín-wagwasursi? ¿Ar Benjamín-dulemarde, Israel-dulemar-sogambe-gakabogwad-abargi (12) bur-bipigwadsursi? Ar an-gwenadgande, Benjamín-e-wagan-abargi, ¿dule-nug-satemaladsursi?
1SA 9:22 Geb Samuel eba Saúl-sesad, degi, eba Saúl-e-mai-sesbalid. Negyaba-odosgua, dulemar-abargi, dule-dummagan-sigmaladgi osilesmalad. A-negyabali, dulemar durgwen-gakambe-wilub (30) bukwamalad.
1SA 9:23 A-sorbali, Samuel dule-masduedga sogded: —An bega san-sabogega-uksa-gusad be sedage.
1SA 9:24 Dule-masdued sibad-wawaad-e-dua-gogwen senonikid. Geb Saúl-asabin mesisad. Degine, Samuel, Saúlʼga sogded: —Bega-san-sabolesad be-asabin-maid be gunne. Ar dule-bamalad mas-gunmaloed-iduar be gunne. We-ibaga bato bega san sabolesmaid. Weyobi, a-ibagi, Samuel, Saúlʼbo mas-guchad.
1SA 9:25 A-sorbali, yar-mullugi-bukwa neggweburse-aidearmalad. Geb Samuel, Saúlʼbo e-neg-birgi gabedneg-siidgi sunmaksad.
1SA 9:26 Neg-oibosgu, bolegoedba, Samuel neg-birgi gabedneg-siidgi goted. Agine, Samuel, Saúlʼga sogded: —Gwisgue. Bato naed be ogusad. Degine, Saúl gwisgusad, geb Samuelʼbogwa neggi noarmalad.
1SA 9:27 Neggwebur-noedse modapmargua, Samuel, Saúlʼga sogded: —Be-maiga be soge, be-idugwerye. Bedi sikwas abitogwelo. An bega Bab-Dummad-ibmar-sogsad soggwelo. Geb degi, Saúl-e-maidi, Saúl-idu nadsunnad.
1SA 10:1 Geb degine, Samuel, olivo-gwallu bute-bipigi onoalid, geb Saúl-e-nonogi eosad. A-sorbali, Saúl-ibe wagar usad. Geb ega sogded: —¡Bab-Jehová, e-dulemar-e-dummadga-megega be-susad!
1SA 10:2 Emi, be angi aibatele, Benjamín-yar-abingunaidgi Selsa-neggwebur-siidse be mosale, Raquel-neg-uan-dikarba dule-warbo be abinguoed. A-dulemar bega sogdagoed: ‘Be molimar-uayasuid-amidiidi bato amismalad. Ar be-babdi, a-molimarba bar bukib-binsasulid. Emigindi, bemarba bukib-binsadiid. Na weyob soged: An-machi-amiegala, ¿igi an imakergebe?’
1SA 10:3 ”Raquel-neg-uangi be bangudele, Taborʼye-neg-nugadgi sapi-dummad-gwichidse be modapile, agine, dule-walapaa be abingudagoed. A-dulemar, Betel-neggweburse Bab-Dummad-nug-odummogega nadapmaloed. Wargwenad, sibad-mimmi-senigwad-walapaa senadapoed. Baiddi, madu-gwapaa senadapmogoed. Geb baiddi moli-uka-buglugi vino senadapmogoed.
1SA 10:4 A-dulemar bega nuedye-sogsamalad-sorba, madu gwabo bega-ukmaloedi, abin be suo.
1SA 10:5 ”Taborʼye-neg-nugadgi be bangudele, Gabaa-yar-mulluse be modapoed. Agine, Filistea-sordamar-e-neg siid. Geb a-neggweburgi be dogdapile, Bab-Dummad-gayaburba-barsogmalad yar-mullugi-aidedani be dakdagoed, Bab-Dummad-gayaburbagi sunmakdanimaloed. Amar-iduale, dule-gar-ogormalad gar-salterio, gar-pandero, gar-flauta, degi, gar-arpa ogordanimaloed.
1SA 10:6 Agine, Bab-Jehová-Burba gandikidba begi aidenonikoed. Geb Bab-Dummad-gayaburba-barsogmaladba Bab-Dummad-gayaburbagi be sunmakdemogoed. Agi, be-san-burba gwagdoed.
1SA 10:7 We-ibmarmar-an-bega-sognaid bela bega gusale, be ibmar-imakbied sunna bela be imakoed, ar Bab-Dummad beba gudii guoed.
1SA 10:8 ”Degine, Gilgal-neggweburse be an-idu nao. Ibagugle (7) be an-edarbo. Agi an be-dakoed. An a-neggweburse modapile, Bab-Dummadga an ibmar-durgan-ogumakdapoed, degi, igar-nabogega-ibmar-ukleged an ega ukdapbaloed. Geb a-sorba an bega sogoed, ibu be imakoe.”
1SA 10:9 Saúl, Samuelʼgi-bangudgua, Bab-Dummad Saúl-e-binsaed-ogwasad. A-ibagi, bela Samuel-ibmar-sogsad gunonikid.
1SA 10:10 Geb a-sorbali, Saúl, e-maibo, Gabaa-neggweburse mosgua, Bab-Dummad-gayaburba-barsogmalad danagwen abin-danimalad. Agine, Bab-Dummad-Burba Saúlʼgi gandikidba aidenonikid. Geb Saúl, Bab-Dummad-gayaburba-barsogmaladba Bab-Dummad-gayaburbagi sunmakdemogad.
1SA 10:11 Dulemar-Saúl-mag-dakmalad, deyob dakarmargua, na muchub-muchub egichiarmalad: —Quis-machi-Saúl weyob-gunaid, ¿igi itoge? ¿Ar wede Bab-Dummad-gayaburba-barsogmogadsi?
1SA 10:12 Dule-gwensak Gabaa-neggweburgined sogded: —¿Ar we, bia-danimala? A-ulale, weyob-sogleged noarsunnad: “¡Ar Saúlʼbela Bab-Dummad-gayaburba-barsogedmogad!”
1SA 10:13 Saúl Bab-Dummad-gayaburba-barsognaid-bergusgua, yar-mullugi Bab-Dummadse-goled-aila-matusulid-siidse naded.
1SA 10:14 Agine, e-gilor Saúlʼse, degi, Saúl-e-maise egichided: —Ar bemar, ¿bia gudimala? Saúl abin-sogded: —Anmar molimar-uayasuid amidii. Ar anmar amisursoggu, anmar Samuel-daknadsunnad.
1SA 10:15 E-gilor, Saúlʼga sogdebalid: —Bega Samuel-ibmar-sogsad be anga soge.
1SA 10:16 Saúl abin-sogdebalid: —Unnila anmarga sogsad, bato molimar-uayasuid amilesye. Degi-inigwele, Saúl, e-gilorga sogsasulid, igi Samuel negseoedgi ega-sunmaksa.
1SA 10:17 We-ibmar-gusad-sorbali, Samuel, Mizpa-neggweburgi Israel-dulemar-onmaksad, Bab-Dummad-nug-odummomalagar.
1SA 10:18 Agine, Samuel Israel-dulemarga sogded: “Israel-e-Bab-Dummad-Jehová weyob soged: ‘Ani an be-dadgan Egipto-yargi-sabsur-wilebukwa onosad. Degi, ani an be-dadgan dulemar-baiganse sabsur-odurdakledigusmaladgi an onosbalid.’
1SA 10:19 Emi-ibagine, be-Bab-Dummad be obachamalad, bonigangi-be-ollor-imakdiid, degi, nue-wile-itogedgi be-bendakdiid be obachamalad. Emide be sogmalad: ‘¡Be anmarga rey-onugsae, anmar-dummadga megegar!’ Degisoggu, na be-dadgan-be-dadgan be ambikumar, be-gwenad-be-gwenadgan be ambikumar. Bela be an-asabin ambikudamar.”
1SA 10:20 Samuel weyob sogsagua, bela Israel-dulemar-sogambe-gakabogwad (12) ese dagmalaga imaksad. Geb, Benjamín-e-wagan sulenonikid.
1SA 10:21 A-sorbali, Samuel, Benjamín-e-wagan e-gwenadgan-e-gwenadganba ese-dagega imaksad. Amar-abargi, Matri-e-gwenadgan sulenonikid. Geb Matri-e-gwenadgan-abargine, Quis-e-machi Saúl nugsalenonikid. Geb degi, Saúl-aminadmalad. Amissurgusmalad.
1SA 10:22 Degidbali, Bab-Jehováʼse egichiarmalad: —¿Ar we-dulede wese nonimoga? Bab-Jehová abin-sogded: —Eye. Ar mor-ulumar-imbaba dukusiid.
1SA 10:23 Agine, mor-ulumar-bukwadse abarmakdemalad, geb a-imbaba-dukusii Saúl-searmalad. Saúl dulemar-abargi-gwisnonigua, mas-bipisuli dakarmalad. Unnila e-gukinse dule-bamalad ese-warmaked.
1SA 10:24 Geb degine, Samuel bela dulemarga sogded: —¡Bab-Jehová dule-nug-imaksad, be dakmala! ¡Ar we-duleyobid dule-baid sated! Yeer-itogedba bela oimakdemalad: —¡Nuedi rey nugsalesad!
1SA 10:25 Geb agine, Samuel, dulemarga rey-negseoedgi sunmaksad. Geb, we-igarmargi-sunmaksadi garda-dummadgi narmaksad. Agi, Bab-Jehová-asabin mesisad. A-sorbali, Samuel, e-neg-e-negse dulemar-barmisad.
1SA 10:26 Saúl e-negse nadmogad, Gabaa-neggweburse. Degine, dule-bulegan eba nadmarmogad. Ar Bab-Jehová wemar-e-gwage-ebusad, Saúl-bardaknamalagar.
1SA 10:27 Ar abar-dule-isganamardi binnasur-sogdemalad: “¿Ar we, anmar-bendakode? Anmar-bendakosuli.” Ar we-dulemar bela-bela isdar-Saúl-dakmarsoggu, ega gwen ibmar uksasurmalad. Saúlʼdi gwen bai-itossulid.
1SA 11:1 Amón-dule-Nahasʼye-nugad, e-sordaganmala, Galaad-yargi-Jabes-neggwebur-siidse naded. Geb ebiris e-sordaganmala bukunonimalad. Dulemar-a-neggweburginmalad ega sogdemalad: —Anmar igar amie. Anmar be-maiga gumaloed.
1SA 11:2 Amón-dule-Nahasʼye-nugad abin-sogded: —Degirdi, nabirdo, be an-maiga gumalo. Degi-inigwele, an bemar-ibe ibya-nuedsikid onogodo. Deyobi, bela Israel-dulemargi an dodogoed.
1SA 11:3 Jabes-girmar-dummagan abin-sogdemalad: —Be anmarga ibagugle (7) iba nasike, Israel-yargi bela gayaburba-berbegegar. Ar dule-anmar-bendaked satele, anmar be-maiga gusunnoed.
1SA 11:4 Dule-gayaburba-berbemalad Gabaaʼse mosmargua, Saúl-neggweburse, dulemarga gayaburba-sogdapmalad. Geb dulemar deyob itosmargua, bela bodmalad.
1SA 11:5 A-wachigine, Saúl moli-bebe-nikad-alugwasualedgi nainu-imudidanigua, egichided: “¿Igi itomala? ¿Ar ibiga bomala?” Geb degine, Saúlʼga Jabes-dulemar-ibmar-sognonimalad sogsamalad.
1SA 11:6 Saúl gayaburba itosgua, Bab-Dummad-Burba, gandikidba egi aidenonikid.
1SA 11:7 Saúl sae-itodgua, moli-bebe-nikad-alugwasualed warbo amisad, geb goamaksad. Geb san-goamaksad dulemar-gayaburba-berbemaladba bela Israel-yargi mimisad. Weyob Saúl sognai gualid: “Ar dule anba, degi, Samuelʼba bila-ononasurmalale, e-molimar-bebe-nikad weyob gumogoed.” Degidbali, Israel-dulemar bela-bela dobgudmalad. Degisoggu, bela dulemar bila-ononadmarsunnad.
1SA 11:8 Saúl, Bezecʼye-neg-nugadgi sordamar-ebisega urbisad. Agine, Israel-sordamar mili-dulataled-ilapaa (300,000) bukwa daklealid, degi, Judá-sordamardi, mili-dulagwen-gakambe (30,000) bukwa daklearmogad.
1SA 11:9 A-sorbali, dulemar-gayaburba-berbedimaladga sogdemalad: “Jabes-De-Galaad-neggweburginmaladga be sognamar: ‘Banedse yorukudba Amón-sordamargi bemar bendaklemaloye.’ ” Degi, gayaburba-berbemalad nadmalad, Jabes-neggweburginmaladga gayaburba sogdapmalad. Jabes-dulemar, deyob-gayaburba-itosgu, weligwar-itodmalad.
1SA 11:10 Geb Jabesʼginmalad Amón-dulemarga sogdemalad: “Ar igi be anmar-imakoye be sogsa, oibosale, deyob be anmar-imakodo.”
1SA 11:11 Geb Saúl, sordamar-sogapaa danar-danar-urbisad-barmisgua, bolegoedba, Amón-sordamargi ubodapmalad. Yorukudse bila-onolenai gusad. Amón-sordamar, Israel-sordamarse bukidar ogilolesad. Amón-sordamar-burgwissurmaladdi war-wargwen wakitemalad.
1SA 11:12 Geb degine, dulemar Samuelʼga sogdemalad: —¿Doamar Saúl anmar-reyga-megega abesulina? A-dulemar be anmarga urmake, adi, anmar oburgoed.
1SA 11:13 Saúl gollalid: —¡Emi dule bar oburgwilegosuli! Ar Bab-Jehová, emi-ibagi Israel-dulemar-ollor-imaksad.
1SA 11:14 Samuel dulemarga sogded: —¡Dagmala! Saúl reyga-megisadga anmar Gilgal-neggweburse iba-ononamala.
1SA 11:15 Belagwable Gilgalʼse nadmalad. Agine, Bab-Jehová-asabin Saúl-Reyga-nuggusadga iba-onosmalad. Aginbali, gwenatigwar-guega-ibmar-ukleged, Bab-Jehováʼga uksamarbalid. Saúl, degine, bela Israel-dulemar, we-ibagi nue-wergusmalad.
1SA 12:1 Samuel bela Israel-dulemarga sogded: —¡Nue an-itomalo! Bemar anse ibmar-egichismalad an bela bemarga imaksad. Be-dummadga-gumalaga, an bemarga rey onugsasad.
1SA 12:2 Emidi, we-rey be-idumaloed. Andina, sapingwagwad-akale an bemar-idudii gusad. Emigindi, bato an seredgusad, nono-dagudikgusad. An-machimaladi bemaryob bemar-abargi gudimarmogoed.
1SA 12:3 Wegi an bemar-abargi gwichidgi, bemar Bab-Jehová-asabin, degi, e-rey-onugsasad-asabin be an-barsogmar. ¿An doa-ibe moli-bebe-nikad-alugwasualed an atursadii gusa? ¿An doa-ibe moli-uayasuid an atursadii gusa? ¿An doa-yardakdii gusa? ¿An doa ibgwensur-imakdii gusa? ¿An doase manigi binsaed-galedii gusa? An deyob ibmar-imakdii gusale, be an-barsogmardo, adi, an gannar sogedba bennukoed.
1SA 12:4 Geb Israel-dulemar Samuel-abin sogdemalad: —Be anmar-yardakdii gussuli, be anmar-sabsur-imakdii gussuli, be anmar-ibe ibmar-atur-imakdii gussurbalid.
1SA 12:5 Samuel sogdebalid: —Gwen-bipisaale weyob-ibmar-imakdii an-daksasurmarye be sogmaladi, emi-ibagi Bab-Jehová, degi, e-rey-onugsasadi, bemar-barsogega gumaloed. Israel-dulemar abin-sogdemalad: —¡Ar deyob-guodo! Bab-Jehová, degi, e-rey-onugsasad-ebo anmar-barsogega gumalodo.
1SA 12:6 Deginbali, Samuel Israel-dulemarga sogdebalid: —Bab-Jehová, bemar-barsogega gued. A, Moisés, degi, Aarón-susgusad, adi, Egipto-yargi be-dadgan-onogegar.
1SA 12:7 Emigindi, nue be an-itomalo. Bab-Jehová bemar-bendakdiidgi, degi, be-dadgan-bendakdigusadgi an bemarga sunmakgwelo.
1SA 12:8 ”Jacob, e-waganmala Egipto-yargi ambikudapmalad. Geb a-sorbali, be-dadgan, Egipto-dulemarse sabsur-wilearmargua, Bab-Jehováʼse ise-wilegar gochamalad. Degidbali, Bab-Jehová, Moisés, Aarón-ebo barmisgusad, be-dadgan-Egipto-yargi-wilebukwad onogegar. Geb amar, be-dadgan-onosmargua, we-yarse senonimalad.
1SA 12:9 Ar be-dadgan, e-Bab-Dummad-Jehová-iedmarsoggu, Bab-Jehová, we-dulemarga urmaksad: Rey-Hazor-sorda-dummad-Sísaraʼga, Filistea-sordamarga, degine, Moab-dulemar-e-reyga. Geb a-dulemar, be-dadgangi bila-onosgusmalad.
1SA 12:10 A-ulale, be-dadgan Bab-Jehováʼse ise-wilegar weyob gochamalad: ‘Anmar begi nue-nosmalad, anmar begi nue-aibachamalad. Ar anmar Baal-e-nuchumar Bab-Dummadyob imakdii gusad, degi, bab-bundor-Astarot-e-wilub-sobarmalad Bab-Dummadyob imakdii gusbalid. A-ulale, anmar begi isgusmalad. ¡Bab-Jehová, anmar-isdarmaladgi be anmar-ollor-imake, adi, anmar be-nugbi odummodii gumaloed!’
1SA 12:11 Geb degine, Bab-Jehová we-dulemar-barmialid: Jerobaal, Barac, degi, Jefté. Amala bela be-isdarmalad-bukwamaladgi be-ollor-imaksamalad. Deyobi, ani Samuel, be-isdarmaladgi be-ollor-imaksamogad. A-ular, bemar dobsuli-gudii gusmalad.
1SA 12:12 ”Ar degi-inigwele, Amón-dulemar-e-rey-Nahas, e-sordaganmala, bila-onogega begi-duurmakdani be dakarmargua, be anga sogsa gusmalad: ‘¡Anmar rey-abege, anmarga negseegar!’ Ar deunni, Bab-Dummad-Jehová bemar-e-reynad, degite bemar deyob sogsa gusmalad.
1SA 12:13 Degisoggu, bemar rey-susmalad wegi gwichid. Ar Bab-Jehová, ese be egichisadba, bemarga we-rey uksad.
1SA 12:14 Bemar, degi, rey bemar-dummadga-maid, Bab-Dummad-Jehová-dobekwaa nanamalale: E-nug be odummodimalale, eba be ibmar-imakdimalale, e-igar-mamaidba be nanadimalale, egi be gwisgusulile, ¡adi, nueddo!
1SA 12:15 ”Ar be eba ibsasulirdi, e-igar-mamaidgi be gwisguerdi, Bab-Jehová igi be-dadgan sabsur-odurdaksagusa, na deyobi bemar-imakmogoed.
1SA 12:16 ”Emigindi, nue be an-itomala: Bab-Jehová na ibmar-dummad-imaksokalid be-sunnad be dakmala.
1SA 12:17 Emigindi, ibmar-gwag-weed-ibagan-naid, dii-wied-ibagan-naisulid. Degi-inigwele, Bab-Jehováʼse an goloed, mar-ogollomakega, dii-owibaligar. Weyobi bemar wisgumaloed, ar bemar rey ese egichamargu, bemar Bab-Jehová-asabin nue-isgusad.”
1SA 12:18 Geb Samuel Bab-Jehováʼse gochad. A-ibagine, Bab-Jehová mar-ogollomaksad, dii-owisbalid. Bela dulemar Bab-Jehová-abin, degi, Samuel-abin nue-dobe itodmalad.
1SA 12:19 Geb Samuelʼga sogdemalad: —Anmarga be-Bab-Dummad-Jehováʼse be gole, adi, mer anmar-oburgwegar. Ar ade, anmar Bab-Jehováʼse rey-egichadbali, bur bule anmar isgusad.
1SA 12:20 Samuel abin-sogded: —Mer be dobgumala. Ar bemar isgued-dummad-imaksa-inigwele, bela-bela be Bab-Jehová-nug-odummomala, mer egi be bangumala.
1SA 12:21 Mer bab-dummadyob-ibmar-imaklemalad-e-nug odummomalo. Ar amardi, gwen bemar-bendakosulid, gwen bemarga ibmar-nued-imakosurbalid, ar ade, ibmar-binsarmaladid.
1SA 12:22 Bab-Jehová na e-nug-dummad-gued mer isguegala, isdar e-dulemar-dakosulid. Ar Bab-Jehová na yeer-itogedba e-dulemarga bemar-susad.
1SA 12:23 Ar andina, bemarga Bab-Jehováʼse-goled gwen-iegosulid. Ar an deyob imaksulile, Bab-Dummadgi an dummad-nosaled. Amba igar-nuedgi, igar-innikigwadgi an bemar-odurdakdii guoed.
1SA 12:24 ”Ar Bab-Jehová-dobekwaa be nanamarsunna, napiragwadgi bela-belad e-nug-odummodii be imakmala. Bab-Jehová bemarga ibmar-dummagan-imaksad be ebinsadii gumala.
1SA 12:25 Ar bemar isguedginbi nanadimalardi, be-reyse-bakar, bemar bergumaloed.”
1SA 13:1 Saúl sapinseredgine, Israel-yargi reyga megnonikid. Birga-dulabo-gakabo (42) reyga-maigusad.
1SA 13:2 Saúl, Israel-dulemar-abargi milipaa (3,000) sordamar-susad. We-sordamar-sulesadi, Saúlʼba Micmasʼgi, degi, Betel-yargine milibo (2,000) ambikusad. E-machi-Jonatánʼbardi Benjamín-neggwebur Gabaaʼye-nugadgi miligwen (1,000) ambikusmogad. Saúl Israel-dulemar-bamaladdi e-neg-e-negse barmisad.
1SA 13:3 Jonatán, Filistea-sordamar-Guebaʼgi-bukwad obelosad. We-ibmar-gusad Filistea-dulemar-bamalad wisgusmalad. Geb degine, Saúl bela Israel-yargi gar-trompeta-ogolega imaksad, ar sogded: “¡Bela Hebreo-dulemar we-ibmar-gusad wisguergebed!”
1SA 13:4 Bela Israel-dulemar we-gayaburba wisgusmalad: “Saúl, Filistea-sordamar-Guibeaʼgi-bukwad-obelosye. A-ulale, Filistea-dulemar isdar Israel-dulemar-dake gunonimarsunnad.” Degisoggu, Israel-dulemar bila-onogega Gilgalʼgi Saúlʼba atosmalad.
1SA 13:5 Filistea-sordamar, Israel-sordamargi-bila-onogega na atosmarmogad. Filistea-dulemar ur-napagined-bila-onoged mili-dulagwen-gakambe (30,000) nikamalad, dulemar-moli-birgi-sii-urwemalad milinergwa (6,000) nikamarbalid, geb e-sordamar-nagab-urwemaladdi demar-gakaba-ukub-naidyob bela-bela mergued. Bet-Avén-dad-nakwedsik, Micmasʼgi Filistea-sordamar bukunonimalad.
1SA 13:6 Israel-sordamar, Filistea-sordamar-doggus-merguedba, na boni-dummad-amis dakarmalad. Degisoggu, bela Israel-sordamar bergue-itoarmaladba, ibe-dummagan-yaba, bulagan-imbaba, akwa-dummagan-imbaba, napa-gwisarmalad-yaba, degi, dia-dinnagana-yagi, dukusmalad.
1SA 13:7 Hebreo-dulemar gwenna-gwenna Gad-yarse, degi, Galaad-yarse wakinmalaga Jordán-diwar obaksamalad. Saúlʼdi, Gilgalʼgi besad. Geb bela sordamar-eba-besmalad na dobedba wawanmakbukwad.
1SA 13:8 Ar Saúl, Samuel ega iba-mesisadbali, ibagugle (7) abitosad. Ar Gilgalʼgi Samuelʼdi yogguded. Geb Saúl e-sordamar-wakinmamai dakargua,
1SA 13:9 igar-ukded: “Ibdurgan-ogumakar-ukleged, degi, gwenatigwar-guega-ibmar-ukleged be anga sedamala.” Geb Saúlʼsunnad ibdurgan-ogumakar Bab-Jehováʼga uksad.
1SA 13:10 Saúl ibdurgan-ogumakar-ukleged-uknaid bergusayala, Samuel nonikid. Saúl, Samuel-abin naded, geb doggus-nued-sogeye ega sogded.
1SA 13:11 Ar Samuelʼdi, sabsur ega ibmar-sogded: —¿Ibiga be yogasaar ibmar-imaksa? Bab-Jehováʼgi be dummad-nosad. Saúl abin-sogded: —Ar an-sordamar wakinmamai an dakalid, be iba-mesisadba gwen be nonisuli an be-dakarbalid, degine, Micmasʼgi, Filistea-sordamar bato guagwar-bukwa an dakarbalid. A-ulale, weyob an binsaded:
1SA 13:12 ‘Filistea-dulemar Gilgalʼse bato angi bila-onodasokarmalad, degi-inigwele, andi amba yoo Bab-Jehováʼse bendakleged egised. A-ulale, ibdurgan-ogumakar-ukleged an uke daklearsunnad.’
1SA 13:13 Samuel, Saúlʼga sogded: —¡Be binsaed-satedsi weyob be ibmar-imaksagu! Ar be-Bab-Dummad-Jehová bega igar-uksadba be ibmar-imaksana, be-wagan Israel-yargi degisadegu reymarga-megmai gumaloenad.
1SA 13:14 Emigindi, an bega sogsundo, ar bedi Bab-Jehová-igar-maidba ibmar-imaksasursoggu, reyga-be-maid gadeguosulid. Bab-Jehováʼdi dule-eba-daoed bato amisad.
1SA 13:15 Samuel weyob ibmar-sogsagua, Gilgalʼgi-gudiidgi naded. Dule-bamaladdi, Gilgal-akale Saúlʼba, Benjamín-neggwebur-Gabaaʼye-nugadse, e-sordamar-bukwadse nadmarmogad. Agi, Saúl, sordamar-eba-gudimalad ebichisad, amardi dulataled-ilanergwa (600) mergued.
1SA 13:16 Saúl na e-machi-Jonatán, degi, e-sordaganmala, Benjamín-neggwebur-Gabaaʼye-nugadgi ambikusmalad. Deunni, Filistea-sordamardi, amba Micmasʼgi bukwamalad.
1SA 13:17 Filistea-sordamar bukwamaladgi, sogapaa danar-danar e-sordamar ainiarmalad: Soggwendi, Ofra-igarba Sual-yarsik nadmalad.
1SA 13:18 Baiddi, Bet-Horónʼsik nadmalad. Sogapaagwaddi, yar-abingunaidsik nadmarmogad. A-yar-abingunaidgi, Zeboim-neba nega-dulesulidgansik magar-dakleged.
1SA 13:19 Ar Filistea-dulemar mer Hebreo-dulemar es-suid-sobega, degi, mer eswar-sobbaliga imaksamalad. Degisoggu, bela Israel-yargine dule-esgoro-sobed wargwensaar sated.
1SA 13:20 Degisoggu, bela Israel-dulemar, akan, napa-imued, napa-akwied, degi, es-dopegwad nugar-onikuega Filistea-dulemarse naddamalad.
1SA 13:21 Ar akan, degi, es-dopegwad, nugar-onikuega mani-gargerba bennukdamalad. Napa-imueddi, napa-akwieddi, nugar-onikuega bur mani-gargerba bennukdamalad.
1SA 13:22 Degisoggu, unnila Saúl, Jonatán-ebo es-suid, degi, eswar nikamalad. Israel-sordamardi wargwensaale, es-suid, degi, eswar satemalad.
1SA 13:23 Filistea-sordamar-danar-soggwenad Micmas-igarse bukunonimalad.
1SA 14:1 Ibagwengine, Saúl-machi-Jonatán, ega-sigu-abgaed-seedga sogded: “Dage, yar-baidsik Filistea-sordamar-bukwamaladse anmar obaknae.” Jonatán deyob ibmar-sogsadi e-bab-owisossulid.
1SA 14:2 Saúlʼdi Gabaa-neggwebur-magaba, Migrónʼgi granado-sapi-urba siid. E-sordamar dulataled-ilanergwa (600) eba-gudiid.
1SA 14:3 Deunni, Ahías, mor-sakwasulid-yoi gudiid. Ahías, Ahitob-machid. Ahitobʼde Icabod-e-iad, Finees-e-masmalad, Elí-e-waganad. Elíʼdi, Siloʼgi dule-irwa-Bab-Dummadse-goledga megisgusad. Deginbali, dule-wargwensaale Jonatán-naded wissulid.
1SA 14:4 Jonatán, Filistea-sordamar-bukwadse warmakegala, ibe-dummagan-imbagi naergebed. We-ibemar Bosesʼye bileged, baiddi, Seneʼye bileged.
1SA 14:5 Ibe-dummad-gwensak dad-nakwed-argan-sapiledsik Micmasʼsik gwichid. Ibe-dummad-baiddi, dad-nakwed-argan-nuedsik Gabaaʼsik gwichid.
1SA 14:6 Geb degine, Jonatán ega-sigu-abgaed-seedga sogded: —Dulemar-Bab-Jehová-wissurmalad-bukwadse anmar obaknamala. Bitigi Bab-Jehová anmar-bendakena gadin. Ar Bab-Jehová dulemar-bukidar-merguedgi, igi, dulemar-iche-merguedgi, baisursunna emar-bendaked.
1SA 14:7 Ega-sigu-abgaed-seed abin-sogded: —¡Anmar nado! Ar bela be ibmar-imakbied imakdo, an be-bendakoed.
1SA 14:8 Jonatán sogded: —Nabirdo. Anmar we-dulemar-bukwadse nao, adi, anmar-dakmalagar.
1SA 14:9 Anmar-daksamaladgi anmarga weyob sokarmalale: ‘¡Abitomala! Anmar bemarse aidenaoed.’ Agi anmar abitogoed, anmar emar-bukwadse nakosulid.
1SA 14:10 Ar anmarga sokarmalardina, be nakwedamarye, agi anmar ese naodo. Adi, anmarga oyolenaid, Bab-Jehová we-dulemargi-nakwega anmar-imakoye.
1SA 14:11 Degisoggu, ebogwad Filistea-sordamarse na magarosmalad. Filistea-dulemar e-sordamarga sogdemalad: —Hebreo-dulemar be dake. Ibemar-yaba-duku-bukwad ainiarmalad.
1SA 14:12 Geb degine, Filistea-sordamar Jonatánʼga, degi, ega-sigu-abgaed-seedga sogdemalad: —¡Wesik be dagmala! Anmar bemarga wis ibmar-soggwelo. Jonatán, ega-sigu-abgaed-seedga sogded: —Anba be dage. Bab-Jehová we-dulemargi-nakwega anmar-imaksad.
1SA 14:13 Jonatán aka-aka nakwemai gusad. Geb ega-sigu-abgaed-seed e-sorba deyob nakwemai gusmogad. Jonatán Filistea-sordamar-onailikusale, geb ega-sigu-abgaed-seed sorba oburgwedaed.
1SA 14:14 Ar gebe ululesadgine, Jonatán, ega-sigu-abgaed-seedbo, neg-bipi-ollornaidgi, Filistea-sordamar-dulagwen-wilub oburgwismalad (20).
1SA 14:15 Agine, Filisteaʼmar-danar-bukwamaladgi-bukwad, neg-ollor-dummad-naidgi-bukwamarmogad, degi, danar-danar nadegusmaladse-bakale, gwayidmalad. A-wachigine, negabandur nagusbalid. Degisoggu, dobed-dummad nagusad.
1SA 14:16 Saúlʼga-nakulemalad, Benjamín-neggwebur-Gabaaʼye-nugad-akale daksamalad, ar igi Filistea-sordamar gwayidedba akar-akar duurmakmai.
1SA 14:17 Geb Saúl deyob-wisgusadbali, na e-sordamarga sogded: “Bela sordamar be ebismar, adi, anmar dakega, doa anmar-abargi sate.” Deyob imaksamargua, Jonatán e-bendakedbogwa sate daklearmalad.
1SA 14:18 Geb degine, Saúl, Ahíasʼga sogded: —Mor-efodʼye-nugad be sedage. Deunni, a-mor Israel-sordamar eba sediid.
1SA 14:19 Saúl amba sunmakgwichidgine, Filistea-sordamar danar-bukwamaladgi bur bule neg-gagaleded. Degisoggu, Saúl deyob neg-daksagua, dule-irwa-Bab-Dummadse-goledga sogded: “¡Mer bar be sedage!”
1SA 14:20 Geb degine, Saúl e-sordamar-onmaksad, geb bela agi bila-ononadmalad. Ar Filistea-sordamar bela-bela oes-gunanaidbali, na e-sorda-e-sorda oburgwidmalad.
1SA 14:21 Deginbali, Hebreo-dulemar Filistea-sordamarba dikasurgus akas-gudimaladi, Filistea-sordamarba gudimarmogad. Amala, Saúl-sordamarba, Jonatán-sordamarba akadmalad.
1SA 14:22 Israel-dulemar Efraín-yalaganba-dukusmaladi, wisguarmargua, Filistea-sordamar-wakinmamaiye, baleginnega bila-onolenaidse nonimarmogad.
1SA 14:23 Bila-onolenaid Bet-Avén-neggweburse warmaksad. A-ibagine, weyobi Bab-Jehová Israel-dulemar-bendaksad.
1SA 14:24 Israel-sordamar ukudba negoebiguarmalad, ar ade, Saúl e-sordamarga weyob igar mesisad: “Neg-mutikgued-iduar, amba yoo an-isdarmalad buged-mai-imakleged-iduar, dule mas-itosale, oburgwilegoed.” Degisoggu, a-ibagine, sorda-wargwensaale gwen mas-itossulid.
1SA 14:25 Saúl-sordamar sapur-mosgua, achanis-napagi-nikadse modapmalad.
1SA 14:26 Geb sapuryaba-dogdemargua, achanis diiyob-aryomai dakarmalad. Degi-inigwele, dule-wargwensaale ebussulid, ar ade, ise-sogar-sogsamalad, “dule mas-itosale, oburgwilegoye.” A-dobedbali, ebussurmalad.
1SA 14:27 Degi-inigwele, Jonatánʼdi, e-bab sordamarga-igar-mesisad-itossurgusad. Degisoggu, suar-dukugi achanis-ebusad, geb masad. Degidbali, ganguded.
1SA 14:28 Geb sorda-wargwen Jonatánʼga sogded: —Be-bab weyob igar-mesisad: ‘¡Emi dule-wargwen mas-guchale, oburgwilegoye!’ A-ulale, sordamar mas-gunsulidba, negoebimalad.
1SA 14:29 Jonatán abin-sogded: —¡An-bab sordamar dummad-wios! Be an-dakmalana, an we-achanis-guchagua, igi an gangude.
1SA 14:30 Be sogena, sordamar, e-isdarmalad-ibe-mas-sulesad guchamalana, bur bule Filistea-sordamar ese girgumaloenad.
1SA 14:31 A-ibagine, Micmas-akale, Ajalón-neggweburse bila-onolesad. Agi, Israel-sordamar, Filistea-sordamar-ogalakusad.
1SA 14:32 Ar Israel-sordamardi bela-bela geggusmarsoggu, ibdurgan na gae-gae-imaksamalad: Sibad-wawaadmar, moli-bebe-nikad-omegan, moli-bebe-nikad-sapingan. Geb napagi-mai we-ibdurgan-e-dukar egwachamalad. Degine, ukudbali ibdurgan-guchamalad, amba abe-nika guchamalad.
1SA 14:33 Geb degine, Saúlʼga sogsamalad: —Sordamar Bab-Jehováʼgi dummad-nonanaye, san abe-nika gunnanaye. Saúl abin sogded: —¡Bemar Bab-Dummad-Igar-Maidgi yolemaladid! Emisgwa, ansik be akwa-dummad obaparmakmala.
1SA 14:34 Saúl ega sogdebalid: —Be namalo, sordamarga be weyob sognamalo: ‘Mer bar san-abe-nika gunmala, Bab-Jehováʼgi mer bar yolemalagar. Degisoggu, war-wargwen na e-moli-bebe-nikaddibe, e-sibad-wawaaddibe, wese sedamalo, wegi e-ibe be dukar egwanmaloed, nuedgi wegi be gunmaloed.’ A-mutikidbali, na war-wargwen e-moli-bebe-nikad searmalad, agine oburgwismalad.
1SA 14:35 A-sorbali, Saúl Bab-Jehováʼga ibmar-ogumakar-uklegegala aila sobsad. Saúl, we-aila, agi gebe sobsagusad.
1SA 14:36 Geb Saúl e-sordamarga sogdebalid: —Anmar emi-mutik Filistea-sordamar baleginnamalo. Oiboged-iduar, anmar e-ibe bela ibmar-sunamalo. Deginbali, anmar e-sorda-wargwensaale dula-obegosulid. E-sordamar abin-imakdemalad: —Degirdi nabirdo, be-sogedba anmar imakodo. Geb dule-irwa-Bab-Dummadse-goleddi sogded: —Anmar Bab-Dummadse idakgwelergebed.
1SA 14:37 Geb agine, Saúl Bab-Dummadse idakdesunnad: “¿An Filistea-sordamar baleginnaoe? ¿Anmarse galakuega be imakoe?” A-ibagine, Bab-Jehová gwen abin-imaksasulid.
1SA 14:38 Degisoggu, Saúl sordagan-e-dummaganga sogdesunnad: —Bemar bela wese be dagmar. Be anga baramimalo, ibi-isgued-ulale Bab-Jehová anga ibmar-sogsasuli.
1SA 14:39 Israel-e-Bab-Dummad-Jehová-asabin inniki an bemarga soged, ar an-machi-Jonatánʼgi ataklenonikile, oburgwilegodo. Dule-wargwensaale, ega akar ibmar-sogsasulid.
1SA 14:40 Geb degine, Saúl bela Israel-dulemarga sogdesunnad: —Bemar wesik gwisgumalo. Andi, an-machi-Jonatánʼbo wegi gwisguoed. Sordamar abin-sogdemalad: —Ar be-dakedba be imako.
1SA 14:41 A-sorbali, Saúl, Israel-e-Bab-Dummad-Jehováʼse egichided, ega ibmar-napiragwad sogegar. Geb wilubdaklenonigua, Jonatánʼgi, degi, Saúlʼgi ataklenonikid. Degisoggu, sordagan-bamaladdi, ollor-gusmalad.
1SA 14:42 Geb degine, Saúl sogded: —An-machi-Jonatánʼbo be an-wilubdakmar. Geb wilubdaksamargu, Jonatánʼgi ataklenonikid.
1SA 14:43 Degisoggu, Saúl, Jonatánʼga sogded: —Ibmar-imaksad be anga soge. Jonatán abin-sogded: —Unni achanisbi an masad. ¿A-ulale, be an-oburgwemalode?
1SA 14:44 Saúl sogded: —Jonatán, be oburgwilesulile, Bab-Dummad sabsur-an-odurdaksunno.
1SA 14:45 Sordamar, Saúl-abin sogdemalad: —¿Ar Jonatán, Israel-dulemar e-isdarmaladgi-nakwega imaksasursi? ¿Degite, sunna oburgwilegosi? Bab-Dummad-nuggi inniki anmar bega soged, dule bipisaale Jonatán-ebugosulid. Bab-Dummad-e-bendaksadba, anmar-isdarmaladgi-nakwega anmar-imaksad. Deyobi, dulemar Jonatán-bendaksamalad.
1SA 14:46 Degidbali, Saúlʼdi, Filistea-sordamar bar balegichasulid, geb Filistea-sordamardi e-yarse gannar nadmalad.
1SA 14:47 Saúl, Israel-yargi na nue reyga-megisadgi, bela e-isdarmalad-e-dikarba-bukwadgi bila-onosad: Moab-dulemargi, Amón-dulemargi, Edom-dulemargi, Soba-e-reymargi, degi, Filistea-dulemargi. Na gangued-nikadba we-dulemargi nakwisdaed.
1SA 14:48 Amalec-dulemargi nakwisbalid, deginbali, ibmar-atursamaladgi Israel-dulemar-bendaksabalid.
1SA 14:49 Saúl machimala walapaa nikusad: Jonatán, Isúi, degi, Malquisúa. Deginbali, bunamala warbo nikusbalid: Dummad, Merabʼye nugad, bipigwaddi, Micalʼye nugad.
1SA 14:50 Saúl-e-omedi, Ahinoamʼye nugad, Ahimaas-e-sisgwa. E-sordamar-bila-onomalad-e-dummaddi, Abnerʼye nugad, Ner-e-machi. Nerʼdi, Saúl-e-gilolod.
1SA 14:51 Saúl-e-bab-Quis, Abner-e-bab-Ner na galagwenmaladid. Amala, Abiel-e-machimalad.
1SA 14:52 Saúl-reyga-mai-gusadgine, Filistea-dulemargi-bila-onoged gwen bogilessulid. A-ulale, Saúl, dule-wargwen dutusur-itoged, degi, dobe-itosulid-dakalile, na e-sorda-bila-onogedga imakdaed.
1SA 15:1 Ibagwengine, Samuel Saúlʼga sogded: “Bab-Jehová Israel-dulemar-reyga be-onugsaega an-barmiargusad. Emisgindi, Bab-Jehová, we-gayaburba bega-sogega an-barmialid. Degisoggu, nue be an-itogo.
1SA 15:2 Bab-Jehová-Bela-Gangued-Nikadi, weyob soged: ‘Israel-dulemar Egipto-yargi noarmargua, Amalec-dulemar e-yargi-naega imaksasulidba, an Amalec-dulemar sabsur-odurdakoye.
1SA 15:3 Degisoggu, Bab-Jehová soged: Emisbinne be Amalec-dulemar-ogilona. Belagwable e-ibmar-nikad e-ibe be obelogo. Bela e-machergan, e-omegan, e-burwigana, e-goe-gwarugana be ogilogo, degi, e-moli-bebe-nikadmar, e-sibad-wawaadmar, e-moli-yargan-muregedmar, degi, e-moli-uayasuidmar be oburgo. Melle be wiledako.’ ”
1SA 15:4 Saúl, Telaimʼgi e-sordamar onmaksad, geb agi ebichisad: Mili-dulataled-ilabo (200,000) sordamar-nagab-urwemalad mergued, degine, miliambe (10,000) sordamar Judá-yarginmalad mergubalid.
1SA 15:5 A-sorbali, Saúl e-sordaganmala Amalec-neggweburse nadmalad. Geb neg-weregedgi, Amalec-dulemar-idu dukuar-bukudapmalad.
1SA 15:6 Degine, Saúl, Ceneo-dulemar-owisosad: “Bemar, Amalec-neggweburgi ainimalo. Ar bemar, Israel-dulemar Egipto-yargi-noargu, nue-wiledaksad. A-ulale, amarba-mesa an bemar-ogilobisulid.”
1SA 15:7 Saúl, Havilaʼye-neg-nugad-akale, Shurʼsega, Amalec-dulemar-bukwad ogilosad. A-negmar, Egipto-yar-abingunaidgi naid.
1SA 15:8 Saúl, bela es-suidgi Amalec-dulemar oburgwisad. Unnila, e-rey-Agagʼbi oburgwissulid, gasa-sesad.
1SA 15:9 Saúl, Rey-Agag-gasadginbali, na e-sordaganmala sibad-wawaadmar-bur-nuegan, degi, moli-bebe-nikad-omegan-bur-nuegan, moli-bebe-nikad-sapingan-bur-wardummagan sabosmalad. Deginbali, ibmar-baigan-nuegan sabosmarbalid. Bela we-ibmarmar yapa obelogusmalad. Unnila gwen ibmar-abelesurmaladbi obelosmalad.
1SA 15:10 Bab-Jehová, Samuelʼga sogded:
1SA 15:11 “An Saúl reyga-mesissulina bur nabirinad, ar ade, angi aibachad. An ega ibmar-sogsadba gwen ibsassulid.” Samuel, Saúlʼba bela-bela bukib-binsadedba Bab-Jehováʼse-gorsii oibosad.
1SA 15:12 Geb neg-mileargua, Samuel, Saúl-daknaded. Geb degine, dulemar Samuelʼga sogded: “Saúl, Carmelʼse e-wagar-akwagi-sobaled-ogwichega naded. Geb agi-gudii Gilgalʼse nabaloed.”
1SA 15:13 Geb Samuel, Saúl-aminaded. Abingunonigu, Saúl ega sogded: —¡Bab-Jehová begi nued-binsasun! An Bab-Jehová-ibmar-sogsadba an ibmar-imaksad.
1SA 15:14 Samuel, Saúlʼga sogded: —Degite, ¿ibu sibad-wawaadyob gole an itosunna? ¿Ibu moli-bebe-nikad-omeyob gole an itobarsunna?
1SA 15:15 Saúl abin-sogded: —Sordamar Amalec-yargi we-ibdurgan searmalad. Be-Bab-Dummad-Jehováʼga-ukega sibad-wawaadmar-bur-nuegan, moli-bebe-nikad-omegan-bur-nuegan dula obesmalad. Ar bela ibmar-bamaladdi anmar obelosad.
1SA 15:16 Samuel urwedgi Saúlʼga sogded: —¡Mer bar sunmake! Bab-Jehová-mutikidba-anga-ibmar-sogsad an bega soggwelo. Saúl abin-sogded: —Degite, soge.
1SA 15:17 Geb degine, Samuel ega sogded: —Wede-nabirsursi, amba be gwen ibmarga-gued-itossulid-inigwele, degite, Israel-dulemar-sogambe-gakabogwad-e-dummadga (12) be megnonikid. ¿Ar Bab-Jehová Israel-e-reyga-megega be-nug-imaksasursi?
1SA 15:18 Bab-Jehová be-barmisgusad, degi, bega sogsagusad: ‘We-Amalec-dule-isganamar be ogilonaye. Bela be obelogoye bega sogsad.’
1SA 15:19 Ar degite, ¿ibiga Bab-Jehová-ibmar-sogsadba be gwen ibmar-imaksasuli? ¿Ar ibiga be ibmar susmala? ¿Ar ibiga be Bab-Jehová-ibmar-isdardaked be imaksabali?
1SA 15:20 Saúl abin-sogded: —¡Andi Bab-Jehová ibmar-sogsadba ibmar-imaksad! ¡Bab-Jehová ibmar-imakega-an-barmisad an imaksad! An Amalec-dulemar-Rey-Agag gasa an senonikid. E-dulemardi an obelosad.
1SA 15:21 Ar sordamardi Amalec-dulemar-e-sibad-wawaad-nuegan, degi, e-moli-bebe-nikad-omegan-nuegan senonimalad, adi, Bab-Jehováʼga Gilgalʼgi ogumakar ukegar.
1SA 15:22 Samuel abin-sogded: “¿Ar Bab-Jehová ibu bur bule abesunna? ¿Ega ibmar-durgan-oburgwileged bur abege? ¿Ega ibmar-durgan-ogumakar-ukleged bur abege? Ar Bab-Dummad, e-sogedba ibmar-imaked bur abeged. E-sogedba-ibmar-imaked ibmar-oburgwilegedba bur nuedid. Degi, e-ibmar-soged-nue-itogedi, sibad-wawaad-machered-e-gwallu-ogumakedba bur-nuedid.
1SA 15:23 Bab-Dummadba-ibsalesulidi, amba burba-isganaba-yoedse-ibmar-guoed-soglegedyob isguedmogad, San-bule-bule-imakedi, amba bab-dummaganyob-e-nug-odummolegedyob isguedmogad. Ar bedi, Bab-Jehová-bega-ibmar-sogsadba gwen be ibmar-imaksasulid. A-ulale, Bab-Jehová, reyga-mai bar be-abesulid.”
1SA 15:24 Saúl magar na itosadba sogded: —Samuel, napira be soged. Bab-Jehováʼgi nue an nosad. Anga igar-uksadba an ibmar-imaksasulid. Be anga ibmar-sogsadba an ibmar-imaksasurbalid. Ar an-sordamar angi aibinbiguarmaladba an ibmar-imaksad.
1SA 15:25 Degisoggu, an bese wilesagwa egised, wis be nossulidyob be an-dake. Gannar Bab-Jehová-nug-odummogega be an-bardakdage.
1SA 15:26 Samuel abin-sogded: —An beba gannar naosuli. Bab-Jehová bega igar-uksadba be ibmar-imaksasulid. A-ulale, Israel-reyga-mai bar be-abesulid.
1SA 15:27 Geb Samuel naega aibiridgua, Saúl, Samuel-e-morduku gasad, geb agi e-ibe achirmakded.
1SA 15:28 Agine, Samuel ega sogded: —Emi, Bab-Jehová, Israel-e-reyga-maid be-obelosad. Be-anar dule-bur-nueddaed onug-imaksad.
1SA 15:29 Napira an bega soged, Israel-e-gangued-Bab-Jehová, bipisaar gakansasulid, ibmar-sogsad imakedsegad. Ar ade, Bab-Jehová duleyobsulid, ibmar-sogsad geg-ogwaed.
1SA 15:30 Saúl abin-sogded: —¡Bab-Jehováʼgi nue an nosad! An bese wilesunnad. Be girmar-dummagan-asabin, Israel-sordamar-asabin, amba dummadyob be an-dake. Gannar be-Bab-Dummad-Jehová-nug-odummogega be an-bardakdage.
1SA 15:31 Samuel nabir-itosad, degi, Saúlʼba naded. Geb agi, Saúl, Bab-Jehová-e-nug odummosad.
1SA 15:32 A-sorbali, Samuel sogded: —Amalec-dulemar-rey-Agag anga be sedage. Agag, Samuel-asabin dobsuli gwisgunonikid, ar ade, binsaed: “Bato burgwed-igar nasad.”
1SA 15:33 Ar Samuel, Agagʼga sogded: —Ar be omegan-ibe bukidar machimala-ogilossoggu, deyobi, be-nan machi-sate gumogoed. Geb Samuel, Gilgalʼgi Bab-Jehová-asabin, Agag-goa-goa imaksad.
1SA 15:34 A-sorbali, Samuel, Ramá-neggweburse naded. Geb Saúlʼdi, e-neggwebur-Gabaaʼye-nugadse, e-negse nadmogad.
1SA 15:35 Samuel bipisaale bar Saúl-daksasulid, unnila eba wile-itodii gusad. Deginbali, Bab-Jehováʼdi, Israel-reyga Saúl-mesissulina bur nabirinye binsasad.
1SA 16:1 Bab-Jehová, Samuelʼga sogded: —¿Ar sanagwadse be Saúlʼba wile-itoged be iegoe? Ar andi bato Saúl-Israel-reyga-maid obelosad. Ar olivo-gwallu be-moli-bebegargi be enoge. Belén-neggweburse be nae, Isaí-negse. An a-e-machi-wargwen reyga-megega an susad.
1SA 16:2 Samuel abin-sogded: —¿An naega, igi an saoe? Saúl an-wisgualile, an-oburgo-itole. Geb Bab-Jehová ega sogded: —Moli-bebe-nikad-ome-bipigwad beba be sedo. Be sogdapo: An Bab-Jehováʼga ibdurgan-ogumakar-ukleged ukega an daniye.
1SA 16:3 Isaíʼse be golo ibmar-ogumakar-uklegoedse dagegar. Geb agine, an bega sogoed ibu be imakoe. An bega dule-oyogoed. A-dule, be anga reyga nug-imakoed.
1SA 16:4 Samuel Bab-Jehová-ega-ibmar-sogsadba ibmar-imaksad. Samuel, Belén-neggweburse-nonigua, girmar-dummagan Samuel-abin dobed-abargi noarmalad. Geb ega sogdemalad: —¿Nuedgi be daniki?
1SA 16:5 Samuel abin-sogded: —Eye, nuedgi an daniki. Bab-Jehováʼga ibdurgan-ogumakar-ukleged an ukdanikid. Bemar ise-bagagwar san imakmalo. Geb be ibdurgan-ogumakar-uklegedse be anba dagmalo. Geb degine, Samuel, Isaí, e-machimalabo san-bagagwar-imakega imaksad. Geb a-sorbali, ibdurgan-ogumakar-ukleged-ukedse anba dakmaloye ega sogsad.
1SA 16:6 Geb Isaí-e-masmala nonimargua, Samuel, Eliabʼgi atakdegu binsaded: “Napiragwa, we, Bab-Jehová na nug-imaksadid.”
1SA 16:7 Bab-Jehováʼdi, Samuelʼga sogded: —Ar we-dule an nug-imaksasulid. Mer e-daklegedgi be atake, mer e-mas-dunguedgi be atake. Ar andi we-ibmar daksulid. Duledi, ibmar-daklegedgi ataked, andi, gwage-ulub daked.
1SA 16:8 Geb degine, Isaí Abinadabʼse gochad Samuelʼga oyogega. Samuel, Isaíʼga sogded: —Bab-Jehová, we nug-imaksasulid.
1SA 16:9 A-sorbali, Isaí, Sama-oyosad. Samuel gannar sogdebalid: —Bab-Jehová amba we-sussurbalid.
1SA 16:10 Isaí, e-machimala walagugle-mergu (7) Samuelʼga oyosad. Samuelʼdi Isaíʼga sogdebalid: —Bab-Jehová wemar-wargwensaar sussulid.
1SA 16:11 Geb Isaíʼse egichided: —¿Machimala-baigan, be suli? Isaí abin-sogded: —Bipigwadbi napi. Adi, sibad-wawaadmar edarbediid. Samuel ega sogded: —Ese gornaega be dule-barmide. Ar a-dule-wese-nonikidse geb anmar mas-gutoed.
1SA 16:12 Isaí, e-machise-gornaega dule-barmisad, geb ega senonimalad. We-machi uka-sichisaar-itoged, sapingwa-nued-daklebalid. Geb degine, Bab-Jehová, Samuelʼga sogded: —Be gwisgue. Ar we-dule an susad. E-nonogi olivo-gwallu be eoge.
1SA 16:13 Samuel olivo-gwallu moli-bebe-gargi-sedanikid susad. Geb David-e-gwenadgan-asabin, David-nonogi olivo-gwallu eosad. Geb degine, Davidʼgi Bab-Jehová-Burba gandikidba aidenonikid. A-iba-akale, Bab-Jehová eba gudigusad. A-sorbali, Samuel, Ramá-neggweburse gannar naded.
1SA 16:14 Bab-Jehová-Burba, Saúlʼgi-aibachad. A-ulale, Bab-Jehová, burba-isgana egi barmialid, adi, sabsur imakegar.
1SA 16:15 Saúl-e-maimar, Saúlʼga sogdemalad: —Bab-Jehová burba-isgana-begi-barmialidi, sabsur-be-imaked.
1SA 16:16 Dummad, be-maimar be barmide, dule-gar-arpa-ogoled-aminaegar. Adi, Bab-Jehová burba-isgana-begi-barmialile, dule-gar-ogoled gar-ogotogua, be baisur-ito naoed.
1SA 16:17 Saúl abin-sogded: —Nabirdo. Dule-gar-ogoled-nued be aminamala, geb anga be sedamalo.
1SA 16:18 E-mai-wargwen sogded: —Dule-Belénʼgined Isaíʼye-nugad-e-machi-gwensak nabir-gar-ogoled mag an daked. We-machigwa dule-gandikidid, bila-onogedgi dule-buledid, binsaed-nikaa-sunmaked-duled, e-dakleged nued-daklebalid. Degine, Bab-Jehová eba gudiid.
1SA 16:19 Geb degine, Saúl, Isaíʼse gayaburba-berbemalad barmisad, ega sogegar: “Be-machi-David sibad-wawaad-edarbed, be anga barmidage.”
1SA 16:20 Geb agine, Isaí, moli-uayasuid amisad. A-moligi, masgullemalad nasiksad, vino buglugwen nasiksabalid, degi, sibad-bipigwad ega wargwen barmisbalid. Geb Isaí, Saúlʼga e-machi-Davidʼba a-ibmarmar barmisad.
1SA 16:21 David, Saúl-sogedba-ibmar-imakega Saúlʼse nonikid. Agi, Saúl, Davidʼbina gadi-ito gunonikid, geb ega-sigu-abgaed-seedga imaknonikid.
1SA 16:22 A-sorbali, Saúl, Isaíʼga we-gayaburba barmisad: “An bei be-machi-David obebido, anga arbadii guegar. Ar ade, wegi-gudiid an yeerdaked.”
1SA 16:23 Bab-Jehová, Saúlʼgi burba-isgana barminonikile, David gar-arpa ogotedaed. Gar-arpa-goledba, Saúl, gadi-gadi-ito-naddaed, degi, burba-isgana egi banguddaed.
1SA 17:1 Filistea-dulemar bila-onogega Soco-neggwebur-Judá-yargi-siidgi e-sordamar-bila-onomalad-oambikusad. Soco-neggwebur, Azeca-neggweburbo-abingunaid-abargi Efes-Damimʼye-neg-nugad-naidgi Filistea-sordamar ambikunonimalad.
1SA 17:2 Saúlʼdi Filistea-sordamargi-bila-onogega, Israel-sordaganmala na onmaksamarmogad. Geb Ela-nebagi ambikusmalad. Agi Saúl, e-sordamar-ilemakar bila-onogega urbisad.
1SA 17:3 Filistea-sordamar yarbirgi bukwamalad, Israel-sordamardi asabin yar-baidsik bukwamarmogad. A-abargi, neg-gullu maid.
1SA 17:4 Filistea-sordamar-bukwad-abargine, dule-buled Gat-neggweburgined, Goliatʼye-nugad noalid. We-dule, daligwen-negabar-gubin dungued.
1SA 17:5 Goliat-nonogi gurgin-esgoro-gordikidbiid siid, degi, mor-esgoro-gordikidbiid yoibalid. We-mor-esgoro-gordikidbiid nibir-dulanergwa (120) aidikued.
1SA 17:6 E-malimargi esgoro-gordikid-madareged naid, e-yarganbali eswar-senigwad esgoro-gordikidgi-sobaled naibalid.
1SA 17:7 Eswar warbipisulid. Eswar-e-duku-esgorobiiddi nibirambe-gakatar (15) aidikued. Goliat-e-sigu-abgaed-seed Goliat-idunaid.
1SA 17:8 Goliat Israel-sordamar-asabin gwisgunonikid, geb binnasur Israel-sordamarga sogded: “¿Ar ibiga be-sordamar ilemakar be urbenanai? ¿Ar doa be an-dakmarsunna? ¿Ar ande Filistea-dulesursi? Ar bemardi, unnila Saúl-e-maiga-gumalad. Ar bemar bela-urwed abelesulid. Unnila dule-wargwen anbo-urwega be amimala. Ar a-dulebi bemarga unnioed.
1SA 17:9 Ar anbo-urweye-sogele, degi, an-ese-burgwenonikile, an-sordamar bemar-maiga gumaloed. Ar an a-dule-oburgwisardi, bemar anmar-maiga-gumaloed.”
1SA 17:10 Filistea-dule-Goliat sogdebalid: “¡Israel-sordamar, anbo be urwemarsundo! ¡Anbo-urwegala dule-wargwen be amimardo!”
1SA 17:11 Saúl, degi, bela Israel-sordamar, weyob Goliat-soge-itosgua, dobgudedba nig-argwatemalad.
1SA 17:12 A-ibagangine, Efrata-dule-Isaíʼye-nugad Judá-yargi, Belén-neggweburgi maid. E-machi-wargwen Davidʼye nugad. Deunni, Saúl-negsemaidgine, bato Isaí nue-seredgusad, degi, machimala walabaabak (8) nikad.
1SA 17:13 E-machimala-bur-dummagan-walapaagwad Saúlʼba bila-onogega, nadegusmalad. Sailagined, Eliabʼye nugad. A-yarbalid, Abinadabʼye nugad. Baiddi, Samaʼye nugad.
1SA 17:14 Ar we-walapaagwad bur-dummagan-gumarsoggu, agala, bila-onogega, Saúlʼba nadgusmalad.
1SA 17:15 Davidʼdi, Saúl-gudiidse naddaed. Degi-inigwele, David, e-babga sibad-wawaad-edarbega gannar Belénʼse nonidaed.
1SA 17:16 Filistea-dule-Goliat Israel-sordamar-ourwega, wakdaradba, sedogidba noardaed. Deyobi, bane-bane iba-dulabo (40) imakdii gusad.
1SA 17:17 Ibagwengine, Isaí, e-machi-Davidʼga sogded: “Be-iamarga ibmar-gwag-dibyaled sagugi be sede, we-madu-gwaambegwad (10) be sedbali. Gwae be sorda-danar-bukwadse be-iamarga be berbenae.
1SA 17:18 Sordamar-miligwenad-e-dummadga (1,000) we-moli-nunis-gwamakaled be sedbali. Be-iamar igi gudidibe be dako. Ar nueganbi gudimalale, anga be e-ibmar-soggwen sedago.
1SA 17:19 Be-iamar, Saúlʼmala, degi, bela Israel-sordaganmala, Ela-neg-gullugi, Filistea-sordamargi bila-ononanai be dakdapoed.”
1SA 17:20 David, Isaí-ega-sogsadba ibmar-imaksad. Wakudaryalaba gwisgualid, dule-sibad-edarbedga sibad-wawaadmar obesad. A-sorba, ibmarmar-susgua naded. David sordamar-danar-bukwadse modapid, deunni, sordamar bila-onogega oimakbukwad, degi, bila-onogega guagwar-ambikunanaid.
1SA 17:21 Israel-sordamar, Filistea-sordamargi bila-onogega na abin-abin bukusmalad.
1SA 17:22 Davidʼdi, e-ibmar-semaid, dule-ibmar-edarbedga obesad. Geb agi, sordamar-bukwadse abarmakded. A-mosgua, e-iamarga sogdapid, nueganbi-sogeye.
1SA 17:23 David, e-iamarbo-sunmaknaigua, Gat-neggweburgined, Goliat, Filistea-sordamar-abargi, gannar Israel-sordamar-ourwega noalid. Geb agi, David, Goliat-ibmar-soggwichid itosad.
1SA 17:24 Israel-sordamar Goliat-dakdemargua, abin-gwayidmalad, degidba duurmakdemalad.
1SA 17:25 Gwenna-gwenna sogdemalad: “¿Dule-Israel-sordamar-ourwenonidaed be dake? Dule-gwensak we-dule-oburgwisale, rey ega ibmar-nuegan ukoed, ega e-sisgwa ukbaloed. Deginbali, e-gwenadgan Israel-yargi-mani-galeged bar ukosurbalid.”
1SA 17:26 David e-walik-bukwamaladse egichided: —Dule, we-Filistea-dule-oburgwisale, Israel-dulemargi-dodolenaid-bergunonikoedba, ¿ibu ega uklegoye sogmala? We-Filistea-Bab-Jehová-wissulid, ¿doa na itoge? Emide, Bab-Dummad-Dula-Maid-e-sordamarga weyob ibmar-sognaigu.
1SA 17:27 Dulemar Davidʼga idu-ibmar-sogsamalad gannar sogdemalad: —Dule, we-dule-oburgwisale, ega ibmar-uklegoye-soglesad uklegoed.
1SA 17:28 David-e-ia-dummad-Eliab, David-dulemarbo-sunmake-itosgua, Davidʼse uluded. Geb ega gandikidba ibmar-sogded: —¿Ibu wese be sadaniki? ¿Doaga be sibad-wawaad wis-iche-nikad nega-dulesulidganba obesa? An be-wisi, be dule-yaisurdaedid, be dule-isganabalid. ¡Napira an bega soged, unnila bila-onolenaid-dakega be nonikid!
1SA 17:29 David abin-imakded: —¿Ibu an oakalosa? ¿Geg an wis sunmaksunde?
1SA 17:30 David e-iagi-bangudgu, dule-bamaladse egichidbalid, dule, Goliat-oburgwisar ibu ega uklegoye. Amardi amba deyopira ega sogsamarmogad.
1SA 17:31 Abar-dulemar David-ibmar-sogdiid itosmalad, geb Saúlʼga sogsamalad. Agi, Saúl, Davidʼbina gochad.
1SA 17:32 Geb, David Saúlʼga sogded: —¡Ar we-Filistea-dule mer be dobgumala! An-sunnad an ebo urwenaoed.
1SA 17:33 Saúl, Davidʼga sogded: —¿Sunna be we-Filistea-dulebo urwosi? Ar amba be bipigwad. Edi na sapingwagwad-akale bila-onodiguad. Degisoggu, ¿sunna be egi obinosi?
1SA 17:34 David abin-imakded: —Ani an-bab-sibad-wawaad an-edarbedid. Ar achumigur-nono-wawaaddibe, wiobdibe, sibad-wawaad-wargwen-sesale, andi balegitedaed,
1SA 17:35 geb an sarsodaed sibad-wawaad-indakedse. Ar angi aibinnardibe, bur bule an sarsoddaed oburgwedse an imakdaed.
1SA 17:36 Ar be-maide, achumigur-nono-wawaad oburgwed, wiob oburgwed. Deyob, an we-Filistea-dule-Bab-Jehová-wissulid an imakbaloed, ar ade, Bab-Dummad-Dula-Maid-e-sordamar-ourwenaid.
1SA 17:37 David sogdebalid: —Bab-Jehová achumigur-nono-wawaadgi, degi, wiobgi an-ollor-imaksad, deyob, we-Filistea-dule-e-ganguedgi an-ollor-imakbaloed. Saúl ega sogded: —Be nado. Bitigi Bab-Jehová beba-namosun.
1SA 17:38 Agine, Saúl e-bila-onoged-mor Davidʼga yosad, degi, gurgin-esgoro-gordikidbiid ega yosbalid, deginbali, binasgar-arsoged-esgoro-gordikidbiid ega binasgargi nasiksabalid.
1SA 17:39 David urwed-mor-birgi es-suid e-dikargi nasiksad. Geb nanadgua, geg nue-nane itoged. Ar ade, urwed-mor-yoi-nanaed durdakarsulid. David, Saúlʼga sogded: —An we-ibmar-yoi geg an nanaed, weyob an durdakarsulid. Degisoggu, David, bela we-ibmar-yoid esusad.
1SA 17:40 Agine, na e-gaapoled-suid susad, degi, dii-akwa-swirigwad gwaatar diwarse aminaded. Geb amisgua, e-dikargi-sagu-naidgi oubosad. A-sorbali, David, akwamied-dub e-argangi-semai Filistea-dulese naded.
1SA 17:41 Goliat, dule-ega-sigu-abgaed-seed-sorba-nai, Davidʼsik armogad.
1SA 17:42 Geb Goliat David-dakdegua dakalid, machi-bipi uka-sichisaar-itoge, degi, sapingwa-nued daklebali.
1SA 17:43 Mesagwar-dakedba Davidʼga sogded: —¿Ar ande achusi, suargi be an-sarsodanigu? Geb Goliat na e-bab-dummagan-nuggi David-ukabsaded.
1SA 17:44 Weyob sogded: —¡Be anse dage. Ar mulamar-masga, achu-sapurmar-masga an be-imakoed!
1SA 17:45 David abin sogded: —Bedi es-suidyalaba, eswaryalaba, degi, siguyalaba be angi danikid. Ar andi, Bab-Jehová-Bela-Gangued-Nikad-nuggi an danikid. Bab-Dummad-e-sordamargi-be-ulusad-nuggi an danikid.
1SA 17:46 Emi Bab-Jehová anga be-urmakoed, an be-oburgoed, an be-nono-egwannoed. Emi, mulamar-masga, achu-sapurmar-masga an Filistea-sordamar-imakoed. Deyobi, bela dulemar wisgumaloed, Israel-dulemar-e-Bab-Dummad doa gue.
1SA 17:47 Bela wegi-bukwamalad wisgumaloed, Bab-Jehová dule-bendakega es-suid, degi, sigu abesurye. Bab-Jehová bila-onolegedgi sordamar-onakwega imaked. Degisoggu, Bab-Jehová, bemargi anmar-onakwega imakoed.
1SA 17:48 Goliat, Davidʼbo-urwega ese mellealid, geb David, Goliat-abin abarmakarmogad.
1SA 17:49 David e-sagu-yaba akwa-gwagwen onosad. Geb Filistea-dulegi akwa-mileged-dubgi akwa meted, geb e-bebegi maksad. E-bebe-abalallagi akwa dogsa-sigisad. Agine, Goliat asgunar aimukuded.
1SA 17:50 Weyobi, David es-suidsuli, akwa-gwagwengi, degi, akwamied-dubgi Goliat-oburgwisad.
1SA 17:51 A-sorbali, David, Goliat-aimukus-maidse abarmakded, geb Goliat-ibe es-suid susad. Agi David, a-es-suid-e-ukayaba-mai-onosgua, Goliat-e-nono egwachad. Degidbali, Filistea-sordamar na e-dule-bila-onoged-buled burgwis dakarmargua, duurmakdemalad.
1SA 17:52 Geb degine, Israel-sordamar, Judá-sordamar, bila-onogega gormakdemalad, agi, Filistea-sordamargi duurmakdemalad. Geb, Gat-neggwebur-dogedse, degi, Ecrón-neggwebur-yawagakse balegichamalad. Saaraim-igarbali Gat-neggweburse, degi, Ecrón-neggweburse, Filistea-sordamar-e-muimar omilede gusad.
1SA 17:53 Israel-sordamar, Filistea-sordamar-baleginnaid bergusmargua, e-ibe ibmar-weega gannar Filisteaʼmar-bukwagusmaladse nonimalad.
1SA 17:54 A-sorbali, David, Goliat-e-nono susad, geb Jerusalén-neggweburse sealid. David, Goliat-e-bila-onogedgi-ibmar-ebulemaladdi, e-gabedneggi urbisad.
1SA 17:55 Ar David, Filistea-dulebo-urwenaigu, Saúl, e-sordamar-e-dummad-Abner-nugadse egichad. —We-machigwa, ¿we doa e-baba? Abner abin-sogded: —Dummad, napira an bega soged, an wissuli, ar doa e-baba.
1SA 17:56 Rey ega sogded: —Anga be egisnae, ar doa e-baba.
1SA 17:57 David, Goliat-oburgwisad-sorba nonigua, Abner, Saúlʼse David-sesad. Deun, amba David, e-argangi Goliat-e-nono sediid.
1SA 17:58 Saúl, Davidʼse egichided: —Machi, ¿doa be-baba? David abin-sogded: —An be-mai-Isaí-Belénʼgined-e-machid.
1SA 18:1 David, Saúlʼbo-sunmaksad-bergusgua, Saúl, David-susad ega-arbaega. A-iba-akale, Saúl, David-e-bab-negse-naega bar imaksasulid.
1SA 18:2 Jonatánʼdi, Davidʼbo ai-nuedga gunonimalad. Degisoggu, Jonatán, bela-bela David-sabgusad.
1SA 18:3 Ar Jonatán bela-bela David-sabsoggu, Davidʼbo igar-mesisad.
1SA 18:4 A-ulale, Jonatán, e-mor-dummad-suid-yoid unnusad, geb Davidʼga uksad. Deginbali, we-ibmarmar ega uksabalid: E-mor-baigan, e-es-suid, e-warsi, degi, e-molidub.
1SA 18:5 Ibu Saúl, Davidʼga sokardibe, David, bela Saúl-sogedba ibmar-imakdaed. A-ulale, Saúl, David-e-sorda-bila-onomalad-e-iduedga onugsasad. Weyob Saúl, David-onugsasadi, bela Saúl-sordamar, degi, sorda-e-dummaganse-bakale, nued-itosmalad.
1SA 18:6 David-Goliat-oburgwisad-sorba sordamar-aibiris-danimargua, bela Israel-yargi neggweburmar-bukwadgi omegan Rey-Saúl-abindakega ainiarmalad.
1SA 18:7 Weligwaledba gar-pandero-abargi gwirnanaid, gar-lira-abargi weyob namaknanaid: “¡Saúl, miligwen (1,000) e-isdarmalad-oburgwisad, Davidʼdi, miliambe (10,000) e-isdarmalad-oburgwisad!”
1SA 18:8 Weyob namaknanaid-ulale, Saúl isdar-itode gandikidba ibmar-sogded: “¡Davidʼnik sogmala, miliambe dulemar-oburgwisye (10,000), andi unnila miligwen oburgwisye (1,000). Unnila reyga mesedpi-napmalad!”
1SA 18:9 A-iba-akale, Saúl, Davidʼgi nobguded.
1SA 18:10 A-bangine, David gar-arpa-ogorsigua, Bab-Dummad burba-isganaga Saúl-urmaksad. Degidbali, Saúl e-neggi yogasaar gole-gole gualid, degine, eswar-annik gudii gualid.
1SA 18:11 Degidgine, Saúl, Davidʼgi ukiagwar eswar-meted, ar binsasad, “¡Galuba-mesa an David-makoye!” Deyobi Davidʼgi eswar-misad. Davidʼdi ilabogus nabir idu aibacha-imaksadaed.
1SA 18:12 Saúl wisid Bab-Jehová bar eba gudisuli, emidi, Davidʼba gudii. A-ulale, Saúl, David-dobee-itoged.
1SA 18:13 Agala, mer bar David-e-walik-gudiguega, bila-onolegedgi emar-idugega, sordamar-miliba-mergued-e-dummadga (1,000) nug-imaksad.
1SA 18:14 David bela ibmar-imakalile, ega nueganbi gusdaed, ar ade, Bab-Jehová eba gudiid.
1SA 18:15 Saúl, Davidʼga bela ibmar-nueganbi-gue dakargua, dobe-itoded.
1SA 18:16 Bela Israel-yargindi, degi, Judá-yargindi, David-sabmalad. Ar David, bela bila-onolegedgi sordamar-idudidaed.
1SA 18:17 Ibagwengine, Saúl, Davidʼga sokalid: —An-sisgwa-dummad Merabʼye-nugad an bega ukoed. Unnila an bega sogo, dule-buled na be imako, Bab-Jehová-nuggi bila-onodii be guo. Ar Saúl binsaed: “An-sunnad mer an David-oburgo. Bur Filistea-sordamar oburgoed.”
1SA 18:18 David, Saúl-abin sogded: —¿Ande doasunna rey-e-sapinga-guega? ¿An-gwenadgande doamarsunna rey-e-gwenadganga gumalagar?
1SA 18:19 Degi-inigwele, Saúl, Davidʼga e-sisgwa-Merab-uked-ibagan-mosgua, Saúl, dule-Meholatʼgined-Adrielʼye-nugadga e-sisgwa uksad.
1SA 18:20 Saúl-e-sisgwa-baid-Micalʼye-nugad David-abealid. Geb Saúlʼga sogsamargua, Saúl yeer-itoalid,
1SA 18:21 geb binsasad: “An Davidʼga yamo Mical-ukoed, adi, degidba, an David, Filistea-dulemarse-burgwega imakoed.” Degisoggu, Saúl, Davidʼga gannar sogdebalid: —Emi an-sapinga be guoed.
1SA 18:22 Geb degine, Saúl e-maimarga sogded: —Davidʼbo arbakee be sunmakmala, ega be sogmalo: ‘Rey be-sabed, bela e-maimar be-sabmarmogad. E-sapinga be gue.’
1SA 18:23 Davidʼga weyob ibmar-sogsamalad, Davidʼdi abin-imaksad: —Ar rey-sapinga-gued, ¿ibmar ibgwensur-guedye be bimala? Unnila andi dule-wilegedid, dule-nug-nikasulidid.
1SA 18:24 Saúl-e-maimar nadmalad, geb igi David e-abin-imaksa Saúlʼga sogsamalad.
1SA 18:25 Saúl gannar ega sogdebalid: —Davidʼga be sogmalo: ‘Rey na e-sisgwa-ukoedgi ega ome-nikuedgi-gusgu-ibmar-ukleged-anale, Filistea-dulemar-e-abgan-uka-duku dulatar (100) abeged. Ar unnila, e-isdarmalad-buged-mai imakbied.’ Ar Saúl abeged Filistea-dulemar David-oburgwed.
1SA 18:26 Saúl-e-maimar, Davidʼga ibmar-sogsamargua, David rey-sapinga-guoed na yeer-itosad. Amba yoo ome-nikued-iba-mogua,
1SA 18:27 David na e-sordaganmala Filistea-dulemar-oburgwega naded, geb dulataled-ilabo (200) oburgwisad. Degine, David reyga Filistea-dulemar-e-abgan-uka-duku senonikid, adi, e-sapinga guegar. Weyobi, Saúl Davidʼga na e-sisgwa-Mical uksad.
1SA 18:28 Saúl, Bab-Jehová-Davidʼba-gudiid magar daksad, degi, e-sisgwa-Mical-nue-Davidʼbina-soged magar daksabalid.
1SA 18:29 A-ulale, Saúl bur bule David-dobguded, geb e-isdaradga degisadegu gunonikid.
1SA 18:30 Deginbali, Filistea-sordamar-e-dummagan Israel-sordamargi bila-onoged-irbali, David, Saúl-sordamar-e-dummagan-bamaladba bur Filistea-sordamar-e-dummagangi nakwisdaed. Degidbali, David dule-nuga-nikadga gunonikid.
1SA 19:1 Saúl, e-machi-Jonatánʼga, degi, bela e-maimarga David-oburgwega igar uksad. Ar Jonatánʼdi David bela-bela sabsoggu,
1SA 19:2 David-owisosad: “An-bab-Saúl be-oburgwebiye. Degisoggu, bane nue-salakoye, sapuryaba be dukuoye, agi be sigoye Jonatán Davidʼga sogsad.
1SA 19:3 Ar bia sapuryaba be siidse an-babbo an naoeye, an begi ega sunmakoye ega sogsad. Ar igi na sogdagoe, an be-owisogoye ega sogsabalid.”
1SA 19:4 Jonatán e-babga Davidʼgi nueganbi sunmaksad: Jonatán e-babga weyob sogded: —¡Dummad, mer be-mai-David be oakaloge! Edi gwen bipisaale akar be-imaksasulid. Ar bur bule e-ibmar-imaksad bega nueganbi gusad.
1SA 19:5 David Filistea-dule-oburgwega na e-san gwen wiledaksasulid. A-ibagine, Bab-Jehová bela Israel-sordamar-nakwega imaksa gusad. Dummad, be-sunnad be daksad, be yeer-itosad. ¿Ar ibiga dule gwen ibmar-oakalossulid-ibe be ablis eogoe? ¿Ar ibiga be binsa David oburgoe?
1SA 19:6 Saúl, Jonatán ega-ibmar-sogsadba ibmar-imaksad, geb weyob goted: —¡Bab-Jehová nue-mai dakledo! Ise-sogar an soged, David burgosuli.
1SA 19:7 Geb degine, Jonatán, Davidʼse gochad, geb bela e-babbo-sunmaksad-ega-sogsagua, Jonatán e-bab-Saúlʼse David-sesad, adi, idualeyob ega ibmar-imakdii gubaligar.
1SA 19:8 Gannar bila-onolearbalid. David, Filisteaʼmargi bila-ononade gusbalid, degi, David, Filisteaʼmargi nakwis gusbalid. Degidbali, Filistea-sordamar galakunonigu, dobgudedba wakite gusmalad.
1SA 19:9 Ibagwengine, Saúl e-neggi sigua, David-gar-arpa-ogorsiid itosigua, ukiagwale, Bab-Jehová, Saúlʼgi burba-isgana odenonikid. Ar Saúl eswar gani sisoggua,
1SA 19:10 Davidʼgi eswar mechalid, adi, galuba-mesa biokegar. Davidʼdi nabir e-idu aibacha imaksamogad. Degisoggu, eswar galugi gwichigudapsunnad. A-mutikidbali David wakite gusad.
1SA 19:11 Geb degine, Saúl, David-negse bukidar dulemar-barmisad, adi, mutiki egi nakulemalaga, geb bangine oburgwemalagar. Ar Micalʼdi e-sui-David-owisosad: “Emi-mutiki be dukusulile, banedse be burgoye” ega sogsad.
1SA 19:12 Geb Mical, yawagak-senigwadba David-odesad. Degidbali, David nabir wakichagusad.
1SA 19:13 A-sorbali, Mical akwa-duleyob-sobaledi David-e-gabedgi mesisad. Geb nono-birgi sibad-absar urbisad, degi, atuedgi edusbalid.
1SA 19:14 Saúl, David-gaega dulemar-barmisgua, Micalʼdi amar-abin sogded: “David uellemai.”
1SA 19:15 Geb gannar dulemar Saúlʼse nonigusmalad. Geb Rey-Saúl David-gaega gannar dulemar-barmisbalid, Saúl amarga sogded: “¡David amba uellemaile, anga be sedagedse imakmalo, oburgwegar!”
1SA 19:16 Dulemar negyaba dogdapmargua, akwa-duleyob-sobaledbi gabedgi mai dakdapmalad, degine, e-nonogi sibad-e-absarbi-bukwa dakdapmarbalid.
1SA 19:17 Geb degine, Saúl, Micalʼga binnasur ibmar-sogded: —¿Ibiga weyob be an-yardakye soge? ¿Ibiga an-isdarad wakinnega be imaksa? Mical e-bab-abin sogded: —Ar David anga soged, be an-owakinsurdibele, anse be oburgwilegoye, degisoggu, an owakichasundo.
1SA 19:18 David deyob na san-bendakega wakitegua, Ramá-neggweburse Samuel-dakega nadegusad. Samuelʼse modapgua, igi Saúl e-imaksa bela Samuelʼga sogdapid. Geb a-sorbali, David Samuelʼbo Naiot-neggweburse megnadmalad.
1SA 19:19 Degi, Saúl wisguargua David Ramáʼgi Naiot-neggweburgi gudiiye,
1SA 19:20 David-gaega e-sordagan-barmisad. Ar sordamar neggweburse modapmargua, Samuel, Bab-Dummad-gayaburba-barsogmaladmala Bab-Dummad-gayaburbagi sunmaknanai dakdapmalad. Geb degine, Saúl-e-sordamargi Bab-Dummad-Burba-Nued gandikidba aidenonikid, geb Bab-Dummad-gayaburbagi sunmakdemarmogad.
1SA 19:21 Saúl deyob gayamar-wisguargua, sordamar-bamalad barmisbalid. Ar a-sordamarde Bab-Dummad-gayaburbagi sunmakde gusmarmogad. A-sorbali, Saúl bamalad-barmisbalid, amba deyobi gusmarmogad.
1SA 19:22 Geb Saúlʼsunnad Ramáʼse nadsunnad. Secúʼgi dia-dummad-siidse modapgua, Saúl emarse egichidapid: —¿Bia Samuel, Davidʼbo gudii? Geb dule-wargwen Saúlʼga sogded: —Samuel, Davidʼbo Ramáʼgi Naiot-neggweburgi gudimarye.
1SA 19:23 Degisoggu, Saúl a-neggweburse nadsunnad, ar Bab-Dummad-Burba-Isligwaleddi egi gandikidba aidenonimogad. Geb Saúl igarba Bab-Dummad-Gayaburbagi-sunmaknadapi Naiot-neggweburse modapid.
1SA 19:24 Saúl Samuelʼse modapgua, na mor esusa imaksad, uka-swiri napagi-meremai Samuel-asabin Bab-Dummad-gayaburba-barsognai osedosad, degi-oiboarbalid. A-ulale, weyob-soglenonikid: “¿Saúlʼde Bab-Dummad-gayaburba-barsogmogadsi?”
1SA 20:1 David Ramá-yargi-Naiot-neggweburgi wakitegusad, geb Jonatán-maidse nade gusad. David weyob Jonatánʼse egichialid: —¿Ar ibu an imaksa? ¿Ar ibu ibmar-isgana an imaksa? Emide, be-bab an-oburgwebied.
1SA 20:2 Jonatán, Davidʼga sogded: —¡Be bipisaar burgosuli! Ar an-bab bipisaale gwen angi ibmar-soggwenad odukudisulid, bela ibmar anga sogdaed. ¿Ibiga angi ibmar odukudagosunna? Geg angi odukued.
1SA 20:3 David ise-sogar sogdebalid: —Ar be-bab nue-wisid, bede nue-an-sabe. Degisoggu, be-bab na binsasargebed: ‘Jonatánʼga an we-ibmar mer-sogoye, adi, mer isdar-itogegarye.’ Ar Bab-Jehová-Dula-Maid-nuggi, degi, be-nuggi, an ise-sogar-soged, ar andi burgwednaga gudiid.
1SA 20:4 Jonatán, David-abin weyob sogded: —Degite, ibu bega sabi be an-abesunna, be anga sogdo, an bega saodo.
1SA 20:5 David ega sogded: —Be wisi, banedse nii-binid-yoleged-ibad. Degisoggu, reyba an mas gunned nikanad. Ar ibabo sapurba-dukuega be an-imake.
1SA 20:6 Ar be-bab an-amialile, ega be sogoed, David Belénʼse e-barmidega angi alamaknaigusye. Bela e-gwenadgande agi bukwamaladdeeye, degine, bela agine na birga-irba ibmar-ogumakar-ukleged ukdamarye anga sogye, ega be sogoed.
1SA 20:7 Ar bega sokardibe, nueganbiye, adi, an dobguosulid. Ar ulualirdi, be wisdo, an-oburgwedgi binsae.
1SA 20:8 Ar Bab-Jehová-asabin be anbo-igar-mesissoggu, an bega sogsundo, mer be an-yardako. Ar begi nosa be an-dakele, be-babga mer be an-urmako. ¡Be-sunnad bur be an-oburgo! A bur nabirid.
1SA 20:9 Jonatán, Davidʼga sogded: —¡Mer deyob be binsae! Ar an-bab be-oakalobiye an wisgualile, ¿an sunna bega sogsasulir be insae? An bega sogsale.
1SA 20:10 David, Jonatánʼga sogded: —Be-babde be-abin sokalile, ede an-oburgoye, degite, ¿doa an-owisogoe?
1SA 20:11 David bela ega ibmar-sogsagu, Jonatán sapurba Davidʼbo nadsunnad. Agine,
1SA 20:12 Jonatán, Davidʼga sogded: —Israel-e-Bab-Dummad-Jehová-nuggi ise-sogar an bega soged, wegi-wachi achuledse an-bab-e-binsaed an wisguoed. Ar begi nueganbi sunmakele, an be-owisogoed.
1SA 20:13 Ar an-bab be-oakalobiye sogele, an be-owisogoed, adi, be wakinnegar. An be-owisosulile, Bab-Jehová sabsur-an-odurdakodo. ¡Ar Bab-Jehová igi an-babba gudigusa, deyobi beba gudigumogoed!
1SA 20:14 An bese wis ibmar egised, ar amba an dula-gudiidgi Bab-Jehová begi nued-binsadele, be angi nued-binsamogo, mer an-oburgwemalaga be imako.
1SA 20:15 Bab-Jehová we-napneggi bela bega be-isdarmalad-obelosale, melle an-gwenadgandi be obelogo, be anga wile dako.
1SA 20:16 ¡Bab-Jehová bela be-isdarmalad-sabsur-odurdakega imaksun! Weyobi, Jonatán, Davidʼbo na igar mesisad.
1SA 20:17 Ar ade, Jonatán na eyobi David-sabed. Jonatán nue-David-sabsoggu, a-ulale, Jonatán Davidʼbo weyobi ise-sogar igar-mesisbalid.
1SA 20:18 Davidʼga sogded: —Banedse nii-binid-yolegoed-ibad. Ar be-gan ollosii dakarmalale, be-obardamaloed.
1SA 20:19 Iduar na be bia dukusgusa, asega be achur naoed, Ezel-akwa-dikarba be sigoed.
1SA 20:20 Akwasik sigu-minaiyob yamo an saoed. Geb asiki, sigu warbaa an mioed.
1SA 20:21 Geb sigu-sunaega, an-mai-wargwen an barmidoed. An ega sogdibe: ‘Be dake, sigumar wesik meremamaid be sunae’, dobsuli sunna be nodaged. ¡Bab-Jehová-Dula-Maid-nuggi an bega soged!
1SA 20:22 Ar ega an sogerdi: ‘Be dake, sigumar bur egesik mamaid’, adi, Bab-Jehová naed be-abeged. ¡Degisoggu, be wakinsunnoed!
1SA 20:23 ¡Anmar na ise-sogar-ibmar-sogsamaladi, Bab-Jehová degisadegu dulemar-baiganga-sogega guoed!
1SA 20:24 Degisoggu, David sapurba dukussunnad. Nii-binid-yoleged-iba-onodedgi, rey igi na gusgu galu-naga mas-gunnega sigdae,
1SA 20:25 deyobi mesegi galu-naga sigisad. Jonatán rey-asabin sigisad, Abnerʼdi Saúl-dikarba sigismogad. David-e-gandi ollobi-sigisad.
1SA 20:26 A-ibagi, Saúl akar-sogsasulid, ar ade, binsaed: “David igi-gusdibeye na binsaed, san-swilidik-gudisulirgeberye binsaed.”
1SA 20:27 Banedgine, Saúl, David-e-gan amba ollobi-sii dakarbalid. Geb Saúl e-machi-Jonatánʼga sokalid: —¿Ibiga Isaí-machi, masgunnega sae nonisuli? Emi amba nonisurbalid. ¿Ibigala?
1SA 20:28 Jonatán e-babga sogded: —David Belénʼse e-barmidega angi alamaknai gusad.
1SA 20:29 Anga sogsad: ‘Wis be an-barmidye. An-gwenadgande na birga-irba ibmar-ogumakar-ukleged ukdamarye. Ede a-daknabiye, anga sogsad. Degine, an-gwenad anbina gochaye, anmarse dagoye. Degisoggu, wis be an-barmidye, an-gwenadgan-daknaegarye,’ anga sogsad. A-ulale, David be-abargi mas-gunnega daklesulid.
1SA 20:30 Saúl deyob Jonatán ega-soge itoargua, Jonatánʼse uluded. Ega sogded: —¡Bedi ome-gambanuchu-imaked-e-mimmid! ¿David-be-ai-nuedid an wissurye be angi binsae? ¡Be-nanga, degi, bega binged-dummad gued!
1SA 20:31 We-napneggi Isaí-machi dula-gudiidgi, be, degi, be-yar-seoedi bonisuli-guosulid, boni-nika guedsegad. ¡David-aminamalagala, sordamar be barmide! Geb wese be anga sedamalo, ar oburgwilegergebed.
1SA 20:32 Jonatán e-bab-abin sogded: —¿Ar ibiga David-oburgwilegoe? ¿Ibu ibmar-isgana imaksasunna?
1SA 20:33 Agine, Saúl, Jonatán-onailiksaega eswar-suid egi mechalid. Degidbali, Jonatán magar-daknonikid, ar e-babde David-oburgwedgi binsae.
1SA 20:34 Jonatán uludedba mese-naba-siidgi gwichibin-imaksad, geb iba-onolenaid-ibbogwadgi bar mas-guchasulid. Ar e-bab Davidʼgi sabsur-ulussoggu, Jonatánʼdi nue bukib-itossunnad.
1SA 20:35 Banedgi wakudaryalaba, Jonatán, David-abinguega sapurba naded. E-mai-sapingwagwad eba nade gusmogad.
1SA 20:36 Jonatán e-maiga sogded: “Sigumar-an-mioed be sunao.” E-mai abarmakded, geb Jonatánʼdi egi dikasur sigu metedaed.
1SA 20:37 Ar mai na bia sigu argwachadse mosgua, Jonatán binnasur ese goted: “¡Be-biriba! ¡Be-biriba sigu mellemai!
1SA 20:38 ¡Gwae be abarmakde! ¡Mer be gwisgue!” Jonatán deyobi ese gorgwichi gusad. Ar mai sigu-susgua, e-dummadga senonikid.
1SA 20:39 Maidi gwen akar binsasulid, ar ade, Jonatán Davidʼbo unnila wismalad, ar sigu-miedde ibi-obare.
1SA 20:40 Geb degine, Jonatán na e-maiga bila-onogedgi-ibmar-ebumalad uksad. Ega sogded: —Be nae. Be gannar negse we-ibmar sede.
1SA 20:41 Ar mai na nadgua, David, e-duku-siidgi noalid. Geb David, Jonatán-asabin ilapaa dulluu e-bebe napase-ebulegedse imaksad. A-sorbali, angaagwar na gasmalad, degine, ebobela na bosmarbalid. Ar Davidʼdi bur bule bosad.
1SA 20:42 Jonatán, Davidʼga sogded: “Gwage-bogidikidgi be nae, ar ade, Bab-Jehová-nuggi anmar weyob ise-sogar imaksad, Bab-Jehová anmarba, degi, anmar-waganba degisadegu gudii guoye.” Degisoggu, David nadsunnad. Geb Jonatánʼdi neggweburse gannar nonikid.
1SA 21:1 David, Nob-neggweburse mosgua, dule-irwa-Bab-Dummadse-goled-Ahimelecʼse naded. Ahimelecʼdi, David-dakargua, na dobe-itoded. Ahimelec, Davidʼga sokalid: —¿Ar ibiga walagwengi be daniki? ¿Ibiga dulemar beba danisuli?
1SA 21:2 David abin-sogded: —Rey-sogedba an daniki. Degi-inigwele, dule wisguegarsulid, ibiga rey bese an-barmiali, degine, igi rey anga igar-uksabali. A-ulale, an-sordamarbo an danisulid. An-sordagan-anbodi igar-baidsik an abinguoed.
1SA 21:3 David, Ahimelecʼga sogdebalid, wis masgunned be nikasua. Wis gwaatarsaar madu be anga udage. Ar sulirdi, ibmar-baid be nikale, a be anga wis udado.
1SA 21:4 Ahimelec, Davidʼga sogded: —Madu-binsaled an sate, unnila madu Bab-Dummadga-nug-imaklesadbi an nikad. Ar be-sordamar omegangi bagagwar-gudimalale, sunna an bega uksardo.
1SA 21:5 David abin-sogded: —Ar anmar urwega-alile, gusgu, anmar, omeganse wissur-bar gordaed. Deginbali, binsa nabir neg-argaega anmar arbalile, abala, an-sordagan omegangi bagagwar san-imakdamarbalid. Emidi, bur bule san-swilidik gudimalad.
1SA 21:6 Degisoggu, ar madu-baid satesoggu, dule-irwa-Bab-Dummadse-goled, Bab-Dummadga-madu-nug-imaklegaled Davidʼga uksad. We-madu, Bab-Dummad-asabin itoged-neggi-bukwagusadi emissale, odelesad A-muchubbi, Bab-Dummadga-madu-nug-imaklegaled-gwapid uwe-uwegwad bato urbilesad.
1SA 21:7 Deunni, a-ibagine, Saúlʼga-sibad-edarbed-wargwen Bab-Dummadse-goled-neggi besad. A-dulede, Doegʼye nugad, Edomʼginedid, Saúl-e-sibad-wawaad-edarbemalad-e-dummadid.
1SA 21:8 A-sorbali, David, Ahimelecʼga sogded: —¿Abakar be eswar-swiswidikid nikasua, es-suiddibe? Ar rey gwae-gwae an-barmialid, a-ulale, es-suid an searsulid, degi, bila-onogedgi-ibmar-ebulemalad an searsurbalid.
1SA 21:9 Dule-irwa-Bab-Dummadse-goledi Davidʼga sogded: —Eye, Filistea-dule-Goliat-es-suidbi maid. Bia be deun Ela-nebagi oburgwisgusa, a-dule-es-suidbi maid, mor-suid-naid-dakasiki morgi bipirmakar-maid. Ar be abegele, sunna be seded. Ar bila-onogedgi-ibmar-ebulemalad-bamaladdi an sated. David ega sogded: —¡We bur-nuedid! ¡Anga be udage! Geb ega uksasunnad.
1SA 21:10 A-ibagine, David amba Saúl-iduar-wakindiidgi, Gat-rey-Aquisʼye-nugadse nade gusad.
1SA 21:11 Aquis-sorda-dummagana, Aquisʼga sokalid: —¿Wede Davidʼsursi? ¿We-yar-naid-e-reysursi? We-dulega gwirnanai, degi, weyob namaknanai damalad: ‘Saúl, miliba (1,000) e-isdarmalad-oburgwisad. Davidʼdi, miliambe (10,000) e-isdarmalad-oburgwisad.’
1SA 21:12 David deyob dulemar-soge itosgua, David suli-suli-itoalid, Gat-rey-Aquis-dobe itodbalid.
1SA 21:13 David-gaesokarmargua, David yamo na dule-iwiledyob-imaksad. Dulemar-wagab yawagak godi-godi-imaknai gusad, geb e-sigaba gaglis-aryomai imaksad.
1SA 21:14 Geb degine, Aquis e-sordamar-e-dummaganga sogded: —¿Ibiga be anga we-dule-sedanimala? Ar we-dule, ¿dule-iwiledid be daksurmarsi?
1SA 21:15 Ar dule-iwirmalad amba an-neggi galaku be dakmarsi, emide, be anga we-dule an-asabin sedanimalad. ¡Be ononamala!
1SA 22:1 David Gat-neggweburgi nadgua, Adulam-gubya-dummad-siidse dukunaded. Na e-iamar, degi, e-gwenadgan wisguarmargua David agi gudiiye, dakega ese nadmalad.
1SA 22:2 Degine, bela dulemar-wile-itodimalad, dulemargi mani-ganimalad, gwagegi-nabir-itodisurmalad ese nadmarmogad. Degidbali, David dulemar-dulataled-ilabake-mergued-e-dummadga (400) gunonikid.
1SA 22:3 Agine, David, Moab-yargi Mizpa-neggwebur-siidse naded. Geb Moab-reyga weyob sogdapid: “An bese wileged, wis an-sergan be-yargi-gudigumalaga wis imakbi an be-abegendo. Geb Bab-Dummad igi anga sogdagoe ase anmar na namarbaloed.”
1SA 22:4 Deyobi David, Moab-e-rey-walik e-babgan na obesad. David dukumaigusad-ibagansega na e-sergan Moab-yargi gudii gusmalad.
1SA 22:5 Bab-Dummad-gayaburba-barsoged-Gadʼye-nugadi, Davidʼga sogded: “Mer be bar dukued-neggi dukuo. Judá-yarse bur be gannar-naed nabirid.” Geb agine, David Judá-yarse nadsunnad, geb Haret-sapuryaba dukudapid.
1SA 22:6 Ar Saúl Gabaa-yar-mullugi, ingwa-soled-gwichid-urba-obunnosigu wisgualid, David e-sordaganmala daklesye. Agine deunni, Saúl eswar-gani siid, e-sordamar-e-dummagandi ebiris-bukwad.
1SA 22:7 Amarga Saúl sogded: —¡Benjamín-wagan, nue an-itomar! Ar Isaí-machi bemarga nainumar-naidi, degine, uva-digar-nanaidi, ¿bemarga ukmogo be ebinsae? Degi, sordamar-miliba-mergued-e-dummadga (1,000), degi, sordamar-dulataled-mergued-e-dummadga (100), ¿bemar-nugsao be ebinsabali?
1SA 22:8 Emigindi, ar bela bemar angi aibichamalad. Ar ade, dule-wargwensaale an-machi Isaí-machibo-igar-mesisad anga sogsasulid. Bemar wargwensaar anba bukib binsasulid. Bemar anga sogsasurbalid, ar igi an-machi an-mai-wargwenad angi aibinega imaknai, emi ibmar-gunaiyob.
1SA 22:9 Agine, Edom-dule, Doegʼye nugadi, Saúl-e-sordamar-e-dummagan-abargi gwismogad, ega sogded: —Isaí-machi, Nobʼgi, Ahitob-machi-Ahimelecʼbo sunmaknai an daksad.
1SA 22:10 Davidʼga, Ahimelec Bab-Jehováʼse ibmar wisgusad, geb ega mas uksad, deginbali, Filistea-dule-Goliat-es-suid ega uksabalid.
1SA 22:11 Geb degine, rey dule-irwa-Bab-Dummadse-goled-Ahitob-machi-Ahimelecʼse gochad. Deginbali, rey, Ahimelec-e-gwenadgan bela Nobʼgi dule-irwa-Bab-Dummadse-goledga-mamaidse gochabalid. Amar nonigua,
1SA 22:12 Saúl, Ahimelecʼga sogded: —Ahitob-machi, be an-itoge. Ahimelec ega sogded: —Dummad, sogdena.
1SA 22:13 Saúl sabsur Ahimelecʼga sogded: —¿Ibiga be, Isaí-machi-ebo, angi aibinnai? Angi-aibinega ega be mas uksad. Degi, an-oburgwega es-suid ega be uksabalid. Deginbali, Bab-Dummadse ega be ibmar-wisgusbalid, igi emi ibmar gunai.
1SA 22:14 Ahimelec rey-abin weyob sogded: —Ar bela be-sordamar-e-dummagan-abargine, ¿doa be-sapin-Davidʼyob innikigwad gudii? Deginbali, be-edarbemalad-e-dummadbalid, be-neggi belagwable e-nug odummomarbalid.
1SA 22:15 ¿Ar emi gebe Bab-Dummadse an Davidʼga igar-wisgunai be an-dake? ¡Suli, deyob suli! Angine, an-gwenadgangine bipisaar rey atake-wilubsulinad, ar andi bemar-boni-nika-gunanaidi, bipisaale wissulid.
1SA 22:16 Rey-Saúl, weyob Ahimelecʼga sogded: —Amba be deyob anga sog-inigwele, ¡Ahimelec, amba be anse burgoe! ¡Bebi burgosulid, bela be-gwenadgan burgwemogoed!
1SA 22:17 Rey e-suar-ibmala-eba-gudimaladga igar uksad: —¡Bab-Jehová-e-dule-irwa-gormalad be oburgwemala! Wemar, Davidʼba nanaimarmogad. David-wakindiid wismalanad, degite, gwen anga sogsasurmalad. Ar rey-e-sordamar-dummagandi, yapa dule-irwa-Bab-Jehováʼse-gormalad-oburgwe gusmalad.
1SA 22:18 Degisoggu, Doegʼga Rey-Saúl igar ukdesunnad: —¡Be dule-irwa-Bab-Jehováʼse-gormalad-oburgwe! Geb degine, Edom-dule-Doeg amargi gwichiguded, geb bela oburgwisad. A-ibagine, Doeg dule-irwa-Bab-Dummadse-gormalad lino-mor-sakwasulid-yoimaladi, dulabake-gakatar (85) oburgwisad.
1SA 22:19 A-sorbali, Doeg, Nobʼse naded, dule-irwa-Bab-Dummadse-gormalad-e-neggweburse. Geb es-suidgi machergan, omegan, burwigan, goemar, moli-bebe-nikamalad, moli-uayasuidmar, degine, sibad-wawaadmarse-bakale, oburgwidapbalid.
1SA 22:20 Degi-inigwele, Ahimelec-machi-wargwen, Abiatarʼye-nugad wakichad. Geb Davidʼse naded. We-Ahimelecʼde Ahitob-e-machid.
1SA 22:21 Geb bela Davidʼga ibmar sogdapid, igi-Saúl dule-irwa-Bab-Jehováʼse-gormalad ogilosa.
1SA 22:22 Agine, David, Abiatarʼga sogded: —An Nob-neggweburgi Edom-dule-Doeg-daksagu, bato an dika egi binsasa, we-dule, Saúlʼga ibmar-sogoye. Emide, belagwable be-gwenadgan-burgwisadi, an-nukinsundo.
1SA 22:23 Degi-inigwele, mer be dobguo. An-walik be gudiguo. Wegine, dule gwen be-oakalogosulid. Ar doa-dule be-oburgwebiele, an-oburgwemogargebed.
1SA 23:1 David wisguargua, Filistea-sordamar Keila-neggweburgi gwichigusmarye, degine, e-ibmar-gwag-sabolebukwad ei atur-imaksamarbarye.
1SA 23:2 Degidbali, David Bab-Jehováʼse idakded, ega sogded: —Bab-Jehováʼye, ¿Filistea-sordamargi an bila-ononaoe? Bab-Jehová abin-sogded: —Be nae. Filistea-sordamargi be bila-ononae. Keila-neggwebur be bendaknae.
1SA 23:3 Ar sordamar Davidʼga sogdemalad: —Ar anmar amba wegi Judá-yalagi gudimar-inigwele, degite, amba anmar dobe-itodimalad. Anmar Keila-neggwebur-bendakega Filistea-sordamargi bila-ononader, bur bule anmar gwakidoed.
1SA 23:4 David gannar Bab-Jehováʼse idakdebalid. Geb Bab-Jehová weyob abin-imaksad: —Keila-neggweburse be nae, ar Filistea-sordamar an bega urmakoed.
1SA 23:5 Degisoggu, David e-sordaganmala Keila-neggweburse nadmalad. Geb Filistea-sordamargi bila-onosmalad. Geb agine, Filistea-sordamar ese galakusmalad. David Keila-neggweburginmalad-bendaksad, deginbali, Filisteaʼmar-ibe ibmar-durgan susbalid.
1SA 23:6 Ar Ahimelec-machi-Abiatar, David-walik-dukuega Keila-neggweburse-wakitegua, mor-efodʼye-nugad sesad.
1SA 23:7 Saúlʼga sogsamargua David Keila-neggweburse nadye, Saúl sogded: “¡Bab-Dummad anga David-urmaksa! Emide, David neggwebur-yawagak-nikad-yaba, degi, yawagak-esgorogi-atied-yaba dogsad, degisoggu, gege wakinned.”
1SA 23:8 Geb degine, Saúl bela e-sordamarse gochad, adi, David-sordamargi bila-ononamalaga, deginbali, Keila-neggwebur-ebiris bukumarbaligar.
1SA 23:9 David Saúl-e-oburgwebied wisgusad. Degisoggu, Abiatarʼga igar-uksad, ega mor-efodʼye-nugad sedegar.
1SA 23:10 A-sorbali, David, Bab-Dummadse gochad: —Israel-e-Bab-Dummad-Jehováʼye, an nue-wisid, an-ular Saúl Keila-neggwebur-obelogega dagsokalid.
1SA 23:11 Israel-e-Bab-Dummad-Jehováʼye, an bese wilege, anga be soge, ¿Keila-dulemar Saúlʼga an-urmakoe? ¿Anga-sogsamaladyobi, Saúl nue-danikoe? Bab-Jehová, Davidʼga sogded: —Eye, Saúl danikoe.
1SA 23:12 David gannar Bab-Jehováʼse egichialid: —¿Keila-dulemar Saúlʼga an-urmakoe? ¿An-sordagan urmaklemarmogoe? Bab-Jehová abin-sogded: —Eye, be-urmakmaloed.
1SA 23:13 Geb degine, David e-sordagan-dulataled-ilanergwa-merguedmala (600) Keila-neggweburgi-gudiidgi nadmalad, geb neg-baid-baid-onodii gusmalad. Saúlʼga sogsamargua, David Keila-neggweburgi-gudiid nadye, degisoggu, Saúl bar Keilaʼse nadsulid.
1SA 23:14 David yar-gwagwengi Zif-nega-dulesulidgangi negmar-dukued-bukwadgi dukudii gusad. Bane-bane Saúlʼdi amidii gusad, ar Bab-Dummaddi Saúlʼga David-urmaksasulid.
1SA 23:15 David Zif-nega-dulesulidgangi, Horesʼgi-gudiidgi wisgusad, Saúlʼdi e-oburgwega e-aminadye.
1SA 23:16 Saúl-machi-Jonatán, Horesʼse David-daknaded. Geb Jonatán, David mer-Bab-Dummadgi-bensuli-gudiguega, David-ogannosad.
1SA 23:17 Jonatán, Davidʼga weyob sogsad: “Melle be dobee-itoge, ar an-bab be-amiosulid. Israel-e-reyga be megoed, an be-sorbalidga guoed. We-ibmar an-babse-bakale, na wisid.”
1SA 23:18 Geb degine, ebogwa Bab-Jehová-asabin igar-mesismalad. A-sorbali, Jonatán na e-negse gannar nonikid. Davidʼdi, Horesʼgi gudii gusad.
1SA 23:19 Zifʼginmalad Gabaa-neggweburse nadmargu, Saúlʼga sogdapmalad: —Dummad, David anmar-yargi-dukudiidi, ¿be wissursi? Haquila-yargi gudiid, nega-dulesulidgan-dad-nakwed-argan-nuedsik, Hores-neg-dukuedgi dukudiid.
1SA 23:20 Dummad, anmarse be naele, anmar bega David-urmakoed.
1SA 23:21 Saúl abin-sogded: —¡Bemar wile an-daked-ulale, Bab-Jehová begi nued binsamalana gadin!
1SA 23:22 Be namala, nue be wisgunamala, David bia gudii, doa daksabali. Ar anga sogsamalad, Davidʼde bato ibmar-wisdaye.
1SA 23:23 Biarmala David-dukue bemar nue wisgumalo, geb nuekwaa be anga sognonimalo. Geb agine, an bemarba naoed. Ar a-yargi nue-gudidibe, bela Judá-e-wagan-abargi an aminaoed.
1SA 23:24 Zifʼginmalad Saúlʼgi banguarmalad, geb e-yarse gannar nonimalad. Deunni, Davidʼdi e-sordaganmala Maón-nega-dulesulidgan-dad-nakwed-argan-nuedsik, Arabáʼye-neg-nugadgi gudimalad.
1SA 23:25 David-owisosmargua, Saúl, e-sordaganmala be-amidanimarye, David, Maón-nega-dulesulidgangi akwasaila-siidse aidenonikid. Ar Saúl deyob wisguargua, Maón-nega-dulesulidgansik David-balegited.
1SA 23:26 Saúl yar-siid-dikarba nadapid, Davidʼdi e-sordaganmala, wakinmalaga gwae-gwae a-yar-dikar-baidsik nadapmogad. Degi-inigwele, Saúl, e-sordaganmala, David-ebiris bukusmalad. Nue-David-gasokarmargua,
1SA 23:27 dule-wargwen-gayaburba-berbeged nonikid, geb Saúlʼga sognonikid: “¡Dummad, gwae be gannar dage, ar Filisteaʼmar anmar-yargi ubosmalad!”
1SA 23:28 Geb degine, Saúl David-baleginnaid indaksasunnad. Geb Filisteaʼmarbo-urgwega gannar naded. A-ulale, we-neg Sela-Hama-Lecotʼye nug-imaksamalad.
1SA 23:29 A-sorbali, David, na dukuega Engadi-neg-dukumalad-bukwadse naded.
1SA 24:1 Saúl Filisteaʼmar-balegindiidgi gannar nonigua, ega sogsamalad, David Engadi-nega-dulesulidganba gudiiye.
1SA 24:2 Geb degine, Saúl Israel-dulemar-abargi milipaa (3,000) sordamar amisad, geb Sibad-Sapurbalid-Yarse David-aminaded.
1SA 24:3 Saúl nadapidgi, sibad-wawaad-galu-siidse mosad, a-dikarba ibe-dummad-ollor siid. Saúl na akunaega ibe-dummad-ollor-siid-yaba dogsad. David, e-sordaganmala, a-ibe-dummadyaba dukubukmalad.
1SA 24:4 Geb e-sordagan Davidʼga sogdemalad: —Bab-Jehová bega ibmar-sogsadi, emi nue-napira gunaid, ar bega sogsagu: ‘Be-isdarad an bega urmakoye, adi, na be igi-imakbie, be-dakedba be imakoye bega sogsad.’ David gwisgusad, geb bogidikmakar itolessuli Saúl-e-mor-suid-duku siksad.
1SA 24:5 Weyob imaksad-ulale, David gwage-naibi itononikid.
1SA 24:6 Geb e-sordaganga sogded: —Bemar anga-ibmar-sogedba an rey-oakalogosulid. ¡Bab-Jehová mer an-dummad-Saúlʼga deyob an-imakena gadin! Ar Bab-Jehová Saúl-nug-imaksasoggu, geg an Saúl-oburgwed.
1SA 24:7 Weyobi, David na e-sordagan-bargasad, adi, mer Saúl-oburgwemalagar. Ar Saúl ibe-dummad-ollor-siid-yaba nosgua,
1SA 24:8 David e-sorba noarmogad, geb Saúlʼse goted: —¡An-dummad-rey! Saúl, yarganba atakdegua, David dulluu napa-nagase imaksad,
1SA 24:9 geb Saúlʼga sogded: —Dummad, dulemar bega sogsamalad ande be-akar-imakbiye, ¿ibiga be a-dulemar itoge? Mer be amar itoge, ar an be-oakalobisulid.
1SA 24:10 Emi, be-sunnad be daksad, ar igi Bab-Jehová ibe-dummad-yaba anga be-urmaksana. An-sordagan be-oburgwega, angi alamaknai gusmalanad. Ar andi wile be-daksad. Geb an sogsad: ‘Gege an, an-rey-oburgweye, ar Bab-Jehová be-nug-imaksaddeeye an sogsad.’
1SA 24:11 ”Dummad, an be-mor-suid-e-duku-ganikid be dake. Be-morduku an siksad, degite, gwen an be-oburgwissulid. Be dakena, an akar be-imakbisulid, an begine aibinbisurbalid. Ar an akar be-imaksasur-inigwele, degite, bedi an-oburgwega an-balegindiid.
1SA 24:12 Bab-Jehová anmarga ibmar sogoed, ar doa bur ibmar-isgana imakdii. Be sabsur-an-imakdiid-ulale, Bab-Jehová buged-mai be-imakoed. Andi an be-oburgosulid.
1SA 24:13 Ar epenne weyob sogledaed: ‘Dulemar-isganamargi isgued nodagoye.’ A-ulale, andi be-oburgosulid.
1SA 24:14 ”¿Ar Israel-e-rey, doagi gwichiguega noali? ¿Ar doabina daniki? Ar dule-nuedsulidbina danikid. Ar ande achu-nungumaiyob gued. Andi genyob gued, ibmar-nuedsulid.
1SA 24:15 Ar Bab-Jehová igar-nabogedga guoed. Anmargine na e sogoed, ar doagi bur ataklegoe. Bab-Jehová an-ibmar-imaksad daksad. Geb begi an-bendakoed, begi an-ollor-imakoed.”
1SA 24:16 David sunmakgwichid-bergusgua, Saúl ega sogded: —¡David, dule-baid anga sunmakgwisye an be-biendo, ar bee be anga sunmakgwichina! Geb Saúl binnasur-gotegu, boded.
1SA 24:17 Saúl ega sogdebalid: —Bedi anbali bur dule-nued gued. Andi begi nabir-binsasur-inigwele, bedi angi bur nued binsasad.
1SA 24:18 Emigindi, be angi-nued-binsasad, an magar itosunnad. Ar Bab-Jehová bega an-urmaksanad, degite, be gwen an-oburgwissulid.
1SA 24:19 ¿Doa na e-isdarad-abingualile, gwen oburgwissulir be insae? ¡Ar emi be angi dogdar-nued binsasad-ulale, Bab-Jehová bega ibmar-nuegan ukoed!
1SA 24:20 Emigindi, ar reyga-be-megoed, an magar itosunnad. Dummadga be maidgine Israel-yar nasgumai guoed.
1SA 24:21 Saúl, Davidʼga sogdebalid: —Emigindi, Bab-Jehová-nuggi anga be ise-sogar-sogsunna, bela an-wagan be ogilogosurye, deginbali, an-gwenadgan-nug be eliosurbarye.
1SA 24:22 David, Saúl-ese-ibmar-egichisad, ega ibmar-imakoye ise-sogar sogsad. A-sorbali, Saúl e-negse naded. Geb Davidʼdi, e-sordaganmala, dukued-negse nadmalad.
1SA 25:1 Samuel burgwisad. Geb e-neggwebur-Ramáʼgi diglesad. Bela Israel-dulemar ega bomalaga nonimalad. A-sorbali, David, Parán-nega-dulesulidganse naded.
1SA 25:2 Maónʼgine dule-wargwen-mani-ibed maid. We-duledi, sibad-wawaad milipaa (3,000) nikad, degi, sibad miligwen (1,000) nikabalid. We-dule, Carmel-neggweburgi neg-dummad-nikadgi sibad-wawaadmar-e-absar enidaed.
1SA 25:3 We-dule, Nabalʼye nugad, Caleb-wagwad. E-ome, Abigailʼye nugad. We-omedi, yeerdakleged, deginbali, nue ibmar wisbalid. Nabalʼdi, dule-binged-satedid, degi, dule-isganabalid.
1SA 25:4 David nega-dulesulidgangi-gudiidgi wisgusad, Nabalʼde e-sibad-wawaadmar-e-absar eninaye.
1SA 25:5 Geb degine, David na e-sordagan ambe (10) barmisad, geb wemarga sogsad: “Carmel-neggweburse be namala, an-nuggine Nabalʼga be sogmalo, David be-obarye, bede nueganbi-gudii-sogeye sogye.
1SA 25:6 Nabalʼga be sogbalo: ‘¡Bitigi bede, be-gwenadgan, degi, bela be-neguyagi-gudimalad nueganbimarmogana gadinye!
1SA 25:7 An be-wisgusad, bede be-sibad-wawaadmar-e-absar eninaye. Na be wisguergebed, be-sibad-edarbemalad anmarba gudigusmargu, anmar ega akar-sogsasulid. Wegi Carmelʼgi na gudigusmargu, e-ibe anmar bipisaar ibmar sussulid.
1SA 25:8 Be-maimarse be egise, na emar bega sogoed. Degisoggu, an-sordagan bitigi be nued abindaksana gadin, ar anmar emi-ibagi iba onogergebed. An bese wileged, na be-maimarga, degi, anga, ar ibu be nika, a be uksunna.’ ”
1SA 25:9 David-e-sordagan mosmargua, ar igi David ega ibmar-sogsa, deyobi Nabalʼga ibmar sogdapmalad, geb abitobukwa gusmalad.
1SA 25:10 Ar Nabalʼdi, weyob abin-imaksad: —¿Ar Davidʼde, doa-dule? ¿Ar Isaí-machide, doasunna? Ar emi-iba, bukidar maimar na e-dummadgi wakindidamalad.
1SA 25:11 An-madu, an-dii, degi, ibmar-durgan-san, an-sibad-wawaad-e-absar-enimaladga an sabosad, ar an dulemar-akudakmaladga, ¿an ukode? Suli, an uked sate.
1SA 25:12 David-e-sordagan biir-imaksamalad, geb nadmalad. Davidʼse-mosmargua, ar igi Nabal ega ibmar-sogsa, deyobi bela Davidʼga sogsamalad.
1SA 25:13 Geb degine, David e-sordaganga igar ukded: “¡Es-suid be nasikmar!” Belagwable, Davidʼse-bakale, na es-suid dikargi nasiksamalad. Davidʼba dulataled-ilabake-mergue (400) sordagan nadmalad. Bamalad-sordagan-dulataled-ilabogwaddi (200) na ibmar-edarbega besmalad.
1SA 25:14 Mai-wargwendi, Nabal-ome-Abigail owisosad, weyob ega sogsad: —David, anmar-dummad-Nabalʼga nued-sogeye-sogega, nega-dulesulidgan-akale gayaburba-berbemalad barmialid. Ar degite, anmar-dummaddi nuedgi abin-daksasulid.
1SA 25:15 Mai sogdebalid: —We-dulemar nueganbi anmarbo gudigusmalad. Sapurba anmar eba gudigusmargu, bipisaale gwen anmarga akar-sogsasurmalad. Deginbali, anmar-ibe gwen ibmar sussurmarbalid.
1SA 25:16 Anmar wemar-walik sibad-wawaad-edarbedigusgu, ibginedba, mutikidba, wemar anmar-edarbismalad.
1SA 25:17 Degisoggu, Abigail, nue be binsao, ibu be imakoe. Ar anmar-dummad na e-berguedi, degi, e-neguyagi-bukmalad-berguedi na dukin bato igar mesisad. Ar Nabal dule-isganasoggu, dule geg ese goled.
1SA 25:18 Abigail gwae-gwae we-ibmarmar amisad: Madu, dulataled-ilabo (200), vino, buglu-gwabo, sibad-wawaad-naraled, walatar, ibmar-gwag-dibyaled, nibir-dulapaa-gakambe-gakagugle (77), uva-sategwad-madu, dulatar (100), degi, higo-sategwad-madu, dulataled-ilabo (200). Moli-uayasuigan-birgi belagwapa we-ibmar nasiksad.
1SA 25:19 A-sorbali, Abigail, e-maimarga sogded: “Be an-idu namala, an be-sorba naoed.” Ar e-sui-Nabalʼgardi gwen we-ibmar sogsasulid.
1SA 25:20 Abigail moli-uayasuid-birgi-sii yar-birgi-aidedanigu, David e-sordaganmala e-asabin-daniki dakalid. Degisoggu, na abingunonimarsunnad.
1SA 25:21 David sogsa gusanad: “An Nabalʼga nega-dulesulidgangi e-ibe mer ibmar-yogguega, an binsa ega ibmar edarbedii gusye. Emigindi, an ega ibmar-nued-imaksad-anale, edi aka isdar angi binsaed.
1SA 25:22 An neg-oiboged-iduar bela Nabal-e-neguyagi-bukmalad an ogilossulile, Bab-Dummad sabsur-an-odurdaksunno.”
1SA 25:23 Abigail, David-daksagua, moli-uayasuid-birgi-siidgi gwae aidesad. Geb David-abin wagar napase dulluu imaksad.
1SA 25:24 David-asabin sindigar-sii ega sogded: —Dummad, ani an nosad. An bega ibmar-sogbienad. Wis be an-itoge.
1SA 25:25 Dule-isgana-Nabalʼba mer be ibsae, ar e-nug-nugadba na deyob daed. E-nugdi sogleged, ‘dule-binsaedsulidye.’ Na binsaedsuli ibmar imakdaed. Dummad, ar andi be-gayaburba-berbemalad be barmiargusadi, an daksasulid.
1SA 25:26 ”Ar Bab-Jehová, ablis-eogega be-imaksasulid. Degi, dukin-bugeb-mai-imakega, be-imaksasurbalid. ¡Napiragwa! Bab-Jehová-Dula-Maid-ular, degi, be dula-gudiid-ular, be-isdarmalad, degi, bela akar-be-imakbimalad, igi-Nabal-sabsur-odurdaklegoe, deyobi gumarmosunno.
1SA 25:27 Dummad, an we-ibmar binsa-bega-ukega-sedanikid be abingae, be-sordagan-beba-gudimaladbo be mimie.
1SA 25:28 An begi-nosadi, nossuliyob be an-dake. Napiragwa, Bab-Jehová bela be-wagan Israel-yargi reyga-megmalaga imakoed. Degine, dule-wargwensaale akar be-imakosulid, ar Bab-Jehová-e-bila-onogedgi be urwediid.
1SA 25:29 Ar amba dule be-oburgwega be-balegindiile, be-Bab-Dummad-Jehová be-bendakoed. Ar Bab-Jehová be-isdarmalad-oberguega dule dubgi-akwa-dikasur-metedaedyobi be-isdarmalad-metoed.
1SA 25:30 Degisoggu, Bab-Jehová bega bela ibmar-nuegan-imakoye-sogsad-imaksale, degine, Israel-dulemar-e-dummadga be-mesisbalile, be yeer itogoed.
1SA 25:31 Degisoggu, be yogasaar buged-mai-imaksasulile, degi, be yogasaar ablis-eossurbalile, bar be binge-itogosulid. Aka bur be yeer itogoed. Deginbali, gwage-nunmaked be itogosurbalid. Bab-Jehová bela bega ibmar-nasgumai-imaksale, be an-ebinsao.”
1SA 25:32 Geb degine, David Abigailʼga sogded: —¡Israel-e-Bab-Dummad-Jehová-e-nug odummolesun! Ar an-abindakega be-barmialid.
1SA 25:33 Bedina, binsaed-nued-nikusadba Bab-Dummad begi nued binsasun. Ar ade, ablis-eogega be an-imaksasulid, degi, buged-mai-imakega be an-imaksasurbalid.
1SA 25:34 Ar Israel-e-Bab-Dummad-Jehová-dula-maidi, akar-be-imakega an-imaksasulid. Ar napira an bega soged, gwae be an-abin arsulina, banedse Nabal-e-sordagan wargwensaale dula-beosulinad.
1SA 25:35 David weyob sogsagu, ome-ega-ibmarmar-senonikidi, ome-abin susad. David omega sogdebalid: —Ar be anga ibmar-sogsad an be-itosad. Anse be ibmar-egichisadba an ibmar imakoed. Degisoggu, nuedgi be-negse be nae.
1SA 25:36 Abigail negse nonigua, daknonikid, Nabal reyyobi iba-dummad-ononai. Nabal weligwar itoged, degi, na bela-bela mummubalid. A-ulale, Abigail, banegidse geb ega ibmar sogsad.
1SA 25:37 Banegine, Nabal dadakusgua, geb e-ome ibmar-gusad ega sogsad. Ar Nabal weyob itosgua, e-gwage ega boo-nadednegoeded, geg bar nanae megisad.
1SA 25:38 Ibambe-gusad-sorbali (10), Bab-Jehová, Nabalʼga gannar boni daknonibalid. Geb deyobi, burgwissunnad.
1SA 25:39 David wisguargu Nabal burgwisye, sogded: “¡Bab-Jehová-e-nug odummolesun! Ar Nabal an-binge-imaksad-ulale, Bab-Jehová buged-mai anga Nabal-imaksad. Bab-Jehová mer-ibmar-isgana-imakega an-imaksad. Ar Nabalʼgi, na e-isgued, dukin-egi-aibinega imaksad.” Geb degine, David, Abigail-nikuega ese gayaburba barmisad.
1SA 25:40 David-maimar Carmelʼse mosmargua, Abigailʼbo sunmakdapmalad, ega sogdemalad: —David anmar-barmialid, bega sogega, ede be-nikubiye.
1SA 25:41 Abigail na wagar-napase-dulluu imaksad, geb sogded: —Ani an David e-maid. Andi ega ibmar-imakega guagwar gudiid. Deginbali, an e-maimarga e-nag-enuked guakwabalid.
1SA 25:42 Abigail weyob-sogsad-sorbali, naye sokarsunnad. Agine, moli-uayasuid-birgi nakwisad. Geb yagan-ega-arbamalad-walataledmala David-gayaburba-berbemaladba nadmalad. Geb Abigail, David-nikusad.
1SA 25:43 David, ome-Jezreelʼgined-Ahinoam nikusbalid. Degisoggu, we-omegan-ebogwad e-omega gunonikid.
1SA 25:44 Ar Saúlʼdi, na e-sisgwa-Mical-David-ome, Paltiʼye-nugadga uksad. Paltiʼdi, Galimʼginedid, Lais-e-machid.
1SA 26:1 Zifʼginmalad Gabaa-neggweburse nadmalad, geb Saúlʼga sogdapmalad: —Ar David nega-dulesulidgan-asabin, Haquila-yar-siidgi dukudiiye.
1SA 26:2 Geb degine, Saúl, Israel-dulemar-abargi, milipaa-sordamar-amisadmala (3,000), Zif-nega-dulesulidganba David-aminaded.
1SA 26:3 Saúl na e-sordaganmala nega-dulesulidgan-asabin, Haquila-yar-siidgi ambikunonimalad. We-yarde igar-dikarba siid. David nega-dulesulidganba-gudiidgi, Saúl e-balegindaniye wisguargu,
1SA 26:4 e-sordagan-barmisad, adi, daknamalaga, bia Saúl e-sordaganmala bukwa.
1SA 26:5 Geb degine, David, bia Saúl na e-sordaganmala-danar-bukwa, ase naded. Geb David daksad, bia Saúl gabe, bia Ner-machi-Abner gabe, degine, bia sordamar-e-dummad gabmoga, bela daksad. Saúlʼdi negabargi maid. E-sordamardi ebiris-bukwad.
1SA 26:6 Geb degine, David, Het-dule-Ahimelecʼse, degi, Sarvia-machi-Abisaiʼse egichisad. Abisaiʼde, Joab-e-gwenadid. David amarse egichided: —¿Doa anba Saúl-gabmaidse nabie? Abisai abin-sogded: —Ani an beba naoe.
1SA 26:7 David, Abisaiʼbo a-mutik mosmalad. Geb Saúl negabargi gabmai, degi, e-nono-dukuba eswar-gwichi dakdapmalad. Abner, degi, sordamar-bila-onomaladbo Saúl-ebiris gabmamai dakdapid.
1SA 26:8 Abisai, Davidʼga sogded: —Emi, Bab-Dummad be-isdarad bega urmaksad. Degisoggua, oburgwega be an-imake. Napagi-mai eswargi irgwen-oburgwar an imakoed, ilagwensaar an saoed.
1SA 26:9 David abin-sogded: —¡Mer be oburgwe! ¿Ar doa Bab-Jehová-dule-nug-imaksad-oburgwisale, gwen sabsur-odurdaklegosuli? Sabsur-odurdaklegedsegad.
1SA 26:10 David sogdebalid: —Bab-Jehová dula-maisoggu, na e Saúl-onaglik-saoed. Sulile, e-burgwed-ibagi burgoed. Degisurbalile, bila-ononaidgi burgoed.
1SA 26:11 ¡Bab-Jehová e-dule-nug-imaksad mer oburgwega an-imakena gadin! E-nono-dukuba-eswar-gwichidi, degi, dii-buglugi-siidi be sue. Anmar nae.
1SA 26:12 Saúl-e-nono-dukuba-eswar-gwichidi, degi, dii-buglugi-siidi David sussunnad, geb agine nadmalad. Dule-wargwensaale David-arbid daksasulid, degi, itossurmarbalid, ar bela negoes-gabmamaid. Ar Bab-Jehová, wemar-mer-atakmalaga, ise-gabar wemar-imaksad.
1SA 26:13 David yar-baidse obaksad, geb a-yar-birgi gwisgudapid. Degisoggu, Saúl-e-sordamar-bukwadgi nued-bangu gwisgusad.
1SA 26:14 Geb agine, David, Saúl-sordamarse, degi, Ner-machi-Abnerʼse goted: —¡Abner! ¿Be an-itoge? Abner abin-sogded: —¿Ar doa reyse gorgwichi?
1SA 26:15 David Abner-abin sogded: —¿Ar bebi Israel-yargi dule-buled gudisursi? ¿Ar ibiga be-dummad-rey be nue-edarbissuli? An bega sogdo, ar dule-wargwen rey-oburgwega bemar-gabmaidse dogapid.
1SA 26:16 Ar weyob be ibmar-imaksadi, adi, gwen nabiridsulid. ¡Bab-Jehová-Dula-Maid-nuggi, napira an bega soged! Bab-Jehová be-rey-nug-imaksadi, be nue edarbissurmalad-ulale, bemar oburgwilegewilubbinad. Be dakena, rey-e-nono-dikarba-eswar-gwichid, degi, dii-buglugi-siid, ¿bia nade?
1SA 26:17 Saúl, David-gaya-magar-itosgua, sogded: —Machi-David, ¿ar bee be sunmakgwichi? David abin-imaksad: —Dummad-rey, ani an sunmakgwichi.
1SA 26:18 Dummad, ¿ar ibiga be an-balegindii? ¿Ar igi an be-imaksa? ¿Ar ibu-ibmar-isgana an imaksa?
1SA 26:19 Dummadye, an bese wilege, an-sunmaked nue be itogo. Ar Bab-Jehová angi isdar-binsaega be-imaknaile, bitigi an ega ibmar-ukleged-ukoed abingaena gadin. Ar dulemar weyob imakega be-imaknairdi, ¡Bab-Jehová amar-ukabsae! Emi, we-yargi, Bab-Jehová-yargi an-ononanaid. Geb anga sogmalad: ‘¡Bamalad-bab-dummadyob-ibmar-imaklemalad-e-nug be odummonae!’
1SA 26:20 Bab-Jehováʼgi-dikasur-burgwega mer be an-imake. Israel-e-rey, ¿ar ibiga be an-balegindii? Ar andi genyob gued, ibmar-nuedsulid. ¡Ar dule sapurba butu-amidiidyob be an-balegindiid!
1SA 26:21 Saúl abin-sogded: —¡An begi nosad! Machi-David, gannar be anse dage. Akar bar an be-imakosulid. Emi, bedi wile an-daksad, ar andi dule-binsaed-satedyob gusad.
1SA 26:22 David abin-sogded: —Dummad, wegi be-eswar an ganiki. Suega be-mai-gwensak be barmidage.
1SA 26:23 Bab-Jehová dule-e-igar-innikigwad-imakedba, degi, e-innikidaedba, war-wargwengi ega ibmar-ukoed. Ar emi Bab-Jehová anga be-urmaksanad, ar andi Bab-Jehová na dule-nug-imaksad gwen-akar-imakbi gussulid.
1SA 26:24 Ar igi an be-oburgwebigussuli, deyobi, Bab-Jehová mer an-oburgwemogana gadin, degi, bela bukib-binsaedgi an-ollor-imakbalina gadin.
1SA 26:25 Saúl ega sogded: —¡Machi-David, bedi dule-nuedid! Bedi ibmar-dummagan imakoed. Bela bega ibmar-nueganbi guoed. A-sorbali, David naded. Geb Saúlʼdi gannar e-negse nonikid.
1SA 27:1 A-sorbali, David binsaded: “Ibagwengine, Saúl an-oburgoed. Degisoggu, bur an Filistea-yarse wakinnergebed. Deyobi, Saúl Israel-yargi-an-amidiid budar-itodagoed, an egi wakinnoed.”
1SA 27:2 David e-sordagan dulataled-ilanergwadmala (600) Gat-yarse, Maoc-machi-Aquis-reyga-maidse naded.
1SA 27:3 David e-sordaganmala Gat-neggweburgi, Aquis-walik gudii gusmalad. Bela sordamar na e-omegan, degi, e-mimmigan sesgusmalad. David e-ome-warbogwad eba sesad. Gwensak, ome-Jezreelʼgined-Ahinoamʼye-nugad, baiddi, ome-Carmelʼgined-Abigailʼye-nugad. Abigailʼde Nabal-omega gusadid.
1SA 27:4 Saúl wisguargua, David Gat-yarse-wakiteye, bar balegichasulid.
1SA 27:5 David, Rey-Aquisʼga sogded: “Dummad, ar napira wile be an-dakele, anga neggwebur-gwagwen be udage, agi an gudii guegar. Ar be-neggwebur-dummadgi an maile, gwen nabirsulid, ichakwa angi noed.”
1SA 27:6 A-ibagine, Aquis, Davidʼga Siclag-neggwebur uksad. A-ulale, we-garda-narmaklenaidse, Siclag-neggwebur Judá-e-reymargadid.
1SA 27:7 David, Filisteaʼmar-yargi birgagwen gaka-nii-warbake gudii gusad.
1SA 27:8 David e-sordaganmala, Gesur-dulemar-ibe, Gezer-dulemar-ibe, degi, Amalec-dulemar-ibe ibmar-atursamalaga ardamalad. Ar we-dulemardi, Shurʼye-neg-nugadsik, Egipto-yar-abingunaidse na dikasurgus bukwamalad.
1SA 27:9 David wemarse bila-onoalile, bipisaale machergan, omegan dula-obesdasulid. Rey-Aquisʼse gannar daged-iduale, sibad-wawaadmar, moli-bebe-nikadmalad, moli-uayasuidmar, moli-yargan-muremalad, degi, mormarse-bakale, susdaed.
1SA 27:10 Ar Rey-Aquis Davidʼse egichialile: “¿Emi ibi-neggwebur-ibe be ibmar-susmala?” David abin-imakdedaed: “Judá dad-nakwed-argan-nuedsik neggwebur-bukwad-ibe an susmala.” Imbagwenale, ega sogdedabalid: “Jerameel dad-nakwed-argan-nuedsik neggwebur bukwad-ibe an susmala.” Imbagwenale, sogdedabalid: “Ceneoʼmar dad-nakwed-argan-nuedsik neggwebur-bukwad-ibe an susmala.”
1SA 27:11 David bipisaale machered-wargwenad, degi, ome-wargwenad, dula obedasulid. Ar ade, binsadaed, Gat-neggweburse an dula-nidele, an ibmar-imakdiid an-barsogoye. David Filistea-yargi-maigusgu, weyobi ibmar-imakdii gusad.
1SA 27:12 Rey-Aquisʼdi, Davidʼgi bensuli gusad. Ar reydi binsadaed: “David e-dulemar-Israel-dorgan-e-isdar-dakega na imaksaye. Degisoggu, anga arbadii sadeguoye na binsaed.”
1SA 28:1 A-ibagangine, Filisteaʼmar Israel-dulemargi bila-ononamalaga na e-sordamar-oatosmalad. Degidgine, Rey-Aquis Davidʼga sogded: —David, be wisguega an bega sogdo, be, degi, be-sordaganmala anba bila-ononamaloed.
1SA 28:2 David abin-sogded: —Dummad, degirdi nabirdo. An ibi sunna imake be an-dakodibe. Rey-Aquis sogdebalid: —Ar deyobile, emi-onodedgi mer dule-an-oakalogegala, angi-nakulegega an be-nug-imakdo.
1SA 28:3 Deunni, Samuel bato burgwisad. Bela Israel-dulemar ega bosgusmalad, geb e-neggwebur-Ramáʼgi digsa gusmalad. Saúlʼdi Israel-yargi nergan-onis gusad, degi, dule-burgwarmaladse-idakmalad-onis gusbalid.
1SA 28:4 Filisteaʼmar na e-sordamar-oatosmargu, Sunemʼgi ambikunonimalad. Geb degine, Saúl, Israel-sordamar-oatosmogad. Geb Gilboaʼgi ambikudapmarmogad.
1SA 28:5 Ar Saúl, Filistea-sordamar-dakdegua, dobguded, geb bela-bela nig-argwated.
1SA 28:6 A-ulale, Saúl, Bab-Jehováʼse idaksad. Degi-inigwele, Bab-Jehováʼdi gabdakedba Saúl-abin-imaksasulid. Degi, Urimʼba gwen-abin-imaksasurbalid. Deginbali, Bab-Dummad-gayaburba-barsogmaladba, gwen abin-imaksasurbalid.
1SA 28:7 A-ulale, Saúl na e-sordamar-idudimaladga igar-ukded: —Ner-bundor-dule-burgwarmaladse-idaked be anga aminamala, adi, an ese idaknaegar. Abin-sogdemalad: —Endorʼgi ner-bundor-wargwen maid.
1SA 28:8 Saúl, na dule-baidyob-imakega mor-yogasaled-yosa, mutikidba ner-bundor-daknaded. Geb sorda-warbo eba naded. Geb Saúl ner-bundorse-modapgu, ega sogded: —Dule-burgwisad-e-burbase be anga gorbi an be-abedo. An bega dule-nug-bioed-e-burba be anga oyoged imake.
1SA 28:9 Ner-bundor abin-sogded: —¿Saúl-ibmar-imaksad be wissursi? Ar we-yargine, Saúl, nergan-onis gusad, degi, dule-burgwarmaladse-idakmalad-onis gusbalid. ¿Ar ibiga be an-oburgwega be an-yardakdaniki?
1SA 28:10 Saúl abin-sogded: —¡Bab-Jehová-nuggi ise-sogar an bega soged, ar we-ibmar-ulale, dule bipisaar gwen akar be-imakosulid!
1SA 28:11 Ner-bundor Saúlʼga sogded: —¿Ar doa bega oyobi be an-abesunna? Saúl abin-sogded: —Anga be Samuelʼse gole.
1SA 28:12 Ner-bundor, Samuel-dakargua, binnasur-gote, sogded: —¡Ar be Saúl! ¿Ibiga be an-yardaksa?
1SA 28:13 Rey-Saúl ega-sogded: —Mer be dobgue. Ibmar be daksad be anga soge. Ner-bundor abin-sogded: —Sergan napa-urba-ainidaniki an daked.
1SA 28:14 Saúl abin-sogded: —¿Igi daklege? Ner-bundor ega sogded: —Dule-sered mor-dummadgi-bipirmakar nodanikid. Ar Saúl magar-itosgu, we, Samuel-gued, na dulluu napase imaksad.
1SA 28:15 Samuel, Saúlʼga sogded: —¿Ar ibiga wese-dagega be anse gole? Saúl abin-sogded: —An bela-bela bukib-itoged. Ar Filisteaʼmar angi bila-ononaid. Bab-Dummaddi angi aibachad. E-gayaburba-barsogmaladba, gabdakedba bar an-abin-imaksulid. A-ulale, an bese gochad, anga be sogega ibu an imakoe.
1SA 28:16 Samuel abin-sogded: —Ar Bab-Jehová begi aibachale, degi, be-isdaradga gunonibalile, degite, ¿ibiga be anse idaksunna?
1SA 28:17 Ar igi an ibmar-sogsagusa, deyobi Bab-Jehová na ibmar-imaksad. Bab-Jehová reyga-maid be-obelosad, be-sorda-David, be-anale, reyga nug-imaksad.
1SA 28:18 Bab-Jehováʼba be ibmar-imaksasulid, ar Amalec-dulemar bela be ogilogoye bega-soglesadba gwen be imaksasulid. A-ulale, Bab-Jehová emi weyob be-imaksad.
1SA 28:19 Bab-Jehová Filisteaʼmarga be-urmakoed, degi, Israel-dulemar-urmakbaloed. Banedse, be, degi, be-mimmigan, burgwemaloed. Geb an-walik be megnonimaloed. Deginbali, Bab-Jehová Filisteaʼmarga Israel-dulemar-danar-bukwad-urmakbaloed.
1SA 28:20 Ar Saúl, Samuel-ega-ibmar-sogsadba, bela-bela dobe-itosad. Degisoggu, Saúl ukiagwar aimukusunnad. Ar a-ibagine, Saúl, mas-guchasuli mutikguded, degisoggu, ukudbali burgwebibalid.
1SA 28:21 Ner-bundor Saúl-bela-bela-dobe-ito-dakgu, ese naded, geb ega sogded: —Dummad, an beba ibsasad. Ar be-sogedba an ibmar-imaksad-ulale, burgwed-naga an gusad.
1SA 28:22 Emigindi, an bega sogdo, anba be ibsae. An mas bega imakoed be gunno, adi, be gangudoed. Agi geb be naoed.
1SA 28:23 Ar Saúlʼdi mas abesulid. Degi-inigwele, e-sordamar-idudimaladdi ner-bundor ibmar-sogsadyob egi alamaknai guarmalad. Degisoggu, Saúl eba ibsassunnad. Saúl napagi-meremaidgi gwisgusad, geb gangi sigisad.
1SA 28:24 Ner-bundor moli-bebe-nikad-wardadagwad-senigwad e-neggi-maid gwae oburgwisad. Deginbali, madubur omukusbalid, geb madu ina-sate yosad.
1SA 28:25 Mas akwigusgua, ner-bundor, Saúlʼga, degi, e-sordamar-idudimaladga mas uksad. Saúl, e-sordaganmala, mas-guchad-sorba, a-mutikidbali, bela duurmakdemalad.
1SA 29:1 Filisteaʼmar belagwapa na e-sordamar-bila-onomalad Afecʼgi oatosad. Israel-sordamardi, Jezreelʼgi dian-maid-dikarba na danar-ambikusmalad.
1SA 29:2 Filisteaʼmar-e-dummagan, na e-sordamar-dulatar-mergued-abargi (100), degi, miligwen-mergued-abargi (1,000) nadapmalad. Amar-sorbali, Rey-Aquis, David, degi, e-sordaganmala nadapmalad.
1SA 29:3 Filistea-sordamar-e-dummagan egicharmalad: —We-Hebreo-dulemar, ¿ibu wegi samala? Rey-Aquis abin-sogded: —¿Davidʼde be akudakmarsi? Ar iduardi, Israel-e-rey-Saúlʼga arbadii gusadid. David birgagwen-gakagus an-walik gudiid. Anse nonikid-akale, gwen akar ibmar-imakdii an dakdisulid. Degisoggu, an egi bensulid.
1SA 29:4 Ar Filistea-sordamar-e-dummagan, Rey-Aquisʼse uludmala, ega sogdemalad: —Ar bia ega be-neg-uksagusa ase gannar be barmide. Bila-onolegoedse mer anmarba-naega be imake. Abakale, anmar urwenaidgi anmargi aibinnalile. Ar anmargi-aibinnonikile, anmar-sordamar-e-nono e-dummadga sedoed. We-igar ega bur-nued noed, adi, e-dummadbo nuguegar.
1SA 29:5 Filistea-dummagan sogdebalid: —¿We-Davidʼga omegan gwirnanai, degi, weyob namaknanai dasursi? ‘Saúl, miliba (1,000) e-isdarmalad-oburgwisad, Davidʼdi, miliambe (10,000) e-isdarmalad-oburgwisad.’
1SA 29:6 A-ulale, Rey-Aquis, Davidʼse gochad, ega sogded: —Bab-Jehová napira dula-maisoggu, an bega soged. Ar bedi dule-innikigwadid. Bila-onolegoedse anba nabi an be-abegenad. Be anse nonikid-akale, gwen be akar ibmar-imakdii an be-dakdisulid. Degisoggu, an begi bensulid. Ar Filistea-sordamar-e-dummagandi begi benmalad.
1SA 29:7 Degisoggu, gannar nuedgi be-negse be nae, adi, Filistea-sordamar-e-dummagan mer isdar-itomalagar.
1SA 29:8 David, Aquisʼga sogded: —Dummad, ¿ibu an oakalosa? An bega arbaded-akale, emi-ibase, ¿an ibigi begi nosa be an-dake? ¿Ar ibiga be-isdarmaladgi urwebisuli an-abemala?
1SA 29:9 Rey-Aquis abin-sogded: —Bato an wisi. Be angardi Bab-Dummad-baliwituryob be gued. Degi-inigwele, Filistea-sordamar-e-dummagandi sogsamalad, anmarba be bila-onolegoedse naosurye.
1SA 29:10 Degisoggu, be, degi, be-maimar-beba-nonimalad, banedse wakudaryalaba bemar gwisgumalo. Geb dad-nakwialile, bemar naoed.
1SA 29:11 Degisoggu, banedgine, David na e-sordaganmala, gannar Filistea-yarse-namalaga wakudaryalaba gwisgusmarsunnad. Ar Filisteaʼmardi Jezreel-nebase nadmalad.
1SA 30:1 David, e-sordaganmala, ibapaagi Siclagʼse modapmalad. Geb dakdapmalad, Amalec-dulemar Neguev-yarse uboapmala, degi, Siclag-neggwebur ogumaksamala.
1SA 30:2 Amalec-dulemar Siclag-dulemar-oburgwissurmalad. Degi-inigwele, omegan, burwigan, degi, serganse-bakale, gasa sesmalad.
1SA 30:3 David, e-sordaganmala, Siclagʼse mosmargua, neggwebur gummakar-sii dakdapid. Degine, e-omegan, e-machimala, e-bunamala, gales-seles dakdapmalad.
1SA 30:4 David, degi, eba-gudimalad, gammu-dinguedse ise-gormakar bodmalad.
1SA 30:5 David-e-ome-warbogwad, Jezreelʼgined-Ahinoam, degi, Carmelʼgined-Abigail, gales-selesmarmogad. Abigailʼde, Nabal-e-omega-gusadid.
1SA 30:6 David dobe-itoded, ar e-sordamar akwagi David-maked sokarmalad. Ar ade, e-sordamar, e-machimala gales-selesad-ular, e-bunamala gales-selesad-ular, bela sae-itodmalad. Degi-inigwele, David e-Bab-Dummad-Jehováʼgi bensulidba nig-ganguded.
1SA 30:7 Geb David, dule-irwa-Bab-Dummadse-goled-Ahimelec-machi-Abiatarʼga sogded: —Anga mor-efodʼye-nugad be sedage. Abiatar ega mor-efodʼye-nugad senonigua,
1SA 30:8 David, Bab-Jehováʼse idakded: —¿An we-dulemar-atursamalad baleginnae? ¿An bargadapoe? Bab-Jehová abin-sogded: —Be baleginnae. Be bargaoed. Be-dule-galesmalad be ollor imakoed.
1SA 30:9 David, e-sordagan-dulataled-ilanergwa-merguedmala (600) naded. Geb Besor-dian-maidse mosmalad. A-mosgua, sordagan e-dulataled-ilabo (200)
1SA 30:10 bela-bela geggusmalad, geg dian-obak gusmalad, melledmarsunnad. Degisoggu, David na e-sordagan-dulataled-ilabake (400) dian-obaksamaladmala Amalec-dulemar-balegitesunnad.
1SA 30:11 David-e-sordagan Egipto-dule-wargwen sapurba amismalad. Geb Davidʼse sesmalad. Masgi oguchamalad, degi, ogobsamarbalid.
1SA 30:12 Ega higo-sategwad-madu gwagwen, degi, uva-sategwad-madu gwabo uksamarbalid. Ar ade, we-dule ibapaagus na yoo mas-gunne gudiid. Geb Egipto-dule mas-guchagu, ganguded.
1SA 30:13 David ese egichided: —¿Doa be-dummadi? ¿Bia be daniki? Egipto-dule abin-sogded: —An, Egipto-duled, Amalec-e-maid. Ar an ibapaagus uellediid. Degisoggu, an-dummad an-mete nadsunnad.
1SA 30:14 Anmar Cereteo-dulemar-yar-dad-nakwed-argan-nuedsik ubos gusmalad. Judá-dulemar-yar-dad-nakwed-argan-nuedsik ubos gusmarbalid. Caleb-yar-dad-nakwed-argan-nuedsik ubos gusmarbalid. Deginbali, anmar Siclag-neggwebur ogumaksamarbalid.
1SA 30:15 David ega sogded. —We-dule-atursamalad-bukwadse be anmar-nide. Egipto-dule sogded: —Bab-Dummad-nuggi ise-sogar be anga soge, be an-oburgosurye, degi, an-dummadga be an-ukosurbarye. Ar be weyob anga sogerdi, wemar-bukwadse an be-nidodo.
1SA 30:16 Egipto-dule Amalec-dulemar-bukwadse David-sessunnad. Amalec-dulemardi Filistea-yargi, degi, Judá-yargi ibmar-bukidar-susmalad-ulale, bela danar-bukwadgi iba-ononanaid, gobnanaid, degi, mas-gunnanaid.
1SA 30:17 David, e-sordaganmala, bolegoedbali egi ubodapid. Geb amarbo banegidse bila-ononai osedosad. Unnila Amalec-sordamar-sapingwamalad dulataled-ilabake (400) durgusmalad. Amala moli-yargan-mureged-birgi-sii wakichamalad.
1SA 30:18 Amalec-dulemar bela-ibmar-atursasmaladi, David na gannar susad. Deginbali, David, e-ome-warbogwad gannar senonibalid.
1SA 30:19 E-ibe ibmar-atur-imaklesgusad yoggussulid. Deginbali, David, e-burwigana, e-sergan, e-machimala, e-bunamala, bela gannar senonibalid.
1SA 30:20 Deginbali, David bela sibad-wawaadmar, degi, ibmar-durgan susbalid. Bela sordamar-ibmar-durgan-iduar-semamaidi gornadapmalad: “¡We-ibmar, Davidʼgadid!”
1SA 30:21 A-sorbali, David, gannar Besor-dianse nonikid. Ar bia e-sordagan-dulataled-ilabogwad-geggusmalad (200) besgusmala, ase gannar nonikid. Amardi, David-abin, degi, sordagan-eba-gudimalad-abin noarmalad. David amarse nonikid, adi, ega sogega nueganbi sogeye.
1SA 30:22 Davidʼba-sordagan-gudimalad-abargi sorda-isganamar, sorda-nobegalamar gudimarmogad. Amardi sogdemalad: —Wemardi, anmarba arbisulid. Degisoggu, anmar-gannar-ibmar-susadi, anmar wemarga uked sate. Na e-omegandi, degi, e-mimmigandi na sumala. Na namarsunna.
1SA 30:23 David sogded: —Gwenadgan, mer weyob be damala. Bela Bab-Jehová anmarga ibmar-uksad, anmar-bendaksad, deginbali, anmar-ibe ibmar-atursalesadi, Bab-Jehová anmarga uksabalid.
1SA 30:24 Degisoggu, ar doa bemarba ibsaoe. Ar dule-urweapid, degi, dule-ega-ibmar-edarbismalad, yopira ibmar nikumaloed.
1SA 30:25 A-ibagine, David, Israel-yargi we-igar mesisad. We-igardi, we-garda-narmaklenaidse maid.
1SA 30:26 David, Siclag-neggweburse-nonikid-sorbali, e-aimar-girmar-dummagan-Judáʼginmaladga, ibmar-susadi abar ega barmisad. Weyob ega sogsii barmisad: “Bab-Jehová-e-isdarmalad-annik anmar gannar ibmar susad. Wegi an bemarga binsa barmisiid.”
1SA 30:27 David we-girmar-dummaganga ibmarmar barmisad: Girmar-dummagan-Betelʼginmaladga, Neguev-Ramotʼginmaladga, Jatirʼginmaladga,
1SA 30:28 Aroerʼginmaladga, Sifmotʼginmaladga, Estemoaʼginmaladga,
1SA 30:29 Racalʼginmaladga, Jerameel-neggweburginmaladga, Ceneo-neggweburginmaladga,
1SA 30:30 Hormaʼginmaladga, Corasánʼginmaladga, Atacʼginmaladga,
1SA 30:31 degi, Hebrónʼginmaladga ibmarmar barmisad. Deginbali, ar David bia e-sordaganmala gudigusmala, a-neggwebur-girmar-dummaganga ibmar barmisbalid.
1SA 31:1 Filisteaʼmar Israel-dulemargi bila-ononadmalad, geb Israel-dulemar amar-abin wakitemalad. Israel-dorgan bukidar Gilboa-yargi burgwismalad.
1SA 31:2 Geb degine, Filisteaʼmar Saúl, degi, e-machimala-balegitemalad. Geb Saúl-e-machimala Jonatán, Abinadab, degi, Malquisúa oburgwismalad.
1SA 31:3 Geb Saúlʼgi bela akadmalad, geb sigu-mimalad Saúl-onailikgusad. Saúl na bela-bela nailikgus itogua,
1SA 31:4 ega-sigu-abgaed-seedga sogded: “Be-es-suid be onoge. Agi be an-oburgwe. Adi, wemar Bab-Jehová-akudakmalad mer an-oburgwega, degi, mer angi dodomarbaligar.” Ar Saúlʼga-sigu-abgaed-seed na bela-bela dobe-itoged, yapa Saúl-oburgwe gusad. Degisoggu, Saúl na e-es-suid onosad, geb na dukin oburgwisad.
1SA 31:5 Ar sigu-abgaed-seed Saúl-burgwis-dakargua, e-es-suidgi na dukin oburgwismogad. Deyob Saúlʼbo burgwismosunnad.
1SA 31:6 Weyobi, Saúl, e-machimala-warbaagwadmala, ega-sigu-abgaed-seedmala, degi, bela e-sordaganmala, iba-galagwena burgwismalad.
1SA 31:7 Israel-dulemar-neba-obakar-bukwamalad, degi, Jordán-diwar-obakar-bukwamalad, ar Israel-sordamar-wakite daksamargua, degi, Saúl, e-machimarmala-burgwis daksamarbargua, e-neggweburmargi ainidmarmogad, geb wakitemarmogad. Weyobi, Filisteaʼmar we-neggweburmar sunonimalad.
1SA 31:8 Banedgine, Filisteaʼmar dule-burgwismalad-ibe ibmar-suega-nonimargu, Saúl, e-machimarmala Gilboa-yargi burgwar-mamai dakarmalad.
1SA 31:9 Geb degine, Saúl-ibe nono-egwachamalad, e-ibe bila-onogedgi-ibmar-ebulemalad susmalad. Geb gayaburba-berbemalad e-bab-dummad-neggi-sogega, degi, e-dulemarga gayaburba-sogega, bela Filistea-yargi gayaburba-berbemalad barmismalad.
1SA 31:10 Saúl-e-ibmar-bila-onogedgi-ebulemalad bab-bundor-Astarotʼse-goled-neggi urbenonimalad. Saúl-muidi, ingwa-Betsán-galu-matusulid-akwabiidgi nasiksamalad.
1SA 31:11 Jabes-De-Galaadʼginmalad igi Filisteaʼmar Saúl-imaksamala, wisguarmargu,
1SA 31:12 mutikidba, e-dulemar-bur-bulegan Betsánʼse nadmalad. Saúl-e-mui, degi, e-machimala-e-mui Betsán-galu-matusulid-akwabiidgi-naid-odesmargua, Jabes-De-Galaadʼse muimar senonimalad. Agine muimar-ogumaksamalad.
1SA 31:13 Geb sorbali, e-garmar susmalad, degi, Jabes-neggweburgi ingwa-soled-sapi-urba e-garmar digsamalad. A-sorbali, ibagugle (7) mas guchasurmalad.
2SA 1:1 Rey-Saúl-burgwisad-sorbali, David, Amalec-dulemargi-nakwisbargua, Siclag-neggweburse nonikid. Agi, ibabo gudii gusad.
2SA 1:2 Ibapaagusgua, dule-gwensak Davidʼse nonikid. We-dule Rey-Saúl-sordagan-bukmaladgi danikid. E-mor-yoid siir-siir-nonikid, e-nono olli-sichi nonibalid. We-dule Davidʼse nonigua, David-asabin dulluu napase imakded.
2SA 1:3 Geb David ese egisded: —¿Bia be daniki? We-dule David-abin sogded: —Israel-sordamar-danar-danar-bukwadgi an wakicha-danikid.
2SA 1:4 David ese egisdebalid: —¿Igi neg-gusa? Bela anga sogo, mer angi odukuo. We-sorda abin-sogdebalid: —Israel-sordamar bila-ononagu, bela sikirmakdemalad, bukidar oburgwilesmalad. Degine, Saúl, e-machi-Jonatánʼbogwa oburgwilesmogad.
2SA 1:5 David sorda-ega-gayaburba-senonikidga sogded: —¿Igi be nabir wisi, Saúl, e-machi-Jonatánʼbogwa oburgwilesa?
2SA 1:6 We-sapingwa-ega-gayaburba-senonikid abin-sogdebalid: —Gilboa-yar-nugadse binsa an atakdinad. Agi an Rey-Saúl, eswargi-akani-gwichi an dakalid. Aginbali, e-isdarmalad egi ebirdani an daksabalid. E-isdarmalad ur-napaginmaladgi egi daniki, degi, moli-birgi-sii egi danimarbali an daksad.
2SA 1:7 Saúl ansik-aibiriargua, an-daksad, geb anse gollalid. Agine, an abin-imakdemogad: ‘Degite, sogdeen.’
2SA 1:8 ”Geb anse egichialid: ‘¿Be doawa?’ Geb an abin-imakded: ‘An Amalec-duled.’
2SA 1:9 ”Geb Rey-Saúl anga sogdebalid: ‘Be an-oburgwe, an geggusa, an-bar-guosuli.’
2SA 1:10 ”Agi, an ese nadsunnad. An dakdegua, Saúl bar-san-onogosuli, an oburgwissundo. Dummad, Rey-Saúl-ibe an e-ologurgin susad, or-swidagi-nagumaladse-bakar e-ibe an susbalid, bega-sedagega.”
2SA 1:11 David bela itosgua, naibid-dummad itononikid. A-ular, e-mor-yoid na siir-imaksad. David-e-sordagan itosmarmogua, deyob imaksamarmogad.
2SA 1:12 Rey-Saúl, e-machi-Jonatán-ebo es-suidse ibitosmalad-ulale, dummad-bonanai-guarmalad, bar-mas-itossurmalad, neg-mutikidse. Deginbali, Bab-Jehová-sordamar-ibitosmaladga, degine, Israel-dulemarga, bonanai-guarmarbalid, ar es-suidse ibitosmalad.
2SA 1:13 Geb degine, David, sapingwa-ega-gayaburba-senonikidse egisdebalid: —¿Be bialidi? Sapingwa abin-sogded: —An Amalec-dule, an Israel-dulesuli.
2SA 1:14 David sabsur ega sogded: —¿Ibiga yogasaar be Rey-Saúl-oburgwisa? Ar wede, Bab-Jehová na nug-imaksa gudinad.
2SA 1:15 Degisoggu, David e-sorda-gwensakse goted, ega sogded: —¡We-dule anga oburgwe! Sorda David-sogedba imaksad, Amalec-dule-oburgwissunnad.
2SA 1:16 Degi-gunai, David sogdebalid: —Na be dukin ablis-eosad, ar dukin na be-barsogsad, ar be sogsad: ‘An Bab-Jehová-dule-nug-imaksa-gudiid oburgwisye.’
2SA 1:17 David, Saúl-ulale, degi, Saúl-machi-Jonatán-ulale bukib-binsadiidba, we-namaked namaknai gualid.
2SA 1:18 A-namaked weyob nug-imaksad, “warsigi-namakleged-igar.” Degine, we-igargi bela Judá-dulemar-odurdakmarbaloye sogsad. We-namaked Jaser-gardagi weyob narmakar maid:
2SA 1:19 “¡Israel-dulemar, nue-wilesmar! Sordamar-nug-nikamalad, Israel-yalaganba nue-ibitos. Israel-sordamar-niga-gandikmalad, ibsas oburgwilesmar.
2SA 1:20 ”Gat-neggweburgi mer egi sunmaknai gumalo, Ascalón-galimbaba mer be a-obardii gumarbalo, adi, Filistea-omegan, Bab-Dummad-wissur-gudimalad-e-sisgan, egi mer wergumalagar, ega mer gwirnanai gumarbaligar.
2SA 1:21 ”Gilboa-yalagan, melle bar begi dii wio, begi bar boo batosulid, napa-nabir-sanmakedga be bar guosulid. Ar Gilboa-yalagi Saúl-e-sigu-abgaedgi dodolesad. Agi Israel-sorda-niga-gandikmalad-e-sigu-abgaed, gutu-nagusadba, e-dakarmaked bergusad.
2SA 1:22 ”Jonatán-warsi, dulemar-abe-eossuli geg aibired, dulemar-oburgwissuli, geg aibirbalid. Saúl-es-suid ablis-eogedse damogad.
2SA 1:23 ”Saúl, e-machi-Jonatánʼbogwa an-ai-nueganmalad. Dula-gudiunni, na bangudsurmalad. Burgwedgine, na bangussurmarbalid. Ebogwadi, sulubbali bur gwae-gwae nanamalad, achumigur-nono-wawaadbali, bur bule gangumarbalid.
2SA 1:24 ”Israel-omegan, Saúl-burgwisadga be bomala. Saúl, mor-ginnid-nuegan-yoega, degi, lino-mor-nued-yoega, bemar-imaksad, olo-bired-yoega bemar-imaksabalid, a-ulale, ega be bomala.
2SA 1:25 ”Israel-dule-niga-gandikmaladi, bila-onogedgi ibiyob wilesmar. ¡Bila-onolegedgi burgwismalad! ¡Jonatán, Gilboa-yalagi oburgwilesad!
2SA 1:26 Jonatán, naibid-dummad be anga uksad. An-gwenadyob an be-sabgusad, wilub-obicha be an-akwisad. Be-sabgued omegan-sabgulegedba bur bule be an-sabgusad.
2SA 1:27 ”¡Israel-dule-niga-gandikmalad, bila-onolegedgi nue ibitosmar! Gingimar-bila-onogedgi-ebulemalad, bela bibichisad.”
2SA 2:1 Deyob-neggusad-sorbali, David, Bab-Jehováʼse idakdegusad. Geb David, Bab-Jehováʼga sogded: —¿Judá-yargi neggweburmar-bukwad-gwensakse an naoye? Bab-Jehová abin-sogded: —Eye, be nae. David gannar Bab-Jehováʼse egisdebalid: —¿Biti-neggweburse an nabi be an-abege? Bab-Jehová abin-sogdebalid: —Hebrón-neggweburse be megnao.
2SA 2:2 Degisoggu, David Hebrón-neggweburse nadegusad. David na e-omegan-warbogwad sesbalid, gwen Ahinoamʼye-nugad, Jezreel-neggweburginedid. E-ome-baidi, Abigailʼye-nugmogad, Nabal-e-omega-gusadid, Carmel-neggweburginedid.
2SA 2:3 Aginbali, David na eba e-sordamar sesbalid. David-e-sordamar na e-omegan, degi, e-mimmiganse-bakar sesmarmogad. Amar Hebrón-neggweburse megidapmalad, degi, neggwebur-dikarba-bukmaladse-bakale, megidapmarbalid.
2SA 2:4 Judá-dulemar deyob daksamargua, Hebrón-neggweburse nonimalad. Geb agine, Judá-dulemar, e-reyga-David-imakega David-nonogi gwallu-wawad eosmalad. Deginbali, Judá-dulemar David-owisosmalad, Jabes-dulemar-Galaad-yarginmalad, neg-uanse Saúl-digapmarye.
2SA 2:5 Agi, David, Jabes-De-Galaad-dulemarse e-sordagan barmisad, Rey-Saúl-digsamaladga weyob sogega: “Bemar be-dummad-Saúl-wile-daksamalad-ulale, neg-uanse dikapmalad-ulale, Bab-Jehová nued begi binsamalana gadin.
2SA 2:6 Bab-Jehová wile bemar-dakoed, e-ibmar-sogsadba bega ibmar-oyogoed. Bemar weyob Saúl-imaksadba, an bemarga sogmoga ibmar-nued an bemarga-oyomogoed.
2SA 2:7 Mer galakumalo, niga-ogannomalo. Be-dummad-Saúl-burgwissoggu, Judá-dulemar e-reyga an-nug-imaksamalad.”
2SA 2:8 Saúl-sordamar-e-dummad Ner-machi-Abner, Mahanaim-neggweburse Saúl-machi-Isboset-sesad.
2SA 2:9 Agi, Galaad-yargi reyga Isboset-nug-imaknonikid. Deyob Gesuri-yargi, Jezreel-yargi, Efraín-yargi, Benjamín-yargi, bela Israel-yargi reyga Isboset-nug-imaksabalid.
2SA 2:10 Saúl-machi-Isboset birga-durbo-nikadgi (40) Israel-yargi reyga megnonikid. Isboset birgabo Israel-yar-semai gusad. Unnila Judá-dulemarbi Davidʼba nagusmalad.
2SA 2:11 David Hebrón-neggwebur-akar Judá-dulemargi birgagugle (7) gaka nii-walanergwa (6) negsemai gusad.
2SA 2:12 Ner-machi-Abner, Saúl-machi-Isboset-sordaganmala Mahanaim-neggweburgi noded, geb, Gabaón-neggweburse modapid.
2SA 2:13 Sarvia-machi-Joab, David-sordaganmala nodmarmogad. Geb agine, Gabaón-dii-siid-dikarba na abingunonimalad. Bila-onomalaga na abin-abin gwisgunonimalad.
2SA 2:14 Degidgine, Abner, Joabʼga sogded: —Be-sapingan an-sapinganbogwa na war-wargwen ourwemalo, anmar dakega doamar bur buledi. Joab abin-imakdemogad: —Nued. Be-sogedba imakmalo.
2SA 2:15 Sapingan emarbi-mergu na-abin-abin gwisgunonimalad. Saúl-machi-Isboset-sordagan-Benjamín-wagan e-ambe-gakabo urwega bukusmalad (12), degine, David-sordagan e-ambe-gakabo bukusmarmogad (12).
2SA 2:16 War-wargwen, muchub-muchub nonogi na gananai-guarmalad, degine, es-suidgi muchub-muchub dikargi na earwenanai guarmarbalid. Deyob darekwaa burgwismalad. Deyob-ululesadba, Gabaón-walik-neg-naid, Helcat-Hazurimʼye nuggunonikid.
2SA 2:17 A-ibagine, nue-undar bila onolesad. Abner, degi, Israel-sordaganmala, David-sordaganse galakunai gusmalad.
2SA 2:18 Agine Sarvia-masmala-warbaagwad urwenai gusmalad: Joab, Abisai, degi, Asael. Asaelʼdi gadi-abarmaked, goe-sapur-abarmakeyob abarmaked.
2SA 2:19 Asael, Abner-balegite gusad, gwen indaksasulid, geb agi barganonikid.
2SA 2:20 Abner sorsik-atakdegua, ega sogded: —¿Ar be Asael? Asael ega sogded: —Eye, ani.
2SA 2:21 Abner ega sogdebalid: —Mer-bar an-bareginne, dule-baidse be achae, a-e-ibmar be sunae. Asael eba ibsasulid.
2SA 2:22 Abner gannar Asaelʼga sogdebalid: —Mer bar be an-bareginne. ¿Anse be burgwebie? Ar an be-oburgwisale, ¿igi be-ia-Joabʼga an sogosunna? Binsa be-ia anbo urwedago-itole.
2SA 2:23 Asael indaknaisursoggua, Abner eswar-e-sorsikidgi Asael-dikargi sikaa imaksad. Eswar Asael-e-saderba butuu yarganba nosad. Geb aimukudgu, yog-burgwar gusad. Dule-igarba-nasdamalad bela gwisgusdamalad, Asael-burgwar-maid-dakegar.
2SA 2:24 Joab, Abisaiʼbogwa Abner-baregitemarmogad. Dad-dogmaidgi, yar-mullu-Ammaʼye-nugadse nonimalad. A-yar-mullu Gabaón-negsulidgan-igar-maidba Gía-neg-nugad-asabin siid.
2SA 2:25 Benjamín-wagan Abner-bendakega, Abner-dikarba gwisgunonimalad. Yar-mullugwagi gwisgunonimalad.
2SA 2:26 Agine Abner iseedi Joabʼse gotegusad, ega sogded: —¿Anmar weyob na dukin-dukin-oburgwedii sadeguode? ¿Be wissursi, unnila anmar na gwage-nunmaked amimaloe? ¿Sana be-sordaganga be sogoe, mer gwenadgan-bargamarye?
2SA 2:27 Joab abin-sogded: —¡Bab-Dummad-Dula-Maid-nukad napira an bega soge! Be sunmaksasulina, an-sordamar be-indakosurmalanad, unnila neg-oibogedse be-indakmaloenad.
2SA 2:28 Degi-sogsagua, Joab gar-trompeta-ogote gusad. Geb bela e-sordamar boo ambikusmalad. Israel-dulemar-sorba bar abarmaksasurmalad. Degisoggu, bar ulussurmalad.
2SA 2:29 Abner, e-sordaganmala neg-mutikidba Arabá-igarba nade gusmalad. Geb Jordán-diwar obaksamarbalid. Agine, Bitrónʼye-neg-nugad obaksamarbalid. Degi, geb Mahanaim-neggweburse modapmalad.
2SA 2:30 Joab, Abner-barganaid-indaksad-sorbali, gannar-nonikid. Geb agine, Joab, e-sordagan-ebisega sordagan-onmaknai gualid, dakega, doamar napidibe. Daklenonikid, Asael sate, degine, David-sordamar e-ambe-gakabakebak (19) satebali.
2SA 2:31 David-sordamardina, Abner-sordamar-Benjamín-wagan e-dulataled-ilapaa gaka dulapaa (360) oburgwisad.
2SA 2:32 Geb degine, David-sordamar Belén-neggweburse Asael-burgwisad sesmalad. E-babgan-neg-uan-maidgi digsamalad. A-mutiki, Joab, geb e-sordaganmala nade gusmalad. Bolegoedba, Hebrón-neggweburse modapmalad.
2SA 3:1 Saúl-sordagan, David-sordaganbogwa undar bila-ononanai gusmalad. David e-negsemaid gangumai-gangumai gualid. Saúl-sordagan-e-negsemaiddina nollomakmai-nollomakmai guded.
2SA 3:2 David Hebrón-neggweburgi-maiun, ega we-masmala gwalulenonikid: Amnón, machi-sailanagined. Amnón-e-nana Ahinoamʼye nugad, Jezreel-neggweburginedid.
2SA 3:3 Sailagined-sorbalid, Quileab nuggunonikid. Quileab-e-nana, Abigailʼye nugad. Abigail, Nabal-omega-gusadid, Carmel-neggweburginedid. Baagine, Absalón gwalulesad. Absalón-e-nana, Maacaʼye nugad, Talmai-e-sisgwad. Talmaiʼde, Gesur-neggwebur-e-reyd.
2SA 3:4 Bakegi, Adonías gwalulenonikid. E-nana, Haguitʼye nugad. Ataledgi, Sefatías aidenonikid. E-nana, Abitalʼye nugad.
2SA 3:5 Nergwadgi (6) Itream gwalulenonibalid. E-nana, Eglaʼye nugad, David-e-ome-baidbalid. We-masmala, Davidʼga Hebrón-neggweburgi gwalulenonimalad.
2SA 3:6 David-sordagan, Saúl-sordaganbogwa bila-ononanaigusmalad. Degidbali, Abner, Saúl-sordagan-abargi gangumai gualid.
2SA 3:7 Epenne, Saúl ome-dikarbalid-nikus-gusad, Rizpaʼye nugad, Aja-e-sisgwad. Ibagwengine, Isboset, Abnerʼga sogded: —¿Ibiga be an-bab-Saúl-e-ome-dikarbalidse be gollali?
2SA 3:8 Abner Isboset-deyob-ega-sokargu, bela-bela isdar itosad. Geb Abner Isbosetʼga sogded: —¿Achu be an-daksi? ¿Judá-dulemarga mailedii be an-dake? Suli. An be-bab-Saúlʼga bule-an-arbadii gusa, be-gwenadganga, degi, be-aimargarbela an arbadii gusbalid. Aginbali, an nue-be-akwisbalid. Davidʼga an be-urmaksasurbalid. Emisgindi, be anga sognaid, we-omebo an akar-gusye.
2SA 3:9 Ar Bab-Jehová, Davidʼga ibmar-imakoye ise-sogar-sogsagusad an imaksasulile, Bab-Dummad sabsur an-odurdaknai gussunno.
2SA 3:10 Ade, Bab-Jehová sogsa gusad: ‘Saúl-yar-bela-semaid Davidʼga an bela ukoye. David bela Israel-yar-naid seoed, Judá-yar-naidse-bakar, Dan-neggwebur-siid-akale, Beerseba-neggwebur-siid-ugakaase yar-seoye.’
2SA 3:11 Ar Isboset nue Abner-dobsoggua, bipisaale Abner-abin gochasulid.
2SA 3:12 Deginbali, Abner, Davidʼse garda-berbemalad barmisad, ega sogegar: “¿Doa-yar nai be dake? ¿Ar we-yar begadsursi?” Agi, Davidʼga sogdebalid: “Anmar anbo igar-mesmala. Bela-Israel-dulemar-e-dummadga-guega an be-bendakoed.”
2SA 3:13 David abin-imaksamogad: “Nabir. An bebo-igar-meso. An bega sogbargwelo: Be anse danikile, anga Saúl-e-sisgwa-Mical sedago. Degisulile, mer anse-dagedgi be binsao.”
2SA 3:14 A-sorbali, David, Saúl-machi-Isbosetʼse e-garda-berbemalad barmisad. Weyob ega sogdapid: “An-ome-Mical gannar be anga uko. Ar Filistea-e-abgan-uka-duku dulatar-merguedgi (100) an bennusgusad.”
2SA 3:15 Isboset dulemar-barmisad, Lais-machi-Paltiel-annik Mical-sunamalaga. Paltiel, Mical-e-suid.
2SA 3:16 Paltiel, Mical-sorba ogormaknadapi nadegusad, deyobi Bahurim-neggweburse modapid. Agine, Abner ega sogded: —¡Be-negse be nae! Degi, Paltiel e-negse nadegusad.
2SA 3:17 Geb agi, Abner Israel-dummaganga sunmakded. Weyob ega sogded: “Dikasurgus David-be-reyga-gued bemar abediid.
2SA 3:18 Emisgindi, bemar deyob imakmalo. Ar Bab-Jehová, Davidʼga sogsa gusad: ‘David-an-nug-odummodiidba, an Filistea-dulemargi an-dulamar na bendakoye, an e-isdarmaladgi bela bendakbaloye.’ ”
2SA 3:19 Deginbali, Abner, Benjamín-dulemarga deyob sunmaksabalid. Degine, geb Hebrón-neggweburse nade gusad, Davidʼga sogega, deyob Israel-dulemar, Benjamín-dulemarse-bakale, nabir itomarye.
2SA 3:20 Abner Hebrón-neggweburse nonigua, David, Abnerʼgala, degine, e-bardakdimalad-e-dulagwenadgala (20) iba-ononai gusad.
2SA 3:21 Agine, Abner, Davidʼga sogded: “Dummad, an bega bela-Israel-dulemar-onmakega be an-imake, bebo igar-mesega. Adi, na be-sogedba be-negseoed nasgumai gudoed.” Bergusgua, David nuedgi Abnerʼga sogsad, degimaloye.
2SA 3:22 David-e-sordagan Joabʼmala bila-onogedgi urwedinonimargu, e-isdarmalad-ibe bukidar-ibmar-susa nonimalad. Deunni, Abnerʼdi bato Hebrón-neggweburgi nade gusad. Ar David nuedgi Abnerʼga degimaloye sogsagusad.
2SA 3:23 Joab e-sordaganmala nonigua, ega sognanai guarmalad, Ner-machi-Abner wegi gudigusye, Rey-Davidʼse atakapye. Rey-David nuedgi Abnerʼga sognai gusye, degimaloye.
2SA 3:24 Agine, Joab, Rey-Davidʼse naded, geb ega sogded: “¿Ibiga be nuedgi Ner-machi-Abner-abindaksa? ¿Ibiga be nuedgi barmisbali?
2SA 3:25 Be nue-wisimakaled, Abner doa-dule. Binsa wegi bese atakega arbisulid, be-yardakega bese atakapid. Bela be-ibmar-imaknaid-wisguega bese arbid.”
2SA 3:26 Joab, Davidʼbo-sunmaked-bergusgua, nade gusad. Geb Joab, Abnerʼse-gannar-gornaega e-sordagan-barmisad. Degidbali, a-dulemarde Sira-dia-siid-modapidgi, Abner-gannar-obirega imaksamalad. Joab, David-owisossuli weyob ibmar-imaknaid.
2SA 3:27 Abner Hebrón-neggweburse gannar-nonigua, Joab, Abnerʼbo-sunmakega yawagaksik bachikii Abner-sesad. Agi, Joab, Abner-e-sadergi esbunyar yalluu-imaksad, geb burgwenonikid. Deyob Joab, e-urba-Asael-oburgwilesad-ular, buged-mai Abner-imaksad.
2SA 3:28 Deyob-neggusad-sorbali, David wisgunonikid, geb sogded: “Ani, degi, an-sordagan dummaganga-mamaid, Bab-Jehová-asabin akar neg-imaksasulid. Anmar we Ner-machi-Abner-e-ablis eossulid.
2SA 3:29 Unnila Joab, degine, e-gwenadganmar, Abner-oburgwismalad. Bitigi Joab-gwenadgan we-bonigan degisadegu nikusmalana gadin: Boni-nalur nika guo, naibe-buna-yaa-maleged-nika gubalo, dule-muya-muya-nanamalad-nika gubalo, es-suidgi oburgwiledii gumarbalo, ukud-dummad-itodii gumarbalo. Bitigi we-bonigan degisadegu nikusmalana gadin.”
2SA 3:30 Weyob neg-gussunnad, Joab, e-gwenad-Abisaiʼbogwa Abner-oburgwismalad. Ar Abner Gabaón-yargi-urwelenaigu, Asael-oburgwisad. Agala, Joab, e-ia-Abisaiʼbogwa e-gwenad-Asael-burgwisad-ular, Abner-oburgwismalad.
2SA 3:31 David, Joabʼga, degi, bela dulemarga sogdebalid: “Abner-burgwisad-ular, nunmak-itogedba bela dulemar mor-siir-siir-imakmalo, gwage-nunmaked-mor yomalo, bukib-binsadii gumalo.” Degine, Rey-David Abner-mui-sorba nadapi gualid.
2SA 3:32 Abner Hebrón-neggweburgi digles gusad. Rey-David neg-uan-dikarbali nue-boale-ogormagwichi gusad, bela dulemar eba nue-bonanai gusmarmogad.
2SA 3:33 Degidbali, Rey-David, Abner-burgwisadga wile-itogedgi weyob namakded: “¿Ibiga Abner dule-isganayob burgwisa?
2SA 3:34 Abner, be-argan atinnar-nai gussulid, be-nagbela esgorogi atinnar-nai gussurbali. Igi dule, dule-isganase-oburgwile-damala, deyob be oburgwilenai gusad.” Abner-ular, bela dulemar-bomalad bur baligannosmalad.
2SA 3:35 Degidgine, bela dulemar ise-wilegar Davidʼga sogdemalad, neg-mutikgudoed-iduar wis mas-itoye. Davidʼdi na ise-sogar sogsad: “Neg-mutikguedse geb an mas-itogoye, an deyob imaksulile, Bab-Dummad sabsur-an-odurdakoye.”
2SA 3:36 Bela-dulemar David-deyob-sogsad nabir-itosmalad. Ar bela-dulemar Rey-David-ibmar-imakalile, nued dakdamalad.
2SA 3:37 A-ibagine, dulemar bela magar-daksamalad, Rey-David, Ner-machi-Abner-oburgwissulid.
2SA 3:38 Rey-David ega-arbamaladga sogsabalid: “¿Ar bemar nue-daksa, dule-nuga-nikad burgwisad?
2SA 3:39 An reyga-nugsales-inigwele, amba an gargangued nika-itosulid. Ar Sarvia-masmala bur sabsur dule-imakmaladid, a-ulale, an gargangued nika itosulid. ¡Bitigi Bab-Jehová a-dulemar e-ibmar-isgana-imaksadba nabossunnana gadin!”
2SA 4:1 Saúl-machi-Isboset Hebrón-neggweburgi Abner-oburgwilesye wisgusgua, dobee itoded. Geb bela-Israel-dulemar dobgudmarmogad.
2SA 4:2 Isbosetʼbali dule warbo gudimalad, dule-ibmar-atursamalad-e-dummagan. Gwensak, Baanaʼye nugad, baiddi, Recabʼye nugad. Amarde Rimón-masmala gued, Beerot-neggweburginmaladid, Benjamín-wagan-imbagi gudimarmogad. (Ar Beerot-neggweburde, Benjamín-yargadga gunonigusad.
2SA 4:3 Deunni, Beerot-dulemar Gitaim-neggweburse wakicha gusmalad. Degisoggu, emi we-garda narmaklenaidse, agi dule-ainebalidyob dakledimalad).
2SA 4:4 Deginbali, Saúl-machi-Jonatán machi-wargwen-geg-nanaed nikad. A-machi, Mefibosetʼye nugad. Mefiboset birgatar nikaunni, Jezreel-neggweburse gardamar-nonigua, soglenonikid, Saúl, Jonatán-ebogwa, oburgwilesye. Mefiboset-e-akwed deyob-itosgua, Mefiboset-gadebin imaksad. Ega gwae-gwae-abarmakdedbali, egi Mefiboset argwategusad. A-ulale, Mefiboset muya-muya nanagusad.
2SA 4:5 Beerot-dule-Rimón-e-masmala Recab, degi, Baana, Isboset-negse bela-bela-dad-ganaidgi nade gusmalad. Isboset-negse-dognonimargua, e-megedgi Isboset-gabmai daknonimalad.
2SA 4:6 Ome-Isbosetʼga-neg-akwediid orosgi-dakleged-trigoʼye-nugad-nudaksagua, gabid gusad. Agine, nabir Recab, e-gwenad-Baanaʼbogwa, Isboset-neggi basursunna dogsa gusmalad.
2SA 4:7 Negyaba dogsamargua, Isboset-gabmai-dakdapmalad, geb esbunyar Isboset-sadergi yaalluu-imaksamalad. Isboset-oburgwismargua, agi e-dukar egwachamalad, geb e-nono sesmalad. Mutikidbali Arabá-neg-nugad-igarba nadapi gusmalad.
2SA 4:8 Recab, Baanaʼbogwa Isboset-e-nono Davidʼga Hebrón-neggweburse sesmalad. Rey-Davidʼga sogdemalad: —Dummad, wegi anmar bega Isboset-e-nono sedani, Saúl-be-oburgwebidaed-e-machi-nono. Bab-Jehová we-ibagi bega-igar-nabos, Saúl-isdar-be-dakdigusad, e-masmalase-bakar, bega buged-imaksad.
2SA 4:9 Geb Davidʼdi, Beerot-dule-Rimón-e-masmalad-Recabʼga, degi, Baanaʼga sunmakded. Weyob ega sogded: —Bab-Dummad mag dulasaila-mai dakledo. Ar a an-sulibinsa-itodiid osulosad.
2SA 4:10 Dule anga Saúl-burgwisye sognonigusadi, anga gayaburba-nued sognoniye na binsasanad. A-dule, Siclag-neggweburgi anse galesgusad, geb anse oburgwiles gusadid. Ar a-dule anga-gaya-senonikidba deyob imakles gusad.
2SA 4:11 Ar bemar dule-isganamala, dule-nued e-neggi nue-gabmai-oburgwismalad, degite, ¿bemar bursunna? Emide, bemar Isboset-e-ablis-eosadi, ¿baisur-bemar-dako be angi binsamala? Suli, degisuli. Degisoggu, Bab-Jehová-Dula-Maid, bonigangi nue-an-bendaksad-nuki an soged: ‘Bemar oburgwilemarmogoye.’
2SA 4:12 Agine, David, Recab-oburgwega, degi, Baana-oburgwega e-sordaganga igar-uksad. Ebogwad oburgwiles gusmalad, e-arganmar bela-siksamalad, e-nagmarse-bakale, siksamarbalid. Ebogwad, Hebrónʼgi-dia-siid-naba bannu-bannu nasiklesmalad. A-sorbali, Isboset-e-nonodina, Hebrón-neggweburgi, Abner-neg-uangi digsamalad.
2SA 5:1 David Hebrón-neggweburgi maigu, bela-Israel-dulemar danar-danar-bukwamalad, Davidʼse nonimalad, geb ega sogdemalad: “Anmar bebogwa na ablis-galagwenmaladid.
2SA 5:2 Saúl anmar-reyga-maiunni, be, bila-onogega Israel-sordamar-sesdaed, degi, be gannar sordamar-senonidabalid. Agine, Bab-Jehová bega sogsad: ‘Be an-Israel-dulemar-iduega guo, Israel-dulemar-akwedii guo.’ ”
2SA 5:3 Degisoggu, Rey-David Hebrón-neggweburgi-gudii, bela-Israel-sapin-dummagan ese nonimalad. Rey-David, Israel-dulemarbo Bab-Jehová-asabin igar-mesnai gualid. Geb agine, David Israel-reyga-guega, David-nonogi gwallu-wawad eosmalad.
2SA 5:4 David negseargua, deun birga-durgwen-gakambe (30) nikad. Geb bela birga-dulabo (40) negsemai gusad.
2SA 5:5 Rey-David Hebrón-neggweburgi-maigua, Judá-yar-naidgi birgagugle (7) gaka nii-walanergwa (6) negsemai gusad. Rey-David Jerusalén-neggweburgi-maigudii, bela-Israel-yargine, degi, Judá-yarginbali birga-dulagwen-gakambe-gakapaa (33) negsemai gusad.
2SA 5:6 Rey-David, e-sordaganmala, Jebuseo-dulemar-Jerusalén-neggweburgi-gudimaladgi-bila-onogega, ese nade gusmalad. Jebuseo-dulemar binsasmalad, David neggweburgi gege dogye. Agi, Jebuseo-dulemar Davidʼga sogdemalad: “We-neggweburgi be dogosurye. Bemar-ononnogega, ar dule-aku-atakmaladbi, dule-muya-muya-nanamaladbi unniguarye.”
2SA 5:7 Degi-inigwele, David, Sión-neg-gandikid susad. Geb a-neg-gandikid, David-Neggweburye nuggunonikid.
2SA 5:8 A-ibagine, David sogsa gusad: “Bela dule Jebuseo-dulemargi-bila-ononasokarmalad dian-neg-urba-maidba nakwenamalo, adi, aku-atakmalad-oburgwega, degi, muya-muya-nanamalad-oburgwebaliga. An we-dulemar isdar daked.” Aga weyob soglenonikid: “Ibya-satemalad, muya-muya-nanamalad, reynegse dogosurmarye.”
2SA 5:9 David Jerusalén-neggweburgi Sión-neg-gandikid-sunonigua, David-Neggweburye onugsanonikid. Geb David, Miloʼye-neg-nugad-akar, e-neggwebur-ebiris akwamar sobar-sobar urbisbalid.
2SA 5:10 David gangumai gualid, nasgumai gualid, ade, Bab-Jehová-Bela-Gangued-Nikadi Davidʼba gudiguad.
2SA 5:11 Tiro-neggwebur-e-rey-Hiram, Davidʼse e-gayaburba-berbemalad barmisad. Degine, Hiram, Davidʼga barmisbalid: Dule-neg-sobmalad, dule-akwa-sobmalad, degi, urwar-urgomar barmisbalid. Bela-we-dulemar Davidʼga reyneg-sobnanai guarmalad.
2SA 5:12 Degidbali, David nue-magar itononikid, Bab-Jehová Israel-reyga nue-e-nug-imaksa. Degine, magar-itononibalid, Bab-Jehová, Israel-dulemar-sabedba e-negsemaid odummomaibali.
2SA 5:13 David Hebrón-neggweburgi-nadegusgua, Jerusalén-neggweburse megnonikid. Agine, David omegan-baigan nikunonikid, degine, omegan-dikarbarmalad nikunonibalid. Geb agine, David bukidar masmala nikusad, degi, bunamala nikusbalid.
2SA 5:14 We-masmala Davidʼga Jerusalén-neggweburgi gwalulenonimalad: Samúa, Sobab, Natán, Salomón,
2SA 5:15 Ibhar, Elisúa, Nefeg, Jafía,
2SA 5:16 Elisama, Eliada, degi, Elifelet.
2SA 5:17 Filistea-sordamar wisgusgua, David Israel-e-reyga-megnoniye, agi, bela Filistea-sordamar, Davidʼgi-bila-onogega nadmalad. David egi-danimalad wisgunonikid, degisoggu, e-dukuedneg-siidse nade gusad.
2SA 5:18 Filistea-dulemar nonimargua, Refaim-Neba-naidse ambikunonimalad.
2SA 5:19 Agine, David, Bab-Jehováʼse idakded, ega sogded: —¿An Filistea-sordamargi bila-ononaoye? ¿Egi-nakwega be an-imakoye? Bab-Jehová, David-abin sogded: —Eye, be bila-ononae. Inniki an bega soged, Filistea-sordamargi-nakwega an be-imakoed.
2SA 5:20 Degisoggu, David Baal-Perazim-neg-nugadse nade gusad. A-neg-nugadgine, David, Filistea-sordamargi nakwenonikid. Geb David sogde gusad: “Bab-Jehová diwar-dummad-nomaiyobi gangued, ayobi gandikidgi an-isdarmaladgi-nakwega an-imaksad.” Agala, David, neg Baal-Perazimʼye nugsanonikid.
2SA 5:21 Filistea-sordamar wakitemargua, e-ibmar-bab-dummadga-imakdimalad bela obenanai guarmalad. David, degi, e-sordamarmala a-ibmar ogumaksamalad.
2SA 5:22 Filistea-sordamar Refaim-Neba-naidse gannar ambikunonimalad.
2SA 5:23 David Bab-Jehováʼse gannar idakdebalid. Geb Bab-Jehová ega sogdebalid: —Mer abin nao, be ebirar nao, bia balsamera-sapimar-bukwa, a-innik be oitogo.
2SA 5:24 Be itoardibe, sapi-niba dule-nag-goleyob neg-itolege, agi, geb be bila-onodoed, ade, Bab-Jehová Filistea-sordamar-bukwadgi-bila-onogega be-idunadapoed.
2SA 5:25 David Bab-Jehová-ega-sogsadba igar-imaksad. Davidʼse Filistea-sordamar Geba-neg-akale, degi, Gezer-neggwebur-nugadse ibitosmalad.
2SA 6:1 David gannar Israel-sordamar-nug-imaklesmalad mili-durgwen-gakambe (30,000) onmaksad.
2SA 6:2 David, degi, e-sordaganmala, Judá-yargi Baala-neg-nugadse nadegusmalad, adi, a-akale, Bab-Jehová-Dulemarbo-Igar-Mesisad-Ulu sedmalagar. A-Ulu-asabinni, Bab-Dummad-Bela-Gangued-Nikad-e-nug odummoleged. E-gan-buled baliwiturmar-querubinʼye-nugad-abalagi siid.
2SA 6:3 Bab-Jehová-Igar-Mesisad-Ulu moli-ur-ibmarmar-seed-binidgi onakwismalad. Abinadab-e-neg-yar-mullugi-siid-akale, Bab-Jehová-Ulu sesa gusmalad. Abinadab-masmala Uza, degi, Ahío, moli-ur semamai gusmalad.
2SA 6:4 Bab-Jehová-Ulu-semamaigua, Ahío ulu-idu nadapi gusad.
2SA 6:5 Davidʼdina, Israel-dulemarmala weligwaledba Bab-Jehová-asabin gwirnanai guarmalad. We-garmar-ogornanai guarmalad: Gar-arpa, gar-salterio, gar-pandero, gar-gammu, gar-címbalo, degine, gar-bamalad-urgogi-sobarmalad.
2SA 6:6 Nacón-e-nainu-naidse nonimargua, molimar-bebe-nikad-yolenonikidba Bab-Jehová-Igar-Mesisad-Ulu aibinednaga guenad. Agi, Uza, Bab-Jehová-Ulu-mer-argwanega ese achaded, e-argangi Bab-Jehová-Ulu ganonikid.
2SA 6:7 Agine, Bab-Jehová, Uza igar-maisulidba yogasaar-achasadba egi sabsur-uluded. Degisoggu, Uza ilagwen-burgwar gusad, Bab-Jehová-Ulu-naba mellenonikid.
2SA 6:8 David Bab-Jehová-Uza-oburgwisadba, bela-bela sae-itononikid. Agala, Bab-Jehová Uza-negabar-daasa-imaksadbali Pérez-Uzaʼye neg-onugsanonikid. We-garda-narmaklenaidse deyob amba neg bileged.
2SA 6:9 Geb degine, David, Bab-Jehová-dobe-itonaded, geb sogded: “¿Ar igi Bab-Jehová-Dulemarbo-Igar-Mesisad-Ulu an-neggi an odogosunna?”
2SA 6:10 Degidbali, David, Bab-Jehová-Ulu Jerusalén-neggweburse bar sedbi guarsulid. Degisoggu, Obed-Edomʼye-neg-nugadse sedega imaksad. Obed-Edomʼde, Gat-duled.
2SA 6:11 Deyob, Bab-Jehová-Dulemarbo-Igar-Mesisad-Ulu Gat-dule-Obed-Edom-neggi nii-walapaa sii gusad. Agi, Bab-Jehová, Obed-Edomʼgi nued-binsanai gualid, geb e-neguya onasgumai guarbalid.
2SA 6:12 Rey-David owisolesgua: “Bab-Jehová-Igar-Mesisad-Ulu Obed-Edom-e-neguyagi-siid-ular, Bab-Jehová Obed-Edomʼgi nued binsasye. Aginbali, bela-e-ibmar-nikad ega onasgumaibarye.” Degisoggu, David, Obed-Edom-negse nade gusad. Agi, David, Bab-Jehová-Dulemarbo-Igar-Mesisad-Ulu, weligwaledgi Jerusalén-neggweburse sesad.
2SA 6:13 Dulemar-Bab-Jehová-Ulu-semamaid ilanergwagus (6) nag-obidanimargusgu, David Bab-Dummadga moli-bebe-nikad-machered-oburgwisad, degi, moli-bebe-nikad-sapingwagwad-wardadad oburgwisbalid. Geb Bab-Jehováʼga uksad.
2SA 6:14 David, weligwaledba Bab-Jehová-asabin lino-mor-yoi gwirnai gualid.
2SA 6:15 David, Israel-dulemarmala weligwaledba oimakdemalad, degi, gar-trompeta-abalagi Bab-Jehová-Ulu-semamai guarmalad.
2SA 6:16 Bab-Jehová-Dulemarbo-Igar-Mesisad-Ulu David-Neggwebur-nugadse seledanigua, Saúl-e-sisgwa-Mical, yawagak-senigwadba atakded. Agine, dakalid, David Bab-Jehová-asabin dodoagwale-ichomakdaniki, degi, dodoagwale gwirdaniki. Mical deyob-David-daksagua, e-ulubgi sae-David-dakalid.
2SA 6:17 Bab-Jehová-Dulemarbo-Igar-Mesisad-Uludi, David-ega-dordoneg-sobsa-gusadse odononimalad, negabargi sinonimalad. Degine, David, Bab-Jehováʼga ibmar-durgan-ogumakar uknai gualid. Gwenatigwar-guedga-ibmar-ukleged Bab-Dummadga uknai guarbalid.
2SA 6:18 David ibmar-durgan-ogumakar-uked-bergusgua, ibmar-bamalad-uked-bergusbargua, dulemarga sognai gualid, Bab-Jehová-Bela-Gangued-Nikadi bemargi-nabir binsaoye.
2SA 6:19 A-sorbali, David bela Israel-machergan-bukwadga, degi, omegan-bukwadga madu-miminai, uva-dinnagwad-miminai, degi, dátil-dinnagana-miminai gualid. Agi, dulemar bergwapa na e-neg-e-negse nade gusmalad.
2SA 6:20 David e-negse-nonikid, adi, Bab-Dummadga sogega, bitigi e-neguyagi nued-binsasana gadinye. Degidgine, Saúl-sisgwa-Mical, David-abin noalid. Geb Davidʼga sogded: —Binged-dummad be neg-imaksad. Reysuliyobi be gusad. Morsuli gwilar-gwilar be gunai gusad. Omegan-bega-arbamalad-abin be sor-oyonai gusad. Dule-yogasaaledyob be gusad.
2SA 6:21 David, Mical-abin sogded: —Bab-Jehová-asabin weyob an gusad. Ar ade, an-ulale, Bab-Jehová be-bab-Saúl-obachad, degi, Saúl-e-neguya obachabalid. A-ulale, Bab-Jehová, Israel-dulemar-e-reyga-guega an-nug-imaksad, e-dulamarga negseega an-nug-imaksabalid. Degisoggu, an Bab-Jehová-asabin an dodagwale, gwirdii guoed.
2SA 6:22 Binsaedsulidyob be an-dakele, emisgindi, bur bule be binsaedsulidyob be an-dakodo. Degi-inigwele, we-omegan-anga-arbamalad-be-sogedi, amardi, magar an-dakmaloed, an-nug-odummonai gumaloed.
2SA 6:23 Degisoggu, Saúl-sisgwa-Mical, deyob-neggusadbali mimmi-nikussuli burgwisad.
2SA 7:1 Rey-David e-neggi-megnonigua, Bab-Jehová, Davidʼga neg-bogidikid nasiknonikid, e-isdarmalad Davidʼbo bar urwenai gussurmalad.
2SA 7:2 Rey-David Bab-Dummad-gayaburba-barsoged-Natánʼga sogded: —Nue be an-dake. Andi urwar-neggi an maid. Bab-Jehová-Dadganbo-Igar-Mesisad-Uludi dordonegyaba siid.
2SA 7:3 Natán, Rey-David-abin sogded: —Nabirdo. Be itogedba be ibmar-imako, ar Bab-Jehová beba-naid.
2SA 7:4 A-mutiki, Bab-Jehová, Natánʼga sunmaknonikid, ega sogded:
2SA 7:5 “An-mai-Davidʼse be nao, ega be sogdapo: ‘Weyob Bab-Jehová soged: ¿Anga be neg-sobosi, egi an megega? Suli.
2SA 7:6 An Israel-dulemar Egipto-yargi-onosad-akale, neg-sobaledgi an megdisulid. Unnila neg-sunna-selegedgi an gudii daed. A-neggi anse-gormalaga an imakdidaed.
2SA 7:7 An Israel-dulemarba gudiid-akale, an Israel-dulemar-idudimaladga igar-uksagu, bemar Israel-dulemar-iduega-guoye, an Israel-dulemar-idudimaladga gwen sogsasulid be anga urwar-neg sobmaloye.’
2SA 7:8 ”Emisgindi, an-mai-Davidʼga be sognao: ‘Weyob Bab-Jehová-Bur-Gangued-Nikad sogye: Be sibad-wawaad-edarbedga gudigu, Israel-dulemar-iduega an be-sunonikid.
2SA 7:9 Bia be naddibele, ani an beba naidaed, degi, an be-isdarmaladgi be-onakwisdaed. Dule-nuga-nikamalad-abalagi an be-nug-odummosad.
2SA 7:10 Aginbali, Israel-dulemargala nega-nued-uknai an guoed, nabir egi gudii samalagar. A-yargi onolenai gwen guosurmalad.
2SA 7:11 Epenne, an Israel-idumalaga igar-nabiromalad-nugsasad-ibagine, neg-gusdaeyobi, bar be-isdarmalad be-naibisanai guosurmalad. An begardi neg-obunnoged nasiko, be-isdarmalad bar-akar be-imakosulid.’ ” Aginbali, Natán, Davidʼga sogdebalid: “Bab-Jehová bega sogbalid: ‘E bega neg-soboye.
2SA 7:12 Be burgwenonikile, be-serganse be nadele, be-machi-gwensak-begi-danikid an ogwisgunoniko, be-sorba rey-gan-seega, e-negsemaid-igar bar-berguosulid.
2SA 7:13 We-be-machi anga anse-goled-neg sobnonikoed, degi, e-negsemaid-igar degisadegu an ogannobaloed.
2SA 7:14 An e-babga gunonikoed, degi, ede an-machiga gunonimogoed. Ichakwa daele, anse molidubgi, degi, suargi bibyolenai guoed, igi baba na e-machi-odurdakardaedyob anse guoed.
2SA 7:15 Degisoggu, an-sabed an na ega oyodii guoed. An Saúlʼgi an-sabed-obachayob, an egi obanosulid.
2SA 7:16 Be-wagan-negsemaloed, degi, be-negsemaidi, an-asabin surguega an imakosulid. Degine, be-negsemaid degisadegu-selemai an imakbaloed.’ ”
2SA 7:17 Weyob, Natán Bab-Dummad-ega-bela-sunmaksad, degi, bela ega-ibmar-oyosadi, Davidʼga ogwanai gusad.
2SA 7:18 Geb Rey-David Bab-Jehová-asabin sigdapid. Bab-Dummadse gotegusad: “Bab-Dummad-Jehováʼye, ¿ande doasunna? ¿An-neguyade ibusunna? Emide be, we-ibmar bela be anga uknagu.
2SA 7:19 Bab-Jehováʼye, ¿amba be ibmar-akuar anga be uksa be itoge? Ar emide, an-wagangi be sunmaknabalid, yoedse an deyob egi ibmar-sabaloye. Bab-Jehová, ¿ar be weyob dulemarga ibmar-imakdae?
2SA 7:20 ”Bab-Dummad-Jehová, ¿ibu an bega bar sogbalirgebe? Suli. Ar nue-magasar be an-daked.
2SA 7:21 Be-sogedba bela ibmar-dummagan be imaksad. Aginbali, be angi we-ibmarmar odukussulid.
2SA 7:22 ”Degisoggu, Bab-Jehová, bedi Bur-Biriginedid. Bab-dummad-baid beyobid sulid, bebi unnila Bab-Dummadga maid. Bela we-ibmar anmar-sunnagwad anmar-uayagwar itosad.
2SA 7:23 ¡Ar be-Israel-dulamaryobidi dulamar-baigan sated! Bab-Dummad, be-dulamar-sabedbali, begadga-imakega be be-dulamar-bendaksa gusad. Israel-nug-odummogega ega be ibmar-dummagan imaksad, degi, ega be ibmar-bulegan oyosbalid. Egipto-yargi-wilebukmargu, be bendaknonikid, neggwebur-bamaladgine be obachad, degi, e-bab-dummagangi be obachabalid.
2SA 7:24 Bab-Jehová, Israel-dulemar degisadegu be-dulamarga be imaknonisunnad. Degisoggu, Bab-Jehová, e-Bab-Dummadga be gunonikid.
2SA 7:25 ”Emide, Bab-Dummad-Jehová, be-angi-nued-sunmaksadi, degi, an-wagangi-nued-sunmaksadi, bela be bar-oganno. Be-sogsadba be imako.
2SA 7:26 Adi, degisadegu be-nug-odummolenai guoed, soglegoed: ‘Israel-dulemar-e-Bab-Dummad, Bab-Jehová-Bela-Gangued-Nikadye.’ Degidbali, an-wagan-negsemaloedi degisadegu bega negsemamai guoed.
2SA 7:27 ”Be Israel-dulemar-e-Bab-Jehová-Bela-Gangued-Nikadi, we-ibmar-dukuar-mainad anga be magar-imaknonigua, anga be sognai gualid: ‘Ani an bega be-wagan-negsemai imakoye.’ Agala, ani-David be-mai guedi, an dobsuli bega soged, wilesagwadgi an bese egised.
2SA 7:28 Bab-Dummad-Jehová, bee be Bab-Dummadid, be-gayaburba sunsogedid. Agine, anga be sognaid, ibmar-nuegan anga be ukoye.
2SA 7:29 Degisoggu, an-wagan-onasguega be imake, adi, be-asabin degisadegu gudii gumalagar. Bab-Jehováʼye, be-nued-binsaedgi degisadegu an-wagan-nasgumai be-imake. Ar be-sunnad be sogsagusad an deyob imakoye.”
2SA 8:1 A-sorbali, David Filistea-sordamargi bila-onogedgi-nakwenonikid, geb Filistea-dulemar maiga imaklesmalad. Geb David, Meteg-Ama-neggwebur Filistea-dulemar-annik sunonibalid.
2SA 8:2 David, Moab-dulemargi bila-onosgu, egi-nakwis gusbalid. David Moab-sordamar bela napayala ilekwaa megmalaga imaksad, geb dubgi wilub-imaksad. Dub-giabo-suguedgi dulemar mamaile, oburgwilesdaed. Geb dub-giapaagwadgi dulemar mamaile, adi, bendaklesdaed, oburgwiledasulid. Degidbali, Moab-dulemar David-e-maiga gunonimalad. Davidʼga mani-uklegergebed ukdii gusmarsunnad.
2SA 8:3 David, Hadad-Ezerʼgi urwenagu, egi obichabalid. Ar ade, deun, Hadad-Ezer, Éufrates-diwar-neg-naid gannar David-annik subigualid. Deun, Hadad-Ezer-e-bab-Rehobʼdi Sobaʼye-neg-nugad e-reyga maid.
2SA 8:4 David e-isdarmalad-ibe moli-ur-napagined miligwen (1,000) gasad, degi, miligugle (7,000) sordamar-moligi-sii-urwemalad gasbalid. Aginbali, sordamar-nagab-urwemalad mili-dulagwen (20,000) gasbalid. Geb ur-napaginedgi-moli-atinnarmalad-e-mali-gasi siksa gusbalid. Unnila e-ur-napaginedga napi-dulatar (100) moli-sabosad.
2SA 8:5 Siria-dulemar Damasco-neggweburginmalad, Soba-e-rey-Hadad-Ezer-bendakega nonimalanad. David amba egi obichabalid. David Siria-sordamar-mili-dulagwen-gakabo (22,000) oburgwisad.
2SA 8:6 Agine, David Siria-yargine e-sordamar nakulegega urbisad. Siria-yargine, Damasco-neggwebur-siid. Degisoggu, Siria-dulemar David-maiga gunonimalad, degi, Davidʼga mani-uklegergebed ukdii nanasmalad. David bia-urwenaddibe Bab-Jehová e-isdarmaladgi nakwega David-imakdaed.
2SA 8:7 A-sorbali, David, Hadad-Ezer-e-maiga-gudimalad-annik sigu-abgaed-olobiid susad. Geb Jerusalén-neggweburse sesa gusad.
2SA 8:8 Deginbali, Rey-David esnon-bormo Beta-neggweburgi-bukwad, degi, Berotai-neggweburgi-bukwabalid ichesur-susa gusbalid. Beta, degi, Berotai, Hadad-Ezer-e-neggweburmalanad.
2SA 8:9 Deun, Hamat-neggwebur-e-rey-Toi, bela Hadad-Ezer-e-sordamargi David-nakwisad wisgusad.
2SA 8:10 Ar Rey-Toi, Hadad-Ezer-e-isdaradmosoggu, na e-machi-Joram Davidʼse barmisad, ese nuedgi ataknaega, egi nued binsabaliga. David Hadad-Ezerʼgi nakwenonikid-ular, Joramʼdi, Davidʼga ibmar-manigi-sobaled, ibmar-orgi-sobaled, degi, ibmar-esgoro-gordikidgi-sobaled sesad.
2SA 8:11 A-ibmarmar Rey-David Bab-Jehováʼga uknai gusad. Degine, manimar, ormar Bab-Dummadga-nugsalesadi uknai gusbalid. We-manimar, degi, ormar Bab-Jehováʼga-nugsalesadi dulemar-David-maiga-gunonimalad-ibe weles gusad. We-dulemar-ibe welesad:
2SA 8:12 Siria-dulemar-ibe, Moab-dulemar-ibe, Amón-dulemar-ibe, Filistea-dulemar-ibe, Amalec-dulemar-ibe, degi, Hadad-Ezer-ibe ibmarmar welesmogad. Hadad-Ezerʼde Rehob-machid, Rehobʼdi Soba-yar-e-reyd.
2SA 8:13 Deyob David-nug dungumai gusad. David Siria-dulemargi nakwis-danigua, neba Baluye-nugadgi Edom-dulemar miliambe-gakabaabak (18,000) ese ibitosmalad.
2SA 8:14 Aginbali, David e-sordagan neg-nakulegega Edom-yar-naidgi urbenai gusad. David Edom-dulemar e-maiga imaksad. Bab-Jehová David-bia-urwenadele, e-isdarmaladgi-onakwega imakdaed.
2SA 8:15 David igar-innikigwadba Israel-yar-sealid, sogedba dulemar-semai gusad. David-sordamar-idumaladi, wemalad:
2SA 8:16 Sarvia-machi-Joab, sorda-bila-onomalad e-dummadid. Ahilud-machi-Josafat, garda-narmaked-e-dummadid.
2SA 8:17 Ahitob-machi-Sadoc, degi, Abiatar-machi-Ahimelecʼbogwa, dule-irwa-Bab-Dummadse-gormaladid. Seraías, Davidʼga garda-narmakedid.
2SA 8:18 Joiada-machi-Benaía, Cereteo-dulemar, degi, Pelet-dulemar-e-dummadid. Geb David-masmaladina, dummagan-negsedimaladid.
2SA 9:1 David egisde gusad: “¿Saúl-gwenadgan wis-gudii be dakmala? Ade, Jonatán an-ai-nuedga gussoggu, a-nukad an egi nabir binsabied.”
2SA 9:2 Dule-gwensak Saúl-neguyagi arbadigusad gudii daklealid. A-dulede, Sibaʼye-nugad. Davidʼse dagega geb Sibaʼse gorlenaded. Siba nonigua, Rey-David ese egisded: —¿Be, Siba? Abin-sogded: —Eye, Dummad. Sogdena, ibu bega imakbi be an-abege.
2SA 9:3 Rey-David ega sogdebalid: —¿Saúl-e-gwenad-gwensak-gudii be dake? Ar Bab-Dummad-emar-wiledakmaid-nuggi an ega ibmar-nued oyobienad. Siba, Rey-David-abin sogded: —Unnila Jonatán-e-machibi gudiid, e-mali abinbela bonigwaled.
2SA 9:4 Rey-David ese egisdebalid: —¿A-dule bia gudii? Siba abin-sogdebalid: —Jonatán-e-machi, Lodebar-neggweburgi gudiid. Amiel-machi-Maquir-e-neggi maid.
2SA 9:5 Rey-David, Mefiboset-sedamalaga Lodebar-neggweburse, Amiel-machi-Maquir-negse dulemar-barmisad.
2SA 9:6 Mefiboset, David-asabin nonigua, napa-nagase dulluu imaksad. Mefibosetʼde Jonatán-machid. Jonatánʼdi, Saúl-machi-gumogad. David, Mefibosetʼga sogded: —¡Mefiboset! Mefiboset abin-imakded: —Degite, sogdeen dummad.
2SA 9:7 David ega sogdebalid: —Mer be an-dobguo. Be-bab-Jonatán-nuggi innikigwadba ibmar-nued an wile be-dakedgi bega imako. Nainumar-nanaid, be-dad-Saúlʼgad, gannar an bega uko. Bedi, be anba mas-gundii guo.
2SA 9:8 Mefiboset, David-abin gannar-dulluu-naded, geb ega sogdemogad: —Dummad, ¿ibiga be nabir angi nued binsae? Ar ande, ibmar-isgana-milemaiyob gued.
2SA 9:9 Agine, Rey-David, Saúlʼga-ibmar-akwedid-Sibaʼse goted. Geb ega sogded: —Be-dummad-e-machi-Mefibosetʼga ibmar-bela-Saúlʼgadga-gusadi, negmarse-bakar, bela ega be uke.
2SA 9:10 Degisoggu, Mefibosetʼga be e-nainumargi arbadii guo, be-masmala ega arbamogo, degi, be-maiga-gudimaladse-bakar, ega-arbamogo. Ibmar-gwag-gulleged-sanmakmalad welealile, ega nue sabomalo, be-dummad-e-machi nabir mas-gundii guegar. Be-dummad-e-machi-Mefibosetʼdi, bane-bane anba mas-gundii guoed. Sibaʼde, masmala-warambe-gakatar (15) nikad, degi, e-maiga-gudimalad e-dulagwen (20) nikabalid.
2SA 9:11 Siba, Rey-David-abin sogded: —An-dummad-rey, an be-maiga-gusoggu, be anga-igar-mesnaidba, an ibmar-imako. Mefiboset, igi rey-masmala mas-gundidamala, deyobi Rey-Davidʼba mas-gundii gussunnad.
2SA 9:12 Mefiboset machi-bipigwad-wargwen nikad, Micaíaʼye nugad. Bela Siba-neggi-gudimalad, Mefiboset-e-maiga gudimalad.
2SA 9:13 Degine, Mefiboset, muya-muya-nanasoggu, Jerusalén-neggweburgi gudii dasunnad, ade, Rey-Davidʼba bane-bane mas gundii daed.
2SA 10:1 Degi-neggusad-sorba, Amón-dulemar-e-rey burgwenonikid. A-sorba, e-machi-Hanún neg-ganonikid.
2SA 10:2 Geb David sogded: “Igi Nahas angi nued gudigusa, e-machi-Hanúnʼga an deyob ibmar oyobimogad.” David, Hanún-e-bab-burgwisad-ular, mer-dogdar-wile-itogega, e-garda-berbemalad Hanúnʼga barmisad. David-e-garda-berbemalad Amón-dulemar-e-yarse nonimargua,
2SA 10:3 Amón-dulemar-idudimalad Rey-Hanúnʼga sogded: “David e-sordagan-barmialidi, ¿binsa nabir be-bab-burgwisad-ular, wile-be-dakedba danimar be ebinsae? Suli. ¿Ar amarde anmar-neggwebur argadanisurmar be ebinsae? ¿Ar anmar-neggwebur-obelogega danimarsursi? Ar deyobdo.”
2SA 10:4 Degisoggu, Hanún, David-sordagan-gassunnad. Geb Hanún, David-sordamar-ibe, aku-negabala siga-emiega igar-uksad. Degi geb, e-morsuid-yomalad e-sor-magar-daklegedse e-ibe sikega igar uksabalid. Hanún, David-sordagan gannar e-negse barmisad.
2SA 10:5 David deyob wisgunonigua, a-dulemar-abinguega e-sordagan-bamalad barmisad, ade, binged-dummad nikunonimalad. Rey-David e-sordagan-abingunadedga sogsad: “Weyob be sogdapoye: ‘Jericó-neggweburgi bemar obunnogo, siga-suguedse geb bemar anse nonimalo.’ ”
2SA 10:6 Amón-dulemar neggusadba dakarmalad, emarde David-e-isdarmaladga-gunoniki. Degisoggu, manigi-bennukar sorda-bamalad amismalad. Amar wemalad: Siria-sordamar, Bet-Rehob-neggweburginmalad, degi, Soba-neggweburginmalad e-mili-dulagwen (20,000). Amón-dulemar, Rey-Maaca-e-sordagan e-miligwen (1,000). Degi, Is-Tob-sordagan e-miliambe-gakabo (12,000) amisbalid.
2SA 10:7 Deyob David itosgua, Joab, degi, bela e-sordagan-niga-gandikmalad barmisad.
2SA 10:8 Amón-sordamar e-neggwebur-noedse Israel-sordamargi-urwega nadegusmalad. Geb ilekwaa ambikusmalad. Soba, degi, Rehob-e-sordagandina, Istob-e-sordaganmala, degi, Maaca-e-sordaganmala neba-ollornaidgi bachikii ambikusmarmogad.
2SA 10:9 Joab deyob-daksagua, Joab-e-sordagan e-isdarmalad-asabin ambikusmalad, degi, yarganba ambikusmarbalid. Degisoggu, Joab, Siria-sordamargi urwega, e-sordagan-niga-bur-gandikmalad urbisad.
2SA 10:10 Joab, e-sordagan-bamaladdi, e-gwenad-Abisaiʼga uksad, adi, Amón-sordamargi urwegar.
2SA 10:11 Geb Joab, Abisaiʼga sogded: “Siria-sordagan angi-obite be dakele, be an-bendaknoniko. Amón-sordamar begi-obite an dakdemogale, an be-bendaknamogoed.
2SA 10:12 Mer sikirmakmalo. Anmar-dulemar-ular, anmar-Bab-Dummad-neggweburmar-ular, niga-gandik-samalo. Degisoggu, Bab-Jehová na e-sogedba ibmar imaksun.”
2SA 10:13 Joab e-sordaganmala Siria-sordagangi urwega nadegusad. Siria-sordagan Joab-abin gwakidmalad.
2SA 10:14 Agine, Amón-sordamar dakdegua, Siria-sordamar Joab-abin-gwakide, Abisai-abin gwakidmarmogad. Agi, Amón-sordamar e-neggweburse dukunadmalad. Joab, e-sordaganmala Amón-sordamargi-ulusad-sorba Jerusalén-neggweburse gannar nonimalad.
2SA 10:15 Siria-sordamar Israel-dulemarse galakus-itosmargua, gannar urwega ambikusmalad.
2SA 10:16 Hadad-Ezer Siria-dulemar-Éufrates-diwar-obakar-bukmaladse gochad. Geb amar Helam-neg-nugadse nonimalad. Hadad-Ezer-sordagan-e-dummad-Sobac a-dulemar-idudani gusad.
2SA 10:17 David owisolesgu deyob e-isdarmalad ambikunonimarye, David urwenaega, belagwable Israel-sordamar-oambikunai gusmogad. Jordán-diwar obaksamalad, geb Helam-neg-nugadse nonimalad. Siria-sordamar Davidʼbogwa-urwega ilekwaa ambikusmalad. Geb urwenai guarmalad.
2SA 10:18 Siria-sordamar, Israel-sordamar-abin gwakidmalad. Geb Davidʼsega dulataled-ilagugle (700) sordamar-ur-napaginmaladgi-urwemalad, degi, mili-dulabo (40,000) sordamar-nagab-urwemalad oburgwilesad. Siria-sordamar-e-dummad-Sobac oburgwilesmogad.
2SA 10:19 Reymar Hadad-Ezer-bendaknanaigusmalad dakdegua, Siria-sordamar Israel-sordamarse galakusmala, we-reymar Israel-sordaganbo igar-nabonanai guarmalad, geb e-maiga gunonimalad. Degisoggu, Siria-sordamar dobedba bipisaale bar Amón-sordamar-bendakdii gussurmalad.
2SA 11:1 Birga-obaksagua, reymar-urwenaddamalad-ibagi, David, Joab-barmisad, degi, bela Israel-sordagan urwenamalaga barmisbalid. Amarde, Amón-sordamar-obelosmalad, geb Rabá-neggwebur-ebirismalad. Davidʼdina Jerusalén-neggweburgi besgusad.
2SA 11:2 Ibagwengi, neg-sedosgua, David na obunnomai gwisguargu, niba-neg-ubeb-naidgi garmakdii gualid. Agi urba-atakdegua, ome-gwensak-obnai dakalid. A-omede yeerdakleged.
2SA 11:3 David we-ome-wisguega emar-barmisad, we-omede doawa. Geb ega sognonimalad: “We-ome Eliam-sisgwaye Betsabéʼye nugye, Het-dule-Urías-e-omeye.”
2SA 11:4 Ar Betsabéʼde, na igar-maidba san-urukega obnai gusad, ar emissaar e-burba-dakdiid bergusad. Geb David ega Betsabé-sedamalaga e-sordagan-barmisbalid. Degidgine, David, Betsabéʼse gornonikid. David-ese-gochagu, geb ome gannar e-negse nade gusad.
2SA 11:5 Geb Betsabé gurgin-nika gunonikid. Geb agine, David-owisosad: “An bonigwarye.”
2SA 11:6 Agine, David dule-barmisad, Joabʼga sogega: “Anga Het-dule-Urías barmidagoye.” Geb Joab, Davidʼse Urías-barmialid.
2SA 11:7 Urías, David-asabin-nonigua, David ese egichialid, Joab nueganbi-sogeye, sordamar-nueganbibar-sogeye, bila-onolenaid igi nadapbarye.
2SA 11:8 Geb David, Uríasʼga sogdebalid: “Be-negse be nae, wis be-ome be daknae.” Urías, Rey-Davidʼgi bangudgua, David ega ibmar-nued barmisad.
2SA 11:9 Uríasʼdi, e-negse nadsurgusad, David-e-maimar-e-neg-gabedgi gabisad.
2SA 11:10 Geb Davidʼga sognonimalad: “Urías e-negse-gabiapsurye.” Agine, David, Uríasʼga sogded: —¿Ibiga be-negse be obunnoapsuli? Ar be undar-bangu danisursi.
2SA 11:11 Urías, Davidʼga sogded: —Dummad, Bab-Jehová-Dadganbo-Igar-Mesisad-Ulu wis neg-matargwagwad-urba mellesiid. Degine, Israel-sordamar, degi, Judá-sordamar wis neg-matargana-urba mellebukmarmogad. Deginbali, Joab, e-sordaganmala neg-sate gaamakbukmarmogad. Ar degite, ¿sunna ande an-negse gabnao be an-itoge? ¿Sunna ande mas-nued-gunsii gubalo be an-itoge? ¿Sunna ande an-ome-yarba nue-gabmai gubalo be an-itoge? Adi sulirgebed. Dummad, be dummad-guedgine napira an bega soged, deyob an ibmar imakosulid.
2SA 11:12 David, Uríasʼga sogdebalid: —Emi be wegi obunnobalo. Banegidse an be-barmido. Urías a-ibagi Jerusalén-neggweburgi besad.
2SA 11:13 Neg-oibosgu, David mas-gunnega Uríasʼse gochad, geb omumgusad. Sedogusgu, Urías gannar David-e-maimar-e-neg-gabedse nade gusad, e-negse gwen arbisulid.
2SA 11:14 A-banedgine, David, Joabʼga garda narmaksad. A-garda Uríasʼba barmisad.
2SA 11:15 David a-gardagi Joabʼga weyob sunmaknaid: “Bia bur sabesur-urwelenai, agi be anga Urías-ogwisguo. Geb Urías-oburgwemalaga walagwen be obego.”
2SA 11:16 Degisoggu, Joab Rabá-neggweburgi urwesokargu, bia sordamar-niga-gandikmalad-ogwisgusa, agi Urías-ogwichisad.
2SA 11:17 Rabá-sordamar Joab-abin noarmargu, David-sordamar oburgwilesad. Geb Het-dule-Urías oburgwilesmogad.
2SA 11:18 Deyob neg-gusgua, Joab, David-owisosad, igi bila onolesa.
2SA 11:19 Joab dule-garda-berbegedga igar uksad: “Bela be Rey-Davidʼga bila-onolesad-ogwasale,
2SA 11:20 agi be-abin ulud-be-dakele, degi, bega sokardibe: ‘¿Ibiga neggwebur-galu-akwabiid-walikaa be ulusmala? ¿Ar bemar wissursi, galu-matusulid-akwabiid-birgi ibumar mileardae?
2SA 11:21 ¿Doa Tebes-neggweburgi Jerobaal-machi-Abimelec oburgwisgusa? ¿Ome-gwensak a-dulegi galu-matusulid-akwabiid-birgi obnaged-akwa egwachagussursi? ¿Ibiga bemar e-galu-walikaa nadegusmala?’ Geb Davidʼga be sogdebalo: ‘Be-mai-Het-dule-Urías burgwismogad.’ ”
2SA 11:22 Agine, Joab-e-garda-berbeged nade gusad. Geb Davidʼse nonigua, bela-ega-Joab-sunmaksad Davidʼse ogwanai gualid.
2SA 11:23 Dule-garda-berbeged Davidʼga sogded: —Anmar-isdarmalad nue-anmargi obitenad. Neg-olloledgi anmargi gwichigudgu, anmarse sikirmakmai gusad. E-neggwebur-yawagakse anmarse sikirmaksamalad.
2SA 11:24 Geb degidgine, sigu-mimalad galu-matusulid-akwabiid-birgi buksoggu, anmargi sigu miarmalad. Geb agine, be-sordagan abar oburgwilesmalad. Het-dule-Urías oburgwilesmogad.
2SA 11:25 David, dule-ega-garda-senonikidga sogded: —Weyob be Joabʼga sogdapo: ‘Mer bai-itogo. Ar sigu mileddibe, yogasaar emargi yoleged. Degisoggu, Rabá-neggweburgi be bila-ononaid gatik ogannogo, be neggwebur suedse imako.’ Bedina be Joab-ogannonai samogo.
2SA 11:26 Urías-e-ome-Betsabé e-sui-burgwisye wisgunonigua, bukib-eba-binsanai gualid.
2SA 11:27 Bukib-binsaed-ibagan-bergusgu, David Urías-omega-gusadbina gochad, geb ega e-negse senonimalad. Agine na nikunonikid. Geb Betsabé Davidʼga goe-susugwa nikunonikid. Bab-Jehová David-deyob-neg-imaksad nued daksasulid.
2SA 12:1 Bab-Jehová, Davidʼse, Natán-barmisad. Geb Natán, Davidʼse-modapgu, ega sogded: —Neggwebur-gwensakgi dule ebo gudiid. Gwensak mani-ibed gued, baiddina, dule-wilegedid.
2SA 12:2 Dule-mani-ibed sibad-wawaad-bukidar nikad, moli-bebe-nikad-ome deyob nikabalid.
2SA 12:3 Dule-wilegeddina, sibad-wawaad-ome-senigwad unnila wargwenna nikad. A-sibad-wawaad na baksa gusad, geb odummosbalid. Dule-wileged e-mimmigan-abargi na e-sibad-wawaad odummomai gusad. E-masgunnedgi na sibad-wawaad omadii gusad, e-nog-gobedgi na ogobdii gusbalid, degi, e-yarba na ogabdii gusbalid. We-dule-wileged e-sibad-wawaad-sabedba, e-bunoloyob na dakdaed.
2SA 12:4 ”Ibagwengi, dule-mani-ibedse dule-gwensak ataknonikid. We-dule-mani-ibed dule-ese-ataknonikid-masgi-ogunnega, e-sibad-wawaad-nikadi, degi, e-moli-bebe-ome-nikadi yapa oburgwe gualid. Degisoggu, dule-wileged-ibe sibad-wawaad-ome-senigwad susad. A-sibad-wawaad oburgwisad, adi, dule-ese-ataknonikid-ogunnegar.”
2SA 12:5 David deyob itosgua, dule-mani-ibedgi sabsur-uluded, geb Natánʼga sogded: —¡Bab-Jehová-Dula-Maid-nuki an soged, we-dule-deyob-neg-imaksad oburgwileged ega igar mai!
2SA 12:6 Igi sibad-wawaad-ome-senigwad-gargegue, deyob neg-imaksadba, wile-emar-daksasulidba ilabake-wilub bennukoed.
2SA 12:7 Agi, Natán, Davidʼga sogded: —Dule-deyob-ibmar-imaksadi, ar bee, a-dule gued. Weyob Israel-dulemar-e-Bab-Dummad-Jehová soged: ‘Ani an Israel-e-reyga be-nug-imaksad. Saúl be-oburgwebiguargu, an ega be-urmaksasurbalid.
2SA 12:8 Saúl-reyneg an bega uksad, e-omeganse-bakar an bega uksabalid. Aginbali, Israel-yar-naid, degi, Judá-yar-naibalidi an bega uksabalid. Amba be galakus-itogena, an bega ibmar-uknai gubaloenad.’
2SA 12:9 ”Bab-Jehová sogbalid: ‘¿Ibiga be an-gayaburba be isdar itossunna? ¿Ibiga be an-asabin ibmar-isgana imaksa? Bee be, Het-dule-Uríasʼgi ome-egwannega be Urías-oburgwisad. Bee be, Amón-sordamar-es-suidgi Urías-oburgwega imaksad. Geb degidba be Urías-ome nikunonisunnad.
2SA 12:10 Ar be Urías-omese-gochadgi, degi, be-omega be imaknonikidgi, be angi dummad-nosad, baisur be an-daksad. A-ulale, be-neguyagi es-suidgi-dule-burgwed ollorguosulid.’
2SA 12:11 ”Weyob Bab-Jehová sogsabalid: ‘Be-neguya begi-aibinega an imakoed. Be-omegan-gudimalad dule-beba-gudiidga an urmakoed, e-yarba gabdii guoed, be-ibyagwar be dakoed. We-ibmar dukuar guosulid.
2SA 12:12 Bedi ibmar dukuar imaksad. Andi bela Israel-dulemar be-omeganse-gollegoed-dakmalaga an imakoed.’ ”
2SA 12:13 David, Natánʼga sogdemogad: —Bab-Jehováʼgi an nue-nosa. Natán, Davidʼga sogdebalid: —Bab-Jehová be-isgusad bato bega elisad, be burgosulid.
2SA 12:14 Degi-inigwele, be Bab-Jehová-nuggi-dodosad-ular, be-mimmi-gwalulegoedi burgwenonikoed.
2SA 12:15 Geb Natán e-negse nade gusad. Bab-Jehová, David-e-mimmi-naibi-sanonikid, undar-uellegega imaknonikid. We-mimmide, David, Urías-omega-gusadba baksagusadid.
2SA 12:16 Degisoggu, David mimmi-bendakega Bab-Dummadse ise-wilegar goted. David bar-mas-itossuli gusad, napayala-meremai oiboardaed.
2SA 12:17 E-sapin-dummagan ese naddamalad, ega sogega, gwisguye. David yapa gwisgudaed, mas gunbidasurbalid.
2SA 12:18 Ibagugle-gusgua (7), mimmi burgwenonikid. David-e-sapin-dummagan dobedba binsananai gusmalad, igi Davidʼga sogoe. Geb dukin-dukin sunmakarmalad: “Mimmi dula-maigua, anmar ega sunmaknai gusanad, anmar-itobisur gusad. Anmar ega sogder, mimmi burgwisye, ¿bule gudago be ebinsae? Naibid-dummadi.”
2SA 12:19 David daksagua, e-sapin-dummagan muchub-muchub binna sunmaknanai, agi, David binsanonikid, mimmi burgwisargebye. Geb David e-sapin-dummaganse egisded: —¿An-ibe bergussunna? Abinsadmalad: —Eye. Be-ibe bergussunna.
2SA 12:20 David mimmi-burgwisye-itosgua, gwichibin imaksad, yog-obar imaksad, gwallu-wawad maksabalid, degi, mor ogwasbalid. Geb Bab-Jehováʼse-goled-negse nadgu, Bab-Dummad-nug odummosad. A-sorba, e-negse nonikid, masgunned egichisad, geb mas-guchad.
2SA 12:21 E-sapin-dummagan ega sogded: —¿Ibiga be deyob dae? Mimmi-nailikgumaiun be bonai gusad, be mas-gunbisur gusbalid. Emisgindi, mimmi-burgwisgua, be yog-gwisguar imaksad, be yog-mas-gunnar imaksabalid.
2SA 12:22 David e-sapin-dummagan-abin sogded: —Mimmi-nailikgumaiun, an mas-gunbisur-gusad, ise-boar an-gudii gusbalid, an binsasad: ‘Abakar Bab-Jehová wile an-dakalirye, anga mimmi-bendakalirye.’
2SA 12:23 Emisgindi, mimmi burgwissoggu, ¿ibiga bar an mas-gunnosuli? ¿Anga bar durguosi? Suli. Bar anse-danikosulid. Ani, an ese naoed.
2SA 12:24 David e-ome-Betsabé-e-niga-ogannonai gualid, mer wile-itogegar. Geb degine, ese gornonikid. Agine, Betsabé mimmi-nikunonikid, Salomónʼye onug-imaksad. Bab-Jehová a-mimmi nue-sabgunonikid.
2SA 12:25 Geb Bab-Jehová, e-gayaburba-barsoged-Natán barmisad, adi, e-sogedba mimmiga nug-nasikega, Jedidíasʼye onugsaegar. Jedidías sogleged: Bab-Jehováʼse sabgulegaledye.
2SA 12:26 Joab Rabá-sordamargi bila-ononai gusad. Geb Amón-reyneg-gandik-siid sunonikid.
2SA 12:27 Geb Joab, Davidʼse dule garda-berbemalad-barmisad, ega sogegar: “Ani Joab, an Rabá-neggweburgi nue-dogsokalid. E-dia-simaladdi, bato bela anmarse sulesad.
2SA 12:28 Degisoggu, Rabá-neggwebur-suega bela sordamar-besmalad be sedago. Degisulile, ani an Rabá-neggwebur suoed, an-nug-obarledii guoed, be-nugdi obarlegosulid.”
2SA 12:29 David e-sordagan-urbenai gualid, Rabá-neggweburse urwenaega. Rabá-sordamargi bila-ononai gusad, geb egi naknonikid.
2SA 12:30 David, Rabá-neggwebur-e-rey-annik ologurgin susad. Geb agine, David-nonogi sismalad. We-ologurgin nibir-dulapaa-gakambe-wilub (70) aidikued, a-gurgingi akwa-nuegan-dakleged nanaibalid. Aginbali, David Rabá-neggweburgi ibmar-nuegan-bukidar amisbalid.
2SA 12:31 David Rabá-dulemar Rabá-neggweburgi onosad. Amar oarbaega imaklesad. Amarga we-ibmar uklenai gualid: Esnali-dummad, napa-omued, degi, akanmar. Aginbali, napsa-ginnid soogi akwayob-sobnai guarmarbalid. Amón-dule-bamalad deyob imaklesmarmogad. Geb David e-sordaganmala Jerusalén-neggweburse gannar nonigusmalad.
2SA 13:1 Ibagan-nasgua, weyob neg-gunonikid. David-machi-Absalón bun-gwensak-nikad, Tamarʼye-nugad. Tamarʼde yeerdakleged. Aginbali, David ome-baidsik machi-baid nikabalid, Amnónʼye-nugad. Geb Amnónʼde, Tamarʼbina sokalid.
2SA 13:2 Amnón e-bun-Tamar-abegedba surbinsa itoalid. Tamar amba yagwasoggua, Amnón binsadidaed, an-bunse-golega igi-an-imakergebye.
2SA 13:3 Amnón e-ai-wargwen nikad, Simea-machi-Jonadabʼye nugad. Jonadabʼde yeer-emar-binsaed-gaedid. Simeaʼdi, David-e-iad.
2SA 13:4 Jonadab, Amnónʼga sogded: —Rey-machi, ¿ibiga be garagus daklege? Deyob be ibagan-obelomai an be-daked. ¿Igi be itoge? ¿Anga be sogosurde? Amnón abin-sogded: —An-urba-Absalón-e-bun-Tamarʼbina nue an soged.
2SA 13:5 Jonadab, Amnónʼga sogdebalid: —Yamo uellemaiyob be imako. Degisoggu, be-gabedgi be mego. Be-bab bese-atakdanidibe, ega be sogo: ‘An-bun-Tamar masgi an-ogunnega be anga barmidaye. Anga mas-dunai an dakega, degi, e-sunnad masgi an-ogunnega be barmidaye.’
2SA 13:6 Amnón e-obunnogedgi yamo uellemaiyob megisad. Rey-David ese ataknonigu, Amnón ega sogded: —Anga be an-bun-Tamar barmidage. Anga madu-matabo imakega, degi, e-sunnad masgi an-ogunbaligar.
2SA 13:7 David, Tamar-negse dule-barmisad, Tamarʼga sognaega: “Be-sus-Amnón-negse be dagye, ega be mas-imakdaye.”
2SA 13:8 Agi, Tamar e-sus-Amnón-negse-naded, e-obunnogedgi-mai dakdapid. Tamar maduburgi arbaded, omukunai gualid. Madu-madar-madar-imaksad, geb soogi yosad.
2SA 13:9 Tamar madu-yosgu, bategi Amnón-asabin sinonikid. Amnón yapa gunne gualid, geb sogded: —Bela neg-magaba ainimalo. Bela node gusmalad.
2SA 13:10 Agine, Amnón, Tamarʼga sogded: —An-gabedse be anga mas-sedago. Geb be-sunnad be anga mas-ukbalo. Tamar madu-yosad gannar susad, geb e-sus-Amnónʼga e-gabmaidse sesad.
2SA 13:11 Tamar, Amnón-asabin madu-sidgu, Amnón, Tamarʼgadebin imaksad, geb ega sogded: —Dage buna, anmar anbo-mege.
2SA 13:12 Tamar, Amnón-abin sogded: —Susu, mer weyob be an-imake. Ar Israel-yargi weyob-dule-imakleged maisulid. Mer we-ibmar-isgana be imake.
2SA 13:13 Angi be dodosar, ¿an bia-naosunna? Ar bedi Israel-dulemarga be dule-isganaga gumogoed. An bega ise-wilegar soged, reybogwa be sunmaknae. Rey bega an-ukoed, yapa bega an-ukosulid.
2SA 13:14 Amnón eba ibsassulid. Tamarʼgi obinsoggu, sabesur-imaksad, geb egi dodosad.
2SA 13:15 Egi-dodosad-sorba, Amnón, Tamar-nue-isdar-dakded. Iduar-sabgusadba bur bule isdar-dakded. Geb Amnón, Tamarʼga sogded: —Gwisgue. Be noe.
2SA 13:16 Tamar ega sogdemogad: —Mer weyob be an-imake. Be angi-dodosadba, bur-naibid-dummad be anga uknaid. Amnón, Tamar-ega-sunmaked itossulid.
2SA 13:17 Amnón e-maise goted, ega sogded: —We-ome be anga neg-magaba onoge, mer bar odogo, yog-yawagak-ediar imako.
2SA 13:18 Geb Amnón-e-mai, neg-magaba Tamar-onosad. Geb yawagak edis imaksad. Tamar mor-yeerdakle-yoi-gudiid, rey-sisgan-yagan gusgu mor-yodamaladyob.
2SA 13:19 Agine, Tamar sooburu amisad, e-nonogi eosad. E-mor-yeerdakleged-yoid siir-imaksabalid, e-arganmar e-nono-birgi mesisa, igarba binnasur-ogormaknadapi gusad.
2SA 13:20 Absalón e-bun-Tamar-deyob-daksagu, ega sogded: —¿Be-sus-Amnón begi dodosa? Buna, we-ibmar mer bar obaro, ar be-gwenadbalid. Mer be surbinsa itogo. Tamar, Absalón-negse megnonikid. Naibid-dummad itodii gusad.
2SA 13:21 Rey-David deyob wisgusgu, bela-bela sae itosad. Degi-inigwele, e-machi-Amnónʼse uludsurgusad. Ar ade, e-machi-sailaginedsoggu, na sabesailad.
2SA 13:22 Absalónʼdi, Amnón-Tamarʼgi-dodosad-ular, Amnónʼga bar sunmaksasulid. Bela-bela Amnón-sae-dake gusad.
2SA 13:23 Birgabo-nasad-sorba, Absalón, Rey-David-masmalase gochad, adi, Baal-Hazor-neggweburse ibase-dagmalagar. Baal-Hazorʼde, Efraín-yar-naid-dikarba siid. Baal-Hazorʼgine, Absalón-sibad-wawaad-e-absar-esikmalad bukwamarmogad.
2SA 13:24 Absalón, Rey-Davidʼse naded, geb ega sogdapid: —Anga-arbamalad sibad-wawaad-e-absar-esinanaisoggu, anse be atakdabi an be-abeged, degi, bega-arbamalad be sedabaloed.
2SA 13:25 Rey-David, Absalón-abin sogded: —Suli machi. Anmar bela bese naosulid. Degiile, be-ibe mani meso-itole. Absalón amba egi alamaknai-inigwele, Rey-David yapa nae gusad. David, Absalónʼga sognai gualid, bitigi bega ibmar-nueganbi gusana gadinye.
2SA 13:26 Absalón ega sogdebalid: —Be anba naosursoggu, degiirdi, an-ia-Amnón be anba barmide. David abin-sogded: —¿Ibiga Amnón beba naoe?
2SA 13:27 Absalón, Davidʼgi alamaknaisoggu, David, Amnón-barmisad, degi, bela e-masmala-bamalad barmisbalid.
2SA 13:28 Absalón e-maimarga sogsa gusad: “Bemar nue Amnón-dako, nue-mumgudele, an bese gotemaloed: ‘Emisgi Amnón-oburgwemarye.’ Geb bemar Amnón-oburgwemaloed. Mer dobgumalo, ani an be-barminanaid. Gandik-samalo, niga-ogannomalo.”
2SA 13:29 Absalón-e-maimar igi Absalón ega sogsagusa, sogedba Amnón-oburgwismalad. David-masmala deyob neg-daksagu, gwichibin imaksamalad, geb e-molimar-uaya-senigwadgi wakitemalad.
2SA 13:30 Amba rey-masmala igarba nadapmargu, Davidʼse gaya-mosad: “Absalón, bela be-masmala-oburgwisye, wargwensaar durgussurye.”
2SA 13:31 David itosgua, gwichibin imaksad, e-mor-yoid siir-imaksad, geb napayala megisad. Bela ega-arbamalad-walik-bukmalad, deyob e-mor siir-imaksamarmogad.
2SA 13:32 Simea-machi-Jonadab Davidʼga sunmakded, ega sogded: —Dummad, be-masmala-burgwisye-soglegedi mer be itoge, ar Amnónʼbi oburgwilesad. Ar ade, Amnón, Tamarʼgi dodosgu, Absalónʼdi sogsagusad, amba anse Amnón-oitolegedseye.
2SA 13:33 ”Dummad, degisoggu, mer emar-sognanaid be itogo: ‘Bela be-masmala-burgwisye,’ ade, Amnónʼbi burgwisad.”
2SA 13:34 Agine, Absalón wakited. Degidgine, sapingwa-nakulegwichid e-yargansik-igar-maidsik-atakdegua, dakalid, bukidar dulemar yar-aidemaid-gakaba danimala.
2SA 13:35 Degi, Jonadab, Rey-Davidʼga sogded: —Rey, igi an bega sogsagusa, bela be-masmala burgwissurye, be dake, danimalad.
2SA 13:36 Jonadab-sunmaked-bergusgu, rey-masmala nonimalad, geb binnasur-bodmalad. Rey-David, degi, bela-ega-arbamalad naibid-dummad-nagunonikidba bodmarmogad.
2SA 13:37 Absalónʼdi, Amiud-machi-Talmaiʼse wakited. Talmaiʼde, Gesur-neggwebur-e-reyd. David na e-machi-Amnón-burgwisadga bane-bane bodii gusad.
2SA 13:38 Deyob Absalón, Gesur-neggweburse wakite gusad. Agi birgapaa gudii gusad.
2SA 13:39 Rey-David, Amnón-burgwisadba, bato baisur-ito-gusgu, Absalón-dakbi gualid.
2SA 14:1 Sarvia-machi-Joab, Rey-David bela-bela Absalónʼgi-nue-binsaed magar daksad.
2SA 14:2 Degisoggu, Joab ome-emar-binsaed-gaed ese sedamalaga imaksad. We-ome, Tecoa-neggweburginedid. Joab a-omega sogded: —An bega sogo, dule-burgwisadgi-mor-yoleged be yoo. Melle gwallu-wawa be mago, igi dule, dule-burgwisadba-bukib-itodidae, deyob be yamo san-imako. Dikasursur dule, dule-burgwisadba-wile-itodiiyob be san-sao.
2SA 14:3 Agi, geb Joab, Rey-Davidʼse ome-barmisad. A-iduale, omega sunmaknai gusad, igi Rey-Davidʼga sunmakdapoe.
2SA 14:4 Ome-Tecoa-neggweburgined Rey-David-asabin gwisgunonigua, e-dummad-dakedba, dulluu-napase imaksad. Davidʼga sogded: —¡Rey, be an-bendake!
2SA 14:5 Rey ega sogded: —¿Igi be itoge? Ome abin-imakded: —An suisuli gudiid, an-sui an-ibe burgwisad.
2SA 14:6 An-be-mai-guedi walabo masmala-nikanad. An-masmala sapurba-gudimargua, na uluarmalad. Dule-e-bendaked satesoggu, gwensak e-gwenad-sabsur-sarsosad, geb, oburgwisad.
2SA 14:7 Emisgindi dakleargua, aka angi bela an-gwenadgan atakdemalad. Geb an-gwenadgan sokarmalad: ‘Dule-e-gwenad-oburgwisad be anmarga udaye, e-gwenad-oburgwisad-nukad anmar oburgwemogoye.’ ¡Ar we-dulemardi gwen bai an-daksurmalad! Anga napi-gudiid oburgwebimalad, itoba e-nug-berguega imakbimalad, abali an-sui-e-nug bergudsunnoed.
2SA 14:8 Agine, Rey-David omega sogded: —Bega an igar-imako. Degisoggu, be-negse be nae.
2SA 14:9 Ome-Tecoa-neggweburgined reyga sogdebalid: —Dummad, be anga igar-imaksulile, akarsuli. Ar boni noalile, angi siid, degi, an-gwenadgangi siid. Rey, begindina, degi, be-negsemaidgindina we-boni sigosulid.
2SA 14:10 Rey-David ome-abin sogdebalid: —Nabir. Ar dule be-oakalobidibe, be anga sogo, adi, mer bese achaega.
2SA 14:11 Ome ega sogdebalid: —Rey, bese an wilegedgi egise, be-Bab-Dummad-Jehováʼse be gole, adi, an-gwenadgan-an-machi-buged-mai-imakbied, mer an-ibe an-machi-baid-oburgwegar. An-machi-oburgwilesale, aka bur bule anga nunmaked-ukbalo-itole. Rey omega sogdebalid: —Bab-Jehová-Dula-Maid-nuggi an bega soged, dule bipisaar be-machise gwen achaosulid.
2SA 14:12 Ome ega sogdebalid: —Dummad-Rey, napi an bega ibmar sogbied. Rey-David ega sogded: —Sunmakdena.
2SA 14:13 Ome reyga sogdebalid: —Ar we-ibmar be anga sogsadba be anga oyoged, dulemar-isgusale, igi-barsaye be sogdaed. Ar degite, ¿ibiga be-machi-ononnolesaddina gannar-dagega geg be imaksunna? Be imake-wilubbinad. Emide, na be dukin be-nug-oichonaid, degi, be-neggwebur-nug be oichonaibalid.
2SA 14:14 Igi dii napagi ariodele, gege bar gannar welege, debayobi anmar bela berguedsegad. Ar Bab-Dummaddina dule-oburgwesulid. Dule-ononnolesgudiid gannar-ese-daged bur abeged, adi, ega igar amiegar.
2SA 14:15 ”Dummad-Rey, dulemar an-ogwayealidba an bebo-sunmakega nonikid. Weyob sogoye an binsasad: ‘Reybogwa an sunmakoye, an ese ibmar egisoye, abakalegi anga nabir ibmar imakalirye an binsasad.
2SA 14:16 Degi, Reydina dule-an-oburgwebi-gudiidgi an-bendakoeddeeye, an-machi-bendakbaloeddeeye, an binsasbalid, adi, mer Bab-Dummad-anmarga-ibmar-uksad anmar-ibe sulegegarye.’
2SA 14:17 ”An weyob soged: ‘Be anga-ibmar-sogoedi, gwage-gadi-gadi an-imakoed. Dummad, ar be Bab-Dummad-e-baliwituryob-gusoggu, magar be neg-daked, biti ibmar-nuedi, degi, biti ibmar-isganabali. ¡Bitigi be-Bab-Dummad-Jehová be-bendakena gadin!’ ”
2SA 14:18 Agine, David ome-abin sogded: —An bese ibmar-egisgwelo. Mer be angi ibmar-odukuo, be anga sogo. Ome abin-sogded: —Dummad, be anga sogdo.
2SA 14:19 Rey ese egisded: —¿Joab, wese be-barmiali? Ome abinsaded: —Dummad-Rey, be-nuggi napira an soged. Ar nabir be soge. Ar be-sorda-Joab bebo-sunmakega bese an-barmialid. Degine, bela an bega ibmar-sogsadi, Joab anga sogsad, deyob be reyga sogoye.
2SA 14:20 Be-machi-Absalónʼga be igar-nudakega yamo Joab deyob imaksad. Dummad, ar bedi, Bab-Dummad-e-baliwituryob nue binsaed nikasoggu, we-napaneggi-ibmar-gued magasar be daked.
2SA 14:21 Geb Rey-David ome-ega-ibmar-sogsadba, Joabʼse gochad, ega sogded: —Nabir be soge, an beba nai. Absalón be sunae.
2SA 14:22 Joab, Rey-David e-dummad-dakedba e-asabin dulluu-napase imaksad. Geb degine, reyga-sognai gualid, be nueganbi-sadeguana gadinye. Joab, Davidʼga sogdebalid: —Rey, be an-dummadid, an wisi, be nued angi binsaed. An ibmar-bese-egichad be anga imaksad.
2SA 14:23 Joab deyob sogsagua, gwisguded, agi Gesur-neggweburse naded. Degi, Joab Jerusalén-neggweburse Absalón-senonikid.
2SA 14:24 Agine, Rey-David sogded: “Mer Absalón anse dagoye. E-negse na nadeguoye.” Degisoggu, Absalón e-negse nadegu imaksad, reyse arbisurgusad.
2SA 14:25 Israel-dulemar-abargine Absalón-daklegedyobi dule sulid. Ar e-daklegedi, machered-nued dakleged.
2SA 14:26 Absalón sailagia-modogusale, e-sailagia sikardaed. E-sailagia-siklesale, rey-e-nibiratar-wilub aidiku gusdaed.
2SA 14:27 Absalón walapaa masmala nikusad, degine, bunolo gwensak nikusbalid. E-bunolo Tamarʼye-nugad, bunolo-nued dakleged.
2SA 14:28 Absalón birgabo-wilub rey-e-wagar-daksuli Jerusalén-neggweburgi gudigusad.
2SA 14:29 Ibagwengine, Absalón, Joabʼse gochad, adi, e-ular reyse naegar. Joab yapa Absalónʼse dage gusad. Degine, Absalón gannar Joabʼse gochabalid. Amba Joab itossurbalid, yapa Absalónʼse dage gusad.
2SA 14:30 Agine, Absalón dule-ega-arbamaladga sogded: “Nabir, Joab-e-nainu-cebada-digar-naidse be namalo. A-nainu, an-nainu-dikarba naid, e-ibe be ogumakmalo.” Absalónʼga-arbamalad nadegusmalad, geb Joab-e-nainu ogumaksamalad.
2SA 14:31 Agine, Joab, Absalónʼse nade gusad. Ega sogdapid: —¿Ibiga bega-arbamalad an-nainu ogumaksa?
2SA 14:32 Absalón abin-sogded: —An bese gochanad, anse be dagye, adi, an-ular reyse be naegar. Adi, ese egisega: ‘¿Ibiga Gesur-neggweburgi-gudii an suleapi? An weba bur gudiina, nuedinad. Emide, reyse an naoed, ar ibmar-oakalos an-dakele, an-oburgodo.’
2SA 14:33 Agi, geb Joab reyse nade gusad, Absalón ega ibmar-sogsadba reyga ibmar sogdapid. Agine, rey, Absalónʼbina gochad, ese dagegar. Degi, geb Absalón reyse nonikid, rey-abin dulluu napa-naga imaksad. Geb Rey-David Absalón-wagar usad, adi, oyogega na ebo nugusmarye.
2SA 15:1 We-ibmar-gusad-sorba, Absalón bila-onoged-ur-napaginmalad amisad, molimar amisbalid, degine, sordamar-egi-nakulemalad e-dulabo-gakambe (50) amisbalid.
2SA 15:2 Absalón wakudaryala gwisguardaed, degine, neggwebur-yawagak-dogedgi signaddaed. Agine, dule-gwensak Rey-Davidʼse igar-nudakega nadapile, Absalón ese gotedaed, ega weyob sogdedaed: “¿Be biti-neggweburginedi?” Dule-nadapid abin-sogdedaed: “Dummad, an Israel-dule, an igar-nudaknadapi.”
2SA 15:3 Agine, Absalón ega sogdedabalid: “Nabir be igar-sedanikinad, deyob imaklegewilubbindo. Degi-inigwele, rey-asabin bega dule-ibmar-imaked satesunnad.”
2SA 15:4 Absalón ega sogdedabalid: “¡Ani an we-neggweburgi igar-nabogega-maina, bela-dule-anse-atakdanimaladga sogedba an ega igar-nudakoenad!”
2SA 15:5 Agine, dule-gwensak Absalón-asabin dulluu napase imakardibe, Absalón a-dule ogwisgusdaed, angaagwar gasdaed, geb e-ibe wagar-usdabalid.
2SA 15:6 Weyob Absalón bela Israel-dulemar reyse-igar-itogega-atakdanidamalad imakardaed. Deyob, Absalón dulemar-e-binsaed ganaidaed. Degisoggu, e-bina yaisur-itoge guarmalad.
2SA 15:7 Birgabakegusgua, Absalón, Rey-Davidʼga sokalid: —Dummad, wis an bese egise, Hebrón-neggweburse an nabienad, Bab-Jehováʼga an ibmar-imakoye-sogsad imaknaegar.
2SA 15:8 An Siria-yargi gudigua, Gesur-neggweburgi weyob an sogsa gusad: ‘Bab-Jehová Jerusalén-neggweburse gannar an-senonidibe, an Bab-Jehová-nug-odummodii guoye.’
2SA 15:9 Rey ega sogded: —Boni-sate, be nae. Agi Absalón Hebrón-neggweburse nade gusad.
2SA 15:10 Degidgine, Absalón, Israel-wagan-ambe-gakabo-bukwad-irba (12) dule-garda-berbemalad barmisad. Weyob sogsad: ‘Bemar gar-trompeta-gote-itodele, binnasur gotemalo: ¡Absalón Hebrón-neggweburgi negsemaiye!’
2SA 15:11 Absalón Jerusalén-neggweburgi dulemar dulataled-ilabo (200) sesad. Amar baisur-binsae eba-nade gusmalad, ibmar-wissuli eba-nade gusmalad.
2SA 15:12 Deginbali, Absalón Bab-Jehováʼga ibmar-ogumakar-uknaigua, Gilo-neggweburse Ahitofel-sunamalaga emar-barmisbalid. Ahitofelʼde, Davidʼga binsaed-daked-duled, Gilo-neggweburginedid. Deyob, rey-egwallegedgi-sunmakleged gangumai gualid, degine, dulemar Absalónʼba-nanaimalad mergumai guarbalid.
2SA 15:13 Garda-berbeged-gwensak Davidʼga sogdapid: “Belagwable Israel-dulemar Absalónʼba nagudmalad.”
2SA 15:14 Geb David e-sordamar-Jerusalén-neggweburgi-gudimaladga sogded: —Anmar gwae nae, anmar wakinnergebed. Ar degisulile, anmar Absalónʼgi wakinnosulid. Ar anmar bargalesale, Absalónʼse anmar ibitogoed, es-suidgi bela dulemar-ese-ibitomaloed.
2SA 15:15 Rey-David-sordamar rey-abin sogdemalad: —Rey-David, be anmar-dummadid. Anmar guakwagwad, be-sogedba anmar imako.
2SA 15:16 Degi, geb rey node gusad, bela e-sordamar eba nadmarmogad. Rey-e-omegan-dikarbalid-warambegwaddina (10) sorba neg-akwega obelesad.
2SA 15:17 Deyob Rey-David, bela e-sordaganmala nade gusad. Bannaba ambikudapmalad.
2SA 15:18 Bela rey-e-sordamar rey-dikarba ambikusmaladi wemalad: Cereteo-dulemar, Pelet-dulemar, degi, Geteo-dulemardi dulataled-ilanergwa (600) mergued. We-Geteo-dulemar, Gat-neggwebur-akar Davidʼba nagab aligusmalad. Bela we-dulemar, rey-idu nadapgusmalad.
2SA 15:19 Agine, Rey-David, Gat-dule-Itaiʼga sogded: —¿Ibiga be anmarba danimoga? Gannar Rey-Absalónʼse be nae, ar be dule-ainebalidid. Ar be-neggweburgi be onoles gudimogad.
2SA 15:20 ¿Ar be emiskwaa nonigudisursi? ¿Sunna anba dagega an be-imakosi? Suli. Anbela an wissulid, an bia naoe. Bur be gannar nae, be-dulemar be sede. ¡Bab-Jehová-e-sabgued-sadeguad, degine, innikigwad-sogmaid bega oyogoed!
2SA 15:21 Itai, rey-abin sogded: —Ar Bab-Jehová-Dula-Maid-nuggi, degi, be an-dummad-gumogad-nuggine, an ise-sogar soged: Ar bia be naoe, an beba nai. An burgodibe, an burgosurdibe, akarsuli, an beba nai.
2SA 15:22 Geb David, Itaiʼga sogded: —Nabirdo. Anmarba be dagsunna. Gat-dule-Itai, degi, e-sordaganmala Rey-Davidʼba nade gusmalad, bela e-gwenadganmarse-bakar, nade gusmalad.
2SA 15:23 David e-sordaganmala-nadapmargua, bela dulemar ega ogormakdemalad. Rey-David e-sordaganmala Cedrón-diwar-maidgi obaksamalad. Geb degine, neg-dulesulidganba nade gusmalad.
2SA 15:24 We-dulemarba Sadoc nade gusmogad, degi, Levita-dulemar nade gusmarmogad. Amardina, Bab-Jehová-Dadganbo-Igar-Mesisad-Ulu semai gusmalad. We-dulemar, Bab-Jehová-Ulu napagi sisad. Degine geb, Abiatar, bela dulemar-neggweburgi-noed-obelosadse Bab-Dummadga ibmar-ogumakar uknai gualid.
2SA 15:25 Geb Rey-David, Sadocʼga sogded: —Bab-Jehová-Dadganbo-Igar-Mesisad-Ulu gannar Jerusalén-neggweburse be berbenao. Bab-Jehová nabir angi binsabidibe, gannar Jerusalén-neggweburse-dagega an-imakoed. Degi, gannar Bab-Jehová-Ulu-dakega an-imakbaloed. Deginbali, Bab-Dummadse-goled-neg-sunna-seleged-dakbaliga an-imakbaloed.
2SA 15:26 Ar Bab-Jehová sogdibe: ‘Bar an bebina sogsurye, ¿igi an bar saosunna? Bab-Jehová e-sogedba an-imakodo.’
2SA 15:27 Aginbali, Rey-David, dule-irwa-Bab-Dummadse-goled-Sadocʼga sogdebalid: —Ar be dule-irwa-Bab-Dummadse-goledsoggu, nuedgi gannar be Abiatarʼbogwa Jerusalén-neggweburse nao. Degine, be-machi-Ahimaas, degi, Abiatar-machi-Jonatán, beba namarmogo.
2SA 15:28 Neba-naidgi dule-buksulidgi anmar ambikudapoed. Gardamar be anmarga-senonikidse anmar ambikuoed.
2SA 15:29 Degisoggu, Sadoc, Abiatarʼbogwa Bab-Jehová-Dadganbo-Igar-Mesisad-Ulu Jerusalén-neggweburse sesgusmalad, geb agine gudigusmalad.
2SA 15:30 Davidʼdina Olivo-yar-enaknai gualid, emurkwaa-bonadapi gusad, degi, sapat-sate nadapi gusbalid. Bela Davidʼba-nadapmalad, emurkwaa-bonadapi gusmarmogad.
2SA 15:31 Agine, Davidʼga sognonimalad: “Ahitofel, emargi-aibinega Absalónʼba gunaimoye.” Geb David weyob sogded: “¡Bab-Jehováʼye, Ahitofel-binsaed-ukedi be obure!”
2SA 15:32 David yar-birse, Bab-Dummadse-gorledaedse mosgua, Arquita-dule-Husai abingualid. We-dule, mor siir-siir David-abin danikid, geb e-nono olli-sichi danibalid.
2SA 15:33 David, Husaiʼga sogded: —Anba be dagye-sogele, binsa be anga arbaed onogoed.
2SA 15:34 Gannar be Jerusalénʼse-naed bur nabirid, adi, be Absalónʼga sogdapiga: ‘Rey, an be-maiga guoye. Igi an be-bab-Davidʼga arbadii gusa, deyob an bega arbadii gumogoye.’ Deyob be imaksale, sunna be Ahitofel-binsaed-ukedi obured.
2SA 15:35 Agi dule-irwa-Bab-Dummadse-goled-Sadoc, degi, Abiatar, be-yarba gwichi gumaloed. Degisoggu, bela be rey-neguyagi-ibmar-itodagoedi, Sadocʼga, degi, Abiatarʼga be ogwaoed.
2SA 15:36 Degine, bela be-ibmar-itogoedi, Sadoc, e-machi-Ahimaasʼga ogwamogoed, degi, Abiatar, e-machi-Jonatánʼga ogwamogoed. A-sapingana, anga ibmar-ogwanai gumarmogoed.
2SA 15:37 Degidgine, David-e-ai-Husai, Jerusalén-neggweburse naded. Absalón neggweburse-dognadapidgine, Husai dognadapi gusmogad.
2SA 16:1 David yarbirgi sikwas-nasgua, Mefiboset-e-mai-Siba David-abin noalid, geb Davidʼga moli-uayasuid-walabo e-siged-nika-nika senonikid, degine, geb molimar-birgi we-ibmarmar senonibalid: Madu, dulataled-ilabo (200), uva-dinnagana-madu, gwadulatar (100), higo-dinnagana-madu, gwadulatar (100), degi, vino, moli-uka-buglu-gwagwen senonibalid.
2SA 16:2 Rey-David, Sibaʼse egisded: —¿Ibiga be we-ibmar sedaniki? Siba abin-sogded: —Moli-uayasuid-walabogwadi, rey-e-gwenadgan-egi-sigmalaga an sedanikid. Madumar, degi, uva-dinnagana be-sordamar-ogunnega an sedanibalid. Vinoʼdina, bemar nega-dulesulidganba-gudiidgi-yeguarmalale, gobmalaga an sedanibalid.
2SA 16:3 Rey-David, Sibaʼse egisded: —¿Be-dummad-Saúl-e-wagwadina? Siba abin-sogded: —Jerusalén-neggweburgi besa. Ar ade, binsaed: ‘Emi-iba, e-dad-negsemaigusad gannar ega uklegoye.’
2SA 16:4 Rey-David, Sibaʼga sogded: —Mefiboset-ibmar-nikad bela begadga gusunno. Ani an bega uked. Siba, David-abin dulluu imakded, geb ega sogdemogad: —Rey, be an-dummad-gued. Nuedye an bega sogdo, we-ibmar be anga uknagu.
2SA 16:5 Rey-David Bahurim-neggweburse nonigua, Saúl-e-gwenad-Gera-machi-Simei, David-abin noalid. Agine, Simei, Davidʼgi uluded, gaya-isgana egi sogded.
2SA 16:6 Degine, sordamar David-ebiris nadap-inigwele, Simei, Davidʼgi akwa-misad, degine, dummagangi akwa misbalid.
2SA 16:7 Simei, Davidʼgi urwenagu, weyob sogded: —¡Be nae! ¡Be dule-isganad, be dule-gindakedid!
2SA 16:8 Rey-gan-suega be Saúl-gwenadgan oburgwisad. A-nukad Bab-Jehováʼse be sabsur-odurdaklenaid. Agala, Bab-Jehová, be-machi-Absalón negseega imaknaid. ¡Na be dukin sadii, dule-gindakedbi gaamakdiid!
2SA 16:9 Geb Sarvia-machi-Abisai, reyga sogded: —¿Ibiga we-dule-isgana an-dummad-reygi isdar sunmaknai? Dummad, an bega e-dukar egwanno.
2SA 16:10 Rey-David, Sarvia-masmala-abin sogded: —Mer be achamalo. We-igar bemargadsulid, degi, angadsurmogad. Ar dule-we-ibmar-sognaidi, Bab-Jehová-sogedba-sognair sognaid, be Davidʼga deyob sognaoye. Degite, ¿doa ese golosunna, ibiga be deyob sognaye?
2SA 16:11 David, Abisaiʼga, degi, e-sordaganga sogdebalid: —Be dakena, ar an-machi-sunnadbela, an-oburgwebigudiid, degite, ¿we-dule-Benjamín-wagwa-bursunna? Mer ese be gormalo. Igi na sunmakbie, e-itolegeddo, ar Bab-Jehová we-dule barmialid.
2SA 16:12 Abakar Bab-Jehová, an-nunmak-itodiidba wile an-dakalile, we-gaya-isgana emi-angi-milenaidi, ibmar-nuedga anga gualile.
2SA 16:13 David, e-sordaganmala igarba gannar nadmarbargu, amba Simei yar-dikarbali iisedi gaya-isgana-sognadapi gusad. Amba Davidʼgi akwamar-minai gusbalid, ukubse-bakar minai gusbalid.
2SA 16:14 Rey-David, degi, bela e-sordaganmar nadapidba nue-geggusmalad. Degisoggu, Jordán-diwarse nonimargua, agi obunnosmalad.
2SA 16:15 Degidgine, Absalón geb bela-Israel-dulemar-eba-danigusmalad, Jerusalén-neggweburse dognonimalad. Ahitofel eba nonimogad.
2SA 16:16 David-e-ai-Arquita-dule-Husai, Absalónʼse-nonigua, ega sogded: —¡Rey be undar-suiti-megena gadin!
2SA 16:17 Absalón, Husaiʼse egisded: —¿Ibiga be-aiba be nadsuli? ¿Ar be-aigi dodoye be soge?
2SA 16:18 Husai, Absalón-abin sogded: —Degisuli. Ar unnila Bab-Jehová-dule-nug-imaksadba an gudiguoed, degi, dulemar, dule-nug-imaksadba an gudiguoed, bela Israel-dulemarba an gudigubaloed. Degisoggu, an be-walik gudiguoed.
2SA 16:19 ¿An doa-e-maiga bar guo be an insasunna? Unnila an be-maiga guergebed. ¿Ar rey-machiga an arbadii guosur be insae? Eye, an arbadii guoe. Ar igi an be-babga-arbadii gusa, deyob an bega arbadii gumogoed.
2SA 16:20 Geb agine, Absalón, Ahitofelʼga sogded: —Be anga binsaed dake, ibu anmar imakoe.
2SA 16:21 Ahitofel, Absalónʼga sogdemogad: —Be-bab e-omegan-dikarbalid e-neg-edarbega-obesadbo be gabnae. Adi, bela Israel-dulemar be-dakmalagar, be-babbogwa be nue-isdaradga gusye. Deyobile, dulemar-beba-nanaimalad bela gangudmaloed.
2SA 16:22 Degisoggu, Absalónʼga neg-uas-birgi dordoneg-sobsamalad. Adi, agi e-bab-e-ome-dikarbarmaladse golegar. Geb deyobi Israel-dulemar bela daksamalad.
2SA 16:23 We-ibagangine, dulemar Ahitofel-binsaed-ukedgi binsadamalad, wede Bab-Dummad-gayaburbaye. David, degi, Absalónʼmoga deyob egi binsadamarmogad.
2SA 17:1 Aginbali, Ahitofel, Absalónʼga sogded: —An bedile, miliambe-gakabo (12,000) sordamar-amisaled. Emisbinne emi-mutikidba an David-baleginnadeled.
2SA 17:2 David-geggus-gudiidgi, nollo-gudibalidgi, egi baisursunna gwisguledapiled. Ega dobed-dummad-naguega an imaksaled. Degidba, e-sordagan-eba-gudidimalad, dobedba wakitemalaled. Unnila Rey-Davidʼbi an oburgwisaled.
2SA 17:3 E-sordamardina an senonikiled. Degii-David-burgwisadbali, bela e-sordamar beba nagudmalaled. Deyob, geb neg-bogidik nagunonikiled.
2SA 17:4 Absalón, degi, Israel-dulemar-nug-nikamalad, Ahitofel-ega-binsaed-uksad nabir-itosmalad.
2SA 17:5 Absalón sogded: —Arquita-dule-Husaiʼse be anga gornamalo. Anmar itomarmogo, igi sogdamogodibe.
2SA 17:6 Husai, Absalónʼse-nonigua, Absalón ega sogded: —Weyob Ahitofel sogsadi, ¿anmar eba ibsao be itomoga? Sulile, be sogmodo.
2SA 17:7 Husai, Absalónʼga sogded: —Emisgindi, Ahitofel-e-binsaed-uknaidi innikisulid.
2SA 17:8 Geb Husai sogdebalid: —Be wisid, be-bab-David, dule-buledid. Aginbali, e-sordamar-eba-gudimalad deyobmarmogad. Igi sapurbali wiob-ome ei mimmigan-sulesale, urwedii dae, deyob e-sordamar sae itodimalad. Aginbali, be-bab bila-onoged-dulebalid, degisoggu, e-sordaganbali mutik gudii guosulid.
2SA 17:9 Inniki an bega soged, akwasailagan-yaba dukus-mairgebed. Bia gudisundibe. Ar e-inse bemargi yolenoniye, dulemar itoarmalale, sogdemaloed: ‘Absalón-sordamar ibitosmarye.’
2SA 17:10 Degidbali, sordamar achumigur-nono-wawaadyob niga-gandikmalad, bela sikirmakdemaloed. Ar bela Israel-sordamar wismalad, be-bab dule-buledi, degine, wismarbalid, e-sordagan-eba-gudidimaladi, dule-buleganmarmoga.
2SA 17:11 ”Degisoggu, an sogmodo, Absalón, bela Israel-sordamar Dan-yar-naidgi-bukwad, degi, Beerseba-neg-naid-ugakaase-bukwad be onmako. Ar sordamar demar-gakaba-ukub-naidyob merguosoggu, be-sunnagwad urwenaega be amar-iduergebed.
2SA 17:12 Ar David bia gudioe, agi anmar egi yoledapoed. Igi boo napagi batiardae, deyobi, anmar egi batidapoed. David, degi, bela e-sordagan-eba-gudimalad, wargwensaale dula anmar obegosulid.
2SA 17:13 Ar David neggwebur-gandikidse dukunaddibe, bela Israel-sordamar a-neggweburse urdub-nika namaloed. A-urdubgi bulakwaa anmar e-ibe e-galu-matusulid-akwabiid earoed, e-akwamar-seniganse-bakar, diwar-maidse mioed.”
2SA 17:14 Absalón, degi, bela Israel-dulemarmala sogdemalad: —Arquita-dule-Husai-e-binsaed, Ahitofel-e-binsaedba bur-nuedid. Ar we-ibmar-gusadi, amba Ahitofel-e-binsaed innikigwad-inigwele, Bab-Jehová, Absalónʼga-boni-onogega Ahitofel-e-binsaed-oburega imaksad.
2SA 17:15 A-sorbali, Husai, dule-irwa-Bab-Dummadse-gormalad-Sadocʼga, degi, Abiatarʼga sogded: —Ahitofel weyob Absalónʼga, degi, Israel-girmar-dummaganga binsaed uksad. Andina weyob Absalónʼga an binsaed uksamogad.
2SA 17:16 Degisoggu, gwae bemar Davidʼga weyob-sognamalo: ‘Mer-bemar emi-mutik neba-naidgi ambikumaloye, gwae Jordán-diwar obakmaloye. Rey-Davidʼye, deyob be imaksulile, be, degi, be-sordagan-beba-gudimalad oburgwilemaloye.’
2SA 17:17 Jonatán, Ahimaasʼbogwa Rogel-dia-siid-naba besmalad, adi, mer Jerusalén-neggweburgi-dogmai dulemarse daklegegar. Degisoggu, amar-owisogega ome-gwensak-maiga-gudiidi, ega gayaburba berbenonidaed, adi, amar-ebogwad Rey-Davidʼse gayaburba sedegar.
2SA 17:18 Degi-inigwele, sapingwa-gwensak a-dulemar-daksad, geb Absalónʼga barsokapid. Degisoggu, Jonatán, Ahimaasʼbogwa agi-gunaid gwae nadmalad. Bahurim-neggweburse nonimargua, dule-gwensak-neggi dognonimalad. A-neg-imba-naidgi, dia-siid-yaba dogsamalad.
2SA 17:19 Neg-ibed-ome atued amisad, geb, dia-siid-birgi ogichad. A-birgi, ibmar-gwag eosad. Degisoggu, dia sisuliyob daklesad, wisgulessurgusad.
2SA 17:20 Absalón-sordamar ome-negse-nonimargua, omese egisdemalad: —¿Bia Ahimaas, Jonatán-ebo nadmala? Ome abin-sogded: —Bato dian obaksamalargebed. Sordamardi amar-ebogwad-aminade gusmalanad, amissurgusmalad. Degisoggu, Jerusalén-neggweburse gannar nonigusmalad.
2SA 17:21 Sordamar bela duurmakdemargua, geb Jonatán, Ahimaasʼbogwa dia-yaba-siidgi nosmalad. David-owisogega Davidʼse nade gusmalad, geb ega sogdapmalad: —David gwae be nae. Gwae be Jordán-diwar-obakmalo. Ar Ahitofel, Absalónʼga binsaed-uksad, igi-bemargi gwichiguoe.
2SA 17:22 Degisoggu, David, bela sordamar-eba-gudimalad neg-oiboged-idu bela Jordán-diwar obaksamalad.
2SA 17:23 Ahitofel, e-binsaedba-Absalón-aibirissuli daksagua, e-moli-uayasuidgi e-neggweburse naded. E-negse mosgua, bela-e-gwenadganga igarmar-uksad-sorbali, na-dukin dukar-gasad. Deyob Ahitofel burgwisad, geb degi, e-bab-neg-uan-maidgi digsamalad.
2SA 17:24 David Mahanaim-neggweburse nonigua, Absalónʼdina Israel-sordaganmala sorba Jordán-diwar-obaksamalad.
2SA 17:25 Absalón, Joab-anar, sorda-dummadga Amasa-onug-imaksad. Amasaʼde, Israel-dule-Itraʼye-nugad-e-machid. Itraʼde, Abigail nikusadid. Abigailʼde, Nahas-e-sisgwad, Sarvia-e-urbad. Sarviaʼdi, Joab-e-nanad.
2SA 17:26 Israel-sordamar, geb Absalónʼmala Galaad-yargi ambikunonimalad.
2SA 17:27 David Mahanaim-neggweburse nonigua, agine wemar abingualid: Nahas-machi-Sobi. Sobiʼde, Rabá-neggweburginedid, Rabáʼde, Amón-wagan-e-neggweburad. Amiel-machi-Maquir. Maquirʼde, Lodebar-neggweburginedid, degine, Barzilai, Barzilaiʼde, Rogelim-neggweburginedid, Rogelimʼde, Galaad-yargi siid. Wemar Davidʼse nonimalad.
2SA 17:28 A-dulemar Davidʼga we-ibmar senonimalad: Atuedmar, gobednogmar, mete-burwigan, orosgi-dakleged-trigo, orosgisaar-dakleged-cebada, madubur, ob-dibyaled, ingwagii-dakleged-habasʼye-nugad, ingwagii-dakleged-lentejas, ingwagii-dakleged-garbanzos-dibyaled,
2SA 17:29 achanis, moli-bebe-nikad-nunis-ollikwagwad, sibad-wawaad-nunis-gwamakaled, degine, moli-bebe-nikad-nunis-gwamakaled. David, e-sordaganmala, we-ibmarmar-gunmalaga ega senonimalad. Ade, binsasmalad: “Sordamar neg-dulesulidganba geggus danimar an insaye, ukudmaada danimar an insaye, mas-gunbi gudanimar an insaye,” ade, deyob binsamalad.
2SA 18:1 David e-sordagan-eba-gudimalad danar-danar-urbenai gualid. Agine, sorda-mili-miligwengi (1,000-1,000) gusad, degi, sorda-dulatar-dulatargi (100-100) e-idumalad onug-imaksad.
2SA 18:2 Agine, David sordagan-bukwad sogapaa-mimisad. Geb degine, sordagan-soggwen-idugega, Joab-onug-imaksad. Sordagan-sogbogi, Abisai-onug-imaksabalid. Abisaiʼde, Joab-e-gwenadid. Ebogwadi, Sarvia-masmalad. Geb David, napi-sordagan-sogapaagwad-idugega, Itai-onug-imaksad. Itaiʼde, Gat-duled. Agine geb, Rey-David, bela sordamar-bukwadga sogded: —An bemarba urwenamogoed.
2SA 18:3 Bela sordamar-bukwad ega sogdemalad: —Anmarba be naosulid. Ar anmar urwenai-wakitedibe, baisur anmar-dakmaloed. Anmar-sordamar negabar-oburgwilesmalar, baisur dakmarbaloed. Ar bedi nuga-nikadsoggu, anmar-miliambe-mergueyobi be gangumaid (10,000). Degisoggu, neggwebur-akar be anmar-bendakmai guoed.
2SA 18:4 Rey-David abin-sogded: —Bemar-sogedba an imako. Degisoggu, Rey-David e-sordagan-dulatar-dulatar (100-100), degi, mili-miligwen-ainidmargu (1,000-1,000), neggwebur-yawagak-noedgi dakegwichi gusad.
2SA 18:5 Rey-David, Joabʼga, Abisaiʼga, geb Itaiʼga igar-uksad: “Mer sabsur an-machi-Absalón imakmalo.” Rey-David, Absalónʼgi deyob sognagu, bela sordamar itosmalad.
2SA 18:6 David-sordamar, Israel-sordamargi-urwenaega nodegusmalad. Efraín-sapur-naidgi urwenai guarmalad.
2SA 18:7 A-ibagine, sordamar yeer oitolesmalad, mili-dulagwen (20,000) burgwismalad. Degi-inigwele, David-sordamar Israel-sordamargi obichad.
2SA 18:8 Bila-onoleged bela yar-gasa nagunonikid. A-ibagine, bila-onolegedba sordamar bur bule sapurba burgwismalad.
2SA 18:9 Absalón moli-uayasuid-birgi-nadapgua, David-sordamar-abingunonikid. Moli-uayasuid sapi-encinaʼye-nugad-urba dogded, geb Absalón-sailagia sapi-e-anagangi galenonikid. Agi bannu-bannu nagusad. E-molidi iduar naded.
2SA 18:10 Sorda-gwensak deyob-Absalón-daksagua, Joabʼga sognonikid: —Emiskwaa, an Absalón-daksad, sapi-encinaʼgi bannu-bannu-nai an daksad.
2SA 18:11 Joab a-dulega sogded: —Degite, be deyob Absalón-daksagua, ¿ibiga be yog-oburgwar imaksasuli? Nued be imakoenad. An bega mani-nibirambe-aidikued-wilub (10) ukoenad, an bega molidub-bur-sunsoged ukbaloenad.
2SA 18:12 A-dule Joab-abin sogdemogad: —Amba be anga mani-miligwen-aidikued-wilub (1,000) ukena, amba Absalón an oburgosulinad. Rey-machigi gege an aibined. Ar anmar rey-bega-ibmar-sogsad ise-itogaled, Abisaiʼga deyob sogsabalid, Itaiʼga deyob sogsabalid: ‘Mer an-machi-Absalón akar-imakmaloye.’
2SA 18:13 Aginbali, an na dukin san-urmakbalo-itole. Ar Rey-David wisgunonidibe, be-sunnad angi be gwisgudbaloed.
2SA 18:14 Joab ega sogded: —An bebo bar sunmakosuli. Joab eswar-warbaa yog amiar-imaksad. Degine, Absalón-bannumaknaidse nadegusad. Agi Absalón-e-binasgargi eswar-warbaagwad yosad
2SA 18:15 Degidgine, sapingan-Joab-bendakmalad, e-ambe (10) Absalón-ebirismalad, geb oburgwismarsunnad.
2SA 18:16 Agine, Joab, sordamar-mer-bar-urwega gar-trompeta-ogormalaga imaksad. Degidgine, geb Joab-sordamar bar Israel-e-sordamar-balegichasulid.
2SA 18:17 A-sorbali, Absalón-e-mui-bannumaknaid odesmalad, sapurba yaa-ollo-siidgi egwachamalad. A-birgi, akwamar-mulluu sie-sie imaksamalad. Israel-sordamardina bela gwakidmalad, e-neg-e-negse duurmakdemalad.
2SA 18:18 Absalón dula-gudiun, Rey-Nebagi na akwa-sobar ogwichisanad. Ade, Absalón weyob binsasgusad: “An machi-satesoggu, bar an-nug obarledii gulegosulid.” Agala, akwa-ogwichisadgine, Absalón, e-nug-nasiksad. Degisoggu, a-akwa, “Absalón-akwa-bubawarye” nuggunonikid. Agala, we-garda-narmaklenaidse, amba deyob bileged.
2SA 18:19 Agine, Sadoc-machi-Ahimaas, Joabʼga sogded: —Gwae an Rey-Davidʼse naoe, ega sognaegar, ‘Bab-Jehová be-isdarmaladgi-nakwega be-imaksaye.’
2SA 18:20 Joab, Ahimaas-abin sogded: —Ar Rey-David-machi burgwissoggu, e-babga emi we-gayaburba bee be berbenaosulid. Baid-ibagi ega be sogoed.
2SA 18:21 Degidgine, Joab, Etiopía-dulega sogded: —Bee be nao. Bela be ibmar-daksadi, Davidʼga be sognao. Etiopía-dule, Joab-abin napase dulluu-imaksad, geb agi abarmakded.
2SA 18:22 Sadoc-machi-Ahimaas gannar Joabʼga sogdebalid: —Degi-inigwele, amba an Etiopía-dule-sorba abarmakdoe. Joab abin-sogded: —Machi, ¿ibiga be abarmakdoe? We-gayaburba-berbenaoedgi ibnued gwen be amiosulid.
2SA 18:23 Ahimaas abin-sogded: —Baisuli. Igi neg-gubie, deyob guodo. Amba an abarmakdoe. Joab ega sogdesunnad: —Degite, be nado. Degidba Ahimaas neba-neg-naidba abarmakde gusad. Agine, Etiopía-dule-bargadapid, geb na e idusunnad.
2SA 18:24 Davidʼdi neggwebur-yawagak-gebe-gwichid, degi, yawagak-baid-sorba-gwisbalid, a-negabargi siid. Dule-nakuleged yawagak-niba neg-swirinaidgi atakgwisgu, dule-gwensak-abarmakdaniki dakalid.
2SA 18:25 Geb agi, Rey-David-owisogegala, binnasuli goted: —Dule dani. Agine, Rey-David sogded: —Ar dule wargwen-danikile, degirdi, gaya-nued sedanido. Degidgine, dule-abarmakdanikid walikgudanigua,
2SA 18:26 dule-nakulegwichid dakarbalid, dule-baid sorba abarmakdanibali. Geb yawagak-dakgwichidse iseedi goted. Ega sogded: —Sorba, dule-baid abarmakdanibali. Rey-David sogdebalid: —We-dule amba gaya-nued sedanibalirgebed.
2SA 18:27 Dule-nakulegwichid sogded: —An dakedi, dule-idunaid Sadoc-machi-Ahimaasʼyob abarmaked. Rey-David abin-sogdebalid: —We-dule, dule-nuedi, gaya-nued sedaniki.
2SA 18:28 Ahimaas, Rey-David-asabin-nonigua, Davidʼga sogded: —Nued-sogeye. Agi Ahimaas dulluu napase imaksad. Geb Davidʼga sogded: —Rey-David, be-Bab-Dummad-Jehová-e-nug odummolesun. Ar aa, be-isdarmalad-begi-aibichamalad, bela bega urmaksad.
2SA 18:29 Rey-David ese egisded: —¿Absalónʼdi, nuedi? Ahimaas abin-sogded: —Joab-an-barmiargu, dulemar oimaknanai unnila an itosad. Degisoggu, an wissurmosundo, ibiga deyob oimaknanai gusmarsundibe.
2SA 18:30 Rey-David ega sogdebalid: —Dage wesik. Wegi gwisguda. Geb Ahimaas, Rey-David-naba gwisgunonikid.
2SA 18:31 Agine, Etiopía-dule nonimogad. Rey-Davidʼga weyob sogded: —Rey, gaya-nued bega an sedanikid: Emi, Bab-Jehová be-isdarmalad-begi-gwisgusmaladgi be-ollor-imaksad.
2SA 18:32 Rey-David Etiopía-dulese egisded: —¿Absalónʼdi, nuedi? Etiopía-dule abin-sogded: —Igi-we-sapingwa-naibigusa, deyob bela rey-e-isdarmalad, degi, reygi-gwisgubi-gudimalad imaklemarmogana gadin.
2SA 18:33 Rey-David deyob e-machi-Absalón-burgwisye itosgua, gwage-naibid-dummad ega nagunonikid. Geb yawagak-birgi-neg-siidse-nakwemaigua, ise-boar-sunmaknadapi gusad: “¡Machiye, machiye! ¡Ani an bur be-ular burgwissunnana gadin! ¡Machiye, machiye!”
2SA 19:1 Agine, Joabʼga sognonimalad: “Rey-David Absalón-burgwisad-ular nue-bodiiye, nue-wile-itodiiye.”
2SA 19:2 Sordamar wisgunonigua, Rey-David e-machi-burgwisad-ular nue-wile-itodiiye. Agidba bila-onolesadgi-nakwismaladgi, bar weligwar itossurmalad, eba wile-itodmarmogad.
2SA 19:3 A-ibagine, David-e-sordagan bila-onogedgi-galakus-danimalayob, arbakee neggweburse ubononimalad.
2SA 19:4 Reydina, ise-boar emurakwaa-gornaid: “¡Machi-Absalónʼye, machi-Absalónʼye!”
2SA 19:5 Degidgine, Joab negyaba dogded, bia Rey-David gunai. Geb Davidʼga sogded: “Be-sordamar bega-uluapmaladgi be-bendaksamalad. Deginbali, bega be-masmala, be-bunamala, be-omegan, degine, be-omegan-dikarbalid, bendaksamarbalid. Emide, aka be be-sordaganga binged-dummad be uknaid.
2SA 19:6 Ar be bur bule isdar-be-dakdimaladdi be sabed. Aka be-sabgudimaladdi be isdar-daked. Emide be anga nue-oyonasunnad, sorda-nug-nikamaladdi an baisur-dakye, sordamar an baisur-dakbarye. Nue an dakedi, anmar bur oburgwilesana baisulinye be anga sogeyobid: ‘Be-machi-Absalón-durgusana bur gadinye.’
2SA 19:7 Degisoggu, gwisgue, sordagan-abin be nonae, ega nuedgi be sunmaknae. Bab-Jehová-nuggi inniki an bega soged: Be nonasulile, we-mutikidba dulemar bar beba gudii guosulid. Be sapingwa-akale bonigan-itosadba bur bule bega neg boniga gunonikoed.”
2SA 19:8 Agine, Rey-David gwisgus-imaksad, yawagak-naba dummagan-bukwad-naba signonikid. Bela sordamar owisolesgua, Rey-David yawagak-naba-sigisye, bela sordamar rey-asabin gwisgunonimalad. Israel-sordamardina bela e-neg-e-negse wakitemalad.
2SA 19:9 Degine, dadgan-ambe-gakabogwad-e-wagan-bukwad-ilibali (12) neggusadgi sunmaklenai gualid. Weyob sunmaklenai gualid: “Rey-David anmar-isdarmaladgi anmar-bendaksad, Filistea-dulemargi anmar-bendaksabalid. Degi-inigwele, Absalón-dobedbali, Rey-David, we-yargi wakite gusad.
2SA 19:10 Ar anmar, reyga Absalón-nug-imaksanad. Emide, bila-onolesadgi burgwissunnad. Degisoggu, Rey-David gannar anmarse-dagega, ¿ibi-boni niksunna? An dakedi, boni sate an dakdo. Anmar ese gorsundo.”
2SA 19:11 Rey-David deyob egi sunmaklenai wisgusgua, dule-irwa-Bab-Dummadse-gormalad-Sadocʼga, degi, Abiatarʼga gayaburba barmisad, weyob ega sogmalagar: “Judá-girmar-dummaganse be gornamaloye, ega sogmaloye: ‘Rey, Israel-dulemar gannar-e-negse-dagega-ese-gornaid bela wisgusye. Ar bemar, rey-gannar-dagega ¿emar-sorba ese be gormalo-sogeye? Deyobwilubsulinye ega be sogo.’ ”
2SA 19:12 David sogbalid: “Weyob be Judá-girmar-dummaganga sogbaloye: ‘Bemar anmar-gwenadgan gumaladdeeye, anmar ablis-soggwenna gumarbaliddeeye. Ar degite, an-negse-gannar-an-dagegala, ¿ibiga bemar geb emar-sorba anse gormalosunye?’
2SA 19:13 Amasaʼga weyob bemar sogmogoye: ‘¿Ar anmarde ablis-emar-sursogeye? Ar anmar ablis-emaladdeeye. Joab-anar sorda-iduedga an be-nug-imakoye. Deyob an imaksulile, Bab-Dummad sabsur-an-odurdakoye.’ ”
2SA 19:14 Rey-David Judá-dulemar-eba-nagumalagar deyob imaksad. Degisoggu, bela danakwaa ese gotemalad: “Rey-David, gannar be-negse be dage, be-sordagan be sedabalo.”
2SA 19:15 Degi, Rey-David aligusad, Jordán-diwar-maidse nonikid. Judá-dulemardina, Rey-David-abinguegala, Gilgal-neggweburse nonimarmogad, adi, Jordán-diwargi bulakwaa-obakmalagar.
2SA 19:16 Aginbali, Gera-machi-Simei, Rey-David-abindakdagegala gwae aidedanigusad, degi, Judá-dulemar eba danigusmarmogad. Simeiʼde, Benjamín-e-wagwad, Bahurim-neggweburginedid.
2SA 19:17 Simeiʼbali, Benjamín-e-wagan miligwen (1,000) danigusmarmogad. Siba, Saúl-e-maiga-gudigusad, danigusmogad, degi, e-masmala warambe-gakatar (15), degi, e-maiga-gudimalad e-dulagwen (20) danigusmarmogad. Wemar, Rey-Davidʼse, Jordán-diwargi obaksamalad.
2SA 19:18 Diwar-dinnagwadsik obaksamalad, adi, Rey-e-gwenadgan obaksokalile, bendakmalagar. Gera-machi-Simei, Jordán-diwar-obaksagua, Rey-David-abin napayala megisad.
2SA 19:19 Geb reyga sogded: —¡Dummadye, wile be an-dake! ¡An begi ichakwa-sunmaksadi, begi-ichakwa-sunmaksasuliyob be an-dake! Bitigi be angi isdar-binsasulina gadin. Be Jerusalén-neggweburgi nodgua, an begi ichakwa-sunmaksadi, mer bar be ebinsaena gadin.
2SA 19:20 An, an-isgusad magar na itoged. Dummad-rey, agala an be-abindakegala, José-waganmar-abargi an-inse an nonikid.
2SA 19:21 Agine, Sarvia-machi-Abisai sunmaknonikid, sogded: —Simei, Bab-Jehová-dule-nugsasad ukabsas gusad. Degisoggu, oburgwilegergebed.
2SA 19:22 David abin-sogded: —Sarvia-masmala, mer be achamalo, we-igar bemargadsulid. Emide, aka be an-isdarmaladyob angi be yolenanaid. Israel-e-reyga gannar an gunonikid-ibagi, ¿sunna dule-oburgwilego be ebinsae? Suli.
2SA 19:23 Agine, Rey-David, Simeiʼga ise-sogar sogded: —Be burgosulid.
2SA 19:24 Saúl-wagwa-Mefiboset, Rey-David-abindaknonimogad. Mefiboset, Rey-David Jerusalén-neggweburgi nodegusgua, degi, emi-ibase David gannar Jerusalénʼse nuedgi-dognonibalidse, gwen nag-enukdisuli, e-mor-yoid-enukdisuli, degi, e-siga-moodo gudii gusad. Deyobi Mefiboset gudii gusad.
2SA 19:25 Rey-David, Jerusalén-neggweburgi dogdanigua, Mefibosetʼga sogded: —Mefiboset, ¿ibiga be anba nadegussuli?
2SA 19:26 Mefiboset abin-sogded: —Rey, be an-dummadid. An-mai an-yardaksad. Be wisid geg an nue nanaed. An Sibaʼga aisaar sogsanad: ‘Moli-uayasuid be anga guagwar nasiko. Egi sii an reyba naoed.’
2SA 19:27 Degisoggu, Siba bega ibmar-sognagua, an-ogakansanai gusad. Rey, be an-dummadid. Bab-Dummad-baliwituryob be gued, be-sogedba be an-imako. Be-dakedba be an-imako.
2SA 19:28 Be-an-dummadsoggua, an-gwenadgan, an-bab-neguyaginmalad, bela bese oburgwilegedinad. Degi-inigwele, beba mas-gunnega be an-imaksad. Degisoggu, gwen bar bese ibmar-egised an itosulid, ar unnila an be-maiga gudiid.
2SA 19:29 Rey-David, Mefibosetʼga sogded: —¡Wese! ¡Mer bar be sunmak! Emi bato an igar-mesisad, be Sibaʼbogwa napa mimimaloye.
2SA 19:30 Mefiboset, reyga sogdebalid: —Bela Sibaʼga napa-ukleged bur nabirid. Dummad, wese be gannar nuedgi-nonikidi anga unnigualed, ibmar-baid an abesulid.
2SA 19:31 Aginbali, Galaad-dule-Barzilai, rey-bardakega Rogelim-neggwebur-akar nonikid, Jordán-diwargi obaknai gusad.
2SA 19:32 Barzilai undar-selebagusad, birga-dulabake (80) nikad, degi, mani-ibedbalid. Rey-David Mahanaim-neggweburgi-gudigua, Barzilai, rey-ibmar-abeged bela binsa ega uksagusad.
2SA 19:33 Rey-David ega sogded: —Anba be dage, anba be Jerusalén-neggweburgi gudii guoed.
2SA 19:34 Barzilai rey-abin sogded: —Jerusalén-neggweburse an beba naesogele, ¿igi-birga an napi-gudii guosunna?
2SA 19:35 ¡An birga-dulabake (80) nika gudiid! Bar an nue neg-itodisurgusad. Mas-e-gullegedbela an aku-itogusbalid. Machergan-namakmalad, degi, omegan-namakmalad bar nue an itosurgusbalid. Degisoggu, dummad, binsa bega arbaed-onogega an beba nao-itole.
2SA 19:36 Rey, unnila Jordán-diwar-obakar an be-bardaknaoed. Degisoggu, baisuli, mer be anga ibmar-uko.
2SA 19:37 Dummad, an-neggweburse gannar-naega be an-imake. Agi-gudii an burgwebied, adi, an-babgan-neg-uangi an-digmalagar. Dummad, bega-arbaegala an-machi-Quimamʼye-nugad an bega obege, we beba-naoed. Igi be an-imakoena, deyob na be-dakedba be an-machi-Quimam imakoed.
2SA 19:38 Rey-David ega sogdemogad: —Nabir. Quimam anba dago. Igi an begi binsasa, deyob an-dakedba an imakoed. Quimamʼga ibu-ibmar-imakbi be an-abege, bega an imakoed. Ibu-ibmar be abege, bega an ukoed.
2SA 19:39 Belagwable Jordán-diwargi obaksamalad. Obaksamargua, Rey-David, Barzilaiʼga degimaloye-sogega e-wagar-usad, degi, ega Bab-Dummadse-gornai gualid. Geb agine, Barzilai gannar e-negse nadegusad.
2SA 19:40 Degidgine, Rey-David, Gilgal-neggweburse naded. Quimam eba nadegusad. Judá-sordamar bela bar-daknadmarmogad, geb Israel-sordamar abar-eba nadegusmarmogad.
2SA 19:41 Agine, Israel-sordamar Rey-Davidʼse nonimalad, ega sogdemalad: —¿Ibiga anmar-gwenadgan-Judáʼginmalad Jordán-diwar-obakega be-semamai guarmala? ¿Ibiga wemar be-gwenadgan-semamai guarmarbali, degi, be-sordagan-semamai guarmarbali?
2SA 19:42 Degidgine, bela-Judá-dulemar Israel-dulemar-abin sogdemalad: —¿Ibiga be sae-itomarsunna? Ar Rey-David anmar-gwenadid. ¿Ar anmar rey-e-masbina-gunasi? ¿Ar anmar Rey-e-ibmarbina-gunasi? Suli.
2SA 19:43 Israel-sordamar, Judá-sordamarga sogded: —¿Ibiga be isdarsunna anmar-dakmala? Ar anmar bur bule ilambe-wilub (10) bemargi obinsiid. Degisoggu, David bur bule anmargad gued. ¿Ar anmar-inse Davidʼse gochasursi, gannar be dagoye? Degi-inigwele, Judá-sordamar, Israel-sordamarse aka bur bule uludmalad.
2SA 20:1 Degi-neg-gunaidgi dule-isgana, Benjamín-dule Bicri-machi-Seba gudimogad. A-dule gar-trompeta ogote gusad, degi, iseedi sunmakded: “¡Israel-dulemar, bela e-neg-e-negse namalo, anmar Davidʼba naguosuli, Isaí-machiba ibmar-nued anmar amiosulid!”
2SA 20:2 Degisoggu, bela Israel-sordamar Davidʼgi bangudmarsunnad, geb Bicri-machi-Sebaʼba nadmarsunna. Judá-dulemardina, Rey-Davidʼba nadegusmalad, Jordán-diwar-akar Jerusalén-neggweburse nadmalad.
2SA 20:3 Rey-David Jerusalén-neggweburgi e-neg-siidse-dognonigua, e-omegan-dikarbalid-warambegwad (10) na e-neg-akwega-obesadi, ononai gualid. Neg-bachik-siidse a-omegan-barmisad. Agi Rey-David we-e-omegan-dikarbalid-bendakdii gusad. Degi-inigwele, David, a-omeganse bar gordii gussulid. A-omegan e-burgwedse negyaba geg-noe gudii gusmalad, sui-e-ibe-burgwismaladyob gudii gusmalad.
2SA 20:4 Degine, geb Rey-David, Amasaʼga sogded: “Judá-sordamar be anga onmako, ibapaase be an-asabin gwisgunoniko, sordamar nonimarmogo.”
2SA 20:5 Amasa, Judá-sordamar-onmakega nade gusad. Sordamar-onmakega undar gaganai gualid, degisoggu, e-ibagan ega obite gusad.
2SA 20:6 David deyob daksadbali, Abisaiʼga sogded: “Bicri-machi-Seba bur bule Absalónʼba anmar-wiogoed. Degisoggu, be an-sordamar sedo, be Seba-baleginnamalo, abakale, Seba neggwebur-galu-matusulidgi dogalile. Ar degiile, aka bur bule anmarga neg-gaganonikoed.”
2SA 20:7 Agi Jerusalén-neggwebur-akar, Bicri-machi-Seba-barganaega wemar Abisaiʼba nade gusmalad: Joab, degi, e-sordamar, Cereteo-sordamar, Pelet-sordamar, degi, niga-gandikmalad nadegusmarmogad.
2SA 20:8 Gabaón-neg-nugadgi akwasaila-siid-dikarba-nadapmargua, Amasa abin noalid. Deunni, Joab urwed-mor-yoi-gudiid, e-dikargi-molidub-naidgi es-suid-nai gudibalid. Degi-gudiidgi egi esbunyar argwated.
2SA 20:9 Agine, Joab Amasaʼga sogded: “Degite gwenad, ¿be nueganbi?” Degine, geb Joab sakwa-nuedgi Amasa-e-siga gasad, e-wagar-uegar.
2SA 20:10 Amasaʼdina, Joab argan-baidgi esbunyar-baid-sedanikid daksasulid. Degisoggu, ese-danigua, Joab, Amasa-e-dikargi esbunyar-yononikid. Geb e-samurmar ainide gusad. Agi Amasa ilagwen-burgwar naded, bar Joab ese achassulid. Degine geb, Joab e-ia-Abisaiʼbogwa Bicri-machi-Seba barganadmalad.
2SA 20:11 Joab-e-sorda-gwensak Amasa-mui-dikarba gwisgunonikid, geb iseedi goted: “¡Dule Joabʼba nanaimalad, David-bendakbimalad, Joab-sorba namalo!”
2SA 20:12 Amasa abebi igargi meremaisoggua, sordamar-a-igarba-nadapmalad, Amasa-dakega, bela gwisguddamalad. Agi, sorda-iseedi-gochadi dulemar-gwisguddamalad-daksagua, Amasa-igargi-maid obacha imaksad. Geb mor-dummad egi ogicha imaksabalid.
2SA 20:13 Deyob Amasa-onirilesgua, Bicri-machi-Seba-baleginnegar sordamar bela Joabʼba nadegusmalad.
2SA 20:14 Seba, bela Israel-dadgan-walambe-gakabogwad-bukwadse (12) idakdii gusad, degi, Abel-Bet-Maaca-neggwebur-siidse idakdii gusad. Degi, Barim-neggweburginmalad bela Sebaʼba nagusmarmogad.
2SA 20:15 Joab e-sordaganbo Abel-Bet-Maaca-neggweburse nonimargua, bela neggwebur-ebirismalad. Neggweburgi dogega, e-galu-matusulid-akwabiid-dikarba napa-nakwemaid-imaksamalad. Geb Joab-sordamar galu-eyaridmalad.
2SA 20:16 Agine, geb ome-nue-binsaed-nikadi iseedi Joab-sordamarse goted: —¡An-itomala! ¡An-itomala! Joabʼse wis be anga gormala. An ebo sunmakbie.
2SA 20:17 Agine, Joab omese-nonikid. Geb ome ega sogded: —¿Be, Joab? Joab abin-sogded: —Eye, ani an Joab. Ome ega sogdebalid: —Dummad, nue be an-itogo, an bega ibmar-sogoed. Joab abin-sogded: —Anga be sogdo, an be-itogoed.
2SA 20:18 Geb ome weyob Joabʼga sogded: —Epennegwa, dule igar-nudakbiele, gusgu soglear daed: ‘Abelʼginmaladse be egismala.’ Ar dulemar deyob igar nudakdamalad.
2SA 20:19 Anmar Israel-yargine dule-belagwamaladid, anmar bila-onoged-dule-surmalad. Anmar-neggwebur Israel-yargine nuga-nikadid. ¡Aka be emisgindi neggwebur-nuga-nikad be oitobied! ¿Ibiga be Bab-Jehová-e-dulamar osulobie?
2SA 20:20 Joab ome-abin sogded: —Suli, deyob an neg-imakosuli, negmar-earnai an guosuli.
2SA 20:21 Neg-oichogega an danisulid. Anmar unnila dule-gwensakbina gudanikid. Efraín-yalaganbalid Bicri-machi-Sebaʼbina anmar danikid. A-dule, Rey-Davidʼgi gwisgunonikid. A-dule, be anmarga uke. Ar be, a-dule be anmarga uksale, anmar yog-naar saoed. Ome, Joabʼga sogded: —Degir-nabirdo. Neggwebur-galu-birgi Seba-e-nono bega egwallenonikodo.
2SA 20:22 We-ome binsaed-yeer-nikasoggua, bela dulemarbogwa sunmaksad. Degisoggu, Bicri-machi-Seba-e-nono egwachamalad. Geb Joabʼga galu-matusulid-birgi Siba-e-nono mecharmalad. Agi, Joab gar-trompeta ogochad, geb deyob neggweburgi bangudmalad, e-neg-e-negse nadegusmalad. Joabʼdina, Rey-Davidʼse nonikid, Jerusalén-neggweburse.
2SA 20:23 Weyob Joab bela Israel-sordamar-e-dummadga gunonikid: Joiada-machi-Benaíaʼdina, Cereteo-dulemar-iduedga, degi, Pelet-dulemar-iduedga gunonimogad.
2SA 20:24 Adoramʼdina, mani-galeged-e-dummadga gunonimogad. Ahilud-machi-Josafatʼdina, neg-gusmalad-garda-narmaked-e-dummadid.
2SA 20:25 Sevaʼdina, garda-narmakedga nug-imaklenonikid. Sadoc, degi, Abiatarʼbogwa, dule-irwa-Bab-Dummadse-gormaladga nuggunonimalad.
2SA 20:26 Jair-dule-Iraʼdina, Davidʼga dule-irwa-Bab-Dummadse-goledga gunonimogad.
2SA 21:1 David negsemaigua, ukud-dummad birgapaa nagunonikid. Agi, David Bab-Jehováʼse idakded. Geb Bab-Jehová ega sogded: “Saúl, degi, e-gwenadgan-dule-gindakmalad Gabaón-dulemar-oburgwismalad-nukad neg-gunaid.”
2SA 21:2 Gabaón-dulemar Amorreo-dulemalad, Israel-dulemarsulid. Israel-dulemar Gabaón-dulemarbo igar-mesismalanad. Saúl Israel-dulemar-nue-bendakbiedba, degi, Judá-dulemar-bendakbiedba, igar-maid bisgenonikid. A-ulale, Saúl, Gabaón-dulemar-oburgwisad. Agine, geb Rey-David Gabaón-dulemar-onmaksad.
2SA 21:3 David, Gabaón-dulemarse egisded: —Bemar-naibi-gusad an nudakegala, degi, bemar Bab-Dummad-e-dulamargi-nabir-binsabaligala, ¿ibu an bemarga imaksale?
2SA 21:4 Gabaón-dulemar David-abin sogdemalad: —Anmar Saúl-manibina sognasulid, Saúl-e-orbina sognasurbalid, Saúl-e-negbina anmar gunasurbalid. Israel-sorda-gwensak-burgwed anmar abesurbalid. David abin-sogdemogad: —Bemar-sogedba an imakodo.
2SA 21:5 Gabaón-dulemar Rey-David-abin sogdemarbalid: —We-Saúl, Bab-Dummad-reyga-nug-imaksad anmar-wiosad. Anmar-gindaknai gusad, Israel-yargi anmar-ogilonai gusad.
2SA 21:6 Agala, anmar Saúl-e-gwenadgan-e-gugle (7) egisnaid. A-dulemar anmar Saúl-neggwebur-Gabaaʼye-nugadgi Bab-Jehováʼse-goled-asabin e-ibe e-dukar-gaoed. Rey abin-sogded: —A-dulemar an bemarga ukoe.
2SA 21:7 Degi-inigwele, Rey-David, Bab-Jehová-asabin ise-sogar Saúl-machi-Jonatánʼbo igar-mesisgussoggu, agidbali, Jonatán-machi-Mefibosetʼbi bendaksad, Gabaón-dulemarga uksasulid.
2SA 21:8 Aja-sisgwa-Rizpa, Saúlʼbo masmala-warbo nikusad. Gwensak Armoniʼye nugad, baiddi Mefibosetʼye nugmogad. A-masmala-warbogwad, Rey-David Gabaón-dulemarga uksad. Deginbali, Saúl-sisgwa-Merab, Barzilai-machi-Adrielʼbo masmala walatar nikusad. A-masmala-walataled, David Gabaón-dulemarga uksabalid. Barzilai-machi-Adrielʼde, Meholat-neggweburginedid.
2SA 21:9 David Gabaón-dulemarga we-dulemar-uknai gualid. Geb Gabaón-dulemar, yar-birgi Bab-Jehová-asabin, a-dulemar-e-gammu gasmalad. We-dulemar-e-gugled (7), cebada-weleged-e-ibagan-onodedgi darekwaa oburgwelenai gusmalad.
2SA 21:10 Degine, geb Aja-sisgwa-Rizpa wile-itoged-atuedmor amisad. Geb megega akwa-dummad-birgi ogichad. Deyob cebada-weleged-e-iba-onodedgi, degi, dii-wied-ibase megis gusad. Rizpa, mulamar e-masmala-muimar-ebugega imaksasulid. Mutiki, ibdurgan-sapurbarmalad e-masmala-muimar-ebugega imaksasurbalid.
2SA 21:11 Davidʼga sogsamalad, Saúl-ome-dikarbalidga-gusad-Rizpa deyob gudiiye. We-Rizpaʼde, Aja-e-sisgwad.
2SA 21:12 Agi, David, Saúl-e-garmar, degi, Jonatán-e-garmar, Jabes-De-Galaadʼgi-digar-bukwad suapid. Deunni, Filistea-dulemar Gilboa-yargi Saúl-oburgwismargua, Betsán-neg-imbagi bannu-bannu nasiksamalad. Agi, Jabes-De-Galaad-neggweburginmalad, Saúl-mui, Jonatán-muibo-bannu-bannu-naidi, atur-imakap gusmalad.
2SA 21:13 Degisoggu, David, Saúl-e-garmar, degi, Jonatán-e-garmar-sedmalaga imaksad. Dulemar-e-gugled (7) gammu-galesmalad-e-garmar sesmarbalid.
2SA 21:14 Deyobi, Saúl-e-garmar, degi, Jonatán-e-garmar, Benjamín-yar-naidgi digsamalad, Zela-neggweburgi. Saúl-e-bab-Quisʼye-nugad-e-neg uangi digsamalad. Ar igi Rey-David imakoye sogsa, deyob sogedba imaksamalad. A-sorbali, Bab-Dummad neg-nued nasiknonikid.
2SA 21:15 Filistea-dulemar Israel-dulemargi gannar bila-onodmalad. Degine, David, e-sordaganmala, Filistea-dulemargi-urwega nade gusmalad. Urwenaidba, David gegguded.
2SA 21:16 Degisoggu, David, Isbi-Benobʼse oburgweleged-naga gusad. Isbi-Benobʼde, dule-masdummagan-e-wagwad. Isbi-Benob-eswar-esgoro-gordikidbiid nibirbaabak-wilub (8) aidikued, degine, e-dikargi es-suid-binid naibalid.
2SA 21:17 Agine, Sarvia-machi-Abisai, David-bendaknonikid. Abisai, a-Filistea-sorda-naibi-imaksad, geb oburgwisad. David-sordagan deyob David-daksamargua, ega ise-sogar sognai guarmalad: “Dummad, bila-onolegedgi bar be anmarba nanaosulid, abakale, dule be-oburgwenonikile. Ar degiile, anmar anmar-iduged surguo-itole, Israel-yar-seed sate gunoniko-itole.”
2SA 21:18 We-ululesad-sorbali, Filistea-sordamargi gannar Gob-neggweburgi urwelenonibalid. Agine, Husa-dule-Sibecai, dule-masdummad-Safʼye-nugad-oburgwisad.
2SA 21:19 A-sorbali, ilapaagus-urwelegedgine, amba Gob-neggweburgi Filistea-sordamargi gannar urwelenonibalid. Agi, Belén-neggweburgined Jaare-Oregim-machi-Elhanán, Gat-neggweburgined-Goliatʼye-nugad-oburgwisad. Goliat-eswar-e-wardunguedi, achagwen-wilub wardungued.
2SA 21:20 A-sorbali, Gat-neggweburgi gannar urwelenonibalid. Agine, sorda-gwensak-mas-bipisulid gudiid. A-dule, argan-irba nergwa (6) goomar nikad, geb nag-matar-irbali nergwa (6) goomar nikabalid. A-dule, bela goomar dulagwen-gakabake (24) nikad. We-dule, dule-masdummagan-e-wagwamogad.
2SA 21:21 We-dule-masdummad, Israel-sordamar-ourweardaed. Agine, Simea-machi-Jonatán a-dule-masdummad-oburgwisad. Simeaʼde, David-e-iad.
2SA 21:22 We-dule-masdummagan-e-bakegwadi, Gat-neggweburginmaladi, Davidʼse, degi, David-e-sordaganse ibitosmalad.
2SA 22:1 Bab-Jehová, Saúlʼgi David-bendaksa-gusgu, degi, e-isdarmaladgi-bendaksa-gusbargu, weyob David Bab-Jehováʼga namaked narmaksad.
2SA 22:2 David weyob narmaksad: “Bab-Jehová anga akwasailayob an-bendaked gued, Bab-Jehová an-garganguedid, an-ollor-imakedid.
2SA 22:3 An-Bab-Dummad an-niga-ogannogedid, egi an benguosulid. Anga sigu-abgaedyob gued, an-abonoged-gandikidid. Bab-Jehová an-odukuedga gued, an-bendakedid. Neg-bulegangi be an-bendaksadid.
2SA 22:4 Bab-Jehováʼye, innikigwadba be-nug odummoleged. An bese gotele, an-isdarmaladgi be an-bendaked.
2SA 22:5 ”Burgwedse an nue sulegednaga gusad, demar-dummagan-arwemaiyobi angi yolenonikid.
2SA 22:6 Burgwednaga an gunonikid, burgwed, sakiyob an-idu nagusad.
2SA 22:7 An nunmak-itodiidgine, Bab-Jehováʼse an gochad. An-Bab-Dummad, e-neg-akale an-itosad. An-gormaked nue-itononikid.
2SA 22:8 ”Bab-Dummad-nue-uludgua, bela ese neg giglimakded. Napneg-naid giglimakdegu, bela nibneg-naid-billigan giglimakdemogad.
2SA 22:9 Bab-Jehová-e-bunnogedba, waa ainialid, e-gaya-yaba, soo-ginnitibi gwabunyealid, ginnitibi soomar milealid.
2SA 22:10 ”Bab-Jehová-aideargua, nibneg argaded, mogir-gudureged-birgi aidealid.
2SA 22:11 Bab-Jehová baliwitur-querubin-birgi-sii, gukunadapid, burwaba-gukumaiyob nadapid.
2SA 22:12 Negasichid egi ebiris nasiksad, mogir-gudureged egi ebiris nasiksad, bela egi ebiris naid.
2SA 22:13 Bab-Jehová-e-daklegedi, ibemakar dakleged, e-dakarmakedba soo ginnitibi milealid.
2SA 22:14 ”Bab-Jehová nibneggi-mai sabsur-gollalid, Bab-Dummad-Bur-Birigined malayob goted.
2SA 22:15 An-isdarmaladgi siguyob egi mar-odenai gualid, surbinsa-itogedba wakinmalaga imaksad.
2SA 22:16 Bab-Dummad-Uludedbali, dii-suke-dummagan noalid. Bab-Jehová-bunnodedbali, napa-dii-urba-naid magar-dakle gunonikid.
2SA 22:17 ”Bab-Jehová e-argan, anse niba-oyononikid, an-argan ganonikid, neg-wilasailadgi an-onononikid.
2SA 22:18 An-isdarad-gannarbaadgi, an-ollor-imaksad. Dule-isdar-an-dakdiidgi, anba bur bule ganguedgi, Bab-Dummad an-bendaksad.
2SA 22:19 An nue-wile-itodiidgi, an-isdarmalad angi gwisgunonikid. Agine, Bab-Jehová an-bendaknonikid.
2SA 22:20 Bab-Jehová an nued-nanadiidba an-ollor-imaknonikid. Neg-nuedgi an-ogwisgunonikid.
2SA 22:21 ”Bab-Jehová an-inniki-gudiidba, anga ibmar-uksad. An-ibmar-akar-imakdisulidba, nabir angi binsanonikid.
2SA 22:22 Ar Bab-Jehová-Igar-Mesisadba an nanadii gusad. Ibmar-isgana an imaksasulid, an-Bab-Dummadgi an bangussulid.
2SA 22:23 Bela e-Igar-Mamaid an-idumaid, e-Igar-Mamaidgi an bangussulid.
2SA 22:24 Bab-Dummad-asabin islikwaa an gudii gusad, ibmar-isgana-imaked an na bargasad.
2SA 22:25 ”An ibmar-inniki-imakdiidba, Bab-Jehová nabir anga ibmar-uksad. An ibmar-akar-imakdisulidba, nabir angi binsanonikid.
2SA 22:26 ”Bab-Jehová, dule-bebaligwaa-gudiidgi, be inniki damogad. Dule-wile-emar-dakedi, be wile dakmogad.
2SA 22:27 Dule-be-sogedba-gudiidga, sogedba ega be ibmar oyomogad. Dule-galagwensur-emar-yardakdiiddina, egi be gwisgumogad.
2SA 22:28 Dule-na-san-bipi-imakdimaladi be bendaked. Dule-na-san-dummarba-imakmaladdina, san-bipii be imakoed.
2SA 22:29 Bab-Jehová, gwalluyob be anga gued. Bab-Dummad, an negsichidgi-gudiidgi anga be neg-mee imaked.
2SA 22:30 Be an-bendakdiidgi sorda-bamalad anse ibitomalad. An-Bab-Dummad, an bebogwa neggwebur-galu-matusulid-birgi nabir an obakoed.
2SA 22:31 ”Bab-Dummad-e-igar, innikii maid. Bab-Jehová-gayaburba, sunsogedid. Dule-begi-dukued-amimaladga, sigu-abgaedyob be gued.
2SA 22:32 ¿Doa-baid Bab-Dummadga maisunna? Unnila Bab-Jehováʼbi, Bab-Dummadga maid. Unnila Bab-Jehováʼbi, akwasailayob gued, abi anmar-bendakmaid.
2SA 22:33 ”Bab-Dummad, an-niga-ogannogedid, igar-nuedbali an-nied.
2SA 22:34 Igi goe-sapur abarmake, deyob-abarmake, Bab-Jehová an-imaked. Yarmar-birgi-baparmaksuli an-imaked.
2SA 22:35 Bab-Jehová bila-onoged-idu an-odurdaked. Warsi-esgoro-gordikid nabir-dopee-imakega, an-surgan-ogannobalid.
2SA 22:36 Sigu-abgaedyob be an-irwa gwisgued. Be-garganguedgi be an-bendaked, be-sabgued nasguega an-imaked.
2SA 22:37 Igar-nanaed be anga nudaksad, adi, an nanadele, mer an yolegegar.
2SA 22:38 ”An-isdarmalad anse bargalesmalad, anse ibitolesmalad. An-isdarmalad-oitossuli an aibirissulid.
2SA 22:39 Bela anse naibigusmalad, anse galakunonimalad. Geg bar gwisgumalad, anse burgwismalad.
2SA 22:40 Bila-onolenaidgi be an-ogannosad. An-isdarmalad anse-galakuega be imaksad.
2SA 22:41 An-isdarmalad an-abin-sikirmakega be imaksad. Deyob isdar-an-dakdimalad an obelosad.
2SA 22:42 An-isdarmalad bendaklegega binnasuli-gornai gusmalanad. Dule-e-bendakmalad sate gusad. Bab-Jehováʼse gochamarbalinad, Bab-Jehová bendaksasurmogad.
2SA 22:43 An-isdarmalad anse sanyob ichi-ichi gusad. Igi ollimargi annalege, deyob an egi annasad, anse ibitosmalad.
2SA 22:44 ”Dulemar-angi-aibinnanaidgi be an-bendaksad, dulemar-iduedga be an-imaksad. Dulemar-aku-an-dakmalad, an-maiga gunonimalad.
2SA 22:45 Dule-ainebarmalad, an-nug-odummodmalad. Wis an-gaya-itosmalale, yog anba ibsaardamalad.
2SA 22:46 We-dule-ainebarmalad geggusmalale, e-dukuedgi-bukwa wawanmakdani noardamalad.
2SA 22:47 ”¡Bab-Jehová dula mai! ¡An be-nug-ogannoged. Akwa-gandikidyob be anga gued! An-Bab-Dummad-an-abonoged, an be-odummoged.
2SA 22:48 Bab-Dummad, an-isdarmalad-an-naibi-imaksadi, be anga buged-mai imaked. Dulemar-yar-baid-baidgi-bukmaladgi-obinega be an-imaked.
2SA 22:49 An-isdarmaladgi be an-onoged, angi-yoledimaladgi-obinega be an-imaksad, dule-ursirmaladgi be an-bendaked.
2SA 22:50 Bab-Jehováʼye, agala, dule-yar-baid-baidginmalad-abargi an be-nug odummoged. Bab-Jehová, be-nuggi an namaked.
2SA 22:51 ”Bab-Jehová, e-rey-onakwega imaked. Bab-Dummad David-na-nug-imaksadga, degi, David-e-wagangala, e-wiledakedbali, e-sabguedi degisadegu oyomai gudoed.”
2SA 23:1 Isaí-machi-David napi-sunmaksad: “We-David reyga-megega, Jacob-e-Bab-Dummad-Jehová, na nug-imaksadid, degine, we-sapin-e-nug odummosbalid. David Israel-dulemar-abargi yeer-namaked-duled. David, weyob napi-sunmaknai gualid:
2SA 23:2 ”Bab-Jehová-Burba an-ular sunmaked, an-gwabindukugi e-gayaburba nasiksad.
2SA 23:3 Israel-dulemar-e-Bab-Dummad sunmaksad, Israel-e-Akwasailayob-gued anga sogsad: ‘Dule igar-innikigwadba dulemar-nidiile, dule Bab-Dummad-dobekwaa negsemaile,
2SA 23:4 we-dule, bolegoedba neg-mee-ainakwiardaedyob gued, wakudaryalaba dad-dummad-ganaiyob gued. Igi dii-wisad-sorbali, neg daarmaksidae, degi, gagan oaramakdedae, deyobi we-dule gued.’
2SA 23:5 ”Igar-innikigwadba an dulemar-nidii gussoggu, degi, Bab-Dummad-dobekwaa an negsesoggu, a-ulale, an-neguya ise-diglegar gusad, degi, Bab-Dummad an-ibmar-abeged anga uked. Bab-Dummad anbogwa igar ise-sogar mesisad, a-igar-mesisad akar guosulid, ise-imaklegar megisad, degisadegu megisad.
2SA 23:6 Bela dule-isganamardina, gagan-ikobiidyob obelolegoed. We-gagan geg argangi ebuleged.
2SA 23:7 Dule a-gagan-weebiele, esgorogi weed, sulile, suargi weebalid. Geb a-gaganmar soogi yog-ogumakar imakleged.”
2SA 23:8 David-sordagan-bulegan, wemalad: Tacmon-dule-Joseb-Basebetʼye nugad. E-warbaagwad-bulegan-e-dummadid. Ibagwengi urwenagu, sorda-bamalad-dulataled-ilabaabak (800) oburgwisad.
2SA 23:9 A-yarbalidi, Dodo-machi-Eleazar danikid. Eleazarʼde Ahoh-duled. We-dule, e-warbaagwad-buledmogad. Israel-sordamar Pasdamim-neggweburgi Filistea-sordamargi urwesokarmargua, deunni Eleazar, Davidʼbogwa gunai gusmogad. Agi, Israel-sordamar Filistea-sordamar-abin sikirmakde gusmalad.
2SA 23:10 Eleazarʼdi, sikirmaksasulid, Filistea-dulemarbo urwenai gusad. Geb e-argan-geggudedba ega gannare naded, geg es-suid-indak gusad. A-ibagine, Bab-Jehová Israel-dulemar bela-bela onakwega imaksad. Israel-sordamardina deyob wisgusmargua, gannar Eleazar-gunaidse nonimalad. Unnila Filistea-sorda-burgwismamaid-e-ibmar-suegarbi nonimalad.
2SA 23:11 Eleazar-yarbarmoga, Age-machi-Sama danikid. Samaʼde, Arar-duled. Ibagwengine, Filistea-sordamar Israel-sordamargi-bila-onogega Lehi-neggweburgi ambikusmalad, bia ingwagiid-lenteja-digar-nai, agi ambikusmalad. Agi-urwelenaigua, Israel-sordamar Filistea-sordamarse-galakudmargua, dobedba duurmakdemalad.
2SA 23:12 Samaʼdina, sikirmaksasulid, a-nainu-naidgi urwenai gusad. Agi Filistea-sordamar ese galakusmalad. A-ibagine, Bab-Jehová, Sama-onakwega imaksad.
2SA 23:13 Ibagwengi, ibmar-weleged-iba nagunonigua, Adulamʼye-neg-nugad-e-akwa-ollorsiidgi, sorda-e-durgwen-gakambegwad-e-dummagan-warbaagwadi (30) Davidʼse nonimalad. Deunni, Filisteaʼmardina yar-imbaba Refaim-nebagi bukwamalad.
2SA 23:14 Davidʼdi, e-neg-gandikidgi gudiid. A-ibagine, Filistea-sordamar Belén-neggweburgi bukwad.
2SA 23:15 Ar Davidʼdi, ukud-yaidsur-itoarsoggua, sogded: “Belén-neggwebur-yawagak-naba dia siid. A-dii an gobsa binsaed.”
2SA 23:16 Geb degine, sordamar-warbaagwad, Filistea-sordamar-bukwadse nadegusmalad. Belén-neggwebur-e-yawagak-naba dia-siidgi dii wesmalad. Geb Davidʼga uknonimalad. Davidʼdi yapa-gobe gualid. Bur Bab-Jehová-e-nug-odummogega napagi eosad.
2SA 23:17 Agi weyob sogded: “Bab-Jehováʼye, an we-dii gobosulid. Sordamar anga dii-amiedbina, burgwednaga gudigusmalad-e-ablis-gobeyob an itoged.” Agala, David, gwen gobsasulid. We-sordamar-warbaagwad-bulegan deyob ibmar-imaksamalad.
2SA 23:18 Sarvia-machi-Abisai, Joab-e-ia, sorda-dulagwen-gakambegwad-e-iduedga (30) gudiid. Ibagwengi, Abisai eswarbi-gani sorda-e-dulataled-ilapaa (300) oburgwisad. Agala, Abisai sordamar-warbaagwad-abargi e-nug dummarba gunonimogad.
2SA 23:19 Abisai sorda-dulagwen-gakambegwadmarba (30) e-nug bur dumma gunonikid, e-dummadga nugsalenonikid. Degi-inigwele, Abisai-nug-dunguedi sorda-dummagan-warbaagwad-e-nugmargi obichasulid.
2SA 23:20 Abisai-yarba, Joiada-machi-Benaía danikid. Benaíaʼde, sapin-buledid, Cabseel-neggweburginedid. Benaía bukidar ibmar-bulegan imaksamogad: Benaía Moab-e-sorda-ebogwad-bulegan oitosgusadid. Benaía, deunni boo batenaigu, yaa-dummad-siidgi aides gusad. Agi Benaía, achumigur-nono-wawaad oburgwisgusad.
2SA 23:21 Benaía, Egipto-sorda-masdummad oburgwisbalid. Deunni, we-Egipto-dule, Benaíaʼbogwa-urwega, eswar sedanigusad. Benaíaʼdina unnila suarbi sedanigusad. Degite, Benaía, Egipto-dulegi eswar-sedanikid gandikidgi susad. Geb a-eswargi Egipto-dule-oburgwisad.
2SA 23:22 Joiada-machi-Benaía weyob-ibmar imaksad. Deyob Benaía, sorda-e-warbaagwad-abargi e-nug dummarba gunonimogad.
2SA 23:23 Benaía sorda-dulagwen-gakambegwadmarba (30) e-nug bur dumma gunonikid. Degi-inigwele, Benaía-nug-dunguedi sorda-dummagan-warbaagwad-e-nugmargi obichasulid. David sordamar-egi-nakulemalad-e-dummadga-guega Benaía-nug-imaksad.
2SA 23:24 David-e-sordamar e-dulagwen-gakambegwad (30), wemar gumalad: Asael, Joab-e-urba. Dodo-machi-Elhanán, Belén-neggweburgined.
2SA 23:25 Samaʼye-nugad, Harod-neggweburgined. Elicaʼye-nugad, Harod-neggweburgined.
2SA 23:26 Helesʼye-nugad, Palti-duled. Iques-e-machi-Ira, Tecoa-neggweburgined.
2SA 23:27 Abiezerʼye-nugad, Anatot-neggweburgined. Mebunai, Husa-duled.
2SA 23:28 Salmón, Ahoh-duled. Maharai, Netofa-neggweburgined.
2SA 23:29 Baana-e-machi-Heleb, Netofa-neggweburgined. Ribai-e-machi-Itai, Gabaa-neggweburgined. Gabaa-neggwebur, Benjamín-e-wagan-yargi siid.
2SA 23:30 Benaía, Piratón-neggweburgined. Hidai, Gaas-diwargined.
2SA 23:31 Abi-Albón, Arba-neggweburgined. Azmavet, Bahurim-neggweburgined.
2SA 23:32 Eliaba, Saalbón-neggweburgined. Jonatán, Jasén-De-Guisón-neggweburgined.
2SA 23:33 Sama, Arar-duled. Sarar-e-machi-Ahíam, Arar-duled.
2SA 23:34 Ahasbai-e-machi-Elifelet, Maaca-neggweburgined. Ahitofel-e-machi-Eliam, Gilo-neggweburgined.
2SA 23:35 Hezrai, Carmel-neggweburgined. Paarai, Arba-neggweburgined.
2SA 23:36 Natán-e-machi-Igal, Soba-neggweburgined. Bani, Gad-yargined.
2SA 23:37 Selec, Amón-duled. Naharai, Beerot-neggweburgined, adi, Sarvia-machi-Joab-bendakedid.
2SA 23:38 Ira, Itri-neggweburgined. Gareb, Itri-neggweburgined.
2SA 23:39 Urías, Het-duled. Belagwable sordamar e-dulagwen-gakambe-gakagugle (37) gued.
2SA 24:1 Bab-Jehová gannar Israel-dulemargi gwisgualid. Degisoggu, Bab-Jehová, David Israel-dulemargi-yolegega imaksad. Ega sogsad: “Israel-sordamar be ebiso, Judá-sordamar be ebisbalo.”
2SA 24:2 Agine, Rey-David, Joabʼga, degi, sordamar-dummaganga sogded: —Belagwable yar-naidgi bipirmakmalo, Dan-neggwebur-akale, Beerseba-neggweburse bila-onoged-birga-nikamalad be nue ebismalo. Adi, an wisguega, igi mergu sordamar nikadibe.
2SA 24:3 Joab, Rey-David-abin sogded: —Dummad-rey, be-Bab-Dummad-Jehová, emi be sordamar-nikadba, sunna bega bela-bela be-sordamar-omerguega imaked. Be-sunnad be daksaled. Degisoggu, ¿ibiga be sordamar ebisbisunna?
2SA 24:4 Degi-inigwele, Rey-David Joab-ibmar-sogsad itossulid, egi obichad, degi, sordamar-e-dummagangi obichabalid. Degisoggu, Israel-sordamar-ebisega sordagan belagwable nade gusmalad.
2SA 24:5 Dulemar-ebisnadmalad Jordán-diwar obaksamalad, geb Aroer-neggweburgi dulemar-ebisega ambikudapmalad. Degi, neggwebur-neba-imbaba-siidgi onodmarbalid. Geb Gad-yarsik, Jazer-neggweburse nadmarbalid.
2SA 24:6 Agi, Galaad-neggweburse nadmarbalid, geb Hodsi-yar-duturgan-naidse nadmarbalid. Agine, Danjaán-neggweburse nadmarbalid, degi, Sidón-neggwebur-naidse nadmarbalid.
2SA 24:7 A-sorba, Tiro-neggwebur-gandik-siidse nadmarbalid, degine, Heveo-neggweburmarba bipirmakapmalad, Canaán-neggweburmarba bipirmakapmarbalid. A-sorbali, Beerseba-neggweburse nadegusmarbalid. A-neggwebur Neguev-yargi siid, Judá-yar-naidgi.
2SA 24:8 Bela dulemar-ebisegala, nii-walabakebak gaka iba-dulagwen yar-ebilismalad. Agi, Jerusalén-neggweburse gannar nonimalad.
2SA 24:9 Agine, Joab, Rey-Davidʼga bela dulemar-ebislesad-igar ogwanonikid: “Israel-yargine, mili-dulataled-ilabaabak (800,000) sordamar-bila-onomalad bukwad. Geb Judá-yargindina mili-dulataled-ilatar (500,000) sordamar-bila-onomalad bukmogad.”
2SA 24:10 David sordagan-ebichisgu, gwage-ulubgi magar-itononikid, ede noar-ibmar-imaksaye. Agine, geb Bab-Jehováʼga sogded: “Bab-Jehováʼye, we-ibmar-imaksadgi an begi nue nosad. Bab-Jehováʼye, gwage-naibidgi an bese egise, an begi-isgusadi be anga elie, nossuliyob be an-dake, binsaed-sateyobi an ibmar-imaksad.”
2SA 24:11 David negburgan-daked-Gadʼse gusgu idakdidaed. Gadʼde Bab-Dummad-gayaburba-barsogedid. David wakdaradba gwisguargua, Bab-Jehová-e-gayaburba Gadʼse nonikid. Agi, Bab-Jehová ega sogded:
2SA 24:12 “Davidʼse be nao, ega be sognao: ‘Weyob Bab-Jehová sogye: An sabsur-be-odurdakega ibmar-sogapaa an bega oyogoye. A-ibmar an bega oyogoedi, unnila soggwen be suoye.’ ”
2SA 24:13 Gad, geb Davidʼse nonikid, ega sognonikid: —Bab-Jehová soged: ‘¿Biti be suoye? ¿We-yargi birgagugle (7) ukud-dummad-neg-naguedi? ¿Be-isdarmaladse be nii-warbaa bargalenai, degi, amargi be dukudii-guoedi? ¿Be-yargi ibapaa bonigan-buled naguoedi? Nue be binsao, be anga sogo, igi an an-barmialidga an sogdapoe.’
2SA 24:14 David, Gadʼga sogded: —Gwage-naibid-dummad anga uksad, suli-suli an itoged, biti an suodibe. Degi-inigwele, an sogdo, ar dulemar-sabsur-odurdakedba Bab-Jehová-e-boni-itoged bur-nuedid, ar ade, Bab-Jehová-e-wile-emar-daked bonigan-birgi obined.
2SA 24:15 Agine, a-wakdaradba, Bab-Jehová Israel-dulemargi iba-sogedse boni-dummad barminonikid. Agi mili-dulapaa-gakambe (70,000) dulemar burgwenonikid. Dan-yar-naidgi geb Beersebaʼye-neg-nugadse we-boni nagunonikid.
2SA 24:16 Geb degine, Bab-baliwitur dulemar-ogilogega Jerusalén-neggwebursik e-argan-oyodgu, Bab-Jehová e-baliwitur-boni-uknaidga sogded: “Mer bar dulemar akar-imako. Be-argan mer bar oyogo.” Jehová-e-baliwitur Araunaʼye-dule-nugad-e-ibmar-gwag-omukuleged-neg-dikarba gwichid. Araunaʼde, Jebuseo-duled.
2SA 24:17 David, baliwitur dulemar-ogilonai daksagua, Bab-Jehováʼga sogded: “Bab-Dummad, ani an nosad, ani an ibmar-ichakwa imaksad. An-sordagandi ibmar oakalossulid. Wilegedgi an bese egised, we-boni bur be anga uke, degi, an-neguyaginmaladga be ukbali.”
2SA 24:18 Agine, Gad a-ibagi David-gunaidse nonikid, geb ega sogded: “David, be nae, Jebuseo-dule-Arauna e-ibmar-gwag-omukuleged-neg-naidse be nae. Agi Bab-Jehováʼga ibmar-ogumakar-ukleged-aila be sobo.”
2SA 24:19 Deyob David, Bab-Jehová, Gadʼba ega ibmar sogsagusadba nadegusad.
2SA 24:20 Arauna, Rey-David-ese-daniki dakded, degi, Davidʼga-arbamalad eba daniki, dakdebalid. Agi, Arauna, Rey-David-abin napagi megisad,
2SA 24:21 geb ega sogded: —Dummad-rey, ¿ibiga weyob be anse daniki? Rey-David abin-sogded: —Ibmar-gwag-omukuleged-neg-bakega an danikid. Degi, Bab-Jehováʼga ibmar-ogumakar-ukleged-aila agi sobega an danibalid. Adi, boni-sordagan-ogilonaid berguegar.
2SA 24:22 Arauna, Davidʼga sogdebalid: —Dummad-rey, be-dakedba be napa sue. Be-dakedba Bab-Dummadga be ibmar uksunna. Aginbali, ibmar-ogumakar-uklegedga wegi moli-bebe-nikad bukwad. Suarmar-moligi-edilleged sunna be sapanga imaked, urgomar-ibmar-gwagmar-omukued be sapanga imakbaloed.
2SA 24:23 Rey-Davidʼye, we-ibmar bela an bega uke. Geb Arauna, Rey-Davidʼga sogdebalid: —Be-Bab-Dummad-Jehová, bitigi ega be ibmar-ukoedi, nued abingaena gadin.
2SA 24:24 Rey-David, Arauna-abinsaded: —¡An ibmar binsa be-ibe suosulid! An ibmar bakar imakoed. E-mani-nug-sogedba an bakoed. Ar ade, Bab-Jehováʼga an ibmar-manigi-baklegarsuli yogasaar an ukosulid. Deyob David ibmar-gwag-omukuleged-neg, degi, moli-bebe-nikad baksa gusad. Agine, mani-sibu-dulatar (100) aidikued-wilub baksa gusad.
2SA 24:25 David, Bab-Jehováʼga ibmar-ogumakar-ukleged-aila sobsagusad, ibmar-ogumakar uksabalid. Geb gwenatigwar-guedga-ibmar-uklegedi, Bab-Jehováʼga uknai gusbalid. David, bonigan-bargaega Bab-Jehováʼse wilesakwaa gornaid. Agi, Bab-Jehová, David-ese-goled itosad. Degisoggu, Bab-Jehová Israel-sordagangi bonigan ganonikid.
1KI 1:1 Rey-David seredgussoggu, e-birga yeer selebagusad. Aisaar Davidʼga mormar yosdamalanad, amba degite, dambe itodaed.
1KI 1:2 Aga Davidʼga-ibmar-imakmalad sogdemalad: “Dummadga yagwa-yoo-sui-nikued anmar amiergebodo. Adi, ega ibmar-saega, akwebaliga, deginbali, e-yarba-megbaliga, adi, nabir reyga uka-uee-saegar.”
1KI 1:3 Bela Israel-yargi Davidʼga yagwa-yeerdakleged amidii gusmalad. Yagwa-amismalad, Abisagʼye nugad, Sunam-neggweburginedid. A-bunagwa reyse senonimalad.
1KI 1:4 Abisag, Rey-David-akwega nonikid, ega-ibmar-imakega nonikid. We-Abisagʼde yeerdakleged, degi-inigwele, David a-yagwase gochasurgusad.
1KI 1:5 David-machi-Adonías negsebigualidba na wargwen sogded: “Ani an negseoed.” Adonías-e-nan Haguitʼye nugad. Adonías urmar-napagined aminai gualid, geb sordamar-ur-napagined-onanaed amisbalid. Geb Adonías sordamar e-dikarba-nakulemalad dulabo-gakambe (50) amisbalid.
1KI 1:6 Adonías-e-dakleged nued daklebalid. Adoníasʼde, Absalón-sorba gwalulegedid, David, e-machi-Adoníasʼga sogdii dasulid: “¿Ibiga be weyob ibmar imakye?” Ar Adoníasʼde na e-sogedba ibmar imakdidaed.
1KI 1:7 Adonías, reyga-megegala, Sarvia-machi-Joabʼbogwa igar-mesnai gusad. Aginbali, dule-irwa-Babse-goled-Abiatarʼbogwa igar-mesnai gusbalid. Wemar, Adonías-bendaksamalad.
1KI 1:8 Adoníasʼba nagussurmaladdina, wemalad: Dule-irwa-Bab-Dummadse-goled-Sadoc, Joiada-machi-Benaía, Bab-Dummad-gayaburba-barsoged-Natán, Simei, Rei, degi, David-e-sordamar-bur bulegan. Wemala, Adoníasʼba nagussurmalad.
1KI 1:9 Ibagwengi, Adonías, Rogel-dian-ariomaidsik akwasaila-Zoheletʼye-nugad-dikarba sibad-wawaadmar ogumakar Bab-Jehováʼga-uksad, moli-bebe-nikad-omegan uksabalid, geb moli-bebe-nikad-senigana-bur-nued uksabalid. Adonías, e-ibase-dagmalagala, bela e-urbamarse gochad. Amar rey-e-masmalad. Geb bela Judá-dulemar-reyga-dummadga-gudimaladse gochabalid.
1KI 1:10 Adonías, Bab-Dummad-gayaburba-barsoged-Natánʼsedi, e-ibase-dagegala gwen gochasulid. Degine, Benaíaʼse gochasurbalid, rey-sordagan-bur buleganse gochasurbalid. Deginbali, e-urba-Salomónʼse gochasurbalid.
1KI 1:11 Agine, Natán, Salomón-e-nan-Betsabéʼga sogded: “Omegwa-Haguit-machi-Adonías, anmar-dummad-David-wissuli reyga na dukin nug-imaksad, ¿be wisgusa?
1KI 1:12 Degisoggu, an be-unagwelo, adi, na be be-san bendakega, degi, be-machi-Salomón-san bendakmogagar.
1KI 1:13 Rey-Davidʼse be nao, ega be sogdapo: ‘Rey, be an-dummadid. Anga be ise-sogar sogsasursi: Be-machi-Salomón be-sorba yar-ganonikoye, be-sorba rey-gangi signonikoye. Degite, ¿ibiga Adonías reyga-megisye itolenaisunna?’ ”
1KI 1:14 Natán sogdebalid: “Be reybogwa sunmaknaddibe, an begi dognonikoed. Geb an be-sunmaknaid bargindioed.”
1KI 1:15 Agi, Betsabé, Rey-David-obunnogedse dogdapid. Ar Rey-David selebagussoggu, a-ulale, yagwa-Sunamʼgined-Abisagʼye-nugad ega ibmar-imaknaid.
1KI 1:16 Betsabé dogdapgua, David-abin dulluu napase imaksad. Geb Rey-David ega sogded: —¿Ibu be abege?
1KI 1:17 Betsabé abin-sogded: —Dummad, be anga ise-sogar sogsa gusad: ‘Be-machi-Salomón an-sorba yar seoye, an-sorba rey-gangi sigoye.’
1KI 1:18 Dummad-rey, emisgindi, Adonías yar-seega-megnaid be wissulid.
1KI 1:19 Adonías Bab-Dummadga-ogumakar-ukega, bukidar molimar-bebe-nikad oburgwisad, degine, moli-bebe-nikad-senigana-bur-nued bukidar oburgwisbalid, geb, sibad-wawaad bukidar oburgwisbalid. Ibase dagmalaga, Adonías, bela rey-machimalase gochad. Bab-Dummadse-goled-Abiatarʼse gochabalid. Geb sordamar-e-dummad-Joabʼse gochabalid. Degite, Salomónʼsedi gwen gochasulid, ar adi, inniki bega ibmar-imakdimogad.
1KI 1:20 ”Dummad-rey, Israel-dulemar neg-gunaidba bela-bela be-edarbebukwad, ega be sogega, doa be-sorba reyga megoye.
1KI 1:21 Degisulile, ar be burgwisale, be-machi-Salomón, geb anbogwa, anmargi ataklenonikoed, anmar neg-oichosmarye.”
1KI 1:22 Betsabé, Rey-Davidʼbogwa amba sunmaknaigua, Natán nonikid.
1KI 1:23 Geb Rey-Davidʼga sognonimalad: “Natán wegi gwichi.” Natán rey-siidse dognonigua, Betsabé noded. Geb Natán rey-asabin dulluu napase imaksagu, Davidʼga sogded:
1KI 1:24 —Dummad-rey, ¿ar be sogsasi, an-sorba Adonías yar seoye? ¿An-sorba Adonías rey-gangi-sigoye? Sulirgebed.
1KI 1:25 Emi Adonías, Akwasaila-Zehelot-neg-nugadse naded. Geb Bab-Dummadga-ibmar-ogumakar-uklegedgi bukidar molimar-bebe-nikad oburgwisad, moli-bebe-nikad-senigana-bur-nued bukidar oburgwisbalid, geb sibad-wawaad bukidar oburgwisbalid. Adonías bela be-masmalase gochabalid, degi, sorda-bila-onomalad-e-idudimaladse gochabalid. Geb Bab-Dummadse-goled-Abiatarʼse gochabalid. Wemar, Adonías-walik gobbukwad, mas-gunbukmarbalid. Geb weyob oimakdemarbalid: ‘¡Rey-Adonías reyga undar-megena yeerbana!’
1KI 1:26 Natán, Davidʼga sogdebalid: —Andi an be-mainad, degite, Adonías, iba-daknaega anse gwen-gochasulid, Bab-Dummadse-goled-Sadocʼse gwen-gochasurbalid. Joiada-machi-Benaíaʼse gochasurbalid. Geb be-machi-Salomónʼse gochasurbalid.
1KI 1:27 Dummad-rey, ¿ar be-sogedba neg gunai? Degite, gwen be anmar-owisossulid: We-dule an-sorba reyga megoye.
1KI 1:28 Geb Rey-David, Natánʼga sogded: “Betsabéʼse anga gornae.” Agi, Betsabé rey-abin gwisgunonikid.
1KI 1:29 Geb Rey-David ise-sogar sunmaknai gualid: —Bab-Jehová belagwable bonigangi an-bendaksad. We-Bab-Jehová sunsoged dula-maisoggu,
1KI 1:30 innikigwad an bega soged: Israel-e-Bab-Dummad-Jehová-nuggi an bega ibmar-imakoed. An ise-sogar bega sogsad: ‘Be-machi-Salomón, an-sorba neg-ganonikoye, an-sorba reyga megnonikoye.’ Emi-iba deyob an imakodo.
1KI 1:31 Betsabé, e-dummad-dakedba, Rey-David-abin dulluu napase imaksad. Geb sindigar-sii reyga sogdemogad: —Dummad-rey, be-anga-ibmar-soged, nueganbi, boni sulid. ¡Be undar degisadegu dula-megena gadina!
1KI 1:32 Geb Rey-David sogdebalid: —Sadocʼse gornamala. Natánʼse gornamarbalo. Geb Joiada-machi-Benaíaʼse gornamarbalo. E-warbaagwad Rey-David-asabin gwisgunonimalad.
1KI 1:33 Geb David sogded: —Bemar dule-anga-arbadimaladbogwa an-moli-uaya-senigwad-birgi an-machi-Salomón-onakmalo. Geb Gihón-neggweburse Salomón be sedmalo.
1KI 1:34 Agi, dule-irwa-Bab-Dummadse-goled-Sadoc, degi, Bab-Dummad-gayaburba-barsoged-Natán, we-ebogwad Salomón-Israel-reyga-nugsalegega e-nonogi olivo-gwallu eomalo, degine, bemar gar-trompeta ogormalo. Geb binnasuli bemar weyob gotemarbalo: ‘¡Rey-Salomón undar-dula-megena gadina!’
1KI 1:35 Geb bemar Salomón-sorba nadapmaloed. Agi, be gannar Salomón-senonimarbaloed, geb Salomón rey-gangi signonikoed, an-sorba yar semai guoed. Ani an Israel-dulemar-iduega, degi, Judá-dulemar-idubaliga Salomón-sunaid.
1KI 1:36 Agine, Joiada-machi-Benaía, Rey-David-abin sogded: —Nabirdo. Be, Bab-Dummad-Jehová-sogedba imakoed.
1KI 1:37 Igi Bab-Jehová beba gudigusa, deyob Salomónʼba gudii gumogoed. Bab-Jehová be-yar-semaidba bur dumma Salomón-yar-seega imakoed.
1KI 1:38 Dule-irwa-Bab-Dummadse-goled-Sadoc, Bab-Dummad-gayaburba-barsoged-Natán, Joiada-machi-Benaía, Cereteo-dulemar, degi, Pelet-dulemar, Rey-David-e-moli-uaya-senigwad-birgi Salomón-onakwismalad. Geb Gihón-neggweburse sesmalad.
1KI 1:39 Sadoc reyga Salomón-onugsaega, Bab-Dummadse-goled-neggi olivo-gwallu moli-bebe-gargi-siid susad. Geb Salomón-e-nonogi olivo-gwallu eosad. Agi, geb gar-trompeta ogotemalad, degi, dulemar binnasuli gotemarbalid: “¡Rey-Salomón undar dula-megena gadina!”
1KI 1:40 A-sorba, bela dulemar Salomónʼba nadap gusmalad: Dulemar namaknanai gusmarbalid, gar-gammu ogotemarbalid, bela dulemar weligwaledbimalad. Weligwaledba neg oimakar-itolesoggua, neg nue-giglimakargwar itoleged.
1KI 1:41 Adonías, degi, eba-wergubukmalad, masgunned-bergusmargua, neg oimake itoarmalad. Joab gar-trompeta-gornaidi itosad, geb sogded: —¿Ibiga neggweburgi neg oimake itolege?
1KI 1:42 Joab amba sunmaknaigu, dule-irwa-Babse-goled-Abiatar-machi-Jonatán nonikid. Adonías, Jonatánʼga sogded: —Doge, be dule-niga-gandikidid. An wisi be anga gaya-nued sedaniki.
1KI 1:43 Jonatán, Adonías-abin sogded: —Suli, degisuli. Ar ade, anmar-dummad-Rey-David, reyga Salomón-nug-imaksad.
1KI 1:44 Rey-David, Salomónʼba we-dummagan-barmisad: Sadoc, Natán, Benaía, Cereteo-dulemar, degi, Pelet-dulemar. Geb wemar, Rey-David-e-moli-uaya-senigwad-birgi Salomón-onakwismalad.
1KI 1:45 Jonatán sogdebalid: —Dule-irwa-Bab-Dummadse-goled-Sadoc, degi, Bab-Dummad-gayaburba-barsoged-Natán, wemar Gihón-neggweburgi Salomón-reyga-nug-imakega Salomón-e-nonogi olivo-gwallu eosmalad. Geb weligwaledgi oimaknanai neggweburse armalad. Aga, bemar neggweburgi neg-oimake itoged.
1KI 1:46 Aginbali, Salomón rey-gangi signonikid.
1KI 1:47 Deginbali, Davidʼga-dummaganga-gudimalad, anmar-rey-Davidʼse ataknonimarmogad, ega sognonimarmogad: ‘Bab-Dummad, Salomón-e-nug, Rey-David-e-nugba bur nug-dummarba imakena gadin. Aginbali, e-yar-seoed Davidʼgadba bur-dummarba-imakbalina gadin.’ Geb Rey-David e-obunnogedgi-mai Bab-Dummad-e-nug odummomai gusad. Weyob David sogded:
1KI 1:48 ‘Israel-dulemar-e-Bab-Dummad-Jehová-nug odummolesun. Ar ade, emi, an-sorba an-rey-gangi-sigega Salomón-nug-imaknaid, degi, an-ibyagwar-dakega imaknaibalid.’
1KI 1:49 Geb dulemar-Adoníasʼba-gunanaid bela gwakidmalad, gwichibin imaksamalad, wala-walagwen duurmakdemalad.
1KI 1:50 Adoníasʼdina, Salomón-dobguded. Geb ibmar-ogumakar-ukleged-ailagi moli-bebeyob-gwichidgi akas nagusad.
1KI 1:51 Salomónʼga sognonimalad: —Rey-Salomón, Adonías be-dobedba, ibmar-ogumakar-ukleged-ailagi moli-bebeyob-gwichidgi akas nagusye. Agi, Adonías sognaye: ‘Rey-Salomónʼye, anga ise-sogar-sogbi an abeye, Adonías anse es-suidgi oburgwilegosurye.’
1KI 1:52 Geb Salomón sogded: —Ar Adonías ibmar-isgana imaksurdibe, adi, bipisaale akar-guosurdo. Ar ibmar-isgana imakdibe, adi, oburgwilegodo.
1KI 1:53 Rey-Salomón, Adonías-ega-sedamalaga sorda-barmisad. Geb Adonías, Salomón-asabin-nonigua, dulluu napase imaksad. Geb Salomón, Adoníasʼga sogded: “Be-negse be nae.”
1KI 2:1 David e-burgwed-ibagan modanigusadgi, e-machi-Salomónʼga igar-uknai gusad. Weyob ega sogsad:
1KI 2:2 “Anmar we-burgwed-igar itogedsesoggu, we-napneggi-naega an-ibagan modanikid, gandik be imako, machered be san-sao.
1KI 2:3 Bab-Dummad-Jehová-Igar-Uksadba be ibsao, e-Igar-Maidba be nanao: Bab-Jehová-Igar-Mesisadba be ibsao. Bab-Jehová-negseleged-igar-mesisad sogedba be nanao, degi, ibmar-imaklegergebed-igar-maidba be ibsabalo. We-Igala, Moisés-gardagi narmakar mamaid. We-Igarmar-Mamaidba be daele, be nueganbi nasgumai guoed.
1KI 2:4 Adi, Bab-Jehová anga-ibmar-imakoye-sogsad, sogedba imakegar. ”Deun, Bab-Jehová anga sogsa gusad: ‘Be-sorba be-wagan-danimaloedi, an-asabin neg-itoakwaa-nanamalale, e-ulubgine innikigwadba an-Igar-Mesisadba ibmar-imakmalale, Israel-yargi, be-sorba be-wagan-negsemaloed surguosurye.’
1KI 2:5 ”Emisgindi be nue-wisid, Sarvia-machi-Joabʼye-nugadi, bila-onolenaiyob yogasaar Israel-sorda-bur-dummagan-ebogwad-oburgwis gusad. Joab, Ner-machi-Abnerʼye-nugad-ibe ablis-eos gusad, degi, Jeter-machi-Amasaʼye-nugad-ibe ablis-eos gusbalid. Deyob, Joab e-molidub-e-dikargi-naid, degi, e-sapat-yoid abebi imaksa gusad.
1KI 2:6 Degisoggu, be-binsaed-nikadba be imako: Melle Joab-sereddii-megega be imako.
1KI 2:7 ”Barzilai-masmala Galaad-neggweburginmalad, bela be wiledakdii nanao. Beba-mas-gunmalaga be imako, ar ade, be-ia-Absalónʼgi an dukudigu, wemar nue-an-bendaksad.
1KI 2:8 ”Aginbali, an Mahanaim-neggweburse nadapgu, Simei sabesur-an-ukabsanai gusad. Simeiʼde Gera-e-machid, Benjamín-wagwad, Bahurim-neggweburginedid. Simei, Jordán-diwargi an-abindakapgu, Bab-Jehová-nuggine Simei-oburgosurye an sogsa gusanad.
1KI 2:9 Degi-inigwele, mer be Simei-dula-gudii imako. Be-binsaed-nikadba be imako, na be wisid, igi be Simei-imakoe, melle be a-dule baisur-dako. Ar Simei seredgusad-inigwele, sabsur-imakar be oburgo.”
1KI 2:10 David burgwenonikid. Geb e-neggwebur-eba-nugadgi e-sergan-neg-uan-maid-dikarba digsamalad.
1KI 2:11 David Israel-yar-naidgi birga-dulabo (40) negsesad: Hebrón-neggweburgi birgagugle (7) negsemai gusad, degi, Jerusalén-neggweburgi birga-dulagwen-gakambe-gakapaa (33) negsesbalid.
1KI 2:12 Geb Salomón, e-bab-David-sorba rey-gangi signonikid, nabir bonisuli negsemai gusad.
1KI 2:13 Geb Haguit-machi-Adonías, Salomón-e-nan-Betsabé daknaded. Betsabé, Adoníasʼga sogded: —¿Nuedgi be daniki? Adonías ega sogdemogad: —Eye, nuedgi an danikid.
1KI 2:14 Geb Adonías sogdebalid: —Ibmar-soggwen an bega sogbi. Betsabé ega sogded: —Degite, soge.
1KI 2:15 Adonías ega sogded: —Be wisid, we-yar-naid, angadinad, Israel-dulemar e-reyga-megega an-edarbismalanad. Emisgindina, Bab-Jehová-sogedba, an-urba-Salomónʼga uklenonikid, egadga gunonikid.
1KI 2:16 Nabir. An bese ibmar-soggwen egis. Mer be anga suli sogena gadin. Betsabé ega sogded: —Soge.
1KI 2:17 Adonías ega sogdebalid: —Wilesagwadgi an bega soge: Rey-Salomónʼbogwa be sunmaknae, anga Sunam-neggweburgined Abisagʼye-nugad ukega, an nikuegar. Ar Salomón begardi surye sogosulid.
1KI 2:18 Betsabé abin-sogded: —Nabir. An be-ular reyse sunmaknao.
1KI 2:19 Betsabé, Adonías-ese-ibmar-egichadba, Rey-Salomón-daknaded, ebo sunmakegar. Rey-Salomón, e-nan-abin gwichibin-imaksad. Geb abin dulluu imaksabalid. Geb Salomón e-nan-osiega, gan-dummad sedagega imaksad. Reydi gannar e-gangi sigisad. Geb Salomón-e-argan-nuedsik e-nan sigisad.
1KI 2:20 Agi, Betsabé sogded: —Ibmar-soggwen an bese egisbie. Mer suli be anga sogena gadin. Rey abin-ega-sogded: —Be egise, ar be an-nanad, ibu be anse egisbie, an bega ukodo.
1KI 2:21 Betsabé ega sogdesun: —Be-ia-Adoníasʼga Abisag-Sunam-neggweburgined be uke, adi, nikuegar.
1KI 2:22 Salomón, e-nan-abin sogded: —¿Ibiga be Adoníasʼga Abisag-egise? Unnila we-yar-naid ega be egisedbi napi an be-dakdo, emide an-ia-Adoníasʼga be Abisag-egisnaigu. Deginbali, dule-irwa-Bab-Dummadse-goled-Abiatarʼye-nugad, Salomónʼba-naid, degi, Sarvia-machi-Joabʼye-nugad eba-naimogad.
1KI 2:23 Rey-Salomón Bab-Jehová-nuggi ise-sogar-imaksad: “Adonías we-ibmar-egichadba burgwesulile, Bab-Dummad sabsuli an-odurdaksunno.
1KI 2:24 Degisoggu, Bab-Jehová an-ogannononikid, an-bab-David-gangi reyga an-osisad. Aginbali, an-sorba negsemaloed surguosurye anga sogsabalid. Degisoggu, Bab-Jehová-Dula-Maid-nuggine an soged, emi Adonías burgoye.”
1KI 2:25 Agi, Rey-Salomón, Adonías-oburgwega Joiada-machi-Benaíaʼga igar-uksad. Adonías-amidapgua, oburgwissunnad.
1KI 2:26 Rey-Salomón dule-irwa-Bab-Dummadse-goled-Abiatarʼgardi, sogded: “Anatot-neggweburse be nae, be-nainumar-naidse. Ar be oburgwelemogadinad, degi-inigwele, emidi, an be-oburgosulid. Ade, an-bab-Davidʼga be Bab-Jehová-Bur-Dummad-Maid-Ulu sedigusad-nukad an be-oakalogosulid. Aginbali, an-bab-David-bonigan-itosad, deun eba be itodii gusmogad.”
1KI 2:27 Salomón deyob dule-irwa-Bab-Dummadse-golleged-igargi Abiatar-onosad. Ade, Bab-Jehová, epenne Silo-neggweburgi, Elí-e-neguyanik sunmaksa gusad: “Elí-e-neguyagi dule-irwa-Bab-Dummadse-goled an osulogoye.”
1KI 2:28 Joab, Absalónʼba nai gussulid, degi-inigwele, Adoníasʼbardi nai gusad. Degisoggu, Joab wisgunonigu, Adonías burgwisye, agi, Joab Bab-Jehováʼse-goled-dordonegse wakite gusad. Geb ibmar-ogumakar-ukleged-ailagi moli-bebeyob-gwichidgi akas nagusad.
1KI 2:29 Salomón-owisosmalad, Joab Bab-Jehováʼse-goled-negse wakiteye, ibmar-ogumakar-ukleged-aila-naba gunaye. Agi, Salomón Joiada-machi-Benaía-barmisad. Weyob ega igar-uknai gusad: “Joab-gunaidse be nao, geb be Joab-oburgo.”
1KI 2:30 Benaía Bab-Jehováʼse-goled-negse dogdapgua, Joabʼga sogded: —Rey soged: ‘Be magaba-nondaye.’ Joab abin-sogded: —Suli. An wegi burgoe. Benaía, Rey-Salomónʼga sognonikid, igi Joab e-abin-imaksa.
1KI 2:31 Rey-Salomón, Benaíaʼga sogded: —Igi Joab bega sogsa, deyob be imako. Be Joab-oburgo, geb be digbalo. We-Joab binsarsunna emar-ablis-eosadgi an-nug-gasad, an-gwenadgan-nug-gasbalid. Geb weyob magar-daklenonikoed, Amasa-oburgwilesadi, degi, Abner-oburgwilesadi, anmarginsurye.
1KI 2:32 Joab igar-maisulidba yogasaar dule-warbogwad-eba-bur-inniki-gudimalad oburgwisad. An-bab-David-wissuli, Joab es-suidgi emar-oburgwenaigusad. Joab, Ner-machi-Abner-oburgwisad, degi, Jeter-machi-Amasa-oburgwisbalid. We-Abnerʼde, Israel-sordamar-e-dummadinad. Amasaʼdi, Judá-sordamar-e-dummadmoganad. We-ebogwad ibmar gwen oakalossurmarsoggu, a-ulale, Bab-Jehová buged-mai Joab-imakoed.
1KI 2:33 ”Degisoggu, Joabʼgi wemar-ebogwad-ablis-eolesad ataklegoed, degi, e-wagan-e-sorba-danimaladgi degisadegu ataklemogoed. Davidʼgardina, Bab-Jehová neg-bogidikid ukoed. Bab-Jehová, David-waganga neg-bogidikid ukmogoed, e-wagan-reyga-megmaloedga neg-bogidikid ukbaloed, geb e-negseoedgi amba neg-bogidik imakbaloed.”
1KI 2:34 Joiada-machi-Benaía Joab-gunaidse naded. Geb egi gwisgudapid, agi Joab-oburgwisad. Geb nega-dulesulidganba e-neg-siidse Joab-dikapmalad.
1KI 2:35 Rey-Salomón sordamar-e-dummadga Joiada-machi-Benaía-nug-imaknonikid. Degi, Abiatar-anar dule-irwa-Bab-Dummadse-goledga Sadoc-nug-imaknonibalid.
1KI 2:36 A-sorba, Rey-Salomón Simeiʼse-gornamalaga emar-barmisad. Geb Simei nonigu, ega sogded: —Be Jerusalén-neggweburgi na be neg sobo, mer be yogasaar aineba nao.
1KI 2:37 Ar be Cedrón-diwar-maidgi obakdedibe, be wisigar, be oburgwilegoed. Na be dukin imako.
1KI 2:38 Simei reyga sogded: —Nabir. Dummad-rey, be-sogedba an imako. Degisoggu, Simei Jerusalén-neggweburgi undar gudii gusad.
1KI 2:39 Birgapaa-nasgu, Simei-mai-warbogwad Gat-neggweburse Maaca-machi-Rey-Aquisʼse wakicha gusmalad. Dule-gwensak Simei-owisosad, ega sognonikid: “Be-maiga-gudimalad Gat-neggweburgi-gudimarye.”
1KI 2:40 Agi, Simei e-maiga-gudimalad-amiega naded, geb e-moli-uayasuid-birgi nakwisad. Geb Gat-neggweburse nade gusad, Aquis-maidse. Degidgine, Simei e-maiga-gudimalad Gat-neggweburgi-gudii amisgu, gannar sealid.
1KI 2:41 A-sorba, Salomónʼga sognonimalad, Simei Jerusalén-neggweburgi nade gusye. Gat-neggweburse atakapye, geb gannar Jerusalén-neggweburse noniye.
1KI 2:42 Agine, Salomón, Simei-sedamalaga imaksad, geb ega sogded: —Bab-Jehová-nuggi, be anga ise-sogar-sogega an be-imaksasursi, mer be Jerusalén-neggweburgi nooye. Nue-ise-sogar an bega sogsabarsursi: ‘A-ibagi be nosdibe, ase be arbidibe, be-oburgwilegoye.’ Be nue anga sogsamogad: ‘Nabiri, an beba ibsaoye.’
1KI 2:43 Degite, ¿ibiga be deyob Bab-Jehová-asabin ise-sogar-sogsad be imaksasuli? An bega igar-mesismogadba be imaksasurbalid.
1KI 2:44 Aginbali, Rey-Salomón Simeiʼga sogdebalid: —Be ebinsao, an-bab-Davidʼgi be nue-isgus-gusad. Degisoggu, emisgindi, Bab-Jehová bega nunmaked-ukmogoed, na be dukin boni-amisad.
1KI 2:45 Angardi, Bab-Jehová ibmar-nued ukoed, Bab-Jehová David-e-negselemaid innikigwadba selegega imakoed, degi-selemai sadeguoed.
1KI 2:46 Agi, Rey-Salomón, Joiada-machi-Benaíaʼga sogsad, Simei-oburgweye. Geb Benaía Salomón-sogedba imaksad, Simei-oburgwisad. Salomón deyobi bela yar-ganonikid.
1KI 3:1 Salomón, Egipto-e-rey-Faraónʼbogwa igar-mesisad. Geb agine, Salomón, Faraón-e-sisgwa nikunonikid. Salomón e-ome-Faraón-sisgwa Neggwebur-Davidʼye-nugadse sesad. Agi gudii gusad. Faraón-sisgwa, Salomón e-reyneg-dummad-sobnaid obelosadse, degi, Bab-Jehováʼse-goled-neg-sobnaid obelosbalidse, degine, Jerusalén-neggwebur-ebirega galu-matusulid-sobnaid-obelosbalidse, gudii gusad.
1KI 3:2 A-ibagangi, Bab-Jehováʼse-goled-neg amba yoo sobleged. Degisoggu, dulemar Bab-Jehováʼga ibmar-ogumakar-ukega, aila-matusulid-birgi ukardamalad.
1KI 3:3 Salomón nue Bab-Jehováʼbina sogegusad, e-bab-David-igar-sogedba nanadii gusad. Degi-inigwele, Salomón Bab-Jehováʼga ailamar-matusulid-birgi ibmar-ogumakar ukardaed, ina-wawadikmalad ogumakardabalid.
1KI 3:4 Rey-Salomón Gabaón-neggweburse naddaed. Ade, agi ibmar-ogumakar-ukleged-aila bur-nug-dummad-nikad siid. Agi, Salomón ibmar-ogumakar-ukleged-aila-birgi, miliba (1,000) ibdurgan-ogumakar ukdaed.
1KI 3:5 Salomón Gabaón-neggweburgi-gudiun, mutik gabmaigu, Bab-Jehová ese magar-gunonikid. Geb Bab-Dummad Salomónʼga sogded: —Ibu be anse egisbie, an bega imakoed.
1KI 3:6 Salomón Bab-Jehováʼga sogded: —An-bab-David be-nug-odummodigusad, bela-bela egi be nued binsadii gusad. Ar an-bab-Davidʼde be-asabin be-sogedba nanadii gusad, ibmar-inniki-imakdii gusad, degi, beba ibsadii gusad. Emi-ibagi be David-sabed magar-daklesad. Be an-bab-Davidʼga sogsagusad: ‘Be-sorba rey-gangi be-machi-sigega an imakoye.’ Bab-Jehováʼye, emide deyob be imaksad.
1KI 3:7 ”An-Bab-Dummad-Jehováʼye, degisoggu, an-bab-David-sorba, reyga be an-imaksad. Amba an sapingwasoggua, yar-seed an aku-itoged, igi an yar seoe.
1KI 3:8 Degi-inigwele, na be Israel-dulemar-nug-imaksad-abargi reyga an maid. Be-dulamarde yeer-mergued, ichesulidba geg ebisleged.
1KI 3:9 Dummad, degisoggu, magar-ibmar-dakega be an-imake, biti ibmar-nuedi, biti ibmar-ichakwabali. Degisulile, ¿igi an nabir negseosunna? Ar be-dulamarde ichesulid, an unniguosulid.”
1KI 3:10 Bab-Jehová, Salomón-ibmar-egichisad nued itosad.
1KI 3:11 A-ular, Bab-Dummad Salomónʼga sogded: —Be reyga-undar-meged egichasulid. Be ibmar-bukidar-nikued egichasurbalid. Be-isdarmalad-ogiloged, be anse egichasurbalid. Unnila be anse egichisad, neg nued-seega nabir binsaed-nika gued. We-ibmar be anse egichasoggu,
1KI 3:12 be-ibmar-egichisadba an bega imako. Binsaed-nikarba an be-imako, ibmar magar-itoakwaa-imakega an be-imakbalo. Dule-beyobid be-iduar gudii gussulid, be-sorba dule-beyobid gudii guosurbalid.
1KI 3:13 Aginbali, ibmar-be-egichasulid an bega ukbaloed: Ibmar-bukidar-nikuega an be-imakoed, nug-dummad-nikuega an be-imakbaloed. Be-dula-gudiidgine, bipisaale beyobi rey-gwensak ibmar-bukidar-nika, degi, nug-dummarba-nika megosulid.
1KI 3:14 Igi be-bab-David an-sogedba nanadii gusa, deyob be nanadiile, an-igar-maidba be gudiile, degi, an-igar-sogmaidba be imakdiile, reyga-suiti-megega an be-imakoed.
1KI 3:15 Salomón gabmai-ataksagu, gabdakmai itoalid. Geb Jerusalén-neggweburse nadegusad, Bab-Jehová-Dadganbo-Igar-Mesisad-Ulugwa-asabin gwisgunonikid. Bab-Jehováʼga ibmar-ogumakar uknai gusbalid, gwenatigwar-guedga-ibmar-ukleged Bab-Jehováʼga uknai gusad. Aginbali, Salomón bela dummagan-ega-arbadimaladga iba-dummad ononai gusbalid.
1KI 3:16 A-ibagangine, omegan-gambasamalad-warbogwad Rey-Salomónʼse nadmalad, geb asabin gwisgunonimalad.
1KI 3:17 Ome-gambasaed-gwensak Salomónʼga sogded: —¡Dummad! We-ome-anbo an neg-gwagwengi gudinad. Geb we-ome anbo-neg-yagi-gudigu, an goe nikunonikid.
1KI 3:18 Geb ibapaagus an goe-nikusadgi, we-ome, goe nikunonimogad. A-negyagi unnila anmarbi gudimalad, dule-baid gudisulid.
1KI 3:19 ”Mutikidbali, we-ome-ibe goe burgwenonikid, ar ade, e-nan, uki megis gusad.
1KI 3:20 Neggabgwengusgu, we-ome gwisgusad. Geb an gabmaigu, an-dikarba-an-mimmi-maid an-ibe sunonikid, geb e-dikarba an-mimmi mesisad. E-goe-burgwaleddina an-dikarba mesnonikid.
1KI 3:21 Bolegoedba, an-mimmi an mamgi-onuega gwisgualinad, geb burgwar-mai an dakalid. Neg-nue-oibosgu, nue an dakdegua, gwen an-mimmi-suli an dakalid.”
1KI 3:22 Agine, ome-baid goted: —¡Suli! An-mimmi duladid. Be-mimmidi, burgwaledid. Ome-gebe-sunmaksad reyga sogdemogad: —¡Suli! An-mimmi duladid. We-e-mimmidi, burgwaledid. Deyob na abin-abin rey-asabin gusmalad.
1KI 3:23 Geb Rey-Salomón sogded: —Gwen soge: ‘An mimmi duladye, be-mimmidi burgwaledye.’ Baiddi sogmogad: ‘¡Suli! Be-mimmi, burgwaledye, an-mimmidi, duladye.’
1KI 3:24 Geb Rey-Salomón sogdebalid: —Anga es-suid sedamalo. Rey-Salomónʼga es-suid senonimalad.
1KI 3:25 Geb Rey-Salomón sogdebalid: —Mimmi-duladi abar-siko. Geb ome-gwensakga mimmi-abar-sikaled uko, ome-baidga baid-abar-sikaled ukmogo.
1KI 3:26 Agine, ome bur e-nan-sunnadi degii itosgua, gwage-naibid itononikidba reyga sogded: —¡An-dummad! Mimmi-duladi bur we-omega be uke. Mer be mimmi-oburgwe. Ome-baiddina sogded: —An goe suosurmo, be suosurmo. Bur abar-sike.
1KI 3:27 Geb Rey-Salomón abin-sogded: —Mer mimmi-oburgo. We-ome-gebe-sunmaksadga mimmi-dulad ega be uke. We-ome, e-nan-sunnadid.
1KI 3:28 Israel-dulemar deyob rey-igar-nudaksad bela itononimargu, geger-rey-dake gusmalad. Agine, Israel-dulemar magar daksamarbalid, Bab-Jehová, Salomónʼga binsaed-nikagued uksa, adi, nabir igarmar-nudakegar.
1KI 4:1 Degisoggu, Salomón bela-Israel-dulemar-e-reyga megnonikid.
1KI 4:2 Salomónʼga sordamar-idumalaga gunonimalad, wemalad: Sadoc-machi-Azarías, dule-irwa-Bab-Dummadse-goledga megisad.
1KI 4:3 Sisa-e-masmala, gwen Elihorefʼye-nugad, baiddi Ahíasʼye nugmogad. Amala, reyga garda-narmakmaladga megismalad, Ahilud-machi-Josafat, negselemaidga-garda-narmakedga megisad.
1KI 4:4 Joiada-machi-Benaía, sordamar-bila-onomalad-e-dummadga megisad. Sadoc, degi, Abiatar, wemar, dule-irwa-Bab-Dummadse-gormaladga megismalad.
1KI 4:5 Natán-machi-Azarías, dule-negsedimalad-e-dummadga megisad. Natán-machi-Zabud, dule-irwa-Bab-Dummadse-goledga megisad, degi, reyga-binsaed-ukedga megisbalid.
1KI 4:6 Ahisar, reyneg-akwedga megisad. Abda-machi-Adoniram, reyga-sabsur-oarbaledimalad-e-dummadga megisad.
1KI 4:7 Deginbali, Salomón Israel-dulemargi e-ambe-gakabo (12) ega-negsemalad nugsanonikid. Amar reyga, degi, rey-neguyagi-gudimaladga mas-amidimalad. Wemar-ambe-gakabogwad (12), birgagine war-wargwen niigwen-niigwen, mas-amidimalad.
1KI 4:8 Wemar-ambe-gakabogwad (12), wemalad: Hur-e-machi, Efraín-yalaganba negdakmaid.
1KI 4:9 Decar-e-machi, we-neggweburmar-e-dummadid: Macaz, Saalbim, Bet-Semes, Elón, degi, Bet-Hanán.
1KI 4:10 Hesed-e-machi, we-neggweburmar e-dummadmogad: Arubot, Soco, degi, bela Hefer-yar-naid dakmaibalid.
1KI 4:11 Abinadab-e-machi, Dor-yar-naid-dakmaid. Deginbali, we-dule Salomón-sisgwa-Tafatʼye-nugad nikusad.
1KI 4:12 Ahilud-machi-Baana we-neggweburmar dakmaid: Taanac, Meguido, Bet-Seán. We-Bet-Seánʼde, Saretán-neggwebur-dikarba siid, Jezreel-neggwebur-deale bukwad. Baana bela Bet-Seán-neggwebur-siid-akale, degi, Abel-Mehola-neggweburse negdakmaid. Amba Jocmeam-neggwebur-obakar negdakmaibalid.
1KI 4:13 Geber-e-machi, Ramot-De-Galaad-neggwebur-e-dummadga-maid, degi, Galaad-yar-naidgi neggwebur-bukmaladse-bakar, dakmaibalid. We-neggweburmarde, Manasés-machi-Jairʼgadinad. Aginbali, Geber-e-machi Basán-yar-naidgi Argob-neg-nugad-e-dummadga gusbalid. Agine, neggwebur gwadulapaa (60) bukwad. A-neggweburmar akwa-galu-matusulid-ebiris-bukwa nanaed. Deginbali, e-yawagak-eduedi esgoro-gordikidgi sobaled.
1KI 4:14 Iddo-machi-Ahinadab, Mahanaim-neggwebur-e-dummadid.
1KI 4:15 Ahimaas, Neftalí-yar-naid-e-dummadid. Deginbali, Ahimaas, Salomón-sisgwa-Basematʼye-nugad nikusad.
1KI 4:16 Husai-machi-Baana, Aser-yar-naid, degi, Alot-yar-naid-e-dummadid.
1KI 4:17 Parúa-machi-Josafat, Isacar-yar-naid dakmaid.
1KI 4:18 Ela-machi-Simei, Benjamín-yar-naid dakmaid.
1KI 4:19 Uri-machi-Geber, Galaad-yar-naid dakmaid. Galaad-yarde, Rey-Sehónʼgadinad. Sehónʼde Amorreo-dulemar-e-reyga maigusanad. Geberʼde Rey-Og-e-yar ganikinad. Ogʼde Basán-yar-naid-e-reyga maigusanad. Galaad-yargindina, Geber wargwenna yar-semaid.
1KI 4:20 Israel-dulemar, degi, Judá-dulemar ichesur gumarsoggu, demar-gakagi-ukub-naidyob gumalad. Aga, geg ebisleged. Ibmar-gobleged, degi, ibmar-gulleged, obinebaka nikasoggu, weligwar itobukwad.
1KI 4:21 Salomón, Éufrates-diwar-maid-akale, Filistea-yar-naidse bela yar-ganonikid. Aginbali, Egipto-yar-abingunaidse-bakar, Salomón bela-we-yar-nanaid-semaigu, bela dulemar-bukmalad ega ibmar-bukidar senonidamalad, degi, Salomón-e-maiga gusmarbalid.
1KI 4:22 Salomónʼga bane-bane weyob ibmar-mergu ebuleged: Madubur-nued, nibir-miliambe-gakabake gaka dulataled-ilatar-aidiku (14,500) ebuleged. Madubur, nibir-milidulagwen-gakambe-aidiku (30,000) ebulebalid.
1KI 4:23 Moli-bebe-nikad-wardadagan mas-nuedbi-madimalad, warambe (10) ebulebalid. Moli-bebe-nikad gaganbi-madimalad, waladulagwen (20) ebulebalid. Sibad-wawaadmar, degi, sibadmar, waladulatar (100) ebulebalid. Goe-sapurmar, goe-sapingan, degi, wasamar ebulebalid. Degi, nuumar-nabir-gullemalad ebulebalid. We-nuumar gege ebisleged.
1KI 4:24 Salomón Éufrates-diwar-dad-argwanedsiki, Tifsaʼye-neg-nugad-akale Gaza-neg-nugadse, bela reymar-mamaid-birgi yar-ganonikid. Degisoggu, bela yar-abingunanaidgi neg-bogidikid nagunonikid.
1KI 4:25 Salomón yar-semaigu, bela Judá-dulemar, degi, Israel-dulemar, nabir-gudii gusmalad. Dan-yar-naid-akale, Beersebaʼye-neg-nugadse, bela neg-bogidik nagunonikid. Degisoggu, Israel-dulemar e-nainugi uvaʼdub-urba, degi, higuera-sapi-urba bonisuli ambikudii gusmalad.
1KI 4:26 Salomón molimar miliambe-gakabo (12,000) nikad. Deginbali, moli-ur-bilagi-ebuleged-e-galumar milibake (4,000) nikabalid.
1KI 4:27 Dummagan-ambe-gakabogwad (12) Salomónʼga-yar-sedimaladi, niigwen-niigwengi Salomónʼga mas ukdimalad. Degi, bela e-sordamar-arbadimaladga mas-ukdimarbalid. Degisoggu, mas-sate gudii gussurmalad.
1KI 4:28 We-ambe-gakabogwad-yar-sedimaladi (12) e-mas-uked-nii-mosale, cebada-e-gwag, degi, gagan-molimar-maed, sogedba molimarga senonidamarbalid.
1KI 4:29 Bab-Dummad, Salomón nue-binsaed-ibedga imaksad, degi, nue-itoakwaa-nanaega imaksabalid. Agine, gurgin-bukidar-nika gunonibalid.
1KI 4:30 Salomón-e-ibmar-wisidi, bela dulemar-ibmar-wismaladgi obined, dulemar-ibmar-wismalad yar-dad-nakwedsik-bukwamaladgi obinbalid. Degi, Egipto-dulemar-ibmar-wismaladgi obinbalid.
1KI 4:31 Salomón we-dulemarba bur bule ibmar-wisid: Ezraí-neggined-Etánʼye-nugadgi. Aginbali, Mahol-e-masmalagi, Hemánʼye-nugadgi, Calcolʼye-nugadgi, degi, Dardaʼye-nugadgi obinbalid. A-ulale, Salomón-nug-dummarba-guedi, bela dulemar-yar-baid-baidgi-bukwamaladi wisgusmalad.
1KI 4:32 Salomón binsaed-nuegan, milipaa (3,000) narmaksad, degi, namaked miligwen gakatar (1,005) narmaksabalid.
1KI 4:33 Salomón sapi-durbamargi Líbano-urwala-akale, degi, galugi-hisopo-gagan-dungumaladse-bakale, egi sunmaksabalid. Deginbali, Salomón ibdurgangi dulemar-odurdaksad: Ibdurgan-ursirmaladgi, nuumargi, ibdurgan-unimakdimaladgi, degi, uamargi dulemar-odurdaksabalid.
1KI 4:34 Bela yar-nanaid-e-reymar, Salomón-bela-bela-ibmar-wisid wisgunonimalad. Degisoggu, we-reymar Salomón-e-binsaed-nikarba-gued-wisgunonimaladi, Salomón-itogegala, e-sordagan Salomónʼse barmiardamalad.
1KI 5:1 Tiro-neggwebur-e-rey-Hiram, Davidʼbogwa ai-nued gudii gusmalad. A-ulale, Rey-Hiram wisgunonigu, Salomón e-bab-David-sorba reyga megnoniye, geb Salomónʼse dule-nug-nikamalad barmis gusad.
1KI 5:2 Geb Salomón, e-sordagan Hiramʼse barmismogad. Geb Hiramʼga sogdapmalad:
1KI 5:3 “Be wisid, an-bab-David, bila-onogedbi gudigussoggua, Bab-Jehová-nug-odummolegega geg Bab-Dummad-Jehováʼga neg-sobe gusad. Geb neg-soblegedi, Bab-Jehová bela an-bab-David-e-isdarmaladgi-naknonikidse edarbilesad.
1KI 5:4 Emisgindi, Bab-Jehová bela yar-nanaid-ugakaase anga neg-bogidikid nasiknonikid. An-isdarmalad bergusad, bonigan-bulegan bergusbalid.
1KI 5:5 Degisoggu, an sogdo, an-Bab-Dummad-Jehová-nug-odummolediguega neg-soblegoye, igi Bab-Jehová an-bab-Davidʼga sognaigusa: ‘An be-sorba be-rey-gangi be-machi an sioye. An-nug-odummolediguega, we, anga neg soboye.’
1KI 5:6 ”Aga, an bega soged, be wis anga urwala Líbano-yar-naidgi-bukwad siknamalo. An-sordagan, be-sordaganbogwa arbamaloed. Be-anga-sogedba, be-sordagan-anga-arbamaloed an bennukbaloed. Be nue-wisid, Sidón-dulemar sapi-siked-wisimaladid. Amaryobid, dulemar, anmar-abargi nabir-sapi-siked-wisid sulid.”
1KI 5:7 Rey-Hiram, Salomón-ibmar-egichisad itosgua, bela-bela weligwar-itonaded, geb sogded: “Emi, Bab-Jehová-nug dummarba gusun. Ar Davidʼga machi nue-binsaed-nikaguedi uksad, adi, Israel-dulemar-bukidarad nabir iduegar.”
1KI 5:8 Hiram weyob Salomónʼga garda barmismogad: “Salomón, be-anga-ibmar-sogsad an be-itosad. An bega ibmar imakoed. Be-abegedba urwala be egise, an bega ukoed, degi, ciprés-suarmar deyob be egisbali, an bega ukbaloed.
1KI 5:9 An-sordagan suarmar-Líbano-yargi-bukwad demar-naidse sedmaloed. Geb edin-edin imakmaloed, mua-mua-sedmalagar. Be anga sogoe, bia an bega ukoe. Agi, suarmar esiklegoed, geb na be sedoed. Muchub be masgullemalad anga ukmogoed, adi, an masgi an-neguyaginmalad ogunnegar.”
1KI 5:10 Deyob Hiram, Salomónʼga urwarmar uksad, degi, ciprés-suarmar ega uksabalid.
1KI 5:11 Salomónʼdina, Hiramʼga birga-irba masgullemalad uksamogad: Orosgi-dakleged-trigoʼye-nugad nibir-miyon-ilabakebak gaka mili-dulataled-ilanergwa-gaka-dulabake-aidiku (9,680,000) ega uksad. Degi, olivo-gwallu galón-mili-dulatar-gakambe-gakatar (115,000) ega uksabalid.
1KI 5:12 Bab-Jehová, igi-Salomónʼga-sogsagusa, deyobi binsaed-ibed-guega imaksad. Deunni, Bab-Jehová ega sogsagusad: “An bega binsaed-nikagued ukoye.” Hiram, Salomónʼbogwa nued-gudii gusmalad. Degisoggu, ebogwa na igar mesisad, mer na bila-onomalagar.
1KI 5:13 Rey-Salomón Israel-yargi dulemarga undar-arbaed uksad: Machergan-arbamalad, mili-dulagwen-gakambe (30,000) nikunonikid.
1KI 5:14 Geb nii-irba Salomón, we-dule-arbamalad e-miliambe-miliambe (10,000-10,000) nii-wargwen-arbaega, Líbano-yarse barmiddaed. Geb a-sordamar, nii-walagwen arbasale, nii-warbo e-neggi-obunnogega imakdabalid. Adoniramʼye-nugadi, we-dulemar-undar-arbamalad-e-dummadga nugsalenonikid.
1KI 5:15 Salomón, sordamar-ega-ibmar-semalad, mili-dulapaa-gakambe (70,000) nikabalid. Geb sordamar-ega-akwa-sikmalad, mili-dulabake (80,000) nikabalid.
1KI 5:16 Geb we-neg-imaklenaid-e-dummagan-idudimalad, milipaa gaka dulataled-ilapaa (3,300) nikabalid.
1KI 5:17 Rey-Salomón sogsabalid, ega neg-akwabinaidse akwa-dummagan-nuegan mamarnamaloye. Geb a-akwamar-sobaledi, Bab-Jehováʼse-goled-neggi akwasailamarga ambikuoye.
1KI 5:18 Bab-Jehováʼse-goled-neg-sobega, Salomón-sorda-neg-sobmalad, Hiram-sorda-neg-sobmalad, degi, Gebal-neggweburginmalad-neg-sobmalad, urgomar mamarismalad, degi, akwamargi arbasmarbalid.
1KI 6:1 Salomón birgabakegus Israel-yargi negsemaidgi, nii-warbogi, nii-Zifʼye-nugadgi, Bab-Jehováʼse-goled-neg sobde gusad. Deunni, Israel-dulemar Egipto-yargi birga-dulataled-ilabake gaka dulabakegus (480) nosad-akaled.
1KI 6:2 Salomón, Bab-Jehováʼga weyob neg-sobsad: E-sugued, daliambe-gakatar (15) sugued. E-yaadunguedi, daliatar (5) dungued. E-nibguedi, daligugle-gaka-abar (7½) nibgued.
1KI 6:3 Neg-doged-asabin neg-ollor-naid-e-suguedi, daliatar (5) sugued. Bab-Jehováʼse-goled-negdummad-yaadunguedyopira, daliatar (5) sugu naid. We-neg-ollor-naid, dalibo-gaka-abar (2½) e-yaa dungued.
1KI 6:4 Aginbali, Salomón Bab-Dummadse-goled-neg yawagak-senigana-esgoro-nika imaksabalid.
1KI 6:5 Bab-Dummadse-goled-neg-dikarmarba neg-senigana sobsabalid, Bab-Dummad-Neg-Ise-Islidikid-dikarse-bakale, neg-senigana sobsad.
1KI 6:6 Neg-senigana ailapaa-nika sobles nanaed. Neg-senigwad-aila-urbalid, daligwen gaka bisgigwen e-yaa dungued. Neg-senigwad-aila-abargineddi, daligwen-gaka-abar e-yaa dungumogad. Neg-senigwad-aila-sogbaagwaddi, daligwen gaka bisgipaa e-yaa dungumogad. Salomón Bab-Dummadse-goled-neg-e-galu-magabalidgi nagubir-abgamalad sobsabalid, adi, neg-senigana-e-nagubirmar mer Bab-Dummadse-goled-neg-e-galu-imbaba dogegar.
1KI 6:7 Bab-Dummadse-goled-neg soblenaigu, akwamar bato-sobar-sobaledgi soblesad. Degisoggu, neg-soblenaigu, mardomar-goled itolessulid, akwa-mamared-goled itolessurbalid, esgoromar-goled itolessurbalid.
1KI 6:8 Neg-senigwad-aila-urbalid-e-yawagakdi, Bab-Dummadse-goled-neg-dad-nakwed-argan-nuedsik siid. Neg-aila-abarginedse-nakwegala, arsan-bipirmakar-sobaledgi nakweleged. Geb agi, neg-aila-sogbaagwadse nakwelemabalid.
1KI 6:9 Degisoggu, Salomón Bab-Dummadse-goled-neg bela sobsagusad, bela e-uasga urwar-urgo mesisad, degi, urwar-suarmar e-nagubirga mesisbalid.
1KI 6:10 Bab-Dummadse-goled-neg-dikarba neg-senigana-soblesmaladi, e-nibgued daligwen-gaka-bisgigwen nika nanaed. Neg-senigana-e-nagubirmar Bab-Dummadse-goled-neg-e-galugi nagubir-abgamalad-nanaid-birgi mamaid. We-nagubirmarde urwar-suarmalad.
1KI 6:11 Agine, Bab-Jehová, Salomónʼga sunmaknonikid, ega sogded:
1KI 6:12 “Nabir. Be an-sogedba nanadidibe, an-igar-ukmaidba be ibmar imakdidibe, an-Islidik-Igar-Mesisadba be gudidibe, we-neg be sobnaidi, an be-bab-Davidʼga ibmar-sogsadba, an bega imakoed.
1KI 6:13 Degisoggu, Israel-dulemar-abargi an gudii guoed. Ani, an-Israel-dulamar obanosulid.”
1KI 6:14 Degisoggu, Salomón Bab-Jehováʼse-goled-neg sobnai gusad. Agi, geb a-neg ogunonikid.
1KI 6:15 Bab-Jehováʼse-goled-negyaba bela-e-galugi urwar-urgo ebiris-nasiksad. Naga-nagase edusad, napa-nagagi-nasikded, uas-nagase nasiksad. E-napagi baryawar-urgomar mesisbalid.
1KI 6:16 Geb Bab-Dummadse-goled-negyabali, napi-solabali neg-emakar sigisad. We-negde, Neg-Ise-Islidikidye nugsalesad. E-suguedi, daliatar (5) sugued. Bela e-galumargi urwar-urgo nasiksad, napa-nagagi-nasikded, uas-nagase nasiksad.
1KI 6:17 Deginbali, Neg-Bur-Islidikid-idu, Bab-Dummadse-goled-Neg-Islidik siid. A-nega, daliambe (10) sugued.
1KI 6:18 Salomón Bab-Dummadse-goled-Neg-Islidikidyaba, urwar-urgo bela ebiris nasiksabalid. A-urgomar-birgi nabamaryob-dakle sobsabalid, degi, dutumar-argas-nanaidyob-dakle sobsabalid. Bela urwar-urgo galu-ebiris nasiksad, bar e-galu-akwamar daklessulid.
1KI 6:19 Salomón, Bab-Dummadse-goled-negyaba Neg-Ise-Islidikid sobsagusad, adi agi, Bab-Jehová-Dadganbo-Igar-Mesisad-Ulu osigegar.
1KI 6:20 Neg-Ise-Islidikidde e-sugued, daliatar (5) nikad, e-yaadunguedi, daliatarbalid (5), degi, e-nibgubalidi, daliatarmogad (5). Bela e-galumar-birgi or-nued egi maad-maad nasiksabalid. Aginbali, ina-wawadikid-ogumakar-ukleged-aila, urwar-urgogi-sobaledi, bela or-nued egi nasiksabalid.
1KI 6:21 Degisoggu, Salomón bela Bab-Dummadse-goled-neg-islidikidyaba or-nued nasiksad. Geb Neg-Ise-Islidikid-doglegedgi ordub nasiksad. Neg-Ise-Islidikidgi or-nued nasiksabalid.
1KI 6:22 Degisoggu, bela Bab-Dummadse-goled-neggi ormar nasiksad, degi, ibmar-ogumakar-ukleged-aila Neg-Ise-Islidikid-asabin-siid, deyob bela egi ormar nasiksabalid.
1KI 6:23 Salomón, Neg-Ise-Islidikidga baliwiturmar-dummagan warbo, olivo-wargi sobega imaksad. We-baliwitur-dummagande, querubinʼye-nugmalad. Amarde, dalibo-abar (2½) nibgu soblesmalad.
1KI 6:24 Querubin-e-sakan-nailik daligwen gaka bisgigwen sugued, e-sakan-baiddi, daligwen-bisgigwen sugubalid. Degisoggu, e-sakan-duku-nailik, e-sakan-duku-baidse dalibo-abar (2½) sugued.
1KI 6:25 Querubin-baiddi, deyob e-sakan-duku-nailik, e-sakan-duku-baidse dalibo-abar (2½) sugumogad. Querubin-warbogwad na dare-dungumalad, na emar-daklebalid.
1KI 6:26 Querubin-gwensak dalibo-abar (2½) nibgued, baid deyob nibgumogad.
1KI 6:27 Salomón, querubin-warbogwad Neg-Ise-Islidikidyaba odosad, neg-abargi e-sakanmar argaar-bukwad. Querubin-e-sakan-nailik galu-gwensak ebunaid, geb querubin-baid-e-sakan-nailik galu-baid ebunaimogad. Agi, na e-sakan-e-sakan neg-abargi ebunanaid.
1KI 6:28 Deginbali, Salomón querubin-warbogwadgi belagwable egi or nasiksabalid.
1KI 6:29 Aginbali, Bab-Dummad-Goled-Negyaba, Neg-Ise-Islidikidgi, degine, Neg-Islidikid-e-galumargi querubinʼyob-daklemalad sobsad, degi, ogobwaryob-daklemalad sobsabalid, degi, dutumar-argaaryob-daklemalad sobsabalid.
1KI 6:30 Aginbali, Neg-Islidikidyaba, degi, Neg-Ise-Islidikidyaba e-napaga-gunaidgi bela or nasiksabalid.
1KI 6:31 Salomón Neg-Ise-Islidikidga, e-yawagak-doged olivo-urgogi sobsad. E-yawagak-doged-birgi, yawagak-bargaed nasiksad. Geb e-yawagak-doged-dikarba, suarmar yawagak-bargaega ogwichisbalid. We-suarmar-yawagak-bargamalad-dikarbalidi, e-dikar-atar-nika imaksad.
1KI 6:32 A-yawagak-warbogwad-birgi, baliwitur-querubinʼyob sobsad, ogobwarmaryobi sobsabalid, geb dutumar-argas-nanaedyob sobsabalid. Aginbali, e-yawagak olivo-urgogi-soblesad, a-birgi bela or nasiksabalid. Querubinʼyob-sobaledgi, degi, ogobwarmaryob-sobaledgi or nasiksabalid.
1KI 6:33 Amba deyob Neg-Islidikidga, e-yawagak-suar-bargamalad, olivo-urgo e-dikar-warbake-nika sobsabalid.
1KI 6:34 A-yawagak-warbogwaddi, baryawar-urgogi sobsad, geb a-yawagak-gwensakgi urgo-matabo-nikad. Argader, we-urgo-matabogwad sinnii naddaed.
1KI 6:35 A-yawagakgine, baliwitur-querubinʼyob sobsabalid, ogobwaryob sobsabalid, dutumar-argas-nanaiyob sobsabalid. Geb bela we-ibmar-sobaledgi or nasiksabalid.
1KI 6:36 Bab-Dummadse-goled-neg-dikarba neg-ollor-ebirnaid-e-galuga, akwamar-sobaled ile-sogapaa onakwisad, geb a-birgi, urwar-urgo-sommegan mesisad.
1KI 6:37 Salomón birgabakegus Israel-yar-semaigu, nii-Zifʼye-nugad-naidgi, Salomón Bab-Jehováʼse-goled-neg sobde gusad.
1KI 6:38 Geb Salomón birgambe-gakagwensakgus yar-semaidgine a-nii-walabaabakgine, nii-Bulʼye-nugadgi, Bab-Jehováʼse-goled-neg-sobleded ogulenonikid. Bela igi soblegoye igar mai, deyobi, Salomón Bab-Dummadse-goled-neg sobsad. Salomón birgagugle (7) Bab-Jehováʼse-goled-neg sobnai gusad.
1KI 7:1 Rey-Salomón e-reyneg sobnai gusbalid. A-nega, birgambe-gakapaa (13) gagasad.
1KI 7:2 Salomón e-reyneg-baid sobnai gusbalid. A-negde Líbano-Sapurye nugad. A-negde, dali-dulagwen-gakatar (25) sugued, daliambe-gakabo-abar (12½) e-yaadungued, degi, daligugle-abar (7½) nibgued. E-buarmarga, urwar-suarmar ile-sogabake ogwichisbalid. Geb a-buarmar-birgi, nagubirmar meslenonibalid.
1KI 7:3 Waladulabo-gakatar (45) nagubirmar mesilesad: A-aila-gebedga, nagubir warambe-gakatar (15) meslenonikid, aila-birginedga, nagubir warambe-gakatar (15) meslenonibalid. Napi-aila-birginedga, nagubir warambe-gakatar (15) meslenonibalid. A-ailamar-e-nagubirmar-birgi, urwar-urgomar meslenonikid
1KI 7:4 Geb ailamar-irba yawagak-senigan sisbalid. We-ailamar-irba, yawagak-senigana gwapaa ilemakar obukusad. Yawagak-senigwad-gwagwengi yawagak-senigan gwapaa sisad. Deyob bela abin-abin obukusad.
1KI 7:5 Bela yawagakmar-dunguedi, emarbi dungued. Yawagak gwapaa ilekwaa asabin-asabin nasiksad.
1KI 7:6 Aginbali, Salomón neg-ubeb sobsad. A-neg-ubeb buarmar-negye nugad. We-neg-ubeb, daliambe-gakabo-abar (12½) sugued, daligugle-abar (7½) e-yaadungued. We-neg-ubeb-sobsad-asabin, neg-ubeb-baid uas-nika, degi, buarmar-nika sobsabalid.
1KI 7:7 Salomón dulemarga igar-nudakega Igar-Nabiroged-Neg sobsabalid. Agi e-rey-gan siid. We-neg, belagwable napa-nagagi, uas-nagase, urwar-urgo e-galu-birgi nasiksad.
1KI 7:8 Salomón-e-reyneg Igar-Nabiroged-Neg-asabin, neg-ollor-naid-obakar siid. Salomón-e-reyneg Igar-Nabiroged-Negyob daklemogad. Salomón Faraón-e-sisgwaga, e-reyneg-dummadyob-dakle neg sobsabalid. Faraón-e-sisgwade, Salomón-e-omed.
1KI 7:9 Bela negmar-soblesmaladi, akwa-bur-nuegangi sobles nanaed. Bela negyabali, neg-magabali, degi, neg-ollor-naidse-bakale, a-akwamargi sobles nanaed. A-akwa-bur-nuegan negsailaga gusnanabalid, e-uas-nagase deyob akwa-bur-nuegan ebulesbalid. A-akwa-bur-nuegande, egwaar imaklesad, wilub-nika-nika siklesad. Esnaligi abinbela siklegar imaklesad.
1KI 7:10 Akwa-bur-nuegan-egwaarmaladi, negsailaga gusnanaed. E-dungumalad, gwen-gwen dalibo-abar (2½) nika nanaed. Bamaladdi, dalibo (2) nika nanabalid.
1KI 7:11 Akwasailamar-birgi, akwa-bur-nuegan ambikusad. We-akwa-bur-nuegande, e-wilub-nika sobar-sobar nanaed. Geb urwar-urgomar e-wilub-nika sobles nanabalid.
1KI 7:12 Neg-ollor-ebirnaid-e-galuga, akwamar-sobaled ile-sogapaa onakwisad, geb a-birgi, urwar-urgo-sommegan mesisad. Bab-Jehováʼse-goled-neg-ollor-naidgi deyob imaklesbalid, degi, e-ubebgi deyob imaklesbalid.
1KI 7:13 Rey-Salomón, Tiro-neggweburse Hiram-sunamalaga emar-barmisad.
1KI 7:14 Hiramʼde, ome-ei-sui-burgwisad-e-machid. We-omede, dad-dummad-Neftalí-e-wagwad. Hiram-e-babdi, Tiro-neggweburginedinad. Hiram-e-babdi, esgoro-gordikid-sobed-dule gusad. Degisoggu, Hiram nue-ibmar-wisidid, ibmar-sobed-buledid. Hiram gurgin-nued nikad, esgoro-gordikid-sobedgi nergualed. Agi, Hiram Rey-Salomón-asabin nonigusad. Geb Salomón-ega-sogsadba bela ibmar-imaksad.
1KI 7:15 Hiram soogi esgoro-gordikid diree imaksad, geb egi buar warbo-sobsad. Buar-warbogwad dalibake-abar-nibgu (4½) imaksad. Aginbali, e-wardungued-ebirileged, dalipaa (3) nikad.
1KI 7:16 A-buar-warbogwad-soblesad-birgi, e-nono-nika esgoro-gordikidgi sobsabalid. Buar-wargwenad-birgi, nono-sobaled daligwen gaka bisgigwen nibgued. Baid-buar-soblesad e-nono-sobaled, daligwen gaka bisgigwen nibgubalid.
1KI 7:17 Esgoro-gordikid-buar-warbogwad-e-nonomargi, dubmar-sakiyob-dakle sobsabalid. E-nono-soggwengine, dub-gugle (7) sobaled.
1KI 7:18 Deginbali, a-buar-nonogi ilabo-ilekwaa guseb-dummadyob-dakle sobsabalid, dubmar-sakiyob ebo-apurnaiyob imaksad. Baid-buar-nonogi deyob imaksabalid.
1KI 7:19 Salomón-neg-ubeb-sobsadgi, a-buarmar e-nonomarga-gunanaid e-dungued daligwen nibgued. Geb a-birgi, lirio-dutumar-achunnai sobsabalid.
1KI 7:20 Buar-e-nonomar-warbogwad, e-sader-mureged-birgi, guseb-dummadyob-daklemalad, dulataled-ilabo (200) ebirnai sobsad. Geb a-birgi, saki-saki-dakleged ebirnabalid.
1KI 7:21 Hiram we-buarmar-warbogwad, Bab-Dummadse-goled-neggi, e-ubeb-naidgi ogwichisad. Buar-wargwenad, dad-nakwed-argan-nuedsik ogwisgunagu, a-buar Jaquínʼye onug-imaksad. Baiddi, dad-nakwed-argan-sapiledsik ogwisgunagu, a-buar Boazʼye onug-imaksad.
1KI 7:22 A-buarmar e-nonoga-gunanaid-birgi lirio-dutumaryob-dakleged sobsad. Deyob buarmar-sobsa obelosad.
1KI 7:23 Hiram, dii-siged-dummad-esgoro-gordikidbiid sobsad. We-dii-siged olor-dakleged, e-yaadungued dalibo-negabar (2½) nikad. E-nibgued, daligwen-gaka-bisgigwen (1¼) nikad. E-yaa-gakuli, daligugle-negabar (7½) dubgi ebirileged.
1KI 7:24 Dii-siged-dummad-e-gakuli-urba, nabamaryob ilabo-ebiris sobsabalid. We-nabamar bisgigwensakgine, gwaambe (10) sobsad. Deyob bisgi-iliba sobsad. We-nabamar dii-siged-dummad esgoro-gordikid-diregwadgi-soblenaigu, yog-eba-soblegar gusmogad.
1KI 7:25 Dii-siged-dummad-esgoro-gordikidbiid, moli-bebe-nikad-warambe-gakabo-sobarmalad-birgi (12) silesad. Moli-warbaa, dad-nakwed-argan-sapiledsik atakbukwad, warbaa, dad-argwanedsik atakbukwabalid, warbaa, dad-nakwed-argan-nuedsik atakbukwabalid, degi, warbaa, dad-nakwedsik atakbukwabalid. We-molimar-bebe-nikad-birgi, dii-siged-dummad-esgoro-gordikidbiid silesad. Dii-siged-dummad-urba, molimar-bebe-nikad-e-sormar yaba-dogar ambikusad.
1KI 7:26 Dii-siged-dummad goo-warbake-wilub songued. Geb e-gakulidi aibinar-sobaled, lirio-dutu-sunna dakleged. A-yagine, tambor-gwadulataled-ilabo-wilub (200) egi dii siged.
1KI 7:27 Degine, Hiram dii-siged-senigan-e-gan, gwaambe (10) esgoro-gordikidbiidgi sobsabalid. Gan-suguedi, daligwen sugued, daligwen matardungubalid, bisgipaa nibgubalid.
1KI 7:28 Weyob we-dii-siged-e-ganmar esgoro-gordikidbi soblesad. We-ganmar e-dikarmar madare-madare ebiris imaksad.
1KI 7:29 Geb madare-naid-birgi achumigur-e-wilub sobsad. Moli-bebe-nikad-e-wilub sobsabalid. Baliwitur-dummagan-querubinʼye-nugad-e-wilub sobsabalid. Dii-siged-e-gan-e-dikarmargi, achumigur-sobaled, moli-bebe-nikad, amar-birgi, geb amar-urba, ibmar-dirbir-dakle sobsabalid.
1KI 7:30 Dii-siged-e-gan-gwa-gwagwengi yandagii-dakleged, esgoro-gordikid-ololed-nabir-baparmaked, gwabake-nika sobsabalid. Yandagii-dakleged-gwabogwadgi, esgoro-gordikid-e-suar imbaba yoid. Deyob dii-siged-e-ganmargi yoi-yoi nanaed. Dii-siged-e-gan-abgamalad sogabake nanaid. Amargi, ibmar-dirbir-daklege sobar nanaid.
1KI 7:31 Dii-siged-e-gakuli, bisgigwen nosa siid. E-gakuli, dirbikwaa siid. Dii-siged-e-gangi, achagwen dogar siid. Bela e-matugued bisgigwen-gaka-achagwen nikad. E-gakuli-nosasidgi, ibmar egi sobar nanaid. Dii-siged-gan-e-sugued, degi, e-matardungued emalad, olorsulid.
1KI 7:32 Dii-siged-gangi madare-madare-sobaled-urba e-yandamar gwabake nanaid. A-yandamar-imbaba esgoro-gordikid-suar yoid. A-esgoro-suar bela dii-siged-e-ganbogwa soggwenna sobar nanaed. Yandamar bisgigwen-gaka-achagwen dungued.
1KI 7:33 E-yandamar, moli-ur-yandagii sobaled. Yandamar-e-warmar-yoyoid, degi, e-dirbir-ebirnanaimalad, degi, e-abgamalad, degine, esgoro-gordikid-e-suar-gamalad, bela esgoro-diregwadgi sobles nanaed.
1KI 7:34 Dii-siged-e-gan-barmayega e-suar-gamalad, sogabake e-dikarmargi sobar nanaid.
1KI 7:35 Dii-siged-e-gan-birgi dirbir achagwen ebirnaid. Geb dii-siged-e-gan-abgamalad-e-dikarmargi, degi, e-gangi madare-madare ebiris nanaid. Dii-siged e-ganbogwa soggwenna soblesad.
1KI 7:36 Aginbali, madare-madare-nanaid-birgi, degi, e-dikarmar-birgi baliwiturmar-dummad-querubinʼye-nugad sobsad, achumigurmar sobsabalid, ogobwaryob-daklemalad sobsabalid, ibmar-dirbir-dakle sobsabalid, bela ollor-nanaidba sobsa gusad.
1KI 7:37 Weyob, Hiram, gwaambe (10) dii-siged-e-gan sobsa gusad. Esgoro-gordikid-diregwadgi emarbi sobles nanaed. Emarbi-dungu sobsad, degi, emarbi-dakle sobsabalid. Na e-wilubmar emarbiidgi sobles nanaed.
1KI 7:38 Hiram gwaambe (10) dii-siged-esgoro-gordikidbiid sobsabalid. Dii-siged-gwensakgine, dii galón-dulataled-ilabo gaka dulabo (240) egi siged. Dii-siged-e-dunguedi, daligwen nikad. Dii-siged-gwaambe-soblesad (10), na egad-egad dii-siged-e-gan-birgi sigis nanaed.
1KI 7:39 Dii-siged-e-gan, Bab-Dummadse-goled-neggi argan-nuedsik gwaatar urbisad, gwaatar argan-sapiledsik urbisbalid. Dii-siged-dummad-esgoro-gordikidbiid Bab-Dummadse-goled-neg-dad-nakwed-argan-nuedsiki, dad-nakwedsiksaar ogwichisbalid.
1KI 7:40 Hiram deyob bormomar sobsabalid, buru-weed sobsabalid, nog-dummagan abe-miega sobsabalid. Weyob, Hiram, Salomónʼga Bab-Jehováʼse-goled-negga ibmar-obelosadi, wemar-gued:
1KI 7:41 Esgoro-gordikid-buarmar, warbo. E-nonoga-gumalad-olor-daklemalad, gwaboba. A-buarmar-e-nono-birgi saki-saki-daklemalad, sogbo nasiksad.
1KI 7:42 Guseb-dummadgi-dakleged, gwadulataled-ilabake (400) saki-saki-dakleged-gobogwadga sobsabalid. Saki-saki-dakleged-gwensaki, guseb-dummadgi-dakleged ilabo ebirnaid. Wemar, buarmar-e-nono-ololedgi-oginnega sobsad.
1KI 7:43 Deginbali, dii-siged, gwaambe (10) sobsabalid. Dii-siged-e-gan, gwaambe (10) sobsabalid.
1KI 7:44 Dii-siged-dummad sobsabalid. Moli-bebe-nikad, warambe-gakabo (12) dii-siged-dummad-urba ambikusad.
1KI 7:45 Bormomar, buru-wemalad, degi, nog-dummagan abe-mimalaga sobsabalid. We-ibmar, bela Hiram, Rey-Salomónʼga Bab-Jehováʼse-goled-neggi-ebulegega sobsad. We-ibmarmar esgoro-gordikid-ise-swilidikidgi bela sobsad.
1KI 7:46 Rey-Salomón, Jordán-neba-naidgi, Sucot-neg, Saretán-negbo-abingunaidgi, soogi esgoro-gordikid diree imaksad. Geb ibmar-wilub-napsagi-sobaledgi eosad.
1KI 7:47 Ibmar-ebulemalad-esgoro-gordikidgi-soblesad doggus mergusoggu, Salomón, esgoro-gordikid nibirgi bar oaidikussulid.
1KI 7:48 Salomón, Bab-Jehováʼse-goled-neggi ibmar-bamalad-ebulemalad-sobega imaksabalid: Bab-Dummadga ina-wawad-ogumaked-aila-orbiid sobsad, degi, mese-madu-mesed-orbiid sobsabalid.
1KI 7:49 Bab-Dummadse-Goled-Neg-Ise-Islidikid-asabin: Argan-nuedsiki, gwallu-siged-orbiid gwaatar bukwad. Argan-sapiledsikdi, gwallu-sied-orbiid gwaatar bukwamogad. Dutumar, orbi sobar nanaed. Gwallumar, orbi sobar nanabalid. A-ukinbali, maskemar, orbi sobar nanabalid.
1KI 7:50 Dii-simalad, orbi sobsabalid. Dislagii-daklemalad, orbi sobsabalid. Nog-abe-mimalad, orbi sobsabalid. Bormomar, orbi sobsabalid. Sianarmar, orbi sobsabalid. Bab-Dummadse-Goled-Neg-Ise-Islidikidyaba yawagak-abgamalad, orbi sobsabalid. Bab-Dummadse-Goled-Neg-Dummad e-yawagak-abgamalad, orbi sobsabalid.
1KI 7:51 Salomón, Bab-Jehováʼse-goled-negga ibmar-ebulemalad soboye-sogsagusad, bela sobsa gusad. Agi, geb Salomón, e-bab-David Bab-Jehováʼga ibmar-nug-imaksadi, Bab-Jehováʼse-goled-negse bela senonikid. Degisoggu, Salomón bela we-ibmar senonikid: Manimar, ormar, degi, ibmar-bamalad-ebulemalad. We-ibmar, Bab-Jehováʼse-goled-neggi, ibmar-saboleged-neg-siidse urbenonikid.
1KI 8:1 Agine, Rey-Salomón Jerusalén-neggweburgi, e-asabin dagmalaga wemarse gochad: Israel-dulemar-nug-nikamaladse, dulemar-sogambe-gakabogwad-e-idumaladse (12), Israel-dulemar-e-neguya-e-dummaganse gochad. Rey-Salomón we-dummaganse gochad, adi, Bab-Jehová-Dadganbo-Igar-Mesisad-Ulu, David-neggwebur-Sión-nugadgi-siidi, Bab-Jehováʼse-goled-negse sedamalagar.
1KI 8:2 A-ulale, nii-walagugled-Etanimʼye-nugad-nagunonigu (7), itoakwaa-onoleged-ibagi, bela-Israel-dulemar, Rey-Salomón-asabin gwisgunonimalad.
1KI 8:3 Israel-dulemar-nuga-nikamalad nonimargu, dule-irwa-Bab-Dummadse-gormalad Bab-Jehová-Ulu onakwismalad.
1KI 8:4 Geb agi, Bab-Jehová-Ulu sesmalad. David-ega-dordoneg-sobsad sesmarbalid. Aginbali, a-dordonegyaba e-ibmar-ebulemalad-islidikid-bukwad sesmarbalid. We-ibmarmar dule-irwa-Bab-Dummadse-gormalad semamai gusad. Levita-dulemar bendaksamarmogad.
1KI 8:5 Rey-Salomón, degi, bela Israel-dulemar-ese-nonimalad, Bab-Jehová-Dadganbo-Igar-Mesisad-Ulu-asabin ambikunonimalad. Agine, amar Bab-Jehováʼga sibad-wawaad ogumakar-uknanai gualid, moli-bebe-nikamalad ogumakar-uknanai guarbalid. Doggus-merguedba geg ebislegusad.
1KI 8:6 A-sorba, dule-irwa-Bab-Dummadse-gormalad Bab-Jehová-Ulu Bab-Dummadse-Goled-Neg-Ise-Islidikid-siidse sesmalad. Geb baliwitur-dummagan-querubin-e-sakan-urba sismalad.
1KI 8:7 Baliwitur-dummagan-querubin, Bab-Dummadse-Goled-Neg-Ise-Islidikid-siidgi sakan-aasaa bukwamalad. Deyob Bab-Jehová-Dadganbo-Igar-Mesisad-Ulu, degi, e-suarmar egi yoyoi sigisad.
1KI 8:8 Bab-Jehová-Ulu-e-suarmar-yoyoid mullusursoggu, Neg-Islidikidgi-gwichir, e-dukumar magasar-dakleged. Magaba-gwichirdi akudakleged. Neg-Islidikidde, Neg-Ise-Islidikid-idu siid. We-garda emi-narmaklenaise deyob amba siid.
1KI 8:9 Bab-Jehová-Dadganbo-Igar-Mesisad-Ulu-yagi, unnila akwa-matargwagwadgi-Bab-Jehová-e-Igar-narmaksad maid. We-akwa-matar, Moisés, Horeb-yar-siidgi-gudigu, mesis gusad. Israel-dulemar-Egipto-yargi-nosmalad-sorba, Bab-Jehová, Horeb-yargine, Israel-dulemarbo igar-mesnai gusad.
1KI 8:10 Dule-irwa-Bab-Dummadse-gormalad Bab-Dummadse-Goled-Neg-Islidikidgi-nodmargua, neg waa-ena sigisad.
1KI 8:11 Ar Bab-Dummadse-goled-neg waa-ena-sigissoggu, dule-irwa-Bab-Dummadse-gormalad, Bab-Dummadse-goled-neggi Bab-Dummadga geg bar ibmar-imake gusmalad. Ar ade, Bab-Jehová-e-gangued-yeerdakleged bela neg-gasa nagusad.
1KI 8:12 Agine, Salomón sogded: “Bab-Jehová, be sogsa gusad: ‘An mogir-sichid-imbaba gudii guoye.’
1KI 8:13 Bab-Jehová, degi-inigwele, an bega neg-bur-birigined sobsad. A-neggi degisadegu be gudii guegar.”
1KI 8:14 Rey-Salomón, Israel-dulemar-bela-gwigwismaladse aibirided. Geb Israel-dulemargi nued-binsasad.
1KI 8:15 Geb sogded: “Bab-Jehová-e-nug odummolesun. Bab-Jehová, Israel-dulemar-e-Bab-Dummadid. An-bab-Davidʼga ibmar-imakoye-sogsagusad, sogedba imaksad. Deun, an-bab-Davidʼga weyob sogsa gusad:
1KI 8:16 ‘An Egipto-yargi Israel-dulemar-ononaigusad-akale, dulemar-dadgan-warambe-gakabogwad-danar-bukwad-abargi (12), e-neggwebur-gwensak anga-neg-sobega, an sussulid. Unnila an-Israel-dulemar-iduega, an Davidʼbi sunonikid.’
1KI 8:17 ”An-bab-David, Israel-e-Bab-Dummad-Jehováʼga neg-nue-sobbi gusanad.
1KI 8:18 Degi-inigwele, Bab-Jehová an-bab-Davidʼga sogsad: ‘Anga be anse-goled-neg-sobbiedi, nued be binsaenad.
1KI 8:19 Degi-inigwele, be anga anse-goled-neg sobosulid. Be-machi-nikuoedi, a-dule, anga anse-goled-neg sobnonikoed.’
1KI 8:20 ”Degisoggu, Bab-Jehová ibmar-imakoye-sogsagusad, sogedba imaksad. Ani, Salomón, an-bab-David-sorba an yar-ganonikid. Bab-Jehová-sogsagusadba an Israel-dulemar-e-rey-gangi signonikid. An Israel-e-Bab-Dummad-Jehováʼga an neg-sobnonikid.
1KI 8:21 A-negyagine, Bab-Jehová-Dadganbo-Igar-Mesisad-Uluga an neg-sobsabalid. A-uluyagi Bab-Jehová anmar-dadgan-ebogwa Igar-Mesisad sabolemaid. Bab-Jehová we-igar-mesis gusad, deunni, anmar-dadgan Egipto-yargi-ononai gusgu.”
1KI 8:22 Agi, Salomón, Israel-dulemar-onmakbukwad-wagab, Bab-Jehová-ibmar-ogumakar-ukleged-e-aila-asabin gwisgusad. Geb Salomón, e-argan-niba-onakdegu,
1KI 8:23 sogded: “Bab-Jehováʼye, be Israel-dulemar-e-Bab-Dummad gued. Nibneggi, napneggi Bab-Dummad-baid beyobid sulid. ”Dule-be-nug-odummodimaladga be-igar-mesisad be imaked. Be-nug-odummodimalad, be-sogedba-gudimalad, be nue-sabed.
1KI 8:24 ”An-bab-David-be-nug-odummodigusadga, be ibmar-imakoye-sogsad, be imaksad. ”Emi-iba, ega be ibmar-sogsagusad be-ganguedba be imaksad.
1KI 8:25 ”Emisgi, Israel-e-Bab-Dummad-Jehováʼye, an-bab-Davidʼga be ibmar-sogsabalid be imakbali. ”Deun, ega be sognaigusgu: ‘Be-wagan, an-asabin, be-gudigusadyob nued damalale, anba ibsamalale, an-asabin, be-wagan rey-gangi-siged Israel-dulemar-e-idumalaga surguosulid.’
1KI 8:26 Israel-e-Bab-Dummad-Jehováʼye, degisoggu, an-bab-David-be-maiga be ibmar-imakoye-sogsa-gusad, emisgi be imake.
1KI 8:27 ”Degi-inigwele, we-napneggi be megegala, ¿sunna we-napnegde bega unniguosi? Ar nibneg-naidbela, billimar-nibneg-nanaidbela, unnisulid. Degite, be-nug-odummoleged-neg an-bega-sobsad-bursunna, ¿sunna unniguosi?
1KI 8:28 Degi-inigwele, an-ibmar-sognaid be itoge, an bese ibmar-egisnaid be itobali. An-Bab-Dummad-Jehováʼye an bese-gornaid be itoge.
1KI 8:29 ”Bese-goled-neg-soblesadgi be nakuledii guoed. Aginbali, be sogsagusbalid: ‘An we-neggi gudii guoye.’ Degisoggu, we-neggi an bega sunmakder, be an-itogoed.
1KI 8:30 We-neggi an bese gollalile, be an-itogoed. Israel-dulemar bese gollarmogale, nibneggi-mai be itogoed. Be anmarga anmar-isgued obeloge.
1KI 8:31 ”Dule-gwensak e-gwenadgi yolesdibe, we-dulega soglesdibe, bese-goled-neg-dummadse nonikoye, agi Bab-Dummad-e-aila-asabin ise-sogar-sogdibe, an egi yolessurye,
1KI 8:32 nibneg-akale be itogoed, be-sogedba be igar nudakoed. Be-dulamarga be igar nudako. Dule-yoledimalad na e-ibmar-imaksadba be sabsur-odurdakoed, e-ibmar-imaksadba ega be igar nabogoed. Dulemar-akar-ibmar-imaksasurmaladgardina, ega be igar nudakoed, e-ibmar-nued-imaksadba egi be sogoed, gwen be ibmar oakalossurye.
1KI 8:33 Bab-Jehováʼye, be-Israel-dulemar begi-yolesad-ular, e-isdarmalad-abin galakunonikile, agine, magar neg-itononimalale, degi, bese gannar-wilenonimalale, gannar be-nug-odummononimalale, bese-goled-neg-soblesadgi ise-wilesagwar bese gollarmalale, degi, bega na e-isgusad barsognanai guarmalale,
1KI 8:34 nibneggi-mai be itogoed. Israel-dulemar-e-isgued be osulogoed. Geb gannar Israel-dulemar yar-e-dadganga-uklesadse be senonikoed.
1KI 8:35 ”Be-dulamar begi yolesad-ular, bar dii-wisuli be imakalile, deyob, be be-dulamar-sabsur-odurdaknai gualile, bese-goled-neggi bese ise-gollar imakarmalale, agine, e-isgusmaladgi bangudmalale, gannar be-nug odummonai guarmalale,
1KI 8:36 nibneggi-mai be itogoed. Be-Israel-dulemar-e-isgued be osulogoed. Be-igarba nabir nanamalaga, igar-nuedgi be odurdakoed. Geb be-dulamarga, yar-ega-be-uksadgi, be dii gannar owibaloed.
1KI 8:37 ”Israel-dulemar-yar-naidgine, ukud-dummad nagunonidibe, bonimar noardibe, uka-aimaked noardibe, sesemar ainiardibe, sese-burwigan ainiarbardibe, aginbali, e-neggwebur-bukwadgine, e-isdarmalad ebiris ambikunonidibe, bela bonigan egi noardibe, uelleged egi nononibardibe, agine, Israel-dulemar magar e-nosad itononikile, bese ise gollar-imakdemalale, nibneggi-mai be itogoed.
1KI 8:38 ”Deginbali, Israel-dule-gwensakgi boni yolenonikile, agine, na magar e-nosad itononikile, bese ise-gollar-imakdele, e-arganmar bese-goled-neg-siidse oyodbalile, degi, bela Israel-dulemar deyob imakdemarmogale,
1KI 8:39 nibneggi-mai be itogoed, degi, Israel-dulemar-e-isgued be osulogoed. War-wargwengi e-daedba ega be ibmar-imakoed, ade, bebi unnila dule-e-binsaed magar be daked.
1KI 8:40 We-yar-anmar-dadganga-be-uksadgi, deyobi, bela dulemar be-dobekwaa-nanadii gumaloed.
1KI 8:41 ”Israel-dulemarsulid, be-dulamarsulid, be-nug-dummarba-maid-itosadba dikasur-danimaladi, deyob be imakmogoed.
1KI 8:42 Degisoggu, dule-bamalad be-nug-dummarba-maid wisgunonimaloed, be-gargandik-maid wisgunonimarbaloed, be-gandik-maid wisgumarbaloed. We-Israel-dulemarsulid bese-goled-neggi bese gollalile,
1KI 8:43 nibneggi-mai be itogoed. Israel-dulemarsulid bese ibmar-egichialile, ega be sogedba ibmar-imakoed. Bela-dulemar-we-napneggi-bukwamalad, Israel-dulemaryob be-nug wisgunonimarmogoed, degi, be-dobee itononimaloed. Agi, an-bese-goled-neg-sobsadgi be-nug-odummolenaidi, magasar dakmaloed.
1KI 8:44 ”Bab-Jehováʼye, be-Israel-dulemar e-isdarmaladgi bila-ononamalaga be barmisale, amar Jerusalén-neggwebur-na-be-susadsik-atakbukwa bese gotemalale, aginbali, an bega bese-goled-neg-sobsadsik-atakbukwa bese gotemalale,
1KI 8:45 nibneggi-mai be itogoed. Bab-Jehováʼye, amar ise-wilegar bese gornanaile, be bendaknonikoed.
1KI 8:46 ”Ar dule we-napneggi begi noedbisoggu, Israel-dulemar begi yolenonimalale, geb egi be gwisgunonikoed, degidba be e-isdarmaladga urmakoed, yar-baid-dikasulidse seledmaloed, sulile, yar-baid-walikagwadse seledmaloed.
1KI 8:47 ”Geb a-yargi Israel-dulemar gales-bukwadgi na e-isgusad magar itononimalale, agine, bese ise-gormakar gotemalale, degi, weyob sogdemalale: ‘Anmar nue-nosye, anmar ibmar-isgana imaksaye, anmar nue-isgusye.’ Bab-Jehováʼye, nibneggi-mai be itogoed, Israel-dulemar-e-isgued be osulogoed.
1KI 8:48 ”Aginbali, e-isdarmalad-e-neggi galesbukwa, e-gwage-ulubgi napiragwadgi gwagnonimalale, we-yar-anmar-dadganga-be-uksadsik-atakbukwa, be-Jerusalén-neggwebursik-atakbukwa gornanaile, an bega bese-goled-neg-sobsadsik-atakbukwa,
1KI 8:49 bese ise-gollar gornanaile, nibneggi-mai be itogoed. Agi, be bendaknonikoed.
1KI 8:50 Be-dulamar-e-isgued ega be osuloge, begi-yolesmalad-e-isgusad ega be elie. E-isdarmalad be-dulamar-wiledakega be imake.
1KI 8:51 Ade, Israel-dulemar be-dulamar-gued, na begadid. Ar ade, be, Israel-dulemar-soo-dummad-abargi-bukwayob, Egipto-yargi-bukwa be onosad.
1KI 8:52 ”Degisoggu, an-bese-gornaid nue be itoge, be-dulamar bese-gornamogad nue be itobali. Bese gorleged-iliba bela be itogoed.
1KI 8:53 Be-dulamar begadga-imakega be bachikii dulemar-bamaladgi obacha gusad. ”Bab-Dummad-Jehová-Bur-Dummadye, anmar-dadgan Egipto-yargi be ononaigusgua, deyob be be-mai-Moisésʼga sogsa gusad.”
1KI 8:54 Salomón, Bab-Jehováʼga-ibmar-ogumakar-ukleged-aila-asabin Bab-Jehováʼse ise-gollar-siigu, yokorgi sindigar gorsii gusad. Degi, e-arganmar niba-onakwale sii gusbalid. Geb Babse-goled-bergusgua, gwisgusad.
1KI 8:55 Salomón gwisgusgua, Israel-dulemarga Bab-Jehováʼse goted. Weyob binnasuli sogded:
1KI 8:56 “Bab-Jehováʼye, be sogsa gusad: ‘Israel-dulemarga an neg-bogidikid nasikoye.’ Emisgindi, ega be nasiknonikid. Belagwable be-mai-Moisésʼga be anmarga ibmar-imakoye sogsagusad, bela be imaknonikid.
1KI 8:57 ”Anmar-Bab-Dummad-Jehováʼye, anmar-dadganba be gudii gusayobi, be anmarba gudii gusana gadin, mer be anmar-obanena gadin.
1KI 8:58 Bab-Jehováʼye, bebina-nue-itogega be anmar-imake, adi, anmar be-sogedba nanamalagar. Be-Igar-Islidik-Maidba, Be-Negseleged-Igar-Maidba, Be-Igar-Mesisadba, anmar nanamalagar. We-igarmar be anmar-dadganga uksa gusad.
1KI 8:59 ”Bab-Jehováʼye, an bega we-ibmar-binai-gusadi, bitigi egi be bane-bane binsadii gusana gadin. Bane-bane ibmar-abelegedba, be an-bendakdii gusana yeerban, degine, deyob be be-Israel-dulamar-bendakbaligar.
1KI 8:60 Adi, deyobi dule-ainebarmalad magar be-dakmaloed, bede Bab-Jehová guye, beyobid, bab-dummad-baid surye.
1KI 8:61 Degisoggu, bela Bab-Jehováʼga na be san-ukmala, gwage-swilidikidgi be nanadii gumala, e-Igar-Sogmaidba be gudii gumala, e-Igar-Islidik-Maidba be gudii gumala. Igi emi-ibagi bemar igar-maidba nanadimala, deyob be nanamala.”
1KI 8:62 Agi, Rey-Salomón, bela Israel-dulemarmala, Bab-Jehová-asabin ibmar-ogumakar uknai gusad.
1KI 8:63 Salomón Bab-Jehováʼga dogdar-nuedye-sogleged-ibmar-ukleged uknai gualid. We-ibmarmar uksad: Moli-bebe-nikad, mili-dulagwen-gakabo (22,000) uksad. Sibad-wawaad, degi, sibadmar, mili-dulanergwa (120,000) uksabalid. Deyob, Salomón bela Israel-dulemarmala, Bab-Jehováʼga neg-soblesad nug-imaknai gusad.
1KI 8:64 A-ibagine, Rey-Salomón, Bab-Jehováʼse-goled-neg-imba-naid, Bab-Jehováʼga nug-imaknai gusad. We-neg-imba, Bab-Jehová-e-neg-asabin naid. A-neg-imba-naidgi, ibdurgan ogumakar uknai gusad, ibmar-gwag-gulleged uknai gusbalid, degi, gwenatigwar-guega ibdurgan-e-gwallu ogumakar uknai gusbalid. Ar ibmar-ogumakar-ukleged-aila-esgoro-gordikidgi-sobaled, Bab-Jehová-e-neg-asabin-siid senisoggu, unnisulid. Ar ade, ibmar-ogumakar-ukleged ichesulid. Deginbali, dogdar-nuedye-sogleged-ibmar-ukleged ichesurbalid.
1KI 8:65 Deyob, Salomón, bela Israel-dulemarmala Bab-Dummad-Jehová-asabin, ibagugle (7) iba-ononai gusad. Degine, Salomón napi-ibagugle (7) iba-obangusbalid. Belagwable ibambe-gakabake (14) iba-ononai gusad. A-ibase, bukidar-dule-ainebarmalad nonigusmalad. Hamatʼye-neg-nugadginmalad, degi, Egipto-diwarginmaladse-bakale, noni gusmalad. Dulemar bukidar ibase noni gusmalad.
1KI 8:66 Iba-gwinmaknaid-oibosgua, Salomón dulemar-naesognanaidga napi-sognai gualid, degimaloye. Geb a-dulemar, Rey-Salomónʼgi nued binsananai gusmalad. Bela e-neg-e-negse nade gusmalad. Nadmargu, Bab-Jehová Davidʼga-ibmar-nuegan-imaksadba, degine, Israel-dulemarga-ibmar-nuegan-imaksabalidba, weligwar na itonadapi gusmalad.
1KI 9:1 Salomón, Bab-Jehováʼse-goled-neg sobsagua, na e-neg obelosbargua, degine, bela ibmar-abeged sobsabargua,
1KI 9:2 geb Bab-Jehová gannar Salomónʼse magarononikid. Ar igi gebe Gabaón-neggweburgi ese magarononigusa, deyobi ese magarononi gusbalid
1KI 9:3 Agi, Bab-Jehová, Salomónʼga sogded: “Ise-wilegar be anse gornaigusadi an be-itosad. We-anse-goled-neg be-anga-sobsadi, angadga an imaknonikid. An egi degisadegu gudii guoed. We-neg an nue-sabgudii guoed, an egi nakuledii guoed, deyob degisadeguoed.
1KI 9:4 ”Igi be-bab-David gudii gusa, deyob be gudimogale, gwage-swilidikidgi be gudiile, bela anba be ibsadiile, an-Igar-Maidba be nadiile, an-sogedba be gudiile,
1KI 9:5 an be-bab-Davidʼga ibmar-imakoye sogsayobi an imakoed. ”Deun an ega sogsagu: ‘Israel-dulemar-iduega be-wagan be-sorba rey-gangi-siged surguosurye.’ Degisoggu, Israel-dulemar-e-dummadga-be-gudiid an be-ogannogoed.
1KI 9:6 Ar bemar, degi, bemar-wagan, an-Igar-Mamaidgi, degi, an-igar-sogsadgi bangudmalale, degi, bemar na bab-dummagan-baiganba nanaega, degine, e-nug-odummogega be angi bangudmarbalile,
1KI 9:7 bemar Israel-dulemar, we-yar-an-bemarga-uksadgi, an gandikidgi sabsur bemar-onogoed. ”We-anse-goled-neg an nug-imaksadi, an obanoed. Israel-dulemar dodolegedga gudoed, degi, bela dule-bamalad egi alledii gudmaloed.
1KI 9:8 Emi anse-gorleged-neg be dakedi, gwen akar-guosuliyob dakleged. Degite, e-ibagan-nonikir, bela ayarnonikoed. Dulemar we-neg-anga-soblesad deyob dakarmardibe, geger dakdemaloed, egi dododmaloed. Egisnai-gudmaloed: ‘¿Ibiga Bab-Jehová weyob we-neg imaksa? ¿Ibiga Bab-Jehová weyob Israel-dulemar-imaksabali?’
1KI 9:9 ”E-abin sogdemaloed: ‘Ade, Israel-dulemar e-Bab-Dummad-Jehováʼgi bangusmalad. We-Bab-Dummad Egipto-yargi e-dadgan-onos gusanad. Degite, Israel-dulemar bab-dummagan-baigan na e-bab-dummadga imakdemalad, a-nug-odummodii gudmalad. Agala, Bab-Jehová ega bonigan uknonikid.’ ”
1KI 9:10 Salomón Bab-Jehováʼse-goled-neg sobsad, geb e-meged-neg sobsabalid. Bela birga-dulagwen (20) gagasad.
1KI 9:11 Agine, Salomón, Tiro-neggwebur-e-rey-Hiram bela Salomón-abegedba ega urwar-suarmar-uksad-ular, ega baryawarmar-uksabalid-ular, degine, ega ormar-uksabalid-ular, Hiramʼga Galilea-yargi-neggweburmar-bukwad gwadulagwen (20) uksad.
1KI 9:12 Hiram, Salomón-neggweburmar-ega-uksad-daknaega Tiro-neggweburgi node gusad. Hiram, neggweburmar-daksagua, abessulid.
1KI 9:13 Agi, Salomónʼga sogded: “Andi, an-aiye an be-bienad. We-neggweburmar-be-anga-uksad gwen nabirsulid.” Geb a-neggweburmar Cabul-Yalaye onug-imaksad. Deyob amba we-garda-narmaklenaidse, bileged.
1KI 9:14 Ar Hiramʼdina, Rey-Salomónʼga or nibir-milibaabak gaka dulataled-ilagugle-aidiku (8,700) uksa gusanad.
1KI 9:15 Rey-Salomón dule-bulegan-arbamalad-amisad, ega we-negmar sobega: Bab-Jehováʼse-goled-neg sobega, e-reyneg sobega, neg-ollor-nabir-nanaleged sobega, galu-matusulid-akwabiid Jerusalén-neggweburga sobega, Hazor-neggwebur gannar urbega, Meguido-neggwebur gannar urbega, degine, Gezer-neggwebur gannar urbegar.
1KI 9:16 Egipto-rey-Faraón, Gezer-neggwebur-oitos gusad. Gezer-dulemar-ibe ablis eos gusad, e-negmar-ogumaksa gusad, bela Canaán-dulemar Gezer-neggweburgi-gudimalad ogilos gusad. Geb sorbali, Faraón, e-sisgwa-Salomón-nikunaigu, a-neggwebur e-sisgwaga uksad.
1KI 9:17 Agala, Salomón, Gezer-neggwebur gannar urbisad. Bet-Horón-Neggwebur-Urbalid gannar urbisbalid.
1KI 9:18 Baalat-neggwebur gannar urbisbalid, degi, neg-dulesulidganba Tadmor-neggwebur gannar urbisbalid.
1KI 9:19 Deginbali, Salomón na neg-bamalad-soboye sogsagusadi, bela sobsad: Ibmar-saboleged-neg, ur-napagined-ambikued-neg, dulemar-moli-birgi-sii-bila-onomalad-neg. Salomón Jerusalén-neggweburgi ibmar-soboye-sogsadi, bela sobsad. Líbano-yar-naidgi amba deyobi sobsabalid. Bela yar-semaidgi ibmarmar sobsabalid.
1KI 9:20 Israel-dulemarsulid-e-wagan-napi-besmalad, wemalad: Amorreo-dulemar, Het-dulemar, Ferezeo-dulemar, Heveo-dulemar, Jebuseo-dulemar.
1KI 9:21 We-dulemar Israel-dulemarse oburgwilessurgusmaladid. Degisoggu, Salomón, a-dulemar, undar-arbalegedgi oarbaega imaksad. Amba deyobi, we-garda-narmaklenaigu, arbadimalad.
1KI 9:22 Salomón, Israel-dulemardi deyob oarbaega imaksasulid. Israel-dulemar we-ibmarga gusmalad: Bila-onomalad-dulega, dule-negsemaladga, sordamar-idumaladga, moli-ur-semalad-e-dummaganga, degi, sorda-moli-birgi-sii-bila-onomaladga gusmalad.
1KI 9:23 Aginbali, Salomón, dulemar dulataled-ilatar gaka dulabo-gakambe (550) ega nakulemalaga nug-imaksabalid. We-dulemar, dule-arbamalad-dakmalaga, degine, idumarbaliga nugsalesmalad.
1KI 9:24 Faraón-e-sisgwa, David-e-neggweburgi-gudiidgi, Salomón-ega-neg-sobsadse nonigua, Salomón, neg-ollor-Miloʼye-nugad sobsad.
1KI 9:25 Salomón, Bab-Jehováʼga ibmar-ogumakar-ukleged-aila-sobsa-gusadgi, birgagine, ilapaa ibmar-ogumakar-ukleged ukdaed. Degi, gwenatigwar-guedga-ibmar-ukleged ukdabalid. Agine, ina-wawadikid Bab-Jehová-asabin-bukwad ogumakdabalid. Deyobi, Bab-Jehováʼse-goled-neggi ibmar-imakleged imakdii gusad.
1KI 9:26 Rey-Salomón, Ezión-Geber-neggweburgi ur-diakinmalad sobsabalid. Ezión-Geber, Edom-yar-naidgi siid. A-neggwebur, Elot-neggweburye-nugad-naba, Demar-Ginnidye-nugad-gakaba siid.
1KI 9:27 Hiram, e-selamar-demargi-durdakarmalad a-urmargi-arbaega barmisad. Amala, Salomón-e-sordaganmala, nade gusmalad.
1KI 9:28 We-dulemar, Ofirʼye-neg-nugadse nade gusmalad. Agi, or nibir-milidulagwen-gakambe gaka dulataled-ilabaabak-aidiku-amis (30,800), Rey-Salomónʼga senonimalad.
1KI 10:1 Sabá-yar-e-rey-bundor Salomón-e-nug-dummarbad-guedi, wisgunonikid. Salomón-e-binsaed-nikadi Bab-Jehová-e-ganguedba binsaed-nikaye wisgunonikid. Degidbali, a-rey-bundorde, Salomón-wilubdakega, yamo ibmar-undar-abinsaleged-egisega, ese nade gusad.
1KI 10:2 Sabá-e-rey-bundor Jerusalén-neggweburse-nonigu, dule-ebardakmalad bukidar eba nonimarmogad. Moli-yargan-muremaladgi ina-wawad-bukidar senonimalad, ormar-bukidar senonibalid, degi, akwa-nuegan-bukidar senonibalid.
1KI 10:3 Salomón, rey-bundor ese-ibmar-undar-abinsaleged-egichisadi, bela abin-imaksad.
1KI 10:4 Sabá-e-rey-bundor, Salomón-nue-binsaed-nikaa daksagua, geger daksa gusad. Aginbali, Salomón-reyneg-sobsad daksabalid.
1KI 10:5 E-masgullemalad-mesegi-bukwad daksabalid. Sorda-dummagan-e-gangi-bubukwad daksabalid. E-mai-e-daklemalad, degi, e-mor-yomalad daksabalid. Dule-ega-nog-dakmalad daksabalid. Aginbali, Bab-Jehováʼse-goled-neggi Bab-Jehováʼga-ibmar-ogumakar-ukleged daksabalid. Sabá-e-rey-bundor bela we-ibmar daksagua, geger daksa gusad.
1KI 10:6 Agine, Sabá-e-rey-bundor, Rey-Salomónʼga sogded: “An-neggweburgi an gudigu, be ibmar-imaksad, degi, be-nue-binsaed-nikad an itosad. ¡Bela ibmar napiragwad, ar gakansulid!
1KI 10:7 Iduar, an be-bengusanad. Emisgindi, an-sunnagwad, an-ibyagwar an daksamosunnad. An dakedi, amba bela anga ibmar-sogsasurmalad. Anga sogsamaladba bur bule wilub-obicha be nue-binsaed nikad, wilub-obicha be ibmar-nuegan nikabalid.
1KI 10:8 ¡Be-dulemar weligwar gudimar an insado! Bega-arbamaladi, be-yalaba-gudimalad, yeer-itodimar an insado, be-nue-binsaed-nikad, nue-itodimar an insado.
1KI 10:9 ”Bab-Jehová-e-nug an odummoged. Be-Bab-Dummad-Jehová, yeer be-daksadba Israel-dulemar-e-rey-gangi be-sisad. Ibmar-innikigwad-imakega, degine, ibmar-sogedba-imakega, e-reyga be-nug-imaksad. Ar ade, Bab-Jehová Israel-dulemar-sabgudiguad.”
1KI 10:10 Agine, Sabá-e-rey-bundor, Rey-Salomónʼga or-nibir-milibaabak gaka dulataled-ilagugle-aidiku (8,700) uksad, ina-wawagana bukidar uksabalid, akwamar-yeerdakle-nanaed bukidar uksabalid. Igi Sabá-e-rey-bundor, Rey-Salomónʼga ina-wawagan uksagusa, deyob-mergu Israel-yarse ina-wawagan seledisulid.
1KI 10:11 Hiram-ur-diakinmalad Ofir-neggweburgi ormar-seargua, bukidar sapi-sándalo-urgomar selenoni gusbalid, akwa-yeerdaklemalad selenoni gusbalid.
1KI 10:12 Rey-Salomón Bab-Jehováʼse-goled-neg-arsanmar a-sapi-sándalo-urgomargi sobsad, e-reyneg-arsanmar agi sobsabalid. Deginbali, dule-namakmaladga gar-arpaʼmar a-sándalo-urgogi sobsabalid, degi, gar-salterioʼmar a-urgogi sobsabalid. Emide, a-akale, sapi-sándalo-urgomar deyob-mergu, bar seledisulid.
1KI 10:13 Rey-Salomón, Sabá-e-rey-bundor bela ese-ibmar-egisnai-gusad, bela ega uksad. A-ukine, Rey-Salomón, na rey-guedgine, e-ibmar-ukbiedba rey-bundorga ibmar uksabalid. A-sorbali, geb Sabá-e-rey-bundor, e-maimar-abargi gannar e-yarse nade gusad.
1KI 10:14 Birga-irba, Salomón or nibir-mili-dulabo-gakambe-aidiku-wilub (50,000) abingadaed.
1KI 10:15 Ibmar-ukedgi-arbamaladgi-mani-galeged, adi, obarlesulid. Aineba, ina-wawad-selenonidamaladgi-mani-galeged, obarlesurbalid. Aginbali, reymar-Arabia-yar-ganimaladgi-mani-galeged, obarlesurbalid. Bela dummaganga-negdakmamaidgi-mani-galeged, obarlesurbalid.
1KI 10:16 Rey-Salomón or-sarsogaledgi sigu-abgaed-dummagan mata-dulataled-ilabo (200) sobsabalid. A-sigu-abgamalad-sobega, matagwengi or nibirambe-gakatar-aidiku (15) ebusad.
1KI 10:17 Deyob or-sarsogaledgine dulataled-ilapaa (300) sigu-abgamalad-senigana sobsabalid. A-sobega, sigu-abgamalad-matagwengi nibirbaa-aidiku or ebusad. Rey-Salomón reyneg Líbano-Sapurye-nugadgi, a-sigu-abgamalad urbisad.
1KI 10:18 Rey-Salomón isbied-nugar-dummagan-marfilʼye-nugadgi rey-gan sobsabalid. A-gan-birgi, or-nued nasiksabalid.
1KI 10:19 We-rey-gan, e-arsan-welle-wellegwad nergwa (6) nika imaksad. Rey-gan-e-yargan-meged, dirbir-dakle imaksabalid. Agine, e-argan-mesed abinbela imaksabalid. A-rey-gan-e-argan-gwensak-dikarba, achumigur-nono-wawaad-sobale osisad. Deyob e-argan-baidsik osisbalid.
1KI 10:20 Aginbali, arsan-welle-wellegedgi, achumigur-nono-wawaad war-wargwen osisad. Walanergwa (6) arsan-argan-nuedsik oambikusad, degi, walanergwa (6) arsan-argan-sapiledsik oambikusbalid. Deyob arsan-welle-wellegwad-nergwamaid-birgi (6) achumigur-nono-wawaad warambe-gakabo (12) bukusad. Weyobi, reymar-baigan-e-ganmar gwen sobledisulid.
1KI 10:21 Belagwable Rey-Salomón-e-gobmalad-nog or-sunnabiid, degine, reyneg Líbano-Sapurye-nugadgi batemar-bukwad bela orbibalid. Salomón-negsemaigu, ibmarmar-manigi-sobaled sated, ar ade, manimar baisur-dakledaed.
1KI 10:22 Rey-Salomón bukidar urmar-diakined nikabalid. A-urmar-diakinedde, degi, Hiram-e-urmar-diakinedmala, Tarsis-neggweburse birgapaagi nanagwismalad. A-neggweburgi ibmar bukidar sedanidamalad: Ormar, manimar, akwa-marfil. Surmar, degine, rey-siglimar.
1KI 10:23 Rey-Salomón ibmar-nikadgi rey-bamalad-birgi nue-obichad, degine, nue-binsaed-nikadi emargi obichabalid.
1KI 10:24 Bela dulemar-yar-baid-baidgi-bukwamalad, Rey-Salomón-dakegala, degi, Bab-Dummad-ega-nue-binsaed-uksad-itogega nonidamalad.
1KI 10:25 Bela dulemar birga-irba ese ataknonidamalad. Ega we-ibmarmar senonidamalad: Ibmar-orgi-sobarmalad, ibmar-manigi-sobarmalad, mormar-yolemalad, bila-onolegedgi-ibmar-ebulemalad, ina-wawadikmalad, moli-sunnadmar, degi, moli-uaya-senigana, senonidamalad.
1KI 10:26 Salomón ur-napaginmalad-omelonai, degi, molimar-omelonai gusad: Urmar, miligwen gaka dulataled-ilabake (1,400) nikunonikid, degi, molimar, miliambe-gakabo (12,000) nikunonibalid. Wemar bela e-neg-ambikuedse selesad. Degi, Rey-Salomón-e-reyneg Jerusalén-neggweburgi-siidse selesbalid.
1KI 10:27 Rey-Salomón akwamar-omileddaeyobi Jerusalén-neggweburgi mani bukidar-nika imaksad. Aginbali, higuera-sapi-Sefela-neba-dummadgi-naiyobi, urwarmar-bukidar nasiksabalid.
1KI 10:28 Dule-ega-arbamalad, Salomónʼga moli-sunnadmar, Egipto-yargi, degi, Coa-yargi baksa senonidamalad.
1KI 10:29 Ur-napagined-wargwen Egipto-yargi-selenonidaedi, Mani-sibu-dulataled-ilanergwa-aidikue-wilub (600) gargegued. Moli-sunnad-wargwen, mani-sibu-dulagugle-gakambe-aidikue-wilub (150) gargegued. Agi, bela Het-e-reymar, bela Siria-e-reymar, Salomónʼse a-ur-napaginmalad, degi, a-moli-sunnadmar baknonidamarmogad.
1KI 11:1 Salomón, Faraón-e-sisgwabi-nikussulid, Israel-dule-omegansurmalad-abesadba bukidar a-omegan nikusbalid. Amar, wemalad: Moab-dule-omegan, Amón-dule-omegan, Edom-dule-omegan, Sidón-dule-omegan, degi, Het-dule-omegan, nikusbalid.
1KI 11:2 Bab-Jehová Israel-dulemarga we-dulemargi sogsa gusad: “Bemar melle we-omegan nikuo, we-omegan be-nikuosurmarmogad. Bemar we-omegan-nikudele, we-omegan e-bab-dummadga-imakdimaladba-nanaega be-imakdemaloed.” Degi-inigwele, Salomón na a-omegan-abegedba nikusad.
1KI 11:3 Salomón dulataled-ilagugle (700) reymar-sisgan nikusad. Aginbali, dulataled-ilapaa (300) omegan-dikarbalid nikusbalid. A-omegan, Salomón Bab-Jehováʼgi-banguega e-binsaed gasmalad.
1KI 11:4 Salomón nue-selebagusgua, e-omegan e-bab-dummadba-nanaega Salomón-imaksad. Degisoggu, Salomón, e-bab-David Bab-Jehováʼba-nanadigusayobi, Salomón Bab-Jehováʼba bar inniki-nanadii gussulid.
1KI 11:5 Salomón bab-dummadyob-bundoryob-imakleged-Astoret e-bab-dummadga imakded. Astoretʼde Sidón-dulemar-e-bab-bundoryob-dummadid. Degi, Salomón, Amón-dulemar-e-bab-dummad-isgana-Moloc e-bab-dummadga-imakdebalid.
1KI 11:6 Salomón, Bab-Jehová-asabin nue-isgusad, Bab-Jehová-e-igarba bar nanassulid. E-bab-David Bab-Jehováʼba inniki-nanadigusayobi, bar nanadsulid.
1KI 11:7 Degidbali, Salomón, Jerusalén-neggwebur-asabin-yar-siidgi Moab-dulemar-e-bab-dummad-isgana-Quemosʼga, ibmar-ogumakar-ukleged-aila sobsad. Aginbali, Amón-dulemar-e-bab-dummad-isgana-Molocʼga ibmar-ogumakar-ukleged-aila sobsabalid.
1KI 11:8 Salomón, Israel-dule-omegansurmalad-bamaladga deyob ibmar-ogumakar-ukleged-aila sobsabalid. A-ailagine, e-omegan e-bab-dummaganga ina-wawadikid ogumakdamalad. Deginbali, a-ailagine, ibmar-ogumakar ega ukdamarbalid.
1KI 11:9 Degidgine, Israel-e-Bab-Dummad-Jehová, Salomón-egi-bangudedba, ese ulude gusad. Ar Bab-Dummad-Jehová, Salomónʼse ilabo magaros-gusad-inigwele,
1KI 11:10 degite, amba Salomón, Bab-Dummad-Jehová-ega-ibmar-sogsadba imaksasulid. Deunni, ese magarosgu, ega sogsa gusad: “Mer bab-dummagan-baigan be-Bab-Dummadga be imakoye.”
1KI 11:11 Agine, Bab-Jehová, Salomónʼga sogded: “Weyob be ibmar-imaksasoggu, an-Igar-Mesisadba be nanassulid, an bega Negseleged-Igar-Uksadba be ibmar-imaksasulid. Degisoggu, be yar-semaidi, an be-annik gannar suoed, be-mai-wargwenga an ukoed.
1KI 11:12 Degi-inigwele, an be-annik suosurgweled. Ar an be-bab-David-sabed-ulale, be amba dula-gudiidgi, be negsemai guoed. Be-machi yar-senonikoedgine, e-negsemaid an ei sunonikoed.
1KI 11:13 ”Ani, an-mai-David-sabed-ular, degi, an Jerusalén-neggwebur-sunonikid-sabed-ular, bela be-machi-yar-ganikid an e-annik suosulid. Unnila dadgan-sogambe-gakabogwad-soggwen an be-machiga ukoed.”
1KI 11:14 Aga Bab-Jehová, Salomónʼga e-isdarad-gwensak ogwisgunonikid. A-dule, Hadadʼye-nugad, Edom-neggweburginedid. Hadadʼde, Edom-e-rey-e-gwenad gued.
1KI 11:15 Deunni, David, Edom-neggweburgi-bila-ononaigusgu, David-sordamar-e-dummad-Joab, Israel-dulemar-burgwismalad-dignad gusad. Agine, Joab, bela Edom-dulemar-oburgwenai gusad.
1KI 11:16 (Joab, degi, Israel-dulemar-eba-gudimalad, Edomʼgi nii-walanergwa (6) gudii gusmalad. Edom-dule-machergan bela oburgwilesmalad).
1KI 11:17 Hadadʼdina, amba deun senigwad, Edom-dulemar-e-bab-maiga-gudimaladba Egipto-yarse wakite gusad.
1KI 11:18 Madiánʼye-neg-nugadgi-gudii nade gusmalad, geb Paránʼye-neg-nugadse mosmalad. Agi, Parán-dulemar abar eba nagusmarmogad. Geb Egipto-yarse nade gusmalad. Agine, Egipto-e-rey-Faraónʼse nadegusmalad. Geb Egipto-e-rey-Faraón, Hadadʼga neg-uksad, masgullemalad ega uksabalid, nainu ega uksabalid.
1KI 11:19 Faraón, Hadadʼbina itogerba gunonikid. Degisoggu, Faraón, Hadadʼga e-ambe uksad, adi, nikuegar. A-omede, Faraón-e-ome-Tahpenesʼye-nugad e-urbad.
1KI 11:20 Geb Rey-ome-Tahpenes-e-urba mimmi nikunonikid, Genubatʼye onug-imaksad. Rey-ome-Tahpenes a-mimmi Faraón-neggi akwisad. Deyob Genubat, Faraón-neggi, Faraón-mimmiganba dungumai gusmogad.
1KI 11:21 Hadad, Egipto-yargi-maiun, David burgwenoniye, degi, sorda-dummad-Joab burgwenonimoye wisgunonigu, Faraónʼga sogded: —An-yarse an nabie.
1KI 11:22 Faraón abin-imakded: —¿Ibiga be nabie? ¿Ibu napi be abesunna, emide be-negse be nabied? Hadad abin-sogded: —Suli. An binsa nabie.
1KI 11:23 Aginbali, Bab-Dummad Salomón-e-isdarad-baid ogwisgunonibalid. A-dule, Rezónʼye-nugad. Rezónʼde, Eliada-e-machid. Rezónʼde, Hadad-Ezer-e-maiga-gudii wakite gusadid. Hadad-Ezerʼde, Sobaʼye-neg-nugad-e-reyd.
1KI 11:24 Agi, Rezón dule-ibmar-atursamalad urbisad, geb a-dulemar-e-dummadga gunonikid. David, Siria-dulemar-oburgwenaigusgu, we-dule-ibmar-atursamaladdi Damasco-neggweburse nade gusmalad. A-neggweburgi, a-dulemar, reyga Rezón-imaksamalad.
1KI 11:25 Rezón, Salomón-yar-semaigu, Israel-dulemar-e-isdaradga gudii gusad. Rezón, Hadad Israel-dulemar-isdar-daksadba bur bule Israelʼgi gwisgusad. Deyob, Rezón, Siria-yar-e-reyga gunonikid.
1KI 11:26 Nabat-machid-Jeroboam, Rey-Salomónʼgi gwisgunonimogad. Jeroboamʼde, Efraín-duled, Sereda-neggweburginedid, Salomón-e-maiga-gudiidid. E-nandi Zerúaʼye nugad, sui-sate gudiid, e-ibe sui burgwisad.
1KI 11:27 Jeroboam, Rey-Salomónʼgi we-ibmar-ular yolenonikid: Deun Salomón, Miloʼye-neg-nugadgi, e-bab-David-neggwebur-e-galu-matusulid onakwialid.
1KI 11:28 Jeroboam dule-niga-gandikidid, dule-buledid. Salomón, Jeroboam-bene-bene-itosuli-daksagua, dulemar-undar-arbaleged-iduega nug-imaksad. We-dule-undar-arbamaladi, José-wagan-e-yargi danimaladid.
1KI 11:29 Ibagwengine, Jeroboam, Jerusalén-neggweburgi nodegusgua, Bab-Dummad-gayaburba-barsoged-Ahíasʼye-nugad abingualid. Ahíasʼde, Silo-neggweburginedid. Deunni, Ahías, atued-binidgi atuar-danikid. Unnila sapurba emarbi na gunanai gusmalad.
1KI 11:30 Ahías atued-binid-egi-atuar-danikid siir-siir goambe-gakabo (12) imaksad.
1KI 11:31 Agine, Jeroboamʼga sogded: “Goambe (10) na be suo. Israel-e-Bab-Dummad-Jehová weyob sogsad: ‘Salomón-yar-semaid an e-annik suoye. Agine, dadgan-warambe-gakabogwad (12), e-ambe (10) bega ukoye sogsad.
1KI 11:32 An-mai-David-nukad, an Jerusalén-neggwebur-sabed-ular, Salomónʼga unnila dadgan-warambe-gakabogwad-soggwen ega bedapoye. Bela Israel-dadgan-warambe-gakabogwadba (12), we-Jerusalén-neggwebur an na susad.’
1KI 11:33 ”Bab-Jehová sogdebalid: ‘Salomón angi banguded: Bab-dummad-bundoryob-imakleged-Astoret e-bab-dummadga imakded-ular, angi banguded. Astoretʼde, Sidón-dulemar-e-bab-dummad-bundorad. Bab-dummadyob-imakleged-Quemos e-bab-dummadga imakded-ular, angi banguded. Quemosʼde, Moab-dulemar-e-bab-dummadid. Bab-dummadyob-imakleged-Moloc e-bab-dummadga imakded-ular, angi banguded. Molocʼde, Amón-dulemar-e-bab-dummadid. ” ’Ar Salomón, an-ibmar-abegedba ibmar imaksasulid: An-Igar-Mesisadba nanassulid. An-ibmar-odurdakedba nanassulid. An-igar-uksadba nanassulid. Salomón, e-bab-David-nanadii-gusadyob nanassulid.
1KI 11:34 ” ’Degi-inigwele, Salomón-annik bela yar-semaid an suosulid, amba-dula-gudiidgi reyga-mai guoed. An-mai-David an na nug-imaknaigusad-nukad, an-Igar-Maidba gudigusad-nukad, an-Igar-sogedba gudigusad-nukad, Salomón-annik yar-semaid an suosurgweled.’
1KI 11:35 ”Bab-Jehová sogdebalid: ‘Salomón-e-machi-yar-semaioedgine, an e-ibe suoed. Jeroboam, an bega Israel-dadgan-sogambe-gakabogwad-e-ambe (10) ukoed.
1KI 11:36 Salomón-e-machigardina, unnila dadgan-sogambe-gakabogwad-soggwen an ukoed. Adi, Jerusalén-neggweburgi, an-egi-mego-sogsadgi, an-asabin, an-mai-David-e-wagan-negseed berguosulid.
1KI 11:37 Bedina, Israel-dulemar-e-reyga an be-imakoed, ibu-ibmar be imakbiele, na be-itolegedba be imakoed.
1KI 11:38 An-ibmar-sogedba be daele, an-Igar-Maidba be nanaele, an-asabin be innikigwadba be gudiile, an-igar-sogsadba be ibmar imakele, an-Igar-Mesisadba be nanaele, igi an-mai-David nanadii gusa, deyob be nanaele, an beba gudii gumogoed. ” ’Be-sorba yar-semaloed surguosulid, gandik-megmaloed, an igi David-e-wagan-imaksayobi, an bega imakmogoed. Israel-dulemar-seega an be-imakoed.
1KI 11:39 Weyob-neg-guoed-ular, David-wagan nunmak itononimaloed. Degi-inigwele, we-nunmaked David-waganga degisadeguosulid.’ ”
1KI 11:40 Agala, Salomón, Jeroboam-oburgwebi gusad. Jeroboamʼdina, Egipto-yarse wakite gusad. Jeroboam, Salomón-burgwedse Egiptoʼgi gudii gusad. Egipto-rey-Sisac-walik gudii gusad.
1KI 11:41 Salomón-negsemai-gusad, e-ibmar-imaksad, e-binsaed-nue-nika-gusad, bela we-ibmar, Salomón-ibmar-gusmalad-e-gardagi narmaklegar maid.
1KI 11:42 Salomón, Israel-dulemarga birga-dulabo (40) yar-semai gusad.
1KI 11:43 Agine, Salomón burgwenonikid. E-bab-David-e-neggweburgi diglesad. Salomón-sorba, e-machi-Roboam yar-ganonikid.
1KI 12:1 Roboam, Siquem-neggweburse nadegusad. Ade, Siquemʼgine Israel-dulemar Roboam-e-reyga-imakega nadegusmalad.
1KI 12:2 Nabat-machi-Jeroboam, Salomónʼgi-wakicha-gusadi, Egipto-yargi-gudiidgi, Roboam-reyga-imaksokarmarye wisgunonikid.
1KI 12:3 Agine, Israel-dulemar Jeroboamʼbina gochamarmogad. Geb Jeroboam, Israel-dulemarmala Roboamʼse nonimalad, ega sogdemalad:
1KI 12:4 —Be-bab-Salomón undar-arbaleged-dummad anmarga uksad. We-undar-arbaleged-dummad, wilubba be anmarga imake. Deyob be anmarga imakele, anmar be-maiga gudii gumaloed.
1KI 12:5 Roboam abin-sogded: —Be namala. Ibapaase gannar be anse dagmalo. Agine, Israel-dulemar nade gusmalad.
1KI 12:6 Geb Roboam girmar-dummaganse binsaed-egisnai gualid. We-girmar-dummagande, e-bab-Salomónʼga binsaed-ukdii nanasmalad. Amarga Roboam sogded: —¿Igi an we-dulemarga sogoe?
1KI 12:7 Girmar-dummagan weyob ega sogded: —We-dulemarba be ibsadibe, nued egi be binsadibe, nued ega be sunmakdibe, we-dulemar, degisadegu, be-maiga gudii gumaloed.
1KI 12:8 Roboam girmar-dummaganba ibsassulid. Sapingan-eun-sergumalad, ega-arbadimalad, amarse binsaed-egichisad.
1KI 12:9 Roboam a-sapinganse egisded: —¿Igi an we-dulemar-anga-weyob-sogsamaladga an sogoe? Ar anga sogsamalad: ‘Be-bab, undar-arbaleged-dummad anmarga uksaye. We-undar-arbaleged-dummad, wilubba be anmarga imakye.’
1KI 12:10 We-sapingan Roboamʼga sogdemalad: —We-dulemar-deyob-bega-sunmaksamaladga weyob be sogo: ‘An-babdi bemar-sabsur-oarbasad. Andi aba bur bule sabsur be-oarbamaloed.
1KI 12:11 An-babdi molidubgi bemar-bibyosad. Andina, molidub-e-duku-esgorobiidgi an bemar-bibyogoed.’
1KI 12:12 Igi Roboam ega sogsa gusa: “Ibapaase gannar be anse dagmaloye,” deyobi, a-ibapaagine, Jeroboam, Israel-dulemarmala, Rey-Roboamʼse gannar noni gusmalad.
1KI 12:13 Rey-Roboam Israel-dulemar-abin sabsur-sunmaksad. Girmar-dummagan-e-binsaed-ega-uksadba ibsassulid.
1KI 12:14 Sapingan-ega-binsaed-uksadba, Roboam, Israel-dulemarga sogded: “An-bab undar-arbaleged-dummad bemarga uksad. Andina, bemarga bur bule undar-arbaleged ukoed. An-babdi molidubgi bemar-bibyosad. Andina molidub-e-duku-esgorobiidgi an bemar-bibyogoed.”
1KI 12:15 Degisoggu, Rey-Roboam, Israel-dulemar ese ibmar-egisnaid itossulid. Ar Bab-Jehová weyob igar-mesisad, adi, Nabat-machi-Jeroboamʼga, Ahías-Silo-neggweburginedba-ibmar-sogsagusad guegar.
1KI 12:16 Israel-dulemar, Rey-Roboam e-itossuli daksamargua, weyob sogdemalad: “¿Ibiga anmar bar David-e-gwenadganba naguosunna? ¡Ar anmar Isaí-wagwaba bar ibmar nikuosulid! Degisoggu, ¡Israel-dulemar! ¡E-neg-e-negse namalo! ¡David-wagwa, be-gwenadganbi na be sedii gusunno!” Agi, Israel-dulemar e-neg-e-negse nadegusmalad.
1KI 12:17 Roboamʼdi Israel-dulemar-Judá-yargi-bukwamalad-e-reyga maigusad.
1KI 12:18 Rey-Roboam, arbaed-dummad-imaklenaid-daknaega Israel-dulemarse Adoram-barmisad. Geb Israel-dulemar Adoram-daksagua, egi akwa-mialid, geb oburgwismalad. Roboam, deyob daksagua, gwae-gwae e-ur-napaginedgi nakwisa imaksad. Geb Jerusalén-neggweburse wakited.
1KI 12:19 Weyobi, emi-we-garda-narmaklenaidse, Israel-dulemar, David-wagwa-negsemaidgi bangude gusmalad.
1KI 12:20 Israel-dulemar, Jeroboam gannar-noniye itosmargu, dulemar-onmakbukwadse-dagega ese gochamalad. Agi, Israel-e-reyga Jeroboam-imaknonimalad. Unnila Judá-waganbi Jeroboam-abessulid. Ar Judá-wagandi, reyga-megega, David-wagwa-Roboam-abesmalad.
1KI 12:21 Roboam Jerusalén-neggweburse nonigu, Judá-dulemar, degi, Benjamín-dulemar-oambikunonikid. Bela mili-dulabakebak (180,000) sordamar-oambikusad. Amala, bila-onomalad-dulemalad. Salomón-machi-Roboam, Israel-dulemar-bamaladgi bila-onogega gualid, adi, bela-yar-naid gannar-suegar.
1KI 12:22 Bab-Jehová, Bab-Dummad-e-dule-Semaíasʼga sogded:
1KI 12:23 “Salomón-machi-Roboam-Judá-e-reyga be sognao, degi, Judá-dulemarga be sognabalo, deginbali, Benjamín-dulemarga be sognabalo, degi, bela-dulemar-gudidiidga be sognabalo.
1KI 12:24 ” ‘Weyob Bab-Jehová sogye: Mer Israel-dulemargi be bila-ononamaloye, ar be-gwenadgan gumaladdeeye. We-yar-mamarlenaidi, ani an imaknaiye. Degisoggu, gannar na e-neg-e-negse namaloye.’ ” Deyob Bab-Jehová-sunmaksad-itosmargua, Bab-Jehová-sogsadba e-neg-e-negse nade gusmalad.
1KI 12:25 Jeroboam, Siquem-neggwebur gandik sobnai gualid. Siquem-neggweburde, Efraín-yalaganba siid. Geb agi megnonikid. Jeroboam Siquem-neggweburgi-gudii, Penuel-neggweburse nade gusad. Geb gannar Penuel-neggwebur gandik sobnai guarbalid.
1KI 12:26 Jeroboam binsaalid: “David-e-gwenadgan gannar yar-naid sunonidibe,
1KI 12:27 Israel-dulemar Jerusalén-neggweburse Bab-Jehováʼse-goled-neggi ibmar-ogumakar-ukega gannar naarmardibe, ar degigudele, Israel-dulemar, Judá-dulemar-e-rey-Roboamʼbina gudamaloed. Geb an-oburgwemaloed.”
1KI 12:28 Jeroboam ega-binsaed-ukmaladse idaksagua, moli-bebe-nikad-orbiid walabo sobsad. Agine, Israel-dulemarga sogded: “Israel-dulemar, Jerusalén-neggweburse bar bemar nanasulir, akarsulid. Ar bemar-bab-dummagan wegi gwichid. We-bab-dummadgan, Egipto-yargi-bemar-gudigu, bemar-onosmaladid.”
1KI 12:29 Degidgine, Jeroboam, Betel-neggweburgi moli-orbiid-wargwen ogwichisad. Dan-neggweburgi baid-moli-bebe-nikad ogwichisbalid.
1KI 12:30 We-ibmar-imaklesadi, Israel-dulemar-isguega imaksad. Ar ade, Israel-dulemar Dan-neggweburse, moli-bebe-nikad-orbiid-asabin, e-nug-odummogega naddamalad.
1KI 12:31 Aginbali, Jeroboam, e-bab-dummadse-gormalaga, aila-matusulid-birgi neg-bipimalad sobsabalid. Agine, Leví-wagansurmalad dule-irwa-bab-dummadse-gormaladga onug-imaksabalid.
1KI 12:32 Geb Jeroboam nii-walabaabakgine, ibambe-gakatargi, iba-itoakwaa-onoleged onosad. Igi Judá-dulemar iba-itoakwaa-onoleged onoardamala, deyob onosad. Jeroboam, ibmar-ogumakar-ukleged-ailagi ibmar-ogumakar uknai gualid. Betel-neggweburgi, deyob imaksabalid. Moli-bebe-nikad-orbiidgala ibmar-ogumakar-uknai gualid. Dule-irwa-e-bab-dummadse-gormalad aila-matusurmaladgi neg-bipimalad-sobsadgi-arbaega-onugsanai gusbalid.
1KI 12:33 Jeroboam Betel-neggweburgi nii-walabaabakgine, ibambe-gakatargi, ibmar-ogumakar-ukleged-ailagi ibmar-ogumakar uksad. We-ibadi, Jeroboam na e-binsaedba onosad. Weyob, Israel-dulemarga iba-ononai gualid, ibmar-ogumakar-ukleged-ailagi ina-wawad ogumaknai guarbalid.
1KI 13:1 Jeroboam ibmar-ogumakleged-ailagi ina-wawad-ogumaknaigu, Bab-Dummad-e-dule-wargwen Judá-yargi-daniki, Betel-neggweburse dognonikid. Bab-Jehová a-dule-barmialid.
1KI 13:2 A-dule, Bab-Jehová-ega-ibmar-sogsadba ibmar-ogumakleged-ailagi sunmakded, geb sogded: “Ibmar-ogumakleged-aila, weyob, Bab-Jehová begi soged: ‘David-e-wagan-abargi machi-gwensak Josíasʼye-nugad gwalulenonikoed. Be-birgi, Josías dule-irwa-bab-dummadse-gormalad-ogumakar oburgoed. We-dule-irwa-bab-dummadse-gormalad, be-birgi ina-wawad-ogumakar ukdidamalad. Be-birgine, dule-e-garmar ogumaklebaloed.’ ”
1KI 13:3 A-ibagine, Bab-Dummad-e-dule neg-gunonikoed-e-wilub sogsad: “Bab-Jehová weyob soged: ‘We-ibmar-ogumakleged-aila aimukuoye, bela galu-birgi-buru-bukwad miledoye.’ ”
1KI 13:4 Rey-Jeroboam, Bab-Dummad-e-dule ibmar-ogumakleged-aila-Betelʼgi-siidgi sogsagusad itosad. A-aila-nagaba-gwichi, Jeroboam e-argan a-dulegi oyoded. Geb sogded: “¡Ganamar!” Rey-Jeroboam-e-argan, Bab-Dummad-e-dulegi-oyosgua, rey-argan gannare naded. Degisoggu, gege bar ega nollogue gusad.
1KI 13:5 Deyob gunaidgi, ibmar-ogumakleged-aila aimukuded. E-birgi buru-bukwad bela mileded. Igi Bab-Jehová e-duleba sogsagusa, deyob gusad.
1KI 13:6 Degisoggu, Rey-Jeroboam Bab-Dummad-e-dulese wileded, ega sogded: —Be-Bab-Dummad-Jehováʼse be anga wis gole. Adi, an-argan anga onudakegar. Agi Bab-Dummad-e-dule Bab-Jehováʼse goted. Geb agine, Rey-Jeroboam-e-argan yog nuguar naded, idualedyob gannar ega nollo naded.
1KI 13:7 Rey-Jeroboam, Bab-Dummad-e-dulega sogdebalid: —Anmar, an-negse namala. Agi anmar mas-gunnoed, ibmar an bega ukbaloed.
1KI 13:8 Bab-Dummad-e-dule, Rey-Jeroboam-abin sogded: —Be-ibmarmar-nikad amba be anga negabar ukdibe, amba an beba naosulid. Beba an mas gunnaosulid, amba an beba gobed gobnaosurbalid.
1KI 13:9 Ar Bab-Jehová deyob anga igar-uksad, anga sogsad: ‘Mer mas-gunno, mer gobbalo, mer be danigusadba be gannar be-negse nao.’
1KI 13:10 Degisoggu, baid-igarba nadegusad, Betel-igarba-danigusadba bar nadsulid.
1KI 13:11 Betel-neggweburgi Bab-Dummad-gayaburba-barsoged-selebagwad gudiid. E-masmala ese nonigu, Bab-Dummad-e-dule Betel-neggweburgi-ibmar-imaksad ega sognonikid. Degi, Bab-Dummad-e-dule reyga-sunmaksad e-babga bela sogsabalid.
1KI 13:12 E-bab e-masmalaga sogded: —¿Bab-Dummad-e-dule nadegusgua, biti-igarba nade? E-masmala ega oyosad, biti-igarba Bab-Dummad-e-dule-Judá-yargi-danikid, nade gusa.
1KI 13:13 E-bab e-masmalaga sogdebalid: —Moli-uayasuid anga guakwaa nasikna. E-masmala e-babga moli-uayasuid guakwaa nasikapmalad. Agine, Bab-Dummad-gayaburba-barsoged-selebagwad moli-uayasuid-birgi nakwisad.
1KI 13:14 Geb Bab-Dummad-e-dule-sorba naded. Sapi-encinaʼye-nugad-urba-sii dakdapid. Geb ese egisded: —¿Be Bab-Dummad-e-dule-Judá-yargi-danikidi? Dule abin-imakded: —Eye, an a-dule.
1KI 13:15 Bab-Dummad-gayaburba-barsoged-selebagwad ega sogdebalid: —An-negse anba be dage, wis-mas itodagega.
1KI 13:16 Bab-Dummad-e-dule abin-sogdebalid: —Beba an naosulid. Beba an mas gunnaosulid. Be-neggi an beba gobnaosurbalid.
1KI 13:17 Weyob Bab-Jehová anga igar-mesisad: ‘Mer mas-gunno, mer wegi gobbalo, mer igar-danigusadba be gannar be-negse nao.’
1KI 13:18 Bab-Dummad-gayaburba-barsoged-selebagwad ega gakansaar sunmakded: —An beyob Bab-Dummad-gayaburba-barsogedmogad. Baliwitur-gwensak Bab-Jehová ega igar-uksadba anga sogsamogad: ‘Be-negse Bab-Dummad-e-dule beba mas-gunnega, beba gobbaliga be sedagoye.’
1KI 13:19 Agine, Bab-Dummad-e-dule ese binsaed-galesgu, Bab-Dummad-gayaburba-barsoged-selebagwadba e-negse nade gusad. Geb eba mas-guchad, eba gobed gobsabalid.
1KI 13:20 Mas-gunsigismargua, Bab-Jehová e-gayaburba-barsoged-selebagwadga sunmaknonikid. We-dule Bab-Dummad-e-dule-obiris gusadid.
1KI 13:21 Agine, Bab-Dummad-gayaburba-barsoged sabsur goted, Bab-Dummad-e-dule-Judá-yargi-danikidga sogded: —Weyob Bab-Jehová soged: ‘Bab-Jehová-Igar-Mesisadgi be yolesad, Bab-Jehová bega igar-uksadba be imaksasulid.
1KI 13:22 Bab-Jehová-bega-sogsad: Mer be mas-gunnoye. Mer be gobbaloye.’ Emide, be mas gunsiid, be gobsibalid. Degisoggu, be-babgan-e-neg-uan-maidgi bar be diglegosulid.
1KI 13:23 Mas-guchad-sorbali, gobsad-sorbali, Bab-Dummad-gayaburba-barsoged-selebagwad, Bab-Dummad-e-dulega moli-uayasuid guakwa-nasiksad.
1KI 13:24 Bab-Dummad-e-dule nadegusgu, igarba egi achumigur-nono-wawaad noalid, geb achumigurse oburgwilesad. Igarba burgwis meremai gusad. Degi, moli-uayasuid, achumigurbo burgwaledgi bangudsurmalad.
1KI 13:25 Dulemar a-igarba nadapmargua, dule burgwar-meremai daksamalad, geb mui-nagaba achumigur sii daksamarbalid. Agine, neggweburse Bab-Dummad-gayaburba-barsoged-selebagwad-gudiidse sognadmalad.
1KI 13:26 Bab-Dummad-gayaburba-barsoged wisgusgua, ede dule-gannar-obirisad deyob gusye. Weyob sogded: “¡We-Bab-Dummad-e-dule Bab-Jehová-e-igar-uksadgi yolesadid! Degisoggu, Bab-Jehová achumigurga urmaksad, ase burgwisad, igi Bab-Jehová ega sogsa gusa, deyob gusad.”
1KI 13:27 Geb dule-Bab-Dummad-gayaburba-barsoged-selebagwad e-masmalaga sogded: “Anga moli-uayasuid guakwa nasiknamalo.” E-masmala ega moli-uayasuid guakwa nasiksamalad.
1KI 13:28 Geb nadegusad. Agi, dakdapid, igargi dule burgwar meremai, moli-uayasuid dule-burgwaled-dikarba nai, degi, achumigur dule-burgwar-maid-dikarba simoga. Achumigur dule-burgwar-maid-guchasulid, degi, moli-uayasuidse achassurbalid.
1KI 13:29 Bab-Dummad-gayaburba-barsoged-selebagwad moli-uayasuid-birgi Bab-Dummad-e-dule-mui onakwisad, geb sealid. Bab-Dummad-gayaburba-barsogedi, Bab-Dummad-e-dule-muiga bomalaga, degine, neg-uanse dignabaliga neggweburse sealid.
1KI 13:30 Bab-Dummad-gayaburba-barsoged-selebagwad e-neg-uangi digsad. Geb bukib-binsaed-iba ega nasiksad. Ega weyob bonai gusad: “¡Gwenadye, nunmaked-dummad be anga uksa!”
1KI 13:31 Bab-Dummad-e-dule-mui digleapgu, Bab-Dummad-gayaburba-barsoged-selebagwad e-masmalaga sogded: “An burgwisale, bia Bab-Dummad-e-dule-Judá-yargined-diglegar-mai, a-neg-uangine be an-digmarmogo. An-garmar a-dule-garmar-nagaba be urbemalo.
1KI 13:32 Ar Bab-Dummad-e-dule-Judá-yargined, Betel-neggweburgi ibmar-ogumakleged-ailagi Bab-Jehová-ega-ibmar-sogsadba sunmaksadi, gunonikoed. Deginbali, Samaria-neggweburgi aila-matusurmalad-bukwadgi sunmaksabalidgi, deyob gunonibaloed.”
1KI 13:33 Degi-inigwele, amba Jeroboam e-isgudiidgi gwen bangussulid. Aka yogasaar dule-irwa-bab-dummadse-gormalad aila-matusulid-soblesmaladgi arbaega onug-imaksad. Jeroboam, dule-irwa-bab-dummadse-goledga-arbabidibe, na e-sunnad yog-onugguar imakdaed.
1KI 13:34 Weyob-Jeroboam-ibmar-imaksadi, na e-gwenadgan-oichogega imaksad. Degidbali, bela Jeroboam-e-gwenadgan-berguega imaksad. Wargwensaale we-napneggi dula bessulid.
1KI 14:1 A-ibagangine, Jeroboam-machi-Abíasʼye-nugad uellemai gusad.
1KI 14:2 Jeroboam e-omega sogded: “Be gwisgue. Dukuagwar mor-baid-yoi be nae, adi, mer be wisgumalaga be an-ome gued. Silo-neggweburse be nao, agine, Bab-Dummad-gayaburba-barsoged-Ahías gudiid. A-dulede, anga sogsa gusad: ‘Be, Israel-dulemar-e-reyga be megoye.’
1KI 14:3 Ome, madu-ologana gwaambe (10) ega be sedo. Madu-ochi ega be sedbalo, achanis bute-gwen ega be sedbalo. Geb ese be egiso, anmar-mimmi-uellemaid, igi gudodibeye.”
1KI 14:4 Degisoggu, Jeroboam-ome Silo-neggweburse nadsunnad. Agine, Ahías-negse mosad. Ahíasʼde bato selebagussoggu, bar ataksulid.
1KI 14:5 Degidgine, Bab-Jehová, Ahíasʼga sogsa gusad: “Jeroboam-ome dule-baidyob bese ataknonikoye, bese egisnonikoye, e-machide igi gudoye. Geb weyob-weyob ega be sogo.”
1KI 14:6 Ahías, ome-dogdanikid-e-nag-goled itosgua, ega sogded: “Jeroboam-ome, doge. ¿Ibiga dule-baidyob na be imake? Emide, be dukuagwar mor-baid-yoi danigu. Doge, bega an garda-isgana soggwelo.
1KI 14:7 Rey-Jeroboamʼse gannar be nao, ega be sogdapo: ‘Weyob Israel-dulemar-e-Bab-Dummad-Jehová sogye: Ani an Israel-dulemar-abargi be-susad, degi, e-dummadga-guega an be-nug-imaksabalid.
1KI 14:8 David-e-wagan-yar-semaid an e-annik susad. Bega an uknonikid. Degite, an-mai-Davidʼyob be gussulid. Davidʼdi, an-Igar-Maidba-nanadii gusad. David bela-bela e-ulubgi an-sogedbarbi, degi, an-ibmar-abegedbarbi ibmar-imakdii gusad.
1KI 14:9 Bedina, noarsaila ibmar-imakded, be-iduar-gudigusmaladba be ege naded, ibmar-yogsaarmalad be-bab-dummadga be imakded. An-ourwega be ibdurgan-e-wilub esgoro-diregwadgi sobnai gusbalid. Nue-isdar be an-daksad.
1KI 14:10 ” ’Degisoggu, Jeroboam-neguyagi an bonimar obatoed. Israel-dulemar-abargi bela Jeroboam-e-gwenadgan-machergan an obelogoed, maiga-gudimalad, degi, maiga-gudisurmalad an obelobaloed. Jeroboam-e-wagan an obelogoed, igi ibdurgan-saa miledae, debayobi an imakoed, swiri e-neguya an nasikoed, wargwensaale an obegosulid.
1KI 14:11 Jeroboam-e-gwenadgan neggweburgi-burgwemalale, achu-masga gumaloed. Sapurba-burgwemalardi, mulamar-masga gumaloed.’ Deyob Bab-Jehová soged.
1KI 14:12 ”Be gwisgue, be-negse be nae. Be-neggweburse be modapile, be-machi burgwenonikoed.
1KI 14:13 Israel-dulemar naibi-itononimaloed. Unnila we-machibi diglegoed, ar ade, we-machibi Israel-dulemar-e-Bab-Dummad-Jehová nabir daknonikid.
1KI 14:14 ”Bab-Jehová rey-gwensak Israel-yargi ogwisgunonikoed. A-dule, bela Jeroboam-e-gwenadgan obelononikoed. Emisgwa, Bab-Jehová deyob imakoed.
1KI 14:15 Bab-Jehová, Israel-dulemar apor-imakoed, igi masarmar diwar-abin banamagwisdae, deyobi imakoed. Aginbali, we-yar-nued-be-dadganga-uklesadgi onolenanai gumaloed, Éufrates-diwar-daksik barmiledmaloed. Ar e-bab-dummad-bundor-Aseraʼga imaksamalad, e-wilub-sobsamalad. A-ular, weyob Israel-dulemar Bab-Jehová-ourwenai gusmalad.
1KI 14:16 Bab-Jehová Jeroboam-isgusadba Israel-dulemar-obanoed. Ar Jeroboam, Israel-dulemar-isguega imaksad.”
1KI 14:17 Agine, Jeroboam-e-ome gwisguded, geb naded. Geb Tirsa-neggweburse dogdapid. Yawagakgi dogdapgua, e-mimmi burgwenonikid.
1KI 14:18 Machi-burgwisad dikapmalad. Degine, bela Israel-dulemar eba bonai gusmalad. Bab-Jehová, igi e-gayaburba-barsoged-Ahíasʼga sogsa gusa, deyob gunonikid.
1KI 14:19 Jeroboam-ibmar-bamalad-imaksadi, degi, bila-onosadi, bela Israel-e-reymar-garda-narmakar-maidgi naid.
1KI 14:20 Jeroboam birga-dulagwen-gakabo (22) yar-semai gusad. Burgwisgua, e-sorba, e-machi-Nadabʼye-nugad e-rey-gangi signonikid.
1KI 14:21 Salomón-machi-Roboam, Judá-yargi negsemai gusad. Roboam birga-dulabo-gakagwensak-nika (41) yar-sealid. Jerusalén-neggweburgine, birgambe-gakagugle (17) yar-sesad. Bab-Jehová Jerusalén-neggwebur sunonikid. Israel-yargi dadgan-sogambe-gakabo-bukwad-abargi (12) gudiguega sunonikid. Roboam-e-nande, Naamaʼye-nugad, Amón-duled.
1KI 14:22 Judá-dulemar, Bab-Jehová-asabin ibmar-isgana imaksamalad. E-babganba bur bule e-isgumaladgi Bab-Jehová-ourwenai gusmalad.
1KI 14:23 Aginbali, bela yar-senigana-birgi, degi, bela-sapi-dummagan-gwismalad-urba bab-dummaganse gordidamalad. Aginbali, aila-matusulidgi ibmar-ogumakleged-ailamar sobsamalad, akwamar-bab-dummadyob-imakleged urbenai gusmarbalid, e-bab-dummad-bundor-Asera-e-wilub sobsamarbalid.
1KI 14:24 Aginbali, machergan omeganyobi na san-ukdii gusmarbalid. Israel-dulemar galagwensuli ibmar-isgana-imakdii gusmalad. Deyob Israel-dulesurmalad-bukwagusmalad nanadii gusmalad. A-ular, Bab-Jehová Israel-dulemar-iduar, a-yargi a-dulemar-ononai gusad. A-ibmar-isgana-imakdigusmalad, Israel-dulemar imakdii gusmarmogad.
1KI 14:25 Roboam birgatargus-yar-semaidgi, Egipto-e-rey-Sisac, Jerusalén-neggwebur oitononikid.
1KI 14:26 Geb Bab-Jehováʼse-goled-neggi ibmar-manisaila-bukwad bela sunonikid, neg-ollobi sinonikid. Salomón-e-reyneg-sobsadgi sigu-abingamalad-olobiid-bukwad bela sesbalid.
1KI 14:27 A-sigu-abgamalad-olobiid-muchub, Rey-Roboam sigu-abgamalad-esgoro-gordikidbiid sobsad. Agi, reyneg-e-yawagak-nakulemalad-e-dummaganga uksad, adi, sabogegar.
1KI 14:28 Rey-Roboam Bab-Jehováʼse-goled-negse nadele, sordamar-neg-nakulebukwad sigu-abgamalad-esgoro-gordikidbiid sesdamalad. Geb a-sorba, nakuleged-negse gannar senonidamalad.
1KI 14:29 Rey-Roboam-ibmar-imaksad, degi, e-yar-semaidgi-ibmar-gusmalad, Judá-e-reymar-gardamargi narmakar mamaid.
1KI 14:30 Rey-Roboam, Rey-Jeroboamʼbogwa bali-bali bila-ononai gusmalad.
1KI 14:31 Roboam-e-nande, Naamaʼye-nugad, Amón-duled. Degi, Roboam burgwenonikid. Geb e-bab-David-e-neggweburgi diglesad. Roboam-sorba, e-machi-Abiamʼye-nugad yar senonikid.
1KI 15:1 Nabat-machi-Jeroboam birgambe-gakabaabakgus (18) Israel-yar-semaidgine, Abiam, Judá-dulemar-e-reyga megnonikid.
1KI 15:2 Abiam birgapaa Jerusalén-neggweburgi yar-semai gusad. Abiam-e-nande, Abisalom-e-sisgwad, Maacaʼye-nugad.
1KI 15:3 Abiam, e-bab-Roboam ibmar-isgana-imakdii gusayobi, bela ibmar-isgana-imakdii gusmogad. Bab-Jehová-asabin islidik-gudii gussulid, e-dad-David Bab-Jehová-sabedba inniki-nanadigusayobi nanassulid.
1KI 15:4 Degi-inigwele, Bab-Dummad-Jehová, David-sabedbali, David-e-wagan-negseed Jerusalén-neggweburgi mer berguega imaksad. Agala, Davidʼga wagwa uknonikid, adi, e-sorba rey-gangi sigegar. Degi, Jerusalén-neggwebur-ogannobaligar.
1KI 15:5 Ade, David Bab-Jehová-asabin inniki-ibmar-imakdii gusad. Degisoggu, David dulagudigu, Bab-Dummad-ega-igar-mesisad-sogedba ibmar-inniki-imakdii gusad. Unnila, David, Urías-Het-dule-oburgwenonikidginbi isgunonikid.
1KI 15:6 Roboam yar-semaigu Jeroboamʼbogwa bila-onodii nanasad.
1KI 15:7 Rey-Abiam-ibmar-imaksad, degi, e-yar-semaidgi-ibmar-gusmalad, Judá-e-reymar-gardamargi narmakar mamaid. Abiam, Jeroboamʼbogwa bila-onodii gusmogad.
1KI 15:8 Abiam burgwenonikid. Agine, David-e-neggweburgi Abiam-digsamalad. Geb e-machi-Asa e-sorba yar-ganonikid.
1KI 15:9 Jeroboam-Israel-dulemar-e-rey birga-dulagwengus (20) yar-semaigu, Asa, Judá-dulemar-e-reyga megnonikid.
1KI 15:10 Asa birga-dulabo-gakagwensak (41) Jerusalén-neggweburgi yar-semai gusad. Asa-e-muu Maacaʼye-nugad, Abisalom-e-sisgwa.
1KI 15:11 Asa, Bab-Jehová-asabin innikii nanadii gusad, e-dad-David-gudigusayob gudii gusad.
1KI 15:12 Asa, e-yargi bab-dummagan-nug-odummogega gambanuchu-imakmalad-ononnonai gusad. Aginbali, e-dadgan-e-bab-dummagan-e-wilub-sobsamaladi, bela obelosbalid.
1KI 15:13 Asa, e-muu-Maaca rey-muuga-maid obelosad, ade, e-bab-dummad-bundor-Asera-e-wilub sobsa gusad. A-ular, deyob imaksad. Asa, a-Asera-sobargwichid omukusad, geb Cedrón-diwar-dikarba ogumakapid.
1KI 15:14 Degi-inigwele, e-bab-dummaganse-gormalaga aila-matusulid-soblesaddi ebulessulid. Amba degite, Asa, Bab-Jehová-sogedba innikii nanadii gusad.
1KI 15:15 Aginbali, Asa, Bab-Jehováʼse-goled-negse ormar sesad, manimar sesbalid, degi, ibmar-ebulemalad sesbalid. We-ibmarmar, Asa, e-babbogwa, Bab-Dummadga nug-imaksa gusad.
1KI 15:16 Judá-e-rey-Asa, Israel-dulemar-e-rey-Baasaʼbogwa, negsemamaidgine, bila-ononai gusmalad.
1KI 15:17 Israel-dulemar-e-rey-Baasa, Judá-dulemargi bila-ononadgu, Ramá-neggwebur bur-gandik imaksad. Adi, Judá-e-rey-Asa mer bar Judá-yargi noegar.
1KI 15:18 Agine, Asa, Bab-Jehováʼse-goled-neggi manimar-bukwadi, ormar-bukwadi, bela wesad. E-reyneg-maidgi, mani, degi, or-bukwad, bela wesbalid. Rey-Asa ega-arbamaladga we-ibmarmar uksad, adi, Siria-dulemar-e-rey-Ben-Adadʼga sedmalagar. Ben-Adadʼde Tabrimón-e-machid, degi, e-daddi, Heziónʼye-nugad. Rey-Ben-Adadʼde Damasco-neggweburgi negsemaid. Deginbali, Asa, Ben-Adadʼga weyob gayaburba barmisbalid:
1KI 15:19 “Anmar anbogwa igar-mesmalo, igi an-bab, be-babbogwa igar-mesisgusa, deyobi anmar igar-mesmarmogo. Agala an bega ormar, degi, manimar barminaid. Degisoggu, Israel-e-rey-Baasaʼbogwa be-igar-mesisadi, gannar be bisge, adi, Baana mer bar anse achaegar.”
1KI 15:20 Ben-Adad, Rey-Asa-ega-ibmar-sognaid nabir itosad. Agine, Ben-Adad, Israel-neggweburmar bukwadse-bila-ononaega e-sorda-dummagan barmisad. Weyobi: Ben-Adad, Ijón-neggweburgi naknonikid, Dan-neggweburgi naknonibalid, Abel-Bet-Maaca-neggweburgi naknonibalid, bela Cineret-yar-naidgi naknonibalid, Neftalí-yar-naidgi bela naknonibalid.
1KI 15:21 Rey-Baasa deyob wisgunonigu, Ramá-neggwebur-gandik-imaknaid indaksad. Geb Tirsa-neggweburse nade gusad.
1KI 15:22 Agine, Rey-Asa bela Judá-dulemar-onmaksad, wargwensaar obelessulid. Judá-dulemar Ramá-neggwebur-gandik-imaklenaid-e-akwamar, degi, e-urgomar bela searmalad. Rey-Asa, a-ibmarmargine, Geba-neggwebur, degi, Mizpa-neggwebur sobnai gusad. We-neggweburmar, Benjamín-neggweburmalad.
1KI 15:23 Asa bela-ibmar-imaksad, bela e-gangued-nika-megisad, neggweburmar-sobsagusad, Judá-e-reymar-gardamargi narmakar mamaid. Rey-Asa seredgine, naggi boni nikunonikid.
1KI 15:24 A-bonigi burgwenonikid. David-neggweburgi e-dadgan-neg-uangi diglesad. Rey-Asa-sorba, e-machi-Josafat e-rey-gangi signonikid.
1KI 15:25 Judá-dulemar-e-rey-Asa birgabogus yar-semaigu, Jeroboam-machi-Nadab, Israel-dulemar-e-reyga nugsalenonikid. Rey-Nadab birgabo yar-sesad.
1KI 15:26 Nadab Bab-Jehová-asabin ibmar-isgana-imakdii gusad. E-bab-Jeroboam-ibmar-isgana-imaksayobi, ibmar-imakdii gusmogad. We-ibmar-isgana, Israel-dulemar-isguega imaksad.
1KI 15:27 Ahías-machi-Baasa, Rey-Nadabʼgi aibinnonigusad. Baasaʼde, dad-dummad-Isacar-e-wagwad. Baasa, Gibetón-neggweburgi Nadab-oburgwisad. Gibetónʼde, Filistea-dulemar-neggweburad. Deunni, Rey-Nadab, bela Israel-dulemarmala, Gibetón-neggwebur ebiris gusmalad.
1KI 15:28 Rey-Asa birgapaagus Judá-e-reyga maigu, Baasa, Nadab-oburgwenonikid. Agine, Baasa, Nadab-sorba yar-ganonikid.
1KI 15:29 Baasa, rey-gangi signonigu, bela Jeroboam-e-gwenadgan oburgwisad. Wargwensaar dula-obessulid. Ar Igi Bab-Jehová Silo-neggweburgined-Ahíasʼga ibmar-sogsagusa, deyob neg gunonikid.
1KI 15:30 Jeroboam e-isgusad-ular, degi, Israel-dulemar-oichosbalid-ular, deyob neg gunonikid. Weyob ibmar-imaksadi, Israel-e-Bab-Dummad-Jehová-ourwega imaksad.
1KI 15:31 Nadab Israel-yar-semaidgine bela e-ibmar-imaksad, Israel-e-reymar-gardamargi narmakar mamaid.
1KI 15:32 Rey-Asa yar-semaigu, Israel-e-rey-Baasaʼbo bila-onodii nanasad.
1KI 15:33 Judá-dulemar-e-rey-Asa birgapaagus yar-semaigu, Ahías-machi-Baasa, Tirsa-neggweburgi-mai Israel-dulemar-e-reyga megnonikid. Baasa, birga-dulagwen-gakabake (24) yar senonikid.
1KI 15:34 Baasa, Bab-Jehová-asabin ibmar-isgana-imakdii nanasad. Baasa, Jeroboam-ibmar-isgana-imaksayobi, ibmar-imakdii gusmogad. We-ibmar-isgana, Israel-dulemar-isguega imaksad.
1KI 16:1 A-ibagi, Bab-Jehová, Hanani-machi-Jehúʼga Rey-Baasaʼgi sunmaknonikid. Geb Jehú weyob Baasaʼga sogded:
1KI 16:2 “Bab-Jehová soged: ‘Be dule-binsaledga-gudiidgi, an-Israel-dulamar-iduega an be-imaknonikid. Jeroboam-ibmar-isgana-imakdii-gusadba be nanasmogad. Aginbali, an-Israel-dulamar-isguega be imaksabalid. Be-isguedgi an-ourwega be an-imaksabalid.
1KI 16:3 Degisoggu, an be-obelosokalid, be-neguya an obelosokarbalid, igi Nabat-machi-Jeroboam-e-neguya an obelosa, deyob an be-neguya obelomogoed.
1KI 16:4 Baasa-e-gwenadgan neggweburgi-gudii burgwisale, achumarse gullegoed. Ar sapurba-burgwismalardina, mulamarse gullegoed.’ ”
1KI 16:5 Baasa Israel-yar-semaidgine bela e-ibmar-imaksad, e-gangued-oyosadi Israel-e-reymar-gardamargi narmakar mamaid.
1KI 16:6 Baasa burgwenonikid. Agine, Tirsa-neggweburgi diglesad. Rey-Baasa-sorba, e-machi-Ela yar senonikid.
1KI 16:7 Bab-Jehová e-gayaburba-barsoged-Jehúʼga, Baasaʼgi sunmaksad, degi, Baasa-neguyagi sunmaksabalid. Jehúʼde, Hanani-e-machid. Rey-Baasa Bab-Jehová-asabin galagwensuli ibmar-imakdigusadba, Bab-Jehová-oulusad. Rey-Baasa, Jeroboam-e-gwenadgan-oburgwisad. Degi-inigwele, Baasa, Jeroboam-e-ibmar-imaksadyobi ibmar-imaknonimogad.
1KI 16:8 Judá-dulemar-e-rey-Asa birga-dulagwen-gakanergwagus (26) yar-semaigu, Baasa-machi-Ela Tirsa-neggweburgi Israel-dulemar-e-reyga megnonikid. Ela birgabo reyga megisad.
1KI 16:9 E-mai-Zimri egi aibinnonikid. Zimriʼde, sorda-dummadga-gudiid, bila-onoged-urmar negabar-sedidid. Rey-Ela Tirsa-neggweburgi-gudigu, Arsaʼye-nugad-neggi mumgusii gusad. Arsaʼde, Ela-reyneg-akwedid.
1KI 16:10 Ela mummu-sigua, Zimri dognonikid. Agine, Baasa-oburgwisad. Geb Baasa-anar reyga megnonikid. We-ibmar-gusadi, deunni, Asa birga-durgwen-gakaguglegus (27), Judá-e-reyga maidgined.
1KI 16:11 Zimri reyga megideyala bela Baasa-e-gwenadgan-oburgwisad. Baasa-e-gwenadgan-machergan bela-naitinaga oburgwisad, degi, bela Baasa-e-aimarse-bakar, oburgwisbalid.
1KI 16:12 Weyob Zimri, Baasa-e-gwenadgan-obelononikid, igi Bab-Jehová e-gayaburba-barsoged-Jehúʼba sognai gusa, deyob gunonikid.
1KI 16:13 We-ibmar-gunonikidi, Baasa ibmar-isgana-imaksad-ular, degi, e-machi-Ela ibmar-imaksad-ular, deyob gunonikid. Deginbali, Ela, Israel-dulemar-ibmar-isgana-imakega imaksabalid-ular, deyob gunonikid. Deyob ibmar-galagwensuli-imakdigusmaladba, Israel-dulemar-e-Bab-Dummad-Jehová oulusmalad.
1KI 16:14 Ela Israel-yar-semaidgine bela e-ibmar-imaksad, e-gangued-oyosadi Israel-e-reymar-gardamargi narmakar mamaid.
1KI 16:15 Judá-dulemar-e-rey-Asa, birga-dulagwen-gakaguglegus (27) yar-semaigu, Zimri, Israel-yar-senonikid. Zimri, Tirsa-neggweburgi ibagugle (7) yar-sesad. Deunni, Israel-sordamar Gibetón-neggwebur-dikarba bila-onogega bukwa gusmalad. Gibetón-neggweburde, Filistea-yargi siid.
1KI 16:16 Sordamar-Gibetón-dikarba-bukwad itoarmalad: “Zimri reygi aibichaye, oburgwisye.” Degi-itosmargua, a-ibagi, Israel-sordamar-bukwad bela sogsamalad: “Anmar, anmar-dummad-Omri reyga mesoye.”
1KI 16:17 Agine, Omri, degi, bela Israel-sordamar Gibetón-dikarba-bukwad-eba-gudidiid, Tirsa-neggweburse armalad. Agine, Tirsa-neggwebur ebiris ambikunonimalad.
1KI 16:18 Zimri, Tirsa-neggwebur-oitolesokar-dakdegu, reyneggi neg-matusulid-yaba dogded. Agine, soo ogasad, geb bela neg gummakded. Deyob Zimri soogi gummakar burgwisad.
1KI 16:19 E-isgusad-ular, Bab-Jehová-asabin ibmar-isgana imakdigusadba burgwisad. Zimri, Jeroboam-ichakwa-nanadigusadba nanadii gusmogad. Aginbali, Jeroboam Israel-isguega-imaksabalidgi, Zimri nanadii gusbalid.
1KI 16:20 Zimri Israel-yar-semaidgine bela e-ibmar-imaksad, reygi aibichagusad, Israel-e-reymar-gardamargi narmakar mamaid.
1KI 16:21 Agi, Israel-dulemar sogabo mimilesad: Soggwen, Ginat-machi-Tibniʼba naded, baiddi, Omriʼba nadmarmogad.
1KI 16:22 Sordamar-Omriʼba-nanaimalad Tibni-sordagangi nakwenonikid. Agidba Tibni burgwenonikid. Geb deyob Omri, Israel-dulemar-e-reyga megnonikid.
1KI 16:23 Judá-e-rey-Asa birga-dulagwen-gakambe-gakagwensakgus (31) yar-semaidgi, Omri Israel-dulemar-e-reyga megnonikid. Omri, birgambe-gakabo (12) yar-sesad. Omri, Tirsa-neggweburgi birganergwa (6) yar-sesad.
1KI 16:24 Geb Omri, Semerʼse Samaria-e-yar-siid mani-nibir-dulagugle-gakambe-aidiku (150) baksad. A-yar-birgi negmar urbisad. Samariaʼye a-neggwebur onug-imaksad. Yar-ibed-Semerʼye-nugadba deyob neggwebur nuggusad.
1KI 16:25 Omri, Bab-Jehováʼba nanadii gussulid, ibmar-isganabi imakdii gusad. E-iduar-yar-sesmaladba bur bule isgudii gusad.
1KI 16:26 Omri, Nabat-machi-Jeroboam-isgudigusadba isgudii gusmogad. Aginbali, Jeroboam Israel-dulemar-ibmar-sobarmalad-e-bab-dummadga-imakega-imaksadbali, Bab-Jehová-oulus gusad. Deyobi, Omri nanadii gusmogad.
1KI 16:27 Omri Israel-yar-semaidgine bela e-ibmar-imaksad, ibmar-bulegan imakdii gusadi, Israel-e-reymar-gardamargi narmakar mamaid.
1KI 16:28 Omri burgwenonikid. Geb Samaria-neggweburgi diglesad. Omri-sorba, e-machi-Acab yar-senonikid.
1KI 16:29 Judá-dulemar-e-rey-Asa, birga-dulagwen-gakambe-gakabaabakgusa (38) yar-semaigu, Omri-machi-Acab Israel-dulemar-e-reyga yar-senonikid.
1KI 16:30 Acab, Israel-dulemarga Samaria-neggweburgi birga-dulagwen-gakabo (22) yar-sesad. Omri-machi-Acab, Bab-Jehová-asabin, bur bule e-iduar-yar-sesmaladba isgudii gusad.
1KI 16:31 Degine, Acab, bur bule Nabat-machi-Jeroboam-ibmar-isgana-imaksadba nanadii gusad. Ar Acab, Et-Baal-sisgwa-Jezabel nikunonibalid. Et-Baalʼde, Sidón-e-reyd. Degisoggu, Acab, bab-dummad-Baalʼse gordii gusad, degi, Baal-e-nug odummodii gusbalid.
1KI 16:32 Acab Samaria-neggweburgi Baalʼse-goled-neg-sobsadgi, ibmar-ogumakar-ukleged-aila Baalʼga sobsabalid.
1KI 16:33 Degine, Acab bab-dummad-bundor-Asera-e-wilub sobsabalid. Degidbali, bur bule Israel-e-reymar-idu-megismaladba Israel-e-Bab-Dummad-Jehová-oulusad.
1KI 16:34 Acab-yar-semaigu, Betel-neggweburgined-Hiel, Jericó-neggwebur gannar urbisad. Gebe-negsaila-sobledgu, e-machi-sailagined-Abiram burgwenonikid. Neggwebur-yawagak sobledbargua, e-machi-bipigwad-Segub burgwenonimogad. Bab-Jehová, Nun-machi-Josuéʼga-sunmaksadba, deyob gusad.
1KI 17:1 Elías, Tisbe-neggweburginedid. Tisbe-neggwebur, Galaad-yargi siid. Elías Rey-Acabʼga weyob sognaded: “Israel-e-Bab-Dummad-Jehová dula-maid. Andi e-maiga gudiidgine, innikigwadgi an bega soged: Birgamar-danikidgi bar dii wiosulid, degine, bar boo batosurbalid. An-sogoedse, geb dii widapoed.”
1KI 17:2 Agine, Bab-Jehová-gayaburba Elíasʼse nonikid, ega sognonikid:
1KI 17:3 “Wegi be nao. Dad-nakwedsik be nao, Jordán-diwar-obakar, Querit-dianse be dukunao.
1KI 17:4 Dian-maid be gobdii guo. Sikwisichimar bega mas-ukega an imakoed.”
1KI 17:5 Degisoggu, Elías Bab-Jehová-ega-sogsadba Jordán-diwar-maidse naded, Querit-dianse megidapid.
1KI 17:6 Bane-bane, wakudarbali, degi, sedogidbali, sikwisichidmar Elíasʼga madu, degi, san senonidaed. Elías dian-maid gobdabalid.
1KI 17:7 Ibagan-nasgu, dian-maid dinguded, ade, bar dii wissulid.
1KI 17:8 Agine, Elíasʼse Bab-Jehová-gayaburba nonikid, ega weyob sognonikid:
1KI 17:9 “Sidón-yar-naidse Sarepta-neggweburse be nao. Agi, be gudii guo. Be-gudiidgine, ome-e-ibe-sui-burgwisad masgi be-ogundii guoed. Ar ade, an deyob ega igar uksad.”
1KI 17:10 Degisoggu, Elías Sarepta-neggweburse nade gusad. A-neggwebur-e-yawagak-noedse modapgua, Elías ome-e-ibe-sui-burgwisad sapan-aminai dakdapid. A-omese goted, ega sogded: —Wis be anga gobega dii sedage.
1KI 17:11 A-ome dii-aminadgu, Elías ega sogdebalid: —Wis be anga madu sedabalo.
1KI 17:12 Ome, Elíasʼga sogdemogad: —Bab-Jehová-Dula-Maid-nuggi an bega soged, an-madu bergusad. Unnila madubur napi-iche bormogi siid. Aginbali, olivo-gwallu napi-iche butegi siibalid. Degisoggu, an mas-imakega sapan-aminaid, adi, an-machi-anbo napi mas-gunnega. An-machi-anbogwa burgwed-idu napi mas-gunsii gumaloed.
1KI 17:13 Elías, omega sogdemogad: —Mer be bukib-binsae, be-negse be nae. Ibu be imaksokali, a be imakdapo. Angad-inse napi-madubur-siidgi be madu imako. Geb anga be sedago. A-sorba, na bemargad madu be imakmogo.
1KI 17:14 Ar ade, weyob Israel-e-Bab-Dummad-Jehová soged: ‘Bormogi-madubur-siid berguosulid, olivo-gwallu-siibalid berguosurbalid, ani an, Bab-Jehová, dii-owiedse geb we-ibmarmar obelogoed.’
1KI 17:15 Geb ome nade gusad, Elías-sogsadba imaksad. Degisoggu, Elías, degi, ome e-machi-ebo bane-bane mas-gundii gusmalad.
1KI 17:16 Degisoggu, Bab-Jehová, Elíasʼga-sogsagusadba gunonikid. Madubur-bormogi-siid surgussulid, olivo-e-gwallu-butegi-siid bergussurbalid.
1KI 17:17 A-sorba, a-ome-sui-e-ibe-burgwisad-e-machi uellenonikid. Egi-bonigan-obinedba burgwenonikid.
1KI 17:18 Agine, ome-sui-e-ibe-burgwisad Elíasʼga sogded: —¿Bab-Dummad-dule, ibiga angi be yolenai? Gannar isguedgi an-obinsaega be nonikid, an-machi-oburgwega be nonibalid.
1KI 17:19 Elías omega sogded: —Be-machi be anga uda. Elías, ome-nukugi-mimmi-burgwarmaid susad. Geb niba e-maidse sesad. Agine, e-gabedgi Elías mimmi-mesisad.
1KI 17:20 Geb Elías Bab-Jehováʼse goted, weyob sogded: “Bab-Dummad-Jehováʼye, ibiga we-ome-an-akwedga be nunmaked-uknai. Emide, be ei e-mimmi-oburgwisad.”
1KI 17:21 Geb Elías ilapaa mimmi-birgi megisadgi, sogdebalid: “An-Bab-Dummad-Jehováʼye, wilesagwadgi an bese egise, gannar be we-mimmi-odulogega be imake.”
1KI 17:22 Bab-Jehová, Elías-ese-gochad itosad. Agine, ega gannar mimmi-odulosad.
1KI 17:23 Geb Elías gannar mimmi-sesad, Elías, mimmi gabedgi-maid odesad. E-nanga uknonikid, ega sogded: —¡An bega mimmi sedani, bei durgusa!
1KI 17:24 Geb ome Elías-abin sogdebalid: —Emisgindi, an wisi, be Bab-Dummad-duled. Be-ibmar-sogedi, Bab-Jehová-gayaburba be soged.
1KI 18:1 Undar birgapaagus dii-wisulid-ibagan-nasadgine, Bab-Jehová-gayaburba Elíasʼse nonikid, weyob sognonikid: “Acabʼse be nao, ega be sogo, we-yargi an dii owisokarye.”
1KI 18:2 Degisoggu, Elías, Acabʼse nade gusad. Deunni, Samaria-neggweburgine ukud-dummad naid.
1KI 18:3 Agine, Acab ega-ibmar-akwed-Abdíasʼse gochad. Abdíasʼde, Bab-Jehová dobekwaa-nanadiid-duled.
1KI 18:4 Jezabel, Bab-Jehová-gayaburba-barsogmalad-oburgwenaigu, Abdías, Bab-Jehová-gayaburba-barsogmalad-e-dulatar (100) akwasaila-olloledyaba odukusad. Dulabo-gakambe (50) akwasaila-olloled-gwensakgi odukusad. Akwasaila-olloled-baidgine, dulabo-gakambe (50) odukusbalid. Ega mas-ukdii gusad, gobed-ukdii gusbalid.
1KI 18:5 Acab, Abdíasʼga igar uksad: “Bela yar-naid be ebirnao, diwarmar-mamaidba, dianmar-mamaidba, be bipirmaknao. Abakar molimar-omaega, degi, moli-uaya-senigan-omaega gagan-nuegan daklealile, adi, melle anmar-ibe ibdurgan burgwega.”
1KI 18:6 Geb Acab, Abdíasʼbogwa bachik-bachik nadmalad. Acab igar-soggwensik-naded, Abdíasʼdina baidsik-nadmogad.
1KI 18:7 Abdías igarba-nadapgu, na Elíasʼbo abingunonikid. Abdías, Elías-dakargu, abin dulluu napase imaksad. Geb ega sogded: —Dummad-Elías, ¿Be Elíasʼye?
1KI 18:8 Elías abin-sogded: —Eye, an Elías. Be-dummadga be sognae, wegi an gudiiye.
1KI 18:9 Abdías abin sogdebalid: —¿Ibiga Acab an-oburgwebi be abege? ¿Ibugi isgus be an-daksunna?
1KI 18:10 Nue napira be-Bab-Jehová dula-maid. Bela-yarmar-naid-ugakaase an-dummad-Acab be-amiega bipirmakdii gusad. Dulemar abin sokar damalad, wegi be gudisurye, Acab a-dulemar ega ise-sogar-imakega imakdaed.
1KI 18:11 Emisgindi, be anga soged: ‘Be-dummad-Acabʼse be naye, ega be sognaye, wegi Elías gudiiye’
1KI 18:12 Anmar na bangudele, wissurmosundo, bia Bab-Dummad-Burba be-sedodibe. An Acabʼse naddibe, geb an ega sogdapsundibe, be wegi gudiiye. Acab wese be-aminonikile, geb sate be-daknonikile, an ese oburgwilegoed. Ar be an-wisid sapingwad-akale Bab-Jehová-dobekwaa an nanadiid.
1KI 18:13 ¿Ar bega sogsasurmarsi, deun Jezabel Bab-Jehová-gayaburba-barsogmalad-oburgwenaigu, Bab-Jehová-gayaburba-barsogmalad-e-dulatar (100) akwasaila-olloledyaba an odukusye? Dulabo-gakambe (50) akwasaila-olloled-gwensakgi an odukusad. Akwasaila-olloled-baidgine, dulabo-gakambe (50) an odukusbalid. An ega mas-ukdii gusad, an ega gobed-ukdii gusbalid.
1KI 18:14 Emisgindi, an-dummadse be an-barminaid, ega sogega, be wegi gunaye. ¿An-oburgwebi be abege?
1KI 18:15 Elías ega sogded: —Bab-Jehová, Bela-Gangued-Nika maid. An e-maiga-gudiidgine an bega soged, emi an Acabʼbo sunmakoed.
1KI 18:16 Agine, Abdías, Acab-aminaded, degi, bela-ibmar-gusad ega sogdapid. Degisoggu, Acab, Elíasʼse alid.
1KI 18:17 Acab, Elías-dakdegu, ega sogded: —¿Be-dule Israel-dulemarga boni-ukdiidi?
1KI 18:18 Elías, Acab-abin sogded: —Ani an Israel-dulemarga boni-ukdisulid. Be-dule, degi, be-gwenadgan Bab-Jehová-igar-islidik-mesisadgi-bangusmaladba na be boni-amidmalad. Aka bemar bab-dummadgan-Baal be-bab-dummadga na be imakdemalad.
1KI 18:19 Emigi, be bela Israel-dulemar-bukwamaladse be gornamalo. Adi, anmar Carmelo-yargi ambikumalagar. Aginbali, bela Baal-gayaburba-barsogmalad e-dulataled-ilabake gaka dulabo-gakambe (450) ambikumarmogo, degi, Asera-gayaburba-barsogmalad e-dulataled-ilabakegwad (400) Jezabelʼba-masgundimalad, bela ambikumarmogo.
1KI 18:20 Acab bela Israel-dulemarse gochad, degi, bab-dummad-Baalʼga-gayaburba-barsogmaladse gochabalid. Adi, Carmelo-yargi ambikumalagar.
1KI 18:21 Elías, Israel-dulemar-asabin gwisgunonigu, ega sogded: —¿Sanadse bemar darbo-binsadiid iemaloe? Ar Bab-Jehová, bemar-Bab-Dummad be dakmardibe, aba be ibsamardo. Ar bab-dummad-Baal bemar-Bab-Dummad be dakmardibe, aba be ibsamalodo. Israel-dulemar Elías-abin-imaksasurmalad.
1KI 18:22 Agine, Elías sogdebalid: —Napi anbi Bab-Jehová-gayaburba-barsogega bedapid. Degi-inigwele, bab-dummad-Baal-gayaburba-barsogmaladdina, e-dulataled-ilabake gaka dulabo-gakambe (450) nikad.
1KI 18:23 Anmarga moli-bebe-nikad-machergan warbo sedamalo. Baal-gayaburba-barsogmalad na e-dakedba moli wargwen sumaloed. Geb goa-goa imakmalo. Geb ailagi sapan-birgi mesmalo. Deginbali, mer soo ogamalo. Andi moli-baid deyob imakmogoed, ailagi sapan-birgi an mesmogoed, an soo ogaosurmogad.
1KI 18:24 Agine, be-bab-dummad-Baal-gayaburba-barsogmalad na e-bab-dummadse gormaloed, ega soo barmidagega. An deyob Bab-Jehováʼse gormogoed. Doa soo ogaoe, a-Bab-Dummad, Bab-Dummad-napiragwadid. Bela Israel-dulemar nabir itosmalad.
1KI 18:25 Agine, Elías, bab-dummad-Baal-gayaburba-barsogmaladga sogded: —Bemardi ichesursoggu, be-dakedba moli-bebe-nikad-machered na be sumalo. Agine, be moli goamakmalo. Mer be soo ogamalo. Geb be-bab-dummadse be gormalo, bemarga soo ogaegar.
1KI 18:26 Bab-dummad-Baal-gayaburba-barsogmalad moli-ega-uklesadi, oburgwismalad, geb goa-goa imaksamalad. E-bab-dummad-Baalʼse wakdaradba, yorukudse gornanai guarmalad. Amarde binnasuli weyob gornanaid: —¡Baalʼye, be anmarga soo ogaye! Aginbali, ibmar-ogumakleged-aila-dikarba gwirnanai guarmarbalid. Degite, e-bab-dummad-Baal-gaya itolessulid, gwen ega soo ogassurbalid.
1KI 18:27 Yorukudbali, Elías, Baal-gayaburba-barsogmalad-gwirnanaidgi dododed. Ega sogded: —Gatik be iseedi gormakmala. ¿Ar Baal, Bab-Dummadsursi? Degiir, be-bab-dummad neg-itomairgebed, arbanaidibe. Sulile, aineba naddibe. Abakar gabmaile, degisoggu, bemar odakergebed.
1KI 18:28 Degite, amba Baal-gayaburba-barsogmalad amba issedi gornanai gualid, degi, e-damaladba na dukin es-suidgi siknanai guarmalad, eswar-seniganagi na nailiksananai guarmalad, abe-ginnitibi aryonanai guarmalad.
1KI 18:29 Yorukud-obitegua, amba deyob gunanai gusmalad. Deyob-gunanai ega neg-sedoded. Ibmar-ogumakar-ukleged-wachi-mosgua, e-bab-dummad-Baal-gaya itolessulid, gwen ega soo ogassurbalid.
1KI 18:30 Agine, Elías bela Israel-dulemarga sogded: —Anse dagma. Bela Israel-dulemar ese armalad. Geb Elías, Bab-Jehováʼga-ibmar-ogumakar-ukleged-aila-ayarisad nudaknai gusad.
1KI 18:31 Elías, akwamar gwaambe-gakabo (12) amisad. We-akwamar, dadgan-warambe-gakabo-bukwadba (12) nug-imaksad, igi Bab-Jehová sogsa-gusa: “Israelʼye be nugguoye.”
1KI 18:32 Elías, Bab-Jehová-nuggi, a-akwamargi ibmar-ogumakleged-aila sobsad. Geb aila-ebiris, napa akwisad. We-napa-akwialedgi sunna galón-gwabake-wilub dii sigewilubbid.
1KI 18:33 Sapan urbisbalid, degi, moli-bebe-nikad-machered goamaksabalid. Geb sapan-birgi sanmar urbisad.
1KI 18:34 Geb degine, Elías sogded: —Bormo-gwabake anga dii enomalo. Geb ibmar-ogumakleged-aila-birgi, degi, sapan-birgi bela eomalo. Deyob ega imaksamalad. Geb sogdebalid: —Gannar anga deyob imakmarbalo. Deyob ega imaksamarbalid. Elías sogdebalid: —Napi be anga imakmarbalo. Deyobi, ilapaa dii eonanai gusmalad.
1KI 18:35 Degisoggu, dii suurmakmai gusad, Elías napa-akwisadgi dii ena sigisad.
1KI 18:36 Ibmar-ogumakar-ukleged-wachi-mosgua, Bab-Jehová-gayaburba-barsoged-Elías, aila-asabin gwisgunonikid. Geb Bab-Jehováʼse weyob goted: “Bab-Jehováʼye, be Abraham-e-Bab-Dummadid. Isaac-e-Bab-Dummadbalid, degi, Jacob-e-Bab-Dummadbalid. Bab-Jehováʼye, emi-iba bela Israel-dulemar be-wisgumaloed, bede, Bab-Dummad-napiragwadid. Degine, wisgumarbaloed, ani an be-maiga gudimogad. An beba-ibsadiidba, be-sogsadba an we-ibmar bela imaksad.
1KI 18:37 Bab-Dummad-Jehováʼye, be anga soo ogae, adi, magar be-dakmalaga, be Bab-Dummad-napiragwadi, degi, dulemar napiragwagi beba-aibirega be imaked.”
1KI 18:38 Elías deyob-sunmaksagu, Bab-Jehová-e-soo ibmar-ogumakar-ukleged-ailagi aidenonikid, moli-bebe-nikad bela gummaksad, sapanmar bela gummaksabalid, akwamarse-bakar gummaksad, napa-akwialedgi dii-naid bela ese dinna gusad.
1KI 18:39 Israel-dulemar deyob daksagu, napase dulluu imaksamalad, sogdemalad: “¡Bab-Jehová, Bab-Dummad-napiragwadid! ¡Bab-Jehová, Bab-Dummad-napiragwadid!”
1KI 18:40 Agine, Elías Israel-dulemarga sogded: —Bab-dummad-Baal-gayaburba-barsogmalad bela be gamar. Mer wargwensaar be owakinmalo. Israel-dulemar bela a-dulemar-gasmalad. Agine, Elías, Cisón-dian-maidse a-dulemar-sesad. Agi, Elías bela a-dulemar-e-gammu egwachad.
1KI 18:41 Geb Elías, Acabʼga sogded: —Be-negse be nae, be mas-gunno, be gobbalo. Bato dii-dummad urmakdanikid.
1KI 18:42 Acab deyob e-negse mas-gunnade, degi, gobnade gusad. Elíasʼdina Carmelo-yarse nakwided, napase dulluu imaksad, degi, yokor-imbaba e-wagar odosad.
1KI 18:43 Elías, e-maiga sogded: —Be naknae. Demarsik be ataknae. E-mai nade gusad. Geb atakdegu, sogded: —Ibmar daklesuli. Agine, Elías deyob e-mai ilagugle (7) barminai gusad.
1KI 18:44 Napidgine, e-mai Elíasʼga sogded: —Magadba mogir nakwedanikid. Mogir arganun-dungu dakleged. Agine, Elías e-maiga sogdebalid: —Acabʼse be nae, ega be sogdapo: ‘Be-ur-napagined guakwa be nasikoye, gwae be naoye. Degisulile, diise be galegoye.’
1KI 18:45 Agine, neg-gudure burwaba-mesa nagunonikid. Geb dii-dummad burwaba-mesa wialid. Acabʼdina, Jezreel-neggweburse e-ur-napaginedgi naded.
1KI 18:46 Elíasʼgindina, Bab-Jehová-e-gangued aidenonikid. Elías e-morsuid e-sasirba edicha imaksad, geb abarmakded. Elíasʼdi, Acab-idu Jezreel-neggweburse modapid.
1KI 19:1 Acab, Jezabelʼga bela Elías-ibmar-imaksad ogwasad. Degi, igi Elías, bab-dummad-Baal-gayaburba-barsogmalad bela es-suidgi oburgwisa, bela ega sogsabalid.
1KI 19:2 Degine, Jezabel e-gayaburba-berbeged Elíasʼse barmisad, ega sogega: “Banedse, we-wachigi, bab-dummad-Baal-gayaburba-barsogmalad-oburgwisayob an be-imaksasulile, bab-dummagan ise-sabsur an-odurdaksunno.”
1KI 19:3 Elías deyob itononigu, gwakided. Geb na san-bendakega wakited. Judá-yargi Beerseba-neggwebur-siidse nonigu, e-mai-obenonikid.
1KI 19:4 Geb Elías nega-dulesulidganba ibagwen-dummad nanasad. Agine, sapi-senigwad-urba signonikid. Elías burgwebiedba weyob sogded: “Bab-Jehováʼye, an budar-itogusad, an-dadganba bur an ege gudiid. Degisoggu, be an-oburgwe.”
1KI 19:5 Degine, Elías sapi-senigwad-urba megis-imaksad, geb gabided. Degidgine, baliwitur Elías-ebunonikid, ega sogded: “Gwisgue, mas-gunne.”
1KI 19:6 Elías atakdegu, e-nono-maidsik soo-aramaksiid-birgi madu yoar-mai dakalid. Degine, noggi dii sii dakarbalid. Geb agine, mas-guchad, degi, gobsabalid. Geb gannar gabidbalid.
1KI 19:7 Bab-Jehová-e-baliwitur gannar Elíasʼse nonibalid, ebunonibalid, ega sogded: “Gwisgue, mas-gunne, ade, igar-suid be nanadagoed.”
1KI 19:8 Elías gwisgusad, mas-guchabalid, gobsabalid. Mas-guchad-sorba nue-gangus itogu, Horeb-yarse nade gusad. Bab-Dummad-yar-siidse-moega iba-dulabo (40) mutik-mutik nanasad.
1KI 19:9 A-yargine, Elías, obunnogega akwasaila-olloledyaba dogdapid. Agine gabisad. Agine, Bab-Jehová-gayaburba Elíasʼse nonikid, ega sognonikid: —¿Elías, ibu be wegi samai?
1KI 19:10 Elías abin-imakded: —Bab-Jehová-Bela-Gangued-Nikad, an bela-bela beba naid. Ar Israel-dulemardi bebo Igar-Mesisad bisgenonimalad, bei ibmar-ogumakleged-ailamar omukusmarbalid. Degine, be-gayaburba-barsogmalad es-suidgi oburgwismarbalid. Napi anbi bedapid. Emide, an-oburgwega, an-amidimalad.
1KI 19:11 Bab-Jehová, Elíasʼga sogded: —Neg-magaba be nonae. An-asabin, yar-birse be gwisgunao, ar ade, an emisgwa dagesokalid. Agine, Bab-Jehová magarononigu, binnasuli burwa gornonikid. Yar-siid giglimakded, akwamar ese mamarided. Degi-inigwele, Bab-Jehová a-burwaba nonisulid. Burwa-dummad-sorbali, negabandur nagunonibalid. Amba Bab-Jehová negabandurba nonisurbalid.
1KI 19:12 Negabandur-nagunonikid-sorba, soo-dummad ganonibalid. Amba, Bab-Jehová sooba nonisurbalid. Geb soo-sorba, neg-bogidik nagunonikid, geb ibmar-goled bar itolessulid.
1KI 19:13 Geb Elías deyob neg-bogidikid-nagunoni-itosgu, e-mor-dummadgi e-wagar edusad, geb akwasaila-ollor-siidgi noalid, e-noedgi gwisgunonikid. Agine, gayaburba ese gornonikid, ega sognonikid: —¿Elías, ibu be wegi samai?
1KI 19:14 Elías abin-imakded: —Bab-Jehová-Bela-Gangued-Nikad, an bela-bela beba naid. Ar Israel-dulemardi bebo Igar-Mesisad bisgenonimalad, bei ibmar-ogumakleged-ailamar omukusmarbalid. Degine, be-gayaburba-barsogmalad es-suidgi oburgwismarbalid. Napi anbi bedapid. Emide, an-oburgwega, an-amidimalad.
1KI 19:15 Bab-Jehová ega sogded: —Be nae. Gannar be-danikidba be nae. Damasco-neg-dulesulidganba be nao. Ase, be mosale, Hazael-nonogi olivo-gwallu be eogo, Siria-dulemar-e-reyga nugsalegegar.
1KI 19:16 Aginbali, Nimsi-machi-Jehú, deyob be imakmogo, Israel-dulemar-e-reyga nugsalemogagar. Deginbali, Safat-machi-Eliseo-e-nonogi be olivo-gwallu eomogo, adi, be-sorba an-gayaburba-barsogedga nug-imaklemogagar. Ar Eliseoʼde, Abel-Mehola-neggweburginedid.
1KI 19:17 Hazael-e-es-suidgi dule wakichadibe, amba Jehúʼse oburgwilegoed. Amba Jehú-e-es-suidgi wakichabardibe, Eliseoʼse oburgwilemogoed.
1KI 19:18 Degi-inigwele, Israel-dulemar miligugle (7,000) bab-dummad-Baal-asabin yokorgi sindigar sigissurmaladi, degi, e-ibe e-wagar-ussurmarbalidi, an bendakoed.
1KI 19:19 Geb degine, Elías nade gusad. Geb Safat-machi-Eliseo abingunonikid. Dakdapid, Eliseo moli-bebe-nikad waladulagwen-gakabake (24) ebo-ebo-nanaidgi napa-imunai. Eliseo, napi-moli-warbo-sorba-naid semai. Geb Elías, Eliseo-nagaba-nasgu, e-mordummad Eliseo-birgi ogichad.
1KI 19:20 Eliseo, moli-bebe-nikamalad indaksa-imaksad. Elías-sorba abarmakded, geb Elíasʼga sogded: —Bina an-bab an napi daknagwelo. Napi an-nan an daknabargwelo. An ega sogega degimaloye. A-sorbali, an beba naoed. Elías, Eliseoʼga sogded: —Degiir nabir, be nae. An be-igar-gaosulid.
1KI 19:21 Eliseo, Elías-idu-argua, moli-bebe-nikad-warbo sesad, geb oburgwisad. Molimar-edichad-e-urgomar sapanga imaknonibalid. Geb a-sapangi, moli-e-san-narisad. Agine, bela dulemar masgi-ogunnai gusad. A-sorbali, Eliseo, Elías-sorba nade gusad. Geb Elías-bendakedga Eliseo-nugsalenonikid.
1KI 20:1 Agine, Siria-e-rey-Ben-Adad, e-sorda-bila-onomalad bela onmaksad. Reymar-waladulagwen-gakambe-gakabo (32) Samaria-neggweburgi-bila-onogega molimar, e-ur-nika-nika semai gusad. Deyob Samaria-neggwebur-ebirnonimalad, agine oitononikid.
1KI 20:2 Geb, Ben-Adad Samaria-neggweburse e-gayaburba-berbemalad Israel-dulemar-e-rey-Acabʼse barmisad, ega sogega:
1KI 20:3 “Weyob Ben-Adad sogye: ‘Be-manimar, be-ormar, be-omegan, degine, be-mimmigan bela angadye.’ ”
1KI 20:4 Israel-e-rey, Ben-Adad-abin sogded: “Dummad-Rey, belagwable an ibmar-nikad begadid, anse-bakale, an begadga gued.”
1KI 20:5 Gannar Ben-Adad-gayaburba-berbemalad Acabʼse nonimalad, ega sognonimarbalid: “Ben-Adad weyob sogye: ‘Bega an sogsa gusye: Be-manimar, be-ormar, be-omegan, degine, be-mimmigan bela angadye.
1KI 20:6 Aginbali, oibosale, we-wachigi an-sordamar an barmidagoed. Be-neguyagi bela be-ibmar-nuegan-bukwad sedmalaga, dule-bega-arbadimalad-e-neguya deyob an imakbaloed.’ ”
1KI 20:7 Degidgine, Israel-e-rey bela girmar-dummaganse gochad, ega sogded: —Be dakmalana, bule we-dule anmarga boni-onobi be daksunna. Anse an-omegan-egichad, an-mimmigan-egichabalid, manimarse-bakar, ormarse-bakale anse egichisbalid. An ega surye sogsasulid.
1KI 20:8 Girmar-dummagan, degi, bela Israel-dulemar ega sogded: —Mer eba be ibsao, mer ibmar-bese-egisnaid ega be ukbalo.
1KI 20:9 Agine, Acab, Ben-Adad-gayaburba-berbemaladga sogded: —Weyob an-dummad-reyga be sogo: ‘Ani, be-maiga an gudiid. Gebesailagi be anse ibmar-egichisad an bega ukoed. Sorba be ibmar-egichisaddi, an bega imakosulid.’ Ben-Adad-e-gayaburba-berbemalad nadmalad. Geb Ben-Adadʼga deyob sogdapmalad.
1KI 20:10 Deginbali, Ben-Adad, Acabʼga gaya barminai gusbalid: “An Samaria-neggwebur an bela osulossulile, bab-dummagan sabsur-an-odurdaksundo. A-ulale, Samaria-neggweburgi an-sordagan-irba argan-nukgwen-nukgwen ega ukub ukega naguosulid.”
1KI 20:11 Israel-e-rey-Acab abin-sogdemogad: “Mer idu-idu amba yoo-bila-onoleged-idu be sunmako.”
1KI 20:12 Ben-Adad we-gaya itosgua, deun reymarmala sisa-gobsiid. Agine, Ben-Adad e-sordaganga sogded: “Guakwamalo.” Degisoggu, e-sordagan, Samaria-neggweburse bila-ononamalaga guakwa ambikusad.
1KI 20:13 Degidgine, Bab-Jehová-gayaburba-barsoged, Israel-e-rey-Acabʼse nonigusad, ega sogded: —Weyob Bab-Jehová soged: ‘¿Ichesuli sordamar be dake? Emi, we-sordamar an bega urmakoed, adi, be an-dakmalaga, ani an Bab-Dummad-Jehová gue.’
1KI 20:14 Acab abin-sogded: —¿Degite, Bab-Jehová doaba deyob imakoe? Bab-Jehová-gaya-barsoged sogdebalid: —Weyob, Bab-Jehová soged: ‘Sapingan-dummagan-bendakdimaladba an imakoed.’ Acab egisdebalid: —¿Degite, doa-inse bila-onodoe? Bab-Jehová-gayaburba-barsoged sogded: —Be-inse be onodoe.
1KI 20:15 Agine, Acab dummagan-yar-sedimalad-e-bendakdimalad onmaksad. A-sordamar bela e-dulataled-ilabo gaka dulagwen-gakambe-gakabo (232) gumalad. Aginbali, Acab bela Israel-sordamar-onmaksabalid, bela miligugle (7,000) gumalad.
1KI 20:16 Agine, yorukudba nade gusmalad. Deun, Ben-Adadʼdina Reymar-dulagwen-gakambe-gakabogwadmala (32) sisa-gobsiid. We reymar e-bendakega nonimalanad.
1KI 20:17 Dummagan-yar-sedimalad-e-bendakmalad-inse nade gusmalad. Ben-Adad nakulemalad-barmis gusad. Amarde ega sognonimalad, Samaria-neggweburgi sordamar noarmarye.
1KI 20:18 Ben-Adad sogded: “Anga ganamalo, mer oburgwemalo. Nuedgi-danimardibe, amba be anga gamalo, bila-onogega danimardibe, amba be anga gamarbalo.”
1KI 20:19 Dummagan-yar-sedimalad-e-bendakmalad Israel-sordamar-idu nadapi gusmalad.
1KI 20:20 Sordamar war-wargwen e-isdarmalad-oburgwemai gusad. Geb degidbali Siria-sordamar wakite gusmalad. Siria-e-rey-Ben-Adadʼdina, moli-birgi-sii e-sorda-moligi-sii-bila-onomaladba wakite gusad.
1KI 20:21 Israel-e-rey, Siria-sordamar-balimaksad. Agine, molimar-bukidar, degi, e-urmarse-bakar bukidar gasad. Siria-dulemar nue ese ibitosmalad, ese galakusmalad.
1KI 20:22 A-sorbali, Bab-Jehová-gayaburba-barsoged Israel-e-reyse nonikid, ega weyob sognonikid: “Mer be baisur-binsao. Siria-sordamar-idu igar be amie, ade, Siria-e-rey, birga-danikir gannar begi bila-onogega gwichigunonikoed.”
1KI 20:23 Degine, Siria-sorda-idudimalad e-reyga sogdemalad: “Ar Israel-sordamar-e-bab-dummagan yalagan-e-bab-dummadid. Agala, Israel-sordamar anmarba dutusurmalad. Anmar, amarbogwa nebagi bila-onodibe, inniki an bega soged, anmar egi nakwisaled.
1KI 20:24 Degisoggu, weyob be imako: Reymar bela be ogwao, amar-muchub, sordamar-idudimalad dummadga be nug-imako.
1KI 20:25 Sordamar-bila-onomalad be urbebalo, igi iduar be nikusa, deyob mergu be urbebalo. Igi molimar, degi, ur-molimar be nikusbalid, deyob be imakbalo. Agine, neba-naidgi be Israel-sordamargi bila-onogoed. Be dakodo, bule bemar nakosurdibe.” Rey-Ben-Adad nabir itosad, geb deyob imaksad.
1KI 20:26 Birga-obaksagua, Ben-Adad Siria-sordamar onmaknai gusad. Geb Israel-sordamargi bila-ononamalaga, Afecʼye-neg-nugadse nade gusmalad.
1KI 20:27 Acabʼdina, e-sordagan-onmaknai gusmogad. Sordamar ibmar-ebulemalad, degi, e-mas-gunmaloed, bela ega daknai gusad. Geb, Siria-sordamargi bila-ononamalaga node gusmalad. Israel-sordamar, Siria-sordamar-abin ambikunonimalad. Israel-sordamar Siria-sordamar-abin sibad-wawaad-warbo-gunaiyob wis dakleged. Siria-sordamardina yeer-mergu e-abin bukwad.
1KI 20:28 Degidgine, Bab-Dummad-e-dule, Israel-rey-asabin gwisgunonikid, ega sogded: “Weyob Bab-Jehová soged: ‘Siria-sordamar an-annik soged, ande, Bab-Jehová-guedi, unnila yalagan-e-bab-dummadye, nebagan-e-Bab-Dummadsurye. Degisoggu, an bega we-dulemar urmakoed, adi, be wisgumalaga, anbi unnila Bab-Jehová gue.’ ”
1KI 20:29 Israel-sordamar, Siria-sordamarbogwa ibagugle (7) abin-abin ambikusad. Ibagugle-gusgua (7) bila onoleded. A-ibagine, Israel-sordamar Siria-sorda-nagab-bila-ononadapmalad mili-dulatar (100,000) oburgwenonikid.
1KI 20:30 Agine, Siria-sorda-bamalad, Afec-neggweburse wakitemalad. Geb, we-sordamar mili-dulagwen-gakagugle-wakinnonimaladgi (27,000) neggwebur-galu-matusulid-akwabiid egi malusad. Aginbali, Ben-Adad deyob a-neggweburse wakinnonimogad, nega-nega dukudii gusad.
1KI 20:31 Degidbali, Ben-Adadʼga e-sordamar sogded: “Anmar itodaed, Israel-dulemar-e-reymar emar-wiledakdaye. Degisoggu, anmar wile-itoged-mor yomarsunno. Israel-dulemar-e-reyse anmar namarsunno. Anmar ese wilenamalo, mer anmar-oburgwega. Abakar wile anmar-dakalile.”
1KI 20:32 Degidbali, Ben-Adad-sordamar Israel-dulemar-e-reyse nade gusmalad. Ega wilesagwadgi sogdapmalad: —Ben-Adad-be-maiga-gudiid weyob sogye: ‘Wile wis be an-dake, mer be an-oburgoye.’ Rey-Acab abin-sogded: —Ben-Adadʼde, ¿amba dula-gudii? We-dule an-gwenadyob gued.
1KI 20:33 Ben-Adad-sordamar deyob Acab-itosgua, nabir neg-gudagoye bismalanad. Degisoggu, Acabʼga sogdemalad: —Inniki-be-soge, ar be-gwenad-Ben-Adad amba dula-gudiid. Agine, Rey-Acab sogdebalid: —Be namar. Ben-Adad be anga nidamalo. Ben-Adad, Rey-Acabʼse nonigua, Rey-Acab, e-ur-moli-bila-onogedgi onakwisad.
1KI 20:34 Ben-Adad, Acabʼga sogded: —An-bab, be-bab-ibe neggweburmar-susad, gannar an bega uko. Aginbali, Damasco-neggweburgi sunna ibmar-ukleged-neg be sied, igi an-bab Samaria-neggweburgi imaksamoga, deyob be imakmogad. Acab abin-sogdemogad: —Deyob be anga sogele, degirdi, bar an be-gaosulid. Agine, Acab, Ben-Adadʼbogwa igar-mesnai gusad. Geb deyob Acab, Ben-Adad-indaksa gussunnad.
1KI 20:35 Bab-Jehová-sogedba, Bab-Jehová-gayaburba-barsogmalad-danar-bukwad e-sorda-wargwen, e-sorda-baidga sogded: —Be an-sarsoge. E-sorda-baid yapa-sarso gusad.
1KI 20:36 Bab-Jehová-gayaburba-barsogmalad-wargwen, e-sorda-baidga sogdebalid: —Be Bab-Jehová-gayaburbaba be ibsasursoggu, angi be banguder, achumigur-nono-wawaadse be oburgwilegoed. Degisoggu, we-dule-baid, Bab-Jehová-gayaburbaba-ibsassulidi, Bab-Jehová-e-gayaburba-barsogedgi bangudgua, achumigur-nono-wawaad e-abin noalid. Geb a-dule ese-oburgwilesad.
1KI 20:37 Degine, Bab-Jehová-gayaburba-barsoged, dule-baid abinguarbalid. Ega sogded: —¡Be an-sarsoge! A-dule, Bab-Jehová-e-gayaburba-barsoged sarsononikid, nue onakbi-imaksad.
1KI 20:38 Agine, Bab-Jehová-gayaburba-barsoged nade gusad. Geb Rey-Acab-edarbega igarba nadapidgine, morgi e-wagar-odukuar gwisgudapid.
1KI 20:39 Rey-Acab igarba nadapgu, Bab-Jehová-gayaburba-barsoged ese binnasuli goted: —Ani an be-maiga gued. Be an-dummadid. Bila-onolenaigu, an beba gunai gusmogad. Agine, sorda-gwensak anga dule-wargwen gasa-senonikid, anga weyob sognoni gusad: ‘We-dulegi nue be nakulegoye. We-dule wakinnonidibe, be be anar oburgwilegoye. Sulile, mani-nibir-dulapaa-gakambe-gakatar (75) be bennukoye.’
1KI 20:40 An obir-obir gunai-gussoggu, we-dule angi wakinnoni gusad. Degisoggu, Israel-e-rey-Acab Bab-Jehová-gayaburba-barsogedga sogded: —Be deyob sogsoggua, be-sogsadba be sabsur-odurdaklegodo.
1KI 20:41 Deyob itosgua, Bab-Jehová-gayaburba-barsoged ibya-atinnaled, yog esikar imaksad. Israel-e-rey magar daknonikid, we-dulede, Bab-Jehová-gayaburba-barsoged-sorda gue.
1KI 20:42 Geb Bab-Jehová-gayaburba-barsoged, Rey-Acabʼga sogded: —Weyob Bab-Jehová soged: ‘We-dule-oburgwilegoye an sogsagusad, be owakichasoggu, be be, e-anar oburgwilegoed. Degine, Israel-dulemar, Siria-dulemar-anar burgwemarmogoed.’
1KI 20:43 Degisoggu, Rey-Acab bukib-binsae, degi, isdar itoe naded. Deyob, Samaria-neggweburse e-neg-siidse naded.
1KI 21:1 We-ibmar-gusad-sorba, weyob neg-gunonikid: Nabot-e-uva-nainu Jezreel-neggweburgi naid. A-nainu, Acab-e-reyneg-Jezreel-neggweburgi-siid-dikarba naid. Nabotʼde, Jezreel-neggweburginedid. Acabʼdina, Samaria-neggwebur-e-reyd.
1KI 21:2 Rey-Acab, Nabotʼga sogded: —Be-uva-nainu an-neg-dikarba-naisoggu, anga be ukbi an abedo. Egi ibmar-digega an abeged. A-nainu-muchub, an bega nainu-baid-bur-nued ukoed. Degisulile, manigi an bese baksunnodo.
1KI 21:3 Nabot, Acab-abin sogded: —We-uva-nainu-an-sergan-anga-uksadi, gege an bega uked, ade, Bab-Jehová deyob igar-mesissulid.
1KI 21:4 Acab bukib-itosad, degine, nabir itossulid, Jezreel-dule-Nabot ega weyob sogsagu: “An-nainu-an-sergan-anga-uksadi, an bega ukosurye.” Degidba, Acab bukib-itogedba e-gabedgi wagar-biria megisad, uludedba bar mas-guchasulid.
1KI 21:5 Geb e-ome-Jezabel ese-nadgu, ega sogded: —¿Ibiga be wile-itomai? Emide, be geg mas-gunne-maid.
1KI 21:6 Acab, e-ome-abin sogded: —Jezreelʼgined-Nabotʼbo an sunmaksad. Ega an sogsad, be-uva-nainu-naid anga be ukye. A-muchub, nainu-baid an bega ukoeddeeye. Sulile, manigi an bese bakoye. Nabot an-abin imaksad: ‘An-uva-nainu an bega ukosurye.’
1KI 21:7 E-ome-Jezabel abin-sogdemogad: —¿Ar be Israel-e-reysursi? ¿Doa-sogedba negselemaisunna? Ar be-sogedba negselemaid. Gwisgue, mas-gunne, mer-bukib-itoge. Nabot-e-nainu begadga guega, an igar amioed.
1KI 21:8 Degidgine, Jezabel, Rey-Acab-nuggi gardamar narmaksad. A-gardamargi rey-olargan-wilub nasiksabalid. Geb, bia Nabot-gudii, a-neggweburse girmar-dummaganse, degi, sapin-dummaganse gardamar barmisad.
1KI 21:9 We-gardamargi weyob sognaid: “Mas-gunsulid-iba nasikmalo, degi, dulemar-asabin, gan-bipigi Nabot-simarbalo.
1KI 21:10 Agine, dule-gadi-gakansamalad warbo amimalo, adi, sogmalaga: ‘Nabot Bab-Dummad-nuggi ichakwa sunmaksaye, degine, rey-nuggi ichakwa-sunmaksabarye.’ Geb, a-sorba neg-magaba be Nabot-onomalo. Akwagi-makar oburgwemalo.”
1KI 21:11 Girmar-dummagan, degi, sapin-dummagan Nabot-e-neggweburgi-gudimalad Jezabel garda-barmialidba, deyob ibmar-imaksamalad.
1KI 21:12 Mas-gunsulid-iba nasiksamalad. Geb dulemar-asabin gan-bipigi Nabot-osismarbalid.
1KI 21:13 Agine, dule-gakansamalad-warbogwad Nabot-asabin signonimalad. We-dulemar-ebogwad Nabotʼgi weyob sunmaksamalad: “Nabot Bab-Dummadgi ichakwa-sunmaksaye, reygi ichakwa sunmaksabarye.” Geb deyob sunmaksamalad-sorba, dulemar neggweburgi Nabot-onosmalad, degine, akwagi-makar oburgwismalad.
1KI 21:14 A-sorba, Jezabelʼga sognonimalad: “Nabot akwagi-maklegar oburgwilesye.”
1KI 21:15 Jezabel deyob itosgua, Jezreel-dule-Nabot akwagi-maklegar oburgwilesye, Acabʼga sogded: “Emisgi be nae, Nabot-burgwissoggu, e-nainu-yapa-bega-uke-gusad, be sunae. Nabot bar gudisulid.”
1KI 21:16 Acab, Nabot-burgwisye itossoggu, Nabot-nainuse nade gusad, e-ibe suegar.
1KI 21:17 Degidgine, Bab-Jehová-gayaburba Tisbeʼgined-Elíasʼse nonikid. Weyob ega sognonikid:
1KI 21:18 “Israel-e-rey-Acabʼse be nae. Acab, Nabot-nainugi gunaid. Nabot-ibe nainu-suega gunaid.
1KI 21:19 Acabʼga weyob be sogo: ‘Bab-Jehová weyob sogye: Be dule-oburgwisad. Degite, be e-ibe-nainu susbalid.’ Aginbali, weyob Acabʼga be sogbalo: ‘Bab-Jehová weyob sogbarye: Bia achumar Nabot-ablis-mananai gusmala, agine achumar be-ablis-mananai gumogoye.’ ”
1KI 21:20 Acab, Elíasʼga sogded: —Elías, be an-isdaradid. Emide, be an-amisad. Elías abin-sogdemogad: —Eye, an be-aminoniki. Ade, Bab-Jehová-asabin be ibmar-isgana imakdiid.
1KI 21:21 Degisoggu, Bab-Jehová weyob soged: ‘An be-neguya bela be-ibe-osulogoed. Be-waganse-bakale, an obelogoed, dule-bega-arbadimaladse-bakale, an osulogoed. Bela Israel-yargi be-gwenadgan-gudimalad an obelogoed.
1KI 21:22 Ade, be angi yolessoggu, degine, Israel-dulemar angi yolegega be imaksabarsoggu, igi Nabat-machi-Jeroboam-e-neguya imaklesa, degine, igi Ahías-machi-Baasa-e-neguya imaklesmoga, deyobi, an be-neguya imakmogoed.’
1KI 21:23 ”Bab-Jehová, Jezabelʼgine sunmaksabalid, weyob sogsad: ” ‘Jezreel-galu-matusulid-dikarba Jezabel burgoed. E-mui achumarse obelolegoed.’
1KI 21:24 Acab-e-gwenadgan neggweburgi burgwismardibe, e-muimar achumarse obelolegoed, amba sapurba burgwismarbardibe, e-muimar mulamarse obelolebaloed.”
1KI 21:25 Dakargu, Acabʼyobi dule-baid ibmar-isgana-imaked gussulid. Acab, Bab-Jehová-asabinni, ibmar-isgana-imakega, e-ome-Jezabel, Acab-ogannodaed.
1KI 21:26 Degisoggu, Acab nue-isgudii gusad, Amorreo-dulemar-e-nuchumar-isganaba nanadii gusad. Bab-Jehová, Israel-dulemargi we-Amorreo-dulemar ononnos gusad.
1KI 21:27 Acab we-gaya-itosgua, e-mor-yoid siir-siir imaksad, geb wile-itoged-mor-sommed yosad. Agine, bar mas-guchasulid. Deyob wile-itoged-mor-yoi.
1KI 21:28 Tisbeʼgined-Elíasʼse, Bab-Jehová-gayaburba nonibalid, ega weyob sognonibalid:
1KI 21:29 “Acab an-asabinni e-isgusad-ular bukib-binsadii gusadi, ¿nue be daksa? Deyob an-asabin e-isgusad-ular bukib-binsadii gussoggu, Acab-dula-gudiidgine, an e-neguya odurdaknai guosulid. E-machi rey-gangi signonikile, geb e-neguya an sabsur-odurdakoed.”
1KI 22:1 Siria-dulemar, Israel-dulemargi birgapaa bila-onossur gusmalad.
1KI 22:2 Geb birgapaa-nasgu, Judá-e-rey-Josafat, Israel-e-rey-Acabʼse ataknad gusad.
1KI 22:3 Agine, Israel-e-rey e-sordaganga sogded: “¿Ar be wissurmarsi, Ramot-De-Galaad-neggwebur-naid anmargadi? Degite, Siria-e-rey-annik anmar gannar we-neggwebur-suega ibmar imaksulid.”
1KI 22:4 Degisoggu, Rey-Acab, Josafatʼga sogded: —¿An Ramot-De-Galaadʼgi bila-ononaye sogele, be anba nadele? Josafat abin-sogded: —Eye. An-sordamar, be-sordamarmogad, an-molimarse-bakar, guakwa-nanaid.
1KI 22:5 Agine, Josafat, Israel-reyga sogdebalid: —Degi-inigwele, a-iduale, Bab-Jehováʼse be idakgwelergebed.
1KI 22:6 Degisoggu, Israel-e-rey, Bab-Dummad-gayaburba-barsogmalad e-dulataled-ilabake (400) onmaksad, amarse egisded: —¿Ramot-De-Galaad-neggweburse an bila-ononaed be an-itomoga? Rey-abin sogdemalad: —Be bila-ononae, ade, Bab-Jehová bega urmakoed.
1KI 22:7 Josafat, Acabʼga sogdebalid: —¿Bab-Jehová-gayaburba-barsoged-baid wegi gudisuli? Adi, anmar ase idakbaligar.
1KI 22:8 Israel-e-rey-Acab, Josafat-abin sogded: —Wegine, Bab-Jehová-gayaburba-barsoged-wargwen gudiid. A-dule, Imla-machid, Micaíasʼye nugad. Sunna anmar ase idaksabaliled. Degi-inigwele, we-dule, an-isdaradid. Ade, ibmar-nued anga sogdasulid, unnila boniganse anga gotedaed. Josafat Israel-e-reyga sogdebalid: —Mer deyob sunmake.
1KI 22:9 Agine, Israel-e-rey e-sorda-gwensakse goted, ega sogded: “Emisgwa anga Imla-machi-Micaías sedago.”
1KI 22:10 Israel-e-rey, degi, Judá-e-rey-Josafatʼbogwa, Samaria-neggwebur-noedgi ibmar-gwag-omukuleged-neg-siid-asabin simalad. E-rey-ganmargi na simalad. Aginbali, e-reymor-yoi-yoi simarbalid. A-reymar-ebogwad-asabinni, Bab-Dummad-gayaburba-barsogmalad, Bab-Dummad-gayaburba-barsognai guarmalad.
1KI 22:11 Quenaana-machi-Sedequías, moli-bebeyob esgoro sobsad. Iseedi gornai gusad: “Weyob Bab-Jehová sogye: ‘We-moli-bebegine, be Siria-dulemargi gwichiguoed, bela obelogedse be imakoed.’ ”
1KI 22:12 Bela Bab-Dummad-gayaburba-barsogmalad weyob sunmaknanai gusmalad: “Ramot-De-Galaad-neggweburse be bila-ononae. Egi be obinoed, Bab-Jehová bemarga urmakoed.”
1KI 22:13 Sorda-Micaíasʼse-gorapidi, Micaíasʼga weyob sogded: —Nue be itoge, igi Bab-Dummad-gayaburba-barsogmalad reyga sunmaknanai. Degisoggu, wemar-sogeyob be sogmogo, rey-nakoye be sogmogo.
1KI 22:14 Micaías abin-sogded: —Bab-Jehová-Dula-Maid igi anga sunmakoe, ayobi an sogoed.
1KI 22:15 Degidgine, Micaías reyse nonikid. Geb rey ega sogded: —Micaías, ¿Ramot-De-Galaad-neggweburse an bila-ononaed be an-itomoga? Micaías rey-abin sogded: —Be bila-ononae, be egi obinoed. Bab-Jehová bega we-neggwebur urmakoed.
1KI 22:16 Rey abin-sogdebalid: —¿Ilabigwa an bese egisoe, anga Bab-Jehová-nuggi, nue-innikigwadgi be ibmar sogye?
1KI 22:17 Agine, Micaías ega sogded: —Bela-Israel-dulemar igi sibad-wawaad e-idued-suliyobi, sapurganba aisakide an daksad. Bab-Jehová weyob soged: ‘We-dulemar e-dummadsuli gudimalad. Nuedgi na e-neg-e-negse namarsunno.’
1KI 22:18 Israel-e-rey-Acab, Rey-Josafatʼga sogded: —¿Be daksa, igi an bega sogsa? We-Micaías ibmar-nued-anga-soged satedaed, unnila boniganse anga gotedaed.
1KI 22:19 Micaías sogdebalid: —Bab-Jehová-gayaburba nue be itogo: Bab-Jehová e-ologangi-sii an daksad. E-baliwitur-bila-onomalad e-dikarba e-argan-nuedsik, degi, e-argan-sapiledsik bukwa nanaed.
1KI 22:20 Bab-Jehová weyob sogded: ‘¿Doa Acab-e-binsaed gaoe, Ramot-De-Galaadʼse bila-ononaega, adi, agi oburgwilegegar?’ ”Baliwitur-gwensak ibmar-sognai gusad, degi, baliwitur-baid ibmar-baid sognai gusmogad.
1KI 22:21 Agine, burba-gwensak Bab-Jehová-asabin gwisgunonikid, ega sognonikid: ‘Ani an Acab-binsaed ganaoe.’ ”Bab-Jehová ega sogded: ‘¿Degite, igi be e-binsaed gaoe?’
1KI 22:22 ”We-burba ega sogded: ‘An naoed, Bab-Dummad-gayaburba-barsogmaladse an naoed. A-dulemar gakansaega an imakoed.’ ”Bab-Jehová ega sogdebalid: ‘Degirdi, deyob be imaknado. Adi, deyob be e-binsaed gaoed.’
1KI 22:23 Agala, Bab-Jehová, e-gayaburba-barsogmalad-gakansaega burba-barmialid. Degisoggu, begi boni-dummagan bela yolenonisundo.”
1KI 22:24 Agine, Quenaana-machi-Sedequías, Micaías-e-wagar-ogochad, ega sogded: —¿Igi be soge, Bab-Jehová-E-Burba angi bar maisurye be sogde? Emisgindi, ¿Bab-Jehová-Burba bega sunmaksasunde?
1KI 22:25 Micaías abin-sogdemogad: —A-ibagine, be-sunnad be wisgunonikoed, geb be dukudii guoed.
1KI 22:26 Degidgine, Israel-e-rey-Acab sogded: —Negsemaid-Amónʼse be Micaías-nidmalo, degi, an-machi-Joásʼse nidmarbalo.
1KI 22:27 Ega be sogdapmalo: ‘Weyob rey sogye: Esgaryagi Micaías-simaloye. Unnila madu, diibogwa ega be ukmaloye. Bila-onogedgi an bonisuli aibirisar, geb be Micaías-onomaloye.’
1KI 22:28 Micaías abin-sogded: —Be nuedgi gannar aibirisale, soglegodo, ‘Bab-Jehová anga sunmaksasurye.’ Geb dulemar-bukwadga sogded: —Dulemar-bukwad, an-ibmar-sogsad be nue ebinsamalo.
1KI 22:29 Israel-e-rey-Acab, Judá-e-rey-Josafatʼbo Ramot-De-Galaadʼse bila-onogega nadmalad.
1KI 22:30 Geb Israel-e-rey-Acab Josafatʼga sogded: “An mer daklegega, mor-baid-yoi an bila-ononaoed. Bedina, reymor be yoed.” Agine, Israel-e-rey, mor-baid-yosa, bila-ononaded.
1KI 22:31 Siria-e-reydina, e-dulagwen-gakambe-gakabo (32) ur-napaginedgi-bila-onomalad-e-dummaganga weyob sogsa gusad: “Mer dule-bamaladbo be bila-onomaloye, unnila Israel-e-reysebi be achamaloye.”
1KI 22:32 Degisoggu, Siria-sordamar-idudimalad Josafat-dakdemargu, sogdemalad: “We-dule, Israel-e-rey-sunnadid.” Agine, oburgwega balegitemalad. Geb Josafat e-bendakmalaga binnasuli goted.
1KI 22:33 Siria-sordamar ur-napaginedgi-bila-onomalad-e-dummagan magar daksamalad, we-dulede Israel-e-reysuli. Degidbali, bar Josafat-balegichasurmalad.
1KI 22:34 Degine, sorda-gwensak yogasaar e-sigu-midgu, nabir Israel-e-rey-Acabʼgi yolenonikid. E-bilamor-saki-sakid-imbaba egi yolenonikid. Geb Acab dule-ega-bila-onoged-ur-semaidga sogded: “Be aibire, neg-olloledsik be anga nae. Nue an ibitosad.”
1KI 22:35 A-ibagine, bila-onoleged baligannos nagusad. Degisoggu, Israel-e-rey e-bila-onoged-urgi Siria-dulemar-asabin-gwichi osedosad. E-ablis e-bila-onoged-urgi bela-bela ginnitibi milemaid. Geb a sedogidbali, Acab burgwenonisunnad.
1KI 22:36 Dad-argwategu, sordamar weyob sogdemalad: “¡Rey burgwisad! Degisoggu, e-neg-e-negse namalo, e-neggwebur-e-neggweburse namalo.”
1KI 22:37 Agine, Samaria-neggweburse Israel-e-rey-Acab selenonikid. Agi digsamalad.
1KI 22:38 Acab-bila-onoged-ur-abebiiddi, Samaria-neggweburgi dia-siidgi, enuksamalad. Geb achumar a-ablis emananai gusmalad. A-diagine, omegan-gambasamalad obdamalad. Bab-Jehová-gayaburba-soglesadba, deyob neg-gunonikid.
1KI 22:39 Acab Israel-yar-semaidgine, akwa-marfilʼgi reyneg-sobsadi, degine, neggweburmar urbisbalidi, degi, bela e-ibmar-imaksadi, Israel-e-reymar-gardamargi narmakar mamaid.
1KI 22:40 Deyob Acab burgwenonikid. A-sorba, e-machi-Ocozías yar senonikid.
1KI 22:41 Israel-e-rey-Acab, birgabakegus negsedanikidgi Asa-machi-Josafat, Judá-yar-e-reyga megnonikid.
1KI 22:42 Deunni, Josafat birga-dulagwen-gakambe-gakatar-nikadgi (35) yar sealid. Josafat, Jerusalén-neggweburgi birga-dulagwen-gakatar (25) negsemai gusad. Josafat-e-nande, Azubaʼye-nugad, Silhi-e-sisgwad.
1KI 22:43 Josafat, e-bab-Asa-nanadigusayobi nanadii gusmogad. Bipisaale, e-bab-ibmar-imaksadba gwen bangussulid. Josafat, Bab-Jehová-asabin ibmar-nueganbi imakdii gusad. Degi-inigwele, bab-dummaganse-goled-neg-aila-matusurmalad-soblesbubukwad earissulid. Ade, amba dulemar egi ibmar-ogumakar-damalad, degine, ina-wawad ogumakardamarbalid.
1KI 22:44 Josafat, Israel-e-reygi bila-onodii nanassulid.
1KI 22:45 Josafat ibmar-bulegan-imaksadi, degi, bila-onosadi, degine, bela e-ibmar-imaksadi, Judá-e-reymar-gardamargi narmakar mamaid.
1KI 22:46 Aginbali, Josafat e-yar-semaidgi, bab-dummaganse-gormalad-negmargi machered-gambasamalad ononnonai gusbalid. We-dulemar, e-bab-Asa-yar-semaid-sorba besmaladid.
1KI 22:47 A-ibagangi, Edom-yargi, rey-maisulid. Unnila dule-gwensak reyyobi negdakmaid.
1KI 22:48 Josafat ur-diakinmalad Tarsis-neggweburgadyob sobsad. Ofir-neggweburse or-aminaega sobsa gusanad. Urmar Ezión-Geber-neggweburgi-naigu, demar-abin bela mamarisad. Degidbali, bar nadsurmalad.
1KI 22:49 Geb agine, Acab-machi-Ocozías Josafatʼga sogded: “An-sordamar, be-sordamarbo be-urmargi be barmide.” Josafatʼdina yapa deyob imake gusad.
1KI 22:50 Geb Josafat burgwenonikid. David-neggweburgi e-sergan-neg-uan-maidgi diglesad. Josafat-sorba, e-machi-Joram reyga megnonikid.
1KI 22:51 Judá-e-rey-Josafat birgambe-gakaguglegus (17) negsedanikidgi, Acab-machi-Ocozías Samaria-neggweburgi Israel-reyga megnonikid. Unnila birgabo Israel-yargi negsesad.
1KI 22:52 Ocozías Bab-Jehová-asabin ibmar-isgana-imakdii gusad, e-bab-Acab-nanasadba nanadii gusad, e-nan-nanasadba nanadii gusbalid, deginbali, e-dad-dummad-Nabat-machi-Jeroboam nanasadba nanadii gusbalid. We-Jeroboam, Israel-dulemar, Bab-Dummadgi-yolegega imaksa gusad.
1KI 22:53 Ar Ocozíasʼde, bab-dummad-Baal-nug-odummodii gusad, degi, ega ibmar-imakdii gusbalid. E-bab-Acab ibmar-isgana imakdii gusadba ibmar-imakdii gusmogad. Degidbali, Ocozías, Israel-e-Bab-Dummad-Jehová-oulusad.
2KI 1:1 Rey-Acab-burgwisad-sorba, Moab-dulemar, Israel-dulemargi gwisgunoni gusad.
2KI 1:2 Rey-Ocozías Samaria-neggweburgi, e-neg-aila-niba yawagak-bipigwadgi argwachagusad, degi, nue-nailikgusad. Geb degine, Ocozías dule-ega-gayaburba-berbemalad barmisad, weyob ega sogsad: “Baal-Zebubʼse be namar, Ecrón-neggwebur e-bab-dummadga-imakedse be egismalo, ande bule gannar nuguodibeye.”
2KI 1:3 Degi-inigwele, Bab-Jehová-e-baliwitur Tisbe-dule-Elíasʼga sogsad: “Samaria-e-rey-Ocozíasʼga gayaburba-berbemalad-abinguega be nae. Ega be sogo: ‘¿Ar Israel-yargi Bab-Dummad satesi? ¿Ibiga bemar ibmar wisguega Ecrón-neggwebur-e-bab-dummad-Baal-Zebubʼse be egisnadapmala?’
2KI 1:4 Nabir, Bab-Jehová weyob soged: ‘Napira an bega soged, Rey-nailikgumaidi, bar nuguosulid, burgoed.’ ” Deyobi Elías, Bab-Jehová-e-baliwitur-ega-ibmar-sogsadba imaksad.
2KI 1:5 Reyga-gayaburba-berbemalad gannar nonimargua, rey amarga sogded: —¿Bato be danibinmarde?
2KI 1:6 Geb abin-sogdemalad: —Igarba anmar dule-wargwen-abingusad. A-dule weyob anmarga soged: ‘Rey-bemar-barmialidse gannar be namar, ega be sogmalo: Weyob Bab-Jehová sogye: ¿Ibiga ibmar wisguega Ecrón-neggwebur-e-bab-dummad-Baal-Zebubʼse be egise? ¿Israel-yargi Bab-Dummad satesi? Degisoggu, be-nailikgumaidi, bar be nuguosulid, be burgoed.’
2KI 1:7 Geb degine, rey amarse egisded: —¿Dule, igarba-bemar-abingusad, degi, ibmar-bemarga-sogsad, igi-daklege?
2KI 1:8 Geb ega sogdemalad: —A-dule, ibmar-durgan-absar-wawaad yoid, degi, moli-uka musirba naid. Rey amar-abin sogded: —¡Degirdi, we, Elías Tisbe-dule!
2KI 1:9 Geb degine, Rey-Ocozías, Elías-sunaega, sordamar-idued-wargwen, e-sordamar-dulabo-gakambegwad-abargi (50) yog-barmiar imaksad. Geb sordamar-idued nadsunnad, degi, dakdapid, Elías yar-birgi sii. Geb sordamar-idudiid Elíasʼga sogded: —¡Bab-Dummad-e-dule, rey soged, be dagye!
2KI 1:10 Elías, sordamar-iduedga sogded: —An Bab-Dummad-e-dule-sunnadiile, soo nibneg-akar aidedasun, adi, be, degi, be-sorda-dulabo-gakambegwad (50) bela ogumakega. Deyob Elías sogsagu, soo aidenonikid, geb sorda-idudiid, degi, e-sordamar bela gummaksad. Abali, sordamar bela burgwisad.
2KI 1:11 Degisoggu, Rey-Ocozías, Elías-sunaega, sorda-idued-baid, sordamar-dulabo-gakambegwad-abargi (50) yog-barmiar imaksabalid. Modapgu, sordamar-idued Elíasʼga sogdapid: —¡Bab-Dummad-e-dule, rey soged, gwae dagoye!
2KI 1:12 Elías, sordamar-iduedga sogded: —An Bab-Dummad-e-dule-sunnadiile, soo nibneg-akar-aidedasun, adi, be, degi, be-sordamar-dulabo-gakambegwad (50) bela ogumakega. Deyob Elías sogsagu, soo aidenonikid, geb sorda-idudiid, degi, e-sordamar bela gummaksad. Abali, sordamar bela burgwisad.
2KI 1:13 A-ilapaagwadgi, Rey-Ocozías, Elías-sunaega, sorda-idued-baid, sordamar-dulabo-gakambegwad-abargi (50) yog-barmiar imaksad. Geb sordamar-idued, Elíasʼse modapgu, Elías-asabin yokorgi-sindigar sigdapid, geb egi wilenaigusad. Weyob ega sogded: —Bab-Dummad-e-dule, an bese wilesagwa egised, mer be an-oburgo, degi, be-maigan-dulabo-gakambegwad (50) mer be oburgwebalo.
2KI 1:14 Ar an nue-wisid soo nibneg-akar aidesad, sordamar-idued-e-bogwad, degi, e-sordamar bela obelosad. Agala, an bese wilesagwa-egised mer be an-oburgwemaloye.
2KI 1:15 Geb degi, Bab-Jehová-e-baliwitur, Elíasʼga sogded: “Melle be dobgu, eba be nae.” Degisoggu, Elías gwichibin-imaksad, geb sordamar-idudiidba Rey-Ocozíasʼse nadsunnad.
2KI 1:16 Elías, reyse modapgu, reyga sogded: —Bab-Jehová weyob soged: ‘Gayaburba-berbemalad, Ecrón-neggwebur-e-bab-dummad-Baal-Zebubʼse ibmar-wisguega be barmis gusanad. ¿Ar ibmar-wisguega Israel-yargi Bab-Dummad satesi? Degisoggu, napira an bega soged, be nailikgumaidi bar be gwisguosulid, be burgoed.’
2KI 1:17 Degidgine, Rey-Ocozías burgwisad. Ar igi Bab-Jehová Elíasʼga e-gayaburba-sogsa, deyob gusad. Ocozías, masmala-nikussursoggu, e-sorba, e-gwenad-Joram negdaknonikid. Birgabogus Josafat-machi-Joram, Judá-yalagi negsemaidgi we-ibmar gusad.
2KI 1:18 Rey-Ocozías ibmar-baigan-imaksad, abala, Israel-e-reymar-ibmar-imaksad-gardagi narmakar-maid.
2KI 2:1 Bab-Jehová, nibnegse Elías burwa-ololedba sedsokalidgine, Elías, Eliseo-ebo Gilgal-neggweburgi noar gusad.
2KI 2:2 Geb degi, Elías, Eliseoʼga sokalid: —Wegi be an-abitogo. Bab-Jehová Betel-neggweburse an-barminaid. Geb Eliseo abin-sogded: —Bab-Jehová-nuggi napira an bega sogo: Bab-Jehová beba gudisoggu, walagwen-naega an be-imakosuli. Degisoggu, Elías, Eliseo-ebo, Betel-neggweburse nadsunnad.
2KI 2:3 E-abin Bab-Dummad-gayaburba-barsogmalad-Betelʼgi-mamaid noarmalad. Geb Eliseoʼga sogdemalad: —¿Be wisi, emi Bab-Jehová be-dummadga-gudiid, be-ibe susokali? Eliseo amar-abin sogded: —Eye, an wisi. Mer be agi anga sunmakmala.
2KI 2:4 A-sorbali, Elías, Eliseoʼga gannar sokarbalid: —Wegi be an-edarbo. Bab-Jehová, Jericó-neggweburse an-barminaid. Geb Eliseo gannar abin-sogded: —Bab-Jehová-nuggi napira an bega sogo, Bab-Jehová beba gudisoggu, walagwen-naega an be-imakosuli. Degisoggu, Elías, Eliseo-ebo, Jericó-neggweburse nadsunnad.
2KI 2:5 Bab-Dummad-gayaburba-barsogmalad-Jericóʼgi-mamaid abin noarmalad. Geb Eliseoʼga sogdemalad: —¿Be wisi, emi Bab-Jehová be-dummadga-gudiid, be-ibe susokali? Eliseo amar-abin sogded: —Eye, an wisi. Mer be agi anga sunmakmala.
2KI 2:6 A-sorbali, Elías, Eliseoʼga sokarbalid: —Wegi be an-edarbo. Bab-Jehová Jordán-diwarse an-barminaid. Geb Eliseo abin-sogded: —Bab-Jehová-nuggi napira an bega sogo: Bab-Jehová beba gudisoggu, walagwen-naega an be-imakosuli. Degisoggu, Elías, Eliseo-ebo, Jordán-diwarse nadsunnad.
2KI 2:7 Geb degi, Elías, Eliseo-ebo, Jordán-diwarse-mosgu, Jordán-diwar-gakagi gwisgudapid. Bab-Dummad-gayaburba-barsogmalad sorba e-dulabo-gakambe-mergu (50) danigusmarmogad. Amar bannabasaar egi gwisgudapmalad.
2KI 2:8 Elías, e-suba susad. Geb obipirmaksagu, diwar-bibyosad. Geb agi, diwar-maid negabala argaded. Agine, Elías, Eliseo-ebo diwar-dingusadgi obaksamalad.
2KI 2:9 Obaksamargu, Elías, Eliseoʼga sokalid: —An begi bangusokalid-idu, ¿ibu-bega-imakbi be an-abege? Eliseo ega sogded: —An be-sorbali, Bab-Dummad-Burba-Gandikid-be-nikadi ilabo-wilub an nikubie.
2KI 2:10 Geb Elías, Eliseo-abin sogded: —Wedi ibmar-yeer-gangued be anse egichisdo. Degi-inigwele, ar nibnegse-nakwemai be an-daksale, we-burba be nikudoed. Ar deyob be an-daksasulirdi, we-burba be nikuosulid.
2KI 2:11 Geb agi, sunmaknadapmaladgine, ukiagwale, ur-napagined-sooyob-dakleged, degi, molimar-sooyob-dakleged, Eliseoʼgi Elías-obachad. Geb degine, Elíasʼdi, burwa-ololedba nibnegse nakwided.
2KI 2:12 Eliseo deyob dakdegu, binnasur goted: “¡An-Dummad! ¡An-Dummad! Bedi Israel-dulemarga sorda-gandikidga gusad.” A-sorba, Eliseo bar Elías-daksasulid. Geb degine, Eliseo, nue-bukib-binsaedba e-mor-yoid gadebin-imaksad, negabala siir imaksad.
2KI 2:13 Agine, Eliseo, Elías-suba-mor-batisad susad. Geb, gannar Jordán-diwar-gakase gwisgunonikid.
2KI 2:14 Geb agine, Eliseo, Elías-morgi diwar-bibyosad. Geb sogded: “¿Bia Elías-e-Bab-Dummad-Jehová nade?” Diwar-bibyosgua, yog diwar negabala-argaded. Geb Eliseo neg-dingusadgi obaksad.
2KI 2:15 Bab-Dummad-gayaburba-barsogmalad-Jericóʼgi-mamaid Jordán-diwar-obakar-bukmalad, deyob Eliseo-daksamargu, sogdemalad: “Emisgindi, Elías-e-burba Eliseoʼgi aidenonikid.” Geb degi, Eliseoʼse nadmalad. Ese-mosmargu, yokorgi-sindigar e-asabin sigismalad.
2KI 2:16 Geb ega sogdemalad: —Eliseo, anmar bega-arbaega gumalad. Anmar dulabo-gakambe-mergu (50) sorda-gandikmalad nikad. Anmar guakwagwad bega be-dummad-aminaed, abakalegi Bab-Jehová-Burba-susadi, sapurba egwachale, igi, yalaganba egwachadibe. Geb Eliseo abin-sogded: —Suli, melle dulemar be barmido.
2KI 2:17 Degi-inigwele, Elías-aminaega Eliseoʼgi alamaknanai gusmalad. Eliseo budar-itogusgu, sogdesunnad: —Degir nabir, dulemar be barmidmarsun. Degisoggu, Bab-Dummad-gayaburba-barsogmalad Elías-aminaega machergan waladulabo-gakambe-mergu (50) barmisad. Ibapaa Elías-amidii gusmalad, degi-inigwele amissurgusmalad.
2KI 2:18 Degidgine, dulemar gannar Jericó-neggweburse, Eliseo-maidse nonimalad. Geb degi, Eliseo dulemarga sogded: —¿An bega sogsamarsursi, melle be namarye? Be an-itossurmalad.
2KI 2:19 Geb degine, neggweburginmalad Eliseoʼga sokarmalad: —Dummad, be dake, anmar-neggwebur nega-nuedid. Degi-inigwele, e-diidi sunnasulid. A-ulale, geg ibmar sanmaked.
2KI 2:20 Eliseo a-dulemarga sogded: —Anga bormo-bini sedamalo. Agine, balu be eomalo. Degi, geb Eliseoʼse senonimargu,
2KI 2:21 Eliseo dii-e-saila-aryomaidse naded. Geb a-dii-sailagi, balu obatisad. Geb binnasur Eliseo goted: —Bab-Jehová weyob soged: ‘We-dii an nudaksad, bar dule egi-burgosulid, degi, nabir ibmar sanmake guoed.’
2KI 2:22 Deyob sogsagu, yog-dii nuguar naded. Emi, we-garda-narmaklenaidse amba a-dii nued maid. Igi Eliseo sogsagusa, deyob gusad.
2KI 2:23 Eliseo Jericó-neggweburgi-gudii, Betel-neggweburse naded. Igarba-nadapidgi sapingan-danagwen Eliseo-abin neggweburgi-danimalad. Geb Eliseoʼgi dodoakwaa sunmakarmalad, ega oimakdemalad: “¡Dad-non-swili be nae! ¡Dad-non-swili be nae!”
2KI 2:24 Geb, Eliseo yarganba aibilided amar-nuu dakdegu, Bab-Jehová-nuggi a-sapingan ukabsasad. Geb degine, wiob-walabo sapingangi noalid. Bela sapingana e-dulabo-gakabo (42) ese ibitosmalad.
2KI 2:25 Agi, geb Eliseo Carmelo-yarse nadsunnad. Geb a-sorba, gannar Samaria-neggweburse nonikid.
2KI 3:1 Rey-Josafat, Judá-yargi birgambe-gakabaabakgus (18) negsemaidgi, Acab-machi-Joram, Israel-yar sealid. Samariaʼgi birgambe-gakabo (12) yar-sesad.
2KI 3:2 Joram ibmar-imaksadi, Bab-Jehová-ibmar-abemaisulid imaksad. Degi-inigwele, dogdar e-babyob, degi, e-nanyob ibmar-isgana imaksasulid. Joram-e-bab Baal-e-nug-odummogega, akwa-sunsoged-yogasaar-geg-ebuleged sobsagusad. Joram bela a-akwamar osulosad.
2KI 3:3 Degi-inigwele, Nabat-machi-Jeroboam isgusgusayobi, Joram isgunonimogad. Ar ade, Jeroboam, Israel-dulemar-isguega imaksad. Ar a-isguedi gwen iessulid.
2KI 3:4 Moab-e-rey Mesaʼye-nugadi, sibad-wawaadmar-e-ibedid. Degine, birga-irba Israel-e-rey bennuklesoggu, Mesa, Israel-dulemar-e-reyga sibad-wawaad-senigana mili-dulatar (100,000) ukdaed, deginbali, sibad-wawaad-machergan-e-absar mili-dulatar (100,000) ukdabalid.
2KI 3:5 Degi-inigwele, Rey-Acab-burgwisgu, Moab-e-rey, Israel-e-reygi gwisgunonikid.
2KI 3:6 Degidgine, Rey-Joram, Samaria-neggweburgi noalid, bela Israel-sorda-bila-onomalad nialid.
2KI 3:7 Rey-Joram, Judá-e-rey-Josafatʼse weyob gayaburba barmisad: —Moab-e-rey angi gwisgunonikid. ¿Moab-sordamargi bila-onogega, be anba naoe? Rey-Josafat abin-sogded: —Guakwagwa. Be-sogedbali. An-sordamar be-sordamarmogad, an-molimarse-bakar, guakwa nanaid.
2KI 3:8 Josafat ega sogded: —¿Degite, biti-igarba anmar naosunna? Rey-Joram abin-sogded: —Edom-nega-dulesulidgan-igarba anmar naoe.
2KI 3:9 Degisoggu, Israel-e-rey, Judá-e-rey, degi, Edom-e-rey bulale nadmalad. Ibaguglegus (7) nega-dulesulidganba nadapmaladgi, sordaganga dii-gobed galakuded, degine, e-molimarga dii galakudmogad.
2KI 3:10 Geb degi, Israel-e-rey sogded: —¡Anmar dule-wiles! Bab-Jehová, Moab-e-reyga anmar-urmakega reymar-warbaagwadse gochad.
2KI 3:11 Geb degi, Josafat egichided: —¿Ar wegi Bab-Jehová-gayaburba-barsoged satesi? Adi, a-dulese anmar egisega: ‘Bab-Jehová, igi-ibmar-imakbi anmar-abege.’ Israel-e-rey-sorda-dummad-gwensak sokalid: —Wegi Safat-machi-Eliseo gudiid, Elíasʼba gudii gusad.
2KI 3:12 Agine, Rey-Josafat sogded: —Degirdi, a-dule anmarga Bab-Jehová-gayaburba barsogoed. Degisoggu, Israel-dulemar-e-rey, Rey-Josafatʼbo, degi, Edom-dulemar-e-reybo, Eliseo-maidse nadmalad.
2KI 3:13 Mosmargu, Eliseo, Israel-e-reyga sogded: —¿Ar ibu bega sogo be an-dake? Suli. Be-bab e-bab-dummad-gayaburba-barsogmaladse, degi, be-nan-e-bab-dummad-gayaburba-barsogmaladse be ibmar egisnae. Geb Israel-e-rey, Eliseo-abin-sogded: —Suli, ar Bab-Jehová Moab-e-reyga anmar-urmakega, reymar-warbaagwadse gochad.
2KI 3:14 Eliseo, Israel-e-rey-abin sogded: —Bab-Jehová-Bela-Gangued-Nika-Maid, e-asabinni an gwichid. Napiragwadgi ise-sogar an bega soged: An Judá-e-rey-Josafatʼgi binsaedsulidaena, bipisaale an bemarse aibirosulinad, degi, an bemarse golosurbalinad.
2KI 3:15 Emisgwa an sogdo: Anga be gar-arpa-ogoled-dule sedamar. Gar-ogoled-dule, gar-arpa-ogorsiidgi, Bab-Jehová-Burba Eliseoʼgi ubononikid.
2KI 3:16 Agi, Eliseo sogded: —Bab-Jehová weyob soged: ‘We-neba-naidgi dii-megega napamar ichesur be akwimalo.’
2KI 3:17 Ar Bab-Jehová weyob soged: ‘Burwa bar-golosur-inigwele, degi, dii bar-wiosurbar-inigwele, we-neba-naidgi dii engudoed. Geb bemar we-dii goboed, degine, be-molimar, degi, be-ibmar-durgan-baigan we-dii gobmarmogoed.’
2KI 3:18 Ar Bab-Jehováʼgardi we-ibmar basursunna gued. De-ukinbali, Bab-Jehová, Moab-dulemargi-nakwega bemar-imakbaloed.
2KI 3:19 Bela bemar, Moab-yar-e-neggwebur-sakdigar-bukmalad obelomaloed. Degine, neggwebur-baigan bur-sunsogmalad bela be obelomarbaloed, e-sapi-nuegan-san-nikamalad bela be oimarbaloed. A-ukinbali, e-diangan-mamaid bela be emurmarbaloed, degine, e-nainu-nuegan bela akwabi be imakmarbaloed.
2KI 3:20 Neg-oibosgua, Bab-Dummadga-ibmar-ukleged-wachigine, dii bela enguded. Ar ade, Edomʼsik dii danikid.
2KI 3:21 Geb degine, Moab-dulemar wisguargu, reymar-warbaagwad emargi bila-onogega daniye. Geb agine, yar-abingunaidgi Moab-dulemar sordamar-nabir-urwemalad nisad.
2KI 3:22 Moab-dulemar wakudaryalaba gwisguarmargu, dakdemalad, dad-ibeler diigi mee-ganai. Geb degi, bannabaa, dii ginnitibi-abeyob-nai dakarmalad.
2KI 3:23 Geb binnasuli gotemalad: “¡We, bila-onosmalad-e-abed! ¡Reymar ulusargebed! Muchub-muchub na e-sordagan-oburgwismalargebed. ¡Moab-sordamar! ¡Anmar nae, e-ibmar-besmalad anmar sunae!”
2KI 3:24 Moab-sordamar, Israel-sordamar-bukwadse nonimargu, Israel-sordamar egi ainialid, Moab-sordamargi gwichigudmalad. Abala egi wakitemalad. Degi-inigwele, Israel-sordamar na balegitemalad, geb bela Moab-dulemar-oburgwismalad.
2KI 3:25 A-sorbali, Israel-sordamar bela Moab-neggweburmar-obelosmalad. Geb e-nainu-nuegan bela akwabi imaksamalad. Degi, e-diangan-mamaidgi bela napa-omulusmalad. Degine, bela sapi-nuegan-san-nikamalad oismarbalid. Unnila Kir-Hareset-neggweburbi napi-sigisad. Degi, sordamar-dubgi-akwa-miar-urwemalad a-neggweburse ubosmalad. Degisoggu, bela a-neggwebur obelosmarbalid.
2KI 3:26 Moab-e-rey, Israel-sordamarse e-sordamar-galakuar dakargu, dulataled-ilagugle (700) e-sordamar-es-suidgi-urwemalad, Edom-e-rey-sordamar-bukwadse sesad, adi, Edom-e-rey ega nabir igar-ukega, e-yargi namalaga. Degi-inigwele, Moab-e-rey Edom-e-reygi nakwissulid.
2KI 3:27 Degidgine, Moab-e-rey-Mesa, e-machi-sailagined e-sorba-negdakmogoenad nisad. Geb Rey-Mesa e-machi-oburgwisad, neggwebur-galu-matusulidgi e-bab-dummadga ogumakar e-machi-uksad. Geb degidbali, Israel-sordamargi bela-belad uluarmalad. Israel-sordamar deyob itoarmargu, na ainidmarsunnad, e-yarse gannar nadmarsunnad.
2KI 4:1 Ome-gwensak Bab-Dummad-gayaburba-barsoged-e-omega-gusadi, nunmak-itogedgi, Eliseoʼga sogded: —An-sui-beba-gudidaed burgwisad. Be wisid, a-dule Bab-Jehováʼba nue ibsadii daed. Epenne, anmar dulegi mani-gasgusad. Emide, a-dule nonikid. An-ibe an-masmala-warbogwad e-maiga-guega sedbied.
2KI 4:2 Geb Eliseo ega sogded: —¿Degite, ibu bega imakbi be an-abesunna? ¿Ibi wis neggi be nikasunna? Ome sogded: —Dummad, bipisaale neggi an ibmar nikasulid, unnila olivo-gwallubi bormogi wis-ichee siid.
2KI 4:3 Eliseo ega sogded: —Degirdi, dule-be-neg-dikarba-mamaidse, bormo-ollogana ichesur be egiso, bela be amioedi be sedago.
2KI 4:4 A-sorba, be-masmala-ebo negyaba be dogo. Geb, yawagak be edio. Agine, olivo-gwallu bormomargi be enogo. Degi, bormomar-engumaidba, bachik-bachik be urbo.
2KI 4:5 Geb degine, omegwa Eliseo-idu e-negse naded. Agine, e-masmala-ebo, negyaba yawagak-ediar sigisad. E-masmaladi ega bormomar senonidaed. Geb e-nan e-abin olivo-gwallu bormogi bar-daed.
2KI 4:6 Bela bormomargi olivo-gwallu engusgu, omegwa e-machi-wargwenga sogded: —Bormo-baid anga seda. E-Machi, abin-sogded: —Bormomar, bela. Agine, olivo-gwallu yog-galegar naded.
2KI 4:7 Geb degine, omegwa, Bab-Dummad-e-dulese naded, geb ega ibmar-gusad sogsad. Agi, Eliseo ega sogded: —Emisgindi be nae, olivo-gwallu manigi be uknae. Geb dulegi-mani-ganikid be bennuko. Mani-gwabguoedgi bemar nabir gudii gumaloed.
2KI 4:8 Ibagwengine, Eliseo Sunem-neggweburgi nadapgu, ome-nue-nuga-nika-maid egi alamaknai gusad, ese mas-gunnee dagoye. Degisoggu, Eliseo a-neggweburgi nadapile, agi mas-gundapdaed.
2KI 4:9 Degidgi, omegwa e-suiga sokalid: “An wisid, we-dule anmarse nanaed-iliba-nonidaedi, we, Bab-Dummad-e-dule-swilidikidid.
2KI 4:10 Anmar ega neg-aila-birgi gabedneg sobmalo. Agine, anmar ega e-meged omesmalo. Anmar ega mese-sioed, gana, degine, gwallu ega sibaloed. Adi, anmarse nanaed-iliba, agi megega.”
2KI 4:11 Ibagwengi, Eliseo nadapgu, a-ome-negse dogdapid. Bia ega obunnoged-neg-sobsamala, agi Eliseo gabisad.
2KI 4:12 Eliseo, e-mai-Gieziʼga sogded: —Ome-Sunam-neggweburginedse be gorna. Geb e-mai, omegwase gorapid. Geb omegwa Eliseoʼse nonikid.
2KI 4:13 Agine, Eliseo, Gieziʼga sogded: —Omega be soge: ‘Be anmarga bela-bela be alamakdiid. ¿Ibu bega wis imakbi be an-abemoga? ¿An bega rey-ebo sunmaknabi be abege, igi, sordamar-bila-onomalad-e-dummad-ebodibe?’ Omegwa abin-sogded: —An-dulemar-abargi an nueganbi gudiid, bonisulid.
2KI 4:14 Eliseo, Gieziʼse egichialid: —¿Degite, an ibu ega imaksunnoe? Giezi abin-sogded: —Ome mimmigan sulid, ar e-sui bato seredgusad.
2KI 4:15 Eliseo sogded: —Ese be gorna. Geb Giezi omegwase gorapid. Degi, omegwa, yawagak-naba gwisgunonikid.
2KI 4:16 Eliseo omega sogded: —We-birga-danikidgi, degi, we-ibaginbali be-nukugi be-mimmi be gani guoed. Ome, Eliseo-abin sogded: —Dogdar-itole. Bedi Bab-Dummad-e-duled. Mer angi be dodoge.
2KI 4:17 Degidgine, ome gurgin-nika gunonikid. Geb birga-nasadgine, ega-iba-soglesadgi ome mimmi baknonikid. Ar igi Eliseo ega sogsagusa, deyob gusad.
2KI 4:18 Degi, machi-bipi dungualid. Geb ibagwengine, machi-bipi e-bab daknaded. E-babde, dulemar-ibmar-gwag-wemalad-abargi-gunaimogad.
2KI 4:19 Agine, ukiagwale susugwa binnasuli goralid: —¡Aaa! ¡An nono-nunmake! Geb e-bab dule-ega-arbaedga sogded: —¡E-nanse be sede!
2KI 4:20 Dule, machi-bipi-gadebin imaksad. Geb, e-nanse sesad. E-nana e-nukugi e-machi-bipi-ganigusad. Deyob-gani, yorukudse machi-bipi burgwisad.
2KI 4:21 Geb degi, e-nan, Bab-Dummad-e-dule-gabednegse sesad. Agi, e-gabed-maidgi omesisad. Geb yawagak-edis alid.
2KI 4:22 Geb agine, e-suise goted: —Mai-wargwen be anga barmidage. Degi, moli-uayasuid-ome be anga barmidabalo. Bin gwae Bab-Dummad-e-dule an daknagwelo. Emisgwa an nonibaloed.
2KI 4:23 E-sui ega sogded: —¿Ibiga be daknae? Yoo nii-binid gwisgued, obunnoged-ibasurbalid. E-ome e-suiga sogded: —Akarsuli.
2KI 4:24 Degi, moli-uayasuid-ome-birgi omega gan sismalad. Geb ome e-maiga sogded: —Ogus. Nae. Mer igarba be anga obunnogo. An bega sogedse, be obunnogo.
2KI 4:25 Geb omegwa Bab-Dummad-e-dule-maidse nadsunnad. Carmelo-yarse mosgu, Eliseo bannabaa omegwa-dani daksad. Geb e-mai-Gieziʼga sogded: —Ome-Sunam-neggweburgined dani.
2KI 4:26 Gwae be abin-nae, be abarmakde. Ega be sogo, be nued-sogeye, degi, be-sui, be-mimmi nueganbimarmo sogeye. Degi, geb e-mai naded. Giezi omega ibmar-sogsagu, omegwa ega sogded: —Anmar bela nueganbi.
2KI 4:27 Degine, omegwa, yar-birse Bab-Dummad-e-dule-siidse modapgu, e-naggi angaagwar nagusad. Geb Giezi, Eliseoʼgi omegwa-obangubi-gualinad. Degi-inigwele, Eliseo ega sogded: —Mer ese achao, ar bela-belad nue-bukib-binsaed. Bab-Jehová amba anga yoo soged, we-omede igi-nue-itoge.
2KI 4:28 Geb, omegwa Eliseoʼga sogded: —Dummad, ¿an mimmi-abeye an bega sogsasi? ¿An bega sogsasursi, mer be angi dodoye?
2KI 4:29 Degidgi, Eliseo, Gieziʼga sogded: —Mor-nudak nue-yoo, nae. An-gaapoled be sedo. Igarba be dule abinguardibe, mer ese be golo. E bese gollalile, mer bedi ese golo. Be neg-mosale, machi-bipi-e-wagargi be, an-gaapoled omeso.
2KI 4:30 Geb machi-bipi-e-nan, Eliseoʼga sogded: —Napira Bab-Jehová-nuggi, an bega sogo: Bab-Jehová beba gudisoggu, walagwen an be-obegosuli. Degisoggu, Eliseo omegwaba nadsunnad.
2KI 4:31 Gieziʼdi, bato amar-idu negse mosad. Geb Giezi machi-bipi-e-wagargi, gaapoled omesisad. Degi-inigwele, machi-bipi gwen gigli-gigli gussulid. Degidgine, Giezi gannar Eliseoʼse alid. Geb Giezi, Eliseoʼga sogded: —Amba machi-bipi ataksulid.
2KI 4:32 Eliseo, negse mosgua, e-megedgi machi-bipi burgwar-mai dakdapid.
2KI 4:33 Geb Eliseo, machi-bipi-maidse dogsad. Yawagak edus-imaksad, degi, Bab-Jehováʼse-goted.
2KI 4:34 Bab-Jehováʼse-gochad-sorba, Eliseo, machi-bipi-birgi megisad. Eliseo machi-bipi-e-gayagi, e-gaya nasiksad, degi, e-ibya-innik egi ataksabalid, degine, machi-bipi-e-argangi e-argan-mesisbalid. Degidgine, machi-bipi durgualid.
2KI 4:35 Geb degine, Eliseo, gwisgusad. Negyaba, bire-bire gudii gusad. A-sorba, gannar Eliseo machi-bipi-birgi megisad. Agine, machi-bipi asmialid, ilagugle (7) asmisad. Geb agi, atakalid.
2KI 4:36 Geb, Eliseo, Gieziʼse goted, ega sogded: —Ome-Sunam-neggweburginedse be gornae. Degi, Giezi omegwase gorapid. Omegwa Eliseoʼse nonigu, Eliseo ega sogded: —Be-mimmi be sue.
2KI 4:37 Omegwa dogdeyalaba, Eliseo-mali-naba, yokorgi-sindigar e-wagar-napase-ebulegedse, signonikid. A-sorba, omegwa e-mimmi-susa nodsunnad.
2KI 4:38 Eliseo Gilgal-neggweburse gannar nonikid. A-ibagangine, a-yargi ukud-dummad naid. Bab-Dummad-gayaburba-barsogmalad-baigan Eliseo-walik bukmalad. Agine, Eliseo e-maiga sogded: “Soo-yagi bormo-dummad be onakwe. Bab-Dummad-gayaburba-barsogmaladga mas-nuesaar be imako.”
2KI 4:39 Bab-Dummad-gayaburba-barsoged-gwensak, gagan-nabir-gullemalad aminaded. Degi, nadapidgi sapi-senigwa gwichi dakalid, geb e-san nabayob-dakleged gwane-gwane imaksad, e-suba enguedse. Nonigu, olo-olo imaksad, geb mas-nuesaar-imaklenaid-yagi obatisad. Degi-inigwele, ar wissulid, wede ibua.
2KI 4:40 Mas-akwigusgu, Bab-Dummad-gayaburba-barsogmaladga mas welesad. Mas-gutemargu, binnasuli gollarmalad: —¡Bab-Dummad-e-duleye, we-mas ina-nusubi! Agi, bar-guchasurmalad.
2KI 4:41 Geb degi, Eliseo sokalid: —Madubur anga sedamar. Geb mas-yagine, Eliseo madubur obatisad. A-sorba, Eliseo sogded: —Emisgi, gwenadganga mas-wee. Geb, mas-yagine ina-nusu-nikad surgusad, bar mas ina-nusubi guchasurmalad.
2KI 4:42 Dule-wargwen, Baal-Salisaʼgined nonikid. A-dule Bab-Dummad-e-dulega ibmar-gwag-gebe-welesad senonikid. Cebada-madu gwadurgwen (20) senonikid, degine, orosgi-dakleged-trigoʼye-nugad gebe-welesad, senonibalid. Geb Eliseo e-maiga sogded: —Gwenadganga mas mimie.
2KI 4:43 E-mai abin-sogded: —¿Wede unniosi, dulemar-dulataledga (100) an mimier? Degi, Eliseo, e-mai-abin sogded: —Gwenadganga mas mimie. Ar weyob Bab-Jehová soged: ‘Mas gunmaloed, degi, amba gwabguoed.’
2KI 4:44 Degisoggu, Eliseo-e-mai na mas mimissunnad. Igi Bab-Jehová, Eliseoʼga sogsa gusa deyobi gunonikid. Bela dulemar mas-guchagu, amba mas gwabgusad.
2KI 5:1 Naamán, Siria-rey-e-sorda-bila-onomalad e-dummadid. Naamánʼde, dule-nue-nug-nikadid, degine, rey, Naamánʼbina-itogerbad, ar ade, Naamánʼbali Bab-Jehová Siria-yala-bendaksagusad. Naamánʼde, dule-gandikidid. Degi-inigwele, Naamánʼde, naibe-buna-yaa-maleged nika gusad.
2KI 5:2 Siria-neggwebur-e-sorda-bila-onomalad, Israel-yarsik bipirmakdimaladgi bunolo-gwensak Israel-neggweburgined gasmalad. Geb a-bunolo Naamán-e-omega ibmar-imakega gusad.
2KI 5:3 Ibagwengi, bunolo e-dummad-omega sokalid: “An-dummad Samaria-neggweburse Bab-Dummad-gayaburba-barsoged daknaddibe, ega naibe-buna-yaa-maleged nudaksaled.”
2KI 5:4 Naamán bunolo-Israelʼgined-ibmar-sogsadi, bela reyga sognaded.
2KI 5:5 Geb, Siria-dulemar-e-rey, Naamán-abin sogded: —Degirdi nabir, be nao. An Israel-dulemar-e-reyga garda an barmidoed. Geb degi, Naamán nadsunnad. Mani-sibu mili-gwadurgwen-gakambe (30,000) sesad, or-mani mili-gwanergwa (6,000) sesbalid, degi, mor-binigan goambe (10) sesbalid.
2KI 5:6 Israel-e-reyga garda-semaidi weyob sognaid: “We-garda be abindaksar, mag be dakoed, we-dule sorda-bila-onomalad-e-dummadid, Naamánʼye nugad. An-nuggine, we-dule an barmisiid, naibe-buna-yaa-maleged-nikad ega be nudakegar.”
2KI 5:7 Israel-dulemar-e-rey garda absosgu, e-mor-yoid siir-siir-imaksad, degi, sogded: “¿Ar an, Bab-Dummadsi? ¿An dulemarga burba-dulad-ukedsi, degi, dulemar-obelobalidsi? Emide, we-dule anga sogsiid, dule-naibe-buna-yaa-maleged-nikad, ega nudakoye. An dakegua, angi-urwega anga boni-onobieyob an dakdo.”
2KI 5:8 Bab-Jehová-e-dule-Eliseo wisguargu, Israel-e-rey garda-absosadbali e-mor siir-siir imaksaye. Agine Eliseo, reyse gayaburba barmisad: “¿Dummad, ibigala be mor esirmaksa? We-dule be anse barmidage, adi, wisguega Israel-dulemargi Bab-Dummad-gayaburba-barsoged maid.”
2KI 5:9 Naamán, e-molimar-abargi moli-urgi, Eliseoʼse nadsunnad. Mosgu, Eliseo-e-neg-yawagak-asabin nagudapid.
2KI 5:10 Geb degi, Eliseo ese dule barmisad, ega sogega: “Jordán-diwarse be nao. Agine ilagugle (7) dii-ulak be-dogo. Geb agi, we-boni-nikad bega nugudoed, degi, be-san daarmakar naoed.”
2KI 5:11 Naamán sae-itoded, weyob sogde naded: “Andi, an-abin yog-noar imakoye, an biendo, e-Bab-Dummad-Jehováʼse yog-gollar imakegar. Degi, e-argan, an-boni-nikad-ebudogu, yog-nuguar an naoergeberye an biendo.
2KI 5:12 ¿Ar Abana-diwar, degi, Farfar-diwar, Damasco-diwarmalad. A-diwarmarde Israel-diwarmarba bur-nuegansursi? Ar an a-diwarmarse an-san enuknader, ¿an nugudsulile? Nugusale.” Naamán, nue-ulus nadsunnad.
2KI 5:13 Geb e-maimar ese nadmalad, ega sogdemalad: —Dummad, ar Bab-Dummad-e-dule ibmar-yeer-gangued imakoye bega sogsana, ¿bur be imakoen be-insae? A-bursunna be imaksasuliled. Ar emidi bega sognaid: ‘Dii-ulak be-dogoye, yog be nuguar-naoye.’
2KI 5:14 Geb degi, Naamán Jordán-diwarse nadsunnad, ilagugle (7) dii-ulak-dogsad, igi, ega Bab-Dummad-gayaburba-barsoged sogsa, deyob imaksad. Geb, Naamán-e-san yog-nuguar naded, burwigan-e-sanyob swilimakar naded.
2KI 5:15 A-sorbali, Naamán, dule-e-bardakdimalad-ebo Bab-Dummad-e-dulese gannar nadmalad. Ese modapgu, ega sogdapid: —Emisgindi, an nue-wisdo, we-napneggine Bab-Dummad-baid maisulid, unnila Israel-Bab-Dummadbi maid. Emide, an bega wilesagwa soged, be-mai bega ibmar-wis-ukbiedi, be sue.
2KI 5:16 Degi-inigwele, Eliseo ega sogded: —Napira Bab-Dummad-nuggi an bega sogo, Bab-Dummad an-dakmaidgi be ibmar anga ukbiedi an suosuli. Naamán egi alamaknaigusad, e-ibmar-uknaid e-abin suegar. Degi-inigwele, Eliseo itossur-gusad.
2KI 5:17 Geb agine, Naamán sogded: —Degirdi, an bega sogo, an moli-uaya-senigana-walabo we-ukub sedbido. Emisgwagwadgine, an be-mai-guedi bar bab-dummad-baidga ibmar-ogumakar, degi, ibmar-oburgwar ukosulid. Unnila Bab-Jehováʼgarbi ukoed.
2KI 5:18 Unnila Bab-Jehováʼga an sogdo, an-dummadba e-bab-dummadse-goled-neg Rimónʼye-nugadse an nadele, Bab-Jehová egi nossuliyob an-daksana gadin. Rimónʼse-goled-negyaba reybo sakwagi-annikaa an dogmaile, an yokorgi-sindigar sige-dakledagoed. Degisoggu, Bab-Jehová an e-maiga-gued egi nossuliyob an-daksana gadin.
2KI 5:19 Geb, Eliseo ega sogded: —Nuedgi be nae. Naamán degi-nadsunnad. Yeer-nanaedgine,
2KI 5:20 Bab-Jehová-e-dule-Eliseo-e-mai-Gieziʼye-nugad, binsaalid: “An-dummad bela-belad Siria-dule-Naamánʼgi nued-binsasad ega ibmar-uknaid e-abin sussulid. Degisoggu, Bab-Jehová-nuggi an napira-soged, e-sorba abarmakded-nika, abakar anga ibmar wis-ukalile.”
2KI 5:21 Geb agi, Giezi, Naamán-bargaega e-sorba abarmakded. Degi, Naamán Giezi e-sorba-abarmakdani-daksagu, moli-urgi yog-aidegar imaksad, abindakega. Geb, ega sogded: —¿Ibu be itoe?
2KI 5:22 Giezi abin-sogded: —Suli, akar-an-itosuli. An-dummad an-barmiali bega sogega: ‘Anse sapingan-warbo Bab-Dummad-gayaburba-barsogmalad Efraín-yalagan-akar nonimalad. Degisoggu, a-dulemarga an bese ibmar-egisdo, mani nibir-dulapaa-gakambe-gakatar (75) an abege, degi, mor-binigan goabo an abebar.’
2KI 5:23 Naamán ega sogded: —Mani nibir-dulagugle-gakambe (150) be sede. Geb, Naamán ise-ukar imakega, sagu-goabo ega mani-balisad, degine, a-yabali goabo mor-binigan ega odosbalid. Geb, e-mai-warbogwadga uksad, Gieziʼga sedega.
2KI 5:24 Yar-mullu-siid-mosmargu, Giezi, dulemar-ega-sagu-sedanimalad-annik sagu susad, geb, negyaba odosad, a-sorba gannar dulemar-barmisad.
2KI 5:25 Geb, Giezi e-dummadse dognonikid. Eliseo ega sogded: —Giezi, ¿bia be gudii? Giezi abin-sogded: —An banna gudisuli.
2KI 5:26 Ar, Eliseoʼdi, binnasur abin gualid, ega sogded: —Dule be-abindakega e-moli-urgi aideargu, an e-asabin, burbar-gwichi gusad. ¿Ar mani-abingaed-ibasi? Degi, ¿mormar, olivo-nainumar, uva-nainumar, sibad-wawaadmar-abingaed-ibasi? ¿Moli-bebe-nikamalad, degine, mai-machergan, degi, mai-omegan, abingamalad-ibasi? Suli, a-iba-suli.
2KI 5:27 Degisoggu, Naamán-e-boni naibe-buna-yaa-maleged-nika-gusad, bela bese gwagoed, degi, bela be waganse-bakar, degisadegu guoed. Degidgine, Giezi, Eliseo-walik-gwichi noargu, naibe-buna-yaa-maleged-sunnabi noalid, igi mogir sibudik-daklege, deyob-dakle noalid.
2KI 6:1 Ibagwengi, Bab-Dummad-gayaburba-barsogmalad Eliseoʼga sokarmalad: —Anmar be-walik-gudiidgine, dogdar neg-bipii anmar dakdo.
2KI 6:2 Degisoggu, anmar Jordán-diwarse suarmar siknamarsi, adi, agine anmar neg-baid soboed. Geb Eliseo sogded: —Degirdi nabir. Be namar.
2KI 6:3 Bab-Dummad-gayaburba-barsoged-wargwen, Eliseoʼga sokalid: —Wis be anmar-bardaknae. Eliseo abin-sogded: —Degirdi nabir, an bemarba nao.
2KI 6:4 Eliseo amarba nadsunnad. Geb Jordán-diwar mosmargu, suar sikdemalad.
2KI 6:5 Degi, Bab-Dummad-gayaburba-barsoged-wargwen suar-siknaidgi, egi akan unnuded, diwargi argwandapid. Geb agi, binnasur gollalid sogded: —¡Dummad, naibid-dummaddo! ¡Ar we-akan dule-baidgad wis an sediid!
2KI 6:6 Bab-Dummad-e-dule-Eliseo ese egichided: —¿Bia argwacha? Geb, a-dule ega oyosad, biasik akan argwacha. Geb Eliseo suar-siksad, bia akan argwacha, a-inniki suar egwachad. Geb akan mua-mua-naguega imaksad.
2KI 6:7 Geb degi, Eliseo sogded: —Akan be sue. Geb dule, akan ikiir susad.
2KI 6:8 Siria-e-rey, Israel-dulemar-ebo bila-ononaidgi, sorda-idumaladse gochad, ega sogega, ede bia neg-amisa na ambikumalaga.
2KI 6:9 Bab-Dummad-e-duledi, Israel-e-reyga weyob gayaburba barmisad: “Siria-sordamar-ambikuoedse melle sordamar-barmido, ar ade, agi Siria-sordamar ambikudanimalad.”
2KI 6:10 Degisoggu, Israel-e-rey, na e-sordamar neg-arganaega barmisad, bia Bab-Dummad-e-dule ega sogsa, ase barmisad. Deyob, na bali-bali neg-argadii gusmalad. Degisoggu, nabir bendaklesmalad.
2KI 6:11 Degidbali, Siria-e-rey sae itoalid, geb e-sorda-idumaladse gochad, ega sogded: —Be anga sogmalo, melle angi be odukumalo, ¿Doa Israel-e-rey we owisodae?
2KI 6:12 Sorda-idumalad-wargwen abin-sogded: —Dummad-rey, anmarginsuli. Bab-Dummad-gayaburba-barsoged-Eliseo Israelʼgi-maid, a, Israel-e-rey-owisodaed. Ar be-neg-gabed-yaba be ibmar-sog-inigwele, bela wisid.
2KI 6:13 Geb degine, Siria-rey igar-ukded: —Be aminamar, bia Eliseo gudiidibe. Adi an-sordamar Eliseo-ganaega an barmidoed. Geb reyga dule sogded: —Dotán-neggweburgi Eliseo mai.
2KI 6:14 Rey ega degiisoge-itosgu, Eliseo-ganaega, sorda-moligi-sii-urwemalad barmisad, degi, sorda-moli-urgi-sii-urwemalad, degine, sorda-bila-onomalad barmisbalid. Geb, mutik Dotán-neggweburse modapmalad. Agi bela a-neggwebur-ebilis ambikusmalad.
2KI 6:15 Oibosgu, Bab-Dummad-e-dule-e-mai magaba nodgu, dakalid, sorda-bila-onomaladi, degi, sorda-moligi-sii-urwemaladi, sorda-moli-urgi-sii-urwemaladi, bela neggwebur-ebilis-bukwa. Geb, Eliseoʼga sokalid: —Dummad, anmar, bela.
2KI 6:16 Eliseo, e-maiga sogded: —Mer be dobgu. Dule-anmarba-nanaidi, bur bule we-dulemarba mergued.
2KI 6:17 Agine, Eliseo Bab-Dummadse-goted sogded: “Bab-Jehová, wilesagwa na bega soged, an-mai, sorda-anmarba-nanaid-bukwad magar-dakega be imake.” Geb degidgine, Bab-Jehová, Eliseo-mai sordamar-bukwad-mag-dakega imaksad. Geb Eliseo-mai nue-dakdegu, dakalid, sorda-moligi-sii-urwemalad, degi, ur-dummagan, bela Eliseoʼbina yar-ebilis bukwa.
2KI 6:18 Eliseo, egi Siria-sordamar dani-dakargu, yog Bab-Jehováʼse-golaled, sogded: “Bab-Jehová, wilesagwa na bega soged, we-dulemar aku-atakega be imake.” Geb degidgine, Bab-Jehová dulemar aku-atakega imaksad. Igi Eliseo ese egichagusa, deyob Bab-Jehová imaksad.
2KI 6:19 Eliseo, sorda-bila-onomalad e-walikgusgu, ega sogded: “Bemar noar nadapid, bemar we-neggweburse nadapsulid. Degisoggu, anba be dagmala, dule-amidiidse an bemar-sedo.” Geb Eliseo Samaria-neggweburse Siria-sordamar sesad.
2KI 6:20 Samaria-mosmargu, Eliseo, Bab-Jehováʼse goted, sogded: “Bab-Jehová, we-dulemar ibmar-mag-dakega be imake.” Geb, Bab-Jehová dulemar ibmar-mag-dakega imaksad. Sordamar nue-atakdemargu, Samaria-neggweburgi-gudii itoarmalad.
2KI 6:21 Israel-e-rey deyob daksagu, Eliseoʼse egichialid: —Dummad, we-sordamar, ¿an ogiloge? ¿An oburgwe?
2KI 6:22 Eliseo abin-sogded: —Mer ogilogo. ¿Ar be-es-suidgi, degi, be-warsigi, be we-dulemar-gassi? Suli. Bur be ega mas-uke, dii-uke, adi, mas-gunmalaga, degi, gobmalagar. Geb a-sorba, gannar na e-reyse namaloed.
2KI 6:23 Degisoggu, Israel-e-rey Siria-sordamarga iba-dummad onosad. Geb degi, bela Siria-sordamar mas-guchamargu, degi, gobsamargu, na gannar e-reyse nadmarsunnad. Degisoggu, Siria-sordamar bar Israel-yar-ebirdii gussulid.
2KI 6:24 Ibagan-nasad-sorba, Siria-rey-Ben-Adad bela e-sordamar-bila-onoged nialid, Samaria-neggweburgi ambikunaega, geb agi ebiris ambikunonimalad.
2KI 6:25 Siria-sordamar ebiris ambikunonisoggu, Samaria-neggweburgi ukud-dummad naguded. Degidgine, moli-uayasuid-nono mani-sibu-nibirbo ukleded, degine, nuu-sibu-saa ibmar-digega-uklegedi, nog-mur-gwagwen, mani-sibu-onza-gwabo ukledbalid.
2KI 6:26 Ibagwengi, rey galu-matusulid-birgi nadapgua, ome-wargwen binnasuli ese gollalid: —¡Dummad-rey, be anmar-bendake!
2KI 6:27 Rey, ome-abin sogded: —Ar Bab-Jehová be-bendaksulile, ¿igi an be-imakmogosunna? ¿Orosgi-dakleged an bega ukosi? ¿An bega vino ukbalosi?
2KI 6:28 ¿Ar ibi be itoge? Ome abin-sogded: —We-omegwa anga soged: ‘Wese, be-mimmi be seda. Anmar emi gunmalo, degi, banedsedi angad anmar gunmarmogo.’
2KI 6:29 Degisoggu, an-mimmi anmar oburgwisad, geb anmar guchamalad. A-bangi omegwaga an sokarmogad: ‘Wese, be-mimmi be seda, anmar emi a-gunmarmogo.’ Ar omegwadina e-mimmi-odukusad.
2KI 6:30 Rey, deyob ome soge-itosgu, sae-itoded, e-mor-yoid siir-siir imaksad. Rey galu-matusulid-birgi garmakdiisoggu, dulemar na dakarmalad, rey e-mor-dummad-urba wile-itoged-mor-yoi nadapi.
2KI 6:31 Geb degi, rey binnasuli goted: “Bab-Jehová emi-ibagi Safat-machi-Eliseo-ibe an dukar egwachasulir, be sabsur-an-odurdaksunno.”
2KI 6:32 Eliseoʼdi, sapin-dummagan-abargi e-neggi siid. Geb rey Eliseoʼse, dule-wargwen gayaburba-berbeged barmisad. Dule-gayaburba-berbeged Eliseoʼse moed-iduale, Eliseo girmar-dummaganga sogded: —Emi, dule-gindakedi an dukar-egwannega, dule-barmialidi, be dakmaloed. Ar reyga gayaburba-berbeged-dule wese nonikile, e-idu yawagak-edumalo, melle ega egamalo. Ar ade, e-sorba, e-dummad-e-nag-goled bato magar itoleged.
2KI 6:33 Eliseo amba girmar-dummaganga sunmaksiidgi, gayaburba-berbeged-dule dognonikid. A-dule Eliseoʼga sogded: —Bab-Jehováʼgi we-sabsur-wileged danikid. Degisoggu, an-bendakega geg an egi bar wileged.
2KI 7:1 Geb Eliseo abin-sogded: —Bab-Jehová-sogedi nue be itomala. Bab-Jehová weyob soged: ‘Banedse we-wachigine, Samaria-neggwebur-dogedgi madubur-bur-sunsogedi, nibirguglegi (7) mani-sibugan-gwagwengi uklego, degi, orosgisaar-dakleged-cebadaʼye-nugad nibirambe-gakatargi (15), mani-sibugan-gwagwengi uklebalo.’
2KI 7:2 Dule-rey-bendaked, Eliseo-abin sogded: —¡Suli! Ar Bab-Jehová deyob na ibmar-imakoye sogele, ar amba guosulid. Geb Eliseo ega sogded: —Be-sunnagwad na be dakoed, degi-inigwele, we-ibmar be gwen gunnosulid.
2KI 7:3 A-ibagi, dulemar-warbake naibe-buna-yaa-maleged-nikamalad neggwebur-dogedgi bukwadi sokarmalad: —¿Ibu anmar wegi sasi? ¿Burgwed an abitobukmala?
2KI 7:4 Ar anmar neggweburse dogye sogele, ar amba anmar ukudba dulemar-abargi burgwemaloed. Degine, amba anmar wegi bukwamarbalile, amba anmar burgwebaloed. Degisoggu, anmar bur Siria-sordamar-bukwadse namarsunna, ar anmar-oburgwesurye sogele, anmar burgosurmalad, ar anmar-oburgweye sogerdi, akarsurdo. Anmar-oburgwemalodo.
2KI 7:5 Degi, na nue neg-gutuleali, Siria-sordamar-bukwadse nadmalad. Amar-bukwadmobinne dakarmalad, Siria-sordamar, sate.
2KI 7:6 Ar ade, Bab-Jehová, Siria-sordamar ibmar-oimakeyob-itogega imaksad. Moli-ur-bila-onomalad-oimakedyob imaksad, sorda-moligi-sii-urwemalad-oimakedyob imaksad, degi, sorda-bila-onomalad-duurmakdanikiyob imaksabalid. Degisoggu, sokarmalad: “Israel-e-rey, Het-dulemar-e-reyse, degi, Egipto-dulemar-e-reyse gochargebed, adi, anmargi gwisguegar.”
2KI 7:7 Degisoggu, Siria-sordamar mutikidba na duurmakdemalad, e-dordoneg-sobarmalad, e-molimar, e-moli-uayasuigan mete nadmalad, degine, igi e-neg-bukwagusa, deyob mete-nadmarsunnad, adi, wakinmalaga, na san-bendakmalagar.
2KI 7:8 Dule-naibe-buna-yaa-maleged-nikamalad, Siria-sordamar-bukwadse-mosmargu, dordoneg-sobaled-yaba ubodmalad, degi, agi mas-guchamalad, gobsamalad. Aginbali, mani, olo, degi, mormar susmalad, geb bela odukuapmalad. A-sorba, gannar nonimalad, geb dordoneg-sobaled-baid-yaba ubodmalad. Agine, bukidar ibmarmar-bukwad susmarbalid, geb odukuapmarbalid.
2KI 7:9 Degine, sokarmalad: —Anmar ibmar-nued gwen imaknaisulid. Emi-iba, gayaburba-nued-sogleged-ibad. Emisgindi, anmardi unnila boo-bukwamalad. Anmar neg-oibogedse abitoye-sogele, anmargi ataklegoed. Anmar emisgwa reynegse naergebed, adi, rey-owisogegar.
2KI 7:10 Degisoggu, neggweburse nadmarsunnad. Neggwebur-mosmargu, neggwebur-yawagak-edarbemaladse gochamalad, ega sogdemalad: “Anmar Siria-sordamar-bukwadse arbimalad. Agi dulemar bar bukwasulid, bipisaale dule-gaya-gole gwen itolesulid, unnila molimarbi, moli-uayasuidmarbi atinnar bubukwad. E-dordoneg-sobarmaladdi igi bukwa, deyob amba gannar bukwad.”
2KI 7:11 Geb degi, dule-yawagak-edarbemalad, reyneg-dummadgi-bukmaladse gayaburba-berbeapmalad.
2KI 7:12 Degi, mutikid-inigwele, rey gwisgusad, geb dummagan-ega-arbamaladga sogded: —An bega sogmalo, igi Siria-sordamar we anmar-imakbie. Ar wemarde wismalad, anmarde ukudba-odurdaklebukwa. Degisoggu, e-neg-bukwadgi ainismalargebed, sapurba dukusmalargebed. Ar ade, binsasmalargebed: ‘Dulemar neggweburgi ainiarmalale, anmar gamaloye, geb e-neggweburgi anmar ubodmaloye.’
2KI 7:13 Geb degi, dule-ega-arbaed-gwensak ega sogded: —Degiirdi, anmar molimar-walatar-napi-gudiidgi dulemar barmido. Ar burgwismalale, igi Israel-dulemar burgwedanigus-bukwa, aba bur bule wilegosulid. Degisoggu, anmar barmiddo, adi, dakega igi na gumaloe.
2KI 7:14 Degisoggu, rey, moli-ur-walabo amisad, geb Siria-sorda-bila-onomalad-bukwadse, dulemar-barmisad, ega sogsad: “Be namar, nue neg-argamalo.”
2KI 7:15 Geb, dulemar Siria-sorda-amiega nadmarsunnad. Jordán-diwarse balimaksamalad, degi, Siria-sordamar gwae-gwae duurmakmai-gusmaladba mormar-obatisnanaed, degi, bela ibmarmar obatisnanaed igarba-omilede, daksamalad. Geb degi, dulemar-barmilesadi gannar-nonimargu, reyga bela ibmar-daksamalad sognonimalad.
2KI 7:16 Degisoggu, Israel-dulemar duurmakded, Siria-sordamar-ambikusadse ibmarmar-weapmalad. Geb agine, madubur-bur-sunsoged, nibirguglegi (7) mani-sibugana-gwagwengi uklesad, degi, orosgisaar-dakleged-cebadaʼye-nugad nibirambe-gakatargi (15), mani-sibugana-gwagwengi uklesbalid. Ar igi Bab-Jehová-sogsagusa, deyob-gusad.
2KI 7:17 Rey, dule-e-bendakedga neggwebur-yawagak-dakega igar-uksanad. Degi-inigwele, dulemar-duurmakdanikidba egi yolesmalad. Degidbali, rey-e-bendaked burgwisad. Ar igi, Bab-Dummad-e-dule ega sogsagusa, deyob-gusad.
2KI 7:18 Degisoggu, Bab-Dummad-e-dule reyga ibmar-sogsadyobi gusad: “Banedse we-wachigine, Samaria-neggwebur-dogedgi madubur-bur-sunsoged, nibirguglegi (7) mani-sibu-gwagwengi uklegoye, degi, orosgisaar-dakleged-cebadaʼye-nugad nibirambe-gakatargi (15), mani-sibu-gwagwengi uklebaloye.”
2KI 7:19 Dule-rey-bendaked Eliseo-abin, weyob sogsagusad: “Ar Bab-Jehová deyob na ibmar imakoye sogele, ar amba guosurye.” Geb Eliseo ega sogsa gusad: “Be-sunnagwad na be dakoed, degi-inigwele, we-ibmar be gwen gunnosur-guoed.”
2KI 7:20 Degisoggu, deyob a-dule na gusad, dulemala neggwebur-yawagakgi egi yolesmalad, agi burgwisad.
2KI 8:1 Eliseo, omegwaga-mimmi-odulos-gusadga, sogsagusad: “Be-negyaginmaladbo, be baid-neggweburse megnamar, ar ade, Bab-Jehová sogsad: ‘Ukud-dummad we-yargi naguoye, deyobi, birgagugle (7) naguoye.’ ”
2KI 8:2 Geb omegwa, Bab-Dummad-e-dule ega sogsadba imaksad: E-neg-yaginmaladbo, Filistea-dulemar-yarse nadmalad. Agine, birgagugle (7) megismalad.
2KI 8:3 A-birgamar-nasad-sorbali, omegwa Filistea-dulemar-yargi gannar bangualid, Israel-neggweburse gannar nonikid. Geb reyse na e-neg-megisad, degi, e-napanegmar gannar egisnonikid.
2KI 8:4 Deunni, rey, Eliseo-e-mai-Giezi-ebo sunmaksiid, ega sogsiid: “Anga bela Eliseo ibmar-dakledisurmalad-imaksad be soge.”
2KI 8:5 Giezi, Eliseo machi-bipi burgwar-mai gannar-odulosgusadgi, reyga sunmaksiidgi, machi-bipi-e-nan reyse dognonikid, e-neg-megisad, degi, e-napanegmar gannar egisega nonikid. Geb Giezi, reyga sogded: —Dummad-rey, we, a-omegwa-dake, we, a-machi-bipibalid, Eliseo we-machi-bipi burgwar-mai gannar-odulos gusad.
2KI 8:6 Geb rey, omegwase nue ibmar-egisded, omegwadi bela ega ibmar-gusad sogsad. Geb degi, rey, dule-ega-arbaedga igar-uksad, ega sogsad: —Bela ega e-ibmarmar ukoye, degi, e-naded-akale, emi-ibase, e-sorba e-nainugi ibmar-sanmaksamalad bela ega ukbaloye.
2KI 8:7 Ibagan-nasad-sorbali, Eliseo Damasco-neggweburse naded. Deunni, Siria-dulemar-e-rey-Ben-Adad nailikgumaid, geb ega sogsamalad: “Bab-Dummad-e-dule, wese noniye.”
2KI 8:8 Geb rey, Hazaelʼga sogsad: “Bab-Dummad-e-dulega ibmar-binsa-ukega ibmar be sedo, degine, ega be sogo: ‘Bab-Jehováʼse anga egisye, rey gannar nuguo sogeye,’ adi, an wisguegar.”
2KI 8:9 Degisoggu, Hazael, Eliseo daknadsunnad. Geb moli-yargan-mureged-waladulabo (40) sesad. Degi, Damasco-neggweburgi-ibmar-nuegan-nikadi ega sesbalid. Degi, Hazael, Eliseoʼse modapgu, asabin gwisgudapid, ega sogded: —Be-mai Siria-e-rey-Ben-Adad, bese an-barmialid, ega egisega ede gannar nuguo sogeye.
2KI 8:10 Geb Eliseo ega sogsad: —Be ega sogna, ‘We bonigine bede burgosurye, be nuguoye.’ Degi-inigwele, Bab-Jehová anga sogsad: ‘Amba we burgwedseye.’
2KI 8:11 Geb degine, Bab-Dummad-e-dule, Hazaelʼbina nuu-gwisgusad. Agine, Hazaelʼdi, Eliseo-abin bingegualid. Geb agine, Bab-Dummad-e-dule Hazael-abin ise-boale-naded.
2KI 8:12 Geb, Hazael ese egichided: —Dummad, ¿Ibiga be boe? Geb, Eliseo ega sogded: —An nue be-wisid, igi be Israel-dulemar imakoe: E-ibe, neggwebur-gandik-bukwamalad, be ogumakoed, e-sapingan es-suidgi be ogilogoed, degi, e-mimmigan be oburgwidbaloed, degine, omegan-gurgin-nikmalad-ibe, be saban-daas-daas imakoed.
2KI 8:13 Hazael abin-sogded: —Ar be-maide ibu be dake ¿Ar ande dule-isganasi, deyob ibmar-imaked? Eliseo ega sogded: —Ar Bab-Jehová anga sogsad: ‘Be-dule Siria-dulemar-e-reyga guoye.’
2KI 8:14 Geb degi, Hazael, Eliseo-mete nadsunnad, gannar e-reyse nonikid. Geb, Rey-Ben-Adad ese egichialid: —¿Degite, igi Eliseo bega sogsa? Hazael ega sogded: —Eliseo anga sogsad: ‘We-bonigine bede burgosurye, be nuguoye.’
2KI 8:15 A-banedgine, Hazael atued-mua-muad, diigi owardikusad. Geb agine, rey-e-wagar atuegi ise-gaar imaknonikid, adi, melle bar bunnogega. Geb agi, rey burgwisad. A-sorbali, Hazael, Siria-e-reyga megnonikid.
2KI 8:16 Acab-machi-Joram, birgatargus (5) Israel-yargi-negsemaidgine, Josafat-machi-Joram, Judá-yar sealid.
2KI 8:17 Josafat-machi-Joram birga-durgwen-gakambe-gakabo nikadgi (32) yar sealid. Degi, Jerusalénʼgi birgabaabak (8) yar sesad.
2KI 8:18 Joram, Israel-e-reymar-isgusadba isgudmogad. Degine, igi Acab-e-wagan-isgusa, debayobi, Joram, Bab-Jehováʼgi isgusad. Deginbali, Joram, Acab-e-sisgwa-gwensak nikusgusad. Degisoggu, Joram, Bab-Jehová-asabin ibmar-isganabi imaksad.
2KI 8:19 Degi-inigwele, Bab-Jehová, e-mai-David-sabedba Judá-yala obelodsulid, ar ade, Davidʼbo igar-mesisgusad, ega sogsagusad, gwallu-meegwad an bega ukoye, degi, be-waganga degisadegu an ukdii guoye. A-ulale, Bab-Jehová Judá-yala obelossurgusad. (We-sogledo, David-nug surguosurye, degi, e-wagan, e-sorba e-dad-David-gangi-sigdii, degisadeguoye).
2KI 8:20 Deunni, Joram-ibagangi, Edom-dulemar, Judá-yar-selemaidgi gwisgunoni gusad. Agi Edom-dulemar na e-rey-nug-imaksamarmogad.
2KI 8:21 Degi, Joram e-moli-ur-bila-onomalad-abargi, Zair-neg-nugadse nade gusad. Joram, degi, moli-ur-bila-onomalad-e-dummagan-abargi mutik Edom-sordamargi gwichiguded. Degidgine, Israel-sordamar dobguar e-neg-e-negse duurmakde gusmalad.
2KI 8:22 Degisoggu, emi we-garda-narmaklenaidse Edom-dulemar Judá-dulemargi ollorgunonikid. Amba a-ibagangi, Libna-neggwebur Judá-dulemargi bachik-gusmarmogad.
2KI 8:23 Joram-ibmar-imaksadi, degi, ibmar-baigan-imaksadi, abala, Judá-e-reymar-ibmar-imaksad-gardagi narmakar-maid.
2KI 8:24 Degi, Joram burgwisad. Degine, David-neggweburgi, e-dadgan-abargi diglesad. A-sorbali, e-machi-Ocozías yar-sesad.
2KI 8:25 Acab-machi-Joram, birgambe-gakabogus (12) Israelʼgi-negsemaidgi, Joram-machi-Ocozías, Judá-yar sealid.
2KI 8:26 Ocozías birga-dulagwen-gakabo-nikadgi (22) yar sealid. Degi, Jerusalénʼgi birgagwen yar sesad. Atalíaʼye e-nan nugad, Omri-e-wagwad. Omriʼde, Israel-e-reyga megisadid.
2KI 8:27 Ocozías, Acab-e-negyaginmalad-daedba nanasad. Ar ade Ocozías, Acab-e-sapinga-gusoggu, a-daedba-nanasad. Degisoggu, Ocozías, Bab-Jehová-asabin ibmar-isganabi imaksad.
2KI 8:28 Ocozías, Acab-machi-Joramʼbo, Siria-dulemar-rey-Hazaelʼgi gwisguega, Galaad-yargi Ramot-neggwebur-siidse nade gusad. Agi, Joram, bila-onogedgi Siria-sordamarse naibigusad.
2KI 8:29 Degisoggu, Rey-Joram, Jezreel-neggweburse gannar nonigusad, Siria-rey-Hazael-ebo, degi, a-e-sordamar-ebo Ramotʼgi bila-ononaidgi naibigusad nudakegar. Degisoggu, Joram-machi-Judá-e-rey-Ocozías, Jezreel-neggweburse aligusad, e-sorda-Acab-machi-Joram-nailikgumaid dakegar.
2KI 9:1 Ibagwengi, Bab-Dummad-gayaburba-barsoged-Eliseo, Bab-Dummad-gayaburba-barsoged-wargwense gochad, ega sogded: “Ramot-De-Galaad-neggweburse-naega guakwao. We-olivo-gwallu be sedo.
2KI 9:2 Be ase modapile, Nimsi-e-wagwa Josafat-machi-Jehú, be dakdagoed. Degi, ese be nao, e-sordamar-idu be sedo, gabedneg-baidse be nido.
2KI 9:3 Geb, olivo-gwallu be suo, e-nonogi be eogo, degi, ega be sogo: ‘Bab-Jehová weyob sogye: An Israel-e-reyga be-nug-imakye. A-sorbali, yawagak be egao, geb gwae be abarmakdo.’ ”
2KI 9:4 Degisoggu, Bab-Dummad-gayaburba-barsoged Ramot-De-Galaad-neggweburse nadsunnad.
2KI 9:5 Degi, ase mosgu, dakdapid, bila-onomalad-e-dummagan danar-bukwa, geb amarga sogded: —Dummadga an bega gayaburba an sedani. Geb Jehú ega sogded: —¿Degite, biti-dummadga be sedaniki? Geb, Bab-Dummad-gayaburba-barsoged ega sogded: —Dummad, begala.
2KI 9:6 Geb Jehú gwichibin imaksad, ebo negyaba dogded. Degi, Bab-Dummad-gayaburba-barsoged Jehú-nonogi olivo-gwallu eosad. Agine, geb ega sogded: “Bab-Jehová, Israel-dulemar-e-Bab-Dummad, weyob soged: ‘Emi, an Israel-dulemar-e-reyga an be-nug-imaked.
2KI 9:7 Be-dummad-Acab-e-wagan, bela be obelogoed. An deyobi, an-maigan an-gayaburba-barsogmalad, Jezabelʼse, ablis-ariosad buged an imako. Degi, bela an-maigan-abe-milesad, buged an imakoed.
2KI 9:8 Bela Acab-masmala obelolegoed, degi, Israel-yargi e-wagan-gudidimalad obelolebaloed, Acab-maiganga-gudiid, igi, maiga-gudisurdibe bela obelolebaloed.
2KI 9:9 Igi Nabat-machi-Jeroboam-e-wagan, degi, Ahías-machi-Baasa-e-wagan an imaksa, deyobi Acab-wagan an imakmogoed.
2KI 9:10 Degi, Jezabel-muidi achumar Jezreel-nainugi gunnoed, dule gwen e-mui digosulid.’ ” Geb a-sorbali, Bab-Dummad-gayaburba-barsoged yawagak egasad, geb gwae abarmakded.
2KI 9:11 Jehú gannar e-sorda-bila-onomalad-dummaganse nonigu, ega e-sordamar sokalid: —¿Ibi be itoge? ¿Ibiga we-dule be-dakdii? Jehú ega sogded: —Ar bemar mag-daked, be wismalad igi we-dule sunmakdae.
2KI 9:12 Geb e-sordamar ega sogded: —Binsa be gordii. Nue be anmarga soge. Jehú sogded: —Anga weyob soged: ‘Bab-Jehová weyob sogye: Emi, an Israel-dulemar-e-reyga an be nug-imaksaye.’
2KI 9:13 Geb deyob soge-itosmargu, bela Jehú-nag-urba mor ogitemalad. Agine, gar-trompeta ogotemalad, degi, oimakdemalad, sogdemalad: “Rey-Jehú-nug odummomar.”
2KI 9:14 Degidgine, Nimsi-wagwa Josafat-machi-Jehú, Joram-oburgwedgi binsaalid. Joramʼdi, Israel-sordamarmala, Ramot-De-Galaad-neggwebur-bendaknai gusad, deunni, Siria-rey-Hazael Ramot-De-Galaad-neggweburgi gwisgunai gusgu.
2KI 9:15 Degi-inigwele, Rey-Joram Siria-sordamargi bila-ononaigu, naibigusad-nudakega, Jezreel-neggweburse gannar noni gusad. Degisoggu, Jehú e-sordamarga sogded: “Bemar reyga an-omesbimalale, melle dulemar Jezreel-neggweburse gayaburba-berbenaega be onomalo.”
2KI 9:16 Geb degine, Jehú bila-onoged-urgi Jezreel-neggweburse Joram-nailikgumaidse naded. Deunni, Judá-dulemar-e-rey-Ocozías Jezreel-neggweburse Joram-dakdimogad.
2KI 9:17 Dule-nakuleged, Jezreel-neggweburgi nakuleged-neg-siid-niba nakulesigu, dakalid, Jehú-sorda-bila-onomalad daniki, geb binnasuli goted: —¡Sorda-bila-onomalad anmargi dani! Geb Joram sogded: —Sorda-moligi-sii-urwed-wargwen barmido, sorda-bila-onomalad-danikid-abin naega, ese egisega: ‘Bemar nuedgi-danimar sogeye.’
2KI 9:18 Degi, sorda-moligi-sii-urwed, Jehú-abin naded. Mosgu, ese egichided: —Rey wisgubied: ‘Bemar nuedgi-danimar sogeye.’ Geb Jehú abin-sogded: —¿Ibiga be wisgubisunna? Wedi be-igarsulid. Anba be dage. Dule-neg-niba-nakulesiid sogded: —Gayaburba-berbeged bato mosad. Degi-inigwele, gwen gannar bar-dani an daksulid.
2KI 9:19 Geb degine, rey sorda-moligi-sii-urwed-baid barmisbalid. Geb amar-bukwadse omosgu, Jehúʼse egichided: —Rey wisgubied: ‘Bemarde nuedgi-danimar sogeye.’ Jehú abin-sogded: —¿Ibiga be wisgubisunna? Wedi be-igarsulid. Anba be dage.
2KI 9:20 Dule-neg-niba-nakulesiid gannar sogdebalid: —Gayaburba-berbeged bato mosad. Degi-inigwele, gwen gannar bar-dani an daksurbalid. An dakedi, Nimsi-wagwa-Jehú, moli-ur-sedani an dakdo, ar ade, gwae-gwae danikid.
2KI 9:21 Geb Joram sogded: —An-moli-ur-bila-onoged guakwaa anga nasikmalo. Bela e-moli-ur ega guakwaa nasismargu, Israel-e-rey-Joram, Judá-e-rey-Ocozíasʼbo, e-moli-ur-e-moli-urgi, Jehú-abin nadmalad. Geb dule-Jezreel-neggweburgined Nabotʼye-nugad-e-nainugi Jehú-abingunonimalad.
2KI 9:22 Joram, Jehú-dakargu ese egichided: —Jehú, ¿be nuedgi-daniki? Jehú abin-sogded: —¿Igi an nuedgi-danikosunna? Emide, be-nan-Jezabel ibmar-sobarmalad-bab-dummadyob-imakleged e-bab-dummadga imakdiid, ina-isganamar imakdibalid.
2KI 9:23 Joram deyob ega-soge-itosgu, Jehúʼgi-wakinnega gannar yog-birar-imaksad, binnasuli Ocozíasʼse goted: —¡Ocozías, anmar ese yamolesa!
2KI 9:24 Degi-inigwele, Jehúʼdi, idu warsi-gachii-ganisoggu, Joramʼgi sigu yog-miar-imaksad, geb yarganba egi gwisgudapid, e-gwagegi yoledapid. Geb, Joram e-moli-ur-yagi aimukuded.
2KI 9:25 Geb Jehú, e-bendaked-Bidcarʼga sogded: —Odege. Jezreel-neggweburgined-Nabot-e-nainugi be meto. Be ebinsae, deun be anbo anmar e-bab-Acabʼba moli-ur-semaigusgu, Bab-Jehová we-dulegi weyob ibmar-guoye sogsa gusad:
2KI 9:26 ‘Ani an Bab-Jehová-guedgi sogye: Saegidbali, wegi Nabot-e-ablis, degi, e-masmala-e-ablis an daksad. Degisoggu, napira an soged, be emar-oburgwisad-ulale, we-nainugi buged-mai an be-imakoed. Degisoggu, Joram-e-mui be odege, Nabot-e-nainugi be mete, igi Bab-Dummad-sogsagusa, deyob guegar.’
2KI 9:27 Judá-e-rey-Ocozías, deyob daksagu, Bet-Hagán-igarba wakited. Degi-inigwele, Jehú balegitegu, e-sordamarga sogded: —Bemar, we-dule moli-urgi-nadapid oburgwemarbalo. Degi, Ibleam-neggweburmobin, Gur-yar-mullu-nakwemaidgi Ocozías-naibi-imaksamalad. Degi-inigwele, Ocozías nabir Meguido-neggweburse wakichad. Geb agi burgwedapid.
2KI 9:28 Agine, ega-arbamalad moli-urgi e-mui Jerusalén-neggweburse sesmalad. Geb agi David-neggweburgi e-dadgan-neg-uan-maidgi digsamalad.
2KI 9:29 Dakargu, Acab-machi-Joram, birgambe-gakagwensakgus (11) Israel-yargi-negsemaidgi, Ocozías Judá-yargi negsear gusad.
2KI 9:30 Geb a-sorbali, Jehú Jezreel-neggweburse naded. Jezabel degii-wisguargu, Jehú-iduar ibya-sigamar magsad, nue-gwiar imaksad, geb yawagak-senigwadba atakded.
2KI 9:31 Jehú neggwebur-yawagak-dogedgi dogdanigu, Jezabel ese goted: —Anna, ¿bede nueganbi? Bedi Zimriʼyobidid. Be-dummad-gindakedid.
2KI 9:32 Geb Jehú yawagak-bipi-siidsik atakdegu, sogded: —¿Doa anba nai? Geb agi, reyneggi dule-maiga-gudimalad warbo, warbaadibe, Jehúʼsik yawagak-bipigwadba atakarmalad.
2KI 9:33 Geb Jehú amarga sogded: —Bemar, Jezabel-egwanmar. Geb, napase egwachamalad. Argwachagu, bela e-ablis galugi, degi, molimargi milesad. Geb molimar Jezabel-birgi dii-dii-annasmalad.
2KI 9:34 Agine, Jehú mas-gunnega, degi, gobega sigisad. Geb bergusgu, igar-uksad: —Emisgi, we-ome-isgana-e-mui be sedmar, degi, be digmalo, ar ade, we-ome, rey-e-sisgwad.
2KI 9:35 Degi, Jezabel-e-mui-digega nadmargu, e-mui amissurmalad, unnila e-nono-gar, e-mali-gar, degi, e-sakwa-garbi amismalad.
2KI 9:36 Degisoggu, gannar Jehúʼse nonimalad, bela ega sognonimalad, geb Jehú amarga sogded: —Bab-Dummad we-gayaburba bato e-mai-Elías-Tisbeʼginedba weyob sogsa gusad: ‘Jezreel-nainugi achumar Jezabel-e-mui gunnoye.’
2KI 9:37 Jezabel-e-mui, ibmar-durgan-saa-miledeyob, Jezreel-nainugi miledoye, gwen dule binsaosurye, wede, Jezabel-an-dakye.
2KI 10:1 Acab dulapaa-gakambe (70) masmala nikad. Amala Samaria-yargi bukwad. Degidgine, Jehú garda narmaksad, geb Samaria-yargi Jezreel-neggweburgi dummagan-bukwadse, degi, sapin-dummagan-bukwadse barmisad. Degine, Acab-masmala-gardagi-odurdakmaladse barmisad. A-gardagi weyob sognaid:
2KI 10:2 “Bemar-abargi Rey-Acab-masmala gudidiid, degi, e-moli-ur-bila-onomaladi be nikamalad, degine, e-sorda-moligi-sii-urwemalad be nikamarbalid, deginbali, e-neggwebur-sakdigar-bukmalad, degi, bila-onogedgi e-ibmar-ebulemalad be nikamarbalid. Degisoggu, bemar we-garda abindaksamalale,
2KI 10:3 Acab-machi-wargwen bur dule-buled, bur nue-nug-nikad be sumalo, e-bab-sorba yar-seega. Deginbali, rey-masmala-ular be urwemalo.”
2KI 10:4 Deyob garda absosmargu, bela-bela dobguarmalad, sogdemalad: “Ar reymar warbogwadbela, gwen egi obichasulid, Degite anmar-bursunna, sunna anmar egi obinmarmogosi.”
2KI 10:5 Degisoggu, dule-reyneg-akwed, degi, Jezreel-neggwebur-dummadga-maid, degine, sapin-dummagan, deginbali, Acab-masmala-gardagi-odurdakmalad, Jehúʼse gayaburba barmisad: “Anmar be-maiga guoed, be-sogedba an ibmar-imakmaloed. Degisoggu, anmar dule-baid reyga omesosulid. Be-dakedba be ibmar imako.”
2KI 10:6 Geb degine, Jehú, garda-baid barmialid, weyob sogsiid: “Bemar anba naimalale, degi, nue be an-sogedba ibmar-imakbimalale, degirdi, Acab-masmala-dukar be egwanmalo, banedse we-wachigi Jezreel-neggweburse be anse dagmalo, degi, anga be Acab-e-masmala-e-nono sedago.” Neggweburgi-dummaganga-gudidiid Acab-e-masmala dulapaa-gakambe-merguedi (70) akwedimalad.
2KI 10:7 Degisoggu, a-dulemala garda abindaksamargua, Acab-masmala-e-dukar yog-egwannar-egwannar imaksamalad, geb e-nonomar garbagi urbismalad, geb degine, Jezreel-neggweburse Jehúʼse barmismalad.
2KI 10:8 Geb dule-gayaburba-berbeged Jehúʼse nonikid, ega sognonikid: —Acab-masmala-nono senonimar. Geb Jehú ega sogded: —Neg-oibogedse, neggwebur-yawagak-dogedgi be danabo urbemalo.
2KI 10:9 Neg-oibosgu, Jehú noalid, geb bela dulemar-bukwadga sogded: “Bemar ibmar oakalossulid. Ani an-dummad-oburgwedgi an binsasad, ani an oburgwisad. Degite, ¿doa bela wemar-oburgwissunna?
2KI 10:10 Be wisgumarsun, igi Bab-Jehová bela Acab-gwenadgangi sunmaksagusadi, ar bela deyob guedsegad. Degisoggu, Bab-Jehová bela e-mai-Elíasʼba ibmar-sogsagusad imaksad.”
2KI 10:11 Jehú deyob sogsagu, Jezreel-neggweburgi Acab-masmala-napi-bukwad, degi, dule-nug-nikamalad, degine, e-gwenadgan, degi, e-irwa-Bab-Dummadse-gormaladse-bakale, Jehú ogilosad, bipisaale wargwenad bar odulossulid, bela oburgwisad.
2KI 10:12 Geb a-sorbali, Jehú Samaria-neggweburse naded, igarba-nadapidgi sibad-wawaad-absar-esileged-neg-siidse modapid.
2KI 10:13 Agine, Jehú, Judá-e-reyga-gusad-Ocozías-e-gwenadgan abingualid. Degi, Jehú amarse egichided: —¿Bemarde doamala? Geb abin-sogdemalad: —Anmar Ocozías-e-gwenadgana. Anmar rey-masmala, degi, Jezabel-masmala dakdanikid.
2KI 10:14 Geb degine, Jehú e-sordamarga sogded: —¡Be gamala! Geb e-sordamar gasmalad. A-sorbali, sibad-wawaad-absar-esileged-neg-dikarba, dia-siid-nagaba, a-dulemar-ibe dukar-egwachamalad. A-dulemarde e-dulabo-gakabo (42) mergued. Bipisaale dula obessurmalad, bela oburgwismalad.
2KI 10:15 Degi, Jehú nadbargu, Recab-machi-Jonadab abingunonikid, ase nadapinad. Geb Jehú ega sogded, be nued-sogeye. Deyob sogsagu, ese egichided: —¿Ibmar-nueganbi an bega imakdiid, deyob be angi imakdimoga? Jonadab abin-sogded: —Ar deyobdo. Geb, Jehú ega sogded: —Degirdi, be-argan be anga udage. Geb Jonadab ega argan-oyoded, geb Jehú e-moli-urgi Jonadab-onakwisad.
2KI 10:16 Geb, Jehú ega sogded: —Anmar nae, adi, be an-dakoed, igi an Bab-Jehováʼbina an nue-soge. Degi, Jehú, na e-moli-urgi, Jonadab-sesad.
2KI 10:17 Geb, Jehú Samaria-neggweburse modapgu, Acab-masmala-napi-bukmalad bela-ogilosad, igi Bab-Jehová, Elíasʼba sogsagusa, deyob gusad.
2KI 10:18 Degine, Jehú, bela dulemarse gochad, ega sogded: “Acabʼdi, Baalʼba nue-nai gussulid. Andi bur bule Baalʼga ibmar imakoed.
2KI 10:19 Degisoggu, bela Baal-gayaburba-barsogmaladse be gormalo, degine, bela dulemar-Baal-nug-odummomaladse, degi, dule-irwa-Baalʼse-gormaladse be gormalo. Wemar-wargwensaale beosulid, ar ande Baalʼga ibmar-ogumakar-ukleged-sunsoged uksokalid. Ar dule nonisulile, oburgwilegoed.” Jehúʼdi napiragwadba deyob sogsulid, ar ade, Baalʼse-gormalad-ogilogedgi binsanaid.
2KI 10:20 Agi, Jehú sogded: “Baal-nug-odummogega dulemarse be gormar.” Degisoggu, deyob imaksamalad.
2KI 10:21 Geb agine, Jehú Israel-dulemar-owisogega gayaburba-berbemalad barmisad. Geb dulemar Baalʼse-gormalad bela nonimalad, bipisaale dule-wargwenad nonisuli gussulid. Degisoggu, Baalʼse-goled-neg bela-belad engus sigisad.
2KI 10:22 Geb degine, Jehú, dule-irwa-Baalʼse-gormalad-e-mor-dakedga sogded: “Bela dule-Baal-nug-odummomaladga, ibagi-mor-yoleged onio.” Dule-mor-dakedi deyob imaksad.
2KI 10:23 Degine, Jehú, Recab-machi-Jonadab-ebo, Baalʼse-goled-negyaba dogded, degi, Jehú Baal-nug-odummomaladga sogded: “Nue be dakmalo, abakale bemar-imbagi dule-Bab-Jehováʼse-gormalad siile, ar ade, unnila Baal-nug-odummomaladbi ambikubi abeleged.”
2KI 10:24 Degine, Baal-nug-odummomalad e-bab-dummadga-ibmar-ukega, degi, e-bab-dummadga-ibmar-ogumakar-ukleged-ukega ubosmargu, Jehú machergan-e-dulabake (80) magaba oambikusad, geb ega sogsad: “Dulemar an bega-urmaksad be dula-obesmalale, be-sunnad be anse oburgwilemaloed.”
2KI 10:25 Geb, bela ibmar-ogumakar-ukleged-uknaid-obelosmargu, Jehú dule-nakulemaladga, degi, bila-onomalad-e-dummaganga sogded: “Emisgi dogmar, bela ogilomalo, melle-wakinnega imako.” Dule-nakulemalad, degi, bila-onomalad-e-dummagan es-suidgi bela Baal-nug-odummomalad ogilosad, degine, bela e-muimar omilede imaksamalad. A-sorba, geb Baalʼse-goled-neg-islidikidyaba ubodmalad.
2KI 10:26 Degi, Baalʼse-goled-negyaba akwa-islidikid-sobarmalad-bukwad onismalad, geb ogumaksamalad.
2KI 10:27 Deginbali, Baal-akwagi-sobaled-gwichid omukusmarbalid. Geb Baalʼse-goled-neg bela earismalad, ibmar-isgana-milegedga emi-we-garda-narmaklenaidse imaklesad.
2KI 10:28 Deyobi, Jehú, Israel-yargi Baalʼse-golleged-neg osulosad.
2KI 10:29 Degi-inigwele, Jehúʼdi, gwen isguedgi bangussulid, ar igi Nabat-machi-Jeroboam, Israel-dulemar-isguega-imaksagusa, deyob, Jehú isgudii gusmogad. Ar ade, Jehú, amba Betelʼgi, degi, Danʼgi moli-bebe-nikad-orbimalad-nug-odummodii gusad.
2KI 10:30 Degi, Bab-Jehová, Jehúʼga sogsad: “Anga ibmar-nueganbi be imaksad. Igi Acab-e-wagan-imakedgi an binsasa, a-sunnagwad be ibmar-imaksad. Degisoggu, be-masmala, degi, be-wagan, be-wagan-yokorginmalad, be-wagan-yarganbarmaladse-bakar, Israel-yalagi negsemai guoed.”
2KI 10:31 Degi-inigwele, Jehú, Israel-e-Bab-Dummad-Jehová-Igar-Maidba imaksasulid, ar ade, amba isguedgi nanadigusad, igi Jeroboam Israel-dulemar-isguega-imaksagusa, deyob isgudii gusad.
2KI 10:32 A-ibagangi, Bab-Jehová Israel-yala binna-binna obipilemai imakalid. Rey-Hazael, bela Israel-yar neggweburmar-baiganbo-abingunanaidgi Israel-sordamargi gwisgusad.
2KI 10:33 Jordán-diwar-dad-nakwedsik yalamar-susad: Bela Galaad-yalaganba alid, degi, Gad-yalaganba, degine, Rubén-neggwebur-yalaganba, degi, Manasés-neggwebur-yalaganba, Aroer-neggweburse, Arnón-dian-maidse yalamar susad. Galaad-neggwebur-akar, degi, bela Basán-neggweburse yalamar susad.
2KI 10:34 Jehú e-ibmar-imaksad-baigan, degine, e-gangued-oyosad-baigan, Israel-e-reymar-ibmar-imaksad-gardagi narmakar maid.
2KI 10:35 Degine, Jehú burgwenonikid, geb Samaria-neggweburgi e-dadgan-abargi digsamalad. A-sorbali, e-machi-Joacaz yar sesad.
2KI 10:36 Jehú, Samariaʼgi Israel-dulemargi birga-dulagwen-gakabaabak (28) yar sesad.
2KI 11:1 Ocozías-e-nan-Atalía, e-machi-burgwisye wisguargu, bela rey-gwenadgan-ogiloapid.
2KI 11:2 Degi-inigwele, rey-masmala-ogilolenaidgi, Rey-Joram-sisgwa-Josaba, Ocozías-e-bun, Rey-Ocozías-mimmi-Joásʼye-nugadi susad. Geb Atalía-idu odukusad. Gabednegyaba ome-mimmi-akwedbo Joás-odukusad. A-ulale, Joás-oburgwissurmalad.
2KI 11:3 Degi, Joás omegwa-e-akwedbo birganergwa (6) Bab-Jehováʼse-goled-neggi dukudii gusad. A-ibagangi, Atalía dummadga yar-semai gusad.
2KI 11:4 Birgagugledgi (7) dule-irwa-Bab-Dummadse-goled-Joiada, rey-sorda-dulataled-e-dummaganbina (100) gochad, degi, Cereteo-sordamar-e-dummaganse, degine, reyneggi-sorda-nakulemalad-e-dummaganse gochad, Bab-Jehováʼse-goled-negse an-dakdamaloye. Geb agine, Bab-Jehováʼse-goled-neggi Joiada a-dulemar-ebo na ise-sogar igar-mesisad, adi, melle e-barsogmalaga. A-sorbali, Joiada amargala rey-machi-Joás oyosad.
2KI 11:5 Degine, amarga weyob igar uksad: “Weyob be imakmalo: Bemar obunnoged-ibagi danapaa-bukwadi, danagwen reyneggi nakulemalo.
2KI 11:6 Geb baid-danagwenadi, Yawagak-Shurʼye-nugadsik nakulemarmogo. Geb napi-danagwenadi, nakulemalad-neg-yawagaksik nakulemarmogo, adi, muchub-muchub bemar Bab-Jehováʼse-goled-neggi nakulemalagar.
2KI 11:7 Degi, sorda-danabogwad obunnoged-ibagi-arbaosurmaladi, Bab-Jehováʼse-goled-neggi reyga nakulegoed.
2KI 11:8 Bemar rey-dikarba danale gingimar annik-annik be ambikumalo. Dule-gwensak a-bukwadgi dogele, oburgwilegoed. Degisoggu, bia rey naddibele, melle wargwen-naega imakmalo.”
2KI 11:9 Rey-sorda-dulataled-e-dummagan (100), igi-dule-irwa-Bab-Dummadse-goled-Joiada ega igar-uksa, deyob imaksamalad. E-sordamar egad-egad urbismalad. Bela sorda obunnoged-ibagi-arbamaladi, degi, obunnoged-ibagi-arbasurmaladse-bakar, e-sordamar egad-egad urbismalad. Geb, dule-irwa-Bab-Dummadse-goled-Joiadaʼse nonimalad.
2KI 11:10 Geb agine, Joiada, rey-sorda-dulataled-e-dummaganga (100) eswar-swiswidikmalad, degi, sigu-abgamalad Bab-Jehováʼse-goled-neggi-sabolebukwad ega uksad. A-ibmarmarde, Rey-Davidʼgadga gusadid.
2KI 11:11 Geb degi, neggi-nakulemalad, Bab-Jehováʼse-goled-neg-siid-argan-nued-akale, sapiledsikidse, Babga-ibmar-ogumakar-ukleged-ailamobin rey-bendakega ambikusmalad. Degine, gingi annik-annik bukusmalad.
2KI 11:12 Degidgine, Joiada, rey-machi-onosad. Geb ega rey-gurgin sisad. Degine, Bab-Jehová-Dadganbo-Igar-Mesisad-Garda ega uksabalid. A-sorbali, gwallu-wawad e-nonogi eosad, degine, bela ega argan-ogotemalad, sabsur-oimakdemalad, sogdemalad: “¡Rey-nug odummomar!”
2KI 11:13 Atalía, sorda-nakulemalad-oimake, degi, dulemar-oimake itoargu, Bab-Jehováʼse-goled-neggi dulemar-oimakbukwadse naded.
2KI 11:14 Mosgua, dakdapid, igi gusgu dule reyga-nugsananaimalale imakdamala, deyobi, rey buar-nagaba-gwichi dakdapid. Degine, dule-dummagan, degi, dule-gar-ogormalad rey-nagaba-bukwa dakdapid. Deginbali, bela dulemar weligwale gar-trompeta-ogorbukwa dakdapid. Degidgine, Atalía, na e-mor-yoid siir-siir-imaksad, geb binnasur-goted sogded: “¡Angi be aibichamar! ¡Angi be aibichamar!”
2KI 11:15 Geb agine, dule-irwa-Bab-Jehováʼse-goled-Joiada, rey-sorda-dulataled-e-dummaganga (100) igar uksad: “Sordamar-bukwad-abargi Atalía be onomala. Dule Atalía-bendakalile, es-suidgi oburgwemalo.” Ar dule-irwa-Bab-Dummadse-goledi melle Bab-Jehováʼse-goled-neggi Atalía-oburgwemaloye sogsasoggu,
2KI 11:16 gasa sesmalad. Agine, reynegsik, bia sorda-moligi-sii-urwemalad ubodae, asiki onosmalad. Geb agine Atalía-oburgwismalad.
2KI 11:17 Geb agine, Joiada, reyga, degine, dulemarga Bab-Jehová-ebo igar-mesisad: Unnila emarde, Bab-Jehová-dulamarga gumaloye. Degine, Joiada, reyga, degi, e-dulamarga igar-mesisbalid, adi, na muchub-muchub bendakmalagar.
2KI 11:18 Geb a-sorbali, bela dulemar Baalʼse-goled-negse nadmalad. Agi, Baalʼse-goled-neg-siid earismalad. Deginbali, Baalʼga-ibmar-ogumakar-ukleged-ailamar bela bibichismalad, degi, e-bab-dummadyob-imaklemalad bela bibichismarbalid. Degine, dule-irwa-Baalʼse-goled-Matán, Baalʼga-ibmar-ogumakar-ukleged-aila-walik oburgwismarbalid. Dule-irwa-Bab-Dummadse-goled-Joiada, dule-nakuleged, Bab-Jehováʼse-goled-neggi nakulegega ogwichisad.
2KI 11:19 Geb rey-sorda-dulataled-e-dummagan (100), degi, Cereteo-sordamar-e-dummagan, degine, reyneggi-dule-nakulemalad, deginbali, bela dule-neggweburginmalad, Bab-Jehováʼse-goled-neg-akar, reyneg-gandikidse reyba nadmalad. Degi, nakuleged-neg-yawagakba dogsamalad. Geb agine, Rey-Joás rey-gangi sigidapid.
2KI 11:20 Bela dulemar weligwar itosmalad. Ar reyneggi Atalía es-suidgi oburgwismarsoggu, neggwebur bonisuli sigisad.
2KI 11:21 Joás birgagugle-nikadgi (7) Judá-yargi reyga megnonikid.
2KI 12:1 Jehú birgaguglegus (7) Samariaʼgi-negsemaidgi, Joás yar sealid. Jerusalénʼgi birga-dulabo (40) yar sesad. E-nandi Sibiaʼye nugad, Beersebaʼginedid.
2KI 12:2 Joás, bela ibmar-nueganbi Bab-Jehováʼga imaksad. Ar ade, dule-irwa-Bab-Dummadse-goled-Joiada deyob odurdaksad.
2KI 12:3 Degi-inigwele, bab-dummadyob-ibmar-imakleged-aila-matusurmalad osulossulid. Degisoggu, dulemar a-aila-matusurmaladgi, amba e-bab-dummaganga ibmar-ogumakaled ukdii gusmalad. Degi, ina-wawadikid amba obupurmakdii gusmalad.
2KI 12:4 Ibagwengi Joás, dule-irwa-Bab-Dummadse-gormaladga sogded: “Bab-Jehováʼga-mani-weleged, dulemar-Bab-Jehováʼse-goled-negse-senonidaed, be weemalo. Degi, neggweburga-mani-galeged, degine, igar-maidba Bab-Jehováʼga-mani-ukleged sedamarbalo. Deginbali, dule e-binsaedba-Bab-Jehováʼga-mani-ukleged sedamarbalo.”
2KI 12:5 Dule mani-sedanikile, dule-irwa-Bab-Dummadse-gormalad e-abin suo. A-manigi bemar, bela Bab-Jehováʼse-goled-neg be nudakmalo.
2KI 12:6 Joás birga-durgwen-gakapaagus (23) negsemaidgine, dule-irwa-Bab-Dummadse-gormalad amba Bab-Jehováʼse-goled-neg nudaksurmarsoggu,
2KI 12:7 Rey-Joás, dule-irwa-Bab-Dummadse-goled-bur-dummad-Joiadaʼse, degi, dule-irwa-Bab-Dummadse-gormalad-baiganse gochad. Amarga sogded: “¿Ibiga bemar Bab-Dummadse-goled-neg gwen-nudaksurmala? Emi-onodoedgi melle bar dulemargi mani weemalo. Be mani-wesmaladi, Bab-Jehováʼse-goled-neg-nudaklegega be ukmalo.”
2KI 12:8 Dule-irwa-Bab-Dummadse-gormaladi, bar dulemargi mani-weosulid nabir itosmalad. Degi, Bab-Jehováʼse-goled-neg-nudaklegoed-e-idumaladga bar guosurmarbalid nabir itosmarbalid.
2KI 12:9 Degi-inigwele, dule-irwa-Bab-Dummadse-goled-bur-dummad-Joiada, mani-urbed-ulugwa susad, geb, eduged-birgi yaa ollomaksad. A-sorba, a-ulu dulemar-Bab-Jehováʼse-goled-negyaba-ubolegedsiki sesad. Geb Bab-Dummadga-ibmar-ogumakar-ukleged-aila-argan-nuedsik sisad. Dulemar Bab-Dummadse-goled-negse-mani-sedani-damaladi, dule-irwa-Bab-Dummadse-gormalad, yawagak-dogedgi-nakulebukwad, a-mani a-ulugwa-yagi urbebukwad.
2KI 12:10 Ulugwagi mani engus-dakarmalale, reyga-garda-narmaked, degi, dule-irwa-Bab-Dummadse-goled-bur-dummad Bab-Dummadse-goled-neggi mani-weles-bukwad ebisnoni damalad. Geb a-sorbali, sagugi bardamalad.
2KI 12:11 Bela mani ebichilesale, Bab-Jehováʼse-goled-neg-nudaknanaid-dakmaladga mani ilagwen-ukar imakmalad. Adi, Bab-Jehováʼse-goled-neg-nudaknanaid-bennukegar: Dule-urgogi-arbamalad, neg-sobedgi-arbamalad,
2KI 12:12 dule-neg-sobedgi-akwagi-arbamalad, degine, dule-akwa-sikedgi-arbamalad-bennukegar. A-ukine, a-manigi urgomar bakmarbalid, degi, neg-sobega-akwa-ebuleged bakmarbalid, adi, Bab-Jehováʼse-goled-neg-nudakegar. De-ukinbali, Bab-Jehováʼse-goled-negga ibmar-baigan-baklemalad-bennukbaliga mani ebulebalid.
2KI 12:13 We-mani, Bab-Jehováʼse-goled-negse-selenonidaedi, mani-nog-sobega ebulesulid, degi, gwillo-dub-sikmalad-sobega, bormo-matargana-sobega, gar-trompeta-sobega ebulesulid. Degine, bipisaale, ibmar-baigan-orbimalad-sobega, degi, manibimalad-sobega ebulesisulid.
2KI 12:14 Unnila we-mani, dule Bab-Jehováʼse-goled-neg-nudaknanaid-dakmaladga ukledaed, adi, a-manigine, Bab-Jehováʼse-goled-neg nudakegar.
2KI 12:15 Degine, dule-arbananaid-bennukmaladse, bar mani-nug egislesulid, ar ade, inniki-sogedba arbamalad.
2KI 12:16 Bab-Jehováʼgi-isgusad-ular-mani-uklegedi, degi, dulegi-gwatirisad-ular-mani-uklegedi, Bab-Jehováʼse-goled-negse selemaisulid. Ar ade, we-mani unnila dule-irwa-Bab-Dummadse-gormaladgadid.
2KI 12:17 A-ibagangi, Siria-dulemar-e-rey-Hazael Gat-neggweburgi gwisgunonikid, degi, a-neggwebur susad. Geb agine, Jerusalén-neggwebursik naded, egi gwisguegar.
2KI 12:18 A-ulale, Judá-e-rey-Joás, e-dadgan-Judá-e-reyga-gusmalad-Josafat, Joram, degine, Ocozías, Bab-Jehováʼse-goled-negga ibmar-nuegan-nug-imaksadi, bela wesad. Degi, Joás, na Bab-Jehováʼga ibmar-nuegan-nug-imaksamogadi, bela-wesbalid. Degine, bela Bab-Jehováʼse-goled-neggi-mani-sabolegedgi ormar-amisadi, degi, bela reyneggi ormar-amisbalidi, bela wesbalid. Geb, bela we-ibmarmar Siria-rey-Hazaelʼse barmisad. Degisoggu, Hazael, Jerusalén-neggweburgi bar-gwisgussulid.
2KI 12:19 Joás bela e-ibmar-imaksad-baigan Judá-e-reymar-ibmar-imaksad-gardagi narmakar mamaid.
2KI 12:20 Joásʼga-arbamalad, Joás-oburgwedgi binsaarmalad. Agine, Sila-neggweburse nadapidgi, Miloʼye-neg-nugadgi Joás-oburgwismalad.
2KI 12:21 Simeat-machi-Josacar, Somer-machi-Jozabadʼbo, Joás-oburgwisad. Joás burgwisgu, e-dadgan-abargi David-neggweburgi diglesad. A-sorbali, e-machi-Amasías yar sesad.
2KI 13:1 Ocozías-machi-Joás, birga-dulagwen-gakapaagus (23) Judá-yargi-negsemaidgi, Jehú-machi-Joacaz, Israel-yar sealid. Samaria-neggweburgi yar-semai gusad. Agine, Joacaz birgambe-gakagugle (17) yar sesad.
2KI 13:2 Joacaz, Bab-Jehová-ibmar-abemaisulidi, Bab-Jehová-asabin imaksad, ar ade, igi Nabat-machi-Jeroboam Bab-Jehováʼgi isgusgusa, deyob Joacaz Bab-Jehováʼgi isgunonimogad. Ar ade, Jeroboam Israel-dulemar Bab-Jehováʼgi isguega imaksagusad. Degine, Joacaz, isguedgi gwen-bangudsur gusad.
2KI 13:3 Degisoggu, Bab-Jehová Israel-dulemargi uluarsunnad. Degidbali, Siria-dulemar-e-rey-Hazaelʼga, degi, Hazael-machi-Ben-Adadʼga urmaksad, adi, Israel-dulemargi obindii guegar.
2KI 13:4 Degi-inigwele, Joacaz, Israel-dulemar bendakega bela-belad Bab-Jehováʼse gochad. Degidbali, Bab-Jehová, Joacaz-ese-goled itosad, ar ade daksad, igi Israel-dulemar Siria-dulemar-e-reyse wilebukwa.
2KI 13:5 Degi, Bab-Jehová, Israel-dulemar-bendakega dule-barmialid. Geb agine, nabir Israel-dulemar Siria-dulemarse-wilebukwadgi bendaklesad. Geb gannar Israel-dulemar iduar-bukwagusadyobi bonisuli bukusmarbalid.
2KI 13:6 Degi-inigwele, amba Israel-dulemar, Jeroboam-wagan-isgusadba nanadii gusad. Amar emar-isguega imaksa gusad, degi, Samaria-neggweburgi bab-dummad-bundor-imakleged-Asera, gwen osulossurmarbalid.
2KI 13:7 Joacazʼga idualeyob sorda-bila-onomalad bar ambikussulid, unnila, sorda-moligi-sii-urwemalad waladulabo-gakambe (50) napi besad. Degi, moli-ur-bila-onomaladi warambe (10), napi besbalid. Deginbali, sorda-nagab-urwemaladi miliambe (10,000), napi ambikudapid. Ar ade, Siria-e-rey bela nagase Joacaz-sordamar-obelosad.
2KI 13:8 Joacaz e-ibmar-imaksad-baigan, degi, e-gangued oyosad-baigan, Israel-e-reymar-ibmar-imaksad-gardagi narmakar maid.
2KI 13:9 Joacaz burgwisgu, Samaria-neggweburgi diglesad. A-sorbali, e-machi-Joás yar sesad.
2KI 13:10 Judá-e-rey-Joás birga-dulagwen-gakambe-gakaguglegus (37) Judá-yargi-negsemaidgi, Joacaz-machi-Joás, Israel-yar sealid. Samaria-neggweburgi yar-semai gusad. Agine, Joacaz-machi-Joás birgambe-gakanergwa (16) yar sesad.
2KI 13:11 Joacaz-machi-Joás, Bab-Jehová-ibmar-abemaisulidi imaksad, ar ade, Nabat-machi-Jeroboam Israel-dulemar-isguega-imaksadgi, Joás isgunonimogad. Degine, Joás, isguedgi gwen bangussurgusad.
2KI 13:12 Joás e-ibmarmar-imaksad-baigan, degi, e-gangued-baigan oyosadi, degine, igi Judá-e-rey-Amasías-ebo bila-onosadi, Israel-e-reymar-ibmar-imaksad-gardagi narmakar maid.
2KI 13:13 Joás burgwisgu, Samaria-neggweburgi reymar-abargi diglesad. A-sorbali, Jeroboam yar sesad.
2KI 13:14 Eliseo nue-gegus-maidgine, Israel-e-rey-Joás ese nadegusad. Degi, ese mosgu, ise-boale angaagwar Eliseoʼgi nagusad, geb ega sogded: —¡Dummad! ¡Dummad! Bedi Israel-dulemarga sorda-gandikidga be gued.
2KI 13:15 Eliseo ega sogded: —Warsi be ami, degi, sigumar be amiba. Geb Joás deyob imaksad.
2KI 13:16 A-sorba, Eliseo Israel-e-reyga sogded: —Warsi be gae. Geb rey warsi gasgua, Eliseo, reygi e-argan omesisad.
2KI 13:17 Geb ega sogded: —Yawagak-bipi-dad-nakwedsik-siid be egae. Geb Joás yawagak-bipi egasad. Eliseo ega sogdebalid: —¡Emisgi, be sigu mie! Agi, Joás sigu mided. Eliseo ega sogdebalid: —¡We-sigu Bab-Jehová-e-wilub gued! Bab-Jehováʼdi, Siria-dulemargi nakwega be-imakoed. Be, Siria-dulemar Afec-neggweburgi ogalakuoed, bela obelogedse be imakoed.
2KI 13:18 A-sorba, Eliseo reyga sogdebalid: —Sigumar be sue. Degi, rey sigumar susad. Geb Eliseo ega sogded: —Emisgi, sigugi napa be bibyoge. Geb, Rey-Joás ilapaa sigugi napa bibyosad. A-sorba bar bibyodsulid.
2KI 13:19 Degidgine, Bab-Dummad-e-dule ese ulualid, ega sogded: —Be napa sigugi ilatar (5), igi, ilanergwa (6) be bibyoged wilubbinad. Deyob be bibyosana, Siria-dulemargi nue be nakoendo, bela obelogedse be imakoendo. Ar emisgindi, wis be unnila ilapaa ogalakuoed.
2KI 13:20 A-sorba, Eliseo burgwenonikid, geb digsamalad. Gusgu birga-irba atursamalad-dule-Moabʼginmalad danale Israel-yarse ubononidaed.
2KI 13:21 Geb ibagwengi, Israel-dulemar dule-mui-dignanaidgi, danale atursamalad-dule egi dani dakarmalad. Degidgine, dule-mui Eliseo-digar-maid-yaba metemarsunnad. Dule-mui Eliseo-garmargi megidapgu, gannar dule durgualid, degi, gwichibinne imaksad.
2KI 13:22 Joacaz Israel-yar-semaiunni, Siria-dulemar-e-rey-Hazael, Israel-dulemar-wiodii gusad.
2KI 13:23 Degi-inigwele, Bab-Jehová Israel-dulemar wiledakarbargu, bendaksagusad. Ar ade, Abraham-ebo, degi, Isaac-ebo, degine, Jacob-ebo igar-mesis gusad. A-ulale, emi we-garda-narmaklenaidse amba Bab-Jehová Israel-dulemar-obelossurgusad, degi, na egi obachasur gusad.
2KI 13:24 Siria-e-rey-Hazael burgwisgu, e-machi-Ben-Adad sorba yar sesad.
2KI 13:25 Degine, Joacaz-machi-Joás gannar Hazael-machi-Ben-Adad-annik neggweburmar susad. Deun, e-bab-Joacaz, Hazaelʼgi bila-ononaidgi Hazael-annik Israel-neggweburmar susgusad. Degi, Joás ilapaa Ben-Adadʼgi bila-onosad, bela egi nakwisadbiid. Degidbali, Joás neggweburmar gannar susad.
2KI 14:1 Joacaz-machi-Joás, birgabogus Israelʼgi-negsemaidgi, Joás-machi-Amasías, Judá-yar sealid.
2KI 14:2 Amasías birga-dulagwen-gakatar-nikadgi (25) yar sealid. Jerusalénʼgi birga-dulagwen-gakabakebak (29) yar sesad. E-nandi Joadánʼye-nugad, Jerusalénʼginedid.
2KI 14:3 Amasías, Bab-Dummad-asabin bela ibmar-nueganbi imaksad. Degi-inigwele, e-dad-dummad-David ibmar-imaksadyob imaksasulid. Ar ade, e-bab-Joás-ibmar-imaksayobi, ibmar-imaksamogad.
2KI 14:4 Amasías, bab-dummad-baidse-goled-aila-matusurmalad osulossulid, aga dulemar ibmar-ogumakleged, degi, ina-wawadikmalad, e-bab-dummadga-ibmar-ogumakleged-ailagi amba ukdii damalad.
2KI 14:5 Amasías nue-yar-sealidgi, dule-nuga-nikamalad e-bab-oburgwisgusmalad bela ogilosad.
2KI 14:6 Degi-inigwele, e-bab-oburgwismalad-e-mimmigandi ogilossulid. Ar ade, Bab-Jehová Moisés-Igar-Maidgi weyob igar-uksad: “Babgan e-mimmigan-ular burgosulid. E-mimmiganmoga e-babgan-ular burgosurmogad. Ar na e-isgusadba na dukin-dukin burgwemaloed.”
2KI 14:7 Amasías, Balu-Nebagi miliambe (10,000) Edom-dulemar-ogilosad, degi, Sela-neggwebur susad. Geb a-neggwebur Jocteelʼye nug-imaksad. Emi, we-garda-narmaklenaidse amba deyob nugad.
2KI 14:8 Ibagwengi, Amasías, Israel-e-rey-Joásʼse gayaburba-berbemalad barmisad. Joásʼde, Joacaz-e-machid, Jehú-wagwad. Weyob Amasías ega gayaburba-barmisad: “Anmar anbo-urwemalaga be dago.”
2KI 14:9 Geb Israel-e-rey-Joásʼdi, weyob Judá-rey-Amasías-abin-imaksad: “Ibagwengi, Líbano-yargi gagan-ikobiid-gwichid urwar-gwichidse gayaburba barmisad. Weyob ega sogsiid: ‘An-machiga be-sisgwa, be uke, na nikuega.’ Geb agi, Líbano-yalagi ibmar-durgan-ursilimalad-bukwad ainiargu, gagan-ikobiidgi bela annasmalad.
2KI 14:10 Ar be Edom-dulemargi be nakwisad, degi, abali be yeer-itoged. Degisoggu, be san-dummarba imake, degi, bur neggi-meremai be sae. ¿Ibiga, na be dukin, Judá-yarga naibid amibisunna?”
2KI 14:11 Degi-inigwele, Amasías, Joásʼba ibsassulid. Degisoggu, Joás, Bet-Semes-neggwebursik nadsunnad, Bet-Semesʼde Judá-yar-abargi-siid. Adi, agi Judá-e-reygi bila-onogega.
2KI 14:12 Judá-sordamar, Israel-sordamarse galakusad, bela e-neg-e-negse wakite duurmakdemalad.
2KI 14:13 Israel-rey-Joás, Bet-Semesʼgi Rey-Amasías-gasad. Amasíasʼde, Joás-e-machid, Ocozías-wagwad. Agine, Joás Jerusalénʼse naded, geb dali-dulatar-wilub (100) yawagak-Efraínʼye-nugad-akale, degi, Yawagak-Dikarye-nugadse galu-matusulid earisad.
2KI 14:14 Deginbali, Joás we-ibmar susbalid: Bab-Jehováʼse-goled-neggi ormar-bukwadi bela susad. Degi, manimar-bukwadi, Bab-Jehováʼse-goled-neggi-ibmar-ebulemalad-bukwadi bela susbalid. De-ukinbali, reyneggi mani-sabolegedgi-ibmarmar-bukwad bela susad. Degine, dulemar-gasa searbalid. Geb Samaria-neggweburse gannar nonigusad.
2KI 14:15 Joás ibmar-baigan-imaksadi, degi, e-gangued-oyosadi, degine, Judá-rey-Amasíasʼgi bila-onosadi, Israel-e-reymar-ibmar-imaksad-gardagi narmakar maid.
2KI 14:16 Israel-e-rey-Joás burgwisgu, Samaria-neggweburgi reymar-abargi diglesad. A-sorbali, e-machi-Jeroboam yar sesad.
2KI 14:17 Joacaz-e-machi-Joás-burgwisad-sorbali, Judá-e-rey-Amasías birgambe-gakatar (15) amba reyga-maigusad.
2KI 14:18 Amasías ibmar-baigan-imaksadi, Judá-e-reymar-ibmar-imaksad-gardagi narmakar maid.
2KI 14:19 Dulemar Jerusalén-neggweburgi Amasíasʼgi gwisguega igar amismalad. Geb degi, Amasíasʼdi, Laquis-neggweburse wakite gusad. Degi-inigwele, dulemar Laquis-neggweburse balimaksagusad, agine oburgwismalad.
2KI 14:20 Geb David-neggweburse Jerusalénʼse moligi searmalad. Geb e-babgan-abargi digsamalad.
2KI 14:21 Geb a-sorbali, Judá-dulemar, Azarías reyga omesismalad, adi, e-bab-Amasías-sorba yar-seegar. Deunni Azarías birgambe-gakanergwa (16) nikad.
2KI 14:22 Azarías, e-bab-burgwisad-sorba, Elat-neggwebur gannar-nudaksad, geb, Judá-dulemarga gannar uknonikid.
2KI 14:23 Joás-machi-Amasías, birgambe-gakatargus (15) Judá-yargi negsemaidgi, Joás-machi-Jeroboam, Israel-yar sealid. Samariaʼgi birga-dulabo-gakagwensak (41) yar sesad.
2KI 14:24 Jeroboam, Bab-Jehová-ibmar-abemaisulidi imaksad. Ar ade, Nabat-machi-Jeroboam Israel-dulemar-oichogega-imaksagusadgi gwen bangussulid.
2KI 14:25 Jeroboam Israel-yar-abingunaid gannar Hamat-neggwebur-doglemaid-akale, Arabá-demar-nomaidse omesnonikid. Ar igi Israel-e-Bab-Dummad-Jehová e-gayaburba-barsoged-Jonásʼba ibmar sogsagusa, deyob gusad. Jonásʼde, Amitai-e-machid, Gat-Hefer-neggweburginedid.
2KI 14:26 Ar Bab-Jehová, bela Israel-neggweburgi dulemar-gudidimalad, maiga-gudimalad, maiga-gudisurmalad, nue-wilebukwa daksad, dule gwen Israel-neggwebur-bendaked-nikasuli daksad.
2KI 14:27 Degi-inigwele, Bab-Jehová, Joás-machi-Jeroboamʼba Israel-dulemar-bendaksad. Ar ade, Bab-Jehová sogsagusad: “Napneggi Israel-nuga an osulogosurye.”
2KI 14:28 Bela Jeroboam e-ibmar-imaksadi, degi, ibmar-baigan-imaksadi, degine, e-gangued-oyosadi, deginbali, bila-onosadgi Damasco-neggwebur, degi, Hamat-neggwebur gannar Judá-neggweburga susgusadi, Israel-e-reymar-ibmar-imaksad-gardagi narmakar maid.
2KI 14:29 Degi, Jeroboam burgwisad. E-dadgan-Israel-e-reyga-megismalad-abargi diglesad. A-sorbali, e-machi-Zacarías yar sesad.
2KI 15:1 Jeroboam birga-dulagwen-gakaguglegus (27) Israelʼgi negsemaidgi, Amasías-machi-Azarías, Judá-yar sealid.
2KI 15:2 Azarías yar-seargu, birgambe-gakanergwa (16) nikad. Degi, Jerusalénʼgi birga-dulabo-gakambe-gakabo (52) yar sesad. E-nandi Jecolíasʼye-nugad, Jerusalénʼginedid.
2KI 15:3 Azarías, Bab-Jehová-asabin bela ibmar-nueganbi imaksad. Ar ade, Azarías e-bab-Amasías yar-sesadgii, yar sesmogad.
2KI 15:4 Degi-inigwele, bab-dummad-baidse-goled-e-aila-matusurmalad osulossulid. Degisoggu, amba agi dulemar e-bab-dummadga ibmar-ogumakaled ukdii damalad, degi, ina-wawadikmalad obupurmakdii damarbalid.
2KI 15:5 Degisoggu, Bab-Jehová, Azaríasʼga naibe-buna-yaa-maleged-boni uksad. A-ular, rey neg-bachikii megisgusad. Degisoggu, e-machi-Jotam reyneg-daknonisunnad, dummadga megnonikid. Degi, Rey-Azarías a-boni-nika burgwisad.
2KI 15:6 Azarías e-ibmar-imaksad-baigan, Judá-e-reymar-gardagi narmakar maid.
2KI 15:7 Degi, Azarías burgwisad. Geb e-dadgan-abargi David-neggweburgi diglesad. E-sorba, e-machi-Jotam yar sesad.
2KI 15:8 Azarías birga-dulagwen-gakambe-gakabaabakgus (38) Judáʼgi negsemaidgi, Jeroboam-machi-Zacarías Israel-yar sealid. Samariaʼgine, nii-walanergwa (6) yar sesad.
2KI 15:9 Zacarías, Bab-Jehová-asabin e-dadgan ibmar-isgana imaksayobi, imaksamogad. Igi Nabat-machi-Jeroboam, Israel-dulemar-oichogega imaksagusa, deyob, Zacarías ibmar imaksamogad. A-igargi gwen bangussurgusad.
2KI 15:10 Jabes-machi-Salum, Zacaríasʼgi gwisguedgi binsaalid. Degisoggu, dulemar-bukwad-wagab Zacarías-sabsur-imaksad, geb oburgwisad. Agine, Salum, rey-gan sunonikid, dummadga megnonikid.
2KI 15:11 Zacarías ibmar-imaksad-baigan, Israel-e-reymar-ibmar-imaksad-gardagi narmakar maid.
2KI 15:12 Igi Bab-Jehová, Jehúʼga ibmar sogsagusa, bela deyob gusad. Deunni, ega sogsa gusad: “Be-wagan, be-wagan-yokorginedse Israel-yalagi negseoye.”
2KI 15:13 Uzías birga-dulagwen-gakambe-gakabakebakgus (39) Judáʼgi negsemaidgi, Jabes-machi-Salum Israel-yar sealid. Salum unnila Samariaʼgi nii-wargwen yar sesad.
2KI 15:14 Ar ade, Gadi-machi-Manahem, Tirsa-neggweburgi-gudii Samaria-neggweburse nonikid. Agine, Manahem, Jabes-machi-Salumʼgi gwichigunonikid. Agi, Salum-oburgwisad. A-sorba, Manahem rey-gan sunonikid, dummadga megnonikid.
2KI 15:15 Salum e-ibmar-imaksad-baigan, degi, Zacarías-oburgwisgusad, bela Israel-e-reymar-ibmar-imaksad-gardagi narmakar maid.
2KI 15:16 A-ibagangine, Manahem, Tirsa-neggwebur-akale Tifsa-neggweburgi gwisgunonigusad. Ar ega yawagak-neggwebur egassurmarsoggu, bela e-ibmar-nikad e-ibe susad, bela dulemar-neggweburgi-gudidimalad, degine, neggwebur-dikarba-bukmalad oburgwissunnad. Deginbali, bela omegan gurgin-nikmalad-ibe, saban mare-mare imaksad.
2KI 15:17 Azarías birga-dulagwen-gakambe-gakabakebakgus (39) Judá-yargi negsemaidgi, Gadi-machi-Manahem, Israel-yar sealid. Samariaʼgi birgambe (10) yar sesad.
2KI 15:18 Manahem, Bab-Jehová-ibmar-abemaisulidi, Bab-Jehová-asabin imaksad. Ar ade, Manahem, Nabat-machi-Jeroboam Israel-dulemar-oichosgusadgi gwen bangussulid.
2KI 15:19 Manahem-ibagangi, Asiria-e-rey-Pul Israel-yargi gwisgunonikid. Degidgine, Manahem, Rey-Pulʼga mani nibir-milidulapaa-gakambe-gakabake (74,000) uksad. Adi, melle egi gwisguega, nabir amba Manahem na Israel-yar-semai guegar.
2KI 15:20 Manahem nabir we-mani-amiegala, igar-uksa gusad: Bela dule-mani-ibgana, mani-sibu-dulabo-gakambe-aidikued-wilub (50) neggweburga-mani-weleged ukmaloye, adi, Asiria-e-reyga ukegar. Degisoggu, Asiria-rey gannar nadsunnad, gwen neggweburgi-gwisgussuli naded.
2KI 15:21 Manahem reyga-maigu, e-ibmar-imaksad-baigan, Israel-e-reymar-gardagi narmakar maid.
2KI 15:22 Degine, Manahem burgwisad. E-dadgan-abargi diglesad. A-sorbali, e-machi-Pekaía yar sesad.
2KI 15:23 Azarías birga-dulabo-gakambegus (50) Judá-yargi negsemaidgi, Manahem-machi-Pekaía, Israel-yar sealid. Samariaʼgi birgabo yar sesad.
2KI 15:24 Pekaía, Bab-Jehová-ibmar-abemaisulidi Bab-Jehová-asabin imaksad. Pekaía, Nabat-machi-Jeroboam Israel-dulemar-oichosgusadgi nanasmogad, gwen agi bangussulid.
2KI 15:25 Degine, ega-sorda-daked-dummad-gwensak, Remalías-machi-Pekaʼye-nugad, Rey-Pekaíaʼgi-gwisguedgi binsaalid. Geb Galaadʼginmalad dulabo-gakambe-mergu (50) Pekaʼba nagusmalad. Agi Samaria-neggweburgi, reyneggine, Pekaía-oburgwismarsunnad. Deginbali, Argob, degi, Arié-oburgwismarbalid. Geb a-sorba, Peka rey-gan susad, dummadga megisad.
2KI 15:26 Pekaía, e-ibmar-imaksad-baigan Israel-e-reymar-ibmar-imaksad-gardagi narmakar maid.
2KI 15:27 Azarías birga-dulabo-gakambe-gakabogus (52) Judáʼgi negsemaidgi, Remalías-machi-Peka Israel-yar sealid. Samariaʼgi birga-dulagwen (20) yar sesad.
2KI 15:28 Peka, Bab-Jehová-ibmar-abemaisulidi, Bab-Jehová-asabin imaksad. Ar ade, Peka, Nabat-machi-Jeroboam Israel-dulemar-oichogega imaksagusadgi gwen bangussulid.
2KI 15:29 Peka, Israel-reyga-maiunni, Asiria-e-rey-Tiglat-Pileserʼye-nugadi we-neggweburmar sunoni gusad: Ijón-neggwebur, Abel-Bet-Maaca-neggwebur, Janoa-neggwebur, Cedes-neggwebur, Hazor-neggwebur, Galaad-neggwebur, Galilea-neggweburmar, degi, Neftalí-neggweburmarse-bakale, bela susad. Geb degi, Asiria-yarse dulemar-yogasaar-gales sesagusad.
2KI 15:30 Geb degine, Ela-machi-Oseas, Remalías-machi-Pekaʼgi gwisguedgi binsaalid. Degisoggu, a-dule, Peka-oburgwissunnad. A-sorbali, rey-gan susad, dummadga megisad. Deunni, Uzías-machi-Jotam, birga-durgwengus (20) Judáʼgi yar semaid.
2KI 15:31 Peka e-ibmar-imaksad-baigan, Israel-e-reymar-ibmar-imaksad-gardagi narmakar maid.
2KI 15:32 Remalías-machi-Peka, birgabogus Israelʼgi negsemaidgi, Uzías-machi-Jotam, Judá-yar sealid.
2KI 15:33 Jotam yar-seargu, deun, birga-durgwen-gakatar (25) nikad. Jerusalénʼgi birgambe-gakanergwa (16) yar sesad. E-nandi Jerusaʼye-nugad, Sadoc-e-sisgwad.
2KI 15:34 Jotam, Bab-Jehová-asabin bela ibmar-nueganbi imaksad. Igi e-bab-Uzías yar-sesa, deyobi Jotam yar sesmogad.
2KI 15:35 Jotam, Bab-Dummadse-goled-negga Yawagak-Matusulid ogwichisad. Degi-inigwele, bab-dummad-baidse-goled-aila-matusurmalad osulossulid. Agala, dulemar amba agi ibmar-ogumakar, degi, ina-wawadikmalad, e-bab-dummadga ibmar-ogumakleged-ailagi ukdii damalad.
2KI 15:36 Jotam e-ibmar-imaksad-baigan, Judá-e-reymar-ibmar-imaksad-gardagi narmakar maid.
2KI 15:37 A-ibagangine, Bab-Jehová, Siria-e-rey-Rezín, degi, Remalías-machi-Peka barmialid, adi, Judá-yargi gwisgumalagar.
2KI 15:38 Jotam burgwenonigua, e-dadgan-abargi e-dad-David-neggweburgi digsamalad. A-sorbali, e-machi-Acaz yar sesad.
2KI 16:1 Remalías-machi-Peka birgambe-gakaguglegus (17) Israelʼgi negsemaidgi, Jotam-machi-Acaz Judá-yar sealid.
2KI 16:2 Acaz birga-dulagwen (20) nikadgi yar sealid. Jerusalénʼgi birgambe-gakanergwa (16) yar sesad. Degi-inigwele, Bab-Jehová-asabin e-dad-David ibmar-nuegan-imaksadyob gwen ibmar-nuegan imaksasulid.
2KI 16:3 Acaz, aka bur Israel-e-reymar-isgusadba nanasad. Acaz, dulemar-yar-bamaladgined-e-isguedba ibmar-imakdii gusad, e-mimmise-bakar ogumakale e-bab-dummadga uksagusad. A-unni, Bab-Jehová Israel-dulemar-wagab, yar-bamalad-e-neggweburmar obachagusad.
2KI 16:4 Deginbali, Rey-Acaz yar-mullugangi, degi, bela sapi-dummagan-urba, e-bab-dummadga-ibmar-ogumakar-ukleged-ailamargi, ibmar-ogumakleged ukdii gusad, degi, ina-wawadikmalad obupurmakdii gusad.
2KI 16:5 Geb degi, Siria-e-rey-Rezín, degi, Israel-e-rey Remalías-machi-Peka, Rey-Acazʼgi-gwisguega Jerusalén-neggweburse aligusmalad. Bela neggwebur-ebilis bukusmar-inigwele, gwen akar imaksasurmalad.
2KI 16:6 A-ibagangi, Siria-e-rey-Rezín, Elat-neggwebur susad. Agine, Judá-dorgan-mamaidi, bela onilesad. Geb a-sorbali, Edom-dulemar Elat-neggweburgi ambikusmalad. Emi, we-garda-narmaklenaidse amba Edom-dulemar agi bukwad.
2KI 16:7 Rey-Acaz, Asiria-rey-Tiglat-Pileserʼse e-nuggi dulemar-barmisad, ega weyob sogsiid: “Andi be-maiga gued, unnila be-sogedba gudiid. Degisoggu, Siria-e-rey, degi, Israel-e-rey, angi gwisgunanaidgi be an-bendakdage.”
2KI 16:8 Degi, Rey-Acaz, Bab-Jehováʼse-goled-neggi-mani-bukwad, degi, olo-bukwad, susad. Deginbali, reyneggi ibmar-nuegan-bukwad, susbalid. Geb Asiria-e-reyga binsa barmisad.
2KI 16:9 Asiria-e-rey, Rey-Acaz ese-bendakleged-egisnaid itosad. Degisoggu, Damasco-neggweburgi gwichigudsunnad, degi, geb a-neggwebur sunonisunnad. Geb Rey-Rezín-oburgwismalad. A-sorba, Kir-neggweburse Damasco-dulemar-gasa sesmalad.
2KI 16:10 Degidgine, Rey-Acaz, Asiria-e-rey-Tiglat-Pileser-abinguega Damascoʼse naded. Rey-Acaz, Damasco-neggweburgi bab-dummadga-ibmar-ogumakleged-aila-sii-dakargu, dule-irwa-Bab-Jehováʼse-goled-Uríasʼse, bab-dummadga-ibmar-ogumakleged-aila-e-sobaled, degi, e-dakleged, sobar barmisad.
2KI 16:11 Geb degi, dule-irwa-Bab-Jehováʼse-goled-Urías, Bab-Jehováʼga-ibmar-ogumakar-ukleged-aila sobsad. Igi Rey-Acaz, ega aila-e-dakleged-sobar Damascoʼgi barmiargusa, deyob sobsad. Urías, Rey-Acaz-danikoed-idu, bela aila ogusad.
2KI 16:12 Rey-Acaz, Damasco-neggweburse-gudiid nonigu, Bab-Jehováʼga-ibmar-ogumakleged-aila-sii daknonikid. Degi, a-ailagine, Bab-Jehováʼga ibmar uknonikid.
2KI 16:13 Geb degi, Bab-Jehováʼga-ibmar-ogumakar-uklegedi, degi, Bab-Jehováʼga-ibmar-uklegedi uknonikid. Degine, vino, Bab-Jehováʼga-ibmar-ogumakleged-ailagi eosad, degi, gwenatigwar-guega ibmar-oburgwisad-e-ablis bomisbalid.
2KI 16:14 A-sorbali, Acaz ibmar-ogumakleged-aila esgoro-gordikidgi-sobaled Bab-Jehováʼse-goled-neg-asabin-siiddi, onirisad, geb Bab-Jehováʼga-ibmar-ogumakleged-aila-bini-sobarsiid, a-argan-nuedsik osisad. Degisoggu, Bab-Jehováʼse-goled-neg-asabin, Bab-Jehováʼga-ibmar-ogumakleged-aila bini sigisad.
2KI 16:15 A-sorba, Rey-Acaz, dule-irwa-Bab-Jehováʼse-goled-Uríasʼga, weyob igar-uksad: “Bab-Jehováʼga-ibmar-ogumakleged-aila-dummadgi, wakudar Bab-Jehováʼga-ibmar-ogumakleged be uko, degi, sedo be Bab-Jehováʼga-ibmar-ukleged be ukbalo. Degine, rey Bab-Jehováʼga-ibmar-ogumakar-ukmogoedi, degine, Bab-Jehováʼga-ibmar-ukleged-ukbaloedi be ukbaloed. Degisoggu, bela dule-neggweburginmalad Bab-Jehováʼga-ibmar-ogumakaled, degi, Bab-Jehováʼga-ibmar-ukleged ukbalo, degine, vinoʼmar, we-ailagine-ukmaloed, be ukoed. Geb degine, Bab-Jehováʼga-ibmar-ogumakleged-ailagi, ibmar-ogumakar-ukleged-e-ablis be eobalo, degi, bela Bab-Jehováʼga-ibmar-dula-ukleged-e-ablis be eobalo. Bab-Jehováʼga-ibmar-ogumakar-ukleged-aila-esgoro-gordikidbi sobaleddina, Bab-Jehováʼse idakega anbi an ebugoed.”
2KI 16:16 Dule-irwa-Bab-Jehováʼse-goled-Urías, Rey-Acaz ega-igar-uksadba imaksad.
2KI 16:17 Geb a-sorbali, Rey-Acaz, argan-enuked-bormo-gordikid-e-gan-madare-madare-nanaid bela sike-sike imaksad. Geb, amar-birgi argan-enuked-dii-simalad odesad. Deginbali, moli-bebe-nikad-esgoro-gordikidgi-sobarmalad-birgi dii-sied-dummad-siid odesbalid, geb akwa-sobaled-birgi sisad.
2KI 16:18 Rey-Acaz, Asiria-e-rey nabir-obinsaegala, Bab-Jehováʼse-goled-neggi neg-ubeb-naid osulosad. Ar ade, obunnoged-ibagi ambikuega sobsagusmalanad. Deginbali, magaba rey-doged-e-yawagak-siid, osulosbalid.
2KI 16:19 Acaz, ibmar-imaksad-baigan, Judá-e-reymar-ibmar-imaksad-gardagi narmakar maid.
2KI 16:20 Degi, Rey-Acaz burgwisad. E-dadgan-abargi David-neggweburgi diglesad. A-sorbali, e-machi-Ezequías yar sesad.
2KI 17:1 Acaz birgambe-gakabogus (12) Judáʼgi negsemaidgi, Ela-machi-Oseas, Israel-yar sealid. Samariaʼgi birgabakebak (9) yar sesad.
2KI 17:2 Oseas, Bab-Jehová-ibmar-abemaisulidi, Bab-Jehová-asabin imaksad. Degi-inigwele, Oseasʼdi, Israel-e-reymar-megisnanaedyob nue-isgussulid.
2KI 17:3 Asiria-dulemar-e-rey-Salmanasar, Rey-Oseasʼgi bila-onosgusad. Salmanasar, Oseasʼgi nakwisgua, e-sogedba-ibmar-imakega Oseas-imaksad. Degi, neggwebur-bennukega-mani-weledaedi, Rey-Oseas bennukega imaksabalid.
2KI 17:4 Ibagwengi, Asiria-e-rey, Oseas-egi-aibinbied magar-daknonikid, ar ade, eba bar-ibmar imaksulid. Degine, Oseas, Egipto-dulemar-e-rey-Soʼye-nugadse e-nuggi e-sorda-dummagan barmisad. Deginbali, birga-irba neggwebur-bennukle-daedi bar bennuksurbalid. Deyob Asiria-e-rey daksagua, Oseas-ganaega dulemar-barmisad. Geb, Oseas-gasgu esgaryagi meted.
2KI 17:5 Agine, Asiria-e-rey bela yar-nanaidgi urwedgi-dognonigusad. Geb Samaria-neggweburse nadegusbalid, agi birgapaa neggwebur-ebilis bukusmalad.
2KI 17:6 Rey-Oseas birgabakebakgus (9) yar semaidgi, Asiria-e-rey, Samaria-yar sunonikid. Degi, Asiria-rey Israel-dulemar-gasa e-yarse sesagusad. Geb Asiria-rey, Israel-dulemar Gozán-neggweburgi urbisad. Agine Habor-diwar-maid Halahʼye-neg-nugadgi oambikusad. Degi, Medo-dulemar-yargi oambikusbalid.
2KI 17:7 Ar Israel-dulemar e-Bab-Dummad-Jehová Egipto-yargi Rey-Faraónʼse-wilebukwa-e-onosgusad-akar Bab-Jehováʼgi isgunonimalad. Ar Israel-dulemardi bab-dummagan-baiganse gordii gusmalad.
2KI 17:8 Degi, Israel-dulemar, dule-bab-wissurmalad-e-daedba nanadii gusmarbalid. A-ular, Bab-Jehová, we-dule-bab-wissurmaladi isdar-nanaedba ononnos gusad. Deginbali, Israel-dulemar, e-reymar baid-igar-isgana-odosadba nanadii gusmarbalid.
2KI 17:9 Israel-dulemar, e-Bab-Dummad-Jehováʼgi dukuar ibmar-isgana imaksamalad. Israel-dulemar na ambikudapdamaladgine nakuleged-negmar-akale, neggweburmar-gandik-bukwadse, bab-dummad-baidse-goled-aila-matusulid sobdamalad.
2KI 17:10 Degi, yar-mullugangi, bela sapi-dummagan-urba, Asera-wagar-wilubmar sobar-sobar ogwichismalad.
2KI 17:11 Degine, bela bab-dummaganga ibmar-ogumakar-ukleged-ailamargi, ina-wawadikmalad obupurmakdii gusmalad. Ar ade, dulemar-bamalad-nanadiidba deyob imaksamalad. Deunni, Bab-Jehová Israel-dulemar-wagab a-dulemar e-neggweburgi onisgusad. Ar ade, dulemar bela-belad ibmar-isgana imaksamalad. Abali, Bab-Jehová-oulusgusmalad.
2KI 17:12 Ar ade, ibmar-bab-dummaganyob-imaklegedse gordii gusmalad. Bab-Jehová ega sogsa gusad: “Melle bab-dummaganyob-imakleged-nug-odummodii be gumaloye.”
2KI 17:13 Agala, Bab-Jehová, Bab-Dummad-gayaburba-barsogmaladba, degi, dule-yoedse-ibmar-guoed-sogmaladba, Israel-dulemarga, degi, Judá-dulemarga ibmar sogsa gusad: “Melle igar-isganaba bar be nanamar. An-Igar-Islidik-Mesisadba, degi, An-Sogsadba be ibsamar, degine, an be-dadganga Negseleged-Igar-uksadba be nanamar. Deyobi, an bemarga an-maigan-anga-gayaburba-barsogmaladba ibmar sogsad.”
2KI 17:14 Degi-inigwele, ar emar Bab-Dummad-sogedba ibsassurmalad, aka e-dadgan e-Bab-Dummad-Jehováʼba uayasuli-nanadii-gusmaladyob nanadii gusmarmogad.
2KI 17:15 Bab-Dummad-Igar-uksad, degi, Bab-Dummad-ega-Ibmar-Sogsad obachamalad. Deginbali, Bab-Dummad-Dadganbo-Igar-Mesisad obachamarbalid. Nuchumar-ib-nuedsulid-nug Bab-Dummad-nugyobi odummosmalad, degidbali, amaryobi ibmar-nuedga be gunonisurmalad. Ar Bab-Jehová ega sogsa gusad, dule-bamalad-damaladyob, melle be damaloye. Degi-inigwele, dule-bamalad-daedba nanadii gusmalad.
2KI 17:16 Bela e-Bab-Dummad-Jehová-Igar-Mesisadba ibsassurmalad. Degi, moli-bebe-nikad-walabo esgoro-gordikidgi sobsamalad, degine, bab-dummad-bundorga-imakleged-Asera-wagar-wilub sobsamarbalid. Geb bela bab-dummadyob ibmar-nibneggi-nanaid-nug odummosmalad, degi, bab-dummadyob-imakleged-Baal-nug odummosmalad.
2KI 17:17 Israel-dulemar na e-masmala, degi, e-bunamala e-bab-dummadga, soogi-ogumakar uksa gusmalad. Degine, nerganse-ibmar-wisguega ese egisdii gusmarbalid. Deginbali, dule-ibmar-guoed-iduakwaa-sogedse ibmar-egisdii gusmalad. Bela-belad ibmar-isgana Bab-Jehová-asabin imaksamalad. Agidbali, Bab-Jehová-nue-oulusmalad.
2KI 17:18 Degisoggu, Bab-Jehová, bela-belad Israel-dulemargi uludsunnad, degi, e-asabin na ononnossunnad, unnila Judá-waganbi napi ambikudapid.
2KI 17:19 Degi-inigwele, Judá-dulemarmoga, e-Bab-Dummad-Jehová-Igar-Mesisadba ibsassurmarmogad, aka Israel-dulemar-ibmar-imaksadba nanasmarmogad.
2KI 17:20 A-ulale, Bab-Jehová bela Israel-wagan obachasunnad, nue-naibi-itogega imaksad, e-isdarmaladga urmaksad, Bab-Dummad na e-asabinni dulemar-ononnosad.
2KI 17:21 Bab-Dummad, David-wagangi Israel-dulemar obachagu, Israel-dulemar, Nabat-machi-Jeroboam e-reyga omesisgusad. Ar Jeroboam Israel-dulemar Bab-Dummad-Igargi-banguega imaksa gusad, degi, nue-dummad-isguega imaksa gusbalid.
2KI 17:22 Israel-dulemar Jeroboam-isgusgusayobi nanasmalad, bipisaale gwen a-igargi bangussurmalad.
2KI 17:23 Degisoggu, Bab-Jehová na Israel-dulemargi bangusad. Ar igi e-maigan-e-gayaburba-barsogmaladba sogsagusa, deyobi imaksad. Deyobi, Israel-dulemar e-yargi Asiria-yarse gales selesgusad. De-akale, emi we-garda-narmaklenaidse amba agi bukmalad.
2KI 17:24 Asiria-e-rey, Israel-dulemar-muchub Samaria-neggweburmargi dulemar-urbegala, wemar-seali gusad: Babiloniaʼginmalad, Cutaʼginmalad. Avaʼginmalad, Hamatʼginmalad, degi, Sefarvaimʼginmalad. Asiria-e-rey wemala Samariaʼgi, degi, e-neggwebur-baigangi oambikusad.
2KI 17:25 Dulemar gebe-ambikudgua, gwen Bab-Jehová-nug odummossurmalad. Degidbali, Bab-Jehová achumigur-nono-wawaadmar egi barmiar gusad. A-achumigurmar dulemar-oburgwemai gusad.
2KI 17:26 Geb degi, Asiria-e-reyga weyob sokarmalad: “Be, dulemar Samaria-neggweburgi-ambikuega-be-sealidi, neggwebur-e-Bab-Dummad-Igar-Maidi wissurmalad. A-ulale, a-Bab-Dummad achumigur-nono-wawaadmar dulemar-oburgwega barmialid.”
2KI 17:27 Geb Asiria-e-rey deyob itosgua, igar-uksad: “Bemar dule-irwa-Bab-Dummadse-goled-gwensak Samaria-yargi be gasa-seargusadi, gannar be ase barmido, adi, neggwebur-e-Bab-Dummad-Igar-Maidgi dulemar-odurdakegar.”
2KI 17:28 Degisoggu, dule-irwa-Bab-Dummadse-goled-gwensak, Samaria-neggweburgi gales-seleargusadi, Betel-neggweburgi megnonikid. Agine, Bab-Jehová-nug odummolegedgi, dulemar-odurdakded.
2KI 17:29 Degi-inigwele, bela we-dulemala, e-neggwebur-mamaidgi bab-dummadyob-imaklemalad egad-egad na sobsamalad. Geb Samaria-dulemar, bab-dummad-baidse-goled-neg-matusurmalad-sobsamaladgi, a-bab-dummadyob-imaklemalad urbismalad.
2KI 17:30 Babiloniaʼginmalad e-bab-dummad-Sucot-Benot-wagar-wilub sobsamalad. Cutaʼginmaladdi, e-bab-dummad-Nergal sobsamarmogad. Hamatʼginmaladdi, e-bab-dummad-Asima sobsamarmogad.
2KI 17:31 Avaʼginmaladdi, e-bab-dummad-Nibhaz, degi, e-bab-dummad-Tartac sobsamarmogad. Sefarvaimʼginmaladdi, e-bab-dummad-Adramelec-nug-odummogega, degi, e-bab-dummad-Anamelec-nug-odummogega e-mimmigan soogi-ogumakar uksamalad.
2KI 17:32 A-ukinbali, ar we-dulemar-Samaria-yargi-ambikunonimaladi Bab-Jehová-nug odummodimalan-inigwele, e-bab-dummad-nug odummodimarbalid. Agala, na emala dule-irwa-bab-dummadse-gormaladga e-dulemar-onugsasmalad, adi, bab-dummad-baidse-goled-neg-matusurmaladgi ibmar-ogumakleged-ailagi ibmar-ogumakar ukegar.
2KI 17:33 Ar Bab-Jehová-nug odummodidamar-inigwele, e-bab-dummad-nug odummodii damarbalid, ar igi na gusgu e-daedba e-yar-danikidgi na imakdamaladyob, imakdamalad.
2KI 17:34 Emi-iba garda-narmaklenaidse amba idu-damaladyob nanabukmalad. Bab-Jehová-nug odummosurmalad, degi, Bab-Dummad-Igar-Sogsadba nanabuksulid. Degine, Bab-Dummad-Igar-Uksadba, degi, Bab-Dummad-Igar-Maidba nanabuksulid. A-ukinbali, Bab-Jehová-Igar-Islidik-Mesisadba nanabuksurmarbalid. Ar Bab-Jehová, Jacob, Israelʼye onug-imaksagusad, a-e-wagangala igar uksagusanad, adi, eba nanaegar.
2KI 17:35 Bab-Jehová, Israel-dulemar-ebo igar-mesisgu, ega igar uksagusad: “Melle bab-dummagan-baigan-e-nug be odummogo, degi, melle e-asabin dulluu be imakmalo, degine, melle ega be ibmar imakmarbalo, deginbali, melle ega ibmar-ogumakar-ukleged be ukmarbalo.
2KI 17:36 Unnila Bab-Jehová-Egiptoʼgi-e-gangued-gandikidba-bemar-onosadbarbi be dobee nanamalo. A-nugbi be odummomalo, degine, agarbi ibmar-ogumakar-ukleged be ukmalo.
2KI 17:37 A-ukinbali an bemarga Igar-Sogsamaladba, Igar-Uksamaladba be nue nanamalo. Degine, Negseleged-Igarmar-an-Uksad, degi, an-Igar-Islidik-Mamaid, nue be akwemalo, degisadegu eba be nue nanamalo. Degi, melle bab-dummagan-baiganse-gormalo.
2KI 17:38 Melle an bemarbo igar-mesisad be iemalo, melle bab-dummagan-baigan-nug odummomalo.
2KI 17:39 Unnila bemar-Bab-Dummad-Jehová-nugbi be odummomaloed. Ar ani, be-isdarmaladgi an bemar-bendakoed.”
2KI 17:40 Degi-inigwele, we-dulemar-Samaria-yargi-ambikunonimaladi, itossurmalad. Aka bur gusgu e-damaladba nanabukwa gusmalad.
2KI 17:41 Deyobi, we-dulemar, Bab-Jehová-nug odummodii gusmalad, bab-dummagan-baigan-nug odummodii gusmarbalid. Emi we-garda-narmaklenaidse amba e-masmala, degi, e-wagan, e-dadgan-nanasmaladyob, nanabukwa gusmarmogad.
2KI 18:1 Ela-machi-Oseas birgapaagus (3) Israelʼgi negsemaidgi, Acaz-machi-Ezequías Judá-yar sealid.
2KI 18:2 Ezequías birga-durgwen-gakatar-nikadgi (25) yar sealid. Jerusalénʼgi birga-durgwen-gakabakebak (29) yar sesad. Ezequías-e-nandi Abiʼye nugad, Zacarías-e-sisgwad.
2KI 18:3 Ezequías, bela Bab-Jehováʼga ibmar-nueganbi imaksad. Ar igi e-dad-dummad-David ibmar imaksa, deyobi Ezequías ibmar imaksamogad.
2KI 18:4 Ezequías, bab-dummad-baidse-goled-aila-matusurmalad, bela osulosad. Degine, akwa-islidikmalad mamarisad, degi, bab-dummad-bundor-Asera-wagar-wilub-sobaled omukusbalid. A-ukinbali, Ezequías, Moisés-esgoro-gordikidgi naibe-wilub-sobsagusadi omukusbalid, ar ade, Israel-dulemar bab-dummadyobi imakdimalad. Ar ega ina-wawadikid obupurmakdidamalad, a-naibe-sobaled Nehustánʼye bismalad. A sogleged, esgoro-gordikid-e-goaye.
2KI 18:5 Rey-Ezequías, Israel-e-Bab-Dummad-Jehováʼgi bengussulid. Judá-yargi reymar-baigan-megisnanaedi, Rey-Ezequíasʼyobi megissurnanaed. Degine, Ezequías-sorba amba reymar-baigan-megisnanaedi ayobi megissulid.
2KI 18:6 Ezequías Bab-Jehováʼga inniki nanasad, degi, gwen egi aibachasulid. Bab-Jehová-Moisésʼga-Igar-Islidikid-uksadba nanasad.
2KI 18:7 Bab-Jehová, Ezequíasʼba gudiguad. Degisoggu, Ezequías bia nadesogele, bela ega ibmar-onasgumai imaksad. Ibagwengi, Rey-Ezequías, Asiria-e-reygi gwisgualid, Asiria-e-rey-sogedba bar ibmar imaksasulid.
2KI 18:8 Degine, Rey-Ezequías, bila-onogedgi Filistea-dulemargi nakwisad, nakuleged-negmar-bukwadgi, neggwebur-sakdigar-siidse, Gaza-yarse obichad.
2KI 18:9 Rey-Ezequías birgabakegus Judáʼgi negsemaidgi, Asiria-e-rey-Salmanasar, Samariaʼgi-gwichiguega neggwebur-ebiris ambikunonigusad. Deunni, Ela-machi-Oseas, Israelʼgi birgaguglegus (7) negsemamogad.
2KI 18:10 Geb Asiria-e-rey, birgapaagi Samaria-neggwebur susa gusad. Deunni, Ezequías birganergwagus (6) negsemaidgined. Degine, Israel-e-rey-Oseasʼdi, birgabakebakgus (9) deun negsemaimogadgined.
2KI 18:11 Geb agine, Asiria-e-rey, Israel-dulemar-gasa Asiria-yarse sesagusad. Geb Gozán-neggweburgi, Habor-diwar-maidgi Halahʼye neg-nugadgi oambikusad. Deginbali, Medo-neggweburmargi Israel-dulemar-oambikusbalid.
2KI 18:12 Weyob neggusadi, ar ade, Israel-dulemar Bab-Jehová-itossurgusmalad, e-Bab-Jehová-Igar-Islidik-Mesisadgi annasmalad. Ar Bab-Jehová-mai-Moisés ega Igar-sogsagusad itossurmalad, a-sogedba gwen nanassurmalad.
2KI 18:13 Rey-Ezequías birgambe-gakabakegus (14) Judáʼgi negsemaidgi, Asiria-rey-binid-Senaquerib, Judá-yargi bela neggweburmar-sakdigar-bukwadgi gwisgunonikid, bela a-neggweburmar susad.
2KI 18:14 Geb degidgine, Judá-e-rey-Ezequías Laquis-neggweburse Asiria-e-rey-gudiidse weyob gayaburba barmisad: “An be-bennuksasulidba, an begi dummad-nosad. Be an-yargi noe. Ar igi-mani be angi gabie, an be-bennukoed.” Geb Asiria-e-rey, Judá-Rey-Ezequíasʼse mani nibir-milidulagwen-gakabo gaka dulataled-ilatar (22,500) egichisad, degi, or nibir-milibo gaka dulataled-ilabo gaka dulabo-gakambe (2,250) egichisbalid.
2KI 18:15 Geb degine, Rey-Ezequías Bab-Jehováʼse-goled-neggi manimar-bukwad, degi, reyneggi mani-sabolegedgi mani-bukwad, bela Rey-Senaqueribʼga uksad.
2KI 18:16 Aginbali, Rey-Ezequías Bab-Dummadse-goled-neg-yawagakgi-ormar-nasiksadi, degi, yawagak-abgamalad-orbiid-nasiksabalidi bela wawannisad. Geb Asiria-e-reyga a-ibmarmar uksabalid.
2KI 18:17 A-sorbali, Asiria-e-rey, e-sorda-bila-onomalad-e-dummad, degi, dule-dummagan-e-dummad, degine, dule-nog-dakmalad-e-dummad, sorda-bila-onomalad-abargi barmialid. Adi, Jerusalénʼgi Rey-Ezequíasʼbo sunmakegar. Geb Laquis-neggweburgi armalad, Jerusalén-neggweburse. Jerusalén-neggwebur-mosmargu, niba dii-sied-e-gammu-yoid-dikarba ambikudapmalad. Bia morsan-odoleged-neg-sii, a-igarba ambikudapmalad.
2KI 18:18 Geb Rey-Ezequíasʼbina gochamalad. Degi-inigwele, rey ese nadsurgusad. E-neg-dakdiid-Hilcías-machi-Eliaquim Asiria-sordamarse nonikid. Degi, Garda-narmaked-Sebna, degi, rey-nuggi-barmilealed-Asaf-machi-Joa, Asiria-sordamarse nonimalad.
2KI 18:19 Degi, Asiria-sorda-dummad amarga sogded: —Rey-Ezequíasʼga sogmalo, weyob Asiria-dulemar-e-rey-gandik-maid sogye: ‘¿Ar doagi be nue bensurye be soge?
2KI 18:20 ” ’Bede soged, bila-onoleged an nue-wisye, degi, sorda-bila-onomalad an nue nikbarye.’ ”Ar unnila binsa gayaginbi be ee-gordiid. ¿Ar be doagi bensurye be soge, emide be angi gwisgubied?
2KI 18:21 ”An be-dakedi, be Egiptoʼgi bensur an be-dakdo. We-Egipto-yar, degi, e-rey, masar-darga-dargadyob gued. Ar agi dule akaele, e-swiswidikidgi ese makleged. Deyobi, dulemar Egiptoʼgi-bensurmaladi, degi, e-rey-Faraónʼgi-bensurmaladi, gwen bendaklegosulid, aka egi aibinoed.”
2KI 18:22 Asiria-sorda-dummad sogdebalid: “Be anga sogmalale: ‘An-Bab-Dummad-Jehováʼgi anmar bensurye.’ ”¿Ar degitega, Ezequías we-Bab-Dummad-e-aila-matusurmaladde, degi, e-ibmar-ogumakar-ukleged-ailamarde, e-ibe obelossursi? ”¿Judáʼginmaladga, degi, Jerusalénʼginmaladga sogsasursi: ‘Unnila we neg-matusulidgi Jerusalén-neggweburginbi Bab-Dummad-nug-odummomaloye?’
2KI 18:23 ”Emisgindi, an bega sogsun, an-dummad-Asiria-e-rey-ebo be igar-omessun: Be anga dule-moligi-nanamalad amiele, an bega milibo (2,000) molimar ukoed.
2KI 18:24 ”Amba be Egipto-e-moli-urmargi, degi, e-sorda-moligi-sii-urwemaladgi be bensulile, amba an-dummad-e-sorda-bur-nug-bipigwad be osikirmakosulid.
2KI 18:25 ”¿Ar andega wese, Bab-Jehová-sogedba bemar-obelogega danisur be an-dake? Eye, ar Bab-Jehová anga sogsad: ‘We-yarse be naoye, be we-yar obelogoye.’ ”
2KI 18:26 Geb degi, Hilcías-machi-Eliaquim, degi, Sebna, degine, Joa, weyob Asiria-e-sorda-e-dummad-abin sogdemalad: —Mer anmarga be Hebreo-gayaba sunmake. Anmarga wis Arameoʼgayaba be sunmake. A-gaya anmar mag-itomalad. Ar ade, dulemar-galu-matusulidgi-bukmalad anmar-itobukwad.
2KI 18:27 Asiria-e-sordamar-e-dummad ega sogded: —¿Ar an-dummadde, unnila bemargarbi, degi, be-dummadgarbi ibmar-sogega an-barmiarsi? ¿Dulemar-galu-matusulidgi bukmaladgardi an-barmiarsuli? Ar bemaryobi, we-dulemar na dukin e-ibmar-isgana gunmaloed, degi, e-winsus na gobbaloed.
2KI 18:28 Geb degine, Asiria-e-sordamar-e-dummad gwichibin imaksad. Geb binnasuli Hebreo-gayaba goted: —Asiria-e-rey-gandik-maid-e-gayaburba nue itomalo.
2KI 18:29 Weyob Asiria-e-rey soged: ‘Melle Ezequíasʼse be yamolemaloye. Ezequías gwen bemar-bendakosurye.
2KI 18:30 Ezequías bemarga sokardibele: Bab-Jehováʼgi mer be bengumaloye. Ar Bab-Jehová Asiria-e-reygi anmar-bendakoye. Asiria-e-rey we-neggwebur obelogosurye. Melle be Ezequías-itomalo.’
2KI 18:31 ”Weyobi, Asiria-e-rey soged: ‘Anbo bogidik-igar-omesmar, anse be dagmar. Geb degi, bemar gannar be-nainumargi uva-naid be gundii gumaloed, degi, higuera-sapi-e-san be gundii gumarbaloed, degine, bemar be-dii-yaa-akwisadgi, na be dii-gobdigumaloed.
2KI 18:32 Geb sorba yar-soggwense an bemar nidoed, a-yala bemar-yaryobid, ase an bemar nidoed. A-yargi orosgi-dakleged yaisulid, degi, vino yaisurbalid. Madu-yaisulid, uva-nainumar-bukidarad, olivo-gwallu-yaisulid, degine, achanis-yaisur nikabalid. Agine bemar nued-gudii gumaloed, be gwen burgosurmalad. ” ’Melle be Ezequías-itomalo. Ar yamo be-yardakmaloed, Bab-Jehová anmar-bendakoye bemarga sogdagoed.’
2KI 18:33 ¿Ar dulemar-bamalad-e-bab-dummadde, Asiria-e-reygi e-dulemar-bendaksasi?
2KI 18:34 Degite, Hamat-neggwebur-e-bab-dummad, Arfad-neggwebur-e-bab-dummad, Sefarvaim-neggwebur-e-bab-dummad, Hena-neggwebur-e-bab-dummad, degi, Iva-neggwebur-e-bab-dummad, ¿we-bab-dummagan Samaria-neggwebur angi obinega imaksasi?
2KI 18:35 Degite, ¿bitid-dulemar-bamalad-e-bab-dummad, e-yar bendaksa be dake? ¿Ar we-bab-dummagan Jerusalén-neggwebur angi obinega imaksasi? Imaksasurgusad.”
2KI 18:36 Degine, dulemardi abin boo-bukusad, bipisaale gwen-abin-imaksasurmalad. Ar ade, Rey-Ezequías weyob ega igar uksad: “Melle be abin-imakmalo.”
2KI 18:37 Geb degine, reyneg-dakdiid-Hilcías-machi-Eliaquim, degi, garda-narmaked-Sebna, degi, rey-nuggi-barmilealed-Asaf-machi-Joa, mor-dubamakagwale Rey-Ezequíasʼse nadmalad, adi, oyogega, emarde bukib-binsamarye. Geb bela Rey-Ezequíasʼga Asiria-e-sorda-dummad-ega-ibmar-sogsadi sogdapmalad.
2KI 19:1 Rey-Ezequías deyob ega ibmar-soge itosgua, e-mor-yoid na siir-siir imaksad. Geb wile-itoged-mor yosad, degi, Bab-Dummadse-goled-negse geb naded.
2KI 19:2 Degine, Rey-Ezequías, e-neg-dakdiid-Eliaquim, degi, ibmar-gusmalad-narmaked-Sebna, degine, dule-irwa-Bab-Dummadse-gormalad-sergan, wile-itoged-mor yoyoi, Amoz-machi-Bab-Dummad-gayaburba-barsoged-Isaíasʼse barmisad, adi, daknamalagar.
2KI 19:3 Amar ega sogdapmalad: “Weyob Rey-Ezequías soged: ‘Emi-iba-naidi, suli-suli-itoleged-iba naid, sabsur-odurdakleged-iba naid, degine, bingeguleged-iba naid. Ar igi sikwi we-napnegse-aidesokalile, na ome e-abagan-nolloo naddae, deyob emi-iba naid.
2KI 19:4 Bitigine, be-Bab-Dummad-Jehová, Asiria-sorda-daked-dummad-e-ibmar-sogsadi bela itosana gadin. Ar ade, e-dummad-Asiria-e-rey, Bab-Dummad-Dula-Maidgi dodoar-sunmakega barmiar gusad. Bitigine, be-Bab-Dummad-Jehová, we-dule-gayaburba-itosadba sabsur-odurdaksunnana gadin. Emide, Israel-dulemar-napi-gudimaladga be Bab-Dummadse gorsun.’ ”
2KI 19:5 Rey-Ezequíasʼga-arbamalad Isaías-dakapmargu,
2KI 19:6 Isaías ega sogsa gusad: “Weyob be-dummad-Ezequíasʼga be sogmalo: ‘Bab-Jehová weyob sogye: Be, Asiria-rey-e-maigan e-ibmar-soge-itosadgine, nue angi ise-yolegar sunmaksadgine, mer-be gwayo.
2KI 19:7 Ani, an Senaqueribʼse gayaburba-isgana-warmakega an imakoed, adi, gannar e-yarse naegar. Geb agine es-suidgi oburgwemalaga an imakoed.’ ”
2KI 19:8 Asiria-sorda-idued-e-dummad, Asiria-e-rey Laquis-neggweburgi-mai nadye wisguargu, balimakde gusad. Agine, Asiria-e-rey, Libna-neggweburgi bila-ononai dakdapid.
2KI 19:9 Geb agine, Rey-Senaquerib wisgualid, Etiopía-dulemar-e-rey-Tirhaca, ebo bila-onogega egi daniye. Geb gannar Rey-Ezequíasʼse dule-gayaburba-berbemalad barmisad.
2KI 19:10 Adi, ega sogega: “Judá-e-rey-Ezequías: ‘Be, mer be be-Bab-Dummadgi-bensulidse be yamolego, ar bega sokalir: Asiria-e-rey Jerusalén-neggwebur-suosurye.
2KI 19:11 Ar be Asiria-e-reymar yarmar nue obelodii-gusadi nue-itodiid. Degite, ¿Ar bedi unni-san-onogo na be itosi?
2KI 19:12 Ar an-babgan, Gozán-neggwebur, Harán-neggwebur, Resef-neggwebur, Edén-wagan Telasar-neggweburgi-bukwad obelosgusad. Degite, ¿e-bab-dummagan bendaksa be daksi?
2KI 19:13 Deginbali, Hamat-dulemar-e-rey, Arfad-dulemar-e-rey, Sefarvaim-dulemar-e-rey, Hena-dulemar-e-rey, degine, Iva-dulemar-e-rey, gwen e-dulemar-bendaksurmogad.’ ”
2KI 19:14 Degine, Ezequías, dule-gayaburba-berbemalad-abin garda susad, geb absosad. Geb a-sorbali, Bab-Jehováʼse-goled-negse-naded. Agine Bab-Jehová-asabin garda nallaa imaksad.
2KI 19:15 Geb degi, Ezequías, Bab-Jehováʼse goted: “Bab-Jehováʼye Israel-dulemar-e-Bab-Dummadye, baliwiturmar-wagar-darbakegwad-abargi be negsemaid. Bebi unnila we napaneg-naid e-Bab-Dummadga gued. Be nibneg, degine, napneg, be nasiksad.
2KI 19:16 Bab-Jehová nue wis be an-itoge. An-ibmar-soged be wis-itoge. Be anmargi ibmar-gunaid nue be dake. Senaquerib begi ise-gwisguar anga gayaburba-barmialidi, nue be itoge.
2KI 19:17 ”Bab-Jehováʼye, ar nabirid, Asiria-e-reymar we-yarmar, degi, e-napamar bela obelos gusad.
2KI 19:18 E-bab-dummadyob-imaklemalad bela soogi ogumaksa gusmalad. Ar ade, bab-dummagansurmalad, unnila suar-sobarmaladid, degi, akwa-sobarmaladid. Ar we-ibmar dulemar sobsamaladid. A-ulale, bela obelosgusmalad.
2KI 19:19 Emigindi, Bab-Jehová-anmar-Bab-Dummad, we-dulegi wis be anmar-bendake, adi, dulemar bela we-napneggi be-wisgumalaga, unnila bebi Bab-Jehová wargwenna Bab-Dummadga maiye.”
2KI 19:20 Geb degi, Amoz-machi-Isaías, Ezequíasʼse weyob gayaburba barmisad: “Bab-Jehová Israel-dulemar-e-Bab-Dummad weyob soged: ‘Be anga Asiria-e-rey-Senaqueribʼgi, ibmar sogsadi, bela an be-itosye.’
2KI 19:21 Bab-Jehová weyob Rey-Senaqueribʼnik sogsad: ‘Senaquerib, Siónʼginmaladi bai be-daksurmalad, begi dodomalad. Jerusalénʼginmalad wakite be-dakmargu, bega nono-ege-ege imakmalad.
2KI 19:22 Senaquerib, ¿Doagi be isdar sunmaksa? ¿Doagi be ise-dodoar sunmaksa? ¿Doagi urwedgi be ibmar-sogsa? ¿Doa-abin san-dummarba be itosa? Ar be Israel-e-Bab-Dummad-Isligwalednik, isdar be sunmaksad.
2KI 19:23 Bega gayaburba-berbemaladba angi ise-yolegar be sunmaksad. Senaquerib, weyob be sogsad: An-moli-ur-bila-onomaladgi Líbano-yar-dummagan-birgi an nakwisye. E-urwarmar-dummagan-bubukwadi, ani, an ei-siksa-nanaye. Degi, e-baryawarmar yeerdaklegwismaladi an bela immisye. Dukumalad-neg-dikasur-bukwadi, ei an bela wisgusye. Degine, e-sapi-dummagan-bukwadi, ei an bela wisgusbarye.
2KI 19:24 Dule-baigan-yargi, ani an dii-yaamar osisye. A-dii, an gobsaye. An-nanasadgine, bela Egipto-diwarmar an odinnosye.’
2KI 19:25 ”Bab-Jehová weyob Rey-Senaqueribʼnik sogbalid: ‘Senaquerib, ¿ar be wissursi? Bato dikasurgus an we-ibmarmar imaksabinned. Bato yola-birgabargus ilemakagwar an mesisad. Emisgwa, geb an we-ibmarmar oyoalid. A-ulale, neggwebur-sakdigar-bukmaladi, be obelosad.
2KI 19:26 E-dulemar geg gue-itogedba, sikirmakdemalad, sulibinsa itodmalad. E-dulemar, gaganmar-ganguedsuliyobi, be-abin naded. Gagan-dutuganayobi be-abin nadmalad. Igi gagan neg-birgi ainiardibele, dinguddae, deyob be-abin dingusayob bukusad.
2KI 19:27 ” ’An nue bela-belad be-ibmar-imakedi an wisid. Sanagwadse be aineba naddae. Sanagwadse be dognonidabali, an nue wisid. Degine, be angi isdar-sunmaksadi, bela an nue wisid.
2KI 19:28 ” ’Ar be, angi ulusad, be angi apor-sunmaksadi an bela itosad. Degisoggu, igi moli-bebe-nikamaladga, e-asugi esgoro-wardummad yolege, deyobi, an be-asugi esgoro-wardummad yooed. Igi-molimar-e-gaya edilledae, deyobi, be-gaya an bei edinnoed, adi, mer bar be sunmakegar. Bia be danigusadba, gannar an be-barmidoed.’ ”
2KI 19:29 Isaías, Ezequíasʼga sogdebalid: “We-ibmarmar bega e-wilubga guoed: We-birgagine, ibmar-gwag walagwen-ainiardaedi be gunmaloed. Geb baid-birgasedi, ibmar-gwag-babatoed-sanmakoedi be gunmaloed. Geb birgapaasedina, be ibmar-gwag digmaloed, degi, weemarbaloed. Uva be digmaloed, degi, e-sanmakoedi be gunmaloed.
2KI 19:30 Judá-wagan amba dula-bukusmaladi, sapi-malimar-ainiardaedyobi gannar ainidagoed, degi, e-anagan gannar ambikudoed.
2KI 19:31 Ar Jerusalénʼgi, amba dulemar ambikuoed, bela ukudba burgosurmalad. Sión-yargi amar bukumaloed. Bab-Jehová-Bela-Gangued-Nikadi, we-ibmar imakoed.
2KI 19:32 ”Deginbali, Bab-Jehová, Asiria-e-reynik weyob soged: ‘We-neggweburse, Senaquerib gwen dogosurguoed, gwen we-neggweburgi, sigu-gagwensaar miosulid. We-dule, we-neggweburse sigu-abgaedyalaba gwen dogosulid, deginbali, neggwebur-galu-matusulid-dikarba, gwen napa-nakwemaid sobosulid, adi, agi atursamalad ubogegar.
2KI 19:33 Gebe-danigusadba gannar Senaquerib naoed, we-neggweburgi gwen dogosurguoed. Ani, an Bab-Jehová-guedgi an soged.
2KI 19:34 An we-neggweburgi nue-binsasoggu, degi, an-mai-Davidʼgi na binsabalidgine, we-neggwebur-irwa an gwisguoed, degi, we-neggwebur an bendakoed.’ ”
2KI 19:35 A-mutikidgine, Bab-Jehová-e-baliwitur, Asiria-sorda-bukwadgine, mili-dulabaabakebak-gakatar (185,000) dulemar-ogilosad. Degine, neg-oiboargu, Asiria-sordamar burgwar-burgwar-mamai daklealid.
2KI 19:36 Degidgine, Asiria-sordamar-e-rey-Senaquerib nadegusad. Geb agi, gannar Nínive-neggweburse nonigusad, agine megidapid.
2KI 19:37 Ibagwengi, Rey-Senaquerib, bab-dummad-Nisrocʼse-goled-neggi e-bab-dummadse gorsiidgi, e-machimala-Adramelec, degi, Sarezer, es-suidgi e-bab-oburgwismalad. Geb Ararat-yalaganse wakite gusmalad. A-sorbali, e-machi-Esar-Hadón yar sesad.
2KI 20:1 A-ibagangine, Ezequías bela-bela nailikgumaigusad, burgwed-naga maigusad. Geb, Bab-Dummad-gayaburba-barsoged-Isaías Amoz-e-machi, Ezequías-daknade gusad. Degi, ega sogdapid: “Bab-Jehová weyob soged: ‘Be bar-gwisguosulid, be burgoed. Degisoggu, be-negyaginmaladga napi nue be igar uko.’ ”
2KI 20:2 Agine, Ezequías, galusik aibilisa imaksad. Geb weyob Bab-Jehováʼse ise-wilegar goted:
2KI 20:3 “Bab-Jehováʼye, mer be an-iege, ar andi be-sogedba innikigwadba bega nue nanadiid, beba napiragwadba an alamakdiid. Degine, be-ibmar-abegedba andi bega ibmar-imaksad.” Deyobi, Ezequías bela-belad isedar-boale meremai gusad.
2KI 20:4 Isaías, amba yoo reyneg-imbase noedgi, Bab-Jehová, Isaíasʼga sunmaknonikid, ega sognonikid:
2KI 20:5 “Ezequías an-neggwebur-e-dummadga-negsemaidse, gannar be nae, ega be sogo: Bab-Jehová be-dad-dummad-David-e-Bab-Dummad weyob sogye: Anse be gochadi, bela an be-itosad, degi, be-ibyanis-ariosad an daksad. Degisoggu, an be-ogwisguoed. Ibapaasega Bab-Jehováʼse-goled-negse be nao.
2KI 20:6 Degirdi, birgambe-gakatar (15) napi-gudii an be-imakoed. Degi, Asiria-e-reygi an be-ollorsaoed, we-neggwebur an bendakoed. An we-neggweburgi nue-binsasoggu, degi, an-mai-Davidʼgi na binsabalidgine, an we-neggwebur-irwa gwisguoed.”
2KI 20:7 Geb degi, Isaías sogdebalid: “Higo-san be ollimakmar.” Geb deyob imaksamalad, agine, rey-abagangi-yaa-siidgi higo-ollimakaled ega magsamalad. Geb agi, rey nugusad.
2KI 20:8 Ezequías, Isaíasʼse weyob egichisad: —Bab-Jehová an-nudakoye sogedi, degi, a-ibapaagi ande ese-goled-negse naoye sogedi, ¿ibigi magar an dakoe?
2KI 20:9 Geb Isaías ega sogded: —Bab-Jehová-bega-ibmar-sogsad magar be dakegala, we-ibmar-wilub Bab-Jehová bega oyogoed. ¿Bab-Jehová bega dad sikwas-osikirmakbi be abege? Igi, ¿sikwas oabarmakbi be abege?
2KI 20:10 Ezequías ega sogded: —Ar dad-sikwas-osikirmakedba, dad-sikwas-oabarmakeddi bursur-sunnagwad.
2KI 20:11 Geb degine, Bab-Dummad-gayaburba-barsoged-Isaías, Bab-Jehováʼse ise-wilegar goted. Geb agine, Bab-Jehová gannar dad-osikirmaksad. Deyobi, Acaz-wachi-naidi, sikirmaksad.
2KI 20:12 A-ibagangine, deunni, Babilonia-e-rey-Merodac-Baladán wisgusad, Ezequíasʼde gegumaiye. Merodac-Baladánʼde, Baladán-e-machid. Geb Merodac-Baladán e-garda-berbemaladba Ezequíasʼga garda-narmakar, degi, binsa-ibmar-ukleged barmisad.
2KI 20:13 Degi, Ezequías nueganbi dulemar-abindaksad, geb garda-berbemaladga, bela e-ibmar-nuegan-bukwad oyosad: Manimar, ormar, ina-wawadikmalad, olivo-gwallu-wawadikmalad. Bila-onolegedgi ibmar-ebulemalad-sabolebukwad, degi, bela ibmar-nuegan-sabolebukwad-neggi ega ibmarmar oyosad. Bela-naitinagase, Ezequías, e-reyneggi-ibmarmar-bukwad, degi, bela e-negsemaidgi-ibmar-nikad oyosad.
2KI 20:14 Geb degine, Bab-Dummad-gayaburba-barsoged-Isaías, Rey-Ezequías-daknaded, geb ese egisdapid: —¿Bia we-dulemar daniki? ¿Igi we-dulemar bega sogmala? Geb Ezequías ega sogded: —We-dulemar dikasur-danimalad. Babilonia-neggwebur-akar an-dakega danimalad.
2KI 20:15 Geb gannar Isaías, Ezequíasʼga sogded: —¿Ibumar be-negyagi daksamala? Ezequías abin-sogded: —Bela an-neg-yagi-ibmar-bukwad daksamalad. An-ibmar-saboleged-neggi ibmar-soggwensaar-daksasuli gussulid. Bela daksamalad.
2KI 20:16 Geb degi, Isaías, Ezequíasʼga sogdesunnad: —Nue Bab-Jehová-gayaburba be itogo:
2KI 20:17 Bab-Jehová weyob soged: ‘Begi ibagan danikoed. Bela be-negyaurgi ibmarmar-bukwad be-ibe seledoed. Bela be-dadgan, emi-iba-naidse, ibmar-nuegan-onmaksadi, bela Babilonia-yarse seledoed. Bipisaale gwen ibmar beosulid.’
2KI 20:18 Bab-Jehová weyob sogbalid: ‘Be-mimmigan, degi, be-wagan-seledoedi, abala Babilonia-reyneggi maiga gumaloed.’
2KI 20:19 Geb Ezequías, Isaíasʼga sogded: —Bab-Jehová-e-gayaburba be anga-sogsadi, nueddo. Igi an bar saoe. Ar ade, Ezequías binsaenad: “Amba an-maidgine, nueganbi bogidik-gudii gumaloye.”
2KI 20:20 Ezequías ibmar-imaksad-baigan, degi, e-gangued-oyosad, degine, dii-wilad-nasiksad, Judá-e-reymar-ibmar-imaksad-gardagi narmakar maid. Deginbali, neggweburse nabir dii-iirmakega, dii-gammu-yosad-e-igar, Judá-e-reymar-ibmar-imaksad-gardagi narmakar maid.
2KI 20:21 Ezequías burgwenonikid. Geb a-sorba, e-machi-Manasés yar sesad.
2KI 21:1 Manasés birgambe-gakabo-nikadgi (12) yar sealid. Degi, Jerusalénʼgi birga-dulabo-gakambe-gakatar (55) yar-sesad. E-nandi Hepsibaʼye nugad.
2KI 21:2 Manasés, Bab-Jehová-ibmar-abemaisulidi, Bab-Jehová-asabin imaksad. Dulamar-bamalad-daedba nanadii gusad. Deunni, Bab-Jehová, Israel-dulemar-wagab Israel-yargi a-dule-bamalad-ononnos gusad.
2KI 21:3 Degi, Manasés, e-bab-Ezequías bab-dummadganse-goled-aila-matusurmalad bela osulosgusadi, gannar sobsa gusad. Degine, bab-dummad-Baalʼga aila-matusurmalad gannar sobnonikid, degi, bab-dummad-bundor-Asera-wagar-wilub gannar sobsabalid. Ar igi Israel-rey-Acab ibmar-imaksagusa, deyob ibmar imaksamogad. Degi, bela nibneggi-ibmar-nanaid, bab-dummadyob abin dulluu sigdii gusad, a-ibmarmarse gordii gusad.
2KI 21:4 Deyobbardo, Bab-Jehováʼse-goled-neggi, Manasés, bab-dummad-baidga-ibmar-ogumakleged-ailamar sobsabalid. Bab-Jehováʼde, ese-goled-negnik sogsa gusad: “We-anse-goled-neg, Jerusalén-neggweburgi-siidgi, an-nug obariledii an imakoye.”
2KI 21:5 Manasés, Bab-Jehováʼse-goled-neg-imba-sogbobeladgi, niisgwamar-nibneggi-nanaidga ibmar-ogumakleged-ailamar sobsad.
2KI 21:6 A-ukinbali, Manasés, e-bab-dummadga, soogi-ogumakar e-masmala-uksagusad, ibmar-burbar-oyoleged-igar durdakdii gusbalid. Ina-isgana-dulegi-imaked-igar durdakdii gusbalid. Gabgi-dule-burgwismaladse-ibmar-egismaladse ibmar-egisdii gusbalid, degi, burba-isganase-ibmar-egismaladse ibmar-egisdii gusbalid. Manasés Bab-Jehová-ibmar-abemaisulidi, bela-belad imakdii gusad. Degisoggu, Bab-Jehová-ourwega imaksasunnad.
2KI 21:7 Manasés, Bab-Jehováʼse-goled-neggi, bab-dummad-bundor-Asera-wagar-wilub ogwichisbalid. Bab-Jehováʼde, Davidʼga, degi, e-machi-Salomónʼga sogsa gusad: “We-anse-goled-neg Jerusalénʼgi-siidgi, degisadegu an-nug obariledii an imakoye. Ar ade, Israel-neggwebur-baiganba Jerusalén-neggwebur an susad, agi maigu an guegar.
2KI 21:8 Degine, Israel-dulemar, an-igar-uksad-sogedba nanadiile, degi, an-mai-Moisés-ega-igar-uksad-sogedba gudimalale, an e-dadganga yar-uksadgi, bar-an oniosurye.”
2KI 21:9 Degi-inigwele, Judá-dulemar Bab-Jehová-sogedba ibsassurmalad. Degi, Manasés, neggwebur-bamaladba bur bule Judá-dulemar-oichosad. Ar ade, Bab-Jehová Israel-dulemar-wagab a-dulemar-obelos gusad.
2KI 21:10 Geb degi, Bab-Jehová, e-maigan-e-gayaburba-barsogmaladba, weyob sogsa gusad:
2KI 21:11 “Judá-e-rey-Manasés, Amorreo-dulemar-ibmar-isgana-imaksadba bur bule ibmar-isdar-daklemalad imaksad. Degi, Manasés e-bab-dummadga-imaklemaladgi, Judá-dulemar-oichosbalid.
2KI 21:12 Emide, Israel-dulemar-e-Bab-Dummad-Jehová weyob soged: ‘Jerusalén-dulemarga, Judá-dulemarga bela-belad naibid-dummad an barmidagoed. Geg-itoged-nagase an imakoed.
2KI 21:13 Igi an Samaria-neggwebur, degi, Acab-e-wagan-odurdaksagusa, deyobi, Jerusalén-dulemar an sabsur-odurdakoed. Ar igi bate enuklesale, odinnogega obinar siledae, deyob, Jerusalén-neggwebur an sioed.
2KI 21:14 Abala-dulemar-amba-ambikumaloedgi bar an binsaosulid. E-isdarmaladga an urmakoed, bela e-ibe ibmar atursadmaloed, degi, e-isdarmaladse bela ibmar-swanga gumaloed.
2KI 21:15 Ar ade, Egipto-yargi an e-dadgan-onosad-akale, emi-ibase, amba we-neggwebur an ibmar-abemaisulid, an-asabin imakdimalad. Degi, an-ourwedigusmarsunnad.’ ”
2KI 21:16 A-ukinbali, Manasés, bela-belad, bukidar dule-neg-oakalossurmalad-ibe, Jerusalén-neggweburgi ablis-eosbalid. Aginbali, Judá-dulemar-Bab-Jehováʼgi-isguega imaksabalid.
2KI 21:17 Manasés ibmar-imaksad-baigan, degi, Bab-Jehováʼgi-isgusadi, Judá-e-reymar-ibmar-imaksad-gardagi narmakar maid.
2KI 21:18 Geb Manasés burgwisgu, e-neg-dikarba Uza-e-nainu-naidgi digsamalad. A-sorbali, e-machi-Amón yar sesad.
2KI 21:19 Amón birga-durgwen-gakabo-nikadgi (22) yar sealid. Degi, Jerusalénʼgi birgabo yar sesad. E-nandi Mesulemetʼye nugad, Haruz-e-sisgwad. Haruzʼde, Jotba-neggweburginedid.
2KI 21:20 Amón, Bab-Jehová-ibmar-abemaisulidi, Bab-Jehová-asabin imaksad. Ar ade, e-bab-Manasés ibmar-imaksayobi, ibmar imaksamogad.
2KI 21:21 Amón, igi e-bab nanadii gusa, deyobi, nanasmogad. Amón, e-babyobi bab-dummadyob-imaklemaladse, gordii gusmogad, e-abin dulluu sigdii gusmogad.
2KI 21:22 E-dadgan-e-Bab-Dummad-Jehováʼgi bur bangusad. Bab-Jehová-igarba gwen nanassulid.
2KI 21:23 Rey-Amónʼga-arbamalad, Amón-oburgwedgi binsaar gusmalad. Geb reyneggi rey-oburgwismalad.
2KI 21:24 Geb agine, dulemar-neggweburginmalad, bela Rey-Amón-oburgwismalad bela oburgwismarmogad. Geb a-sorbali, e-machi-Josías reyga nug-imaksamalad.
2KI 21:25 Amón ibmar-imaksad-baigan, Judá-e-reymar-ibmar-imaksad-gardagi narmakar maid.
2KI 21:26 Amón, e-neg-uangi Uza-e-nainugi diglesad. A-sorbali, e-machi-Josías yar sesad.
2KI 22:1 Josías birgabaabak-nikadgi (8) yar sealid. Jerusalénʼgi birga-durgwen-gakambe-gakagwensak (31) yar sesad. E-nandi Jedidaʼye nugad, Adaía-e-sisgwad. Adaíaʼde, Boscatʼginedid.
2KI 22:2 Josías, bela Bab-Jehová-asabin ibmar-nueganbi imaksad. E-dad-dummad-David-nanasad-igarmarba, nanadii gusad. A-igarba gwen bangudii gussulid.
2KI 22:3 Josías, birgambe-gakabaabakgus (18) Judáʼgi negsemaidgine, Rey-Josías, Bab-Jehováʼse-goled-negse, ega-neggusmalad-narmaked-Safán barmisad. Safánʼde, Azalía-machid, Mesulam-e-wagwad. Josías weyob Safánʼga sogsad:
2KI 22:4 “Dule-irwa-Bab-Jehováʼse-goled-bur-dummad-Hilcías be daknao, ega be sogo, Bab-Jehováʼse-goled-neggi dule-yawagakgi-nakulemaladse mani-berbelesmaladi, be suoye.
2KI 22:5 Geb be we-mani Bab-Jehováʼse-goled-neg-nudaknanaid-dakmaladga ukoye. Adi, amar Bab-Jehováʼse-goled-neg-nudaknanaid bennukegar.
2KI 22:6 A-manigi dule-urgogi-arbamalad, neg-sobedgi-dule-arbamalad, degine, dule-akwa-neg-sobedgi-arbamalad be bennukoye. Degi, a-manigi urgomar bakmarbaloye ega be sogo. Deginbali, a-manigi neg-sobega-akwa-ebuleged bakmarbaloye, adi, Bab-Jehováʼse-goled-neg nudakegar.
2KI 22:7 Degi, ega be sogbalo, dule-arbananaid-bennukmaladse mer mani-nug egisoye, ar ade, na sogedba arbananaidamaladdeeye.”
2KI 22:8 Geb dule-irwa-Bab-Jehováʼse-gormalad-bur-dummad-Hilcías, neg-gusmalad-narmaked-Safánʼga sogded: “Bab-Jehováʼse-goled-neggi, Bab-Jehová-Igar-Mesisad-Garda an amisa.” Geb degi, Hilcías, a-garda Safánʼga uksad. Geb Safán abin absosad.
2KI 22:9 A-sorbali, dule-garda-narmaked-Safán, rey-owisonaded, geb ega sogdapid: —Bega-arbamalad, Bab-Jehováʼse-goled-neggi manimar-bukwad wesmala, geb dule-arbananaimaladga uklesad, degine, Bab-Jehováʼse-goled-neg-nudaknanaid-dakmaladga uklesbalid.
2KI 22:10 Geb deginbali, dule-garda-narmaked-Safán, reyga sogbalid: “Dule-irwa-Bab-Jehováʼse-goled-Hilcías, anga garda-matagwen uksa.” Degi geb, Safán, Rey-Josías-wagab garda absosad.
2KI 22:11 Degi, rey, Bab-Jehová-Igar-Mesisad-Garda-itosgua, nunmak-itogedba e-mor-yoid na siir-siir imaksad.
2KI 22:12 Degi, geb Rey-Josías wemarga ilagwen-igar-ukar imaksad: Dule-irwa-Bab-Jehováʼse-goled-Hilcíasʼga, Safán-machi-Ahicamʼga, Micaías-machi-Acborʼga, neg-gusmalad-narmaked-Safánʼga, degine, reyga-dummadga-arbadiid-Asaíasʼga igar uksad. Geb amarga sogsad:
2KI 22:13 —Be namalo. Anga Bab-Jehováʼse be igar-aminamalo. Israel-dulemar-besmaladga, Judá-dulemar-besmaladga, we-garda-amilesadgi ibmar-sognaidi ibi obarye, ega be sogmalo. Bab-Jehová bela-bela anmargi urwemairgebed, ar ade, anmar-dadgan we-gardagi-ibmar-sognaidba ibsassurmalad. We-garda-narmakarnaidba nanassurmalad.
2KI 22:14 Degisoggu, dule-irwa-Bab-Jehováʼse-goled-Hilcías, degi, Ahicam, Acbor, Safán, degine, Asaías, Bab-Jehová-gayaburba-barsoged-bundor-Huldaʼye nugadse nadmarsunnad. Huldaʼde, Jerusalén-neggweburgi neggwebur-binidgi maid. Huldaʼde, Salum-omed. Salumʼde, Bab-Jehováʼse-goled-neggi-mor-sabolemalad-dakedid. Salumʼde, Ticva-e-machid, degi, Harhas-e-wagwad. Geb agine, dule-nonimaladi Huldaʼbo sunmaksamalad.
2KI 22:15 Geb Hulda ega sogded: “Weyob Bab-Jehová Israel-dulemar-e-Bab-Dummad soged: ‘Dule be-barmialidga weyob be sogoye:
2KI 22:16 Ani an Bab-Jehová-guedgi an soged: Igi Judá-dulemar-e-rey, we-garda-sognaid-absosa, deyob an neg-saoed. We-neggweburgine, degi, e-dulemargi naibid-dummad an barmidoed.
2KI 22:17 We-dulemar, an-obachamalad-ular, degi, bab-dummad-baiganga ina-wawadikmalad oburmakdii gusmalad-ular, an-ourwega imaksamalad. A-ulale, an bela-belad we-neggweburgi sae-itoalid, an-sae-itogedi gwen an iegosulid.
2KI 22:18 ” ’Deginbali, Judá-e-rey-Josías anse-igar-amiega-be-barmialidga be sogbalo: Weyob Bab-Jehová Israel-e-Bab-Dummad sogye: We-gardagi ibmar-guoed-sognaid be itosgua,
2KI 22:19 gwagegi naibid-dummad na be itosad. An-asabin san-bipii be imaksad. We-neggweburnik, degi, e-dulamarnik ibmar-guoed be itosad, ade, we-neggwebur bela-napabi-daarmakar an nasikoye sogsad. Ise-ukabsalegar an imakoye sogsabalid. Ar na be mor-yoid esirmaksadi, an be-daksad, degi, an-asabin ogormaksii be gusadi, bela an be-itosad. Ani an-Bab-Jehová-guedgi deyob an soged.
2KI 22:20 Degisoggu, a-ulale, nuedgi burgwega an be-imakoed, degi, be-dadgan-abargi an be-omesoed. Nue-bogidikidgi neg-uanse selemai an be-imakoed. Degisoggu, we-neggweburgi naibid-dummad an barmidagoedi be dakosulid.’ ” Geb degi, dulemar igar-amidimaladi gannar nonimargu, bela Rey-Josíasʼga gayaburba-soglesadi, sognonimalad.
2KI 23:1 Degidgine, Rey-Josías, bela Judá-girmar-dummaganse, Jerusalén-girmar-dummaganse gochad, adi, ese dagmalagar.
2KI 23:2 Agine, Rey-Josías, bela Judá-dulemar-abargi, Jerusalén-dulemar-abargi, dule-irwa-Bab-Dummadse-gormalad-abargi, Bab-Dummad-gayaburba-barsogmalad-abargi, Bab-Dummadse-goled-negse naded. Degine, bela-dulemar, serganse-bakale, degi, burwiganase-bakale, Bab-Jehováʼse-goled-negse, reyba nadmalad. Geb Rey-Josías, bela a-dulemar-asabin, binnasuli Bab-Dummad-Israel-dulemarbo-Igar-Mesisad-Garda-narmakar-maid absosad. A-gardade, Bab-Jehováʼse-goled-neggi amilesgusad.
2KI 23:3 Geb a-sorba, Rey-Josías buar-naba-gwisgusgu, Bab-Jehová-asabin weyob igar mesisad: Ede, Bab-Jehováʼba ibsaoye. Bela-bela gwage-ulubgi, bela-e-san-burbagi, Bab-Jehová-sogedba nanaoye. Bab-Jehová-Igar-Mesisadba, Bab-Jehová-daedba ede nanaoye. Deginbali, Bab-Dummad-Igar-Sogsadba nanabaloye. Igi-Bab-Dummad-Israel-dulemarbo-Igar-Mesisad-Gardagi narmakar-mai, aba ede nanaoye. Geb bela-dulemar, Bab-Dummadbo-Igar-Mesisad-sogedba na nanamarmogoye sogsamarmogad.
2KI 23:4 Rey-Josías wemarga igar uksad: Dule-irwa-Bab-Dummadse-gormalad-bur-dummad-Hilcíasʼga, dule-irwa-Bab-Dummadse-gormalad-e-yarbarmaladga, degine, Bab-Dummadse-goled-neggi yawagak-edarbemaladga, igar uksad. Bab-Jehováʼse-goled-neggine bela we-ibmar-bukwad onioye igar uksabalid: Baalʼse-golega ibmar-ebulemalad-bukwad, Bab-dummad-bundor-Aseraʼse-golega ibmar-ebulemalad-bukwad, degine, niisgwamar-nanaidse-golega ibmar-ebulemalad-bukwad, bela onioye. Geb Jerusalén-neggwebur-magaba, Cedrón-nebagi ogumaksamalad. Geb e-burumar Betel-neggweburse-sedmalaga imaksad.
2KI 23:5 Epenne, Judá-e-reymar dule-irwa-bab-dummaganse-gormalad-nugsasadi, Josíasʼdi a-dule-irwa-bab-dummaganse-gormalad onisad. Judá-e-reymar amar-nugsasanad, adi, amar Judá-neggweburmargi, degi, Jerusalén-neggweburgi, bab-dummad-baiganse-gormalad-neggi, e-bab-dummadga-ibmar-ogumakleged-ailagi, ibmar-wawadikmalad-ogumakega nug-imaksa gusad. Geb amar we-bab-dummaganga ibmar-wawadikmalad-oburmakdii gusmalad: Bab-dummad-Baalʼga, dadga, niiga, nibneggi ibmar-nanaidga, degi, bela niisgwamar-nanaidga, ibmar-wawadikmalad oburmakdii gusmalad.
2KI 23:6 Deginbali, Rey-Josías, Bab-Jehováʼse-goled-neggi bab-dummad-bundor-Asera-sobar-gwichid onosbalid. Geb Jerusalén-neggwebur-magaba, Cedrón-dian-maid-nagaba ogumaksamalad, bela burubi imaksamalad. Geb neg-uan-bulaledgi e-burumar mie-mie imaksamarbalid.
2KI 23:7 A-ukinbali, Bab-Jehováʼse-goled-neggi, negmar dulemar-e-bab-dummad-nug-odummogega-galagwensuli-nanamalad-bukwad earisbalid. Degine, Rey-Josías bia omegan bab-dummad-bundor-Aseraʼga mor-sobsidamala, a-neg-bukwad earisbalid.
2KI 23:8 Rey-Josías, dule-irwa-Bab-Dummadse-gormalad-Judáʼginmalad bela Jerusalén-neggweburse-dagega imaksad. Degine, Geba-neggwebur-akar, Beersebaʼsega bab-dummaganse-goled-negmar-aila-matusulid bela osulosad. A-negmargine, dule-irwa-bab-dummaganse-gormalad ibmar-wawadikmalad-ogumakdii damalanad. Degi, bab-dummaganga-ibmar-ogumakleged-ailamar, dummad-negdakmaid-Josué-e-yawagak-nagaba, argan-sapiledsik, a-ailamar-bukwadi, bela Rey-Josías earisbalid. We-Josué-e-neg neggwebur-dogleged-argan-sapiledsik siid.
2KI 23:9 Ar dule-irwa-bab-dummaganse-gormalad, ibmar-ogumakleged-ailamargi ibmar-ogumakar-ukdii gusmaladi, Jerusalén-neggweburgi, Bab-Jehováʼga-ibmar-ogumakleged-ailase warmakega imaklessulid. Unnila dule-irwa-Bab-Dummadse-gormalad-abargi, wis madu-inasulid-gullegedbi guchamalad.
2KI 23:10 Deginbali, Rey-Josías, Hinom-nebagi bab-dummaganse-goled-neg-Tofetʼye-nugad-siid osulosbalid. Adi, melle bar dulemar e-masmala, degi, e-bunamala, a-neggine bab-dummad-Molocʼga ogumakar ukegar.
2KI 23:11 A-ukinbali, Bab-Jehováʼse-goled-neg-yawagak-dogedgi, Natán-Melec-e-gabedneg-nagaba, molimar-dadga-nugsalegar-nanaid osulosbalid. Natán-Melecʼde, neggwebur-dikarba-nainumar-naid dakedid. We-molimar, Judá-e-reymar nasiksagusad, adi, dadse-golegarbii ebulegegar. Deginbali, Josías, dadga-moli-urmar-nugsalegar-nanaid bela ogumaksabalid.
2KI 23:12 Deginbali, Rey-Josías, epenne Judá-e-reymar Acaz-obunnoged-neg-birgi ibmar-ogumakleged-ailamar sobsagusbalidi, bela osulosbalid. Degine, Rey-Josías, Manasés Bab-Jehováʼse-goled-neg-imba-sogabobela, ibmar-ogumakleged-ailamar sobsamogadi, bela bibichisbalid. Amar bela burubi imaksagu, Cedrón-dian-maidgi, e-burumar miapid.
2KI 23:13 A-ukinbali, Rey-Josías, bela Jerusalén-neggwebur-dad-nakwedsik, Olivo-Yar-siid-argan-nuedsik bab-dummaganga-ibmar-ogumakleged-ailamar-bukwad bibichisbalid. Rey-Salomón we-bab-dummagan-imadaklemaladga aila sobsa gusad: Sidón-dulemar-e-bab-dummad-bundor-Astoretʼga, Moab-dulemar-e-bab-dummad-Quemosʼga, degine, Amón-dulemar-e-bab-dummad-Milcomʼga, sobsagusad. A-ailamar, Rey-Josías bela bibichisad.
2KI 23:14 Geb Josías, bela Akwa-islidikmalad mamarisbalid, degi, bab-dummad-bundor-Asera-e-wilub-sobarmalad bela omukusbalid. Geb bia ibmarmar-sobarmalad bukusa, agine, dule-burgwismalad-e-garmar ena digsad.
2KI 23:15 Deginbali, Betel-neggweburgi, ibmar-ogumakleged-aila-siid earisad, degi, Nabat-machi-Jeroboam bab-dummad-baidse-goled-negmar-sobsagusad, bela earisbalid. Jeroboam, Israel-dulemar-oichogega a-neg-sobsagusadi, Rey-Josías ogumaksad, burubi-nasikedse imaksad. Deginbali, bab-dummad-bundor-Asera-e-wilub ogumaksabalid.
2KI 23:16 Rey-Josías gannar-aibirisgu, yarbirgi neg-uanmar-bukwa dakalid. Agine garmar-oniega imaksad. Geb agine, ibmar-ogumakleged-ailagi ogumaksad, adi, a-aila-oichogegar. Melle bar egi ibmar-ogumakar-ukmalaga ogumaksad. Ar igi Bab-Dummad-e-dule Bab-Jehová-sogsadba ibmar-sogsagusa, deyob gusad.
2KI 23:17 Geb agine, Rey-Josías sogded: —We neg-uan-dummad-siidi, ¿we doagadi? Dulemar ega sogdemalad: —We-neg-uangine, Bab-Dummad-e-dule digar-maid. Deun we-dule, Judá-neggweburgi danigusgu, be Betel-neggweburgi-aila-siid-osulonaidnik sunmaksagusad.
2KI 23:18 Geb rey sogded: —Degirdi, melle ese achamalo. Dule-wargwensaar e-garse achaosulid. Degisoggu, Bab-Dummad-e-dule-garmar bar onossurmalad, degi, Bab-Dummad-gayaburba-barsoged-Samariaʼgined-e-garmar onossurmarbalid.
2KI 23:19 Igi Betel-neggweburgi Josías neg-imaksa, deyob Samaria-neggweburgi neg-imaksabalid. Israel-dulemar-e-reymar Samariaʼgi e-bab-dummaganse-goled-neg-sobsananaed bela osulosad. A-negmar-sobsananaedgi Bab-Jehová-oulusmalad.
2KI 23:20 Geb a-sorbali, bab-dummaganse-goled-neggi dule-irwa-e-bab-dummadse-goledgi-arbamalad bab-dummadga-ibmar-ogumakleged-ailagi oburgwismalad, e-garmar bela ogumaksamalad. Degi, geb Rey-Josías gannar Jerusalén-neggweburse alid.
2KI 23:21 Rey-Josías bela dulemarga weyob igar uksad: —Bab-Jehováʼga Oburgwilegoenad-Iba onomalo, igi Bab-Dummad-Israel-dulemarbo-Igar-Mesisad-Gardagi narmakar-mai, deyob imakmalo.
2KI 23:22 Deun, dummagan Israel-yargi-negsemamaigu, degi, Israel-e-reymar-ibagangi, degine, Judá-e-reymar-ibagangi, gwen weyobi we-iba onodisurmalad.
2KI 23:23 Rey-Josías birgambe-gakabaabakgus (18) Judáʼgi yar-semaidgi, Jerusalén-neggweburgi Bab-Jehováʼga we-iba onosad.
2KI 23:24 Degine, Rey-Josías weyob ibmar imaksabalid: Nergan-obelosad, ina-isgana-imaked-dulemar obelosbalid. Bela suar-nuchumar-bukwad osulosbalid. Judá-yargi, degi, Jerusalén-neggweburgi, bela ibmar-nuedsurmalad bab-dummadyob-dakdimalad osulosbalid. Adi, Bab-Jehová-Igar-Mesisad-sogmaidba-guega deyob imaksad. A-garda-narmakar-maidi, dule-irwa-Bab-Jehováʼse-goled-Hilcías Bab-Dummadse-goled-neggi amisgusad.
2KI 23:25 Rey-Josíasʼyob reymar-Josías-iduar-megismaladi, degi, sorba-megismaladi, wargwensaar gwen Bab-walikaa nanadii gussulid. Amar gwen Josíasʼyobi Bab-Jehováʼga bela-belad e-gwagegi ibmar-imakdii gussurmalad, degi, bela-belad na-ulubgi ibmar-imakdii gussurmarbalid. Degine, bela-belad na-e-ganguedgi ibmar-imakdii gussurmarbalid. Ar Moisés-Igar-Maid-sogedba ibmar-imakdii gussurmalad.
2KI 23:26 Rey-Josías ibmar-nuegan-imaksa-inigwele, Bab-Jehová, Manasés bela-belad egi isgudii gusad-ulale, Judá-dulemargi amba sae-itodii gusad.
2KI 23:27 A-ulale, Bab-Jehová weyob sogsa gusad: “Igi an Israel-dulemar-obacha gusa, deyopira, an Judá-dulemar obanmogoed. Degine, Jerusalén-neggwebur anse-goled-negga an nug-imaksadi, an obanoed. Degi, anse-goled-neg-annik an sogsanad: ‘Wegi an-nug obariledii guoye.’ ”
2KI 23:28 Josías e-ibmar-imaksad, degi, ibmar-imaksad-baigan, Judá-e-reymar-ibmar-imaksad-gardagi narmakar maid.
2KI 23:29 Josías-dulaunni, Egipto-dulemar-e-rey-Faraón-Necaoʼye-nugad, bila-onogedgi Asiria-e-rey-bendakega Éufrates-diwar-igarsik nade gusad. Geb Rey-Josías, Necaoʼgi-bila-onogega abin nade gusad. Agine, Meguido-neggweburgi Necao-abingunonikid. Geb Necao, Josías-ilagwen-oburgwar imaksad.
2KI 23:30 Geb degine, Josías-sordamar Meguido-neggwebur-akar Jerusalén-neggweburse moli-urgi Josías-mui searmalad. Geb e-neg-uangi digsamalad. A-sorba, dulemar, Josías-machi-Joacaz nugsanonimalad. Geb gwallu-wawa egi eosmalad, agi reyga e-bab-muchub megisad.
2KI 23:31 Joacaz birga-dulagwen-gakapaa-nikadgi (23) yar sealid. Jerusalénʼgi nii-warbaa yar sesad. E-nandi, Hamutalʼye nugad, Jeremías-e-sisgwad. Hamutalʼde, Libnaʼginedid.
2KI 23:32 Joacaz Bab-Jehová-ibmar-abemaisulidi, Bab-Jehová-asabin imaksad. Ar igi e-dadgan ibmar-isgana-imaksa, ayobi ibmar imaksamogad.
2KI 23:33 Geb Faraón-Necao, Ribla-yalagi Hamat-neggweburgi esgaryagi Rey-Joacaz-metegusad, adi, melle bar Joacaz Jerusalén-neggweburgi Judá-yar-seegar. Geb degi, Faraón-Necao, Egipto-yar-bennukega, mani nibir-miligugle gaka dulataled-ilatar-aidiku-ukega (7,500) Judá-dulemar-imaksad, degi, or nibir-dulapaa-gakambe-gakatar-aidiku-ukega (75) imaksabalid.
2KI 23:34 Geb agine, Faraón-Necao, Josías-machi-Eliaquim e-bab-Josías-muchub reyga omesisad. Geb Eliaquimʼga nug-ogwanonikid, Joacimʼye onug-imaksad. Faraón-Necao Egipto-yarse Joacaz-sesad. Agi Joacaz burgwisad.
2KI 23:35 Geb Rey-Joacim, Faraón-Necao-mani-egisnaidi ega uksasunnad, mani-sibu, degi, or-mani ega uksad. Joacim nabir mani-bennukegala, bela dulemarse neggweburga-mani-weledaed egichisad. Geb degi, Faraón-Necao-bennukega dulemar mani-sibugi, degi, or-manigi neggweburga-mani-welegedi bennuksa nanaed.
2KI 23:36 Joacim birga-dulagwen-gakatar-nikadgi (25) yar sealid. Jerusalénʼgi birgambe-gakagwensak (11) yar sesad. E-nandi Zebudaʼye nugad, Pedaías-e-sisgwad. Zebudaʼde, Rumaʼginedid.
2KI 23:37 Joacim, amba Bab-Jehová-ibmar-abemaisulidi, Bab-Jehová-asabin imaksamogad. Ar igi e-dadgan ibmar-isgana-imaksa, deyobi ibmar imaksamogad.
2KI 24:1 Joacim Judá-yar-semaidgine, Babilonia-dulemar-rey-Nabucodonosor egi bila onononikid. A-bila-onosadgi, Nabucodonosor Joacimʼgi nakwisad. Geb agi, Judá-dulemar Nabucodonosor-sogedba birgapaa ibmar-imakdii gusad. Geb a-sorbali, Rey-Joacim, Nabucodonosor-sogedba bar ibmar-imakbisur gualid.
2KI 24:2 Agine, Bab-Jehová, Joacimʼgi, degi, Judá-dulemargi-gwisguegala, wemar-barmiar gusad: Babilonia-sordamar, Siria-sordamar, Moab-sordamar, degi, Amón-sordamar egi barmiar gusad. Igi Bab-Jehová, ega-gayaburba-barsogmaladba ibmar-guoye sogsagusa, deyob gusad.
2KI 24:3 Bab-Jehová-sogedba Judá-dulemar sabsur-odurdaklesad. Ar Judá-dulemar Manasés-isgusadba-nanasad-ulale, Bab-Jehová egi Judá-dulemar-banguega imaksad.
2KI 24:4 Manasés, Jerusalénʼgi dulemar-ibmar-oakalossulid-oburgwisad-ulale, Bab-Jehová egi Judá-dulemar-banguega imaksad. Degisoggu, Bab-Jehová Judá-dulemarga, igi-barsaye gwen sogsasulid.
2KI 24:5 Joacim e-ibmar-imaksad, degi, ibmar-imaksad-baigan, Judá-e-reymar-ibmar-imaksad-gardagi narmakar maid.
2KI 24:6 Rey-Joacim burgwisgu, e-machi-Joaquín e-sorba yar sesad.
2KI 24:7 Babilonia-e-rey bela Egipto-yar-gasasoggu, Egipto-dulemar-e-rey bar Egipto-yargi nossulid. Ar ade, Babilonia-e-rey Egipto-diwar-maid-akale, Éufrates-diwar-maidse, Egipto-e-rey-yarmar-ganikidi, bela gasad.
2KI 24:8 Joaquín birgambe-gakabaabak-nikadgi (18) yar sealid. Jerusalénʼgi nii-warbaa yar sesad. E-nan Nehustaʼye nugad, Elnatán-e-sisgwad. Nehustaʼde, Jerusalénʼginedid.
2KI 24:9 Joaquín Bab-Jehová-ibmar-abemaisulidi, Bab-Jehová-asabin imaksad. Ar e-bab-ibmar-imaksadba ibmar imaksamogad.
2KI 24:10 A-ibagangi, Babilonia-e-rey-Nabucodonosor-e-sorda-bila-onomalad, Jerusalén-neggwebur-ebilis ambikunonigusad.
2KI 24:11 Degi, Babilonia-Rey-Nabucodonosor, e-sordamar-Jerusalén-neggwebur-ebilis-bukwadgi, Jerusalénʼse nonikid.
2KI 24:12 Geb Judá-rey-Joaquín, e-nanmala, degi, ega-arbamaladmala, e-dule-dummaganmala, degine, e-sorda-bila-onomalad-e-dummaganmala, Babilonia-e-reyse galakunonimalad. Geb galesmalad. Deunni, Nabucodonosor birgabaabakgus (8) Babilonia-yargi negsemaid.
2KI 24:13 Ar igi Bab-Jehová sogsagusa, deyob ibmar gusad. Nabucodonosor, Bab-Jehováʼse-goled-neggi ibmar-nuegan-bukwad bela sesad, degi, reyneggi ibmar-nuegan-bukwadse-bakale, bela sesad. Nabucodonosor, Bab-Jehováʼse-goled-neggi-ibmar-ebulemalad bela goamaksabalid. We-ibmar Rey-Salomón orbi-sobsagusadid.
2KI 24:14 Deginbali, Nabucodonosor, bela dule Jerusalénʼginmalad-gasa sesa gusad: Dule-dummagan, dule-bila-onomalad-bulegan, dule-ibmar-sobedgi-arbamalad, degi, dule-esgoro-sobedgi-arbamalad, gasa sesad. Belagwable miliambe (10,000) dulemar-gasa sesad. Unnila, dule-wileganabi napi obesad.
2KI 24:15 Degi, Rey-Nabucodonosor, wemar-gasa Babilonia-yarse sesa gusad: Rey-Joaquín, e-nan, rey-e-omegan, dule-dummagan, degi, dule-bulegan-gasa sesa gusad.
2KI 24:16 A-ukinbali, bela sorda-bila-onomalad-bulegan, miligugle-mergu (7,000) sesa gusbalid. Dule-ibmar-sobedgi-arbamalad, degi, dule-esgoro-sobedgi-arbamalad, miligwen-mergu (1,000) sesa gusad. Degine, Nabucodonosor, bela dulemar-bila-onolegedgi-urwemalad-gasa Babilonia-yarse sesa gusbalid.
2KI 24:17 Geb a-sorbali, Nabucodonosor, Joaquín-e-gilor Mataníasʼye nugad, Judá-e-reyga nug-imaksad. Geb ega nug ogwasad, Sedequíasʼye onugsasad.
2KI 24:18 Sedequías birga-durgwen-gakagwensak-nikadgi (21) yar sealid. Jerusalénʼgi birgambe-gakagwensak (11) yar sesad. E-nandi, Hamutalʼye nugad, Jeremías-e-sisgwad. Hamutalʼde, Libnaʼginedid.
2KI 24:19 Sedequías Bab-Jehová-ibmar-abemaisulidi, Bab-Jehová-asabin imaksad. Ar ade, Sedequías, Joacim-ibmar-isgana-imaksadba ibmar imaksamogad.
2KI 24:20 Degidbali, Bab-Jehová Jerusalén-dulemargi, degi, Judá-dulemargi uluar gusad. Degisoggu, Bab-Dummad amar-obachasunnad. A-sorbali, Sedequías, Babilonia-e-reygi gwichigusad.
2KI 25:1 Sedequías birgabakebakgus (9) Judá-yargi negsemaidgine, Tebet-nii-gwichid-ibambegwadgi, Babilonia-Rey-Nabucodonosor Jerusalénʼgi-gwichiguega, Jerusalén-neggweburse sorda-bila-onomalad-abargi aligusad. Geb bela neggwebur-ebilis ambikusmalad, a-dikarba napa arsanyob sobsamalad, adi, aba ubomalagar.
2KI 25:2 Jerusalén-neggwebur birgabo Babilonia-sordamarse ebiriles-sii gusad. Deunni, Sedequías birgambe-gakagwensakgusa (11) reyga maidgined.
2KI 25:3 Amba a-birga-naidgine, nii-walabakegwad-ibabakebakgi ukud-dummad Jerusalénʼgi nagunonikid. Dulemar ibmar-sate gunonimalad.
2KI 25:4 Degisoggu, Jerusalén-dulemar neggwebur-galu-matusulidgi yaa-ollomaksamalad. Ar Babilonia-sorda-bila-onomalad neggwebur-ebilis-bukwa-inigwele, Rey-Sedequías, Jerusalén-sordamar-bila-onomalad a-mutikidgine, galu-darbogwadba rey-nainu-naidsik ainidmalad. Arabá-igarba wakitemalad.
2KI 25:5 Degi-inigwele, Babilonia-sordamar, Rey-Sedequías-balegite gusmalad. Geb Jericó-nebagi bargadapmalad. Bela Sedequías-sorda-bila-onomalad, Sedequías-idu duurmakdemalad.
2KI 25:6 Geb, Babilonia-sordamar, Rey-Sedequías gasmalad. Geb Ribla-neggweburse, Babilonia-e-reyse sesmalad. Agi ega Rey-Nabucodonosor, sabsur-odurdakleged-igar itosad.
2KI 25:7 Geb degi, Sedequías-wagab, e-masmala-e-dukar egwachamalad. Geb sorba, Sedequías-ibe ibya onosmalad. Agine, esgoro-gordikid-dubgi-edinnar Babilonia-neggweburse sesmalad.
2KI 25:8 Nabucodonosor Babilonia-yargi birgambe-gakabakebakgus-negsemaidgine (19), Ab-nii-gwichid-ibatargi, reygi-nakulemalad-e-dummad Nabuzaradánʼye-nugad Jerusalén-neggweburse nonigusad. Nabuzaradánʼde, Rey-Nabucodonosor-e-sordamar-e-dummadga-gudiid, reyga e-bendaked-dummadid.
2KI 25:9 Nabuzaradán, Bab-Jehováʼse-goled-neg-siid ogumaksad, degi, reyneg-siid ogumaksabalid. Aginbali, bela Jerusalénʼgi-negmar-bukwad ogumaksabalid. Deginbali, Nabuzaradán, sapin-dummaganga-gudidimalad-negmar, bela ogumaksabalid.
2KI 25:10 Degi, Babilonia-sorda-bila-onomalad Nabuzaradánʼba-gudimarmogadi, akwa-galu-matusulid-Jerusalén-neggwebur-ebirnaidi, bela earismalad.
2KI 25:11 Degisoggu, Nabuzaradán, bela Jerusalén-neggweburgi dulemar-besmalad-gasa Babilonia-yarse sesad. Degi, Judá-dulemar-Rey-Nabucodonosorʼba-nagusmarmogadi, bela gasa sesbalid.
2KI 25:12 Unnila, sorda-idued-Nabuzaradán, dule-wileganabi napi obesad. Adi, amar uva-nainumargi arbaega, degi, nainumar-nanaidgi ibmar digegar.
2KI 25:13 Babilonia-sordamala Bab-Dummadse-goled-neggi: Buarmar-esgoro-gordikidgi-sobaled, bela bibichismalad. Bormo-argan-enuked-e-malimar esgoro-gordikidgi-sobarmalad, bela ogoamaksamarbalid. Degine, bormo-dii-sied-dummad esgoro-gordikidgi-sobaled, bela ogoamaksamarbalid. Geb bela Babilonia-yarse esgoro-gordikid sesmalad.
2KI 25:14 Deginbali, Nabuzaradán bela bormomar, bormo-buru-wemalad, gwillo-dub-siked-dislamar, degine, buru-wemalad, sesad. Bela-Bab-Jehováʼse-goled-neggi ibmar-ebulemalad esgoro-gordikidgi-sobarmalad, Babilonia-yarse sesad.
2KI 25:15 A-ukinbali, sorda-bila-onomalad-e-dummad-Nabuzaradán, sianarmar sesbalid, degi, nog-dummagan-abe-bomimalad sesbalid. A-ibmarmala bela orbi nanaed, degi, manibi nanabalid.
2KI 25:16 We-buarmar-warbogwad-selesadi, Salomón Bab-Jehováʼse-goled-negga esgoro-gordikidgi sobsagusadi, bela-bela-aidikusoggu, e-aidikued wisguledsulid. Degi, bormo-dii-sied-dummad, degi, a-e-malimar-sobsagusadi, bela-bela-aidikusoggu, e-aidikued wisguledsurbalid.
2KI 25:17 Buarmar, dalibake-gaka-binasgarse sugu-sugu nanaed. Geb buar-e-nonomar, bisgipaa dungu nanaed. Buar-nono-e-dikargi guseb-dummadyob-sobar-nanaid, degi, a-sobaled-birgi sakiyob nanaibalid. Bela esgoro-gordikidbi sobaled. Buarmar-warbogwadgi ibmar-sobar-nanaidi, bela emarbi dakleged.
2KI 25:18 Degine, sorda-bila-onoged-e-dummad-Nabuzaradán wemar-gasa sesad: Dule-irwa-Bab-Jehováʼse-goled-e-dummad-Seraías. Seraías-e-sorbalid-Sofonías. Dule-Bab-Jehováʼse-goled-neg-yawagak-dakmalad, warbaa sesad.
2KI 25:19 Jerusalén-neggweburgi-besmalad-gasa sesbalid: Sorda-bila-onomalad-daked. Dule-walatar reyga-ibmar-imakdimalad. Sorda-bila-onomaladga-garda-narmaked-e-idued A-dulede, dulemar-nug-semaidid. A-ukinbali, dulemar-amba-neggweburgi-gudimalad, dulapaa (60) gasmarbalid.
2KI 25:20 Sorda-bila-onomalad-e-dummad-Nabuzaradán dulemar-gasgu, Ribla-neggweburse Babilonia-e-rey-maidse dulemar-sesad.
2KI 25:21 Geb Rey-Nabucodonosor, Hamat-yargi Ribla-neggweburgi dulemar-oburgwisad. Deyobi, Judá-dulemar galesa e-neggweburgi selear gusad.
2KI 25:22 Babilonia-Rey-Nabucodonosor, dummadga Gedalías-nug-imaksad, adi, a-dule, Judá-dulemar-napi-besmalad dakegar. Gedalíasʼde Ahicam-e-machid, Safán-wagwad.
2KI 25:23 Judá-sorda-bila-onomalad-e-dummagan, degi, e-sordamar, Babilonia-e-rey Judá-dulemar-besmalad-dakega Gedalías-nug-imaksaye wisguarmargu, Mizpa-neggweburse Gedalías-dakega nadegusmalad. Sordamar-nadmaladi, wemalad: Netanías-machi-Ismael, Carea-machi-Johanán, Tanhumet-machi-Seraías, Tanhumetʼde Netofaʼginedid, degi, dule-Maacaʼgined-machi-Jaazanías.
2KI 25:24 Geb Gedalías a-dulemarga, degi, e-sordamarga weyob ise-sogar sogded: “Melle be Babilonia-sordamar dobgumar. Be we-yargine gudii be imakmala. Babilonia-e-reyga sogedba be ibmar-imakmala. Ar deyobile, nueganbi-gudii be gudmaloed.”
2KI 25:25 Gedalías nii-walaguglegus (7) dummadga-maidgi, Ismael, Gedalíasʼse nonigusad. Eba dulemar-warambe (10) nonigusmarmogad. Ismaelʼde, Netanías-machid, degi, Elisama-e-wagwad. Ismael, Judá-e-reymar-wagansikidid. Geb agine, Ismael e-sordamarmala Mizpaʼse nonimargu, Gedalías-oburgwismalad. Deginbali, Judá-dulemar, degi, Babilonia-dulemar Gedalíasʼba-nanaimalad oburgwismarbalid.
2KI 25:26 Geb degidgine, bela dulemar Babilonia-sorda-dobguar, Egipto-yarse wakite-duurmakde gusmalad. Bela sergan, degi, burwiganase-bakale, degi, sorda-bila-onomalad-e-dummaganse-bakale, wakitemalad.
2KI 25:27 Babilonia-e-rey-Evil-Merodac birgagwengus megidagedgi, Judá-e-rey-Joaquín-esgaryagi-siid onosad. Deun, Joaquín, birga-durgwen-gakambe-gakaguglegus (37) Babilonia-neggweburse gales selenonigusad. Geb Joaquín, Adar-nii-yoidgi, a-iba-durgwen-gakagugledgi, esgaryagi-sii nosad.
2KI 25:28 Geb Evil-Merodac nueganbi Joaquín-akwisad. Geb agine, Evil-Merodac, e-sorda-reymar-imbagi, dummadga Babilonia-neggweburgi Joaquín-sisad.
2KI 25:29 Deginbali, Joaquín, esgaryagi-siged-mor bar-yossulid, degi, rey-imbagi mas-gundii gusad.
2KI 25:30 De-ukinbali, Evil-Merodac, Joaquínʼga bane-bane ibmar-abelemalad-bakega mani-ukdii gusad.
1CH 1:1 Adán-e-wagan, wemalad: Adán-e-machi, Set. Set-e-machi, Enós.
1CH 1:2 Enós-e-machi, Cainán. Cainán-e-machi, Mahalaleel. Mahalaleel-e-machi, Jared.
1CH 1:3 Jared-e-machi, Enoc. Enoc-e-machi, Matusalén. Matusalén-e-machi, Lamec.
1CH 1:4 Lamec-e-machi, Noé. Noé-e-masmala, wemalad: Sem, Cam, Jafet.
1CH 1:5 Jafet-e-masmala, wemalad: Gomer, Magog, Madai, Javán, Tubal, Mesec, degi, Tiras.
1CH 1:6 Gomer-e-masmaladi, wemarmogad: Askenaz, Rifat, Togarma.
1CH 1:7 Javán-e-masmaladi, wemarmogad: Elisa, Tarsis, Quitim, degi, Dodanim.
1CH 1:8 Cam-e-masmala, wemalad: Cus, Mizraim, Fut, degi, Canaán.
1CH 1:9 Cus-e-masmaladi, wemarmogad: Seba, Havila, Sabta, Raama, degi, Sabteca. Raama-e-masmaladi, wemarmogad: Seba, Dedán.
1CH 1:10 Cus, machi-Nimrod-nikusad. Nimrodʼde, gebe-we-napneggi, dule-bila-onoged-gandikid megisad.
1CH 1:11 Mizraimʼdi, we-dulemar-e-dad-dummadga gunonikid: Ludim-dulemar, Anamim-dulemar, Lehabim-dulemar, Naftuhim-dulemar,
1CH 1:12 Patrusim-dulemar, degi, Casluhim-dulemar. Casluhim-dulemargi, Filistea-dulemar-danikid, degi, Caftorʼmar agi danimarmogad.
1CH 1:13 Canaán, machi-Sidón-nikusad. Sidón, Canaán-e-machi-gebesailadid, degi, Het, Canaán-e-machimogad.
1CH 1:14 We-dulemar, Canaán-e-waganmarmogad: Jebuseoʼmar, Amorreoʼmar, Gergeseoʼmar,
1CH 1:15 Heveoʼmar, Araceoʼmar, Sineoʼmar,
1CH 1:16 Arvadeoʼmar, Zemareoʼmar, degi, Hamateoʼmar.
1CH 1:17 Sem-e-masmala, wemalad: Elam, Asur, Arfaxad, Lud, Aram, Uz, Hul, Geter, degi, Mesec.
1CH 1:18 Arfaxad, Sela-e-babga gunonikid. Geb Sela, Heber-e-babga gunonimogad.
1CH 1:19 Heber, masmala-warbo ega gwalulesad: Gwensak, Pelegʼye nugad. Ar a-ibagangi, dulemar napneggi mimiles-gussoggu, aba, Peleg-nuggusad. Peleg-e-urbadi, Joctánʼye nugmogad.
1CH 1:20 Joctán-e-masmaladi, wemarmogad: Almodad, Selef, Hazarmavet, Jera,
1CH 1:21 Adoram, Uzal, Dicla,
1CH 1:22 Ebal, Abimael, Seba,
1CH 1:23 Ofir, Havila, degi, Jobab. Bela-wemar, Joctán-e-masmalad.
1CH 1:24 Sem, machi-Arfaxad-nikusad, Arfaxadʼdi, machi-Sela-nikusmogad. Selaʼdi, machi-Heber-nikusmogad.
1CH 1:25 Heberʼdi, machi-Peleg-nikusmogad, Pelegʼdi, machi-Reu-nikusmogad.
1CH 1:26 Reuʼdi, machi-Serug-nikusmogad, Serugʼdi, machi-Nacor-nikusmogad, Nacorʼdi, machi-Taré-nikusmogad.
1CH 1:27 Taréʼdi, machi-Abram-nikusmogad. We-Abram, Abrahamʼye nugbalid.
1CH 1:28 Abraham-e-masmala, wemalad: Isaac, Ismael.
1CH 1:29 Ismael-e-masmala, wemalad: Ismael-e-machi-gebesailadi, Nebaiotʼye nugad. Ismael-machi-sorbarmaladdi, wemalad: Cedar, Adbeel, Mibsam,
1CH 1:30 Misma, Duma, Massa, Hadad, Tema,
1CH 1:31 Jetur, Nafis, degi, Cedema. Wemar, Ismael-e-masmalad.
1CH 1:32 Cetura, Abraham-ome-dikarbalidid. Abraham abogwa masmala-baksad, wemalad: Zimram, Jocsán, Medán, Madián, Isbac, degi, Súa. Jocsán-e-masmaladi, wemarmogad: Seba, Dedán.
1CH 1:33 Madián-e-masmaladi, wemarmogad: Efa, Efer, Hanoc, Abida, degi, Elda. Bela-wemar, Cetura-e-waganad.
1CH 1:34 Abraham machi-Isaac-nikusad. Isaac-e-masmaladi, wemarmogad: Esaú, Israel.
1CH 1:35 Esaú-e-masmala, wemalad: Elifaz, Reuel, Jeús, Jaalam, degi, Coré.
1CH 1:36 Elifaz-e-masmaladi, wemarmogad: Temán, Omar, Zefo, Gatam, Cenaz, Timna, degi, Amalec.
1CH 1:37 Reuel-e-masmaladi, wemarmogad: Nahat, Zera, Sama, degi, Miza.
1CH 1:38 Seir-e-masmala, wemalad: Lotán, Sobal, Zibeón, Aná, Disón, Ezer, degi, Disán.
1CH 1:39 Lotán-e-masmaladi, wemarmogad: Hori, Homam. Lotán-e-bundi Timnaʼye nugad.
1CH 1:40 Sobal-e-masmaladi, wemarmogad: Alván, Manahat, Ebal, Sefo, degi, Onam. Zibeón-e-masmaladi, wemarmogad: Aja, Aná.
1CH 1:41 Aná-e-machidi, wemogad: Disón. Disón-e-masmaladi, wemarmogad: Amram, Esbán, Itrán, degi, Querán.
1CH 1:42 Ezer-e-masmaladi, wemarmogad: Bilhán, Zaaván, degi, Jaacán. Disán-e-masmaladi, wemarmogad: Uz, Arán.
1CH 1:43 Israel-dulemar-rey-nikued-iduar, Edom-yargi wemar reyga megismalad: Beor-machi-Bela. E-neggwebur Dinabaʼye nugad.
1CH 1:44 Rey-Bela-burgwenonigua, Zera-machi-Jobab reyga megnonikid. Zeraʼde, Bosra-neggweburginedid.
1CH 1:45 Jobab-burgwenonigua, Husam reyga megnonikid. Husamʼde, Temán-yargined.
1CH 1:46 Husam-burgwenonigua, Bedad-machi-Hadad reyga megnonikid, Hadadʼde, Moab-yargi Madián-ogalakus-gusadid. E-neggwebur Avitʼye nugad.
1CH 1:47 Hadad-burgwenonigua, Samla reyga megnonikid. Samlaʼde, Masreca-neggweburginedid.
1CH 1:48 Samla-burgwenonigua, Rehobotʼgined-Saúl reyga megnonikid, Rehobot-neggweburde, Éufrates-diwar-dikarba siid.
1CH 1:49 Saúl-burgwenonigua, Acbor-machi-Baal-Hanán reyga megnonikid.
1CH 1:50 Baal-Hanán-burgwenonigua, Hadad reyga megnonikid. E-neggwebur, Paiʼye nugad. Hadad-e-ome, Mehetabelʼye nugad. Mehetabelʼde, Matred-e-sisgwad, Mezaab-e-wagwad.
1CH 1:51 Hadad-burgwenonikid-sorba, Edom-yargi wemar sailaganga megismalad: Timna, Alva, Jetet,
1CH 1:52 Aholibama, Ela, Pinón,
1CH 1:53 Cenaz, Temán, Mibzar,
1CH 1:54 Magdiel, degi, Iram. Wemar, Edom-yargi sailaganga megismalad.
1CH 2:1 Israel-e-masmala, wemalad: Rubén, Simeón, Leví, Judá, Isacar, Zabulón,
1CH 2:2 Dan, José, Benjamín, Neftalí, Gad, degi, Aser.
1CH 2:3 Judá-e-masmala, wemalad: Er, Onán, degi, Sela. We-masmala-warbaagwadi, Súa-e-sisgwagi gwalulesmalad. We-omede, Canaán-duled. Judá-machi-gebesailadi, Erʼye nugad. Bab-Jehová-asabin dule-isganaga gusad. Agala, Bab-Jehová, Er-iblosad.
1CH 2:4 Judá-bala-Tamar, Judáʼga masmala-warbo baksad: Fares, Zera. Judá, masmala bela walatar nikusad.
1CH 2:5 Fares-e-masmaladi, wemarmogad: Hezrón, Hamul.
1CH 2:6 Zera-e-masmaladi, wemarmogad: Zimri, Etán, Hemán, Calcol, degi, Dara. Bergwable, e-atar gumalad.
1CH 2:7 Carmi-e-machidi, wedid: Acán. We-Acán, Bab-Dummadga-ibmar-nugsalesad atur-imaksa-gusadba, Israel-dulemarga boni-dummad onos gusad. Agi, dummad-neg-gagasad.
1CH 2:8 Etán-e-machidi, wedid: Azarías.
1CH 2:9 Hezrón-e-masmaladi, wemarmogad: Jerameel, Ram, degi, Quelubai.
1CH 2:10 Ram, machi-Aminadab-nikusad. Aminadabʼdi, machi-Naasón-nikusmogad. We-Naasónʼde, Judá-dulemar-e-dummadid.
1CH 2:11 Naasón, machi-Salmón-nikusmogad. Salmónʼdi, machi-Booz-nikusmogad.
1CH 2:12 Boozʼdi, machi-Obed-nikusmogad. Obedʼdi, machi-Isaí-nikusmogad.
1CH 2:13 Isaí, machi-Eliab-nikunonikid. A-machide, gebesailaginedid. Eliab-yarbali, Abinadab gwalulesad. Abinadab-yarbali, Simea gwalulenonimogad.
1CH 2:14 Simea-yarbali, Natanael gwalulesmogad. Natanael-yarbali, Radai gwalulesmogad.
1CH 2:15 Radai-yarbali, Ozem gwalulesmogad. Napidgine, David gwalulenonikid.
1CH 2:16 E-bunmardi, wemarmogad: Sarvia, Abigail. Sarvia-e-masmala, warbaa gumalad: Abisai, Joab, Asael.
1CH 2:17 Abigailʼga, Amasa gwalulenonikid, Amasa-e-baba, Jeterʼye nugad, Ismael-duled.
1CH 2:18 Hezrón-machi-Caleb, e-ome-Azubaʼga masmala-baksad, degi, e-ome-baid-Jeriotʼga masmala-baksabalid. E-masmala, wemalad: Jeser, Sobab, Ardón.
1CH 2:19 Azuba-burgwisgua, Caleb, ome-baid Efrataʼye-nugad nikusad. Geb Efrataʼga, machi-Hur-baknonikid.
1CH 2:20 Hurʼdi, machi-nikusad, Uriʼye nugad. Uriʼdi, machi-Bezaleel-nikunonimogad.
1CH 2:21 Hezrón, birga-dulapaa (60) nikunonigua, Maquir-e-sisgwa nikusad. Maquirʼde, Galaad-e-babad. Agi, Maquir-e-sisgwa Segub-baknonikid.
1CH 2:22 Segubʼdi, machi-Jair-nikunonimogad. Jairʼde, Galaad-yargi, neggwebur-gwadulagwen-gakapaa (23) nikunonikid.
1CH 2:23 Gesur-dulemar, degi, Aram-dulemarbogwa, Jair-ibe Kenat-neggwebur, degi, bela e-neggwebur-burwiganase-bakar, sunonimalad. Belagwable, neggwebur-gwadulapaa (60) Jair-ibe susmalad. Bela wemar, Maquir-e-wagan gumalad. Maquirʼdi, Galaad-e-babad.
1CH 2:24 Hezrón, Caleb-De-Efrata-neggweburgi-burgwisgua, e-ome-Abías, machi-Asur-baksad. Asurʼde, Tecoa-e-babad.
1CH 2:25 Hezrón-machi-gebesailagined-Jerameel-e-masmala, wemalad: E-machi-gebesailagined, Ramʼye nugad. Baigana, wemalad: Buna, Orén, Ozem, degi, Ahías.
1CH 2:26 Jerameel ome-baid nikunonikid. A-ome, Ataraʼye nugad. Atara, machi-Onam-baknonikid.
1CH 2:27 Jerameel-machi-gebesailagined-Ram-e-masmala, wemalad: Maaz, Jamín, Equer.
1CH 2:28 Onam-e-masmaladi, wemarmogad: Samai, Jada. Samai-e-masmaladi, wemarmogad: Nadab, Abisur.
1CH 2:29 Abisur-e-ome, Abihailʼye nugad. Ega masmala-gwalulesadi, wemalad: Ahbán, Molid.
1CH 2:30 Nadab-e-masmaladi, wemarmogad: Seled, Apaim. Seledʼdina mimmigan-nikussuli burgwisad.
1CH 2:31 Apaim-e-machidi, Isiʼye nugad. Isi-e-machidi, Sesánʼye nuggunonikid. Sesán-e-machidi, Ahlaiʼye nuggunonikid.
1CH 2:32 Samai-urba-Jada-e-masmaladi, wemarmogad: Jeter, Jonatán. Jeterʼdina mimmigan-nikussuli burgwisad.
1CH 2:33 Jonatán-e-masmaladi, wemarmogad: Pelet, Zaza. Bela wemar, Jerameel-e-wagan gumalad.
1CH 2:34 Sesán, masmala-nikussulid, unnila bunamalabi nikusad. Unnila, Sesán, Egipto-dulebi e-maiga sedii gusad. We-maide, Jarhaʼye nugad.
1CH 2:35 Sesán Jarhaʼga e-sisgwa-uksad, adi, nikuegar. Degidba, Jarha, Sesán-e-sisgwaga machi-Atai-baknonikid.
1CH 2:36 Atai, machi-Natán-nikunonikid. Natánʼdi, machi-Zabad-nikunonikid.
1CH 2:37 Zabadʼdi, machi-Eflal-nikunonikid. Eflalʼdi, machi-Obed-nikunonikid.
1CH 2:38 Obedʼdi, machi-Jehú-nikunonikid. Jehúʼdi, machi-Azarías-nikunonikid.
1CH 2:39 Azaríasʼdi, machi-Heles-nikunonikid. Helesʼdi, machi-Elasa-nikunonikid.
1CH 2:40 Elasaʼdi, machi-Quismai-nikunonikid, Quismaiʼdi, machi-Salum-nikunonikid.
1CH 2:41 Salumʼdi, machi-Jecamías-nikunonikid. Degi, Jecamíasʼdi, machi-Elisama-nikunonikid.
1CH 2:42 Jerameel-e-urba-Caleb-e-masmaladi, wemalad: E-machi-gebesailagined, Mesaʼye nugad. Mesaʼdi, Zif-e-babad, degi, Maresa-e-babbalid. Maresaʼdi, Hebrón-e-babmogad.
1CH 2:43 Hebrón-e-masmaladi, wemarmogad: Coré, Tapúa, Requem, Sema.
1CH 2:44 Semaʼdi, machi-Raham-nikunonikid. Rahamʼdi, machi-Jorcoam-nikunonikid. Requemʼdi, machi-Samai-nikunonikid.
1CH 2:45 Samaiʼdi, machi-Maón-nikunonikid. Degi, Maónʼdi, machi-Bet-Sur-nikunonikid.
1CH 2:46 Caleb-ome-dikarbalid-Efa, we-masmala nikusad: Harán, Mosa, Gazez. Haránʼdi, machi-nikusad. Gazezʼye onugsasad.
1CH 2:47 Jahdai-e-masmaladi, wemalad: Regem, Jotam, Gesam, Pelet, Efa, degi, Saaf.
1CH 2:48 Caleb-ome-dikarbalid-Maaca, we-masmala nikusad: Seber, Tirhana.
1CH 2:49 Deginbali, Maaca masmala nikusbalid: Saaf, Seva. Saafʼdi, Madmana-e-babad. Sevaʼdi, Macbena-e-babad, degi, Gibea-e-babbalid. Caleb-e-sisgwadi, Acsaʼye nugad.
1CH 2:50 Bela-wemar, Caleb-e-wagan gumalad. Efrata-machi-gebesailagined-Hur-e-masmala, wemalad: Sobal, Salma, Haref.
1CH 2:51 Sobalʼdi, Quiriat-Jearim-e-babad, Salmaʼdi, Belén-e-babad, Harefʼdi, Bet-Gader-e-babad.
1CH 2:52 Sobal-e-wagan, wemalad: Haroe, degi, Manahet-dulemar-negabalad.
1CH 2:53 Degi, Quiriat-Jearim-e-anagan, wemalad: Itri-dulemar, Fut-dulemar, Sumat-dulemar, degi, Misraim-dulemar. Misraim-dulemargi, Zora-dulemar danimalad, degi, Estaolita-dulemar danimarmogad.
1CH 2:54 Salma-e-wagan, wemalad: Belén, Netofa-dulemar, Atrot-Bet-Joab, Manahat-dule-negabar, degi, Zora-dulemar.
1CH 2:55 Degine, garda-narmakmalad-e-gwenadgan-Jabesʼgi-mamaid, wemalad: Tirat-dulemar, Simea-dulemar, Sucat-dulemar. We-Ceneo-dulemar, Hamatʼgi-danimaladid. Hamatʼde, Recab-dulemar-e-dad-dummadid.
1CH 3:1 David-e-masmala Hebrónʼgi-gwalulesmaladi wemar gued: E-machi-sailagined, Amnón. E-nandi, Ahinoamʼye nugad, Jezreel-duled. E-machi-Amnón-yarbali, Daniel gwalulesad. E-nandi, Abigailʼye nugad, Carmel-neggweburginedid.
1CH 3:2 Daniel-yarbali, Absalón gwalulesad. E-nandi, Maacaʼye nugad, Gesur-e-rey-Talmai-e-sisgwad. Absalón-yarbali, Adonías gwalulesad. E-nandi, Haguitʼye nugad.
1CH 3:3 Adonías-yarbali, Sefatías gwalulesad. E-nandi, Abitalʼye nugad. Sefatías-yarbali, Itream gwalulesad. E-nandi, Eglaʼye nugad.
1CH 3:4 Deunni, David birgagugle (7) gaka-nii-walanergwa (6) Hebrónʼgi negsemaidgi we-masmala-walanergwadi (6), ega gwalulesad. David, Jerusalénʼgi birga-dulagwen-gakambe-gakapaa (33) yar-semai gusad.
1CH 3:5 Jerusalénʼgi, masmala-walabake ega gwalulesbalid. Amar, wemalad: Simea, Sobab, Natán, degi, Salomón. Wemar, Amiel-sisgwa-Betsabé-e-masmalad.
1CH 3:6 David masmala-baigan walabakebak (9) nikusbalid: Ibhar, Elisama, Elifelet,
1CH 3:7 Noga, Nefeg, Jafía,
1CH 3:8 Elisama, Eliada, degi, Elifelet.
1CH 3:9 Bela-wemar, David-e-masmala gued. We-masmala-e-bundina, Tamarʼye nugad. E-omegan-dikarbarmaladbo-machimala-baklesaddi, soglesulid.
1CH 3:10 Weyob Salomón-e-waganmar danikid: E-machi-Roboam. Roboam-e-machidi, Abías. Abías-e-machidi, Asa. Asa-e-machidi, Josafat.
1CH 3:11 Josafat-e-machidi, Joram. Joram-e-machidi, Ocozías. Ocozías-e-machidi, Joás.
1CH 3:12 Joás-e-machidi, Amasías. Amasías-e-machidi, Azarías. Azarías-e-machidi, Jotam.
1CH 3:13 Jotam-e-machidi, Acaz. Acaz-e-machidi, Ezequías. Ezequías-e-machidi, Manasés.
1CH 3:14 Manasés-e-machidi, Amón. Amón-e-machidi, Josías.
1CH 3:15 Josías-e-masmala, wemalad: E-machi-sailagined, Johanán. Johanán-yarbalidi, Joacim. Joacim-yarbalidi, Sedequías. Sedequías-yarbalidi, Salum.
1CH 3:16 Joacim-e-masmaladi, wemalad: Jeconías, degi, Sedequías.
1CH 3:17 Jeconías-gales-selesgusad-e-masmala, wemalad: Asir, Salatiel,
1CH 3:18 Malquiram, Pedaías, Senazar, Jecamías, Hosama, degi, Nedabías.
1CH 3:19 Pedaías-e-masmaladi, wemarmogad: Zorobabel, degi, Simei. Zorobabel-e-masmaladi, wemarmogad: Mesulam, degi, Hananías. We-masmala-e-bundina, Selomitʼye nugad.
1CH 3:20 Zorobabel, masmala-baigan walatar nikusbalid: Hasuba, Ohel, Berequías, Hasadías, degi, Jusab-Hesed.
1CH 3:21 Hananías-e-wagan, wemalad: E-machi, Pelatías. Pelatías-e-machidi, Jesaías. Jesaías-e-machidi, Jefaías. Jefaías-e-machidi, Refaías. Refaías-e-machidi, Arnán. Arnán-e-machidi, Abdías. Degi, Abdías-e-machidi, Secanías.
1CH 3:22 Secanías-e-wagan, wemalad: E-machi-Semaías, Semaías-e-machimala-walataled: Hatús, Igal, Barías. Nearías, degi, Safat. Wemar, bergwable walanergwa (6) gumalad.
1CH 3:23 Nearías-e-masmala, warbaa-gumalad: Elioenai, Ezequías, Azricam.
1CH 3:24 Elioenai-e-masmaladi, walagugle (7) gumalad: Hodavías, Eliasib, Pelaías, Acub, Johanán, Dalaías, degi, Anani.
1CH 4:1 Judá-e-wagan-baigan, wemalad: Fares, Hezrón, Carmi, Hur, degi, Sobal.
1CH 4:2 Sobal-machi-Reaía, machi-Jahat-nikusad. Jahatʼdi, machi-Ahumai-nikusad, degi, machi-Lahad-nikusbalid. Jahatʼgi, Zora-dulemar danikid.
1CH 4:3 Etam-e-masmala Hur-e-wagan, wemalad: Jezreel, Isma, degi, Ibdas. Wemar-e-bundi, Haze-Lelponiʼye nugad.
1CH 4:4 Penuelʼdi, Gedor-e-babad. Ezerʼdi, Husa-e-babad. Wemar, Hur-e-waganad. Hurʼde, Efrata-e-machi-sailaginedid. Efrataʼde, Belén-neggwebur-dulemar-e-dadsailad.
1CH 4:5 Tecoa-neggwebur-dulemar-e-dadsaila-Asur, ome-walabo nikusad: Hela, Naara.
1CH 4:6 Naara, we-masmala baksad: Ahuzam, Hefer, Temeni, degi, Ahastari. Wemar, Naara-e-masmalad.
1CH 4:7 Hela-e-masmaladi, wemarmogad: Zeret, Jezoar, Etnán, degi, Cos.
1CH 4:8 Cosʼdi, warbo masmala nikusad: Anub, Zobeba. Cosʼde, Aharhel-e-wagan-e-dadsailad. Aharhelʼde, Harum-machid.
1CH 4:9 Jabesʼdi, bur bule e-gwenadganba nug-nika megisad. E-nan Jabesʼye-onug-imaksad, ade soged: “Bonigan-abalagi an na mimmi-nikusye.”
1CH 4:10 Jabes, Israel-e-Bab-Dummadse gochad, ega sogded: “An bese wilesagwa egise, be ise-nued-angi-binsae, napa-dummad be wis anga uke. Be wis an-bendake, mer bar boni-dummadba wilegegar.” Jabes, Bab-Dummadse-ibmar-egichisadi, Bab-Dummad ega imaksad.
1CH 4:11 Súa-urba-Quelub, machi-Mehir-nikunonikid. Mehirʼdi, Estón-e-babad.
1CH 4:12 Estón masmala-nikusadi, wemalad: Bet-Rafa, Paseah, Tehina. Tehinaʼde, Nahas-neggwebur-e-dadsailad. Wemar, Reca-dulemarga gunonikid.
1CH 4:13 Cenaz-e-masmala, wemalad: Otoniel, Seraías. Otoniel-e-masmaladi, wemarmogad: Hatat, degi, Meonotai.
1CH 4:14 Meonotaiʼdi, machi-Ofra-nikusad. Seraíasʼdi, machi-Joab-nikusmogad. Joabʼde, dulemar-Carisim-nebagi-bukwamalad-e-dadsailad. We-dulemarde, ibmar-sobedgi-arbamaladid.
1CH 4:15 Jefone-machi-Caleb-e-masmala, wemalad: Iru, Ela, Naam. Ela-e-machidi, wedid: Cenaz.
1CH 4:16 Jehalelel-e-masmala, wemalad: Zif, Zifa, Tirías, degi, Asareel.
1CH 4:17 Esdras-e-masmala, wemalad: Jeter, Mered, Efer, degi, Jalón. Mered, e-ome-Bitiaʼye-nugadga we-mimmigan-baksad: María, Samai, Isba. Isbaʼde, Estemoa-e-babad.
1CH 4:18 Wemar, Faraón-e-sisgwa-Bitia-e-mimmiganad. Mered-e-ome-baid-Jehudaíaʼye-nugad, Judá-duled. A-omede, machimala-baksamogad: Jered, Heber, Jecutiel. Jeredʼdi, Gedor-e-babad. Heberʼdi, Soco-e-babad. Jecutielʼdi, Zanoa-e-babad.
1CH 4:19 Hodías, Naham-e-bun nikusad. A-ebogwa, wemar-baksad: Keila, Estemoa. Keilaʼde, Garmita-duled, degi, Estemoaʼdi, Maaca-duled
1CH 4:20 Simón-e-masmala, wemalad: Amnón, Rina, Ben-Hanán, degi, Tilón. Isi-e-wagandi, wemalad: Zohet, Benzohet.
1CH 4:21 Judá-machi-Sela-e-masmala, wemalad: Er, Laada Erʼde, Leca-neggwebur-dulemar-e-dadsailad. Laadaʼde, Maresa-e-babad, degi, Laadaʼde, Bet-Asbea-neg-nugadgi lino-morgi-arbamalad-e-dadsailabalid.
1CH 4:22 Sela-e-wagandi, wemalad: Joacim, degi, Cozebaʼginmalad. Deginbali, Joás, Saraf. Wemar-warbogwad Belén-neggweburse gannar-daged-iduale, Moab-yargi negsemai gusmalad. We-ibmar-gusad garda-sergangi narmakar maid.
1CH 4:23 We-dulemar napsagi-arbamaladid. Netaín-neggweburgi, degi, Guederá-neggweburgi gudii gusmalad. Agine, we-dulemar reyga arbadii gusmalad.
1CH 4:24 Simeón-e-waganmar, wemalad: Nemuel, Jamín, Jarib, Zera, degi, Saúl.
1CH 4:25 Saúlʼdi, Salum-e-babad. Salumʼdi, Mibsam-e-babad. Mibsamʼdi, Misma-e-babad.
1CH 4:26 Misma-e-wagan weyob danikid: Misma, Hamuel-e-babad. Hamuelʼdi, Zacur-e-babad. Zacurʼdi, Simei-e-babad.
1CH 4:27 Simei, masmala warambe-gakanergwa (16) nikusad, degi, bunamala walanergwa (6) nikusbalid. Simei-e-gwenadgandina, mimmigan-ichesur nikussurmalad. Agala, Simeón-e-wagan, Judá-e-wagan-mergueyob gussurmalad.
1CH 4:28 Simeón-e-wagan, David reyga-megnonikidse, we-neggweburmargi ambikusmalad: Beerseba, Molada, Hazar-Sual,
1CH 4:29 Bilha, Ezem, Tolad,
1CH 4:30 Betuel, Horma, Siclag,
1CH 4:31 Bet-Marcabot, Hazar-Susim, Bet-Birai, degi, Saaraim. Simeón-e-wagan Rey-David reyga-megnonikidse, we-neggweburmar na e-neggweburga imaksamalad.
1CH 4:32 Simeón-e-wagan-e-neggwebur-burwigana, wemarbalid: Etam, Aín, Rimón, Toquén, degi, Asán. Bela we-neggwebur-burwigana gwaatar gued.
1CH 4:33 Deginbali, Baal-neg-nugadse bela neggwebur-burwigana neggwebur-dummagan-dikarba-bubukwadi, amargadbalid. Simeón-wagan we-neggweburmargine ambikusmalad.
1CH 4:34 Simeón-wagan-e-dadgan-e-dadgan-e-dummagan-e-nugmar, wemalad: Mesobab, Jamlec, Amasías-machi-Josías.
1CH 4:35 Joel, Josibías-machi-Jehú. Josibíasʼdi, Seraías-e-machi. Seraíasʼdi, Asiel-e-machi.
1CH 4:36 Degine, e-dummagan-baigan, wemalad: Elioenai, Jaacoba, Jesohaía, Asaías, Adiel, Jesimiel, Benaía.
1CH 4:37 Degi, Sifi-machi-Ziza. Sifiʼdi, Alón-e-machi. Alónʼdi, Jedaías-e-machi. Jedaíasʼdi, Simri-e-machi, degi, Simriʼdi, Semaías-e-machi.
1CH 4:38 Wemar-nug-bilesmaladi, e-gwenadgan-e-dummaganga gudimalad. Degine, e-gwenadgan bela-bela mergusmalad.
1CH 4:39 We-dulemar sibad-wawaadmarga gagan-nuegan-amiegala, Gedor-neg-nugad-dogedse, neba-neg-dad-nakwedsik-naidse mosmalad.
1CH 4:40 Agi, napa-bipisur-unnitiba amismalad, egi gagan-nuegan-bukidar-nai amismalad. A-yargi nabir-bogidik-gudii guleged amismalad. A-yargine, Cam-e-wagan gudimalanad.
1CH 4:41 We-dulemar-nug-bilesmaladi, Ezequías-Judá-e-reyga-maidgine, nonigusmalad. Bela Cam-e-wagan-danar-bukwad oitononimalad, egi naknoni gusmalad. E-ibe bela neg-burwigana-bukwad obelosmalad. Agi moli-omaed-gagan nue-nikasoggu, Cam-dulemar-muchub ambikusmalad. We-garda-narmaklenaigu, bela nug-iduar-bilesmalad, amba agi bukwamalad.
1CH 4:42 Deginbali, we-Simeón-sordamar, e-dulataled-ilatar (500), Seir-yalaganba nade gusmalad. Wemar-e-dummagan-idumalad, Isi-e-masmalad. Amarde, wemalad: Pelatías, Nearías, Refaías, degi, Uziel.
1CH 4:43 Degi, Isi-e-masmala bela Amalec-sordamar-napi-wakicha-gudimalad obelosmalad. Isi-e-wagan we-garda-narmaklenaidse agi amba bukwamalad.
1CH 5:1 Rubén, Israel-machi-sailaginedid. Rubén e-bab-omegi-dodosad-ular, bar machi-sailaginedyob gunonisulid. Ibmar-egadga-guoenadi, Israel-machi-José-e-masmalaga uklessunnad.
1CH 5:2 Ar Judá bur bule e-gwenadganba gandik-megis-inigwele, degine, e-gwenadgan-dummadga-gusbar-inigwele, degite, ibmar-Rubénʼgadga-guoenadi ega uklessulid. Aka Joséʼga, degi, José-e-waganga uklesad.
1CH 5:3 Israel-machi-sailagined-Rubén-e-masmala, wemalad: Hanoc, Falú, Hezrón, Carmi.
1CH 5:4 Joel-e-wagan, wemalad: Joel-e-machi, Semaías, Semaías-e-machidi, Gog. Gog-e-machidi, Simei.
1CH 5:5 Simei-e-machidi, Micaía. Micaía-e-machidi, Reaía. Reaía-e-machidi, Baal.
1CH 5:6 Baal-e-machidi, Beera. Beeraʼde, Rubén-e-sordamar-e-dummadid. Asiria-e-rey-Tiglat-Pileser Beera-gasa sesa gusad.
1CH 5:7 Beera-e-gwenad-e-gwenadganba, nug-ilemakar-maid, wemalad: Jeiel, e-gwenadgan-e-dummad, Zacarías.
1CH 5:8 Bela, Azaz-e-machi, Azazʼdi, Sema-e-machi, Semaʼdi, Joel-e-machi. Zacarías, degi, Belaʼmala, Aroer-neg-nugadgi gudii gusad. Aroer-akar Neboʼye-neg-nugadse, degi, Baal-Meón-neg-nugadse napa ganonikid.
1CH 5:9 Deginbali, e-moli-bebe-nikamalad Galaad-yargi ichesur mergusbarsoggu, agala, dad-nakwedsik Éufrates-diwar-maid-akale, nega-dulesulidgan-onodedse, neg-ganonibalid.
1CH 5:10 Rey-Saúl-negsemaigua, Rubén-e-wagan, Agareno-dulemargi bila-onos gusmalad, geb egi naknoni gusmalad. Degidba, Rubén-e-wagan, bela Galaad-yar-naidgi dad-nakwedsik megismalad. A-e-negmar-bukwadgi gudii gusmalad.
1CH 5:11 Gad-e-wagan, Rubén-e-wagan-bukwad-asabin Basán-yargi ambikusmalad, degi, Salca-yar-naidse ambikusmalad:
1CH 5:12 Joel, Basán-neggweburgi dummadga-megnonikid. Joel-sorbalid, Safánʼye nugad. Amar-sorba, Jaanai, Safatʼbogwa megnonikid.
1CH 5:13 E-gwenadgan e-babgangi-danimalad, wemalad: Micael, Mesulam, Seba, Jorai, Jacán, Zía, degi, Heber. Bergwable walagugle (7) gumalad.
1CH 5:14 Wemar-e-babgan weyob danikid: Abihail, Huri-e-machi, Huriʼdi, Jaroa-e-machi, Jaroaʼdi, Galaad-e-machi, Galaadʼdi, Micael-e-machi, Micaelʼdi, Jesisai-e-machi, Jesisaiʼdi, Jahdo-e-machi, degi, Jahdoʼdi, Buz-e-machi.
1CH 5:15 Degine, Abdiel-machi-Ahí, Guni-e-wagwad. Ahíʼye-nugadi, e-gwenadgan-e-dummadga gudii gusad.
1CH 5:16 Wemar, Galaad-yargi, degine, Basán-yar-naidgi ambikusmalad. Deginbali, Basán-e-neggwebur-burwiganagi, degi, Sarón-nainumargi gagan-moli-mas-nanaidgi, bela e-nainumar-ugakaase, ambikusmalad.
1CH 5:17 Bela e-dadgan-igar-danikidi, Judá-e-rey-Jotam-e-ibagangi, degi, Israel-e-rey-Jeroboam-e-ibagangi narmaklesad.
1CH 5:18 Rubén-e-wagan, Gad-e-wagan, degi, Manasés-e-wagan-negabalad, wemar bela sorda-mili-dulabo-gakabake gaka dulataled-ilagugle gaka dulapaa (44,760) sordamar-gandikmalad nikad. We-sordamarde sigu-abingaed-nikamaladid, es-suid-nikamaladid, degi, sigu-nikamarbalidid. Deginbali, bila-onoged nue-wismarbalidid.
1CH 5:19 Wemar, we-dulemargi bila-onosmalad: Agareno-dulemargi, Jetur-dulemargi, Nafis-dulemargi, degi, Nodab-dulemargi bila-onosmalad.
1CH 5:20 Degi-inigwele, bila-onolenaid-abargi, Bab-Dummad-bengussurmaladba Bab-Dummadse ise-gollar imaksamalad. Degi, Bab-Dummad itosgua, bendaksad. Degisoggu, Agareno-dulemar, degi, bela-Agareno-dulemarba-bila-ononanaid ese galakusmalad.
1CH 5:21 Degi, Rubén-e-wagan, Gad-e-wagan, Manasés-e-wagan-negabalad Agareno-dulemar-ibe we-ibmar-durgan susmalad: Moli-yargan-mureged, mili-dulabo-gakambe (50,000). Sibad-wawaad, mili-dulataled-ilabo-gaka-dulabo-gakambe (250,000). Moli-uayasuid, milibo (2,000). Deginbali, mili-dulatar (100,000) dulemar-gasbalid.
1CH 5:22 Ar bila-onogedgi Bab-Dummad eba gunaisoggu, agala, Agareno-dulemar bukidar girgusmalad. Deyob, Rubén-wagan, Gad-wagan, Manasés-wagan-negabalad, Israel-dulemar-gales-seledmaloed-e-ibaganse, Agareno-dulemar-e-yargi ambikunonimalad.
1CH 5:23 Manasés-e-wagan-negabalad bela-bela mergusmalad. Basán-yargi ambikusmalad, bela Baal-Hermón-yarse-bakar, ambikusmalad. Senirʼye-neg-nugadgi ambikusmarbalid, degi, Hermón-yar-siidse-bakar, ambikusmalad.
1CH 5:24 E-neguya-idudii gusmalad, wemalad: Efer, Isi, Eliel, Azriel, Jeremías, Hodavías, degi, Jahdiel. We-dulemar, bila-onogedgi dule-gandikmaladid, nug-nikamaladid, e-babgan-neggi sordamar-idudimaladid.
1CH 5:25 Aka bur Rubén-wagan, Gad-wagan, Manasés-wagan-negabalad Israel-e-Bab-Dummadgi gwisgudmalad. A-yargi-dulemar-baigan-bukusmalanad-e-bab-dummagan-e-nug odummodmalad. Bab-Dummad a-dulemar-obelos gusad.
1CH 5:26 Agala, Israel-e-Bab-Dummad we-Israel-dulemargi Asiria-e-Rey-Pul-egi-gwisguega imaksad. Pulʼde, Tiglat-Pileser-warbaagwadye (III) nugbalid. We-Pulʼde, we-negmar-nugadse Israel-dulemar-gasa sesad: Halah-neg-nugadse, Habor-neg-nugadse, Hara-neg-nugadse, degi, Gozán-diwarse. We-garda-narmaklenaidgine, amba agi bukwamalad.
1CH 6:1 Leví-e-masmala, wemalad: Gersón, Coat, Merari.
1CH 6:2 Coat-e-masmaladi, wemarmogad: Amram, Izhar, Hebrón, degi, Uziel.
1CH 6:3 Amram-e-mimmigandi, wemarmogad: Aarón, Moisés, María. Aarón-e-masmaladi, wemarmogad: Nadab, Abiú, Eleazar, degi, Itamar.
1CH 6:4 Eleazarʼdi, machi-Finees-nikusad. Fineesʼdi, machi-Abisúa-nikusad.
1CH 6:5 Abisúaʼdi, machi-Buqui-nikusad. Buquiʼdi, machi-Uzi-nikusad.
1CH 6:6 Uziʼdi, machi-Zeraías-nikusad. Zeraíasʼdi, machi-Meraiot-nikusad.
1CH 6:7 Meraiotʼdi, machi-Amarías-nikusad. Amaríasʼdi, machi-Ahitob-nikusad.
1CH 6:8 Ahitobʼdi, machi-Sadoc-nikusad. Sadocʼdi, machi-Ahimaas-nikusad.
1CH 6:9 Ahimaasʼdi, machi-Azarías-nikusad. Azaríasʼdi, machi-Johanán-nikusad.
1CH 6:10 Degi, Johanánʼdi, machi-Azarías-nikusad. Azaríasʼde, Jerusalénʼgi Salomón-Bab-Dummadse-goled-neg-sobsadgi dule-irwa-Bab-Dummadse-goledga maigusad.
1CH 6:11 Azarías, machi-Amarías-nikusad. Amaríasʼdi, machi-Ahitob-nikusad.
1CH 6:12 Ahitobʼdi, machi-Sadoc-nikusad. Sadocʼdi, machi-Salum-nikusad.
1CH 6:13 Salumʼdi, machi-Hilcías-nikusad. Hilcíasʼdi, machi-Azarías-nikusad.
1CH 6:14 Azaríasʼdi, machi-Seraías-nikusad. Degi, Seraíasʼdi, machi-Josadac-nikusad.
1CH 6:15 Degi, Josadac gales-selesad. Deunni, Bab-Jehová Judá-dulemar, degi, Jerusalén-dulemar, Nabucodonosorʼse-galegega imaksad.
1CH 6:16 Leví-e-masmala, wemalad: Gersón, Coat, Merari.
1CH 6:17 Gersón-e-masmaladi, wemarmogad: Libni, degi, Simei.
1CH 6:18 Coat-e-masmaladi, wemarmogad: Amram, Izhar, Hebrón, degi, Uziel.
1CH 6:19 Merari-e-masmaladi, wemarmogad: Mahli, degi, Musi. Leví-wagan-e-dadgangi-danimaladi, wemalad.
1CH 6:20 Gersón-e-wagandi, wemarmogad: Gersón-e-machi, Libni. Libni-e-machi, Jahat. Jahat-e-machi, Zima.
1CH 6:21 Zima-e-machi, Joa. Joa-e-machi, Iddo. Iddo-e-machi, Zera. Degi, Zera-e-machi, Jeatrai.
1CH 6:22 Coat-e-wagandi, wemarmogad: Coat-e-machi, Aminadab. Aminadab-e-machi, Coré. Coré-e-machi, Asir.
1CH 6:23 Asir-e-machi, Elcana. Elcana-e-machi, Ebiasaf. Ebiasaf-e-machi, Asir.
1CH 6:24 Asir-e-machi, Tahat. Tahat-e-machi, Uriel. Uriel-e-machi, Uzías. Degi, Uzías-e-machi, Saúl.
1CH 6:25 Elcana-e-masmaladi, wemarmogad: Amasai, Ahimot.
1CH 6:26 Ahimot-e-wagandi, wemarmogad: Ahimot-e-machi, Elcana. Elcana-e-machi, Zofai. Zofai-e-machi, Nahat.
1CH 6:27 Nahat-e-machi, Eliab. Eliab-e-machi, Jeroham. Degi, Jeroham-e-machi, Elcana.
1CH 6:28 Samuel-e-masmaladi, wemarmogad: Vasni, e-machi-sailaginedid, degi, Abías.
1CH 6:29 Merari-e-wagandi, wemarmogad: Merari-e-machi, Mahli. Mahli-e-machi, Libni. Libni-e-machi, Simei. Simei-e-machi, Uza.
1CH 6:30 Uza-e-machi, Simea. Simea-e-machi, Haguía. Degi, Haguía-e-machi, Asaías.
1CH 6:31 Bab-Dummad-Israel-Dadganbo-Igar-Mesisad-Ulu Bab-Jehováʼse-goled-neggi-sigisadgine, David dulemar-namakmalad nug-imaksad.
1CH 6:32 Amar, amba yoo Salomón Jerusalénʼgi Bab-Jehováʼse-goled-neg-sobeunni, Bab-Dummadse-goled-neg-asabin Bab-Dummad-dulemarbo-ambikued-neggi, namakbukwadamalad. Geb a-sorba, a-dulemar amba deyob David-ega-igar-mesisadba, namakdii gusmalad.
1CH 6:33 We-dulemar, degi, e-masmalamala, namakdii gusmalad. Amar, wemalad: Coat-e-wagangi-danimalad, wemalad: Namaked-dule-Hemán, Joel-e-machi. Joelʼdi, Samuel-e-machi.
1CH 6:34 Samuelʼdi, Elcana-e-machi. Elcanaʼdi, Jeroham-e-machi. Jerohamʼdi, Eliel-e-machi. Elielʼdi, Toa-e-machi.
1CH 6:35 Toaʼdi, Zuf-e-machi. Zufʼdi, Elcana-e-machi. Elcanaʼdi, Mahat-e-machi. Mahatʼdi, Amasai-e-machi.
1CH 6:36 Amasaiʼdi, Elcana-e-machi. Elcanaʼdi, Joel-e-machi. Joelʼdi, Azarías-e-machi. Azaríasʼdi, Sofonías-e-machi.
1CH 6:37 Sofoníasʼdi, Tahat-e-machi. Tahatʼdi, Asir-e-machi. Asirʼdi, Ebiasaf-e-machi. Ebiasafʼdi, Coré-e-machi.
1CH 6:38 Coréʼdi, Izhar-e-machi. Izharʼdi, Coat-e-machi. Coatʼdi, Leví-e-machi. Degi, Levíʼdi, Israel-e-machi.
1CH 6:39 Namaklealile, Hemán-e-argan-nuedsik e-gwenad-Asaf gwisgus daed. Asafʼde, Berequías-e-machi, Simea-e-wagwad.
1CH 6:40 Simeaʼdi, Micael-e-machi. Micaelʼdi, Baasías-e-machi. Baasíasʼdi, Malquías-e-machi.
1CH 6:41 Malquíasʼdi, Etni-e-machi. Etniʼdi, Zera-e-machi. Zeraʼdi, Adaía-e-machi.
1CH 6:42 Adaíaʼdi, Etán-e-machi. Etánʼdi, Zima-e-machi. Zimaʼdi, Simei-e-machi.
1CH 6:43 Simeiʼdi, Jahat-e-machi. Jahatʼdi, Gersón-e-machi. Degi, Gersónʼdi, Leví-e-machi.
1CH 6:44 Hemán-e-argan-sapiledsikdina, Merari-e-wagwa-Etán gwisgus daed. Etánʼdi, Quisi-e-machi. Quisiʼdi, Abdi-e-machi. Abdiʼdi, Maluc-e-machi.
1CH 6:45 Malucʼdi, Hasabías-e-machi. Hasabíasʼdi, Amasías-e-machi. Amasíasʼdi, Hilcías-e-machi.
1CH 6:46 Hilcíasʼdi, Amsi-e-machi. Amsiʼdi, Bani-e-machi. Baniʼdi, Semer-e-machi.
1CH 6:47 Semerʼdi, Mahli-e-machi. Mahliʼdi, Musi-e-machi. Musiʼdi, Merari-e-machi. Degi, Merariʼdi, Leví-e-machi.
1CH 6:48 Leví-wagandina, bela Bab-Dummadse-goled-neg-nabir-selegedyagi arbamalaga ogwichilesmalad.
1CH 6:49 Aarón, degi, e-waganmala, Bab-dummadga-ibmar-ogumakleged-ailagi ibmar-durgan-ogumakar ukdamalad. Degi, ina-wawadikid ogumakar ukdamarbalid. Deginbali, Neg-Ise-Islidikidyaba, Israel-dulemar-e-isgued-eliega, Bab-Dummadga ibmar-durgan-e-abe-ukedgi arbadamarbalid. Igi Moisés-Bab-Dummad-e-mai sogsagusa, deyob imakdamalad.
1CH 6:50 Aarón-e-wagandi, wemarmogad: Aarón-e-machi, Eleazar, Eleazar-e-machi, Finees. Finees-e-machi, Abisúa.
1CH 6:51 Abisúa-e-machi, Buqui. Buqui-e-machi, Uzi. Uzi-e-machi, Zeraías.
1CH 6:52 Zeraías-e-machi, Meraiot. Meraiot-e-machi, Amarías. Amarías-e-machi, Ahitob.
1CH 6:53 Ahitob-e-machi, Sadoc. Degi, Sadoc-e-machi, Ahimaas.
1CH 6:54 Aarón-e-waganga neggweburmar, degi, e-moli-ambikued-nainu-abingunanaidi, weyobi mimilesad: Coat-e-waganmargar-inse neggweburmar yamo-sulegarsuli ibmargi-wilubdakar ega uklesad.
1CH 6:55 Amarga, Judá-yargi Hebrón-neggwebur uklesad, degi, we-neggwebur-dikarba moli-ambikumalad-nainuse-bakar, ega uklesad.
1CH 6:56 Jefone-machi-Calebʼga, Hebrón-neggwebur-e-nainugan, degi, e-neggwebur-burwiganase-bakar, uklesad.
1CH 6:57 Aarón-e-waganmarga Judá-yargi we-neggweburmar, degi, e-moli-ambikued-nainuse-bakar, ega uklesad: Dukued-neggwebur Hebrónʼye-nugad. Libna-neggwebur, Jatir-neggwebur, Estemoa-neggwebur,
1CH 6:58 Hilén-neggwebur, Debir-neggwebur,
1CH 6:59 Asán-neggwebur, Juta-neggwebur, degi, Bet-Semes-neggwebur.
1CH 6:60 Benjamín-yargi Aarón-e-waganga we-neggweburmar, degi, e-moli-ambikued-nainuse-bakar, ega uklesad: Gabaón-neggwebur, Geba-neggwebur, Alemet-neggwebur, degi, Anatot-neggwebur. Bela-neggwebur sogambe-gakapaa (13) Coat-e-waganga uklesad, e-dula-merguedba ega uklesad.
1CH 6:61 Coat-e-dadgan-e-dadganba, Manasés-wagan-negabalad-e-neggwebur-gwaambe (10) ega uklesad, yamo-sulegarsuli, ega ibmargi-wilubdaklegar uklesad.
1CH 6:62 Gersón-e-waganga, e-dadgan-e-dadganba ega we-neggweburmar abar-abar uklesad: Isacar-e-wagan-e-neggweburmar, Aser-e-wagan-e-neggweburmar, Neftalí-e-wagan-e-neggweburmar, degi, Basán-yargi Manasés-wagan-negabalad-e-neggweburmar ega uklesad. Belagwable, neggwebur gwaambe-gakapaa (13) ega uklesad.
1CH 6:63 Merari-e-waganga, e-dadgan-e-dadganba neggweburmar yamo-sulegarsuli, ega ibmargi-wilubdaklegar uklesad. We-neggweburmar abar-abar ega uklesad: Rubén-e-wagan-e-neggweburmar, Gad-e-wagan-e-neggweburmar, degi, Zabulón-e-wagan-e-neggweburmar ega uklesad. Belagwable, neggwebur gwaambe-gakabo (12) ega uklesad.
1CH 6:64 Israel-dulemar, Levita-dulemarga neggweburmar, degi, e-moli-ambikued-nainuse-bakar, uksamalad.
1CH 6:65 Levita-dulemarga neggweburmar-yamo-sulegarsuli, ega ibmargi-wilubdaklegar uklesad. We-neggweburmar abar-abar ega uklesad: Judá-e-wagan-e-neggweburmar, Simeón-e-wagan-e-neggweburmar, Benjamín-e-wagan-e-neggweburmar, bato we-neggwebur-iduar-bilesmalad ega uklesad.
1CH 6:66 Coat-e-waganga, Efraín-e-wagan-neggweburmar, degi, e-moli-ambikued-nainuse-bakar, ega uklesad:
1CH 6:67 Efraín-yalaganba, Siquem-neggwebur-siid ega uklesad. Siquem-neggweburde, dukued-neggweburad. Deginbali, we-neggweburmar, degi, e-moli-ambikued-nainuse-bakar, ega uklesbalid:
1CH 6:68 Geser-neggwebur, Jocmeam-neggwebur, Bet-Horón-neggwebur,
1CH 6:69 Ajalón-neggwebur, degi, Gat-Rimón-neggwebur.
1CH 6:70 Coat-e-wagan-baiganga Manasés-e-wagan-negabalad-e-neggweburmar, degi, e-moli-ambikued-nainuse-bakar, ega uklesad: Aner-neggwebur, degi, Bileam-neggwebur.
1CH 6:71 Gersón-e-waganga, Manasés-e-wagan-negabalad-e-neggweburmar, degi, e-moli-ambikued-nainuse-bakar, ega uklesad: Golán-neggwebur-Basán-yargi-siid, degi, Astarot-neggwebur, ega uklesad.
1CH 6:72 Gersón-e-waganga, Isacar-e-wagan-e-neggweburmar, degi, e-moli-ambikued-nainuse-bakar, ega uklesbalid: Cedes-neggwebur, Daberat-neggwebur,
1CH 6:73 Ramot-neggwebur, degi, Anem-neggwebur, ega uklesbalid.
1CH 6:74 Gersón-e-waganga, Aser-e-wagan-e-neggweburmar, degi, e-moli-ambikued-nainuse-bakar, ega uklesbalid: Masal-neggwebur, Abdón-neggwebur,
1CH 6:75 Hucoc-neggwebur, degi, Rehob-neggwebur, ega uklesbalid.
1CH 6:76 Gersón-e-waganga, Neftalí-e-wagan-e-neggweburmar, degi, e-moli-ambikued-nainuse-bakar, ega uklesbalid: Cedes-neggwebur Galilea-yargi-siid. Hamón-neggwebur, degi, Quiriataim-neggwebur, ega uklesbalid.
1CH 6:77 Merari-e-wagan-napi-ambikusmaladga, Zabulón-e-wagan-e-neggweburmar, degi, e-moli-ambikued-nainuse-bakar, ega uklesad: Rimón-neggwebur, degi, Tabor-neggwebur, ega uklesad.
1CH 6:78 Merari-e-waganga, dad-nakwedsik, Jordán-diwar-obakar, Jericó-asabin, Rubén-e-wagan-e-neggweburmar, degi, e-moli-ambikued-nainuse-bakar, ega uklesbalid: Beser-neggwebur nega-dulesulidganba-siid. Jaza-neggwebur,
1CH 6:79 Cademot-neggwebur, degi, Mefaat-neggwebur, ega uklesbalid.
1CH 6:80 Merari-e-waganga, Gad-e-wagan-e-neggweburmar, degi, e-moli-ambikued-nainuse-bakar, ega uklesbalid: Ramot-De-Galaad-neggwebur, Mahanaim-neggwebur,
1CH 6:81 Hesbón-neggwebur, degi, Jazer-neggwebur, ega uklesbalid.
1CH 7:1 Isacar-e-masmala-walabakegwad, wemalad: Tola, Fúa, Jasub, degi, Simrón.
1CH 7:2 Tola-e-masmala, wemalad: Uzi, Refaías, Jeriel, Jahmai, Jibsam, degi, Semuel. Wemar, e-gwenadgan-e-gwenadgan-e-dummaganad. Degine, David-negsemaiunni, Tola-e-wagan dule-bila-onomalad-bulegan, mili-dulagwen-gakabo gaka dulataled-ilanergwa (22,600) mergu-nika daklealid.
1CH 7:3 Uzi machi-wargwen-nikusad, Israhíasʼye-nugad. Israhías-e-masmala, wemalad: Micael, Obadías, Joel, degi, Isías. Bela wemar e-dummagan-walataled gumalad.
1CH 7:4 We-dulemarde omegan-bukidar-nikamarsoggua, degi, mimmigan-bukidar-nikusmarbarsoggua, e-gwenadgan-e-gwenadganba-nug-ilemakar-maidgi, sorda-bila-onomalad-e-nugmar, mili-dulagwen-gakambe-gakanergwa (36,000) mergu-nika daklealid.
1CH 7:5 Isacar-wagan-e-gwenadgan-e-gwenadgangi-bela-danimalad, e-dadgansik-e-nug-ilemakar-mamaidgi dule-gandikmalad-bila-onomalad, mili-dulabake-gakagugle (87,000) mergu-nika daklealid.
1CH 7:6 Benjamín-e-masmala-warbaagwad, wemalad: Bela, Bequer, degi, Jediael.
1CH 7:7 Bela-e-masmaladi, wemarmogad: Ezbón, Uzi, Uziel, Jerimot, degi, Iri. Wemar-e-ataledi, e-gwenadganga dummaganga gudii gusmalad. A-uki, gala-ibegan nanabalid. E-dadgansik-e-nug-ilemakar-maidgi, sorda-gandikmalad-bila-onomalad, mili-dulagwen-gakabo gaka dulagwen-gakambe-gakabake (22,034) mergu-nika daklealid.
1CH 7:8 Bequer-e-masmaladi, wemarmogad: Zemira, Joás, Eliezer, Elioenai, Omri, Jerimot, Abías, Anatot, degi, Alamet. Bela-wemar, Bequer-e-masmala gumalad.
1CH 7:9 Amarde, e-gwenadgan-e-dummaganga gudii gusmalad. E-dadgansik nug-ilemakar-maidgi, sorda-gandikmalad-bila-onomalad, mili-dulagwen gaka dulataled-ilabo (20,200) mergu-nika daklealid.
1CH 7:10 Jediael-machi weyob nugad: Bilhán. Bilhán-e-masmaladi, wemarmogad: Jeús, Benjamín, Aod, Quenaana, Zetán, Tarsis, degi, Ahisahar.
1CH 7:11 Bela-wemar, Jediael-e-wagan gumalad. A-uki, bela we-masmalade, e-gwenadgan-e-dummaganbalid. Bergwable bila-ononaddamalad, miliambe-gakagugle gaka dulataled-ilabo (17,200) mergued.
1CH 7:12 Hir-e-wagan, wemalad: Supim-dulemar, Hupim-dulemar. Aher-e-wagan, degi, Husim-dulemar. Bela-wemar Hir-e-wagan gumalad.
1CH 7:13 Neftalí-e-masmala, wemalad: Jahzeel, Guni, Jezer, degi, Salum. Wemar, Bilha-e-wagan gumalad.
1CH 7:14 Manasés-e-wagan, wemalad: Manasés, Siriaʼgined-e-ome-dikarbalidga masmala walabo baksad, Asriel, degi, Maquir. Maquirʼdi, Galaad-e-babad.
1CH 7:15 Maquirʼdi, Hupim, degi, Supim-e-bun Maacaʼye-nugad nikusad. Maquir baid-machi nikusad, Zelofehadʼye nugad. Zelofehadʼdi, bunamalabi-nikusad, masmala-nikussulid.
1CH 7:16 Maquir-e-ome-Maaca machigwa-baknonikid, Peresʼye onug-imaksad. Geb baid-machigwa-baksabalid. We-e-urbadina, Seresʼye onug-imaksad. Seres-e-masmala, wemalad: Ulam, Requem.
1CH 7:17 Ulam-e-machidi, wedid: Bedán. Wemala, Galaad-e-masmala gumalad. Galaadʼde, Maquir-e-machid, Manasés-e-wagwabalid.
1CH 7:18 Galaad-e-bun-Hamolequet, we-masmala baknonikid: Isod, Abiezer, degi, Mahala.
1CH 7:19 Semida-e-masmala, wemalad: Ahián, Siquem, Likhi, degi, Aniam.
1CH 7:20 Efraín-e-wagan, wemalad: Sutela. Sutela-e-machidi, Bered. Bered-e-machidi, Tahat. Tahat-e-machidi, Elada. Elada-e-machidi, Tahat.
1CH 7:21 Tahat-e-machidi, Zabad. Degi, Zabad-e-machidi, Sutela. Degine, Efraín e-machi-baigandi, wemalad: Ezer, degi, Elad. Wemar-ebogwad Gat-neggweburse moli-bebe-nikamalad-atursaega nadegusmalad. Agine, Gat-dulemar, wemar-ebogwad-oburgwismalad.
1CH 7:22 Efraínʼdi, e-masmala-Ezer, degi, Elad, burgwismalad-ular, beedse-bukib-binsadii gusad. Degi, Efraín-e-gwenadgan, Efraín-baisur-ito-imakega ese nonigusmalad.
1CH 7:23 Deyob-neggusad-sorbali, Efraín e-omese gornonikid. Degidba, e-ome, ega machigwa-baksad. Agala, Efraín, e-neguyagi nunmaked-dummad-nagusadba, Beríaʼye e-machi-onug-imaknonikid.
1CH 7:24 Bería-e-sisgwade, Seeraʼye nugad. Seeraʼde, Bet-Horón-neggwebur-urbalid urbisad, degi, Bet-Horón-neggwebur-birgined urbisbalid. Deginbali, Uzen-Seera-neggwebur urbisbalid.
1CH 7:25 Bería-e-wagan, wemalad: Bería-e-machi, Refa. Refa-e-machidi, Resef. Resef-e-machidi, Telah. Telah-e-machidi, Tahán.
1CH 7:26 Tahán-e-machidi, Laadán. Laadán-e-machidi, Amiud. Amiud-e-machidi, Elisama.
1CH 7:27 Elisama-e-machidi, Nun. Degi, Nun-e-machidi, Josué.
1CH 7:28 We-Efraín-e-waganga yar-uklesad. We-yargi neggweburmar, degi, e-neggwebur-burwiganase-bakar, Efraín-waganga uklesad. We-neggweburmargi, ega Betel-neggwebur uklesad. Dad-nakwedsiki, Naarán-neggwebur ega uklesbalid. Dad-argwanedsiki, Gezer-neggwebur ega uklesbalid. Degi, Siquem-neggwebur-akale, Gaza-neggweburse ega uklesbalid.
1CH 7:29 Efraín-yar Manasés-wagan-e-yarbo-abingunaidgi, Efraín-waganga we-neggweburmar, degi, e-neggwebur-burwiganase-bakale, ega uklesbalid: Bet-Seán-neggwebur, Taanac-neggwebur, Meguido-neggwebur, degi, Dor-neggwebur. We-neggwebur-gwabakegwadgi Israel-machi-José-masmala-e-wagan ambikusad.
1CH 7:30 Aser-e-masmala, wemalad: Imna, Isúa, Isúi, Bería. Degi, a-masmala-e-bundi, Seraʼye nugad.
1CH 7:31 Bería-e-masmaladi, wemarmogad: Heber, Malquiel. Malquielʼdi, Birzavit-e-babad.
1CH 7:32 Heber mimmigan-nikusadi, wemalad: Jaflet, Somer, Hotam. Degi, a-masmala-e-bundi, Súaʼye nugad.
1CH 7:33 Jaflet-e-masmaladi, wemarmogad: Pasac, Bimhal, degi, Asvat.
1CH 7:34 Semer-e-masmaladi, wemarmogad: Ahí, Rohga, Jehúba, degi, Aram.
1CH 7:35 E-urba-Helem-e-masmaladi, wemarmogad: Zofa, Imna, Seles, degi, Amal.
1CH 7:36 Zofa-e-masmaladi, wemarmogad: Súa, Harnefer, Súal, Beri, Imra,
1CH 7:37 Beser, Hod, Sama, Silsa, Itrán, degi, Beera.
1CH 7:38 Jeter-e-masmala, wemalad: Jefone, Pispa, degi, Ara.
1CH 7:39 Ula-e-masmala, wemalad: Ara, Haniel, degi, Rezia.
1CH 7:40 Bela-wemar, Aser-e-wagan nanaed. Degi, bela e-gwenadgan-iduedga gusmaladid. De-ukinbali, dule-nug-nikamalad gusmarbalid, dule-gandikmalad gusmarbalid. E-dadgansik-nug-ilemakar-maidgi, wemar-e-nug narmakar-maidi, dule-bila-ononaddamaladi, mili-dulagwen-gakanergwa (26,000) mergu-nika daklealid.
1CH 8:1 Benjamín-e-masmala, wemalad: E-machi-sailagined Belaʼye nugad. Bela-yarbali, Asbel nikusad, Asbel-yarbali, Ahara nikusad.
1CH 8:2 Ahara-yarbali, Noha nikusad. Noha-yarbali, Rafa nikusad.
1CH 8:3 Belaʼye-nugad-e-masmaladi, wemarmogad: Adar, Gera, Abiud,
1CH 8:4 Abisúa, Naamán, Ahoa,
1CH 8:5 Gera, Sefufán, degi, Hiram.
1CH 8:6 Aod-e-wagan, Geba-neggweburgi e-gwenadgan-e-dummaganga-gudii gusmalanad. Geb Aod-e-wagan, Manahatʼye-neg-nugadse gales-seles-gusmalad, wemalad:
1CH 8:7 Naamán, Ahías, degi, Gera. Geraʼdi, Uza-e-babad, degi, Ahiud-e-babbalid. Geraʼde, Manahatʼse e-gwenadgan-idumai gusad.
1CH 8:8 Saharaim, e-ome-Husim metegusad, degi, e-ome-baid-Baara metegusbalid. A-sorbali, Saharaim, Moab-yargi baid-omebo masmala-baksabalid.
1CH 8:9 Saharaim, e-ome-Hodesʼbo masmala-baksad, wemalad: Jobab, Sibia, Mesa, Malcam,
1CH 8:10 Jeúz, Saquías, degi, Mirma. Wemar, e-gwenadgan-e-dummagan gudii gusmalad.
1CH 8:11 Saharaim, e-ome-Husimʼbo masmala-baksad, wemalad: Abitob, Elpaal.
1CH 8:12 Elpaal-e-masmaladi, wemarmogad: Heber, Misam, degi, Semed. Semedʼde, Ono-neggwebur, degi, e-neggwebur-burwiganase-bakar, urbisad, degi, Lod-neggwebur, degi, e-neggwebur-burwiganase-bakar, urbisbalid.
1CH 8:13 Elpaal-e-masmala-baigan, wemarbalid: Bería, degi, Sema. Wemar-walataled, e-gwenadgan-Ajalónʼgi-bukwamalad-e-dummaganad. Degi, we-walataled, Gatʼgi-dulemar-bukwad ononnosmarbalid.
1CH 8:14 Bería-e-masmaladi, wemarmogad: Ahío, Sasac, Jeremot,
1CH 8:15 Zebadías, Arad, Ader,
1CH 8:16 Micael, Ispa, degi, Joha.
1CH 8:17 Elpaal-e-masmala-baigan, wemarbalid: Zebadías, Mesulam, Hizqui, Heber,
1CH 8:18 Ismerai, Jezlías, degi, Jobab.
1CH 8:19 Simei-e-masmala, wemalad: Jaquim, Zicri, Zabdi,
1CH 8:20 Elienai, Ziletai, Eliel,
1CH 8:21 Adaías, Beraías, degi, Simrat.
1CH 8:22 Sasac-e-masmaladi, wemarmogad: Ispán, Heber, Eliel,
1CH 8:23 Abdón, Zicri, Hanán,
1CH 8:24 Hananías, Elam, Anatotías,
1CH 8:25 Ifdaiás, degi, Peniel.
1CH 8:26 Jeroham-e-masmala, wemalad: Samserai, Seharías, Atalías,
1CH 8:27 Jaresías, Elías, degi, Zicri.
1CH 8:28 We-dulemar, e-gwenadgan-dummaganga gudii gusmalad, degi, Jerusalén-neggweburgi maigusmalad. Amarde, Benjamín-e-wagan-e-nug-ilemakar-maidgi maid.
1CH 8:29 Gabaón-e-bab-Jeiel, Gabaón-neg-nugadgi gudii gusad. Jeiel-e-omedi, Maacaʼye nugad.
1CH 8:30 Jeiel-e-masmaladi, wemalad: Abdón, e-machi-sailaginedid. Zur, Quis, Baal, Ner, Nadab,
1CH 8:31 Gedor, Ahío, Zequer, degi, Miclot.
1CH 8:32 Miclotʼdi, machi-Simea nikusad. Wemar, e-gwenadganba Jerusalén-neggweburgi gudii gusmarmogad.
1CH 8:33 Nerʼdi, machi-Quis nikusad. Quisʼdi, machi-Saúl nikusad. Saúlʼdi, we-masmala nikusad: Jonatán, Malquisúa, Abinadab, degi, Es-Baal.
1CH 8:34 Jonatán-e-machidi, Merib-Baalʼye nugad. Merib-Baalʼdi, machi-Micaía nikusad.
1CH 8:35 Micaía-e-masmaladi, wemarmogad: Pitón, Melec, Tarea, degi, Acaz.
1CH 8:36 Acazʼdi, machi-Joada nikusad. Joadaʼdi, we-masmala nikusad: Alemet, Azmavet, degi, Zimri. Zimriʼdi, machi-Mosa nikusad.
1CH 8:37 Mosaʼdi, machi-Bina nikusad. Binaʼdi, Rafa-e-babad. Rafaʼdi, Elasa-e-babad. Elasaʼdi, Azel-e-babad.
1CH 8:38 Azel-e-masmaladi, walanergwa (6) gumalad: Azricam, Bocru, Ismael, Searías, Obadías, degi, Hanán. Bela-wemar, Azel-e-masmalad.
1CH 8:39 Azel-e-urba Esecʼye nugad. Esec-e-masmaladi, wemarmogad: Ulam, e-machi-sailaginedid. Jehús, machi-dummad-yarbalidid, Elifelet, Jehús-yarbalidid.
1CH 8:40 Ulam-e-masmala dule-gala-ibeganad, sigu-mied-buleganad. Amarde, mimmigan-bukidar-nikusmalad, degi, wagan-bukidar-nikusmarbalid. Belagwable, dulagugle-gakambe (150) nikusmalad. Bela-wemala, Benjamín-e-wagan gumalad.
1CH 9:1 Israel-dulemar-e-nugmar bela e-dadgan-e-dadganba Israel-e-reymar-gardagi ilemakar megisad. Judá-dulemar, Bab-Dummad-sogedba-dasurmaladba, Babilonia-neggweburse gales-selesgusmalad.
1CH 9:2 Wemar-inse gannar e-neggweburmarse nonimalad: Israel-dulemar-abala, dule-irwa-Bab-Dummadse-gormalad, Levita-dulemar, degi, Bab-Dummadse-goled-neggi-arbamalad. Wemar-inse e-neggweburse, degi, e-nainumar-nanaidse gannar nonimalad.
1CH 9:3 Amar-abargi, wemar nonimarmogad: Judá-dulemar, Benjamín-dulemar, Efraín-dulemar, degi, Manasés-dulemar. Wemar, Jerusalén-neggweburgi ambikusmalad.
1CH 9:4 Judá-wagan-nonimaladi, wemalad: Utai, Amiud-e-machi, Amiud, Omri-e-machi, Omri, Imri-e-machi, Imri, Bani-e-machi, Bani, Fares-e-machi, degi, Fares, Judá-e-machi.
1CH 9:5 Silo-dulemar-nonimarmogad, wemalad: Asaías, machi-sailagined, degi, e-masmala.
1CH 9:6 Zera-dulemar-nonimarmogad, wemalad: Jeuel, degi, e-gwenadgan. Judá-e-wagan bela dulataled-ilanergwa gaka dulabake-gakambe (690) mergu nonimalad.
1CH 9:7 Benjamín-wagan-nonimalad, wemalad: Salú, Mesulam-e-machi, Mesulam, Hodavías-e-machi, Hodavías, Asenúa-e-machi.
1CH 9:8 Ibneías, Jeroham-e-machi. Ela, Uzi-e-machi, Micri-e-wagwa. Mesulam, Sefatías-e-machi, Reuel-e-wagwa. Degi, Reuel, Ibnías-e-machi.
1CH 9:9 Degi, Benjamín-e-wagan, e-dadgan-gardagi-e-nug-ilemakar-mamaid, bela e-gwenadgan-neguyagi dummaganga gudidimalad. Bela we-dulemar, dulataled-ilabakebak gaka dulabo-gakambe-gakanergwa (956) mergued.
1CH 9:10 Dule-irwa-Bab-Dummadse-gormalad-nonimalad, wemalad: Jedaías, Joiarib, Jaquín,
1CH 9:11 Azarías, Hilcías-e-machi, Mesulam-e-wagwa. Mesulam, Sadoc-e-machi, Meraiot-e-wagwa. Meraiot, Ahitob-e-machi. Ahitobʼde, Bab-Dummadse-goled-neg-iduedid.
1CH 9:12 Adaía, Jeroham-e-machi, Pasur-e-wagwa. Pasur, Malquías-e-machi. Masai, Adiel-e-machi, Jazera-e-wagwa. Jazera, Mesulam-e-machi, Mesulam, Mesilemit-e-machi, degi, Mesilemit, Imer-e-machi.
1CH 9:13 Wemar, Bab-Dummadse-goled-neggi-arbadimalad, Jerusalén-neggweburse nonimarmogad. We-dulemar, nue-ibmar-wisi ibmar-imakdamalad. Degine, e-gwenadgan-e-dummaganga-gudidimarbalid. Bela e-gwenadgan-gumaladi, miligwen gaka dulataled-ilagugle gaka dulapaa (1,760) mergumalad.
1CH 9:14 Levita-dulemar-nonimalad, wemalad: Semaías, Hasub-e-machi. Hasub, Azricam-e-machi. Azricam, Hasabías-e-machi. Hasabíasʼde, Merari-wagansikidid.
1CH 9:15 Bacbacar, Heres, Galal, Matanías, Micaía-e-machi. Micaía, Zicri-e-machi. Zicri, Asaf-e-machi.
1CH 9:16 Obadías, Semaías-e-machi. Semaías, Galal-e-machi. Galal, Jedutún-e-machi. Berequías, Asa-e-machi. Degine, Asa, Elcana-e-machi. We-Elcana, Netofa-dulemar-e-neggwebur-burwigangi maigusad.
1CH 9:17 Dule-yawagak-dakmalad, Jerusalén-neggweburse-nonimarmogad, wemalad: Salum, Acub, Talmón, Ahimán, degi, e-gwenadgan. Salumʼde, wemar-e-dummadga gusad.
1CH 9:18 We-Leví-e-wagan, we-garda-narmaklenaidse, Rey-Yawagakye-nugad dad-nakwedsik-siidgi nakulemalaga gudimalad.
1CH 9:19 Deginbali, yawagak-dakmalad-baigan-nonimarmogad, wemalad: Salum, Coré-e-machi. Coré, Ebiasaf-e-machi. Ebiasaf, Coré-e-machi. Degine, Coré-e-gwenadgan. Wemar, Bab-Dummad-dulemarbo-ambikued-neg-yawagak-dakmaladid. Igi-epenne, e-babgan, Bab-Jehováʼse-goled-neg-e-yawagak-dakega gudii damarmoga, deyob yawagak-dakmarmogadid.
1CH 9:20 Wemar-iduale, Eleazar-machi-Finees, yawagak-dakmalad-e-iduedga gudii gusad. Degine, Bab-Jehová eba-gudii gusad.
1CH 9:21 Meselemías-machi-Zacarías, Bab-Dummad-dulemarbo-ambikued-neg-yawagak-dakedid.
1CH 9:22 Belagwable we-dulemar, yawagakgi-nakulegega-sulesmaladi, dulataled-ilabo gakambe-gakabo (212) mergu daklealid. E-neggwebur-burwiganagi, e-nugmar gardagi-ilemakar-mamaid. David, degi, dule-negburgan-daked-Samuelʼbogwa, nakulegega we-dulemar-nug-imaksa gusad.
1CH 9:23 We-dulemar-yawagakgi-nakulemaladi, degi, e-waganmar, Bab-Jehováʼse-goled-dordoneg-e-yawagakgi nakulemalaga, muchub-muchub ambikudamalad.
1CH 9:24 Dule-yawagakgi-nakulemaladi, Bab-Dummadse-goled-dordoneggi nakulebuk nanaed: Bab-Dummadse-goled-dordoneg-e-dikar-dad-nakwedsik, Bab-Dummadse-goled-dordoneg-e-dikar-dad-argwanedsik, Bab-Dummadse-goled-dordoneg-e-dikar-dad-nakwed-argan-sapiledsik, degi, Bab-Dummadse-goled-dordoneg-e-dikar-dad-nakwed-argan-nuedsik, nakulebuk nanaed.
1CH 9:25 Degine, e-gwenadgan-neggwebur-burwigangi-mamaid, yawagak-nakulegedgi-bendakegala, ibagugle-ibaguglegi (7-7) muchub-muchub gwagbukwad.
1CH 9:26 Dule-yawagak-nakulemalad-e-dummagandina, Levita-dulemar-nanaed. A-dulemardina gusgu nakulebukumalad, ambikumalad-neg dakedid, degi, Bab-Dummadse-goled-neggi-ibmar-gargemalad-bukwadgi nakulemarbalidid.
1CH 9:27 We-dulemar, neg-mutik Bab-Dummadse-goled-neg-naba nakulemalad. Neg-oibosale, bane-bane wakudaradba yawagak-egaar damarbalid.
1CH 9:28 We-Levita-dulemar-gwen-gwen, Bab-Dummadse-goled-neggi-ibmar-ebulemalad-dakmarbalidid. We-dulemar, a-ibmar-ebulemalad-onilealir, abin ebisdamalad, degi, gannar-oubolealir, abin ebisdamarbalid.
1CH 9:29 Levita-dulemar-baigan, Bab-Dummadse-goled-neggi-ibmarmar-bukwad-dakega nug-imaklesmalad. We-ibmarmar-dakegar: Madubur, vino, olivo-gwallu, ina-wawadikid, gwallu-wawadmar, degi, bela-ibmar-ebulemalad.
1CH 9:30 Dule-irwa-Bab-Dummadse-gormalad-gwenna-gwenna we-gwallu-wawadmar-oburedgi arbamalad.
1CH 9:31 Levita-dule-Matatíasʼye-nugad, Coré-wagwa-Salum-machi-sailagined, madu-ologana bane-bane-Bab-Dummadga-ukleged-sobedgi arbaed.
1CH 9:32 Degi, gwen-gwen-e-gwenadganmar-Coat-dulemar, obunnoged-iba-irba Bab-Dummadga-madu-ukleged, guakwaa urbisdamalad.
1CH 9:33 Deginbali, dule-namakmalad, Levita-dulemar-e-dummagan-naed. A-dulemar, Bab-Dummadse-goled-neggi gabedneg-bubukwadgi mamaid. We-dulemar mutikidba, degi, ibginedba, e-arbaedginbi arbananai damalad. Degisoggu, arbaed-baigan imaksurmalad.
1CH 9:34 We-dulemar Levita-dulemar-e-dadgan-e-dadganba gardagi-ilemakar-maidgi maid. Wemar Levita-e-gwenadgan-e-dummaganga gusmaladid. Jerusalén-neggweburgi maigusmalad.
1CH 9:35 Gabaón-neg-nugadgi, Jehiel maigusad. Jehiel, Gabaón-e-babad. E-ome, Maacaʼye-nugad.
1CH 9:36 Jehiel-e-masmala, wemalad: Abdón, e-machi-sailagined. E-urbamar-sorba-gwalulesmalad, wemalad: Zur, Quis, Baal, Ner, Nadab,
1CH 9:37 Gedor, Ahío, Zacarías, degi, Miclot.
1CH 9:38 Miclotʼde, machi-Simeam-nikusad. Wemar, e-gwenadganmar-abargi, Jerusalén-neggweburgi gudii gusmarmogad.
1CH 9:39 Ner, machi-Quis-nikusad. Quisʼdi, machi-Saúl-nikusad. Saúl, masmala-nikusmogad, wemalad: Jonatán, Malquisúa, Abinadab, degi, Es-Baal.
1CH 9:40 Jonatán-e-machidi, Merib-Baalʼye nugad. Merib-Baalʼdi, machi-Micaía-nikusad.
1CH 9:41 Micaía-e-masmaladi, wemarmogad: Pitón, Melec, Tarea, degi, Acaz.
1CH 9:42 Acazʼdi, machi-Jara-nikusad. Jaraʼdi, masmala-baksamogad. E-masmaladi, wemalad: Alemet, Azmavet, degi, Zimri. Zimri machigwa-Mosaʼye-nugad nikusad.
1CH 9:43 Mosa-e-wagan, wemalad: Bina, Refaías-e-babad. Refaíasʼdi, Elasa-e-babad. Degi, Elasaʼdi, Azel-e-babad.
1CH 9:44 Azel masmala walanergwa (6) nikusad. E-nugmar, wemalad: Azricam, Bocru, Ismael, Searías, Obadías, degi, Hanán. Wemar, Azel-e-masmala nanaed.
1CH 10:1 Filistea-dulemar, Israel-dulemargi bila-ononad gusmalad. Agine, Israel-dulemar Filistea-sordamar-abin wakitemalad. Israel-dulemar bukidar Gilboa-yargi oburgwilesmalad.
1CH 10:2 Degidgine, Filistea-sordamar Saúl-balegite gusmalad, deginbali, Saúl-e-masmala-balegite gusmarbalid. Oburgwedse indaksamalad. Deyob, Saúl-e-masmala Jonatán, Abinadab, degi, Malquisúa oburgwilesmalad.
1CH 10:3 Deyob-gusgua, bela Saúlʼginbi gwichigudmalad. Dule-sigu-mimalad Saúl-bargasmalad, geb sigugi Saúl-maksamalad. Saúl sabsur-naibi-gunonikid.
1CH 10:4 Degidgi, Saúl, sorda-ega-sigu-abgaed-seedga sogded: “Be-es-suid be onoge. Agi, be an-oburgwe. Abakale, dule-Bab-Jehová-wissurmalad angi dodonai guarmalale.” Degi-inigwele, sorda-ega-sigu-abgaed-seed, ar nue-dobe-itogedba, es-suidgi Saúl-earwissurgusad. Agine, Saúl, na es-suid susad, geb egi na ogwichis imaksad. Saúl, deyob na dukin earwisad.
1CH 10:5 Geb sorda-Saúlʼga-sigu-abgaed-seed, deyob daksagua, e-es-suidgi dukin na earwismogad. Deyob na gindaksamogad.
1CH 10:6 Weyob Saúl, degi, e-masmala-warbaagwad burgwismalad. A-ibagine, bela Saúl-e-gwenadgan burgwismarmogad.
1CH 10:7 Israel-dulemar-nebagi-bukwamalad daksamargua, Israel-sordamar Filistea-sordamar-abin wakitemala, degine, Saúl-oburgwilesa, deginbali, bela-Saúl-e-masmala-oburgwilesbali, agi wakitemarmogad. Israel-dulemar e-neggwebur-mete duurmakdemalad. Agine, geb sorba Filistea-sordamar, Israel-dulemar-e-neggwebur-metemaladgi ambikunonimarsunnad.
1CH 10:8 Neg-oibosgua, Filistea-dulemar, dule-burgwarmalad-e-ibmar-sudanimargua, dakarmalad, Saúl, degi, e-masmala Gilboa-yargi burgwar-mamai.
1CH 10:9 Agine, geb Saúl-e-nono siksamalad, e-ibe e-mor-bila-onoged susmarbalid, degi, e-gingimar bela e-ibe susmarbalid. Degidba, geb Filistea-sordamar, Filistea-yar-nanaidba gayaburba-berbemalad barmismalad, adi, e-bab-dummagan deyob-neggusad wisgumalagar, deginbali, Filistea-dulemar bela wisgumarmogagar.
1CH 10:10 A-sorbali, Filistea-sordamar, e-bab-dummagan-neggi Saúl-e-gingimar urbismalad. Degi, Saúl-e-nonodi e-bab-dummad-Dagón-neggi nasiksamalad.
1CH 10:11 Jabes-De-Galaadʼginmalad wisguarmargua, Filistea-dulemar igi Saúl-imaksamala,
1CH 10:12 bela e-sorda-gandikmalad nadegusmalad. Geb Saúl-e-mui, degi, e-masmala-e-mui suapmalad. Geb Jabes-neggweburse senonimalad. Agine, sapi-encinaʼye-nugad-urba, Saúl-e-mui digsamalad, degi, Saúl-e-masmala-e-mui digsamarbalid. Degidbali, Israel-dulemar nue-nunmaked-itomaladba, ibagugle (7) mas-guchasurmalad.
1CH 10:13 Weyob Saúl e-isgusadba burgwisad. Bab-Jehová-e-gayaburba-sogedba ibmar-imaksasulidba, deginbali, ner-bundorse idakapidba isgusad.
1CH 10:14 Ar Bab-Jehováʼse idaksasursoggua, agala, Bab-Jehová, Saúl-oburgwisad. Degisoggu, Bab-Jehová, reyga Isaí-e-machi-David-onug-imaksasunnad.
1CH 11:1 Degidgi, bela Israel-dulemar onmaknonimalad, geb Davidʼbo-sunmakegala Hebrón-neggweburse nadmalad. Agi, ega sogdemalad: “Dummad, anmar na ablis-emar-gued, anmar na gwenadmalad.
1CH 11:2 Ar Saúl reyga-maiunni, bila-onogedgi bato be Israel-sordamar-idudii daed. Deginbali, David, Bab-Jehová bega ise-sogar sogsabalid: ‘Bee, be an-Israel-dulemar-akwedii be guoye, degi, bee be, an-Israel-dulemar-e-dummadga be gubaloye.’ ”
1CH 11:3 Deyobi, bela Israel-e-dummagan, Hebrón-neggweburse nade gusmalad, geb Davidʼbogwa sunmaksa gusmalad. Degine, geb David, Bab-Jehová-wagab we-dulemarbo igar-mesisad. A-sorbali, Israel-dulemar, David-nonogi olivo-gwallu eosmalad. Deyob, reyga David-onug-imaksamalad. Ar igi Bab-Dummad Samuelʼga sogsagusa, deyob sogsadba neg-gunonikid.
1CH 11:4 A-sorbali, Rey-David, bela Israel-dulemarbogwa Jerusalén-neggweburse nadmalad. A-neggweburde, Jebúsʼye nugbalid. Jebús-dulemar a-neggweburgi bukwamalad.
1CH 11:5 Jebús-dulemar Davidʼga sogdemalad: “Wegi be gwen dogosulid.” Degi-inigwele, David, Sión-neg-gandikid sunonikid. Sión, David-Neggweburye soglebalid.
1CH 11:6 David, Siónʼse doged-iduale, weyob sogsa gusad: “Doa-inse Jebús-dule-gwensak-oburgoe, an a-dule sordamar-bila-onomalad-e-idued-bur-dummadga an onug-imakoed.” Degidgi, Sarvia-machi-Joab-inse Jebús-dule-gwensak-oburgwisad. Geb agi, Joab, sordamar-bila-onomalad-e-idued-bur-dummadga gunonisunnad.
1CH 11:7 Geb David, Sión-neg-gandikidgi-megnonisunnad. Agala, David-Neggweburye onug-imaksamalad.
1CH 11:8 David, neg-gandikid odummosad. Miloʼye-neg-nugad-akar neg-dummad-nagaba neg-arsanyob-maidse, galu-matusulid sobsad. Joabʼdina, amba neggwebur-yoo-nudaklemalad bela nudaksad.
1CH 11:9 Ar Bab-Jehová-Bela-Gangued-Nikad Davidʼba nue-naisoggu, David nasgumai gusad, degi, gangumai gusbalid.
1CH 11:10 We-David-sorda-dummagan, sorda-bulegan-e-dummaganad. We-sordamar, David-negsemaidgi nue-David-bendaksa-gusmaladid. Degine, Bab-Jehová-sogsagusadba, we-sordamar, Israel-dulemarbogwa, reyga David-imaksamarbalidid.
1CH 11:11 David-sorda-bulegana, wemalad: Hacmoni-machi-Jasobeam, sorda-dulagwen-gakambegwad (30), e-dummadid. Jasobeam ibagwengi-bila-ononaidgi, eswar-suidgi dulataled-ilapaa (300) sordamar-ogilosad.
1CH 11:12 Jasobeam-yarba, Dodo-machi-Eleazar danikid. Dodoʼde, Ahoh-duled. Eleazar sorda-buledmogad. Eleazar sorda-bulegan-warbaagwad-gwensakmogadid.
1CH 11:13 Eleazar, Pasdamimʼgi bila-onolenagua, Davidʼbogwa gunai gusad. Deunni, Filistea-sordamar Israel-sordamargi bila-onogega Pasdamimʼgi ambikusmargua, orosgi-dakleged-cebada-nainugi Israel-sordamar, Filistea-sordamar-idu duurmakde gusmalad.
1CH 11:14 A-ibagine, Eleazar, cebada-digar-naid-abargi Filistea-sordamar-abin ganna gwisgus gusad, sikirmaksasulid. Degidba, Eleazar, Davidʼbogwa, Filistea-sordamargi bela-bela nakwismalad, ar Bab-Jehová nakwega imaksad.
1CH 11:15 Ibagwenginbali, David-aminaegala sorda-dulagwen-gakambegwad (30) e-dummagan-warbaagwad-bulegan akwasaila-dummad-siidse nadegusmalad. A-akwasaila-yaa-dummad, Adulamʼye-nugad. Deunni, Filistea-sordamar-ambikued-neg Refaim-nebagi siid.
1CH 11:16 A-ibagine, David, e-neg-gandikidgi-maid. Filistea-dulemardina, Belénʼgi nakulebukmalad.
1CH 11:17 David nue-ukud-itosoggua, weyob sogded: “¡Bitigi dule-gwensak Belén-neggwebur-e-yawagak-dogedgi dia-siid-e-dii anga amisana yeerbana!”
1CH 11:18 Degine, geb sordamar-bulegan-warbaagwad, dii-amiegala, Filistea-sordamar-bukwadgi dogsamalad. Geb, Belén-neggwebur-yawagak-dogedgi-dii-siid susmalad, geb Davidʼga sesmalad. Davidʼdina budar gobe gualid, bur Bab-Jehováʼga eosad. Weyob sogded:
1CH 11:19 “¡Bab-Dummad! Bipisaale we-dii gwen an gobosulid. Ar we-dulemar, boni-dummad-abargi anga dii-amidii gusmalad. Degisoggu, an we-dii gobosulid. We-dulemar-e-ablis-gobsayob negguo-itole.” Agala, David, dii gobsasulid. Weyob sorda-gandikmalad-warbaagwad ibmar-dummagan-imaksamalad:
1CH 11:20 Joab-e-ia-Abisai, sorda-bulegan-warbaagwad-e-dummadid. Ibagwengi, Abisai, bila-ononaidgi e-eswargi bela-sordamar dulataled-ilapaa-bukwad (300) ogilosad. A-ular, sordamar-warbaagwad-abargi e-nug dummarba-gunonimogad.
1CH 11:21 Abisai, sordamar-warbaagwadba bur bule-nug-dumma megisad, e-sordamar-warbaagwad-e-iduedga gunonikid. Degi-inigwele, Abisai, we-sordamar-warbaagwad e-sordasulid.
1CH 11:22 Joiada-machi-Benaía dule-buledid. Bemaíaʼde Cabseelʼgined. We-dulede, bukidar ibmar-dummagan imaksad. Benaía, Moab-sorda-bur-gandikmalad-warbogwad oburgwisgusad. Ibagwengi, Benaía, boo-dummad-batenaigua, yaa-dummad-yaba aidesgusad, geb agi achumigur-nono-wawaad oburgwisgusad.
1CH 11:23 Benaía, Egipto-dule-masdummad-daligwen-bisgise-sugued oburgwis gusbalid. Deunni, we-Egipto-dule, eswar-dummad-sedanigua, Benaíaʼdi, unnir suar-bipigwadbi abin sedanigusad. Degite, Benaía, Egipto-dule-annik eswar-dummad gandikidgi susad. Geb a-eswargi Egipto-dule-masdummad-oburgwisad.
1CH 11:24 Joiada-machi-Benaía, weyob ibmarmar-dummagan imaksad. A-ular, sordamar-warbaagwad-abargi e-nug dummarba-gunonimogad.
1CH 11:25 Benaía, sordamar-dulagwen-gakambegwadba (30) bur e-nug-dummarbagusad. Degi-inigwele, we-sordamar-warbaagwad-e-ibmar-imaksadgi obichasulid. Degidba, David, e-dikarba-sorda-nakulemalad-e-dummadga-guega Benaía-onug-imaksad.
1CH 11:26 David-e-sordamar-bulegan, wemalad: Asael, Joab-e-urbad. Elhanán, Dodo-e-machi, Belénʼgined.
1CH 11:27 Samot, Harodita-duled. Heles, Peloni-duled.
1CH 11:28 Ira, Iques-e-machi, Tecoa-duled. Abiezer, Anatot-duled.
1CH 11:29 Sibecai, Husa-duled. Ilai, Ahoh-duled.
1CH 11:30 Maharai, Netofa-duled. Heled, Baana-e-machi, Netofa-duled.
1CH 11:31 Itai, Ribai-e-machi, Gabaaʼgined, Benjamín-wagwad. Benaía, Piratón-duled.
1CH 11:32 Hurai, Gaas-diwargined. Abiel, Arba-duled.
1CH 11:33 Azmavet, Barhum-duled. Eliaba, Saalbón-dule.
1CH 11:34 Gizón-dule-Hasem-e-masmala, Jonatán, Arar-dule-Sage-e-machi.
1CH 11:35 Ahíam, Sacar-e-machi, Arar-dule. Elifal, Ur-e-machi.
1CH 11:36 Hefer, Mequerat-dule. Ahías, Peloni-dule.
1CH 11:37 Hezro, Carmel-dule. Naarai, Ezbai-e-machi.
1CH 11:38 Joel, Natán-e-urba. Mibhar, Hagrai-e-machi.
1CH 11:39 Selec, Amón-dule. Naharai, Beerot-dule. Naharaiʼde, Joabʼga sigu-abgaed-seedga gudiid. Joab, Sarvia-e-machi.
1CH 11:40 Ira, Itri-dule. Gareb, Itri-dule.
1CH 11:41 Urías, Het-dule. Zabad, Ahlai-e-machi.
1CH 11:42 Adina, Siza-e-machi, Rubén-wagwa, Adina, Rubén-dulemar-e-dummad, degi, sordamar dulagwen-gakambe (30) eba naid.
1CH 11:43 Hanán, Maaca-e-machi. Josafat, Mitni-dule.
1CH 11:44 Uzías, Astarot-dule. Sama, degi, Jehiel, Hotam-e-masmala, Aroer-dulemar.
1CH 11:45 Jediael, Simri-e-machi, degi, e-urba-Joha, Tizi-dule.
1CH 11:46 Eliel, Mahavim-dule. Jerebai, degi, Josavía, Elnaam-e-masmala. Itma, Moab-dule.
1CH 11:47 Eliel, Obed, degi, Jaasiel Mesoba-dule.
1CH 12:1 We-sordamar David-bendakegala, Siclag-neggweburse nonimalad. Deunni, David, Quis-machi-Saúl-idu wakindigu, we-sordamar, bila-onogedgi David-bendaksa gusmalad.
1CH 12:2 We-sordamar sigu-mimalad-buleganad, degine, dubgi akwa-mimalad-buleganbalid. We-ibmar-ebugegala, argan-abinbela ebumalad. Benjamín-wagan-Saúl-e-gwenadgan David-bendaksa-gusmalad, wemalad:
1CH 12:3 Saúl-e-gwenadgan-e-dummad-Ahiezer, degi, Joás Ahiezer-sorbalid. Amala, Semaa-e-masmalad, Gabaad-dule gumalad. Jeziel, Peletʼbogwa, Azmavet-e-masmala. Beraca, Anatot-dule-Jehú.
1CH 12:4 Degi, Gabaónʼgined-Ismaías, Ismaíasʼde, sordamar dulagwen-gakambegwadmogad (30), deginbali, a-sordamar-e-dummadbalid. Jeremías, Jahaziel, Johanán, Gedera-dule-Jozabad.
1CH 12:5 Eluzai, Jerimot, Bealías, Semarías, degi, Haruf-dule-Sefatías. Coré-e-gwenadgan, wemalad:
1CH 12:6 Elcana, Isías, Azareel, Joezer, degi, Jasobeam.
1CH 12:7 Deginbali, Jeroham-e-masmala, wemalad: Joela, degi, Zebadías. Wemar-ebogwad Gedorʼginmaladid.
1CH 12:8 Gad-wagan-bila-onomalad nega-dulesulidganba-neg-gandik-siidse, David-maidse wakite-gusmarmogad. We-dulemar, dule-niga-gandikmaladid, dule-bila-onomalad-buleganad. Deginbali, we-dulemar, sigu-abgaed-ebuged nue-wisimaladid, degi, eswargi-nue-wisi bila-onomaladid. Achumiguryob urwemaladid, degi, goe-sapur-abarmakeyob gwae-gwae abarmakmaladid.
1CH 12:9 A-dulemar, wemalad: Ezer, bur-dummadid, Ezer-yarbalid, Obadías, Obadías-yarbalid, Eliab,
1CH 12:10 Eliab-yarbalid, Mismana, Mismana-yarbalid, Jeremías,
1CH 12:11 Jeremías-yarbalid, Atai, Atai-yarbalid, Eliel,
1CH 12:12 Eliel-yarbalid, Johanán, Johanán-yarbalid, Elzabad,
1CH 12:13 Elzabad-yarbalid, Jeremías, degi, Jeremías-yarbalid, Macbanai.
1CH 12:14 Wemar, Gad-sorda-bila-onomalad-e-dummaganad. Dummad-napi-sorbalid, sorda-dulatar-mergued (100) idudiid. Sorda-bur-dummaddi, sorda-miligwen-mergued (1,000) idudimogad.
1CH 12:15 We-dummaganmar, gebe-nii-gwisgusadgi, Jordán-diwar-nomaigu, Jordán-diwar-obaksa-gusmaladid. We-dulemala, dulemar-nebagi-bukwamalad dad-nakwedsik, degi, dad-argwanedsik-oduurmakega imaksamaladid.
1CH 12:16 Amba David neg-gandikidgi gudigua, Benjamín-wagan, degi, Judá-wagan-gwenna-gwenna David-maidse nade gusmarmogad.
1CH 12:17 Degi, David amar-abin-nodgu, ega sogded: —Be anse nuedgi danimalale, be an-bendakega danimalale, an bemar-abingaodo. Ar bemar, an-isdarmaladga an-ukega be danimalale, anmar-dadgan-e-Bab-Dummad bemar-sabsur-odurdako. Ar an emar akar-imaksasulid, an dule-isganasulid.
1CH 12:18 Degidgi, Bab-Dummad-Burba Amasaiʼgi aidenonikid. Geb Amasai, sorda-durgwen-gakambe-e-dummad (30) weyob sogded: “¡David, anmar be-sordamalad! ¡Isaí-machi, anmar beba-naimalad! Neg-bogidik bega nagusana gadin. Be-bendakmaladgala, neg-bogidik nagusmogana gadin. Ar be-Bab-Dummad be-bendakdiid.” David, Benjamín-wagan, degi, Judá-wagan-ese-nonimalad abingasad, geb sorda-idumaladba a-dulemar-urbisbalid.
1CH 12:19 Manasés-wagan-gwenna-gwenna, David Filistea-sordamarba Saúlʼgi bila-ononadgusgu, Davidʼba nagusmarmogad. (Deunni, David, Filistea-sordamar-bendaksasurgusad, ar Filistea-e-dummagan igar-itosmargua, sogde gusmalad: “Ar David anmar-oburgwega gunaid, wede anmar-nono-egwannega gunaid. E-dummad-Saúlʼba gannar nagudoed, anmargi aibitoed.”)
1CH 12:20 Degisoggu, David Siclagʼse nonigua, Manasés-dulemar ese-nonimaladi, wemalad: Adnas, Jozabad, Jediael, Micael, Jozabad, Eliú, degi, Ziletai. Wemar, Manasés-sordamar milibarmalad (1,000) e-dummaganad.
1CH 12:21 We-sorda-dummagan, dule-gandikmaladid, degi, sorda-bila-onomalad-idumaladga gusmarbalidid. We-dulemar, dule-ibmar-atursaega-yogasaar-ubononidamaladgi David-bendaksa gusmalad.
1CH 12:22 Degi, Davidʼga bane-bane sordamar mergumai gusad. Degisoggu, David, bela-bela sorda-ibedga gunonikid.
1CH 12:23 Sordamar-bila-onomalad-bulegan, Bab-Jehová sogsa gusadba Davidʼga Saúl-yar-semaid-ukegala Hebrón-neggweburse nonigusmalad.
1CH 12:24 Bila-onomalad-bulegan, eswar-gani-bila-onomalad, degi, sigu-abgaed-gani-bila-onomalad. A-sordagan weyob-mergu nonigusmalad: Judá-dulemar-merguedi: Milinergwa gaka dulataled-ilabaabak (6,800) mergued.
1CH 12:25 Simeón-sordamar gandik-bila-onomalad merguedi: Dule-miligugle gaka dulatar (7,100) mergued.
1CH 12:26 Levita-dulemar-merguedi: Milibake gaka dulataled-ilanergwa (4,600) mergued.
1CH 12:27 Aarón-e-wagan-merguedi: Milipaa gaka dulataled-ilagugle (3,700) mergued. Joiadaʼdi, Aarón-e-wagan-dummadga maid.
1CH 12:28 Sadoc, sapingwa-gandikid-buledid, e-gwenadgan-dummagan, e-dulagwen-gakabo (22) eba nanaid.
1CH 12:29 Benjamín-wagan-Saúl-e-gwenadgan-merguedi: Milipaa (3,000) mergued. A-ibaganse we-dulemar bukidar Saúlʼba nanaimalanad.
1CH 12:30 Efraín-dulemar-merguedi: Mili-dulagwen gaka dulataled-ilabaabak (20,800) mergued. Amar, dule-gandikmalad-nanaed, degine, e-babganba nug-nika danimalad.
1CH 12:31 Manasés-wagan-negabalad-merguedi: Miliambe-gakabaabak (18,000) mergued. Wemar-nuggusmaladi, reyga David-nug-imakega nugsalesmalad.
1CH 12:32 Isacar-dulemar-merguedi: E-dummagan dulataled-ilabo-mergu (200) bukwad. We-dulemar, ibagangi nerguarmaladid. We-dulemar wisdamalad, igi Israel-dulemar bila-onogedgi urwemalargebe. Degisoggu, wemar-sogedba e-gwenadgan ibmar-imakdamalad.
1CH 12:33 Zabulón-dulemar, sordamar-bila-onogedgi-durdakarmaladid, e-gingimar-akar-akar-ebumarbalidid, degi, Davidʼba nue-nanaimarbalidid. Zabulón-dulemar, David-bendakega guakwaa bila-onogega-gudimaladi: Mili-dulabo-gakambe (50,000) mergued.
1CH 12:34 Neftalí-dulemar-merguedi: E-dummagan miligwen (1,000) mergued. Deginbali, sordamar-sigu-abgaed-semalad, degi, eswar-semalad: Mili-dulagwen-gakambe-gakagugle (37,000) mergubalid.
1CH 12:35 Dan-dulemar guakwaa bila-onogega-gudimaladi: Mili-dulagwen-gakabaabak gaka dulataled-ilanergwa (28,600) mergued.
1CH 12:36 Aser-dulemar guakwa-bila-onogega-durdakar-bukwamaladi: Mili-dulabo (40,000) mergued.
1CH 12:37 Degi, Jordán-diwar-obakar sordamar-bukwadi, wemalad: Rubén-dulemar, Gad-dulemar, Manasés-dulemar-negabalad. Amar weyob mergued: Mili-dulanergwa (120,000) mergumalad. Degi, wemar, ibmar-bila-onolegedgi-ebulemalad bela-nika bukwamalad.
1CH 12:38 Bela we-sordamar, bila-onogega gudimaladid. Wemar, Hebrón-neggweburse, Israel-yargi reyga David-onugsaega nadgusmaladid.
1CH 12:39 Degi, ar na e-gwenadgan-ega-ibmar-uksadba David-walik ibapaa gobbukwagusmalad, degi, mas-gunbukwagusmalad.
1CH 12:40 Degine, e-neg-dikarba-neggweburmar-bukwamalad, ibmar-bukidar Davidʼga senonimalad. Deginbali, Isacar-dulemar, Zabulón-dulemar, Neftalí-dulemar, amarse-bakar, ega ibmar-bukidar senonimarmogad. Davidʼga ibmar-gullemalad we-ibdurgangi ena-ena senonimalad: Moli-uayasuidmargi, moli-yargan-muregedmargi, moli-uaya-senigwadmargi, moli-bebe-nikad-alugwasualedmargi ibmarmar senonimalad. We-ibmar Davidʼga senonimalad: Madubur, higuera-e-san, uva-dinnagana, vino, olivo-gwallu. Deginbali, Davidʼga moli-bebe-nikamalad, degi, sibad-wawaadmar-bukidar senonimarbalid. Ar Israel-yargi neg-weligwar-naidbali, Davidʼga deyob ibmar-gullemalad senonimalad.
1CH 13:1 Degidgi, David, sorda-milibalid-e-idumaladse (1,000) gochad, degi, sorda-dulatar-e-idudimaladse (100) gochabalid. Belagwable dummaganga-gudimaladse gochad.
1CH 13:2 Degi, David, Israel-dulemar-bela-ambikunonimaladgala sogded: “Bemar nabir-itomalale, degi, anmar-Bab-Dummad-Jehová weyob-ibmar-gued-abegele, anmar-gwenadgan bela Israel-yargi-bukwamaladse anmar gormalodo. Deginbali, anmar gormarbalodo, dule-irwa-Bab-Dummadse-gormaladse, degi, Levita-dulemar e-neggweburgi-mamaidse, degi, Levita-dulemar sapurba-mamaibalidse gormalodo. Wemar anmarba-nagumalaga, anmar ese gormalodo.
1CH 13:3 Adi deyob, Bab-Dummad-Dadganbo-Igar-Mesisad-Ulu, buladik anmar sedamaloed. Ar Saúl-reyga-megisad-akale, anmar Bab-Dummad-Ulu ies-gudimalad, anmar gwen bar ese idakdisulid.”
1CH 13:4 Bela Israel-dulemar David-sunmaksad nabir-itosmalad. Geb sogdemalad: “Degiir, anmar deyob imakodo.”
1CH 13:5 Degidgi, David, Quiriat-Jearimʼgi Bab-Dummad-Ulu-siid sedamalagala, Egiptoʼgi Sihorʼye-diwar-nugad-akale, Hamat-neggwebur-dogedse bela dulemar-oambikusad.
1CH 13:6 Geb agi, David, degi, bela Israel-dulemarmala, Bab-Dummad-Ulu Jerusalén-neggweburse-sedagegala, Quiriat-Jearimʼse nadmalad, Judá-yargi Baalaʼye-neg-nugadse. We-Ulu-asabin, Bab-Dummad-baliwiturmar-querubinʼye-nugad-abargi-negdakmaidse gorleged.
1CH 13:7 Degine, Bab-Dummad-Dadganbo-Igar-Mesisad-Ulu Abinadab-neggi-onosmalad, geb ur-napagined-binidgi onaksamalad. Degi, Uza, Ahío-ebogwa, ur-napagined-semamai gusmalad.
1CH 13:8 David, degi, Israel-dulemarmala, Bab-Dummad-asabin bela-bela-wergu-nadapi guarmalad, degine, weligwaledba namaknadapi guarmarbalid. We-garmar ogornadapi guarmalad: Gar-arpa, gar-salterio, gar-tambor-burwigan, gar-címbalo, degi, gar-trompeta.
1CH 13:9 Ibmar-gwag-omukuleged-neg-Quidónʼgi-naidse mosmargua, moli-bebe-nikad-alugwasualed-yolenonikidba Bab-Jehová-Igar-Mesisad-Ulu aibinednaga guenad. Geb agi, Uza, Bab-Dummad-Ulu-mer-argwanega, ese achaded.
1CH 13:10 E-argangi Bab-Jehová-Ulu ganonikid. Agine, geb Bab-Jehová, Uza igar-maisulidba yogasaar-achasadba egi sabsur-uluded. Geb degidba, Uza, Bab-Dummad-asabin ilagwen-burgwar gusad. Deyob Bab-Dummad Uza-oburgwisad, E-Ulu-ebusad-nukad.
1CH 13:11 David Bab-Jehová-Uza-oburgwisadba, bela-bela sae-itononikid. Agala, Bab-Jehová-Uza-negabar-daasa-imaksadbali, David, Pérez-Uzaʼye neg-onugsanonikid. We-garda-narmaklenaidse, deyob amba neg bileged.
1CH 13:12 A-ibaginbali, David Bab-Dummad-dobee-itonaded, geb sogded: “¿Ar igi an Bab-Dummad-Dadganbo-Igar-Mesisad-Ulu an-negse an sedosunna?”
1CH 13:13 Degisoggu, David, Bab-Dummad-Ulu e-neggwebur-David-nugadse sessulid, Gat-neggweburgined-Obed-Edomʼye-nugad-negse sesad.
1CH 13:14 Deyobi, Bab-Dummad-Ulu Obed-Edom-neggi nii-walapaa sigisad. Degidbali, Bab-Jehová, Obed-Edom-e-neguyagi nued binsasad, deginbali, e-ibmar-nikad bela onasguega imaksabalid.
1CH 14:1 Tiro-neggwebur-e-rey-Hiram, Davidʼse e-gayaburba-berbemalad barmisad. Degine, Hiram, Davidʼga urwar-urgomar barmisad. Deginbali, dule-akwa-neg-sobmalad, dule-urgoneg-sobmalad, wemar reyneg-sobmalaga Davidʼse barmisbalid.
1CH 14:2 Degidgi, David magar neg-itononikid, Bab-Jehová Israel-e-reyga nue-e-nug-imaknoniye, degine, Bab-Dummad na Israel-dulemar-sabedba, e-negsemaid odummosbarye.
1CH 14:3 David, Jerusalén-neggweburgi omegan-baid nikusbalid. Agi, masmala-nikusbalid, degi, bunamala-nikusbalid.
1CH 14:4 E-masmala-Jerusalén-neggweburgi-gwalulesmalad, wemalad: Samúa, Sobab, Natán, Salomón,
1CH 14:5 Ibhar, Elisúa, Elpelet,
1CH 14:6 Noga, Nefeg, Jafía,
1CH 14:7 Elisama, Beeliada, degi, Elifelet.
1CH 14:8 Filistea-dulemar David bela-Israel-yargi reyga-nug-imaklenoniye wisguarmargua, bela-Filistea-sordamar, Davidʼgi-bila-onogegala David-aminadmalad. David deyob wisgusgua, Filistea-sordamar-abin nadegusmogad.
1CH 14:9 Filistea-sordamar Refaim-nebase nonimalad, agi bela neg-ganonimalad.
1CH 14:10 Degisoggu, David, Bab-Dummadse idakded, ega sogded: —Bab-Dummadye, ¿Filistea-sordamargi an bila-ononaoe? ¿Be Filistea-dulemargi-obinega be an-imakoe? Bab-Jehová abin-sogded: —Be bila-ononae. Filistea-sordamar bese galakuega an imakoed.
1CH 14:11 Degi, geb Baal-Perazim-neg-nugadse nadmargua, agi David Filistea-dulemargi naknonikid. Geb David sogded: “Bab-Dummad diwar-dutusur-nomaidyob an-imaksad. An-isdarmalad-ogalakuega anga igar-eganonikid.” Agala, we-neg, Baal-Perazimʼye nug-imaklesad.
1CH 14:12 A-neg-nugadgi, Filistea-sordamar, galakudedbali, na e-bab-dummagan-sobaled obesmalad. Degisoggu, David sogde gusad: “Bela we-ibmarmar ogumakmalo.”
1CH 14:13 Filistea-sordamar ibmarmar-atursaega gannar neba-naidgi ambikunonimalad.
1CH 14:14 Geb, David, gannar Bab-Dummadse idakdebalid. Bab-Dummad ega sogdebalid: “Be daksiki ebirar nao, mer asabin be nao. Sapimar-wawadik-yapan-gwismaladse be mosale, egi be gwichigudo.
1CH 14:15 We-sapi-e-anagan-wawadik-yapanmalad-birgi, sordamar-nanaeyob binnasur neg-oimake be itoalile, bila-onogegala yog-noar be imako. Ar ani, Bab-Dummad, Filistea-sordamar-ogalakuega be-idugoed.”
1CH 14:16 David, Bab-Dummad-ega-sogsadyob imaksad. Degisoggu, David Gabaón-neggwebur-akar, Gezer-neggweburse, Filistea-sordamar-ogilosad.
1CH 14:17 Degidbali, David-e-nug bela a-yalaganba nasgumai gualid. Degi, Bab-Jehová, David-dobgumalaga bela dulemar-yar-baid-baidgi-bukwamalad imaksad.
1CH 15:1 David, e-neggweburgi na e-negmar sobsad. Deginbali, Bab-dummad-dadganbo-Igar-Mesisad-Ulu-sigega dordoneg sobsabalid.
1CH 15:2 Degidgi, David sogded: “Bab-Dummad-Dadganbo-Igar-Mesisad-Ulu yogasaar seledosulid. Levita-dulemar, Bab-Dummad-Ulu semaloed. Ar Bab-Jehová, e-Ulu-semalaga, degi, ega degisadegu arbadii gumarbaliga, a-dulemar-nug-imaksa gusad.”
1CH 15:3 Geb David, Bab-Jehová-Ulu na neg-sobsadse sedmalaga, bela Jerusalénʼgi Israel-dulemar-oambikusad.
1CH 15:4 Deginbali, David, Aarón-wagan-oambikusbalid, degi, Levita-dulemar-oambikusbalid.
1CH 15:5 Levita-dulemar Coat-wagansik-sulesmalad, wemalad: Uriel e-gwenadgan-e-dummad, degi, e-gwenadgan, dulanergwa (120) mergued.
1CH 15:6 Merari-wagansiki: Asaías e-gwenadgan-e-dummad, degi, e-gwenadgan, dulataled-ilabo gaka dulagwen (220) mergued.
1CH 15:7 Gersón-wagansiki: Joel e-gwenadgan-e-dummad, degi, e-gwenadgan, dulanergwa-gakambe (130) mergued.
1CH 15:8 Elizafán-e-wagansiki: Semaías e-gwenadgan-e-dummad, degi, e-gwenadgan, dulataled-ilabo (200) mergued.
1CH 15:9 Hebrón-e-wagansiki: Eliel e-gwenadgan-e-dummad, degi, e-gwenadgan, dulabake (80) mergued.
1CH 15:10 Uziel-e-wagansiki: Aminadab e-gwenadgan-e-dummad, degi, e-gwenadgan, dulatar-gakambe-gakabo (112) mergued.
1CH 15:11 Geb degine, David, dule-irwa-Bab-Dummadse-gormaladse gochabalid: Sadocʼse, Abiatarʼse. Degi, Levita-dulemarse gochabalid: Urielʼse, Asaíasʼse, Joelʼse, Semaíasʼse, Elielʼse, degi, Aminadabʼse.
1CH 15:12 Geb, David, amarga sogded: “Ar bemar Levita-dulemar-e-gwenadgan-e-gwenadgan-e-dummagansoggu, bemar na be san swilidik imakmar, degi, be-gwenadgan deyob imakmarmogo. Adi, bemar, Israel-e-Bab-Dummad-Jehová-Ulu, an ega dordoneg-guakwa-imaksadse nabir sedmalagar.
1CH 15:13 Gebe-iduale, ar bemar, we-Ulu searsur gusad. Ar ade, anmar igar-maidba anmar-Bab-Dummad-Jehováʼse idaksasulid. Agala, Bab-Dummad, sabsur-anmargi yolesad.”
1CH 15:14 Degisoggu, dule-irwa-Bab-Dummadse-gormalad, degi, Levita-dulemarmala, na san swilidik imaksamarsunnad, adi, Israel-e-Bab-Dummad-Jehová-Ulu nabir sedamalagar.
1CH 15:15 Degine, Bab-Jehová-Moisésʼga-Igar-Uksagusadba guegala, Levita-dulemar, Bab-Dummad-Igar-Mesisad-Ulu e-gukingi e-suargi-nai searmarsunnad.
1CH 15:16 David, Levita-dummaganga sogsabalid: “Be-gwenadgan-abargi dule-namakmalad-amimaloye. Wemar weligwaledba we-garmar-ogorbukwa namakmalagar: Gar-salterioʼmar, gar-arpaʼmar, degi, gar-címbaloʼmar.”
1CH 15:17 Degisoggu, Levita-dulemar we-dulemar-onug-imaksamalad: Joel-machi-Hemán. Degi, Berequías-machi-Asaf e-gwenadgan-abargi onugsasmarbalid. Degi, Merari-wagansikdi, Cusaías-machi-Etán onugsasmarbalid.
1CH 15:18 We-warbaagwadmarba, e-gwenadgan-sorbarmalad onugsasmarbalid: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, degi, Micnías. Deginbali, yawagak-dakmalad onugsasmarbalid: Obed-Edom, Jeiel.
1CH 15:19 Dulemar-gar-esgoro-gordikid-címbaloʼye-nugad-ogormalad onugsasmarbalid: Hemán, Asaf, degi, Etán.
1CH 15:20 Dulemar-gar-salterio-Alamotʼye-nugad-ogormalad, wemalad: Zacarías, Aziel, Semiramot, Jehiel, Uni, Eliab, Maasías, degi, Benaía.
1CH 15:21 Deginbali, gar-arpaʼmar-e-dub-gabaabak-nikad (8) binnalee-ogormalad, degi, namakedgi-emar-idumalad, wemalad: Matatías, Elifelehu, Micnías, Obed-Edom, Jeiel, degi, Azazías.
1CH 15:22 Degi, Levita-dulemar-e-dummad-Quenanías, dule-namakedgi-nergualedsoggu, dule-namakmalad-e-dummadga nugsalesad.
1CH 15:23 Dordoneggi Bab-Dummad-Dadganbo-Igar-Mesisad-Ulu-siidgi-nakulemaladi, wemalad: Berequías, degi, Elcana.
1CH 15:24 Dule-irwa-Bab-Dummadse-gormalad, Bab-Jehová-Ulu-walik gar-trompeta-ogormaladi, wemalad: Sebanías, Josafat, Natanael, Amasai, Zacarías, Benaía, degi, Eliezer. Dordoneggi Bab-Jehová-Ulu-siidgi nakulemarmogadi, wemarmogad: Obed-Edom, degi, Jehías.
1CH 15:25 Degisoggu, David, Israel-girmar-dummaganmala, degi, sorda-miliba (1,000) e-dummaganga-gudimaladmala, Bab-Jehová-Dadganbo-Igar-Mesisad-Ulu-sunaega, weligwaledbali Obed-Edom-negse nadegusmalad.
1CH 15:26 Ar Bab-Dummad Levita-dulemar-bendaksasoggu, Bab-Jehová-Igar-Mesisad-Ulu-semamaigu, Bab-Jehováʼga moli-bebe-nikad-machergan-walagugle (7) ogumakar uksamalad, degi, sibad-wawaad-machergan-walagugle (7) ogumakar uksamarbalid.
1CH 15:27 Abali, David lino-mor-nued-yoi naded. Deyobi, Levita-dulemar lino-mor-yoyoimoga Bab-Dummad-Ulu-semamai guarmalad. Degi, dule-namakmalad, deyob lino-mor-yoyoimarmogad. Quenanías namakmalad-e-dummad, lino-mor-nued-yoi nadmogad. Davidʼdina, lino-mor-efodʼye-nugad yoibalid.
1CH 15:28 Weyob bela Israel-dulemar, Bab-Jehová-Ulu-senadapi guarmalad. Doggus-weligwaledba we-garmar-ogornadapi gusmalad: Gar-bocinaʼmar, gar-trompetaʼmar, gar-címbaloʼmar, gar-salterioʼmar, degi, gar-arpaʼmar ogornadapi gusmalad.
1CH 15:29 Geb Bab-Jehová-Dadganbo-Igar-Mesisad-Ulu David-neggweburse-mosgua, Saúl-e-sisgwa-Mical, yawagak-bipigwadba atakded. Agine, Mical, Rey-David weligwaledgi gwirdaniki dakdegua, e-gwagegi David-saedakalid.
1CH 16:1 Deyob, Bab-Dummad-Dadganbo-Igar-Mesisad-Ulu selear gusad. Geb David-dordoneg-ega-sobsadgi sinonimalad. Agine, Bab-Dummadga ibmar-durgan ogumakar uksamalad, degi, gwenatigwar-guega Bab-Dummadga ibmar uksamarbalid.
1CH 16:2 David, Bab-Dummadga ibmar-durgan-ogumakar uksad-sorba, degi, gwenatigwar-guega Bab-Dummadga ibmar uksad-sorba, David, dulemarga, Bab-Jehová-nuggi nued-ibmar-gusana yeerbanye sognai gualid.
1CH 16:3 Degi, David, bela Israel-machergan-iliba, degi, omegan-iliba madu-ologana ega uksad, degi, dátil-dinnagana annugwen ega uksabalid, degi, uva-dinnagana annugwen ega uksabalid.
1CH 16:4 David, Bab-Jehová-Ulu-walik-arbamalagar Levita-dulemar-abar onug-imaksad. Adi, Israel-e-Bab-Dummad-Jehováʼse-gormalaga, degi, ega dog-nuedye-sogega, degi, Bab-Jehová-e-nug-odummomalaga. Wemar-onug-imaksad:
1CH 16:5 Asaf, e-dummadid. Zacarías, e-yarbalidid, Jeiel, Semiramot, Jehiel, Matatías, Eliab, Benaía, Obed-Edom, degi, Jeiel. Wemar, gar-salterio, degi, gar-arpa ogordamalad. Asafʼdi, gar-címbalo ogoledid.
1CH 16:6 Deginbali, dule-irwa-Bab-Dummadse-gormalad, Benaía, degi, Jahaziel, Bab-Dummad-Dadganbo-Igar-Mesisad-Ulu-asabin gusgu gar-trompeta-ogornai damalad.
1CH 16:7 A-ibagi, David Asafʼga, degi, Asaf-e-gwenadganga gebe igar-uknonikid, adi, Bab-Jehováʼga we-namakedgi namakmalagar:
1CH 16:8 “¡Bab-Jehováʼga dog-nuedye be sogmala! ¡E-nuggi Bab-Dummadse be gormala! Bab-Dummad-ibmar-imaksadgi, dule-yar-baid-baidgi-bukwamaladga be sunmakmala.
1CH 16:9 ¡Bab-Jehováʼga namakmala! Namaklegedgi e-nug-odummomala. ¡Ega namakmala! ”¡Bab-Jehová-ibmar-dummagan-imakmaidgi be sunmakmala!
1CH 16:10 ”¡E-nug-isligwaledgi wergumala! Dule-Bab-Jehová-e-nug-odummodimalad, ulubgi wergumala.
1CH 16:11 Bab-Jehová-Gandik-Maidse be dagmala. Bane-bane ese be gordii gumalo.
1CH 16:12 Bab-Jehová-ibmar-dummagan-imaksadgi be binsamalo. E-ibmar-gegerdakleged-imaksadgi, degi, igarmar-inniki-mesisadgi be binsamarbalo.
1CH 16:13 ”Bemar, Bab-Jehová-e-mai-Israel-e-wagan gumalad. Jacob-wagan, Bab-Dummad na bemar-susadid.
1CH 16:14 Bab-Jehová, anmar-Bab-Dummad gued. Bela e-sogedba napneggi igar-inniki semaid.
1CH 16:15 E-igar-degisadegu-na-mesisadi, iemaisulid. Degi, amba wagan mili-miligwen-nasale (1,000-1,000), na ibmar-imakoye-sogsadi, gwen iegosulid.
1CH 16:16 Deginbali, Bab-Jehová Abrahamʼbo-igar-mesisadi, Isaacʼga ise-sogar-igar-mesisadi, iemaisulid.
1CH 16:17 Deginbali, Jacobʼga-igarmar-mesisadi, bargindinai gusad. Israelʼga deyob degisadegua ega igar-mesisad.
1CH 16:18 Israelʼga Bab-Jehová weyob sogsa gusad: ‘Canaán-yar an bega ukoed, ar we-yar bega nugsalesad.’
1CH 16:19 ”Deunni, bemar-dadgan ichee merguenad, amar negsuli gaamakdidimalanad.
1CH 16:20 Deginbali, be-dadgan yar-baid-baid obakdidimalanad, reymar-baid-baid-negsemamaidgi obak-obak nanadimarbalinad.
1CH 16:21 Degi-inigwele, Bab-Dummad, dule-bamalad be-dadgan-sabsur-imakega imaksasulid. Degine, Bab-Jehová anmar-dadgan-sabedba, reymarga weyob gandikidgi sogsa gusad:
1CH 16:22 ‘Dulemar-an-maiga-sulesmalad, mer oakalomalo. An-gayaburba-barsogmalad, mer ani sabsur-imakmalo.’
1CH 16:23 ”Bela dulemar-napneggi-gudidimalad, Bab-Jehováʼga namakmalo, bane-bane e-abonolegedgi sunmakmalo.
1CH 16:24 Dulemar-abargi, Bab-Jehová-e-gangued-yeerdaklegedgi be namakmalo, degi, e-ibmar-dakledisulid-imaksadgi, dulemar-baid-baidmarga namakmarbalo.
1CH 16:25 Ar Bab-Jehová, dule-dummadid, e-nug bela-bela odummoleged maid. Degi, bab-dummagan-baiganba bur bule gangu maid. Degisoggu, dulemar bur bule Bab-Jehová-dobgue-wilubmalad.
1CH 16:26 Ar bela bab-dummad-baigan-yar-baid-baidginmaladi, bab-dummagansurmalad, binsarmaladid. Bab-Jehováʼdi, nibneg-obinnisadid.
1CH 16:27 Bab-Jehová bela-bela yeerdakleged, degi, bur-gangued-nika maid. Bab-Jehová-maidgi, gangued, degi, weligwaled nue-nikad.
1CH 16:28 ”Dulemar-yar-baid-baidgi-bukwamalad, bemar, Bab-Jehová-nug-dummarba-gued odummomarsun. Bemar, Bab-Jehová bela-bela yeerdakleged-nikaye sogmarsun. Bemar, Bab-Jehová bela-bela gangued-nikaye sogmarsun.
1CH 16:29 Bab-Jehová-asabin dagmar, Bab-Dummad-asabin ega ibmar-ukleged sedamar. E-nug-odummomar, ar deyob imaklegergebed. Bab-Jehová-asabin dulluu ambikumalo, Bab-Jehová-neg-islidikid-yeerdaklegedgi, Bab-Jehová-nug odummomalo.
1CH 16:30 Bela-neg-ugakaase, Bab-Jehová-asabin dobee itomalo. Ar Bab-Jehová neg-dirbir-naid nasiksad. Degisoggu, e-sogedba naigu guoed.
1CH 16:31 ¡Nibnegmar, wergumar! ¡Napneg, yeer-itogedba wergumar! Dulemar-yar-baid-baidgi-bukwamalad, be sogmar: ‘Bab-Jehová, rey-dummadye, be sogmar.’
1CH 16:32 ”¡Demar, uurmake! ¡Bela egi-ibmar-bukwad, uurmake! ¡Sapur, wergue! ¡Bela-egi-ibmar-bukwad, wergue!
1CH 16:33 Bela sapimar sapurba-bukwad, Bab-Jehová-asabin, weligwaledba namakmar. Ar Bab-Jehová, napneg-seega danikid.
1CH 16:34 ”Bab-Jehováʼga doggus-nuedye be sogmar, ar Bab-Jehová, dule-nuedid. Ar e-sabguedi, degisadeguad.
1CH 16:35 Ega be sogmar: ‘Bab-Dummadye, be anmar-bendake. Ar be anmar-abonogedid. Bab-Jehováʼye, bulakwa-ambikuega be anmar-imake, dulemar-yar-baid-baidgi-bukwamaladgi be anmar-bendake. Adi, be-nug-swilidikid odummogegar, adi, weligwaledgi be-nug odummogegar.’
1CH 16:36 Israel-e-Bab-Dummad-Jehová, be-nug dummarba gusun. Degisadegu, be-nug odummoledii gusun.” Degi, dulemar bela abin sogdemogad: “¡Deyob guo!” Degi, geb Bab-Jehová-e-nug odummosmalad.
1CH 16:37 Degisoggu, David, Asaf-onug-imaksad, degi, Asaf-e-gwenadgan-onug-imaksabalid. Adi, Bab-Jehová-Dadganbo-Igar-Mesisad-Ulu-asabin, bane-bane igar-maidba Bab-Dummad-nug-odummogedgi arbadii gumalagar.
1CH 16:38 Deginbali, David, yawagak-dakmalaga, wemar onug-imaksabalid: Obed-Edom, degi, e-gwenadgan dulapaa-gakabaabak (68). Obed-Edomʼde, Jedutún-e-machid. Deginbali, Hosa, yawagakgi-nakulegega onugsasbalid.
1CH 16:39 Degi, David, dule-irwa-Bab-Dummadse-goled-Sadocʼye-nugad, degi, e-gwenadganmala, Bab-Jehováʼse-gorleged-neg-Gabaónʼgi-siidgi arbamalaga onug-imaksabalid.
1CH 16:40 Adi, wemar, Bab-Jehováʼse-gorleged-neggi, bane-bane wakdaradbali, degi, sedogidbali, ibmar-durgan-ogumakar Bab-Jehováʼga ukmalagar. Igi Bab-Jehová Israel-dulemarga gardagi-narmakar Igar-uksa, abali imakmalagar.
1CH 16:41 Wemarba, David, wemar-onug-imaksabalid: Hemán, Jedutún, degine, dule-baigan onug-imaksabalid. Adi, wemar Bab-Jehováʼga doggus-nuedye sogega, degi, we-namaked-swilidikidgi namakmalagar: “Bab-Jehová-e-sabguedi, degisadeguad.”
1CH 16:42 Degi, Hemán, Jedutúnʼbogwa, we-namakedgi gar-trompeta, gar-címbalo, degi, gar-baigan Bab-Jehováʼga ogormaladid. Jedutún-e-masmaladi yawagak-dakmaladid.
1CH 16:43 Degine, geb bela dulemar na e-neg-e-negse nadmalad. David e-negse nadmogad. Adi, e-neguyaginmaladgi nued-binsaegar.
1CH 17:1 David bato e-reyneggi-gudiidgine, Bab-Dummad-gayaburba-barsoged-Natánʼye-nugadga sogded: —Be an-dakena, andi urwar-neggi maid. Bab-Jehová-Dadganbo-Igar-Mesisad-Uludi, dordonegyaba siid.
1CH 17:2 Degi, Natán, Davidʼga sogded: —Be-binsaedba na be ibmar-imako, ar Bab-Dummad beba gudiid.
1CH 17:3 A-mutikidba, Bab-Dummad, Natánʼga sunmaknonikid. Ega sogded:
1CH 17:4 “Be nao. An-mai-Davidʼga be sognao, ‘Bab-Dummad weyob sogye: David, an-megega be anga neg sobosulid.
1CH 17:5 An Israel-dulemar Egiptoʼgi-onosad-akale, emi-ibadsega, neg-sobaledgi an megdisulid. Unnila dordoneg-sobaledginbi an gudii daed, degi, anse-goled-neg-nabir-selegedginbi an gudii daed.
1CH 17:6 Bela Israel-dulemarba an gudigusgua, deunni an Israel-e-dummaganga sogsagua, anga an-dulemar-idugoye. ¿A-dulemarga an sogsa, anga urwar-neg sobmaloye? A-dulemarse an neg-egichissulid.’
1CH 17:7 ”Degisoggu, an-mai-Davidʼga be sogo, Bab-Jehová-Bela-Gangued-Nikad weyob sogye: ‘Sapurba be sibad-wawaad-akwedga be gudigua, an be-sunonikid. An-Israel-dulemar-iduegala an be-susad.
1CH 17:8 Ar bia be naddibe, an beba gudii daed. Degine, an be-isdarmalad bega obelosbalid. Ani, an be-nug we-napneggi odummobaloed. Dulemar-nug-bur-dummarba-megismaladyobi, an be-nug odummogoed.
1CH 17:9 Deginbali, an-Israel-dulemarga deyopira amba an yar ukbaloed. Agi ambikuogu, bar ainirosurmalad. Be-isdarmalad, idualedyob ibigwensuli bar be imakosurmalad.
1CH 17:10 An an-Israel-dulemargi dule-igar-nabomalad-dummagan-onugimaksad-akale, e-isdarmalad bela anse galakunoni gusmalad. ” ’A-ukinbali, an bega sogbalid, ani, Bab-Jehová, an bega be-wagan-urbebaloed.
1CH 17:11 Be-ibagan bergudanikile, be burgwidele, be-sorbali, be-machi-gwensak rey-gangi-sigega an imakoed. E-negselegoed, an ogannogoed.
1CH 17:12 A-dule anga neg-soboed, degi, e-yar-seoed an bargindioed. Deyob, e-yar-seodi, degisadegu guoed.
1CH 17:13 An e-babga guoed, degi, e, an-machiga gumogoed. An-sabgued an egi obanosulid. Igi an-sabgued dule-be-iduar-negsesadgi an obachagusa, an deyob imakosulid.
1CH 17:14 A-dule-rey-gangi-sigoedi anse-goled-neggi, degi, an-yar-dakmaidgine, degisadegu e-yar-semaid an-bargindimai guoed. E-negseleged gandikidba-selemai degisadegu guoed.’ ”
1CH 17:15 Natán, negburgan-daksadba, we-gayaburba bela Davidʼga sogsad.
1CH 17:16 Degidgi, David, Bab-Jehováʼbo-sunmakegala, Bab-Dummad-asabin signonikid. Ega sogded: “Bab-Jehováʼye, ¿ande doasunna? ¿An-neguyade ibusunna? Emide, we-ibmar bela be anga uknagu.
1CH 17:17 A-ukinbali, Bab-Dummad, emide be anga sogbalid, be an-wagan-yoedse-danikoedgi be nued-binsabaloye. Bab-Jehová, bur bule dule-nug-nikadiyob be an-imaked.
1CH 17:18 ”Bab-Dummad, ¿ibu an bega bar sogbalirgebe? Emide be, weyob angi-nued-binsanaigu. Ani, an-be-maiga-gudiid, magasar be an-daked.
1CH 17:19 Bab-Jehováʼye, be bela we-ibmar-gegerdaklemalad an-sabedba be imaksad. Degi, na be-abegedba be imaksabalid. Deginbali, be we-ibmar-magar-itogega be an-imaksabalid.
1CH 17:20 ”Bab-Jehováʼye, anmar nue be-wisid, dule-baid beyobidsulid. Degi, Bab-Dummad-baid be-imbagi maisurbalid.
1CH 17:21 We-napneggi, ¿biti-dulemar-baid Israel-dulemaryobi bukwabali? Ar Israel-dulemarbi, be-dulamarga-imakegala, degi, be-nug-ogannogegala, na be sabsur-wilebukwadgi onosad. Degine, ibmar-gegerdaklemalad be imaksabalid. Deunni, be-dulamar Egipto-yargi be onosgua, be dule-bamalad barmete gusad, degi, dule-bamalad-e-bab-dummagan be barmete gusbalid.
1CH 17:22 Israel-dulemar be-dulamarga-guega na be susad. Bab-Jehová, bee be e-Bab-Dummadga gunonikid.
1CH 17:23 ”Bab-Jehová, angi be sunmaksadi, degi, an-wagangi be sunmaksabalidi, mer be iegena gadin. Be-sogsadba degisadegu be imakena gadin.
1CH 17:24 Adi, be-nug mer ielegegar, degi, be-nug-degisadegu odummoledii gubaligar. Bela dulemar sogmalagar: ‘Bab-Jehová-Bela-Gangued-Nikadi, Israel-e-Bab-Dummadid.’ Deginbali, an-wagan degisadegu bese bendakledii guegar.
1CH 17:25 ”Bab-Dummad, an-wagan reymarga degisadegu maiguoed-wisguega be an-imaksad. A-ulale, ani, an be-maiga-guedi, bese an ibmar egisnaid.
1CH 17:26 Emisgi, Bab-Jehová, bee, be Bab-Dummadid. Anga be ibmar-nued-ukoye be sogsad.
1CH 17:27 A-ulale, an bese wilesakwaa egisnaid, an-wagangi ise-nued be binsaoye. Adi, an-wagan degisadegu bega arbadii guegar. Bab-Jehová, an-wagangi be nued-binsassoggu, ega igar-nueganbi degisadegu naoed.”
1CH 18:1 We-ibmar-gusad-sorbali, David, Filistea-sordamar-ogalakusad, degi, e-maiga imaknonibalid. David, Filistea-dulemar-ibe Gat-neggwebur sunonibalid, e-neggwebur-burwiganase-bakar, sunonikid.
1CH 18:2 David, Moab-dulemar-ogalakunonibalid, geb e-maiganga imaksad. Deginbali, David, Moab-dulemar-mani-bennukdii-gumalaga imaksabalid.
1CH 18:3 A-ukinbali, David, Hamat-neg-nugadgi, Soba-e-rey-Hadad-Ezer Éufrates-diwarba-yar-suega-gunaigu, Hadad-Ezer-ogalakusbalid.
1CH 18:4 Agi, David, Hadad-Ezer-ibe: Ur-napagined miligwen (1,000) susad, sordamar-moligi-sii-urwemalad miligugle (7,000) gasad, dulemar-napagi-urwemalad mili-dulagwen (20,000) gasbalid. Ur-napaginedgi-moli-atinnarmalad-e-mali-gasi siksa gusbalid. Unnila molimar-dulatar (100) oakalossulid, ur-napaginmaladga urbisad.
1CH 18:5 Geb degi, Siria-sordamar-Damascoʼginmalad, Soba-e-rey-Hadad-Ezer-bendakega nonimarmoganad. Degi-inigwele, David egi-obichabalid. David, Siria-sordamar mili-dulagwen-gakabo (22,000) ogilononikid.
1CH 18:6 Degine, geb David, e-sordamar Siria-yargi, Damasco-neggweburgi-nakulemalaga urbisad. Siria-dulemar David-maiga gunonimalad. Deginbali, David, Siria-neggweburga mani-bennukleged-igar mesisad. Bab-Jehová, David-bia-bila-ononadele, emargi-obinega David-imakdaed.
1CH 18:7 Deginbali, David, Hadad-Ezer-sordamar-sigu-abgamalad-orbiid-ebusadi, e-ibe susbalid, geb Jerusalénʼse sesa gusad.
1CH 18:8 Deyobbali, David, Hadad-Ezer-e-neggweburmar Tibhatʼye-nugadgi, degi, Cunʼye-nugadgi, esgoro-gordikid-bukidar susbalid. A-esgoro-gordikidmar, Salomón, dii-sied-dummad-sobega ebusad, degi, buarmar-esgoro-gordikidbiid-sobega ebusbalid, deginbali, ibmar-Bab-Dummadse-goled-neggi-ebulemalad-sobega ebusbalid.
1CH 18:9 Hamat-e-rey-Toi wisgusad, David, Soba-e-rey-Hadad-Ezer-e-sordamar bela obelosye.
1CH 18:10 Ar Hamat-e-rey-Toi, Hadad-Ezer-e-isdaradmosoggu, Rey-Davidʼga nuedye-sogegala, degi, Hadad-Ezerʼgi-nakwisad nued-be-imaksaye ega sogbaligala, ese e-machi-Adoram barmialid. Degidbali, Toi, ibmar-akar-akar-orgi-sobarmalad, manimar, degi, ibmar-esgoro-gordikidgi-sobarmalad Davidʼga barmialid.
1CH 18:11 David, bela Toi-ega-ibmar-uksadi, Bab-Jehováʼga uksad. Deginbali, dulemar-ibe manimar-susbalidi, degi, ormar-susbalidi, Bab-Dummadga uksabalid. We-dulemar-ibe susgusad: Edom-dule, Moab-dule, Amón-dule, Filistea-dule, degi, Amalec-dule.
1CH 18:12 Deginbali, Sarvia-machi-Abisai, Balu-Nebagi miliambe-gakabaabak (18,000) Edom-dulemar-ogilosad.
1CH 18:13 Degine, Abisai, Edom-yargi dule-nakulemalad-urbenonikid. Agine, geb bela Edom-dulemar David-e-maiganga gunonimalad. Bab-Jehová, David-bila-ononadele, e-isdarmaladgi-nakwega imakdaed.
1CH 18:14 David bela Israel-yargi negsemaidgine, nue-itoakwaa dulemarga negsemai gusad, innikii e-dulamar-semai gusad.
1CH 18:15 David-e-dulemar-idumaladi, wemalad: Sarvia-machi-Joab, sorda-bila-onomalad e-dummadid. Ahilud-machi-Josafat, garda-narmaked-e-dummadid.
1CH 18:16 Ahitob-machi-Sadoc, degi, Abiatar-machi-Abimelecʼbogwa, dule-irwa-Bab-Dummadse-gormaladid. Savsa, Davidʼga garda-narmakedid.
1CH 18:17 Joiada-machi-Benaía, Cereteo-dulemar, degi, Pelet-dulemar-e-dummadid. Geb David-masmaladina, dummagan-negsedimaladid.
1CH 19:1 We-ibmarmar-nasad-sorba, Amón-dulemar-e-rey-Nahas burgwenonikid. Geb sorbali, Nahas-e-machi reyga megnonikid.
1CH 19:2 Geb degine, David sogded: “Nahas angi nued-binsassoggua, deyob an Nahas-machi-Hanúnʼgi an nued binsamogargebed.” Agala, David, Hanúnʼse ega-gayaburba-berbemalad barmisad, e-bab-burgwisad-nukad mer dogdar bukib-binsaegar.
1CH 19:3 David-e-gayaburba-berbemalad Hanúnʼga mer-bukib-binsaye sogega mosmargua, Amón-dulemar-e-dummagan Rey-Hanúnʼga sogdemalad: “¿Ar David mer-bukib-binsaye bega-sogega, e-sordamar-barmiar be ebinsasi? ¿Ar be-babgi-nued-binsaye, aga barmiar be ebinsasi? Degisuli. Ar David, neg-argaega e-sordamar-barmialid, ar anmar-obelogega barmialid.”
1CH 19:4 Degidgine, Hanún, David-e-sordamar-gayaburba-berbemalad gasad. Amar-ibe e-siga-emiega imaksad, degi, e-mormar-yoid e-sor-nagase e-ibe-sikega imaksabalid. Deyob gannar Davidʼse barmisad.
1CH 19:5 David-e-sordamar deyob gusmalad, nue-binge gusmalad. Geb David, deyob e-sordagan-gusye wisgusgua, amarse sorda-bamalad-barmisad, weyob ega sognamalagar: “Jericó-neggweburgi be gudii imakmargwelo. Bemarga siga-sugusar, geb be dagmalo.”
1CH 19:6 Degidbali, Hanún, degi, Amón-dulemar David-e-isdaradga gunonimarsunye itononimalad. Degisoggu, wemar, ur-napaginmalad manigi-bennukar-sedegala, degi, dulemar-moligi-bila-onomalad manigi-bennukar-sedegala, mani nibir-milidulapaa-gakambe-gakabake (74,000) Mesopotamia-yarse, Siria-yarse, Maaca-yarse, degi, Soba-yarse barmismalad.
1CH 19:7 Degine, geb ur-napagined mili-dulagwen-gakambe-gakabo-mergu (32,000) manigi bennuksamalad. Deginbali, manigi-bennukale Maaca-yar-e-rey, Maaca-sordamarse-bakale sesbalid. Wemar Medebaʼye-neg-nugad-asabin ambikunonimalad. Amón-e-sordamardina, bila-ononamalagala, e-neggweburmargi noarmalad.
1CH 19:8 David deyob-wisgusgua, Joab-barmisad, bela e-sordamar-gandikmaladmala barmisad.
1CH 19:9 Amón-dulemar bila-onogega-ainiarmargua, e-neggwebur-dogedgi ambikunonimalad. Reymar Amón-dulemar-bendakega-nonimarmogad, amardina bachikii neba-neg-naidgi ambikusmalad.
1CH 19:10 Joab, e-asabin e-isdarmalad-bukwa dakded, degi, e-yargansik-bukwa dakdebalid. Geb agine, Siria-sordamargi-bila-onogegala, Israel-sordamar-bur-niga-gandikmalad egwasad.
1CH 19:11 Geb Joab, Amón-sordamargi-urwemalaga e-ia-Abisai Israel-sordamar-bamalad-e-iduega onug-imaksad.
1CH 19:12 Agine, Joab, Abisaiʼga sogded: “Ar Siria-dulemar angi obite be dakdele, be an-bendaknao. Ar Amón-dulemar begi obite an dakdemogale, an be-bendaknamogo.
1CH 19:13 Na be gandik imakmalo, mer sikirmakmalo. Anmar-dulemar-nukad, degi, anmar-Bab-Dummad-e-neggweburmar-nukad bila-onomalo. Ar Bab-Jehová na igi-abege, deyob na neg-imakoed.”
1CH 19:14 Agine, Joab, e-sordamarmala, Siria-sordamargi ilagwen-dogar bila-ononadmalad. Siria-sordamardi aka Joab-idu duurmakdemalad.
1CH 19:15 Amón-dulemardi, Siria-dulemar-duurmakde-dakdemargua, Joab-e-ia-Abisai-idu duurmakdemarmogad, geb e-neggweburse ubononimalad. Degi, geb Joab, Jerusalénʼse gannar nonikid.
1CH 19:16 Siria-dulemar, Israel-dulemarse galakus na itosmargua, e-bendakdamalaga Siria-dulemar-Éufrates-diwar-obakar-bukwamaladse gayaburba-berbemalad barmisad. A-sordamar-e-dummad Sofacʼye-nugad. Sofacʼde, Rey-Hadad-Ezer-e-sorda-dummadid.
1CH 19:17 David deyob wisgunonibargua, bila-ononaegala, bela Israel-sordamarse gornai guarbalid. Geb, Jordán-diwar-obaksamargua, Siria-sordamargi-bila-onogegala, guakwaa ambikudapmalad. Degidgine, Siria-sordamar David-e-sordamargi gwichiguarmalad. Agi bila-onodmarsunnad.
1CH 19:18 Siria-sordamar, Israel-sordamar-abin-galakudedba duurmakdemalad. Agi, David, Siria-sordamar-ur-moli-onanamalad, miligugle (7,000) oburgwisad. Deginbali, sordamar-napagi-bila-onomaladdi mili-dulabo (40,000) ogilosbalid. Deyob, David, Siria-sordamar-e-dummad-Sofac oburgwisbalid.
1CH 19:19 Hadad-Ezerʼba-bila-ononanai-gusmaladi Israel-dulemarse-galakus na itosmargua, mer bar bila-onogega Davidʼbogwa igar-mesnai guarmalad. Deyobi, geb David-e-maiga gunonimarsunnad. Degi-neggusad-akale, Siria-dulemar, bar Amón-dulemar-bendakbi gussurmalad.
1CH 20:1 Birga-binid-nagunonigua, reymar-bila-ononaddamalad-ibagangi, Joab bila-ononad gusad. Davidʼdina, Jerusalénʼgi besa gusad. Geb agi, Joab, Amón-dulemar-sabsur-wionai gusad. Geb Rabá-neggwebur-ebirnai gualid, geb a-neggwebur-obelosad.
1CH 20:2 Geb agi, David, Amón-dulemar-e-rey-ibe ologurgin-susad. We-ologurginde, nibir-dulapaa-gakambe-gakatar (75) aidikued, degi, akwa-nuegan-dakar-dakar-gamalad egi sobarbalid. We-ologurgin, David-e-nono-birgi sismalad. A-ukinbali, David, Rabá-neggweburgi ibmar-bukidar sesa gusbalid.
1CH 20:3 Degine, David, dulemar-Rabá-neggweburgi-besmalad onisbalid. Geb, David, a-dulemar we-ibmargi-oarbaega imaksad: Esnaligi, esgorogi, degi, akangi-oarbaegar. Deginbali, David, bela dulemar-Amón-neggweburmargi-bukwamalad, deyob-oarbaega imaksabalid. Degi, David, belagwable e-sordamar-bila-onomalad Jerusalénʼse senonikid.
1CH 20:4 Degi-neggusad-sorbali, Israel-sordamar Gezer-neg-nugadgi Filistea-sordamargi bila-onosmarbalid. Sibecai Husaʼgined, dule-masdummagan-e-wagwa-Sipaiʼye-nugad oburgwisad. Deyob Israel-dulemar, bila-onogedgi, Filistea-dulemargi obichad. Filistea-dulemar Israel-dulemarse bar achassulid.
1CH 20:5 Ibagan-nasbargua, Filistea-sordamargi bila-onolesbalid. A-bila-onolesadgine, Jair-machi-Elhanán Lahmi-oburgwisad. Lahmiʼde, Goliat-e-gwenadid, Gat-duled. Lahmi bila-onogedgi e-eswar-ebuged warbipisulid.
1CH 20:6 Gat-neggweburgi gannar bila-onolesbalid. A-neggweburgi dule-masdummad maid. E-argan-goomar abinbela walanergwa-walanergwa (6-6) nikad. E-nag-goomar, deyob abinbela walanergwa-walanergwa (6-6) nikabalid. Belagwable e-goomar dulagwen-gakabake (24) nikad. We-dule, dule-masdummagan-e-wagwad.
1CH 20:7 We-dule-dummad, Israel-dulemarbo-urwegala, egi yee-sogdii gualid. Agi, Simea-machi-Jonatán, we-dule-masdummad-oburgwisad. Simeaʼde, David-e-iad.
1CH 20:8 We-dule-masdummagan, Gatʼginmalad-masdummagan-e-waganad. Wemar, Davidʼse, degi, David-sordaganse oburgwiles gusmalad.
1CH 21:1 Nia-Satanás Israel-dulemargi gwichigunonikid, geb David-e-binsaed ganonikid. Geb Israel-sordamar-ebisega David-imaksad.
1CH 21:2 Agine, David, Joabʼga, degi, sordamar-e-idumaladga sogded: —Be namala, Israel-sorda-ebisnamalo. Bemar Beerseba-neggwebur-akale dulemar-ebisdoed, geb Dan-neggweburse obelodapoed. Sordamar-ebislesad bela be anga sogmalo, adi, an wisguegar, ebigwa dulemar bila-onomalaga gusmalale.
1CH 21:3 Joab abin-sogded: —Bitigi Bab-Jehová na e-dulamar emi-nikadbali, ila-dulataledse (100) bur bule omelogena gadin. ¿Ar we-dulemarde belagwable bega arbadimarsursi? Dummad-rey, ar degite, ¿ibiga be sordamar-ebisbie? Ar aka be Israel-dulemarga boni-amiega be gunaid.
1CH 21:4 Degi-inigwele, rey-igar-uksadi Joabʼgi obichad. Degisoggu, Joab, sordamar-ebisega bela Israel-sordamar-bukwadba bipirmaknadsunnad. Joab Jerusalénʼse gannar aibirisgua, Davidʼga bela dule-nabir-bilagi-urwemalad-e-mergued sognonikid.
1CH 21:5 Bela Israel-yargine, dulemar-nabir-sunna-bilagi-urwemalad miyon-gwensak-gaka-mili-dulatar (1,100,000) mergued. Degi, Judá-dulemar nabir-bilagi-urwemarmogad mili-dulataled-ilabake-gaka-dulapaa-gakambe (470,000) mergubalid.
1CH 21:6 Joab Levita-dulemardi-ebichasulid, degi, Benjamín-dulemar-ebichasurbalid. Ar Joab, rey-ega-igar-uksad gwen abessulidba deyob imaksad.
1CH 21:7 Bab-Dummad, David-sordamar-ebichisgu, gwen nabir daksasulid. Degisoggu, a-nukad, Israel-dulemargi sabsur-odurdaked barmialid.
1CH 21:8 Degidgi, David, Bab-Dummadga sogded: “Bab-Dummadye, ar an yogasaar binsaedsulidyob sordamar-ebisnai gusad. An begi dummad-nosad. Degisoggu, Bab-Dummadye, an wilesagwar bese egisdo, an-begi-nosad be anga eliye.”
1CH 21:9 Degine, Bab-Jehová David-e-negburgan-daked-Gadʼga sogded:
1CH 21:10 “Davidʼse be nae, ega be sognao: Weyob Bab-Jehová sogye: ‘An bega ibmar-sogapaa sogoed, soggwen be suo. Be anga sogo, biti an bega imakoye.’ ”
1CH 21:11 Gad Davidʼse nadgua, ega sogdapid: “Bab-Jehová weyob soged:
1CH 21:12 ‘We-ibmar-sogapaagwad, soggwen be suo: Birgapaa ukud-nagueddibe. Be-isdarmalad nii-walapaa es-suidgi be-ogalakudii-gueddibe. Sulile, Bab-Dummad bela Israel-yar-naid-ugakaase ibapaa bemar-sabsur-odurdaked, e-baliwitur bela dulemar neg-uelleged-dummadba-galitoged imakeddibe. ” ’David, nue be binsao. Dule-an-barmialidgala, ¿igi an sogosunna?’ ”
1CH 21:13 David, Gad-abin sogded: “An nue-wile itoged. Bab-Jehová-e-ganguedgi an berguer bur gadid. Ar Bab-Jehováʼdi, emar-saberba maisoggu, a, an-sabsur-odurdaker bur nuedid. Dule-an-isdarmalad-an-wioged an abesulid.”
1CH 21:14 Degisoggu, Bab-Jehová, Israel-dulemargi boni-dummad barmialid. Agine, Israel-dulemar mili-dulapaa-gakambe (70,000) burgwisad.
1CH 21:15 Deginbali, Bab-Jehová, dulemar-ogilogega e-baliwitur Jerusalén-neggweburse barmialid. Bab-Jehová, deyob baliwitur-emar-oburgwenai daksagua, dulemar-wiledakded. Degi-dakdedbali, baliwiturga sogded: “¡Wesego! ¡Mer bar ogilogo!” Deunni, Bab-Jehová-e-baliwitur, Jebuseo-dule-Ornán-e-ibmar-gwag-omukulegedgi gunaid.
1CH 21:16 David atakdegua, Bab-Jehová-e-baliwitur niba nai dakalid, degi, es-gani Jerusalén-neggwebursik-oyonai dakalid. Geb David, degi, girmar-dummaganmala bukib-itoged-mor-yoi napase dulluu imaksamalad.
1CH 21:17 Degine, David, Bab-Dummadga sogded: “¿Ani an dulemar-ebisnai gussursi? Ani an begi-yolesadid, ani an noar ibmar-imaksad. We-dulemardi, ¿ibugi nosmarsunna? Wemar sibad-wawaadmaryob gued, an-sogsadba imaksamalad, ibmar gwen akar imaksasurmalad. Bur be angi yolege, bur be an-gwenadgangi yolebali. Be-dulamardi, mer be akar imake, mer be-dulamargi boni-dummad be barmidage.”
1CH 21:18 Bab-Jehová-e-baliwitur Gadʼga sogded: “Be nae. Davidʼga be sogo: ‘Bab-Jehováʼga ibmar-ogumakar-ukleged-aila be soboye. Jebuseo-dule-Ornán-e-ibmar-gwag-omukuleged-naidgi be aila-soboye.’ ”
1CH 21:19 Degine, geb David nadsunnad, igi Gad Bab-Jehová-nuggi-ega-ibmar-sogsa, deyob imaksasunnad.
1CH 21:20 Ornán trigo-gwag-omukunaidgi sorsik-aibiridgua, baliwitur-dakalid, degi, e-masmala-warbakegwad-eba-gunanaid, baliwitur-dakdemarmogad. Geb agi, baliwitur-iduar dukusmalad.
1CH 21:21 Degidgi, David, Ornán-gunaidse naded. Ornán ibmar-gwag-omukulegedgi-gunaidgi David-dani-dakdegua abin noalid, geb, David-abin napase dulluu imaksad.
1CH 21:22 Geb David, Ornánʼga sogded: —We-ibmar-gwag-omukuleged-nega be anga manigi uke. Adi, an agi Bab-Jehováʼga ibmar-ogumakar-ukleged-aila sobega. Geb degidbali, boni-dummad-nonaid dulemargi nabir bangudoed. E-mani-gargegued-sogedba be anga uko.
1CH 21:23 Degi, Ornán, Davidʼga sogded: —Dummad-rey, be-dakedba na be neg sue, an binsa bega uked. Bab-Dummadga-ogumakar-ukega an moli-bebe-nikad-machered-alugwasualed bega uko. Degi, trigo-naged-urgo sapanga-imakega an bega ukbalo. Deginbali, trigo-gwag an bega ukbalo. Bela we-ibmar maniginsuli an binsa bega uko.
1CH 21:24 Degi, Rey-David, Ornánʼga sogded: —¡Adi, deyobsulirgebed! Be-ibmar Bab-Jehováʼga-ukega an be-ibe suosulid, ar we-ibmar begadid. Bela we-ibmar e-gargeguedba an bakar imakergebed. Ar Bab-Jehováʼga-ibmar-ogumakar-ukega an mani-missuli gwen ukosulid.
1CH 21:25 Degisoggu, David, ibmar-gwag-omukuleged-neg-bakega, Ornánʼga or nibirambe-gakatar (15) uksad.
1CH 21:26 A-nainugi, David, Bab-Jehováʼga ibmar-ogumakar-ukleged-aila sobsad. Agi, Bab-Dummadga ibdula-ogumakar uksad, degi, gwenatigwarguedga ibmar-ukleged ega uksabalid. Degine geb, Bab-Jehováʼse gochad. Agi, Bab-Jehová, nibneg-akale, ibmar-ogumakar-ukleged-ailagi soo odenonikid.
1CH 21:27 Degidgi, Bab-Jehová, baliwiturga sogsad, es-ganikid e-saboged-yaba odoye.
1CH 21:28 David, Bab-Jehová-e-itos-daksagua, Jebuseo-dule-Ornán-e-ibmar-gwag-omukulegedgi-gunaidgi, Bab-Dummadga bur bule ibmar-uknai gusad.
1CH 21:29 A-ibagangine, Moisés Bab-Jehováʼse-goled-neg-sunna-seleged negsulidganba-sobsagusad, degi, ibmar-ogumakar-ukleged-aila sobsagusbalid, Gabaón-yargi neg-matusulidgi bukwad.
1CH 21:30 Degi-inigwele, David, Bab-Dummadbo-sunmakega, Gabaónʼse nadsurgusad, ar ade, Bab-Jehová-e-baliwitur-es-ganikid-dobedbali geg nae gusad.
1CH 22:1 Degi, David sogded: “Wegi Bab-Dummad-Jehováʼse-goled-neg soblego. Deginbali, wegi ibmar-ogumakleged-aila soblebalo, adi, Israel-dulemar, nabir Bab-Jehováʼga ibmar-ogumakar ukmalagar.”
1CH 22:2 David, Israel-yargi dulemar-ainebarmalad-gudimaladse bela gochad. A-dulemar-abar, akwagi-arbaegala nug-imaksad, adi, a-akwagi Bab-Dummadse-goled-neg-soblegegar.
1CH 22:3 Deginbali, David, yawagak-abgaed-sobega, degi, yawagak-biokega, esgoro-bukidar amisbalid. Degi, esgoro-gordikid bukidar amisbalid, e-aidikuedi, wisgulessulid.
1CH 22:4 Deyob, David, urwar-urgomar geg ebislegedse onmaksabalid. Sidón-dulemar, degi, Tiro-dulemar, Davidʼga urwar-urgo bukidar senonibalid.
1CH 22:5 David sokargusad: “An-machi-Salomón amba-sapingwagwad, amba binsaed dogdar nikasulid. Ar Bab-Jehováʼse-goled-neg soblegergebed, nuekwa soblegoed, degi, bela-bela yeerdakle soblebaloed. We-napneggi we-neg-e-yeerdaklegedgi dummad-sunmaklegoed. Degisoggu, a-neg-soblegegala, an guakwaa ibmar-onmakergebed.” Deyobi, David, Bab-Dummadse-goled-neg-sobegala, e-burgwed-iduale, bela ibmarmar guakwaa urbisad.
1CH 22:6 Degine, geb David, e-machi-Salomónʼse gochad, ega sogegar, Israel-e-Bab-Dummad-Jehováʼga be neg-soboye.
1CH 22:7 Degidbali, David e-machi-Salomónʼga sogded: “Machi, an-Bab-Jehová-e-nug-odummogegala an binsasando, an Bab-Dummadse-goled-neg soboye.
1CH 22:8 Degi-inigwele, Bab-Jehová weyob anga sunmaknonikid: ‘Be ablis dummad-eosad, be dummad-bila-onosbalid. Degisoggu, be anga neg sobosulid.
1CH 22:9 Degi-inigwele, be machi-wargwen-nikuoedi, dule-bogidikid guoed. An ega e-isdarmalad-e-yar-dikarba-bukwamaladbo neg-bogidik nasikoed. Agala, we-machi Salomónʼye nugguoed. Ar e-negsemaidgi, Israel-dulemargala neg-bogidikid nasikoed, degi, bonisuli gudii gumaloed.
1CH 22:10 We-machigwa anga anse-goled-neg soboedid. Degine, an-machiga guoed, an e-babga gumogoed. E-yar-seoedgi an bur bule bendakoed, Israel-yargi degisadegu yar-semai-guega an imakbaloed.’
1CH 22:11 ”Machi, be-Bab-Dummad-Jehováʼga be neg soboed. Degisoggu, Bab-Jehová beba gudii guoed. Igi na sogsa-gusa, bede ega neg-soboye, ar deyob imakoed.
1CH 22:12 Bab-Jehováʼdi binsaed-nued, bega ukoed, degi, magar-neg-itoged bega ukbaloed, adi, be Israel-dulemarga negsear-soger, be-Bab-Dummad-Jehová-Igar-Maidba be nanadii guegar.
1CH 22:13 Ar be nue-ise-itogar Bab-Jehová-sogsadba be nanadiile, degi, Israel-dulemarga-Moisésʼba-Igarmar-uklesadba be nue-nanadibalile, nueganbi bega ibmar nadoed. Degine, be gandik imako, mer be dobguo. Mer be na san gegegwa imako, mer be galakubalo.
1CH 22:14 Be dake, Bab-Jehováʼse-goled-neg-sobega, yeer-ganguedgi an bega we-ibmarmar onmaksad: Or, nibir-miyon-gugle gaka mili-dulataled-ilatar (7,500,000), degi, mani, nibir-miyon-dulapaa-gakambe-gakatar (75,000,000) an onmaksad. Esgoro-gordikiddi, degi, esgoro-sunnaddi, ichesulidba ebislessulid, ar dogdar-mergued. Urgomar, degi, akwamar, deyob an urbisbalid. Geb sorba be, bur bule be ibmarmar omelobaloed.
1CH 22:15 Deginbali, dule-bega-arbamalad an bukidar bega amisbalid: Dule-akwa-mamarmalad, akwagi-neg-sobmalad, urgogi-arbamalad. Degi, bela-we-ibmargi-nerguarmalad an amisbalid:
1CH 22:16 Orgi-nerguarmalad, manigi-nerguarmalad, esgoro-gordikidgi-nerguarmalad, esgoro-sunnadgi-nerguarmalad. Degisoggu, be arbasundo, ar Bab-Jehová beba gudii guoed.”
1CH 22:17 Geb degine, David, e-machi-Salomón-bendakmalaga bela Israel-e-dummaganga igar uksad.
1CH 22:18 Weyob ega sogsad: “Bemar-Bab-Dummad-Jehová bemarba gudiid. Ar a bemarga bela-yar-naidgi neg-bogidikid nasiksad. Ar Bab-Dummad dulemar-we-yargi-bukwadgi-nakwega an-imaksad. Wemar, Bab-Jehová-urbaligwa nanabukwad, degi, Bab-Jehová-e-dulemar-sogedba nanabukmarbalid.
1CH 22:19 Emisgi, bemar bela-bela ulubgi, bemar-Bab-Dummad-Jehováʼba nanabukwa be gumarsunno. Degisoggu, Bab-Dummad-Jehováʼse-goled-neg-sobega ogudmarsun. Ar deyobi, anmar Bab-Jehová-Dadganbo-Igar-Mesisad-Ulu a-negse sedamaloed, degi, Bab-Dummadga-ibmar-ebulemalad sedamarbaloed. Ar Bab-Jehová-nug-odummolegegala, we-neg soblegoed.”
1CH 23:1 David, e-birga-nue-seleba-gusadgine, Israel-e-reyga-megega e-machi-Salomón-onug-imaksad.
1CH 23:2 Degine, David, Israel-girmar-dummagan onmaksad, dule-irwa-Bab-Dummadse-gormalad onmaksabalid, degi, Levita-dulemar onmaksabalid.
1CH 23:3 Levita-dulemar birga-dulagwen-gakambe-obine-nikamalad (30+) ebislesad. War-wargwengi-ebichilesgu, machergan mili-dulagwen-gakambe-gakabaabak-mergu (38,000) daklealid.
1CH 23:4 David sogded: “We-dulemar-deyob-merguedgi, Bab-Jehováʼse-goled-neggi mili-dulagwen-gakabake (24,000) arbamaladid. Sapin-dummagan, degi, igar-nabomalad-dummagan milinergwa (6,000) mergubalid.
1CH 23:5 A-uki, yawagak-dakmalad milibake (4,000) mergubalid. Deginbali, garmar-ogoledgi Bab-Dummad-nug-odummomalagala milibake (4,000) bukwabalid. Ani, Bab-Dummad-nug-odummomalaga a-garmar-sobmalaga imaksad.”
1CH 23:6 David, Leví-e-masmala-warbaagwadba, Leví-wagan danar-danar oambikusad. Leví-e-masmala, wemalad: Gersón, Coat, Merari.
1CH 23:7 Gersón-masmala, wemalad: Laadán, Simei.
1CH 23:8 Laadán-e-masmaladi, wemarmogad: E-machi-gebesailagined Jehiel. Jehiel-yarbalid, Zetam, degi, Joel. Bela walapaa gued.
1CH 23:9 Simei-e-masmala-warbaagwad, wemalad: Selomit, Haziel, Harán. Wemar, Laadán-e-gwenadgan-e-dummaganad.
1CH 23:10 Simei masmala-walabake-nikusbalid, wemalad: Jahat, Zina, Jeús, Bería.
1CH 23:11 Jahatʼde, machi-gebesailaginedid, Zinaʼdi, e-yarbalidid. Jeús, degi, Beríaʼbo masmala-ichesur nikussurgusmalad. Degisoggu, neg-gwagwenayob gunonimalad.
1CH 23:12 Coat-e-masmala bela walabake gumalad: Amram, Izhar, Hebrón, degi, Uziel.
1CH 23:13 Amram-e-masmala, wemalad: Aarón, Moisés. Aarón, degi, e-waganmala, amarbi Bab-Jehováʼga ibmar-bur bule-swilidikmalad-ukega, degi, ina-wawadikid-ogumakbaliga nuggusmalad. Deginbali, Bab-Dummad-nuggi-arbaega, degi, e-nug-odummodi-gubaliga nuggusmarbalid.
1CH 23:14 Bab-Dummad-e-dule-Moisés-e-masmala, Leví-e-waganmarba dognonimarmogad.
1CH 23:15 Moisés-e-masmala, wemalad: Gersón, Eliezer.
1CH 23:16 Gersón-e-machidi, wedid: Sebuel, machi-sailagined.
1CH 23:17 Eliezer-e-machidi, wemogad: Rehabías, machi-sailagined. Eliezer masmala-baid nikussulid. Rehabíasʼdina masmalad-ichesur nikusad.
1CH 23:18 Coat-machi-Izhar-e-machidi, wedid: Selomit, machi-sailagined.
1CH 23:19 Coat-machi-Hebrón-e-masmaladi, wemalad: Jerías, machi-sailagined. Jerías-yarbalid, Amarías. Amarías-yarbalid, Jahaziel. Jahaziel-yarbalid, Jecamán.
1CH 23:20 Coat-machi-Uziel-e-masmaladi, wemalad: Micaía, machi-sailagined. Micaía-yarbalid, Isías.
1CH 23:21 Merari-e-masmala, wemalad: Mahli, Musi. Mahli-e-masmaladi, wemalad: Eleazar, Quis.
1CH 23:22 Eleazar masmala-suli burgwisad. Degi-inigwele, bunamalabi nikusad. Degine, we-bunamala, e-gwenadgan-Quis-masmala nikusmalad.
1CH 23:23 Musi-e-masmala-warbaagwaddi, wemalad: Mahli, Edar, Jeremot.
1CH 23:24 Wemar, Leví-e-waganmalad, e-babgangi-danimalad. Nug-welesadi, e-dummaganba war-wargwengi e-nugmar nagusad. Degi, birga-durgwen (20) nikamalad, birga-durgwen-obine (20+) nikamarbalid. Amar, Bab-Jehováʼse-goled-neggi arbadii damalad.
1CH 23:25 Ar David weyob sogsa gusad: “Israel-e-Bab-Dummad-Jehová, Israel-dulemarga neg-bogidik nasiksad, degi, Jerusalénʼgi-mai sadeguoed.
1CH 23:26 Aga, Levita-dulemar, Bab-Dummadse-goled-neg-sunna-seleged bar-sedii guosurmalad, degi, ibmar-ebulemalad-ebipidii bar guosurmarbalid.”
1CH 23:27 Degisoggu, David-napi-ibmar-sogsadbali, Levita-dulemar birga-durgwen-nikamalad (20), degi, birga-dulagwen-obine-nikamalad (20+), ebislesad.
1CH 23:28 We-Levitaʼmar Aarón-e-masmala-sogedba Bab-Jehováʼse-goled-neggi we-ibmargi-arbamalaga ebislesmalad: Babse-goled-neg-imbaba arbaegar, Babse-goled-negyaba neg-burwigana-dakmalagar, ibmar-islidikmalad-bukwad urukegar, degi, Bab-Dummadse-goled-neggi bela ibmar-imakedgi bendakbaligar.
1CH 23:29 Amba wemala, Bab-Jehováʼga-ukegala, we-ibmar guakwaa imakmarbalid: Madu-islidikid, madubur Bab-Dummadga ukegar, madu-ologana-inasulid, ibmar-dibyar-ukleged, ibmar-duar-uklegeddibe. Deginbali, nibir-ibmar-oaidikumalad, ibmar-wilubsamalad, a-dakedmarbalid.
1CH 23:30 A-ukine, Bab-Jehováʼga-dog-nued-sogegar, degi, Bab-Jehová-e-nug-odummobaligar, bane-bane wakudaradba, degine, sedogidba Bab-Dummadse-goled-negse naddamalad.
1CH 23:31 Degi, Bab-Jehováʼga we-ibmar-ukleged-dakedmarbalid: Ibmar-durgan-ogumakar itoged-ibagi-ukleged, nii-gebe-gwisgusadgi-ukleged, degi, iba-dummad-itoakwaa-onolegedgi-ukleged dakedmarbalid. Emar-merguedba bane-bane, degi, muchub-muchub, e-igar-maidba Bab-Dummadga arbabukwadamalad.
1CH 23:32 Deginbali, Levita-dulemar, Bab-Dummad-dulemarbo-ambikued-neg dakedmarbalid, degi, Neg-Swilidikid-dakedmarbalid. Aarón-masmala-sogedba Bab-Jehováʼse-goled-neggi arbabukwadamalad.
1CH 24:1 Weyobi, Aarón-e-masmala danar-danar mimilesmarmogad. Aarón-e-masmala, wemalad: Nadab, Abiú, Eleazar, Itamar.
1CH 24:2 Nadab, Abiúʼbogwa, mimmigan-nikussurgusmalad. Deginbali, e-bab-idu burgwismarbalid. Degisoggu, Eleazar, Itamar-ebo, Bab-Dummadse-dule-irwa-goledga arbadmalad.
1CH 24:3 Degine, David, Eleazar-e-wagwa-Sadoc-nugadmala, degine, Itamar-e-wagwa-Ahimelec-nugadmala, dule-irwa-Bab-Dummadse-gormalad nuekwaa arbamalagala, ega e-arbaed-ibagan ilemakar mesisad.
1CH 24:4 Dule-idumalad Eleazar-e-wagan-abargi, Itamar-e-waganba bur merbaasoggu, weyob mimilesad: Eleazar-wagan-dule-idumalad, warambe-gakanergwa ambikusad (16). Itamar-wagan-dule-idumaladdi, walabaabak (8) ambikusmarmogad.
1CH 24:5 Sordamar, wachi-wachiba-arbamalaga danar-danar mimilesad. Weyob-mimilesadi ibmargi-wilubdaklegar imaklesad. Degisoggu, Bab-Dummadse-goled-neg-yagi, Bab-Dummadga-arbamalad-e-dummagan, Eleazar-waganmar-abargi, degi, Itamar-waganmar-abargi deyob gudidii nanamalad.
1CH 24:6 Degine, Levita-dule-Natanael-machi-Semaías, we-dulemar-wagab, nugmar gardagi-narmakar mesisad: Rey-wagab, dummagan-wagab, dule-irwa-Bab-Dummadse-goled-Sadoc-wagab, Abiatar-machi-Ahimelec-wagab, dule-irwa-Bab-Dummadse-gormalad-e-dummagan-wagab, Levita-dulemar-wagab. Eleazar-e-gwenadganga wachi-wachiba-arbamalaga ilabo-wilub uklesad, degi, Itamar-e-gwenadgangardina, ilagwen-wilub uklesad. Weyob sulenonimalad:
1CH 24:7 Gebe-suleargua, Joiarib sulenonikid. Ilabogi, Jedaías sulenonikid.
1CH 24:8 Irbaagi, Harim sulenonikid. Irbakegi, Seorim sulenonikid.
1CH 24:9 Ilatargi, Malquías sulenonikid. Ilanergwagi (6), Mijamín sulenonikid.
1CH 24:10 Ilaguglegi (7), Cos sulenonikid. Ilabaabakgi (8), Abías sulenonikid.
1CH 24:11 Ilabakebakgi (9), Jesúa sulenonikid. Irambegi (10), Secanías sulenonikid.
1CH 24:12 Irambe-gakagwensakgi (11), Eliasib sulenonikid. Irambe-gakabogi (12), Jaquim sulenonikid.
1CH 24:13 Irambe-gakapaagi (13), Hupa sulenonikid. Irambe-gakabakegi (14), Jesebeab sulenonikid.
1CH 24:14 Irambe-gakatargi (15), Bilga sulenonikid. Irambe-gakanergwagi (16), Imer sulenonikid.
1CH 24:15 Irambe-gakaguglegi (17), Hezir sulenonikid. Irambe-gakabaabakgi (18), Afses sulenonikid.
1CH 24:16 Irambe-gakabakebakgi (19), Petaías sulenonikid. Ila-dulagwengi (20), Hezequiel sulenonikid.
1CH 24:17 Ila-dulagwen-gakagwensakgi (21), Jaquín sulenonikid. Ila-dulagwen-gakabogi (22), Gamul sulenonikid.
1CH 24:18 Ila-dulagwen-gakapaagi (23), Delaía sulenonikid. Ila-dulagwen-gakabakegi (24), Maazías sulenonikid.
1CH 24:19 Wachi-wachiba Bab-Jehováʼse-goled-negyaba arbamalaga, weyob ilemakar-ambikulesmalad. Igi Israel-e-Bab-Dummad e-dad-Aarónʼba igar-uksagusa, deyob imaksamalad.
1CH 24:20 Leví-wagan-baigan-gudidimalad, wachi-wachiba-arbaega-sulesmarmogad, wemalad: Amram-e-wagansik, Subael. Subael-e-wagansik, Jehedías.
1CH 24:21 Rehabías-e-wagansik, e-machi-sailagined-Isías.
1CH 24:22 Izhar-e-wagansik, Selomot. Selomot e-wagansik, Jahat.
1CH 24:23 Hebrón-e-masmaladi, wemalad: Jerías, machi-sailagined. Jerías-yarbalid, Amarías. Amarías-yarbalid, Jahaziel. Jahaziel-yarbalid, Jecamán.
1CH 24:24 Uziel-e-machi, wedid: Micaía. Micaía-e-machidi, Samir.
1CH 24:25 Micaía-e-urba, Isías. Isías-e-wagansik, Zacarías.
1CH 24:26 Merari-wagansik, wemalad: Mahli, Musi. Jaazías-machi-Beno.
1CH 24:27 Merari-wagansik, e-machi-Jaazíasʼgi danimalad, wemalad: Beno, Soham, Zacur, Ibri.
1CH 24:28 Mahli-machi-Eleazar. Eleazarʼdi, machimala-nikussur gusad.
1CH 24:29 Quis-e-machi, Jerameel.
1CH 24:30 Musi-e-masmala, wemalad: Mahli, Edar, Jerimot. Wemar, Levita-dulemar e-wagan-e-waganba ambikusmalad.
1CH 24:31 Wemar, e-gwenadgan-Aarón-waganyob ibmargi-wilubdaklegar, we-dulemar-asabin mimilesmarmogad: Rey-David-asabin, Sadoc-asabin, Ahimelec-asabin, dule-irwa-Bab-Dummadse-gormalad-e-dummagan-asabin, degi, Levita-dulemar-asabin mimilesmalad. Ia-dummagan-e-gwenadgana, e-urbamar-e-gwenadganyob na yopira imaklesmalad.
1CH 25:1 David, degi, e-sorda-dummaganmala, Bab-Dummadga-namaklegedgi-arbamalaga wemar-onug-imaksamalad: Asaf, degi, e-masmala, Hemán, degi, e-masmala, Jedutún, degi, e-masmala. Wemala gar-arpaʼba, gar-salterioʼba, gar-címbaloʼba Bab-Dummad-gayaburba-barsogmaladid. Gar-ogormaloed, wemalad:
1CH 25:2 Asaf-e-masmala: Zacur, José, Netanías, Asarela. E-bab-Asaf e-masmala-iduedga gudiid. Deginbali, Asaf, rey-sogedba Bab-Jehová-gayaburba barsogdiid.
1CH 25:3 Jedutún-e-masmala, wemalad: Gedalías, Zeri, Jesaías, Hasabías, Matatías, Simei. E-bab-Jedutún e-masmala-e-nergwadga (6) iduedga gudiid. Jedutún, Bab-Jehová-gayaburba-barsokalir, Bab-Jehováʼga dog-nuedye sogega, degi, e-nug-odummobaliga, gar-arpa ogollardaed.
1CH 25:4 Hemán-e-masmala, wemalad: Buquías, Matanías, Uziel, Sebuel, Jeremot, Hananías, Hanani, Eliata, Gidalti, Romanti-Ezer, Josbecasa, Maloti, Hotir, Mahaziot.
1CH 25:5 Bela wemar, Hemán-e-masmala gued. Hemanʼde, reyga-Bab-Dummad-igarsik negburgan-dakedid. Bab-Dummad Hemánʼga masmala warambe-gakabake (14) uksad. Bunamaladi ega warbaa uksabalid. Agala, Hemán nug-dummarba-megnonikid, ar Bab-Dummad ega sogsagusad, an deyob be-imakoye.
1CH 25:6 E-bab Bab-Jehováʼse-goled-neggi namakedgi e-masmala-idudiid, we-garmarba namakarmalar: Gar-címbaloʼba, gar-salterioʼba, gar-arpaʼba namakmalar. Asaf, Jedutún, degi, Hemán, rey-sogedba arbadii damalad.
1CH 25:7 We-dulemar, e-gwenadganse-bakale, Bab-Jehováʼga-namakbukwa-gumalaga odurdaklesmalad. Bela wemar e-dulataled-ilabo gaka dulabake-gakabaabak (288) mergumalad.
1CH 25:8 Bela dule-dummaganse-bakar, dule-burwiganase-bakar, odurdaked-sailaganse-bakar, amba ibmar-durdaknaidse-bakar, wachi-wachiba-arbaega ibmargi-wilubdaklegar yopira mimilesmalad.
1CH 25:9 Asaf-gwenad-Joséʼye-nugad, a-inse sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad. A-sorbali, Gedalías sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:10 Irbaagi, Zacur sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:11 Irbakegi, Izri sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:12 Ilatargi, Netanías sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:13 Ilanergwagi (6), Buquías sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:14 Ilaguglegi (7), Jesarela sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:15 Ilabaabakgi (8), Jesahías sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:16 Ilabakebakgi (9), Matanías sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:17 Irambegi (10), Simei sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:18 Irambe-gakagwensakgi (11), Azareel sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:19 Irambe-gakabogi (12), Hasabías sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:20 Irambe-gakapaagi (13), Subael sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:21 Irambe-gakabakegi (14), Matatías sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:22 Irambe-gakatargi (15), Jeremot sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:23 Irambe-gakanergwagi (16), Hananías sulenonikid. We-dule, e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:24 Irambe-gakaguglegi (17), Josbecasa sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:25 Irambe-gakabaabakgi (18), Hanani sulenonikid. We-dule e-masmalamala, degi, e-gwenadganmala sulenonikid. Wemar bela warambe-gakabo (12) gumalad.
1CH 25:26 Irambe-gakabakebakgi (19), Maloti sulenonikid. We-dule e-masmalamala, degi, e-gwenadganmala sulenonikid. Wemar bela warambe-gakabo (12) gumalad.
1CH 25:27 Ila-durgwengi (20), Eliata sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:28 Ila-durgwen-gakagwensakgi (21), Hotir sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:29 Ila-durgwen-gakabogi (22), Gidalti sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:30 Ila-durgwen-gakapaagi (23), Mahaziot sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 25:31 Ila-durgwen-gakabakegi (24), Romanti-Ezer sulenonikid. We-dule e-masmalamala, degi, e-gwenadganmala sulenonikid. Wemar, bela warambe-gakabo (12) gumalad.
1CH 26:1 Dule-yawagak-dakmalad weyob mimilesmarmogad. Coréʼgi dulemar-danimalad: Coré-machi-Meselemías, Asaf-wagwa.
1CH 26:2 Meselemías-e-masmaladi, wemalad: Zacarías, machi-sailagined. Zacarías-yarbalid, Jediael. Jediael-yarbalid, Zebadías. Zebadías-yarbalid, Jatniel.
1CH 26:3 Jatniel-yarbalid, Elam. Elam-yarbalid, Johanán. Johanán-yarbalid, Elioenai.
1CH 26:4 Obed-Edom-e-masmaladi, wemalad: Semaías, machi-sailagined, Semaías-yarbalid, Jozabad. Jozabad-yarbalid, Joa. Joa-yarbalid, Sacar. Sacar-yarbalid, Natanael.
1CH 26:5 Natanael-yarbalid, Amiel. Amiel-yarbalid, Isacar. Isacar-yarbalid, Peultai. Ar Bab-Dummad Obed-Edomʼgi nabir binsassoggu, ega masmala-bukidar uksad.
1CH 26:6 Obed-Edom-machi-Semaías masmala-baigan nikusbalid. Wemar, e-babgan-e-gwenadgan-iduedga gudii gusmalad. Ade, we-dulemar, dule-gandikmalad naed.
1CH 26:7 Semaías-e-masmaladi, wemalad: Otni, Rafael, Obed, Elzabad. Wemar, dule-gala-ibegan nanaed. Semaías-e-gwenadgan: Eliú, degi, Samaquías. Wemar, dule-gala-ibegan nanamogad.
1CH 26:8 Bela wemar, Obed-Edom-waganmalad. Wemala, e-wagan-e-masmala, degi, e-gwenadganse-bakar, dule-gala-ibegan-naed, arbaedgi gandikmaladid. Obed-Edom-wagan, waladulapaa-gakabo (62) mergued.
1CH 26:9 Meselemías-e-masmala, degi, e-gwenadganse-bakar, warambe-gakabaabak (18) mergued, bela dule-gandikmaladid.
1CH 26:10 Merari-wagwa-Hosaʼye-nugad-e-masmaladi, wemalad: Simri, (machi-sailaginedsulinad, degi-inigwele, e-bab, bur-dummadga nug-imaksad).
1CH 26:11 Simri-yarbalid, Hilcías. Hilcías-yarbalid, Tebalías. Tebalías-yarbalid, Zacarías. Belagwable Hosa-e-masmala, degi, e-gwenadganse-bakar, warambe-gakapaa (13) mergued.
1CH 26:12 Weyob dule-yawagak-dakmalad, wachi-wachiba-arbamalaga mimilesmalad. Wemala, degi, e-dummagan, e-gwenadganse-bakale, Bab-Jehováʼse-goled-neggi-arbamalaga mimilesmalad.
1CH 26:13 Yawagak-iliba egi nakulemalagala, burwiganase-bakale, dummaganse-bakale, e-babgan-e-gwenadgan-merguedba, ibmargi-wilubdaklegar yopira mimilesmalad.
1CH 26:14 Mimilenaigua, Yawagak-Dad-Nakwedsikid-dakega, Selemías sulenonikid. Yawagak-Dad-Nakwed-Sapiledsik-dakegardi, Selemías-machi-Zacarías sulenonikid. Zacaríasʼde, dule-binsaed-daked-nuedid.
1CH 26:15 Yawagak-Dad-Nakwed-Argan-Nuedsikid-dakega, Obed-Edom sulenonikid. Bab-Dummadse-goled-neggi ibmar-sabolemalad-neg-dakedgi-arbaegardi, Obed-Edom-e-masmala sulesmalad.
1CH 26:16 Dad-argwanedsik Yawagak-Salequetʼye-nugad-dakegardi, Supim, Hosaʼbogwa sulesad. A-yawagaksik igar-nakwileged maid. Wachi-wachiba-arbaleged weyob mimilesad:
1CH 26:17 Iba-ilibali yawagak-dad-nakwedsikidgi, Levita-dulemar-nakulemalad, walanergwa (6) bukwamalad. Yawagak-dad-nakwed-argan-sapiledsikidgi, walabake bukwamarbalid. Yawagak-dad-nakwed-argan-nuedsikidgi, walabake bukwamarbalid. Degi, ibmar-saboleged-neg-iliba, agi, ebo-ebo bukwamarbalid.
1CH 26:18 Dule dad-argwanedsik neg-imba-naidgi nakulemalaga, Levita-dulemar walabake bukwamalad. Degi, dule neg-ollor-naid-dakedga, walabo gwichibalid.
1CH 26:19 Weyob Coré-wagan, degi, Merari-wagan yawagak-dakmaladgi-arbaega mimiles nanaed.
1CH 26:20 Levita-dulemar-baigan, Bab-Dummadse-goled-neggi ibmar-nuegan-gargermalad-bukwad-daked-Ahíasʼga sulesmalad, degi, ibmar-Bab-Dummadga-nugsalegaled-dakedga sulesmarbalid.
1CH 26:21 Gersón-wagwa-Laadán-e-wagan e-neguya-sedimaladi Jehiel-masmala ega gudimalad. Jehiel-e-masmala, wemalad:
1CH 26:22 Zetam, degi, Joel. Wemar-warbogwad Bab-Jehováʼse-goled-neggi ibmar-nuegan-gargermalad-dakedga sulesmalad.
1CH 26:23 Deginbali, Amram-dulemar-abargi, Izhar-dulemar-abargi, Hebrón-dulemar-abargi, Uziel-dulemar-abargi, dule-sulesmalad, wemalad:
1CH 26:24 Sebuel, ibmar-Bab-Dummadga-nugsalegaled-daked-e-dummadga nugsalesad. Sebuelʼde, Moisés-machi-Gersón-e-wagwad.
1CH 26:25 Sebuel-e-gwenadgan, e-gwenad-Eliezerʼgi-danikidi, wemar sulesmalad: Eliezer-machi-Rehabías. Rehabías-machi-Jesaías. Jesaías-machi-Joram. Joram-machi-Zicri. Zicri-machi-Selomit.
1CH 26:26 Selomit, degi, e-gwenadganmala, Bab-Jehováʼga ibmar-nuegan-nug-imaklegar-bukwad dakedmaladid. We-ibmar-nuegan-nug-imaklegar-bukwad, wemar uksad: Rey-David, Israel-e-gwenadgan-e-gwenadgan-e-dummagan, sorda-mili-milibalid-e-dummagan (1,000-1,000), sorda-dulataled-dulataled-e-dummagan (100-100), sorda-dummagan-baigan. Selomit, degi, e-gwenadganmala bela a-ibmar dakmaladid.
1CH 26:27 We-ibmarmar bila-onolesadgi sulesmaladid. Degi, we-ibmarmar, Bab-Jehováʼse-goled-neg-nudakega nug-imaksamalad.
1CH 26:28 Deyopira, Selomit, degi, e-gwenadganmala Bab-Dummadga ibmar-belagwable-nug-imaklesad akwismarbalid. We-ibmarmar we-dulemar uksamalad: Negburgan-daked-Samuel, Quis-machi-Saúl, Ner-machi-Abner, Sarvia-machi-Joab, degine, dule-baigan. We-dulemar, Bab-Jehováʼga-we-ibmarmar-belagwable-nug-imaksamalad akwismalad.
1CH 26:29 Izhar-e-wagansik: Quenanías, degi, e-masmala, Israelʼgi sailaganga mamaid, degi, Israel-dulemarga igar-itoged-dummaganbalid, degine, neggwebur-baiganbo igar-itomaladid.
1CH 26:30 Hebrón-dulemarsik: Hasabías, degi, e-gwenadganse-bakar, dule-gandikmalad-naed, bela miligwen gaka dulataled-ilagugle (1,700) mergued. Wemar Jordán-diwar-dad-argwanedsik bela Bab-Jehováʼga, degi, reyga arbabukwamalad.
1CH 26:31 Hebrón-dulemar-e-gwenadgan-e-gwenadganga, Jerías e-dummadga maid. Birga-dulabogus (40) Rey-David-yar-semaidgi, nugmar-narmakar-mamaid-gardagi Hebrón-wagan-danimalad amismalad. Agi daklenonikid, Jazer-De-Galaad-neggweburgi Hebrón-waganmar-abargi dule-gandikidmalad gudimala.
1CH 26:32 Jerías-e-gwenadgan dule-gandikmalad-naed. Amarde, bela milibo gaka dulataled-ilagugle (2,700) mergued. Degi, e-gwenadgan-e-gwenadgan-dummadganga maimarbalid. Rey-David wemar-dakega Jerías-e-gwenadgan-onug-imaksad: Rubén-wagan-dakega, Gad-wagan-dakega, Manasés-wagan-neg-abalad-dakbaligar. Deginbali, bela Bab-Dummadga negdakega, degi, reyga negdakbaliga onug-imaksabalid.
1CH 27:1 Israel-sordamar reyga-arbamalaga, sogambe-gakabo (12) danar-danar bukwamalad. Birgagi nii-irbali, na muchub-muchub arbamalad. Dana-danad-sog-soggwengi mili-dulagwen-gakabake (24,000) sordamar bukwa naed. We-dummaganmar, Israel-masmala-nuga-nikamaladid, e-babgan-e-gwenadgan-e-dummaganmalad, sorda-mili-miliba-bukwad-e-dummaganmalad (1,000-1,000), sorda-dulataled-dulataledba-bukwad-e-dummaganmalad (100-100), deyob, reyga sordamar-danar-danar-bukwadgi-arbamaladid.
1CH 27:2 Sorda-mili-dulagwen-gakabakegwad-gebed (24,000), gebe-nii-nagudedgi arbamalad. Amar-idugega Fares-e-wagwa-Zabdiel-machi-Jasobeam gudiid.
1CH 27:3 We-Jasobeamʼde, bela e-sordamar-idumalad-e-dummadid. Wemar gebe-nii-nagudedgi arbamaladid.
1CH 27:4 Sorda-mili-dulagwen-gakabake-sogbogwad (24,000), nii-warbo-nagudedgi arbamalad. Amar-idugega Ahoh-dule-Dodai gudiid. Dodai-e-bendaked Miclotʼye-nugad.
1CH 27:5 Sorda-mili-dulagwen-gakabake-sogbaagwad (24,000), nii-warbaa-nagudedgi arbamalad. Amar-idugega Joiada-machi-Benaía gudiid. Joiadaʼde, dule-irwa-Bab-Dummadse-goled-bur-dummadid.
1CH 27:6 Benaíaʼdi, sorda-gandikmalad-dulagwen-gakambegid-e-sordad (30), degi, e-dummadbalid. Benaía-e-machidi, Amisabadʼye nugad. We, sorda-mili-dulagwen-gakabake-sogbaagwad-e-dummadga (24,000) gudiid.
1CH 27:7 Sorda-mili-dulagwen-gakabake-sogabakegwad (24,000), nii-warbake-nagudedgi arbamalad. Joab-e-urba-Asael, amar-e-dummadid. Geb Asael-sorba, e-machi-Zebadías-nuggusad.
1CH 27:8 Sorda-mili-dulagwen-gakabake-sogataled (24,000), nii-walatar-nagudedgi arbamalad. Izra-dule-Samhut, amar-e-dummadid.
1CH 27:9 Sorda-mili-dulagwen-gakabake-soganergwad (24,000), nii-walanergwa-nagudedgi (6) arbamalad. Tecoaʼgined-Iques-e-machi-Ira, amar-e-dummadid.
1CH 27:10 Sorda-mili-dulagwen-gakabake-sogagugled (24,000), nii-walagugle-nagudedgi (7) arbamalad. Peloni-dule-Efraín-wagwa-Helesʼye-nugad, amar-e-dummadid.
1CH 27:11 Sorda-mili-dulagwen-gakabake-sogabaabakad (24,000), nii-walabaabak-nagudedgi (8) arbamalad. Husaʼgined, Zera-e-wagwa-Sibecaiʼye-nugad, amar-e-dummadid.
1CH 27:12 Sorda-mili-dulagwen-gakabake-sogabakebakad (24,000), nii-walabakebak-nagudedgi (9) arbamalad. Anatotʼgined, Benjamín-wagwad-Abiezerʼye-nugad, amar-e-dummadid.
1CH 27:13 Sorda-mili-dulagwen-gakabake-sogambegwad (24,000), nii-warambe-nagudedgi (10) arbamalad. Netofaʼgined, Zera-wagwa-Maharaiʼye-nugad, amar-e-dummadid.
1CH 27:14 Sorda-mili-dulagwen-gakabake-sogambe-gakagwensakad (24,000), nii-warambe-gakagwensakad-nagudedgi (11) arbamalad. Piratónʼgined, Efraín-wagwa-Benaíaʼye-nugad, amar-e-dummadid.
1CH 27:15 Sorda-mili-dulagwen-gakabake-sogambe-gakabogwad (24,000), nii-warambe-gakabo-nagudedgi (12) arbamalad. Netofaʼgined, Otoniel-wagwa-Heldaiʼye-nugad, amar-e-dummadid.
1CH 27:16 Israel-dulemar-danar-danar-bukwamalad-e-saila-dummagan, wemalad: Rubén-wagan-e-dummad: Zicri-e-machi-Eliezer. Simeón-wagan-e-dummaddi: Maaca-e-machi-Sefatías.
1CH 27:17 Levita-dulemar-e-dummaddi: Kemuel-e-machi-Hasabías. Aarón-wagan-e-dummaddi: Sadoc.
1CH 27:18 Judá-wagan-e-dummaddi: David-e-ia-gwensak-Eliú. Isacar-wagan-e-dummaddi: Micael-e-machi-Omri.
1CH 27:19 Zabulón-wagan-e-dummaddi: Abdías-e-machi-Ismaías. Neftalí-wagan-e-dummaddi: Azriel-e-machi-Jerimot.
1CH 27:20 Efraín-wagan-e-dummaddi: Azazías-e-machi-Oseas. Manasés-wagan-negabalad-e-dummaddi: Pedaías-e-machi-Joel.
1CH 27:21 Manasés-wagan-baid-negabar Galaadʼgi-bukwabalid-e-dummaddi: Zacarías-e-machi-Iddo. Benjamín-wagan-e-dummaddi: Abner-e-machi-Jaasiel.
1CH 27:22 Dan-wagan-e-dummaddi: Jeroham-e-machi-Azareel. Wemar, Israel-e-sailagan-dummaganad.
1CH 27:23 David dulemar-birga-dulagwen-akuar-nikamaladdi (20) ebichissulid. Ar ade, Bab-Jehová sogsagusad: “Israel-dulemar niisgwamar-merguedyob an omelogoye.”
1CH 27:24 Sarvia-machi-Joab, dule-ebisdegua, obelossurgusad, ar durbas boni-dummad Israel-dulemargi yolenonikid. A-ulale, Rey-David-negsemaid-ibagangi, sordamar-mergued, ibmar-imaklesmalad-narmakar-maid-gardagi narmaklessulid.
1CH 27:25 Reyga-arbamalad-e-dummagan, wemalad: Adiel-machi-Azmavet, reyga-manimar-dakedid. Uzías-machi-Jonatánʼdi, we-ibmarmar-dakedid: Sapurmar-e-ibmar-nuegan, neggwebur-senigana-e-ibmar-nuegan, neggwebur-dummagan-e-ibmar-nuegan, degi, neg-matusulid-e-ibmar-nuegan-dakedid.
1CH 27:26 Quelub-machi-Ezri, dulemar-sapurba-ibmar-digmaladgi-arbamalad-dakedid.
1CH 27:27 Ramat-neggweburgined-Simei, uva-nainumar-dakedid. Sifmit-neggweburgined-Zabdi, uva-nis-saboleged-neg-dakedid.
1CH 27:28 Gederita-dule-Baal-Hanán, Sefela-yargi olivo-sapimar-bukwad, degi, higuera-sapimar-bukwad-dakedid. Joásʼdi, saboleged-neggi olivo-gwallu-bukwad-dakedid.
1CH 27:29 Sarónʼgined-Sitraiʼdi, Sarón-e-gagan-nainumargi moli-bebe-nikmalad-bukwad-dakedid. Adlai-machi-Safatʼdi, yar-imbaba-neba-naidgi moli-bebe-nikmalad-bukwad-dakedid.
1CH 27:30 Ismael-dule-Obilʼdi, moli-yargan-muregemalad-dakedid. Meronot-dule-Jehedíasʼdi, moli-uayasuid-omemar-dakedid.
1CH 27:31 Agareno-dule-Jazizʼdi, sibad-wawaad-dakedid. We-dulemar, belagwable David-nainugangi arbamaladid.
1CH 27:32 David-e-gilor-Jonatán, reyga binsaed-ukedid, degi, dule-binsaed-nikaa-ibmar-imakedid, deginbali, reyga gardamar-seedbalidid. Hacmoni-machi-Jehielʼdi, rey-e-masmala-akwediid.
1CH 27:33 Ahitofelʼdi, reyga binsaed-dakedid. Arquita-dule-Husaiʼdi, rey-e-ai-walikagwadid.
1CH 27:34 Ahitofel-sorbali, Benaía-machi-Joiada, Abiatar-ebo, reyga binsaed-dakmarmogadid. Joabʼdi, reyga-sorda-bila-onomalad-e-dummadid.
1CH 28:1 David Jerusalén-neggweburgi bela we-Israel-dummagan-onmaksad: Israel-dulemar-e-dummagan-negsedimalad, Israel-wagan-sogambe-gakabogwad-e-dummagan (12), sorda-bila-onomalad-danar-danar-bukwad-e-dummagan, reyga-muchub-muchub-arbamalad, sordamar-bila-onomalad-milibalid-e-dummagan (1,000), sorda-bila-onomalad-e-dulataled-e-dummagan (100), bela-nainu-dakmalad-e-dummagan, reyga-ibmar-durgan-dakmalad-e-dummagan, rey-machimala-e-ibmar-dakmalad-e-dummagan, reyneggi dule-arbamalad-e-dummagan, dule-gandikmalad, degi, e-sordamar-bur bulegan, David bela we-dulemar-onmaksad.
1CH 28:2 Degidgi, Rey-David gwisguded, agi geb sogded: “Gwenadgan, nue an-itomalo. Sordamar, nue an-itomalo. An Bab-Dummadse-goled-neg-soboye an sogsanad, agi Bab-Jehová-Dadganbo-Igar-Maid-Ulu sigegar. Degi, Bab-Jehová egi nue-mai mag-itolebaligar. Bela an ibmar guakwaa urbisgusanad.
1CH 28:3 Degi-inigwele, Bab-Dummad anga sogsad: ‘Be bila-onosad-dulesoggu, be ablis-bukidar eosadsoggu, bee, be anga anse-goled-neg sobosurye.’
1CH 28:4 ”Degi-inigwele, Israel-e-Bab-Dummad-Jehová an-gwenadgan-abargi Israel-reyga degisadegu-megega an-sunonikid. Agala, Bab-Jehová, e-Israel-dulemar-seegala, Judá-sunonikid. Degi, Judá-wagan-abargi, an-gwenadgan-sunonikid. Deginbali, an-iamar-abargi Israel-yargi reyga-megega an-sunonikid.
1CH 28:5 Deginbali, Bab-Jehová, masmala-bukidar-anga-uksad-abargine, rey-gangi-sigegala, degi, Israel-yar-seegala, an-machi-Salomón-sunonikid.
1CH 28:6 ”Degine, Bab-Jehová anga sogsabalid: ‘Be-machi-Salomón anse-goled-neg, degi, neg-ubebmar anga soboedye. Ar we-machi, an-machiga an na imakoye, degi, e-babyob an gunonikoye.
1CH 28:7 Ar Salomón, igi emi-iba an-Igar-Maidba nanadii, igi an-gayaburba-maidba nanadibali, ar deyob-nanadiile, e-yar-seoed an ega bar-ogannogoye, degisadegu reyga megoye.’
1CH 28:8 ”Emide, bela Israel-dulemar, Bab-Jehová-dulemar-gued-bukwadi, anmar-sunmaknaid anmar-itobukwad. Degisoggu, we-ibagine, wemar-asabin, bemar bela Bab-Dummad-Jehová-Igar-sogmaidba be ibsamalo, eba be dobekwaa nanamalo. Ar unnila deyobi, geb be we-yar-nuedgi nabir gudii gumaloed, degi, deyob geb bee, be-mimmiganga we-yar degisadegu be obemarbaloed.
1CH 28:9 ”Emisgi, Salomón, be an-machi-guedgi, be an-Bab-Dummad be mag-dake nanaergebed. Innikigwadba ega be arbaergebed, gandikidgi, degi, weligwaledgi eba be ibsaergebed. Ar Bab-Jehová dule-binsaed bela wissoggu, dule ibmar-imakbiele, bela magasar-daked. Ar be Bab-Jehová-nue-ami-sogele, e-amiega be-imakoed. Ar be Bab-Jehováʼba ibsasurdibe, Bab-Jehová degisadegu be-obanoed.
1CH 28:10 Mer be iego, Bab-Jehová ega ese-goled-neg-sobega be-onug-imaksad. Degisoggu, gandik na be imako, ega be ese-goled-neg sobsun.”
1CH 28:11 Degidgi, David e-machi-Salomónʼga neg-soblegoed-garda uksad: Bab-Dummadse-goled-negyaba e-ubeb-soblegoed-garda. E-negmar-soblegoed-garda. Ibmar-nuegan-saboleged-neg-soblegoed-garda. Neg-aila-nika-soblegoed-garda. Negyaba-dulemar-ambikued-soblegoed-garda, degi, Bab-Dummad-dulemarbo-igar-naboged-neg soblegoed-garda. David, a-gardamar e-machi-Salomónʼga uksad.
1CH 28:12 Deginbali, David, deyopira we-negmar-sobega, e-gardamar-sobaled uksabalid: Bab-Jehováʼse-goled-neg-imba-sobaled-garda, e-ambikuleged-negmar-dikarbalid-sobaled-garda, Bab-Dummadse-goled-negga manimar-saboleged-neg-sobaled-garda, degi, ibmar-nuegan-swilidikid-ambikuleged-neg-sobaled-garda uksad.
1CH 28:13 Rey-David, deyopira dule-irwa-Bab-Dummadse-gormaladga, degi, Levita-dulemarga, bela Bab-Jehová-neggi danar-danar-arbaega igar mesisad, degi, Bab-Jehováʼse-goled-neggi-ibmar-ebulemaladga igar mesisbalid.
1CH 28:14 Deginbali, e-machi-Salomónʼga ormar-ichesur, manimar-ichesur uksabalid, adi, Bab-Dummadse-goled-neggi-ibmar-ebulemalad orbi-sobega, degi, manibii-sobegar.
1CH 28:15 Deginbali, gwallu-sigmalad ebulegega, soblegega or, degi, mani uksad: Gwallu-sigmalad-orbi-soblegegala, e-gwallumar-orbi-soblebaligala, unnitiba or-uksad. Degi, gwallu-sigmalad-manibi-soblegegala, e-gwallumar-manibi-soblebaligala, unnitiba mani-uksabalid.
1CH 28:16 Amba deyobi, David, ormar uksabalid, mesemar-madu-ambikued ilibali orbi-soblegegar. Deyob manimar uksabalid, mesemar-madu-ambikued ilibali manibii-soblebaligar.
1CH 28:17 David, we-ibmar-soblegega ormar uksabalid: Wesar-iko, nog-dummagan, dii-sied. Or-nog-iliba na-e-aidikuedba-soblegega or uksad, mani-nog-iliba na-e-aidikuedba-soblegega mani-uksabalid.
1CH 28:18 A-ukinbali, we-ibmar-soblegega unnitiba or-uksabalid: Ina-wawadik-ogumakar-ukleged-ailaga, degi, baliwitur-querubin-seed-ur-sobega uksad. We-querubinʼde, Bab-Jehová-Dadganbo-Igar-Mesisad-Ulu-birgi e-sakan nallaa gwisguoed.
1CH 28:19 David sogded: “Bela we-ibmar-soblegoed, Bab-Jehová-e-ibmar-sogedba narmaklesad. Adi, ibmar-soblegoed magar-ito an-imakegar.”
1CH 28:20 David a-uki, e-machi-Salomónʼga sogdebalid: “Gandik na be imako, mer galakuo. Be-arbaed na be imako, Bab-Dummadse-goled-neg be sobo. Mer dobguo, mer be niga-galakuo. Ar an-Bab-Dummad-Jehová beba gudii guoed, begi banguosulid. Ese-goled-neg-oguedse beba gudii guoed.
1CH 28:21 ”Degine, dule-irwa-Bab-Dummadse-gormalad, Levita-dulemar, wegi guakwa bukwamalad. Wemar, Bab-Dummadse-goled-neg-sobedgi arbamaloed. Wemar, be-bendakegala, bela ibmar-soblegedgi be-walik gudimaloed. Deginbali, dule-bela-ibmar-soblegedgi-nergumalad be-bendakmarbaloed. Girmar-dummagan, degi, bela dulemar, be-sogedba ibmar-imakdii gumaloed.”
1CH 29:1 Rey-David, bela dulemar-igar-itobukwamaladga sogded: “Bab-Dummad an-machi-Salomón ega arbaed-dummad-imakega nug-imaksad. Degi-inigwele, an-machi amba sapingwasoggua, we-ibmar-dummad-imakegala, amba nue ibmar wissulid. Ar neg-soblegoedi, dulega soblegosulid, ar Bab-Dummadga soblegoed.
1CH 29:2 An Bab-Dummadse-goled-neg-sobega ibmarmar-bukidar-onmakega, an dummad-gar-itonai gusad. An we-ibmarmar onmaksad: Ormar, ibmar-orbi-soblegoedga, manimar, ibmar-manibi-soblegoedga, esgoro-gordikidmar, ibmar-esgoro-gordikidbi-soblegoedga, esgoromar, ibmar-esgorobi-soblegoedga, degi, urgomar, ibmar-urgobi-soblegoedga. Deginbali, akwa-óniceʼye-nugadmar, akwamar-yeerdaklegedmar, akwa-sichigan, akwamar-akar-akar-daklegedmar, bela akwamar uniryeerdaklemalad, a yeerdaklemalad degi, akwa-mármol-bukidar ibmar-soblegoedgi ebulegega an urbisbalid.
1CH 29:3 ”An Bab-Dummadse-goled-neg nuekwaa sobedgi an binsasoggua, we-ibmarmar-onmaksad-ukine, an ibmarmar-nuegan-nikadgi, an bela ormar-nikadi, manimar-nikadi, Bab-Dummadse-goled-neggala an ukbalid. An wemar uked:
1CH 29:4 Ofir-yargi-or-danikid, nibir-milidulataled-ilabo-gaka-dulagwen-aidikue-wilub (220,000) an uked. Manidi, nibir-milidulataled-ilatar-gaka-dulagwen-aidikue-wilub (520,000) an ukbalid. We-ormar, degi, we-manimar, negmar-galu-birgi nasikegalad.
1CH 29:5 Deginbali, ormar, orbi-ibmar-soblegoedgarbalid. Manimar, manibii-ibmar-soblegoedgarbalid. Bela we-ormar, manimar, dule e-argangi ibmar-akar-akar sobegalad. Bemarmoga, emi-ibagine, ¿doa-dule Bab-Jehováʼga na binsa e-ibmar-ukmogoe?”
1CH 29:6 Degine, geb gwenadgan-e-dummagan, Israel-e-wagan-sogambe-gakabogwad-e-dummagan (12), sorda-milibalid-e-dummagan (1000), sordamar-dulataled-e-dummagan (100), degi, reyga-nainu-dakmalad-e-dummagan, na war-wargwengi e-ibmar uksamarmogad.
1CH 29:7 Bab-Dummadse-goled-neggala, weyob-aidiku we-ibmar uksamalad: Or, nibir-milidulataled-ilapaa-gaka-dulabake gaka dulataled-ilabo (380,200), mani, nibir-milidulataled-ilagugle-gaka-dulabo-gakambe (750,000), esgoro-gordikid, nibir-miyon-gwensak gaka milipaa-gaka-dulabo-gakambe (1,350,000), degi, esgoro, nibir miyon-gwensak gaka mili-dulataled-ilagugle-gaka-dulabo-gakambe (1,750,000) uksamalad.
1CH 29:8 Dulemar bela akwa-nuegan-gargermalad-nikamalad Gersón-wagwa-Jehielʼga uksamalad. Jehiel, Bab-Jehováʼse-goled-neggi ibmar-gargermalad-akwediid.
1CH 29:9 Deyobi, dulemar na war-wargwengi ibmar-uksamaladba yeer-itosmalad, ar ade, Bab-Jehováʼga bela-bela na weligwaledba uksamalad.
1CH 29:10 Degidbali, Rey-David nue-yeer-itosmogad. Geb, David, bela dulemar-danar-bukwad-asabin Bab-Jehová-e-nug-odummonai gualid. Weyob sogded: “Bab-Jehová, be-nug odummolesun, be anmar-dad-Israel-e-Bab-Dummadid. Degisadegu, be-nug odummolesun.
1CH 29:11 Bab-Jehová, bebi gargangued nikad, begi dule obinmaisulid. Bebi be emargi obinmaid. Be-nugbi dummarba-maid, Bela be neg-gani maid. Bela-bela be yeerdakle maid. Ar bela nibneggi-ibmar-nikadi, bela begadbiid. Ar bela we-napaneggi-ibmar-nikadi, bela begadbiid. Bab-Jehová, napneg-dirbir-naidgi bela be negdakmaid. Bee, be bur dummadga maid.
1CH 29:12 Begi bela ibmar-nuegan-gargermalad danikid. Begi bela nug-dummarba-gued danikid. Bela be negsemaid. Beginbi unnila gargangued maid. Ar be emar-ogannomaid, ar be dule-odummomaid.
1CH 29:13 Anmar-Bab-Dummadye, agala, anmar bega dog-nuedye sogbalid, degine, be-nug-dummarbamaidgi anmar be-nug-odummogega namakbalid.
1CH 29:14 ”Degi-inigwele, ¿ande doasunna? ¿An-dulamarde, doamarsunna? Emide, nabir ibmar-bukidar bega ukye soged. Ar anmardi be-anmarga-ibmar-uksad, gannar anmar bega uknaid. Ar bela be ibmar-e-ibedid.
1CH 29:15 Ar anmar be-asabinni, we-napneggi negsuli an gudimalad, anmar-dadgan-nanadii gusmaladyob, yar-obak-obak an gudimalad. We-napneggine, anmar-ibagan burwa-nasayob unnila sikwas-nasdaed, gwen bendakleged nikasulid.
1CH 29:16 Anmar-Bab-Dummad-Jehováʼye, be-nug-islidikidga neg-sobegala, bela ibmar-bukidar-an-onmaksamaladi, begi danikid, ar be e-ibedid.
1CH 29:17 Anmar-Bab-Dummadye, an wisi be anmar-wilubdaked, degi, dule-innikidaed be nue-abeged. Agala, an gwage-islidikidgi bela an bega ibmarmar uksad. Emide an daked, dulemar ibiyobi ulubgi weligwaledba bega ibmar uksamala.
1CH 29:18 ”Bab-Jehová, anmar-dadgan-Abraham-e-Bab-Dummad, Isaac-e-Bab-Dummad, Israel-e-Bab-Dummad: Bitigi be, be-dulamar-weyob-binsaed, degi, weyob-ibmar-imakedi, mer osulogena gadin. Deginbali, be-dulamar bela-bela bebina-soged, mer bergubalina gadin.
1CH 29:19 Deyopira, be an-machi-Salomónʼgala, gwage-nued be uksamogana gadin, adi, Be-Igar-Mamaidba nanaega, degi, Be-Igar-Mesismaladba nanabaligar. Deginbali, an bese egisbalid, bitigi an-machi-Salomón, an-ibmarmar-onmaksadgi, bese-goled-neg-sobed-obelogega be imaksabalina gadin.”
1CH 29:20 Degine, geb David bela-dulemar-bukwadga sogded: “Be-dadgan-e-Bab-Dummad-Jehová-e-nug be odummomarsun.” Degidgi, bela-dulemar-bukwad, e-dadgan-e-Bab-Dummad-Jehová-e-nug odummosmalad. Agine, Bab-Jehová-asabin, degi, rey-asabin napase dulluu imaksamalad.
1CH 29:21 Neg-oibosadgine, Israel-dulemar-nuggine, Bab-Jehováʼga we-ibmar-durgan oburgwismalad, degi, ega ogumakar uksamarbalid: Moli-bebe-nikad-machergan, miligwen (1,000), sibad-wawaad-machergan, miligwen (1,000), sibad-wawaad-sapingana, miligwen (1,000), degi, vinoʼse-bakar, Bab-Jehováʼga uksamalad. Deyob, Israel-dulemar-ular ibmar-bukidar Bab-Jehováʼga uksamalad.
1CH 29:22 A-ibagine, Israel-dulemar, Salomón-e-nonogine olivo-gwallu eosmalad, adi, Salomón David-sorba reyga megegar. Deyob Sadocʼgi olivo-gwallu eosmarbalid, dule-irwa-Bab-Dummadse-goledga onug-imakmalagar. Israel-dulemala, wese-ilabogus deyob Salomón-imakdanimalad, adi, oyogega reyga gunoniye. Degidbali, bela weligwaledba Bab-Jehová-asabin gobsamalad, degi, mas-guchamarbalid.
1CH 29:23 Degine, Salomón, e-bab-David-sorba Bab-Jehová-gangi reyga signonisunnad. Degidgine, Salomón bela-bela nasgusad. Israel-dulemar belagwable Salomón-sogedba bela ibmar-imakbukwa gusmalad.
1CH 29:24 Bela dule-dummagan, dule-gandikmalad, degi, Rey-David-e-masmala, Salomón-reyga-megisad yeerdaksamalad, eba nanadii gusmalad.
1CH 29:25 Degi, Bab-Jehová, Israel-dulemar-asabin bela-bela Salomón-e-nug odummosad, e-yar-semaid bela-bela ogannosbalid. Salomón-iduale, rey-baid Salomónʼyobid gandikidba-yeerdaklege Israel-yargi yar-semai gussulid.
1CH 29:26 Isaí-machi-David, bela-Israel-dulemarga yar-semai-gusad.
1CH 29:27 Israel-yargi bela birga-dulabo (40) yar-sesad. Hebrón-neggweburgi birgagugle (7) yar-sesad, degi, Jerusalén-neggweburgi birga-dulagwen-gakambe-gakapaa (33) yar-sesad.
1CH 29:28 David nue-selebagusadgi burgwisad. Ibmar-nuegan-bukidar-nika, degi, nug-dummarba-nika burgwisad. Geb a-sorbali, e-machi-Salomón yar-seega megnonikid.
1CH 29:29 Bela-Rey-David-gebe-ibmar-imakded, degi, napi-ibmar-imaksadse, Bab-Dummad-negburgan-daked-Samuel neggusad-gardagi narmakar maid, degi, Bab-Dummad-gayaburba-barsoged-Natán neggusad-gardagi narmakar maibalid, degi, Bab-Dummadgi-negburgan-daked-Gad neggusad-gardagi narmakar maibalid.
1CH 29:30 Bela Rey-David-e-negsesad, e-gangu-megisad, e-gudigusad, degi, Israel-dulemargi-ibmar-gusmalad, bela yar-baigangi neg-gusmarbalidi, we-gardamargi narmakar nanaid.
2CH 1:1 David-machi-Rey-Salomón na e-yar-semaidi bela-bela ogangusad. Ar ade, Bab-Dummad-Jehová, Salomónʼba gudiguad. A-ulale, Bab-Jehová bela-bela Salomón-ganguega imaksad.
2CH 1:2 Salomón, bela Israel-dulemarse gochad: Sorda-milibalid-e-dummaganse (1,000), sorda-dulataled-e-dummaganse (100), igar-nabomalad-e-dummaganse, belagwable Israel-e-dummaganse, degi, neguya-idudimaladse, bela gochabalid.
2CH 1:3 Geb Salomón, degi, bela-dulemar-bukwad, Gabaón-neggweburse, Bab-Dummad-dulemarbo-ambikued-neg-siidse nadmalad. Ar ade, agi, Bab-Jehová-e-mai-Moisés, nega-dulesulidganba a-ambikued-neg-sobsad-gusadi siid.
2CH 1:4 Bab-Dummad-Igar-Mesisad-Uludina, epenne Quiriat-Jearimʼye-neg-nugadgi-sii gusad. Ar David, Uluga dordoneg-sobsasoggu, David, Jerusalénʼse we-Ulu, sear gusad.
2CH 1:5 Bab-Dummadga-ibmar-ogumakar-ukleged-ailadi Gabaónʼgi Bab-Jehováʼse-goled-neg-sunna-seleged-asabin siid. A-aila, Uri-machi-Bezaleel esgoro-gordikidgi sobsa gusad. Uriʼdi, Hur-e-machid. A-aila-siidse, Salomón, degi, dulemar-eba-gudimarmogad, Bab-Dummadse gollap gusmalad.
2CH 1:6 Salomón, Bab-Jehováʼse Bab-Dummad-dulemarbo-ambikued-negse naded. Geb ibmar-ogumakar-ukleged-aila esgoro-gordikidbi-sobaledgi, ibmar-durgan miligwen (1,000) ogumakar Bab-Jehováʼga uksad.
2CH 1:7 A-mutikidba, Bab-Dummad Salomónʼse magarononigu, ega sogded: —Salomón, ibu be anse egisbie, be-itolegedba be anse egise. An bega ukoed.
2CH 1:8 Salomón Bab-Dummad-abin sogded: —Be an-bab-David, be nue-wile daksad. A-ular, an-bab-anar yar-seega be an-imaknonikid.
2CH 1:9 Degisoggu, Bab-Dummad-Jehováʼye, emisgi, dula-bukidar-geg-ebisleged-e-reyga be an-nug-imaksasoggu, an-bab-Davidʼga be-ibmar-sogsadyob be imaksundo.
2CH 1:10 Bab-Jehováʼye, ¿ar doa, dulemar-bukidar-nabir-seega guosunna? Dule sated. Degisoggu, nue-binsaed-nikaa be an-imakdo, ibmar-wisgued be anga ukbardo, adi, an nabir be-dulamar-bukidarad seegar.
2CH 1:11 Geb Bab-Dummad Salomón-abin sogded: —Be we-ibmar-abegedi, ibnuedid. Ibmar-nuegan-nikued be anse egichasulid, mani-ibedga-gued be anse egichasulid, degi, nug-dummad-gued be anse egichasurbalid, be-isdarmalad-ogiloged be anse egichasurbalid, degi, iba-suitibaa-maiguedi be anse egichasurbalid. ”Emisgindi, anga yar-seega an be-onug-imaksadgine, nue-binsaed-nikagued be anse egichisad, degi, nue ibmar-wisgued be anse egichisbalid, adi, nabir an-dulamar-idumai be guegar.
2CH 1:12 Degisoggu, a-ular, nue-binsaed-ibedga-guega an be-imakodo, degi, nue-ibmar-wisiguega an be-imakbalodo. Deginbali, mani-ibedga-guega an be-imakbaloed, or-ibedga-guega an be-imakbaloed, ibmar-bukidar an bega ukbaloed, degi, nug-dummarba-guega an be-imakbaloed. Be-idu reymar-megismalad, weyobi ibmar nikussurmalad. Be-sorba reymar-megmarbaloed, weyobi ibmar nikuosurmarbalid.”
2CH 1:13 Degi, Salomón, Gabaónʼgi Bab-Dummadse-goled-neg-aila-matusulid-siidgi-gudii, gannar Jerusalén-neggweburse alid. Degi, geb Israel-yar-semai guarsunnad.
2CH 1:14 Salomón, bila-onoged-urmar-napagined, degi, molimar nikunonikid. Bila-onoged-ur-napagined miligwen gaka dulataled-ilabake (1,400) nikusad, degi, moli miliambe-gakabo (12,000) nikusbalid. Geb neggweburmargi we-urmar, degi, we-molimar urbisad, degi, Jerusalénʼgi reyneg-walik urbisbalid.
2CH 1:15 Rey-Salomón, Jerusalén-neggwebur akwa-bukidar-nikadyobi or-bukidar-nikuega imaksad, degi, mani-bukidar-nikuega Jerusalén-imaksabalid. Deginbali, Rey-Salomón, higuera-sapimar-bukidar yar-mulluganba-nikadyobi, Jerusalén-neggwebur urwar-bukidar-nikuega imaksabalid.
2CH 1:16 Rey-Salomónʼga-ibmar-bakmalad, Egipto-yarse, degi, Cilicia-yarse Salomónʼga e-mani-gargeguedba molimar-baknaddamalad.
2CH 1:17 Dulemar Egiptoʼgi, ur-napagi-bila-onoged mani-sibugan-gwadulataled-ilanergwa (600) bakdamalad, degi, molidi mani-sibugan-gwadulagugle-gakambe (150) bakdamarbalid. Degi, geb belagwable Het-dule-e-reymar, degi, belagwable Siria-e-reymar, Salomónʼga-arbamaladse molimar bakdamalad.
2CH 2:1 Rey-Salomón, Bab-Jehováʼga Babse-goled-neg-sobye binsaalid, degi, e-reyneg-sobedgi binsaarbalid.
2CH 2:2 Degi, Rey-Salomón ibmar-imakmalad nugsasad: Dule-ibmar-semalad, mili-dulapaa-gakambe (70,000) nug-imaksad. Yalaganba dule-akwa-sikmalad, mili-dulabake (80,000) nug-imaksad, Arbamalad-e-dakmalad, milipaa gaka dulataled-ilanergwa (3,600) nug-imaksabalid.
2CH 2:3 Geb degi, Salomón Tiro-neggwebur-e-rey-Hiramʼga gayaburba barmisad: “An-bab-David e-reyneg-sobnaigua, igi ega be urwar-urgomar barmimai-gusa, deyobi, be anga imakmogana gadin.
2CH 2:4 Emide, an-Bab-Dummad-Jehováʼga, e-nug-odummogega, ese-goled-neg an ega sobesokalid. We-negde an Bab-Jehováʼga nug-imakoed. Adi, an Bab-Jehováʼgarbi e-asabin inamar-wawadikid ogumakdii guega, degi, bane-bane madu-swilidikid-urbedii guega an imakoed. Deginbali, agi an wakudaradbali, degi, sedogidbali ibmar-durgan ogumakar Bab-Dummadga-ukega an imakbaloed. Amba deyobbardo: Itoged-iba-irba, degi, nii-gebe-gwisgusar imaklebaloed. Deginbali, anmar-Bab-Dummad-Jehová-nug-odummoleged-e-ibagangi deyobi imaklebaloed. Degiibi igar-mai Israel-dulemar degisadegu imakdii guoed.
2CH 2:5 ”Ar anmar-Bab-Dummad, bab-dummad-baiganba bur bule dule-dummad-maisoggu, an ega neg bela-bela bur-yeerdakle an sobergebmogad.
2CH 2:6 Degi-inigwele, nibnegbela amba Bab-Dummadga unniguarsulid. Degite, we-neg-bursunna ¿sunna unniguosi? Geg unnigued. ¿Ar ande doasunna, ega we-neg-nued sobega? Andi an ega we-neg sobewilubsulinad. Degi-inigwele, Bab-Jehová-nug-odummogega, an neg soboed, adi, agi ega ina-wawagan-ogumakegar.
2CH 2:7 Degisoggu, dule-wargwen-ibmar-wisid an abeged: Dule-nabir-orgi-arbaed, nabir-manigi-arbaed, nabir-esgoro-gordikidgi-arbaed, nabir-esgorogi-arbaed, a-dule be anga barmidago. ”Degine, we-dule-ibmar-wisid nirba-suir-akwagiid, nirba-ginnid, nirba-arad-nabir-imaked, an abeged. Deginbali, dule-ibmar-sobar-sobar-nasiked-wisid an abeged. Ar a-dule-amilegoedi, an-bab-Davidʼga-epenne-arbasmaladbogwa-arbanai an abeged. Amar Judá-yargi, degi, Jerusalénʼgi arbamaloed.
2CH 2:8 ”Deginbali, Líbano-e-urgomar anga barmidabalo: Urwar-urgomar, baryawar-urgomar, sapi-gupu-wargii-dakleged-urgomar-sándaloʼye-nugad barmidago. Ar an wisid, be-sordamar Líbano-urgomar-mamaredgi durdakaled. Degine, dule-anga-arbamalad be-sordamar-bendakmaloed.
2CH 2:9 Adi, amar anga urgo-bukidar mamarmalagar. Ar ade, an Bab-Dummadse-goled-neg-dummad, bela-bela yeerdakle an sobesokalid.
2CH 2:10 Be-sordagan-urgo-mamarmaloedga orosgi-dakleged-omukualed-trigoʼye-nugad, sagu-dummagan mili-durgwen (20,000) an ukoed. Degi, orosgisaar-daklemogad-cebadaʼye-nugad, sagu-dummagan mili-durgwen (20,000) an ukbaloed. Degine, vino, galón-mili-dulatar-gakambe-gakatar (115,000) an ukbaloed. Degine, ibmar-dibyed-gwallu, amba galón-mili-dulatar-gakambe-gakatar (115,000), an ukbaloed.”
2CH 2:11 Geb degine, Tiro-e-rey-Hiram, Rey-Salomónʼga gardagi e-gayaburba narmakar barmialid: “Bab-Jehová na e-dulemar-sabedbali Israel-yar-seega be-imaksad.”
2CH 2:12 Hiram wegii sogsibalid: “Israel-e-Bab-Dummad-Jehová-nug odummolesun. A-Bab-Dummad nibneg, degi, napneg obinnisad. Degine, Rey-Davidʼga machi-binsaed-ibed uksad. We-machide mag neg-itoged, mag ibmar-daked, nue-binsaed-nikad. We-machi Bab-Jehováʼse-goled-neg soboed, degine, ega reyneg sobbaloed.
2CH 2:13 ”Degisoggu, dule-wargwen-odurdakedsaila-bela-ibmar-wisid an bega barmido. We-dulede, Hiram-Abiʼye-nugad.
2CH 2:14 We-dule-e-nandi, Danʼginedid. E-babdi, Tiroʼginedid. Ar Hiram-Abiʼdi, bela ibmar-wisid: Or-sobed, mani-sobed, esgoro-gordikid-sobed, esgoromar-sobed wisbalid. Degi, akwagi nabir arbabalid, urgogi arbabalid. Deginbali, Hiram-Abi nirba-suir-akwagiid-imaked, nirba-arad-imaked, nirba-ginnid-imaked wisbalid, degi, nirba-linoʼye-nugad imakbalid. Deginbali, Hiram-Abi ibmar-e-itoleged galagwensuli-sobar-sobar-imaked wisbalid. ”We-dule, be-dulemar-ibmar-wismalad-abargi, degi, be-bab-an-dummad-Davidʼga-arbasmalad-abargi arbaoed.
2CH 2:15 ”Dummad, emisgi, anmar-bega-arbamaloedga we-ibmarmar be barmidage: Orosgi-dakleged-trigo, orosgisaar-dakleged-cebada, olivo-gwallu, degine, vino, be anga-sogsadyob be anmarga barmidado.
2CH 2:16 ”Anmar Líbano-yargi urgomar-abeleged mamarmaloed. Geb we-urgomar edinnar-edinnar-nanai, demargi-oselegar Jope-neggweburse an sedmaloed. Geb agi, Jerusalénʼse be urgomar sedmosunnoed.”
2CH 2:17 Salomón-e-bab-David dule-ainebarmalad-ebichisgusad-sorba, Salomónʼdi, dulemar-ainebarmalad-Israel-yargi-gudimalad bela ebichismogad. Belagwable, mili-dulagugle-gakambe-gakapaa gaka dulataled-ilanergwa-mergu (153,600) daklealid.
2CH 2:18 Rey-Salomón, a-dulemar mili-dulapaa-gakambe (70,000) ibmar-berbemalaga onug-imaksad. Degi, mili-dulabake (80,000) yar-mulluganba akwa-sikmaloed onug-imaksabalid. Deginbali, arbamalad-e-dakmalad sordamar-oarbaega, milipaa gaka dulataled-ilanergwa (3,600), onugsasbalid.
2CH 3:1 Salomón, Jerusalénʼgi, Moriahʼye-yar-nugadgi, Bab-Jehováʼse-goled-neg sobded. A-yargi Bab-Jehová e-bab-Davidʼse magaros gusad. We-negde David Bab-Jehováʼga-neg-sobega napaneg guakwa amis gusad. Jebuseo-dule-Ornánʼye-nugad a-ibmar-gwag-omukued-neggi Bab-Jehováʼse-goled-neg sobarmalad.
2CH 3:2 Rey-Salomón birgabake gaka nii-warbo gaka ibabogus yar-semaidgi, Bab-Dummadse-goled-neg-sobed onoded.
2CH 3:3 Salomón Bab-Jehováʼse-goled-neg-sobega, weyob neg-wilub-imaksad. Neg-uluba-neg-gaega, daliambe-gakatar-sugue (15) wilub-imaksad. E-matardungueddi, daliatar-sugue (5) wilub-imaksad.
2CH 3:4 Degi, Babse-goled-neg-e-ubeb, Babse-goled-neg-matardunguedbo emar dungued. Neg-ubeb daliatar (5) matardungued, degi, e-nibgueddi, daliatar (5) nikad. Geb Salomónʼdi, bela negyaba or-sunnadbi nasiksa gusad.
2CH 3:5 Degi, Babse-goled-negyaba baryawar-urgo-sunnabi ebo-matak-matak imaksa gusad. Geb a-baryawar-uki or-sunsogedbi nasiksabalid. A-birgi, ogobwargii dakleged, degi, esgoro-dubgi-dakleged or-sunsogedgi sobsabalid.
2CH 3:6 Bab-Jehováʼse-goled-neg, yeerdakle-imakega, olo-naidgi akwa-nuegan-dakar-dakar-gamalad, nasiksa nabalid. We-or-sunsogeddi neg-ogannogega Parvaimʼye-neg-nugadgi-or-nikad selenonikid.
2CH 3:7 Deginbali, bela or-sunnabi irdimar, neg-yawagak-doged, e-galu-dikar, e-yawagakmar, degi, bela negyaba, olobi nasiksa gusad. Degine, baliwitur-querubinʼye-nugad neg-dikar-birgi sobar-sobar imaksabalid.
2CH 3:8 Amba deyobi Salomón, Neg-Ise-Islidikid sobsabalid: E-suguedi, Babse-goled-neg-yaadunguedyobi, daliatar (5) sugued. E-matardunguedi, e-suguedbo emala, daliatar (5) nikamogad. Wemargi bela or-nuegan egi nasikles nanaed. Agi, or nibir-milidulabo-gakanergwa (46,000) bela ebulesad.
2CH 3:9 Esgoro-orbimalad-gagwen nibirgwen-gaka aidiku naed. Babse-goled-neggi neg-niba-siidgi or-sunnabi nasiksabalid.
2CH 3:10 Neg-Ise-Islidikidyaba, baliwitur-querubinʼye-nugad-walabo sakan-nika-nika urgogi sobsabalid. Geb baliwitur-birgi or nasiksabalid.
2CH 3:11 Baliwitur-querubin-e-sakanmar bela daliatar (5) sugued. Ar ade, baliwitur-sakan-gwensakgi daligwen gaka bisgigwen sugued, bela neg-dikarse warmaknaid. Geb sakan-baid daligwen gaka bisgigwen sugubalid, adi, baid-baliwitur-querubin-e-sakanse warmaknaimogad.
2CH 3:12 Baid-baliwitur-querubin-e-sakan amba daligwen gaka bisgigwen sugumogad. A-sakan-gwensak neg-dikarse warmaknaimogad. Geb e-sakan-baid, baliwitur-baid-e-sakanse warmaknaimogad.
2CH 3:13 We-baliwitur-querubinʼmar gwigwichi nanaed. E-sakan-nallabukwad belagwable daliatar (5) sugued, degi, yawagaksik bela atakbukwa nanaed.
2CH 3:14 Geb mor-dummad imaksabalid, nirba-aradgi, nirba-suir-akwagiidgi sobsabalid. Nirba-ginnidgi, nirba-linoʼye-nugadgi sobsabalid. Geb we-nirba-dub-akar-akar-daklegedba mor-dummadgi baliwitur-querubinʼmar oniar sobsad.
2CH 3:15 Rey-Salomón, buar dalibaabak (8) sugunanaed-walabo neg-asabin ogwichisad. Geb buarmar-birgi, e-nono daligwen-gaka-dungu sobsad.
2CH 3:16 Deginbali, esgoro-dubyob dubmar sobsabalid. Geb buar-e-nono-birgi nasiksa nabalid. Geb esgoro-dub-naidgi sapi-e-san-granadaʼye-nugad-dulatar (100) sobar-sobar nasiksabalid.
2CH 3:17 Babse-goled-neg-asabin buar-warbo ogwichisad. Gwensak argan-nuedsik, baiddi argan-sapiledsik ogwichisad. Salomón, buar-argan-nuedsikidi Jaquínʼye nug-imaksad. Buar-baid sapiledsik-gwichidi Boazʼye nug-imaksabalid.
2CH 4:1 Salomón ibmar-ogumakar-ukleged-aila esgoro-gordikidbi sobsabalid. E-suguedi, daliatar (5) sugued. E-matardungueddi, daliatar (5) madardungubalid. E-nibgueddi, dalibo-gaka-negabar nibgued.
2CH 4:2 Dii-siged-dummad, esgoro-gordikid-sunnabi orokwaa sobsabalid. E-yaadungued, dalibo-gaka-negabar (2½) yaadungued. E-nibguedi, daligwen-gaka-bisgise (1¼) nibgued. E-gakuli-ebiraledi, daligugle-gaka-negabar (7½) ebiraled.
2CH 4:3 Dii-siged-dummad-e-gakuli-urba, moli-bebe-nikad-machergan ilabo-ebiris sobar-sobar-nasiklesad, bisgigwen-bisgigwensakgi-bangue warambe-warambe (10-10) nasikles naed. Dii-siged-dummad esgoro-gordikid-diregwadgi-soblenaigu, yog-eba-soblegar gusad.
2CH 4:4 Dii-siged-dummad, moli-bebe-nika-machergan-warambe-gakabogwad-birgi (12) sobar-siid. Moli-warbaa, dad-nakwed-argan-sapiledsik atakgwichid, warbaa, dad-argwanedsik atakgwisbalid, warbaa, dad-nakwed-argan-nuedsik atakgwisbalid, warbaa, dad-nakwedsik atakgwisbalid. We-molimar-warambe-gakabogwad-birgi (12) dii-siged-dummad siid. Moli e-nagmar-sorsikid dii-siged-urba dogar nanaid.
2CH 4:5 Dii-siged-dummad argan-goo-walabake-wilub songued. E-gakuligi dutu-lirio sobaled, nog-dummadyobi sobaled. Dii-siged-dummadgi, galón-miliambe-gakagugle gaka dulataled-ilatar (17,500) dii siged.
2CH 4:6 Rey-Salomón dii-simalad-senigana gwaambe (10) sobsabalid. Dad-nakwed-nuedsik gwaatar urbisad, geb sapiledsik gwaatar urbisbalid. Adi, ibmar-dula-oburgwilesale, we-diimargi ibmar-ebulemalad enuklegegar. Dii-siged-dummaddina, dule-irwa-Bab-Dummadse-gormalad e-argan-enukega siid.
2CH 4:7 Salomón gwallu-simalad-orbiid warambe (10) ega-igar-maidba sobsabalid. Geb Bab-Dummadse-goled-negyaba e-galu-naba urbisad. Argan-nuedsik walatar urbisad, argan-sapiledsik walatar urbisbalid.
2CH 4:8 Degidgi, mese gwaambe (10) sobsabalid. Geb Bab-Dummadse-goled-negyaba e-galu-naba gwaatar argan-nuedsik urbisad, geb gwaatar argan-sapiledsik urbisbalid. Deginbali, or-nog-abe-mimalad dulatale (100) sobsabalid.
2CH 4:9 Salomón dule-irwa-Bab-Dummadse-gormaladga neg-imba sobsabalid, degi, neg-imba-dummad sobsabalid, degi, e-yawagak guar-guar sobsabalid. Geb neg-yawagak-uki esgoro-gordikid nasiksabalid.
2CH 4:10 Degine, dii-siged-dummadi Babse-goled-neg-dad-nakwed-argan-nuedsik, Bab-neg-dikargi argan-nuedsik sisad.
2CH 4:11 Salomón bormomar sobsabalid, degi, buru-wemalad sobsabalid, degi, abe-mied-nog sobsabalid. Rey-Salomón igi Hiramʼga Bab-Dummadse-goled-neg soboye sogsa, deyopira, Hiram bela Bab-Dummadga-neg-sobnaid, ogusad.
2CH 4:12 We-neg-soblesad, weyob soblesad: Buarmar-walabo soblesad. We-buarmar-e-nonomar dirbir soblesbalid. Degi, esgoro-gordikid-mor-saki-sakid matabo imaksabalid, buar-warbogwad-e-nonogi nasikegar.
2CH 4:13 Esgoro-gordikid-mor-saki-sakid-matabogwadgi, guseb-dummadgi-dakleged ile-sogabo dulataled-ilabake (400) egi nanaid. A-matabogwad buar-nonomar-dirbiled-ebilis nanaid.
2CH 4:14 Geb ibmar-ebulemalad-enuked, degi, ibmar-ebulemalad-enuked-e-siged soblesbalid.
2CH 4:15 Dii-sied-dummad soblesbalid, molimar-bebe-nikad-machergan warambe-gakabo (12) dii-sied-dummad-bargaega sobar urbisbalid.
2CH 4:16 A-uki, bormomar soblesbalid, degi, buru-wemalad soblesbalid, degi, wesar-ikomar-dummagan soblesbalid. We-ibmar-ebulemalad bela Hiram-Abi Bab-Jehováʼse-goled-negga Rey-Salomónʼga esgoro-gordikid-dakar-gaedgi sobsad.
2CH 4:17 Hiram-Abi, Rey-Salomónʼga-bela-ibmar-sobsadi, Jordán-neba-ukub-naidgi soogi dusad. A-neg-ukub-naidi, neggwebur-Sucot, degi, Seredata-ebo abingunaidgi naid.
2CH 4:18 Salomón belagwable we-ibmar-ebulemalad ichesur-imaksasoggu, esgoro-gordikid-aidikuedi wisgussulid.
2CH 4:19 Deginbali, Salomón ibmar-ebulemalad-baigan Bab-Dummadse-goled-negga-soblesbalid, weyob sobsabalid: Ina-wawadik-ogumakar-ukleged-aila, bela orbi sobsad. Degi, mesemar, madu-Bab-Dummadga-mesmalad bela orbi sobsabalid.
2CH 4:20 Degi, gwallu-gaed-simalad, degi, gwallumar bela or-sunnabi sobsabalid. Adi, igar-soglesadba, Neg-Ise-Islidikid-asabin ogaegar.
2CH 4:21 Dutumar-soblesadi, gwallumar-soblesbalidi, degi, maskemar-soblesadi, bela amba or-sunnabi sobles nanabalid.
2CH 4:22 Amba dislamar-gwallu-gwillodub-siked soblesbalid, abe-mied-nogmar soblesbalid, wesarmar, degi, sianarmar soblesbalid. We-ibmarmar, bela amba or-sunnabi soblesad. Deginbali, Bab-Dummadse-goled-neg-doged, ber or-sunnabi soblesbalid: Neg-Ise-Islidikidgi-doged-e-yawagakmar, bela or-sunnabi sobles nanabalid. Degi, Bab-Dummadse-goled-negga-gusiid-e-yawagakmar, bela or-sunnabi sobarbalid.
2CH 5:1 Salomón, Bab-Jehováʼse-goled-neg-sobsad-bergusgua, e-bab-David Bab-Dummadga-ibmar-ebulemalad-nug-imaksa-gusad, bela Bab-Dummadse-goled-neggi ibmar-gargermalad-urbilegedse urbiapid. A-ibmar-ebumaladde, orbi sobar nanaed, degi, manibi sobar nanabalid.
2CH 5:2 Degidgine, Salomón Jerusalénʼgi-onmakmalaga, bela Israel-girmar-dummaganse, Israel-wagan-e-dummaganse, degi, Israel-neguya-idudimaladse gochad. Adi, Bab-Jehová-Dadganbo-Igar-Mesisad-Ulu David-neggwebur-Siónʼgi-siid-akar, Babse-goled-negse sedegar.
2CH 5:3 Geb degi, nii-walagugledgi (7) iba-dummad-islidikid-onogedgi Israel-dulemar belagwable Rey-Salomónʼse ambikunonimalad.
2CH 5:4 Israel-girmar-dummagan belagwable nonimargu, dule-irwa-Bab-Dummadse-gormalad, degi, Levitaʼmar Bab-Dummad-Dadganbo-Igar-Mesisad-Ulu sesmalad.
2CH 5:5 Degine, Bab-Dummadse-goled-neg-sunna-seleged, degi, ibmar-ebulemalad-islidikmalad, bela Bab-Dummadga-nuggusad sesmarbalid.
2CH 5:6 Rey-Salomón, degi, bela Israel-dulemarmala, Bab-Dummad-Ulu-asabin bukwa gusmalad. Agine, sibad-wawaad, degi, moli-bebe-nikamalad ogumakar Bab-Dummadga uksamalad. Ar a-ibdulamar ichesursoggu, geg ebisle gusad.
2CH 5:7 Dule-irwa-Bab-Dummadse-gormalad, Bab-Jehová-Igar-Mesisad-Ulu, Bab-Dummadse-goled-negyaba sesmargu, Neg-Ise-Islidikidyaba odosmalad. Geb baliwitur-querubinʼye-nugad-e-sakan-urba sismalad.
2CH 5:8 Baliwitur-querubinʼye-nugad-e-sakanmar Bab-Jehová-Ulu-birgi nalla-nalla bukwad. Degisoggu, Bab-Jehová-Igar-Mesisad-Ulu, degi, e-suarmar-dikarba-mamaidse-bakar, bela baliwitur-e-sakanmar-nalla-bukwad oatonaid.
2CH 5:9 Degi, Bab-Jehová-Ulu-e-suarmar suigansoggu, e-dukumar Neg-Islidikidgi daled-nomamai, degi-inigwele, neg-magabardi akudakleged. Deyobi, we-garda-narmaklenaidse siid.
2CH 5:10 Bab-Jehová-Uluyaba, unnila akwa-matabo maid. We-akwa-matabogwadgi Bab-Jehová Israel-dulemar Egiptoʼgi-onosgu, Israel-Dulemarbo-Igar-Mesisad. A-igala, a-akwagi narmakar maid. Moisés a-akwa Horeb-yargi Bab-Jehová-Uluyaba mesisad.
2CH 5:11 Dule-irwa-Bab-Dummadse-gormalad Neg-Islidikidgi-bukwadgi bela ainismalad. Wemar na e-arbaedginsur-inigwele, belagwable gwage-swilidik na imaksamalad.
2CH 5:12 Levita-dule-namakmalad: Asaf, Hemán, Jedutún. We-e-masmala, degi, e-gwenadganmala, ibmar-ogumakar-ukleged-aila-dad-nakwedsik bukwamalad. Amarde: Mor-sibu-nued-linoʼye-nugad yoyoid. Geb gar-esnon-madareged-címbaloʼye-nugad, degi, gar-salterioʼye-nugad, degi, gar-arpaʼye-nugad ogorbukwamalad. A-dulemarbo, dule-irwa-Bab-Dummadse-gormalad dulanergwa (120) gar-trompeta ogorbukmarmogad.
2CH 5:13 Wemar gar-trompeta-suid darekwaa ogotedamalad, darekwaa namakdedamarbalid. Geb Bab-Jehová-nug odummoddamalad, Bab-Jehováʼga dog-nuedye sogdedamarbalid. Degi, emar gar-trompeta-suidba namakbukdamalad. Esnon-madareged-gar-címbaloʼba namakbukwadamarbalid. Deginbali, gar-baiganba Bab-Jehová-nug-odummobukmaladgi, sogdedamalad: “Bab-Jehová, dule-nuedid, e-sabguedi degisadeguad.” Degi, geb Bab-Jehováʼse-goled-neg bela mogir dasasigisad.
2CH 5:14 Degi, dule-irwa-Bab-Dummadse-gormalad, mogirdasa Bab-Jehováʼse-goled-neggi-sigisadbali, geg Bab-Dummadse bar-gole guarmalad. Ar ade, Bab-Jehová-e-gangued-yeerdakleged bela neg-gasa sigisad.
2CH 6:1 Degidgi Salomón sogded: “Bab-Jehová na be sogsad, mogir-guduregedgi be maiguoye.
2CH 6:2 Emigindi, an bega neg sobsad, adi, be agi maigu sadeguegar.”
2CH 6:3 Geb degi, Rey-Salomón sorsik aibilided, adi, bela Israel-dulemar-gwigwichimaladgi nued-binsaegar.
2CH 6:4 Geb Salomón sogded: “Israel-e-Bab-Dummad-Jehová an-bab-Davidʼga ibmar-imakoye-sogsadi, emidi imaknonikid. Degisoggu, Bab-Jehová-e-nug odummolesun. Deunni, Bab-Jehová an-babga sogsa gusad:
2CH 6:5 ‘An Egiptoʼgi an-dulamar-onosad-akale, Israel-wagan-e-neggwebur-gwagwensaale, an-nug-odummogega, anse-goled-neg-sobega, an sussulid. Deginbali, dule-wargwensaale Israel-dulemar-e-dummadga-guega an sussurbalid.
2CH 6:6 Degi-inigwele, emi, an Jerusalén-neggwebur susad, adi, agi an megegar. Deginbali, an-Israel-dulamar-seega, an David nug-imaknonibalid.’
2CH 6:7 ”An-bab-David, Israel-e-Bab-Dummad-Jehová-nug-ogannogega, Bab-Dummadse-goled-neg soboye binsasando.
2CH 6:8 Degi-inigwele, Bab-Jehová an-bab-Davidʼga sogsagusad: ‘Be gwagegi nued be binsasando, anga anse-goled-neg soboye.’
2CH 6:9 Degi-inigwele, bee be-anse-goled-neg gwen sobosulid. Be-machi-gwensak-bega-uklegoedi, a-dule, an-nug-odummogega anga neg-soboed.
2CH 6:10 ”Emidi, Bab-Jehová e-igar-mesisadba imaknonikid: Ani an Israel-e-reyga megnonikid, an-bab-David-anar an rey-gangi signonikid. Deginbali, Israel-e-Bab-Dummad-Jehová-e-nug odummogega ese-goled-neg an sobsabalid. Igi Bab-Jehová sogsa, deyob bela gunonikid.
2CH 6:11 Deginbali, Bab-Jehová-Ulu, Babse-goled-neggi an osisbalid. A-Ulugine, Bab-Jehová-Israel-Dulemarbo-Igar-Mesisadi maid.”
2CH 6:12 Geb Salomón, Bab-Jehováʼga ibmar-ogumakar-ukleged-aila-asabin gwisgudapid. Degi, geb bela Israel-dulemar-bukwad-abargi Bab-Jehováʼse golega e-argan onakwided.
2CH 6:13 Salomón neg-imba-ollor-dummad-naidgi nibakwaa-gwisguega aila-esgoro-gordikidbi sobsad. Aila-suguedi, degi, e-matardunguedi emarbi daligwen-bisgise sobsad, degi, e-nibgueddi bisgipaa nibgue sobsad. Salomón a-aila-birgi-gwichi, Israel-dulemar-bukwad-asabin yokorgi-sindigar sigisad. Geb niba argan onakwided. Weyob Bab-Jehováʼse gote, sogded:
2CH 6:14 “Israel-e-Bab-Dummad-Jehováʼye, bab-dummad beyobid nibneggi, degi, napneggi sated. Dulemarbo be Igar mesisale, geg be iedaed, degi, dule-beba-gwagegi-binsadimalad be nue-sabesaila maid.
2CH 6:15 Bab-Dummadye, an-bab-Davidʼga be ibmar-imakoye ise-sogar be sogsagusadi, emisgi, be imaknonikid. Be-ganguedba be imaksad.”
2CH 6:16 Rey-Salomón, Bab-Jehováʼse gotebalid: “Israel-e-Bab-Dummad-Jehováʼye, emisgi, be-mai-an-bab-Davidʼga, be ibmar-imakoye sogsagusadi, be imake. Deunni, ega be sogsagusad: ‘Ar be an-asabin nued-nanadii-gusmogadyob be-wagan nuegan damalale, degi, an-igar-maidba nanamarbalile, be-wagan Israelʼgine e-reyga maigu guoed, gwen surguosulid.’
2CH 6:17 ”Israel-e-Bab-Dummad-Jehováʼye, emisgi, be-mai-Davidʼga be igar-mesisadi, deyopira be imake.
2CH 6:18 ”Bab-Dummadye, ¿be we-napneggi, be-dulamar-abargi nue-napira be megode? Sulirgebed. Ar be-nibnegbela dummad-inigwele, amba bega unnigusulid. Degite, we-bese-goled-neg-an-bega-sobsad-bursunna, sunna unniguosi.
2CH 6:19 Degi-inigwele, Bab-Jehová, an-bese-goled be itoge, an bese-wilenaid be itoge. Bab-Jehováʼye, bee be, an-Bab-Dummadid. Andina be-maiga gued. Be-asabin an sabsuli wilesakwaa-bese-goled, be nue an-itoge.
2CH 6:20 Bese-goled-neg-siidgi, nue nakulemai mutikidba, degi, ibginedba be imake, ar ade, we-neggi be megoye sogsad. Bese-goled-negsik-ataksii an bese-gollalile, be wis an-itogo.
2CH 6:21 Deyobi, we-bese-goled-negsiki an wilesagwa-bese-gollalile, degi, Israel-dulemar-bese-gollalile, Bab-Dummad-Jehováʼye be wis an-itogo. Be nibneggi-mai, be anmar-itogo, degi, anmarga isgued be elio.
2CH 6:22 ”Dule-gwensak dule-baidgi gwatirisale, we-bese-goled-neggi ibmar-ogumakar-ukleged-aila-asabin ise-sogar imaksale,
2CH 6:23 nibneg-akale be itogoed. Geb dakedba na be imakoed, degi, igar-innikigwadba be-maimarga be imakoed. Dule-nodiid be sabsur-odurdakoed, e-isguedgi na dukin odurdaklegoed. Dule-isgudisuliddi na-ibmar-imakdiidba egi be-sogo, we-dulede gwen isgussurye.
2CH 6:24 ”Be-Israel-dulamar, begi-nodiidba e-isdarmaladse galakusale, degi, be-nug-ogannogega, gannar bese aibilisbalile, bese-goled-neggi bese wilesagwa gollalile,
2CH 6:25 nibneg-akar be itogoed. Agi, be-Israel-dulemarga e-isgued be elioed. Geb e-yar-ega-uklesadse, degi, e-dadganga-uklesmogadse gannar be sedagoed.
2CH 6:26 ”Bab-Jehováʼye, Israel-dulemar-begi-nosadba be neg-yola-dummad-nasikoed, dii bar owiosulid. Geb odurdaklesad-sorba Israel-dulemar we-bese-goled-negsik gannar bese gornonikile, degi, be-nug gannar obarnonikile, degi, e-isgusadgi bukib itononikile,
2CH 6:27 nibneggi-mai be itogoed. Be-maimar-Israel-dorganga isgued be elioed. Geb be igar-nuedba-nanaedgi Israel-dulemar be odurdakoed. Geb be Israel-dulemarga yar-ega-uklesadgi be dii owisunnoed.
2CH 6:28 ”Bab-Jehováʼye, Israel-yargi ukud-dummad nagunonikile, igi, bonigan nagunonibalile, igi, neg-uedba gagan dingudele, igi, ses-dummagan, igi, ses-burwigan ibmar-digaled ogilodbalile, agi, anmar bese gotele, be anmar-itogo. ”Deginbali, anmar-isdarmalad anmar-neggwebur-ebilis ambikunonikile, anmargi gwichigu-nonikile, degi, ibu-boni-dummagan-baid danibalile, uellegeddibe, Bab-Jehováʼye, anmar-bese-gotele, be anmar-itogoed
2CH 6:29 ”Bab-Jehováʼye, Israel-dule-gwensak bese gollardibe, igi, bela-Israel-dulemar bese gollardibe, doa-dule e-isgued magar itogele, ulubgi e-nunmaked magar itobalile, degi, na wile-itogedgi bese we-neggi golele, Bab-Jehováʼye be itogoed.
2CH 6:30 ”Nibneg-akale be itogoed, degi, geb e-isgued ega be elioed. Ar bebi-unnila dulemar-binsaed be wissoggu, be ibmar-wisidba, dule-e-damaladba be dule-odurdakoed.
2CH 6:31 Adi, anmar be-dobgumalagar, degi, be-igar-maidba anmar-dadganga-be-yar-uksadgi an gudii gumalagar.
2CH 6:32 ”A-ukinbali, dule-ainebarmalad, Israel-dulesurmalad, be-nug-dummarba-maid wisgusadba, degi, be-gangued-dummarba-maid-wisgusadba dikasur danimalale, degi, be e-bendakoedba we-negsik bese gordanikile,
2CH 6:33 Bab-Dummadye, nibneg-akale bese-goled be itogoed. Dule-ainebalid bela bese ibmar-egisele, ega be imakoed, adi, we-napneggi-dulemar-bukwad bela be-wisguega, degi, igi be-Israel-dulamar be-dobee nanabukwa, dule-baigan deyob be-dobee nanamarmogoed. Degi, bese-goled-neg an bega sobsadgi, besebi-gorlegoye igar-maidi magar-itomarbaloed.
2CH 6:34 ”Be-dulamar, be-sogedba e-isdarmaladgi bila-onogega nadele, agine we-neggwebur-be-susadsik-atakbukwa, degi, bese-goled-neg-an-bega-sobsadsik-atakbukwa bese gollarmalale,
2CH 6:35 nibneg-akale be itogoed. Degi, amar-bendakegar be wemar-ular gwisgubaloed.
2CH 6:36 ”Ar be-dulamar begi-nosmalale, ar ade dule geg begi nosurye-soglesulid bela begi noedbimalad. Begi-isgusadba be sae anmar-dakdele, anmar-isdarmaladga be anmar-urmakdele, adi, anmar-isdarmalad neggwebur-baidsik dikasuli, igi, itakagwadsedibe anmar-sedmaloed.
2CH 6:37 Bab-Dummadye, be-dulamar e-isdarmaladse galesad-yargi, e-isgusadga bukib-itogedba, bese wilesagwa gotemalale, sogdemalale: ‘Anmar magar-itoye, anmarde begi nosad, anmar ibmar-isgana-imaksad magar-itoye.’
2CH 6:38 ”Be-dulamar gales-siid-yargi, bela-belad gwage-ulubgine beba nagusmalale, degi, e-babganga-be-yar-uksadsik, bese golele, degi, be neggwebur-susadsik bese golele, degine, an bega bese-goled-neg-sobsadsik atakbukwa bese gormalale,
2CH 6:39 amar-bese-goledi, degi, bese-wilesagwa-goledi, nibneg-akale be itogoed, degi, be bendakoed. Be-dulamar-begi-nosad, e-isgued ega be elioed.
2CH 6:40 ”Emisgi, Bab-Dummadye, bese wilesakwaa an egised, we-bese-golleged-neg-akar anmar bese gotele, nue be anmar-itogo.
2CH 6:41 Bab-Dummad-Jehováʼye, bee, be-Ulu-gandikidbo, be-obunnoged-negse, be obunnodage. Bab-Dummad-Jehováʼye, dule-irwa-bese-gormalad be-abonoleged-igargi sunmakdii gumalana gadin, degi, be-sorda-swilidikmalad be-sabguedgi wergumalana gadin.
2CH 6:42 Bab-Dummad-Jehováʼye, dule-reyga-nug-imaklegaled melle be obano. Bab-Jehováʼye, be-mai-David be sabesaila imakdii gusad, be ebinsao.”
2CH 7:1 Salomón Bab-Dummadse-gorsiid bergusgua, soo nibneg-akar aidenonikid, geb a-soo Bab-Jehováʼga ibmar-ogumakar-ukleged, degi, ibmar-baigan-ukleged bela obelosad. Degi, geb Bab-Jehová-e-gangued-yeerdakleged, Babse-goled-neggi daasa sigisad.
2CH 7:2 Ar Bab-Jehová-e-gangued-yeerdakleged bela e-neggi daasa-sigissoggu, dule-irwa-Bab-Dummadse-gormalad, geg Bab-Jehováʼse-goled-negse doge gusmalad.
2CH 7:3 Degidgi, bela Israel-dulemar, soo neggi-aidenoni daksamargua, degi, Bab-Jehová-e-gangued-yeerdakleged neg-birgi-aidenoni daksamarbargua, bela asabin wagar napa-ebulegedse dulluu imaksamalad. Geb Bab-Jehová-nug odummodmalad, dog-nuedgi sogdemalad: “Bab-Jehová, dule-nuedid, e-sabguedi degisadeguad.”
2CH 7:4 Geb degine, rey, degi, bela dulemar, ibmar ogumakar Bab-Jehováʼga uksamalad.
2CH 7:5 Rey-Salomón Bab-Dummadga moli-bebe-nikad, mili-dulagwen-gakabo (22,000) uksad, degi, sibad-wawaad, mili-dulanergwa (120,000) uksabalid. Deyob rey, degi, bela dulemar Bab-Dummadse-goled-neg ega nug-imaksad.
2CH 7:6 Dule-irwa-Bab-Dummadse-gormalad gusgu e-ambikudamaladgi bukmalad. Levita-dulemardina, Rey-David Bab-Jehová-nug-odummogega garmar-ogorleged-sobsagusadi ogotemalad. Degine, we-namakedgi namakbukmalad: “Bab-Jehová-e-sabguedi, degisadeguad.” Degi, geb Levita-dulemar-asabin, dule-irwa-Bab-Dummadse-gormaladdi, gar-trompeta ogotedamalad. Degine, bela Israel-dulemardi gwigwichimalad.
2CH 7:7 Dakargu, ar ibmar-dula-ogumakar-ukleged, dule Bab-Dummadga e-binsaedba-ibmar-ukleged, degi, ibmar-gwallumar-Bab-Jehováʼga-ukleged ichesursoggu, ibmar-ogumakar-ukleged-aila esgoro-gordikidgi-Salomón-sobsadi unnisulid. A-ular, Salomón, Bab-Jehováʼse-goled-neg-asabin, neg-imba-naidi Bab-Dummadga nug-imaksabalid agi ibmar-ogumakar, degi, ibmar-gwallu Bab-Jehováʼga gwenatigwar-guega-ibmar-ukleged ukegar.
2CH 7:8 Degidgi, Salomón, degi, bela Israel-dulemar, ibagugle (7) iba-onosmalad. Agine, dule-bukidar nonimalad: Hamat-igar-maid-akale, Egipto-diwar-maidse, bela ambikusad.
2CH 7:9 Ar ibagugle (7) ibmar-ogumakar-ukleged-ailaga iba-onosmalad, degi, ibagugle (7) iba-dummad onosmarbarsoggu, ibabaabakgi (8) igar-dummad itosmalad.
2CH 7:10 Geb degine, nii-walagugle gaka ibdurgwen-gakapaagi Rey-Salomón e-negse-e-negse dulemar-barmisad. Degine, dulemardina weligwaledba, yeer-itogedba, e-negse nadmalad. Ar adega, Bab-Jehová David-bendaksad, degi, Salomón-bendaksabalid, degi, Israel-dulemar-bendaksabalid.
2CH 7:11 Salomón, bela Babse-goled-neg-obelosgua, degine, we-negga ibmar-ebulemaloed-imakoye-binsasad-obelosgua, degi, reyneg-sobnaid-obelosbargua,
2CH 7:12 mutikidba, Bab-Jehová Salomónʼse magarononikid, ega sogded: “Anse-be-gochad an be-itosad. Degi, we-neg anga ibmar-ogumakar-ukleged-ukega an susad.”
2CH 7:13 Bab-Jehová ega sogdebalid: “Ar bemar an-sogedba dasurmalale, an bemarga dii owiosulid, be-nainumargi ibmar-naid-obelogega, an sesmar barmidagoed. Sulile, an bemarga uelleged-dummad barmidagoed.
2CH 7:14 Ar an-dulamar an-asabin na san bipii imakdemalale, anse-gollarmalale, degi, anba gannar nanadmalale, e-isgudiidgi bar nanadsurmalale, Andi an nibneg-akar itogoed, an ega e-isgued elioed, degi, an ega gannar yar onudakoed.
2CH 7:15 ”We-neggi anse-gorlegedi an nue-dakmaioed, degi, ise-itogar an maibaloed.
2CH 7:16 Emisgindi, we-anse-goled-neg an susad, angadga an nug-imaksad. Adi, an degisadegu agi maiguegar. Degi, aginbi an atakdii, aginbi an binsadii sadeguoed.
2CH 7:17 Salomón, bedi be-bab-David-nanasayob be an-asabin gudii guele, degi, an-bega-ibmar-sogedba be ibsabalile, an-Igar-Mesisadba be gudibalile, degi, an-Igar-Maidba be nanadibalile,
2CH 7:18 be-rey-gangi-siid, degi, be-yar-semaid, bega an sogsadyob an imakoed. ”Emide, an be-bab-Davidʼbogwa igar-mesisa, an ega sogsagusa: ‘Israel-yargi be-wagan-wargwensaale negdakmaisuli guosurye.’
2CH 7:19 ”Degi-inigwele, bemar angi aibatemalardi, an-igarmar-mamaidgi, degi, an-igarmar uksadgi be gwisgudmalardi, aka bab-dummad-baiganba be nanadmalardi, a-e-nug be odummodmalardi,
2CH 7:20 an bemarga yar-uksa-gusadgi an be-osulomaloed, degi, anse-goled-negga an neg-susadi, an balimetoed. Degine, bela dulemar-yar-baid-baidgi-bukmalad, bela-bela bemargi dodogega an imakoed.
2CH 7:21 ”We-anse-goled-neg bela-bela nued-sobarsii-inigwele, bela dulemar e-dikarba nasdamalar geger dakdamaloed, geb sogdamaloed: ‘¿Ar ibiga Bab-Jehová we-yar, degi, ese-goled-neg weyob imaksa?’
2CH 7:22 ”Geb a-dulemarga sogdamaloed: ‘Ar Israel-dulemar, e-Bab-Dummad-Jehová Egiptoʼgi e-babgan-seargusadi, obachamalad. Degi, bab-dummad-baiganba nanadmalad, a-bab-dummagan-e-nug odummodmalad, amar-sogedba ibmar-imakdemarbalid. Aga, Bab-Jehová bela we-bonigan-dummagan Israel-dulemargi barmialid.’ ”
2CH 8:1 Rey-Salomón, Bab-Dummad-Jehováʼse-goled-neg-oguega, degi, reyneg-oguega, birga-dulagwen (20) gagasad.
2CH 8:2 A-sorbali, Salomón, Hiram-ega-neggweburmar-uksadi nudaksad. Geb agi Israel-dulemar-oambikusad.
2CH 8:3 Geb degine, Salomón, Hamat-neggwebur, Soba-yargi-siid, a-ebo bila-onosgua, Hamat-neggwebur-susa gusad.
2CH 8:4 Salomón, Tadmor-neggwebur nega-dulesulidganba-siid sobsad. Degi, bela Hamat-neggweburmargi mas-sabolemalad-neg sobsabalid.
2CH 8:5 Deyopira, neggweburmar-gandikmalad Bet-Horón-Nakwaled, degi, Bet-Horón-Dealed gannar sobsabalid, degi, e-galu-matusulid, e-yawagakmar obinosbalid, degi, yawagakmar-idu-suar-biir-megmalad obinosbalid.
2CH 8:6 Deginbali, Salomón, Baalat-neggwebur, degine, e-gingi-sabolemalad-negmar sobsabalid. E-ur-napagined-osabomalad-negmar sobsabalid, e-moli-ambikued-negmar sobsabalid. Degi, Salomón baigan-negmar e-itolegedba sobsabalid: Jerusalénʼgi, Líbano-yargi, degine, bela e-negdakmaid-ugakagi negmar-sobsa-naed.
2CH 8:7 Bela-neggweburmargi Israel-dulesurmalad-besmaladi, wemalad: Het-dulemar, Amorreo-dulemar, Ferezeo-dulemar, Heveo-dulemar, degi, Jebuseo-dulemar.
2CH 8:8 Ar Israel-dulemar bela amar-obelossurmarsoggu, wemardi, we-yargi e-sergan-sorba besmalad. Salomón a-dulemarga we-garda-narmaklenaidse gandik-arbaleged-igar mesisad.
2CH 8:9 Degi-inigwele, Salomón, Israel-dulemar-wargwensaar maimaryob-arbaega imaksasulid. Ar ade, Salomón, Israel-dulemar: Sorda-bila-onomaladga-onug-imaksad, sordamar-e-dummaganga onug-imaksabalid. Sordamar-ur-napaginedgi-urwemalad-e-dummaganga onug-imaksabalid, degi, sordamar-moligi-sii-urwemalad-e-dummaganga onug-imaksabalid.
2CH 8:10 Deginbali, Salomón, ega-arbamalad-dakega e-dummagan dulataled-ilabo gaka dulabo-gakambe (250) nikabalid.
2CH 8:11 Salomón, Faraón-sisgwa David-neggweburgi-maidgi sesad, bia ega reyneg-sobsadse. Ar ade, Salomón binsaed: “Bab-Jehová-e-Ulu Rey-David-neggi-signonisoggu, reyneg neg-swilidikidga gunonisunnad. Degisoggu, an-ome we-neggi geg gudii gued.”
2CH 8:12 Degidgi, Salomón neg-ubeb-naid-asabin, ibmar-ogumakar-ukleged-ailagi, Bab-Jehováʼga ibmar-ogumakar uksasunnad. We-ailade, Salomón, Bab-Jehováʼga sobsa gusad.
2CH 8:13 Salomón, Moisés-Igar-Maidba, ibmar ogumakar ukdaed: Itoged-ibamargi, nii-bini-gwisgued-ibamargi, birgagi irbaa iba-dummagan-onolegedgi ibmar ogumakar ukdaed. A-ibamar-dummagandi, wemalad: Madubur-Inasulid-Iba, Itoged-Irgwenad-E-Ibamar, degi, Neg-Matargana-Iba.
2CH 8:14 Deginbali, Salomón e-bab-David-igar-mesisadbali, dule-irwa-Bab-Dummadse-gormaladga igar mesisad, adi, e-iba-arbamaladgi na muchub-muchub arbamalagar. Degi, Levita-dulemardi Bab-Dummad-nug-odummogega urbilesmogad, adi, dule-irwa-Bab-Dummadse-gormaladbogwa bane-bane igar-megisadba arbamalagar. Ar David Bab-Dummadga-arbaedi, deyob igar mesisad. Degi, yawagak-dakmaladga yawagak-iliba e-igar-maidba ega mesisbalid.
2CH 8:15 Degisoggu, dule-irwa-Bab-Dummadse-gormalad, Levita-dulemar, mani-dakmalad, degi, ibmar-baigangi-arbabukwamalad, rey-igar-mesisadba nanabukwa gusmalad.
2CH 8:16 Weyobi, Salomón Bab-Jehováʼse-goled-neg-e-sailagan-mesialid-akale, bela-ogusadsega, bela ibmar-imaksad. Bab-Jehováʼse-goled-neg bela weyob ogulenonisunnad.
2CH 8:17 Degidgine, Salomón, Edom-yargi, demar-gaka naidsik, Ezión-Geber-neg-nugadse, degi, Elot-neg-nugadse naded.
2CH 8:18 Hiram, Salomónʼga e-gapdanmarba ur-dummagan barmisad. Degi, Hiram-e-gapdanmar, degi, e-selamar demargi nerguarmaladid. Amar, Ofirʼye-neg-nugadse Salomón-sordamarbo nadmalad. Agi, or nibir-milidulagwen-gakambe-gakapaa (33,000) Rey-Salomónʼse senonimalad.
2CH 9:1 Rey-bundor-Sabáʼgined, Salomón nug-nue-nika-maiye wisgusad. Degisoggu, Rey-bundor Salomón-dakega Jerusalénʼse naded, adi, ibmar-aku-itolemalad-egisedgi Salomón-wilubdakegar. Geb Jerusalénʼse e-sordamar-bukidarad-abargi modapid. Agi, Rey-bundor, Salomónʼga ibmar-bukidar moli-yargan-muremaladgi sesad: Ibmar-wawadikmalad bukidar, ormar bukidar, degi, akwa-nuegan-dakar-dakar-gamalad bukidar, Salomónʼga sesad. Degisoggu, Rey-bundor, Salomónʼse modapgu, ibmar-aku-itolemalad bela ese egichisad.
2CH 9:2 Salomón, Rey-bundor-ese-ibmar-egichisad bela abin-sogsad. Ibmar-soggwensaar abin-sogsasuli gussulid.
2CH 9:3 Rey-bundor-Sabáʼgined, daksagua, Salomón nue binsaed-nikarba, degi, reyneg-sobaled daksabargua, geger dakded.
2CH 9:4 Degine, e-mesegi mas-nuegan-gullemalad daksabargua, reyga-dummaganga-gumalad-e-ganmar daksabargua, degi, reyga-arbamalad-e-mor-yomalad daksabargua, geger dakdebalid. Deginbali, nog-dakmalad-e-mor-yomalad daksabargua, degi, Bab-Dummadse-goled-negse-arsan-nakwilemaid daksabargua, geger dakdebalid.
2CH 9:5 Geb degi, Rey-bundor-Sabáʼgined Rey-Salomónʼga sogded: “An-neggweburgi-mai an be-itoalid, be ibmar-nuegan bukidar imaksaye, degi, binsaed-ibed be maibarye. Emide, an we-ibmar-itosadi, nue-napira an dakdo.
2CH 9:6 Dulemar-we-ibmar-sogedi an benenad. Emisgindi, an wese-nonikidgi, an-ibyagwar an be-daknonisunnad. Be binsaed-ibed-maidi, belallaa anga sogsasurmalad. Anga-sogsamaladba bur bule ibmar-wisi an be-daked.
2CH 9:7 Be-sordamar, degi, bega-dummaganga-gumaladi bane-bane be-binsaed-ibed-itodiidba weligwar gudimalad.
2CH 9:8 ¡Be-Bab-Dummad-Jehová-nug-odummolesun! Bab-Jehová begi nued-binsasadba, ega-negseega rey-gangi be-sisad. Ar be-Bab-Dummad, Israel-dule-nue-sabsoggu, be-ogannodii sadeguoed. Bab-Jehová Israel-yar-seega be imaksad. Ega be igar-nuegan imakmaiguega, degi, ega be igar-nudakmai-guega be-imaksad.”
2CH 9:9 Degi, Rey-bundor, Salomónʼga we-ibmarmar uksad: Or nibir-milibaabak gaka dulataled-ilagugle aidikue (8,700) uksad, degi, ina-wawadik-yapanmalad ichesur uksabalid, akwa-nuegan-dakar-dakar-gamalad deyob uksabalid. We-ina-wawadikmalad, Rey-bundor-Sabáʼgined Salomónʼga-ichesur-uksadyob, Judá-yargi dakledisulid.
2CH 9:10 Degine, Hiramʼga-arbamalad, degi, Salomónʼga-arbamarmogad, Ofir-or senoni gusmalad. Deginbali, sapi-sándalo-urgo, degi, akwa-nuegan-dakar-dakar-gamalad senoni gusmarbalid.
2CH 9:11 Rey-Salomón, Bab-Dummad-Jehováʼse-goled-neggi, degi, reyneggi, sapi-sándalo-urgogi arsanmar sobsad. Deginbali, a-urgogi gar-arpa, degi, gar-salterio gar-ogormaladga sobsabalid. Wegiid-sapi-sándalo-urgo, Judá-yargi dakledisulid.
2CH 9:12 Rey-Salomón, Rey-bundor-Sabáʼgined-ibmar-abegedi, degi, ese-ibmar-egichisbalidi, bela Rey-bundorga uksad. Salomón, Rey-bundor-ega-ibmar-senonikidba, bur bule-mergu ega uksad. Geb degi, Rey-bundor dule-ega-ibmar-imakmalad-abargi, gannar e-yar-Sabáʼse nonikid.
2CH 9:13 Salomón birga-irba, or nibir-mili-dulabo-gakambe-aidiku-wilub (50,000) abingadaed.
2CH 9:14 Dulemar-ibmar-ukmalad, degi, ibmar-bakmaladgi-mani-galemaiddi, obarlesulid. Deginbali, reymar-Arabiaʼginmaladi, degi, sailagan-negdakmamaidi, ormar, manimar Salomónʼga senonidamarmogaddi, amba obarlesurbalid.
2CH 9:15 Deginbali, Rey-Salomón, sigu-abingaed-dummagan dulataled-ilabo (200) or-sarsogaledgi sobsad. War-wargwengi e-aidikued nibirambe-gakatar (15) aidikued.
2CH 9:16 Deyobi, Rey-Salomón sigu-abingaed-bipigana dulataled-ilapaa (300) or-sarsogaledgi sobsabalid. War-wargwengi nibirnergwa (6) aidikued. Rey, we-ibmar, e-neg-Sapur-Líbanoʼye-nugadgi urbisad.
2CH 9:17 A-ukinbali, isbied-nugar-dummagan-marfilʼye-nugadgi rey-gan sobsabalid. A-gan-birgi or-nued nasiksabalid.
2CH 9:18 Rey-gan-e-nag-onakwed or-sunnabi sobaled. We-rey-gan e-arsan-welle-wellegwad nergwa (6) nika imaksad. Degine, e-argan-mesed abinbela imaksabalid. A-rey-gan-e-argan-gwensak-dikarba achumigur-nono-wawaad-sobale osisad. Walanergwa (6) arsan-argan-nuedsik ambikusad, degi, walanergwa (6) arsan-argan-sapiledsik ambikusbalid.
2CH 9:19 Deyobi arsan-welle-wellegwadgi, achumigur-nono-wawaad war-wargwen osisad. Weyobi, reymar-baigan-e-ganmar gwen sobledisulid.
2CH 9:20 Rey-Salomón, e-nog-vino-gobmalad ber or-sunnabi soblesad, degi, reyneg-Sapur-Líbanoʼye-nugadgi batemar, nogmar-bukwad, ber or-sunnabiid. Ibmar-soggwensaar manigi soblessulid, bela orbi sobaled. Rey-Salomón negdakmaigua, mani baisur-dakleged, aga ega ibmar manibi soblessulid.
2CH 9:21 Rey-Salomón urmar-dummad nikadi, Hiram-e-selamar ega onanadii gusmalad. Birgapaa-birgapaagi Rey-Salomón-e-urmar, Tarsis-yarse Rey-Hiram-e-sordamarmala naddaed. Tarsis-yargine, seardamalad: Ormar, manimar, isbied-nugar-marfilʼye-nugad, sulumar, degi, rey-siglimar seardamalad.
2CH 9:22 Rey-Salomón, ibmar-nuegan bela-bela nikusadba, degi, binsaed-ibed-megisbalidba, bela rey-baigangi obicha megisad.
2CH 9:23 Degisoggu, rey-baigan yar-baid-baidgi-mamaid, Bab-Dummad Salomónʼga-binsaed-nikaa-imaksad-itogega, Salomón-dakbiguardamalad.
2CH 9:24 Bela we-dulemar birga-irba, Rey-Salomónʼse-nanamamaidi, war-wargwengi Salomónʼga ibmar-binsa-ukleged senonidamalad. We-ibmar senonidamalad: Manimar, ormar, mor-nuegan, gingimar, ina-wawadikmalad, molimar, degi, moli-uaya-senigan, Salomónʼga-ukega senonidamalad.
2CH 9:25 Salomón, e-molimar-ambikuega, degi, ur-napaginmalad-sabogega, moli-ambikued-negmala milibake (4,000) nikusbalid. Degi, Salomón sorda-moligi-nanamalad miliambe-gakabo (12,000) nikusbalid. Amar neggwebur-baigangi ur-napaginmalad-negmar-ega-uklesadgi bela ambikusmalad, degi, Jerusalén-neggweburgi rey-walik ambikusmarbalid.
2CH 9:26 Rey-Salomón, reymar-baigan-yar-semaid-ibe bela yarmar-susad. Éufrates-diwar-akar, bela Filistea-dulemar-yarse, degi, bela Egipto-yar-abingunaidse yar-semai gusad.
2CH 9:27 Salomón akwamar-omileddaeyobi Jerusalén-neggweburgi mani bukidar-nika imaksad, degi, yar-mulluganba higuera-sapimar-bukidar-digaleyobi urwar-urgomar bukidar digsabalid.
2CH 9:28 Salomónʼga, Egiptoʼgi, degi, bela neggweburmar-baigangi molimar selenoni daed.
2CH 9:29 Salomón ibmar-baigan imaksabalid, a-ibmar-gebe-imakdedi, degi, e-berguedse ibmar-imaksadi, belagwable Bab-Dummad-gayaburba-barsoged-Natán-e-garda-narmakar-maidgi narmakar-maid. Degi, Siloʼgined-Ahías-e-garda-narmakar-maidgi narmakar maibalid. Degine, dule-negburgandaked-Iddo-e-garda-narmakar-maidgi narmakar maibalid. Nabat-machi-Jeroboamʼgi-sunmaklenaid-gardagi narmakar maibalid.
2CH 9:30 Salomón bela Israel-yargi birga-dulabo (40) Jerusalén-neggweburgi yar-semai gusad.
2CH 9:31 Salomón burgwisgua, e-bab-David-e-neggweburgi diglesad. Salomón-sorba, e-machi-Roboam yar-ganonikid.
2CH 10:1 Roboam, Siquem-neggweburse naded. Ar ade, bela Israel-dulemar reyga-Roboam-onugsaega, Siquem-neggweburse nadmalad.
2CH 10:2 Nabat-machi-Jeroboam Egipto-yarse Salomón-idu-wakite-gusadi, deyob gaya-wisgusgua, Egiptoʼgi-mai gannar alid.
2CH 10:3 Israel-dulemar Jeroboamʼbina-gochamargu, bela Jeroboamʼba Roboamʼse nonimalad. Geb degine, Roboamʼbo sunmakdemargu, Roboamʼga sogdemalad:
2CH 10:4 —Be-bab-Salomón undar-arbaleged-dummad anmarga uksad. We-undar-arbaleged-dummad, wilubba be anmarga imake. Deyob be anmarga imakele, anmar be-maiga gudii gumaloed.
2CH 10:5 Roboam abin-sogded: —Be namala. Ibapaase gannar be anse dagmalo. Agine, Israel-dulemar nade gusmalad.
2CH 10:6 Geb Roboam girmar-dummaganse binsaed-egisnai gualid. We-girmar-dummagande e-bab-Salomónʼga binsaed-ukdii nanasmalad. Amarga Roboam sogded: —¿Igi an we-dulemarga sogoe?
2CH 10:7 Geb girmar-dummagan abin-sogdemalad: —We-dulemarba be ibsadibe, nued egi be binsadibe, degine, nuedgi ega be sunmakdibe, wemar degisadegu be-maiga gudii gumaloed.
2CH 10:8 Degi-inigwele, Roboam girmar-dummagan-ega-binsaed-uksadi gwen itossulid. Aka sapingan-ega-arbamaladse, ebo-dare-dungusmaladse binsaed egichided.
2CH 10:9 —Be anga binsaed-dakmala, ¿igi an we-dulemarga sogoe? Ar ade, wemar anse egichisad: ‘Be-bab, undar-arbaleged-dummad anmarga uksaye. We-undar-arbaleged-dummad, wilubba be anmarga imakye.’
2CH 10:10 We-sapingan-ebo-dare-dungusmalad ega sogdemalad: —We-dulemar weyob-bega-sunmaksamaladi: ‘Be-bab, undar-arbaleged-dummad anmarga uksaye. We-undar-arbaleged-dummad, wilubba be anmarga imakye.’ We-dulemarga weyob be sogoed: ‘An-bab bemar-sabsur-wiosale, andi bur bule be-wiomogoed.
2CH 10:11 An-bab, arbaed-dutusulid bemarga ukdii gusale, andi bur bule bemarga arbaed-dutusulid ukoed. An-bab molidubgi bemar-bibyosale, andina, molidub-e-duku-esgorobiidgi an bemar-bibyogoed.’
2CH 10:12 Igi Roboam ega sogsa gusa: “Ibapaase gannar be anse dagmaloye.” Deyobi, a-ibapaagine, Jeroboam, Israel-dulemarmala, Roboamʼse gannar noni gusmalad.
2CH 10:13 Rey-Roboam, Israel-dulemar-abin sabsur-sunmaksad. Girmar-dummagan-e-binsaed-ega-uksadba ibsassulid.
2CH 10:14 Roboam, sapingan-ega-binsaed-uksadba, Israel-dulemarga sogded: “An-bab undar-arbaleged-dummad bemarga uksad, andina, bemarga bur bule undar-arbaleged ukoed. An-babdi molidubgi bemar-bibyosad. Andina molidub-e-duku-esgorobiidgi an bemar-bibyogoed.”
2CH 10:15 Degisoggu, Rey-Roboam, dulemar-ese-ibmar-egichisad ega imaksasulid. Ar Bab-Jehová weyob igar-mesisad, adi, Nabat-machi-Jeroboamʼga, Ahías-Silo-neggweburginedba ibmar-sogsagusad guegar.
2CH 10:16 Israel-dulemar, Rey-Roboam e-itossuli daksamargua, weyob sogdemalad: “¿Ibiga anmar bar David-e-gwenadganba naguosunna? ¡Ar anmar Isaí-wagwaba ibmar nikasulid! Degisoggu, ¡Israel-dulemar! E-neg-e-negse namalo. ¡David-wagwa, be-gwenadganbi na be sedii gusunno!” Weyob, bela Israel-dulemar e-neg-e-negse nadmarsunnad.
2CH 10:17 Degi-inigwele, Roboam Israel-dulemar-Judá-neggweburmargi-bukwamaladgi negdakmai gusad.
2CH 10:18 Degi geb sorba, Rey-Roboam Adoram-barmisad. Adoramʼde, dulemar-ise-oarbaar-imakleged-dakedid. Israel-dulemar a-dule-daksamargua, akwagi-makar oburgwismalad. Roboam, deyob daksagua, gwae-gwae e-ur-napaginedgi nakwisa imaksad. Geb Jerusalén-neggweburse wakited.
2CH 10:19 De-akale, Israel-dulemar we-garda-narmaklenaidse David-wagangi bangusmalad.
2CH 11:1 Roboam, Jerusalén-neggweburse modapgu, Judá-sordamala, degi, Benjamín-sordamala mili-dulabakebak (180,000) bila-onomaladga-sulesadi oambikusad. Adi, Israel-sordamargi bila-onogega, Jeroboamʼgi gannar yar-suegar.
2CH 11:2 Degi-inigwele, Bab-Jehová, e-dule-Semaíasʼga sognonikid:
2CH 11:3 “Judá-dulemar-e-rey Salomón-machi-Roboamʼga, degi, Israel-dulemar-Judáʼginmaladga, degine, Benjamín-wagan be sogo:
2CH 11:4 Bab-Jehová weyob soged: ‘Mer be-gwenadgangi be bila-ononamalo. Degisoggu, gannar e-neg-e-negse namar, ar ade, an-sogedba an imaksad.’ ” Deyob-Bab-Jehová-soge-itosmargua, Roboam-sordamar gannar bilismalad, bar Jeroboamʼgi bila-onoapsurmalad.
2CH 11:5 Roboam Jerusalén-neggweburgi megisad, degi, Judá-yar-bendakegala, neggweburmar-gandikid sobsa gusad.
2CH 11:6 Neggweburmar-ogannolesmalad-sobsadi, wemardo: Belén, Etam, Tecoa,
2CH 11:7 Bet-Sur, Soco, Adulam,
2CH 11:8 Gat, Maresa, Zif,
2CH 11:9 Adoraim, Laquis, Azeca,
2CH 11:10 Zora, Ajalón, degi, Hebrón. We-neggweburmar-gandik-sobsagusadi, Judá-yargi, degi, Benjamín-yargi bukwamalad.
2CH 11:11 Roboam neggweburmar-gandik-bukwad napi ogannosbalid. A-neggweburmargi, sordamar-e-dummagan urbisad. Deginbali, masgullemalad, olivo-gwallu, degi, vino, sabolemalaga, agi urbisbalid.
2CH 11:12 Degi, sigu-abingamalad, degi, ilawar-swiswidikmalad, neggwebur-iliba oambikusbalid. A-ibmar, bela-bela omelosad. Degisoggu, Judá-dulamar, Benjamín-dulamar Roboam-sogedba ibmar-imakbukwagusmalad.
2CH 11:13 Dule-irwa-Bab-Dummadse-gormalad, degi, Levita-dulemar, bela Israel-yargi-bukwamaladi, Roboamʼba-naguega nonimalad.
2CH 11:14 Ar Jeroboam, degi, e-masmala, Levita-dulemar-ibe Bab-Jehová-igargi-arbaed osulosad. Agala, Levita-dulemar moli-gagan-omaed-nainugan-mete armarsunnad. Degine, Judá-yarse-naega, degi, Jerusalén-neggweburse-naega, e-ibmarse-bakale, metemarbalid.
2CH 11:15 A-ulale, Jeroboam aila-matusulidgi niamarse golega, degi, moli-bebe-nikad-burwigana-sobaledse gollebaliga, na egad dule-bab-dummadse-gormalad nug-imaksad.
2CH 11:16 Geb Israel-dadgan-warambe-gakabogwad-abargi (12), Israel-dulemar e-Bab-Dummad-Jehováʼba napiragwadba-nanaidi, e-babgan-e-Bab-Dummad-Jehováʼga ibmar-ogumakar-ukega, bela Levita-dulemarba Jerusalén-neggweburse, Bab-Dummadse-goled-negse nadmarmogad.
2CH 11:17 Deyobi, we-dulemar birgapaa Salomón-machi-Rey-Roboam-ogannodii gusmalad, degii Judá-yar-dakmaid ogannosmalad. Ar ade, birgapaa, David-igarba, degi, Salomón-igarba nanadii gusmalad.
2CH 11:18 Roboam, Jerimot-sisgwa-Mahalat nikusad. Jerimotʼde, David-e-machid. Mahalat-e-nandi Abihailʼye-nugad. Abihailʼde, Eliab-sisgwad, Isaí-e-wagwad.
2CH 11:19 Mahalat-e-machimala, wemalad: Jeús, Semarías, Zaham.
2CH 11:20 Geb degi, Roboam, Absalón-e-sisgwa Maacaʼye-nugad nikusbalid. Maaca-machimala-gwalulesadi, wemalad: Abías, Atai, Ziza, degi, Selomit.
2CH 11:21 Roboam e-omegan-baiganba, degi, e-ome-dikarmarbalidba e-ome-Maaca-bur bule-sabgusad. Degine, Roboam omegan warambe-gakabaabak (18) nikusad, degi, omegan-dikarbalid waladulapaa (60) nikusbalid. Roboam mimmigan-nikusad: Masmala, waladulagwen-gakabaabak (28), degi, bunamala, waladulapaa (60) nikusad.
2CH 11:22 Geb degi, Roboam, e-ome-Maacaʼsikid-e-machi-Abías e-gwenadgan-e-dummadga nug-imaksad. Ar ade, Roboam, Abías reyga-mesoye egi binsasad.
2CH 11:23 Roboam binsaed-nue-nikaa ibmar-imaksad. Roboam neggwebur-iliba e-masmala mesisnaed, Judá-neggweburmargi, degi, Benjamín-neggweburmargi, degi, negmar-gandik-bukwa-nanaedgi bela e-masmala-mesis-nabalid. Geb mas-bukidar onimai gusbalid, degi, e-masmalaga omegan-bukidar uksabalid.
2CH 12:1 Rey-Roboam, e-negsemaid nue-gangus-sigisa daksagua, Bab-Jehová-Igar-Maidba bar nanadii gussulid. Degine, bela Israel-dulemar eba Bab-Jehová-Igar-Maidba bar nanassurmarmogad.
2CH 12:2 A-ulale, Bab-Jehováʼba ibsassurmaladbali, Rey-Roboam birgatargus-negsemaidgi, Egipto-e-rey-Sisac, Jerusalén-dulemargi bila-onoapid.
2CH 12:3 Rey-Sisac ur-napaginmalad, miligwen gaka dulataled-ilabo (1,200) sealid, degi, sordamar-moligi-sii-bila-onomalad, mili-dulapaa (60,000) searbalid. Deginbali, sordamar-bukidar, Sisacʼba Egipto-yar-akar dani gusmalad. A-dulemarde, Libia-dulemalad, Suquim-dulemalad, (dule-yarsuli-gudimaladid) degi, Etiopía-dulemalad.
2CH 12:4 Rey-Sisac, Judá-neggweburmar-gandik-simalad susad. Geb degi, Jerusalén-neggweburse nonikid.
2CH 12:5 Geb degine, Bab-Dummad-gayaburba-barsoged-Semaías, Rey-Roboamʼse, degi, Judá-e-dummagan Jerusalénʼgi Sisac-dobmaladba igar-itobukmaladse nonikid. Geb Semaías, dummaganga sogded: —Bab-Jehová weyob soged: ‘Bemar an-obachamarsoggu, aga, an Sisacʼga an be-urmakmarsundo.’
2CH 12:6 Degidgi, Israel-dummagan, degi, Rey-Roboam, san-bipii imaksamalad. Geb sogdemalad: —¡Bab-Jehová, ibmar-inniki-imakedid!
2CH 12:7 Bab-Jehová daksagua, Judá-e-dummagan san-bipi-imaksamala, gannar e-gayaburba-barsoged-Semaíasʼga sognonikid: “Judá-e-dummagan san-bipii imaksamarsoggu, bar an osulogosulid. Aka emisgwasaar, an Judá-dulemar-bendakoed. An Jerusalénʼgi isdar bar binsaosulid. Bar Sisac Jerusalén-neggwebur-osulogega an imako-sulid.
2CH 12:8 Degi-inigwele, bemar Sisac-e-maiga gumaloed, adi, itomalagar, igi anga ibmar-imaklege, degi, reymar yar-baigangi-mamaidga igi ibmar-imaklemoga.”
2CH 12:9 Degidgine, Egipto-e-rey-Sisac, Jerusalén-dulemargi bila-onosad. Sisac, Jehováʼse-goled-neggi ibmar-nuegan-bukwad, degi, reyneggi-ibmar-nuegan-bukwad, Salomón-sigu-abgamalad-orbi-sobsagusadse-bakale, susad. Bela a-ibmarmar Egipto-yarse sesad.
2CH 12:10 Degi, geb Rey-Roboam sigu-abingaed-orbiid-anar, sigu-abingaed esgoro-gordikid-madaregedbi sobsad. Degi, suar-ibed-dummagan-rey-yawagakgi-nakulemaladga uksad.
2CH 12:11 Suar-ibmala, Rey-Roboam Bab-Jehováʼse-goled-negse-nanaed-irba, sigu-abingaed guar-guar sedii damalad. Degi, geb sorba, suar-ibmala, suar-ibed-ambikumaladgi gannar sigu-abingaed osabosdamalad.
2CH 12:12 Roboam san-bipii imaksadbali, Bab-Jehová bar-isdar itossulid. Degisoggu, Bab-Dummad bela Jerusalén-neggwebur-osulogega bar imaksasulid. Ar ade, Judá-yargi dulemar-nuegan amba gudidii nanaed.
2CH 12:13 Degisoggu, Rey-Roboam nue-gangusa, Jerusalénʼgi negsemai gusad. Roboam gebe-yar-seargu, birga-dulabo-gakagwensak (41) nikad. Jerusalénʼgi birgambe-gakagugle (17) negsemai gusad. A-Jerusalén-neggweburde Israel-dadgan-warambe-gakabogwad-abargi (12) Bab-Jehová na susgusad, adi, agi e-nug-odummolegegar. Roboam-e-nande, Naamaʼye-nugad, Amón-duled.
2CH 12:14 Roboam, e-gwagegi Bab-Jehová-nue-amissursoggu, ibmar-isgana imakde gusad.
2CH 12:15 Rey-Roboam gebe-ibmar-imakdedi, degi, e-berguedse-ibmar-imaksadi, Bab-Dummad-gayaburba-barsoged-Semaías, degi, negburgan-daked-Iddo, a-e-gardamar-nug-mamaid-gardagi narmakar maid. Roboam, Jeroboamʼbogwa bila-onogedbi-dakedii gusmalad.
2CH 12:16 Roboam burgwenonigu, David-neggweburgi diglesad. Geb degi, e-machi-Abías Judá-yargi yar-senonikid.
2CH 13:1 Rey-Jeroboam birgambe-gakabaabakgus (18) reyga-maidgi, Abías, Judá-yargi gebe yar-sear gusad.
2CH 13:2 Abías, Jerusalénʼgi birgapaa yar-sesad. E-nande, Micaíasʼye-nugad, Uriel-e-sisgwad. Urielʼde, Gabaaʼginedid. Deginbali, Abías, Jeroboamʼgi bila-onos gusad.
2CH 13:3 Rey-Abíasʼdi, bila-onogega, sordamar-gandikmalad, mili-dulataled-ilabake (400,000) susad. Degi, Rey-Jeroboamʼdi, Rey-Abíasʼbo bila-onogega mili-dulataled-ilabaabak (800,000) e-sordamar-gandikmalad susmogad.
2CH 13:4 Rey-Abías, Efraín-yalaganba, Zemaraimʼye-yar-nugadgi-gwichi sabsur goted: “Jeroboam, bela Israel-dulemar-bukwad, nue itomalo.
2CH 13:5 Be wissurmarsi, Israel-e-Bab-Dummad-Jehová, Rey-Davidʼga, degi, e-waganga Israel-dulemar-degisadegu-yarsemai guoye, gwen ogwaosurye sogsad.
2CH 13:6 Nabat-machi-Jeroboam, David-machi-Salomónʼga arbadii gusanad. Degi-inigwele, e-dummad-Salomónʼgi aibicha gusad.
2CH 13:7 Salomón-machi-Roboamʼba dule-wiegana, degi, dule-isganamar akadmalad. Ar Roboamʼdi, sapingwagusoggu, dule-naa-daedsoggu, we-dulemar-ibmar-sogedba ibmar-imakdii gusad. Geg abinsae gudii gusad.”
2CH 13:8 Rey-Abías sogdebalid: “Emidi, bemar binsaed: ‘Anmar ichesurgussoggu, degi, moli-bebe-nikad-orbiid nikabarsoggu, we-ibmar-bab-dummadga-imakleged Jeroboam-anmarga-sobsadi, sunna Bab-Jehová-yar-Davidʼga-uksadgi anmar-obinega imakoye.’
2CH 13:9 Deginbali, bemar, Bab-Jehová Aarón-wagan dule-irwa-Bab-Dummadse-gormaladga-onugsasadi, degi, Levita-dulemala, be onosmalad. Igi dule-Bab-Jehová-wissurmalad yar-baigangi e-dule-irwa-babse-gormalad nug-imake, deyob, a-dulemar-anar, be-dule-irwa-bab-dummadse-gormalad be nugsasad. Dule-wargwen moli-bebe-nikad-sapingwagwad, degi, sibad-wawaad-machered-walagugle (7) bab-dummadga-ukega-sedanikile, we-dulede, dule-irwa-bab-dummagansulidga-goledga yog onugsalegar daed.
2CH 13:10 ”Ar anmar-Judá-dulemardi, Bab-Jehová-obachasurmalad, ar ade, Bab-Jehová, anmar-Bab-Dummadid. Anmar-irwa-Bab-Dummadse-gormaladdi Aarón-masmala-gued. Amar amba Bab-Jehováʼga ibmar-imaked. Degine, Levita-dulemardi e-bendakmalad-gued.
2CH 13:11 Amardi bane-bane, wakdaradba, degi, sedogidba Bab-Jehováʼga ibmar ogumakar ukdamalad. Degine, ina-wawadikid obupurmak damarbalid. Deginbali, bane-bane madu-Babga-nugsaleged mese-orbiidgi urbedamalad, degi, sedogidba gwallu-sied-orbiidgi gwallu-bukwad ogadamalad. Ar ade, anmardi Bab-Dummad-Jehová-Igar-Maidba nanadimalad. Ar bemardi, Bab-Jehováʼgi be bangudmalad.
2CH 13:12 Degisoggu, Bab-Jehová, anmar-idunadapid. Degine, dule-irwa-Bab-Dummadse-gormaladi, gar-trompeta-ogolega, bato guakwa-bukwad, adi, anmar bemargi-gwichiguegar. Degisoggu, Israel-dulemar, mer be-dadgan-e-Bab-Dummad-Jehováʼgi bila-onogedgi be binsamar. Ar ade, Bab-Jehováʼgi, be gwen nakosurmalad.”
2CH 13:13 Geb degi, Jeroboam, abala e-sordamar-dukuar oambikusad, adi, ukiagwar Abías-sordagan-yarganba egi gwisguegar. Geb e-sordagan-baigandi, Judá-dulemar-asabin, barmisad.
2CH 13:14 Geb degi, Judá-dulemar yargansik atakdemargu, Jeroboam-sordamar egi gwichigudani dakarmalad, degi, Jeroboam-sordamar-baigan, e-asabin egi gwichigudani dakarmarbalid. Geb Bab-Jehováʼse sabsur-apor gotemalad, geb dule-irwa-Bab-Dummadse-gormaladdi gar-trompeta ogotemalad.
2CH 13:15 Geb degi, Judá-dulemar, Jeroboamʼgi-gwichiguega binnasuli-gotegua, Bab-Jehová, Jeroboam-ogalakuega, degine, bela Israel-dulemar-ogalakuega imaksad. Degine, Bab-Jehová, Abías-onakwega, degi, bela Judá-dulemar-onakwega imaksad.
2CH 13:16 Israel-dulemar, Judá-sordamar-idu wakinbi-gualinad, degi-inigwele, Bab-Jehováʼdi, ega urmaksad.
2CH 13:17 Abías, degi, e-sordaganmala, dula-bukidar-ogilosmalad. Bela Israel-sordamar mili-dulataled-ilatar (500,000) girgusmalad.
2CH 13:18 Deunni, a-ibagangine, weyobi Israel-dulemar mesagwar gunonimarsunnad. Degi, Judá-sordamardi emargi nakwismalad, ar ade, e-dadgan-e-Bab-Dummad-Jehováʼgi bengussurmalad.
2CH 13:19 Abías deyob Jeroboam-bareginnai gusad. Degine, Jeroboam-ibe we-neggweburmar susad: Betel-neggwebur, degi, e-neggwebur-burwiganase-bakar, susad. Jesana-neggwebur, degi, e-neggwebur-burwiganase-bakar, susad. Efraín-neggwebur, degi, e-neggwebur-burwiganase-bakar, susad.
2CH 13:20 Degisoggu, Abías reyga-maigu, Jeroboam bar gangued-nika-gudii gussulid. Degi, geb Bab-Jehová, Jeroboam-onailiksasgu, Jeroboam burgwisad.
2CH 13:21 Degine, Abíasʼdi, reyga bur bule gandik maigusad. Abías ome-warambe-gakabake (14) nikusad, degi, masmala-waladulagwen-gakabo (22) nikusbalid. Bunamaladi warambe-gakanergwa (16) nikusbalid.
2CH 13:22 Abías e-ibmar-baigan-imaksabalid, degi, e-nanasad, degi, e-ibmar-sogsabalid, Bab-Dummad-gayaburba-barsoged-Iddo-e-gardagi narmakar maid.
2CH 14:1 Rey-Abías burgwenonimogu, David-neggweburgi diglesad. A-sorba, e-machi-Asa yar-seega megnonikid. Asa-negsemaigu, birgambe (10) neg bogidikid nai gusad.
2CH 14:2 Rey-Asa, e-Bab-Dummad-Jehová-asabin ibmar-nueganbi-imakdii, degi, igar-innikigwadbi-imakdii gusad.
2CH 14:3 Ar ade, Rey-Asa, aila-matusurmalad, degi, bab-dummaganga-ibmar-ukleged-ailamar-bukwad osulosad. Degi, akwamar-islidikid obelosbalid, degi, Asera-e-wilubgan-suargi-sobar-bukwad osulosbalid.
2CH 14:4 Deginbali, Rey-Asa, Judá-dulemar, e-dadgan-Bab-Dummad-Jehováʼba naguega imaksabalid, adi, Judá-dulemar, Moisés-Igar-Maidba, degi, Bab-Dummad-Igar-Sogsadba nanabukwa guegar.
2CH 14:5 Deyobi, Rey-Asa bela Judá-neggweburmargi, bab-dummaganga-aila-matusulidmar-bukwad osulosad. Degi, ina-wawadikid-ogumakleged-ailamar osulosbalid. Degisoggu, Rey-Asa e-yar-semaidgi boni-sate yar-semai gusad.
2CH 14:6 Deunni, yar bogidik naid. Degisoggu, Rey-Asa Judá-yargi neggwebur-gandikmalad sobsad. Ar a-ibagangi, Rey-Asaʼbo dule-bila-onobimalad sated, ar ade, Bab-Jehová bogidik neg nasiksad.
2CH 14:7 Agi, Rey-Asa, Judá-dulemarga sogded: “Anmar neggweburmar-obinomargwelo, bela neggwebur-dikar-ebiris galu-matusulid neg-suid-nika anmar sobmalo. Degi, e-yawagakmar anmar sobmarbalo, degi, esgoromar yawagakgi biir-biir nasikmarbalo. Ar we-yar-naid anmargad-naid. Ar ade, anmar, anmar-Bab-Dummad-Jehováʼba-nanadisoggu, Bab-Jehová anmarga neg-bogidik nasiksad.” Judá-dulemar neggwebur-obinonanaigua, ega igar-nueganbi nadapi gusad.
2CH 14:8 Rey-Asa, Judá-dule-bila-onomalad mili-dulataled-ilapaa (300,000) nikusad. Amar eswar, degi, e-sigu-abgaed-dummagan guar-guar ganidamalad. Degine, Benjamín-dule-bila-onomalad mili-dulataled-ilabo-gaka-dulabake (280,000) nikusbalid. Ar a-sordamarde bela sigu-mied wismarsoggu, sigu-abgaed-senigana, degi, sigumar guar-guar ganidamarmogad.
2CH 14:9 Etiopía-dule-Zera, e-sordamar-miyongwen-mergu (1,000,000), Rey-Asa-sordamargi-bila-onogega e-abin noargusmalad. Zera ur-napagined, dulataled-ilapaa (300) sedanigusad, agi, Maresaʼye-neg-nugadse nonikid.
2CH 14:10 Geb agi, Rey-Asa, Zera-abin noded. Geb Asa e-sordamar-bila-onogega Maresaʼye-neg-nugad-naba Sefata-nebagi urbisad.
2CH 14:11 Agi, Asa e-Bab-Dummad-Jehováʼse sabsur-goted, sogded: “Bab-Jehováʼye, dulemar emarbi be dakmaid. Dule-gandikiddibe, igi dule-nollogwaddibe amba be bendakmaid. Degisoggu, anmar-Bab-Dummad-Jehováʼye, be anmar-bendake. Ar ade, anmar begi bensurmalad, degi, be-nuggi an we-dulemar-ichesur-bukwadbogwa bila-onodanimalad. Bab-Jehováʼye, bee be anmar-Bab-Dummadid. Dule begindi obinosulid.”
2CH 14:12 Bab-Jehová, Asa-wagab, degi, Judá-sordamar-wagab Etiopía-dulemar-ogalakusad. Degi, Etiopía-dulemar wakitemalad.
2CH 14:13 Degi-inigwele, Rey-Asa e-sordaganmala, Etíope-dulemar-wakitemaladi Gerar-neg-nugadse baregitemalad. Agine, bela Etiopía-dulemar girgusmalad, wargwensaar gwen durgussulid, ar ade, Bab-Jehová, Zera-sordamar-osulosad. Judá-sordamar, Etíope-ibe ibmar-bukidar susmalad.
2CH 14:14 Geb sorbali, Judá-sordamar Gerar-dikarba-neggweburmar-burwigana-bukwad osulosmarbalid. Geb agine, a-dulemar Bab-Jehová-dobgudmalad. A-ulale, Judá-dulemar bela e-ibe ibmar-bukidar-bukwad susmalad.
2CH 14:15 Deginbali, Judá-sordamar ibmar-durgan-bukwadgi ubodapmarbalid. Sibadmar, degi, sibad-wawaadmar bukidar susmalad, degi, moli-yargan-mureged bukidar sesmarbalid. Geb agine, Jerusalén-neggweburse gannar nonimalad.
2CH 15:1 Bab-Dummad-Burba, Obed-machi-Azaríasʼga gayaburba sognonigusad.
2CH 15:2 Azarías, Rey-Asa-abinguega e-abin noded. Geb degi, Azarías, Asaʼga sogded: “Rey-Asa, be nue an-itogo. Bela Judá-dulemar, degi, Benjamín-dulemar, nue an-itomarmogo: Bemar, Bab-Jehováʼba be nue nanamalale, Bab-Jehová bemarba-gudii guoed. Ar bemar, Bab-Jehová-amiele, Bab-Jehová be-amimarmogoed. Ar be Bab-Jehováʼgi bangumalardi, Bab-Jehová bemargi bangumarmogoed.
2CH 15:3 Israel-dulemar, dikasurgus-Bab-Dummad-napiragwad-wissuli bukwa gusmalad, degi, Bab-Dummad-Igargi emar-odurdakega, dule-irwa-Bab-Dummadse-goled-sate bukwa gusmarbalid. Degi, Bab-Jehová-Igar-Maid-suli gudii gusmarbalid.
2CH 15:4 Degi, Israel-dulemarga boni noargua, e-Bab-Dummad-Jehováʼba gannar nanadmalad. Geb Israel-dulemar Bab-Jehová-amidmargua, Bab-Jehová-amismalad.
2CH 15:5 A-ibagangi, dule-wargwensaarga neg-bogidikid naigussulid, yarmar-nanaidgi wile-itoleged-dummad negdaknai gusad.
2CH 15:6 Ar Bab-Dummad bela-bonigan-galagwensulidgi dulemar-surbinsa-itoge-imaksasoggu, dulemar yar-baid-baidgi-bukwamalad, na muchub-muchub oburgwidgusmalad. Degi, neggwebur na muchub-muchub obelobukwa gusmalad.
2CH 15:7 Degisoggu, gandik be samar, melle nollo be itomar. Ar ade, bemar ibmar-imakoed-anar, bega muchub ibmar uklegoed.”
2CH 15:8 Asa, Bab-Dummad-gayaburba-barsoged-Azarías Obed-e-machi, degi-soge itosgua, e-niga-ogannosad. Geb bela Judá-yarmargi, degi, Benjamín-yarmargi nuchu-mimmimar obelosad. Degi, Efraín-yalaganba neggweburmar-susbalidgi bela nuchu-mimmimar obelosbalid. Deginbali, Asa, Bab-Jehováʼga ibmar-ogumakar-ukleged-aila Bab-Jehová-e-neg-ubeb-asabin-siidi obinosbalid.
2CH 15:9 Geb degi, Asa, bela Judá-dulemar, degi, Benjamín-dulemar bular-oambikusad. Degi, dulemar-Efraín-yargi, Manasés-yargi, degi, Simeón-yargi danimaladi, Judá-dulemarba ambikusmarmogad. Ar amar daksamalad, e-Bab-Dummad-Jehová Asaʼba nue-nai. Degisoggu, Israel-dulemar bukidar Asaʼba nagudmalad.
2CH 15:10 Amala, Asa birgambe-gakatar (15) gaka nii-warbaagus yar-semaidgi, Jerusalénʼgi ambikusmalad.
2CH 15:11 A-ibagine, dulemar Bab-Jehováʼga moli-bebe-nikad dulataled-ilagugle (700), degi, sibad-wawaad miligugle (7,000) ogumakar uksamalad. A-ibmar-durgan e-isdarmaladgi susmaladid.
2CH 15:12 Degidgi, Jerusalénʼgi-ambikusmalad bela-bela na e-gwage-ulubgi sogsamalad, emarde, e-dadgan-e-Bab-Dummad-Jehováʼba nanadii gumaloye.
2CH 15:13 Deginbali, amar na sogsamarbalid: “Doa-dule Israel-e-Bab-Dummad-Jehová-amisulile, oburgwilegoye: Dule-dummaddibe, dule-bipigwaddibe, dule-machereddibe, omedibe, oburgwilegoye.”
2CH 15:14 Deyobi, bela sabsur-gotemalad, Bab-Jehováʼga sabsur-ise-sogar-sogsamalad, degi, gar-trompeta ogochamarbalid, degi, sibad-wawaad-e-bebe ogochamarbalid.
2CH 15:15 Ar ade, bela Judá-dulemar gwagegi-itogedba Bab-Jehováʼga-ise-sogar-imaksamaladba weligwar-itosmalad. Degi, amar, ulubgi nue-napiragwadba Bab-Jehová-amismalad. Geb degine, Bab-Dummad dulemar nabir e-amiega imaksad. Degisoggu, Bab-Jehová bela Judá-dulemarga neg-bogidikid nasiksad.
2CH 15:16 Deginbali, Rey-Asa, e-muu-Maaca suargi-bab-dummad-bundor-Asera-sobsadbali, e-muu nug-dummarba-nikadi osulosad. Degi, Rey-Asa, Asera-suargi-soblesad mamarisad, degi, Cedrón-dian-naba ogumaksad.
2CH 15:17 Ar Rey-Asa Bab-Dummadba inniki nanadigus-inigwele, Israel-yargi aila-matusurmalad-bukwad obelossur gusad.
2CH 15:18 Degi, Rey-Asa, Bab-Dummadse-goled-negse e-bab-ibmar-Bab-Dummadga-uksa-gusadi, degi, e uksagusmogadi senonikid: Mani, olo, degi, ibmar-nuegan-Bab-Dummadse-goled-neggi-ebulemalad.
2CH 15:19 Degi, Rey-Asa yar-semai-gusgua, birga-dulagwen-gakambe-gakatarse (35) bar bila-onoledii gussulid.
2CH 16:1 Rey-Asa birga-dulagwen-gakambe-gakanergwagus (36) yar-semaidgine, Israel-rey-Baasa, Judá-yargi bila-onos gusad. Degine, Ramá-neggwebur gandik sisad. Adi, bela dulemar Judá-yargi Asa-negsemaidgi mer dogega, degi, mer noegarba.
2CH 16:2 Geb degine, Rey-Asa, Bab-Jehováʼse-goled-neggi, degi, reyneggi mani-bukwad, or-bukwad onisad. Geb a-ibmar Siria-rey-Ben-Adadʼga barmisad. Ben-Adadʼde, deun Damasco-neggweburgi Siria-reyga maid.
2CH 16:3 Deginbali, Rey-Asa, Ben-Adadʼga gayaburba barmiargusad, ega sogsiid: “Ar igi be-bab, an-babbo igar-mesisgusa, deyobi, anmar igar-mesmarmoga. An bega mani, olo barmisiid, adi, be anse dagegar. Israel-rey-Baasaʼbo be-igar-maid be osuloge, adi, a-dule an-yargi banguegar.”
2CH 16:4 Ben-Adad, Rey-Asa-ega-sogsad nabir-itosad. Degisoggu, Ben-Adad bila-onomalad-e-dummagan barmisad, Israel-neggweburmargi bila-onogegar. Degidbali, Ben-Adad we-neggweburmar susad: Ijón, Dan, Abel-Maim, degi, Neftalí-yargi bela neggweburmar-bukwadgi ibmar-saboged-negmar-siid susad.
2CH 16:5 Rey-Baasa deyob-wisgusgua, Ramá-neggwebur-gandik-sinaid metebini imaksad, bar sobsasulid. E-ibmar-imaknaid bar imaksasulid.
2CH 16:6 Geb degidgine, Rey-Asa bela Judá-dulemarse gochad. Baasa, Ramá-neggwebur gandik-sinaigua, akwamar-ebusadi, urgomar-ebusadi searmalad. A-ibmargi, Rey-Asa Geba-neggwebur sobsad, degi, Mizpa-neggwebur sobsabalid.
2CH 16:7 A-ibagangi, negburgan-daked-Hanani, Judá-Rey-Asaʼse noni gusad, degi, ega sognonikid: “Be-Bab-Dummad-Jehováʼgi be bensuli guoenad. Ar emidi, Siria-e-reygi be bensuli-gusad-ulale, Siria-e-sorda-bila-onomalad begi wakichad.
2CH 16:8 Ar Etiopía-dulemar, degi, Libia-dulemar, sorda-bila-onomalad-bukidar nikanad, ur-napaginmalad, degi, dulemar-moligi-bila-onomalad-bukidar nikamarbalinad, degi-inigwele, ar Bab-Jehová be egi bensuli-gunonikid-ular, we-dulemar bega urmaksad.
2CH 16:9 Ar Bab-Jehová, bela napneg-naid dakmaid, degi, dulemar-egi-bensurmalad-bendakegala guagwar maid. Ar be gegegwaga gussoggu, emi iba-onodoed-akale, bila-onogedbi be gudii sadeguoed.”
2CH 16:10 Geb degine, Rey-Asa dule-negburgan-daked-Hanani ega-ibmar-sogsad-itosgua, e-abin nue-sae-itosad, esgaryagi meted. A-ibagine, Asa dule-gwenna-gwenna sabsur-apor imaksabalid.
2CH 16:11 Degi-inigwele, Asa-e-nanasad, gebe e-ibmar-imakalid, berguedsega ibmar-imaksad, bela Judá-reymar-e-gardagi, degi, Israel-reymar-e-gardagi narmakar maid.
2CH 16:12 Asa birga-dulagwen-gakambe-gakabakebakgus (39) yar-semaidgi, e-naggi boni nikualid. Ar boni-dummad e-naggi nika-inigwele, Bab-Jehováʼgi binsassulid, aka bur ina-duledmarse gochad.
2CH 16:13 Degi, Asa birga-dulabo-gakagwensakgus (41) yar-semaidgi burgwenonikid. Degi, e-dadgan-mamaid-abargi diglesmogad.
2CH 16:14 Asa David-neggweburgi na e-neg-uan-sobsa-gusadgi digsamalad. Ulugwagi Asa-mesismargu, ina-wawadikid, degi, dii-ina-wawadikmalad-akar-akarad-dutusur-yapanmalad egi oubosmalad. A-ina-dii dulemar-egi-nergusmalad imaksad. Asa-e-nug-odummogega soo-dummad ogasmalad.
2CH 17:1 Rey-Asa burgwisgu, e-machi-Josafat Judá-yar-seega megnonikid. A-reyde, Israel-dulemar-abin gandik megnonikid.
2CH 17:2 Josafat, bela Judá-yargi neggwebur-gandikmaladgi sorda-bila-onomalad urbisad. Geb degi, Judá-yargi sordagan-bila-onomalad nakulegega urbisbalid. Degi, Josafat, e-bab-Asa-Efraín-neggweburmar-susgusbalidgi, sordamar-nakulemalad urbisbalid.
2CH 17:3 Bab-Jehová, Josafatʼba gudii gusad, ar ade, Josafat, e-dad-David-nanasayobi nanasmogad, bab-dummad-Baalʼmarba nanassulid.
2CH 17:4 Ar Josafat, e-dad-e-Bab-Dummad-Jehová amisad, a-Igar-Maidba nanadii gusad. Degisoggu, Israel-dulemaryobi gudii gussulid.
2CH 17:5 A-ulale, Bab-Jehová, Josafat-yar-semaid bur bule ogannosad. Bela Judá-dulemar Josafatʼga binsa-ibmar-ukega senonidamalad. Degisoggu, Josafat, ibmar-nuegan-bukidar nikusad, degi, e-nug ogannolesbalid.
2CH 17:6 Josafat, Bab-Jehová-Igarba-nanaedgi nue-gannaleded. Degi, Josafat Judá-yargi bab-dummad-baiganse-gormalad-e-aila-matusulid osulosad, degi, bab-dummad-bundor-Asera-sobaled osulosbalid.
2CH 17:7 Degi, Josafat birgapaagus-yar-semaidgi e-dummagan-barmisad, adi, Judáʼgi neggweburmar-bukwadgi dulemar-odurdakegar. E-dummagan-barmilesmalad, wemalad: Ben-Hail, Abdías, Zacarías, Natanael, degi, Micaías.
2CH 17:8 Josafat amarba Levita-dulemar-barmisbalid. A-Levita-dulemar, wemalad: Semaías, Netanías, Zebadías, Asael, Semiramot, Jonatán, Adonías, Tobías, degi, Tobadonías. Degine, dule-irwa-Bab-Dummadse-gormalad barmilesmarmogadi, wemalad: Elisama, degi, Joram.
2CH 17:9 Wemar Bab-Jehová-Moisésʼga-Igar-Mesisad-Garda sesmalad, adi, Judá-yargi Bab-Jehová-Igar-Maidgi dulemar-odurdakegar. Degisoggu, bela Judá-yargi neggweburmar-bukwadgi bipirmaksamalad, dulemar-bukwad odurdakegar.
2CH 17:10 Bela reymar Judá-yar-dikarba yarmar-nanaidgi-mamaid Bab-Jehová-dobee-ito nadmalad. Degisoggu, amar Josafatʼgi bar bila-onobi nadsurmalad.
2CH 17:11 Filistea-dulemar neggwebur-bennukega mani Rey-Josafatʼga senonidamalad. Deginbali, Filistea-dule-gwenna-gwenna ega ibmar binsa senonidamarbalid. Deginbali, Árabe-dulemar neggwebur-bennukega Josafatʼga sibadmar miligugle gaka dulataled-ilagugle (7,700) senonimalad, degi, sibad-wawaad-machergan miligugle gaka dulataled-ilagugle (7,700) senonimarbalid.
2CH 17:12 Josafat nue nug-dungumai guded. Geb Judá-yargi neggweburmar-gandik urbisad, degi, negmar-ibmar-sabomalad sobsabalid.
2CH 17:13 A-uki, Judá-yargi neggweburmar-bukwadgi ibmar-gulleged-bukidar sabosbalid, degi, Jerusalénʼgi sordamar-bila-onoged-gandikmalad nikusbalid.
2CH 17:14 We-sorda-dummagan-e-nugmar e-babgan-gardagi-mamaidi, wemalad: Judá-yargi sordamar-miliba-mergued-e-dummagan (1,000), wemalad: Adnas sordamar-e-dummadid. A-dummadbali, sordamar-gandikmalad, mili-dulataled-ilapaa-mergue (300,000) gudimalad.
2CH 17:15 Adnas-yarbali, Johanán sordamar-e-dummadmogad. A-dummadbali, sordamar-gandikmalad, mili-dulataled-ilabo gaka dulabake-mergue (280,000) gudimalad.
2CH 17:16 Johanán-yarbali, Zicri-machi-Amasías sordamar-e-dummadmogad. We-dule na e-itogedba Bab-Jehováʼga-an-arbaoye sogsa gusad. Amasíasʼba sorda-gandikmalad, mili-dulataled-ilabo-mergue (200,000) gudimalad.
2CH 17:17 Benjamín-e-dummagan, wemarmogad: Eliada, sordamar-e-dummadid. A-dummadbali, sorda-gandikmalad sigu-nika, sigu-abgaed-nika guar-guar-gudimaladi, mili-dulataled-ilabo-mergue (200,000) gudimalad.
2CH 17:18 Geb baid-dummad nugbalid, Jozabad. A-dummadba sorda-bila-onomalad, mili-dulabakebak-mergue (180,000) gudimalad. We-sordamala bila-onogega guagwar gudidimalad.
2CH 17:19 Bela we-dulemar reyga-arbamaladid. Degine, Rey-Josafat, Judá-yargi neggweburmar-gandik-bukwadgi sordamar-urbisaddi obarlesulid.
2CH 18:1 Josafat ibmar-nuegan-bukidar nikusad, degi, nug-dummarba megisad. Josafat, Rey-Acab-e-sisgwa-nikunonikidba Acabʼba nagunonikid.
2CH 18:2 Geb degine, birgamar-nasad-sorba, Josafat, Samaria-neggweburse Acab-daknad gusad. Agi, Acab, Josafatʼga, degi, e-bardakmaladga sibad-wawaad-bukidar, degi, moli-bebe-nikad-bukidar oburgwisad. Agine, Acab, Josafat-binsaed gasad, eba Ramot-De-Galaad-neggweburse bila-ononaegar.
2CH 18:3 Degi, Israel-rey-Acab, Judá-rey-Josafatʼse egichided: —¿An Ramot-De-Galaadʼse bila-ononaye-sogele, be anba nadmogale? Josafat, Acab-abin sogded: —An guakwagwa, degi, an-sordamar guakwamogad. Anmar beba bila-ononamarmogoed.
2CH 18:4 Degi-inigwele, anmar naoed-iduale, bin be Bab-Jehováʼse-idakgwerdo.
2CH 18:5 Degisoggu, Israel-rey-Acab, Bab-Dummad-gayaburba-barsogmalad-dulataled-ilabake-merguedse (400) gochad, geb ese egichided: —¿Anmar Ramot-De-Galaadʼse bila-ononaoe, ononaosuli? Bab-Dummad-gayaburba-barsogmalad Acab-abin sogdemalad: —Be bila-ononae. Ar ade, Bab-Dummad bega amar-urmakoed.
2CH 18:6 Degi-inigwele, Josafatʼdi, sogded: —¿Bab-Jehová-gayaburba-barsoged-baid wegi gudisuli? Adi, anmar ase idakbaligar.
2CH 18:7 Israel-e-rey, Josafat-abin sogded: —Wegi, dule-wargwen amba gudiid. A-dule, Bab-Jehováʼse sunna anmarga idaked. Degi-inigwele, we-dule an-isdaradid, ar anga igar-nued gwen sogdasulid. Ibmar-isganabi anga sogdaed. We-dule, Micaíasʼdo, Imla-e-machi. Rey-Josafat, Rey-Acab-abin sogded: —Melle deyob be soge.
2CH 18:8 Degidgine, Israel-e-rey e-sorda-dummad-wargwense-gocha ega sogded: —Imla-machi-Micaías anga nidago.
2CH 18:9 Israel-e-rey, degi, Judá-rey-Josafat, Samaria-neggwebur-dogedgi e-rey-ganmargi na simalad, deginbali, e-reymor-yoi-yoi simarbalid. A-reymar-ebogwad-asabinni, Bab-Dummad-gayaburba-barsogmaladi, Bab-igar-barsognanai guarmalad.
2CH 18:10 Degi, Quenaana-machi-Sedequías, moli-bebeyob esgoro sobsad. Sedequías sogded: —Weyob Bab-Jehová soged: ‘We-moli-bebeyobidgine, bemar Siria-sordamar-obelogedse imakoye.’
2CH 18:11 Bela Bab-Dummad-gayaburba-barsogmalad weyob sogbukmarmogad: —Ramot-De-Galaadʼse be bila-ononae, ar ade Bab-Jehová a-dulemargi nakwega bemar-imakoed.
2CH 18:12 Geb degine, dule Micaíasʼse-gorapid, Micaíasʼga sogded: —Micaías, be dakena. Bela Bab-Dummad-gayaburba-barsogmalad balibi reyga ibmar-nueganbi sognonimalad. Degisoggu, amar-sogeyob be ibmar-nueganbi an sogbi be-abemogo.
2CH 18:13 Geb degine, Micaías sogded: —Bab-Jehová-Dula-Maid-nuggi inniki an bega sogdo, a-anga-ibmar-sogoedba, an reyga ibmar sogmogoed. Geb degi, Micaías reyse nadsunnad.
2CH 18:14 Rey geb ega sogded: —Micaías, ¿Anmar Ramot-De-Galaadʼse bila-ononaoe, ononaosuli? Micaías abin-sogded: —Ar be namardo. Ar Bab-Dummad be-bendakmalosoggu, be nakwemaloed.
2CH 18:15 Rey ega sogded: —Ar ilabigwa-wilub an bega ise-sogar saergebe, be anga nue-napira ise-sogar Bab-Jehová-nuggi be imakye.
2CH 18:16 Agine, Micaías abin-sogded: —Bela Israel-dulemar yar-imbaba duurmakmamai an daksad. Igi sibad-wawaad, e-akwedsuli yogasaar gudidae, deyobi Israel-dulemar gudidinanaed. Degi, Bab-Jehová sogded: ‘We-dulemar dummad-sate gudidimalad. Degisoggu, nuedgi e-neg-e-negse namarsunno.’
2CH 18:17 Israel-rey-Acab, Josafatʼga sogded: —¿Nue be daksa, igi an bega sogsa? We-dule ibmar-nued anga sogdasurye. Ibmar-isganabi anga sogdaed.
2CH 18:18 Geb degine, Micaías sogdebalid: —Bab-Jehová-e-gayaburba nue be itomar: Bab-Jehová e-rey-gangi-sii an daksad. E-sordagan-nibarmalad e-argan-nuedsik-bukwa, degi, e-argan-sapiledsik-bukwa an daksabalid.
2CH 18:19 Geb degi, Bab-Jehová amarse egichided: ‘¿Doa Israel-rey-Acab-e-binsaed-ganaoe, adi, Ramot-De-Galaadʼse bila-ononaega, agi Acab burgwega?’ ”Degi, burba-gwensak ibmar-sognaigualid, degi, baiddi akar sogdemogad.
2CH 18:20 Degidgine, burba-gwensak Bab-Jehová-asabin gwisgunonikid, ega sogded: ‘Ani an e-binsaed-ganaoe.’ ”Degi, Bab-Jehová ega sogded: ‘¿Igi be imakoe?’
2CH 18:21 ”Degi, burba abin-sogded: ‘An naogu, burba-gakansaedga an guodo. Bela-Bab-Dummad-gayaburba-barsogmalad-gakansaega an imakoed.’ ”Geb Bab-Jehová abin-sogded: ‘Deyob be imaknado. Be e-binsaed-gaoed.’
2CH 18:22 ”A-ulale, emidi, Bab-Jehová, burba-gakansaed bela Bab-Dummad-gayaburba-barsogmalad-gakansaega imaksad. Ar ade, Bab-Jehová sogsad, be-obelogoye.”
2CH 18:23 Quenaana-machi-Sedequías, deyob-itosgua, Micaíasʼse nonikid, geb wagargi bibyosad, degi, ega sogded: —¿Igi be soge? ¿Bab-Dummad-Burba bar angi maisursunde? ¿Begarbi bega sunmaksaye be sogsunde?
2CH 18:24 Micaías abin-sogded: —We-ibmar an bega sogsad gunonikile, magar be itononikoed nue-nabir-dakleye. A-ibagi be dukudii gudoed.
2CH 18:25 Agi geb Israel-e-rey igar-ukded, weyob sogded: —Micaías be gamalo, saila-Amón-neggwebur-dakmaidse be sedmalo, degi, an-machi-Joásʼse be sedmarbalo.
2CH 18:26 Ega be sogmalo, rey wegii sogye: ‘Esgaryagi be Micaías-metoye. An nuedgi gannar aibiroedsega, unnila maduginbi be ogunmaloye, degi, diiginbi-ogobmarbaloye.’
2CH 18:27 Micaías sogded: —Ar gannar nued be aibilisale, degirdi, Bab-Jehová anga sunmaksasurdo. Degi, sogdebalid: —Bela an-ibmar-sogsad nue be ebinsamalo.
2CH 18:28 Geb degine, Israel-e-rey, Judá-rey-Josafatʼbo, Ramot-De-Galaadʼse nadmarsunnad.
2CH 18:29 Degi, Israel-rey-Acab Josafatʼga sogded: —An-wagar-mer-daklegega mor-baid-yoi bila-onolenaidse an dogoed. Bedi reymor-yoi be dogoed. Degisoggu, Israel-e-rey baid-mor-yoi, bila-onolenaidse dogdesunnad.
2CH 18:30 Siria-e-reydi e-sorda-ur-napagined-dakmalad-dummaganga igar-uksad: “Unnila Israel-e-reybobi be urwemalo. Dule-bamaladsedi, mer be achamalo. Dule-dummaddibe, dule-yogasaleddibe, mer ese be achamalo.”
2CH 18:31 Ur-napagined-dakmalad-dummagan Josafat-daksamargu, binsadmalad: “We, Israel-e-rey.” Degisoggu, Josafat-ebilis ambikusmalad, egi gwichigunonikid. Geb degi, Josafat Bab-Jehováʼse sabsur-gotegu, Bab-Jehová, Josafat-bendaknonikid. Bab-Dummad Siria-sordamar Josafatʼgi-banguega imaksad.
2CH 18:32 Ur-napagined-dakmalad-e-dummagan, Israel-e-reysuli Josafat-daksamargua, bar ese achassurmalad.
2CH 18:33 Degi-inigwele, sorda-gwensak yogasaar sigu-mechargu, Israel-e-reygi yolenonikid, e-urwed-mor-yoid-imbaba gwisgunonikid. Degi, Israel-rey-Acab dule-e-ur-napagined-seedga sogded: “Be aibire, neg-olloledsik be anga nae, bela-bela an nue-nailikgusad.”
2CH 18:34 A-ibagine, ululeged baligannos-naisoggu, Israel-e-rey e-ur-yagi gwisgussunnad. Deyob, Siria-sordamar-dakgwichi neg-osedosad. Dad-argwategu, Israel-e-rey-Acab burgwisad.
2CH 19:1 Judá-e-rey-Josafat, bonisuli Jerusalénʼgi e-negse nonigu,
2CH 19:2 dule-negburgan-daked-Hanani-machi-Jehú ese ataknonikid, degi, ega sognonikid: “¿Ibiga dule-isgana-bendakye be soge? ¿Dule-Bab-Jehová-isdar-dakmalad be sabde? Weyob be ibmar-imaksad-ulale, Bab-Jehová-sae-itogedba begi gwisgusad.
2CH 19:3 Degi-inigwele, be we-ibmar-nuegan imaksabalid: Bab-dummad-bundor-Asera-wagar-wilub-sobaledi we-yargi be osulosad. Degine, be-gwage-ulubgi be bela-bela Bab-Dummadgi bensuli gunonibalid.”
2CH 19:4 Josafat Jerusalénʼgi megnoni-inigwele, gannar e-dulemarse ataknade gusad. Beerseba-neggwebur-akale, Efraín-yalagan-nanaidsega atakdii gusad. Adi, dulemar-bukwad, e-dadgan-e-Bab-Dummad-Jehováʼba nanamalagar.
2CH 19:5 Degi, Josafat Judá-yargi bela-neggweburmar-gandik-bukwadgi igar-nabomalad-dummagan-nug-imaksabalid.
2CH 19:6 Degi, Josafat igar-nabomalad-dummaganga sogded: “Bemar ibmar-imakedgi nue be salakarmar, ar ade, duleyobi be igar-nabirogosulid, Bab-Jehová-nuggi be igar-nabomaloed, dulemar-nugginsulid. Bemar igar-naboalile, Bab-Jehová bemar-abargi sii gumogoed.
2CH 19:7 Degisoggu, Bab-Jehová-dobee be gudii gumalo. Degine, ibmar be imakarmalale, nue-itoakwaa imakmalo. Ar ade, anmar-Bab-Dummad-Jehová igar-isgana-imaked abesulid. Deginbali, Bab-Jehová dule-wargwensaar obansulid, emarbi dule-daked. Degine, manigi dulemarse geg binsaed-galeged. Degisoggu, nue salakarmalo.”
2CH 19:8 Deginbali, Josafat, Bab-Dummadse-dule-irwa-gormalad Jerusalén-neggweburgi urbisad, degi, e-bendakmalad-Levita-dulemar urbisbalid. Degine, Israel-e-neguya-e-dummagan, Bab-Jehová-Igar-Sogmaidba igar-nabogega urbisbalid. Amarde, Jerusalénʼgi mamaimalad.
2CH 19:9 Geb degine, Josafat amarga sogdebalid: “Amba deyobi Bab-Jehová-dobekwaa, napiragwadgi, degi, innikigwadgi be gudii gumalo.
2CH 19:10 ”Be-gwenadgan neggweburmar-baiganginmalad, boni-nika bese danimalale: Na ablis-eosmaladgindibe, Moisés-Igar-Maidgindibe, Bab-Dummad-Igar-odurdaklemaidgindibe, ega be we-Igarmargi sunmakoed, ega weyob be sogoed: ‘Mer Bab-Jehováʼgi be isgumarye.’ Adi, mer Bab-Jehová-sae-itogedgi bemar odurdaklegegarye, degi, be-gwenadgangi mer yolebaligarye. Ar deyob be imakmalale, begi ataklegosulid.
2CH 19:11 ”Dule-irwa-Bab-Jehováʼse-goled-Amarías bela Bab-Jehová-Igar-Maidsik, be-odurdakmaloed. Degi, Ismael-machi-Zebadías, Judá-wagan-e-iduedga gudiid. A-dule bela rey-igarmar-mamaidgi bemar-odurdakoed. Deginbali, Levita-dulemardi, bemar-abargi dummaganga gumarmogoed. Degisoggu, gandik be imakmar, arbamarsun. Bab-Jehová, dule-ibmar-nued-imakedba gudii guoed.”
2CH 20:1 We-ibmar-gusad-sorba, Moab-sordamar, Amón-sordamar, degi, abar Meunita-sordamar, bular-danimalad, Rey-Josafatʼgi bila-onogegar.
2CH 20:2 Degine, gwenna-gwenna Josafat-owisoapmalad, ega sogdapmalad: “Sordamar-bukidar Siria-yar-akale, Demar-Gagbid-obakar bebina itos danimarye. A-dulemar bato Hazezon-Tamarʼye-neg-nugadgi bukwamarye. We-negde Engadiʼye nugbalid.”
2CH 20:3 Josafat nue-dobe-ito-nadedba, na Bab-Jehováʼse idakded. Degine, Josafat, bela Judá-yargi gayaburba mimisad, Bab-Dummadse-golega mer mas-gunmaloye.
2CH 20:4 Geb degine, Judá-yargi bela neggwebur-baigangi-dulemar-bukwad nonimalad, adi, bulale, Bab-Jehováʼse bendakleged egisegar.
2CH 20:5 Geb degidgine, Josafat, Bab-Jehováʼse-goled-neggi, neg-imba-bini-naid-asabin gwisgusad, Judá-dulemar-asabin, degi, Jerusalénʼginmalad-asabin.
2CH 20:6 Sogded: “Anmar-dadgan-e-Bab-Dummad-Jehováʼye, bee be nibneggi Bab-Dummadga maid. Bee be yarmar-baid-baid-nanaid semaid. Bee be gargandik maid. ¿Doa be-gangued-abin gwisguoe? Dule-gwisgued sate.
2CH 20:7 Anmar-Bab-Dummad, bee be Israel-dulemar-wagab, we-yargi dulemar-bukwad onisad. Bee, be-ai-Abraham-e-waganga, a-yar degisadegu ega be uksad.
2CH 20:8 Abraham-e-waganmar we-yargi-ambikunonimalad, degi, be-nuggi bese-goled-neg sobsamalad. ”Geb degine, sogdemalad:
2CH 20:9 ‘Ar anmargi boni-dummad danikile, es-suidba-galitogeddibe, uelleged-dummaddibe, igi, ukud-dummaddibe, agi, anmar be-nuggi bese-goled-negse be-asabin bular ambikunonimalale, degi, wile-itogedba anmar binnasur bese gotemalale, be anmar-itogoed, be anmar-bendakoed.’
2CH 20:10 ”Anmar-Israel-dadgan Egipto-yargi noarmargua, Amón-dulemar-yargi, Moab-dulemar-yargi, degi, Seir-yargi dogmalad be abessurgusad. Aka be anmar-dadgan baid-igarba be barmis gusad, adi, mer anmar-dadgan, we-dulemar-bukwad osulogegar.
2CH 20:11 Emidi, aka we-dulemardi be-anmarga-yar-uksadgi gandikidgi anmar-ononno-danimalad.
2CH 20:12 Anmar-Bab-Dummadye, ¿a-dulemar be apor-odurdakosurde? Ar anmardi we-sordamar-bukidaradgi bila-onogega gargangued sated. An wissurmalad, igi an imakmaloe. Degisoggu, bese an idakmarsundo.”
2CH 20:13 Bela Judá-dulemar, Bab-Jehová-asabin gwigwichimalad, e-omeganse-bakar, e-machimalase-bakar, degi, e-mimmi-bipiganase-bakar, gwigwis nanaed.
2CH 20:14 Geb degine, dulemar-igar-itobukwadgi Bab-Jehová-Burba, Zacarías-machi-Jahazielʼgi ubononikid. Jahaziel e-dad-dummad-Asafʼgi wemargi danikid: Levita-dule-Matanías. Matanías-machi, Jeiel. Jeiel-machi, Benaía. Benaía-machi, Zacarías. Degisoggu, Zacarías, Jahaziel-e-babad.
2CH 20:15 Degi, Jahaziel sogded: “Rey-Josafat, nue itogo. Degine, Judá-dulemar, Jerusalén-dulemar, nue itomarmogo. Bab-Jehová weyob bemarga soged: ‘Mer sorda-bukidar-danikid-abin gwayemalo, mer dobgumalo. Ar bemar bila-onogosurmalad, ani an bila onogoed.
2CH 20:16 Banedse abin be aidedmalo. Sorda-bila-onomaladdi, Quis-yar-nakwilemaidgi nakwedanimaloed. Geb degine, Jeruel-neg-dulesulidganse-moed-iduar, dian-maidgi be a-sordamar-abingunonimaloed.
2CH 20:17 Bemardi, melle ese be achamalo. Bogi be ambikumalo. Be dakmaloed, ani, Bab-Jehová, igi an bemar-bendakoe. Judá-dulemar, degi, Jerusalén-dulemar, mer be dobgumalo, mer galakumalo. Banedse amar-abin be namalo, ar ade, ani, Bab-Jehová, an bemarba gudioed.’ ”
2CH 20:18 Degidgi, Josafat, degi, bela Judá-dulemar, degine, Jerusalén-dulemar Bab-Jehová-nug-odummogega napase dulluu Bab-Jehová-asabin imaksamalad.
2CH 20:19 Geb Levita-dulemar-Coat-e-wagan, degi, Levita-dulemar-Coré-e-wagan, gandikidgi Israel-Bab-Dummad-Jehová-nug-odummogega gwisgusmalad.
2CH 20:20 A-banedgine, Judá-sordamar wakudaryala gwisgusmargua, Tecoa-nega-dulesulidganba nadmarsunnad. Degi, sordamar-irmakmaidgine, Josafat gwisgusad, sogded: “Judá-dulemar, Jerusalénʼginmalad, nue itomalo: Bonisuli be gudii gumalagala, mer be be-Bab-Dummad-Jehováʼgi bengumalo. Bab-Jehová-e-gayaburba-barsogmaladgi mer be bengumarbalo, adi, bega igar-nueganbi guegar.”
2CH 20:21 Geb degi, Josafat dulemarga ibmar-sogsad-sorba, dulemar susad, adi, amar Bab-Jehová-nug-odummogega, degi, sordamar-idumaidgi namakegar. We-namaklegedgi namakegar: “Bab-Jehová-nug odummomala, e-sabguedi degisadeguad.”
2CH 20:22 Judá-dulemar Bab-Jehová-nug-odummogega namakdemalad. Geb agine, Bab-Jehová, Amón-sordamar, Moab-sordamar, degi, Seir-Yar-sordamar Judá-dulemargi-bila-onogega-danimalad na muchub-muchub aibinmalaga e-igar oburusad. Deyobi, Bab-Jehová amar-ogalakusad.
2CH 20:23 Ar Amón-sordamar, Moab-sordamarbo, Seir-yarginmaladgi gwisgudmalad. Geb bela Seir-sordagan-ogilosmalad. A-sorbali, Amón-sordamar, degi, Moab-sordamar na muchub-muchub bela-osulogedse e-sordamar-ogilosmalad.
2CH 20:24 Geb degi, Judá-dulemar e-isdarmalad-bukidarad-dakega, nega-dulesulidganba nebasik ataknonimalad. Unnila dulemar-burgwar-burgwar napagi omilede dakarmalad. Wargwensaale gwen wakichasulid, bela burgwismalad.
2CH 20:25 Geb degine, Josafat, e-dulemarbo ibmar-nuegan-mileded-sunaega nadmarsunnad. Geb degi, burgwarmalad-abargi ibmar-nuegan-bukidar amismalad: Mormar-nuegan, ibmar-nuegan-yeerdaklemalad susmalad. Ar ibmar bukidarsoggu, geg bela seda gusmalad. Ibapaa ibmar-wenanai gusmalad, ar ade, ibmar yaisulid.
2CH 20:26 Ibabakegusgu, Beraca-nebagi bular ambikunonimalad. Agi, Bab-Jehová-nug-odummosmalad. Agala, a-neba Beraca-Nebaye onug-imaksamalad. We-garda-narmaklenaidse amba deyob nugad.
2CH 20:27 A-sorbali, bela Judá-dulemar, degi, Jerusalénʼginmalad, Josafat emar-idumai, weligwaledba Jerusalén-neggweburse gannar nonimalad. Ar ade, Bab-Jehová e-isdarmaladgi emar-bendaksad.
2CH 20:28 Degi, Jerusalénʼse nonimargu, Bab-Jehováʼse-goled-negse nadmalad. We-garmar-ogornadapi ubodapmalad: Gar-salterio, gar-arpa, degi, gar-trompeta. We-garmar-abargi ubodapmalad.
2CH 20:29 Dulemar wisgusgua, Bab-Jehová Israel-isdarmaladgi gwichigusye, bela we-napneggi dulemar-bukwad Bab-Jehová-dobgudmalad.
2CH 20:30 Geb degi, Josafat-negsemaidgi neg bogidik-nagunonikid, ar ade, Israel-Bab-Dummad bela neggwebur-iliba bogidikid neg-nasiksad.
2CH 20:31 Josafat birga-dulagwen-gakambe-gakatar-nikadgi (35), Judá-yar-sealid. Jerusalénʼgine birga-dulagwen-gakatar (25) negsesad. E-nandi Azubaʼye nugad Silhi-e-sisgwad.
2CH 20:32 Josafat, e-bab-Asa-nanasayob nanadii gusad. A-igargi gwen bangussulid. Degisoggu, ibmar-nueganbi Bab-Jehová-asabin imakdii gusad.
2CH 20:33 Degi-inigwele, bab-dummaganse-goled-aila-matusulid-bukwad osulossulid. Deunni, Judá-dulemardi e-gwagegi amba e-dadgan-e-Bab-Dummad yoo nue-napira amimalad.
2CH 20:34 Rey-Josafat ibmar-baigan imaksabalid. A-ibmar gebesaila-imakded-akale, e-berguedsega, Hanani-machi-Jehú-gardagi narmakar maid. Degine, Israel-reymar-garda-maidgi narmakar maibalid.
2CH 20:35 We-ibmar-nasad-sorba, Judá-rey-Josafat, Israel-rey-Ocozíasʼbo ai-nued gunonikid. Ocozíasʼde, dule-isganad.
2CH 20:36 Urmar-sobega na ebo atosmalad, adi, a-urmar Tarsis-yarse nanaegar. Ezión-Geber-neg-nugadgi urmar sobsamalad.
2CH 20:37 Degidgine, Maresaʼgined-Dodava-machi-Eliezer Josafatʼga sunmaknonikid, ega sogded: “Rey-Ocozíasʼbo be atossoggu, be ibmar-imaknaidi Bab-Jehová bei obelogoye.” A-ulale, e-urmar dogsad bela mamarnonikid. Tarsisʼse geg bar nae gussunnad.
2CH 21:1 Josafat burgwisgua, David-neggweburgi e-babgan-diglesadgi digsamalad. A-sorbali, e-machi-Joram yar-seega megnonikid.
2CH 21:2 Joram-e-urbamala, wemalad: Azarías, Jehiel, Zacarías, Azarías, Micael, Sefatías. Bela wemar, Judá-rey-Josafat-e-masmala gumalad.
2CH 21:3 E-bab-Josafat e-masmalaga we-ibmar-bukidar uksad: Ormar, manimar, ibmar-gargerbamalad. Deginbali, Judá-yargi neggwebur-gandikmalad ega uksabalid. Ar Joram machi-sailaginedsoggu, yar-seega megnonisunnad.
2CH 21:4 Joram e-bab-gangi-signonigua, bela es-suidgi e-urbamar-oburgwisad, degi, Israel-dummagan-gwenna-gwenna-oburgwisbalid.
2CH 21:5 Joram birga-dulagwen-gakambe-gakabo-nikadgi (32) yar-sealid. Degi, birgabaabak (8) Jerusalén-neggweburgi yar sesad.
2CH 21:6 Degi-inigwele, Joram, Bab-Jehová-asabin ibmar-isganabi imaksad. Israel-reymar-nanasadyob nanasmogad. Ar Joram, Acab-e-wagwa nikussoggu, Acab-e-waganyob ibmar-isganaba nanadii gusmogad.
2CH 21:7 Degi-inigwele, Bab-Jehová, David-e-wagwa-Joram yapa obelo gusad, ar ade, Bab-Jehová, Davidʼbo igar-mesisad. Davidʼga sogsagusad, be-nug degisadeguoye, surguosurye. Degi, be-wagan degisadegu rey-gangi sigdii guoye.
2CH 21:8 Deunni, Joram-negsemaid-ibagangi, Edom-dulemar Judá-yarse-selesiidgine Edom-dulemar egi gwisgudmalad. Geb agine, Edom-dulemar e-rey amismarmogad.
2CH 21:9 Degidgine, Joram, e-dummaganmala Edom-yarse nadmalad. Degi, bela e-moli-ur-bila-onomalad sesad. Geb degi, Edom-dulemar Joram-ebiris, degi, moli-ur-napagined-e-dummagan-ebiris bela ambikunonimalad. Agine, Joram, e-sordamar-abargi mutikidba Edom-sordamargi wakite gusad.
2CH 21:10 Joram, e-sordaganmala galakussoggu, a-akale, Edom-dulemar Judá-dulemarbo isdaradga gunonikid. Deyobi a-ibagangine, Libna-neggwebur Judá-dulemargi aibachamogad. Ar ade, Joram, e-dadgan-e-Bab-Dummad-Jehováʼgi aibachasoggu, deyob gusad.
2CH 21:11 A-ukinbali, Joram, Judá-yargi, yarmar-bukwadgi e-bab-dummaganse-goled-aila-matusurmalad sobsad, degi, Jerusalén-dulemar bab-dummagan-baiganse-golega imaksad. Degi, bela Judá-dulemar Bab-Jehová-iegega imaksabalid.
2CH 21:12 Degidgine, Bab-Dummad-gayaburba-barsoged-Elías Joramʼse garda barmialid. Weyob ega sogsiid: “Be-dad-David-e-Bab-Dummad-Jehová, weyob soged: ‘Be-bab-Josafatʼyobi be nanassurye, degi, Judá-rey-Asaʼyobi be nanassurbarye.
2CH 21:13 Aka bur be Israel-e-reymar-nanasayobi be yogasaar nanasye. Deginbali, Judá-dulemar, degi, Jerusalénʼginmalad, Acab-neg-oichosayobi bab-dummagan-baiganse-golega be imaksabarye. A-ukinbali, be-urbamar be-bab-mesamalad be ogilosbarye. Amar beba bur dule-nuegan nanaenaddeeye.’
2CH 21:14 A-ulale, Bab-Jehová boni-bulegangi be-dulemar sabsur-odurdakoed, degi, be-masmala, be-omegan, degi, bela be ibmar-nikad bei osulogoed.
2CH 21:15 Bab-Dummad-Jehová uelleged-dummad begi barmidagoed, bela-bela saban-nunmake be itogoed. A-boni iba-irbali baligannomai guoed, bei samur-oniedse be-imakoed.”
2CH 21:16 Geb degine, Bab-Jehová, Filistea-dulemar, degi, Árabe-dulemar Etiopía-dulemar-walik-bukwad, Joramʼgi-gwisguega imaksad.
2CH 21:17 Degisoggu, Filisteaʼmar, degi, Árabe-dulemar Judá-dulemargi gwichiguded, degi, Judá-yargi dogsamalad. Geb degi, reyneggi ibmar-nuegan-gargerbamalad-bukwad bela ibe susmalad. Joram-e-machimarse-bakar, e-omeganse-bakar, sesmalad. Unnila e-machi-bipigwad-Joacazʼbi napi-obesmalad.
2CH 21:18 Bela deyob-gusad-sorbali, Bab-Jehová Joram-sabsur-odurdaksad, saban-yaba boni-dummad-nikuega imaksad.
2CH 21:19 Degi, ibagan-suibasaar-nasad-sorbali, birgabogi Joram, samurgi-boni-nikadba ega samur ainided. Joram nue-naibid-abargi a-bonigi burgwisad. E-sordamar, e-dadgan-burgwisar ega soo-ogadamalayobi, Joram-nuggi, soo-dummad ogassurmalad.
2CH 21:20 Joram, birga-dulagwen-gakambe-gakabo-nikadgi (32) yar-sealid. Degi, birgabaabak (8) Jerusalén-neggweburgi yar-sesad. Joram burgwisgu, gwen eba bossurmalad. Degi, David-neggweburgi digsamalad, reymar-digar-mamaidgi diglessulid.
2CH 22:1 Jerusalén-dulemar, Joram-burgwisadbali, e-machi-bur-bipigwad-Ocozías, e-bab-Joram-sorba, reyga onugsasmalad. Ar ade, dule-isgana-danagwenad, Árabe-sordamarba Judá-dulemar-bukwadse-nonigusmaladi, Joram-machi-baigan ogilosmalad. Deyobi, Joram-machi-Ocozías Judá-yar-searsunnad.
2CH 22:2 Ocozías, birga-dulagwen-gakabo-nikadgi (22) yar-sealid. Degi, Jerusalén-neggweburgi birgagwen yar-sesad. E-nandi Atalíaʼye-nugad, Omri-e-wagwad.
2CH 22:3 Ocozías, Acab-neg-ichodii-gusadyob nanadmogad. Ar ade, e-nan, galagwensur-isguedgi-nanalegedgi unasad.
2CH 22:4 Degisoggu, Acab-neg-ichosadyob Ocozías ibmar-isganabi Bab-Jehová-asabin imaksad. Ar ade, Ocozías-e-bab-burgwisad-sorba, Acab-e-wagan ega binsaed-dakega gusad, adi, Ocozías isgudii guegar.
2CH 22:5 Degisoggu, Ocozías amar-ega-binsaed-ukedbali nanadii gusad. Degi, Acab-machi-Israel-rey-Joramʼba akaded. Ocozías, Joramʼbo Siria-rey-Hazaelʼgi bila-onogegala, Ramot-De-Galaadʼse nade gusad. Agine, Siria-sordamar Israel-rey-Joram-naibi-imaksamalad.
2CH 22:6 Degisoggu, Joram, Siria-rey-Hazaelʼse Ramotʼgi-e-nailikgusadi-nuguega gannar Jezreelʼse nonikid. Geb degi, Judá-rey-Joram-machi-Ocozías, Jezreelʼse Acab-machi-Joram daknaded. Deunni, Joram e-nailikgusad-onuguega Jezreelʼgi maid.
2CH 22:7 Bab-Dummad sogsagusad, Ocozías Joramʼse-ataknadele, burgoye. Geb degi, Ocozías modapiyala, Joramʼbo alid, adi, Nimsi-machi-Jehúʼgi gwichiguegar. Bab-Jehová a-dule-Jehú, Acab-e-wagan-osulogega nug-imaksad.
2CH 22:8 Jehú, Acab-e-wagan-ogilonaigua, dakalid, Judá-dummagan-gudii, degi, Ocozías-e-gwenadgan Ocozíasʼga-arbamalad-gudii dakalid. Geb agi, Jehú bela amar-ogilosad.
2CH 22:9 Geb degine, Jehú, Ocozías-Samariaʼgi-dukusmaid-aminaega e-sordagan-barmisad. Geb sordamar Ocozías-amismargu, Jehúʼse senonimalad, agine, Ocozías-oburgwisad. Geb degine, Ocozías-digsamalad, ar ade, sogdemalad: “Wede, Josafat-e-machiddeeye. Josafatʼde, bela-bela Bab-Jehováʼgi nue-bensuli gudii gusaddeeye.” Degidbali, Ocozías-e-gwenadgandi gannar yar-seega gargangued sategusad.
2CH 22:10 Rey-Ocozías-e-nan-Atalía, e-machi-burgwisa daksagua, Rey-Ocozías-e-mimmigan, degi, e-wagan bela obeloapid.
2CH 22:11 Deunni, dule-irwa-Bab-Dummadse-goled-Joiada-ome-Josabet, Atalía-iduar Ocozías-machi-Joás odukus gusad. Josabetʼde, Rey-Joram-e-sisgwad. Josabet, gabednegyaba Joás, degi, ome-mimmi-akwedbo odukusad. Josabet, Atalíaʼgi Joás-odukusadba Joás-oburgwilessulid. Josabet, Ocozías-e-bungued-ulale, weyob ibmar-imaksad.
2CH 22:12 Joás, Joiada-walik Bab-Dummadse-goled-neggi birganergwa (6) dukudii gusad. A-ibagangi, Atalía rey-bundorga negsemai gusad.
2CH 23:1 Dule-irwa-Babse-goled-Joiada, birgagugledgi (7), sorda-dulataled-dummaganse (100) gochad. Amala, wemalad: Jeroham-machi-Azarías, Johanán-machi-Ismael, Obed-machi-Azarías, Adaía-machi-Maasías, degi, Zicri-machi-Elisafat.
2CH 23:2 Wemar bela Judá-yar-nanaidbali bipirmakdii gusmalad. We-dummagan Levita-dulemar-Judá-yargi-bela-neggweburmargi-gudidimalad Jerusalén-neggweburse-dagmalaga oambikusad. Degi, bela Israel-dulemar-neguya-dummagan Jerusalén-neggweburse-dagmalaga oambikusbalid.
2CH 23:3 Agine, bela-dulemar Bab-Dummadse-goled-neggi-bukwad, reybo igar mesismalad. Degi, Joiada amarga sogded: “Wegi rey-machi dukusiid. Ar we, reyga megergebed. Ar igi Bab-Jehová David-wagangi sogsagusa, deyobi guergebed.
2CH 23:4 Degisoggu, weyob be imakmalo: Bemar-danapaagwad-soggwenad, dule-irwa-Bab-Dummadse-gormalad, degi, Levita-dulemar, obunnoged-ibagi-arbamaloedi, Babse-goled-neg-yawagakgi nakulemaloed.
2CH 23:5 Geb baid-danagwenaddina, reyneggi ambikumalo. Degi, baiddina, Yawagak-Sailagi ambikumarmogo. Degi, dulemardina bela Bab-Jehováʼse-goled-neg-imbagi ambikumarmogoed.
2CH 23:6 ”Unnila, dule-irwa-Bab-Dummadse-gormaladbi, degi, Levita-dulemar-arbamaladbi, Bab-Jehováʼse-goled-negyaba dogmaloed. Ar wemardi nugsalearmaladid. Dule-baid wargwensaar dogosulid. Dulemardina, Bab-Jehová-Igar-Uksadbali ibsamalagargebed.
2CH 23:7 Degi, Levita-dulemar, gingimar gani-gani rey-ebilis bela ambikumaloed. Ar dule Bab-Dummadse-goled-negyaba-dogsale, oburgwemalo. Melle reybi wargwengi be obemalo. Bia rey-nadele, eba be namarmogoed.”
2CH 23:8 Geb degine, Levita-dulemar, degi, bela Judá-dulemar dule-irwa-Bab-Dummadse-goled-Joiada-sogsadba bela ibmar-imaksamalad. Amar egad-egad e-sordagan-urbisad. Sordamar obunnoged-ibagi-arbamaloed, degi, dule-arbaosulidse-bakar, urbisad. Ar adega, dule-irwa-Babse-goled-Joiada sordamarga obunnoged-igar mesissulid.
2CH 23:9 Dule-irwa-Babse-goled-Joiada, sorda-e-dummaganga sigumar, degi, sigu-abgaed-dummagan uksad. Degine, sigu-abgaed-senigana-Rey-Davidʼgad, Bab-Dummadse-goled-neggi-bukwadi, a dummaganga uksabalid.
2CH 23:10 Geb degi, Joiada dulemar-bukumaloedgi bela dulemar-nue-urbisad. Dulemar es-suid-gani-gani, Bab-Dummadse-goled-neg-argan-nuedsik, degi, argan-sapiledsik ambikusad. Bela rey-dikarba, ibmar-ogumakar-ukleged-aila-asabin, degi, neg-siid-asabin ambikusmarbalid.
2CH 23:11 Degidgine, Joiada, degi, e-machimarmala, rey-machi-Joás neg-abarse onosmalad, ega rey-gurgin sisad, degi, Bab-Dummad-Israel-dulemarbo-Igar-Maidba-eba-narmakaled ega uksamarbalid. Geb degine, reyga-guega ega rey-gan uklesad. Agine, Joiada e-machimalabo Joás-nonogi gwallu-wawa eosmargu, sogdemalad: “¡Rey, bitigi, be undarsaar megisana gadin!”
2CH 23:12 Atalía, dulemar-ber-oimake itoargu, degi, dulemar binnasuli-rey-onugsananai-itoargu, Bab-Jehováʼse-goled-negse, dulemar-bukwadse nonikid.
2CH 23:13 Agine, Atalía, rey dogedgi buar-naba-gwichi daksad. Dummagan, degine, dule-gar-suid-trompeta-ogormalad rey-naba-bukwa daksabalid. Deginbali, Atalía bela-dulemar ber weligwale gar-suid-trompeta ogorbukwa, degi, dule-namakmalad garmar-abargi namakbukwa daksabalid. Atalía deyob daksagua, e-mor siir-siir imaksad, binnasur sogded: “¡Angi be aibichamala! ¡Angi be aibichamala!”
2CH 23:14 Degi, dule-irwa-Bab-Dummadse-goled-Joiada, Bab-Jehováʼse-goled-neggi dule-oburgwileged abesursoggu, sorda-e-dummaganga igar-ukded: “Be ainimar. Atalía Bab-Dummadse-goled-neggi dulemar-abargi-gwichid be onomar. Ar dule Atalía-bendakalile, es-suidgi oburgwilegoed.”
2CH 23:15 Degisoggu, buladik Atalía-gasmarsundo. Geb reyneggi, sordamar-moligi-sii-urwemalad-ubogedsik sesmalad. Agi, Atalía-oburgwismalad.
2CH 23:16 Degidgine, Joiada bela dulemarbo, degi, reybo igar-mesisad, emarde Bab-Jehová-e-dulemarga gumaloye.
2CH 23:17 Geb a-sorbali, bela-dulemar bab-Baalʼse-goled-negse nadmalad. Agine, Baal-neg-siid earismalad. Degine, Baalʼga ibmar-ogumakar-ukleged-aila osulosmarbalid, ibmar-e-bab-dummadga-imaklemalad, bela bibichismarbalid. Deginbali, Baalʼga-ibmar-ogumakar-ukleged-aila-siid-walik, dule-irwa-Baalʼse-goled-Matán oburgwismarbalid.
2CH 23:18 Geb sorba, Joiada, suar-ibgan Bab-Jehováʼse-goled-neggi-nakulegega urbisad. Geb degi, Joiada dule-irwa-Bab-Dummadse-gormaladga, degi, Levita-dulemarga-sogsad, be wemar-dakoye. Ar ade, David epenne, we-dule-irwa-Bab-Dummadse-gormaladga, degi, Levita-dulemarga igar uksad. Adi, Moisés-Igar-Maidba ibmar-durgan ogumakar Bab-Jehováʼga ukega, degi, na muchub-muchub Bab-Jehováʼga ibmar-imakmalaga, degi, David-igar-mesisadyobi weligwaledbali namakmarbaligar.
2CH 23:19 Deginbali, Joiada dule-Bab-Jehováʼse-goled-neg-yawagak-dakmalad urbisbalid, adi, dule-swilidiksurmalad mer dogegar.
2CH 23:20 Geb Joiada wemarse gochad: Sordamar-e-idumaladse. Sorda-dummagan-nug-nikamaladse. Neggweburmar-semamaidse, degi, bela dulamarse gochabalid. Adi, Bab-Jehováʼse-goled-neggi reynegse rey-sedamalagar. Dummagan reyneg-e-yawagak-dummad-gwichid-innik-gusgua, rey-gangi Rey-Joás-osismalad.
2CH 23:21 Degine, Atalía es-suidgi-oburgwilesad-sorba, bela dulemar weligwar-itosmalad. Degi, neggweburgi neg bogimakar nagusad.
2CH 24:1 Joás birgagugle-nikadgi (7) yar-sealid. Jerusalénʼgi birga-dulabo (40) yar sesad. E-nandi Sibiaʼye nugad, Beersebaʼginedid.
2CH 24:2 Joás, dule-irwa-Bab-Dummadse-goled-Joiada-duladgine, Bab-Jehová-asabin ibmar-nueganbi imakdii gusad.
2CH 24:3 Joiada, Joásʼga ome-walabo uksad. Degisoggu, Joás a-omeganga masmala, degi, bunamala baksad.
2CH 24:4 Geb a-sorba, Joás Bab-Jehováʼse-goled-neg-nudakedgi binsaded.
2CH 24:5 Agine, Joás dule-irwa-Bab-Dummadse-gormaladse, degi, e-bendakmalad-Levita-dulemarse gochad. Geb ega sogded: “Emisgwa, Judá-yargi neggweburmar-bukwadse be namala. Bela Israel-dulemargi be mani-weenamala, adi, birga-irba anmar-Bab-Dummadse-goled-neg nudakledii guegar.” Degi-inigwele, Levita-dulemardi itossurmalad.
2CH 24:6 Degisoggu, rey, dule-irwa-Bab-Dummadse-goled-Joiadaʼse gotesundo, ega sogded: “¿Ibiga be Levita-dulemargi alamaknaigussuli, Judá-yarse, degi, Jerusalén-neggweburse naega? Adi, Bab-Jehová-e-mai-Moisés, epenne Israel-dummaganbo mani-ukoye igar-mesisad sunaegar. Adi, Bab-Jehováʼbo-Igar-Mesisad-neg bendakledii guegar.”
2CH 24:7 Ar ome-isgana-Atalía, e-masmalamala, Bab-Jehováʼse-goled-neg ichosmalad. Degine, a-neggi ibmar-nuegan-nugsaar-bukwad, Baal-nuchumar-nug-odummogega ebusmalad.
2CH 24:8 Degisoggu, Rey, dulemar ulugwa-sobega imaksad. Geb Bab-Jehováʼse-goled-neg-yawagak-innik magadba sisad.
2CH 24:9 Geb degi, rey, Judá-yargi, Jerusalénʼgi gayaburba mimisad: “Bab-Jehová-e-mai-Moisés nega-dulesulidganba Israel-dulemarga igar mesisad, Bab-Jehováʼga-mani-ukleged be sedamaloye.” A-mani, Bab-Jehováʼga be sedamala.
2CH 24:10 Geb bela dule-dummagan, degi, dulemar-baigan weligwaledba Bab-Dummadga-mani-ukleged seargusmalad. Degi, ulugwa-enguedse imaksamalad.
2CH 24:11 Geb degi, Levita-dulemar, mani-argaega mani-urbed-ulugwa reyga-dummaganga-gudimaladse sesdaed. Levita-dulemar mani-bukidargus-dakele, reyga-garda-narmakedse, degi, dule-irwa-Bab-Dummadse-goled sorda-dummadga-nug-imaksadse ulugwa sesdamalad. Geb degi, Levita-dulemar ulugwa ollor-imaksale, gannar e-sigedse senonidamalad. Degiibi bane-bane imakdamalad. Deyobi mani-bukidar wesmalad.
2CH 24:12 Geb degine, rey, Joiadaʼbogwa, Bab-Jehováʼse-goled-neg-nudaknanaimalad-e-dummaganga mani ukdamalad. A-dummagan dule-arbamalad amidaed: Akwagi-arbamalad, urgogi arbamalad, esgoro-gordikidgi-arbamalad, degi, esgorogi-arbamalad amidaed, adi, Bab-Jehováʼse-goled-neg-nudakedgi arbaegar.
2CH 24:13 Neg-sobmalad-e-dummagan bela neg-ogusadse nue-arbasmalad. Bab-Dummadse-goled-neg gannarse idualedyob obinolesad. A-neg nue-obinoles sigisad.
2CH 24:14 Bela neg-ogulesad-sorba, mani-gwabgusad reyse, degi, Joiadaʼse senonimalad. A-manigi Bab-Jehováʼse-goled-neggi we-ibmar-ebulemalad soblesad: Bab-Dummadga-namakedgi, ese goledgi ibmar-ebulemalad, Bab-Dummadga-ibmar-ogumakar-uklegedgi ibmar-ebulemalad. Wesar-dummagan, nogmar orbi soblesad, degi, nogmar manibi soblesbalid. Deunni, Joiada-duladgine, bane-bane dulemar Bab-Jehováʼse-goled-neggi ibmar-durgan ogumakar-ukdii gusmalad.
2CH 24:15 Degi-inigwele, Joiada sered-guded. Degisoggu, nue-selebaadgi burgwisad. Birga-dulanergwa-gakambe-nika (130) burgwisad.
2CH 24:16 Geb David-neggweburgi reymar-mamaidgi Joiada-digsamalad. Ar ade, Israel-yalagi Joiada nued nanasad, degi, Bab-Dummadba nued nanasbalid, degi, Bab-Dummadse-goled-neggi nued binsasbalid.
2CH 24:17 Joiada-burgwisad-sorba, Judá-dummagan reyba-ibsaega Rey-Joásʼse nonimalad. Geb degine, Rey-Joás, dummagan-ega-binsaed-uksad itosad.
2CH 24:18 We-dummagande, e-dadgan-Bab-Dummad-Jehováʼse-goled-neg metemalad. Bab-dummad-bundor-Asera-e-wilubgan, degi, bab-dummadyobi-ibmar-imaklemalad-nug odummodmalad. A-isgued-ulale, Bab-Jehová Judá-yargi, degi, Jerusalén-neggweburgi uluded.
2CH 24:19 Bab-Jehová eba gannar aibirmalaga amarga e-gayaburba-barsogmalad barmialinad. Degi-inigwele, dulemar gwen eba aibirissurmalad.
2CH 24:20 Degidgine, Bab-Jehová-Burba, dule-irwa-Babse-goled-Joiada-machi-Zacaríasʼgi aidenonikid. Geb degi, Zacarías dulemar-asabin gwisgusgu, dulemarga sogded: “Bab-Dummad-Jehová weyob soged: ‘¿Ibiga bemar an-Igar-Mamaidba be nanasurmala? Emidi, bemar an-Igarba nanasurmarsoggu, bemarga iba-nuegan bar-naguosulid. Ar ade, bemar an-obachamarsoggu, an be-obanmarmogoed.’ ”
2CH 24:21 Dulemardi, Joiada-machi-Zacaríasʼgi gwisgumalaga igar amismalad. Degisoggu, rey-sogedba dulemar Bab-Jehováʼse-goled-neg-imbagi Zacarías-oburgwedse akwagi maksamalad.
2CH 24:22 Ar Rey-Joás, Zacarías-bab-Joiada wile-e-daksa-gusad gwen ebinsassulid. Deyobi, Joás, Joiada-machi-Zacarías-oburgwisad. Zacarías burgwedanimaigua, sogsad: “Be-angi-ibmar-imaknaid Bab-Jehováʼdi, be-daksad. Degisoggu, Bab-Jehová na e-sogedba bemar-odurdakoed.”
2CH 24:23 Birga-baid gwagnonigua, Siria-e-sordamar Rey-Joásʼgi gwichigusad. Judá-yargi, degi, Jerusalén-neggweburgi, ukiar ubodapmalad. Geb degi, dulemar-abargi bela dummagan-ogilosmalad. Degine, Siria-sordamar bela ibmar-wesmaladi, e-reyse Damasco-neggweburse barmismalad.
2CH 24:24 Siria-sorda-bila-onomalad iche nonimalan-inigwele, sordamar-bukidaradgi nakwismalad. Ar ade, Judá-dulemar e-dadgan-Bab-Dummad-Jehová-obachamalad. A-ulale, Bab-Jehová Siria-e-sordamar Judá-sordamargi-nakwega imaksad. Deyobi, Bab-Jehová Joás-sabsur-odurdaksad.
2CH 24:25 Siria-sordamar, Joás nue-naibi-itomai obesnadmalad. Geb degine, ega-arbamalad-e-dummagan Joásʼgi aibitemalad, e-gabedgi-mai iblosmalad. Deyobi Joás, dule-irwa-Bab-Dummadse-goled-Joiada-machi-Zacarías-oburgwisadba buged-mai gusad. Geb amar David-neggweburgi Joás-digsamalad. Degi-inigwele, reymar-neg-uangi-diglegar-mamaidgi digsasurmalad.
2CH 24:26 Joásʼgi-dulemar-gwichigusmalad, wemalad: Zabad, Amón-dule-omegwa-Simeat-machi. Degi, Jozabad, Moab-dule-Simrit-machi.
2CH 24:27 Rey-Joás-e-masmalagi-sunmaklenaidi, degi, egi iduakwaa ibmar-bukidar-guoed-soglesad, degi, Bab-Jehováʼse-goled-neg-nudaklesadi narmakar maid. A-narmakaledi reymar-igar-gusmalad-gardagi narmakar-maid. Degi, Rey-Joás-sorba, e-machi-Amasías yar-seega megnonikid.
2CH 25:1 Amasías birga-dulagwen-gakatar-nikadgi (25) yar sealid. Jerusalén-neggweburgi birga-dulagwen-gakabakebak (29) yar sesad. E-nan. Joadánʼye nugad, Jerusalénʼginedid.
2CH 25:2 Amasías, Bab-Jehová-asabin ibmar-nueganbi imaksad. Degi-inigwele, gwage-ulubgi innikigwadba Bab-Jehováʼga ibmar-imaksasulid.
2CH 25:3 Amasías nue-yar-semai-guargua, dummagan-e-bab-gindaksamalad bela oburgwisad.
2CH 25:4 Degi-inigwele, Amasías. Bab-Jehová-sogsa-gusadbali dummagan-e-masmaladi oburgwissulid. Ar ade, Moisés-gardagi Bab-Jehová-sogsad narmakar maid: “Babgan mimmigan-ulale burgosurye, degi, mimmigan babgan-ular burgosurmoye. Dule war-wargwen na e-isgued-ular burgwemaloye.”
2CH 25:5 Geb degine, Amasías, bela Judá-dulemar, degi, Benjamín-sordamar oambikusad. Degine, amar-e-gwenad-e-gwenadganba sorda-miligwenad-e-dummagan (1,000), degi, sorda-dulataled-e-dummagan (100) urbisad. Geb degine, Amasías, dule-birga-durgwen-nikmalad-nug (20), degi, obine-nikamalad-nug wesad. Daklealid, mili-dulataled-ilapaa (300,000) sordamar guagwar bila-ononaega gudii. Wemar bato eswar-mied wismalad, degi, sigu-abgaed-ebuleged wismarbalid.
2CH 25:6 Deginbali, Amasías, Israel-sorda-mili-dulatar-mergue (100,000) amisad. Amasías a-sordamar, mani nibir-miligugle gaka dulataled-ilabo gaka dulapaa-aidikue-wilub (7,260) baksad.
2CH 25:7 Geb Bab-Dummad-e-dule Rey-Amasíasʼse nonigusad, ega sognonikid: —Rey-Amasías, mer Israel-sordamar beba be nido. Ar ade, Bab-Jehová, Israel-sordamarba, degi, Efraín-dulemarba naisulid.
2CH 25:8 Degi, gines amar-abargi gandikidba be bila-ononaye sogele, Bab-Dummad be-isdarmalad-asabin be-ogalakuoed. Ar ade, Bab-Dummad dule-bendakega gargangued-nikad, degine, dule-ogalakuega gargangued nikabalid.
2CH 25:9 Amasías, Bab-Jehová-e-dulese egichided: —Degite, ¿igi we guosunna Israel-sordamar mani nibir-miligugle gaka dulataled-ilabo gaka dulapaa (7,260) an bennuksad? Bab-Jehová-e-dule abin-sogded: —Be we-mani-uksadba Bab-Jehová bur bule bega ukoed.
2CH 25:10 Degidgi, Amasías, Israel-sorda eba-bila-onogedse-naega Efraín-yargi-danimaladi obesad, e-neg-e-negse namalagar. A-sordamar bela-bela Judá-dulemargi sae-itosmalad, degi, nabir-gwen-itossuli e-neg-e-negse gannar nadmalad.
2CH 25:11 Amasías nue gangusa, e-sorda-bila-onomalad Balu-Neba-naidse sesad. Agi, Seir-sorda-miliambe (10,000) osulosad.
2CH 25:12 Deginbali, Judá-sordamar, Seir-sorda-baigan-miliambe (10,000) gasmarbalid. A-sordamar ibe-matusulid-birise sesmalad. A-birigi-bukwa, Judá-sordamar Seir-sorda-obatismalad, degi, bela gar-bibisgar burgwismalad.
2CH 25:13 Deyob neg-gunagua, Amasías-Israel-sordamar-bila-onogedse-nissurmaladi, Judá-yargi igarba neggweburmar-bukwadgi ubodapmalad. Agi, wemar Samaria-neggwebur-akale, Bet-Horón-neggweburse, milipaa (3,000) dulemar-ogilosad. Degine, e-ibmar-nuegan-bukidar e-ibe susmarbalid.
2CH 25:14 Amasías, Edom-dulemar-ogilodiid-aibiris-nonigua, Seir-dulemar-e-nuchumar sealid, geb e-bab-dummaganga imaksad. Amasías a-bab-dummagan-e-nug odummosad, ega ina-wawadikid ogumaksabalid.
2CH 25:15 A-ulale, Bab-Jehová Rey-Amasíasʼgi uluded, degi, e-gayaburba-barsoged ega barmialid, ega sogega: —Amasías, Seir-bab-dummagan be-bila-onosadgi e-dulamar gwen bendaksasulid. Degite, ¿ibiga be a-e-nugmar be odummosa?
2CH 25:16 Geb Bab-Dummad-gayaburba-barsoged amba sunmakgwichidgine, Rey-Amasías egi gaya-egwannonikid, ega sogded: —Mer be sunmake. ¿Doa reyga-binsaed-dakega be-onug-imaksa? ¿Dule be-oburgwebi be abege? Geb Bab-Dummad-gayaburba-barsoged berguedgine ega sogded: —An wisid, ar weyob be ibmar-imaksad-ulale, degi, an-binsaedba be dabisulidbali, Bab-Dummad be-obelogoed.
2CH 25:17 Degi-inigwele, Judá-rey-Amasías, dule-baiganse binsaed-galesad-sorba, Israel-e-reyga e-gayaburba-berbemalad barmisad. Israel-rey-Joásʼde, Joacaz-e-machid, Jehú-e-wagwad. Amasías, Rey-Joásʼga weyob sogsiid: “Be wese dagmala, anmar anbo bila-onoge.”
2CH 25:18 Degidgine, Israel-rey-Joás, Judá-rey-Amasías-abin-imaksa gusad, ega weyob sogsiid: “Dutu-ikobiid-Líbano-yargi-nikad urwar-gwichidga gayaburba barmis gusad: ‘Be-sisgwa an-machiga be uke.’ Geb degi, Líbano-yargi ibmar-durgan-sapurbalid a-dutu-iko-nikadse nonigu, egi annasad, degi, obelosad.
2CH 25:19 Emide, be soged: ‘An Edom-dulemar-ogalakusye.’ Aga, be san-dummarba itoged, bur bule be san-dummarba imaked. Degi-inigwele, bur-nuedid be-neggi be gudii saed. ¿Ibiga na-be-dukin-berguegala boni be amibie, degi, Judá-dulemarga be boni amibibali?”
2CH 25:20 Degi-inigwele, Amasías, Edom-bab-dummagan-nug-odummodii gusad-ulale, Bab-Dummad Amasías-isdarmaladga Amasías-urmaksad. A-ulale, Amasías, Joás-itossurgusad.
2CH 25:21 Degidgine, Israel-rey-Joás, Amasíasʼbo-bila-onogega, Judá-yargi Bet-Semes-neggwebur-siidse nadsunnad.
2CH 25:22 Judá-sordamar, Israel-sordamarse galakusad. Degi, bela Judá-sordamar e-neg-e-negse duurmakdemarsunnad.
2CH 25:23 Israel-rey-Joás, Bet-Semes-neggweburgi Judá-rey-Amasías-ganonikid. Amasíasʼde, Joás-machid, Joacaz-wagwad. Geb Joás, Jerusalénʼse Amasías-sesad. Agi, Rey-Joás neggwebur-galu-egaega dali-dulatar-sugue (100) omukusad. A-galu, Efraín-Yawagak-gwichid-akale, Neg-Sukun-Yawagak-gwichidsega egasad.
2CH 25:24 A-ukinbali, Rey-Joás, ormar, manimar, degi, bela Bab-Dummadse-goled-neg-yagi ibmar-ebulemalad-amilesadi susbalid. A-ibmarmala Obed-Edom akwediid. Deginbali, ibmar-nuegan-gargerbamalad reyneggi-amilesadi sesbalid. Degine, dule-dummagan-e-mimmigan-gasa sesbalid. Geb Joás, gannar Samaria-neggweburse nonikid.
2CH 25:25 Joás-machi-Judá-rey-Amasías, Joacaz-machi-Israel-rey-Joás-burgwisad-sorba, birgambe-gakatar (15) napi-gudii gusad.
2CH 25:26 Rey-Amasías ibmar-baigan imaksabalid. Gebesaila-ibmar-imakded, bela berguedsega ibmar-imaksadi, Judá-e-reymar-gardagi, degi, Israel-e-reymar-gardagi narmakar mamaid.
2CH 25:27 Amasías, Bab-Jehováʼgi bangudgua, Jerusalénʼginmalad egi isdar binsadmalad. Degidbali, Amasías Laquis-neggweburse wakite gusad. Degi-inigwele, dulemar a-neggweburse balegicha gusmalad. Geb Laquisʼgi, Amasías-oburgwismalad.
2CH 25:28 Degi, Amasías-mui moligi searmalad. Geb Judá-neggweburgi e-babgan-digar-mamaidgi digsamalad.
2CH 26:1 Degidgine, bela Judá-dulemar, Uzías birgambe-gakanergwa-nikadgi (16), e-bab-Amasías-burgwisad-sorba reyga onug-imaksamalad.
2CH 26:2 Uzías, e-bab-Amasías-sorba, Elot-neggwebur Judá-dulemargadga gannar imaknonigu, gannar nudaksad.
2CH 26:3 Uzías birgambe-gakanergwa-nikadgi (16) yar sealid. Jerusalénʼgi birga-dulabo-gakambe-gakabo (52) yar-sesad. E-nande, Jecolíasʼye nugad, Jerusalénʼginedid.
2CH 26:4 Uzías, Bab-Jehováʼga ibmar-nueganbi imakdii gusad, bela e-bab-Amasías-ibmar-imaksadyob imaksamogad.
2CH 26:5 Degine, Zacarías dula-gudiunni, Uzías-odurdaksad igi Bab-Dummad-sogedba nanaoe. Degisoggu, Uzías bela-belad Bab-Jehováʼba nanadii gusgu, Bab-Dummad Uzías-onasgumai imaksad.
2CH 26:6 Uzías, Filistea-dulemargi gwichiguded, Gat-neggweburgi, Jabnia-neggweburgi, degi, Asdod-neggweburgi galu-matusurmalad-bubukwad omukusad. Degine, Asdod-yargine neggweburmar-urbis-nanaed, degine, Filistea-yar-baidgi deyob neggweburmar-urbis nanabalid.
2CH 26:7 Uzías, Filistea-dulemargi bila-ononaigusgua, Bab-Dummad nue bendaksad, degi, Árabe-dulemar-Gur-Baalʼgi-bukwadgi bila-onosbargua, Bab-Dummad nue bendaksabalid. Degi, Amón-dulemargi bila-onosbargua, bendaksabalid.
2CH 26:8 Amón-dulemar, mani-galegedi Uzíasʼga ukdamalad. Degine, Uzías-e-nug bela-bela gandik megisad. Degisoggu, e-nug Egipto-yar-abingunaidsega, ogannoledii gusad.
2CH 26:9 Uzías, Jerusalénʼgi Neg-sukun-innik yawagak-siid-walik, neg-matusulid-warakwagwad sobsad. Nebasik-Yawagak-siid-walik, degine, Neg-Bilidoedgi-Yawagak-siid-walik neg-matusulid-warakwamalad sobsabalid. Degi, we-neg-matusulid-warakwagwad bela gandik sisad.
2CH 26:10 Amba-deyobi, Uzías nega-dulesulidganba galu-matusulid-warakwamalad sobsabalid. Degine, dia-bukidar akwisbalid, ar ade, nebagi, degi, yar-mullugan-naidgi e-moli-bebe-nikad bukidar-bukwad. Deginbali, Uzíasʼde, sapur-dulesoggu, nainumar, degi, uva-nainumar yar-mullugangi, degi, neba-nuegangi nikabalid, degine, dule-ega-arbamalad nikabalid.
2CH 26:11 A-ukinbali, Uzías, sorda-bila-onomalad nikusbalid. Amar danar-danar bila-onogedse naddamalad. Ar Jeiel, Maasíasʼbo sorda-nugmar danar-danar-narmaksagusad-sogedba sordamar barmilesdaed. Deun, rey-e-dummagan-wargwen Hananíasʼye-nugad sordamar-nug-omesega igar uksagusad. Jeielʼde, reyga-neg-gumamaid ilemakar narmakedid, degi, Maasíasʼdi, dummadga maimogad.
2CH 26:12 Bela e-gwenadgan-e-gwenadganba sorda-dummagan-bulegan milibo gaka dulataled-ilanergwa (2,600) mergued.
2CH 26:13 We-dummagan-sorda-bila-onomalad, mili-dulataled-ilapaa-gakagugle gaka dulataled-ilatar-mergue (307,500) nikad. Amardi bila-onogedgi nue-odurdaklegaled, adi, rey e-isdarmaladbo bila-onoalir, rey-bendakmalagar.
2CH 26:14 Rey-Uzías, bela-sorda-bila-onomaladga we-ibmarmar uksad: Sigu-abgamalad, eswarmar, bormo-gurginmar, binasgargi-mor-esgorobiid-nasikleged, sigumar-mied, degi, akwa-mied-dubmar.
2CH 26:15 A-ukinbali, Rey-Uzías Jerusalénʼgi sigu-mied-máquinaʼmar, degi, akwa-dummagan-mied-máquinaʼmar sobsad. A-máquina dule-egi-nergusmalad ega sobsad, geb galu-matusulid-warakwagwadgi sisad. Neggwebur-dikargi sisbalid. Adi, a-akale, sigumar, degi, akwa-dummagan miegar. Bab-Dummad bela-bela Rey-Uzías-bendaksadbali, Uzías gandikidba megisad. Degine, e-nug-dummad-nikadi dikasur wisgulesad.
2CH 26:16 Degi-inigwele, Uzías, e-nug-gandiki megnonigua, san-dummarba imakded. Degidbali, Bab-Jehováʼgi aibategusad. Uzías e-babgan-e-Bab-Dummad-Jehováʼba ibsassulid, Bab-Jehováʼse-goled-negyaba, ibmar-ogumakar-ukleged-ailagi ina-wawadikid-ogumakega dogdegusad.
2CH 26:17 Geb dule-irwa-Bab-Dummadse-goled-Azarías, Uzías-sorba-nai, Babse-goled-negyaba dogded. Agine, dule-irwa-Bab-Dummadse-gormalad-dulabakegwad (80) Azaríasʼba dogdemarmogad. Amarde, dule-niga-gandikmaladid.
2CH 26:18 A-dulemar Rey-Uzíasʼga urwedgi weyob sogdemalad: “Rey-Uzías, Bab-Jehováʼga ina-wawadikid-ogumaked-igar bega maisuli. Wedi unnila dule-irwa-Bab-Dummadse-gormalad Aarón-wagan-e-arbaedid. Amardi ina-wawadikid ogumakega onugsalesad. Emisgwa, be Bab-Dummadse-goled-neggi be noe, ar ade, be Bab-Jehováʼgi dummad-nosad. A-ulale, Bab-Jehová be-nug-odummogosulid.”
2CH 26:19 Geb, Uzías, ina-wawadikid-ogumakega e-argangi guakwa sianar ganikid. Dule-irwa-Bab-Dummadse-gormalad-itosgua, bela-bela sae-itoded. Degine, Uzías agi-gunaidgine, ukiarmakar bela dule-irwa-Bab-Dummadse-gormalad-wagab, Bab-Jehováʼse-goled-neggi, ibmar-ogumakar-ukleged-aila-walik, e-bebegi boni-naibe-buna-yaa-maleged ainialid, bela e-wagar biin gusad.
2CH 26:20 Degine, dule-irwa-Bab-Dummadse-goled-bur-dummad-Azarías, degi, bela dule-irwa-Bab-Dummadse-gormalad, Uzías-dakdemargua, dakdemalad, boni-naibe-buna-yaa-maleged e-bebegi nika. Geb agi-gunaidgi, magadba yog-onogar Uzías-imaksamalad. Geb Uzías gwae-gwae noded, ar ade, Bab-Jehová e-naibi imaksad.
2CH 26:21 Weyob Rey-Uzías e-burgwedse boni-naibe-buna-yaa-maleged nikusad. Degisoggu, rey, boni-naibe-buna-yaa-maleged-nikadba, neg-baidsik walagwen maigusad. Degi, Bab-Jehováʼse-goled-negse bar dogega imaklessurbalid. Degine, e-machi-Jotam reyneg-dakega gusad, degi, yar-semai gusbalid.
2CH 26:22 Uzías e-ibmarmar-imaksad, gebe ibmar-imakded, degi, berguedse-ibmar-imaksadi, Amoz-machi-Bab-Dummad-gayaburba-barsoged-Isaías narmaksa gusad.
2CH 26:23 Uzías burgwenonigua, reymar-neg-uansik, e-babgan-digar-mamaid-naba digsamalad. Ar ade, sogmalad, “Boni buna-yaa-maleged nikaddeeye.” Geb sorba, e-machi-Jotam e-reyga megnonikid.
2CH 27:1 Jotam birga-dulagwen-gakatar-nikadgi (25) yar-sealid. Jerusalénʼgi birgambe-gakanergwa (16) yar-sesad. E-nandi Jerusaʼye-nugad Sadoc-e-sisgwad.
2CH 27:2 Jotam, Bab-Jehováʼga ibmar-nueganbi imakdii gusad, bela e-bab-Uzías-ibmar-imaksayobi, imaksamogad. Degi-inigwele, Jotamʼdi, Bab-Jehováʼse-goled-negyaba dogsasur gusad. Dulemardina, bur bule igar-isganaba nanabukwa gusad.
2CH 27:3 Rey-Jotam we-negmar sobsad: Bab-Jehováʼse-goled-neg-Yawagak-Nakwaled. Degi, yar-Ofelʼye-nugad-birgi galu-matusulid sobsad.
2CH 27:4 A-ukinbali, Judá-yar-mullugangi neggweburmar urbisbalid, degine, sapurba neg-gandikmalad sobsabalid, degi, galu-matusurmalad-warakwagwad sobsabalid.
2CH 27:5 Rey-Jotam, Amón-dulemar-e-reygi-bila-onosad. Jotam egi nakwisad. Degine, a-birgagi Amón-dulemar weyob mani-galeged bennuksad: Mani, nibir-miligugle gaka dulataled-ilabo gaka dulapaa-mergue (7,260) Rey-Jotamʼga uksad. Oros-gwagyob-dakleged-trigo, sagu-dummagan-miliambe (10,000) uksabalid. Orosgisaar-daklebalid-cebada, sagu-dummagan-miliambe (10,000) uksabalid. Amón-dulemar, birgabogwadgi amba deyob ibmarmar uksabalid, degi, birgapaagwadgi amba deyob ibmar uksabalid.
2CH 27:6 Jotam gandik-megnonisunnad, ar ade, nue-inniki e-Bab-Dummad-Jehováʼba nanasad.
2CH 27:7 Jotam bela e-ibmar-imaksad, degi, bila-onosad, e-nanasad, Israel-reymar-e-gardagi, degi, Judá-reymar-e-gardagi narmakar maid.
2CH 27:8 Jotam birga-dulagwen-gakatar-nikadgi (25) yar-sealid, degi, Jerusalénʼgi birgambe-gakanergwa (16) yar-sesad.
2CH 27:9 Jotam burgwenonigua, David-neggweburgi e-dadgan-mamaidgi digsamarmogad. A-sorba, e-machi-Acaz yar-seega megnonikid.
2CH 28:1 Acaz birga-dulagwen-nikadgi (20) yar-sealid. Degi, Jerusalénʼgi birgambe-gakanergwa (16) yar-sesad. Degi-inigwele, Bab-Jehováʼga ibmar-nuegan gwen imaksasulid. Igi e-dad-David ibmar-nuegan-imaksagusa, deyobi ibmar-imaksasulid.
2CH 28:2 Aka Rey-Acaz, Israel-reymar-igar-isganaba-nanasadba nanasad. Deginbali, Baal-nug-odummogega diregedgi-bab-dummadyob-imakleged Baal-e-wilubgan sobsabalid.
2CH 28:3 Amba deyobi, Rey-Acaz, Ben-Hinom-nebagi ina-wawadikid ogumaksabalid. Agi, e-masmala ogumakar e-bab-dummadga uksabalid. Acaz, dule-yar-baidginmalad-isguedba nanadiid-ular, Bab-Jehová Israel-dulemar-wagab we-dulemar-bamalad-balimete gusad.
2CH 28:4 Deginbali, Acaz, bab-dummad-baidse ibmar-ogumakar, degine, ina-wawadikid-ogumakar aila-matusulidgi uksad. Deginbali, yar-mullugan-birgi, degi, sapi-bulamakwichid-urba uksabalid.
2CH 28:5 A-ulale, e-Bab-Dummad-Jehová, Siria-e-reyga Acaz-urmaksad. Degi, Siria-dulemar egi nakwissunnad. Degine, Siria-sordamar, Damasco-neggweburse Acaz-dulemar-bukidar-gasa sesmarbalid. Degi, Rey-Acaz, Israel-reyga amba urmaklesbalid. Agi, Israel-dulemarse dummad-galakusad.
2CH 28:6 Ibagwen-dummadgi Remalías-machi-Peka, Judá-sorda-gandikmalad mili-dulanergwa-mergue (120,000) ogilosad. Ar ade, Judá-dulemar e-dadgan-e-Bab-Dummad-Jehová-obachamaladba, deyob girgusmalad.
2CH 28:7 Sorda-wargwen-Efraín-yargined Zicriʼye-nugad, Rey-Acaz-machi-Maasías oburgwisad. Degi, Zicri reyneg-daked-dummad-Azricam oburgwisbalid, degine, rey-sorba-negdaked-Elcana oburgwisbalid.
2CH 28:8 A-ukinbali, Israel-sordamar, Judá-dulemar-mili-dulataled-ilabo (200,000) gasmarbalid: Omegan, masmala, degi, bunamalase-bakar, gasmalad. Deginbali, amar-ibe ibmar-bukidar Samaria-neggweburse sesmarbalid.
2CH 28:9 Deunni, Samariaʼgi Bab-Jehová-gayaburba-barsoged-mai daklealid. A-dulede Obedʼye-nugad. Israel-sorda-bila-onomalad Samariaʼgi ubodanimargu, Obed Israel-sordamar-abin noargusad, degi, amarga sogded: —Be-dadgan-e-Bab-Dummad-Jehová, Judá-dulemargi bela-bela sae-itosad. A-ulale, bemarga urmaksad. Degi-inigwele, bemardi nue sae-itogedbali dule-oburgwisoggua, bela nibnegse-bakale, be-sae-itogedi warmaksad.
2CH 28:10 Emide, be sogsamalad, Judá-dulemar, degi, Jerusalén-dulemar, machergan, degi, omegan, be-maiga be imakmaloye. Ar bemarde, ¿be-Bab-Dummad-Jehováʼgi nossuli na be itomarmosi? Be nosmarmogad.
2CH 28:11 Emisgi, nue an-itomalo. We-sordamar-galesad be onomala. Ar ade, ¿wemar be-gwenadgansursi? Be-gwenadganad. Degisoggu, Bab-Jehová sabsur-bemar-odurdaksokarsunnad.
2CH 28:12 Degidgine, Efraín-sorda-dummagan gwenna-gwenna, sordamar-bila-onoged-danimalad-abin-noarmalad. Amardi, wemalad: Johanán-machi-Azarías, Mesilemot-machi-Berequías, Salum-machi-Ezequías, degi, Hadlai-machi-Amasa.
2CH 28:13 Degi, we-dummagan e-sordamarga sogdemalad: —Dule-galesbukwad mer wese sedamalo. Ar degiile, Bab-Jehová-asabin anmar isgusayobi guoed. Ar ¿bemar, bur bule anmar-isguega imakbie? ¿Bur bule anmargi-ataklegega imakbimala? Adi, sulirgebed. Ar ade, anmar-isgued dogdar-obingusad, Bab-Jehová bela-bela Israelʼgi uludoed.
2CH 28:14 Degisoggu, sorda-bila-onomalad, dule-galesmalad indaksamalad. Degi, amar-ibe-ibmarmar-susmarbalidi, dummagan-wagab, degi, bela dule-bukwad-wagab gannar ega uksamarbalid.
2CH 28:15 Dule-gwenna-gwenna, dule-galebukwad-dakega nugsalesmalad. A-dummagan galesmalad-ibe-mor-susmaladi, degi, e-nag-uka-susmaladi ega gannar uksamalad. Adi, dule-galebukmalad mormar, degi, sapat yomalagar. Agine, dule-galebukwad ogobsamarbalid, masgi oguchamarbalid, degi, e-nailikgusadi ega nudaksamarbalid. Degi, dule-geg-nanamaladi moli-uayasuidgi-sii, Sapi-Ogobgi-Dakleged-Neggweburse Jericóʼye-nugadse sesmalad. Degi, e-gwenadgan-walik obesad. Geb degi, e-berbemalad gannar Samaria-neggweburse nonimalad.
2CH 28:16 A-ibagangi, Rey-Acaz, Asiria-reymarse bendakleged egichisad.
2CH 28:17 Ar ade, Edom-dulemar gannar Judá-dulemargi gwichigunoni gusmalad, degi, dule-gwenna-gwenna gasa-sesmalad.
2CH 28:18 Filistea-dulemardina, Judá-yargi neggwebur-nebagi-bukwadgi, degi, Neguevʼgi neggweburmar-bukwadgi sabsuli ubosmalad. Degine, we-neggweburmar-susmarbalid: Bet-Semes, Ajalón, Gederot, Soco, Timna, degi, Gimzo-neggwebur. Degi, bela we-neggweburmar e-neggwebur-burwiganase-bakar, susad. A-neggweburmargi Filistea-dulemar ambikusmarbalid.
2CH 28:19 Ar Bab-Dummad Rey-Acaz-nuki, Judá-dulemar ibgwensur imaksad. Ar Acazʼde, Judá-yalagi dulemar wilub-obicha-isguega imaksad, degi, Bab-Jehováʼgi bela-bela isgusbalid.
2CH 28:20 Asiria-e-rey Tiglat-Pileserʼye-nugad, Acaz-bendaknadenad. Degi-inigwele, aka egi bila-onogega ebilis ambikusmalad.
2CH 28:21 Ar Acaz, Rey-Asiriaʼga Bab-Jehováʼse-goled-neggi ibmar-nuegan-bukwad ukded. Degine, reyneggi ibmar-gargerbamalad-bukwad, degi, dummagan-neggi ibmar-bukwad uksabalid. Degi-inigwele, Tiglat-Pileser, Acaz-gwen-bendaksasulid, aka egi gwisgusad.
2CH 28:22 Rey-Acazʼga neg-boni-dummad-nai-inigwele, aka bur bar-buloded, Bab-Jehováʼba amba nanassulid.
2CH 28:23 Acaz, Damasco-sordamar-e-bab-dummagan-e-ogalakusadga ibmar-ogumakaled uksad. Ar ade, Acaz binsasad: “Ar Siria-bab-dummagan e-reymar-bendakdasoggua, an ega ibmar-ogumakaled ukmogale, nabir an-bendakmogoye.” Degi-inigwele, we-bab-dummagana Acaz-oberguega imaksad, degi, Israel-dulemar bela oberguega imaksabalid.
2CH 28:24 A-ukinbali, Acaz, Bab-Dummadse-goled-neggi bela ibmar-ebulemalad-danar-urbisgu, geb goa-goa imaksad. Deginbali, Bab-Jehováʼse-goled-neg-yawagak ediar sisad. Degi, bab-dummagan ibmar-ogumakar-ukleged-ailamar, bela Jerusalén-neg-sukungangi sobsabalid.
2CH 28:25 Degine, Acaz, Judá-yargi neggweburmar-bukwadgi bab-dummad-baidse-goled-aila-matusurmalad sobsabalid, adi, agi bab-dummad-baiganga ibmar-wawadikid ogumakegar. Deyobi, Acaz e-dadgan-e-Bab-Dummad-Jehová bela-bela ourwega imaksad.
2CH 28:26 Rey-Acaz-ibmar-imakded, degi, bela e-igar-nanasadi, gebe-onoded-akale, berguedse e-ibmar-imaksadi, Judá-reymar-e-gardagi, degi, Israel-e-reymar-gardagi bela narmakar mamaid.
2CH 28:27 Acaz burgwenonigua, Jerusalén-neggweburgi digsamalad, Israel-reymar-digar-mamaidgi digsasurmalad. Geb a-sorba, e-machi-Ezequías yar-seega megnonikid.
2CH 29:1 Ezequías birga-durgwen-gakatar-nikadgi (25) yar-sealid. Degine, Jerusalénʼgi birga-durgwen-gakabakebak (29) yar-sesad. E-nandi Abíasʼye nugad Zacarías-e-sisgwad.
2CH 29:2 Ezequías Bab-Jehováʼga ibmar-nueganbi imaksad. Igi e-dad-dummad-David ibmar-imaksa, deyobi imaksamogad.
2CH 29:3 Rey-Ezequías yar-semaid-onoded-niigwengi, Bab-Jehováʼse-goled-neg-yawagak egasad, degi, neg nudaksabalid.
2CH 29:4 Agine, Ezequías, dule-irwa-Bab-Dummadse-gormaladse gochad, degi, Levita-dulemarse gochabalid. Degi, dulemar-dad-nakwedsik-ambikumaladsik amar-oambikusad.
2CH 29:5 Degi, Ezequías amarga sogded: “Levita-dulemar, nue an-itomalo. Na san-swilidik be imakmar. Degi, be-dadgan-e-Bab-Dummad-Jehováʼse-goled-neg swilidik be imakmarbalo. Bela Bab-Dummadse-goled-negyaba ibmar-isgana-bukwad be onimalo.
2CH 29:6 Ar ade, anmar-babgan, anmar-Bab-Dummad-Jehováʼgi bangusmalad. Ibmar-isganabi Bab-Jehováʼga imaksamalad. Degi, Bab-Jehová-obachamalad, ese-gorleged-neg obachamarbalid, bar eba nanassurmalad.
2CH 29:7 Deyobi, Bab-Dummadse-goled-neg-imba-e-yawagak edusmarbalid, degi, gwallumar ogichamarbalid. Degine, ina-wawadikid bar ogumaksasurmalad. Degi, Bab-Dummadse-goled-neggi Israel-e-Bab-Dummadga ibmar-durgan ogumakar bar uksasurmarbalid.
2CH 29:8 ”Degisoggu, Bab-Jehová Judá-yalagi, degi, Jerusalén-neggweburgi uluded. Degi, Judá-dulemargi dulemarga dobed-dummad nasiksad, surbinsa-itogega imaksad, degi, Judá-dulemargi dodolegega imaksabalid. Igi bemar be-ibyagwar Judá-dulemargi ibmar-gunaid be dakbukwamala, deyobi gusad.
2CH 29:9 A-ulale, anmar-babgan bila-onolesadgi burgwis-nanaed, degi, anmar-masmala, anmar-bunamala, anmar-omegan, galesa selesnanaed.
2CH 29:10 ”Degisoggu, Bab-Jehová-urwed anmargi banguega, Israel-e-Bab-Dummad-Jehováʼbo igar-mesedgi an binsaed.
2CH 29:11 Degisoggu, Levitaʼmar, nuekwa be Bab-Jehováʼga ibmar imakmalo. Ar Bab-Jehová bemar-susad ega guakwa gudii gumalaga, e-sogedba nanamalaga, ese golega, degi, ega ina-wawadikid ogumakegarbar. Melle we-ibmarmar be imaksuli guo.”
2CH 29:12 Levita-dulemar yog-arbaar-imakdemaladi, wemalad. Coat-e-wagan: Amasai-machi-Mahat, degi, Azarías-machi-Joel. Merari-e-wagandi, wemalad: Abdi-machi-Quis, degi, Jehalelel-machi-Azarías. Gersón-e-wagandi, wemalad: Zima-machi-Joa, degi, Joa-machi-Edén.
2CH 29:13 Elizafán-e-wagandi, wemalad: Simri, Jeiel. Asaf-e-wagandi, wemalad: Zacarías, Matanías.
2CH 29:14 Hemán-e-wagandi, wemalad: Jehiel, Simei. Jedutún-e-wagandi, wemalad: Semaías, Uziel.
2CH 29:15 Geb wemala na e-gwenadgan-e-gwenadgan oambikusmalad, degi, bela na e-san swilidik imaksamalad. Geb agine, rey-sogsadba, degi, Bab-Jehová-sogsadba, Bab-Jehováʼse-goled-neg-nudakega, Bab-Dummadse-goled-negse dogdemarsunnad.
2CH 29:16 Geb dule-irwa-Bab-Dummadse-gormalad, Bab-Jehováʼse-goled-negyaba neg-nudakega dogdemalad. Agine, Babse-goled-neg-imba-naidse bela negyaba ibmar-isgana-bukwad onismalad. Geb degi, Levita-dulemar Cedrón-dianse ibmar-isgana-bukwad miapmalad.
2CH 29:17 Nii-gebesaila-gwisguded-onodedgi, Babse-goled-neg islidik-imaklegega nudakdemalad, degi, ibabaabak-gusgua (8), Bab-Jehová-neg-imba-naidse, neg-nudaked mosmalad. Geb Bab-Jehová-Neg-Islidik imaknanaid bela obelogegala, ibabaabak (8) napi egi arbasmarbalid. Degisoggu, gebe-nii-gwisgusad ibambe-gakanergwagi (16) neg-nudaked obelosmalad.
2CH 29:18 Geb a-sorbali, Rey-Ezequíasʼse nadmargu, ega sogdapmalad: “Anmar bato bela Bab-Jehováʼse-goled-neg nudaksamalad. Degi, ibmar-ogumakar-ukleged-aila, degi, bela ibmar-ebulemalad nudaksamalad. Deginbali, mese-madu-ambikued, degi, bela e-ibmar-ebulemalad bato an nudaksamarbalid.”
2CH 29:19 A-ukinbali, Rey-Acaz yar-semaigu, isgudigusgua, bela Bab-Jehováʼse-goled-neggi-ibmar-ebulemalad oichosagusadi, anmar nudaksabalid, degi, islidiki an imaksamarbalid. A-ibmarmar bato guagwar anmar Bab-Dummadga-ibmar-ogumakar-ukleged-aila-asabin urbisad.
2CH 29:20 Rey-Ezequías wakudaradba gwisguargua, neggwebur-e-dummagan-oambikusa, Bab-Jehováʼse-goled-negse nadegusad.
2CH 29:21 Degi, dummagan rey-gwenadgan-isgusad-ular, Bab-Jehováʼse-goled-neg-isgusad-ular, degi, Judá-dulemar-isgusad-ular, moli-bebe-nikmalad-machergan, walagugle (7) sesmalad. Degi, sibad-wawaad-machergan, walagugle (7), sibad-wawaad-machergan-bipigana, walagugle (7), degi, sibad-machergan, walagugle (7), sesmarbalid. Adi, dulemar-isgusad-nuki Bab-Jehováʼga ogumakar ukegar. Rey-Ezequías, Aarón-wagan-dule-irwa-Bab-Dummadse-gormaladga sogded: “Bab-Jehováʼga ibmar-ogumakar-ukleged-ailagi ibmar-ogumakar-ukleged be ukmar.”
2CH 29:22 Geb dule-irwa-Bab-Dummadse-gormalad: Moli-bebe-nikad-machergan oburgwismargu, e-ablis abingasmalad, degi, ibmar-ogumakar-ukleged-ailagi mie-mie imaksamalad. Geb, sibad-wawaad-machergan oburgwismalad, e-ablis ibmar-ogumakar-ukleged-ailagi mie-mie imaksamarbalid. Geb sibad-wawaad-machergan-bipigana oburgwismarbalid, geb deyob ibmar-ogumakar-ukleged-ailagi e-ablis mie-mie imaksamarbalid.
2CH 29:23 A-sorbali, reyse, degi, dule-bukidar-bukwadse sibadmar-isgued-ular-uklenaid sesmalad. Geb wemar sibad-birgi e-argan mesismalad.
2CH 29:24 Geb agine, dule-irwa-Bab-Dummadse-gormalad sibadmar-oburgwisad, degi, e-ablis Israel-dulemar-isgued-ular ibmar-uklegedyobi ibmar-ogumakar-ukleged-ailagi mie-mie imaksamalad. Adi, bela Israel-dulemar-isgued nabogegar. Ar ade, rey, bela Israel-dulemar-e-isgued-eliegala, ibmar-dula-oburgoye, degi, ibmar-durgan ogumakar Bab-Jehováʼga ukbaloye sogsad.
2CH 29:25 Rey-Ezequías, Levita-dulemar, Bab-Jehováʼse-goled-neggi we-gar-ogormalaga urbisad: Gar-címbalo, gar-salterio, degi, gar-arpa ogormalagar. David-igar-mesisadba, Bab-Gayaburba-barsoged-Natán-igar-mesisadba, degi, reyga-negburgan-daked-Gad-igar-mesisadba imaksamalad. We-igarmarde, Bab-Jehová, e-gayaburba-barsogmaladba uksad.
2CH 29:26 Levita-dulemar David-e-gar-ogorlemalad-ganiki gwigwichid, degi, dule-irwa-Bab-Dummadse-gormaladdi gar-trompeta-gani gwigwismarmogad.
2CH 29:27 Degisoggu, Rey-Ezequías igar-ukded, sogded: “Ibmar-ogumakar-uklegedi ibmar-ukleged-ailagi ukoye.” Geb ibmar-ogumakar-ukleged ogumakdemargua, Bab-Jehováʼgi-namakleged, namakleded, degi, gar-trompeta ogorleded, Israel-rey-David-e-garmar ogorleded.
2CH 29:28 Bela dulemar ibmar-ogumakar-uklenaid-berguedsega, sindigar Bab-Dummadse-gorbukwa gusmalad. Dule-namakmaladdi, namakbukwa gusmalad. Dule-gar-ogormaladdi, gar-trompeta-ogorbukwa gusmarmogad.
2CH 29:29 Ibmar-ogumakar-uknaid bergusmargua, rey, degi, dulemar-eba-gudimarmogad Bab-Dummad-nug odummogega napase dulluu imaksamalad.
2CH 29:30 A-sorbali, Rey-Ezequías, degi, dummagan, Levita-dulemarga sogdemalad: “David-namaked-narmaksadgi, degi, negburgan-daked-Asaf-namaked-narmaksadgi, Bab-Jehováʼga be namakmala.” Degi, Levita-dulemar bela-bela weligwaledba namaksamalad, degi, bela dulluu ambikusmalad, degi, Bab-Dummad-nug odummosmalad.
2CH 29:31 Geb agine, Ezequías dulemarga sogded: “Emisgindi, bemar Bab-Jehováʼga be san uksamarsoggu, Bab-Jehová-nug be odummonamala, degi, Bab-Jehováʼse-goled-neggi ibmar-dula ogumakar be uknamala.” Geb dule-bukidar ibmar-ogumakar-ukleged senonimalad. Degine, bela-dulemar ulubgi weligwaledgi, yeer-itogedgi, Bab-Dummadga ibmar-ogumakar-ukega senonimalad.
2CH 29:32 Dulemar ibmar-dula-ogumakar-ukega, we-ibmar-durgan senonimalad: Moli-bebe-nikad-machergan, dulapaa-gakambe-mergue (70) senonimalad. Sibad-wawaad-machergan, dulatar-mergue (100) senonimalad. Degine, sibad-wawaad-machered-bipigana, dulataled-ilabo-mergue (200) senonimalad. Adi, we-ibmarmar ogumakar Bab-Jehováʼga ukegar.
2CH 29:33 A-ukinbali, moli-bebe-nikad-machergan, dulataled-ilanergwa (600), Bab-Dummadga ogumakar-uklesad. Deginbali, sibadmar, sibad-wawaadbo, milipaa-mergu (3,000) uklesbalid.
2CH 29:34 Degi-inigwele, dule-irwa-Bab-Dummadse-gormalad icheesoggu, moli-ichesulidgi-arbaega unnisurmalad. Degisoggu, e-gwenadgan-Levita-dulemar amar-bendaksad, adi, a-arbaed obelogegar. Degi, dule-irwa-Bab-Dummadse-gormalad-baigan na san-swilidik-imakedse imaksamarmogad. Ar ade, Levita-dulemardi, e-idumaladba bur bule oyomalad, emarde san-swilidik-imakmalaga guakwamarye.
2CH 29:35 A-ukinbali, dulemar Bab-Dummadga ibmar-ogumakar-ukleged-bukidar uksamalad. Degi, moli-gwallu Bab-Jehováʼga dog-nuedye-sogega uksamarbalid. Degi, molimar-ogumakar-ukleged-iliba, vino-ukleged uksamarbalid. Weyobi, Bab-Jehováʼse-gorleged-neg gannar-nugusa sigisad.
2CH 29:36 Degine, Rey-Ezequías, degi, bela-dulemar Bab-Dummad-emarga-ibmar-imaksadba wergusmalad. Ar ade, ibmar gwae-gwae gusad.
2CH 30:1 Degigusad-sorba, Rey-Ezequías e-gayaburba-berbemalad, bela Israel-dulemar-bukwadse, degi, Judá-wagan-bukwadse barmisad. Degine, Efraín-waganga, degi, Manasés-waganga garda narmaksabalid. Adi, Jerusalénʼse Bab-Jehováʼse-goled-negse dagmalagar. Adi agine, Israel-dulemar e-Oburgwilegoenad-Iba Israel-e-Bab-Dummad-Jehováʼga onogegar.
2CH 30:2 Rey, degi, e-dummagan, Jerusalénʼginmalad-ebo na igar amismalad, Israel-dulemar-Oburgwilegoenad-Iba nii-warbogi onomaloye.
2CH 30:3 E-iba-mesisadba geg imakegusmalad, ar ade, dule-irwa-Bab-Dummadse-gormalad-bukidar amba na yoo san-urukmakmalad, deginbali, dulemar Jerusalénʼgi amba yoo ambikubalid. Aga geg iba-onoge gudii gusmalad.
2CH 30:4 Rey we-igar yeer-itosad, degi, bela dulemar yeer-itosmarmogad.
2CH 30:5 Degi, bela Israelʼgi gayaburba-wisgumalaga, Beerseba-akale, Dan-neg-nugadse gayaburba barmilesad. Adi, dulemar Israel-e-Bab-Dummadga, Israel-dulemar-Oburgwilegoenad-Iba Jerusalén-neggweburgi onodagegar. Ar ade, dikasurgus igar-maidba we-iba onodisurmalad.
2CH 30:6 Geb dulemar gayaburba-berbemalad, rey-nuggi, degi, dummagan-nuggi bela Israel-dulemarse, degi, bela Judá-dulemar-bukwadse garda-berbenadmarsunnad. We-garda-sognaidba sognadapmalad: “Israel-dulemar, Bab-Jehová, Abraham-e-Bab-Dummad, Isaac-e-Bab-Dummad, degi, Israel-e-Bab-Dummadse gannar be dagmala. Adi, Bab-Jehová, be-dulemar Asiria-reymarse-galessurmaladi, gannar egadga imakegar.
2CH 30:7 Mer be-babgan-sunna, degi, be-gwenadgan-sunna be damalo. Amardi e-babgan-e-Bab-Dummad-Jehováʼgi dummad-nosmarsoggua, Bab-Jehová sabsur-odurdakega imaksad. Igi emi bemar be-sunnagwad dakbukwamalayob.
2CH 30:8 Melle be-babganyobi uayasuli be damalo. Bab-Jehová-urbaligwa be nanamala. Degi, Bab-Dummad bato ese-goled-neg degisadegu swilidik-imaksasoggu, a-negse be dagmala. Bemar-Bab-Dummad-Jehová-nug-odummogega ega be arbamala. Adi, Bab-Dummad bemargi bela-bela-sae-itoged bergudoed.
2CH 30:9 Ar bemar gannar Bab-Jehováʼba be aibirmalale, adi, be-gwenadgan, degi, be-mimmigan e-isdarmaladse-galesbukwadi, wile dakledamaloed, degi, gannar e-yalase barmidamaloed. Ar ade, bemar-Bab-Dummad-Jehová, nueddaed, wile dule-dakdaed. Bemar gannar ese aibirmalale, be-obanosurmalad.”
2CH 30:10 Dule-gayaburba-berbemalad, Efraín-yalaganba, degi, Manasés-yalaganba, neggwebur-bubukwadba bipirmakdii guarmalad. Degi, Zabulón-yala-naidse warmaksamalad. Degi-inigwele, dulemardi ega allide gusmalad, egi dodode gusmalad.
2CH 30:11 Degi-inigwele, dulemar-gwenna-gwenna Aser-e-wagan, Manasés-e-wagan, degi, Zabulón-e-wagan, Bab-Dummad-asabin, na san-bipii imaksamalad. Geb degi, Jerusalénʼse nonimalad.
2CH 30:12 Deginbali, Bab-Dummad Judá-dulemar-gwage ebusad, adi, rey-e-igar-uksadba damalaga, dummagan-e-gayaburba-maidbali damalaga, degi, Bab-Jehová-gayaburba-sogmaidba damalagarba.
2CH 30:13 Degisoggu, Jerusalénʼgi dule-bukidar ambikusmalad. Adi, nii-warbogi Madu-Inasulid-Iba onomalagar.
2CH 30:14 Geb degine, Jerusalénʼgi bab-dummaganga ibmar-ogumakar-ukleged-ailamar osulosmalad. Degi, ina-wawadikid-ogumaked-ailamar osulosmarbalid. A-ibmarmala Cedrón-dianse miapmalad.
2CH 30:15 Degidgine, nii-warbogi (2) e-ibagan-ibambe-gakabakegi (14) Oburgwilegoenad-Iba onobukwa gusmalad. Degine, dule-irwa-Bab-Dummadse-gormalad, degi, Levitaʼmar nue bingegusmalad. Geb degi, na san uruksamalad. Geb ibmar-durgan ogumakar Bab-Jehováʼga ukega, Bab-Jehováʼse-goled-negse sesmalad.
2CH 30:16 Agine, na e-arbaedgi-arbadmaladi, Bab-Dummad-e-dule-Moisés-Igar-sogmaidbali imaksamalad. Levitaʼmardi, dule-irwa-Bab-Dummad-gormaladga abe ukdamalad, geb a-dulemar a-abe mie-mie imakdamalad.
2CH 30:17 Ar dulemar-bukwadi, bukidar amba yoo Bab-Jehováʼga-arbaega na san urukmarsoggua, Levitaʼmar a-dulemar-ular sibad-wawaad-senigana, Bab-Jehováʼga ogumakar-ukegala oburgwisad.
2CH 30:18 A-ukinbali, Efraín-wagan-bukidar, Manasés-wagan-bukidar, Isacar-wagan-bukidar, degi, Zabulón-wagan-bukidar Oburgwilegoenad-Ibagi sibad-wawaad-oburgwilesad yogasaar guchamalad. Bab-Dummad-Igar-narmakar-maidba imaksasurmalad. Ar ade, e-san uruksasurmalad. Degi-inigwele, Rey-Ezequías amar-ular, Bab-Dummadse gochad, weyob sogsad: “Bab-Jehováʼye, be, dule-nuedid. Dulemar bela-bela gwagegi be-amidanimaladi, be wile dakena gadin.
2CH 30:19 We-dulemar-e-dadgan-e-Bab-Dummad-Jehováʼye, an bega sogdo, we-dulemar, bese-goled-neggi igar-maidba na san-urukmaksasur-inigwele, be wile dako.”
2CH 30:20 Bab-Jehová, Ezequías-ese-gochad itosad, degi, dulemargi igi-barsaye binsasad.
2CH 30:21 Degisoggu, Israel-dulemar Jerusalénʼgi-bukwamalad iba-dummad onosmalad, ibagugle (7) nue weligwaledba Madu-Inasulid-Iba ononai gusmalad. Degi, dule-irwa-Bab-Dummadse-gormalad, degi, Levitaʼmar, bane-bane Bab-Jehová-nug odummosmalad, degi, Bab-Jehová-e-garmar-abargi namaksamarbalid.
2CH 30:22 Degi, Rey-Ezequías, bela Levitaʼmarga Bab-Jehováʼse-gorlesadgi ibmar-nueganbi-oyosmaladga sogsad, be ibmar-nueganbi imaksamarye. Iba-dummad ibagugle (7) onolesad. Agi, Levitaʼmar ibmar-dula-ogumakar Bab-Jehováʼga-uklesad guchamalad. Degi, gwenatigwar-guedga-ibmar-ukleged uksabalid, degi, e-dadgan-e-Bab-Dummad-Jehová-nug odummosbalid.
2CH 30:23 Geb degi, bela-dulemar napi ibagugle (7) iba onobaloye na sogsamalad. Degisoggu, sorba ibagugle (7) weligwaledba napi-iba onosmarbalid.
2CH 30:24 Ar ade, Judá-e-rey-Ezequías dulemarga uksad: Moli-bebe-nikad-machergan miligwen (1,000), degi, sibad-wawaad miligugle (7,000) uksabalid. Degine, neggwebur-dummagandi dulemarga uksamarmogad: Moli-bebe-nikad-machergan miligwen (1,000), degi, sibad-wawaad miliambe (10,000) uksabalid. Deunni, dule-irwa-Bab-Dummadse-gormalad-bukidar bato san uruksamalad.
2CH 30:25 Bela Judá-dulemar, dule-irwa-Bab-Dummadse-gormalad, degi, Levitaʼmar wergusmalad, degi, bela dulemar Israel-yargi-danimalad yeer-itosmarmogad. Degine, dulemar-ainebarmalad Israel-yargi-danimalad, degi, Judá-yalagi-bukwamalad wergusmarmogad.
2CH 30:26 Degisoggu, Jerusalénʼgi neg-weligwar nagusad, ade, Israel-e-rey-David-machi-Salomón yar-semai-gusad-akale, weyob bar Jerusalén-neggweburgi neg weligwar itoledisulid.
2CH 30:27 A-sorba, dule-irwa-Bab-Dummadse-gormalad, degi, Levitaʼmar bela gwisgusmalad, degi, dulemargi nued-binsasmalad. A-nued-binsasadi, Bab-Jehová itosad. Ar ade, amar-gayaburba, Bab-Dummad-maidse warmaksad.
2CH 31:1 Iba-bergusgua, bela Israel-dulemar a-ibagi-bukwamaladi, Judá-yargi neggweburmar-bukwadse nadmalad. Geb akwa e-bab-dummaganga-nug-salesmalad ei mamarisad, degi, bab-dummad-bundor-Asera-wagar-wilub-sobar-bukwad osulosmarbalid. Deginbali, bab-dummaganse-goled-aila-matusurmalad, degi, e-ibmar-ogumakar-ukleged-aila-bukwad omukusmarbalid. Bela Judá-yalagi, Benjamín-yalagi, Efraín-yalagi, degi, Manasés-yalagi a-ibmarmar-bukwad osulosad. Geb a-sorba, bela Israel-dulemar e-neggwebur e-neggweburse gannar e-neg-e-negse nonimalad.
2CH 31:2 Degi, Rey-Ezequías, dule-irwa-Bab-Dummadse-gormaladga, degi, Levitaʼmarga na muchub-muchub arbamalaga wachi-mesisad. Adi, war-wargwengi na e-arbaed e-arbaedgi arbamalagar. Adi, deyobi Bab-Dummadga ibmar-durgan ogumakar ukmalaga, degi, gwenatigwar-guedga-ibmar-ukleged ukmalagar. Degine, nuedye Bab-Dummadga sogmarbaliga, degi, namakedgi Bab-Jehová-nug odummomarbaligar. Deginbali Bab-Dummadse-goled-neg-yawagakgi nue arbamarbaligar.
2CH 31:3 Rey-Ezequías Bab-Jehová-Igar-Maidba, wakudaradba, degi, sedogidba na e-ibmar-nikad Bab-Dummadga ogumakar-ukega uksamogad. Degi, obunnoged-ibagi ibmar-ukleged uksabalid, degi, nii-gebe-gwisguoedgi ibmar-ukleged uksabalid. Degine, iba-itoakwaa-onolegedgi ibmar-ukleged uksabalid.
2CH 31:4 Deginbali, Rey, Jerusalén-dorganga igar mesisad, dule-irwa-Bab-Dummadse-gormaladga, degi, Levitaʼmarga ibmar-nugsales-bukwad ega ukmalo. Adi, a-dulemar Bab-Jehová-igar-maidba nabir arbamalagar.
2CH 31:5 Israel-dulemar, rey-igar-megisad wisgusmargua, na e-ibmar-gebe-sanmaksamalad-bukidar senonimalad: E-ibmar-gwagmar, vino, olivo-gwallu, achanis, degi, bela ibmar-wesadi senonimalad. Deginbali, e-ibmarmar-wesadi sogambegi-gwensakad (10%) Bab-Jehováʼga ukega senonimarbalid.
2CH 31:6 Israel-dulemar, degi, dulemar Judá-yargi neggweburmar-bukwadgi-bukwamalad, moli-bebe-nikamalad, sibadmar, degi, sibad-wawaadmar, warambegi-gwensak (10%) senonimarmogad, degi, Bab-Jehováʼga ibmar-swilidikid sogambegi-gwensak (10%) senonimarbalid. Bela a-ibmarmar bular urbismalad.
2CH 31:7 Nii-warbaagi ibmarmar-bukwad nue-ilemakar urbiarmalad, geb nii-walaguglegi (7) obelodapmalad.
2CH 31:8 Ezequías, degi, dummaganmala ibmar-dunnumakbukwa daksamargua, Bab-Jehová-nug-odummodmalad, degi, Israel-dulemargi nued-binsasmalad.
2CH 31:9 Degidgine, Ezequías, dule-irwa-Bab-Dummadse-gormaladse, degi, Levitaʼmarse egichisad, ibmar-bukwad igi gunaye.
2CH 31:10 Degi, Sadoc-e-wagwa, dule-irwa-Bab-Dummadse-goled-bur-dummad-Azarías, Ezequías-abin-sogded: “Dulemar Bab-Dummadse-goled-negse Bab-Jehováʼga ibmar-ukleged berbelealid-akar, anmar nue mas-gundimalad, anmar nue immeledimalad, degine, anmargi mas bukidar gwabgusbalid. Ar ade, Bab-Jehová e-dulemar nue-bendaksad. Degisoggu, we-ibmar ichesur gwabgusad.”
2CH 31:11 Aga, Rey-Ezequías sogded, Bab-Jehováʼse-goled-neggi, ibmar-sabolemalad-neg sobmaloye. Geb sobsamalad.
2CH 31:12 Agi, dulemar ibmar-Babga-uklesad, ibmar sogambegi-gwensak (10%) uklesad, degi, bela ibmar-swilidik-imaklesad-senonimaladi, agi urbismalad. Geb a-ibmar-dakegala Conanías-nug-imaksamalad. Conaníasʼde, Leví-duled a-ibmar dakega sigisad. Degi, e-urba-Simei e-sorbalidga nugsalesmogad.
2CH 31:13 Rey-Ezequías, degi, Bab-Dummadse-goled-neg-e-daked-dummad-Azarías, ibmar-dakmalad-dummagan-Conaníasʼga, degi, Simeiʼga dule-e-yarbarmalad ega nugsasad: Jehiel, Azazías, Nahat, Asael, Jerimot, Jozabad, Eliel, Ismaquías, Mahat, Benaía.
2CH 31:14 Leví-dule-Coré, Imna-e-machi, Dad-Nakwedsik Yawagak-dakedid. A-dulede, dulemar Bab-Dummadga gwagegi-e-itolegedba-ibmar-uked e-dakedid, degi, Bab-Jehováʼga ibmar-ukleged mimiedbalid, degi, ibmar-islidikmalad dakedbalid.
2CH 31:15 Coré-bendakmaladi, wemalad: Edén, Miniamín, Jesúa, Semaías, Amarías, degi, Secanías. We-dulemar, dule-irwa-Bab-Dummadse-gormalad-e-neggweburmargi, e-dulemar-merguedba, serganse-bakar, degi, burwiganase-bakar innikigwadba e-gwenadganga ibmar mimismalad.
2CH 31:16 Masmala birgapaa-nikamalad, degi, birgapaa-gwena-nikamalad e-dadgan-nugmar-gardagi-narmakar-mamaidgi e-nugmar narmaklegar-mamaidga mimilesmogad. Degine, bela dulemar Bab-Jehováʼse-goled-negse-nanabukmaladga, bane-bane Bab-Jehováʼga-arbaed-imakbukmaladga, degi, danar-danar Bab-Dummadga-arbabukmaladga, ibmar-mimismarbalid.
2CH 31:17 Dule-irwa-Bab-Dummadse-gormaladdi, e-babgan-nugmar-maid-gardagi e-nugmar narmaklesmarmogad. Degi, Levitaʼmar birga-durgwen-nikamalad (20), degi, obine nikamalad, e-arbaed-ega-uklesadba muchub-muchub Bab-Dummadga arbabukwamalad.
2CH 31:18 Bela, burwiganase-bakar, omeganse-bakar, masmalase-bakar, degi, bunamalase-bakar, e-nugmar narmakar mamaid. Degisoggu, soglesundo, bela-dulemar ibmar-ebulemalad, napiragwadba ise-islimakale ebudamarye.
2CH 31:19 A-ukinbali, Aarón-e-wagan dule-irwa-Bab-Dummadse-gormaladga, degi, bela Levitaʼmar-nug-mamaidga, bela-neggwebur-iliba dulemar-ibmar-mimimaladi nikananaed. Degine, bela a-neggweburmar-burwiganagi, neggweburmar-iliba dule-irwa-Bab-Dummadse-gormalad, degi, bela Levitaʼmar-mamaimarmogadga ibmar mimismarmogad.
2CH 31:20 Rey-Ezequías bela Judá-yalagi weyob imaksad. E-ibmar-imaksad, nueganbi, degi, innikigwadbi, degi, napiragwadba e-Bab-Dummad-Jehová-asabin ibmar imaksad.
2CH 31:21 Rey-Ezequías bela Bab-Dummadse-goled-negga ibmar-imaksadi, igar-maidba ibmar imaksad. A-uki, Bab-Dummad-gayaburba-maidba ibmar imaksabalid. Gwagegi Bab-Dummadba nanadii gusad. Degisoggu, Bab-Jehová nue-Ezequías bendaksad.
2CH 32:1 Bela we-ibmar-nasad-sorba, degi, Rey-Ezequías Bab-Jehováʼba nue-napira-nanasad-oyosad-sorba, Asiria-rey-Senaquerib, Judá-yargi gandikidgi bukunonigusad. Degi, a-rey neggweburmar-gandik-bukwadgi ebiris bukunonikid, ei neggwebur-suedgi binsasad.
2CH 32:2 Rey-Ezequías wisgusgua, Senaquerib, Jerusalénʼgi-bila-onogega, a-neggwebursik nadapye,
2CH 32:3 Ezequías, e-dummaganbo, degi, e-sordagan-gandikmaladbo igar amisad. Degi, Ezequías weyob sogsad: “Neggwebur-magaba-dii-gammu-mummurmakbukwad be edimalo.” Degi, bela e-sordamar nabir itosmalad.
2CH 32:4 Degidgine, dulemar bular-atosmalad, degi, bela dii-gammu-mummurmakbukwad edismalad, degi, diangan yar-imbaba-aryomaid odingusmarbalid. Ar ade, abesurmalad Asiria-e-reymar nonikile, dii-unniguar nikued.
2CH 32:5 Agine, Ezequías na gandik-itodedba galu-aimukusadi gannar sobded, degi, neg-matusulid-warakwamalad sobdebalid, degi, neggwebur-magaba baid-galu-matusulid sobsabalid. Degi, David-neggweburgi napa-gureged-naidgi napa onakwisad, deginbali, es-suid-bukidar, degi, sigu-abgaed-bukidar sobsabalid.
2CH 32:6 Agine, dulemar dule-urwed-idumaladga nug-imaklesmaladi, neggwebur-yawagak-dogedgi dule-bukidar-ambikumaladgi sordamar-oambikusad. Degi, sordamarga sunmakde, ega sogded:
2CH 32:7 “Gandik-imakmalo, mer galakumalo. Mer Asiria-e-rey-abin, degi, e-sorda-bukidar-danikoed-abin gwayemalo, mer dobgumalo. Ar ade, anmar amarba bur gandikgumalad.
2CH 32:8 A-rey, dule-we-napaneggined-ganguedba danikoed. Anmardi, anmar-Bab-Dummad-Jehová-e-gangued anmar-bendakoed.” Degi, dulemar, Judá-rey-Ezequías-itosmargua, gannaledmalad.
2CH 32:9 A-sorba, Asiria-rey-Senaquerib, e-sordamarmala, Laquis-neggwebur-ebiris-bukunaidgi, Jerusalénʼse e-sorda-dummagan barmisad. Adi, Judá-rey-Ezequíasʼga sogega, degi, Judá-dulemar-bela-Jerusalénʼgi-bukwamaladga weyob sogegarba:
2CH 32:10 “Asiria-rey-Senaquerib weyob sogye: ‘¿Ar doa be-bendako be dakmala, emide Jerusalénʼgi be ganna bukwamargu?
2CH 32:11 ¿Ar Ezequías be-yardaksur be dakmala? Bemarga sogmargu, Asiria-Rey-e-ganguedgi anmar-Bab-Dummad-Jehová anmar-bendakoye. Ar Ezequías ukudba, degi, uku-uku-itogedba be-oburgwemaloed.
2CH 32:12 ¿Ar Ezequías na e, bemar-ibe bab-dummadganse-goled-negmar, degi, e-ibmar-ukmalad-aila, osulossursi? Degi, Rey-Ezequías na e, Judá-dulemarga, degi, Jerusalénʼginmaladga sogsabarsursi, ¿bemar Bab-Jehováʼse-goled-negginbi be Bab-Dummadse-goloye? ¿Degi, a-negginbi ibmar-ogumakar Bab-Dummadga be ukoye, degi, ina-wawadikid a-negginbi ogumaklebaloye?’
2CH 32:13 ”Rey-Senaquerib weyob sogbalid: ‘¿Be wisgussurmarsi, igi ani, degi, an-babganmala neggweburmar-we-napneggi-bukwad, imaksa gusa? ¿Ar an egi yolesgua, e-bab-dummagan a-dulemar-bendaksasi?
2CH 32:14 Ar an-babgan a-neggweburmar-obelonaigua, e-bab-dummagan-wargwensaale bendaksasulid. Ar deyobi, amba bemar-Bab-Dummad an-urwedgi be bendakosurmogad.
2CH 32:15 Mer Rey-Ezequíasʼse yamolemalo, degi, melle ese-binsaed galemalo. Melle be itomala, ar bab-dummagan-wargwensaar neggweburmar angi-nakwega imakmaisulid. Degi, bab-dummagan dule-bamalad an-babgangi-nakwega imakmaisurbalid. Ar be-Bab-Dummad-bule-sunna, angi-nakwega be-imakosulid.’ ”
2CH 32:16 Senaquerib-e-sordamar Bab-Jehováʼgi isdar sunmakdemarbalid, degi, Rey-Ezequíasʼgi deyob sunmakdemarbalid.
2CH 32:17 A-ukinbali, Rey-Senaquerib Israel-e-Bab-Dummad-Jehová-e-nug-ise-oichogar garda narmaksad. Weyob Bab-Jehováʼnik sogsad: “Ar igi dule-yar-baiganginmalad-e-bab-dummagan, dulemar angi-nakwega gwen imaksasuli, amba deyobi, Ezequías-e-Bab-Dummad, angi-nakwega e-sordamar-gwen-imakosurmogad.”
2CH 32:18 Agine, Senaquerib-e-sordamar, Jerusalén-neggwebur suega Jerusalén-sorda-galu-matusulidgi-bukwamalad-ogwayegala, Hebreo-gayaba sabsur gotemalad.
2CH 32:19 Senaquerib-e-sordamar, Jerusalénʼginmalad-e-Bab-Dummadgi dulemar-yar-baigan-e-bab-dummaganyobi, egi sunmaksamalad. Ar amar-bab-dummagandi yamo dulemar sobsananaed.
2CH 32:20 Degi-neg-gunaidbali, Rey-Ezequías, degi, Bab-Dummad-gayaburba-barsoged-Amoz-machi-Isaíasʼbogwa, Bab-Jehováʼse gochamalad, degi, ese bendakleged egichismalad.
2CH 32:21 Geb degine, Bab-Jehová e-baliwitur barmialid, adi, Senaquerib-e-sordamar, degi, sorda-idudimalad, degine, Asiria-e-rey-sordamar-e-dummagan-bukwad obelogegar. Degisoggu, Senaquerib nue-binge-itoge gannar e-neggweburse nonikid. Geb degi, e-bab-dummadse-goled-negse-dognonigua, e-masmala es-suidgi oburgwisad.
2CH 32:22 Weyob Bab-Jehová, Ezequías, degi, Jerusalénʼginmalad, Asiria-rey-Senaqueribʼgi-nakwega imaksad. Degine, bela e-isdarmaladgi-nakwega imaksabalid. Bab-Jehová, Judá-dulemar, neggwebur-e-nagaba-bukwadbo boni-sate-guega imaksad.
2CH 32:23 Degisoggu, dule-bukidar Bab-Jehováʼga ibmar-ukmalad Jerusalénʼse senonimalad. Degi, Judá-rey-Ezequíasʼga ibmar-gargemalad senonimarbalid. Deyobi, neggwebur-iliba Rey-Ezequías-nug dungusad.
2CH 32:24 A-ibagangi, Ezequías bela-bela uellear-gusad, burgwed-naga gusad. Agine, Bab-Jehováʼse gote gusad, geb Bab-Jehová abin-imaksad, ibmar-dakledisulid ega imaksad.
2CH 32:25 Degi-inigwele, Ezequías Bab-Dummad-egi-nued-binsasadba dog-nuedye ega gwen sogsasulid, aka na san-dummarba imaksad. Degidbali, Bab-Jehová sae-itogedba egi gwichigunonikid, degi, Judá-yargi, degine, Jerusalén-neggweburgi gwichi-gunonibalid.
2CH 32:26 Agine, Ezequías na-san-dummarba-itosad-sorba, san bipii imaksad, degi, Jerusalénʼginmalad san bipii imaksamarmogad. Agala, Ezequías-gudigusadgi Bab-Jehová bar dulemargi gwichigussulid.
2CH 32:27 Ezequías ibmar-gargemalad bukidar-nikusad, degi, nug-dummarba nikusbalid, degi, Mani-ibed megisbalid. We-ibmar nikusad: Or bukidar-nikusad, mani, akwa-nuegan-gargemalad, ibmar-wawadikmalad, sigu-abgamalad, degi, ibmar-nuegan-gargemalad-bukidar nikusbalid.
2CH 32:28 Deyobi negmar sobsabalid, adi, agi we-ibmar-gwagmar urbega, vino, olivo-gwallu, ibmar-durgan-sog-akar-akar urbega, degi, sibad-wawaadmar-urbega sobsad.
2CH 32:29 Deginbali, neggweburmar sobsabalid. Ar Bab-Dummad, Ezequíasʼga ibmar bukidar-uksasoggu, we-ibmar-durgan bukidar danar-danar nikusbalid: Sibad-wawaadmar, degi, moli-bebe-nikadmar.
2CH 32:30 Deginbali Ezequías, Gihón-dia-siid edisad. Geb David-neggwebur-dad-argwanedsik, napa-urba a-dii-iirmakega imaksad. Ezequías bela ibmar-imaksadi, bela nueganbi ega gusad.
2CH 32:31 Degi-inigwele, Babilonia-e-dummagan, na e-sordamar-barmialid, Jerusalén-neggweburgi-ibmar-dakledisurmalad-oyolesad wisguegar. Agine, Bab-Dummad Ezequías-wilubdakega egi bangusad, adi, dakega bule e-sogedba ibmar-imakoe.
2CH 32:32 Ezequías-ibmar-baigan-imakdii-gusad-e-igar, degi, wile-dulemar-daksabalid-e-igar, Bab-Dummad-gayaburba-barsoged-Amoz-machi-Isaías-e-gardagi narmakar maid, degine, Judá-e-reymar-gardagi, degi, Israel-e-reymar-gardagi narmakar maibalid.
2CH 32:33 Ezequías, burgwenonigu, e-dadganba, David-e-wagan-neg-uan-bur-nuedgi digsamalad, Degi, bela Judá-dulemar, degi, Jerusalén-dulemar e-nug odummosmalad. A-sorba, e-machi-Manasés yar-senonikid.
2CH 33:1 Manasés birgambe-gakabo-nikadgi (12) yar sealid. Degi, Jerusalénʼgi birga-dulabo-gakambe-gakatar (55) yar sesad.
2CH 33:2 Rey-Manasésʼde, Bab-Jehová-asabin ibmar-isganabi imaksa gusad. Ar ade, epenne, Bab-Jehová neggweburmar-isgusgusadi, Israel-dulemar-wagab, balimete-gusad. Amaryobi, Manasés nanasmogad.
2CH 33:3 E-bab-Ezequías, bab-dummaganse-goled-negmar-osulos-gusadi gannar sobsad. A-ukinbali, bab-dummad-Baalʼga ibmar-ogumakar-ukleged-aila sobsabalid, degi, bab-dummad-bundor-Asera-wilubgan sobsabalid. Degine, bela niisgwamar-nanaidi, e-bab-dummadga imaksabalid. Geb niisgwamarse gordii gusad.
2CH 33:4 Manasés Bab-Jehováʼse-goled-neggi, ibmar-ogumakar-ukleged-ailamar sobsabalid. Bab-Jehová we-negnik weyob sogsagusad: “An Jerusalénʼgi degisadegu maiguoye.”
2CH 33:5 Manasés Bab-Jehová-neg-imba-sogabo-naidgi bela niisgwamar-nanaidga ibmar-ogumakar-ukleged-ailamar sobsabalid.
2CH 33:6 Deginbali, Ben-Hinom-neba-naidgi soogi e-masmala-ogumaksabalid. Degi, ibmarmar-burbar-oyoleged-imakdii gusad, ina-isganagi arbadii gusad. A-ukine, ibmar-yoo-guoed barsogdii gusad, degi, dule-burgwarmaladse goled-dulese ibmar-idakdii gusad, degi, burba-isganase goled-dulese idakdii gusbalid. Manasés doggus bela-bela Bab-Jehová-asabin isgusad. Degisoggu, Bab-Dummad oulusad.
2CH 33:7 A-ukinbali, Bab-Dummadse-goled-neggi, na e-nuchu-mimmi-sobsadi ogwichisad. A-negnik, Bab-Dummad Davidʼga, degi, e-machi-Salomónʼga sogsa gusad: “Bela Israel-neggweburmar-abargi, an Jerusalén-neggwebur-susad, agi anse-goled-neg siega, agi an degisadegu maiguegar.”
2CH 33:8 Ar bela Israel-dulemar, Moisésʼga an-Igar-uksadba nanamalale, an-sogsadba, degi, an-Igar-Mamaidba nanamalale, Israel-dulemar an e-babganga-yar-uksadgi-bukwad bar an oniosulid.
2CH 33:9 Manasés, Judá-dulemar-oichogega, degi, Jerusalén-dulemar-oichogega imaksad. Degisoggu, neggweburmar-baigan Bab-Jehová Israel-dulemar-wagab-balimete-gusadba bur bule isgudmalad.
2CH 33:10 Bab-Dummaddi, Manasésʼga, degi, e-dulemarga sunmaksanad, degi-inigwele, emardi itossurmalad.
2CH 33:11 A-ulale, Bab-Jehová, Asiria-e-sorda-dummagan Manasésʼgi gwichiguega barmiarsunnad. Amala Manasés-gasmalad, e-asugi esgoro nasiksamalad, degi, esnas-dub-esgoro-gordikidgi edichamarbalid. Geb Babilonia-neggweburse Manasés sesmalad.
2CH 33:12 Degi-inigwele, Manasés wile na itodgua, Bab-Jehováʼse sabsur-apor goted, degi, e-dadgan-e-Bab-Dummad-asabin bela-bela na san-bipii imaksad.
2CH 33:13 Degi, Manasés Bab-Jehováʼse gotegu, Bab-Jehová Manasés-ese-wilesagwa-gornaid itosad. Degi, Jerusalénʼse Manasés gannar-dagega, degi, gannar negsemai-guega imaksad. Deyobi, Manasés mag daknonikid, Bab-Jehováʼbi, Bab-Dummad-sunsoged gued.
2CH 33:14 Geb a-sorbali, Manasés, David-neggwebur-magabali galu-matusulid sobsabalid. A-galu Gihón-dian-dad-argwanedsik, neba-naidgi onoalid, geb Ua-Yawagak doglegedse warmakmaid, degine, a-galu Ofel-yar-ebirsibalid. We-galu matusuli sobsad. A-ukinbali, Manasés, bela Judá-neggweburmar-gandik-bukwamaladgi sorda-urwemalad-dummagan urbisbalid.
2CH 33:15 A-ukinbali, Manasés Bab-Jehováʼse-goled-neggi bab-dummagan-baigan osulosad, degi, nuchu-gwichid osulosbalid. Degi, Bab-Jehováʼse-goled-neg-yar-birgi-ailamar-sobsad, degi, Jerusalénʼgi bela bab-dummaganga-ibmar-ogumakar-ukleged-ailamar-sobsad osulosbalid. A-ibmarmala neggwebur-magaba miapid.
2CH 33:16 A-sorba, Bab-Jehováʼga ibmar-ogumakar-ukleged-aila obinosad. Degi geb, gwenatigwar-guega-ibmar-ukleged uksad, degi, nuedye-soglegega ibmar-ukleged uksabalid. Geb Manasés Judá-dulemarga igar-mesisbalid, Israel-e-Bab-Dummad-Jehová-e-nugbi-odummomaloye, degi, agarbi arbamaloye.
2CH 33:17 Ar e-Bab-Dummad-Jehováʼgarbi ibmar-ukoye sogsan-inigwele, dulemardi amba bab-dummaganse-goled-negmargi ibmar-ogumakar ukbukwa gusmalad.
2CH 33:18 Manasés ibmarmar imaksadi, degi, Bab-Dummadse-gocha-gusadi, degi, negburgan-dakmalad ega Israel-e-Bab-Dummad-Jehová-nuggi sunmaksamaladi, bela Israel-e-reymar-gardagi narmakar mamaid.
2CH 33:19 Manasés Bab-Dummadse-gocha-gusadi, degi, Bab-Dummad-e-abin-imaksa-gusadi, gardagi narmakar mamaid. Manasés na san-bipi imaked-iduar, bela-e-isgusadi, bela e-galagwensur-nanasadi, degi, bab-dummaganse-goled-negmar-sobsadi, degi, bab-dummad-bundor-Asera-wagar-wilub-sobsabalidi, degi, nuchumar-sobsabalidi, Bab-Dummad-gayaburba-barsogmalad-e-gardamargi narmakar maid.
2CH 33:20 Manasés burgwenonigua, e-reyneggi digsamalad. A-sorbali, e-machi-Amón reyga megnonikid.
2CH 33:21 Rey-Amón birga-dulagwen-gakabo-nikadgi (22) yar seargusad. Degi, Jerusalén-neggweburgi birgabo reyga megisad.
2CH 33:22 Amón, e-bab-Manasés-isgusadyobi Bab-Jehová-asabin ibmar-isganabi imaksamogad. Degine, e-bab-Manasés-nuchu-mimmimar-sobsa-gusadga ibmar-ogumakaled uksa-gusad, degi, ese gordii gusad.
2CH 33:23 Degi-inigwele, e-bab-Manasésʼyobi na san-bipii imaksasulid. Aka bur bule dummad-isgudii gusad.
2CH 33:24 Rey-Amónʼga-arbamalad-dummagan, rey-oburgwedgi sunmakargusmalad. Geb reyneggi, rey-oburgwismalad.
2CH 33:25 Geb degine, neggweburginmalad, dulemar-rey-oburgwismalad oburgwismarmogad. Degi, a-sorba, e-machi-Josías reyga nugsanonimalad.
2CH 34:1 Josías birgabaabak-nikadgi (8) yar sealid. Josías Jerusalénʼgi birga-dulagwen-gakambe-gakagwensak (31) yar sesad.
2CH 34:2 Josías, Bab-Jehová-asabin ibmar-nueganbi imaksad. Ar e-dad-David-nanasayobi nanadii gusad. A-igarbali gwen aibachasulid.
2CH 34:3 Josías, birgabaabakgus (8) reyga-megedgi, amba sapingwa-guedgine, e-dad-David-e-Bab-Dummadba nanaar gusad. Degi, birgambe-gakabogus (12) reyga-maidgine, Judá-yar, degi, Jerusalén-neggwebur nudakar gusad. Bab-dummaganse-goled-negmar osulosad. Degi, bab-dummad-bundor-Asera-wagar-wilub-sobarmalad, degi, nuchumar-sobarmalad, degi, bormogi-nuchuyob-sobar-sobar-nanaed bela osulosbalid.
2CH 34:4 Degi, Josías-wagab Baalʼga-ibmar-ogumakar-ukleged-ailamar-bukwad osulolesad. Degi, ina-wawadikid-ogumakleged-ailamar osulosbalid. Deginbali, bab-dummad-bundor-Asera-wagar-wilub-bukwad, degi, nuchumar, degi, bormogi-wagar-wilub-sobar-sobar-naed mamarismalad. Geb degi, e-goagandi dulemar-Baalʼga-ibmar-ukdigusmalad-digar-mamaidgi misad.
2CH 34:5 A-ukinbali, Josías, bab-dummaganga-ibmar-ogumakar-ukleged-aila-birgi, dule-irwa-bab-dummaganse-gormalad-e-garmar ogumaksabalid. Deyobi, Josías, Judá-yar, degi, Jerusalén-neggwebur nudaksad.
2CH 34:6 Deginbali, Manasés-neggweburmar, Efraín-neggweburmar, Simeón-neggweburmar, degi, Neftalí-neggweburmarse-bakar, bela nudaksabalid. Degi, a-dikarba neggweburmar-bukwadse-bakar, nudaksabalid.
2CH 34:7 Rey-Josías bela Israel-yargi ibmar-ogumakar-ukleged-ailamar osulosad. Degi, ubigwar nuchumar imaksad, degi, bab-dummad-bundor-Asera-e-wilubmar, degine, ina-wawadid-ogumakleged-e-ailamar osulosad. Geb agine, Jerusalénʼse gannar nonikid.
2CH 34:8 Josías birgambe-gakabaabakgus (18) yar-semaidgine, yar-naid-nudaksagusad-sorba, degi, Bab-Jehováʼse-goled-neg swilidik-imaksad-sorba, Azalía-machi-Safán barmisad. Deginbali, neggwebur-saila-Maasías, degi, Joacaz-machi-Joa barmisbalid. Joacazʼde, reyga-garda-narmakedid. Adi, wemar, Bab-Dummad-Jehováʼse-goled-neg nudakega barmisad.
2CH 34:9 We-dulemarde, dule-irwa-Bab-Dummadse-goled-bur-dummad-Hilcíasʼse modapmalad. Degine, Bab-Jehováʼse-goled-negga-mani-welesad ega uksamalad. Deginbali, Levitaʼmar-yawagak-dakmalad wemargi mani wesmalad: Manasés-e-wagangi, Efraín-e-wagangi, bela Israel-dulemar-besmaladgi, Judá-dulemargi, Benjamín-dulemargi, degi, bela Jerusalén-neggweburginmaladgi mani wesmalad.
2CH 34:10 Geb agine, Levitaʼmar, dulemar-arbamalad-e-dummaganga mani uksad. A-dulemarde, Bab-Jehováʼse-goled-neg-nudakmalad-e-dummagan gued. Geb amala, Bab-Jehováʼse-goled-neg-nudaknanaimalad bennuksad. Degine, dule neg-obinonanaimalad bennuksad.
2CH 34:11 Deginbali, urgogi-arbamalad-dulega, degi, akwa-neggi-arbamaladga mani uksamarbalid, adi, wemar akwamar-bakega, degi, urgomar-nagubirmarga-guoed-bakegar. Adi, Judá-e-reymar-negmar-bibichisad ogachimakegar.
2CH 34:12 We-dule-arbamaladde, gusgu sogedba arbaed-imakdamalad. Dulemar-arbaed-e-idumaladdi, Levitaʼmalad. Amar, wemalad: Jahat, Abdías. Wemala, Merari-waganad. Zacarías, Mesulam. Wemala, Coat-e-wagan gumalad.
2CH 34:13 Bela Levitaʼmar gar-ogoled wismaladbiid. We-Levitaʼmarde: Ibmar-berbemalad-e-dummaganbalid. Dule-ibmar-baigangi-arbamalad-dakedbalid. Degine, baid-ibmar-imaklemalad-e-dummaganbalid. Levitaʼmar abala, dule-garda-narmakmaladid, dummaganad, degi, yawagak-dakmaladid.
2CH 34:14 Geb Bab-Jehováʼse-goled-neggi, mani-oubolesad, gannar oniarmargua, dule-irwa-Bab-Jehováʼse-goled-Hilcías, Bab-Jehová-Igar-narmakar-maid-garda Moisésʼga-uklesgusad amisad.
2CH 34:15 Degidgine, Hilcías dule-garda-narmaked-Safánʼga sogded: “Bab-Dummad-Igar-Maid-Garda, Bab-Jehováʼse-goled-neggi an amisad.” Geb agine, Hilcías Safánʼga garda uksad.
2CH 34:16 Geb degine, Safán, Rey-Josíasʼse garda sesad. Agine, reyga sogdesunnad: —Dummad, bega-arbamalad, bela ibmar imakoye-ega-soglesad, bela imaknanaimalad.
2CH 34:17 Bab-Jehováʼse-goled-neggi mani-amilesadi, bela urbismalad. Geb arbananaid-e-idumaladga a-mani uksamalad.
2CH 34:18 A-ukinbali, dule-garda-narmaked-Safán reyga sogdebalid: —Dule-irwa-Bab-Dummadse-goled-Hilcías, anga garda-bipirmakaled uksad. Geb degi, Safán, rey-wagab garda absosad.
2CH 34:19 Rey-Josías, gardagi Bab-Dummad-Igar-Maid-itosgua, nunmak-itogedba e-mor esirmaksad.
2CH 34:20 Degi, rey wemarga igar ukded: Hilcíasʼga, Safán-machi-Ahicamʼga, Micaía-machi-Abdónʼga, garda-narmaked-Safánʼga, degi, reyga-arbaed-Asaíasʼga igar-uksad. Weyob Rey-Josías amarga igar-uksad:
2CH 34:21 —¡Be namala! An-ular, Bab-Jehováʼse be igar-aminamala. Degine, Israel-dulemar-besmaladga, Judá-dulemar-besmaladga, Bab-Jehováʼse be igar-aminamala. We-gayaburba-narmakar-naid gardagi-amilesadi, ibi obarye ega be sogmalo. Ar anmar-dadgan Bab-Jehová-gayaburba we-gardagi-maid gwen itossurmalad, degi, eba nanassurmarbalid. A-ulale, Bab-Jehová-sae-itogedba bela-bela anmargi urwemairgebed.
2CH 34:22 Degidgine, Hilcías, degi, rey sordamar-nug-imaksadi, Bab-Dummad-gayaburba-barsoged-bundor-Huldaʼse-idakega nadmalad. Huldaʼde, Jerusalén-neg-binigan-bukwadgi maid. Huldaʼde, Salum-e-omed. Salumʼde, Ticva-machid, degi, Harhas-e-wagwad. Ticvaʼde, Bab-Dummadse-goled-neggi mor-sabolemalad-e-dakedid. Geb dule-barmilesmalad Huldaʼbo sunmaksamalad.
2CH 34:23 Degidgi, Hulda amarga sogded: —Israel-e-Bab-Dummad-Jehová, weyob soged: ‘Rey-Josías anse idakega, bemar-barmialid. A-reyga weyob be sogoye:
2CH 34:24 Judá-reyga-garda-absolesadgi igi-narmakar-sognai, deyobi, an neg imakoye, degi, e-dulamargi an naibid-dummad an barmidabaloye.
2CH 34:25 We-dulemar an-obachamalad, degi, bab-dummad-baiganga ibmar-wawadik-ogumakdii gusmalad. Degine, nuchu-mimmigan sobsamarbalid. A-ulale, an-ourwega imaksamalad. Degisoggu, an bela-bela sae-itodedba, we-neggwebur an sabsur-odurdakoed, degi, an-sae-itoged gwen berguosulid.’
2CH 34:26 Degi-inigwele, Judá-rey-Josías anse-igar-amiega bemar-barmialidga, be weyob sogmalo: ‘Israel-e-Bab-Dummad-Jehová sogye, an-gayaburba-gardagi-narmakar-maid be itosmaladyob neg guoye.
2CH 34:27 Gardagi igi-we-neggwebur-guoed, degi, e-dulamar-guoedgi-sunmaknaid be itosgua, be-gwagegi naibid-dummad be itosad. Be san-bipii an-asabin imaksad, degi, mor na be esirmaksabalid. Degine, be an-asabin ogormaksii be gussoggu, bela an be-itosad. An, Bab-Jehová-guedgi, an be-itosad.
2CH 34:28 Degisoggu, be nuedgi, bonisuli burgoed, degi, be-dadganba neg-uangi-megega an be-imakoed. Neggweburgi, naibid-dummad an barmidagoedi, be dakosulid.’ Degine, dule-igar-amidimalad gannar Rey-Josíasʼse nonimargu, gayaburba-ega-soglesad, reyga sognonimalad.
2CH 34:29 Degidgine, rey igar-itogega bela Judá-girmar-dummaganse, degi, Jerusalén-girmar-dummaganse gochad.
2CH 34:30 Geb agine, rey Bab-Jehováʼse-goled-negse-nadgua: Bela Judá-dulemar, Jerusalénʼginmalad, dule-irwa-Bab-Jehováʼse-gormalad, Levitaʼmar, bela serganse-bakar, degi, burwiganase-bakar, Bab-Dummadse-goled-negse nadmarmogad. Geb Rey, Bab-Jehováʼse-goled-neggi, Bab-Dummad-Israel-dulemarbo-Igar-Mesisad-garda-amilesad, bela-dulemar-itogega, a-garda absosad.
2CH 34:31 Geb a-sorba, rey buar-naba-gwisgusgua, Bab-Jehová-asabin weyob gannar igar mesisad: “Bab-Jehová-Igar-Maidba nanadii an guoye, Bab-Jehová-dulemarga-Igar-narmakar-mesisadba an nanadii guoye, degi, Bab-Dummad-Igar-uksadba an nanadii guoye. An bela-bela gwage-ulubgi Bab-Jehová-Igar-Mesisadginbi an nanadii guoye.”
2CH 34:32 Geb a-sorbali, rey bela Jerusalénʼgi-bukwamalad, degi, Benjamín-yargi-bukwamalad, eba-imakmogoye-sogega imaksad. Degi, bela Jerusalén-dulemar, Bab-Jehová-Dadganbo-Igar-Mesisadba imaksamalad.
2CH 34:33 Rey-Josías bela Israel-yargi galagwensuli ibmar-isgana-imaklemalad-bukwad osulosad. Degi, Josías bela Israel-yargi-gudidimalad, Bab-Jehováʼse-golega imaksad. Josías we-napneggi-gudigusgua, dulemar e-dadgan-e-Bab-Dummad-Jehováʼba nue-nanadii gusmalad. Bab-Jehováʼgi bar bangussurmalad.
2CH 35:1 Josías, Jerusalénʼgi Bab-Jehováʼga, Israel-Dulemar-Oburgwilegoenad-Iba onosad. Gebe-nii-yolesad ibambe-gakabakegi (14), a-ibaga sibad-wawaad-senigwad oburgwismalad.
2CH 35:2 Degi, Josías dule-irwa-Bab-Dummadse-gormaladga arbaed uksad, degi, Bab-Jehováʼse-goled-neggi-arbamalaga amar-ogannosbalid.
2CH 35:3 A-ukinbali, Josías, Levita-Israel-dulemar-odurdakmaladga-nugsalesmaladga, degi, Levitaʼmar Bab-Jehováʼga na san uksamarbalidga weyob sogsad: “Bab-Jehová-Dadganbo-Igar-Mesisad-Ulu, Bab-Jehováʼse-goled-neggi be simalo. Israel-rey-David, a-e-machi-Salomón-neg-sobsagusadgi be simalo. Adi, mer bar gannar-gannar gukingi semalagar. Emisgindi, be-Bab-Dummad-Jehová-sogedba be damar, degi, be-Israel-dulemarga be arbamar.
2CH 35:4 Emisgine, guakwamalo, be-gwenad-be-gwenadganba be ambikumalo, degi, bega-arbaega ibagan-megisadba be ambikumalo, adi, Israel-rey-David-igar-mesisadba, degi, e-machi-Salomón-igar-mesisadba na muchub-muchub arbamalagar.
2CH 35:5 ”Bab-Jehováʼse-goled-neggi na e-arbaed-e-arbaedgi arbamar. Israel-dulemar e-gwenadgan-e-gwenadganba-mimilesadba ambikumar. Degine, Levitaʼmar e-gwenadgan-e-gwenadganba-mimilesmaladi, Israel-dulemar-e-gwenadgan-e-gwenadganba-mimilesadba ambikumar.
2CH 35:6 Israel-Dulemar-Oburgwilegoenad-Ibaga sibad-wawaad-senigwad be oburgwemalo. Bemar swilidik na be imakmalo. Degine, bela ibmar-abelemalad guagwar be urbemalo. Adi, be-gwenadgan sogedba Bab-Jehová-gayaburba-Moisésʼga-uklesadba imakmalagar.”
2CH 35:7 Geb Rey-Josías bela dulemar-bukwamaladga e-ibmar-durgan-nuegan uksad: E-sibad-wawaad-senigana, degi, e-sibad-senigana, bela mili-dulagwen-gakambe (30,000) uksad. Moli-bebe-nikad milipaa (3,000) uksabalid. Bela we-ibmar-durgan, Oburgwilegoenad-Iba-onogegala, uksad. Degi, bela we-ibmar-durgan Rey-Josías-nainugi danikid.
2CH 35:8 Deginbali, rey-e-dummagan dulemarga ibmar-durgan uksamarmogad. Degine, dule-irwa-Bab-Dummadse-gormaladga, degi, Levitaʼmarga uksamarbalid. Deginbali, Bab-Jehováʼse-goled-neggi-dummaganga-gudidimalad, Hilcías, Zacarías, Jehiel ibmar-durgan uksamarmogad. Amala, dule-irwa-Bab-Dummadse-gormaladga sibad-wawaad-milibo gaka-dulataled-ilanergwa (2,600) uksamalad, degi, moli-bebe-nikad dulataled-ilapaa (300) uksamarbalid. We-ibmar-durgana, Israel-Dulemar-Oburgwilegoenad-Iba-onogegala uksamalad.
2CH 35:9 Amba deyobi, Conanías, degi, e-urbamar Semaías, Natanael, ibmar-durgan-uksamarmogad. Degi, Levitaʼmar-e-dummagan, Hasabías, Jeiel, degi, Josabad, Israel-Dulemar-Oburgwilegoenad-Iba-onogega Levitaʼmarga ibmar-durgan uksamarmogad. Amala, sibad-wawaad-miliatar (5,000) uksamalad, degi, moli-bebe-nikad dulataled-ilatar (500) uksamarbalid.
2CH 35:10 Ibmar bela guakwagusgua, dule-irwa-Bab-Dummadse-gormalad e-ambikumaladgi ambikusmalad. Degi, Levitaʼmar rey-e-igar-sogmaidba e-ambikumaladgi ambikusmarmogad.
2CH 35:11 Degi, Israel-Dulemar-Oburgwilegoenad-Iba-onodmargu, sibad-wawaadmar oburgwismalad. Geb dule-irwa-Bab-Dummadse-gormalad sibad-wawaad-abe bomi-bomi imaksamalad, degi, Levitaʼmardi, ibmar-durgan-e-uka edarnanai guarmalad.
2CH 35:12 Agine, Bab-Jehováʼga-ibmar-dula-ogumakar-ukmalaga, e-gwenadgan-e-gwenadgan-merguedba ibmar-durgan mimilesad. Adi, Moisés-Igar-narmakar-maidba Bab-Jehováʼga ukmalagar. Amba deyob moli-bebe-nikad imaksamarbalid.
2CH 35:13 A-sorbali, Israel-Dulemar-Oburgwilegoenad-Iba-onogega Igar-maidbali san narismalad. A-ukinbali, san-swilidik-bukwadi, bormomargi, esmedgi, degi, ibmar-dibyedgi dusmalad. Geb degi, gwae-gwae bela dulemarga mimismalad.
2CH 35:14 Geb a-sorbali, Levitaʼmar dukin na ega san imakdemarmogad, degi, dule-irwa-Bab-Dummadse-gormaladga imaksamarmogad. Ar ade, dule-irwa-Bab-Dummadse-gormalad-Aarón-e-wagan ibmar-ogumakar-ukedgi, degi, e-gwallumar-mimiedgine neg-mutikguedse arbananai gusmalad. Degisoggu, Levitaʼmar dukin na ega san imaksamarmogad, degi, dule-irwa-Babse-gormalad-Aarón-waganga imaksamarmogad.
2CH 35:15 Deyobi, Asaf-e-wagan-namakmaladi: David-igar-maidba, Asaf-igar-maidba, Hemán-igar-maidba, degi, Jedutún-igar-maidba, na e-ambikuedgi ambikusmarmogad. Jedutúnʼde, reyga Bab-Dummad-nuggi negburgan-dakedid. Amba deyobi dule-yawagak-dakmalad ambikusmarmogad. Degisoggu, wemardi e-arbaedgi bangussurmalad, ar ade, e-gwenadgan-Levitaʼmar ega ibmar imaksamalad.
2CH 35:16 Weyob Israel-Dulemar-Oburgwilegoenad-Iba onosmargu, Bab-Jehováʼga ise-ilemakar arbalesad. Degi, Rey-Josías-igar-uksa-gusadba, Bab-Jehováʼga ibmar ogumakar-ukleged-ailagi ibmar-durgan uklesbalid.
2CH 35:17 Deunni, Israel-dulemar a-ibagi-gudidimarmogadi, Oburgwilegoenad-Iba onosmarmogad. Degi, Madu-Inasuli-Gulleged-Iba ibagugle (7) onosmalad.
2CH 35:18 Bab-Dummad-gayaburba-barsoged-Samuel, Israel-yargi megisad-akale, Israel-reymar-megmamaidi, wargwensaale Israel-Dulemar-Oburgwilegoenad-Iba, deyobi, onodisurmalad. Igi Rey-Josías, degi, dule-irwa-Bab-Dummadse-gormalad, degi, Levitaʼmar, degi, bela Judá-dulemar, Israel-dulemar, Jerusalén-dulemarbogwa iba-onosmaladyobi, gwen-onodisurmalad.
2CH 35:19 Rey-Josías birgambe-gakabaabakgus-maidgi (18), we-Oburgwilegoenad-Iba onolesad.
2CH 35:20 Rey-Josías Bab-Jehováʼse-goled-neg-nudaksad-sorbali, Egipto-rey-Necao, urwega Carquemis-neggweburse nadegusad. A-neggwebur Éufrates-diwar-maidsik siid. Geb degi, Josías egi-gwisguega aligusad.
2CH 35:21 Degidbali, Necao, Rey-Josíasʼse e-gayaburba-berbemalad barmisad. Weyob ega sogega: “Judá-e-rey, mer be anse achamoga. Ar an bebo-urwega danisulid. Neggwebur-angi-gwisgunaidbo an urwe-danikid. Bab-Dummad anga sogsad, gwae be naoye. Mer Bab-Dummad-anba-gudiidgi-gwisguedgi be binsao, adi, mer Bab-Dummad be-oburgwegar.”
2CH 35:22 Degi-inigwele, Josías, Necaoʼba Bab-Dummad-ega-gayaburba-sognaidi itossur gusad. Aka na reysuliyob imaksad, geb Meguido-neba-naidse Necaoʼgi bila-onogega nadegusad.
2CH 35:23 Agine, Necao-e-sigu-mimalad Rey-Josíasʼgi sigu miarmalad, geb onailikgusmalad. Degidgi, Rey-Josías e-sordamarga sogded: “Be an-nidmala, bela-bela naibigus an itoged.”
2CH 35:24 Degisoggu, e-sordamar e-ur-napaginedgi-gwichidgi urwed-ur-baidse ogwasmalad. Geb Jerusalén-neggweburse sesmalad. Agi, Rey-Josías burgwedapid. Geb e-dadgan-neg-uangi diglesad. Degi, bela dulemar-Judá-yargi-bukmalad, degi, Jerusalénʼgi-bukmalad Josías-burgwisadba nue-nunmak itosmalad.
2CH 35:25 Jeremías, Josías-burgwisad-ebinsalegega bukib-binsaed-namaked narmaksad. Emi-ibasega bela machergan-namakmalad, degi, omegan-namakmalad, bukib-binsaleged-namaklegedba Josías-burgwisad ebinsadamalad. We-namaklegedi, Israel-yargi gusgu namakledii gusad. We-bukib-binsaleged-namaklegedi, Lamentaciones-gardagi narmakar nanaid.
2CH 35:26 Josías-ibmarmar-imaksadi, degi, Bab-Jehová-igar-narmakar-maidba, ibmar-nuegan-imaksadi,
2CH 35:27 deginbali, bela Josías-e-ibmar-gebe-imakded, degi, e-burgwedse-ibmar-imaksabalidi, Israel-rey-gardamargi, degi, Judá-rey-gardamargi narmakar mamaid.
2CH 36:1 Degidgine, dulemar, Josías-machi-Joacaz ega yar-seega sunonimalad, degi, e-bab-burgwisad-sorba, e-bab-anar Jerusalénʼgi rey-gangi sinonimarsunnad.
2CH 36:2 Joacaz birga-dulagwen-gakapaa-nikadgi (23) yar-sear gusad. Jerusalén-neggweburgi nii-warbaa yar sesad.
2CH 36:3 Degi-inigwele, Egipto-rey-Necao, Rey-Joacaz Jerusalénʼgi reyga-mai egwannonikid. Agi, Egipto-rey Judá-yarga gandikidgi mani-bennuked-igar mesnonikid: Mani nibir-miligugle gaka dulataled-ilatar (7,500), ukoye. Or nibir-dulapaa-gakambe-gakatar (75) ukbaloye igar mesnonikid, adi, ega ukegar.
2CH 36:4 Agine, Egipto-rey, Joacaz-anar, Judá-reyga-megega, degi, Jerusalén-reyga-megega e-urba-Eliaquim nugsanonikid. Geb degi, Necao, Eliaquimʼga nug-ogwanonikid, Joacimʼye onugsanonikid. Rey-Necaoʼdi, Egipto-yarse Joacaz-gasa sesad.
2CH 36:5 Joacim birga-durgwen-gakatar-nikadgi (25) yar-sear gusad. Jerusalénʼgi birgambe-gakagwensak (11) yar sesad. E-Bab-Dummad-Jehová-asabin ber ibmar-isganabi imaksad.
2CH 36:6 Babilonia-Rey-Nabucodonosor Joacimʼgi gwisguega ese nadegusad. Geb degi, Nabucodonosor Babiloniaʼse Joacim esgoro-gordikid-dubgi edinnar-sesad.
2CH 36:7 A-ukinbali, Nabucodonosor, ibmar-gargemalad Bab-Jehováʼse-goled-neggi-bukwad, Babiloniaʼse sesbalid. Geb Babiloniaʼgi e-bab-dummadse-goled-neggi urbedapid.
2CH 36:8 Joacim e-ibmarmar-imaksadi, degi, ibmar-isgana imaksadi, degi, ibmar egi-gusadi, bela Israel-e-reymar-e-gardagi, degi, Judá-e-reymar-e-gardagi narmakar mamaid. Joacim-sorba, e-machi-Joaquín yar-seega megnonikid.
2CH 36:9 Joaquín birgambe-gakabaabak-nikadgi (18) yar sealid. Jerusalénʼgi nii-warbaa gaka-ibambe yar sesad. Joaquín, Bab-Jehová-asabin ibmar-isganabi imaksa gusad.
2CH 36:10 A-ulale, Rey-Nabucodonosor birga-gebe-onodgu sogsad, Joaquín, Babiloniaʼse sedmaloye, degi, ibmar-nuegan-gargerbamalad, Bab-Jehováʼse-goled-neggi-bukwad sedmarbaloye. Geb degi, Nabucodonosor Joaquín-e-gwenad-Sedequías Judá-yar-seega, degi, Jerusalén-neggwebur-seega mesisad.
2CH 36:11 Sedequías birga-dulagwen-gakagwensak-nikadgi (21), yar-sear gusad. Jerusalén-neggweburgi birgambe-gakagwensak (11) yar sesad.
2CH 36:12 Sedequías, Bab-Dummad-Jehová-asabin ibmar-isganabi imaksad. Sedequías, Bab-Dummad-gayaburba-barsoged-Jeremías, ega Bab-Jehová-nuggi sunmaksagu, Bab-Jehová-abin san-bipii imaksasulid.
2CH 36:13 A-ukinbali, Sedequías, Bab-Dummad-asabin Nabucodonosorʼga ise-sogar imaksanad: “An beba ibsadii guoye.” Degi-inigwele, Sedequías aka Nabucodonosorʼgi gwisguded. Sedequías aka bur bule burguded, Israel-e-Bab-Dummad-Jehováʼba gwen ibsassulid.
2CH 36:14 Aginbali, dule-irwa-Bab-Dummadse-gormalad-e-dummagan, degi, dulemar, bela-bela isgusmalad. Dulemar-epenne-bukwagusmalad ibmar-isgana-imaksadba isgudmarmogad, degi, Bab-Jehováʼse-goled-neg oichosmalad. A-nega Bab-Jehová swilidik imasgusanad.
2CH 36:15 Degi-inigwele, e-dadgan-e-Bab-Dummad-Jehová, bela-bela e-dulemar-sabsoggu, degi, ese-goled-neggi binsabarsoggu, amarga bali-bali e-gayaburba-barsogmaladba e-gayaburba barmisanad.
2CH 36:16 Degi-inigwele, Judá-dulemar, Bab-Dummad-gayaburba-barsogmaladgi dododgusmalad, e-gayaburba sae-itodgusmalad, degi, Bab-Dummad-gayaburba-barsogmaladnik sogdegusmalad: “Binsa gordimarye.” Geb degi, ibagwengi, Bab-Jehová-sae-itogedba e-dulemargi gwichigussunnad, degi, bar bendakdii gussulid.
2CH 36:17 Degisoggu, Bab-Jehová, Babilonia-dulemar-e-rey Judá-dulemargi-gwisguega Judá-yarse barmialid. Degi, a-rey bela sapingana Bab-Dummadse-goled-negyaba es-suidgi ogilosad. Degine, Bab-Dummad, Nabucodonosorʼga bela dulemar-urmaksad: Sapingana, yagana, degi, serganse-bakar, degi, dad-seleganse-bakar, urmaklesad.
2CH 36:18 Bela Bab-Dummadse-goled-neggi ibmar-ebulemalad-dummagan-bukwad. Ibmar-ebulemalad-bipigan-bukwad. Degi, Bab-Dummadse-goled-neggi ibmar-gargermalad-bukwad selesad. Reygad ibmar-nuegan-gargermalad-bukwamogad, degi, dummagan-reyga-arbamaladgad ibmar-nuegan-gargermalad-bukwabalid, bela Caldeo-dulemar-e-rey Babiloniaʼse sesad.
2CH 36:19 A-ukinbali, Bab-Dummadse-goled-neg ogumaksamarbalid, Jerusalén-e-galu-matusulid earismarbalid, reynegmar bela soogi ogumaksamarbalid, degi, bela ibmar-gargemalad-bukwad bibichismarbalid.
2CH 36:20 Dule-burgwissurmaladdi, Babiloniaʼse galesa selesmalad. Agi, rey-maiga gudapmalad, degi, rey-e-masmala-e-maiga gudapmarbalid. Geb Persa-dulemar-yar-sealidse deyobi gudii gusmalad.
2CH 36:21 Deyobi, Bab-Jehová-gayaburba-Jeremíasʼba-soglesgusad gunonikid. Bela dulemar Israel-yargi-bar-bukwasulidgi, napaneg bogidik naigusad. Igar-maidbali, napaneg birga-dulapaa-gakambe (70) bogidik naigusad.
2CH 36:22 Rey-Ciro, Persa-dulemar-e-rey, gebe-megided-birgagi, Bab-Jehová, a-rey-e-gwage ebusad e-gayaburba-oniega, degi, garda narmakar mimiegarbar. Adi, e-gayaburba-barsoged-Jeremías-sogsagusadba ibmar guegar. Degisoggu, Rey-Ciro bergwable-yar-ganikidgi, gayaburba gardagi narmakar, degi, gayagi-sogar gaya-mimisad, weyob sogsiid:
2CH 36:23 “Persa-dulemar-e-rey-Ciro, weyob soged: ” ‘Bab-Jehová, Bab-Dummad-Nibneggi-Maid, bela-yarmar-nanaid anga uksad. Degi, anga sogsabalid: Judá-yargi, Jerusalén-neggweburgi ese-goled-neg soboye. Dulemar-anmar-abargi-gudiid, na Judío-dule-itogele, degi, Bab-Jehová, e-Bab-Dummad-itogele, Jerusalénʼse e-Bab-Dummad-Jehováʼba naodo.’ ”
EZR 1:1 Rey-Ciro, Persia-yar-e-reyga maigusad. Ciro-gebe-reyga-megided-birgagi, Bab-Jehová, Rey-Ciro-e-gwage ebusad, adi, bela e-yar-dakmaidgi igar-mesegar. Adi, we-igar-megoedba, nabir Bab-Jehová Jeremíasʼba gayaburba-sogsadba guegar. Degine, Rey-Ciro bela yar-ganikidgi igar-mesisad sogsa gusad, degi, gardagi-narmakar imaksabalid. Weyob sogsad:
EZR 1:2 “Persia-rey-Ciro weyob soged: ” ‘Bab-Dummad-Jehová-Nibneggi-Maidi, anga we-napneg-dirbir-naidgi bela yarmar-nanaid uksad. Degi, anga sogsabalid, Judá-yargi Jerusalén-neggwebur-siidgi ese-goled-neg ega soboye.
EZR 1:3 Degisoggu, anmar-abargi-Judá-dulemar-gudimalad Jerusalén-neggweburse be namar. Israel-dulemar-e-Bab-Dummad-Jehováʼga ese-goled-neg be sobnamar. We-Bab-Dummadde, Jerusalénʼgi maid. Degi, a-Bab-Dummad bemarba naena gadin.
EZR 1:4 A-ukinbali, an igar-ukbardo, dule-bamaladi Judío-dulemar-amba-gudidimalad-bendakega we-ibmar ukmalo: Mani, olo, ibmar-nuegan, degi, e-ibmar-durgan ukmalo. De-ukinbali, dulemar Bab-Dummadga-ibmar-ukleged e-binsaedba Bab-Dummadse-goled-negga ukbalo.’ ”
EZR 1:5 Degidgine, Judá-wagan-e-dummagan-neguya-sedimalad, Benjamín-wagan-e-dummagan-neguya-sedimalad, dule-irwa-Bab-Dummadse-gormalad, degi, Levita-dulemar, degi, Bab-Dummad bela dule-gwenna-gwenna-e-gwage-ebusmaladmala, amar Jerusalén-neggweburse Bab-Dummadse-goled-neg-sobnaega guakwaa ambikusmalad.
EZR 1:6 Bela dulemar e-neg-nagaba-mamaimalad bendaksamarmogad. We-ibmarmar ega uksamalad: Mani, or, ibmar-nuegan, ibmar-durgan, degi, ibmar-gargerbamalad ega uksamalad. Deginbali, dulemar, bela ibmarmar-akar-akar e-binsaedba Bab-Dummadse-goled-negga uksamarbalid.
EZR 1:7 Epenne, Jerusalénʼgi Bab-Jehováʼse-goled-neggi-ibmar-ebulemalad, Nabucodonosor Babiloniaʼse sear gusad. Geb e-bab-dummadse-goled-negse urbenoni gusad. Emide, a-ibmarmar Persa-rey-Ciro onisad.
EZR 1:8 Degi, Persia-rey-Ciro, e-mani-daked-Mitrídatesʼga ibmar-onilesmalad uksad, adi, ebisegar. Bela ebichisgu, Judá-dulemar-e-dummad-Sesbasarʼga we-ibmarmar uksad.
EZR 1:9 Ar ibmar-ebislesmalad, wemalad: Bate-dummagan-orbiid, gwadulagwen-gakambe (30). Bate-dummagan-manibiid, miligwen (1,000). Estin, gadulagwen-gakabakebak (29).
EZR 1:10 Nog-orbiid, gwadulagwen-gakambe (30). Nog-manibiid, gwadulataled-ilabake gakambe (410). Degi, ibmar-baigan-ebulemalad, miligwenba (1,000).
EZR 1:11 Ibmar-ebulemalad-orbiid, degi, manibiid, bela miliatar gaka dulataled-ilabake-mergu (5,400) daklealid. Bela we-ibmarmar Sesbasar gannar Jerusalén-neggweburse sesa gusad, deun Judá-dulemarga soglesgu, bemar gannar Babilonia-neggweburgi-bukwad Jerusalén-neggweburse namaloye.
EZR 2:1 Babilonia-rey-Nabucodonosor, Judá-yargi dulemar-bukidar Babilonia-yarse sesa gusad. Geb a-sorba, ise barmiar Jerusalén-neggweburse imaksad, degi, Judá-yargi neggweburmar-bukwadse barmisbalid. Degine, dulemar na e-neggwebur-e-neggweburse nonigusmalad.
EZR 2:2 Dulemar-Zorobabelʼba-nonigusmaladi, wemalad: Jesúa, Nehemías, Seraías, Reelaías, Mardoqueo, Bilsán, Mispar, Bigvai, Rehum, Baana. Israel-dulemar e-yarse-nonimaladi, wemalad:
EZR 2:3 Paros-wagan, milibo gaka dulabaabak-gakambe-gakabo (2,172).
EZR 2:4 Sefatías-wagan, dulataled-ilapaa gaka dulapaa-gakambe-gakabo (372).
EZR 2:5 Ara-wagan, dulataled-ilagugle gaka dulapaa-gakambe-gakatar (775).
EZR 2:6 Pahat-Moab-wagan, a sogleged, Jesúa-e-waganye, degi, Joab-e-waganye, milibo gaka dulataled-ilabaabak gakambe-gakabo (2,812).
EZR 2:7 Elam-wagan, miligwen gaka dulataled-ilabo gaka dulabo-gakambe-gakabake (1,254).
EZR 2:8 Zatu-wagan, dulataled-ilabakebak gaka dulabo-gakatar (945).
EZR 2:9 Zacai-wagan, dulataled-ilagugle gaka dulapaa (760).
EZR 2:10 Bani-wagan, dulataled-ilanergwa gaka dulabo-gakabo (642).
EZR 2:11 Bebai-wagan, dulataled-ilanergwa gaka dulagwen-gakapaa (623).
EZR 2:12 Azgad-wagan, miligwen gaka dulataled-ilabo gaka dulagwen-gakabo (1,222).
EZR 2:13 Adonicam-wagan, dulataled-ilanergwa gaka dulapaa-gakanergwa (666).
EZR 2:14 Bigvai-wagan, milibo gaka dulabo-gakambe-gakanergwa (2,056).
EZR 2:15 Adín-wagan, dulataled-ilabake gaka dulabo-gakambe-gakabake (454).
EZR 2:16 Ater-wagan, a sogleged Ezequías-e-waganye, dulabake-gakambe-gakabaabak (98).
EZR 2:17 Bezai-wagan, dulataled-ilapaa gaka dulagwen-gakapaa (323).
EZR 2:18 Jora-wagan, dulatar-gakambe-gakabo (112).
EZR 2:19 Hasum-wagan, dulataled-ilabo gaka dulagwen-gakapaa (223).
EZR 2:20 Gibar-wagan, dulabake-gakambe-gakatar (95).
EZR 2:21 Belén-neggweburginmalad, dulanergwa-gakapaa (123).
EZR 2:22 Netofa-neggweburginmalad, dulabo-gakambe-gakanergwa (56).
EZR 2:23 Anatot-neggweburginmalad, dulanergwa-gakabaabak (128).
EZR 2:24 Azmavet-neggweburginmalad, dulabo-gakabo (42).
EZR 2:25 Quiriat-Jearim-neggweburginmalad, Cafiraʼginmalad, degi, Beerotʼginmalad, dulataled-ilagugle gaka dulabo-gakapaa (743).
EZR 2:26 Ramá-neggweburginmalad, degi, Gebaʼginmalad, dulataled-ilanergwa gaka dulagwen-gakagwensak (621).
EZR 2:27 Micmas-neggweburginmalad, dulanergwa-gakabo (122).
EZR 2:28 Betel-neggweburginmalad, degi, Haiʼginmalad, dulataled-ilabo gaka dulagwen-gakapaa (223).
EZR 2:29 Nebo-neggweburginmalad, dulabo-gakambe-gakabo (52).
EZR 2:30 Magbis-neggweburginmalad, dulagugle-gakambe-gakanergwa (156).
EZR 2:31 Elam-neggweburginmalad, miligwen gaka dulataled-ilabo gaka dulabo-gakambe-gakabake (1,254).
EZR 2:32 Harim-neggweburginmalad, dulataled-ilapaa gaka dulagwen (320).
EZR 2:33 Lod-neggweburginmalad, Hadidʼginmalad, degi, Onoʼginmalad, dulataled-ilagugle gaka dulagwen-gakatar (725).
EZR 2:34 Jericó-neggweburginmalad, dulataled-ilapaa gaka dulabo-gakatar (345).
EZR 2:35 Senaa-neggweburginmalad, milipaa gaka dulataled-ilanergwa gaka dulagwen-gakambe (3,630).
EZR 2:36 Dule-irwa-Bab-Dummadse-gormalad-nonimalad, wemalad: Jesúa-gwenadgansikid Jedaías-wagan, dulataled-ilabakebak gaka dulapaa-gakambe-gakapaa (973).
EZR 2:37 Imer-wagan, miligwen gaka dulabo-gakambe-gakabo (1,052).
EZR 2:38 Pasur-wagan, miligwen gaka dulataled-ilabo gaka dulabo-gakagugle (1,247).
EZR 2:39 Harim-wagan, miligwen gakambe-gakagugle (1,017).
EZR 2:40 Levita-dulemar-nonimalad, wemalad: Jesúa-wagan, degi, Cadmiel-wagan, a sogleged Hodavías-e-waganye, dulapaa-gakambe-gakabake (74).
EZR 2:41 Dule-namakmalad-nonimalad, wemalad: Asaf-wagan, dulanergwa-gakabaabak (128).
EZR 2:42 Bab-Dummadse-goled-neg-yawagak-dakmalad-nonimalad, wemalad: Salum-wagan, Ater-wagan, Talmón-wagan, Acub-wagan, Hatita-wagan, degi, Sobai-wagan. Amar, dulanergwa-gakambe-gakabakebak (139) mergued.
EZR 2:43 Bab-Dummadse-goled-neggi-arbamalad, wemalad: Ziha-wagan, Hasufa-wagan, Tabaot-wagan,
EZR 2:44 Queros-wagan, Siaha-wagan, Padón-wagan,
EZR 2:45 Lebana-wagan, Hagaba-wagan, Acub-wagan,
EZR 2:46 Hagab-wagan, Salmai-wagan, Hanán-wagan,
EZR 2:47 Gidel-wagan, Gahar-wagan, Reaía-wagan,
EZR 2:48 Rezín-wagan, Necoda-wagan, Gazam-wagan,
EZR 2:49 Uza-wagan, Paseah-wagan, Besai-wagan,
EZR 2:50 Asena-wagan, Meunim-wagan, Nefusim-wagan,
EZR 2:51 Bacbuc-wagan, Hacufa-wagan, Harhur-wagan,
EZR 2:52 Bazlut-wagan, Mehída-wagan, Harsa-wagan,
EZR 2:53 Barcos-wagan, Sísara-wagan, Tema-wagan,
EZR 2:54 Nezía-wagan, degi, Hatifa-wagan.
EZR 2:55 Salomónʼga-arbamalad-e-wagan, wemalad: Sotai-wagan, Soferet-wagan, Peruda-wagan,
EZR 2:56 Jaala-wagan, Darcón-wagan, Gidel-wagan,
EZR 2:57 Sefatías-wagan, Hatil-wagan, Poqueret-Hazebaim-wagan, degi, Ami-wagan.
EZR 2:58 Bab-Dummadse-goled-neggi-arbamalad-e-wagan, degi, Salomónʼga-arbamalad-e-wagan, bela dulataled-ilapaa gaka dulabake-gakambe-gakabo (392) mergued.
EZR 2:59 Deginbali, dulemar-baigan geg oyo gusmalad, doamar e-dadganmala, degine, emarde bule-nabir Israel-dule-gumarbali. We-neggweburmargi noar gusmalad: Tel-Mela-neggweburgi, Tel-Harsa-neggweburgi, Querub-neggweburgi, Addán-neggweburgi, degi, Imer-neggweburgi noarmaladid.
EZR 2:60 A-dulemarde, wemalad: Delaía-wagan, Tobías-wagan, Necoda-wagan, bela dulataled-ilanergwa gaka dulabo-gakambe-gakabo (652) mergued.
EZR 2:61 Dule-irwa-Bab-Dummadse-gormalad abala geg oyo gusmarmogad, doamar e-dadganmala, emarde bule-nabir Israel-dule-gumarbali. Amala, wemalad: Habaía-wagan, Cos-wagan, degi, Barzilai-wagan. Ar ade, dule, Barzilai-Galaadʼgined-e-sisgwa nikus gusad. Degidbali, a-dule e-sakba Barzilaiʼye nuggunonikid, degi, e-wagan Barzilai-waganye bilenonikid.
EZR 2:62 Wemala na e-dadgan-nug amidmargu, amissurgusmalad. Degisoggu, dule-swilidiksulid-soglesadba, dule-irwa-Bab-Dummadse-goledga onolesmalad.
EZR 2:63 Degidgine, dule-dummadga-negdakmaid igar-uksad, we-dulemar melle Bab-Dummadga-ibmar-ukleged gunnamaloye, dule-irwa-Bab-Dummadse-goled-gwensak, Urimʼba, degi, Tumimʼba Bab-Dummadse idakedseye.
EZR 2:64 Bela dulemar dule-wargwennayob danar-ambikunonimaladi mili-dulabo-gakabo gaka dulataled-ilapaa gaka dulapaa (42,360) mergued.
EZR 2:65 Wemar-abargi e-mai-machergan, degi, e-mai-omegan, miligugle gaka dulataled-ilapaa gaka dulagwen-gakambe-gakagugle (7,337) mergueddi obarlesulid. Degine, e-namakmalad-machergan, e-namakmalad-omegan, dulataled-ilabo (200) mergu-nikaddi obarlesurbalid.
EZR 2:66 A-ukinbali, dulemar-gannar-nonimaladi, ibmar-durgan-ibmar-semalad, weyob nikamalad: Moli, dulataled-ilagugle gaka dulagwen-gakambe-gakanergwa (736). Moli-uaya-senigwadmar, dulataled-ilabo gaka dulabo-gakatar (245).
EZR 2:67 Moli-yargan-muremalad, dulataled-ilabake gaka dulagwen-gakambe-gakatar (435). Moli-uayasuid, milinergwa gaka dulataled-ilagugle gaka dulagwen (6,720) nikamalad.
EZR 2:68 Gwenna-gwenna babgan-neguya-sedimaladi, Jerusalén-neggweburgi Bab-Jehováʼse-goled-neg-siidse nonimalad. Agine, na e-binsaed-e-binsaedba ibmar-nuegan Bab-Dummadse-goled-negga uksamalad, adi, Bab-Jehováʼse-goled-neg gebe-iduar-sii-gusadgi gannar sobegar.
EZR 2:69 Degine, dulemar e-ganguedba, Bab-Dummadse-goled-neg-soblenaid-e-mani-dakedga ibmar uksamalad. A-ibmarmar wemalad: Or, nibir-miligwen gaka dulatar aidiku (1,100) uksamalad. Mani, nibir-milinergwa aidiku (6,000) uksamarbalid. Degine, dule-irwa-Bab-Dummadse-gormalad-e-mormar, goadulatar (100) uksamarbalid.
EZR 2:70 Degine, dule-irwa-Bab-Dummadse-gormaladi, Levita-dulemar, dule-namakmaladi, degine, dulemar-bamaladi, Jerusalénʼgi megismalad. Degi, dule-yawagak-dakmaladi, dule-Bab-Dummadse-goled-neggi-arbamaladi, e-neggwebur-e-neggweburgi megismalad. Degine, bela Israel-dulemar-baigan na e-neggwebur-e-neggweburgi megis nanaed.
EZR 3:1 Bela Israel-dulemar nii-walaguglegus (7) bato e-neggwebur-e-neggweburgi mamaimaladgi, Jerusalén-neggweburgi bulakwaa dule-soggwennayobi ambikunonimalad.
EZR 3:2 Degidgine, dule-irwa-Bab-Dummadse-goled-Jesúa Josadac-e-machi, na e-gwenadgan-dule-irwa-Bab-Dummadse-gormaladbo, degi, Salatiel-machi-Zorobabel, na e-gwenadganmala, Israel-e-Bab-Dummadga ibmar-ogumakar-ukleged-aila sobdemalad. Adi agine, Israel-dulemar-e-Bab-Dummadga ibmar-ogumakar ukmalagar. Igi Bab-Dummad-e-mai-Moisés-e-Igar narmakar-mai, deyob gusad.
EZR 3:3 Ar Israel-dulemar, dulemar-baid-baid-bukwadgi nue-dobe ito-inigwele, Bab-Dummadga-ibmar-ogumakar-ukleged-aila gebe-iduar-sii-gusadgine gannar sobsamalad. Geb bane-bane wakdaradba, sedogidba, ibmar-ogumakar-ukleged, Bab-Jehováʼga-ibmar-ogumakar-ukleged-ailagi ukdemalad.
EZR 3:4 Deyobi, Igar-narmakar-sogmaidbali Neg-Matargana-Sobaled-E-Iba-islidikid onosmalad. A-iba-onolegedgi, gusgu-bane-bane-ibmar-uklegedba Bab-Dummadga ibmar-ogumakar-ukleged-bukidar uksamalad.
EZR 3:5 A-ukinbali, gusgu ibmar-ogumakar-ukleged Bab-Jehováʼga ukdamalad, degi, nii-gwapid-yoleged-irba ibmar-ogumakar-ukleged uksamarbalid. Geb degine, Bab-Jehováʼga iba-dummagan-onolegedgi-ibmar-ukleged uksamarbalid. Degi, dule na-e-binsaedba, Bab-Jehováʼga ibmar-ukleged uksamarbalid.
EZR 3:6 Amba-yoo Bab-Jehováʼse-goled-neg-e-saila-sobleda-inigwele, gebe-nii-walagugled (7) gwisgusadgi, dulemar Bab-Jehováʼga ibmar-ogumakar-ukleged ukdemalad.
EZR 3:7 Geb agine, akwa-neg-sobedgi-arbamaladga, urgo-sobedgi-arbamaladga mani uksamalad. Sidón-dulemarga, Tiro-dulemarga, gobed, masi, olivo-gwallu uksamalad, adi, Ciro Persia-yar-e-rey, a-igar-uksadba, wemar nabir urwar-urgo Líbano-yar-akale, demarba, Jope-neggweburse sedamalagar.
EZR 3:8 Israel-dulemar birgabogus Jerusalén-neggweburse-nonimaladgine, a-nii-warbogi Bab-Dummadse-goled-neg sobbarmalad. Salatiel-machi-Zorobabel, Josadac-machi-Jesúa, degi, na e-gwenadgan-dule-irwa-Bab-Dummadse-gormalad-abargi, degi, Levita-dulemarmala, degi, dule-galesgusmalad-Jerusalénʼse-nonimalad-abargi Bab-Jehováʼse-goled-neg sobdemalad. Levita-dulemar birga-dulagwen (20) nikamaladi, degi, birga-durgwen-obine (20+) nikamaladi, Bab-Jehováʼse-goled-neg-soblenaid-dakedga nugsasmalad:
EZR 3:9 Degidgine, Jesúa, e-masmalamala, degi, e-gwenadganmala arbadmalad. Degine, Judá-dule-Cadmiel, e-masmalamala arbadmalad. Amardi, Hodavías-e-waganad. Degine, Henadad-e-wagan, e-masmalamala, degi, e-gwenadganmala arbadmalad. Bela-a-dulemar, Levita-dulemalad. Amala, bulale dule-wargwennayobi dulemar-Bab-Dummadse-goled-neggi-arbananaid-dakega arbadmalad.
EZR 3:10 Dule-akwa-neg-sobedgi-arbamalad Bab-Jehováʼse-goled-neg-e-saila mesismargu, dule-irwa-Bab-Dummadse-gormalad na e-mor yoyoidbi, gar-trompeta gani-gani gwisguarmalad. Degine, Asaf-wagan-Levita-dulemardi, gar-címbalo-abin-abin-gormalad gani-gani gwisguarmarmogad, igi Israel-rey-David, igar-uksagusadyob, Bab-Jehová-nug odummogegar.
EZR 3:11 Bela namakdemalad, Bab-Jehová-nug ogannodmalad, degine, Bab-Jehováʼga dog-nuedye sogdemalad, degi, baigandi sogdemalad: “Bab-Jehová bela-belad dule-nuedid, wile Israel-dulemar-dakmai degisadeguad.” Bela dulemar weligwaledba oimakdemalad, degine, Bab-Jehová-nug ogannodmalad. Ar ade, Bab-Jehováʼse-goled-neg-e-saila megis dakmalad.
EZR 3:12 Bukidar dule-irwa-Bab-Dummadse-gormalad, Levita-dulemar, degi, babgan-neguya-sedimalad bato selebagusmalad. Amala, gebe-Bab-Jehováʼse-goled-neg-soblesad daksamalad. A-ulale, Bab-Jehováʼse-goled-neg gannar soblenai dakarmarbargu, bela-belad binnasuli ise-boale bodmalad. Baigandina, weligwaledba binnasuli oimakbukwad.
EZR 3:13 Dulemar oimakbukwadbali, dulemar-bobukwad itolesulid, ar ade, dulemar ise-gandikidba oimakbukwad, degine, e-oimakedi dikasuli-bannabaa itoleged.
EZR 4:1 Judá-dulemar-e-isdarmalad, degi, Benjamín-dulemar-e-isdarmalad wisguarmargu, dulemar-galesgusmalad gannar e-neggweburse-nonimaladi, Israel-e-Bab-Dummad-Jehováʼse-goled-neg sobnanaiye.
EZR 4:2 Geb agine, a-isdarmalad Zorobabelʼse, degi, Israel-dulemar-neguya-sedimalad-e-dummaganse nonimalad, ega weyob sognonimalad: —Anmar Bab-Dummadse-goled-neg bemarba sobbimarmodo. Ar ade, bemar-Bab-Dummad-nug-odummodiid, a-Bab-Dummad-nug anmar odummodimarmogad. Asiria-rey-Esar-Hadón we-yarse anmar-senonikid-akale, be-Bab-Dummadga ibmar-ogumakar-ukleged anmar ukdimogad.
EZR 4:3 Geb degine, Zorobabel, Jesúa, degi, Israel-dulemar-neguya-sedimalad-e-dummagan, abin-sogdemalad: —Suli. Anmarba be Bab-Dummadse-goled-neg-sobega anmar be-abesuli. Ar anmarbi, Israel-dulemar-Bab-Dummadga, Bab-Jehováʼse-goled-neg soboed. Ar igi Persa-yar-e-rey-Ciro, anmarga igar-uksadba.
EZR 4:4 Degidgine, Judá-yar-dikarba-dulemar-bukwad, Judá-dulemar-niga-egwannega ese urwenonimalad, degine, ogwakismalad, adi, mer bar Bab-Dummadse-goled-neg-sobnanai gumalagar.
EZR 4:5 A-ukinbali, a-dulemar, dule-binsaed-dakmalad-gwenna-gwenna manigi binsaed-gasbalid, adi, Bab-Dummadse-goled-neg-soblenaid galegegar. Ciro, Persia-yar-e-reyga maigusad-akale, Persia-yar-e-rey-Darío-megis-gusadse, deyob gusad.
EZR 4:6 Deginbali, Rey-Asuero gebe reyga megnonigua, Judá-dulemar-e-isdarmalad, reyse garda narmakar barmismalad. Judá-dulemargi, degi, Jerusalén-dulemargi, yamo ise-yolegar egi sunmaksamalad.
EZR 4:7 Geb sorba, Artajerjes, Persa-dulemar-e-reyga megnonikid. A-ibagangine, amba deyob Bislam, Mitrídates, Tabeel, degi, e-sordamar-baigan, Rey-Artajerjesʼse garda narmaksamarmogad. A-garda, Arameo-gayaba narmaklesad, geb Persa-gayaba odulolesad.
EZR 4:8 A-ukinbali, dule-dummad-neg-dakmaid-Rehum, degi, dule-garda-narmaked-Simsai, Rey-Artajerjesʼse garda narmakar barmismalad. A-gardagi Jerusalén-dulemargi ise-yolegar sunmaksamalad.
EZR 4:9 Dule-dummad-neg-dakmaid-Rehum, degi, dule-garda-narmaked-Simsai, we-garda narmaksad. Deginbali, we-e-sorda-bakamalad we-gardagi e-goo-burba mesismalad: Dule-igar-nabiromalad, saila-dummagan, dule-dummagan, Persaʼginmalad, Erecʼginmalad, Babiloniaʼginmalad, degi, Elam-dulemar Susaʼginmalad.
EZR 4:10 We-gardagi, dule-baigan e-goo-burba mesismarmogad. Epenne, dule-dummad-dule-nug-nikad-Asnapar, we-dulemar-gasa-sesa-gusad, geb Samaria-yalagangi oambikudap gusad, degi, Éufrates-diwar-dad-argwanedsik neggweburmar-baigangi oambikudap gusbalid. Bela amala we-gardagi e-goo-burba mesismarmogad. We-gardagi weyob sogsiid:
EZR 4:11 “Rey-Artajerjes, be-maimar Éufrates-diwar-dad-argwanedsik-bukmalad bega sogsiid:
EZR 4:12 ”Rey, na be wisguega, anmarse be Judío-dulemar-barmialidi, Jerusalén-neggweburse nonimalad. Emide, we-dulemar we-neggwebur-isgana, degi, beba-ibmar-imaksulid, gannar sobnanaid. Bato neggwebur-e-saila mesisbinmalad. Degine, we-neggwebur-e-galu-matusulid gannar sobnanaimalad.
EZR 4:13 ”A-ukinbali, Dummad, an be-owisobardo, ar bela galu-matusulid-ogusmalale, degi, gandik neggwebur-sigisale, wemar begi gwisgudamaloed, gwen mani-galeged bennukosurmalad, neggweburga-mani-weleged ukosurmarbalid, degi, ibmar-ebumaloed gwen bennukosurmarbalid. Degisoggu, reyga bar manimar ubogosulid.
EZR 4:14 Ar anmar be-neggi bega-arbamaladsoggu, geg anmar be-nug-mesagwar imaked. Agala, be-owisogega, anmar bega garda barmisimalad.
EZR 4:15 Dummad, be-garda-bukwadgi, be-sergan-e-gardamar-mamaidgi be e-igar amisale, a-gardagi we-dulemar-ibmar-imaksamalad be dakdagoed. Agi, be wisguoed, we-Jerusalén-dorgande bela-bela galagwensuli gudii gusad, degi, reymargi, neggwebur-bamaladgi yoledii gusad. Degi, dikasurgus we-neggweburginmaladde reymargi gwisgudii gusmalad. A-ulale, we-neggweburde bela oitoles gusad.
EZR 4:16 Rey, a-ulale, an bega sogdo, we-neggwebur gannar soblesdibele, e-galu-matusulid-bela-ogulesale, neggweburmar-Éufrates-diwar-dad-argwanedsik-bukwadi bar begadga guosulid.”
EZR 4:17 Geb degi, rey abin-sogsamogad: “Ani, Rey-Artajerjes, an bemarse garda barmisimogad: Dule-dummadga-negdakmaid-Rehum, dule-garda-narmaked-Simsai, geb bela e-sordamar-Samaria-neggweburgi-bukmalad, degi, dule-baigan Éufrates-diwar-dad-argwanedsik-bukmalad: ‘Bemar nued sogeye.’
EZR 4:18 ”Bemar, anga garda-barmiarmaladi, bela ise-mag-itoleale anga absolesad.
EZR 4:19 Degine, Jerusalénʼginmalad-e-igarmar-amiega an igar uksad. Agi, daklealid, we-neggweburginmaladde dikasurgusa bato reymar-baigangi gwisgudimala, a-sogedba igar-imakdisurmala, gusgu na urwed-onodii damala.
EZR 4:20 Degine, Jerusalén-neggweburgine, reymar-gangued-nikmaladi megis nanae. We-reymar bela yarmargi Éufrates-diwar-dad-argwanedsiki, e-ganguedba negsemamai gusmala. Degine, daklearbalid, dulemar neggwebur-bennuklegedi ega ukdii gusmala, neggweburga-mani-weleged ega ukdii gusmala, degi, neg-mamaid-bennukdii nanasmala.
EZR 4:21 Degisoggu, an sogdo, we-dulemarga be-sogmalo, melle bar arbamaloye, melle bar we-neggwebur-sobmaloye, ani an gannar igar-ukedse.
EZR 4:22 Degisoggu, an bega-we-igar-ukedi melle be ieged-imakmalo, adi, melle anga boni-dummad onogega, melle an-mani-bukwad galakuega.”
EZR 4:23 Rey-Artajerjes-garda-barmialidi Rehum-asabin, dule-garda-narmaked-Simsai-asabin, degi, e-sorda-bamalad-asabin absolesgu, bela Jerusalén-neggweburse duurmakdemalad. Geb sabsur-urwedigine, Judío-dulemar-neg-sobnanaidi ganonimalad, mer bar neg-sobmalagar.
EZR 4:24 Weyob, Rey-Darío, Persa-yargi birgabogus negsemai-gusadse, Bab-Dummadse-goled-neg Jerusalén-neggweburgi-soblenaidi galesad.
EZR 5:1 Bab-Dummad-gayaburba-barsogmalad Hageo, degi, Iddo-wagwa-Zacarías, amar Judíoʼmar Judá-yargi-gudimaladga, degi, Jerusalénʼginmaladga, Israel-dulemar-e-Bab-Dummad-nuggi, Bab-Dummad-gayaburba barsognai guarmalad.
EZR 5:2 Degidgine, Salatiel-machi-Zorobabel, degi, Josadac-machi-Jesúa, Bab-Dummadse-goled-neg Jerusalén-neggweburgi-siid gannar sobdemalad. Agine, Bab-Dummad-gayaburba-barsogmalad, we-dummaganba gudii gusad, degine, amar-bendakdii gusad.
EZR 5:3 Amba a-ibagangine, Tatnai, Éufrates-diwar-dad-argwanedsik dummadga-negdakmaidi, degi, Setar-Boznai, degi, e-sordamarmala Judío-dulemarse modapid, geb ese egichidmalad: “¿Doa bemarga igar-uksa, we-Bab-Dummadse-goled-neg sobega, e-galumar sobega?”
EZR 5:4 Degine, ese egichismarbalid: “Dulemar-neg-sobnanaid-e-idumalad, ¿we igi nugmala?”
EZR 5:5 Ar Bab-Dummad Judío-dulemar-e-dummagan nue-bendakmaisoggu, dummagan-negdakmamaid Rey-Daríoʼse neg-soblenaid-garda-barmidedse, geb rey-e-abin-imakedse, Judíoʼmar neg-sobnanaid gwen indaksasurmalad.
EZR 5:6 Geb Tatnai Éufrates-diwar-dad-argwanedsik dummadga-negdakmaidi, degi, Setar-Boznai, degi, e-sordamar Éufrates-diwar-dad-argwanedsik-dummaganga-negdakmamaidi, Rey-Daríoʼse garda barmismalad.
EZR 5:7 Garda wegii sogsiid: “Rey-Darío, bitigine be nued-gudina gadin.
EZR 5:8 ”Rey, anmar na be-owisosun, anmar Judea-yalase arbimalad, Bab-Dummad-Dule-Dummad-e-negse. A-nega, akwa-dummagangi soblenaid, degi, bato urgomar e-galu-dikargi nasiklenaid, e-arbalenaidi nue-nasgumaid, gwae-gwae arbalenaid.
EZR 5:9 ”Geb degi, anmar e-dummaganse egichismalad: ‘¿Doa bega igar-uksamala we-Bab-Dummadse-goled-neg be sobmaloye, e-galumar be sobmarbaloye?’
EZR 5:10 Deginbali, anmar ese egichisbalid, dule-arbananaid-e-dummagan igi-nugmarye, adi, bese gardagi-narmakar barmidegar.
EZR 5:11 ”Geb Judío-dummagan anmar-abin-imaksamalad: ” ‘Anmar Bab-Dummad-Nibneg-Dakmaid-e-mai, degi, Napneg-Dakmaid-e-mai gumalad. Anmar Bab-Dummadse-goled-neg dikasurgus birgabargus-soblesgusad, anmar gannar sobnanaid. A-neg, Israel-dulemar-e-rey-gandikidi bela ogus gusad.
EZR 5:12 Ar anmar-dadgan Bab-Dummad-Nibneg-Dakmaid-oulusgussoggu, Bab-Dummad, Babilonia-rey-Nabucodonosorʼga Caldeo-dulega, anmar-dadgan-urmaksasunnad. A-rey a-Bab-Dummadse-goled-neg earis gusad. Geb agine, Babilonia-yarse, dulemar-gasa sesa gusad.
EZR 5:13 ” ’Geb a-sorba, Babilonia-dulemar-e-rey-Ciro, gebe reyga-megided-birgagine, Bab-Dummadse-goled-neg gannar soblegega igar uksad.
EZR 5:14 A-ukinbali, epenne Nabucodonosor Jerusalén-neggweburgi Bab-Dummadse-goled-neggi ibmarmar-ebuleged-orbiid, manibiid, Babilonia-dulemar-e-bab-dummadse-goled-negse sesagusad. A-ibmarmar, Rey-Ciro onisad. Geb Rey-Ciro Sesbasarʼga, Judá-yar-e-dummadga-nug-imaksadga a-ibmarmar uksagusad.
EZR 5:15 Degine, Rey-Ciro Sesbasarʼga sogsad: We-ibmar-ebulemalad be sue, be nae, Jerusalén-neggweburgi Bab-Dummadse-goled-neg-siidse gannar be sede. Gannale Bab-Dummadse-goled-neg be sobo, bia-gebe-iduar-sii-gusadgi.
EZR 5:16 Geb degi, Sesbasar Jerusalén-neggweburse nonisunnad. Geb Bab-Dummadse-goled-neg-e-saila mesnonikid. Emide, emi-ibase amba-soblenaid, amba yoo ogule naid.’
EZR 5:17 ”Rey, ar be nabir-itogele, Babilonia-e-reymar-ibmar-imaksad-gardagi igar-maid be-amiodo. Be adi dakegar, bule-nabiri Rey-Ciro Judío-dulemarga igar-uksagusa, Jerusalén-neggweburgi Bab-Dummadse-goled-neg gannar-sobegar. De-ukinbali, be anmar-owisogodo, igi we-igarsik be nue-binsamoga. Be itogua.”
EZR 6:1 Geb degine, Rey-Darío igar-uksad, Babilonia-yargi-ibmar-nuegan-saboleged-neggi gardamar-sabolegedgi, garda-mamaid amioye.
EZR 6:2 Degi, Acmeta-neggweburgi, reyneg-gandikidgi garda amilesad. Acmeta-neggweburde Media-yargi siid. A-gardagi weyob narmakar naid:
EZR 6:3 “Rey-Ciro gebe reyga-megided-birgagi, e-sunnad, Bab-Dummadse-goled-neg Jerusalénʼgi-siid-sobega, Judío-dulemarga igar-uksad: Bab-Dummadse-goled-neg Jerusalén-neggweburgi-sii-gusanad be gannar sobmar, e-neg-saila be mesmar. Adi agine, Bab-Dummadga ibmar-ogumakar ukmalagar. We-nega-e-nibguedi daliambe-gakatar-sugu (15) be imako, degi, e-yaadungued amba deyob be imakbalo.
EZR 6:4 Degine, akwa-dummagan ile-sogapaa be sobmalo, degi, urgodi ile-wargwen sobmarbalo. We-ibmarmar-baklegoedi, rey-manigi bela bennuklegoed.
EZR 6:5 A-ukinbali, Jerusalénʼgi Bab-Dummadse-goled-neggi ibmarmar-ebuleged-orbiid, degi, manibiid, Nabucodonosor-Babiloniaʼse-sesa-gusadi be gannar Jerusalénʼse sedamalo. Degi, ibmar gannar e-ambikuedgi Bab-Dummadse-goled-neg-Jerusalénʼgi be urbemalo.”
EZR 6:6 Degidgine, Rey-Darío, Tatnaiʼga igar-uksasunnad. Tatnaiʼde, Éufrates-diwar-dad-argwanedsik dummadga-negdakmaid. Degine, Setar-Boznaiʼga, degi, e-sordamar-dummadga-negdakmamaidga, weyob igar-uksad: “Jerusalén-dulemargi be bangumar.
EZR 6:7 Melle Bab-Dummadse-goled-neg-soblenaidi, be igar-gamalo. Baisuli, na e-itomaladba Judío-dulemar-e-dummad-negsemaid, degi, girmar-dummagan, na e-sordagan-bulakwaa Bab-Dummadse-goled-neg, gebe-iduar-sii-gusadgi sobmaloed.
EZR 6:8 ”Deginbali, an igar ukbalid: Bemar, Judío-girmar-dummagan-bendakmalo, adi, nabir bemar Bab-Dummadse-goled-neg sobnai guegar. Dulemar-Éufrates-diwar-dad-argwanedsik-bukmalad neggweburgi-mani-bennuklegedgi rey-bennukdamalad. A-mani, Judío-dulemarga iba-sogedba be ukmalo, adi, ibmar-baklesmaladi bennukegar. Deyobsulile, Bab-Dummadse-goled-neg-soblenaidi galegoed.
EZR 6:9 A-ukinbali, bemar bane-bane ibmar-ukoed: Moli-bebe-nikad-sapingana, sibad-wawaad-machergan, sibad-wawaad-sapingana be ukmalo. Adi, Bab-Dummad-Nibneg-Dakmaidga ogumakar ukegar. Deginbali, dule-irwa-Bab-Dummadse-gormalad-Jerusalénʼgi-bukmalad-sogedba, orosgi-dakleged-trigoʼdibe, baludibe, vinoʼdibe, igi, olivo-gwalludibe, bemar ukbaloed. Melle ukesuli be gumalo.
EZR 6:10 Ar deyobi, wemar-Babse-gormalad, nabir Bab-Dummad-Nibneggi-Maidga yeer-itogedgi ibmar-ogumakar-ukleged ukmaloed, degi, Bab-Dummadse anga-gormaloed, degi, an-masmalaga gormarbaloed.
EZR 6:11 ”Degine, an igar ukbalid: Doa-dule, an igar-uksadba dasulile, a-dule-ibe, e-neg-nagubir ungilegoed. Geb a-dule a-nagubir-swiswidikidgi yolegar nasiklegoed. Geb, bela e-neg eyarlegoed.
EZR 6:12 Bela reymar, igi, dulemar-yar-baid-baidgi-bukmaladi, we-igar-an-mesnaid oakalobimalale, Bab-Dummad-Jerusalén-neggweburgi-maidi a-dulemar-obelosun. Deginbali, Bab-Dummadse-goled-neg Jerusalén-neggweburgi-siid e-yarbimalale, a-dulemar-obelobarsun. ”Ani, Rey-Darío, an we-igar mesisad. Degisoggu, we-igar-maid-sogedba be nuekwa damalo.”
EZR 6:13 Geb degi, Tatnai Éufrates-diwar-dad-argwanedsik dummadga-negdakmaidi, degi, Setar-Boznai, degi, e-sordaganmala, Rey-Darío-igar-uksadba nue-inniki imaksamarsunnad.
EZR 6:14 Igi Bab-Dummad-gayaburba-barsoged-Hageo, degi, Iddo-wagwa-Zacarías-sogsagusa, deyobi Judío-dulemar-e-dummagan, Bab-Dummadse-goled-neggi-arbalenaid-nasomai gusmalad. Deyobi, Bab-Dummadse-goled-neggi-arbalenaid obelosmalad. Israel-dulemar-e-Bab-Dummad-sogsagusadba, degi, Persa-yar-e-reymar: Ciro, Darío, Artajerjes, we-reymar-igar-uksadba, Bab-Dummadse-goled-neg bela ogulesad.
EZR 6:15 Rey-Darío birga-nergwagusa (6) negdakmaidgi Bab-Dummadse-goled-neg ogulesad, Adar-nii-gwichid-ibapaagi.
EZR 6:16 Degidgine, Israel-dulemar: Dule-irwa-Bab-Dummadse-gormalad, Levita-dulemar, dule-baigan-gales-gannar-nonimalad, amar weligwaledgi Bab-Dummadse-goled-neg-soblesadi, Bab-Dummadga nug-imaksamalad.
EZR 6:17 We-neg Bab-Dummadga nug-imaksamaladgi, Bab-Dummadga we-ibmar-durgan ogumakar uksamalad: Moli-bebe-nikad-sapingana, waladulatar (100). Sibad-wawaad-machergan, waladulataled-ilabo (200). Sibad-wawaad-sapingwagwad, waladulataled-ilabakebar (400). Degi, Israel-dulemar e-dadgan-warambe-gakabogwad-iliba (12), e-isgued-ular, na war-wargwen sibad-machergan, warambe-gakabo (12) uksamarbalid.
EZR 6:18 Geb degine, dule-irwa-Bab-Dummadse-gormalad e-arbaed-imakega urbilesad, degi, Levita-dulemar amar e-ibmar-imakedgi-bendakega urbilesmogad, adi, Jerusalén-neggweburgi Bab-Dummadse-goled-neggi Bab-Dummadga arbamalagar. Igi Moisés-gardagi-narmakar-nai, deyob gusad.
EZR 6:19 Dulemar-galesgusmalad Jerusalén-neggweburse-gannar-nonimaladi, gebe nii-onoded-ibambe-gakabakegi, Oburgwilegoenad-Iba onosmalad.
EZR 6:20 Ar dule-irwa-Bab-Dummadse-gormalad, Levita-dulemar dule-wargwennayobi bato na san-uruksamalad, bela na swilidik-gusmalad. Degisoggu, Levita-dulemar, Israel-dulemar-gales-gannar-noni-gusmaladga, Oburgwilegoenad-Ibagi gusgu sibad-wawaad-sapingwagwad-oburgwedamalad, oburgwismalad. Degi, Levitaʼmar, dule-irwa-Bab-Dummadse-gormaladga, degine, na e-nuki oburgwismarmogad.
EZR 6:21 Israel-dulemar-galesgusmalad gannar Jerusalén-neggweburse-nonimaladi, Oburgwilegoenad-Ibagi sibad-wawaad-sapingwagwad guchamalad. Amar-abargi, dule-baigan Israel-Bab-Dummad-Jehová-igarba-nanaega, dulemar-galagwensulidaedgi-bangusmaladi, a-mas guchamarmogad.
EZR 6:22 Judíoʼmar, ibagugle (7), Madu-Inasuli-Gulleged-Iba weligwaledba onosmalad. Ar ade, Bab-Jehová, Asiria-dulemar-e-rey Israel-e-Bab-Dummadse-goled-neg gannar-sobega imaksadba, yeer-itosmalad.
EZR 7:1 Bela we-ibmarmar-gusad-sorbali, Artajerjes Persa-dulemar-e-rey, yar-semaiunni, dule-wargwen gudii gusad. A-dulede, Esdrasʼye nugad. Esdras, Seraías-e-machi. Seraía, Azarías-e-machi. Azarías, Hilcías-e-machi.
EZR 7:2 Hilcías, Salum-e-machi. Salum, Sadoc-e-machi. Sadoc, Ahitob-e-machi.
EZR 7:3 Ahitob, Amarías-e-machi. Amarías, Azarías-e-machi. Azarías, Meraiot-e-machi.
EZR 7:4 Meraiot, Zeraías-e-machi. Zeraías, Uzi-e-machi. Uzi, Buqui-e-machi.
EZR 7:5 Buqui, Abisúa-e-machi. Abisúa, Finees-e-machi. Finees, Eleazar-e-machi. Eleazar, Aarón-e-machi. Aarónʼde, gebe dule-irwa-Bab-Dummadse-goledga gusadid.
EZR 7:6 We-Esdras Babilonia-neggwebur-akar nonikid. A-dule, dule garda-narmaked-duled, degi, Israel-e-Bab-Dummad-Jehová Moisésʼba-Igar-uksa-gusad nue-wisbalid. Ar Israel-e-Bab-Dummad-Jehová Esdrasʼba nue gudigusoggu, Rey-Artajerjes, Esdras ese-ibmar-egichisadi bela ega-sogedba uksad.
EZR 7:7 Rey-Artajerjes birgaguglegus-yar-dakmaidgi (7), Israel-dulemar gwenna-gwenna Esdrasʼba Jerusalén-neggweburse nonimalad Amarde, wemalad: Dule-irwa-Bab-Dummadse-gormalad, Levita-dulemar, dule-namakmalad, dule-yawagak-dakmalad, degi, dule-Bab-Dummadse-goled-neggi-arbamalad. Amala, Esdrasʼba Jerusalénʼse nonimalad.
EZR 7:8 Degisoggu, Esdras, Rey-Artajerjes birgaguglegus (7), negdakmaidgi a-nii-walatargine, Jerusalén-neggweburse nonigusad.
EZR 7:9 Esdras Babilonia-neggweburgi gebe-nii-gwisgusad-iba-onodedgine, noaligusad. Ar Bab-Dummad dule-wiledaked-maid eba gudigussoggu, geb Jerusalén-neggweburse gebe-nii-walatar-gwisgusad-ibagi nonigusad.
EZR 7:10 Esdras, Bab-Jehová-Igar-Maid-durdakegala Bab-Igargi nue-alamaknai gusad. A-Igar-Maid-sogedba-ibmar-saega, degi, Bab-Jehová-Igar-Maidgi, degine, Bab-Dummad-Igar-sogsadgi Israel-dulemar-odurdakega Bab-Igargi nue-alamaknai gusad.
EZR 7:11 Rey-Artajerjes, dule-irwa-Bab-Dummadse-goled-Esdrasʼga we-garda uksagusad. Dule-garda-narmaked-Esdrasʼde, Bab-Jehová-Igar-Maid nue-wisidid. Deginbali, Bab-Dummad Israel-dulemarga-ibmar-sogsad nue-wisbalid. Rey weyob garda narmaksad:
EZR 7:12 “Ani Artajerjes, reymar-e-rey, Esdrasʼse an we-garda an-barmisiid. Bedi dule-irwa-Bab-Dummadse-goledid, degi, garda-narmaked-dule-gubalid. Deginbali, Bab-Dummad-Nibneg-Dakmaid-Igar be nue wisbalid: Bitigine be nueganbina gadin.
EZR 7:13 ”An igar-uksad: Bela Israel-dulemar an-yargi-bukwad, dule-irwa-Bab-Dummadse-gormaladi, degi, Levita-dulemarse-bakale, Jerusalén-neggweburse beba nabimalale, namalodo.
EZR 7:14 Ani rey, degi, anga-binsaed-dakmalad-gugled-nuggine (7), Judea-yalase, Jerusalén-neggweburse, dulemar-daknaega an be-barmisiid. Igi be be-Bab-Dummad-Igar-wisi, deyobi bule-nabiri, we-Judío-dulemar Bab-Dummad-Igar-Maidba nanabukmarmodibe.
EZR 7:15 ”Deginbali, or be sedo, mani be sedbalo. Wede, ani rey, degi, dulemar-ega-binsaed-dakmalad e-binsaedba Israel-e-Bab-Dummadga uksamalad. We-Bab-Dummadde, Sión-yalagi, Jerusalén-neggweburgi maid.
EZR 7:16 Degine, Babilonia-yalagi, mani, ormar bega uklesale, be sedbalo. Deginbali, dulemar, dule-irwa-Bab-Dummadse-gormalad, Bab-Dummadse-goled-neg Jerusalén-neggweburgi-siidga e-binsaedba-ibmar-ukmaloedba be sedmalo.
EZR 7:17 A-manigi, ibmar-durgan be baksuli gudager: Moli-bebe-nikad-sapingana, sibad-wawaad-machergan, sibad-wawaad-sapingana. De-ukinbali, Bab-Dummadga-ibmar-uklebaloed be bakbalo: Ibmar-gwagmar, vinoʼmar. Geb degi, Jerusalén-neggweburgi bemar-Bab-Dummadse-goled-neggi Bab-Dummadga ibmar-ogumakar-ukleged-aila-siidgine, bemar we-ibmarmar Bab-Dummadga-ogumakar ukoed.
EZR 7:18 ”Mani-gwabgumaloedi, or-gwabgumaloedi, be dakedba, degi, be-gwenadgan-dakedba na be imakmaloed. Degi-inigwele, bemar-Bab-Dummad-sogedba be imakmalo.
EZR 7:19 Bab-Dummadse-goled-neggi ibmar-ebulemalad bega-uklesadi, a-neggi be urboed. Adi, Jerusalén-neggweburgi be-Bab-Dummadse-goled-neggi ebulegegar.
EZR 7:20 Ibmar-baigan be-Bab-Dummadse-goled-negga nue abegele, rey-mani-bukwadgi, baklegoed.
EZR 7:21 ”Emide ani, Rey-Artajerjes, bela dulemar Éufrates-diwar-dad-argwanedsik mani-dakmalad-bukmaladga an we-igar uked: Dule-irwa-Bab-Dummadse-goled-Esdras, Bab-Dummad-Nibneggi-Maid-e-Igar nue-wisidi, bemarse ibmar egichialile, ega be ibmar ukmalo.
EZR 7:22 Sunna ega be we-ibmar ukmaloed: Mani, nibir-miligugle gaka dulataled-ilabo gaka dulapaa (7,260). Orosgi-dakleged-trigoʼye-nugad, tambor-gwadulatar (100). Vino, galón-gwa-dulataled-ilatar gaka dulabo-gakambe (550). Olivo-gwallu, galón-gwa-dulataled-ilatar gaka dulabo-gakambe (550). Degine, baludi, wilubsarsuli ega be ukmaloed.
EZR 7:23 ”Bela Bab-Dummad-Nibneggi-Maid igar-uksadba, a-sogedbali, ese-goled-negga inniki be ibmar-ukmaloed, ar adi melle Bab-Dummad, rey-negsemaidgi, degi, e-masmalagi urwegar.
EZR 7:24 An bemar-owisobalid, melle we-dulemar neggwebur-bennukega be imakmalo: Dule-irwa-Bab-Dummadse-gormalad, Levita-dulemar, degi, dule-namakmalad. Deginbali, dule-yawagak-dakmalad, dule-Bab-Dummadse-goled-neggi-arbamalad, degi, dule-Bab-Dummadse-goled-neggi-ibmar-imakmalad, ”Melle we-dulemarse ibmar-weleged be egismarbalo, degi, ibmar-sedanikidgi-mani-galeged melle bennukega be imakmarbalo.
EZR 7:25 ”Esdras, bedi, Bab-Dummad-binsaed nue-nikasoggu, dule-igar-nabiromaladi, dule-dummagan-neggwebur-semaladi be nug-imako. Adi, amar bela dulemar-Éufrates-diwar-dad-argwanedsik-bukmaladga igar-nabogegar. A-dulemardi, bela dulemar Bab-Dummad-Igar-Maid wismaladid. Deginbali, dulemar amba Bab-Dummad-Igar-Maid-wissulile, be amar-odurdakbalo.
EZR 7:26 Ar, dule-gwensak be-Bab-Dummad-Igar-Maidba ibmar-imaksulile, degi, rey-igar-mesisadba dasurbalile, we-dule ise-sabsur-odurdaklegoed: Oburgwilegodibe, neggweburyagi ononnolegodibe, igi egi-mani-dummad galegodibe, igi, esgaryagi odolegodibe.”
EZR 7:27 Geb degidgine, Esdras Bab-Dummadse gotesunnad: “Bab-Jehová, anmar-dadgan-e-Bab-Dummadye, be nug odummolesun. Emide, Rey-Artajerjes-e-gwage be ebusad, Jerusalén-neggweburgi bese-goled-neg-siid ogannogegar.
EZR 7:28 Bab-Dummad, bedi wile an-dakedbali, rey, degi, dulemar-ega-binsaed-dakmalad, dule-dummagan-gangued-nikamalad, a-dulemar-asabinni, yeer an-dakega be an-imaksad. Bab-Jehová, bedi anba gudigusoggu, an-niga gangusad.” Degisoggu, Israel-dule-dummagan, Jerusalén-neggweburse anba-naega an oambikusad.
EZR 8:1 Rey-Artajerjes Babilonia-yalagi negdakmaiunni, babgan-neguya-sedimaladi, degi, dulemar e-dadgan-e-dadganba-ilemakar-nug-mamaidi Babilonia-akale, Jerusalén-neggweburse anba-noni-gusmalad. Amarde, wemalad:
EZR 8:2 Finees-wagansikid, Gersón. Itamar-wagansikid, Daniel. David-wagansikid, Hatús.
EZR 8:3 Hatúsʼde, Secanías-wagansikidid. Paros-wagansikid, Zacarías. Zacaríasʼbali, machergan, dulagugle-gakambe-mergu (150) nonikid.
EZR 8:4 Pahat-Moab-wagansikid, Zeraías-machi-Elioenai. Elioenaiʼbali, machergan, dulataled-ilabo-mergu (200) nonikid.
EZR 8:5 Secanías-wagansikid, Jahaziel-machi. Jahaziel-machibali, machergan, dulataled-ilapaa-mergu (300) nonikid.
EZR 8:6 Adín-wagansikid, Jonatán-machi-Ebed. Ebedʼbali, machergan, dulabo-gakambe-mergu (50) nonikid.
EZR 8:7 Elam-wagansikid, Atalías-machi-Jesaías. Jesaíasʼbali, machergan, dulapaa-gakambe-mergu (70) nonikid.
EZR 8:8 Sefatías-wagansikid, Micael-machi-Zebadías. Zebadíasʼbali, machergan, dulabake-mergu (80) nonikid.
EZR 8:9 Joab-wagansikid, Jehiel-machi-Obadías. Obadíasʼbali, machergan, dulataled-ilabo gakambe-gakabaabak-mergu (218) nonikid.
EZR 8:10 Selomit-wagansikid, Josifías-machi. Josifías-machibali, machergan, dulabaabak-mergu (160) nonikid.
EZR 8:11 Bebai-wagansikid, Bebai-machi-Zacarías. Zacaríasʼbali, machergan, dulagwen-gakabaabak-mergu (28) nonikid.
EZR 8:12 Azgad-wagansikid, Hacatán-machi-Johanán. Johanánʼbali, machergan, dulatar-gakambe-mergu (110) nonikid.
EZR 8:13 Napi-sorba-nonimaladi, Adonicam-wagansikmalad, wemalad: Elifelet, Jeiel, Semaías. Amarbali, machergan, dulapaa-mergu (60) nonikid.
EZR 8:14 Degine, Bigvai-wagansikmalad, Utai, Zabud. Amarbali, machergan, dulapaa-gakambe-mergu (70) nonikid.
EZR 8:15 Ani, Esdras, Ahavaʼse dii-iirmakmaid-gakaba dulemar an oambikusad. Agi, ibapaa anmar ambikusad. Agi bela dulemar-bukwa, degi, dule-irwa-Bab-Dummadse-gormalad-bukwa an daksad. Levita-dulemardi an gwen daksasulid.
EZR 8:16 Geb degine, dule-dummaganse an gochad: Eliezerʼse, Arielʼse, Semaíasʼse, Elnatánʼse, Jaribʼse, baid-dule-Elnatánʼse, Natánʼse, Zacaríasʼse, degi, Mesulamʼse. Degi, odurdaked-sailagan-Joiaribʼse, Elnatánʼse, an gochabalid.
EZR 8:17 Degi, Iddoʼse geb we-dulemar an barmisad. Iddoʼde, Casifiaʼye-neg-nugad-e-dummadid. Amar bela Iddoʼga ibmar-sogmaloedi, Iddo-e-gwenadganga ibmar-sogmaloedi, Casifiaʼginmaladga-ibmar-sogmaloedi, an ega sogsad. Adi, anmar-Bab-Dummadse-goled-negga, anmarga dule-arbamalad-barmidagegar.
EZR 8:18 Dog-nuedye anmar-Bab-Dummadga an sogdo. Bab-Jehová nued-anmargi binsamaid. Anmargala, dule-ibmar-nue-wisid Serebíasʼye-nugad barmialid. Serebíasʼde Mahli-wagangi-danikid. Mahliʼdi, Leví-wagangi-danimogad. Levíʼdi, Israel-e-machid. Serebías, e-machimala, degi, e-gwenadgan nonimalad. Serebíasʼbali bela machergan, warambe-gakabaabak-mergu (18) nonikid.
EZR 8:19 Deginbali, anmarga Hasabías barmilearbalid. Hasabíasʼbali, Jesaías Merari-wagangi-danikid nonimogad, degi, e-gwenadgan, degi, e-machimala nonimogad. Bela machergan, waladulagwen-mergu (20) nonikid.
EZR 8:20 Deginbali, anmargala, dulemar-Bab-Dummadse-goled-neggi-arbamalad dulataled-ilabo gaka dulagwen-mergu (220) barmiarbalid. Deun a-dulemar-e-dadgande, epenne, David-maiun, degi, e-dummagan-bukwaun, Levita-dulemar-bendakega na nug-imaksa gusad. Geb e-nugmar bela megisgusad.
EZR 8:21 Degine, Ahava-dii-iirmakmaid-walikaa anmar mas-gunsuli-Bab-Dummadse-golega ambikusad, adi, anmar-Bab-Dummad-asabin na san-bipi-imakegar. Degine, anmar-naoedba Bab-Dummad anmar-bendakega. De-ukinbali, anmar-mimmigan, degi, anmar-ibmar-nuegan-sedoedi bonisuli guegar.
EZR 8:22 Sordamar igarba anmar-isdarmaladgi anmar-bendakega, an reyse, sordamar danar-danar-bukwad anga barmidagega, an binge egisgusad. Deginbali, dule-moligi-urwemalad anga barmidagega, an binge ese egisgusbalid. Ar ade, anmar bato reyga sogsagusbinned: Dule Bab-Dummadba-gudimaladi, Bab-Dummad nue bendakmaiye, egi nued binsamaibarye. Degi-inigwele, dule-Bab-Dummad-igarba-dasurmaladdi, Bab-Dummad ourwega na imakdamarye.
EZR 8:23 Degisoggu, anmar Bab-Dummadse-golega mas-gunsuli-gudii gussunnad, degi, anmar-Bab-Dummadse anmar nue gochad, adi, anmar-bendakegar. Degine, Bab-Dummad anmar-ese-goled itosad, geb anmar-bendaknonikid.
EZR 8:24 A-sorbali, dule-irwa-Bab-Dummadse-gormalad-dummagan, e-dummagan-warambe-gakabo (12) an bachikii urbisad. Amarde, wemardo: Serebías, Hasabías, degi, e-gwenadgan e-ambebar (10).
EZR 8:25 Geb agine, rey, ibmar-ebulemaladi, mani, olo, anmar-Bab-Dummadga uksagusad, degine, dule-ega-binsaed-dakmalad, dule-dummagan, degi, bela Israel-dulemar-gudigusmalad uksamarmogad, Bab-Dummadse-goled-neg-sobega. A-ibmarmala a-dulemar-asabinni nibirgi an wilubdaksad.
EZR 8:26 Nibirgi an wilub-daksadi, wemalad: Mani, nibir-milidulabo-gakabaabak gaka dulataled-ilagugle gaka dulabo-gakambe (48,750). Ibmar-ebulemalad-manibiid, nibir-miligugle gaka dulataled-ilatar (7,500). Ormar, nibir-miligugle gaka dulataled-ilatarba (7,500).
EZR 8:27 De-ukinbali, nog-dummagan-orbiid gwadulagwenba (20). A-nogmar nibirambe-gakabakebak (19) aidikued. Nog-nuegan-esgoro-gordikidgi-sobaled ise-daarmakarmalad, oryob-gargeguedi, gwabobar.
EZR 8:28 Geb a-sorbali, dule-irwa-Bab-Dummadse-gormaladga an sogded: “Bemala, degi, Bab-Dummadse-goled-neggi-ibmar-ebulemalad, Bab-Jehováʼga nug-imaklesmalad. E-binsaedba-ibmar-uksamaladi, we-ibmarmalad: Mani, degi, olo. Amardi, Bab-Jehová-anmar-dadgan-e-Bab-Dummadgadid.
EZR 8:29 Nue we-ibmarmar be dakmalo, nue sabomalo, Jerusalén-neggweburgi Bab-Jehováʼse-goled-neg-imbagi ibmar-wilub-imaklegedse. Agi, dule-irwa-Bab-Dummadse-gormalad-e-dummagan-asabin, degi, Levita-dulemar, babgan-neguya-sedimalad-asabin, wilub-imaklegoed.”
EZR 8:30 Degisoggu, mani, olo, Bab-Dummadse-goled-neggi-ibmar-ebulemalad, bela wilub-imaklesadi, dule-irwa-Bab-Dummadse-gormaladga, degi, Levita-dulemarga, uklesad, adi, amar Jerusalénʼse anmar-Bab-Dummadse-goled-negse sedmalagar.
EZR 8:31 Gebe-Nii-gwichid-ibambe-gakabogi anmar Ahava-dii-iirmakmaidgi-bukwa, Jerusalénʼse aligusad. Igarbali, Bab-Dummad bela-belad anmar-bendaksad, anmar-isdarmaladgi, degi, dule-ibmar-atursamaladgi anmar-bendaksabalid.
EZR 8:32 Geb Jerusalénʼse anmar modapidgi, wis ibapaa an obunnosmalad.
EZR 8:33 Geb ibabakegi, anmar-Bab-Dummadse-goled-neggi, mani, olo, Bab-Dummadse-goled-neggi-ibmar-ebulemalad, anmar wilub-imaksamalad. Geb, dule-irwa-Bab-Dummadse-goled-Meremot Urías-machi, aga ibmar-wilub-imaklesadi anmar uksad. Degine, Finees-machi-Eleazar, Meremot-walik gwismogad. Amar-abargi Levita-dulemar gwismarmogad. Amardi, wemalad: Jesúa-machi-Jozabad, degi, Binúi-machi-Noadías.
EZR 8:34 A-ibagi bela ibmarmar ebislesad, degi, wilub-imaklesad, degi, bela e-aidikuedi narmaklesad.
EZR 8:35 A-sorbali, Israel-Dulemar-galesgusmalad-gannar-nonimaladi Israel-e-Bab-Dummadga ibmar-ogumakar-ukleged ukdemalad. A-dulemar we-ibmar-durgan uksamalad: Moli-bebe-nikad-sapingana, warambe-gakabo (12). Sibad-wawaad-machergan, waladulabake-gakambe-gakanergwa (96). Sibad-wawaad-sapingana, waladulapaa-gakambe-gakagugle (77). Degine, e-isgued-ular uksamarbalid: Sibad-machergan, warambe-gakabo (12). Bela Bab-Jehováʼga weligwaledgi we-ibmarmar-ogumakar uklesad.
EZR 8:36 Geb degine, Éufrates-diwar-dad-argwanedsik dummagan-negdakmamaidga, degi, suar-ibed-dummaganga, rey-igar-uksadi, uklesad. Amarde, Israel-dulemar-bendaksamarmogad, Bab-Dummadse-goled-neg-soblesad bendaksamarbalid.
EZR 9:1 Bela we-ibmarmar-bergusad-sorbali, dule-dummaganga-mamaid anse nonimalad, weyob anga sognonimalad: “Anmar-Israel-dulemar, dule-irwa-Bab-Dummadse-gormalad, degi, Levita-dulemarse-bakale, dulemar-baigangi bangusurmalad, degine, e-galagwensur-daedgi amba nanadimalad. A-dule-baigan, wemalad: Canaán-dulemar, Het-dulemar, Ferezeo-dulemar, Jebuseo-dulemar, Amón-dulemar, Moab-dulemar, Egipto-dulemar, degi, Amorreo-dulemar. Israel-dulemardi, a-dulemar-daedba ibmar-isgana imakdimarmogad.
EZR 9:2 ”Ar Israel-dulemar, we-dulemar-baigan-omegan-nikudmalad. Deginbali, Israel-dulemar, e-masmalaga, dule-baigan-e-sisgan-ukdemalad. Bab-Dummad-na-e-dulemar-susadi, emide, dulemar-baiganbo ablis-apurudmalad. Dule-dummagan, dule-negsemamaid, a-inseba na we-isguedgi isgudmalad.”
EZR 9:3 Deyob an itosgua, an mor-yoidi, degi, an-suba-dummad-yoidi, nunmak-itogedbali, siir-siir an imaksad, sailagia unge-unge an imaksad, degi, aku-sigamarse-bakale, deyob an imaksad. Geb degi, nue-wile-itogedbali, napagi-maada an sigisad.
EZR 9:4 Dulemar-galesgusmalad-nonimalad-e-isgusad-ular, anse Israel-e-Bab-Dummad-Igar-Maidba-gudimaladi ambikunonimalad. Ar andi, neg-sedoguedse Bab-Dummadga-ibmar-ogumakar-ukleged-wachise gwage-nunmak an itosii gusad.
EZR 9:5 Sedogusgua, Bab-Dummadga-ibmar-ogumakar-ukleged-wachigine, an gwage-nunmakedi wis gadigusad. Degi, an mor-yoidi, suba-dummad-yoibalidi esiirmakagwale, napagi yokorgi-sindigar an-Bab-Dummad-Jehováʼse-golega an argan onakwisad.
EZR 9:6 Degi, Bab-Dummadga an sogded: “Bab-Dummadye, bela-belad an akusunna itoged, an bingedar bese goled. Ar anmar-isguedi nue anmargi wilub-obicha naid. Anmar galagwensuli-bela-bela-isguedgi-nanadiidi bese warmaksa naid.
EZR 9:7 Anmar-dadgan-ibagan-akale, emi-ibagansega, bela-belad anmar begine dummad-nodiid. Anmar-isgued-ular, bela anmar, anmar-reymar, degi, anmar-irwa-bese-gormalad, reymar-yar-baid-baidsik-negdakmamaidga anmar urmaklesad. Anmala, emarse es-suidgi naibigusad, gales gusad, anmar-ibe ibmar sulesad, ise-mesagwale anmar gusad, emi-ibagi amba imaklediidyob.
EZR 9:8 ”Anmar-Bab-Dummad-Jehováʼye, emide be, sikwas be-sabguedi be anmarse oyosad. Anmar-gwenna-gwenna dulemargi-ollor-guega wis be anmar-imaksad. Bese-goled-neg-islidikidgi-ambikuega be anmar-imaksabalid. Degi, ibagan-nued be anmarse oyosad, anmar maiga-bukwa-gusadgi dula-gudiguega wis be anmar-imaksabalid.
EZR 9:9 Bab-Dummadye, anmar dulemar-e-maiga-gudigus-inigwele, bedina gwen anmargi bangussulid. Aka bur Persia-yar-e-reymar wile anmar-dakega be imaksad. Bese-goled-neg-bibichis-gusadi, gannar-sobega be anmargi burba-nuegan oubosad. Judá-yalagi, degi, Jerusalén-neggweburgi be anmar-bendakmaid, adi, melle bonigan anmarse warmakegar.
EZR 9:10 ”Emide, Bab-Dummadye, anmar we-ibmar-isgana-imaksadgine, ¿ibu an bega sogmaloe? Ar ade, anmar be-Igar-Maidbali gwen ibmar imaksasulid.
EZR 9:11 Be-maigan-be-gayaburba-barsogmaladba, be iduakwaa anmar-owisosgusad. Deun, weyob be sogsagusad: ‘Bemar we-yarse dogmaloedi, degi, we-yar be gamaloedi, nue-isgus-naiye, dule-gudimalad ibmar-isgana-imakedba, bela-belad we-yar nue-gagalesye. Bela a-yala nue-isgus-naiye be anmar-owisosanad.’
EZR 9:12 Deginbali, be anmarga sogsagusbalid: ‘Bemar, melle be-sisgan, we-macherganga be ukmaloye. We-dulemar-e-bunamaladi, melle be-masmalaga be ukmarbaloye. Degine, we-dulemarbo, melle be igar mesmaloye. Melle be bendakmaloye, adi, bemar gandikidba nanadii-gumalaga, degi, we-yargi ibmar-nuegan-nikad-gundii gumarbaligar. We-yar-nued geb be-mimmiganga degisadegu be obemaloye.’
EZR 9:13 ”Bab-Dummadye, anmar bela-belad isgusad an na magar itoged. Anmar sabsur-odurdaklegedwilubbinad. Degite, be anmar-Bab-Dummad-guedgi, be sabsur anmar-odurdaksasulid. Wile be anmar-dakedbali, napi-ichee be anmar-obedapid.
EZR 9:14 Bab-Dummadye, ¿anmarde Be-Igar-Maidba bar nanasuli gumalode? ¿Gannar we-dulemar-baigan-omegan ibmar-galagwensuli-imakmaladbo nikumai gumarbalode? Adi surbali. Bab-Dummad, ar deyobile, ¿be anmarse ulussulirde, be anmar obelossulirde? Be anmarse ulusale, bela be anmar-obelosale, dule wargwensaar begi gwen wakichasuliled.
EZR 9:15 ”Bab-Jehováʼye, Israel-e-Bab-Dummad, bedi dule-napiragwadid. Bedi, emi-ibasega, nabir danakwaa wis-ambikuega be anmar-imaksad. Anmar be-asabin ambikued-wilubsulinad. Ar anmar begi isgusad, degi-inigwele, anmar be-asabinni bukwamalad.”
EZR 10:1 Esdras Bab-Dummadse-goled-neg-asabin, Israel-dulemar-isgusad-ular, ise-boale, degi, yokorgi-sindigar, Bab-Dummadse gorsiidgine, bukidar Israel-dulemar: Machergan, omegan, mimmiganse-bakale, ese ambikunonikid. A-dulemar, bela ise-boedbimarmogad.
EZR 10:2 Geb degine, Jehiel-machi-Secanías, Elam-wagangi-danikid, Esdrasʼse aligusad. Geb weyob ega sogded: “Anmar, omegan-Israel-dulesurmalad nikus-nanasoggu, anmar-Bab-Dummadgi nue-nosad. Degi-inigwele, amba sunna anmar bendakleged.
EZR 10:3 Degisoggu, anmar, anmar-Bab-Dummadbo, igar mesmardo. Emi, bela we-omegan-Israel-dulesurmalad anmar metemaloye, mimmigangi bangumarbaloye, be anmargala binsaed-uksadba, deyob anmar imakodo. Degi, dule-Bab-Dummad-Igar-Maidba-nanadimalad-sogsamogadba, deyob anmar imakodo.” Degisoggu, Bab-Dummad-Igar-Maidba imaklesundo.
EZR 10:4 Geb degi, Esdrasʼga sogdemalad: “Gwichibin be imake, ar we-igarde be imakergebed, ar anmar be-bendakmogoed, gandik be-sae, be ibmar imake.”
EZR 10:5 Degidgine, Esdras gwichibin imaksad. Geb Esdras, dule-irwa-Bab-Dummadse-gormalad-e-dummagan, Levita-dulemala, bela Israel-dulemala ibmar-sogsamaladba-ise-sogar-imakega, imaksad. Degisoggu, Israel-dulemala ise-sogar eyeye na sogsamalad, deyob imakmaloye.
EZR 10:6 Geb agi, Esdras, Bab-Dummadse-goled-neg-asabin-sii nadsunnad. Geb Johanán-e-gabednegse naded. Johanánʼde, Eliasib-machid. Agine, dulemar-galesgusmalad-gannar-nonimalad-e-isgusadba, Esdras, nue bukib-binsaedba, gwen gobsasuli, mas-guchasuli, gabided.
EZR 10:7 Geb sorbali, dulemar-galesgusmalad-nonimaladse gorlesad. We-dulemarse gorlesad: Judá-yalagi-bukmaladse, degi, Jerusalénʼgi-bukmaladse. Ega weyob soglesad: “Jerusalén-neggweburse ambikunonimaloye.”
EZR 10:8 Degi, ega soglesbalid: “Dule ibapaagwadgi nonisulile, bela ei e-nainumar-nikadi sulegoye. Ar igi-dummagan, degi, Judío-girmar-dummagan igar-mesisa, deyob guoye. Degi, dulemar-galesgusmalad-nonimalad-imbagi, bemar-ononnolegoye,” ega soglesad.
EZR 10:9 Geb degine, a-ibapaagwadgi, bela machergan Judá-yarginmalad, degi, Benjamín-yarginmalad, Jerusalén-neggweburse ambikunonimalad. Deunni, nii-walabakebakgi, e-iba-durgwengi, bela dulemar Bab-Dummadse-goled-neggi ambikued-neg-naidgi ambikusmalad. Degi, weyob ibmar-soglesadba, nue dobee itodmalad. De-ukinbali, dii nue-winaibarsoggu, a-bakas bela-belad wawanmakbukwad.
EZR 10:10 Geb degi, dule-irwa-Bab-Dummadse-goled-Esdras gwichibin imaksad. Geb amarga weyob sogded: —Bemar, bela-belad Bab-Dummadgi nue isgusad, omegan-Israel-dulemarsurmalad be nikusmalad. Degidbali, bela-belad Israel-dulemar-isguega be imaksamalad.
EZR 10:11 Emi, anmar-dadgan-e-Bab-Dummad-Jehová-asabin, be-isgusmalad be barsogmarsun. Bab-Jehová-ibmar-abegedba be imakmalo. Degine, dule-Bab-Jehová-wissurmaladgi be bangumalo, omegan-be-dulamarsulid be metemalo.
EZR 10:12 Geb, bela dulemar gandikidba, Esdras-abin sogdemalad: —Ar deyobdo. Degiirdi nabir, be-sogedba anmar imako.
EZR 10:13 Degi-inigwele, anmar bukidarsoggu, degine, diide nue-winaibarsoggu, anmar geg weyob magaba bukwa gued. Ar we-igarde binsa ibagwenadye, degi, ibabogwadye soglesulid, ar ade, anmar bukidar na we-igargi isgusmaladbiid.
EZR 10:14 ”Degisoggu, anmar sogsundo, dule e-neggweburga-dummadga-gudimalad, e-sordagan-ular, wegi beoye, adi, amar-ular sunmakegar. Geb dulemar-omegan-Israel-dulesulid-nikusmalad iba-sogedba nonimaloed. Wemar dule-dummagan-abargi, dule-igar-nabiromalad-abargi, degi, e-neggwebur-e-neggwebur-iliba wese nonimaloed. Adi, Bab-Dummad anmar egi-isgusad-ular anmarse-urwemaidi, melle bar anmarse urwegar.”
EZR 10:15 Geb degi, unnila Asael-machi-Jonatán, Ticva-machi-Jahazías, wemar-ebogwad, we-ibmar-sogsamaladgi gwisgusad, degine, Levita-dulemar-ebogwad Mesulam, Sabetai, we-dulemarba nai gusmarmogad.
EZR 10:16 Dulemar-gales-selesgusmalad-nonimaladdi, na sogedba imaksad. Geb degine, dule-irwa-Bab-Dummadse-goled-Esdras, neguya-gwenna-gwennagi dummadga-gudimalad amisad, adi, dulemar-omegan-Israel-dulesulid-nikusmaladga igar-amiegar. Geb, nii-warambegi, a-ibagwenadgi, dulemar e-neggweburmar-ular dummadga-besmaladi na igar-amidmalad.
EZR 10:17 Degi, gebe-nii-yolesad-ibagwenadgi, bela-dulemar omegan-Israel-dulemarsulid-nikusmaladga igar-nabiroleged bergusad.
EZR 10:18 Dule-irwa-Bab-Dummadse-gormalad-e-wagan, omegan-Israel-dulesulid-nikusmalad, wemalad: Josadac-machi-Jesúa, Josadac-wagangi-danikid, degi, e-gwenadgan: Maasías, Eliezer, Jarib, Gedalías.
EZR 10:19 We-dulemar na nue-ise-sogar sogsamalad, we-omegan-Israel-dulesurmalad anmar metemaloye. Degine, amarde, e-isgued-eliega, Bab-Dummadga sibad-wawaad-machered-wargwen ogumakar uksamarbalid.
EZR 10:20 Imer-wagansikid: Hanani, Zebadías.
EZR 10:21 Harim-wagansikid: Maasías, Elías, Semaías, Jehiel, Uzías.
EZR 10:22 Pasur-wagansikid: Elioenai, Maasías, Ismael, Natanael, Jozabad, Elasa.
EZR 10:23 Levita-wagansikid: Jozabad, Simei, Kelaía. Kelaíaʼde, Kelita-duled. Petaías, Judá, Eliezer.
EZR 10:24 Dule-Namakmalad-e-wagansikid: Eliasib. Dule-yawagak-dakmalad-e-wagansikid: Salum, Telem, Uri.
EZR 10:25 Deginbali, Israel-dulemar-baigansikmalad. Paros-wagansikid: Ramía, Jezías, Malquías, Mijamín, Eleazar, Malquías, Benaía.
EZR 10:26 Elam-wagansikid: Matanías, Zacarías, Jehiel, Abdi, Jeremot, Elías.
EZR 10:27 Zatu-wagansikid: Elioenai, Eliasib, Matanías, Jeremot, Zabad, Aziza.
EZR 10:28 Bebai-wagansikid: Johanán, Hananías, Zabai, Atlai.
EZR 10:29 Bani-wagansikid: Mesulam, Maluc, Adaía, Jasub, Seal, Ramot.
EZR 10:30 Pahat-Moab-wagansikid: Adna, Quelal, Benaía, Maasías, Matanías, Bezaleel, Binúi, Manasés.
EZR 10:31 Harim-wagansikid: Eliezer, Isías, Malquías, Semaías, Simeón,
EZR 10:32 Benjamín, Maluc, Semarías.
EZR 10:33 Hasum-wagansikid: Matenai, Matata, Zabad, Elifelet, Jeremai, Manasés, Simei.
EZR 10:34 Bani-wagansikid: Madai, Amram, Uel,
EZR 10:35 Benaía, Bedías, Quelúhi,
EZR 10:36 Vanías, Meremot, Eliasib,
EZR 10:37 Matanías, Matenai, Jaasai,
EZR 10:38 Bani, Binúi, Simei,
EZR 10:39 Selemías, Natán, Adaía,
EZR 10:40 Macnadebai, Sasai, Sarai,
EZR 10:41 Azareel, Selemías, Semarías,
EZR 10:42 Salum, Amarías, José.
EZR 10:43 Nebo-wagansikid: Jeiel, Matatías, Zabad, Zebina, Jadau, Joel, degi, Benaía.
EZR 10:44 Bela-wemar, omegan-Israel-dulemarsurmalad-nikusmaladid. Geb degi, na e-omegangi bangudmarsunnad, e-mimmigangi aibatemarsunnad.
NEH 1:1 Ani, Nehemías Hacalías-machi, angi-ibmar-gusad an narmaksiid. Rey-Artajerjes birga-durgwengus (20) negdakmaidgi Nii-Quisleuʼye-nugad gwichidgi, deunni, an Susa-neggwebur-gandikidgi gudiid. We-Susaʼgi reyneg-siid.
NEH 1:2 Agi, deunni an-urba-Hanani, dule-Judá-yarginmaladba anse nonikid. Geb degi, a-dulemarse an egichided, Judío-dulemar-abonolesmaladi, igi gubukye, degine, Jerusalén-neggwebur, igi gusimoye.
NEH 1:3 Degidgine, anga sokarmalad: “Judío-dulemar-abonolesa Jerusalén-neggweburse gannar-nonimaladi, bela-bela wilebukmalad, degi, binged-dummad-abargi gudidimalad. Jerusalén-neggweburdina, e-galumar bela omukulesad, e-yawagakmardi soogi ogumaklesad.”
NEH 1:4 An deyob itosgua, an bosii gualid. Degine, ibagan undarsaar an bela-bela ulubgi nunmak-itodigusad. Geb degi, gwen mas-gunsuli an Bab-Dummad-Nibneggi-Maidse gornaigussunnad.
NEH 1:5 Geb agi, an ega sogded: “Bab-Jehováʼye, Bab-Dummad nibneg-e-ibedye, be, be bela-bela gangued nikad. Dule-be-sabmalad, degi, be-igar-mamaidba-nanamalad be sabdaed. Degi, be amar-ebo igar-mesisadba be imakedsedaed.
NEH 1:6 Bab-Dummad, bese an wilesagwa egissun, wis be an-itogena gadin, degi, an, be-maiga-gued, bitigi nued be dakena yeerban. An be-maigan-Israel-dulemarga bane-bane mutikidba, ibginedba an bese gornaid. Anmar-Israel-dulemar begi nue-nosad. A-ular, nunmak-itogedgi an na bega na barsogsunnad. Deginbali, ani, geb bela an-gwenadgan, anmar begi nue-nosmalad.
NEH 1:7 Degi, anmar bela-bela begi isgusmalad, degine, be-Igar-Mesisadba, degi, be-sorda-Moisés-sogsadba anmar nanassurmarbalid.
NEH 1:8 ”Emisgi be ebinsao, be-sorda-Moisésʼga be-ibmar-sogsad: ‘Bemar angi nosmardibe, ani dule-yar-baid-baid-bukwadgi an be-oaisakioye.
NEH 1:9 Degi-inigwele, bemar gannar anba nanamalale, geb an-Igar-Maidba bemar damalale, degi, aba bemar innikii gudimarbalile, gannar an bemar-suoed. Ar bemar dikasur mimilesdibe, an gannar bemar-suoed. Geb bia bemarga an neg nasiksa, a-negse an bemar-sedagoed, agi, angi nue binsadii gumalagar.’
NEH 1:10 ”Bab-Jehová, anmar be-maiganad, degi, be-dulamarbalid, ar bela-bela be-ganguedba be anmar-abonosad.
NEH 1:11 Bab-Jehováʼye, bese an wilesakwaa egissun, wis be, be-maiga-an-gued, be itogena gadin, degi, be-maimar bese-wilesagwa-gornaid be itogena gadin. Ar amardi bela be-nug-odummobimalad. An bese egisbardo, bitigi rey-asabin igar-nueganbi be anga uksana gadin.” Deunni a-ibagangine, an reyga nog-dakedid.
NEH 2:1 Rey-Artajerjes birga-dulagwengus (20), negdakmaidgi, a-ibagwengi, Nisán-nii-gwichidgi, an ega vino uknaigua, rey bukib-itoge an-daksad. Ar rey gwen bukib-binsa an-dakdisursoggu, anse egisalid:
NEH 2:2 —¿Ar ibiga be bukib-itoge? Ar gwen-nailikgu an be-daksurbalid, degisoggu, ibmar-baidba be bukib-binsadiirgebed. Agine, an bela-bela dobe-itonaded.
NEH 2:3 Geb agi, reyga an sogded: —¡Dummad, bitigi be suibasaar dulamai-gusana yeerban! ¿Igi an bukib-itosuli an daklegosunna? Ar ade, neggwebur bia an-dadgan-napa-mamai bela bibisgar-siid, degine, e-yawagakmar sooba bela gummaksabalid. Aga, an bukib-binsadiid.
NEH 2:4 Geb rey anse egichialid: —¿Ibu bega imakbi be an-abesunna? Geb agi, Bab-Dummad-nibneg-ibedse an goted.
NEH 2:5 Geb agi, rey-abin an sogded: —Dummad, ar be nabir itogele, nabir angi be binsaele, Judá-yarse be an-barmiddo, neggwebur bia an-babgan-napa-mamaidse, adi, a-neggwebur gannar an sobbaligar.
NEH 2:6 Deunni, rey, e-omeyalaba siid. Agi, rey anse egichialid: —Be nadele, ¿bule-melu be yogguoe? ¿Sana gannar be danibaloe? Geb an reyga sogsagu sana an gannar danikoe, agi, rey nuedgi an-barmisad.
NEH 2:7 Geb degi, reyga an sogsabalid: —Dummad, be nabir itogele, an bese wilesakwaa egissundo, dummagan Éufrates-diwar-dad-argwanedsik-negdakmamaidga be anga gardamar narmake, adi, Judá-yargi an bonisuli dogegar.
NEH 2:8 Geb reyga-sapur-daked-Asafʼse garda be narmakbalina yeerban. We-gardagi Asafʼga be sogodo: ‘Sapi-warmar Nehemíasʼga be ukoye, adi, urgomar-mamarega. We-urgomar, Bab-Dummadse-goled-neg-dikarba neg-gandikid-siid-e-yawagakmarga ebulegoed. Degine, neggwebur-e-galumargi yawagakmar-siid sobega we-urgomar ebulebaloed. Deginbali, Nehemías e-meged-neg sobega urgomar ega be ukbaloye.’ Ar Bab-Dummad angi nued-binsasoggu, rey we-gardamar anga uksasunnad.
NEH 2:9 Geb an Éufrates-diwar-dad-argwanedsik dummagan-negdakmamaidse an nadsunnad. Geb agi, rey-garda-narmaksad, a-dummaganga an uksad. A-ukinbali, rey, suar-ibed-dummagan, degi, dule-bila-onomalad-moli-birgi-simalad anba barmisad.
NEH 2:10 Degi-inigwele, Sanbalat Horón-neggweburgined, geb Tobías Amón-dulemarga-arbaed, Israel-dulemar-bendakega dule-gwensak noniye, itosmargua, bela-bela sae-itodmalad.
NEH 2:11 Geb an Jerusalén-neggweburse modapid. Geb agine, ibapaagus an gudiidgine,
NEH 2:12 mutikidbali an naded, anbali dulemar-ichesaar an sesad. Amargala bipisaale Bab-Dummad Jerusalén-neggweburga ibmar-imakbie-abeged an sogsasulid. Unnila anbi moli-birgi-sii nadapgusad, baigandi nagab nadapgusmalad.
NEH 2:13 A-mutiki, Neba-Yawagak-Noedsik an nosad. Bia dii-e-saila-Dragónʼye-nugad-siidsik, degi, bia Ibmar-Isgana-Mied-e-Yawagak-Noed-siidsik an naded. Agine, an Jerusalén-neggwebur e-galumar-ganna-ganna-bukwad an daksad. Degine, e-yawagakmar bela soo-abin gummakar an daksabalid.
NEH 2:14 Degidgine, Dii-e-saila-Yawagak-Dogedsik, degi, Rey-Dii-Wila-naidsik an naded. Degi-inigwele, geg an dogegusad, ar ade, moli-birgi-an-siidgi geg doged.
NEH 2:15 Degisoggu, amba mutiksoggu, dian-maidba an nakwid gusad. Agi, neggwebur-e-galu-matusulid an nue argasad. Geb degine, gannar an bilisad, Neba-Yawagak-Noedsik an dognonikid.
NEH 2:16 Ar deunni, dummagan-negdakmamaid wissurmalad, bia an arbi, degi, ibu an imakapi. Ar ade deunni, amba yoo an Judíoʼmarga ibmar-soged: Dule-irwa-Bab-Dummadse-gormaladga, dule-dummaganga, dummagan-negdakmamaidga, degi, dule-arbananaimaladga amba yoo an ibmar soged.
NEH 2:17 Geb amarga an sogded: —Ar bemar nue wismalad, anmargala nue-neg-gagales-naid: Jerusalén-e-galumar-matusulid bela nue bibisgar-siid, degine, e-yawagakmar bela soose gummaksad. Degisoggu, anmar Jerusalén-e-galu-matusulid gannar sobnamarsun, adi, melle bar dulemar anmargi dodomalagar.
NEH 2:18 Geb degine, amarga an sogdebalid, igi Bab-Dummad angi nued-binsasa, degine, igi anga rey sogsabali. Deyob-itosmargua, anga sokarmalad: —Anmar guakwado. Anmar neggwebur-e-galu-matusulid sobnamardo. Deyobi ibmar-nued saegala, yeer-itogedba arbadmarsunnad.
NEH 2:19 Geb Sanbalat Horón-neggweburgined, Amón-dulemar-e-dummad-wargwen Tobíasʼye nugad, degi, Árabe-dule-Gesem, deyob itosgu, anmargi dodoarmalad, gegegwaye anmargi sokarmalad. Amar anmarga sokarmalad: —¿Ar bemar ibu imaknanai? ¿Ar bemarde reygi-gwisguoye sogmarde?
NEH 2:20 Ar andi a-dulemar-abin sogded: —Bab-Dummad-Nibneg-Ibed, a anmar-ibmar-imaknaidgi nasguega anmar-imakoed. Anmardi e-maigan-gumalad. Anmar Jerusalén-neggwebur e-galu-matusulid obinosokalid. We-neggwebur bemargadsulid. Degisoggu, bemar ibmar-soged sate, ar be-dadgande weginmaladsurbalid. A-ulale, bemar anmarba arbaed sate.
NEH 3:1 Degidgine, dule-irwa-Bab-Dummadse-goled-e-dummad Eliasibʼye nugad, na e-sordagan dule-irwa-Bab-Dummadse-gormaladmala, Sibad-Wawaad-Yawagak sobsamalad. Degine, a-yawagak Bab-Dummadga nug-imaksamalad, geb e-gwichi-gusadse ogwichiapmalad. Deginbali, neggwebur-galu-matusulid sobdemarbalid, neg-matusulid-warakwagwad-Hamea-nugadgi onoded, geb neg-matusulid-warakwagwad-Hananeel-nugadse sobsamalad.
NEH 3:2 Geb a-dikarba galu-soblededi Jericó-dulemar egi arbasad. Geb amar-nagaba, Imri-machi-Zacur arbasmogad.
NEH 3:3 Senaa-e-wagan Ua-Yawagak gannar sobsamalad. Geb e-yawagak-gamalad e-dikargi mesisad, degi geb, a-yawagak e-gwichi-gusadse ogwichiapmalad, geb a-yawagak-edimalad, degi, yawagak-abargi urgo-mesleged mesismarbalid.
NEH 3:4 Geb a-yawagak-gwichidgi galu-soblededi, Cos-wagwa Urías-machi-Meremot, a-ailagi arbasad. Geb a-nagabali, Mesezabeel-e-wagwa Berequías-machi-Mesulam galu-sobsamogad. Geb Mesulam-arbanaid-nagaba, Baana-machi-Sadoc galu sobsamogad.
NEH 3:5 Geb Tecoaʼginmalad a-galugi-arbasmarmogad. Degi-inigwele, Tecoa-dule-e-dummagandi a-arbaedgi bendaksasurmalad, yapa eba ibsagusmalad.
NEH 3:6 Paseah-machi-Joiada, degi, Besodías-machi-Mesulam Yawagak-Seredye nugad gannar sobsamalad. Geb e-yawagak-gamalad e-dikargi mesisad, degi, geb a-yawagak e-gwichi-gusadse ogwichiapmalad, geb a-yawagak-edimalad, degi, yawagak-abargi urgo-mesleged mesismarbalid.
NEH 3:7 Geb a-yawagak-gwichidgi galu-soblesadi, Melatías Gabaón-neggweburgined, degi, Jadón Meronot-neggweburgined egi arbasmogad. Amarbali, Gabaón-neggweburginmalad, degi, Mizpa-neggweburginmalad arbasmarmogad. A-dulemarde, Éufrates-diwar-dad-argwanedsik dule-negsemaid e-maiganga gusmalad.
NEH 3:8 A-dulemar-nagaba, Harhaía-machi-Uziel, galu-sobsamogad. Harhaíaʼde, or-sobedid. Degi, Hananías, dule-ina-wawadikid-sobedid, a-dikarba galu-sobsamarmogad. Amar-ebogwa, Jerusalén-neggwebur-e-galumar gannar sobsamalad, Galu-Matar-Dummadye-nugad-nagase arbasmalad.
NEH 3:9 A-nagabali, Hur-e-machi-Refaías galu-nudaksamogad. Hurʼde, Jerusalén-neggwebur-abala dummadga-maigusad.
NEH 3:10 A-nagabali, Harumaf-machi-Jedaías, e-neg-asabin arbadmogad. Degine, a-nagaba, Hasabnías-machi-Hatús, arbasmogad.
NEH 3:11 Geb amar-nagaba, Harim-machi-Malquías, Pahat-Moab-machi-Hasubʼmala, arbasmarmogad. Degi, amar Neg-Suid-Soo-Galuye-nugadgi arbasmalad.
NEH 3:12 A-nagabali, Halohes-machi-Salum, na e-sisganmala galu sobnanai-gusmarmogad. Salumʼde, Jerusalén-neggwebur-abala dummadga mai gusad.
NEH 3:13 Degine, Hanún, Zanoa-neggweburginmaladmala Neba-Yawagak sobsamarmogad. Degine, e-yawagak-gamalad e-dikarba mesismalad, a-yawagak e-gwichi-gusadse ogwichiapmalad, geb a-yawagak-edimalad, degi, yawagak-abargi urgo-mesleged mesismarbalid. Degi, neggwebur-e-galumar dali-dulataled-ilabo gaka dulabo-gakambe-sugu (250) onudaksamalad, Ibmar-Isgana-Mied-e-Yawagak-Noed siidse.
NEH 3:14 Deginbali, Recab-machi-Malquías, Ibmar-Isgana-Mied-e-Yawagak sobsamogad. Recabʼde, Bet-Haquerem-yar-dakmai-gusad. Malquías yawagak-edimalad, degi, yawagak-abargi urgomar-mesleged mesisad.
NEH 3:15 Colhoze-machi-Salum Dii-Saila-e-Yawagak nudaksad. Colhozeʼde, Mizpa-yargi-dummadga-maigusad. Salum, Dii-Saila-Yawagak-uas gannar sobsad, e-yawagakmargi urgo-dummagan-sommeremalad nasiksad, geb e-gwichi-gusadse ogwichiapid. Salum, yawagak-edimalad, degi, yawagak-abargi urgomar-mesleged mesisad. Deginbali, dii-wilasar-naid, Siloéʼye-nugad, a-galu-matusulid, Salum nudaksabalid. We-dii-wilasar-naidde, Rey-Nainu-naba naid. A-akale, Salum, David-neggweburse arsanmar aidemaidse, galu nudaksad.
NEH 3:16 Salum-arbanaid-nagaba, Azbuc-machi-Nehemías, galu-nudaksamogad. Nehemíasʼde, Betsur-neggwebur-abala dummadga-maigusad. A-dulede, David-neg-uan-asabin neg-naidsega, degi, dii-wila-naidse, degine, sordamar-neg-bukwadse, arbasad.
NEH 3:17 Nehemías-nagaba, Levita-dulemar, degi, Bani-machi-Rehum, galu-nudaksamarmogad. A-nagabali, Hasabías, e-yar-nuggi galu nudaksamogad. Hasabíasʼde, Keila-neggwebur-abala dummadga-maigusad.
NEH 3:18 Hasabías-sorba e-gwenadgan arbasmarmogad, Henadad-machi-Bavai. Henadadʼde, Keila-neggweburmar-abala dummadga-maigusmogad.
NEH 3:19 Jesúa-machi-Ezerʼdi, gingimar-saboleged-neg-bukwadse galu nudaksamogad. Jesúaʼde, Mizpa-neggweburgi dummadga-maigusad.
NEH 3:20 Amar-nagaba, Zabai-machi-Baruc, bela-bela yeer-itogedgi galu-nudaksamogad. E-dikar-abingunaidgi onoded, dule-irwa-Bab-Dummadse-goled-bur-dummad-Eliasib-e-neg-yawagakse, Baruc nudaksamogad.
NEH 3:21 Baruc-nagaba, Urías-machi-Meremot, galu-nudaksamogad. Eliasib-neg-doged-akar, a-neg-bergunaidse, Meremot galu-nudaksad. Meremotʼde, Cos-wagwad.
NEH 3:22 Meremot-nagaba, dule-irwa-Bab-Dummadse-gormalad Jerusalén-dikarba-mamaimaladi galu-nudaksamarmogad.
NEH 3:23 Dule-irwa-Bab-Dummadse-gormalad-nagaba, Benjamín, Hasubʼmala, na e-negmar-asabin galu-nudaksamarmogad. Geb amar-nagaba, Maasías-machi-Azarías, e-neg-asabin galu-matusulid nudaksamogad. Azaríasʼde, Ananías-e-wagwad.
NEH 3:24 Azarías-nagaba, Henadad-machi-Binúi, galu-matusulid nudaksamogad. Binúi, Azarías-e-neg-akar-onoded, galu-abingunaidse nudaksad.
NEH 3:25 Uzai-machi-Palal, galu-abingunaidgi galu-nudaksa-gusad. A-galu-nudaklesadi, neg-suid-gwichid-asabin nudaklesad. A-neg-suidde esgarya-neg-imbasik reyneg-nagaba siid. Faros-machi-Pedaías, Palal-nagaba, galu nudaksamogad.
NEH 3:26 Bab-Dummadse-goled-neggi-arbamalad, Ofel-yar-mullugi-mamaimaladi, dad-nakwedsik Dii-Yawagak-Noed-asabin galu nudaksamalad. Neg-suid-nogwichidse nudaksamalad.
NEH 3:27 Amar-nagaba, Tecoaʼginmalad, neg-suid-nogwichid-akar, Ofel-galuse nudaksamarmogad.
NEH 3:28 Dule-irwa-Bab-Dummadse-gormalad na e-neg-e-neg-asabin Moli-Yawagak-Noed-akar galu nudaksamalad.
NEH 3:29 Amar-nagaba, Imer-machi-Sadoc, e-neg-asabin galu-nudaksamogad. Sadoc-nagaba, Secanías-machi-Semaías, a-galu-nudaksamogad. Secaníasʼde, Dad-Nakwedsik-Yawagak-Noed-siid-dakedid.
NEH 3:30 Semaías-nagaba, Selemías-machi-Hananías, degi, Salaf-machi-nergwad (6) Hanúnʼye-nugadmala galu nudaksamarmogad. Wemar-nagaba, Berequías-machi-Mesulam, e-neg-asabin galu-nudaksamogad.
NEH 3:31 Degine, Mesulam-nagaba, Malquías dule-orgi-ibmar-sobedi, galu nudaksamogad. A-dule, Bab-Dummadse-goled-neggi-arbamalad-e-negse, degi, ibmarmar-manigi-ukleged-negse, nudaksad. A-galu, Igar-Itoleged-e-Yawagak-Noed-asabin, dulemar-ambikued-neg-e-galu-abingunaidse nudaksad.
NEH 3:32 Degine, dule-ambikued-neg-akar Sibad-Wawaad-Yawagak-Noedse dule-orgi-ibmar-sobmalad, degine, dule manigi-ibmar-ukmalad galu-nudaksamarmogad.
NEH 4:1 Sanbalat itoargu, anmar Jerusalén-neggwebur-e-galu sobnanaiye, bela-bela sae-itoded, geb nue-uluded. Agine, Judíoʼmargi dododed.
NEH 4:2 Geb Sanbalat e-gwenadgan-wagab, degi, Samaria-sorda-bila-onomalad-wagab sogded: —We-Judíoʼmar, gegegana, ¿we, ibu-imaknanai? ¿Wede we-neggwebur-galu gannar sobmaloye sogmarde? ¿Ar Judíoʼmarde gannar e-Bab-Dummadga ibmar-ogumakar-uknai-guoye sogmarde? ¿Ar ibagwen-dummad we-arbaed gagamaloye sogmarde? ¿Ar akwa-gummaksamalad, bela ubigwar-gusmalad, gannar ebugoye sogmarde, we-galu gannar a-akwagi sobegar? Adi surbali.
NEH 4:3 Sanbalat weyob sogsagu, deunni, Amón-dule Tobías, e-dikarba gwichid. We-dule sogdemogad: —We-galu-akwabi-sobnanaidgi, achu-bunnu-wawaad egi nakwidele, yaar-nadeled.
NEH 4:4 Degi, an Bab-Dummadse goted: “Anmar-Bab-Dummadye, nue be itoge, bule nue-isdarsunna anmar-dake be daksunna. Isdar anmargi-sunmaknanaid, egi dukin-aibined be imake. E-isdarmaladga be urmake. E-isdarmaladse yogasaar-gales-yar-baid-baidse ebipileged.
NEH 4:5 Bab-Dummad, ar we-dulemar galu-sobnanaidgi sunnasur sunmaksamarsoggu, melle e-ibmar-isdar-imaksamalad igi-barsaye be sogo. E-isgusmalad, melle ega be osulogo.”
NEH 4:6 Degisoggu, anmar anba galu-matusulid sobnai-guarmarsunnad. Ar dulemar bela-bela nue yeer-itogedgi arbanai gusmarsoggu, bato negabargus anmar galu onakmalad.
NEH 4:7 Ar Sanbalat, Tobías, Árabe-dulemar, Amón-dulemar, degi, Asdodʼginmalad itoarmargu, Jerusalén-neggwebur-e-galu-matusulid gannar soblenaiye, degine, galumar bato nue edilemaiye, amar nue bela-bela sae-itosmalad.
NEH 4:8 Degisoggu, we-dulemar igar-amismalad, adi, Jerusalénʼgi gwisgunamalagar, bela Jerusalén-neggwebur oichomalagar.
NEH 4:9 Geb degine, anmardi anmar-Bab-Dummadse goted. Degidgine, anmar igar-amisad, mutikidba, degi, ibginedba sordamar neggi-nakulegega ogwismaloye.
NEH 4:10 Deunni, Judá-yargi-bukmaladdi sogdemalad: “Dulemar-akwa-berbemalad geggusmalad, deginbali, akwamar-mileded yaisursoggu, anmar galu-matusulid geg bar-sobdo.”
NEH 4:11 Degine, anmar-isdarmalad sogdemalad: “Melle anmar-wisguega anmar imakmalo, degi, melle anmar-dakega imakmarbalo. Judíoʼmar bato yaba-gudii anmar-dakdamaloed, geb agi, anmar oburgwemaloed. Deyob anmar imakoed, adi, melle galu-matusulid bar-nudakmalagar.”
NEH 4:12 Judíoʼmar-gwenna-gwenna amar-abargi-mamaimalad bali-bali anmarga sognonidamalad: “Sanbalat-sordamala ukiar bemargi galagwensuli baidsik-baidsik bemar-bukwadgi gwisgunonimaloye.”
NEH 4:13 Geb agine, dulemar e-gwenadgan-e-gwenadganba danar-danar an oambikusad. Guakwa es-suidgi gani-gani an oambikusad. E-sigu, e-gingi bato guar-guar gani, galu-matusulid-dikarba, bur-baisursunna-anmargi-ubogedgi an amar-urbisad.
NEH 4:14 Geb degidgine, neg nue an daksagua, an gwichiguded. Geb agi, dummaganga, sorda-idumaladga, degi, bela dulemarga an sogded: “Melle anmar-isdarmalad-abin gwayemalo. Nue insamalo, Bab-Dummad, dule-dummadid, bela-gangued-nika-maid. Be-gwenadgan-ular, be-masmala-ular, be-bunamala-ular, be-omegan-ular, degi, be-negyaur-ular be bila-onomalo.”
NEH 4:15 Anmar-isdarmalad wisguarmalad, anmarde guakwaa bukwamarye, ar e-igar-mesismalad Bab-Dummad ei obelosye. Agi, anmar gannar galu-matusulid sobdemalad, na egad-egad arbaed imakdemalad.
NEH 4:16 A-iba-onoded-akar, an-sordamar-negabar arbananai gusad. Abaladi, guakwaa e-ilawar-swiswidikmalad, e-sigu-abgaed, warsi, degi, e-binasgargi mor-esgorobiid-yoi gudii gusmalad. Judá-dummagan guakwa-bukwamarmogad e-sordagan-bendakega.
NEH 4:17 Dulemar galu-matusulid-sobnanaidi, degi, dulemar-ibmar-berbemaladi, sakwa-nailiki arbananai gusad, sakwa-baidsikdi eswar-gani gunanai gusad.
NEH 4:18 Ar dule-galu-sobnanaimaladdi, na e-sadergi es-suid-nai gunanai gusmarbalid. Deyob arbananai gusmalad. Dule gar-trompeta-ogoleddi an-dikarba gwichid.
NEH 4:19 Ar ade dummaganga, dule-nue-nug-nikamaladga, degine, bela dulemar-baiganga an sogsad: “We-arbaedi, arbaed-dummadid, bipisulid. Emide, anmar galugi banna-banna dika-dikasur gunanaid.
NEH 4:20 Degisoggu, ar bia gar-trompeta gole bemar itogoe, asik bemar anmarbogwa ambikunonimalo. Ar anmar-Bab-Dummad bila-onolegedgi anmar-ular gwisguoed.”
NEH 4:21 Degisoggu, deyobi anmar arbananai gusmalad. Dad-nakwialid-akar, neg-mutikguedse anmar arbaed indakdedamalad. Dule-negabala arbananai gusmalad, baigan-abaladdi eswar-gani guakwaa nakulebukwa gusmalad.
NEH 4:22 Geb degine, dulemarga an sogsabalid: “Bemala, be-bendakmaladmala Jerusalén-neggwebur-yaba be ambikumalo, adi, mutiki be nakulemalaga, ibgindi bemar arbamaloed.”
NEH 4:23 A-ulale, an-gwenadgan, an-sapingana, degi, sordamar-an-edarbemaladi, bipisaale binsa-gannaa-bukwadasurmalad, unnila obsokalirbi geb bogiguddamalad.
NEH 5:1 Degidgine, dulemar, degi, e-omegan binnasuli e-gwenadgan-Judíoʼmargi oimakarmalad.
NEH 5:2 Gwenna-gwenna sogdemalad: “Anmar mimmigan bukidar nikamalad, degisoggu, anmar nabir mas-gunnega ibmar-gwag-gullemalad egisergebed, adi, mer burgwegar.”
NEH 5:3 Baigan sogdemarmogad: “Anmar ukud-dummad-naidba, anmar-nainu, degine, anmar-uva-nainu manigi odogar nagusad, degi, anmar-nega dule-baidga manigi-odogar sigwisbalid, adi, anmar a-manigi mas bakegar.”
NEH 5:4 Baigandi sogmarmogad: “Anmar rey-bennukegala, anmar-nainu, anmar-uva-nainu, manigi-odogar nasiksad.
NEH 5:5 Ar anmar, we-dulemarbo emar-gumalad, anmar-mimmigan emar-mimmiganbo akarsulid, emalad. Degi-inigwele, anmardi anmar-masmala, degi, anmar-sisgan maiga-guegala anmar manigi-ukergebed. Bato anmar-sisgan gwenna-gwenna maiga-gudidimalad, amala geg anmar bar oakaloged. Ar ade anmar-nainu, anmar-uva-nainu bato dule-baigangadid.”
NEH 5:6 Ani, Nehemías, we-dulemar isdar-itogedba oimakbukwa an itosgua, bela-bela sae-an-itoded.
NEH 5:7 Nuekwaa an egi binsasgua, dule-nug-nikamaladga, degi, dule-dummaganga sabsuli ibmar an ega sogded: —Ar be-gwenadganga ibmar be uksale, egi mani-onogega, ¿mani-dummarba be gadamarde? Deginbali, bela we-igar-itogegala dulemar-onmakega an imaksad.
NEH 5:8 Amarga an sogded: —Anmar, bela-bela alamaknanai gusad an-gwenadgan-Judíoʼmar, dulemar-Judíoʼsurmaladse manigi-uklesmalad-onogegar. ¿Ar emide bemar gannar be-gwenadgan-uknaibarde, adi, anmar a-gwenadgan gannar manigi onomarbaligar? Dule-nuga-nikamalad, degi, dummagan gwen anmar-abin-imaksasurmalad. Ar ade, ¿ibu anmarga sogosunna? Anmarga soged-satemala.
NEH 5:9 Degidgine, an sogdebalid: —Bemar ibnued imaknanaisurmalad. Ar bemar anmar-Bab-Dummad dobee nanae-wilubmalanad, adi, anmar-isdarad-Judíoʼsurmalad melle anmargi dodomalagar.
NEH 5:10 Ani, an-gwenadgan, degi, dule-anga-arbamalad, anmar dule-wileganaga mani gaar-uksad, orosgi-dakleged-trigoʼye-nugad gaale an uksamarbalid. Degisoggu, dule-anmargi-ibmar-ganikidbali anmarga gannar ibmar-ukoed, obichadi suli.
NEH 5:11 Degisoggu, dummagan gandikidgi an bemarga sogdo: Emisbinne, bemar ega e-nainumar, e-uva-nainumar, e-olivo-nainumar, degi, e-negmar gannar ukmala. Deginbali, mani-e-sangi-mani-onolesad mer be e-annik-suo, degi, ibmar-gwaggi, vinoʼgi, degi, olivo-gwallugi, e-gaka-obicha-ukleged, mer be egiso.
NEH 5:12 Dummagande an-abin sogdemalad: —Nueddo, bela be anmarga ibmar-sogsadba an imakmaloed. Anmar gannar ega e-ibmarmala ukoed, bipisaale anmar ese ibmar-egisosulid. Geb degidgine, dule-irwa-Bab-Dummadse-gormaladse an gochad. Amar danar an oambikusad. Amar-wagab dule-nug-nikamalad, degi, dule-dummagan na e-ibmar-sogsad anga ise-sogar-imakega an imaksad.
NEH 5:13 Agine, an-mor-dummad binnasur mor-mor an imaksad, geb an sogded: —We-ibmar-sognaidba dule-wargwen imaksasulile, Bab-Dummad a-dule-neg, degi, e-ibmarmar-nikad an-mor-dummad an mor-mor imaksayobi imakoed. Deyobi mor-mor guoed, na ibmar sate-guoed. Bela dulemar-bukwadi sogdemalad: —¡Ar deyob guodo! Geb bela dulemar Bab-Jehová-e-nug odummodmalad, bela dulemar ibmar-sogsadba imaksamalad.
NEH 5:14 Rey-Artajerjes birga-dulagwengus (20), reyga maidgi, an Judá-yar-daked-dummadga nuggunonikid. A-gan an sesigusad, Rey-Artajerjes birga-dulagwen-gakambe-gakabo (32) megisadse. We-birgambe-gakabogwadgi (12), an-dummadga maigusan-inigwele, ani, degi, an-bendakmaladse-bakale, ibmarmar dule-dummadga-ukleged, anmar gwen ebussurmalad.
NEH 5:15 Ar an-idu-dummaganga-megismaladdi, dulemargi mani-dummad gasmalad. Na e-mas gunnega, e-vino gobega, mani-nibir-dulabo (40) aidikued-wilub gasmalad. Deginbali, ega-arbamaladmoga dulemar-wiosmarmogad. Ar andi Bab-Dummad-dobed-ular, deyob an imaksasulid.
NEH 5:16 Neggwebur-galu-matusulid gannar-nudakega an arbanai gusad, degine, anga dule-arbamalad arbanai gusmarmogad. Anmar bipisaale nainu baksasur gusmalad.
NEH 5:17 A-ukinbali, Judíoʼmar, degi, dule-dummagan, dulagugle-gakambe (150) mese-naba anba mas-gunnonidamalad. Degine, dule-neggwebur-baiganginmalad anse ataknoni-gusmaladdi obarlesulid.
NEH 5:18 Bane-bane, moli-bebe-nikad, wargwen, sibad-wawaad-nuegan, walanergwa (6) oburgwiledaed. Deginbali, nuumar-oburgwiledabalid. Ibambe-ibambegi (10-10), vino-ichesuli anga selenonidaed. Degi-inigwele, an dummadga-guedgi anga-ibmar-uklegoenad an ese egichissulid. Ar ade, an daked, ar weyobile, we-dulemarga mani-bipisuli nosaled.
NEH 5:19 ¡An-Bab-Dummadye, bela we-dulemarga an ibmar-imaksad, nue be ebinsao! ¡Angi nued be binsamogo!
NEH 6:1 Sanbalat, Tobías, Árabe-dule Gesemʼye-nugadi, degi, an-isdarmalad-baigan itoarmargua, Jerusalén-neggwebur-galu-matusulid an nudaksaye, degine, yaa-ollogwad sateye, bela bato atisye. (Ar a-ibagangi amba yoo yawagakmar nasikleged).
NEH 6:2 Degidgine, Sanbalat, degi, Gesem anga gayaburba barmiarmalad, sogsiid: “Neba-Onoʼye-nugadgi, neggwebur-burwigana-gwensakgi anmar abingumalo.” Ar emardi, bato angi ichakwa binsasmalad.
NEH 6:3 Geb agine, amarga dule gayaburba-berbemalad an barmisad, ega sogega: “Ande bela-bela arbaed nue-nikaye, arbaed-dummad an imaknaye. Degisoggu, bemar-abinguega an naele, an-arbaed galegodole.”
NEH 6:4 Ilabake, gannar-gannar anga we-gayaburba barmisad. Degi, ilabake, gannar-gannar an abinsasmogad.
NEH 6:5 Ilataledgine, Sanbalat na e-maiba anga garda-argaar barmialid.
NEH 6:6 Gardagi weyob narmakar-naid: “Dule Gasmuʼye-nugadi soged, degi, dule-Judíoʼsurmalad sogmarmogad: ‘Bede, Judíoʼmarbo galu-sobnanaiye, adi, be-reygi be aibinmalaga. A-ulale, bemarde galu-matusulid sobnanaiye. Weyob sogmalad, bede, e-reyga guoye.’
NEH 6:7 Degine, bede Bab-Dummad-gayaburba-barsogmalad-onugsasye, adi, amar Jerusalén-neggweburgi begi sogmalagar: ‘Judá-yargi anmar rey-nikamarye.’ Ar Rey-Artajerjesʼse we-gayaburba warmakosoggu, be anmarse dage, anmar sunmakmalagar.”
NEH 6:8 Geb degine, an abin-imaksad: “Bela be ibmar-sogedi bela gakanbiid. Ar na be wargwengi yogasaar gordiid.”
NEH 6:9 Ar ade, wemar binsa yamo anmar-ogwayebimalad. Binsamalad ar deyobile, anmarde bar arbabi gudagosurmarye. Andi, an Bab-Dummadse gochad: “Bab-Dummadye, emigindi gangued be anga udasun, adi, melle galakuega.”
NEH 6:10 Geb a-sorbali, Delaía-machi-Semaías-negse an nadsunnad. Semaíasʼde, Mehetabel-e-wagwad, a-dule na e-neggi nomaisulid. Geb anga sokalid: —Anmar Bab-Dummadse-goled-negse ambikunamar. Anmar Bab-Dummad-negse dogogu, yawagak edioed, ar ade emi-mutik be-oburgwedanimaloed.
NEH 6:11 Ar andi an abin-imakded: —An dule-wakinnedsuli. Dule-anyobmalad e-san-abonogega Bab-Dummadse-goled-negse gwen dukunaosulid. An dukuosulid.
NEH 6:12 Ar ade mag an daksad, Bab-Dummad Semaías-barmiarsulid. Ar we-dule deyob sogedi, Tobías, Sanbalatʼbo we-dule-binsaed-gasad, ar manigi baksad deyob sogegar.
NEH 6:13 Ar ade, Semaías manigi baklesad, adi, an-ogwayegar, an-oichogegar. Ade, Tobías, Sanbalat-ebo binsasmalad, deyobi an-imaksale, angi isdar sunmakmaloed, an-nug oichomaloed.
NEH 6:14 “An-Bab-Dummadye, Tobías, Sanbalatʼbo, na e-ibmar-imaksadi be ebinsao. Deginbali, Bab-Dummad-gayaburba-barsoged-bundor-Noadías, degi, Bab-Dummad-gayaburba-barsoged-baigan, an-ogwayebi-gusmaladi be ebinsabalo.”
NEH 6:15 Jerusalén-neggwebur-e-galu-matusulid-soblenaidi, nii-Elulʼye-nugad iba-dulagwen-gakatargi bergusad. Galu-matusulidgi, iba-dulabo-gakambe-gakabo (52) nue egi arbalesad.
NEH 6:16 Anmar-isdarmalad itoarmargu, anmarde arbaed-obelosye, bela anmar-dikarba-dulamar-bukwad, dobe-itonadmalad. Bela amala na nug-bipii itonadmalad. Amar mag itosmalad, we-arbaed anmar-Bab-Dummad-sogedba imaklesad.
NEH 6:17 A-ibagangi, Judá-yargi dummaganga-mamaid, Tobíasʼga bukidar garda barmimai-gusmalad, degine, Tobíasʼmoga bukidar amarga garda barmimai-gusmogad.
NEH 6:18 Adega, bukidar-dummagan-Judá-yargi-mamaid Tobíasʼba nanaimalad. Ar ade, Tobías, Ara-machi-Secanías-e-sapinid. Degine, Tobías-machi-Johanán, Berequías-machi-Mesulam-sisgwa nikusad.
NEH 6:19 Deginbali, bukidar-dulemar Tobías-ibmar-nuegan-imaked an-asabin sognonidamalad. Geb degine, bela an ibmar-sogdaed, Tobíasʼga sogdapdamalad. Degine, Tobías yamo an-ogwayega, anse gardamar barmimai-gusad.
NEH 7:1 Jerusalén-galu-matusulid bela nudaklesgua, e-yawagakmar ogwichilesad. Geb e-yawagak-dakmalad onugsalesad, degi, dule-namakmalad onugsalesbalid, degi, Levita-dulemar amilesbalid.
NEH 7:2 Geb degine, an-urba-Hanani, Jerusalén-neggwebur-e-dummadga-megega an nugsasad. Degi, Hananíasʼdi, Jerusalénʼgi reyneg-siid-dakedga an nugsasad. Hananíasʼde, dule-napiragwadid, dule-baiganba bur bule Bab-Dummad-dobee nanadiid-duled. We-dulemar-warbogwadga an igar-uksad.
NEH 7:3 Amarga an sogsad: “Dad-nakwialile, Jerusalén-neggwebur-e-yawagakmar argadoed. Geb, dad-argwaned-idu, dule-yawagak-dakmalad amba arbananai, e-yawagakmar sakdiledoed, degi, be urgo iduar-mesoed nue edilegega. ”Deginbali, Jerusalénʼginmalad neggweburgi-nakulegega an onugsasad, amala gwenna-gwenna ega-soglesad bia nakulegoe, abala na e-neg-e-neg-asabin nakulemaloed.”
NEH 7:4 Jerusalén-neggweburde bipisursoggu, olloo-dakleged. Ar ade amba yoo negmar gannar soblesoggu, dulemar-ichee bukwad.
NEH 7:5 Geb degidgine, Bab-Dummad an-gwage ebusad, dule-dummagan, dule-nuga-nikamalad, degi, bela dulemar na e-gwenadgan-e-gwenadganba urbega, adi, e-dadgan-e-dadganba amar-ebisega. Geb agine, an garda amisad, dulemar an-idu-nonimalad-e-dadgan-nugmar narmakar-nanai. Agi, narmakar-naid:
NEH 7:6 Wemar, Babilonia-e-rey-Nabucodonosorʼse-galesa, Babiloniaʼse-selesmalad. Amar gannar Judá-yarse, degi, Jerusalén-neggweburse-nonimalad-e-nugmar narmakar-nai an dakalid. Wemar, na e-neggwebur-e-neggweburse gannar nonimalad:
NEH 7:7 Zorobabelʼba, Jesúaʼba, Nehemíasʼba, Azaríasʼba, Raamíasʼba, Nahamaniʼba nonimalad. Degine, Mardoqueoʼba, Bilsánʼba, Misperetʼba, Bigvaiʼba, Nehumʼba, degi, Baanaʼba nonimalad. Israel-dulemar gannar nonimalad, wemalad:
NEH 7:8 Paros-wagan, milibo gaka dulabaabak-gakambe-gakabo (2,172).
NEH 7:9 Sefatías-wagan, dulataled-ilapaa gaka dulapaa-gakambe-gakabo (372).
NEH 7:10 Ara-wagan, dulataled-ilanergwa gaka dulabo-gakambe-gakabo (652).
NEH 7:11 Pahat-Moab-wagan, a sogleged, Jesúa-waganye, degi, Joab-waganye, milibo gaka dulataled-ilabaabak gakambe-gakabaabak (2,818).
NEH 7:12 Elam-wagan, miligwen gaka dulataled-ilabo gaka dulabo-gakambe-gakabake (1,254).
NEH 7:13 Zatu-wagan, dulataled-ilabaabak gaka dulabo-gakatar (845).
NEH 7:14 Zacai-wagan, dulataled-ilagugle gaka dulapaa (760).
NEH 7:15 Binúi-wagan, dulataled-ilanergwa gaka dulabo-gakabaabak (648).
NEH 7:16 Bebai-wagan, dulataled-ilanergwa gaka durgwen-gakabaabak (628).
NEH 7:17 Azgad-wagan, milibo gaka dulataled-ilapaa gaka durgwen-gakabo (2,322).
NEH 7:18 Adonicam-wagan, dulataled-ilanergwa gaka dulapaa-gakagugle (667).
NEH 7:19 Bigvai-wagan, milibo gaka dulapaa-gakagugle (2,067).
NEH 7:20 Adín-wagan, dulataled-ilanergwa gaka dulabo-gakambe-gakatar (655).
NEH 7:21 Ater-wagan, a sogleged, Ezequías-waganye, dulabake-gakambe-gakabaabak (98).
NEH 7:22 Hasum-wagan, dulataled-ilapaa gaka durgwen-gakabaabak (328).
NEH 7:23 Bezai-wagan, dulataled-ilapaa gaka durgwen-gakabake (324).
NEH 7:24 Harif-wagan, dulatar-gakambe-gakabo (112).
NEH 7:25 Gabaón-wagan, dulabake-gakambe-gakatar (95).
NEH 7:26 Belénʼginmalad, degi, Netofaʼginmalad, dulabakebak-gakabaabak (188).
NEH 7:27 Anatotʼginmalad, dulanergwa-gakabaabak (128).
NEH 7:28 Bet-Azmavetʼginmalad, dulabo-gakabo (42).
NEH 7:29 Quiriat-Jearimʼginmalad, Cafiraʼginmalad, degi, Beerotʼginmalad, dulataled-ilagugle gaka dulabo-gakapaa (743).
NEH 7:30 Ramá-neggweburginmalad, degi, Geba-neggweburginmalad, dulataled-ilanergwa gaka durgwen-gakagwensak (621).
NEH 7:31 Micmas-neggweburginmalad, dulanergwa-gakabo (122).
NEH 7:32 Betel-neggweburginmalad, degi, Hai-neggweburginmalad, dulanergwa-gakapaa (123).
NEH 7:33 Nebo-neggwebur-baidginmalad, dulabo-gakambe-gakabo (52).
NEH 7:34 Elam-baid-wagan, miligwen gaka dulataled-ilabo gaka dulabo-gakambe-gakabake (1,254).
NEH 7:35 Harim-wagan, dulataled-ilapaa gaka durgwen (320).
NEH 7:36 Jericó-wagan, dulataled-ilapaa gaka dulabo-gakatar (345).
NEH 7:37 Lod-wagan, Hadid-wagan, degi, Ono-wagan, dulataled-ilagugle gaka durgwen-gakagwensak (721).
NEH 7:38 Senaa-wagan, milipaa gaka dulataled-ilabakebak gaka durgwen-gakambe (3,930).
NEH 7:39 Dule-irwa-Bab-Dummadse-gormalad-nonimalad, wemalad: Jedaía-wagan, Jesúa-gwenadgansikid, dulataled-ilabakebak gaka dulapaa-gakambe-gakapaa (973).
NEH 7:40 Imer-wagan, miligwen gaka dulabo-gakambe-gakabo (1,052).
NEH 7:41 Pasur-wagan, miligwen gaka dulataled-ilabo gaka dulabo-gakagugle (1,247).
NEH 7:42 Harim-wagan, miligwen gakambe-gakagugle (1,017).
NEH 7:43 Levita-dulemar, wemalad: Jesúa-wagan, degi, Cadmiel-wagan, amala, Hodavías-e-waganad, dulapaa-gakambe-gakabake (74) mergued.
NEH 7:44 Dule-namakmalad, wemalad: Asaf-wagan, dulagugle-gakabaabak (148).
NEH 7:45 Dule-yawagak-dakmalad, wemalad: Salum-wagan, Ater-wagan, Talmón-wagan, Acub-wagan, Hatita-wagan, degi, Sobai-wagan, dulanergwa-gakambe-gakabaabak (138).
NEH 7:46 Dule-Bab-Dummadse-goled-neggi-arbamalad, wemalad: Ziha-wagan, Hasufa-wagan, Tabaot-wagan,
NEH 7:47 Queros-wagan, Siaha-wagan, Padón-wagan,
NEH 7:48 Lebana-wagan, Hagaba-wagan, Salmai-wagan,
NEH 7:49 Hanán-wagan, Gidel-wagan, Gahar-wagan,
NEH 7:50 Reaía-wagan, Rezín-wagan, Necoda-wagan,
NEH 7:51 Gazam-wagan, Uza-wagan, Paseah-wagan,
NEH 7:52 Besai-wagan, Mehunim-wagan, Nefisesim-wagan,
NEH 7:53 Bacbuc-wagan, Hacufa-wagan, Harhur-wagan,
NEH 7:54 Bazlut-wagan, Mehída-wagan, Harsa-wagan,
NEH 7:55 Barcos-wagan, Sísara-wagan, Tema-wagan,
NEH 7:56 Nezía-wagan, degine, Hatifa-wagan.
NEH 7:57 Salomón-maimar-wagan, wemalad: Sotai-wagan, Soferet-wagan, Perida-wagan,
NEH 7:58 Jaala-wagan, Darcón-wagan, Gidel-wagan,
NEH 7:59 Sefatías-wagan, Hatil-wagan, Poqueret-Hazebaim-wagan, Amón-wagan.
NEH 7:60 Dule Bab-Dummadse-goled-neggi-arbamalad, degi, Salomónʼga-arbamalad-wagan, dulataled-ilapaa gaka dulabake-gakambe-gakabo (392).
NEH 7:61 Baigandi: Tel-Melaʼgi, Tel-Harsaʼgi, Querubʼgi, Adónʼgi, degi, Imer-neggweburmargi noarmarmogad. Amarde, geg oyogusmalad, doamar e-dadganmala, degi, emar Israel-dulemar-gumarbardibe.
NEH 7:62 Amardi, wemardo: Delaía-wagan, Tobías-wagan, degi, Necoda-wagan, dulataled-ilanergwa gaka dulabo-gakabo (642).
NEH 7:63 Dule-irwa-Bab-Dummadse-gormaladmoga, geg oyogusmarmogad, emarde Israel-dulemar-gumardibe. Amardi, wemardo: Habaía-wagan, Cos-wagan, degi, Barzilai-wagan. Barzilai-wagwa-gwensakde, Barzilai-sisgwa-wargwen nikusad. We-Barzilaiʼde, Galaadʼginedid. Abali, na e-nug susad.
NEH 7:64 Wemala, na e-dadgan-nug amidmargu, amissurgusmalad. Degisoggu, dule-irwa-Bab-Dummadse-goledga bar gussurmardo, ar ade, swilidikidsuryenik soglesad.
NEH 7:65 Degidgine, saila-dummadga-maid igar-uksamogad, we-dulemar melle Bab-Dummadga-ibmar-uklegaled gunnamaloye. Geb dule-irwa-Bab-Dummadse-goled-wargwen Urimʼba, degi, Tumimʼba Bab-Dummadse-egisedse nabir we-dulemar mas-swilidikid gunmalodibe, surdibe.
NEH 7:66 Bela dulemar-danar, mili-dulabo-gakabo gaka dulataled-ilapaa gaka dulapaa (42,360) mergu ambikunonimalad.
NEH 7:67 Wemar-abargi, e-mai-machergan, degi, e-mai-omegan obarilenaisulid. Emarbi, miligugle gaka dulataled-ilapaa gaka durgwen-gakambe-gakagugle (7,337) mergued. E-namakmalad-machergan, degi, e-namakmalad-omegan, dulataled-ilabo gaka dulabo-gakatar (245) mergu nikad.
NEH 7:68 Molimar weyob mergued: Dulataled-ilagugle gaka dulagwen-gakambe-gakanergwa (736) mergu nikad. Moli-uaya-senigwadmardi, dulataled-ilabo gaka dulabo-gakatar (245) mergu nikad.
NEH 7:69 Moli-yargan-muremaladdi, dulataled-ilabake gaka durgwen-gakambe-gakatar (435) mergued. Moli-uayasuiddi, milinergwa gaka dulataled-ilagugle gaka durgwen (6,720) mergumogad.
NEH 7:70 Bukidar babgan-na-neguya-sedimalad, Bab-Dummadga arbaed-imakega ibmar uksamalad. Jerusalén-neggweburgi dummadga-maid ibmar-uksad: Or-nibirambe-gakabakebak (19) uksad, nogmar gwadulabo-gakambe (50) uksabalid, degine, dule-irwa-Bab-Dummadse-gormalad-e-mor-yomalad, goadulataled-ilatar gaka dulagwen-gakambe (530) uksabalid.
NEH 7:71 Babgan-na-neguya-sedimalad, Bab-Dummadga weyob-arbaed-imakega ibmar-uksamarmogad: Or, nibir-dulataled-ilapaa gaka dulapaa-gakambe-gakatar (375) aidiku uksad. Mani, nibir-milibo gaka dulataled-ilagugle (2,700) aidiku uksabalid.
NEH 7:72 Dule-baiganmoga: Or, nibir-dulataled-ilapaa gaka dulapaa-gakambe-gakatar (375) aidiku uksamarmogad, Mani, nibir-milibo gaka dulataled-ilabo gaka dulabo-gakambe (2,250) aidiku uksamarbalid. Degine, dule-irwa-Bab-Dummadse-gormalad-e-mor-yomalad, goadulapaa-gakagugle (67) uksamarbalid.
NEH 7:73 Degine, dule-irwa-Bab-Dummadse-gormalad, Levita-dulemar, dule-yawagak-dakmalad, dule-namakmalad, dule-neggweburginmalad, dule-Bab-Dummadse-goled-neggi-arbamalad, degi, bela Israel-dulemar, na e-neggwebur-e-neggweburse megnadmalad. Nii-walaguglegusgu (7), bela Israel-dulemar na e-neggwebur-e-neggweburgi bato mamaimalad.
NEH 8:1 Geb degidgine, bela dulemar na bulakwaa danar-ambikunonidamaladse ambikunonimalad. We-ambikuedde, Dii-Yawagak-Noedye-nugad-asabin naid. Dule-garda-narmaked-Esdrasʼye-nugadga, sogdemalad, Moisés-Igar-Mesisad-garda sedaye. We-Igarde, Bab-Jehová, Moisésʼba Israel-dulemarga uksa-gusad.
NEH 8:2 Nii-walagugled iba-onodedgine, dule-irwa-Bab-Dummadse-goled-Esdras, Bab-Dummad-Igar-narmakar-maid dulemar-bukwadse senonikid. Agi, machergan, omegan, degi, dulemar-baigan bela-nabir-mag-itomalad bukwamalad.
NEH 8:3 Esdras wakudaryalaba, yorukudse dulemar-ambikuedgi, dulemar-wagab, Dii-Yawagak-Noed-asabin garda absoded. Bela dulemar Bab-Dummad-Igar-gardagi-narmakar-maid nue-itobukwa gusmalad.
NEH 8:4 Dule-garda-narmaked-Esdrasʼde, urgo-aila-nibakwaa-soblealed-birgi gwichigusad, ar ade, agala urgo-sobsagusmalad. Esdras-dikarba: Matatías, Sema, Anías, Urías, Hilcías, degi, Maasías, e-argan-nuedsik gwichi-gusmalad. Esdras-e-argan-sapiledsikdi: Pedaías, Misael, Malquías, Hasum, Hasbadana, Zacarías, degi, Mesulam, gwichigusmarmogad.
NEH 8:5 Esdrasʼdi, dulemarba bur-nibakwaa gwichisoggu, dulemar bela Esdras-dakbukwa gusmalad. Esdras garda egadgu, dulemar bela gwisgusmalad, nue-boo ambikusmalad, adi, nuekwaa itomalagar.
NEH 8:6 Geb degidgine, Esdras, Bab-Jehová, Bab-Dummad-Bur-Dummad-nug-odummoded. Bela dulemar argan onakwidmargu, sogdemalad: “¡Ar deyobdo! ¡Ar deyobdo!” Agine, dulemar Bab-Jehová-nug-odummogega napase e-bebe-ebulegedse dulluu imakdemalad.
NEH 8:7 Levita-dulemar, dulemarga Bab-Dummad-Igar-Maid odulobukwa-gusmalad. We-Levita-dulemar-Igar-odulobukwadi, wemalad: Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán, degi, Pelaía. Bela dulemardi na nue-itobukwa-gusmalad.
NEH 8:8 We-Levita-dulemar Bab-Dummad-Igar-Maid ise-nue-absoar imaknanai-gusmalad, degine, ise-nue-odulogar dulemarga imaksamalad, adi, ise-nue-magar itomalagar.
NEH 8:9 Geb degidgine, saila-dummad-Nehemías, degi, dule-irwa-Bab-Dummadse-goled, dule-garda-narmaked-Esdras, geb Levita-dulemar dulemarga-odulonanaid, dulemarga bela sogdemalad: “Emi-iba, anmar-Bab-Dummad-Jehová-iba-islidikid. Degisoggu, melle be bukib-itomar, melle be bomar.” Ar ade, dule-Bab-Dummad-Igar-Maid-itobukmalad bela boedbimalad.
NEH 8:10 Degine, Nehemías sogded: “Bemar namar, mas-birigined be gunnamar, gobed-birigined be gobnamar. Degine, bemar mas-nikamalad, dule mas-satemaladga be ukmalo, ar ade, emi-iba anmar-Bab-Dummad-ibad. Melle be bukib-itomar, be wergumala, ar ade, Bab-Jehováʼgi-wergued, anmar-ogannogediid.”
NEH 8:11 Levita-dulemarmoga dulemar-baisur-itogega amarga sognanaimalad: “Melle be bukib-itomar, melle be bomar, ar ade, emi-iba, iba-islidikidid.”
NEH 8:12 Degisoggu, bela dulemar nue mag-itosmarsoggu, bela wergunadmalad, gobnadmalad, mas-gunnadmalad, degine, dulemar-mas-satemaladga mas uknadmalad. Ar ade, Bab-Dummad-Gardagi e-odurdaklesad nue-magar-itosmalad.
NEH 8:13 Banedgine, oibosgua, bela babgan na-neguya-sedimalad, degi, dule-irwa-Bab-Dummadse-gormalad, degi, Levita-dulemar, Bab-Dummad-Igar-Maid-durdakmalaga dule-garda-narmaked-Esdrasʼse ambikunonimalad.
NEH 8:14 Israel-dulemar Bab-Dummad-Jehová Moisésʼba-Igar-Uksad, gardagi-narmakar-mai dakarmalad: “Israel-dulemar nii-walagugledgi, iba-onodedgi neg-matarganagi megmaloye.
NEH 8:15 Degine, bela neggwebur-iliba dule-baigan-owisomaloye, degi, Jerusalénʼgi owisomarbaloye, sogoye: ‘Be sapurba namar, olivo-sapi-anagan sedamaloye, olivo-sapurbalid-anagan, sapi-arrayánʼye-nugad-e-gagan-wawadikmalad sedamaloye, ogobgi-dakleged-gagan, degi, bela sapi-dummagan-gagan sedamaloye, adi, neg-matargwa-matargwa sobmalagarye, ar igi gardagi narmakar-naidba.’ ”
NEH 8:16 Degisoggu, dulemar sapi-anagan-amiega ainidsunnad, geb na senonimalad. Agi, neg-matargana sobsamalad. Gwenna-gwenna na e-neg-birgi neg-ollornaidgi sobsamalad, baiddi e-neg-imbagi, baiddi Bab-Dummadse-goled-neg-imbagi sobsamalad, baiddi Dii-Yawagak-Noedye-nugad-asabin sobsamalad, baidmoga dulemar-danar-ambikuedgi sobsamalad, degi, baiddi Efraín-Yawagak-Noedye-nugad-asabin dulemar-danar-ambikuedgi neg-matargana sobsamalad.
NEH 8:17 Bela we-dulemar-gales-gusmalad-nonimaladi, neg-matargana sobsamalad. Geb a-neg-matarganagi megismalad. Ar Israel-dulemar weligwar-itosmalad, ar ade, Nun-machi-Josué-akale, we-ibasega Israel-dulemar weyob neg-matarganagi nue megdisurmalad. Degisoggu, bela-bela weligwaledgi iba-dummad onosmalad.
NEH 8:18 Esdrasʼde, gebe-iba-onoded-akar, Neg-Matargana-Iba-bergunaidse bane-bane dulemarga Bab-Dummad-Igar-Maid absosad. Ibagugle (7) Iba-onosmalad. Geb a-banedgine, bela-dulemar bulakwaa igar-sogmaidba Bab-Jehová-nug odummosmalad.
NEH 9:1 Nii-walagugled iba-durgwen-gakabakegi, Israel-dulemar na bular ambikunonimalad, adi, mas-gunsuli Bab-Dummadse-golega. Geb emar bela-bela bukib-itoged-oyogega, mor-sommed yosmalad, degi, e-nonogi buru eosmarbalid.
NEH 9:2 Israel-dulemar dule-baigangi bachikii ambikusmargua, gwichi na e-isgued Bab-Dummadga barsogdemalad, degi, e-dadgan-isgusad Bab-Dummadga barsogdemarbalid.
NEH 9:3 Deyob-gwichi, E-Bab-Dummad-Jehová-Igar-Maid-garda wachi-ilapaa absosmalad. Geb baid-wachi-ilapaa, e-isgued e-Bab-Dummad-Jehováʼga barsogsamarbalid, degi, baid-wachi-ilapaa, e-Bab-Dummad-Jehová-nug odummosmarbalid.
NEH 9:4 Agine, Levita-dule: Jesúa, Bani, Cadmiel, Sebanías, Buni, Serebías, Bani, degi, Quenani, nibakwaa urgo-aila-soblealid-birgi nakwismalad. Agi, binnasuli e-Bab-Dummad-Jehováʼse gotemalad.
NEH 9:5 Weyobi, Levita-dulemar: Jesúa, Cadmiel, Bani, Hasabnías, Serebías, Hodías, Sebanías, degi, Petaías sogdemalad: “Bemar gwisgumar. Bab-Jehová-gusgu-maiguad, degisadegu-maigubaloed, a-e-nug be odummomar. ‘Bab-Jehová, be-nug odummolesun. Bur bule be-nug-gandikidgi, nued binsaledii gusana yeerban, ibmar-baiganba bur bule be-nug odummolesana yeerban.
NEH 9:6 ” ’Unnila bebi Bab-Jehová-gued. Nibneg be nasiksadid: Bela nibneg-naid ugakaase, bela e-niisgwamar ega be nasiksad. Be, be napneg nasiksabalid, degi, bela ibmarmar-bukwad be obinnisbalid. Deginbali, demar-nanaidi, degi, bela agi ibmarmar-bukwad be obinnisbalid. Bela we-ibmarmala dula-gued be imaksad. A-ulale, sordamar-nibnegginmalad bese gotemalad, bela-belad be-nug-odummomalad.
NEH 9:7 ” ’Be, Bab-Dummad-Jehová-gued. Be, be Abram-susad. Be, Abram Caldea-dulemar-neggwebur-Urʼgi be onosad. A-dulega be nug-ogwasad, Abrahamʼye be onugsasad.
NEH 9:8 Be, Abraham-e-gwage-ulub be daksad, nue-inniki beba nanadii guo be daksad. A-ulale, Abraham-ebogwa be igar-mesisad, e-waganga we-yarmar ukoye be sogsad: Canaán-dulemar-yar, Het-dulemar-yar, Amorreo-dulemar-yar, Ferezeo-dulemar-yar, Jebuseo-dulemar-yar, degi, Gergeseo-dulemar-yar. We-yarmar, Abraham-waganga ukoye be sogsad. Bab-Dummad, be-ibmar-sogsad be imaksad. Ar ade, be dule-innikigwadid.
NEH 9:9 ” ’Anmar-dadgan-Egipto-yargi-wilebukwa-gusadi, be daksad. Demar-Ginnidye-nugad-gakaba bese binnasur gotemargu, be itosad.
NEH 9:10 Be, be ibmar-gegerdaklemaladi, degi, ibmar-dakledisurmaladi Faraónʼgi be imaksad. Faraón-e-dummagangi, degine, bela Egipto-yargi-dule-bukmaladgi be imaksabalid. Ar ade, Egipto-dulemar be-dulamargi na-san dummarba-itogedba, gandikidgine-ibmar-imaksamalad be daksad. A-ulale, emi-ibadse, be-nug dummarba gued.
NEH 9:11 Israel-dulemar-wagab, demar negabar be egasad. A-demar-abargi, Israel-dulemar neg-dinnagwadgi obaksagusmalad. Ar Israel-dulemar-baregindanimaladdi, dii-ulakse be egwachad, igi akwa dii-ulakse egwalleddaedyob be imaksad.
NEH 9:12 Ibgine, mogir-bubawaryob-gwichidba be semai-gusad. Mutikdi, soo-bubawaryob-gwichid-gwabunyemaidba be semai-gusad, adi, igar-namaloedba, ega neg-mee imakegar.
NEH 9:13 ” ’Sinaí-yarse be aidenonigusad, Israel-dulemarga nibneg-akar be sunmaksad. Igar-innikimalad, igar-napiramalad ega be uksa-gusad. Igar-Mesisad, igarmar-be-anmarga-sogsad, ber nuegan-gued.
NEH 9:14 Israel-dulemarga be sogsagusad, obunnoged-iba-islidikidgi be obunnomaloye. Beba-nanadiid-Moisésʼba, be igarmar-sogsadi, igarmar-be-mesisadi, degine, Igar-Maidi be uksad.
NEH 9:15 ” ’Madu-nibneggined Israel-dulemarga be uksad. A-madugine be Israel-dulemar oimmosad. E-uku-uku-itoged-osulogega, akwa-dummadgi ega be dii onosad. Ega be sogsagusad, bemar yar-suegala na be a-yarse-dognamarye. Ega be ise-sogar sogsagusad, an bega we-yar ukedseye, a-yar ega be uksad.
NEH 9:16 ” ’Ar anmar-dadgandi, na san-dummarba imaksamalad. Be-Igar-Mamaidba ibsassurmalad.
NEH 9:17 Anmar-dadgan yapa be-ito gusmalad. Degine, ibmar-dakledisulid-ega-be-imaksadi, gwen ebinsassurmalad. Ar be-itossurmarsoggu, amar begi-yoledmalad. Geb na e-dummad-amismalad, adi, gannar Egiptoʼse na maiga-wiledii gunamalagar. Degi-inigwele, Bab-Dummad, bedi amargi bangussulid. Ar Bab-Dummad, bedi dule-wiledaked maid. Bedi sabedgi igar-nudaked, dule-wiledakedba sabedgi be ibmar imaked. Be wissur gwae-gwae sae-itodaed. Be-sabgueddi bur dummarba gued. A-ular, be-dulamar, be iessulid.
NEH 9:18 ” ’Ar moli-bebe-nikad-sapingwagwad-orbiid na ega imaksagua, na sogsamalad: We, anmar-bab-dummad-dake, Egipto-yargi anmar-onosmalad-dake. Anmar-dadgan begi bela-bela yolesmargua, begi nue-dummad-nosmalad.
NEH 9:19 Bab-Dummad, ar be-sabgued bur-dummarbasoggu, nega-dulesulidgangi gwen be-dulamar be metesulid. ” ’Mogir-bubawaryob-gwichid igarba e-idumai-guega, ibginedba gwen egi aibachasulid, degine, mutikidba mogir-bubawaryob-gwabunne-gwichid gwen egi aibachasurbalid, adi, emar igar-namaloedba ega igar-mee imakegar.
NEH 9:20 ” ’Bab-Dummad, Be-Burba-Nued be-dulamarga be barmialid, adi, inniki amar-odurdakegar. Be madu-maná ega ukmai-gusadi, gwen ega be osulossulid, degine, uku-uku-itogedgi ega be dii ukmai-gusad.
NEH 9:21 Birga-dulabo (40) nega-dulesulidganba Israel-dulemar-akwedii be gusad. Emarga gwen ibmarmar akussulid. E-mormala gwen nungussulid. Degine, e-nagmar gwen engussurbalid.
NEH 9:22 ” ’Neggwebur-dummagan, ega be uksad, dule-baigan-bukwad-yarmar ega be uksabalid. Bela negmar bachik-bachik ega be uksa-gusad. Hesbón-yala susagusmalad, a-yar, Rey-Sehón-yarga gusanad. Degine, Basán-yala be uksagusbalid. A-yar, Rey-Og-yarga gusanad.
NEH 9:23 Israel-dulemarga mimmigan be omelos gusad. Niisgwamar-nibneggi-nanaidyob, ega be omelosad. Be napa ukoye, e-dadganga ise-sogar-sogsadse be amar-sesa gusad.
NEH 9:24 Geb e-mimmigan a-yalagi ubos-gusmalad, degine, a-yala egadga gunonikid. Canaán-dulemar-a-yargi-bukwamalad, be, Israel-dulemar-wagab ibgwensuli be imaksad. Israel-dulemarga a-dulemar be urmaksa-gusad. Amba e-reymar, degi, dulemar-a-yargi-bukwad Israel-dulemarga be urmaksa-gusad. Adi, Israel-dulemar na igi we-dulemar-imakbimala, deyob imakega.
NEH 9:25 Neggweburmar-nue-sakdigar-siid susagusmalad. Napa-gadi-ibmar-sanmakmalad susagusmarbalid. Negmar ibmar-nuegan-ena-bukwad egadga-gunoni gusmalad. Diamar-soblearbukwad, uvaʼmar-digar-nanaid, olivo-nainumar, degine, sapi-durgan akar-akarmalad, bela na egadga gunoni gusmalad. Nue guchamalad, nue immediki gusmalad, degi, nue wardungus gusmarbalid. Degine, nued-egi be binsasadgi, nue-wergus gusmalad.
NEH 9:26 ” ’Ega be ibmar-nueganbi imaksa-inigwele, degite, be-sogedba dassurmalad, begi gwisgusmalad. Be-Igar-Maid obacha gusmalad, be-gayaburba-barsogmaladi gannar be-igarba-nanaega ega sunmaksamalanad, emide, oburgwis gusmalad. ¡Anmar-dadgan bela-belad be-nug oichosmalad!
NEH 9:27 A-ulale, e-isdarmaladga be urmakde gussunnad. Amar, anmar-dadgan-nue-wiosmalad. Anmar-dadgan nue wile-itobukmaladgi bese gotegusmalad. Bedi nibneg-akar amar-itosad. Degine, be sabgued-dummarba-nikadba, be-dulamar-wilebukwadgi-onogegala, ega be dule-barmimai gusad, adi, anmar-dadgan-isdarmaladgi emar-bendakegar.
NEH 9:28 Anmar-dadgan, gales-bukwadgi ollorgunonimalale, gannar be-asabin isguddamalad. Degidgine, e-isdarmaladga be urmakdedasunnad, amarse wilebukwa guddamalad. Anmar-dadgan gannar bese binnasuli gotedamalad. Bedi nibneg-akar amar-itodaed. Be sabgued-dummarba-nikadba, an-dadgan gannar-gannar be abonomai gusad.
NEH 9:29 Ega be sogsanad, be-Igar-Maidba be damarye. Ar anmar-dadgandi, na san-dummarba imaksamalad. Ega be-Igarmar-Uksadba gwen ibsassurmalad, ar Be-Igarmar-Mamaidgi bur annadmalad. Dule-be-Igar-Mamaidba-nanamaladdi, dula be imaked. Anmar-babgan begi nosmalad, uaya-sate-daedba be-obachamalad. Binsaed-sate gusmalad, be-itobi gussurmalad.
NEH 9:30 ” ’Epennegwa, be anmar-dadgangi gwae-gwae urwedii gussulid. Bedi, be-Burbaba be-gayaburba-barsogmaladga sunmaksad, adi, anmar-dadganga be ibmar-sogegar. Ar degite, gwen be-itossurmalad. A-ulale, anmar-dadgan be dulemar-baigan-we-napneggi-bukmaladga be urmaksa gusad.
NEH 9:31 Degi-inigwele, ar be-sabgued dummarba-gusoggu, be anmar-dadgan-obelossulid, degine, wargwen be metesurbalid, Bab-Dummad, ar ade bede-sabedgi igar-nudaked, nue-wile be dule-daked.
NEH 9:32 ” ’Emigindi, anmar-Bab-Dummad, bedi, Bab-Dummad-bur-dummadid, bur-dutusulidid, bela dulemardi, be-dobdaed. Bab-Dummad, bedi, dule-napiragwadid, dulemarbo be igar-mesisale, be imakedse-daed, degine, be anmar-sabgumaiguad. Bab-Dummadye, be-asabin anmar dummad-wilediid. Degisoggu, anmar-reymar, anmar-saila-dummagan, anmarga-dule-irwa-bese-gormalad-wilediid, melle be baisursunna dako. Degine, anmarga-be-gayaburba-barsogmalad, anmar-babgan, degi, bela be-dulamar, Asiria-reymar-maigusad-akar, emi-ibadse nue-wilediidi, melle be baisursunna dako.
NEH 9:33 Bela-anmargi-ibmar-gusmaladi, igar-innikigwadba be imaksad. Ar bedi dule-innikigwadba be ibmar-imaked, ar anmardi begi nue-dummad nosmalad.
NEH 9:34 Anmar-reymar, anmar-saila-dummagan, anmar-irwa-bese-gormalad, anmar-babgan, Be-Igar-Maidba nanassurmalad. Amarde, Be-Igar-Mamaid itossurmalad, degine, iduakwaa be owisonai-gusadi gwen itossurmarbalid.
NEH 9:35 Bab-Dummadye, amar-negsemaigu, ibmar-nuegan ega be uksad. Anmar-babganga be yar-dummad gadi-ibmar-sanmaked-yala be uksagu, degite, bese gochasurmalad, degine, igar-isgana-imakdimalad gwen metesurmarbalid.
NEH 9:36 ” ’A-ulale, emi anmar maiga-gusa-bukwamalad. Anmar-dadganga be yala-uksadgi, anmar maiga-gusa-bukwamalad. We-yala anmar-dadganga be uksanad, e-ibmar-sanmaked-gunmalagar, bela ibmar-agi-nikadi gunmalagar.
NEH 9:37 Emigindi, we-napagi ibmar-sanmakedde, bela reymarga uklemaid. We-reymarde, anmar-dummadga be onugsanonikid. Anmar-isgusadba we-reymar anmar-dummadga gunonikid. We-reymarde, gangued nikasoggu, na e-ibmar-imakbiedba anmargi, degi, anmar-ibdurgangi imakdedamalad. Emide, anmar nue-bukib itobukmarsunnad.’ ”
NEH 9:38 Israel-dummagan Bab-Dummadse gotebalid: “Bela wemar-ulale, anmar ise-sogar sogbukmalad, anmarde imakedseye, degine, anmar narmakar messundo. A-ulale, anmar-saila-dummagan, anmar-Levita-dulemar, degi, anmar-irwa-bese-gormalad, we-garda-anmar-narmaksadgi anmar-dummagan-e-goo-burba omeslesundo.”
NEH 10:1 Dulemar gardagi e-goo-burba-mesismalad, wemalad: Saila-dummad-Nehemías Hacalías-e-machi, degi, dule-irwa-Bab-Dummadse-gormalad, wemalad:
NEH 10:2 Sedequías, Seraías, Azarías, Jeremías,
NEH 10:3 Pasur, Amarías, Malquías,
NEH 10:4 Hatús, Sebanías, Maluc,
NEH 10:5 Harim, Meremot, Obadías,
NEH 10:6 Daniel, Ginetón, Baruc,
NEH 10:7 Mesulam, Abías, Mijamín,
NEH 10:8 Maazías, Bilgai, degine, Semaías. Amala, dule-irwa-Bab-Dummadse-gormalad gumalad.
NEH 10:9 Geb degine, Levita-dulemardi, wemalad: Azanías-machi-Jesúa, Henadad-e-wagwa-gwensak Binúi.
NEH 10:10 Cadmiel. Cadmiel-e-gwenadgan: Sebanías, Hodías, Kelita, Pelaías, Hanán,
NEH 10:11 Micaía, Rehob, Hasabías,
NEH 10:12 Zacur, Serebías, Sebanías,
NEH 10:13 Hodías, Bani, degine, Beninu.
NEH 10:14 Neggwebur-e-dummagan goo-burba-mesismaladdi, wemalad: Paros, Pahat-Moab, Elam, Zatu, Bani,
NEH 10:15 Buni, Azgad, Bebai,
NEH 10:16 Adonías, Bigvai, Adín,
NEH 10:17 Ater, Ezequías, Azur,
NEH 10:18 Hodías, Hasum, Bezai,
NEH 10:19 Harif, Anatot, Nebai,
NEH 10:20 Magpías, Mesulam, Hezir,
NEH 10:21 Mesezabeel, Sadoc, Jadúa,
NEH 10:22 Pelatías, Hanán, Anaías,
NEH 10:23 Oseas, Hananías, Hasub,
NEH 10:24 Halohes, Pilha, Sobec,
NEH 10:25 Rehum, Hasabna, Maasías,
NEH 10:26 Ahías, Hanán, Anán,
NEH 10:27 Maluc, Harim, degine, Baana.
NEH 10:28 Degine, dule-baigan: Dule-irwa-Bab-Dummadse-gormalad, Levita-dulemar, dule-yawagak-dakmalad, dule-namakmalad, dule-Bab-Dummadse-goled-neggi-arbamalad. Degi, bela Israel-dulemar Bab-Dummad-Igar-Maidba nanamalaga, dule-Judíoʼsurmaladgi-aibachamaladi, degi, e-omemala, e-masmala, e-bunamala, degine, bela dule-mag-neg-itomalad.
NEH 10:29 Amala, na e-gwenadgan-e-gwenadganba, e-dummaganmala ambikunonimalad, adi, ise-sogar sogega, emarde Bab-Dummad-Moisésʼba-Igar-uksa-gusadba damaloye. Degine, emarde Bab-Dummad-Igar-Maidba, Igar-uksadba, degi, e-igar-sogsadba nanamaloye.
NEH 10:30 A-ukinbali, anmar sogsabalid: “Anmar-sisgan dule-yar-baid-baidginedga anmar ukosurye, degine, anmar-masmalaga anmar a-sisgan-ukosurmarbarye.
NEH 10:31 ”Deginbali, dulemar-yar-baid-baidginmalad, obunnoged-ibagi ibmarmar-ukdanikir, igi mas-ukdanidibe, anmar a-ibagi ibmar ese bakosurye. Ibamar-islidikidgi ibmar-ukdanidibe, anmar ese ibmar-bakosurmarye.” Deginbali, anmar sogsabalid: “Birgagugle-irba (7) anmar nainumargi gwen arbaosurmarye. Dule anmargi ibmar-ganikile, bar anmarga muchub ukosurmarye.”
NEH 10:32 A-ukinbali, anmar sogsamarbalid: “Birga-ilibali, Bab-Dummadse-goled-negga mani-bipi-uklegoye (4 gramos), adi, a-manigi Bab-Dummadse-goled-negga ibmar-abelesiid bakegar.
NEH 10:33 ”Adi, a-manigi: Bab-Dummadga bane-bane-madu-ukleged bakega, ega ibmar-gwag-ukleged, degine, bane-bane ibmar-durgan-ogumakar-ukleged bakegar. ”Degine, a-manigi obunnoged-ibagi Bab-Dummadga ibmar-ukleged, nii-binidgi ibmar-ukleged, degi, iba-dummagangi ibmar-ukleged, Bab-Dummadga ibmar-islidik-ukleged bakegarbar. Degine, Israel-dulemar-isgusad-eliegala, Bab-Dummadga-ibmar-uklegoed bakega, degi, bela ibmarmar Bab-Dummadse-goled-neggi-ebulemalad, bakegarbar.
NEH 10:34 ”Deginbali, anmarbali dule-irwa-Bab-Dummadse-gormalad, Levita-dulemar, degi, dule-neggweburginmalad, anmar-gwenad-gwenadganba na wilubdaknai-guarmalad, adi, wisguega doamar-e-gwenadgan-inse, birgagi igar-megisadba Bab-Dummadga-ibmar-uklegedgi-sapan-ebuleged, Bab-Dummad-Jehováʼse-goled-negse sedagodibeye, adi, Bab-Dummad-Igargi igar-narmakar-maidba, Bab-Dummadga-ibmar-ukleged-ailagi ogalegegar.”
NEH 10:35 A-ukinbali, anmar sogsamarbalid: “Birga-irba, anmar-nainugi gebe-ibmar-sanmakmalad, degine, bela sapi-e-san-gebe-sanmakmalad, Bab-Dummad-Jehováʼse-goled-negse sedagoye.
NEH 10:36 ”Deyobbardo, Bab-Jehová-Igar-Maidba anmar-masmala-gebe-gwalulemaladi Babga-arbaega ukoye, degine, ibmar-durgan anmar Bab-Dummadga ukbaloye. Anmar-moli-bebe-nikamalad, degi, sibad-wawaad-mimmi-gebegwalulemaladi dule-irwa-Bab-Dummadse-gormalad Bab-Dummadse-goled-neggi-arbananaimaladse sedmaloye.”
NEH 10:37 Deginbali, anmar sogmarbalid: “Bab-Dummadse-goled-neggi ibmar-sabolegedse gebe-madubur-imakleged sedmaloye. Bab-Dummadga ibmar-gwag-ukleged, bela sapi-san, vinoʼmar, olivo-gwallumar, dule-irwa-Bab-Dummadse-gormaladse sedmaloye. Degine, anmar-nainugi bela ibmar-welegoed anmar Levita-dulemarga sedoye, degine, anmar na neggweburgi-ibmar-welegoed, we-Levita-dulemarga ambegi gwensak (10%) uklegoed. Wemarde na ambegi gwensak-weemaladid.
NEH 10:38 ”Levita-dulemar ibmar-ambegi gwensak (10%) weenadele, dule-irwa-Bab-Dummadse-goled-wargwen Aarón-e-wagwa, eba naoye. Levita-dulemar, ibmar-ambegi gwensak-wesad (10%), anmar-Bab-Dummadse-goled-negse sedoed, adi, ibmar-sabolegedgi, Bab-Dummadse-goled-neggi sabogegar.
NEH 10:39 ”Israel-dulemar, degi, Levita-dulemar, Bab-Dummadga-ibmar-gwag-uklesadi, vinoʼmar, degine, olivo-gwallu-uklesad, ibmar-sabolemalad-negse sedoed. Degine, Bab-Dummadga ibmar-uklemalad-ebulemalad a-neggi ambikuoed, degi, agine, dule-irwa-Bab-Dummadse-gormalad-arbananaid, degi, dule-yawagak-dakmalad, degi, dule-namakmalad, agi bukwa-gumarmogoed.” Deginbali, anmar sogsabalid: “Anmar-Bab-Dummadse-goled-neg anmar gwen iegosurmarye.”
NEH 11:1 Dulemar-neggweburgi-dummaganga-gudidimalad Jerusalén-neggweburgi megnonimalad. Ar Jerusalén-neggwebur, neggwebur-swilidikid-gued. Degi, dulemar-baigandi, na wilubdaknanai-guarmalad, doa-dule, dule-e-ambegine gwensak (10%) Jerusalén-neggwebur-islidikidse megnamaloe, degine, baigan-walabakebakaddi (9) e-neggwebur-baiganse megnamaloed.
NEH 11:2 Bela-dulemar na dukin-dukin sogsamalad, emarde Jerusalén-neggweburgi megmaloye. A-ular, Israel-dulemar nue-yeer a-dulemargi binsasmalad.
NEH 11:3 Dulemar Judá-yar-neggwebur-baigangi na e-nainu-nainugi-megismaladi, degi, na e-neggwebur-e-neggweburgi-megismaladi, wemar-dake: Dule-irwa-Bab-Dummadse-gormalad, Levita-dulemar, Bab-Dummadse-goled-neggi-dule-arbamalad, degi, Salomón-maigan-e-wagan. Israel-yar-e-dummaganga-gudimaladi, Jerusalén-neggweburgi megismalad.
NEH 11:4 Amala, abala Judá-waganad, degi, abala Benjamín-waganmogad. Judá-wagandi, wemalad: Uzías-machi-Ataías. Uzíasʼde, Zacarías-machid. Zacaríasʼdi, Amarías-machid. Amaríasʼdi, Sefatías-machid. Sefatíasʼdi, Mahalaleel-machid. Mahalaleelʼdi, Fares-wagwad.
NEH 11:5 Degine, Baruc-machi-Maasías, Barucʼde, Colhoze-machid. Colhozeʼdi, Hazaías-machid. Hazaíasʼdi, Adaías-machid. Adaíasʼdi, Joiarib-machid. Joiaribʼdi, Zacarías-machid. Zacaríasʼdi, Siloni-machid.
NEH 11:6 Bela Fares-wagan, Jerusalén-neggweburgi dulataled-ilabake gaka dulapaa-gakabaabak (468) mergu megismalad. Bela wemala, bila-onomalad-sorda-gumalad.
NEH 11:7 Benjamín-wagan Jerusalénʼgi megismaladi, wemalad: Mesulam-machi-Salú, Mesulamʼde, Joed-machid. Joedʼdi, Pedaías-machid. Pedaíasʼdi, Colaías-machid. Colaíasʼdi, Maasías-machid. Maasíasʼdi, Itiel-machid. Itielʼdi, Jesaías-machid.
NEH 11:8 Degine, Jesaías-gwenadgan-gargwenmaladdi, Gabai, degi, Salai, bela amarse-bakale, dulataled-ilabakebak gaka dulagwen-gakabaabak (928) mergumalad.
NEH 11:9 Zicri-machi-Joel, wemar-e-dummadga gued. Degine, Senúa-machi-Judá, dummad-sorbali Jerusalén-neggweburgi negdakedmogad.
NEH 11:10 Dule-irwa-Bab-Dummadse-gormaladdi, wemalad: Joiarib-machi-Jedaías, Jaquín,
NEH 11:11 Hilcías-machi-Seraías. Hilcíasʼde, Mesulam-machid. Mesulamʼdi, Sadoc-machid. Sadocʼdi, Meraiot-machid. Meraiotʼdi, Ahitob-machid. We-Ahitobʼde, Bab-Dummadse-goled-neg-e-dummadid.
NEH 11:12 Degine, bela e-gwenadgan Bab-Dummadse-goled-neggi-arbananaid, dulataled-ilabaabak gaka dulagwen-gakabo (822) mergued. Deyobi, Jeroham-machi-Adaías, Jerusalénʼgi megismogad. Jerohamʼde, Pelalías-machid. Pelalíasʼdi, Amsi-machid. Amsiʼdi, Zacarías-machid. Zacaríasʼdi, Pasur-machid. Pasurʼdi, Malquías-machid.
NEH 11:13 Degine, Adaías-gwenadgan, e-neg-yaurgi na negsedimalad, bela dulataled-ilabo gaka dulabo-gakabo (242) mergue megismarmogad. Deginbali, Azareel-machi-Amasai, megismogad, Azareelʼde, Azai-machid. Azaiʼdi, Mesilemot-machid. Mesilemotʼdi, Imer-machid.
NEH 11:14 Degine, Amasai-gwenadgan, dule-gala-ibeganad, bela dulanergwa-gakabaabak (128) mergued. Gedolim-machi-Zabdiel amar-dummadga-gued.
NEH 11:15 Levita-dulemardi, wemalad: Hasub-machi-Semaías, Hasubʼde, Azricam-machid. Azricamʼdi, Hasabías-machid. Hasabíasʼdi, Buni-machid.
NEH 11:16 Sabetai, Jozabadʼbo, megismarmogad. Wemar, Levita-dulemar-e-dummagan-gumalad, degi, Bab-Dummadse-goled-neg-magabalid-soblenaid, e-dummaganga-gumalad.
NEH 11:17 Micaía-machi-Matanías, a-dule-namaked-e-iduedid. Bab-Dummadse-goter, a-inse Bab-Dummad-nug ogannoddaed, degi, dog-nuedye Bab-Dummadga sogdedaed. Micaíaʼde, Zabdi-machid. Zabdiʼdi, Asaf-machid. Degi, Bacbuquías Matanías-sorbalidi, Jerusalénʼgi megismogad. Degi, Samúa-machi-Abda, Samúaʼde, Galal-machid. Galalʼdi, Jedutún-machid.
NEH 11:18 Bela Levita-dulemala, Jerusalén-neggwebur-islidikidgi, dulataled-ilabo gaka dulabake-gakabake (284) mergue megismalad.
NEH 11:19 Yawagak-dakmaladdi, wemalad: Acub, Talmón, degine, e-urbamar. Wemala, yawagakgi-nakulemaladid. Amar, dulabaabak-gakambe-gakabo (172) bela mergumalad.
NEH 11:20 Geb Israel-dulemar-baigandi, dule-irwa-Bab-Dummadse-gormalad-baigandi, degi, Levita-dulemar-baigandi, Judá-yargi baigan-neggweburmargi, na e-nainu-e-nainugi mamai-gusmalad.
NEH 11:21 Bab-Dummadse-goled-neggi-arbamaladdi, Ofel-yargi megismalad. Ziha, degi, Gispa, amar, amar-dummadga gusmalad.
NEH 11:22 Bani-machi-Uzi Jerusalén-neggweburgi, Levita-dulemar-e-dummadid. Baniʼde, Hasabías-machid. Hasabíasʼdi, Matanías-machid. Mataníasʼdi, Micaía-machid. We-Micaíaʼde, Asaf-wagwa-gwensakadid. Wemarde, Bab-Dummadse-goled-neggi dule-namakmalad-gumalad.
NEH 11:23 Ar ade, rey igar-uksagusad, degi, bane-bane dule-namakmalad igarmar-mamaidba ibmar imakmaloed.
NEH 11:24 Rey, e-nuggi Mesezabeel-machi-Petaías bela-dulemarga-igar-nabogegala, onug-imaksad. Mesazabeelʼde, Zera-wagwa-gwensakad-gued. Zeraʼde, Judá-wagwa-gumogad.
NEH 11:25 Israel-dulemar-baigandi, Judá-yargi neggwebur-dummagangi, degi, e-neggwebur-burwigangi megismalad. A-neggweburmardi, wemalad: Quiriat-Arba-neggwebur, Dibón-neggwebur, Jecabseel-neggwebur.
NEH 11:26 Jesúa-neggwebur, Molada-neggwebur, Bet-Pelet-neggwebur.
NEH 11:27 Hazar-Sual-neggwebur, Beerseba-neggwebur,
NEH 11:28 Siclag-neggwebur, Mecona-neggwebur,
NEH 11:29 En-Rimón-neggwebur, Zora-neggwebur, Jarmut-neggwebur,
NEH 11:30 Zanoa-neggwebur, Adulam-neggwebur, Laquis-neggwebur, Azeca-neggwebur. Beerseba-neggwebur-akar, Hinom-nebase ambikusmalad.
NEH 11:31 Benjamín-wagandi we-neggweburmargi ambikusmalad: Geba-neggweburgi, Micmas-neggweburgi, Aía-neggweburgi, Betelʼgi, degi, e-neggwebur-burwigangi ambikusmalad.
NEH 11:32 Neggwebur-baigan, wemarbalid: Anatot-neggwebur, Nob-neggwebur, Ananías-neggwebur,
NEH 11:33 Hazor-neggwebur, Ramá-neggwebur, Gitaim-neggwebur,
NEH 11:34 Hadid-neggwebur, Seboim-neggwebur, Nebalat-neggwebur.
NEH 11:35 Lod-neggwebur, Ono-neggwebur, degi, Argangi-Ibmar-Sobmalad-Nebagi ambikusmalad.
NEH 11:36 Levita-dulemar gwen-gwena Judá-yargi megismalad, degine, Benjamín-dulemarba megismarbalid.
NEH 12:1 Dule-irwa-Bab-Dummadse-gormaladi, degi, Levita-dulemar, Salatiel-machi-Zorobabelʼba, degi, Jesúaʼba nonigusmalad. Amarde, wemalad: Seraías, Jeremías, Esdras,
NEH 12:2 Amarías, Maluc, Hatús,
NEH 12:3 Secanías, Rehum, Meremot,
NEH 12:4 Iddo, Gineto, Abías,
NEH 12:5 Mijamín, Maadías, Bilga,
NEH 12:6 Semaías, Joiarib, Jedaías,
NEH 12:7 Salú, Amoc, Hilcías, degi, Jedaías. Amala, Jesúa-ibagangi, dule-irwa-Bab-Dummadse-gormalad-e-dummagan, degi, e-gwenadgan-gumalad.
NEH 12:8 Levita-dulemardi, wemalad: Jesúa, Binúi, Cadmiel, Serebías, Judá, degi, Matanías. Amala, na e-gwenadganmala Bab-Dummad-nug-ogannogedgi namakmalad.
NEH 12:9 Degine, e-gwenadgan-Bacbuquías, degi Uni, amar-asabin ambikunonidamalad, Bab-Dummad-nug-odummomalagar.
NEH 12:10 Jesúa-wagan, wemalad: Jesúaʼde, Joiacim-babad. Joiacimʼdi, Eliasib-babad. Eliasibʼdi, Joiada-babad.
NEH 12:11 Joiadaʼdi, Jonatán-babad. Jonatánʼdi, Jadúa-babad.
NEH 12:12 Joiacim negdakmaigu, dule-irwa-Bab-Dummadse-gormalad e-neg-yaurgi dummaganga gudimalad. Amarde, wemalad: Seraías-gwenadgan-e-dummad, Meraías. Jeremías-gwenadgan-e-dummad, Hananías.
NEH 12:13 Esdras-gwenadgan-e-dummad, Mesulam. Amarías-gwenadgan-e-dummad, Johanán.
NEH 12:14 Melicú-gwenadgan-e-dummad, Jonatán. Sebanías-gwenadgan-e-dummad, José.
NEH 12:15 Harim-gwenadgan-e-dummad, Adna. Meraiot-gwenadgan-e-dummad, Helcai.
NEH 12:16 Iddo-gwenadgan-e-dummad, Zacarías. Ginetón-gwenadgan-e-dummad, Mesulam.
NEH 12:17 Abías-gwenadgan-e-dummad, Zicri. Miniamín-gwenadgan, Moadías-gwenadgan-e-dummad, Piltai.
NEH 12:18 Bilga-gwenadgan-e-dummad, Samúa. Semaías-gwenadgan-e-dummad, Jonatán.
NEH 12:19 Joiarib-gwenadgan-e-dummad, Matenai. Jedaías-gwenadgan-e-dummad, Uzi.
NEH 12:20 Salai-gwenadgan-e-dummad, Calai. Amoc-gwenadgan-e-dummad, Eber.
NEH 12:21 Hilcías-gwenadgan-e-dummad, Hasabías. Jedaías-gwenadgan-e-dummad, Natanael.
NEH 12:22 Levita-dulemar-neguya-sedimaladi, degi, dule-irwa-Bab-Dummadse-gormalad-neguya-sedimaladi, Eliasib-ibagangi, Joiada-ibagangi, Johanán-ibagangi, degi, Jadúa-ibagangi, Persa-dule-Rey-Darío negdakmaigu, we-dummagan-nug garda-selemaidgi narmaklesad.
NEH 12:23 Eliasib-machi-Johanán-maigusad-ibase, Levita-dulemar-neguya-dummaganga-gumalad-e-nugmar garda-selemaidgi narmaklesad.
NEH 12:24 Levita-dulemar-neguya-dummagana, wemalad: Hasabías, Serebías, Cadmiel-machi-Jesúa. Amar Bab-Dummadse-goled-neggi-arbaega egad-wachi-omosale, na e-gwenadgan, e-asabin ambikunonidamalad, adi, Bab-Dummad-nug-odummomalagar, degi, Bab-Dummadga dog-nuedye sogmalagar, ar igi David Bab-Dummadga-arbaed-dule, igar-mesisadba.
NEH 12:25 Yawagak-dakmalad, wemalad: Matanías, Bacbuquías, Obadías, Mesulam, Talmón, degi, Acub. Deginbali, amala, yawagak-dogedgi ibmarmar-saboleged-negmargi nakulebukwa-gusmarbalid.
NEH 12:26 Bela amala, Jesúa-machi-Joiacim-ibagangi gudii gusmalad. Joacimʼde, Josadac-wagwad. Degine, amar Nehemías-Saila-Dummadga-maigusad-ibagangi, degi, dule-irwa-Bab-Dummadse-goled-ibagangi gudii gusmalad. Degine, dule-garda-narmaked Esdrasʼye-nugad-ibagangi gudii gusmarbalid.
NEH 12:27 Jerusalén-galu-matusulid-ogulesadi Bab-Dummadga nug-imaklesokargua, Levita-dulemar-banna-banna-mamaid bela amiapmalad. Geb Jerusalén-neggweburse amar-searmalad, adi, weligwaledba Bab-Dummadga galu-nug-imaklenaidgi werguegar, ega dog-nuedye namaklegedgi sogega, degi, garmar-címbaloʼba, salterioʼba, degine, cítaraʼba Bab-nug-odummogega.
NEH 12:28 Degidgine, Levita-dule-namakmalad, Jerusalén-neggwebur-dikarba-mamaidi, degi, Netofa-neggwebur-dikarba neggwebur-burwiganagi-mamaid bela nonimalad.
NEH 12:29 Deginbali, Gilgal-neggweburginmalad, Geba-neggweburginmalad, degi, Azmavet-neggweburginmalad nonimarmogad. Ar ade, dule-namakmalad Jerusalén-neggwebur-dikarba neggwebur-burwigana sobsamalad.
NEH 12:30 Dule-irwa-Bab-Dummadse-gormalad, degi, Levita-dulemar, bela na san-uruksamalad. Geb a-sorbali, dulemarga san-uruksamarmogad. Degi, yawagakmar, degi, galu-matusulid swilidik-imaksamarbalid.
NEH 12:31 Ani, Nehemías, Judá-saila-dummagan Jerusalén-galu-matusulidgi-nakwega an imaksad. Degine, ichesur dule-namakmalad danabo an urbisad. Adi, amar galu-matusulid-birgi namakale Bab-Dummadga dog-nuedye sogegar. Danagwenad-soggwenaddi, galu-matusulid-argan-nuedsik, Ibmar-Isgana-Mied-Yawagak-Noedsik ilekwaa nadapgusmalad.
NEH 12:32 Wemar-sorbali, Osaías Judá-saila-dummaganmala ilekwaa nadapgusmarmogad. Amala, wemalad:
NEH 12:33 Azarías, Esdras, Mesulam,
NEH 12:34 Judá, Benjamín, Semaías, degi, Jeremías.
NEH 12:35 Amarba, dule-irwa-Bab-Dummadse-gormalad, gar-trompeta sedanigusmaladi, wemalad: Jonatán-machi-Zacarías. Jonatánʼde, Semaías-machid. Semaíasʼdi, Matanías-machid. Mataníasʼdi, Micaías-machid. Micaíasʼdi, Zacur-machid. Zacurʼdi, Asaf-machid.
NEH 12:36 Zacarías-e-gwenadgandi, wemalad: Semaías, Azarael, Milalai, Gilalai, Maai, Natanael, Judá, degi, Hanani. Wemala, Bab-Dummadga-arbaed-David-igar-mesisadba gar-ogormalad semamai gusad. Degine, dule-garda-narmaked-Esdras, we-dulemar-idumai gusad.
NEH 12:37 Dii-Saila-Yawagak-Noed-innikgusgu, David-neggweburse-doged-arsan-maidgi nakwide-gusmalad, galu-matusulidse-nakwileged-birgi nakwide gusmalad. Geb David-neg-niba-nasmargu, Dii-Yawagak-Noedse, dad-nakwedsik modapmalad.
NEH 12:38 Dule-namakmalad-danabogwaddi, obakar nadapgusmarmogad. Ani, an a-sorba, degi, dulemar-neggweburginmalad-negabaladbo galu-matusulid-birgi, neg-matusur-warakwagwad-Soo-Yaaye-nugad-akar, Galu-Matusulid-Matardummadse, anmar nadapgusmalad.
NEH 12:39 Anmar Efraín-Yawagak-Noedgi nasmalad, Yawagak-Sered-Noedgi, Ua-Yawagak-Noedgi nasmalad. Geb neg-suid-Hananeelʼye-nugadgi, degi, neg-suid-Hameaʼye-nugadgi nasmarbalid. Sibad-Wawaad-Yawagak-Noedgi nasmargu, geb Esgarya-Yawagak-Noedse anmar ambikudapmalad.
NEH 12:40 Geb degidgine, dule-namakmalad-danabogwadi Bab-Dummadga dog-nuedye-sogsamargu, Bab-Dummadse-goled-negse modapmalad. Geb e-gwisgudapmaloedgi gwisgudapmalad. An deyob dummagan-abargi anba-gudimalad-abargi gwisgudapmogad.
NEH 12:41 Degine, dule-irwa-Bab-Dummadse-gormalad, gar-trompeta ogorgwismalad, wemalad: Eliacim, Maaseías, Miniamín, Micaías, Elioenai, Zacarías, Hananías,
NEH 12:42 Maasías, Semaías, Eleazar, Uzi, Johanán, Malquías, Elam, degi, Ezer. Dule-namakmaladdi, binnasuli ise-namakar bukwa-gusmalad, Izrahías amar-idu gwichi gusad.
NEH 12:43 A-ibagine, Bab-Dummadga ichesuli ibmar-ogumakar uksamalad. Degine, ar Bab-Dummad, nue-weligwale amar-imaksasoggu, nue wergusmalad. Omegan, degi, burwigana nue wergusmarmogad. Jerusalén-neggweburgi-wergubukmalad dikasuli itolesad.
NEH 12:44 A-ibagine, dulemar-onugsalesad: Mani-weleged-daked, Bab-Dummadga-ibmar-weleged-daked, ibmar-gebe-welemalad-ukleged-daked, ambegi-gwensak (10%) ibmar-ukleged-daked. We-dulemar-onugsalesmalad ibmarmar nainu-baid-baidgi neggwebur-dikarbarmaladgi-danikidi, ibmar-sabomalad-neggi sabomalaga. Adi, Igar-Maidba dule-irwa-Bab-Dummadse-gormaladga, degi, Levita-dulemarga ibmar-ukegar. Ar ade, dule-irwa-Bab-Dummadse-gormalad, degi, Levita-dulemar ibmar-nuegan-imaknanaidgi Judá-yargi-bukmalad ber weligwar-itosmalad.
NEH 12:45 Dule-nugsalesmaladi, Bab-Dummadga-arbaedgi arbananai gusmalad, degi, dule-isgusmalad-anar Bab-Dummadga-ibmar-ogumakar-ukleged imaknanai gusmalad. Amba deyob, dule-namakmalad, degi, dule-yawagak-dakmalad eba arbananai gusmarmogad, ar igi David, degi, e-machi-Salomón igar-uksadba.
NEH 12:46 Ar ade, dikasurgus, David-akar, degi, Asaf-akar, bato dule-namakmalad-e-idued-nika danikid. Bab-Dummadga-namakleged-namakmalad-nika danibalid, degi, Bab-Dummadga-dog-nuedye-sogdimalad-nika danibalid.
NEH 12:47 Degine, Zorobabel-ibagangi, degi, Nehemías-ibagangi, bela Israel-dulemala, dule-namakmaladga, dule-yawagak-dakmaladga mas ukdamalad. Degine, amarga ibmar-uklemalad na e-iba-maidgi ega ukdedamalad. Deginbali, amba Levita-dulemarga deyob ibmar-ukdamarbalid. Geb, we-Levita-dulemar, Aarón-waganga ukdedamarmogad.
NEH 13:1 A-ibagangine, Moisés-garda-narmaksad dulemarga absolesad. Agi, weyob narmakar-nai daklealid: “Amón-dulemar, degi, Moab-dulemar bipisaale Bab-Dummad-dulamarga guosurye.
NEH 13:2 Ar ade, we-dulemar Israel-dulemar-Egipto-yar-akar-danimargua, gwen dii ega uksasurmalad, degi, mas ega uksasurmarbalid. Aka bur Balaam-bennuksamalad, adi, Balaam Israel-dulemar-ukabsaega. Ar anmar-Bab-Dummaddi we-ukabsalegedi, ibmar-nued-guega imaksad.”
NEH 13:3 Dulemar bela Igar-Maid-absolesad itosmargua, dulemar Israel-dulesulid onismalad.
NEH 13:4 We-iduale, dule-irwa-Bab-Dummadse-goled-Eliasib, Babse-goled-neggi ibmar-sabolemalad-neg-dakedga maid. Ar Eliasibʼde, Tobías-ai-nuedsoggu,
NEH 13:5 gabedneg-dummad-gwagwen Tobíasʼga uksad. A-gabedneggine, ibmarmar Bab-Dummadga-ukleged urbileged: Agine, ina-wawadikmaladi, bormomar-Bab-Dummad-neggi-ebulegedi, ibmar-gwagmar-uklemaladi, vinoʼmar, olivo-gwallumar urbileged. Bela we-ibmarmar ambegi-gwensak (10%) Levita-dulemarga-uklegedi, dule-namakmaladga-uklegedi, dule-yawagak-dakmaladga-uklegedi, degi, dule-irwa-Bab-Dummadse-gormaladga-uklegedi, a-neggi urbileged.
NEH 13:6 Weyob ibmar-gusgua, deunni Jerusalén-neggweburgi an gudisulid, ar ade, Babilonia-rey-Artajerjes birga-dulagwen-gakambe-gakabogus (32) negdakmaidgi, an rey-maidse nadegusad. A-ibagan-undar-nasadgi, reyse an egichisad, wis Jerusalénʼse gannar an nabiye.
NEH 13:7 Agi, geb an wisgunonikid, Eliasibʼde, nue-dummad-nosa. Tobías-nabir-ito-imakegala, Bab-Dummadse-goled-neggi ega gabedneg-gwagwen uksad.
NEH 13:8 We-ibmar-gusadi, nue-sae an itosad. A-ulale, Tobías-neggi bela ibmarmar-bukwadi magaba ibe mie-mie an imaksad.
NEH 13:9 Geb degine, neg-swilidik-imakegala, an neg-nudaksad. Deginbali, Bab-Dummadse-goled-neggi-ibmarmar-ebulemalad gannar sedagega, an imaksabalid. Bab-Dummadga ibmar-gwag-uklemalad, degi, ina-wawadikmalad gannar sedagega, an imaksabalid.
NEH 13:10 Deginbali, an wisgusbalid, Levita-dulemarga-ibmar-uklegedi gwen ega uklemaisurye. Degine, an wisgusbalid, Levita-dulemar, degi, dule-namakmalad na e-nainu-nainuse arbanadmarbarye.
NEH 13:11 Geb degine, dummaganga apor ibmar an sogded: “¿Wede ibiga Bab-Dummadse-goled-neg olloo mellesii?” A-sorbali, a-dummagan gannar an urbisad, ega e-arbaed-e-arbaed an uksad.
NEH 13:12 Geb degidgine, bela Judá-dulemar ibmar-sabolemalad-negse ibmar-gwag-welesad, vino, degi, olivo-gwallu ambegi gwensak (10%) senonimalad.
NEH 13:13 Ibmar-sabolemalad-neg-dakega, dule-irwa-Bab-Dummadse-goled-Selemías, dule-garda-narmaked-Sadoc, degi, Levita-dule-Pedaías, an nug-imaksad. Wemar-bendakegala Zacur-machi-Hanán, an ega nug-imaksad. Hanánʼde, Matanías-wagwad. Ar amarde, dule-innikii-ibmar-imakmaladid. We-dulemala e-bakamaladga na ibmar mimimaloed.
NEH 13:14 Ani, Nehemías, Bab-Jehováʼse an goted: “An-Bab-Dummadye, we-ibmar-imaksad-ulale, melle be an-iego, degi, be angi nued-binsao, bese-goled-neggi ibmar-nuegan be-nug-odummogega an imaksadi, melle be iegoye.”
NEH 13:15 A-ibagangine, Judá-yargi an daksabalid, dule gwenna-gwenna obunnoged-ibagi uva-egurnanai. Baigandi, moli-uayasuid-birgi orosgi-dakleged-trigo senadapi. Deginbali, vinoʼmar, uvaʼmar, higoʼmar, degi, ibmar-baigan-akar-akar obunnoged-ibagi Jerusalén-neggweburse moli-uayasuidgi sedanimala an daksabalid. Manigi mas-uksamalad-ulale, we-dulemarse an ulusad.
NEH 13:16 Deginbali, Tiro-dorgan-Jerusalénʼgi-mamaimalad obunnoged-ibagi, ua, degi, ibmar-uklemalad-baigan manigi-ukega Jerusalén-neggweburse sedanidamalad. Degine, obunnoged-ibagi Judá-dulemarga, we-ibmarmala manigi ukdedamalad.
NEH 13:17 Geb degine, Judá-dulemarse binnasuli an uluded, amarga an sogded: “Ar bemar nue-isgunanaid, ¿obunnoged-iba-naid be daksurmarsi?
NEH 13:18 Ar be-babgan weyob ibmar-imaksamarmogad. Ar a-ulale, anmar-Bab-Dummad anmargi, degi, anmar-neggweburgi we-ibmar-isganamar barmialid. Degite, ¿Bab-Dummad gatik bur bule sabsur anmar-odurdakbi be abemarde? Emide, obunnoged-iba-naid be daksurmalad.”
NEH 13:19 Geb agine, an igar-uksad, Jerusalén-neggwebur-yawagakmar obunnoged-iba-iduar, sedogusar edimaloye. Geb obunnoged-iba-sorba a-yawagakmar gannar egalegoye. Geb degine, gwenna-gwenna dule-anga-arbamalad, yawagakgi an urbisad, adi, melle obunnoged-ibagi Jerusalén-neggweburgi ibmar-oubomalagar.
NEH 13:20 Dule-mani-onomalad, dule-ibmar-galagwensuli-ukmalad, Jerusalén-neggwebur-magaba irgwen, irbodibe, gabismalad.
NEH 13:21 Ar ani, Nehemías, apor amarga ibmar an sogded: “Melle galu-matusulid-dikarba be ambikumala. Ar gannar be nonibalile, an esgaryagi bemar-metoed.” A-ibagan-akale, bar obunnoged-ibagi nonisurmalad.
NEH 13:22 Geb Levita-dulemarga an sogded, bemar na san-uruknamar, bemar yawagak edarbenamar, adi, obunnoged-iba swilidik-guegar. Ani, Nehemías, Bab-Jehováʼse an gotebalid: “An-Bab-Dummadye, we-ibmar-imaksad-ulale, melle be an-iego, degi, be sabgued-dummarba-nikadba, wile be an-dakoye.”
NEH 13:23 Degine, a-ibagangine an daksabalid, Judío-dulemar Asdod-dorgan-sisgan nikumamai, Amón-dulemar-sisgan, degine, Moab-dulemar-e-sisgan nikumamai an daksad.
NEH 13:24 Abala e-mimmigan Asdodʼgaya sunmakmalad, degine, dule-baigan-gayaba sunmakmarbalid. Ar ade, Judío-gayadi sunmaksurmalad.
NEH 13:25 Degidgine, a-dulemarbo an ulusad, amar an ukabsasad, amar an gwenna-gwenna bibyosad, amar-ibe an e-sailagia-unnusad. Degine, amar anga-ise-sogar-sogega an imaksad. Ega an sogsad: “Melle bemar Judíoʼsurmalad-masmalaga be-sisgan-ukmaloye, degi, a-e-sisgan melle bemar be-masmalaga ukmarbaloye, degi, bemar a-e-sisgan amba nikuosurmarmoye an sogsad.
NEH 13:26 ¿Ar a-ulale, Salomón Israel-e-reyde, Bab-Dummadgi isgussursi? Ar ade, yar-baigangine, Rey-Salomónʼyobid dule maigussulid. Bab-Dummad we-rey nue-sabgusad, Israel-reyga-guega imaksad. Degi-inigwele, omegan-Israelʼginsurmalad we-rey-isguega imaksad.
NEH 13:27 ¿Ar degite, bemar deyob isgumarmogode? ¿Bab-Dummadgi bemarde dummad-nomarmogode? ¿Bemarde omegan-Israel-dulesurmalad-nikumarmogode? Adi surbali.”
NEH 13:28 Joiada-machi-wargwen, Sanbalat-sisgwa nikusad. Joiadaʼde, Eliasib-machid. Eliasibʼdi, dule-irwa-Bab-Dummadse-gormalad-dummadid. Sanbalatʼde, Horón-neggweburginedid. Degisoggu, a-dule, an ononnosad.
NEH 13:29 Ani, Nehemías, Bab-Dummadse an gotebalid: “An-Bab-Dummadye, a-dulemar be insao. Wemarde, dule-irwa-Bab-Dummadse-gormalad-igar-ichomaladid. Wemarde, dule-irwa-Bab-Dummadse-gormalad igar-mamaid bisgemaladid, degine, Levita-dulemar-igargi annamaladid.”
NEH 13:30 Degisoggu, bela Judíoʼsurmalad an ononnosad. Degine, dule-irwa-Bab-Dummadse-gormalad, degi, Levita-dulemar danar-danar an urbisad. Amarga na e-arbamaloed-e-arbamaloed an uksad.
NEH 13:31 Amba dulemar sapan na e-ibagangi amimaloed, deyob an urbisbalid. Degine, dule ibmar-gebe-sanmakmalad Bab-Dummadga-ukleged-dakmaloed, amba deyob an urbisbalid. Ani, Nehemías, Bab-Dummadse an gotebalid: “An-Bab-Dummadye, melle an-iego, nued be angi binsaoye.”
EST 1:1 Rey-Asuero yarmar-sogadulanergwa-gakaguglegi (127) reyga-mai gusad. We-yarde, India-yar-akar, Etiopía-yalase dungued.
EST 1:2 A-ibagangine, Rey-Asuero, Susa-neggweburgi e-ologana sinonikid. Degisoggu, Susa-akale, Rey-Asuero na yarmar-semai gusad.
EST 1:3 Rey-Asuero birgapaagus reyga-maidgine, bela dummagan-sordamar-idudimaladga, degi, ega-arbamaladga iba-ononai gusad. A-iba-onolenaidse, Persia-yargi, degi, Media-yargi sordamar-idudimalad-bur-dummagan, igar-nabomalad-e-dummagan, degi, yar-baid-baidgi dummaganga-mamaid arbimalad.
EST 1:4 Rey-Asuero, nii-walanergwa (6) na e-ibmar-nuegan-bukidar nikad, degi, bela-bela e-negsemaid-dungued, e-gangued-nikad oyonai gusad.
EST 1:5 A-ibagan nasad-sorbali, Rey-Asuero iba-baid ibagugle (7) ononai gusbalid. We-ibade, bela Susa-neggweburgi dulemar-bukwamaladga, dulemar-nug-dummarba-nikamaladga, degi, dulemar-binsarmaladga ononai gusad. We-iba reyneg-imba-ollornaidgi onolesad.
EST 1:6 Reyneg-imbagi atued-dummad-sibu, atued-dummad-arad, degi, gwili-absargiid naigusad. We-atued-dummagan, lino-dub-nuegangi, degi, suir-akwagiid-dubgi, atinnar naid. We-dubmar, mani-orokwagwad-yaa-simaladgi-odogar-odogar maid, geb mármol-akwa-buarmargi atinnar naid. Deginbali, gan-megmalad-ologi-sobaled, manigi-sobaled bukbalid. We-gan-megmalad napa-mármol-akwabiid-birgi, napa-dimmur-birgi, degi, napa-akwa-yeerdaklemalad-birgi bukwad.
EST 1:7 Nog-dummagan-olobiid-akar-akar-sobarmaladgi rey-e-vino mimilenai gusad. We-vino obinebaka goblenai gusad, ar ade, rey ibmar-obinebaka-ukedid.
EST 1:8 Degi-inigwele, rey na e-neggi-arbamaladga igar-uksagusad, vino-gobega melle dulemargi alamaknai gumalo. Dulemar na gobbiedba gobmaloed.
EST 1:9 Rey-ome-Vastiʼdi, dummagan-e-omeganga Rey-Asuero-neggi iba-ononai gusmogad.
EST 1:10 Ibaguglegus (7) iba-nonaidgine, Rey-Asuero vino-gobedba bela-bela weligwar itoded. Geb degine, dulemar-walagugle-e-walik-arbamaladse (7) gochad: Mehumánʼse, Biztaʼse, Harbonaʼse, Bigtaʼse, Abagtaʼse, Zetarʼse, degi, Carcasʼse gochad.
EST 1:11 Geb Rey-Asuero wemarga igar-uksad, e-asabin e-ome-Vasti ologurgin-yoi sedamarye. Adi, dulemar, degi, dule-dummagan, Vasti bela-bela-e-yeerdakleged dakmalagar. Ar rey-omede bela-bela yeerdakleged.
EST 1:12 Ar dulemar-rey-walik-arbamalad rey-ome-Vastiʼga rey-igar-uksad sogdapmargu, Vastiʼdi, Rey-Asueroʼse yapa-nae gusad. Degisoggu, Rey-Asuero bela-bela sae-itonaded, uluded.
EST 1:13 Geb Rey-Asuero, dule-igar-wismaladse egisnai gualid, ibu imakergebe. Ar ade, gusgu igar-maid, rey dulemar-nue-igar-wismaladse binsaed-egised.
EST 1:14 We-dule-igar-wismalad bur rey-walikamalad, wemalad: Carsena, Setar, Admata, Tarsis, Meres, Marsena, degi, Memucán. We-dulemar-walagugled (7), Persia-yar-e-dummaganad, degi, Media-yar-e-dummaganad. Wemala, reyga binsaed-dakmaladid, deginbali, Rey-Asuero-yargi dummaganga gudimarbalid.
EST 1:15 Geb Rey-Asuero we-dulemarse egichided: —Igar-maidbali, ¿an-ome-Vasti, igi imaklegergebe? Ar ade, an-gayaburba-berbemaladba an ega igar-uksagusadba gwen ibsassulid.
EST 1:16 Geb degine, Memucán, reyga, degi, dule-dummaganga sogdesunnad: —Rey-ome-Vasti, unnila reyginbi dodossulid. Ar belagwable dule-dummagan-bukwadgi dodosad, degi, Rey-Asuero-yarmargi bela-dulemar-bukwadgi dodosbalid.
EST 1:17 Ar bela omegan-bamalad rey-ome-weyob-ibmar-imaksad wisgumaloed, degisoggu, omegan e-suimargi bar binsaed-nikaa guosurmalad. Ar ade, sogdamaloed: ‘Rey-Asuero na e-ome-Vasti ese sedamalaga imaksanad, ar e-omedi gwen ese arbisulid.’
EST 1:18 Ar Persa-dummagan-e-omegan, degi, Media-dummagan-e-omegan rey-ome-weyob-ibmar-imaksad wisguarmalale, ar deyopira e-suimar-abin-imakdemarmogoed. Geb degine, omegan na e-sui-ibgwensur-imakdagoed. Geb agi, urwed nodasunnoed.
EST 1:19 ”Degisoggu, Rey-Asuero, na be yeer-itogele, be igar uksundo. We-igar Persa-dulemarga, degi, Media-dulemarga geg-bar-gwage weyob igar-narmakar-mai guoed: ‘Rey-Asueroʼse mer e-ome-Vasti bar dagoye.’ Rey-Asuero, ome-baid Vastiʼba-bur-nueddaed rey-omega-guega be amie.
EST 1:20 Bela-we-yar-dummad-naidgi rey-igar-uksad wisguarmalale, bela omegan na e-suimargi binsaed-nikaa nadmaloed. Belagwable dummagan-e-omegan, degi, dule-binsarmalad-e-omeganse-bakale, na e-suimargi binsaed-nikaa damaloed.”
EST 1:21 Weyob ibmar-soglesadi Rey-Asuero, degi, e-dummagan-negdakmamaid yeer-itosmalad. Degisoggu, rey, Memucán-ibmar-sogsadba ibmar imaksad.
EST 1:22 Rey bela e-yar-naidgi neggweburmar-bukmaladse na e-gwabinduku-akar-akar-sunmakmaladba gardamar narmakar barmisad. We-gardagine igar uklenaid, bela machergan e-negyaurgine negsedii gumaloye. Degine, e-dulemar-e-gwabinduku-sunmakedba we-garda ainioed.
EST 2:1 We-ibmar-gusad-sorbali, Rey-Asuero na sae-itodiid baisur-itogusadgine, e-ome-Vasti ebinsaalid, igi e-omede neg-imaksagusa, degi, igi e-omega igar megis gusbali.
EST 2:2 Geb degine, Rey-Asuero-bendakdimalad, degi, e-dule-dummagan sogdemalad: “Reyga yagan-yoo-sui-nikumalad yeerdaklemalad aminamala.
EST 2:3 Rey-Asuero, bela be-yar-dakmaidgine, bela-neggwebur-iliba be dulemar-onugsae, adi, wemala yagan-yoo-sui-nikumalad-yeerdaklemalad Susa-neggweburse, rey-omegan-negmar-siidse sedamalagar. Geb a-neggine, Hegai we-yagan-akoed. Hegaiʼde, bur-rey-walikagwadid, rey-omegan-edarbedid. Geb Hegai, we-yaganga yeerdaklegega-wagargi-ibmar-maglemalad ukoed.
EST 2:4 Geb rey, yagwa-bur-yeerdakleged, Vasti-anar e-omega suoed.” Weyob-soglesadi, Rey-Asuero yeer-itosad. Geb deyob ibmar-imakmalaga igar uksad.
EST 2:5 Susa-neggweburgi, reyneg-siidgine, Judío-dule-wargwen, Jair-machi-Mardoqueoʼye-nugad gudiid. Jairʼde, Simei-e-machid. Simeiʼdi, Quis-e-machid. Quisʼdi, dad-dummad-Benjamínʼgi danikid.
EST 2:6 Mardoqueo dulemar-galesgusmaladba Jerusalén-neggweburgi seleargusad. We-dulemar, Judá-e-rey-Jeconíasʼmala Babilonia-Rey-Nabucodonosorʼse gales selesgusmalad.
EST 2:7 Mardoqueo, e-sia-wargwen na e-ibe-sergan-burgwisad odungusad. E-babgan-burgwisgua, Mardoqueo na-e-bunoloyob susad. We-yagwa Hadasaʼye-nugad, deginbali, Esterʼye nugbalid. Ester bunagwa-nued-itoged, bela-bela yeerdakleged.
EST 2:8 Rey-igar-mesisad wisgusmargua, yagan-bukidar Susa-neggweburse, reynegse selenonimalad. Agi, Hegai we-yagan-akwenonikid. Ester, we-yagan-abargine reynegse selenonimogad. Agi Hegai. Ester-akwisad. Hegaiʼde, rey-e-omegan-edarbedga gudiid.
EST 2:9 Hegai, Ester-yeerdaksad, degi, nued daksabalid. A-ulale, Hegai, Esterʼga yeerdaklegega-wagargi-ibmar-maglemalad yoga-ukar imaksad. Bur mas-nuegan ega uksabalid. Deginbali, Hegai Esterʼga-ibmar-imakmalaga reyneggi-yagan-bur-nuegan-gudidiid walagugle (7) uksabalid. Geb Ester we-yagan-walagugledmala (7) rey-e-omegan-neg-bur-nuedse selesad.
EST 2:10 Ester na sogsasulid ede bialidi, degi, doamar e-gwenadgan gubali. Ar ade, Mardoqueo ega sogsagusad: “Melle be-dulemargi, degi, be-sergangi be sunmakoye.”
EST 2:11 Mardoqueoʼdi, bane-bane rey-e-omegan-neg-bukwad-asabin nasdaed. Adi, na wisguega, Ester nued gudiidibeye, igi imakdimardibeye.
EST 2:12 Yagan reyse-daged-iduale, birgagwen igar-maidba yeerdaklegega-ibmar-ebulemalad magdidii gumaloed. Nii-walanergwa (6) sapi-mirra-e-gwalluginbi abagan-magdii gumaloed. Geb baid nii-walanergwa (6), gwallu-wawadikmalad-bur-yeer-yapanmaladgi, degi, ina-wawadikmalad-bur-nuegangi abagan-magdii gumarbaloed. Geb a-ibamar-sorbali, we-yagan war-wargwen Rey-Asueroʼse nonimaloed.
EST 2:13 Yagwa-wargwen reyse dagsokalile, bela rey-e-omegan-neggi ibmar-sedbied ega ukledaed. Geb we-ibmar-yoi reynegse naddamalad.
EST 2:14 Neg-sedogusale, yagan war-wargwen reynegse naddamalad. Geb banedgine, omegan neg-baidsik barmilesdaed. A-neggi, Saasgaz neg-akwediid. Ar we-dulede, a-neggi rey-omegan edarbediid. Geb a-sorbali, we-omegan bar gannar reyse nonisurdamalad. Ar rey na biti-ome-wargwen gannar dakbierdi, degi, ese gornamalaga imaksale, unnila aginbi a-ome gannar reyse nonidaed.
EST 2:15 Mardoqueo-e-gilor-Abihail-e-sisgwa-Esterʼga, Rey-Asueroʼse naed-e-ibagan-warmaknonigua, rey-omegan-edarbed-Hegai, ibi ibmar-ese-egisoye ega sogsagusa, unnila a-ibmarbi Ester, Hegaiʼse egichisad. Bela dulemar Ester-walik-gudimaladi yeer Ester-dakmalad.
EST 2:16 Rey-Asuero birgaguglegus reyga-maidgi, a-nii-ambe-gwichidgi, Ester, rey-asabin-gwisgunaega reynegse selesad. A-nii Tebetʼye-bilebalid.
EST 2:17 Rey-Asuero, omegan-bamaladba bur bela-bela Ester-abesad. Yagan-bamaladba bur Esterʼbina nue-soge itosad. Degisoggu, Rey-Asuero, Ester-nonogi ologurgin sisad, geb Vasti-anar Rey-omega Ester-sunonikid.
EST 2:18 Geb sorbali, Rey-Asuero e-dummagan-negdakmamaidga, degi, ega arbamaladga, Ester-nuggi iba-dummad onosad. Rey-Asuero bela e-yarmar-dakmaidgi mani-uklegergebed bipi-imaksad. Deginbali, rey na yeer-itogedba ibmarmar obinebaka binsa-uknai gusbalid.
EST 2:19 Yagan-suisurmalad gannar rey-omegan-negse selenonimargua, Mardoqueoʼdi, reyneg-yawagakgi neg-daksii gusad.
EST 2:20 Ester, Mardoqueo ega igar-uksadba sogsasulid doamar e-sergana, degi, ede bialidbali. Ar Ester, Mardoqueo-walik-gudiunni igi eba ibsadae, deyobi, Mardoqueo-sogedba ibmar imaksad.
EST 2:21 Mardoqueo reyneg-yawagak-naba-sigu, Bigtán, degi, Teres sunmake itoalid. We-dulemardi, dummagan-warbogwad reyneg-yawagakgi-nakulemaladid. We-dulemar nue-sae-itogedgine, Rey-Asuero-oburgwega igar-aminanaid.
EST 2:22 Mardoqueo we-dulemar weyob sunmaknai itosgu, Rey-ome-Esterʼga we-gayaburba ogwasad. Agine, Esterʼmoga Mardoqueo-nuggi reyga we-gayaburba ogwasmogad.
EST 2:23 A-ulale, Rey-Asuero we-gayaburba-baraminai gualid, wede bule nabiri. Geb baramisgu, daklealid, we-gayaburba nue-napiragwa. Degisoggu, we-dule-ebogwad-dummagan dukargi-galegar burgwismalad. Geb bela we-ibmar-gusadi, rey-wagab rey-gardamargi narmakles megisad.
EST 3:1 Weyob ibmar-gusad-sorbali, Rey-Asuero, Hamedata-machi-Amán-nug odummononikid. Hamedataʼde, Agag-duled. Rey-Asuero, bela dule-dummagan-negdakmamaidba bur-dummadga Amán-onugsasad.
EST 3:2 Bela reyneggi-arbamalad-yawagakgi-gwismaladi, Amán-asabin yokorgi-sindigar sigisdamalad, deginbali, e-asabin dulluu imakdamarbalid. Ar deyobi, Rey-Asuero igar-uksagusad. Mardoqueoʼdi, Amán-asabin gwen yokorgi-sindigar sigdisulid, deginbali, gwen dulluu e-asabin imakdisurbalid.
EST 3:3 Geb degine, reyneggi-arbamalad-yawagakgi-gwismaladi, Mardoqueoʼse egichismalad: “¿Ibiga be, rey-igar-uksadba ibsasuli?”
EST 3:4 We-dulemar bane-bane degibi ese egisdii gusmalad, ar Mardoqueoʼdi, gwen eba ibsassulid. A-ulale, Amánʼga, Mardoqueo-barsogsamalad, adi, dakega, Mardoqueoʼde, na emarga ibmar-sogsagusad bule Amánʼga sogmogodibeye. Ar ade, Mardoqueo we-dulemarga sogsagusad, an Judío-duleye.
EST 3:5 Amán dakalid, Mardoqueo gwen e-asabin yokorgi sindigar sigsuli, degi, gwen e-asabin dulluu imaksurbali, agi, sae-itoded.
EST 3:6 Ar ade, Amánʼga bato sogsamarsoggu Mardoqueoʼde, Judío-duleye. A-ulale, Amán unnila Mardoqueo-oburgwedginbi binsassulid, bela Mardoqueo-e-dulemar-obelobi gusad. Amán bela Judíoʼmar Rey-Asuero-yar-semaidgi-bukwamalad-obelogega na igar-amisad.
EST 3:7 Rey-Asuero birgambe-gakabogus reyga-maidgine, gebe nii-yolededgi, nii-Nisánʼye nugadgi, Amán-wagab ibmar-Purʼye-nugadgi dodoar-wilubdaksamalad. Weyob-dodoarwilubdaksamalad, adi, dakega, Amán-igar-amisadi ibu-niigi, degi, ibi-ibagi imaklegoe. Geb agine, nii-warambe-gakabogi, nii-Adarʼye nugadgi, Amán-igar-amisad-imaklegega iba nagunonikid.
EST 3:8 Geb degine, Amán Rey-Asueroʼga sogded: —Bela be-yarmar-dakmaid-abargine, dulemar-soggwen mimiles-bukwad. Amardi, dulemar-bamaladba na igar akar nikamalad, deginbali, rey-igar-maidba ibsasurmarbalid. Degisoggu, dummad, ar be we-dulemar dula-gudii imakele, ibu-ibmar-nued egi be nikuosunna. Sate.
EST 3:9 Rey, we-ibmar na be yeer-itogele, we-dulemar-oberguegala be igar-messundo. Ar andina talento-mani-miliambe (10,000), be-mani-dakmaladga an ukoed, adi, rey-mani-sabomalad-neggi we-manimar odogegar.
EST 3:10 Geb degine, Rey-Asuero e-olargan unnusad. We-olargangine e-wilub naid. We-wilub oyonaid e-gangued nikad. Geb rey olargan Agag-dule-Hamedata-machi-Amánʼga uksad. Amánʼde, Judíoʼmar e-isdaradid.
EST 3:11 Geb rey, Amánʼga sogded: —Be we-mani-uknaidi na be sue. Ar be we-dulemar igi imakbie, deyob be imakdo.
EST 3:12 Gebe-nii-yoleded ibambe-gakapaagine reyga-garda-narmakmaladse gorlesad. Ar igi Amán igar-uksagusa, deyobi garda narmaklesad. We-garda we-dulemarse narmaklesad: Reyga-dummagan-negdakmamaid-Sátrapaʼmarye-nugmaladse, dummagan-yarmar-dakmamaidse, degi, bela neggweburmargi dummaganga-gudimaladse. We-gardamar bela dulemar-galagwensuli akar-akar e-gwabinduku-sunmakmaladba narmaklesad. We-gardamar Rey-Asuero-nuggi, degi, e-olargan-wilub-nai narmaklesad.
EST 3:13 Geb sorbali, we-gardamar bela Rey-Asuero-yarmar-dakmaidse garda-berbemaladba barmilesad. We-gardagi weyob igar-uklenaid: “Ibagwen-dummad bela Judío-dulemar: Sergan, sapingan, omegan, degi, burwiganase-bakale, oburgwemaloye, deginbali, e-ibe ibmar sumarbaloye. Nii-warambe-gakabogwad ibambe-gakapaagwadgi, weyob ibmar-guoye soglesad. Nii-warambe-gakabogwadde, nii-Adarʼye nugad.”
EST 3:14 We-igar-megisad garda-bamaladse-ogwalesadi bela yar-iliba gardamar mimilesad, adi, dulemar-owisogega, iba-sulesadgi guagwar gudii samaloye.
EST 3:15 Rey-sogedba gardamar-berbemalad gwae nadmalad. Deginbali, we-igar-megisadi, Susa-neggweburgi, bia rey-negsemaidgi mimilesbalid. Ar Rey-Asuero, Amán-ebo vino gobbukwadgine, Susa-neggweburgine neg-gagalenai gusad.
EST 4:1 Mardoqueo bela we-ibmar wisgusgua, wile-itogedba na-mor-yoid esirmaksad. Geb sagumor-sommed yosad. E-nonogi buru eosbalid, geb galimbaba neggweburgi ise-boar binnasur-gornadapi gusad.
EST 4:2 Deyobi, Mardoqueo reyneg-yawagakse mosad. Reynegyabardi dogsasurgusad, ar ade, dule sagumor-sommed-yoi reynegyaba-doged igar maisulid.
EST 4:3 Bela neggweburmar-bukwadgi Rey-Asuero-e-igar-uksad-wisgusmargua, Judío-dulemar bela-bela wile-itodmalad, bar mas-guchasurmalad, ise-boar gudii gusmalad, degi, gwage-nunmaked-dummad itodii gusmalad. Bukidar Judíoʼmar sagumor-sommed-yoi buru-birgi megismalad.
EST 4:4 Rey-ome-Esterʼga yagan-arbamalad, degi, machergan-egi-nakulemalad, bela we-ibmar-gunaid Esterʼga sogsamalad. Ester we-ibmar-itosgua, nunmaked-dummad itononimogad. Geb degine, Mardoqueoʼga mormar barmisad, adi, Mardoqueo sagumor-sommed-yoid-anar, we-mormar yoegar. Degi-inigwele, Mardoqueoʼdi, we-mormar yapa yoe gusad.
EST 4:5 Geb degine, Ester, machered-egi-nakuleged-Hatacʼse gochad. Geb Hatacʼga igar uksad, adi, Mardoqueo-daknaega, degi, Mardoqueoʼse egisega igi neg-gunai, deginbali, ese egisbaliga, ibiga be deyob gudiiye.
EST 4:6 Degisoggu, Hatac, Mardoqueo-daknadsunnad. Mardoqueoʼdi, neg-ollornaidgi, dulemar-ambikuedgi, reyneg-yawagak-asabin siid.
EST 4:7 Mardoqueo, Hatacʼga bela neg-gunaid sogsad. Deginbali, ega sogsabalid, igi Amán, Judío-dulemar-obelogega rey-mani-gamaladga mani uknai.
EST 4:8 Geb Mardoqueo, Hatacʼga Susa-neggweburgi gardamar-mimilesadi, uksabalid. A-gardagi, Judío-dulemar-obelogedgi sunmaknaid. Geb Mardoqueo, Hatacʼga sogsad: “We-garda Esterʼga oyogoye, degi, bela ega ibmar-guoed sogbaloye.” Mardoqueo, Hatacʼga sogsabalid: “Esterʼga be sogoye: ‘Be Rey-Asuero-daknaoye, adi, reyse be wilesagwa egisegarye, mer Judío-dulemar oburgweye.’ ”
EST 4:9 Hatac gannar Esterʼse nonikid. Geb bela Esterʼga Mardoqueo ega ibmar-sogsad sognonikid.
EST 4:10 Geb degine, Ester gannar Hatac-barmisad, adi, Mardoqueoʼga weyob sogega:
EST 4:11 “Bela reyga-arbamalad, degi, bela dule-rey-e-neggweburmargi-bukwamalad igar-maid wismalad. Ar dule-machereddibe, omedibe, rey-ese-gochasuli rey-dakega reyneg-imbagi dogsadibe, a-dule oburgwilegoye. Ar rey na e-olo-gaapoled a-dulegi oyosardi, we-dule bendaklegoye, bar oburgwilegosurye.” Ester sogdebalid: “Ar bato iba-dulagwen-gakambe-gusad (30), Rey-Asuero anbo-sunmakega bar anse gorsulid.”
EST 4:12 Hatac, Ester-ega-ibmar-sogsadi Mardoqueoʼga sogdapid.
EST 4:13 Geb Mardoqueo, Esterʼse gannar Hatac-barmisad, adi, Esterʼga weyob sogega: “Mer be binsaoye: ‘Ar andi reyneggi-maisoggu, andi bendaklegoye, andi Judío-dulemarba burgosurye.’
EST 4:14 Ar emi-ibagi, be sunmaksurdibe, baidsik Judío-dulemar-bendakleged danikoed. Ar bedi, degi, be-gwenadgan bela burgwemaloed. An ebinsagu, be we-ibmar-gunaidgi be-dulemar-bendakega, be rey-omega gunonikid.”
EST 4:15 Geb degine, Ester weyob Mardoqueo-abin-imaksad:
EST 4:16 “Bela-Judío-dulemar Susa-neggweburgi-gudimalad be onmaknae, adi, an-ular mas-gunsuli gudii gumalagar. Ibapaa mer mas gunmalo, degi, mer gobmarbalo. Ar andi anga-yagan-arbamaladmala bemaryob mas-gunsuli gudii gumarmogoed. A-sorbali, ar amba yogasaar-reyse-naed-igar-maisur-inigwele, andi reyse naoed. ¡Ar a-ular, an-oburgwebimalale, an-oburgwemalodo!”
EST 4:17 Geb degine, Mardoqueo, Ester-bela-ega-ibmar-sogsadba ibmar imaksad.
EST 5:1 Ibapaagine, Ester, rey-omegan-mor-yoed na yosad. Geb Ester reyneg-imbase, Rey-Asuero neg-obunnoged-asabin gwisgudapid. We-neg-obunnogedgi, Rey e-ologangi, yawagak-doged-asabin siid.
EST 5:2 Geb Rey-Asuero, e-ome-Ester neg-imbagi-gwichi-dakargua, yeer itoded. Geb e-olo-gaapoled-ganikid Esterʼsik oyosad. Geb degine, Ester rey-walikaa nonikid, agine, Ester rey-e-olo-gaapoled-e-duku ebusad.
EST 5:3 Rey-Asuero, Esterʼse egichided: —Ester, ¿Igi be itoge? ¿Ibu be abege? ¡Be anse an-yar-naid-negabar amba egisele, an bega uksaled!
EST 5:4 Geb Ester abin-sogded: —Dummad-Rey, be nabir itodibe, emi an bega masgunned-iba-onosokalidse, be, Amánʼbo be dagbi an be-abedo.
EST 5:5 Geb rey ega-arbamaladga sogded: —Gwae be Amán-aminamala, adi, anmar Ester-masgunned-iba-onosokalidse naegar. Degisoggu, Rey-Asuero, Amánʼbo Ester-masgunned-iba-ononaidse nadmalad.
EST 5:6 Geb Rey-Asuero vino gobsigu, gannar Esterʼse egisded: —Be anga soge, ibu be abege, an bega ukoed. ¿Ibu be egisbie? ¡Be anse an-yar-naid-negabar amba egisele, an bega uksaled!
EST 5:7 Geb Ester rey-abin sogded: —An-ibmar-abeged, an-ibmar-egised unnila wedid:
EST 5:8 Dummad-Rey, ar yeer-ito an be-imaksale, ar an-ibmar-abeged, an-ibmar-egisoed, be anga nuedgi ukbiele, banedse, masgunned-iba-baid an bega onosokalidse be Amánʼbo dago. Geb agi, be-anse-emi-ibmar-egisnaid an bega sogoed.
EST 5:9 A-ibagine, Amán bela-bela weligwar-itogedgi, degi, yeer-itogedgi masgullenaidgi nodegusad. Amán, rey-yawagak-noedgi Mardoqueo gwen e-asabin dulluu imaksuli, gwen e-dobsurbali dakargu, bela-bela sae itoded.
EST 5:10 Degi-inigwele, Amán e-sae-itoged bargasad. Geb e-negse naded. Geb Amán e-negse-mosgua, e-aimarse-gornamalaga, degi, e-ome-Zeresʼse-gornaega igar uksad.
EST 5:11 Geb Amán e-ibmar-nuegan-bukidar-nikadgi, masmala-bukidar-nikadgi sunmaknai gusad. Deginbali, rey, e-nug-odummosgusadgi, degi, rey-sorba-negmar-dakmamaid-birgi, igi rey e-odungusa, degi, dule-reyga-arbamalad-e-dummagan-birgi, igi rey e-odungusbali, agi sunmaknai gusbalid.
EST 5:12 Geb Amán sogdebalid: —Rey-ome-Ester, reyga mas-imaksadse-atakdagega unnila ansebi gochad. Deginbali, oibosale, gannar Reyba mas-gunnabaliga unnila ansebi gochabalid.
EST 5:13 Degi-inigwele, we-Judío-dule-Mardoqueo reyneg-yawagakgi-sii an daked-ilibali, dummadga-nugsalessuliyob an itoddaed.
EST 5:14 Geb degine, e-ome-Zeres, degi, bela e-aimar Amánʼga sogdemalad: —Suar daliambe-gakabo-gaka-negabar-nibgued (12½) be ogwiso. Geb banedse, be Reyse egisoed, Mardoqueo dukargi edinnar bannu-bannu nasikye. Degidbali, be weligwar Reybo mas-gunnaoed. Weyob ega binsaed-uksamaladi, Amán yeer-itosad. Geb Amán suar-ogwisguega igar-uksad, agi Mardoqueo-e-dukar gaegar.
EST 6:1 A-mutikidgine, rey geg gabe gualid. Degisoggu, e-yargi-ibmar-gusmalad-garda-narmakar-mamaid, degi, reymar-ibmar-imaksad-garda-narmakar-mamaid ega sedamalaga imaksad, adi, ega absomalagar.
EST 6:2 Geb a-gardagine narmakar-nai dakarmalad, igi Mardoqueo, reyga-nakulemad-e-dummagan-warbogwad Bigtán, degi, Teres-barsogsagusa. Deunni, wemar Rey-Asuero-oburgwega igar amisgusad.
EST 6:3 Geb agine, rey egichialid: —Mardoqueo, weyob ibmar-imaksad-ulale, ¿ibu ibmar-nued ega uklesa? Reyga-arbamalad, degi, e-sordamar-idudimalad, reyga sogdemalad: —Dummad-Rey, we-dulega ibmar-nued uklessuli.
EST 6:4 Deyob sunmaknanaidgine, Amán reyneg-imbagi dognonikid, adi, Reyse-egisega, suar-ogwichisadgine dukargi-edinnar Mardoqueo-bannu-bannu nasikye. Degisoggu, rey egisdesunnad: —¿Doa we neg-imbagi gudii?
EST 6:5 Reyga-arbamalad reyga sogdemalad: —Dummad, Amán neg-imbagi gudii. Geb Rey sogded: —Ega be sogmar, be dogdaye.
EST 6:6 Amán dognonigua, Rey-Asuero ese egichided: —An dule-wargwen-nug-odummobiele, ¿Igi an a-dule imakoe? Amán na binsaded: “¿Rey, doa-dule-nug-odummobisunna? Unnila an-nugbi odummolegergebed, geg dule-baid-nug odummoleged.”
EST 6:7 Amán reyga sogdesunnad: —Rey, be dule-nug-odummobiedgala,
EST 6:8 be-mor-yosad, degi, be-moli-birgi-sigisad ega sedamala. Deginbali, a-dule-nonogi reyyobi ologurgin ega sibaloed.
EST 6:9 Geb we-ibmarmar reyga-arbaed-e-dummad-wargwenga uklegoed, adi, dule-nug-odummolenaidga reymor-yosad yoegar. Deginbali, rey-moli-birgi-sii neggwebur-galimbaba sedbaloed. Agi, reyga-arbaed-e-dummad dule-nug-odummolenaid-iduar binnasuli gornadapi guoed: ‘¡Weyobi, rey, dule-nug-odummobied, imaked!’
EST 6:10 Geb Rey-Asuero, Amánʼga sogded: —Gwae be mor sunae, degi, be moli sedabalo. Ar igi na be ibmar-sogsadyobi, Judío-dule-Mardoqueo reyneg-yawagakgi-siidi, deyob be imaknae. Bela na be ibmar-sogsadi, mer be soggwensaar imaksuli guo.
EST 6:11 Degisoggu, Amán reymor susad, degi, rey-moli searbalid. Geb Amán Mardoqueoʼga mor-yosad. A-sorbali, Amán moli-birgi Mardoqueo-onakwisad, geb galimbaba sesad. Agine, Amán, Mardoqueo-idunadapi, weyob binnasuli gornadapi gusad: “¡Weyobi, Rey, dule-nug-odummobied, imaked!”
EST 6:12 Weyob-gusad-sorbali, Mardoqueo gannar reyneg-yawagakse nonikid. Amánʼdi, bela-bela bukib-itoge, na bingegudedba wagar-odukuar gwae-gwae e-negse nadsunnad.
EST 6:13 Geb Amán e-ome-Zeresʼga, degi, e-aimarga bela we-ibmar-gusadi sogsa gusad. Geb Amánʼga dulemar-ega-binsaed-daked, degi, e-ome-Zeres sogdemalad: “Ar Mardoqueo-abin be-nug-bipi-gudedi, we-dule, Judío-dule-guele, mer egi be nakodeeye binsao. Aka bur bule ese be galakuoed.”
EST 6:14 Amba wemar Amánʼbo sunmaknanaidgine, reyga-arbamalad nonimalad, geb Ester-mas-imaknaidse gwae Amán-sesmalad.
EST 7:1 Rey-Asuero Amánʼbo, rey-ome-Ester-mas-imaksadse nadmalad.
EST 7:2 Geb ibbogwadgine, vino-gobsimaladgine, Rey-Asuero, Esterʼse gannar ibmar egichialid: —Ester, be anga soge, ibu be abege, ar an bega ukoed. Amba an-yar-naid-negabar be anse egisele, an bega uksaled.
EST 7:3 Geb degine, e-ome-Ester rey-abin sogded: —Rey, be yeer-an-dakele, be nued-itogele, an bese ibmar egisoed be anga imakodo. Unnila an bese egised, mer be an-oburgwena gadin, dula-gudii be an-imakena gadin. Deginbali, an bese egisbalid, mer be an-dulemar-oburgwemogana gadinye.
EST 7:4 Ar ade, ani, bela an-dulemarmala-oburgwilegega manigi ukles bukwad. Ar weyob guele, reyga boniga gudoed. Ar anmar unnila maiga-guega-uklesana, adi, an sunmakosulinad. An bese wilenaisulinad.
EST 7:5 Geb degine, Rey-Asuero, Esterʼse egichided: —Degite, ¿Doa-dule we-ibmar-isgana imakbi gudisunna? ¿Bia we-dule gudii?
EST 7:6 Geb Ester, reyga sogded: —¡Anmar-isdarad anmargi gwisgudiidi, we-dule-isgana, Amán gued! Amán weyob-itosgua, rey-asabin, degi, rey-ome-Ester-asabin dobedba ganna gwisgusad.
EST 7:7 Geb Rey-Asuero urwedgi gwichibin-imaksad, bar gobsasulid, geb reyneggi-dutumar-galuse noded. Ar Amánʼdi, rey e-oburgoed daksabinsoggu, rey-ome-Ester-walik bessunnad, adi, e-san-bendakega Esterʼgi nue-wilenai guegar.
EST 7:8 Rey-Asuero reyneggi-dutumar-galuse-gudiidgi gannar neg-mas-gullenaidse-dognonigua, daknonikid, Amánʼdi, Ester-maidgi dulluu gunai. Rey weyob-daksagua, binnasur goted: —An-wagab, an-neggi, ¿be an-ome gagabibarde? ¡Adi, sulirgebed! Suar-ibmala Rey weyob-gole-itosmargua, dognonimalad. Geb Amán-e-wagar edusmalad.
EST 7:9 Suar-ibed-wargwen Harbonaʼye-nugad, Rey-Asueroʼga sogded: —Amán e-neg-nagaba Judío-dule-rey-san-bendaksagusad-Mardoqueo-dukar-gaega, suar ogwichisad. We-suarde daliambe-gakabo gaka negabar-nibgue (12½) gwichid. Geb Rey-Asuero igar ukded: —¡Be a-suargi dukar-gaale Amán-nasikmar!
EST 7:10 Deyobi, Amán, Mardoqueo-e-dukar-gaega suar-ogwichisadgi, dukargi-edinnar nasiklesad. Geb rey baisur-itoded.
EST 8:1 A-ibagine, Rey-Asuero, Judío-dulemar-e-isdarad-Amán-e-neg e-ome-Esterʼga uksad. Geb Mardoqueo, Rey-Asuero-asabin gwisgunonikid, ar ade, Ester, Reyga sogsagusad Mardoqueoʼde, e-gwenadye.
EST 8:2 Rey na e-olargan-Amán-annik-gannar-susadi unnusad, geb Mardoqueoʼga uksad. Ester bela Amán-e-ibmarmarga-gusad-dakega Mardoqueo-onugsasad.
EST 8:3 Geb Ester, Rey-asabin ise-boar, sindigar-sii, wilesagwadgi gannar ese egisdebalid. Adi, Agag-dule-Amán, Judío-dulemar-oburgwega igar-isgana-uksagusad-osuloye, reyga sognai gusad.
EST 8:4 Geb degine, Rey-Asuero e-olo-gaapoled Esterʼsik oyosad. Agine, Ester gwisgusad. Geb Rey-asabin-gwichi,
EST 8:5 Reyga sogded: —Rey, be yeer-an-dakele, be binsadibe napiragwadba an ibmar-egisnaiye, be nabir itogele, gardagi-narmakar be igar uksundo. Adi, Agag-dule Hamedata-machi-Amán Judío-dulemar bela rey-yarmargi-bukmalad-oburgwega garda-narmaksa-gusadi, be obelodo.
EST 8:6 Ar an-dulemar-ogilolealile, ¿igi baisur-an-dakosunna? An-dulemar-oburgwilealile, ¿igi boo-an-dakosunna? An deyob geg gued.
EST 8:7 Geb degine, Rey-Asuero, e-ome-Esterʼga, degi, Judío-dule-Mardoqueoʼga sogded: —An Esterʼga, Amán-neg uksad. Ar Amán Judío-dulemar-oburgwebigusad-ulale, dukargi-atinnar bannu-bannu-nai burgwisad.
EST 8:8 Emigindi, igi Judío-dulemar-bendaklebi be abemala, deyobi an-nuggi bemar garda narmakmala. Geb we-gardagi an-olargan-e-wilub bemar nasikmaloed. Ar ade, garda-soggwen an-nuggi narmaklesale, degi, a-gardagi an-olargan-e-wilub nasiklesale, narmakar-igar-uklesadi gege bar elileged.
EST 8:9 Geb degine, nii-warbaagi, Siván-nii-gwichidgi, e-iba-durgwen-gakapaagi reyga-garda-narmakmaladse yog-gollar imaksamalad. Dule-garda-narmakmalad bela Mardoqueo ega igar-uksadba narmaksamalad: Judío-dulemarga, dummagan-negdakmamaid-Sátrapaʼmarye-nugmaladga, sordamar-idudimaladga, degi, India-yala-akale, Etiopía-yalase yarmar dulanergwa-gakagugle-naid (127), e-dummagan-negdakmamaidga garda narmaklesad. A-gardamar na gwabin-akar-akar-sunmakmaladba narmaklesad. Deginbali, Judío-dulemarga na e-gwabin-sunmakedba narmaklesmogad.
EST 8:10 Mardoqueo, Rey-Asuero-nuggi garda narmaksagusad. Geb rey-e-olargan-e-wilub we-gardamargi nasiksad. Degine, reyga-gardamar-berbemaladba barmisad. We-dulemar rey-molimar-bela-belad-abarmakmalad-birgi-sii abarmakmaladid.
EST 8:11 Rey garda-narmaksadgine bela neggwebur-iliba Judío-dulemar-na-san-bendakega sunna danar-ambikuye igar uksad. Deginbali, rey igar-uksabalid, doa-dulemar Judío-dulemar-oburgwebi-gudanimalale, Judío-dulemar sunna a-dulemar, e-omegan, degi, e-mimmigan oburgweye. Deginbali, Judío-dulemar sunna e-isdarmalad-ibe ibmar subarye.
EST 8:12 Judío-dulemar, bela-Rey-Asuero-yargi nii-warambe gakabogi, e-iba ibambe-gakapaagi, weyob-ibmar-imakega, iba mesismalad. We-nii-warambe-gakabogwadde Adar-niiye-nugad.
EST 8:13 Bela dulemar wisgumalaga, bela neggweburmar-iliba matagwen-matagwen igar-narmakar-megisad mimilegoed. Adi, a-ibagi, Judío-dulemar na e-isdarmalad-idu guagwar-bukumalaga, e-isdarmalad-abin gwisguegar.
EST 8:14 Dule-garda-berbemaladi Rey-sogedba molimar-bela-belad-abarmakmalad-birgi-sii gwae-gwae nadmalad. Deginbali, we-igar-narmakar-megisadi, Susa-neggweburgi mimilesmogad.
EST 8:15 Mardoqueo rey-asabin-gwichi, reymor-arad-yoi, reymor-sipugwad-yoi, ologurgin-dummad-sii, degi, suba-lino-nued-suir-akwagiid-yoi noded. Bela Susa-neggweburginmaladi weligwar-itogedba oimakdemalad.
EST 8:16 Judío-dulemargardi bela yeer-neg-itogedbi nagusad, weligwar itodmalad, nug-dungudmalad.
EST 8:17 Bela yarmar-iliba, neggweburmar-iliba rey-igar-mesisad-modapile, Judío-dulemar na weligwar-itoddamalad, yeer-itoddamalad, na iba-dummad onoddamalad. Bukidar dulemar-yar-baidsikmalad Judío-dulemar-dobedba na emarde Judío-duleye sogdemalad.
EST 9:1 Rey-e-igar-mesisadi, e-igar-uksadi, nii-warambe-gakabogi, e-ibambe-gakapaagi, imaklegoye soglesad. We-nii-warambe-gakabogwad, Adar-niiye nugad. A-ibagine, Judíoʼmar-e-isdarmalad, Judío-dulemar-ogilomaloye binsasanad. Degi-inigwele, aka bur ibmar sorsik-gusad. Ar a-ibagine, Judío-dulemar e-isdarmaladgi naknonimalad.
EST 9:2 Bela Rey-Asuero-yarmar-dakmaidgine, Judío-dulemar, e-isdarmalad-e-oburgwebimalad-abin-samalagala, na guagwar e-neggwebur-e-neggwebur-mamaidgine ambikusmalad. Degi-inigwele, bipisaale dulemar, Judío-dulemar-abin gwisgussurmalad, ar ade, bela Judío-dulemar-dobgudmalad.
EST 9:3 Bela yarmargi-dummaganga-mamaid, dummagan-Sátrapaʼmar, sordamar-dummagan, degi, reyga-dummaganga-gudimaladi, Mardoqueo-dobed-ular, Judío-dulemar-bendaknai gusmalad.
EST 9:4 Mardoqueoʼde, reyneggi dule-dummadga gunonikid. Bela yarmar-ugakaase e-nug dungumai gusad. Bane-bane bur gangumai gusad.
EST 9:5 Judío-dulemar es-suidgi e-isdarmalad-oburgwismalad, bela giir-imaksamalad. Judío-dulemar, e-isdarmalad-igi-imakbie, deyobi na imaksamalad.
EST 9:6 Judío-dulemar, Susa-neggweburgine dulataled-ilatar (500) dule-oburgwismalad.
EST 9:7 Deginbali, we-dulemar-oburgwismarbalid: Parsandata, Dalfón, Aspata,
EST 9:8 Porata, Adalía, Aridata,
EST 9:9 Parmasta, Arisai, Aridai, degi, Vaizata.
EST 9:10 Wemar, Hamedata-machi-Amán-e-masmala-warambegwadid (10). Amánʼde, Judío-dulemar-e-isdaradid. Degi-inigwele, Judío-dulemar amar-ibe e-ibmarmardi sussurmalad.
EST 9:11 A-ibagine, Rey-Asuero Susa-neggweburgi igi-mergu dulemar-burgwisye wisguargua,
EST 9:12 e-ome-Esterʼga sogded: —Ar Judíoʼmar Susa-neggweburgi dulataled-ilatar (500) dule-oburgwismalale, degi, Amán-masmala-warambegwad (10) oburgwismarbalile, ¿An-yarmar-baigangi, igi neg-imaksamarbar be insae? Ester, be anga sogbali, ¿Ar ibu be egisbibali? Ar bega uklegoed. ¿Ibu be abebali? Ar be-sogedba bega ibmar imaklegoed.
EST 9:13 Ester, Reyga sogded: —Rey, be yeer-itogele, Judíoʼmar igi emi neg-imaksamala, deyobi, banedse be igar-megisadba, Judíoʼmar-Susa-neggweburginmalad na e-isdarmalad-obelogega be igar uke. Amán-e-masmala-e-ambegid-e-muimardi (10) bannu-bannu nasikega be imake.
EST 9:14 Rey-Asuero, Ester-ibmar-sogsadba, ibmar-imakega igar uksad. Susa-neggweburgi igar-uklenai gusad. Geb Amán-e-masmala-e-ambegid-e-mui (10) bannu-bannu nasiksamalad.
EST 9:15 Judío-dulemar-Susa-neggweburginmaladi nii-Adarʼye-nugadgi, e-ibambe-gakabakegi na bulakwaa ambikusmarmogad. Geb agi, dulataled-ilapaa (300) dulemar-oburgwismalad. Degi-inigwele, e-ibmarmardi gwen e-ibe sussurmalad.
EST 9:16 Judíoʼmar-baigan Rey-yar-bamaladgi-gudidimaladdi, na e-isdarmaladgi san-bendakmalaga, degi, e-isdarmaladgi ollorgumalaga na danakwaa ambikusmarmogad. Amala, mili-dulapaa-gakambe-gakatar (75,000) e-isdarmalad-oburgwismalad. Degi-inigwele, e-ibmarmardi e-ibe sussurmalad.
EST 9:17 Weyob neggusadi, Adar-nii-ibambe-gakapaagi (13) gusad. A-banedgine, Judío-dulemar obunnosmalad. A-ibagi, weligwaledgi iba-dummad onosmalad.
EST 9:18 Ar Judío-dulemar-Susa-neggweburginmalad, ibambe-gakapaagi, degi, ibambe-gakabakegi na bulakwaa ambikusmalad. Amardi, ibambe-gakatargi obunnosmalad. Geb a-ibagine, weligwaledgi iba-dummad onosmarmogad.
EST 9:19 A-ulale, Judío-dulemar-neggwebur-burwigangi-bukmalad Adar-nii-ibambe-gakabakegi (14) weligwaledgi iba-dummad onodamalad. A-ibagi, na muchub-muchub binsa ibmar ukdamalad.
EST 9:20 Mardoqueo we-ibmarmar-gusad narmakar mesisad. Mardoqueo bela Judío-dulemar Rey-Asuero-yarmar-dikasulidgi-bukwadse, degi, itakaa-bukwadse gardamar barmisad.
EST 9:21 A-gardagine, Mardoqueo Judío-dulemarga igar-uknaid, birga-iliba, nii-Adarʼye-nugad-ibambe-gakabakegi, degi, e-ibambe-gakatargi iba-onodii gumaloye.
EST 9:22 Adi, ebinsamalaga, a-ibagi Judío-dulemar e-isdarmaladgi ollorgusye. Deginbali, ebinsamarbaliga, igi a-niigi Judío-dulemar-e-bukib-binsaed, e-wile-itoged, ega weligwaledga, degi, iba-dummadga gunoni gusye. A-ulale, a-iba weligwaledgi, mas-bukidar-gullenai onomaloed. Aginbali, na muchub-muchub ibmar-uknanai imakmarbaloed, deginbali, dule-wileganga ibmar-uknai gumarbaloed.
EST 9:23 Ar igi Mardoqueo gardagi-narmakar ega igar-uksagusa, deyobi, Judío-dulemar we-iba-onoleged onodii gumaloye sogsamalad.
EST 9:24 Ar ade, Agag-dule-Hamedata-machi-Amán, bela Judío-dulemar-ogilogega na igar-amisgusad. Amánʼde, Judío-dulemar-e-isdaradid. Geb Amán, Purʼgi wilub-daksad, adi, wisguega ede sana Judíoʼmar-obelogoe.
EST 9:25 Ar Ester, Rey-Asuero-asabin-gwisgudapgua, rey gardagi-narmakar igar uksad. Amán Judío-dulemargi igar-isgana-amisgusadi, aka Amánʼgi aibinega imakye. Degi, Amán e-machimarmala dukargi-edinnar suargi nasikmarye.
EST 9:26 A-ulale, wilub-daked-Purʼye-nugadba we-ibamar Purimʼye onugsasmalad. Deyobi, Judío-dulemar garda-narmaklesadba, degi, ibmar-daksamaladba, degine, ibmar-gusad-itosadba, igar mesismalad.
EST 9:27 Judío-dulemar, na emarga, e-waganga, degi, bela eba-nanaimaladga, we-iba onoleged-igar mesismalad. We-iba degisadegu birga-irba ibabo-onoledii guoye igar mesismalad. Ar igi gardagi we-iba onolegoye sognai, deyobi onolegoed. Deginbali, ibi-ibagi onolegoye sognai, a-ibagi onolegoed.
EST 9:28 Bela Judíoʼmar, degi, e-wagan-danimaloed, bela yar-baid-baidgi-bukmalad, bela neggwebur-baid-baidgi-bukmalad, we-iba ebinsadii, degi, onodii gumaloed. Judíoʼmar we-iba gege onosuli gumaloed, adi, e-wagan melle we-iba iemalagar.
EST 9:29 Abihail-sisgwa-Rey-ome-Ester, Judío-dule-Mardoqueoʼbo, bela gangued-nikadba we-garda-sogbogwadgi Purim-Iba-onogedgi narmaksamalad.
EST 9:30 We-gardamar nuedgi, degi, napiragwadgi narmakale, bela Judío-dulemar Rey-Asuero-yarmar-dulanergwa-gakaguglegi-bukwadse (127) barmismalad.
EST 9:31 We-gardagine, Mardoqueo, Esterʼbo Judío-dulemarga, degi, e-waganga igar uknaid. Purim-Iba-onoleged na gusgu-e-iba-maidba onomaloye. Deginbali, a-gardagine sognaibalid, igi mas-gunsuli-gudigued-e-iba onomarbaloe, degi, igi wile-itoged na oyomarbaloe.
EST 9:32 Ester-igar-uksadi, Purim-Iba-onolegoed-e-igar-maid bargindisad. Bela we-ibmarmar gardagi narmakar megisad.
EST 10:1 Rey-Asuero bela e-yarmargi, degi, bela dupumargi-dulemar-bukwadgi mani-gaega imaksad.
EST 10:2 Bela Rey-Asuero e-ganguedba ibmar-imaksadi, degi, igi Mardoqueo-nug-ogannosbalidi, bela we-ibmar-gusadi Media-yargi, degi, Persia-yargi reymar-megismalad-gardagi narmakar maid.
EST 10:3 Ar Judío-dule-Mardoqueo, Rey-Asuero-e-yarbalidga dummadga sigismogad. Mardoqueo Judío-dulemar-abargi dule-dummadga gunonikid, degi, e-gwenadgan yeer Mardoqueo-daksamogad. Ar ade, e-dulemarga bur ibmar-nued-imakedgi binsadaed, degi, e-gwenadganga neg-bogidik nasiksabalid.
JOB 1:1 Dule-gwensak Uz-yar-naidgi gudii gusad. We-dule, dule-nuedid, dule egi-geg-akar sunmaked, we-dule Jobʼye nugad. Job, Bab-Dummad-dobekwaa nanadiid, ibmar-isgana imakdisulid.
JOB 1:2 Job, walagugle (7) masmala nikad, bunamalabi walapaa nikabalid.
JOB 1:3 We-dule ibmar-nika gudii gusad. We-ibmar-durgan nikananaed: Sibad-wawaad, miligugle (7.000) nikad, moli-yargan-mureged, milipaa (3.000) nikad, moli-bebe-nikad-abin-abinnid-napa-imumalad, dulataled-ilatar (500) nikad, moli-uayasuid-omegan, dulataled-ilatar (500) nikad, degine, bukidar e-maiga-gudimalad nikabalid. We-Job dule-dad-nakwedsikidmaladba bur nug-dummarba gued.
JOB 1:4 E-masmala iba-onoardamalad. Muchub-muchubbi e-neggine, iba-onoardamalad. Iba-onoarmalale, eba mas-gundamalaga e-bunmar-warbaagwadbina gordamalad.
JOB 1:5 Iba-onolesad-sorbali, Job e-masmalase gotedaed, ese dagmalaga, adi, Bab-Dummad-asabin swilidik-gumalagar. Job, bolegoedbali e-masmala-nuggine, wala-walagwenga ibmar-ogumakar-ukleged imakardaed, ade binsadaed: “Abakale, an-masmala, Bab-Dummadgi yolesmarsuaye, e-gwagegi ichakwa binsasmarsuaye.” Job weyob bali-bali ibmar imakardaed.
JOB 1:6 Ibagwengi, baliwiturmar Bab-Dummad-asabin-ambikunonimalad. Agine, nia-saila-Satanás nonimogad.
JOB 1:7 Bab-Jehová, nia-Satanásʼga sogded: —¿Bia be daniki? Nia-saila-Satanás abin sogded: —An napneg-naid-ebirdii danikid.
JOB 1:8 Bab-Jehová ega sogdebalid: —¿An-mai-Job be daksa? ¿Igi gudii be dake? Ar we-napneggine, dule Jobʼyobid sulid. Jobʼde angi gwen yoledisulid, an-dobekwaa nanadiid, igar-isganaba nanadisulid.
JOB 1:9 Geb nia-saila-Satanás, Bab-Jehová-abin weyob sogded: —¿Ar Jobʼde, binsa be-dobekwaa nanadii be ebinsae? Binsa deyob gudisulid. Ar ega be ibmar-ukedba deyob gudiid.
JOB 1:10 Ar melle akarguega, be nued akwediid. Ar ega e-mimmigana be nue-sabgudibalid. Ar bela e-ibmar-nikadi, ega be nued akwedibalid. Agala, ega be bela-bela e-ibmar-imaked nasguega imakdibalid. A-ulale, Job we-napneggine, moli-bebe-nikamalad, degi, sibadmar nue-nikad.
JOB 1:11 Napira an bega soged, ar be Job-sabsur-imakdibe, e-ibmar-nikadi bela e-ibe be osulodibe, be daksaled, ar be-asabin begi sabsuli-ulusaled.
JOB 1:12 Agine, Bab-Jehová, nia-Satanásʼga sogded: —Degirdi, nabirdo. Job-bela-e-ibmar-nikadi an bega-urmaksundo. Saedba be sao. E-duledi mer be oakalogo. Agine, geb nia-Satanás, Bab-Jehováʼgi banguded.
JOB 1:13 Geb ibagwengine, Job-masmala, e-bunmarmala, e-ia-sailagined-neggi iba-onobukwa gusmalad.
JOB 1:14 Degidgine, dule-gaya-berbeged Jobʼse nonikid, ega sognonikid: “Molimar-bebe-nikad napa-imunaigua, dikarba molimar-uayasuid-omegan gagan-manaimogua,
JOB 1:15 ukiagwale atursamalad-Sabeoʼginmalad nonimalad, bela molimar-bukwad sesmalad. Dule-arbamaladdina, bela es-suidgi oburgwilesmalad. Unnila anbi an wakichad, aga nabir an bega we-ibmar sogdanikid.”
JOB 1:16 Amba we-dule-gaya-berbeged-sunmaknai-yoo-bergue, dule-baid nonibalid, weyob sognonimogad: “Sibad-wawaadmargine, degine, sibad-wawaad-edarbemaladgine, mala aidesad. Bela burgwismalad, unnila anbi an durgusad. Agala, an nabir bega we-ibmar sogdanikid.”
JOB 1:17 Amba we-dule-durgusad-sunmaknai-yoo-bergue, dule-baid nonibalid, weyob sognonimogad: “Caldea-dulemar sogapaa danar-danar ukiagwar nonimalad, bela moli-yargan-mureged-bukwad sesmalad. Dule-arbamaladdina bela es-suidgi oburgwilesmalad, unnila anbi an wakichad. Agala, nabir an bega we-ibmar sogdanikid.”
JOB 1:18 Amba we-dule-durgusad-sunmaknai-yoo-bergue, dule-baid nonibalid, weyob sognonimogad: “Be-masmala, degine, be-bunamala, e-gwenad-sailagined-neggi mas-gunbukmargua, degine, gobbukmarbargua,
JOB 1:19 ukiagwale, burwa-dummad nega-dulesulidgansik-danikidi neggi yolenonikid, bela ese neg ayarisad. Bela be-mimmigangi neg marwenonikid, degisoggu, bela burgwismalad. Unnila anbi nabir san-onosad. Agala, nabir an bega we-ibmar sogdanikid.”
JOB 1:20 Degidgine, Job gwichibin imaksad, nunmak-itogedbali mor-dummadyoid siir imaksad, degine, e-nono swiri imaksabalid, napase dulluu imaksad, Bab-Dummad-nug odummosad.
JOB 1:21 Weyob sogded: “Uka-swiri an we-napnegse aidenonikid. Deyobi, ibmar-sate an gannar nabaloed. Ar Bab-Jehová we-ibmarmar anga uksad, emide, na Bab-Jehová, we-ibmarmar susbalid. Degisoggu, ¡Bab-Jehová-nug odummolesun!”
JOB 1:22 Degite, Job, weyob-ibmar-gusadgine, Bab-Dummadga sogsasulid, ibiga deyob be an-imaksaye. Job, Bab-Dummadgi gwen yolessulid.
JOB 2:1 Ibagwenginbali, baliwiturmar Bab-Dummad-asabin ambikunonibalid. Amar-imbagi nia-saila-Satanás nonibalid.
JOB 2:2 Bab-Jehová, nia-Satanásʼga sogded: —¿Bia be daniki? Nia-saila-Satanás abin-sogded: —An napneg-naid-ebirdii danikid.
JOB 2:3 Bab-Jehová ega sogdebalid: —¿An-mai-Job be daksa? ¿Igi gudii be dake? Ar we-napneggine, dule, Jobʼyobid sulid. Jobʼde, angi gwen yoledisulid, an-dobekwaa nanadiid, igar-isganaba nanadisulid. Ar Job gwen ibmar-oakalossuli, an egi yolegega be angi alamaknaigus-inigwele, degine, e-ibe be bela e-ibmar-nikad obelononibar-inigwele, degite, Job amba innikigwadba gudiid, gwen nossulid.
JOB 2:4 Nia-saila-Satanás, Bab-Jehová-abin sogdebalid: —Ar dule e-san-bendakegala, na e-ibmar-nikad bela ukdaed.
JOB 2:5 Napira an bega soged, ar be e-dulesunnad sabsur-imakdibe, be daksaled, ar be-asabin begi nue-sabsur ulusaled.
JOB 2:6 Bab-Jehová, nia-saila-Satanásʼga sogded: —Degir nabirdo. Be Job-naibi-imakega an bega urmaksun, degi-inigwele, mer oburgweddi be oburgo.
JOB 2:7 Agine, nia-Satanás, Bab-Jehováʼgi banguded. Geb nia-saila-Satanás, Jobʼga boni-dummad-yaabiid uknonikid. Job, bela e-nag-dukuse, degine, nonose-bakale, boni-yaabiid nikunonikid.
JOB 2:8 Degidbali, Job buru-birgi sigisad. Uka-aimakalile, nog-goagi godidaed.
JOB 2:9 E-ome ega sogded: —Job, ¿ar bede dule-nuedye nue-sogsunde? ¡Bab-Dummadgi be sabsur-urwe! ¡Be burgwesunna!
JOB 2:10 Job, e-omega sogded: —Dule-binsaed-satedyob be sunmaked. Ar Bab-Dummad anmarga ibmar-nuegan-ukedi, anmar abingadiid. Degitega, ¿ibiga geg anmar bonigandi abingabarsunna? Anmar, bonigan abingabalirgebed. Weyob Job wiles-inigwele, degite gwen Bab-Dummadgi yolessurgusad, isdar egi sunmaksasurbalid.
JOB 2:11 Job-e-aimar-warbaagwadi, Job-boniganba-galaitonaid wisgunonimalad. We-dule-warbaagwadi Job-dakdamalaga, degi, ega-gwage-armakega, daredibi na e-yargi noargusmalad. Amar, wemalad: Temán-neggweburgined-Elifaz, Súah-neggweburgined-Bildad, degine, Naamat-neggweburgined-Zofar, wemala Job-e-aimalad.
JOB 2:12 We-dulemala Job-maidse nonimalad. Bannaba Job-dakarmargua, oemalad, we, doa-dule. Geb nue-dakdemargua, binnasuli bodmalad, bukib-binsaedbali e-mor-yoyoid siir-siir imaksamalad. Degine, nunmak-itogedbali nonogi ukub eosmalad, degi, nonogi buru eosmarbalid.
JOB 2:13 Deyobi, Job-e-aimar ibagugle (7) mutik-mutik Job-nagaba napagi sigismalad. Ar Job boniba-galitosisoggua, e-aimar gwen Jobʼga sunmakbigussulid.
JOB 3:1 Job na boniganba geg-itogusadgine, e-iba-gwalulesadgi isdar sunmakded.
JOB 3:2 Job weyob sogded:
JOB 3:3 “Ibiga an-iba-gwalulesad geg bergudibe. Ibiga a-mutikidba soglenaigusdibe, ‘susugwa gwalulesye,’ a-mutikid nagussulina gadinad.
JOB 3:4 A-iba, negasichidga nagusana nuedinad. Bab-Dummad, a-ibagi binsassulina gadinad, a-ibagi negsichidbi nagusana nuedinad.
JOB 3:5 A-iba neg-gubyagwaledga nagusana gadinad, a-iba mogir-sichidga nagusana nuedinad. A-iba dad-ibeler-galegedyobi nagusana nuedinad.
JOB 3:6 A-neg-mutikidgi nega-gudureged nagusana gadinad. A-iba, nii-gardamar-abargi-naidgi elilesunna, a-iba, birgamar-ibagangi-naid elilesunna.
JOB 3:7 We-neg-mutikidgi geg dule gwalulegena gadinad. We-neg-mutikidgi mer dule wergusunna.
JOB 3:8 Ibiga dule-ina-isgana-imakmaladi, we-iba-ukabsassurdibe. Ibiga we-dulemar-ibdula-demarginedgi-gangued-nikamaladi, a-iba-ukabsassurdibe. A-iba ukabsalesana, nuedinad.
JOB 3:9 Ibiga a-ibagi niisgwamar-bolego-noardaed nodibe, ibiga a-ibagi dad-ibeler gasdibe, dad-ibeler gassulina bur nuedin.
JOB 3:10 Ibiga a-mutikidbali an gwalulesdibe, emide, bonigan-gunaid mag-dakega an-imaknaid.
JOB 3:11 ”Ibiga an sapidukugi-maigu, burgwissurdibe, ibiga an gwalulenaigu, burgwissurdibe, burgwisana bur nabirinad.
JOB 3:12 Ibiga an gwalulenaigu, an-abingasmardibe, ibiga an gwalulesgua, an-onusmardibe.
JOB 3:13 An burgwisana, nue-imas an meremainad, gwen itomaisulinad.
JOB 3:14 Reymar-gannar-neg-dummagan-sobmalad-burgwismalad-abargi an obunnomainad. Dule-dummagan-gannar-negdummagan-sobmalad-burgwismalad-abargi, an gabmainad.
JOB 3:15 Ar dule-nuga-nikamalad or-ibed-gudigusmalad-abargi, na e-neg-dummagangi ena mani-urbisgusmalad-abargi, an nue-imas meremainad.
JOB 3:16 Igi sikwi amba yoo aideged-iba-omoe burgwar-aidenonidae, gwen-neg-daksasuli digleddae, ayobi, ibiga an gussurdibe.
JOB 3:17 Ar dule-isganamar burgwenonikile, ase e-ibmar-isgana-imaked bergusiid. Ar dule-gegus-gudimalad burwa-dulega gunonikile, ase obunnosiid.
JOB 3:18 Ar dule-galesgudimalad burgwenonikile, ase na obunnosiid. Degine, we-dulemar dummad-e-wiodiid-ese-iseedi-goledi, asega bar itogosurmalad.
JOB 3:19 Ar dule-bulegana, degi, dule-belagwamaladi burwa-dulega gunonikile, bela na emarbi daklesiid, dule egi obined sulid. Degine, dule-maiga-gudiidi burgwenonikile, geb na e-dummadgi ollorgusiid.
JOB 3:20 ”Bab-Dummad, ¿ar ibiga be dule-naibi-itodiid gwalulegega be imaksa? ¿Ar ibiga be dule-isdar-itodiid dula-gudiguega be imake?
JOB 3:21 Ar wemar burgwebigudidaenad, ar geg burgwesunnad. Aisaar gwae burgwebigudidaenad, ibmar-nued-amidiiyobi, burgwed amididaenad.
JOB 3:22 Ar wemar yeer itosmalaled, geb neg-urba-aidedele, weligwar itogoed.
JOB 3:23 Ar Bab-Dummad dulega igar-obured, negsichigi aka-aka-gudidaeyobi, emar-imaked.
JOB 3:24 An-akiginnedi dii-aryomaiyobi gued, bane-bane-masgullegedyobi, an naibid itodiid.
JOB 3:25 Aka bur bule an ibmar-dobgudiid anga nagunonikid, ar an ibmargi-gwayediid anga daklenonikid.
JOB 3:26 Neg-bogidikid bar anga naisulid, nue bar an obunnodisulid. Unnila surbinsa-itogedbi an dakedisunnad.”
JOB 4:1 Elifaz Temán-neggweburgined, weyob Jobʼga sogded:
JOB 4:2 “Job, an bega ibmar-sogoedi, be isdar-itogodibe, degi-inigwele, an bega ibmar sogergebed.
JOB 4:3 Emide, be emar-bukidar odurdakdidaed, be emar-niga-ogannodidaed,
JOB 4:4 be-sunmakedgi wile-itodimalad-ogannodidaed, degine, be dule-gege-itomalad-bendakdidaed,
JOB 4:5 degite, emisgindi, begi bonigan-yolenonikidi geger be itoged. Bonigan begi obin na be itoged.
JOB 4:6 Ar Bab-Dummadgi be dobekwaa gudiiye-sog-inigwele, degite, ¿ibiga be Bab-Dummadgi bensunna? Na be nued gudiiye-binsadiidde, degite, ¿igi be gudsunna?
JOB 4:7 ”Nue be itogena: Ar dule ibmar-oakalodsulile, ¿sunna we-dule oburgwiledasi? Dule ibmar-inniki-imakdiile, ¿sunna we-dule oakaloledasi? Suli.
JOB 4:8 Bato an nue neg-daksamogad, ar dule ibmar-isgana-imakdidibe, ibmar-isgana egi aibined.
JOB 4:9 Ar Bab-Dummad dule-isganagi-uludele, unnila e-bunnogedgi sunna oburgwed.
JOB 4:10 Amba achumigur-nono-wawaad uludele, degi, e-mimmigan uludmogale, e-nugarmar bibisgoed. Bab-Dummad deyob dule-isgana-imakoed.
JOB 4:11 Ar igi-achumigurmar, mas-satedba burgwiddae, degi, e-mimmigan banna-banna aineba duurmakdedae, Bab-Dummad deyob dule-isgana-imakoed.
JOB 4:12 ”Gayaburba-gwensak anse arbakee nonikid, unnila an sikwas-bollee itosad.
JOB 4:13 Deunni, mutiki dulemar bela gabmamaigua, negburgan an dakalid, agine, an sulibinsa-itoalid,
JOB 4:14 angi dobed-dummad nagunonikid, an wawanmakded, bela an-niga batided.
JOB 4:15 Ibmar-burba an-ebus an itononigu, bela an-abagan iko-iko itonaded.
JOB 4:16 Agine, geb an-asabinni duleyob gwisgunoniki an itoged, e-daklegeddi aku dakleged. Gwisgunonigu, bela neg boo nagunonikid, e-sunmaked sikwas-soge an itoged:
JOB 4:17 ” ‘¿Ar dule Bab-Dummadba bur bule innikidaed nikasi? ¿Ar dule we-napnegse-e-odenonikidba bur bule dule-islidikga gusi?
JOB 4:18 Ar Bab-Dummadi, e-maiga-gudimaladginbela bengudiid. Ar Bab-Dummadi, e-baliwiturmarbela egi yole daked.
JOB 4:19 Degisoggu, dulemargin-bulesunna, dulemardi unnila napsa gued, dule ukub-birgi neg-soblessiidyob gued, samuyob baisursunna abulemaladid.
JOB 4:20 Wakdaradbali, nued-gudii gued, sedogidbali, bato bergus gued. Unnila dulemar sikwas wis-dula gudii gued. Ar burgwidele, bar dulegi binsalegosulid, deyob dule yoggudoed.
JOB 4:21 Na e-mormar-nikad bela e-ibe miledoed, gwen binsaed-nikagussuli burgwidoed.’ ”
JOB 5:1 Elifaz sogdebalid: “Job, emisgindi be binnasuli golena, doa be-abin-imakdagodibe. Ar biti-baliwitur-gwensakse be golodibe.
JOB 5:2 Ar emargi-isdar-binsalegedi, dule-binsaedsulid-oburgwed. Emargi-nobgulegedi, dule-binsaedsulid-oburgwed.
JOB 5:3 An-sunnad an dakdaed, dule-binsaedsulidaedi igi nasgumaidae, degite, sikwas-naogua, e-neguya wioleddabalid.
JOB 5:4 Dule-binsaed-sulidaed-e-mimmigandina, dule-e-bendaked satedaed, igar-naboleged-neggine nue-ibitodamalad, dule-e-irwa-gwisgued satedaed.
JOB 5:5 Deginbali, dule-binsaedsulidaed-e-ibmar-digarmaladi, dule-ukudmaada-gudimalad e-ibe wedamalad. Gunmalagala iko-abargi e-ibe wedamalad. Dule-uku-uku-itodimaladi, a-dule-ibmar-nuegan-bukidar-nikadgi nue-nobe itodamalad.
JOB 5:6 Ar ibmar-isgana, yogasaar ainisulid. Ar bonigan-abingalegedi, walagwen noardasulid.
JOB 5:7 Ar igi soo-e-ditismakedi soogi daniki, debayobi, naibi-itolegedi dulegi danimogad.
JOB 5:8 ”Ani an weyob gunaina, bato an dika Bab-Dummadga an-bonigan an sogsabinnena.
JOB 5:9 Ar Bab-Dummad ibmar-gegerdaklemalad imaked, bukidar ibmar-dakledisurmalad imaked. Akusunna-itoge anmar-imaked.
JOB 5:10 Ar Bab-Dummadi dii owimaid, sapurgi dii-wiega imakmaid.
JOB 5:11 Bab-Dummadi, dule-san-dummarba-imaksulid-e-nug ogannoged, degine, dule-naibi-itodimalad bendakbalid.
JOB 5:12 Bab-Dummadi, dule-emar-binsaed-gaed-ibe binsaed obured, adi, e-ibmar-imakedgi mer nasguegar.
JOB 5:13 Bab-Dummadi, dule-emar-binsaed-gaed-e-binsaed, egi aibinega imaked, degi, ibmar-isgana-imakbied e-ibe oburbalid.
JOB 5:14 Bab-Dummadi, a-dule ibgine yolegega imaked. Ar amba neg-meegwadgi-gudiiyob-gudiile, mutikidba-gudiiyob yolegega imaked.
JOB 5:15 Bab-Dummadi, dule-wileged bendaked, dule-isdar-sunmakdimaladgi bendakbalid, degi, dule-sabsur-emar-imakdimaladgi bendakbalid.
JOB 5:16 Ar Bab-Dummadi, dule-wileged ogannoged, degine, dule-ibmar-isgana-imaked-gaya-maklegega imakbalid.
JOB 5:17 ”Dule Bab-Dummadse-nuguega-odurdaklegedi, ¡egi nued binsalesadid! Degisoggu, Bab-Dummad-Bela-Gangued-Nikadi be-odurdakele, mer be isdar itoge.
JOB 5:18 Ar Bab-Dummadi, naibi-emar-imak-inigwele, emar-nudakbalid. Bab-Dummadi, amba emargi-yole-inigwele, emarga nunmaked osulobalid.
JOB 5:19 Bab-Dummadi, bonigangi be-ollorsamaiguad. Ar amba be bonigan-abalagi-gunaile, be-bendakoed.
JOB 5:20 Ukud-dummad-nagunonikile, Bab-Dummadi be-oburgwega be-imakosulid. Bila-onoleged-nagualile, es-suidgi-burgwega be-imakosurbalid.
JOB 5:21 Gaya-isgana begi milealile, Bab-Dummadi, akarguega be-imakosulid. Degine, neg-isgued-nonikile, bai be itogosulid.
JOB 5:22 Aka be neg-isgued-abin alledii guoed, ukud-abin be werguoed. Degine, ibdurgan-ursirmar-abin be gwayosulid.
JOB 5:23 Ar akwamar be-nainu oichogosulid, ibnuedga bega guoed. Ibdurgan-ursirmar be-ibmar-digarmalad be-ibe ebugosulid.
JOB 5:24 Be-neguyagine, nueganbi be garmakdii guoed, degine, be-sibad-wawaadmar be ebichialile, bega sogedba bukwa be dakoed.
JOB 5:25 Mimmigan-bukidar be nikuoed, waganmar gaganmar-aineyobi be nikuoed.
JOB 5:26 Seredgi amba nollosuli be neg-uangi megdapoed. Igi ibmar-gwag-goresadgine, e-iba-sogedbali welege, deyobi, be-iba-sogedba be burgwidoed.
JOB 5:27 ”Ar anmar bela we-ibmar bega sogedi, bato anmar nue-daksad, we nue-napiragwadid. Degisoggu, nue be itoge, be-sunnad be itoge. Ar bega ibmar-nuedga guoed.”
JOB 6:1 Degine, Job ega-sunmaknaid-abin weyob sogded:
JOB 6:2 “An-naibi-itodiidi, an-wiles-itodiidbogwa, nabir nibirgi-aidolegena nuedinad.
JOB 6:3 Ar nabir-aidolegena, demar-ukubba bur bule aidikueled. An-sunmakedi bemar geger itogewilubsulid.
JOB 6:4 Ar Bab-Dummad-Bela-Gangued-Nikad-e-sigumar naibi-an-imaksad. E-sigu-bonimar, bela an-sangi gwichigunonikid. Bab-Dummadi dobed-dummadi anga barmialid.
JOB 6:5 Moli-uayasuidi gagan-dikarba-gunaile, ¿masbina bonaidae? Moli-bebe-nikadi, e-mas-bukwad-dikarba, ¿masbina bonaidae? Suli. Deyobsuli.
JOB 6:6 ¿Ar mas balu-sulile, nued-gulle be ebinsae? Suli. Nued gullesuli. ¿Ar gannir-akwa-e-sipugwadi nued gulle be ebinsae? Suli.
JOB 6:7 An bonigan-abganaid-abesulidi, emide, an-masga gunonikid.
JOB 6:8 ”Bitigi Bab-Dummadi, an-ibmar-egisnaidi, anga imaksana gadin. Bitigi Bab-Dummadi, an-ibmar-abegedi, anga uksana gadin.
JOB 6:9 Bab-Dummad ilagwen an-obelosunnana gadin, an-oburgwedse an-imaksunnana yeerban.
JOB 6:10 Ar adi, anga bonigan ibnuedga gusaled, an yeer-itosaled. Ar Bab-Dummad-isligwaledgi an yolessurgusad.
JOB 6:11 ”Bato an bela gudisoggu, ¿ibu bar an edarbosunna? ¿Ibiga bar an gudii guosunna?
JOB 6:12 ¿Ar an akwayob gangusi? ¿Ar an-ukade, esgoro-gordikidyob gangusi?
JOB 6:13 An wargwen geg na dukin bendaked, an-bendakmalad bela bergusad.
JOB 6:14 ”Dule-naibi-itodidbela, e-ai ega-gwage-armaked nikad. Amba dule-Bab-Dummad-Bela-Gangued-Nikadba-dasulidbela, e-ai-egi-bangusulid nikamogad.
JOB 6:15 Ar bemardina, an-aimar-inigwele, be baisur an-dakdemalad. Ar diwar-dinguddaeyobi, degi, noddabaliyobi be damalad.
JOB 6:16 Ar dii-gwamakar-bukwad daludele, dii-amuregedga naddae, degine, diwar engudedae, deyobi, be gumalad.
JOB 6:17 Ar igi yor-mosale, diwar-dinnamaile geg bar iirmake, degi, neg-uedikidbali bela dinguddae, deyob, be gudmalad, baisur be an-dakdemalad.
JOB 6:18 Dulemar-danagwen-dummad-nadapdamaladi, e-igar-nadapidgi aibatele, nega-dulesulidganba yogguddamalad, agi burgwiddamalad.
JOB 6:19 Temánʼginmalad-danagwenmaladi, dii-amiegala naddamalad, Sabá-neggweburginmalad-ibmar-ukmaladi, na binsadamalad, bitigi dii an amisana gadinye.
JOB 6:20 Dii-nue-amio-itosmalanad, degi-inigwele, dii-dinna-mai dakdapmalale, nabir-itoardasurmalad.
JOB 6:21 Debayobi, bemar gudmarmogad, ibmar-gacharsuli-dakebayobi be angi gwakidmalad.
JOB 6:22 ¿An bemarse ibmar egichasi, wis be anga ibmar udamarye? ¿An-bendakmalaga an bemarse mani egichisbarsi? Suli.
JOB 6:23 ¿An bemarse gochasi, an-isdarmaladgi be an-bendakdamarye? ¿An bemarse egichisbarsi, dule-sabsur-emar-imakmaladgi be an-bendakye? Suli. An bemarse ibmar egichissulid.
JOB 6:24 ”Be anga sogmardo, ibugi nodii be an-dake. Ar an nodiile, bar an sunmakosurdo.
JOB 6:25 Bemar innikigwadba be anga ibmar sognaina, an bemar-abin isdar itogosulinad. Emide, be yogasaar angi sunmaknanaid.
JOB 6:26 Mer an-sunmakedba be angi yolemala, ar an surbinsa-itogedba an deyob soged. We-ibmar-an-sogedi bela bergudoed.
JOB 6:27 An be-dakedi, sunna be dule-sergan-sated ibmargi-dodoar-wilubdakar be uksamalar an be-dakdo, degine, bemar sunna ibmarbina be-ai be uksamalar an be-dakbardo.
JOB 6:28 ”Nue be ise-nuu an-dakmala. Be anga sogmala, bule an bemarga gakansanai.
JOB 6:29 Be nue itomala, mer yogasaar be angi yolemala. An ibmar-oakalodisulid, be magar an-dakmala.
JOB 6:30 An-bemarga-ibmar-sogedi, gakansulid. ¿Ar an napira-ibmar-sogedi, gakansaed-ebo emarbi-dakye be angi binsamarde? Suli, degisuli.”
JOB 7:1 Job sogdebalid: “Ar dule we-napneggi bela arbamalargebed. E-ibagan, dule-undar-arbadiid-e-ibaganyob gued.
JOB 7:2 Igi maigagudiid gwae-neg-mutikgusana gadinye binsadidae, igi dule-arbadiid e-bennukleged-iba edarbedidae,
JOB 7:3 deyobi, an nii-irbali wile-itodii gusad, mutikidbali nunmakedba an galitodii gusad.
JOB 7:4 An mutikidba megisale, an binsamaidaed, sana anga neg oibogodibeye. Mutikid anga bergusurdaed. Deyobi, an bindumakmai gabsuli oiboardaed.
JOB 7:5 Bela an-san nus biinid. An-uka sommere-sommere itoleged. An-uka-daas-dasadba sibudik-sibudik nis ariomamaid.
JOB 7:6 An-bergued-ibagan binna-binna nadapsulid, e-ibagan omosad. Gwen an bar-gannarsegued itosulid, bato an bela itoged.
JOB 7:7 ”Bab-Dummad, be ebinsao, an-gudiidi, unnila bunnolegedyob an gudiid. Neg-nued bar an dakosulid.
JOB 7:8 An bergudele, dulemar gwen bar an-dakosulid. Be an-amidii gumaloenad, be an-amiosurmalad. Ar andi bar gudii guosulid.
JOB 7:9 Igi mogirmar aisakiddae, gwen bar dakleddasuli, debayobi, dule neg-uangi-digledele, geg bar gannar noed.
JOB 7:10 E-negse geg gannar bar aibired, bar egi binsalegosulid, deyob yoggudoed.
JOB 7:11 ”Degisoggu, an sunmakedi gege bar an boggued. Nue-bukib-binsaed sunmakega an-imaked. Neg-nued-dakdisulid-abalagi an ibmar sogoed.
JOB 7:12 ¿Demargi ibdula-dummad-gudiiyob be an-daksi? Emide, be angi nakulebukwad.
JOB 7:13 Imbagwenar an binsaardaed: ‘An gabidele, we an-bendakoye. Gabedi, anga naibid osulogoye.’
JOB 7:14 Amba an gabmaidibe, be an-ogwayeardaed, gabgi gwayed-dummadi be anga ukdaed.
JOB 7:15 Bur an-gammu-gasmarsunnana gadin, adi, an-gudiidi bar an itogosulid.
JOB 7:16 An-gudiidi, nabir an gwen itosulid, bar an dula-gudii gubisulid, burgwisa an binsaed. Ies be an-imake, an wegi-gudiidi gwen-nabirsulid.
JOB 7:17 ”¿Wede dule ibusunna, bede dummarbaa imaked? ¿Ar ibiga duleba be bukib binsae?
JOB 7:18 ¿Ar ibiga be bane-bane egi be atakdii? ¿Ar ibiga be bane-bane wilubdakdibali?
JOB 7:19 Bab-Dummad, ¿sana be angi-nakulediid iegoe? Wis gwen be an-indaksulid, gwen wii-doega be an-imaksulid.
JOB 7:20 Ar an begi nosye-sogele, ¿igi an-isguedde be-imakosunna? Ar be dulegi nakuleged gudiid. ¿Ibiga be sabsur an-imake? ¿Isdarsunna be an-dake?
JOB 7:21 Bab-Dummad, ¿ibiga geg be an-isgued elisunna? ¿Ibiga geg be an-isgued ies imaksunna? Bato an-burgwed omosad. Bato an napaga binyesokalid. Be an-amidagoenad, bato satebin be an-dakdagoed.”
JOB 8:1 Súah-neggweburgined-Bildad, Jobʼga sogded:
JOB 8:2 “¿Ar sanagwadse weyob be sunmakmai guoe? Be-sunmakedi, burwa-dummad-noedyobi be sunmaked.
JOB 8:3 Bab-Dummad-Bela-Gangued-Nikadi, ¿ibmar-inniki-maid oichogo be ebinsasi? Bab-Dummadi, ¿ibmar-inniki-imaklegedgi yolego be ebinsasi? Gege yoleged.
JOB 8:4 Ar be-masmala, Bab-Dummadgi yolesmalargebed. Ar degubinne Bab-Dummadse nabir odurdaklesmalad.
JOB 8:5 Bab-Dummad-Bela-Gangued-Nikad be baramiele, ega be sogele, wile be an-dakye,
JOB 8:6 be islidik-gudiile, be ibmar akar-imakdisulile, Bab-Dummad be-bendakoed. Bega gannar ibmar-iduar-nikusadi ukoed.
JOB 8:7 Ar yoedse be ibmar-nikuoedi, ibmar-nikusadba bur bule be nikuoed.
JOB 8:8 ”Dadganse be nue ibmar egise, be-babgan-ibmar-bar-amismaladi, be durdake.
JOB 8:9 Ar anmardi geb emicharmaladid, gwen we-ibmar wissurmalad. Anmar we-napneggi-gudiidi, unnila an sikwas gudimalad.
JOB 8:10 Ar we-dulemardi sunna be-odurdakoed, ibmar-bukidar-wisguega be-imakoed. E-ibmar-wismalad bega sogoed.
JOB 8:11 ”Gagan-papiroʼye-nugad neg-matagangi-dungumaladi, ega neg-mata dingudele, ¿sunna dungusi? Gagan-diigi-dungumaladi, ega dii-dingudele, ¿sunna dungusi?
JOB 8:12 Ar we-gaganmala, amba aramaksiile, degi, amba siklessuli, ega dii-dingudele, yog-dinguar naddaed. Gagan-bamaladba bur bule itosur dinguddaed.
JOB 8:13 Dulemar Bab-Dummad-ieddamaladi, we-gaganmaryob gumalad. Dule-isganamar na e-ibmar-edarbediidi degibergudoed.
JOB 8:14 Dule-isgana e-ibmar-edarbediidi ega dub-garagwadyobi gued. E-bensulid-nikadi, dibamaryob baisursunna e-ibe berguddaed.
JOB 8:15 Ar dule dibagi akaye-sogele, gege egi akaed, ar yoga-itirar naddaed. Debayobi, e-bensulid-nikadi ega yoga-berguar naddaed.
JOB 8:16 Dule-isganamar, sapi dad-duurmaknaid-abin-gwichiyob gued. E-anagan-nasgudele, bela napagi-gagan-naid odukued.
JOB 8:17 Degine, e-malimar akwa-imbaba uboddaed, sabsur-akwagangi e-malimar diglesdaed.
JOB 8:18 Ar dule we-sapi-olasale, dulemar gwen egi bar binsaosurmalad, we-sapide wegi gwichidaeddeeye.
JOB 8:19 Deyobi, dule-isganamar weligwar-itodiid berguddamogad, e-sorba baigan dunguardaed.
JOB 8:20 ”Bab-Dummad gwen dule-innikidaed iedisulid, degine, dule-isganadi ese obanledaed.
JOB 8:21 Bab-Dummad gannar yeer-itogega be-imakoed, degine, yeer-itogedbali be binnasuli gordii guoed.
JOB 8:22 Dule-isdar-be-dakdimaladi, binge-gudii gumaloed, degine, dule-isdarmalad-e-neguyamar bela bergudoed.”
JOB 9:1 Job, deyob Bildad-sunmaksad-itosgua, weyob abin-sogded:
JOB 9:2 “An nue-wisimakar-inigwele, we nue-napiragwa, degite, ¿igi dule Bab-Dummad-asabin isgussuliyob na san-oyogosunna? Gege dule na deyob san-oyoged.
JOB 9:3 Ar dule Bab-Dummad-ebo gachimakye-sogele, gwen dule Bab-Dummadgi, nakwissuliled.
JOB 9:4 Ar Bab-Dummad binsaed-ibed maid, e-gargangued dutusulid. Degisoggu, ¿ar doa-dule, Bab-Dummadgi obichar be ebinsasunna? Dule egi obichasuliled.
JOB 9:5 Ar Bab-Dummad uludele, yar-dummagan-bukwad onired. Yar-dummagan bato ainirisbin daklenonidaed.
JOB 9:6 Bab-Dummad napneg-naid ogiglimaked, degi, napneg-e-sailagan-mamaid ogiglimakbalid.
JOB 9:7 Bab-Dummad dad-ibeler-mer-noega imaked, niisgwamar mer-bar-gaega imakbalid.
JOB 9:8 Bab-Dummad na e-ganguedba nibneg nasiksad, degine, Bab-Dummad bogi demar-sabalid.
JOB 9:9 Bab-Dummad bela niisgwamar danar-danaled nasiksad: Niisgwa-danaled-Osaʼye-nugad, niisgwa-danaled-Oriónʼye-nugad nasiksad. Degi, bela niisgwa-danaled-Pléyadesʼye-nugad-naguega imaksabalid. Bela dad-nakwed-argan-nuedsik niisgwa-danar-danar nasiksabalid.
JOB 9:10 Ar Bab-Dummad ibmar-dummagan-magar-itolesulid imaked, degine, bukidar ibmar-gegerdaklemalad-geg-ebisleged imaked.
JOB 9:11 Ar Bab-Dummad an-nagaba nadapye-sogele, an daksasuliled. Angi bangudye-sogele, an itossurbaliled.
JOB 9:12 Bab-Dummad ibmar-suye-sogele, ¿doa ega sogoe: ‘Mer be suye?’ ¿Doa ega sogoe: ‘Ibu be imaknaiye?’ Dule ega soged, sate.
JOB 9:13 Ar Bab-Dummad uludele, ibdula-dummad-demargined, degi, e-sordaganse-bakale, Bab-Dummad-asabin dulluu ambikumalad.
JOB 9:14 ”Ar deyobile, degite, ¿igi an Bab-Dummad-abin-imakosunna? An abin-imakegala, ¿igi an sogsale? Geg an abin-imake.
JOB 9:15 Amba an ibmar-akar-imaksasuli-inigwele, Bab-Dummad-asabin geg an san-bendaked. Ar unnila an Bab-Dummadse ise-wilegar bendakleged an egised.
JOB 9:16 Ar an Bab-Dummadse igar-itogega gorye-sogele, degine, anse nonikile, gwen an-itosar an ebinsasulid.
JOB 9:17 Aka bur angi burwa-dummadiyob yolenonikiled, aka bur an-naibid-itodiid anga omelonai gualiled.
JOB 9:18 Gwen obunnogega an-imaksasuliled, aka bur wile-itoged anga omelononikiled.
JOB 9:19 Ar garganguedgi sunmakleye-soglegele, Bab-Dummad bur bule emarba gargangued nikad. Ar Bab-Dummadga igar-itoleye-soglegele, ¿doa igar-itoleged-abarse Bab-Dummad-ogwichosunna?
JOB 9:20 Amba an ibmar-akar-imaksasurye sogele, an-sunmaked angi dukin aibinnonikoed. Amba an innikigudiiye-sogele, Bab-Dummad nosadga an-imakoed.
JOB 9:21 ”Ar an ibmar oakalossur-inigwele, degite, Bab-Dummad amba deyob angi binsasulid. A-ulale, an burgwebigussunnad.
JOB 9:22 Ar bela dulemar emarbiid, degisoggu, an sogdo: ‘Ar Bab-Dummad dule-nued, dule-isgana obeloged.’
JOB 9:23 Ar boni-gwensak ukiagwar dule-oburgwenonikile, an sogdo, Bab-Dummad, dule-ibmar-oakalodisulid-surbinsa-itogedga allesii guoye.
JOB 9:24 Dule-isgana yar-ganonikile, Bab-Dummad dule-igar-nabomalad igar-noar-imakmalaga imaked. Ar Bab-Dummad weyob-imaksulile, degite, ¿doa imaksunna?
JOB 9:25 ”An-ibagan-bergued bato mosad, an-ibagan binna-binnagwad bar abarmaksisulid. Weligwaled an gwen-itogosuli an-ibagan bergudoed.
JOB 9:26 An-ibagan, ur-binnasur-nadapiyobi, nadapid. Sulubagi e-masbina-gwichigumaiyobi, an-ibagan gued.
JOB 9:27 Amba an sogdibe: ‘We-ibmar-nabir-an-itodisulidi, an iegoye. An-wagar-wile-itoged, an ogwaoye, an alledii guoye,’
JOB 9:28 degite, an bela-bela-nunmaked-itodiidba, amba an dobe itodaed. An wisbalid, ar Bab-Dummad-asabinni, amba an ibmar-oakalossuliyob daklegosulid.
JOB 9:29 Ar an ibmar-oakalosye soglesoggu, ar ¿ibiga bar an alamaknai guosunna? Binsarsunna bar an alamaknai guo itole.
JOB 9:30 Amba an-uka an dii-diregwadgi ise-enukye-sogele, morgaukgi an-argan dagur-dagur an imakye-sogele,
JOB 9:31 amba Bab-Dummad, ibmar-isgana-milegedse an-bar-meteled, ar an-mormarse-bakale, ima an-itosaled.
JOB 9:32 ”Ar Bab-Dummaddi anyobsulid, andi dule gued. Degite, ¿igi an igar-nabolegedse Bab-Dummad-sedosunna? Gege an seded, ar Bab-Dummad dulesulid.
JOB 9:33 Ar anmarga-igar-nabogega igar-naboged-dule, wargwensaar gudisulid.
JOB 9:34 Ar Bab-Dummad-angi-urwenaid-osulogega, dule-wargwensaale, gudisulid. Adi, mer an Bab-Dummad-e-urwed dobguegar.
JOB 9:35 Aisaar an dobsuli sunmakbienad, geg an gued, ar an dobe itoged.”
JOB 10:1 Job, Bildadʼga sogdebalid: “¡An budar wegi-gudiidi itogusad! Agala, yogasaar an sunmakargussunnad. An-nabir-itosulid na dukin barsognagussunnad.
JOB 10:2 ”Bab-Dummadga an sogoed: ‘Mer weyob be an-wioye. Anga be sogye, ¿ibiga weyob be an-imaknai?
JOB 10:3 Bab-Dummadga an sogbaloed: ¿Weyob be an-imaknaid yeer be an-dake? ¿Isdarsunna be dule-obinnisadi dake? ¿Dule-isganamar isdarsunna-angi-binsananaidi, be baisur-dake?
JOB 10:4 ¿Dulemar-daeyob be emar-dake? ¿Anmar-ibmar-dakeyob be dakmoga?
JOB 10:5 ¿Ar be-ibagande, anmar-ibaganyobmoga? ¿Ar bega birgamar-nanamaid dulega-nanamaidyobmoga?
JOB 10:6 Degite, ¿ibiga be an-isguedi wisgubisunna? ¿Ar ibiga be an-isguedi bela be bar-amibisunna?
JOB 10:7 ¿Ar be nue-wissursi, ani an ibmar-oakalossulid? ¿Ar be nue-wissursi, begine geg an dukued?
JOB 10:8 ” ’Ar be-sunnad be an-imaksad, be-sunnad be an-obinnisad. Degite, be-binsaed be gwagdode, ¿ar an-obelogedgi be binsadode?
JOB 10:9 Be ebinsao, igi sianar napsagi soblege, deyob be-sunnagwad be an-sobsad. Degite, ¿gannar napsaga be an-obinyebalode?
JOB 10:10 ¿Moli-nunis-owirmaklegedyob be an-imaksasursi? ¿Moli-nunis-gwamaklegedyob be an-imaksasursi?
JOB 10:11 Bee be, anga sanmar nasiksad. Bee be, anga ukamar enirisad. Ar bee be, an-garmar gwadisad. Bee be, anga an-san-dubagan mesisbalid.
JOB 10:12 Burba-dulad be anga uksad, be-sabguedi be anga oyosbalid. Degine, be nue-an-akwisbalid, be an-niga ogannosbalid.
JOB 10:13 ” ’Degi-inigwele, ibmar-soggwendi be angi odukusad. Ar an wisid, be weyob binsadigusad:
JOB 10:14 Angi be nakuledii gusad, abakale an begi isgunonikirye. Ar an isgunonikile, be baisur-dakosulid.
JOB 10:15 An nue-isgunonikile, an dule-wiles. Ar an isgussur-daklenonikile, amba geg an weligwar itoged. Nue-binged-dummad angi naid. Nunmakedba-an-galitodiid nue magar an na itodiid.
JOB 10:16 An gwisguye-sogele, achumiguryob be anbina melleardaed, be-gargangued be angi oyononidaed.
JOB 10:17 Be-isdar-itoged aka angi barbulomaid, dule-angi-yolemalad aka be gatik amisbalid. Be-sordamar angi ukin-ukin yolenanaid.
JOB 10:18 ” ’¿Ar ibiga gwalulegega be an-imaksa? Bur an burgwisana gadinad, adi, dule bar an-dakosulinad.
JOB 10:19 Bur an gudisulina gadinad, an burgwar-aidenonikina gadinad, adi, yog-diglegar an guoenad.
JOB 10:20 ¿Ar an-ibagande bergued-mossursi? Degisoggu, mer bar be anse gole. An nasokalid-idu napi an wis-yeer itodigweled.
JOB 10:21 Emide an-nasokalid, bar an dagegarsulid. Negsichidse an naesokalid. We-an-naesokalidi, bar an aibiregarsulid.
JOB 10:22 Neg-gubyagwaledse an naesokalid, neg-gagalesnaidse an naesokalid. Amba neg-meegwad-negsichidyob-daklegedse, an naesokalid.’ ”
JOB 11:1 Naamat-neggweburgined-Zofar Jobʼga sunmakded, ega sogded:
JOB 11:2 “¿Ar be we-ibmar-sognaidi, abin-imaklegosurde? ¿Ar we-dule gadi-sunmakedba, nodisuliyob daklegode? Sulirgebed.
JOB 11:3 ¿Bela-we-ibmar-soglesad-abin anmar gaya-maklegode? ¿Dule-be-abin-imakosulidba emargi-dodogoye be soge? Gege be emargi dodoged.
JOB 11:4 Emide, be soged: ‘An-ibmar-soged innikigwadye, Bab-Dummad-asabinni an ibmar-oakalossurye.’
JOB 11:5 Bitigi Bab-Dummad begi gwichigunonikina gadin. Bitigi begi sabsur-sunmaknonikina yeerban, yeer an be-daksaled.
JOB 11:6 Ar Bab-Dummad binsaed-nikadba bega ibmar sogoed. Ar we-igar-dukuarmamaid akusunna itoleged. Agi, be geb magar Bab-Dummad-be-odurdaknaidi, be itosaled, be-isguedba bur bule, be odurdaklegewilubbinye.
JOB 11:7 ”¿Sunna be Bab-Dummad-e-ibmar-burbar-mamaid wisguosi? ¿Sunna be Bab-Dummad-Bela-Gangued-Nikad-ibmar-wisiyob be guosi? Gege be deyob gued.
JOB 11:8 Ar Bab-Dummad-e-binsaed, nibnegba obined, degite, ¿igi be wisguega imakosunna? Bab-Dummad-e-binsaed yaa-matusulidba obined. Degite, ¿igi be e-binsaed wisguosunna?
JOB 11:9 Deginbali, Bab-Dummad-e-ibmar-burbar-mamaidi, napneg-naidba bur dummadid, demar-matasuid-naidba bur bipisulid.
JOB 11:10 ”Ar Bab-Dummad esgaryase be-metedibe, degine, igar-nabogega bese gollarbardibe, ¿doa ega sogoe, mer deyob be imakye? Dule geg ega soged.
JOB 11:11 Ar Bab-Dummadi dule-yardakdimalad magasar daked, degine, e-ibmar-isgana-imaked baisur-dakosulid.
JOB 11:12 Moli-uayasuid-sapurbalidgine dule gwalulenonikile, geb dule-binsaedsulidaedi, binsaed-ibedga guoed.
JOB 11:13 ”Ar Bab-Dummadga be gwage ukele, be-argan ese be onakwele,
JOB 11:14 ibmar-isgana-imaksadgi be banguele, geb be-neguyagi ibmar-isgana be osulobalile,
JOB 11:15 be bar bingeguosulid, bar be dobgudii guosulid.
JOB 11:16 Naibid-itodigusadgi bar be binsaosulid, ukiagwar-ibmar-gusayob be itogoed.
JOB 11:17 Neg-ibegwar-naiyob bega neg nagunonikoed, weligwar be itononikoed. Negsichidi, bolegoe neg-ainakwiardaeyobi bega mee nagunonikoed.
JOB 11:18 Ar be bendaklegoed-wissoggu, be Bab-Dummadgi bensuli-gudii guoed. Bab-Dummad be-dikarba bega nakuledii guoed, degidbali be nue-gabdii guoed.
JOB 11:19 Dule gwen bar be-ogwayedii guosulid, nued be obunnodii guoed. Deginbali, dulemar bese wilenonimarbaloed.
JOB 11:20 Dule-isganamardina wakinnosulid. E-ibyamar bela akitoed. Unnila burgwed-edarbedimalad.”
JOB 12:1 Agine Job, Zofarʼga weyob sogded:
JOB 12:2 “Ar bemar odurdaked-sailaye be sogmarsunde. Ar bemar burgwidele, ¿bemarba binsaed-nikaa-dalegedi burgwidmosunnode?
JOB 12:3 An bemaryobi binsaed nikamogad, gwen be angi obinsurmalad. Ar bemar-ibmar-sogsamaladi, ¿doa we-ibmar wissur be ebinsae? Bela wismala.
JOB 12:4 ”Gebeunni an Bab-Dummadse-gotele, Bab-Dummad an-abin-imakdaenad. Emigindina, aka an-aimar-oallega an guded. An ibmar-oakalossulin-inigwele, aka an-aimarga an dodogedga guded.
JOB 12:5 Dule-gwen-boni-itodisurmaladi weyob sogdemalad: ‘Dule-boni-itodiidi mer bai be dake, dule-aimukubi-gudiid gatik be egee imake.’
JOB 12:6 Dule-ibmar-atursamaladi, e-negyagi na yeer itodimalad. Ar wemar Bab-Dummad-ourwedimaladid, Bab-Dummad-gege-anmar-oakaloye, sogdimaladid.
JOB 12:7 ”Ibdurganse be ibmar egismalana, ar wemar bemar-odurdaksamalaled. Sikwimarse be ibmar egismalana, ar wemar bega ibmar sogsamalaled.
JOB 12:8 Napneg-naidbogwa be sunmakena, ar we bemar-odurdaksaled. Demargi uamar-bukwadbogwa be sunmakena, wemar bemarga ibmar sogsamalaled.
JOB 12:9 Ar wemar Bab-Jehová-bela-ibmar-imaksad, bela wismalad.
JOB 12:10 Bab-Dummadgine, bela burba-dulad siid. Bab-Dummadgine, bela dule dula-gued siid.
JOB 12:11 Ar uaya, ibmar-goled magar itoged, degi, gwabin, ibmar-igi-gulleged magar itoged.
JOB 12:12 Deginbali, dule-selebagus-gudimaladi, magasar neg-itomalad, binsaed-ibegan nanamalad.
JOB 12:13 ”Ar Bab-Dummaddi bur bule binsaed-nikaa gued. Abi gargangued bur bule nikabalid. Binsaed-nued-ukleged Bab-Dummadgadbiid, degine, magar-neg-itoleged egadbibalid.
JOB 12:14 Ar Bab-Dummad ibmar-earisale, dule-wargwensaale bar sobosulid. Ar Bab-Dummad esgaryagi dule-metele, dule-wargwensaale gege bar onoged.
JOB 12:15 Ar Bab-Dummad dii-owisulile, bela ibmar dingudeled. Ar dii-owierdi, bela neg-dogdebaliled.
JOB 12:16 Bab-Dummadgine gargangued maid, degine, binsaed-nikagued egi danibalid. Bab-Dummadgi-siid, emar-yardaked, degi, dule-emarse-yardaklediid, igi imakoe.
JOB 12:17 Ar Bab-Dummadi dule-binsaed-ibedmar-obingegsaed, degine, dule-igar-nabomalad suli-suli obinsabalid.
JOB 12:18 Bab-Dummad, reymar-ibe e-negsemamaid osuloged, degine, rey maiga imakbalid.
JOB 12:19 Bab-Dummad dule-irwa-Bab-Dummadse-gormalad-obingegsaed, degine, dule-bulegan-surbinsa-itogega imakbalid.
JOB 12:20 Bab-Dummad dule-binsaed-dakmalad-e-gaya-maked, degine, girmar-dummagan-binsaedsuli imakbalid.
JOB 12:21 Bab-Dummad dule-nuga-nikamalad-obingegsaed, degi, dule-gandik-gudimalad gargangued-sate imakbalid.
JOB 12:22 Bab-Dummad ibmar-yaa-matusurmaladgi-bukwad magar-dakle imaked, degine, negasichidgi ibmar-bukwad magar-daklegega imaked.
JOB 12:23 Bab-Dummad neggwebur-merguega imaked, neggweburmar obelobalid. Bab-Dummad neggweburmar-oambikuega imaked, neggweburmar-aisakiega imakbalid.
JOB 12:24 Bab-Dummad dule-dummagan-yar-sedimalad-ibe e-binsaed-oburega imaked. Degidbali, negsulidganba-gudiiyobi imakbalid.
JOB 12:25 Negsichigangi-unimakdiiyobi imaked, mummuganyob banamakdiiyobi imaked.”
JOB 13:1 Job sogdebalid: “Bela bemar ibmar-sogsamaladi bato an itosad, bato an we-ibmar daksad.
JOB 13:2 Ar bemaryopira an wismogad, gwen be angi obinsurmalad.
JOB 13:3 Bur an Bab-Dummad-Bela-Gangued-Nikadbogwa an sunmakbied, Bab-Dummadbogwa an-igar bur an nudakbied.
JOB 13:4 Ar bemardi unnila gakansamaladid, ina-durgan-ibmar-wissurmaladyobi be gumalad, gwen an-bendaksulid.
JOB 13:5 Ar bemar wis boo ambikuele, degidba, bemar binsaed-nikagued oyosmalaled.
JOB 13:6 Emisgindi, nue an-sunmaked itomalo, an-ibmar-bega-soged-nikad be itomarmogo.
JOB 13:7 ¿Bemar Bab-Dummad-nuggi gakansaode? ¿Gakansaedgi bemar Bab-Dummad-bendaknaimarye sogode?
JOB 13:8 ¿Ar bemar ega ibmar-nued imaknaiye binsasunde? ¿Ar bemar Bab-Dummad-bendakmaladye sogmarsunde?
JOB 13:9 Ar Bab-Dummad bemar-wilubdaknonikile, ¿igi be gusmalale? Ar bemar dulemargi-dodolegeyob, ¿Bab-Dummadgi be dodomarye sogmarsunde? Gege bemar Bab-Dummadgi dodoged.
JOB 13:10 Ar bemar arbakee dule-wargwenbi bendakbigualile, Bab-Dummad bemargi sabsur-gwichigusaled.
JOB 13:11 Ar Bab-Dummad-e-gargangued-yeerdakleged be-ogwayenonimalaled. Bemar e-abinni bela-belad gwayidmalaled.
JOB 13:12 Ar bemar binsaed-nued-nika-sunmakedi binsaledid, bemar-ibmar-sognaidi gwen gangued nikasulid.
JOB 13:13 ”Mer bar sunmakmala, an sunmakmogwelo. Ar igi an-guoe, ar deyob an guodo.
JOB 13:14 Ar an naibigubier, an naibiguodo, bar san-bendaklegedgi an binsasulid.
JOB 13:15 Ar Bab-Dummad an-oburgwebiele, an-oburgodo. An bendaklegodeeye, bar an binsasulid, bato an bela gudiid. Unnila Bab-Dummad-asabinni, an-gudiid na barsogoed.
JOB 13:16 Ar Bab-Dummad na e an-bendakoedid. Ar dule-isganadi, Bab-Dummad-asabinni gwen gwisgunonikosulid.
JOB 13:17 ”An-binsaed nue itomalo, an-ibmar-sognaid be nue itomalo.
JOB 13:18 An-sunmakoed bato guakwaa an ilemaksad. Bato an wisid, Bab-Dummad ibmar-oakalossuli an-daknonikoed.
JOB 13:19 Ar dule-angi-yoleged-nikardina, bar an golosurdo, an burgwed-edarbesunnodo.
JOB 13:20 ”Bab-Dummadye, ibmar-sogbo an bese egised. Ar we-ibmar be anga ukele, an bar begi dukuosulid:
JOB 13:21 Soggwengi: Mer bar be sabsur-an-odurdako. Sogbogi: Mer bar be sabsur-an-ogwayo.
JOB 13:22 Na san-bendakegala, be-asabin-gwisgudagega be anse gole, adi, nabir an be-asabin sunmakoed. Be anse gorsulile, an-inse an bega sunmakodo, geb bee be an-abin-imakoed.
JOB 13:23 Be anga soge, ibugi an begi isgusa, ibu ibmar-isganamar an imaksa, biti-be-igargangi an annasa, ibugi an begi yoledii gusa.
JOB 13:24 Bab-Dummadye, ¿ar ibiga be angi dukue? ¿Ar ibiga be-isdaradyob be an-dake?
JOB 13:25 Ar andi gagan-dinnagana burwaba-seledaedyob gued. Degisoggu, ¿ibiga be an-obelobisunna?
JOB 13:26 Emide be, nunmaked-dummad-itogega be an-imaknaid. Sapingwaun an ibmar-isgana-imaksad-ular, ¿deyob be an-imaknaisunde?
JOB 13:27 Sepo-yaba be an-nag-odosad. Bia an nadesogele, bela be angi nakuleged, an-nag-gannarmarba be angi nakulediid.
JOB 13:28 ”Dule urgo-nunguddaeyob berguddaed, mor udubiin-gusar-bergudaedyobi, dulemar berguddaed.”
JOB 14:1 Job sogdebalid: “Dule gwalulenonikile, unnila sikwas gudii gued, ar bonigandi bukidar daed.
JOB 14:2 Dulemar dutumaryobid. Dutumar argadele, bato dinguddaed, debayobi, dulemar gued. Sikwas-negsichid-nagunonidaeyobi, dulemar berguddaed.
JOB 14:3 Bab-Dummad, ¿be deyob duledaedgi ataknasunde? ¿Be-asabin-igar-nabodagega be anse gornasunde?
JOB 14:4 Degite, ¿ar doa ibmar-nued, ibmar-isganagi onogoe? Gege dule deyob imaked.
JOB 14:5 Dulega ibagan-bergued bato sogles maid, bee be, bato ega niiwarbigwa-wilub-gudiguega ega ibagan mesisad. Degisoggu, gege a-ibagan-obicha gudii gued, ar deyob be imaksad.
JOB 14:6 Mer bar egi be nakulege, ies be sae, na e-arbadiid-manigi wergudii be imakgwele.
JOB 14:7 ”Ar sapimarbela amba siklesale, gannar ainiardaed, degi, e-anagan dunguddaed.
JOB 14:8 Ar sapi-e-malimar nungumai-inigwele, e-saila nungumai-inigwele,
JOB 14:9 egi dii-aryoderdi, gannar sunna durgued. Sapi-gebe-diglesadyob e-anagan ainiardaed.
JOB 14:10 Ar duledina, burgwisar bar daklegosulid. Ar dule burgwisale, ¿bia nadoe?
JOB 14:11 Ar igi demar dinguddae, degine, igi diwar dinguddabali,
JOB 14:12 deyob dulemar berguddaed, bar gwisgusurdamalad. Ar mogir-arad-naid-berguedsega, geb dule-burgwismalad gwisgumaloed. Dule-burgwismalad e-gabmamaidgi geb atakdemaloed.
JOB 14:13 ”Be-urwemaid-berguedse neg-uangi be an-odukuena yeerban. Bitigi an-ebinsaega be ibagan nasikena yeerban.
JOB 14:14 Dule burgwisale, geg bar gannar durgued. A-ulale, an-bendakleged-iba an bane-bane edarbedii gusaled.
JOB 14:15 Geb agi be anse gornonikoed. An be-abin-imaknonikoed. Ar bee be, an-obinnisadsoggu, be yeer an-daknonikoed.
JOB 14:16 Be an-gudiid emi be daked, an-isguedgindi bar be binsassulid.
JOB 14:17 Ibmar-sagugi-ise-atinnar-melleddaedyobi, be an-isgued dikasuli meted. An-isgumalad bela be anga elisad.
JOB 14:18 ”Ar igi yar-dummad-mamaridele, akwamar-babatidele, baidsik ambakusdae, deyobi, be dule-e-ibmar-edarbediid be imaked.
JOB 14:19 Ar igi-diimar akwamar-sabsursae, deginbali, diwar-dummad-nomaile, bela ese ibmarmar ebipilege, deyobi, dule-ibe e-bendakleged be osuloged.
JOB 14:20 Bela-bela be we-dule oitoged, be we-dule-obelogega imaked, bar e-wagar-daklesuli be imaked. Deyob, be we-dule neg-uanse barmeted.
JOB 14:21 Ar e-mimmigan-nug ogannolenaile, we-duledi gwen bar wisguosulid. Ar e-mimmigan mesagwar-imaklenaile, we-duledi gwen wisguosulid.
JOB 14:22 Unnila e-san-nunmakedbi itoged, na e-nunmakdiidbali, wile-itodiid.”
JOB 15:1 Geb agine, Temánʼgined-Elifaz, Jobʼga weyob sogded:
JOB 15:2 “Dule-binsaed-ibedi yogasaar sunmaksulid. Dule-binsaed-ibed yogasaar urwesulid.
JOB 15:3 Dule-binsaed-ibedi, dule-baidbo abin-abin-imaknaidgine, yogasaar sunmaksulid. Dule-binsaed-ibedi, igar-nudakedgi sunmaksuli gusulid.
JOB 15:4 Bedina, aka be Bab-Dummad-dobekwaa-nanaedi obelonaid. Aka be dule-bamalad mer Bab-Dummadse-golega imaknaid.
JOB 15:5 Be-sunmakedi be-isguedba be sunmaknaid, dule-galagwensulidamaladyobi be sunmaked.
JOB 15:6 Be-sunmakedi dukin begi yolenaid, andi begi yolenaisulid. Be-gwabin-duku dukin be-wioged.
JOB 15:7 ”¿Be-inse gwalules be itoge? ¿Yarmar-nanaid-idu, be-inse gwalules be itoge?
JOB 15:8 ¿Bebi binsaed-ibed be itosi? ¿Bab-Dummadde bese binsaed egissi?
JOB 15:9 Anmar bela be-ibmar-wisidi wismogad, bela be-ibmar-magar-itogedi anmar magar itomogad.
JOB 15:10 Anmar-abargine dadagan bukwad, be-babba bur selegan nanaed.
JOB 15:11 ¿Bab-Dummad gadi-gadi be-gwage-imaked be baisurdaksunde? ¿Bab-Dummad bega binnalegwadgi sunmaked be baisurdaksunde?
JOB 15:12 ¿Ibiga be surbinsa urwed-itoge? ¿Ibiga be urwakwaa atake?
JOB 15:13 ¿Ibiga be Bab-Dummadse urwe? ¿Ibiga egi be yogasaar sunmake?
JOB 15:14 ”¿Igi-dule na ibmar-oakalodisurye sogosunna? ¿Doa nodisurye sogosunna?
JOB 15:15 Bab-Dummad e-nug-odummodimaladginbela bengued, amba nibnegbela swilidik daksulid.
JOB 15:16 Dulemarginbulesunna, e-abin swilidikidsulid. Duledi, gobedbinagudiiyobi, isguedbina gudiid.
JOB 15:17 ”Job, nue be an-itogo, an bega ibmar soggwelo. An-ibmar-daksad an bega sogesokalid.
JOB 15:18 We-ibmar dule-binsaed-ibegan anmar-odurdaksadi, na e-babganba durdaksamaladid.
JOB 15:19 Agala, Bab-Dummadi a-dulemarga yala uknonikid. Dule-ainebarmalad a-yargi eba bukwa gussulid.
JOB 15:20 Dule-isganadina, bane-bane nunmakedba-gar-itodii gudoed, degine, dule-sabsur-emar-imakdiidgala, e-ibagan-bergued bato sogles naid.
JOB 15:21 Dule-isgana ibmargoled-emar-ogwayed itoged, degine, na bogidik-gudiidgine, dule-atursamalad egi gwisgunonikoed.
JOB 15:22 Dule-isgana negsichidgi-wakinnodeeye gwen binsasulid, es-suidse-ibitogoed ega igar maid.
JOB 15:23 Igar-wissuli garmakdiid, mula-masga-guega gudiid. Dule-isgana e-oburgwileged-ibagan-mosad na wisid.
JOB 15:24 Wileged-dummad, suli-suli-itoged, bela-bela dobe-itogega imaked. We-ibmarmala, rey-egi-yolesokaliyob itoge imaked.
JOB 15:25 Ar Bab-Dummadgi ise-urwar argan-oyonai-gusad-ulale, na san-bule-bule Bab-Dummad-Bela-Gangued-Nikadga imaknai-gusad-ulale, ede na dobe itodiid.
JOB 15:26 Ar dule-isgana Bab-Dummad-asabin ise-urwar gunaigusad, ar Bab-Dummad-ourwega, sigu-abgaed-sommed urwedgi ega oyonai gusad.
JOB 15:27 ”Ar dule-isgana amba wagar-dukwa-dukwa-nika-inigwele, degi, saban-dummad-inigwele,
JOB 15:28 neggwebur-ayaraledgi mai guoed, negmar-ollo-ollo-siidgi gudii guoed, negmar-aimukudanimaladgi mai guoed.
JOB 15:29 We-dule-isgana, bar ibmar-ibedga guosulid, e-ibmar-nuegan-nikadi bela e-ibe bergudoed, e-nainumar, bela e-ibe surgudbaloed.
JOB 15:30 Burgwedgi wakinnosulid, sapi-gannar-ainiardaed soogi-gummakeyob guoed. Ar Bab-Dummad unnila e-bunnogedgi we-dule-obelogoed.
JOB 15:31 Dule-isgana, ibmar-baisurmaladgi-yardaklediid iege, ibmar-baisurmaladgi-bengudisulid iege. Ar we-ibmarmargi gwen ibmar-nued amiosulid, we-ibmarmar, binsaledid.
JOB 15:32 Igi sapi e-sikleged-ibagan-idu sikleddae, e-anagan aramakosuli sikleddae, deyob, we-dule-isgana burgwidoed.
JOB 15:33 Igi uva-dub-e-san, amba yoo-nue-gue batiddae, degi, igi olivo-sapi e-durbamar-ainissuli berguddae, deyob, dule-isgana bergudoed.
JOB 15:34 Degidbali, dule-isganamar e-anagan nikuosulid, degine, manigi-emar-binsaed-gamaladdina, e-neguya bela soogi gummakoed.
JOB 15:35 Dule ibmar-isgana-imakedgi-binsaed, ibmar-isgana imaknonikoed, e-gwagegi unnila emar-yardakedgi binsadiid.”
JOB 16:1 Job Elifaz-abin weyob sogded:
JOB 16:2 “We-ibmar bukidargus an weyob itodanikid, bemar-ibmar-soged gwen an-bendaksulid.
JOB 16:3 ¿Ar bemar-yogasaar-sunmaked geg bergumarsi? ¿Ar ibiga geg bemar an-ies imakmala?
JOB 16:4 Ar bemar an-gunaiyob be gunanaimogana, an bemarga deyob sunmaksamogaled. An bemargi-yolelega, gaya-nueganbi bemarga sunmaksamogaled. Bemar-wiledakeyob an bemarga nono-ege-ege imaksabaliled.
JOB 16:5 An-sunmakedgi an bemar-ogannosmalaled. Bemar ibmar-nunmak-itodimaladi, an-sunmakedbali gadi-gadi be itosmalaled.
JOB 16:6 ”Ar an sunmaknaid gwen an-bendaksulid, ar gwen anga ibmar-nunmak-itonaidi osulosulid, ar an sunmaksurbalile, gwen anga surgusurbalid.
JOB 16:7 Bab-Dummad napiragwadba an-obelosad, an-neguyaginmaladse-bakale bela obelosad.
JOB 16:8 Bab-Dummadse nue an galesgunaid, nue angi yolesgunaid. An-uka-dunnumakega an-ibe imaksad, degisoggu, garagus an dakleged.
JOB 16:9 ”Bab-Dummad nue anse urwed, an ese balegillenaid, nue-ibitos itoleged. Achu-angi-nugar-oyonaiyob gunaid, e-isdaradga an-imaksad.
JOB 16:10 An-isdarmalad angi dododmalad, an-wagar ogotemalad. We-dule-isdarmalad buladik angi yoledmalad.
JOB 16:11 Bab-Dummad dule-isganamarse-ibitogega an-imaksad, dule-gakansamaladse ibitogega an-imaksad.
JOB 16:12 Iduardina, an bogidik gudiinad, emisgindi, Bab-Dummad nue an-wiosad, dukar-walaba an-ganonikid, saga-saga an-imaksad. Bela-bela angi yolenonikid.
JOB 16:13 E-sigu-mimalad nue an-ebirisad, e-sigumar, an-sabangi sabe-sabe-yolenonisulid, bela an-samurmar, napase yaarmakded.
JOB 16:14 Bia an naibigusa, agi gannar angi yolenonidaed, bila-onoged-duleyob angi gwisgunonikid.
JOB 16:15 ”An-naibi-itodiid-oyogegala, an wile-itoged-mor-yonai gualid. Napayala an gudii gualid.
JOB 16:16 An boedba an-wagar ginnitibigusad, an-ibyamar-dakleged guduregus dakleged.
JOB 16:17 Degi-inigwele, an dule-emar-sabsur-imakedsulid, Bab-Dummadse innikigwadgi an gordiid.
JOB 16:18 ”Ar an burgwenonisundibe, napnega, an-ibmar-oakalossulid-barsognai gusana gadin.
JOB 16:19 Ar dule-an-barsogoedi nibneggi maid. Nibneggine, dule-an-ular-sunmakoedi maid.
JOB 16:20 Ar an-ai an-irwa-goledid, an an-ai-asabin ise-boar an gunaid,
JOB 16:21 adi, an-ai an-ular Bab-Dummadse golegar. Ar igi dule na e-ai-bendakega sunmake, deyobi, an-ular sunmakegar.
JOB 16:22 Bar an birga-suitii naosulid, an-burgwed-ibagande, bato mosad. Gwen an bar aibirosulid.”
JOB 17:1 Job sogdebalid: “Napi an iche-iche bunnomaid, an-ibagande nue-bergudanikid, neg-uan bato an-edarbemaid.
JOB 17:2 Dule-emargi-dodomaladbi unnila an-ebiris-gunanaid, emide, a-dulemarbi an dakdisunnad.
JOB 17:3 ”Bab-Dummad, be an-ular mani-bennukega be an-bendakdage. ¿Ar doa bar an-bendakdagosunna?
JOB 17:4 Bab-Dummad, we-dulemar-ibe be ebinsaed oburusad. A-ulale, amar nakwegala be imakosulid.
JOB 17:5 Ar dule manibina e-ai-urmakdibe, na e-mimmigan-burgwed daknonikoed.
JOB 17:6 ”Bab-Dummad, dulemar-angi-dodogar-sunmakega be imaksad, aka an-wagargi-wiiakmalaga be imaksad.
JOB 17:7 Ibmar-nunmakedba bar an nue ataksurgusad, bela an garbigus dakleged.
JOB 17:8 Dule-nuegan an-dakalile, geger an-dakardamalad. Degidbali, we-dulemar dule-isganamargi uluddamalad.
JOB 17:9 Degi-inigwele, ar dule-innikidaedi, e-gudiidbali, bur nued gudii guoed. Dule-ibmar-oakalossulidi, bur bule gangumaid.
JOB 17:10 ”¡Dagmala! Anse gatik gwisgudamala. Ar an wisid, ar bemar-abargi dule-binsaed-ibed gwen gudisulid.
JOB 17:11 An-bergued-ibagan nue-walikgusad, an-ibmar-abeged gwen anga gusulid, degine, an-ibmar-imakoye-sogsad, gwen anga gusurbalid.
JOB 17:12 We-dulemar neg-mutikid neg-ibginedyob dakdamalad. Amba neg mutikile, sogdedamalad, neg oibodaniye.
JOB 17:13 ¿Ibu bar an edarbosunna? Unnila napa-yaba-dogedbi an napid, negsichidgi an mai guoed.
JOB 17:14 Ar neg-uan an-babga guoed, nusmar an-nanga, an-gwenadganga gunonimogoed.
JOB 17:15 Degisoggu, ¿bia bendakleged-igar an amiosunna? ¿Bia ibmar-nued bar anga danikosunna?
JOB 17:16 An ibmar-nued-edarbediid anba bergudoed, anba napaga gudmogoed.”
JOB 18:1 Degine, geb Bildad Súah-neggweburgined, Job-abin-sogded:
JOB 18:2 “¿Sana be sunmaked bogilegoe? Binsaed-nikaa be sunmakena, anmar nuedgi sunmaksaled.
JOB 18:3 ¿Ibiga ibdulamaryob be anmar-dake? ¿Ibiga binsaedsurmaladyob be anmar-dake?
JOB 18:4 Ar be urwed doggussoggu, abali, na be dukin wionaid. ¿Ar degidbali, napaneg swiri naguoye be binsasi? ¿Ar be-sogedba akwamar ainiroye be binsasi?
JOB 18:5 ”Ar dule-isganamar-e-gwallu akitoed, e-soo-gaedi baligaosulid.
JOB 18:6 Dule-isgana-e-neguyagine neg sichiledoed, e-gwallu-gasiid akitoed.
JOB 18:7 Dule-isgana gandikidba-nanaed bergudoed, degine, e-igar-mesisadgi dukin yardaklegoed.
JOB 18:8 Na e-nanadiidba dukin yardakledii guoed, dukin e-sakigi galenai guoed,
JOB 18:9 e-nagmatarba galegoed, egi bar noosulid, bela egi apurnai guoed.
JOB 18:10 Dule-isgana-iduale, napagi dukuar dub bukwad, adi, nadapile, egi galegegar.
JOB 18:11 Dule-isganaga neg-gwayed nagunonikid, gwayed eba sorba gudiguad.
JOB 18:12 Bonigan-egi-yoleged bogigunaisulid, dule-isgana ukudba belagus nadapid.
JOB 18:13 E-ukamar, boniganse ibitonaid, e-arganmar, e-nagmar, burgwedanikid.
JOB 18:14 Dule-isgana na neguyagi-baisur-binsadiid bergusad, emisgindina, burgwed-igarse nadapsunnad.
JOB 18:15 Dule-isgana-e-neguya, soo-sailase bela ibitosad. E-ibmar-nikadi, soo-azufreʼse bergusad.
JOB 18:16 Igi sapi-saila, e-malimar, e-anagan, dinguddae, debayobi, dule-isgana gued.
JOB 18:17 We-napneggi bar dule-isganagi binsalegosulid, e-nug-dummarba-megisad bela bergunonikoed.
JOB 18:18 Dule-isgana neg-meegwadgi-gudiidi, negasichidse barmelledoed, we-napneggi-gudiidgi ononnolegoed.
JOB 18:19 Dule-isgana na e-neggweburgi mimmigan, gwen obegosulid, e-gudigusadgi, gwenadgan gwen obegosurbalid.
JOB 18:20 Dulemar dad-nakwedsik-bukwamaladi, degine, dad-argwanedsik-bukwamaladi, dule-isgana-deyob-gusad geger itomaloed. Degisoggu, gwayed egi nagunonimaloed.
JOB 18:21 Weyob dule-isgana bergued, dulemar-Bab-Dummad-akudakdimalad weyob bergued.”
JOB 19:1 Degidbali Job, Bildad-abin-imakded. Weyob sogded:
JOB 19:2 “¿Sanagwadse bemar an-wionai guoe? ¿Sanagwadse bemar angi-sunmaknaid indakmaloe?
JOB 19:3 Bemar angi gannar-gannar yolenanaidi, ¿bemar bingesurmarsi?
JOB 19:4 Ar an nue-isgusye soglegele, angi siido, an na wargwen gunaid.
JOB 19:5 Bemar bur anba dule-nuedye sogmarsunde, emide, an-isgusadba be angi dododmalad.
JOB 19:6 Bemar wisgumalargebed, Bab-Dummad weyob an-imaknaid, ar Bab-Dummad e-sakigi an-gasa gunaid.
JOB 19:7 ”Aisaar an binnasuli gornainad: ‘¡An-oburgwebimarye!’ Dule-wargwensaale, gwen an-itosulid. An bendakleged egisnai-inigwele, gwen an-bendaksurmalad.
JOB 19:8 Bab-Dummadi an-idu igar edusad, gege bar an obake gusad. An-nanaedbali negasichidbi an-idu nasiksad.
JOB 19:9 Bab-Dummadi, an-ibmar-bukidar-nikadi bela an-ibe sunonikid. An-nug-dummarba-gued bela an-ibe obelononibalid.
JOB 19:10 Sapiyobi, bela an-obelosad. An-ibmar-edarbediid, sapi-e-saila-bergusayobi an-ibe obelosad.
JOB 19:11 Bab-Dummadi nue angi dummad-urwenaid, e-isdaradga an-imaksa gunaid.
JOB 19:12 Bela e-bila-onomalad an-ebiris ambikunonimalad, an-dordoneg-ebiris bukunonimalad. Napa-arsanyob-nakwemai sobsamalad degi, angi gwisgunonimalad.
JOB 19:13 ”Bab-Dummadi an-gwenadgan-angi-banguega imaksad, an-aimarse-bakale, angi bangudmalad.
JOB 19:14 An-gwenadgan an-iedmalad, dule-magar-an-dakdimalad an-iedmarmogad.
JOB 19:15 An-neggi-gudimalad aku an-dakdemalad, bunormar-anga-arbadimaladse-bakale, dule-baidiyob an-dakdemalad.
JOB 19:16 An-maiga-gudiidse an gotedaenad, gwen an-abin-imaksurdaed. Amba ise-wilegar an gordibe, amba an-itodasulid.
JOB 19:17 An-gaya-yapannedde gwen nabir-yapansulid, an-ome ima an-itoged. An-gwenadgan-gargwenmaladse-bakale, imasun an-daked.
JOB 19:18 Burwiganase-bakale, angi dododmalad. An-dakarmalale, biir naddamalad.
JOB 19:19 An-aimarbela imasar an-dakdemarmogad, an-gwenadganbela angi aibitemalad.
JOB 19:20 An-garmar bus-bus gusad, an-san bar daklesurgusad. Unnila napi an bunnodiid.
JOB 19:21 An-aimar, nue-wile be an-dakmala, ar Bab-Dummad nue an-wionaid. ¡Nue-wile be an-dakmala!
JOB 19:22 ¿Ar ibiga Bab-Dummad-an-wionaidyob bemar an-imaknaimarmoga? ¿Ar bemar an-wionanaid baisur-itomala?
JOB 19:23 ”Bitigine an-sunmakedi gardagi narmaklegena yeerban, gardagi narmakar megisana yeerban.
JOB 19:24 An-sunmakedi akwagi degisadegu narmakar megisana yeerban, esgoro-madaregedgi degisadegu narmakar megisana yeerban.
JOB 19:25 An nue-wisid, an-Bab-Dummad-An-Ollor-Imaked dula maid. We-dule dummad-an-wilenaidgi an-ogwisguoed an nue-wisid.
JOB 19:26 An-san bela bergussundibele, amba an-ibyagwar an Bab-Dummad-dakedsegad.
JOB 19:27 Amba Bab-Dummad-dakoedi an nue-wisid, an-sunnagwad an dakoed, dule-baid dakosulid. We-ibagan an nue bela-bela edarbediid.
JOB 19:28 ”Bemar sogbalid: ‘Anmar egi yolegoe, ar a-dulegi isgued nue-maid.’
JOB 19:29 Nue salakarmalo, es-suidse ibitodamalar. We-es-suidgi Bab-Dummad dule-isgana obeloged. Bemar wisgumar, Bab-Dummad anmar-wilub-daked maid.”
JOB 20:1 Weyobi, Zofar Naamat-neggweburgined, Job-abin sogded:
JOB 20:2 “An we-ibmar-itosad sunmakebier an-imaked. An-binsaed-oburusadba sunmakebier an itoged.
JOB 20:3 We-ibmar-sunmaklesad-an-itosadi, isdarsunna an-imaked. An ibmar-wismogadba an abinsamogargebed.
JOB 20:4 ”Neg-gusad be nue-wisimakaled, gebesailanagine, we-napneggi dule-aidenonikid-akale,
JOB 20:5 dule-isgana-werguedi sikwas nagudaed. Unnila sikwas yeer-itodii gudidaed, bato yog-berguar naddaed.
JOB 20:6 Dule-isgana-e-san-dummarba-imakedi, amba nibnegse warmakdibe, dule-isgana-e-nono amba mogir-ebudibe,
JOB 20:7 we-dule, e-ibmar-isgana-berguddaedyobi bergudoed. E-aimar sogdemaloed: ¿Bia we-dule nade?
JOB 20:8 We-dule gabdaklegedyobi bergudoed, negburgan-daklegedyobi sikwas daklegoed.
JOB 20:9 Dulemar, we-dule-isgana-daksagusmalad bar dakosurmalad. E-neguyagi-gudigusmaladse-bakale, bar dakosurmalad.
JOB 20:10 We-dule-isgana-e-mimmigan, dule-wilegana-wiolesad bendakedsegad. We-dule-isgana-e-mimmigan, dule-wilesmalad-ibe ibmar-nuegan-susmaladi gannar ukedsegad.
JOB 20:11 Dule-isgana sapingwagwadgine, gandik na itodiile, ibagwengi amba neg-urba dogedsegad.
JOB 20:12 ”We-dule ibmar-isgana ibnuedga imakdiid, ibmar-ochiganayob dakdiid.
JOB 20:13 Gwen ibmar-isgana metebigudisulid, aka egi wergudiid.
JOB 20:14 Igi-dule ibmar-ochigwad dogdar-masale, saban-nunmaked ega ukdae, deyobi, ibmar-isgana dule-isganaga naibe-e-gichiyob gunonikoed.
JOB 20:15 Ibmar-bukidar-emar-yardakedgi-amisad gannar e-ibe sulegoed. Bab-Dummad-sogedba gannar e-ibe bela sulegoed.
JOB 20:16 Dule-isgana-e-isguedi naibe-e-gichiyob gued, we-gichigi dukin burgoed.
JOB 20:17 Bela moli-nunis-bukidar, achanis-bukidar, diwar-ariomaiyob-guedgi gwen wergudii guosulid.
JOB 20:18 Ibmar-bukidar-amisadi, gannar uknai dakledagoed, gwen egi werguosulid, egi ibmar-nued amiosulid.
JOB 20:19 Dule-isgana dogdar dule-wilemalad wiosad, gwen negmar-e-sobsasulid emar-ibe susbalid.
JOB 20:20 ”We-dule-isgana sulibinsa ibmarbina-itodii gusad, gwen ibmar-nikad itossulid. Bela ese ibmar sulemai gusad.
JOB 20:21 Ibmar gwen abin sigissulid, bela ese sulesad. A-ulale, e-ibmar-nasgumaid bergudoed.
JOB 20:22 Ibmar-bukidar-nikadbali, sulibinsa-itodii gudoed, degidbali, ega boni-dummagan nonikoed.
JOB 20:23 Dule-isgana ibmarba nue-yeer-itodiidgine, Bab-Dummad egi yolenonikoed, egi ise-urwar gwichigunonikoed.
JOB 20:24 Dule-isgana aisaar gingimar-esgorogi-sobaledgi wakinbi-gudagoenad, sigu-esgoro-gordikidgi ibitogoed.
JOB 20:25 Sigu-esgoro-gordikidbiid egi yolenonikoedi, ungebigudagoenad, sigu-duku binagi buudu-noedi ungebigudagoenad. Dobedbali, surbinsa itodoed.
JOB 20:26 Negasichidi, dule-isgana-edarbenaid, soo-dule-ogaed-abesulidi, dule-isgana-obelogoed, e-negse-bakale, ogumakoed.
JOB 20:27 Nibneg, dule-isgana-e-isgusad magar-dakle imaknonikoed. Napneg, dule-isgana-isgusad barsognonikoed.
JOB 20:28 Bab-Dummad-urwenonikoed-ibagine, dule-isgana-e-neg-bukwad, dii-dummad-muredba seledoed.
JOB 20:29 Weyobi, Bab-Dummad dule-isganaga bergued nasiksad. Weyobi, Bab-Dummad, dule-isganaga bergued-igar mesisad.”
JOB 21:1 Agine Job abin-sogded:
JOB 21:2 “Bemar nue an-sunmaked itomala, adi, bemar nabir gadi-gadi an-imakmaloed.
JOB 21:3 An sunmaknaile, mer sulibinsa alled-itomalo. An sunmaked-bergusale, bemar allebier, allemaloed.
JOB 21:4 ”An-urwenaidi, dulemarbo an urwenaisulid. A-ulale, geg an san bargaed.
JOB 21:5 Nue be an-dakmar. Geger be an-dakmaladba, gaya be gamaloed.
JOB 21:6 We-ibmargi an binsaddibe an gwakiddaed, bela an-abaganmar iii naddaed.
JOB 21:7 ¿Ibiga dule-isganamar amba dula-gudinanae? Aka bur bule nasgumamaid, deyob seredgumamaid.
JOB 21:8 Dule-isganamar e-mimmigan-nasgumai daked, e-waganmar-nasgumai daked.
JOB 21:9 Dule-isganamar e-neguyagi neg-bogidikid-nika gudidamalad, dobedsuli gudidamalad, Bab-Dummadse gwen sabsur-odurdaklesurmalad.
JOB 21:10 Dule-isgana-e-molimar-bebe-nikad e-dula-bakmalad sunsogmaladid. E-moli-omegandina, mimmigan-nikualile, gwen e-ibe mellesulid.
JOB 21:11 Dule-isgana-e-mimmigan sibad-wawaadyob abarmakdidamalad, dodonaigusmalale, oallenagusdamalad.
JOB 21:12 Gar-tambor-goledbali, gar-arpa-goledbali, namakdedamarbalid. Gar-gammu-goledbali, wergunaidamarbalid.
JOB 21:13 Ar dule-isganamar-e-gudiidi, nueganbi gudidamalad. Burgwidmalale, nuedgi burgwiddamalad.
JOB 21:14 Dule-isganamar Bab-Dummadga sogdedamalad: ‘Mer be anse gole, anmar Be-Igar-Maidba nanabisurmalad.
JOB 21:15 Anmar e-nug-odummogega, Bab-Dummad-Bela-Gangued-Nikadde, ¿doasunna? Anmar ese gorye sogele, ¿ibu-nued egi amilesunna?’
JOB 21:16 Dule-isganamar na e-ibmar-nuegan-nika-guega egi sisulid. Bipisaale, amar-binsaed-isgana-ukedba an binsaed galegosulid.
JOB 21:17 ”Dule-isganamar geg burgwe gudimalad. Undar iba-suitii gudidamalad. Dule-isganamar boni-dummaganba-gar-itodii dasurmalad.
JOB 21:18 Dule-isganamar, gagan-dinnagwadyob, burwa-dummadba-selemai dakledisulid. Dule-isganamar, burwa-ooredba gaganyob-selemai dakledisurbalid.
JOB 21:19 Anga sogdamaloed, Bab-Dummad dule-isgana-e-mimmiganbi sabsur-odurdakoye, e-babgandi, odurdakosurye. Bab-Dummad bur bule e-babgan sabsur-odurdakena gadin, adi, magar na itomaloed.
JOB 21:20 Dule-isgana e-wilegoed, e-ibyagwar na daksun. Dule-isgana, Bab-Dummad-Bela-Gangued-Nikad-sabsur-e-odurdaked itosun.
JOB 21:21 Dule-isganamar bar undar-gudii guosulidbali, e-sorba-e-gwenadgan-beoedi, gwen bai dakosulid, gwen egi binsaosulid.
JOB 21:22 ”¿Doa Bab-Dummad binsaed-nuegan-nikuega odurdakosunna? Bab-Dummad bur emar-wilubdaked maid, nuga-nikamaladse-bakale, ese wilub-daklemalad.
JOB 21:23 Abar-dulemar nuchukwagwadgi burgwemalad, nue yeer-neg-itodimaladgi burgwemalad, nue bogidikid-gudiidgi burgwiddamalad.
JOB 21:24 Ibmar-bukidar-nikaa gudidamalanad, san-nuedi, bonisuli gudidamalanad, deyob burgwiddamalad.
JOB 21:25 Abar-dule sulibinsa-isdar-itodii burgwiddabalid, gwen ibmar-nuedgi-wergudsuli burgwiddamalad.
JOB 21:26 Bela we-dulemar napa-yaba-burgwarmamaile, emarbi gumalad. Napa-urba nusbiini mamai gumaloed.
JOB 21:27 ”Ar bemar-binsabukwadi an wisid, unnila bemar an-wiogedgi binsabukwad.
JOB 21:28 Bemar-binsananaid an wisbalid. Bemar binsabukwad: ‘¿Bia we-dule-nuga-nikad-e-neg-dummad nade? ¿Bia we-dule-isgana-e-neg nade?’
JOB 21:29 ¿Dule-bukidar-igarba-nanamaladse be egissurmarsi? ¿A-dulemar-sunmaked be nue-itosurmarsi?
JOB 21:30 Dule-isgana bonigan-nonikile, akar-gusurdamalad. Sabsur-odurdakleged-ibagi, san-onosdamalad.
JOB 21:31 ¿Doa dule-isganaga e-gudiidgi akar sogosunna? ¿Doa ega asabinmakar ibmar sogosunna? ¿Doa dule-isgana sabsur-odurdakosunna?
JOB 21:32 Dule-isgana-burgwisar, neg-uanse-selesdibe, e-neg-uangi dule-nakulemalad ogwichilesdaed.
JOB 21:33 Neg-uanse-e-bardakmalad bukidar ainiardaed. Napa-nuedgi digles mesilesdaed, nuedgi bogidik mesilesdaed.
JOB 21:34 ”Degite, ¿igi bemar an-gwage gadi-gadi imakosunna? Yogasaar be anga sunmaknanaimalad, bemar anga ibmar-sognaid inniki anga sunmaknanaisurmalad.”
JOB 22:1 Agine, Temán-neggweburgined-Elifaz, Job-abin sogded:
JOB 22:2 “Dule-gwensak binsaed-nikarbadibe, ¿Bab-Dummadgala ibnuedga gue? Suli. Dule-deyobid na dukin ega ibnuedga gued.
JOB 22:3 ¿Be-innikidaedgi Bab-Dummad-Bela-Gangued-Nikad ibmar-nued amisi? Suli. Ar gwen ibmar-nued egi amisulid. ¿Be-nued-nanaedgi Bab-Dummad ibmar-nued amisi? Suli. Ar gwen ibmar-nued egi amisulid.
JOB 22:4 ”Ar Bab-Dummad sabsur bega ibmar-sognaile, degi, bega igar itonaile, ar be e-dobegudiidbarsulid.
JOB 22:5 Ar be-isgued-doggus-merguedba, degi, be-isgued-bargalesulidba, deyob be-imaknaid.
JOB 22:6 Be-gwenadgan bese ibmar-egisdanidibe, gwen be ibmar-abesulidgi, gandikidgi, e-ibe ibmar-anar, mor be susdaed. Dule-wilemalad-ibe mor bela be susdaed, uka-swana be metedaed.
JOB 22:7 Dule-ukudmaad-gudimaladga, gwen gobed be ukdasurbalid. Dule-masbina-gudimaladga, be gwen mas ukdasurbalid.
JOB 22:8 Be dule-buled megissoggu, dule-nainu-ibed be megissoggu, be binsasanad, ani an napa-ibedye.
JOB 22:9 Omegan-ei-sui-burgwismaladga, gwen ibmar-uksasuli be barmiddaed. Sergan-satemalad-ibe be ibmar bela susdabalid.
JOB 22:10 A-ulale, emisgindi galesnaiyob be itoged, ukiagwar nue-dobe be itoardaed.
JOB 22:11 Negsichidgi-gudiiyob be itoged, a-ulale, ibmar-daksuli be-imaked. Diwar-dummadse-selemaiyob be itoged.
JOB 22:12 ”¿Bab-Dummadi nibneggi maisursi? ¡Be dakena! Niisgwamar-dikasurnanaid matusuli begi nanaid.
JOB 22:13 Emide be soged: ‘Bab-Dummad, ¿ibi wissunna? ¿Bab-Dummad sunna negsichid-abalagi emar-wilubdaksi?’
JOB 22:14 Be sogbalid: ‘Mogirmar Bab-Dummad-idu bipirmaknaiye, mogir-gudureged ebirisnaiye. Agala, Bab-Dummad gege anmar-dakye.’
JOB 22:15 ”Dule-isganamar-galagwensuli-nanasmaladba, ¿be nanamogode?
JOB 22:16 Be ebinsao, we-dulemar nuchukwagwadgi burgwisgusmalad, diwar-dummadba ibmar-selegedyobi bergusmalad.
JOB 22:17 Aka Bab-Dummadga sogdegusmalad: ‘Mer be anmarse gorye, Bab-Dummad-Bela-Gangued-Nikad, ¿ibu be anmarga imaksunnoye?’
JOB 22:18 Bab-Dummad ega ibmar-nuegan-ukdii gusanad. Andina, dule-isgana-e-binsaed-isganaba binsaed-galeged, sate.
JOB 22:19 ”Dule-nuegan, dule-isganamar-ibitonanaid-daksagua, yeer-itosmalad, dule-ibmar-oakalodisurmalad egi dododmalad, sogdemalad:
JOB 22:20 ‘Anmar-isdarmalad burgwismalad, e-ibmar-nikad soose bela ei-gummaksad.’
JOB 22:21 ”Job, Bab-Dummad-urbaligwa be nanae, ebo be igar nudake, Bab-Dummad gannar ibmar-nikuega be-imakoed.
JOB 22:22 Bab-Dummad-e-sunmakmaid be nue abingae, e-igar-durdakleged be-gwagegi nue-sedii be gue.
JOB 22:23 Bab-Dummad-Bela-Gangued-Nikadse be gannar wilesakwaa atakdedibe, be-neguyagi ibmar-isgana be obangusbardibe, bela be nugunonikoed, weligwar be gunonikoed.
JOB 22:24 Be or-nuegan-nikadi napagi be miele, Ofir-e-ormar diwar-akwamar-imbagi be miele,
JOB 22:25 Bab-Dummad-Bela-Gangued-Nikad be-or-nuedga gunonikoed, Bab-Dummad be-mani-nuedga gunonikoed.
JOB 22:26 Bab-Dummad-Bela-Gangued-Nikad yeer-ito be-imakoed. Bab-Dummad-asabinni bar be bingeguosulid.
JOB 22:27 Bab-Dummadse be gotele, be-itogoed. Bedi ega ibmar-imakoye-sogsad be imakedsegad.
JOB 22:28 Be ibmar-imaksokalile, bega ibmar-nueganbi gudoed. Be-iduale gwallu-ganaiyob bega neg-nagunonikoed.
JOB 22:29 Bab-Dummadi, dule-san-dummarba-imakdiid, san-bipii imaked. Dule-na-san-bipi-imakdimalad-e-nugdi, odummoged.
JOB 22:30 Bab-Dummadi, dule-ibmar-oakalodisurmalad bendaked. Be dule-innikidaedba Bab-Dummad be-bendakoed.”
JOB 23:1 Job, Elifaz-abin-imakded:
JOB 23:2 “Emi amba an naibi-itoged-abalagi sunmakoed, amba Bab-Dummad sabsur-an-imaknaid.
JOB 23:3 An wisina, bia Bab-Dummad mai, degi, an e-maidse sunna nabir moena,
JOB 23:4 an san-bendakegala an bela ega ibmar sogsaled.
JOB 23:5 Bab-Dummad-ibmar-sogbied an wisgusaled. Degidbali, an magar itononikiled.
JOB 23:6 Bab-Dummad angi sabsur-gwisguega, ¿e-gangued angi oyogergebsi? ¡Suli! Angi gwisgussuliled, unnila an-itonai gusaled.
JOB 23:7 Dule-innikidaedi, Bab-Dummad-asabinni sunna na san-bendaked. Andina, anga-igar-naboged-asabin degisadegu ollorgusaled, ibmar-oakalossuliyob an-daksaled.
JOB 23:8 ”Aisaar an Bab-Dummad-amidiinad. An dad-nakwedsik nadele, an daksulid, dad-argwanedsik nadbalile, an daksurbalid.
JOB 23:9 Bab-Dummad dad-nakwed-argan-sapiledsik-gunaile, an daksurbalid. Dad-nakwed-nuedsik-gunaile, an daksurbalid.
JOB 23:10 Bab-Dummaddi bela an-gudiid nue-wisimakaled. Bab-Dummad an-wilubdakye-sogele, or-swilimakaleyob an gusaled.
JOB 23:11 Bab-Dummad-Igarba an nue-nanadiid, e-sogedba an nanadiid, an egi bangudisulid.
JOB 23:12 E-Igar-sogsagusadgi an bangudisulid. E-ibmar-sogsadi, an-gwage-ulubgi an sediid.
JOB 23:13 ”Bab-Dummad na ibmar-imakbiedba imakmaid, ¿doa ega akar-sogoe? Na e-abegedba ibmar imakmaid.
JOB 23:14 Bab-Dummad, igi-an-imakoye na sogsa, deyob an-imakoed. Ibmar-baigan-bukidar ayobi, na e-abegedba imakoed.
JOB 23:15 Agala, an Bab-Dummad-asabin dobee itodaed. We-ibmargi an bela binsaddibe, nue-dobe an itoddaed.
JOB 23:16 Bab-Dummad-Bela-Gangued-Nikadi an-niga-egwachad, nue-dobed anga uksad.
JOB 23:17 We-ibmar-bela-angi-gunaidi, an-gayamakosulid, an nunmaked-dummad-itonai-inigwele, amba an ibmar sogedsegad.”
JOB 24:1 Job sogdebalid: “¿Ibiga Bab-Dummad-Bela-Gangued-Nikadi, dule-isgana-odurdakleged-iba nasiksuli? Adi, dule-Bab-Dummadba-nanaimalad dakmaloenad.
JOB 24:2 Dule-isganamar nainu-suegala, nainu-dikar-abingunaidgi dogdedamalad, degine, molimar-atursasmalad akwedidamalad.
JOB 24:3 Sergan-satemalad-ibe moli-uayasuid susdamalad. Ome-ei-sui-burgwisad-ibe ibmar-ganikid-anar moli-bebe-nikadi susdamarbalid.
JOB 24:4 Dule-isganamar dule-wilemalad-igarba-abingualir, e-idu ainirmalaga imaked, e-dobedba e-idu dukumalaga imaked.
JOB 24:5 Dule-wilemalad, moli-uayasuid-sapurbalidyobi wakudaryalaba negsulidganba masbina gudidamalad. Nega-dulesulidganba e-mimmiganga mas amied.
JOB 24:6 Dule-wilemalad emar-nainuganse ibmar-obichad-weegala, naddamalad. Dule-isganamar-e-uva-nainugi uva-san-babatisad weenai damalad.
JOB 24:7 Dule-wilemalad mutikgusale, morsurmaladbali uka-swana megiddamalad. Atued-sulidbali dambed-abalagi neg-oiboardamalad.
JOB 24:8 Yalaganba dii-wiedba waradik gudidamalad, dukued-sate gudidamalad, unnila akwa-imbaba dukubukwadamalad.
JOB 24:9 Dule-isganamala, goe-bab-sated e-nan-annik sumalad. Egi-mani-ganikid-anar dule-wilemalad-ibe mimmigan sudamalad.
JOB 24:10 Dule-wilegana mor-satedbali, uka-swiri gudidamalad. Emar-nainugi ibmar-gwag gwaada semaidamalad. Degidbali, ukudbali burgwiddamalad.
JOB 24:11 We-dule-wilegana, olivo-gwallu-egurega e-naged-akwa obipirmaknagusdamalad. Uva-e-nis-onogegala egi annanagus damarbalid, degi-inigwele, ukudmaada gunanaidba burgwiddamalad.
JOB 24:12 Neggweburgine dule-burgwedanimamaid-e-akiginned magar itoleged. Dule-undar-naibigusmalad aisaar Bab-Dummadse bendakleged egisnaidamalanad, degi-inigwele, Bab-Dummad gwen bai dakdasulid.
JOB 24:13 ”Gwenna-gwenna dulemar igar-nued abedasurmalad, isdarsunna dakdamalad. Igar-innikigwadba nanabisurdamalad, ibmar-isgana-imakdiid magar itosurmalad.
JOB 24:14 Dule-emar-gindaked dule-wilemalad-oburgwega, degi, ibmar-abesa-gudimalad-oburgwega, oibosayala gwisguardaed. Neg-mutikgudele, dule-ibmar-atursaedga binyiddabalid.
JOB 24:15 Dule-galagwensuli-e-omesulidbo-nanaed neg-mutikgued edarbedidaed, weyob sogdidaed: ‘Dule gwen an-dakosuli.’ Deyob dukuakwaa gudidaed.
JOB 24:16 Dule-ibmar-atursaed mutikidba emar-negse dogdaed. Neg-ibgindina e-negyaba dukumaidaed. Isdar neg-ibgined dakdaed.
JOB 24:17 Bela we-dule-isganamargala, neg-ibginedi mutikidyob gued. Neg-mutikid-neg-galagwensur-guardaed bur abedamalad.”
JOB 24:18 Zofar weyob sogded: “Dule-isganamar dii-iirmakmaiyobi gwae-gwae wakitedamalad, e-nainu-naidi nue-ukabsales naid. A-ulale, gwen dule e-uva-nainugi gannar bar arbabidasulid.
JOB 24:19 Igi dad-dummad-gaedi, neg-diopisulidi, boo-batenaid berguega-imake, deyobi, dule-isgudimaladi burgwedse berguddamalad.
JOB 24:20 Dule-isganamar-bergudele, e-nangan bar egi binsaosulid. Amar napa-urba-dogdele, nus-masga gudoed. Dulemar gwen dule-isganamargi bar binsadii guosurmalad. Igi sapimar olaledae, deyobi, gumaloed.
JOB 24:21 Dule-isganamar ome-geg-mimmi-baked, sabsur-imakdidamalad. Degi, omegan-ei-sui-burgwismalad-sabsur imakdidamarbalid.
JOB 24:22 Degi-inigwele, Bab-Dummad e-garganguedba dule-isganamargi yoleged. Bab-Dummad uluddibe, dule-isganamar geg abin gwisgued.
JOB 24:23 Bab-Dummad dule-bulegan-dobsuli imaked, degi, egi bensuli imaked, degi-inigwele, Bab-Dummad amba we-dulemargi nakuleged.
JOB 24:24 Amar-e-nug unnila sikwas odummoleged, yog-berguar naddaed. Dule-isganamar oros-welegeyob gumalad, gagan-gummakeyob gummakmalad, yoga-berguar naddaed.
JOB 24:25 ”¿Doa anga sogosunna, an-sunmaknaidi gakanye? Dule gege anga soged, we gakanye.”
JOB 25:1 Súah-neggweburgined-Bildad, Job-abin weyob sogded:
JOB 25:2 “Bab-Dummadi, dule-gandikidid. Dobesar dule-imakedid. Bab-Dummadi bela nibneggine igar-ilemakmaidid.
JOB 25:3 E-sordagan-merguedi, gege ebisleged. Bela dulemargi Bab-Dummad-e-gwallu gaed.
JOB 25:4 ¿Sunna dule ibmar-oakalossuliyob Bab-Dummad-asabinni gwisgusi? ¿Sunna dule Bab-Dummad-asabinni islidikidga na san-imaksi?
JOB 25:5 Ar niibela Bab-Dummad-asabinni bollee gaed, niisgwamarbela e-asabinni gannarba gasurmogad.
JOB 25:6 Dule-bulesunna, nus-musgimakmaiyob gudiid, dulede, napa-nusyob gued.”
JOB 26:1 Job Bildad-abin weyob sogded:
JOB 26:2 “¿Weyob be dule-gegudiid-bendaksunde? ¿Weyob be dule-nollogudiid nue-bendakye be sogsunde?
JOB 26:3 Ibiyobi dule-ibmar-wissulidga binsaed-nued-uke an be-dake. Ibiyobi nue-binsaed-nikaye na be san oyoge.
JOB 26:4 ¿Doa weyob-sunmakedgi be-odurdaksa? ¿Doa weyob sunmakega be-imaksa?” Bildad, Job-abin-sogdebalid:
JOB 26:5 “Dule-burgwarmalad demar-wilad-urbali-mamaidi, Bab-Dummad-asabinni, wawanmakmaid.
JOB 26:6 Burgwarmalad-meged-galumar bela Bab-Dummad-asabinni, magar daklemamaid. Burgwed-igar Bab-Dummad-asabinni, dukumaisulid.
JOB 26:7 Bab-Dummadi, bela nibneg-naid neg-olloledgi nasiksad, napnegdi, ibmargi-akanaisuli nasiksabalid.
JOB 26:8 Bab-Dummadi, mogirmargi dii nasiksabalid, Bab-Dummadi, mogir nabir dii-bargae imaksabalid.
JOB 26:9 Bab-Dummadi, nii-dalunaid-eduegala, irwa mogir nasiked.
JOB 26:10 Bab-Dummadi, magatibali demargi igar-maiyob imaksad, adi, nabir neg-ibgined, neg-mutikidgi bachiki-nai guegar.
JOB 26:11 Bab-Dummad-urwed-abinni nibneg-bargamaladi, dobedbali wawanmakdedamalad.
JOB 26:12 Bab-Dummadi, e-ganguedgi demar-uurmaked obogileged. Bab-Dummadi, e-ibmar-wisidbali ibdula-Rahabʼye-nugad ese ibitosad.
JOB 26:13 Bab-Dummadi, e-bunnogedgi mogir oaisakied. E-argangine, ibdula-dummad-demargined oitoged.
JOB 26:14 We-ibmar unnila-sikwas Bab-Dummad-e-gangued oyonaid. Anmar unnila-sikwas, Bab-Dummad-e-gangued itonaid. ¿Doa Bab-Dummad-e-gangued bela magar itogosunna? Dule gege magar itoged.”
JOB 27:1 Job weyob sogdebalid:
JOB 27:2 “Bab-Dummad-Bela-Gangued-Nikad-nuggine, degine, anga igar-nudaksulid-nuggine, sae-itogega an-imaked-nukine, ise-sogar an soged:
JOB 27:3 Amba an dula-gudiidgine, an nue garmakdiidgine,
JOB 27:4 an gaya-isgana sogosulid, gakansaale an ibmar sogosulid.
JOB 27:5 Bemar-angi-sunmakedi nabir be sogmarye an sogosulid. Amba an dula-gudiidgine an ibmar-oakalossurye an sogoed.
JOB 27:6 An ibmar-oakalossursoggu, an sikirmakosulid, gwen akar an binsanaisulid. An dula-gudiidgine gwagegi akar an itogosulid.
JOB 27:7 ”Bab-Dummad, dule-isganamaryobi an-isdarmalad be obeloge. Dule-inniki-nanasurmaladyobi an-isdarmalad be obeloge.
JOB 27:8 Bab-Dummad dule-isganamar-oburgweye-sogele, ¿bia bar bendakleged amimalosunna?
JOB 27:9 Amargi boni-dummagan gwichigunonikile, Bab-Dummad amar-ese-binnasuli-goled itogosulid.
JOB 27:10 ¿Ar dule-isgana Bab-Dummad-Bela-Gangued-Nikadgi wergudisi? ¿Ar Bab-Dummadse bane-bane gordibarsi?
JOB 27:11 An bega Bab-Dummad-e-gangued oyogwelo. Bab-Dummad-Bela-Gangued-Nikad-e-igarmar an bega odukuosulid.
JOB 27:12 Ar bela bato bemar we-igarmar daksabinmaladde, degite, ¿ibiga bemar yogasaar sunmaknanaisunna?”
JOB 27:13 Zofar Job-abin weyob sogded: “Bab-Dummad-Bela-Gangued-Nikadi dule-isganamarga we-igarmala sabosad. Bab-Dummadi dule-galagwensurdamaladga sabsur-odurdakleged-igala, weyob mesisad:
JOB 27:14 Ar dule-isgana mimmigan-ichesur-nika-inigwele, amba es-suidgi burgwemaloed, a-e-mimmigandi, ukudmaada gudii gudmaloed.
JOB 27:15 Dule-isgana amba besmalale, boniganse burgwemaloed. E-omegan-bemaloedi, gwen e-suimar-burgwismaladga boosurmaloed.
JOB 27:16 Dule-isganamar, amba mani-bukib ukubyob-onmaksale, mormar suar-ena-ena nikuele,
JOB 27:17 dule-nued-daedi a-mormar yononikoed, dule-inniki-gudiid a-mani sunonibaloed.
JOB 27:18 Dule-isgana-neg-sobedi sikwi-uu-baisur-ayareyob gued, dule-nakuleged-neg-matar-baisur-ayared-sobsadyob e-neg dakleged.
JOB 27:19 Dule-isganamar, napi-mani-ibed-gudii gabiddamalad, neg-oibosale, mani-sate oiboardamalad. Dule-wilegedga nadmalad.
JOB 27:20 Dule-isgana neg-ibgine, gwayed-dummad egi nagunonidaed. Neg-mutikgusale, burwa-dummad egi gordanikiyob itodaed.
JOB 27:21 Burwa-uereged sabsur-gornonikile, we-dule-isgana gwen abin gwisguosulid, burwa-dummadi e-neg-maid sedoed.
JOB 27:22 Bab-Dummadi, dule-isganagi sabsur-yoleged, dule-isgana Bab-Dummadgi, aisaar wakinnoeyob itodaenad.
JOB 27:23 Weyobi, dulemar, dule-isgana-ibitonai-dakarmalale, yeer dakdamalad, ega argan ogotedamalad, ega sabsur-wigoddamalad.”
JOB 28:1 Job sogdebalid: “Manimala, ormala napa-urba amileged, sooyagi diree imaklesiid.
JOB 28:2 Esgoromala, napa-yaba onolesiid, esnon-goromardi akwamargi onolesiid.
JOB 28:3 Dule-akwa-nuegan-amimaladi, bar negsichid-nai daksurmalad. Negsichidgi-akwamar-bukwadi ese onilebukwad. Yaamargi-akwa-nuegan-nikadi bela onimalad.
JOB 28:4 Neg-uluba-nanaledisulidgi yaamar akwimalad. Matusuli yaa akwimalad. Dubba bannumakar aidedamalad. Dulemargi dikasuli neg-urba gunanaidamalad
JOB 28:5 Yaa-matusulidgine arbananaidamalad, neg-uere-itoledaed-yabali gunanaidamalad, abali, masgunned amididamalad.
JOB 28:6 A-yabali, akwa-dummagangine akwa-nued-zafiroʼye-nugad onomalad, a-napa-yabali, or amimarbalid.
JOB 28:7 Sulubmar we-yaa-gwisaled dakdisurmalad, sulub-e-atakedi, we-yaa-gwisaled-e-gulluse ataksulid.
JOB 28:8 Ibdula-ursirmaladbela, a-yaa-gwislegaledyaba dogdisulid. Achumigurbela ese walikgudisulid.
JOB 28:9 Dule-akwa-nuegan-amimaladi akwa-nuegan-amiegale, akwa-dutusulid sarsonagusdamalad, akwa-e-sailamarse-bakale, onodamalad.
JOB 28:10 Akwa-dummagan-akwimalad a-yaba dii-oiirmakega yaa-dummagan omesdamalad. Dii-iirmakmaidbali akwa-nuegan-bukwadi bela magar dakdamalad.
JOB 28:11 Akwa-nuegan-amiegala, diwar-e-sailase warmakdamalad. Ibmar-dukuar-bubukwad bela negache onodamalad.
JOB 28:12 ”Degite, ¿bia binsaed-nued-nikagued danisunna? ¿Bia gurgin-nuegan-nikulegedde danimosunna?
JOB 28:13 Binsaed-nued-gargeguedi dule wissulid. We-binsaed-nuedi we-napneggi danisulid.
JOB 28:14 Muu-billi-maidbela soged: ‘Binsaed-nuedi, angi danisurye.’ Demarbela sogmogad: ‘Binsaed-nuedi, angi amilesurmoye.’
JOB 28:15 Or-nuegangine, binsaed-nuegana amilesulid, manigine, binsaed-nuegana baklesulid.
JOB 28:16 We-napneggi amba or-Ofir-bukwadgi binsaed-nuegan gege bakleged. Amba akwa-nued-óniceʼye-nugadginbela gege bakleged, akwa-nued-zafiroʼye-nugadginbela gege baklebalid.
JOB 28:17 Binsaed-nuedi, bur or-nueganba, akwa-diamanteʼye-nugadba bur gargerbasailad. Olua-or-nuegangi-sobaledbo geg binsaed-nuedi ogwaleged.
JOB 28:18 Binsaed-nuedi, akwa-bisgi-nueganba ibnuedid, dimmurgiid-e-akwa-yeerdaklegedba bur sunsogedid.
JOB 28:19 Akwa-nued-topacioʼye-nugad Etiopíaʼgi-nikadi, gege binsaed-nued-nikagued-ebo yobi gued. Binsaed-nued-nikaguedi gege or-sunsogedgi bakleged.
JOB 28:20 ”Degite, ¿bia binsaed-nued-nikaguedde danisunna? ¿Bia gurgin-nuegan-nikulegedde noarsunna?
JOB 28:21 Binsaed-nued-nikagued bela emargi dukumaid, nuumarbela gege binsaed-nued-nikagued baramimogad.
JOB 28:22 Bergulegedi, degi, burgwedi, weyob soged: ‘Unnila, anmar binsaed-nikagued-e-nug-dummarba-guedbi itodimoye.’
JOB 28:23 ”Unnila Bab-Dummadbi binsaed-nikagued-igar wisid. Binsaed-nuedi bia daniki, bia binsaed-nikaguedi amilebali, nue-wisbalid.
JOB 28:24 Bab-Dummadi, we-napneggi galu-sukunmar-bubukwadse-bakale, wisid. Soggwensaale, napneggi-ibmar-bukwad gwen egi yoggusisulid.
JOB 28:25 Bab-Dummadi, burwaga e-gangued mesnaigua, degine, muu-billiga e-dungued mesnaibargua, binsaed-nued-nikaguedi daksagusad.
JOB 28:26 Bab-Dummad, dii-wiedga igar mesnaibargua, mar-goledga igar mesnaibargua,
JOB 28:27 binsaed-nued-nikaguedi daksagusbalid. Bab-Dummadi binsaed-nued-e-gargegued daknaigusbalid, degine, binsaed-nued-nikagued wilubdaknaigusbalid, geb binsaed-nued-nikagued bargannononikid.
JOB 28:28 Bab-Dummad dulemarga sogded: ‘An-dobekwaa-nanaedi, binsaed-nued-nikaadaedye. Degine, ibmar-isgana-imakedgi-banguedi, ibmar-wisi-daedbarye.’ ”
JOB 29:1 Job gannar sunmakdebalid, weyob sogded:
JOB 29:2 “Bitigi Bab-Dummad-nue-an-akwedigusad-ibagan-nasadyobi, gannar an gudigusana gadin.
JOB 29:3 Ar negsichiganba dobsuli an gudidaed, ar Bab-Dummad gwalluyob an-idudidaed.
JOB 29:4 An sapingwaunni, amba an gannarba-gudidaeunni, Bab-Dummad nued-angi-binsaedba an-neguya mer akarguega imakdaed.
JOB 29:5 ”Bab-Dummad-Bela-Gangued-Nikad anba gudidaeunni, an-mimmigan an-ebiris gudidaed.
JOB 29:6 Deyob-gudiidgine, an-mesegine wilub-obicha mas an nikagudaed. Olivo-gwallumar e-akwa-eguredgi wilub-obicha ariomaidaed.
JOB 29:7 Igar-itogegala, neggwebur-e-yawagak-noedse an signadele, dule-igar-nabomalad-abargi an signadele,
JOB 29:8 sapingan, yog-ainiar an-iduar imakdamalad, sergana, yog-gwichibin an-abin imakdamarmogad.
JOB 29:9 Dule-nuga-nikamaladi, bogi-ambikusdamalad, bar-sunmakdasurmalad. An-abin e-gaya gasa imakdedamalad.
JOB 29:10 Dummadga-negdakmamaidse-bakale, an-asabinni binnasdikii sunmakdedamalad, imbagwenale bar-sunmaksurdamalad.
JOB 29:11 Dulemar an-sunmaked itodmalale, nued angi sunmakdamalad. An-dakdemalale, an-nug ogannoddamalad.
JOB 29:12 Dule-wilegana, anse wiledanikile, an bendakdaed. Sergan-sated, an bendakdabalid. Ar dule-e-bendakmalad sated.
JOB 29:13 Dule-na-bela-itodimaladi, angi ise-nued binsadamalad. Omegan-ei-sui-burgwismalad, an yeer-ito imakdabalid.
JOB 29:14 An gusgu igar-innikigwad an imakdaed, an igar-sogmaidba ibmar imakdaed. An we-ibmar-imakedi, mor-nued-yoeyobi anga gudaed, gurgin-nued-sieyob anga gudaed.
JOB 29:15 Dule-aku-atakmaladga e-ibyayobi an gudii gusad. Dule-yaku-yaku-nanamaladga, e-maliyobi an gudii gusbalid.
JOB 29:16 Dule-ibmar-abesa-gudimaladga, an e-babyobi gudii gusad. Dule-yar-baidsikmaladi, an bendaksabalid.
JOB 29:17 Dule-isganamar-e-gangued an obelosdabalid. We-dulemar, bar emar-wiogega an imaksasulid.
JOB 29:18 ”An weyob binsadii gualid: ‘Undar an gudii guoye, an-neggi nuedgi sereddii an burgoye.
JOB 29:19 Andi sapi-diwar-naba-gwichiyobi gued, sapi-anagan boo-mutik-batedgi-obgwichiyobi an gued.
JOB 29:20 An-nug-dummarba-maid berguosurye, an-gargangued berguosurye,’ an binsadii gualid.
JOB 29:21 ”Dulemar an-sunmaked-itodmalale, ise-itogar bukusdamalad. Bogidikgi an-binsaed-uknaid itosigisdamalad.
JOB 29:22 An-gayaburba-sunmakedi nue yeer itodamalad, dule gwen an-abin-imakdasulid.
JOB 29:23 An-sunmaked edarbedidamalad. Igi dii-wied-edarbeledae, deyobi, an-sunmaked-edarbedidamalad.
JOB 29:24 An dulemarga allee gualile, geger an-dakdamalad. An-ega-allee gusale, e-niga ganguddamalad.
JOB 29:25 Ani an ega igar oyodaed, ibi-igarba namaloe, degi, ani an idumaidaed. Rey e-sordamar-abargigudiiyobi, an emar-abargi gudidaed. Dule-gwage-naibi-itodiid-baisur-itoge-imakedyob an gued.”
JOB 30:1 “Emisgindi, sapingan-burwigana anga alliardamalad. Ar we-sapingan-e-babgana an-achu-sibad-wawaad-edarbemalad-edarbega an imaksasuliled.
JOB 30:2 Ar anga-arbamarye-sogele, ¿ar ibu wis anga imaksamalale? Ar bar gargangued nikasurmalad.
JOB 30:3 We-dulemar, neg-mutikidba negsulidganba gaamakdidamalad, ukudmaada gudidamalad, boniganba galitodidamalad.
JOB 30:4 We-dulemar ibmar-gunnegala, gagan-moododba ibmar-gwag wedidamalad, gagan-e-malimarse-bakale, gundii damarbalid.
JOB 30:5 Neggweburginbela isdar we-dulemar-dakdamalad, atursamaladye gin sogdamalad.
JOB 30:6 Agala, we-dulemar dian-dinnaganaba gudidamalad, akwa-yaba, degi, ibegan-imbaba gudii damarbalid.
JOB 30:7 Moli-uayasuid-goledyobi gagan-bulaba gormakdidamalad, degine, ikoganba doge-doge gudidamarbalid.
JOB 30:8 We-dulemar dule-abelesurmaladid, agala, neggweburgi ononnolesmalad.
JOB 30:9 ”Emisgindi, aka we-sapinganga an dodogedga gued, amar-oalledga an gued.
JOB 30:10 Ima an-dakdemalad, deyob-an-dakedbali angi bangudmalad, angi wii-minanai gusdamalad.
JOB 30:11 Emidi, Bab-Dummad bela-bela mesagwar an-imaksasoggu, dule-an-bendaked-satesoggu, anga bela-bela sabsur-ibmar sognanaid.
JOB 30:12 Dule-isganamar an-argan-nuedsiki angi noarmalad, an-oitogegala, an-idu dukuar ambikusmalad. Angi-gwisguegala, napa-nakwemai sobsamalad.
JOB 30:13 An-obelogegala, an-iduar gwisgunonimalad. Dule-bargaed-sate, an-obelononimalad.
JOB 30:14 Igi bila-onomalad igar-ollo-imaksamaladba danidae, degi, galumar-ese-ailasmalad-birgi danidae, deyobi angi gwisgunonimalad.
JOB 30:15 Ise an gwayale gusad, an nug-nika bar an itonadsulid, an-bendakleged mogirmar-yoggudeyob berguded.
JOB 30:16 ”Emisgindi, nue an-san bergudani an itoged, nunmaked-dummad-ibagan an-wionaid.
JOB 30:17 An-garmarse-bakale, nunumaker an itogusad. Abali, an mutikidba galitomaidaed. Nunmaked gwen anga bergu an itosulid.
JOB 30:18 Bab-Dummadi dukarba-an-gasagunaiyob an-wionaid. Akus-akus-bunnonaiyob an-imaknaid.
JOB 30:19 Bab-Dummad olligangi an-barmeted, ukubyobi, degi, buruyobi an-imaksad.
JOB 30:20 ”Bab-Dummad, an bese gornainad, gwen be an-itosulid. Be-asabinni an gwisgunonikinad, gwen be an-daksulid.
JOB 30:21 Bab-Dummad, gwen-sabe be an-imaksulid, be-gangued-nikadba be an-baregindiid.
JOB 30:22 Igi ibmar burwaba-seleddae, deyobi, be an-imaksad. Burwa-oored-dummad-abarse be an-barmeted.
JOB 30:23 Bab-Dummad, neg-uan-urba be an-semaid an nue-wisid. Dule-burgwisar-seleddaedse be an-semaid.
JOB 30:24 ”Dule-galakusmaidi, geg be bar sarsoged, dule-suli-suli-itogedgi-bendakleged-egisnaidi, geg be bar wioged.
JOB 30:25 ¿Dule-boniba-galitodimaladba an bonai gussursi? ¿Dule-wilemalad an wiledaksasursi?
JOB 30:26 Anga-ibnued-gued an edarbediidgine, aka ibmar-isgana anga gunonikid. Ibagan-nuegan an edarbediidgine, aka ibagan-isgana anga nagunonikid.
JOB 30:27 Bane-bane sulibinsa an itodiid, gwen baisur-itoge an gudisulid. Unnila boniganba bane-bane an galitodiid.
JOB 30:28 An wile-itodiid, an bodiidbiid. Aisaar an, an-dulemarse bendakleged egisnaidaenad, degi, an bendakleged abenaidaenad, gwen an-bendaksurdamalad.
JOB 30:29 Emide, achu-sapur-e-gwenadganayob an gunonisunnad, irmon-senigan-e-gwenadganayob an gunonisunnad.
JOB 30:30 An-ukamar bela gudure naded, an-ukamar an-ibe yaas-yaas naded. Uellegedbali an-uka-diopisuli an itoged.
JOB 30:31 An-gar-arpa-goledi, wilesakwaa gorgusad, an-gar-gammu-goledi, wilesakwaa gorgusbalid.”
JOB 31:1 Job sogdebalid: “An weyob sogsanad: ‘An ome-gwensak-dakalile, bipisaale galagwensuli an egi binsaosurye.’
JOB 31:2 ¿Ibu-ibmar-nued Bab-Dummad-Bur-Biriginedgine amilege? ¿Ibu-ibmar-nued Bab-Dummad-Bela-Gangued-Nikadgi nikulege?
JOB 31:3 ¿We-odurdaklegedde dule-isganamargadsursi? ¿Boni-dummagan-amilegedi dule-isganamargadsursi?
JOB 31:4 Bab-Dummad, ¿an-ibmar-nued-imakdiid daksursi? Bab-Dummad, ¿an-nanadiid daksursi?
JOB 31:5 ”An igar-isganaba nanasale, an gakanginbi sunmaksale,
JOB 31:6 Bab-Dummad an-wilubdaksundo. Geb agi Bab-Dummadi, an-ibmar-isgana-imakdisulidi dakoed.
JOB 31:7 An ibmar-nued-imakedgi bangusale, ibmar-isgana-imakedgi an binsadiile, ibmar an atur-imaksa gudiile,
JOB 31:8 an-ibmar-digsadi bela ani gunmarsundo. An-nainugi-ibmar-naidi bela ani sumarsundo.
JOB 31:9 ”Ome-gwensakse an binsaed galesale, dule-an-neg-dikarbamaid-e-ome an argadii gusale,
JOB 31:10 an-ome dule-baid-omega gusunnodo, dulemar an-omebo galagwensuli gumarsunnodo.
JOB 31:11 Ar deyob an ibmar imaknonikile, binged-dummad anga gunonikiled. An sabsur-odurdaklegergebed.
JOB 31:12 Soo-dummad-neg-gasayob gusaled, an-nainumar bela gummaksayob gusaled.
JOB 31:13 ”An-maiga-gudimalad anga sognonimalale, be anga igar-maidba imaksasurye, an ega igar nudakedsedaed.
JOB 31:14 Degisulile, Bab-Dummad igar-itogega anse gollalile, ¿igi an abin sogosunna?
JOB 31:15 Bab-Dummadi, we-napnegse-an-odenonikidid, an-maiga-gudiid-odenonimogadid, ¿A-Bab-Dummadi emarbi sapidukugi anmar-mesissursi?
JOB 31:16 ”Dule-wilemaladi ibmar-abealile, an ega ukdidaed. Omegan-ei-sui-burgwismaladi, an ukudmaada imakdisulid.
JOB 31:17 Bipisaagwale walagwen an mas gundisulid, sergan-satedga an mas ukdii gusad.
JOB 31:18 An sapingwad-akale, we-dulemarga e-babyob an gudii gusad. An gwalulesad-akale, omegan-ei-sui-burgwismalad-bendakdii an gusad.
JOB 31:19 Dule-wilemaladi an morsuli imakdii gussulid, an-wagab dule-wilegedi morsulidbali dambedba burgwissurgusad.
JOB 31:20 An dule-wilegedga an-sibad-wawaad-mor uksagusad. Degidbali, nuedye anga sogsagusad.
JOB 31:21 Dule-sergan-satedgi an dodossulid, igar-itolealir, an-garganguedgi egi yolegodeeye an binsassulid.
JOB 31:22 An yamo-gakansanaile, an-swidamar bela batesunnodo, an-surgan-e-garmar-abingunanaidi bela bus-bus nosunnodo.
JOB 31:23 An gusgu Bab-Dummad-emar-sabsur-odurdakedgi dobekwaa gudiid. Bab-Dummad uludele, e-gangued-asabin an gwisgussuliled.
JOB 31:24 ”Orginbi an atakdii gussulid, orbina sulibinsa an itodii gussulid.
JOB 31:25 An ibmar-bukidar-nikadba an na san dummarba imaksasulid. An-arbasadba bukidar-ibmar-amisadgi an na san-dummarba imaksasulid.
JOB 31:26 Deginbali, dad-ibeler-ganai an dakdaed, nii-bela-bela-ganaid nadapi an dakdaed.
JOB 31:27 Degi-inigwele, bipisaagwale, an emar-wagab we-e-nugmar odummodisulid, arbakebela an odummodisurbalid.
JOB 31:28 An we-ibmar-nug odummosana, an odurdaklegedinad. Bab-Dummad-Bur-Biriginedgi an dummad-nosan-itole.
JOB 31:29 ”An-isdarmalad boniganse sabsur-odurdaklenaile, egi burgunai an gudisulid. Egi boni-dummagan danikile, ega gwen an yeer itodisurbalid.
JOB 31:30 Degine, an-isdaradgi ukabsaale, an sunmakdisulid. Ibiga wemar geg burgwedibeye, an sogdisurbalid.
JOB 31:31 Dule-gwensak an-negse-ataknadele, masgi an ogunnedsedaed. Ukudmaada an barmidisulid.
JOB 31:32 Dule-ainebalid an-neggi an nuekwaa ogabdiid, neg-magaba an ogabdisulid.
JOB 31:33 Dulemar-isgued-odukuedyobi an-isgued an odukudisulid. Dulemar-dobedba, an-ibmar-oakalosad odukuodeeye an binsadisulid.
JOB 31:34 An-gwenadgan-isdar-an-dakmalad-abin an boo sigissulid, amar-abin an gayamaklessulid.
JOB 31:35 ”Bitigi Bab-Dummadi an-itosana gadin. Bab-Dummad-Bela-Gangued-Nikadi an-abin-imaksun. An-sunmaksadi, gardagi ise-narmakar an messunnad. Bab-Dummad angi akar-sogbiele, anga narmakar mesmosunna.
JOB 31:36 Bab-Dummad-akar-angi-sogoedi, nuedgi an sedii guoed, ologurginyobi an sii gudigusaled.
JOB 31:37 Bab-Dummad-asabin an gwisgudapile, bela an na barsogoed. Gwen an Bab-Dummad-asabin bingeguosulid.
JOB 31:38 ”An-nainumar angi gwisgunanaile, bela napa-imulesmaladi boedbimalale,
JOB 31:39 gwenadgan-ibe, ibmar-gwag-bennussuli an guchale, degine, e-ibmala-yardaknai an gusale,
JOB 31:40 an-nainugi trigo-digaled-muchubbi, gagan-ikobiid ainisundo. An-nainugi cebada-digaled-muchubbi, gagan-isgana ainisundo.” Job-sunmaked wese bergunaid.
JOB 32:1 Job-e-aimar-warbaagwadi magar-itosmargua, Job na ibmar-oakalodisurye-sognaidi, bar abin-imaksasurmalad.
JOB 32:2 Degine, sapin-gwensak Eliúʼye-nugadi, Job-sunmaked-itosgua, Jobʼde inniki-gudiiye, degine, Bab-Dummad egi ichakwa-binsamaye sogsad-itosgua, Jobʼse sabsur-uluded. Eliúʼde Baraquel-machid, Buz-e-wagwad, dad-dummad-Ramʼgi danikidid.
JOB 32:3 Deginbali, Eliú, Job-e-aimar-warbaagwad nue-Job-abin-imaksasurmaladba, degi, Jobʼgi-ataknaigusmaladba amargi uludbalid.
JOB 32:4 Eliú iduar sunmakbigusanad. Ar Eliúʼdi bur sapingwasoggu, e-aimar-eba-selegan-inse Jobʼga sunmaked edarbisgweled, adi, a-sorba sunmakegar.
JOB 32:5 Ar Eliú dakdegua, e-warbaagwadi, gwen bar sunmaksurmala, degidbali, na san bargassuli, nue-ulude gusad.
JOB 32:6 Geb Buz-e-wagwa Baraquel-machi-Eliú sunmakded. Weyob sogded: “Andi amba bemar-imbagi sapingwagwad, bemardi bato uka-sele-selebagusad. A-ulale, an bemar-abin-sunmakegala, dobe sunmakdaed.
JOB 32:7 ‘Bur ibmar-wismalad-inse sunmakmaloye, an binsasad. Uka-selebamalad-binsaed-nikamalad-inse, neg-dakdiidba sunmakmaloye an sogsad.’
JOB 32:8 Bab-Dummad-Bela-Gangued-Nikad-e-burba, dulegi-maidi magar neg-ito emar-imaked.
JOB 32:9 Dule-serganbi binsaed-ibegan gusulid, dule-birga-seleganbi magar-ibmar-ito gusulid.
JOB 32:10 ”Degisoggu, bemar, nue be an-itomalo, an ibmar-soggwen-soged nikamogad.
JOB 32:11 Bemar sunmaknaigua, boo an bemar-itosad. Bemar-binsamalad, degine, bemar binsaed-akar-akar-sognanaigusmalad, an nue itosad.
JOB 32:12 Nue an bemar-itosii gusad, bemar gwen oyossulid, Jobʼde nue-nodii gusye. Deginbali, Job-sunmaksad bemar nue-abin-imaksasurbalid.
JOB 32:13 Mer be anga sogmalo: ‘Anmar binsaed-nikaa gumarye. Bab-Dummadbi Job-abin-imakye, dulemardi Job-abin-imaksurye.’
JOB 32:14 Job anga sunmaksasursoggua, an bemaryob Jobʼga ibmar sogosulid.
JOB 32:15 ”Job, wemar-warbaagwadi gege bar be-abin-imakmalad, ar aku itonanaid, e-binsaed galakudmalad.
JOB 32:16 Wemarde bar sunmaksurmarsoggua, ¿geg an bar sunmakmosunde? Suli. Andi sunmakoe.
JOB 32:17 An ibmar-soged nikamogad, an-binsaed an bega sogmogoed.
JOB 32:18 An ibmar sogebier-itosoggua, burba-angi-maidi sunmakebier an-imaksoggua, an ibmar sogmogoed.
JOB 32:19 An-gwage-itolegedi, vino-e-bugluyaba-mus-musmaksiiyob an itoged. Vino e-buglu-binidgi-siidyob-marebieyob an itoged.
JOB 32:20 An sunmakergebed, adi, an nabir ollorgudoed. An bega ibmar sogergebed.
JOB 32:21 Emarba-nai an sunmakosulid, emar-nabir-obinsaega an sunmakosurbalid.
JOB 32:22 Yogasaar-gakansaale an emargi nued sunmakosulid. An deyob imakdele, Bab-Dummad-we-napnegse-an-odenonikid, sabsur-an-odurdako itole.”
JOB 33:1 Eliú sogdebalid: “Job, wis be an-itomogo, an-sunmakoed nue be itogo, bela an bega ibmar-sogoed nue be itogo.
JOB 33:2 Emiskwaa an bega sunmaksokalidi, bela an bega ibmar sogedsegad.
JOB 33:3 An-sunmakoedi, an-gwagegi innikigwadba an bega sunmakoed. An-gwabinduku gakansaale bega ibmar sogosulid.
JOB 33:4 Bab-Dummad-Burba an-obinnisad, Bab-Dummad-Bela-Gangued-Nikad burba anga uksad.
JOB 33:5 Be nabir an-abin-imakele, be an-abin-imakodo. Sunmakega be guakwaa sigo.
JOB 33:6 Bab-Dummad-asabinni, anmar anbogwa na emalad, anmar napsagi danikid.
JOB 33:7 Degisoggu, mer be an-abin gwayo, an begi obinsurmogad.
JOB 33:8 ”Job, be-sunmaked an wis-itosad, weyob sognaiyob an be-itosad:
JOB 33:9 ‘An isgudisurye, isgued angi maisurye, an ibmar oakalodisurye.
JOB 33:10 Emisgindi, Bab-Dummad, ibmar-oakalosadyob an-dakdeeye, e-isdaradyob emisgindi an-dakmaiye.
JOB 33:11 Bab-Dummadi naggi esgoro-dubgi an-edichaye, bane-bane angi nakuledigussunye.’ ”
JOB 33:12 Eliú sogdebalid: “Job, degiirdi nabir, an bega sogo. Be we-ibmar-sogsad, be noar soged. Ar Bab-Dummadi dulemarba bur dumma maid.
JOB 33:13 ¿Ibiga Bab-Dummadgi be deyob sunmake? ¿Bab-Dummad be-abin-imakergebye, be sogsunde? Degisuli, be dummad nodiid.
JOB 33:14 Ar Bab-Dummad anmarga sunmaked, gusgu bane-bane anmarga sunmakmaid, degi-inigwele, dule itosurdaed.
JOB 33:15 Imbagwena, anmar-ise-gabar-maidgine, yakumaksiidgine, Bab-Dummad gabdakedba anmarga sunmaked, negburgan-dakedgine anmarga sunmakdabalid.
JOB 33:16 Bab-Dummad anmarga sunmaked, ibmar-danikidgi anmar-owisogedba dule-ogwayed.
JOB 33:17 Bab-Dummad ibmar-isganagi-banguegala anmar-owisobalid, mer anmar san-dummarba-imakdiguegala, anmarga sunmaked.
JOB 33:18 Mer burgwed-igar-itogegala, mer es-suidse-burgwegala, anmarga sunmaked.
JOB 33:19 ”Imbagwenale, Bab-Dummad anmar-odurdakegala, boniganba gala-itogega anmar-imaked anmarga abagan-nunmakedi uked.
JOB 33:20 Degidbali, san-nuegan-gullemalad, isdarsunna be dakdoed, degisoggu, mas-gunbi bar be itogosulid.
JOB 33:21 Anmar-abaganmar bela malemai gudoed, garmar-mamaid magar-daklege gudoed.
JOB 33:22 Be-burba burwaga-gued-ibaganse warmakdanikid, neg-uangi-meged modanikid.
JOB 33:23 ”Baliwiturmar-miligwen-bukwad-abargine (1,000), baliwitur-gwensak dule-bendakegala gwisgunonisunnad. We-baliwiturde, ibu-imakoye ega sognonisunnad.
JOB 33:24 We-baliwitur wile-dule-dakedbali, Bab-Dummadse weyob wilesakwaa egisdesunnad: ‘Bab-Dummadye, we-dule mer napa-urba-megega be imakye. Ar we-dulega ollor-gued-igar maiye.’
JOB 33:25 Agine geb, dule gannar nuchukwaa gunonikiled, bipigwaun-gudigusayob gunonikiled.
JOB 33:26 Agine, geb dule Bab-Dummadse gotoed, geb Bab-Dummad na abinsaoed. Degidbali, dule Bab-Dummad-wagar nabir daknonikoed. Degi, weligwar-itogedba na binnasur-gornai gudoed. Geb Bab-Dummad ibmar-oakalossuliyob dule-daknonikoed.
JOB 33:27 Deyob geb dule, dulemarga weyob sognai gudoed: ‘Amba an nue isgus-inigwele, an igar-inniki-maidgi yolenoni-inigwele, an sabsur-odurdaklegewilubbinye, degite, an deyob odurdaklessurye.
JOB 33:28 Ar Bab-Dummad burgwedgi nue-an-bendaknonisoggua, emisgindi, an dula-gudiidi, an nabir neg-itodisunnad.’ ”
JOB 33:29 Eliú sogdebalid: “Bela we-ibmarmar, Bab-Dummad imakmaid, ilabigwa dulemarga imakbie, Bab-Dummad na e-sogedba imakmaid.
JOB 33:30 Burgwedgi anmar-bendakmaid, degine, nued-gudii anmar-imaked.
JOB 33:31 ”Job, nue be an-itoge. Mer be sunmake. Ani an sunmaknaid.
JOB 33:32 Be ibmar-soged-nikamogale, be an-abin-imakmogodo. Be nabir sogele, an nuedgi be-itogoed.
JOB 33:33 Degisulile, nue-bogimakale, be an-itoge. Nabir-binsaed-nued-nikuega an be-imakoed.”
JOB 34:1 Eliú sogdebalid:
JOB 34:2 “Bemar-binsaed-ibegan-gumalad, nue an-sunmaked be itomalo. Bemar-nue-ibmar-wismalad, nue be an-itomalo.
JOB 34:3 Ar igi anmar-gwabin magasar yeer masgulleged-itoge, deyobi, uaya magasar gayaburba yeer itomogad.
JOB 34:4 Degisoggu, anmar, we-igar bulakwaa daksunnodo, anmar igar-nuedse bulakwaa onogoed.”
JOB 34:5 Eliú sogdebalid: “Ar Job weyob sogye: ‘An ibmar-oakalossurye, Bab-Dummaddina deyob an-daksurye.
JOB 34:6 An dule-nued-gudi-inigwele, dule-gakansaedyob daklesunye. Amba an ibmar-akar-imaksasur-inigwele, Bab-Dummaddi nue-naibi an-imaknaiye.’
JOB 34:7 ¿Ar bia be dule Jobʼyobid dakdimala? Ar we-dule unnila Bab-Dummadgi dododiid.
JOB 34:8 ”Ar Jobʼde, dule-isganaba akadigued bur yeer itodaed, dule-isganamarba bur gudii gubidaed.
JOB 34:9 Job anmarga sogbalid, ‘Bab-Dummadba-ibsalegedi, dule gwen ibmar-nued egi amisurye.’
JOB 34:10 ”Bemar dule-machergan-nue-binsaed-nikamalad, nue be an-itomalo: Anmar geg soged, Bab-Dummaddi, ibmar-isgana nabir-imakye, Bab-Dummad-Bela-Gangued-Nikaddi, sunna ibmar noar-imakye.
JOB 34:11 Bab-Dummad dule-na-ibmar-imakedbali, dulega ibmar uked. Dule-daedbali dulega ibmar imaked.
JOB 34:12 Geg anmar sogbalid, Bab-Dummad ibmar-isgana imakye. Bab-Dummad-Bela-Gangued-Nikadi, igar-inniki-maid oichobarye.
JOB 34:13 Bab-Dummad we-napneg-seega, ¿doa ega gargangued uksa? ¿Doa Bab-Dummadga negseed-igar uksa?
JOB 34:14 Ar Bab-Dummad anmargi burba-dula-maid gannar suye-sogele, anmar-bunnodiidi obeloye-sogele,
JOB 34:15 bela dule-gudimaladi bergudmalaled, dulemar bela napaga binnidmalaled.
JOB 34:16 ”Job, be we-ibmar magasar-itodibe, an-ibmar-sogoed, nue be itogodo.
JOB 34:17 ¿Sunna dule ibmar-isgana-imakdiidi, nabir negseosi? Suli. Geg gue. Degisoggu, gege be Bab-Dummad-innikigwadgi, bela-gangued-nikadgi be yoleged.
JOB 34:18 Reymar, degi, dule-dummagan isganamalale, ar Bab-Dummad gwen binsaosulid mer an oakalogodeeye.
JOB 34:19 Bab-Dummad dule-negsemaidba nagusulid. Degi, dule-mani-ibedba nagusulid, dule-mani-satedba nagusurbalid, bela emarbi daked. Bab-Dummad bela emarbi amar-imaksad.
JOB 34:20 Dulemar ukiagwar mutikidba burgwiddamalad. Dulemar oimakbukwadamalad, degi, berguddamalad. Dule-bulegan-negsedimaladi, negsediidgi dule-oakalossuli ukiagwar egwalleddamalad.
JOB 34:21 ”Bab-Dummad bela dulemar-gudiid dakmaid, bela dulemar-e-gudiidgi nakulediid.
JOB 34:22 Dule-isganamarde negsichidgi, neg-guduregedgi dukuye-sogele, gege amba Bab-Dummadgi dukued.
JOB 34:23 Bab-Dummad, dulega igar-nabogega dulega iba messulid.
JOB 34:24 Bab-Dummad dule-bulegan-negsemamaid-onogegala, igar-amiegala, emarse idaksulid. Amar-muchub dule-baid omesed.
JOB 34:25 Bab-Dummad dulemar-ibmar-imaked bela wisid, mutikidbali egi gwisgued, bela ese ibitomalad.
JOB 34:26 Bab-Dummadi, bela dulemar dakmalaga, dule-e-isguedbali, dule-sabsur-odurdaked.
JOB 34:27 Dulemar Bab-Dummadgi-banguddamaladbali, degi, eba ibsasurdamaladbali, deyob gunonidamarsunnad.
JOB 34:28 Degine, wemar sabsur dule-wilemalad-obosmalad, sabsur dule-ibmar-abese-gudimalad-wiosmalad. Degidbali, Bab-Dummad dule-wilemalad-e-ogormaked itosad.
JOB 34:29 Ar Bab-Dummad ibmar sogsulile, ¿doa ega akar sogosunna? Dule geg ega akar soged. Ar Bab-Dummad dule-idu wagar-odukuele, ¿doa e-wagar dakosunna? Bab-Dummadi, bela dulemargi nakulemaid,
JOB 34:30 adi, dule-isganamar mer negsemalagar, degi, mer dulemar-yardakdii gumalagar.
JOB 34:31 ”Job, amba be Bab-Dummadga weyob sogele: ‘Nabirye, nue an nosye, bar an begi yolegosurye.
JOB 34:32 Be an-odurdaksunye, magar-neg-itogedse be an-imakye. An ibmar-isgana-imaksadi, bar an imakosurye.’
JOB 34:33 Job, be deyob sogdibe, degite, be Bab-Dummad-obacha-inigwele, ¿Bab-Dummad bega be-ibmar-abeged uked abesunde? Sulirgebed. Andi be-ular sogosulid, ar bee be sogoedid. Degisoggu, na be-binsaedi be soge, igi na be binsae.
JOB 34:34 ”Bemar, an-itobukwadi dule-binsaed-ibeganad, be magar neg-itomaladid. Degisoggu, be anga sogmardo:
JOB 34:35 ‘Job yogasaar sunmakye, e-sunmakedi gwen binsaed-nika itolesurye.’
JOB 34:36 Ar Job-e-sunmakedi dule-isganayobi anmarga sunmaked. Degisoggu, bela-bela Job-gudiid nue-wisguleged abeleged.
JOB 34:37 Job unnila dule-isganabisulid, uayasulidbalid. Ar anmar-wagab anmargi dododiid. Ar Bab-Dummadgi, bela-belad ise-yolegar sunmaksad.”
JOB 35:1 Eliú sunmakdebalid, weyob sogded:
JOB 35:2 “Job, nabir ibmar-sognaiye be sogsunde, bede soged: ‘Bab-Dummadba bur an ibmar innikii imakdiiye.’
JOB 35:3 Emisgindi, be Bab-Dummadga weyob sogbalid: ‘¿An isguye sogele, akarsi? An-isguedde, ¿igi-be-imaksunna?’
JOB 35:4 Job, degiir nabir, an bega ibmar soggwelo, be-aimarga an ibmar sogmogwelo.
JOB 35:5 Niba be atakena, nue nuu be dakena, mogir-naid be dakena.
JOB 35:6 Ar be isguye-sogele, ¿ibugi be Bab-Dummad oakalogosunna? Ar be ichesur isgudisogele, gwen be Bab-Dummad-oakalogosulid.
JOB 35:7 Ar be nued-ibmar-imakdiiye sogele, Bab-Dummadga ¿ibu be ukosunna? Ar Bab-Dummad egi ibmar-nued amiosulid.
JOB 35:8 Ar be ibmar-isgana imakdibe, be ibmar-nued imakdibe, unnila be-abargi-gudimaladi, beba wilegoed.
JOB 35:9 ”Ar neg nue-isgusnaisoggua, dulemar na bendakleged amidimalad. Dule-bulegan-emar-wionaidgi-noegala, bendakleged egisnanaid.
JOB 35:10 Degi-inigwele, dule gwen sogsulid: ‘Bia Bab-Dummad-an-obinnisad nadye. Mutikidba an-niga-ogannoardaedi,
JOB 35:11 ibmar-durganba, bur ibmar-wisi-anmar-imakedi, ¿bia nadsunye? Sikwimarba bur binsaed-nued-anga-ukedi, ¿bia nadsunye?’
JOB 35:12 Ar dulemar Babse gornanai-inigwele, dule-isganamarsoggu, na san-odummogedginbi binsadimarsoggu, a-ulale, Bab-Dummad we-dulemar-abin-imaksulid.
JOB 35:13 A-ulale, Bab-Dummad-Bela-Gangued-Nikadi, binsarsunna-ibmar-egisnanaid itosulid, Bab-Dummad a-dulemar baisur-daked.
JOB 35:14 Amba be sogdibe: ‘An Bab-Dummad daksurye,’ degi-inigwele, amba be-igar itolegedsegad, degisoggu, be Bab-Dummad-edarbedsegad.
JOB 35:15 Bede soged, ‘Bab-Dummad wissur-urweye, wissur-emar-sabsur-odurdakye, degine, ibmar-isgana baisurdakye.’
JOB 35:16 Job, be yogasaar sunmaked, binsa-ee-be gwichid, binsaedsuli be sunmaked.”
JOB 36:1 Eliú sunmakdebalid, weyob sogded:
JOB 36:2 “Ar an Bab-Dummadgi amba an nued bega ibmar-soged-nikasoggu, mer be budar itogo.
JOB 36:3 An-bela-bela-nue-ibmar-wisid an bega oyogwelo. Abali an bega oyogoed, Bab-Dummad-an-obinnisadi innikii ibmar imakmaiye.
JOB 36:4 Inniki an bega soged, bega an gakansaosulid, an be-asabinni dule-binsaed-ibed gwichid.
JOB 36:5 ”Bab-Dummad dule-gandikidid, dule-ibmar-oakalodisulid obandisulid. Bab-Dummad gandikidid, bela magar neg-itomaid.
JOB 36:6 Bab-Dummad dule-isgana gudiguega imaksulid. Dule-wiledimaladgardi igar nabiroged.
JOB 36:7 Bab-Dummad dule-nuegan nue-akwed, dule-nuegan reymar-abargi-sigega imaked, degine, dule-nuegan-nugmar odummoged.
JOB 36:8 Ar we-dulemar esgaryagi-sigega galenonikirdi, wile-itoged egi dognonikirdi,
JOB 36:9 Bab-Dummad we-dulemarga e-isgusad ega oyonaido, degine, ega oyonaibardo, na san-dummarba-imakedbali igi-isgusmala.
JOB 36:10 Degidbali na magar itomaloed, wede Bab-Dummad ega sunmaknai, be nue-nanamarye, ibmar-isganagi be bangumarye.
JOB 36:11 Ar we-dulemar Bab-Dummadba ibsaele, Bab-Dummadga arbadele, e-burgwedse nasgumai gumaloed, weligwar-gudii gumaloed.
JOB 36:12 Ar Bab-Dummadba ibsasurmalardi, wisguosuli ukiagwar es-suidgi burgwenonimaloed, binsaedsulidbali burgwenonimaloed.
JOB 36:13 ”Dule-isganamar na sae-itodamalad. Amba Bab-Dummadse sabsur-odurdaklenaile, bipisaale bendakleged egisdasurmalad.
JOB 36:14 Bab-dummaganse-goled-neggi-dule-gambasamalad-burgweyobi, nuchukwaa burgwiddamalad.
JOB 36:15 Bab-Dummad dule-wiledimalad e-wilediidgi bendaked. E-nunmaked-itodiid, baisur-itogega imaked.
JOB 36:16 ”Job, ar Bab-Dummad bonigangi be-bendakoed, neg-nuedse be-ogwisgunonikoed, bega mas-nuegan ena be-mesegi urboed.
JOB 36:17 Emide, dule-isganamar-wilubdaklegedyob be gunaisunnad, igar-nabolegedse be gales gunaisunnad, igar-inniki-imaklegedse be odurdaklegega gunaisunnad.
JOB 36:18 ¡Degisoggu, nue salak! Abakalegi be manibina surbinsa itodager, manise be binsaed-galenai gudager, ese be baklenai gudager.
JOB 36:19 Be mani-ibedguedgi be bendaklegosulid, be-garganguedgine be bendaklegosurbalid.
JOB 36:20 Neg-mutikid be edarbedii gudager, mer abdako. Ar mutikidba dulemar obeloleged.
JOB 36:21 Nue salakar. Mer be gannar ibmar-isgana-imakedgi binsao. Ar be ibmar-isgana-imakdigusadba be wilesad.
JOB 36:22 ”Bab-Dummad na e-ganguedba gannarba maid. ¿Dule Bab-Dummadyob dule-odurdaked-saila gudii? Sate.
JOB 36:23 ¿Doa Bab-Dummadga sogoe, ibiga be deyob ibmar imaknaiye? Gege dule Bab-Dummadga weyob sogbalid, noar be ibmar-imaksaye.
JOB 36:24 Bab-Dummad-ibmar-imaked be gatik-ogannogo, ar namaklegedba we-ibmar-ogannolenai gusad.
JOB 36:25 Bela dulemar Bab-Dummad-ibmar-imaksadi dakmalad. Ar dulemar dikasuli Bab-Dummad-ibmar-imaksadi sunna bela dakmalad.
JOB 36:26 Bab-Dummad dule-dummad-maisoggu, degidbali, gege anmar e-daed baramied, e-birga-nikadi gege anmar wisgubalid.
JOB 36:27 ”Bab-Dummad anmarga dii barmimaid, dii-wiedbali diwar-enguega imakmaid.
JOB 36:28 Mogirmar-dii-owiega imaked, bela-belad dulemargi dii-owiega imaked.
JOB 36:29 ¿Doa wisguoe, ibiga mogirmar nanae? ¿Doa wisgubaloe, mar-gollalile bia noardae?
JOB 36:30 Bab-Dummadi, demargine mar-gaedi barmied, degidbali, magatiba demar-naid magar-daklege imaked.
JOB 36:31 Bab-Dummad bela dulemar-yar-baid-baidgi-bukwamalad semaid, mas-bukib ega ukmaid.
JOB 36:32 Bab-Dummad mar-dakarmakmaid e-argangi gaed, bia mar-odebie, na e-sogedba mar-odeged.
JOB 36:33 Mar-goled Bab-Dummad-maid oyoged, mar-goledi, Bab-Dummad-sae-itogedi oyoged.”
JOB 37:1 Eliú sogdebalid: “An we-ibmar-dakdedbali, an-gwage dik-dik-naded, ber an-gwage noebieyob an itoged.
JOB 37:2 Be nue itomala, Bab-Dummad-e-sunmaked mar-gollomakeyob-sunmaked be itomala, binnasuli-sunmaked be itomala.
JOB 37:3 Bab-Dummad e-mala-ibyedi, bela nibneg-gaed, e-ibyemaidi, bela napneg-ugakaasega ibyed.
JOB 37:4 Bab-Dummad-e-sunmakedi, binnasur-itoleged, e-mala-ibyedi, galesulid.
JOB 37:5 Bab-Dummad binnasuli-sunmakdele, ibmar-gegerdakleged oyoardaed. Anmar-ibmar-magar-itosulid oyoardaed.
JOB 37:6 Bab-Dummadi, boo-batedga igar-ukdaed, ‘¡Napase batemaloye!’ ega sogdaed. Dii-wiedga igar-ukdabalid, ‘¡Be-gangued-oyomaloye!’ ega sogdaed.
JOB 37:7 Bab-Dummad deyob ibmar-imakedbali, dulemar bar aineba ainidasurmalad, adi, Bab-Dummad-ibmar-imakmaid magasar dakdamalad.
JOB 37:8 Ibmar-durgan na dukuegala, e-dukued-yaba na bukusdamalad, agine na dukubukusdamalad.
JOB 37:9 Dad-nakwed-argan-nuedsik burwa-goledba, burwa-oored danidaed. Dad-nakwed-argan-sapiledsik burwa-goledba, neg-dambed danidaed.
JOB 37:10 Bab-Dummad-bunnogedbali, dii gwamakleddaed. Bela dii-dummad-naidi negdammipegwadba dutusuli naddaed.
JOB 37:11 Bab-Dummadi dii-wiedi mogirmargi urbed, degidbali, a-mogirmargi mar-ibyedi onoged.
JOB 37:12 We-mogirmar napneg-naid ebirbukwad. Bab-Dummad-ega-igar-mesisadba iirmakbukwad.
JOB 37:13 Bab-Dummad na e-sogedba dii owied, imbagwenale, dulemarga dii-wiedi ibnuedga gued, imbagwenale, dulemarga dii-wiedi dule-wiogega gued.
JOB 37:14 ”Job, nue be itogo, Bab-Dummad-ibmar-gegerdakle-imaksadgi be binsagwelena.
JOB 37:15 ¿Be wisi, igi Bab-Dummad mogirmar see? ¿Be wisi, Bab-Dummad mar-ogaega igi imake?
JOB 37:16 Degite, be soged, bela an ibmar wisye. Be anga sogdo, ¿igi Bab-Dummad niba mogirmar-naguega imake?
JOB 37:17 Emide, dad-nakwed-argan-nuedsik burwa-ued-danikidbali, mor-yoid be geger itodaed.
JOB 37:18 Bab-Dummad nibneg-egasadgi, esgoro-gordikidiyob daarmakar-nasiksadgi, ¿be Bab-Dummad-bendaksasi?
JOB 37:19 ”Anmarga be soge, igi anmar Bab-Dummad-abin-saoe. Anmardi ibmar-wissursoggu, geg anmar Bab-Dummad-abin-imaked.
JOB 37:20 Ar Bab-Dummadi an-ibmar-sogedi, ¿dule-baid-ega-soged abege? Suli. ¿Doa ega ibmar akala sogosunna? ¿Doa ese burgwebisunna?
JOB 37:21 ”Mogir dad-irwa-naid dadgi banguddibe, gege dule dad-ganaidgi ataked.
JOB 37:22 Emide, dad-nakwed-argan-sapiledsiki neg dakarmakdanikid. Bab-Dummad danikid, bela-bela e-gargangued-yeerdaklegedba danikid.
JOB 37:23 Anmar gege Bab-Dummad-Bela-Gangued-Nikadyob gued. E-gangued-maidi bipisuli maid. E-ibmar-inniki-imakedi, degine, e-igar-nabogedi yeer gangu maid, mesagwar emar-imaksulid.
JOB 37:24 Bab-Dummad, dule-na-ibmar-wisirbaye-sogdiidi, gwen ibmar-wisi daksulid. A-ulale, dulemar Bab-Dummad-dobmalad.”
JOB 38:1 Bab-Dummad burwa-ooreged-bipirmaknaidba Jobʼga sunmakded. Weyob ega sogded:
JOB 38:2 “¿Be doasunna? Emide be, an-binsaed-nikarbadgi be bengunaigu. Emide be, binsaedsuli sunmaknaigu.
JOB 38:3 Be an-abin gwisgudena, an bese egisodo, bule be an-abin-imakodibe.
JOB 38:4 ”An napneg-e-sailamar-urbenaigua, ¿bia be gudiinsunna? ¡Anga be sogena, be nue-ibmar-wisye soged!
JOB 38:5 ¿Doa napneg-naid-e-dungued imaksa? ¿Doa napneg-dungued wilubdaknai gusa?
JOB 38:6 Napneg-e-sailamar, ¿ibu-birgi bukwasunna? ¿Doa degite, e-akwasaila sisasunna?
JOB 38:7 Deunni, niis-buksurmar namaknanaigu, degi, baliwiturmar yeer-itogedba oichomaknanaigu, ¿be gudii? Be gudisulid, be sated.
JOB 38:8 ”Deunni, demar napagi-nagudgua, ¿doa ega abingued-igar mesissunna?
JOB 38:9 An demargala moryobi mogirmar nasiksagua, degi, ega garsonyobi mogirmar-gudureged nasiksabargua, ¿be gudii?
JOB 38:10 Ani an demarga abingued-igar nasiksagua, yawagak-dummaganyob ega an nasiksagua, e-yawagakgi yabiyob ega an nasiksabargua, ¿be gudii?
JOB 38:11 Demarga an weyob sogsagua: ‘Wese be warmakoed, bar be naosurye. Be-daomakedi, wese iirmakbukwa guoye,’ ¿deunni be gudii?
JOB 38:12 ”¿Negmeegwad-naguega bolegoedga be sogsa, naguye?
JOB 38:13 ¿Negmeegwad bela napneggi-naguye be sogsa, adi, dule-isganamar magar daklegegar?
JOB 38:14 Neg-meegwadbali napneg-e-yar-mullugana magar daklenonidaed, e-daklegedi morgi-morgomar-akar-akar-odolesayob daklenonidaed.
JOB 38:15 Degidbali, dule-isganamar negmeegwad-abin ambikuosurmalad, dule-isgana-e-garganguedi, bela bergunonikoed.
JOB 38:16 ”¿Ar be wila-arad-naid-solase be aideapi? ¿Bela be dii-ulakbali bipirmaksa?
JOB 38:17 Deginbali, ¿burgwed-negse be aideapbali? ¿Dule-burgwarmalad-e-galuse be arbi?
JOB 38:18 ¿Napneg-dungued be wisi? Ar be we-ibmar nue-wisile, degite, be anga sogdo.
JOB 38:19 ”Deginbali, ¿be wisbali, bia gwallu-meegwad-neg sii? ¿Be wisbali, bia negsichid-neg sibali?
JOB 38:20 ¿Sunna be we-ibmarmar e-igarmarba-moed be imake? ¿Sunna be gannar e-negse sedabali?
JOB 38:21 Be wisirgebed, ar be deunni bato be gwalulesargebed. Ar be dikasurgus gudisursi.
JOB 38:22 ”¿Ar dambed-sibudikmalad-sabolebukwad be dakapsi? ¿Dii-ologan-akwaga-binyarmalad-sabolebukwad be dakapsi?
JOB 38:23 An dii-ologan-sabolebukwadi, naibid-dummad-ibagi-ebugega an sabobukwad. Degi, bila-onoged-ibagangi-ebugega, urweleged-ibagi-ebugega an sabobukwad.
JOB 38:24 ¿Be wisi, negmeegwad bia noardae, degi, igi nasguddae? ¿Be wisi, dad-nakwedsik-burwa-goled igi onoardae?
JOB 38:25 ”¿Be wisbali, doa dii-dummad owie? ¿Doa dii-dummadba-mesa mar-ogollomakmai imake?
JOB 38:26 ¿Doa nega-dulesulidganba dii owie? ¿Doa dule-buksurmaladba napaneg oge?
JOB 38:27 ¿Doa gaganmar-aradik-oniega, dii owie? ¿Doa napa-dutuu-imakega, dii owie?
JOB 38:28 ”¿Dii-wiedde bab nikasi? ¿Doa boo ogwalulesibali?
JOB 38:29 Be anga sogena, ¿bia dii-gwamakaled soblesii? ¿Doa dii-sibudikid onisibali?
JOB 38:30 ¿Doa dii akwayob-dutusuli imake? ¿Doa demar-dummad-naid osatelegega imake?
JOB 38:31 ”¿Sunna be niisgwamar-Pléyadesʼye-nugad danar-danar-naguega imake? ¿Sunna be niisgwamar-Oriónʼye-nugad aisakiega be imake?
JOB 38:32 ¿Sunna be bolegoedba niisgwamar-danar-danar-nanaid, e-wachiba-onogega be imake? ¿Sunna be niisgwamar-Osa-Mayorʼye-nugad, degi, Osa-Menorʼye-nugad nabir-bipirmakega be imake?
JOB 38:33 ¿Be nibneg-seleged-igarmar-mamaid, be wisi? ¿Sunna be a-igarmar-mamaidba be napneg see?
JOB 38:34 ”¿Sunna be mogirga sogsale, begi dii-dummad owiye?
JOB 38:35 ¿Be-sogedba mar gotedae? ¿Be sunmakdele, bebali mala yoga ibsaardae?
JOB 38:36 Degite, be anga sogdo, ¿doa gannir-macheredga binsaed uksa? ¿Doa sikwi-gikamarga binsaed daksa?
JOB 38:37 ¿Sunna be mogirmar ebise? ¿Doa napamar-sergudele, dinnaa nadele,
JOB 38:38 dutuu-imakegala dii owie?
JOB 38:39 ”¿Sunna be achumigurmarga masgunned amie? ¿Sunna e-mimmigan masgi be omae?
JOB 38:40 Achumigur e-negyaba dukumamaile, sapur-yaba masbina gudimalale, ¿sunna ega be mas amie?
JOB 38:41 ¿Ar bee be sikwisichimar masgi omae? E-burwigana yoggusgudimalale, degi, mas-satedba ukudmaad-gudiidba, anse gordimalale, ¿ega be mas amie?”
JOB 39:1 Bab-Jehová sogdebalid: “¿Be wisi, ibu-ibagine sibad-sapurbarmalad milege? ¿Goe-sapur-mileged be dakdii?
JOB 39:2 ¿Be wisi, goe-sapur milegega nii-walabigwa nanae? ¿Be wisi sana milegoe?
JOB 39:3 Ar goe-sapur milesokalile, ega nued-aidegega, sinni sigisdaed. Degiid-bergusale, geb ega nunmaked bergued.
JOB 39:4 Geb e-mimmigan sapurba dungudamalogua, na gannarbagus itomalale, e-nangi banguddamalad, bar e-nanse nonidasurmalad.
JOB 39:5 ”¿Doa moli-uayasuid-sapurbarmalad yogasaar gudiguega imaksa? ¿Doa achikar-gudigumalaga imaksabali?
JOB 39:6 Ani an moli-uayasuidmarga, nega-dulesulidgan e-negga imaksad, agi gudigumalaga an imaksad.
JOB 39:7 Na wargwen e-itolegedba-gudimarsoggua, neggweburgi-neg-oimaked bai itodasurmalad, degi, dule-moli-seed-ese-goledi baisur itodamalad.
JOB 39:8 Deyob moli-uayasuidmar yalaganba gudidamalad, gagan-ara-arad amididamalad.
JOB 39:9 ”Ar moli-bebe-nikad-ursilid, ¿sunna bega arbasar be ebinsae? ¿Sunna be-molimar-gabedgi megisar be ebinsae?
JOB 39:10 ¿Ar we-moli-ursilid, sunna be e-dukarba edinne? ¿Sunna be-sorba napa-imudaniguega be imake?
JOB 39:11 ¿Ar we-moli-e-garganguedgi be bengusuli guoe? ¿Ar we-moli-ursilid bega be-arbaed imako be ebinsae?
JOB 39:12 ¿Sunna be we-moli ibmar-gwag-onmakega be imake? Degine, ¿ibmar-gwag-welesad e-neg-sabolegedse bega danakwaa-urbenaega be imake?
JOB 39:13 ”Ar nuu-avestruzʼye-nugadi, weligwaledba na e-sakan mer-mer imakardaed, dabgalayob-gukuega sakan niksulid.
JOB 39:14 We-nuu-dummad-dukar-suid e-akwa ukubgi urbed, ukubgi-uee-siega, urbed.
JOB 39:15 We-nuu-dummad e-akwa-sisad-birgi na annaele, gwen bai itosulid. Ibmar-durgan-egi-annaele, gwen bai daksulid.
JOB 39:16 We-nuu-dummad e-mimmigan egadsuliyobi sabsur-imaked, e-ibe surgudele, gwen bai itodasulid.
JOB 39:17 Ar Bab-Dummadi, nuu-dummad-dukar-suidga binsaed uksasulid. Magar-neg-itoged ega uksasulid.
JOB 39:18 Degi-inigwele, we-nuu, sakan-nallaa-imakdele, degi, abarmakde-sogele, molimarba bur bule abarmaked, dule-moligi-abarmakedgi burgued.
JOB 39:19 ”¿Ar be, molimarga gargangued uksasi? ¿Ar be moliga sailagia nasiksabarsi?
JOB 39:20 ¿Ar be, moli ses-ichomakeyobi be imaksasi? ¿Ar be we-moli, sabsur-e-bunnogedgi emar-ogwayed be imaksasi?
JOB 39:21 Moli sabsur-annanagusdaed, e-gargangued-nikadba weligwar itonadaed, deyobi, neba-naidbali, ise-abarmakar naddaed.
JOB 39:22 Moli dobed wissulid, ibmar dobsulid, urwelenaile, es-suid-abin sikirmaksulid.
JOB 39:23 Sigumar moli-dikargi-nanaidi gornanaid, arbon-suarmar, degi, eswarmar-moli-dikargi-nanaidi, dakarmaknanaid.
JOB 39:24 Sabsur-abarmakedbali, dikasur-abarmakdedaed. Gar-gotele, gege bar galeged.
JOB 39:25 Ar moli gargote-itogele, abarmakega aka binnasur-bunnogar-gotedaed. Bila-onolenaile, dikasuli magar-itoged, bilagi-dulemar-oimaknanaile, dikasur magar-itobalid.
JOB 39:26 ”¿Ar bee be, noomar-gukuega imaksa? ¿Ar be-binsaedba noomar dad-nakwed-argan-nuedsik-gukuega be imaksa?
JOB 39:27 ¿Ar be-sogedbali sulubagimar dikasuli-gukuega be imaksasi? ¿Ar be-sogedbali sulubagimar matusuli e-uu-sobega be imaksasi?
JOB 39:28 Ar sulubagi akwasaila-dummagan e-negga imaked, agi na e-gabed siid. A-akwasaila-dummad-birgi e-neg-gandikid siid.
JOB 39:29 A-akale, bannaba na e-mas-gaega masbina ataksidaed.
JOB 39:30 Sulubagi-e-mimmigan ibmar-durgan-e-ablisgi ibmeremalad. Ar bia ibdurgan-burgwar-mai-sogele, agi mula gudidaed.”
JOB 40:1 Bab-Jehová, Jobʼga sunmakdebalid, weyob ega sogded:
JOB 40:2 “¿Ar dule Bab-Dummad-Bur-Biriginedgi-urwenaidi, gan-bipigi Bab-Dummad-osioye binsasunde? Ar degite, we-dule, Bab-Dummad-abinsado.”
JOB 40:3 Geb Job, Bab-Dummad-abin sunmakded, weyob sogded:
JOB 40:4 “¿Igi an be-abin-imakosunna? Ar an dule-nuedsulid. Geg an be-abin-imaked.
JOB 40:5 Bato ilagwen an sunmaksabinned, bar an sunmakosuli. Bato an ibmar sogsabinned, bar an gannar-gannar ibmar sogosuli.”
JOB 40:6 Bab-Jehová burwa-gammuba Jobʼga sunmakded. Weyob ega sogded:
JOB 40:7 “An-abin, machered na be san-imako. Be an-odurdakega, emisgi ani an bese ibmar egisgwelo.
JOB 40:8 ”¿Be an-ibmar-inniki-imaked be osulosunnode? Na be sogega, bedi ibmar inniki-imakdiiye, ¿aga be angi gwisgusunnode?
JOB 40:9 ¿Be-surgande an-surganyob gangude? Ar be-sunmakedde, ¿an-sunmakedyob gangu-sunmakde?
JOB 40:10 ”Ar deyobile, be-gangued-yeerdakleged be oyodo, be-ganguedba be-nug-dummarba be imakdo. Be-gangued-yeerdakleged be oyodo, bela-bela be-yeerdakleged be oyodo.
JOB 40:11 Be-isdarsun-itodiid mer be bargae, dule-san-dummarba-itodimalad be dake, mesagwar be imake.
JOB 40:12 Dule na san-bule-bule-imakdiid be dake, a-dule be obingegsae. Dule-isganamar bia gudii be dakalir, bela be obeloge.
JOB 40:13 Bela we-dulemar be dige-dige imake, napa-urba ise digar be imake.
JOB 40:14 Ar deyob ibmar-saele, magar an be-dakodo, be dule-buledye, be-ganguedgine be bendakleged amiye.
JOB 40:15 ”Be dakena, ibdula-Behemotʼye-nugad, moli-bebe-nikadyob unnila gaganbi maed, igi an be-obinnisa, deyob an we-ibdula obinnismogad.
JOB 40:16 We-ibdula-e-garganguedi bela e-sorgargi, degine, e-saderba siid.
JOB 40:17 E-bunnu urwaryob banamaked, e-dua-gasimar yeer gangu nikabalid.
JOB 40:18 E-gar-nikadi esgoro-gordikidyobi nikad, e-nagmar esgoroyob-gangue nikad.
JOB 40:19 ”An ibmar-durgan-obinnisad-abargi we-ibdula emargi obinmaid. An we-ibdula oburgwebiele, sunna an oburgwed.
JOB 40:20 Sapurmar-nanaidi, ega masgunned uked, a-sapurgi ibdurganmar ichomakdididamalad.
JOB 40:21 We-ibdula negsichigi obunnomaidaed, masar-matagan-imbaba dukumaidaed.
JOB 40:22 Sapimar-urba obunnomaidaed, gaganmar-mata-imbaba gudidaed.
JOB 40:23 We-ibdula diwar-noalile, gwen bai itodasulid, diwar-Jordán e-gayase ubomaile, gwen bai itodasulid.
JOB 40:24 ¿Doa we-ibdula nuu-e-dakmai gaoe? ¿Doa ega asu udkoe?”
JOB 41:1 Bab-Jehová weyob sogdebalid: “¿Sunna be ibdula-Leviatánʼye-nugadi, achwergi be sosale? ¿We-ibdula-e-gwabin sunna dubgi be edichale?
JOB 41:2 ¿Sunna e-asumurgi dub be nasiksale? ¿E-aku sunna esgoro-swiswidikidgi be boodo imaksale?
JOB 41:3 Ar we-ibdula-Leviatánʼde, ¿nuedgi bese ibmar-egisosi? Ar bega sogosi, wile be an-dakye.
JOB 41:4 Ar be-maiga-guega, ¿bebo igar-mesosi?
JOB 41:5 ¿Sikwibo-dodolegeyob be we-ibdulabo dodosale? ¿Be-bunamala egi dodogega, ega be dubgi edichale?
JOB 41:6 ¿Sunna dule-ibmar-ukmaladi we-ibdula uksamalale? ¿Sunna dule-ibmar-ukmaladi ibdula-Leviatán-goamakar uksamalale?
JOB 41:7 ¿Sunna we-ibdula-e-uka esgi-siksar be itoge? ¿Sunna arbon-suargi-makar e-nono bayosar be itoge?
JOB 41:8 Ese be achaena, ebo be urwena. Ar bar be ese achaedgi binsassuliled, mer bar deyob guena gadinye be binsasaled.
JOB 41:9 Mer be binsao, an we-ibdula baisursunna gaoye, unnila e-daklegedbi unnid. Ar unnila be dakdele, bato be negoedbinneled.
JOB 41:10 We-ibdula-Leviatánʼse dule gege achaed. Degite, ¿doa an-abindi nabir gwisguosunna?
JOB 41:11 Ar bela napneggi-ibmar-bukwadi angadbiid. Degisoggu, doa anga sogosunna, be angi ibmar ganiye.
JOB 41:12 ”Ibdula-Leviatán-e-malimargi an sunmakergebed, e-gargangued-dutusulidgi, e-dakleged-yeerdunguedgi an sunmakergebed.
JOB 41:13 ¿Doa e-ibe e-uka edarisale? ¿Doa ese warmaksale? ¿Doa e-ibe e-gaya edichabalile?
JOB 41:14 Ibdula-Leviatán-e-nugarmar-swiswimakaled-dakegala, ¿doa e-ibe e-gaya-mee imakoe?
JOB 41:15 Ibdula-Leviatán-e-yargan, sigu-abgaed-senigana-daklegeyob madar-madar nanaid, akwayob dachak-dachak nanaid.
JOB 41:16 Bela e-ukamar-madar-madar-nanaidgi ollor naisulid, degine, burwabela egi geg doged.
JOB 41:17 Bela e-ukamar-abingunanaid, ise achamakar nanaid. Gege dule e-ibe ollo-ollo imaked.
JOB 41:18 We-ibdula-Leviatán asmidele, mar-ibyeyob asmied. E-ibya-gaedi, dad-ibelergaeyob gaed.
JOB 41:19 E-gayabali, soo gwabunyeardaed, ditismakar soo ainiardaed.
JOB 41:20 E-asa-yabali, waa bupurmakardaed, dii-gwakwarmaknaid-birgi waa-bupurmaknaidyobi bupurmakardaed.
JOB 41:21 E-bunnogedgi soo ogaed, e-gaya-yabali, soo mied.
JOB 41:22 Ibdula-Leviatán-e-gargangued e-dukargi siid, e-abinni bela dulemar niga argwatedamalad.
JOB 41:23 E-san-nikadi sommereged, egi geg ibmar doged. E-sanmar-bur-dutugwadbela, amba selelleged.
JOB 41:24 Ibdula-Leviatán-e-binasgar akwayob dutusulid, ibmar-gwag-naged-akwayob gangued.
JOB 41:25 Ibdula gwisgudele, ese gwakiddamalad. Binnasurgualile, bela idu duurmakdedamalad.
JOB 41:26 Es-suid egi gwisgunonikile, gege bayoged. Arbon-suarmarbela, sigubela, degi, ibmar-swiswidikidbela, gwen bayosulid.
JOB 41:27 Ibdula-Leviatán esgoro-suar gaganyobi ibigwensur daked esgoro-gordikidbela urgo-nunudyob daked.
JOB 41:28 We-ibdula-Leviatán sigumar dobsulid, akwamied-dubgi-akwa-milegedbela ibmar-dutukwayob daked.
JOB 41:29 Mardo-dummadgi sarsolenaile, baisur-itoged, egi gagan iir-iir-gunaiyob itoged, eswar-suid-goled yeer-itodaed.
JOB 41:30 Ibdula-Leviatán-e-dikarmar nugaryobi swichwi-swichwi dakleged. Unimakdedibele, gwala-esgorobiidgi neg-durwilesayob e-gannarmar megisdaed.
JOB 41:31 Ibdula dii-urba-burdidele, dii-gwakwarmaknaiyob neg-imaked, ina-wawad butegi-sik-sik-imaklenaidyob neg-imaked.
JOB 41:32 E-sorbali, e-igar dagudik diigi megisdaed, sailagia-sibudikidyob e-igar makumakar megisdaed.
JOB 41:33 We-ibdula-Leviatán gwen ibmar dobsulid, ibdulamar we-ibdulayob-dakleged gwen nikasulid.
JOB 41:34 We-ibdula-Leviatán, dule-bulegan-sogdimalad-mesagwar imaked, degine, bela ibdula-ursilimalad-e-reyga maid.”
JOB 42:1 Job Bab-Jehová-abin sunmakded, weyob ega sogded:
JOB 42:2 “An nue-wisid, bela be ibmar imaked. Ar be-igar-mesisad gege dule be-ibe oichoged.
JOB 42:3 Be sognai gusad: ‘We doa-dule yogasaar sunmaknaiye, an-binsaed-oburnaiye.’ An yogasaar ibmar-wissuli-sunmaksadi an magar itoged. Anga ibmar-gegerdaklemaladba sunmaklenai gussoggu, an aku-itonai gusad.
JOB 42:4 ”Be anga sogsa gusad: ‘Emisgindi, an bega sunmakgweloye, nue be an-itogoye. An bese-ibmar-egisoedgi be an-abinsaoye.’
JOB 42:5 Unnila dulemar begi-sunmakedbi an itodidaed, an be-dakdisulid. Emisgindi, an-ibyagwar an be-daksasunnad.
JOB 42:6 Degisoggu, an ibmar-sogsadi, begi-ibmar-akar-sogsasuliyob be an-dake. An bukib-itogedba, buru-abargi mellesisunnad.”
JOB 42:7 Bab-Jehová bela Jobʼga sunmaksad-sorbali, Bab-Jehová, Temánʼgined-Elifazʼga sogdemogad: “Be-ibmar-sogsad an-oulusdo, be-aimar-ebogwad an-oulusmarmodo. Ar bemar angi sunmaksamaladi, gwen innikigwadba bemar sunmaksasurmalad. Ar an-mai-Jobʼdi, innikigwadba sunmaksad.
JOB 42:8 ”Emisgi, bemar Job-bardaknamalo, geb moli-bebe-nikad-senigana walagugle (7) anga ogumakar ukmalo, degine, sibad-wawaad-machered walagugle (7) anga ogumakar ukmarbalo. Degine, an-mai-Job anse bemarga goloed. Job bemarga anse-goloedbali, an sabsur-bemar-odurdakosulid. Bemar odurdaklegewilubbinad, bemar Jobʼyobi sunmaksasulidi, be magar itomalargebed. Ar bemar angi sunmaksamaladi, inniki sunmaksasurmalad.”
JOB 42:9 Degidbali, Temánʼgined-Elifaz, Súahʼgined-Bildad, degine, Naamatʼgined-Zofar, Bab-Jehová-ega-ibmar-sogsadba imaksamalad. Agine, Bab-Jehová Job-ese-goled itosad.
JOB 42:10 Job e-aimarga Bab-Dummadse-gochagua, Bab-Jehová gannar Job-ibmar-bukidar-nikuega imaksad. Bab-Dummad Jobʼga ibmar-iduar-nikusadba ilabo-wilub ega ibmar uksad.
JOB 42:11 Geb bela Job-e-gwenadgana, e-bunmarse-bakale, degine, dule-magar-Job-dakmaladse-bakale, Job-dakmalagala e-negse nonigusmalad. Agine, iba-dummad onosmalad, mas gullenai gusad. Job-ogannonanai gusmalad, Bab-Jehová-egi-bonigan-bukidar-barmiargusadba mer-bar-bukib-binsaye ega sognanai gusmalad. Geb e-gwenadgan war-wargwen Jobʼga mani-gwa-gwagwen uknanai gusmalad, degine, olargan deyob ega gwa-gwagwen uksamarbalid.
JOB 42:12 Bab-Jehová, Job-e-ibagan-napi-gudiidgi bur bule nued binsanai gusad. Iduar-gudigusadba bur nued gudigusad. Job bela weyob ibmar nikunonikid: Sibad-wawaad, miliambe-gakabake (14,000), moli-yargan-mureged, milinergwa (6,000), moli-bebe-nikad-abin-abinnid-napa-imumalad, miligwen (1,000), moli-uayasuid-omegan, miligwen (1,000).
JOB 42:13 Job, masmala walagugle (7) nikunonibalid, degine, bunamaladina, walapaa nikunonikid.
JOB 42:14 Bunolo-sailanagined Jemimaʼye onug-imaksad, sorbaliddi Cesiaʼye onug-imaksad, napiddi Keren-Hapucʼye onug-imaksad.
JOB 42:15 We-Job-bunamala-e-warbaagwadi, we-yarnaidgine, omegan-bamalad-gudimaladba bur yeerdaklemalad. Job igi e-bunamalaga e-ibmar-nikad mimisa, deyobi, e-masmalaga, e-ibmar-nikad ega mimismogad.
JOB 42:16 A-sorbali, Job birga-dulagugle (140) gudii gusad. Na e-mimmigan dungualid daksagusad, degine, e-wagan daksagusbalid. Wagan-yokorginmalad-yalabarmalad daksa gusbalid.
JOB 42:17 Job bela ibagan-nueganbi gudii gusad, geb undar-selebagusadgi burgwenonisunnad.
PSA 1:1 Dule, dule-binsaed-isganaba nanadisulile, dule-isgudimaladba akadisulile, dule-Bab-Dummadgi-dododimalad-abargi gudisulile, we-dulegi, Bab-Jehová nued binsadiid.
PSA 1:2 We-dule, Bab-Jehová-Igar-Maidgi bur wergudisunnad. A-igargi, mutikidbali, ibginedbali, egi binsadisunnad.
PSA 1:3 We-dule, igi sapi diwar-naba aramakgwisdae, e-iba-sogedba sanmakdedae, deyobi gued. Bela na e-ibmar-imaked ega nueganbi naddaed.
PSA 1:4 Dule-isganamardi, degisulid. Igi oros-uka burwaba mileddae, deyobi, dule-isganamardi guoed.
PSA 1:5 A-dule-isganamarga igar-itolealile, gwen san-onogosurmalad. Degisoggu, dule-isganamar dule-nuegan-abargisii guosurmalad.
PSA 1:6 Bab-Jehová dule-nued-damalad nue-bendakmaid. Dule-isganamardi, degi-bergudmaloed.
PSA 2:1 ¿Ibiga dulemar-yar-baid-baidgi-bukwamalad, Bab-Jehováʼgi binsarsunna urwebukwa? ¿Ibiga dulemar Bab-Jehováʼgi-aibinedgi binsarsunna binsabukwa?
PSA 2:2 Reymar-negsemamaid, Bab-Jehováʼgi aibitemalad. Dulemar-nuga-nikamalad, Bab-Jehováʼgi isdar-binsadmalad. Bab-Jehová-na-nug-imaksadgi aibitemarbalid.
PSA 2:3 We-dulemar, weyob sogdemalad: “Anmar e-gangued obeloge, e-negsemaidgi anmar ollorgumala.”
PSA 2:4 Bab-Jehová-Niba-Neg-Dakmaid ega alled, Bab-Dummad amargi dodoged.
PSA 2:5 Bab-Jehová a-dulemarse urwed. A-dulemar, Bab-Dummad-urwedba abin gwakidmalad.
PSA 2:6 Bab-Jehová weyob ega sogded: “Ani an-yar-islidikid-Siónʼye-nugadgi, an-rey an mesisad.”
PSA 2:7 Bab-Jehová-Igar-Mesisad an soggwelo. Bab-Dummad weyob anga sogsad: “Be an-machi gued, emi-ibagi, an be-babga gunonikid.
PSA 2:8 Anse be ibmar egise, ar bela dulemar-yar-baid-baidgi-bukwamalad an bega ukoed, yarmar-nanaid bela ugakaase an bega ukbaloed.
PSA 2:9 Sabsur-gandikidba be negseoed, sianar-irgwensur-mamariddaedyobi, be a-dulemar-imakoed.”
PSA 2:10 Reymar, degisoggu, wisigarmar, nue-binsaed-nikaa damalo. Dulemar-negsemamaid, ¡nue salakarmar! Bab-Jehová bega ibmar-sognaidba be damar.
PSA 2:11 Bemar, Bab-Jehová-e-nug nue-itoakwaa odummomalo, ise-itoakwaa Bab-Jehová-mag-dakedgi be wergudii gumalo.
PSA 2:12 Bab-Jehová-mer-urwega, E-Machi-urbalikwaa be nanamarsun. Ar Bab-Jehová bemarse-uludele, bemar sunna ese oburgwilemalad. ¡Bab-Jehová dule-egi-bensuli-nanamaladgi, nued binsadaed!
PSA 3:1 David e-machi-Absalón-idu-wakindigu, we-namaked narmaksad. ¡Bab-Jehová, an-isdarmalad dogdar mergued! ¡An-isdarmalad bukidar angi aibitemalad!
PSA 3:2 An-isdarmalad bukidar an-annik sogmalad: “Bab-Dummad bendakosulid.”
PSA 3:3 Bab-Jehová, bedi an-isdarmalad-idu, sigu-abgaedyob be an-irwa gwisguedid. Be, an-ganguedid. Be, an-niga-ogannogedid.
PSA 3:4 Bab-Jehováʼse binnasur an goled. Na e-neg-islidikid-akale, an-abin-imaked.
PSA 3:5 Ar Bab-Jehová an-edarbedsoggu, an dobsuli meged, nue an gabed. Neg-oibosale, bogidikidgi an gwisgued.
PSA 3:6 Degisoggu, an-isdarmalad miliambe (10,000) an-ebiris-bukwamalad, an dobsulid. ¡Bab-Jehováʼye, wis be an-itoge!
PSA 3:7 ¡Bab-Jehováʼye, be an-bendakdage! ¡Bab-Dummadye, an-isdarmaladgi be an-ollor-imakdage! An-isdarmalad-e-akugar be sarsodage, we-dule-isganamar-e-nugar be obatedage.
PSA 3:8 Bab-Jehová, beginbi abonoleged danikid. ¡Be-sordamargi be nued-binsao!
PSA 4:1 David we-namaked narmaksad. Namakmalad-e-iduedga soglenaid: We-namakleged, Neginotʼba namaklegoye. Bab-Dummad, igar-bulegan-idu be an-irwa-gwisguedid. An bese gotele, bitigi be an-itosana gadin. Bab-Dummadye, an suli-suli itoged, wis be an-bendake. Wile be an-dake. An bese-goled be an-itoge.
PSA 4:2 Emide, ¿sanagwadse bemar, an-nug-oichodiidi, iemaloye be soge? ¿Sana be ibmar-igarga-gwen-guosulidgi-alamakdimaladi, be iemaloye soge? ¿Sana be gakan-igarba-nanamalad, be iemaloye soge?
PSA 4:3 Be itomar, dule-Bab-Jehováʼba nue-nanadiile, Bab-Dummad, a-dulebina itogerba daed. A-ular, Bab-Jehováʼse an gotele, an-itodaed.
PSA 4:4 Be sae-itoalile, nue salakarmar. Melle Bab-Dummadgi isgumalo. Mutik be gabesokalir, bogidik be-ulubgi, be ibmar-imaksadgi nue-binsamai samalo.
PSA 4:5 Bab-Dummad-bese-ibmar-napiragwad-egismaidba Bab-Dummadga be ukmalo. Melle Bab-Jehováʼgi be bengumalo.
PSA 4:6 Bukidar dulemar sogdidinanaed: “¿Wede doa anmarga ibmar-nued wis oyogoe?” Bab-Jehováʼye, wis be anmarga ibmar-nued oyoge, be-sabgued be anmarse-oyoge.
PSA 4:7 Dulemar bukidar-masgunned-nikale, gobed-nikale, na weligwar itodidamalad. Bab-Dummad, bedi a-dulemarba bur bule weligwar-itogega be an-imaked.
PSA 4:8 Bab-Jehová, ar bebi unnila an-edarbedisoggu, dobsulidgi an megidoed, bogidikidgi an gabidoed.
PSA 5:1 Namakmalad-e-iduedga soglenaid: Gar-gammuba namaklegoye. David we-namaked narmaksad. Bab-Jehováʼye, an bega ibmar-sogedi, be an-itoge. Nunmakedgi an bega ibmar-biedi, nue be an-itoge.
PSA 5:2 Bab-Jehová, be an-Bab-Dummad gued, be an-rey gued. Ar an bese gornaisoggu, an bese wilenaidi, nue be itosunna.
PSA 5:3 Bab-Jehová, wakudaryalaba an bese-goledi be an-itodaed, wakudaryalaba an-wile-naidi, an bega sognonidaed. Be-an-abin-imakedi, an edarbedidaed.
PSA 5:4 Bab-Dummad, ar bedi ibmar-isgana abesulid, Dule-isgana be-walikaa gudii guosulid.
PSA 5:5 Dule-san-dummarba-imakmalad, bese gwen dogosulid. Dule-ibmar-isgana-imakmalad, nue-sae be dakdaed.
PSA 5:6 Dule-gakansamalad be obelogoed. Bab-Jehová, bedi dule-gindakmalad, dule-yardakmalad, nue-sae dakdaed.
PSA 5:7 Bab-Dummad, ar bedi nue-wile-an-daksoggu, andi nabir bese-goled-negse dogsunnad. Nabir an be-neg-islidikidsik sindigar-ataksii an be-nug odummosunnad.
PSA 5:8 Bab-Jehováʼye, an-isdarmalad an bukidar-nikadba be-igar-innikigwadba be an-nie. Be-Igar-Maid magar-dakega be an-imake.
PSA 5:9 Dule-isganamar innikigwadba sunmaksurmalad, e-ulubgi ibmar-isgana-imakedginbi binsadimalad. Yamo dule-nug-odummogar sunmakmalad, yardakar emar-obelogega, guagwar bukwamalad.
PSA 5:10 ¡Bab-Dummadye, a-dule-isganamar be sabsur-odurdake! Dule-isganamar yamo dule-yardaked-igar mesismalad. A-igar na dukin egi aibinega be imake. We-dulemar gannar-gannar ibmar-isgana-imakdimalad-ular, be obane. Ar ade, begi nue-gwisgusmalad.
PSA 5:11 Dule-begi-bendakleged-amidimaladi, wergumarsun, degisadegu weligwar namakmarsun. Bab-Dummad, be amar-bendakdaed. Dule-be-sabgudimaladi, begi wergumarsun.
PSA 5:12 Bab-Jehová, dule-ibmar-innikii-imakedgi be nued binsaoed. Bab-Jehová, be-sabedi dulega sigu-abgaedyob guoed.
PSA 6:1 David we-namaked narmaksad. Namakmalad-e-iduedga soglenaid: Neginotʼba-namakoye. We-namaked, Seminitʼye nugad. Bab-Jehováʼye, melle ise-urwaledgi be sabsur-an-odurdake, melle sae-itogedgi be sabsur-an-imake.
PSA 6:2 Bab-Jehováʼye, wis be wile-an-dake, ar an boniganba nue negoebied. Bab-Dummadye, be an-bendake, ar an-abagan nue-bibichis itoleged.
PSA 6:3 Bab-Jehováʼye, ¿sanase be an-bendaknonikoe? Emide, an nue-naibid-dummad itonaid.
PSA 6:4 Bab-Jehováʼye, be sabed-nikarbadbali, wis be an-bendakdage, mer baisur be an-dake.
PSA 6:5 Ar dule-burgwarmaladdi, bar begi binsamamaisulid. Ar neg-urbardi, ¿doa be-nug odummogoe? Gwen dule be-nug odummogosulid.
PSA 6:6 Bela-bela an bodiidbali, gege an sagusad. Bane-bane mutikidbali gachiyala, an ise-ogormakar maidaed. An-ibyanisbali, an-gas-megedi dinnasurgus naidaed.
PSA 6:7 An-isdarmalad-nukad, an-ibya an-ibe mommoleded. An-ibya, nunmakedbali, nue bar ataksurgusad.
PSA 6:8 ¡Dule-isganamar! Be angi bangumala. Ar Bab-Jehová, an-bodiid itononikid.
PSA 6:9 Bab-Jehová an ese wilesakwaa-gornaid an-itononikid. An-ese-gornaid an-itosad.
PSA 6:10 Ar bela an-isdarmaladi, surbinsa-itodmaloed, an-isdarmaladi, bingegudmaloed. Bingegudedba wakitemaloed.
PSA 7:1 David, Benjamín-wagwa-Cus-ibmar-imaksadgi Bab-Jehováʼga Sigaiónʼgi namaksad. An-Bab-Dummad-Jehováʼye, be an-bendake, ar an begi bendakleged amied. ¡Dulemar-an-balegindimaladgi be an-bendake! ¡Amargi be an-ollor-imake!
PSA 7:2 Ar be an-bendaksulile, ¿doa bar an-bendakosunna? Dule-baid an-bendaked sated. Ar igi achumigur dule-ichimake, deyobi, an-isdarmalad an-imakmaloed. Ar igi achumigur dule-gunne, deyobi, an-obelomaloed.
PSA 7:3 An-Bab-Dummad-Jehováʼye, we-ibmar-soggwengi nosa be an-dakdibe: An ibmar-isgana imaksadibe,
PSA 7:4 an-aigi an nue-yolesdibe, an-isdarad-ibe an yogasaar ibmar-susdibe,
PSA 7:5 adi, an-isdarmalad an-baleginner, akarsurdo, an-isdarmalad an-bargado, dii-dii napagi an-oburgwedse angi annamardo. An-nug-dummad-nikad obelomalar, akarsurdo.
PSA 7:6 Bab-Jehováʼye, be sae-itogedba an-isdarmalad-anse-urwebukwadgi be gwisgudage. Anga be igar nabodage. An-Bab-Dummadye, anba be nague, igar-innikigwadba be anga igar naboge.
PSA 7:7 Bab-Jehováʼye, dulemar-baid-baid be-asabin-ambikuega be imake. Nibnega-akar a-dulemar-e-saila-dummadga be gue.
PSA 7:8 Bab-Jehováʼye, be dulemarga igar itosoggu, an-ibmar-inniki-imakdiidba be anga igar itoge, an-nossulidba be anga igar naboge.
PSA 7:9 Bab-Jehová, bedi Bab-Dummad-innikigwadid, bedi dule-binsaed bela baramied. Degisoggu, dule-isganamar-e-ibmar-isgana-imakdimalad be obeloge. Dule-nuegandi, melle be osikirmakega imake.
PSA 7:10 Bab-Dummad, sigu-abgaedyob an-irwa-gwisguedid, Bab-Dummad, na dule-gwage-ulubgi-inniki-binsadimalad bendakedid.
PSA 7:11 Bab-Dummad, dulega igar-itogedgine, innikigwadba ega igar nabiroged, bane-bane dule-isganamar sabsur-odurdaked.
PSA 7:12 Ar dule-isganamar, na e-isguedga bukib-binsasulile, amar-idu, Bab-Dummad es-suid-e-nugar ebinoed, amar-idu e-warsi guagwar dakbaloed.
PSA 7:13 Ar deyopira, Bab-Dummad ibmar-dule-gindakmalad guagwar urbisbalid, sigu-sooba-gamalad sobsabalid.
PSA 7:14 Dule-isgana, igar-isganaginbi binsadaed, ibmar-isgana-imakega igar amidaed, geb igar-isgana imaknonidaed.
PSA 7:15 Dule-isgana, yaa-matusur akwisad. A-yaa-matusulidgi na dukin argwanoed.
PSA 7:16 Dule-isgana, na e-igar-isgana-imaked egi aibinoed, e-sabsur-urwed egi aibinoed.
PSA 7:17 Bab-Jehová anga igar-inniki-nabosadba, an e-nug odummogoed. Bab-Dummad-Bur-Birigined-Jehováʼga, an namaked.
PSA 8:1 David namaked narmaksad. Namakmalad-e-iduedga soglenaid: Igi uva-nis-egurelealir gar-ogorledae, deyob ogoloye. Bab-Jehová, be anmar-Dummad gued. Ibiyobi bela we-napneggine, be-nugdi dummarba gue. Bela be-ganguedi nibnegse-bakale, magar-yeerdaklege be nasiksad.
PSA 8:2 Be-isdarmalad-begi-yolesad-ular, burwigan-namakedgi, mimmigan-namakedgi, be-nug-odummoged-igar be mesisad. Adi, be-isdarmalad, dule-begi-gwisgudimalad, be-abin gaya-maklegar sigegar.
PSA 8:3 Bab-Dummad, mogir-billigi be-ibmar-nasiksad an nue dakdele, nii-naid an nue dakdele, niisgwamar-naid an nue-dakdebalile,
PSA 8:4 Bab-Dummad, an binsaddaed: “¿Wede, dule ibusunna, egi be binsanonigu? ¿Wede, dule ibusunna, be akwenonigu?”
PSA 8:5 Ar dule baliwiturmarba wis yaisaale be imaksad. Napneggi, dummadga-guega, gangued-yeerdakleged bela-bela-nikuega be nug-imaksad. Degi, nug-dummarba-nikuega be imaksabalid.
PSA 8:6 Bela be ibmar-obinnisadgi gangued-nika-guega be dule-imaksad. Bela e-argan-yaurgi we-ibdurgan ega be uksad:
PSA 8:7 Bela sibad-wawaadmar, bela moli-bebe-nikamalad, bela ibdurganmar-sapurba-bukwamalad.
PSA 8:8 Bela nuumar, bela demar-wilaganba uamar-iirmakbukmalad, degi, muu-billigi, bela ibdurganmar-bukwamalad. Bela we-ibdurgangi gangued-nika-guega, be dule-imaksad.
PSA 8:9 Bab-Jehová, be anmar-Dummad gued. Ibiyobi bela we-napneggine, be-nugdi dummarba gue.
PSA 9:1 David we-namaked narmaksad. Namakmalad-e-iduedga-soglenaid: Gar-goledba namakoye. Bab-Jehováʼye, bela-belad an be-nug odummogoed. Bela be-ibmar-gegerdaklemalad-imakdiidgi an sunmakoed.
PSA 9:2 Bab-Dummadye, begi an werguoed, begi an yeer itogoed. Bab-Dummad-Bur-Biriginedye, be-nuggi an namakoed.
PSA 9:3 An-isdarmalad be-abin wakitemalad, amar yoledapmalad, amar be-abin bela burgwismalad.
PSA 9:4 Be-ologanagi be sigisad, dulemarga innikigwadba be igar naboged. A-ulale, innikigwadba be anga igar nabosad, be anba nagunonikid.
PSA 9:5 Bab-Dummad, dule-yar-baid-baidgi-bukwamaladse be sabsur-ulusad, dule-isganamar be obelosad. A-dule-isganamargi dulemar bipisaale bar binsaega be imakosulid.
PSA 9:6 An-isdarmalad bela bergusmalad, dule-wargwensaale gwen gudii gussulid. E-neggweburmar bela napabi nagusad, bipisaale gwen bar egi binsalegosulid.
PSA 9:7 Bab-Jehováʼdi dulemarga igar-itogega e-ologanagi sigisad. Bab-Jehováʼdi degisadegu maigu guoed.
PSA 9:8 Bab-Jehová dulemarga innikigwadba igar naboged, degi, dulemarga igar-innikigwadba negseed.
PSA 9:9 Bab-Jehováʼye, be neg-dukuedyob dule-mesagwar-imakledimaladga gued. Ibagan-suli-suli-itolegedgi, Bab-Jehováʼye, a-dulemarga be galu-gandikidyob gued.
PSA 9:10 Bab-Jehováʼye, dulemar-be-amimaladi be wargwen bipisaale metedisulid. A-ular, dule-magar-be-dakmalad begi bensurmalad.
PSA 9:11 Bab-Jehová, Sión-neggweburgi negdakmaid. A-Bab-Jehováʼga namakmar. E-ibmar-dummagan-imakedgi, dule-yar-baid-baidgi-bukmaladga be sunmakmar.
PSA 9:12 Bab-Dummad, be dule-gindakmalad buged-mai-imakosurdeeye sogsulid, Bab-Jehová dule-wiledimalad-ese-gornaid nue itodaed. Amar-iegodeeye sogsulid.
PSA 9:13 Bab-Jehováʼye, wile be an-dake. Nue be dakena, isdar-an-dakmalad nue an-wionanaid. Melle dulemar an-oburgwega be imake,
PSA 9:14 adi, Jerusalén-neggwebur-dogedgi, dulemarga an be-nug-odummogega, degine, be an-bendakedgi an weligwar-itogegar.
PSA 9:15 Dule-aku-be-dakmalad na dukin yardaklesmalad. Emar-gaega, saki-odukuar-nasismaladgi, na dukin e-nag galesmalad.
PSA 9:16 Bab-Jehová-igar-innikigwadbi-imaked, bela nue-magar daksamalad. Dule-isganamardi, dukin e-ibmar-isgana-imaksadgi yardakledimalad.
PSA 9:17 Dule-isganamar, bela burgwed-negse seledmaloed. Dule-yar-baid-baidgi-bukmalad Bab-Dummad-ieddamalad, amar neg-urba burgwed-negse seledmaloed.
PSA 9:18 Ar dule-wiledimaladdi, be degisadegu iegosulid, dule-baidse-sabsur-wiledimalad be-ibmar-edarbedimalad, berguus be imakosulid.
PSA 9:19 ¡Bab-Jehováʼye, nue be atake! ¡Dulemar melle begi-nakwed be imake! Dule-yar-baid-baidgi-bukmaladga be igar-itoge. A-dulemar be sabsur-odurdake.
PSA 9:20 Bab-Jehováʼye, dulemar-e-niga be egwane. Dule-yar-baid-baidgi-bukmalad wisgued be imake, emarde, Bab-Dummadsurmarye, unnila dule-gumarye.
PSA 10:1 Bab-Jehováʼye, ¿ibiga be angi yoggus gudii? ¿Ibiga be an-idu dukue? An bonigan-abalagi-gunaidgi, aisaar an bebina bela-bela gudidaenad.
PSA 10:2 Dule-isgana na-san-bule-bule-imakedgi, sabsur dule-wileged-baregindaed. Degi-inigwele, we-dule-isgana, na dukin e-ibmar-isgana-imakedgi yoleged.
PSA 10:3 Dule-isgana, sulibinsa-ibmarbina-sogedgi na san-ogannodiid. Dule-isgana, dule-ibmarbina-suli-suli-itodimalad-e-nug ogannoged, Dule-isganadi, isdar be-daked.
PSA 10:4 Bab-Dummadye, dule-isgana bule-bule-san-imakedbali, be-amisulid. Bipisaale begi binsasulid.
PSA 10:5 Bela-ibmar-imakdele, ega ibmar-nueganbi naddaed. Bab-Dummad, we-dule-isgana, Be-Igar-Mamaidgi gwen binsadisulid, ar akusunna daked. Ar dule-isgana, mesagwar e-isdarmalad-imakdaed.
PSA 10:6 E-gwagegi weyob binsadaed: “Dulemar gwen-an-oakalogosurye, bipisaale an boni nikuosurye, unnila, an weligwar gudii guoye.”
PSA 10:7 E-sunmakedi, unnila dule-ukabsaedginbi sunmaked, gakansaedginbi sunmaked, dulemar-sabsur-imakedginbi sunmaked. E-gayaburba unnila emar-oakalogedginbi sunmaked.
PSA 10:8 Dule-isgana emar-naibi-imakega, galimbaba gudidaed. Arbakee dulemar-argadidaed, emar-idu dukusidaed, adi, ukiar emar-oburgwegar.
PSA 10:9 We-dule, igi achumigur dule-baisur-binsadiidgi-ichomakegala, e-dukued-yaba-dukusidae, dule-ganonikir, ebipiddae, deyobi, we-dule-isgana, emar-naibi-imakega gudiid.
PSA 10:10 Ar deyobi, dule-e-bendakedsuli-gudiidi, dule-isganase-galenonikile, ese nue sabsur-ibitoged.
PSA 10:11 We-dule-isgana ulubgi binsaed: “Bab-Dummad we-ibmargi gwen binsamaisurye. We-ibmar-mer-dakegala, e-wagar biir imakdaye. Ar Bab-Dummad neg-gunaid gwen dakmaisurye.”
PSA 10:12 ¡Bab-Jehováʼye, be dake! ¡Bab-Dummadye, be-gangued be oyoge! ¡Melle be dule-wilediid iege!
PSA 10:13 ¿Ibiga we-dule-isganade, e-sunmakedgi mesagwar be-imakosunna? ¿Ibiga we-dule-isganade, ulubgi binsaosunna: “Bab-Dummad gwen anga akar sogosurye?”
PSA 10:14 Bab-Jehováʼye, ar bedi bato neg-gunaid daksad, sabsur-ibitonanaid bato be daksad, nunmakedba-galitonanaid be daksad. Ar bedi, sogedba be we-ibmar nudakoed. Dule-ibmar-suli-gudimaladi, begi bensur gudimalad. Ar be, dule-sergan-sated-bendakedid.
PSA 10:15 ¡Bab-Dummadye, dule-isgana-ibe be e-gangued-osuloge! ¡Dule-isgana e-isgued-imakedba be sabsur odurdake! ¡We-dulemar we-napneggi-obelogedse be imake!
PSA 10:16 Bab-Jehováʼye, be degisadegu Reyga maid. Dulemar-aku-be-dakmaladdina, be-yargi bela obelolemaloed.
PSA 10:17 Bab-Jehováʼye, dule-wilegana-bese-goled be itodaed. Dule-wilegana-e-niga be ogannodaed. Bese ibmar-egisder ega be ukdaed.
PSA 10:18 Bab-Jehová dule-sergan-satedga, degi, dule-wiledimaladga, igar-innikigwad imakdaed, adi, dule-we-napnegginmaladi, melle bar emar-wiodii gumalagar.
PSA 11:1 David we-namaked narmaksad. Namakmalad-e-iduedga soglenaid. Bab-Jehováʼgi, an bendakleged amied. Degisoggu, ¿ibiga anga sogmalosunna, sikwiyob yalaganba be wakinye?
PSA 11:2 Be dakmala, dule-isganamar e-warsi guagwar ganimalad, e-sigu guagwar warsigi-yoi ganimalad. Dule-gwage-innikii-gudimaladgi sigu-miega, negsichigi dukuar gwichimalad.
PSA 11:3 Ar we-napneggi, igar-innikii-selemaid-bergudele, dule-innikidaed, geg bar ibmar imaked.
PSA 11:4 Bab-Jehová, e-neg-islidikidgi maid. Bab-Jehová, nibneggi ologanagi siid, e-ibyagwar dulemar-ibmar-imaked nue-dakmaid.
PSA 11:5 Bab-Jehová, dule-innikidaed, degi, dule-isganadaed bela baramied. Bab-Jehová, dule-sabsur-emar-imakdiidgi-wergudiid isdardaked.
PSA 11:6 Bab-Jehová, dule-isganamargi, soo azufreʼba-mesa odegoed. Dule-isganamar bela burwa-ueregedba burgwemaloed.
PSA 11:7 Bab-Jehová, dule-innikigwadid, igar-inniki-maid-sabedid. A-ulale, dule-inniki-nanadiiddi, Bab-Jehová-e-wagar dakoed.
PSA 12:1 David we-namaked narmaksad. Namakmalad-e-iduedga soglenaid: We-namakleged, Seminitʼba namaklegoye. Bab-Jehováʼye, be anmar-bendake. Dule-be-sogedba-nanamalad bergusad. We-napneggine, dule-napiragwad bar-daklesulid.
PSA 12:2 Dulemar na muchub-muchub gakangi sunmakmalad, nue-nabiridyob sunmakmalad. Asginbi nued sunmakmalad, ulubgindi, emar-yardakedgi binsamalad.
PSA 12:3 Bab-Jehováʼye, dule-nue-nabiridyob-sunmakmalad, bela be obeloge. Dule-san-dummarba-sunmakmalad, bela be osuloge.
PSA 12:4 We-dulemar sogdimalad: “Sunmakedgi anmar dulemargi obinoed. Aga anmar gwabin-duku nikasursi. Anmar-gwabin-duku dule-baidgadsulid. ¿Degite, doa anmargi obinosunna? Dule anmargi-obined sate.”
PSA 12:5 Emide, Bab-Jehová, bede soged: “Dule-e-bendaked-satemalad mesagwar-imaklediid-ular, an gwisguoye. Dule ibmar-sate-gudimaladba bela-belad-bodimalad, an bendakoye.”
PSA 12:6 Bab-Jehová-gayaburba isedar-swilimakaledid. Igi mani swilimakar-imaklegega, soo-yagi gannar-gannar ilagugle (7) dulege, aba bur bule Bab-Dummad-gayaburba swilidik gued.
PSA 12:7 Bab-Jehováʼye, bebi-unnila dule-isganamar-idu, be anmar-edarboed. We-dule-isganamar-idu, degisadegu, be anmar-irwa gwisguoed.
PSA 12:8 Dule-isganamar anmar-ebirdiile, bee be anmar-edarboed. We-napneggi igar-isganamar bur yeerdaklealile, bee be anmar-bendakoed.
PSA 13:1 David we-namaked narmaksad. Namakmalad-e-iduedga soglenaid. Bab-Jehováʼye, ¿sana be angi wis binsanonikoe? ¿Sana be anse wis wagar oyononikoe?
PSA 13:2 ¿Sana an bane-bane-surbinsa-itodiid anga berguoe? ¿Sana an ulubgi-nunmak-itodiid anga berguoe? ¿Sanadse an-isdarad angi obindii guoe?
PSA 13:3 Bab-Jehováʼye, be an-Bab-Dummadid, wis be an-dake, wis be an-abin-imake, be anga niga-ogannoge. Deyob be imakele, an bar burgosulid.
PSA 13:4 An-isdarad angi weligwar-itogosulid. Weyob sogosulid: “Anse galakusye.”
PSA 13:5 Ar andi, be-sabgued-dummarba-nikadgi bensulid. Be-an-abonogedgi an weligwar itoged.
PSA 13:6 Bab-Jehováʼye, an bega namaked, Be nued-angi-binsamaidba, an bega namaked.
PSA 14:1 David we-namaked narmaksad. Namakmalad-e-iduedga soglenaid. Dule-binsaedsulidaed, weyob e-gwagegi sogdiid: “Bab-Dummad maisulid.” Dulemar nue-isgus gudimalad, unnila ibmar-isganabi imakdimalad. Dule-wargwensaale, ibmar-nued-imaked gudisulid.
PSA 14:2 Bab-Jehová nibneg-akale, dulemar-napneggi-gudimalad dakmaid, abakale, dule-gwensak magar-neg-itoged gudiile, abakale, dule-gwensak magar-Bab-Dummad-dakbied gudiile.
PSA 14:3 Degi-inigwele, dulemar Bab-Dummadgi bela bangus gudimalad, dule ibmar-nued-imaked gwen wargwensaale, gudisulid, bela nue isgus gudimalad.
PSA 14:4 ¿Ar dule-isganamar na ibmar-isgana-imakdimalad, nue wismalansursi? Ar nue wismalanad. Emide, igi dulemar madu-gunmala, deyob an-dulemar ese dolediid. We-dule-isganamar, gwen bipisaagwar Bab-Jehováʼse gordisurmarbalid.
PSA 14:5 Emisgindi, be dakmalana, emide, wawanmakbukwad. Ar Bab-Dummaddi dule-innikidamaladba gudisoggu, dule-isganamardi, dobgubukwad.
PSA 14:6 Dule-isganamar dule-wilemalad-e-igar obured, degi-inigwele, dule-wilemaladdi Bab-Jehováʼgi bendaklegoed.
PSA 14:7 Bitigi Bab-Jehová, Israel-dulemarga abonoleged-igar, Sión-yala-akale, barmialina gadin. Bab-Jehová na e-dulamar-galesbukwad, gannar na e-yarse-senonikile, Jacob-e-wagan wergudmaloed, Israel-dulemar weligwar itodmaloed.
PSA 15:1 David we-namaked narmaksad. Bab-Jehováʼye, ¿doa bese-goled-neg-selegedgi nabir mai guoe? ¿Doa be-yar-islidikidgi nabir gudii guoe?
PSA 15:2 Unnila weyob-damaladbi gudii guoed: Dule-inniki-nanadiid, dule-igar-innikigwad-imakdiid, dule-napiragwadba-ibmar-soged.
PSA 15:3 Dule-baidgi-wissur-gakansaed, dule-aimar-naibi-imakdisulid, dule-emar-mesagwar-imakdisulid.
PSA 15:4 Dule, dule-Bab-Jehováʼse-obanlesad obanmogad. A-dule, Bab-Jehová-dobekwaa-nanadiid-e-nugdi ogannoged. Dule, ibmar-imakoye-sogsad, ega nuedga-guosur-inigwele, imakedse-daed.
PSA 15:5 Dule, dule-baidga mani-uksale, e-gaka egi-onosulid. Dule, dule-ibmar-oakalossulidgi-aibinega dule-baiganse manigi-bakledisulid. Ar dule weyob-daedi, bipisaale gwen galakuosulid.
PSA 16:1 David namaked-Mictam narmaksad. Bab-Dummadye, be an-bendake, an begi dukued amidiid.
PSA 16:2 Bab-Jehováʼga an sogsad: “Bebi unnila be an-Dummadga-guye, dule-baidgi ibnued an amisurye, unnila beginbi ibnued an amiye.”
PSA 16:3 Dule-gwage-swilidikmalad we-yargi-bukmaladgi an yeer-itoged. Dule-gwage-inniki-gudimaladgi an yeer-itoged.
PSA 16:4 Dulemar ibmar-bab-dummadyob-imaklemaladga nue-alamakdimaladdi, dukin nunmaked-onasguega imakdimalad. Andi, ibmar-bab-dummadyob-imaklemaladga ablis-uklegedi, bipisaale gwen ukosulid. An-gwabindukubela, gwen e-nug biosulid.
PSA 16:5 Bab-Jehová, bela ibmar-nueganba be anga ibmar-biriginedga gued. Be angi doggus ise-nued-binsamaid. An-san-burba, bela be-argan-yaurgi siid.
PSA 16:6 Napa-nuegan be anga uknonikid, napadar-nued be anga daksad.
PSA 16:7 Bab-Jehová-anga-binsaed-ukmaid-nug an odummogoed. E-binsaedi, mutikidba an-ulubgi, anga ibmar-soge an itodaed.
PSA 16:8 Gusgu Bab-Jehováʼse an idaked, ar anba-gudiguad. Ar an-yalaba gwichigusoggu, dule gwen an-oakalogosulid.
PSA 16:9 A-ulale, an-gwagegi an yeer-itoged. Bela an-ulubgi an weligwar itoged. Bela an-san-burba begi-bensuli gudii guoed.
PSA 16:10 Gwen be an-san-burba neg-uangi oyogsaosulid, ar be-mai-gwage-swilidikid-e-mui gwen neg-uangi onunsaega be imakosulid.
PSA 16:11 Igar-nuedba-gudigued be anga oyosad, be-asabinni bela-belad weligwar-gudii be an-imaked. Be-yalaba degisadegu-gudiid an yeer-itoged.
PSA 17:1 David, Bab-Dummadse goled. Bab-Jehováʼye, an bese napiragwadgi wilesagwa-goledi, wis be an-itoge. An bese-binnasuli-goledi, be an-itoge. An bese-goledi, nue be itoge, yamo an be-yardaknaisulid.
PSA 17:2 Bab-Dummadye, be ibmar-innikigwad-magar-daked-ular, bee be an-bendakedga gue.
PSA 17:3 Be an-binsaed nue-dakdaed. Mutikidba an nue-ulubgi-binsamaid be baramidaed. Nue be an-wilubdaksad, ibmar-isgana be angi amissurgusad. An na sogsad, an-sunmakedgi an begi isguosurye.
PSA 17:4 Be-igar-nued-mesisad-ular, dulemar-baigan-daedyobi an dasulid, ibmar-isgana-imakedgi an nanadisulid.
PSA 17:5 Be-Igar-Maidba bur an nanadiid, a-igargi gwen an bangudisulid.
PSA 17:6 Bab-Dummad, ar be an-abin-imakdasoggu, a-ular, an bese binnasuli goled. Wis be an-itoge, an bese-goled nue be itoge.
PSA 17:7 ¡Be-sabed-sunsoged be anga oyoge! Dulemar begi-bendakleged-amididamaladi, dulemar-isganamarse baregilledidamaladi, a-dulemar, be-ganguedgi be bendakdaed.
PSA 17:8 Ar dule-isganamar angi dummad-yolenanaisoggu, igi be-ibyagwag na be akwe, deyobi, be an-akwemoga.
PSA 17:9 Ar dule-an-oburgwebimalad bato an-walik guakwaa gudimarsoggu, igi gannir e-sakan-urba na e-mimmigan odukue, deyobi, be an-odukumoga.
PSA 17:10 A-dulemar, dule-wiledaked satemalad, unnila na san-dummarba-imakedgi sunmakmalad.
PSA 17:11 An-isdarmalad-an-baregindimalad an-walikagusad, angi ukiar sabsur-yolemalaga, guakwaa gudimalad.
PSA 17:12 Achumigur mas-gabiedyobi, an-isdarmaladde anbina gudimalad. Achumigur e-mas-gaega balidakagwar maidaedyobi, anbina gudimalad.
PSA 17:13 Bab-Jehováʼye, ginebinne, an-isdarmalad-abin be nodage, an-isdarmalad be obelodage. Bab-Dummadye, be an-abonogega, be-es-suidgi an-isdarmalad be oburgwedage.
PSA 17:14 Bab-Jehováʼye, be-gangued-nikadba, an-isdarmaladgi be an-onoge. We-dulemar unnila we-napnegginbi ibmar-nika gudimalad. We-dule-isganamar, be-ibmar-nuegan nue-nika gudimalad. E-mimmigan, e-babgan-sorba, a-ibmar-nuegan abingadimarmogad. Degine, e-wagangarmoga bela ibmar-nuegan obine abingadimarmogad.
PSA 17:15 Bab-Jehováʼye, andi, ibmar-oakalossurye be angi-sogsadba, an be-wagar dakoed. Sikwas an be-wagar-daksale, bato gusbin an itogoed.
PSA 18:1 Bab-Dummad-e-mai-David, Bab-Jehováʼga we-namaked narmaksad. Deunni, Bab-Jehová Saúlʼgi David-bendaknonigu, degi, e-isdarmaladgi bendaksabargu. David weyob Bab-Jehováʼga sogded: Bab-Jehováʼye, nue an be-sabed, be an-niga-ogannoged maid.
PSA 18:2 Bab-Jehováʼye, be an-akwasailaga gued. Be an-garganguedsoggu, an begi bensulid. Bab-Jehováʼye, be an-neggandikidid. Sigu-abgaedyob be an-idu bonigan-irwa gwisgued. Be-garganguedgi be an-bendaked. Bebi unnila bonigan-idu an-odukued-birigined maid. Bab-Jehováʼye, be an-ollor-imakedid. Bonigangi be an-ollor-imakdiid. Ar an bese gotele, an-isdarmaladgi-nakwega be an-imaked.
PSA 18:3 Bab-Jehováʼye, be-nug an ogannoged, ar be-nug innikigwadba odummoleged maid. Bab-Jehováʼye, an-isdarmaladgi an bendaklegoed.
PSA 18:4 Burgwed-igar nue an-ebiris gunaid. Diwar-dummad-nomaiyobi, burgwed angi gwisgunonikid.
PSA 18:5 Bato an gachiyala megis-itoged, gwillo angi-biles-maiyob an itoged, gwen bar san-onoged an itosulid. Burgwed-igar, an-idu saki-milesnaiyob naid.
PSA 18:6 An surbinsa-itodiidgi Bab-Jehováʼse an gote gusad, Bab-Dummadse ise-gollar an imaksad. Agine, e-neg-akale, an-itononikid. Bab-Jehováʼse-an-gornaidi, e-uayagwar an-itosad.
PSA 18:7 Bab-Jehová-uludgua, neg giglimakded, yar-sailagan-mamaidse-bakale, giglimakded.
PSA 18:8 Bab-Jehová-bunnodedbali waa bupurmakded, e-gaya-yaba soo-gwabunyeded, ginnitibi soo-mialid.
PSA 18:9 Bab-Jehová mee mogir-egasad, geb abali aidealid, mogir-gudureged-birgi aidealid.
PSA 18:10 Bab-Jehová baliwitur-querubinʼye-nugad-birgi-sii, mogir-imbaba nadapid. Burwa-gandik-gormaidba gukumai gualid.
PSA 18:11 Bab-Dummad neg-gudureged-abargi nadapid. E-irwa mor-dummad-naiyob mogir nagusad. We-mogir dii-dummad-widanikiyob dakle sigisad.
PSA 18:12 Bab-Jehová-sabsur-gadedbali, mogirmar aisakided, mogirmar dii-akwamaryob mileded, sogunmar ginnitibi mileded.
PSA 18:13 Bab-Jehová nibneg-akale, mogirmar-dii-akwamaryob-milemaid-abalagine, sogunmar-ginnitibi milemaid-abalagine, mala-gollomakmaiyob binnasuli sunmakded. Bab-Jehová-Bur-Birigined-e-sunmaked bela neg-gaded.
PSA 18:14 Bab-Jehová sigu-milegeyob e-isdarmaladgi mar-odealid. Bab-Dummad e-isdarmalad-oduurmaksad, e-isdarmalad-oabarmakega imaksad.
PSA 18:15 Bab-Jehová, be-uludedbali demar-urba-napa-naid mag-dakle gunonikid. Bab-Jehová, be-bunnodedbali, napasaila daled gunonikid.
PSA 18:16 Bab-Jehová nibneg-akale, anse e-argan oyononikid. An demar-wilagi-gundilenai an-ononnonikid.
PSA 18:17 Bab-Jehová an-isdarad-buledgi an-bendaksad. Bab-Jehová isdar-an-dakdimaladgi, an-ollor-imaknonikid. An-isdarmalad-angi-obinmaladgi an-abonononikid.
PSA 18:18 Boniganba-an-galitonaidgi an-isdarmalad angi gwisgunonikid. Agine, Bab-Jehová an-bendaknonikid.
PSA 18:19 Bab-Jehová wile-an-dakedbali, an-bendaknonikid, neg-nuedgi an-ogwisgunonikid.
PSA 18:20 Bab-Jehová an ibmar-nued-imakedba anga ibmar-nued uked. Ibmar-isgana-imakdisulidba nued angi binsaed.
PSA 18:21 Ar Bab-Jehová-Igar-Maidba an gudiid, ibmar-isgana an imakdisulid, Bab-Dummadgi an bangudisulid.
PSA 18:22 Ade, bela e-igar-uksad an nue-gasa gudiid, e-Igar-Maidgi an bangudisulid.
PSA 18:23 Bab-Jehováʼga sogedba an gudiid, ibmar-isgana-imaklegedgi an na san-bargas gudiid.
PSA 18:24 Bab-Jehová an ibmar-nued-imakedba anga ibmar-nued uked. Ibmar-isgana-imakdisulidba nued angi binsamaid.
PSA 18:25 Bab-Jehová, dule-beba-bane-bane-inniki-nanadiidgine, egi be bane-bane inniki damogad. Bab-Jehová, dule-igar-innikigwadba-nanadiidga, ega be inniki ibmar-imaked.
PSA 18:26 Bab-Jehová, dule-bega-gakansasulidga, be gakansasurmogad. Be dule-emar-yardakedgardi, e-igar e-ibe be obured.
PSA 18:27 Bab-Jehová, dulemar na-san-bipi-imakdimalad, bonigangi-obinega be imaked. Dule-na-san-dummarba-imakdimaladdina, be sabsur-wioged.
PSA 18:28 Bab-Dummad-Jehová, be dula-gudii an-imaked. Bab-Jehová, an bonigan-abalagi-gudiidgi, san-burba-dula-gudii be an-imaked.
PSA 18:29 Bab-Jehová, be-an-bendakedbali, sordamar-danar-bila-onomalad an ogilogoed. An-Bab-Dummad, be-an-bendakedbali, neggweburmar-galu-matusulid-nikad an obelogoed.
PSA 18:30 Bab-Dummad-e-ibmar-imakedi innikigwad imaked, e-gayaburba sunsogedid. Bab-Jehová dule-egi-dukumaladga sigu-abgaedyob gued.
PSA 18:31 ¿Doa Bab-Jehováʼyob Bab-Dummadga mai? Dule sate. Unnila Bab-Jehováʼbi maid. ¿Doa Bab-Dummadyob-gangued mai? Dule sate. Unnila Bab-Jehováʼbi maid.
PSA 18:32 Bab-Jehováʼbi unnila anga gargangued ukmaid, Bab-Dummadbi dobsuligudii an-imaked.
PSA 18:33 Bab-Dummad goe-sapur-abarmakedyob an-oabarmaked, yar-billiganaba geg baparmakega an-imaked.
PSA 18:34 Bab-Jehová an-surgan ogannoged, adi, an nabir bila-onogegar. Bab-Jehová an-swidamar ogannoged, adi, nabir warsi-esgoro-gordikidbiid an dopee imakegar.
PSA 18:35 Sigu-abgaedyob be an-irwa gwisgued, be-garganguedgi be an-bendaked. Be nued-angi-binsaedba nasguega be an-imaked.
PSA 18:36 Bab-Jehová, an nabir nanaega, melle an aimukuega, anga be neg-ollor-dummad nasiksad.
PSA 18:37 An an-isdarmalad-baregitegusgua, an indaksasulid, an bargadapid. Bela an-isdarmalad-obelogedse an imaksad.
PSA 18:38 Bela-bela an an-isdarmalad naibi-imaksad, degisoggu, gege bar angi gwisgu gusmalad. An-isdarmalad anse nue-galakusmalad.
PSA 18:39 Bab-Jehová, bila-onogega be an-ogannosad, an-isdarmalad anse-ibitogega be imaksad.
PSA 18:40 An-isdarmalad anse-galakudedba, wakinnega be imaksad. Deyob isdar-an-dakdimalad an obelosad.
PSA 18:41 An-isdarmalad aisaar dule-e-bendakegala, emarse gornanai gusmalanad, dule-e-bendaked sate gusmalad. Bab-Jehováʼse gochamalanad, Bab-Jehováʼdi abin-imaksasulid.
PSA 18:42 An-isdarmalad anse sanyob ichi-ichi gusad. Amar ukub burwa-abin-mileddaedyob anse gusmalad, sabsur-enalenai anse gusmalad.
PSA 18:43 Bab-Jehová, dule-angi-urwedimaladgi be an-bendaksad, dule-yar-baid-baidgi-bukwamalad-e-dummadga be an-imaksad. Dulemar-aku-an-dakmalad an-maiga gunonimalad.
PSA 18:44 Ibmar-imakoye an sogsale, a-dulemar, yog anba ibmar-imakar damalad. Wemar-Israel-dulesurmaladi, an-nug odummodimalad.
PSA 18:45 We-Israel-dulesurmaladi, an-gaya-itosale, nig-argwate damalad, e-dukued-yaba-bukwa-noarmalale, wawanmakdani noardamalad.
PSA 18:46 ¡Bab-Jehová dula-mai! ¡Bab-Jehová, unnila bebi an-bendaked maid! ¡Be-nug an odummosun! Bab-Jehová, be an-abonogedid. Be-nug bela-bela odummolesun.
PSA 18:47 Bab-Dummad anga an-isdarmalad-buged-mai imaksad, Bab-Dummad, dule-yar-baid-baidgi-bukmalad an-maiga-gumalaga anga imaksad.
PSA 18:48 Bab-Dummadye, an-isdarmalad-angi-gwisguargua, be an-abonononikid. An-isdarmaladgi-obinega be an-imaksad, dule-ursilimaladgi be an-ollor-imaksad.
PSA 18:49 Degisoggu, Bab-Jehová, Israel-dulesurmalad-abargi an be-nug ogannoged, Be-nug-odummogegala an namaked.
PSA 18:50 Bab-Jehová, e-rey bela-bela e-isdarmaladgi-obinega na imaked. Na nug-imaksa-gudiidga, e-sabgued oyoged. Davidʼga, degi, e-waganga, e-sabgued oyoged. Degisadegu, e-sabgued ega oyodii guoed.
PSA 19:1 David we-namaked narmaksad. Namakmalad-e-iduedga soglenaid. Mogir-naidi, Bab-Dummad-e-gangued-yeerdaklegedgi sunmaknaid. Mogir-billi-aradgi bela-ibmar-naidi, Bab-Dummad-e-ibmar-obinnisad oyonaid.
PSA 19:2 Bela-ibmar-naidi, bane-bane ibginedbali, Bab-Dummad-e-gangued-yeerdaklegedgi na sunmaknanaid, Bela-ibmar-naidi, bane-bane mutikidbali, Bab-Dummad-e-gangued-yeerdakleged na barsognanaid.
PSA 19:3 We-ibmarmar duleyob-sunmaksur-inigwele, ibmar-bisurmar-inigwele, e-gaya-goled-itolesur-inigwele,
PSA 19:4 we-ibmarmar-naid-e-sunmakedi, napneggi bela itoleged, bela napneg-dirbir-naid-ugakaase warmaked.
PSA 19:5 Bab-Dummad dad-ibelerga mogir-billigi neg-nasiksad. Ar igi machered-ome-nikusad neg-oibosale, e-gabedneggi weligwar-noardae, deyobi, dad-ibeler wakudaryalaba noardaed. Ar Igi dule-abarmaked abarmaksokalir, yeer-itodae, deyobi, dad-ibeler nakwiardaed.
PSA 19:6 Dad-ibeler mogir-billi-nagagi nakwidagogu, mogir-billi-bergunaidse argwandapdaed. Dad-ibeler-e-ueregedgi ibdula gwen dukuosulid.
PSA 19:7 Bab-Jehová-Igar-Maidi, napiragwadid, dule-burba-ogannogedid. Bab-Jehová-Igar-Maidi, sunsogedid, egi geg benguleged. Bab-Jehová-Igar-Maidi, dule-binsaedsulidaed binsaed-ibedga imaked.
PSA 19:8 Bab-Jehová-Islidik-Igar-Mesisad innikigwadid, gwage-weligwar dule-saed. Bab-Jehová-e-Igar swilidikidid, magar-ibmar-itoge dule-imaked.
PSA 19:9 Bab-Jehová-dobee-nanaed-igar swilidikidid, degisadegu mai guoed. Bab-Jehová-igar-naboged, napiragwadid, bela innikigwadbiid.
PSA 19:10 Bab-Jehová-e-Igar orba bur bule nuedid, or-nuedba bur bule e-bina sogleged. Bab-Dummad-e-Igar achanisba bur bule ochigwad, achanis-aryomaidba bur bule osidikid.
PSA 19:11 Be-Gayaburba anga iduakwaa ibmar-soged: “Nue salakarye.” Ar dule a-Gayaburbaba ibmar-imakele, bukidar ibmar-nuegan nikuoed.
PSA 19:12 ¿Doa e-nodiid na magar-itoge? Bab-Jehováʼye, ibugi an begi nodidibe, an na wissulid. Agi be an-ollorsae.
PSA 19:13 Deginbali, an yamo-begi-yoledaedgi, be an-ollorsabali. We-isgued mer angi obined be sae. Adi, dulemar bar angi sunmakosulid, bar an isgued-dummad imakosulid.
PSA 19:14 Bab-Jehová, be an-edarbedid, be an-odukuedid. Degisoggu, an-sunmaked be yeer-itosana gadin, ulubgi-an-binsaed be yeerdaksana gadin.
PSA 20:1 David we-namaked narmaksad. Namakmalad-e-iduedga soglenaid. Dobedba be suli-suli itogele, Bab-Jehová be-itogena gadin. Jacob-e-Bab-Dummad-nuggi, be bendaklegena gadin.
PSA 20:2 Bab-Jehová e-neg-islidikid-akale, bega bendakleged barmidagena gadin. Bab-Dummad Sión-yar-akale, be-bendakena gadin.
PSA 20:3 Ega be ibmar-ukedi, Bab-Dummad bela insaena gadin, ega be ibmar-ogumakar-ukedi, be-abin nuedgi abingaena gadin.
PSA 20:4 Be ibmar-abediidbali, Bab-Dummad bega ukena gadin. Be ibmar-imakedgi-binsaedi, bega bela nueganbi guena gadin.
PSA 20:5 Boni-dummagangi be obichale, anmar weligwar-itogedba oimakdemaloed. Anmar-Bab-Dummad-nuggi, olo-bander omemmermakdemaloed. Bab-Jehováʼse be ibmar-egichisadi, bela bega sogedba imakena gadin.
PSA 20:6 Ar emigindi an wisdo, Bab-Jehová, e-nuggi-rey-nugsalegaled bendakoed. Bab-Jehová e-ganguedgi, bila-onolegedgi, rey-nakwemai-guega imakoed. Bab-Jehová e-nibneg-islidikid-akale, rey-abinsaoed.
PSA 20:7 Dulemar gwenna-gwenna unnila moli-ur-bila-onomaladginbi bensurmalad, baigandi e-molimarginbi bensurmarmogad. Anmardina, unnila anmar-Bab-Dummad-Jehováʼgi bensurmalad.
PSA 20:8 We-dulemardi nue geg gugus galakudmalad. Anmardina, amba Bab-Jehováʼgi-bensulidba ganna gudimalad.
PSA 20:9 Bab-Jehováʼye, sorda-bila-onomaladgi, rey-nakwega be imako. Bab-Jehováʼye, anmar bese gotele, be anmar-abinsao.
PSA 21:1 David we-namaked narmaksad. Namakmalad-e-iduedga soglenaid. Bab-Jehová, be-ganguedgi rey weligwar itoged. E-isdarmaladgi-nakwega be imaksadba, rey nue-weligwar itoged.
PSA 21:2 Bab-Jehová, e-ulubgi ibmar-abediid ega be uksad. Ibmar-bese-egichisadi, mer an ega gwen ukodeeye be sogsasulid.
PSA 21:3 Bab-Jehová, reygi be nued binsasad. E-nonogi, gurgin-olobiid ega be sisad.
PSA 21:4 We-reyde, san-burba-dula-gudigued bese egichisad. Suitii degisadegu dula-gudiguega be imaksad.
PSA 21:5 Bab-Jehová, be rey-bendakedba, rey bila-ononanaidgi-nakwega be imaksad. Be-bendakedba, e-gangued dummarba naded. Be-bendakedba, e-nug nue be odungusad. Bela-bela e-gangued-yeerdakleged reyga be uksabalid.
PSA 21:6 Bab-Dummad, reygi nuedbi degisadegu be binsamaid. Eba be gudiidbali, rey weligwar itodaed.
PSA 21:7 Bab-Jehová-Bur-Birigined-e-sabgued geg bergusoggu, rey a-Bab-Jehováʼgi bensulidbali, gandik megoed, onolegosulid.
PSA 21:8 Bab-Jehová, be-ganguedgi bela be-isdarmalad bese galegoed, bela begi gwisgudidimalad bese galebaloed.
PSA 21:9 Bab-Jehová, be nonikile, be-isdarmalad sooga be obinyoed. Bab-Jehová, be ulude-sogele, igi soo bela ibmar-obelodae, deyobi, bela be-isdarmalad bese bergumaloed, bela bese girgumaloed.
PSA 21:10 Bab-Dummad, bela we-napneggi be-isdarmalad-e-mimmigan be osulogoed, dulemar-abargi bela e-anagan be sate imakoed.
PSA 21:11 Amba akar be-imakbimalandibe, amba gwen be-oakalogosurmalad. Ibmar-isgana-imakega igar-amimardibe, gwen imakosurmalad.
PSA 21:12 Be-warsi be-isdarmaladgi be oyodogu, be-abin yogasaar duurmakdemaloed.
PSA 21:13 ¡Bab-Jehováʼye, be-nug-odummolegega be-gangued be oyoge! ¡Be-ganguedgi namakar anmar be-nug odummomaloed!
PSA 22:1 David we-namaked narmaksad. Namakmalad-e-iduedga soglesad: We-namaked Ajelet-Saharʼye-nugadba namaklegoye. Bab-Dummadye, ¿ibiga be an-obacha? Be an-bendakegala, ¿ibiga be angi dikasur-gunai? ¿Ibiga an-gormaknaid gwen be itosuli?
PSA 22:2 Bab-Dummadye, ibginedba an bese gornadaenad, gwen be an-abin-imakdasulid. Mutikidba an bese gornadabalinad, gwen be an-abin-imakdasurbalid. An obunnodisulidba nue-geggus itolegusad.
PSA 22:3 Be dule-islidikidid, Israel-dulemar bega namakmalad.
PSA 22:4 Anmar-dadgan begi bensurgusmalad. Begi-bensurgusmaladba be bendaknonikid.
PSA 22:5 Bese-gochamaladba be bendaknonikid. Begi-bensurgunonimargu, be obinge-imaksasulid.
PSA 22:6 An dulesuliyob itoleged, napa-nus-musgimakdiidyob itoleged. Dulemar ibmar-dodogedga an-imaknanaid, bela dulemar isdarsun an-dakmalad.
PSA 22:7 An-dakarmalale, anga alliardamalad. Anga akar-akar gunanai damarbalid, nono ege-ege gunanai damarbalid. Weyob sogmalad:
PSA 22:8 “Bab-Jehováʼgi bensurye-sogdiid, degite, Bab-Dummad e-bendakdado. Bab-Dummadgi-wergudiiye-sogdiid, degite, Bab-Dummad-e-sunnagwad we-ibmargi e-ollor-imakdado.”
PSA 22:9 Bab-Dummadye, sapidukugi-an-maigu, bee be an-odenonikid. An-nan-nukugi nue-obunnogega be an-imaksabalid.
PSA 22:10 Bab-Dummadye, sapidukugi-an-maigu, be nue an-akwisad. Amba sapidukugi-an-maigu, bato be an-Bab-Dummadid.
PSA 22:11 Bab-Dummadye, mer wargwen be an-mete, ar an surbinsa itoged, ar dule-an-bendaked gwen nikasulid.
PSA 22:12 An-isdarmalad an-ebiris gudimalad, Basán-moli-bebe-nikad-ursirmaladyobi an-ebiris gudimalad.
PSA 22:13 Igi-achumigur masbina uurmaknagusdae, igi-san-gasale, ichimaknagusdae, deyob, an-isdarmalad angi gwisgunonimalad.
PSA 22:14 Dii-napagi-eolenaiyob bela an-san na itoged, bela an-garmar nue-gwatiris itolebalid. Igi-baka-gwallu soo-abin daluddae, deyob, an-ulubgi an-gwage nade an itoged.
PSA 22:15 Dobedba bela an-gaya dinguded. An-gwabinse-bakale, gege bar banamakgusad. Napa-urba bato ber an megisayob na itoged.
PSA 22:16 Dule-isganamar achu-soemaladyob an-ebiris gunanaid. Bela an-argan, an-nag-matarse-bakale, uudu imaksamalad.
PSA 22:17 An-garmar daled daklegusad. An-isdarmaladi an-indaknanaisulid, an-ebiris an-dakbukwad.
PSA 22:18 An-mormar mimismarsunnad, an-mor-suega, egi wilubdaknanai gusmalad.
PSA 22:19 Bab-Jehováʼye, be an-niga-ogannogedid. ¡Mer be angi bangue! ¡Gwae be an-bendakdage!
PSA 22:20 Mer es-suidse-oburgwilegega be an-imake. Dule-achumaryob-gudimaladgi be an-bendake.
PSA 22:21 Achumigur-nono-wawaadyob-gudimaladgi be an-bendake. Moli-bebe-nikad-ursirmaladyob-gudimaladgi be an-ollor-imake.
PSA 22:22 Bab-Jehováʼye, an-gwenadganga an begi sunmakoed. Dulemar-onmaked-abargi an be-nug-odummogoed.
PSA 22:23 Bemar, Bab-Jehová-dobekwaa-gudimalad, Bab-Jehová-e-nug odummomar. ¡Jacob-e-wagan! Bab-Jehová-magar-dakdii nanamar. ¡Israel-e-wagan! Bab-Jehová-e-nug odummomar.
PSA 22:24 Bab-Jehová, dule-wileged-e-naibi-itodiid baisur-daksulid, wagar-biria daksulid. We-dule-ese-gollalile, abin-imaked.
PSA 22:25 Bab-Jehová, be-dulamar-onmaked-abargine, be-nug-odummogega be an-imaked. An bega ibmar-imakoye-sogsadi, dulemar-be-nug-odummodimalad-asabin an bega imakoed.
PSA 22:26 Dule-wilemalad nue immeledmaloed. Dule-Bab-Jehová-amidimalad, Bab-Jehová-e-nug-odummodimalad, e-ulubgi weligwar-itodmaloed, deyob sadegu gudmaloed.
PSA 22:27 Bela we-napneggi-dulemar-yar-baid-baidgi-bukwamalad, dulemar-ablis-akar-akar-bukwamalad-ugakaasega, Bab-Jehová-ebinsadmaloed, Bab-Jehováʼse gannar aibirnonimaloed, sindigar abin ambikunonimaloed.
PSA 22:28 Ar Bab-Jehová bela we-napneg ganikid, bela dulemar-bukwad, e-argan-yaurgi gudidiid.
PSA 22:29 Dule burgwesuli geg gued. Degisoggu, bela we-napneggi ibmar-bukidar-nikagudimalad, dulemar-burgwedani-gudimalad, Bab-Jehová-asabin sindigar sigmaloed, e-nuggi iba onomaloed.
PSA 22:30 Bela mimmigan-danimalad, Bab-Jehová-e-nug odummomaloed. Yoedse-danimalad, Bab-Jehová-e-nug-odummodii gumaloed.
PSA 22:31 Amba-yoo-dulemar-gwalulemaladga soglemogoed, Bab-Jehová ibmar-innikigwad imakmaiye, degi, ibmar-dummagan oyomaiye.
PSA 23:1 David we-namaked narmaksad. Dule-sibad-wawaad-edarbedyobi, Bab-Jehová, an-edarbed gued. Unniguar ibmar-nika an-imaked.
PSA 23:2 Igi sibad-wawaad gagan-ara-aradgi obunnomegisdae, deyobi, Bab-Jehová egi-obunnogega an-imaked. Degi, igi dule dii-boo-naidse sibad-wawaad-niddae, deyobi, Bab-Jehová neg-bogidikidse an-niddaed.
PSA 23:3 Bab-Jehová an-san-burba anga ogannodaed. Igar-innikimaladba an-seddaed. Mer e-nug-isguega, deyob an-imakdaed.
PSA 23:4 Ar neg-gudureged-sunnasulid-imbaba an nadapile, amba an dobguosulid. Bab-Jehová, ar be anba gudisoggu, an akar-guosulid. Be-suar-gaapoled an-niga-ogannoged, dobsuli an-imaked.
PSA 23:5 Bab-Jehová, be an-isdarmalad-asabin, mas-bur-nued be anga ukdaed. Be-nonikidi nued-an-be-dakye be anga-sogega, gwallu-wawad an-nonogi be eodaed. Degi, igi gobed noggi-engudele, aryomaidae, deyobi, an-ulubgi ise-weligwar an itodaed.
PSA 23:6 Bab-Jehová, nue-napira bane-bane an-burgwedse wile be an-dakdii guoed, an-burgwedse be angi nued-binsadii gubaloed. Geb Bab-Jehová-neggine, degisadegu an maiguoed.
PSA 24:1 David we-namaked narmaksad. Bela we-napneg-naidi, bela egi ibmarmar-bukwadi, Bab-Jehováʼgadid. Bela yalagan-nanaidi, dulemar-egi-bukwadi, bela Bab-Dummadgadbiid.
PSA 24:2 Bab-Jehová, demar-naidgi napaneg onakwisad, dii-wilagangi napaneg nasiksad.
PSA 24:3 ¿Doa Bab-Jehová-yarse nakoe? ¿Doa Bab-Jehováʼse-goled-neg-islidikidgi gudiguoe? Unnila weyob-gudimaladbi gudii guoed:
PSA 24:4 Dule-ibmar-nueganbi-imaked, dule-gwage-swilidikid, dule-ibmar-bab-dummadyob-imaklemaladse-gordisulid, yamo-ibmar-ise-sogar-imakdisulid, amarbi unnila, Bab-Jehováʼse-goled-negse dogoed.
PSA 24:5 Dule-deyob-daedgi, Bab-Jehová ise-nued-binsaoed, Bab-Jehová-e-abonogedid ega nuedgi igar-nabogoed.
PSA 24:6 Bab-Dummad, dule-be-amidimaladi, weyob damalargebed, dulemar Jacob-e-Bab-Dummad-dakbi-gudimaladi, weyob nanamalargebed.
PSA 24:7 Yawagak-dummagan, be argamarsun, yawagak-degisadegu-gwichimalad, be argamarsun, we-yawagakgi, Rey Gandikidba-Yeerdakleged dogesokalid.
PSA 24:8 ¿We doawa, Rey Gandikidba-Yeerdakleged? We-Rey, Bab-Jehová-Dule-Gandikidid, dule-buledid. Bab-Jehová bila-onogedgi dule-buledid.
PSA 24:9 Yawagak-dummagan, be argamarsun, yawagak-degisadegu-gwichimalad, be argamarsun, we-yawagakgi Rey Gandikidba-Yeerdakleged dogesokalid.
PSA 24:10 ¿We doawa, Rey Gandikidba-Yeerdakleged? We-Rey, Bab-Jehová-Bela-Gangued-Nika-Maidid. We, Rey Gandikidba-Yeerdaklegedid.
PSA 25:1 David we-namaked narmaksad. Bab-Jehováʼye, an be-bensuli an bese goled.
PSA 25:2 An-Bab-Dummadye, an begi bendakleged amied, mer bingeguega be an-imake. ¡An-isdarmalad mer angi-dodoged be imake!
PSA 25:3 Ar begi-bendakleged-amimalad bipisaar bingeguosulid, dulemar igarsuli emargi-gwisgudimaladdi bingegumaloed.
PSA 25:4 Bab-Jehová, Be-Igarmar be anga oyoge, Be-Igarmargi be an-odurdake.
PSA 25:5 Be-Igar-innikigwadba be an-nide, a-Igargi be an-odurdake. Bedi, an-Bab-Dummad-an-abonogedid, andi, gusgu beginbi bendakleged amied.
PSA 25:6 Bab-Jehová, be-ebinsao, be wile-dule-dakedid, be dule-sabguedid. Weyob be-daedi, anga be oyodiguad.
PSA 25:7 An sapingwaun isgudigusaddi, an begi-yolesaddi, mer be ebinsao. Bab-Jehová, be-wile-dule-dakedba, wile be an-dako. Bab-Jehová, ar bedi dule-nuedid.
PSA 25:8 Bab-Jehová dule-nuedid, dule-innikigwadid, a-ular, dule-isganamarga igar-maid-imakega oyoged.
PSA 25:9 Bab-Jehová igar-innikigwadba dulemar-san-bipi-imakdimalad nied, Bab-Dummad e-igargi dulemar-san-dummarba-imakdisurmalad odurdakbalid.
PSA 25:10 Bab-Jehová-Igar-Mesisadba-ibsadimaladga, Bab-Jehová-Igar-Islidikid-Mesisadba-nanadimaladga, bela Bab-Jehová-e-Igarmar, sabgued-igalad, napiragwad-igalad.
PSA 25:11 Bab-Jehová, na be-nug-sabedba, an-nue-isgusadi, be anga osuloge.
PSA 25:12 Bab-Jehová, dule-e-dobee-nanadiidga oyogoed, biti-igarba nanaoe.
PSA 25:13 A-dule, nued-gudii guoed, e-wagandi nainumar gamaloed.
PSA 25:14 Bab-Jehová dulemar-e-nug-odummodimaladbo walikaa gued, amarga e-igar-mesisad sogbalid.
PSA 25:15 Ar Bab-Dummaddi emar-yamoged-igargi an-ollorsaed. A-ular, Bab-Jehováʼginbi an ataked.
PSA 25:16 Bab-Jehováʼye, be wile-an-dake, andi walagwen gudiid, an wile itodiid.
PSA 25:17 Bab-Jehováʼye, an-suli-suli-itoged bur bule gangumaid. An-bukib-binsadiid, be anga osuloge.
PSA 25:18 Bab-Jehováʼye, an-ulubgi-naibi-itoged be dake, an boniganba-galitodiid be dake. Bela an-isgued be anga elie.
PSA 25:19 Bab-Jehováʼye, be dake, ibiyobi an-isdarmalad mergusa, bela-bela nue-isdar an-dakmalad.
PSA 25:20 ¡We-dulemar-idu be an-odukue! ¡We-dulemargi be an-ollorsae! Mer bingegued be an-imake, ar andi begi bensulid.
PSA 25:21 An-ibmar-oakalossulid, an-inniki-daedi, an-bendakedga gued. Ar andi begi bensulid.
PSA 25:22 ¡Bab-Dummadye, Israel-dulemar suli-suli-itogedgi, be bendake!
PSA 26:1 David we-namaked narmaksad. Bab-Jehováʼye, an-akar-akar-gudisulid be oyoge. Begi an bengussulid, begi gwen an bangussulid.
PSA 26:2 Bab-Jehováʼye, be an-wilubdake, an-ulubse be an-dake, bela an-binsanaid be dake, an-gwage-naid bela ulubse be dake.
PSA 26:3 Be-sabed an nue wisid, an be-igar-napiragwadba nanadiid.
PSA 26:4 Dule-galagwensurdamaladbali an nanadisulid, wagar-darbodamaladbali an sigdisurbalid.
PSA 26:5 Dule-galagwensurdamalad an isdarsun-daked, dule-isganamar an-aiga an imakdisulid.
PSA 26:6 An ibmar-isganase-achadisulidba, an-argan swilidik gued. Agala, an sunna nabir be-ibmar-ogumakleged-aila-ebirdii gued.
PSA 26:7 Bab-Jehová, agi be-nug-odummogegala, an binnasur namakdii guoed, be-ibmar-dakledisulid-imaksad-barsogegala, an binnasur gordii guoed.
PSA 26:8 Bab-Jehová, bese-gorleged-neggi-be-maidbina an nue-soged, be-gargangued-oyomaid-negbina an nue-soged.
PSA 26:9 An burgwisale, dule-galagwensulid-abargi, dule-gindakmalad-abargi, mer megega be an-imako.
PSA 26:10 Ar unnila, we-dulemar ibmar-isganabi imakdimalad, emar-yardakedginbi binsadimalad, manigi emar-binsaed-gaed gudimalad.
PSA 26:11 Bab-Jehováʼye, andi innikigwadba gudiid. Be an-bendake, wile be an-dake,
PSA 26:12 ar an inniki nanadiid. Bab-Jehová, dulemar-onmakmalad-abargi, an be-nug-odummodii an guoed.
PSA 27:1 David we-namaked narmaksad. Bab-Jehová anga burba-dulad ukedid, an-abonogedid. ¿An doa dobguosunna? Bab-Jehová an-gandikidga gued. ¿An doase gwayosunna?
PSA 27:2 Dule-isganamar an-obelogega angi gwisguarmargu, an-isdarmalad an-oburgwega angi gwisguarmargu, aka bur amar burgwismalad.
PSA 27:3 Ar amba sordamar-bila-onoged, an-ebiris-bukwa-inigwele, andi an dobguosulid. Amba angi bila-onolealile, andi an bukib-binsaosulid.
PSA 27:4 Bab-Jehováʼse unni ibmar-soggwen an egichisad, abi an abeged: E-neggi-degisadegu-gudigued an abeged. Adi, an Bab-Jehová-e-yeerdakleged dakega, e-neggi ese gordii gubaligar.
PSA 27:5 Ar Bab-Jehová, ibagan-bulegangi na ese-goled-neggi an-odukuoed, na e-neg-megedgi an-odukuoed, akwasaila-birgi an-ogwichoed.
PSA 27:6 A-sorbali, an-isdarmalad-an-ebiris-bukwamaladgi-nakwega an-imakoed. Ese-goled-neggi, an e-nug odummogoed, Bab-Jehováʼga andi namakoed.
PSA 27:7 ¡Bab-Jehováʼye, an bese-goled, be itoge! ¡Be wile-an-dake, be an-abinsae!
PSA 27:8 An-gwage anga-soge an itoged: “Be Bab-Jehová-amie.” Bab-Jehová, an be-amied.
PSA 27:9 ¡Bab-Jehováʼye mer be angi dukue! ¡Mer be isdar-itogedgi be an-obane! Ar be an-bendakedid. Bab-Jehová an-abonogedye, mer be walagwen an-obege, mer be an-mete.
PSA 27:10 Ar amba an-bab, degi, an-nan an-obachale, Bab-Jehováʼdi an-suoed.
PSA 27:11 Bab-Jehová, an-oburgwebimalad-ulale, be-igarba be an-nide, igar-nueganba be an-idue.
PSA 27:12 Bab-Jehová, an-isdarmaladga mer be an-urmake, ar gakansaar-emar-barsogmalad, emar-sabsur-imakmalad, angi gwisgunanaid.
PSA 27:13 Degisoggu, an nue-wisimakaled, an we-napneggi-gudiidgi Bab-Jehová-dulemargi-nued-binsamaid an dakoed.
PSA 27:14 ¡Bab-Jehováʼgi mer be bengue! ¡Be gangue! ¡Be niga-gandik sae! ¡Eye, Bab-Jehováʼgi mer be bengue!
PSA 28:1 David we-namaked narmaksad. Bab-Jehováʼye, an bese gole, ar bedi an-bendakedga gued. Bab-Dummadye, melle be an-itosuli gue. Be an-itosulile, bato dule-burgwarmaladba, e-galuse-nadapiyob an guoed.
PSA 28:2 Bab-Jehováʼye, an bese wilesakwaa-gotele, bitigine, be an-itosana gadin. Bab-Dummadye, an-bendakega an bese-gotele, an bese-golega be-Neg-Ise-Islidikidsik argan onakwidele, bitigine, be an-daksana gadin.
PSA 28:3 Bab-Jehováʼye, dule-isgudimaladba melle be sabsur-an-wiogo, dule-ibmar-isgana-imakdimaladba, melle be sabsur-an-imako. We-dulemar, unnila asgi dule-baiganga nueganbi sunmakdidamalad. E-gwage-ulubgindina, egi isdar-binsadidamalad.
PSA 28:4 Dule-isgudimalad e-ibmar-isgana-imakedba, e-galagwensuli-nanaedba, be buged imake. Dule-isgudimalad e-ibmar-galagwensuli-imakedba, be buged sae.
PSA 28:5 Ar Bab-Jehová-ibmar-imaksadgi bar binsasurgusmarsoggu, Bab-Jehová-ibmar-imaksad baisur-dakarmarsoggu, Bab-Jehová bela a-dulemar obelogoed, baligannarse imakosulid.
PSA 28:6 Bab-Jehová-nug odummolesun, an ese wilesakwaa-goled an-itosad.
PSA 28:7 Bab-Jehová, an-ogannogedid, sigu-abgaedyob an-irwa-gwisguedid. Bela-belad gwage-ulubgi an egi bensulid, Bab-Jehováʼgi an bendaklesad. An-gwage-ulubgi, bela-belad-weligwale an itoged, an-namakedgi dog-nuedye an ega soged.
PSA 28:8 Bab-Jehová, na e-mimmiganga dule-gandikidga gued, Bab-Jehová, na e-nuggi rey-nugsalegaledga abonoged-gandikidga gued.
PSA 28:9 Bab-Jehováʼye, be-dula be abonoge, be-mimmigangi be ise-nued binsae. Sibad-wawaad-edarbed e-sibad-edarbedyobi, be-mimmigan be edarbe, degisadegu bendakdii be gusun.
PSA 29:1 David we-namaked narmaksad. Bemar baliwiturmar, Bab-Jehová-e-nug odummomar, Bab-Jehová-e-ganguedgi, e-yeerdaklegedgi be sunmakmar.
PSA 29:2 Bab-Jehová, Bab-Dummad-gued-ulale, e-nug be odummomar, Bab-Jehová-e-neg-islidikidgi, be Bab-Dummad-nug ogannomar.
PSA 29:3 Bab-Jehová-sunmakedi muu-billigi gollomakemaid. Bab-Dummad-Bela-Gangued-Nikad gollomakemaid. ¡Bab-Jehová muu-billi-dummad-birgi negsemaid!
PSA 29:4 Bab-Jehová-sunmaked dutusur sunmaked, Bab-Jehová-sunmaked dutusur goled.
PSA 29:5 Bab-Jehová-sunmaked iksiwar-bibisged. ¡Líbano-Yar-e-iksiwarmar Bab-Jehová-sunmakedba bibisged!
PSA 29:6 Bab-Jehová, Líbano-yar, Sirión-yar ogiglimaked. Moli-bebe-nikad-sapingana-ichomakeyob Bab-Jehová we-yarmar-oichomaked. Moli-bebe-nikad-sapurbarmalad-ichomakeyob Bab-Jehová we-yarmar-oichomaked.
PSA 29:7 Bab-Jehová-sunmaked ginnitibi milemaid.
PSA 29:8 Bab-Jehová-sunmaked nega-dulesulidgan ogiglimaked, ¡Bab-Jehová nega-dulesulidgan-Cadesʼye-nugad ogiglimaked!
PSA 29:9 Bab-Jehová-sunmaked sapi-encinaʼmar bibisged, sapurmar swanga nasiked. Bab-Jehováʼse-goled-neggi bela-dulemar Bab-Dummad-nug odummomalad.
PSA 29:10 Bab-Jehová dii-barigan-e-sailaga gued, Bab-Jehová bela negsemai degisadeguoed.
PSA 29:11 Bab-Jehová na e-dulemarga gangued ukoed, Bab-Jehová e-dulemarga bela neg-bogidikid nasiked.
PSA 30:1 David, Bab-Dummadse-goled-neg-nugsalegega namaked narmaksad. Bab-Jehová, an be-nug ogannoged, ar be an-bendaksad. An-isdarmalad mer angi wergumalaga be imaksad.
PSA 30:2 An-Bab-Dummad-Jehová, an bese gochagu, be an-nudaknonikid.
PSA 30:3 Bab-Jehová, an burgwedani-maigu, be an-bendaknonikid. Burba-dulad be anga uksad. Mer burgwarmalad-abargi-megega, be gannar an-ogwisgusad.
PSA 30:4 Bemar Bab-Dummad-e-sordagan, Bab-Jehováʼga be namakmar, e-nug-islidikid be ogannomar.
PSA 30:5 Bab-Dummad uludele, unnila sikwas-urwed. Ar nued-emargi-binsaeddina, degisadeguad. Ar mutikidba, boed nagunonidibe, neg-oibosardi, wergued nagunonikoed.
PSA 30:6 Anga ibmar-nasgumaigu, an weyob sogsagusad: “Bipisaale dule an-osikirmakosurye.”
PSA 30:7 Bab-Jehová, ar be-nued-angi-binsaedba, yar-dummad-siidyobi, ganna be an-osisad. Be angi aibategua, suli-suli an itonaded.
PSA 30:8 Bab-Jehová, an bese goled, Bab-Dummadye, an bese ise-wilegar goled.
PSA 30:9 Ar an burgwisale, ¿ibu-ibmar-nued egi amilegoe? An neg-uanse diglenader, ¿ibu-ibmar-nued egi amilegoe? ¿Ar dule-burgwaledde be-nug odummogoe? ¿Ar dule-burgwaledde be-igar-innikigwad barsogoe?
PSA 30:10 Bab-Jehováʼye, be an-itoge, wile be an-dake. Bab-Jehováʼye, ¡be an-bendake!
PSA 30:11 Bab-Dummad, an-gwage-naibi-itonaid, be weligwar imaknonikid. An nunmaked-mor-yoid be anga ungenonikid, weligwaled-mor be anga yononikid.
PSA 30:12 Bab-Dummad, degisoggu, an bega namaked, be-nug-odummoged bar an galegosulid, Bab-Dummad-Jehová, degisadegu, an bega dog-nuedye sogdii guoed.
PSA 31:1 David we-namaked narmaksad. Namakmalad-e-iduedga soglenaid. Bab-Jehová, an begi bensulid. Mer bingeguega be an-imake. ¡Be-igar-innikigwadgi, be an-bendake!
PSA 31:2 Bab-Jehováʼye, be an-itoge, gwae be an-bendakdage. ¡Be an-akwasaila-gandikidyob gued, be an-abonoged-gandikidyob gued!
PSA 31:3 Bab-Jehová, be an-akwasaila-gandikid-dukuedid, an-abonoged-neggandikidid. Degisoggu, be-nug-sabed-ular, be an-idue, be an-nide.
PSA 31:4 Bab-Jehováʼye, an-isdarmaladi emar-yamoged-igar-an-idu-mesismaladgi be an-ollor-imake, ar bedi an-dukuedid.
PSA 31:5 Bab-Dummad, be-argangi an-san-burba an uksun. Bab-Dummad-Jehová-napiragwad, bee be an-abonosad.
PSA 31:6 Dule-ibmar-babyob-imakleged-e-nug-odummodimalad an isdar-daked. Ar andi, Bab-Jehováʼgi bensulid.
PSA 31:7 Bab-Jehová, an be-sabguedgi yeer itoged, an egi wergubalid. Ar bedi an-ulubgi-naibi-itoged daksad, an-ulubgi-surbinsa-itoged be wisid.
PSA 31:8 Bab-Jehová an-isdarmaladga be an-uksasulid, be an-ollor-imaksad.
PSA 31:9 Bab-Jehováʼye, wile be an-dake, ar andi surbinsa-itoged. An wile-itogedba an-ibya mommoleded, an-abagan, an-ulub bela nunmaked.
PSA 31:10 An-naibi-itogedba bela an-abagan nollomakded, an bukib-binsaedbi birgamar onamaid. An-isgued-ular, an-gangued bela berguded, an-garmar bela nollomakded.
PSA 31:11 Bela an-isdarmaladga an ibmar-dodogedga gued, an-neg-dikarba-mamaid bur bule angi dodomalad. Dulemar-magar-an-dakmalad an-dakalile, an-dobguddamalad, ¡Dulemar igarba an-abingualile, angi gwakiddamalad!
PSA 31:12 Burgwisayobi dulemar bar angi binsasulid, nog-mamarisayobi an gunonikid.
PSA 31:13 Dulemar-bukidar emargi-gakansaar-sunmakmar an itoged. An bia naddibe, an dobee itoged. Ar dulemar angi-aibinega na atosmalad, an-oburgwedgi binsamalad.
PSA 31:14 Bab-Jehová, ar andi begi bensulid. Andi soged: “¡Be an-Bab-Dummadye.
PSA 31:15 An be-nugginbi gudiiye!” An-isdarmaladgi, an-balegindimaladgi, be an-ollor-imake.
PSA 31:16 Bab-Jehováʼye, angi be nued binsae, ¡Be-sabgued-dummad-nikadba be an-abonoge!
PSA 31:17 Bab-Jehováʼye, ar an bese gochasoggu, mer bingeguega be an-imake. Dule-isganamardi bingeguega be imake, gaya-bogidiki burgwarmalad-meged-galugi be mese.
PSA 31:18 Dule-gakansilimar-e-gaya bogidik be imake. Na san-dummarba-imakedba, dule-mesagwar-imakedba, dule-nuedgi ibmar-sabsur-sogdimalad.
PSA 31:19 Bab-Jehová, be-sabgued ibiyobi dungue. Dule-be-nug-odummodimaladga, be-sabed be oyoged. Dulemar-wagab, dule-begi-bengusurmaladga, be-sabgued be oyoged.
PSA 31:20 Bab-Jehová, dule-nued dule-egi-isdar-binsaedgi, be-walik be odukued. Dule-nued dule-urwedginbi-sunmakmaladgi, bese-goled-neg-sunna-selegedgi be odukued.
PSA 31:21 Bab-Jehová-nug an odummosun. Ar sordamar neggwebur-ebiris an-oburgwega bukwagusmargu, e-sabgued-dummad anga oyosad.
PSA 31:22 An surbinsa-itogedba an sogde gusad: “Be-asabin bar be an-ogwisguosurye.” Degi-inigwele, Bab-Jehová, an bese gochagua, bedi an-wilesakwaa-gornaid itosad.
PSA 31:23 Bela-bemar-Bab-Jehováʼba-nanaid, Bab-Jehová-sabgumala. Bab-Jehová, dule-ega-galakudisurmalad na edarbed. Ar Bab-Jehová dule-na-san-dummarba-imakdimaladdi, sabsur-odurdaked.
PSA 31:24 Bela Bab-Jehováʼgi-bensurmalad gangumala, niga-ogannomala.
PSA 32:1 David namaked narmaksad. We-namaked Masquilʼye nugad. Bab-Jehová, dulega e-galagwensuli-gudigusad elisale, e-isgusad ega osulosale, Bab-Jehová egi nued binsanonidaed.
PSA 32:2 Bab-Jehová, dulega e-isgudigusad bar insasuli gunonikile, egi-isgued-naid ega osulononikile, Bab-Jehová egi nued binsanonidaed.
PSA 32:3 Bab-Jehováʼga, an-isgued an sogsulidbali, bane-bane an akigindiidbali, an-abagan galalemai guded.
PSA 32:4 Mutikidbali, ibginedbali, sabsur be an-imaked. Igi yorgi dutu dad-ibeler-abin dinguddae, deyobi, an na itoged.
PSA 32:5 Geb degi, an-isgued na bega barsognonikid, gwen an begi an-isgued odukussulid. Weyob an sogsad: “Emi, Bab-Jehováʼga an-isgued an barsogoye.” Agine, an-galagwensuli-gudigusad be elinonikid, an-isgudi-gudigusad be anga osulononikid.
PSA 32:6 A-ulale, dule-be-sogedba-nanadimaladi, suli-suli-itogedgi, bese gormalad. Boni-dummagan-ainialile, ese warmakosulid.
PSA 32:7 Bee be an-odukuedid, nega-bulegangi bee be an-edarbedid, bendakleged-igarmargi-namakega, be an-imaked.
PSA 32:8 Bab-Jehová soged: “Ani an be-odurdakoed, ani an bega sogoed, ibu-igarba be nanaoe, ani an bega binsaed ukoed, ani an begi nakuledii guoed.
PSA 32:9 Igi moli, degi, moli-uayasuid, ibmar-akusunna itodamala, deyob melle be dao. Ar wemardi, bese warmakmalaga, e-dukargi, dub-nasiklegergebed, e-gayagi, e-gaya-bargaed nasiklegergebed. Degisulile, bese warmakosurmalad.”
PSA 32:10 Dule-galagwensuli-nanadimaladi, ega gwage-nunmaked-dummad danikid. Dule Bab-Jehová-abdakakwaa-gudimaladdi, Bab-Jehová ise-wile dakoed.
PSA 32:11 Bemar, dule-innikidamaladi, be weligwar-itomarsun, Bab-Jehováʼgi be wergumarsun. Bemar, dule-gwage-nuegan-gumaladi, bela yeer-itogedgi namakmarsun.
PSA 33:1 Bemar, dule-ibmar-inniki-imakmalad, Bab-Jehováʼgi be wergumar. Dule-nuegan, Bab-Jehová-e-nug-odummomalar, yeer itoledaed.
PSA 33:2 Bab-Jehová-nug gar-arpa-ogoledba be odummomar, Bab-Jehová-nug gar-arpa-dub-giambe-nikadba (10) be odummomar.
PSA 33:3 Namaked-binid Bab-Jehováʼga be namakmar, Nue ega weligwaledgi gar be ogormar.
PSA 33:4 Ar Bab-Jehová-sunmaked, napiragwadid, bela na e-ibmar-imakedi, napiragwadbiid.
PSA 33:5 Bab-Jehová, igar-innikigwad, igar-napiragwad nue-sabed. Bab-Jehová-sabguedi, bela we-napneg-gasa naid.
PSA 33:6 Bab-Jehová na e-sunmakedginbi nibneg nasiksad, na e-bunnogedginbi bela niisgwamar nasiksad.
PSA 33:7 Bab-Dummadi demar-dummagan danar nasiksad, ibmar-sabolegedyobi demar danar urbisad.
PSA 33:8 Bela we-napneggi-bukmalad Bab-Jehová-nug ogannomar. Bela bemar-we-napneggi-bukmalad Bab-Jehová-nug odummomar.
PSA 33:9 Ar Bab-Jehová sunmaksagu, bela ibmar gunonikid. Bab-Dummad igar-ukdegu, bela deyob gunonikid.
PSA 33:10 Bab-Jehová, dule-yar-baid-baidgi-bukmalad-igar-amimalad-ibe ei igar bisged. Dule-yar-baid-baidgi-bukmalad-igar-amimalad-ibe ei igar obured.
PSA 33:11 Bab-Jehová-ibmar-imakbieddi, degisadegu mai guoed. Bab-Dummad-binsaed, degisadegu mai guoed.
PSA 33:12 Dule-yar-baid-baidgi-bukmalad Bab-Jehová e-Bab-Dummadga imakmaladi, we-dulemargi nued binsalesad. Bab-Jehová we-dulemar-egadga-imakegala na susad.
PSA 33:13 Bab-Jehová nibneg-akale atakmaid, Bab-Dummad bela dulemar-dakmaid.
PSA 33:14 Bab-Jehová na e-maidgi atakmaid, Bela we-napneggi-dule-bukmalad dakmaid.
PSA 33:15 Bab-Dummad bela dulemarga gwage nasiksad, degisoggu, ulubgi-be-binsanaid be-wisid.
PSA 33:16 Rey, na e-sordamar-ichesur-nikadba bendaklegosulid, dule-dutusulid, na e-gangued-nikadba wakinnosulid.
PSA 33:17 Moli, dutusur-inigwele, bila-onogedgi e-ganguedba geg-dule-bendaked.
PSA 33:18 Bab-Jehová dule-e-dobee-nanadimaladgi nue nakuledaed, dule-e-sabgued-edarbedimaladgi nue nakuledaed.
PSA 33:19 Bab-Jehová melle we-dulemar-burgwega bendakmaid, ukud-dummad-nagunonikile, we-dulemar-bendakmaid.
PSA 33:20 Bab-Jehová, anmar begi bensulidgi be-edarbebukwad. Bedi anmar-bendakedid. Bedi sigu-abgaedyob be anmar-irwa gwisgudiid, a-ulale, anmar begi bensulid.
PSA 33:21 Degisoggu, Bab-Dummad, begi anmar wergusunnad, ar ade, anmar be-nug-islidikidgi bengussulid.
PSA 33:22 Bab-Jehová, be-wile-anmar-daked, anmar begi edarbediid. Ar anmar begi bensulid.
PSA 34:1 David yamo iwileyob na imaksagu, Abimelecʼse ononnolesgusad. A-ulale, David we-namaked narmaksad. An bane-bane Bab-Jehová-e-nug-odummodii an guoed, an ega namakdii guoed.
PSA 34:2 Bab-Jehováʼba an nug-dummarba itoged. Deyob dule-na-san-dummarba-imakdisurmalad itononimaloed, agi Bab-Jehováʼgi wergudmarmogoed.
PSA 34:3 Bemar an-balikwaa Bab-Jehová-e-nug odummomar, anmar bela danakwaa e-nug odummomar.
PSA 34:4 An Bab-Jehová-amidigua, an-abin-imaknonikid. An ibmar-dobgudiidgi, an-ollor-imaknonikid.
PSA 34:5 Dulemar Bab-Jehováʼse-idaksamaladi, egi gangunonimalad, bipisaale bingeguosurmalad.
PSA 34:6 Ani, an dule-wileged, an Bab-Jehováʼse-gochagu, an-itononikid, agine, bela bonigangi an-ollor-imaknonikid.
PSA 34:7 Bab-Jehová-e-baliwitur dule-e-nug-odummodiid-bendakegala, ese nonidaed.
PSA 34:8 Bemar-sunnagwad be dakdamala, Bab-Jehová-ibidar-nuedid be dakmala. Dule, Bab-Jehováʼgi-bensurgudiid, egi nued binsalediid.
PSA 34:9 Bemar Bab-Jehová-sordamar, Bab-Jehová-dobekwaa nanamar. Dule-Bab-Jehová-dobekwaa-nanadimaladi, ibmarsuli-gudii guosurmalad.
PSA 34:10 Dule-mani-ibmala, dule-wilegedga nadmaloed, ukud-itodii gudmaloed. Dule-Bab-Jehováʼgi-bensur-gudimaladdina, ibmarsuli-gudii guosurmalad.
PSA 34:11 Mimmigan, dagmala, an-itodamala: Bab-Jehová-dobekwaa-nanaedgi an be-odurdakmaloed.
PSA 34:12 Ar dule na wergudii gubiele, iba-nuegangi weligwar nanadii gubiele,
PSA 34:13 ibmar-isganagi-sunmaked na bargaergebed, gakansaar-sunmaked iegergebed.
PSA 34:14 Ibmar-isgana-imaked iegergebbalid, ibmar-nuedbi imakergebed. Neg-bogidikidbina gudiguergebed, neg-bogidik-imakdii gubalirgebed.
PSA 34:15 Bab-Jehová dule-inniki-gudimalad akwediid, wemar-ese-goled nue-itodaed.
PSA 34:16 Dule-ibmar-isgana-imakmaladgindina, egi yoleged. Bab-Jehová a-dulemargi yoleged, adi, we-napneggi mer bar egi binsalegegar.
PSA 34:17 Dule-inniki-gudimalad Bab-Jehováʼse-gotele, Bab-Jehová abin-imaked. Bab-Jehová bonigangi dule-inniki-gudimalad nue-bendaked.
PSA 34:18 Bab-Jehová dule-naibi-itodimaladba gudiid, dule-bukib-binsadimalad nue-bendakbalid.
PSA 34:19 Dule-inniki-gudiid, bonigan-bukidar nikued, degi-inigwele, Bab-Jehováʼdina, bela a-bonigangi ollor-imakoed.
PSA 34:20 We-dule-e-garmar akarguega imakosulid, gwen wargwensaale e-ibe-bibislegega imakosulid.
PSA 34:21 Dule-isganamar ibmar-isgana-imakdimaladba na dukin wioged. Ar dulemar dule-innikidamalad-isdardakdimaladi, odurdaklegedsemalad.
PSA 34:22 Bab-Jehová dule-ega-arbadimalad nue bendaked, Bab-Jehováʼgi-bengudisurmalad, sabsur-odurdaklegosurmalad.
PSA 35:1 David we-namaked narmaksad. Bab-Jehováʼye, angi-gwisgudimaladgi be gwichigue. Angi-bila-onodimaladgi be bila-onoge.
PSA 35:2 Bab-Jehová, be-sigu-abgaed-suid be sue, an-bendakega be dage.
PSA 35:3 An-balegindimalad-abin eswar be gae, akan be gae. Ani an be-abonogedye be anga soge.
PSA 35:4 An-oburgwebimalad, bingegumarsun, neg-aku-ito gumarsun. An-oakalobimalad, gannar sorsik namarsun, bingegus namarsun.
PSA 35:5 Amala, oros-e-uka burwa-abin-mileddaedyob gumarsun, Bab-Jehová-e-baliwitur amar-baleginne.
PSA 35:6 E-igar-nanaedi, ega negsichidyob gusun, e-igar-nanaedi, ega gware-gwareyob gusun. Bab-Jehová-e-baliwitur amar-baleginne.
PSA 35:7 Gwen an ibmar-oakalossuli, an-oburgwega, an-idu yaa akwismalad, an-idu saki nasiksamalad.
PSA 35:8 Boni egi ukiagwar yolesunna, na emar-yardakdiidgi, na dukin yardaklege. Na yaa-akwismaladgi, na dukin argwanmala.
PSA 35:9 Degidbali, Bab-Jehováʼgi an yeer itogoed, an e-abonogedgi weligwar itogoed.
PSA 35:10 Weyobi, binnasur an gotoed: “Bab-Jehováʼye, ¿doa beyobi, dule-nollogwad dule-dutusulidgi bendake? ¿Doa beyobi, dule-wileged dule-e-ibe-ibmar-suedgi bendake? ¿Doa beyobi, dule-ibmar-abediid, dule-e-ibe-ibmar-suedgi bendake? Dule beyobid sated.”
PSA 35:11 Dule-barsogmalad-isganamar angi gwisguarmalad, an-ibmar-wissulid anse egismalad.
PSA 35:12 Andi wemargi nueddaed, emardi, angi ichakwadamalad. Weyob-damalad ulubgi nunmak an-imaked.
PSA 35:13 Ar wemar uellemaigusgu, andi nue-bukib eba itodii gusad, andi wile-itoged-mor-yoi gudii gusad. Ulubgi-naibi-itogedba an mas guchasulid, an ega Babse-goled gwen bogigussulid.
PSA 35:14 An-ai-burgwisayobi, an-gargwenad-burgwisayobi, an bukib-itodii gusad. An-nan-burgwisayobi, an bodii gusad. An ulubgi-naibi-itogedba, an bukib-binsadii gusad.
PSA 35:15 An sabsur-wilesgu, emardi yeer-itosmalad, na atosmarbalid. Dule-isganamar aku-an-dakmaladyobi, angi aibinmalaga na atosmalad, an-san goa-goa imaknaidbi gusmalad.
PSA 35:16 Sabsur-an-imaknanai gusmalad, angi dodonanai gusmalad, isdar-an-dakmaladba anse uludmalad.
PSA 35:17 Bab-Jehová, ¿sanagwadse be we-dulemar yeerdakoe? Dulemar-an-gindakbiedgi be an-bendake, dulemar achumigur-nono-wawaadyob an-obelobiedgi be an-bendake.
PSA 35:18 Dulemar-bukidarad-abargi, an bega dog-nuedye sogoed. Dulemar-bukidarad-abargi, an be-nug odummogoed.
PSA 35:19 An-isdarmalad-angi-aibindimaladi, mer angi wergumala. Binsa-isdar-an-dakdimaladi, mer angi dodomala.
PSA 35:20 Ar wemar neg-bogidik-nasikedgi sunmaksurmalad, unnila dulemar-gwage-eikwaa-damaladgi gakansaar sunmakmalad.
PSA 35:21 Anga ise-allar allemalad, sogmalad: “¡Anmar-sunnad anmar e-isgusad daksamarye!”
PSA 35:22 ¡Bab-Jehová, bela be daksad! ¡Mer be gayamaklege! ¡Mer be angi bangue!
PSA 35:23 An-Bab-Dummad-Jehováʼye, anga igar-innikigwad-imakega be dage, an-arsogega be dage.
PSA 35:24 An-Bab-Dummad-Jehováʼye, be-igar-innikigwadba be anga igar naboge. ¡We-dulemar mer angi dodomalaga be imake!
PSA 35:25 Mer weyob binsamalaga be imake: “¡Anmar weyopira dakbigusye!” Mer weyob sogmalaga be imake: “¡Anmar we-dule obelosye!”
PSA 35:26 An-sabsur-wilesadgi bela yeer-itodimaladi, bingegumala, neg-aku-itodii gumala. Dulemar angi bur san-dummarba-itodimaladi, bela-bela bingegumala, nug-bipii gumala.
PSA 35:27 Anba-nanaimalad, binnasur namakmar, wergumar. Sogdii gumarsun: “Bab-Jehová-e-nug odummolesunye, Bab-Jehová e-mai-gwage-bogidikid yeerdakye.”
PSA 35:28 Be-igar-innikigwadgi an sunmakoed, bane-bane an be-nug-odummodii gudoed.
PSA 36:1 Bab-Dummad-e-mai-David we-namaked narmaksad. Namakmalad-e-iduedga soglenaid. Dule-Bab-Dummadgi-isgudiid weyob soged: “Isgudiid an yeer-itoged.” Bab-Dummad-dobe-nanaodeeye gwen binsasulid.
PSA 36:2 Dule-isgana e-nug-odummolegoye binsaed, e-isgued akudaklegoye binsaed. Bab-Dummad ega akar-sogosurye binsaed.
PSA 36:3 E-sunmaked, galagwensuli sunmaked, gakansaale sunmaked. Dule-binsaedsulidga naded, ibmar-nued-imaked ieded.
PSA 36:4 Megidele, isgued-imakedginbi binsamegisdaed. Igar-nued-imakedgi gwen binsadasulid. Isguedgi bangugwelodeeye gwen binsadasulid.
PSA 36:5 Bab-Jehová, be-sabguedi bela nibnegse warmaked, be-innikidaedi, bela mogir-billise warmaked.
PSA 36:6 Be-igar-innikimaladi, yala-dummagan-gandik-bukwadyob gued. Muu-billi-wilasaila-naibayobi, be-igar-nabomalad mamaid. Bab-Jehová, bela be dulemar-akwemaid, bela be ibdurgan-bukwadi, akwemaibalid.
PSA 36:7 Bab-Dummad, ibibayobi bedi bela-belad wile dule-dakmai. Gannir e-mimmigan e-sakan-urba-odukueyob, dulemar begi bendakleged amied.
PSA 36:8 Be-neggi ega be mas-obineba-ukmaidgi, nue immelebukwad, be-dii-nued-ariomaidgi nue-immelebukwa be imaked.
PSA 36:9 Ar beginbi, san-burba-geg-bergued danikid. Anmar unnila beginbi, san-burba-dula-gued amied.
PSA 36:10 Bab-Dummad, dule-beba-ibmar-imakdimaladi be wiledaksun. Dule-gwage-nuegan, be-igar-innikigwadba be bendaksun.
PSA 36:11 Dule-san-dummarba-imakdimaladi, melle an-ogalakuega be sao. Dule-isgudimaladse, melle galakuega be an-imako.
PSA 36:12 Nue be dakmar, dule-isgudimaladi, igarga gudasulid. Galakuddamalad, gege bar igarga gudamalad.
PSA 37:1 David we-namaked narmaksad. Dule-isganamar-nasgumaidba mer be sae itoge, Dule-isganamargi mer be nobgue.
PSA 37:2 Ar we-dulemar gaganyobi emiskwaa bergudmaloed, gagan-dinguddaedyobi emiskwaa surgudmaloed.
PSA 37:3 Bab-Jehováʼgi mer be bengu, ibmar-nuegan be imake. We-napneggi galakusuli be gudii guoed.
PSA 37:4 Bab-Jehováʼgi be nue-wergudii sae. Ar be ibmarbina-sogdiid, Bab-Dummad bega ukoed.
PSA 37:5 Be-ibmar-imakbied, Bab-Jehováʼga be uke. Mer be Bab-Jehováʼgi bengue, ar Bab-Jehová bega ibmar imakoed.
PSA 37:6 Igar-maidba be-ibmar-imakedi, Bab-Dummad bega dad-ibeleryob odalogoed. Deyobi dule bela magar daknonikoed, bede, dule-napiragwadid, bede, igar-maidba ibmar-imakedid.
PSA 37:7 Bab-Dummad-asabin bogidik-gudii be imake. E-bega-ibmar-imakedse edarbedii be sae. We-dule-ibmar-isgana-imaked nasgumai be dakele, mer be sae-itogo.
PSA 37:8 Be-isdar-itoged na be bargae, be-sae-itoged be iege. Melle be urwe, abakalegi be neg-oichoalile.
PSA 37:9 Ar dule-isganamar burgwemaloed. Dule-Bab-Jehováʼgi-ibmar-edarbedimaladdi, neg-nued-bonisulid ega uklegoed.
PSA 37:10 Dule-isganamar napi-ichee gudidimalad. Ar a-dulemardi be-amidigumaloen-inigwele, gwen be-amiosurmalad.
PSA 37:11 Ar dule-san-dummarba-imaksurmalad neg-nued-bonisulid egadga guoed, amala bela nue-nasgumaidbali, weligwar itomaloed.
PSA 37:12 Dule-isgana dule-nuedgi sunnasur binsadaed. Dule-isgana dule-nued-dakdele, bela-bela nue-sae dakdaed.
PSA 37:13 Degi-inigwele, Bab-Jehováʼdi dule-isganaga alloed, ar wisid, we-dulemar-bergued bato ese warmaksad.
PSA 37:14 Dule-isganamar, dule-wilegana-oburgwega, dule-nued-nanamalad-ogilogega, e-es-suid ononanaid, e-sigumar guagwar ebisbukwamalad.
PSA 37:15 Degi-inigwele, e-es-suid e-gwagegi yolegoed, e-warsimardi ei bibislegoed.
PSA 37:16 Dule-nued ibmar-ichee-nikale, dule-isgana-ibmar-bukidar-nikadba, bur nuedid.
PSA 37:17 Ar Bab-Jehová, we-dule-isganamar-e-gangued ei osulogoed. Dule-igar-inniki-imakmaladdi bendakoed.
PSA 37:18 Bab-Jehová, dule-inniki-nanadimalad-edarbediid. A-dulemarga ibmar-uklegoedi, degisadegu egadga guoed.
PSA 37:19 Dule-inniki-nanadimaladga ibagan-bulegan-noni-sogele, akar-guosulid. Ukud-dummad nagunonikile, mas-nika guoed.
PSA 37:20 Dule-isganamardi, bergudmaloed. Bab-Jehová-isdarmaladdi, gagan-burgweyobi burgwidmarmogoed. Waayob bergudmaloed.
PSA 37:21 Dule-isganamar aimargi mani-gasale, bar bennukdasulid. Dule-nueddi dule-wiledakedba aimarga ibmar ukdedaed.
PSA 37:22 Dulemar Bab-Jehováʼse-nabir-binsalesmaladi, neg-nued egadga guoed. Dulemar Bab-Jehováʼse-ukabsalesmaladdi, girgumaloed.
PSA 37:23 Dule-wargwen e-daedgi Bab-Jehová-yeer-ito imakele, Bab-Dummad we-dule-nued-nanadii imaked.
PSA 37:24 Dule-nued gwatirnoni-sogele, deyob degisadegu gudii guosulid, ar Bab-Jehová we-dule-bendakoed.
PSA 37:25 An sapingwa-danikid-akale, an seredgusadse, an dakdisulid, dule-nuedi nue-dummad-wiledii, e-mimmigan mas-egisdii an dakdisulid.
PSA 37:26 Dule-nuedi aimarga ibmar-ukalile, nuedgi yeer-itogedba ukdedaed. E-mimmigan ega ibnuedga gued.
PSA 37:27 Ibmar-isganagi be bangu, ibmar-nueganbi be imakdii gue. Ar deyob be imakele, Bab-Dummad bega-yar-ukoye-sogsadgi degisadegu be gudii guoed.
PSA 37:28 Ar Bab-Jehová igar-inniki-imakleged yeer dakdaed, dule-eba-nue-nanadiidgi, bangusulid, Bab-Jehová amar-nue-edarbedidaed. Dule-isganamardi, bergumaloed, gwen wagan-nikuosurmalad.
PSA 37:29 Dule-nuegan-damaladdi, Bab-Dummad ega yar-ukoye-sogsadgi degisadegu mai gumaloed.
PSA 37:30 Dule-nued sunmakdele, nue-binsaed-nikaa sunmakdedaed, Dule-nued sunmakdele, igar-inniki-maidba sunmakdedaed.
PSA 37:31 E-Bab-Dummad-igar-maid e-gwagegi sedidaed. A-ulale, isgusurdaed.
PSA 37:32 Dule-isgana dule-nued-oburgwega arbakee dule-nued-argadidaed,
PSA 37:33 Degi-inigwele, Bab-Jehováʼdi dule-isganaga dule-nued-urmakosulid. Dule-nuedga igar-itolear-sogele, egi isgusye-sogega imakosulid.
PSA 37:34 Bab-Jehová-abdakdii be gue, a-sogedba be nanadii gue. Bab-Jehová be-nug-odummogoed, neg-nued begadga-guegala, bega ukoed. Dule-isgana-bergumaloedi, be-sunnad be dakoed.
PSA 37:35 An dule-isgana daksad, urwar-sapi-dummad-neg-ganikidyob, na san dummarba imaked.
PSA 37:36 Degi-inigwele, we-dulemar emiskwaa bergudoed. We-dulemar bato sulibinne dakledagoed. Be amialile, be dakosurguoed.
PSA 37:37 Dule-nuegan-damalad be dake, dulemar igar-maidba-damalad be dake. We-dulemar-nueddamaladga igar-nued ega maid.
PSA 37:38 Ar dulemar igar-maidgi-yoledimaladdi, bela burgwemaloed, Dule-sunnasur-damaladdi, bela bergudmaloed.
PSA 37:39 Dule-nuegan-damalad-e-bendakleged Bab-Jehováʼgi danikid. Ibagan-suli-suli-itogedgi, Bab-Jehová dule-nuegan-bendakedga gued.
PSA 37:40 Bab-Jehová bonigangi dule-nued-bendakoed, ar Bab-Jehováʼgi bensuli-gudii gusad. Bab-Jehová dulemar-isganagi we-dule-onogoed, dulemar-isganagi bendakoed.
PSA 38:1 Ibmar-ukleged-ebinsalegega, David we-namaked narmaksad. Bab-Jehováʼye, mer be anse urwe. Be sae-itogedgi, mer be sabsur an-imake.
PSA 38:2 Be sabsur-angi-uludedba an naibigunonikid, be angi sabsur-gwisgunonikid.
PSA 38:3 An-isgusad-ular, be anse uludedbali, an-san bar nuedsulid, an-garmar bar nuedsulid.
PSA 38:4 An-isgued bela an-nonogagas naid, ibmar-aidikidyob angi signonikid.
PSA 38:5 An binsaedsuli gudigusad-ulale, an-sanse-bakale, nunusar yapangusad, bela sibudik-sibudikgusad.
PSA 38:6 Nue-ibitos itoleged, bela-bela an oitolesad, nue-wiles itoleged.
PSA 38:7 Bela-bela an uedik itoged, an-san bela ibitosad.
PSA 38:8 Nue geggus itoleged, nunumakesar itolegusad. An gwage-nunmaked-dummad nue-itonaid.
PSA 38:9 Bab-Dummad, an-ibmar-abeged bela be wisid, an-ibmarbina-gudiid begi dukunaisulid.
PSA 38:10 An-gwage sabesur dik-dik-naid, an-niga argwated, nue an ataksurgusad.
PSA 38:11 An bonigan-nikadba, an-aimar, an-sordamar, angi bangudmalad. An-gwenadgan angi deyob bangudmarmogad.
PSA 38:12 An-oburgwebi-gudimaladi, an-yardakega angi arbananaid. An-oitomaloye-sogdimaladi, an-yardakega arbakee bane-bane igar-aminanaid.
PSA 38:13 Degi-inigwele, uayasuliyob an imaksad, yamo amar-itonaisuliyob an imaksad. Amar-abin an sunmaksasulid, wissur-sunmakeyob an imaksad.
PSA 38:14 Degisoggu, dule-uayasulidyob an gued, wissur-emar-abinsaedyob an gued.
PSA 38:15 Bab-Jehová, unnila an beginbi ibmar-edarbediid. An-Bab-Dummad-Jehová, bebi unnila wemar-abin-imakoed.
PSA 38:16 Unnila ibmar-soggwen an egised: An ailanonikile, mer anga allemalaga be imako, mer angi burgumalaga be sao.
PSA 38:17 Nue an galakue itoged, ibmar-nunmaked gwen-an-indakbisulid.
PSA 38:18 Degisoggu, an-isgusad an na barsogergebed, an isgusadba nue-wiles an itoged.
PSA 38:19 An-isdarmaladdina nue baligannosmalad, yogasaar-isdar-an-dakdimaladi nue mergusmalad.
PSA 38:20 An ibmar-nued-imaked-ular, dulemar angi yolenanaid. An ibmar-nued-imaked-ular, dulemar angi gwisgunanaid.
PSA 38:21 Bab-Jehováʼye, mer be an-barmete, an-Bab-Dummadye, mer be angi bangue.
PSA 38:22 Gwae be an-bendakdage, Bab-Dummad, be an-abonogedid.
PSA 39:1 David we-namaked narmaksad. Namakmalad-e-idued-Jedutúnʼga soglenaid. An na dukin sogsad: “An itoakwaa nanadii imakoye, adi, an-sunmakedgi mer an isguegar. Ar dule-isgana an-asabin gwichile, andi ibmar-sogosulid.”
PSA 39:2 Degisoggu, an sunmaksasulid, ar ibmar-nuedse-bakale, bar an bissulid. Degi-inigwele, nunmakeddi anga ulubgi nasgumai gusad.
PSA 39:3 An-gwagedi uelleded. An we-ibmargi-binsasiidgi an isdar itoded, geb an sogdesunnad:
PSA 39:4 “Bab-Jehová, an-ibagan-berguoed be anga soge, birgabigwa an napi-dulagudiguoed be anga soge, adi, an sikwas-gudiguoed magar itogegar.
PSA 39:5 Bab-Jehová, wis-ichee-dulagudigued be anga uksad, an-birga-nikaddi be-asabinni birgamar-nassuliyob be daked. We gakansulid, bela-dulemar-gudidiid sikwas-bunnogedyob gudidimalad.
PSA 39:6 ”Ar napiragwad, anmar we-napneggi unnila sikwas gudimalad. Dule binsarsunna sulibinsa itodiid. Ar binsa na ibmar-nuegan saboged, ar wissulid, doa we-ibmar sunonikoe.
PSA 39:7 ”Bab-Jehováʼye, degisoggu, ¿bia an bendakleged amiosunna? Unnila an beginbi bendakleged amied.
PSA 39:8 Bab-Jehováʼye, bela an-isguedgi be an-ollorsae, mer dule-binsaed-nikasurmalad angi-dodomalaga be imake.
PSA 39:9 ”An bar sunmaksasulid, an bar ibmar-sogsasulid, ar bee be deyob ibmar imaked.
PSA 39:10 ”Bab-Jehováʼye, mer bar be sabsur-an-odurdake, ar be an-oburgwednaga an-imaknaid.
PSA 39:11 Be dule-isgued-sabsur-odurdakedba dule-nudaked, na bur e-ibmar-binasoged uduyob be e-ibe obeloged. We gakansulid, bela-dulemar-gudidiid, sikwas-bunnogedyob gudidimalad.
PSA 39:12 ”Bab-Jehováʼye, an bese-goled be itoge, an bega-ibmar-soged be itoge, an-boed mer be itosuli gue. Andi bega dule-ainebalid gued, bela an-dadgan-nanadigusadyobi an yar-obak-obak gudiid.
PSA 39:13 Mer isdar be an-dake. An we-napneggi-naed-iduar, an gannar weligwar itogoed.”
PSA 40:1 David we-namaked narmaksad. Namakmalad-e-iduedga soglenaid. Ulubgi-abitoakwaa, Bab-Jehová-abdakdii an gusad. Ansik aibilisad, an ese-goledi, magar an-itosad.
PSA 40:2 San-burba-bergued-galu-yagi an-onosad, nega-matagangi an-onosad. Akwasaila-birgi an-ogwisgusad, nega-nuedgi an-ogwisgusad.
PSA 40:3 Bab-Jehová an-gwabindukugi namaked-gwapid nasiksad, e-nug-ogannoedgi-namakega an-imaksad. Deyob an-dakarmargua, bukidar dobe itodmalad, Bab-Jehováʼgi bensuli gudmalad.
PSA 40:4 Dule, Bab-Jehováʼgi-bensuliguedi, Bab-Jehová egi nued binsadiid. Dule, san-dummarba-samalad-barwisodisulidi, bab-dummad-baidse-gormalad-barwisodisulidi, Bab-Jehová egi nued binsadiid.
PSA 40:5 An-Bab-Dummad-Jehováʼye, ibibayobi ibmar-dakledisurmaladi be imaksa. Ibibayobi be anmargi nued binsasa. ¡Dule beyobid sulid! Aisaar an bega bela be-ibmar-imaksad sogbienad. Igi an bega sogergebele, ar gege bela bega sogleged.
PSA 40:6 Bega-ibdula-uklemalad gwen be abessulid, bega-ibmar-gwag-gullemalad-ukleged gwen be abessurbalid. Unnila beba-ibsaega be an-imaksad. Bega-ibdula-ogumakar-uklegedi, isgued-eliega ibdula-uklegedi, gwen be egichissulid.
PSA 40:7 A-ulale, an sogdesunnad: “Bab-Dummad, be-gardagi angi-narmakar-maiyob an danisun.
PSA 40:8 Bab-Dummad, an be-sogedba ibmar-imakedi ibiyobi an yeer-itodae. Be-Igar-Mesisadi an-gwage-ulubgi an sediid.”
PSA 40:9 Dule-bukidarmalad-abargi an be-igar-napiragwadgi sunmakdiid. Bab-Jehová, bedi nue an-wisid be-igarba-sunmakedi an gwen boggudisulid.
PSA 40:10 Be-igar-napiragwadi dulemarga an gwen odukudisulid. Be-innikidaedgi, be-abonoleged-igargi, an obinmakdiid. Bipisaale, dule-bukidarmalad-abargi be-sabguedi, be-igar-napiragwadi, an gwen odukudisulid.
PSA 40:11 Bab-Jehováʼye, melle be-sabguedi be angi obano. Be nue-an-sabedgi, be-igar-napiragwadba, be an-sedii guo.
PSA 40:12 Isguedi bukidar an-ebiris naid, isgued bukidarsoggu, gege na bega bela bied. Isgued angi dar nue obined, an akusunna-itogusad. Isgued an-sailagiaganba bur bule mergued, bar-gannarbaa an itosurgusad.
PSA 40:13 Bab-Jehováʼye, we-isguedgi wis be an-onodage. Bab-Dummadye, gwae be an-bendakdage.
PSA 40:14 Dule-an-obelobimaladi be obingegsae, akusunna ibmar-itogega be imake. Dule-an-oichobigudimaladi, binged-abargi duurmakemai be sae.
PSA 40:15 Dule-an-wagar-daksuli an-dikarba-sunmakdimaladi, bingedar-itogwichi be imake.
PSA 40:16 Dule-be-amidimaladi, begi wergumarsun, begi yeer-itomarsun. Dule-abonoleged-igarbina-nue-sogdimaladi, weyob sogdii gumarsun: “¡Ibiyobi Bab-Jehováʼdi dule-gandikid guye!”
PSA 40:17 Bab-Jehováʼye, melle be an-iego, andi dule-wilesa gudiid, ibmar-abesa garmakdiid. Bab-Dummad, bee be an-bendakedid, igar-bulegangi bee be an-onogedid. Bab-Dummadye, melle be undar-yogguo.
PSA 41:1 David, namakmalad-e-iduedga we-namaked narmaksad. Dule, dule-wileged-bendakedgi binsaele, Bab-Jehová, a-dulegi nued-binsaed. Ar ade, ibagan-isgana ega nagunonikile, Bab-Jehová we-dule-bendakoed.
PSA 41:2 Bab-Jehová we-dule-edarboed, we-napneggi dula-gudii imakoed, we-napneggi we-dulegi nued-binsalegoed. E-isdarmaladga we-dule-urmakosulid.
PSA 41:3 We-dule nailikgumaile, Bab-Jehová bendakoed. Bab-Jehová we-dulega nailikgued osulogoed.
PSA 41:4 Bab-Dummadga, an sogsad: Bab-Jehováʼye, wile be an-dake. Ar an begi nos-inigwele, an-nailikgumaid be anga osuloge.
PSA 41:5 An-isdarmalad angi isdar sunmakmalad, sogmalad: “¿Wede sana burgoe? ¿Wede sana berguoe?”
PSA 41:6 Anse atakdanimalale, gakansaar anga sunmakmalad. Geb nadmalogua, angi sunmakdedamalad.
PSA 41:7 Dule-isdar-an-dakmalad danar ambikunonimalogu, angi urwebukdamalad. Angi isdar binsabukdamalad, sogbukdamalad:
PSA 41:8 “We-dule-nailikgumaidi gwisguosulid, burgoed. Boni-dummad egi naid.”
PSA 41:9 Ar an-ai-nued-anba-masgundiid, an-egi-bensur-gudiid, a-bela angi aibitemogad.
PSA 41:10 Bab-Jehováʼye, wile be an-dake. An-nailikgumaidi, be anga nudake, adi, an-isdarmaladgi an gwisguegar.
PSA 41:11 An-isdarmalad-angi-nakosulidba an magar dakoed, yeer-ito an be-imaksad.
PSA 41:12 Bab-Dummad, an isgussulidba, be an-ogannodii guoed, be-asabin-gudigu be an-imakoed.
PSA 41:13 ¡Israel-e-Bab-Dummad-Jehová, be-nug odummolesun! Birga-birgaba degisadegu be-nug odummoledii gusun. ¡Deyob gusunno!
PSA 42:1 Coré-e-wagan we-namaked narmaksad. We-namaked Masquilʼye-nugad. Namakmalad-e-iduedga soglenaid. Bab-Dummad, igi goe-bebe-nikad diibina ogormakdidae, an deyob bebina sogdiid.
PSA 42:2 Bab-Dummadbina an nue-soged, Bab-Dummad-san-burba-ukmaidbina an nue-soged. ¿Ar sana Bab-Dummad-asabin an gwisgunonikoe?
PSA 42:3 Bane-bane an bodiid, ar an-boed an-masgunnedga anga gunonikid. An-isdarmalad bane-bane anga sogdimalad: “Emisgindi, ¿bia be-Bab-Dummadde nade?”
PSA 42:4 An ebinsaddaed, igi an dulemar-abalagi an nadapdae, igi an Bab-Dummadse-goled-negse dulemar-semaidae. An ebinsaddaed, iba-dummad-onolealile, weligwaledgi an dulemar-semaidae, bela-belad namakagwale an nadapdamalad. An we-ibmar ebinsadele, naibid-dummad angi nonidaed.
PSA 42:5 ¿Ibiga an suli-suli-itogoe? ¿Ibiga an bukib-itogoe? ¡Gwen an deyob itogewilubsulinad! Bab-Dummad-abitodii an guoed, Bab-Dummad-e-nug-odummodii amba an guoed. Ar Bab-Dummad, an-abonogedid. Bab-Jehová, an-Bab-Dummadid.
PSA 42:6 Bab-Dummadye, nue an suli-suli-itoged. A-ulale, an begi Jordán-diwar-akale binsadiid, Hermón-yar-dummagan-akale, an begi binsadiid, Mizar-yalagan-akale, an begi binsadiid.
PSA 42:7 Igi ibe-sailagi diwar-dummad-aryomaidae, dii sukamakmaidae, sabsur uurmakmaidae, deyobi, wile-itolegedi be angi-gwisguega imaksad.
PSA 42:8 Bab-Dummad, an bese weyob goled: Bitigi be-sabgued be anga ibginedba oyogena gadin, neg-mutikidba an-bega-namakeddi berguosulid.
PSA 42:9 Bab-Dummadga an sogoed: “Be an-Bab-Dummadid, be an-bendakdiidid. ¿Ibiga be an-ies-gudii? ¿Ibiga wilesakwaa an-isdarmalad-nukad an itodii guoe?”
PSA 42:10 An-isdarmalad-angi-allenanaid, nue-nunmak an-imaked, bela-bela ulubse an-ebuged. An-isdarmalad weyob anga sokardamalad: “¿Bia be-Bab-Dummadde nade?”
PSA 42:11 ¿Ibiga an suli-suli-itogoe? ¿Ibiga an bukib-itogoe? ¡Gwen an deyob itogewilubsulinad! Bab-Dummad-abitodii, an guoed, Bab-Dummad-e-nug-odummodii amba an guoed. Ar Bab-Dummad, an-abonogedid. Bab-Jehová, an-Bab-Dummadid.
PSA 43:1 Bab-Dummad, anga be igar-naboge, dule-beba-naisurmalad-abin be an-idu gwisgue, dule-isganamargi, dule-gakansilimargi be an-ollorsae.
PSA 43:2 Bedi an-Bab-Dummadid, be an-ganguedid. ¿Ar ibiga be an-obacha? ¿Ar ibiga an-isdarad an-sabsur-imaked-ular, an wile-itodioe?
PSA 43:3 Be-magar-ito-ibmar-imakedi, be-igar-napiragwadi, be anga udage. Adi, igar-nuedba an-idugega, be-yar-islidikidse an-nidega, be-maidse an-sedegar.
PSA 43:4 Bab-Dummad, be-ibmar-ukleged-ailase an warmakoed. Agi, an gar-arpaʼba bega namakoed. Ar be, an-Bab-Dummadid, weligwar be an-imakedid.
PSA 43:5 ¿Ibiga an suli-suli-itogoe? ¿Ibiga an bukib-itogoe? ¡Gwen an deyob itogewilubsulinad! Bab-Dummad-abitodii an guoed, Bab-Dummad-e-nug-odummodii amba an guoed. Ar Bab-Dummad, an-abonogedid. Bab-Dummad, an-Bab-Dummadid.
PSA 44:1 Coré-wagan namakmalad-e-iduedga we-namaked-Masquilʼye-nugad narmaksad. Bab-Dummad, epenne ibmar-dakledisurmalad be imaksadi, anmar-sunnagwad uayagwar itosad. Epenne-ibmar-gusadi, anmar-dadgan anmarga sogsad.
PSA 44:2 Be-sunnagwadi, dule-be-wissurmalad be onisad. A-muchubbi, anmar-dadgan be urbisad. Dule-be-wissurmaladi be sabsur-odurdaksad, anmar-dadgandi nasgumai be imaksad.
PSA 44:3 Dadgan gwen e-es-suidgine yar sussurmalad, gwen e-surgangine dulemargi obichasurmalad. Unnila be-ganguedgi, be-surgangi, be anmar-dadgan-bendaksad. Eba-be-gudigusadgi be amar-bendaksad. Ar bede, dadgan-nue-sabedbali, deyob imaksad.
PSA 44:4 Bebi unnila be an-Bab-Dummadid, bebi be, an-reyd. ¡Be-igar-ukedba dulemargi-nakwega be anmar-imaksad!
PSA 44:5 Be-ganguedgi anmar-isdarmaladgi anmar nakwisad. Be-nuggi anmargi-gwichigudimaladi anmar obelosad.
PSA 44:6 An-warsigi bendakleged an amiosulid, an-es-suid dulemargi-nakwega gwen an-imakosulid.
PSA 44:7 Be anmar-isdarmaladgi-nakwega be anmar-imaksad. Bebi, dule-anmargi-gwisgudimalad-obingegsaega be imaksad.
PSA 44:8 ¡Bab-Dummad, anmar beginbi nug-dummarba-itodii gumaloed! ¡Anmar be-nug-odummodii gumaloed!
PSA 44:9 Emisgindi, be anmar-obachad, be anmar-obinge-imaksad. Bar be anmar-sorda-bila-onomaladba nanasurgusad.
PSA 44:10 Dule-isdarmalad-abin sikirmakega be anmar-imaksad. Dule-sae-anmar-dakdimalad, anmar-ibe ibmar-atur-imaksamalad.
PSA 44:11 Sibad-wawaadyob be anmar-oburgwega anmar-urmaksad. Dulamar-bamalad-imbagi be anmar-oaisakisad.
PSA 44:12 Be-dulamar mani-bipii be uksad, egi be ibmar-nued gwen-amissulid.
PSA 44:13 Dule-anmar-neg-dikarba-mamaid-abin, dule-gegegwaga be anmar-imaksad. Dulemarga anmar dodogedga guded, dulemarga anmar alledga guded.
PSA 44:14 Neggweburmar-oallega be anmar-imaksad. Anmar-dakalir, yamo-yamo anmarga guardamalad.
PSA 44:15 Bane-bane bingedar an itodigussunnad. An akusunna-itogedba bingeguarsunnad.
PSA 44:16 An-isdarmalad-buged-an-imakbi-gudimaladse, an-isdarmalad-sae-an-dakdimaladse, an-isdarmalad-an-dikarba-urwedimaladse, an bingedar-itoged.
PSA 44:17 Bela we-ibmar anmargi gusad. Degi-inigwele, anmar be-iessulid. Dadgan-Ebo-Be-Igar-Mesisadi anmar gwen-bichissulid.
PSA 44:18 Anmar bega uayasuli gussulid, be-Igargi anmar gwen bangussurbalid.
PSA 44:19 Ar bedi achusapur-bunnu-wawaad-e-gubya-yaba be an-balimetemalad, negasichidbi be anmar-idu nasiksad.
PSA 44:20 Bab-Dummad, ar anmar be-iesana, be-muchub anmar bab-dummad-baidse gochana,
PSA 44:21 ¿ar be wisguosulin be insae? Ar bede bela ulubgi dulemar-binsaed mag-daked.
PSA 44:22 Be-ular, anmar bane-bane oburgwilediid. Sibad-wawaad-oburgwelegedyob anmar imaklediid.
PSA 44:23 ¡Bab-Dummad, atake! ¡Mer gabe! ¡Gwisgue! Mer be anmargi bangudii gue.
PSA 44:24 ¿Ibiga be anmar-idu dukue? ¿Ibiga be anmar-wilediid be iege? ¿Ibiga be anmar-sabsur-imaklediid be iege?
PSA 44:25 Anmar napa-nukuse yasulemamaigus-naed. Napayala baparmakdigusmalad.
PSA 44:26 Bab-Dummadye, be dage. Be anmar-bendakdage. Be-sabguedgi be anmar-bendakdasun.
PSA 45:1 Namakmalad-e-iduedga sogleged: “Dutu-lirioʼga-namaklegedyob we-namaked namaklegoed.” Coré-wagan we-namaked narmaksad. An-ulubgi ibmar-nued sogbie an itoged. An reyga an-namaked-narmaksad soged. An-gwabin garda-suar-yeer-narmakeyobi gued.
PSA 45:2 Rey, be bur dulemar-baiganba yeerdakleged, be bur yeer-sunmaked, ar Bab-Dummad degisadegu begi ise-nued binsasad.
PSA 45:3 Rey, be-ganguedgi, be-yeerdaklegedgi, be-es-suid be-saderba be nasike.
PSA 45:4 Be-gangued-yeerdaklegedgi nakwemai be imake. Igar-napiragwadbina urwedii be sae. Dule-wileganaga ibmar-innikigwad-imakdii be gue. ¡Rey, be-ganguedgi ibmar-dummagan-imakdii be nanae!
PSA 45:5 Be-sigu-swiswidikmaladgi, be-isdarmalad-bese-galakudii be imake. A-sigumar, rey-e-isdarmalad-gwagegi yoledapoed.
PSA 45:6 Bab-Dummad, be-negsemaid degisadeguoed. Be-negsemaid, igar-maidba be imaked.
PSA 45:7 Igar-innikigwad-imaked be yeer-itodaed, ibmar-isganadi, be isdar-daked. A-ulale, Bab-Dummad-be-Bab-Dummadi, be-aimar-baiganba be-susad. Be-Bab-Dummad, ina-wawadikidgi be-wawamaksad, weligwar-ito be-imaksad.
PSA 45:8 Be-mola, we-ina-wawadikmaladbi yapanned: Mirraʼye-nugadbi, áloeʼye-nugadbi, canelaʼye-nugadbi yapanned. Reyneg-marfilʼgi-ise-nudakaled-akale, gar-bega-ogorlenaidi weligwar be-imaked.
PSA 45:9 Yagana-be-ebilidmaladi, reymar-sisgan nanaed. Be-ologana-argan-nuedsik rey-ome siid. We-rey-omede, Ofir-or-nuedgi ise-nudakar siid.
PSA 45:10 Bunagwa, an bega-ibmar-sogoedi, nue be an-itogo. Be-dulemar be iege, be-gwenadgangi mer be bar binsae.
PSA 45:11 Be-yeerdaklegedba rey nue-be-abeged. Rey be-dummadid, degisoggu, eba be ibsae.
PSA 45:12 Tiro-dorgan binsa-ibmar-uklemalad bega sedagoed. Dule-mani-ibgan ega-ibmar-nued-imakbi be-abemaloed.
PSA 45:13 Rey-e-sisgwa e-gabedyaba nue-nudakar maid. E-mor ber olobi dakleged.
PSA 45:14 E-mor-ise-nue-sobaled-yoi reyse seledoed. E-aimar-yagana e-sorba-nai nadapmaloed.
PSA 45:15 Weligwar itonadapmaloed, Rey-e-negse weligwaledgi dogdapmaloed.
PSA 45:16 Rey, be-masmala be-dadgan-negsemai-gusad-ganagi sigmaloed. Amar bela bemar-yala-semamai gumaloed.
PSA 45:17 An bega we-namaknaidgi, dulemar-be-iegega an imakosulid. Bela neggwebur-baiganginmalad be-ebinsadiguega an imakoed.
PSA 46:1 Coré-wagan we-namaked narmaksad. Namakmalad-e-iduedga soglenaid: “We-namaked-Alamotʼgi-namaklegoye.” Bab-Dummad anmar-niga-ogannogedid. Bab-Dummad anmar-irwa-gwisguedid. Bab-Dummad wilubdaklegedgi, anmar-bendaked-sunsogedid.
PSA 46:2 Degisoggu, ar neg giglimakde-sogele, anmar dobguosulid. Yala-dummagan demar-wilagangi-dogdedibe, amba anmar dobguosulid.
PSA 46:3 Demar-dummagan-urwedbali, yala-dummagan giglimakdedibe, amba anmar dobguosulid.
PSA 46:4 Diwar-iirmakemaidi, weligwar Bab-Dummad-e-neggwebur imaked. Weligwar Bab-Dummad-Bur-Birigined-e-neg-Islidikid imaked.
PSA 46:5 Bab-Dummad e-neggwebur-abargi gudiid, degisoggu, e-neggwebur akar-guosulid. Bab-Dummad, neg-oibosale, na e-neggwebur-bendakoed.
PSA 46:6 Bab-Dummad-sunmakdele, dulemar-yar-baid-baidgi-bukwamalad dobguddamalad, neggweburmar-bubukwad giglimakdedaed.
PSA 46:7 Bab-Jehová-Bela-Gangued-Nikad anmarba gudiid, Jacob-e-Bab-Dummad an-dukuedga gued.
PSA 46:8 ¡Dagmala! Bab-Jehová-e-ibmar-imaksad be dakdamala. We-napneggi-ibmar-dakledisulid-imaksad be dakdamala.
PSA 46:9 Bab-Dummad we-napneg-ugakaase bela bila-onoleged obelosad. Warsimar bibisgisad, eswarmar bibisgisbalid, moli-urmar soogi ogumaksabalid.
PSA 46:10 “Boo be ambikumalo, magar be an-dakmalo, ani an Bab-Dummadid. Dulemar-yar-baid-baidgi-bukwamalad-abargi an-nug odummolegoed, we-napneggi an-nug odummolegoed.”
PSA 46:11 Bab-Jehová-Bela-Gangued-Nikad anmarba gudiid, Jacob-e-Bab-Dummad an-dukuedga gued.
PSA 47:1 Coré-wagan we-namaked narmaksad. Namakmalad-e-iduedga soglenaid. ¡Bela-dulamar, argan ogormala! ¡Weligwaledgi binnasuli Bab-Dummad-nug odummomala!
PSA 47:2 Ar Bab-Jehová-Bur-Birigined, dule-buledid, bela napneg-e-rey-dummadid.
PSA 47:3 Neggweburmargi-obinega anmar-imaksad, dule-yar-baid-baidgi-bukmaladgi-nakwega anmar-imaksad.
PSA 47:4 Bab-Jehová, anmarga we-yar susad, we-yar, Jacob-nug-dummarba-imakedid. Bab-Jehová na we-Jacob-wagan-sabgusadid.
PSA 47:5 Bab-Dummad dulemar-weligwar-oimakmalad-abargi, gar-trompeta-goled-abargi, e-ologanase nakwemai gusad.
PSA 47:6 ¡Namakmala! Bab-Dummadga namakmala. ¡Namakmala! Anmar-reyga namakmala.
PSA 47:7 Ar Bab-Dummad bela napneg-e-reyd. ¡Ise-itoagwar namakmala!
PSA 47:8 Bab-Dummad dulemar-yar-baid-baidgi-bukmalad-e-reyga maid, Bab-Dummad e-ologan-islidikidgi siid.
PSA 47:9 Dule-dummagan-neggwebur-dakmamaidi, Abraham-e-Bab-Dummad-e-dulamarbo onmaksamalad. Ar dule-dummagan-negdakmamaidi, Bab-Dummadgadid. ¡Bab-Dummad bela-bela odummoleged!
PSA 48:1 Coré-wagan we-namaked narmaksad. Bab-Jehová, duledar-dummadid. E-neggweburgi, e-yala-isligwaledgi, e-nug-birigined innikigwadba odummoleged maid.
PSA 48:2 Ibiyob Sión-yala yeerdaklege, bela napneg-naid weligwar imaked. Sión-yala, dad-nakwed-argan-sapiledsik-siid, Bab-Dummad-e-neggweburga gued.
PSA 48:3 Bab-Dummadi, Sión-neg-suid-gandikmaladgi, dulemar-edarbedga gued.
PSA 48:4 Reymar na atosmalad, geb Jerusalénʼgi gwisguargusmalad.
PSA 48:5 Reymar a-neggwebur-dakargu, geger-dakarmalad, abin gwakidmalad, itosur-gwae duurmakdemalad.
PSA 48:6 Emargi bela-belad dobed nagusad, igi sior ugakgunair, e-boniba galitonaidae, debayobi, a-dulemargi dobed nagusad.
PSA 48:7 Dii-burwa-dummadba Tarsis-ulu-dummagan-aibinebayobi, dulemargi dobed nagusad.
PSA 48:8 Igi-anmar-sunnagwad uayagwar epenne na ibmar itosmala, emide, deyob Bab-Dummad-Bela-Gangued-Nikad-e-neggweburgi, anmar na ibyagwar daksamalad. Anmar-Bab-Dummad, na e-neggwebur, degisadegu-sii imakoed.
PSA 48:9 Bab-Dummad, anmar bese-goled-neggi, be-ise-wile-anmar-dakmaidgi binsabukwadamalad.
PSA 48:10 Bab-Dummad, bela napneg-ugakaase be-nug odummoleged. Be-nuggi nued sunmaklediid. Igar-innikigwadba be negsemaid.
PSA 48:11 Be-igar-innikii-imakedba Sión-yala yeer-itoged, Judá-neggwebur-burwigana weligwar itomarmogad.
PSA 48:12 Sión-yala be ebirnamalo, binnalee be namalo. E-neg-suigan-bukwad be ebismalo.
PSA 48:13 E-galu-matusurmalad nue be dakmalo, e-neg-gandikmalad nue be argamalo. Adi, yoo be-wagan-danikoedga be we-ibmar sogmalagar.
PSA 48:14 We-Bab-Dummadi, anmar-Bab-Dummad-degisadeguadid. Bab-Dummadi, anmar-idudii sadeguoed.
PSA 49:1 Coré-wagan we-namaked narmaksad. Namakmalad-e-iduedga soglenaid. Bela bemar, nue an-itomar. Bela bemar, we-napneggi-bukmalad, nue be an-itomar.
PSA 49:2 Dule-dummagan, dule-binsarmalad, dule-mani-nikamalad, dule-wilegana, nue be an-itomar.
PSA 49:3 An sunmakoedi, nue-binsaed-nikaa an sunmakoed. An-ulubgi-binsaedi, nue-magar-itole an sogoed.
PSA 49:4 Ibmar-binsaed-nikaa-soglemalad nue-itoakwaa an sogoed. Gar-arpa-ogorsiidgi we-ibmar-soglegoed-e-obared an bega odulogoed.
PSA 49:5 Ar bonigan dani-sogele, ¿ibiga dobee an itogoe? Dule-isganamar an-ebilis ambikunonimalale, ¿ibiga an dobguoe?
PSA 49:6 Dule-mani-nikadba-dobsuli-itodimalad, na e-ibmar-nikadba san-dummarba-imakdimalad, ¿a-dulemarde an dobguode? Suli, an dobguosuli.
PSA 49:7 Dule wargwensaale na dukin bendakosulid. Na dukin burgwedgi san-onogegala, geg Bab-Dummad-bennuked.
PSA 49:8 San-onolegedi gargesailad. San-onolegegala, mani unniguarsulid.
PSA 49:9 Dule degisadegu dula-gudii guosulid. Dule burgosurdeeye sogsulid, burgwedsegad.
PSA 49:10 Bela dulemar burgwedbiid, dule-binsaed-ibedi, dule-binsaedsulidi, bela burgwedsemalad. E-ibmar-nikadi dulemar-baiganga beoed.
PSA 49:11 Ar nainu ichesur-nikus-inigwele, neg-uangi degisadegu mai guoed.
PSA 49:12 Ar dule mani-ibed-inigwele, degisadegu dula-gudiguodeeye sogsulid. Ibdurganyobi burgwemarmogoed.
PSA 49:13 Weyobi, dulemar e-manigi-alakwaa-gudimaladi, berguddamalad. Na dukin san-dummarba-imakmaladi, weyobi, berguddamarmogad.
PSA 49:14 Igi sibad-iduged e-sibad-wawaad-semaidae, deyobi, burgwed we-dulemar-semai gumogoed. E-neg-dummagan-nuegan-daklemaladgi, dikasuli e-mui neg-uangi nungumai guoed. Yoedsega dule-nuegan negsemamai gumaloed.
PSA 49:15 Ar Bab-Dummaddi burgwedgi an-ollorsaoed, Bab-Dummad eba an-sedoed.
PSA 49:16 Dule-wargwen mani-ibedga-gudele, mer bai be dako, e-neg yeerdakle nadele, mer geg be dako.
PSA 49:17 Ar we-dule burgwidele, na e-ibmar sedosulid, e-ibmar-yeerdaklemalad eba naosulid.
PSA 49:18 Ar we-napneggi dula-gudigua, weligwar itodigus-inigwele, dulemar e-nug-odummodigusmar-inigwele,
PSA 49:19 we-dule, e-babgan-burgwismogayobi, burgwemogoed, we-napneggi bar gudii guosulid.
PSA 49:20 Ar dule mani-ibed-inigwele, na aku itoged, ede ibdurgan-burgweyobi, burgwemogoed.
PSA 50:1 Asaf, we-namaked narmaksad. Bab-Jehová, Bab-Dummadbi-maidi, goled: Dulemar-dad-nakwedsik-bukmaladse goled, dulemar-dad-argwanedsik-bukmaladse, onmakega goled.
PSA 50:2 Bab-Dummad, Sión-neggwebur-yeerdaklegedba, dad-ibeler-gaeyob, e-maid oyomaid.
PSA 50:3 Anmar-Bab-Dummad-danikidi boo danisulid, e-iduale, soo-dummadi gadanikid, bela ibmar-ogumakdanikid. Burwa-oored bela Bab-Dummad-ebiris danikid.
PSA 50:4 Bab-Dummad nibnegse gochad, napnegse gochabalid, e-dulamarga-igar-nabolesokalid dakdamalagar. Bab-Dummad weyob soged:
PSA 50:5 “Anga dule-islidik-gudimalad onmakmalo, dulemar ibmar-ogumakar-uklegedgi anbo-igar-mesismalad, anga onmakmalo.”
PSA 50:6 Nibneg soged: Bab-Dummad dulega igar-naboged-innikigwad maiye.
PSA 50:7 “Israel-dulemar, an-itomala, an-sunmaksokalid nue-itomala. An-dulamar, an begi sunmaksokalid: Ani an be-Bab-Dummadid, unnila, anbi Bab-Dummad maid.
PSA 50:8 Bemar anga ibmar-ogumakar-ukdamaladgi an yolesulid. Bemar anga gusgu ibmar-nued-ukdamaladgi an yolesulid.
PSA 50:9 Be-moli-bebe-nikad-sapingana e-galugi-bukwadbina an sogsulid. Be-sibad-machergan e-galugi-bukwadbina an sogsulid.
PSA 50:10 Ar bela ibmar-durgan-sapurba-bukwad, angadbiid, bela molimar-yalaganba-bukwad, angadbiid.
PSA 50:11 Bela nuumar-sapurba-bukwad angi yoggusisulid, bela ibmar-durgan-yalaganba-gudinanaed, angadbiid.
PSA 50:12 Degisoggu, an mas-gunbiele, an bese gochasuliled. Ar bela we-napneg, angadbiid, bela ibmar-we-napneggi-bukwad, angadbiid.
PSA 50:13 ¿Ar moli-bebe-nikad-e-san-gunnedgi an gudisi? ¿Ar sibad-machered-e-ablis-gobedgi an gudisi?
PSA 50:14 Anga weligwaledgi dog-nuedye be sogdage. Anga, Bab-Dummad-Bur-Biriginedga be ibmar-imakoye-sogsad, be imakdage.
PSA 50:15 Bonigan-abalagi be gunaidgi, anse be gole, an be-bendaknonikoed. Bedi be an-nug-odummogoed.”
PSA 50:16 Bab-Dummad dule-isganagardina, weyob soged: “¿Doa bega soge, An-Igar-Maid be absogoye? ¿Doa bega soge, An-Igar-Maidgi be sunmakoye?
PSA 50:17 Ar be durdakleged-igar abesulid. An-gayaburba be isdarsun-daked.
PSA 50:18 Ar be atursamalad-dakardibe, eba be naddaed, dule-gambasamalad nabir be daked.
PSA 50:19 Be-gayadina ibmar-isganagi sulibinsa sunmaked, be-gwabindukudina, unnila, gakansaedginbi sunmaked.
PSA 50:20 Ar be-gwenadgi gusgu be yolegar sunmaked, amba be-gargwenadgine be gakansabalid.
PSA 50:21 Bela be we-ibmar-imaksadba, an bese gochasulid. Ande beyobye, ¿be binsasunde? Emisgindi, an bese urwoed. Bega an bakar ibmar sogoed.
PSA 50:22 Bemar an-ieddamalad, an bega ibmar-sogsad nue egi be binsamalo. Degisulile, anse be ibitomaloed, dule-wargwensaale be-bendakosurmalad.
PSA 50:23 Dule anga dog-nuedye-sogega, ibmar-nued-ukedi, an-nug odummoged. Dule na e-daed ogwaele, an ega abonoleged-igar oyononikoed.”
PSA 51:1 David Betsabéʼbo galagwensuli-gusad-sorba, Bab-Dummad-gayaburba-barsoged-Natán Davidʼse arbid. A-sorbali, David we-namaked narmaksad. Namakmalad-e-iduedga soglenaid. Bab-Dummadye, be dule-wiledakedba, be wile-an-dake. Be bela-bela-dule-sabedba, an-isgued be anga elie.
PSA 51:2 Bela an-ibmar-isgana-imaksad be anga obeloge. Bela an-isgued be anga osuloge.
PSA 51:3 An ibmar-noar-imaksadi an magar itoged, an-isgusad an nue wisid.
PSA 51:4 Bab-Jehová, beginbi, unnila beginbi an isgusad. Be-asabin an ibmar-isgana imaksad. Agala, be-igar-nabogedgi be-igar-mesedi innikigwadid. Be-igar-naboged dule geg egi akarsoged.
PSA 51:5 An gwalulesad-akale, an dule-isgana gued, an sapibeneggi-maigusad-akale, bato an dule-isguedid.
PSA 51:6 An nue-wisid, be dule-inniki-gudiid nue-sabed. Burbale, nue-binsaed-nikadaed be an-odurdaksad.
PSA 51:7 An swilidik-guega, hisopo-gagangi be an-nudake. An boo-sibudikidba bur bule sipuu guega, swilidik be an-imake.
PSA 51:8 Weligwar be an-imake, yeer-ito be an-imake, be an-san-sabsur-odurdaksad gannar yeer-itoge be imake.
PSA 51:9 An-isgued mer be bar ebinsae, an-ibmar-isgana-imaksad bela be osuloge.
PSA 51:10 Bab-Dummadye, gwage-swilidikid be anga nasike. Burba-swilidikid be anga uke.
PSA 51:11 An be-walik-gudiidgi mer be an-ononnoge. Be-Burba-Isligwaled mer be angi obane.
PSA 51:12 Be-abonolegedgi-weligwar-itolegedi, gannar be anga udage. Uaya-nikadae be an-imake.
PSA 51:13 Geb deyobi, be-igar-maidgi-yoledimalad an be-igargi odurdakoed, geb dule-isgudimalad gannar bese nonimaloed.
PSA 51:14 An-Bab-Dummad-an-abonogedye, an dule-ibe-ablis-eosadgi be an-ollorsae, adi, an be-igar-innikigwadgi namakdii guegar.
PSA 51:15 Bab-Dummadye, an be-nug odummogega, ibmar-biega be an-imake.
PSA 51:16 Ibmar-ukleged an bega-ukele, be yeerdakosulid. Ibmar-durgan-ogumakar-ukleged an bega-ukele, be abingaosulid.
PSA 51:17 Ar begardi, dule-na-e-isguedga-wile-itogedi, ibmar-uklegedba bur-nued gued. Bab-Dummad, dule-na-e-isguedga-bukib-itogedi, bedi isdar daksulid.
PSA 51:18 Be-nued-binsaedbali, Sión-neggwebur-nasgumai be imake. A-Jerusalén-neggwebur-e-galu-dummagan be gannar ogwiche.
PSA 51:19 Geb be-igar-mesisadba-ibmar-bega-ukleged be abingaoed. Ibdurgan-bela-gwagwar-ogumakar-bega-uklegedi be yeer dakoed. Geb moli-bebe-nikad-sapingan bega-ibmar-ogumakar-ukleged-ailagi ukledoed.
PSA 52:1 David we-namaked-Masquilʼye nugad. Deunni, Edomʼgined-Doeg Saúl-owisonadgu: David Ahimelec-negse nadye. Namakmalad-e-iduedga soglenaid. Be, na-san-buled-imaked, ¿ibiga be-isguedgi be san-dummarbaa imake? ¡Bab-Dummaddi dule-sabgumaiguad!
PSA 52:2 Be-gwabin-duku, esbipi-nugar-datarmakaledyobid, emar-obelogedginbi binsaed, gakanginbi sunmaked.
PSA 52:3 Igar-nuedba bur bule, igar-isganabina be soged. Igar-nabiridba bur bule, gakansaedbina be itoged.
PSA 52:4 Gakansaed-gwabin-duku be sediid. Be-sunmakedgi emargi-urwed be yeer itodaed.
PSA 52:5 Bab-Dummaddi, ilagwen-be-obelogar imakoed. Be-negyaurgi be-onogoed, we-napneggi be-obelogoed.
PSA 52:6 Dule-nuegan, we-ibmar dakmaloed, nue-dobee itodmaloed. Weyob be-annik dodoakwaa sunmakdemaloed:
PSA 52:7 “We-dule-isgana, Bab-Dummadgi-bendakleged-amissulid, be dakmala. Unnila ibmar-nue-nikadba na yeer itosad, e-ibmar-isgana-imakedgi gwen bangussulid.”
PSA 52:8 Andi, Bab-Dummadse-goled-neggi olivo-sapi-durbamakar-daedyob gued. Andi, degisadegu, Bab-Dummad-e-sabguedgi bensulid.
PSA 52:9 Bab-Dummad, andi be-ibmar-imaksadba be-nug-odummodii guoed. Bede dar dule-nuedsoggu, begine an bensuli gudioed. Dule-nuegan-abargi an bese gordii guoed.
PSA 53:1 David namakmalad-e-iduedga we-namaked narmaksad. Dule-binsaedsulidaed, e-gwagegi sogdiid: “Bab-Dummad maisurye.” We-dulemar nue-isgusgudidimalad, unnila ibmar-isganabi imakdidimalad. ¡Bipisaale dule ibmar-nued-imaked sated!
PSA 53:2 Bab-Dummad, nibneg-akale dulemar-napneggi-bukmalad dakded, abakalegi, dule-wargwen binsaed-nikadaed gudiile, abakalegi, wis dule-wargwensaar Bab-Dummad-amibied gudiile.
PSA 53:3 Bab-Dummad dakalid, bela dulemar egi bangus gudidimala, bela nue-isgus gudidimala. Wargwensaale ibmar-nued-imaked suli, bipisaale wargwengiid ibmar-nued-imaked, sate.
PSA 53:4 Dule-ibmar-isgana-imakdimalad akusunna itomalad, amarde, madu-gunneyob an-dulamar-imakdimalad, Bab-Dummadse gordisurmarbalid.
PSA 53:5 Dule-isganamar dobguewilubsurmalanad, degite, bela-bela dobedba wawanmakdemaloed. Bab-Dummad we-dulemar-obachadbali, be-isdarmalad-e-garmar oaisakioed. Bab-Dummad dule-isgana obingesaoed.
PSA 53:6 Bitigi Israel-neggwebur-bendakleged Sión-yar-akar danikina gadin. Bab-Dummad na e-dulamar gannar e-yarse senonikile, Jacob-e-wagan wergudmaloed, Israel-dulemar weligwar itodmaloed.
PSA 54:1 David we-namaked-Masquilʼye-nugad narmaksad. Namakmalad-e-iduedga soglesad: Neginotʼba-namakoye. Deun Zif-dulemar Saúlʼga sognonimargu: David anmar-abargi dukudiiye. Bab-Dummadye, be an-bendake, be-nug-dummarba-maidba be an-bendakdage. Be-ganguedgi be an-bendakdage.
PSA 54:2 Bab-Dummadye, an-gornaid be an-itoge, an bega-ibmar-sognaid wis be an-itoge.
PSA 54:3 Ar dule-galagwensurdamaladi, angi gwisgunanaid. Ar dule-sabesulidamaladi, an-oburgwega anbina gudimalad. Ar we-dulemar, bipisaagwar begi binsadisurmalad.
PSA 54:4 Bab-Dummadbi unnila an-bendakedid, Bab-Dummadbi unnila an-sediid.
PSA 54:5 Bab-Dummad an-isdarmaladgi bonigan-yolegega imakoed. Bab-Dummadye be inniki-ibmar-imakmaidba, bela be an-isdarmalad oburgwe.
PSA 54:6 Bab-Dummad, an bebina-sogedba ibmar-nued an bega ukoed. Bab-Jehová, an be-nug odummogoed, ar deyob-imaked ibnuedid.
PSA 54:7 Bab-Dummad, bela bonigangine be an-ollor-imaksad. An-isdarmalad-galakued-dakega be an-imaksabalid.
PSA 55:1 David we-namaked-Masquilʼye-nugad. Namakmalad-e-iduedga soglesad: Neginotʼba namakoye. Bab-Dummadye, an bese-goled be an-itoge, an bese-wilenaid mer be an-itosuli gue.
PSA 55:2 Be an-itoge, be an-abin-imake. Ar an-surbinsa-itogedi, anga gwage-bogidikid uksulid.
PSA 55:3 Dule-isdarmalad-sabsur-ibmar-soged an dobe itoged, dule-isganamar-e-sabsur-dule-imaked wile-ito an-imaked, ar gakansaar angi sunmakmalad, nue-urwedgi an-baleginmalad.
PSA 55:4 Ulubgi gwage nunmak an itoged, angi bela-bela dobe-burgwed nagunonikid.
PSA 55:5 Dobedbali an wawanmakgwichid, bela-bela an dobe itoged.
PSA 55:6 Geb an-sogsad: “¡Nuuyobi an sakan-nikana gadin! Adi, an gukusaled. Obunnoged-neg an aminadeled.
PSA 55:7 An wegine dikasur wakiteled, nega-dulesulidgangi an megisaled.
PSA 55:8 ”Burwa-dummad-idu-wakinnega, dukued-negse an gwae wakiteled.”
PSA 55:9 Bab-Dummadye, we-dulemar be obeloge, e-sunmakmalad aku-ito be imake. Ar unnila neggweburgine sabsur-imakmaladbi, abin-abin-imakmaladbi an daked.
PSA 55:10 Mutiki, ibgine, e-galu-matusulid-ebirdii damalad, e-galu-matusulid-yabali ibmar-isganabi, yamo-dulemar-yardakedbi neg naid.
PSA 55:11 E-galu-matusulidgindi dule-obelogedbi neg naid, e-igar-imbaganbardi dule-wiogedbi, dule-yardakedbi neg naid.
PSA 55:12 Ar an-isdarad an-obinge-imaksana, an na san bargasanad. Ar dule-isdar-an-daked mesagwar an-imaksana, an e-idu dukusanad.
PSA 55:13 Ar emigindi, bee be weyob an-imaksad. Be an-ai-nuedid. Be anyob dule gumogad. Be an-sordad, be an-ai-bur-walikagwadid.
PSA 55:14 Be nuedgi anbo-walikaa gudidaenad, ai-nuedgi be anbo Bab-Dummadse-goled-neggi gudidaenad. Emigindi, bee be angi weyob yolesad.
PSA 55:15 Burgwed ukiagwar an-isdarmaladgi yolesunna, neg-uangi napa-yaba dula odelesunna, ar e-neg-yaurgi ibmar-isganabi nikad.
PSA 55:16 Ar andi Bab-Dummadse goloed, Bab-Jehová an-bendakoed.
PSA 55:17 Wakdaradba, yorukudba, mutikidba an surbinsa-itogedgi Bab-Dummadse goloed, edi an-itogoed.
PSA 55:18 Ar dulemar bukidar angi aibinmar-inigwele, Bab-Dummaddi bogidikidgi angi-bila-ononanaidgi an-onogoed.
PSA 55:19 Bab-Dummad-gusgu-dummadga-maiguad an-itogoed. Bab-Dummad an-isdarmalad ibgwensur-imakoed. Ar wemar na e-daed ogwasurmalad, gwen Bab-Dummad dobsurmarbalid.
PSA 55:20 Dule-isgana dule-ebo-nued-gudiidgi aibined, e-igar-mesisadgine annaed.
PSA 55:21 Na e-ibmar-sogedi ochii ibmar-nueganbi soged. E-gwagegindi bila-onogedginbi binsanaid. Na e-sunmakedi, innikii sunmak itolegenad. Degi-inigwele, esyobi dule-naibi-imaked.
PSA 55:22 Bab-Jehováʼga, be-bukib-binsaed be soge, na e be-bendakoed. Ar Bab-Dummad, dule-nued degisadegu-galakudii imakosulid.
PSA 55:23 Bab-Dummad, bedi dule-isganamar oburgoed, napa-gullu-yaa be barmetoed. Dule-ablis-eodimaladi, dule-emar-yardakdimaladi, undar-dikasur dula-gudii guosurmalad. Ar andi begi bensulid.
PSA 56:1 Namakmalad-e-iduedga soglesad: Sapur-nuu surgar-war-birgi namaksidaedba namakoye. Deunni, Filistea-dulemar Gat-neggweburgi David-gasgusmalad. Agi David Mictam-narmaksad. Bab-Dummadye, wile be an-dake, dulemar an-balegindii nanaed. Bane-bane sae-an-dakmaladi, an-wiodimalad.
PSA 56:2 Bane-bane an-isdarmaladi, an-balegindii nanaed. Dule-san-dummarba-imakdimaladi, bukidar angi gwisgudimalad.
PSA 56:3 An dobe-itoalile, begi an benguosulid.
PSA 56:4 Bab-Dummad, an begi bensulid, an be-gayaburba odummoged. Bab-Dummad, an begi bensulid, an dobe-itosulid. Degisoggu, ¿ar igi dule an-imakosunna? Dule akar an-imakosulid.
PSA 56:5 Bane-bane an-sunmaked oakaloddamalad, gusgu an-oakalogedgi binsadamalad.
PSA 56:6 Danakwaa ambikusdamalad, na dukusdamalad. An-oburgwed na yeer-itomalad. Yamo arbakee an-ibmar-imaked dakdimalad.
PSA 56:7 Bab-Dummad, we-dulemar be sabsur-odurdaksun. Melle begi wakinnega be imako.
PSA 56:8 An-bukib-binsadiid be nue-wisid. An-ibyanis-aryodiid be daksabalid ¿Ar we-ibmar be-gardagi narmakar maisursi?
PSA 56:9 An-bendakega na bese gotele, an-isdarmalad duurmakdoed. Ibmar-soggwen an wisid: Bab-Dummad, nue anba naid.
PSA 56:10 Bab-Dummad, an begi bensulid, be-gayaburba an odummoged. Bab-Jehová, an begi bensulid, be-gayaburba an odummoged.
PSA 56:11 Bab-Dummad, an begi bensulid, an dobe-itosulid. Degisoggu, ¿ar igi dule an-imakosunna? Dule akar an-imakosuli.
PSA 56:12 Bab-Dummad, an be-asabinni ibmar-saoye-an-sogsadi, angi siid. Ibmar-uklegedi, an bega ukoed.
PSA 56:13 Bab-Dummad, burgwedgi be an-ollorsasad. Igar-bulegangi be an ollor-imaksad. Adi, be-asabinni, neg-meegwadgi dula-nanadii guegar.
PSA 57:1 David, Saúl-idu akwasaila-ollo-yaba dukudigusgu, we-namaked narmaksad. Namakmalad-e-iduedga soglesad: We-namaked, Melle-obelogoye-nugad-namaklegeyobi, namakoye. Bab-Dummadye, wile be an-dake, Bab-Dummadye, wile be an-dake, ar begi an bensulid. Igi gannir e-sakan-urba na e-mimmigan odukue, deyobi, bonigan-berguedse, be an-odukue.
PSA 57:2 Bab-Dummad-Bur-Biriginedse an binnasuli goled. We-Bab-Dummad angi nued binsamaidaed.
PSA 57:3 Bab-Dummad, dule-an-isdarad-an-baregindiidgi-an-bendakega, e-gangued, nibneg-akar anse oyogoed. Bab-Dummad e-sabgued, e-igar-napiragwad anga oyomaid.
PSA 57:4 Achumiguryobi, dulemar an-ebiris bukwamalad, dulemar an-obelobimalad. E-nugarmar, sigumaryobi, warsimaryobi, nanaed. E-gwabin, es-suid-datarmakaleyobi gued.
PSA 57:5 Degi-inigwele, Bab-Dummad, bedi nibneggi maid. Be-gangued-yeerdakleged bela we-napneg-gani naid.
PSA 57:6 An-iduar saki nasiksamalad. An-iduar yaa gwichamalad. Naibid-dummad anga uksamalad. Degi-inigwele, emar agi na dukin argwachamalad.
PSA 57:7 Bab-Dummad, bega namakmalad-namakega, an-gwage guagwar naid.
PSA 57:8 An wakudaryalaba gwisgudagoed. An atakalile, gar-arpa, gar-lira, an ogoloed.
PSA 57:9 Bab-Dummad, neggweburmar-baigan-abargi be-nug an odummogoed, dulemar-baigan-abargi bega an namakoed.
PSA 57:10 Ar be-sabgued dummarbasoggu, nibnegse warmaked. Be-ibmar-napira-soged nibnegse warmaked.
PSA 57:11 Bab-Dummad, bedi nibneggi maid. Be-gangued-yeerdakleged bela we-napneg-gani naid.
PSA 58:1 David we-namaked-Mictam narmaksad. Namakmalad-e-iduedga soglesad: We-namaked, Melle-obelogoye-nugad-namaklegeyobi, namakoye. Bemar, dule-bulegan-negsedidimalad, ¿ar innikigwadba be negsemamai? ¿Ar innikigwadba be dulemarga igar-nabomamai? Suli.
PSA 58:2 Aka bemar na be-gwagegi, unnila ibmar-isgana-imakedgi binsadidimalad. Ar bemar, we-napneggi unnila sabsur-ibmar-isgana-imakdidimalad.
PSA 58:3 Dule-isganamar amba sapibeneggi-maid-akale, bato isgus danimalad. Dule-gakansilimar amba yoo-gwaluleged-akale, bato gakansaar sunmakmalad.
PSA 58:4 E-sunmaked boni-dummad sediid naibe-boni-nikadyobi gudiid.
PSA 58:5 Dule-naibe-gaed, naibega sunmaknaigusale, igi-we-naibe, yamo uayasulidaeyob na imake, deyobi, dule-isgana, uayasulidaedba ibmar-isgana imaked.
PSA 58:6 Bab-Dummad, dule-isgana-e-nugarmar be bibisge, achumigur-ibe e-nugarmar-ungeyob be imake, dule-isgana-e-gargangued be obeloge.
PSA 58:7 Igi dii napagi-mileder, yogguddae, deyob geg gumargina. E-warsi-dopee-imakdemalale, bitigi e-sigu geg bisgegina.
PSA 58:8 Igi gole-masi-masid baisursunna berguddae, dule-isgana deyob geg gumargina. Igi goe-burgwar-aidenonikid, gwen neg dakdasuli, deyob dule-isgana geg gumargina.
PSA 58:9 Igi gagan-ikobiid-dinnagana sabsur-gummakdedae, deyobi, dule-isganamar baisur-binsadiidgi gummakena gadin. Dule-isganamar dula-gudimaladgi, bitigi burwa-dummadba selemalana gadin.
PSA 58:10 Dule-inniki-gudiidi, dule-isgana-sabsur-odurdaklenai dakalile, weligwar itodoed. Dule-isganamar-e-ablisgi dii-dii annanai guoed.
PSA 58:11 Agine, dulemar sogdemaloed: “Napirado. Dule-inniki-gudimaladga ibmar-nued ega ukleged. Bab-Dummad nue-mai dakledo, ar we-napneggi bela dulemarga igar innikii nabomaid.”
PSA 59:1 David we-Mictam-namaked narmaksad. Namakmalad-e-iduedga soglesad: We-namakedi, ar igi namaked “Melle-obeloged” namaklege, deyobi namaklegoye. Deunni, Saúl, David-oburgwega e-sordamar David-negse barmisgu. Bab-Dummadye, an-isdarmaladgi be an-ollorsae, angi aibinmaladgi be an-bendake.
PSA 59:2 Dule-ibmar-isgana-imakmaladgi be an-ollorsae, dule-gindakmaladgi be an-bendake,
PSA 59:3 ar an-oburgwebimalad. Bab-Jehová, an nossulinad, an isgussurbalinad, degite, dule-isganamar angi-aibinmalaga na atosmalad.
PSA 59:4 An ibmar-isgana imaksasur-inigwele, degite, an-oburgwebimalad. Bab-Jehováʼye, be gwae-dage, be an-bendakdage. Be dake, igi an be-asabin gwichi.
PSA 59:5 Bab-Jehová, be, Bab-Dummad-Bur-Gangued-Nika-Maid. Be, Israel-e-Bab-Dummadid. Dule-yar-baid-baidgi-bukwamalad-sabsur-odurdakega gwae be dage, dule-isgana-emargi-aibinmalad, mer be wiledake.
PSA 59:6 Dule-isganamar, mutikidbali achumar-urwedidaedyobi gannar nonidamalad, geb neggweburgi bipirmakdidamalad.
PSA 59:7 Yogasaar sunmakmalad, emargi yolegar sunmakmalad. An-itogosurmaladdeeye sogdedamalad.
PSA 59:8 Bab-Jehová, ar bedi we-dulemarga be alled, bela dule-yar-baid-baidgi-bukwamaladgi be dodoged.
PSA 59:9 Ar be an-ganguedsoggu, an begi bensulid. Ar be an-odukuedid.
PSA 59:10 Be, Bab-Dummad-wile-an-daked an-iduoed. Bab-Dummad an-isdarmalad-galakued anga oyogoed.
PSA 59:11 An-dulemar mer a-dule-isganamar-iegega, mer ilagwen-obelogar be imako. Be, Bab-Jehová, sigu-abgaedyob an-irwa-gwisguedid. Be-ganguedgi be oaisakie, be-garganguedgi be irgwensur-imake.
PSA 59:12 Na e-ibmar-isgana-sogedba, e-sunmakedba, emar-ukabsaedba, e-gakansaedba, san-dummarba-imakdimaladba, na dukin yardaklemarsun.
PSA 59:13 Bab-Dummad, urwedgi be amar-obeloge, mer bar dulagudigumalaga be obeloge. Deyobi, bela Israel-yargine wisgumaloed, Bab-Dummad bela we-napneg-ugakaase, negdakmaiye.
PSA 59:14 Dule-isganamar, mutikidbali achumar-urwedidaedyobi gannar nonidamalad, geb neggweburgi bipirmakdidamalad.
PSA 59:15 Masgunned-amiega gaamakdidamalad, immelessurmalale, mutikidba urwedidamalad.
PSA 59:16 Bab-Dummad, ar andi be-ganguedgi an namakoed. Wakudaryalaba be-dula-wiledakedgi an namakoed, ar bedi an-bendakedid. An-surbinsa-itoged-ibagi bedi an-dukuedid.
PSA 59:17 Be, an-ganguedid, an bega namakoed, ar bedi, Bab-Dummad, an-dukuedid. Bab-Dummad, be an-sabedid.
PSA 60:1 Namakmalad-e-iduedga soglesad: Bab-Dummad-Dulemarbo-Igar-Mesisad-e-dutu-lirio-nugadba namaklegoye. Deunni, Aram-Naharimʼgi, degi, Aram-Sobaʼgi bila-ononaidgi, Joab gannar nonigu, Balu-Nebagi miliambe-gakabo (12,000) Edomʼginmalad ogilosad. Agi, David dulemar-odurdakega namaked-Mictam narmaksad. Bab-Dummad, bedi anmarse ulusad, be anmar-obachad, be anmar-wiosad. ¡Bab-Dummadye, be anmar-bendakdage!
PSA 60:2 Napneg-naid yeer be ogiglimaksad, yeer napamar argas-nanaed. E-yaa-argasmaladi be nudake, ar binna-binna babatemaigusad.
PSA 60:3 Yeer-gangu be-dulamar be wilubdaksad, vino-gagbid-gobega be anmar-imaksad.
PSA 60:4 Dule-sigu-miemaladgi san-onogega, beba-inniki-nanadimaladgala, igar-inniki-maid be oyosad.
PSA 60:5 Be-dulamar-be-nue-sabedi, nabir bendaklegega, be-ganguedgi be anmar-bendake, be anmar-abinsae.
PSA 60:6 Bab-Dummad, be-neg-islidikidgi be weyob sogsad: “An Siquem-neggwebur-mimioedgi, weligwale an itoged. An Sucot-neba-naid-ilemakoedgi, weligwale an itoged.
PSA 60:7 Galaad, angadga gued, Manasés, angadga gued. Efraín, an-bormo-gurginga gued. Judá, an-gaapoledga gued.
PSA 60:8 Moab, an-argan-enukedga gued. Edomʼgi, an-sapat bikiin an metoed. Filistea-neggweburgi, gandikidba an gormakoed.”
PSA 60:9 ¿Doa, neggwebur-gandikidse an-nidoe? ¿Doa anga, Edom-yalase-aibillemaid oyogoe?
PSA 60:10 Bab-Dummad, ¿bee be anmar-obachagussursi? Bab-Dummad, bar be anmarga sorda-bila-onomalad-bendakdisurgusad.
PSA 60:11 Dule-isdarmaladgi-nakwega be anmar-imake. Ar dulemar anmar-bendakele, anmar gwen igarga guosulid.
PSA 60:12 Bab-Dummad, anmar bebali unnila anmar-isdarmaladgi nakoed. Be anmarga, anmar-isdarmalad obelogoed.
PSA 61:1 David we-namaked narmaksad. Namakmalad-e-iduedga soged: We-namaked Neginotʼba namaklegoye. Bab-Dummadye ise-gollar an bese-goled, wis be an-itoge, an bese-ibmar-egised, wis be an-itoge.
PSA 61:2 An-yargi yeer-bangu an gudiidba, surbinsa-an-itogedba, an bese goled. Akwasaila-matusulidse be an-sede.
PSA 61:3 Bab-Dummad, bee be an-odukuedid. Bee be, neg-gandikidyob an-isdarmaladgi be an-bendakedid.
PSA 61:4 Bab-Dummad, be-dordoneggi degisadegu an gudii gubied, be an-edarbedigu an be-abeged.
PSA 61:5 Bab-Dummad, an bega ibmar-imakoye-ise-sogar-sogsad be itosad. Be-nug-odummodimaladga-yar-be-uksadi, be anga uksamogad.
PSA 61:6 Rey-suiti-gudii-guega be imake. We-napneggi degisadegu-gudiguega be imake.
PSA 61:7 Be-sogedba negsemaigu be imake. Be-sabgued-nikadba, be-igar-napiragwadba, egi nakuledii be imake.
PSA 61:8 Weyob be-nuggi namakdii an guoed, ibmar-an-bega-imakoye-sogsad bane-bane an bega imakdii guoed.
PSA 62:1 David namakmalad-e-iduedga namaked narmaksad. Jedutúnʼye-nugadga narmaksad. Bab-Dummadginbi an neg-bogidik amied, Bab-Dummadgi an-bendakleged danikid.
PSA 62:2 Bab-Dummadbi anga akwasailaga gued, Bab-Dummadbi bela-bela-an-bendakedid. An egi dukued amied, agala, gege an galakued.
PSA 62:3 ¿Ar sanadse bemar dule-gwensakgi yolenanai gumaloe? Galu-aimukudani-gwichiyobi, olaegala, egemaknanaiyobi, emide, bemar dule-gwensak imaknanaid.
PSA 62:4 Unnila a-dule-wiogega gunanaid, e-nug-dummarba-nikad-oichogega gunanaid. Surbinsa gakansaedbina itomalad, ar e-sunmakeddi ibmar-nuedbi sogmalad, e-gwagegindina, emar-ukabsaedginbi binsadimalad.
PSA 62:5 An-gwage Bab-Dummadginbi neg-bogidikid amied, Bab-Dummadginbi unnila an bensulid nikad.
PSA 62:6 Bab-Dummadbi anga akwasailaga gued, Bab-Dummadbi bela-bela-an-bendakedid. An egi dukued amied, agala, gege an galakued.
PSA 62:7 Bab-Dummad bela-bela-an-bendakedid, egi an wergudiid. Unnila Bab-Dummadgi an-gangued siid, an-odukuedbalid.
PSA 62:8 ¡Unnila Bab-Dummadginbi be bensuli gumalo! ¡Bab-Dummad-asabin be nadele, bela be-boni-nikad ega be sogo! ¡Ar Bab-Dummad, anmar-akwediidid!
PSA 62:9 Dule-wilemalad baisursunna bergued, dule-mani-nikamalad baisursunna bergumogad. Ebogwad nibirgi oaidiksaele, amba ukugwaled.
PSA 62:10 Ibmar-isganagi-mani-amilegedgi melle be binsaed galemalo, ibmar-atursalegedgi mer be binsamala. Amba ibmar-nue-bukidar-bega-mergude be dakele, mer we-ibmarginbi be binsadii gumalo.
PSA 62:11 Bab-Dummad weyob-ilagwen-sunmaksagusadi, ilabo an itosgusad: Bab-Dummadgi gangued daniye.
PSA 62:12 Bab-Dummad, bede bela-bela emar-wile dakmaiye, bede dule-e-ibmar-imakedba, sogedba be naboye.
PSA 63:1 David Judá-nega-dulesulidganba-gudigusgu, we-namaked narmaksad. ¡Bab-Dummad, be an-Bab-Dummadid! ¡Bolegoedba an be-amioed! An uku-uku-itogeyob an bebina soged, an-sana bela bebina soged. Ar igi dule nega-dulesulidganba dii-satedgi dii-amididae, deyobi, an be-amied.
PSA 63:2 Bab-Dummad, an be-gangued-yeerdakleged-dakega, bese-goled-neggi an be-dakbied.
PSA 63:3 Dula-gudiguedba be-sabgued bur-nuedid. A-ulale, an bega namakoed.
PSA 63:4 Dula-gudiidgi an be-nug odummodii guoed. An be-nug-odummogega an-argan an onakoed.
PSA 63:5 Mas-nued-immerba-guchayobi an yeer-itogoed. An yeer-itogedgi bega namakoed.
PSA 63:6 An megidele, an begi binsamaidaed, bela mutikidbali, an begi binsamaidaed.
PSA 63:7 Ar be an-bendaksad, deyobi, be-an-bendaksadgi an yeer-itoged.
PSA 63:8 Andi begi alakwaa naid, ar be-gargangued an-bendaked.
PSA 63:9 Ar dule-an-oburgwebimaladdi bergumaloed, nega-urbali argwanmaloed.
PSA 63:10 Es-suidgi oburgwilemaloed, achu-sapur-masga gumaloed.
PSA 63:11 Ar reydi, Bab-Dummadgi weligwar-itogoed. Dule Bab-Dummad-nuggi-ibmar-ise-sogar-soged weligwaledgi Baba-Dummadga namakmaloed. Ar dule-gakansilimardi gaya-maklemaloed.
PSA 64:1 David namakmalad-e-iduedga we-namaked narmaksad. Bab-Dummadye, an-ibmar-isdar-itogedi, an bega sognaidi, wis be itoge. Bab-Dummadye, be an-bendake, an-isdarmalad dobe an itodiid.
PSA 64:2 Dule-isganamar-anbina-itosgudimalad-idu, be an-odukue. Dule-ibmar-isgana-imakmaladgi, be an-onoge.
PSA 64:3 Es-suid-nugar-datarmakle-daebayobi e-gwabin-duku imakmalad. Igi sigu-milege, debayobi, e-gwabin-duku gayaburba-isganagan dulegi mied.
PSA 64:4 Dule-gwen-neg-oakalossulidgi, yamo arbakee gwichiguddamalad, wile-gwen-daksuli, dulegi aibitedamalad.
PSA 64:5 Dule-isganamar, na muchub-muchub e-igar-isganagi ogannobukwadamalad. Idu igar-amibukwadamalad, igi imakmalodibeye. Sogdedamarbalid: “¿Ar doa anmar-dakosunna?”
PSA 64:6 Dule-isganamar igar-isgana-nue-amibukwadamalad, sogdamalad: “Anmar igar-napiragwad amibukwamalad.” Dule-binsaedi ibiyobi, nue-akusunna itolege.
PSA 64:7 Bab-Dummaddi a-dulemargi e-sigu midoed. Wissuli-bukwadgi galedamaloed.
PSA 64:8 Dukin na e-gwabin-sunmakedgi sabsur-odurdaklemaloed. Doa deyob dakdagoe, egi dodoar sunmakdoed.
PSA 64:9 Bela dulemar-bukwadgi dobed nagunonikoed. Degidgine, Bab-Dummad-ibmar-dummagan-imaksadgi sunmakdemaloed. Agine, magar Bab-Dummad-ibmar-imaksadgi binsadmaloed.
PSA 64:10 Dule-nuegan, Bab-Jehováʼgi wergudmaloed, egi bensuli gudmaloed. Dule-gwage-nuegan yeer itodmaloed.
PSA 65:1 David we-namaked narmaksad. Namakmalad-e-iduedga soglenaid. Bab-Dummad-Sión-yargi-maid, be-nug odummolesun. Ibmar-imakmaloye-sogsamalad bega imakmalargebed.
PSA 65:2 Bab-Dummad, dule-bese-goled be itodaed, degisoggu, bese bela dulemar nonimaloed.
PSA 65:3 Anmar-ibmar-isgana-imaked anmargi obined, degi-inigwele, anmar-isgued be anmarga osulodaed.
PSA 65:4 Dule-wargwen be susale, we-dulegi nued binsalesad. We-dule, be-neggi-gudiguega, bese be senonidaed.
PSA 65:5 Bab-Dummad, be anmar-Abonogedid. Ibmar-innikigwadba be anmar-abin-imakdaed. Dulemar we-napneg-naid-ugakaase-bukmaladi bela begi bensurmalad. Dule-demar-obakar-dikasur-bukmaladi begi bensurmarmogad.
PSA 65:6 Bab-Dummad, bee, be-ganguedgi yalamar be nasiksad, agi be-gangued be oyomaid.
PSA 65:7 Bee, muu-billi-uurmakmaid obogileged, muu-billi-welegan-uurmakmaid bogidik be imaked, dulemar-oimakbukwad be osuloged.
PSA 65:8 Degisoggu, dulemar dikasuli-bukmalad be-ibmar-dakledisulid-imaked dobdamarsunnad. Dulemar-dad-nakwedsik-bukmalad, dad-argwanedsik-bukmalad be weligwar-ito imaked.
PSA 65:9 Bee be, napa nue-akwed. Napagi gatik ibmar sanmakega egi be dii owied. Dian-dummad-Babagadi gege-dinguedi, bela ibmar-sanmakega imaked.
PSA 65:10 Napa-guremaladgi dii be owied, agi dii be osurmaked, diigi napa be odutumaked. Napagi ibmar sanmakega be imaked. Weyobi, be-dulamarga-be-mas-ukega, napa guakwaa be-dulamarga be nasiked.
PSA 65:11 Be birga-nued nasikmaid, be ibmar unniguar-nika imakmaid.
PSA 65:12 Nega-dulesulidgangi gaganmar aradikid, yar-mullugan ber weligwaled.
PSA 65:13 Nebagangi sibadmar, sibad-wawaadmar, obiryamakded, orosgi-dakleged agi nue naibalid. ¡Bela agine ibmar-durgan oimakded! ¡Bela namakedibimalad!
PSA 66:1 Namakmalad-e-iduedga namaked narmaklesad. Bela-dule-we-napneggi-bukwamalad, weligwaledgi Bab-Dummad-e-nug odummomar.
PSA 66:2 E-nug-dummarbaadga namakmar, gandikidgi e-nug odummomar.
PSA 66:3 Bab-Dummadga sogmar: “¡Be-ibmar-imakedi, geger-dakleged! Be gandik-maisoggua, be-isdarmalad be-urbaligwa gudimalad.
PSA 66:4 Bela-dule-we-napneggi-bukwad be-nug odummomaloed, bega namakmaloed, be-nuggi namakmaloed.”
PSA 66:5 ¡Dagmala! Bab-Dummad-ibmar-imaksad dakdamala. Anmarga-ibmar-gegerdaklemalad-imaksad be dakdamala.
PSA 66:6 Bab-Dummad demar dinnaa imaksad, diwar dinnaa imaksabalid. Degidbali, dulemar neg-dinnagwadgi nabir-obaksamalad. Degisoggu, anmar Bab-Dummadgi wergumarsunna.
PSA 66:7 Bab-Dummad gargandikidba degisadegu negsemaid, bela-dule-gudimaladgi nakulediid. Dulemar-eba-dasurmalad, gwen-abin gwisguosurmalad.
PSA 66:8 Bela dulemar, Bab-Dummad-nug odummomarsun. Bab-Dummadga-namaklenaid, bela itomalaga imakmarsun.
PSA 66:9 Ar Bab-Dummad anmar-san bendaksad, mer-galakuega anmar-imaksad.
PSA 66:10 Bab-Dummad, bee be, anmar-wilubdaksad, mani-swilidik-imaklegeyob be anmar-imaksad,
PSA 66:11 sakigi-galegega be anmar-imaksad, nunmaked-dummad be anmargi ogwisnonikid.
PSA 66:12 Dulemar anmar-nonogi-annaega be imaksad, soo-buleganba-ibitogega be anmar-imaksad, dii-buleganba-ibitogega be anmar-imaksad. Emisgindi be, neg-nuedse anmar-ogwisgunonikid.
PSA 66:13 An bese-goled-negse ibmar-ogumakar-ukega an nonikoed, an bega ise-sogar ibmar-imakoye-sogsad-imakega an nonikoed.
PSA 66:14 An bonigan-abalagi-gunaidgi, an bega ise-sogar ibmar-imakoye sogsa gusad.
PSA 66:15 An bega ibmar-ogumakegala, we-ibdurgan-waladummagan ukoed: Sibad-wawaad-machergan, moli-bebe-nikad-machergan, sibad-machergan, an bega ukoed.
PSA 66:16 Bab-Dummad-dobekwaa-gudimalad, ¡dagmala! ¡Itodamala! Bela Bab-Dummad-anga-ibmar-imaksad, an bemarga sogoed.
PSA 66:17 Bela-belad gandikidbali Bab-Dummadse an gocha gusad, an e-nug-odummonai gusad.
PSA 66:18 Ar an-gwagegi an isdar binsasana, Bab-Jehová an-itossulinad.
PSA 66:19 Emidi, Bab-Dummad an-itononikid, an-wilesakwaa-gornaid itosad.
PSA 66:20 ¡Bab-Dummad-e-nug odummolesun! An-ese-gornaid nue an-itosad, e-sabgued gwen angi obachasurgusad.
PSA 67:1 Namakmalad-e-iduedga soglesad, we-namakedi Neginotʼba namakoye. Bab-Dummadye, wile be anmar-dake, be anmargi nued-binsae, bela-bela be-sabgued be anmarga oyoge,
PSA 67:2 adi, we-napneggi be-igar wisgumalagar, bela dule-yar-baid-baidgi-bukwamalad be-abonoged wisgumalagar.
PSA 67:3 Bab-Dummad, dulemar be-nug odummomala, bela dulemar be-nug odummomala.
PSA 67:4 Dule-yar-baid-baidgi-bukwamalad wergumala, weligwaledgi namakmala. Bedi, dulemarga innikigwadgi igar naboged. Napneggi dule-yar-baid-baidgi-bukwamalad-e-iduedga be gued.
PSA 67:5 Bab-Dummad, dulemar be-nug odummomala, bela dulemar be-nug odummomala.
PSA 67:6 Napneggi bela ibmar-durba sanmakoed, Bab-Dummad, anmar-Bab-Dummad, anmargi nued-binsaoed.
PSA 67:7 Bab-Dummad, be anmargi nued-binsaoed, bela we-napneggi-yarmar-nanaid-ugakaase Bab-Dummad-dobgumaloed.
PSA 68:1 David we-namaked namakmalad-e-iduedga narmaksad. Bab-Dummad, dakebinne. Be-isdarmalad bela be oaisakisun. Dule-be-isdardakdimalad bela be-idu be oduurmaksun.
PSA 68:2 Igi waa burwaba yogguddae, debayobi, Bab-Dummadi dule-isganamar-imakoed. Igi baka-gwallu soo-abin daluddae, debayobi, dule-isganamar Bab-Dummad-abin bergudoed.
PSA 68:3 Dule-innikidamaladdi weligwale itomaloed, Bab-Dummad-asabin yeer itomaloed, weligwaledbali oichomakdemaloed.
PSA 68:4 Bab-Dummadga be namakmar, E-nuggi-namaklegedgi be namakmar, mogir-billigangi-sii-nanaed-e-nug be odummomar, ¡Bab-Jehováʼgi wergumala! ¡E-asabin be namakmala!
PSA 68:5 Bab-Dummad-e-neg-islidikidgi-maidi, dulemar-sergan-sated-e-babad, ome-ei-sui-burgwismalad-e-bendakedid.
PSA 68:6 Bab-Dummad, dule-wilesakwaa-walagwen-gudimalad, neguya-nikuega imaked, dule-galesbukwamalad-onogedid. Dule Bab-Dummadba-ibsadisurmaladdi, napa-isganagi ambikuoed.
PSA 68:7 Bab-Dummad, be Israel-dulemar-abargi-noargua, nega-dulesulidganba be idu-nadapgua,
PSA 68:8 napnega giglimakdegusad, mogir dii-owidegusad, Sinaí-yala, be-abin giglimakdegusad. Deyobi, Sinaí-yala Bab-Dummad-abin gusad, deyobi, Sinaí-yala Israel-e-Bab-Dummad-abin giglimaksad.
PSA 68:9 Bab-Dummad, bedi bela-belad dii-owisagusad, be-dulamar geggus-danimargua, be e-niga-ogannosad.
PSA 68:10 Bab-Dummad, a-napagine, be-dulamar ambikusad, dule-wilegedgi be nued-binsaedgi ega napa-nued be nasiksad.
PSA 68:11 Bab-Jehová, e-gayaburba uksad, omegana mili-milibali (1,000-1,000), a-gayaburba-nued weyob sogmalad:
PSA 68:12 “Reymar duurmakdemalad, sorda-bila-onomalad duurmakdemalad. E-isdarmalad-ibe-ibmar-sulesmaladi, omegan e-neggine mimidmalad:
PSA 68:13 Ibmar manigi-sobarmalad, orgi-sobarmalad, mimidmalad. Ar bemardi unnila sibad-wawaad-abargi meremai gusmalad.”
PSA 68:14 Bab-Dummad-Bela-Gangued-Nikadi, reymar-oakinnaigua, Salmón-yala-birgi dambed-sibudik-sibudik-batemaibayobi reymar-imaksad.
PSA 68:15 Basán-yalagan, yalagan-dummagan nanaed. Basán-yalagan-e-billigan matusuli nanaed.
PSA 68:16 Yala-dummagan, ¿ibiga be Bab-Dummad-yala-nug-imaksadgi be nobe itomala? Ar Bab-Jehová degisadegu agi mai guoed.
PSA 68:17 Bab-Dummad-e-moli-ur-bila-onomaladi, mili-miliba mergued (1,000-1,000). A-abalagine, Bab-Jehová Sinaí-yalase nonikid, e-neg-islidikid-yaba dogenonikid.
PSA 68:18 Bab-Dummad-Jehová, niba be nakwisgua, dule-galesmalad beba be sesa gusad. Dulemar-ibmar-bega-binsa-uksad be susad, dule-uayasulidamalad-e-ibmar be susad. Adi, be be-dulamar-abargi gudii guegar.
PSA 68:19 ¡Bab-Jehová-nug odummolesun! Bab-Dummad-anmar-abonogedi, iba-irbali anmar-bendakmaiguad.
PSA 68:20 Anmar-Bab-Dummadi, dule-bendakmaidid. Bab-Jehová-Bur-Dule-Dummad burgwed-igargi anmar-onogedid.
PSA 68:21 Bab-Dummad, dule-e-isdarmalad-nonogi annaoed, e-nono-binsaed-isganabi-sediid ei sagamakoed.
PSA 68:22 Bab-Jehová anmarga sogsad: “Basán-akale, gannar an be-barmidagoed. Demar-mata-wilaganba gannar-naega an be-imakoed.
PSA 68:23 Be-naga, be-isdarmalad-e-ablisbi-moodo-guega an imakoed. Be-achumar we-ablis elomaloed.”
PSA 68:24 Bab-Dummad, be-Neg-Islidikidgi dulemar-yaryarmakmamaidi, magar dakleged. Dule-duurmakmaidi, an-Bab-Dummadgadid, an-Reygad gued.
PSA 68:25 Dule-namakmaladi idumamaid, a-yalabali, yagana gar-panderetaʼmar ogornadapid, solaba dule-gar-ogormalad nadapmogad.
PSA 68:26 Danar-bukwadgi Bab-Dummad-nug be odummomalo, Israel-wagan, Bab-Jehová-nug be ogannomalo.
PSA 68:27 Benjamín-wagan we-dulemar-iduedga nadapid, amar-yalabali, Judá-dulemar-e-dummagan bukidar nadapmogad, solanapi, Zabulón-dulemar-e-dummagan, Neftalí-dulemar-e-dummagan nadapmarmogad.
PSA 68:28 Bab-Dummad, be-gargangued be oyoge, Bab-Dummad, be anmar-bendakegala be-gangued-oyosgusadi, be oyobali.
PSA 68:29 Bese-goled-neg Jerusalén-neggweburgi-siid-ulale, reymar bega ibmar ukmaloed.
PSA 68:30 Bab-Dummad, we-ibdula-masarganbalidga sabsuli be ibmar-soge. Moli-bebe-nikad-machergan-ursilimaladga, ise-sabsuli ega be ibmar soge. Yarmar-baiganbali, moli-bebe-nikad-sapinganayob-damaladga, ise-sabsuli ega be ibmar soge. Ibmar-bela-bela-nikubiedba dulemar-sabsuli-imakdiidga, sabsuli be ibmar soge. ¡Dule-bila-onogedgi-binsadimalad be oaisakisun!
PSA 68:31 Egipto-akale, dule-sapin-dummagan danimaloed, Etiopía-dorgandi, gwae-gwae Bab-Dummadse wilenonimaloed.
PSA 68:32 Napneggi-dule-bukmalad, Bab-Jehováʼga be namakmala. Namaklegedgi Bab-Dummadga be namakmala.
PSA 68:33 Mogir-negasailaun-nagusmalad-birgi-sii-nanaedga, be namakmala. E-sunmaked-itogega-dule-imakedga, be namakmala. E-sunmaked mala-gollomakeyob-goledga, be namakmala.
PSA 68:34 Bab-Dummad-e-gargangued magar be dakmala. E-ganguedi, Israel-neggweburgi maid. E-garganguedi, nibneg-akale oyonaid.
PSA 68:35 Bab-Dummad, be-Neg-Islidikidgi, bedi, dule-geger-dakleged maid. Israel-e-Bab-Dummad, e-neggweburga, gargangued ukedid, niga-gangued ukedid. ¡Bab-Dummad-nug odummolesun!
PSA 69:1 Namakmalad-e-iduedga soged: Igi dutu-lirioʼga-namaklege, deyob namaklemogoye. David we-namaked narmaksad. Bab-Dummad be an-bendake, ar dii an-gammu-nagagus-naid, ar an didulenaid.
PSA 69:2 Olli-mata-yaagi an dogmaid, gwisguega annaed an sated. Dii-wilasailad-abargi an naid, e-dukeba an selemaid.
PSA 69:3 Dule-baidse-bendakleged an budar egisgusad. An gammu dinnagusad. An-Bab-Dummadse an-bendakleged-edarbediidba, ataked an yegusad.
PSA 69:4 Dule-isdar-an-dakmalad, an-sailagiaba bur bule mergued. Bukidar binsarsunna isdar an-dakmalad. Isdar-an-dakmalad nue-gangued-nika gudmalad, binsarsunna an-oburgwebimalad. Ar an ei ibmar atursassulite, ¿ibu gannar ega an ukosunna?
PSA 69:5 Bab-Dummad, an binsaedsuligudigusad be wisid, an-isgued geg begi an odukued.
PSA 69:6 Bab-Dummad-Jehová-Bela-Gangued-Nikad, dule-begi-bensurmaladi, melle an-nukad bingegued be imako. Israel-e-Bab-Dummad, dule-be-amidimaladi melle an-nukad suli-suli-itoged be imako.
PSA 69:7 Ar be-nug-ulale, dulemar sunnasur-angi sunmaksamalad. An bingedba an-wagar gisii naded.
PSA 69:8 An-gwenadgan dule-baidyobi an-daked, an-nan-mimmigana akusunna an-dakmalad.
PSA 69:9 An bese-goled-negbina-nue-soged-ular, egi nue-nobe an itoged. Dulemar-begi-isdar-sunmaknanaid angi yolenonimogad.
PSA 69:10 An bodele, mas-gunsuli an gudele, angi dododedamalad.
PSA 69:11 Bukib-itoged-mola an yosale, angi dodoardamalad.
PSA 69:12 Dulemar neggwebur-doged-yawagakgi-bukudamaladi, angi sunmakedibidamalad. Mummugana angi namakedibidamalad.
PSA 69:13 Bab-Jehová, andi an bese goledi, be-itolegedba be an-abin-imakdaed. Sabed-dummarba-be-nikadba be an-abinsadaed. Be sunna an-abonogedba be an-bendaked. Bab-Dummadye, ¡emiskwaa be an-bendake!
PSA 69:14 Olli-mata-dummadgi be an-onoge. Melle olli-matagi-doged be an-imake. Dule-isdar-an-dakmaladgi be an-onoge, dii-wilasailadgi be an-onoge.
PSA 69:15 Melle diiba-seleged be an-imake, melle biryaba-bipirmakega be an-sae, melle napa angi mured be imake.
PSA 69:16 Bab-Jehová, be an-abin-imake, ar bedi dule-nuedid, be-sabgued dummarba be nikad. Be bela-bela dule-wiledakmaidba, gannar be anse dage.
PSA 69:17 Bab-Dummad, be-mai-idu melle be dukue, be an-abin-imake, ar an boni-abargi naid.
PSA 69:18 Bab-Dummadye an-walikaa be dage, be an-bendakdage. ¡An-isdarmaladgi be an-onoge!
PSA 69:19 Bab-Dummad, nue be wisid dulemar angi yoledimalad, dulemar an-obingegsadimalad, dulemar angi dododimalad. Bab-Dummad, bela be wisid, doamar an-isdarmalad gumala.
PSA 69:20 Dule-angi-dododimalad nue-nunmak an-imaksamalad. Emide geg an barsagusad, an bendakleged sated. Dule-wile-an-daked an amidiinad, gwen an amissurgusad. Dule-wile-an-dakmalad satemalad.
PSA 69:21 An-masgi ina-nusu obatismalad. An uku-uku-itonaigua, ina-gagbid anga uksamalad.
PSA 69:22 E-iba-onobukwadgi, e-masi egi-aibinega be imake. E-nasgumaidi, egi-aibinega be imake.
PSA 69:23 Melle-atakmalaga, amar-e-ibya mommoo be imake. Nolloo namalaga, e-gangued ei be sue.
PSA 69:24 Be-urwed egi gwichigued be imake. Be-urwed amargi yoleged be imake.
PSA 69:25 E-negmar ollo-ollo-siged be sae. Amargi dulemar megsuli be imake.
PSA 69:26 Ar be dule-naibi-imaksad balegichamalad, ar be dule-naibi-imaksad-e-nunmakedgi dododmalad.
PSA 69:27 Wemar ibmar-isgana-imaksadyob be imakmoga. We-dulemar melle be wiledako.
PSA 69:28 We-dulemar garda-burba-duladgi-e-nug-narmakar-naid be elie. Melle dulemar-nueganba e-nug-narmakar be meso.
PSA 69:29 Bab-Dummad, ar andi an uellediid, an nunmak-itodiid, be an-ogwiche, be an-bendake.
PSA 69:30 Bab-Dummad, namakedgi an be-nug ogannogoed, dog-nuedye-sogedgi be-nug an odummogoed.
PSA 69:31 We-ibmar-uklegedi, Bab-Jehováʼga moli-bebe-nikad-ukedba, moli-sapingwagwad-bebe-nikad-ukedba, Bab-Jehová bur-yeer itodaed.
PSA 69:32 Dule-wilegana weyob-dakdagogua, nue-yeer itodmaloed, Bab-Dummad-amidimalad-e-gwage gannaledmaloed.
PSA 69:33 Ar Bab-Jehová dule-wilegana-ese-goledi itodaed. E-dulemar-galebukwad mesagwar daksulid.
PSA 69:34 Nibnega, napnega, muu-billigan, bela-agi-ibmar-bukmalad, Bab-Dummad-nug odummosun.
PSA 69:35 Ar Bab-Dummad Sión-yala bendakoed, Judá-neggweburmar gannar soboed. Agine na e-dulemar degisadegu ambikuega imakoed.
PSA 69:36 Be-dulamar-e-wagan, a-yala degisadegu egadga guoed. Dule-be-sabmalad, a-yalagi bukwa gumaloed.
PSA 70:1 David na egi-binsamalaga namaked narmaksad. We-namaked namakmalad-e-iduedga narmaklesad. Bab-Dummadye, gwae be an-bendakdage, Bab-Jehováʼye, gwae be an-irwa gwisgudage.
PSA 70:2 Dule-an-oburgwebigudimalad bela surbinsa be imake. Dule-angi-isdar-binsadimalad bela be obingegsae, gannar osikirmakega be imake.
PSA 70:3 Dule-angi-dododimalad, bingedba gannar osikirmakega be imake.
PSA 70:4 Bab-Dummad, dulemar-bebina-gudimalad, begi-wergumala, begi-yeer-itomala. Dulemar-be-abonoged-igar-sabgudimalad weyob degisadegu sogdii gumala: “¡Bab-Dummad, nue-Bab-Dummad-Bur-Biriginedid!”
PSA 70:5 An dule-wilegedid, ibmarbina an sogdiid. Degisoggu, Bab-Dummadye, gwae be anse dage, ar be an-bendakedga gued, ar be an-ollor-imakedid. ¡Bab-Jehováʼye, mer be edarbe! Gwae be dage.
PSA 71:1 Bab-Jehová, an begi bensulid, mer bipisaar bingeguega be an-imake.
PSA 71:2 Be-igar-innikigwadba be an-bendake, be an-ollorsae, wis be an-itoge, be an-bendake.
PSA 71:3 Bee be, an-akwasaila-dukuedga gue, adi, an ase bali-bali dukudii guegar. Bedi an-bendakega be igar uksad. Be an-akwasailaga gued, bedi an-ganguedid.
PSA 71:4 An-Bab-Dummad, dulemar-isgana-e-ganguedgi be an-ollorsae. Dule-isgudimalad-e-ganguedgi, be an-ollor-imake. Emar-sabsur-imakmalad-e-ganguedgi be an-ollorsae.
PSA 71:5 Ar bedi, Bab-Dummad-Jehová, an-bendakedid. Sapingwagwad-akale, an begi bengudisulid.
PSA 71:6 An sapidukugi-mai, be an-akwide gusad. Bee be, muu-neggi-mai we-napnegse be an-odesad. A-ulale, degisadegu an be-nug-odummodii guoed.
PSA 71:7 Dulemarga an ibmar-gegerdaklegedyob gued, ar bedi an-odukued-gandikidid.
PSA 71:8 Bab-Dummad, bali-bali an be-nug odummoged, be-ganguedgi, be-yeerdaklegedgi an sunmakdii osedoddaed.
PSA 71:9 Bab-Dummadye, an seredgusale, mer be an-obano, an-gangued bergudele, mer be an-obano.
PSA 71:10 Ar an-isdarmalad angi sunmakmalad, an-oburgwebimalad na muchub-muchub angi sunmakmalad,
PSA 71:11 weyob sogmalad: “Bab-Dummad we-dulegi bar binsamaisurye. Anmar baleginmala, ganamala, ar dule-e-bendaked sated.”
PSA 71:12 Bab-Dummadye, mer be angi bangue, an-Bab-Dummad, gwae be an-bendakdage.
PSA 71:13 An-isdarmalad bingegumarsun, burgwemarsun. An-oakalobimalad, bela-bela bingegumarsun, bela-bela oesgudii gumarsun.
PSA 71:14 Ar andi begi degisadegu benguosulid, bur bule an be-nug-odummodii guoed.
PSA 71:15 Be-Igar-innikigwad, be-abonoleged-igar, amba an wissuli-inigwele, an egi sunmakdii osedodoed.
PSA 71:16 Bab-Dummad-Jehová, be-ganguedba-be-ibmar-imaksad an sogoed, be-igar-innikigwad an ebinsaoed, unnila abi an ebinsaoed.
PSA 71:17 Bab-Dummad, sapingwagwad-akale, be an-odurdaksad, amba emise-bakale, an be-ibmar-gegerdaklemalad-imaksadgi an sunmakdiid.
PSA 71:18 Bab-Dummad, an-seredgusale, an nono-dableargusale, mer be angi banguo. Amba dulemar-danimaloedga be-ganguedgi an sunmakbied, amba yoo-gwalulemaladga be-garganguedgi an sunmakbied.
PSA 71:19 Bab-Dummad, be ibmar-dummagan imaksad, be-igar-innikigwad nibnegse warmakmaid. Bab-Dummad, dule beyobid sulid.
PSA 71:20 Bedi, surbinsa-itolegedba galitonai an-imaksad, wile-itolegedba galitonai an-imaksad. Degi-inigwele, gannar be an-ogannogoed, napa-urba-mai gannar be an-odurguoed.
PSA 71:21 An-nug-dummarba be imakoed, gannar be baisur-itoge an-imakoed.
PSA 71:22 Deyobi, an bega gar-salterioʼba doggus-nuedye sogoed, An-Bab-Dummad, innikigwadba-be-ibmar-imakedgi gar-arpaʼba an bega namakoed, Israel-Bab-Dummad, an bega gar-liraʼba namakoed.
PSA 71:23 An bega namakdele, an weligwaledgi bega namakoed, ar ade, be an-abonosad.
PSA 71:24 Deginbali, be-igar-inniki-imaksadgi an sunmakdii guoed. An-oakalobimalad nue-bingegusmalad, nug-bipii gusmalad.
PSA 72:1 Salomón we-namaked narmaksad. Bab-Dummad, be-naboged-igar reyga be uke. Be-Igar-innikigwadba-be-ibmar-saedi rey-machiga be uke.
PSA 72:2 Adi, rey, innikigwadba be-dulamarga igar nabogoed, wile-itodimaladga innikigwadba igar nudakoed.
PSA 72:3 Yalamar, dulemarga neg-bogidikid nasiknonikoed, yala-mullugan, dulemarga igar-innikigwad ukoed.
PSA 72:4 Rey, dule-bukib-binsadimaladga igar nabogoed. Rey, dule-ibmar-nue-abedimalad-e-mimmigana abonogoed, mesagwar-dule-imakdimaladdi, obelogoed.
PSA 72:5 ¡Rey-nug odummolesun! Birga-birgaba rey yar-semai guoed. Igi-dad-ibeler birgabargus-naiyob, nii-ibeler birgabargus-naiyob guoed.
PSA 72:6 Igi-nainugi ibmar-digar-naidgi dii wiardae, deyob guoed. Igi dii-wied napa-dutuu imakdae, deyob guoed.
PSA 72:7 Rey-ibagangi igar-innikigwad dutu-achunnedyob guoed, rey-ibagangi ibmar nasgumai guoed, nii-naid-berguedse ibmarmar nasgumai guoed.
PSA 72:8 Rey demar-naid-ugakaase yar-semai guoed, Éufrates-diwar-maid-akale, bela napaneg-naid-ugakaase, rey yar-semai guoed.
PSA 72:9 Dulemar-nega-dulesulidganba-mamaid yokorgi-sindigale, rey-asabin dulluu imakmaloed, e-isdarmalad, rey-asabin napa-nagase dulluu imakmaloed.
PSA 72:10 Tarsis-e-reymar, dulemar-demar-gakagi-bukmaladi, neggweburgi-mani-galeged reyga ukmaloed. Sabá-e-reymar, Seba-e-reymar, ibmar-nuegan-binsa-ukleged reyga ukmaloed.
PSA 72:11 Bela reymar yokorgi-sindigale, e-asabin dulluu imakmaloed. Dulemar-yar-baid-baidgi-bukmaladi, bela ega-arbamaloed.
PSA 72:12 Rey, dule-ibmar-nue-abediidba wilesagwa-gordiidi bendakoed. Dule-wile-itodiid, dule-e-bendakoyob-binsadiid, rey bendakbaloed.
PSA 72:13 Rey, dule-wileged nue-wile dakbaloed, dule-ibmar-nue-abediid nue-wile dakbaloed, dule-wilegana-abonogoed.
PSA 72:14 Mesagwar-imaklediidgi dule-onogoed, sabsur-imaklediidgi dule-onogoed, ar dule ega bela-bela ibnuedga gued.
PSA 72:15 ¡Rey-nug odummolesun! Sabá-ormar ega uklesun. Bali-bali ega Babse-gorlesun. Bane-bane egi ise-nued-binsalesun.
PSA 72:16 Bela-napamargi, ibmar-gwag-gullemalad bukidar nikusun. Bela yalamar-birgi, Líbano-yargi-ibmar-gwag-gullemalad-nikayobi nikusun. Dulemar, gagan-nainugi-ainieyobi, neggweburgi mergusun.
PSA 72:17 Degisadegu rey-nug biledii gusun, dad-ibeler-naiyob e-nug naguoed. Bela dule-yar-baid-baidgi-bukmaladi rey-nuggine, dule-baigangi ise-nued-binsadii gumarsun, Bab-Dummad-egi-nued-binsasye sogmarsun.
PSA 72:18 Israel-e-Bab-Dummad-Jehová-nug odummolesun, unnila abi ibmar-gegerdaklemalad-imaked maid.
PSA 72:19 ¡Degisadegu, e-nug-gandikid odummoledii gusun! ¡Bela napneggi e-yeerdakleged neg-ganai gusun!
PSA 72:20 Isaí-machi-David, Bab-Dummadse-goled-narmaksadi, wese bergunaid.
PSA 73:1 Asaf we-namaked narmaksad. Ibibayobi, Bab-Dummad Israel-dulemargi nued-binsae, ibibayob dule-gwage-swilidikmaladgi nueddae.
PSA 73:2 An iche-napinad isguednaganad, an iche-napinad nue-dummad-noenad.
PSA 73:3 Dule-san-dummarba-imakmaladgi an nobguded, we-dule-isganamar nasgumai an dakargua, an egi nobguded.
PSA 73:4 We-dulemar gwen boni nikasurmalad, na san-swilidik gudidimalad.
PSA 73:5 Dulemar-ibmarbina-sogeyob ibmarbina-sogdisurmalad, dule-baigan-wiledimaladyob, wiledisurmalad.
PSA 73:6 We-dulemar, e-san-dummarba-imaked, wingwa-dukargi-naiyob ise-daklegaled. E-sabsur-dule-imaked, mor-yoeyobi ise-oyogar damalad.
PSA 73:7 Ibmar-isgana-ulubgi-sediid ise-oyogar damalad, ibmar-isgana-imaked bakar-buud oyomalad.
PSA 73:8 Dulemar-baigangi sunnasur sunmakdamalad. Gadi dule-baigangi dododamalad. Na san-dummarba-imakmaladba aimar-ibgwensur imakmalad.
PSA 73:9 E-sunmakedgi Bab-Dummadgi isdar sunmakdamalad, e-sunmakedba bela dulemar eba selediid.
PSA 73:10 A-ulale, dulemar ese idaknaddamalad, ega ibmar-soged bela nabiridbiiye binsadamalad.
PSA 73:11 We-dule-isganamar sogdedamalad: ¿Ar wede, Bab-Dummad wisguosi? ¿Ar wede, Bab-Dummad-Bur-Birigined mag-itogosi?
PSA 73:12 We-dule-isganamar dogdar-alamaknai dasurmalad, degite, baisursunna mani-ibedga guddamalad.
PSA 73:13 Binsarsunna, an gwage-swilidik gudiid, binsarsunna, an ibmar-nued imakdiid.
PSA 73:14 Ar emide, sabsur-an-imakdigumalad, wakudaryalaba an-sarsoardamalad.
PSA 73:15 An weyob sogsana: “We-dule-isganamaryob an sunmakoye.” An be-mimmigangi aibichanad.
PSA 73:16 An we-ibmarmala magar-itobi gusanad, suli-suli-itogega an-imaksad, aku an itogusad.
PSA 73:17 Bab-Dummadse-goled-negse an dogsagua, geb an magar-itosad, igi-dule-isganamar bergumaloe.
PSA 73:18 Bab-Dummad, be we-dulemar bonimar-abargi ogwichisad, we-dulemar na san-berguedse nadapmalad.
PSA 73:19 ¡Wemar ukiagwar bergudmaloed! Wemar dobedba bergudmaloed.
PSA 73:20 Bab-Jehová, bedi, igi dule e-gabdaksad napiragwadsulidba baisursunna daknonidae, deyobi, be gwisgualile, we-dule-isganamar-baisursunna dakoed, be we-dulemar-obelogoed.
PSA 73:21 Bab-Dummad, suli-suli an itodigua, an-ulubgi nue-sae an itodii gusad.
PSA 73:22 Ar an ibmar-wissulidbali, gannar-gannar an imaksad, ibmar-durganyob an gusad.
PSA 73:23 Degi-inigwele, an begi bangussulid, bee be nue-an-nidii gusad.
PSA 73:24 Be anga binsaed-ukedba an nanadiid. We-napneg-bergusale, ise-nuedgi be an-abingaoed.
PSA 73:25 ¿Ar doa nibneggi an-edarbemaisunna? Unnila bebi an-edarbemaid. Ar an beba gudiile, we-napneggi ibmar-baid an abesulid.
PSA 73:26 An-gangued bar nika an itosulid, degi-inigwele, Bab-Dummad, be an-ganguedid. Beginbi gudigu an sadeguoed.
PSA 73:27 Dulemar-begi-banguddamaladdi bese berguoed. Dule-be-sogedba-nanadisurmaladdi bese burgwemaloed.
PSA 73:28 Ar andina, Bab-Dummad-walikaa-gudigued bur nued an itoged. Be, an-Bab-Jehová gued, be, an-odukuedid. Degisoggu, bela be-ibmar-imaksad, dulemar-baiganga an sogoed.
PSA 74:1 Asaf, we-namaked-Masquilʼye-nugad narmaksad. Bab-Dummad, ¿ibiga be degisadegu anmar-obacha? ¿Ibiga be anmarse nue-urwe? Ar be-sibad-wawaadyob-danar-bukwadse, ¿ibiga be nue-urwe?
PSA 74:2 Be-dulamar negasailaun be susadi, mer be iego. Be-dulamar begadga-guega be bendaksagusadi, mer be iego. We-Sión-yar-siid be-negga be imaksadi, mer be iebalo.
PSA 74:3 We-neg bela-bibichis-bukwadse be dage, ar dule-be-isdarmalad, bese-goled-neg bela-bibichismalad.
PSA 74:4 Bab-Dummad, be-isdarmalad be-onmakedneggi oimakbukwad, nakwis-itomaladba e-bandermar digsamalad.
PSA 74:5 Dule sapurba-sapi-sikmaladyob, ibmar-olananai gusmalad.
PSA 74:6 Bela ibmar-urgogi-sobarmalad, e-akangi bibichismalad. Mardomargi bela bibichismarbalid.
PSA 74:7 Be-neg-siid soogi ogumaksamalad, bela swiri imaksamalad.
PSA 74:8 Dule-isdarmalad na e-gwagegi sogsamalad: “¡Bela anmar we-dulemar-obelogo!” ¡Geb we-yargi bese-goled-negmar-bukwad bela ogumaksamalad!
PSA 74:9 Anmar, anmar-bander gwen memermaknai bar-daksulid, dule-Bab-Dummad-e-gayaburba-barsogedbela bergusbalid. Anmar we-ibmargunaid-e-ibagan-bergudapoed gwen wissurbalid.
PSA 74:10 Bab-Dummad, ¿sanadse dule-isdarmalad begi dododii guoe? ¿Sanadse dule-isdarmalad be-nug oichodii guoe?
PSA 74:11 ¿Ibiga be sabsur-odurdaksuli? ¿Ibiga be bai-gwen-daksuli?
PSA 74:12 Bab-Dummad, bedina bato-sailanagi an-reyga be maid. We-napneggi bendakleged-igar be oyomaid.
PSA 74:13 Be-garganguedgi be demar egasbalid, be ibdulamar-dummagan-diakinmalad-e-nono marisad.
PSA 74:14 Be ibdula-dummad-diakined Leviatánʼye-nugad-e-nono ubigwar be imaksad. Ibdurgan-negsulidganba-gudimalad Leviatán-e-san-gunmalaga be imaksad.
PSA 74:15 Dii-sailagan-ariogega be imaksad, dianmar-megega be imaksad, diwar-dummagan-mamaid-dinguega be imaksabalid.
PSA 74:16 Be neg-meegwad nasiksad, mutikid be nasiksabalid. Be nii nasiksad, dad-ibeler be nasiksabalid.
PSA 74:17 Napneg-naid-e-abingunanaid be mesisad, Be dii-wied-iba nasiksad, yolagued-iba be nasiksad.
PSA 74:18 Bab-Jehová, nue be ebinsao: Be-isdarad begi ulusad. Dule-galagwensurdamalad be-nug isdar-daksamalad.
PSA 74:19 Be-dula-belagwa-gudimalad mer be ibdurganga urmake. ¡Be-dula-wiledimalad mer be iego!
PSA 74:20 Bab-Dummad, be-dulaga-be-igar-mesisad be ebinsao, mer be iego. Ar we-napneggi bela neg isgusnaid, bela neg-urwed naid.
PSA 74:21 Dule-boniganba-galitodiid, melle be obingegsao. Dule-boniganba-galitodiid, dule-ibmar-abediid, be-nug-odummogega be imake.
PSA 74:22 ¡Bab-Dummad, be-gargangued be oyoge! Be, dule-binsaedsuligudimalad bane-bane begi-urwedimalad, mer be baisurdake.
PSA 74:23 Be-isdarmalad-begi-oimaknanaid, mer be baisurdake. Ar begi-yoledimalad nue-mergumamaid.
PSA 75:1 Asaf, namakmalad-e-iduedga we-namaked narmaksad. We-namakedi, “Mer neg-obergued” namaklegeyobi namaklegergebed. Bab-Dummad, anmar doggus-nuedye bega soged, anmar bese goled. Dulemar be-ibmar-gegerdaklemalad-imaksadgi sunmakmalad.
PSA 75:2 Bab-Dummadye, be soged: “An igar-nabogoye-sokalile, innikigwadgi an igar nabogoed.
PSA 75:3 Napaneg-giglimakdele, bela egi-bukwamalad giglimakdele, ar ani an napneg-e-sailamar-ganikid ogannoged.”
PSA 75:4 Nug-dummarba-imakdimaladga an soged: “¡Mer be na nug-dummarba imakmar!” Dule-isganamarga an soged: “¡Mer be na san-dummarba imakmar!
PSA 75:5 ¡Mer be na gangued-nikadba yamo san-gannarba imakmar! ¡Mer be na bule-bule sunmakmar!”
PSA 75:6 Ar nug-dummarba-guedi, dad-nakwedsik danikosulid, dad-argwanedsik danikosulid, nega-dulesulidganba danikosulid.
PSA 75:7 Ar unnila Bab-Dummadbi igar-nabogedid. Bab-Dummad belallaa dulemar-nug odummosulid. Abala e-nug-bipii imaked, abala e-nug-dummarba imaked.
PSA 75:8 Bab-Jehová sabsur-dule-isganamar-odurdakega e-argangi nog-enamakar vino-gagbid-ibmar-baiganba-oburaled siid. A-vino-gagbid-eodele, bela dule-isganamar-we-napneggi-gudidiid, vino-gagbid-e-asase-bakale, gobmaloed.
PSA 75:9 Ar andi, Jacob-e-Bab-Dummadgi degisadegu sunmakdii guoed, Jacob-e-Bab-Dummadga an namakdii guoed.
PSA 75:10 Ar Bab-Dummad, dule-isganamar-e-gangued bela obelogoed, dule-nued-e-gangueddi, ogannogoed.
PSA 76:1 Asaf, we-namaked narmaksad. Namakmalad-e-iduedga-sogleged: We-namakleged, Neginotʼba namaklegoye. Judá-yalagine, bela Bab-Dummad magar-dakmalad, Israel-yalagi, e-nuga dummarba gued.
PSA 76:2 Ese-goled-neg Salemʼgi siid, e-meged-neg Sión-yalagi siid.
PSA 76:3 A-yalagine, Bab-Dummad warsi-e-sigumar bibichisad, sigu-abgamalad bibichisad, es-suidmar bibichisad, bila-onolegedgi-ibmar-ebulemalad, bela obelosad.
PSA 76:4 Bab-Dummad, bedi dule-gandikidid, bedi yalamar-degisadegu-bukwadba bur gandikidid.
PSA 76:5 Dule-bulegan omilede gusmalad, burgwismalad. We-dule-bulegan gannale bar gwisguosurmalad.
PSA 76:6 Be, Jacob-e-Bab-Dummad, egi be gwichigusgua, e-moli-urmar, e-molimar geg bar nanae gusad.
PSA 76:7 ¡Bebi, unnila be-dobmalad! Be uludegwale, ¿doa be-asabin gwisguoe? Suli, dule gwen gwisguosuli.
PSA 76:8 Bab-Dummad, be nibneg-akale igar-nabosad. Bab-Dummad, napneggi san-bipi-imakdimalad-abonogega,
PSA 76:9 be gwichiguargusgu, napnega dobee itosad, napnega bogi nagusad.
PSA 76:10 Dule-begi-urwedimalad aka be-nug-ogannogoed. Dule-begi-urwedimalad-besmaladi aka bega iba-dummad onomaloed.
PSA 76:11 Be-Bab-Dummad-Jehováʼba, ise-ibmar-sogar be imakmar, ega sogedba be ibmar imakmarbalo. Bela yarmar-anmar-neggwebur-dikarba-bukwadi, Bab-Dummad-gandikidga ibmar-ukleged sedamalo.
PSA 76:12 Ar Bab-Dummadi, dule-dummagan-negdakmamaid obelogedid, napneggi reymar-mamaid-odobguedid.
PSA 77:1 Asaf, we-namaked narmaksad. Namaked-idued-Jedutúnʼga soglenaid. Bab-Dummad an-itogega, an ese binnasuli goled. Suli-suli an itodiidgine, Bab-Dummadse an goted.
PSA 77:2 Bab-Dummadse mutikidba bogigusuli an argan-onakgwar gormai daed, degite, amba an-gwage naibi-itodaed.
PSA 77:3 Bab-Dummadgi an binsadele, nue-bukib an itodaed. An egi nue-binsadele, an boddaed, an binsaddaed bar an bendaklegosurye.
PSA 77:4 Bab-Dummad, gabsuli be an-imaked. Suli-suli an-itosoggu, geg sunmak an naddaed.
PSA 77:5 Ibagan-epenne-nasmalad an insaddaed, birgamar-epenne-nasmalad an insaddaed.
PSA 77:6 An mutikidba-namakmaidaed an ebinsaddaed, ulubgi an binsamaidaed, an egismaidaed:
PSA 77:7 “¿Ar Bab-Jehová degisadegu anmar-obandiguode? ¿Ar anmargi nued-binsadii bar guosurde?
PSA 77:8 ¿Bab-Dummad degisadegu-anmar-sabgudiid bergussi? ¿Bab-Dummad anmarga-ibmar-imakoye-sogsad degisadegu bergussi?
PSA 77:9 ¿Bab-Dummad dule-wiledaked iessi? ¿Bela-bela urwemaidba, bar anmar-sabguosurde?”
PSA 77:10 Geb an sogdesunnad: Bab-Dummad-Bur-Birigined bar epennegii anmarga ibmar imaksulid. We, nue-nunmak an-imaked.
PSA 77:11 Epenne Bab-Jehová-ibmar-dakledisurmalad-imaksad an ebinsaoed. Epenne Bab-Jehová ibmar-gegerdakleged-imaksad an ebinsaoed
PSA 77:12 Bab-Dummad-ibmar-dummagan-imaksad an egi binsaoed, be-ibmar-dummagan-imaklesadgi an sunmakoed.
PSA 77:13 Bab-Dummad, be-ibmar-imaked islidikidbiid. ¡Bab-dummagan-baigan anmar-Bab-Dummadyobid sulid!
PSA 77:14 Bab-Dummad, be ibmar-dakledisulid-imakedid. Be-gangued dulemar-yar-baid-baidgi-bukmaladse be oyomaid.
PSA 77:15 Be-ganguedgi, be-dulamar be ollor-imaksad, Jacob-wagan be ollor-imaksad, José-wagan be ollor-imaksad.
PSA 77:16 Bab-Dummad, demar be-daksagua, be-dobguded, muu-wilasailad be-daksagua, binnasuli giglimakded.
PSA 77:17 Mogirmar, dii-dummad owialid, nibneggi, malamar gollomakded, nibneggi, malamar ibyeded.
PSA 77:18 Burwa-bipirmakaled-imbaba be-goled malayobi binnasuli gollomakded, be-mala-ibyemamaid napaneg ibegwar-imakded, napaneg wawanmakded, bela giglimakded.
PSA 77:19 Demar-abargi, igar be mesisad, Muu-billi be egasad, a-abargi be nasad, degite, be-gannar daksasurmalad.
PSA 77:20 Sibad-wawaadyobi be-dulamar Moisésʼba, Aarónʼba be semai gusad.
PSA 78:1 Asaf, we-namaked-Masquilʼye-nugad narmaksad. An-dulamar, an-ibmar-odurdaked be nue itomala, an-ibmar-soged be nue itomala.
PSA 78:2 An ibmar-burbarmaladba sunmakoed, dikasurgus negasailaunni ibmar-dukuar-mamaidi, an osanalogoed.
PSA 78:3 Anmar bato we-ibmar itodiid, bato anmar wisid. We-ibmar anmar-babgan anmarga sogsadid.
PSA 78:4 Anmar anmar-mimmigangi we-ibmar odukuosulid. Anmar anmar-wagan-danimaloedga Bab-Jehová-e-ganguedgi sunmakoed, e-ibmar-dummagan-imaksadgi sunmakoed, e-ibmar-dakledisurmalad-imaksadgi sunmakoed.
PSA 78:5 Bab-Dummad, Jacob-waganga Igar mesisad, Israel-dulemarga Igar mesisad. Anmar-dadganga-Igar-uksagusad, be-wagan be odurdakoye,
PSA 78:6 adi, yoedse-be-wagan-danimaloedi, bela we-Igar wisgumalagarye, degi, yoedse-mimmigan-gwalulemaloedi, bela we-Igar wisgumarmogagarye, we-mimmiganmoga, we-Igargi na e-mimmigan-odurdakmogoed.
PSA 78:7 Deyobi, wemala, Bab-Dummadgi bensuli gumaloed, Bab-Dummad-e-ibmar-dummagan-imaksad iegosurmalad. Bab-Dummad-Igar-Maidba ibsamaloed.
PSA 78:8 E-dadganyobi guosurmalad. E-dadgandi, binsaed-sate, uayasuli gusmalad, e-gwagegi innikigwadba nanassurmalad, e-ulubgi Bab-Dummad-sogedba gudii gussurmalad.
PSA 78:9 Efraín-wagan, sigu-miemalad-buleganad, degi-inigwele, bila-onolenaid-ibagi wakite gusmalad.
PSA 78:10 Israel-dulemar Bab-Dummadbo-Igar-Mesisadba ibmar imaksasurmalad, Bab-Dummad-Igar-Maidba ibsassurmalad.
PSA 78:11 Bab-Dummad-ibmar-dummagan-imaksadi, ega ibmar-gegerdaklemalad-oyosadi, bela iesmalad.
PSA 78:12 Bab-Dummad Egipto-yargi, Zoán-nebagi, e-dadganga ibmar-dakledisurmalad-oyosgusadi, bela iesmalad.
PSA 78:13 Bab-Dummad, Israel-dulemar nabir-obakmalagala demar-dinnaa imaksad, demar gasdibiryob ganna mesisad.
PSA 78:14 Bab-Dummad, ibginedba mogirbali Israel-dulemar-idu-nadapi gusad, mutikidba soo-gaedbali idunadapi gusad.
PSA 78:15 Bab-Dummad, nega-dulesulidganba akwasaila marisad. A-akwagi dii-aryomai imaksad, geb a-dii-gobmalaga imaksad.
PSA 78:16 Bab-Dummad, akwagi dii-aryogega imaksad, diwaryobi dii-aryomai imaksad.
PSA 78:17 Degi-inigwele, Israel-dulemar gannar Bab-Dummadgi-isgunai gusmalad, nega-dulesulidganba Bab-Dummad-Bur-Biriginedgi gwisgunai gusmalad.
PSA 78:18 Israel-dulemar, yamo Bab-Dummad-wilubdakbi gusmalad, agala, e-abegedba Bab-Dummadse masgunned-egicha gusmalad.
PSA 78:19 Bab-Dummadgi sunmaksa gusmalad, sogsagusmalad: “¿Bab-Dummad, sunna anmarga nega-dulesulidganba mas-ukoe? Suli. Anmarga geg uke.
PSA 78:20 Ar napiragwa, Bab-Dummad akwasaila-sarsosgua, dii binnasuli aryoargusad. Ar anmarga-mas-ukegala, ¿deyob imakbalo be ebinsae? E-dulamarga, ¿sunna san ukbalo be ebinsae?”
PSA 78:21 Bab-Jehová, Israel-dulemar weyob-soge-itosgua, bela-belad uluded. Jacob-wagangi sae-itoded, Israel-dulemargi sabsur-uluded.
PSA 78:22 Ar Israel-dulemar Bab-Dummadgi bengusmalad, Bab-Dummad e-bendakosurye binsasmalad.
PSA 78:23 Bab-Dummad, nibneg-akale, mogirmarga igar-uksad, degidba, mogirmar argaded.
PSA 78:24 Bab-Dummad, Israel-dulemar mas-gunmalagala, mas-manáʼye-nugad ega obatisad, madu-nibneggined-gunmalaga imaksad.
PSA 78:25 Bela Israel-dulemar baliwitur-e-madu guchamalad. Nue-immelegedse-gunmalagala, Bab-Dummad ega mas barmialid.
PSA 78:26 Bab-Dummad, dad-nakwedsikid-burwa barmiar gusad. E-gangued-nikadba dad-nakwed-argan-nuedsikid-burwa barmiar gusad.
PSA 78:27 Bab-Dummad, ukub-mileddaedyobi ega san obatisad, demar-gakaba ukub-mergunaiyob ega nuumar obatisad.
PSA 78:28 Bab-Dummad, dulemar-danar-danar-bukwamaladgi, nuumar-babatega imaksad, Israel-dulemar-e-neg-gabmalad-dikarba nuumar-obatisad.
PSA 78:29 Israel-dulemar bela-bela-immelegedse mas-guchamalad. Deyobi, Bab-Dummad, ibmar-egichamaladi ega uksad.
PSA 78:30 Ar undar-immerba-gudii gussurmalad, ar amba e-gaya-yaba mas-sigua,
PSA 78:31 Bab-Dummad-e-urwed egi gwisgunonikid. Bab-Dummad, e-ibe bur-dule-dutusurmalad oburgwisad, Israel-dulemar-bur-nuga-nikamalad ogilosad.
PSA 78:32 Degi-inigwele, Israel-dulemar amba isgudii gusmalad, Bab-Dummad-geger-ibmar-daklemalad-imaksadgi bengusmalad.
PSA 78:33 A-ulale, Bab-Dummad, Israel-dulemar-e-ibagan sikwas-bunnogedyobi, berguega imaksad, e-birgamar dobed-dummad-abalagi, berguega imaksad.
PSA 78:34 Ar Bab-Dummad Israel-dulemar-abar-oburgwisale, geb Israel-dulemar-baigan gannar Bab-Dummad-amiddamalad, gwae-gwae gannar Bab-Dummadse nonidamalad.
PSA 78:35 Geb ebinsaddamalad, Bab-Dummad ega akwasailayob guye, Bab-Dummad-Bur-Birigined e-bendaked guye.
PSA 78:36 Ar Israel-dulemar e-gayaginbi, e-gwabin-dukuginbi, gakansaar Bab-Dummad-nug-odummodii damalad,
PSA 78:37 ar e-ulubgindi ega gakansadii damalad. Bab-Dummadbo-Igar-Mesisadba, sogedba imaksasurmalad.
PSA 78:38 Degi-inigwele, Bab-Dummaddi wemar-wiledaksad, e-isgusad ega elisad, wemar-obelossurgusad. Bab-Dummad, gannar-gannar na e-urwed-barganai gusad, e-urwedba ibmar-imaknai gussulid.
PSA 78:39 Bab-Dummad ebinsasgusad, wemarde unnila dulemar-guye, unnila burwa-goleyob guye, gwen bar daklegosurye.
PSA 78:40 Israel-dulemar, nega-dulesulidgangi, bukidargus Bab-Dummadgi-yoledanigusmalad. Nega-dulesulidgangi Bab-Dummad-wile-itogega imaksamalad.
PSA 78:41 Gannar-gannar Bab-Dummad-wilubdaknai gusmalad, Israel-e-Bab-Dummad-Isligwaled-ourwenai gusmalad.
PSA 78:42 Bab-Dummad-e-gangued bipisaar ebinsassurmalad, e-isdarmaladse-wilebukwa-onolesgusadi, ebinsassurmalad.
PSA 78:43 Egipto-yargi, Bab-Dummad ibmar-dakledisurmalad-oyosad iesmalad, neba-Zoánʼye-nugadgi ibmar-dummagan-imaksad iesmarbalid,
PSA 78:44 Bab-Dummad, Egipto-yar-e-diwarmar abega obinnisad, Egipto-dulemar, a-diwar geg gobe gusmalad.
PSA 78:45 Bab-Dummad, Egipto-dulemargi, gukurmar-bela-ibmar-biin-imakmalad barmiar gusad. Noomar-ibmar-obelomalad barmiar gusbalid.
PSA 78:46 Bab-Dummad, Egipto-dulemar-e-ibmar-gwag-wesmaladi, sese-burwigana-omaega imaksad, e-ibmar-gwag-gullemalad-digarmaladi, sesega urmaksabalid.
PSA 78:47 Bab-Dummad, Egipto-dulemar-e-uvaʼdub-digarnanaid, dii-gwamakaled-obatisadgi obelosad, e-higo-sapimar, boo-gwamakarmaladgi obelosad.
PSA 78:48 Bab-Dummad, Egipto-dulemar-e-moli-bebe-nikamalad, dii-gwamakaled-obatisadgi oburgwisad. E-sibad-wawaadmar mar-egi-odesadgi obelosad.
PSA 78:49 Bab-Dummad, Egipto-dulemargi bela-bela-e-urwed, e-sae-itoged, e-isdar-itoged, e-sae-daked barmiar gusad. Baliwitur-ibmar-obelomalad danagwen barmiar gusad.
PSA 78:50 Bab-Dummad na e-urwed bar bargassur gusad. Burgwedgi, Egipto-dulemar bar ollor-imaksasulid, boni-dummaganga urmaksagusad.
PSA 78:51 Bab-Dummad, bela Egipto-dulemar-e-machi-sailaginmalad oburgwisad, Cam-dulemar-e-machi-sailaginmalad ogilosad.
PSA 78:52 Bab-Dummad, sibad-wawaad-danar-bukwadyobi, Israel-dulamar-idunadapi gusad, nega-dulesulidganba senadapi gusad.
PSA 78:53 Bab-Dummad, Israel-dulamar-mer-dobee-itomalaga, igar-nueganba semai gusad. E-isdarmaladdi demargi-gundilegega imaksad.
PSA 78:54 Bab-Dummad, na e-yar-islidikidse Israel-dulamar-senoni gusad, na e-garganguedgi we-yarmar-susadse senonikid.
PSA 78:55 Bab-Dummad, Israel-dulemar-nadapid-idu dule-baigan-bukwad onosgusad, we-dulemar-e-napamar, Israel-dulemargadga-guega ega uksad. Deyobi, Bab-Dummad, a-napamargi, Israel-dadgan-dummagan-wagan urbisad.
PSA 78:56 Degi-inigwele, Israel-dulemar Bab-Dummad-wilubdaknai gusmalad, Bab-Dummad-Bur-Biriginedgi aibitemalad, e-Igar-Maidba ibsassurmalad.
PSA 78:57 E-babganyobi Bab-Dummadgi aibatemalad, egi yolenai gusmalad. Israel-dulemar, warsi-binsaledyob dopere gusmalad.
PSA 78:58 E-bab-dummadse-goled-neg-sobsamaladba, Bab-Dummad-oulusmalad, ibmar-e-bab-dummadga-imakdimalad-e-wilub-sobsamaladba, Bab-Dummad-nobguega imaksamalad.
PSA 78:59 Bab-Dummad, weyob ibmar-daksagua, uluded, degidbali, bela Israel-dulemar-obachad.
PSA 78:60 Silo-neggweburgi e-neg-meged-siidgi aibated. Agi, Bab-Dummad dulemar-abargi maidaenad.
PSA 78:61 Bab-Dummad, na e-Ulu, e-gangued-yeerdakleged-e-wilubga guedi, e-isdarmaladse-galegega imaksad.
PSA 78:62 Bab-Dummad bela-bela e-dulamargi urwemaisoggu, es-suidgi e-dulamar-oburgwilegega imaksad.
PSA 78:63 E-dula-sapingan soogi gummaksamalad, e-yaganga sui-nikued-ibagi-namakleged namaklessulid.
PSA 78:64 E-dule-irwa-Bab-Dummadse-gormalad es-suidgi oburgwilesmalad, E-omegan-e-ibe-sui-burgwismaladi, e-suimarga gwen bonai gussurmalad.
PSA 78:65 Geb Bab-Dummad, igi-dule-gabmair atakardae, deyobi atakalid. Igi-dule-bila-onoged-buled vino-gobnair binnasuli gormakdedae, deyobi Bab-Dummad uludedba binnasuli goted.
PSA 78:66 Bab-Dummad, e-isdarmalad-sikirmakega imaksad, degisadegu bingeguega imaksad.
PSA 78:67 Bab-Dummad, José-wagan-obachad, Efraín-wagan-sussulid.
PSA 78:68 Bab-Dummad, aka bur Judá-wagan-sunonikid, na e-yar-bur-sabed-Sión sunonikid.
PSA 78:69 Bab-Dummad, ese-goled-nega nibnegyobi matusuli sobsad, Bab-Dummad, igi-napneg degisadegu-gangu-nasiksa, deyobi na e-neg gangu sisad.
PSA 78:70 Bab-Dummad, e-mai-David-sunonikid, sibad-wawaad-edarbedgi-arbadiidgi David-onosad.
PSA 78:71 Sibad-wawaad-baregindidaedgi, Davidʼse gochad. Bab-Dummad, ega e-dulamar-Jacob-wagan-akwega, Israel-dulemar-egad-gued-akwega, Davidʼse gochad.
PSA 78:72 David na e-gwage-innikigwadba Israel-dulemar-akwisad, e-binsaed-nue-nikadba dulemar-idudii gusad.
PSA 79:1 Asaf, we-namaked narmaksad. Bab-Dummad, dulemar-aku-be-dakmalad be-yargi ubosmalad. Bese-goled-neg-islidikid oichosmalad. Jerusalén-neggwebur akwabi-dunnumakbukwa imaksamalad.
PSA 79:2 We-dulemar, be-maimar-e-mui, mulamarga masga uksamalad. Dule-bega-inniki-nanadiid-e-sanmar, ibdurgan-ursilimarga masga uksamarbalid.
PSA 79:3 Be-maimar-e-ablis, bela Jerusalén-neggweburgi diiyobi eosmalad. Burgwismalad-digega dule sate gusad.
PSA 79:4 Dulemar-anmar-yar-dikarba-bukmaladi, anmargi dodomalad, dulemar-anmar-yar-dikarba-bukmaladga anmar e-dodoedga gued.
PSA 79:5 Bab-Jehováʼye, ¿sanagwadse be-urwed berguoe? ¿Sanagwadse degisadegu be urwemai guoe? ¿Sanagwadse be-nobgued sooyob gamai guoe?
PSA 79:6 Dulemar-aku-be-dakmaladse be urwe, dulemar-bese-gordisurmaladse be urwe.
PSA 79:7 Ar we-dulemar, Jacob-wagan obelosmalad. Jacob-wagan-e-yar akwabi-dunnumakbukwa imaksamarbalid.
PSA 79:8 Bab-Jehováʼye, anmar-epenne-isgusad, mer be bar ebinsae. Be-wiledaked gwae be anmarga oyoge, ar anmar bela-bela oitoles bukwad.
PSA 79:9 Bab-Dummad-anmar-abonoged, be-nug-dummarba-gued-ular, be anmar-bendake. Be-nug-sabed-ular, be anmar-ollorsae, anmar-isgusad be elie.
PSA 79:10 Ar ibiga dulemar-yar-baigangi-bukwad sogmaloe: “¿Bia e-Bab-Dummad nade?” Be anmarga oyoge, igi-be, be-dulamar-e-ablis-aryosad be buged-mai imake. Bela dulemar-yar-baid-baidgi-bukwamaladga oyobali, igi-be, be-maimar-e-ablis-aryosad be buged-mai imake.
PSA 79:11 Dule-galesbukmalad-e-boed be itoge, dule-oburgwilesokarmaladi, be-garganguedba be bendake.
PSA 79:12 Bab-Jehová, dulemar-anmar-yar-dikarba-bukwamalad begi dummad-dododigusmaladi, ilagugle (7) deyob-egi-dodomarmogaga be imake.
PSA 79:13 Anmardi, be-dulamar-gumalad, be-sibad-wawaadmaryob-gumalad. Degisadegu, anmar dog-nuedye bega sogmaloed. Degisadegu, anmar bega namakmaloed.
PSA 80:1 Namakmalad-e-iduedga-sogleged: We-namaked, Dutu-Lirioʼgi-namaklegedyob namaklegoye. Asaf e-gudiidba we-namaked narmaksad. Bab-Dummad, Israel-dulemar-edarbed, be anmar-itoge. Be, sibad-wawaad-edarbedyobi José-wagan-e-iduedid, be, baliwiturmar-querubinʼye-nugad-abargi negsemaidid.
PSA 80:2 Efraín-waganse, Benjamín-waganse, Manasés-waganse, be magar gue. Be-gangued be oyoge, be bela-bela anmar-bendakdage.
PSA 80:3 Bab-Dummad, igi-anmar epenne bukwagusa, deyobi, be gannar anmar-imake. Bab-Jehováʼye, be anmargi ise-nued-binsae, be bela-bela anmar-bendake.
PSA 80:4 Bab-Dummad-Jehová-Bela-Gangued-Nikad, be-urwe-maid-ulale, ¿sanagwadse be-dulamar-bese-goled be itogosuli?
PSA 80:5 Boed-dummad e-masgunnedyob ega be uksad, ibyanis-obinebaka e-gobedyob ega be imaksad.
PSA 80:6 Dulemar-anmar-yar-dikarba-bukwamaladi, anmarga allega be imaksad, anmar-isdarmalad anmargi dodomalad.
PSA 80:7 Bab-Dummad-Bela-Gangued-Nikad, igi-anmar epenne bukwagusa, deyobi be gannar anmar-imake. Bab-Jehováʼye, be anmargi ise-nued-binsae, be anmar-abonoge.
PSA 80:8 Bab-Dummad, Egipto-yalagi be uva-dub seargusad, Canaán-yargi dulemar-Bab-Dummad-akudakmalad be ononnosgusad, geb we-uva-dub be digsagusad.
PSA 80:9 Ega be neg-emisad, uva-dub-e-maligan gatik-diglemai be imaksad, bela-yar-gasa nagusad.
PSA 80:10 Bela uva-dub-gagan-urba negsichigwadgi yarmar bukusad, e-dubagan, urwar-sapi-matusur-gwigwichidgi bipirmakde gusad.
PSA 80:11 E-anamar, demar-Mediterráneoʼse warmaksad, e-muugan, Éufrates-diwarse nasgumai gusad.
PSA 80:12 Bab-Dummad, ¿ibiga uva-nainu-e-galu-emakaled be earisa? Bela-dulemar-e-dikarba-nasdamaladi, e-ibe san gwandamalad.
PSA 80:13 Wedarmala bela-bela wionaid, ibdurgan-ursirmar gundamalad.
PSA 80:14 Bab-Dummad-Bela-Gangued-Nikad, be anmarse gannar dage, nibneg-akale be atake, we-uva-dub be bendakdage.
PSA 80:15 Be-sunnad we-uva-dub be digsagusad. Begadga-guega e-ana be odummosad.
PSA 80:16 Be-uva-dub aimukus maid, soogi ogumaklesad. Be-urwedbali be-dulamar burgwemamaid.
PSA 80:17 Dule na be susagusadi, be bendake, dule-begadga-guega na be odungusgusadi, be bendake.
PSA 80:18 Ar deyob be imakele, anmala begi aibanosurmalad. Gannar-dula-gudii be anmar-imake, anmar unnila besebi gordii gumaloed.
PSA 80:19 Bab-Dummad-Jehová-Bela-Gangued-Nikad, igi-anmar epenne bukwagusa, deyobi be gannar anmar-imake. Bab-Jehováʼye, be anmargi ise-nued-binsae, be bela-bela anmar-bendake.
PSA 81:1 Namakmalad-e-iduedga sogleged: Igi uva-nis-egurelealir gar-ogorledae, abali, namaklegoye. Asaf, we-namaked narmaksad. Bab-Dummadga weligwaledgi namakmala, e anmar-ogannogedid. Jacob-e-Bab-Dummadga binnasuli weligwaledgi namakmala.
PSA 81:2 Namakmala, gar-pandero ogormala, gar-lira ogormala, gar-arpa ogormala.
PSA 81:3 Nii-binid-gwisgunonikidgi, gar-trompeta ogormala. Nii-dalu-naidgi anmar-iba-dummad-guedgi, gar-trompeta ogormala.
PSA 81:4 Ar weyob-imakoye Bab-Jehová Israel-dulemarga igar uksad, weyob Jacob-e-Bab-Dummad igar mesisad.
PSA 81:5 José-wagan Egipto-yargi noargu, Bab-Dummad José-waganbo igar mesisad.
PSA 81:6 Dule-sunmaked an itosad, an wissulid, doa anga sunmake. Anga weyob soged: “Be-gukingi be ibmar-ukusulid-semaid an bega osulosad. Arbaed-dummad be imakdiidi an bega obelosad.
PSA 81:7 Bemar suli-suli-itoarmargua, be anse gochamalad, agine, an be-bendaksamalad. Mogir-gudureged-imbaba, an be-abin-imaksamalad. Mar-gollomakmaid-abargi, an be-abin-imaksamalad. Meriba-dii-naba an bemar-wilubdaksad.
PSA 81:8 ”An-dulamar, an be-owisogega bega ibmar-sogedi, be itomala. Israel-dulemar, bitigi be an-itosmalana gadin.
PSA 81:9 Bab-dummagan-bamalad be-Bab-Dummadga be imakosurmalad, bab-dummagan-bamalad-asabin, be yokorgi sindigar sigosurmalad.
PSA 81:10 Ani, an be-Bab-Dummad-Jehová gued. Ani an Egipto-yargi bemar-onosad. Guagwar be bukumala, an bemarga mas-obinebaka ukoed.
PSA 81:11 ”Degi-inigwele, an-dulamar an-itossurmalad, Israel-dulemar anba ibsabisur gusad.
PSA 81:12 A-ulale, na e-itolegedba-ibmar-imakega an imaksad. Na e-itolegedba-nanadii gusmarsunnad.
PSA 81:13 ”Ar an-dulamar an-itosana, ar Israel-dulemar an-igar-mamaidba nanasmalana,
PSA 81:14 an ega e-isdarmalad irgwensuli osulosanad, an e-isdarmalad sabsur-odurdaksanad.
PSA 81:15 Dulemar-Bab-Jehová-isdar-dakmalad, Bab-Jehová-e-nug bela-bela odummodmaloenad. Degi-inigwele, an a-dulemar degisadegu sabsur-odurdakoed.
PSA 81:16 An-dulemardi trigo-gwag-bur-nuedgi an oguchaled, akwamargi-achanis-nanaidgi, immerba-itomalaga an imaksaled.”
PSA 82:1 Asaf, we-namakleged narmaksad. Bab-Dummad, bab-dummagan-onmakbukwad-e-dummadga siid, amarga igar-nabogedga siid.
PSA 82:2 “¿Ar sanagwadse, bemar yogasaar igar-nabodii gumaloe? ¿Ar sanagwadse, bemar dule-isganamargarbi igar-nudakdii gumaloe?
PSA 82:3 ”Be dule-e-sergan-sate-gudimalad, be bendakmala, be dule-bendaked-sate-gudimalad, be bendakmala. Dule-wilemaladga, be innikigwadgi igar-nabomala, dule-sabsur-imakledimaladga, be innikigwadgi igar-nabomala.
PSA 82:4 Dule-e-bendaked-satemalad be dule-isganamargi bendakmala, dule-ibmar-abedimalad be dule-isganamargi bendakmala.
PSA 82:5 ”We-dule-isganamar ibmar wissurmalad, ibmar aku-itomalad, negsichidgi gaamakdimalad, weyob gudimaladba bela napneg-saila-giglimakega imakmalad.
PSA 82:6 ”An bemarga sogsa gusad: ‘Bemar bab-dummagan gumarye, bela-bemar Bab-Dummad-Bur-Birigined-e-mimmigan gumarye.’
PSA 82:7 Degi-inigwele, bemar dulemaryobi burgwemaloye, dummagan-negsemamaidyobi burgwemaloye.”
PSA 82:8 ¡Bab-Dummad! We-napnegga be igar itodage, ar bela-dule-napneggi-bukwamalad begadid.
PSA 83:1 Asaf, we-namaked narmaksad. Bab-Dummad, melle be gaya-bogidik mege. Bab-Dummad, melle be sunmaksuli gue, melle be ibmar-imaksuli gue.
PSA 83:2 Bab-Jehová, be dake, ibibayobi be-isdarmalad uurmakbukwa, ibibayobi isdar-be-dakmalad begi gwisgunanai.
PSA 83:3 Be-dulamargi-aibinega yardakar igar-amismalad. Be-dulamar-na-be-sabgumaidgi-gwisgumalaga, yardakar bular igar-amismalad.
PSA 83:4 We-dulemar sogmalad: “Dagmala, anmar bela e-dulamar obelonae. Deyobi, Israel-e-nug bar bipisaar ebinsalegosulid.”
PSA 83:5 Dule-wargwennayob na igar-aminanaid, begi bila-onomalaga, we-dulemar na atosmalad:
PSA 83:6 Edom-dorgan, Ismael-dorgan, Moab-dorgan, Agar-dorgan,
PSA 83:7 Gebal-dorgan, Amón-dorgan, Amalec-dorgan, Filistea-dorgan, degi, Tiro-dorgan, bela wemar na atosmalad.
PSA 83:8 Asiria-dorganse-bakale, bela wemarba atosad. Lot-wagan-bendakega atosmalad.
PSA 83:9 Ar igi be Madián-dulemar-obelosgusa, deyobi be we-dulemar obelomoga. Ar igi be Sísara, degi, Jabín, Cisón-diangi-obelosgusa, deyobi be we-dulemar obelomoga.
PSA 83:10 We-dulemar Endorʼgi burgwismalad, ibmar-isganayob napagi miled gusmalad.
PSA 83:11 Ar igi be Oreb, degi, Zeeb, imaksagusa, deyobi be e-sordamar-dummagan imakmoga. Ar igi be Zeba, degi, Zalmuna, imaksagusa, deyobi be bela e-dummagan-nuga-nikamalad be imakmoga.
PSA 83:12 Wemar sogsagusad: “Bab-Dummad-e-yar-naidi, anmar e-ibe sumala.”
PSA 83:13 Bab-Dummad, we-dulemar burwaba-selegega be imake. Gaganmar burwaba-gukuddaeyobi be we-dulemar-imake.
PSA 83:14 Ar igi soo sapur-ogumakdae, degi, igi soo-gwabunyemaid yarmar-ogumakdae,
PSA 83:15 deyobi be we-dulemar, be-burwa-dummadgi be baleginne, be-burwa-ooredgi, be ogwaye.
PSA 83:16 Bab-Jehová, we-dulemar be obingegsae, adi, magar-be-dakmalaga, be Bab-Dummad gued.
PSA 83:17 We-dulemar, degisadegu bingegudii gumala, na bingegudii burgwemala.
PSA 83:18 Na wisgumala, bebi Bab-Jehová gued, weyobi be nugad. Na wisgumala, napneggine, bebi unnila Bab-Dummad-Bur-Birigined gued.
PSA 84:1 Coré-e-wagan, we-namaked narmaksad. Namakmalad-e-iduedga soglesad: We-namakedi igi uva-nis-egurelealir gar-ogorledae, aba namaklegoye. Bab-Jehová-Bela-Gangued-Nikad, ibibayobi be-meged-negmala yeerdaklege.
PSA 84:2 Bab-Jehováʼse-goled-neg-imbabina, an bela-bela ulubgi itoged, agi an gudiguega an surbinsa itoged. Bela-belad an-ulubgine, an-gwagegine, Bab-Dummad-Dula-Maidga an weligwaledgi namaked.
PSA 84:3 Bab-Jehová-Bela-Gangued-Nikad, an-e-rey, an-Bab-Dummad, amba gig-sikwibela, bese-goled-neggi neg-amied, amba wirsobbela, na e-mimmigan-urbega, bese-goled-neggi e-uu sobed.
PSA 84:4 Be-itoged-neggi-gudimaladi, egi nued-binsalesmaladid, ar degisadegu be-nug-odummodimalad.
PSA 84:5 Dule-begi-gangued-amiedi, egi nued-binsalesmaladid, unnila bese-goled-negse-dagedginbi binsadiid.
PSA 84:6 Ibyanis-aryoged-nebaba-nadapile, dii-sailagan-ariomaid-negga imaked. Gebe-dii-argwanedi, neba-naidgi nabir-binsadaed.
PSA 84:7 Dulemar, nanadapidbali e-ganguedi gangumai gued, Sión-yalagi Bab-Dummad-dakmaloed.
PSA 84:8 Bab-Jehová-Bela-Gangued-Nikad, an bese-goled be itoge, Jacob-e-Bab-Dummad, be an-itoge.
PSA 84:9 Bab-Dummad, be anmar-irwa sigu-abgaedyob gued. Be-dule-nug-imaksadgi be nued binsae.
PSA 84:10 Magaba iba-miliba-gudiguedba, bur-nuedid, bese-goled-neg-imbagi ibagwen gudii gued. Dule-isganamar-abargi-gudiguedba, bur an an-Bab-Dummadse-goled-neg-yawagak edarbebied.
PSA 84:11 Bab-Jehová, dad-ibeleryob gued, sigu-abgaedyob gued. Bab-Dummad, anmar-nug dummarba imaked, anmarga gangued uked. Bab-Jehová, dule-galagwensuli-gudisurmaladga, e-ibmar-nikadi obinagwar uked.
PSA 84:12 ¡Bab-Jehová-Bela-Gangued-Nikad, dule-begi-bensur-gudiid, egi nued-binsalesadid!
PSA 85:1 Coré-wagan, we-namaked narmaksad. Namakmalad-e-iduedga narmaklesad. Bab-Jehová, be-dulamargi be ise-nued binsasad. Jacob-e-wagan-yar-baidgi-galebukmalad, be gannar e-yarse senonikid.
PSA 85:2 Be-dulamar-e-ibmar-isgana-imaksad ega be osulosad, bela e-isgusad begi nossuliyob be daksad.
PSA 85:3 Bab-Jehová, be-sae-itoged bela be osulosad, be-urwed na be bargasad.
PSA 85:4 Bab-Dummad-anmar-abonoged, gannar be anmar-nudake. Be-anmarse-urwemaid be obeloge.
PSA 85:5 ¿Ar be degisadegu anmarbo sae-itodii guoe? ¿Be degisadegu urwemai guoe?
PSA 85:6 Ar anmar burgwaleyob-gusoggu, gannar be anmar-odulodage. Adi, anmar be-dulamar-guedi, begi weligwar itomaloed.
PSA 85:7 Bab-Jehováʼye, be-sabgued be anmarse oyoge, be anmar-abonoge.
PSA 85:8 Bab-Dummad-Jehová-ibmar-soged an itogoed, ar e-dulamarga, ega-inniki-nanadimaladga, bogidikidgi sunmakoed, adi, melle bar gannar Bab-Dummadgi bangumalagar.
PSA 85:9 E-nug-odummodimalad-bendakega, Bab-Dummad anmar-walikaa gudiid. E-gangued-yeerdakleged anmar-napneggi nai guoed.
PSA 85:10 Sabgued, na napiragwadbo abingunonimaloed. Igar-innikigwad-imaked, na bogidikidbo, angaagwar akanonimaloed.
PSA 85:11 Napiragwad napneggi nai guoed, Igar-innikigwad-imaked, nibneg-akale aidedani guoed.
PSA 85:12 Bab-Jehová-sunnad anmargi nued-binsaoed. Anmar-napaneg, nue-ibmar-sanmake guoed.
PSA 85:13 Igar-innikigwad-imaked, e-gayaburba-barsogedga guoed, Bab-Dummad-idu igar-mayoed.
PSA 86:1 David Bab-Dummadse gornaid. Bab-Jehováʼye, wis be an-itoge, be an-abin-imake. Ar ande, dule-wilegedid, ibmarbina an bela-bela soged.
PSA 86:2 Bab-Dummadye, be an-bendake, ar ande begala sogedba nanadiid. Be, an-Bab-Dummadid. An begi bensulid. Be-mai be bendake.
PSA 86:3 Bab-Jehováʼye, wile-be-an-dake, ar an bese gordii osedoddaed.
PSA 86:4 Be-nug-odummodiid weligwar be imake, adi, Bab-Jehová, an bese golegar.
PSA 86:5 Bab-Dummad, be dule-nued gued, isgudsuliyob be emar-dakedid. Dulemar-bese-gormalad be bela-bela sabed.
PSA 86:6 Bab-Jehováʼye, an bese-gornaid be itoge, an-wilesagwar-gornaid be itoge.
PSA 86:7 An suli-suli-itogedgi an bese goled, ar be an-abin-imakdaed.
PSA 86:8 Bab-Jehová, bab-dummagan-beyobid sated, be-ibmar-imaksadyobi gege ibmar imakmalad.
PSA 86:9 Bela be dulemar-obinnisadi, be-asabin sindigar signonimaloed, be-nug odummomaloed.
PSA 86:10 Bab-Dummad, ar bebi dummarba-maid, ar bebi ibmar-gegerdakleged imaked. ¡Ar bebi unnila Bab-Dummad gued!
PSA 86:11 Bab-Jehová, an be-igar-innikigwadba nanadii guega, Be-Igar-Maid be anga oyoge. Bab-Dummad, an be-nug-odummodii nanaega, be an-gwage ogannoge.
PSA 86:12 An-Bab-Dummad-Jehová, bela-bela an napiragwadgi be-nug odummogoed, degisadegu, an be-nug odummodii guoed.
PSA 86:13 Ar bela-belad be an-sabed, degisoggu, burgwega be an-imaksasulid.
PSA 86:14 Bab-Dummad, dulemar-na-san-buled-imakmalad angi gwisgunanaid, dule-gindakmalad an-oburgwebied. We-dulemar gwen begi binsasurmalad.
PSA 86:15 Bab-Jehová, bedi dule-nuedid, emar-wiledakedid. Bedi, baisursunna urwesulidid, sabgued-dummad-nikadid, dule-innikigwadbalidid.
PSA 86:16 Bab-Dummad, be an-dake, wile-be-an-dake. Be-nug-odummodiidga be-gargangued be uke. Ome-be-nug-odummodiid-e-machi be bendake.
PSA 86:17 Bab-Dummad, an-isdarmalad dakmalaga, an-isdarmalad bingegumalaga, be-sabgued be angi oyoge. Ar be Bab-Jehová, be an-bendakedid, be an-gwage-armakedid.
PSA 87:1 Coré-wagan, we-namaked narmaksad. Bab-Dummad-e-neggwebur-e-negsailamar yar-islidikidgi mamaid.
PSA 87:2 Bab-Jehová Jacob-wagan-e-negmarba bur bule Sión-yawagakmar sabed.
PSA 87:3 Bab-Dummad-neggwebur, ibiyobi be-yeerdaklegedginbi sunmakmalad.
PSA 87:4 Bab-Jehová soged: “Neggweburmar-magar-an-dakmalad-abargi sunna an we-neggweburmar bie-bie saed: Rahab, Babilonia. Filistea, Tiro, Etiopía. We-neggwebur-e-dulemar-annik sogleged: ‘Sión-neggweburgi Bab-Dummad-magar-daksamarye.’ ”
PSA 87:5 Sión-neggweburnik soglegoed: “We-dule, degi, wemoga, Siónʼgi gwalulesmarye.” Bab-Dummad-Bur-Birigined na e-sunnad Sión-neggwebur sisad.
PSA 87:6 Bab-Jehová neggweburmar-nug-mamaid-gardagi narmakoed: “We, Sión-neggweburgi gwalulesye.”
PSA 87:7 Namaknanaidgi, degi, gwirnanaidgi, sognanaid: “Anmar begi bela-danikid.”
PSA 88:1 Ezraí-dule-Hemán Coré-wagwa, we-namaked-Masquilʼye-nugad narmaksad. Namakmalad-e-iduedga soglesad: We-namakleged Mahalatʼyob namaklegoye. Bab-Jehová, Bab-Dummad-an-bendaked, an bese ibginedba, mutikidba gordiid.
PSA 88:2 An bese-gornaidi be itoge. An bese wilesakwaa-goledi be nue itoge.
PSA 88:3 Bela-bela angi bonigan yolenaid, an burgwedani maid.
PSA 88:4 Dulemar bato burgwisayob angi binsamalad. An ganguedsulidyob dakleged.
PSA 88:5 Burgwarmalad-abargine an-metemalad, napa-urba mui-mellemaiyobi an gued. We-muimargi-bar-be-binsalesulidyob an gued, ar be wemar bar-bendaksasulid.
PSA 88:6 Yaa-bur-matusulidgi be an-balimeted, nega-sichiganba, napa-urba-solanaga be an-balimeted.
PSA 88:7 Be-sae-itogedi bela angine yolenonikid, be-urwed demargi-gundilenaiyobi an-imaksad.
PSA 88:8 An-aimar angi banguega be imaksad, an-aimar ima-an-dakega be imaksad. An dule-esgaryagi-mellesiidyob geg wakinned,
PSA 88:9 An bela-bela-boedbali an-dalamar momommakded. Bab-Jehová, bane-bane an bese gordiid, an bese argan onakdiid.
PSA 88:10 ¿Ar dule-burgwarmalad-abargi ibmar-gegerdaklemalad be imake? ¿Dule-burgwarmalad be-nug-odummogega sunna durgudagosi?
PSA 88:11 ¿Dule-burgwarmamaidgi sunna be-sabguedgi sunmaklesi? ¿Dule-burgwarmalad-neggi sunna be-innikidaedgi sunmaklesi?
PSA 88:12 ¿Ar nega-sichigangi, be-ibmar-gegerdaklemalad wismarsi? ¿Ar napneg-ieleged-neggi, be-igar-inniki-imakleged wismarsi?
PSA 88:13 Bab-Jehová, an bese goled, be an-bendakye. Wakudaryalaba an bese-goledgi, an be-amied.
PSA 88:14 Bab-Jehová, ¿ibiga be an-obane? ¿Ibiga be angi be-wagar odukue?
PSA 88:15 An sapingwagwad-akale ibitodiid, an burgwed-naga gudidaed. Bab-Jehová, be angine gwage-nunmaked-dummagan barmialid, geg an bar gugusad.
PSA 88:16 Be-urwedbali an galitosad, be-ise-sabsur-an-imaksadi, an-obelosad.
PSA 88:17 Be-emargi-gwisguedi, demaryobi bane-bane an-ebirnaid, bela an-ebilis naid.
PSA 88:18 Be angine an-aimar obachad, be an-gwenadgan angi obachabalid. Emigindi, unnila negsichidbi an-aiyob gued.
PSA 89:1 Ezraí-dule-Etán, we-namaked-Masquilʼye-nugad narmaksad. Bab-Jehováʼye, an degisadegu be-sabguedgi namakdii guoed. An degisadegu bela dulemarga, be-innikidaedgi sunmakdii guoed.
PSA 89:2 An sogdii guoed: Be-sabguedi degisadegu gege berguye. Be-innikidaedi nibneg-naiyob degisadeguye.
PSA 89:3 Bab-Jehová, be sogsa gusad: “An-dule-susadbo an igar mesisye. An-mai-Davidʼga an ise-sogar sogsagusye:
PSA 89:4 ‘Be-sorbali, be-wagan degisadegu reyga-megmalaga an imakoye, be-wagan degisadegu negsemamai an imakoye.’ ”
PSA 89:5 Bab-Jehová, be ibmar-gegerdaklemalad-imaksadba nibnegginmaladi be-nug odummomalad. Dule-gwage-swilidikmalad-onmakbukwadgi be-innikidaedgi sunmakmalad.
PSA 89:6 Nibneggine, ¿doa Bab-Jehováʼyopira gue? Dule deyobid sate. Nibnegginmalad-abargi, ¿doa Bab-Jehováʼyob gue? Dule deyobid sate.
PSA 89:7 Dule-gwage-swilidikmalad onmakbukwale, Bab-Dummad-dobee itodamalad. Bab-Dummad na e-ebiris-bukmaladba bur-dummadid, bur-dutusurbalid.
PSA 89:8 Bab-Dummad-Bela-Gangued-Nika-Maid, ¿doa beyob gue? Dule beyobid sate. Bab-Jehová, bedi gandikidid, bedi innikidaedid.
PSA 89:9 Bab-Dummad, demar-dagumakmaid be bargaed. Demar-dummagan-arwemaid be obogileged.
PSA 89:10 Be ibdula-dummad-Rahabʼye-nugad, maataa be oburgwisad. Bela-bela be gangued-nikadba be-isdarmaladgi be nakwisad.
PSA 89:11 Bab-Jehová, nibneg begadid, napneg begadid. Be we-napneg-naidi obinnisad, bela egi-ibmar-bukwadi be urbisad.
PSA 89:12 Be dad-nakwed-argan-sapiledsik-yar-bukwad obinnisad, dad-nakwed-argan-nuedsik-yar-bukwad be obinnisbalid. Tabor-yar weligwar be-nugga namaked, Hermón-yar weligwar be-nugga namaked.
PSA 89:13 Bab-Jehová, bela-bela be gangued-nikadba be ibmar-dummagan imaked. Be-argan-nued be onakwed, ar be emargi obichad.
PSA 89:14 Bab-Jehová, igar-maidba, igar-innikigwadba be negsemaid. Dule-wiledaked be oyoged, igar-innikigwad be oyobalid.
PSA 89:15 Bab-Jehová, dulemar weligwaledgi-be-nug-odummomaladgi, nued binsalesad. Wemar be-sogedba nanadimalad.
PSA 89:16 Be-nuggi wergudii osedoddamalad, be-igar-innikii-imakedgi wergudimalad.
PSA 89:17 Ar be we-dulemar-e-gangued-e-yeerdakleged gued. Nued be anmargi-binsaedbali, be anmar-gangued ogannoged.
PSA 89:18 Be, Bab-Jehová, be anmar-sigu-abgaedga gued. Be, Israel-dulemar-e-reyd, Gwage-Isligwaledid.
PSA 89:19 Ibagwengine, be-dula-gwage-swilidikmaladga be negburgan oyosad, aba ega be sunmaksad. Be-dulamar-bega-nued-nanadimaladga be sogsagusad: “An dule-wargwen-buled bendaksad. Dulemar-abargi dule-bur-emargi-obindiid-e-nug an odummosad.
PSA 89:20 An-mai-David an sunonikid, reyga-guega an-gwallu-wawad, an e-nonogi eosad.
PSA 89:21 An bendakdii guoed. An-ganguedgine ogannodii an imakoed.
PSA 89:22 E-isdarmalad egi nakosulid, dule-isganamar sabsur-imakosulid.
PSA 89:23 An e-isdarmalad obelogoed, dule-e-isdardakdimaladi an osulogoed.
PSA 89:24 An degisadegu David-sabgudii guoed. An-nuggine e-gangued dungumai guoed.
PSA 89:25 David, demar-Mediterráneoʼye-nugad-naid-akar, Éufrates-diwar-maidse neg-gani guoed.
PSA 89:26 Anga sogoed: ‘Be an-baba, be an-Bab-Dummad-an-abonogedid, be an-edarbedid.’
PSA 89:27 Machi-sailaginedga an imakoed, bela reymar-baiganba bur dummadga-megega an imakoed.
PSA 89:28 An degisadegu sabgudii guoed, an-ebo-igar-mesisadi degisadegu-mai guoed.
PSA 89:29 E-wagan e-sorba negsemamai gumaloed, Igi nibneg degisadegu nai, deyobi e-wagan degisadegu negsemamai gumaloed.
PSA 89:30 ”Ar e-wagan an-igar-maidgi bangudmalale, an-igar-maidba nanasurmalale,
PSA 89:31 An-igar-maidgi annadmalale, an-igar-uksadba ibsasurmalale,
PSA 89:32 e-uayasulidaed-ulale, an sabsur-odurdakoed, e-isgusad-ulale, an bibyogoed.
PSA 89:33 Degi-inigwele, an David-sabguosuli bipisaale guosulid, an egi innikidaedi oberguosurbalid.
PSA 89:34 An Davidʼbo-igar-mesisadi an bisgosulid, an-ibmar-sogsadi an osulogosurbalid.
PSA 89:35 An-nug-islidikid-ular, an unnila irgwennaa ise-sogar imaksad, an Davidʼga gakansaosulid:
PSA 89:36 David-sorba, e-wagan degisadegu negsemamai gumaloed. An-asabin, igi dad-ibeler degisadegu-nai, deyobi, e-wagan degisadegu negsemai gumaloed.
PSA 89:37 Igi nii nibneggi degisadegu-nai, deyobi, David-e-wagan degisadegu negsemai gumaloed.”
PSA 89:38 Degi-inigwele, Bab-Dummad, be Reyga-guega-dule-susadi, be meted, be obachad, a-dulegi bela-bela be uluded.
PSA 89:39 Be-maibo be igar-mesisadi be bichisad, e-wagan-degisadegu-negsemai-guoed e-ibe be obelosad.
PSA 89:40 Bela e-galu-dikar-matusulid e-ibe be omukusad, e-neg-gandikbukmalad e-ibe be obelosad.
PSA 89:41 Bela dulemar-a-igargi-nasdamaladi, e-ibe ibmar atursadamalad. Neggweburmar-e-dikarba-bukmalad egi dodomalad.
PSA 89:42 David-e-isdarmalad-e-gangued be ogannosad, e-isdarmalad weligwar-itogega be imaksad.
PSA 89:43 David-e-es-suid-nugar sate be imaksad, bila-onogedgine gwen be bendaksasulid.
PSA 89:44 E-gangued-yeerdakleged e-ibe be osulosad, e-ologana napase e-ibe be meted.
PSA 89:45 E-birga-dulagudigued e-ibe be osikirmaksad, binged-dummad ega be uksad.
PSA 89:46 Bab-Jehová, ¿wede degisadegu be dukumai guoe? ¿Wede sooyobi be-urwed degisadegu guoe?
PSA 89:47 Bab-Jehová, be insao, an-dula-gudiguedi unnila sikwas gued. Degisoggu, ¿ibiga be dule-obinnisa?
PSA 89:48 ¿Ar doa burgosuli degisadegu dula gudiguoe? ¿Ar doa burgwedgine wakinnoe?
PSA 89:49 Bab-Jehová, be sabguedsailagined, be Davidʼga be-innikidaedba ise-sogar-sogsa-gusadi, ¿bia nade?
PSA 89:50 Bab-Jehová, be-maimargi-dodolediid, be ebinsao, dulemar-bukidar-angi-dodogedi an ulubgi sediid.
PSA 89:51 Bab-Jehová, be-isdarmalad anmargi dodomalad. Na be dule-susadgi dodomalad.
PSA 89:52 ¡Bab-Jehová-e-nug degisadegu odummolesun! ¡Degisadegu odummolesun!
PSA 90:1 Bab-Dummad-e-dule-Moisés Babse goled. Bab-Jehová, be anmarga degisadegu, anmar-dukuedga gudiguad.
PSA 90:2 Bab-Jehová, amba yoo yarmar be urbegua, amba yoo napa be obinyegua, amba yoo napneg be obinyegua, degisadegu dikasurgus, emi-ibadse, bato bedi Bab-Dummad gued.
PSA 90:3 Bab-Jehová, be sogdele: “¡Dulemar, gannar napaga-binyemarye!” Be-sogedbali dulemar gannar napaga binyiddaed.
PSA 90:4 Bab-Jehová, birga-miligwenadi (1,000) bega sae-iba-nasadyob gued, bega sikwas-neg-mutikid-nasadyob gued.
PSA 90:5 Bab-Jehová, igi diwar-noder ibmar-seddae, deyobi, be dulemar-seddaed. Dulemar, unnila sikwas-gabdakedyobi dulagudigued. Dulemar, wakdaradba gaganmar-ainiar-daedyobi gued.
PSA 90:6 Wakdara e-dutumar achundagoed. Sedogusale, bato dingudoed, degi-burgwidoed.
PSA 90:7 Bab-Jehová, be-urwedi anmar-obeloged, be-sae-itoged anmar-dobe imaked.
PSA 90:8 Anmar-ibmar-isgana-imaked bela be wisid, anmar-isgued-ulubgi-naidi begi dukusulid.
PSA 90:9 Bab-Jehová, be-urwed-ular, anmar-san bergumaid, anmar-ibagan sikwas-bunnolegeyob gued.
PSA 90:10 Anmar birga-dulapaa-gakambese (70) dulagudigued. Anmar-bur-dutusur-gumaladdi, sunna birga-dulabakese (80) warmaked. Degi-inigwele, suiti-dulagudiguedi, unnila arbaed-dummad anmarga uked, wile-itoged anmarga uked. Igi anmar sikwas-dula-gudigue, deyobi, birgamar nasmogoed.
PSA 90:11 Bab-Jehová, ¿doa be-urwed-gangued magar-itoge? Be-urwed bela-bela-gangusoggu, anmarga dobed-dummad uked.
PSA 90:12 Bab-Jehováʼye, anmar sikwas dula-gudisoggu, be anmarga binsaed-nikagued uke, adi, anmar nued nanadii guegar.
PSA 90:13 Bab-Jehová, gwae be anmarse dage. Ar anmar be-dulamar gued. ¡Be-maimar be wile dake!
PSA 90:14 Wakudaradba, be-sabgued be anmarga oyoge, anmar bane-bane bega weligwaledgi namakdii guoed.
PSA 90:15 Igi birgabargus suli-suli-itogega, degi, wile-itogega be anmar-imaksa, emigindi, ibagan debayobi-mergue be anmar-weligwar imake.
PSA 90:16 Be-maimarga be-ibmar-imaked be oyoge, e-waganga be-gangued-dummarbad be oyoge.
PSA 90:17 Bitigi anmar-Bab-Dummad-Jehová-nued-binsaedi, anmargi oyolenonikina gadin. Bab-Dummadye, anmar-ibmar-imakedgi be nued-binsae, anmar-ibmar-imaked be onasgumai imake.
PSA 91:1 Dule, Bab-Dummad-Bur-Biriginedgi-dukued-amiedi, Bab-Dummad-Bela-Gangued-Nika-Maid e-edarbedga guoed.
PSA 91:2 An Bab-Jehováʼga soged: “Be an-dukuedid, be an-garganguedid, an-Bab-Dummad, an begi bensulidid.”
PSA 91:3 Bab-Jehováʼbi bonigan-dukuar-bukwadgi be-ollor-imaked, boni-bulegangi be-ollorsaed.
PSA 91:4 Igi gannir e-sakan-urba e-mimmigan-odukue, deyobi Bab-Jehová be-edarbedga guoed. Bab-Jehováʼgi be dukued amioed. E-gayaburba be-sigu-abgaedyob guoed, be-edarbedga guoed.
PSA 91:5 Mutikidba boni-noed be dobguosulid, ibginedba sigu-mileged be dobguosulid,
PSA 91:6 negsichidgi boni-gudiid be dobguosulid, yoruku boni-dule-ogiloged be dobguosurbalid.
PSA 91:7 Be-argan-sapiledsiki, miligwen (1,000) dulemar burgwemai guoed, be-argan-nuedsiki, miliambe (10,000) dulemar burgwemai guoed. Bedi akar-guosulid.
PSA 91:8 Dule-isganamar sabsur-odurdaklegoed, be-sunnad be dakoed. Bedi sabsur-odurdaklegosulid.
PSA 91:9 Ar bedi Bab-Jehová be-odukuedga imaksasoggu, Bab-Dummad-Bur-Birigined be-edarbedga imaksasoggu,
PSA 91:10 ibmar-isgana gwen be-ebugosulid, boni-dummagan gwen be-neguyase warmakosulid.
PSA 91:11 Ar Bab-Jehová, e-baliwiturmarga igar-ukoed, bia be nadesogele, adi, be-edarbemalagar.
PSA 91:12 Mer be akwagi-gowarmakega baliwiturmar nakwaa be-semai guoed.
PSA 91:13 Achumigur-nono-wawaadgi be obinoed. Naibe-nuedgi be dii-dii annaoed. Be achumigur-nono-wawaad-sapingwagwad naibi-imakoed. Be naibe-bulegan oburgoed.
PSA 91:14 Bab-Dummad soged: “Ar an-sabsoggu, ani an ollor-imakoed, ar magar-an-daksoggu, bonigangi an bendakoed.
PSA 91:15 Ar anse-gollalile, an abinsaoed, na surbinsa-itogedgi an eba gudiguoed, an ollor-imakoed, an e-nug odummogoed.
PSA 91:16 An ega birga-ichesur-dula-gudigued ukoed, an-abonolegedgi weligwar-itodii an imakoed.”
PSA 92:1 We-namaked obunnoged-ibagi namakleged. Bab-Jehová, bega-doggus-nuedye-soglegedi, ibiyobi dog-nuedi. Bab-Dummad-Bur-Birigined, be-nuggi-namakedi, ibiyobi dog-nuedi.
PSA 92:2 Wakudaryalaba be-sabgued-dummadgi-namakedi, ibiyobi dog-nuedi. Mutikidba be-innikidaedgi-namakedi, ibiyobi dog-nuedi.
PSA 92:3 Gar-oimakar-goledba-namaked, gar-lira-goledba-namaked, ibiyobi dog-nuedi. Gar-arpa-goledba-namaked, gar-salterio-goledba-namaked, ibiyobi dog-nuedi.
PSA 92:4 Bab-Jehová, be be-ibmar-gegerdaklemalad-imakedba, weligwar be an-imaked. A-ulale, be-ibmar-imaksadba, an weligwar-itoge an bega binnasur namakoed.
PSA 92:5 ¡Bab-Jehová, ibibayobi be-ibmar-imaksad dummarba-gue! Bab-Jehová, be-binsaed bela-bela yeer-gangusoggu,
PSA 92:6 dule-binsaedsulidaed, magar itosulid, dule-ibmar-wissulid, aku itoged.
PSA 92:7 Amba dule-isganamar gaganyobi ainialile, dule-galagwensulidamalad dutuyob achunnalile, unnila degisadegu-berguega gumaloed.
PSA 92:8 Bab-Jehová, bebi unnila degisadegu bur-gandikidga maid.
PSA 92:9 Bab-Jehová, napiragwa, be-isdarmalad berguoed, bela dule-galagwensulidamaladi oaisakilegoed.
PSA 92:10 Bedi moli-bebe-nikad-ursilid-gangued-nikadyobi anga gargangued uked, gwallu-wawad-bur-nuedgi be an-nono wawamaksad.
PSA 92:11 An-isdarmalad-galakusad-dakega, be an-imaksad, an-isdarmalad-obelolesad-itogega, be an-imaksad.
PSA 92:12 Dule-nuegan, ogob-sanmakedyobi gumalad, Líbano-yargi urwarmar-dungumaiyobi gumalad.
PSA 92:13 Dule-nuegan, Bab-Jehováʼse-goled-neggi sapi-digar-gwichiyobi gumalad, anmar-Bab-Dummadse-goled-neg-imbagi dutuyobi achutemalad.
PSA 92:14 Dule-nuegan, amba sered-ugakine, sanmakgwichi gumaloed, san-nued-gudii, dutusur-gudii gumaloed,
PSA 92:15 adi, sogmalaga: “Bab-Jehová dule-innikigwadye. Bab-Jehová an-gandikidye, egine igar-isgana-imaked naisurye.”
PSA 93:1 ¡Bab-Jehová, gangued-yeerdakle-nika negsemaid! Bab-Jehová, dummarba-gued oyosad, e-gangued oyosad. Innikigwadba napneg nasiksad, napneg bar bipisaar onirilegosulid.
PSA 93:2 Bab-Jehová, bedi gebe-negasaila-akale, bato negsemaid. ¡Bedi degisadegu maiguad!
PSA 93:3 Bab-Jehová, diwarmar dutusuli nomamaid, diwarmar binnasuli uurmakmaid, diwarmar binnasuli sukamakmaid,
PSA 93:4 Bab-Jehová, ar bedi demar-uurmakedba bur be dutusur gued, ar bedi muu-billigan-arwedba bur be dutusur gued, ar bedi nibneggi bur dutusur maid.
PSA 93:5 Bab-Jehová, Be-Igar-Mamaidgi dutusuli mamaid, gege bisged. Islidik-gued degisadegu bese-goled-neg-yeerdakle imaked.
PSA 94:1 Bab-Jehová-dule-buged-mai-imakedye, Bab-Dummad-dule-buged-mai-imakedye, be magarodage, dule-sabsur-imaklediid be buged-mai imakdage.
PSA 94:2 Bab-Jehová, be igar-naboged-dulesoggu, be-gangued be oyodage, dule-na-san-buled-imakdimalad, be sabsur-odurdakdage.
PSA 94:3 Bab-Jehová, ¿sanagwadse dule-isganamar yeer-itodii gumaloe?
PSA 94:4 Ar bela we-dule-isganamar, dule-ibmar-sabsur-sogmaladid, na san-dummarbaa imakmaladid.
PSA 94:5 Bab-Jehová, dule-isganamar be-dulamar-sabsur imakdimalad. Be-dulamar-mesagwar imakdimalad.
PSA 94:6 We-dule-isganamar, omegan-ei-sui-burgwismalad oburgwemalad. Wemar, dule-yar-baidsikid ogilomalad. Wemar, dule-babsuli-gudimalad gindakmalad.
PSA 94:7 Dule-isganamar sogmalad: “Bab-Jehová we-ibmar daksulid, Jacob-e-Bab-Dummad, we-ibmar wissulid.”
PSA 94:8 ¡Dule-ibmar-aku-itomalad, be magar itomala! Bemar binsaed-satemaladi, ¿sanagwadse be binsaed-nika gumaloe?
PSA 94:9 Ar dule-anmarga-uaya-nasiksadi, ¿itogosuli? Ar dule-anmarga-ibya-sisadi, ¿dakosuli?
PSA 94:10 Ar dulemar-ibmar-noar-imaksad-onudakedi, ¿sabsur-odurdakosur be ebinsae? Ar dule-ibmargi-odurdakedi, ¿ibmar-wisguosur be ebinsae?
PSA 94:11 Bab-Jehová dulemar-binsaed bela wisid, Bab-Jehová wisid, dulemar unnila yogasaar binsamalad.
PSA 94:12 Bab-Jehová, dule-ibmar-noar-imaksad be nudakedi, we-dulegi be ise-nued binsasad. Be, be-igar-maidgi-dule-odurdakedi, we-dulegi be ise-nued binsasad.
PSA 94:13 We-dule, ibagan-bulegangi gwage-bogidiki gudiguoed. Dule-isganagardi, diglegega napa gwislegoed.
PSA 94:14 Bab-Jehová e-dulamar obanosulid. Bab-Dummad, e-dulamar-egadga-imaksad wargwen metosulid.
PSA 94:15 Igar-nabolegedi igar-innikigwadba imaklegoed, bela dule-gwage-inniki-gudimalad, igar-maidba damaloed.
PSA 94:16 ¿Doa, dule-isganamar-abin an-irwa gwisgusa? ¿Doa, dule-isganamar-abin anba nagusa?
PSA 94:17 Ar Bab-Jehová an-bendaksasulina, bato an napa-uluba bergus mellemainad.
PSA 94:18 Bab-Jehová, an sogsagusgu, “an bergudaniye,” be-sabgued-nikadba yog be an-bendaknoni gusad.
PSA 94:19 An bela-bela suli-suli-itogedgine, baisur-itogega be an-imaksad, weligwaled be anga uksad.
PSA 94:20 Bab-Jehová, reymar-isganamar-e-aiga geg be gued. Ar we-reymar ibmar-isgana-imakega igar-mesmalad,
PSA 94:21 dule-nuegangi-aibinega igar-amimalad, dule-ibmar-akar-imaksasulid-oburgwega imakmalad.
PSA 94:22 Ar Bab-Jehová an-edarbedid, an-Bab-Dummadid, akwasaila-an-odukuedyob gued.
PSA 94:23 Bab-Jehová dule-isganamar-e-isguedi, dule-isganamargi-aibinega imakoed. Bab-Jehováʼse e-isgusad-ulale, dule-isgana berguoed. ¡Anmar-Bab-Dummad-Jehová we-dulemar-obelogoed!
PSA 95:1 ¡Dagmala, anmar weligwaledgi Bab-Jehováʼga namakmala! ¡Anmar weligwaledgi Bab-Dummad-anmar-abonogedga namakmala!
PSA 95:2 Anmar Bab-Jehováʼga doggus-nuedye-sogedgi e-negse doge. ¡Anmar Bab-Jehováʼga namake!
PSA 95:3 Ar Bab-Jehová, bur Bab-Dummadid, bela ibmar-bab-dummadyob-imaklemalad-birgi, bur Rey-dummadid.
PSA 95:4 Bab-Jehová, na e-argan-yaurgi napa-billigan ganikid, yala-dummagan-matusurmalad na egadid.
PSA 95:5 Muu-billi-maidi, egadid, ar na e obinnisad, neg-dinnagwad-naidi na e obinnisbalid.
PSA 95:6 Dagmala, anmar Bab-Jehová-nug-odummogega napase wagar dulluu imakmala. Anmar Bab-Jehová-anmar-obinnisad-abin yokorgi sindigar sigmala.
PSA 95:7 Ar e anmar-Bab-Dummadid. Anmardi e-dulamar gumalad, e anmar-edarbedid. Anmardi e-sibad-wawaadyob gumalad, e anmar-akwediid. Ar emi bemar Bab-Jehová-gayaburba itogele,
PSA 95:8 melle be Meribaʼgi-gusmalayob, bur bule burgumalo. Ar igi deun nega-dulesulidganba Masahʼye-neg-nugadgi bur bule burgusgusmala, melle be deyob burgumalo.
PSA 95:9 Deun agine, be-dadgan amba an-ibmar-imaksad-daksamar-inigwele, an-wilubdaksa gusmalad, urwega an-imaksa gusmalad.
PSA 95:10 Birga-dulabo (40) an be-dadgan-ebo sae-itodii gusad. An sogsa gusad: “We-dulemar noar nanadimalad, an-igar-maidba ibsadisurmalad.”
PSA 95:11 Degisoggu, an sae-itogedgine, an weyob ise-sogar sogsa gusad: “Ega-yar-ukoye-an-sogsadgine, dogosurmalad, agine, an ega obunnoged ukoenad.”
PSA 96:1 Bab-Jehováʼga, namakleged-binidgine, be namakmala. Bela napneggi-dulemar-bukwad, Bab-Jehováʼga namakmala.
PSA 96:2 Bab-Jehováʼga namakmala, e-nug odummomala, e-isdarmaladgi-nakwisad bane-bane obarmala.
PSA 96:3 Dulemar-yar-baid-baidgi-bukmalad-abargi, e-gandikid-yeerdakleged sogmala, bela neggweburmar-abargi, e-ibmar-gegerdaklemalad-imaked obarmala.
PSA 96:4 Ar Bab-Jehová, dule-dummadid. Bela-belad e-nug odummolegergebed. Bab-Jehová ibmar-bab-dummadyob-imaklemaladba bur bule dobguleged.
PSA 96:5 Neggweburmar-baigan-e-bab-dummaganga-imaklemaladi, Bab-Dummadsulid, unnila ibmargi sobarmaladid, ar Bab-Jehováʼdi nibneg obinnisad.
PSA 96:6 ¡Bab-Jehová-walikaa neg-ibegwaled naid, dummarba-gued naid! E-neggine gangued oyolenaid, yeerdakleged oyolenaid.
PSA 96:7 Bela-dulemar-napneggi-bukwamalad, Bab-Jehová-nug odummomala, Bab-Jehová e-gandikid-yeerdakleged be obarmala.
PSA 96:8 Bab-Jehová-e-nug-gandikid-yeerdaklegedi be ogannomala. Ese-goled-neg-imbase be dogdamala, ega ibmar-ukleged be sedamala.
PSA 96:9 Bab-Jehová-e-nug, e-neg-yeerdaklegedgi be odummomala. Bab-Jehová-asabin bela-napneggi-dulemar-bukwad bela-belad dobekwaa ambikumarsun.
PSA 96:10 Dulemar-yar-baid-baidgi-bukmaladga weyob be sogmala: “¡Bab-Jehová, Rey gued!” Innikigwadba napneg nasiksad, napneg bar bipisaale onirilegosulid. Bab-Jehová igar-innikigwadba dulemarga igar-naboged.
PSA 96:11 ¡Nibnegmar weligue, napneg yeer-itoge! Muu-billi uurmake, bela egi ibmar-bukwad weligumala.
PSA 96:12 Sapurmar, weligwar namakmala. Bela sapurgi ibdurgan-bukwad, weligwar namakmala. Bela sapurgi sapimar-bubukwad, weligwar namakmala.
PSA 96:13 ¡Bab-Jehová-asabin namakmala, bato danikid! Igar-innikigwadba dulemarga-igar-nabogega bato danikid. Bab-Jehová igar-innikigwadba dulemarga igar-nabogoed. Napiragwadgi dulemarga igar-nudakoed.
PSA 97:1 ¡Bab-Jehová, Rey gued! ¡Napneg, wergumala! ¡Dupugan-dikasur-nanaid, wergumala!
PSA 97:2 Mogir-guduremalad Bab-Jehová-ebilis naid. Bab-Jehová igar-inniki-imakedba negsemaid, igar-innikigwadba negsemaid.
PSA 97:3 Soo, Bab-Jehová-idu nadapid, we-soo, Bab-Jehová-e-isdarmalad Bab-Jehová-ebiris-bukwad obeloged.
PSA 97:4 E-mala-ibyedi napneg-mee imaked. Napneg mala-ibyed-dakdegu, wawanmakded.
PSA 97:5 Yarmala baka-gwalluyob Bab-Jehová-abin daluded. Bab-Jehováʼde bela we-napneg-e-ibedid.
PSA 97:6 Mogirmar, Bab-Jehová-e-igar-innikigwad-imaked barsogmalad. Bela-dulemar, Bab-Jehová-gangued dakmalad.
PSA 97:7 Dule-bab-dummadyob-ibmar-imakdimalad, bingegumala. Dule, bab-dummadyob-ibmar-imakdimaladgi na san-dummarba-imakmalad, bingegumala. Bela bab-dummadyob-ibmar-imaklemalad, Bab-Dummad-asabin dulluu sigmala.
PSA 97:8 Bab-Jehová, be igar-innikigwad-imaked-ular, Sión-neggwebur, weligwar itoged, Judá-neggweburmar, yeer itomalad.
PSA 97:9 ¡Ar be, Bab-Jehová-Bur-Birigined gued! ¡Be we-napnegba bur dummad gued! ¡Be, bab-dummadyob-ibmar-imaklemaladba bur dummad gued!
PSA 97:10 Bab-Jehová, dule-ibmar-isgana-isdar-dakmalad, sabed. Bab-Jehová, e-dulamar-inniki-nanadimalad, edarbed. E-isdarmaladgi wakinnega imakbalid.
PSA 97:11 Dule-nuegan, nue-binsaed-nikaa imaked, Bab-Jehová, dule-inniki-gudidimaladga weligwaled uked.
PSA 97:12 Bemar dule-nuegan, Bab-Jehováʼgi be wergumala, Bab-Jehová-nug-isligwaled be odummomala.
PSA 98:1 Namakleged. Bab-Jehováʼga namakleged-binidgi be namakmala, ar ibmar-dakledisurmalad imaksad. E-ganguedgi, e-swida-gandikidgi, e-isdarmaladgi nakwisad.
PSA 98:2 Bab-Jehová, na e-nakwisad bela magar-dakmalaga imaksad. Bela-dulemar-yar-baid-baidgi-bukmaladga e-igar-inniki-imaked oyosad.
PSA 98:3 Bab-Jehová Israel-dulemar-sabesaila maid. Ega ibmar-imakedseye-sogsa-gusad ebinsanonikid. Bela dulemar-napneggi-bukmalad, anmar-Bab-Dummad-bela-bela-e-bendaked daksamalad.
PSA 98:4 Bela-dulemar-napneggi-bukmalad, Bab-Jehováʼga weligwaledgi namakmala. Binnasuli weligwar-namaklegedgi ega namakmala.
PSA 98:5 Bab-Jehováʼga gar-arpaʼba namakmala, gar-liraʼba ega namakmala, yeer-namaklegedgi ega namakmala.
PSA 98:6 Bab-Jehová-Rey-guedga, weligwaledgi namakmala, gar-trompetaʼba ega namakmala, garmarba ega namakmala.
PSA 98:7 Demar-naid, bela egi ibmar-bukmalad namakmala, Napneg-naid, bela egi dulemar-bukmalad namakmala.
PSA 98:8 Diwarmar-mamaid, argan ogormala, bela yarmar-bubukwad, weligwaledgi namakmala.
PSA 98:9 Bab-Jehová-asabin weligwaledgi namakmala, ar Bab-Jehová napneg-seega danikid. Dulemar-bukwadga igar-innikigwad-imakedba igar nabogoed, dulemar-bukwadga emarbi igar nabogoed.
PSA 99:1 ¡Bab-Jehová, Reyga maid! Bab-Jehová e-ologanagi baliwitur-querubinʼye-nugmalad-abargi siid. Neggweburmar wawanmakmala. Bela napneg giglimake.
PSA 99:2 Bab-Jehová Sión-neggweburgi bur dule-dummadid, bela neggweburmargi bur dule-dummadid.
PSA 99:3 ¡E-nug-dummad, e-nug-buled odummomala! ¡Bab-Jehová, dule-isligwaledid!
PSA 99:4 Bab-Jehováʼye, be, Rey-gandikidid. Igar-innikigwad-imaked be sabed. Be, dulemarga yobi-gumalad-igar mesisad. Be, Israel-neggweburgi igar-innikigwadba, ibmar-imaksad, inniki-sogedba be ibmar-imaksad.
PSA 99:5 Anmar-Bab-Dummad-Jehová-nug odummomala, Bab-Jehová-asabin, napase-dulluu Bab-Jehová-nug odummomala. ¡Bab-Jehová, dule-isligwaledid!
PSA 99:6 Moisés, Aarónʼbo dule-irwa-Babse-gormaladga gusmarmogad, Samuel, Bab-Jehová-nug-odummodii gusmogad. Wemala, Bab-Jehováʼse gordii gusmalad, geb Bab-Jehová abin-imaksadaed.
PSA 99:7 Wemarga mogir-bubawarba sunmaksad. Wemala, Bab-Jehová-Igar-Mesisadba nanadii gusmalad, Bab-Jehová-Igar-Uksadba gudii gusmalad.
PSA 99:8 Anmar-Bab-Dummad-Jehová, wemar-bese-gochagu, be abin-imaksagusad. Amba e-ibmar-isgana-imaksamalad-ular, be sabsur-odurdaksa-inigwele, bedi, wemargala, Bab-Dummad-dule-isgussuliyob-dakedga gusad.
PSA 99:9 Anmar-Bab-Dummad-Jehová-nug odummomala, e-yar-islidikidgi, e-nug odummomala. ¡Anmar-Bab-Dummad-Jehová, dule-isligwaledid!
PSA 100:1 Bab-Dummadse-goled-negse-dognadapidgi, we-namaked-doggus-nuedye-sogleged namakleged. Bela-napneggi-dulemar-bukmalad, weligwaledgi, be Bab-Dummadga namakmala.
PSA 100:2 Weligwaledgi, Bab-Jehová-nug be odummomala. Yeer-itogedgi, e-asabinni be namakdamala.
PSA 100:3 Bab-Jehová-Bab-Dummad-gued be magar-dakmala. E anmar-obinnisad. Anmar, egadid. Anmar e-dulamalad. Anmar, e-sibad-wawaadyob gumalad.
PSA 100:4 Doggus-nuedye-sognai, ese-goled-negyaba be dogmala, Namakar e-nug-odummonai, e-neg-imbase be dagmala. ¡Ega be doggus-nuedye sogmala! ¡E-nug be odummomala!
PSA 100:5 Ar Bab-Jehová dule-nuedid, e-sabguedi degisadeguad. E-innikidaedi gege bergued.
PSA 101:1 David we-namaked narmaksad. Bab-Jehová, namaklegedgi an bega namakoed. Sabguedgi, an namakoed, igar-innikii-imaklegedgi an namakoed.
PSA 101:2 Nued nanadii an gubied. ¿Wede sana be anse ataknonikoe? An-neggi gwage-napiragwadgi an nanadii gubied.
PSA 101:3 Ibmar-isganagi an atakbisulid. Igar-isgana an imakbisulid. Dule-Bab-Dummad-Igargi-banguddamalad an sae-daked. Amala anse-warmaked an imakosulid.
PSA 101:4 Binsaed-isganamargi an banguoed. Ibmar-isgana an imakbisulid.
PSA 101:5 Dule dule-baidgi-arbak-sunmaked an obelogoed. Dule-san-dummarba-saed, anse-warmaked an imakosulid. Dule-baigangi-obinye-soged, anse-warmaked an imakosulid.
PSA 101:6 We-yargi dule-be-igarba-nanamalad, anba-gudigumalaga an amioed. Dule-be-igar-maidba-nanadimaladbi, anga arbamaloed.
PSA 101:7 Dule, dule-yardakmaladgi-arbamaladi, an-negyagi gudii guosulid. Dule gakansaar-sunmakedi an-asabin gudii guosulid.
PSA 101:8 Bane-bane we-yargi dule-isganamar-gudimalad obelomai an imakoed. Bela dule-ibmar-isgana-imakmalad, Bab-Jehová-neggweburgi an onogoed.
PSA 102:1 Dule-naibi-itodiid, gege-bar-gugusadgi Bab-Jehováʼse ise-boar gornaid. Bab-Jehováʼye, an bese-gornaid be itoge, wilesagwar-an bese-gornaid bese mosana gadin.
PSA 102:2 Bonigan angi-yolenonikile, mer be an-idu dukuo, nue be an-itogo. An bese-gornaile, gwae be an-abin-imako.
PSA 102:3 An-ibagande, waayob bergudedaed. An-garmardina, soogi-gummaknaiyob itoleged.
PSA 102:4 An-gwage ber nollomakded, gaganyob dinguded, ukuddi bar an itosurgusad.
PSA 102:5 An binnasuli-akiginnedbali, an-garmardi daledgusad.
PSA 102:6 Noo-negsulidganba-gukudiidyobi, an wargwen itoged. Irmon-neg-ayaraledgangi-gudiidyobi, an wargwen garmakdiid.
PSA 102:7 Bar an gabdisulid, sikwi-walagwen-uas-birgi-gudidaedyobi, an gudiid.
PSA 102:8 An-isdarmalad bane-bane mesagwar an-imakdimalad, yogasaar an-nug-oichogega an-nug-gadimalad.
PSA 102:9 Degisoggu, sooburu an madisunnad. An-ibyanisde, an-gobedba-mesa an gobdisunnad.
PSA 102:10 Bab-Dummad, be sabsur-uludedbali, sabsur-an-imaksa gusad. Sabsur-nakwaa be an-imaksagu, be an-barmeted. Deyob be an-wiosad.
PSA 102:11 An-ibagande, negsichiledanikiyobi, bato bergudanikid. Gagan-dinguddaedyobi, an guded.
PSA 102:12 Bab-Jehová, ar bedina, degisadegu be negsemai guoed. Be-nugdina berguosulid, degisadeguoed.
PSA 102:13 Be, Sión-dulemar bendaknonikoed, be-sabgued ega be oyononikoed. Ar a-ibagan bato nagunonikid.
PSA 102:14 Anmar-be-maimar, Jerusalén-neggweburbina nue-sogmalad. E-negmar-ayarar-bukwadi, nunmaked-dummad anmarga uked.
PSA 102:15 Bela dulemar-yar-baid-baidgi-bukwamaladi, Bab-Jehová-nug-dobe-nanadii gumaloed. Bela-yar-baid-baidgi-reyga-mamaid, Bab-Jehová-e-gangued-yeerdakleged magar-dakmaloed.
PSA 102:16 Ar Bab-Jehová, Sión-neg-ayarar-siid gannar soboed, e-gangued-nikad oyononikoed.
PSA 102:17 Dule-ibmar-suli-gudimalad-ese-goledi itogoed, dule-ese-wilesagwar-gornaidi itogoed.
PSA 102:18 Wagan-danimalad wisgumalaga, we-ibmar narmaklego. Dulemar-gwalulemaloed, Bab-Jehová-nug-odummomalaga, we-ibmar narmaklego.
PSA 102:19 Ar Bab-Jehová, dulemar-gales-gorbukwad-itogega, e-neg-islidikid-akale, napneg-naid nue-dakded.
PSA 102:20 Bab-Jehová, dulemar-oburgwilegega-galesbukwad-onogegala, napneg-naid nue-dakded.
PSA 102:21 Bab-Jehová, dulemar Sión-yargi-e-nug-barsogmalagala, napneg-naid nue-dakded. Jerusalén-neggweburgi e-nug-odummomalagala, napneg-naid nue-dakded.
PSA 102:22 Bab-Jehová-nug-odummomalagala, bela we-dulemala danakwaa ambikudmaloed, reymar-negsemamaidi, bela ambikudmaloed.
PSA 102:23 An gudiidgine, Bab-Dummad, an-ibe an-niga onollomaksad, an-ibagan osikirmaksad.
PSA 102:24 Agala, an ise-wilegar ega sogded: “An-Bab-Dummadye, mer be an-ibe an-ibagan osikirmakye. Bab-Dummad, ar begardina ibagan geg bergued.
PSA 102:25 Gebesailaunni, napneg be nasiksad, degi, nibneg-naid be-argangi be nasiksabalid.
PSA 102:26 We-napnegdina, berguoed, nibnegmoga bergumogoed. Bedina berguosulid. Igi mormar serguddae, deyobi, bela nibneg, degi, napneg, sergudoed. Mormar-ogwalegeyob be ogwaoed. Mormar-milegeyob be imakoed.
PSA 102:27 Bab-Dummad, bedina amba gannar maid, be-ibagan gwen berguosulid.
PSA 102:28 Be-nug-odummodimalad-e-mimmigandina, nued-gudii gumaloed. E-waganmala, be-asabinni gudii gumarmogoed.”
PSA 103:1 David we-namaked narmaksad. Bab-Jehová-nug, an odummoged, Bab-Jehová-nug-isligwaledi, bela an-ganguedbali an odummoged.
PSA 103:2 Bab-Jehová-nug, an odummoged. Anga ibmar-nuegan-uksad an iegosulid.
PSA 103:3 Bab-Jehová, bela an-isgusad isgussuliyob daked. Bela bonigangi an-nudaked,
PSA 103:4 burgwedgi an-ollorsaed. Nue-an-sabed, nue-wile an-daked,
PSA 103:5 Bab-Dummad bela ibmar-nueganbi anga uked, sulubagi-gannar-ganguddaedyobi an-imaked.
PSA 103:6 Bab-Jehová, igar-innikigwad-imakedid, dule-baidse-wiledimaladbina urwedid.
PSA 103:7 Moisésʼga e-igarmar oyosad, Israel-dulemarga e-ibmar-imaksad oyosad.
PSA 103:8 Bab-Jehová dule-wiledakedid, dule-nuedid, irgwensuli urwesulid, e-sabguedi dummarbad.
PSA 103:9 Degisadegu urwemai guosulid. Dule-egi-nosale, degisadegu ebinsabalosulid.
PSA 103:10 Bab-Jehová anmar-isguedba anmar-sabsur-odurdaksulid, anmar-ibmar-isgana-imakedba anmar-sabsur-odurdaksulid.
PSA 103:11 Ar igi mogir napneggi matusur-nai, debayobi, e-sabgued dulemar-e-nug-odummodimaladgi dummarba nikad.
PSA 103:12 Ar igi dad-ibeler-nakwed, dad-ibeler-argwanedgi dikasur nai, debayobi, anmar-isgued anmargi obachad.
PSA 103:13 Ar igi bab na e-mimmigan sabe, debayobi, Bab-Jehová na dulemar-e-nug-odummodidimaladi sabgued.
PSA 103:14 Ar Bab-Jehová anmar-wisid, anmar ibu gue. Nue wisid, anmardi unnila napa gued.
PSA 103:15 Dule-dula-gudiguedi gaganyob gued, yog-berguar naddaed. E-ibagan, dutu-achutedaedyob gued.
PSA 103:16 Ar burwa gornaisale, dutu yoga babatiar naddaed, e-nagusad bar dakledasulid.
PSA 103:17 Ar Bab-Jehová-e-sabgueddi, degisadeguad. E-nug-odummodimaladgardi, e-sabgued-oyoged berguosulid. Wemar-e-wagangardi, Bab-Dummad-e-igar-innikigwad degisadeguad.
PSA 103:18 Ebo-Igar-Mesisadba-nanadimaladga, e-Igar-Islidikid-Mesisad-ebinsadimaladga, eba-ibmar-imakdimaladga, Bab-Dummad-e-Igar-innikigwad degisadeguad.
PSA 103:19 Bab-Jehová e-ologan nibneggi sisad. Bab-Jehová bela neg-dirbir-naidgi dummadga negdakmaid.
PSA 103:20 Bemar, Bab-Dummad-e-baliwiturmar-dule-bulegan, bemar, Bab-Dummad-sogedba-ibmar-imakmaladi, bemar, e-igar-uksadba-nanadimaladi, Bab-Jehová-nug odummomar.
PSA 103:21 Bemar, bela e-sordamar, ega-arbamalad, e-sogedba-ibmar-imakmalad, Bab-Jehová-nug odummomala.
PSA 103:22 Bemar, bela ibmar-obinnilesmaladi, bela dummadga-negdakmaidgi, Bab-Jehová-nug odummomala. Bab-Jehová-nug an odummoged.
PSA 104:1 Bab-Jehová-nug an odummoged. An-Bab-Dummad-Jehová, duledar-gandikid be gued, gandikidba yeerdakleged-mola be yosad, ibiyobi-mola-yeerdakle be yosa.
PSA 104:2 Mola-dummad-yoiyobi nega-ibegwaledi begi ebirnaid, mola-dummad-nallaa-imaklegeyobi mogir-billi be imaked.
PSA 104:3 Diigine, be-nega-dummagan-urbega be imaked, mogirmala, be-moli-ur-bila-onomaladga be saed. Bedi burwa-ooreged-birgi-sii nanaed.
PSA 104:4 Burwamala, be-gayaburba-berbegedga be imaked, soo-gwabunyemaladi, be-maiganga be saed.
PSA 104:5 Napanega, e-saila-birgi be sisad, e-siidgi, bipisaale gwen bar ainirosulid.
PSA 104:6 Napanegga e-mor-dummad-naiyobi, muu-billi egi be nasiksad. Diimala, yalamar-birise nagusad.
PSA 104:7 Diimarse be uludedbali, diimala ilided. Be-dolewala-gollomakedbali, diimala uboded.
PSA 104:8 Diimala, yalamar-birise engusad, nebagansega diimala ilisbalid. Bia be ega neg-amisa, agi be diimala oambikusbalid.
PSA 104:9 Dii melle bar napneg-odogega, ega be igar mesisad, adi, a-igarse galegegar.
PSA 104:10 Bedi, ibe-diimar-ariogwichidi, dianganbali, oiirmakega be saed. Yalaganbali, suurmakega be imaked.
PSA 104:11 Ibdurgan-sapurbarmaladi, a-dii gobmalad. A-diigine, moli-uayasuid-sapurmar immelemalad.
PSA 104:12 A-dii-gakabali, sikwimala e-uu urbe damalad. Sapi-anagan-imbabali, nuumala namakbukwa damalad.
PSA 104:13 Be-nega-akale, yalamar be ogmaid. Be-ibmar-saedbali, napaneg yeer itoged.
PSA 104:14 Molimarga gagan-ara-aramalad-oniega be imaked, dulega ibmar-durgan-sanmakega be saed. Adi, agi we-masgunned amiega:
PSA 104:15 Vino-weligwar-emar-saed-amiega, olivo-gwallu-wagar-daarmakar-imaked-amiega, mas-burba-dula-uked-amiega be imakbalid.
PSA 104:16 Bab-Jehová e-sapimala-urbisadi, sapi-urwarmala Líbano-yargi urbisadi nue-obagwale gwigwichid.
PSA 104:17 A-sapimargine, nuumala e-uu sobbukwad, e-anagangine, dabgalamar ambikubukwad.
PSA 104:18 Yala-dummaganbali, sibad-sapurbarmalad bukwad. Akwa-olloganbali, nubimar dukubukwad.
PSA 104:19 Bab-Jehováʼye, yolamar-nagumaid-magar-daklegega, bee be nii nasiksad. Bee be dad-ibeler e-doged-wisguega be imaksad.
PSA 104:20 Neg-mutik-imakegala, be negsichidi nasikdaed. Agine, ibmar-durgan sapurba ainiardaed.
PSA 104:21 Achumigur-nono-wawaamalad e-masbina uurmakdidaed. Bab-Dummadse na e-masgunned egisdidaed.
PSA 104:22 Dad-ibeler-nakwialile, geb e-neg-olloledyaba gannar dogdedaed.
PSA 104:23 Geb dulemala, arbaega gwisguardamarmogad, neg-gutulegedse e-arbaed gadapdamalad.
PSA 104:24 Bab-Jehová, ibiyobi be ibmarmar-imaksadi, ichesur mergue. Be ibmar-wisidbali, bela we-ibmarmar be imaksad. Be ibmar-obinnisadi, bela napneggi nanaid.
PSA 104:25 Agine muu-billi-dummadi naid, a-yagine ibmar-durgan-bukidar bukwad. Ibmar-durgan-dummagan, ibmar-durgan-bipigana bukwananaed.
PSA 104:26 Muu-billigine, ulu-dummagan iirmakbukwad, agine, be, baka-dummaganyobid-obinnisadi gudiid, ulu-dummagangi dodogega be obinnisad.
PSA 104:27 Bela we-ibmar-durgana begi gudidiid, ega be sogedba e-masgunned ukmaid.
PSA 104:28 Ega be masgunned ukmaid, emardi be-abin gundidiid. Ega be-argan be oyomaid, nue-immeledidiid.
PSA 104:29 Be wagar-biriar-dakdele, be-abin gwayiddamalad. Be e-annik-mas-susale, burgwiddamalad, gannar napaga binniddamalad.
PSA 104:30 Be-Burba be barmialile, bela gannarse napneg obinoleddaed. Deyob gannarse napneg naguddaed.
PSA 104:31 Bab-Jehová-e-gangued-yeerdakleged degisadegusun. Bab-Jehová, e-ibmar-imaksadgi wergusun.
PSA 104:32 Bab-Dummadi napneg-dakdele, ese napneg wawanmakdedaed. Yalamar-ebudele, waa daasa sigisdaed.
PSA 104:33 An dula-gudiidgine, Bab-Jehováʼga an namakoed. Amba an dula-gudiidgine, namaklemaladgi an-Bab-Dummadga an namakoed.
PSA 104:34 Ulubgi-an-egi-binsaedi, Bab-Dummad yeer-itogoed, Bab-Jehováʼgi an weligwar itoged.
PSA 104:35 Dule-isgudimalad napneggi bergumarsun. Napneggi, dule-isgudimalad bar daklesuli gusun. ¡Bab-Jehová-nug an odummoged! ¡Bab-Jehová-nug odummolesun!
PSA 105:1 Bab-Jehováʼga dog-nuedye be soge, e-nug be odummomala. Bab-Jehová-ibmar-imaksad be dulemar-yar-baid-baidgi-bukwamaladga soge.
PSA 105:2 Be namakmala, Bab-Jehová-e-nug-odummogega be namakmala. Bela e-ibmar-dakledisurmalad-imaksadgi be sunmakmala.
PSA 105:3 Bab-Jehová-nug-isligwaledgi be san-dummarba itomala. Dulemar-Bab-Jehová-amidimalad ulubgi wergumala.
PSA 105:4 Bab-Jehová be amimala, e-gangued be amimala. Bab-Jehová-amidigu be imakmala.
PSA 105:5 Bab-Jehová-ibmar-gegerdaklemalad-imaksad be insamalo. E-ibmar-dummagan-imaksad be insamalo. E-igarmar-sogsad be insamalo.
PSA 105:6 Bemar, Bab-Jehová-mai-Abraham-e-wagan gumalad. Bemar, Jacob-e-wagan gumalad. Bab-Jehová e-dulemarga bemar-imaksad.
PSA 105:7 Bab-Jehová anmar-Bab-Dummad gued. Bela we-napneggine, Bab-Dummad-e-igarmar oyolemamaid.
PSA 105:8 Wagan miliba-gwago-inigwele, Bab-Dummad Israel-Dulemarbo-Igar-Mesisadi gwen iegosulid.
PSA 105:9 Bab-Jehová Abraham-ebo igar-mesisgusad, Isaacʼga ise-sogar-imaksad, an bega a-igar imakedseye.
PSA 105:10 Bab-Jehová, Jacobʼga igar-mesisgua, Israelʼbo degisadegu igar mesisgua,
PSA 105:11 ega sogsagusad: “Canaán-yala begadga-guega an bega ukoed.”
PSA 105:12 Anmar ichee-guen-inigwele, anmar yar-sate gudigusmar-inigwele,
PSA 105:13 anmar yar-baid-baidgi-gudigusmaladgi, neggwebur-baid-baidgi gudigusmaladgi,
PSA 105:14 Bab-Jehová, sabsur-anmar-imaklegega gwen imaksasulid. Anmar-ulale, reymarga sabsur-ibmar-sogsad.
PSA 105:15 Weyob sogsa gusad: “Melle an-dulamar-nugsalegarmaladse achao, melle an-gayaburba-barsogmalad naibi-imako.”
PSA 105:16 Bab-Jehová, Canaán-yalagi ukud-dummad nasiksad, agi masgunned sate imaksad.
PSA 105:17 Degi-inigwele, Bab-Jehová, dule-wargwen-Joséʼye-nugad emar-idu Egipto-yalase barmisgusad. José maiga manigi ukles gusad.
PSA 105:18 Egipto-dulemar José-e-nag esgoro-dubgi edichagusmalad, geb esgaryagi metegusmalad.
PSA 105:19 José-ibmar-sogsa-gusadba neg-gunonigua, Bab-Dummad agi oyosad, ede idu-ibmar-sogsad, we napiraye.
PSA 105:20 Geb Egipto-rey sognonigusad, José esgaryagi-siid onomarye. A-rey, deunni, dule-bukidaradga negsemaid.
PSA 105:21 Rey, José bela e-neggi ega ibmar-dakega onugsanonigusad, bela e-dulemar-e-dummadga-guega imaksad.
PSA 105:22 Adi, José reyga-arbamalad-dummagan-odurdakega imaksad, e-girmar-selegan-binsaed-nikagued-odurdakega imaksad.
PSA 105:23 Geb a-sorbali, Israel, Egipto-yalase nonigusad. We-Jacobʼde, Cam-yalagi, e-yarsulidgi maigusad.
PSA 105:24 Agine, Bab-Jehová, e-dulamar-bukidar-merguega imaksad, e-isdarmaladba bur-dutusuli imaksabalid.
PSA 105:25 Bab-Jehová, Egipto-dulemar-e-binsaed ogwasad, isdar anmar-dakega imaksad, degisoggu, anmar-wioar gussunnad.
PSA 105:26 Agine, Bab-Dummad, e-mai-Moisés-susagusadi, Aarón-susagusadi, Egipto-yarse barmiargusad.
PSA 105:27 Agine, Bab-Dummad, wemar-ebogwad, Cam-yalagi ibmar-dakledisulid-imakega imaksad.
PSA 105:28 Bab-Jehová, Egiptoʼgi negsichid nasiksagusad, bela neg-gudure imaksagusad, degite, Egipto-dulemar Bab-Dummad-gayaburba itosurgusmalad.
PSA 105:29 Egipto-diwarmar abega obinnisgusad, e-uamala ogilosgusad.
PSA 105:30 Bela Egipto-yala ammanoo yaisur-nika imaksad, rey-e-negyaginse-bakar, ammanoomar-nika imaksad.
PSA 105:31 Bab-Dummad-sunmaksagu, gukurmar-bukidar ainiargusad, bela Egipto-yalagangi, guumar yaisur-nika imaksad.
PSA 105:32 Dii-wied-anar, dii-gwamakaled-wiega imaksad. Egipto-yalagi mar-dakarmakmai imaksabalid.
PSA 105:33 Uvaʼmar-digar-bukwadi, higueraʼmar-bukwadi ei obelosgusad. E-yalagangi sapimar-bukwad ei bibichisgusad.
PSA 105:34 Bab-Dummad sunmakdegua, ses-dummagan onisad. We-sesmarde, bela-bela-mergu batisad.
PSA 105:35 Sesmar, bela Egipto-yargi gagan-obelosad. Ibmar-durba-e-sanmar, bela obelosbalid.
PSA 105:36 Bab-Jehová, Egipto-yalagi bela machi-sailaginmalad oburgwisgusad, bela gebesailagi-gwalulesmalad ogilosgusad.
PSA 105:37 Bab-Jehová, Israel-dulemar or-bukidar-semamai, mani-bukidar-semamai onosgusad. E-dulemar-wargwensaale, gwen-burgwissurgusad.
PSA 105:38 Egipto-dulemala nue-dobe itomarsoggu, Israel-dulemar ainide-daksamargua, yeer itosgusmalad.
PSA 105:39 Bab-Jehová Israel-dulemarga mogir nasiksad, adi, a-urba ambikumalagar. Neg-mutik ega neg-mee imakega ega soo ogasad.
PSA 105:40 Bab-Dummadse mas-egichismargu, nuu-codornizʼye-nugad ega uksagusad. Madu-nibnegginedgi immeles gusmalad.
PSA 105:41 Ega akwasaila egasgusad, agi dii aryoargusad. Nega-dulesulidganba ega dii aryomai imaksad.
PSA 105:42 Bab-Dummad deyob imaksadi, e-mai-Abrahamʼga gayaburba-ise-sogar-sogsad gwen iessulid.
PSA 105:43 Bab-Dummad e-dulamar weligwaledgi onosgusad, ber yeer-itogedgi e-dulamar-susadi onosgusad.
PSA 105:44 Dulemar-baigan-yala na e-dulamarga uksad. Dulemar-baigan-arbasad-e-ibmar-sanmaksamalad na e-dulamarga uksabalid.
PSA 105:45 Bab-Jehová, na e-dulamar e-igar-uksadba binsaed-nika-gudi-imakmalaga imaksad, eba nanamalaga imaksabalid. ¡Degisoggu, Bab-Jehová-nuggi wergumarsun!
PSA 106:1 ¡Aleluya! ¡Bab-Dummad-e-nug odummomar! Bab-Jehová-nug dummarba imakmarsun. Bab-Jehováʼga dog-nuedye sogmar. Ar Bab-Dummad, dule-nuedid, e-sabgued, degisadeguad.
PSA 106:2 ¿Doa, Bab-Jehová-e-ibmar-bulegan-imaksad sogedba nabir barsogoe? ¿Doa, Bab-Jehováʼga-namaklegedgi sogedba sunmakoe? Dule barsoged sate.
PSA 106:3 Dule-igar-inniki-imakdimaladgi, igar-maidba gusgu ibmar-imakdimaladgi nued-binsalesad.
PSA 106:4 Bab-Jehová, wile be-dulamar be dakalile, wis be angi binsao. Be, be-dulamar-bendakdanikile, mer be an-iemogo.
PSA 106:5 Adi an, be-dulamar-susa-gudiidba, e-wergudimaladba wergumogoed. Be-dulamar-na-be-nug-imaksa-gudiid-abargi namakmogagala, be an-bendakdage.
PSA 106:6 Anmar, anmar-dadganyob isgusad, anmar, ibmar-isgana imaksad, anmar, galagwensuli-gudii gusad.
PSA 106:7 Anmar-dadgan Egipto-yargi-bukwagu, bela aku be-ibmar-gegerdaklemalad-imaksad daksamalad. Degi, be-sabgued-dummarbadgi gwen binsassurmarbalid. Aka Demar-Ginnidye-nugad-dikarba begi-yolenai gusmalad.
PSA 106:8 Degi-inigwele, Bab-Jehová na e-nug-sabed-maidba bendaknonikid, na e-gangued-dummarbad-oyogega deyob imaksad.
PSA 106:9 Bab-Dummad Demar-Ginnidye-nugadse gotegua, demar argaas naded, geb dinnaa megisad. Bab-Dummad demar-wilasaila-maigusadba, e-dulamar-semai gusad. Neg-dulesulidganba-nadapiyob, e-dulamar-semai gusad.
PSA 106:10 Bab-Dummad anmar-dadgan-bendaksad, e-isdarmalad-argan-yaurgi-bukwa bendaknonikid.
PSA 106:11 E-isdarmalad-birgi demar gannar-arwega imaksad, degisoggu, wargwensaale durgussulid, bela burgwismalad.
PSA 106:12 Geb anmar-dadgan Bab-Dummad-ibmar-imakoye-sogsadgine, bar bengussurgusmalad, agi, Bab-Dummadga namakde gusmalad.
PSA 106:13 Sikwas ibagan-nasgua, Bab-Dummad-ibmar-imaksad ienonimarbalid. Bab-Dummad-e-igar-imakbied edarbissurmalad.
PSA 106:14 Anmar-dadgan negsulidganba-gudigua, e-itolegedba ibmar imaksamalad. Wargwen-gudimaladbali, Bab-Dummad-wilubdaksamalad.
PSA 106:15 Degisoggu, Bab-Dummad, ese-ibmar-egisnanaidba ega ukdesunnad, Bab-Dummad, boni-buled-emar-ogiloged ega barmiarsunnad.
PSA 106:16 Deunni, negsulidganba gudidimargua, Moisésʼgi nobguargusmalad, Bab-Jehová-nug-imaksad-Aarónʼgi nobguargusmalad.
PSA 106:17 Geb agine, napa argadgusad, degidbali, Datán napase dolesgusad. Abiramʼye-nugad, degi, e-sordamarse-bakale, napa-yaba barmellede gusmarmogad.
PSA 106:18 We-dulemardi, soose bergus gusmalad. Bela-we-dule-isganamar soose gummaksa gusmalad.
PSA 106:19 Anmar-dadgan, Horeb-yargi, moli-bebe-nikad-sapingwagwad e-bab-dummadga-imakegala, sobsagusmalad. Bormo-sobaled-asabin dulluu imaknanai gusmalad.
PSA 106:20 Bab-Dummad-e-nug-odummoleged-anar, moli-bebe-nikad-gagan-maed-sobaled-e-nug odummodmalad.
PSA 106:21 E-Bab-Dummad-e-abonosaddi iedemalad, Egipto-yargi ega ibmar-gegerdakleged-imaksad bela iedemalad.
PSA 106:22 Cam-yar-naidgi, Bab-Dummad ega ibmar-dakledisulid-imaksad bela iedemalad. Demar-Ginnidye-nugad-dikarba, ega ibmar-bulegan-imaksad, iedemarbalid.
PSA 106:23 Ar Bab-Dummad Israel-dulemar-oburgwedgi binsasanad. Degi-inigwele, Moisés, Bab-Dummadgadga-nug-imaklesadi, wemar-irwa Bab-Dummad-asabin gwisgusad. Agala, Moisés wis Bab-Dummad-barganonikid, adi, Israel-dulemar, mer Bab-Dummadse ibitomalagar.
PSA 106:24 Deginbali, napneg-nued-ega-uklesadi, isdar-daksamarbalid. Bab-Dummad-ega-ibmar-imakoye-sogsadgi, bengusmarbalid.
PSA 106:25 Ar Bab-Jehová-ega-ibmar-sogsadba ibsassurmalad, aka e-dordonegyaba uurmakbukwa gusmalad.
PSA 106:26 Degisoggu, Bab-Dummad amargi yolenonisunnad. Adi, negasulidganba sabsur-odurdaklemalagar.
PSA 106:27 Adi, e-wagan dule-bamaladse sabsur-wilemalagar. Degi, yar-akar-akar-bukwadba mimilemalaga imaksad.
PSA 106:28 Baal-Peorʼye-nugad na-e-bab-dummadga imaksamarbalid. Bab-dummagan-burbasulidga ibmar-ukleged guchamarbalid.
PSA 106:29 E-ibmar-isgana-imakedbali, Bab-Jehová-nue-oulusmalad. Degisoggu, boni-dummad ega nagunonisunnad.
PSA 106:30 Agine, Finees igar-innikigwad imaknonikid, geb bonigan bargalenonikid.
PSA 106:31 Finees we-ibmar-nued-imaksadbali, degisadegu, egi nued-binsalemai gulesunnoed.
PSA 106:32 Meriba-dii-naid-dikarba, Bab-Jehová-oulusmarbalid. We-dulemar-nukad Moisésʼga neg isgunonikid.
PSA 106:33 Moisés-surbinsa-itogega imaksamalad, abali, Moisés bar-nue-binsassuli ibmar-soge-soge sunmaknai gusad.
PSA 106:34 Bab-Jehová ega sogsa gusanad, dulemar-bamalad-bukwad oburgwemaloye. Degi-inigwele, eba ibsassurmalad, oburgwissurmalad.
PSA 106:35 Aka e-dulesurmaladba apurudmalad, a-ibmar-imakmaladba akadmalad.
PSA 106:36 Dule-baigan-e-bab-dummagan-e-nug odummodmalad. Degisoggu, we-ibmar egi aibinnonisunnad.
PSA 106:37 Niamarga e-bunamala, e-masmala, oburgwenanai guarmalad.
PSA 106:38 Dule-ibmar-okalodisulid-e-ablis eosmalad, a-e-masmala-e-ablis eosmalad, a-e-bunamala-e-ablis eosmarbalid. Canaán-dulemar-e-bab-dummaganga amar-oburgwenanai guarmalad. Degidbali, ablis-aryosad-ular, napneg isgunonikid.
PSA 106:39 Weyob neg-imaksamaladbali, neg isgunonikid, bela isgunonimarsunnad.
PSA 106:40 Degisoggu, Bab-Jehová e-dulemargi nue-uluded, isdar e-dulemar-sunonikid-dakdesunnad.
PSA 106:41 Agala, Israel-dulesurmaladga urmaknonikid, e-isdarmaladse nilebukwa gusmarsunnad.
PSA 106:42 E-isdarmaladse sabsur-imaklebukwa guarmalad, amarse apor-imakledii gusmarsunnad.
PSA 106:43 Bab-Jehová bukidargus Israel-dulemar-bendakdii gusanad. Degi-inigwele, emardi, Bab-Dummadgi bur bule yoledgusmalad. Degidbali, isguedgi bur bule nanadmarsunnad.
PSA 106:44 Bab-Dummad e-dulamar-surbinsa-itonanai-dakdegua, gormaknanaid-itononigua,
PSA 106:45 e-dulamarbo-igar-mesisad ebinsaded. Sabbarsoggua, wile dakded.
PSA 106:46 Bab-Dummad, Israel-dulemar-e-isdarmalad Israel-dulemar-wiledakega imaksabalid.
PSA 106:47 Anmar-Bab-Jehováʼye, anmar-bendakdage, anmar-yar-baid-baidgi-mimiles-bukwadgi gannar be anmar-yarse be anmar-barmide, adi, anmar be-nug-isligwaled odummogega, weligwaledgi bega namakegar.
PSA 106:48 Israel-e-Bab-Dummad-Jehová-nug dummarba gusun. ¡Degisadegu, e-nug odummolesun! Bela dulemar weyob sogmar: “¡Napira deyob gusun!” ¡Bab-Jehová-nug odummomar!
PSA 107:1 Bab-Jehováʼga dog-nuedye sogmala, ar edi, dule-nuedid. E-sabgued, degisadeguad.
PSA 107:2 Bab-Jehováʼse-abonolesmalad, Bab-Jehováʼse-e-isdarmalad-ganguedgi-bela-bela-bendaklesmalad,
PSA 107:3 Bab-Jehová bela-Israel-dulemar-yar-baid-baidgi-bukwad senonikid: Dad-nakwedsikmalad, dad-argwanedsikmalad, dad-nakwed-argan-sapiledsikmalad, dad-nakwed-argan-nuedsikmalad. Amar Bab-Jehováʼga dog-nuedye sogmala, ar edi, dule-nuedid. E-sabgued, degisadeguad.
PSA 107:4 Dulemar-abala nega-dulesulidganba yoggus gaamakdii gusmalad. Neggwebur-megdapmaloedse-momalaga, gwen igar-amisuli-gudii gusmalad.
PSA 107:5 Na mas-gunbigudii gusmalad, uku-uku-itodii gusmarbalid, gwen san-bar-onoged itossurmalad.
PSA 107:6 Geb surbinsa-itogusmaladba Bab-Jehováʼse gochamalad, geb Bab-Jehová e-wiledimaladgi bendaknonikid.
PSA 107:7 Bab-Jehová neggwebur-megdapmaloedse-momalaga, igar-innikigwadba idumai gusad.
PSA 107:8 Dule-nue-wiledakmaid-ulale, Bab-Jehováʼga doggus-nuedye be sogmala. Dulemarga-ibmar-gegerdaklemalad-imakdiid-ulale, Bab-Jehováʼga doggus-nuedye be sogmala.
PSA 107:9 Bab-Jehová dule-uku-uku-itodimaladga ukud obeloged. Dule-ukudmaad-itodimaladga bur mas-nued uked.
PSA 107:10 Abala nue-wile-itobukwa, emar-maiga-bukwa gusmalad. Negasichidgi, burgwednaga-bukwa gusmalad.
PSA 107:11 Ar Bab-Jehová-Bur-Birigined-igar-sogsadba ibsassurmalad. Ar Bab-Jehová-binsaed-uked isdar itosmalad.
PSA 107:12 A-ulale, Bab-Jehová arbaed-dummad ega urmaksad, aimukumai gusmalad, dule gwen bendaksasulid.
PSA 107:13 Geb surbinsa-itogusmaladba Bab-Jehováʼse gochamalad. Geb Bab-Jehová, e-wiledimaladgi bendaknonikid.
PSA 107:14 Negasichidgi-burgwednaga-bukwamaladgi onosad, emar-maiga-gudidiidgi onosad.
PSA 107:15 Dule-nue-wiledaked-ulale, Bab-Jehováʼga doggus-nuedye be sogmala. Dulemarga-ibmar-gegerdaklemalad-imakdiid-ulale, Bab-Jehováʼga doggus-nuedye be sogmala.
PSA 107:16 Ar yawagakmar-esgoro-gordikidgi-sobaled bibichisad, yawagak-edimalad-esgorobiid ubi-ubi imaksad.
PSA 107:17 Anmar-dadgan Bab-Jehová-Igar-Sogsadba gwen ibmar-imaksasurmarsoggu, binsaed-satedyob gusmalad. Ibmar-isgana-imaked-ulale, wiledii gusmalad.
PSA 107:18 Bela ibmar-gullemaladi ega aged ukdaed. Bato e-bergued-ibagan ese warmaksa itosgusad.
PSA 107:19 Geb surbinsa-itogusmaladba Bab-Jehováʼse gochamalad. Geb Bab-Jehová, e-wiledimaladgi bendaknonikid.
PSA 107:20 Bab-Dummad na e-sunmakedba dulemar-nudaksad, deyobi, burgwedgi bendaksad.
PSA 107:21 Dule-nue-wiledaked-ulale, Bab-Jehováʼga doggus-nuedye be sogmala. Dulemarga-ibmar-gegerdaklemalad-imakdiid-ulale, Bab-Jehováʼga doggus-nuedye be sogmala.
PSA 107:22 Bab-Jehováʼga doggus-nuedye-sogleged-ibmar-ukleged be ukmala, weligwaledgi e-ibmar-imaksad be sogmala.
PSA 107:23 Dulemar muu-billi-dummaganba mani-amiegala, muu-billiba urgi nanadimalad.
PSA 107:24 Wemala, Bab-Jehová-e-ibmar-imaksad daksamalad. Muu-billi-wilasailadgi e-ibmar-gegerdaklemalad-imaksad daksamalad.
PSA 107:25 Bab-Dummad e-sunmakedba burwa binnasur ogochad, demardi bela-bela dunguded.
PSA 107:26 Urdi mogirmar-naidse nakwiddaed, muu-billi-wilaganse gannar aidenonidabalid. Ar dulemardi burgwe-itomaladba niga-argwatemalad.
PSA 107:27 Mummuyobi banamakdidii guarmalad. Aimukumamai guarmalad. E-ibmar-wisidi binsa-wismalad, gwen e-bendaksasulid.
PSA 107:28 Geb surbinsa-itogusmaladba Bab-Jehováʼse gochamalad, geb Bab-Jehová e-wile-itomaladgi bendaknonikid.
PSA 107:29 Bab-Dummad burwa-dummad bogidik imaksad, demar bipii imaksabalid.
PSA 107:30 Ar burwa-bogiledgua, dulemar yeer itosmalad. Deyobi, Bab-Jehová ur-naguedse dulemar-sesad.
PSA 107:31 Dule-nue-wiledaked-ulale, Bab-Jehováʼga doggus-nuedye be sogmala. Dulemarga-ibmar-gegerdaklemalad-imakdiid-ulale, Bab-Jehováʼga doggus-nuedye be sogmala.
PSA 107:32 Bemar, dulemar-onmakbukwad-abargi, Bab-Jehová-e-nug odummomala. Girmar-dummagan-danar-bukwad-abargi, e-nug odummomala.
PSA 107:33 Bab-Dummadi, e-dulamar-ichakwadamalad-ular, diwarmar nega-dulesulidganga obinnisad, dianmar neg-dinnaganaga obinnisbalid.
PSA 107:34 Bab-Dummadi, e-dulamar-ichakwadamalad-ular, napa-gadi-ibmar-sanmakedi, napa-ichakwaga imaksad.
PSA 107:35 Bab-Dummad nega-dulesulidgan diimarga obinnisad, neg-dinnagwad dianmarga obinnisad.
PSA 107:36 Agi dulemar-uku-uku-itodimalad urbisad, geb we-dulemar megmalaga negmar sobsamalad.
PSA 107:37 Nainumargi ibmar-gwag digsamalad, uva-dubmar digsamarbalid. A-ibmardi ega bela-bela sanmaksad.
PSA 107:38 Bab-Dummad we-dulemargi nued-binsasad, e-dulamar mergudmalad, e-molimar merguega imaksabalid.
PSA 107:39 Ar e-dulemar icheleddibe, ibgwensur-imakleddibe, mesagwar-imaklebukwad-ular, deyob guoed. Sabsur-imaklebukwad-ular, nue-wilebukwad-ular, deyob guoed.
PSA 107:40 Bab-Dummad dulemar-nue-nug-nikamalad ibgwensur-daked, nega-dulesulidganba gaamakdii imaked.
PSA 107:41 Ar Bab-Dummad, dule-wilegeddi na e-wilediidgi onoged. E-gwenadgan, sibad-wawaad-mergueyobi, bukidar-nika imaked.
PSA 107:42 Dule-nuegan weyob-ibmar-dakoedba weligwar itomaloed. Ar dule-isganamardi, bar-sunmakosurmalad.
PSA 107:43 Ar dule, binsaed-ibedile, we-ibmar gwagegi sedii guoed, Bab-Jehová-e-sabgued magar itogoed.
PSA 108:1 We-Namaked, David narmaksad. Bab-Dummad, an-gwage guagwar-naid, an bega namaklemaladgi an namakoed, ar we, an-gandikidga gued.
PSA 108:2 ¡Gar-arpa, gar-salterio be atakmala! Iba-gwapid-onodedga ogolega an imakoed.
PSA 108:3 Bab-Jehová, an be-nug neggweburmar-abargi odummogoed. Dulemar-yar-baid-baidgi-bukwad-abargi an bega namaklemaladgi namakoed.
PSA 108:4 Be-sabgued nibneg-naidba bur-dummarba gued. Be-innikidaed nibnegse warmaknaid.
PSA 108:5 Bab-Dummad, bedi nibneggi maid. Gandikidba-be-yeerdakleged bela napneg-ebilis naid.
PSA 108:6 Bab-Dummad, be-neggwebur-be-nue-sabed-bendakega, be anmar-bendake, be anmar-abinsae.
PSA 108:7 Bab-Dummad e-neg-islidikid-akale sogsad: “Weligwaledgi an Siquem-neggwebur mimioed, weligwaledgi an Sucot-neba-naid ilemakoed.
PSA 108:8 Galaad-yala, angadi gued, Manasés-yala, angadi gued, Efraín-yala, an-bormo-gurginga gued, Judá-yala, an-gaapoledga gued.
PSA 108:9 Moab-yala, an-argan-enukedga gued, Edom-yargi, an-sapat bikiin an metoed, Filistea-sordamargi-nakwisadba, gandikidba an gormakoed.”
PSA 108:10 ¿Doa, neggwebur-gandikidse an-idugoe? ¿Doa, anga Edom-yarse-aibillemaid oyogoe?
PSA 108:11 Bab-Dummad, ¿bee be anmar-obachagussursi? Bab-Dummad, bar be anmarga sorda-bila-onomalad-bendakdisurgusad.
PSA 108:12 Dule-isdarmaladgi-nakwega be anmar-imake. Ar dulemar anmar-bendakele, gwen anmarga igarga guosulid.
PSA 108:13 Unnila, Bab-Dummadbali, anmar, anmar-isdarmaladgi nakoed. E anmarga, anmar-isdarmalad obelogoed.
PSA 109:1 David, we-namaked narmaksad. Namakmalad-e-iduedga soglenaid. Bab-Dummad, an be-nug ogannoged. Melle be an-abin-imaksuli gue.
PSA 109:2 Dule-isganamar, dule-gakansamalad, angi gakansaar sunmakdimalad. Gakansaedgi an-nug oichodimalad.
PSA 109:3 Sae-an-dakmaladbali, sunnasur angi sunmakdimalad. Binsarsunna angi yolenanaid.
PSA 109:4 Andi, we-dulemar-nue-sabed, degite, emardi angi yolenanaid. Bab-Dummad, andi emarga bese gorsii daed.
PSA 109:5 Andi, ibmar-nued ega imaked, emardi, ibmar-isgana anga imaked. Andi, wemar-sabed, emardi, sae-an-daked.
PSA 109:6 Bab-Dummad, we-dulemarga-igar-nabogega, dule-isgana ega be ogwiche, dule-e-bendaknaid egi aibined be imake.
PSA 109:7 Ega igar-nabolealir, we-dulegi isgusye-sogleged be imake, bese-goledse-bakar, ega isguedga-guega be imake.
PSA 109:8 Gwae be oburgwe. Dule-baid ei arbaed-sued be imake.
PSA 109:9 E-mimmigan, bab-sate be imake. E-ome, suisuli be imake.
PSA 109:10 E-mimmigan, neg-sate be imake. Dule-baiganse mani-egisdii be imake. E-neg-bibisgar-siidgi ononnoged be imake.
PSA 109:11 Dule-ega-idu-mani-ukdidaed, bela ei ibmar-seled be imake. Na e-ibmargi-arbasad, ei dule-baigan-suega be imake.
PSA 109:12 Dule-baigan we-dule-wiledaksuli be imake. Dule-baid bipisaale e-mimmigan-sergan-sated, melle wiledaked be imake.
PSA 109:13 E-wagan bela be ogiloge. Dulemar we-dulemar-bela-ieged be imake.
PSA 109:14 Bab-Jehová, e-bab-ibmar-isgana-imakdigusad, mer be iego, e-nan-isgudigusad, melle be iebalo.
PSA 109:15 Bab-Jehová, melle e-isgued be iego. We-napneggi, dulemar we-dule-ieged be imake.
PSA 109:16 Ar we-dulede, dule-baigan-baisur-daksa gusad. Dule-wilegana-baregindii gusad, dule-ibmarbina-sogdimalad-baregindii gusad. Dule-gwage-naibi-itodiid-baregindii gusad. We-dulemar-oburgwedse baregindii gusad.
PSA 109:17 Ar aimar-ukabsaed yeer itodasoggu, dulemar-baigan e-ukabsamosun. Ar egi nued-binsaed abessursoggu, melle egi nued binsamarsun.
PSA 109:18 Dule, emar-ukabsaedi na e-mor-dummadyob ega gusun. Emar-ukabsaedi, dii-goblegeyob egi ubosun. Emar-ukabsaedi, ina-abagalaganse-ubogeyob ega gusun.
PSA 109:19 We-ukabsaedi, e-mor-dummadyobi gusun. Sadergi-molidub-guur-naiyob egi nagubarsun.
PSA 109:20 Weyobi, Bab-Jehová an-isdarmalad imaksun, weyobi, dulemar-sunnasur-angi-sunmakdimalad imaksun.
PSA 109:21 Bab-Jehová, bee be an-Dummadid, Be-nug-dummarba-nikadba wile be an-dake, dule-angi-sunmakdimaladgi be an-onoge, ar be-sabgued dummarba gued.
PSA 109:22 An wilegedid, an ibmar-sate gudiid, ulubgi ise-nue-naibi an itoged.
PSA 109:23 Binna-binna neg-gutulemaiyobi, an nolloo gumaid, ses burwa-goledba-seled-daedyobi, an selemaid.
PSA 109:24 An mas-gunsulidba an gaaragusad. An mas-gunsulidba an-yokor nue-nollogusad.
PSA 109:25 Dulemar an-dakalile, angi dodoardamalad, anga alliardamalad.
PSA 109:26 An-Bab-Dummad-Jehováʼye, be an-bendake. Sabgued-dummarba-nikadba be an-bendake.
PSA 109:27 Bab-Jehováʼye, magar-itogega be dulemar-imake, ar bee be we-ibmar imaksad.
PSA 109:28 Be angi ise-nued binsae. Ar emardi an-ukabsaele, akarsulid. An-isdarmaladdi be obingegsae, andi be-maiga-guedi, weligwar-itoge be an-imake.
PSA 109:29 ¡An-isdarmaladdi be dummad-obingegsae! ¡Bela-belad-bingeguega be imake!
PSA 109:30 Bab-Jehová-e-nug an-gayagi an odummogoed. Dule-bukidar-abargi be-nug an ogannogoed.
PSA 109:31 Ar dule-isgana dule-wilegana-oburgweye-sokalile, bee be dulemar-wilegana bendakdaed. A-ulale, be-nug an odummogoed.
PSA 110:1 David, we-namaked narmaksad. Bab-Jehová an-Dummadga sogsad: “An-argan-nuedsik be sige, be-isdarmalad an bela ogalakuedse be sige.”
PSA 110:2 Bab-Jehová Sión-yar-akale, bega be-negsemaid-e-gargangued oyononikoed: Be-isdarmalad-be-urbalikwaa-nanaega, be imako.
PSA 110:3 Be-sordamala bila-onoleged-ibagi, sogedbali guakwaa bukumaloed, ilekwaa yeerdakle ambikumaloed. Bolegoedba boo-bateyobi, be-niga bega gannolemai-gannolemai guoed.
PSA 110:4 Bab-Jehová ise-sogar-imaksad e-sogsad bar ogwaosulid: “Be, Bab-Dummad-asabin Dule-Irwa-Gwisgued-Dummad-Degisadeguadid. Igi Melquisedec maigusa, deyob be gumogad.”
PSA 110:5 Bab-Jehová, Dule-Dummad be-argan-nuedsik siid. Sabsur-urwenonikoed-e-ibagi reymar-mamaid ese ibitomaloed.
PSA 110:6 Dulemar-yar-baid-baidgi-bukwamalad ese odurdaklemaloed. Muimar bukidar-omiledmaloed. Napneggi-dulemar-bukwad bela ese ibitolemaloed.
PSA 110:7 Igarbali, rey, dian-aryomaid goboed, degidba, e-niga gangunonikoed.
PSA 111:1 ¡Bab-Dummad-nug odummolesun! Dulemar-abargi, dule-nueganbo an bela-bela gwagegi Bab-Jehová-nug odummogoed.
PSA 111:2 Bab-Jehová-e-ibmarmar-imaksad doggus dungued, we-ibmarbina-itogerbamaladi, egi nergumalad.
PSA 111:3 Na e-ibmar-imaksad doggus gangu-dakleged, doggus yeerdakleged, na e-Igar-innikigwad degisadegu-maigu guoed.
PSA 111:4 Bab-Dummad, e-ibmar-gegerdaklemalad-imaksad, degisadegu ebinsamalaga imaked. Bab-Jehová nued-binsaedgi-dulemar-bendakedid, dule-wiledakedid.
PSA 111:5 Bab-Dummad dulemar-e-nug-odummodimaladga mas uked, na Ebo-Igar-Mesisad degisadegu ebinsaed.
PSA 111:6 Na e-dulamarga e-ibmar-imaksadgi e-gangued oyosad. Dulemar-yar-baid-baidgi-bukwamalad-e-yar ega uksadba, e-gangued oyosad.
PSA 111:7 Na e-ibmar-imaksad, napiragwadid, innikigwadid. Bela e-Igar-Islidikid-Mesisad egi bengulesulid.
PSA 111:8 E-Igar-Mesisad degisadegu gangu maid, gege gwaged, napiragwadgi, innikigwadgi mesisad.
PSA 111:9 Bab-Dummad na e-dulemar-galebukwad ollor-imaksad. Degisadegu na ebo Igar mesisad. ¡E-nug-isligwaled, bur gannarbadid!
PSA 111:10 Bab-Jehová-dobee-nanaedgi binsaed-ibed-guedi danikid. Bab-Jehová-Igar-Mesisadba-ibmar-imakdimalad nue-ibmar-wisi gumalad. ¡Bab-Jehová-nug degisadegu odummoledii guoed!
PSA 112:1 ¡Aleluya! ¡Bab-Jehová-nug odummolesun! Dule Bab-Jehová-dobee-nanadiidgi, Bab-Jehová nued binsasad. Dule Bab-Igar-Mesisadba bela-belad yeer-itodiidgi, Bab-Jehová nued binsasad.
PSA 112:2 Napneggi e-wagan dule-gandikidga guoed, dule-gwage-innikimalad-e-anagangi ise-nued-binsalegoed.
PSA 112:3 E-neggi ibmar-nuegan-bukidar-nika guoed, e-Igar-Inniki-Imaked degisadeguoed.
PSA 112:4 We-dulede, dule-innikidaedsoggu, wile-dule-dakdaedsoggu, itoakwaa-ibmar-imakedsoggu, dule-nueganga negasichidgi neg-meegwadyob gued.
PSA 112:5 Dule-nued-daedi, emarga obinagwar ibmar-ukedid. Igar-innikigwadba e-ibmar-baklemaid semaid.
PSA 112:6 Bipisaale gwen-galakuosulid dule-nued-daedi, degisadegu ebinsalegoed.
PSA 112:7 Garda-isganamar-itoalile, dobee itogosulid. E-gwagegi baisur-itogoed, Bab-Dummadgi bensuli guoed.
PSA 112:8 Na e-ulubgi gandik itogoed, dobee itogosulid. E-isdarmalad ese galakusad na dakoed.
PSA 112:9 E-ibmar-nikadi, dule-wilemaladga mimied. E-Igar-Inniki-Imaked degisadegu maigu guoed. E-ganguedi, gandikidba-yeerdakle ogannolegoed.
PSA 112:10 Deyob dule-isgudiid we-ibmar dakoed, na sae-itodoed, nugar-gormai na bergudoed. Dule-isgudiid-e-ibmar-abegedi bela bergudoed.
PSA 113:1 ¡Aleluya! ¡Bab-Jehová-nug odummolesun! Bab-Dummad-Jehová-e-maimar, Bab-Jehováʼse be gormar, Bab-Jehová-nug be odummomar.
PSA 113:2 Emi-iba-akale, Bab-Jehová-nuggi degisadegu nued-binsalesun.
PSA 113:3 Dad-nakwed-akar, dad-argwanedse, Bab-Jehová-nugdi dummarba gusun.
PSA 113:4 Bab-Jehová bela dulemar-yar-baid-baidgi-bukwad semaid, Nibneggi e-gangued-yeerdakleged bur dummarba gued.
PSA 113:5 Anmar-Bab-Dummad-Jehová-nibneggi-maidyobi, dule sated.
PSA 113:6 Bab-Jehová, e-maid-akale, nibneg dakmaid, napneg dakmaibalid.
PSA 113:7 Bab-Jehová, dule-wileged e-wilediidgi bendakdaed, Bab-Dummad, dule-ibmar-abesa-gudiid e-ibmar-abediidgi bendakdaed.
PSA 113:8 Adi, neggwebur-e-dummagan-abargi siegar. Dule-nuga-nikamalad-abargi siegar.
PSA 113:9 Ome geg mimmi-bakedi, nabir mimmi-bake imaked, nabir neguya-nika imaked. ¡Aleluya! ¡Bab-Jehová-nug odummolesun!
PSA 114:1 Israel-dulemar Egipto-yargi nosmargua, Judá-yar Babse-goled-negga gunonikid.
PSA 114:2 Jacob-wagan dule-baigan-yargi-bukwa nosmargua, Israel-yar-naid bela Bab-Dummadgadga gunonikid.
PSA 114:3 Demar-naid Israel-dulemar-dakdegua, Israel-dulemar-abin argaded. Jordán-diwar-ariomaid e-abin gales megisad, bar aryossulid.
PSA 114:4 Sibad-wawaad-macheredyob yar-dummagan ichomakded, sibad-wawaad-mimmiganyob yar-senigana ichomakdemalad.
PSA 114:5 Demar, ¿ibiga be argade? Jordán-diwar, ¿ibiga be gales-megismoga?
PSA 114:6 Bemar yar-bukwamaladi, ¿ibiga bemar sibad-wawaad-macheredyob ichomakdemala? Bemar yar-senigana, ¿ibiga bemar sibad-wawaad-mimmiganyob ichomakdemarmoga?
PSA 114:7 Napneg-naid, Bab-Jehová-asabin be giglimake, Jacob-e-Bab-Dummad-asabin be giglimake.
PSA 114:8 Ar Bab-Jehová akwasaila dii-siedga imaksad, akwasailagi dii-aryomai imaksad.
PSA 115:1 Bab-Jehová, be-nug-odummolegega bega namakleged. Anmar-nug-odummolegega namaklesulid. Be dule-wiledakedba, be ibmar-innikigwad-sogedba, a-ular, bega namakleged.
PSA 115:2 Ar ibiga dulemar-yar-baid-baidgi-bukwamalad anmarga sogoe: “¿Bia be-Bab-Dummad nadsunna?”
PSA 115:3 Anmar-Bab-Dummad nibneggi maid, ar ibi na imakbigusa, bela imaksad.
PSA 115:4 Dule-baigan ibmarmar-e-bab-dummadga-imakbukwadi, manigi sobaled, orgi sobaled, dulemar e-argangi sobsananaed.
PSA 115:5 We-ibmardi, gaya nikamalanad, degite, sunmaksurmalad. Ibya nikamalanad, degite, aku-atakmalad.
PSA 115:6 Uaya nikamalanad, degite, itosurmalad. Asu nikamalanad, degite, ibmar-yapanned usurmalad.
PSA 115:7 Argan nikamalanad, degite, ibmar ebusurmalad. Nag nikamalanad, degite, nanasurmalad. E-dolewar nikamalanad, degite, ibmar-soggwensaar bisurmalad.
PSA 115:8 E-sobmalad, deyobi gumarmogad, bela-egi-bengusurmalad, deyobi gumarmogad.
PSA 115:9 Israel-dulemar, ¡mer Bab-Jehováʼgi bengumala! Na e be-bendaked gued, be-sigu-abgaedga gued.
PSA 115:10 Aarón-wagan, dule-irwa-Bab-Dummadse-gormalad, ¡mer Bab-Jehováʼgi bengumala! Na e be-bendaked gued, be-sigu-abgaedga gued.
PSA 115:11 Bab-Jehová-urbali-gudimalad, ¡mer Bab-Jehováʼgi bengumala! Na e be-bendaked gued, be-sigu-abgaedga gued.
PSA 115:12 Bab-Jehová anmar-ebinsaed, anmargi nued binsaed, Israel-dulemargi nued binsaed, Aarón-wagangi nued binsaed.
PSA 115:13 Bab-Jehová, e-urbali-gudimaladgi nued binsaed, dule-nuga-nikamaladgi nued binsaed, dule-binsarmaladgi nued binsabalid.
PSA 115:14 Bab-Jehová bemarga bur bule mimmigan-mergumai imaksun, be-waganga mimmigan-mergumai imakbarsun.
PSA 115:15 Bab-Jehová-nibneg-obinnisadi, bemargi nued-binsaena gadin. Bab-Jehová-napneg-obinnisadi, bemargi nued-binsaena gadin.
PSA 115:16 Nibneg, Bab-Jehováʼgadid. Napnegdi, Bab-Jehová dulemarga uksad.
PSA 115:17 Dule-burgwarmalad Bab-Jehová-nug odummosurmalad. Dulemar-neg-urba-diglesmamaidi, Bab-Jehová-nug odummosurmalad.
PSA 115:18 Ar anmardi, emi-akale, Bab-Jehová-nug degisadegu odummodii gumaloed. ¡Aleluya! ¡Bab-Jehová-nug odummolesun!
PSA 116:1 Bab-Jehováʼbina, an bela-belad soged. An-ese-wilesakwaa-goledi an-itoged.
PSA 116:2 Ar Bab-Dummad an-itodasoggu, bane-bane an burgwedse ese gordii guoed.
PSA 116:3 Burgwed-igar nue an-ebiris nagusad. Burgwarmalad-meged-galu anbina nue-itos naid. Degidbali, surbinsa an itoded, gwage-nunmak an itonaded.
PSA 116:4 Degidgine, Bab-Jehováʼse an goted: “Bab-Jehováʼye, wis be an-bendakye.”
PSA 116:5 Bab-Jehová, wile-dule-dakedid, dule-innikidaedid. Anmar-Bab-Dummad, ise-wile-dule-dakedid.
PSA 116:6 Bab-Jehová, dule-belagwadamalad akwemaid. An nue-bela-maidgi, an-abonosad.
PSA 116:7 Emigindi, an bar bukib-binsaosulid, gwage-bogidik-gudii guoed. Ar Bab-Jehová angi nued binsasad.
PSA 116:8 Bab-Jehová, bee be burgwedgi an-san-burba-onosad, an-ibyanis be elisad, galagwensuli-gudiidgi be an-onosad.
PSA 116:9 Degisoggu, dule-bukwamalad-abargi, Bab-Jehová-asabin an gudii guoed.
PSA 116:10 An nue-bukib-itodiiye an sog-inigwele, amba an Bab-Dummadgi bensulid.
PSA 116:11 An sulibinsa-itogedgi an sogsad: Bela dulemar gakansaedbiiye.
PSA 116:12 Bab-Jehová bela-belad angi nued-binsasadi, ¿ibugi an bennukoe?
PSA 116:13 Unnila abonolesad-ular, Bab-Jehováʼga dog-nuedye-sogega, noggi an vino ukoed. Unnila Bab-Jehová-nuggi an goloed.
PSA 116:14 Unnila Bab-Jehováʼga an ibmar-imakoye ise-sogar-sogsadi, bela dulemar-asabin an imakoed.
PSA 116:15 Bab-Jehová dule-eba-nanaimalad-burgwedi bela-bela yeer daked, ega ibnuedid.
PSA 116:16 Bab-Jehová, ani an be-maiga gued. An be-machi-innikigwadid, an be-maiga gudiid. Galessiidgi be an-ollor-imaksad.
PSA 116:17 Bab-Jehová, an bega doggus-nuedye-sogega, ibmar-ogumakar-ukleged ukoed. Bab-Jehová, be-nuggi an goloed.
PSA 116:18 Bab-Jehováʼga an ibmar-imakoye ise-sogar-sogsadi, bela e-dulamar-asabin an imakoed.
PSA 116:19 Bab-Jehováʼse-goled-neg-imbagi an imakoed, Jerusalén-neggwebur-abargi an imakoed. Aleluya, ¡Bab-Dummad-nug odummolesun!
PSA 117:1 Bela dulemar-yar-baid-baidgi-bukwad, Bab-Jehová-nug odummomar. Bela dulemar-baid-baid-danar-danar-bukwamalad, Bab-Jehová-nug ogannomar.
PSA 117:2 Ar Bab-Jehová bela-bela anmar-sabed. Ar Bab-Jehová-ibmar-soged, guedsegad. ¡Aleluya! ¡Bab-Jehová-nug odummolesun!
PSA 118:1 Bab-Jehová-e-nug odummomar. Ar Bab-Jehová dule-nuedid. Ar Bab-Jehová-e-sabgued, degisadeguad.
PSA 118:2 Israel-dulemar, emisgi be sogmala: “Bab-Dummad-e-sabgued, degisadeguye.”
PSA 118:3 Aarón-e-wagan, emisgi be sogmala: “Bab-Dummad-e-sabgued, degisadeguye.”
PSA 118:4 Bab-Jehová-dobekwaa-gudimalad, emisgi be sogmala: “Bab-Dummad-e-sabgued, degisadeguye.”
PSA 118:5 An bonigan-abalagi-gudiidgi, Bab-Jehováʼse an gochagusad. An gochagua, an-abin-imaksad, neg-olloledgi an-ogwisgunonikid.
PSA 118:6 Bab-Jehová anba gudiid, degisoggu, an ibmar dobsulid, ar dule akar an-imakosulid.
PSA 118:7 Bab-Jehová anba gudiid, ar nue-an-bendakdiid. Degisoggu, isdar-an-dakdimalad, napayala-baparmakdii an dakoed.
PSA 118:8 Dulemargi-bensuliguedba bur Bab-Jehováʼgi-bengusuligued abeleged.
PSA 118:9 Dule-nug-nika-gudimaladgi-bensuliguedba bur Bab-Jehováʼgi-bengusuligued abeleged.
PSA 118:10 Dulemar-yar-baid-baidginmalad an-ebiris gusmalanad, degi-inigwele, Bab-Jehová-nuggi anse ogilolesmalad.
PSA 118:11 Bela an-ebirismalanad, degi-inigwele, Bab-Jehová-nuggi anse ogilolesmalad.
PSA 118:12 Burmaryobi an-ebirismalanad, degi-inigwele, gagan-soogi-gummakeyob anse gusmalad. Bab-Jehová-nuggi anse ogilolesmalad.
PSA 118:13 An-egwanmalagala, sabesuli an-barmete gusmalanad, degi-inigwele, Bab-Jehová an-bendaknonikid.
PSA 118:14 Ar Bab-Jehová an-niga-gandikidga gued, an-namakedga gued. Ar Bab-Jehová an-abonogedid.
PSA 118:15 Dule-inniki-gudimalad, weligwaledgi oimakdemalad, bendaklenonimaladba e-neg-e-neggi weyob binnasur-gotemalad: “Bab-Jehová e-garganguedgi ibmar-bulegan imaked.
PSA 118:16 Bab-Jehová-e-gargangued, biriginedid. Bab-Jehová-e-gargangued ibmar-bulegan imaked.”
PSA 118:17 An burgosulid, an dula-gudii guoed. Bab-Jehová-ibmar-imaksad-barsogega an dula-gudii guoed.
PSA 118:18 Bab-Jehová undar-naibi an-imaksad, degi-inigwele, an-oburgwissurgusad.
PSA 118:19 Anga yawagak egamar, Bab-Dummadse-goled-neg-e-yawagak anga egamar, Bab-Jehová-nug-odummogegala, agi an dogoed.
PSA 118:20 We, Bab-Jehová-e-yawagak gued, agi dule-inniki-gudimaladbi dogmaloed.
PSA 118:21 Bab-Jehová, be an-abin-imaksasoggu, an bega dog-nuedye soged, ar be an-abonosad.
PSA 118:22 Akwa dule-neg-sobmaladse-oballesadi, neg-sobleged-e-akwasailaga gunonikid.
PSA 118:23 Bab-Jehová deyob we-ibmar imaknonikid, anmarga geger-dakle gunonikid.
PSA 118:24 We-ibagi Bab-Jehová anmarga ibmar imaksad, ¡anmar egi wergumarsun, yeer-itomarsun!
PSA 118:25 Bab-Jehováʼye, wilesakwaa an bese gornaid, be anmar-abonoge. Bab-Jehová, anmar-onasguega be anmar-imake.
PSA 118:26 Bab-Jehová-nuggi-dule-danikid, Bab-Jehová egi nued-binsasun. Bab-Jehová-e-neg-akale, anmar ega sogsun: “Bab-Jehová begi nued-binsasunye.”
PSA 118:27 Bab-Jehová, Bab-Dummadid. Anmarga gwallu-meegwadyobi gued. Igarba bipirmaknamalo, sapi-e-anagan semamai gumalo, Bab-Jehováʼga-ibmar-ogumakar-ukleged-ailagi moli-bebeyob-nonaidse sedmalo.
PSA 118:28 Bab-Jehová, ar be an-Bab-Dummadid, agala, an bega dog-nuedye soged. Bab-Jehová, ar be an-Bab-Dummadid, agala, an be-nug-odummoged.
PSA 118:29 Bab-Jehová-e-nug odummomar, ar Bab-Jehová, dule-nuedid, ar Bab-Jehová-e-sabgued, degisadeguad.
PSA 119:1 Dulemar-inniki-nanadimalad, Bab-Jehová-Igar-Maidba nanadimalad. Amargi, Bab-Jehová, ise-nued binsaed.
PSA 119:2 Dulemar-Bab-Dummad-Igar-Maidba-gudimaladi, bela-bela-ulubgi-be-amidimaladi, amargi, Bab-Jehová, be ise-nued binsaed.
PSA 119:3 We-dulemar, bipisaale ibmar-isgana imakdisurmalad, unnila, Bab-Dummad-Igarbarbi nanadimalad.
PSA 119:4 Bee be Be-Igar-Islidik-Mamaid mesisad, adi, a-sogedba nanamalagar.
PSA 119:5 Be-Igar-Mamaidba an nanadiguega, bitigi bela-bela eba an innikii nanadii gusana gadin.
PSA 119:6 Bela Be-Igar-Islidik-Mesisadba an nanaele, an binge-itogosulid.
PSA 119:7 Be-Igar-Inniki-Nabolemalad-Mamaid an durdaksale, an innikigwadbali ulubgi be-ogannogoed.
PSA 119:8 ¡Be-Igar-Mamaid-Sogedba, an nanaoed! ¡Bipisaale melle be an-iego!
PSA 119:9 ¿Igi-sapingwa melle-isguega, na nuekwaa nanadii guergebe? Unnila, Be-Gayaburba-Maidbarbi nanadii guergebed.
PSA 119:10 An gwage-ulubgi bela-belad, an be-amidiid. Be-Igar-Islidik-Mamaidgi, melle aibanega be an-imako.
PSA 119:11 Melle begi-isguegala, Be-Gayaburba an-gwage-ulubgi an na sediid.
PSA 119:12 ¡Bab-Jehová, be-nug-odummolesun! ¡Be-Igar-Mamaidgi be an-odurdake!
PSA 119:13 Igar-Megisadba bela be ibmar-sogsadi, dulemarga an sogsad.
PSA 119:14 Bela ibmar-nikadba bur bule Be-Igar-Mamaidba-nanadiidgi an weligwar itodiid.
PSA 119:15 Be-Igar-Islidik-Mamaidgi an binsaoed, Be-Igarbarbi an nue-nanadii guoed.
PSA 119:16 Be-Igar-Mamaidgi an weligwar itogoed. Bipisaale, an Be-Gayaburba gwen iegosulid.
PSA 119:17 An be-mai-guedi, nue-wile be dakdii guo, deyobi, an nabir gudii guoed, be-Gayaburba-sogedba an nanadii guoed.
PSA 119:18 Be-Igar-Biriginmalad-Mamaid, magar-itogega be an-imake.
PSA 119:19 We-napneggine, an dule-baid gued, melle angi Be-Igar-Islidik-Mamaid be odukue.
PSA 119:20 Bane-bane an Be-Igar-Nabolemalad bei-durdakbiedbali, an yaisur-itoged.
PSA 119:21 Dule-san-dummarba-imakmaladse be urwemaid. Dule-isganamar, Be-Igar-Islidik-Mamaidgi-banguder, ega be sabsur-ibmar soged.
PSA 119:22 Melle we-dulemar isdar-an-dakmalaga, be imako. Melle ibgwensur-an-samalaga be imako, Ar an Be-Igar-Mamaidba an nanadiid.
PSA 119:23 Dule-gandikmalad angi ichakwa-sunmakmar-inigwele, andi be-mai-guedi, Be-Igar-Mamaidginbi binsadii guoed.
PSA 119:24 Be-Igar-Mamaid, weligwar an-imaked, anga binsaed-ukedid.
PSA 119:25 An san bela-itoged, Be-Anga-Ibmar-Sogsadba be an-ogannoge.
PSA 119:26 An-gudiidgi an bega sunmaksagua, be an-abin-imaksad. ¡Be-Igar-Mamaidgi be an-odurdake!
PSA 119:27 Be-Igar-Islidik-Mamaidi, magar-itogega be an-imake, adi, be-ibmar-gegerdaklemaladgi an binsaegar.
PSA 119:28 An ulubgi wile-itogedba bodiid, degisoggu, Be-Gayaburbagi baisur-itogega be an-imake.
PSA 119:29 Gakan-igarmargi mer-nanaega be an-imake. Be-wile-dule-dakmaidba Be-Igar-Nuegan-Maidgi be an-odurdake.
PSA 119:30 Igar-Napiragwad-Maid an susad. Be-Igar-Mamaid angadga an imaksad.
PSA 119:31 Bab-Jehová, Be-Igar-Sogsadgi an alamaknaid, melle bingeguega be an-imako.
PSA 119:32 Be-Igar-Islidik-Mamaidba an gwae ibsaoed, ar gwage-weligwar an-imakdaed.
PSA 119:33 Bab-Jehová, Be-Igar-Mamaidgi be an-odurdake, an eba nanadii guoed.
PSA 119:34 Be-Igar-Maidba-nanaegala, Be-Igar-Maid magar-itogega be an-imake. Geb gwage-ulubgi bela-belad eba an nanadii guoed.
PSA 119:35 Be-Igar-Islidik-Mamaidba be an-iduge, ar agi an wergued amied.
PSA 119:36 Unnila Be-Igar-Mamaidbarbi-binsaega be an-imake. Melle ibmar-baiganbina-surbinsa-itoged be an-imake.
PSA 119:37 Melle ibmar-binsarmaladbina-sogega be an-imake. Be-Igar-Maidba-nanaega be an-imake.
PSA 119:38 Igi be dule-be-dobee-nanadimaladga be ibmar imaksa, deyobi, an-be-mai-guedga be Ibmar-Imakoye-Sogsad, be imake.
PSA 119:39 Mesagwar-imaklegedgi an dobe-itodiidgi be an-onoge, ar Be-Igar-Nabogedi, we, ibnuedid.
PSA 119:40 Be-Igar-Islidik-Mamaidbina an nue-soged. Be-igar-innikii-imakedba dula-gudii be an-imake.
PSA 119:41 Bab-Jehová, igi na be Sogsa-Gusa, deyob be-sabgued be anse oyoge, deyob dule-bendaked be anse oyoge.
PSA 119:42 Deyobi, dule-isdar-an-dakmaladga an sogoed. Ar Be-Ibmar-Sogsadgi an bensulid.
PSA 119:43 An-gwabinduku, ibmar-inniki-soged be imake. Ar Be-Igar-Mamaidgi an bensulid.
PSA 119:44 Be-Igar-Mamaidba an degisadegu ibsadii guoed, Deyob degisadegu an imakoed.
PSA 119:45 An bonisuli nanadii guoed, ar an Be-Igar-Islidik-Mamaid amisad.
PSA 119:46 Be-Igar-Mamaidgi reymar-asabin an sunmakoed, gwen an bingeguosulid.
PSA 119:47 Be-Igar-Islidik-Mamaidbina an nue-soged, an egi wergued.
PSA 119:48 Be-Igar-Islidik-Mamaid an nue-sabedbali, an-argan an onakoed, Be-Igar-Maidgi an binsaoed.
PSA 119:49 An-be-mai-guedga be Ibmar-Sogsa-Gusadi be ebinsao, a-Gayaburba-abdakagwar-gudiguega, be an-imaksad.
PSA 119:50 An bukib-binsaedba-wile-itodiidgi, a-Gayaburba baisur-itogega an-imaked, Be-Ibmar-Sogedi, an-ogannodaed.
PSA 119:51 Dule-san-dummarba-imakmalad angi nue-isdar sunmakdimalad, degi-inigwele, andi Be-Igargi bangudisulid.
PSA 119:52 Bab-Jehová, be epenne Be-Igar-Nabosadi an ebinsaed. A-Igarmala, an-gwage-baisur-itogega imaked.
PSA 119:53 Dule-isganamar Be-Igar-metemaladi, sae-itogega an-imaked.
PSA 119:54 An we-napneggi sikwas-gudiidgi, Be-Igar-Mamaid, an-namakedga gusad.
PSA 119:55 Bab-Jehová, mutikgusale, an be-ebinsaardaed. Be-Igar-Sogedba an nanabied.
PSA 119:56 Be-Igar-Islidik-Mamaid-sogedba-nanadiguedi, angi siid, an imakedsegad.
PSA 119:57 Bab-Jehová, bebi angadga gued, Be-Gayaburbaba-nanaoye an sogsad.
PSA 119:58 Bela-bela gwagegi an be-amidiid. Be-Ibmar-Sogsadba ise-wile be an-dake.
PSA 119:59 An-daedgi an binsaargua, Be-Igar-Mamaidba an gannar nanaded.
PSA 119:60 Be-Igar-Islidik-Mamaid-sogedba nanaegala, an undar-binsadii gussulid.
PSA 119:61 Dule-isganamar an-gaegala, an-ebirdimalad. Degi-inigwele, Be-Igar-Maidi an gwen-iessulid.
PSA 119:62 Be-Igar-Inniki-Maid-nukad, an bega dog-nuedye-sogegala, nega-gabigwenbali an gwichiguardaed.
PSA 119:63 Ani an, dulemar-be-dobekwaa-nanadimalad-e-aid. Ani an, Be-Igar-Islidik-Mamaidba-nanadimalad-e-aid.
PSA 119:64 Bab-Jehová, ¡Be-Igar-Mamaidgi be an-odurdake! We-napneg-naidgi bela be-sabgued-nikadi oyolenaid.
PSA 119:65 Bab-Jehová, bee be, Be-Ibmar-Sogsadbali, be nued an-nidii gusad.
PSA 119:66 An Be-Igar-Islidik-Mamaidgi an bensulid. Agala, gatik-ibmar-wisgued be an-imake, ibmar-mag-itoged be an-imake.
PSA 119:67 An sabsur-odurdakleged-iduale, an-itolegedba galagwensuli an gudii daed. Emigindi, Be-Gayaburba-Sogedba an nanadiid.
PSA 119:68 Bab-Dummad, bedi dule-nuedid. Be, ibmar-nuegan-imakedid. ¡Be-Igar-Mamaidgi be an-odurdake!
PSA 119:69 Dule-san-dummarba-imakmaladi angi isdar-sunmakmalad. Degi-inigwele, andi gwagegi bela-belad Be-Igar-Islidik-Mamaid-sogedba an nanaed.
PSA 119:70 We-dulemar, gwage-dutusurmaladid. Andina, Be-Igar-Maidgi wergudiid.
PSA 119:71 Bur-nueddo, an sabsur-odurdaklesgu. Abali, an Be-Igar-Mamaid durdaknonikid.
PSA 119:72 Be-Igar-Maidi, olo-mili-milibalidba bur bule ibnuedid. Be-Igar-Maidi, mani-mili-milibalidba bur bule anga ibidar-nuedga gued.
PSA 119:73 Bee be, we-napnegse an-barmialid, bee be, anga burba uksad. Be-Igar-Mamaid-durdakegala, nono-nued be anga udage.
PSA 119:74 Dulemar-be-nug-ogannodimalad an-dakalile, weligwar-itodmaloed, ar an, Be-Gayaburbagi, bensuli gudiid.
PSA 119:75 Bab-Jehová, an wisid, Be-Igar-Mamaidi innikigwadbiid. Degisoggu, nabiridba sabsur-be-an-odurdaksado.
PSA 119:76 Be-sabguedi, an-gwage-baisur-itoge imaked. Ar Be-Anga-Sogsagusadba be imaksad.
PSA 119:77 Be-wile-dule-dakedi, anse be oyodage. Dula-gudii be an-imakdage. Ar Be-Igala, weligwar an-imakedid.
PSA 119:78 Dule-san-dummarba-imakmalad, obingegsalesun, ar binsarsunna an-ogakansadimalad. Andi Be-Igar-Islidik-Mamaidgi bur binsaoed.
PSA 119:79 Dulemar-be-nug-ogannodimalad, gannar anbo-atogega be imaksun. Dulemar-Be-Igar-Mamaid-wismalad, gannar anbo-atogega be imaksun.
PSA 119:80 An-gwage Be-Igar-Mamaidba innikii nanasun, adi, an melle bingeguegar.
PSA 119:81 Bab-Jehováʼye, bela-belad be-an-bendaked an abdakdiid, Be-Ibmar-Sogsadgi an bensulid.
PSA 119:82 Be Anga-Ibmar-Sogsad-abdakdiidbali, an-dala galakuded. An weyob soged: “¿Sana wede gwage-baisur-itogega be an-imaknonikoe?”
PSA 119:83 Bato an seredgus-inigwele, wagar-bapigwargus-inigwele, amba Be-Igar-Mamaid gwen an iedisulid.
PSA 119:84 ¿Bule napi an dula gudii guoe? ¿Sana be, dule-an-balegindimalad-sabsur-odurdakoe?
PSA 119:85 Dule-san-dummarba-imakdimaladi, an-yardakega igar amismalad. Be-Igar-Sogedba-nanadisurmaladi, an-yardakega igar amismalad.
PSA 119:86 Bela Be-Igar-Mamaidi innikigwadbiid. ¡Bab-Dummadye, be an-bendake! Binsarsunna an-balegindimalad.
PSA 119:87 Napneggi an-oburgwednaga gusmalad. Degi-inigwele, andi Be-Igar-Mamaidgi gwen bangussulid.
PSA 119:88 Be-sabed-dummarba-nikadbali, be anga burba-ogannosun. Be-Igar-Mamaid-sogedba an nanaoed.
PSA 119:89 Bab-Jehová, Be-Gayaburbadi degisadeguad, nibneggi, Be-Gayaburbadi gwen gwagmaisulid.
PSA 119:90 Be-innikidaedi, degisadeguad. Napneg be nasiksad, innikigwadba nagusad.
PSA 119:91 Be-Igar-Uksadbali, emi-iba-akale, we-ibmarmar amba bukwad. Bela we-ibmarmala be-sogedba ibmar-imakbukwad.
PSA 119:92 Be-Igar-Maid, weligwar an-imaksasulina, bukib-binsaedba an bato bergusbinnenad.
PSA 119:93 Bipisaale, Be-Igar-Mamaid an gwen iegosulid, ar we-igarbali, be an-san-burba dula imaksad.
PSA 119:94 Bab-Jehováʼye, be an-bendake, andi, begadga-gued. Andi, Be-Igar-Islidik-Mamaid ulubse baramidiid.
PSA 119:95 Dule-isganamar an-obelobigudimalad. Andi, Be-Igar-Mamaid-magar-itogega alamakdiid.
PSA 119:96 Bela ibmarmar e-bergued-nika an dakdiid. Unnila, Be-Igar-Islidik-Mamaidbi gege bergued.
PSA 119:97 ¡Be-Igar-Maidbina an nue soged! Bane-bane an egi binsadaed.
PSA 119:98 Be-Igar-Mamaidi, an-isdarmaladbali bur bule binsaed-nika an-imaked. Ar Be-Igar angadga an imaksad.
PSA 119:99 Bela an-odurdakmaladba bur bule an ibmar magar-itoged. Ar an Be-Igar-Mamaidgi binsadigu daed.
PSA 119:100 Girmarba bur bule an ibmar magar-itoged. Ar an Be-Igar-Mamaid-sogedba nanadiid.
PSA 119:101 Be-Gayaburba-Sogedba-nanaegala, bela igar-isganagi an bangusad.
PSA 119:102 Be-Igar-Mamaidgi an bangussulid, ar bee be an-odurdaksad.
PSA 119:103 Ibibayobi Be-Gayaburba anga ochii gue. Achanis-maedba bur bule anga ochii gued.
PSA 119:104 Be-Igar-Mamaidbali, an binsaed-nuegan amidiid. A-ulale, bela gakan-igarmar an isdar daked.
PSA 119:105 Be-Gayaburba gwallu-meegwadyobi an-iduedga gued. Neg-ibegwalebayobi anga igar oyoged.
PSA 119:106 An bega ibmar-ise-sogar-sogsadi, an imakedsegad. Be-Igar-Mamaid-sogedba an nanadii guoed.
PSA 119:107 Bab-Jehová, an bela-bela bato nue dummad-wilediid. ¡Be-Gayaburba-sogedba be an-ogannoge!
PSA 119:108 Bab-Jehová, an bega ibmar-sogedi be abingasana gadin. Be-Igar-Mamaidgi be an-odurdake.
PSA 119:109 Bonigan-abargi an-sandi gudiid, degi-inigwele, Be-Igar-Maiddi an iedisulid.
PSA 119:110 Dule-isganamar an-yardakbimalad, degi-inigwele, Be-Igar-Mamaidgi andi bangudisulid.
PSA 119:111 Be-Igar-Mamaidi, degisadegu angadga-guega an susad, ar an-gwage-weligwar imakdaed.
PSA 119:112 Degisadegu, an-burgwedsega gwage-ulubgi Be-Igar-Mamaid-sogedba nanadioye an sogsad.
PSA 119:113 Dule-wagar-darbo-damaladi, an isdar daked. Be-Igar-Islidikiddi, an nue-sabed.
PSA 119:114 Bab-Dummad, bedi an-odukuega gued, bedi an-sigu-abgaedibayobi anga gued, Be-Ibmar-Sogsadi, an edarbediid.
PSA 119:115 “¡Dule-isganamar, be angi bangue! An-Bab-Dummad-Igar-Mamaidba an nanabied.”
PSA 119:116 Be-Gayaburba-Maidbali, be an-ogannoge, agi an dula gudiguoed. An-ibmar-edarbediidgine, melle bingeguega be an-imake.
PSA 119:117 Be an-bendake, adi, an bendaklegoed. Be-Igar-Mamaidgi, an weligwar itodiguoed.
PSA 119:118 Dulemar-Be-Igar-Mamaidgi-nodimaladi, be isdar dakdaed. Ar gakansaedginbi binsadidamalad.
PSA 119:119 Napneggi dule-isganamar-bukwadi, ibmar-isgana-milediidyob be daked. A-ulale, an Be-Igar-Mamaidbina nue-soged.
PSA 119:120 An be-dobedbali, be-asabin an wawanmakgwichid, Be-Igar-Nabolemalad-dobee an itoged.
PSA 119:121 Igar-inniki-imaklemalad an imakdiid. Melle dule-mesagwar-an-imakdimaladga be an-urmako.
PSA 119:122 An-be-mai-guedga, igar-nueganbi-guega be imako. Melle dule-san-dummarba-imakmaladi mesagwar-an-imakega be imako.
PSA 119:123 Be an-abonogega, an be-abdakdiidba an-dala mommoleded. Be-Igar-Sogsad anga-guedi, an edarbediid.
PSA 119:124 Sabed-dummarba be nikadbali, be-mai be sabguo. Be-Igar-Mamaid be an-odurdake.
PSA 119:125 Andi be-mai gued. An Be-Igar-Mamaid-durdakega, Be-Igar-Mamaid mag-itoge be an-imake.
PSA 119:126 Bab-Jehová, ar Be-Igar-Mamaidba nanasurmarsoggu, be-ibmar-imakbied be imaksunna.
PSA 119:127 Bela ibmarmar-baiganba bur bule Be-Igar-Mamaid bur an sabed. Be-Igar-Mamaidbina olobali bur bule an bina soged. Olo-sunnadbali bur bule an bina itoged.
PSA 119:128 A-ulale, Be-Igar-Mamaidbali an nanaed. Bela Be-Igar ibmar-baiganbali nueganbi an daked. Bela gakan-igarmardi an isdar daked.
PSA 119:129 Be-Igar-Mamaidi doggus-ibnuedid. A-ulale, an e-sogedba nanadiid.
PSA 119:130 Be-Gayaburbagi sunmakledele, magar ibmar-itogega anmar-imaked. Dule-ibmar-wissulid magar-ibmar-itogega imakbalid.
PSA 119:131 An bela-bela Be-Igar-Mamaid-durdakbiedbali, Be-Gayaburbabina an nue soged.
PSA 119:132 Bab-Dummad, wile-be-an-dake. Igi be gusgu dule-be-nug-odummodimaladi wile be dakdae, deyobi, be an-dakmoga.
PSA 119:133 Be-Igar-Sogsadba-nanaega be an-imake. Melle igar-isgana angi obinega be imake.
PSA 119:134 Dule-ibmar-sabsur-imakedgi be an-ollor-imake, ar an Be-Igar-Mamaidba an nanabied.
PSA 119:135 Be-ise-nued-binsaedi be-maiga be oyoge. ¡Be-Igar-Mamaidgi be an-odurdake!
PSA 119:136 Be-Igar-Mamaidba bar nanasurgusmalad-ulale, an-ibyanis suurmakemaid.
PSA 119:137 Bab-Jehová, bedi dule-innikigwadid, innikigwadba bedi igarmar nabogedid.
PSA 119:138 Be-Igar-Mamaid-be-uksadi, bela innikigwadbiid. Be-Igar-Mamaidgi bengulesulid.
PSA 119:139 An-isdarmalad Be-Gayaburba-Maid-iedmaladbali, an bela-bela nue sae-itoged.
PSA 119:140 Be-Gayaburba isedar-swilidikidid, a-ulale, an Be-Gayaburba nue-sabed.
PSA 119:141 Andi san-bipi-imakdiidbali, ibgwensur daklediid, degi-inigwele, Be-Igar-Mamaidi, an iedisulid.
PSA 119:142 Be Igar-Inniki-Imakedi, degisadegu innikigwadbiid. Be-Igar-Mamaidi, napiragwadid.
PSA 119:143 Surbinsa an itononikile, Be-Igar-Mamaiddi weligwar an-imaked. Suli-suli an itononikile, Be-Igar-Mamaiddi weligwar an-imaked.
PSA 119:144 Be-Igar-Mamaiddi, gusgu innikigwadbiid. A-igarba nabir gudiguega, a-igar-magar-itoge be an-imake.
PSA 119:145 Bab-Jehová, bela-bela gwagegine an bese goled. Be an-abinsae. Be-Igar-Mamaid-sogedba an nanabied.
PSA 119:146 An-bendakye an bese goled. Ar Be-Igar-Mesisad-sogedba an nanabied.
PSA 119:147 Bese bendakleged egisegala, wakudaryalaba an gwisguardaed. An Be-Gayaburbagi bensulid.
PSA 119:148 Be-Igar-Mamaidgi-binsaedba, mutikidbali, an gabdasulid.
PSA 119:149 Be dule-wile-nue-dakdasoggu, be an-itoge. Bab-Jehová, Be-Igar-Innikigwadba be an-ogannoge.
PSA 119:150 Dule-isganamar-an-balegindimaladi, an-walikgudanikid. Amar, Be-Igar-Mamaidgi bangus gudimalad.
PSA 119:151 Bab-Jehová, be an-walikaa gudiid. Be-Igar-Mamaidi, belagwable napiragwadbiid.
PSA 119:152 Dikasurgus, an Be-Igar-Mamaid wisi gudiid, ar gusgu be a-Igar omesisad.
PSA 119:153 An-wile-itodiidi be dake, bonigangi be an-ollor-imake, ar an Be-Igar-Mamaidi gwen an iedisulid.
PSA 119:154 Be an-irwa gwisgue, be an-bendake. Be-Gayaburba-sogsadba be an-ogannoge.
PSA 119:155 Dule-isganamargi, burbar-bendakleged-igar dikasur naid, ar Be-Igar-Mamaidi gwen-amisurmalad.
PSA 119:156 Bab-Jehová, be-dule-wiledakedi dummarbaa gued. Be Igar-Nabomaidba, burba-dulad be anga uke.
PSA 119:157 Dule-an-balegindimalad bukidarad, an-isdardakmalad bukidarad, degi-inigwele, Be-Igar-Mamaidgi an bangudisulid.
PSA 119:158 An dule-yardakdimalad-dakalile, an sae-dakdaed, ar Be-Gayaburba-sogedba gwen nanadisurmalad.
PSA 119:159 ¡Bab-Jehová, be dake! Ibiyobi Be-Igar-Mamaid an sabe. Be sabgued-dummarba-nikadbali, burba-dulad wis be anga uke.
PSA 119:160 Bela Be-Gayaburba-Mamaidi napiragwadid, Be-Igar-Maidi bela innikigwadba degisadegu maid.
PSA 119:161 Ar binsarsunna dule-gandikmaladi an-balegindiid, an-gwage-ulubgine an Be-Gayaburba-dobekwaa nanadiid.
PSA 119:162 Be-Gayaburbagi an weligwar-itoged, dule-ibmar-nuegan-gargerbamalad-amisadyobi, an egi wergued.
PSA 119:163 Gakan-igar an sae-daked, an nue-isdarsunna-dakdaed. Degi-inigwele, Be-Igar-Maiddi an nue-sabed.
PSA 119:164 Be-Igarmar nue-napiragwad-guedbali, an bali-bali be-nug odummoged.
PSA 119:165 Dule-Be-Igar-Mamaid-sabgudimaladi, gwagegi bogidik itodimalad. Wemar igar-isganaba gege selemalad.
PSA 119:166 Bab-Jehováʼye, wis be an-bendakena gadin. Ar Be-Igar-Mamaidbali an ibmar imakdiid.
PSA 119:167 Bela-belad an Be-Igar-Mamaid-sogedba nanadiid, ar an Be-Igar nue-sabed.
PSA 119:168 Bela Be-Igarmar-Mamaidba an nanadiid, ar bela be an-ibmar-saedi wisid.
PSA 119:169 Bab-Jehováʼye, gandikidba an bese-goledi, bese warmaksun. Be-Gayaburba-Maidba magar-ibmar-itogega be an-imake.
PSA 119:170 An bese ise-wilesakwaa-goledi bese warmaksun. Be-Ibmar-Sogsadba be an-bendake.
PSA 119:171 Be-Igarmar-Mamaidgi be an-odurdaksad. A-ulale, an-gwabinduku be-nug ogannoged.
PSA 119:172 Ar bela Be-Igar-Mamaid innikigwadbisoggu, Be-Ibmar-Sogsadgi an namaked.
PSA 119:173 Bab-Jehováʼye, Be-Igar-Mamaidi angadga an imaksasoggu, gwae be an-bendakdage.
PSA 119:174 Bab-Jehováʼye, wis be an-bendaked an be-abeged. Be-Igar-Maidi weligwar an-imakedid.
PSA 119:175 Be-nug-odummogega, dula-gudii be an-imake, Be-Igar-Nabolemaladi, an-bendakega gusun.
PSA 119:176 Sibad-wawaad-yoggus-gudibayobi, an gudiid. An-be-maiga-gudiid be amidage, ar Be-Igar-Mamaidi an gwen iedisulid.
PSA 120:1 We-namaked, Jerusalénʼse-nakwe-nadapir, namakleged. Bab-Jehováʼse an surbinsa-itogedgi gochad, Bab-Jehová an-abin-imaksad.
PSA 120:2 Bab-Jehová, dule-gakansilimargi be an-ollorsae, dule-emar-yardakmaladgi be an-ollorsae.
PSA 120:3 Dule-yardakmalad, ¡be dule-wilesmar! ¿Ar ibu bemarga uklegoe? ¿Ar ibu egi bemar nikuoe?
PSA 120:4 Bila-onomalad-e-sigu-swiswidikid-ginnitibi-aramakmaidi, begi mioed.
PSA 120:5 ¡Andi, duledar-wiles! Andi dule-ibmar-wissurmalad-abargi gudiid. An Mesec-neggweburgi-maiyobi gudiid, an Cedar-dulemar-abargi-maiyobi gudiid.
PSA 120:6 Dule-neg-bogidikid-abesurmalad-abargi bato an dikasurgus maid.
PSA 120:7 Andi, dule-belagwadaedid. Ar an neg-bogidikid-nasikedgi sunmakele, emardi bila-onomaladgi sunmakmalad.
PSA 121:1 We-namaked, Jerusalénʼse-nakwe-nadapir, namakleged. Yalagansik an atakdele, an egisdaed, ¿bia an-bendakleged danikoe?
PSA 121:2 Bab-Jehováʼgi an-bendakleged danikid. Bab-Jehová-napneg-nasiksadgi, an-bendakleged danikid Bab-Jehová-nibneg-nasiksadgi, an-bendakleged danikid.
PSA 121:3 Bab-Jehová aimukuega be-imakosulid, Bab-Dummad-be-edarbediid gwen gabosulid.
PSA 121:4 Ar nue-napiragwad, Israel-dulemar-edarbed gwen gabosulid.
PSA 121:5 Bab-Jehová be-edarbedid, Bab-Jehová be-dikarba gudiguad.
PSA 121:6 Ibgine, dad-ibeler be-oakalogosulid, mutikidba, nii gwen be-oakalogosurbalid.
PSA 121:7 Bab-Jehová bonigan-bese-warmakega imakosulid, Bab-Jehová be-edarboed.
PSA 121:8 Bia be nadesogele, Bab-Jehová, degisadegu beba gudii guoed.
PSA 122:1 We-namaked, Jerusalénʼse-nakwe-nadapir, namakleged. Dule anga sogdemalale: “¡Bab-Jehová-e-negse anmar namarye!” An weligwar-itoddaed.
PSA 122:2 Jerusalén-neggwebur, be-neg-e-yawagak-asabin bato anmar gwichid.
PSA 122:3 Jerusalén neggwebur-gandikidid, be-soblesadi, nuekwaa soblesad. Begi nabir ambikumalaga be soblesad.
PSA 122:4 Jerusalén-neggwebursega dadgan-warambe-gakabogwad-e-wagan (12) Bab-Jehová-e-nug-odummogegala, ese nakwemai damalad. Igi Bab-Jehová Israel-dulemarga igar-uksagusa, deyobi, gunonikid.
PSA 122:5 Jerusalén-neggweburgine igar-naboged-e-ganmar siid, agi David-e-wagan-igar-naboged-e-ganmar siid.
PSA 122:6 Jerusalén-neggweburga anmar neg-bogidikid ega egise. Be-sabgudimaladga ibmar nasgumaigusun.
PSA 122:7 Be-galu-matusulidga, neg-bogidik nagusun. Be-neg-dummagan-bukwadga, neg-bogidik nagusun.
PSA 122:8 An-gwenadgan-sabed-nuggi, an-aimar-sabed-nuggi, an soged: “¡Neg bogidikid bega gusun!”
PSA 122:9 Anmar-Bab-Dummad-Jehová-e-neg-sabedba, bega nueganbi-ibmar-guega an imakoed.
PSA 123:1 We-namaked, Jerusalénʼse-nakwe-nadapir, namakleged. Bab-Jehová an besik ataked, bedi nibneggi neg-dakmaid.
PSA 123:2 Ar igi maigan ibmarbina-sogedba e-dummagangi gudidimala, ar igi omegan-maiga-gudidimalad ibmarbina-sogedba e-dummad-omegi gudidimala, deyobi, anmar, anmar-Bab-Dummad-Jehováʼgi gudidimogad, anmar-wiledaked anmar abediid.
PSA 123:3 Bab-Jehová, be wile-anmar-dake. Be wile-anmar-dake. Dulemar ibgwensur-anmar-imaked, anmar budar-itogusmalad.
PSA 123:4 Dule-mani-ibgan anmargi-dodomalad, anmar budar-itogusmalad. Dulemar-san-dummarba-imakdimalad, ibgwensur-anmar-imakmalad, anmar budar-itogusmalad.
PSA 124:1 We-namaked, Jerusalénʼse-nakwe-nadapir-namakleged. David narmaksad. Israel-dulemar, be sogmar, Bab-Jehová anmar-bendaksasulina, igi anmar guoendibe.
PSA 124:2 Bab-Jehová anmar-bendaksasulina, bela dulemar, anmargi gwichigudmargu,
PSA 124:3 anmargi uludgu, dula anmar-dosanad.
PSA 124:4 Diwar-noeyobi anmar ese berguoenad, dii-nollosuliyob anmargi nasoenad.
PSA 124:5 Degisoggu, dii-nollosurmaladyobi anmar-sedoenad.
PSA 124:6 Bab-Jehová-nug odummomarsun, we-dule-isganamarse berguega anmar-imaksasulid.
PSA 124:7 Nuuyobi, anmar wakichamalad. Dule nuu-gaega-galu-sobmaladyobidgi, anmar wakichamalad. E-galu-ayarmaksa-siiyobidgi, anmar wakichamalad.
PSA 124:8 Bab-Jehová-napneg-obinnisadid-nuggi, Bab-Dummad-nibneg-obinnisadid-nuggi, anmar-bendakleged danikid.
PSA 125:1 We-namaked, Jerusalénʼse-nakwe-nadapir, namakleged. Dulemar Bab-Jehováʼgi-bensurmalad Sión-yalayobi gued. Sión-yala degisadegu sii guoed, bipisaale ainirosulid.
PSA 125:2 Igi yarmar Jerusalén-ebirbukwananae, deyobi, Bab-Jehová e-dulemar-edarbedii degisadegu gumogoed.
PSA 125:3 Dulemar-isgana, dule-nueganga degisadegu negsemai guosulid, adi, melle dule-nuegan ibmar-isganamarse binsaed galemalagar.
PSA 125:4 Bab-Jehováʼye, dule-nueganga ibmar-nuegan be imake. Dule-gwage-swilidikmaladga ibmar-nuegan be imake.
PSA 125:5 Bab-Jehováʼye, dule igar-isganaba-naddamaladdi, dule-isganamarba bergued be imakmoga. ¡Israel-yargi neg-bogidikid nai be imaksun!
PSA 126:1 We-namaked, Jerusalénʼse-nakwe-nadapir, namakleged. Bab-Jehová dule-galesbukwamalad Sión-yarse gannar senonigusgua, anmar gabdakmaiye bismalanad.
PSA 126:2 Anmar nue-alledii gusmalad. Anmar weligwaledba onamakde gusmarbalid. Dule-Bab-wissurmaladi sunmakdemalad: “Bab-Jehová we-dulemarga ibmar-dummagan-nuegan imaksaye.”
PSA 126:3 Napiragwa, Bab-Jehová anmarga ibmar-dummagan-nuegan imaksad, agala, anmar weligwar itoged.
PSA 126:4 Emisgine, Bab-Jehová, anmar-dulemar-galesbukwad gannar be sedage. Igi be nega-dulesulidganba yar-Neguevʼye-nugad-e-dianmar gannar-dii-nikuega be imakdae, deyobi, be anmar-dulemar-galesbukwad, gannar be sedage.
PSA 126:5 Dule boed-abalagi ibmar-gwag-digedi, weligwaledgi e-sanmardi weed.
PSA 126:6 Ibmar-gwag-digegala, boed-abalagi alamaknai-damalad, ibmar-sanmar-wesmalale, weligwaledba namakdaniki damalad.
PSA 127:1 Jerusalénʼse-nakwe-nadapir-namaklegega, Salomón, we-namaked narmaksad. Ar Bab-Jehová neg-sobsulile, binsarsunna neg-sobmalad arbananaid. Ar Bab-Jehová neggweburgi nakulesulile, binsarsunna neggweburgi-nakulemalad nakulebukmalad.
PSA 127:2 Bemar mas-gunnega binsarsunna arbaed-dummad-imakega, bolegoedba gwisgumalad, mutiksaila be gabmalad. Ar Bab-Jehová, e-dule-sabeddi bukib-binsasuli nue-gabdii imaked.
PSA 127:3 Anmar mimmigan-nikadi, Bab-Jehová anmarga uksad, Bab-Jehová anmargi doggus-nued-binsaedbali, mimmigan anmarga gwalulemaid.
PSA 127:4 Igi-dule bila-onogedgi sigu-bukidar-ganikile, dobsuli-itoge, debayobi, sapingwagwadgi dule mimmigan-bukidar-nikale, dobsuli gued.
PSA 127:5 Dule, mimmigan-bukidar-nikale, we-dulegi, nued binsalesad. We-dule, dulemar-abargi na e-isdarmaladbo abin-abin-imakalile, e-isdarmalad-abin suli-suli itogosulid.
PSA 128:1 We-namaked, Jerusalénʼse-nakwe-nadapir, namakleged. Dule-Bab-Jehová-dobee-nanadimalad, we-dulegi nued binsalesad. Bab-Dummad-igarba-nanadimalad, we-dulegi nued binsalesad.
PSA 128:2 Be-arbadiidgi na be mas gunnoed, dule-weligwaledga be guoed, nueganbi bega igarmar naoed.
PSA 128:3 Be-neguyagi, be-ome, uva-dub-san-nikuedyobi guoed. Olivo-sapi-e-muugan, e-saila-ebilideyobi, be-mimmigan be-mese-ebilidmogoed.
PSA 128:4 Weyob, dule-Bab-Jehová-dobee-nanadiidgi ise-nued binsalegoed.
PSA 128:5 Bab-Jehová, Sión-yar-akale, begi ise-nued-binsasun. Be dula-gudiidgi, bane-bane Jerusalén-nasgumaid-dakdii be gusun.
PSA 128:6 Be-wagan-dakedse be dula-gudii gusun. ¡Israel-yargi neg-bogidikid nagusun!
PSA 129:1 We-namaked, Jerusalénʼse-nakwe-nadapir, namakleged. Sapingwagwad-akar, nue-an-wiodimalad, degi-inigwele, gwen an-oakalossurgusmalad. Israel-dulemar weyob be sogmarmosun.
PSA 129:2 Sapingwagwad-akar, nue an-wiodimalad, degi-inigwele, gwen an-oakalossurgusmalad.
PSA 129:3 An-isdarmalad yargangi an-bibyosmalad, yargangi an-naibi-imaksamalad. Igi dule napa-akwie, debayobi, an-naibi-imaksad.
PSA 129:4 Ar Bab-Jehováʼdi ibmar-napiragwad imaksoggu, an-isdarmaladse-wilediidgi an-onosad.
PSA 129:5 Bela Sión-yar-isdar-dakmalad, sabsur-mesagwar-gusadba gannar sorsik be oduurmake.
PSA 129:6 Wemala, uas-birgi gagan-ainiedyobi gumalad. Ainidagogu, baisursunna dingued.
PSA 129:7 Dule-ibmar-gwag-wemalad we-gagan sikosurmalad, weosurmarbalid.
PSA 129:8 Dulemar ibmar-gwag-wenanaid begi nasmalogu, bega sogosurmalad: “Bab-Jehová begi nued-binsaena gadin.” Ega be sogosurmarmogad: “Bab-Jehová begi nued-binsamogana gadin.”
PSA 130:1 We-namaked, Jerusalénʼse-nakwe-nadapir, namakleged. Bab-Jehováʼye, an bese wilesagwar goled. Ulubgi nunmaked-dummad-itonaidgi an bese goled.
PSA 130:2 Bab-Jehováʼye, be an-itoge, an-sabsuli-gornaid wis be itoge, ise-wilesagwar an bese gornaid.
PSA 130:3 Bab-Jehová, be dule-e-isguedgi atakdele, ¿doa be-asabin sogosunna, an isgudisurye?
PSA 130:4 Ar bedi isgussuliyob dule-daknonidaed, degisoggu, dobekwaa be-asabinni nanamalargebed.
PSA 130:5 Bab-Jehová an-bendakega an edarbed, an-gwagegi an Bab-Jehová edarbed. Bab-Jehová-ibmar-imakoye-sogsadgi an bensulid.
PSA 130:6 An Bab-Jehová edarbed. Igi dule-mutik-nakuleged neg-ibgued-edarbesidae, aba bur bule an Bab-Jehová edarbed.
PSA 130:7 Deyobi, Israel-dulemar, Bab-Jehová be edarbemala. Ar bela-bela Bab-Jehová anmar-sabgumaid, bela isguedgi emar-ollor-imakbalid.
PSA 130:8 Bab-Dummad-sunnagwad isguedgi Israel-dulemar-ollor-imaknonikoed.
PSA 131:1 We-namaked, Jerusalénʼse-nakwe-nadapir, namakleged. David we-namaked narmaksad. Bab-Jehová, andi na san-dummarba imaksulid, andi, dulemar-ibgwensur daksurbalid, andi, nug-dummarba imakdisulid, andi, ibmar-gegerdaklemalad-dummagan imakdisurbalid.
PSA 131:2 Andi bur, igi goe mam-nusale e-nan-nukugi-bogidik megisdae, debayobi, an bogidik megisad, an yakirgus-megisad. ¡Andi goe-mam-nusar-bogidik-megisdaedyob gued!
PSA 131:3 Israel-dulemar, Bab-Jehováʼgi emi-ibad-akale, degisadegu bensuli be gumala.
PSA 132:1 We-namaked, Jerusalénʼse-nakwe-nadapir, namakleged. Bab-Jehová, David be ebinsao, e-bukib-binsaedba-wile-itoged bela be ebinsao.
PSA 132:2 Bab-Jehová, David bega-ibmar-ise-sogar-imaksad be ebinsae, Jacob-e-Bab-Dummad-Bur-Birigined bega ibmar-imakoye-sogsad be ebinsae, deun, David weyob sogsad:
PSA 132:3 “An-negse an nag-obiosulid, bipisaale an gasgi obunnogosulid,
PSA 132:4 gabemai an saosulid, wis-ibya-muruu an imakosulid.
PSA 132:5 Bab-Jehováʼga-neg-amiedse, an deyob guoed. Jacob-wagan-e-Bab-Dummadga-neg-amiedse, an deyob guoed.”
PSA 132:6 Anmar Efrata-neggweburgi-gudigu, Bab-Dummad-Dulemarbo-Igar-Mesisad-Ulugi dulemar-sunmake an itosmalad. Geb anmar Quiriat-Yearimʼgi Ulu-amismalad.
PSA 132:7 Geb anmar sogdemalad: “Anmar Babse-goled-negse namar, e-asabin sindigale anmar signamar.”
PSA 132:8 Bab-Jehová, be-obunnoged-negse be dage, be-Ulu-gandikidmala be asega dage.
PSA 132:9 Be-dule-irwa-bese-gormalad, e-mor-yomalayobi, igar-innikigwad imakmar. Bega-innikigwadba-nanadimalad, weligwaledba namakmar.
PSA 132:10 Be, be-mai-David-sabedbali, be-nuggi-nugsalegaled, melle wagar-biriar be dako.
PSA 132:11 Bab-Jehová Davidʼga ibmar-ise-sogar-sogsa-gusadi, bar osulogosulid. Weyob ega sogsad: “Be-wagan-gwensak beyob reyga an omesoye.
PSA 132:12 An bemarbo-igar-mesisad-sogedba be-wagan nanaele, an-igar-mamaidgi-an-e-odurdakoedba nanaele, e-mimmigan reyga degibi megmarmogoed.”
PSA 132:13 Ar Bab-Jehová, Sión-yala-nug-imaksad, egi-megega abesad.
PSA 132:14 Weyob sogsad: “We, an-obunnoged-negga degisadegu gudii guoed. Wegi an-ologana an sioed, ar an deyob abeged.
PSA 132:15 E-mas gatik-obinebaka-merguega an imakoed, e-dule-wilegana masgi an oimmogoed.
PSA 132:16 Amba deyob, e-dule-irwa-Bab-Dummadse-gormaladga bendakleged-mola an ega yooed, e-dule-nuegan, weligwaledba namakmaloed.
PSA 132:17 ”Wegine, David-e-gangued-gannar-nikuega an imakoed. An-nuggi-nugsalegaled gwallu-meegwadyob negsemai-guega an imakoed.
PSA 132:18 E-isdarmalad, binged-dummad-nikuega an imakoed. Davidʼdina e-ologurgin-dakarmakaled yooed.”
PSA 133:1 We-namaked, Jerusalénʼse-nakwe-nadapir, namakleged. David we-namaked narmaksad. ¡Ibibayobi, gwenatigwale-ambikued nuedi! Ibibayobi, gwenatigwale-bulakwa-ambikued yeer-itolege.
PSA 133:2 Olivo-gwallu-nuedyobi gued, Aarón-nonogi eolesale, e-sigase aryoddaed, geb e-mor-naga-dukuse aryoddaed.
PSA 133:3 Hermón-yalagi-dii-bomieyobi gued. We-dii Sión-yalase bomied. Bab-Jehová weyob dulemar-gwenatigwale-bukwadgi, nued binsadaed, suitii we-napneggi-gudii imaked.
PSA 134:1 We-namaked, Jerusalénʼse-nakwe-nadapir, namakleged. Bab-Jehová-e-nug bela bemar odummomar, Bab-Jehováʼga-arbadimalad, Bab-Jehová-nug be odummomar. Bemar mutikidba Bab-Jehová-neggi-bukwamalad, bemar Bab-Jehová-e-nug be odummomar.
PSA 134:2 Bab-Dummadse-golesokalile, Bab-Dummadse-goled-negsik be-argan onakmar, Bab-Jehová-e-nug odummomar.
PSA 134:3 Bab-Jehová-napneg-nasiksad, Bab-Jehová-nibneg-nasiksad. Sión-yar-akale, begi nued binsamarsun.
PSA 135:1 ¡Aleluya! ¡Bab-Jehová-nug odummolesun! ¡Bab-Jehová-e-nug odummomala! Bab-Jehová-e-maimar, Bab-Jehová-nug odummomala.
PSA 135:2 Bab-Jehová-e-neggi-gudidimalad, ¡Bab-Jehová-e-nug odummomala! Anmar-Bab-Dummad-neg-imbagi-gudidimalad, Bab-Jehová-nug odummomala.
PSA 135:3 Bab-Jehová-nug odummomala, ar Bab-Jehováʼdi, dule-nuedid. E-nuggi-namaklegedgi namakmala, ar Bab-Jehováʼdi nued-binsaedgi dulemar-bendakedid.
PSA 135:4 Ar Bab-Jehová Jacob-wagan-egadga-guega susad. Israel-dulemar na egadga imaksad.
PSA 135:5 Nue an wisid, Bab-Jehová, dule-dummadid. Ibmar-bab-dummadyob-imaklemaladba anmar-Bab-Dummad bur bule dule-dummadid.
PSA 135:6 Bab-Jehová bela nibneggi, napneggi, muu-billigangi, degi, muu-billigan-wila-dummagangi e-ibmar-abeged imaked.
PSA 135:7 Bab-Jehová neg-oagnakwiardaed, dii-owiegala mar-odakarmakardaed, burwa e-galugi-bukwadgi barmiardaed.
PSA 135:8 Bab-Dummad Egipto-dulemar-e-machi-sailaginmalad oburgwisadid. Dulemarse-bakale, ibmar-durganse-bakale, oburgwisadid.
PSA 135:9 Egipto-dulemar, Bab-Dummad be-abargi Faraónʼga, bela e-maimarga oyosad, ibmar-wilubgan-dummagan, ibmar-dakledisurmalad oyosad.
PSA 135:10 Bab-Jehová dulemar-yar-baid-baidgi-bukwad bukidar obelosad. We-reymar-gandik-mamaid-oburgwisbalid:
PSA 135:11 Amorreo-e-rey-Sehónʼye-nugad, Basán-e-rey-Ogʼye-nugad, bela reymar-Canaán-yargi-mamaid obelosad.
PSA 135:12 Bab-Dummad we-reymar-e-yarmar mimisad, e-Israel-dulamarga mimisad.
PSA 135:13 Bab-Jehová, be-nug degisadeguad. Bab-Jehová, dulemar degisadegu be-ebinsadii gumaloed.
PSA 135:14 Bab-Jehová na e-dulamarga igar nabogoed, e-maimar-wiledakoed.
PSA 135:15 Dulemar-yar-baid-baidgi-bukwamalad na e-bab-dummadyob-ibmar-imakbukwadi, orgi sobaled, manigi sobaled. Dulemar na e-argangi sobsa nanaed.
PSA 135:16 We-ibmarmar gaya-nikamalanad, degite, geg sunmakmalad. Ibya-nikamalanad, degite, ibmar-daksurmalad.
PSA 135:17 Uaya-nikamalanad, degite, ibmar-itosurmalad, deginbali, bunnosurmarbalid.
PSA 135:18 E-sobmalad, deyob gumarmogad, bela a-ibmargi-bengusurmalad deyob gumarmogad.
PSA 135:19 Israel-dulemar, ¡Bab-Jehová-nug odummomala! Aarón-wagan, ¡Bab-Jehová-nug odummomala!
PSA 135:20 Leví-wagan, ¡Bab-Jehová-nug odummomala! Bab-Jehová-dobee-nanadimalad, ¡Bab-Jehová-nug odummomala!
PSA 135:21 Sión-akale, Bab-Jehová-nug odummomala. Bab-Jehová, Jerusalénʼgi maid. ¡Aleluya! ¡Bab-Jehová-nug odummolesun!
PSA 136:1 Bab-Jehová-e-nug odummomar, ar Bab-Jehová, dule-nuedid. Ar e-sabguedi, degisadeguad.
PSA 136:2 Bab-Dummadbi-wargwenna-maid-e-nug odummomar. Ar e-sabguedi, degisadeguad.
PSA 136:3 Bab-Dummad-Bela-Gangued-Nikad-e-nug odummomar. Ar e-sabguedi, degisadeguad.
PSA 136:4 Bab-Dummadbi ibmar-gegerdaklemalad imaked. A-e-nug odummomar. Ar e-sabguedi, degisadeguad.
PSA 136:5 Bab-Dummad e-ibmar-wisidbali, nibneg-nasiksad. A-e-nug odummomar. Ar e-sabguedi, degisadeguad.
PSA 136:6 Bab-Dummad diigine napneg nasiksad. A-e-nug odummomar. Ar e-sabguedi, degisadeguad.
PSA 136:7 Bab-Dummad gwallu-dummagan nasiksad. A-e-nug odummomar. Ar e-sabguedi, degisadeguad.
PSA 136:8 Bab-Dummad dad-ibeler-neg-ibgi-gaega imaksad. A-e-nug odummomar. Ar e-sabguedi, degisadeguad.
PSA 136:9 Bab-Dummad nii-mutik-gaega nasiksad, niisgwamar neg-mutikid-gaega imaksad. A-e-nug odummomar. Ar e-sabguedi, degisadeguad.
PSA 136:10 Bab-Dummad, Egipto-dulemar-e-masmala-sailaginmalad oburgwisad. A-e-nug odummomar. Ar e-sabguedi, degisadeguad.
PSA 136:11 Bab-Dummad, Egipto-yargi Israel-dulemar onosad. A-e-nug odummomar. Ar e-sabguedi, degisadeguad.
PSA 136:12 Bab-Dummad gangued-nikadba e-sakwa oyogwichigusad, e-surgan oyogwichigusad. A-e-nug odummomar. Ar e-sabguedi, degisadeguad.
PSA 136:13 Bab-Dummad, Demar-Ginnidye-nugad egasad. A-e-nug odummomar. Ar e-sabguedi, degisadeguad.
PSA 136:14 Bab-Dummad, Israel-dulemar-demargi-obakega imaksad. A-e-nug odummomar. Ar e-sabguedi, degisadeguad.
PSA 136:15 Bab-Dummad, Demar-Ginnidye-nugadgi we-Faraón, e-sorda-bila-onomaladmala, ogundisad. A-e-nug odummomar. Ar e-sabguedi, degisadeguad.
PSA 136:16 Bab-Dummad, e-dulamar-nega-dulesulidganba niargusad. A-e-nug odummomar. Ar e-sabguedi, degisadeguad.
PSA 136:17 Bab-Dummad, rey-nuga-nikamalad oburgwisad. A-e-nug odummomar. Ar e-sabguedi, degisadeguad.
PSA 136:18 Bab-Dummad, rey-gandikmalad ogilosad. A-e-nug odummomar. Ar e-sabguedi, degisadeguad.
PSA 136:19 Bab-Dummad, Amorreo-e-rey-Sehón oburgwisad. A-e-nug odummomar. Ar e-sabguedi, degisadeguad.
PSA 136:20 Bab-Dummad, Basán-e-rey-Og oburgwisad. A-e-nug odummomar. Ar e-sabguedi, degisadeguad.
PSA 136:21 Bab-Dummad, we-reymar-e-yarmar e-dulamarga uksad. A-e-nug odummomar. Ar e-sabguedi, degisadeguad.
PSA 136:22 Bab-Dummad, e-mai-Israel-dulemarga yar uksad. A-e-nug odummomar. Ar e-sabguedi, degisadeguad.
PSA 136:23 Bab-Dummad, anmar-nue-yegus-gunanaidgi anmar-iedsulid. A-e-nug odummomar. Ar e-sabguedi, degisadeguad.
PSA 136:24 Bab-Dummad, anmar-isdarmaladgi anmar-ollor-imaksad. A-e-nug odummomar. Ar e-sabguedi, degisadeguad.
PSA 136:25 Bab-Dummad, bela ibmar-durganga mas-ukmaid. A-e-nug odummomar. Ar e-sabguedi, degisadeguad.
PSA 136:26 ¡Bab-Dummad-Nibneggi-Maid-e-nug odummomar! Ar e-sabguedi, degisadeguad.
PSA 137:1 Babilonia-diwar-naba anmar ambakudapdaed. Agi, anmar Siónʼgi-binsabukwadba, bobukwadaed.
PSA 137:2 Anmar, anmar-gar-arpa sapi-Sauceʼye-nugadgi, an nasikdamalad.
PSA 137:3 Dule-anmar-gasa-sesmaladi, anmarga sokardaed, namakmarye. Dule-anmar-ibe-ibmar-susmaladi, anmarga sokardaed, anmarde wergumarye. Anmarga sokardaed: “Be-Sión-yargi-namaklemaladi, be anmarga namakye.”
PSA 137:4 ¿Wede igi anmar yar-baidgi Bab-Jehováʼga namakosunna?
PSA 137:5 Jerusalén-neggwebur, an be-iedele, an argan mer bar gar-ogolega gusun.
PSA 137:6 Jerusalén-neggwebur, an be-iedele, an-wergudiidba bar begi an binsasulile, geg bar namake an gusun.
PSA 137:7 Bab-Jehová, Babilonia-dulemar Jerusalénʼgi-nakwisgu, Edom-dulemar-sognanai-gusad, be insao: “¡Jerusalén-neggwebur bela be obelomarye! ¡Swanga be nasikmarye!”
PSA 137:8 Babilonia-neggwebur, ibagwengi be bibisgelemogoed. Bemar anmar-imaksayob be imaklemarmogoed. Dule-deyob-bemar-imakoedi, egi nued binsalegoed.
PSA 137:9 Dule be-mimmigan-gani akwagi-sabsur-omukuoed. Dule-deyob-be-mimmigan-imakoedi, egi nued binsalegoed.
PSA 138:1 David namakleged narmaksad. Bab-Jehová bela-bela an-ulubgi an be-nug odummoged. Baliwiturmar-asabin an bega namakoed.
PSA 138:2 Bese-gorleged-neg-islidikid-siidsiki an dulluu napagi sigoed. Be-sabed-dummarba-maidbali, sogedba be ibmar-imakmaidbali, an be-nug odummogoed. Bab-Dummad, be ibmar-imakoye-sogsad, bela ibmar-birgi, sogedba be imaksad. Degidba be-nug na be ogannosad.
PSA 138:3 Bab-Dummad, an bese gochagua, be an-abin-imaksad, be an-niga ogannononikid.
PSA 138:4 Bab-Jehová, bela-reymar-we-napneggi-mamaid, bela be-sunmaked-itomaloedba, be-nug odummodmaloed.
PSA 138:5 Bab-Jehová-Igar-Mamaidgi namakdemaloed. Ar Bab-Jehová-e-gargangued dummarba gued.
PSA 138:6 Bab-Jehová, dule-biriginedid. Bab-Dummad, dule-na-san-dummarba-imaksulidgi, nued binsaed. Bab-Dummad, dule-na-san-dummarba-imakdiiddina, obaned.
PSA 138:7 Amba an bonigan-abalagi-gudidibe, amba dula-gudii be an-imakoed. Bab-Jehová, an-isdarmalad-urwedgi, be an-bendakoed. Be-ganguedba be an-bendakoed.
PSA 138:8 Bab-Jehová, angine bela ibmar-imakoye-sogsad imakedsegad. Bab-Jehová, be-sabgued gege gwaged, degisadeguad. Bab-Dummad, be an-obinnissoggu, mer wargwen be an-meto.
PSA 139:1 Namakmalad-e-iduedga narmaklesad. David we-namaked narmaksad. Bab-Jehová, be an-baramied. An-gudiid bela be wisid.
PSA 139:2 Sana an sigoe, sana an gwisguoe, be nue-wisimakaled. An begi dikasur-gudi-inigwele, bedi an-binsaed nue-wisimakaled.
PSA 139:3 An-nanaed, an-obunnoged, be nue-wisimakaled, bela an-igarmar be nue-wisid.
PSA 139:4 Bab-Jehová, ar amba yoo an ibmar-soge, bato bedi bela wisdaed.
PSA 139:5 Bela-belad be an-irwa gwisgudiguad. Be-argan-yaurgi be an-sediid.
PSA 139:6 Weyob be ibmar-wisidi, an bela-bela geger-itoged, ¡Bela-bela be ibmar-wisidi, an aku-itoged!
PSA 139:7 Bab-Dummad, ¿Ar bia be-Burbagi an banguoe? ¿An bia begi wakinnoe?
PSA 139:8 Ar an nibnegse naele, bedi agi maid. Ar an burgwarmalad-meged-galuse an naele, bedi agi gudibalid.
PSA 139:9 Ar an dad-nakwedsik naeyesogele, ar an magatiba naeyesogele,
PSA 139:10 amba be agine an-idu gudiid, be-ganguedgi be an-sedii guoed.
PSA 139:11 An sogdibe: Negsichid an-odukuoye, neg-meegwad anga neg-mutikidga guoye, an binsa-sogsaled.
PSA 139:12 Ar begardi negasichid negsichidga gusulid, begardi neg-mutikid neg-ibginedyob gued. Begardi negasichidi, neg-meegwadi, emarbi gued.
PSA 139:13 Bab-Dummad, bee be bela an-abagangi-ibmar-bukwad obinnisad. Bee be, sapidukugi an-mesisad.
PSA 139:14 Doggus-nuedye an bega soged, be-ibmar-obinnisadi, andi geger-daked. Be ibmarmar-imaksadi, geger-dakleged, ar we-ibmar an nue-wisid.
PSA 139:15 Ise-dukuale, an-abagangi arbalenaigu, an-garmardi begi odukulessulid. Ise-dukuale, an sapidukugi-mai angi-arbalenaigu, anga abgan-dubagan gwadilenai gusad.
PSA 139:16 An sapidukugi-maigua, bedi an-daksad. Amba yoo an we-napnegse aidedage, birgabigwa an dula-gudii guoe, bela bato be-gardagi narmakar maid.
PSA 139:17 Bab-Dummad, be-binsaed ibiyobi anga doggus-nued gue. ¡Be-binsaedi, ibiyobi mergue!
PSA 139:18 Ar be-binsaed an ebisye-sogele, bur bule ukubba mergueled. Ar an be-binsaed-ebised an obelo-sogele, amba be an-walik gudiiled.
PSA 139:19 Bab-Dummad, dule-isganamar be oburgwe. Dule-ablis-eomalad, angi be obangue.
PSA 139:20 Wemar-begi-dodoar-sunmakdimaladi, binsarsunna begi gwisgumalad.
PSA 139:21 Bab-Dummad, dulemar-isdar-be-daked, ¿an isdar-daksurmo be insae? Dulemar-be-abingasulid, ¿an sae-daksurmo be insae?
PSA 139:22 An bela-bela isdar-daked, an-isdarmaladga gunonimalad.
PSA 139:23 Bab-Dummad, be an-baramie, an-gwage-ulub be dake, be an-wilubdake, be an-binsaed dake.
PSA 139:24 An igar-isganaba nadapi be an-dakele, geg-igar-berguedba be an-sede.
PSA 140:1 David namakmalad-e-iduedga namaked narmaksad. Bab-Jehová, dule-isganamargi be an-ollor-imake. Sabesur-dule-imakmalad-idu be an-odukue.
PSA 140:2 Ar unnila e-gwagegi, ibmar-isgana-imakedginbi binsadii daed. Bane-bane urwed-onodii daed.
PSA 140:3 Naibe-nued-gangueyobi, e-gwabin-duku gued. Naibe-nued-e-gichi-boniyobi, e-sunmaked sedimalad.
PSA 140:4 Bab-Jehová, dule-isganamar-e-gangued-idu be an-odukue. Sabesur-dule-imakmaladgi be an-ollor-imake, ar an-ogalakuedgi binsadidamalad.
PSA 140:5 Dule-san-dummarba-imakmalad, an-yardakmalaga, an-idu dub nasiksamalad. An-idu igargi saki nasiksamalad. An-nanaedgi an-idu yardakleged-galu osismalad.
PSA 140:6 An Bab-Jehováʼga sogsad: “Be an-Bab-Dummadid. Bab-Jehová, wilesakwaa an bese-goledi be an-itoge.”
PSA 140:7 Bab-Jehová-Dule-Dummad, be an-Bab-Dummad-bur-gandikidid. Bila-onolegedgi be an-bendakedid.
PSA 140:8 Bab-Jehová, dule-isganamar e-ibmar-imakbiedi, melle imakega be imake. Melle na san-dummarba-itomalaga be imake, melle e-igarmar-nasgumai be imake.
PSA 140:9 Bab-Dummad, dule-an-balegindimalad, an-wiogega-igar-isgana-amismalad egi dukin-aibinega be imake.
PSA 140:10 Wemargine, sogun-ginnitibiid babatega be imaksun. Soo-yagine balimelledega be imaksun. Melle bar noega yaa-matusulidgi-argwanega be imaksun.
PSA 140:11 Dule-geg-gwabin-duku-bargaed, napneggi gudigu guosulid. Sabsur-dule-imakmalad, boni-dummaganse obelolesun.
PSA 140:12 An wisid, Bab-Jehová, dule-wile-itodiidga igar naboged, dule-ibmarbina-sogdimalad, Bab-Dummad bendaked.
PSA 140:13 Dule-nuegan, be-nug-odummomaloed. Dule-innikimalad be-walik-gudii gumaloed.
PSA 141:1 David, we-namaked narmaksad. Bab-Jehová, sabsuli an bese goled: ¡Gwae be an-bendakdage! An bese gotele, be an-itoge.
PSA 141:2 An-bese-goledi, ina-wawadikid-nakwemaidaeyob bese nakwemai gusun. An-argan-bese-onakwedi, sedo-ibmar-ogumakar-ukledaeyob be dake.
PSA 141:3 Bab-Jehová an-gwabinduku-bargaed be an-imake. Bab-Jehová, mer ibmar-yogasaar-sunmaked be an-imake.
PSA 141:4 Melle an-gwage ibmar-isganagi-binsaega be imake, dulemar-ibmar-isgana-imakbiedba melle akaed be an-imake. Dulemar-ibmar-isgana-imaked-abargi, melle ibagi-masgulleged-gunnega be an-imake.
PSA 141:5 Dule-ibmar-innikii-imaked an-bibyoye-sogele, sabsur ibmar anga sogele, we, ibmar-nued anga imaknaid. Dulemar-isgana-e-gwallu-wawamar, an-nonogi, mer eolegega be imako. Bab-Dummad, mer an dule-isgana-e-ibmar-isgana-imakedgi-yolegega, an bese gornai guoed.
PSA 141:6 E-dummagan-negsemamaid akwasaila-birgi-gwichi gulluse barmelledmalale, agi geb itomaloed, an-ibmar-sogsadi, napiragwad.
PSA 141:7 Geb sogdemaloed: Anmar-garmar, napa-imules-argaarmaiyobi, anmar-garmar neg-uangi omiledoed.
PSA 141:8 Bab-Jehová-Dule-Dummad, bebi an-bendakedid. Bendakleged beginbi an amied. ¡Melle dulemar an-oburgwed be imako!
PSA 141:9 Dulemar an-idu dub-nasiksamaladgi mer aimukued be an-imako. Dule-isganamar yamo dule-yardakega-ibmar-imakmaladgi, melle yardakleged be an-imako.
PSA 141:10 Dule-isganamar na dukin e-sakigi-argwaned be imake. Bab-Dummadye, be an-bendake. Mer ese galegega be an-imako.
PSA 142:1 David we-namaked-Masquilʼye-nugad narmaksad. David akwasailayaba-dukusigu, Bab-Dummadse gornai gusad. Bab-Jehováʼse ise-gollar bendakleged an egised, Bab-Jehováʼse ise-wilegar an e-sabgued egisnaid.
PSA 142:2 Bab-Dummadga naibi-itodiid, an sogoed, an-sulibinsa-itodiid, an ega sogoed.
PSA 142:3 Bab-Dummad, an geggus-itogele, bato be an-daksabinnedaed. An bia nadele, abala dulemar an-yardakega, an-iduar ibmar-sisadamalad.
PSA 142:4 An-argan-nuedsik an atakdele, dule-an-bendaked wargwensaale gwen daklesurdaed. Neg-dukued an sulid, dule-wargwensaale angi binsasulid.
PSA 142:5 Bab-Jehová, be-an-bendakegala, an bese gochad. An bega sogsad: “Bebi unnila an-bendaked maid. We-napneggi dulemar-bukwad-abargi bebi unnila anga gudiid.”
PSA 142:6 Bab-Dummadye, an-gornaid be itoge, an sulibinsa itoged. An-bareginnanamaladgi be an-bendake, ar anba bur bule gangumalad.
PSA 142:7 An be-nug-odummogega, wegi-an-galessiidgi be an-onodage. Ar be-sabed be anga oyononikile, dule-inniki-gudimalad weligwar an-ebiris ambikunonimaloed.
PSA 143:1 David, we-namaked narmaksad. Bab-Jehováʼye, an bese-goled be itoge, an-wilesakwaa-goled, be itoge. Be-ibmar-soged-imakedba, be an-abinsae. Be-Igar-innikigwadba, be an-abinsae.
PSA 143:2 Dummad, mer be anga igar-itoge. Ar be-asabindi, dule-wargwensaale na nuedye sogosulid.
PSA 143:3 An-isdarmalad an-oburgwebied, napayala bikiin an-metemalad. Dule-dikasurgus-burgwismaladyob negasichidgi-megega an-imaksamalad.
PSA 143:4 Bar an nue-bunnosurgusad, an-gwage bogiled an-itoged.
PSA 143:5 Epenne ibagan-nasmalad an ebinsaded. Belagwable be-ibmar-dummagan-imaksadgi an binsaded. Be-ibmarmar-imaksad, nue an ebinsaded.
PSA 143:6 An-argan an besik oyoged, ar igi napa-dinnagwad dii-abedae, deyobi, an bebina soged.
PSA 143:7 Bab-Jehová, gwae be an-abinsae, ar an geg-sagusad. Be-wagar mer be angi odukue, ar degiile, dule-napa-yaba-digarmaidyobi, an guoed.
PSA 143:8 Wakudaryalaba be-sabgued be anga oyoge, ar andi begi bensulid. Ar andi bese goled, be anga oyoye, ibu-igarba an naoe.
PSA 143:9 Bab-Jehová, an-isdarmaladgi be an-ollorsae, ar andi begi dukued amied.
PSA 143:10 Be-sogedba-ibmar-imakedgi be an-odurdake, ar be an-Bab-Dummadid. Be-Burba-nued neg-bonigan-satedba an-idue.
PSA 143:11 Bab-Jehová, be-nug-ular, dula-gudii be an-imake. Be-Igar-innikigwad-ular, surbinsa-itogedgi be an-onoge.
PSA 143:12 Be-dule-wiledaked-ular, an-isdarmalad be ogiloge. Bela an-balengindimalad be obeloge, ar andi be-mai gued.
PSA 144:1 David, we-namaked narmaksad. Bab-Jehová-nug odummolesun, an-akwasailaga guedid. Bila-onoged-idu, an-surgan-ogannogedid, urwed-idu, an-arganmar-ogannogedid.
PSA 144:2 Bab-Jehová, an-sabguedid, an-edarbedid, bonigan-idu an-odukuedid, bonigangi an-ollor-imakedid, an-sigu-abgaedyob an egi dukuedid, an egi bensulid-nikadid, an-urbaligwa-nanaega dulamar-imakedid.
PSA 144:3 Bab-Jehová, ¿wede, dule ibusunna, egi be binsanonigu? ¿Wede, dule ibusunna, be akwenonigu?
PSA 144:4 Ar dule unnila gayagi buu-imaklegaledid. Ar e-ibagan unnila negsichigwad-ukiar-nasdaeyobid.
PSA 144:5 Bab-Jehová, be-mogir be egae, be aidedage. Yalamar be ebuge, waa-obupurmake.
PSA 144:6 Mala-ibyemakale be odege, dule-isdardakmalad be oaisakie, be-sigumala egi be mie, dule-isdarmalad-oduurmakega be imake.
PSA 144:7 Nibneg-akale, be-gangued be anse oyoge, dii-wiladgine be an-onoge, dule-isganamargi be an-ollor-imake.
PSA 144:8 Ar sunmakdemalale, gakansaddamalad, argan-onakwidmalale, nabiridyob ibmar-ise-sogar imakdamalad.
PSA 144:9 Bab-Dummad, na begala namaked-gwapidgi an namakoed. Gar-arpa-dub-giambe-nikadba (10) an bega namakoed.
PSA 144:10 Bila-onolegedgi be reymar-onakwemaidid. Be-mai-David-melle-es-suidgi-burgwega be imakedid.
PSA 144:11 Be an-bendake, dule-isganamargi be an-ollorsae. Ar sunmakdemalale, gakansaddamalad, argan-onakwidmalale, nabiridyob ibmar-ise-sogar imakdamalad.
PSA 144:12 Anmar-mimmigan, e-dungumaidba sapimar-binnasuli-dungumaiyob be imako. Anmar-bunamala, reyneg-e-buarmar-sobarmaladyob, yeerdaklege be imako.
PSA 144:13 Anmar-ibmar-gwag-sabomaladgi bukidar masmar-akar-akar ena-ena bukuega be imake. Anmar-sibad-wawaadmar, mili-miliba-omelomai (1,000-1,000) be imake. Anmar-nainugi, mili-miliba-bukuega be imake.
PSA 144:14 Anmar-moli-bebe-nikad-omegan, obargudiguega be imake. Mileged-ibagan-iduar, melle milegega be imako. Melle anmar-neg-imbabali, bar dule, suli-suli-itogedba-gordiguega be imako.
PSA 144:15 Neggwebur we-ibmarmar bela nikale, egi-nued-binsalesdo. Neggwebur, Bab-Jehová e-Bab-Dummadga-imakdiile, egi-nued-binsalesdo.
PSA 145:1 Bab-Dummad-nug odummomar. David, we-namaked narmaksad. An-Bab-Dummad, an-Rey, be-nug an odummogoed. Degisadegu, be-nuggi nued sunmakdigu an guoed.
PSA 145:2 Bane-bane degisadegu, be-nug-odummodii an guoed.
PSA 145:3 Bab-Jehová, Dule-Dummadid. E-nug nue-odummolegergebed. E-nug-dungued dule magar itogosurguoed.
PSA 145:4 Bab-Dummad, babgan be-ibmar-imaksamaladi, e-mimmiganga sogoed. Be-ibmar-dummagan-imaksamaladi, e-mimmiganga sogoed.
PSA 145:5 Be-ganguedgi, be-yeerdaklegedgi, an sunmakdii guoe. Be-ibmar-dummagan-imaksamaladgi, an binsadii guoe.
PSA 145:6 Be-ibmar-dummagan-imakedgi dulemar, sunmakmaloed, be dule-dummad-guedgi, an sunmakoe.
PSA 145:7 Be-sabgued-dummarba-nikadgi, sunmakmaloed, be-ibmar-inniki-imakedgi, namakmaloed.
PSA 145:8 Bab-Jehová wile dulemar-dakdaed, nue dulemar-sabdaed. Bab-Jehová wissur gwae-gwae urwed, nue dulemar-sabgumaid.
PSA 145:9 Bab-Jehová bela dulemargi nueddaed. Bela na e-ibmar-imaksad nue-sabed.
PSA 145:10 Bab-Jehová, bela be-ibmar-obinnisadi, be-nug odummosunna. Be-sordamar-napiramalad be-nug odummomarmosunna.
PSA 145:11 Be gannarba-negsemaidgi, sunmakmarsunna. Be-ganguedgi sunmakmala.
PSA 145:12 Adi, dulemar be-ibmar-dummagan-imaksad wisgumalaga, be-yeerdakleged, be-gangued wisgumarbaligar.
PSA 145:13 Be-negsemaidi, degisadeguoed, be-neg-ganikidi, berguosulid.
PSA 145:14 Bab-Jehová dule-wis-gwatirisdibe, dule-ogwisdaed, dule-nollo-itomalad ogannodaed.
PSA 145:15 Bab-Jehová bela ibmarmala ega be mas ukega bese atakbubuk-naed. Ega be iba-sekalaa masgunned ukmaid.
PSA 145:16 Nalledginsuli ega be mas ukmaid. Bela ibmar-dulaga mas unnitibali be ukmaid.
PSA 145:17 Bab-Jehová, bela-be-ibmar-imakedi, innikigwadbi imaked. Bela nue-sabedgi be ibmar imaked.
PSA 145:18 Bab-Jehová, dule-ese-napiragwadgi-gordimalad-bendakega egi walikaa gudidaed.
PSA 145:19 Bab-Jehová, dule-e-sabee-gudimaladga ibmar-abemalad ukdaed. Amar-ese-ibmar-egisedi ega ukdaed.
PSA 145:20 Bab-Jehová, dule-e-sabgudimalad-edarbedii daed. Ar dule-isganadi bela obelogoed.
PSA 145:21 Bab-Jehová, an be-nugdi ogannosunna. Bela ibmarmar be-nug ogannomarmosunna. Degisadegu, be-nug ogannodii gumarsunna.
PSA 146:1 ¡Aleluya! ¡Bab-Dummad-e-nug-odummomarsun! Bab-Jehová, an-gwagegi an be-nug odummoged.
PSA 146:2 An dula-gudiidgi Bab-Jehová-nug an odummogoed. Bab-Dummadga-namaklegedgi an Bab-Dummadga namakoed.
PSA 146:3 Mer girmar-dummagangi be bensulid-nika guo, bipisaale mer dule-gwensakgi be bensulid-nika gubalo, ar wemargi bendakleged-igar maisulid.
PSA 146:4 Ar we-dulemar bergunonikile, gannar napaga binnidmaloed. Bela na ibmar-imako-sogsamalad, a-ibagi berguus ega naoed.
PSA 146:5 Dule Jacob-e-Bab-Dummadgi bendaklediile, we-dulegi nued-binsalesad. E-Bab-Dummad-Jehováʼginbi bensuli gudiid.
PSA 146:6 Ar Bab-Dummad napneg-nasiksadid, nibneg-nasiksabalidid. Demar-naidi, bela-egi-ibmar-bubukwadi urbisbalid. Bab-Dummad ibmar-imakoye-sogsad, sogedba imaked, gakansamaisulid.
PSA 146:7 Bab-Jehová dule-sabsur-imakledimaladga sogedba ega igar naboged. Dule-ukud-itodimaladga masgunned uked. Dule-gales-bubukwad onobalid.
PSA 146:8 Bab-Jehová dulemar-ibyasulid nabir-atakega imaked. Dule-yore-nanamalad inniki-nanaega imaked. Bab-Jehová dule-innikidamalad nue-sabed.
PSA 146:9 Bab-Jehová Israel-dulesurmalad nue-akwed. Dule-babgansuli-gudimalad nue-bendakbalid. Ome-ei-sui-burgwisgudiid nue-bendakbalid. Bab-Dummad dule-isganamarga igar obured.
PSA 146:10 Sión-dulemar, be-Bab-Jehová degisadegu, negsemai gusun. ¡Aleluya! ¡Bab-Dummad-nug odummomarsun!
PSA 147:1 ¡Aleluya! Bab-Jehová-nug odummolesun. Ar anmar, anmar-Bab-Dummadga-namaked ibnuedid. E-nug-odummoleged yeer-itolegedid.
PSA 147:2 Bab-Jehová Jerusalén-neggwebur gannar sobed, Israel-dulemar-e-yargi-onolesmalad gannar senonikoed.
PSA 147:3 Bab-Dummad, dule-gwage-nunmak-itodimalad nudaked. E-wile-itodiid baisur-itoge imaked.
PSA 147:4 Bab-Jehová bela wisid igi mergu niisgwamar nai, bela ega nug nasiksad.
PSA 147:5 Anmar-Bab-Jehová, dule-dummadid, e-gangued bipisurbalid, e-ibmar-wisid degisadeguad.
PSA 147:6 Bab-Jehová dule-wilegana bendaked. Dule-isgana-e-nugdi bipii imaked.
PSA 147:7 Bab-Jehováʼga yeer-itogedgi namakmala. Anmar-Bab-Dummadga gar-arpaʼba namakmala.
PSA 147:8 Bab-Dummad, nibneggi mogirmar nasiked, napaneggi dii owied, sapurgi gaganmar onied.
PSA 147:9 Bab-Dummad, ibmar-durganga mas uked. Sikwisichii-mimmigan mas-abealile, ega mas ukbalid.
PSA 147:10 Bab-Jehová moli-e-ganguedgi yeer-itosulid, dule-ibmar-bursur-imakedgi yeer-itosurbalid.
PSA 147:11 Bab-Jehová, e-nug-odummomaladgi yeer-itoged, e-sabgued-bensurmaladgi yeer-itobalid.
PSA 147:12 Jerusalén-neggwebur, Bab-Jehová-nug odummoge. Sión-yar, be Bab-Dummad-nug odummoge.
PSA 147:13 Bab-Jehová be-yawagak-bargamalad-e-suarmar bega ogannosad. Dule-be-yargi-gudidimaladgi nued-binsalesad.
PSA 147:14 Bab-Dummad be-yargi neg-bogidikid nasiked, orosgi-dakleged-trigo-bur-nuedgi immerba be-imaked.
PSA 147:15 Bab-Dummad napnegga ibmar-soged, e-ibmar-soged yog-imakar imakledaed.
PSA 147:16 Bab-Dummad ubsan-daklegedyob boo-sibudiki obated. Buru-bateyob boo-gwamakaled obated.
PSA 147:17 Bab-Dummad dii-gwamakaled akwanyob obated. Dii-gwamakaled-e-dambed, ¿doa baisur-itogoe?
PSA 147:18 Bab-Dummad-e-ibmar-sogedba dii-gwamakaled diree imaked. Burwa-golega imaked, geb dii gannar suurmakega imaked.
PSA 147:19 Bab-Dummad Jacob-waganga e-gayaburba uksad, Israel-dulemarga na E-Igar-Maid, E-Igar-Inniki-imaklemalad, uksad.
PSA 147:20 Bab-Dummad dulemar-yar-baid-baidgi-bukwamaladdi, deyob imaksasulid. Amardi, bipisaale E-Igar-Mesisad wisgussurmalad. ¡Aleluya! ¡Bab-Jehová-nug odummolesun!
PSA 148:1 ¡Aleluya! ¡Bab-Jehová-nug odummolesun! Nibneg-akar, Bab-Jehová-nug be odummomar. Nibneg-matusulid-akar, Bab-Jehová-nug be odummomar.
PSA 148:2 Bela Bab-Jehová-baliwiturmar, Bab-Jehová-nug odummomar. Bela Bab-Jehová-sorda-bilagi-urwemalad, Bab-Jehová-nug odummomar.
PSA 148:3 Dad-ibeler, Bab-Jehová-nug odummosun. Nii, Bab-Jehová-nug odummosun. Niisgwamar, Bab-Jehová-nug odummomar.
PSA 148:4 Bela mogirmar-ugakaase-nanaid, Bab-Jehová-nug odummomar. Diimar-mogirmar-niba-nanaid, Bab-Jehová-nug odummomar.
PSA 148:5 Bab-Jehová-nug odummomarsun, ar e-ibmar-sogsadba, ibmarmar obinnilesad.
PSA 148:6 Degisadegu ibmarmar innikii urbilesad. E-igar-omesisadi, bar egi annalegegarsulid.
PSA 148:7 Napneg-akale, Bab-Jehová-nug odummomar: Demargi ibdula-dummagan-bukwad, Bab-Jehová-nug odummomar. Demar-wilagana, Bab-Jehová-nug odummomar.
PSA 148:8 Mala-ibyemalad, dii-gwamakarmalad, Bab-Jehová-nug odummomar. Boo-gwamakaled, boo-batemalad, Bab-Jehová-nug odummomar. Burwa-dummagan-be-sogedba-ibmar-imakedi, Bab-Jehová-nug odummomar.
PSA 148:9 Yalamar, bela yala-mullugan, Bab-Jehová-nug odummomar. Sapi-san-nikamalad, bela urwarmar, Bab-Jehová-nug odummomar.
PSA 148:10 Ibmar-dula-sapurbarmalad, ibmar-durgan-negginmalad, Bab-Jehová-nug odummomar. Ibdula-unimalad, nuumar, Bab-Jehová-nug odummomar.
PSA 148:11 Reymar-napneggi-mamaid, Bab-Jehová-nug odummomar. Bela dulemar-yar-baid-baidgi-bukmalad, Bab-Jehová-nug odummomar. Dule-nuga-nikamalad, dule-dummagan-yar-semamaid, Bab-Jehová-nug odummomar.
PSA 148:12 Sapingana, yagana, Bab-Jehová-nug odummomar. Dadormar, mimmigan, Bab-Jehová-nug odummomar.
PSA 148:13 Bab-Jehová-nug odummomar, ar a-nugbi unnila dummarba gued. E-gandik-yeerdakleged, napnegba, nibnegba, bur-gandik dakleged.
PSA 148:14 Bab-Jehová, e-neggweburga gangued uksad. Israel-wagan-bela-Bab-Jehováʼba-nanadimalad, e-dulamar-walikagwadga-gubalid, Bab-Jehová-nug odummomar. ¡Aleluya! ¡Bab-Jehová-nug odummolesun!
PSA 149:1 ¡Aleluya! ¡Bab-Jehová-nug odummolesun! Bab-Jehováʼga namaked-binid namakmala. Bab-Jehová-sordamar-abargi Bab-Jehová-nug odummomala.
PSA 149:2 Israel-dulemar, dule-bega-burba-uksadgi be wergumala, Israel-dulemar Sión-yargi-bukmalad, be-e-Reygi be wergumala.
PSA 149:3 Nue-weligwaledgi-dodonai, Bab-Dummad-e-nug ogannomala. Gar-pandero-ogornai ega be namakmala. Gar-arpa-ogornai ega be namakmala.
PSA 149:4 Ar Bab-Jehová e-dulemargi yeer itodaed. Dule-wiledimaladi e-isdarmaladgi-nakwega imakdaed.
PSA 149:5 Bab-Dummad-sordagan na be emargi-obichamaladgi, wergumala. Gachigi amba be maile, namakmai be imakmala.
PSA 149:6 Be-gammu-galagi Bab-Dummad-nug odummomala. Be-argangi es-suid-nugar-darbogwad-gani Bab-Dummad-nug odummomala:
PSA 149:7 Adi, dulemar-baigan buged-mai be imakmalaga, dulamar-baigan sabsur-odurdakega,
PSA 149:8 esgoro-dubgi e-reymar-edinnega, esgoro-dubgi e-dummagan-edinnegar.
PSA 149:9 Adi, Bab-Dummad, dulemar-sabsur-odurdakoye-sogsadba imaklegegar. Weyob gunonikile, bela bemar Bab-Dummad-sorda-gumaladi egi be wergumaloed. ¡Aleluya! ¡Anmar-Bab-Jehová-nug ogannomar!
PSA 150:1 ¡Aleluya! Bab-Jehová-nug odummolesun. Bab-Dummadse-goled-neggi, Bab-Jehová-nug odummomar. Bab-Dummad-nibneg-geger-dakle-nasiksadba, Bab-Dummad-nug odummomar.
PSA 150:2 E-ibmar-dummagan-imaksadba, Bab-Dummad-nug odummomar. E-gangued-dummarba-nikadba, Bab-Dummad-nug odummomar.
PSA 150:3 Gar-trompeta-goledba, Bab-Dummad-nug odummomar. Gar-arpa-goledba, Bab-Dummad-nug odummomar. Gar-lira-goledba, Bab-Dummad-nug odummomar.
PSA 150:4 Gar-pandero-goledba, Bab-Dummad-nug odummomar. Gwirnanai, Bab-Dummad-nug odummomar. Gar-dub-nikad-goledba, Bab-Dummad-nug odummomar. Gammu-goledba, Bab-Dummad-nug odummomar.
PSA 150:5 Gar-címbalo-binnasur-goledba, Bab-Dummad-nug odummomar. Gar-címbalo-yeer-goledba, Bab-Dummad-nug odummomar.
PSA 150:6 ¡Bela dula-gudidiid, Bab-Jehová-e-nug odummomar! ¡Aleluya! ¡Bab-Jehová-e-nug odummomarsun!
PRO 1:1 David-machi-Salomón Israel-e-rey, we-binsaed-nuegan narmaksad:
PRO 1:2 Adi, binsaed-nikaa guega, igarmar-nuegan-mamaidba nanaega, gayaburba-dummagan-mamaid mamarega,
PRO 1:3 igar-mamaid-wisguega, itoakwaa ibmar-imakega, igar-innikii-mamaidba ibmar-imakega, igar-nabolegedgi igar-maidba imakega, emarbi-dulemar-dake nanaega.
PRO 1:4 Dule-nue-ibmar-wissulid ibmar-dukuar-maid-wisi imakega, sapingan nue-ibmar-wisi guega, sapingan mag-neg-itoakwaa nanaegar. Agala, Salomón, we-binsaed-nuegan narmaksad.
PRO 1:5 Dule-binsaed-ibedi, dule-nue-ibmar-wisidi, we-binsaed-nued itodaed, adi, gatik binsaed-nikaa guega, egi durdakbaligar.
PRO 1:6 Adi, binsaed-nuegan magar-itogega, e-burbagan-mamaid magar-itogega, dule-binsaed-nikaa-e-ibmar-soged magar itogega, oegedgi-sunmakleged magar-itobaligar.
PRO 1:7 Binsaed-nikaguedi, Bab-Jehová-dobee-nanaedgi danikid. Dule-binsaedsurmaladi, binsaed-nikagued abesulid, binsaed-nueganba nanabisulid.
PRO 1:8 Machi, be-bab-be-unaed nue be itogo. Be-nan-be-odurdakedba be dao.
PRO 1:9 Be-ibmar-durdaksad bega orgurginyobi ibnuedga guoed, bega ordubyobi ibnuedga guoed.
PRO 1:10 Machi, dule-isganamar be-yardakbi-gualile, melle ese binsaed galego.
PRO 1:11 Bega sokarmalale: “Anmarba be dage. Anmar dule-ibmar-oakalossulid oburgwenae. Anmar binsa-nabir-itogedba dule-baisur-binsadiid oburgwenae.
PRO 1:12 Igi napa dule-burgwaled-doe, deyob, anmar dule-neg-oakalossulid oburgwenamoga.
PRO 1:13 Anmar ibmar-nuegan ichesuli sumaloed. Anmar ibmar-sumaloedi, anmar-neggi ichesuli urbemaloed.
PRO 1:14 Anmarba be akae. Anmar ibmar-suoedi, anmar bega ukmogoed.”
PRO 1:15 Machi, melle amarba be akao, amar-igar-isganagi be banguo.
PRO 1:16 Ar we-dule-isganamar, ibmar-isgana bur gwae imakbidamalad, gwae dule-oburgwebidamalad.
PRO 1:17 Ar sikwimar e-wagab e-gaedsinai daksale, egi gwen dogosulid.
PRO 1:18 Ar we-dule-isganamardi, na dukin yardakledimalad, emar na dukin oburgwedimalad.
PRO 1:19 Dulemar-dogdar-maniginbi-binsamalad, deyob gunonidamalad. Dulemar-dogdar-maniginbi-binsamalad, dule-baidse burgwenonidamogad.
PRO 1:20 Binsaed-Nikaguedi, binnasuli galimbaba goled, dulemar-bukidar-ambikued-abargi isseed sunmaked.
PRO 1:21 Binsaed-Nikaguedi, dulemar-igar-itoged-abargi sunmaked, neggweburse-doged-yawagakgi sunmaked. Weyob soged:
PRO 1:22 “Sapingan, bemar-amba-nue-ibmar-wissurmalad, ¿ar sanagwadse, ibmar-wissuli be gudii gumaloe? ¿Ar sanagwadse, be dulemargi-dododiid, bar dulemargi dodosuli gumaloe? Dule-binsaed-satemalad, bemar, ¿sanagwadse ibmar-wisigued-isdar-daked sae be dakmalode?
PRO 1:23 ¡An-ibmar-sabsur-soged be itomala! An-burba-nued an bega unnitiba ukoed. An-binsaed-wisguega an be-imakoed.
PRO 1:24 An bese gochamar-inigwele, yapa be an-itogusmalad. An bese achasmar-inigwele, gwen be amba ibsassurmalad.
PRO 1:25 Binsaed-nuegan-an-bega-uknaigusmaladi, aka be obachamalad. An-sabsur-bega-ibmar-sogsadi, gwen be itossurmalad.
PRO 1:26 A-ulale, bemar sabsur-odurdaklealile, an bemarga binnasuli alloed. Bemargi dobed nagunonikile, an bemarga alloed.
PRO 1:27 Burwa-dummad-goledyob bemargi dobed nagunonikile, an bemarga alloed. Burwa-ololedyobi bemargi nunmak-itoleged-dummad nagunonikile, an bemarga alloed.
PRO 1:28 ”A-ibagine, geb be anse gordamaloed. Degi-inigwele, andi bemar-abin-imakosulid. Be an-amidii gumaloenad, degi-inigwele, be an-amiosurmalad.
PRO 1:29 Ar bemar binsaed-nikagued abessurmalad, Bab-Jehová-dobee be nanassurmalad.
PRO 1:30 An-bemarga-binsaed-nued-uked be itossurmalad, an-bemarga-sabsur-ibmar-sogsad be abessurmalad.
PRO 1:31 Na be-daed begi gannar aibinoed, be dule-yardakdimaladgi, na dukin be yardaklemaloed.
PRO 1:32 Be-isgusadba, be-ibmar-wissulidba, na be dukin berguoed. Be baisur-ibmar-dakedba, na be dukin oburgoed.
PRO 1:33 Ar dule anba-ibsaerdi, bogidik gudii guoed. Ibmar-isgana-dobsuli gudii guoed.”
PRO 2:1 Machi, an ibmar-bega-soged be itogele, an-igar-maidba be nanaele,
PRO 2:2 binsaed-nikaguedba be ibsaele, be-ulubgi bela-bela ise-itoagwar be ibmar imakele, geb be Bab-Jehováʼba-ibsaleged magar be itononikoed, magar be Bab-Dummad daknonikoed.
PRO 2:3 Machi, nue-ibmar-wisigued be egisele, magar-ibmar-itoged be egisele,
PRO 2:4 binsaed-nikagued maniyob be e-bina-sogdiile, or-nuegan-dukuar-bukwadyob be amiele,
PRO 2:5 geb be Bab-Jehováʼba-ibsaleged magar be itononikoed, magar be Bab-Dummad daknonikoed.
PRO 2:6 Ar Bab-Jehováʼbi binsaed-nikagued uked, Bab-Dummadbi nue-ibmar-wisi be-imaked.
PRO 2:7 Bab-Jehová dule-ibmar-innikii-imakmaladga binsaed-nikagued uked. Bab-Jehová amar-bendakdaed, amarba gudidaed.
PRO 2:8 Bab-Jehová dule-igar-maidba-ibmar-imakmalad nue-dakdidaed, Bab-Jehová dule-eba-nanadimalad edarbedidaed.
PRO 2:9 Geb agine, igar-inniki-mamaidba-imakleged, igar-nabolegedgi-igar-maidba-imakleged, emarbi-dulemar-dakleged, magar-itoge be guoed, wede ibi-obare.
PRO 2:10 Binsaed-nikagued be-ulubgi nagunonikile, nue-ibmar-wisidi, yeer-itoge be-imakoed.
PRO 2:11 Itoakwaadaedi be-bendakoed, nue-ibmar-wisiguedi be-bendakbaloed.
PRO 2:12 Binsaed-nikagued, igar-isganaba-nanaega be-imakosulid, dulemar-sunnasur-sunmakmaladgi be-ollor-imakoed.
PRO 2:13 Dulemar-igar-isganaba-bur-nanaega, igar-nuedgi-banguddamaladgi, binsaed-nikaguedi, be-ollor-imakoed.
PRO 2:14 Dulemar-ibmar-isgana-saedgi-wergumaladgi, ibmar-isgana-imakedba iba-onodamaladgi, binsaed-nikaguedi, be-ollor-imakoed.
PRO 2:15 Dulemar-igar-noar-noar-gudidamaladgi, igarmar-innikisulidba-gudidamaladgi, binsaed-nikaguedi, be ollor-imakoed.
PRO 2:16 Machi, binsaed-nikaguedi, dule-baid-e-omegi be-ollor-imakoed. Binsaed-nikaguedi, ome-agumakedba-emar-binsaed-gaedgi, be-ollor-imakoed.
PRO 2:17 A-ome, Bab-Dummad-asabin na abirgunagwar-gued-igar-mesisad ieded, degidbali, na e-suigi bar binsassulid.
PRO 2:18 A-ome-negse naye be sogele, burgwed-igarse be-sedoed.
PRO 2:19 Dule a-omese-gochale, bar gannarse guosulid, bar gannaryob nued-gudii guosulid.
PRO 2:20 Machi, deyobi, dule-nued-nanadimalad-igarba be nanaoed, igar-innikigwadbi be imakdii guoed.
PRO 2:21 Ar dule-igar-maidba-ibmar-imakmaladi we-napneggi gudii gumaloed. Dule-egi-ibmar-akar-soged-satemaladi, we-napneggi undar-suitii gudii gumaloed.
PRO 2:22 Dule-isganamardi we-napneggi bergumaloed, dule-ichomaladdi oburgwilemaloed.
PRO 3:1 Machi, melle an-igar-odurdaked be iego, be-gwage-ulubgi an-igar-maid be sedigu guo.
PRO 3:2 Ar deyob be imakele, we-napneggi suitii mai be guoed, weligwar-itodii be guoed.
PRO 3:3 Sabgued-igar melle be iego, napiragwad-igar melle be iebalo. Igi wingwa be-dukargi-naigu be gudidae, deyobi be imako, be-gwage-ulubgi sedigu be imako.
PRO 3:4 Deyob be imakele, Bab-Dummad nabir be-dakoed, dulemar nabir be-dakmogoed.
PRO 3:5 Melle be-ibmar-wisidba be nanadii guo. Bab-Jehováʼgi bela-belad-ulubgi-bensuli be nanadii imako.
PRO 3:6 Bela be ibmar-imakedgi Bab-Jehováʼse idakdii be imako. Deyob be imakele, Bab-Jehová bega igar nueganbi imakoed.
PRO 3:7 Mer be binsao, “An ibmar nue-wisye.” Bur be Bab-Jehová dobee nanae, bur be ibmar-isgana-imakedgi bangue.
PRO 3:8 Deyob be nanaele, we-igala, bela bega ina-nuedga guoed, bela bega be-abagan ogannogoed.
PRO 3:9 Be-ibmar-nikad-Bab-Jehováʼga-ukedgi Bab-Jehová-nug be odummoge. Gebe be-ibmar-sanmaked-Bab-Jehováʼga-ukedgi Bab-Jehová-nug be odummoge.
PRO 3:10 Deyob be imakele, be-ibmar-gwag-saboged-uu ena sii guoed, be-vino-binigan e-galugi ena sii guoed.
PRO 3:11 Machi, Bab-Jehová sabsur-be-odurdakalile, melle isdar be itogo, melle be urwebalo.
PRO 3:12 Igi baba na e-mimmi-sabedba sabsur-odurdakdae, deyobi, Bab-Jehová dulemar-sabedi sabsur-odurdakdamogad.
PRO 3:13 Dule binsaed-nikagued nikunonikile, we-dulegi nued binsalegoed. Dule ibmar-nue-wisi gunonikir, we-dulegi nued binsalegoed.
PRO 3:14 Binsaed-nikagued maniba bur bule ibnuedid, orba bur bule egi ibmar-nuegan amileged.
PRO 3:15 Binsaed-nikagued, akwa-nuegan-manisailadba bur ibnuedid. Ibmar-nue-wisigued, ibmar-nueganbina-sogleged-ebo yobsulid.
PRO 3:16 Ar binsaed-nikagued we-napneggi suitii mai be-imakoed. Deginbali, mani-ibedga be-imakbaloed, nug-nued-nikaguedga be-imakbaloed.
PRO 3:17 A-igarmarba-nanalegedi, yeer-ito dule-saedid, bela e-igarmar bogidik-gudii dule-imakedid.
PRO 3:18 Dule binsaed-nikagued-amisale, egi burba-dula-gudigued nikued. Dule binsaed-nuedgi-akas-gudiile, Bab-Dummad, we-dulegi nued binsaed.
PRO 3:19 Bab-Jehová binsaed-nikaguedgi, napneg nasiksad. Nue-ibmar-wisiguedgi, nibneg nasiksabalid.
PRO 3:20 Na ibmar nue-wisidba, diimar bachik-bachik nasiksad, nibneg-akale, dii-wiega imaksad.
PRO 3:21 Machi, nue-binsakwaa be ibmar imako. Itoakwaa-ibmar-imaked melle be iego.
PRO 3:22 Deyob be imakele, burba-dula-gudii be-imakoed. Bega ordubyobi ibnuedga guoed.
PRO 3:23 Geb agine, bonisuli be nanadii gudoed, be yoledii guosulid.
PRO 3:24 Be megid-sogele, be dobguosulid. Be gabidogu, bogidikidgi be gabidoed.
PRO 3:25 Ukiagwar-bonigan-noardaedi, be dobguosulid, dule-Bab-wissurmaladgi ukiagwar boni-dummagan-noardaedi, be dobguosurbalid.
PRO 3:26 Ar Bab-Jehová beba gudiguoed, dulemar-isganase yardaklegega be-imakosulid.
PRO 3:27 Dule-baidga-ibmar-nued-imaked begi siile, ega be imako, melle ega imaksuli be guo.
PRO 3:28 Melle ega be sogo: “Be nagwerye, banedse an be-bendakoye.” Ar emi sunna be a-dule-bendakele, bendaksabin be imako.
PRO 3:29 Melle be-ai-begi-bensuli-gudiidgi be aibino.
PRO 3:30 Melle dule-gwen-be-oakalossulidbo be urwo, ar dule gwen-be-oakalossulid.
PRO 3:31 Melle dule-sabsurdamalad-e-ibmar-imakdiidgi be nobguo, melle e-daedba be nanabalo.
PRO 3:32 Ar Bab-Jehová dule-isganamar nue isdar-dakdaed. Ar dule-nuegan-ebodi walikaa gudidaed.
PRO 3:33 Bab-Jehová, dule-nued-daed-e-neguyagi nued binsadaed, dule-isgana-e-neguyadi, ukabsadaed.
PRO 3:34 Bab-Jehová, dule-emargi-dododimaladgi dododamogad, ar dule-san-bipi-imakmaladdi, bendakdaed.
PRO 3:35 Dule-binsaed-ibegan-nug odummolegergebed. Ar dule-binsaedsulidamaladdi, egi dodoleddaed.
PRO 4:1 Machimala, bab-be-unaed nue be itomala, ibmar-nue-wisiguega nue-ise-itogale be imakmala.
PRO 4:2 Igar-nuegangi an be-odurdakgwelo, melle an-ibmar-odurdaked be itosuli guo.
PRO 4:3 An bipigwaunni, an-babba-an-gudigusgua, an-nana anbina bela-belad-sogdigusgua,
PRO 4:4 an-bab an-odurdaksad, weyob anga sogsad: “An-bega-ibmar-soged, ulubgi be nue-sedii imako. An-bega-ibmar-soged be imako. Deyob be imakele, we-napneggi suitii be gudiguoed.
PRO 4:5 Binsaed-nikagued be amie, ibmar-nue-wisigued be amie. Melle be an-gayaburba iego, melle egi be banguo.
PRO 4:6 Binsaed-nikaguedgi melle be bangue, ar a, be-bendakdii guoed. Binsaed-nikaguedbina bur be soge, ar a, be-edarbedii guoed.
PRO 4:7 Ibmar-baigan-idu, nue-binsaed-nikagued bur be amie. Bela ibmar baiganba, ibmar-nue-wisigued bur be amie.
PRO 4:8 Binsaed-nikaguedbina bur be soge, ar a, be-nug-odummogoed. Binsaed-nikagued bur be sabgue, ar a, be-nug-ogannogoed.
PRO 4:9 Binsaed-nikaguedi bega akwa-nuegan-ologurgingi-sigeyob gued. Ologurgin-nonogi sigeyobi bega gued.”
PRO 4:10 Machi, we-napneggi suibaksaar be gudiguega, an bega-ibmar-soged, nue be itoge.
PRO 4:11 Binsaed-nikagued-igarba an be-semaid, igar-innikigwadba-nanaega an be-imaked.
PRO 4:12 Be binnaa nadapsogele, bega ibmar-nueganbi guoed. Amba be gwae-gwae nadapsogele, bega ibmar-nueganbi gubaloed.
PRO 4:13 An be-odurdaked mer be iego, melle be indako, nue be sedio, we burba-dulagudiguega be-imaked.
PRO 4:14 Dule-isganamarba melle be akae. Amar-igarba melle be nanae.
PRO 4:15 A-dulemargi be bangue. Melle a-dulemar-walikaa be gudigue.
PRO 4:16 Dule-isganamar ibmar-isgana-imaksurmalale, geg gabdamalad, dule-oakalosurmalale, geg gabdamalad.
PRO 4:17 Ibmar-isgana-imaked mas-gunnedba bur-yeer itodamalad. Sabsur-emar-imaked, vino-gobedba bur-yeer itodamalad.
PRO 4:18 Igi bolegoe neg-ainakwiardae, deyobi, dule-nuegan-e-nanaedi gued. Dule-nuegan-e-daedi, neg ibegwaledse-nasgumai-nasgumai-daeyobi gued.
PRO 4:19 Dulemar-isgana-e-nanaeddi negsichid-naidyobi gued, wissurmalad, ibigi na yoledimala.
PRO 4:20 Machi, an bega binsaed-uked, nue be itoge, ibmar-bega-an-soged, nuekwaa be itoge.
PRO 4:21 An be-odurdakedgi melle be bangue, gwage-ulubgi nue-sedii be imake.
PRO 4:22 Ar dule binsaed-nikagunonikile, ega burba-duladga gued, we-dulega ina-nuedga gubalid.
PRO 4:23 Bela ibmar-sunsogmalad-baiganba, be-binsaedi nue-itoakwaa be ebugo. Ar we-binsalegedgine, gudiguleged danikid.
PRO 4:24 Gaya-isgana-sunmaked be indake, melle bar be gakansadii nanae.
PRO 4:25 Ibmar-nueganginbi be atake, yoo ibmar-danimaloedgi-atakdii be sae.
PRO 4:26 Be-nanadiid nue be dake. Bela be-ibmar-imakedi innikigwadbi be imake.
PRO 4:27 Melle igar-nuedgi be aibane. ¡Igar-isganagi be bangue!
PRO 5:1 Machi, an-binsaed-nikagued an bega-ukedi, nue be itoge, an ibmar-nue-wisidi an bega-sogedi, nue-ise-itogar be imake.
PRO 5:2 Adi, be sunmakalile, nue-itoakwaa sunmakegar, nue-ibmar-wisi be guegar.
PRO 5:3 Ome-sui-dikarba-yoleged-e-agumakedi, ibmar-nuediyob sunmaked. E-gwabin-ibmar-biedi, ibmar-nueganbi sogdaed.
PRO 5:4 Dule ese-binsaed-galesale, ina-gagbisailadyobi ega gued, es-suid-nugar-darbogwadba bur bule dule-naibi-saeyob gued.
PRO 5:5 Dule a-ome-ebogwa negsichidgi nanaele, burgwedse nilemaid. Neg-uanse selemaid.
PRO 5:6 A-ome dule-egi-sunmakmalad bai-itosulid. E-sunnasur-daedi, na bargasulid, e-ichakwa-nanadiidi na aku itoged.
PRO 5:7 Machi, emigi nue be an-itoge. An-ibmarmar-bega-sogedba be nanae.
PRO 5:8 Ome-e-sui-yardakdiidgi, be bangue. Melle e-neg-yawagakse be warmako,
PRO 5:9 adi, melle dule-baid-aku-be-dakedga be-arbasadgi-ibmar-nikusad be ukegar, melle be-burba-gandikid dule-baidga be ukegar.
PRO 5:10 Degiile, dule-baid be-ganguedgi yeer-itogoed. Degiile, be-arbasad-mani dule-baid-negse dogoed.
PRO 5:11 Geb agine, bela binna-binna be-san bergumaidba, be bodii gudoed.
PRO 5:12 Agi be sogdoed: “Ar wede, ibiga dule-anga-binsaed-uksamalad an itossuli. Ar wede, ibiga dule-sabsur-an-odurdaknaigua, an itossuli.
PRO 5:13 Dule-anga-binsaed-daknanai-gusmalad an itossulid. Dule-an-odurdaknanai-gusmaladba an ibsassulid.
PRO 5:14 Emide, dulemar-abargi, an oitolegednaga gudiid, wis ugak an gudiid.”
PRO 5:15 Be nog-gobbigualile, be-ome-ebo be nog gobo.
PRO 5:16 Unnila be-omesebi be golo, melle be-omesulidse be golo.
PRO 5:17 Be-ome unnila begadbiid, melle dule-baidga be-ome be urmakdii nanao.
PRO 5:18 Ome-bega-uklesadgi nued-binsalesun. Nuchukwagwadgi bega abirgin-uklesad-ebo be wergudii gusun.
PRO 5:19 Ome goe-sapuryob, yeer dakleged. Ome wasa-omeyob, yeer dakleged. Bele-bele be-imakar-sogele, egi be wergudii sao. E-sabguedgi be wergudii guo.
PRO 5:20 Machi, melle ome-baidse-binsaed-galedii be guo, melle ome-baid be-werguega, be imako.
PRO 5:21 Bab-Jehová bela dulemar-e-daed nue-wisid. Dulemar-nanaedi egi gwen yoggumaisulid.
PRO 5:22 Ibmar-isgana, dule-isganagi aibinoed, e-isguedgi ollorguosulid.
PRO 5:23 Dule-isgana, igar-maidba-nanabisulidbali burgwidoed. Na e-binsaed-satedbali, burgwidsunnoed.
PRO 6:1 Machi, dule-mani-gasad-anar, be bennukoye sogsale, igidibe, dule-baidga, be bennukoye igar mesisale,
PRO 6:2 na be imakoye sogsadgi, na be dukin yardaklesdo.
PRO 6:3 Degisoggu, machi, emidi be-aise be yardaklesad. Ar agi be ollorgubiele, weyob be imaksunna: Ese be nae, egi be wilenae, ega be sognae, an-bega-bennukoye-sogsadi, be anga osuloye.
PRO 6:4 Melle be ogabe, melle be banega saboge.
PRO 6:5 Igi goe-sapur, dule-e-makbied-idu wakinne, deyobi, dule-be-yardakbiedgi be wakinmoga. Igi nuu dule e-gabied-idu wakinne, deyobi, dule-be-yardakbiedgi be wakinmoga.
PRO 6:6 Dule-wiegala, nue be igli dake, e-ibmar-imaked nue be dake, binsaed-nikaguega eba be durdake.
PRO 6:7 Igli, ega-igar-uked sated, e-dummad sated, e-idued satebalid.
PRO 6:8 Degi-inigwele, dii-wisulidgine na e-mas onmaked, ibmar-durba-weleged-ibagine na e-mas onmakdaed.
PRO 6:9 Dule-wiegala, be meremaidi, ¿sanadse gwisguoye be soge? ¿Sanadse gabmaid be atakoe?
PRO 6:10 Be gabsiile, nono-yakumaksiile, sikwas napi-gabele, sakwa-bipirmakar wis obunnosiile,
PRO 6:11 ukiarmakale, dule-atursaeyobi, begi wileged nonikoed. Ukiarmakale, dule-negsuligudiidyobi, begi ibmarsuligued yolenonikoed.
PRO 6:12 Dule-isgana, dule-galagwensuli-nanaed, dule-gakansaedginbi-gudiid,
PRO 6:13 dule-yardakega, ibya-biri-emar-daked, dule-yardakega googi sunmaked, naggi sunmaked.
PRO 6:14 We-dulemar unnila ibmar-isgana-imakedginbi binsadidaed, aimar-ourwed yeer-itodaed.
PRO 6:15 A-ulale, ukiagwar egi bonigan yolenonikoed, ukiagwar berguoed.
PRO 6:16 Bab-Jehová ibmar soganergwa (6) sae-daked, napi-ibmar-sogagwenad-baid bur-bela-bela isdar daked. We-ibmarmar-sogagugled (7) isdar daked:
PRO 6:17 Dule-na-san-dummarba-imaked, dule-gadi-gakansaed, dule-binsarsunna-aimar-gindaked,
PRO 6:18 dule-galagwensuli-dule-baidgi-binsaed, dule-ibmar-isganabi-imakdidaed,
PRO 6:19 dule-ibmar-daksad-gakansaar-ibmar-soged, gwenadgan-gwenadgan-ourwed-dule. We-ibmarmar, Bab-Jehová isdar daked.
PRO 6:20 Machi, be-bab-be-odurdakedba be ibsae. Be-nan-be-unaedba, be dae.
PRO 6:21 Be-gwagegi-sedigu, be imake, ordub-be-dukargi-naiyob, be imake.
PRO 6:22 We-binsaed-nuegan, be bia nadele, be-idumai guoed. Be gabidele, be-edarboed. We-binsaed-nuegan, be atakar-sogele, bega sunmaknai guoed.
PRO 6:23 Igarmar-Mamaidi, gwalluyobi gued, ibmar-odurdakleged neg-meegwadyobi gued. Igar-nuegan-mamaidba-nanalegedi, be-odurdakoed igi be nanaergebe.
PRO 6:24 We-binsaed-nuegan, melle be ome-isganabo galagwensuli nanadiguega be-imakoed. Melle be ome-sui-dikarba-galagwensuli-gudiidbo nanaega be-imakoed. Melle we-ome-e-ibmar-nued-sogedgi be binsaed-galediguega be-imakoed.
PRO 6:25 Melle ome-isgana-e-yeerdaklegedbina be sogo. Ome-isgana be-dakedgi, melle ese be-binsaed galego.
PRO 6:26 Ar ome-gambanuchu-imaked unnila masbina gudiid. Ome-sui-dikarba-yolegeddi, bela be-sanbina sogdiid.
PRO 6:27 Ar dule na e-nukugi soo-sisale, ¿ei mor gummaksasulir be insae?
PRO 6:28 Ar dule soo-birgi nanaele, ¿ei nag gummaksasulir be insae? Ei gummaksale.
PRO 6:29 Dule, dule-baid-ome-ebo negsichigi nanaedi, soogi-gummakeyob boni-amiedsemogad.
PRO 6:30 Dule-atursaed ukudmaada-itogedba ibmar-atursasale, ¿isdar dakdamarsursi?
PRO 6:31 Dule-atursaed daklesardi, ilagugle (7) ibmar-atursasad bennukoed. Sulirdi, bela e-neggi-ibmar-nikad ukoed.
PRO 6:32 Dule ome-baidbo negsichidgi nanaele, we-dule, binsaed-satedid. Dule deyob-daedi, na dukin san-wioged.
PRO 6:33 Unnila binged-amiedid, na dukin naibid-amiedid. E-nug-gagalesad gwen ega alliosulid.
PRO 6:34 Ar we-ome-e-sui nobedba uludele, na san gwen bargaosulid, igi-barsaye gwen sogosulid.
PRO 6:35 Dule amba ome-e-suiga ibmar-ukye sogele, gwen abingaosulid. Ar amba ega ibmar-dummarba-ukye sogele, igi-barsaye gwen sogosulid.
PRO 7:1 Machi, bega-an-ibmar-sogedba be dae, igargan-an-bega-ukedba be nanae.
PRO 7:2 Igargan-an-bega-ukedba be nanaele, be dula gudiguoed. Be-ibyagwag be akweyobi, an-bega-ibmar-sogedba be ibsae.
PRO 7:3 An-be-unaedi, olargan-googi-yoiyobi, be sedii sae, be-gwagegi nue-ebinsadii be imake.
PRO 7:4 Binsaed-nikaguedga be soge: “Be an-bunye.” Ibmar-wisiguedga be soge: “Be an-ai-nuedye.”
PRO 7:5 Adi, wemar, ome-sui-dikarba-yolediidgi, be-ollor-imakoed, ome-e-agumakedba-emar-binsaed-gaedgi, be-ollor-imakoed.
PRO 7:6 An-neggi, yawagak-bipigwad-imbaba an atakded.
PRO 7:7 An dakalid, sapingana-binsaedsurmalad-abargi, machi-wargwen bur-binsaed-sated gudii.
PRO 7:8 We-sapingwade, igar-abingunaidse warmakdapid, agi ome-e-sui-dikarba-yolediid-negse naded.
PRO 7:9 Deunni, neg-sedomaid, neg nue-gutuleded, degi, neg nue-mutikguded.
PRO 7:10 Geb agine, ome e-abin-noalid. Ome gambanuchu-imakedyob mor-yoid. E-daedi, mag-dakleged, macherganbina sognadapid.
PRO 7:11 We-ome neg-gagadidaed, gwinni-gwinni daed, geg neggi siged, galimbabi wisid.
PRO 7:12 Galimbaba gudidaed, dulemar-bukidar-ambikuedgi gudidabalid. Igi-saele machered-wargwen-yardakodibeye binsadidaed.
PRO 7:13 We-ome, sapingwa-daksagua, gadebinne imaksad, ei wagar usa imaksad. Ega bingesuli sogded:
PRO 7:14 “Gwenatigwar-guega Bab-Dummadga an ibmar-ukoye an sogsad. Deyob an sogsadi, emi deyob an imaksad.
PRO 7:15 A-ulale, an be-abin noalid. An be-amidii gusad, emide an be-abingunonisunnad.
PRO 7:16 An-gabedgi atue-nued-yeerdakleged, lino-dubgi-sobaled-Egiptoʼgi-danikid an ogichad.
PRO 7:17 An-gabedgi ina-wawadikmalad, mirraʼye-nugad, áloeʼye-nugad, degine, canelaʼye-nugad an eosad.
PRO 7:18 Anba be dage. Anmar nog-gobmai oibodagoed. Oibogedse anmar nog-gobmai imakmaloed.
PRO 7:19 Ar an-sui neggi gudisulid, dikasuli neggwebur-baidse naded.
PRO 7:20 Mani-ichesuli sesa-naded, geb nii-dalu-naidse gannar negse aibiroed.”
PRO 7:21 Weyobi, ome, agumaksadgi, machigwa-binsaed-gasad.
PRO 7:22 Moli-alugwasualedi, e-oburgwilegedse ebipilemaiyobi, machigwa ome-sorba-nai nadapid. Goe-sapur galesgunaidgi sigu egi yolenonikiyobi, machigwa gued.
PRO 7:23 Igi nuu burgwed-wissuli saki-naidse naddae, machigwa deyobi gued.
PRO 7:24 Machi, emigi nue be an-itoge, an-be-unaed nue-itosii be imake.
PRO 7:25 Melle a-omegi-binsadii be sae, melle a-omese be binsaed galege.
PRO 7:26 Ar a-omese bukidar machergan yardaklediid. Machergan-bukidargus ese burgwedanikid.
PRO 7:27 We-ome-negse be nadele, be burgoed. A-igar burgwedse dule-semaid.
PRO 8:1 Binsaed-Nikagued, ¿anmarse iseedi gornaisursi? Ibmar-wisigued, ¿iseedi gornaisursi?
PRO 8:2 Binsaed-Nikagued, igarba yar-birigwagi gorgwisdaed, igarmar-abingunanaidgi gorgwisdaed.
PRO 8:3 Neggwebur-doged-e-yawagakmar-dikarba ise-gollar gornaidaed. E-yawagak-dogedgine binnasuli weyob-gornaid:
PRO 8:4 “Machergan, bemarse an gornaid, bela-dulemar-bukwadse an gornaid.
PRO 8:5 Bemar-ibmar-wissurmalad, itoakwaa be gudisamala. Bemar-binsaedsate-gudimalad, ibmar-magar-itoged be amimala.
PRO 8:6 Nue an-itomalo, an ibmar-nuegan sogesokalid. An-gwabinduku igar-innikigwadba sunmaksokalid.
PRO 8:7 An ibmar-sogedi gakangi sunmakosulid, ar gakanmar an nabir-daksulid.
PRO 8:8 An-gayaburbamar, igar-innikigwadbi sunmaked, darbo sunmaksulid, ibmar-isganagi sunmaksulid.
PRO 8:9 An-gayaburbamar, dule-magar-neg-itogedgala baisursunna-noed. Dule-binsaed-ibeganga, an-gayaburbamar innikigwadbi ega noed.
PRO 8:10 Mani-abelegedba an-ibmar-odurdakedbina bur bule be sogmala. Olo-nued-abelegedba ibmar-wisgulegedbina bur bule be sogmala.
PRO 8:11 Ar Binsaed-Nikagued, dimmurgiid-e-akwa-yeerdaklegedba bur bule ibnuedid. Ibmar-bur-nued egi obinsulid, ar ibmar-baid-ebo geg wilub-imakleged.”
PRO 8:12 “Ani an Binsaed-Nikaguedi, itoakwaa-binsaedbogwa an gudiid. Ibmar-wisigued an nikad, itoakwaadaed an nikabalid.
PRO 8:13 Dule, Bab-Jehová-dobekwaa nanadiile, isdar ibmar-isgana daked. Ar san-dummarba-imaked, an isdarsun daked, san-bule-bule-saed, an isdar dakbalid. Sunnasur-daed, galagwensur-sunmaked, an isdarsun dakbalid.
PRO 8:14 Binsaed-uklegeddi, angi maid, nuekwa-igar-nabolegeddi, angi maibalid. Neg-magar-itolegeddi, angi maid, gargangueddi, angi maibalid.
PRO 8:15 Ani an Binsaed-Nikaguedi, an-sogedba reymar wis negsedimalad. An-sogedba dule-nug-nikamalad, wis igar-innikii nabodimalad.
PRO 8:16 An-sogedba dule-nug-nikamalad negsedimalad, an-sogedba dule-negsedimalad napneg-sedimalad.
PRO 8:17 Dule-an-sabmaladi, an sabmogad. Dule-an-amidimaladi, baisursunna an-amimalad.
PRO 8:18 Ibmar-bukidar-nikuleged angi danikid, nuga-nued-nikuleged angi danibalid. Nue-nasguleged-degisadeguad angi danikid, igar-inniki-imakleged angi danibalid.
PRO 8:19 An-binsaed-ukedi, olo-nuedba bur-nuedid. Angi-binsaed-nued-amilegedi, mani-nuedba bur-nuedid.
PRO 8:20 Ani an Binsaed-Nikaguedi, igar-inniki-imaklegedba an nanaed, igar-inniki-naboleged-igarba an gudiid.
PRO 8:21 Dule-an-sabesar-gudimalad an onasgudiid, ibmar-nued-bukidar-nikubaliga an imakdiid.”
PRO 8:22 “Bab-Jehová ibmar-obinyed-iduale, bato anga burba-dulad uksad. Amba-yoo ibmar-obinyegua, bato an-obinnisad.
PRO 8:23 Yoo neg-nagued-iduale, Bab-Jehová an-obinnisad. Napneg amba yoo nagugua, sailanagi an-obinnisad.
PRO 8:24 An gwalulesgua, demar-wilagan amba yoo nagued. An gwalulesgua, suke-dummagan amba yoo megmalad.
PRO 8:25 Yala-dummagan-nagued-idu, an gwalulesad, yala-senigana-ambikued-idu, an gwalulesad.
PRO 8:26 Bab-Dummad amba yoo napneg-nasikgua, amba yoo sapurmar-bukwad-nasikgua, amba yoo napa-buru-napneg-sobsad-obinyegua, bato an gwalulesad.
PRO 8:27 Bab-Dummad mogir-arad-nasiknaigua, a-idu, bato an gudiid. Mogir-demarbo-abingunaid-nasiknaigua, a-idu, bato an gudiid.
PRO 8:28 Bab-Dummad mogirmar-nasiknaigua, a-idu, bato an gudiid. Demar-wiladgine suke-dummagan-ogannonaigua, a-idu, bato an gudiid.
PRO 8:29 Bab-Dummad demar-mer-murega, demargala igar-abingunanaid-ilemaknaigua, a-idu, bato an gudiid. Napneg-e-sailagan-mesnaigua, a-idu, bato an gudiid.
PRO 8:30 Bab-Dummadbogwa bela igar-ilemaknai an gusad. Iba-ilibali weligwar an-itodidaed. Bab-Dummad-asabinni iba-ilibali an wergudidaed.
PRO 8:31 Bab-Dummad-napneg-obinnisadgi an wergudiid, dulemar-gudimaladba an wergudiid.”
PRO 8:32 Ani an Binsaed-Nikaguedi sogbalid: “Degisoggu, mimmigan, nue an-itomalo: Dule an-igar-maidba-nanadiile, egi ise-nued binsalesad.
PRO 8:33 An-binsaed-uked be-nue-itomala, binsaed-nikaa be damala, mer baisur-dakmala.
PRO 8:34 Dulemar-nabir-an-itodimalad, bane-bane an-yawagak-naba an-edarbedimalad, we-dulemargi ise-nued binsalesad.
PRO 8:35 Ar dule an-aminonidibe, burba-dula-maid aminonikoed. Bab-Jehová we-dulegi nabir binsanonikoed.
PRO 8:36 Dule an-obandibe, na dukin bonigan-amioed. Dule isdar an-dakdibe, na burgwed-amied.”
PRO 9:1 Binsaed-Nikagued na e-neg-sobsad, e-buarmar walagugle (7) ogwichisad.
PRO 9:2 Binsaed-Nikagued iba-dummad onosad, vino-nued imaknai gualid, mese guakwaa siinai guarbalid.
PRO 9:3 Binsaed-Nikagued, e-garda-berbemalad barmisad, neggwebur-siid-birise barmisad agi iseedi gorbukwa gumalagar.
PRO 9:4 Dule-binsaedsurmaladga weyob sogded: “Dule-binsaedsurmalad, anse be dagmala.
PRO 9:5 Dagmala, an-mas-nued gundamala, an-vino-oburusad be gobdamala.
PRO 9:6 Ar be nabir-gudii gubimalale, be binsaedsuli-gudimalad osulomalargebed, binsaed-nikaa be gudigumalargebed. Deyobi, geb be nabir-gudii guoed.”
PRO 9:7 “Be dule-gwen-nabir-dasurmaladse be gotedibe, melle ibmar-isgana be imakye, aka bese-urwega ese be goloed. Ar be dule-isganase uluddibe, aka bese-urwega guoed.
PRO 9:8 Dule-gwen-nabir-dasulidse, mer be gole. Aka sae-be-dakega ese be goloed. Dule-binsaed-nikadse be gotedibe, mer ibmar-isgana be imakye, we-duledi, be-sabguoed.
PRO 9:9 Dule-binsaed-nikagued be odurdakele, a-dule, bur bule binsaed-nikaa naoed. Dule-inniki-gudiid be odurdakele, a-dule, bur bule binsaed-nikaa naoed.
PRO 9:10 ”Dule binsaed-nikarba-gubidibe, Bab-Jehová-dobekwaa-gudii guergebed, Dule, Bab-Dummad-Isligwaled wisgubiele, ibmar-wisirba-gued na oyonaid.
PRO 9:11 Ar ani, Binsaed-Nikagued, angi be-ibagan-gudiid suitii guoed, an-nukad deyob guoed. Be-burba-dula-gudiid birgaba sugumai guoed.
PRO 9:12 Be nabir-binsaed-nikarbaddibe, we-binsaed-nikagued ibnuedga bega gunonikoed. Be galagwensulidaeddibe, na be dukin nunmaked-itodii guoed.”
PRO 9:13 Binsaedsulid, yaisur neg-gagadaed, gwen ibmar wissulid, gwen nabir binsasurbalid.
PRO 9:14 Binsaedsulid, e-neg-yawagak-naba sigoed. Neggwebur-dogedgine, bela-e-dakmalagala, neggwebur-birigwagi sigoed.
PRO 9:15 Binsaedsulid, dule-igarba-gudidamaladse gorsidaed, binsaedsate-gudidamaladse gorsidaed.
PRO 9:16 Weyob dule-binsaed-satemaladga sogdedaed: “Be anse dagmala.
PRO 9:17 Dii-atursaaled bur-nued gobleged, mas-nued arbakee-dukuar-gullegedi, bur-nued gulleged.”
PRO 9:18 Ar we-dule-binsaed-satemaladdina, agi burgwed-amileged wissurmalad. Ar dule-binsaedsulidba-ibsasmaladi, emisgindi neg-urba mamaid.
PRO 10:1 Salomón-e-binsaed-nuegan-narmaklesad: Machi-binsaed-ibedi, e-bab-gwage-weligwar imaked. Machi-binsaedsuliddina, e-nanga gwage-nunmaked-ukega gued.
PRO 10:2 Ibmar-isganagi-mani-amilegedi, ibnuedga gusulid. Ibmar-inniki-imaklegeddina, burgwedgi-san-onogega emar-imaked.
PRO 10:3 Bab-Jehová, dule-innikidaedi, ukudmaada-gudiguega imaksulid. Dule-isgana-sulibinsa-ibmarbina-itodimaladdi obaned.
PRO 10:4 Dule-wiesailamaladi, wilegega gued. Dule-gadi-arbamaladdina, e-ibmar ega nasgumai gued.
PRO 10:5 Dule-binsaed-nikadaedi, yorgine ibmar-gwag-gullemalad na onmaked. Dule ibmar-gwag-weleged-e-ibagangi gabedbi-gudiiddi, we-dule, na dukin binged-amied.
PRO 10:6 Bab-Dummadi, dule-innikidaedgi, nued binsaed. Gaya-isgana-sunmaklegedi, unnila dule-wiogega emar-imaked.
PRO 10:7 Dule-innikidaed-e-nuggi nued sunmakledidaed. Dule-isgana-e-nuggindina, bar-egi-binsalesulid.
PRO 10:8 Dule-binsaed-ibed igar-maidba ibsaed. Dule-binsaedsulidaeddi, e-sunmakedgi na dukin san-wioged.
PRO 10:9 Dule-nuekwa-nanadiidi, bonisuli nanadiid. Dule-galagwensuli-nanadiiddina, ibagwengi e-isgued magar-daklenonikoed.
PRO 10:10 Dule ibmar-isgana-gunaid baisur-dakedi, emarga naibid-uked. Dule-binsaedsulid e-sunmakedgi na boni-amioed.
PRO 10:11 Dule-innikidaed-e-sunmakedi, dulega ibnuedga gued. Dule-isgana-e-sunmakeddina, unnila yamo dule-ourwega sunmaked.
PRO 10:12 Sae-emar-dakedgi, urwed amileged. Sabgueddina, isgussuliyob emar-dake imaked.
PRO 10:13 Dule-itoakwaa-gudiid-e-sunmakedgine, binsaed-nikagued amileged. Dule-binsaedsulidaeddina, e-yargan-gordii gued.
PRO 10:14 Dule-binsaed-ibegan, e-ibmar-wisigued bur bule amied. Dule-binsaedsulidaeddina, e-sunmakedgi ukiagwar boni-onogedsedaed.
PRO 10:15 Dule-mani-ibedi, manigi e-gangued siid. Dule-wilegeddina, wileged ega boniga-gumogad.
PRO 10:16 Dule-innikidaed-e-ibmar-imakedi, ega ibnuedga gued. Dule-isgana-e-ibmar-imakeddina, ega ib-isganaga gued.
PRO 10:17 Dule igar-odurdaklegedba-ibsaele, burba-dulad-nikaa gudii gued. Dule igar-odurdaklegedba-ibsasuliddina, igar-isganaba naddaed.
PRO 10:18 Dule-gakansaerbadi, sae-emar-daked odukued. Dule-emargi-isdar-sunmakedi, binsaedsuli gued.
PRO 10:19 Dule-gadi-sunmaked, gege isgued sogsuli gued. Dule gwabinduku-bargaed-nikaddina, we-dule, dule-binsaed-ibedid.
PRO 10:20 Dule-innikidaed-e-sunmakedi, mani-nuedyobid. Dule-isgana-e-binsaeddina, ibnuedga gusulid.
PRO 10:21 Dule-innikidaed-e-sunmakedi, dulemarga binsaed-nued uked. Dule-binsaedsuliddina, noar-binsaedba na dukin burgwed-amied.
PRO 10:22 Bab-Jehová-nued-emargi-binsaedi, ibmar-nuegan uked, bukib-binsaed-igar egi maisulid.
PRO 10:23 Dule-binsaedsulidaedi, na galagwensuli-gudiidgi wergudiid. Dule-binsaed-nikarbaddina, e-binsaed-nikarbadgi na wergudimogad.
PRO 10:24 Dule-isgana, na ibmar-dobgudiid egi aibined. Dule-innikidaeddina, na ibmar-abediid ega nabir gued.
PRO 10:25 Dule-isgana boni-dummagan-abin gwen gwisguosulid, yog-berguar gued. Dule-innikidaeddina, boni-dummagan-abin gwen-sikirmaksuli degisadeguoed.
PRO 10:26 Igi-ina-soled nugar-iii-imake, igi waabali ibya aurmake, deyobi, dule-wiegala e-dummadga gued.
PRO 10:27 Dule-Bab-Jehováʼgi-dobekwaa-nanadiidi, ibagan-suitii gudii gued. Dule-isganamardina, ibagan-suitii gudii gusulid.
PRO 10:28 Dule-innikidaedgala, iba-nuegan ega danidaed. Dule-isganagardina, iba-isganamar ega nonidaed.
PRO 10:29 Bab-Jehová-Igar-Maidi, dule-innikidaedga bendakleged-igar gued. Dule-ibmar-isgana-imakdimaladgardina, ega boniga binyed.
PRO 10:30 Dule-innikidamaladi, bonigan-abin akar-guosulid. Dule-isganamardina, we-napneggi gudii guosulid.
PRO 10:31 Dule-innikidaed-e-sunmakedi, binsaed-nika sunmaked. Dule-galagwensuli-sunmakeddina, gaya-maklemaloed.
PRO 10:32 Dule-innikidaed-e-sunmakedi, yeer-ito dule-imaked. Dule-isganamardina, galagwensuli ibmar-isganagi sunmaked.
PRO 11:1 Bab-Jehová nibir-innikisulid isdar daked. Nibir-innikigwaddina, nued daked.
PRO 11:2 San-odummolegedgi, nug-oicholeged danikid. San-bipi-imaklegedgindina, binsaed-nikagued danikid.
PRO 11:3 Dule-innikidaedgala, e-daed e-iduedga gued. Dule-isganadina, na e-isguedgi dukin boni-amied.
PRO 11:4 Igar-naboleged-ibagan-nonikile, be-ibmar-bukidar-nikadi be-bendakosurguoed. Ibmar-inniki-imaklegedgindina, burgwed-igar amilesulid.
PRO 11:5 Dule-innikidaedgala, e-ibmar-inniki-imakedi ega igar-nuegan oyoged. Dule-isganadina, e-ibmar-isgana-imakdiidgi na dukin wilegoed.
PRO 11:6 Dule-innikidamaladi, ibmar-inniki-imakedgi bendaklemalad. Dule-isganamardina, sulibinsa-ibmarbina-sogedgi bipirmakmalad.
PRO 11:7 Dule-isgana-burgwidele, na ibmar-edarbediid eba-yoggudoed, na e-nug-dummarba-guedgi-gabdakdiid bela eba-bergudbaloed.
PRO 11:8 Dule-innikidaedga, bonigan-noalile, akar-gusulid. Dule-isganadina, boniganse ibitogoed.
PRO 11:9 Dule-isgana, e-gwabin-dukugi dule-e-neg-nabamaid wioged. Dule-innikidaeddina, e-binsaed-nued-nikarbadgi na san-onoged.
PRO 11:10 Dule-innikidaed-nasgudele, bela dulemar wergued. Dule-isgana-burgwiderdina, wergued-dummad nagued.
PRO 11:11 Dule-innikidaedi, e-ibmar-nued-oyogedgi neggwebur-ogannoged. Dule-isgana-e-gwabin-dukudina, neggwebur-wioged.
PRO 11:12 Dule-inniki-binsasulidi, mesagwar emar-imaked. Dule-itoakwaa-binsaeddina, na e-gwabin-bargaed wisid.
PRO 11:13 Dule-yogasaar-sunmakedi, ibmar-soged odukusulid. Dule-na-burba-bargaed-nikaddina, itoakwaa sunmaked.
PRO 11:14 Negseleged-igar inniki-maisulile, dulemar galagwensuli guddaed. Dule-binsaed-nued-dakmaladgi neg-inniki-seleged danikid.
PRO 11:15 Be dule-akudaked-mani-gasad-anar, mani be bennukoye sogsale, na be dukin boni-amioed. Be dule-akudaked-mani-gasad-anar, be mani bennukosurye sogsardi, be bonisuli gudii guoed.
PRO 11:16 Ome gwage-nued-nikad-oyodiile, e-nug ogannoledii guoed. Dule ibmar-imakerbaddi, unnila ibmar-bukidar-nika-gudii guoed.
PRO 11:17 Dule gwage-nued-nikad-oyodiile, ega ibmar-nuedga gued. Dule-sabsurdaeddina, na dukin nunmaked amied.
PRO 11:18 Dule-isgana ibmar-isgana-imakedgi-ibmar-amied binsaledid. Dule-ibmar-inniki-imakedgi-ibmar-amied, ega ibnuedga gued.
PRO 11:19 Dule-innikidaed, burba-dulad-nika gudiid. Dule-ibmar-isganabina-sogdiiddina, burgwed-igar ega ukleged.
PRO 11:20 Bab-Jehová dule-gwage-isgana-nikadi, nabir-daksulid, ar we-dulemar, ibmar-isganaginbi binsadimalad. Bab-Dummad dule-inniki-gudiiddina yeerdaked.
PRO 11:21 Dule-isgana, amba sabsur odurdaklegedsegad. Dule-innikidamaladdina, sabsur-odurdaklegosurmalad.
PRO 11:22 Olo-nued-sin-e-asugi-yoiyobi, ome-yeerdakleged-binsaedsulidaed gued.
PRO 11:23 Dule-innikidaedi, unnila ibmar-nued-imakedbi abeged. Dule-isganamar-e-ibmar-abegeddina, unnila urwedginbi binsadiid.
PRO 11:24 Dule-wilub-obicha-ibmar-ukedi, aka ibmar-bukidar ega ukleged. Dule, mani-ganikid gwen-bennukdisulile, dule-wilegedga gudoed.
PRO 11:25 Dule-wilub-obicha-ibmar-ukedi, ibmar ega nasgued. Dule emar-ogannodiile, ogannoledii gumogoed.
PRO 11:26 Dule ibmargwag-gulleged na ebi gaasa-imakele, dulemar egi isdar sunmaked. Dule ibmargwag-gulleged emarga weligwaledgi manigi-ukdibe, dulemar egi nued binsaed.
PRO 11:27 Dule ibmar-nued-imakedi, aimar-nued amied. Dule ibmar-isganabina-gudiiddi, ibmar-isgana egi aibined.
PRO 11:28 Dule e-ibmar-nikadgi-alakwaa-naidibe, we-dule galakudoed. Dule-innikidaeddina, sapi-durbamakgwichidyob gudoed.
PRO 11:29 Dule dukin e-neguya-oichogedi, na e-neguya-obelogega imaked. Dule-binsaedsulidaeddi, dule-binsaed-ibed-e-maiga gudii gued.
PRO 11:30 Dule-innikidaed-e-ibmar-imakedi, nued-gudii e-imaked. Dule, dule-bamalad-ibmar-nued-imake-saedi, dule-binsaed-ibedid.
PRO 11:31 Dule-innikidaedga, we-napneggi ibmar-nued ukleged. Dule-isganamar-bulesunna, ar e-ibmar-isgana-imakdiidba we-napneggi sabsur-odurdaklemaloed.
PRO 12:1 Dule igar-nuegan-mamaidbina-itogerbadi, binsaed-nikaguedbina nue-soged. Dule igar-nuegan-mamaid-isdar-dakeddi, dule-binsaedsulidaedid.
PRO 12:2 Dule-nueddaedgi Bab-Jehová nabir-binsaed. Dule-galagwensuli-binsaeddi, Bab-Dummadse apor-gued.
PRO 12:3 Dule ibmar-isgana-imakedgi gargangued amiosulid. Dule-innikidaed-e-gargangueddi, gwen gigli guosulid.
PRO 12:4 Ome-innikidaedi, e-sui-nug odummoged. Ome-galagwensulidaeddina, e-sui-nug oichoged.
PRO 12:5 Dule-innikidaed-e-igarmar-amiedi, ibmar-inniki-imakedgi binsaed. Dule-isgana-e-sunmakeddina, unnila emar-yardakedgi sunmaked.
PRO 12:6 Dule-isgana-e-sunmakedi, emar-yardakar sunmaked, ablis-eogedgi sunmaked. Dule-nuegan-e-sunmakeddina, dulemar egi bendakleged amied.
PRO 12:7 Bab-Dummad sulibinsa dule-isganamar-imaked, degidba berguddamalad. Dule-innikidaed-e-mimmigandina, gwen-berguosulid.
PRO 12:8 Dule e-binsaed-nikaguedba, e-nug odummoleged. Dule-gwage-isgana-nikaddina, isdar dakleged.
PRO 12:9 Dule-san-dummarba-imaked-masgunned-satedba, bur nuedid, dule-mesagwar-gudiid wis-e-mai-ega-ibmar-imaked-nikar.
PRO 12:10 Dule-innikidaedi, na e-moli-nikad nued akwediid. Dule-isganadina, baisur e-ibmar daked.
PRO 12:11 Dule-sapurba-gadi-arbaedi, mas nikagudaed. Dule, dule-gegeganaba-gudiiddina, binsaedsuli gued.
PRO 12:12 Ibmar-isganabina-surbinsa-itolegedi, dule-isganaga boniga gued. Dule-innikidaeddina, sapi-nued-durbamakgwichiyob gued.
PRO 12:13 Dule-isgana na dukin gakansaar-sunmakedgi boni-amied. Dule-innikidaeddina, boniganse galakusulid.
PRO 12:14 Dulemar-na-e-sunmakedba ibmar abingaed. E-ibmar-imakedba ibmar abingabalid.
PRO 12:15 Dule-binsaedsulidaed na e-igar inniki-maiye bidaed. Dule-binsaed-nikarbaddina, unaleged-igarba ibsaed.
PRO 12:16 Dule-binsaedsulidaedi, baisursunna uluddaed. Dule-itoakwaadaeddina, egi-dule-urwed igi-barsaye sogdaed.
PRO 12:17 Dule-inniki-gudiid ibmar-napiragwad sunmaked, dule ibmar-gusad-gakansaar-barsogeddina, unnila gakanbi-sunmaked.
PRO 12:18 Dule-yogasaar-sunmakedi, es-suidse-naibigulegeyob emar-imaked. Dule-binsaed-nikarbad-e-sunmakeddina, ina-nuedyob gued.
PRO 12:19 Dule-ibmar-napiragwad-sunmakedi, sereddii megoed. Dule-gakanbi-sunmakeddina, sikwas gudii guoed.
PRO 12:20 Dule-galagwensuli-binsaedi, emar-yardakedgi binsaed. Dulemar-neg-bogidik-imakmaladdina, werguleged uked.
PRO 12:21 Dule-innikidaedi, boniganse akar-guosulid. Dule-isganamardina, boniganse ibitomaloed.
PRO 12:22 Bab-Jehová dule-gadi-gakansamaladi, gwen-nabir daksulid. Dule-inniki-gudiiddi, nued daked.
PRO 12:23 Dule-binsaed-nikarbadi, ibmar-wisirba na san-imaksulid. Dule-binsaed-sulidaeddina, galagwensulidaed na oyoged.
PRO 12:24 Dule-gadi-arbaedi, negseoedid. Dule-wiegaladina, maiga gudii guoed.
PRO 12:25 Sulibinsa-itogedi, dule-gwage wioged. Gaya-nueddina, emar-weligwar imaked.
PRO 12:26 Dule-innikidaedi, binsaed-nued emarga uked. Dule-isganadina, e-isguedgi emar-oichoged.
PRO 12:27 Dule-wiegala masgunnedsuli gudidaed, dule-arbaegaladina, ibmar-nikagu daed.
PRO 12:28 Ibmar-inniki-imakleged-igargi undar-dula-gudiid amileged, we-igargine burgwed-igar amilesulid.
PRO 13:1 Machi-binsaed-ibed, e-bab-ega-binsaed-uked nabir-itoged. Machi-uayasuliddina, ega-binsaed-uked isdar-itoged.
PRO 13:2 Dule-inniki-sunmaked, na e-sunmakedgi ibnued amidii guoed. Dule-emargi-yolemaladdina, unnila urwedginbi gudii guoed.
PRO 13:3 Dule-na-e-gwabinduku-nabir-bargaed, na dukin e-san bendakdiid. Dule-na-e-gwabinduku-wissur-bargaeddina, na dukin e-san wioged.
PRO 13:4 Dule-wiegala, na e-ibmar-abediid gwen-abingaosulid. Dule-gadi-arbaeddina, na e-ibmar-abediid abingaedsegad.
PRO 13:5 Dule-innikidaed gakan-igar gwen nabir-daksulid. Dule-isganadina, binged-amiedid, degine, emar-wiogedid.
PRO 13:6 Ibmar-inniki-imakleged dule-inniki-gudiid-bendakedid. Ibmar-isganadina, dule-isgudiid-wiogega imaked.
PRO 13:7 Abar-dulemar mani-nikayob gudidamalad, degi-inigwele, ibmardi gwen nikasurmalad. Abar-dulemar ibmarsuliyob gudidamalad, degi-inigwele, ibmardi nue-nika gudidamalad.
PRO 13:8 Dule-mani-ibed mani-nikadbali, sunna dule-isganase galesar gudiid. Dule-wilegeddina, we-boni nikasulid, ar dulemar bai daksulid.
PRO 13:9 Dule-innikidaed-e-gudiidi, gwallu-gaeyob weligwaled oyodiid. Dule-isgana-gudimaladdina, negsichid-naiyob gued.
PRO 13:10 Dule-san-dummarba-imaked emarga urwed-amied. Dule-na-san-bipi-imakeddi, binsaed-nikaguedba gudiid.
PRO 13:11 Mani-yogasaar-amileged baisursunna-berguddaed. Dule-mani-saboged-wisiddina, binnasdikii ibmar-nikumaidaed.
PRO 13:12 Ibmar-edarbelediid-abingalesulile, gwage-nunmaked emarga uked. Ibmar-edarbelediid-abingalenonikile, weligwaled anmarga uked.
PRO 13:13 Dule igar-soglemaid isdar-dakele, na dukin boni-amied. Dule igar-soglemaidba ibsaele, ibmar-nued ega ukleged.
PRO 13:14 Dule-binsaed-ibed-e-ibmar-odurdaked, burba-dulad emarga uked. Dule-binsaed-ibed-e-ibmar-odurdaked, burgwed-igargi nabir emar-bendakbalid.
PRO 13:15 Unaleged-igar-innikigwad-uklegedi, nabir-itole neg-imaked. Dule-igar-maidba-ibsadisuliddina, boni-dummad na abgadii guoed.
PRO 13:16 Dule-itoakwaadaed, binsaed-nued-nikadgi ibmar imaked. Dule-binsaed-sulidaeddina, galagwensulidaed na oyoged.
PRO 13:17 Dule-gayaburba-berbeged-isgana, boni emarga amied. Dule-gayaburba-berbeged-nueddina, ibmar-nued emarga uked.
PRO 13:18 Dule, unaleged-igar isdar-dakele, dule-wilegedga gued, e-nuggi dodolebalid. Dule, unaleged-igar nabir-itogele, nug-dummarba nikuoed.
PRO 13:19 Ibmar-abeleged-abingalesale, emar-gwage-weligwar imaked. Ibmar-isganagi-banguleged, dule-binsaedsulidga gwen nabir-nosulid.
PRO 13:20 Dule, dule-binsaed-nued-nikadba akaele, binsaed-nued-nika gumogoed. Dule, dule-binsaedsulidba akaele, na dukin boni-amied.
PRO 13:21 Dule-isgana, ibmar-isganase bargaledidaed. Dule-innikidamaladdina, ibmar-nuegan abingaed.
PRO 13:22 Dule-nued-daed e-wagangala, ibmar-nuegan obeged. Dule-isgana-e-ibmar-nikaddina, dule-innikidaedga obeged.
PRO 13:23 Dule-wilemalad-e-nainugi, nue-ibmar sanmaked. Degi-inigwele, dule-ibmar-isgana-imakedba, bela we-ibmar yoggued.
PRO 13:24 Dule, e-machi-odurdaksulile, e-machi-isdar-dakeyob gued. Dule, e-machi-sabele, e-machi yolenonikile, igar-maidba odurdakoed.
PRO 13:25 Dule-innikidaed, nue-immee masgunned. Dule-isganadina, amba ukudmaada gudii guoed.
PRO 14:1 Ome-binsaed-ibed e-neguya onasgued. Ome-binsaed-sulidaeddina, na dukin e-neguya obeloged.
PRO 14:2 Dule-inniki-nanadiid, Bab-Jehová-sogedba gudiid. Dule-igar-isganaba-gudiiddina, isdar Bab-Dummad-dakdiid.
PRO 14:3 Dule-binsaedsulidaed-e-sunmaked, unnila na san-odummogedgi sunmaked. Dule-binsaed-ibeddina, e-sunmakedgi bendakleged.
PRO 14:4 Dule moli-bebe-nikad-satele, e-ob-aila binsa ollo sigoed. Ar moli-bebe-nikad-e-arbaedgi masgulleged nue-amileged.
PRO 14:5 Dule-ibmar-gusad-barsoged-innikigwad, wissur-gakansaed. Dule-ibmar-gusad-barsoged-napiragwadsuliddi, unnila gakangi sunmaked.
PRO 14:6 Dule-galagwensulidaedi aisaar binsaed-nued nikubi gudidaenad, degi-inigwele, gwen amiosur guoed. Dule-binsaed-nued-nikarbaddina, baisursunna ibmar durdaked.
PRO 14:7 Dule-binsaedsulidaedgi be bannaba gudisae, ar a-dulegi, gwen be binsaed-nued amiosulid.
PRO 14:8 Dule-itoakwaadaedi, binsaed-nued-nikadba na magar neg-itoge gudiid. Dule-binsaedsulidaeddina, na e-binsaedgi yardaklediid.
PRO 14:9 Dule-binsaedsulidaedi, unnila isguedgi burgudiid. Dule-nuedmargindina, Bab-Dummad nued-binsaed.
PRO 14:10 Dule, na sana-walagwen e-nunmaked magar itoged. E-wergued, dule-baid eba itogosulid.
PRO 14:11 Dule-isgana-e-neguya bela bergudoed. Dule-innikidaed-e-neguyadina, nasgumai gudoed.
PRO 14:12 Imbagwenale, dule na e-ibmar-imakedi, inniki-imakye bidaed, degi-inigwele, e-ibmar-imakedgine, sunna burgwed-igar amied.
PRO 14:13 Imbagwenale, alled-abalagine, gwage-nunmaked itoleged. Imbagwenale, weligwar-itogedgine, nunmak itoledabalid.
PRO 14:14 Dule-binsaedsulidaedi, na e-igar-isganagi wergudiid. Dule-nued-daeddina, na ibmar-nued-imakedgi wergudimogad.
PRO 14:15 Dule-baisur-binsaedi, baisursunna binsaed-galeged. Dule-itoakwaa-binsaeddina, ibmar-imaked-iduale itoakwaa binsaed.
PRO 14:16 Dule-binsaed-ibedi, ibmar-isgana-abin dobekwaa nanaed, igar-isganagi bachikii gudidaed. Dule-binsaedsulidaeddina, na san-buled imaked, gwen-akar-guosurye na binsadabalid.
PRO 14:17 Dule-baisursunna-urwedi, galagwensuli ibmar imaked. Dule-itoakwaa-binsaeddina, na san-bargaed oyoged.
PRO 14:18 Dule-baisur-binsaedi, unnila galagwensur-binsaleged abingaoed. Dule-itoakwaa-binsaedgala binsaed-nikarbad uklegoed.
PRO 14:19 Dule-isganamar, dule-nued-asabin yokorgi-sindigar sigmaloed. Dule-isganamar, dule-innikidamalad-e-igar-itogedgi, gan-bipigi sii gumaloed.
PRO 14:20 Dule-wilegedi, e-aimarbela isdarsunna dakdamalad. Dule-mani-ibeddina, bukidar e-aimar nikad.
PRO 14:21 Dule, dule-mesagwar-imakdiile, bato isgusye sogleged. Dule, dule-wileged-sabgudiile, we-dulegi ise-nued binsalesad.
PRO 14:22 Dule-galagwensuli-binsadiid igar-noar imaked. Dule-ibmar-inniki-imakdiiddi, sabgued-igar amied, igar-innikigwad amibalid.
PRO 14:23 Nue-arbalegedgine, ibmar-nuegan amileged. Binsa-gayaginbi-soglegeddina, wilegedga emar-imaked.
PRO 14:24 Dule-binsaed-ibedi, e-binsaed-nikaguedgi e-nug dungued. Dule-binsaedsulidaeddina, e-binsaedsulidaedgi na e-wileged amied.
PRO 14:25 Dule-ibmar-gusad-barsoged-innikigwadi, burgwedgi nue-emar-bendaked. Dule-ibmar-gusad-barsoged-napiragwadsuliddi, unnila gakansaedba emar-wioged.
PRO 14:26 Bab-Jehováʼgi-dobekwaa-nanalegedgine, bela-bela bendakleged siid. E-mimmigana, Bab-Dummadgi bendakleged nue-amimarmogad.
PRO 14:27 Bab-Jehováʼgi-dobekwaa-nanalegedgine, nued-gudiguleged amileged. Dule-deyob-gudiile, muis burgosulid.
PRO 14:28 Rey-e-garganguedi e-dulemar-bukidarad-nikadba siid. Dule-nuga-nikadi e-dulemar-satedba, bingesaar dakleged, agi nollomaksiid.
PRO 14:29 Dule baisursunna-urwesulidi, magasar neg-itoged. Dule-bargaedsuli-gudiiddina, galagwensuli-binsaed yoga-oyogar imaked.
PRO 14:30 Dule-gwage-bogidik-nikadi, nued-gudii gued. Dule-nobgueddina, bela na san-oichoged.
PRO 14:31 Dule-wileged-apor-imakedi, Bab-Dummadgine-yolenaid. Dule-wileged-sabgudiiddina, Bab-Dummad-e-nug odummodiid.
PRO 14:32 Dule-isgana e-ibmar-isgana-imakedgi boni-amied. Dule-innikidaeddina, e-daedgine na san-bendaked amied.
PRO 14:33 Dule-binsaed-ibed-e-gwagegine binsaed-nikagued naid. Dule-binsaedsulidaeddina, binsaed-nikagued magar-itosulid.
PRO 14:34 Ibmar-inniki-imaklegedgi neggwebur ogannolesiid. Isguedgindina, neggweburmar wiolesiid.
PRO 14:35 Rey, e-mai-itoakwaa-gudiidgi, nued-binsaed oyoged. Dule-e-nuggi-dododiidgardina, e-urwed oyoged.
PRO 15:1 Binnalegwadgi dule-urwenaid-abin-imakedi, urweleged bargaleged. Urwedgi dule-urwenaid-abin-imakeddi, urweleged baligannoged.
PRO 15:2 Dule-binsaed-ibed-e-sunmakedi, binsaed-nuegan uked. Dule-binsaedsulidaed-e-sunmakeddina, binsaed-isgana uked.
PRO 15:3 Bab-Jehová bela negdakmaid. Dule-nuedgi nakulemaid, dule-isganagi nakulemaibalid.
PRO 15:4 Gayaburba-gwage-gadi-gadi-imakedi, ina-nuediyobid. Gayaburba-isganadina, emarga gwage-naibid uked.
PRO 15:5 Dule-binsaedsulidaedi, e-bab-e-unaed isdarsunna itodaed. Dule-e-bab-e-unaed-nabir-itogeddina, itoakwaadaed oyoged.
PRO 15:6 Dule-innikidaed-e-neggine, ibmar-bukidar nikaguad. Dule-isganadina, na e-ibmar-bukidar-amiedgine, bonigan ega noed.
PRO 15:7 Dule-binsaed-ibegan-e-sunmakedgi, binsaed-nuegan ainied. Dule-binsaedsulidamaladdina deyob sunmaksulid.
PRO 15:8 Bab-Jehová dule-isgana-ega-ibmar-ogumakar-ukedi, gwen nabir-daksulid. Bab-Jehová, dule-innikidaed-ese-goledgindina, yeer itodaed.
PRO 15:9 Bab-Jehová dule-isgana-e-daed gwen nabir-daksulid. Dule-igar-inniki-imakdiiddina, nue-sabed.
PRO 15:10 Dule-galagwensuli-gudiidga, sabsur-odurdakleged-igar maid. Dule-odurdakleged-igar-isdar-dakdiiddi, unnila oburgweleged-igar ega maid.
PRO 15:11 Bab-Jehováʼgi, neg-uan dukumaisulid, burgwed-igar dukumaisurbalid. Degite, ¡dule-gwage-bule-sunna!
PRO 15:12 Dule-gwen-nabir-dasulidi, dule-ese-goled isdar-itodaed, degite, dule-binsaed-ibedbali, akasurbalid.
PRO 15:13 Gwage-weligwaledi, wagargi magar dakleged. Gwage-wile-itogedi, wagargi magar daklebalid.
PRO 15:14 Dule-magar-neg-itogedi, unnila binsaed-nuedbina gudidaed. Dule-binsaed-sulidaeddina, ibmar-galagwensulid na e-masgunnedyob imakdiid.
PRO 15:15 Dule-wile-itodiidgala, iba-nuegan gwen naisulid. Dule-weligwaledgardina, bane-bane ibabi neg-naid.
PRO 15:16 Dule ibmar-bukidar-nikad-ular, sulibinsa-itodiidba bur nuedid, dule wis-ibmar-belagwa-nika-gudiir, Bab-Jehová-dobekwaa-gudigubalir.
PRO 15:17 Isdar-itogedgi, moli-san-isesaar-gunsiidba bur nuedid, sabedgi wis mas-yoaledbi gunsiir.
PRO 15:18 Dule-gadi-urwedi, emarga gadi-urwed amied. Dule na san-bargaed-nikaddina, neg-bogidik imaked.
PRO 15:19 Dule-wiegalaga neg ikoganbi gued. Dule-innikidaedgardina, akwan-eogaleyob igar-maid.
PRO 15:20 Machi-binsaed-ibedi, e-bab-weligwar imaked. Machi-binsaedsulidaeddina, e-nan-mesagwar imaked.
PRO 15:21 Dule-binsaedsulidaedi, e-binsaedsulidba na wergudiid. Dule-magar-neg-itogeddina, na dukin e-daed-gudiid nudaked.
PRO 15:22 Binsaed-nuegan-satele, igarmar apurnonidaed. Dule-binsaed-nuegan-bukidaradbali, neg nasguddaed.
PRO 15:23 Ibmar-nued-soglegedi yeer-itole emar-imaked. Ibmar-nued-soglegedi, e-ibagi-sogledele, bur bule nuedid.
PRO 15:24 Dule-binsaed-ibedi, igar-nueganba nakwemaid. Degidbali, burgwisale, odurdakleged-neg dakosulid.
PRO 15:25 Bab-Jehová, dule-san-dummarba-imakdiid-e-neg obeloged. Omegan-ei-sui-burgwismalad e-napaneg-abingunanaiddi, Bab-Jehová akar-guega imakosulid.
PRO 15:26 Bab-Jehová, dule-isgana-e-binsaed isdarsun-daked, gayaburba-nuegandi, nued itoged.
PRO 15:27 Dule-ibmarbina-suli-binsa-itogedi e-neguyaga boni-uked. Dule manigi-binsaed-galeged-isdarsun-dakeddina, nued-gudii gued.
PRO 15:28 Dule-innikidaedi, emar-abin-imaksokalile, ise-binsaar imaked. Dule-isganadina, e-sunmaked ibmar-isganaginbi sunmaked.
PRO 15:29 Bab-Jehová dule-isganamar-itosulid. Dule-innikidaed-ese-goterdi, nue-itoged.
PRO 15:30 Dule, weligwaledba-emar-dakedi, emar-gwage-weligwar imaked. Gayaburba-nuegana, emar-niga-ogannoged.
PRO 15:31 Dule, emar-ega-ibmar-nabir-sogedi nabir-itogele, dule-binsaed-ibegan-abargi gudii guoed.
PRO 15:32 Dule, odurdakleged-igar isdarsunna dakele, na dukin isdarsunna dakdiid. Dule, odurdakleged-igar nued-abin-gaele, ibmar-nue-wisidga gued.
PRO 15:33 Bab-Jehováʼgi-dobekwaa-nanalegedgi binsaed-nikagued amileged, egi odurdakleged-igar-nued amilebalid. Ar dule na e-nug-odummoleged-abegele, na san-bipii imakgwelergebed.
PRO 16:1 Dule na e-gwagegine-soged, ibmar-imakoye, degi-inigwele, ibmar-imakleged Bab-Jehováʼse bergusiid.
PRO 16:2 Dule na bela-ibmar-imakedi, inniki-imakdiiye-bied, degi-inigwele, Bab-Jehová sogoed, bule ibmar-inniki-imakdidibe.
PRO 16:3 Be ibmar-imakbied, Bab-Jehováʼga be uke, deyob be imakele, nabir bega igarga gunonikoed.
PRO 16:4 Bab-Jehová-ibmar-imakedi, igar-nikaa imaked. Ar dule-isganagase-bakale, odurdakleged-iba ega imaklesmogad.
PRO 16:5 Bab-Jehová dule-na-san-buled-imakdiid gwen-nabir-daksulid, ar we-dule sogedba-odurdaklegedsegad.
PRO 16:6 Isgued-nudaklegegala, unnila sabgued-nikadba, degi, innikigwadba nudakleged. Bab-Jehová-dobekwaa-gudiidgine, isguedgi banguleged.
PRO 16:7 Bab-Jehová dule-e-daed nued-dakele, dule-e-isdarmaladse-bakale, ebo-nued-gudii imakbalid.
PRO 16:8 Dule ibmar-isgana-imakdiidgi ibmar-bukidar-amied, aba bur nuedid, dule ibmar-inniki-imakdiidba wis-belagwasaar-gudii gued.
PRO 16:9 Dule ibmar-imakoye na sogedi, Bab-Jehová-sogedba we-dulega ibmar-gumai guoed.
PRO 16:10 Ar rey-sogdibe, ibmar deyob guoye, rey-igar-mesnonikidi irgwen-sogar meged.
PRO 16:11 Nibir-innikigwadi, nibir-e-bate-sogedbalid, Bab-Jehováʼgadid, ar Bab-Dummad bela ibmar-wilubsaleged imaksad.
PRO 16:12 Rey, ibmar-isgana-imaklegedi nabir-daksulid, ar e-garganguedi, unnila ibmar-inniki-imaklegedgi siid.
PRO 16:13 Rey, gayaburba-innikigwad-sunmakleged yeer daked, dule-napiragwad-sunmakedi, nued dakbalid.
PRO 16:14 Rey-e-urwedi, burgwed-igar-daged obared. Dule-binsaed-ibeddina, rey-e-gwage bogidik imaked.
PRO 16:15 Rey weligwaledba-emar-dakedi, igar-nuegan-oyoged. Rey-emargi-nued-binsaedi, dii-wieyob gued.
PRO 16:16 Or-nued-nikuedba, binsaed-nued-nikued bur-nuedid. Mani-nikuedba, ibmar-nue-wisigued bur-nuedid.
PRO 16:17 Dule-innikidaedi ibmar-isganaba nanadisulid. Dule-deyob-gudiidi na san-burba-bendakdiid.
PRO 16:18 San-odummolegedgine, ibitoged-igar maid. San-dummarba-imaklegedgine, yoleged-igar maid.
PRO 16:19 Dule san-dummarba-imakdimalad-abargi ibmar-nuegan-abingaedba, bur nuedid, dule-mesagwar-gudimalad-abargi wilesakwasaar-gudii gued.
PRO 16:20 Dule gayaburba-itogedi ibmar-nuegan amied. Dule Bab-Jehováʼgi bengudisulile, ise-nued egi binsalesad.
PRO 16:21 Dule-binsaed-ibed-sunsogedgindi, sogleged, dule-gurgin-nued-nikadye. Dule gayaburba-nuedgi-sunmaked, dule-eba-daega imaked.
PRO 16:22 Dule-itoakwaa-ibmar-imakedi, undar-gudiguoed. Dule-binsaedsulidaeddina, e-binsadiidgi na sabsur-odurdaklegoed.
PRO 16:23 Dule-binsaed-ibed-sunsoged, e-sunmaked nabir na bargaed. E-gayaburba-sunmakedgine, ibmar-nuegan-wisguleged onisiid.
PRO 16:24 Gayaburba-nuegan achanis-malegedyobi, gwage-ulubgine yeer-ito emar-imaked. Gayaburba-nuegan, san-burbagala ina-nuediyob gued.
PRO 16:25 Imbagwenale, dule, na e-ibmar-imakedi inniki-imakye bidaed, degi-inigwele, e-ibmar-imakedgine, sunna burgwed-igar amied.
PRO 16:26 Dule-arbadiid mas-gunnega arbaergebed, ar e-ukumaad-itoged oarbaega-imaked.
PRO 16:27 Dule-isgana, unnila igar-isgana-imaked amidiid. E-sunmakedi, igi-soo-ibmar-ogumake, deyob emar-imaked.
PRO 16:28 Dule-isgana, emarga urwed-amied. Dule-binsa-yogasaar-ibmar-sogedi, ai-nuegan-mamaredid.
PRO 16:29 Dule-gadi-urwed e-ai-yardakerbad, e-ai-galagwensulidae imaked.
PRO 16:30 Dule-ibyagi-sunmaked, ibmar-isgana-imakedgi binsadaed. Dule-gaya-gunnar-imaked, ibmar-isgana bato imaksa gudiid.
PRO 16:31 Dule-selebagus-nono-sipu-gudiidi, ologurgin-nikayob gudiid. Ibmar-inniki-imakdiidbali, e-nug ogannolediid.
PRO 16:32 Dule-na-niga-gandik-oyodiidba bur-nuedid, dule-na-e-gwage-bargaed-nika gudigued. Dule gandikidgi neggwebur-suedba bur nuedid, dule na san-bargaed-wisi gudigued.
PRO 16:33 Ibmar-imaklegegala, wilub-daklegar imakleged. Degi-inigwele, ibmar-guoed, Bab-Jehováʼse bergusiid.
PRO 17:1 Urwed-abargi san-nued-gunsiidba bur-nuedid, weligwaledgi madu-dutusulid-gunsiir.
PRO 17:2 Mai-binsaed-ibedi, machi-galagwensurdaed-e-dummadga gudiguoed. Mai-binsaed-ibedi, machi-galagwensurdaed-e-gwenadganba e-babgan-ega-ibmar-obesad nikumogoed.
PRO 17:3 Olo, soogi wilubdakleged, bormo-crisolʼgi mani wilubdaklebalid. Dule-e-binsaeddina, Bab-Jehováʼse wilubdaklemogad.
PRO 17:4 Dule-isgana, dulemar-gaya-isgana-sunmakedba ibsaed. Dule-gakansaegwa, dule-gaya-isgana-sogedba gudiid.
PRO 17:5 Dule dule-wilegedgi-dododiidi, Bab-Dummadgi dodoged. Dule, dule-wileged-naibi-itodiidga-allediidi, odurdaklegedsegad.
PRO 17:6 Dad-e-werguedi, e-wagan-nikadgi siid. Mimmigan-e-werguedi, e-babgangi simogad.
PRO 17:7 Dule-binsaedsulidaedi, gaya-nuegan-sunmakedi egi nosulid. Dule-dummagan-negsemamaid, gakansaar-sunmakedi, egi nosurmogad.
PRO 17:8 Dule manigi-emar-binsaed-gaed-gudiidi, na binsadaed, ede, ina-nika-gudiiye. Ar deyobi, yogasaar ibmar-amididaed.
PRO 17:9 Dule, dule-egi-isgusad-egi-isgussuliyob-dakedi, ai-nikued-igar ogannoged. Ar dule, dule-egi-isgusadga ibmar gannar-gannar-obarele, aimar-isdaradga imaked.
PRO 17:10 Dule-itoakwaa-binsaedga sabsur-ibmar-soglegele, irgwen-itogaled. Dule-binsaedsulidaeddina, molidubgi ila-dulataledse (100) bibyolenaidibe, amba itosulid.
PRO 17:11 Dule-uayasatedaedi, gusgu urwed-amididaed. Ibagwengine, dule-eba-bur-egi-obined abingunonikoed.
PRO 17:12 Dule-binsaedsulidaed e-ibmar-imakedgi-alamakdiid-abinguedba bur-baisulid, wiob-urwediid-abingued.
PRO 17:13 Dule, ibmar-nued-ega-imaklesad-ular, ibmar-ichakwa-ukdibe, e-neguyagine, bipisaale bonigan berguosulid.
PRO 17:14 Dule, urwed-onoye-sogele, diwar-dummad-noedyobi, dummad-neg-gagaed. Degisoggu, bur-nuedid urwedgi yog-banguar-imaked.
PRO 17:15 Bab-Jehová ibmar-sogbo isdar daked: Dule, dule-ibmar-oakalosad, ibmar-oakalossulidyob daked. Dule, dule-ibmar-oakalossulid, ibmar-oakalosadyob daked.
PRO 17:16 Dule-binsaedsulidaedga mani-uklenonikile, ¿igi imako na itoge? ¿Egi binsaed-nikagued amio na itoge? Suli. Ar edi, dule-ibmar-wissulidid.
PRO 17:17 Dule, ai-guedgine, gusgu ai-sabguerbad. Degisoggu, boni-dummad-ibagan-nonikile, gwenad-gargwenadyob gued.
PRO 17:18 Dule-itoakwaa-binsasulidi, yogasaar emarbogwa igar-mesed, dule-mani-gasad-anar mani-bennukega gubalid.
PRO 17:19 Dule-isguedbina-itogerbadi, unnila urwedbina gudidaed. Dule-san-dummarba-imakedi, na dukin boni-amidaed.
PRO 17:20 Dule-gwage-isgana, bipisaagwale ibmar-nued amiosulid. Dule-gadi-gakansaar-sunmakedi, ibmar-isgana egi aibinoed.
PRO 17:21 Dule, machi-binsaedsulidaed-nikale, bukib-binsaed ega uked. Dule-binsaedsulidaed-e-babga-guedi, wergued egi amilesulid.
PRO 17:22 Dule, gwage-weligwaled-nikale, ina-nuedga gued. Gwage-wile-itolegeddi, niga-obated.
PRO 17:23 Dule-isgana dukuar dule-baidse manigi binsaed galeged. Agala, ibmar-galagwensuli-imakleged geg bergued.
PRO 17:24 Dule-itoakwaa-binsaedi, binsaed-nued-nikuedginbi binsaed. Dule-binsaedsulidaeddina, aku neg-itoged, gabdakedginbi gudiid.
PRO 17:25 Dule-binsaedsulidaedi, e-bab-ourwed gudiid. E-nanga, gwage-nunmaked-uked gudibalid.
PRO 17:26 Dule-ibmar-oakalossulid sabsur-odurdaklegele, ibnuedsulid. Dule-ibmar-innikidamalad naibi-imaklegele, ibnuedsurbalid.
PRO 17:27 Dule-magar-neg-itogedi, nabir na e-gwabinduku bargaed. Dule-itoakwaa-binsaedi, nabir na san-bargamogad.
PRO 17:28 Dule-binsaedsulidaedi bogidik gudiile, binsaed-ibedyob daklemogad. Sunmaksurbalile, dule-itoakwaa-binsaedye, egi binsalebalid.
PRO 18:1 Dule-na-eginbi-binsaedi, unnila egarbi ibmar-nued abeged, dule-ega-binsaed-nued-ukeddi, abesulid.
PRO 18:2 Dule-binsaedsulidaedi, magar-ibmar-itoged baisur-daked, unnila e-ibmar-sogedgi na san-odummodiid.
PRO 18:3 Ibmar-isgana-imaklegedgine, dule-sae-dakleged nononidaed. Bingegulegedba-mai dule-nug-gagaleged danidaed.
PRO 18:4 Dule-e-gayaburba, dii-wiladyob gued. Diwar-iirmakemaiyob egi binsaed-nikagued ainimaid.
PRO 18:5 Dule-ibmar-oakalosad ibmar-oakalossuliyob-imakedi, ibnuedsulid. Dule-ibmar-oakalossulidga ega igar-innikigwad-imaksulile, ibnuedsurbalid.
PRO 18:6 Dule-binsaedsulidaed-e-sunmakedi, unnila neg-urwed onoged, e-sunmaked emarga urwed-amied.
PRO 18:7 Dule-binsaedsulidaed e-sunmakedgi na dukin san-wioged, e-sunmaked na dukin egi aibinega-imaked.
PRO 18:8 Gakangi-sunmaklegedi, mas-nued-gullegeyobid. Gakangi-sunmaklegedi, ulubse uboged.
PRO 18:9 Dule, e-arbaedgi nue-arbasulile, dule-ibmar-ogiloged-e-sordaga gued.
PRO 18:10 Bab-Jehová-e-nug, neg-matusulid-gandikid-geg-ayaredyobid. Dule, bendakleged-amiegala, a-negse abarmakdedaed. Bab-Jehová-e-nug dule-innikimaladga deyob gued.
PRO 18:11 Igi neggwebur-e-akwa-galu-matusulid-ebirnai, mani-ibmalad na deyob e-ibmar-nikad egi ebirnai itoged. Degisoggu, gwen akar-guosuliyob na binsamalad.
PRO 18:12 Dule, ibitoged-idu, e-daed bule-bule na san-oyoged. Dule, e-nug-ogannoleged-idu, e-daed na san-bipii oyoged.
PRO 18:13 Yogasaar gwen ibmar-itossuli-emar-abinsaele, binsaedsulidalegedid, dule-emar-obingeg-saedid.
PRO 18:14 Dule-uelleged bonigan-itomaidgi niga-gandikgudele, gwae nugudoed. Ar dule-uelleged niga-batismaile, ¿adi, igi nuguosunna?
PRO 18:15 Dule-itoakwaadaed ibmar-nuegan baramied. Dule-binsaed-ibed gatik ibmar-wisgued-nikuegala, nue ibmar-itodaed.
PRO 18:16 Ibmar-binsa-uklegedba belagwable yawagakmar argaed, abali, dule-dummaganse warmakleged.
PRO 18:17 Dule-na-e-inse-san-bendakedi, e-ibmar-sogedi, e-gussuliyob sunmaked. Geb dule-baid-ebo-boni-nikadi, sorba ibmar-sognonimogale, akar egi sunmaknonimogoed.
PRO 18:18 Ibmargi-wilubdaklegar-imakleged igar-apurnaid nabir nudaked. Dule-gandikidga, dule-gandikid-baidbo boni-nika-gunair, nabir ega igar-nudakbalid.
PRO 18:19 Neggwebur-e-akwa-galu-ebiris-bukwad-earedba bur undarad, gwenad-oululesad-e-gwage gadi-gadi-imaked. Neggwebur-yawagak-geg-argaedba bur undarad, gwenadgan-na-muchub-muchub-urwemalad walikaa-gudigued.
PRO 18:20 Dule na e-sunmakedba yeer-itodiid, na e-sunmakedba immee gudiid.
PRO 18:21 Sunmaklegedgine, burba-dulad maid, burgwed-igar maibalid. Dule na e-sunmakedbali, e-igar abingaoed.
PRO 18:22 Dule ome-nikunonikile, ibnued nikued. Bab-Jehová-egi-nued-binsaed ega oyoleged.
PRO 18:23 Dule-wileged wilesakwaa ibmar egised. Dule-mani-ibeddina, sabsur dule-abin-imaked.
PRO 18:24 Dule, aimar-nikale, aigwar guergebed. Abar-aimar nikad, gwenad-gargwenadba bur bule walikaa daed.
PRO 19:1 Dule-emargi-gakansaar-sunmakedba, bur nuedid, dule-wileged inniki-nanadii gued.
PRO 19:2 Itoakwaa ibmar-imaksulidi, nuedsulid. Dule gwae-gwae-ibmar-imakedi, gadi noar-ibmar-imakdaed.
PRO 19:3 Dule-binsaedsulidaedi, e-binsaedsulidba yogasaar nanaddaed. Geb sogdedaed: “An-akargusadi, Bab-Jehováʼginye.”
PRO 19:4 Dule, ibmar-nuegan-nikadba bukidar aimar-nikuega gued. Ar dule-wilegeddi, na e-aise-bakale, egi bangued.
PRO 19:5 Dule-ibmar-daksad-gakansaar-sogedi, sabsur-odurdaklegosuli guosulid. Dule-gakansili na gwen san-onogosulid.
PRO 19:6 Dulemar-bukidar, dule-obinebak-ibmar-uked-e-aiga-guega amimalad. Bela dulemar, dule-ibmar-binsa-uked-e-aiga gumalad.
PRO 19:7 Ar bela dule-wileged-e-gwenadgan, dule-wileged-isdar-dakele, e-aimar-bursunna, bur bule isdar dakoed. Dule-wilegedi, na e-bendakega e-aimar-amidiguo-inigwele, bipisaar amiosulid.
PRO 19:8 Dule ibmar-magar-itoged-amiedi, na e-san sabed. Na ibmar-durdaksad imakele, ibmar-nued amioed.
PRO 19:9 Dule-ibmar-daksad-gakansaar-sogedi, sabsur-odurdaklegosuli guosulid. Dule-gakansaar-sunmakedi, na burgwed-amioed.
PRO 19:10 Dule-binsaedsulidaedi, ibmar-mani-gargerbad-nikuedi, egi nosulid. Dule-maiga-gudiid-bursunna, bur bule dule-dummagan-e-dummadga-guedi egi nosulid.
PRO 19:11 Dule-binsaed-nikadaedi, na urwed wisi bargaed. Dule-egi-nosad-egi-nossuliyob-dakeddi, e-nug dummarbaa imaked.
PRO 19:12 Rey-urwedi, achumigur-nono-wawaad-uurmakedyob gued. Ar rey-e-nued-binsaeddi, gagangi boo-bateyobi neg-imaked.
PRO 19:13 Machi-binsaedsulidaedi, na e-bab-wile-itogega imaked. Ome-e-ulus-ulusdaedi, dii-yakedyob gued, binna-binna sui-wioged.
PRO 19:14 Nega, degi, ibmar-nuegan, babgan uked. Ome-binsaed-nikadaeddi, Bab-Jehová uked.
PRO 19:15 Wieguedi, dulega gabed-uked. Dule-wiegala ukudmaada gudii guoed.
PRO 19:16 Dule-Bab-Dummad-Igar-Maidba-ibsaedi, dukin san-bendaked. Dule-Bab-Jehová-Igar-Mesisad-isdar-dakeddi, burgoed.
PRO 19:17 Dule-wilegedga-ibmar-ukedi, Bab-Jehováʼga-ibmar-uknaiyob gued. Bab-Jehová dule-ibmar-uksadga gannar ibmar uked.
PRO 19:18 Be-machi nued-nanaegala, bipigwadgi be unao. Be sabsur-odurdakalile, melle oburgwedse be imako.
PRO 19:19 Dule-gadi-urwedi, sabsur-odurdaklegoed. E-urwed-bargaega egi binsa alamakleged, aka bur bule uluddaed.
PRO 19:20 Bega-binsaed-uklegedi, be itoge. Be-unaedi mer be isdar-itoge, ar dule-binsaed-ibedga be guoed.
PRO 19:21 Dule ibmar-imakega bukidar igar-amied, degi-inigwele, Bab-Jehová-ibmar-imakbiedbi imakleged.
PRO 19:22 Dule emar-innikii-eba-daed abeged. Dule-gakansiliba, bur nuedid, dule-wilegedga-gued.
PRO 19:23 Bab-Jehová-dobekwaa-nanaedi, dula-gudii dule-imaked. Bogidik-gudii dule-imaked, mer-bonigan-nikuega dule-imaked.
PRO 19:24 Dule-wiegala mas-gunnega bateyagi e-argan ododaenad, degi-inigwele, wiedba e-gayaba mas odosulid.
PRO 19:25 Dule-binsaedsulidaedi, unnila sabsur-odurdakedgi ibmar-durdaked. Dule-binsaed-nikagueddi, na ibmar-durdakega irgwen-ounaed abeged.
PRO 19:26 Dule e-bab-ibe-ibmar-atursaedi, neggi e-nan-ononnobalidi, a-dule, machi-isganad, dule-binged-satedid.
PRO 19:27 Machi, dule-be-unaed be itosulile, binsaed-nikaguedgi be bangudoed.
PRO 19:28 Dule-ibmar-daksad-gakansaar-soged igar-nabolenaidgi dodoged. Dule-isgana ibmar-isganaginbi sunmaked.
PRO 19:29 Dule-emargi-dododimaladga sabsur-odurdakleged-igar guagwar maid. Dule-binsaedsulidaedga bibyoleged-igar guagwar maimogad.
PRO 20:1 Inna-gagbidi, bingedsuli dule-imaked. Sisa neg-gagaega dule-imaked. Dule, wemar-gobsale, binsaedsuli naddaed.
PRO 20:2 Rey-urwedi, achumigur-nono-wawaad-uurmakedyob gued. Dule rey-ourwega-imakedi, na dukin boni amied.
PRO 20:3 Dule-e-urwedgi-banguedi, bur nug-dummarba gued. Dule-binsaedsulidaeddi, urwed-amied.
PRO 20:4 Dule-wiegala yorgi neg imaksulid, ibmar-gwag-weleged-ibagangi ibmar-gwag weosulid.
PRO 20:5 Dule-binsaedi, dii-wiladyob gued, dule-ibmar-nue-wisiddi irgwensuli dule-binsaed-baramied.
PRO 20:6 Dule-bukidar sogdamalad, ede dule-nuedye. Degi-inigwele, dule-inniki-ibmar-sogeddi, ¿doa amioe?
PRO 20:7 Dule-nuedi, innikigwadba nanaed. E-mimmigan e-bab-nanaedba-nanadimarmogadi, egi ise-nued binsalesad.
PRO 20:8 Ar rey igar-nabogega e-ologanagi sigisale, unnila e-atakedgi bela ibmar-isgana baramied.
PRO 20:9 Dule geg soged: “Andi gwage swilidik-nikaye, andi isgued sateye.”
PRO 20:10 Bab-Jehová ibmar-sogbogwad nabir daksulid: Nibir-noaled, wilubsaed-noaled.
PRO 20:11 Machigwa e-ibmar-imakedba magar dakleged, e-daed innikigwadid, degi, nuedbalid.
PRO 20:12 Bab-Jehová ibmar-sogbo yeerdakle obinnisad: Uaya, ibmar-itogegar. Ibya, ibmar-dakegar.
PRO 20:13 Mer be dule-wilegedga-guega, mer be gabedginbi binsae. Bur be arbaedginbi binsae, adi, mas obinebaka be nikuoed.
PRO 20:14 Dule-ibmar-bakedi, yamo sogdedaed: “¡Wedi nuedsuli! ¡Wedi ibmar-isgana!” Ar we-ibmar-baksad-sorbardi, weligwar itodaed.
PRO 20:15 We-napneggi, ormar-nika-inigwele, akwa-nuegan-nika-inigwele, dule-binsaed-ibed-e-sunmakeddi, we-ibmarmarba bur nuedid.
PRO 20:16 Dule-akudaked-anar dule-mani-bennukoye-sogsad-ibe, ibmar-nued be sue. Mani-bennukegala, dule-e-ibmar-nued be gae.
PRO 20:17 Dule, emar-yardakedgi masgunned-amiedi yeer-itoged, degi-inigwele, a-masgunnedi durgan-gunneyob gued.
PRO 20:18 Igarmar-nuegan-amilegedi, binsaed-nued-dakedba amileged. Bila-onolegegala, igar-nikaa imaklegergebed.
PRO 20:19 Dule-galagwensuli-sunmakedi, ibmar odukusulid. Degisoggu, dulemar-gadi-galagwensuli-sunmakmaladba mer be akae.
PRO 20:20 Dule e-bab-ukabsaele, e-nan-ukabsaele, nuchukwaa burgoed.
PRO 20:21 Gebegi ibmar-irgwensursunna-nikulegedgi, be yeer itogosulid.
PRO 20:22 Mer be sogo, an buged-mai imakoye. Mer be Bab-Jehováʼgi bensuli gue, ar e be-bendakoed.
PRO 20:23 Bab-Jehová nibirmar-noaled isdar-daked, ibmar-wilubdaked-noaled abesulid.
PRO 20:24 Bab-Jehová, dule-iduega gued. Degisoggu, dule na yoedse igi-guoed wissulid.
PRO 20:25 Nue-binsassuli Bab-Dummadga-ibmar-imakoye-soged bonidar-dummadid. Geb sogsad-sorba, binsadele, an ibiga deyob sogsadibeye. Deyob-binsaedi, bonidar-dummadid.
PRO 20:26 Rey-binsaed-ibedi, dule-isganamar-oaisakied. Ob-ubigwar-imaklegeyob ese ubigwar gumalad.
PRO 20:27 Dule-burba, Bab-Jehová-anmarga-uksadi, bela gwage-ulubse binsaed-baramied. Ar a-burba, gwallu-meegwadyob dulega uksad.
PRO 20:28 Wile-dule-daklegedi, degi, napiragwadgi-ibmar-soglegedi, rey-bendakega gued. Rey-e-negdakmaidi, wile-dule-daklegedgi gangumaid.
PRO 20:29 Sapingan-e-werguedi, e-garganguedgi siid. Sergan-e-werguedi, e-ibmar-wisidgi simogad.
PRO 20:30 Bibyolegedgi, degi, naibisalegedgi, dule-isgana nudakleged. Sabsur-imaklegedgi, galagwensur-binsaleged nudakleged.
PRO 21:1 Bab-Jehováʼgi, rey-e-binsaed diwar-iirmakmaiyob gued. Deyobi, rey, Bab-Dummad-ibmar-abegedba ibmar-imaked.
PRO 21:2 Dule na war-wargwengi e-ibmar-imaked nueganbi-imakye binsaed. Ar Bab-Jehováʼdi, dule-ibiga-ibmar-imakbied, bato wisid.
PRO 21:3 Bab-Dummad ibdurgan-ogumakar-ukedba, bur nued-daked, igar-inniki-imakleged, degi, innikigwadba-ibmar-imakleged.
PRO 21:4 Emar-ibgwensur-dakedi, san-dummarba-imakedi, dule-isganamar-e-binsaedi, bela wemar isgumaladid.
PRO 21:5 Nue-itoakwaa-igarmar-amilegedi, ibmar-nuedga gued. Gwae-gwae-igar-amilegeddi, ibmar-nuedga gusulid.
PRO 21:6 Gakansaedgi ibmar-nuegan-ichesur-nikuedi, booyob berguddaed, dule-oburgwega gubalid.
PRO 21:7 Dule-isganamar, dukin e-sabsur-ibmar-imakedse berguoed. Ar igar-inniki-imaklegedi, imakbisurmalad.
PRO 21:8 Dule-isgana-e-daedi, innikisulid, boni-nikad. Dule-nued-daeddi, innikigwadid.
PRO 21:9 Neg-dummadgi ome-gadi-urwedbo-gudisaedba, bur nuedid, neg-bipigwadgi-gudisaed.
PRO 21:10 Dule-isgana unnila ibmar-isganaginbi binsaed. Ar bipisaale, wile dule-bamalad-daksulid.
PRO 21:11 Dule-ibmar-nue-wissulid, dule-emargi-dododiid-sabsur-odurdaklegedgi ibmar durdaked. Dule-binsaed-nikagued ibmargi-odurdaklegele, dule-ibmar-nue-wissulidi ibmar durdaked.
PRO 21:12 Dule-nued, dule-isgana-e-neg dakdedaed, igi dule-isgana e-ibmar-nikadi berguddae.
PRO 21:13 Dule, dule-wileged-e-ibmar-egised itosulile, na ibmar-egichiarmogar, dulemar e-itogosurmarmogad.
PRO 21:14 Ibmar-binsa-uklegedi dulemar-wagab-uksulidi, sae-itoged boo imaked. Ibmarbina-sogdiidgi a-ibmar bega-uklenonikile, sabsur-urwed boo imaked.
PRO 21:15 Igar-innikigwad-imaklesale, dule-nued na yeer-itodaed. Dule-isganagardi, dobed nagunonidaed.
PRO 21:16 Dule, itoakwaa nanadisulile, burgwarmai dakledagoed.
PRO 21:17 Dule, galagwensuli-gudiguedginbi-binsaedi, dule-wilegedga guoed. Dule, mummudbi-gaamakdiidi, degi, ina-wawadginbi-mani-oediidi, bipisaale, mani-ibedga gwen guosulid.
PRO 21:18 Dule-isgana, dule-nued-anar sabsur-odurdaklegoed. Dule-emargi-aibined dule-inniki-nanadiid-anar, sabsur-odurdaklegoed.
PRO 21:19 Ome-gadi-urwed-nikuedba, ome-gadi-isdar-itoged-nikuedba, bur nuedid, ome-sate walagwen-gudisaed.
PRO 21:20 Dule-binsaed-nikagued-e-neggi ibmar-nuegan obinebaka nikad, ina-wawadikmalad obinebaka nikabalid. Dule-binsaedsulidaeddi, bela ibmar-nikad binsa diiga imakdaed.
PRO 21:21 Dule, igar-inniki-imakleged-amidiile, wile-dule-dakleged-amidibalile, san-dula-gudiguleged amied. Igar-inniki-imakleged amied. Nug-dummarba-guleged amibalid.
PRO 21:22 Dule-binsaed-ibed dulemar-gandikmalad-ibe neggwebur sued. Dule-binsaed-ibed dule-gandikmalad-e-ibmargi-bensuli-gudiid-ibe e-ibmar obelobalid.
PRO 21:23 Dule na itoakwaa-sunmaked, e-gwabinduku-bargabalid, bonigangi ollorgued.
PRO 21:24 Dule-na-doggus-san-buled-imakedi, dule-na-san-dummarba-imakedi, dule-emar-mesagwar-imakedi, weyob egi sogleged, wilub-obicha sabsur-isdar-nanadiidye.
PRO 21:25 Dule-wiegala bela ibmar nikubienad, degi-inigwele, budar arbaed.
PRO 21:26 Dule-wiegala, dule-baid-ibe ibmar-abedii osedoddaed. Dule-nueddi, wilub-obicha ibmar uked.
PRO 21:27 Bab-Dummad, dule-isganamar-ega-ibmar-ukedi, isdar-daked. Bur bule isdar daked, nabiridgi ega uksurmalar.
PRO 21:28 Dule-ibmar-daksad-gakansaar-soged burgoed. Dule, a-duleba-ibsaeddi, deyob guedsemogad.
PRO 21:29 Dule-isgana na ibmar-sogsadi gege ogwadaed. Dule-nueddi, na e-daed nudaked.
PRO 21:30 Nue-binsaed-nikaguedi, nue-ibmar-wisiguedi, degi, binsaed-nuegana, gwen Bab-Jehováʼgi obinsulid.
PRO 21:31 Dule bila-onogega moli guakwaa nasiked. Degi-inigwele, bila-onogedgi-nakwegala, Bab-Jehováʼgi siid.
PRO 22:1 Ibmar-nuegan-bukidar-nikadba, bur nuedid, nug-nued nikued. Bukidar-or-nikuedba, degi, mani-nikuedba, bur nuedid begi dulemar nued sunmaked.
PRO 22:2 Mani-ibed, degi, dule-wileged, ¿ibugi emar gumala? Bab-Jehová-ebobela-obinnisadgi emar gumalad.
PRO 22:3 Dule-itoakwaadaed magar bonigan-daked, bonigangi banguddaed. Dule-binsaedsulidaeddi, bonigan-idu bangusulid, degisoggu, boni amisdasunnad.
PRO 22:4 San-bipi-imaklegedgi, Bab-Jehová-nug-odummolegedgi we-ibmar-sogbaagwad danikid: Ibmar-nuegan-nikued, nug-dummarba-gued, dula-gudii-saed, danikid.
PRO 22:5 Dule-isganamar-gudiidbina, ikomar bukwad, sakimar bukwad. Dule-na-san-sabgudiiddi, a-ibmarmargi bangued.
PRO 22:6 Igar-innikigwadgi mimmigan be odurdake. Amba sered-ugakgusale, we-ibmargi banguosulid.
PRO 22:7 Dule-mani-ibed, dule-wilemalad-e-dummad gued. Dule-mani-ganikid, dule-mani-ega-uksad-e-maiga gued.
PRO 22:8 Dule-ibmar-isgana-imaked, bonigan amied. Bab-Dummad isdar-itogedgi we-dule-obelogoed.
PRO 22:9 Dule emar-wiledakele, egi nued binsalegoed. Ar we-dule, dule-wilemaladga masgunned uked.
PRO 22:10 Dule-gadi-urwed-amied be ononnoge, adi, na abin-abin-imaklegedi, urwelegedi, degi, sabsur-ibmar-soglegedi, berguoed.
PRO 22:11 Dule innikigwadgi-ibmar-sogedi, e-sunmaked-yeer-itolegedi, rey e-aiga imakoed.
PRO 22:12 Bab-Jehová dule-binsaed-ibedgi nakuleged. Bab-Jehová, dule-gakansili-e-ibmar-sogeddi oyoged, e-sunmaked gakanye.
PRO 22:13 Dule-wiegala yapa-arbaedba sogdaed: “Achumigur-nono-wawaad magaba gudiiye. An noddibe, an-gunnoye.”
PRO 22:14 Ome-sui-dikarba-yoleged-e-gaya, yaa-matusur-siidyob gued. A-yaagine, dule-Bab-Jehová-ourwega-imakedi, argwanoed.
PRO 22:15 Uayasulidaedi, gusgu burwigana-e-daedid. Molidubgi-bibyolegedgi uayasulidaed surgued.
PRO 22:16 Dule, mani-bur bule-nikuega, dule-wileged-mesagwar imaked. Dule, mani-ibedga binsa-ibmar-ukedi, na dule-wilegedga guoed.
PRO 22:17 Dule-binsaed-ibed-e-sunmakedi, nuekwaa be itoge. An be-odurdakedba, be ibmar imake.
PRO 22:18 Ar be we-ibmar nonogi-gaele, bela be gannar-gannar sogdiile, be yeer-itogoed.
PRO 22:19 Bab-Jehováʼgi be mer benguega, emi an be-owisonaid.
PRO 22:20 Emi, an bega durgwen-gakambe (30) binsaed-nuegan-ibmar-wisigued narmaksad.
PRO 22:21 Adi, be gayaburba-napiragwadi, wisi guega, adi, dule-bese-ibmar-egised-abin nabir be ibmar sogegar.
PRO 22:22 Melle dule-wileged-ibe be ibmar-atursae, ar wede, dule-wilegedid. Melle igar-naboleged-neggi dule-ibmar-sate-gudiid be sabsur-imakbalo.
PRO 22:23 Ar Bab-Jehová wemar-ular gwisguoed, geb dule-wileged-ibe-ibmar-susad-annik ibmar sumogoed.
PRO 22:24 Melle be dule-emar-sabsur-imaked-e-aiga gue. Melle be dule-emar-wiogedba akabali.
PRO 22:25 Ar e-ichakwadamalad be durdaksale, na be dukin boni-dummad amioed.
PRO 22:26 Melle be emar-anar ibmar-imakoye sogo. Melle be emar-anar mani-bennukega gubalo.
PRO 22:27 Ar be bennukega mani-sate-gualile, be-gabedse-bakale, be-ibe sumaloed.
PRO 22:28 Melle be-dadgan dikasurgus-nainu-abingunaidgi ibmar-ogwichismalad be oniro.
PRO 22:29 ¿Dule e-arbaedgi nued-arbaed be dakdii? Dule-deyob-arbaedi, reymarga arbadii guoed, dule-binsarmaladga arbaosulid.
PRO 23:1 Be dule-dummadbo mas-gunsokalile, nue ebinsao, doa-asabin be sii.
PRO 23:2 Ar be gadi-mas-gunnele, masgunned bargao.
PRO 23:3 Melle be e-mas-yeer-gullegedbina soge, ar we-masdi, unnila dule-yardakedid.
PRO 23:4 Melle be ibmar-nuegan-nikuega surbinsa-itodii gue. Melle be ibmar-gargerbamaladginbi binsadii gue.
PRO 23:5 Ar be nuekwaa dakdele, be daksaled, ibmar-gargerbamalad baisursunna berguddaed.
PRO 23:6 Melle be dule-nallegaladbo mas-gunne. Melle be e-mas-yeer-gullegedbina sogbalo.
PRO 23:7 Ar e-masde, gammugi-sailagia-megeyob gued. Bega sogoed: “Mas-gunne, gobe.” Degi-inigwele, gwen gwage-nuedgi bega sogosulid.
PRO 23:8 A-sorbali, be bela mas-guchad agoed, ega be nuedgi-sunmaksadi, binsa be sunmakoed.
PRO 23:9 Melle be dule-binsaedsulidaedga binsaed dako. Ega be ibmar-sogoedi, be-abin isdar-itogoed.
PRO 23:10 Melle dikasurgus-nainu-abingunaidgi ibmar-ogwichismalad be oniro. Mer be dule-sergansated-e-nainugi dogbalo.
PRO 23:11 Ar wemar Dule-E-Bendaked-Gandikid nikad. Dule-sergansated-bendakegala, be-abin gwisguoed.
PRO 23:12 Ibmar-durdaksadba be ibmar imake, binsaed-nued-uklegedi, be nue-itoge.
PRO 23:13 Melle be mimmigan-odurdaksuli gue, molidubgi-bibyolegedba burgosulid.
PRO 23:14 Ar bur be molidubgi-bibyogele, burgwed-igargi be ollor-imaknaid.
PRO 23:15 Machi, be dule-binsaed-ibedga gunonikile, gwagegi an weligwar itomogoed.
PRO 23:16 Be-sunmakedi, napiragwadba be sunmakele, ulubgi an yeer itononikoed.
PRO 23:17 Melle be dule-isganamargi nobgue, bur be bane-bane Bab-Dummad-nug odummodii imake.
PRO 23:18 Adi, yoedse bega ibmar nueganbi guoed, na be ibmar-edarbediid nikudapoed.
PRO 23:19 Machi, nue be itoge, binsaed-nikaa be dae, igar-innikigwadbarbi be nanadii sae.
PRO 23:20 Dule-gadi-mumgumaladba mer be akae. Dule-gadi-masgunmaladba mer be akadii gubali.
PRO 23:21 Ar dule-gadi-mumgumaladi, degi, gadi-mas-gunmaladi, dule-wilegedga gumaloed. Ar dule-gabedginbi-binsaedi, unnila mor-siir-siir-yoi gudiguoed.
PRO 23:22 Be-bab-we-napnegse-be-odenonikid be itoge, be-nan seredgusale, mer be isdar-dako.
PRO 23:23 Igar-napiragwad, nue-binsaed-nikagued, be amie. Ibmar-durdaked, nue-ibmar-wisigued, be amie. Wemala, mer be ibmar-baid-anar ogwao.
PRO 23:24 Dule-nued-e-baba na bela-bela yeer itoged. Dule na machi-binsaed-ibed-nikad, weligwar itoged.
PRO 23:25 Be-bab, degi, be-nan, werguega be imake. Be-sergan-we-napnegse-be-senonikid wergumalaga be imake.
PRO 23:26 Machi, an-bega-binsaed-dakdiidgi be binsae, an-nanadiid be dake.
PRO 23:27 Ar ome-gambanuchu-imakedi, yaa-dummad-matusursiidyob gued. Dule-baid-ome-galagwensur-nanaedi, dia-garagwad-matusursiidyob gued.
PRO 23:28 We-omedi, dule-atursaedyob matarmakdidaed. We-ome, machergan-bukidar-e-ome-dikarba-yolemalaga imaked.
PRO 23:29 Dule-mumgued-iedisulidi, dule-sisamar-galagwensuli-gobedi, boed amied, ibmar-nunmaked-itoged amied, urwed amied, isdar-itoged amied, binsa-nailikgued amied, ibya-gudure-gued amied.
PRO 23:30 Dule-mumgued-iedisulidi, dule-sisamar-galagwensuli-gobedi, deyob gued.
PRO 23:31 Vino-gisi-daklesidaedbina mer be soge, vino-noggi-dakarmaksidaedbina mer be sogbali. E-goblegedi, nolloo gobleged.
PRO 23:32 Degi-inigwele, dubgi-warmakeyobi, be itogoed. Naibe-e-gichi-begi-ubodeyobi, be itogoed.
PRO 23:33 Ibya-apurega be-imakoed, galagwensuli-binsaega be-imakoed.
PRO 23:34 Magadba-yakumaknadapiyob be itogoed, urmor-suar-dukugi-maiyob be itogoed.
PRO 23:35 Be sogdagoed: “An-naibi-imaksamala, degite, gwen nunmak an itosulid. An-bibyosmala, degite, gwen bai an itosulid. An dadakusale, gannar an mumgunabaloed.”
PRO 24:1 Melle be dule-isganamargi nobgue, melle be eba-akaedgi binsabali.
PRO 24:2 Ar e-gwagegi unnila emar-sabsur-imakedgi binsamalad, unnila ibmar-isgana-imakedgi sunmakmalad.
PRO 24:3 Nue-binsaed-nikaguedba neg sobleged. Nue-ibmar-wisidba neg-e-sailamar mesleged.
PRO 24:4 Itoakwaa-binsalegedba e-gabednegmaryaba ibmar-gargermaladi, degi, ibmar-yeerdaklemaladi enoleged.
PRO 24:5 Dule-binsaed-ibedi, dule-gandikidid. Dule-nue-ibmar-wisidi, dule-dutusulidid.
PRO 24:6 Nue-igar-amiale, bila onoleged. Bukidar-dulemar-binsaed-dakmaladgi nakwileged siid.
PRO 24:7 Dule-binsaedsulidaedi, dule-binsaed-ibedga gwen guosurguoed. Igar-itolegedgi sunmakosulid, ar aku-itoged na ibi obaroe.
PRO 24:8 Dule unnila ibmar-isganaginbi-binsaedi, egi-soglegoed: “Dule-isganaye.”
PRO 24:9 Dule-binsaedsulidaedi, unnila isguedginbi binsaed. Bela dulemar dule-emargi-dododiid isdar-dakmalad.
PRO 24:10 Ar be bonigan-abin sikirmakele, amba be-gangued nollogwad.
PRO 24:11 Dulemar-burgwed-igarse-nadapmalad be ollor-imake, dulemar e-burgwed-modanimalad be bendake.
PRO 24:12 Ar amba be sogele: “An wissulinye.” ¿Dule-gwage-wilubdakedi, gwen wisguosur be insae? Dule-begi-nakulegedi gwen wisguosur, ¿be insae? Bab-Jehová dulemar-e-daedba dulemarga ibmar-uked.
PRO 24:13 Machi, achanis be mae, ar yeer-maleged, achanis ochii maleged.
PRO 24:14 Binsaed-nikaguedi, achanisyob bega ochii gumogoed. Binsaed-nikagued be amisale, yoedse bega ibmar nueganbi guoed, be-ibmar-edarbediid be nikudapoed.
PRO 24:15 Dule-isgana, melle be dule-nued-oakalogedgi binsae. Melle be e-neg-obelogedgi binsabali.
PRO 24:16 Dule-nuedi, amba ilagugle (7) aimukuele, gannar gwisgubaloed. Dule-isganamardi aimukusale, geg bar gannar gwisgued.
PRO 24:17 Be-isdaradi aimukusale, mer be yeer-itogo. Be-isdarad akar-gusale, mer be wergubalo.
PRO 24:18 Ar Bab-Jehová egi-be-wergue be-dakalile, be-daed nabir-dakosulid. Ar egi be werguele, Bab-Jehová be-isdarad bar sabsur odurdakosulid.
PRO 24:19 Melle be dule-isganamarba akae. Melle be egi nobgubalo.
PRO 24:20 Ar dule-isgana nuedgi berguosulid. Dule-isgana gwallu-akitedaedyob bergudoed.
PRO 24:21 Machi, Bab-Jehová-dobekwaa be nanae, rey-nug be odummoge. Uayasulidamaladba mer be akae.
PRO 24:22 Ar wemar ukiagwale, sabsur-odurdaklemaloed. Ar dule wissulid, ibi-bonigan egi danikoe.
PRO 24:23 Dule-binsaed-ibegan amba we-ibmar sogsamarbalid: Igar-nabirolegedgi dule-wargwenbarbi-nagued nuedsulid.
PRO 24:24 Dule-igar-naboged, dule-ibmar-oakalosad ibmar-oakalossuliyob dakele, neggweburmarse ukabsalegoed, dulemarse isdar daklebaloed.
PRO 24:25 Ar dule-igar-nabogedi, dule-ibmar-oakalosad-sabsur-odurdakerdi, dulemar yeer dakmaloed, dulemar egi ise-nued binsamaloed.
PRO 24:26 Napiragwadgi dule-abinsaed, yeer-itole dule-imaked.
PRO 24:27 Ibmar-digoed guakwa be urbe, ibmar-digega be-nainumar guakwa be nasike, geb a-sorbali, be-neg be soboed.
PRO 24:28 Melle be ibmar-daksasuli dule-baidgi sunmako, melle be egi gakansabalo.
PRO 24:29 Melle be sogo: “Igi be an-imaksa, deyob an be-imakmogoed. An deyopira imaked nikamoga.”
PRO 24:30 Dule-wiegala-e-nainu-dikarba an nasad, dule-binsaedsulidaed-e-uva-digaled-dikarba an nasad.
PRO 24:31 A-nainugine, ikomar yaisur an daksad, e-nainu bula-moodo-nai an daksabalid, e-galu-emakaled-nainu-ebiris-naidi aimukumai an daksabalid.
PRO 24:32 An weyob ibmar-daksadi bipisaale, an iessulid. We-ibmargine, ibmar-soggwen an durdaksad:
PRO 24:33 Ar be sikwas gabele, ar be sikwas megele, ar be sikwas obunnogele, unnila be sakwa-obirmasmaile,
PRO 24:34 wilegedi, dule-atursaedyob begi nonikoed, ibmar-sate-guedi, dule-gingi-nikadyob begi nonikoed.
PRO 25:1 We-binsaed-nuegana Salomón onosbalid. Judá-rey-Ezequíasʼga dule-garda-narmakmaladi we-binsaedmar nue-ilemakar narmaksad.
PRO 25:2 Ibmar-dukuar-mamaidi, Bab-Dummad-e-gandikid-e-wilub oyoged. Reymar, igar-dukuar-mamaid-balamiedi, dule-gandikmaladga gued.
PRO 25:3 Dule, nagase nibneg-nibgued balamiosulid, degi, nagase napneg-e-ulub-naid balamiosulid. Amba deyobi, reymar-binsaedi gege ulubse balamilemogad.
PRO 25:4 Mani-dulenaidgi-durgan-welegoed be mie. Geb a-manigine, dule-mani-sobedi, nog soboed.
PRO 25:5 Rey-asabin dule-isgana be onoge. Geb rey igar-innikigwadba yar-seoed.
PRO 25:6 Melle rey-asabin dule-nug-nikadga be san-imako. Melle dule-dummagan-imbagi yogasaar sigis be imako,
PRO 25:7 rey bur bega soged nabirid: “Wese be sigda” adi, melle dule-dummagan-abin rey be-obingegsaegar. Be-sunnagwad be ibmar-daksale,
PRO 25:8 melle gwae-gwae dummaganse-odonao. Ar dule yamo be-abin osulosale, igi be saoe. Aka dukin be bingeguoed.
PRO 25:9 Bebogwa igar-gwatirisad be nudako. Degi-inigwele, melle dule-bega-ibmar-sogedi, dule-baidga sogmogo.
PRO 25:10 Ar be dule-baidga ibmar-sogele, we-dule, sunna be-nug oichoged. Degidbali, bar be, nug-nued-nika guosulid.
PRO 25:11 Iba-sogedba ibmar-soglegedi, galimbaba dutumar-oyapateyobi gued.
PRO 25:12 Dule-binsaed-ibedi, nuedgi dulega gannabasaar-ibmar-sogsiile, dulega olargan-dummaganba bur bule ibnuedid, ega ormadaremaladba bur bule sunsogedid.
PRO 25:13 Igi-neg-diopisulidgi, neg-diopigwad yeer-itoledae, debayobi, dule-garda-berbeged-innikigwadi, e-dummadga niga-gandikid ukmogad.
PRO 25:14 Igi-dii-wioeyobi neg-ainakwis sii dakledae, debayobi, dule ibmar-ukoye-sogdidaedi, gege ibmar-ukdaed.
PRO 25:15 Gwae-gwaesuli, binnasdikigwadgi, dule-nuga-nikad-e-binsaed ogwaleged. Nuedgi, urwedginsuli-sunmaklegedi, bela igar-bulegangi obilleged.
PRO 25:16 Be achanis amisale, melle dogdar-mao. Ar doggus be masale, be agdoed.
PRO 25:17 Melle bali-bali dule-baid-negse nanao. Ichakwagwad, bali-bali-nanaer, abakalegi budar-be-dakedba, isdar be-dakalile.
PRO 25:18 Dule, e-aigi gakansaar-sunmakedi, akwa-mamaredyob gued. Es-suidyobi, degi, es-swiswidikidyob gubalid. Emar-wioged.
PRO 25:19 Dule, suli-suli-itogedgine, dule-isganagi bensuli gunonikile, nugar-nunmakedyob gued. Degi, nailik-mali-bisgar-gudiidyobi gued. Binsaedsuli daed.
PRO 25:20 Dule-bukib-binsaedba-wile-itodiidgala namaklemaladgi-namakedi, nuedsulid. Ega ukagi-yaa-siidgi balu-eogeyobid. Degi, neg-dambipigwadgi mor-esuedyobid. Gwen gadi-gadi imakosulid.
PRO 25:21 Be-isdarad ukudmaada-itogele, masgi ogunno, uku-uku-itogele, ogobo.
PRO 25:22 Deyob be a-dule-imakele, be nue-obingegsaoed, Bab-Jehováʼdi bega ibmar-buged ukoed.
PRO 25:23 Dii-burwa-goledbali dii-wied danidaed. Gaya-isgana-sunmakedbali, neg-urwed noardaed.
PRO 25:24 Ome-ursili-ebo neg-dummadgi-megedbali, bur nabirsursi, neg-sukungwaba-meremair.
PRO 25:25 Igi-uku-uku-itolegedgi dii-dambipigwad gobledae, deyobi, gayaburba-nuegan dikasur-danikir, itoledaed.
PRO 25:26 Dule-innikidaedi, dule-isgana-abin sikirmakele, dii-isgumaidaeyobi gued. Diagi-ib-isgana-mileddaeyobi gued.
PRO 25:27 Achanis-gadi-maele, ichakwagwad. Dukin-san-dummarba-imaked-amiedi, ichakwabalid.
PRO 25:28 Dule-san-bargaed-wissulidi, neggwebur-galu-matusulid-sateyobi gued.
PRO 26:1 Dambed-sibudik-sibudik-bated, yorgi batesulid. Ibmar-gwag-weleged, dii-wiedgi welesurmogad. Dule-binsaedsulidaed-e-nuga gwen odummolesurmogad.
PRO 26:2 Igi-sikwigolo igarsuli gukudidae, igi-wirsob uu-suli gudidae, debayobi, yogasaar-ukabsalegedi, gwen igarga guosulid.
PRO 26:3 Moli-bibyoged-duba, moli-bibyogega gued. Moli-gaya-bargaedi, moli-uayasuid-gaya-bargaega gued. Suardi, dule-binsaedsulidaed-bibyogega gumogad.
PRO 26:4 Melle be dule-binsaedsulidaed barwisogo, aka be bur dule-binsaedsulidaedga gudoed.
PRO 26:5 Dule-binsaedsulidaedga, bakar be ibmar-sogo, adi, melle e-ibmar-sogedba binsaed-ibedga na san-imakegar.
PRO 26:6 Dule, dule-binsaedsulidaedba garda barmiele, mali-siklegar-maiyob gued. Duleba garda-barmissuliyobi gued.
PRO 26:7 Dule-binsaedsulidaedi, binsaed-nuegangi-sunmakele, nabirsulid. E-sunmakedi, mali-burgwar-bellemaknaidyobi itoleged. Baisursunna itoleged.
PRO 26:8 Dule-binsaedsulidaedga nug-odummolegedi, akwa gunnu-akwa-miedgi-atinnar-naidyob gued. Dule-binsaedsulidaed-e-nug-odummolegedi, gwen nabirsulid.
PRO 26:9 Dule-binsaedsulidaedi, binsaed-nuegangi-sunmakele, aku-itodabalid. E-sunmakedi, dule-mummud e-argangi iko-yolesayobid, aku-itodaed.
PRO 26:10 Dule, e-neggi dule-binsaedsulidaed-oarbaele, sigu-mied-dule yogasaar sigu-miedba dule-onailiksaedyobid. Wissulid bia sigu argwatapoe.
PRO 26:11 Igi achu na e-agsad gannar maddae, debayobi, dule-binsaedsulidaedi, gannar-gannar ibmar-nabirsulid obariddaed.
PRO 26:12 ¿Dule-binsaed-ibedye-na-sogdiid be dakdii? Dule-binsaed-ibedye-na-sogdiidba bur baisursunna, dule-binsaedsulidaedi ibmargi odurdakleged.
PRO 26:13 Dule-wiegala, yamo wiedbali weyob sogdedaed: “¡Igarba achu-sapur gudii daklesa! ¡Neg-galimbaba achumigur achiksa-gudii daklesa!”
PRO 26:14 Igi yawagak, e-naidgi egemakwisdae, debayobi, dule-wiegala e-megedgi nikwamakmaidaed.
PRO 26:15 Dule-wiegala mas-gunnega bateyagi e-argan ododaenad, degi-inigwele, wiedba e-gayaba mas odosulid.
PRO 26:16 Dule-wiegala, dule-binsaed-ibegan-e-walagugledba (7), bur binsaed-ibediyob itodaed.
PRO 26:17 Igi achu uaya-ebilenaidgi emargi aibine, deyobi, dule, dulemar-urwenaid-imbagi gotemogale, boni-amied.
PRO 26:18 Igi dule oes yogasaar sigu-soo-nikad mie,
PRO 26:19 deyobi, dule, e-ai-yamoged. Geb sorba ega sogdaed, “unnila, binsa an begi dodonaiye.”
PRO 26:20 Dule, soo-yagi sapan urbesulile, soo akitedaed. Deyobmodo, gakansaleged satele, urwed satedaed.
PRO 26:21 Sogungi soo oaramakledaed, sapangi soo ogaledaed. Deyobmodo, dule-ursilidgi urwed noardamogad.
PRO 26:22 Gakangi-sunmaklegedi, mas-nued-gullegeyobid. Gakangi-sunmaklegedi, ulubse uboged.
PRO 26:23 Igi yamo napsa-nog manigi oglege, debayobi, dule-gwage-isgana-e-sunmakedi yamo nabiridyobi sunmakdaed.
PRO 26:24 Sae-dule-dakedi, yamo nueganbi dulega sunmakdaed, ar e-ulubgindina, sae dule-dakdaed.
PRO 26:25 Ar sae-dule-dakedi, yamo bega nueganbi sunmakele, melle be itogo, ar e-gwage-ulubgindi, dogdar isdar binsadaed.
PRO 26:26 Amba yamo sae-dule-daksuliyob na san-saele, dulemar-abargindi e-isgued magar daklenonikoed.
PRO 26:27 Dule yaa-dummad-akwiele, na dukin a-yaagi-argwanega guoed. Ar dule akwa-dummad obaparmakele, na dukin e-birgi-sigega imakoed.
PRO 26:28 Gakansaed-gwabin-duku, gayaburba-nuegan isdar-itodaed. Yamo-nabiridyob-sunmaklegedi bela neg-oichoddaed.
PRO 27:1 Melle be san-dummarba-imakedgi binsao, ar be wissulid, ibagan begi igi-daniki.
PRO 27:2 Melle be dukin san-dummarba-imako, dule-baigan be-nug-odummogedi, bur nabirid.
PRO 27:3 Akwa ukusulid, ukubbela ukusurbalid, dule-binsaedsulid-e-urweddi, aba bur bule yeer-gangued.
PRO 27:4 Urwedi, yeer-gangued. Sae-itogedgi-urwedi, dule-wioged. Nobeddi, geg bargaleged.
PRO 27:5 Arbakee-sabgulegedba, bur nuedid, bakar-bega-ibmar-soged.
PRO 27:6 Be-isdarad-yamo-be-wagar-uedba, bur nuedid, be-ai-nued sabsur-bega-ibmar-soged.
PRO 27:7 Dule, nue-immeles-gudiile, bar ibmar abedasulid. Achanisse-bakar, budar madaed. Dule, ukudmaada-gudiirdi, ibmar-gagbiregedse-bakar gunned, ochigwayobi itodaed.
PRO 27:8 Dule, dikasuli aineba gaamakdiidi, dikasuli nuu e-uugi gaamakdiyobid, neguyagi sate daed.
PRO 27:9 Gwallu-wawadikmaladi, ina-wawadikmaladi, e-yapanned weligwar dule-saed, debayobi, ai-nued-binsaed-ukedi, dulega niga-ogannoged.
PRO 27:10 Melle be-ai-obanedgi be binsao. Melle be-bab-e-ai-obanedgi be binsabalo. Melle be-boni-itodiidi, be-gwenad-negse be sedo. Bur be-gwenad-bebo-urwediidba, bur nabirid, dule-be-neg-dikarba-maidse be naed.
PRO 27:11 Machi, dule-binsaed-nikaa be dae, weligwar be an-imake. Adi, an deebali, mesagwar-an-imakdimalad-gayamakoed.
PRO 27:12 Dule-itoakwaa-binsaedi, boni-noed bato daksabindaed. Degisoggu, mer boni-noega imakdaed. Dule-binsaed-sateddi, boni-noalir akudakdaed. Degisoggu, egi nue wileddasunnad.
PRO 27:13 Dule, dule-baid-ular mani-gasad-bennukoye-sogsale, mani-bennuksulile, e-ibe be mor weenao, dule-baid-mani-gasad-ular, be e-mor sioed.
PRO 27:14 Dule bolegoedba binnasuli e-aise nuedgi-goler, e-ai-gabmaidga ukabsalegedyob gued.
PRO 27:15 Ome-ursili, dii-wied-ibagi, dii-gargarmaknaiyobi gued. Urwedbi wisdaed.
PRO 27:16 Dule, e-igar-gaye-sogele, geg gaed, burwayobid, burwadi geg galeged. Argangi ibmar-gwallu-geg-abingalegeyobid.
PRO 27:17 Esgoro, esgoro-baidgi oswiswimakleged. Dule na ebo-idakmalale, igar-nuedse onomalad.
PRO 27:18 Dule, sapi-nue-akwele, e-san gunnoed, dule, e-dummadga nue-nakulediile, e-nug odummolegoed.
PRO 27:19 Igi diigi, magar wagar dakledae, deyobi, dule e-binsaedbali, na magar-daklesimogad.
PRO 27:20 Igi-neg-uan ollorgusisuli, degi, burgwed-igar galemaisuli, debayobi, dule ibmarbin-gadisogedi, napi-ibmar abedaed.
PRO 27:21 Bormo-crisolʼgi mani wilubdakleged, soogi or wilubdaklemogad, duledi, e-nug-odummolegedgi mag-daklemogad, igid-dule gue.
PRO 27:22 Dule-binsaedsulid be nagele, amba uki be nagbalile, degi, ibmar-gwagyob be osarwele, amba e-binsaed-sateddi, e-ibe be osulogosurguoed.
PRO 27:23 Be-sibad-wawaadmar nue be dakdii sao, be-molimar gatik nue be akwedii sao.
PRO 27:24 Ar ibmar-nuegana, degisadeguadsulid. Manimala, degisadeguadsurbalid.
PRO 27:25 Sapur emilesale, gagan-aradik ainidagoed. Sapurgi gagan-dutugana weledagoed.
PRO 27:26 Sibad-wawaadmar bega mor-yoed ukoed. Sibaddi, bega nainu-bakega guoed.
PRO 27:27 Sibad-e-nunis bukidar be nikuoed, adi, bedi, be-ome, be-mimmigana egi nabir itomaloed, degine, bela-bega-arbamaladi, yeer-itomarmogoed.
PRO 28:1 Dule-isgana dule-e-balegin-danikiyobi, oes abarmakmaidaed. Dule-nueddina, achumigur-nono-wawaadyobi, dobsurdaed.
PRO 28:2 Yargi, nue-neg-isgusnaile, dummagan-negdakmalad ogwalemaidaed. Dule-yar-seed nue-binsaed-nikale, igar-nikaa yar-selemaidaed.
PRO 28:3 Dule-isgana mesagwar-dule-wilediid-imakedi, dii burwaba-mesa ibmar-digar-naidgi wieyobid, bela ibmar-naid obeloged.
PRO 28:4 Dule, Igar-maidgi-banguddamaladi, dule-isgana-nug odummoddamalad. Dule, Igar-Maidba-nanadimaladdi, dule-isganamarbo gaardamalad.
PRO 28:5 Dule-isganamar, igar-innikigwad aku itodamalad. Dule, Bab-Jehová-Igarba-nanadimaladdi, bela magar ibmar-itodamalad.
PRO 28:6 Dule-mani-ibed-sunnasurdaedba, bur nuedid, dule-wileged-nueddaed.
PRO 28:7 Dule, Igar-Maidba-nanadiile, dule-binsaed-nikadaedid. Dule, dule-galagwensurdamaladba-nanaeddi, e-bab-obingegsaedid.
PRO 28:8 Dule, dule-baidga-mani-gaar-ukedi, e-gakagi mani-onogele, yamolegoed. Aka wiledimalad-bendakega, dule-wilemalad-bendakedga, omelodaed.
PRO 28:9 Dule, Igar-Maid-itobisulile, Bab-Dummad, a-dule-ese-goled itogosurmogad.
PRO 28:10 Dule, igar-isganaba dule-innikidaed-nidele, dukin egi igar-isgana aibinmogoed. Dule-gwage-nuegandi ibmar-nued abingaoed.
PRO 28:11 Dule-mani-ibedi, na binsadaed, ede, binsaed-ibedye. Dule-wileged-ibmar-nue-wisiddi, bela wisid, we-dulede, doa-dule.
PRO 28:12 Dule-innikidamalad nakwisale, iba-dummad onoleddaed. Dule-isganamar nakwenonikirdi, bela dulemar dobedba dukuddaed.
PRO 28:13 Dule, e-isgued gwageginbi sediile, nued-gudii guosulid. Dule, e-isgued na barsogerdi, egi banguerdi, Bab-Dummad wiledakoed.
PRO 28:14 Dule, gusgu Bab-Jehová-dobee nanadiidi, egi ise-nued binsalesad. Dule, gwage-dutusuliddi, nue-wilegoed.
PRO 28:15 Dule-yar-seed-isgana, dule-wilemalad-mesagwar-imakmaile, achumigur-nono-wawaad mas-gaeyobid, wiob mas-gasa gunaiyobid.
PRO 28:16 Dummadga-negsemaid aku-neg-itogedi, bur bule dulega neg-gagaed. Dummadga-negsemaid ibmar-nueganbina surbinsa-itosuliddi, undar suitii gudigued.
PRO 28:17 Emar-gindaksad-ular, dule balegillediile, oburgwilegedsegad. Gwen dule e-ular-gwisguosulid.
PRO 28:18 Dule, igar-nuedba napira nanadiidi, bendaklegoed. Dule-galagwensur-garmakdiiddi, ibagwengi dummad-wiolegoed.
PRO 28:19 Dule, arbaele, mas-bukidar-nika guoed. Dule, arbasulile, wilegedga gudoed.
PRO 28:20 Dule-nueddaedi, egi-ise-nued-binsaledii guoed. Dule, gwae-gwae mani-ibedga-gubieddi, sabsur-odurdaklesuli guosulid, odurdaklegedsegad.
PRO 28:21 Dulemar bela emarbi be dakoed, akar-akar be dakosulid. Akar-akar be dakele, igar-nuedsulid. Ar madu-wargwengi bato binsaed-galeddamalad.
PRO 28:22 Dule-manibina-surbinsa-itogedi, gwae mani-ibedga gubidaed, ar egi wileged-dummad danikodeeye binsasurdaed.
PRO 28:23 Dule, dule-baidga, nuedgi-sabsur-ibmar-sogele, sorba egi nued sunmakleged. Dulega-nuedgi-sunmakedba bur bule egi nued sunmakledaed.
PRO 28:24 Dule, e-sergan-ibe, ibmar-atursaele, ede, ibmar-oakalossurye sogbalile, we-dule, dule-isgana-e-aid.
PRO 28:25 Dule, ibmarbin-sogerbadi, neg-gagaedid. Dule Bab-Jehováʼgi bensulirdi, Bab-Dummadgi nasgumai guoed.
PRO 28:26 Dule, dukin na egi-bensulile, dule-binsaedsulidaedid. Dule, binsaed-nikaguedgi ibmar-saele, bendakleged.
PRO 28:27 Dule, dule-wilemalad-bendakedi, wilegedga guosulid. Dule, dule-wilemalad-bendaksuliddi, sabsur-ukabsalegoed.
PRO 28:28 Dule-isganamar nakwisale, bela dulemar dobedba dukuddaed. Dule-isganamar bergunonikirdi, dule-innikidamalad nasguddaed.
PRO 29:1 Dule, nuedgi-ega-ibmar-sogleged amba itossulile, wiledaklesuli, sabsur ukiagwale, sarsolegoed.
PRO 29:2 Dule-innikidamalad nasgudele, neggwebur yeer itodaed. Dule-isganamar negsealile, neggwebur bukib binsaddaed.
PRO 29:3 Dule, binsaed-nueganbina itogerbale, weligwar e-bab-saed. Dule, gambanuchu-samaladgi mani-miele, bela na mani-nikadi obeloged.
PRO 29:4 Rey, igar-innikigwadba-negseedi, yar-nue-innikii sedaed. Ar rey, unnila neggweburgi mani-gaedginbi binsaerdi, neggwebur-wioddaed.
PRO 29:5 Dule, e-aiga yamo-nueganbi-sunmakedi, e-ai-yardakega sunmakdaed.
PRO 29:6 Dule-ibmar-isgana-imakedi, dukin e-isguedse yamoleged. Dule-innikiidaeddi, weligwaledba namakdaed.
PRO 29:7 Dule-nueddaedi, dule-wilemalad-bendakdidaed. Dule-ibmar-isgana-imakeddi, dule-wilemaladgi binsadasulid.
PRO 29:8 Aimargi-gadi-dodomaladi, neggwebur-oimaker saed. Dule-binsaed-ibegandi, bogidik neg-imaked.
PRO 29:9 Dule-binsaed-ibedi, dule-binsaedsulidbo abin-abin-imakele, amba ebo-urwodibe, ebo alledibe, gwen igar nudakosurmalad.
PRO 29:10 Dule-gindakmaladi, dule-nuegan-sae dakdamalad, dule-nuegan-oburgwebidamalad.
PRO 29:11 Dule-binsaedsulidi uludele, bar galedasulid. Dule-binsaed-ibeddi, nabir san-bargaed wisid.
PRO 29:12 Dummadga-negdakmaid gakansaedba-ebipiledele, bela ega dummaganga-arbamaladi ibmar-isgana-imakedga guoed.
PRO 29:13 Dule-wilegedi, mesagwar-dule-imakedbogwa emarbimalad. Bab-Jehová ebobela magar-atake imaksad.
PRO 29:14 Rey, igar-innikigwadba dule-wilemaladga igar nabogele, e-yar-seedi, degisadeguoed.
PRO 29:15 Sarsolegedi, nuedgi-sabsur-ibmar-sogedi, binsaed-nikaa dule-imaked. Mimmi-uayasulidaeddi, e-nan-bingedar imaked.
PRO 29:16 Ibmar-isgana-imakmalad bukidarale, isgued bukidardaed. Dule-nueddamaladdi, dule-isganamar-bergued dakoed.
PRO 29:17 Be-mimmi be unaele, bonisuli-gudii be-imakoed, weligwaled bega ukoed.
PRO 29:18 Bab-Dummad-gayaburba barsoglesulile, neggwebur yogasaar nanaddaed. Dule Igar-Maid-sogedba nanadiile, egi ise-nued binsaleged.
PRO 29:19 Mai, uayasuli-gualile, gayaginbi-ega-ibmar-soged unnisurdaed. Nabir ibsaegala, wis bibyoleged abeledabalid.
PRO 29:20 Dule nue-binsasulidgi-sunmakedi, nue be dake. Ar dule-binsaedsulid-sunmaked-bursunna, bur bule yogasaar sunmakdaed.
PRO 29:21 Dule, na e-mai, bipigwad-akar unadii nanassulile, sorba, bukib-binsaed-dummad ega ukoed.
PRO 29:22 Dule-urwegala, urwed onogerbadaed. Dule-yaisur-urwedi, yeer-isguddaed.
PRO 29:23 Dule-san-dummarbadaedi, nug-bipii guoed. Dule-san-bipi-imakeddi, nug-dummarbaa guoed.
PRO 29:24 Dule, ibmar-atursaed-duleba-akaedi, dukin na san-wioged. Dule-ibmar-atursaed-galenonikile, amba dule-eba-akadidse ise-egisar-gunanaidibe geg barsoged.
PRO 29:25 Ar be dulemar-dobee-itogele, dukin be yamolegoed. Be Bab-Jehováʼgi-bensulile, bonigangi be ollorgudoed.
PRO 29:26 Dule-bukidar, dummadga-negdakmaid ega-ibmar-imakegala amidamalad. Unnila Bab-Jehováʼbi dulemarga igar-nabomaid.
PRO 29:27 Dule-innikimaladi, dule-ibmar-isgana-imakmalad isdar dakdaed. Dule-ibmar-isgana-imakmaladi, dule-innikimalad isdar dakdamogad.
PRO 30:1 Jaqué-machi-Agur-ibmarmar-sogsad. Agur, Itielʼga, degi, Ucalʼga weyob sunmaksad:
PRO 30:2 “Andi dulemarba bur bule ibmar-wissulid, akusunna an ibmar itoged.
PRO 30:3 Binsaed-nikaguedi an durdaksasulid, Bab-Dummad-Isligwaledbela an akusunna itoged.
PRO 30:4 ”¿Doa nibnegse nakwiapi? ¿Doa nibneg-akar aidenoniki? ¿Doa e-argangi burwa gaoe? ¿Doa e-mor-dummadgi demar gaoe? ¿Doa napneg-naid-dikarmar omesisa? ¿Ar be wisi, doa we-ibmarmar-imaksa, degi, e-machi-nug be wisbali?
PRO 30:5 ”Bela Bab-Dummad-gayaburbagi bensuli guleged. Bab-Dummadi, sigu-abgaedyob dule-egi-bendakleged-amimalad-irwa gwisgued.
PRO 30:6 Melle Bab-Dummad bega-sabsur-ibmar-sogega, degi, melle dule-gakansaedga be-imakbaliga, melle-e-gayaburbamar-maid be obulogo.
PRO 30:7 ”Bab-Dummadye, unnila ibmar-sogbo an bese egised. An burgwed-iduale, melle be anga imaksuli guo, be anga we-ibmar-sogbogwad imakedsego:
PRO 30:8 Igar-isganagi, gakan-igargi, be an-ollor-imake. Melle dule-wilegedga, dule-mani-ibedga be an-imakbalo. Unnila ibmar-nue-abelemaladi be anga ukmai imako.
PRO 30:9 Ar an mani-ibedga gudele, abakar na be-iealile, abakale an sokalile: ¿Ar doa wede Bab-Jehováʼye? Degine, an wiledibalile, abakar ibmar-atursaarbalile, degidbali, an be-nug-ichoge dakledagoed.
PRO 30:10 ”Melle mai-e-dummad-asabinni e-maigi ichakwa sunmako, adi, melle, we-mai be-ukabsaega, degidbali, be dummad-wilegoed.
PRO 30:11 ”Ar gwen-gwena dulemar gadi-e-bab-ukabsadaed, degi, e-nangi ise-nued binsasurdabalid.
PRO 30:12 Ar gwen-gwena dulemar san-swilidikye na bidamalad. Degi-inigwele, isguedginbi gudidamalad.
PRO 30:13 Ar gwen-gwena nuga-nikamaladye na sogdidamalad, yamo bule-bule dulemarga gudidamalad.
PRO 30:14 Gwen-gwena dulemar dule-wilemalad-wiogega, dule-ibmar-nue-abedimalad-wiogega, es-suidyobi, e-nugar-imaksa gudidamalad, estinyobi, e-akugar-imaksa gudidamalad.
PRO 30:15 ”Nus-abe-gobed, mimmigan warbo nikad, amala unnila weyob sokardamalad: ‘Udage, napi-udage.’ ”Ibmarmar geg wis-nubin-itodamaladi, sogbaa nikabalid. Ibmar-sogbakegwaddi, ‘gusye’ geg sogdaed.
PRO 30:16 A-ibmarmar, wemalad: Burgwarmalad-meged-galu, napi-dule-burgwarmalad-abedaed. Ome-geg-mimmi-baked, mimmigan-abedaed. Napa diibina napi-sogdaed. Soo-duurmaksiid napi-sapan-abedaed.
PRO 30:17 ”Dule, urwakwaa e-bab-dakele, degi, e-nan-sogedba dasulile, sikwisichid e-ibe ibya-onosun, mula-non-ginnid, dula-gunsun.
PRO 30:18 ”Ibmar-sogbaagwad an geger itoged, ibmar-sogbakegwaddi, an nue-aku itoged.
PRO 30:19 A-ibmarmar, wemalad: Mogir-billiba-sulubagi-nalla-naguedi, igi an magar itogoe. Akwasaila-dummadgi-naibe-nakwedi, igi an nabir magar itogoe. Demargi-ur-dummad-nadapir-geg-dogedi, igi an nabir magar itogoe. Degine, igi an magar itobaloe, dule abirgunagwar-gudii gubidaed.
PRO 30:20 ”Ome, machered-dikarba-yoleged-e-daed weyobdo: Ome, machered-baid-ebo nog-gobdedaed, a-sorbali, na abalukdedaed. An neg-oakalossurye sogdedaed.
PRO 30:21 ”Dulemar-ibmar-abedasulid-sogbaa nikadi, napneg-wawanmaker saed. Sogbakegwaddi, napneg-giglimaker imaked.
PRO 30:22 A-ibmarmar, wemalad: Mai reyga megider, geger dakleged. Dule-binsaedsulid mani-ibedga-guder, geger dakleged.
PRO 30:23 Ome-galagwensuli-nanaed sui-nikuder, geger dakleged. Mai-ome e-dummad-omegi dummadga-guder, bur bule geger dakleged.
PRO 30:24 ”Napneggi ibdurgan-burwigwad sogabake nikad, dule-binsaed-ibedbali bur binsaed-ibeganad.
PRO 30:25 A-ibdurgan wemardo: Iglimar, sorda-gandikidsurmaladid, degi-inigwele, yor-mosale, e-mas saboddamalad.
PRO 30:26 Nubimar, dogdar sorda nikasurmalad, degi-inigwele, akwa-ollogana-yaba e-gabedneg sobmalad.
PRO 30:27 Sesmar, e-idued satemalad, degi-inigwele, darekwaa nadapdamalad.
PRO 30:28 Asbanmar, baisursunna argangi galemalad, degite, reyneggi gudidamalad.
PRO 30:29 ”Ibmar-sogbaa nikabalid, yeerdakle-gandikidba garmakdidaed. Sogbakegwaddi, gandikidba nanadidaed.
PRO 30:30 A-ibmarmar, wemalad: Achumigur-nono-wawaad, ibmar-durgan-bamaladba bur buledid, ibmar-abin sikirmaked satedaed.
PRO 30:31 Gannir-machered, san-dummarbaa imakdidaed. Sibad-machered, e-bebe burwisur-dakledaed. Degine, rey, e-sorda-bila-onomalad-asabin e-ologurgin-sii nadapdaed.
PRO 30:32 ”Dule-binsaedsuliyobi be san-odummosale, melle bar egi be binsao. Ibmar-isgana-imakedgi be binsas-gudiile, melle bar egi be binsao.
PRO 30:33 Dule, moli-nunis-eguredi, egi e-nunis-gwamakaled amied. Binnasur be asa-ogolele, bega abe ariodagoed. Be urwed-amiele, urwenai be gudoed.”
PRO 31:1 Rey-Lemuel-ibmarmar-sogsad. E-nana we-igargi Lemuel-odurdaksad:
PRO 31:2 “Machi, ¿igi an bega ibmar sogsale? An-nukugi-dungued, ¿igi an be-unasale? Bab-Dummadse-ise-egislegaled-mimmi-gued, ¿igi na bega binsaed uksale?
PRO 31:3 ”Melle omeganbina surbinsa itogo. Bukidar reymar omeganse galakumaid.
PRO 31:4 ”Lemuel, reymar sisa-gobedi, igar-nuedsulid. Dule-dummagan-negdakmaidi mumguedi, igar-nuedsurbalid.
PRO 31:5 Abakale, mumgudedgi, igar-maid iedmalale, dule-wilemaladgi bar binsasuli gudmalale.
PRO 31:6 Bur be dulemar-burgwedanigus-maidga sisa uke, bur be dulemar-sae-itodiidga vino uke,
PRO 31:7 adi, itoba na mumgumalagar, ibmar-abesa-gudiid, iemalagar, ise-wilegar-gudiidgi mer bar binsamalagar.
PRO 31:8 ”Dule-belagwadamalad-ular be sunmake, dule-sergan-sated-ibmar-ular be gwisgue.
PRO 31:9 Wemar-ular be sunmake, igar-napiragwadba ega be igar itoge, dule-wilese-gudimalad be bendake. Dule-ibmar-nue-abesagudimalad be bendake.”
PRO 31:10 Ome-innikigwadba-e-daed-oyogedi, ¿doa amioe? Ar akwa-nuegan-gargerbamaladba bur sunsogedid.
PRO 31:11 E-sui egi bensurdaed. E-omeba ibmar nikagudaed, ega ibmar galakusurdaed.
PRO 31:12 Ome e-suiga, bane-bane ibidar-nuedga gued, ibmar-isganaga ega gusulid.
PRO 31:13 Ome, lino-dub-baknaddaed, sibad-wawaad-e-absar baknaddabalid, na yeer-itogedba e-gonugargi morgi arbadaed.
PRO 31:14 Igi-ur-dummagan-ibmar-ukedi, dikasuli-mas-sedanidae, debayobi, ome mas sedanidaed.
PRO 31:15 Bolegoedba gwichiguardaed, masgi na e-mimmigan ogunnardaed, e-maimarga, neggi-ibmar-imaklegedi urmakdaed.
PRO 31:16 Nainu-nued amidaed, geb nainu bakdaed, nainugi, uvaʼbi bipirmaknai imakdaed.
PRO 31:17 Ome, arbaega, guagwar gunaidaed, gandikidba na surgan-minaidaed.
PRO 31:18 Ome, e-ibmar-ukedi nueganbi nasgumaidaed. Mutikidbali, e-neggi gwallu-dummad akinsisulid, ar mutik-mutik arbasidaed.
PRO 31:19 Argan-nailik mor-sobed-naku gani sidaed. Argan-baidsik, dub ebisidaed.
PRO 31:20 Ome, dule-wileged-bendakdaed, dule-ibmar-abesaagudiid-bendakdaed.
PRO 31:21 Dambed-sibudik-sibudik batealile, e-mimmiganga bukib-binsadasulid. Ar bela e-mimmigan dambed-mor yoyoidbi damalad.
PRO 31:22 Ome na dukin, ubsan-mor-uki mor-baid makdaed, mor-suir-akwagiid yoidaed, lino-mor-sunsogmalad yoidabalid.
PRO 31:23 Dulemar bela neggweburgi e-sui mag-dakedbimalad. E-sui, ibmar-dummadga dummagan-abargi simogad.
PRO 31:24 Ome, lino-mor-nued-sobedi, saderba-mor-nagumalad-imakedi, dulemar-ibmar-ukmaladga manigi ukdaed.
PRO 31:25 Ome, innikigwadba gudidaed. E-nug dummarbaa gued. Ibmar-guoedga, bukib binsadasulid, ega alledaed.
PRO 31:26 Sunmakdele, binsaed-nikaa sunmakdedaed, dule-odurdakdele, sabekwaa dule-odurdakdaed.
PRO 31:27 E-neguya-selemaidgi nue-nakuledaed, e-mani-amiedginbi na mas-gundaed.
PRO 31:28 E-mimmigan, e-nanga sokardaed, bedi nan-nuedye. E-sui, e-ome-nug odummodamogad. Ega sogdaed:
PRO 31:29 “Ome-nuegan bukidar nikaye, degi-inigwele, bedi amarba bur bule ome-nuedye.”
PRO 31:30 Yeerdaklegedi, dule-yamogedid. Yeerdaklegedi, sikwas yeer dakledaed. Ome Bab-Jehová-dobee-nanaeddi, e-nug odummolegoed.
PRO 31:31 Dulemar, ome-e-ibmar-imaked magar dakmarsun. Bela dulemar-abargi e-nug odummolesun.
ECC 1:1 Odurdaked-Saila David-machi, Jerusalén-neggweburgi-reyga-megisadi, weyob sogsagusad:
ECC 1:2 “We-napneggi-ibmar-imaklegedi, binsarsunna imakleged, bela igarga gwen gusulid.”
ECC 1:3 Dule we-napneggi na gandikidba-alamakdiile, ¿ibu-nued egi amioe? Ibmar-nued amiosuli.
ECC 1:4 Dulemar gwalulemamaid. Bamaladdi burgwemamaid. Ar napnegdi amba gannar naid.
ECC 1:5 Dad-ibeler nakwiardaed, argwatedabalid. Na-bia-nakwiardaedse gannar gwae-gwae naddabalid, gannar nakwidabaligar.
ECC 1:6 Burwa-goledi, dad-nakwed-argan-nuedsik gollardaed, geb sorbali, dad-nakwed-argan-sapiledsik aibiliddaed. Deyobi, burwa-goledi, gwen bogigusuli, gannar-gannar bipirmakdiguad.
ECC 1:7 Bela diwarmar demarse nomaid, degi-inigwele, demardi gwen engudasulid. Diwarmar na bia gwalulemai, ase gannar aibirsibalid, adi, agi gannar nodagegar.
ECC 1:8 Bela we-ibmargi-sunmaklegedi, budar-itoleged uked, gwen egi bar sunmaklebidasulid. Ibya, ibmar-dakedi gwen geggusulid, uaya, ibmar-itogedi gwen geggusulid.
ECC 1:9 Bato ibmar-gusadi, gannar gunonibaloed. Bato ibmar-imaklesadi, gannar imaklenonibaloed. We-napneggine, ibmar-gwapid sated.
ECC 1:10 Dule-gwensak, sokardibe: “Be dakena, wedi ibmar-gwapidid.” Ar we-ibmardi, bato gusgu gudiguad, anmar-idu-gudigusmalad-abargi bato gudiguad.
ECC 1:11 Ibmar-epenne-gusmaladi, bela ielesad. Dule-yoedse-gwalulemaloedi, bela ibmar-yoedse-guoedi, iemarmogoed.
ECC 1:12 Ani, an emar-odurdakedid, an Israel-yargi, Jerusalén-neggweburgi reyga mai gusad.
ECC 1:13 An nue-binsaed-nikadba bela we-napneggi-ibmar-imakleged-e-burba-baraminai, degi, egi nergunai an gusad. Bab-Dummad dulemarga we-arbaed-dummad uksad, adi, egi arbadii gumalagar.
ECC 1:14 Bela we-napneggi ibmar-imaklegedi, an daksad. Bela a-ibmarmar binsarsunna imakleged, gwage-nunmaked ukbalid.
ECC 1:15 Ibmar-doperegwadi, geg bar gannar innikii gued. Ibmar-satedi, geg ebisleged.
ECC 1:16 An binsadii gualid: “Emide, an wegi dule-nug-nikadga gunonikid. Jerusalén-neggweburgi an-idu-dummagan-megismaladba an bur nue-binsaed-nikaa gued. Anyobi, dule-baid bela-bela nue-binsaed-nikaa, bela ibmar-wisi megdisulid.
ECC 1:17 ”An ulubgi bela-bela wisgubigualid, nue-binsaed-nikaguedi, wede ibi obarleye. Deginbali, an magar-itobiguarbalid, binsaedsuli-ibmar-imaklegedi, wede ibi obarlebarye, degi, yogasaar-sunmaklegedi, ibi obarlebarye. ”Geb an wisgunonikid, amba we-ibmarse-bakale, gwage-nunmaked ukbalid.
ECC 1:18 Napiragwa, ar bela-bela nue-binsaed-nikaguedi, bur bule bonigan ukbalid. Ar dule bur bule ibmar-wisguedi, bur bule naibid itobalid.”
ECC 2:1 An-gwagegi an sogsa gusad: “Emigindi, ibmar-galagwensuli-imakedgi-yeer-itolegedi, an imakdii guoye, an nue-yeer-itodii gubaloye.” Ar amba deyob gudiguedi, binsarsunna imaklebalid.
ECC 2:2 Alledi, binsa goelleged an daked. Ibmar-galagwensuli-imakedgi-yeer-itogedi, ¿ibiga gue? Ibmarga gusuli.
ECC 2:3 Geb an wisgubigualid, vino-gobedgi bule an magar neg-itodii guodibe, degi, binsaed-satedyobi galagwensuli ibmar-imakdii guodibe. Adi, an wisguega, dule we-napneggi sikwas-dula-gudiguedgi, na e-ibmar-imakdiidgi ibi-nued amie.
ECC 2:4 An we-ibmar-dummagan imaksad: Negmar an sobsad, uva-nainu-dummagan an nasiksabalid.
ECC 2:5 An-nainugine, bukidar ibmar-gullemalad an digsad, dutumar an digsabalid. Sapi-san-nabir-gullemalad akar-akar an digsabalid.
ECC 2:6 Amar-ogegala, dii-sabogega yaa-dummagan an akwisbalid.
ECC 2:7 An bukidar mai-machergan, degi, mai-omegan baksad. Maimar-an-neggi-gwalulesmalad an nikusbalid. Jerusalén-neggweburgi-an-idu-dummagan-megismaladba, an bur bule molimar-bebe-nikad nikusad, degi, sibad-wawaadmar an nikusbalid.
ECC 2:8 An ormar, degi, manimar ichesur nikusad. Rey-bamalad-e-ibmar-nuegan an susad, degi, dule-yar-bamaladgi-bukwamalad-e-ibmar-nuegan an susbalid. Machergan-anga-namakmalad, degi, omegan-anga-namakmalad an nikusgusad. An wergudiidbali, an ome-baigan-bukidar nikusbalid.
ECC 2:9 Jerusalénʼgi-an-idu-dummaganga-megismaladi, anyobi nug-dummarbaa nikussurmalad. Deginbali, anyobi nue-binsaed-nikaa gussurmarbalid.
ECC 2:10 Bela an-ibmar-imakbigusadi, an imaksad. Bela ibmar-galagwensuli-imakedgi-yeer-itogedi, an itosbalid. Bela an-arbasadgi an wergudii gusad. We-ibmarmar-imaksadgi an yeer itosad.
ECC 2:11 Geb sorbali, bela-ibmar-imaksadgi an binsadii gusad. Bela ibmar-imakega an dummad-arbadigusadgi, an binsadii gusbalid. An bela we-ibmarmar dakalid, bela wedi, binsarsunna imaklegedi, degi, gwage-nunmaked ukbalidi, egi ibmar-nued amilesurbalid.
ECC 2:12 Geb sorbali, an binsadii gualid, nue-binsaed-nikagued, wede ibi obarlege, binsaedsuli-ibmar-imakleged, ibi obarlebali, degi, yogasaar-sunmakleged, ibi obarlebali. Ar dule rey-sorba-megnonikoedi, ¿ibu-ibmar-baid imaknonikosunna? Ibmar-baid-imaked sate. Ar ade, bato bela ibmar imaklesad.
ECC 2:13 An daknonikid, ar igi neg-meegwad negsichidba bur nued gue. Deyobi, nue-binsaed-nikagued, yogasaar-sunmaklegedba bur nuedid.
ECC 2:14 Dule-binsaed-ibed, magasar neg daked. Dule-binsaedsuliddina, aku neg daked. An daknonibalid, bela dulemar burgwedsemarbalid.
ECC 2:15 Geb degine, an sogdesunnad: “Dule-binsaedsulid-burgwedyobi an burgwemogoed. Degisoggu, ¿ibiga an binsaed-ibedga gubisunna?” Degisoggu, an daknonibalid, we-ibmar binsarsunna imaklebali.
ECC 2:16 Ar dulemar, dule-binsaed-ibedgi, degi, dule-binsaedsulidgi bar binsaosurmalad. Ar birgamar-namaidba bela iedmaloed. Dule-binsaed-ibed, dule-binsaedsulidyobi burgwemogoed.
ECC 2:17 Degisoggu, an we-napneggi-gudiidi, isdar an itononisunnad. Ar ade, bela we-napneggine ibmar-imakleged nabir anga nosulid. Ar bela we-ibmarmar binsarsunna imakleged, gwage-nunmaked ukbalid.
ECC 2:18 Deginbali, we-napneggi arbaed-dummad-an-imaksadi, gwen-nabir an daknonisurbalid. Ar bela arbaed-dummad-an-imaksadi, dule-an-sorba-megnonikoedga an obegergebed.
ECC 2:19 An-sorba dule-reyga-megnonikoedi, binsaed-ibedga guodibe, binsaedsulidga guodibe, amba bai daklegosulid. Degi-inigwele, dummad-an-arbasadgi-ibmar-nikusadi, degi, binsaed-nikaguedgi-an-ibmar-imaksadgi-ibmar-nikusadi, we-reygadga gunonikoed. Ar we-ibmarmar binsarsunna imaklebalid.
ECC 2:20 We-napneggine, an dummad-arbasad-ulale, an gwen nabir itononisurbalid.
ECC 2:21 Ar gwen-gwen-dulemar, ibmar-nikuega e-binsaed-nikad ebudamalad, ibmar-nikuega e-ibmar-wisid ebudamalad, degi, ibmar-nikuega e-ibmar-durdaksad ebudamalad. Ar sorbardi, dule-gwen-arbassulidga bela e-ibmar-nikuedi, obegoed. Ar weyob ibmar-guedi, gwen nabirsulid. We-ibmarmar, binsarsunna imaklebalid.
ECC 2:22 Dule we-napneggi arbaed-dummad-imakedgi, surbinsa-alamaknaidgi, degi, bukib-binsaed-abalagi-alamaknaidgi, ¿ibu-ibmar-nued egi nikue? Sate.
ECC 2:23 Ar dulega bane-bane wile-itogedbi, degi, arbaed-dummad-imakedbi neg naid. Mutikidse-bakale, gwen obunnosulid. We-ibmarmar binsarsunna imaklebalid.
ECC 2:24 Degisoggu, unnila masgunnedgi-yeer-itogedi, gobedgi-yeer-itogedi, degi, e-arbaedgi-yeer-itogedi, dulega bur-nued gued. An daksabalid, we-ibmala Bab-Dummadgi danibali.
ECC 2:25 Ar Bab-Dummad dulegi-nabir-binsasulile, ¿doa nabir mas-gunnoe? ¿Doa yeer itobaloe?
ECC 2:26 Bab-Dummad dule-yeerdakedga, binsaed-nikagued uked, ibmar-nue-wisi imaked, degi, yeer-itoged ega ukbalid. Ar dule-isganagardina, ibmar-onmakedgi-arbaed ega uked. Adi, sorbali, we-ibmar dule-yeerdakedga ukegar. Ar we-ibmarmar binsarsunna imaklebalid, degi, gwage-nunmaked ukbalid.
ECC 3:1 Ibmar-imaklegega bela e-wachi nikad. We-napneggine, ibmar-imaklegega bela e-ibagan nikabalid:
ECC 3:2 Gwaluleged-e-iba nikad, burgwileged-e-iba nikabalid. Ibmar-gwag-digleged-e-iba nikad, ibmar-gwag-ungeleged-e-iba nikabalid.
ECC 3:3 Oburgwileged-e-iba nikad, onuguleged-e-iba nikabalid. Ibmar-earileged-e-iba nikad, ibmar-sobleged-e-iba nikabalid.
ECC 3:4 Boleged-e-iba nikad, alleleged-e-iba nikabalid. Dule-burgwisadba wile-itoleged-e-iba nikad, yeer-itogedba gwirleged-e-iba nikabalid.
ECC 3:5 Akwamar-osamakleged-e-iba nikad, akwamar-weleged-e-iba nikabalid. Angaagwar-imakleged-e-iba nikad, degimaloye-sogleged-e-iba nikabalid.
ECC 3:6 Ibmar-imaklebienad-e-iba nikad, ibmar-imaklebisulid-e-iba nikabalid. Ibmar-saboleged-e-iba nikad, ibmar-mileged-e-iba nikabalid.
ECC 3:7 Ibmar-esirmakleged-e-iba nikad, ibmar-makleged-e-iba nikabalid. Sunmaklesulid-e-iba nikad, sunmakleged-e-iba nikabalid.
ECC 3:8 Sabguleged-e-iba nikad, isdar-dakleged-e-iba nikabalid. Bila-onoleged-e-iba nikad, neg-bogidik-naguleged-e-iba nikabalid.
ECC 3:9 Ar dule arbaedgi alamaknaiguedi, ¿ibu-nued egi nikue?
ECC 3:10 An daksad, Bab-Dummadi dulemarga arbaed-dummad uksad, adi, arbaedgi alamaknai gumalagar.
ECC 3:11 Bab-Dummad e-iba-sogedba bela ibmar-yeerdakle imaksad. Deginbali, dule nabir epenne-ibmar-gusmalad-magar-itogega, degi, yoedse-ibmar-guoed-magar-itogega imaksabalid. Degi-inigwele, dule, bela Bab-Dummad negasailagi-ibmar-imaksad, degi, yoedse-ibmar-imakoed wissulid.
ECC 3:12 An wisdo, dule na dula-gudiidgine wergudiguedba, degi, ibmar-nued-imakdiguedba, bur ibmar-nued-baidi, sated.
ECC 3:13 An wisbalid, nabir-masgundiguedi, nabir-gobdiguedi, degi, dummad-arbasadgi-yeer-itodiguedi, Bab-Dummad dulega uksabalid.
ECC 3:14 Amba an wisbalid, bela-Bab-Dummad-ibmar-imaksadi, degisadegu gued. Na e-ibmar-obinnisadgi ibmar-baid geg nasikleged, geg bar osulolebalid. Bab-Dummad bela deyob imaksad, adi, dulemar e-dobekwaa nanamalagar.
ECC 3:15 Emi ibmar-bukwadi, bato dikasurgus bukwad. Ibmar-gunonikoedi, bato gudiid. Bab-Dummad gannar-ibmar-guega imaked.
ECC 3:16 We-napneggine ibmar-baid an daksabalid: Igar-itolegedgi, igar-isgana imakleged. Igar-innikigwad-imaklegedgi, igar-isgana imakleged.
ECC 3:17 Geb an binsadsunnad: “Bab-Dummad dule-nuedga igar itogoye, degi, dule-isganaga igar itobaloye. Ar ade, bela-ibmar-guedga, igar-itoleged-iba nikaye. Bela-ibmar-imaklegedga igar-itoleged-iba nikabarye.”
ECC 3:18 An dulemargi binsasbalid: “Bab-Dummad dule-wilubdaknaiye, adi, dulemar na magar itomalagarye, emarde, ibdurganyob gumarye.
ECC 3:19 Dulemar ibdurganmaryob bergumarmogad. Ebobela ega igar yopira maid. Ebobela na yopira burgwemalad. Ebobela dulagudiguega bunnodigued abeged. Degisoggu, dule ibdurgangi obinsulid. Ar napiragwa, bela wemar gwen nabirsulid,
ECC 3:20 degi, bela napa-urba megmaloed. Bela napagi danimalad, bela gannar napaga binyemarbaloed.
ECC 3:21 ”¿Ar doa wissunna, dule-e-burba niba naddae? ¿Ar doa wissunna, ibdurgan-e-burbadi neg-urba aideddae?”
ECC 3:22 An daksasunnad, dule, e-arbaedgi-wergudiguedba bur ibmar-nued-imaked sated. Ade, arbaed-igar ega uklesad. E-burgwisad-sorba ibmar-guoed-dakega, ¿doa we-dule-burgwisad gannar-dagega imakoe?
ECC 4:1 An dakdebalid, we-napneggine, dule-mesagwar-imakledimalad yaisulid. Dule-mesagwar-gudimaladi bodidii an daksad, dule-gadi-gadi-e-gwage-imakedi sate gudimalad. Dule-mesagwar-gudimaladi, dule-gadi-gadi-e-gwage-imakedi sate gudimalad. Dule-wemar-mesagwar-imakdimaladi, gangued nikamalad.
ECC 4:2 Degidbali an binsaded, dule-burgwismaladi, dula-gudimaladba bur weligwar gumalad.
ECC 4:3 Ar degi-inigwele, amba yoo-gwalulemaladdi, bur bule wemarba weligwar gumalad. Ar ade, we-napneggi ibmar-isgana-imaklemalad amba yoo dakmalad.
ECC 4:4 An daksabalid, arbaed-dummad-imakedi, degi, ibmar-imakedba-nasgumaiguedi, nobed uked. Wedi binsarsunna imaklebalid, gwage-nunmaked ukbalid.
ECC 4:5 Dule-binsaedsulid, gwen arbasuli ukudmaad burgwidoed.
ECC 4:6 Sikwas-obunnolegedi, doggus-obicha-arbaedba bur nuedid. Ar doggus-arbaedi, gwage-nunmaked uked.
ECC 4:7 We-napneggi, ibmar-binsarsunna-imakleged-baid an dakdebalid:
ECC 4:8 Dule-wargwenad mimmigansuli gudiid, degi, gwenadgansuli gudibalid, bipisaar arbaed indakdisulid. Bato-ibmar-nikadi amba yeer-itosulid, bur bule ibmar nikubied. Gwen binsasurbalid, doaga ede alamaknai. Gwen werguedgi binsasurbalid. Wedi binsarsunna imaklebalid, arbaed-dummad gued.
ECC 4:9 Dule-ebogwad, dule-wargwenadba bur nuedid. Ar na e-arbadiidgi bur bule ibmar-nuegan nikumalad.
ECC 4:10 Ar gwensak aimukudele, baid ogwichoed. Ar dule walagwen-gudiiddi, aimukudele, dummad-wilegoed, ar dule-baid-e-ogwisgued sateoed.
ECC 4:11 Ar dule-ebogwad na walikaa megmalale, na muchub-muchub uee imakmaloed. Ar dule walagwen-megerdi, ¿igi na uee itogoe?
ECC 4:12 Dule walagwenale, sunna dule-baidse galakued. Ar ebogwardina, sunna dule-baid-abin ganna gwisgumalad. Dub-giapaa-bipirmakaledi, irgwensuli itirsulid.
ECC 4:13 Sapingwa-wilesakwagwad binsaed-ibed-gudiid, bur nuedid, rey-sered binsaedsuli-gudiidba. Ar we-reyde, dule-ega-binsaed-uked bar abesulid.
ECC 4:14 Ar we-sapingwa, esgaryagi-mellesii gusdibe, e-yargine wilesakwaa gwalulesdibe,
ECC 4:15 degi-inigwele, we-napneggine an daksad, we-sapingwa rey-sorba reyga-megnonikile, dulemala eba nanai damalad.
ECC 4:16 Ar amba dule-bukidar we-sapingwa-gebe-reyga-megidedgi eba nagusdamar-inigwele, degite, dule-danimarmogoedi amba we-rey gwen yeer dakosurmarmogad. Amba we-ibmala binsarsunna imaklebalid, gwage-nunmaked ukbalid.
ECC 5:1 Bab-Dummadse-goled-negse be nadele, mer be yogasaar ibmar imako. Agi ibmar-odurdaklenaid-itoged bur nuedid, dule-binsaedsurmalad Bab-Dummadga ibmar-ogumakar-ukedba. Ar we-dulemardi, ibmar-isgana-imaknanaid aku-itodamalad.
ECC 5:2 Bab-Dummad-asabin, mer be ibmar sogdebin imako, deginbali, mer be gwae-gwae binsabalo. Ar Bab-Dummaddi nibneggi maid, bedi, napneggi gudiid. Degisoggu, nue-itoakwaa be ibmar sogo.
ECC 5:3 Ar dule-gadi-bukib-binsaedi, gabmaile, gadi gwayedaed. Dule-gadi-sunmakedi, yogasaar sunmakdaed.
ECC 5:4 Bab-Dummadga be ibmar-imakoye-ise-sogar-sogsale, gwae be imako. Ar Bab-Dummad dule-binsaedsulidamalad nabir-dakdasulid. Be ibmar-imakoye-ise-sogar-sogsad, be imake.
ECC 5:5 Ibmar-imakoye-ise-sogar-soged-sogsadba, degi, imaksulidba, ibmar-imakoye-ise-sogar-soged-sogsulid bur nuedid.
ECC 5:6 Mer be-gwabin-duku isguega-be-imaked be imako. Geb sorbali, dule-Bab-gayaburba-berbegedga mer be sogo, an ibmar-sogbisulid sogsaye, an noar sunmaksaye. Ar noar be sunmaksadba, binsarsunna Bab-Dummad be ourwoed. Binsarsunna be-ibmar-imaksad be-ibe-obelogega imakoed.
ECC 5:7 Degisoggu, bukidar-ibmar-binsarsunna-imakleged-abargi, bukidar-gwayed-abargi, degi, bukidar-yogasaar-sunmakleged-abargi, bur be Bab-Dummad-dobekwaa nanae.
ECC 5:8 Yar-gwensakgi, dule-dummad dule-wileged-sabsur-imake be dakalile, degi, dulemarga igar-nabolegedi innikigwadba imaksuli be dakalile, mer be geger dako. Ar weyob ibmar-gued, ade, dule-dummad eba-bur-dummad-e-bendaked nikad. Deginbali, dule-baid-eba-bur-dummad, eba-bur-dummagan-e-bendaked nikamogad.
ECC 5:9 Weyob-ibmar-guedi, ¿ibu-nued yar-naid egi nikue? ¿Reyde, nainugi-arbamalad-bendakega mai? Eye, bendakega maina.
ECC 5:10 Ar dule-manibina-sulibinsa-itogedi, bur bule mani-nikubidaed. Ar dule-ibmar-nueganbina-sulibinsa-itogedi, bur bule ibmar-abedaed. Amba we-ibmarmardi binsarsunna imaklebalid.
ECC 5:11 Ar mani-bukidar-nikulegele, mani bur bule oeledabalid. Mani-ibed unnila mani-e-wagarbi dakoed egi buu-nasoed. Ibmar-nued egi nikuosulid.
ECC 5:12 Arbaed-dule, immediki mas-gundibe, wilubba mas-gunbardibe, bonisuli gabdiid. Dule-mani-ibeddina, doggus-mani-nikadba gwen nue gabdisulid.
ECC 5:13 We-napneggine, boni-dummad an daksad: Dule mani-bukidar-sabogele, egi aibinega gued.
ECC 5:14 Degi, ibmar-uklegedgi yogasaar-mani-ebulegedba mani yoggued. A-ular, we-dule, machi-nikunonikile, e-machiga bar mani obegosulid.
ECC 5:15 Ar igi we-napnegse aidenoniki, deyobi, gannar nabaloed. Ar igi we-napnegse uka-swiri noniki, deyobi, e-dummad-arbasadgi-ibmar-nikusadi gwen sedosulid.
ECC 5:16 We-ibmar, boni-dummadbalid. Ar igi-dule napnegse aidenoniki, deyobi, gannar nabaloed. Ar dule arbaed-dummad-imakedgi, ¿ibi nued amie? Sate.
ECC 5:17 Deginbali, ar we-dulede, we-napneggine wile-itogedgi, arbaed-dummad-imakedgi, bonigan-abalagi, degi, sae-itogedgi mas-gundiid.
ECC 5:18 Weyob an daknonikid: We-napneggi-gudiidgi masgunned bur-nuedid, gobed bur-nuedid, degi, arbaed-dummad-imakdiidgi yeer-itodigued bur-nuedid. Ar weyob Bab-Dummad abesad, we anmarga uklesad.
ECC 5:19 Deginbali, Bab-Dummad, ar doaga mani-bukidar uke, degine, ibmar-nuegan-bukidar ukbali, deyobi, a-dulega, we-ibmarmar-uklesadgi-werguega imakbalid, deginbali, egi masgunnega imakbalid, egi gobega imakbalid. Ar weyob-dulega-guedi, Bab-Dummad uksad.
ECC 5:20 Ar Bab-Dummad weligwar dule-imaksoggu, dule, we-napneggi-sikwas-gudiidgi dogdar bukib binsasulid.
ECC 6:1 We-napneggine, dulemar-abargi we-boni nue-nika an daksad:
ECC 6:2 Bab-Dummadi, abar-dulemarga ibmar-bukidar uked, mani-bukidar-nikuega imaked, deginbali, dule-nug-odummogega imakbalid. Degidbali, we-dulemar na ibmar-abegedba nikued. Degi-inigwele, Bab-Dummad, we-dule e-ibmar-nikuedgi-werguega imaksulid, aka dule-bamalad e-ibmargi-werguega imaked. Weyob-ibmar-guedi, gwen nabirsulid, boni-dummad dakleged.
ECC 6:3 Ar dule-gwensak mimmigan dulatar-nikadibe (100), degine, birga-undar-gudii gusbardibe, ar ibmar-nuegangi-wergudigussuli-burgwisale, yogasaar-diglesale, an sogdo, bur mimmi-gwensak-burgwar-aidenonikir, bur we-duleba nuedye.
ECC 6:4 Ar we-mimmi-burgwar-aidenonikid gwen neg daksasulid, degine, negsichigi megidapid. Deyob negsichigi-megidapidgi gwen bar egi binsaledsurbalid.
ECC 6:5 We-mimmide, gwen dad-ibeler-daksasulid, gwen neg-wisgussulid.
ECC 6:6 Degi-inigwele, we-mimmi, dule birga-milibo-gudigusadba (2,000), degi, gwen-ibmar-nuegangi-wergussur-gusadba, bur bogidikid nue-nikusad. ¿Ar bela dulemar bergunonikile, burgwed-negse bela naedsemarsursi? Bela naedsemalad.
ECC 6:7 Dulemar mas-gunnegala arbaedginbi alamakdidamalad, degi-inigwele, e-ukuddi gwen bergusurbalid.
ECC 6:8 Ar dule-binsaed-ibed, ¿ibuginbi dule-binsaedsulidgi-obinsisunna? Ar dule-wileged, nabir-bonigan-abin-gwisgudiidgi, ¿ibi-nued egi amimosunna? Ar e-bogwad na yopira bonigangi obindimalad.
ECC 6:9 Ibmar-sanakwa-daklegedi, ibmar-ulubginbi-abelegedba bur nuedid. Ar we-ibmar gwen nabirsurbalid.
ECC 6:10 Ibmar-gudiidi bato e-nug nika gudiid, ar bato wisgulesad, we, dule gue. Deginbali, dule, gege dule-bur-eba-niga-gandikidbogwa urwed.
ECC 6:11 Gadi-sunmaklegedgine, yogasaar sunmakleged. Ar we-ibmargi, ¿ibu-ibmar-nued egi amilesunna?
ECC 6:12 Degisoggu, we-napneggi wis sikwas-gudiidgine, dule wissulid, ibu ega nued noe. Degisoggu, we-napneggi, unnila sikwas-gudigued, gwen nabirsulid. Ar dule-gudiid, burwa-goleyob sikwas-buu nasoed. Ar dule burgwisad-sorba, ¿doa ega sogosunna, igi neg guoye?
ECC 7:1 Ina-wawadikidba nug-nued-nikuleged, bur nuedid. Gwaluleged-ibaba burgwed-iba, bur nuedid.
ECC 7:2 Iba-dummad-nonaidse-ataknaedba dule-burgwisadse-ataknaed, bur nuedid. Ar dule bela burgwedsegad, degisoggu, dulemar-dula-gudimalad, burgwedgi binsadii gumalawilubbinad.
ECC 7:3 Allelegedba boleged bur nuedid. Ar boleged amba wile-ito emar-imak-inigwele, gadi-gadi gwage-imakbalid.
ECC 7:4 Dule-binsaed-ibed, dule-burgwis-naidse-ataknadele, binsaed-nikaa daed. Dule-binsaedsuliddina, ataknadele, unnila dodogedginbi binsadaed.
ECC 7:5 Dule-binsaedsulid yamo emar-ogannogedba, dule-binsaed-ibed emarga sabsur-ibmar-soged, bur nuedid.
ECC 7:6 Dule-binsaedsulidaed-e-alledi, ikomar-gummakder doos-doos-gotedaeyobid, yog-berguar naddaed.
ECC 7:7 Sabsur-ibmar-imakleged dule-binsaed-ibed-oichoged. Ibmargi-bennuklegar-binsaed-galeged, dule-binsaed-ibed-e-gwage oichobalid.
ECC 7:8 Ibmar-gebe-imaklegedba, ibmar-nagase-obeloleged, bur nuedid. Dule-na-san-dummarba-imakdiidba, dule-na-ulubgi-bargaagwar-gudiid, bur nuedid.
ECC 7:9 Mer urwed begi-obinega be imako, ar urweddi, dule-binsaedsulidaedgadid.
ECC 7:10 Mer be sogo, ibiga ibagan-nasmalad bur nuegan gusye. Weyob-sunmaklegedi, binsaed-ibegan-sunmakedsulid.
ECC 7:11 Dulemar-we-napneggi-gudimalad binsaed-nikagued-nikale, nuedid. Degine, nainu-nikabalile, doggus bur nuedid.
ECC 7:12 Binsaed-nikagued emar-bendaked, mani-nikued emar-bendakmogad. Degi-inigwele, binsaed-nikagued bur biriginedid, ar adi, nuedgi-sered-megega dule-imaked.
ECC 7:13 Bab-Dummad-ibmar-imaksad be dakena: Ar Bab-Dummad ibmar-dopere-imaksadi, ¿doa bar inniki imakosunna?
ECC 7:14 Bega ibagan-nuegan-nonikile, egi be werguo. Amba bega ibagan-isgana-nonibalile, Bab-Dummadgi-danibarye be binsabalo. Ar dule wissulid, ibagan-danikoedi, igi danibali.
ECC 7:15 Wegi-wile-itodiidgi an we-ibmar belagus dakdanikid: Dule-nuegan, ibmar-inniki-imakdiid-ular, sabsur-ibitodimalad. Ar dule-isganamardina, ibmar-isgana-imaked-inigwele, aka bur undar-seredi megmalad.
ECC 7:16 Mer doggus be wilub-obicha an dule-innikigwadye be sogo. Mer doggus be wilub-obicha binsaed-ibed na be sao. Abakalegi na be dukin oitoalile.
ECC 7:17 Mer doggus dule-isganaga na be imako, mer dule-binsaedsulidga na be imakbalo. ¿Ar ibiga na be durbas burgwed aminonikosunna?
ECC 7:18 Mer doggus wilub-obicha na be dao, wilubba na be gudii guoed. Ar dule, Bab-Dummad-dobekwaa-gudiile, bela ega ibmar nueganbi gudoed.
ECC 7:19 Dulemar-bulegan-ambegid (10) neggwebur-semaladba, binsaed-nikagued dule-binsaed-ibed-ogannoged, bur nuedid.
ECC 7:20 Dule, bela-belad-innikidaedi, bela-belad-ibmar-nued-imakdibalidi, gwen bipisaale isgudisurbalidi, we-napneggine, sated.
ECC 7:21 Mer yogasaar-sunmaklegedba be aibiro. Adi, be-mai-begi-ichakwa-sunmaked, be itogosulid.
ECC 7:22 Ar be nue-wismogad, emargi-ichakwa be sunmaksamogad.
ECC 7:23 Binsaed-ibed-dulega an guoye na sogsagusanad, bela we-ibmar an-binsaed-nikadba an baraminai gusanad. Degi-inigwele, amba bela an ibmar magar-itosulid.
ECC 7:24 Bela-ibmar-guedi yeer angi gangu noed, amba an magasar-itosulid. ¿Doa we-ibmar bela baramiosunna?
ECC 7:25 Degisoggu, binsaed-nued-bar-amiega an guarsunnad, ulub-nagasega ibmar-gumaid-bar-amiega an gualid. Degidbali an neg-daknonikid, dule-isgana-gued binsaedsulidaedid, degine, binsaedsulidaedi, igar-gwen-nabirsulidid.
ECC 7:26 Deginbali, we-ibmar bur boni-dummad an daknonibalid: Ome-isgana, burgwedba bur bule boni uked. We-ome-e-gwage-naidi, sakiyob emar-gaed, e-swidamala, esgoro-dubyob emar-edinned. Ar dule Bab-Dummadbaligwa-gudidibe, we-omese galegosurguoed. Isgued-duledina, we-omese ibitogoed.
ECC 7:27 Bab-Dummad-gayaburba-barsoged sogded: “Bela an ibmar-sog-soggwen baraminai-gusgua, an weyob ogwinmaknonisunnad:
ECC 7:28 ”An ibmar-amidiidi, amba an yoo baramied. An dula-miligwenad-abargine (1,000), dule-machered-amidiidi, an wargwen aminonikid. Ome-nued-gwensakdina, wargwensaale gwen an amissurgusad.
ECC 7:29 ”Degisoggu, unnila webi an magar-itonikid: Bab-Dummad dule-imaksadi, dule-bonisuli imaksanad. Degi-inigwele, dule na e-daedba, dukin na bonigan-amisad.”
ECC 8:1 ¿Doa-dule binsaed-ibedyob gue? ¿Doa-dule bela-ibmar-wisid gudii? Dule, binsaed-nued-nikadbali, e-daklegedi, weligwar-dakleged, degine, e-daedi, nued dabalid.
ECC 8:2 Degisoggu, an bega soged: Rey-e-ibmar-sogmaidbali be ibsao, ar Bab-Dummad-asabinni deyob-imakoye be sogsad.
ECC 8:3 Melle be rey-asabin-gwichidgi gwae-gwae-nodebin sao. Mer ibmar-isgana-imakedgi be binsabalo. Ar ade, rey na e-ibmar-imakbiedba ibmar imaked.
ECC 8:4 Ar rey-e-sunmakedi gargangued nikad, degisoggu, ¿doa ese golosunna ibu be imaknaiye?
ECC 8:5 Ar dule rey-sogedba daele, gwen akar-guosulid. Dule-binsaed-ibedi na wisid, sana reyba ibsaoe, degine, igi imakbaloe.
ECC 8:6 Ar bela-ibmar-imaklegedi, e-ibagan nikad. Degine, igi ibmar-imaklebaloed-igar nikabalid. Degi-inigwele, dulega, we-ibmar, boni-dummad gued:
ECC 8:7 Bonigan-egi-gwisgunonikoed wissulid, degine, dule-ega-ibmar-guoed-soged satebalid.
ECC 8:8 Dule burgwed-bargaegala, gargangued nikasulid, na degisadegu-gudiguega, gargangued nikasurbalid. Ar burgwed-igargine, gege dule wakinned, dule-isganase-bakale, gege wakinned.
ECC 8:9 An we-napneggi ibmar-gued bela-bela an nue-wisgubiguargua, an daknonikid: Imbagwenale, dule, e-maiga dule-baid-imakele, ega boniga gunonidaed.
ECC 8:10 Degine, an daksabalid, dule-isganamar-burgwisale, iba-dummad-abalagi digledaed. Degine, dulemar Babse-goled-negse-nanadimaladdina, na e-neggweburgi-gudigusmaladgi ielededaed, gwen bar egi binsaledasulid. We-ibmar gwen-nabirsulid.
ECC 8:11 Dule-isgana ibmar-isgana-imaksale, abgayala ega igar nabolesulile, dulemar binsaddamalad, igar-isgana-imakleger, akarsurye. Degisoggu, ibmar-isgana-imakedgi aka gatik burguddamalad.
ECC 8:12 Dule-isgana bali-bali isguedginbi-alamakdiidi, sunna undar gudii gubalid. An wisbalid, dule-Bab-Dummad-dobekwaa-gudiidi, degi, e-nug-odummodibalidi, bur nued gudii guoed.
ECC 8:13 Dule-isganamargardina, bela ega ibmar boniga gudoed. Ar unnila sikwas gudii gumaloed, waa-yogguddaeyob gumaloed. Ar we-dulemar, Bab-Dummad-dobekwaa gudisurmalad.
ECC 8:14 We-napneggi galagwensuli ibmar gued, degine, igarsuli ibmar gubalid. Imbagwenale, dulemar-inniki-gudimalad dule-isganayob ega ibmar guddaed. Degine, dule-isganagardina, imbagwenale ega ibmar nueganbi naddaed. An sogdo, we-ibmar gwen nabirsurbarye.
ECC 8:15 Degisoggu, an soged: Wergudii gumarsun. Ar anmar we-napneggi-gudiidgi Bab-Dummad-anmarga-ibmar-uksadbali, bur mas-gundii gumarsun, gobdii gumarbarsun, wergudii gumarbarsun. Ar galitodiid-sorba, we-ibmarbi wis anmarga besad. Ar we-ibmar-birgi ibmar-baid sulid.
ECC 8:16 We-napneggi binsaed-nued-balamiegala, degine, we-napneggi-ibmar-gued-balamiegala, ise-dakale an imaknai gualid. Degidbali, ibginedse-bakale, nue bar an gabdisulid.
ECC 8:17 Geb deyobi, Bab-Dummad-we-napneggi-ibmar-imaksad an daknonikid. Ar dule Bab-Dummad-bela-ibmar-imaksad bela magar itogosulid. Ibmar-magar-itogegala, aisaar alamaknai guoenad, degite, baramiosurguoed. Ar amba, dule-binsaed-nikarbad sogdibe, an magar-neg-itoye, degi-inigwele, nagase amba magar-itosurmogad.
ECC 9:1 Bela we-ibmarmar-wisguegala, an egi alamaknai gualid. Wegi an daknonikid, dule-innikidamalad-e-ibmar-imakmaladi, degi, dule-binsaed-ibegan-e-ibmar-imakmaladi, Bab-Dummad-e-argan-yaurgi siid. Anmar amba wissulid sabgued, ibu obare, sae-emar-daked, ibu-obarbali. Amba, anmar-asabinni we-ibmar oyole-inigwele, magar-itolesurdaed.
ECC 9:2 Bela dulemar yopira guedbimalad: Dule-innikidaeddibe, dule-ichakwadaeddibe, amba yopira burgwedsemalad. Dule-nueddibe, dule-isganadibe, amba yopira burgwedsemalad. Dule-swilidikiddibe, dule-swilidiksuliddibe, amba yopira burgwedsemalad. Dule-ibmar-ogumakar-ukeddibe, dule-ibmar-ogumakar-uksuliddibe, amba yopira burgwedsemalad. Dule-ibmar-nued-imakdeddibe, dule-ibmar-isgana-imakdeddibe, amba yopira burgwedsemalad. Dule-ibmar-ise-sogar-imakeddibe, dule-ibmar-ise-sogar-imaksuliddibe, amba yopira burgwedsemalad.
ECC 9:3 We-napneggi, ibmar-imakleged-abargi, we-ibmar gwen nabir nosulid: Bela dulemar na yopira guedsemalad. Deginbali, dule e-gwagegine, ibmar-isganaginbi binsadiid. Dule-gudiidi, unnila galagwensuli binsadiid. Ar bela burgwemaloedbiid.
ECC 9:4 Degisoggu, dule na dule-bamalad-abargi dula-garmakdiir, wis nubin itoged. Agala an soged: Rey-burgwedba, dule-belagwad-dulagudigued, bur nuedid.
ECC 9:5 Ar dulemar amba dula-gudimaladi, e-burgwemaloed na wismalad. Dule-burgwismaladdina bar ibmar-abemaisurmalad, ar bar-itomaisurmalad. Deginbali, gwen egi bar-binsalesurbalid.
ECC 9:6 Ar e-daedi, e-sabguedi, e-sae-itogedi, ibmarbina-sulibinsa-itogedi, burgwisadgi, bergusiid. Ar we-napneggi, gannar weyob-guoedgi-binsaodeeye bar binsamaiosulid.
ECC 9:7 ¡Weligwaledgi mas be gunne! ¡Yeer-itogedgi vino be gobbali! Ar Bab-Dummad be-ibmar-imaksadi, yeer be-ibe daksad.
ECC 9:8 Na be mor-dagudikmaladbi yodigu guo, gwallu-wawad nonogi be magakwaa-gudigu guo.
ECC 9:9 Na be ome-bela-bela-abegedbogwa, bane-bane wergudii gusun. Ar Bab-Dummad, we-napneggi sikwas-gudiguega be-imaksad. We-napneggi, ibagan-gwen-nabir-nanamaisursoggu, na be wegi wergudii gusun. We-napneggi-alamakdiid-nukad, we-werguedi wis bega uklesad.
ECC 9:10 Ibu-ibmar-imaked bega uklenonikile, imakedse be sao, melle be imaksuli guo. Ar be burgwisardi bar arbaosulid, ibmar-wisguleged-igar surbalid, degi, binsaed-nikagued-igar surbalid.
ECC 9:11 We-napneggi an negdaknonibalid: Abarmaklegedgi-bengulegedgi dule-sabsur-abarmakedbi emargi obinsulid. Bila-onolegedgi dule-gargangued-nikadbi emargi obinsulid. Dule-binsaed-ibedbi mas gunsulid. Dule-ibmar-wisirbaadbi mani-ibedga gusulid. Dule-nue-garda-wismaladbi e-bina soglesulid. Ar bela dulemarga, imbagwenale, ibagan-nued ega nonidaed, imbagwenale, ibagan-isgana ega nonidabalid.
ECC 9:12 Deginbali, an daksabalid, dule na e-burgoed-ibagan wissurbalid. Uamar-sakigi-galedamaladyob gued, sikwimar-galedamaladyob gued. Ar dulemar ukiagwar boniganse galeardamogad.
ECC 9:13 We-napneggi an we-ibmar-daksabalid, egi an nue-durdaksabalid:
ECC 9:14 Neggwebur-bipigwadi dulemar-iche-nika an daksad. A-neggweburgine, rey-buledi neggwebur-suega e-sordamarbo ebiris ambikunoni gusad. We-rey, e-sordamarbo, neggweburgi-dogega dikarba napa arsanyob onakwismalad.
ECC 9:15 We-neggweburgine, dule-wileged gudiid. We-dulede, dule-binsaed-ibedid. We-dule, e-binsaed-nikadbali, neggwebur-bendaksa gusad. Degi-inigwele, dulemala we-dulegi gwen binsassurmalad.
ECC 9:16 Andi sogdo: “Dule-wileged-e-binsaed-nikad isdar-daklege-inigwele, deginbali, e-sunmaked itolebisuli-inigwele, ‘ar garganguedba binsaed-nikaa-ibmar-imaklegedi, bur nuedye.’ ”
ECC 9:17 Dule-binsaedsulidamalad-e-dummad binnasuli-sunmakedba, dule-binsaed-ibed-binnasdikii-sunmaked bur nabir itoleged.
ECC 9:18 Gingimarba, binsaed-nikagued bur sunsogedid. Ar dule ibmar-soggwengi wis nosale, bela ibmar oichoged.
ECC 10:1 Gukur-burgwaled neg-nunu-yapanne imaked, degidbali, ina-wawa-sobed-ibe ina-wawadikid oichoged. Deyobi, gaya-isgana-sunmakleged, bela dule-binsaed-ibed-e-sunmaked oichoged, e-nug-nued oichobalid.
ECC 10:2 Dule-binsaed-ibed-e-gwage ibmar-nued-imakedgi binsaed. Dule-binsaedsulidaed-e-gwagedina, ibmar-isgana-imakedgi binsaed.
ECC 10:3 Dule-binsaedsulidaed, ar ibu imakalile, e-ibmar-imakedgi magasar na oyoged, ede, dule-binsaedsulidye.
ECC 10:4 Dule-sapin-dummad-negsemaid bese ulualile, mer be abin-imakdebin sao. Ar san-bargaagwar-imaklegedi, bukidar ibmar-noar-imakleged bargaed.
ECC 10:5 We-napneggi-gudiidgine, an daksabalid, sapin-dummagan-negsemamaidi, weyob ibmar noar-imakdimalad:
ECC 10:6 Dule-binsaedsulidaedgala, aka arbaed-nuegan ukleged. Ar dule-bur-nabir-binsamaladgardina, arbaed-baisulid ega ukleged.
ECC 10:7 An daksabalid, dule-maiga-gudimaladi, moli-birgi-sii gudidamalad. Ar dule-nuga-nikamaladdina, maiga-gudiiyob nagab galitodidamalad.
ECC 10:8 Dule yaa-matusur-akwisdibe, sunna egi argwaned. Dule gagan-matusulid-eminaidibe, sunna dubgi warmaked.
ECC 10:9 Dule, akwa mamarye-sogdibe, sunna akwagi nailikgued. Dule sapan mamarye-sogdibe, sunna e-dargagi makleged.
ECC 10:10 Ar akan e-nugar-berguddibe, e-nugar ebillesurbardibe, ibmar-sikegala, sabsur achiklegergebed. Binsaed-nikaguedgi ibmar-imaklegedi, nuekwagwadgi-ibmar-imaklegedi, ibmar-nued amileged.
ECC 10:11 Ar naibe gar-ogoledba-ododoleged-iduar, dule-ega-gar-ogoledgi warmaksadibe, dule gwen egi bar mani amiosulid.
ECC 10:12 Dule-binsaed-ibed-e-sunmaked yeer itoledaed, dule-binsaedsulidaed-e-sunmakeddina, na dukin egi aibined.
ECC 10:13 Dule-binsaedsulidaed gebe sunmakdele, e-gaya-miedi, gwen nabir sunmaksulid. Deyob gaya-nuedsuli e-sunmaked obeloddaed.
ECC 10:14 Degite, sunmaknaigusale, gayaburbamar suli-suli amisulid. Dule neg-guoed gwen wissulid. Yoedse ibmar-danibaloed gwen-wissurbalid. Ar dule, we-ibmar, gwen wisguosulid.
ECC 10:15 Dule-binsaedsulidaed, arbaedgi baisursunna yegued. Neggweburse-naed-igarbela wissurbalid.
ECC 10:16 Rey amba nuchukwagwar, neggwebur, wilesdakledaed. Degine, e-sapingan-dummaganmoga, unnila wakdaradba iba-onogedgi arbadidamalad, deyob osedoddamalad.
ECC 10:17 Neggwebur-e-rey dule-nuga-nikaddibe, we-neggweburgi ise-nued binsalesad. Degine, e-sapin-dummagandina, e-wachiba na mas-gunmalad, deyob na niga-ogannomalad. Mumguega ambikusurmalad.
ECC 10:18 Wiedba neg-uas-nudaklesulile, neg-uas ayariddaed, degine, wiedgi-neg-soblesadbali, neg maluddaed.
ECC 10:19 Wergulegegala, masgulleged-iba onoleged, yeer-itolegegala, vino goblebalid. We-ibmar-imakegala, mani abeleged.
ECC 10:20 Reygi mer be ichakwa sunmako, mer egi be ichakwa binsabalo. Deginbali, dule-mani-ibedgine, mer egi be arbakee isdar sunmakbalo. Ar sikwimar-gudidiid sunna be-barsoged, ar sikwimarde sakan-nika nanaed, degisoggu, baisursunna gayamar berbeged.
ECC 11:1 Diaki be-madu be mete, yoedsega be gannar amioed.
ECC 11:2 Be-ibmar-nikad, dule-walaguglega (7) be uke, dule-walabaabakadse (8) ega be ukodibe. Ar yoedsega we-napneggi bonigan-gwisgunonikoed be wissulid.
ECC 11:3 Mogirmar gudure-naddibe, dii wiardaed. Sapi dad-nakwed-argan-sapiledsik ailaddibe, dad-nakwed-argan-nuedsik ailaddibe, ar agi megodo.
ECC 11:4 Dule unnila burwa-goledginbi atakdidibe, ibmar-gwag digosurguoed. Dule mogirmarginbi atakdidibe, ibmar-gwag weosurguoed.
ECC 11:5 Ar be wissulid, bia burwamar naddae. Be wissurbalid, igi mimmi sapidukugi-mege, degi, igi dungumaidabali. Degisoggu, ar bela Bab-Dummad-e-ibmar-imaked-bursunna, igi be wisguosunna. Geg be wisgued.
ECC 11:6 Wakudaryala ibmar-gwag be digo, sedogidbali, be baid digbalo. Ar be wissulid, biti bur bega nabir igarga gudoe, wakudaryala-diglesaddibe, sedo-diglesaddibe. Ar wisgulesulid, biti nabir igarga gudodibe. Ar ebobela sanmakdebalodibe.
ECC 11:7 Neg-meegwadi yeer emar-imaked. Dad-ibeler-gaedi weligwar emar-imaked.
ECC 11:8 Amba dule undar seredi-megye-sogele, degine, e-ibagangi wergudigus-inigwele, ebinsao, ibagan-bulegan-bukidar itodii gubaloed. Deginbali, bela ibmar-danikoedi, gwen nabirsulid.
ECC 11:9 Machi-sapin, sapingwa-guedgi gatik be werguo. Nuchukwagwadgi na be yeer-itodii imako. Be-gwage-itogedba na be ibmar imako, be-ibyagwar-neg-dakdiidba na be ibmar-imakbiedba imako. Degi-inigwele, be ebinsao, Bab-Dummad ar bela be ibmar-imaked, wilubdaknonikoed.
ECC 11:10 Degisoggu, urwed be iego, ibmar-isgana-imaked be iebalo. Be ebinsao, ar sapingudanikidgine, degi, sapingwagwadgine, amba aku neg-itoleged-ibaganad. Ar we-igar gwen-nabirsulid.
ECC 12:1 Sapingwa-gudiidgi Bab-Dummad-be-obinnisad be ebinsao. Ibagan-bulegan-danikoed-idu, Bab-Dummad be ebinsao. Ar birgamar-bulegan-nonikile, be sognonikoed: “An-seredgussoggu, ibmar-nuegangi bar an wergudisurye.”
ECC 12:2 Dad-ibeler-gaed bar be itogosulid-iduale, Bab-Dummad-be-obinnisad be ebinsao. Nii-gaed bar be daksuliguoed-iduale, Bab-Dummad-be-obinnisad be ebinsao. Niisgwamar-gaed bar be daksuliguoed-iduale, Bab-Dummad-be-obinnisad be ebinsao. Bega dii-dummad-wisad-sorba, gannar mogirmar-nagunonikoedyob-guoed-iduale, Bab-Dummad-be-obinnisad be ebinsao.
ECC 12:3 Ibagwengine, be-argan, neggi-nakulemaladyob-gued wawanmakdoed, be-mali, bila-onomalad-dulemaryob-gued nollomakdoed. Be-nugarmar ibmar-gwag-naged-akwamaryob-gued, ichegusadbali, bar ibmar bayogosulid. Be-ibya, yawagak-seniganaba-atakmaladyob-gued, bar atakosulid.
ECC 12:4 Be-uaya, yawagak-neg-imbamaryob-gued, atudoed. Bega ibmar-gwag-naged-akwamar-goled, boggumai gudoed. Bega sikwimar-namaked bergudoed, bela namakmalad bar be itogosulid.
ECC 12:5 Neg-matusulidgi-nanalegedgi be dobe itononikoed, igarba-bonisar-nanalegedgi dobe be itononibaloed. Be-sailagia, ibmar-durba-sibudiksiiyob osibumakdoed. Ses-nanaeyob arbaed-dummad be nanadii guoed. Ibmar-gullegedi, bar bega nued-gulle gunonikosulid. Ar ade, dule degisadegu-yoggued-negse nadapid, bar gannar dagegarsulid. Bega-dule-bomaladdi, galimba-ebiris obiryamakdoed.
ECC 12:6 Mani-dub-itired-idu, or-nog-mared-idu, Bab-Dummad-be-obinnisad be ebinsao. Dii-weenaidgi mete-mared-idu, dii-weed-bipirmaknaid-bibisged-idu, Bab-Dummad-be-obinnisad be ebinsao.
ECC 12:7 Ar napagi be danisoggu, napaga be gannar binnidoed. Be-burbadi gannar Bab-Dummadse naoed. Ar Bab-Dummad bega burba-uksadid.
ECC 12:8 Odurdaked-saila weyob soged: “We-napneggi-ibmar-imaklegedi, binsarsunna imakleged, bela igarga gwen gusulid.”
ECC 12:9 Odurdaked-saila, binsaed-ibedbar-inigwele, dulemar-odurdakdii gusbalid. Bela nue-ibmar-balaminai gualid, sogedba balaminai gusad. Deginbali, binsaed-nuegan-narmaksad bukidar ilemaknai gusbalid.
ECC 12:10 Odurdaked-saila gayaburba-nuegan ise-amiar imaksagusad. Degine, gayaburba-nuegan innikigwadba narmaksa gusad.
ECC 12:11 Dule-binsaed-ibegan-e-sunmakedi, gammi ur-semaidaebayobi, emar-nied. E-binsaed-nuegan-onmaksadi, buarmar-neg-ganikidyob gued. We-binsaed-nuegan, Bab-Dummadgi danikid.
ECC 12:12 Machi, egi be binsabaliga napi an bega sogbargwelo: Gardamar-bukidar-narmakleged berguosulid, degine, gardamar-doggus-durdaklegedi, dulega geg-gued uked.
ECC 12:13 We-ibmar-sunmaklesad, wese bergunonisunnad: Unnila be Bab-Dummad-dobekwaa-gudii nanao, e-Igarmar-Mamaidba be ibsao. Ar dulega, we-ibmarbi unnila ibnuedga gued.
ECC 12:14 Ar ibmar-nued-imaklesadi, ibmar-isgana-imaklesadi, Bab-Dummad bela wilubdaknonikoed. Amba ibmar dukuar-imaklesdibe, bela wilubdakbaloed.
SOL 1:1 Salomón we-namakleged-birigined narmaksad.
SOL 1:2 ¡Bitigi be an-wagar-usana gadina! Be-sabgued vino-goblegedbali, bur bule yeer itoleged.
SOL 1:3 Be-ina-wawadikid-e-yapannedi, nue-yeer yapanned. Ar be-sunnadi, ina-wawadikidyob gued. ¡Agala, yagana nue-bebina sogmalad!
SOL 1:4 ¡Be an-nide! ¡Gwae beba be an-nide! ¡An-rey, be-gabednegse be an-sede! Anmar wergumarsun, anmar yeer-itomarsun. Be-sabguedgi, vino-goblegedbali, bur bule anmar egi wergue. ¡Agala, bebina nue sogmalad!
SOL 1:5 ¡Jerusalén-neggwebur-bunamala! An uka sichii gued, an yeer dakleged. Cedar-dulemar-dordoneg-sichigan-bubukwadyob an-uka sichii dakleged. Salomón-mor-dummaganyob an yeer dakleged.
SOL 1:6 Mer an-uka-sichigwadgi be atakmala, ar dad-ibeler-gaedba, deyob an gusad. An-susmar anse ulusmalad, e-uva-dub-nainu-akwega an-imaksamalad. A-ulale, an-uva-dub-nainu bar an nue akwissurgusad.
SOL 1:7 ¡An-sui-nue-sabesailad! Anga be soge, be-sibadmar-gagangi-omanaegala, ¿bia be omanaddae? ¿Bia yorukudba be obunnogega seddae? ¿Ar ibiga an dule-negsuligudidaeyobi, be-aimar-sibad-bukwad-abargi an be-amidii guoe?
SOL 1:8 Omegan-yeerdaklemaladba, bur be yeer dakleged. Be-sui-nue-sabesailad-amiegala, sibad-gannarba be nae. Be-sibad-burwigan masgi-omanae, dule-sibad-edarbemalad-e-dordoneg-dikarba be omanae.
SOL 1:9 Be, an-ome-nue-sabesailadid. Bee be Faraón-ur-ebipimalad-moli-omegan-nuegan-yeerdaklegedyob be gued.
SOL 1:10 Ibiyob be-wagar yeerdaklege, be-wagar oluamar-abargi yeer dakleged. Ibiyob be-dukar yeerdaklege, wingwamar-naid-abargi yeer be-dukar dakleged.
SOL 1:11 Anmar bega oluamar-olobiid soboed, oluamargi manimar-nanai bega imakoed.
SOL 1:12 Rey e-megedgi yollekwaa megisale, an-ina-wawad, wawadik-oburmakdedaed.
SOL 1:13 An-sui, ina-wawadikid binasgargi-atinnar-sagu-bipigi-seledidaedyob, anba gabdiid.
SOL 1:14 An-sui, Engadiʼye-neg-nugadgi dutu-nuegan-nigwichiyob, anga gued.
SOL 1:15 An-ome-nue-sabesailad, ¡ibiyob be yeer daklege! ¡Doggus nued be dakleged! ¡Be-ibyamar, nuumaryobi gued!
SOL 1:16 ¡An-sui-nue-sabesailad! ¡Ar ibiyob be yeer daklege! ¡Machered-nued be daed! Sui-nue-sabgulediid namaked Gaganmar-aramakmamaidi anmar-gabedga guoed,
SOL 1:17 anmar-neg-nagubirmar urwarmar mamaid, anmar-neg-uas ciprés-e-urgomar mamaid.
SOL 2:1 Sarón-neba-naidgi dutu-gwichidyob an gued. Nebagi dutu-lirio-digar-gwichidyob an gued.
SOL 2:2 An-ome-nue-sabesailad, ikoganba dutu-lirio-gwichiyobi, omegan-abalagi gudiid.
SOL 2:3 An-sui-nue-sabesailad sapimar-abalagi manzana-sapi-gwichiyobi, sapingan-abalagi gudiid. A-sapi-urba-sigedi yeer an itodaed, e-sana, yeer gulledaed.
SOL 2:4 An-sui, yeer-masgullegedse an-semai gusad, agi e-sabed anga nue-oyosad.
SOL 2:5 Uva-odinnolegaledgi an-niga be ogannomala, manzanaʼgi an-niga be ogannomala, sui-abegedbina an nue-soged.
SOL 2:6 Bitigi, e-sakwa-sapiled an-nono-urba mesisana gadin. Bitigi, e-sakwa-nueddi angaagwar an-imakena gadin.
SOL 2:7 Omegan-Jerusalénʼginmalad, goe-sapurbarmalad-nukad an bemarga ise-wilegagwar soged, melle be an-ome-nue-sabesailad an-ibe odakmalo, melle be ese gormalo, na atakbiedba atakdagoed.
SOL 2:8 ¡An-sui-nue-sabesailad-e-gaya gordani an itoged! ¡Be dakmala! ¡Wegi danikid be dakmala! Yalaganba ichomakdanikid, yar-mulluganba icho-icho danikid.
SOL 2:9 An-sui-nue-sabesailad goe-sapuryob daed. An-sui-nue-sabesailad goe-sapur-senigwadyob gued. Be dakmalana, anmar-galu-naba gwichid, galu-imbaba atakgwichid, arbakee yawagak-senigwad-ollo-ollogwadba an-dakgwichid.
SOL 2:10 An-sui-nue-sabesailad anga sunmaksad. Weyob anga sogded: “An-ome-nue-sabesailad, be gwisguye. ¡Ome-yeerdakleged, be anba dagye!
SOL 2:11 Be dakena, dii-wied-ibagan bato nasye, dii-wied bato bergusye.
SOL 2:12 Dutumar bato sapurba ainiarye. Namakleged-ibagan noniye. Suirgwamar-namakmalad, bela anmar-yargi itoleye.
SOL 2:13 Higuera-sapi bato sanmakdeeye, uva-dub durbamakgwisye, e-dutumar bato oyapachaye. ¡An-ome-nue-sabesailad, be gwisguye. Ome-yeerdakleged, be anba dagye!”
SOL 2:14 Igi nuu akwa-imbaba, degi, yar-imbaba yaa-olloganagi dukue, melle be deyob an-idu dukue. Be-wagar anga be oyoge, be-sunmaked-itogega be an-imake. Ar be-gayaburba yeer itoledaed, be-wagar yeer daklebalid.
SOL 2:15 Achu-asdubingiidmar anmarga be gamala. We-achu-senigana nainu-oichoged gudimalad. Ar anmar-ibe uva-dubmar-durbamakgwismalad wiogedid.
SOL 2:16 An-sui-nue-sabesailad angadid, an egadmogad. Dutumar-imbagi sibadmar-akwedii daed.
SOL 2:17 An-sui-nue-sabesailad, dad-argwaned-iduale, negsichilealile, anse be dage. Goe-sapurbalidyobi be abarmakdage, yar-Beterʼye-nugad-yalaganba be abarmakdage.
SOL 3:1 Mutik-gabmaidgine, an-sui an amialid, an-sui-na-nue-sabesailad an amialid. An-gabmaidgi an aminaigusanad, an amissurgusad.
SOL 3:2 Geb an gwisguded, neg-imbaba an aminadgusad. Galimbaba an aminaded, ibmar-uklebukwadgi an aminaded. An-sui-nue-sabesailad an amidii gualid. An amidigusanad, an amissurgusad.
SOL 3:3 Dule-nakulemalad galimbaba-bipirmakdimaladgi an-abingunonimalad. Geb amarse an egisded: “¿An-sui-nue-sabesailad be daksasurmala?”
SOL 3:4 An a-dulemargi sikwas-aibategua, an-sui-nue-sabesailad an aminonikid. Angaagwar an gasad, bar an indaksasulid. Deyobi an-nan-negse an sesad, an-gwalulesad-negse an sesad.
SOL 3:5 Omegan-Jerusalénʼginmalad, goe-sapurbarmalad-nukad an bemarga ise-wilegagwar soged, melle be an-ome-nue-sabesailad an-ibe odakmalo, melle be ese gormalo, na atakbiedba atakdagoed.
SOL 3:6 ¿We ibu waayobi neg-dulesulidganba ainakdani-daklege? Ina-wawadikid-mirra-abargi danikid, ina-wawadikid-incienso-abargi danikid, dutumar-wawadik-yapanmalad-abargi danikid.
SOL 3:7 ¡Be dakmala! Salomón-e-moli-ur danikid. E-yalabali sordamar-niga-gandikmalad e-dulapaa (60) danikid. Israel-sordamar-niga-gandikmalad-abargi sulesmaladid.
SOL 3:8 Wemar bela es-suid-nikamaladbiid, bilagi-urwemalagala odurdaklesmaladid. Neg-mutikidba e-isdarmalad-ainiardaed-ular, e-dikargi es-suid-nika-nika gudimalad.
SOL 3:9 Rey-Salomón e-sii-seleged-ulu sobsad, Líbano-yargi sapimar-nuegan-gwismalad-e-urgogi sobsad.
SOL 3:10 Ulu-e-suarmar, manigi-sobsabalid, e-bargamaladdi, orgi sobsabalid, e-siged, mor-suir-akwagiidgi oginnar nasiksabalid. Ulu-negyabali, ibmar-imaklesadi, bunamala-Jerusalénʼginmalad imaksad, ise-nudakar imaksamalad.
SOL 3:11 ¡Omegan-Sión-yarginmalad, nodamala! Rey-Salomón be dakdamala. E-nan-ega-ologurgin-imaksad-yoi danikid. Ome-nikued-ibagi-yosad-yoi danikid. Wergued-dummad-itoged-ibagi-yosad-yoi danikid.
SOL 4:1 Be an-ome-nue-sabesailad, ibiyob be yeer daklege, doggus wilub-obicha be dakleged. Be-ibyamar, be-muswe-batenaid-imbaba nuumaryobi, yeer dakleged. Be-saila-batenaidi, sibadmar-Galaad-yargi danagwen ichomakar-aidedanidamaladyob, be-saila-batenaidi, yeer dakleged.
SOL 4:2 Be-nugarmar, sibad-wawaadmar, e-absar-siklesad-sorba, oglesadgi dagudik-nakwedanidamaladyob dakleged. Degine, be-nugarmar, bela emaladbi daklebalid, bela amba sogedba bubukwad. Degidbali, yeer dakleged.
SOL 4:3 Be-gakuli-daklegedi, morgo-gisigwadyobi dakleged. Be-sunmakedi, ibiyob yeer-itole an-imake. Be-wagar, be-muswe-batenaid-imbagi mammi-gisigwadyobi yeerdakleged.
SOL 4:4 Be-dukar-daklegedi, David-e-neg-matusulidyobi yeer dakleged. We-neg-matusulidi, akwamar-yamo-sobaledgi sobaled. Be-dukargi, neg-matusulidgi miligwen-sigu-abgamalad-nanaiyob naid. We-sigu-abgamalad, bila-onomalad-bulegangadid.
SOL 4:5 Be-mam-abinbela-naidi, goe-sapurmar-emarbi-daklegedyob dakleged. Goe-sapurmar dutumar-imbagi gagan-mananaidaeyobi, be-mam yeer dakleged.
SOL 4:6 Dad-ibeler-nakwialile, negsichid miledele, ina-wawadikid-mirra-yarse an nakwenaoed, ina-wawadikid-incienso-yar-mulluse an nakwenaoed.
SOL 4:7 Be an-ome-nue-sabesailad, nue be yeer dakleged. Be swilimakar dakleged.
SOL 4:8 An-ome, Líbano-yar-akar anba be dage, Líbano-yargi-gudiidgi anba be dage, Amana-yar-akar be aidedage, Senir-yar-akar be aidedage, Hermón-yargi be aidedage. Achumigur-e-negmar-akar be aidedage, achu-barbad-e-yarmar-akar be aidedage.
SOL 4:9 An-ome-nue-sabesailad, gebe be an-daksagua, bela-belagwad be an-binsaed ganonikid. Be-win-dukarba-naidgi an-edichayob be an-imaknonikid. Agi an-gwage begadga gunonikid.
SOL 4:10 An-ome-nue-sabesailad, be-sabgued ibiyobi itolege. Be-sabgued, vino-goblegedba bur bule yeer itoleged. Be-ina-wawadikid-yapannedi, bela-ina-wawadikid-bamaladba bur bule yeer yapanned.
SOL 4:11 An-ome-nue-sabesailad. Be-gakuligi, acha-uugi achanis-aryomaiyob gued. Be-gwabin-urba, nunis-aryomaiyobi gued, egi achanis-aryomaiyobbalid. Be-mormar-yapannedi Líbano-yar-yeer-yapannedyobi yapanned.
SOL 4:12 An-ome-nue-sabesailad, be an-bun gued. Dutugalu-emakar-naiyob be gued. Dii-nued-aryomaid-emakar-naiyob be gued.
SOL 4:13 Be-nuu, nainu-nued-naidgi, manzanaʼmar digar-gwisnanaeyobi gued. E-san-gullegedi yeer-gulle-nanaed. Be-nuu nainugi, dutu-nardo, degi, dutu-azahar nigwis-nanaedyob gued.
SOL 4:14 Be-nuu nainugi ibmar-wawagana-nuegan, akar-akar egi digar-bukwayob gued: Egi dutu-nardo-digaleyob gued, dutu-azafrán-digaleyob gued, dutu-cálamo-digaleyob gued, ina-canela-digaleyob gued, ina-mirra-digaleyob gued, ina-áloe-digaleyob gued, degi, dutumar-baigan-nuegan-digaleyob, be-nuu gued.
SOL 4:15 Igi diwar nainu-oge, deyob be gued. Dii-sukemakmaidi, Líbano-yar-akale aidedanidaeyobi, be gued.
SOL 4:16 Burwa-dad-nakwed-argan-sapiledsikid, be gordage. Burwa-dad-nakwed-argan-nuedsikid, be dage. An-dutugalugi be gordage. E-wawadikid-oyapandagega be imakdage. Be an-sui-nue-sabesailad, be-dutugaluse be dage. E-sanmakgwichid-yeer-gulleged be gundage.
SOL 5:1 Be, an-ome-nue-sabesailad, an-bunbalid. An-dutugaluse an dogsad, agi an-mirra-wawadikid an aminonikid, agi an-ina-wawadikid an sunonikid. Agi an-achanis an nue-masad, agi an-achanis-e-uu an nue-guchabalid. Agi vino an nue-gobsad, nunis an nue-gobsabalid. Bular-namakleged An-aimar, mas-nued be gunmala, gatik be gobmarbali, immee gudii be imakmala.
SOL 5:2 An gabmaidgine itoakwaa an gabmaid. Agine, an-sui yawagakba gorgwichi an itoalid: “An-ome, an-buna, nuu-yeerdaklegeyob be yeer dakleged. ¡Anga yawagak be egae! Ar boo-batenaidba an-nono waradikgusad, ar neg-mutikidba-boo-batenaidba, an-sailagia waradikgusad.”
SOL 5:3 Bato an mor esusad. ¿Gannar an mor yobarsunde? Bato nag an enuksabalid. ¿Gannar an nag ollibi-gubarsunde?
SOL 5:4 An-sui yawagakgi-yaa-ollo-siidgi e-argan odosad. Deyob an daksagua, bela an-gwagese an-ebusad.
SOL 5:5 An-suiga an yawagak-egaegala, yog gwisguar an imaksad. An-argangi mirra-wawadikid ariomaid, an-goomar-imbaba bela ariomaid, yawagak-eduedgi deemaknai gusad.
SOL 5:6 An an-sui-nue-sabesailadga yawagak-egasgua, bar gwichisulid, an-idu naded. An-idu-nadedbali, an naibi itononikid. Aisaar an amisanad, an amissurgusad. An ese gornaigusbalinad, an-abin-imaksasurbalid.
SOL 5:7 Agine geb, dulemar-nakulemalad nakuledimargua, an-aminonimalad. A-dulemala an-sarsononimalad, an-naibi-imaksamalad. Dulemar-galugi-nakulebukwad, sabsur-an-ibe mor esusmalad.
SOL 5:8 Jerusalén-bunamala, ise-wilegagwar an bega sogmar. Bemar an-sui-nue-sabesailad-abingualile, ega be sogmalo, sui-abegedba an uelledye.
SOL 5:9 Omegan-bamaladba-bur-yeerdakleged, be anmarga soge, “¿ibugi be-macheredde, machergan-bamaladgi obinsunna? ¿Ibugi obinsunna, emide be weyob anmarse egisnaigu?”
SOL 5:10 An-sui-nue-sabesailad, machered-nued dakleged, e-uka sichisaar-daklebalid. Dule-miliambegwad-abargi (10,000) magasar dakleged.
SOL 5:11 An-sui-e-nono, or-nuedyob yeer dakleged. E-sailagia, sinni-sinni nikad, sikwisichidyob sichii gued.
SOL 5:12 E-ibyamar-gwabogwad-daklegedi, nuumar diwar-gakanaba-simalayob dakleged, nunisgi-obsayob dakleged. E-ibyamar innikimakar bukwad.
SOL 5:13 E-wagardi, wawadikid, ina-wawadikid egi digar-naiyobid. E-gakuli dutumar-daklegeyobid, agi mirra-nis egi dedemaknaiyobid.
SOL 5:14 E-swidamardina, or-suarmar-daklegeyobid, akwa-nuegan egi nanaiyobid. Bela-e-abagan, elefante-nugar-daklegeyob, swilidikid dakleged. Akwa-nuegan-zafiroʼye-nugad, bela egi ebiris naiyobid.
SOL 5:15 E-malimar-warbogwaddina, akwa-nued-mármol or-nued-sobaled-birgi-gwigwichidyob dakleged. E-gwisgued, yeerdakle gwisgued, Líbano-yargi-urwar-gwigwichidyob dakleged.
SOL 5:16 E-gakulide, bela osidikid, bela e-daklegedi, machered-nued itoged. Jerusalén-bunamala, ar deyob an-sui dakleged, ar deyob an-ai dakleged.
SOL 6:1 Omegan-bamaladba-bur-be-yeerdakleged, ¿bia be-sui-nue-sabesailad nade? ¿Bitisik nade? Anmar beba bulakwaa aminaoe.
SOL 6:2 An-sui e-dutugaluse aidenaded, ina-wawadikid-bukwadse naded, dutumar-imbaba-garmakdii imaknaded, dutumar-gwanega naded.
SOL 6:3 Ani an, an-sui-nue-sabesailadgadid, an-sui-nue-sabesailad, angadmogad. Dutumar-imbaba na e-ibmar-durgan akwediid.
SOL 6:4 Be, an-ome-nue-sabesailad. Ar igi Tirsa-neggwebur yeer daklege, igi Jerusalén-neggwebur yeer daklege, igi niisgwamar-niba-nanaid geger daklege, deyob be yeer dakleged.
SOL 6:5 Mer bar be an-daknai gue, ar be an-daksadbali, an bebina-sognonikid. Be-saila-batenaidi, sibadmar-Galaad-yargi danagwen ichomakar-aidedanidamaladyob, be-saila-batenaidi, yeer dakleged.
SOL 6:6 Be-nugarmar, sibad-wawaadmar, e-absar-siklesad-sorba, oglesadgi dagudik-nakwedanidamaladyob dakleged. Degine, be-nugarmar, bela emaladbi daklebalid, bela amba sogedba bubukwad. Degidbali, yeer dakleged.
SOL 6:7 Be-wagar, be-muswe-batenaid-imbagi mammi-gisigwadyobi yeerdakleged
SOL 6:8 Ar rey-omegan e-dulapaa (60) gued, rey-omegan-dikarbarmalad e-dulabake (80) gubalid, degi, yagana-bukidar gubalid,
SOL 6:9 degi-inigwele, unnila wargwenna nuu-yeerdaklegedyobid angad gudiid. E-nan, a-omegwa na nue sabedid, ega wargwenna guedid, na we-napnegse odesadid, a-bina bur gadi-sogedid. Yagana, a-ome-dakarmale, egi ise-nued binsadamalad. Rey-omegan, degi, e-omegan-dikarbarmalad, bunagwa-e-nug odummodamalad.
SOL 6:10 ¿Ar we doawa, yeerdakleged? Ar bolegoedba neg-ainakwiardaeyobi, mutikidba nii-daarmakenaidaeyobi, dad-ibeler daarmakenaidaeyobi, niba niisgwamar gananaidaeyobi, ber yeer dakleged.
SOL 6:11 Sapimar-Nogalʼye-nugad-bukwadse an aidesad, yar-imbagi dutumar-binigan-dakega an aidesad, abakale, uva-e-muumar ainisale, abakale, manzana-e-durbamar ainisale.
SOL 6:12 Degine, naded an itossulid, an yeer-itogedbali, an-dummad-naba urgi-gwichi an itoalid.
SOL 6:13 Ome-Sulamʼgined, be dage, be dage. Gannar be anmarse dage, anmar nue be-dakbied. Ome-nue-sabgulediid namaked ¿Ar Ibiga be an-dakbimala? ¿Ibiga bemar emar-abargi-dodonai be an-dakbimala?
SOL 7:1 An-yagwa-yeerdakleged, be-nag, nag-uka-yoid yeer dakleged. Be-duawar-billikwaa-daklegedi, dule-or-sobed ormar-yeerdakleged-sobsayobi, yeer dakleged.
SOL 7:2 Be-simu-daklegedi, noga-dirbikwagwadgi, vino enamakarsiiyobi dakleged. Be-saban-daklegedi, orosgi-dakleged-trigo-dunnumaksiidgi, dutumar ebiris-nanaiyobi, yeer dakleged.
SOL 7:3 Be-mam-abinbela-naidi, goe-sapurmar-emarbi-daklegeyobi, yeer dakleged.
SOL 7:4 Be-dukar-daklegedi, neg-matusulid-elefante-nugargi-soblegaleyobi, yeer dakleged. Be-ibyamar-daklegedi, Hesbón-neg-nugad-e-diamar, Bat-Rabim-e-yawagak-naba dakarmakbukwayobi, yeer dakleged. Be-asu-daklegedi, Líbano-yargi neg-matusulid, Damasco-neggwebursik negadakegwichiyobi, yeer dakleged.
SOL 7:5 Be-nono-daklegedi, Carmelo-yar-magasar-daklesiyobi, yeer dakleged. Be-sailagia-ilemakmaid, dub-suir-akwa-daklegeyob dakleged. Be-sailabali, rey binsaed-galenai gusad.
SOL 7:6 An-ome-nue-sabesailad, ibiyobi be yeerdaklege, be-sabgued yeer an-imaked.
SOL 7:7 Be-daklegedi, ogobwar-innikimakar-gwichiyobi yeer dakleged. Be-mam, ogobmar-naidyobi yeer dakleged.
SOL 7:8 Weyob an sogded: “Ogobgi an nakwenaoe, e-san an gwannaoe.” Be-mam, uva-duk-dukwen-naidyobid. Be-gaya-yapannedi, manzana-yeer-yapannedyobid.
SOL 7:9 Be-gaya-itolegedi, vino-nued goblegedyob itoleged. Igi vino, binnasdikii gaya-yaba ariomaidae, bela gakuli waradik imake, nugarse-bakale waradik naddae, deyobi be-gaya itoleged.
SOL 7:10 Ani an, an-sui-nue-sabesailadgadid. Nue-anbina-sogedbali, angi nue-wergudiid.
SOL 7:11 An-sui-nue-sabesailad, anba be dage, sapurba anmar nae, dutugan-imbaba oibodii anmar imaknae.
SOL 7:12 Neg-oibosale, anmar uva-nainuse naoed, abakale, e-muumar ainisale, abakale, e-dutumar-ainisale, abakale sapi-granada-e-dutumar ainisale. ¡Agi an bega sabgued oyogoed!
SOL 7:13 Gagan-mandrágora-e-san-yapanned bato magar itoleged. Anmar-yawagak-nagaba bukidar akar-akar sapi-sanmar bubukwad. An-ome-nue-sabesailad, sapi-sanmar-binigan an bega sabosad, sapi-sanmar-dinnagana, an bega sabosbalid.
SOL 8:1 Be, an-sus-gargwenadina yeerbana, an-nangi be nuugusmogana yeerbana. Degina, igarba an be-abingunonikidgi an be-ibe wagar uoenad, dule gwen anga akar sogosulinad.
SOL 8:2 Argangi-gasa an be-imakoenad, an-nan-negse an be-sedoenad, agine, sabgued-igargi be an-odurdakoenad. Vino-wawadikidgi be-ogobega an be-imakoenad, an-nur-granada-nisgi an be-ogobbaloenad.
SOL 8:3 Bitigi, e-sakwa-sapiled an-nono-urba mesisana gadin. Bitigi, e-sakwa-nueddi angaagwar an-imakena gadin.
SOL 8:4 Omegan-Jerusalénʼginmalad, an bemarga ise-wilegagwar soged: “Melle be an-ome-nue-sabesailad an-ibe odakmalo, Melle be ese gormalo, na atakbiedba atakdagoed.”
SOL 8:5 ¿We doa negsulidganba e-sui-gukingi birikwaa-mai-akas nakwedaniki? Sui-nue-sabgulediid namaked Manzana-sapi-urba, an be-odaksad. A-sapi-urbali, be-nan nunmakedgi be-odenoniki gusad.
SOL 8:6 Be-gwagegine an-sedii be gue. Be-swidagine an-wilub narmakar be sedii imake. Ar sabgued-e-ganguedi burgwed-igaryobid, gege dule e-igar gaed. Suibina-soglegedi, sulibinsa emar-imaked. Sabgued-itolegedi, soo-dummad-gwabunyemaiyob itoleged. Bab-Dummad deyob imaksad.
SOL 8:7 We-sabgued-sooyobidi, dii-dummadi gege oginned, diwarmarbela gege we-sabgued obelobalid. Dule-gwensak sabgued-bakega, bela e-ibmar-nikad ukdele, we-dulegi dodoledoed.
SOL 8:8 Anmar-bun senigwad, amba yoo e-nuu mullugudaged. Dule anmarse nikuega egisdanikile, ¿igi anmar abin sogosunna?
SOL 8:9 Ar galu-matusulidyob-guena, anmar e-birgi nega-dummad-manibiid soboenad. Ar yawagakga-guena anmar urwala-e-urgo egi nasikoenad.
SOL 8:10 An galu-matusulidyob gued, ar an-mam, neg-suigan-warbo-gwichiyob gued. Agala, an-sui-nue-sabesailadga, an gwage-bogidikid uked.
SOL 8:11 Salomón, Baal-Hamón-yargi nainu-gwensak nikanad, ega akwemalaga, dulemarga manigi-urmaksagusad. E-nainu-sanmaksale, we-dulemar ega war-wargwen mani-sibu-milibo (2,000) senonidamalad.
SOL 8:12 Salomón, mani-milibogwad be sue, bemar-dule-nainu-akwemalad, mani-sibu-dulataled-ilabakegwad (400) be sumarmoga. Ar an-nainudina, unnila angadid.
SOL 8:13 Be, dutugalu-abargi gudiid, anmar-aimar be-sunmaked itobigudimalad. Be-gaya-itogega be anmar-imake.
SOL 8:14 An-sui-nue-sabesailad, gwae be dage. Goe-sapuryob be abarmakdage, yalamar-wawadikid-yapanned-abargi gwae be abarmakdage.
ISA 1:1 Judá-e-reymar: Uzías, Jotam, Acaz, degi, Ezequías, amar-negdakmamaidgine, Amoz-machi-Isaías, Judá-yargi, degi, Jerusalén-neggweburgi neg-guoed daksad.
ISA 1:2 ¡Nibneggi-bukmalad, an-itomalo! ¡Napneggi-bukmalad, an-itomalo! Bab-Jehová weyob soged: “Ani an an-mimmigan akwisad, an na odummosad, degi-inigwele, angi gwisgudmalad.
ISA 1:3 Moli-bebe-nikad-alugwasualed, e-ibed magar daked. Moli-uayasuid, moli-urbed-galu-e-ibedgad magar daked. Degite, Israel-dulemardi, akusunna itomalad, an-dulamardi, aku ibmar dakmalad.
ISA 1:4 ”Dulemar-nue-isgus-bukwamalad, ¡ibitosmar! Dule-nue-isguedgi-bipirmaksa-bukwamalad, ¡ibitosmar! Dule-ibmar-isgana-imakmalad-e-wagan-bukwad, ¡ibitosmar! Dule-gwage-isgus-gudimalad-e-mimmigan-bukwad, ¡ibitosmar!” Ar bemar, ¡Bab-Jehováʼgi bangudmalad! ¡Israel-e-Bab-Dummad-Isligwaled isdar dakdemalad! ¡Gannar sorsik aibiridmalad!
ISA 1:5 ¿Ibiga amba sabsur-odurdakledii gubimarsunna? ¿Ibiga uayasuli-gudii gubimarsunna? Bela e-nono, ise-nailikguar siid, bela e-gwage nued naisulid.
ISA 1:6 Bela e-nag-duku-akale, nonosega, e-san-nued wis naisulid, bela oitolesadbi nanaed. E-san, gudure-gudure nanaid. E-yaamar-bukwadi, nunu-yapanne nanaed, ar gwen nugussuli nanaed, morgi-obipirmakar naisurbalid, olivo-gwallugi maglegarsurbalid.
ISA 1:7 E-yala, nue-bergus naid. E-neggweburmar, bato soogi-ogumakles bubukwad. Emar-sunnagwad na dakmaloed, igi-dule-baigan e-ibmar-digar-nanaid gutemaloe. E-yala, olloo naioed, dule-bamaladse e-yala obelolesadyob naguoed.
ISA 1:8 Sión-yala, uva-nainugi binsa dukued-neg olloo-siidaedyobi daklenaded. Melón-digar-naidgi, binsa neg-ollobi-siidyobi daklenaded, neggwebur, dule-isdarmaladse ebirilessiidyob gued.
ISA 1:9 Ar Bab-Jehová-Bela-Gangued-Nikad anmar-gwenna-gwenna-odulossulina, Sodoma-dulemaryob anmar gumogoenad, Gomorra-dulemaryob anmar obelolemogoenad.
ISA 1:10 Sodoma-e-dummagan, Bab-Jehová-ibmar-soged be itomar. Gomorra-neggwebur, anmar-Bab-Dummad-Igar-Maid be itomar.
ISA 1:11 Bab-Jehová soged: “Be-ibmar-ukleged-bukidaradi, ¿ibi-nuedga anga wis gue? Ar gwen an abemaisulid. Ar sibad-wawaad-machergan-ogumakar-anga-ukleged an budar dakgusad. Ar ibdurgan-wardummagan-e-gwallu-anga-ukleged an budar dakgusad. Moli-bebe-nikad-machergan-e-ablis an abesulid, sibad-wawaadmar-e-ablis an abesulid, sibad-machergan-e-ablis an abesulid, we-ibmarmar, gwen bai an daksulid.
ISA 1:12 ¿Ibiga be an-asabin danimala? ¿Doa bega ibdurgan-sedamaloye sogsa? Unnila anse-goled-neg-imba-oichogega be nonidamalad.
ISA 1:13 Melle bar be anga ibmar-ukleged-gwen-igarga-gusulid sedamalo. Ar ina-wawadikid anga ibmar-isganaga gued. Nii-binidgi, iba-onoleged an budar dakgusad, obunnoged-ibagi, iba-onoleged an budar dakgusad, dulemar-bular-onmaknonidamalad an budar dakgusad, be-an-nug-odummomalad, aka bur an-ourwe damalad, bar an itobisulid.
ISA 1:14 Bemar nii-binid-gwisguedgi iba-onogedi, an budar itogusad. Itoakwaa-iba-onolegedi, an budar itogusad. Ibmar-nuedga gwen anga gusulid, abali, an budar itogusad.
ISA 1:15 Bemar anse-goledgi argan-onakwialile, an bemar-dakosulid, wagar-biir an bemar-idu imakoed. Ar gandikidgi bemar anse gornanaile, an bemar-itogosulid. Ar bemar dulemar-ibe ablis eosmalad.
ISA 1:16 ”¡Isguedgi be bangumar, swilidik be gumar! ¡An-asabin ibmar-isgana-imakedgi be bangumar! ¡Melle bar ibmar-isgana be imakmar!
ISA 1:17 ¡Igar-nuegan-imaked be durdakmar! ¡Igar-napiragwad be imakmar! ¡Dule-mesagwar-imaklediid be bendakmar! ¡Dule-sergan-satedga be igar nabomar! ¡Siamar-ei-sui-burgwismalad-ular, be gwisgumar!”
ISA 1:18 Bab-Jehová soged: “Be dagmar, anmar igar nudakmargwelo. Bemar-isgued, ginnitibiyob-gue-inigwele, boo-sibudikidyob-dakle naoed. Bemar-isgued, mor-ginnidyob-gue-inigwele, sibad-wawaad-e-absar-dagudikid-daklegedyob naoed.
ISA 1:19 Ar bemar an-sogedba nanamaloye sogele, be-yargi ibmar-nuegan-sanmakoedi be gunmaloed.
ISA 1:20 Ar bemar amba an-itosulile, angi be gwisgudmalale, es-suidgi be ogilolemaloed.” Ar Bab-Jehová, e-sunnagwad deyob soged.
ISA 1:21 Neggwebur-innikigwad, ¿ibiyobi gambanuchusaedga be gusa? Gebe-iduar, igar-napiragwadbi be imakdidaenad. Igar-innikigwadbi begi nai gusanad. Emide, unnila dule-gindakmaladbi begi gudigusmarsunnad.
ISA 1:22 Gebeunni be maniyob-gumalanad, emidi, durganga-binnideyob be gudnanaed. Vino-nuedyob be gumalanad, emidi, vino dii-sunnabi-goblegeyob be gudnanaed.
ISA 1:23 Be-dummagan-neg-dakmamaid dulegi-gwisgumaladid. Amarde, dule-ibmar-atursamalad-e-sordamalad. Manigi-dule-binsaed-gaedgi bela na yeer itodamalad, dulemar-ega-ibmar-uked unnila abedamalad, dule-sergan-sated-ular sunmakdasurmalad, siamar-ei-sui-burgwismalad-e-igar gwen bai dakdasurmalad.
ISA 1:24 A-ulale, Israel-dulemar-e-Bab-Jehová-Bela-Gangued-Nikad, weyob soged: “¡Wese ugaksun! An-isdarmaladga an igar nudakoed, an-isdarmalad an buged imakoed.
ISA 1:25 Gannar an-argan an bemarse oyogoed, bela be-isgued an elioed, degi, bela begi ibmar-isgana-naid an osulogoed.
ISA 1:26 Bega dule-igar-nabomalad gebe-iduar-bukusadyob an oambikuoed, dule-be-unamalad gebe-iduar-ambikusadyob an oambikuoed. Degisoggu, Neggwebur-Innikigwadye be-nugsamaloed, Neggwebur-Sogedba-Daedye be-nugsamaloed.”
ISA 1:27 Sión-yala, igar-innikigwadba bela-belad bendaklegoed, dulemar e-isguedga-bukib-binsamalad igar-napiragwadba, bela-belad bendaklegoed.
ISA 1:28 Degi-inigwele, dule-uayasulidamaladdi, isguedgi-gudimaladdi, obelolegoed. Ar dule-Bab-Jehová-obandimaladdi, oburgwilegoed.
ISA 1:29 Bemar we-sapimarbina nue-sogdimaladgi bemar nue-bingedar itomaloed, we-dutugalubina be nue-sogdimaladgi bemar nue-undar bingegumaloed.
ISA 1:30 Bemar, sapi-e-gagan-dinguddaeyob gudmaloed, dutu-digaled dii-sate-gugwichidyob gudmaloed.
ISA 1:31 Dule-gala-ibedi, gagan-durgan-milegeyob naoed, e-arbaedi, ilagwen-bergus naoed, ebobela soogi-ogalegoed, dule gwen soo oginnosulid.
ISA 2:1 Amoz-machi-Isaías, Judá-yargi, degi, Jerusalén-neggweburgi neg-guoed-daksad, sogsad:
ISA 2:2 “Ibagan-bergued-mosale, Bab-Jehováʼse-goled-neg-yala bur yala-sunsogedga sii guoed, yala-mulluganba bur nug-dummarba sii guoed, dulemar-yar-baid-baidgi-bukmalad bela we-yalase duurmaknonikoed.
ISA 2:3 Bukidar neggwebur-bamalad nonimaloed, sognonimaloed: ‘Dagmar, anmar Bab-Jehová-yalase nakwenamar, Jacob-e-Bab-Dummadse-goled-negse nakwenamar. Ar Bab-Jehová, e-Igar-Maidgi anmar-odurdakoed, adi, anmar e-igargi nanadii guegar.’ Ar ade, Sión-yalagi Bab-Jehová-igar-maid-odurdakleged nodagoed, Jerusalénʼgi Bab-Jehová-gayaburba ainidagoed.
ISA 2:4 Bab-Jehová, dulemar-yar-baid-baidsik-bukmaladga igar-nabogoed, neggwebur-bukibgi-nakulegega guoed. Dulemar, e-es-suidmar napa-imuedga obinyemaloed, eswar-swiswidikmalad gagan-sikedga gudoed. Yar-gwensak, yar-baidbo bar na abin-abin urwosurmalad. Bila-onogega bar odurdaklenai guosurmalad.
ISA 2:5 Jacob-wagan be dagmar, Bab-Jehová-anmar-nidiguega, anmar imakmar.”
ISA 2:6 Bab-Dummad, be-dulamar be obachad, be Jacob-e-wagan obachad. Ar be-dulamar-yargi, dad-nakwed-dorgan-niisgwagi-nerguarmaladi, bukidar bukwad. Filistea-dulemaryob, yoo-ibmar-guoedgi-sunmakmalad-bukidar nikamalad, Be-dulamar, ar dule-bamaladbo igar mesdamalad.
ISA 2:7 E-yalagi, mani-sunnabi engus bukwad, olo-sunnabi engus bukwad, e-ibmar-nuegan gege ebisleged. E-yalagine, moli-bukidar nikad, e-moli-ur-bila-onomalad gege ebisleged.
ISA 2:8 A-ukinbali, e-yala ibmar-bab-dummadyob-imaklemalad-sunnabi engus bukwad, ar dulemar, e-argangi-ibmar-sobsamalad-asabin sindigale, sigdimalad, e-googi-ibmar-obinnismalad-asabin sindigale sigdimalad.
ISA 2:9 Ar weyob, dulemar, e-asabin sindigar-sigedba na nug-wiodimalad, ar dulemar, e-asabin na nug-bipii imakdimalad. Begi-isgusadi, melle ega be elio.
ISA 2:10 ¡Israel-dulemar! Bab-Jehová-e-gangued-sabsur-oyoged-idu be dukumar, e-gangued-dobesaila-dakleged-idu be dukumar, akwasailagan-ollogan-yaba be dogmar, e-idu be napa-yaba dukumar.
ISA 2:11 Dule-san-dummarba-imakmalad, sabsur-obingegsalemaloed, dule-san-dummarba-imakmalad, san-bipii imaklemaloed. A-ibagangi, unnila Bab-Jehová-e-nugbi odummolegoed.
ISA 2:12 Bab-Jehová-Bela-Gangued-Nikad ibagwengi nonikoed, bela-dulemar-na-san-dummarba-imakmaladgi, dulegi-mesagwar-sunmakmaladgi, gwichigunonikoed, dule-na-san-bule-bule-samaladgi, gwichigunonikoed. A-e-nugmar bipii imaknonikoed.
ISA 2:13 Bela dulemar Líbano-yalagi-urwar-suigan-gwichiyob-san-imakmaladgi, gwichigunonikoed, bela urwar-matusurmalad-bukwadyob-san-imakmaladgi, gwichigunonikoed. Bela Basán-nebagangi sapi-dummaganyob-san-imakmaladgi, gwichigunonikoed.
ISA 2:14 Bela dulemar yala-dummagan-matusurmaladyob-san-imakmaladgi, bela yala-mullu-mullugan-nuga-nikamaladyob-san-samaladgi, gwichigunonikoed.
ISA 2:15 Bela dulemar neg-suigan-bukwadyob-san-imakmaladgi, bela galu-matusur-akwabiidmalad-gandikidba-bukwadyob-san-imakmaladgi, gwichigunonikoed.
ISA 2:16 Bela dulemar Tarsis-ulu-dummaganyob-san-imakmaladgi, bela ulu-dummagan-yeerdaklemaladyob-san-imakmaladgi, gwichigunonikoed.
ISA 2:17 Dule-san-dummarba-imakmalad, nug-bipii gudoed, dule-dogdar-obicha-san-imakmalad san-bipii gudoed. A-ibagangi, unnila Bab-Jehová-e-nugbi odummolegoed.
ISA 2:18 Bab-dummadyob-ibmar-imaklemalad bela-naitinaga obelolegoed.
ISA 2:19 Bab-Dummad dulemar-sabsur-odurdaksokalile, dulemar Bab-Jehová-e-gangued-sabsur-oyoged-idu, e-gangued-dobesaila-dakleged-idu, akwasailagan-ollogan-yaba ubodmaloed, idu napa-ollogana-yaba dogdemaloed.
ISA 2:20 A-ibagine, dulemar e-bab-dummagan-nug-odummogega-orgi-sobsamaladi, manigi-sobsamaladi, sapur-nusaga, degi, uksirga midmaloed.
ISA 2:21 Bab-Dummad dulemar-sabsur-odurdaksokalile, dulemar, Bab-Jehová-e-gangued-sabsur-oyoged-idu, e-gangued-dobesaila-dakleged-idu, dulemar akwasailagan-ollogana-imbaba ubodmaloed, akwasailagan-ollormalad-yaba dogdemaloed.
ISA 2:22 Degisoggu, melle be dulegi bensuli-gudii guo. Ar duledi, unnila sikwas dula gudiid. E-dula-gudiidi, unnila buu naddaed.
ISA 3:1 Isaías Jerusalén-dulemarga, degi, Judá-dulemarga sogded: “¡Nue bogi be an itomalo! Bab-Jehová-Bela-Gangued-Nikadi Jerusalén-neggweburgi, degi, Judá-yargi, bela ibmar-nabir-gullemalad obelogoed: Bela masgullemalad, bela gobedmarse-bakale, obelogoed.
ISA 3:2 Bab-Jehová, bela we-dulemala, Jerusalén-neggweburgi, degi, Judá-yargi, osulogoed: Bela dule-gandikmalad, bela dule-bila-onomalad, dule-igar-nabomalad, e-gayaburba-barsogmalad, dule-ibmar-guoedgi-iduakwaa-sunmakmalad, girmar-dummagan,
ISA 3:3 sorda-bila-onomalad-e-idumalad, dule-nug-nikamalad, dule-binsaed-dakmalad, galagwensuli-ibmar-sobmalad, degine, dule-burgwismaladse-gabgin-ibmar-egismalad, wemar, bela obelogoed.”
ISA 3:4 Bab-Jehová soged: “An negsemalaga, sapingana urboed. Dule-dummaganga-gumalaga, masmala-ibmar-abes-abesdamalad urboed.
ISA 3:5 Dulemar na muchub-muchub sabsur-imakdemaloed: Dule e-neg-dikarba-maidbo, na abin-abin nagudmaloed. Sapingwa, dador-sarsodoed. Dule-binsaled, dule-nug-nikadbo na sabsur-imakdemaloed.
ISA 3:6 ”Dule-gwensak e-bab-neggi e-gwenadga sogdagoed: ‘Ar bedi mor-nued-ise-nudakar be yoisoggu, we-neg-gagalenaid nudake, be anmar-dummadga gue.’
ISA 3:7 Geb e-gwenaddi e-abin sogdagoed: ‘An nersuli. Ar an-neggi mas sated, morbela satebalid. Melle neggwebur-dummadga-guega be an-imake.’ ”
ISA 3:8 Ar Jerusalén-neggwebur nue-bergus mellesiid, Judá-yar nue-oitoles naid. Ar e-sunmakedi, e-ibmar-imakedi, Bab-Jehováʼgi ise-yolegaled. Amarde, Bab-Dummad-e-gangued-yeerdakleged bai daksulid.
ISA 3:9 E-ichakwadamaladgi na dukin e-daed barsoged. Sodoma-dulemar-isgusadyobi, e-isguedgi bule-bule-gudiid odukusurmalad. ¡Emar na dummad-wilesmar! Na dukin sabsur-odurdaklegega gunanaid.
ISA 3:10 Dule-napira-nanadiidga be sogmalo, “bega ibmar nueganbi guoye.” Ar na e-arbadiidgi nue-ibmar nikuoed.
ISA 3:11 ¡Dule-isgana, be nue-wiles! Ar bega ibmar-nuegan guosulid, ar be-arbasadgi na be odurdaklegoed.
ISA 3:12 Bab-Jehová sogbalid: “¡An-dulamar, be nue-wilesmar! Sapinganse mesagwar-gudimalad, Omegan ega dummadga-negdakmamaid. ¡An-dulamar, be nue-wilesmar! Ar dule-be-idumaladi begi dododimalad, ar igar-isganaba be-nidimalad.”
ISA 3:13 Bab-Jehová, e-dulemarga-igar-nabogega, gwichigudasokalid. Dulemar-sabsur-odurdakega, gwichigudasokalid.
ISA 3:14 Bab-Jehová, girmar-dummagangi, degi, dummagan-negsemamaidgi, gwichigudasokalid. Bab-Dummad ega weyob sognonikoed: “Ar bemar uva-nainu-naid bela obelosmalad. Be-negyagi dule-wilemalad-ibe-be-ibmar-atursasmalad bukwad.
ISA 3:15 ¿Doa bega sogsa, an-dulamar mesagwar imakmaloye? ¿Doa bega sogsa, dule-wilesagwar-gudimalad be wiomaloye?”
ISA 3:16 Bab-Jehová weyob sogbalid: “Omegan-Sión-yalaginmalad san-bule-bule-imakmaladi, emargi-obine-itogedba bule-bule nanamalad. A-omegan dule-mesagwale dakdaed. San-bule-bule-imakedba, e-maligi ibmar-nanaid-ogolegala, yamo nag-bana-bana nadapdamalad, adi, e-ibmar-maligi-naid-goled itomalagar.
ISA 3:17 A-ulale, ani, omegan-Sión-yalaginmalad-e-nonogi, boni-yaa-dummagan yaisur-nikuega imakoed, an bela amar-nono swana imakoed.”
ISA 3:18 A-ibagine, Bab-Jehová, we-ibmarmar osulogoed: Maligi-ibmar-nagumalad, bebegi-ibmar-nasiklemalad, morgi-ibmar-nasiklemalad.
ISA 3:19 Bela dukargi-ibmar-nasiklemalad, sakwagi-ibmar-nasiklemalad, muswe-wagar-odukumalad.
ISA 3:20 Dunwemar, maligi-ordubyob-ibmar-nasiklemalad, saderba-mordub-atillemalad. Ina-wawagan-nuegan, olargan-matar-dummagan,
ISA 3:21 olarganmar, olasumar.
ISA 3:22 Ibagi-mor-yoleged-gargerbamalad, mor-dummagan, mor-suigan, mor-sakwa-metegana.
ISA 3:23 Isbe-wagar-dakmalad, lino-mor-nued, mor-obipirmakar-nonogi-silemalad, degi, dukarba-biar-mor-nasiklemalad. Bela e-ibe we-ibmarmar osulolegoed.
ISA 3:24 A-ibagine, ina-wawadikidbi-yapannedi, nunu-yapanne naoed. Saderba-mordub-atillemalad-muchubbi, saderba gasdub nasikdemaloed. Ise-gwialed-muchubbi, sailagia-sate gumaloed. Ibagi-mor-gargerbamalad-yoleged-muchubbi, wilegedba mor-yaara-dakle yodmaloed. Wagar-yeerdakleged-muchubbi, bingedar-dakle itodmaloed.
ISA 3:25 Be-machergan es-suidgi oburgwiledmaloed. Be-dule-bulegan bila-onolenaidgi oburgwiledmaloed.
ISA 3:26 Bela dulemar ogormakdemaloed, burgwed-ibagi-mor-yoleged yodmaloed. Neggwebur bela olloo dakle nadoed.
ISA 4:1 A-ibagangine, omegan-walagugle (7) machered-wargwengi alamakdamaloed, ega sogdamaloed: “Anmar anbo-nikue, ar be an-nikguele, anmar na dukin mas amioed, anmar na dukin mor bakbaloed, unnila anbo-nikubi anmar be-abeged. Adi, anmar melle bingegudii gumalagar.”
ISA 4:2 A-ibagangine, Bab-Jehová, sapi-siklesad gannar ainiega imakoed. We-sapi-gannar-ainioedi, yeerdaklegedga guoed, degi, gandikidba-yeerdaklegedga gubaloed. Ibmar-durbamar-welemaloedi, Israel-dulemar-besmalad-e-nug-odummogega guoed, degi, e-nug-ogannogega gubaloed.
ISA 4:3 Degine, Sión-yalagi napi-dula-bemaloedi, Jerusalén-neggweburgi napi-dula-bukumaloedi, bilegoed: Dule-islidikidmarye, degi, bela Jerusalénʼgi-gudimalad-e-nug-narmakar-mamaidse-bakar, deyob bilegoed.
ISA 4:4 Bab-Dummad, sabsur-odurdakleged-igar mesnonikile, degi, geb sabsur-odurdakdele, omegan-Sión-yalaginmalad-e-isgued osulogoed, degi, Jerusalén-dulemar-ablis-eosmalad-e-isgued elioed.
ISA 4:5 Geb degine, Bab-Jehová, ibgine, Sión-yalagi, dulemar-ambikuoedgi mogir-gudure nasikoed. Mutikdi, ibegwar soo-gwabunye-gwichi imaknonikoed. Bab-Jehová-e-gangued-yeerdaklegedi atued-dummadyob-dakle bela neg-gasa naguoed.
ISA 4:6 Adi, ibgine, dad-ibeler-uedikgued-idu negsichii-imakedyob naguoed. Dii-wiedgi, degi, burwa-dummad-noedgi ega dukuedga naguoed.
ISA 5:1 An-ai-nued-nuggi an namakoed, e-uva-nainugi an namakoed. An-ai-nued-e-uva napa-nuedgi digar naigusad.
ISA 5:2 Na napa nudaksagusad, akwa-murugan obelosgusad. Uva-dub-sailagan-nuegan digsagusad. Nainu-abargine neg-suid sobsagusad, uva-egured-galu sobsagusbalid. Uva-san-nuegan-ega-sanmaked abedii gusanad, aka ega uva-soledbi sanmaksad.
ISA 5:3 Bab-Jehová soged: “Judá-dulemar, Jerusalén-dulemar, be anga sogmardo. Emide, uva-soledbi-sanmaksadi, ¿wede doagine? ¿Angine? ¿Uva-nainugine?
ISA 5:4 ¿Ar ibu-ibmar an-uva-nainuga an imaksasuli? ¿Ibu-ibmar bar an ega imakosunna? Ar uva-san-nuegan-anga-sanmaked an abesanad. Ar degite, ¿ibiga uva-san-soled sanmaksasunna?
ISA 5:5 An bega sogmalodo, igi an-uva-nainu an imakoe: An e-ibe galu-emakaled earoed, adi, bela berguegar. An e-galu-matusulid e-ibe earbaloed, adi, bela egi annalegegar.
ISA 5:6 Bela swanga-nai an imakoed, bar uva-dub diglegosulid, bar nuekwaa emilegosulid. Ikomarbi, degi, gagan-ikobimaladbi ainidagoed, bar mogirmar egi dii-owiega an imakosulid.”
ISA 5:7 Israel-dulemar Bab-Jehová-Bela-Gangued-Nikad-e-uva-nainu gued. Judá-machergandi ega uva-yeerdakle-digaledga gued. Bab-Jehová Israel-dulemar ega igar-innikigwad-imaked edarbediinad, emide dakalid, unnila dule-ablis-eodimaladbi gudimala. Bab-Jehová, ega igar-napiragwadba-nanaed edarbediinad, emide dakalid, unnila suli-suli-itogedba binnasuli gormakdimala.
ISA 5:8 Dulemar emar-idu neg-sobe-sobe-gudimalad, ¡dule-wilesmar! Emar-ibe nainu-sue-sue-gudimalad, ¡be duledar-wilesmar! Dule-bamaladga wis napaneg-ollogwad nasiksulid. Na wargwen we-neggweburgi-gudimaladyob itoged.
ISA 5:9 Bab-Jehová-Bela-Gangued-Nikad weyob an-uayagwar anga ibmar-sogsad: “Negamar-bukidara obelolegoed. Neg-dummagangi, neg-yeerdaklegedgi, dule gwen megosulid.
ISA 5:10 Uva-nainu-dummagan sogapaa naidi, unnila bari-gwagwen wis vino egi amilegoed. Ibmar-gwag galón-gwaambe-diglegoedgi (10), unnila galón-gwagwen wis egi welegoed.”
ISA 5:11 Dulemar wakudaryalaba-mumguega-gwisguardamaladi, ¡duledar-wilesmar! Mumgusii mutikguddamaladi, ¡be duledar-wilesmar!
ISA 5:12 Be-iba-onomaladgi vino-bukidar nikadamalad, gar-arpaʼmar ogorleddaed, degi, gar-liraʼmar, damborʼmar, degine, gar-flautaʼmar ogorleddaed. Degi-inigwele, bemar Bab-Jehová-ibmar-imaksadgindi, binsadasurmalad, e-ibmar-saedginbela bar binsadasurbalid.
ISA 5:13 An-dulamar an-itobisurmalad-ulale, gales seledmaloed. E-dule-nuga-nikamalad mas-gunsulidba burgwidmaloed, dule-bukidar gobsulidba burgwidmaloed.
ISA 5:14 A-ulale, burgwarmalad-meged-galu-e-yaa sabsur-argas maid. Agine, dule-nuga-nikamalad, e-mumguedgi-yeer-itodimalad, neg-uanse doledmaloed. Dule-binsarmalad, e-isguedgi-wergudimaladba neg-uanse doledmaloed.
ISA 5:15 Dulemar sabsur-ibitomaloed, emarse ibmarbina-wiledii gudmaloed. Dule-san-dummarba-imakdimalad, binge itodmaloed.
ISA 5:16 Ar Bab-Jehová-Bela-Gangued-Nikadi igar-innikigwadba e-nug ogannolegoed, Bab-Dummad-Isligwaled igar-napiragwadba na san-swilidikid oyogoed.
ISA 5:17 Sibad-wawaad-senigana, e-nainu-sunnadyobi, egi gagan-ara-aramalad-madii gudmaloed. Sibad-omemardi, dule-mani-ibmala-e-neg-ollo-ollo-bukmaladgi gagan-madii gudmaloed.
ISA 5:18 Dule isguedse-ebipiledimalad, ¡duledar-wilesmarsun! Dule urdubgi-isgued-ebipidimalayob-gudidiid, ¡be dule-wilesmar!
ISA 5:19 Na sogdimalad: “Bab-Dummad gwae dagye. Gwae ibmar imakdaye, adi, anmar e-ibmar-imakoed dakegarye. Israel-dulemar-e-Bab-Isligwaled e-ibmar-imakbied gwae imakdaye, adi, anmar e-ibmar-imakoed wisguegarye.” Deyob-sogdidiid, ¡duledar-wilesmarsun!
ISA 5:20 Dulemar, igar-isgana igar-nueganga-imakdidiidi, ¡duledar-wilesmar! Dulemar, igar-nuegan igar-isganaga-imakdimaladi, ¡dule-wilesmar! Dulemar, negsichid neg-meegwadga-imakdimaladi, ¡duledar-wilesmar! Neg-meegwaddi, negsichidga-imakdimaladi, ¡dule-wilesmar! Dulemar, ibmar-gagbireged ochigwadga-imakdimaladi, ¡duledar-wilesmar! Dulemar, ibmar-ochigwad gagbiregedga-imakdimaladi, ¡dule-wilesmar!
ISA 5:21 Dule, binsaed-ibedga na san-sadimaladi, ¡duledar-wilesmar! Dule, nue-ibmar-wisidga na san-imakdimaladi, ¡dule-wilesmar!
ISA 5:22 Bemar vino-gobedsik-bulegan-gudimaladi, ¡be duledar-wilesmar! Bemar inna-gagbid-sobedsik-bulegan-sogdimaladi, ¡dule-wilesmar!
ISA 5:23 Bemar dule-baiganse-manigi-baklegar, dule-ibmar-isgana-imaksad-galessiid-onodamaladi, ¡duledar-wilesmar! Bemar dule-ibmar-oakalossulid-obanagwar-imakdimaladi, ¡dule-wilesmar!
ISA 5:24 A-ulale, igi-soo-ditismaked gagan-ogumakdedae, igi-gagan-dinnagwad soo-abin gummakdedae, deyobi, bemar gummakmaloed. Igi sapi-mali napa-urba-nunguddae, igi e-dutu, ukub-miledeyob-mileddae, deyob bemar berguoed. Ar bemar, Bab-Jehová-Bela-Gangued-Nikad-Maid-e-Igar obatemalad, Israel-e-Bab-Jehová-Isligwaled-e-gayaburba isdar-itodmalad.
ISA 5:25 A-ulale, Bab-Jehová e-dulemarse sabsur-urwed, a-ulale, sabsur-odurdaked, yalagan ese giglimaked. Muigan, durgan-milegeyob, galimbaba omileded. Deyob-imaksa-inigwele, Bab-Jehová, amba sae-itomaid, amba dulemar-sabsur-odurdakmaid.
ISA 5:26 Bab-Jehováʼdi, dulemar-yar-baid-baidgi-dikasur-bukwadse-golegala, bander onakoed. Bela yar-naidgi-bukwamaladse wigooed, we-dulemar gwae-gwae abarmakar-abarmakar nonimaloed.
ISA 5:27 We-dulemar, dutusurmalad, gwen yeguosurmalad. Unnila, guagwar gudii gumaloed, gwen gabbie itogosurmalad. E-musirba-mor-atinnaimalad gwen ei achikosulid. Nag-uka-e-dubmar e-ibe gwen itirosurbalid.
ISA 5:28 E-sigumar ise-swiswidikidbioed, e-warsimar bela gachii ganikidbimaloed. E-molimar-e-sapat akwayobi dutusulidbioed, e-moli-ur-bila-onomalad-e-yandamar burwa-bipirmakaledyobi guoed.
ISA 5:29 Sorda-bila-onomalad-e-goledi, achumigur-nono-wawaadyob goledbioed. Achumigur-nono-wawaad-e-mimmigan-uurmakeyobmaloed, e-nugar ogotemaloed. Dule ese-galesale, dule gwen egi suosulid.
ISA 5:30 A-ibagangine, we-dulemar Israel-dulemargi demar-dummad-arwemaiyobi gwichigunonikoed. Dule, Israel-yar-naid-dakalile, bela negsichidbi-nai dakdagoed, dad-ibeler-idu mogir-sichid nai guoed.
ISA 6:1 Rey-Uzías-burgwisad-birgagine, ani Isaías, Bab-Dummad ologana-biriginedgi-sii an daksad. E-mola-duku ese-goled-neggi bela batenai an daksad.
ISA 6:2 E-birgine, dule-nibnegginmalad-Serafínʼye-nugmalad gukunanai an daksad. A-dulemar sakan-nergwa (6) nikamaladbiid: Sakan-warbogwadgi e-wagar odukunanaid, sakan-warbogwad-baidgine, e-malimar odukunanaibalid, degine, sakan-warbogwad-baidgindi, gukunanaid.
ISA 6:3 Muchub-muchubbi, binnasuli sognanaid: “Bab-Jehová-Bela-Gangued-Nikadi, Bab-Jehová-Isligwaledid, Isligwaledid, Isligwaledid. Bela napneggi e-gangued-yeerdaklegedi neg-gasa naid.”
ISA 6:4 Serafínʼmar-binnasur-gornanaidbali, Bab-Dummadse-goled-neg-yawagak-bargamalad e-sailamarse-bakale, giglimakded, geb Bab-Dummadse-goled-neg bela waa daasa sigisad.
ISA 6:5 Geb an binnasuli goted: “¡An duledar-wiles! ¡An bergussun! Ar ande ibmar-isganabi-sogdiid-duled, dulemar-ibmar-isganabi-sogdimalad-abargi an gudiid. Emide, an Rey-daksad, Bab-Jehová-Bela-Gangued-Nikad an daksad.”
ISA 6:6 Degidgine, Serafín-gwensak ansik gukualid. Bab-Dummadga-ibmar-ogumakar-ukleged-ailagi soo-gasiidgi soo-weed-esgorogi sogun-ara-arad-wesadi sedanikid.
ISA 6:7 Geb a-sogungine, an-gakuli ebunonikid, agi anga sogded: “Be dake, we-sogun-ara-arad be-gakuli-ebusadi, bega isgued elinonisunnad. Bab-Dummadgi be isgudiidi, emide isgussulidyobi be daklenadsunnad.”
ISA 6:8 Geb degidgine, Bab-Jehová-e-sunmaked an itosad. Weyob soge an itosad: —¿An doa-dule barmidoe? ¿Doa anmar-anar naoe? Geb abin an sogded: —Ani be an-barmide, ani an naoe.
ISA 6:9 Geb Bab-Jehová anga sogded: —Be nae, we-dulemarga be sogna: ” ‘Be ibmar nue-itomalo-inigwele, akusunna be itomaloed. Be ibmar nue-dakmalo-inigwele, akusunna be dakmaloed.’
ISA 6:10 We-dulemar-e-gwage dutusuli be imako, akusunna ibmar-itogega be imako, akusunna ibmar-dakega be imako. Degisulile, e-ibyagwale ibmar-dakdoed, e-uayagwale ibmar-itodoed, degi, e-gwagegi magar-ibmar-itodoed, e-isguedga bukib binsadmaloed. Degidbali, nudake an dakledagoed.”
ISA 6:11 Geb an ese egichided: —Bab-Jehová, ¿sanagwadse an be-nuggi sunmakdii gusunnoe? Bab-Jehová anga sogded: —Bela neggweburmar-obelolegedse be an-nuggi sunmakdii guoed. Bela negmar-ollo-ollo-ambikuedse be angi sunmakdii guoed. Dulemar a-neggweburmargi-bar-gudii-guosulidse be an-nuggi sunmakdii guoed. Nainumarbela-swiri-naguedse be angi sunmakdii guoed.
ISA 6:12 An bela-dulemar-e-yalagi dikasuli ononnogoedse be angi sunmakdii guoed. Bela e-yala-olloo-naguedse be an-nuggi sunmakdii guoed.
ISA 6:13 Ar dulemar e-dulataledgi (100) amba e-ambe (10) besale, bela amba amar berguoed. Ar sapi-emisgwa-siklesad-e-sailabi gannaa-siidaedyobi wis bemaloed. Geb we-dulemar-bemaloedi neggwebur-islidikidga guoed.
ISA 7:1 Deunni, Rey-Acaz Judá-yargi negsemaid. Acazʼde Jotam-e-machid, degi, Uzías-e-wagwabalid. A-we-reymar-warbogwad Jerusalén-neggwebur sussurgusmalad.
ISA 7:2 Weyob Rey-David-negga-gusadse gayaburba nonikid: Siria-dulemar Efraín-dulemarbo atosmarye. Degi, Rey-Acaz nue-dobe itonaded. E-neggweburginmalad bela dobedba wawanmakdemalad. Igi-sapimar burwaba banamakgwisdae, ayobi wawanmakdemalad.
ISA 7:3 Geb degi, Bab-Jehová Isaíasʼga sogded: “Be-machi-Sear-Jasubʼbo, Acaz-abinguega be nae. Bia dii-gammu-maid dii-wilad-dummad-siid-akar dii-sedanidae, a-bergunaid-nagaba be abinguoed. We-dii-gammude, mor-odidued-neg-igar-nalemaidsik maid.
ISA 7:4 Acazʼga be sogo: ” ‘¡Nue salakalo! ¡Melle be dobguo! Siria-rey-Rezín-sabsur-urwed-abin, melle be gwayo. Remalías-machi-Peka-abin, melle be gwayebalo. We-dulemar-warbogwad-abin melle be gwage-nunmak-itogo. We-reymar-warbogwad unnila, igi soogi-waa-ainakwialir yog berguar-naddae, ayobi gumalad.’
ISA 7:5 ”Acazʼga be sogbalo: ‘Efraín-dulemar Remalías-machi-Pekaʼmala, Siria-dulemarbo, bemar-wiogega na atosmalad.
ISA 7:6 Ar ade, sogsamalad: Anmar Judá-yalagi gwisgunae, anmar e-dulemar ogwayenae, anmar we-yala e-ibe suoed, geb anmar agi Tabeel-machi reyga omesoed.’
ISA 7:7 ”A-ukinbali, Acazʼga be sogbalo: ‘Ani Bab-Jehová-Bela-Gangued-Nikad weyob sogbarye: We-ibmar-deyob-sogmaladi, bipisaale guosurye.
ISA 7:8 Ar Damasco-neggweburbi Siria-yala-e-nonoga wis siid, ar Rezínʼye-nugadi Damasco-neggwebur-e-reyga wis maid. Birga-dulapaa-gakatarsega (65), Efraín-yala berguoed, bar neggweburga sii guosulid.
ISA 7:9 Samaria-neggweburbi Efraín-yala-e-nonoga wis-simogad, Remalías-machidi, Samaria-neggwebur-e-reyga wis-maimogad. Ar bemar angi benmalale, bemar wegi ambikuosurmalad.’ ”
ISA 7:10 Bab-Jehová, Acazʼga sogdebalid:
ISA 7:11 —An be-Bab-Dummad-Jehová-gued. Anse wilubga-guega ibmar-gegerdakleged-imaked be egise. Sunna bega ibmar-gegerdakleged nibneg-birigi imakodibe, bela-bela napa-uluse imakodibe.
ISA 7:12 Acaz abin-sogded: —Bab-Jehová, an be-wilubdakosulid. An bese bipisaale ibmar egisosulid.
ISA 7:13 Geb degi, Isaías sogded: “Emisgine, bemar, David-wagan, nue be an-itomalo. ¿Ar be dulemar-ourwed nubin be itosursi? Ar emide be, deyob an-Bab-Dummad-ourwebimarmogad.
ISA 7:14 A-ulale, Bab-Jehová-sunnagwad ibmar-guoed-e-wilub oyogoed: Yagwa-wargwen gurgin-nika guoed, degi, goe nikunonikoed. Emanuelʼye onugsaoed.
ISA 7:15 Goe achanisbi madii guoed, moli-nunis-ollikwagwadbi madii gubaloed. Mag-neg-itogusadse we-ibmarmar indakoed.
ISA 7:16 Ar mimmi-mag-neg-itoged-iduale, igid ibmar-nuedi, igid-ibmar-ichakwabali, reymar-warbogwad-ese-be-gwayediidi, e-yalamar bela ibitomaloed.”
ISA 7:17 Isaías, Acazʼga sogbalid: “Bab-Jehová, Judá-yargine Asiria-e-rey barmidagoed. Begine, be-dulemargine, degi, be-wagangine, ibagan-bulegan barmidagoed. Efraín-yala, Judá-yalagi-bangusad-akale, a-ibmarmar-gwen-dakledsulidi, begi barmidagoed.”
ISA 7:18 A-ibagangine, Bab-Jehová, Egipto-sorda-diwar-dukuba-dikasur-bukmaladse wigooed. Amala gukurmaryobi bemarse barmidagoed. Degi, Asiria-yalagi-bukmaladse wigobaloed. Bemarse burmaryobi barmidagoed.
ISA 7:19 Amar bela nonimaloed, ibe-dummagan-imbaganba ambikunonimaloed, akwasaila-ollogana-yaba ubononimaloed, gagan-moodo-ikoyaisur-naidgi bukunonimaloed, molimar-dii-gobmalad-nagaba ambikunonimaloed.
ISA 7:20 A-ibagangine, Bab-Jehová, Asiria-e-reyga Éufrates-diwar-obakar-Israel-dulemar-bukmalad-sabsur-odurdakega urmakoed. Bela e-sailagia swanga imaklegoed, bela e-sigamala, ei immilegoed, alu-sigase-bakale ei immilegoed. Bela-bela-wilemalaga imaklegoed.
ISA 7:21 A-ibagangine, dule-wargwen moli-bebe-nikad-bunolo-wargwen wis akwedii guoed, sibad-ome-warbo wis akwedii gubaloed.
ISA 7:22 We-ibmar-durgan ega nunis-bukidar nika guoed, e-nunis-ollikwagwad-madii guoed. Dule-we-yargi-bemaloedi, unnitiba moli-nunis-ollikwagwad achanisba madii gumaloed.
ISA 7:23 A-ibaganginbali, uva-nainugi uva-miligwen-digar-naigusadi (1,000), mani-sibu-miligwen-gargegus-gusadi, emidi ikomar-nainuga guoed, degi, gagan-ikobimalad-nainuga guoed.
ISA 7:24 Bela yala iko-sunnabi naguoed. A-sapurgi, warsibi-annika nanadii gumaloed, sigubi-annika nanadii gumaloed.
ISA 7:25 Gebe-iduale, a-yala-mullugangi memed-weregedgi ibmar-nabir digledaenad. Emisgindi, ikomar-dobedba, gagan-ikomar-dobedba, bar dule ese warmakosulid. Unnila, we-gaganmar, moli-bebe-nikad-e-masga, sibad-wawaadmar-e-masga guoed.
ISA 8:1 Bab-Jehová anga sogsad: “Urgo-matar-dummad be sue, agine be nug-narmako, nuekwaa magar-daklege be narmako. ‘Maher-Salal-Hasbazʼye be narmako.’
ISA 8:2 Degine, dule-irwa-anse-goled-Urías, degi, Jeberequías-machi-Zacarías, be-barsoged-innikigwadga-gumalaga an bega amioed.”
ISA 8:3 Geb agine, an Bab-gayaburba-barsoged-bundorse an gochad, geb gurgin-nika gunonikid, geb susugwa ega uklenonikid. Geb degi, Bab-Jehová anga sogded: “Maher-Salal-Hasbazʼye be onugsae.
ISA 8:4 Ar mimmi nanaye-gordagoed-iduale, babaye-gordagoed-iduale, bela Damasco-neggwebur-e-ibmar-nuegan-nikadi Asiria-e-reyse sulegoed. Degi, Samaria-neggwebur-ibe ibmar-nuegan seledbaloed.”
ISA 8:5 Bab-Jehová gannar anga sogdebalid:
ISA 8:6 “We-Judá-neggwebur, Siloé-dii-binnalee-aryomaidgi bangudmalad, bur Rezín-dobee nanadmalad, bur Remalías-machi-dobee gudmalad.
ISA 8:7 A-ulale, Bab-Dummadi, we-dulemargi Éufrates-diwala-dummad onosokalid: Ar Asiria-e-rey, bela e-garganguedba, Judá-yalagi-yolegega barmidagoed. Bela e-diangan-mamaid odogoed, bela e-dii-gakamar akudaklege imakoed.
ISA 8:8 Judá-yalase, bela swada-dogoed, dii dukarba-engus naguoed. ¡Emanuel! Be-yala-naidgi, Asiria-sordamar dognonikoed. We-Asiria-rey sulubagi-sakan-nalla-napase-aidedanidaedyobi, begi dognonikoed.”
ISA 8:9 Dulemar-yar-baid-baidgi-bukmalad, bela-yar-baid-baidgi-dikasur-bukmalad, we-ibmar-an-sogoedi nue be itomalo: Aisaar bemar bila-onodamaloenad, degi-inigwele, be bergumaloed. Aisaar be guagwar bila-onoged-iduar bukumaloenad, degi-inigwele, bemar girgumaloed. Aisaar be guagwar bila-onoged-iduar bukumaloenad, Degi-inigwele, bemar nue-ibitomaloed.
ISA 8:10 Be igarmar-amimalo-inigwele, bega igarga guosurmalad. Aisaar be ibmargi sunmakmalo-inigwele, bega igarga guosurmalad. Ar ade, Bab-Dummad anmarba gudiid.
ISA 8:11 Bab-Jehová weyobi anga sabsur ibmar sogsad, iduakwaa anga sogsad, melle we-dulemar-daedba be nanaoye. Weyob anga sogsad:
ISA 8:12 “Melle bemar we-dulemar-sogedyob be sogmalo, we angi gwisgunaye. Ar bela ibmarmar-guedi, egi gwisgunaiye sogdamalad. Melle be we-dulemar-ibmar-dobedi, dobgumalo, melle be gwayebalo.
ISA 8:13 Unnila be ani Bab-Jehová-Bela-Gangued-Nikadbi dobguo, bur be anga islidik nanamalo. Unnila an-nugbi be odummomalo, unnila anbi be dobgumalo.
ISA 8:14 Ani an bemar-neg-islidikidga guoed. Degi-inigwele, Israel-dulemar-sogabogwadga akwasailaga an guoed, adi, agi goo-warmakmalagar. A-akwa-dummad, dule-omukuedga guoed. Jerusalén-dulemar-idu sakinaiyobi an naguoed, amar-idu galu-ibmar-gaed-siidyob an guoed.
ISA 8:15 Bukidar goo-warmakmaloed, bukidar aimukumaloed, bukidar wilemaloed. Sakigi-galesayobi, ibmar-gaed-galugi-galesayobi, gales nagumaloed.”
ISA 8:16 Geb degi, Isaías, eba-nanaimaladga sogded: “An bemarga ibmar-sogsamaladi, gwagegi be sedii imakmalo. An be-odurdaksamalad, melle be sogmalo.
ISA 8:17 ”Ar Bab-Jehová, urwedba Jacob-wagan-idu wagar-aibiris sigisad. Bab-Jehováʼgi an benguosulid, ar an wisid, an egi bendaklegoe.”
ISA 8:18 Be an-dakmalana, emisgindi wegi an Bab-Jehová-anga-mimmigan-uksadmala an gudiid. Anmar, Israel-yargi, Bab-Jehová-Bela-Gangued-Nikad-Sión-yalagi-maidga ibmar-guoed-e-wilubga gumalad, iduakwaa-ibagan-guoed-sogedga anmar ega gumalad.
ISA 8:19 Dule bemarga sokarmalale: “Dule-ibmar-e-burbagan-wismaladse be ibmar-wilubagan egisnamarye, yoedse-ibmar-guoed-barsogmaladse be ibmar-wilubagan egisnamarye.” Weyob be sogo: “¿Ar dulemar e-bab-dummaganse geg idakmarsogeye? ¿Ar dulemar dule-burgwarmaladse geg idakmarsogeye?”
ISA 8:20 An bemarga sogdo: “Bab-Dummad-Igar-Mesisadgi bur be nanamalo, e-ibmar-sogsadgi bur be binsamalo.” Ar dule, we-igarmargi-nanasulile, igar-napiragwad amiosulid.
ISA 8:21 Bemar, napneggi suli-suli-itoarmalale, ukudmaada-itoarmalale, be uludamaloed. Niba atakgwichi, be-reygi be gwisgudmaloed, Bab-Dummadgi be ukabsaar sunmakdemaloed.
ISA 8:22 Be napneg-dakdagogua, unnila boniganbi-nai be dakdemaloed, negsichidbi-nai be dakdemaloed. Bemar negasichidginbi-gudii gumaloed.
ISA 9:1 We-ibmarmar-guoed-sorbali, dule-suli-suli-itodigusadga bar negsichid naguosulid. Epennegwa, Bab-Dummad, Zabulón-dulemar-yala sabsur-odurdaksa gusad, Neftalí-dulemar-yala sabsur-odurdaksa gusbalid. We-yarmar Galilea-yargi bukwamalad. Yoedsega, Galilea-yargi nued binsanonikoed, e-nug-dummarbaa imakoed. Galilea-yala, Jordán-diwarsik, degi, demarse-nalemaidsik naid. A-yalagi, dule-Bab-wissurmalad bukwad.
ISA 9:2 Dulemar-negsichidgi-gudigusmaladi, neg-meegwad daksamalad. Negsichidgi-bukwagusmaladga, neg mee gunonikid.
ISA 9:3 Bab-Jehová, bee be, dulemar-omelosad, bee be, bela-bela-weligwar-itogega imaksad. Igi dule ibmar-gwag-weenaile, weligwar itodae, deyobi, be-asabinni weligwale na itomaloed. Igi dule ibmar-nuegan-miminaile, weligwar itodae, deyobi, be-asabinni weligwale na itomaloed.
ISA 9:4 Bee be, dulemar-wilebukwagusad ollor-imaksad, sabsur-imaklebukwadgi be bendaksad, mesagwar-imaklebukwadgi be ollor-imaksad. Ar igi be, Madián-dulemar-obelosgusa, deyobi, be e-isdarmalad imaksad.
ISA 9:5 Bila-onolegedgi-sapat-yolesmaladi, degi, bela mor-ablisbi-gusmaladi, soo-yagi ogumaklegoed, sooga bela binyoed.
ISA 9:6 Ar susugwa-gwensak anmarga gwalulesad, mimmi-gwensak anmarga uklesad. A-machi gandikidba negseoed, weyob nugguoed: Binsaed-Daked-Wilub-Obichadye, Bab-Dummad-Bela-Gangued-Nikadye, Bab-Degisadeguadye, Neg-Bogidikid-E-Dummadye, nugguoed.
ISA 9:7 E-gangued bela nasguoed, e-neg-bogidik-seoed bela nasguoed, gwen berguosulid. David-ologangi dummadga sigoed. E-yalagi dummadga negseoed. E-negseoedi, igar-napiragwadba yar-seoed, innikigwadba negseoed, emi-ibase, degisadegu negseoed. Bab-Jehová-Bela-Gangued-Nikad we-ibmar-imakoedi, e-sabgued-oyomaidba, deyob imakoed.
ISA 9:8 Isaías, Israel-dulemarga sogdebalid: “Bab-Jehová Jacob-waganse e-gayaburba barmialid, Israel-dulemarse e-gayaburba nonikid.
ISA 9:9 We-ibmar bela dulemar wisgumaloed, Efraín-dulemar bela wisgumaloed, Samaria-dulemar bela wisgumaloed. Ar we-dulemar-san-dummarba-imakdimalad, yeer-sogdimalad, weyob sogdimalad:
ISA 9:10 ‘Ar negmar ayarele, akarsulid. Ar anmar gannar akwagi-nuesaar sobmaloed. Ar higuera-sapiwar-nagubirga-mamaid babatidele, baisulid. Ar anmar a-muchub urwar mesoed.’
ISA 9:11 ”Degi-inigwele, Bab-Jehová, Rezín-sordamargi e-isdarmalad barmidagoed Bab-Dummad e-sunnad Rezín-sordamargi e-isdarmalad-gwisguega imakoed.
ISA 9:12 Siria-dulemar dad-nakwedsik-bukwadi, degi, Filistea-dulemar dad-argwanedsik-bukwadi, ilagwen-obeloga Israel-dulemar-imaksamalad. ”Weyob-gus-inigwele, Bab-Dummad-urwedi amba bogigumaisulid. Amba Israel-dulemargi urwemaid.
ISA 9:13 ”Degi-inigwele, dulemar Bab-Dummad-sabsur-e-odurdaksad amba aku daksamalad. Bab-Jehová-Bela-Gangued-Nikad e-bendakega gwen amissurmalad.
ISA 9:14 A-ulale, Bab-Jehová, ibagwen-nuedi Israel-dulemar-obelogoed. Ibmar-dula-e-nono-egwanneyobi imakoed, ibmar-dula-e-bunnu-immieyobi imakoed. Sapi-ana-sikeyobi imakoed, sapi-e-war-immieyobi imakoed.
ISA 9:15 Ar ibmar-dula-e-nono, girmar-dummagan-e-wilubganad, dule-nuga-nikamalad-e-wilubganad. Ibmar-dula-e-bunnu, Bab-Dummad-gayaburba-barsogmalad-gakansaar-odurdakmaladid.
ISA 9:16 We-neggwebur-idumaladi, igar-noaledba dulemar-sesmalad. Dule-eba-selesmaladi, aku neg-itodmalad, yoggudmalad.
ISA 9:17 A-ulale, Bab-Jehová, sapingan-gwen-yeer dakosulid, dule-sergan-satemalad-gwen-yeer dakosulid. Siamar-ei-sui-burgwismalad-gwen-yeer dakosulid. Ar bela wemala, isgumaladbiid, ibmar-isgana-imakmaladbiid, galagwensuli sunmakmaladbiid. ”Weyob dulemar imakles-inigwele, Bab-Dummad-urwedi amba bogigumaisulid. Amba anmargi urwemaid.
ISA 9:18 ”Ibmar-isgana sooyobi gued. Igi-soo-gadele, gagan-ikobiid bela biin-imake, ikomar bela biin-imake, deyobi, ibmar-isgana-imaklegedi gued. Igi soo-gaedi sapurgi sapi-bukwadi bela obeloge, degi, geb burwa-bipirmakaledyob, waa ainakwiddae, deyobi, ibmar-isgana-imakedi gued.
ISA 9:19 Ar Bab-Jehová-Bela-Gangued-Nikad-urwedbali yala duu gadoed. Dulemar e-sapanga guoed. Dulemar na e-gwenadgan wiledakosulid.
ISA 9:20 Gwen-gwen, mas-satedba e-argan-nuedsik ibmar-bukwad gutemaloed. Degi-inigwele, amba ukudmaada itomaloed. Baigana, e-argan-sapiledsik ibmar-bukwad gutemarbaloed. Degi-inigwele, amba immelegosurmarbalid. Dulemar e-mimmigangi aibitemaloed, e-mimmigan-gutemaloed.
ISA 9:21 Manasés, sabsur-Efraín-imakoed, Efraín, sabsur-Manasés-imakmogoed. Geb ebobela Judá-yalagi sabsur-gwichigudmaloed. ”Weyob dulemar imakles-inigwele, Bab-Dummad-urwedi amba bogigumaisulid. Amba anmargi urwemaid.”
ISA 10:1 Dule, igar-isgana-omesmalad, be duledar-wilesmar. Dule, dulemar-idu igar-yeer-gangu-omesmalad, be duledar-wilesmar.
ISA 10:2 Bemar, dule-wilemalad-ibmar-nikuega be imaksurmalad, an-dula-wilesagwa-gudimaladga be igar nudaksurmalad. Siamar-ei-sui-burgwisadi, be wiodimalad, dule-sergan-sated-ibe be ibmar atursadimalad.
ISA 10:3 Bemar sabsur-odurdaklealile, ¿bemar igi imakoe? Boni-dummad bannaba-nosa begi-dani be dakalile, be-bendakega, ¿doase be goloe? ¿Bia be-ibmar-nuegan be odukumaloe?
ISA 10:4 Ar be bar oakalogosurmalad. Ar bemar gales seledmaloed. Emar-gales-bukwad-abargi be mesagwar gumarmogoed. Sulile, burgwarmalad-imbagi be oburgwilemarmogoed. Weyob bemar imaklego-inigwele, Bab-Dummad-urwedi, amba bogigumaiosulid, Bab-Dummad amba amargi urwemaioed.
ISA 10:5 Bab-Jehová weyob soged: “An bela-bela sae-itoged, Asiria-e-Rey anga sabsur-odurdaked-suaryobi guoed. A-suargine, an sabsur-dulemar-odurdakoed. An isdar-itogedbali, a-suar an ebugoed.
ISA 10:6 Yala-nue-isgus-naidse an barmidoed, dulemar an-ourwega-imakbukwadse an barmidoed, adi, ibmar ei atursanaega, e-ibmar ei bela weenaegar. Igi-dule dii-dii napa-imake, deyob-emar-imaklegega an barmidoed.
ISA 10:7 Ar Asiria-e-reydi deyob-imakodeeye gwen binsassulid, deyob-imakedgi gwen binsassulid. Unnila dulemar-obelogedginbi binsaed, unnila bukidar yar-baigan-osulogedginbi binsaed.”
ISA 10:8 Bab-Jehová weyob soged: “Ar ade, Asiria-e-rey weyob soged: ‘¿Ar reymarde anga dummaganga-arbabukwadbisursi?
ISA 10:9 ¿Ar Calno-neggwebur, Carquemis-neggweburyob gussursi? ¿Hamat-neggwebur, Arfad-neggweburyob gussursi? ¿Ar Samaria-neggwebur, Damasco-neggweburyob gusmosursi?
ISA 10:10 An ibmar-bab-dummadyob-imakleged-yalamar obelos gusad. A-yalamar, Jerusalén-neggweburba, degi, Samaria-neggweburba, bur bule melu ibmar-bab-dummadyob-imaklemalad nikagusana, degite, an obelosad.
ISA 10:11 An igi Samaria-neggwebur-imaksa, degi, igi e-ibmar-bab-dummadyob-imaklemaladse-bakale, an obelosa, deyob an Jerusalén-neggwebur imakoed. E-ibmar-bab-dummadyob-imaklemaladse-bakale, an obelomogoed.’ ”
ISA 10:12 Bab-Jehová, Sión-yalagi-ibmar-imakoed bela-obelosale, degi, Jerusalén-neggweburgi-ibmar-imakoed bela-obelosale, sogdagoed: “Asiria-e-rey-san-dummarba-itogedba an sabsur-odurdakoed, emar-saedakedba an sabsur-odurdakoed.”
ISA 10:13 Ar ade, Asiria-e-rey weyob soged: “We-ibmar an-ganguedba an imaksad, an-binsaed-nikaa-daedba an imaksad, ar ande, nue-ibmar-wisid-duled. Ani an neggweburmar-e-abingunanaid ogwasad, ani an e-ibe ibmar-nuegan atursasad, ani an sorda-bila-onoged-buled-guedsoggu, an e-reymar-obelosad.
ISA 10:14 E-yalamar bela e-ibe an susad. Igi dule sikwi-e-akwa-bukwad weedae, deyobi, an e-ibe e-yalamar susad. Igi dule sikwi-uu sudae, deyobi, dule-e-ibmar-nuegan-nikad an susad. An-abinni, dule-wargwensaale gochasulid, dule gwen akar sogsasulid.”
ISA 10:15 Isaías weyob soged: “¿Ar akande sunna dule-e-ebunaidba bur san-gannarbaa na imaksi? ¿Ar sunna esnali-sapisikedde dule-e-ebunaidba bur bule-bule na san-imaksi? ¿Gaapoledde, dule-e-ganikidgi obinosi? ¿E-nabiedba naosi? ¿Bia be daksa, suar-garagwadi, sapiwar-dummad-nakwaa imake? Deyob be dakdisulid.
ISA 10:16 ”A-ulale, Bab-Jehová, Bab-Jehová-Bela-Gangued-Nikadi, Asiria-e-rey-sorda-bila-onomalad-bulegangi boni-dummad barmidagoed. Amar-e-nug-odummoleged-muchubbi, uelleged-dummad ega ukoed, uellegedi sooyobi uegu egi nasikoed.
ISA 10:17 Bab-Dummad-wargwenna-guedi, Israel-dulemarga-neg-meegwadyobi-guedi, soo-gaeyobi gudoed. Bab-Jehová-Isligwaled soo-gwichigumaidyob gudoed. Ibagwen-nuedi, Asiria-sordamar-obelogoed, ikomaryobi, gagan-ikomaryobi, soogi bela obelogoed.
ISA 10:18 Bab-Dummad, bela Asiria-e-sapur-yeerdakle-nanaidi, e-nainu-nanaidi, obelogoed. Dule-geg-bar-gugus-gegumaiyobi bela ibmar nasikoed.
ISA 10:19 Sapur-naidgi sapimar napi-ichee ambikuoed. Ichegwadbali, burwigana sunna ebisge guoed.”
ISA 10:20 A-ibagangine, Israel-dulemar-napi-bemaloedi, Jacob-wagan-napi-gudimaloedi, dule-e-obelosmaladba bar naguosurmalad. We-napi-bemaloedi, Israel-e-Bab-Dummad-Jehová-Isligwaledba, nue innikigwadba nagumaloed.
ISA 10:21 Israel-dulemar-napi-bemaloedi, gannar Bab-Dummadba nagudmaloed, Jacob-wagan-dula-napi-gudimaloedi, Bab-Dummad-Bela-Gangued-Nikadba gannar nagudmaloed.
ISA 10:22 Israel-dulemar, bemar ukub-demar-gakaba-mergueyob-guen-inigwele, unnila bemar napi-ichee gannar nonimaloed. Israel-dulemar-obelolegoye bato soglesmaid. Bela ega igar nabolegoed.
ISA 10:23 Ar Bab-Dummad-Jehová-Bela-Gangued-Nikad, Israel-dulemar-obelolegoye bato sogsad. Ar deyob yargi-gudimaladgi imakoed.
ISA 10:24 A-ulale, Bab-Dummad-Jehová-Bela-Gangued-Nika-Maid weyob soged: “An-dulamar, be Sión-yalagi-bukwamalad, melle be Asiria-dulemar dobee itomalo. Asiria-sordamar gaapoledgi be-sarsomalo-inigwele, begi suar-oyodamalo-inigwele, melle dobgumalo. Igi-Egipto-dulemar bemar-imaksagusa, deyob bemar-imakdago-inigwele, melle be dobgumalo.
ISA 10:25 Emisgwasaale, bemargi an-nue-sae-itogedi berguoed. An-urwedi, be-isdarmaladgi yoledoed.”
ISA 10:26 Bab-Jehová-Bela-Gangued-Nikad, Asiria-dulemar-sabsur-odurdakoed. Bab-Jehová, igi-akwasaila-Orebʼye-nugadgi Madián-dulemar-imaksagusa, deyob Asiria-dulemar-imakoed. Bab-Dummad, igi-Egipto-dulemar-igarba-nadapgu e-gaapoled-oyosgu, egi demar-arwega-imaksagusa, deyob Asiria-dulemar-sabsur-imakoed.
ISA 10:27 A-ibagangine, bemar we-boniganba-galitodiidi bela bega berguoed, bemar gangudoedba, sabsur-wilediidgi be ollorgudmaloed.
ISA 10:28 Be-isdarmalad-Asiria-sordamar Ajatʼye-neg-nugadgingus naid, Migrónʼye-neg-nugadgi nadapid, Micmasʼye-neg-nugadgi e-ibmarmar obesad.
ISA 10:29 Diwar-dinnagwadgi obakmamaid, degi weyob sogmalad: “Gebaʼye-neg-nugadgi anmar obunnomaloye.” Ramá-dulemar dobedba wawanmakdemalad, Saúl-neggwebur-Gabaaʼginmalad duurmakdemalad.
ISA 10:30 ¡Omegan-Galim-neggweburginmalad binnasur be oimakmala! ¡Omegan-Lais-neggweburginmalad be itomala! ¡Anatot-neggwebur be abinsamarmoga!
ISA 10:31 Madmena-dulemar wakitemalad, Gebim-dulemar dukudmalad.
ISA 10:32 Emi-ibagi, Asiria-sordamar Nobʼye-neg-nugadse ambikunonimaloed. Sión-yalagi gwichiguega, guagwar ambikumaloed. Siónʼde, Jerusalén-e-yalad.
ISA 10:33 ¡Nue be dake! Bab-Dummad-Jehová-Bela-Gangued-Nikad-abin, sapi-anagan doos-doos naded. Sapi-suigan bibichis nanaed, sapi-dummagan e-abin ailade nanaed.
ISA 10:34 Sapi-moodo-naidi, akangi immided, Líbano-yargi sapimar-yeerdakle-bukwad bela berguded.
ISA 11:1 Sapi-siklesad-gannar-ainieyobi, dule-Isaíʼye-nugadgi dule-gwensak nodagoed. E-wagangine, a-dule danikoed.
ISA 11:2 A-dulegi Bab-Jehová-E-Burba megoed: Nue-binsaed-nikagued ega ukoed, nue-ibmar-magar-itoged ega ukoed, binsaed-nued-uke imakoed, degi, gangued-nika imakoed, gurgin-nikarba imakoed, degi, Bab-Jehová-dobee-nanadii imakoed.
ISA 11:3 We-dule, Bab-Jehová-dobee-nanaoedba yeer-itodii guoed, dulemar-daklegedba dulemarga igar nabogosulid, dulemar-ibmar-sogedba igar nudakosulid.
ISA 11:4 Dule-wilemaladga igar-napiragwadba igar nabogoed, degi, igar-innikigwadba dule-belagwadaedga igar nudakoed. E-sunmakedba dule-bukwad-obelogoed, e-ibmar-sogedba dule-isgana-oburgoed.
ISA 11:5 Igar-napiragwadi, molidub-saderba-naiyobi, oyodii guoed. Innikidaedi, e-musir-edinnedyobi, oyodii guoed.
ISA 11:6 Achu-burburud, sibad-wawaad-senigwad-ebo gudii guoed. Achu-barbad, sibad-bipi-ebo dodomai guoed. Moli-bebe-nikad-sapingwagwad, achumigur-nono-wawaad-bipigwadmala garmakdii gumaloed. Machi-bipigwa a-ibmar-durgan-idudii guoed.
ISA 11:7 Moli-bebe-nikad-ome, wiob-omemala garmadii guoed, e-mimmigana bulakwaa gudii gumogoed. Achumigur-nono-wawaad, moli-bebe-nikad-alugwasualedyob gagan-madii gumogoed.
ISA 11:8 Goe-susugwa-amba yoo-mam-iargued, naibe-buled-galu-dikarba dodonai guoed. Mimmi-gebe-mam-iargusadi, naibe-nued-e-yaa-yaba e-argan ododii guoed.
ISA 11:9 An-Yala-Islidikid-Naidgi gwen dulemar neg-oichodii guosurmalad, gwen oakalogosurmalad, ar ade, bela yar-naidgi, Bab-Jehová-magar-dake nanadii gumaloed. Muu-billi-dii-bela-engus-naiyobi, bela Bab-Dummad-magar-dake gumaloed.
ISA 11:10 A-ibagangine, Isaí-e-wagangi-dule-danikoedi, dulemar-iduedga guoed. Bela dulemar-yar-baid-baidgi-bukwamalad ese duurmaknonimaloed. E-neg-megoedi gandikidba-yeerdaklege guoed.
ISA 11:11 A-ibagangine, Bab-Jehová bela e-dulamar-amba-yar-baid-baidgi-mimiles-bubukwad gannar-sedagega imakoed. We-yarmargi mimiles bubukwad: Asiria-yalagi, Egipto-yalagi, Patros-yalagi, Cus-yalagi, Elam-yalagi, Sinar-yalagi, degi, Hamat-yalagi, degine, demar-gakagi-besmalad. Wemar gannar senonikoed.
ISA 11:12 We-dule-danikoedi, dule-ebiega bandergwichiyobi guoed, bela-dulemar-yar-baid-baidgi-bukmalad ese duurmaknonimaloed. Deginbali, bela Israel-dulemar, degi, Judá-dulemar, galesadba-akar-akar-aisakis-bukwamalad gannarse danakwaa urboed.
ISA 11:13 Efraín-dulemar nobed surgudoed, Judá-dulemar-e-isdarmalad bela obelolegoed. Efraín-dulemar, Judá-dulemargi bar nobguosulid, Judá-dulemarmoga Efraín-dulemar-mesagwar bar imakosurmogad.
ISA 11:14 Aka, emar ebogwa, Filistea-dulemargi dad-argwanedsik-bukmaladgi gwisgudmaloed. Emar ebogwa, dulemar-dad-nakwedsik-bukmalad-ibe ibmar atursadmaloed. Edom-dulemar, Moab-dulemar, degi, Amón-wagan, amarse sabsur-wilemarmogoed. Amar-sogedba ibmar imakmaloed.
ISA 11:15 Bab-Jehová, Egipto-demar-sukun-naid bela dinna nasikoed. Éufrates-diwargi e-argan oyogoed, egi burwa-uereged barmidagoed, geb we-diwargi dian-sogagugle (7) mesoed, adi, nabir nagab obakmalagar.
ISA 11:16 Igi-Israel-dulemar Egipto-yargi-nosmargu, ega nanaed-igar maigusa, deyobi, Israel-dulemar-Asiria-yargi-napi-besmaladga nanaed-igar mai gumogoed.
ISA 12:1 A-ibagangine, weyob be sogdoed: “Bab-Jehová, be anse ulus-inigwele, an bega namakoed. Be-urwediid bergunonikid, be an-gwage baisur-itogega imaknonikid.
ISA 12:2 Bab-Dummad, an-abonogedid. An egi benguosulid, an dobee itogosulid. Bab-Jehová, be an-ogannogedid, Bab-Jehová, anga namakedga gued, be an-abonogedga gued.”
ISA 12:3 Deginbali, bemar abonolegedgi weligwar itomaloed, bela-bela be Bab-Dummad-e-abonolegedgi yeer itomaloed.
ISA 12:4 A-ibagangine, weyob sogledoed: “Bab-Jehováʼga be namakmar, e-nug be odummomar, bela-dulemar-napneggi-bukmaladga e-ibmar-imakedgi be sunmakmar, e-nug-dummarba-guedgi be sunmakmar.
ISA 12:5 Bab-Jehováʼga ega-namaklemaladgi be namakmar, ar ade, ibmar-gegerdaklemalad imaksad. We-ibmar-gegerdaklemalad bela we-napneggi dulemar-wisguega be imakmar.
ISA 12:6 Sión-yalagi-bukmalad, weligwaledba be namakmar, weligwaledba be gormakmar. Israel-dulemar-e-Bab-Dummad-Isligwaled, bemar-abargine Dule-Gandikidid.”
ISA 13:1 Bab-Dummad Amoz-machi-Isaíasʼga Babilonia-dulemar-berguoedgi sunmaksad:
ISA 13:2 Yala-swire-naidgi bander be mer-mer imakmar, sorda-bila-onomaladse be binnasuli gormar. Argan ese be oyomar, adi, dule-nuga-nikamalad-yawagakba ubomalagar.
ISA 13:3 Anga-nug-salegarmaladga bato an igar-uksad. Anga-dule-bulegan-gumaladi, an-nakwedgi-na-yeer-itodimaladi, an guakwaa urbisad, adi, anga sabsur-dulemar-odurdakegar.
ISA 13:4 ¡Be itomar! Yalaganba neg-oimake itoleged, dulemar-ichesur-oimakedyob itoleged. ¡Be itomar! Neggwebur-dummagan-atosmalad-oimaked, be itomar, mala-gollomakedyob e-oimaked itoleged. Bab-Jehová-Bela-Gangued-Nikad, bila-onogega, sorda-bila-onomalad-guagwar urbenaid.
ISA 13:5 Neggwebur-dikasulidba danimalad, yarmar-bergunaid-akale danimalad. Bab-Jehová, e-urwedba-ibmar-ebulemalad sedanikid, adi, bela napneg obelogegar.
ISA 13:6 ¡Be bomarsun! Bab-Jehová-urwemaid-iba omosad, Bab-Dummad-Bela-Gangued-Nikad bemar sabsur-odurdakoed-e-iba danikid.
ISA 13:7 A-ulale, bela argan nollomakdoed, bela dulemar niga-argwatemaloed.
ISA 13:8 Bela-belad dobe-itodmaloed, suli-suli-itomaloed, nunmaked-dummadi egi nagudmaloed. Igi-sior-muu-neggi-ugakgunair nunmaked-itodae, deyobi, egi nunmaked nagunonikoed. Dukin-dukin geger na dakdemaloed, e-wagarmar-daklegoedi, bela-bela dobed-nika daklemaloed.
ISA 13:9 ¡Be dakmar! Bab-Jehová-urwed-e-iba danikid: Iba-buled dani, yeer-gangued-iba, bela-belad-urwed-iba dani, napneg ollobi daarmakar nasikoed, agine, bela dule-isgubukmalad obelogoed. Bab-Jehová soged:
ISA 13:10 “Niisgwamar mogir-biriba-nanaidi bar gaosulid, niisgwamar-danar-danar nanaidi, bar ibegwar gaosulid. Dad-ibeler-noalile, sichii naguoed, bar nii ibegwar gaosulid.
ISA 13:11 Napneggi-dulemar-bukwad e-isgudiid-nukad an sabsur-odurdakoed, dule-isganamar e-ibmar-isgana-imakdiidba an sabsur-imakoed. Dule-na-san-dummarba-imakmaladi, na san-dummarba-imakega bar guosurmalad. Dule-bulegan-na-san-dummarba-imakmaladi, na san-dummarba-san-saega bar guosurmalad bela nug-bipi-gumalaga an imakoed.
ISA 13:12 Dulemar, olo-sunsoged-icheguedba bur ichee-bukuega an imakoed. Dulemar, Ofir-or-nued-icheguedba ichee-bukuega an imakoed.
ISA 13:13 A-ulale, ani Bab-Jehová-Bela-Gangued-Nikad, an-urwemaid-ibagangi an-urwedba nibneg giglimakega an imakoed. Napneg e-naidgi ainirega an imakoed.
ISA 13:14 Dulemar igi-goe-sapur balegillemaidae, deyob, balegillegoed, e-neggweburse duurmakdemaloed. Igi-sibad-wawaad e-idugedsuli duurmakmadaedyobi gumaloed, wala-walagwen e-yarse wakitemaloed.
ISA 13:15 Doa-dule galenonikile, ewarar oburgwilegoed, dule yogasaar-galesale, es-suidgi oburgwilegoed.
ISA 13:16 Dulemar-wagaba e-mimmigan omukudmaloed, e-negmar-ibe ibmarmar atursadmaloed, e-omegan e-ibe gagadmaloed.
ISA 13:17 Babilonia-dulemargi Media-dulemar gwichiguega an imakoed. We-dulemar mani bai dakdasurmalad, orgi gwen weligwar itodasurmalad.
ISA 13:18 E-sigugi ese sapingana, yagana, oburgwilegoed, goe-gwarugana gwen wile dakosurmalad, burwigana gwen bai dakosurmalad.
ISA 13:19 Babilonia-neggwebur, be yeerdakleged, gandikidba be yeer-dakleged, Caldea-dulemarga be san-dummarbaa gusiid. Emidi, Sodoma-neggweburyob be guoed, Gomorra-neggweburyob be guoed. Ani an Bab-Dummad gued. Igi an we-neggweburmar obelosa, deyob an be-imakmaloed.
ISA 13:20 Bipisaale, bar dulemar egi ambikuosulid, dulemar-sorba-danimaloedi bar egi ambikuosurmalad. Árabe-dulemar we-yargi bar megosulid. Sibad-wawaad-edarbedi, bar egi e-sibad-wawaadmar oambikuosulid.
ISA 13:21 Unnila nega-dulesulidganba ibmar-durgan-ursilimaladbi bukuoed. E-negmargine, irmonbi ena ambikuoed, nuu-dummad-malisuiganbi a-yargi ambikuoed, sibad-omegan-sapurbarmaladbi gudidioed.
ISA 13:22 E-neg-gandikmaladgi achu-sapurmarbi gordioed, e-reynegmargi achu-sapur-uaya-gannareged-bunnu-wawaadmarbi gordioed. Babilonia-neggwebur, Bab-Dummadse be sabsur-odurdakleged-igar omodanigusad, bar bega ibamar obannolegosulid.”
ISA 14:1 Ar Bab-Jehová wile Jacob-wagan-daknonikoed, gannale Israel-dulemar-sunonikoed. E-yala-sunnadgi-bukuega imaknonikoed. Dule-yar-baiganginmalad ese megnonimaloed, Jacob-waganba garmakdii gumaloed.
ISA 14:2 Dulemar-bukidar Israel-dulemar-bendakmaloed, Israel-yarse sedmaloed. Geb degi, Israel-dulemar, e-galesgusmalayobi Bab-Jehová-yargi e-maiganga amar-imaknonimaloed. Degi, Israel-dulemar, dulemar-mesagwar-e-imaksamaladgi dummadga gumaloed.
ISA 14:3 Israel-dulemar, Bab-Jehová be-bukib-binsadigusadgi baisur-itoge be-imaknonikile, degi, be-nunmak-itodigusadgi, be-ise-mesagwar-imaklesadgi, Bab-Jehová bemar-ollor-imaknonikile,
ISA 14:4 Babilonia-e-reygi we-sabsur-emar-obingesaar-namaklegedgi be weyob namakmaloed: “Dule-emar-mesagwar-sadiid, igi-gusa be dakmarsunna. E-urwedi, igi-bergus be daksunna.
ISA 14:5 Bab-Jehová dule-isganamar-e-suar bibichisad, dulemar-yeer-neg-gangu-semamaid-e-gaapoled bibichisad.
ISA 14:6 We-gaapoled dulemar-sabsuli-wiodii gusad, urwedgi dulemargi-obindii, degi, balengindii gusad.
ISA 14:7 Emidi, bela napneg bogigus naid, weligwaledba binnasuli namakmalad.
ISA 14:8 Baryawarse-bakale, degi, Líbano-urwarse-bakale, Babilonia-e-rey, be-bergusadga wergumalad, weyob sogmalad: ‘Be-bergusad-akale, bar dulemar anmar-omukudisurmalad.’
ISA 14:9 Be-ibmar-imaksad-ular, neg-urba burgwarmalad-galu bebina itosmaid, be-abindakagwar maid. Be-ibmar-imaksad-ular, dule-burgwarmalad odaklealid. Amala dule-dummaganga megismaladid. Ar bela reymar-yar-bamaladgi-megisgusmaladi be-abin ainidagega, e-ologanagi-bubukwadgi ogwislealid.
ISA 14:10 Bela wemar ibmar sogdamaloed, bega weyob sogdagoed: ‘Anmaryobi be ganguedsuli gunonisunde. Be anmaryobi gunonimosunde.’
ISA 14:11 Be-san-dummarba-na-be-imakdiid napa-uluba melledsun, be-gar-arpa-goled bergunonimosun. Emisgindi, nusu-imbagi be megmosunnoed, nusubi ber biini be megmosunnoed.
ISA 14:12 ”Niisgwa-dummad-bolegoedba-gaardaed, ibiyobi be niba-nai argwannoniki. Bee be, bela-bela dulemar-wiodiidid, napnegse be e-gwallenonisunnad.
ISA 14:13 Be-gwagegi weyob be sogsa gusanad: ‘Nibnegse an naoye. Bab-Dummad-e-niisgwamar-birigi an-ologana an sioye. Dad-nakwed-argan-sapiled-akar bab-dummad-baigan-e-yalagi, dummadga an negsemai guoye.
ISA 14:14 Mogirmar-bur-birise an nakoye, Bab-Dummad-Bur-Biriginedyob an guoye.’
ISA 14:15 Emide, burgwarmalad-galuse be balimellealid, bela neg-ulubalidse be egwallesad.
ISA 14:16 Dulemar-be-dakmaladi, nue-nuu be-dakmaloed, ar ade, geger be-dakmaloed, weyob binsadmaloed: ‘¿Wee we, napneg-wiodigusadi? ¿Wee we, yalamar-ogwayedii gusadi?
ISA 14:17 ¿We-dule we, napneg nega-dulesulidga imaksadi? ¿We-dule we, yalamar obelodii gusadi? ¿We-dule we, esgaryagi-dulemar-gales-bukwad gannar e-negse-naega gwen imakdasulidi?’
ISA 14:18 Dulemar-yar-baid-baidgi-bukmalad-e-reymardi, nug-nikadba nuegwadgi e-neg-uangi digar-digar mamaid.
ISA 14:19 Ar bedi napa-ulugi-maidgi be-onosmalad, igi durgan-nunud mileddae, deyob be-imaklesad. Dule-es-suidgi-oburgwilegar-burgwismaladi, neg-uluba-melledmaladi, bela be-omurus mamaid. Dule, muigi dii-dii-annasadyobi be dakleged.
ISA 14:20 Bedi gwen reymar-diglegeyobi nuedgi be diglegosulid, ar be-yala be obelosad, be-dulamar be ogilosad. ”Bipisaale dule-isganamar-e-wagan bar obarlegosulid.
ISA 14:21 Babgan-isgusad-ulale, e-mimmigan ogilolegega, ibmar-oburgwileged-neg guagwar imakmalo. Adi, wemar melle yar-seedgi bar binsamalagar, adi, melle bar napneggi neggweburmar-urbegar.”
ISA 14:22 Bab-Jehová-Bela-Gangued-Nikad weyob soged: “We-dulemargi ani an gwichiguoed, ani an Babilonia-yala osulogoed, e-nuga an obelogoed, dulemar-dulagudimaladi ani an obelogoed, e-masmala, e-wagana ani an obelogoed. Weyobi, ani an Bab-Jehová-guedi soged.
ISA 14:23 Neg-matabi-naguega an imakoed akwanuku-negga an obinyoed. Gwalagi-negdurwieyob Babilonia-yala an imakoed, bar gudii an imakosulid. Weyobi ani an Bab-Jehová-guedi soged.”
ISA 14:24 Bab-Jehová-Bela-Gangued-Nikad weyob ise-sogar imaksad: “Igi an igar-mesisa, deyob sogedba guodo. Igi an sogsa, deyob sogedba imaklegodo.
ISA 14:25 An-yalagi, an Asiria-dulemar obelogoed, an-yarmar-birgi, an amar-ogilogoed. An-neggwebur bar ese mailedii guosulid, ibmar-buleganba bar galitodii guosulid.
ISA 14:26 We-igarde, ani an weyob bela yalamarga igar-mesisad. We-igarde, ani an weyob bela yalamarse an oyosad.”
ISA 14:27 Ar Bab-Jehová-Bela-Gangued-Nikad weyob sogsasoggu, ¿doa e-igar gaosunna? Ar e na igar mesisad, degite, ¿doa e-igar gaosunna? ¡Suli, dule gwen e-igar gaosuli!
ISA 14:28 Rey-Acaz-burgwisad-birgagine, Isaíasʼse we-gayaburba nonikid:
ISA 14:29 “Bemar bela-Filistea-dulemar, yala-be-wiodigusad-bergusadba, melle be weligwar itomalo. Ar yala-baid bela-bela be-isdaradga guoed, naibe-nued-gukualedba bur bule isganaga guoed.
ISA 14:30 Ar dule-wileganadi, nue-mas-gundii gumaloed. Ar dulemar ibmar-abesa-gudimaladi, ibmar nue-nikagudii gumaloed. Degi-inigwele, Filistea-dulemar, an be-wagandi ukudba oburguoed, be-dule-dula-napi-bukwadi bela an obelogoed.
ISA 14:31 Filistea-dulemar, gwage-nunmak-itogedba be binnasuli bomarsun. ¡Bela bemar dobe-itogedba be wawanmakmarsun! Ar ade, sorda-bila-onomalad dad-nakwed-argan-sapiledsik waa-ainakweyob melledanikid, dule bela danagwena duurmakdanikid.
ISA 14:32 ¿Igi-be we-yalaga-dule-garda-berbemalad-abin be sogoe? Weyob be sogoed: ‘Ar Bab-Jehová Sión-yala sisad, ar agi dule-wile-itodimalad dukued-neg amioed.’ ”
ISA 15:1 Isaías, Moab-neggwebur-berguoedgi iduakwaa sunmaksad. Moab-neggwebur-Arʼye-nugad bela ayarisad, mutiki bergusad. Moab-neggwebur-Kirʼye-nugad bela ayarisad, mutiki bergusad.
ISA 15:2 Dibón-neggweburginmalad, e-bab-dummadse-goled-negse nadmalad, adi, e-bab-dummadga-ibmar-ogumakar-ukleged-ailase bonamalagar. Moab-dulemar Nebo-neggwebur-bergusadga, degi, Medeba-neggwebur-bergusadga, ogormakbukwad. Bela sailagia-swiri-swiri imaksamalad, aku-sigamarse-bakale, bela enismalad.
ISA 15:3 Bela-dulemar boedbimalad, galimbabali wile-itoged-mor yoyoidbimalad. Neg-ubebbali ogormakdemalad, dulemar-bukidar-ambikuedgi dulemar boedbimalad.
ISA 15:4 Hesbón-dulemar, degi, Eleale-dulemar, wile-itogedba binnasuli e-bendakmarye gordidimalad, e-binnasur-gordiidi Jahaza-neggweburse magar itoleged. A-ulale, Moab-sorda-bila-onomalad dobedba-binnasuli gorbukwad, bela-bela egi dobed nagunonikid.
ISA 15:5 Moab-yar-ulale, an nue-bukib binsaed, E-dulemar, Zoar-neggweburse duurmakmamaid, Eglat-Selesiyáʼye-neg-nugadse duurmakmamaid. Luhitʼye-neg-nugadba ise-boar-boar nakwemamaid. Horonaim-neggwebur-igarba ise-boar-boar nadapmalad.
ISA 15:6 Nimrim-dianmar bela dingusad, gagan-ara-aramalad bela dingusad. Bar gagan-ara-aramalad nikagussulid, bela gagan-ara-aramalad bergusad.
ISA 15:7 A-ulale, dulemar-bukidar e-ibmar-nuegan-nikamaladi Sauce-sapimar-dian-maid-obakar sesmalad.
ISA 15:8 Dulemar-binnasuli-bodiidi, bela Moab-yalagi itolesad. Dulemar-akigindiidi, bela Eglaim-neggweburse warmaksad, degi, Beer-Elimʼye-neg-nugadse warmaksad.
ISA 15:9 Dimón-dian bela ablisbi-naid, bonigan napi-egi an barmidagoed: Moab-dulemar-duurmakmaidgi achumigur-nono-wawaad an barmidagoed. Amba dulemar-napneggi-bukwadgi achumigur-nono-wawaad an barmidagoed.
ISA 16:1 Isaías sogdebalid: “Sela-neggwebur-nega-dulesulidgi-siid-akale, Sión-yalase, Israel-yala-dakmaidga be sibad-wawaad-senigana barmidmar.
ISA 16:2 Moab-dulemar-omegan, nuu-e-uugi-ise-gwayar-noddaedyobi, Arnón-diwargi obakmamai guoed.
ISA 16:3 ”Moab-dulemar, Sión-dulemarga weyob sogdanimalad: ‘Be igar-amimala, be sogmalo igi be imakmaloe. Neg-ibginedgine mutikidyobi negsichidbi be anmarga nasike. Dule-gwakiar-duurmakarmaladi be odukue, melle dule-dukudimalad be urmako.
ISA 16:4 Itoba Moab-dulemar-gwakiar-duurmakarmalad be bemar-walik dukudii imako, dule-e-obelobigudiidgi be wis bendako.’ ”Mesagwar-imakleged-ibagan bergusale, sabsur-odurdakleged-ibagan bergusale, napneggi dule-obeloged bergudoed.
ISA 16:5 Geb Rey-David-wagwa-gwensak, Israel-reyga megnonikoed. E-yar-seoedi, innikigwadba yar seoed, binsaed-nikaa yar seoed, nueganbi dulemar-idugoed, dulemarga igar-naboged ega gwae imaknonikoed.
ISA 16:6 ”Anmar itodiid, Moab-dulemar doggus na san-dummarba-imakmarye. Wemar na bule-bule-na-san-imakdimalad. Dule-buledye na sogdimalad. Doggus-e-sunmakedgi emar-mesagwar imakdimalad. Ar binsarsunna deyob-damalad anmar nue-wisid.
ISA 16:7 Degisoggu, Moab-dulemar ogormakdemaloed, bela e-yalaga boedbimaloed. Kir-Hareset-uva-maduga bomaloed ega bukib-binsamaloed, bukib-binsaedba ega wile itomaloed.
ISA 16:8 Ar Hesbón-dulemar-nainu bela dingusad, Sibma-neggwebur-e-uva-nainu deyob naimogad. Dulemar-yar-baid-baidgi-bukmalad-negsemamaid, uva-nainu-nuegan obelosmalad. E-dubagan-Jazer-yalase-warmaknanainadgi, nega-dulesulidganse-warmaknanainadgi, e-dubagan-demarse-batenanainadgi, bela dii-dii imaksamalad.
ISA 16:9 A-ulale, an Jazer-yala-e-uva-nainubina booed, an Sibma-neggwebur-e-nainuga bomogoed. An Hesbón-dulemarga, Eleale-dulemarga an-ibyanis aryogoed. Ar dule-weligwar-imakega bar e-nainugi ibmar-gwagmar nikuosulid, ibmar-gwagmar gwen bar weelegosulid.
ISA 16:10 Nainugi bar wergulegosulid. Uva-nainugi dulemar bar namake itolegosulid, binnasuli dulemar-goled bar itolegosulid, uva-egurelegedgi dulemar bar uva egured daklegosulid, uva-welegedgi binnasur-gorledaedi ani an osulosad.
ISA 16:11 Degisoggu, an-gwage, Moab-dulemar-ular, Kir-Hareset-neggwebur-ular, gar-arpa-dub-nakwamaknaiyobi, wile-itonaid.
ISA 16:12 Ar Moab-dulemar aisaar na e-bab-dummaganga-ibmar-ogumakar-ukleged-ailase-namalo-inigwele, bendakleged amiosurmalad, yegudamaloed. E-bab-dummadse-goled-neg-islidikidse e-bab-dummadse gornamalo-inigwele, gwen ega igarga guosulid, bela bergus naoed.”
ISA 16:13 Bab-Jehová weyob epenne Moab-dulemargi ibmar-guoedi sogsagusad.
ISA 16:14 Emidi, Bab-Jehová weyob soged: “Igi-dule unnila birgapaa arbadae, deyobi, birgapaasega Moab-yala-e-yeerdaklegedi, berguoed. E-dulemala burgwemaloed. E-dula, unnila napi-ichee bemaloed, garganguedsuli gumaloed.”
ISA 17:1 Isaías, Damasco-neggweburgi iduakwaa sunmaksad: Bab-Jehová-Bela-Gangued-Nikad weyob sogdo. “¡Damasco-neggwebur-siid be nue-dakmar! ¡Bar neggweburga sii guosulid! ¡Nue bibichis sigoed!
ISA 17:2 Aroer-neggweburmar ollobi melledoed, gagan-ara-aramaladbi naguoed. Agine, sibad-wawaadmar dobed-nikasuli gagan-madii gumaloed.
ISA 17:3 Efraín-dulemar-e-neggwebur-gandikid-siid berguoed, Damasco-neggwebur-Siriaʼgi-siid bergumogoed. Aram-dulemar-napi-durgumaloedi, e-ibmar-nuegana Israel-dulemargadga guoed.”
ISA 17:4 Bab-Dummad sogdebalid: “Siria-yala-gandik-siid bela bergusale, Israel-dulemar-e-gangued bela nollomakdemogoed.
ISA 17:5 Dule-ibmar-gwag-weed ibmar-gwag-welesadyobi, Israel-dulemar-e-gangued guoed. Dule na e-argangi ibmar-gwag-weesayobi, Israel-dulemar-e-gangued berguoed. Refaim-nebagi ibmar-gwag-welesad-besmaladyobi, Israel-dulemar ichee bemaloed.
ISA 17:6 Degine, igi-dule olivo-san-osiamaksale, e-anagan-matusulid-dukugi napi gwabo, gwapaadibe, nagusdae, deyobi, Israel-dulemar napi-ichee bemaloed. Ar igi olivo-san bela e-sapi-anagangi gwabake, gwaatardibe napi-nagusdae, deyobi, napi-bemaloed.” Deyobi, Bab-Jehová-Bela-Gangued-Nikad sogdo.
ISA 17:7 A-ibagine, Israel-dulemar, e-Obinnisad amidagoed. Israel-dulemar, e-Bab-Dummad-Isligwaledse gannar atakdemaloed.
ISA 17:8 Bar bab-dummad-Baalʼga-ibmar-ogumakar-ukleged-aila-sobsamaladgi binsadosurmalad. Bar bab-bundor-Asera-sobarmalad-dakdosurmalad, ina-wawad-ogumaked-ailase naosurmalad. Ar we-bab-dummagan-ibmarmar e-argangi sobsagusmaladid.
ISA 17:9 A-ibagine, Israel-e-neggwebur-gandikmaladi, ollobi mellede gumaloed, sapurbi-moodo, negmar-ollobi-mellenaiyobi naguoed. Igi Israel-dulemar Canaán-e-neggweburmargi dognonigusmargu, neg-imaksamala, deyob bela-neg-ollo naguoed.
ISA 17:10 Ar bemarde Bab-Dummad-bemar-abonoged be iesmalad, Bab-Dummad bemarga-akwasailayob-gued be iedmalad. A-ulale, bemar amba ibmar-durba-nuegan digmalo-inigwele, amba neggwebur-baidsik-uva-danikid digmalo-inigwele, bela boniganba ibmar-gwag isgudoed.
ISA 17:11 Amba bemar-uva-digsad bega dungumalo-inigwele, banegi e-durba ainidago-inigwele, bonigan egi nonikoed. Ar bemar ibmar-gwag-weemaloedi, bela boniganba ibmar-gwag isgudoed.
ISA 17:12 Bukidar dule-yar-baid-baidgi-bukmalad-uurmakbukwadi, ¡duledar-wilesmar! Demar-uurmakmaiyobi dulemar uurmakbukwad. Dulemar-binnasuli-oimakbukwadi, ¡duledar-wilesmar! Dii-wilasailad uurmakmaidyobi dulemar oimakbukwad.
ISA 17:13 We-dulemar, demar-uurmakmaid-dagumakmaidyob-damar-inigwele, Bab-Dummad ese-binnasur-uludele, duurmakdedamalad. Igi yarbali gagan-dinnagana burwa-abin seleddae, deyobi, dulemar duurmakdedamalad. Igi ukub burwa-binnasur-goledba mileddae, deyobi, dulemar duurmakdedamalad.
ISA 17:14 ¡Sedogusale, dobed-dummad egi nagusdamalad! Oibosale, dule-isganamar bar dakleddasulid. Weyob dulemar-anmar-wiodimalad guodo. Anmar-ibe dule-ibmar-atursadimaladga, weyob ega igar idu maid.
ISA 18:1 Isaías sogdebalid: “Gwimar-uurmaked-yala, ¡nue-wilessun! Cus-diwarba-bukmalad, ¡be duledar-wilesmar!
ISA 18:2 Ur-nagwaryob-daklegedgi-sobaledba Nilo-diwarba dule-garda-berbemalad-barmimalad, ¡be duledar-wilesmar! ”Dule-garda-berbemalad-gandik-nanamalad be gwae-namar, dule-mullusurmaladse be namar, uka-sichigwadba-uka-dakaar-gamaladse be namar, we-dulemar-bela-dobesar-daklemaladse be namar, dulemar-gargandikmaladse be namar, dulegi-obin-san-sadimaladse be namar, yala-emargi-obinsiidse be namar. A-yala, diwarmar-iirmakmaid-yalad.
ISA 18:3 ”Bemar, bela we-napneggi-bukmalad, yar-imbaba bander-nakwiali be dakalile, degi, gar-trompeta-gollali be itoarmalale, asiki be atakbukwa imakmalo, Napneggi-bela-bukmalad, nue be dakmalo, nue be itomalo.”
ISA 18:4 Bab-Jehová weyob anga sogsad: “Isaías, an-neg-maid-akale, dulemar-nue-dakmai an imakoed. An golosulid, bogi-mai an dulemar-dakmai imakoed. Dad-ibeler yorgi-duurmaknadaeyobi, bogidik-mai an dulemar-dakmai guoed. Ibmar-welenaidgi dad-ibeler duurmaknaile, boo-mileardaeyobi, bogidik-mai an dulemar-dakmai guoed.
ISA 18:5 Ar uva-weleged-iduale, e-dutu batialir, degi, nue-uva-san-nagualir, e-anagan an sike-sike imaknonikoed. E-anagan-binigan an sike-sike imakoed.
ISA 18:6 Deyobi, bela we-dulemar gumogoed. Ibdurgan-sapurbarmaladga miledoed. Yorgi, nuu-ibmar-burgwarmalad-gunmalad-masga guoed. Dii-wied-ibagangine, bela ibdurgan-sapurbarmalad-masga guoed.”
ISA 18:7 A-ibagangine, we-dulemar Bab-Jehová-Bela-Gangued-Nikadga ibmar-ukleged sedmaloed. We-dulemarde, dule-mullusurmaladid, uka-sichigwadba uka-dakaar-gamaladid. We-dulemar, bela-dobesar-daklemaladid, dulemar-gargandikmaladid, dulegi-obin-san-sadimaladid. A-yala, diwarmar-iirmakmaid-yalad. A-dulemarde, Bab-Jehová-Bela-Gangued-Nikadga ibmar-ukleged sedmaloed. Sión-yalase ega sedmaloed, bia Bab-Jehová-Bela-Gangued-Nikad-e-nug-obarilege, ase Bab-Jehováʼga ibmar-ukleged sedmaloed.
ISA 19:1 Egipto-yar-guoedgi iduakwaa sunmaklesad: Bab-Jehová be dakmala. Mogir-gwae-gwae-iirmakmaid-birgi-sii, Egipto-yalase danikid. Egipto-e-bab-dummagan e-abin wawanmakbukwad. Egipto-dulemar nue dobe-itomalad.
ISA 19:2 Bab-Jehová soged: “Egipto-dulemar na abin-abin-urwemalaga an imakoed, na e-gwenad-e-gwenad-egi-gwisgumalaga an imakoed, dulemar-na-e-aimarbo-urwega an imakoed, neggweburmar-na-abin-abin-urwemalaga an imakoed, yalamar-na abin-abin-urwemalaga an imakoed.
ISA 19:3 Egipto-dulemar suli-suli itodamaloed, bab-dummadyob-imaklemaladse idakdemaloed. Dule-burgwarmalad-e-burbase idakdemaloed, bab-dummad-gayaburba-barsoged-bundorse idakdemaloed. Yoo-ibmar-guoed-soged-dulese idakdemaloed, anmar ibu imakoye. Degi-inigwele, e-igarmar igarga-guega an imakosulid.
ISA 19:4 Egipto-dulemargi dule-bulegan yar-seega an imakoed. Rey-isgana yar-seega an imakoed. Ani Bab-Jehová-Bela-Gangued-Nikad soged.
ISA 19:5 ”Demar-naid dingudoed, Nilo-diwar-maid bela dinna naoed.
ISA 19:6 Dian-akwiar-mamaid sunnasuli yapanne gudoed, Nilo-diimar-iirmakmaidi, iremai gudoed, bela dinna naoed. Nallayob-daklemaladi, degi, nagwaryob-daklemaladi, bela burgwidoed.
ISA 19:7 Nilo-diwar-gakaba ibmar-digarmaladi, bela burgwidoed, Nilo-diwar-gakaba ibmar-nanaidi, bela bergudoed, bela swiri naoed, bar daklegosulid.
ISA 19:8 Bela dule Nilo-diwargi-ua-somaladi, degi, bela saki-miar-ua-gamaladi, bukib binsadmaloed, bela bodmaloed.
ISA 19:9 Bela dule lino-mor-nued-sobedgi-arbamaladi, degi, saki-sobedgi-arbamaladi, suli-suli itodamaloed.
ISA 19:10 Ua-galugi-arbamaladi, nue-wiles itodamaloed, ar bela e-sakimar itiridoed.
ISA 19:11 ”Zoán-neggwebur-e-dummagan, dule-binsaed-ibedye be sogdimalad, bemar dule-gegeganad. Ar bemar Faraónʼga binsaed-isgana ukdimalad. Ar igi yogasaar bemar sogmalosunna: ‘Anmar binsaed-ibedye, epenne-reymar-binsaed-ibegan-megismaladse binsaed amismaladye.’
ISA 19:12 ”Egipto-rey, ¿be-dule-binsaed-ibegande bega igigudmarsunna? Emide, be-dule-binsaed-ibegan bega sogmardo, ibu Bab-Jehová-Bela-Gangued-Nikadi, Egipto-dulemargi imaksokali, igi-Egipto-dulemar-idu igar-amismaidi, bega sogmarbardo.
ISA 19:13 Zoán-neggwebur-e-dummagan dule-binsaedsulidga nadmalad, Menfis-neggwebur-e-dummagan ese yamolesmalad. We-neggwebur-e-dummagan, Egipto-yala noar sesmalad.
ISA 19:14 Ani an Bab-Jehová dule-binsaed-dakmaladgine, suli-suli-neg-itoged-burba egi nasiksad. Bela Egipto-dulemar-ibmar-imakedi, noarsaila imakdemalad. Igi-dule-mummudi, agar-agar banamakdii, debayobi, Egipto-yala banamaksiid.
ISA 19:15 Gege bar Egipto-yar-ulale, ibmar imakleged. Ar dule-dummagana, dule-ibmar-wismaladi, dulamar-bukwadi, degi, sordamala, gege bar Egipto-yar-bendakega ibmar imakmalad.”
ISA 19:16 A-ibagangine, Egipto-dulemar, Bab-Jehová-Bela-Gangued-Nikad sabsur-e-odurdakega egi gwisgualile, omeganyobi dobe itodmaloed.
ISA 19:17 Egipto-dulemar Judá-dulemar-dobe itodamaloed. Ar Judá-dulemargi wis binsadmalale, bato dobed egi nagudmaloed. Ar ade, Bab-Jehová-Bela-Gangued-Nikadi Egipto-dulemar-idu igar-bulegan amisad.
ISA 19:18 A-ibagangine, Egiptoʼgi neggwebur-gwaatale Canaán-dulemar-gayaba sunmakdemaloed, degi, ise-sogar Bab-Jehová-Bela-Gangued-Nikadga sogdemaloed: Anmar be-sogedba damaloye. A-neggwebur-gwagwenad nugguoed, Herez-neggweburye.
ISA 19:19 A-ibagangine, Egipto-yalagi Bab-Jehováʼga ibmar-ogumakar-ukleged-aila sigoed. Geb degine, yar-abingunaid-nagaba Bab-Jehováʼga akwa-dummad ogwismarbaloed.
ISA 19:20 Ar a-akwa-dummadi Egipto-dulemarga e-wilubga guoed. Adi, oyogega, Egipto-dulemar Bab-Jehová-Bela-Gangued-Nikad-e-nug odummomarmoye. Ar Egipto-dulemar Bab-Jehováʼse mesagwar-dule-e-imakmaladgi e-ollor-imakega gotemaloed. Bab-Jehová ega dule-e-abonoged, degi, dule-e-ular-gwisgued barmidagoed, adi, mesagwar-dule-e-imakmaladgi ollor-imakegar.
ISA 19:21 A-ibagangine, Bab-Jehová Egipto-dulemar magar-e-dakega imakoed, ede, nue-Bab-Dummad guye. Geb Egipto-dulemar magar daknonimaloed, wede, Bab-Jehová nue-Bab-Dummad guye. Degi, Bab-Jehováʼga ibmar-oburgwar ukdemaloed, ibmar-gwagmar ega ukdemaloed. Bab-Jehováʼga ise-ibmar-imakoye-sogmaloedi, na sogedba ega imakmaloed.
ISA 19:22 Bab-Jehová bonigi Egipto-dulemar-naibi-imaknonikoed, geb a-sorbali, onugubaloed. Geb degi, Egipto-dulemar Bab-Jehováʼba gannar nagudmaloed, degine, Bab-Dummad wile amar-dakoed, degi, onuguoed.
ISA 19:23 A-ibagangine, Egipto-akale, Asiria-yalase igar-dummad megoed. Geb Asiria-dulemar Egiptoʼse nanabukwa gumaloed, degi, Egipto-dulemar Asiriaʼse nanabukwa gumarmogoed. Egipto-dulemar, Asiria-dulemarbo Bab-Jehová-nug odummobukwa gumaloed.
ISA 19:24 A-ibagangine, yala-sogapaa ambikumaloed: Egipto, Asiria, Israel. Degi, wemar-yalagi neggwebur-bamaladba egi nued binsalegoed.
ISA 19:25 Ar ade, Bab-Jehová-Bela-Gangued-Nikad bela we-yalamargi ise-nued binsaoed, weyob sogdoed: “Egipto an-dulamarga gued. Egi nued binsalesun. Asiria-dulemargi nued binsalesun, ani an urbisad. Degi, Israel-dulemargi nued binsalesun, wedi angadid. Ani an we-dulemar susad.”
ISA 20:1 Ibagwengine, Asiria-e-rey-Sargón, e-sordamar-bila-onoged-e-dummad, e-sorda-bila-onomaladmala, Asdod-neggweburse barmisgusad. Geb agine, Asdod-dulemargi bila-onosgusad, geb egi nakwisadba Asdod-neggwebur-sunonigusad.
ISA 20:2 A-ibagangine, Bab-Jehová Amoz-machi-Isaíasʼga sunmaksad. Weyob ega sogsad: “Wile-itoged-mor-yoid be esue, nag-uka-yoid be ungebali.” Isaías deyob imaksad, uka-swili gudigusad, degi, nag-swili gudigusbalid.
ISA 20:3 Degine, Bab-Jehová weyob sogded: “Igi an-mai-Isaías birgapaa uka-swili e-abganbi-odukudii gusa, degi, nag-swili gudii gusa, Egipto-yalagi ibmar-guoed-e-wilub oyoged, Etiopía-yalagi neg-guoed-e-wilub oyobalid.
ISA 20:4 Deyobi, Asiria-e-rey, Egipto-dulemar-uka-swili, unnila e-abganbi-odukuale, nag-swili, degi, ber bela sor-daledi, gales sedmaloed. Amba deyobi, Etiopía-dulemar-e-sapingana, degi, e-dulemar-sergan gales seledmarmogoed. A-ulale, bingedar itomaloed.
ISA 20:5 Dulemar Etiopía-dulemargi bensurmaladi, degi, Egipto-dulemarba-san-dummarbaa-imakdimaladi, nue bingedar itodmaloed, nue bela-bela dobe itodmaloed.
ISA 20:6 A-ibagangine, dulemar demar-gakagi-bukmalad sogdemaloed: ‘Be dake, we-dulemar anmar-bendakega gudimalansursi. Ar wemarse anmar, Asiria-e-reygi-anmar-ollor-imakega bendakleged amidimalansursi. Emidi, be dake: ¿Igi anmar bar bendaklegosunna? Anmar bar wakinned, sate.’ ”
ISA 21:1 Bab-Dummad Isaíasʼga nega-dulesulidgan-demar-dikarba-naidgi-neg-guoedi oyosad: Neguevʼba burwa-bipirmakaled-nanaedyobi, dule-yar-sumalad nega-dulesulidganba-danikidi, bato modanikid.
ISA 21:2 Anga yeer-gangue negburgan oyolesad: Dule-emar-yardakedi, dule-yardaked. Dule-wiogedi, dule-wioged. Elam-dulemar, ¡gwichigunae! Media-dulemar, ¡oitonae! Dule-wile-itogedba-bodimalad bar boega imaklegosulid.
ISA 21:3 A-ulale, an-abagan nunmakedba wawanmaked, an nunmaked-dummad itoged. Sior muu-neggi-ugakgunair abagan nunmakdaeyobi, an nunmak itoged. An dule-sunmaked-itogedi, suli-suli-ito an-imaked. An ibmar-dakedi, dobed-dummad anga uked.
ISA 21:4 An aku-itogusad. Dobedba an wanwan-itoged. Sedogusale, negdambegwad an yeer-itodaenad. Emide, aka gwayed anga uked.
ISA 21:5 Sorda-dummagan iba-ononanaid, mas-bukidar gullenaid. ¡Sorda-dummagan, be guagwarmalo! ¡Be-sigu-abgamalad be nudakmala!
ISA 21:6 Ar Bab-Jehová anga weyob sogsad: “Dule-nakuleged be ogwicho. Bela-ibmar-dakoedi, bega-sogega be imako.
ISA 21:7 Moli-ur-bila-onomaladgi dulemar ebo-ebo moli-uayasuigan-birgi-sii-dani be dakalile, igi dulemar ebo-ebo moli-yargan-muremalad-birgi-sii-dani be dakalile, yog-gollar be imako.”
ISA 21:8 Degi, dule-nakuleged binnasuli goted: “Dummad, bane-bane nakuleged-neg-suid-niba an nakulegwisguad. Mutikidbali, an nakulegwisguad. An bangusisulid.
ISA 21:9 ¡Be dake! Dulemar moli-ur-bila-onomaladgi danimalad, ebo-ebo danimalad.” Geb dule-gwensak binnasuli goted: “¡Babilonia-neggwebur bergus! ¡Babilonia-neggwebur bela oitoles! Bela ibmar-wilub-sobarmalad e-bab-dummadga-imakmalad napagi omileded.”
ISA 21:10 Geb Isaías sogded: “Sordagan, ibmar-gwagyob napagi-omilede be gusmaladid. Israel-e-Bab-Dummad-Jehová-Bela-Gangued-Nikad an-uayagwar anga we-ibmar-sogsadi, an bemarga sognaid.”
ISA 21:11 Isaías, Duma-yalagi neg-guoedgi iduakwaa sunmaksad: Dule anse binnasuli Seir-neggwebur-akale goled: “Nakuleged-dule, ¿sana neg-mutikid berguoe? Nakuleged-dule, ¿sana neg-ibguoe?”
ISA 21:12 Geb an-abin sogded: “Neg-ibgued omodani, neg-mutikgued omodanibar. Ar be gannar anse egisbiele, gannar egisbalodo. Gannar be anse egisbiele, gannar be anse dagodo.”
ISA 21:13 Arabia-dulemargi iduakwaa sunmaklesad: Dedánʼginmalad, danar-danar duurmakmadaed, nega-dulesulidganba sapur-moodonaidgi ambikumalad.
ISA 21:14 Uku-uku-itodimalad-abin be ainimarsun, ega be dii ukmarsun. Tema-yarginmalad, dule-wakinmamaidga be mas ukmarsun.
ISA 21:15 Ar ade, es-suidgi-gwakialidba duurmakmamaid, es-suid-daarmakaledgi-gwakialidba duurmakmamaid. Ar ade, e-idu warsi yaa-gwichidgi-gwakialidba duurmakmamaid, bila-onolegedgi-gwakialidba duurmakmamaid.
ISA 21:16 Ar Bab-Jehová weyob anga soged: “Birgagwensega, Cedar-yala-e-yeerdakleged an obelogoed. Igi dule-manigi-arbaed birgagi e-arbaed ega bergunonidae, deyobi an imakoed.
ISA 21:17 Dule-sigugi-urwemalad-bulegan-Cedarʼginmalad, napi-ichee durgumaloed.” Ar ade, Israel-dulemar-e-Bab-Dummad-Jehová deyob soged.
ISA 22:1 Isaías, Negburgan-Daked-Nebagi yoedse-ibmar-guoedgi sunmaksad: ¿Igi be itomala? Emide, bela bemar neg-uas-birgi be nakwemamaigu.
ISA 22:2 Bemar, dulemar-e-itoleged-damalad-neggweburad, bemar, oimakedginbi-gudidamaladid, ibagibi be negdakdimalad. Ar be-dule-burgwismaladi, es-suidgi gwen burgwissurmalad, bila-ononanaidgi gwen burgwissurmalad.
ISA 22:3 Bela be-dummagandi, danar duurmakdemalanad, degi-inigwele, gwen egi warsi-miledsuli galedapmalad. Bela be-dulemar-galesmaladi, aisaar wakinye sokarmalanad, bela galedapmalad.
ISA 22:4 A-ulale, Bab-Jehová weyob sogsad: “Be angi bangumar. Mer be anse gormar. Melle an-gwage baisur-itoge be imakmar. An-dulamar-bela-bergusad-ular, an boesii imakgwelo.”
ISA 22:5 Ar Bab-Dummad-Jehová-Bela-Gangued-Nikad, Negburgan-Daked-Nebaga gwayed-dummad-iba nasiksad, suli-suli-itoged-iba nasiksad, nug-bipi-gued-iba nasiksad. Galu-matusulid-earleged-iba nasiksad, yalaganba binnasuli-gordigued-iba nasiksad.
ISA 22:6 Elam-yar-sorda-bila-onomalad moli-birgi-sii e-warsi oniarmalad. Kir-yar-sorda-bila-onomalad e-sigu-abgamalad oniarmalad.
ISA 22:7 Be-neba-yeerdaklemaladgi ur-bila-onomaladi, engus nanaid. Sorda-bila-onomaladi, degi, e-molimala, bela neggwebur-yawagak-doged-ebilis bukwad.
ISA 22:8 Judá-dulemar bendakleged-sate gudmalad. A-ibagine, bemala Sapurba-Neg-Dummad-siidgine, bila-onogedgi-gingimar-ebulemalad-bukwadi, be daksagusmalad.
ISA 22:9 David-neggwebur-e-galu-matusulid bukidar marar-marale be daksa gusmarbalid. Degine, dii-saboleged-urbalid-siidgine, dii be wesmarbalid.
ISA 22:10 Jerusalén-negmar-bukwad be ebichismarbalid. Galu-matusulid-mararmalad-nudakmalaga, abala, a-negmar-bukwad be earismarbalid.
ISA 22:11 Galu-matusulid-abinnidgi, be dia sobsamalad, adi, dii dia-epennegwadgi-sabolesiid, dia-soblesadse ogwaegar. Degi-inigwele, we-dule-ibmarmar-imaksadgi be binsaed-nikaa gwen gussurmalad. Degine, we-dule dikasurgus-we-ibmar-guoed-mesisadi, aku be daksamalad.
ISA 22:12 Isaías sogdebalid: “A-ibagangine, Bab-Dummad-Jehová-Bela-Gangued-Nikadi, boega bemarse gochanad, bukib-binsaega bemarse gochanad. Sailagia-swiri-saega bemarse gochanad, mor-sommed-yoega bemarse gochanad.
ISA 22:13 Degi-inigwele, aka bemar weligwar itodmalad. Yeer-itogedba be iba onodmalad. Moli-bebe-nikad be oburgwidmalad, sibad-wawaad be oburgwidmalad. Moli-sana be gutemalad, vino be gobdemalad.” Degine, be weyob sogdemalad: “Anmar mas-gunmala, anmar gobed-gobmala, ar anmar banedse burgwemalosursi.”
ISA 22:14 A-ulale, Bab-Jehová-Bela-Gangued-Nikad an-uayagwar anga weyob sogsad: “We-isguedi an bemarga osulogosulid. Ani, Bab-Dummad-Jehová-Bela-Gangued-Nika-Maid, an soged.”
ISA 22:15 Bab-Jehová-Bela-Gangued-Nikad weyob Isaíasʼga soged: “Sebna be aminae, ar ade, reyneg-daked-dummadid. Ega be weyob sogo:
ISA 22:16 ‘¿Ibu be wegi sanai? ¿Doa bega igar-uksa neg-uangi be yaa-gwisega? ¿Ibiga be nibali ise-sobale be yaa gwisnai? ¿Ibiga be akwasailagi nuesaale-megega be yaa gwisnai?
ISA 22:17 ” ’Ar Bab-Jehová dikasuli be-barmetoed. Dule-gandikid-emar-gaeyobi, Bab-Jehová be-gaoed, ise-sabsur be-metoed.
ISA 22:18 Ogob-baparmakeyob be-imakoed, yar-dummadgi be-balimetoed. Agi, be burgoed. Agi be-ur-bila-onomalad-yeerdaklemalad bedapoed. Be-dummadga binged-dummad be guoed.
ISA 22:19 Be-gangi be siidgine, an be-onogoed. Be dummadga-maidi, an be-oberguoed.’
ISA 22:20 ”A-ibagine, an-mai-Hilcías-machi-Eliaquimʼse an goloed.
ISA 22:21 Be-mor-dummad-suid an ega yooed. Be-molidub an ega nasikoed, degine, be-negseed-igar an ega ukoed. Jerusalén-dulemarga, degi, Judá-dulemarga, e-babayob guoed.
ISA 22:22 Rey-David-waganga-ibmar-sogega an ega igar ukoed. Eliaquim igar-ukele, dule igar-gaosulid, gwen dule egi akar sunmakosulid. Eliaquim igar-uksulile, ibmar guosulid.
ISA 22:23 Igi esgoro ise-bioklegar-gwisdae, deyob an Eliaquim dummadga-megega imakoed. Egine, e-neg-yaginmalad nug-gannarba itomaloed.
ISA 22:24 Bela e-neg-yaginmalad egi weligwar-itomaloed, degi, bendakdemarmogoed: E-masmala, e-wagan, bela-e-gwenadgan-bamalad, degine, e-aimarse-bakale, bendakdemaloed.”
ISA 22:25 Bab-Jehová-Bela-Gangued-Nikad weyob sogbali: “A-ibagine, ani an, Eliaquim, bela-e-gwenadgan, bela dulemar-egi-bengussurmalad obelononikoed. Ani an Bab-Jehová-guedgi, deyob an soged.”
ISA 23:1 Bab-Jehová Isaíasʼga Tiro-neggwebur-guoedi oyosad: Quitim-yar-akale, Tarsis-ur-selaganse gayaburbamar nonikid. Tiro-neggwebur bergussiid, e-negmar, degi, e-ur-nagumalad, bela ei bibichisad. Abali, amar bukib-binsabukwad.
ISA 23:2 Tiro-dorgan, boo be ambikumar. Sidón-dulemar-ibmar-ukedgi-arbamalad, boo be ambikumar. Be-selamar bega ibmar-nuegan-bukidar berbesmalad.
ISA 23:3 E-masgullemaladi, Nilo-diwar-e-ana-gwensakgi danikid. Tiro-neggwebur, dulemar-yar-baid-baid-bukwadbo, mani-onobukwa gusad. Nilo-diwargi-ibmar-gwag-welegedgi mani-amibukwa gusmalad.
ISA 23:4 Sidón-dulemar, be bingedar itomarsun, bemar, muu-billi-ibedga gumalad. Emidi, muu-billi weyob sogsad: “An bipisaale gwen abganba an galitodisulid, an gwen mimmi bakdisulid. An gwen mimmigan odummodisulid, an gwen bunamala ibmargi odurdakdisulid.”
ISA 23:5 Egipto-yalase, Tiro-neggwebur-bergusad-gayaburba warmaksale, Egipto-dulemar Tiro-neggweburga bukib-binsadmaloed.
ISA 23:6 Tarsis-neggweburse be namar, demar-gakagi-bukwamalad, be bukib-binsamar.
ISA 23:7 Tiro-neggweburde, ¿neggwebur-weligwaledinsursi? We-neggweburde, ¿bur dikasurgus siidinsursi? We-dulemarde, ¿dikasur-aineba bur nanadimaladinsursi?
ISA 23:8 ¿Doa Tiro-neggwebur-weyob-guega igar amisa? We-neggwebur nuga-nika siidinad. E-dulemar-ibmar-ukedgi-arbamaladi, dule-nuga-nikamaladinad. Dulemar-ese-ibmar-bakmaladi, bela mag-dakedbimalanad.
ISA 23:9 Bab-Jehová-Bela-Gangued-Nikad we-igar mesisad, adi, dulemar-nug-gannarba-nikad ei obelogega, bela dule-napneggi-nuga-nikamalad-e-nug bipii imakegar.
ISA 23:10 Tarsis-dulemar, sapurgi be arbamarsun, ar ur-nagumaladde, bela be-ibe bergusad. Ar bar bemarse Tiro-urmar dognonikosulid.
ISA 23:11 Ar Bab-Jehová muu-billigi e-gangued oyosad, dulemar-yar-baid-baidgi-bukmalad-ogwayega imaksad. Bab-Jehová, Canaán-neggwebur-gandikmalad-obelogega imaksad.
ISA 23:12 Degi, Bab-Jehová, Sidón-dulemarga weyob sogsad: “Sidón-dulemar, be wese bergunonisun. Be-neggwebur-dummad bela bergussun, bar be weligwar itogosurmalad. ”Ar be Quitim-neggweburse obakmalo-inigwele, amba bogidiki gwen be itogosurmalad.
ISA 23:13 ”¡Caldea-neggweburgusadi be dakmala! ¡Bar we-neggwebur sisulid! Ar Asiria-sordamar we-neggwebur bela obelosad. Ibmar-durgan-ursilimalad nega-dulesulidganba-gudimalad-e-negga imaksad. Neg-matusulid-gandikmalad sobsa gusmalad. Reyneg-gandikmalad bela ei earis gusmalad, akwamarbi ganna-ganna napi-obesmalad.
ISA 23:14 ”Tarsis-ur-selagan bukib-binsabukwamalad, ar e-ur-nagumalad bela bergusad.
ISA 23:15 ”A-ibagangine, Tiro-neggwebur ieles-guoed, bar egi binsalegosulid. Rey-birga-dulapaa-gakambe (70) dula-gudiguedyobi, e-ieleged-iba guoed. Geb birga-dulapaa-gakambegwad-sorba (70), Tiro-neggweburgi, gambasamalad-e-namaklegedyobi egi namaklegoed:
ISA 23:16 ‘Gambasaed-ieles-gudiid, gar-arpa be sue, neggwebur be ebirnae. Namaked-bur-nued be ogolo, namaklemalad-bukidar be namako, adi, dulemar bee-ebinsamalagar.’ ”
ISA 23:17 Birga-dulapaa-gakambegwad (70) bergunonikile, Bab-Jehová Tiro-dulemar gannar e-ibmar-ukedgi-arbamalaga imakdebaloed. Degine, bela-neggwebur-baiganbo gannar ibmar-ukedgi arbadmaloed.
ISA 23:18 Ar e-mani-onogoeddina, degi, e-ibmar-ukoeddina, Bab-Jehováʼga ukdemaloed. E-manimar, degi, e-ibmarmar gwen sabolesii guosulid. Ar e-mani-onomaladi, dule-Bab-Jehová-nug-odummomaladga uklegoed, adi, nue-immedik-gudii gumalagar, degi, mor-nuegan-yoi-gudii gumalagar.
ISA 24:1 Dakmalana, Bab-Jehová napneg-swaana imaksad, bela napneg obelonaid. Bab-Dummad e-dulamar-ononnonaid.
ISA 24:2 Bela deyobi we-dulemala gumarmogoed: Dule-irwa-Bab-Dummadse-gormalad, degi, bela dulamar. Mai-e-dummadga-gudimalad, degi, e-maimar. Dummagan-omeganmar, degi, mai-omeganmar. Ibmar-ukedgi-arbamalad, degi, ibmar-bakedgi-arbamalad. Mani-gaar-ukmalad, degi, dulegi-mani-gamalad. Mani-ibegan, degi, dule-wileganamar. Wemala, bela deyob gumarmogoed.
ISA 24:3 Napanega bela swaanga naguoed, bela e-ibmarmar sulegoed. Ar Bab-Jehová deyob sogsad.
ISA 24:4 Napneg ibitosad, napneg bela-bela oitolesad. Dule-gala-ibegan, bela e-gangued bergusad, dule-napneggi-nuga-nikamaladi, bela yogguded.
ISA 24:5 Napneggi, bela isgued neg-gagasnaid, ar ade, e-dulemar, Bab-Dummad-Igar-Maidba gwen nanassurmalad. Igar-Maidgi annasmalad. Dule bipisaale Bab-Dummad-Ebo-Degisadegu-Igar-Mesisadba gwen nanassurmalad.
ISA 24:6 A-ulale, napnega ukabsales naid, ar e-dulamar-nukad deyob gusad. Agala, soo napneggi aidesad, unnila dulemar napi-ichee bukusmalad.
ISA 24:7 Uva-nainumar isgus naid, vino-binid bar daklesulid. Dulemar-yeer-itogedba-namakdidamaladi, emidi, bukib-binsaedba ogormakdimalad.
ISA 24:8 Damborʼmar-goledi, bergus-nanaed, gar-arpaʼmar-goledi, bergus-nanaed, dulemar-oimakedi, bela bergusad.
ISA 24:9 Namakbukmalale, bar vino gobsurmalad. Dule-mummuganga inna-gagbid isguded.
ISA 24:10 Neggwebur nue-bergus siid, olloo selenaid. Bela neg-yawagakmar, atiar-atiar bubukwad.
ISA 24:11 Galimbabali, dulemar vinoʼbina binnasuli oimakdimalad, wergulegedi bela bergusad, yeer-itolegedi bela yogguded.
ISA 24:12 Neggwebur bela-bela nue-bergus sigisad, neggwebur-yawagak-dummad bela daas-daas gusad.
ISA 24:13 Weyob napneggi dulemar-yar-baid-baidgi-bukmalad imaklemaloed. Igi olivo-sapi-san gwallealir, e-san obatega, binnasuli-osiamaklege, deyobi gumaloed. Uva-batisbukwayob gumaloed.
ISA 24:14 Dulemar napi-ichee-besmaladi, weligwaledbali binnasuli oimakdemaloed. Dad-ibeler-argwanedsiki, Bab-Jehová-e-gangued-yeerdakleged weligwaledba oimakmaloed.
ISA 24:15 Degisoggu, nebaganba Bab-Jehová-nug be odummomar. Demar-gakaba, Bab-Jehová-Israel-dulemar-e-Bab-Dummad-nug be ogannomar.
ISA 24:16 Bela napneg-naidgine, anmar namakleged itoged. Weyob soged: “Dule-innikigwad odummolesun.” Ar andi an sogdo, an duledar-wilesye. Bela-bela an nunmak-itogedba, an burgwebied. Dule-yardakmaladi, unnila dule-yardakdimalad. Dule-yardakmaladi, emar-yardakedginbi binsadimalad.
ISA 24:17 Dulemar-napneggi-bukmalad, gwayed-dummad be-edarbebukmalad, be-iduar neg-bulegan naid, yardakleged-igar be-idu naid.
ISA 24:18 Dule gwayed-dummadgi unni-nosale, igar-buleganse galedapoed. Dule igar-bulegangi unni-nosbalile, amba yardakleged-igarse galedapbaloed. Ar ade, dii-dummad wioed. Dii-dummadi napneg-sailagan owawanmakoed.
ISA 24:19 Negabandur-dummadi napneg mamaroed, napa-daas-daas-imakedse saoed, bela napa goa-goa guoed.
ISA 24:20 Dule-mummu-banamakdiiyobi, napneg naguoed. Neg-uas-baisursunna-ayaredyobi, napneg ayaridoed. Dulemar-isguedbali napneg bergudoed, napneg gannarse bar guosulid.
ISA 24:21 A-ibagangine, Bab-Jehová nibagi-negsemamaid sabsur-odurdakoed, napneggi, reymar-yar-semamaid sabsur-odurdakbaloed.
ISA 24:22 Esgaryaba odolemaloed, agine, mellesii gumaloed. Geb sorbali, sabsur-odurdaklemaloed.
ISA 24:23 Bab-Jehová-Bela-Gangued-Nikadi, Sión-yalagi, Jerusalén-neggweburgi, gandikid-yeerdaklegedba yala seoed. Degiidbali, dad-ibeler sichii nadoed, nii sichii nadmogoed. E-girmar-dummagan bela Bab-Dummad-e-gangued dakmaloed.
ISA 25:1 Bab-Jehová, be an-Bab-Dummadid. An bega namakoed, an be-nug odummogoed, ar be ibmar-gegerdaklemalad imaksad. Be-Igarmar epennegwad-akale bela napiragwadbiid, degi, inniki maiguad.
ISA 25:2 Neggwebur akwamarbi ganna-ganna be urbisad, neggwebur-gandikid, bela oitolesad. Dule-bamalad-e-neggwebur bela oitolesad, neggweburga bar sigissulid.
ISA 25:3 A-ulale, dule-gandikmalad be-nug odummoged, a-ulale, neggweburgi dule-gandikmalad be-dobee itomalad.
ISA 25:4 Ar be dule-wileged-suli-suli-itodiidga be niga ogannosad. Dule-ibmar-abesa-gudiid, be bendaksa gusad. Igar-bulegan-idu be, e-bendakedga gusad, dad-ibeler-gaed-irwa ibmar-nagueyob ega be gusad. Dule-isganamar-e-bunnoedi, burwa-dummad-noeyobi, galu-matusulidgi-gwichigueyobi gued, nega-dulesulidganba neg-diopisur-itolegeyobi gued.
ISA 25:5 Igi nega-dulesulidganba neg-diopisuli itoledae, deyobi, be dule-yar-baidginmalad-oimakedi, bogidik imaked. Igi mogir dad-ibeler-idu negsichii imakdae, deyobi, dule-bulegan be obeloged.
ISA 25:6 Bab-Jehová-Bela-Gangued-Nikadi sogded: “Sión-yalagine, bela dulemar-yar-baid-baidgi-bukmaladga, an mas-nuegan-yeer-gullemalad bukidar imakoed. Vino-nuegan-sunsogmalad an bukidar imakoed. Mas-bur-yeer-gullemalad-nuegan, degi, bur vino-sunsogmalad-sulearmalad an imakobaloed.
ISA 25:7 Ani we-yalagine, mor-dummad dulemar-odukunaidi, esirmakoed. Mor-dummad-dulemar-yar-baid-baidgi-bukmalad-odukunaidi, esirmakoed.
ISA 25:8 Ani Bab-Jehová, burgwed-igar degisadegu obelogoed. Degi, bela dulemarga ibyanis elioed, bela napneggi, e-dulamar-mesagwar-gudiid onogoed.” Ar Bab-Jehová, e-sunnad deyob sogsad.
ISA 25:9 A-ibagangine, weyob sogledagoed: “Eye, ar we, anmar-Bab-Dummadid. Anmar egi bensulid, ar we, anmar-abonosad. We, Bab-Jehová gued, egi anmar bengussulid. Anmar wergumarsun, Bab-Jehová-anmar-abonosadgi anmar weligwar itomarsun.”
ISA 25:10 Isaías sogdebalid: “Bab-Jehová we-yala akoed, Moab-yaladi sabsur-odurdaklegoed, igi durgangi annaledii dae, deyob Moab-yala imaklegoed.
ISA 25:11 Igi dule-dapumaknadapir, sakwa-onakwiddae, degine, aka dii-urba dogdedae, deyobi, Moab-dulemar e-san-dummarba-itogedbali, aisaar sakwa-onakwesii gumaloenad. Degi-inigwele, Bab-Jehová, we-dulemar e-san-dummarba-imakmalad ei obelogoed. Gannarse we-dulemar barguosulid.
ISA 25:12 Bab-Jehová ei galu-matusurmalad, degi, neg-gandikmalad bibisgoed, bela napaga obinyoed.”
ISA 26:1 A-ibagine, dulemar Judá-yargi we-namaked namakdemaloed: “Anmardi neggwebur-gandikid nikamalad. Bab-Jehová, neggwebur-gandikidi, galu-matusulidyobi, degi, neg-abingaed-gandikidyobi anmar-bendakega imaksad.
ISA 26:2 Jerusalén-neggwebur-e-yawagak egamar, adi, dule-nuegan innikii-Bab-igargi-nanamalad ubomalagar.
ISA 26:3 Dule-beginbi-binsaedi, bogidikidgi-gudisaega be imakoed, ar begi bensulid.
ISA 26:4 Bab-Jehováʼgi-bensuli be gudii gumar, ar Bab-Jehováʼbi akwasailayobi degisadegu gued.
ISA 26:5 Bab-Jehová, dule-gannarba-san-sadimaladi sabsur-imaked, neggwebur-san-dummarba-imakedi, ogalakued. Napase-balimetega imaked, napabi-nai imaked.
ISA 26:6 Dule-wilegana, degi, dule-nollogana, we-neggweburgi dii-dii annamaloed.
ISA 26:7 ”Dule-innikimalad-e-igar innikigwadbiid, Bab-Jehová, bedi dule-innikigwad gued, bee be, dule-innikigwadga igar inniki imaked.
ISA 26:8 Bab-Jehová, anmar begi bensurmalad. Be-igar-nabolemalad-innikimaladgi bensurmarbalid. Anmar begi-binsadii gubied, be-nuggi-binsadii gubied.
ISA 26:9 Mutikidbali, degi, ibginedbali, an be-amidaed. Be igar-innikigwad napneggi ukdele, bela dule-napnegginmalad durdakdedamalad, ibi igar-innikigwadi.
ISA 26:10 Bab-Jehová, be dule-isganamar wiledakda-inigwele, degite, amba igar-innikigwad durdaksurmalad. Napneggi dule-nuegan-abargi-gudimar-inigwele, galagwensuli gudimalad, Bab-Jehová-Bela-Gangued-Nikadsuliyob be-dakdamalad.
ISA 26:11 ”Bab-Jehová, be sabsur-odurdaked-igar guagwar ega be nasiksad, ar emardi degite aku dakmalad. Be anmar-bela-bela-sabed we-dulemarse be oyoge, adi, bingedar itomalagar. Dule-isganamar-idu be soo-sisadgi obeloge.
ISA 26:12 ”Bab-Jehová, be anmarga bogidikid uked, ar bela anmar-ibmar-imakedi, be-ganguedba anmar imaked.
ISA 26:13 Bab-Jehová, be anmar-Bab-Dummadid. Dummagan-baigan anmar-dummaganga gusmalanad, degi-inigwele, anmar bur be-nugbi odummoged.
ISA 26:14 We-dummagan bato burgwismalad, bar durguosurmalad. Bato napaga gusmalad, bar gwisguosurmalad. Ar be we-dummagan sabsur-odurdaksad, bela be obelosad. Dulemar melle egi bar binsaega be imaksad.
ISA 26:15 Bab-Jehová, be anmar-yala onasguega imaksad, be anmar-yala onasgusad, dule-gandikidga be gusad. Bela yarmar-abingunanaid-onasguega be imaksad.
ISA 26:16 Bab-Jehová, anmar suli-suli-itodigua, anmar bese gochagusad. Be anmar-sabsur-odurdaknaigua, anmar ulubgi-nunmaked-abalagi bese gochagusad.
ISA 26:17 Igi sior-gurgin-nikad e-boni-itoalile, nunmakedba binnasuli gollardae, deyob, Bab-Jehová, anmar be-asabinni nunmakedba binnasuli gorsii gusad.
ISA 26:18 Anmar binnasuli bese gochamar-inigwele, degi, nunmakedgi bese gocha-inigwele, unnila boniganbi anmar abingasad. Gwen anmar napnegse emar-bendaked senonisulid, napneggi-dulemar-bukib-bukuega gwen gwalulessurmalad.
ISA 26:19 ”Degi-inigwele, Bab-Jehová, be-dula-burgwarmalad gannar dula gudii gumaloed. E-muimar gannarse dula gumaloed. ¡Dulemar-burgwar-mamaidi, be gwisgumar! ¡Weligwaledgi binnasuli be gormar! Bab-Jehová, igi be bolegoedba, be-boo-miedi, gaganmar odungudae, deyobi, be-dula-burgwarmalad gannar be odulogoed.
ISA 26:20 ”¡An-dulamar! Be-negyaba be ubomar. Yawagak be edumalo. Wis ichee be dukumalo, Bab-Jehová e-urwed-berguedse be dukumalo.
ISA 26:21 Itoakwaa be bukumalo, ar Bab-Jehová e-maidgi noesokalid. Dulamar we-napneggi-bukmalad egi isgusadba sabsur-odurdakdasokalid. Napnega ablis-aryosadi, oyogoed, napnega dulemar-burgwismaladi, bar odukumai guosulid.”
ISA 27:1 Isaías sogded: “A-ibagangine, Bab-Jehová, naibe-dummad-Leviatánʼye-nugad sabsur-odurdakoed. Naibe-sinni-sinnid-Leviatánʼye-nugad sabsur-odurdakoed. Bab-Jehová e-es-suid-gandikidgi, degi, e-es-suid-dummadgi achu-simudubaled muu-billi-yagi-maidi oburgoed.
ISA 27:2 A-ibagangine, Bab-Jehová weyob sogdoed: ‘Uva-nainu-nued-sulealedga be namakmar:
ISA 27:3 Ani, an Bab-Jehová, uva-nainu-edarbedga an gued. Bali-bali an-uva-nainu an oged. Melle dule ani oakalogega, mutikidbali, ibginedbali, an-nainu an edarbed.
ISA 27:4 An ese bar urwesulid. Ar amba ikomar uva-nainugi nikana, gagan-ikobimalad amba uva-nainugi nikana, an ebo ulusaled, an bela ogumaksaled.
ISA 27:5 Ar Israel-dulemar e-irwar gwisgubi an-abegele, anbo igar nudakergebed. Anbo igar nabogergebed.’
ISA 27:6 ”Yoo ibagan nonikoed, Jacob-wagan ambikunonikoed, Israel-dulemar gannar ainidagoed, nue-nasgumai gudagoed. E-ibmar-nuegan napneg-dirbirmakar-naidgi iirmakmai gudoed.
ISA 27:7 Ar igi Bab-Jehová dule-baigan-sabsur-imaksa, ¿deyobi Bab-Jehová Israel-dulemar-sabsur-imaksasi? Suli. Ar igi Bab-Jehová dule-baigan-ogilosgusa, ¿deyobi Bab-Jehová Israel-dulemar-ogilossi? Suli.
ISA 27:8 Ar Bab-Jehová e-dula-sabsur-odurdaksad, e-yalagi-bukwadgi onosad. Igi burwa-ued nega-dulesulidganba-gordae, deyobi, Bab-Jehová, Israel-dulemar-neggwebur-dikasurmaladse-odurdaklegega barmeted.
ISA 27:9 Jacob-wagan-e-isgued, weyob osulolenonikoed, e-isgued-osulolegegala, weyob imakmalargebed: Bela bab-dummagan-e-ailamar-bukwad obelomalargebed, we-ailamar, akwasib-ebillegeyob imakmalargebed. Deginbali, Jacob-wagan, bab-bundor-Asera-e-wilub bipisaale bar ogwissulirgebed, degine, bali ina-wawadikmalad-aila obukusulirgebed. Geb degidbali, Bab-Jehová, Jacob-wagan-e-isgued osulogoed.
ISA 27:10 ”Ar neggwebur-gandikid-siid bela oitoles siid, neg olloo mellesiid. Igi-nega-dulesulidganba dule sate, deyobi siid. Moli-bebe-nikad-senigwad-gagan-maed-negga guded, moli-bebe-nikad-senigwad-obunnoged-negga guded. Sapi-gaganmar bela ese bergued.
ISA 27:11 Geb sapi dingudele, e-anagan bibichiddaed. Geb omegan, sapanga aminonidamalad. Ar Israel-dulemar neg-gunaid nue-akusunna itomalad. A-ulale, e-Bab-Dummad-e-obinnisadi, we-dulemar-wiledaksulid, a-ulale, e-Bab-Dummad-e-obinnisadi, we-dulemarga igi-barsaye sogosulid.”
ISA 27:12 A-ibagangine, Bab-Jehová, Éufrates-diwar-suke-aryomaid-akale, degi, Egipto-dian-maidse dulemar-egwaoed. Ar bemar Israel-dule-gumaladdi, igi-dule-sapurgi-arbaed ibmar-gwag gagagwen weedae, deyob bemar war-wargwen welemaloed.
ISA 27:13 A-ibagangine, gar-trompeta-dummad gordagoed. Asiria-yalase, degi, Egipto-yalase, dulemar-galesa-selesgusadi, Jerusalén-Yala-Islidikidse Bab-Jehová-nug odummononimaloed.
ISA 28:1 Efraín-dule-mummugan san-dummarba-imakdimalad, ¡duledar-wilesmar! E-dummagan neba-nued-mullu-birgi dutu-dinnagana-bukwayobi gumalad. Dulemar-vinoʼse-ebipiledimalad, ¡be duledar-wilesmar!
ISA 28:2 Bab-Jehová dule-gwensak-yeer-gangued, be-idu amisad, dule-dutusulid be-idu amisad: We-dule, bela ise-urwedgi sabsur-be-imaknonikoed, we-dule, dii-gwamakar-wieyobi gangued, burwa-dummad-dule-obelogedyobi gangued, dii-burwaba-mesa-wiedyobi gangued, diwar-dummad-noedyobi gangued.
ISA 28:3 Efraín-dule-mummugan san-dummarba-imakdimalad, ¡duledar-wilesmar! Egi dii-dii annalegoed.
ISA 28:4 We-dutu e-gangued-yeerdaklegedi, neba-nued-mullugwagi-gwichidi, dingudoed. Igi higo-san-gorogwad gwallegoed-iduar dule bato daksayalaba, gwandae, degi, geb gundae, deyobi gumaloed.
ISA 28:5 A-ibagangine, Bab-Jehová-Bela-Gangued-Nikadi, e-dula-napi-ichee-bemaloedgala, ologurgin-yeerdaklegedga guoed, ibmar-yeerdakleged-bebegi-nagued-gandikidga guoed.
ISA 28:6 Bab-Dummadi, dule-igar-nabogedga igar-innikii-imaked-burba ukoed. Neggwebur-yawagakgi-nakulemaladga niga-ogannogoed.
ISA 28:7 Amba dule-irwa-Bab-Dummadse-gormaladi, degi, Bab-Dummad-gayaburba-barsogmaladi, vinoʼba bipirmakdemarmogad, inna-gagbid ebipiledimarmogad. Vinoʼba binsaedsuli nadmalad Inna-gagbid-gobedba yoledimalad. Negburgan-dakalile, wawanmakdedamalad, ibmar-sokarmalale, suli-suli-ito naddamalad.
ISA 28:8 Bela mesemar aged-sunnabi bukwad, gwen neg daarmakar naisulid, bela isgusnaid.
ISA 28:9 Deginbali, an-annik weyob sogmalad: “¿Ar wis doamar-odurdaknai itoge? ¿Doamarga Bab-Dummad-gayaburba-barsognai itoge? ¿Burwigan-gebe-mam-iargusayobi anmargi binsae?
ISA 28:10 ¿Burwigan-gebe-garda-absoged-durdaknaidyobi anmargi binsae? Gannar-gannar anmarga igar-mamaid sognaid, ise-sogar-ise-sogar we-igargi anmar-odurdaknaid. Nugmargi gwagwagwen-gwagwagwen anmar-odurdaknaid.”
ISA 28:11 Emigindi nabir, ar bemar Bab-Dummadba ibsasulile, Bab-Dummad bemarga gaya-baidba sunmakoed, a-gaya bemar aku itomaloed.
ISA 28:12 Bab-Dummad bemarga bato weyob sogsa gusad: “Wegine, neg-bogidikid-negad. Dule-yegusgudiid wegi obunnogoed.” Degi, sogsabalid: “We-neg, obunnoged-negad.” Degi-inigwele, bemar gwen itossurmalad.
ISA 28:13 Degisoggu, Bab-Jehová, burwigana-gebe-garda-absoalidga-sunmakedyob ega sunmakoed. Gannar-gannar ega igar-mamaid sognai guoed, ise-sogar-ise-sogar we-igargi amar-odurdaknai guoed. Nugmargi gwagwagwen-gwagwagwen amar-odurdaknai guoed. Amar nanadmalale, gebe-burwigan-nag-obialidyob gumaloed: Yarganba ailadmaloed, nailikgumaloed, gege bar gwisgue gumaloed.
ISA 28:14 Jerusalén-neggwebur-e-dummagan-bingedsulidamalad, Bab-Jehová-gayaburba be itomar.
ISA 28:15 Ar bemar weyob sogmalad: “Anmar burgwed-igarbo igar amisad, anmar burgwed-galubo igar amismalad. Boni-dummagan anmargi danikile, anmarse warmakosulid, ar ade, anmar-gakansaedi anmar napiragwadyobi daksad, anmar-emar-yardakedi anmar igar-nuediyobi daksad.”
ISA 28:16 A-ulale, Bab-Jehová-Bela-Gangued-Nika-Maid weyob soged: “¡Be dakmala! Ani an Sión-yalagi akwa-bur-nued-sulealed negsailaga mesisad. Akwa neg-gaega, akwa-nued an ebusad, adi, neg gandik sii guegar. Ar dule agi bensulile, suli-suli itogosulid.
ISA 28:17 Ar ade, we-neg-soblegoedi igar-napiragwad-wilubsaega an imakoed, igar-innikigwad-wilub-imakega an imakoed. Dii-gwamakar-wimaladi bela bemar-gakansaed-igar-napiragwadyob-imakdimalad obelogoed, diimala, bela bemar-neg-dukued odogoed.
ISA 28:18 Degidbali, bemar burgwed-igarbo-igar-mesisadi bar igarga-guosulid. Burgwed-galubo-igar-amismaladi bar gangued-nika guosulid. Boni-dummagan bemargi danikile, bela bemargi gwichigunonikoed.
ISA 28:19 Be-isdarmalad bemargi-gwichigued-ilibali, ese be bergudii guoed. Bane-bane, mutikidbali, ibginedbali, bemargi nanagwichi guoed.” Bonigan-daniye itoarmalale, bela-belad nue-dobe itodmaloed.
ISA 28:20 Gas-bipigwadgi-megeyob gumaloed, atued-bipigwadgi-atueyob gumaloed.
ISA 28:21 Bab-Jehová, Perazim-yalagi-ulusadyob, uludagoed. Gabaón-nebagi e-urwed-oyosadyob, oyodagoed. Bab-Dummad bato guagwarmaid, ukiarmakale, weyob-ibmar-imakdisulid imakoed.
ISA 28:22 Emigindi, bemar melle bar Bab-Jehováʼgi dodomalo, adi, melle bur bule be sabsur-odurdaklemalagar. Ar Dummad-Bab-Jehová-Bela-Gangued-Nikadi, bela neggweburmar-obelolegoedgi-sunmaksa an itosad.
ISA 28:23 Be itomar, nue be an-gayaburba itomar. Nue be bogi an-itomar, an-ibmar-soged be itomar:
ISA 28:24 Sapurgi-arbaed-dule, ibmar-digega napa imued. A-dule, ¿obunnosuli napa-imuedginbi alamakdii guode? Suli. ¿Unnila bane-bane napa-swaana, degi, gwisar-gwisar imaknai guode? Suli.
ISA 28:25 Ar bela napa guakwaa imaksale, ¿gagan-wawagan-gwag-eneldoʼye-nugad mie-mie imakdasursi? ¿Ibmar-gwag-cominoʼye-nugad digdasursi? Geb a-sorba, ¿ilekwaa-orosgi-dakleged-trigo digdasursi? ¿Orosgisaar-dakleged-cebada digdasursi? ¿Nainu-gakabali orosgi-saardakleged-centenoʼye-nugad digdasursi? Eye, deyob imakdado.
ISA 28:26 Ar ade, Bab-Dummad weyob ibmar-imakega dule-odurdaked, igi dule ibmar imakoe, aba odurdaked.
ISA 28:27 Ar gagan-wawagan-eneldo-gwag, orosyob omukulesulid. Ibmar-gwag-cominoʼye-nugad-birgine, e-gwag-oniega ibmar-ukusulid obipirmaklesulid. Ar ade, gagan-wawagan-eneldo-e-gwagmar suar-bipigwadgi obateledaed, Ibmar-gwag-cominoʼye-nugad suar-nollogwadgi obateledaed.
ISA 28:28 Oros-gwagmar omukulenaile, sabsur-ubikwaa imaklesulid. Deginbali, ibmar-gwag naglenaidbi geg gued. E-birgine, ibmar-ukusulid-nanaega imakleged, ar molimardi, ibmar-gwagmar ubimaksulid.
ISA 28:29 We-binsaedi, bela Bab-Jehová-Bela-Gangued-Nikadgi danibalid. E-binsaed-dakedi, innikigwadid, e-binsaed-nikadaedi, sunsogedid.
ISA 29:1 Bab-Jehová sogdebalid: “Ariel-neggwebur, be nue-wilegoed. We-neggwebur, David-sorda-ambikusad-negad. Gatik birga-irba iba-onodii be nanamar.
ISA 29:2 Degi-inigwele, Ariel-dorgan, an begala bonigan onogoed. Ar ogormaksii be guoed, bukib-binsasii be guoed. Bela neggwebur soose ogumaklegoed, ibmar-ogumakar-ukleged-ailagi ibmar-ogumaklegeyob guoed.
ISA 29:3 An-sorda-bila-onomalad bela be-ebilis an urboed. Bela neggwebur-dikarbali, bila-onoged-galumar an emakoed, bila-onoged-aila an be-iduar soboed.
ISA 29:4 Mesagwar be imaklegoed, napagi mellemai be guoed. Be-ibmar-biedi wis-bollee-itolege guoed. Be-gayaburba galudor-sunmakedyob itolege guoed. Napayala be sunmakmaile, unnila wis bipi-bollee itolege guoed.”
ISA 29:5 Be-isdarmalad-ichesulidi, ukub-buruyob guoed. Dule-gandikmalad-bukidaradi, gagan-durgan-dinnagana burwaba seleddaedyobi, imaklegoed. Ukiarmakagwale, ilagwen-saale imaklegoed.
ISA 29:6 Bab-Jehová-Bela-Gangued-Nikadi, bese nonikoed. Mala-abalagi, negabandur-abalagi nonikoed. Neg-oimakagwaled-abalagi nonikoed, burwa-ololed-abalagi, burwa-dummad-abalagi nonikoed. Degine, soo-duurmakwichid-abalagi nonikoed.
ISA 29:7 Dula-bukidar-yar-baid-baidgi-bukmalad Ariel-neggweburgi-gwisgumaladi, bela e-neg-gandikmalad-ei-earbimaladi, bela neggwebur-ebirdimaladi, bela bergudmaloed. Boo-dadabin-berguddaeyobi, bergudmaloed.
ISA 29:8 Dula-bukidar-yar-baid-baidgi-bukmaladi, Sión-yalagi-bila-onomaladi, ukudba burgwidmaloed. Dule gabidele, na mas-gunsiiye gabdakdamaloed, gobsiiye gabdakdamaloed. Degi-inigwele, ataas-nadele, ukudmaada itodamaloed. Gammu dinare itodamaloed.
ISA 29:9 Bemar Bab-Dummad-gayaburba-barsogmalad, dule-binsaedsulidyob be gudii gumarsun. Dule-aku-atakedyob, ibmar-akudake be gudii gumarsun. Mummuyobi be aibandii gumarsun Inna-gagbid gobsabayobi be aibandii gumarsun.
ISA 29:10 Bab-Jehová bela-belad bar-ibmar-daksuli be-imaksad. Bab-Dummad-gayaburba-barsogmalad-ibe burbar-geg-ibmar-dake imaksad. Negburgan-dakmalad bar negburgan-daksuli imaksad.
ISA 29:11 Negburgan-bemarga-oyolegedi, garda-bipirmakaled-sakdigaleyobi guoed, be aku itomaloed. Ar dule-garda-wisidga, we-garda-bipirmakar-maid be uksale, ega be sogele: “Wis be anga absoye.” We-dule, be-abin weyob sokaliled: “An bega absogosurye. Ar ade, sakdigar maiddeeye.”
ISA 29:12 Ar dule-garda-wissulidga, we-garda-bipirmakar-maid be ukye sogele, ega be sogele: “Wis be anga absoye.” We-dule, be-abin weyob sokaliled: “An garda wissur-absoye.”
ISA 29:13 Bab-Jehová weyob Isaíasʼga sogded: “We-dulemar an-nug-odummoye soged. E-sunmakedgi an-nug-ogannoye soged. Degi-inigwele, unnila asginbi an-nug odummomalad. E-gwage-ulubgindi angi gwen binsasurmalad. An-dobee-nanaye-sogmaladi, ar gwen an-igar-maidba nanasurmalad. Unnila dulemar-igar-mamaidba nanamalad.
ISA 29:14 A-ulale, we-dulemar gannar ibmar-gegerdaklemalad-dakega an imakoed, geb geger dakdemaloed. E-dule-binsaed-ibegan e-binsaed-nikadi, an ei osulogoed, degi, e-dule-nue-ibmar-wismalad ibmar-wissulidga an imakoed.”
ISA 29:15 Dulemar Bab-Jehová-idu-dukumaloye-na-bimaladi, ¡be duledar-wilesmar! E-igar-dukuar-imakdimaladi, negsichigi igar-isgana-imakdimaladi, ¡be dule-wilesmar! Ar we-dulemar na binsadimalad: “¿Ar doa anmar-dakoe? ¿Doa anmar-wisguoe? Gwen dule anmar-dakosuli. Gwen dule anmar-wisguosuli.”
ISA 29:16 ¡Ibiyob be gakansadamala! ¿Ar dule-napsagi-arbaed, napsabo emarsi? Ar ibmar-soblesadde, dule-e-sobsadga sogosi: “Be an-sobsasuli.” Napsa-sobaled, sunna dule-napsagi-arbaedga sogosi: “Amba be ibmar wissuli.” Suli, gege deyob soged.
ISA 29:17 Líbano-yala emisgwasaale, napa-nuedga guoed, gadi-ibmar-sanmakedga guoed. Napa-gadi-ibmar-sanmakedi, sapurga naguoed.
ISA 29:18 A-ibagangine, uaya-satemaladi, dule ega garda-bipirmakar-maid absoalile, magar itodmaloed. Dule-ibyasurmaladi, magar atakdemaloed, negasichid bar ega naguosulid.
ISA 29:19 Dule-wilemaladi, gannar Bab-Jehováʼgi yeer-itodmaloed, dule-ibmar-abesa-gudimalad Israel-e-Bab-Jehová-Isligwaledgi weligwar-itodmaloed.
ISA 29:20 A-ibagangine, sabsur-dule-imakmaladi, dule-isgudimaladi, bela yoggudoed. Ibmar-isgana-saedginbi-binsadidamaladi, bela obelolegoed.
ISA 29:21 Yogabinne-dulegi-gakansaar-gwisgumaladi, dule-igar-nabomalad-yamoged-dulemala, degi, dule-e-bendaked-satedgi yamo-gakansaale-sunmakmaladi, bela obelolegoed.
ISA 29:22 A-ulale, Bab-Jehová Abraham-bendaksadi, weyob Jacob-waganga soged: “Emi-iba-onodoedgi, bemar Jacob-wagan bar bingedar itogosulid, dobedba bar niga-argwanosulid.
ISA 29:23 Israel-e-mimmigan bela e-dulemargi an-ibmar-imaksad magar daksamalale, bela an-nug-odummodmaloed, degi, bela Israel-dulemar Jacob-e-Bab-Dummad-Isligwaled-nug odummodmaloed. Israel-e-Bab-Dummadgine binsaed-nikaa gudmaloed.
ISA 29:24 Dulemar aku-neg-itodimalad, magar neg-itoge namaloed. Dule-geg-boo-gudidamaladi, an-igar-maid itodmaloed.”
ISA 30:1 Bab-Jehová weyob sogsad: “Bemar-uayasuli-damaladi, ¡be duledar-wilesmar! An-wissuli-igar-imakmaladi, an-ega-ibmar-sogsulidba ibmar-imakdimaladi, isguedginbi-nanadimaladi, ¡dule-wilesmar!
ISA 30:2 Anse-idaksuli Egipto-yalase igar amibukmalad. Faraónʼgi bendakleged-amiega ese naddamalad. Egipto-dulemargi bendakleged amibukmalad.
ISA 30:3 We-Faraón-be-bendakedi, be-bingeguega guoed Egipto-dulemargi be dukued-amiedi, nug-bipii be-imakoed.
ISA 30:4 Zoán-neggweburgi e-dummagan ega mamai-inigwele, Hanes-neggweburse e-garda-berbemalad mosa-inigwele, gwen bendakosurmalad.
ISA 30:5 Bela Israel-dulemala, neggwebur ega ibmar-nued-imaksulidba bingedar itodmaloed. Ar Egipto-dulemar wis gwen ega ibmar-nued imakosulid. Unnila we-dulemala, emar-obingegsaedginbi binsadimalad, dulemar-isdar-obelogedgi binsadimalad.”
ISA 30:6 Isaías sogdebalid: “Bab-Jehová weyob Neguev-e-ibmar-durgan-guoedgi sunmaksad: ‘Israel-dulemar, Egipto-yalase bela e-ibmar-nuegan, moli-uayasuidgi semamaid, bela e-manimar moli-yargan-muregedgi semamaid. Nega-dulesulidganba obakmamaid, ar ade, nega-bulegan naed, ar a-nega, achumigur-bulegan nika-naed, naibe-bulegan nika-naed, degi, naibe-gukuar-gukuar-nanamalad nika-naed.
ISA 30:7 Egipto-neggwebur gwen emar-bendakosulid. A-ulale, weyob an bied: Ibdula-ursiliye, gwen dule-oakalosulidye.’ ”
ISA 30:8 Bab-Dummad weyob Isaíasʼga sogdebalid: “Emisgwa be, we-ibmar dulemar-wagab narmak. Urgogi be narmakar-omeso, adi, ibagan-danikoed-idu degisadegu narmakar-oyomai guegar.”
ISA 30:9 Geb Isaías sogdebalid: “Ar we-dulemar uayasulidamalad, dule-isgana gumalad, Bab-Jehová-Igar-Maid itobisurmalad.
ISA 30:10 Emide, dulemar-yoedse-ibmar-guoed-sogedga sogdamalad: ‘Melle bar be negburgan-daked sogmarye.’ Bab-gayaburba-barsogmaladga sogdamarbalid: ‘Melle bar be anmarga Bab-Dummad-gayaburba-napiragwad sogmarye. Binsa nabir ibmar-nuegangi be anmarga sunmakmarye, binsa gakangi be anmarga sunmakmarye.’
ISA 30:11 Muchub-muchub sokarmalad: ‘Bab-Igargi be bangumar, melle Bab-Dummadba be ibsamar. Melle bar be anmarga Israel-dulemar-e-Bab-Dummad-Isligwaledgi sunmake.’ ”
ISA 30:12 A-ulale, Israel-dulemar-e-Bab-Dummad-Isligwaled weyob soged: “An-bemarga-ibmar-soged be itobisurmalad, mesagwar-gued bur be abemalad. Igar-isgana bur be itodmalad. Bur be we-igar-isganaba be akasmalad.
ISA 30:13 A-ulale, we-isguedi, bemargi gwichiguoed. Igi-galu-matusulid marar-gwichile, ukiagwar ailaddae, deyob bemargi isgued gwichigudagoed. Ukiagwale, ilagwensaale bemargi babatedagoed.
ISA 30:14 We-isguedi, napsa-bormo ise bela-belad goa-goa-mareyob guoed. Igi napsa-bormo bipisaale, gwen e-goa bar sogun-weega abelesurdae, igi bar diagi dii-weedga ebulesurdae, deyob we-isgued guoed.”
ISA 30:15 Ar weyob Bab-Jehová-Israel-dulemar-e-Bab-Dummad-Isligwaled soged: “Dule e-isguedga-bukib-binsaedgi bendaklegoed, nued-nanaedgi, bendaklegoed. Bargaagwar-gudiidgine, degi, angi-bensuli-nanaedgine, gannaleged siid. Ar degi-inigwele, bemar an-abesulid.
ISA 30:16 Ar bemardi weyob sogmalad: ‘Anmar moligi wakinmaloe.’ Degisoggu, deyob bemar wakinmalargebdo. Bemar weyob sogmarbalid: ‘Moli-gwae-gwae-abarmakedgi anmar wakinmaloe.’ Degi-inigwele, dule-be-baleginmaloedi, beba bur bule abarmake gumaloed.
ISA 30:17 Dule-gwensak-bemar-oburgwebied-asabinni, bemar-milibalidi (1,000), dobedba duurmakdemaloed. Dule-e-ataled-bemar-oburgwebied-asabinni, bela bemar, dobedba duurmakdemaloed. Igi yar-birgi suarbi ganna-gwisdae, deyobi be gumaloed. Igi-yar-mullugi ibmar-wilub gwisdae, deyobi bemar napi-bemaloed. Deyobi bela neg-olloo nadoed.”
ISA 30:18 Isaías sogdebalid: “Degi-inigwele, Bab-Jehová, wile-bemar-dakegala, bemar-abitomaid. Bemarga e-sabgued-nikadi, oyobied. Ar Bab-Dummad-Jehová, igar-innikigwad imakedid. Dule-Bab-Dummadgi-bensuli-gudimaladgi, nued binsalesad.”
ISA 30:19 Sión-dulemar Jerusalén-neggweburgi-mamaid, bipisaale, bar be boosurmalad. Bab-Dummad be-bendakega ese binnasuli be gornanaile, Bab-Dummad-dule-wiledakedi, wile be-dakoed. Be-itosayalabali, be-abinsaoed.
ISA 30:20 Ar Bab-Jehová igar-bulegan bemarga barmidago-inigwele, degi, wile-itoged-ibagan bemarga barmidago-inigwele, be-odurdaked-saila bar bemargi dukuosulid, bemar-sunnagwad be dakmaloed.
ISA 30:21 Ar be igar-noar aibatedibele, be-yarganbali dule bese-gole be itogoed, weyob bega soge be itogoed: “Noar be aibatemala, wesik igar-mai. Wesik be namala.”
ISA 30:22 Degisoggu, be-ibmar-sobarmalad-bab-dummadyob-imaklemalad-manibiidi, be-ibmar-wilubgan-orbimaladi, bela ibmar-isedyob be metemaloed. Be sogdemaloed: “Wegi-bukwad be nae.”
ISA 30:23 Degisoggu, be ibmar-gwag digele, Bab-Jehová bemarga dii barmidagoed. Ibmar sanmakdagogu, nue-sanmakoed, degi, yeer-gullemaladbi guoed. A-ibagangine, be moli-bebe-nikamalad nainu-dummagangine, gagan-madii gudoed.
ISA 30:24 Moli-bebe-nikad-alugwasuarmalad, degi, moli-uayasuigan be-nainugi-arbamaladi, gagan-nuegan bato egwaar-guagwar-bukwad-madii gumaloed.
ISA 30:25 Bab-Dummad be-isdarmalad-obeloged-ibagine, e-neg-suigan ayaridele, yala-matusurmaladbali, degi, bela yala-mulluganbali dianmar megidoed, diimar iirmakdoed.
ISA 30:26 A-ibagangine, Bab-Jehová bemar-nailikgusmalad bemarga nudakoed, ar bemar e-dulaga gumalad. Nii-gaedi, dad-ibeler-gaeyob mee gadoed, degi, dad-ibeler-e-gaedi, ilagugle-wilub bur bule mee-gaeyob (7) gadoed. Dad-ibeler-gwagugle-mee-ganaiyob (7) dad-ibeler gaoed.
ISA 30:27 Isaías sogdebalid: “Be dakmar, Bab-Jehová-sunnagwad bannaba-dikasuli danikid. E-urwedi, soo-gwabunye-gwichidyobi, waa-bupurmakgwichiyob danikid. E-gaya, degi, e-gwabin-duku, soo-ginnitibi-gwichiyobi dakleged.
ISA 30:28 Bab-Dummad-e-ibmar-sogedi, diwar-nollosur-uurmakmaid-neg-odogeyob gued. Bab-Dummadi, dulemar-yar-baid-baidgi-bukmalad-oros-omukueyobi-imakega danikid, adi, bela obelogega danikid. Moli-gaya-bargaed-yoiyobi dulemar imaksad, adi, igar-baidsig sedegar, adi, yoggumalagar.
ISA 30:29 Ar bemardi, Islidikid-Iba-onolegedgi-namaklegedyob namakdemaloed, gwage-ulubgi, be weligwar-itodmaloed. Igi dule, Bab-Jehová-yalase-nadapile, Bab-Jehová-Israelʼga-akwasailayobi-guedse-nadapile, gar-gammu ogornadapdae, deyobi bemar itomaloed.
ISA 30:30 ”Bab-Jehová, e-gayaburba-gandikid-itomalaga dulemar-imakoed. Bemarga e-gangued weyob oyogoed: Soo-ginnitibi gwichigudoed, malamar aidedoed, diimar suamakdoed, dii-gwamakarmaladi babatidagoed.
ISA 30:31 Bab-Jehová e-gayaburbaba, Asiria-yala obelogoed. E-ganguedba obelogoed.
ISA 30:32 Bab-Jehová we-dulemar-sabsur-odurdaked-ilibali, gar-panderoʼmar gotoed, degi, gar-arpaʼmar gotoed. Bab-Jehová Asiria-dulemarbo-urwenaile, e-sakwa minaidbioed.
ISA 30:33 Ar Bab-Jehová, Asiria-dulemarga, degi, e-reyga, sabsur-odurdakleged-neg bato dikasurgus guagwar sisad. Yaa-dummad-matusulid-yabali soo-duurmaked sobsad, degi, sapanmar-ichesuli urbisad. Bab-Jehová soogi buu imakdogu, soo-azufre-gwabunye-gwichiyobi, gadoed.”
ISA 31:1 Isaías weyob sogded: “Egipto-dulemarse-bendakleged-amibukmaladi, ¡duledar-wilesmar! Egipto-molimargi-bensurmaladi, degi, e-moli-ur-bila-onomalad-bukidar-nikadgi-bensurmaladi, ¡duledar-wilesmar! E-sorda-bila-onomalad-ganguedgi bensurmaladi, ¡duledar-wilesmar! Ar Israel-dulemar-e-Bab-Dummad-Isligwaleddi baisur-dakmalad, ar Bab-Jehová-amiedgindi gwen binsasurmalad.
ISA 31:2 Degi-inigwele, dule Bab-Dummad yamogosulid, ar ade, dule-binsaed-ibed maid. Boni-dummagan barmidagoed, ar ibmar-sogsale, sogedba imakedsedaed. Bab-Dummadi, dule-isganamar-e-neguyagi gwichiguoed, dule-ibmar-isgana-imakmalad-bendakdamaladgi gwichiguoed.
ISA 31:3 Ar Egipto-dulemardi, unnila dule gumalad, Bab-Dummadsurmalad. E-molimala, sanakwaa gumalad, burbarsurmalad. Ar Bab-Jehová, e-ganguedba dulemar-sabsur-odurdakdele, dule-isgana-bendakmalad-obelogoed, ese-bendaklesmarmogad-obelobaloed, bela ebobela bergumaloed.”
ISA 31:4 Bab-Jehová weyob anga sogsad: “Igi achumigur-nono-wawaad sibad-wawaad-gasa-uurmaknaile, dule-sibad-edarbemalad ese urwed itodasuli, degi, igi-achumigur-nono-wawaad-senigwad mas-gasa-uurmaknaile, dulemar ogwayenaile, gwen dobdasuli, deyobi, ani an-Bela-Gangued-Nikadi, Sión-yalabina-urwega, e-yar-mulluganbina-urwega, an aidenonikoed.
ISA 31:5 Igi-nuumar e-mimmigan uugi-bukwale, edarbesidae, deyobi, ani Bab-Jehová-Bela-Gangued-Nikadi, Jerusalén-dulemar-edarbemogoed, dule-isganamargi ollorsaoed, e-ular gwisguoed, bendakoed.”
ISA 31:6 Israel-dulemar, ar doagi bemar dummad-nosmala, ase be gannar namarsun.
ISA 31:7 A-ibagangine, bemar war-wargwen, bab-dummadyob-imaklemalad-manigi-sobaled, degine, orbi-sobaled, be metemaloed. Bab-Dummadgi-yolediidba bemar-sunnagwad be sobsagusmalad.
ISA 31:8 Bab-Jehová weyob soged: “A-ibagine, Asiria-dulemar es-suidgi burgwemaloed, degi-inigwele, dulemar imakosulid. Es-suidgi-wakinnegala, duurmakdemaloed. E-sapingan-bila-onomaladdi, maiga imaklemaloed.
ISA 31:9 E-rey bela-belad nue-dobe itodoed, e-dummagana e-bander-ies wakitemaloed.” Bato guagwar Sión-yalagi Bab-Jehová-e-soo gasiid, Jerusalén-neggweburgi soo-yaa-matusulid bato dule-isdarmalad-idu guagwar siid.
ISA 32:1 Be dakmar. Rey-wargwen innikigwadba yar-seoed, degi, dummagan-neggwebur-semaladi, napiragwadba negsemaloed.
ISA 32:2 Dummagan-neggwebur-semaladi, burwa-irwa dulemar-odukueyobi, dulemarga gumaloed. Burwa-dummagan-noed-irwa dulemar-odukueyobi, ega gumaloed. Neg-dinnagwadba dian-maidaeyobi, ega gumaloed. Nega-dulesulidganba akwa-dummad-negsichi-imaksidaeyobi, ega gumaloed.
ISA 32:3 Bela-belad nue-nakuledii gumaloed, nue-bogimakar dulemar-sunmaked-itodii gumaloed.
ISA 32:4 Nue-itoakwaa ibmar-imake gumaloed. Nuekwa-sunmake, magar-nue-neg-itoge gumaloed.
ISA 32:5 Dulemala, dule-binsaedsulidaed dule-nuga-nikadye bar biosurmalad. Gadi-dule-yamogedi, sae-dakledoed.
ISA 32:6 Ar dule-binsaedsulidaedi, binsaedsuli sunmaked, yogasaar sunmaked. Igar-isganaginbi binsadidaed, igar-isganabi imakdidaed. Bab-Jehováʼgi gakansaar sunmakdidaed. Dule-masgunbigudiid ogunbidasulid, dule-ukudmaada-itodiid ogobbidasulid.
ISA 32:7 Gadi-dule-yamogedi, dule-yamogedgi alamakdidaed, igar-isgana-imakedgi alamakdidaed, e-gakansaedgi dule-wilemalad-wiodidaed. Dule-gakansaedi, dule-ibmarbina-sogdiid ega igar-naboye-gordidamaladga, gakansadidaed.
ISA 32:8 Ar dule-nuga-nikaddi, degisulid. Igar-nueganbi imakdidaed, e-igar-nuegan-imakedba e-nug dunguoed.
ISA 32:9 Omegan-gwen-bai-itosurmalad, ¡be nue an-itomar! Bunamala-gwen-bai-binsadisurmalad, an bemarga-ibmar-sogoedi nue bogimakar be an-itomalo.
ISA 32:10 Emide, bemar bela nueganbi-bukwa daklemalad, birgagwensega bemar, dobedba-wawanmakdemaloed. Ar ade, uva-sanmar bar welegosulid, ibmar-gwagmar bar welegosulid.
ISA 32:11 Omegan-gwen-bai-itosurmalad, ¡be nue dobee itomarsun! Bemar-baisur-itodimalad, ¡dobedba be wawanmakmarsun! We-mor be yoimalad esumarsun, wile-itoged-mor be yomarsun.
ISA 32:12 Nainu-yeerdaklege-naidga, degi, uva-nainu-nuegan-naidga, be bukib-itogedba binasgar be bibyomarsun.
ISA 32:13 Degine, an-dulamar-e-yar ikomar-yaisulidga gudoed, gagan-ikobimalad-yaisulidga gudoed. Deginbali, bela neg-yagi weligwar-gudimaladga, neggweburgi ibabi-dakdimaladga be wile-itomarsun.
ISA 32:14 Ar reynegmar olloo melledoed, dulemar-neggwebur bela olloo sigoed. Reyneg, degi, neg-gandikmalad, akwa-dummagan-ollogan-bukwayobi degisadegu bukuoed. Sapur-moli-uayasuid-obunnoged-negga guoed, sibadmar-mas-maed-negga guoed.
ISA 32:15 Geb Bab-Dummad-Burba anmargi aidenonikoed, nega-dulesulidi, napa-nuedga gudoed, napa-nuedi, nainu-nued-daklege nadoed.
ISA 32:16 Degisoggu, bela neggweburmar-ilibali, igar-napiramalad, degi, igar-innikimalad oyolemai guoed.
ISA 32:17 Igar-napiragwadi, bega gwage-bogidikid ukoed. Baisur-itoge be-imakoed, degisadegu dobsuli-nanadii be-imakoed.
ISA 32:18 An-dulamar neg-bogidikidgi-gudii gumaloed, nega-nuedgi-mamai gumaloed, neg-boo-itolegedgi-obunnomamai gumaloed.
ISA 32:19 Ar amba sapurdi egi dii-gwamakaled babatidoed-inigwele, bela neggwebur ibitogoed-inigwele, bemargindi nued binsalemarsun.
ISA 32:20 Bemar, dii-gakanaba-ibmar-digmaladi, moli-bebe-nikad-alugwasualed-esikar-imakdimaladi, degi, moli-uayasuid-esikar-imakdimaladi, bemargindi nued binsalemarsun.
ISA 33:1 Asiria-dulemar-dule-wiodimalad, gwen be wioledisulidi, ¡be duledar-wilesmar! Asiria-dulemar-dule-yamodimaladi, gwen be yamoledisulidi, ¡be dule-wilesmar! Be dulemar-obelosale, be bergumarmogoed. Be dulemar-yamosale, be yamolemarmogoed.
ISA 33:2 Bab-Jehováʼye, wile be anmar-dake. Ar anmar begi bendakleged edarbediid. Bane-bane wakudaryalabali, anmarga be niga-ogannoged. Suli-suli-itoged-ibagine, anmar-abonogega be gued.
ISA 33:3 Be-gayaburba mala-goledyob-goledbali, dulemar gwakiar duurmakdedamalad. Be-gangued be oyodele, dulemar-yar-baid-baidgi-bukmalad aisakiddamalad.
ISA 33:4 We-dulemar-e-ibmar-nikadgi, e-isdarmalad ses-burwigana-bateyobi egi nonimaloed. E-ibe bela ibmar-nuegan sunonimaloed.
ISA 33:5 Bab-Jehová-e-nug odummolegoed, ar nibneggi negdakmaid. Bab-Jehová, igar-innikigwad-imakega Sión-yala-imakmaid, emarga-ibmar-nabir-guega imakmaid.
ISA 33:6 Bab-Dummadi, dobsuli-gudiguega anmar-imaked. E-binsaed-nikadaed, degi, bela e-ibmar-wisid, bela-bela bendakleged anmarga uksad. Bab-Jehová-dobee-nanaedi, anmarga ibmar-nuedga gued.
ISA 33:7 Be nue dule-gandikmalad-gordidiid itomar, ibiyobi neg-galimbaba binnasuli oimakdemala. Neg-bogidik-saedgi-sunmakdimaladi, bela-belad ogormakdemalad.
ISA 33:8 Dulemar bar igarba daklesulid, igar-ollo maid, dulemar bar igarba iirmaksulid. Na-ebo-igar-mesismaladi bichismalad. Dulemar, dule-we-igar-maid-wismalad isdar dakdemalad. Dulemargi bar binsaed-nika dasurmalad.
ISA 33:9 Bela dulemar bukib-binsaedbimalad, Líbano-yala bela dinguded, e-dakleged bela yogguded. Sarón-neba bela nega-dulesulidga naded. Basán-yala, degi, Carmelo-yala, e-yeer-ara-ara-dakleged yogguded.
ISA 33:10 Bab-Jehová weyob soged: “Emisgindi, an ibmar imakgwersunno. Emisgindi, an-nug odummolesunnoed, emisgindi, an-nug ogannolesunnoed.
ISA 33:11 Asiria-dulemar igar-amimaladi, unnila e-igarmar binsaledga gued, igarmar-isganaga gued. Ar an buu imakdogua, bergudoed.
ISA 33:12 E-sorda-bila-onomaladi, ikomar-sooyagi-gummaknaidyobi, gumaloed. Bela burubi gumaloed.
ISA 33:13 ”Bemar, dikasuli-bukwamalad, an ibmar-imaksad, be nue itomar. Bemar, itaka-bukmalad, an-gangued be dakmar.
ISA 33:14 Dule-isgumalad Sión-yalagi dobe itobukmalad. Dule-isganamar dobedba wawanmakbukmalad. Weyob sogbukwamalad: ‘¿Doa-anmar, soo-dule-obeloged-nagaba megoe? ¿Doa-anmar, soo-dummad-gege-bergued-duurmaksiid-nagaba megoe?’
ISA 33:15 Unnila dule-igar-innikigwadba-nanadiidbi, degi, napiragwadba-sunmakdiidbi, nibneggi mai guoed. Dule ibmar-isganagi-mani-onodisulidbi, dule emarse-manigi-bakledisulidbi, nibneggi mai guoed. Dule emar-gindakmaladba ibsadisulidbi, ibmar-isgana-imakleged dakbidasulidbi,
ISA 33:16 dule-weyob-daedi, nibneggi mai guoed. Akwasaila-gandikmalad e-dukued-negga guoed, masgullemalad ega uklegoed, gobed ega gwen surguosulid.”
ISA 33:17 Isaías, Israel-dulemarga sogdebalid: “Bemar-sunnagwad, rey-e-gangued-yeerdaklegoed be dakmaloed, bemar-yala dungumai be dakmarbaloed.
ISA 33:18 Bemar dobee-itosadgi-binsadmardibe, na be sogdemaloed: ‘¿Bia wede mani-ebisged nade? ¿Bia wede mani-daked nade? ¿Bia wede nakuleged-neg-matusurmalad-dakdiid nade?’
ISA 33:19 Bar be we-dulemar-isgana dakosurmalad. We-dulemar, e-gwabinduku-aku-itolemaladid, e-sunmakedi, magar-itolesurmaladid, ber oburagwar sunmakmaladid.
ISA 33:20 ”Sión-yala be dakmar, ar a, anmar-ibamar-onoged-neggweburad. Bemar-sunnagwad Jerusalén-neggwebur be dakmaloed. A-neggwebur, bogi-meged-negad, nuesaale sobar siid. Bipisaale e-abgamalad-suar ungosulid, e-abgamalad-dubmar itirosurbalid.
ISA 33:21 Jerusalénʼgi, Bab-Jehová anmarga e-gangued oyogoed. Diwar-dummagan-maiyob, degi, diimar-iirmakmaiyob guoed. Ar a-diwargine, ur-gammi-nikamalad iirmakosulid, degine, ur-gandikmalad egine iirmakosulid.
ISA 33:22 Ar ade, Bab-Jehová, anmar-idugedid. Ar Bab-Jehová, anmarga dummadga negdakmaidid. Ar Bab-Jehová, anmar-e-reyd. ¡E na anmar-abonogoedid!
ISA 33:23 ”Asiria-ulumar-e-dub nollomakded. E-urmor-buar geg-nue-gwisgue egemakwichid, degine, e-urmormar geg argaed. E-isdarmaladi, degi, dule-muya-muyamaladse-bakale, ei ibmar atursamaloed.
ISA 33:24 Ar Bab-Dummad bela dulemar-Siónʼgi-mamaid-e-isgued osulogoed, degine, bipisaale dule-gwensak sogosulid: ‘An uelleye.’ ”
ISA 34:1 Dulemar-yar-baid-baidgi-bukmalad, gayaburba-itogega wese be walikgudamar. Dulamar, nue-bogimakar be itomar. Napneg-naid, nue itogo. Bela-egi-ibmar-bukwamalad, nue-itomarmogo. Napneg-bipirmaknaidgi-bukmalad, bela itomogo. Bela-napneggi-ibmar-sanmakedi, nue-itomarmogo.
ISA 34:2 Bab-Jehová, dulemar-yar-baid-baidgi-bukmaladse bela urwemaid. Amar-sorda-bila-onomaladse bela urwemaid. Bab-Dummad, bela bemar-obeloged sogmaid, bela bemar-ogiloged sogmaid.
ISA 34:3 Dule-girgumaloedi, bela omiledoed, e-muimar nunusaila yapatoed, e-ablismar yalaganba suurmakdoed.
ISA 34:4 Niismar-mogir-imbaba-nanaid bar daklegosulid, bela mogir atudoed. Igi garda obipirmakledae, mogir deyob guoed. Bela niismar-e-dakarmakmalad berguoed. Uva-sapi-gagan-dinguddaedyobi, dakle naoed. Higuera-sapigi e-san-dingusnai-daedyobi, dakle naoed.
ISA 34:5 Bab-Jehová weyob sogye: “Bato mogir-imbaba, an-es-suid guagwar naid. Be dakmalana, Edom-dulemargi es-suid igi-gwichigudani be dake, ar an we-dulemar bela ogilogoye sogsad.”
ISA 34:6 Bab-Jehová-e-es-suid bela ablisbi naid, sibad-omemar-ablisgi obagwar naid, sibad-wawaad-senigana-ablisgi obagwar naid. Bela e-es-suidgi e-gwallu darwagwar magaled. Sibad-wawaad-machered-mirwa-gwallugi darwagwar magaled. Ar Bab-Jehová, Edom-yargi Bosra-neggweburgi ibmar-durgan oburgwenaid. Edom-yalagi ibmar-durgan yeer ogilonaid.
ISA 34:7 Moli-bebe-nikad-ursirmalad egi gwichigudmaloed. Moli-bebe-nikad-sapingana, degi, moli-bebe-nikad-machergan egi gwichigudmaloed. Edom-yalagi ablisbi bipirmaknai guoed, e-napagi, e-gwallumarbi neg-ganai guoed.
ISA 34:8 Ar ade, Bab-Jehováʼga buged-imaked-iba gued, buged-saed-birga gued, adi, Sión-yala bendaklegegar.
ISA 34:9 Edom-yar-e-dianmala baryaga binnidoed, e-ukub, azufreʼyob uediki naguoed, barya-uedikidyobi diopisuli napa naguoed.
ISA 34:10 Bane-bane barya uediki-ganaidbi guoed, gwen akinnosulid, e-waa bupurmagwichidbi guoed. E-yala degisadegu ollobi-nai guoed, bipisaale, bar dulemar egi iirmakosurmalad.
ISA 34:11 Noomargii-daklemalad egi neg-egwannoed, akwanuku-negga gudoed. Egine, irmonmar e-uu sobdoed, degi, sikwisichimar e-uu urbidoed. Bab-Dummadi we-yala bela gagaoed, degi, walagwen-ollobi-selenai imakoed.
ISA 34:12 Dule-nuga-nikamalad-sate guoed, yalaye bar bilegosulid. Bela dule-gandikmalad bar daklegosulid.
ISA 34:13 E-reynegmargine ikomarbi bipirmakdoed, e-neg-gandikmaladgi dakemar-sunnabi bipirmakdoed, degi, gagan-iko-ikomaladbi engudoed. Achu-sapur-uaya-gannagana-e-negga gudoed, nuu-dummad-malisuigan-megega gudoed.
ISA 34:14 Nega-dulesulidganba ibmar-durgan-ursilimalad-bukwadi, achu-sapurmarbo atodoed. Sibad-sapurmar, e-sordaganse gotemaloed. Irmon agi ambikumarmogoed, a-neggine signonimaloed.
ISA 34:15 A-neggine, irmonmar e-uu soboed, degi, e-akwamar urbidoed. E-sakan-urbali, nuekwa e-akwamar urboed, nuekwa e-mimmigan akoed. Agine, mulamar ambikumogoed, abirgunar-abirgunar ambikumogoed.
ISA 34:16 Bab-Jehová-gardase be idako, agi be nue-absogo: “Bipisaale we-ibmar-durgan gwen beosulid, abirgin-abirgin egad-egad nikamaloed. Ar Bab-Jehová-sunnagwad igar weyob uksad, Bab-Dummad-Burba weyob oambikusad.
ISA 34:17 Ar Bab-Dummad ega negmar amisad, ega yala uksad. Degisadegu, wemar we-yalagi bukwa gumaloed, degisadegu, egi gudii gumaloed.”
ISA 35:1 Nega-dulesulid weligwale itodoed, napa-dinnagwad weligwale itodoed, nega-dulesulidgi gagan ainidoed, dutu-achunnedyob dakledoed.
ISA 35:2 Bela nega-dulesulid weligwar itodoed. Ar Bab-Dummadi nega-dulesulidga Líbano-yalayobi neg-dakle imakoed. Degi, igi Carmelo-yala daklege, deyobi, neg-dakle ega imakoed. Igi Sarón-neba yeerdaklege, deyobi, neg-dakle ega nasikoed. Ar Bab-Jehová-e-gangued-yeerdakleged dakmaloed. Anmar-Bab-Dummad-e-gangued bela dakmaloed.
ISA 35:3 Dule-argan-nollo-itomalad, be ogannomarsun. Yokor-wanwanmalad, be ogannomarsun.
ISA 35:4 Dule-dobeganaga weyob be sogmar: “Gandik be samala, melle be dobgumar. Be-Bab-Dummad danikoed, bemarga buged-imakega danikoed. Bab-Dummad-sunnagwad bemar-bendaknonikoed.”
ISA 35:5 Geb degine, dulemar-aku-atakmalad magar atakdemaloed, dule-uaya-yallirmalad magar dule-itoge gumaloed.
ISA 35:6 Geb deginbali, dule-muya-muyamalad, goe-sapuryob ichomake gumaloed. Dule-geg-sunmakmalad, weligwaledba binnasuli gotemaloed. Ar nega-dulesulidganba diimar suurmakdoed, nega-dinnaganba diimar aryodagoed.
ISA 35:7 Napa-dinnagana dii egi sigega an imakoed. Neg-dinnagana-naigusadgi, ibe makumakar aryogwichioed. Achu-sapur-uaya-gannagan e-negga-gusadgi, nargammugi-daklemaladbi guoed, degi, naiwargi-daklemalad-negga guoed.
ISA 35:8 Agine, igar-dummadsaar mai guoed. A-igar, Igar-Islidikidye bilegoed. Dule-isgudimalad egi gwen nanaosulid. Dulemar-uaya-satedamalad egi gwen iirmakosurmogad. Unnila dulemar we-Igarbarbi-nanadimaladbi egi nanamaloed.
ISA 35:9 Bipisaale, agi achumigur-nono-wawaad gwen nika-guosulid, ibmar-durgan-dulegi-aibined ese gwen nonikosurmogad. Ibmar-degimalad gwen daklegosulid, unnila dulemar-bendaklesmaladbi iirmakmai guoed.
ISA 35:10 Bab-Jehováʼgi dulemar-bendaklesmaladbi, gannar Sión-yalase yeer-itogedgi dognonimaloed. Weligwale itodmaloed, yeer itodmaloed. Bukib-binsaedi egi yoggudoed, wiles-itogedi egi yoggudbaloed. Bela weligwaledbi itodmaloed.
ISA 36:1 Rey-Ezequías birgambe-gakabakegus (14) Judá-yalagi negsemaidgi, Asiria-e-rey-Senaquerib bela Judá-neggweburmar-sakdigar-bukmaladgi gwisgunonikid. Geb bela, Senaquerib, a-neggweburmar sunonikid.
ISA 36:2 Asiria-e-rey-Senaquerib, Laquis-neggwebur-akale, sordamar-e-dummadi, sorda-bukidaradmala, Jerusalén-neggweburse Rey-Ezequíasʼbo sunmaknaega, barmisad. Jerusalén-neggwebur-mosmargu, Morsan-Odoleged-Neg-siid-igarba Nakwale-Dian-Maid-e-gammu-yoid-nagaba ambikudapmalad.
ISA 36:3 Agine, Rey-Ezequías-neg-dakdiid-Eliaquim, Asiria-sorda-bukmaladse nonigusad. Degi, neg-gusmalad-narmaked-Sebna, degine, rey-sikwi-Joa, eba nonigusmarmogad. Eliaquimʼde, Hilcías-machid. Rey-sikwi-Joaʼdi, Asaf-machid.
ISA 36:4 Degi, Asiria-sordamar-e-dummad amarga sogded: —Rey-Ezequíasʼga be sogmalo, weyob Asiria-dulemar-e-rey-gandik-maid sogye: ‘¿Ar doagi be nue-bensurye be soge?
ISA 36:5 Bede soged, binsaed an nue-nikaye, sorda-bila-onomalad an nue-nikabarye. Ar unnila binsa gayaginbi be ee gordiid. ¿Ar be doagi-bensurye be soge, emide be anba ibmar imakbisulid?
ISA 36:6 An be-dakedi, Egipto-yar gaapoled-masar-darga-darga-daklegedyobidgi be bensuli an be-dakdo. Ar dule, aba-naile, sunna e-argangi e-darga-dargadgi makleged. Ar we-masar, Egipto-dulemar-e-rey-Faraón gued. Bela-dulemar-egi-bensurmaladga deyob ega gued.
ISA 36:7 Be anga sogele: An-Bab-Dummad-Jehováʼgi an bensurye. Ar degitega, e-neg-matusurmalad, e-ibmar-ogumakar-ukleged-ailamar, Ezequíasʼde obelossursi. Judáʼginmaladga, degi, Jerusalénʼginmaladga sogsasursi: ¿Unnila we-neg-matusulid-Jerusalén-neggweburgi-siidginbi Bab-Dummad-Jehová-nug-odummomaloye?’
ISA 36:8 ”Emisgwa, an bega sogo, an-dummad-Asiria-e-rey-ebo be igar-omes: Dule-moligi-nanamalad be amiele, an bega molimar milibo (2,000) ukoed.
ISA 36:9 Degi-inigwele, an-sorda-dummadsulid be osikirmakosulid. Ar bede, Egipto bega, e-moli-urmar, degi, bega e-sorda-moligi-sii-urwemalad, ukoye be soged.
ISA 36:10 Ar andega wese, ¿Bab-Jehová-sogedba bemar-obelogega danisur be an-dake? Eye, Ar Bab-Jehová anga sogsad: ‘We-yarse be naoye, be we-yar obelogoye.’ ”
ISA 36:11 Degine, Eliaquim, Sebna, degi, Joa, weyob Asiria-sordamar-e-dummad-abin sogdemalad: —Be-maimarga wis Arameo-gayaba be sunmake, ar anmar mag-itomalad. Mer anmarga Hebreo-gayaba be sunmake, ar dulemar galu-matusulidgi-bukmalad anmar-itobukwad.
ISA 36:12 Asiria-sordamar-e-dummad ega sogded: —Ar an-dummadde, ¿unnila bemargarbi ibmar-sogega an-barmiarsi? ¿Be-dummadgarbi ibmar-sogega an-barmiarbarsi? ¿Ar dulemar-galu-matusulidgi-bukmaladga-sogega an-barmiarbarsursi? Ar bemaryobi, we-dulemarde dukin e-ibmar-isgana na gunmaloed, dukin e-winsus na gobmaloed.
ISA 36:13 Geb degine, sordamar-e-dummad gwichibin-imaksad, geb binnasuli Hebreo-gayaba goted: —Asiria-e-rey-gandik-maid-e-gayaburba be itomar.
ISA 36:14 Weyob rey soged: ‘Melle Ezequíasʼse yamolemalo. Ezequías amba angi naosulid, anse oitolegoed.
ISA 36:15 Ezequías bemarga sokardibe: Bab-Jehováʼgi mer be bengumarye, Bab-Jehová anmar-bendakoye. Asiria-e-rey we-neggwebur obelogosurye. Melle be Ezequías-itomalo.’
ISA 36:16 ”Ar weyob Asiria-e-rey soged: ‘Anbo igar nabomar, anse be dagmar. Geb bemar gannar be-nainumargi uva-naid be gundii gumaloed, higuera-sapi-e-san be gundii gumarbaloed. Degine, bemar be-diagi na be dii-gobdii gumaloed.
ISA 36:17 Geb sorba, bemargadyob-yar-daklegedse an bemar-nidoed, orosgi-dakleged-yalase an bemar-nidoed, vino-yalase, madu-yalase, degi, uvaʼmar-nainu-yalase, an bemar-nidoed.
ISA 36:18 ” ’Melle be Ezequías-itomalo, ar yamo bemar-yamogoed, bemarga sogdagoed: Bab-Jehová anmar-bendakoye. ¿Ar yar-bamalad-e-bab-dummagande, Asiria-e-rey-annik bemarga yar-susa be daksi?
ISA 36:19 Ar Hamat-e-bab-dummadi, Arfad-e-bab-dummadi, Sefarvaim-e-bab-dummadi, Hena-e-bab-dummadi, gwen Samaria-neggwebur angi sussurmalad.
ISA 36:20 Degite, ¿bitid-yar-bamalad-e-bab-dummagan bemar-yar-angi-suega angi obicha be dake? Ar degitega, ¿igi-Bab-Jehováʼde Jerusalén-neggwebur-bendakoye be binsasunna? Bendakosuli.’ ”
ISA 36:21 Degine, dulemar, abin boo bukusad, bipisaale gwen-abin-imaksasurmalad, ar ade, Rey-Ezequías ega weyob igar-uksad: “Melle abin-imakmaloye.”
ISA 36:22 Geb degine, reyneg-dakdiid-Eliaquim Hilcías-e-machi, degi, ibmar-gusmalad-narmaked-Sebna, degine, reyga-garda-narmaked-Asaf-machi-Joa mor-dubamakagwale Rey-Ezequíasʼse nadmalad, adi, oyogega, ede bukib-binsamarye. Geb bela Asiria-sordamar-e-dummad-ega-ibmar-sogsad, Rey-Ezequíasʼga sogdapmalad.
ISA 37:1 Rey-Ezequías deyob ibmar-itosgua, e-mor-yoid siir-siir imaksad. Geb wile-itoged-mor yosad. Geb Bab-Jehováʼse-goled-negse naded.
ISA 37:2 Degi geb Rey-Ezequías, dummad-reyneg-dakdiid-Eliaquim, degi, ibmar-gusad-narmaked-Sebna, degine, dule-irwa-Bab-Dummadse-gormalad-sergan wile-itoged-mor-yoyoi, Amoz-machi-Isaías-daknamalaga barmisad. Isaíasʼde, Bab-Dummad-gayaburba-barsogedid.
ISA 37:3 Isaíasʼga sognonimalad: “Weyob Rey-Ezequías soged: ‘Emi-iba-naidi, suli-suli-itoged-iba naid, sabsur-odurdakleged-iba naid, degine, bingegued-dummad-iba naid. Igi ome muu-neggi-nagudele, na abagan-nollo-naddae, deyob emi-iba naid.
ISA 37:4 ” ’Bitigine, be-Bab-Dummad-Jehová, Asiria-sordamar-e-dummad-ibmar-sogsadi, bela itosana gadin. Ar ade, Asiria-e-rey, e-sorda-dummad, Bab-Dummad-Dula-Maidgi-dodoar-sunmakega barmiar gusad. ” ’Bitigine, be-Bab-Dummad-Jehová, we-dule-gayaburba-itosadba sabsur-odurdaksunnana gadin. Bab-Dummadse Israel-dulemar-napi-gudimaladga be gorsun.’ ”
ISA 37:5 Rey-Ezequías-e-dummagan Isaíasʼse nadmargu,
ISA 37:6 Isaías ega sokalid: “Weyob be-dummadga be sogmalo: ‘Bab-Jehová weyob sogye: Be we-dule-ibmar-soge-itosadgine, Asiria-e-rey-e-dummagan angi ise-yolegar-sunmaksadgine, mer be gwayo.
ISA 37:7 ¡Be dako! Senaquerib gayaburba-isgana-itogega an imakoed. Geb gannar e-yarse naoed. Geb e-yargi, es-suidgi oburgwemalaga an imakoed.’ ”
ISA 37:8 Asiria-sordamar-e-dummadi, Asiria-e-rey, Laquis-neggweburgi-mai-nadye-wisguargu, balimakde gusad. Libna-neggwebur-ebo bila-ononai Asiria-e-rey-dakdapid.
ISA 37:9 Geb agine, Rey-Senaquerib wisgualid, Etiopía-dulemar-e-rey-Tirhaca, ebo bila-onogega egi daniye. Deyob-wisguargua, gannar Rey-Ezequíasʼse dule-gayaburba-berbemalad barmisad,
ISA 37:10 ega sogegar: “Judá-e-rey-Ezequías, be-Bab-Dummad-egi-be-bensurgudiid bega-sogedi: ‘Asiria-e-rey Jerusalén-neggwebur suosurye.’ Mer be-Bab-Jehováʼse be yardaklego.
ISA 37:11 Ar Asiria-e-rey bela yarmar-obelos-gusadde be wisgussursi. Ar degite be, ¿san-onogo be itoge?
ISA 37:12 Ar an-babgan Gozán-neggwebur-obelosgusadi, Harán-neggwebur-obelosgusadi, Resef-neggwebur-obelosgusadi, Edén-wagan-Telasar-neggweburgi-bukwad-obelosgusbalidi, degitega, ¿e-bab-dummagan bendaksa be daksi?
ISA 37:13 Degite, ¿bia Hamat-dulemar-e-reyde, Arfad-dulemar-e-reyde, nadmarsunna? ¿Bia Sefarvaim-dulemar-e-reyde, Hena-dulemar-e-reyde, Iva-dulemar-e-reyde, nadmarsunna?”
ISA 37:14 Degine, Rey-Ezequías, dule-gayaburba-berbemalad-abin garda susad, geb absosad. Geb a-sorbali, Bab-Jehováʼse-goled-negse naded. Geb Bab-Jehová-asabin garda nallaa imaksad.
ISA 37:15 Geb degi, Ezequías weyopira Bab-Jehováʼse goted:
ISA 37:16 “Bab-Jehová-Bela-Gangued-Nika-Maid, Israel-dulemar-e-Bab-Dummad, baliwiturmar-wagar-darbakegwad-abargi be negsemaid. Unnila bebi we-napneg-naid-e-Bab-Dummadga be gued. Be nibnega nasiksad, napnega be obinnisbalid.
ISA 37:17 Bab-Jehová-Dula-Maidye, nue be an-itoye, nue be anmar-gunaid be dakye. Igi Senaquerib begi ise-yolegar anga gayaburba-barmiali, nue be itoge.
ISA 37:18 ”Bab-Jehová, ar nue napiragwa, Asiria-e-reymar we-neggweburmar, e-yarmar, obelosad.
ISA 37:19 E-bab-dummadyob-imaklemalad bela soogi-ogumaksabalid. Ar wemar Bab-Dummadsurmalad, suarmar-sobaled nanaed, akwa-sobarmalad nanaed. Dulemar sobsananaedid.
ISA 37:20 Emidi, Bab-Jehová, be-anmar-Bab-Dummadid, wis be we-dulegi anmar-bendake, adi, dulemar bela we-napneggi-bukmalad be-wisgumalaga, unnila beebi, Bab-Jehová wargwenna maiye.”
ISA 37:21 Geb degi, Amoz-machi-Isaías, Rey-Ezequíasʼse weyob gayaburba barmisad: “Bab-Jehová Israel-dulemar-e-Bab-Dummad, weyob soged: ‘Be anga Asiria-e-rey-Senaqueribʼgi ibmar-sogsadi, bela an be-itosye.
ISA 37:22 Ani an Bab-Jehová, weyob Rey-Senaqueribʼnik an soged: Senaquerib, Siónʼginmalad sae be-dakmalad, begi dodomalad. Jerusalénʼginmalad wakite-be-dakmargu, bega nono-ege-ege imakmalad.
ISA 37:23 Senaquerib, ¿doanik be isdar-sunmaksa? ¿Doagi be ise-dodoar-sunmaksa? ¿Doaga urwedgi be ibmar sogsa? ¿Doa-abin san-dummarba be itosa? Ar be Israel-e-Bab-Dummad-Isligwalednik be isdar sunmaksad.
ISA 37:24 Bega-gayaburba-berbemaladba be Bab-Jehováʼgi ise-yolegar sunmaksad. Weyob be sogsad: An-moli-ur-bila-onomaladgi Líbano-yar-dummagan-birigi an nakwisye. E-urwarmar-dummagan-bubukwad, ani an ei siksa naiye. E-baryawarmar-yeerdaklegwismaladi bela an ei immisye. E-yar-birse an nakwisye, e-neg-sergan-nanaid bela an ei wisgusbarye.
ISA 37:25 Dule-baigan-yargi, ani an dii-yaamar urbisye, we-diimar an gobsaye. An-nanaedba, bela Egipto-diwarmar an odinnosye.
ISA 37:26 ” ’Senaquerib, ¿ar be wissursi? Ar bato an dikasurgus we-ibmarmar-guoed an ega igar mesisad. Bato yola-birgabargus weyob-imakega an igar amisad. Emisgwa, geb an we-ibmarmar oyoalid. Aga be nabir neggwebur-sakdigar-bukmalad be obelos nanaed.
ISA 37:27 E-dulemar gaganmar-naiyob be-abin naded, gwen be-abin imaksasulid, be-abin nollo nadmalad. Be-abin bingegudmalad. Amarde nainugi gagan-dutugana-naiyob, be-abin nadmalad. Neg-uas-birgi-gagan-ainialir dinguddaeyob, be-abin nadegusmalad.
ISA 37:28 ” ’An nue bela-belad be-wisid, sanase be signonidae, sanagwadse be aineba naddabali. Sanagwadse be dognonidabali. Deginbali, sanadgine be angi isdar-sunmakardabali, bela an nue be-wisid.
ISA 37:29 Ar be, an-annik sunmaksadi, be-angi-apor-sunmaksadi, an bela itosad. Degisoggu, be-asugi esgoro-wardummad an yooed, mer bar be sunmakega be-gaya an edinnoed. Degine, bia be danigusa, gannar a-igarba an be-barmidoed.’ ”
ISA 37:30 Isaías, Rey-Ezequíasʼga weyob soged: “Rey-Ezequías, we-ibmarmar bega e-wilubga guoed: We-birgagine, ibmar-gwag-gwen-diglessuli-ainiardaed be gunmaloed. Baid-birgasega, ibmar-gwag-diglessulid-sanmakoedi amba be gunmarbaloed. Geb birgapaasedina, sunna ibmar-gwaggi be arbamaloed, degi, nabir be weemarbaloed. Sunna uvaʼgi be arbamaloed, degi, geb nabir e-san be gunmaloed.
ISA 37:31 Judá-wagan-abala-san-onosmaladi sapi-malimar-ainiardaedyobi, gannar ainidagoed, e-anagan gannar nikudoed.
ISA 37:32 Ar Jerusalén-neggweburgi wis ichee dulemar bedapoed, amba Sión-yargi bukumaloed. Ar Bab-Jehová-Bela-Gangued-Nikad e-dulamargi-bela-bela-sabgued-nikadba, we-ibmar imakoed.”
ISA 37:33 Degisoggu, Bab-Jehová, Asiria-e-reynik weyob soged: “Senaquerib we-neggweburse gwen dogosurguoed. We-neggweburgi sigu-wargwensaar miosulid. We-dule, bila-onogega we-neggweburse sigu-abgaedyalaba gwen urwosulid. Deginbali, neggwebur-galu-matusulid-dikarba, gwen napa-nakwemaid imakosulid.
ISA 37:34 Ani an Bab-Jehová-guedgi, an soged: We-dule, gebe-danigusadba gannar naoed. We-neggweburgi gwen dogosurguoed.
ISA 37:35 ”An we-neggweburgi nued-binsasoggu, an-mai-Davidʼgi nued-binsabarsoggu, we-neggwebur an bendakoed, we-neggwebur an obelogosulid.”
ISA 37:36 A-mutikidgine, Bab-Jehová-e-baliwitur, Asiria-sorda-bukwadgine, mili-dulabakebak-gakatar (185,000) dulemar-ogilosad. Degine, neg-oiboargu, bela dulemar burgwar-mamaitibi oiboalid.
ISA 37:37 Degidgine, geb Asiria-rey-Senaquerib nadegusad, gannar Nínive-neggweburse nonigusad, agine megidapid.
ISA 37:38 Ibagwengi, Rey-Senaquerib bab-dummad-Nisrocʼse-goled-neggi, e-bab-dummadse-gorsiidgi, e-masmala Adramelec, degi, Sarezer, es-suidgi Senaquerib-oburgwismalad. Geb agine, Ararat-yalase wakitegusmalad. Senaquerib-sorbali, e-machi-Esar-Hadón yar-sesad.
ISA 38:1 A-ibagangine, Ezequías bela-bela nailikgumai burgwednaga gusad. Geb Bab-Dummad-gayaburba-barsoged-Isaías Amoz-e-machi, Ezequías-dakega ese nade gusad. Degi, ega sogdapid: “Bab-Jehová weyob soged: ‘Be bar-gwisguosurye, be burgoye. Degisoggu, be-neg-yaginmaladga igargan napi-nue be ukoye.’ ”
ISA 38:2 Geb degine, Ezequías, galusik aibilisa imaksad. Weyob, Bab-Jehováʼse isedar-gollar imaksad:
ISA 38:3 “Bab-Jehováʼye, be an-ebinsao. Andi be-sogedba bega arbasad. Napiragwadba an beba nanasad. Be-ibmar-abegedba andi bega ibmar imaksad.” Degi Ezequías bela-belad isedar-boale meremai gusad.
ISA 38:4 Geb degine, Isaíasʼse Bab-Jehová-gayaburba nonikid, ega weyob sognonikid:
ISA 38:5 “Ezequíasʼse be nae, ega be sogo: ‘Bab-Jehová, be-dad-dummad-David-e-Bab-Dummad weyob sogye: Anse be gochadi, bela an be-itosye, be-ibyanis-aryosadi an daksabarye. Degiirdi, birgambe-gakatar (15) napi-gudii-guega an be-imakoye.
ISA 38:6 Asiria-e-reygi an be-ollorsaoed, we-Asiria-neggwebur-e-reygi an be-bendakoed. Ani an, we-neggwebur-irwa gwisguoed.’ ”
ISA 38:7 Geb Isaías, Ezequíasʼga sogded: “Bab-Jehová-bega-ibmar-sogsad mag be dakegala, we-ibmar-wilub Bab-Jehová bega oyogoed:
ISA 38:8 Acaz-wachi an gannar sorsik wachi-irgwen-wilub osikirmakoed.” Geb agine, dad-ibeler-naidi gannar wachi-irgwen-wilub sorsik sikirmaksad.
ISA 38:9 Judá-e-rey-Ezequías, nailikgumaigusad-sorbali, gwisgusgua, weyob garda narmaksad:
ISA 38:10 “An weyob sogmai gusad: ‘¿An nabir-gudiid-ibagangi nue-an-burgwesunnode? ¿Burgwed-galuse an megnaedgadsunde? ¿Bar an wegi daklegosuli gusunnode?’
ISA 38:11 An sogsabalid: ‘We-napneggi bar an Bab-Jehová-dakosulid. We-napneggi-dulemar-bukwad bar an dakosurbalid.’
ISA 38:12 An-annik an-neg susmalad, urwedigi an-annik susmalad. Sibad-wawaad-edarbed-e-dordoneg-obipirmaklegeyobi an-neg imaksamalad. Dule-mormaked, mor-maknaiyobi be an-san imaksad. Emide, Bab-Dummad, mor-maknaid-bergusadgi-e-dikarmar-sike-sike-imaklegeyobi an-imaksad. An-ibagan baisursunna be obelononikid.
ISA 38:13 Ogormaksii an neg-oiboalid. Achumigur-nono-wawaad-garmar-bibisgeyobi an-imaknonikid. Irgwennaar be an-obelononikid.
ISA 38:14 Wirsob-boedyobi an bosad, nuu-dabgalayob-dakleged-boedyobi an bosad, nuu-sibu-uurmakedyobi an bosad. An-ibya niba-atakedbali, yegusad. Bab-Jehová an suli-suli-itogusad, be an-bendakdage.
ISA 38:15 ”Ar ¿igi bar an sogosunna? Ar e-sunnagwad anga sogsad. Ar deyob imaksado. Ulubgi an-isdar-itogedi, bar gabbisuli an-imaksad.
ISA 38:16 Bab-Jehová, be-sogedbali dulemar dula gudidimalad. An deyobi be-sogedba an dula-gudii gumogoed. Bee be, anga san nudaksad, bee be, anga burba uksad.
ISA 38:17 An suli-suli-itosad, emidi, an bogidik itoged. Be an-sabedbali yaa-dummad-dule-obelogedgi be an-bendaksad, begi isgussuliyob be an-daksad.
ISA 38:18 Neg-uan-mamaidi, gwen be-nug ogannogosulid. Dule-burgwarmaladi, gwen be-nug odummosulid. Dule-yaa-dummadse-batemamaidi, be-innikigwadba-daedgi gwen sunmakosurmalad.
ISA 38:19 Unnila dula-gudimaladi, be-nug-ogannoged, igi an emi-ibagi be-ogannoge, deyob be-ogannomarmogad. Bela babgan na e-mimmiganga be-innikidaedgi sunmakmaloed.
ISA 38:20 ”Bab-Jehová an-abonogoed. Degisoggu, anmar bane-bane Bab-Jehováʼse-goled-neggi, igar-dub-nikamaladba namakmaloed.”
ISA 38:21 Geb degi, Isaías sogded: —Higo-san ollimakmalo, geb rey-abagangi yaa-siidgi be mage-mage imakmalo. Agine nabir nugudoed.
ISA 38:22 Geb degi, Ezequías, Isaíasʼga sokalid: —An nabir Bab-Jehováʼse-goled-negse naknaega, ¿ibi-wilubgi nabir magar an daksale?
ISA 39:1 A-ibagangine, Babilonia-e-rey-Merodac-Baladán, Rey-Ezequíasʼse dule-gayaburba-berbemalad barmisad. Amarba Ezequíasʼga garda barmisad, degi, ibmar-binsa-ega-ukleged ega barmisbalid. Merodac-Baladánʼde, Baladán-e-machid. Ar Merodac-Baladánʼde wisgusgusad, Ezequías bela-bela-nailikgumaidi, emidi, nue-nugunoniye.
ISA 39:2 Ezequías weligwaledgi we-dulemar-abindaksad, degine, dule-gayaburba-berbemaladga, bela e-ibmar-nuegan-gargerbamalad-bukwad oyosad: Manimar, ormar, ina-wawadikmalad, olivo-gwallu-wawadikmalad, degi, bila-onogedgi-ibmar-ebulemalad-sabolebukwad bela oyosbalid. Degine, bela ibmar-nuegan-sabolebukwad-neggi ega ibmarmar oyosbalid. Ezequías, e-negsemaidgi bela e-neggi-ibmarmar-bukwad, oyosad.
ISA 39:3 Geb degine, Bab-Dummad-gayaburba-barsoged-Isaías, Rey-Ezequías-daknaded. Geb ega sogdapid: —¿Bia we-dulemar daniki? ¿Ar igi bega we-dulemar soge? Geb Ezequías ega sogded: —We-dulemar dikasur danimalad. Babilonia-neggwebur-akale an-dakega danimalad.
ISA 39:4 Geb gannar Isaías, Ezequíasʼga sogded: —¿Ibu be-negyagi daksamala? Ezequías abin-sogded: —Bela an-negyagi ibmar-bukwad daksamala. Bela ibmarmar-bukwad an ega oyosad.
ISA 39:5 Geb degi, Isaías, Ezequíasʼga sogdesunnad: —Nue Bab-Jehová-Bela-Gangued-Nikad-e-gayaburba be itogo:
ISA 39:6 ‘Ibagan danikoed, bela be-neggi-ibmarmar-bukwadi, bela be-dadgan-emi-ibase-ibmar-urbisadi, Babilonia-yarse seledoed. Bipisaale ibmar gwen beosulid.
ISA 39:7 Be-mimmigan-abala, be-wagan-abala, Babilonia-e-reyneggi maiga-guega seledmaloed.’ Deyobi Bab-Jehová soged.
ISA 39:8 Geb Ezequías, Isaíasʼga sogded: —Nueddo. Bab-Jehová-gayaburba be anga sognonikidi, yeer an itodo. Ar Ezequías e-ulubgindi binsasad: “Amba an-maidgine, neg nueganbi, degi, bogidik-nai guoed.”
ISA 40:1 Anmar-Bab-Dummad soged: “An-dulamar-e-gwage ogannomar, baisur-ito be imakmar.
ISA 40:2 Jerusalén-dulemarga nue-sabedgi be sunmakmar, ega be sogmar: ‘Be maiga-arbadigusmalad-ibagan wese bergunoniye, be-isgusmalad bato bega bennuklesye. Bemar isgusad-nukad unniguar bato ilabo-wilub sabsur-odurdaklesye. Bab-Jehová bemarga isgued elisye.’ ”
ISA 40:3 Gayaburba binnasuli goled, weyob soged: “Bab-Jehováʼga nega-dulesulidganba igar mayemar, anmar-Bab-Dummadga nega-dinnaganba igar swilidik mesmar.
ISA 40:4 Bela nebagan swilidik imakmarsun, yalamar, degi, neg-mullugana omatolesun. Degine, napa-muru-muru-mamaid innikii imakmarsun, igar-bire-bire-mamaid innikii imakmarsun.
ISA 40:5 Agine geb Bab-Jehová-e-gandikid-yeerdakleged bela dulemarga oyolegoed.” Ar Bab-Jehová-sunnagwad deyob sogsad.
ISA 40:6 Gayaburba weyob soged: “Binnasuli be soge.” An ega weyob soged: “¿Ibu an binnasuli sogosunna?” Geb anga soged: “Bela dulemarga be soge: ‘Dulemar gaganyobi gued. E-yeerdaklegedi, nainugi-dutu-achunneyobi gued.
ISA 40:7 Bab-Jehová-e-buu-imaked egi nasale, gagan baisur-dinguddaed, dutumala, baisur-dinguddamogad. Ar dulemar gagan-ara-aramaladyobi gued.
ISA 40:8 Gaganmala baisur-dinguddaed, dutumala, baisur-dinguddamogad. Ar anmar-Bab-Dummad-Gayaburbadi, degisadegu maiguad, berguosulid.’ ”
ISA 40:9 Bab-Dummad sogded: “Sión-yalagi be nakwenae, gayaburba-nuegangi be sunmaknae. Yala-matusulidse be nakwenae, Jerusalén-neggweburga, gayaburba-nuegangi be sunmaknae. Ise-gandikidba be sunmaknae, binnasuli be sunmako, melle be dobe itogo. Judá-neggweburmarga be soge: ‘Be nue-dakmar. Wegi anmar-Bab-Dummad-danikid be dakmar.’
ISA 40:10 ”Bab-Jehová-gandikidba-danikid, be dakmar. Bab-Jehová e na negsemaid. E-dulamar-ollor-imaksadi, ebali nidanikid. Ibidar-nued-amisadi eba sedanikid.
ISA 40:11 Bab-Jehová e-dulamar-bendakdanikid. Igi sibad-wawaad-edarbedi, e-sibad-wawaad-mimmi nakwaa imakdae, geb e-binasgargi semaidae, degi, sibad-wawaad-milesmalad nue nimaidae. Deyobi, Bab-Jehová e-dulamar bendakdanikid.”
ISA 40:12 ¿Doa dii-naid e-argangi wilubsasa? ¿Doa mogir-naid e-goomargi wilub-imaksa? ¿Doa ibmar-wilubsaedgi ukub-naid urbisa? ¿Doa ibmar-wilubsaedgi yar-dummagan wilubsasa? ¿Doa ibmar-wilubsaedgi yar-mullugana wilub-imaksa?
ISA 40:13 ¿Doa Bab-Jehová-E-Burba bela balamioe? ¿Doa ega binsaed-ukedga guoe?
ISA 40:14 ¿Ar doase Bab-Jehová ibmar-magar-itogega binsaed-amissunna? ¿Ar doa igar-inniki-imaked-igarba Bab-Jehová-odurdaksasunna? ¿Doa ega ibmar-nue-wisigued uksasunna? ¿Doa binsaed-nikaa-daed-igarba Bab-Jehová-odurdaksasunna? Suli, dule bipisaale wegiid-igarba Bab-Jehová-odurdaksasulid.
ISA 40:15 Ar dulemar-yar-baid-baidgi-bukmaladi, Bab-Jehová-asabinni unnila bormoyagi dii-gwagwen-argwachayobi gumalad. Degi, ibmar-wilubsalegedgi ukub-ichesaar wilubsalegedyob gumalad. Ar Bab-Jehová dupgan-nanaidi, ukub-buru-aidikueyobi daked.
ISA 40:16 Líbano-yargi-sapanmar-nikadi, Babga-ibmar-ogumaklegedgi-ebulegega unnisulid. Líbano-e-ibmar-durgan-nikadi, Bab-Dummadga-ogumaklegega, unnisurbalid.
ISA 40:17 Bab-Jehová-asabinni, bela dulemar-yar-baid-baidgi-bukmaladi, ibigwensuli gumalad. Egala, gwen ibmar-nuedga gusulid.
ISA 40:18 ¿Doa-ebo be Bab-Dummad-wilubdakoe? ¿Ibu-ibmar-sobaledbo be wilub-imakoe?
ISA 40:19 Dule-ibmar-sobmaladi, esgorogi ibmar-bab-dummadyob-imakleged sobmalad. A-sorba, dule-or-sobedi, a-ibmar-birgi or-nasikmalad, geb ega manidubmar sobbalid.
ISA 40:20 Ar dule-wilegeddi, e-bab-dummad-sobega suar-gege-nunguedi amied. A-sorbali, dule-wileged, dule-ibmar-nued-sobed amied. Adi, ega nuekwaa suar-bab-dummadyob sobega, melle ege-ege gwisguegar.
ISA 40:21 ¿Ar ade, bemar wissurmarsi? ¿Bemar itossurmarsi? ¿Bato gebesailagine bemarga soglessursi? ¿Napneg-nagusad-akar bemar odurdaklessurmarsi?
ISA 40:22 Ar Bab-Jehováʼdi napneg-dirbir-naidbirgi negdaksiid, dulemar-bukwadi sesmaryobi ega gued, bai daksulid. Bab-Jehová mor-dummad-nallaa-imaklegedyobi mogir-imaked. Bab-Jehová mor-neg-egalegedyobi, mogir-billi egadaed, adi, egi megegar.
ISA 40:23 Bab-Jehová, dule-gandikmalad obelodaed. Dule napneggi-dummadga-negsemamaidi, ibmar-isganayobi obeloged.
ISA 40:24 A-dummagan sapiwar-nue-diglessuliyobi gumalad, ibmar-gwag-nue-diglessuliyobi gumalad, sapi-saila napa-yaba e-malimar-nue-ainissulidyobi gumalad. Ar Bab-Jehová egi buu-imakdele, dingudmaloed, ar gagan-dinnaganayobi burwa-dummadba seledoed.
ISA 40:25 Bab-Jehová-Isligwaled weyob soged: “Degite, ¿doabo bemar an-wilubdakmalosunna? ¿Doa anyobi-daklege gusunna?”
ISA 40:26 Niba be nue atakmar, ¿doa bela we-ibmarmar obinnisa? Bab-Jehová e na niisgwamar-onied, sog-soggwen ilemaked, e-nugbali ese goled. Bab-Jehová-e-ganguedi, ibiyobi dummarba gue. E-garganguedi, ibiyobi gandiki negsemai.
ISA 40:27 Jacob-wagan, ¿ibiga be Bab-Jehová-dikarba sunmake? Israel-dulemar, ¿ibiga be urwakwaa Bab-Jehová-dakmala? Be sogmalad: “An-igarmar Bab-Jehováʼgi dukumaiye. An-Bab-Dummad an-ibmar-imaked baisurdakye.”
ISA 40:28 ¿Ar ade, be wissursi? ¿Be wisgussursi? Ar Bab-Jehová Bab-Dummad-degisadeguadid, napneg-bipirmaknaid bela obinnisadid, budar-itoged nikasulid, gege geggubalid, e-nue-ibmar-wisidi, gege balamileged.
ISA 40:29 Bab-Jehová dule-yegusmaladga gangued uked, E na dule-nollo-itomaladga gandikidba gangued uked.
ISA 40:30 Sapingana dutusur-inigwele, geggusdamalad, budar-itogusdamalad. Masmala yoleddamalad, aimukuddamalad.
ISA 40:31 Degi-inigwele, dule-Bab-Jehováʼgi-bensurmaladdi, gannarse gangued nikumaloed, sulubagi-gukueyobi gumaloed: Abarmakdii gumaloed, gwen gegguosurmalad, igala-suid-nanadii gumaloed, gwen gegguosurmalad.
ISA 41:1 Bab-Dummad weyob soged: “Neggwebur-demar-gakaba-bukmalad, bogi an-abin ambikumalo. Dulemar-yar-baid-baidgi-bukmalad, gandik be imakmar. Walikaa be dagmar, be sunmakmar. Anmar igar-nabogega ambikumar.
ISA 41:2 ”¿Doa dad-nakwedsik, dule-gusgu-emargi-obinmaid wese-dagega imaksa? ¿Doa we-dulega dulemar-yar-baid-baidgi-bukmalad urmaksa? ¿Doa reymar-seega imaksa? ¿Doa ukub-milegeyobi es-suidgi dulemar-obelogega imaksa? ¿Doa e-warsi-abin-ibmar-durgan-mileddaedyob dulemar-imaksa?
ISA 41:3 Gwen nanadisulid-igarba, binnasuli dule-balegindanikid.
ISA 41:4 ¿Doa weyob imaksa? ¿Doa nabir we-ibmar bursuli-guega imaksa? ¿Doa gebesailaunni dulamar-ainakwedanikidse gocha? Ani an Bab-Jehová guedi, bela we-ibmarmar imaksad. Ani an gebesailaginedid, ani an berguedse gudii gubaloed.
ISA 41:5 ”Neggwebur-demar-gakaba-bukmaladi, dani-daksamalad, dobe-itodmalad. Napneg-naid-ugakaase abin giglimakded. Bato egi danimalad, bato walikgusmalad.
ISA 41:6 Muchub-muchub e-aimar-bendakdemalad, muchub-muchub burba-ogannodmalad.
ISA 41:7 Dule-ibmar-sobedi, dule-orgi-arbaed ogannoged. Dule-mardogi-ibmar-sobedi, dule-esgorogi-arbaed-ogannoged, ega weyob soged: ‘Arbaed-nued be imaksa.’ Geb sorba, ibmar-sobaled-bab-dummadyob-imakleged nue-esgorogi bioked, adi, melle ege-ege gwisguegar.”
ISA 41:8 Bab-Jehová sogdebalid: “Israel, bedi an-maiga gued. Be, Jacob-wagan, an bemar-susadid, An-ai-Abraham-wagan be gumalad.
ISA 41:9 Ar napneg-naid-ugakaase an be-susad, nega-sukungan-dikasulidba an bese gochad. An bega sogsad: ‘Be an-maiga gued.’ Ani an be-susad, an be-obachasulid.
ISA 41:10 Melle be gwayo. An beba gudiguad. Melle be suli-suli-itogo. Ani an be-Bab-Dummadid. An be-ogannogoed, an be-bendakoed, an-sakwa-gandikid-nuedsikidgi an be-ganikioed.
ISA 41:11 ”Dule-isdar-be-dakmaladi, bingegudmaloed, nug-mesagwar gudmaloed. Dule-begi-gwisgudimaladi, bela bergudoed, gudisurmaladyobi naoed.
ISA 41:12 Be be-isdarmalad-amidiguo-inigwele, gwen be amiosulid. Bebo-bila-onomaladi, bela bergudoed, gudisurmaladyobi naoed.
ISA 41:13 Ar ani an be-Bab-Dummad-Jehová gued. An be-argan-nuedsikid-ganikidid. Ani an bega soged: ‘Melle be gwayo, ani an be-bendakoed.’ ”
ISA 41:14 Bab-Jehová soged: “Bemar-Israel-dulemar ichee-gue-inigwele, melle be gwayemalo. Bemar-Jacob-wagan-gandik-gusur-inigwele, melle be gwayemalo. Ar an-sunnagwad an be-bendakoed. Ani an Israel-dulemar-e-Bab-Dummad-Isligwaled gued. Ar an be-Bendakedid.
ISA 41:15 ”Ibmar-gwag-egwaed-binidyobi an be-imakmaloed, e-nugar-abinbela-datarmakar-nikayobi an be-imakmaloed. Yarmar be obelogoed, swana be imakoed. Yar-mullugana gaganbi naguega be imakoed.
ISA 41:16 Oros-gwag-burwaba-mileddaedyobi be imakoed. Burwa-noedba aisakidmaloed. Ar bedi, angi weligwar itogoed. Bedi, angi Israel-dulemar-e-Bab-Dummad-Isligwaledgi nug-gannarba itomaloed.”
ISA 41:17 Bab-Dummad sogdebalid: “Dule-wilemalad, degi, dule-ibmar-abesa-gudimalad, gobega dii amididamalad, degi-inigwele, amidasurmalad. Uku-uku-itogedba gwabin-dinna itogusdamalad. Degi-inigwele, ani Bab-Jehová-guedgi an amar-itogoed. Ani an Israel-dulemar-e-Bab-Dummad-guedgi, an amar walagwen metosulid.
ISA 41:18 Yalamar-biribali, diwarmar-iirmakega an imakoed, nebaganba ibemargi-dii-aryogega an imakoed, nega-dulesulidganba dii-ambikuega an imakoed. Neg-dinnaganba ibemar-aryomai an imakoed.
ISA 41:19 Nega-dulesulidganbali, urwarmar, acacia-sapimar, an digoed. Baryawarmar, degine, olivo-sapimar an digoed. Napa-isganagi, ciprés-sapimar an digoed, pino-warmar, degi, abeto-sapimar an digoed.
ISA 41:20 Adi, dulemar dakega, degi, wisgumalaga, egi binsamalaga, degi, magar-itomalagar, Bab-Jehová we-ibmarmar-imaksaye, Israel-dulemar-e-Bab-Dummad-Isligwaledi, we-ibmarmar obinnisye.”
ISA 41:21 Bab-Jehová Jacob-dulemar-e-Rey, ibmar-sobaled-bab-dummadyobi-imaklemaladga sogded: “Be-igar be sogmardo. E-wilubmar be oyomardo.
ISA 41:22 Wese be dagmar, ibmar-guoed be sogmar. Gebesailagi ibmarmar-gusnanaedi, anmarga be soge, anmar egi binsaegar, degi, ibmar-gusadi, anmar magar-itomalagar. Igi-neg-guoe anmarga be sogmar.
ISA 41:23 Yoedse-negguoed be anmarga sogmar, adi, anmar wisgumalagar, bemar bab-dummagan gumarye. Bemar ibmar imakmala, nueddibe, ichakwadibe, adi, anmar dakega, degi, anmar ese gwayegar.
ISA 41:24 Ar bemar binsarmaladid, ar be-ibmar-imakmaladi, binsa ibmar-imaklemaladid. Ar dule-begi-bensurmaladga ibmar-nuedga be gusurmalad.”
ISA 41:25 Bab-Dummad sogdebalid: “Dad-nakwed-argan-sapiledsik, dule-gwensak-dagega an imaksad. An-ese-gochad, an-itosad. We-dule, dad-nakwedsik an-nug odummogoed. We-dule, dule-dummagan-negsemamaid-birgi dule-napsa-sobed-napsagi-dii-dii-annanaiyob imakoed.
ISA 41:26 ¿Ar doa we-ibmar-guoed gebesailaunni anmar-owisosa? ¿Ar doa abgayala we-ibmar-guoed anmar-owisosa? Adi, anmar sogega, eye, nabir sogye. Ar dule gwen we-ibmar-guoed sogsasulid, dule gwen owisossurbalid. Dule-we-ibmar-guoed-soged, gwen dule itossurbalid.
ISA 41:27 Ar ani an abgasaila Sión-dulemarga bato an sogsad: ‘Be dakmarye, bato wegi bukmarye.’ Ani an Jerusalén-neggweburse dule-gayaburba-berbeged-nued barmisad.
ISA 41:28 An-dikarbali an atakded, dule gwen an daksulid. Emar-imbagi dule-ega-binsaed-daked gwen an daksulid. An ibmar-ese-egichidgu, gwen an-abinsassurmalad.
ISA 41:29 Ar bela we-bab-dummagan-baigana binsa-ibmar-imaklemaladyobi gued. E-ibmar-imakmaladi, gwen nabirsulid. E-ibmar-sobarmalad-bab-dummadyob-imaklemaladi, unnila uka-olloo daklemaladid. Binsa-ibmar-daklemalad gued.”
ISA 42:1 Bab-Jehová soged: “We, an-mai-gued. Ani an we-dule-sediid. Ani na susad. An egi yeer itoged. An-burba an ega uksad. Ani Bab-Jehová, dulemar-yar-baid-baidgi-bukmaladga igar-innikigwad imakoed.
ISA 42:2 We-dule, binnasuli golosulid, sabsuli sunmakosulid. Galimbaba binnasuli sunmakdii itolegosulid.
ISA 42:3 Nargammu-bisgedanigwichidi bar bisgosurmalad. Gwallu-gwillo-binnagamaidi gwen oginnosulid. Igar-napiragwadbali igar nabogoed.
ISA 42:4 We-dule, napneggi igar-napiragwad-omesedse gwen wieguosulid, gwen galakuosulid. Demar-gakaba-neggwebur-bukmalad, we-dule-e-odurdaked abdakbukwad.”
ISA 42:5 Bab-Dummad-Jehová mogir-billi obinnisadid, mogir-billi nasiksadid, napneg onasosadid, bela egi-ibmar-sanmaked onasosadid, dulemar-bukwadga niga-ogannogedid, dulemarga burba-dulad-ukedid. We-Bab-Dummad-Jehová weyopira soged:
ISA 42:6 “Ani an Bab-Jehová gued. Ani an bese gochad, igar-innikigwad-imakega an be-semai gusad. Ani an be-odenonikid, an-dulamarga an dulemarbo-igar-mesisad-e-wilubga-guega an be-imaksad. Dule-yar-baid-baidgi-bukmalad-magar-neg-itomalaga, gwallu-meegwadyobi an be-ogwisgunonikid.
ISA 42:7 Adi, be dulemar-aku-atakmaladga ibya egaegar, be dule-esgaryagi-bukmalad onogegar, degi, be dule-esgaryaba-negsichidgi-bukmalad onogegar.
ISA 42:8 ”¡Ani an Jehová gued! ¡Deyob an nugad! An-nug-odummolegedi, dule-baidgadga guosulid. An-nug-odummolegedi, ibmar-sobaled-bab-dummadyob-imaklemaladga an ukosurbalid.
ISA 42:9 Ibmar-iduar-an-sogsagusmalad bela gusad. Emisgindi, ibmar-gwapidmarbi an sogbalid. Iduakwaa ibmar-guoed an bemar-owisoged.”
ISA 42:10 Bab-Jehováʼga namakleged-gwapidgi be namakmar. Bemar-muu-billigi-iirmakbukwad, ega be namakmar. Demar-yagi-ibmar-dula-bukmalad, Bab-Jehová-nug odummomar. Napneg-ugakagi-bukmalad, Bab-Jehová-nug ogannomar. Bemar demar-gakaba-bukmalad, Bab-Jehová-nug be odummomar.
ISA 42:11 Nega-dulesulidganba-bukwamalad, bemar binnasuli gormar. Cedar-dulemar neggwebur-burwigangi-bukmalad, bemar binnasuli gormar. Sela-dorgan, yeer-itogedba be namakmar, yeer-itogedba yala-birgi binnasuli be gormar.
ISA 42:12 Gandikidba be Bab-Jehová-nug odummomar, neggwebur-demar-gakaba-bukmaladgi binnasuli Bab-Jehová-nug be odummomar.
ISA 42:13 Bab-Jehová dule-bila-onogedyob nodagoed. Dule-bila-onoged-urweyobi uludagoed. Binnasuli urwedgi bila-onodagoed, e-isdarmaladgi obinoed.
ISA 42:14 Bab-Jehová soged: “An dikasurgusa bogidik gudigusad, an gwen sunmaksasulid, an gwen ibmar sogsasulid. Emisgindi, an binnasuli goloed. Ome-ugakgunair binnasuli-bunnonaiyobi, akus-akus-bunnonaiyobi, binnasuli gornai an guoed.
ISA 42:15 Yalamar, degi, yar-mullugana, an obelogoed. E-gaganmar bela an odinnogoed. Diwarmar neg-dinnaganaga an imakoed, dii-wilagana an odinnogoed.
ISA 42:16 Dule-aku-atakmalad, igar-dakdisurmaladba an nidoed, nanaledisulid-igarba an nidoed. Amar-asabinni, negsichidi neg-meegwadga an imakoed. Amar-idu, neg-muru-murumalad an innikii imakoed. Deyob an imakoed, an gwen amar-obanosulid.
ISA 42:17 Dulemar ibmar-sobaled-bab-dummadyob-imaklemaladgi bengudisurmaladi, nue-bingegus bangudmaloed. Akwa-sobarmaladga-sokardamaladi, ‘be anmar-bab-dummaganaye,’ a-dulemala, nue-bingegus bangudmaloed.”
ISA 42:18 Bab-Dummad weyob soged: “¡Dule-uaya-yallirmalad! Nue be itomarsun. ¡Dule-aku-atakmalad! Nue be atakmarsun.
ISA 42:19 ¿Doa an-maiba bur bule akusunna ataksunna? ¿Doa an-gayaburba-berbergedba bur bule uaya-yallirsunna? ¿Doa an-nuggi-barmilesadba bur bule akusunna ataksunna? ¿Doa Bab-Jehová-e-maiba bur bule akusunna ataksunna?
ISA 42:20 Be ibmar-bukidar-daksa-inigwele, degite, be amba aku daked. Uaya be olloo-sii-inigwele, be ibmar-itosulid.”
ISA 42:21 Bab-Jehová, e-igar-innikigwad-sabedbali, yeer-itosad. E-igar-maid-dummarba-guedbali, degi, gandikid-guedbali, yeer-itosad.
ISA 42:22 Ar we-dulemarde atursaledidimalad, sabsur odurdakledidimalad. Bela akwa-dummagan-yaba gales-bukwamaladid, esgaryaba mellesmaladid. Ei-ibmar atursales gudidimalad, dule gwen bendakdisurmalad. Ei ibmar sules gudidimalad. Gwen dulemar gannar-ega-ibmar-ukmarye sogdisurmalad.
ISA 42:23 ¿Doa bemar we-ibmar itogoe? ¿Doa bemar yoedse-we-ibmar-guoed nue-itogoe?
ISA 42:24 ¿Doa ibmar-sulesmaladyobi Jacob-wagan-uksa? ¿Doa ibmar-atursalealedyobi Israel-dulemar-uksa? ¿Ar Bab-Jehová e-dulamar egi isgusgusad urmaksasursi? Eye, urmaksa. Ar ade, Bab-Jehová-igarba nanassurmalad, e-Igar-Maid-sogedba ibsassurmalad.
ISA 42:25 A-ulale, Bab-Jehová egine ulusad, bila egi onosad. Soogine sabsur-odurdaksad, degi-inigwele, amba aku-itosmalad. Sabsur-odurdakles-inigwele, amba eba ibsassurmalad.
ISA 43:1 Jacob-wagan, Bab-Jehová-be-obinnisadi soged, Israel-dulemar, Bab-Dummad-be-urbisadi, weyob soged: “Melle be dobguo, ar ani an be-nudaksad. Be-nugba an bese gochad. Be an-mimmi gued.
ISA 43:2 Be dii-obaknaile, an beba nadapmogoed. Be diwar-obaknaile, be gundilegosulid. Soo-birgi be nadapile, gwen be gummakosulid. Soo-duurmakedi gwen begi naguosulid.
ISA 43:3 Ar ade, ani an be-Bab-Dummad-Jehová gued, an Israel-dulamar-e-Bab-Dummad-Isligwaledid, an be-Abonogedid. Ani an, be-onogega, Egipto-dulemar-urmaksad. Be-muchub Etiopía-yar, degi, Seba-yar an urmaksad.
ISA 43:4 An be-muchubbi dulemar-urmakoed, an be-san-burba-muchubbi, dule-bamalad an urmakoed. Ar an bela-belad bemar-sabed. Be an-asabinni, ibiyob be yeerdaklege, be duledar-nued gued.
ISA 43:5 Melle be dobguo. Ar an beba gudiid. Dad-nakwed-akale, an be-anagan sedagoed. Dad-argwaned-akale, an be-urboed.
ISA 43:6 Dulemar-dad-nakwed-argan-sapiledsik yar-baid-baidgi-bukmaladga an sogoed: ‘¡An-dulamar anga udage!’ Dulemar-dad-nakwed-argan-nuedsik yar-baid-baidgi-bukmaladga an sogoed: ‘¡Melle an-dulamar gamalo!’ Be anga an-masmala-dikasuli-bukwad sedage, be anga an-bunamala-napneg-ugakaase-bukwad sedage.
ISA 43:7 An-nugba-ese-gollemaladi, be anga bela seda. An-nug-odummogega an obinnisadi, be anga seda. Ani an obinnisad, ani an urbisad.”
ISA 43:8 Bab-Dummad soged: “Dule-aku-atakmalad, amba ibya-nika-inigwele, be anga onimar. Dule-uaya-yallirmalad, amba uaya-nika-inigwele, be anga onimar.
ISA 43:9 Dule-yar-baid-baidgi-bukmalad bela be oambikumar. Bela dulemar danar ambikumar. ¿Doa we-dulemar-abargi we-ibmar-guoedgi iduakwaa anmarga sunmaksa? ¿Doa ibmar-gusmalad anmarga sogsa gusa? E-daksamalad be oyomardo, nabir-sogmarye be sogmardo, adi, dule-baigan itomalagar, degi, sogmalagar: ‘Napiraye.’ ”
ISA 43:10 Bab-Jehová Israel-dulemarga soged: “Bemar an-barsogega be gumar, anga-arbaega an bemar-susad, adi, bemar magar-an-dakmalagar, melle angi bengumalagar. Adi, be magar-itomalagar, an doa gue. An-iduale, bab-dummad-baid gwen megissulid, gwen an-sorba bab-dummad-baid megosurbalid.
ISA 43:11 Ani an Bab-Jehová gued. An-imbagi, dule-abonoged-baid sated.
ISA 43:12 Ani an bemar-owisosad, ani an bemar-bendaksad. Ani an bemarga sunmaksad. Bemar-abargi, gwen bab-dummad-baid gudii gussulid. Ani an gudii gusad. Ani an Bab-Jehová-guedgi soged: ‘Bemar an-barsogega be gumarye, Ani an Bab-Dummad guye.’
ISA 43:13 Ani an gebe-negasaila-akale Bab-Dummad gued. Dule gwen angi wakinnosulid. An-ibmar-imakedi, dule gwen obelogosulid.”
ISA 43:14 Israel-dulemar-e-Bab-Dummad-Jehová-Isligwaled bemar-bendakmaidi, weyob soged: “Bemar-ulale, Babilonia-neggweburse sorda-bamalad an barmidoed. Dulemar-wakindiiyobi an bela Babilonia-dulemar-imakoed. Caldea-dulemar urmar-nikadba na nug-dummarba-itodimalad, bela an obelomogoed.
ISA 43:15 Ani an Bab-Dummad-Jehová-Isligwaledid. Ani an bemar-e-rey gued, Israel-dulemar-obinnisad gued.”
ISA 43:16 Bab-Jehová sogdebalid: “Ani an demargi igar-mesisgusad, dii-wilasailadgi igar-egasgusad.
ISA 43:17 Egipto-sordamar, moli-birgi, degi, moli-ur-bila-onomaladgi, Israel-dulemar-bargananai-gusmargua, Bab-Jehová, Egipto-sordamar-bela-obelosgusad. Gwallu-gwillo-akichayob amar-imaksagusad.”
ISA 43:18 Bab-Jehová weyob soged: “Ibmar-nasmalad be iemar, melle bar ibmar-gusmaladgi be binsadii gumar.
ISA 43:19 Ibmar gwapidmar an imakoed. ¿Ar bato ibmar-imaklenaid aku be dakmarsi? Ar nega-dulesulidganba an igar mesnaid, neg-dinnaganba an diwarmar mesnaid.
ISA 43:20 Ibmar-durgan-sapurbarmalad-ursilimalad, an-nug ogannomalad. Achu-sapur-uaya-gannagana, nuu-dummad-dukar-suid-avestruzʼye-nugmalad, an-nug odummomalad. An an-dulamar-susad-ogobega, nega-dulesulidganba dii-suurmakega an imaked, neg-dinnaganba diwarmar-megega an imaked.
ISA 43:21 We-dulemar angadga-guega an urbisad, an-nug ogannomalaga an urbisad.
ISA 43:22 ”Degi-inigwele, bemar, Jacob-wagan, gwen an-nug odummossurmalad. Israel-dulemar, bemar angi wiegudmalad.
ISA 43:23 Anga bemar sibad-wawaad-sapingana-ogumakar uksasurmalad, ibmar-durgan-anga-ukedgi gwen be an-nug ogannosurmalad. An bese-ibmar-gwag-ukleged-egichedgi-wieguega, an bemar-imaksasulid. Ina-wawagan-oburmakedgi-budar-itogega, an bemar-imaksasulid.
ISA 43:24 Be anga gwen masar-wawadikmalad baksasulid. Gwen be ibmar-durgan-oburgwileged-e-gwallugi an-yeer-itogega, be an-imaksasulid. Aka bur be be-isgumaladgi isdarsunna-itogega be an-imaksamalad. Be-isgumaladi, budarsunna-be-dakega an-imaksad.
ISA 43:25 ”Degi-inigwele, ani, an nue-be-sabsoggu, a-ulale, an bega isgued elied. An be-isguedgi bar binsaosulid.
ISA 43:26 Be angi ibmar-soged-nikale, igar-nabogedneggi be anga sogdado. Be ibmar sogdo, adi, magar-daklegega, bule-nabir be ibmar imaksasuli.
ISA 43:27 Ar be-dad-sailaginedi isgusad. Be-odurdakmaladi, angi dummad-nosmalad.
ISA 43:28 A-ulale, anse-goled-neg-dakmalad-dummagan nug-bipii an imaksad. Jacob-wagan-bela-obelolegega an imaksad. Israel-dulemar-mesagwar-imaklegega an imaksad.”
ISA 44:1 Bab-Jehová soged: “An-mai-Jacob-dulamar, Israel-dulamar-an-na-susad. ¡Emigi, nue be an-itogo!”
ISA 44:2 Weyob Bab-Jehová-be-obinnisadi, sapibeneggi be-omesisadi, be-bendakmaidi, soged: “Jacob-dulamar, melle be dobgu, be an-mai gued, Jesurún, ani an be-susad.
ISA 44:3 Napa-dinnaganaba dii-suurmakega an imakoed, nega-dinnaganaba dianmar an omesoed. Be-wagangine, An-Burba an odegoed, be-anagangine, ise-nued an binsaoed.
ISA 44:4 Gagan-oglegwichiyobi gumaloed, dianmar-gaka-nagaba sapi-senigana-gwigwichi-daeyobi gumaloed.
ISA 44:5 Dule-gwensak sogdagoed: ‘An Bab-Jehováʼgad gued.’ Dule-baiddi ‘Jacobʼye’ nugguoed. Dule-baidmoga e-argangi weyob narmakoed: ‘Ani an, Bab-Jehováʼgadi.’ Geb Israel-nug e-nugga imakoed.”
ISA 44:6 Weyobi, Bab-Jehová, Israel-dulemar-e-Rey, Israel-dulemar-Bendakmaidi, degi, Bela-Gangued-Nikadi, soged: “Ani an gebesailadid, anse bergunaibalid, Bab-Dummad-baidi sulid.
ISA 44:7 ¿Doa anyob gusunna? ¡Dule anyobile, sunmakdo! An an-dulamar-urbisad-akale, ibmarmar-gusad sogdo. ¡An-asabin, yoo-ibagan-guoedgi sunmakdo!
ISA 44:8 ¡Melle be gwayemar, gandik be imakmar! ¿Ar bato an bega sogsasursi? ¿Dikasurgus an be-owisossursi? Ar bemar an-barsogega gumalad. ¿Ar Bab-Dummad-baid maisi? Suli. ¿Bab-Dummad-baid bebina-sogedi maisi? Suli. Gwen Bab-Dummad-baid-gudii an dakdisulid.”
ISA 44:9 Dule ibmar-bab-dummadyob-imakleged-sobmaladi, ibmar-nuedga gusulid. E-ibmar-bur-yeerdakle-sobarmaladi, gwen ibmar-nuedga gusulid. E-sobmaladi, na wismalanad, we-ibmar-bab-dummadyob-imaklegedde, aku atakmalad, uaya yallirmalad.
ISA 44:10 Dule-bab-dummad-baid-sobedi, we-ibmar ega ibmar-nuedga gusulid. Degi, esgoro-diregwadgi bab-dummadyob-imakleged-sobedi, we-ibmar ega ibmar-nuedga gusulid.
ISA 44:11 Bela dule-ega-san-uksamaladi, bingedar itomaloed, we-ibmar-sobedgi-arbamaladi, unnila dulemar gumalad. Bela bular ambikudamarsun, bela dagmarsun. Ar bela ise-gwayar bukudmaloed, nue-bingedar itodmaloed.
ISA 44:12 Dule-esgoro-sobed, esgoro amied. Geb soo-ginnitibidgine, esgoro mesed. Geb mardogi sarsogar bab-dummadyob-imakleged sobed. Ise nuesaar imaked. Ar dule-esgoro-sobedi, mas-gunsuli-arbanaile, gobsurbalile, nolloleddaed.
ISA 44:13 Dule-ibmar-sobedi, suargi-ibmar-soboed dubgi wilub-imaked. Geb esgoro-garagwadgi ibmar sobed, ibmar-orokwaa-saedgi wagar-wilub-onoged. Geb a-sorbali, akwa duleyob-daklege, degi, yeerdaklege sobed, adi, neg-bipigwad-yaba ogwisegar.
ISA 44:14 Dule-baigan nikabalid, urwar-digmalad. Geb dii-wiedi a-urwarmar odummoged. Geb urwar siklegega bukidar nika gunonikoed. Ciprés-warmardibe, barya-warmardibe, sapurba digdamalad, nue-odummogedse imakdamalad.
ISA 44:15 Geb dulemar e-anagan soo-ogaega imakdamalad. Dule waegala, sapan-negabala ogadamalad. Egi soo-ogasale, madu yodamarbalid. Deginbali, egi suar-nuchu sobdamarbalid. Geb e-nug-odummoddamalad. Ibmar-sobaled-bab-dummadyob-imakleged sobdamarbalid. Geb asabin yokorgi-sindigar sigdamalad.
ISA 44:16 Abala, a-suar, sapanga imakdamalad. Egine, geb na mas dudamalad, degi, san nariddamarbalid, geb nue-immelesdamalad. Geb deginbali, egi wadamarbalid. Sogdedamalad: “Soo-gasgu, wis uka-uegus-itole.”
ISA 44:17 Geb suar-gwabgusadgi, suar-nuchu sobdamalad, e-bab-dummadga imakdamalad. Geb asabinni yokorgi-sindigar sigdamalad, e-nug odummoddamalad. Geb ise-wilegar ega sogdedamalad: “Be an-bendake, ar bee be, an-bab-dummadid.”
ISA 44:18 Ar we-dulemar ibmar wissurmalad. Akusunna ibmar itomalad. Ar nue-atakmar-inigwele, akusunna ibmar dakmalad. Neg-aku-itomaladid, akusunna ibmar-itomaladid.
ISA 44:19 Amba ibmar-wisgued napid. Amba magar-ibmar-itoged abeged. Ar gwen weyob binsasurmalad, weyob sogsurmalad: “Suar, abala madu-yoega an ebusad, abala an egi san-narisbalid, a-san an guchad. ¿A-suar-gwabgusadgi, an ibmar-isgana sobode? ¿Ar we-suar-asabin ande yokorgi-sindigar sigode?”
ISA 44:20 Ar we-dulemar sooburu-maeyobi gumalad. Dukin e-binsaedbali yamoledimalad. Geg na-dukin agi onomalad, degi, geg sogbalid: “¡We an-argan-nuedsik-ibmar-ganikidi, ibmar-binsaledid!”
ISA 44:21 Bab-Dummad weyob sogded: “Jacob-wagan, we-ibmar be insao. Ani an be-obinnisad, be an-maiga-gued, Israel-dulemar, an gwen be-iegosulid. Israel-wagan, ar be an-maiga gued.
ISA 44:22 Burwa-sibugana-yogguddaedyobi, an bega be-ibmar-isgana-imaked, osulosad. Degi, boo-aisakiddaedyobi, an bega be-isgued osulosad. Gannar be anse dage, ani an be-nudaksad.”
ISA 44:23 Isaías weyob sogded: “Mogir-billi, Bab-Jehová-ibmar-imaksadgi weligwaledgi be namak. Napa-yaa-matusurmalad, gandikidba be gormakmar. Yalamar, sapurmar, degi, bela e-sapimar, binnasuli be namakmar. Ar ade, Bab-Jehová Jacob-dulemar-bendaksad, Bab-Dummadi e-gandikid-yeerdakleged Israel-yalagi oyosad.”
ISA 44:24 Weyob Bab-Jehová-be-bendakedi, sapibeneggi-be-omesisadi soged: “Ani an Bab-Jehová gued, bela ibmar-obinnisadid. Ani an wargwen mogir-billi egasadid. Ani an dukin napneg onasosadid. Dule gwen an-bendaksasulid.
ISA 44:25 ”Ani an Bab-Dummad-gayaburba-barsogedyob-san-imakdamalad-e-ibmar-sogedi, ega guega an imakdasulid. Nergan an obingesadaed. Dule-binsaed-ibegana sikirmakega an imakdaed. E-binsaed-nikaa-daedi, gannar-gannar-ibmar-obaredga an imakdaed.
ISA 44:26 Ani an an-maimar-gayaburba ogannodaed. Degi, anga-gayaburba-berbemalad anse-ibmar-egisedi, sogedba-guega an imakdaed. ”Ani an soged, ‘Jerusalén-neggwebur gannar sigoye, Judá-neggweburmar gannar bukuoye, e-neg-bibichismalad, gannar an nudakoye.’
ISA 44:27 Ani an demar-wilasailad odinnoged. Degi, diwar-odinnogega an igar ukbalid.
ISA 44:28 Ani an Rey-Ciroʼgi soged: ‘Anga sibad-wawaad-edarbed guye. An-ibmar-abegedi anga sogedba imakoye. Jerusalén-neggwebur gannar sigoye. Anse-goled-neg-e-saila gannar megoye.’ ”
ISA 45:1 Isaías soged: “Bab-Jehová, dulemar-yar-baid-baidgi-bukwamalad Ciro-urbalikwaa-nanaega imaksad. Ciroʼde, Bab-Jehová-nuggi-reyga-nugsalesadid. Degi, Bab-Jehová, Ciro reymar-e-gangued-obelogega imaksadid, Ciro-abinni, yawagakmar-argaega-imaksadid, yawagakmar-mer-bar-atuega-imaksabalidid.”
ISA 45:2 Bab-Jehová weyob Ciroʼga soged: “Ani an be-idunadapi guoed, ani an yalamar-omatogoed. Ani an bega esgoro-gordikid-yawagakmar mamaroed, ani an bega yawagak-eduged-esgorobiid bibisgoed.
ISA 45:3 Ibmar-nuegan-gargerbamalad-dukuar-bukwad an bega ukoed. Ibmar-nuegan-dukuar-bukwad an bega ukoed. Adi, be wisguegar, ani an Bab-Jehová gued. Ani an Israel-dulamar-e-Bab-Dummadid. An be-nugba bese goledid.
ISA 45:4 An, an-mai-Jacob-sabedbali, degi, an Israel-dulamar-susadbali, an bese be-nugba goled. Be aku an-dak-inigwele, an bega nug-gandikid uked.
ISA 45:5 Anbi an Bab-Jehová gued, dule-baid sulid. An-imbagi, Bab-Dummad-baid sulid. Be aku an-dak-inigwele, an be-ogannogoed,
ISA 45:6 adi, dulemar dad-nakwedsik-bukmalad, degi, dad-argwanedsik-bukmalad wisgumalagar, an-imbagi Bab-Dummad-baid sulid. Anbi an Bab-Jehová gued, dule-baid sulid.
ISA 45:7 Ani an neg-meegwad nasiksad, ani an negsichid nasikbalid. Ani an dulemar-nued-gudiguega imakbalid, ani an boni-dummagan ukbalid, ani an Bab-Jehová-guedi, bela we-ibmarmar imakmaid.”
ISA 45:8 Bab-Jehová soged: “¡Nibali, dii-boomiedyobi igar-innikigwad an barmidsun! ¡Mogir-imbaba dii-wiedyobi igar-napiragwad an barmidsun! ¡Napneggi igar-innikigwad maiguguega an imaksun! ¡Abonoleged an barmidsun! An Bab-Jehová-guedgi an we-ibmarmar obinnisad.”
ISA 45:9 Bab-Dummad sogbalid: “Dule na e-obinnisadbo urwele, ¡duledar-wiles-dakle! Ar dule napsa-nog-goayobi, napsa-nog-goamar-abargi-milediidyob gued. Ar napsa dule-e-sobedga weyob sogosi: ‘¿Ibu be imaknai? Be-ibmar-imaknaid nue be imaknaisulid.’
ISA 45:10 ”Dule e-babga sogele: ‘Ibiga be an-baksa.’ Dule-deyob-sogedi, ¡duledar-wiles-dakle! Dule e-nanga sogele: ‘Ibiga be napnegse an-odesa.’ Dule-deyob-sogedi, ¡duledar-wiles-dakle!”
ISA 45:11 Bab-Jehová Israel-dulemar-e-Bab-Dummad-Isligwaled, Israel-dulemar-urbisad, weyob soged: “¿Ar igi-an-mimmigan-yoedse-guoed be anse egichosi? ¿An-ibmar-obinnisadgi bemar anga igar-ukosi? Suli.
ISA 45:12 Ar ani an napneg nasiksad. Ani an dulemar urbisad. An-argangine, mogir-billi an nasiksad. E-niisgwamarga ani an igar uksad.
ISA 45:13 Ani an gandikidba Rey-Ciro-ogwichisad, an ega igarmar nudakoed. Ciro anga an-neggwebur gannar urboed, an-dulamar-gales-bukwad anga onogoed. Ciro, an-dulamar-onogoedi, manigi-baklegar onogosulid. Ani an Bab-Jehová-Bela-Gangued-Nikad deyob soged.”
ISA 45:14 Weyob Bab-Jehová soged: “Egipto-e-ibmar-nuegan, degi, Etiopía-e-ibmar-nuegan, begadga gumaloed. Sabeo-dule-burwisurmaladi, be-sorba esgoro-dubgi ebipilemai gumaloed. Bemar-asabinni yokorgi-sindigar bukumaloed, ise-wilesakwaa bemarga sogdamaloed: ‘Unnila Bab-Dummad wargwenna-mai, Bab-Dummad-baid suli. We-Bab-Dummadi, bemarba naid.’ ”
ISA 45:15 Bab-Dummad, be, Israel-dulemar-Abonogedid, be Bab-Dummad-akudaklegedid.
ISA 45:16 Bela dulemar ibmar-bab-dummadyob-imaklemalad-sobmaladi, bingedar-itoge gumaloed, degi, san-bipii gumaloed. Bela bular na san-bipi gumaloed.
ISA 45:17 Israel-dulemar Bab-Jehováʼgi-nue-bendaklesmalad, bendakles sadegumaloed. Bali-bipisaale, bingedar-itogosurmalad, bali-san-bipi imaklegosurmalad.
ISA 45:18 Ar ade, weyob Bab-Jehová soged: “Ani an Bab-Jehová gued, Bab-Dummad-baid sulid. Ani an mogir-billi-obinnisadid. Ani an napneg-nasiksadid. Ani an napneg-ilemakar nasiksadid, binsa-ollobi-nasikega an imaksasulid, dulemar egi ambikuega an imaksad.
ISA 45:19 Gwen an bemarga we-napneg-naidgi negsichidgi-dukuar an sunmaksasulid. Degi, gwen an Jacob-waganga weyob sogsasulid: ‘Neg-olloledgi be an-amimalo.’ Ani an Bab-Jehová-guedgi igar-napiragwadbi an soged, degi, an igar-innikigwadbi soged.”
ISA 45:20 Bab-Jehová sogbalid: “Dule-yar-baid-baidginmalad bemar-wakindimalad be atomar, be anse dagmar. Akusunna-ibmar-itomaladi, ibmar-sobarmalad-bab-dummadyob-imakleged sedimalad. Degine, bab-dummagan-gwen-e-abonogosulidse gordimalad.
ISA 45:21 Be sunmakmar, ibmar-imaksad be sogmar, na be muchub-muchub egisnanai be samalo. ¿Doa bato dikasurgus iduakwaa we sogsa? ¿Doa epenne bato we-ibmar sogsa? ¿Ar ade, ani an Bab-Jehová we-ibmar sogsasursi? Baid Bab-Dummad sulid. Ani an Bab-Dummad-Innikidaedid. Ani an Dule-Abonogedid. Baid Bab-Dummad sated.
ISA 45:22 ”Bela napneg-ugakagi-bukmalad be abonolemalagala, anse be gannar dagmar. Ar ade, ani an Bab-Dummadid, Bab-Dummad-baid sated.
ISA 45:23 An-nuggi an ise-sogar-imaksad, an napiragwadba ibmar-sogsad, ibmar gusuli-guosulid guedsegad. Bela-dulemar an-asabin yokorgi-sindigar sigmaloed, bela-dulemar anga ise-sogar imakmaloed.
ISA 45:24 ”Wemar angi sogmaloed: ‘Unnila Bab-Jehováʼgi igar-innikigwad danikid, degi, gargangued eginbi danibalid.’ ” Dulemar isdar Bab-Dummad-daksamaladi, Bab-Dummad-asabin nonimaloed, bingedar itomaloed.
ISA 45:25 Bela Israel-e-wagan bendaklegoed, degi, bela Bab-Jehová-nuggi gannarba gumaloed.
ISA 46:1 Babilonia-dulemar e-bab-dummad-Belʼye-nugad dugdir naded, bab-dummad-Neboʼye-nugad balimelleded. Wemar-e-wilubgan-sobarmalad, ibmar-durgan-nabir-ibmar-semaladgi sesmalad. Ar ade, wemar-e-wilubgan yeer-aidikued, bela ibmar-durgan-nabir-ibmar-semalad-ebilis nasikdamalad, ibmar-durgan nue-yegus itodamalad.
ISA 46:2 Bab-dummadyob-imaklemalad dugdir nadmalad, napagi babatided, gwen dukin na bendaksasurmalad, degidba gales selesmalad.
ISA 46:3 Bab-Dummad weyob soged: “Jacob-wagan, be an-itomar, bela Israel-dulemar be an-itomar. Sapibeneggi be maigu, an nue-be-akwisad, an nue-be-nidii gusad.
ISA 46:4 Amba bemar seredgusale, bato bemar nono-dagudikgusale, amba an nue-be-nidii guoed. Amba an-sunnagwad an be-sedioed. Ani an bemar-obinnisad, ani an bemar-bendakdii guoed. Ani an be-sedioed. Ani an igar-bulegangi be-ollorsaoed.
ISA 46:5 ”¿Doa-ebo be an-wilubdakoe? ¿Doa-ebo emar-daklege be an-imakoe? ¿Doa-yopira an-daklege be an-imakoe? Suli. Gege be emaryob be an-imaked.
ISA 46:6 Ar dulemar gwenna-gwenna, binsa e-or sagumargi-bukwadi, obelodamalad, e-manidi, nibirgi wilubsadamalad. Geb dule-ibmar-sobed amidamalad, adi, bab-dummadyob-imakleged sobegar. A-bab-dummadyob-imakleged-nug-odummogega, e-asabinni yokorgi-sindigar sigdamalad.
ISA 46:7 Geb a-sorbali, a-bab-dummadyob-imakleged, gukingi-mai seddamalad. Geb e-gwisguedgi ogwisgudapdamalad, bar onirdasurmalad. Ar dule amba we-ibmar-sobaledse binnasuli-gornaile, amba e-abinsaosulid. Degine, amba dule-bukib-binsadiid egi gwen bendaklegosulid.
ISA 46:8 ”Bemar, uyasulidamalad. We-ibmar be ebinsamalo. ¡Nue na be binsamalo, nue be itomalo!
ISA 46:9 Epenne ibmar-dikasurgus-gusmalad be ebinsamalo. Ani an Bab-Dummadid, dule-baid sated, Ani an Bab-Dummadid, dule-anyobid sulid.
ISA 46:10 Ani an sailanagi yoedse-ibmar-guoed owisoged. Ibmar yoedse-guoedi amba dikasuli-gued-idu an soged. An soged: An-ibmar-abegedi sogedba guoed, an-ibmar-abegedba an imakoed.
ISA 46:11 Dule-gwensakse dikasuli dad-nakwedsik an gochad, sulubagiyob dikasuli danikoed, a-dule, anga an-ibmar-abeged-imakoed. An-ibmar-sogsadi, sogedba-guega an imakoed. An-igar-amisadi, an imakoed.
ISA 46:12 Gwage-dutusurmalad, be an-itomar. Igar-napiragwadgi-dikasurgudimalad, be an-itomar.
ISA 46:13 An-igar-napiragwadi dikasur maisulid, an-abonogedi bato warmaksad. Sión-yala-abonoleged an imakoed, Israel-dulemarga an-gandikid an ukoed.”
ISA 47:1 Bab-Jehová sogbalid: “Babilonia-yala yagwa-yoo-sui-nikuedyobi be guedi, be aidege, napagi be sige. Caldea-dulemar-e-sisgwayobi be guedi, napagi be sige, ar be-ologana bergusad. Bar bese ome-nued-dakleye gorlegosulid, degi, ome-bakagwaledye gorlegosulid.
ISA 47:2 Obnaged-akwa be sue, ibmar-gwag egi be nage. Muswe be unge, sabure-bayaa be sae, dua swiri be imake, diwargi be obake.
ISA 47:3 Be-uka-swiligwadi bela daklegoed, bela be-abganse-bakale, daklegoed. Be dummad-bingeguoed. An buged be-imakoed. Bela dulemar isgusadbi an dakoed, an ega e-isgued gwen eliosulid.”
ISA 47:4 Anmar-Bendakedi, Israel-dulemar-e-Bab-Dummad-Isligwaledid. Bab-Jehová-Bela-Gangued-Nikadye nugad.
ISA 47:5 Bab-Dummad weyob soged: “Caldea-dulemar-sisgwa bogi be sige. Neg-gubyagwaled-yaba be doge. Ar dule bar be-biosulid: ‘Rey-bundor yar-baid-baid-nanaid semaidye.’
ISA 47:6 An-dulamala an-oulus gusad. A-ulale, a-dulemar an obachagusad. Be-argan-yaurgi an uksagusad. Degi-inigwele, gwen be wiledaksasulid. Dule-sergangala arbaed-dummad be uksagusad.
ISA 47:7 Weyob be sogsa gusad: ‘¡Gusgu bela yar-semaigu an guoye!’ Degi-inigwele, gwen be binsassulid, an berguodeeye, gwen weyob-guodeeye be binsassulid.
ISA 47:8 ”Emigindi, Rey-bundor-ibmarbina-surbinsa-itoged, be nue-itogo: Emide, na be nued-gudii itoged, na be dukin-weyob sogdiid: ‘Anbi an weyob guye, dule-baid anyobid surye. Bipisaale, an gwen machered-sate guosurye, an gwen mimmigansuli guosurbarye.’
ISA 47:9 Ar ibagwennaa ukiarmakale, ibmar-sogbobela bega guoed: Mimmigansuli be gunonikoed, degi, machered-sate be gunonikoed. Ar be bukidar ina-isgana-imako-inigwele, degi, bela ibmar-burbamar be oyogo-inigwele, we-ibmar be-bendakosulid.
ISA 47:10 Ar be be-ibmar-isgana-imakedgi be bengussulid. Ar be sogsagusad: ‘We-ibmar-isgana-imakedgi dule an-dakdisuli.’ Be-binsaed-nikadaedi, be-ibmar-wisidaedi, dukin be-yardaksad. Ulubgine na be weyob sogsad: ‘Anbi an weyob guye, dule-baid anyobid surye.’
ISA 47:11 Begine, boni-dummad nonikoed, mer begi-yolegega be imakoenad, degi-inigwele, we-boni begi yolegedsegad. Begine, boni-dummad-nagunonikoed, gwen be gaosulid. Boni-dummad begi danikoye gwen be binsadisulidgi, ukiarmakale begi gwisgunonikoed.
ISA 47:12 ”Ibmar-burbamar-wisid-oyogedgi be alamakdii gudo. Ina-isgana-imakedgi be alamakdii gudo. Ar nuchukwagwad-akale, egi be arbadiid. Abakar wis be-ibmar be-bendakalile, abakar wis be nabir bonigan-ogwayealile.
ISA 47:13 Bukidar-bega-binsaed-uklesadba, be budar-itogusad. Emisgi, dule-niisgwaba-bega-ibmar-dakar-sogmalad dagmarsun: We-dulemar mogirmargi-ibmar-nanaidba-nergumaladid, niisgwa-dakedba-ibmar-sogmaladid, degi, nii-irba iduakwaa-ibmar-guoed-sogmaladid. We-dulemar boni-dummagan begi-danikoedgi be-bendakmarsun.
ISA 47:14 Be-dake, we-dulemar gagan-durganyob-gumalad, bela soo obelogoed. Na-dukin soo-gwabunyedgi san-onogosurmalad. Ar we-soo, neg-uee-imakedyobsulid, geg be walik siged. Geg be we-soo-asabin siged.
ISA 47:15 Weyob dulemar-bebo-alamakdigusad gumaloed. Ar be nuchukwagwad-akale, bebo-ina-isganagi-arbasmalad weyob gumaloed. Na wala-walagwen e-itolegedba nademaloed, ar dule-wargwensaale be-bendakosulid.”
ISA 48:1 Jacob-wagan, we-igar-an-bega-sogoedi, nue be itomalo. Judá-wagan Israel-dulemarye-biledimalad, nue an-itomalo. Bemar Bab-Jehová-nuggi be ise-sogar-ibmar-sogdimaladi, Israel-e-Bab-Dummadse be gordimaladi, napiragwadgi be imakdisurmalad. Igar-innikigwadgi be imakdisurmalad.
ISA 48:2 Bemar neggwebur-islidikidginmaladye na be sogdimalad, degine, Israel-e-Bab-Dummadgi-bensurmalad, Bab-Dummad-Bela-Gangued-Nikadye-nugadgi be bensurmalad, nue be itomalo.
ISA 48:3 Bab-Dummad weyob soged: “Ibmar-gusmaladi, bato an dikasurgus egi an sunmaksad. Yoo-ibmar-guoed-iduale, bato an egi iduakwaa sunmaksad. An-sunnagwad dulemarga an oyosad. Ukiarmakale, an imaksad. Bela deyob gunonikid.
ISA 48:4 Ar ade, bato an wisid, bede nue gwage-dutusulid, be-dukar-war esgoro-gannaregedyobid, be-bebe-gar esgoro-gordikidyobid.
ISA 48:5 A-ulale, an bega dikasurgus we-ibmar sogsad. Iduakwaa we-ibmar-guoed an bega oyosad, adi, melle be sogegar: ‘An-ibmar-bab-dummadyob-sobaled, we-ibmar imaksaye. An-ibmar-wilub-sobaled, degi, an-suar-sobaled we-ibmar-guoed sogsaye.’
ISA 48:6 Bela we-ibmarmar-gusad be itosad, bela be daksad. Degite, ¿bemar we-ibmarmar-gusad sogosursi? ”Emisgi, an ibmar-binigan bemarga an sogoed. Be-idu ibmar-dukuar-mamaidi, akudaklemaladi, an bemarga sogoed.
ISA 48:7 We-ibmarmar emiskwaa imaklesmaladid, dikasurgus imaklesurmaladid. Emi-ibagine, amba egi-sunmakleged be itodisulid, adi, melle be sogegar: ‘Eye, dika bato an wisbinye.’
ISA 48:8 Bipisaale, gwen we-ibmar be itodisulid, gwen be wissurbalid. We-ibmar gwen be iduar itodisulid, gwen bega iduar be-uaya, magasar-itogega argassulid. Ar an nue be-wisid, be emar-yardakmaladid, be gwalulesad-akale, uayasulidaedye be-bimalad.
ISA 48:9 ”An, an-nug-sabed-ulale, an-urwed an bargaed. An-nug-odummoleged-ulale, an na san-bargaed, adi, melle be-obelogegar.
ISA 48:10 ¡Be dakena! An swilidik be-imaksad. Degi-inigwele, mani-swilidik-imaklegedyob an be-imaksasulid, sabsur-wile-itolegedgi an be-wilubdaksad.
ISA 48:11 An we-ibmar-imaksadi, an-ulale an imaksad, an na dukin-sabed-ulale, an deyob imaksad. ¿Sunna an-nug obanagwar-imakmalaga an imakosi? Suli. An-nug-odummolegedi, dule-baidgadga an ukosulid.”
ISA 48:12 Bab-Jehová weyob sogbalid: “Jacob-wagan, be an-itoge, Israel-wagan, ani an bese gochad. Ani an Bab-Dummadid. Ani an gebesailaginedid, anse bergunaibalid.
ISA 48:13 An-argangine, napneg an nasiksad, an-argan-nuedsiki, mogir-billi an egasad. Ani an e-nugba ese gochagu, bela nagunonikid.
ISA 48:14 ”Bela bemar ambikumar, be an-itomar: ¿Doa we-ibmar-guoed iduakwaa sogsa? Ani Bab-Jehová, an dule-gwensak-susad Babilonia-yalagi an-ibmar-imakbied imakoed, Caldea-dulemargi gwichiguoed.
ISA 48:15 Ani an we-ibmarmar sogsad. Unnila ani an we-dulese gochad. Dagega, an imakoed, e-ibmar-imakoedgi emargi obinoed.
ISA 48:16 ”Anse be walikgudamar, an ibmar-sogoedi, nue itomalo: Gebesailaunni an gwen dukuar sunmaksasulid, ibmarmar gualile, bato an gunaidaed.” Emide, Bab-Jehová-Bela-Gangued-Nikad, E-Burba-gandikidba an-barmialid.
ISA 48:17 Weyobi Bab-Jehová be-Bendakedi, degi, Israel-dulemar-e-Bab-Dummad-Isligwaled, soged: “Ani an Bab-Jehová gued, bemar-Bab-Dummadid. Ibmar-nueganba be-odurdakedid, ibu-igarba be nanaoe, a-igarba be-iduedid.
ISA 48:18 An-igarmar-mamaidba be uaya-nika gudigusana, diwar-aryomadaedyobi ulubgi bogidikid be nikuoenad, demar-mullumakmadaedyobi be baisur-itodii guoenad.
ISA 48:19 Be-wagan ukub-naidyob-mergu guoenad, be-mimmigan ukub-merguedyob-mergu guoenad. E-nuga gwen-alliosulinad, an-asabinni, gwen weyob guosulinad.”
ISA 48:20 ¡Babilonia-yalagi be ainimar! ¡Caldea-dulemargi be wakinmar! Bemar Babilonia-yalagi-noedgi binnasuli weligwaledba be we-igargi sunmakmalo. We-ibmar dulemar-wisguega be imakmalo, bela yala-naid-ugakaase gayaburba be mimimalo. Weyob be sogmalo: “Bab-Jehová, e-mai-Jacob-wagan bendaksaye.”
ISA 48:21 Nega-dulesulidganba-seargua, gwen ukud mechasurmalad. Bab-Jehová emargala, akwasailagi dii-aryogega imaksad. Akwa-marisgusadgi dii-binnasur ega aryogega imaksad.
ISA 48:22 Bab-Jehová soged: “Dule-isganagardi gwage-bogidikid sateye.”
ISA 49:1 Dikasur-demar-gakaba-bukmaladi, be an-itomar. Neggwebur-bannaba-bukmaladi, an-ibmar-sogoed itomalo: Gwaluleged-iduale, Bab-Jehová bato anse gochad. Sapibeneggi-mai, bato an-nug bisad.
ISA 49:2 Es-suid-swiswidikidyobi an-gayaburba imaksad. E-argan-yaurgine an-odukusad. Sigu-daarmakaledyob an-imaksad, e-sigumar-saboged-yaba an-odukusad.
ISA 49:3 Bab-Dummad anga weyob sogsad: “Israel-wagan, be an-maiga gued. Begine, an-nug odummolegoed.”
ISA 49:4 Geb an abinsaded: “Binsarsunna an arbasad. Binsarsunna an gar-itosad, gwen ibmar-nued an nikgussulid. Degi-inigwele, an-ibmar-imakedi, Bab-Jehováʼgi siid. Bab-Dummad anga-ibmar-nuegan-ukoed bato guagwar sisad.”
ISA 49:5 Emide, Bab-Jehová soged: “An e-maiga-guegala, sapibeneggi-mai anga burba uksad. Adi, Jacob-wagan gannar eba nanaegar, Israel-dulemar gannar ese ambikudagegar. Ar ande Bab-Jehová-asabin an-nug gannarba gued. Agala, an-Bab-Dummad anga niga-ogannoged.”
ISA 49:6 Bab-Dummad weyob e-maiga soged: “Be an-maiga-guedgi, unnila be anga Jacob-waganbi gannarse nudakosulid. Unnila be anga Israel-dulemarbi gannar-e-yarse sedagosurbalid. Dulemar-yar-baid-baidgi-bukmaladga, neg-meegwadga-guega an be-imakbalid, degi, bela napaneg-naid-ugakaasega, an-abonoleged-igar-sedega an be-imakbalid.”
ISA 49:7 Bab-Jehová, Israel-dulemar-ollor-imakedi, Bab-Dummad-Isligwaledi, weyob soged, dulemar-yar-baid-baidgi-bukmaladse mesagwar-gulediidga, isdar-daklediidga, degine, dummagan-negdakmamaid-e-maiganga, weyob soged: “Reymar be-dakdamalogu, gwisgudmaloed. Dule-dummagan-nuga-nikamalad be-dakdamalogu, be-abin dulluu imakmaloed. Israel-dulemar-e-Bab-Jehová-Isligwaled-ular, be-nug odummodmaloed. Ar ade, Bab-Dummad, dule-napiragwadid, degi, na e be-susadid.”
ISA 49:8 Bab-Jehová weyob soged: “Iba-nuegangi an be-itosad, degi, abonoleged-ibagangi an be-bendaksad. Emigindi, an nue-be-akoed, degi, an begine dulemarga igar mesoed, adi, be gannarse neggwebur-urbegar, degine, nainumar-olloo-nanaid be mimiegar.
ISA 49:9 Adi, dule-galesmaladga weyob be sogegarba: ‘Be ainimarye.’ Degi, dulemar-negsichidgi-bukmaladga weyob be sogegarba: ‘Bemar ollorgusmarye.’ ”Bemar, igarbali, be-ibdurganga gagan-ara-aramalad amimaloed, bela nega-dulesulid-yar-mullugangi gagan-ara-aramalad be amimaloed.
ISA 49:10 Bemar ukudmaada itogosurmalad. Dad-ibeler-gaedi, degi, neg-ueguedi, budar-itoge be-imakosurmalad. Ar dule-wile-be-daked, be-nioed, dian-aryomamaidba be-sedoed.
ISA 49:11 Bela an-sapurmar-nanaidgi igar-mamai an imakoed, an-igarmar an omesoed.
ISA 49:12 ¡Be dakmalana! Wemarde dikasuli danimaloed. Gwen-gwen dad-nakwed-argan-sapiledsik danimaloed, baigandi, dad-argwanedsik danimarmogoed, degi, baigandina, Sinim-yar-akar danimaloed.”
ISA 49:13 Nibneg-naid, be weligwaledba, ¡binnasuli gole! Napneg-naid, ¡be wergusun! Sapurmar, ¡gandikidba be namakmar! Ar Bab-Jehová e-dulemar-gwage armaked, e-dulemar-wilesagwa-gudimalad wiledaked.
ISA 49:14 Degi-inigwele, Sión-yalagi-bukmalad weyob sogsad: “Bab-Jehová walagwen an-meted, Bab-Jehová an-iesad.”
ISA 49:15 Bab-Jehová sogdebalid: “¿Ar sunna nan-gwensakde e-mimmi-iesi? ¿Ar sunna e-mimmi-baksad sabgusuli gusi? Ar we-nande, e-mimmi-nue-ieye-sogele, andi an gwen be-iegosulid.
ISA 49:16 An-argangi-sobar-naiyobi an be-sediid. Be-galu-matusurmaladi, an iedisulid.
ISA 49:17 Bega-neg-sobmaladi, begi gwae-gwae danimalad. Be-obelomaladdi, begi bangudmalad, bei neg-ollomaksamalad begi bangudmalad.
ISA 49:18 Nue be-atake, be-dikarba nue be neg-dake. Bela bulakwaa ambikunonimalad, bese danimalad.” Bab-Jehová soged: “An dula-maisoggu, bela wemar, ibmar-nuegan-ebulegedyobi gumaloed, abirgin-nikued-mor-yolegedyobi gumaloed.
ISA 49:19 ”Be-yala obelosmar-inigwele, akwamarbi ganna-ganna obesmar-inigwele, degi, olloo nasiksamar-inigwele, be-yala be-dulemarga unniguosulid. Dule-be-wiosmaladdi, dikasuli bemargi bukwa gumaloed.
ISA 49:20 Be-mimmigan-bei-yoggusye-na-be-bisadi, bega sogdamaloed: ‘Dogdar we-yala anga bipii noye. Anga be neg-amiye, agi nabir an gudisaegarye.’
ISA 49:21 Geb degi, be binsadoed: ‘¿Doa we-mimmigande anga baksasunna? An mimmi satenad, ar an geg mimmi bakenad. An ononnoles gudiinad, emarse-obanagwar an gudiinad. Ar we-mimmigande, ¿doa anga odummossunna? Ar an walagwen gudiinad, emide, ¿ar bia wemarde danimarsunna?’ ”
ISA 49:22 Bab-Jehová-Bur-Biriginedi weyob soged: “Dulemar-yar-baid-baidgi-bukmaladga an igar ukoed, neggwebur-bukmaladsik an-bander an onakoed, adi, wemar, e-sakwagi-mai bega be-mimmigan-sedamalagar, degi, e-gukingi-mai bega be-bunamala-sedamarbaligar.
ISA 49:23 Reymar e-mimmiganga be-imakmaloed, degi, rey-omegan be-nanga gumaloed. Be-asabinni, dulluu napase imakmaloed. Degi, maligi ukub-naile, bega elimaloed. Geb agi, be wisgumaloed, ani an Bab-Jehová gued. Dule-angi-bensurmaladi, bingedar itogosurmalad.”
ISA 49:24 Dule-bila-onomalad bila-onogedgi-ibmar-susadi, ¿sunna e-ibe be susi? Geg gue. Dule-galesadi, ¿sunna dule-isgana-e-gasadgi wakinnosi? Suli.
ISA 49:25 Degi-inigwele, Bab-Jehová weyob soged: “Dule-bila-onoged bila-onogedgi-ibmar-susadi, e-ibe sulegoed. Deginbali, dule-isgana dule-gasa-sesadi, gannar e-annik sulegoed. Ar andi, dule-begi-urwedimaladgi an be-bendakoed. An-sunnagwadi, an be-mimmigan bendakoed.
ISA 49:26 Be-isdarmalad na dukin e-san-gunmalaga an imakoed. Vino-gobeyobi, na dukin e-ablisgi-mumgumalaga an imakbaloed. Degisoggu, bela dulemar wisgumaloed, ani an Bab-Jehová gued. Ani an be-Abonogedid. Ani an Jacob-waganga dule-gandikid gued. Ani an be-bendakedid.”
ISA 50:1 Bab-Jehová weyob soged: “Israel-dulemar, ¿an bemar-nan obachasi? Degite, ¿bia abirgin-meted-gardade nadsunna? Anga be oyodo. ¿An doa-dulemarga bemar-egi-mani-ganikidyobi an be-uksamarsunna? An deyob be-uksasurmalad. Ar be-isgued-ular, na be dukin uksamalad. Bemar uaya-sate-gusad-ulale, be-nan oballedsunnad.
ISA 50:2 An nonigua, ¿ibiga dule-sate an daknonisunna? An gotegua, ¿ibiga dule gwen an-abin-imaksasursunna? ¿Ar bemar-bendakosurye, be angi binsamala? ¿An bemar-onogega, garganguedsuli be an-dakmala? Ar an sunna, demar, ilagwensaale dinna saed. Ar an sunna, diwarmar, nega-dulesulidga-nai imaked. Uamar e-mas-satedba burgwideled. Dii-dingudedba uamar bela nungudeled.
ISA 50:3 An sunna mogir-billi nega-gubyagwaledbi-nai an imaked, mor-sichid-naidyobi an imaked.”
ISA 50:4 Bab-Jehová binsaed-ibegan-sunmaked-gwabinduku anga uksad, adi, dulemar-geggus-gudimalad-e-gwage gadi-gadi-imakegar. Bab-Dummad bane-bane wakudaryalabali an-odaked, ibmar-itogega an-imaked, adi, dule-ibmar-durdaknaidyobi an ibmar durdakegar.
ISA 50:5 Bab-Jehová ibmar-magar-itogega an-imaksad, an eba uayasuli gussulid, an eba ibsassuli gwen gussulid.
ISA 50:6 Dulemar-an-bibyonanaidga an-yargan an oyosad. Dulemar-an-siga-sabsur-ungemaladgi, an-aku an gwen odukussulid. Degine, dule-angi-dodomaladgi, degi, angi-wiakmaladgi, an-wagar an gwen odukussulid.
ISA 50:7 Ar Bab-Jehová-Bur-Birigined an-bendaked, degisoggu, mesagwar-imaklenaidgi an bai itossulid. A-ulale, akwasailayob an na gandik imaksad. Ar an wisid, an bingeguosulid.
ISA 50:8 Dule-an-irwa-gwisguedi, an-nagaba gudiid. ¿Degisoggu, doa anbo gala-itobie? Dule anbo-gala-itobiele, ¡anse dagdo! Dule angi gwisgubiele, ¡anga ibmar sogdado!
ISA 50:9 ¡Ar Bab-Jehová-Bur-Birigined an-bendakdaed! ¿Doa sabsur-odurdakleged-igar anga mesosunna? Ar an-isdarmaladdi, ilagwen-berguar gudoed, igi mor suuse-gulledae, deyobi namaloed.
ISA 50:10 ¿Doa bemar-abargi Bab-Jehová-dobee gudii? ¿Doa Bab-e-mai-sogedba nanadii? Dule sated. Dule-negasichidba-nanadiidi, neg-meegwadba-nanadisulidi, a-dule, Bab-Jehováʼgi bensuli guoed, e-Bab-Dummadgi alakwaa naguoed.
ISA 50:11 Ar bemar na soo ogadamalad, na be gwinnur ogadamarbalid. Bemar na be soo-ogadamaladgi be nanabukmalad, na be gwinnur-ogadamaladgi be nanabukmalad. Degi-inigwele, an we-ibmarmargi sabsur-bemar-odurdakoed: Igar-bulegangi be sabsur-odurdaklemaloed.
ISA 51:1 Bab-Dummad weyob soged: “Bemar, igar-innikigwadba-nanadimalad, be an-amidimalad, be an-itomar: Bemar, dad-Abraham-wagan gumalad.
ISA 51:2 Be nue-dakmar, ar dad-Abraham bemar dad-dummadid, degi, muu-Sara bemar-urbisadid. An Abrahamʼse gochagua, na sana-walagwen gudiinad. Degi-inigwele, an egi nued binsasad, an ega dula omelosad.
ISA 51:3 Ani Bab-Jehová, Sión-yala wiledakedsegad. Bela e-neg-bibichismaladi, wiledakoed. E-nega-dulesulidgan Edénʼgi-nainu-nued-naigusayobi, imakoed. E-nainu-geg-ibmar-egi-sanmakedi, an-nainuga guoed. A-nainugine weligwar-itomaloed, egi wergumaloed. Anga namaklegedgi namakmaloed, dog-nuedye anga sogmaloed.
ISA 51:4 ”An-dulamar, nue be an-itomar. An-neggweburmar, nue be an-itomar: Ar ani an ibmargi-odurdakleged-igar onioed, an-igar-napiragwadi, dulemar-yar-baid-baidgi-bukmaladga neg-meegwadga guoed.
ISA 51:5 An-igar-naboged, bato walik-gusad. An-abonoleged-igar bato igarba abarmakdanikid. An-ganguedi, dule-yar-baid-baidgi-bukmaladga igar nabogoed. Dule-demar-gakaba-bukmaladi, angi bensurmalad, an-ganguedgi, bendakleged abdakmalad.
ISA 51:6 Niba be atakmar, napneggi be atakmarbar. Waa-berguddaedyobi, mogir-billi bergudoed, mor-nunguddaedyobi napneg nungudoed. Gukur-burgweyobi, e-dulemar burgwidoed. Degi-inigwele, an-abonogeddi, degisadegu maiguoed. Degi, an-igar-napiragwaddi, noargumai gwen guosulid.
ISA 51:7 ”Bemar, igar-napiragwad-wismalad, be an-itomar. Gwagegi-an-igar-sedidimalad, be an-itomar. Dulemar-begi-ichakwa-sunmakedi, melle be dobgumalo, sabsur-e-ibmar-sogedgi, melle be niga argwanmalo.
ISA 51:8 Ar we-dulemar unnila mor suuse-gulledaedyob gumaloed, mor-wawaad nusmarse-gulledaedyob gumaloed. Ar an-igar-napiragwaddi, degisadegu maiguoed, an-abonoged-igardi, maigu guoed.”
ISA 51:9 Bab-Jehová, ¡be atake! ¡Be atake! ¡Gandikid-mola be yoe! Epenne be-gangued be-dulamarga-be-oyosayob be oyoge. ¿Ar bee be, Rahab-obelossursi? ¿Ar bee be, ibdula-demargined obelossursi?
ISA 51:10 ¿Ar bee be, demar-odinnosgussursi? ¿Ar bee be, a-dii-wilasailad odinnossursi? ¿Ar bee be, dule-bendaklesmalad-obakega demar-wilasailadgi igar-omesisgussursi?
ISA 51:11 Bab-Jehováʼgi-bendaklesmalad gannar nonimaloed, weligwaledgi namakagwale Sión-yalase dognonimaloed. Weligwar-itodiidi, magasar na e-wagargi oyomaloed. Wergudii gumaloed, na yeer itomaloed. Bukib-binsadiidi, gwage-nunmak-itodiidi, bela bergudoed.
ISA 51:12 Bab-Jehová weyob soged: “Ani an bemar-gwage baisur-itoge imakedid. ¿Ar ibiga be dulemar-dobe? Ar wemardi, unnila gagan-durganyob gumalad.
ISA 51:13 ¿Bab-Jehová-be-obinnisad be iesde? ¿Bab-Jehová-mogir-billi-nasiksad bato be iesde? ¿Bab-Dummad-napneg-nasiksad bato be iesde? ¿Bane-bane be-isdarad-be-obelobi-gudiidgi be gwayedii guode? ¡Adi surbali! ¿Sabsur-dule-odurdakdiid-e-urwedde, bia nadsunna?
ISA 51:14 Dulemar-esgaryagi-gales-bukmaladi, emiskwaa onolemaloed. Esgaryagi burgosurmalad, gwen ega mas galakuosurmalad.
ISA 51:15 Ani an be-Bab-Dummad-Jehová gued. Ani an demar-osukamakedid, ani an demar-uurmakega imakedid. Bab-Jehová-Bela-Gangued-Nikadye an nugad.
ISA 51:16 Be-gwabindukugine, an-gayaburba an nasiksad. An-ganguedbali an be-anar gwisgusad. Ani an mogir-billi nasiksad, ani an napneg nasiksad. Degine, Sión-yalagi-bukmaladga an weyob sogsad: ‘Be an-dulamar guye.’ ”
ISA 51:17 ¡Jerusalén-dulemar! Be gwisgumar, be gwisgumar. Bab-Dummad-e-urwed be itosad. Be bela-belad ulubse surbinsa-itoge be gusad, geg bar be gwisgu gusad.
ISA 51:18 Bela be mimmigan-nikusadi, gwen wargwensaale, be-idugega gussulid. Bela be mimmigan-odummosadi, bipisaale, gwen argangi be-gassulid.
ISA 51:19 We-bonigan-sogbogwad begi nonigusad: Be-neggwebur bibichisgusad, degi, be-neggwebur obelolesgusad. Ukudba be gala-itosgusad, es-suidgi oburgwilesgusad. ¿Doa wile be-dakoe? ¿Doa be-gwage baisur-itoge imakoe?
ISA 51:20 Be-mimmigan galakusmalad. Goe-sapur-bebe-suid sakigi-galesnaidaeyob gusmalad, galimba-dikarba mellemamaid. Egine, bela Bab-Jehová-e-urwedi gwichigusad, bela be-Bab-Dummad-urwedi egi gwichigusad.
ISA 51:21 Emisgindi, dule-bukib-binsadiid, vino-gobedginsuli be mummu-gudiid. An-bega-ibmar-sogoed be ito.
ISA 51:22 Be-Bab-Dummad-Jehová-Bur-Birigined, e-dulemar-ular-sunmakedi, weyobi soged: “An-urwedgi an sabsur-bemar-odurdaksad an obelosad. We-an-urwedi bipisaale bar be itogosulid.
ISA 51:23 Dulemar-sabsur-be-odurdakdimalad an odurdakoed. Ar we-dulemar bega weyob sogsa gusmalad: ‘Napagi balimellemai be imakmarye, adi, anmar begi annamalagarye.’ Ar deyob be imaksa gusmalad, ega napagi mellemai be gusmalad, bela dulemar be-birgi annas gusmalad.”
ISA 52:1 Sión-dorgan, ¡be atake! ¡Be atake! ¡Gandikid-mola be yoe! Neggwebur-islidikid-Jerusalén, be-mor-gargerbamalad be yoe. Ar dule-abgan-uka-duku-sikarsurmaladi, degi, dule-Bab-Dummad-wissurmaladi, bar bemarse dogosurmalad.
ISA 52:2 ¡Jerusalén-neggwebur, be gwichigue! ¡Olli be obate! ¡Gannar ologanagi be sige! Sión-yala-sisgwa, be galesgua, dukargi-esgoro-dub-nasiklesad be unge.
ISA 52:3 Ar Bab-Jehová weyob soged: “Bemar manigi be uklessulid, bemar manigi be onolegosurbalid. Bemar binsa-onolegoed.”
ISA 52:4 Ar Bab-Dummad-Bur-Birigined-Jehová weyob soged: “Epenne an-dulamar, Egipto-yalase nadegusad. Agine, na megisgusmalad. Emide, Asiria-sordamar binsarsunna an-dulemar-mesagwar imakalid.”
ISA 52:5 Emide, Bab-Jehová soged: “¿Ibi an wegi imakdii? Ar binsarsunna, an-ibe an-dulamar-gasa sesmalad. E-negsemamaid an-dulamargi dodomalad. Bane-bane an-nuggi dododigudamalad, bogigudisurmalad.
ISA 52:6 Degisoggu, a-ulale, a-ibagangine, an-dulamar an-nug wisgunonikoed. A-ibagangine, ani an ega sunmaknaidi, an e-walik gwisgunonikoed.”
ISA 52:7 Dule yar-imbaba-gayaburba-nued-sedanikidi, dule-gayaburba-bogidikid-berbegedi, ibiyobi yeer daklemala. Dule gayaburba-nuegan-barsogedi, degine, dule abonoleged-igargi-sunmakedi, ibiyobi yeer daklemala. Dule, Sión-dulemarga weyob-sogedi: “Be-Bab-Dummad negdakmaiye.” Dule-deyob-sunmakmaladi, ibiyobi yeer daklemala.
ISA 52:8 ¡Be itoge! Be-dule-nakulemalad binnasuli-gorbukmalad, weligwaledbali gandikidba gorbukmalad. Ar ade, na e-ibyagwale dakbukmalad, Bab-Jehová gannar Sión-yalase daniki.
ISA 52:9 Jerusalén-dulemar, na be bular-weligwar-namaklegedgi be namakmar. Ar ade, Bab-Jehová e-dulemar-baisur-itogega imaksad, degi, Jerusalén-neggwebur bendaksad.
ISA 52:10 Bab-Jehová, bela dulemar-yar-baid-baidgi-bukmaladga e-gangued oyogoed. Bela napneg-naid-ugakaase-bukmaladi, anmar-Bab-Dummad-e-abonoged dakmaloed.
ISA 52:11 Bemar, Babse-goled-neggi-ibmar-ebulemalad-semaladi, be nomar, be agi ainimar. ¡E-dulemar-abargi-gudiidgi be nomar! ¡Be san-urukmar! ¡Melle ibmar-swilidiksulid be ebumalo!
ISA 52:12 Degi-inigwele, mer be gwae-gwae itomalo. Mer be gwae-gwae-abarmakdemarbalo. Ar Bab-Jehová bemar-idumai guoed. Israel-e-Bab-Dummad be-sorba-nai guoed.
ISA 52:13 Bab-Jehová soged: “An-mai emargi nakoed. E-nug odummolegoed, dule-dummadga guoed, degi, ologanagi sigoed.
ISA 52:14 Dulemar dakdamalogu, bukidar geger-dakmaloed, ar e-wagar-daklegedi bar aa daklegosulid, ar e-daklegedi, bar dule-daklegosulid.
ISA 52:15 Amba deyob dulemar-yar-baid-baidgi-bukmaladi, geger dakmarmogoed. E-asabinni, reymar gwen-sunmakosurmalad, ar weyob-ega-ibmar-soglessulid dakdamaloed, degi, weyob-ibmar-itossurmalad na magar itononimaloed.”
ISA 53:1 ¿Doa anmar-ibmar-sogsad bengussuli? ¿Doase Bab-Jehová na e-gangued oyosa?
ISA 53:2 Bab-Jehová, e-mai sapi-e-nii-dutugwad-dungueyobi odummosad. Sapi-e-mali napa-isganagi dogdedaeyobi, e-mai-odummosad. E-mai yeer daklesulid, gandik daklesurbalid. E-daklegedi, wilubba dakleged. Dulemar baisur-dakmalad.
ISA 53:3 Dulemarse obanagwale gusad. Mesagwale gusad. Gwage-nunmaked-itodii gusad. Undar-odurdakledii gusad. Dulemar gwen-dakbisuli gusmalad. Dulemarse obanagwale gusad. Gwen anmar bai daksasurmalad.
ISA 53:4 Degi-inigwele, anmarga anmar-bonigan sesad, anmar-anar, anmar-nunmaked itosad. Anmardi egi binsaed, Bab-Dummad we-dule-naibi-imaksaye, sabsur-imaksaye, degi, mesagwar-imaksaye.
ISA 53:5 E na, anmar-uaya-sated-ular, naibigusad. E na, anmar-isgued-ular, bela-bela sabsur-bibyolesgusad. Anmarga gwage-bogidikid-ukegala, anmar-ular, bela-bela sabsur-odurdaklesad. Anmar e-naibigusadgi nugunonimalad.
ISA 53:6 Anmar bela sibad-wawaad-yoggusgudidaedyobi, yoggus gudimalanad. Na wala-walagwen e-itolegedba gudidimalanad. Degi-inigwele, Bab-Jehová bela e-maigi anmar-isgued nasiksad.
ISA 53:7 Sabsur-imaklenaigu, mesagwar-imaklenaigu, gwen e-gaya itolessulid. Igi-sibad-wawaad-senigwad e-oburgwilegedse selesdae, deyobi, gaya-itosuldgi selemai gusad. Igi-sibad-wawaad ega-e-absar-siked-abin, gordasuli, deyobi, dulemar-asabin Bab-Jehová-e-mai gaya nikussulid, degi, dulemar-asabin gwen gochasurbalid.
ISA 53:8 Gasmargua, ega igar-amismargua, oburgwismalad. Gwen bai daksasurmalad, e-bina sogsasurmalad. E-wagan-danikoedgi gwen binsassurmalad. Dulemar-bukwad-abargi gandikidgi onolesad, an-dulamar-isgued-anar, oburgwilesad.
ISA 53:9 Gwen e-sunmakedgi emar-yardaksasur-inigwele, gwen ibmar-isgana-imaksasur-inigwele, dule-ibmar-isgana-imakmalad-abargi burgwisad, degi-inigwele, mani-ibgan-abargi diglesad.
ISA 53:10 Ar Bab-Jehová, mesagwar-guega imaksad, sabsur-wilegega imaksad. E na dulemar-isgued-anar san-uksasoggu, a-ulale, na suitiba gudii guoed, bela e-waganmar-dakoed, Bab-Jehová-sogedba bela ibmar imakoed.
ISA 53:11 Sabsur-wilegoed-sorbali, magar-daknonikoed, e-sabsur-wilesadi, binsa wilessuli, degidbali na yeer-itononikoed. Bab-Jehová soged: “An-mai-innikigwadi, e-ibmar-wisidbali, dulemarga igarmar nabogoed. E na dule-ibmar-isgana-imaked sedoed.
ISA 53:12 A-ulale, dule-dummagan-abargi an osimogoed, e-ibmar-suoedi dule-gandikmaladbo mimioed. Ar ade, na burgwegala, e-san uksad. Dulemar-isgumaladyob imaklesmogad. Dule-bukidarad-e-isgumalad na sesad, dule-isgumalad-irwa gwisgusad.”
ISA 54:1 Bab-Jehová sogded: “Be, omegwa-geg-baked, gwen be mimmi-nikudisulid, weligwaledba be binnasuli-gole. Be, gwen-muu-neggi-boniba-galitodisulid, binnasuli be namake. ¡Weligwaledba be binnasuli-gole! Ar ani Bab-Jehová soged: Ome-wilesagudiid, bur bule ome-sui-nikadba mimmigan nikuoye.
ISA 54:2 ”Be-dordoneg-siidi, be odummo, be-dordoneg-siidgi atued-dummagan-nanaid be egae. ¡Melle dobe-dobe be imako! Dordoneg-e-dubamar be osugue, e-dordoneg-bargamalad be ogannoge.
ISA 54:3 Ar be-argan-nuedsiki, degi, be-argan-sapiledsiki be nasgudoed. Be-wagana yar-baigan suoed, be-wagana neggweburmar-olloganagi ambikudoed.
ISA 54:4 ”Melle be dobe-itogo, ar be bingeguosulid. Melle be gwayo, ar be-nug mesagwar guosulid. Be yagwaunni bingegusadi be iegoed. Bei-machered-burgwisgu, bingedar be itosadgi bar be binsaosulid.”
ISA 54:5 Ar Bab-be-obinnisadi, be-suiga gued. A nugad: “Bab-Jehová-Bela-Gangued-Nikadye.” Be-bendakedi, Israel-dulamar-e-Bab-Dummad-Isligwaledid. A bilegoed: “Bela-napneg-naid-e-Bab-Dummadye.”
ISA 54:6 Be ome-wilesakwagudiidyob Bab-Jehová bese gornonikoed. Ome-suli-suli-itodiidyob Bab-Jehová bese gornonikoed. Igi ome dogdar yagwa-guedgi machered-nikusale, machered gannar metedae, deyob gudiidgi Bab-Dummad bese gornonikoed.
ISA 54:7 Bab-Jehová-be-ollor-imakedi soged: “Unnila sikwas an be-obachad. Degi-inigwele, na bela-belad ulubgi wile-be-dakedgi gannar an be-abingaoed.
ISA 54:8 Unnila sikwas-sae-itogedgine, an be-idu bangusad. Degi-inigwele, sabgued-degisadeguad-nikadgine, an wile be-dakoed.”
ISA 54:9 Bab-Dummad sogdebalid: “Angardi Noé-ibaganyobi gued, igi an Noéʼga ise-sogar sogsa gusa, muu-dummad bar napneggi murosurye. Deyobi, an bega ise-sogar soged, bar an bebo urwosulid, bar an iisedi bega ibmar sogosulid.”
ISA 54:10 Bab-Jehová-wile-be-dakedi soged: “Amba yalamar-bukwad baidsik ainirye-sogele, degi, yar-mullugana giglimakdele, andi amba an be-sabedi gwen gwagosulid. Anbo be igar-bogidikid-omesisadi, andi obelogosulid.”
ISA 54:11 Bab-Jehová-soged: “¡Be dake! Neggwebur-nue-wilesagwa, burwa-dummadba oitolesad. Dule a-neggwebur baisur-itogega-imaked sated. ¡Akwa-nuegan-yeerdaklemaladgi an be-soboed! Akwamar-zafiros-birgi an be-sioed.
ISA 54:12 Be-galu-matusulid-birgine, an akwa-rubí-nuegan e-bargaedga mesoed. Be-yawagakmar akwa-gargemalad-gaemaladgi an soboed. Degi, bela be-galu-matusurmalad, akwa-gargemaladgi an soboed.
ISA 54:13 Ani Bab-Jehová, bela be-mimmigan odurdakoed, be-mimmigan gwage-bogidikid nika gudii guoed.
ISA 54:14 Igar-napiragwadi gannarbaa an be-imakoed. Mesagwar-gudii bar be itogosulid. Bali dobee be itogosulid. Begine, gwayed-dummadi bangudoed, gwen be-walikaa guosulid.
ISA 54:15 Dule begi gwichigualile, an eba-nai guosulid, dulemar-yogasaar begi gwichiguarmalale, bese galakudmaloed.
ISA 54:16 ”Ani an dule-esgoro-sobed-soo-oduurmakedi obinnisad. We-dule, na bilagi-ibmar-ebulemalad sobed. Ani an dule-emar-obeloged obinnisbalid, adi, bela dule-obelogegar.
ISA 54:17 Dule begi-nakwega, bila-onogedgi-ibmar-ebuleged-yeer-ganguedi, gwen begi obinosulid. Dulemar begi yogasaar-sunmakmaladi, boo-sigega be imakoed. We-ibmarmala anga-arbadimaladga an ukoed. Angine, igar-innikigwad danikid.” Deyobi, Bab-Jehová soged.
ISA 55:1 Bab-Jehová sogbalid: “¡Dule-uku-uku-itodimaladi, dii gobdamar! Dule-mani-surmaladi, ibmar-sudamar, vino be sudamar, moli-nunis be sudamar. Gwen be bennukosulid, binsa bega uklegoed.
ISA 55:2 ¿Ar ibiga be binsarsunna mas-nuedsulidgi be mani-oesunna? ¿Ar ibiga binsarsunna be ibmar-yeer-ito-be-imaksulidgi mani-misunna? Be nue an-itomar, bur be mas-nued gunmar, ar be mas-nuegan-gullegedgi na be yeer itomaloed.
ISA 55:3 Nue be bogi itomar, be anse dagmar. Be nue an-itomar, adi, be dula gudii gumaloed. An bemar-ebo degisadegu igar mesoed, adi, an-mai-David-sabedba an-ega-ibmar-sogsa-gusadba guegar.
ISA 55:4 Dulemargala, we-David, an-barsogega an nug-imaksad, degi, dule-yar-bamaladga-e-odurdaked-sailaga-guega an nug-imaksad, degine, dummadga an nug-imaksad.
ISA 55:5 Israel-dulemar, dulemar-dakdisurmaladbina be goloed, degi, dule-aku-be-dakdimarmogadi, bese abarmakdanimaloed. Ar ani an be-Bab-Dummad-Jehová Israel-dulemar-e-Bab-Dummad-Isligwaled, be-nug odummosad.”
ISA 55:6 Bab-Jehová be amimar, ar emisgwa, Bab-Dummad amilegedgined, Bab-Dummadse be gormar, ar ade, be-walikaa gudiid.
ISA 55:7 Dule-ibmar-isgana-imaked, e-igar-isgana-imakedgi bangusun, dule-isgana, e-binsaed-isganagi bangusun. Bab-Jehová amisun, ar ade, Bab-Jehová dule-nuedid, isgued-eliedid. Ar anmar-Bab-Dummad wile be-dakoed.
ISA 55:8 Bab-Jehová soged: “An-binsaedi, bemar-binsaedyobsulid, an-daedi, bemar-daedyobsulid.
ISA 55:9 Igi mogir, napneggi dikasur nai, deyobi, an-daedi, bemar-daedba bur-dikasur-akalad. Deginbali, deyobi an-binsaedi, bemar-binsaedba bur-dikasur-akarbalid.
ISA 55:10 Ar dii-wiedi, degi, dambed-sibudikid-batedi, ibmar-imaksasuli geg gannar ainakwedaed. Bina we-ibmar imakgwelergebed: Napa-owardikuergebed, napagi-ibmar-oniergebed, ibmar-gwag-osanmakergebed, adi, dule-ibmar-digedga, ibmar-gwag-ukega, degine, dulega masgunned ukegarbar,
ISA 55:11 deyobi, gayaburba an-gayagi nodele: Anse ollobi nonikosulid, an-ibmar-abegedba ibmar saoed, an-ibmar-sogedba ibmar imakoed.
ISA 55:12 Bemar weligwaledba ainidmaloed, bogidikidgi gannar be-yalase be momaloed. Be-nadapidbali yalamar, degi, yar-mullugan, binnasuli-weligwaledba namakdemaloed. Degi, bela sapimar-bukwadi, argan ogotemaloed.
ISA 55:13 Gagan-ikobimalad-muchubbi, ciprés-sapimar ainidagoed. Dakemar-muchubbi, mirto-sapimar dungudagoed. We-ibmarmala, ani an-Bab-Jehová-nug ogannogoed, we-ibmarmala, degisadegu e-wilubga naiguoed.”
ISA 56:1 Bab-Jehová weyob soged: “Igar-innikigwad be imakmar, igar-nued be oyomar. Ar an-abonolegedi, warmakdanigusad, an-igar-innikigwadi, sanar-guoed.
ISA 56:2 Dule, an-igarmarba nanadiile, degi, sogedba eba gudiile, we-dule, dule-weligwaledid. Dule, obunnoged-ibagi obunnodiile, gwen egi nodisulile, degi, dule ibmar-isgana-imakdisulile, we-dule dule-weligwaledid.”
ISA 56:3 Dule-ainebalidi e-binsaedba Bab-Jehová-nug-odummodiile, geg weyob binsaed: “Bab-Jehová e-dulemar-imbagi an-obanguoye.” Dule-alugwasualed geg weyob sogmogad: “Sapi-dingus-gwichidyob, an dakleye.”
ISA 56:4 Ar Bab-Jehová weyob soged: “Ar dule-alugwasuarmalad obunnoged-ibagi obunnodimalale, an-ibmar-abegedba ibmar-imakdimalale, an-igar-mesisadba nue-nanadimalale,
ISA 56:5 an-neggweburgi, anse-goled-negyaba, galugi an ega e-nuga ise-narmakar nasikoed. We-ibmala ega mimmigan-nikuedba bur bule guoed, degine, an ega nug-degisadeguad ukbaloed, bipisaale gwen e-nuga ielegosulid.
ISA 56:6 Dule-ainebarmalad anga-arbaega anba-akasmaladi, an-nug-ogannogega anba-akasmaladi, an-nug-odummogega anba-akasmaladi, an-yalase an nidoed. Bela obunnoged-ibagi-obunnodimalad gwen angi-nodisurmaladi, degi, anbo-igar-mesisad-sogedba-gudimaladi,
ISA 56:7 an-yala-islidikidse an nidoed. Anse-goled-neggi an weligwar-imakoed. Anga ibmar-ogumakar-ukleged-ailagi ibmar-ukmaloedi an abingaoed. Degi, anga-ibmar-ogumakar-ukmaloedi, an abingabaloed, ar an-nega, bela dulemarga anse-goled-negye nugguoed.”
ISA 56:8 Bab-Dummad-Bur-Birigined-Jehová weyob soged: “Israel-dulemar e-yargi-gudisurmaladi, gannar e-yargi-ambikuega imaked. An-dulamar dagega an imakoed, bato an Israel-dulemar-baigan-urbisadbo, an oatogoed.”
ISA 56:9 Bab-Jehová weyob soged: “Bela ibmar-durgan-sapurgi-gudimaladi, degi, bela ibmar-durgan-ursirmaladi, be dagmar, an-dulamar be obelodamar.
ISA 56:10 Bela Israel-dulemar-nakulemaladi aku-atakmalad, ar wargwensaale, ibmar-daksurmalad. Ar bela achu-gwabinsulidyob gumalad, ar geg urwemalad. Gadi-gabmalad, wiegalamalad, yeer gabed itodamalad.
ISA 56:11 Bemar achumar-gadi-mas-gunnedyobmalad, immeleged itodasurmalad. Bemar sibad-wawaad-edarbemalad, ibmar akusunna itomalad. Na war-wargwen e-itolegedba gudidii nanaed, bela na e-ibmar-abegedba wala-walagwengi gudidiid.
ISA 56:12 Binnasuli be gormar, bemar sogmala: ‘¡Dagmar, anmar vino sunamar! ¡Anmar mumgue, inna-gagbid gobe! Anmar banedse emiyobi ibmar imakbaloed, emiba anmar bur bule imakmaloed.’ ”
ISA 57:1 Dule-innikidaedi burgwemamaigusad, dule gwen bai daksurmalad, dule-bega-arbamalad-nuegan, burgwemamaigusad. Ar dule aku itodamalad, ibiga dule-nuegan isgued-ular burgwiddamala.
ISA 57:2 Ar dule-igar-nuedba-nanaedi, nuedgi burgwemalad, neg-uangi obunnomegisdamalad.
ISA 57:3 Bab-Jehová sogded: “Bemar, ome-ina-isgana-imaked-mimmigan, negsichigi-galagwensuli-gambanuchuganba-nanamalad-e-wagan, be anse walikgudamar.
ISA 57:4 ¿Doagi be dodoye sogmala? ¿Doaga be binnasur gaya-maa-maa-imake? ¿Doaga be gwabin buud-buud-imake? ¿Ar bemar isgued-mimmigansursi? ¿Ar bemar gakansamalad-wagansursi?
ISA 57:5 Bemar wag-ulu-sapi-urba, degi, bela sapi-dummagan-urba, galagwensuli guddamalad. Bab-dummadsurmalad-e-nug-odummogega diangangi, degi, akwa-yaa-ollogangi burwigana be oburgwiddamalad.
ISA 57:6 Dian-akwa-swirimalad, begadga gumaloed. We-akwa-swirigangi be bergudmaloed. We-ibmar-asabinni, vino be eosmalad, degi, ega be ibmar-gwag-uklemalad uksamalad. Degite, ande we-ibmarmar-abinni, ¿bogi sigode? ¡Adi surbali!
ISA 57:7 Yar-matusulid-birigine, be-meged be omesisad, yar-matusulidse be nakwisad, agi bab-dummadsulidga ibmar-ogumakar-ukega be nakwisad.
ISA 57:8 Be-yawagak-daksiki, degi, e-suarmargine, bab-dummadyob-imaklemalad be nasiksad. Be angi bangusad, dule-baid-asabinni uka-swili be gwisgusad. Be-meged-dummad-omesisadgine, be megisad. Doamarbo be megbigusa, amarbo be igar nabosad. Amarbo be megisgua, e-abgan be daksad.
ISA 57:9 Bab-dummad-Molocʼse be nanasad. Ega be olivo-gwallu berbedii gusad, be-ina-wawagan ega be omelosad. Be be-nuggi-sunmakmalad dikasuli barmisad. Amala, dule-burgwarmalad-burbase binsaed-amiega, be barmisad.
ISA 57:10 Bali-bali-nanaedba be yegus-inigwele, degite, gwen be sogsasulid: ‘An wesegoye.’ Aka bur be gangusad. A-ulale, gwen be galakussulid.
ISA 57:11 ”¿Doa be-ogwayisa? ¿Doa dobguega be-imaksa? Emide, be an-yardakdiid. Gwen be angi bar binsassurmalad. Gwen bai be an-daksasurmalad. ¿Ar be an-dobsurmarsunde? ¿Ar an undar bogi-gudigusadba be deyob damarsunde?
ISA 57:12 Emisgi, an be-ibmar-imakedi an barsogoed, gwen bega ibmar-nuedga guosulid.
ISA 57:13 Ar dule-be-bendakega be binnasuli gollalile, we-ibmar-sobarmalad-bab-dummadyob-imaklemalad gwen be-bendakosulid. Bela we-ibmarmala burwaba seledoed, unnila buu-imakedgi yoggudoed. Ar dule angi-bensuli guele, napaneg egadga guoed, an-yala-islidikid na egadga suoed.”
ISA 57:14 Bab-Jehová sogded: “Weyob sogdamaloed: ‘Igar-nudakmar, igar-nudakmar, igar-mesmar, an-dulamar-idu igar-isgana nudakmar.’
ISA 57:15 Ar ade, ani an Bab-Dummad-degisadegu-maidid, an-nuga Isligwaledid, weyob an soged: Ani an niba-maid, neg-isligwaledgi an maid, degi, dulemar-bukib-binsadimaladgi, degi, gwage-eikwaa-imakmaladgi an burbar maibalid. Adi, dulemar-gwage-eikwaa-imakmaladga niga-ogannogegar, degi, dule-bukib-binsadimalad baisur-ito imakegar.
ISA 57:16 An degisadegu an-dulamargi gwisgudii guosulid, degisadegu an amarse urwedii guosurbalid. Ar degisulile, bela an dulemar-obinnisadi an-abin bergudo-itole.
ISA 57:17 Emar-isgued-ular, an ese ulusad. An-urwedgine, an sabsur-imaksad. An egi bangusgusad, degi-inigwele, aka igar-isganaba bur nanadmalad.
ISA 57:18 E-damaladi, an daksad, degi-inigwele, an ega nudakoed. Idudii an guoed, baisur-itoge an imakoed. Degine, dule-ega-bukib-binsadimalad,
ISA 57:19 weligwaledgi weyob namakmalaga an imakoed: ‘Dikasuli-bukmaladga gwage-bogidik gusun, degi, walikaa-bukmaladga gwage-bogidik gusun.’ An-dulamar an isgussulidyob-dakoed. Ani, an Bab-Jehová-guedgi, deyob soged.
ISA 57:20 Ar dule-ibmar-isgana-imakmaladi, demar-arwemaiyob gued, geg bogi meged. Igi demar-arwemair, ibmar-isgana mie, degi, ollimar-miardae, deyob dule-isganamar gued.
ISA 57:21 An Bab-Dummadi soged: ‘Dule-isganamargala gwage-bogidikid sulid.’ ”
ISA 58:1 Bab-Dummadi Isaíasʼga sogded: “Gandikidba be binnasuli gole, melle be bogguo, gar-trompetaʼyob be binnasuli gole. An-dulamarga e-nodiid be soge, Jacob-waganga e-isgudiid be soge.
ISA 58:2 Ar bane-bane anse gordimalad, dulemar igar-innikigwad-imakdiiyobi, degi, An-Igar-Mesisadgi bangussurmalayobi, An-Igar-Mamaid wisgubimalad. Igar-inniki-imakleged anse egismalad, ar anse walikgudabimalad.
ISA 58:3 Degi, ar anga weyob sogmalad: ‘¿Ar ibiga anmar mas-gunsuli bese-golega gudiguoe? Ar bede aku-anmar-daked. ¿Ar ibiga anmar be-ular san-wiomarsunna? Ar bede baisur anmar-dakbalid.’ ”Bemar mas-gunsuli-gudigued-ibagi, mani-onogedgi be arbadamalad, degi, dule-bega-arbamalad be sabsur-imakdedamalad.
ISA 58:4 Ar unnila bemar urwegala, degi, abin-abin-imakmalagala, na sarsomalagala, be mas-gunsuli gudii damalad. Ar be-itobi be an-abemalale, be mas-gunsuli-gudigued imakmardo. Degi-inigwele, melle emi-imakedyobi be imako.
ISA 58:5 Weyob mas-gunsuli-gudiguedgi, ¿dule na dukin san-wiodii imakoye an sogsasi? Nargammu-dopee-daklegedyobi, ¿nono-dullu-gudiguoye an sogsasi? Gwage-naibid-oyogega, ¿wile-itoged-mor-yoi gudiguoye an sogsasi? ¿We be bimarsunde, mas-gunsuli-gudigued an yeer dakye? Degi, ¿Bab-Jehová-iba-nued guye?
ISA 58:6 ”An-ular-mas-gunsuli-gudigued-iba an susadi, ¿igar-isgana obelogegarsursi? ¿Dule-sabsur-arbaega-imakleged onogegarsursi? ¿Dule-mesagwar-saledimalad bendakegarsursi? Degine, ¿bela igar-isganaba-ebipiledimalad onogegarsursi?
ISA 58:7 Ar mas-gunsuli-gudiguedi, ¿dule-ukudmaada-gudiidga be-mas be ukegarsursi? ¿Dule-negsuli-gudimalad akwegarsursi? ¿Dule-morsatemaladga mor-ukegarsursi? Degine, ¿melle be-gwenadgan-obanegarsursi?
ISA 58:8 Ar be weyob mas-gunsuli-gudigued imakele, igi-wakudar-dad-ibeler noardae, deyobi be guoed. Boni-be-nikadi, yog-bega nugudoed. Be-igar-inniki-imakedi bega igar egaoed, gandikidba-an-yeerdaklegedi beba gudioed.
ISA 58:9 Be anse golele, an be-abinsaoed. Be anse-bendakleged-egisele, an bega sogoed: ‘¡Wegi an gwichiye!’ ”Dule-mesagwar-imaked-igargi be banguele, dulegi-gwisgued-igargi be noele, degi, yogasaar-emargi-gakansaedgi be banguele, igi-negsichidgi neg-ibegwar-naddae, deyobi be-daedi naoed.
ISA 58:10 Dule-ukudmaada-gudimalad be bendakdele, degi, dule-ibmar-abesa-gudiidga be ibmar-ukdele, igi-yoruku-neg-mee-dakledae, deyobi be-daedi guoed.
ISA 58:11 Ani an Bab-Jehová gusgu be-idudii guoed. Nega-dinnaganba an bega mas-ukdii guoed, an bega be-garmar ogannogoed. Igi-dutugalu ogles-naidae, deyobi be guoed, igi-ibe-aryomaidaedi, geg dii-bergue, deyobi be guoed.
ISA 58:12 Dikasurgus-neg-bibichismaladi gannar bemar soboed. E-sailamar dikasurgus-mamaidi, ogannomaloed. Be weyob bilemaloed: ‘Galu-matusurmalad-bibichisad-nudakmaladye, negmar-bibichisad-gannar-sobmaladye.’ ”
ISA 58:13 Bab-Jehová weyob soged: “Obunnoged-ibagi be obunnodimalale, gwen egi be nodisurmalale, an-iba-islidikidgi be-itolegedba be ibmar-baigan-imaksulile, be ani Jehováʼgine wergued amimaloed. Weyob be obunnoged-iba-bimalale: ‘Weligwaled-ibaye.’ Degi, weyob be iba-islidikid-bimarbalile: ‘Bab-Jehová-nug-odummoged-ibaye.’ Be angine, wergued amimaloed. Obunnoged-ibaga be bagagwar-gumalale, mani-onogedgi-arbasulidgi be an-nug-odummomalale, degine, walagwengi be-itolegedba-yogasaar-sunmaksulidgi be an-nug-odummomalale,
ISA 58:14 be angine, wergued amimaloed. Neggwebur-e-dummaganga an be-imakmaloed, degi, be-dad-Jacobʼba be ibmar-nikuoedgi be yeer itomaloed.”
ISA 59:1 Bab-Jehová anmar-abonogega, ganguedsurye soglesulid. Degi, aku-anmar-itoye soglesurbalid, ar bela magar anmar-itoged.
ISA 59:2 Ar bemar-isguedi, Bab-Dummadgi-banguega bemar-imaked. Ar be-isgumaladi, Bab-Dummad bemar-idu wagar-aibirar-megega imaked, adi, melle bemar-itogegar.
ISA 59:3 Ar bemar ablisbi argan sedimalad, degi, goonumar isguedbi na be sedimalad. Be-gwabin-duku unnila gakansaedgi sunmaked, be-gaya unnila igar-isganaginbi sunmaked.
ISA 59:4 Dule igar-innikigwadgi-sunmaked sulid, dule napiragwadgi-igar-naboged sulid. Gakansalegedgi bensurmalad, na muchub-muchub gakansamalad. Binsaed-isganagi binsadamalad, degi, igar-isgana imakdedamalad.
ISA 59:5 Dulemar, naibe-nuegan-e-akwa-bukwayobi binsaed-isgana sedimalad, diba-nagueyob, igar-isgana amimalad. Dule, binsaed-isgana we-naibe-akwayob gunnele, burgoed. Ar dule, we-naibe-akwa marele, ega naibeyob binsaed-isgana ainidagoed.
ISA 59:6 Dibagi geg mor sobleged, dule diba-soblealed geg e-morga imaked. Dule-ibmar-imakedi ibmar-isganabi-imakmalad, e-ibmar-samaladi, unnila sabsur-neg-gagaed.
ISA 59:7 A-dulemar ibmar-isgana bur-imakmalad, bur dule-ibmar-akalodisulid-ibe ablis eomalad. E-binsaedi, galagwensur-igar-isganagi binsamalad. E-ibmar-imakedi bela neg-oichoged.
ISA 59:8 Gwage-bogidikid-igar gwen wissurmalad. E-ibmar-imakedgi igar-innikimalad naisulid, unnila igar-noarmaladbi onoardaed. Ar dule we-igar-isganamarba nanadiile, gwage-bogidikid-igar wisguosulid.
ISA 59:9 Isaías sogded: “A-ulale, igar-napira-maid anmargi banguded. Degi, igar-innikigwadi anmargi aibated. Neg-meegwadi anmar abdakdii gusanad. Degi-inigwele, neg-gubyagwaledgi anmar bukudapid. Neg-ibegwaledi anmar abdakdii gusanad. Degi-inigwele, anmar negsichidgi bukudapid.
ISA 59:10 Dule-aku-atakmaladyobi, anmar galu-ebu-ebu gudimalad. Dule-ibyasurmaladyobi, anmar negsichidgi acha-acha gudimalad. Neg-mutikidyobi, anmar neg-ibgine yoleddamalad. Anmar bonisuli-inigwele, burgwaleyob na gudimalad.
ISA 59:11 Bela anmar wiob-uurmakedyob, uurmakbukwad. Nuu-sibu akiginnedyob, anmar akiginbukwad. Aisaar igar-innikigwad-imaked anmar na abdakbukwanad, gwen imaklessulid. Ollorgued-igala anmargi amba dikasulid.
ISA 59:12 ”Be wisid, anmar-isguedi bukidarad. Anmar-isguedi, anmargi aibined. Anmar-ibmar-isgana-imaked anmarba gudiguad. Anmar isguedgi-gudiidi, na magar itomalad.
ISA 59:13 Anmar, uayasuli gusad. Anmar, Bab-Jehová-obachamalad. Anmar, Bab-Dummad-iedmalad. Anmar, dogdar dule-mesagwar imakmalad, degi, dogdar dule-yardaksamalad. Anmar-binsaedgi-gakansaed-ainiedi, anmar dulemarga sogsamalad.
ISA 59:14 Igar-napira-maidi isdar-daklege gusad, degi, igar-napiragwadi amba anmargi dikasulid. Dulemar-ambikuedgi igar-nabirid-oyoleged bergusad. Binsaed-nikadaedi, bar anmar oyosurgusad.
ISA 59:15 Dule ibmar-nabir-imaked, bar daklesulid. Ar dule isguedgi bangudele, bela e-ibmar-nikadi ei obelodamalad. ”Bab-Jehová bela igar-innikimalad-bergusa-dakargu, nabir-itossulid.
ISA 59:16 Bab-Dummadi, dule igar-nuegangi bar-binsasuli dakargu, geger dakalid. A-ulale, Bab-Dummad na e-gangued oyogoye binsaalid. Adi, anmar-abonogegar, e-igar-innikigwadba anmar-abingaegar.
ISA 59:17 Bab-Dummadi e-igar-innikigwadi, sigu-abgaedyobi yooed, degi, bormo-gurginyobi abonoleged-igar sioed, buged-imaked-mola yooed, urwed-mola yooed.
ISA 59:18 Dule-ibmar-imaksamaladba sabsur-odurdakoed. Neggwebur-demar-gakaba-bukmaladga buged-imakoed: E-isdarmaladse urwoed, degi, e-isdarmaladgi buged-imakoed.
ISA 59:19 ”Dad-argwanedsikmalad Bab-Jehová-nug dobgudmaloed. Dad-nakwedsikmalad Bab-Jehováʼgi binsaed-nikaa gudmaloed. Ar ade, diwar-gwichigudanidaedyobi Bab-Jehová na e-buu-imakedba danikoed.”
ISA 59:20 Bab-Jehová weyob soged: “Dule-bendakedi, Sión-yalase danikoed, Jacob-wagan-e-isguedga-bukib-binsaega imaknonikoed.
ISA 59:21 ”An bemarbo igar mesed, An-Burba bemargi maigu guoed. Be-gwabindukugine, an bega an-gayaburba-nasiksadi, bar begine alliosulid. Degi, be-mimmigangine, be-wagangine, bar an-gayaburba alliosulid, emi-ibadse degisadegu guoed.”
ISA 60:1 Bab-Jehová soged: “¡Jerusalén-dulemar, be gwichigu! ¡Bela ibegwale be gumar! ¡Be-neg-ibegwaledi bese warmaknonikid! Ani Bab-Jehová-gued. An-gangued-yeerdaklegedi begi ibegwar naid.
ISA 60:2 Be dake, neg-gubyagwaledi napneg-gasanaid. Degi, negsichidi, dulemargi naid. Degi-inigwele, an-ibegwaledi begi mee-gaoed. ¡Begine, an-gangued-yeerdaklegedi oyolegoed!
ISA 60:3 Dule-yar-baid-baidgi-bukmaladi, be-neg-meegwadba gudii gumaloed, degi, reymar be-neg-ibegwaledba nanadii gumaloed.
ISA 60:4 ”Nue be atake, be-dikarba be nue neg-dake: Bela danar-ambikusmalad, bese danimalad. Be-mimmigana dikasuli bese danimaloed. Be-bunamala argangi-annikaa nidanimaloed.
ISA 60:5 Weyob be dakoed, degi, weligwaledba be yeer itodoed, ise-weligwaledba be-gwage dik-dik naguoed. Degi, be-gwage ise-yeer itonaoed. Ar begala neggwebur-demar-gakagi-bukmalad-e-ibmar-nuegan senonimaloed. Degi, dulemar-yar-baid-baidgi-bukmalad-e-ibmar-nuegan bese warmaknonikoed.
ISA 60:6 Be-walik moli-yargan-muremalad engudoed. Madián-dulemar-e-moli-yargan-muremalad, Efa-dulemar-moli-yargan-muremalad engudoed. Bela Sabá-neggweburginmaladi bese nonimaloed, bega ina-wawagana, degi, ormar senonimaloed. Degine, an-nug-odummogagwale danimaloed.
ISA 60:7 Bega, Cedar-neggwebur-e-sibad-wawaadmar ambikunonikoed. Degi, Nebaiot-neggwebur-e-sibad-wawaad-machergan bega ibnuedga guoed. Adi, an-ailagi anga ibmar-nued-uklegedga guegar. Degi, ani an, an-nug-odummoleged-neg yeerdaklege an imakoed.
ISA 60:8 ”Mogiryob-nasdamalad, ¿wede doamala? Nuu-sibuyob e-uuse nadapdamalad, ¿wede doamala?
ISA 60:9 Neggwebur-demar-gakaba-bukmaladi angi benguosurmalad. Tarsis-ur-dummagan, ur-dummagan-idudanikid. We-urmar, dikasuli be-mimmigan-sedanikid, degi, e-ormar, e-manimar sedanikid, adi, an-nug-odummolegegar. Ar ani an Israel-dulemar-e-Bab-Dummad-Isligwaledid, ar ani an gandikidga be-imaksad.
ISA 60:10 ”Dule-ainebarmalad bega gannar galu-matusurmalad soboed, degi, e-reymar bega arbamaloed. An-urwedgi an sabsur-be-odurdaksa-inigwele, an-sabguedgi an ise-wile be-dakoed.
ISA 60:11 Be-yawagak argasigu guoed, mutikidbali, degi, ibginedbali gwen atiosulid. Bega dulemar-yar-baid-baidgi-bukmalad-e-ibmar-nuegan seledanikoed, e-reymar bese ilekwaa seledanikoed.
ISA 60:12 Dulemar-yar-baid-baidgi-bukmaladi, degi, yalamar-nanaidi, beba ibmar-imaksulile, bela obelolegoed.
ISA 60:13 ”Líbano-yala-e-ibmar-nuegan-nikadi, bese warmakoed, ciprés-sapi-warmar, baryawarmar, degi, abeto-sapi-warmar bese warmakoed. Adi, an-neg-islidikid yeerdakle imakega, an-mali-onakwed-gana-neg-siid-e-nug ogannogegar.
ISA 60:14 Dulemar-mesagwar-be-imakmalad-e-mimmigan, bese dulluu-ambikunonimaloed. Bela dulemar isdar-be-dakmaladi, be-asabin sindigar-signonimaloed, degi, weyob be-bimaloed, ‘Bab-Jehová-neggweburye, Sión-yala, Israel-dulamar-e-Bab-Dummad-Isligwaledgadye.’
ISA 60:15 ”Be walagwen-melledgus-inigwele, degi, be isdardakles-inigwele, dule gwen be-igarba nanassur-inigwele, degisadegu nug-dummarba-guega an be-imakoed, degi, dulemar weligwar be-imakega an imakoed.
ISA 60:16 Dule-yar-baid-baidgi-bukmalad-e-mas be gunnoed, reymar-e-ibmar-nuegan bega uklegoed. Degisoggu, na be wisguoed, ani an Bab-Jehová be-Abonogedid. Ani an Jacob-wagan-e-Bab-Dummad-gandikid be-bendakedid.
ISA 60:17 ”Esgoro-gordikid-muchubbi an bega olo sedagoed, esgoro-muchubbi an bega mani sedagoed. Urgo-muchubbi an bega esgoro-gordikid sedagoed, degi, akwamar-muchubbi an bega esgoro sedagoed. Neg-bogidikid-naguega an imakoed. Degi, igar-innikigwadi negseega an imakoed.
ISA 60:18 Bipisaale bar be-yargi sabsur-imaklegedi, be itogosulid. Bar be-yalagi neg-bibichedgi, degi, neg-obelogedgi sunmaklegosulid. Ar ade, weyob be-galu-matusurmaladgi soglegoed: ‘Abonolegedye.’ Degi, be-yawagakmardi weyob bimarbaloed: ‘Bab-Dummad-nuggi-namaklegedye.’
ISA 60:19 Bar dad-ibeler bega neg-ibgi, neg-meegwadga guosulid, degi, nii bar bega mee gaosurbalid. Ar Bab-Jehová bega gwallu-meegwad-degisadeguadga guoed. Be-Bab-Dummad be-gangued-yeerdaklegedga guoed.
ISA 60:20 Dad-ibeler bar bega argwanosulid, degi, nii-gaedi gwen mommolegosurbalid. Ar ani Bab-Jehová be-gwallu-meegwadga degisadegu guoed. Geb agi be-wile-itodiidi bergunonikoed.
ISA 60:21 ”Degisoggu, bela innikigwadga be-dulemar guoed, degi, bela be-dulemar napneg gaoed. Sapi-ainiedyob ainidamaloed. Ani an deyob imakoed. An-sunnagwad an imakoed, an-nug odummolegoed.
ISA 60:22 Dula-ichegwadi bur miliba (1,000) mergudoed, bur-neggwebur-bipigwadi, neggwebur-gandikidga guoed. Ani an Bab-Jehová gued. We-ibmarmar-guoed-e-ibagan warmaknonikile, gwae-gwae-guega an imakoed.”
ISA 61:1 “Bab-Dummad-Jehová-Bur-Birigined-E-Burba angi maid. Ar ade, dule-wilemaladga gayaburba-nuegangi-sunmakega, Bab-Dummad an-susad. Bab-Dummad an-barmialid, dule-gwage-nunmak-itodimaladga gwage-armakegar. An-barmialid, dule-galesbukmalad-onogedgi sunmakega, degi, dule-esgaryagi-galesbukmalad onogegar.
ISA 61:2 Bab-Dummad an-barmiarbalid, Bab-Jehová-birga-nuedgi sunmakega, degi, anmar-Bab-Dummad-buged-mai-imakoed-e-ibagi sunmakegar. An-barmiarbalid, bela dule-wile-itodimalad-e-gwage armakega,
ISA 61:3 degi, Sión-dulemar-gwage-nunmak-itodimalad-niga ogannoegar. An-barmialid, nonogi-buru-biin-gudiid-muchub, ega ologurgin ukegar. An-barmialid, wile-itoged-muchub, weligwaledba ega gwallu-wawad ukegar. An-barmialid, bukib-binsadiid-muchub, ega weligwar-itoged ukegar. Geb degine, wemar weyob biledmaloed: ‘Igar-innikigwad-urwar-sapimarye.’ Bab-Jehová na e-gangued-oyogega digsad.
ISA 61:4 ”Negmar-epennemalad-bibichis-bukwadi, gannar sobmaloed. Negmar-birgabargus-akwamarbi-omilededi, gannar nudakmaloed. Neggweburmar-bibichis-bukwadi, gannar obinomaloed. Dikasurgus akwamarbi-neggwebur-omilededi, gannar nudakmaloed.
ISA 61:5 Dule-ainebarmaladi, be-sibad-wawaadmar akwemaloed. Dule-neggwebur-baidsikmaladi, be-nainumargi, degi, be-uva-nainumargi, bega arbamaloed.
ISA 61:6 Ar bemardi weyob biledmaloed: ‘Dule-irwa-Bab-Dummadse-goled Bab-Jehováʼgadye.’ Bemarga sogdemaloed: ‘Anmar-Bab-Dummadga ibmar-imakmaladye.’ Dulemar-yar-baid-baidgi-bukmalad-e-ibmar-nuegangi, be yeer itomaloed. E-ormar-sunsogmaladi, be yomaloed.
ISA 61:7 ”An-dulamar, e-binged-dummad-itosmalad-muchub, ibmar-nuegan ilabo-wilub abingamaloed. An-dulamar, e-nug-isgusad-muchub, ibmar-ega-uklegoedgi yeer itomaloed. Deyobi, na e-napagine ibmar-ega-uklegoedi, ilabo-wilub abingamaloed, degisadegu weligwale gudii gumaloed.
ISA 61:8 ”Ani an Bab-Jehová, igar-innikigwad-sabedid, ar ibmar-atursaeddi, degi, igar-isgana-imaklegeddi, an isdar-daked. An-inniki-daedgi an bemarga ibmar-buged-ukleged ukoed. An bemarbo igar-degisadeguad mesoed.
ISA 61:9 Be-wagana, dulemar-yar-baid-baidgi-bukmalad-imbagi, nug-nika gumaloed. Be-mimmigan neggweburmar-imbagi nug-nika gumaloed. Dulemar dakarmalale, magar dakmaloed, sogmaloed: ‘We-dulemar, Bab-Jehová dulemargi-nued-binsasmalad e-waganad.’ ”
ISA 61:10 “Bab-Jehováʼgi an bela-bela yeer itoged, an-Bab-Dummadgi an weligwar itoged. Ar ade, abonoleged-mormar anga yosad, degi, igar-innikigwad-imaked-morgi an-edusad. Machered ome-nikunair, igi ibmar-yeerdakleged bebegi-yoidae, deyobi an gued. Ome sui-nikunair, igi ormar-nasikdae, deyobi an gued.
ISA 61:11 Ar igi napa ibmar-muugan-oniega imake, degi, igi nainu ibmar-gwag-niega imake, deyobi, Bab-Jehová-Bur-Birigined, bela dulemar-yar-baid-baidgi-bukmalad-abargi, igar-innikigwad, degi, namakleged, ainidagega imakoed.”
ISA 62:1 An Sión-neggwebur-sabed-ulale, an bogiguosulid. An Jerusalén-neggwebur-sabed-ulale, an obunnogosulid. Geb Bab-Dummad-e-Igar-innikigwad-imaked magar-daklegedse, an bogiguoed. Geb Bab-Dummad-bendakleged, gwinnur-gaedyob-guedse, an obunnogoed.
ISA 62:2 Dulemar-yar-baid-baidgi-bukmaladi, be-igar-innikigwad-imaked dakmaloed. Bela reymala be-gangued-be-yeerdakleged dakmaloed. Nug-gwapid be nikuoed, Bab-Jehová-sunnad bega nug ukoed.
ISA 62:3 Bab-Jehová-e-argangine, ologurgin-yeer-gaedyob, be guoed. Be-Bab-Dummad-e-argan-yaurgine, ibmar-yeerdakleged-reymar-bebegi-nasiklegedyob, be guoed.
ISA 62:4 Wargwen-mellededye, bar be-biosurmalad. Napabi-naidye, be-yala biosurmarbalid. An egi-yeer-itogedye, be bilegoed. An-sanwaye, be-yala bilegoed. Ar Bab-Jehová begi yeer itogoed, be-yala sui nikuoed.
ISA 62:5 Ar sapingwa na e-yagwabo-nikunaiyobi, gannar-be-urbed, deyobi bebo nikuoed. Ar igi-sapingwa yagwa-ebo-nikuoedgi weligwar-itodae, deyobi, be-Bab-Dummad, begi yeer itogoed.
ISA 62:6 Jerusalén-neggwebur, be-galu-matusurmaladgi, sorda-nakulemalad an urbisad. Wemala, bipisaale gwen mutikidbali, ibginedbali, gaya bogiguosurmalad. Bemar, Bab-Jehováʼse-gormalad melle be obunnomalo.
ISA 62:7 Ar Jerusalén-neggwebur gannar urbedse, degi, Jerusalén-neggwebur-nug-nika imakedse, melle be, Bab-Dummad obunnogega imakmalo.
ISA 62:8 Bab-Jehová na e-argan-gangued-nikadba, weyob ise-sogar imaksad: “Bipisaale be-ibmar-gwag be-isdarmalad-e-masga-guega bar an ukosulid, degi, vinoʼgi be nue-arbasgusadi, dule-ainebarmaladi be-ibe gobosurmalad.
ISA 62:9 Dule ibmar-gwag-wesmaladi, an nug odummobukwa ibmar-gwag gunmaloed. Dule uva-san-wesmaladi, anse-goled-neg-islidikid-neg-imbagi, vino gobmaloed.”
ISA 62:10 ¡Jerusalénʼginmalad, be ainimar! ¡Yawagak-bukwadgi, be ainimar! ¡Dulemar-idu igar nudakmar! ¡Igar-dummad be mesmar! ¡Bela akwamar be onirmar! ¡Dulemar igar-maid-magar-dakega be bander onakwe!
ISA 62:11 Bab-Jehová bela-dulemar-napneggi-bukwadga, weyob sogsad: “Jerusalén-dorganga be sogmar: ‘¡Bato be-abonoged danikid! Na e-nakwisad-ibmar eba sedanikid, na e-ibmar-buged-ukleged eba danikid.’
ISA 62:12 Dulemar-islidikidye, be bilemaloed. Bab-Jehováʼse bendaklesmaladye, be bilemaloed. Neggwebur-abelegedye, be-neggwebur bilegoed. Neggwebur bipisaar wargwen-melledsulidye, be-neggwebur bilegoed.”
ISA 63:1 Edom-yar-akar danikid, ¿wede doawa? Bosra-neggwebur-akar mor-ginnidbi-yoi danikid, ¿wede doawa? Mor-nudakar-yoi danikid, ¿wede doawa? Gandikidba binna-binnagwad danisulid, ¿wede doawa? “Ani an danikid. An igar-innikigwadba-sunmakedid, an dule-abonogega-gangued-nikadid.”
ISA 63:2 ¿Ar ibiga be-mor ginnitibi daklege? Ar be-mor, uva-egured-galugi dule-uva-egured-e-moryob dakleged.
ISA 63:3 “An walagwen uva-egured-galugi uva-egurusad, dule-bamalad gwen anba gunai gussulid. An-sae-itogedgi an egi annasad. An-urwedgi an maataa imaksad. E-ablis an-morgine milesad, degi, bela an-mor ese isgusad.
ISA 63:4 Buged-mai-imaked-iba bato an mesisad. An-dulamar-bendakleged-iba bato warmaksad.
ISA 63:5 Dule-an-bendaked an edarbisanad, degi-inigwele, dule gwen an-bendaksasulid, dule-wargwensaar-an-bendakbi-gussulid geg an itoged. Dukin an-ganguedgine an emargi obichad. An-urwedi sikirmakega an-imaksasulid.
ISA 63:6 An-sae-itogedgi, dulemar-yar-baid-baidgi-bukmalad-birgi an annasad, an-urwedgi an amar-obelosad. E-ablis napagi-milegega an imaksad.”
ISA 63:7 Bab-Jehová-e-sabgued-dummad an ebinsaoed, e-ibmar-dummagan-imaksadgi an namakoed. Bab-Jehová bela anmarga ibmar-imaksad-ular, an ega namakoed. Wile-anmar-daked-ular, degi, dummad-anmar-sabed-ular, an ega namakoed. Bab-Jehová Israel-dulemarga ibmar-nuegan-bukidar-imaksad-ular, an ega namakoed.
ISA 63:8 Ar Bab-Dummad weyob sogsad: “Ar napiragwa, wemar an-dulamalad, mimmigan-an-yardakmalosulidid.” Deyobi, e-suli-suli-itogedgine, Bab-Dummad bendaknonikid.
ISA 63:9 Bab-Dummad dule-abonogega, dule-e-nuggi-sunmaked, degi, baliwitur, barmiarsulid, na e-sunnad dule-abonosad. E-sabedgine, degi, e-wile-dule-dakedgine, bendaknonikid. Gannarse ogwichisad, na e-ganguedba sesad. Epennegwadyobi deyob imaksad.
ISA 63:10 Degi-inigwele, Israel-dulemar Bab-Jehováʼba ibsassurmalad, E-Burba-Isligwaled-wile-itogega imaksamalad. A-ulale, Bab-Jehová Israel-dulemar-e-isdaradga gunonikid, Bab-Dummad e-sunnad egi bila-onosad.
ISA 63:11 E-dulamar, epenne neg-gusmalad-ebinsadmalad, degi, Moisés-ibagangi neggusad-ebinsadmalad, weyob sogdemalad: “Dule demar-obakega anmar-idunadap-gusadi, emide, ¿bia gudii? Dule Israel-dulemar-e-iduedi, ¿bia nade? Bab, E-Burba-Isligwaled-Moisésʼgi-mesisad, ¿wede bia nade?
ISA 63:12 Dule e-gangued-nikadba Moisés-argan-nuedsik, Moisésʼba nadapigusad, emide, ¿bia nade? Bab, dulemar-asabin demar-egasad, adi, degisadegu e-nug-dummarba-guega, ¿wede bia nade?
ISA 63:13 Igi-moli nega-dulesulidganba gwen ibmargi-yolesuli nadapdae, deyobi, muu-billi-odinnosadba dulemar-obakega-imaksadi, ¿wede bia nade?”
ISA 63:14 Igi-moli-bebe-nikamalad nebase gagan-manonidamala, deyobi, Bab-Jehová-E-Burba, Israel-dulemarga obunnoged uksad. Bab-Jehová, be-nug-dummarba-guega, weyobi, be-dulamar-idumai be gusad.
ISA 63:15 Bab-Dummadye, mogir-billi-akale, be nue atake. Be-neggandikid-islidikid-yeerdakleged-akale, be nue negdake. ¿Bia be-sabed-dummarbad, degi, be-gangued nade? Be-wile-dule-daked, degi, be-sabgued anmar daksulid.
ISA 63:16 Degi-inigwele, be, anmar-Babad, ar Abraham amba aku-anmar-dakele, degi, dad-Israel amba aku-anmar-dakbalile, be, Bab-Jehová, be anmar-Babad. Gusgu be Anmar-Ollor-Imakedye nugad.
ISA 63:17 Bab-Jehová, ¿ibiga be-igargi banguega be anmar-imake? Bab-Jehová, ¿ibiga be, mer be-dobgumalaga, anmar-gwage-dutusur imake? Be-maigan-sabed-ulale, be gannar dage. Be-dulamar-danar-danar-bukwad-sabed-ulale, be gannar dage.
ISA 63:18 Be-dulamar ichesaale be-neg-islidikid akwisad. Emidi, anmar-isdarmalad bela be-neg-islidikidyaba ubosad.
ISA 63:19 Emidi, anmala, be-anmar-dummad-iduedga-megissulidyob bukwad. Anmala, begadga-gussulidyob bukwad.
ISA 64:1 Anmar-Bab-Dummadye, bitigi be nibneg egasana gadin, bitigi be aidealina gadin. Ar be-abin yarmar giglimakdeled.
ISA 64:2 Be-isdarmalad-abargi be-nug be oyodele, igi soo sapan-ogader dii-ogwakgwarmakdae, deyobi, be-abin dulemar-yar-baid-baidgi-bukmaladi gudmalaled, be-abin wawanmakdemalaled.
ISA 64:3 Be aidenonigu, ibmar-geger-itolemalad, ibmar-gegerdaklemalad, anmar abdakbuksulid be imaksad, be-asabin yarmar giglimakded.
ISA 64:4 Negasaila-akale, dule-egi-bensurmaladga ibmar-dummagan-imaked dakledisulid, dule-baid-beyobid gwen itoledisurbalid.
ISA 64:5 Dule-weligwaledgi-igar-innikigwad-imakdiid be abingaed, be-igarba-nanadimalad be abingabalid. Ar anmar isgussoggu, be sae-itoded. Ar anmar dikasurgus isguedginbi gudidimalad. ¿Ar wede anmar sunna abonolede?
ISA 64:6 Ar anmarde bela ibmar-isganayob gumalad. Bela anmar-igar-inniki-imakedi, siamar-yokor-bisgemalad-e-mor-ebusadyob gued. Bela anmar gagan-dinguedyob gumalad. Anmar-isguedi, burwayobi anmar-oseleged.
ISA 64:7 Dule-wargwensaale, be-nug obarsulid, begi-bendakleged-amiegala gwen gandik-imaksurmarbalid. A-ulale, be-wagar be anmar-idu odukusad, degi, anmar-isguedba-berguega be anmar-imaksad.
ISA 64:8 Degi-inigwele, Bab-Jehová, bee be anmar-Babad. Anmar napsa gumalad. Bedi napsa-sobedga gued, bela be anmar-obinnisad.
ISA 64:9 Bab-Jehová, melle be bela-bela sae-itoge. Melle be degisadegu anmar-isgued ebinsadii gue. Wis be wile-anmar-dake, ar anmar bela be-dula gumalad.
ISA 64:10 Be-neggweburmar-islidikmalad nega-dulesulidganga gunonikid. Siónʼse-bakale, nega-dulesulidganga gunonikid, Jerusalén-neggwebur ollobi-daarmakarnai gunonikid.
ISA 64:11 Anmar-bese-goled-neg-yeerdakleged-islidikid, bia an-babgan bega namakbukdamala, bela soose gummaksa siid. Bela anmar-ibmar-bur-nuegan-nikadi, bergusad.
ISA 64:12 Bab-Jehová, weyob-ibmarmar-gusadgine, bede, ¿gwen ibmar akar imakosuli? Bede, ¿ibmar sogosurde? ¿Binsarsunna be bukib-binsaega anmar-imakode?
ISA 65:1 Bab-Jehová soged: “Dule-an-egisdisurmaladse an magarosad, an doa-dule gue. Dule-an-amidisurmalad an-amiega an imaksad. Dule-baigan-an-nug-odummodisurmaladga, an sogsad, wegi an gwichiye.
ISA 65:2 Dule-uayasulidamaladse, igar-isganaba-nadapmaladse, e-binsaedba-nanadimaladse, bane-bane, an-argan an oyomai gusanad.
ISA 65:3 We-dulemar, bali-bali an-ourwega an-imakmalad. Dutugalumargine, bab-dummadyob-ibmar-imaklemaladga ibmar ukmalad. Ibmar-ogumakar-ukleged-ailamargi, ina-wawadikmalad ogumakmalad.
ISA 65:4 We-dulemar, neg-uangi sigmalad, mutikidbali, dukuar oibosii damalad. Sin-san gundamalad, e-esmedmargi ibmar-nis-isgana dudamalad.
ISA 65:5 We-dulemar sogmalad: ‘¡Be anmargi bannabagudii samalo! ¡Melle be anmarse walikaa gumalo!’ An bemarba bela-bela dule-islidikid gued. ”We-dulemar, waayobi gwen-nabir-ito an-asu-imaksulid, bane-bane soo-duurmaksiiyob gued.
ISA 65:6 An-asabin bela e-ibmar-imaked narmakar naid, an sunmaksuli guosulid. An sabsur-odurdakoed, na nunmak itomaloed.”
ISA 65:7 Bab-Jehová soged: “Bemar-isgued-ulale, degi, be-babgan isgusad-ulale, an sabsur-be-odurdakoed. Ar we-dulemar yar-birgi ina-wawadikmalad-ogumakdii gusmalad, yar-mullugangi angi-gwisgudii gusmalad. Epenne e-ibmar imaksamaladba, na dukin sabsur-odurdaklemalaga an imakoed.”
ISA 65:8 Bab-Jehová weyob soged: “Dule-wargwen uva-san-dukgwen-nued-amisale, sogdaed: ‘An oichogosurye, ar ade, amba nis nikaye.’ Deyopira, an an-maimar-sabed-ulale, belamakale, an-maimar an obelogosulid.
ISA 65:9 Jacob waganmar-nikuega an imakoed, Judáʼgi, dulemar-an-yarmar-gamaloedi, an onidagoed. Anse-sulegarmaladi we-napaneg gamaloed, a-napagine, an-maimar megmaloed.
ISA 65:10 An-dulamar-an-amidimaladga, Sarón-neba sibad-wawaad-galuga guoed, Acor-neba-naidi, moli-bebe-nikamalad-galuga guoed.
ISA 65:11 ”Ar bemar angi-banguddamaladdi, bemar an-yala-islidikid-ieddamaladdi, es-suidgi-oburgwilegega an be-imakmaloed. Bemar bab-dummad-ibmar-bukidar-ukedgala, degine, bab-dummad-deyob-guoye-sogmaidgala, guagwar mas, degi, vino ukdamaladdi,
ISA 65:12 es-suidgi-oburgwilegega an be-imakbaloed. Bela bemar dukar-egwallegega sindigar sigmaloed. Ar an bemarse gochamalanad, bemardi gwen an-abin-imaksasurmalad. An bemarga sunmaksanad, bemardi, gwen an-itossurmalad. Aka bur an-asabin ibmar-isgana imaksamalad, degi, an-ibmar-abesulidi bemar imaksabalid.”
ISA 65:13 A-ulale, Bab-Jehová-Bur-Gangued-Nikad weyob soged: “An-maimar mas-gunmaloed, bemardi, ukudmaad gudigumaloed. An-maimar gobed-nika gudimaloed, bemardi, gobedsuli gudigumaloed. An-maimardi, weligwar-itodii gumaloed, bemardi, bingedar-itodii gumaloed.
ISA 65:14 An-maimar weligwaledgi namakmaloed, bemardi, suli-suli-itogedgi binnasuli gormaloed, nue wiles-itogedba akiginmaloed.
ISA 65:15 Anse-sulegarmaladi, emar-ukabsamalaga bemar-nug ebumaloed. Ani Bab-Dummad-Jehová-Bur-Birigined bemar-oburgoed, ar an-maimargardi, nug-baid an ukoed.
ISA 65:16 Dule, neggweburgi ise-nued-binsaleged egichialile, an-innikigwad-gued-nuggi egisoed. Dule, neggweburgi ise-sogar-ibmar-imakalile, an-innikigwad-gued-nuggi imakoed. Suli-suli-itolesadi, bela ielesad, an-asabin an bela elisad.”
ISA 65:17 Bab-Jehová weyob soged: “Nue an-itomalo. An nibneg-binid, napneg-binid, an obinyesokalid. Ibmar-nasmalad bar obarilegosulid, bar egi binsalegosurbalid.
ISA 65:18 An-ibmar-obinyesokalidba bur be weligwar-itomala, degisadegu be yeer-itomala. An Jerusalén-neggweburga yeer-itoged nasiksokalid, an e-dulemarga weligwar-itoged uksokalid.
ISA 65:19 An Jerusalén-neggweburba, weligwar itogoed, an-dulamarbo an yeer itogoed. Jerusalénʼgi bar boed itolegosulid, deginbali, suli-suli-itogedba-gormaked bar itolegosurbalid.
ISA 65:20 ”Jerusalénʼgi mimmigan gwalulesale, bipigwadgi bar burgosurmalad, deginbali, dadormar bar sapingwaa burgosulid, selebaa megmaloed. Ar dule birga-dulatar-nika (100) burgwele, amba nuchukwaa burgwisye soglegoed. Ar dule birga-dulatarse (100) warmaksasulirdi, dule-isganaye egi soglegoed.
ISA 65:21 An-dulamar, negmar sobmaloed, egi megmaloed. Uva-dubmar digmaloed, e-san gunmaloed.
ISA 65:22 Dule-baid-megega neg bar sobosurmalad. Deginbali, dule-bamalad uva-san-gunnega, uva-dubmar bar digosurmarbalid. Ar an-dulamar-e-ibagan, sapimar-ibaganyob guoed. Anse-sulegarmaladi, na e-ibmar-imakmaladgi yeer itomaloed.
ISA 65:23 Binsarsunna arbanai guosurmalad, deginbali, mimmigan-wiogega, mimmigan nikuosurmalad. An-dulamar na e-sunnagwad, degi, e-waganmoga, Bab-Jehová egi ise-nued-binsasad-dulemarga guoed.
ISA 65:24 Anse-goled-iduale, ani an abinsaoed. Amba sunmaknanaidgine, bato an itogoed.
ISA 65:25 Achu-sapur, sibad-wawaad-senigwadbo mas-gundii gumaloed. Achumigur-nono-wawaad, moli-bebe-nikad-alugwasualedyob gagan-madii guoed, degi, naibe unnila ukub-burubi madii guoed. Bela an-yar-islidikidgine, dule, dule-baid-onailiksadii guosulid, degi, ibmar-obelodii guosurbalid. Ani an Bab-Jehová-guedi deyob soged.”
ISA 66:1 Bab-Jehová weyob soged: “Nibnega an-ologana gued, napneg an-nag-onakwed gued. ¿Ibi-neg be anga sunna sobsamarsunnale? An-obunnoged-neg, ¿bia be anga sobmalosunna?
ISA 66:2 Ani Bab-Jehová soged: Ar belagwable we-ibmarmar ani an obinnisad, deyobi nagunonikid. ”Ani an dule-wilemalad, dule-suli-suli-itodimalad, degi, an-gayaburbaba binsaed-nika-nanadimalad, an yeer-daked.
ISA 66:3 Ar dulemar anga moli-bebe-nikad-machered ogumakar ukedi, dule-gindakmaladyob gumalad. Ar dulemar anga sibad-wawaad-senigana-oburgwedamaladi, bab-dummadyob-imaklemaladga achu-nono-bisgar-ukmaladyob gumalad. Ar dulemar anga ibmar-gwag ukdamaladi, bab-dummadyob-imaklemaladga sin-ablis-ukdamaladyob gumalad. Ar dulemar an-nug odummogega anga ina-wawadikid obupurmakdamaladi, bab-dummadyob-imaklemalad-e-nug-odummomaladyob gumalad. We-dulemar na dukin e-itolegedba igar susmalad, e-ibmar-isgana-imakedgi na yeer itodimalad.
ISA 66:4 An ega sabsur-odurdakleged ukmogoed, bela-belad-ibmar-dobmalad an egi barmidoed. Ar an gochagua, gwen dule an-abin-imaksasulid. Ar an sunmaksagua, gwen dule an-itossulid. Aka bur an-asabin ibmar-isgana imaksamalad, an-ibmar-abesulid imaksamarbalid.”
ISA 66:5 Bemar Bab-Jehová-gayaburba-dobee-nanadimalad, Bab-Jehová-gayaburba be itomala: “Be-gwenadgan-sae-be-dakdimaladi, degi, an-nug-ular-be-obandimaladi, dodoakwaa weyob sogmalad: ‘Bab-Jehová, e-gargangued oyoge, adi, anmar bemar-weligwar-itoged dakegar.’ Ar isdar-be-dakmaladdi bingegumaloed.”
ISA 66:6 Neggwebur-akale, gayaburba binnasuli goled, Bab-Dummadse-goled-neggi gayaburba goled: “We-gaya, Bab-Jehová-gayaburba gued, e-isdarmaladga sabsur-ibmar sognaid.”
ISA 66:7 Bab-Jehová soged: “Jerusalén, boni-itodaged-iduale, bato mimmi nikusad. Jerusalén, yoo-bonigan-itodaged-iduale, goe-susugwa baksad.
ISA 66:8 ¿Doa weyob ibmar-soglege itodii? ¿Doa weyob ibmar-oyolege dakdii? ¿Ar dulemar-yargi-bukued ilagwen-bukuar bukusi? ¿Ar neggwebur-gwagwen ukiagwale gwalulesi? Degi-inigwele, Sión-yardi abga-bonigan-itoaliyalaba mimmigan nikusad.”
ISA 66:9 Bab-Jehová soged: “Ar ani an sikwi-aidegega imaked, degite, ¿an geg sikwi-odegega imakde? Ar ani an dula-nikuega-imaked, degite, ¿an sikwimar-aideged-igar gaode?
ISA 66:10 ”Bemar, Jerusalén-neggwebur-sabmaladi, Jerusalénʼba be weligwar-itomala, e-ular, be yeer-itomala. Bemar, Jerusalénʼba bukib-binsadimaladi, be weligwaledgi ichomakmala.
ISA 66:11 Ar Jerusalén-neggwebur nanyobi e-mamgi be-onumaloed, immerbaa be gumaloed. E-nunis-ena-ena-nanaid immelegedse bemar gobmaloed, egi be nue-yeer itomaloed.”
ISA 66:12 Ar Bab-Jehová weyob soged: “An Jerusalén-neggweburgi dii-nollosur-aryomaidyobi gwage-bogidikid nasikoed. Dulemar-yar-baigangi-bukmalad-e-ibmar-nuegan diwar-engumaidyobi, Jerusalénʼga-ukega an imakoed. Jerusalén, goemaryobi mamgi be-onumaloed, e-sakwagi angaagwar be-semai guoed, e-nukugi be-mesmaloed.
ISA 66:13 Nan igi na e-mimmi-gwage armake, deyobi an bemar-gwage armakoed. Bemar Jerusalén-neggweburgi gwage armaklemaloed.”
ISA 66:14 Bemar weyob ibmar-dakalile, gwagegi bemar weligwar itodmaloed, gagan-aramakdedyobi bemar gannar gannaledmaloed. Bab-Jehová e-maimar-abargi e-gangued oyogoed, e-isdarmalad-abargi e-urwed oyogoed.
ISA 66:15 Bab-Jehová bato soo-abargi danikid. E-bila-onoged-ur-napagined burwa-ooredyob dakleged. Bab-Dummad, e-sae-itoged urwedgi oyononikoed, e-sabsur-odurdaked soo-aramakwichiyob guoed.
ISA 66:16 Bab-Jehová, bela dulemarga soogi, degi, es-suidgi igar-nabogoed. Bukidar Bab-Jehováʼse burgwemaloed.
ISA 66:17 Bab-Jehová soged: “Dulemar-san-islidik-imakmaladi, degi, san-swilidik-imakmaladi, dule-negabargi-nadapidba nadapmalad, adi, bab-dummadyob-imaklemalad-dudumar-galuse-dogega. Bela-wemar na mesa burgwemaloed. Dulemar-sin-gunmalad, nusa-gunmalad, degi, ibmar-baigan-isemalad-gunmalad, bela-mesa bergumaloed.
ISA 66:18 ”Ani, an e-ibmar-imaked-ulale, degi, e-binsaed-ulale, bela dulemar-yar-baid-baidgi-bukmalad, degi, gaya-akar-akar-sunmakmaladi oatosokalid. We-dulemar danimaloed. An-gangued-yeerdakleged dakmaloed.
ISA 66:19 ”An ega wilub-oyogoed, abala dule dula-bemaloedi, we-yarmarse an barmidoed: Tarsisʼse, Futʼse, Ludʼse (we-dulemarde sigu-mied-dulemalad), Tubalʼse, Javánʼse, dikasur demar-gakaba-neggwebur-bukmalad an-nug-itodisurmaladse, degi, an-gangued-yeerdakleged-dakdisurmaladse an barmidoed. ”Wemala, dulemar-yar-baid-baidgi-bukmaladga, an-gangued-yeerdaklegedgi sunmakmaloed.
ISA 66:20 Dulemar be-gwenadgan-yar-baid-baidgi-gudidimalad, an-yala-islidikid-Jerusalénʼse, anga ibmar-uklegedyobi seledagega imakmaloed: Abala, molimargi be-gwenadgan-sedamaloed. Bamaladdi, moli-ur-napagined-bila-onomaladgi, e-gabmaladgi, moli-uaya-senigwadmargi, degi, moli-yargan-muremaladgi sedamaloed. ”Ar igi-Israel-dulemar anse-goled-negse bormo-swilidikidgi anga ibmar-gwag-ukleged sedanidamala, deyobi, be-gwenadgan-sedamaloed. Ani Bab-Jehová deyob soged.
ISA 66:21 ”We-be-gwenadgan-seledamaloedi, abala dule-irwa-anse-golemaladga, degi, Levita-dulemarga an suoed.
ISA 66:22 Ar igi an-asabinni nibneg-gwapid, degi, napneg-gwapid degisadegu-nai-guoe, deyobi, be-waganmar degisadegu-bukwa an imakoed. Degi, bemar-nug degisadegumogoed. Ani Bab-Jehová deyob soged.”
ISA 66:23 Bab-Jehová soged: “Nii-binid-gwisgued-ilibali, degi, obunnoged-ibagan-ilibali, bela dulemar an-nug-odummodii gumaloed.
ISA 66:24 Ainidmaloed, geb dule-angi-gwisgusmalad-e-muigan omilede dakmaloed. ”Ar nus-e-san-gunnedi gwen burgosulid, deginbali, soo-e-san-ogumaknaidi gwen ginnosurbalid. Bela dulemarga ibmar-imadga guoed.”
JER 1:1 Hilcías-machi-Jeremías we-gayaburbamar sogsad. Jeremíasʼde dule-irwa-Bab-Dummadse-gormalad-e-gwenadgansik danikidid, Anatot-neggweburginedid. Anatot-neggweburde, Benjamín-yalagi siid.
JER 1:2 Deunni, Amón-machi-Josías reyga birgambe-gakapaagus (13) Judá-yargi-maidgi, Jeremíasʼse Bab-Jehová-gayaburba nonikid.
JER 1:3 Deginbali, Josías-machi-Joacim Judáʼgi reyga-maigusadgi, Bab-Jehová-gayaburba Jeremíasʼse nonigusbalid. Josías-machi-Sedequías Judáʼgi birgambe-gakagwensak-gaka-nii-walataledgi reyga-maid-bergusadse, Bab-Jehová-gayaburba Jeremíasʼse nonigusbalid. Wegisundo, a-ibagangi, deunni, Jerusalén-dulemar Babilonia-neggweburse gales-selesgusmalad.
JER 1:4 Bab-Jehová-gayaburba anse nonikid, weyob anga nonikid:
JER 1:5 “Jeremías, amba yoo be sapibeneggi-mege bato an be-susad. Amba yoo be gwalulege, bato angadga an be-imaksad. Dulemar-yar-baid-baidgi-bukmaladga an-gayaburba-barsogedga bato an be-nug-imaksad.”
JER 1:6 An weyob Bab-Jehová-abin sogded: “¡An duledar-wiles! Bab-Dummad-Jehová, amba an machi-swilid. An wissulid, igi an dulemar-abargi sunmakoe.”
JER 1:7 Degi-inigwele, Bab-Jehová anga sogded: “Melle be soge: ‘Amba an machi-swiliye.’ Ar bia an be-barmidoe, aba be naoed. An bega-ibmarmar-sogoedi, bela dulemarga be sogmogoed.
JER 1:8 Ani an Bab-Jehová-guedgi bega soged: Melle be dulemar-abin gwayo. Ani an be-bendakega beba gudii guoed.”
JER 1:9 Geb agine, Bab-Jehová e-argan anse-oyoalid, geb an-gakuli ebusad. Agine weyob anga sogded: “Be-gwabindukugi an bega, an-gayaburbamargi-sunmakoed an nasiksad.
JER 1:10 Emi-ibagi, yarmar-selemamaidgi, degi, dulemar-yar-baid-baidgi gargangued-nika an be-imaked: Adi, be dulemar-ononnogega, yar-selemamaid-obelogegar, Dulemar-osulogega, yar-selemamaid-bibisgegar. Gannar dulemar-urbega, gannar yarmar-selemamai guegar.”
JER 1:11 Geb Bab-Jehová anga soged: “Jeremías, we-ibmar, ¿ibu-ibmar be dake?” Bab-Jehová-abin an sogded: “We an dakedi, sapi-almendro-ana an daked.”
JER 1:12 Degi, Bab-Jehová anga sogded: “Nabir-be-soge, inniki be daksad. An-ibmar-sogsadi, sogedba-guega an imakedsegad.”
JER 1:13 Geb Bab-Jehová gannar anga sognonibalid. Weyob anga sogded: “¿Jeremías, we-ibmar, ibu-ibmar be dakbali?” Bab-Jehová-abin an sogded: “We an dakedi, bormogi-dii-gwakwarmaknai an daked. A-dii-gwakwarmaknaid dad-nakwed-sapiled-akar aryodani an daked.”
JER 1:14 Geb Bab-Jehová anga odaloded: “Dad-nakwed-sapiled-akale, bela we-yalagi-dulemar-bukwadgi, boni-dummagan an barmidoed.”
JER 1:15 Bab-Jehová weyob soged: “Dulemar-dad-nakwed-argan-sapiledsik-bukmaladse an golesokalid. A-dulemar Jerusalén-neggwebur-doged-yawagakse, e-ambikued-negmar urbenonikoed. Bemar-galu-matusulid-akwabiid-asabin ambikunonimaloed, degi, bela Judá-neggweburmargi gwichigunonimaloed.
JER 1:16 Dulemar bela-belad-isgusmalad-ular, an egi gwichiguoed. Ar ade, angi bangudmalad. Bab-dummad-baiganga ina-wawadikid ogumakar ukdemalad. Degine, e-ibmar-sobsamalad, e-bab-dummadyobi imakdemalad.
JER 1:17 ”Jeremías, bedi guakwagudii sao. An bega bela-ibmar-sogoedi, be sognao. Melle be we-dulemar dobguo. Degisulile, ani an dulemar-asabin-gwayega an be-imakoed.
JER 1:18 Emi-ibagi, neggwebur-gandikidyob an be-imaksad. Bubawar-esgorobiidyob, an be-imaksad, degi, galu-matusulid-esgoro-gordikidbiidyob, an be-imaksad. An be-ogannosadi, bela we-yalagi dulemar-bukwadgi-yolegega an be-imaksad. Judá-e-reymargi-gwichiguega an be-imaksad, e-dummagangi-gwisguega an be-imaksad. Degine, e-dule-irwa-anse-gormaladgi-gwisguega an be-imaksad. Bela dulemar-e-neggweburginmaladgi-yolegega an be-ogannosad.
JER 1:19 We-dulemar bela begi gwisgunanai gumaloed, degi-inigwele, begi obinosurmalad. Ar ani an, be-bendakega beba gudii guoed. Ani an Bab-Jehová-guedgi, we-ibmar an bega soged.”
JER 2:1 Bab-Jehová-gayaburba weyob anse nonikid:
JER 2:2 “Be nae, Jerusalén-dulemarga be sunmakna, ega weyob be sogna, Bab-Jehová weyob-sogye: ‘An ebinsado. Be yagwa-unni anbinarbi be-sogdidaed. Ome machered-abesiidyobi, nega-dulesulidganba be an-balimaksa gusad. Napaneg-ibmar-digar-sulidganba be an-balimaksa gusad.
JER 2:3 Ani an Bab-Jehová-guedgi an bega soged: Bemar-Israel-dulemar, anga be dule-gwage-swilidikmalad gumalanad. Bemar anga, gebe-ibmar-sanmakedyob gumalanad. Dulemar ibigwensur-bemar-imakalile, anse sabsur-odurdakledaed, boni-dummagan an egi barmiardaed.’ ”
JER 2:4 Ani Jeremías sogded: Jacob-wagan, Bab-Jehová-gayaburba be nue itomar, Israel-dulamar bela be an-itomar.
JER 2:5 Bab-Jehová weyob soged: “Be-dadgande, ¿ibigi egi-nosa an-daksamarsunna? Emide, angi bangusmalad. Bab-dummagan-ibmarga-gusurmaladba nadegusmalad, agala, be-dadgan ibmarga gussurmarmogad.
JER 2:6 Bipisaale, be-dadgan gwen-egichasurmalad: Bab-Jehová-Egipto-yalagi-anmar-onosadi, ¿bia-nadye? Bab-Jehová-nega-dulesulidganba-anmar-idusadi, napa-dii-sateganba, degi, nega-buleganba-anmar-seargusadi, bia-nadye, gwen egichasurmalad. Bab-Jehová-nega-dinnaganba, degi, negasichidganba-anmar-seargusadi, bia-nadye, gwen egichasurmalad. Nega-dulemar-iirmaksurmaladba, degine, dulemar-bukwasulidba-anmar-seargusadi, bia-nadye, be-dadgan gwen egichasurmalad.
JER 2:7 Napa-gadi-ibmar-sanmakedse ani an bemar-sealid, bemar agi ibmar-san gunmalagar, degi, e-ibmarmar-nuegan gunmalagar. Degi-inigwele, bemar an-yalase-nonimargua, be an-yala oichononimalad. Ib-isganaga be an-yala imaksamalad.
JER 2:8 Dule-irwa-anse-gormalad bipisaale gwen sogsasurmalad: ‘Bab-Jehová ¿bia-nadye?’ Dule-bulegan-an-igar-mamaid-wisimaladi, Bab-Dummadsuliyobi an-daksamalad. Dulemar-idumaladi, angi yoledmalad. An-gayaburba-barsogmaladi, bab-dummad-Baal-nuggi sunmakdemalad, degine, bab-dummad-baigan-ibnuedga-gusurmaladba nanadmalad.
JER 2:9 ”Ani an Bab-Jehová-guedgi bemarga soged: A-ulale, an bemargi gwisguoed, degi, amba an be-wagangi gwisgubaloed.
JER 2:10 ”Quitim-dup-gakase be obakmar, nue be atakmalo. Cedar-yalase dule-gayaburba-berbemalad be barmidmar, nue be igar amimalo. Nue be egismalo, we-dulemarde deyob gusmarmodibe.
JER 2:11 Ar neggwebur-gwensak e-bab-dummagan Bab-Dummadsunnadsur-inigwele, e-bab-dummagan-ogwasye gwen an itossulid. Ar bemardi, bab-dummagan-ibnuedga-gusurmaladba-nanaed-ular, be an-obatemalad. Andi bur Bab-Dummad-napiragwadid, Bab-Dummad-gandikidid.
JER 2:12 Ani an Bab-Jehová-guedgi bemarga soged: ¡Nibneggi-bukwamalad, weyob-neg-gunaidgi be gwayemar! ¡Be wawanmakmar! ¡Weyob-neg-gunaid geger be dakmar!
JER 2:13 ”An-dulamala, ilabo dummad-nosmalad: Ani an bemarga dii-burba-dulad ukedid, emide be angi bangudmalad. Dia-geg-dii-siged be sobsamalad, egi dii-sigsulid. Na-be-walagwengi a-dia be sobsamalad.
JER 2:14 ”Ar bemarde, Israel-dulemar, ¿be emar-maimarsii? ¿Ar bemarde, maiga-gubukwadgi gwalulesmarsi? Degite, ¿ibiga be galenonimarsunna?
JER 2:15 Dule-baigan achumigur-nono-wawaad-uurmakeyobi bemargi oimaksamalad. Achumiguryob bemargi akigichamalad. Bela-swanga be-yala-imaksamalad, be-neggweburmar bela ogumaksamalad. Bar dulemar agi bukwa gussurmalad.
JER 2:16 ”Menfis-dulemarbela, degi, Tafnes-dulemarbela be-nono mamarismalad.
JER 2:17 Ani an bemar-Bab-Dummad-Jehová gued. Ani an igarba-danigu bemar-idusadid. Bemar an-obachamalad-ular, weyob be gusmalad.
JER 2:18 Emide bemar, Egipto-yalase Nilo-diwar-gobnabiye-sogedde, ¿ibi-nued egi be amimalo na be itoge? Emide bemar, Asiria-yalase Éufrates-diwar-gobnabiye-sogedde, ¿ibi-nued egi be amimalo na be itoge? Ar gwen egi ibmar-nued be amiosurmalad.
JER 2:19 Ani an Bab-Dummad-Jehová-Bela-Gangued-Nikad an bemarga soged: Be-isguedgi na be dukin sabsur-odurdaklemaloed, be angi-yolenanaidgi na be dukin wilemaloed. Nue be binsamar, ‘dule Bab-Jehováʼgi-bangudele, Bab-Dummad-dobsuli-nanadele, we nuedsulid, Bab-Dummad-ieged yeer gangued.’
JER 2:20 ”Bato dikasurgus bemar angi gwisgusmalad, dikasurgus be angi bangusmalad. Ar bemarde weyob sogsamalad: ‘¡Anmar beba daosuli!’ Bela yar-mullugangi, bela sapi-dummagan-urba, gambanuchu-imakdii be gusmalad.
JER 2:21 Uva-dub-nuediyobi, an bemar-digsanad. Bela uva-muu-nueganyobi an bemar-digsanad. Ibiga emide be, ¿uva-muu-isgana-diglesayobi, be gusa?
JER 2:22 Ani an Bab-Dummad-Jehová-Bela-Gangued-Nikad an bemarga soged: Amba ibmar-dagudik-imakmaladgi be-isgued be elimarye-sogele, degi, morgaukgi ise-makumakar na be imakmarye-sogele, amba an-asabin be-isgued-e-gutumar nai guoed.
JER 2:23 ”Ar bemarde igi be sogosunna: ‘An isgussurmarye, bab-dummagan-Baal-e-nugmar an odummossurmarye.’ ¡Nebagi ibmar-imaksamalad be ebinsamar! ¡Be ibmar-isgana-imaksamalad be magar-itomar! Bemar moli-yargan-mureged-abarmakwisdaedyob be gumalad, geg boo be gudii gumalad.
JER 2:24 Bemar, igi-moli-sapur-uayasuid-ome nega-dulesulidganba machered-amiegala, burwa-goledba machered-yapanned-itodidae, deyob be gumalad. We-moli-ome nagubigudiile, dule geg e-igar gaed. Ar moli-ome nagubigudiile, machereddi baisursunna ome-amied. Bemar debayobi, gumalad.
JER 2:25 ”Bemar, Israel-dulemar, melle nag-swili be gudii gumar, ar degiile, na be dukin naibigumaloed. Melle be-gammu na dinguega be imakmar. Ar be sogsad: ‘¡Suli! ¡Geg an na san bargaed! Bur an bab-dummad-baiganbina soged, bur amar-e-nug an na odummodii guoed.’
JER 2:26 ”Igi dule-ibmar-atursaed daklesale, nue-bingegudae, deyobi, bemar Israel-dulemar, nue-bingegumaloed. Be-reymar-abargi, be-dummagan-abargi, bemar bingegumaloed. Be-irwa-bab-dummadse-gormalad-abargi, degine, be-bab-dummad-gayaburba-barsogmalad-abargi, bemar nue-bingegumaloed.
JER 2:27 Bemar, Israel-dulemar, suarga be sokardamalad: ‘Be an-babad.’ Akwaga be sokardamarbalid: ‘Be an-nana, begi an gwalulesad.’ Andi wagar-biriar be an-dakdemalad, gwen ansikdi be aibirbisurmalad. Boni-dummagan-noalirdi, negoe be gollardamalad: ‘¡Gwae-gwae be anmar-bendakdage!’
JER 2:28 Emide, Judá-dulemar, ¿bia be-bab-dummagan-sobsamalad nadsunna? Neggweburmar-merguedyob bemar bab-dummagan nikamalad. Amarga be soge, bemar-bendakye, adi, be dakmaloed, bule we-bab-dummagan boni-dummagangi bemar-bendakmalodibe.
JER 2:29 ”Ani an Bab-Jehová-guedgi bemarga soged: ¿Ibiga bemar angi urwenanai? Bela bemar angi yoledmalad.
JER 2:30 ”Binsarsunna an-dulamar an sabsur-odurdaksad, gwen an-itossurmalad. Achumigur-nono-wawaadyobi, bemar, be-es-suidgi an-gayaburba-barsogmalad oburgwismalad.”
JER 2:31 Bemar, wegi-an-itobukmarmogadi, Bab-Jehová-gayaburba nue be itomarmogo. Bab-Jehová weyob soged: “Emide, an Israel-dulamarga, ¿nega-dulesulidyob an gussi? ¿Negasichidyob an gussi? Ibiga an-neggwebur weyob-soge: ‘Anmar na e-itolegedba gudigumaloye, anmar bar be-nug-odummogosurye,’ anga sogmalad.
JER 2:32 ¿Ar yagwa sui-nikunair, na olo-nuegan-yooedi iego be insae? ¿Sui-nikued-mor-yoed iego be insae? Suli, gege iege. Ar bemar-an-dulamardi, dikasurgus an-ies bukwamalad.
JER 2:33 ”Bemar, Judá-dulemar, omegan-dikarba-amied nue-wismalad. Omegan-gambasamaladse-bakale, bese ibmar durdaksamalad.
JER 2:34 Bela be-morgi dule-wilemalad-e-ablis nanaid, dule-ibmar-oakalossurmalad-e-ablis be-morgi nanaid. Ar wemar gwen-ibmar-atursanai be daksasurmalanad, degite, be oburgwismalad.
JER 2:35 Degite, amba be sogmalad: ‘Anmar ibmar-oakalossurye, Bab-Dummad anmarse urwosurye.’ Ar be ibmar-oakalossurmarye-sogmarsoggu, an bemargi gwisguoed.
JER 2:36 Ar bemar baisursunna binsaed-ogwaddamalad. Ar igi Asiria-dulemar bemar-yardaksa, deyobi, Egipto-dulemar bemar-yardakmogoed.
JER 2:37 Binged-abalagi be Egipto-yargi nodmaloed. Ar ande, we-dulemar-egi-be-bensurmaladi, obachad. Gwen be we-dulemar-abargi nasguosurmalad.”
JER 3:1 Bab-Jehová bemarga soged: “Binsa-sogmalo: ‘Dule-wargwen ome-metele, we-ome machered-baid-nikunonikile, machered-idualed, ¿gannar e-omega-gusad-monao be insae? Suli, gege gannar monaed. Ar monaele, bela yar-oichogo-itole.’ Emide bemar, Israel-dulemar, galagwensuli abirgunagwarsuli be nanasmalad. Degisoggu, geg be bar anse warmakmalad.
JER 3:2 Nue be yar-mullugan-swana-naid be dake: Bia be galagwensuli-gussuli dakmalodibe. Bemar, Árabe-dulemaryob nega-dulesulidba igar-yalagi mellesii be damalad. Omegan-gamba-imakmaladi, na machered-abindaksidamaladyobi, be gudidamalad. Bemar galagwensuli-isgusmaladbali, we-yala be oichosmalad.
JER 3:3 A-ulale, bar bemarga dii wissulid, degi, dii-wied-ibagangi bar bemarga dii wissurbalid. Ar bede ome-gambasaedyob na be san-imaksamalad, gwen bingedar be itossurmalad.
JER 3:4 Emisgwasaar be anse weyob gordigusad: ‘Babaye, bipigwad-akale be an-ai-nuedye.’
JER 3:5 Be sogsabalid: ‘Babaye, ¿be anmarbo urwedigu guode? ¿Be anmarbo degisadegu sae-itodii guode?’ Deyob be sogdigusmargu, degite, amba bemar ibmar-isgana-imakdii gusmalad.”
JER 3:6 Josías-reyga-maiunni, Bab-Jehová anga weyob sognonigusad: “Jeremías, ¿Israel-dule-uayasulidamalad-ibmar-isgana-imaksad be daksa? Bela yar-mulluganse, sapi-dummagan-urba galagwensuli gusmalad.
JER 3:7 Bela we-ibmar-isgana-imaksamalad-sorba, gannar anse nonimaloye an binsasanad. Degi-inigwele, gwen anse gannar nonisurmalad. E-gwenadgan-Judá-dulemar-uayasulidamogadi, e-gwenadgan-ibmar-imaksad daksamarmogad.
JER 3:8 Ar Judá-dulemar daksagusad, igi an Israel-dule-uayasulidamalad galagwensuli-gued-ular metegusa, an ega ome-meted-garda-uksagusad an-daksamalad. Degite, e-gwenadgan-Judá-dule-uayasulidamalad gwen an-dobee itossulid, e-gwenadgan-Israel-dulemaryob galagwensuli gusmarmogad.
JER 3:9 ”Israel-dulemar an-yardaksagu, gwen bai itossulid. Aka bur bela yar-oichosad, degi, akwamar-bab-dummadyob-imaklemaladba, degine, suarmar-bab-dummadyob-imaklemaladba galagwensuli nanasmalad.
JER 3:10 Bela weyob neg-nagus-inigwele, e-gwenadgan-Judá-dule-uayasulidamalad gwen gwage-ulubgi e-itogedba anse nonisulid, unnila binsa angi dododii gusad. Ani an Bab-Jehová-guedgi bemarga soged.”
JER 3:11 Bab-Jehová anga weyob sogdebalid: “Jeremías, Israel-dule-uayasulidamaladi, bur Judá-dule-galagwensuli-nanamaladba bur nued daklesunnad.
JER 3:12 Jeremías, dad-nakwed-argan-sapiledsik be nae. We-gaya be sognao. Weyob be sogo: ‘Weyob Bab-Jehová sogye: Ani an Bab-Jehová-guedgi bemarga soged: Israel-dule-uayasulidamalad, gannar be anse dagmala, an isdar bemar-dakosulid. Ani an Bab-Jehová-guedgi bemarga soged: An wile-dulemar-dakdaedid, isdar an bemar-dakdii guosulid.
JER 3:13 Ani an Bab-Jehová-guedgi bemarga soged: Unnila be-isgusad be magar-itomala, na be angi-nosmalad be magar-itomala. Bela sapi-dummagan-urba bab-dummad-baiganga be ibmar-imaksamalad be magar-itomala, gwen be an-sogedba-nanabigussulid be magar-itomala.’
JER 3:14 ”Ani an Bab-Jehová-guedgine bemarga soged: Bemar Israel-dule-uayasulidamalad, gannar be anse dagmala. ¡Ar ani an be-ibedid! Neggwebur-iliba war-wargwen an bemar-suoed, degine, be-dadgan-iliba war-warbo an bemar-subaloed. Geb Sión-yalase an bemar-nidagoed.
JER 3:15 An bemarga dule-be-idumalad dakedba an bega ukoed, adi, wemar an-ibmar-abegedba imakmalagar. Binsaed-nikaa be-semalagar, ibmar-nue-wisidba be-idumalagar.
JER 3:16 ”Ani an Bab-Jehová-guedgi bemarga soged: Yoo bemar bukidargusale, nue-mergusale: Bab-Jehová-Dadganbo-Igar-Mesisad-Ulugi bar sunmaklegosulid. Dulemar bar a-Ulugi binsaosurmalad, degi, bar a-Ulu obarosurmalad. Degine, bar Ulu-baid sobosurmalad, ar bar abegosurmalad.
JER 3:17 ”A-ibagangine: ‘Bab-Jehová-ologanaye’ be Jerusalén-bimaloed. Bela dulemar-yar-baid-baidgi-bukwamalad Jerusalén-neggweburse an-nug-odummogega nonimaloed. Bar bemar gwagegi-ibmar-isganagi-binsaedba ibmar imakosurmalad.
JER 3:18 ”A-ibagangine, Judá-dulemar, Israel-dulemarbo gannar atogoed. Neggwebur-dad-nakwed-argan-sapiledsik-siidba be danimaloed, bia an, be-dadganga-yar-uksagusadse be bukunonimaloed.
JER 3:19 An-sunnagwad an weyob sogsagusanad: Israel an-mimmiga an imakoye, napa-bur-sunsoged an ega-ukoye, an sogsagusad. Baiganba yar-bur-yeerdakleged an ega ukoye, an binsasad. An binsasanad be anse gormaloye, ‘Babye.’ Be angi aibanosurmarye, an binsasanad.
JER 3:20 An Bab-Jehová-guedgine bemarga soged: Bemar, Israel-dulemar, igi-ome e-sui-dikarba-galagwensuli-nanae, deyobi, be angi gusmalad.”
JER 3:21 Bab-Jehová bemarga soged: “Yar-mullugan-nega-swaan-naidganba, dulemar-oimake itoleged. Israel-dulemar ise-wilegar bobukwa itoleged. Ar e-daed oichosmalad, igar-noaled susmalad, Ani an e-Bab-Dummad-Jehová-guedi iedmalad.
JER 3:22 ”Mimmigan, bemar uayasulidamalad, gannar be anse dagmala, be-galagwensulidamalad ani an bega nudakoed.” Israel-dulemar sogdemalad: “Bab-Jehová, anmar bese danimala, ar be, anmar-Bab-Dummadid.
JER 3:23 Ar anmar binsa bab-dummaganse-gorleged-e-yar-mulluganase naoed, binsa a-yalaganba anmar iba-galagwensulid ononamaloed. Bab-Dummad-Jehová, unnila anmar beginbi abonoleged-igar-maid amied.
JER 3:24 ”Anmar sapingwagwad-akale, galagwensuli bab-dummad-baiganba-nanaed-ular, anmar-masmala, degi, anmar-bunamala, surgunonikid. Anmar sibad-wawaadmar, moli-bebe-nikadmar, degi, bela anmar-babgan-ibmar-amisadi, surgunonikid.
JER 3:25 Bab-Dummad-Jehováʼye, anmar begi isgudiguad, anmar-babgan begi nodiguad. Bab-Dummad-Jehová, anmar bipigwad-akale, emi-ibase be-sogedba nanadisulid. Degisoggu, bur anmar bingegumarsun, bela-belad bingedar itomarsun.”
JER 4:1 Ani an Bab-Jehová-guedgi bemarga soged: “Bemar Israel-dulemar, gannar be anse-dagmarye-sogele, mer bar be isgumalo. Be an-asabin ibmar-isgana-bab-dummadyob-imaklemalad-osulogele, mer bar be angi bangumalo.
JER 4:2 Ar gakansulidgi, igar-napiragwadgi, innikigwadgi, ‘Bab-Jehová-nuggi an ise-sogar-sogmarye,’ be sogmalale, ar degidbali, ‘dulemar-yar-baid-baidsik-bukwamaladgi anbali egi yeer binsalegoed, degine, anbali egi weligwar itomaloed.’ ”
JER 4:3 Bab-Jehová weyob Judá-dulemarga, degi, Jerusalén-dulemarga soged: “Napa-ebuledisulidgi be ibmar digmala. Melle bar iko-imbaba be ibmar digmalo.
JER 4:4 Judá-dulemar, Jerusalén-dulemar, an-bemarbo-igar-mesisadbarbi be nue-nai gumala, be-gwage-ulubgi a-igarbarbi nue-nai be gumala. Melle be-ibmar-isgana-imaksamalad-ular, an-urwed sooyobi begi-nodagega be imakmalo. An-urwed, soo-gamaiyob, dule geg oginned.” Bab-Jehová sogdebalid:
JER 4:5 “Judá-yalagi, bela be sunmako. Jerusalén-neggweburgi, bela gayaburbamar be mimimar. ‘¡Bela yalamargi gar-trompeta be ogormar!’ Binnasuli gandikidba be gormakmar. Weyob sogmar: ‘Anmar danar-ambikumar, neg-gandikmaladse ubonamar.’
JER 4:6 Sión-yarsik bander be oyomar, melle be gannaa sigmala, gwae be duurmakdemar. An bela-belad-dulemar-wiogega dad-nakwed-argan-sapiledsik boni-dummagan an barmidasokalid.
JER 4:7 Bato achumigur-nono-wawaad gagan-imbaba nodanikid, dule, dulemar-akar-akar-bukwamalad-obeloged bato igarba danikid. Be-yala-obelogega, e-yalagi bangualid. Be-neggweburmar akwamarbi ganna-ganna ambikuoed, dulemar bar bukwasuli guoed.”
JER 4:8 Ani Jeremías sogded: “A-ulale, wile-itoged-mola be yomar, bukib be binsamar, wile-itogedba be akiginmar, ar Bab-Jehová-bela-bela-urwedi, anmargi urwemaid.”
JER 4:9 Bab-Jehová sogbalid: “Ani an Bab-Jehová-guedgi bemarga soged: A-ibagan warmaknonikile, rey, degi, dummagan-negsemamaid bela dobedba wawanmakdemaloed. Dule-irwa-anse-gormalad gwakidmaloed. An-gayaburba-barsogmalad geger dakdemaloed.”
JER 4:10 Ani Jeremías sogded: “An-Bab-Dummad-Jehová, nue be we-dulemar yardaksad, nue be Jerusalén-dulemar yardaksad. Ega be sogsagusanad: ‘Bonisuli be gudii gumaloye.’ Emide be dakena, boni-dummaganba galitonanaid.”
JER 4:11 Bab-Dummad an-abin sogded: “Sabsur-odurdakleged-iba warmaknonikile, we-Jerusalén-dulemarga weyob soglegoed: ‘An-neggwebursik nega-dulesulidganba yar-mullugan-bukmalad-akar burwa-uereged gordanikid. We-burwa-gormaid ibmar-gwag-miegarsulid, degi, neg-swiri imakega gormaisulid.’
JER 4:12 An we-burwa-barmidagoedi, binnasuli goled. Ar an-sunnagwad, sabsur-odurdakega an we-dulemar imakoed.”
JER 4:13 Israel-dulemar weyob sogdemaloed: “Be dake, anmar-isdarmalad mogiryob danikid. E-ur-napagined-bila-onomalad, burwa-ooregedyob gwichigudanikid. E-molimar, sulubagi-gukuedba bur binnasuli abarmakdanikid. ¡Anmar duledar-wilesmar! ¡Anmar bela!”
JER 4:14 Bab Jehová soged: “Jerusalén-dulemar, be-gwage-isgudiid be urukmala, adi, be, abonolemalagar. ¿Ar sana be binsaed-isganamargi-binsaed iemaloye be sogmala?
JER 4:15 Dan-neggwebur-akale, Efraín-yalagan-akale, gayaburba boni-dummagan-danikidgi-sunmaked noalid.
JER 4:16 Dulemar-yar-baid-baidsik-bukwamalad be owisomar, Jerusalén-dulemarga be sogmar: ‘Dulemar-dikasurmalad begi ubodani, Judá-neggweburmargi binnasuli gormakdanimar.’
JER 4:17 Ani an Bab-Jehová-guedgi soged: Dulemar nainu-ebiris-ambikuedyob bela be-ebiris ambikumaloed, ar ade, be angi uayasuli gusmalad.
JER 4:18 Be-daed-ular, be-ibmar-isgana-imaked-ular, bemar weyob gunanaid. ¡Ibmar-isgana-imaked bega nunmaked-dummad uksad! ¡Gwage-ulubgi nue nunmak be-imaksad!”
JER 4:19 Ani Jeremías sogded: “¡Nue-nunmak itoleged! ¡Suli-suli an itoged! ¡An-gwage-ulub nue-nunmak an itogusad! ¡An-ulubgi an-gwage-ulub nakwamaknaid! ¡An sunmaksulir guosulid! ¡An sunmakergebed! Gar-trompeta-goled an itoged, bila-onomalad-gormaked an itoged.
JER 4:20 Sabsur-wilegedi, ukin-ukin danikid, ar bela yalagan sabsur-gusa nagusad. Ukiagwale, an-dordoneg maluded, an-meged-neg ukiagwale ayarided.
JER 4:21 ¿Ar sanagwadse an-isdarmalad-e-bander bar daksuli an guoe? ¿Ar sanagwadse an-isdarmalad-e-gar-trompeta-goled bar an itogosuli guoe?”
JER 4:22 Bab-Jehová soged: “An-dulamar binsaedsurmaladid, aku an-dakmalad. Mimmigan-binsaedsurmaladid, aku neg-itomalad. Ibmar-isgana-imakedsikdi binsaed-ibegan nanamalad. Ibmar-nued-imakeddi wissurmalad.”
JER 4:23 Ani Jeremías sogded: “An napneg-dakdegu, bela napaneg gagales-nai an dakalid. Niba an atakdebargu, bela negsichidbi-nai an dakalid.
JER 4:24 Yalasik an atakdebargu, yalamar giglimakbukwa an dakalid. Bela yar-mullugan nakwamakbukwa an dakalid.
JER 4:25 An atakdegu, dulemar sate an dakalid, bela nuumar duurmaksa nanaed.
JER 4:26 An nue-dakdebargu, napa-gadi-sanmakedi nega-dulesulidbi-nai an dakalid. Bab-Jehová ibmar-imaksadbali, bela neggweburmar akwamarbi ganna-ganna-bukwa gusad. Bab-Dummad-urwedbali, bela deyob gusad.”
JER 4:27 Bab-Jehová weyobi soged: “Bela yalamar swanga imaklegoed, degi-inigwele, naitinagase an obelogosulid.
JER 4:28 A-ulale, bela-yar-naid wile-itonai guoed, nibnega negsichidbi naguoed. An bato sogsabinned, an-ibmar-sogsad bar an ogwaosulid. Bato an imakoye sogsad, bar an igar ogwaosulid.
JER 4:29 ”Sorda-sigugi-bila-onomalad binnasuli-goledba, degi, sorda-moligi-sii-urwemalad binnasuli-goledba, dulemar bela duurmakdemaloed. Gwenna-gwenna dulemar, bulaganba-doge-doge wakitemaloed, baigandi, akwa-dummagangi nakwidmaloed. Bela neggwebur ollobi naguoed, dule-wargwensaale bar egi gudii guosulid.
JER 4:30 ”Bemar, Jerusalén-dorgan nue be wilesmalad: ¿Ar igi be binsamala? ¿Ibiga be mor-gargemalad yomala? ¿Ibiga be ormar-nuegan nasikmala? ¿Ibiga be ibya-sigamar magmala? Ar binsarsunna yeerdaklege na be san-imaknanaid. Ar dule-be-abesmalad, isdar be-dakmalad, unnila be-oburgwega be-abemalad.
JER 4:31 ”Igi-ome na gebe e-igargi-boni-itonaile, binnasuli-gornaidae, deyobi, dulemar-gole an itoged. We-binnasuli-gornanaidi, Sión-dulemar gornaid, akus-akus bunnonaid. Na e-argan-onakwale, weyob sognanaimalad: ‘¡An duledar-wiles-ini! ¡An bela! ¡Dule-gindakmalad an-gasmalad!’ ”
JER 5:1 Bab-Dummad soged: “Jerusalén-galimbaba be bipirmaknamar, nue be miamakmalo. Dulemar-ambikuedgi nue be dulemar amimalo. Bemar dule-ibmar-inniki-imaked, dule-ibmar-napira-soged amismalale, an, Jerusalén-neggwebur bar an sabsur-imakosulid.
JER 5:2 Ar dulemar sogdamalanad: ‘Bab-Jehová-nuggi an napira sogye,’ degi-inigwele, yamo sogdamalad.”
JER 5:3 Ani Jeremías sogded: “Bab-Dummadga an weyob sogded: Bab-Jehová, ¿ar be dule-innikidamalad amisursi? Eye, be amienad. Ar dulemar be sabsur-odurdaksa-inigwele, degite, gwen bai-itossurmalad. Be we-dulemar-e-ibmarmar-obelos-inigwele, gwen gwage-nuguedgi binsasurmalad. Akwaba bur bule e-gwage dutusuli nadmalad, gwen e-isguedga bukib itossurmalad.
JER 5:4 ”An weyob binsaenad: ‘Unnila dule-wilemaladbi, binsaedsuli ibmar imakye. Be-Igar-Maid gwen magar itosurmarye. Be-ibmar-abemaid gwen imaksurmarbarye.’
JER 5:5 Agala, sapin-dummaganse an naoed, an ega sunmaknaoed. Ar we-dulemardi, Be-Igar-Maid wismalad, be-ibmar-abemaidi, wismarbalid. ”Degi-inigwele, amba be-sogedba ibmar-imaksasurmarmogad, Be-Igar-Maidgi annasmarmogad.
JER 5:6 A-ulale, achumigur-nono-wawaadse gullemaloed, achu-burburud-nega-dulesulidganbalidse ichimaklegoed. Achu-barbad e-neggwebur-ebiris bina itos gudiid. Bela dulemala neggweburgi-nodmalale, ese ibitolegoed. Ar we-dulemar dogdar begi yolesmalad, ar we-dulemar dogdar begi uayasuli gusmalad.”
JER 5:7 Bab-Dummad sogded: “¿Ibiga isgussulidyob an bemar-dakosunna? Ar be-mimmigan an-obachamalad, bab-dummagansurmalad-nuggi ise-sogar sogdamalad. An bemarga mas unnitiba uksad, degite, bemar galagwensuli gudmalad. Bela bemar danagwen galagwensuli gambanuchumarba be gudii gusmalad.
JER 5:8 Moli omegi-nakwebigudiyobi, be gudimalad. Dule-baigan-omeganbina be yaisur-gordii damalad.
JER 5:9 Ani an Bab-Jehová bemarga soged: A-ular, ¿an bemar-sabsur-odurdakosur be insae? ¿Buged-mai an bemar-imakosurde? An bemar-odurdakergebed.
JER 5:10 ”Israel-dulemar-e-uvaʼdub-digarmaladba be dagmar, maad-maad be imakdamar, degi-inigwele, mer bela be obelomalo. E-muumar be ungemalo, ar we-muumar bar angadsulid.
JER 5:11 Ani an Bab-Jehová soged: Israel-dulemar, Judá-dulemar, uayasuli angi gudmalad.
JER 5:12 ”Bemar an-obachamalad, ‘Bab-Dummad maisurye’ be sogmalad. ‘Bilagi anmar odurdaklegosurye’ be sogdamalad. ‘Ukumesedgi anmar odurdaklegosurye’ be sogmarbalid.
JER 5:13 ‘Bab-Dummad-gayaburba-barsogmaladdi, binsa-ee-gordimarye’ be sogmarbalid, ‘ar Bab-Jehová-gayaburba egi naisurye’ be sogmalad. ‘Bab-Dummad-gayaburba-barsogmalad deyob-sunmaksamaladba sabsur-odurdaklemarsunye,’ be sogmalad.”
JER 5:14 Degisoggu, ani an Bab-Dummad-Jehová-Bela-Gangued-Nikad bega soged: “Weyobi, dulemar sogsamarsoggu, Jeremías, an-gayaburba be-gayagi sooyobi guoed. We-dulemardi, sapanyobi gumaloed, bela bergumaloed.”
JER 5:15 Ani an Bab-Jehová bemarga soged: “Israel-dulemar, dule-dikasurmalad an bemarse barmidagoed. Neggwebur-gandikmalad, undargus-bukwamalad an bemargi barmidagoed. Dule gaya-akarsaila-sunmakmalad, e-gaya-be-aku-itomalad an bemarse barmidagoed.
JER 5:16 Bela we-dulemala bila-onogedgi buleganad, e-sigumala, dule-ogilogednanaed.
JER 5:17 Be-ibmar-wesmalad bei obelomaloed, be-masgullemalad bei obelomarbaloed. Be-masmala, be-bunamala, bei oburgwemarbaloed. Degine, be-sibadmar, be-moli-bebe-nikamalad, bei ogilomarbaloed. Deginbali, be-uvaʼmar, be-higuera-sapimar, bei obelomarbaloed. Be-neggwebur-gandikmaladgi, dule-oakalogosurye-egi-be-binsaedi, bela es-suidgi bei obelolebaloed.”
JER 5:18 Ani an Bab-Jehová soged: “A-ibagangine, an belallaa dulemar-obelogosulid.
JER 5:19 Dule bese egichiarmalale, ‘¿ibiga anmar-Bab-Dummad-Jehová weyob anmar-imaksaye?’ Jeremías, ega be sogo: ‘Bab-Dummad sogye: Ar igi-bemar an-obachamala, degine, be-neggweburgi bab-dummad-baiganba be ibsadii gusmala, deyobi, neggwebur-baidgi, dule-baiganga-arbadii be gumaloye.’
JER 5:20 Jacob-waganga be soge, Judá-dulemarga be sunmake:
JER 5:21 ‘Dule-binsaed-satemalad, dule-aku-neg-itomalad, be itomala. Ar bemar ibya-nika-inigwele, be aku-ibmar-dakmalad. Ar bemar uaya-nai-inigwele, be aku-ibmar-itomalad.’ ”
JER 5:22 Ani an Bab-Jehová soged: “Ar bemar, ¿bar an-dobsurmarde? Ar bemar, an-dobguewilubmalanad. Ani an ukub nasiksad, adi, demar-abingunaidga guegar. Demar-abingunanaid degisadegu-mai guoed, gwen berguosulid. Amba demar binnasur-arwedago-inigwele, degine, uurmakdago-inigwele, e-igar-abingunanaidgi gwen dogosulid.
JER 5:23 Ar we-dulemar gwage-dutusurmaladid, uayasuli angi damaladid. Angi bangus gudimalad, angi aibatemalad.
JER 5:24 Wis binsasurmalad, na sogsurmalad: ‘Anmar, anmar-Bab-Dummad-Jehová dobee nanamarye. Anmarga dii-owimaiye, ibagan-sekalaa dii barmimaiye. Degine, anmarga ibmar-weed-ibagan sekalaa nasikmaiddeeye,’ gwen binsasurmalad.
JER 5:25 ”Be-isgumaladi, bemargi we-ibmar-nuegan obelosad. Be-isgumaladi, bei ibmar-nuegan gasa siid.
JER 5:26 An bensuli, ar bemar-abargi dule-ibmar-isgana-imakmalad gudidiid, nuu-gaega-nakulemaladyob nakuledimalad, dule-gaega yamo emar-yardakmalad gudidiid.
JER 5:27 Sikwimar garbagi-ena-bukwadyobi, e-negmargi ibmar-atursasmaladi, ena-ena bubukwad. A-ulale, bemar dule-buleganga gudmalad, deyob, dule-mani-ibmalaga gudmalad.
JER 5:28 Be wardungudmalad, san-dummarbaa be gudmalad. Bemar-ibmar-isgana-imakmaladi gege bergued. Dule-babgan-satemalad nabir-nued-gudigumalaga ega be igar nabosurmalad. Dule-wilegana-e-ibmar-nikue-wilubmogad be bendaksurmarbalid.”
JER 5:29 Ani an Bab-Jehová soged: “¿We-ulale, sabsur-bemar-odurdakosur be an-insae? Weyob-dule-damaladi, buged-mai ¿imakosur be an-insae? An imakoe.
JER 5:30 ”Be dakmala we-napneggi, gwayed-dummad naid. ¡We-ibmar-gunaid gwen nabir-daklesulid!
JER 5:31 An-gayaburba-barsogmalad, unnila gakansaale sunmakmalad. Dule-irwa-anse-gormalad, na e-itolegedba negsemamaid. An-dulamarde, weyob-abeye soged. Ar bela ibmar bergunonikile, ¿bemar igi-gudmalosunna?”
JER 6:1 Bab-Jehová soged: “¡Benjamín-wagan, Jerusalén-neggweburgi be ainimar! ¡Tecoa-neggweburgi be gar-trompeta ogormar! ¡Bet-Haqueremʼgi be waa-obupurmakmar! Ar dad-nakwed-argan-sapiledsiki boni-dummad danikid, neg-obeloged danikid.
JER 6:2 Jerusalén-neggwebur-yeerdakleged an obelosokalid, gagan-aradikid-naid-yeerdaklegedyobidi, an obelosokalid.
JER 6:3 Sibad-edarbemalad, degi, e-sibadmar ese danimalad, neggwebur-ebilis ambikunonimaloed, na wala-walagwen e-itolegedba ibmar imakdemaloed.
JER 6:4 ”Be-isdarmalad, e-sordamarga sogdemaloed: ‘¡Jerusalén-neggweburgi-bila-onogega guakwamalo! ¡Yorukudbali anmar egi gwisgumaloed! ¡Emide, gwen nabir itolesulid, dad nae-naegusad! ¡Bato neg sedomaid!
JER 6:5 ¡Anmar nae! ¡Anmar mutiki egi gwisgudapoed! ¡Anmar e-neg-gandikmalad obelogoed!’ ”
JER 6:6 Deyob Bab-Jehová-Bela-Gangued-Nika-Maid soged: “¡Suarmar be immimar! Jerusalénʼgi-dogega napa-nakwemai be sobmalo. Ar e-dulemar ibmar-isgana-imakedbi wismarsoggu, we-neggwebur sabsur-odurdaklegergebed.
JER 6:7 Igi dia-yaagi dii-mummurmakmaidae, debayobi, Jerusalén-neggweburgi isgued ainimaid. A-neggweburgi sabsur-imaklegedbi itoleged, unnila ibmar-obelolegedbi itoleged. Ibmar-nued-imakleged an daksulid, unnila boniganbi nomamai an daked, nailikguedbi nomamai an daked.
JER 6:8 ¡Jerusalén-dulemar! An-bemargi-melle-banguega, be-daed be ogwamala. Ar degisulile, an bela bemar-obelogoed, dulemar bar-ambikuega an imakosulid.”
JER 6:9 Bab-Jehová-Bela-Gangued-Nika-Maid weyob soged: “Israel-dulemar-dula-bemaloedi, bela amiledii gulemaloed. Igi uva-san belallaa weledae, e-gaagi gwen gwagwenad obeledasuli, debayobi, dule-wargwenad gwen obelegosulid.”
JER 6:10 Ani Jeremías sogded: “Bab-Dummad, an bese egisdo, ¿wede doaga an sunmakoe? ¿An doa owisogoe? ¿Doa an-itogoe? Ar yamo itogosurmalad, an ega-ibmar-soged aku-itomaloed. Ar be-gayaburbagi dododamalad, ar be-gayaburba itobisurmalad.
JER 6:11 Ar Bab-Dummad-isdar-itogeyobi an isdar itogusmogad, agala, geg na san bargagusad.” Bab-Jehová anga sogded: “Be-sae-itoged be soge, burwigana-neg-imbaba-gudimaladga be soge, sapingan-danar-danar-gudimaladga be oyoge. Ome e-suibogwa gales seledmaloed, degine, dule-uka-selebamalad, dadgan-sergan-ebo, gales seledmarmogoed.”
JER 6:12 Bab-Jehová soged: “E-negmar, e-nainumar, degi, e-omegan dule-baigangadga guoed. Ar ani, an-dulamar-we-neggweburgi-bukmalad sabsur-odurdakoed.
JER 6:13 ”Bipiganase-bakale, degi, serganse-bakale, igar-maisulidba-ibmar-nikuedgi yaisur-itodimalad. An-gayaburba-barsogmaladse-bakale, dule-irwa-anse-gormaladse-bakale, dule-yardakedgi arbadimalad.
JER 6:14 Unnila asginbi an-dulamarga sokardamalad: ‘Be-isguedgi be ollorgusye, nueganbiye.’ Sokardamarbalid: ‘Neg nueganbiye.’ Degi-inigwele, neg nueganbi dasulid.”
JER 6:15 Ani an Bab-Jehová soged: “¿Bemar ibmar-isgana-imaksadbali, be bingegusmala? Ar bemar, bingedar itossurmalad. ¡Bingeguodeeye gwen binsasurmalad! A-ulale, wemar dulemar-sabsur-odurdaklegoedba, sabsur-odurdaklemogoed. An we-dulemar sabsur-odurdakalile, bela wilemaloed.”
JER 6:16 Bab-Jehová weyob soged: “Ibmar-imakdimalad be melle bar imakmar, be-gudiid be nue itomar. Igar-epennegana be egismar, igid-igar bur nuedye. Melle a-igargi be bangumalo. Deyobi, bonisuli garmakdii be gumaloed. Degi-inigwele, ‘bemar we-igarba nanaosurye’ sogsamalad.
JER 6:17 An bemarga gayaburba-berbemalad barmisad, weyob bemarga sogegar: ‘Nue gar-trompeta-goled be itomalo.’ Degi-inigwele, bemar gar-trompeta-goledba ibsaosurmarye sogsamalad.
JER 6:18 ¡Degisoggu, dulemar-neggwebur-akar-akar-bukmalad be itomar! ¡An-dulamar-wilegoed be nue itomalo!
JER 6:19 ”Dulemar, bela be an-itomar: Boni-dummad an Jerusalén-neggweburga sedanikid. E-isgudimalad-ulale, boni-dummad an ega sedanikid. Ar an ega ibmar-soged itossurmalad, aka an-igar-maid obachamalad.
JER 6:20 Ina-wawadikid Sabá-neggweburgi be sedanidamaladi, ¿ibi-nuedga wis anga guoe? Masaryob-dakleged-wawadikmalad, dikasur-neggwebur-baidgi be sedanidamaladi, ¿ibi-nuedga wis anga guoe? Be anga we-ibmarmar ogumakar-ukmalad an abesulid. We-ibmarmar an yeer daksulid.”
JER 6:21 A-ulale, Bab-Jehová weyob soged: “An Jerusalén-dulemar-igar oburoed, egi yolemalaga an imakoed. Babgan, e-mimmiganmala, e-aimarmala, degine, e-neg-dikarba-mamaimalad, bela girgumaloed.”
JER 6:22 Bab-Jehová weyob soged: “¡Be dakmar! Dad-nakwed-argan-sapiledsik sorda-bila-onomalad danikid. Bela napaneg-ugakaase sordamar-bukib duurmakdanimalad.
JER 6:23 Warsiyalaba duurmakdanimalad eswarmar-annik-annik melledanimalad. Dule-isganamalad, wile dule-daksurmaladid. Demar-uurmakemaiyobi, binnasuli oimakdanimalad, e-molimar-birgi abarmakdanimalad. Jerusalén-dulemar, we-dulemar begi-bila-onogega duurmakdanimalad.”
JER 6:24 Jerusalén-dulemar sogdemalad: “Anmarse gayaburba nonikid, degidbali, anmar niga argwated. Anmargi dobe-itogedi obined, igi-ome-ugakgunair boniganba-galitonaidae, deyobiyob anmar itoged.
JER 6:25 Melle be sapurba ainimalo, melle aineba namalo. Ar anmar-isdarmalad es-suid-guagwar danikid. ¡Bela neg-imbaba neg dulagwar naid!
JER 6:26 An-dulamar, wile-itoged-mor be yomala. Burugi baparmakmai be imakmala. Igi-dule na e-mimmi-wargwennagwad-ei-burgwisar bina boe, debayobi be ise-boale bomala. Ar dulemar-anmar-obelogedi, emisgwa anmargi danikid.”
JER 6:27 Bab-Dummad anga sogded: “Jeremías, be an-dulamar-daed-argaega, e-daed-balamiega, amar-abargi-egi-nakulegega, an-be-ogwichisad.
JER 6:28 Bela we-dulemala uayasulidamalad, gakansaedbi dakdimalad. Na dule-nuedga san-imakmar-inigwele, bela dule-isganamarbiid.
JER 6:29 Ar soo-binnasur gadele, gingwa soo-abin daluddaed. Ar dulemardina, gwen san-islididik gusulid. Gwen igarga gusurmalad.
JER 6:30 A-ulale, we-dulemar ibmar-isganaye bileged. Ar angala ibmar-isganaga gumalad.”
JER 7:1 Bab-Jehová Jeremíasʼga weyob sognonikid:
JER 7:2 “Jeremías, anse-goled-neg-dogedse be gwisguna, agine weyob be sogo: ‘Bemar bela Judá-dulemar-we-yawagakgi-ubomalad, Bab-Jehová-gayaburba nue be itomaloye.
JER 7:3 Weyobi, Israel-e-Bab-Dummad-Jehová-Bela-Gangued-Nikad soged: We-yalagi-gudii amba an bemar-imakega, be-daed be ogwamar, be-ibmar-imaked be ogwamar.
JER 7:4 Melle dulemar-bega-gakansaar weyob-sogmalad be itogo: Wegi we Bab-Jehováʼse-goled-neg siid. Wegi we Bab-Jehováʼse-goled-neg siid. Wegi we Bab-Jehováʼse-goled-neg siid. Agala, neg akarguosulid.
JER 7:5 ” ’Ar bemar be-daed be ogwamalale, be-ibmar-imaked be ogwamalale, degine, na be muchub-muchub igar-innikigwad be imakmarbalile, an wile bemar-dakoed. Be-dadganga-an-yala-uksadgi bemar degisadegu gudii an imakoed.
JER 7:6 Deginbali, be dule-be-neggweburginedsulid-sabsur-imaksurmalale, degi, sergan-satemalad be mesagwar-imaksurmarbalile, degi, ome-ei-sui-burgwisad be mesagwar-imaksurmarbalile, an wile bemar-dakoed. Degi, we-yargi be dule-ibmar-oakalossulid-binsa-gindaksasurmalale, deginbali, bab-dummad-baiganba be isgumalaga bar be nanasurmarbalile,
JER 7:7 we-yalagi, be-dadganga-an-yala-uksadgi amba gudii an bemar-imakoed.
JER 7:8 ” ’Ar bemar, gakangi be bensurmalad. Ar we-gayamardi gwen nabiridsulid. Gwen ibmar-nued bega uksulid.
JER 7:9 Bemar gadi-ibmar-atursamalad, emar-gindakmalad, abirgunagwarsuli-galagwensuli-nanamalad, ibmar-imakedseye be ise-sogar binsa-sogdamalad, bab-dummad-Baalʼga ina-wawadikid ukmalad, degine, bab-dummad-baigan-akudakmaladse be gordimalad,
JER 7:10 degite, be an-itoged-negse be anse nonidamarbalid, weyob be sognonidamalad: Wegi anmar nued gudimarye. Geb sorba gannar be isgunaddamarbalid.’ ”
JER 7:11 Ani an Bab-Jehová soged: “¿Ar bemar binsasi, anga neg-nugsalegarsiid atursamalad-neg-sogeye? Ar an-sunnagwad deyob an bemar-dakdiid.
JER 7:12 ”Silo-neggweburgi anse-goled-neg-sigisadse be namar. A-nega gebesailagi an megega susanad. Agi an-dulamar-isgusadba an neg-imaksad be dakmalo.”
JER 7:13 Ani an Bab-Jehová soged: “Degi-inigwele, amba bemar deyob gudimarbalid. An bemarga bali-bali sunmakdigus-inigwele, be anba ibsassurmalad. An bemarse gochamar-inigwele, be an-abin-imaksasurmalad.
JER 7:14 ”Igi an Silo-neggweburgi anse-goled-neg-siid an imaksagusa, deyobi, anse-goled-neg-siid egi bemar-bensulidi, an imakbaloed. Degine, an be-dadganga we-yala-uksadi, degi, bemarga an we-yala-uksadi, Silo-neggwebur-imaksayob an imakbaloed.
JER 7:15 ”Igi-an bela be-gwenadgan-Efraín-waganmar-obachagusa, deyobi, an-asabin an be-obanmarmogoed.”
JER 7:16 Bab-Jehová sogdebalid: “Be, Jeremías, melle we-dulemarga be anse golo. Melle we-dulemarga be anse wilesagwa golo, melle we-dulemarga be anse ise-wilegar golo. Melle be angi alamaknai guo, ar an be-itogosulid.
JER 7:17 ¿Ar Judá-neggweburgi-ibmar-imakmalad be aku daksi? ¿Jerusalén-neg-imbaba-neg-gunaid be aku daksi?
JER 7:18 ”Mimmigandi sapan-urbenanaidamalad, babgandi soo-ogananaidamalad, omegandi madu-omukuardamalad, adi, Rey-Bundor-Nibnegginedga madu-ukmalagar. A-ukinbali, yamo an-ourwega bab-dummad-baiganga-ibmar-ukega vino eodamarbalid.
JER 7:19 Ani an Bab-Jehová soged: ‘Weyob ibmar-imakmaladi an-wiomarye bimalanad. Aka na dukin egi isdar-binsananaid, na dukin bingegumaloed.’
JER 7:20 ”A-ulale, ani an Bab-Jehová-Bela-Gangued-Nikad, an soged: ‘We-yalagine an gwichiguoed, dulemargi an yolegoed, ibmar-durgangi an yolegoed, sapimargi, degi, ibmar-sanmakbukmaladgi an gwichiguoed. Degi, an-urwedi soo-gamaiyob bar galegosulid.’ ”
JER 7:21 Israel-e-Bab-Dummad-Jehová-Bela-Gangued-Nikad weyob soged: “Bemar bela ibmar-ogumakar-uklemalad, ibmar-uklemaladba be anga ukmarbalo. E-sandi be gunmalo.
JER 7:22 ”Deunni, an Egipto-yargi bemar-dadgan-onosgua, anga-ibmar-ogumakar-ukmaloedgi, degine, anga-ibmar-ukmarbaloedgi an ega sunmaksasulid.
JER 7:23 Unnila an ega weyob igar uksad: ‘An-sogedba be damaloye. Adi, ani an bemar-Bab-Dummadga guegarye, degine, bemar, an-dulamarga gumarmogagarye an sogsad. Deginbali, an bemarga-igar-ukoedba be nanamaloye an sogsad, adi, bemar nueganbi we-yalagi-gudigumalagarye, an sogsad.’
JER 7:24 ”Degi-inigwele, be-dadgan an-itossurmalad, an-sogedba ibsassurmalad. Aka bur e-binsaed-isganamarba nanasmalad. Anba bur nanae-wilubmala-inigwele, aka bur angi bangudmalad.
JER 7:25 ”An Egipto-yargi-be-dadgan-onosad-iba-akar, emi-ibasega, an bemarga bane-bane an-gayaburba-barsogmalad barmidii gusad.
JER 7:26 Degi-inigwele, amba be an-itosurmalad, an-sogedba be ibsassurmalad. Aka be be-dadganba bur bule uayasuli nadmalad, bur bule be isgudmalad.”
JER 7:27 Bab-Jehová anga sogdebalid: “Jeremías, ega be bela ibmar-sogo, degi-inigwele be-itogosurmalad. Ese be golo-inigwele, be-itogosurmalad.
JER 7:28 Geb agi weyob ega be sogo: ‘We-neggweburmala, Bab-Dummad-Jehováʼba ibsassurmalad, e-odurdaked abessurmalad. Bela e-ibmar-napira-sogmalad bergusad, ibmar-napira-soglegedgi gwen bar sunmaklesulid.
JER 7:29 Sailagia be siksun, sailagia be misun, yar-mullugan-swiliganba be bonae. Ar dulemar-an-ourwega-imaksamaladi an obachad, agala, an egi bangusad.’ ”
JER 7:30 Bab-Jehová soged: “Bemar, Judá-dulemar, ibmar-isgana-an-sae-daked be imaksamalad. Bemar, be-ibmar-bab-dummadyob-imaklemalad-isganamar an-itoged-negyagi-urbismaladba be ichosmalad, an-itoged-neg-angi-sunmakleged be oichosmalad.
JER 7:31 ”Deginbali, bemar Ben-Hinom-nebagi bab-dummadsulid-Tofetʼga aila be sobsamarbalid, adi, a-ailagi be-mimmigan be ogumakmalagar. Ar an bemarga we-igar gwen uksasulid, bipisaale an-binsaedgi gwen nossulid.
JER 7:32 Ani an Bab-Jehová soged: Ibagan nonikoed, Tofet-aila bar Tofet-ailaye bilegosulid, degi, Ben-Hinom-neba Ben-Hinom-nebaye, bar bilegosurbalid. Agala, Gindakmalad-nebaye bilenonikoed. Napaneg-baid-satedbali, Tofet-aila-siidgi be dule-burgwarmalad digmaloed.
JER 7:33 We-neggweburginmalad-e-muigan ibmar-durgan-gukumalad-e-masga guoed, achu-sapurmar-e-masga guoed. Dulemar we-ibmar-durgan ogwayosurguoed.
JER 7:34 Judá-neggweburmargi, degi, Jerusalén-neg-imbaba weligwar-itoleged an obelogoed. Degine, wergulegedgi-namakleged an obelobaloed, deginbali, abirgin-nikulegedgi-namakleged an obelobaloed. Ar ade, we-yala bela ollobi naguoed.”
JER 8:1 Bab-Jehová soged: “A-ibagangine, reymar-garmar, degi, Judá-dulemar-garmar-neg-uangi-mamaid bela onomaloed. Degine, dule-irwa-Bab-Dummadse-gormalad-garmar, Bab-Dummad-gayaburba-barsogmalad-garmar-mamaid bela onomarbaloed. Deginbali, Jerusalén-dulemar-garmar bela onomarbaloed.
JER 8:2 Bela-a-garmar dad-abin, degi, nii-abin, degine, niisgwamar-abin urbilegoed. Ar ade, wemar dad, nii, degine, niisgwamar sabgusmalad, ega ibmar imaksamalad, degine, we-ibmarmarse ibmar egichismalad, e-nugmar odummosmarbalid. Dulemar we-garmar-digega bar garmar weosulid. ¡Ibmar-isganamaryob napagi omiledoed!
JER 8:3 Ani an Bab-Jehová-Bela-Gangued-Nikad soged: An we-dule-isganamar galagwensuli aisakis urboed. Amar dula bar gudii gubigudagosurmalad, burgwebi bur gudamaloed. Ar deyob guoed.”
JER 8:4 “Jeremías, we-dulemarga be sogbalo, Bab-Jehová weyob sogye: ‘Dulemar aimukusale, ¿gwichibin imakdasursi? Dule wis igar-noaledba-aibatele, ¿gannar igar-nabirid-amidasursi?
JER 8:5 Degite, ¿ibiga bemar igar-noaledba aibatemarsunna? Jerusalén-dulemar, ¿ibiga be nue-an-obachamarsunna? Unnila gakan-igargi be alamakdimalad, gwen anse gannar be dagbisurmalad.
JER 8:6 Dule-sunmaked nue an itodii gusanad, dakega, dule-wargwen igar-nuedba sunmakdiidibeye. Dulemar e-isguedga gwen bukib binsasurmalad, e-ibmar-isgana-imaksamalad aku itomalad. Bela dulemar, igi moli bila-onolenaidgi-abarmakwisdae, deyobi, e-itoleged-e-itolegedba nanabukmalad.
JER 8:7 Ar dabgalamarbela ibagan-nagumaid wisid. Sapur-nuumar, degi, wirsobmarbela wisid, sanase neg-baidse obakmaloe. Ar bemardi, an-dulamar-gumaladi, an-igar-mamaiddi gwen wissurmalad.’
JER 8:8 ”Ar ibiga be sokardamala: ‘Anmar binsaed-ibegana, anmar Bab-Jehová-Igar-Maid sedimala.’ Ar dule-garda-narmakmaladbela gakansaar odurdakmalad, Bab-Dummad-igar weyob-maiye sogdidamalad.
JER 8:9 We-dule-binsaed-ibegan nue-bingegumaloed, na dukin ise-yardaklegar gumaloed. Ar an-gayaburba itossurmalad, degisoggu, ¿bia e-binsaed-nikagued nadsunna?
JER 8:10 A-ulale, an e-omegan machergan-baiganga ukoed, degi, an e-nainumar dule-baiganga ukbaloed. Ar bipigana, serganse-bakale, igar-maisulidba ibmar-nikuedgi binsamalad. Bab-Dummad-gayaburba-barsogmalad, dule-irwa-Bab-Dummadse-gormaladse-bakale, ibmar-amimalagala, emar-yardakar arbadimalad.
JER 8:11 Unnila asginbi an-dulamar-nudakdimalad. Unnila ega sokardamalad: ‘Nueganbi, bonisuli.’ Ar degi-inigwele, nueganbi-dasulid, aka bur bule neg ege naid.”
JER 8:12 Bab-Jehová soged: “Weyob ibmar-isgana-imaksamaladba, degite, ¿bingedar-itosurmarde? Suli, degite amba bingedar itosurmalad. ¡Ar bingegued wissurmalad! A-ulale, dulemar-sabsur-odurdaklegoedba, wemar sabsur-odurdaklemogoed. An we-dulemar sabsur-odurdakalile, bela wilemaloed.”
JER 8:13 Bab-Jehová soged: “Bela an bemar-obelogoed, uva-san e-nainugi berguedyob an bemar-obelogoed. Higo-san e-sapigi satedaeyob an bemar-imakoed. Degine, e-gagan-dinnaganbi-nanaidaeyob an bemar-imakoed. A-ulale, an bela bemarga ibmarmar-uksadi, gannar an bemar-annik suoed.”
JER 8:14 Geb dulemar sogdemalad: “¿Ibi anmar wegi gannaa sabukwa? Dage, anmar neggwebur-gandikmaladse nae, agi anmar itoba burgwemaloed. Ar anmar Bab-Dummadgi dummad-isgusad-ular, anmar-Bab-Dummad-Jehová anmar-obelonaid. Dii-ina-nusubiid-gobega anmar-imaksad.
JER 8:15 Nueganbi-naoye anmar bisanad, degi-inigwele, anmar ibmar-nued gwen daksasulid. San-nued-gumaloye an bisanad, degi-inigwele, anmarga dobed-dummad uksad.
JER 8:16 Dan-neggwebur-akale, molimar-abarmakdanikid itoleged. Molimar gotele, bela yala giglimakdedaed. Yala-naid obelodanikid, bela yalagi-ibmar-bukwad obelodanikid. Neggweburgi-siid, degi, bela e-dulemar-bukwad obelodanikid.”
JER 8:17 Bab-Jehová soged: “An bemargi naibe-nuegan barmidoed, bemargi warmakoed. We-bonigan-nudakegala, inamar sulid.”
JER 8:18 An bela-belad nue-nunmak-itogedbali, an-gwage-ulubgi an burgwebidar itogusad.
JER 8:19 Bela neggwebur-imbaba an-dulemar-ogormakbukwad itoleged, “¿Bab-Jehová Sión-yalagi bar gudisursi? ¿E-reyde a-yargi bar maisurmosi?” Bab-Dummad abin-sogded: “¿Ar ibiga bemar be-bab-dummagangi an-ourwega an-imakmala? ¿Ibiga be-bab-dummagan-ibmar-nuedga-gusurmaladgi an-ourwega an-imakmala?”
JER 8:20 Israel-dulemar sogded: “Ibmar-weed-ibagan bergus, neg-yolad bergus, ar anmardi gwen bendaklessurmalad.”
JER 8:21 Geb an abin-imaksad: “An-dulemar-nunmak-itogedbali, an nunmak-itomogad. An nue bukib-binsaedba, bela-belad angi dobednagusad.
JER 8:22 ¿Ar Galaad-yalagi ina-wawadikid sursi? ¿Agi ina-duledmarde sursi? ¿Ar ibiga an-dulemarde bonigan-abgadii gumalosunna?”
JER 9:1 Ani Jeremías, an-neggweburginmalad-girgusadba, ibginedba, degi, mutikidba, an bodii guega, an-nono, dii-aryomaiyob guena yeerban. An-ibyanis, dii-aryogwisdaeyobi gusana yeerban.
JER 9:2 An nega-dulesulidganba, obunnoged-neg nikana yeerban. An-neggwebur-mete an naoenad. We-dulemargi an banguoenad. Ar bela we-dulemala, galagwensur-nanamaladid, ar bela we-dulemala, dule-yardakmaladid.
JER 9:3 Bab-Jehová soged: “Gakansamalaga guakwaa gudidamalad, warsi-guagwar-ganikidyob gudidamalad. We-yalagine, igar-napiragwad sated, gakansaed neg-gagas naid. Aka bur nue-ege neg-nadapid. Ani an Bab-Dummad-gued gwen an-daksurmalad.
JER 9:4 ”Be-aimar-warwargwengi nue salakarmar, melle gwenadganse-bakar, egi be bensuli guo. Ar bela gwenadganmar dule-yardakedbiid. Bela aimar, na e-aimar-dikarba yogasaar sunmakdimalad.
JER 9:5 Na muchub-muchub yardakdimalad, dule-wargwensaale, napiragwadgi sunmaksurmalad. Na gakansaedgi nue-durdaksa gudimalad, gakansaedginbi binsadimalad.”
JER 9:6 Bab-Jehová soged: “Be, Jeremías, dulemar-yardakmalad-abargi be gudiid, amar emar-yardakmaladba magar an-dakbisurmalad.”
JER 9:7 A-ulale, ani Bab-Jehová-Bela-Gangued-Nikad weyob soged: “¿Ibu-ibmar-baid bar an-dulamarga an imakbalosunna? An we-dulemar urukergebed, an we-dulemar wilubdakergebed.
JER 9:8 Ar e-gwabin-duku sigu-dule-gindakedyobid, unnila gakansaar-sunmakedbi wismalad. E-aibo nuedgi sunmakdaed, ar e-ulubgindi yamogedgi binsadamalad.”
JER 9:9 Bab-Jehová soged: “Degite, a-ulale, ¿an sabsur-odurdakosurde? An sabsur-odurdakergebed. ¿We-dulemar an buged-mai imakosurde? An imakergebed.
JER 9:10 ”Yalaganga boega an be-imakoed, yalaganga akiginnega an be-imakoed. Nega-dulesulidgan-e-gaganmarga oakudii an be-imakoed, ar bela neg-olloo nai guoed. Ar dulemar bar agi gudii guosulid, molimar-goledi bar itolegosurbalid. Bela nuumarse-bakale, ibmar-durganse-bakale, duurmakdemaloed.
JER 9:11 ”Jerusalén-neggwebur napi akwabi ganna-ganna-bukwa an imakoed, achu-sapur-uaya-ganna-ganna-e-negga an imakoed. Judá-neggweburmar-e-sailaga-gubukwad neg-ollobi an sioed, dulemar-sate an imakoed.”
JER 9:12 Ani Jeremías weyob sogded: Ar we-ibmar magar-itogegala, ¿doa binsaed-ibed-gudii? ¿Ar doaga Bab-Dummad sunmaksa, adi, dule-baidga we-ibmar-sogmogagar? ¿Ar ibiga anmar-yar bergusnai? ¿Ibiga anmar-yar nega-dulesulid-naidyobi dule gwen nanasuli ollo-nai?
JER 9:13 Bab-Jehová soged: “Ar Israel-dulemar an-Igar-Maid an ega uksadgi aibatemalad. An-sogedba ibsassurmalad, a-Igarba nanassurmalad.
JER 9:14 Aka e-binsaed-isganaba nadmalad, bab-dummagan-Baalʼmarba nanasmalad. E-babgan-e-odurdaksadba nanasmalad.”
JER 9:15 Israel-e-Bab-Dummad-Jehová-Bela-Gangued-Nikad weyob sogbalid: “We-dulemar ibmar-gagbiremalad-gunnega an imakoed, degine, dii-ina-nusubiid-gobega an imakbaloed.
JER 9:16 Wemar, yar-baid-baid-nanaidgi-aisakiega an imakoed. Wemar, degi, e-babgan we-yarmar-gwen-dakdisurmaladse an oduurmakoed. Es-suidyalaba an baleginnoed, bela obelogedse an imakoed.”
JER 9:17 Bab-Jehová-Bela-Gangued-Nikad weyob soged: “Nue be itomar. Omegan-dule-burgwismaladga-bomaladse be gornamar. ‘Bur nue-yeer-bomalad dagmaloye,’ be sogo:
JER 9:18 Gwae-gwae dagmalo. Anmar-ular bodamala. Anmar-ibyanis bela-bela aryogoed, anmar-ibyanis ena-ena naoed.
JER 9:19 Sión-yala-akale, dule-boedi, degi, dule-akiginnedi, weyobi, itoleged: Anmar nue oitolesmar, nue-anmar-obingegsasmalad. Anmar we-yalagi nomalargebed, ar bela anmar-neguyamar obelosmalad.
JER 9:20 ”Omegan, an-gayaburba nue be itomar. An-ibmar-soged nue be itomalo. Be-bunamala, bukid-binsaleged-namakedgi be odurdakmar. Be-aimar muiga-bolegedgi weyob be odurdakmar:
JER 9:21 ‘Burgwedi, anmar-negse dognoniki, anmar-neg-yawagakba dogsad. Burwigana-magaba-gudidimalad obelolesad, sapingana-magaba-ambikulegedgi-bukmalad obelolesad.’ ”
JER 9:22 Bab-Jehová soged: “Muimar, napagi ibmar-isganayob omilede guoed. Igi dule-ibmar-gwag-wesale, napagi-babatismalad-omileddae, gwen bar dule wedasuli, deyobi, muimar napagi omilede guoed.”
JER 9:23 Bab-Jehová weyob soged: “Dule-binsaed-ibed, melle na e-binsaed-nue-nikadgi san-dummarba itogo. Dule-gandikid, melle na e-gangued-nikarbadgi san-dummarba itomogo. Dule-mani-ibed, melle na e-mani-nikarbadgi san-dummarba imakmogo.”
JER 9:24 Bab-Jehová soged: “Ar dule na nug-dummarba-imakbiele, magar-an-dakedgi na nug-dummarbaa imakdo. Ar dule na wergubiele, ani Bab-Dummad-Jehová-gued-magar-an-dakbalidgi, wergusundo. Ani an dulemar-sabgumaiye, degi, ani an igar-innikii-imakedye, be wisidba, be wergusundo. Ani an igar-maidba we-napneggi-ibmar-imakedgi be wergusundo. Ar weyob ibmar-imaklegedi, an yeer daked.”
JER 9:25 Bab-Jehová soged: “Bela dule-abgan-uka-duku-sikarmalad, anse-sabsur-odurdakleged-ibagan ega danikid.
JER 9:26 An we-dulemar sabsur-odurdakoed: Egipto-dulemar, Judá-dulemar, Edom-dulemar, Amón-dulemar, Moab-dulemar, degine, bela dulemar-nega-dulesulidganba-bukwamalad, dulemar-burgwarmaladse-golega na nono-swiri-imakmaladi, wemar an sabsur-odurdakoed. Ar bela dulemar-yar-baid-baidgi-bukwamalad, degi, Israel-dulemarse-bakale, e-gwage-ulubgine anba dasurmalad.”
JER 10:1 Israel-dulemar, Bab-Jehová-sunmaked be itomar,
JER 10:2 weyob soged: “Dulemar-yar-baid-baidsik-bukmalad-e-daedba melle be damalo. Nibneg-akar ibmar-yogasaar-oyolegar-be-dakele, melle be gwayemalo. Dule-bamalad-dobee-itodamaladyob, melle be dobgumalo.
JER 10:3 Ar dulemar-e-bab-dummaganse-goled-igar-maidi binsaled gued. We-dulemala, sapurba-nadele, suar-immidamalad, geb dule-ibmar-sobed, esbipigi suar-sobdaed.
JER 10:4 Geb egi mani matak-matak nasikdamalad, ormar matak-matak nasikdamarbalid. Melle-aimukuegala, esgorogi biokdamalad.
JER 10:5 ”We-bab-dummagan, ibmar-digar-naidgi, ibmar-sikwimar-ogwayed-gwichidaeyob gued, geg sunmaked. We-ibmarmar dule yamo sear imakergebed, geg walagwen nanamalad. Melle be we-ibmarmar dobgumalo, ar gwen be-oakalogosulid, bemarga gwen ibmar-nued imakosurbalid.”
JER 10:6 Ani Jeremías sogded: “Bab-Jehováʼye, dule beyobid sulid, bedi dule-dummadid, be-nuga gandiki gued.
JER 10:7 Dule-yar-baid-baidgi-bukwamalad-e-Rey-be-gued, ¿doa be-dobguosuli? ¡Bela be-dobgumalargebed! Ar be dulemar-binsaed-ibegan-abargi, reymar-negsemamaid-abargi, dule-beyobid sulid.
JER 10:8 Bela dulemala, gegeganad, binsaedsurmaladid, suar-sobarmalad-ibmarga-gusurmaladse ibmar-durdaksamaladid.
JER 10:9 Tarsis-yala-akale, mani-matargana sedanidamalad, Ufazʼye-neg-nugad-akale, olo sedanidamarbalid. We-ibmarmargine, bab-dummadyob-imaklemalad sobdamalad. Geb ega mor-arad, mor-ginnid makdamalad. Dulemar-orgi-arbamaladi, manigi-arbamaladi, degi, ibmar-sobedgi-arbamaladi, bela we-ibmarmar imakmalad.
JER 10:10 Degi-inigwele, Bab-Jehováʼdi, Bab-Dummad-napiragwadid, Bab-Dummad-dulasaila-maidid, e-Reyga-maigu degisadeguadid. Bab-Dummad uludele, napaneg ogiglimaked, dulemala, e-urwed-abin gege gwisgumalad.”
JER 10:11 Bab-Jehová sogdebalid: “Jeremías, weyob be Israel-dulemarga sogo: ‘Bab-dummagan-gwen-nibneg-imaksasulidi, degi, gwen napneg-nasiksasulidi, nibneg-urbali bela we-napneggi berguoed.’ ”
JER 10:12 Bab-Dummad, e-ganguedba napneg nasiksad, e-binsaed-nikadbali, napneg ilemaksad, e-ibmar-wisidbali, nibneg nasiksad.
JER 10:13 Bab-Dummad sunmakdele, nibneggi diimar uurmakardaed, magatibali, mogirmar ainakwiardaed, mala-ibyed-abalagi, dii owidaed, burwa-galumargi, burwa onidaed.
JER 10:14 Bela dulemar binsaedsulidamaladid, aku-neg-itomaladid. Bela-dule-orgi-arbamaladi, e-ibmar-sobedgi bingedar itomalad, e-ibmar-sobarmaladi, dule-yardakmaladid, burba satemalad.
JER 10:15 We-ibmarmala binsaledid, binsa dodolegedid. E-sabsur-odurdakleged-iba-nonikile, bela berguoed.
JER 10:16 Jacob-e-Bab-Dummaddi deyobsulid, ar e, bela ibmar-imaksadid. E-nuga, Bab-Jehová-Bela-Gangued-Nikadye nugad, Israel-dulemardi, egadiga gued.
JER 10:17 Bab-Dummad weyob soged: “Be-ebiris bukwamalad, be-ibmarmar-napagi-omileded be sue-sue imakmar.
JER 10:18 Ar ani Bab-Jehová weyob soged: Emisgindi, an we-neggweburginmalad we-yargi dikasuli an barmidoed. Suli-suli-itogega an imakoed, dule-bamaladse-galegega an imakoed.”
JER 10:19 Ani Jeremías sogded: “¡An duledar-wiles! ¡An nue-ibitos! An boni-nikadi geg-nudaklegedid. Ar an-bonisoggu, an na gala-itosunnodo.
JER 10:20 An-dordoneg ayaris siid, bela dordoneg-e-dubmala itiris bukwad. An-mimmigan-an-obachamaladi, bela amar girgusmalad. Anga-neg-sobed dule sated, anga-mor-dummagan-onakwed dule sated.
JER 10:21 Dule-negdakmamaidi, binsaedsulidga gusmalad, gwen Bab-Dummad-amiedgi binsassurmalad. A-ulale, igar-nued ega gussulid, e-dulemala, yogasaar-aisakis gudimalad.
JER 10:22 ”¡Be itomar! ¡Gayaburba-gwensak noni! Dad-nakwed-argan-sapiledsik, sorda-bila-onomalad danikid. Judá-neggwebur achu-sapur-uaya-gannagana-e-negga guoed, bela Judá-neggwebur akwabi ganna-ganna sigoed.”
JER 10:23 Ani Jeremías weyob Bab-Dummadse goted: “Bab-Jehováʼye, an wisid, dule-e-san-burba dulegadsulid. Deginbali, e-guoedi na wissurbalid.
JER 10:24 Bab-Jehová, igar-maidba be an-odurdake, melle urwedgi be an-odurdako. Ar urwedgi be an-odurdakele, be an-wiogoed.
JER 10:25 Bur be dulemar-aku-be-dakmaladgi be-urwed be oyoge. Dule-be-nug-odummosurmaladgi be-urwed be barmidage. Ar Jacob-wagan-wiosmalad, bela naitinagase obelosmalad, degine, bela e-negmar obelosmarbalid.”
JER 11:1 Bab-Dummad weyob Jeremíasʼga sognonikid:
JER 11:2 “We-igar-maid nue be itogo, geb Judá-dulemarga, degi, Jerusalén-dulemarga be sogo.
JER 11:3 ‘Israel-e-Bab-Dummad-Jehová weyob sogye be sogo: Dule we-igar-sogmaidba dasulile, iwiguoye.
JER 11:4 We-igala, an-sunnagwad bemar-dadganga an narmaksad. Deunni, Egipto-yala-esgoro-duleged-negyobidgi sabsur-wilebukwa-onosgu, an ega we-igar uksad. An ega weyob sogsad: An-bega-ibmar-sogedba be nanamalo, an-bega-igar-ukedba be damalo. Bemar an-neggweburga gumaloed, ani an bemar-Bab-Dummadga-guoye an ega sogsad.
JER 11:5 Ar be anba ibsamalale, bemar-dadganga an ibmar-ise-sogar-sogsad an imakoed. Deunni, an sogsagusad: Yala-nued-gadi-ibmar-sanmaked an bemarga ukmaloye. Ar emi bemar a-yalagi be bukwamalad.’ ” Geb agine, Bab-Dummadga an sogded: Bab-Jehová, ar deyobdo.
JER 11:6 Bab-Jehová anga sogdebalid: “Bela we-gayaburba Judá-neggweburgi, degi, bela Jerusalén-galimbaba be sogo. Weyob be sogo: ‘We-igar-mamaid be itomarye, we-igar-maidba be damarye.
JER 11:7 An Egipto-yalagi bemar-dadgan-onosad-akale, emi-ibase an-sogedba-nanamarye an sogdaniguad.
JER 11:8 Degi-inigwele, an-sogedba nanasurmalad, gwen an-itosurmalad, unnila na e-binsaed-isganaba nanadimalad. A-ulale, we-igargi-bonigan-mamaid an egi barmialid. Ar igar-sogmaidba nanamaloye an ega sogsad, degi-inigwele, a-igar-sogedba nanasurmalad.’ ”
JER 11:9 A-ukinbali, Bab-Jehová anga sogsabalid: “Judá-dulemar, degi, Jerusalén-dulemar angi uayasuli gudmalad.
JER 11:10 E-babgan-isgusadyob gannar isgudmarmogad. Amarde gwen an-sogedba nanasurmalad. Bab-dummad-baiganba ibmar-imakdii gudmalad. Ar Judá-dulemar, degi, Jerusalén-dulemar, an E-Dadganbo-Igar-Mesisad bichismalad.
JER 11:11 A-ulale, ani an Bab-Jehová soged: An egi boni-dummagan barmidoed, a-bonigangi gwen san-onogosulid. Anse wile-itogedgi-gormalo-inigwele, an itogosulid.
JER 11:12 ”Geb degine, Judá-dulemar, degi, Jerusalén-dulemar, bab-dummadganga-ina-wawadikid-ukdamaladse bendakleged egisnamaloed. Degi-inigwele, boni-dummagan-ibagan-warmaknonikile, a-bab-dummagan gwen e-bendakosurmalad.
JER 11:13 Judá-dulemar, be-neggweburmar-merguedyobi, bab-dummagan-nika be gudimalad. Jerusalén-galimbamar-mergueyobi, bab-dummadse-goled-ailamar be sobsamalad. Ar bemar, a-ailamargi Baalʼga ina-wawadikid uksamalad. We-ibmar-imaksamalad na be dukin bingegumalagalad.
JER 11:14 ”Ar bedina, Jeremías, melle we-dulemarga be anse golo. Melle we-dulemarbina anse-goledgi wilenai be guo. Ar e-bonigangi-e-bendakye anse gollarmalale, an itogosulid.
JER 11:15 An-Israel-dulemar-sabesailadde, nue-isgusad-sorba, ¿ar ibu an-negyaba sadimarsunna? ¿Ar wede binsamarsunde, anga-ibmar-uked-ular, an emargi boni-dummagan bar barmidosurye? ¿Deyobi wergudigumaloye binsamarsunde?”
JER 11:16 Bab-Jehová soged: “Olivo-sapi-aradye, e-sanmar-yeerdaklegedye an be-nug-imaksanad. Emisgindi, mar-binnasuli-goled-abalagi, an bemargi soo odesad, be-sapi-anagan bela gummaksad.”
JER 11:17 Bab-Jehová-Bela-Gangued-Nikadi, we-yalagi bemarga-ibmar-nasiksadi, bemargi boni-dummad-barmidagoye sogsad. Bemar Israel-dulemar, degine, Jerusalén-dulemar, be ibmar-isgana-imaksamalad-ulale, bonigan begi barmilealid. Ar bemar Baalʼga inamar-wawadikid-ogumakar-ukdigusmaladgi isdar-itogega be Bab-Jehová-imaksamalad.
JER 11:18 Bab-Jehová wisguega an-imaknonikid, agi an magar itononikid. Dule-e-ibmar-isgana-imaksamalad anga oyononikid.
JER 11:19 Ar andi, angi-igar-amilenaidi wissulid. Igi sibad-wawaad-sapingwagwadi oburgwilegedse-selemaidae, deyob an selemaid. An-isdarmalad angi weyob sogmalad: “Anmar we-sapi-e-san-nika-gwichid omukue, dulemar-abargi we-sapi anmar osuloge, adi, mer bar dulemar egi binsamalagar.”
JER 11:20 Ar be, Bab-Jehová-Bela-Gangued-Nikad, be igar-napiragwadba dulega igar-nabogedid. Bedi, dulemar-ulubgi-ibmar-itoged-wisidid, magar be dulemar-binsaed-dakedid. Ar be an-bendaksadba an begi bensulid, degisoggu, be we-dulemar-buged-mai-imakoed-dakega be an-imake.
JER 11:21 Bab-Jehová-Bela-Gangued-Nikadi, Anatot-dulemarnik sunmaksad. Anatot-dulemar be-oburgwebigudimaladid, degi, weyob begi sogsamaladid: “Melle be anse-oburgwilegega, mer be Bab-Jehová-nuggi sunmakoye.”
JER 11:22 A-ulale, Bab-Jehová-Bela-Gangued-Nikadi weyob Anatot-dulemarnik soged: “We-dulemar anse sabsur-odurdaklemaloed. E-sapingana, es-suidgi oburgwilegoed, e-mimmigana, ukudba burgwemaloed.
JER 11:23 Anatot-dulemarga sabsur-odurdakleged-iba-nonikile, boni-dummad an ega nasikoed. Wargwensaale, we-dulemar durguosulid, bela burgwemaloed.”
JER 12:1 Ani Jeremías Bab-Jehováʼga sogded: “Bab-Jehová, an bebo abin-abin-imakdele, be gusgu nabir-ibmar-sogdaed, ar bedi dule-innikigwadid. Degi-inigwele, an bese igar-soggwen wis egisgwersunno. ¿Ar ibiga dule-isganamarga ibmar-nueganbi naddae? ¿Ar ibiga dule-emar-yardakmalad gwen-bai itodasurmala?
JER 12:2 Bee be we-dulemar urbedaed, sapimaryobi bonisuli ganguddamalad, deyob dunguddamalad, sapi-sunmakedyobi nasguddamalad. Unnila asginbi be-nug-ogannodimalad, e-gwage-ulubgindi begi binsadisurmalad.
JER 12:3 Bab-Jehová, bedi be an-wisid. Be an-dakdiid, be an-wisid igi an begi binsae. Igi sibad-wawaad e-oburgwileged-negse-selemaidae, deyob be we-dulemar sede. Oburgwileged-ibaga be we-dulemar saboge.
JER 12:4 ¿Sanagwadse we-napade gannar sanmakdoe? ¿Sanagwadse wede gaganmar gannar ainidagoe? Emide, bela we-dulemar-isgued-ulale, ibmar-durgan girgumamaid, degi, bela nuumar burgwemamaid. Ar we-dulemarde sogmalad: ‘Bab-Dummad anmar-ibmar-imaked dakmaisurye.’ ”
JER 12:5 Bab-Dummad, Jeremíasʼga sogded: “Dule-abarmakmaladbo be abarmaknaile, be yegusdaedde, degite, ¿igi-be dule-moligi-abarmakmaladbo be benguosunna? Yar-bogidikidginbela be dobe-itodaedde, degite, ¿igi be Jordán-bula-naidgi be dobe itogosuli?
JER 12:6 Ar be-gwenadganbela, be-galagwenmalad-inigwele, begi dododimalad, begi yoledimalad. Ar we-dulemar ibmar-nuegangi amba bega sunmakmalale, melle be we-dulemar itogo.
JER 12:7 ”An-dulamargi an bangusad, an-dulamar an na obachad. An-dulamar-na-sabesailadi e-isdarmaladga an urmaksad.
JER 12:8 Ar an-dulamar, achumigur-nono-wawaad sapurba-gudiiyob angi gudmalad. Binnasuli angi uurmakdemalad, a-ulale, an isdar-daked.
JER 12:9 An-dulamar, igi nuu-e-absar-akar-akar-daklemalad sulubagise-balegilledidaeyobi gued. ¡Bela be dagmar! Bela ibmar-durgan-ursirmalad, dulemargi-aibinega egi be dagmarsun.
JER 12:10 Bukidar dule-isdarmalad-e-dummagan, an-uvaʼmar-digaled obelosad, an-nainu bela oichosmalad. An-nainu-yeerdaklegedi, nega-dulesulid-ollonaidga imaksamalad.
JER 12:11 Bela an-nainu wiosmalad. An-sunnagwad an daksad, bela nainu-olloo imaksamalad, bela swanga imaksamalad. Ar dulemar yala gwen bai-daksurmarsoggu, bela yala swanga nagusad.
JER 12:12 Bela yala-mullugan-negasulidganba, dule-isganamar nonimalad. Bab-Jehová-e-es-suid bela we-yala obelogoed, bela naga-nagase obelogoed, gwen dule-wargwenga neg-bogidikid naguosulid.
JER 12:13 Bemar orosgi-dakleged-digsamalan-inigwele, ikomarbi bega ainisad. Be arbasmaladi, binsa be arbasmalad. Bab-Jehová-e-urwed-ulale, bemar-ibmar-wessulidbali be bingegumaloed.”
JER 12:14 Bab-Jehová weyob soged: “Dule-isganamar yar-baigan-dikarba-bukmaladi, an-dulamar-ibe an-yar-uksad-obelosmaladi, an bela e-yalagi we-dulemar-onogoed. Deyob an Judá-dulemar we-dulemar-abargi onomogoed.
JER 12:15 Geb an onosad-sorbali, wile an an-dulamar dakoed, gannar na e-negmarse-dagega an imakoed, e-yalamarse-dagega an imakoed.
JER 12:16 Ar we-dulemar-yarmar-baidginmaladi, an-dulamar-Baal-nuggi-ise-sogar-ibmar-imakleged odurdaksa-gusmaladid. Ar we-dulemar, an-dulamar-abargi gudigubimalale, an-igarmar-mamaid abingamalargebed, ise-sogar an-nuggi imakmarmogargebed. Weyob sogmalargebed, ¡Bab-Jehová-dula-maid-nugginye!”
JER 12:17 Bab-Jehová soged: “Ar dule an-sogedba dasulirdi, bela an obelogoed.”
JER 13:1 Bab-Jehová weyob anga sogsad: “Jeremías, sasirdub-lino be bakna, be-saderba be edinno. Melle we-sasirdub-lino be owardikuo.”
JER 13:2 Igi-Bab-Jehová-anga-sogsa, aba an imaksad. Sasirdub-lino an baksad. Geb agine, an-saderba an edichad.
JER 13:3 Geb Bab-Jehová anga weyob sognonibalid:
JER 13:4 “Be sasirdub-lino-baksadi, be-saderba-naidi be unge. Éufrates-diwarse be nae, akwa-maraled-yaba sasirdub be odukuo.”
JER 13:5 Igi Bab-Jehová anga-sogsa, aba an imaksad. Geb an Éufrates-diwarse naded, sasirdub-lino akwa-maraled-yaba an odosad.
JER 13:6 Ibagan-undar-nasadgi, Bab-Jehová anga sokalid: “Jeremías, Éufrates-diwarse be nae, sasirdub-lino-akwa-maraled-yaba-odosgusad be sunae.”
JER 13:7 Geb agine, an Éufrates-diwarse naded. An akwa-akwisad, agine, akwa-maraled-yaba-sasirdub-odosgusadi, an onosad. Sasirdub-lino bela nungusad, gwen bar nuedsulid.
JER 13:8 Geb Bab-Jehová weyob anga sognonibalid:
JER 13:9 “Ar igi be we-sasirdub nunu-daksa, deyopira an Judá-dulemar-na-san-dummarba-imakdiid imakoed. Jerusalén-dulemar-na-san-dummarba-imakdimarmogad deyob an imakbaloed.
JER 13:10 We-dule-isganamar an-ega-ibmar-soged-itobisurmaladi, na e-gwage-binsaedba ibmar imakmalad. Amar bab-dummaganba-nanadmaladi, bab-dummagan-e-nug odummodmalad. Amala bela sasirdub-lino-nunudyob gumaloed, gwen bar nued guosurmalad.”
JER 13:11 Bab-Jehová soged: “Ar igi sasirdub-lino dule-saderba-atinne, deyopira an bela-Israel-dulemar, degi, bela-Judá-dulemar, an-Igar-Maidgi alakwaa-naguega an imaksanad. Adi, an-neggweburga-guega, an-nug-ogannodiguega, angi nue-binsaed-nikaa-nanamalaga, degi, an-gandikid-yeerdakleged-egi-oyolegega an imaksanad. Degi-inigwele, an-sogedba ibmar imaksasurmalad.”
JER 13:12 “Jeremías, an-dulamarga be sogbalo: Israel-e-Bab-Dummad-Jehová weyob sogye: ‘Bela metemargi vino enolegoye.’ Bega sokarmalale: ‘¿Ar anmar bela metemargi-vino-enolegoed wissurmarsi?’
JER 13:13 Geb agine be, emarbin-sogdoed, weyob Bab-Jehová sogye: ‘Bela dulemar we-yalaginmaladi an omumsaoye. Wemar an omumsaoye: Reymar-e-dad-Davidʼgi-danimalad, dule-irwa-Bab-Dummadse-gormalad, degi, bela Jerusalénʼginmalad an omumsaoye.’ ”
JER 13:14 Bab-Jehová soged: “Na muchub-muchub-sarsomalaga an imakoed, babgana, e-mimmiganbo-sarsomalaga an imakbaloed. An we-dulemar bai-dakosulid, wile an ebinsaosulid. An we-dulemar obelogoed.”
JER 13:15 Ani Jeremías dulemarga weyob sogded: “Israel-dulemar, nue-bogimakar be an-itomala.” Bab-Jehová-sunnagwad sogsad: “Melle na be san-dummarbaa imakmarye.
JER 13:16 Begi Bab-Jehová negsichid barmidaged-iduar, be gandikidba e-nug-ogannomar. Bemar negsichidgi yoledigumaloed-iduale, Bab-Dummad-nug be odummomar. Ar bemar, neg-meegwad edarbedimalad, degi-inigwele, Bab-Dummad bega negsichid nasiknonikoed, bela-belad neg gudure imakoed.
JER 13:17 Ar bemar anba-ibsasulile, an bemarga walagwengi arbakee bemar-san-dummarba-imakedba an bodii guoed. An yaisuli-boedbali an-ibyanis ariodii guoed, geg an sagusadse bodii guoed. Ar Bab-Jehová-e-dulemar, dikasuli gales-seledmaloed.
JER 13:18 ”Reyga, degi, e-nanga be weyob sogo: ‘San-bipii na be imakmala. Bemar, rey-gangi-siidgi be aidemala, napagi be sigmala. Ar be-ologurgin-yeerdakleged-yoega bar bega igar maisulid.’
JER 13:19 Neguev-neggweburmar bela e-isdarmaladse ebililesbukwad, dulemar geg-noe bukwamalad. Bela Judá-dulemar yar-baidse selesmalad, bela yar-baidgi ambikusmalad.
JER 13:20 ”¡Be atakmala! Dulemar-dad-nakwed-argan-sapiledsik-danikid be nue dakmala. ¿Bia dulemar-akwega-bemarga-uklesad nade? ¿Bia we-dulemar-be-yeerdaksamalad nade?
JER 13:21 Wede igi be sogosunna, Bab-Dummad, be-ai-nueganga-guega be odurdaksadi be-dummaganga nug-imaksar. Naibid-dummad be itomaloed. Sior-gwensak muu-neggi-ugakgunaile, nunmaked-dummad abinganaidae, debayobi, ulubgi be nunmaked itogoed.
JER 13:22 ”Na be dukin weyob sokarmalale: ‘¿Ibiga wede deyob anmar wilearye?’ Ar be galagwensuli-isgusad-ulale, uka-swili be-imakmaloed. Be galagwensuli-isgusad-ulale, be-gagamaloed.
JER 13:23 ¿Ar dule-uka-sichidi, e-uka ogwao be insae? Gege na e-uka ogwaed. ¿Ar achu-sapur-uka-mata-matad, e-uka ogwao be insae? Suli. Gege ogwaed. Ar bemar deyobmodo. ¿Ar bemar ibmar-isgana-imakdimaladgi, ibmar-nuegan imakmalosi? Suli. Ar bemar bato ibmar-isgana-imaked nue-durdaksamalad.”
JER 13:24 Bab-Jehová soged: “Igi nega-dulesulidganba-burwa-goledi, gagan-dinnagan-oaisakie, deyobi, an bemar-oaisakioed.”
JER 13:25 Bab-Jehová sogbalid: “Ar weyob be odurdaklemalargebed, na weyob be wilemalargebed. Ar bemar an-iedmalad, ar gakansaedgi bur be bensuli gudmalad.
JER 13:26 Uka-swili an bemar-imakoed, be-abgangi be bingegugwichiguedse an be-imakoed.
JER 13:27 Bemar-galagwensuli-ibmar-isgana-imaked an daksad. Nainumargi-ibmar-imaksad, yar-mullugangi-ibmar-imaksad, an bela daksad. Bemar galagwensuli-negsichigi-nanaedi, emarga-agumakedi, degine, bemar-gambanuchu-saedi, an daksad. ¡Jerusalén-dulemar! ¡Na be duledar-wilesmar! ¿Ar sanagwadse be isguedgi-gudigumaloye be sogmala?”
JER 14:1 Dii bar wimaisulid-ular, Bab-Jehová Jeremíasʼga sunmaknonikid. Ega weyob sognonikid:
JER 14:2 “Judá-dulemar nue-bukib binsabukmalad, e-neggweburmar bergumamaigusad. Judá-neggweburgine, bela oakubukmalad, Jerusalén-dulemar bela binnasuli bobukmalad.
JER 14:3 Dule-nuga-nikamaladi, dule-ega-arbamalad ega dii-amiega barmiddaed. Dia-dummagan-siidse naddamalanad, degi-inigwele, diimar satedaed. Binged-abalagi gannar e-gwidu-ollo-ollo negse nonidamalad. Nue-naibi-itogedbali, e-nono gasa imakdamalad.
JER 14:4 Yalagi dii bar wisulidbali, napamar daas-daas naded. Dule-sapurgi-arbamaladi akusunna na itogusmalad, bukib binsagusmalad.
JER 14:5 Ar goe-sapurmarbela, gaganmar-bergusad-ular, sapurgi e-mimmi-mete naddamarsunnad.
JER 14:6 Moli-sapur-uayasuid, yar-mullugan-swiligangi achu-sapur-uaya-gannagannayob, masbina asa-nakwa-nakwa gudidamalad. Ar gaganmar-satesoggu, e-ibyamar mommoleddaed.”
JER 14:7 Ani Jeremías Bab-Jehováʼga sogded: “Bab-Jehová, anmar-isgued amba anmargi-yolena-inigwele, be-nug na-be-nue-sabedbali be anmar bendakdage. Ar anmar-isgued bukidargusad, anmar begi nue-isgusmalad.
JER 14:8 Bab-Dummad, ar be Israel-dulemar-abonogedid. Israel-dulemar suli-suli-itoalile, begi bendakleged. ¿Ar ibiga degite, be we-yalagi dule-baidyobi bakar-nadapi be gusunna? Emide be, igi dule-aineba-danikid ibagwen-wis-gabis-naddaedyob be gued.
JER 14:9 ¿Ar ibiga be akusunna-ibmar-itogedyob be dasunna? ¿Ar ibiga be dule-bilagi-urwed gege-dule-bendakedyob be dasunna? Bab-Jehová, be anmar-abargi gudiid, bela dulemar wisid, anmar begadga gued. Melle be anmar-obane, wile be anmar-dake.”
JER 14:10 Bab-Jehová weyob bemarnik soged: “Ar be-itolegedba-gaamakdiid bur yeer-itomalad, gwen bogigusurmalad. A-ulale, an bemar-abingabisulid. Emisgindi, aka be, bemar-isguedgi-binsaega be an-imakarmalad, degisoggu, bemar-isgued-ular, be anse sabsur-odurdaklemarsunnoed.”
JER 14:11 Geb Bab-Jehová weyob anga sokalid: “Jeremías, melle we-dulemar-bendakega be anse wilesakwaa golo.
JER 14:12 Ar anse-goled-ular, mas-gunsuli-gumalale, amba an itogosulid. Ar amba anga ibmar-ogumakar-ukmalale, anga ibmar-gwagmar-ukmalale, amba an abingaosulid. Es-suidgi an we-dulemar obelogoed, degi, ukudgi, boni-dummagangi an we-dulemar obelogoed.”
JER 14:13 Bab-Jehová-abin an sogded: “¡Bab-Dummad-Jehová! ¡Nunmaked-dummaddo! Ar Bab-Dummad-gayaburba-barsogedye-sogdimaladi, sunmakdimalad, we-dulemarde es-suidgi burgosurmarye, ukud-dummad-naguosurye sogmalad. Unnila, bede, we-yalagi ega neg-bogidikid-degisadeguad-ukoye sogdimalad.”
JER 14:14 Geb Bab-Jehová an-abin sogded: “Wedi, gayaburba-barsogmalad an-nuggi gakansaar sunmakdimalad. Gwen an we-dulemar barmissulid, gwen an ega an-nuggi-sunmakega igar uksasurbalid, gwen an ega sunmakdisulid. We-dulemar-sunmakmaladi, unnila binsa yogasaar na wargwen-ibya-apuredba sunmakdimalad, binsa ee gordimalad, dukin-yogasaar-e-itogedba sunmakmalad.”
JER 14:15 A-ulale, weyob Bab-Jehová soged: “We-dulemar an gwen-barmissulidi, an-nuggi sunmakmarye-sogmaladi, degine, na sogmarbalidi, we-yalagi dulemar es-suidgi burgosurye, ukud-dummad naguosurye. Ar wemala, na ukudba burgwemaloed, e-sunnagwad es-suidgi burgwemaloed.
JER 14:16 ”Degine, dule-we-sunmakmalad-itosmaladi, Jerusalén-neggwebur-neg-imbabali ukudba mellemamai gumaloed, es-suidgi oburgwilemaloed, igarba-mellemamai gumaloed. E-omegan-e-muimar, e-masmala-e-muimar, e-bunamala-e-muimar gwen dule digosurmalad. Ar dule-muimar-digedbela sate gumaloed. Ar bela e-isgumalad egi aibinega an imakoed.
JER 14:17 ”Be, Jeremías, we-dulemarga weyob be sogo: ‘Bane-bane an ise-boale gudii guoed, ar an-dulemar-na-nue-sabedi, nue-dummad wilesad. Bela-belad nue-sabsur odursaklesad.
JER 14:18 Sapurba an nadele, es-suidgi-dulemar-burgwisad-e-mui omilede an dakdaed. Neggweburgi an dogdele, ukudba-dulemar-burgwisad-e-mui omilede an dakdaed. Ar Bab-gayaburba-barsogmaladdi, degi, dule-irwa-Babse-gormaladbela, neg-gunaid akudakmalad.’ ”
JER 14:19 Ani Jeremías, Bab-Dummad-abin sogded: “Ar be Judá-dulemar nue-obachad, isdarsun be Jerusalén-dulemar daked. ¿Ibiga be dogdar sabsur-anmar-wiosa? Aisaar anmar bendakleged edarbediinad. Emide, gwen anmar ibmar-nued abingassulid. Anmar san-nued-gudigued edarbediinad, aka gwayed-dummad anmarga nonikid.
JER 14:20 Bab-Jehová, anmar, anmar-isgusad magar na itoged. Anmar-babgan-begi-isgusad anmar magar-dakbalid. Anmar begi dummad-isgusad.
JER 14:21 Be-nug be nue-sabedbali, melle be isdar anmar-dake. Be-ologana-yeerdakleged-e-neg melle be isdar-dake. ¡Be anmarbo-igar-mesisad nue be ebinsae! ¡Melle be anmarbo-igar-mesisad bisge!
JER 14:22 Bab-Dummad, ¿ar bab-dummagan-imbagi, gwensak dii-nabir-owied gudisi? Suli. Bab-Dummad-Jehová, ¿ar bee be, dii-owisursi? ¿Ar nibnega e-itolegedba dii-owiardasi? Suli. Ar bela be we-ibmarmar imaksad. A-ulale, anmar begi bensurmalad.”
JER 15:1 Bab-Jehová anga sogsad: “Amba Moisés anse danidibe, Samuelʼdibe, Judá-dulemar-ular-sunmakega, amba an Judá-dulemar bendaksasuliled. ¡Judá-dulemar, angi be obane! Ega be soge, ‘¡be namarye!’
JER 15:2 Bega sokarmalale: ‘¿Bia anmar naosunna?’ Ega be sogo, weyob Bab-Jehová sogye: ‘Dule bonigi-burgwemaloye ega-igar-maidi, bonigi burgwemaloed. Dule es-suidgi-burgwemaloye ega-igar-maidi, es-suidgi burgwemaloed. Dule ukudba-burgwemaloye ega-igar-maidi, ukudba burgwemaloed. Dule gales-seledoye ega-igar-maidi, galesa seledmaloed.’ ”
JER 15:3 Bab-Jehová soged: “We-dulemargine, we-boni-dummagan-sogabake an barmidoed: Bila-onoleged, adi, agi-burgwemalagar. Achumar, adi, e-muimar-ebipiegar. Mulamar, adi, e-san-gunmalagar. Geb ibdurgan-sapurbarmalad, adi, bela e-san-obelomalagar.
JER 15:4 ”We-dulemargi an ibmar-imakoedi, Ezequías-machi-Manasés Judá-e-reyga-megisadi, Jerusalénʼgi ibmar-isgana-imaksad-ular, bela dulemar-yar-baid-baidgi-bukmalad dobee-itogegala an we-bonigan barmidoed.
JER 15:5 Jerusalén-dulemar, ¿doa wile be-dakoe? ¿Doa bebina booe? ¿Doa be-egisoe, bede nueganbi-sogeye?”
JER 15:6 Bab-Jehová soged: “Bemar an-obachamalad, be angi bangudmalad. Degisoggu, an bemargi gwichiguoed, an bemar-obelogoed. An wile-bemar-dakdiid budar-itogusad. Wese-ugaksun.
JER 15:7 Gagan-durgan-burwaba-mileddaedyobi, neggweburgi an bemar-oaisakioed. Mimmigansuli an bemar-imakoed, bela an bemar-obelogoed, ar be-daedi na be ogwassurmalad.
JER 15:8 Omegan-ei-sui-burgwismaladi, demargakaba-ukub-naiyob an omelogoed. Yorukudbali, sapingana-e-nangangine, burgwed-igar an egi barmidoed. Ukiagwale, an egi suli-suli-itoged nasikoed, an egi dobed-dummad nasikoed.”
JER 15:9 Bab-Jehová soged: “Bukidar-mimmigan-nikusmaladi, negoedmaloed, burgwidmaloed. Na bingedar itodmaloed, san-bipii itodmaloed. Dad-ibeler-gaedi ukiagwar ega akitoed. Dule-burgosurmaladdi, e-isdarmaladse-es-suidgi-oburgwilegega an imakoed.”
JER 15:10 Jeremías binnasuli sogded: “¡Nana! Nue-nunmak an itoged. We-napnegse unnila dulemarbo-abin-abin-naguega be an-odesad. ¡Dulemarbo-urwega be an-odesad! ¡Bur an gwalulessulina nabirinad! Gwen dulemargi an mani gadisulid, gwen dulemar angi mani gadisurmogad, degite, bela dulemar an-ukabsadimalad.”
JER 15:11 Bab-Jehová soged: “Napira an bega soged, we-ibmarmargi an be-ollorsaoed. An be-isdarmaladi, boni-dummagan-ibagangine, suli-suli-itoged-ibagangine, begi-wilegega an imakoed.
JER 15:12 ”¿Sunna dule esgoro-dad-nakwed-argan-sapiledsik-danikid bisgesi? ¿Sunna dule esgoro-gordikid-dad-nakwed-argan-sapiledsik-danikid bisgesi?
JER 15:13 Bemar-isgumalad-ulale, an be-isdarmaladga binsa maniginsuli, be-manimar, be-ibmar-nuegan, an ukoed. Bela be-neggweburgi be ibmar-nikamaladi, an ega binsa be-isdarmaladga ukoed.
JER 15:14 Yar be dakdisurmaladgi, be-isdarmaladga mailedigumalaga an bemar-imakoed. An-sae-itogedi soo-gwabunye-gwichiyobi bemarbina itosnaid.”
JER 15:15 Ani Jeremías, Bab-Jehováʼga sogded: “Bab-Jehová an be-ular-wilediid be nue-wisid. ¡Melle be an-iege! ¡Be an-bendakdage! ¡Dulemar an-balegindimalad buged-mai be imake! Be-gwae-gwae-itosurdaedba, melle we-dulemarse-burgwega be an-imake. Be nue-an-dake, an be-ular uasoledid.
JER 15:16 ”Bab-Dummad-Jehová-Bela-Gangued-Nikad, be-anga sunmaksagua, bela-belad sogedba an abingasad. An be-gayaburba-itoargua, yeer-ito an-imaksad, ar an begadga gued.
JER 15:17 Dule-ibagibi-gudimaladba an gwen akadisulid. Gwen an amarba wergudisurbalid. Be anse nonikid-akale, an walagwen nanadiid, ar bebi be anba gudiid. Isgued-sae-dakega be an-imaksamogad.
JER 15:18 ”¿Ar ibiga an-nunmaked geg bergue? ¿Ar ibiga an-naibigusad gege nugue? ¿Ar ibiga an-nuguedde ganna-nai? Be anga dian-dinnaa maiyob naded, ar be dii-aryomaisulidyob guded.”
JER 15:19 A-ulale, Bab-Jehová weyob soged: “Gannar be anse dagye-sogele, gannarse an be-onudakoed, be anga arbadii guoed. Yogasaar be-itolegedba be sunmaksulile, unnila napiragwadba be sunmakele, bee be, anga gayaburba-berbegedga guoed. We-dulemarba be mer ibsao, ar wemar bur be-sunmakedba ibsamaloedid.”
JER 15:20 Bab-Jehová soged: “Galu-esgoro-gordikid-matusulidyobi, we-dulemarga an be-imakoed. We-dulemar bebo urwemaloed, degi-inigwele, begi obinosurmalad. Ar ani an be-bendakega guoed. We-dulemargi ollorguega an be-imakoed.
JER 15:21 Dulemar-isganamargi an be-onogoed, dulemar-bulegangi an be-ollorsaoed.”
JER 16:1 Bab-Jehová-gayaburba weyob anse nonikid. Weyob anga sognonikid:
JER 16:2 “Melle be we-yargi ome-nikuo. Melle be mimmigan nikubalo.”
JER 16:3 Ar Bab-Jehová weyob we-yargi mimmigan-gwalulesmalad-annik soged, e-nangan-annik sogbalid, degine, e-babgan-annik sogbalid:
JER 16:4 “Wemala, bonigan-dummagangi burgwemaloed, gwen dule ega boosurmalad. Geb degine, e-muimar gwen dule nuedgi digosurbalid. Bela e-muimar ibmar-isganayob napagi-omilede guoed. We-dulemar es-suidgi oburgwilemaloed, ukud-dummad egi gwichiguoed. E-muimar, ibdurgan-gukumalad-e-masga guoed, achu-sapurmar-e-masga gubaloed.”
JER 16:5 Bab-Jehová weyob sogbalid: “Melle dulemar-bonanaid-negse be dogo, de-ukinbali, melle ega be bonabalo, degine, melle be e-naibi-itodiid baisur-itogega be imaknabalo. Ar ade, an we-dulemargi an-bogidikid-ega-uksadi, an e-ibe obelosad. An-sabguedi an e-ibe osulosad, an-wile-dule-dakedi an e-ibe osulosbalid.
JER 16:6 We-yalagine, bela dulemar burgoed: Dule-nuga-nikamaladdibe, dule-binsarmaladdibe, bela burgwemaloed. Gwen dule ega boosulid, gwen dule nuedgi e-mui digosurbalid. Degine, gwen dule e-ular, na e-san-naibisaosulid, degi, gwen e-ular, saila-swiri imakosurbalid, wile-itoged-iba ega gwen dakosulid.
JER 16:7 ”Deginbali, gwen dule, dule-burgwisadga-bonaidgala-e-gwage-baisur-ito-imakega, masgunned ukosurbalid. Deginbali, gwen dule, ega gwage-baisur-ito-imakega gobed ukosurbalid. Degine, amba e-nan-burgwisdibe, e-babdibe, gwen dule ega ibmar ukosurbalid.
JER 16:8 ”Melle iba-onolenaid-negse be dognao. Melle be mas-gunnegala, gobbaligala, a-dulemar-abargi be signao.
JER 16:9 Ar Israel-dulemar-e-Bab-Dummad-Jehová-Bela-Gangued-Nikad soged: ‘Bela we-yalagine, yeer-itolegedi, weligwaled-oyolegedi, an obelogoed. Deginbali, abirgunagwaledgi-weligwar-namakleged bela an obelobaloed. We-ibmar-guoedi, e-ibagangi guoed, na emar-sunnagwad e-ibyanugi dakmaloed.’
JER 16:10 ”Bela be we-dulemarga we-ibmarmar-sogsale, we-dulemar bega sogdamaloed: ‘¿Ibiga Bab-Jehová weyob anmar-imakbiye soge? ¿Ibu-ibmar-isgana anmar imaksasunna? ¿Ibugi anmarde anmar-Bab-Dummad-Jehováʼgi nossunna?’
JER 16:11 Geb a-dulemar-abin be sogdoed, Bab-Jehová weyob sogye: ‘Be-dadgana angi aibachagusmalad, bab-dummagan-baiganba nanadgusmalad, abali ibsadgusmalad, a-e-nug odummodgusmalad. Ar andi an-iedgusmalad, an-Igar-Maidba nanassurmalad.
JER 16:12 ” ’Ar bemardi bur bule be-dadganba isgudmalad. Na wala-walagwen e-itolegedba nanadmalad, gwen an-sogedba be ibsadisurmalad.
JER 16:13 A-ulale, bemar, we-yalagi-bukwadi an be-onomaloed. Be yala-akudakmaladse, be-dadgan-a-yala-daksasurmarmogadse an bemar-ebipidoed. A-yalagine, bane-bane bab-dummagan-baiganse be gordii gudmaloed. An wile bemar-dakosulid.’ ”
JER 16:14 Bab-Jehová weyob sogbalid: “Dulemar bar weyob-sogosulid-ibagan danikid: ‘¡Bab-Jehová-e-nug odummomarye, ar Egipto-yalagi Israel-dulemar-onosadiddeeye!’
JER 16:15 Bur sogdemaloed: ‘Bab-Jehová-e-nug odummomarye, ar Asiria-yalagi, degi, Babilonia-yalagi Israel-dulemar-bukwa-onosadiddeeye, degine, bela yalamar-bamaladgi galesbukwad-onosbalididdeeye.’ Ani an gannar an e-dadganga-yala-uksagusadse an barmidoed.”
JER 16:16 Bab-Jehová soged: “Bukidar an be-isdarmalad begi barmidagoed. We-dulemala, ua-galegeyob be-gamaloed. Geb an bukidar be-isdarmalad-baigan barmidabaloed. We-dulemala, ibmar-makedyob, sapurbali, yar-mulluganbali, degine, akwa-dummagan-mararmaladbali, be-balegindiguega an imakoed.
JER 16:17 ”Ar an bela bemar-ibmar-imaked an wisid. Bipisaale angi soggwenad dukumaisulid. Ar bemar-ibmar-isgana-imakedi, gwen angi dukuosulid.
JER 16:18 Gebedgine, bemar-isgusad-ular ilabo-wilub bemar sabsur-odurdaklegoed. Ar be-bab-dummaganyob-ibmar-imaklemaladgi be an-yala oichosmalad, sunnasuli ibmar-isganabi-yapannega be an-yala imaksamalad.”
JER 16:19 Bab-Jehováʼye, an suli-suli-itogedgine, be an-ganguedga guedid, be an-ogannogedid, be an-edarbedid. Bela yalamar-ugakaase-bukmaladi bese danimaloed, bega sognonimaloed: “Anmar-dadgan bab-dummadsulid e-bab-dummadga na imaksamalad. Gwen ibmar-nued abingassurmalad, unnila ibmar-igarga-gusulid na abingasmalad.
JER 16:20 ¿Ar sunna dulemar na dukin e-bab-dummagan sobsi? Eye, degi-inigwele, we-ibmarmarde gwen bab-dummagansulid.”
JER 16:21 Bab-Jehová Jeremíasʼga sogded: “A-ulale, an we-dulemar odurdakoed, an we-dulemarga an-ganguedi an ega oyogoed. Adi, wisgumalaga, ani an Bab-Jehová gued.”
JER 17:1 Bab-Jehová soged: “Judá-dulemar-e-isguedi, e-gwagegi, esgoro-swiswidikidgi narmakar naiyobid, akwa-diamante-e-dukugi narmakar naiyobid. Judá-dulemar-e-isguedi, Bab-Dummadga-ibmar-ogumakar-ukleged-aila-e-bebegi sobles naid.
JER 17:2 Ar be-mimmiganse-bakale, bab-dummad-bundor-Asera-e-wilubgan-sobsadi, ega e-ailamar sapi-dummagan-nagaba-sobsadi, nue ebinsamalad.
JER 17:3 Degi, yar-mullugangi sapurba-neg-ollornaidgi aila-sobar-bukwamarbalidi, nue ebinsamarbalid. ”Bemar-isgued-ulale, bela be-yargine, be-manimala, be-ibmar-nuegana be-isdarmaladga an ukoed, degine, be-bab-dummaganse-goled-negmar an ega ukbaloed.
JER 17:4 Na be dukin an-bemarga-yala-uksadi be surgumaloed. Be yar-dakdisulidgi, be-isdarmalad-e-maiga an be-imakoed. Ar be, nue an-oulussoggu, an-urwed, soo-geg-ginnedyobi, bemargi degisadegu gusunnoed.”
JER 17:5 Bab-Jehová weyob soged: “¡Dule dule-baidgi-bensuli-gued, duledar wilesun! ¡Dule, dulegi-bendakleged-amidiid, duledar wilesun! ¡Dule angi-banguedi, duledar wilesun!
JER 17:6 A-dule, sapi-matugana nega-dulesulidganba-nikadyob gumaloed: Neg-nuegan-nonikir, gwen werguosulid, unnila nega-dulesulidganba garmakdii guoed, napa-balubiidgi gudii guoed, agine, gwen dulemar gudidasurmalad. Debayobi, dule Bab-Dummadgi-banguder guoed.
JER 17:7 ”Ar dule angine-bensuligueddi, anginbi-bendakleged-edarbediiddi, egi nued binsalesad.
JER 17:8 A-dule, sapi-diwar-naba-gwichidaedyobi gued, igi sapi-malimar diwarse-bategwichile, neg-ued-nonikile, gwen akar-gusuli, e-gagan aramakwisgudae, debayobi, a-dule gued. Deginbali, igi a-sapi yolagi gwen akar-gusuli birga-irba gusgu sanmakgwisdae, deyobi, we-dule gued.
JER 17:9 ”Dule-binsaedi, ibmar-baiganba bur bule isganad, dule-yardakedgi binsadaed. ¿Ar wede doa dule-binsaed magar-dakosunna?
JER 17:10 ”Unnila ani an Bab-Jehová-guedi, dulemar-ulubgi-binsaed magar-daked, dulemar-binsaed balamied. Degidbali, an e-ibmar-isgana-imakedba sabsur-odurdaked.
JER 17:11 ”Dule igar-maisulidba mani-ibedga-guedi, nuu-butu, igi nuu-baid-akwa-akwedae, deyobi gued. Dule-deyob-mani-ibedga-gusadi, sikwas-gudiidgi, gannar mani-sate gunonikoed, gannar dule-wilegedga gudoed.”
JER 17:12 Ani Jeremías, an weyob sogded: “Bab-Dummad, anmar-bese-goled-nega, ologana-gandikidba-yeerdakleged-negad, sailanagi bato agi be-nug odummoledanikid.
JER 17:13 ¡Bab-Jehová, be Israel-dulemar-bendakega gued! Dulemar begi-aibatemaladi, bingegudmaloed. Dulemar begi-banguddamaladi, ukubgi-ibmar-narmaklegeyob yoggudmaloed. Ar Bab-Jehová-dii-nuedyob-gued iedmalad.
JER 17:14 ”Bab-Jehová be an-nudake, adi, an nuguoed. Be an-abonoge, adi, an abonolegoed, unnila an be-nugbi odummoged.
JER 17:15 Ar dulemar anga sokardaed: ‘¿Ar bia Bab-Jehová-anmarga-ibmar-sogsadde? Anmarga-ibmar-sogsadi anmarga imakbi an abedo.’
JER 17:16 Bab-Jehová, an bega-ibmar-sogsadi be nue-wisid, ar an be-asabinni an bega ibmar sogsad. Degi-inigwele, an begi alamaknai gussulid, be we-dulemar sabsur-odurdakye, be we-dulemargi boni-dummagan-barmidaye an bega sogsasurbalid.
JER 17:17 Bab-Dummad, melle be an-ogwayega gue, ar boni-dummagangine, bee be an-bendakedid.
JER 17:18 ¡Baba, melle bingeguega be an-imake! ¡We-dulemar be obingegsae! ¡Melle dobe-itogega be an-imake! ¡We-dulemar be odobgue! ¡Ibagan-bulegan ega be barmidage! ¡We-dulemar be obeloge! ¡Ilabogwadse be wioge!”
JER 17:19 Bab-Jehová weyob anga sogsad: “Be nae, neggwebur-yawagakse be gwisguna, bia Judá-reymar ubodae, degi, bia noardae, ase be gwisgunao. Geb, a-sorbali, bela Jerusalén-neggwebur-yawagak-bukmaladse be gwisgunabalo. Weyob be ega sogo:
JER 17:20 ‘Judá-dulemar-e-reymar, Bab-Jehová-gayaburba be itomar. Degi, bela Judá-dulemar, bela Jerusalén-dulemar we-yawagakgi-dogdimalad, Bab-Dummad-gayaburba be itomar.’ ”
JER 17:21 Bab-Jehová weyob soged: “Nue salakarmalo. Obunnoged-ibagi melle be ibmar-semalo, melle Jerusalén-yawagakgi ibmar-odomarbalo.
JER 17:22 Deginbali, melle obunnoged-ibagi, be-negyagi ibmar-onomarbalo, degi, bipisaale, a-ibagi melle be arbamarbalo. We-obunnoged-iba iba-islidik be dakmalo. Igi an be-dadganga sogsagusa, deyob be dakmalo.
JER 17:23 Degi-inigwele, be-dadgan an-itossurmalad, gwen an-sogedba ibmar imaksasurmalad, bur gwage-dutusuli gudmalad, gwen an-itossurmalad, degine, e-odurdaked abessurmarbalid.”
JER 17:24 Bab-Jehová soged: “Ar bemar an-sogedba ibmar-imakmalale, gi we-neggwebur-yawagakba be ibmar-odosurmalale, unnila we-iba, iba-islidikidga be imakmalale, a-ibagi be ibmar-imaksurmalale,
JER 17:25 we-neggwebur-yawagaknaba reymar, degi, reymar-masmala Rey-David-ologanagi sigmaloed. Reymar, reymar-masmala Judá-dulemar-abargi, degi, Jerusalén-dulemar-abargi ur-napaginedgi-sii dogmaloed, degi, moli-birgi-sii ubomaloed. We-neggweburgi dulemar bukwagu gumaloed.
JER 17:26 ”Judá-dulemar danikoed, dulemar-Jerusalén-neggwebur-dikarba-bukmalad danimaloed, degi, Benjamín-yalagi-bukwamalad danimarmogoed, degine, Sefela-yalagi-bukwamalad danimaloed. Degine, yalaganba-bukwamalad, degi, Neguev-yalaganba-bukwamalad danimarmogoed. Bab-Jehováʼse-goled-negse Bab-Jehováʼga-ibmar-ukega, ibmar-uklemalad sedanimaloed, degi, ibmar-ogumakar-uklemalad, orosgi-dakleged, degine, ina-wawagan, sedanimaloed. Deginbali, Bab-Dummadga dog-nuedye-sogega-ibmar-ukleged sedanimarbaloed.
JER 17:27 Ar bemar anba-ibsasulile, an-igar-maidba obunnoged-iba iba-islidikidga be imaksurmalale, degi, Jerusalén-yawagak-dummagangi be ibmar-odomalale, an a-yawagakmar ogumakoed, dule gwen-oginnosulid, bela Jerusalén-reynegmar an ogumakoed.”
JER 18:1 Bab-Jehová weyob anga sognonikid:
JER 18:2 “Jeremías, napsagi-ibmar-sobed-dule-negse be nae, agi an bega ibmar sogo.”
JER 18:3 Geb an napsagi-ibmar-sobed-dule-negse nadsunnad, degi, an modapgu, napsa-e-obipirmakedgi ibmar-sobnai an dakdapid.
JER 18:4 Napsagi-ibmar-sied-sobnaid e-ibe isgunonikile, gannar sobdedabalid, egi bela nued-noedse imakdaed.
JER 18:5 Agine Bab-Jehová-gayaburba anse nonikid, anga weyob sognonikid:
JER 18:6 Bab-Jehová soged: “Israel-dulemar, ¿geg an napsagi-ibmar-sobed-duleyob an bemar-imakmosi? Bemar Israel-dulemar, igi-napsagi-ibmar-sobed-dule napsa-imake, deyobi, bemar an-argangi gumalad.
JER 18:7 ”An dula-bukwad-gwensak-obelogedgi-sunmakbiele, yar-gwensakgindibe, an-itogedba sunna an sunmaked. Sunna an bela we-dulemar-sabsur-odurdakedgi an sunmakbalid.
JER 18:8 Ar we-dula-bukwad-gwensak-bukwadi, e-isguedga-ulubgi-bukib-binsaele, ibmar-isgana-imaked iemarsogele, an sabsur-odurdakoye-sogsad bar an odurdakosulid.
JER 18:9 ”Deginbali, an sunna bega neggwebur-onasguedgi sunmakbalid. An sunna neggwebur gangued-nika-imakedgi sunmakbalid.
JER 18:10 Degi-inigwele, ar emar an-asabin ibmar-isgana-imakele, an-sogedba dasurmalale, bar an emarga ibmar-nued-imakedgi binsaosulid.
JER 18:11 ”Jeremías, emisgindi, Judá-dulemarga be sogo, degine, Jerusalén-dulemarga be sogbalo. Bab-Jehová weyob sogye ega be sogo: ‘An bemar-idu boni-dummagan urbenaiye, bemar-sabsur-odurdakedgi an binsanaiye. Bemar igar-isganagi bangumarye, be-daed be ogwamarye, be-ibmar-imaked nue be imakmarye.’
JER 18:12 Degi-inigwele, bega sogdamaloed: ‘Suli, anmar imakosuli. Anmar, anmar-itolegedba ibmar imakoed, anmar ibmar-isgana-abegedba na ibmar-imakdii gumaloed.’ ”
JER 18:13 Ar Bab-Jehová weyob soged: “Dule-yar-baid-baidgi na be egismardo: ‘¿Doa weyob ibmar-imakdimar be itosa?’ ¡Suli! Weyob ibmar itoledisulid. Ar Israel-dulemar, ibmar-isgana yeer-gangu imaksamalad.
JER 18:14 Ar Líbano-yalaganba boo-sibudik-bated, ¿berguoe be insae? Yalaganba dii-dammipegwad-aryomaid, ¿berguo be insae? ¡Suli! Berguosuli.
JER 18:15 Degi-inigwele, an-dulamar an-iedmalad. Bab-dummagan-binsagumaladga ina-wawadikmalad ogumakar ukdemalad. Igar-nued gebesailagi an ega-uksadgi bangudmalad. E-igar-isganaba nanadmalad, igar-gwen-nabirsulidgi gudii gudmalad.
JER 18:16 A-ulale, e-yar-naid nega-dulesulidga imaksamalad, egi-dodolegega imaksamalad. Dulemar egi nasdamaladi, geger-dakedbali, nono-ege-ege imakdemaloed.
JER 18:17 Dad-ibeler-nakwedsik burwa-goled-neg-imakedyobi, an bemar-imakoed, an be-isdarmalad-asabin bemar-oaisakioed. Be sabsur-odurdaklemaloed-ibagi an bemar-bendakosulid, an bemar-idu wagar-biir imakoed.”
JER 18:18 Dulemar weyob Jeremíasʼgi sogdemalad: “Anmar Jeremíasʼgi-gwisguega igar amimargwelo. Amba anmarga dule-irwa-Bab-Dummadse-gormalad igar-maidgi-anmar-odurdakega surguosulid. Degine, dule-binsaed-ibed anmarga-binsaed-uked surguosurbalid. Anmarga Bab-Dummad-gayaburba-barsoged surguosurbalid. Anmar melle we-dule-ibmar-soged itomalo. Anmar naibid ega ukega, e-sunmaked-egi-aibinega imakmalo.”
JER 18:19 Ani Jeremías Bab-Dummadga weyob sogded: “¡Bab-Jehováʼye, nue be an-itoge! ¡Dulemar angi-gwichigunanaid nue be itoge!
JER 18:20 ¿Ar ibmar-nued-imaklegedi, ibmar-isgana-imaklegedga gunonidasi? Ar we-dulemala an-metemalaga, an-idu yaa-dummad-akwisa gunanaid. Bab-Dummad, an bese-gochagusad be ebinsae, adi, melle we-dulemar be sabsur-odurdakegar.
JER 18:21 Agala, e-mimmigan, ukudba be oburgwesunna, e-isdarmaladse es-suidgi-burgwega be imaksunna. E-omegan-ibe, e-suimar-oburgwega be imake, e-omegan, e-mimmigansuli be imake. E-suimar, gindaklegar be oburgwe. E-masmala, bilagi es-suidgi-burgwega be imake.
JER 18:22 Egi, ukiagwale dulemar-ibmar-atursamalad be barmidage, adi, gwakidedba binnasuli oimakde gumalagar. An-gamalaga an-idu yaa-dummad akwismalad, an-nag-gaega an-idu dubmar nasiksamalad.
JER 18:23 Bab-Jehová, bedi we-dulemar-an-oburgwedgi-binsananaidi be wisid. Melle e-ibmar-isgana-imaksamalad be baisur-dako, melle be e-isgusmalad iego. Bab-Jehová, be-asabin galakumalaga be imako. Sae-itogedgi be sabsur-odurdako.”
JER 19:1 Bab-Jehová weyob anga sogsad: “Napsagi-ibmar-sobed-dulese be nae, ese be napsa-buglu bako. Geb a-sorbali, be-bardaknamalaga neggwebur-girmar-dummaganse abala be golo, degi, dule-irwa-Bab-Dummadse-gormalad-idumaladse abala be gorbalo.
JER 19:2 ”Geb agine, Hinom-nebase be namalo. A-neba napsa-sobmalad-e-yawagak-asabin naid. Agine, an bega-ibmar-sogoedi be sogoed.
JER 19:3 Weyob be sogo: ‘Judá-e-reymar, degi, Jerusalén-dorgan, Bab-Jehová-ibmar-soged be itomar. Weyob Israel-dulemar-e-Bab-Dummad-Jehová-Bela-Gangued-Nikad soged: We-nebagi boni-dummad an barmidagoed, dulemar we-ibmar-itomaloedi geger itomaloed.
JER 19:4 ” ’Ar Israel-dulemar an-obachamalad. We-neba oichosmalad, egi ina-wawadikid bab-dummagan-baiganga ogumakar uksamalad. Ar Israel-dulemar we-bab-dummagan-akudakmaladga, e-dadgan we-bab-dummagan-akudaksamarmogadga, degine, Judá-e-reymar we-bab-dummagan-akudaksamarmogadga ina-wawadikid uksamalad. Emide, we-nebagi dule-neg-oakalossurmalad-e-ablis-bukidar eosmalad.
JER 19:5 ” ’Bemar Baalʼga ibmar-ogumakar-ukleged-aila be sobsamalad. Agi be-mimmigan ega be ogumakar uksamalad. Ar gwen an bemarga we-igar uksasulid, we-ibmar-imakmaloye an bemarga sogsasulid, bipisaale gwen an-binsaedgi danisulid.’ ”
JER 19:6 Bab-Jehová soged: “Ibagan nonikoed, Tofet-aila bar Tofet-ailaye bilegosulid, degi, Ben-Hinom-neba bar Ben-Hinom-nebaye bilegosurbalid. Gindakmalad-nebaye bilenonikoed.
JER 19:7 We-nebagine, Judá-dulemar-e-igar-mesismalad an obelogoed, degi, Jerusalén-dorgan-e-igar-mesismalad an obelobaloed. E-isdarmalad-e-oburgwebigudimaladse es-suidgi-oburgwilegega an imakoed. E-muimar, ibmar-durgan-gukumaladse-gullegega an imakoed, degi, achu-sapurmarse-gullegega an imakbaloed.
JER 19:8 ”We-neggwebur dule-bar-bukwasuli an imakoed, egi-dodolegega an imakoed. Dulemar we-neggweburgi-nadapile, geger dakdemaloed, e-dule-bergusadgi dododmaloed.
JER 19:9 Be-isdarmalad bela bemar-ebilis-ambikunonikidbali, be suli-suli itodmaloed. Na be dukin be-mimmigan be gutemaloed, degi, be-aimar be-gutemarmogoed.
JER 19:10 ”Bela be we-ibmarmar-sogsale, dulemar-beba-gudimalad-wagab napsa-buglu be mamaroed.
JER 19:11 Geb amarga be sogoed, weyob Bab-Jehová-Bela-Gangued-Nikad sogye: ‘We-yala-naidi, degi, we-neggwebur-siidi, bela an obelogoye. Igi napsa-buglu-mamarisale, gege bar gannarse-nugue, deyobi, an we-yala imakoye. Dulemar, e-muimar-digegala, napneg-satedbali, Tofetʼye-neg-nugadgi digdemarsunnoye.’ ”
JER 19:12 Bab-Jehová soged: “An bega ibmar-sognaidi, deyobi, an we-nebagi, degi, e-dulemargi imakoed. We-neggwebur Tofet-aila-sigoedyobi an imakoed.
JER 19:13 ”Bela Jerusalén-neggweburgi negmar-bukwadi, degine, Judá-dulemar-e-reymar-negmar-bukwadi, Tofet-ailayob guoed. Bela we-negmar-e-ailamar-birgi ina-wawadikmalad niisgwamarga uklesad. Degine, a-ailamar-birgi bab-dummad-baiganga gobed-eosgusmarbalid. A-negmala, Tofet-ailayob isgus bukuoed.”
JER 19:14 Jeremías, Bab-Jehová-ega-ibmar-sogsad Tofet-ailase-sogdii nonigua, Bab-Jehováʼse-goled-neg-imbagi gwisgunonikid. Geb bela dulemarga weyob sogded:
JER 19:15 “Israel-e-Bab-Dummad-Jehová-Bela-Gangued-Nikad weyob soged: ‘Ar we-neggwebur, degi, bela e-neggwebur-burwigan-dikarba-bukwamaladi, an-ibmar-sogedba imaksasurmarsoggu, bela boni-dummagan-barmidagoye-an-sogsadi, an bemargi barmidasunnoye.’ ”
JER 20:1 Dule-irwa-Bab-Dummadse-goled-Pasur Bab-Jehováʼse-goled-neggi dummadga-gudiid. Pasurʼde Imer-machid. Pasur, Jeremías Bab-Dummad-gayaburba-barsoggwichi-itosgua,
JER 20:2 Jeremías-sarsomalaga dulemar-barmisad. Geb Benjamín-neggwebur-yawagak-biribalid-nagaba, Bab-Dummadse-goled-negmobin sepo-maidgi Jeremías-odosad.
JER 20:3 A-bangine, Pasur, Jeremías-sepogi-galessiidgi-onosgua, Jeremías ega sogded: “Bab-Jehová bar Pasurʼye be-biosulid, emisgi Magor-Misabibʼye be-bioed. A-sogleged: ‘Gwayed-dummad-neg-naidye.’
JER 20:4 ”Ar Bab-Jehová weyob soged: ‘Na be dukin gwayed-dummadga guoed, degi, be-aimar-ogwayedga be gubaloed. Be-aimar e-isdarmaladse es-suidgi oburgwilegoed, be-sunnagwad be dakoed. Bela Judá-dulemar, Babilonia-e-reyga an urmakoed, geb a-rey, Babilonia-yarse bemar-sedoed, sulile, es-suidgi be-oburgwemaloed.
JER 20:5 ” ’Deginbali, be-isdarmaladga an bemar-neggwebur-e-ibmar-nuegan ukoed. Bela be-ibmar-sanmakmaladi, be-ibmar-gargemaladi, degi, bela Judá-dulemar-e-reymar-ibmar-nuegana an ega urmakoed. Bela we-ibmala, atursamaloed, Babilonia-yalase bela sedmaloed.
JER 20:6 Pasur, bedina, bela-be-negyaginmaladbo, Babilonia-yalase gales be ebipiledmaloed. A-yalagi be burgoed, agine be diglegoed. Be-aimarga be gakansaale ega sunmaksadi, deyob gumarmogoed.’ ”
JER 20:7 Ani Jeremías Bab-Dummadga weyob sogded: “¡Bab-Jehová, be nue an-binsaed gasad! ¡Nue an bese binsaed galesad! Ar be anba bur dutusurgusoggu, be angi obichad. Bela-dulemar angi dodogedbimalad, anga alledibidamalad.
JER 20:8 An sunmaked-ilibali, unnila an sogdedaed. ¡Belamarye! ¡Ibagan-bulegan daniye! Agala, be-gayaburba mesagwar-guega an-imaked, degi, angi-dodolegega an-imaked.
JER 20:9 An sogdibe: ‘Bar an begi binsaosurye, bar be-nuggi an sunmakosurye, aka bur bule be-gayaburba an-ulubgi soo-duurmaksiiyobi naddaed, an-galamarse-bakale, ebuged. Aisaar an-sunmaked na bargaye sogdaenad, degi-inigwele, gege an na bargaed.
JER 20:10 Dule-bukidar sabsur-uasogagwar-sunmake an itoged.’ Weyob sogmalad: ‘¡Bela gwayed-dummad neg-naiye!’ Weyob sogmarbalid: ‘¡We-dulegi anmar gwisgunamala! ¡Anmar dummaganga barsognamala!’ An-aimar-nueganbela begi-isguega an-imakbimalad, amarbela weyob sogmalad: ‘Sunna Jeremías anmarse binsaed galeged. Deyobile, anmar egi obinoed, anmar buged-mai imakoed.’
JER 20:11 ”Degi-inigwele, Bab-Jehová, bee be anba gudiid, bila-onoged-gandikidyob be anba garmakdiid. Degisoggu, dulemar an-balegindimaladi, angi obinosulid, anse galakumaloed, igarga guosurmalad, bingedar itomaloed. Degisadegu, suli-suli-itodii gumaloed, bipisaale dulemar we-ibmar iegosurmalad.
JER 20:12 ”Be, Bab-Jehová-Bela-Gangued-Nikadid. Bedi dule-innikigwad-e-daed balamied. E-gwage-ulubgi-ibmar-itoged be wisid, degi, e-binsaed magar be daked. Degisoggu, be we-dulemar-buged-mai-imakoed-dakega be an-imake. Ar an-bonigan an bega uksad, emidi, begi siid.
JER 20:13 ”¡Bab-Jehová-nuggi be namakmala! ¡E-nug be odummomala! Ar Bab-Dummad dule-wilemalad abonoged, dule-isganamar-e-ganguedgi ollorsaed.
JER 20:14 ”¡Ibiga an we-ibagi gwalulesdibe! ¡Iba-isganaga gusun! ¡Ibiga we-ibagi an-nan an-odesdibe! ¡Iba-isganaga gusun!
JER 20:15 Dule an-bab-weligwar-imaksadi, deun ega weyob sogsagusgu, susugwa bega uklesye. ¡We-dule iwigusun!
JER 20:16 We-dule, Bab-Jehová-neggweburmar-sabsur-obelosgusadyob gumosun. Degi, we-dule, wakdaradbali, neg-oimake itosun, yorukudbali, dule-bila-onomalad-oimake itosun.
JER 20:17 ¿Ibiga Bab-Dummad, an sapidukugi-maidgi burgwega an-imaksasuli? Adi, an burgwar aidesanad. An-nan anga neg-uanga gusanad.
JER 20:18 ¡Ibiga an sapibeneggi-maid aidesdibe! ¿Unnila an boniganba-galitogega nonide? ¿Unnila bukib-binsaega an nonide? ¿Unnila emarse bingegudiguega an nonide?”
JER 21:1 Bab-Jehová Jeremíasʼga ibmar sognonigusad. Deunni, Rey-Sedequías, Malquías-machi-Pasur, degi, Maasías-machi-dule-irwa-Bab-Dummadse-goled-Sofoníasʼbo Jeremíasʼse barmiargusad, adi, ega weyob sogmalaga:
JER 21:2 “Jeremías, be anmar-ular Bab-Jehováʼse idake, ega be soge, ibiga Babilonia-Rey-Nabucodonosor anmargi bila-ononaiye. Abakale, Bab-Jehová, anmarga ibmar-dakledisulid imakalile, anmargi we-dulemar-banguega nabir imakalile.”
JER 21:3 Jeremías we-dulemar-abin sogded: “Be Rey-Sedequíasʼga sogmalo,
JER 21:4 Israel-e-Bab-Dummad-Jehová weyob sogye: ‘Ani an, be-sordamar-bila-onomalad Babilonia-e-rey-sordamarbo bila-ononaid-abin sikirmakega an imakoed. Bela Caldea-sordamar neggwebur-ebilis-ambikuega an imakoed. Be-sordamar neggwebur-yaba gwayis-bukuega an imakoed.
JER 21:5 An-sunnagwad an bemargi gwichiguoed. An-gangued an bemarse oyogoed, an ise-urwedgi, an sae-itogedgi an bemargi gwichiguoed.
JER 21:6 ” ’An dulemar onaibisaoed. Boni-dummad an barmidoed. A-bonigi bela ibmar-durganse-bakale, degi, dulemar we-neggweburginmaladse-bakale, burgwemaloed.’ ”
JER 21:7 Bab-Jehová soged: “Deyob-gusad-sorbali, geb an Babilonia-e-reyga Judá-e-rey-Sedequías an ukoed, e-dummagan an ukbaloed, degine, dulemar bonigi-burgosurmaladi, bilagi-burgosurmaladi, degi, ukudba-burgosurmaladi, Babilonia-Rey-Nabucodonosorʼga an ukoed. E-isdarmalad-oburgwebigudimaladga amar an urmakbaloed. Geb Nabucodonosor es-suidgi amar-oburgoed, igi-barsaye ega gwen-sogosulid, wile gwen-dakosulid.”
JER 21:8 Bab-Dummad Jeremíasʼga weyob sogsad: “We-neggweburga be sogo, weyob Bab-Jehová sogye: ‘An bemarga igar sogbo uked, igid-igar be sumalodibe, dula-gued-igardibe, burgwed-igardibe.
JER 21:9 Dule we-neggweburgi beoedi, es-suidgi-burgoed, degi, boni-dummadgi burgoed, igi ukudba burgodibe. Ar dule we-neggweburgi-nooeddi, bela-Caldea-sordamar-ebilis-bukwadse-naoeddi, burgosulid, nabir san-onogoed.’ ”
JER 21:10 Bab-Jehová soged: “Ar an we-neggwebur sabsur-imakoye sogsad, wile an dakosulid. Degisoggu, Babilonia-e-reyga urmaklegoed, a-rey we-neggwebur-ogumakoed.
JER 21:11 ”Judá-e-reyneg-yaginmaladga be sogmogo, ‘Bab-Jehová-gayaburba be nue itomarye.’
JER 21:12 Rey-David-e-waganga weyob-Bab-Jehová-sogye be sogo: ‘Bane-bane wakudaradba igar-innikigwad imakmalo. Dule-mesagwar-gudiid, mesagwar-imaked-dulegi be ollor-imakmalo. Adi, melle bemar-ibmar-isgana-imaked-ulale, an-urwedi bemargi sooyobi gwichiguegar. Ar an-urwed, geg dule gwen bargassuliled.’ ”
JER 21:13 Bab-Jehová soged: “Jerusalén-dulemar, an bemargi gwichid, neba-e-nanaga be siid, yalaganba-neba-nanaid-e-akwa-dummadga be gusiid. Emide, be weyob sogmalad: ‘¿Doa anmar-oakalononikosunna? Dule akar anmar-imakosulid. ¿Doa anmar-neggweburgi dogosunna? Dule anmargi dogosuli.’ ”
JER 21:14 Bab-Jehová soged: “Bemar-ibmar-isgana-imaksadba an sabsur-bemar-odurdakoed. Be-sapurgi an soo odegoed. We-soo bela sapur-dikarba-ibmar-nanaid obelogoed.”
JER 22:1 Bab-Jehová weyob anga sogsad: “Jeremías, reynegse be nae, agi Judá-dulemar-e-rey dad-David-ologanagi-siid-asabin be we-gayaburba sogo.
JER 22:2 Deginbali, Rey-e-dummaganga-arbamaladga, degi, e-dulamar-we-yawagakba-ubomaladga be sogmogo: ‘Bab-Jehová-gayaburba be nue itomarye.’
JER 22:3 ”Weyob Bab-Jehová soged: ‘Igar-innikigwad be imakmarye, igar-napiragwadba be nanamarye. Dule-mesagwar-gudiid, mesagwar-imaked-dulegi be ollor-imakmarye. Melle Judíoʼsurmalad be sabsur-imakmaloye, degi, melle be babgan-satemalad wiomaloye, degine, melle be siamar-e-sui-burgwismalad wiomarbaloye. Deginbali, melle wegine dulemar-ibmar-oakalossulid-ablis eomarbaloye.
JER 22:4 ” ’Ar bemar we-ibmar-sogedba-damalale, we-reyneg-yawagakbali reymar-ubomai, Rey-David-e-ologanagi sigmai gumaloed. Reymar, e-dummagan-abargi, degi, e-dulamar-abargi moli-urgi-sii, degine, moli-birgi-sii ubomai gumaloed.
JER 22:5 Ani an, Bab-Jehová-guedgi soged: Ar bemar we-gayaburba-bega-soged be itosurmalale, an-sunnagwad an bemarga innikigwadgi ibmar-sogdo, we-reynega bela akwamarbi-bukwa an imakoed.’ ”
JER 22:6 Bab-Jehová, weyob Judá-e-reyneg-annik soged: “Be angala Galaad-yaryobi gued. Líbano-yala-biriyobi, be anga gued. Degi-inigwele, napira an bega soged, nega-dulesulidga an be-imakoed, neggweburmar-dulesulidga an be-imakoed.
JER 22:7 Dulemar-be-obeloged an begi barmidoed, e-gingimar-nika-nika begi namaloed. Be-urwar-buarmar-bur-yeerdaklemalad bei omukumaloed, geb bela soogi bei ogumakmaloed.
JER 22:8 ”Dule-bukidar we-neggweburgi nasmalogua, e-sordaganga sogdamaloed: ‘¿Ibiga Bab-Jehová weyob we-neggwebur-dummad imaksa?’
JER 22:9 Geb na e-sordagan sogdamaloed: ‘Ar we-dulemala, e-Bab-Dummad-Jehová-ebo-igar-mesisadi obachamaladdeeye, bab-dummagan-baiganba ibsasmaladdeeye, a e-nug-odummodii gusmaladdeeye. A-ulale, weyob we-neggwebur gusye.’
JER 22:10 Melle rey-burgwaledga be bomalo, melle a-ular be bukib binsamalo. Bur be rey-gales-selesadga be bomala, we-rey bar gannar wese-aibirosulidga bur be bomala, degi, e-gwalulesad-yar-bar-dakosulidga bur be bomala.”
JER 22:11 Bab-Jehová weyob Josías-machi-Salum, e-bab-sorba-Judá-e-reyga-megisadga-annik soged: “Salum, bar wese gannar aibirosulid.
JER 22:12 Bia gales-selesa, agine burgoed, we-yarse bar gannar nonikosulid.
JER 22:13 Dule igar-maisulidba-e-neg-sobdiidi, degi, ibmar-isgana-imakedgi e-gabedneg-nibalid-sobdiidi, ¡we-dule, duledar-wiles! Dule, ega-binsa-dule-arbaega-imakdiidi, degi, ega-arbaed-bennukdisulidi, ¡we-dule, duledar-wiles-ini!
JER 22:14 Dule na sogdiid: ‘An na neg-dummadi-soboye, neg-obunnomalad burwisuli aila-dummad-birgi imakoye.’ We-dule, e-neg yawagak-atakmalad-dummagan-nika imakele, deginbali, urwar-urgo ebirgi nasikele, geb e-maged-ginnidgi magbalile, ¡we-dule, duledar-wiles-ini!
JER 22:15 ”¿Ar be urwar-neggi-maidba, be reyga megode? Ar be-babdi amba iba-dummagan-onodigusan-inigwele, ar degite, amba igar-innikigwadba nanadii gusad, igar-nuegan-mamaidba nanadii gusad, igar-innikigwad-imakdii gusbalid. A-ulale, ega nueganbi ibmar gusad.
JER 22:16 Deginbali, dule-wilemalad-bendakdii gusbalid, dule-ibmar-satemalad-wile-dakdii gusbalid. ¿Ar we-soglesursi, we-dule magar-an-daksaye? Ani Bab-Jehová soged: We sogleye, magar an-dakdii gusye.
JER 22:17 ”Unnila bedi maniginbi be binsadiid, mani-amiegala yogasaar be ibmar imakdiid. Ar bedi dulemar-gindakedginbi be binsaed, unnila mesagwar be emar-imakdiid, sabsur-emar-imaked be gudiid.”
JER 22:18 A-ulale, Bab-Jehová Judá-e-rey-Josías-machi-Joacim-annik weyob soged: “Dule bipisaale Joacim-burgoedbina bukib-binsaosulid, ega weyob binnasuli boosurmalad: ‘¡Gwenadye! ¡Duledar-wilesmarye! ¡Bunaye! ¡Dule-wilesmarye!’ Degi, ega weyob binnasuli boosurmarbalid: ‘¡Dummadye! ¡Be bergudsunye! ¡Anmar-rey, be anmar-idu nadsunye!’
JER 22:19 Moli-uayasuid-diglegeyobi diglegoed, illi-illir ebipimaloed. Jerusalén-neggwebur-magaba metemaloed.”
JER 22:20 Bab-Jehová, Jerusalén-dulemarga weyob sogdemogad: “Líbano-yarse be naknamar, agi be binnasuli ogormaksii gumalo, Basán-yargine, be binnasuli bosii gumalo, Abarim-yarmar-akale, be bodii gumalo. Ar dulemar-be-bendakmalo-sogmaladi, bela ogilolesmalad.
JER 22:21 Bemar nued-gudiunni, an bega sunmaksamalanad. Aka be sogdegusmalad: ‘Anmar be-itobisurye.’ Ar be dungudanikid-akale, deyob be damalad, gwen be an-itobisurgusmalad.
JER 22:22 Be-sapin-dummagan-gudimaladi, burwa-dummadse ebipiledmaloed. Bebina-sogdimaladi, gales seledmarmogoed. Na be-isgued-ulale, bingedar be itodoed, mesagwar be imakledoed.
JER 22:23 Emide be, Líbano-yargi be maid, urwargi be uu-sobsayobi be gued. Ar emisgindi, be dummad-naibid itosunnoed, igi ome-muu-neggi-nai, nunmaked-itonaidyobi, be nunmaked itonai guoed.”
JER 22:24 Judá-Rey-Conías, Joacim-e-machid. Bab-Jehová, Coníasʼnik weyob soged: “An-dula-maidgi inniki an bega soged: Amba an bela-bela bebina-soged-inigwele, be wegi-gudiidgi amba an be-bar-metedsegad.
JER 22:25 Be-oburgwebi-gudimaladga an be-urmakoed, be bela-bela-dule-dobgudimaladga an be-urmakoed. We-Babilonia-e-rey-Nabucodonosorʼga, degi, Caldea-dulemarga an be-ukmaloed.
JER 22:26 Be, be-nanbogwa, yar-baid-gwen-be-dakdisulidse an be-barmetoed. Be gwalulessulid-yargi, be-nanbogwa an be-oburgwemaloed.
JER 22:27 Gwen bipisaale be-yar-naidse be gannar aibirosulid.
JER 22:28 ”¿Ar we-Coníasʼde nog-maraled-gwen-bar-dule-abesulidyob gude? ¿Ar ibiga wede yar-baid-gwen-dakdisulidse, e-mimmiganmala barmelledsunna?
JER 22:29 ¡Israel-dulemar! Bab-Jehová-e-gayaburba be itomar.”
JER 22:30 Weyob Bab-Jehová soged: “We-dule, dule-wargwenadye be gardagi narmakar meso, dule gwen igarga gudsulidye be gardagi sogo. Ar e-mimmigan-wargwensaale, Judá-yar-seegala David-e-ologangi sigosurguoed.”
JER 23:1 Bab-Jehová weyob soged: “¡Dummagan duledar-wilesmar! Dummagan an-neggwebur-dula-wiodimalad, bela-neggwebur-oaisakidimalad, ¡duledar-wilesmar!”
JER 23:2 A-ulale, Israel-e-Bab-Dummad-Jehová, weyob dummagan-e-dulamar-sedimaladga soged. “Ani an Bab-Jehová soged: Bemar an-dulamar-oaisakismalad, an-dulamar-ononnosmalad, gwen be bendaksasurmalad. Degisoggua, bemar ibmar-isgana-imakmaladba an sabsur-bemar-odurdakoed.
JER 23:3 ”An-dulamardi, an-sunnad gannar e-yargi-ononnolesgusadse-dagega an imakoed. Gannar e-nainumarse-dagega an imakoed. Agine na nasgumai gumaloed, dula-mergumai gumaloed.”
JER 23:4 Bab-Jehová soged: “An-dulamar-seegala, ani an ega e-idumalad ukoed. Degisoggu, an-dulamar bar dobee itogosulid, degi, bar gwayosurmalad. Bela bukwagumaloed.”
JER 23:5 Bab-Jehová weyob soged: “An Rey-David-e-wagwa-gwensak-barmidaged-ibagan danikid. Igar-innikigwad-imaked an ogwisgunonikoed. A-dule, binsaed-nikaa negsemai guoed. Igar-innikigwadba, degi, igar-napiragwadba ibmar-imakdii guoed.
JER 23:6 A-ibagangine, Judá-dulemar abonolegoed, Israel-dulemar dobsuli-bukwa guoed. ‘Bab-Jehová, anmar-abonogedye,’ ega nug nasikmaloed.”
JER 23:7 A-ulale, Bab-Jehová weyob soged: “Bar weyob-soglegosulid-ibagan daniye, Bab-Jehová Egipto-yalagi-Israel-dulemar-onosad-e-nug odummomarye.
JER 23:8 Bur sogdemaloed: Bab-Jehová-e-nug odummomarye, ar a Israel-dulemar-Babilonia-yargi-bukwa onosaddeeye. Ar Bab-Jehová, bela Israel-dulemar-yar-bamaladgi-oaisakisadi, agi bukwa onosaddeeye sogdemaloed. Degisoggu, Israel-dulemar na e-yalagi bukwagumaloed.”
JER 23:9 Ani, Jeremías, an Bab-Dummad-gayaburba-barsogmaladga an ibmar soged: “Bab-Jehová-nuggine, degi, e-gayaburba-islidikid-anga-uksadbali, an bela-belagwad an-ulubgi an naibid-dummad itoged. Bela an-abaganmar wawanmaked, ber dule-mummudyob an dakleged, dule-inna-gagbidba-aibandiiyob an dakleged.
JER 23:10 We-yala ukabsales-naid-ulale, galagwensuli-negsichigi-yoledimalad doggusad. We-yala nue wiles-itonaid, nega-dulesulidganba gagan-nanaid bela dinguded. Bab-Dummad-gayaburba-barsogmalad, igar-isganaba nanadmalad, e-garganguedi, igar-innikigwadga ebusurmalad.”
JER 23:11 Bab-Jehová soged: “Bab-Dummad-gayaburba-barsogmaladi, dule-isganamalad. Dule-irwa-Bab-Dummadse-gormaladi, dule-isganamarmogad.”
JER 23:12 Bab-Jehová soged: “A-ulale, e-igarmar ega masimakmaiyob guoed. Negasichidba balimelledoed, agi mellemai gumaloed. E-sabsur-odurdakleged-birgagi an egi boni-dummad barmidagoed.
JER 23:13 ”Bab-gayaburba-barsogmalad-Samariaʼginmaladi, e-ibmar-isgana-imakmalad an daksad. We-dulemala, Baal-nuggi gayaburba barsogsamalad, degi, yogasaar igar-isganabali an-dulamar-naega imaksamalad.
JER 23:14 Bab-gayaburba-barsogmalad-Jerusalénʼginmalad, we-ibmar-isgana-gegerdaklemalad-imaksad an daksad: Galagwensuli negsichigi-nanamalad, gakansaagwar nanadimalad, dule-ibmar-isgana-imakmalad ogannomalad, adi, melle dule-wargwensaale na e-daed ogwaegar. Bela we-dulemar anga, Sodoma-dulemaryob gued, bela Jerusalén-dulemar anga, Gomorra-dulemaryob gued.”
JER 23:15 Degisoggu, Bab-Jehová-Bela-Gangued-Nikad weyob gayaburba-barsogmaladnik soged: “Mas-solemalad-gunnega an imakoed, dii-isgana-gobega an imakoed. Ar Bab-Dummad-gayaburba-barsogmalad-Jerusalénʼginmalad, bela yala-oichosmalad.”
JER 23:16 Bab-Jehová-Bela-Gangued-Nikad weyob soged: “Melle be an-gayaburba-barsogmalad-e-sunmaked be itomar. Ar binsa gakansaar bega igar-nueganbi sunmakmalad, na emar wargwengi gaya-onoardamalad, gwen an ega ibmar-sogdasulid sokardamalad.
JER 23:17 Dule-isdar-an-dakmaladga sokardamalad: ‘Bab-Jehová sogye, bemarga igar-nueganbi namaloye.’ Dule-e-binsaedba-ibmar-imakmaladga sokardamalad: ‘Bemargi bonigan danikosurye.’
JER 23:18 ”Wede, ¿doa an-asabinni binsaed-amisii gusa? ¿Doa an-sunmaked-itosii gusa? ¿Doa an-ibmar-sogsadba ibmar-imaksa? Wemar wargwensaale gwen deyob gussulid.
JER 23:19 An-urwedi burwa-dummadyob urwedigi nodagoed, burwa-bipirmakaledyobi gwichigudagoed. Dule-ibmar-isgana-imakmaladgi, gwichigunonikoed.
JER 23:20 An-urwedi gwen-bogguosulid. Bela an-ibmar-abemaid-imakedse geb an-urwed bogguoed. Bela we-ibmarmar-gusadgi magar-itononimaloed.
JER 23:21 ”We-dule-gayaburba-barsogmalad an barmissulid, degi-inigwele, an-gayaburba-barsogegala, sulibinsa abarmakdemalad. Gwen an ega ibmar-sogsasulid, degi-inigwele, yogasaar gayaburba sogsamalad.
JER 23:22 Ar we-dulemar angi binsaed-amisana, an-dulamarga an-gayaburba sogsamalanad, ibmar-isgana-imakmaladgi an-dulamar-obangusanad.”
JER 23:23 Bab-Jehová soged: “¿Ar an weginbi gudidasi? ¿Ar an dikasuli gudidasurbarsi?”
JER 23:24 Bab-Jehová soged: “Ar mer e-dakega, ¿sunna dule an-idu dukusi? Suli, gege an-idu dukued.” Bab-Jehová soged: “¿Ar an bela napneggi gudisursi? ¿Ar an bela nibneggi gudisursi? Ar an bela neg-gani maid.
JER 23:25 ”Gayaburba-barsogmalad, gakansaar weyob an-nuggi-sunmake an itosad: ‘¡An negburgan daksaye, an negburgan daksaye!’
JER 23:26 ¿Sanagwadse gayaburba-barsogmalad gakansaar sunmakdii gumaloe? ¿Ibmar-daksasulid-wargwengi-obinyedimalad sanagwadse bar sogosurmala?
JER 23:27 Na muchub-muchub negburgan-dakedgi-sunmakmaladba, an-dulamar angi-banguega imakbimalad, igi e-dadgan bab-dummad-Baal-ular an-ied-gusmaladyob imakdimalad.”
JER 23:28 Bab-Jehová soged: “Gayaburba-barsoged negburgan-daksale, ar e-negburgan-daksad sogodo. Ar dule an-gayaburba-itosale, napiragwadba an-gayaburbagi sunmakodo. ¿Ar gagan-dinnagwadi, ibmar-gwagbogwa emarsi? Suli, geg emar gued.”
JER 23:29 Bab-Jehová soged: “¿Ar an-gayaburbade sooyobi gangusursi? ¿An-gayaburbade, mardo-akwa-mamardaeyob gusursi? Eye, deyob gue.”
JER 23:30 Bab-Jehová soged: “A-ulale, gayaburba-barsogmaladgi an gwichid. Ar ade, na muchub-muchub yogasaar sogdamalad, ‘Bab-Dummad anga sunmaksaye.’ ”
JER 23:31 Bab-Jehová soged: “Gayaburba-barsogmaladi, an ega sunmaksayobi na yogasaar-e-itolegedba-sunmakdimaladgi an gwichid.”
JER 23:32 Bab-Jehová soged: “Gayaburba-barsogmaladgi an gwichid. Negburgan-daksasulidgi gakansaale sunmakdimalad. An-dulamarga deyob gakansaale sunmakedba, igar-noaledba an-dulamar-seddamalad, yamo-binsaed-gaale, ega sunmakmaladba an-dulamar-binsaed gadamalad.” Bab-Jehová soged: “Ani an, gwen we-dulemar barmissulid, gwen an ega igar uksasurbalid. We-dulemar, an-dulamarga igar-nued gwen senonisulid.”
JER 23:33 Bab-Jehová soged: “Israel-dulemar bese egichiardibe, gayaburba-barsogmaladdibe, dule-irwa-anse-gormaladdibe, ‘Bab-Jehová igi-sogye.’ Ega weyob be sogo, ‘Bab-Jehová sogye, an bemargi banguoye.’
JER 23:34 Ar gayaburba-barsoged-gwensak-sokardibe, dule-irwa-anse-gormaladdibe, Israel-dule-gwensakdibe, weyob sokalile, ‘¡We, Bab-Jehová-gayaburbaye!’ Deyob dule sogsale, we-dule anse sabsur-odurdaklegoed, bela e-neg-yaginmaladse-bakar anse odurdaklegoed.
JER 23:35 ”Ar dule-gwensak e-gwenadganse, degi, e-aimarse bur weyob egisewilubbid: ‘¿Igi Bab-Jehová sogsa?’ Weyob egisodibe, ‘¿igi Bab-Jehová soge?’
JER 23:36 Degi-inigwele, melle bar weyob sogmalo: ‘Weyob Bab-Jehová sogye.’ Ar dule deyob sogele, na dukin e-ibmar-sogedba sabsur-odurdaklegoed. Ar ade, bemar Bab-Dummad-Dula-Maid-gayaburba oakalodmalad, ar bemar Bab-Dummad-Jehová-Bela-Gangued-Nikad-gayaburba oichodmalad.
JER 23:37 ”Jeremías, weyob be gayaburba-barsogmaladse be egiso: ‘¿Bab-Jehová igi-bega sogsa? ¿Bab-Jehová igi-bega soge?’
JER 23:38 ”Ar sogdemalale, ‘Bab-Jehová weyob sogye.’ ”Jeremías, ega be weyob sogo: ‘Bab-Jehová weyob sogye: An bemarga sogsad, melle be Bab-Jehová-weyob-sogye be sogmaloye.’
JER 23:39 ”Bemar deyob sogsasoggu, bar an bemargi binsaosulid, an-asabin an be-balimetemaloed. An bemarga, degi, be-dadgangala-yala-uksadi, an obelogoed.
JER 23:40 Degisadegu, bingedargudii an bemar-imakoed, nug-gannarbaa bar be guosulid, dulemar gwen we-ibmar iegosurmalad.”
JER 24:1 Babilonia-Rey-Nabucodonosor, e-yarse Judá-dulemar-gasa sear gusad. Wemar selealid: Judá-e-rey-Jeconías. Jeconíasʼde Joacim-e-machid. Judá-e-dummagan, dule-ibmar-sobedgi-arbamalad, dule-esgoro-sobedgi-arbamalad, selearmalad. Wemar-selesad-sorbali, Bab-Jehová, ese-goled-neg-asabin, anga higo-san garba-gwabo oyosad.
JER 24:2 Garba-gwagwengine, higo-san-nuegan bukwad, gebe-goresmaladyob daklebukwad. Garba-baidgindina, higo-san-isgana bukwad. Ar nue-isganabisoggu, geg-gulleged.
JER 24:3 Degidgine, Bab-Jehová anga sokalid: “Jeremías, ¿we ibu be dake?” Geb an e-abin sogded: “Higo-sanmar an dakdo. Gwensak, nueganad. Baigandi, isgana-nanaed, geg-gulle an daked.”
JER 24:4 Geb agine, anse Bab-Jehová-gayaburba nonikid. Weyob anga sognonikid:
JER 24:5 “Israel-dulemar-e-Bab-Dummad-Jehová weyob soged: ‘Judá-dulemar Babiloniaʼse-gales-selesmaladi, an we-higo-nueganyob dakoed.
JER 24:6 We-dulemala an nue-akwedii guoed, gannar we-yarse-dagmalaga an imakoed. Emisgindi, we-yalagine nasgumaiguega an imakoed, an obelogosulid. We-yalagi an urboed, an ononnogosulid.
JER 24:7 Magar-itomalaga an imakoed, adi, wisgumalagar ani an Bab-Jehová gued. Emala anga an-dulamarga guoed, ani an e-Bab-Dummadga gumogoed. Ar bela-belad e-gwagegi-itogedba, anse gannar nonimaloed.’ ”
JER 24:8 Bab-Jehová soged: “Judá-e-rey-Sedequíasʼdi, degi, e-dummagana, degine, Jerusalénʼgi-gudimaladi, Egipto-yarse-abar-wakitemaladi, higo-san-isganayob an dakoed, higo-san-geg-gullemaladyob an dakoed.
JER 24:9 Bela yalamar-nanaidga we-dulemar boni-dummaganyob an imakoed, adi, an bia-oduurmakoe, agi isdar-dakmalaga an imakoed. Amar-sae-dakmalaga, mesagwar-dakmalaga, degine, ukabsamalaga an imakoed.
JER 24:10 We-dulemargine, bila-onoleged an barmidoed, ukud-dummad an egi barmidoed, degine, boni-dummagan an egi barmidbaloed. Bela an e-dadganga, degi, an ega-yala-uksadgi obelogedse an imakoed.”
JER 25:1 Jeremíasʼse Bab-Dummad-gayaburba-nonikidi, ega Judá-dulemargi sunmaknonikid. Deunni, Josías-machi-Judá-e-rey-Joacim birgabakegus reyga-maidgi, Bab-Dummad Jeremíasʼga sunmaknonikid. Deunni, Babilonia-Rey-Nabucodonosor birgagwengus negsemaid.
JER 25:2 Bab-Dummad-gayaburba-barsoged-Jeremías, bela Judá-dulemarga, degine, Jerusalén-dulemarga weyob sogded:
JER 25:3 “Amón-machi-Josías birgambe-gakapaagus (13) Judá-e-reyga-maid-akale, emi-ibase, birgadurgwen-gakapaagusad (23) Bab-Jehová anga sunmakdanikid. A-akale, an bemarga-sunmakdanikidi an boggudisulid. Degite an bemarga-ibmar-sogedba be gwen imakdisurmalad.
JER 25:4 ”De-ukinbali, Bab-Jehová bemarga ega-gayaburba-barsogmalad barmimaiguanad, degi-inigwele, bemar gwen itossurmalad, gwen eba be ibmar imaksasurmalad.
JER 25:5 We-dulemar bega sogsamalanad: ‘Igar-isganagi be bangumala, melle be igar-isgana imakmala. Adi, nabir bemar, degibi, degisadegu, Bab-Jehová-bemarga-yar-uksadgi, be-dadganga-yala-uksadgi, be bukwa gumalagar.
JER 25:6 Degi, melle bab-dummagan-baiganse be gormalo, melle be e-nug-odummomalo. Melle be ibmar-isgana-imakmaladba an-ourwemalo. Adi, an sabsur bemar-imakosulid.’ ”
JER 25:7 Bab-Jehová weyob soged: “Emide, bemar an-sogedba ibsassurmalad, aka be be-ibmar-isgana-imakedba be an-oulusmalad. Na be dukin sabsur-wilemalaga na be imaksamalad.”
JER 25:8 A-ulale, Bab-Jehová-Bela-Gangued-Nikad weyob soged: “Bemar an-sogedba be ibmar-imaksasurmarsoggu,
JER 25:9 dad-nakwed-argan-sapiledsik-dulemar-bukwadi an bemargi barmidagoed. Degine, anga-arbaed Babilonia-Rey-Nabucodonosor an barmidabaloed. We-yalagi-gwichiguega an barmidagoed, degi, bemargi-gwichiguega, be-neggweburmar-nagaba-neggweburmar-bubukwadgi-gwichiguega an barmidagoed. Bela naitinagase an obelogoed. Bemargi dodolegega an imakoed, isdar-daklemalaga an bemar-imakoed. Bela yala olloo naguoed.
JER 25:10 ”Weligwaledba-binnasuli-neg-oimakleged an obelogoed, yeer-itolegedba-binnasuli-gorleged an obelogoed. Ome-nikuedgi-namaklegedi bar namaklegosulid, degi, ibmar-naged-akwa-goledi bar golosulid, degine, mutikidba bar gwallu gaosulid.
JER 25:11 Bela we-yala akwamarbi-bukwa an imakoed, gwayed-negga binyenonikoed. We-dulemala birga-dulapaa-gakambe (70) Babilonia-e-reyga mailemaloed.”
JER 25:12 Bab-Jehová soged: “Birga-dulapaa-gakambe-gunonikile (70), Babilonia-e-rey-na-isgued-ular, an sabsur-odurdaknonikoed, degi, Caldea-dulemar-bukwad-yala, bela ilagwen-obelogar an imakoed.
JER 25:13 Bela an ibmar-sogsadi, we-dulemargi-guega an imakoed, degi, bela we-gardagi narmaklegar-maidi, degi, Jeremías dulemargi-sunmaksadi bela guega an imakoed.
JER 25:14 Caldea-dulemar dulemar-baiganse mailemarmogoed, rey-gandikmaladga ibmar-imakdii gumarmogoed. Degidbali, na e-damalad-ular, degi, e-ibmar-imakmalad-ular, sabsur-odurdaklemaloed.”
JER 25:15 Bab-Jehová Israel-dulemar-e-Bab-Dummad anga sogsad: “Be we-vino-nog-an-ganikid be sue, an-urwed-nogad. Bela yarmarse an be-barminaidgi dulemar-gobega be imako.
JER 25:16 We-dulemar gobsamalale, banamakdemaloed. We-dulemar, bila-onoged-an-barmidagoedgi suli-suli itodmaloed.”
JER 25:17 Geb an Bab-Jehová-annik nog susad. Geb bia Bab-Dummad dulemarse-an-barmisa, a-dulemar an bela ogobsad.
JER 25:18 We-dulemar an ogobsad: Jerusalén-dulemar, Judá-dulemar, Judá-e-reymar, bela e-dummagan an ogobsad, adi, obelogegar. E-neggweburmala, akwabi ambikusmalad, egi-dodolegedga gusmalad, degi, ukabsalegega an imaksad, igi emi-ibagi amba deyob daklege.
JER 25:19 Egipto-e-rey-Faraón we-noga-gobega an imaksabalid, degi, bela ega-arbamalad, e-dummagan, degine, bela e-dulamar, we-nog-gobega an imaksad.
JER 25:20 Degi, bela Egipto-yalagi dule-baigan-mamaidi, bela Uz-yala-e-reymala, we-nog-gobega an imaksad. Deginbali, bela Filistea-yala-e-reymar we-nog-gobega an imaksad. We-reymar gobsamalad: Ascalón-neggwebur-e-rey, Gaza-neggwebur-e-rey, Ecrón-neggwebur-e-rey, degine, Asdod-dulemar. Wemar bela we-nog-gobega an imaksad.
JER 25:21 Deginbali, Edom-dulemar, Moab-dulemar, degine, Amón-wagan, we-nog-gobega an imaksad.
JER 25:22 Deginbali, bela Tiro-neggwebur-e-reymar, Sidón-neggwebur-e-reymar, we-nog-gobega an imaksad. Degi, Mediterráneo-demar-naidsik gakaba-neggwebur-bukmalad-e-reymar, we-nog-gobmalaga an imaksad.
JER 25:23 Deginbali, Dedán-neggwebur-e-rey, Tema-neggwebur-e-rey, degine, Buz-neggwebur-e-rey, degi, bela nono-swiri-imakmalad, we-nog-gobega an imaksad.
JER 25:24 Degine, bela Arabia-e-reymar, bela nega-dulesulidba dulemar-akar-akar-bukwad-e-reymar, we-nog-gobega an imaksad.
JER 25:25 Deginbali, bela Zimri-neggwebur-e-reymar, Elam-neggwebur-e-reymar, degine, bela Media-yala-e-reymar, we-nog-gobega an imaksabalid.
JER 25:26 Bela dad-nakwed-argan-sapiledsik-reymar-mamaidi, degi, wegi-itaka-mamaidi, dikasur-mamaidi, degi, bela napaneg-naid-ugakaase-mamaidi, we-nog-gobega an imaksad. Geb bela wemar-gobsad-sorbali, Babilonia-e-rey we-nog gobmogoed.
JER 25:27 Geb Bab-Dummad anga weyob sogsabalid: “We-dulemarga weyob be sogo, Israel-e-Bab-Dummad-Jehová-Bela-Gangued-Nikadi weyob sogye: ‘Be we-nog gobmar, be mumgumar, be sakar-sakar agmar, degidba bar be gwisguosurmalad. Ar an bemargi bila-onoleged barmidoedgi be girgumaloed.’
JER 25:28 ”Ar yapa be-abin we-nog-sumalale, yapa gobmalale, ega be sogo, weyob Bab-Jehová-Bela-Gangued-Nikad sogye: ‘Bemar we-nog gobergebye.’ ”
JER 25:29 Bab-Jehová soged: “Neggwebur-angadga-gusadga bato an boni-dummagan barmidasokalid. ¿Sabsur-bemar-imakosurye be binsamala? Mer degi-binsamalo, ar bemar anse dummad-odurdaklegoed. Ar dulemar-bukwadbina an es-suid onosbinned.
JER 25:30 ”Emi, Jeremías, we-dulemarga bela we-ibmar an bega-soged be soge: ‘Bab-Jehová, nibneggi binnasuli urwemaid, e-neg-islidikid-akale, malayob e-sunmakedi goled. E-dulabina nue-itos maid. Igi-dulemar uvaʼgi-annanair binnasuli-gornanaidae, deyobi, Bab-Jehová, bela dulemar-napneggi-bukwadgi binnasuli goled.
JER 25:31 E-gollomakedi, bela yalamar-ugakaase gollomaked, ar Bab-Jehová dulemar-akar-akar-bukwadgi urwemaid. Ar Bab-Dummad bela dulemarga igar-itogedid, dulemar-ibmar-isgana-imakmaladi ese oburgwilegoed.’ Deyobi, Bab-Jehová sogsad.”
JER 25:32 Bab-Jehová-Bela-Gangued-Nikadi, weyob soged: “Yalamar-nanaid-iliba, boni-dummagana nomai guoed. Burwa-dummadi bemargi gwichigualid, bela yalamar-ebilis begi danikid.”
JER 25:33 A-ibagangine, Bab-Jehová, a-dulemar-ogilogoed, bela napaneg-ugakaase napagi-omilede guoed. Dulemar ega boosulid, dulemar gwen e-muimar-digega weosurbalid, ibmar-isganayobi napagi-omilede gumaloed.
JER 25:34 Dummagan-negsedimalad, be akiginmar, binnasuli be gormar. Dulemar-idudimalad, napagi be bindumakmar, ar girgued-ibagan bemarse owarmaksad. Bela be yogasaar aisakidmaloed, degi, moli-bebe-nikad-sapingana-wardadaganayobi be oburgwilemaloed.
JER 25:35 Dummagan-negsedimaladi, Bab-Jehová-idu dukuosurmalad. Dulemar-idudimaladi, gwen wakinnosurmalad.
JER 25:36 Dummagan-negsedimalad-binnasuli-goled be itomar, dulemar-idudimalad-akiginned be itomar, ar Bab-Jehová bela e-nainumar obelonaid.
JER 25:37 Bab-Jehová bela-bela-e-urwedba, gagan-nebagi-yeerdakle-nanaid bela obelosad,
JER 25:38 Igi achumigur-nono-wawaadi, e-galugi-noardaeyobi, Bab-Jehová e-dulamargi noalid, e-yala bela olloo nasiksad. Bela Bab-Jehová-e-urwedbali es-suidgi oburgwilesmalad.
JER 26:1 Josías-machi-Judá-e-rey-Joacim, gebe reyga-megideunni, Bab-Jehová Jeremíasʼga sunmaknonikid, ega weyob sognonikid:
JER 26:2 Bab-Jehová soged: “Jeremías, anse-goled-neg-imbagi be gwisguna. Bela an bega-ibmar-sogoedi, Judá-dulemar-anse-goled-negse an-nug-odummodanimaladga a-gayaburba be sogo. Melle be soggwenad odukuo.
JER 26:3 Abakalegi be-itoarmalale, degi, e-isguedgi banguarmalale. E-isguedgi bangudmalale, adi, an e-isgumalad-ular bar sabsur-odurdakosulid. Gebe an binsasadyobi bar an imakosulid.
JER 26:4 ”Jeremías, ega be weyob sogoed, Bab-Jehová weyob sogye: ‘Ar bemar an-itosurmalale, an bemarga-igar-uksadba be dasurmalale,
JER 26:5 degine, an-gayaburba-barsogmalad bega-ibmar-soged be itosurmalale, an sabsur-bemar-odurdakoed. Ar an-gayaburba-barsogmalad an bemarga barmimaiguad, degi-inigwele, eba be ibsadisurmalad.
JER 26:6 Degisoggu, igi an Silo-neggweburgi anse-goled-neg an imaksa, deyobi, an wegi anse-goled-neg an imakbaloed. We-neggwebur, bela dulemar-baiganga ukabsaleged-neggweburga an imakoed.’ ”
JER 26:7 Bela dulemar, Jeremías Bab-Dummadse-goled-neggi-ibmar-sogsadi itosmalad, dule-irwa-Bab-Dummadse-gormalad, degi, Bab-Dummad-gayaburba-barsogmaladi, bela itosmalad.
JER 26:8 Jeremías bela Bab-Jehová ega-igar-uksad dulemarga sogsagu, dule-irwa-Bab-Dummadse-gormaladi, Bab-Dummad-gayaburba-barsogmaladi, degi, bela dulemar, Jeremías-gasmalad. Geb weyob ega sogsamalad: “¡Be anmarse oburgwileged-nika!
JER 26:9 ”¿Ibiga Bab-Jehová-nuggi be weyob sunmake? Emide be soged: We-itoged-nega Silo-neggweburgi-gusadyob gumogoye, degi, we-neggwebur bela olloo-naguoye, dulemar sateguoye be soged. Weyob be sunmakedsulid.” Bela dulemar Bab-Dummadse-goled-neggi-bukmaladi Jeremíasʼgi gwichigudmalad.
JER 26:10 Judá-dulemar-e-dummagan deyob neg-gunaiye itoarmargu, reyneggi-bukwa, Bab-Dummadse-goled-negse nadmalad. Geb yawagak-binid-nagaba ambikudapmalad.
JER 26:11 Agine dule-irwa-Bab-Dummadse-gormaladi, degi, Bab-Dummad-gayaburba-barsogmaladi, dummaganga, degi, bela dulemargala sogdemalad: “We-dule oburgwilegergebed, ar we-neggweburnik sabsur-sunmaksad, ar bemar-sunnagwad itosmalad.”
JER 26:12 Degi-inigwele, Jeremías, bela dummaganga, degi, bela dulemarga sogded: “Ar bemar, bela be we-ibmar-itosmaladi, ar Bab-Jehová we-neggweburnik-sunmakega, degi, we-itoged-neggi-sunmakega an-barmialid.
JER 26:13 Degisoggu, be-damalad be ogwamar, be-ibmar-imaked be ogwamar, Bab-Dummad-Jehová-sogedba be damar. Adi, Bab-Jehová sabsur-bemar-odurdakoye-sogsad bar imakosulid.
JER 26:14 Ar andina, bemargi siid, igi-be an-imakbimala. Be-itolemalad, be-dakedba be an-imakmalo.
JER 26:15 Degi-inigwele, be ebinsamalo, be an-oburgwemalale, na be dukin bemargi, degi, bela we-neggwebur-dulamargi be dule-neg-oakalossulid-ablis eonaido. Ar nue-napira an bemarga soged, Bab-Jehová we-ibmar-sogega an-barmialid.”
JER 26:16 Geb dummagana, degi, bela dulemala, dule-irwa-Bab-Dummadse-gormaladga, degi, Bab-Dummad-gayaburba-barsogmaladga weyob sogsamalad: “We-dule oburgwilegewilubsulid, ar anmar-Bab-Dummad-Jehová-nuggi anmarga sunmaksad.”
JER 26:17 Geb degine, gwenna-gwenna girmar-dummagan dulemar-danar-igar-itobukwadga weyob sogdemalad:
JER 26:18 “Epenne, Ezequías reyga-maiunni, Moreset-neggweburgined-Miqueas bela Judá-dulemarga weyob sogsa gusad: ‘Bab-Jehová-Bela-Gangued-Nikadi weyob sogye: Sión-neggwebur nainu-imulegeyob guoye, Jerusalén-neggwebur bela bibisgoye, Bab-Dummadse-goled-neg-siid-yala, bela sapurbi-nai guoye.’
JER 26:19 ”¿Ar Judá-e-rey-Ezequíasʼde, degi, bela Judá-dulemarde Miqueas-oburgwissi? Suli, oburgwissuli. ¿Ar Ezequíasʼde bur Bab-Jehová dobgussursi? Eye. Ar Bab-Jehováʼse bendakleged-egichisad. Ar Bab-Dummadi, Judá-dulemar-sabsur-odurdakoye-sogsadi bar imaksasulid. Degi-inigwele, anmardi na dukin boni-amisokalid.”
JER 26:20 Deginbali, Bab-Dummad-gayaburba-barsoged-baid gudii gusbalid. A-dule, Semaías-machi-Urías, Quiriat-Jearimʼginedid, Bab-Jehová-nuggi gayaburba-barsogdii gusmogad. A-dule, Jeremíasʼyobi Jerusalén-neggweburnik, degi, we-yalanik yolegar sunmaksamogad.
JER 26:21 Rey-Joacim deyob itoargua, degi, ega-arbamalad, degine, dule-dummagan, deyob, Urías-soge-itoarmargua, Rey-Joacim, Urías-oburgwebigualinad. Degi-inigwele, Urías e-oburgwebimarye-wisguargua, dobgud gusad. Degidbali, Egipto-yarse wakite gusad.
JER 26:22 Geb Rey-Joacim, Egipto-yarse Acbor-machi-Elnatán barmisgusad, degi, dulemar-baigan eba barmisgusbalid.
JER 26:23 Geb wemala, Egipto-yargi Urías-gasa seargusmalad. Agi geb Rey-Joacimʼse ninonigusmalad. Geb degine, Rey-Joacim, es-suidgi Urías-oburgwega igar-uksa gusad. Degi, yogasaar-dulemar-diglemaladgi e-mui-metemaloye sogsa gusad.
JER 26:24 Degi-inigwele, Safán-machi-Ahicamʼdi, Jeremías-ular gwisgusad. We-dule, Jeremías-oburwemalaga dulemar-imaksasulid.
JER 27:1 Rey-Josías-machi-Joacim Judá-e-reyga-megidgu, Bab-Jehová Jeremíasʼga sunmaknonikid:
JER 27:2 Bab-Jehová weyob anga sogsad: “Moli-dukarba-suar-meged be sobo, degi, geb e-dubmar-nagued be imakbalo. Deyob be imaksale, geb be-dukarba we-suar be edinno.
JER 27:3 Geb a-sorba, be we-reymarse gayaburba barmido: Edom-e-reyse, Moab-e-reyse, Amón-e-reyse, Tiro-e-reyse, degi, Sidón-e-reyse. Be an-gayaburba, garda-berbemalad-danimaloedba be barmidoed. We-dulemar Judá-e-rey-Sedequías-dakega Jerusalénʼse danimaloed.
JER 27:4 ”Be a-dulemarga sogoed, be-reymarga weyob be sogoye: ‘Ani an Israel-dulemar-e-Bab-Dummad-Jehová Bela-Gangued-Nikad, weyob sogye:
JER 27:5 Ani, an-ganguedba, an-surgan-gandikidba an we-napneg nasiksad. Ani an dulemar-obinnisad, degi, an bela egi ibmar-durgan-bukwamalad urbisad. Ar doaga an we-ibmarmar ukbie, an-itolegedba an uked.
JER 27:6 ” ’Emide, bela we-yalamar an-mai-Babilonia-e-Rey-Nabucodonosorʼga an uksad. Deginbali, bela ibmar-durgan-nabir-akwilemalad, degi, sapurbarmaladse-bakale, an Rey-Nabucodonosorʼga uksabalid, adi, e-urbaligwa gudii gumalagar.
JER 27:7 Bela dulemar-yar-baid-baidgi-bukmaladi, Babilonia-yalaga wileged-iba-nonimogoedse Rey-Nabucodonosor-e-maiga gumaloed, e-machi-maiga gumaloed, degi, e-wagwa-maiga gumarbaloed. Weyobi, Babilonia-yala, rey-gandikmaladse, degi, yalamar-baiganse mailemogoed.’ ”
JER 27:8 Bab-Jehová soged: “Ani Bab-Jehová sogye: ‘Neggwebur-dummagan-gwensak, reymar-gwensak, Babilonia-rey-Nabucodonosorʼba dabisurmalale, yapa ega mailemalale, ani an a-dulemala, es-suidgi, ukud-dummadgi, degi, bonigan-dummagangi obelogoed. Bela-naitinagase, Nabucodonosor, we-dulemar-obelogega an imakoed.
JER 27:9 ” ’Degisoggu, be-gayaburba-barsogmalad, be-nermar, be-dule-gabdaked-odulomalad, be-niisgwaba-dakar-ibmar-sogmalad, be-ina-isgana-imakmalad, bega sokarmalale, melle be Babilonia-e-reyba ibsamaloye, melle be itomalo.
JER 27:10 Ar we-dulemar bemarga gakansaar-sunmakmalad, unnila we-neggweburgi-banguega be-imakbimalad, adi, an be-barmetemalagar. Deyob be burgwemalaga be-imakbimalad.’ ”
JER 27:11 Bab-Jehová soged: “Ar dule-yar-baid-baidgi-bukmalad Babilonia-e-rey-maiga-guoye-sogmaloeddi, degi, a-sogedba-nanamaloeddi, e-yargi-bukwa an imakoed, adi, agi arbabukwaguega, nued-garmakdiguega, an imakoed.”
JER 27:12 Ani Jeremías, an Judá-e-rey-Sedequíasʼga sunmaksabalid. Amba weyob an ega sogsabalid: “Be dula-gudiguega, Babilonia-e-rey-maiga be guo, a-sogedba be nanao, e-dulamar-sogedba be ibsao.
JER 27:13 ¿Ar ibiga be, be-dulamarmala, es-suidgi burgwebimarsunna? ¿Ibiga bemar ukudba, degi, boni-dummaganba burgwebimarsunna? Ar Bab-Jehová sogsad: ‘Dulemala Babilonia-e-reyba-ibsaosulidi deyob gumaloye.’
JER 27:14 ”Bab-Dummad-gayaburba-barsogmalad bega-sogmaladi, Babilonia-e-rey-sogedba be mer damaloye, we-dulemar melle be itomalo. Ar bega-ibmar-sogmaladi, yogasaar-gakansaar sunmakmalad.”
JER 27:15 Bab-Jehová soged: “An we-dulemar barmissulid. We-dulemar yogasaar-gakansaale an-nuggi sunmakdimalad. Unnila we-dulemar we-neggweburgi-an-be-onogega bega sunmaknanaid. Ar deyob bemar-burgwemalodo, bega-Bab-gayaburba-barsogmaladse-bakar, burgwemarmogodo.”
JER 27:16 Dule-irwa-Bab-Dummadse-gormaladga an sogsabalid, degi, bela dulamarga an weyob sogsabalid, Bab-Jehová weyob sogye: “Melle be Bab-Dummad-gayaburba-barsogmalad itomala. Bega-sogmaladi, ‘emisgwasaar gannar Bab-Dummadse-goled-neggi ibmar-ebulemalad Babilonia-yargi-bukwad seledanikoye,’ we-dulemar unnila binsa gakansamalad.
JER 27:17 Melle be we-dulemar itomala. Be dulagudigumalaga bur Babilonia-e-rey-sogedba be ibsamala. ¿Ar ibiga Jerusalén-neggweburde obeloledagosunna?
JER 27:18 ”Ar wemar Bab-Dummad-gayaburba-berbemalad-sunsogmaladile, deginbali, nue an ega sunmakdibalile, ani an Bab-Jehová-Bela-Gangued-Nika-Guedgi, anse ibmar egismardo. Anse egismardo, anse-goled-neggi-ibmar-bukwadi, reyneggi-ibmar-bukwadi, Jerusalénʼgi-ibmar-bukwadi, melle Babilonia-yarse seledega imakye.”
JER 27:19 Bab-Jehová-Bela-Gangued-Nikad soged: “Ar buar-sailamardina, dii-sied-sailamardina, dii-sied-abingaedsailamardina, degi, ibmar-bamalad-nuegan Jerusalén-neggweburgi-besmaladdina,
JER 27:20 Babilonia-Rey-Nabucodonosor sessurgusad. Deunni Nabucodonosor, Jerusalénʼgi Babiloniaʼse Joacim-machi-Judá-rey-Jeconías-sesgu, Judá-dulemar-nuga-nikamalad-sesgu, degi, Jerusalén-dulemar-sesbargu, we-ibmarmar sessulid.
JER 27:21 ”Ar Israel-dulemar-e-Bab-Dummad-Jehová-Bela-Gangued-Nikad, ese-goled-neggi-ibmar-besmaladgi, Judá-e-reyneggi-ibmar-besmaladgi, degi, Jerusalén-neggweburgi-ibmar-besmaladgi, weyob soged:
JER 27:22 ‘Bela we-ibmarmar-besmaladi Babilonia-yarse seledoed. Agine bukwa guoed. An gannar bemar-sedagoed-ibase, we-ibmarmar gannar geb an Jerusalén-neggweburse sedagoed.’ ”
JER 28:1 Deunni, birgabake-gaka-nii-walatargus Judá-Rey-Sedequías reyga megdagedgine, Azur-machi-Hananías Bab-Dummad-gayaburba-barsoged, Gabaón-neggweburgined, anga weyob Bab-Dummadse-goled-neggi, dulemar-abargi, degi, dule-irwa-Bab-Dummadse-gormalad-abargi sogded:
JER 28:2 —Weyobi Israel-dulemar-e-Bab-Dummad-Jehová sogye: ‘Babilonia-rey maiga-bemar-imakdidii an obelogoye.
JER 28:3 Birgabosega, Babilonia-rey-Nabucodonosor Bab-Dummadse-goled-neggi ibmarmar-bukwad-sesadi gannar an sedagoye.’
JER 28:4 Hananías anga sogdebalid: —Bab-Dummad-sogye, ‘Ani an Bab-Jehová-guedgi sogye: Joacim-machi-Judá-e-rey-Jeconías gannar wese-dagega an imakoye, degi, bela dule Judá-yalagi, Babiloniaʼse gales-selesgusmalad an gannar wese sedagoye.’
JER 28:5 Geb ani Jeremías bela Bab-Dummadse-goled-neggi-bukmalad-abargi, degi, dule-irwa-Bab-Dummadse-gormalad-abargi, Bab-Dummad-gayaburba-barsoged-Hananíasʼga an sogded:
JER 28:6 —¡Degir-nabir! Bitigi Bab-Jehová deyob imaksana gadin. Be-ibmar-sogsadba Bab-Jehová ibmar-imaksana gadin. Babilonia-yar-akar Bab-Dummadse-goled-neg-ibe ibmar-selesmalad gannar selenonikina yeerban, bela dule-gales-selesmalad gannar wese aibirismalana gadin.
JER 28:7 Degi-inigwele, an bega ibmar-sogoedi, dulemarga an ibmar-sogoedi, nue be itogo:
JER 28:8 Epennegwa anmar amba satedgine, Bab-Dummad-gayaburba-barsogmalad, bila-danikoedgi sunmaksamalad, ukud-dummad-naguoedgi sunmaksamalad. Deginbali, neggweburmargine, yalamargine, boni-dummagan-danikoedgi anmar-idu sunmaksamarbalid.
JER 28:9 ”Ar Bab-Dummad-gayaburba-barsoged-wargwen neg-akarguosurye-sogele, napiragwadba deyob gusale, agi daklenonidaed, we-dule, nue Bab-Dummad-gayaburba-barsoged-innikigwadi, Bab-Jehová-nuggi barmilealedi.”
JER 28:10 Geb agi, Bab-Dummad-gayaburba-barsoged-Hananías, an-dukarba-suar-atinnar-naid unnusad, geb bichisad.
JER 28:11 Agine, Hananías bela dulemar-bukwad-abargi sogded: —Bab-Jehová weyob soged: ‘Igi we-suar bichisa, deyobi, birgabose Babilonia-e-rey-gangued an obelogoed. Dulemar bar e-maiga guosulid.’ Hananías deyob-sogsagu, Jeremías e-iduar nadsunnad.
JER 28:12 Hananías, Jeremías-dukarba suar-atinnar-naid-bichisad-ibagan-sorba, Bab-Jehová, Jeremíasʼga weyob sognonikid:
JER 28:13 “Be nae, Hananíasʼga be sogna, weyob Bab-Jehová sogye: ‘Suar-an-dukarba-naid be bichisadi unnila wedi sualad, degi-inigwele, we-anale, esgoro-suar an imakoed.
JER 28:14 Ar Israel-dulemar-e-Bab-Dummad-Jehová Bela-Gangued-Nikad weyob soged: Bela we-dulemargi esgoro-aidikid-dukarba-nagueyobi Babilonia-e-reyga-mailegega an imakoed. A-dulemala, a-reyba ebipiledii gumaloed. Bela ibmar-durganse-bakar, Babilonia-e-reyba ibsamalaga an imakoed.’ ”
JER 28:15 Geb degi, Jeremías, Hananíasʼga sogded: —Hananías, nue be an-itogo. Bab-Jehová dulemarse be-barmiarsulid. Emide, be we-dulemar gakangi-bensuliguega be imaksad.
JER 28:16 A-ulale, Bab-Jehová weyob soged: ‘Be we-napaneggi an be-osulogoed. Ar be angi-gwisguar dulemarga sunmaksad, degisoggu, we-birgagi be burgoed.’
JER 28:17 Deyobi gusad, a-birga-nii-walagugledgi (7) Hananías burgwenonikid.
JER 29:1 We-garda, Bab-Dummad-gayaburba-barsoged-Jeremías, Jerusalén-neggwebur-akale girmar-dummagan-gales-selesmaladga barmisad. Degi, dule-irwa-Bab-Dummadse-gormaladga, Bab-Dummad-gayaburba-barsogmaladga, degine, bela dulemar Nabucodonosorʼse Jerusalénʼgi-gales Babiloniaʼse-selesmaladga garda barmisad.
JER 29:2 Deunni, Rey-Jeconías, e-nanmala, ega-arbamaladmala, Judá-e-dummaganmala, Jerusalén-e-dummaganmala, Jerusalénʼgi-gales selesgusmalad-sorba, we-garda barmilesad. Degi, Rey-Jeconías, dule-ibmar-sobedgi-arbamaladmala, degi, dule-esgoro-sobedgi-arbamaladmala, Jerusalénʼgi-gales selesgusmalad-sorbali, we-garda barmilesad.
JER 29:3 Deunni, Judá-Rey-Sedequías, Babilonia-Rey-Nabucodonosorʼse Safán-machi-Elasa, Hilcías-machi-Gemaríasʼbo barmisgu, Jeremías eba garda barmismogad. Gardagi weyob sognaid:
JER 29:4 Weyobi, Israel-dulemar-e-Bab-Dummad-Jehová Bela-Gangued-Nikad, Jerusalén-akar gales Babiloniaʼse-bemar-sealid soged:
JER 29:5 “Neg be sobmalo, agi be megmalo. Ibmar be digmalo, a-e-san be gunmalo.
JER 29:6 Abirgin be nikumalo, be mimmigan nikumalo. Be-mimmiganga abirgin be ukmalo, adi, bega wagan-urbemaloed. Gatik Babilonia-yalagi dula-mergumai be imakmalo, melle dula-iregega be imakmalo.
JER 29:7 ”A-ukinbali, bemar-bukwad-yargi be nue-arbamalo, ega be anse-gormalo. Ar Babilonia-yargi nueganbi ibmar-nadapile, bemarga ibmar-nueganbi namarmogoed.”
JER 29:8 Israel-dulemar-e-Bab-Dummad-Jehová Bela-Gangued-Nikad soged: “Melle be Bab-gayaburba-barsogmaladse binsaed-galemalo, melle be nermar bemar-abargi-gudimaladse yamolemalo. Melle be e-gabdaked itomalo.”
JER 29:9 Bab-Jehová soged: “Ar bemarga an-nuggi-sunmakye-sogmaladi, binsa gakansadimalad. Ar we-dulemar gwen an-nuggi-sunmakega an barmissulid.”
JER 29:10 Ar weyob Bab-Jehová soged: “Bemar Babilonia-yargi-gudiid birga-dulapaa-gakambe-gunonikile (70), geb an bemarse ataknonikoed. An ibmar-imakoye-sogsadba an bemarga ibmar imakoed. Gannar Jerusalénʼse an bemar-sedagoed.”
JER 29:11 Bab-Jehová soged: “An bemargi-ibmar-imakbied an nue wisid, ibu an imakbie. An bemarga bonigan-ukedgi binsasulid, bemar nueganbi-garmakdii-imakedgi an binsaed. Yoedse be yeer-itodii-gudigumalaga an binsaed.
JER 29:12 ”Geb agine, bemar an-nug-odummodmaloed, be anse-wilesakwaa-gornonimaloedi, an bemar-itogoed.
JER 29:13 Ar bemar bela-belad gwagegi an-amimalale, be an-amimaloed.”
JER 29:14 Bab-Jehová soged: “Be an-amimalaga an be-imakmaloed. Bemar-gales-selesmaladi, gannar an bemar-sedagoed. Bela dulemar anse yar-baid-baidse-selesgusmalad an onogoed. Bemar oaisakiles-bukwadgi an bemar-onogoed. Bia be bukwa gales-selesgusmala, ase gannar an bemar-sedagoed.” Bab-Jehová soged.
JER 29:15 “Ar bemar weyob sokalile: ‘Bab-Jehová, Babiloniaʼgi anmarga e-gayaburba-barsogmalad barmiarmoye.’ ”
JER 29:16 Degi-inigwele, Bab-Jehová David-ologanagi-Rey-siidnik soged, bela dulemar we-neggweburgi-bukmaladnik sogbalid. Deginbali, bemar-gwenadgan bemarba gales-selearsurmaladnik soged.
JER 29:17 Bab-Jehová Bela-Gangued-Nikad weyob soged: “We-dulemar-besmaladgine, bila-onoleged an egi barmidoed, ukud-dummad an egi nasikoed, boni-dummagan an egi barmidoed. Higo-san-nunumaladyob an imakoed. Higo-san ise-nunudba geg-gulledaedyob an imakoed.
JER 29:18 ”We-dulemargi bilamar an egi barmimai imakoed, degi, ukud-dummadi, boni-dummagana an egi barmimai imakoed. Bela we-napaneggi-yalamar-bukwad-ogwayega an imakoed. Degine, an bia oaisakioe, agi be deyob-guoedba dulemar-ogwayega an wemar-imakoed. Degi, ukabsalegega, ima-daklegega, egi-dodolegegala, an imakoed.”
JER 29:19 Bab-Jehová soged: “Bemar an-gayaburba itossurmalad, gwen eba be ibsassurmalad. An bemarga, an-gayaburba-barsogmaladba gayaburba-barmimai-barmimai gusanad.
JER 29:20 ”Emisgwa bemar-gales-selesgusmalad, we-yalagi-mamaimalad, Jerusalénʼgi Babilonia-yarse an bemar-sealid, be an-sogedba damar.”
JER 29:21 Israel-dulemar-e-Bab-Dummad-Jehová Bela-Gangued-Nikad weyob Colaías-machi-Acabʼnik soged, degi, Maasías-machi-Sedequíasʼnik sogbalid. We-dulemar bemarga an-nuggi yogasaar-gakansaar sunmakdimalad: “We-dulemar an Babilonia-Rey-Nabucodonosorʼga urmakoed, a-dule, bemar-wagab we-dulemar-oburgoed.
JER 29:22 ”Degisoggu, Judá-dulemar gales Babiloniaʼse-selesmalad emar-ukabsamaloed, weyob sogdemaloed: ‘Bab-Jehová igi Sedequías Acab-ebo, Rey-Nabucodonosorʼse soogi ogumaklegega imaksa, deyobi, be-imakmogana gadin.’ ”
JER 29:23 Bab-Jehová soged: “Ar we-dulemar, Israel-yargi ibmar-isgana imaksamalad: Galagwensuli emar-omeganba negsichigi nanasmalad, gakansaale an-nuggi sunmaksamarbalid. Bipisaale an ega gwen ibmar-sogsasulid sogsamalad. We-ibmala an bela wisid, ani an we-ibmar daksadid.”
JER 29:24 Bab-Jehová soged: “Jeremías, Nehelam-machi-Semaíasʼga be sogmogo,
JER 29:25 weyob Israel-dulemar-e-Bab-Dummad-Jehová Bela-Gangued-Nikad sogye: ‘Bee be, be-nuggine, bela dulemar Jerusalénʼgi-bukmaladse be garda barmisye. Maasías-machi-dule-irwa-Bab-Dummadse-goled-Sofoníasʼse, degi, bela dule-irwa-Bab-Dummadse-gormaladse be garda barmisye, ega be sogoed. We-gardagi weyob soglenaiye:
JER 29:26 Sofoníasʼye, Bab-Jehová, ese-goled-neggi neg-dakega, dule-irwa-Bab-Dummadse-goled-Joiada-muchub be-onug-imaksaye. Deginbali, Semaías be sogsibalid, dule yogasaar Bab-Dummad-gayaburba-barsogedye na gordiile, esgaryaba be odogoye, esgoro-dubgi be edinbaloye.
JER 29:27 ” ’De-ukine, gardagi be sogbalid, ¿ibiga wede Anatotʼgined-Jeremías be gasurmala? Emide, bemar-abargi Bab-Dummad-gayaburba-barsogedyob gudiid.
JER 29:28 Emide, Jeremías we-Babilonia-yarse anmarga garda barmialid, gardagi weyob sognaid: Bemar gales-bukwadi undar-birgaba-bukwa gumaloye. Degisoggu, be neg sobmaloye, agi be megmaloye, ibmar be digmaloye, a-e-san be gunmaloye anmarga gardagi sognaid.’ ”
JER 29:29 Dule-irwa-Bab-Dummadse-goled-Sofonías, Jeremíasʼga we-garda absosad.
JER 29:30 Agine, Jeremíasʼse Bab-Jehová-gayaburba nonikid, ega weyob sognonikid:
JER 29:31 “Babiloniaʼgi dulemar-galesbukmaladga gayaburba be barmido. Weyob be sogo, Bab-Jehová, Nehelam-machi-Semaías-annik weyob sogye: ‘Semaías bemarga yogasaar-gakansaar gayaburba sogsad. Gwen we-gayaburba an barmissulid. Bemar-binsaed-gaega be-imaksamalad.’
JER 29:32 ”Ani an Bab-Jehová, an soged: We-dule Nehelam-machi-Semaías an sabsur-odurdakoed, degine, e-wagan an sabsur-odurdakbaloed. Ar dulemar-angi-banguega imaksad. Bipisaale, e-neg-yaginmaladi, dula-gudii guosulid, adi, melle an-ibmar-nuegan-imakoedgi an-dulamarga bar sunmakegar.”
JER 30:1 Bab-Jehová Jeremíasʼga sognonikid.
JER 30:2 “Ani Israel-dulemar e-Bab-Dummad-Jehová soged: An bela bega ibmar-sogsad gardagi be narmako.
JER 30:3 Ar ibagan danikid, an-dula-Israel-dorgan, degi, an-dula-Judá-dorgan gales-bukmalad gannar an wese sedagoed. An e-dadganga-yala-uksadse an sedagoed, a-yalagi na yeer-itobukwa gumaloed.”
JER 30:4 Bab-Jehová Jeremíasʼga Israel-dulemargi sunmaksad, degi, Judá-dulemargi sunmaksad.
JER 30:5 Weyobi Bab-Jehová soged: “Dule dobedba binnasuli-gorbukwa itolesad, gwayale-gwayale oimakbukwa itolesad, neg-bogidikid itolesulid.
JER 30:6 Yamo be dakena, ese be egisena, machergan, omeganyobi muu-neggi nagusogeye. Degite, ¿ibiga machergana, siamar-muuneggi-nagueyobi, musiragi alamaknanai an daksunna? ¿Ar ibiga e-wagarmar bela sipuu daklesunna?
JER 30:7 ¡Duledar-wiles! Ibagan-bulegan, ibagan-weyobid-dakledisulid omos. Jacob-dulemarga, suli-suli-itoged-ibaga guoed, degi-inigwele, we-ibagan-bulegangi ollorgumaloed.”
JER 30:8 Bab-Jehová-Bela-Gangued-Nikad soged: “An-dulamar mailediidgi an onogoed, atinnaryob-ebipilediid an esikoed. Dulemar-baigan-e-maiga bar guosurmalad.
JER 30:9 Unnila bemar be-Bab-Dummad-Jehováʼsebi, be gordii gumaloed. Be-e-reyga be arbadii gumaloed. Rey, Davidʼyobid an bemarga barmidagoed.”
JER 30:10 Bab-Jehová soged: “An-dula-Jacob-wagan, melle be gwayemar. An-dula-Israel-wagan, melle be dobee itomar. Jacob-wagan, ar an we-yargi be-onogoed, ar be-wagan-Babiloniaʼse-gales-selesmalad an onogoed. Gannar be bogidik-gudii guoed. Dobedsuli be garmakdii guoed, dulemar bar be-ogwayosurmalad.”
JER 30:11 Bab-Jehová soged: “An be-bendakega be-yalaba gwichid. Bia an be-oaisakismala, a-yarmala an bela-naitinagase obelogoed. Degi-inigwele, bemardi an be-obelogosulid, unnila igar-innikigwadba an sabsur-bemar-odurdakoed, an bemar-odurdaksuli an guosulid, an bemar-odurdakedsegad.”
JER 30:12 Bab-Jehová weyob soged: “Be-boni-amisad geg nudakleged, be-boni-yaa-siidga bendakleged-igar sulid.
JER 30:13 Bega-igar-nudakega dule-be-ulagwisgued sated, ar be-boniga bendakleged-igar sulid, ar be-boni-nikadga nugued-igar sated.
JER 30:14 Bela bebo-galagwensur-nanasmalad be-iesmalad, bar bemar-amiedgi binsasurmalad. Be, dummad-ibmar-isgana-imaksad-ulale, degi, be, dummad-isgusad-ulale, an be-sarsosad, degi, a-ulale, an be-odurdaksad. Igi dule-isgana dule-sabsur-imakdamalayob an bemar-imaksad.
JER 30:15 ¿Ibiga nunmakedba be binnasuli gole? Ar be-bonide gege-nudakleged. Be, dummad-ibmar-isgana-imaksad-ulale, degi, be dummad-isgusad-ulale, an weyobi bemar-imaksad.
JER 30:16 ”Bela be-wiomaladi, bela wiolemarmogoed, bela be-isdarmalad gales-seledmaloed. Begi-dii-dii-annamaladi, egi dii-dii annalemarmogoed, bela dulemar-bei-ibmar-sumaladi, bela ei ibmar sulemarmogoed.
JER 30:17 Gannarse an be-onudakoed, be-boni-amisadi an bega osulogoed. Ar be-isdarmalad sogmalale, Sión-yala oballessiiye, dule bar Sión-yalagi binsasurmarye. Deyob sokarmalar, gwen akarsulid.”
JER 30:18 Bab-Jehová weyob soged: “Jacob-wagan-gales-bukmalad gannar an sedagoed, Jacob-wagan an nue-wiledakoed. Neggweburmar gannar e-ambikusadgi ambikuoed, reyneg gannar iduar-sii gusadgi sigoed.
JER 30:19 Neg-galimbabali, dog-nuedgi-namakleged itoledagoed, degi, weligwaledba binnasuli-oimake itoledagoed. Be-anagan an bega omelomai imakoed, bega ichegumai guosulid. Be-nug-ogannodii an imakoed, mesagwar-imakledii be guosurmalad.
JER 30:20 Be-mimmigana, idualedyobi gumaloed, an-asabinni gannarse-bukwa gumaloed. Ani an, bela dule-mesagwar-be-imakmalad obelogoed.”
JER 30:21 Bab-Jehová soged: “Bemar-abargi, bemar-iduged nodagoed, a-dulegine, bemarga-negseed danikoed. An-walikaa-guega an imakoed, anba gudii guoed. Degite, ¿doa an-walikaa anse-dagega guakwasunna?
JER 30:22 Bemar anse alile, be an-dulaga gumaloed, ani an, bemar-Bab-Dummadga gumogoed.
JER 30:23 ”An-urwedi burwa-dummad-goleyob gued. Burwa-bipirmakaledyobi gwichigualid, dule-ibmar-isgana-imakmaladgi, gwichigunonikoed.
JER 30:24 An-urwedi gwen-bogguosulid, bela an-ibmar-abemaid-imakedse, an-urwed bogguoed. Geb bela we-ibmarmar-gusadgi, be magar itononimaloed.”
JER 31:1 Bab-Jehová weyob soged: “A-ibagangine, ani an bela Israel-dulemar-e-Bab-Dummadga guoed, Israel-dulemala an-dulaga gumarmogoed.”
JER 31:2 Bab-Jehová weyob soged: “Es-suidgi-burgwissurmaladi, nega-dulesulidganba obunnoged-aminadapmargu, egi-nued an binsasad.”
JER 31:3 Bab-Jehová anmarse dikasurgus magarosad, anmarga weyob sogsad: “Gusgu degisadegu an be-sabgudanikid, a-ulale, amba nue-wile an be-dakdiid.
JER 31:4 Israel-dulemar, gannar an be-urbemaloed. Gannar neggweburga an be-imakoed. Gannale gar-pandereta be suoed, weligwaledba be dodonai guoed.
JER 31:5 Gannar Samaria-yala-mullugangi, uvaʼmar be nasikmaloed. Dulemar uva-digmaloedi, e-uvaʼgi yeer-itodii gumaloed.
JER 31:6 Ibagwengine, dule-nakulemaladi, binnasuli Efraín-yala-mulluganba weyob gormakgwichi gumaloed: ‘Be dagmar. Sión-yalase anmar nakwenamar, anmar-Bab-Dummad-Jehová-yalase anmar namar.’ ”
JER 31:7 Weyob Bab-Jehová soged: “Weligwaledba be Jacob-wagan-nuggi namakmar, yeer-itogedgi neggwebur-biriginedga be gormakmar. Bab-Dummad-nug-odummoleged-itolegega be imakmar, weyob be gormar: ‘Bab-Jehová, be-dulamar be bendake, Israel-dulemar-napi-besad be bendake.’
JER 31:8 Bemar dad-nakwed-argan-sapiledsik-bukmaladi ani an bemar sedagoed. Bela napneg-ugakaase be bukmaladi, gannar danar wegi an bemar-urbemaloed. ¡Bela-belad-bur-ichesuli gannar nonimaloed! Amar-abargi, dala-satemalad danimarmogoed. Muya-muya-nanamaladi, siamar-gurgin-nikamaladi, degine, muugan-sikwigamaladi, danimarmogoed.
JER 31:9 Boed-abalagi danimaloed. Igar-nuedba sedaniki an saoed, igar-olloo-maidba dii-maidse an bemar-idudani guoed, a-igarbali, be gowarmaknadapi guosurmalad. Ani an, Israel-e-Babad, an-machi-sailanaginedi, Efraínʼad.
JER 31:10 ”Dulemar-yar-baid-baidgi-bukmalad, Bab-Jehová-sunmaked be itomar. Neggwebur-dikasuli-bukmaladga be weyob gayaburba sogmar: ‘Israel-dulemar-oaisakisadi, a-dule gannar Israel-dulemar danar-oambikubaloed, igi sibad-wawaad-edarbed na e-sibad-akwe, deyobi, e-dulamar-akwemogoed.’
JER 31:11 Ar Bab-Jehová Jacob-wagan-abonosad, dule-gandikidgi ollor-imaksad.
JER 31:12 Nonimaloed, Sión-yala-birse weligwar namaknonimaloed, Bab-Jehová-ega-ibmar-nuegan-ukedgi yeer-itomaloed. Bab-Dummad ega we-ibmar ukoed: Orosgi-dakleged-trigo-nugad, vino-binid, olivo-gwallu, sibad-wawaadmar, moli-bebe-nikmalad, ega ukoed. Nainu-senigwad-nue-egi-arbalediidyob gumaloed, bar abgan-galagan itogosurmalad.
JER 31:13 Weligwaledba yagana gwirdemaloed, sapingana, weligwaledba serganmala gwirdemarmogoed. E-naibi-itodimalad bar nunmake itogosurmalad, gwagegi-baisur-itomalaga an imakoed. E-nunmak-itomalad, yeer-itogega an saoed.”
JER 31:14 Bab-Jehová soged: “Dule-irwa-anse-gormaladga ise-obinagwar ibmar an ukoed, an-ibmar-nuegangi an-dulamar yeer-itogoed.”
JER 31:15 Weyob Bab-Jehová soged: “Dulemar Ramáʼgi binnasuli-oimake itoleged, dulemar ise-boale, degi, nunmakedba-bukib-binsae itoleged. Wede Raquel, e-mimmiganga bonaid, dule-e-gwage-gadi-gadi-imaked abesulid, e-mimmigana bela ei girgusad.”
JER 31:16 Weyob Bab-Jehová soged: “Raquel, melle bar be boe, be-boed be bargae, ganna be sae. Ar be-wile-itogedi, bega ibmar-nuedga guoed. Be-mimmigan, e-isdarmalad-yargi nonikoed.”
JER 31:17 Bab-Jehová soged: “Yoedse bega ibmar-nueganbi guo-dakleged, be-mimmigana gannale e-yalase nonimaloed.
JER 31:18 ”Efraín-dulemar weyob binnasuli-ogormake an itosad: ‘Sabsur-be-an-imaksad, moli-bebe-nikad-bipi binnasur-gunaidaedyob an gudinad, emide be an-odurdaksad an nued-itosad. Gannar bese-dagega be an-sae, adi, gannar an beba gudioed. Ar bee be an-Bab-Dummad-Jehová gued.
JER 31:19 An begi bangusad, degi-inigwele, an magar-itosgua, bukib an binsasad, binasgar dataa dukin an imaksad. Bingedar an itoged, mesagwar an itoged, sapingwa-akar an isgudaniguad.’ ”
JER 31:20 Bab-Jehová soged: “¿Ar Efraín an-Machi-sabed-sunnadsursi? ¿Bur Efraínʼbina an nue-itosursi? Gandikidba an ega ibmar-sokalile, an ebinsaardaed. Efraín bur bela-belad an-gwage-ebudaed, we bur an nue-wiledaked.
JER 31:21 ”Israel-dulemar, igarba wilubgan be nasikmar, bia be nasmala, agine be-gannar be nasikmar, igargi nue be atakmalo. Israel-dulemar-yeerdaklegedi, gannar be dagmala, be-neggweburse gannar be dagmala.
JER 31:22 Bunagwa-uayasulidaedi, ¿ar sanagwadse be yoggus-gudiguoye be soge? Bab-Jehová, ibmar-gwapid we-napneggi imaksad. Ome sui-ebirdii guoed.”
JER 31:23 Israel-dulemar-Bab-Dummad-Jehová Bela-Gangued-Nikadi soged: “Judá-dulemar gannar-we-yalase an senonikile, Judá-yalagi, degi, e-neggweburmargi weyob gannar sogdamarbaloed: ‘Yala-islidikid, igar-innikigwadba-ibmar-imakleged-neg, Bab-Jehová begi nued binsasun.’
JER 31:24 ”Agine Judá-dulemar ambikumaloed, bela dule sapurgi-arbamalad, degi, moli-edarbemalad ambikumaloed.
JER 31:25 Dule uku-uku-itomaladi, an ogoboed. Dule ukumaada-itomaladi, masgi an ogunnoed.”
JER 31:26 Ani Jeremías, nue-gabmai, an ataas naded. Ibiyobi, negburgan-daksadi an nued-daksa.
JER 31:27 Bab-Jehová weyob soged: “Ibagan-dani, Israel-yalagine, degi, Judáʼgine dulemar-bukidar-ambikuega an imakoed, degi, ibmar-durgan bukidar-merguega an sabaloed.”
JER 31:28 Bab-Jehová soged: “Igi an bemarbina bemar-obelogega, bemar-wiogega, sabsur-bemar-imakega, degi, bemargi-gwichiguega, degine, bemargi bonigan-barmidagega an ibmar-imaksagusa, deyobi, an bemarbina bemar-urbega, degine, bemarga neggweburmar-sobega ibmar-imakdii gubaloed.
JER 31:29 A-ibagangine bar soglegosulid: ‘Babgan uva-soled guchaye, a-ulale, e-mimmigan nugar-iii-naddaye, bar soglegosulid.’
JER 31:30 ”Emisgindi, bar deyob soglegosulid. Dule uva-soled-guchale, na-ee nugar-iii naoed. Wegisundo, na wala-walagwena e-isguedba burgwemaloed.”
JER 31:31 Bab-Jehová weyob soged: “Israel-dulemarbo, degi, Judá-dulemarbo an igar-binid-mesoed-ibagan dani.
JER 31:32 E-dadganbo-igar-mesisadyobi, an igar mesosulid. Deunni, Egipto-yalagi an e-dadgan-onosgu, anbo-igar mesisgusad. Angadga gusmar-inigwele, anbo-igar-mesisad bichismalad.”
JER 31:33 Bab-Jehová soged: “A-ibagangine, Israel-dulemar-ebo an weyob igar mesoed: E-gwage-ulubgi an-igar an ega nasikoed, e-binsaedgi an-igar an ega narmakoed. Ani an e-Bab-Dummadga guoed, emar an-dulaga gumarmogoed.
JER 31:34 Bar dule, dule-baid odurdakosulid, degi, bar dule, e-gwenad odurdakosulid, ega weyob bar sogosulid: ‘Bab-Jehová be amimala.’ Ar bela burwiganase, degi, serganse-bakale, an-amimaloed. Ar e-isgumaladi, isgussulidyob an dakoed, bipisaale bar an e-isgusadgi binsaosulid.”
JER 31:35 Bab-Jehová, Bab-Jehová-Bela-Gangued-Nikad, dad-ibeler-ibgi-gaega-nasiksadi, degi, nii, niisgwamar, mutik-gaega-imaksadi, degine, demar-uurmakega-osukamakedi, weyob soged:
JER 31:36 “We-igarmar-mamaidgi anga gwatirnonikile, a-ibagine, Israel-dulemar bar an-dulamarga gussuliled.”
JER 31:37 Bab-Jehová soged: “Dule, nibneg-matugued wilubsasale, degi, napneg-urba napneg-sailagan-mamaid wisgusale, ibmar-isgana-imaksamalad-ulale, an Israel-dulemar obachaled.”
JER 31:38 Bab-Jehová weyob soged: “An-neggwebur gannar soblegoed-ibagan dani. Nakuleged-galu-Hananeelʼye-nugad-akar yawagak-Ánguloʼye-nugadse neggwebur ambikuoed.
JER 31:39 We-akale, ibmar-wilubsaed-dub-baksa, Gareb-yar-mulluse naguoed. Geb Garebʼgi-baksa Goa-neggweburse aibiridoed.
JER 31:40 Bela neba-naidgi bia dulemar-mui-diglege, degi, burumar-milege bela angadga nugsalegoed. Degine, bela-nainumarnanaid-akale, Cedrón-dian-maidse, degine, dad-nakwedsik molimar-yawagak-gwichidse angadga nugsalegoed. Bipisaale, we-neggwebur bar berguosulid, degi, bar bibisgosulid. Degisadegu sii guoed.”
JER 32:1 Sedequías birgambegus (10) Judá-reyga-maidgi, Bab-Jehová, Jeremíasʼga sunmaknonikid. A-ibagangine, deunni, Nabucodonosor, birgambe-gakabaabakgus (18) Babilonia-reyga maimogadgined.
JER 32:2 A-ibagangine, Babilonia-rey-sordamar, deun Jerusalén-neggwebur-ebilis bukwad. Degi, Bab-Dummad-gayaburba-barsoged-Jeremías reyneg-imbagi esgaryargi gales-mellesimogad.
JER 32:3 Ar deunni, Judá-Rey-Sedequías, esgaryaba Jeremías-meted. Ar Jeremíasʼga weyob soged: “¿Ibiga be yogasaar Bab-Dummad-gayaburba-barsogdii? Emide, be weyob sogdiid, Bab-Dummad weyob-sogye: ‘Babilonia-reyga an we-neggwebur urmakoye, Babilonia-rey we-neggwebur suoye,
JER 32:4 Judá-Rey-Sedequías, Babilonia-dulemargi wakinnosurye, be sogdiid. Babilonia-reyga urmaklegoye, degine, ande Babilonia-reybo asabin-asabin gwisgumaloye be sogdibalid.’
JER 32:5 ”Degi, weyob be sogdibalid, Bab-Jehová weyob-sogye: ‘Nabucodonosor, Babiloniaʼse Sedequías-sedoye. Geb an daknaoedse agi mai guoye.’ Deginbali, be sogdibalid: ‘Anmarde Babilonia-dulemarbo bila-onogele, anmarde galakumaloye, gwen egi nakosurmarye be sogdiid.’ ”
JER 32:6 Geb Jeremías, Rey-Sedequías-abin sogded: “Bab-Jehová-gayaburba anse nonikid,
JER 32:7 weyob anga sognonikid: ‘Be-gilor-Salum-machi-Hanameel bese dani. Bega sogdanikid, Anatotʼgi-an-nainu-naid anse bakye. Ar bedi nabir sunna we-nainu bakeddeeye, ar bedi an-gwenad-walikagwadiddeeye bega sogdanikid.’
JER 32:8 ”Degidgine, Bab-Jehová anga-ibmar-sogsadba, an-gilor-machi-Hanameel esgarya-neg-imbagi anse nonikid, anga weyob sognonikid: ‘Benjamín-yalagi, Anatot-neggweburgi an-nainu-naid be anse bake. Ar bedi bur an-gwenad-walikagwadsoggu, sunna be anse nabir baked.’ Geb an magar itosad, wede Bab-Jehová we-ibmar sognai.
JER 32:9 Geb degi, an-mesad-Hanameelʼse Anatotʼgi-nainunaid an baksasunnad. Mani-sibu-gwaambe-gakagugle-gargegu (17) an ese baksad.
JER 32:10 ”Geb an-barsogmaloedse an gochad, an amar-asabinni garda narmaksad, gardagi goo-burba mesisad, degi, an garda edichad, geb an ega nainu-mani uksabalid.
JER 32:11 A-sorbali, we-garda-matabo-egi-onolesadi an susad. A-gardamargine, bela nainu-baklesad-igarmar soglenaid. A-garda matagwen nuesaar-edilesad, baiddina edilessulid.
JER 32:12 ”Geb agine, an-gilor-machi-Hanameel-wagaba, an Nerías-machi-Barucʼga nainu-baklesad-garda an uksad. Barucʼde Maasías-wagwad. Degi, dulemar goo-burba-mesismarmogad-wagab, degine, bela Judíoʼmar-neg-imbagi-bukmalad-wagaba, Barucʼga garda an uksad.
JER 32:13 Bela amar-wagab an Barucʼga weyob igar-uksad:
JER 32:14 ‘Weyob Israel-dulemar-e-Bab-Dummad-Jehová-Bela-Gangued-Nikad soged: We-garda-atiar-naid be sue, degi, garda-atiarsulid be subar. Napsagi-ibmar-sobaled-yaba be sabogo, adi, undar seledii guegar.’
JER 32:15 Ar Israel-dulemar-e-Bab-Dummad-Jehová-Bela-Gangued-Nikad weyob soged: ‘Bemar gannale we-yalagi negmar bakdemaloye, degi, nainumar, uva-nainumar be bakdemaloye soged.’
JER 32:16 ”Geb an Nerías-machi-Barucʼga nainu-baksad-garda-uksad-sorba, Bab-Jehováʼse an gochad, weyob an goted:
JER 32:17 ” ‘Bab-Dummad-Jehová, bedi be-ganguedba, be-gala-nikadba napneg be nasiksad, be nibneg obinnisad. Bipisaale, bega ibmar-geg-gued niksulid.
JER 32:18 Baba, bedi bela dulemarga be-sabgued be oyomaid. Bedi bela mimmigan e-babgan-isgusad-ular sabsur-odurdakbalid. ¡Bab-Dummad, ibibayobi bedi dule-dummad gue! ¡Ibibayobi, bedi gangued nika mai! ¡Bab-Jehová-Bela-Gangued-Nikadye be nugad!
JER 32:19 ” ’Be-ibmar-imakmaladi, igar-dummad gued, degi, be-arbamaladi doggus yeerdakleged. Bela dulemar-ibmar-imakedi be dakmaid, adi, na wala-walagwengi e-damaladba, e-ibmar-imakmaladba ega ibmar guegar.
JER 32:20 Bee be, Egipto-yalagi ibmar-gegerdaklemaladi, degi, ibmar-dakledisurmaladi be imaksad. Amba emi-ibasega Israel-yalagi, degi, bela napneg-naid-ugakaase be we-ibmarmar oyomaid. Degidbali, emi-ibagi be-nuga dummarbaa gued.
JER 32:21 ” ’Be, be-garganguedbali, be-dulamar be Egiptoʼgi-bukwa onosad. Be ibmar-dakledisurmalad-imakedbali, degi, ibmar-gegerdaklemalad-imakedbali, degine, dulemar-ogwayedbali be Israel-dulemar-onosad.
JER 32:22 Israel-dulemarga yala-gadi-sanmaked be uksad, igi be, e-dadganga sogsagusa, deyob be imaksad.
JER 32:23 A-yala susmargu, degi, ese dogsamargua, bar be-sogedba ibsassurmalad, Be-Igar-Maidba dassurmarbalid. Degine, ega be igar-uksadba gwen ibmar-imaksasurmarbalid. A-ulale, egi be bela we-bonigan barmialid.
JER 32:24 ” ’Emide, Jerusalénʼgi-gwichiguega we-yala-sulegega, bato Caldea-dulemar napa-arsanyob-sobnaid neggweburse modanigusad. Bila-onolemaladba, ukud-dummagan-naguedba, boni-dummagan-noedba we-neggwebur Babilonia-dulemarse berguoed. Bab-Jehová, bela be-ibmar-sogsamaladi, sogedba gunaid, be-sunnagwad be we-ibmarmar dakmaid.
JER 32:25 Bab-Dummad-Jehová, Jerusalén-neggwebur Babilonia-sordamarse-berguo-inigwele, bedi anga sogsad: Nainu be bako, mie-miegwad be imako, dulemar-be-dakbukwad-wagab be bakoye.’ ”
JER 32:26 Geb Bab-Jehová anga sogded:
JER 32:27 “Ani an, Bab-Jehová bela-dulemar-bukmalad-e-Bab-Dummad gued. ¿Ibmar-soggwenad anga geg gued nikasi? Suli, bela an ibmarmar imakedbiid.
JER 32:28 Degisoggu, ani Bab-Jehová, weyob soged: We-neggwebur Babilonia-Rey-Nabucodonosorʼga, degi, Caldea-dulemarga an urmakoed. Amar na we-neggwebur sumaloed.
JER 32:29 Babilonia-dulemar we-neggweburgi-gwisgumaloedi, we-neggwebur-yaba ubononimaloed, bela negmar-ogumakmaloed. Bia bab-dummad-Baalʼga negmar-uas-birgi ina-wawadikid-uksamala, a-negmar bela ogumaklegoed, degine, bia an-ourwega bab-dummad-baiganga vino-eosmala, a-neg bela ogumaklebaloed.”
JER 32:30 Bab-Jehová soged: “Ar Israel-dulemar, degi, Judá-dulemar, gebe-onoded-akale, ibmar-nuegan gwen imakdanisulid, ibmar-isganabi an-asabin imakdanikid. Israel-dulemar e-ibmar-isgana-imakedba an-ourwedanikidbiid.
JER 32:31 We-neggwebur bukusad-akale, emi-ibase, unnila an-ourwega gudiid, unnila sae-itogega an-imakdiid. A-ulale, an-asabin-bukwadi an obelogoed.
JER 32:32 ”Israel-dulemar, degi, Judá-dulemar, bela ibmar-isgana-imaksamalad-ular, an obelogoed: E-reymar, e-dummagan, ega dule-irwa-anse-gormalad, ega an-gayaburba-barsogmalad, degi, bela Judá-dulemar, degine, Jerusalén-dulemar, an obelogoed.
JER 32:33 We-dulemar an-idu wagar biir-imaksamalad. An gannar-gannar odurdaknaigus-inigwele, an-itossurmalad, e-odurdaked baisur-itosmalad.
JER 32:34 E-bab-dummagan-isdar-daklemaladi, anse-goled-neggi urbidgusmalad, degidbali, anse-goled-neg ichodmalad.
JER 32:35 ”Degi, Ben-Hinom-nebagi Baalʼga ibmar-ukleged-aila sobdegusmarbalid, adi, bab-dummad-Molocʼga e-mimmigan-ogumakar ukegar. We-ibmar isdar-daklemaladid, weyob ibmar-imakmaloye gwen an igar uksasulid, bipisaale, gwen an-binsaedgi nossulid. Degidbali, Judá-dulemar-isguega imakdemalad.”
JER 32:36 Israel-dulemar-e-Bab-Dummad-Jehová we-neggweburnik soged: “Bemar bila-onogedba, ukud-dummadba, degi, boniganba, Babilonia-e-reyse berguoye.
JER 32:37 Bela an-urwedba, an-sae-itogedba, degi, an-bela-belad-nabir-itosulidba neggwebur-akar-akar dulemar an oaisakisadi, danar an urboed. Degi, gannale we-yalase an sedagoed, adi, nabir nueganbi garmakdii gumalagar.
JER 32:38 Israel-dulemar an-dulaga guoed, Ani an, e-Bab-Dummadga gumogoed.
JER 32:39 ”E-binsamaladi, e-damaladmala, emarbi-binsaega an imakoed. Adi, nabir an-dobee-nanadii gumalagar, e-mimmiganga, degi, emarga ibmar-nuedga guoed.
JER 32:40 Israel-dulemarbogwa igar-degisadegu an mesoed. Weyob an igar-mesoed: Bipisaale, bar an Israel-dulemar iegosulid, egi nued an binsadii guoed. E-gwagegi angi-binsaed an nasikoed, adi, degidbali angi banguosurmalad.
JER 32:41 Israel-dulemarga an ibmar-saedgi an weligwar-itogoed. Napiragwadgine, degi, innikigwadgine an gannar neggweburga bemar-urboed.”
JER 32:42 Bab-Jehová weyob soged: “Igi an we-dulemargi we-boni-dummagan senoniki, deyobi, an-ega-ibmar-nuegan-imakoye-sogsad an-sunnagwad an egi imaknonikoed.
JER 32:43 Bemarde sogmalad: ‘We-yala unnila olloo-selenaiye, dulemar sateye, degi, ibmar-durgan satebarye, ar we-yalade Babilonia-dulemar susaddeeye.’ Emide, bemar deyob we-yar-annik-sogmar-inigwele, we-yalagine, napanegmar na be bakdemaloed.
JER 32:44 Ani Bab-Jehová soged: Benjamín-yalagi, Jerusalén-neggweburmar-dikarba, degi, Judá-neggweburmar-dikarba napanegmar baklegoed. Degine, yalaganba, nebamargi, degine, Neguev-yargi napanegmar bakmaloed. Manigi napanegmar baklegoed, gardagi goo-burbamar omeslegoed, dulemar-dakmaloed-asabin nuesaar garda edilegoed.”
JER 33:1 Amba Jeremías reyneg-imbagi esgaryagi-gales-mellesiidgi ilabogine Bab-Jehová-gayaburba ese nonibalid, ega weyob sognonikid:
JER 33:2 “Ani an Bab-Jehová, napneg-obinnisad, napneg-nasiksad, innikigwadba napneg-ilemaksad, degi, Bab-Jehováʼye-an-nugad, soged:
JER 33:3 ‘Anse be gole, ani an be-abinsaoed, igar-dummagan-mamaid an bega sogoed, degi, ibmar-dukuar-mamaid an bega odalogoed. We-ibmarmar amba be wissulid.’
JER 33:4 ”Ani an Israel-dulemar-Bab-Dummad-Jehová, we-neggwebur-negmar-annik soged, degi, Judá-reymar-neg-ayaroed-annik soged:
JER 33:5 ‘Babilonia-dulemar, neggweburgi gwichiguega danikid, degi, neggweburgi dule-muimar-enogega danikid. An-urwedgine, degi, an-sae-itogedgine, Jerusalén-neggwebur-idu wagar-biir an imaksad. Bela e-ibmar-isgana-imakmalad-ular, an ogilogoed.’
JER 33:6 ”Degi-inigwele, an bemar-bendakoed, degi, an bemar-nudakoed, degine, gannarse san-nued an bemar-imakoed. Yeer-bogidik-itodigumalaga, degi, dobedsuli-gudigumalaga an bemar-imakoed.
JER 33:7 Gannar Israel-dulemar, degi, Judá-dulemar galesbukmaladgi an sedagoed. Gannar iduale-bukwagusadyobi an urbebaloed.
JER 33:8 ”Angi-isgusmalad an ega swilidik saoed. Angi-gwisgusmalad, angi gwisgussulidyob an dakoed.
JER 33:9 Jerusalén-neggwebur weligwaledga anga guoed, degi, an-nug-ogannogega, degine, dulemar-neggwebur-akar-akar-bukwad-asabin an-nug-odummogega anga guoed. An Jerusalén-dulemarga ibmar-nuegan-saoedi, bela wisgumaloed, degi, an ega ibmar-nasgumai-imakoedi, bela wisgumarbaloed, degidbali, dobedba wawanmakdemaloed.”
JER 33:10 Bab-Jehová soged: “Bemar sogmalad: ‘We-yala unnila olloo-selenaiye, dulemar sateye, degi, ibmar-durgan satebarye. Judá-neggweburmar, degi, Jerusalén-neg-galimbamar ollo-ollo-mamaiye, dulemar-sateye, degine, ibmar-durgan surbarye.’ Emide, gannar agine dule-sunmaked itoledagoed.
JER 33:11 Ani an Bab-Jehová soged: Weligwaledba-binnasuli-goledi, yeer-itogedba binnasuli-goledi, degine, abirgin-nikuedgi-namaklegedi, gannar itoledagoed. Degi, dule an-itoged-negse anga ibmar-uknadapir weyob namaknadapi-gumaloedi, itolebaloed: ‘Bab-Jehová-Bela-Gangued-Nikadga dog-nuedye, be sogmar. Ar Bab-Jehová dule-nuedid, ar e-sabgued degisadeguad.’ Ani an, we-dulemar gales-bukwadgi gannar sedagoed. Idualedyobi gannarse an imakoed.”
JER 33:12 Weyob Bab-Jehová-Bela-Gangued-Nikad soged: “We-neggwebur bela bibichis-siid, neggweburgi dulemar sated, degi, ibmar-durgan satebalid. Degi-inigwele, bela we-neggweburmargi gagan-araramalad nikuoed, agine dule moli-edarbemalad, e-molimar-obunnogega imakoed.
JER 33:13 Ani an Bab-Jehová soged, wemar-neggweburmargi sibad-wawaadmar ebisnai gumaloed: Neggweburmar-yarmargi-bukmaladgi, nebagi-bukmaladgi, Neguev-yargi-bukmaladgi, Benjamín-yalagi-bukmaladgi, Jerusalén-neggwebur-dikarba-bukmaladgi, degine, Judá-neggweburmargi-bukmaladgi, sibad-wawaadmar-ebisnai gumaloed.
JER 33:14 ”Ani an Bab-Jehová soged: Ibagan nonikoed, Israel-dulemarga an ibmar-sogsadi, degi, Judá-dulemarga an ibmar-sogsadi, an ega sogedba imakoed.
JER 33:15 A-ibagan-mosale, a-ibagine, David-wagwa reyga-megega an imakoed. A-dule, yargi dulemarga-igar-nudakdii guoed, degi, igar-innikigwad-imakdii guoed.
JER 33:16 A-ibagangine, Judá-neggwebur nueganbi sii guoed, degi, Jerusalén-neggwebur dobsuli sii guoed. Bab-Jehová, anmarga igar-innikigwadgaguedye, bilegoed.”
JER 33:17 Aga Bab-Jehová weyob soged: “David-wagan, Israel-dulemar-e-reyga gusuli guosulid, nikagu guoed.
JER 33:18 Degi, dule-irwa-anse-gormalad-Leví-wagan gwen surguosurmarmogad. An-asabinni, anga-ibmar-uklegedi, anga-ibmar-gwag-ogumakar-uklegedi, degi, bane-bane anga-ibmar-ogumakar-uklegedi, ukdigu gumaloed.”
JER 33:19 Bab-Jehová-gayaburba Jeremíasʼse nonibalid, ega weyob sognonikid:
JER 33:20 “Ar bemar ibginedbo an-igar-mesisad be nabir bisgemalale, adi, melle neg-ibgined-naguega, degi, mutikidbo an igar mesisad be nabir bisgemarbalile, adi, melle mutikid-naguega,
JER 33:21 sunna nabir an-mai-Davidʼbo an-igar-maid be osulosmarbaliled. Adi, melle e-wagan e-sorba reyga megegar. Degine, sunna nabir deyopira be dule-irwa-anse-gormalad-Leví-wagan, degi, Leví-wagan-baigan anga-arbamaladi, be osulosmarbaliled.
JER 33:22 ”Ani an, an-mai-David-wagan omelogoed, degi, deyob an Leví-wagan anga-arbamaladi, an omelobaloed. Niisgwamar nibneggi-nanaid-mergueyobi, an saoed, degi, demar-gakaba ukub-naid-mergueyobi, an imakoed.”
JER 33:23 Jeremíasʼse Bab-Jehová-gayaburba nonikid, ega weyob sognonikid:
JER 33:24 “¿Ar be daksursi, dulemarde an-annik-sogmalad, ande yala-sogabo-susadi bela obachaye? A-ulale, wede isdar-an-dulamar-dakmalad, dulamar-bukwasuliyob dakmalad.
JER 33:25 Ani Bab-Jehová soged: An-sunnad an neg-ibginedbo-igar-mesissulina, degi, mutikidbo-igar-mesissulina, degine, nibneggad-igar-mamaid, napneggad-igar-mamaidi, an mesissurbalina,
JER 33:26 an Jacob-wagan obachanad, degi, an-mai-David-wagan an obachabalinad. Degine, David-wagan, Abraham-waganga, Isaac-waganga, degi, Jacob-waganga, dummadga-negsemaiguega an sussulinad. Emide, an Israel-dulemar gannar e-yarse an sedagoed, an-dulamar an ise-wile dakoed.”
JER 34:1 Deunni, Babilonia-rey-Nabucodonosor, bela-e-sordaganmala, degi, bela dulemar-eba-nanaimaladmala, degine, neggweburmar bela e-sogedba-selemamaidmala, Jerusalénʼgi, degi, neggweburmar-Jerusalén-nagaba-bukmaladgi gwichigunaigu, Bab-Jehová-gayaburba Jeremíasʼse nonikid. Ega weyob sognonikid:
JER 34:2 Israel-dulemar-e-Bab-Dummad-Jehová sogye: “Be nae, Judá-rey-Sedequíasʼga be sogna, ega be sogo, Bab-Jehová sogye: ‘Babilonia-reyga an we-neggwebur urmakoed, Babilonia-rey we-neggwebur ogumakoed.
JER 34:3 Rey-Sedequías, bedi, Babilonia-rey-e-ganguedgi wakinnosulid. E-sordamarse be galegoed, agine, e-reyse be-sedmaloed. Be-sunnagwad be rey-dakoed, be-asabin e-sunnad bega sunmakoed. Geb a-sorbali, be Babilonia-yalase seledoed.
JER 34:4 ” ’Degi-inigwele, Rey-Sedequías, an bega ibmar-sogoed nue be ito. Bab-Jehová weyob sogbalid: Napiragwadgi an bega soged, es-suidgi-ewarar be burgosulid,
JER 34:5 nuedgi be burgoed. Napira an bega soged, igi dulemala be-dadgan-reyga-megismaladga ina-wawadikid ogumaksamala, deyobi, be-burgoedgi bega dulemar ina-wawadikid ogumakmarmogoed. Degine, bega bukib-binsabukwa gumaloed. ¡Dummadye, bedi nue-nadsunye! bega sognanai gumaloed.’ ”
JER 34:6 Geb Bab-Dummad-gayaburba-barsoged-Jeremías bela Bab-Jehová ega ibmar-sogsadi, Judá-rey-Sedequíasʼga Jerusalén-neggweburgi sogsad.
JER 34:7 Deunni, Babilonia-rey-sordamar, Jerusalénʼgi gwichigunanaid, degi, Judá-e-neggwebur-Laquisʼgi, Judá-e-neggwebur-Azecaʼgi gwichigunanaid. We-Judá-e-neggweburmardega galu-matusulid-akwabiid nikamaladid, wemar napi-besmaladid.
JER 34:8 Rey-Sedequías bela Jerusalén-dulemarbo maiga-gudimalad-ollor-imakoye-igar-mesisad-sorbali, Jeremíasʼse Bab-Jehová-gayaburba nonigusad.
JER 34:9 Deunni, weyob igar mesilesad, Israel-dulemala, Hebreo-dule-ega-maiga-gudiid ollor-imakoye. Dule wargwensaale, Judío-dule e-maiga imakosurye.
JER 34:10 Bela dulemar, degi, bela dummagan nueganbi itosmalad. Geb bela e-maiga-gudimalad bar e-maiga imaksasurmalad, degisoggu, dule bar dule-maiga-gudigued gussulid.
JER 34:11 Degi-inigwele, gannar sorbali, igar-maid obelosmalad. Dulemar, gannar e-maiga-gudigusmalad e-maiga imakdemarbalid.
JER 34:12 Degidbali, Jeremíasʼse Bab-Jehová-gayaburba nonikid, ega weyob sognonikid:
JER 34:13 “Israel-dulemar-Bab-Dummad-Jehová soged: ‘Ani an, bemar-dadgan Egipto-yalagi-maiga-bukwadgi-onosgu, deunni, an ebo igar mesisad. An ega weyob igar uksad:
JER 34:14 Bela Hebreo-dulemar bemar-maiga-guega na manigi san-uksamalale, birgagugled-iliba (7) be ollorsamai imakmaloye. Bemarga birganergwa (6) arbadii gusale, birgagugledgi (7) be onomaloye. Degi-inigwele, be-dadgan gwen an-sogedba ibmar imaksasurmalad.
JER 34:15 ” ’Emide, bemar be-gwenadgan maiga-gudiidgi-ollorsaega be igar-mesismaladi, nueganbi an daksanad, an-ibmar-abemaidba be imaksamalanad. Deginbali, anse-goled-neggi bemar an-asabin anbo igar mesismarbalid.
JER 34:16 Emide, bemar gannar sikirmakdemalad, an-nuggi be dodoakwaa gudmalad. Emide be, be-maiga-gudiid be onosmaladi, gannar be-maiga be imakdemalad.’
JER 34:17 ”A-ulale, ani Bab-Jehová, an bemarga weyob soged: Bemar an-sogedba ibmar-imaksasurmalad, ar bemar, be-gwenadgan bega-maiga-gudiidgi gwen be onossurmalad. Degisoggu, ani an bemargine bila-onoleged barmidagoed, boni-dummagan, ukud-dummad-nagued an barmidagoed. Adi, bemargi-ibmar-guoedi, bela we-napneggi-dulemar-bukmalad-ogwayega guoed.
JER 34:18 ”Ar bemar an-Igar-Maidgi annasmarsoggu, degi, an-asabinni Igar-Mesisadgi-igarmar-sogmamaidba be ibsassurmarsoggu, moli-bebe-nikad-sapingwagwad-imaklesadyob an bemar imakoed. Deunni, bemar anbo-igar-mesnaigu, moli-bebe-nikad-sapingwagwad negabar-daasa imaksamalad, a-sanmar-abargi be nanasmalad, deyobi, an bemar-imakoed.
JER 34:19 ”Judá-dulemar-e-dummagana, Jerusalén-dulemar-e-dummagana, degi, reyneggi-dummaganga-bukmaladi, degine, dule-irwa-anse-gormaladi, degi, bela dulemar moli-bebe-nikad-e-san-negabar-marilesad-abargi nanasmaladi,
JER 34:20 be-isdarmaladga an bemar-ukoed, be-oburgwebi-gudimaladga an bemar-urmakoed. Degine, bemar-muimar mulamar-masga guoed, achu-sapurmar-masga guoed.
JER 34:21 ”Judá-Rey-Sedequías, degi, e-dummagana, amba deyob e-isdarmalad-e-oburgwebigudimaladse-galegega an imakmogoed. Wemar-galegoedi, Babilonia-rey-e-sordamarse galemaloed. Emisgwadina, Babilonia-sordamar wis bogigus bukwad.”
JER 34:22 Bab-Jehová soged: “Ani an, Babilonia-dulemar we-neggweburgi-gwichiguega an ega igar ukoed. Geb Babilonia-dulemar bemargi gwichigumaloed, bela neggwebur-susmalale, ogumakmaloed. Bela Judá-neggwebur swanga an nasikoed, dulemar-sate an imakoed.”
JER 35:1 Jeremías sogded: “Josías-machi-Judá-e-rey-Joacim-ibagangine, Bab-Jehová-gayaburba anse nonikid, weyob anga sognonikid:
JER 35:2 ‘Recab-waganse be nae, anse-goled-neg-ollogwadse be sedago, ega be vino dako.’ ”
JER 35:3 Degisoggu, dule Jeremíasʼye-nugmogad-machi-Jaazanías an sunaded. Jaazaníasʼde Habasinías-wagwad. Degi, bela e-mimmigan, e-gwenadgan, degine, bela Recab-waganmar an sunadsunnad.
JER 35:4 Geb agine, an, Bab-Jehováʼse-goled-negse amar-niarsunnad, bia Hanán-e-mimmigan-ambikued-neg-imba-nai, ase an sealid. Hanánʼde Igdalías-machid Bab-Dummadga arbaed-duled. We-neg-imbade dummagan-neg-imba-dikarba naid. We-nega, Salum-machi-Maasías-neg-imba-birgi-siid. Maasíasʼde yawagak dakedid.
JER 35:5 Geb degi, an Recab-waganga bormogi an vino osisad, geb an ega noggi ena-ena uksad, agine an ega sogded: “¡Gobmardeen!”
JER 35:6 Recab-wagan an-abin weyob sokarmalad: “Anmar wissur-vino gobmala, anmar-dad-dummad-Recab-machi-Jonadab anmarga weyob igar uksad: Melle bipisaale vino gobmaloye, degi, be-waganse-bakale, vino gobosurmarmoye anmarga sogsad.
JER 35:7 Deginbali, melle be negmar sobmarbaloye, melle be ibmar-gwagmar digmarbaloye, degi, melle be uvaʼmar-nasikmaloye, bipisaale melle be we-ibmarmar-nikumaloye anmarga sogsad. Unnila dordoneggi megmaloye anmarga sogsad, adi, be-yarsulidgi be undar-suitii gudii gumalagarye anmarga igar uksad.
JER 35:8 ”Ar anmar, anmar-dad-dummad-Recab-machi-Jonadab-sogedba ibmar imakdimalad. Degi, bipisaale anmar, vino gobdisulid, anmar-omeganse-bakale, degi, anmar-mimmiganse-bakale, vino gobdisurmalad.
JER 35:9 Deginbali, anmar, negmar sobdisurbalid, degine, anmar, uva-nainumar, degi, ibmar-digarmaladi nikudisurmarbalid.
JER 35:10 Unnila anmar dordonegmargi mamaimalad. Anmar-dad-dummad-Jonadab anmarga-igar-uksadba anmar nanadimalad.
JER 35:11 ”Ar Babilonia-rey-Nabucodonosor Judá-yalagi-dognonigu, anmar weyob sokarmalad: ‘Anmar Babilonia-sordamargi, Siria-sordamargi-wakinnega Jerusalén-neggweburse anmar nae. A-ulale, anmar Jerusalénʼgi mamaimalad.’ ”
JER 35:12 Geb degi, Bab-Jehová-gayaburba Jeremíasʼse nonikid ega weyob sognonikid:
JER 35:13 Israel-dulemar-e-Bab-Dummad-Jehová Bela-Gangued-Nikadi soged: “Jeremías, be nae, bela Judá-dulemarga, Jerusalén-dulemarga, be weyob sogna. ‘Bab-Jehová soged: ¿Ar bemarde Recab-wagan-daedyob geg ibmar durdakmarmosi? ¿Ar bemarde geg wis an-sogedba damarmosi?
JER 35:14 Recab-machi-Jonadab-wagan e-dad-ega-igar-uksadba ibmar imaksamalad, ega sogsad, melle vino gobmaloye. Emi-ibasega vino gobdisurmalad, ar e-dad-ega-igar-uksadba ibsadimalad. Ar bemardina, an bemarga gannar-gannar sunmakdi-inigwele, gwen be an-sogedba ibsadisurmalad.
JER 35:15 ” ’De-ukinbali, an bemarga an-maimar, an-gayaburba-barsogmalad barmimaiguad. Adi, bemarga sogmalagar: Be-igar-isganagi be bangumarye, be-damalad be ogwamarye, melle be, bab-dummaganba nanamarye. Adi, be nabir an bemarga yala-uksadgi, degi, an be-dadganga-yala-uksadgi be ambikumalagarye. Degi-inigwele, an bemarga-ibmar-soged be itossurmalad, an-sogedba be ibsassurmalad.
JER 35:16 Ar Recab-machi-Jonadab-wagandi, e-dad ega igar-uksadba nanadimalad. Ar bemardi, gwen an-sogedba nanadisurmalad.’
JER 35:17 ”A-ulale, ani Israel-dulemar-e-Bab-Dummad-Jehová Bela-Gangued-Nikadi soged: Bela an Judá-dulemargi, Jerusalén-dulemargi boni-dummagan-barmidoye an sogsadi, egi an barmidoed. Ar an ega ibmar-sogsadba ibsassurmalad, an ese-gochadi an-itossurmalad.”
JER 35:18 Jeremías weyob Recab-waganga sogsabalid: “Israel-dulemar-e-Bab-Dummad-Jehová Bela-Gangued-Nikad soged: ‘Bemar, be-dad-dummad-Jonadab bemarga igar-uksadba be nanadimarsoggu, degi, e-igar-maidba be ibsadimarsoggu, degine, be-dad-dummad bega igar-mesisadba be ibmar imakdimarsoggu,
JER 35:19 ani Israel-dulemar-e-Bab-Dummad-Jehová Bela-Gangued-Nikadi bemarga soged: Bipisaale, Recab-machi-Jonadab-wagan bane-bane anga-arbadiguega surguosulid, nikagu guoed.’ ”
JER 36:1 Josías-machi-Judá-rey-Joacim birgabakegus Judá-yalagi reyga-maidgi, Jeremíasʼse Bab-Jehová-gayaburba nonikid, ega weyob sognonikid:
JER 36:2 “Garda-suid be sue, agine bela an bega Josías-ibagan-akar emi-ibadse ibmar-sogdanikid be narmako. An bega, Israel-dulemargi, Judá-dulemargi sunmakdanikid, degine, bela dulemar-baigangi an bega-sunmaksadi bela be narmako.
JER 36:3 ”Abakalegi, Judá-dulemar boni-dummagan an egi-barmidasokalid-wisgualile, e-isgued-igargi banguarmalale, degidbali, an sunna e-ibmar-isgana-imakmaladi, degi, e-isgumaladi an ega elied.”
JER 36:4 Geb Jeremías, Nerías-machi-Barucʼse gochad. Baruc, Bab-Jehová Jeremíasʼga e-ibmar-sogsadi, bela garda-suid-bipirmakaledgi narmaksad.
JER 36:5 Geb a sorbali, Jeremías Barucʼga weyob igar-uksad: “Andi wegi gales-siid, Bab-Jehováʼse-goled-negse geg an naed.
JER 36:6 ”Degisoggu, be, dulemar mas-gunsuli-gudiguoed-ibagi Bab-Jehováʼse-goled-negse be nao, agine, Jerusalén-dulemar-asabin be binnasuli Bab-Jehová-gayaburba garda-suid-bipirmakaledgi narmakoye an bega-sogsad be narmaksadi, be absogo. Degine, bela Judá-dulemar Babse-goled-negse-nonimaloedga be absobalo.
JER 36:7 Adi, emar-Bab-Dummadse-goloedi, sunna Bab-Jehováʼse warmakega, deginbali, e-isgumalad-igargi banguegar. Ar Bab-Jehová we-dulemargi-urwedi, sae-itogedi, yeer-gangued.”
JER 36:8 Nerías-machi-Baruc, Bab-Dummad-gayaburba-barsoged-Jeremías ega igar-uksadba imaksad. Bab-Jehováʼse-goled-neggi garda-suid-bipirmakaledgi gayaburbamar-narmakar-naid absosad.
JER 36:9 Josías-machi-Judá-e-rey-Joacim birgatargus-negsemaid-nii-walabakebakgi, bela Jerusalén-dulemar, bela Judá-dulemar neggweburmar-akar-danimaladi mas-gunsuli-gudiguega Bab-Dummadse-goled-neggi ambikusmalad.
JER 36:10 Agine, Baruc, Bab-Dummadse-goled-neg-aila-niba naded. Yawagak-Binidye-nugad-doglemaid-akale, niba Gemarías-neg-imbagi bela dulemar-bukwad-asabin, Baruc, Jeremías-ega-sunmaksad garda-suid-bipirmakaledgi-narmakarnaid absosad. Gemaríasʼde, Safán-machid. A-dulede garda-narmakedid.
JER 36:11 Gemarías-machi-Micaías, Safán-wagwa, bela Bab-Jehová-gayaburba garda-suid-bipirmakaledgi-narmakarnaid-absolesad itosad.
JER 36:12 Geb agine, Micaías reynegse naded, garda-narmaked-negse, bia dule-dummagan-bukwadse. Agine, garda-narmaked-Elisama siid, degi, Semaías-machi-Delaía simogad, Acbor-machi-Elnatán, degi, Safán-machi-Gemarías, Ananías-machi-Sedequías, degine, bela dummagan-baigan bukmogad.
JER 36:13 Geb Micaías, bela Baruc-dulemar-asabin-garda-absosad-itosadi, dummaganga sogdapid.
JER 36:14 Geb degi, bela dummagan Barucʼse, Jehudí-barmisad, ega sogegar: “Be we-garda-absosad sedaye.” Degi, Nerías-machi-Baruc, Jehudí-sogedba imaksad, garda-suid-bipirmakaled-absosadi dummaganse sealid. Jehudíʼde Netanías-machid, degi, Selemías-wagwabalid, e-dad-yokorginedi Cusiʼye nugad.
JER 36:15 Dummagan, Barucʼga weyob sogdemalad: —Wegi be sige, gardagi-ibmar-sognaid be anmarga abso. Geb Baruc, bela dummagan-asabin garda absosad.
JER 36:16 Bela garda-absolesad-itosmargua, dobed-abalagi muchub-muchub na dakdemalad, weyob sokarmalad: —Anmar bela we-ibmarmar reyga sogergebed.
JER 36:17 Geb Barucʼse egisdemalad: —Baruc anmarga be soge: ¿Wede igi be nabir we-ibmarmar bela narmaksa? ¿Ar Jeremías bega we-ibmarmar sogsa?
JER 36:18 Baruc dummagan-abin sogded: —Eye, Jeremías anga we-ibmarmar sogsad. Geb ani an, garda-suid-bipirmakaledgi narmaksad.
JER 36:19 Geb dummagan Barucʼga sogdemalad: —Be Jeremíasʼbo dukunao. Melle dulemar be-wisguega be imako, be bia dukusimala.
JER 36:20 A-sorba dummagan, garda-narmaked-Elisama-arbaed-neggi garda-obesmalad. Geb dummagan rey-asabin neg-imbagi gwisgudapmalad, bela ibmar-gusad ega sogdapmalad.
JER 36:21 Agi Rey-Joacim, garda-sunaega Jehudí-barmisad. Jehudí, Elisama-arbaed-negse garda suapid. Agine, Jehudí rey-asabin, degi, dummagan-bukwad-asabin garda-absosad.
JER 36:22 A-ibagine, deunni, nii-walabakebakad-yoidgined (9) dii-wied-iba naid. A-ulale, rey dii-wied-ibagi-meged-neggi maid, deunni, rey soo-nagaba siid.
JER 36:23 Jehudí ile-warbaagus, igi, ile-walabakegus garda-absodanigusale, rey garda-narmakaled esbipigi garda-sigdedaed, geb agine, soo-yagi metedaed. Deyopira bela garda-suid-bipirmakaled imaksad, bela soogi ogumaksad.
JER 36:24 Ar rey garda-absolesad-itos-inigwele, degi, dummagan itosmarmo-inigwele, degite, gwen dobe-itossurmalad. Gwen e-mor esirmaksasurmalad.
JER 36:25 Aisaar Elnatán, Delaía, degi, Gemarías reyga ise-wilegar sogsamalan-inigwele, melle be garda-suid-bipirmakaled-ogumakye, rey gwen itossulid.
JER 36:26 Aka bur rey, e-machi-Jerameel barmisad, Azriel-machi-Seraíasʼmala, degi, Abdeel-machi-Selemíasʼmala, garda-narmaked-Baruc-ganaega, degi, Bab-Dummad-gayaburba-barsoged-Jeremías ganaegar. Degi-inigwele, Bab-Jehováʼdi, Jeremías, Barucʼbo odukusad.
JER 36:27 Baruc, Jeremías ega-ibmar-sogsad garda-suid-bipirmakaledgi-narmaksadi, rey ogumaksagusad. A-sorbali, Bab-Jehová-gayaburba Jeremíasʼse nonikid, ega weyob sognonikid:
JER 36:28 “Garda-suid-bipirmakaled-baid be amio, gannar gebe-iduar-naiyob be narmako. Bia Judá-e-rey-Joacim garda-ogumaksagusa, deyopira be narmakbaloed.
JER 36:29 ”Rey-Joacimʼga be sogo, weyopira Bab-Jehová sogye: ‘Joacim, bee be, garda-suid-bipirmakaled ogumaksad, be weyob sogsad: Jeremías, ¿ibiga be we-gardagi weyob be narmaksa? Nue-napiraye, Babilonia-e-rey we-yala obelononikoye, bela dulemar-obelononikoye, degine, ibmar-durganse-bakale obelononikoye.’ ”
JER 36:30 A-ulale, Bab-Jehová Judá-dulemar-e-rey-Joacim-annik weyob soged: “Bipisaale, e-wagan-gwensak, David-ologangi sigosulid. E-mui dadabinni mellemai guoed, mutikidbali, neg-dambed-abalagi mellemai guoed.
JER 36:31 E-ibmar-isgana-imaksad-ulale, edi, degi, e-wagana, degine, ega-arbamaladi, an sabsur-odurdakoed. Ar amar an-sogedba ibsassurmarsoggu, boni-dummagan barmidagoye an sogsadi, amargi an barmidoed, degi, Jerusalén-dulemargi, Judá-dulemargi an barmidoed.”
JER 36:32 Geb degi, Jeremías garda-suid-bipirmakaled-baid amisad, geb garda-narmaked-Nerías-machi-Barucʼga uksad. Geb Baruc bela Jeremías-ega-ibmarmar-sogsad narmaksad. Garda-idualed Rey-Joacim-ogumaksadyobsaale, narmaklesad. De-ukinbali, napi ibmar-baigan bukidar emar-emarsaar narmaklesbalid.
JER 37:1 Babilonia-rey-Nabucodonosor, Joacim-machi-Conías-muchub, Josías-machi-Sedequías Judá-reyga omesisad.
JER 37:2 Degi-inigwele, Sedequíasʼbela, degi, ega-arbamaladbela, degine, Judá-dulemarbela gwen Bab-Jehová-sogedba ibsassurmalad. Bab-Jehová e-gayaburba-barsoged-Jeremíasʼba-ibmar-sogsad itossurmalad.
JER 37:3 Degi, Rey-Sedequías, Selemías-machi-Jucal dule-irwa-Bab-Dummadse-goled-Sofoníasʼbo Bab-Dummad-gayaburba-barsoged-Jeremíasʼse barmisad. Sofoníasʼde Maasías-machid. Jeremíasʼga weyob sogdapmalad: “Anmar-ular be, anmar-Bab-Dummad-Jehováʼse be anmarga gole.”
JER 37:4 Deunni, Jeremías amba yoo esgaryaba mellegedgined, degisoggu nabir dulemar-imbagi garmakdiid.
JER 37:5 Deginbali, a-ibagangine, Faraón-sordamar Egiptoʼgi ainis danimalad. Deyob Babilonia-sordamar-Jerusalén-ebilis-bukwad wisguargu, gannar e-yarse duurmakdemalad.
JER 37:6 Bab-Jehová-gayaburba Jeremíasʼse nonikid, weyob ega sognonikid:
JER 37:7 “Israel-dulemar-e-Bab-Dummad-Jehová soged: Rey-Sedequías anse-ibmar-idakega-dulemar-barmialidga be sogo: ‘Faraón-sordamar bemar-bendakega-ainis-danikoedi gannar biremaloed, gannar Egiptoʼse namaloed.
JER 37:8 Babilonia-sordamar gannar wese we-neggweburgi-gwichiguega nonimaloed, bela bemar-gamaloed, degine, neggweburmar ogumakmaloed.’ ”
JER 37:9 Bab-Jehová soged: “Melle be yeer itomalo, mer be binsamalo Babilonia-sordamar bar danikosurmarye. Suli, gannar Babilonia-sordamar danimaloed.
JER 37:10 Ar bemar amba bela Babilonia-sordamar-ogalakusale, degi, unnila gwenna-gwenna nailikgus-besmalale, sunna wemar we-neggweburgi gwichigusmalaled, we-neggwebur ogumaksamalaled.”
JER 37:11 Babilonia-sordamar, Faraón-sordamar-egi-daniye wisguarsoggu, Jerusalénʼgi bangudgusmalad.
JER 37:12 Aisaar Jeremías, Jerusalénʼgi-gudiidgi nainu-ega-uklenaid-suega Benjamín-yarse aligusanad.
JER 37:13 Degi-inigwele, Yawagak-Benjamínʼye-nugadse-mosgua, sordamar-e-dummad Iríasʼye-nugad Bab-Dummad-gayaburba-barsoged-Jeremías-gasad. Iríasʼde Selemías-machid, Hananías-wagwabalid. Geb Irías, Jeremíasʼga weyob sogded: —¡Babilonia-sordamarba akaye be soge!
JER 37:14 Jeremías abin-sogded: —¡Wedi gakana. Babilonia-sordamarba an akasokarsulid! Degi-inigwele, Irías, Jeremías-ega-ibmar-soged itossulid. Aka gasa dummaganse sesad.
JER 37:15 Dummagandi bela Jeremíasʼgi sae-itodmalad. Geb sarsosmalad-sorba garda-narmaked-Jonatán-negyaba osiapmalad. Ar ade, a-neg esgaryaga imaksamalad.
JER 37:16 Deyobi, neg-urba-esgarya-siidgi Jeremías-metemalad. Agine dikasuli mellesii gusad.
JER 37:17 Rey-Sedequías, Jeremías ega-e-negse-sedamalaga igar-uksad. Agine, rey, Jeremíasʼse arbakee weyob ibmar egichisad: —¿Bab-Jehová bega sunmaksa? Jeremías abin-sogded: —Eye, Dummad, anga sunmaksa. Bede Babilonia-e-reyga-uklegoye anga sogsad.
JER 37:18 Jeremías, Rey-Sedequíasʼse egisdemogad: —Dummad, ¿ibigi an begi dummad-nossunna? ¿Ibugi an be-dummagangi, we-neggweburgi an dummad-nossunna? Emide be esgaryagi an-metegu.
JER 37:19 ¿Bia bega Bab-Dummad-gayaburba-barsogmaladde nade? Bega sogsamalad: Babilonia-sordamar anmargi gwichiguosurye, degi, bemargi, we-dulemar gwichiguosurye bega sogsamalad.
JER 37:20 Emide, Dummad, an bega ise-wilesakwaa soged, wis an bega ibmar-soged be an-itoge. Melle be bar gannar garda-narmaked-Jonatán-negse be an-barmide, degiile, an agi burgwidoed.
JER 37:21 Geb agine, Rey-Sedequías igar-uksad, nakulemalad-neg-imbagi Jeremías-simaloye. Degi, neggweburgi madu-nikad-berguedse, bane-bane madu-yomalad-igarye-nugadgi madu-uklebubukwad ega ukmaloye sogsabalid. Degisoggu, deyob, Jeremías nakulemalad-neg-imbagi mellesii gusad.
JER 38:1 Matán-machi-Sefatías, Pasur-machi-Gedalías, degi, Selemías-machi-Jucal, degine, Malquías-machi-Pasur, we-dulemala, Jeremías-sunmaksad itosmalad. Weyob Jeremías sogsad:
JER 38:2 “Weyob Bab-Jehová soged: ‘Dule we-neggweburgi beeye-sogele, ukudba burgodibe, es-suidgi burgodibe, boniba burgodibe. Degi-inigwele, ar dule Babilonia-sordamarse-galegele, adi, burgosulid. Bila-onolegedgi-ibmar-sulegedyob na san uksunnoed, degidbali, na san bendaklegoed.’
JER 38:3 Weyob Bab-Jehová soged: ‘We-Jerusalén-neggwebur Babilonia-rey-sordamarse sulegoed, amarse galegoed.’ ”
JER 38:4 Degidbali, dummagan reyga sogsamalad: —Anmar we-dule gindakergebed. Weyob-sunmakdiidba sordamar-niga-egwandiid, degi, bela dulemar-niga egwandiid. We-dule neggweburga igar-nued gwen amisulid, aka bur sabsur-odurdaklegoedgi sunmaked.
JER 38:5 Geb Rey-Sedequías amar-abin sogded: —An bemarga urmake. Anbela, rey-gued-inigwele, geg an bemarga akar soged.
JER 38:6 Agine dummagan, Jeremías-susmalad. Geb rey-machi-Malquías-e-dia-dummad-yaba urdubgi-odegar Jeremías-odesmalad. We-diade sordamar-ambikuedneg-imbagi siid. Ar dia-yaba dii-sated, unnila olli-matabi naid, degisoggu, ollibali Jeremías dogded.
JER 38:7 Etiopía-dule-reyneggi-arbaed Ebed-Melecʼye-nugadi, itosad igi-dia-dummad-yaba Jeremías-metemala. Deunni, rey, Benjamín-yawagak-asabin igar-itosigua,
JER 38:8 Ebed-Melec reyneggi-gudii reyse nadegusad, geb reyga sogdapid:
JER 38:9 —Dummad-rey, we-dulemar Jeremíasʼgi nue sabsur-urwenanaimalad. Dia-yagi metemalad. Agi sii, Jeremías ukudba burgo an daked. Ar neggweburgi madude bergusad.
JER 38:10 Degidgine, rey, Etiopía-dule-Ebed-Melecʼga igar-ukded: —Dulemar dulagwen-gakambe (30) beba-naega be amio. Bab-Dummad-gayaburba-barsoged-Jeremías dia-yaba-siid be onomalo, adi, melle agi-sii burgwegar.
JER 38:11 Ebed-Melec rey-ega-igar-uksadba imaksad, degi, mormar-bukwadse nadegusad. Agi mormar-bukwad onisad, degi, mor-sergan-bukwad onisbalid. Geb Jeremíasʼga urdub, degi, mormar-onisad dia-yaagi odesmalad.
JER 38:12 Geb Ebed-Melec, Jeremíasʼga sogded: —We-mormala, degi, mor-isganamala, be-senya-urba be nasiko, adi, melle urdubgi be ebillegegar. Jeremías deyob imaksad.
JER 38:13 Degine, dulemar ega urdub obatismalad, dia-yaba-sii urdubgi Jeremías-onosmalad. Geb sordamar-ambikuedneg-imbagi Jeremías osilesad.
JER 38:14 Rey-Sedequías igar-uksad ega Bab-Dummadse-goled-neg-yawagak-sogapaagwadse Jeremías-sedmaloye. Agine, Sedequías Jeremíasʼga sogded: —An bese wis ibmar egisgwelo, melle be angi bipisaar ibmar odukuo.
JER 38:15 Jeremías rey-abin sogded: —Dummad, an bega ibmar-sogele, be an-gindaksalergebed. An bega binsaed-dakele, be an-itogosulid.
JER 38:16 Degi, arbakee Rey-Sedequías, Jeremíasʼga ise-sogar sogsad: —Bab-Jehová-anmarga-burba-dulad-uksad-nuggi napira an soged: An be-gindakosulid, an we-dulemar-be-gindakbigudimaladga an be-urmakosurbalid.
JER 38:17 Jeremías, Sedequías-abin sogded: —Israel-dulemar-Bab-Dummad-Jehová Bela-Gangued-Nikadi, weyob soged: ‘Babilonia-rey-e-dummagan-abin be urwesulile, be san bendaklegoed. We-neggwebur ogumaklegosulid. Dummad, bedi, degi, bela be-neg-yaginmalad bendaklemaloed.
JER 38:18 Ar be Babilonia-rey-e-dummagan-abinsaele, we-neggwebur Caldea-dulemar-e-ganguedse berguoed. A-dulemar neggweburmar-ogumakoed, bedi gwen egi wakinnosurmogad.’
JER 38:19 Rey-Sedequías, Jeremías-abin sogded: —Judá-dulemar Babiloniaʼba-akasmalad an dobed. Abakalegi a-dulemar, Babilonia-sordamarga an-ukarmalale, adi, sabsur-an-imakmalagar.
JER 38:20 Jeremías rey-abin sogded: —Dummad, an bega Bab-Jehová-gayaburba-barsognaidba be ibsae. Adi, be Babilonia-dulemarse berguosulid. Nueganbi be naoed, degi, be-san be bendakbaloed.
JER 38:21 Dummad, ar be yapa Babilonia-sordamarga san-ukele, Bab-Jehová weyob anga sogsabalid:
JER 38:22 ‘Bela Judá-reyneggi omegan-amba-bukwadi, Babilonia-rey-e-dummaganga uklegoye. Ar a-omegana weyob bakar bega sogmaloye: Rey, be-aimar be-walikamaladi, be-yamosmalad, begi nakwismalad. Emigindi, be-nag napa-olli-ollidyaba dogsa-gwichid, be-aimar bela begi bangudmalad.’
JER 38:23 ”Dummad-Sedequías, bela be-omegana, degi, be-mimmigana, Babilonia-sordamarga uklegoed. Dummad, bedi gwen wakinnosulid, Babilonia-reyse be galegoed. Degi, be-neggwebur ogumaklegoed.”
JER 38:24 Geb Sedequías, Jeremías-abin sokalid: —Melle we-gayaburba dulemar wisguega be imako, degisulile, be anse oburgwilego.
JER 38:25 Dummagan wisgualile, bede anbo sunmaksaye, bese danimalale, bega sokarmalale: ‘Reyga be ibmar-sogsadi anmarga be sogmoga, igi-bega rey ibmar-sogsamoga be anmarga sogbalo. Melle anmargi be odukuo, degisulile, anmarse be oburgwilego.’
JER 38:26 Ega be weyob sogo: ‘Ise-wilegar an reyse egichisad, melle gannar Jonatán-negse be bar an-barmidoye, adi, melle agi an burgwegarye.’
JER 38:27 Deyopira gusad. Bela dummagan Jeremíasʼse ibmar egisnonimalad. Jeremíasʼdi rey-ega-igar-uksadba imaksamogad. Degidbali, bar Jeremías-oakalossurmalad. Ar dulemarde Jeremías reybo-sunmaksad itossurmalad.
JER 38:28 Degi, Jerusalén-neggwebur-sulesad-ibaganse, Jeremías, sordamar-ambikued-neg-imbagi mellesii gusad.
JER 39:1 Birgabakebakgus Sedequías Judá-yar-semaidgine, a-nii-warambegi Babilonia-Rey-Nabucodonosor, Jerusalénʼgi gwichiguega, Jerusalén-neggweburse sorda-bila-onomalad-abargi aligusad. Bela neggwebur-ebilis ambikunonikid.
JER 39:2 A-birgabogi gaka nii-walabake-ibabakebakgine Babilonia-sordamar galu-matusulid-akwabiid-neggwebur-ebirnaid geb egasmalad. Deun, agi Sedequías birgambe-gakagwensakgus (11) reyga maidgined.
JER 39:3 A-yaa-ollo-imaklesadbali, bela Babilonia-rey-e-dummagan ubosad, geb yawagak-yaabalid negabargi-siidgi ambikudapmalad. Babilonia-rey-e-dummagan-ubosad, wemalad: Nergal-Sarezer, Samgar-Nebo, reyneggi-arbamalad-e-dummad-Sarsequim, reyneggi-arbamalad-e-dummad-baid-Nergal-Sarezer, degine, bela Babilonia-reyneggi-arbamalad-e-dummagan-bamalad.
JER 39:4 Deyob dulemar dakarmargu, Judá-Rey-Sedequías, degine, bela sorda-bila-onomalad neggweburgi wakitemalad. Mutiki, galu-matusulid-akwabiid-darbogwad-imbagi yawagak-siidba rey-dutugalu-naidba ainidmalad. Arabá-igarba wakitemalad.
JER 39:5 Degi-inigwele, Babilonia-sordamar balegitegusmalad, geb Jericó-nebaganba bargadapmalad. Babilonia-sordamar Sedequías-gasmalad, geb Babilonia-rey-Nabucodonosorʼse sesmalad. Deunni, Rey-Nabucodonosor Hamat-yargi Ribla-neggweburgi maid. Agine Rey-Nabucodonosor Sedequíasʼga odurdaklegoed-igar itosad.
JER 39:6 Geb Rey-Sedequías-wagab e-mimmigan dukar-egwannar oburgwilesad, deyob, Judá-dulemar-nuga-nikamalad oburgwilesmogad.
JER 39:7 A-sorbali, Babilonia-rey, Sedequías-ibya-onomalaga imaksad. Degi, esgoro-gordikid-dubgi-edinnega imaksabalid, adi, Babilonia-yarse sedmalagar.
JER 39:8 Degi, Babilonia-sordamar, reyneg-ogumaksamalad, degine, bela negmar-ogumaksabalid, deginbali, bela Jerusalén-galu-matusur-akwabiidmalad omukusmarbalid.
JER 39:9 Geb reyga-nakulemalad-e-dummad-Nabuzaradánʼye-nugadi, bela dulemar-besmaladi gasa Babilonia-yalase sesad, degi, dulemar-emarba-atosmaladi, bela gasa sesbalid. Soglesundo, bela neggweburginmalad gales selesmarye.
JER 39:10 Reyga-nakulemalad-e-dummad-Nabuzaradánʼye-nugadi, unnila dule-wilemaladbi, degi, dule bur ibmar-satemaladbi Judá-neggweburmargi obesad. A-ibagine, a-dulemarga uva-nainumar uklesad, degi, ibmar-digleged-nainumar uklesbalid.
JER 39:11 Babilonia-rey-Nabucodonosor ega-nakulemalad-e-dummad-Nabuzaradánʼye-nugadga Jeremías-akwega weyob igar uksad:
JER 39:12 “Nue be Jeremías-ako, melle ichakwaa nio. Ibmarmar-abeardibele, ega sogedba be uko.”
JER 39:13 Degine, Nabuzaradán, degi, reyneggi-arbamalad-e-dummad-Nabusazbánʼye-nugadi, degi, reyneggi-arbamalad-e-dummad-baid-Nergal-Sarezerʼye-nugad, degine, bela Babilonia-reyneggi-arbamalad-e-dummagan-bamaladi,
JER 39:14 sordamar-ambikued-neg-imbagi Jeremías-gales-siid-ononaega imaksamalad. Geb Ahicam-machi-Gedalías, Jeremías-negse gannar Jeremías-sedega imaksamalad. Gedalíasʼde Safán-wagwad. Agine, Jeremías dulemar-abargi gudii gussunnad.
JER 39:15 Jeremías, amba sordamar-ambikued-neg-imbagi gales-mellesigua, Bab-Jehová-gayaburba ese nonigusad, ega weyob sognonigusad:
JER 39:16 “Be nae, Etiopía-dule-Ebed-Melecʼga be sogna, weyob Israel-dulemar-Bab-Dummad-Jehová Bela-Gangued-Nikadi sogye: ‘We-neggwebur-sabsur-wilegoedgi an sunmaksadi, an sogedba imakoed. Ega ibmar-nued gwen guosulid. A-ibagangine, be-sunnagwad ibmar-guoedi, be dakoed.
JER 39:17 Gines a-ibagine, ani an be-bendakoed. Be dulemar-dobgudiidgi an be-bendakoed, be-oakalogosurmalad.
JER 39:18 Innikigwadgi an bega soged, ani an be-bendakoed, es-suidgi be burgosulid, be wakinnoed. Ar be angi-bengussursoggu, an be-bendakoed.’ Deyob Bab-Jehová sogye.”
JER 40:1 Reyga-nakulemalad-e-dummad-Nabuzaradánʼye-nugadi, Ramáʼgi Jeremías-indaksad-sorba Bab-Jehová-gayaburba Jeremíasʼse nonikid. Ramáʼgi, Nabuzaradán, Jeremías atinnar Babilonia-yalase Judá-dulemar-gales-selemaid-imbagi, degi, Jerusalénʼginmalad-gales-selemaid-imbagi, gales-selemai dakalid.
JER 40:2 Reyga-nakulemalad-e-dummadi, bachikii Jeremías-nisad, geb ega weyob sogded: “Bab-Jehová, be-Bab-Dummad, weyob we-neggwebur-wilegoednik sogsagusad,
JER 40:3 emide, emi-ibagi Bab-Jehová-e-ibmar-sogsad gunaid. Bela we-ibmar-gunaidi, ar Bab-Jehováʼgi-isgusmaladba, e-ibmar-sogsadba-ibsassurmaladba gunaid.
JER 40:4 Emisgwa, be-arganmar esgoro-dubgi-atinnaid an esikoed. Be anba Babilonia-yarse-dagbiele, dagodo, ani an nuekwaa be-akoed. Ar be anba dagbisulile, akarsurbardo. Bela we-napa-naidi begadid, be-itolegedid bia be nabie.”
JER 40:5 Jeremías amba aku-itoged ede bia naodibeye, degidbali, Nabuzaradán ega sogdesunnad: “Ahicam-machi-Gedalíasʼba be nae, ar Babilonia-e-rey, Judá-neggweburmar-dakega a-nug-imaksad. Gedalíasʼde Safán-wagwad. Aba, be-dulemar-abargi be gudii imakna. Sulile, be-itolegedba be naodo, bia be nabie aba be naodo.” Reyga-nakulemalad-e-dummadi, Jeremíasʼga masgullemalad uksad, degi, ibmar-baigan ega binsa uksabalid, degine, nuedgi onolesad.
JER 40:6 Degisoggu, Jeremías, Mizpaʼse Ahicam-machi-Gedalíasʼba nadsunnad. Mizpa-neggweburgi Gedalías-walik, degi, amba abala-neggweburgi-dulemar-besmalad-walik gudii gusad.
JER 40:7 Judá-sorda-dummagan, degi, sorda-bila-onomalad, amba sapurba-bukmargua wisguarmalad, emi, Babilonia-rey, Ahicam-machi-Gedalías neggwebur-dummadga nug-imaksaye. Degine, Gedalías, machergan-dakega, omegan-dakega, mimmigan-dakega nugsalesbarye, degine, neggweburgi dule-wilemalad Babilonia-yalase-selessurmalad-dakega nug-imaklesbarye.
JER 40:8 Deyob wisguarmargua, Mizpa-neggweburse Gedalíasʼse nade gusmalad. Dulemar nadegusmaladi, wemalad: Netanías-machi-Ismael, Carea-masmala: Johanán, degi, Jonatán. Tanhumet-machi-Seraías, Netofaʼgined-Efai-masmala, degi, Maaca-dule-e-machi-Jezanías. Bela we-dulemala e-sorda-bila-onomalad-abargi nade gusmalad.
JER 40:9 Ahicam-machi-Gedalías, Safán-wagwa gued. Gedalías, a-dulemargala, degi, a-e-sordagangala, ise-napiragwadgi ega ibmar sogsad: “Melle be Babilonia-sordamar dobgue. Ar bemar neggweburgi ambikuye-sogele, degi, Babilonia-reyga be arbamalale, innikigwadgi an bemarga sogdo, bemar nueganbi gudii gumaloed.
JER 40:10 Andi Mizpa-neggweburgi megoed, adi, Babilonia-dulemar-danimalar, an bemar-ular sunmakegar. Bemardi vino be sabomar, ibmar-durbagan-yorgi-sanmakmalad, degi, olivo-gwallu be sabomar, degine, gannar be-neggweburgi be megmalo.”
JER 40:11 Bela Judá-dulemar Moabʼgi-mamaid, Amónʼgi-mamaid, degi, Edomʼgi-mamaid, degine, bela neggwebur-baigangi-mamaidi wisguarmarmogad, Babilonia-rey amba Judá-dulemar-obesye, degi, Ahicam-machi-Gedalías neggwebur-dummadga nug-imaksaye. Gedalíasʼde Safán-wagwad.
JER 40:12 Degidbali, bela Judá-dulemar neggwebur-baiganba-aisakis-bukmaladi Judá-yalase nonimalad. Nonimargu, Gedalíasʼse Mizpa-neggweburse nadmalad. Wemala, vino sabosmarmogad, degi, ibmar-durbagan-yorgi-sanmakmalad-bukidar sabosmarmogad.
JER 40:13 Carea-machi-Johanán, degi, bela sorda-bila-onomalad-e-dummagan sapurba-bukmaladi, Mizpa-neggweburse Gedalíasʼse nonimalad,
JER 40:14 Ega weyob sognonimalad: —Amón-dulemar-rey-Baalis be-oburgwega Netanías-machi-Ismael-barmialid, ¿be wissursi? Ahicam-machi-Gedalíasʼdi eba ibsassulid.
JER 40:15 Carea-machi-Johanán Mizpaʼgi Gedalíasʼga arbakee ibmar-sogsad: —Netanías-machi-Ismael an bega oburgwenao. Dulemar we-ibmar wisguegarsulid. ¿Ar ibiga we-dule be-gindakega anmar imakosunna? Ar be burgwisale, bela be-dikarba Judá-dulemar-ambikunonimalad-oaisakiega gudeled, degi, Judá-neggweburgi-bukmalad bela obelolesaled.
JER 40:16 Ahicam-machi-Gedalías, Carea-machi-Johanán-abin sogded: —¡Melle deyob-imakedgi be binsao! Be weyob Ismaelʼnik-sogedi, be-binsa gordiid.
JER 41:1 Nii-walaguglegine (7) Netanías-machi-Ismael rey-e-gwenadga-guedi, rey-sordamar-e-dummadga gusmogadid. A-dulede, dulemar-e-ambemaladbo (10) Mizpa-neggweburse nonikid. Ismaelʼde Elisama-wagwad. Geb Ahicam-machi-Gedalíasʼse nonimalad. Mizpa-neggweburgi bulakwaa mas-gunbukmargua,
JER 41:2 ukiale, Netanías-machi-Ismael, dulemar-e-ambegwad (10) eba-bukwamarmogadmala, es-suidgi Ahicam-machi-Gedalías-gindaksad. Gedalíasʼde Safán-wagwad. Deyobi, Ismael, Gedalías-oburgwisad. Babilonia-e-rey, Judá-yar-e-dummadga Gedalías-nug-imaksagusanad.
JER 41:3 A-ukinbali, Ismael, Judá-dulemar Mizpaʼgi Gedalíasʼba-gudimalad, degi, sorda-bila-onomalad, ogilosbalid.
JER 41:4 A-bangine, amba yoo dulemar Gedalías-gindaklesad-wisgumargua,
JER 41:5 Siquem-akale, Silo-akale, degi, Samaria-akale, dulemar dulabake-mergu (80) Mizpaʼse nonimalad. A-dulemarde siga-eniar-eniar, nonimalad, degi, mor-siir-siir, degine, na dukin e-abagan daas-daas-imaksa nonimalad. Ibmar-gwagmar, degi, ina-wawadikmalad, Bab-Dummadse-goled-neggi-ukega senonimalad.
JER 41:6 Netanías-machi-Ismael Mizpa-neggweburgi emar-abin ise-boale noalid. Dulemar-abinguargu, dulemarga weyob sokalid: —Ahicam-machi-Gedalías be dakdamala.
JER 41:7 Degi-inigwele, amba yoo dulemar-danimalad neggwebur-abarse dogmala, Netanías-machi-Ismael e-sordamarbogwa dule-danimalad-oburgwismalad, degi, dia-dummad-yaba obatismalad.
JER 41:8 Dule-danigusmalad-abargine, e-ambe (10) ise-wilegar Ismaelʼga sogdemalad: —Melle be anmar-oburgwe, anmar sapurba trigo-gwag odukusiid, degi, cebada-gwagmar, olivo-gwallu, degine, achanis, anmar odukusiid. Degidbali, Ismael bar a-dulemar-oburgwissulid, e-sordamar-oburgwilesadyob bar imaksasulid.
JER 41:9 We-dia-dummad Rey-Asa sobsagusad, adi, Israel-rey-Baasa-idu dukuegar. Netanías-machi-Ismael, we-dia-yaagi Gedalíasʼba-dulemar-oburgwisad-e-mui obatisad. We-dia-yaagi muimar ena urbisad.
JER 41:10 Degine, a-sorbali, Ismael, rey-sisgan gasa sesad. Degi, bela dulemar Mizpa-neggweburgi-besmalad sesbalid. Deun reyga-nakulemalad-e-dummad-Nabuzaradánʼye-nugadi, Ahicam-machi-Gedalíasʼga igar-uksagusad we-dulemar dakegar. Netanías-machi-Ismael Amón-yarsik dulemar-galesmalad sesad.
JER 41:11 Carea-machi-Johanán, degi, bela sorda-bila-onomalad-e-dummagan e-walik-bukmaladi wisguargua, Netanías-machi-Ismael deyob neg-oakalosye,
JER 41:12 Johanán bela dulemarse gochad, degi, Netanías-machi-Ismaelʼgi bila-ononadgusmalad. Gabaónʼgi dii-dummad-naid-nagaba abingudapmalad.
JER 41:13 Bela dulemar-Ismaelʼse-gales-seledanimaladi, Carea-machi-Johanán-dakarmargu, sorda-bila-onomalad-e-dummagan-abargi-daniki bela yeer-itosmalad.
JER 41:14 Bela dulemar-Ismaelʼse-gales Mizpa-akar-selemaidi, Carea-machi-Johanánʼba armalad.
JER 41:15 Netanías-machi-Ismaelʼdi, e-sordamar e-baabakadbogwa (8) Johanán-idu Amónʼse wakite gusmalad.
JER 41:16 Carea-machi-Johanán, bela sorda-bila-onomalad-e-dummagan eba gudimaladbo, dulemar-Netanías-machi-Ismaelʼse-selemaid bendaksamalad. Ismael, Ahicam-machi-Gedalías-oburgwisgu, dulemar-besmaladi Mizpa-akale sesanad. Amala wemalad: Sordamala, omegana, mimmigana, degi, reyga-arbamalad-e-dummagana selemamainad.
JER 41:17 Johanán, bela dulemarmala nadmargu, Gerut-Quimamʼye-neg-nugadse obunnodapmalad. Gerut-Quimamʼde Belén-nagaba naid. A-akale, Egipto-yalase moedse binsanadapmalad,
JER 41:18 adi, Babilonia-sordamargi wakinnegar. Ar Netanías-machi-Ismael, Babilonia-e-rey Ahicam-machi-Gedalías Judá-neggwebur-e-dummadga-nug-imaksagusanad-oburgwisadba nue-dobe itomalad.
JER 42:1 Geb degine, Carea-machi-Johanán, Osaías-machi-Jezanías, degi, sorda-bila-onomalad-e-dummagana Jeremíasʼse nonimalad. Deginbali, bela dulemar ese nonimalad, mimmigana, degi, serganse-bakale, ese nonimarmogad.
JER 42:2 Bab-Dummad-gayaburba-barsoged-Jeremíasʼga weyob sogdemalad: —Anmar bega ise-wilegar-ibmar-sogedi, be wis-anmar-itoge. Anmar-napi-besmalad-ular, be Be-Bab-Dummad-Jehováʼse ise-wilegar be anmarga gole. Ar magar be anmar-daked, iduale, anmar bukidaranad, emidi, anmar napi-ichee bedapmalad.
JER 42:3 Be-Bab-Dummad-Jehováʼba be ibmar-soge, adi, anmarga igar oyogega bia anmar naoe, degine, ibu anmar imakbaloe.
JER 42:4 Jeremías amar-abin sogded: —Eye, bato an be-itosmala. Bab-Jehová-bemar-Bab-Dummadga ise-wilegar an ibmar sogoed, igi be anga sogsamala, deyob an ega sogoed. Bab-Jehová anga ibmar-sogoedi an bemarga bela sogoed, bipisaale an bemargi ibmar odukuosulid.
JER 42:5 Geb Jeremíasʼga sogdemalad: —Bab-Dummad-Jehová-bela-beba-anmarga-ibmar-sogoedba anmar imaksulile, Bab-Jehová anmargi innikigwadba, degi, napiragwadgi anmar-barsogega gusunno.
JER 42:6 Gayaburba anmarga nueddibe, ichakwadibe, anmar-Bab-Dummad-Jehováʼba anmar ibsamaloed. Anmar Bab-Jehováʼse idakega be-barmisad, aba anmar ibsaoed. Deyobi, anmar, anmar-Bab-Jehová-ibmar-sogedba-ibsaele, nueganbi anmarga ibmar naoed.
JER 42:7 A-ibambegine (10), Bab-Jehová, Jeremíasʼga sunmaknonikid.
JER 42:8 Geb Jeremías, Carea-machi-Johanánʼse, degi, bela sorda-bila-onomalad-e-dummagan Johanánʼba-gudimaladse gochad. Deginbali, bela dulemarse, burwiganase, degi, serganse-bakar, gochabalid.
JER 42:9 Amarga weyob Jeremías sogded: “Israel-dulemar-e-Bab-Dummad-Jehováʼse bega ibmar-egisega be an-imaksamaladi, a-Bab-Dummad weyob soged:
JER 42:10 ” ‘Ar bemar we-yalagi ambikuega guakwamalale, an be-onasgumai samaloed, an bemar-obelogosulid, an bemar-urboed, an bemar-osulogosulid. Ar ade, an bemargi boni-dummagan-barmisadi an nue-nunmak itoged.’ ”
JER 42:11 Bab-Jehová soged: “Bemar Babilonia-rey-dobgudimalad, melle be dobgumalo. Ar ani an bemar-bendakega bemarba gudiid, degi, Babilonia-rey-e-ganguedgi bemar-ollorsaega an gudiid.
JER 42:12 Ise-wile an bemar-dakoed, deyobi, Babilonia-rey wile bemar-dakmogoed. Gannar be-yarse-naega bemar-imakoed.”
JER 42:13 Ani Jeremías sogdebalid: Ar bemar, bemar-Bab-Dummad-Jehová-sogedba ibsasulile, weyob be sogmalale: “Anmar we-yargi ambikuosurmala,
JER 42:14 Egipto-yarse anmar bur megnaoe. Agindi, anmar bila-onoleged itogosulid, degi, bila-onolegedgi gar-trompeta-goled itogosurbalid. Degine, anmar agi uku-mesosurbalid, asega anmar bur megnamaloye.” Deyob be sogmalale,
JER 42:15 Judá-dulemar-napi-besmalad, nue Bab-Jehová-gayaburba be itomalo. Weyob Israel-dulemar-e-Bab-Dummad-Jehová-Bela-Gangued-Nikadi soged: “Ar bemar Egipto-yarse-megnaedgi nue-binsamalale,
JER 42:16 bemar bila-onoleged-dobgudimaladi, Egipto-yalagi be itodapmaloed. Degi, bemar ukud-dummad-dobgudimaladi, Egipto-yalagi be itodapmaloed. A-yalagine bemar girgumaloed.
JER 42:17 ”Bela dulemar Egipto-yalase-nue-nabimaladi, ase nue-megnabimaladi, Egiptoʼgi bila-onolegedgi girgumaloed, degi, ukudbali, boniganbali girgumaloed. Bipisaale dule-wargwen boni an barmidoedgi gwen durguosulid, gwen egi wakinnosurbalid. Bela burgwemaloed.”
JER 42:18 Ar Israel-dulemar-e-Bab-Dummad-Jehová Bela-Gangued-Nikadi soged: “Ar bemar Egipto-yalase-megnamarye-sogmalale, igi an Jerusalén-dulemargi an-urwed oyosa, degi, igi an an-sae-itogedi egi oyosbali, deyobi, an bemargi an-urwed oyomogoed. Ibmar-ukabsalegeyobi be ukabsalemaloed, isdar-daklegedga, sae-daklegedga be gudmaloed, degi, bar be Jerusalén-neggwebur dakosurmalad.”
JER 42:19 Ani Jeremías sogdebalid: “Judá-dulemar-napi-besmalad, Bab-Jehová weyob bemarga sogsad, melle be Egipto-yalase namaloye. Ebinsamalo, an bemarga iduakwaa-ibmar-sognaidi, napiragwad.
JER 42:20 Bemar, be-Bab-Dummadse-an-barmisadgi be dummad-nosmalad. Be anga weyob sogsamalad: ‘Anmar-ular, be anmar-Bab-Dummad-Jehováʼse ise-wilegar-gorye, bela bega ibmar-sogoedi anmarga be sogmogoye, adi, anmar a-sogedba ibsamalagarye.’ ”
JER 42:21 Emide, an emi-ibagi an bemarga ibmar-sognaidi, emisgwa bemar, bemar-Bab-Dummad-Jehová-sogedba ibsabisurmalad. Bab-Dummad bemarga ibmar-sogoye-anga-sogsadba be dabisurmalad.
JER 42:22 Degisoggu, be ebinsamalo, bia be megnabiye na be binsamalale, agine bila-onolegedgi be girgumaloed, degi, ukudbali, boni-dummagangine be burgwemaloed.
JER 43:1 Jeremías, dulemarga Bab-Dummad-Jehová ega ibmar-sogsad bela sogsagua,
JER 43:2 Osaías-machi-Azarías, degi, Carea-machi-Johanán, degine, bela san-dummarba-imakmalad Jeremías-abin sogdemalad: “¡Binsa be gordii! Anmar-Bab-Dummad-Jehová, bega sogsasulid, ‘be anmarga sogoye Egipto-yalase melle megnamaloye.’
JER 43:3 Nerías-machi-Baruc, be anmargi-gwichiguega be-ourwenaid. Adi, Babilonia-sordamarga anmar-urmakega, adi, a-dulemar anmar-oburgwegar, adi, a-dulemar anmar-gasa Babilonia-yarse anmar-sedegar.”
JER 43:4 Degisoggu, Carea-machi-Johanán, degi, sorda-bila-onomalad-e-dummagana, degine, neggwebur-dulamar, bipisaale Bab-Jehová-gayaburba-sogedba ibsassurmalad. Ar emarga soglesanad “Judá-yalagi be megmaloye,” degite, itossurmalad.
JER 43:5 Aka Carea-machi-Johanán, degi, sorda-bila-onomalad-e-dummagana, Egipto-yalase Judáʼgi-napi-besmaladi sesmalad. Amardina, dulemar-gannar-Judá-yarse-megnonimaladinad, degi, yogasaar neggwebur-baiganba-aisakis-bukwamalad-nonimaladinad, amala selesad.
JER 43:6 Deunni, reyga-nakulemalad-e-dummad-Nabuzaradánʼye-nugadi, Ahicam-machi-Gedalíasʼga, machergan, omegan, mimmigan, degi, rey-sisgan, degine, bela dulemala, dakega ega uksagusanad. Degine, Bab-Dummad-gayaburba-barsoged-Jeremías, degi, Nerías-machi-Baruc, ega dakega uklesgusbalinad. Gedalíasʼde Safán-wagwad.
JER 43:7 Ar Bab-Jehová-sogedba ibsassurmarsoggu, bela Egipto-yalase nadegusmalad, Tafnes-neggweburse modapmalad.
JER 43:8 Tafnesʼgine, Bab-Jehová-gayaburba Jeremíasʼse nonikid, ega weyob sognonikid:
JER 43:9 “Akwa-dummagan be sue, Tafnesʼgi Faraón-neg-doged-asabin, Judá-dulemar-wagab napsa-ariogar-maidgi be digo.
JER 43:10 Geb a sorbali, dulemarga be weyob sogo: ‘Weyob Israel-dulemar-e-Bab-Dummad-Jehová Bela-Gangued-Nikadi sogye: An-mai-Babilonia-rey-Nabucodonosorʼbina an goloed. An we-akwamar-diglesad-birgine, an e-ologana sioed. We-akwamar-birgine, e-dordoneg soboed.
JER 43:11 ” ’Nabucodonosor Egipto-yalase nonikoed, egi gwichigunonikoed. Dulemar-burgwemaloye ega igar-maidi, burgwemaloed. Dulemar-gales-seledmaloye ega igar-maidi, gales-seledmaloed, degine, bila-onolegedgi-girgumaloye ega igar-maidi, bilagi girgumaloed.
JER 43:12 Babilonia-sordamar Egipto-dulemar-bab-dummadse-goled-negmar ogumakmaloed, e-bab-dummagan ei sedmaloed. Egipto-yala bela swanga imakmaloed, igi sibad-edarbed mor omomormakdae, deyobi, Nabucodonosor, Egipto-yala imakoed. Geb a-sorbali, Nabucodonosor, bogidikidgi e-yarse naoed.
JER 43:13 Egipto-yargi, Bet-Semes-neggweburgi akwa-sobarmalad-bukwad bela obelogoed, Egipto-dulemar-e-bab-dummaganse-gormalad-negmar ogumakoed.’ ”
JER 44:1 Bab-Jehová-gayaburba Jeremíasʼse nonikid, bela Egipto-yalagi Judá-dulemar-bukwadgi ega sunmaknonikid. We-Judá-dulemar Migdol-neggweburgi bukmalad, Patros-yargi Tafnesʼgi-bukmalad, degi, Menfisʼgi-bukmalad, degine, dad-nakwed-argan-nuedsik neggweburmar-bukmaladsik-bukmaladgi ega sunmaknonikid. Weyob ega sognonikid:
JER 44:2 “Weyob Israel-dulemar-e-Bab-Dummad-Jehová Bela-Gangued-Nikadi soged: ‘Ar bemar daksad, igi an Jerusalén-dulemargi boni-dummagan barmiali, degine, bela Judá-neggweburmargi boni-dummagan an egi barmiali, ar bemar daksamalad. Ar emi-ibase, bela a-neggwebur bibichis-bukwad, dule-wargwen gwen egi maisulid.
JER 44:3 Ar ade, ibmar-isgana-imaksamaladba deyob gusad. Ar bab-dummadyob-imaklemalad-e-bab-dummaganga-imaksamaladba an-oulusmalad, degi, a-bab-dummaganga ina-wawadikmalad-ukdemaladba an-oulusmalad. Ar e-dadgana, degi, emarbela gwen we-bab-dummagan wissurmalanad.
JER 44:4 ” ’An bemarga an-gayaburba-barsogmalad barmimaiguanad, adi, bemarga sogmalagar: Melle igar-isgana an sae-dakedba be nanamarye.
JER 44:5 Degi-inigwele, be an-itossurmalad, an-sogedba be dassurmalad. Be-isguedga be bukib-binsassurmalad, aka be bab-dummadyob-imaklemaladga ina-wawadikid ukdii gudmalad.
JER 44:6 A-ulale, an-urwedi, an-sae-itogedi, sooyobi Judá-neggweburmargi gwichigusad, degi, Jerusalén-neg-galimbamargi gwichigusad. Emi-ibasega akwamarbi ganna-ganna bukwad, degi, nega-dulesulidga nagusad.
JER 44:7 ” ’Emide ani an Israel-dulemar-e-Bab-Dummad-Jehová Bela-Gangued-Nikadi soged: ¿Ar ibiga be dukin boni-dummad-amiedgi be binsamala? ¿Ibiga be Judá-dulemar bela-girguega be imakbimala? ¿Bela machergana, omegana, mimmigana, degine, goe-gwaruganase-bakale, burgwega be imakbimala? ¿Ibiga bela dulemar-obelogedse be imakbimala?
JER 44:8 ” ’Ibmar-isgana-imakedba be an-ourwega an-imakmalad. Bemar wegi Egipto-yalase megnonimaladgi bab-dummad-baiganga ina-wawadikid ogumakar ukdimalad. Unnila be dukin sabsur-wilemaloed-aminanaid, degi, ukabsalegedga-guega be gunanaid. Degine, dulemar-yar-baid-baidsik-bukmalad-imbagi isdar-daklegega be gunanaid.
JER 44:9 ¿Ar bemar bato be-dadgan bela ibmar-isgana-imaksamalad be iesmarsi? ¿Judá-reymar, degi, e-omegan ibmar-isgana-imaksamalad bato be iesmarsi? ¿Bemar, be-omegana Judá-neggweburgi, degine, Jerusalén-neg-galimbaba ibmar-isgana-imaksamalad bato be iesmarsi?
JER 44:10 ” ’Degi-inigwele, amba emi-ibasega gwen san-bipii be imaksurmalad, degi, gwen dobee be itosurmarbalid. An-Igar-Mesisadba, an-Igar-uksadba, gwen be ibsadisurmalad, an bemarga, degine, be-dadganga an we-Igarmar uksad.
JER 44:11 ” ’A-ulale, ani an Israel-dulemar-e-Bab-Dummad-Jehová Bela-Gangued-Nikadi soged: An bemar-sabsur-odurdakega bemargi gwichigue-sokarsunnad. Bela an Judá-dulemar obelosokarsunnad.
JER 44:12 Judá-dulemar-napi-besmaladi, Egipto-yalase-megnadegusmaladi, bela agine girgumaloed. Es-suidgi girgumaloed, ukud-dummadse bergumaloed. Bela serganse, burwiganase-bakale, ukudba burgwemaloed, es-suidgi girgumaloed. Ibmar-ukabsalegeyobi ukabsalegega gumaloed, mesagwar-imaklegedga gumaloed, degi, dulemar-ogwayega gumaloed.
JER 44:13 ” ’Igi an Jerusalén-dulemar sabsur-wiosa, deyobi, an Egipto-yalagi-mamaimaladi sabsur-wiomogoed. Ukud-dummadba an wiogoed, boni-dummaganba an wiogoed, degi, es-suidgi an wiogoed.
JER 44:14 Wargwensaale, Judá-dulemar-napi-besmalad Egiptoʼse megnadmaladi gwen wakinnosulid. Degine, gannar Judá-yalase dagega gwen san-onogosulid. Judá-yalase dagbimaloen-inigwele, dagosurmalad. Unnila gwenna-gwenna nabir-wakinmaloedbi gannar Judá-yalase nonimaloed.’ ”
JER 44:15 Machergan, e-omegan bab-dummad-baiganga ina-wawadikid ogumakar-ukdimarye wismaladi, degine, omegan bela soggwenna danagwen-bukmaladi, degine, Patros-yargi bela dulemar Egipto-dad-nakwed-argan-nuedsik-bukmaladi, Jeremíasʼga sogdemalad:
JER 44:16 —Be anmarga Bab-Jehová-nuggi-sunmaksad, anmar be-itogosuli.
JER 44:17 Anmar ibmar-imakoye-sogsad bur imakoe. We-ibmar anmar imakoe: Rey-Bundor-Nibnegginedga ina-wawadikid ogumakar-ukdii gumaloe, degi, vino-eogar ega-ukmaloye anmar sogsad. ”Bato anmar we-ibmar imakdibinned, degi, igi iduar bato anmar-dadgan we-ibmar imaksamala, deyob anmar imakmogoed. Igi iduar anmar-reymar, anmar-dummagan Judá-neggweburmargi, Jerusalén-neg-galimbaba we-ibmarmar imaksamala, deyob anmar imakmogoed. Deunni, a-ibagangine, anmar mas nue-nikadaed, anmar nueganbi gudidaed, gwen anmar boniganba-galitodii dasulid.
JER 44:18 Anmar Rey-Bundor-Nibnegginedga ina-wawadikmalad bar-ukdesurgua, degi, vino bar ukdesurgua, anmar ibmar-sate gudmalad. Anmar-dulemar ukudba, degi, bilagi burgwemamai gudmalad.”
JER 44:19 Geb omegan sogdemogad: —Anmar Rey-Bundor-Nibnegginedga ina-wawadikid ogumakar-ukdagu, degi, vino-eodagu, ¿anmar-machergan wissurdasi? Anmar Rey-Bundor-Nibneggined-sundakle madu imakdaed, degi, anmar ega vino-eodabalid ¿anmar-machergan wissurdasi?
JER 44:20 Geb Jeremías bela machergan ega ibmar-sogsamaladga, degi, omegan ega ibmar-sogsamaladga sogded:
JER 44:21 —¿Bab-Jehová we-ibmar wissurye be bimala? Bela wisi. Bemar, degi, be-dadgana, be-reymala, degi, be-dummagana, degine, bela dulemala Judá-neggweburmargi, degi, Jerusalén-neg-galimbaba ina-wawadikmalad ogumakar-ukdidamaladi, ar bela wisid.
JER 44:22 Bab-Jehová bemar-ibmar-isgana-imakmalad budar-dakgusgu, degi, ibmar-isdar-daklemalad-be-imakmaladi budar-dakgusgu, be-neggwebur ibmar-ukabsalegeyobi, ukabsalesad. Nega-dulesulidga imaksad, neg-olloo, dule-sate imaksad. Emi-ibadse, deyob naid.
JER 44:23 ”Bemar bab-dummad-baidga ina-wawadikid ukdegusmalad, Bab-Jehováʼgi be isgusmalad, e-gayaburbaba be ibsassurmalad, e-Igar-Maid-sogedba be ibmar imaksasurmalad, degi, e-Igarmar-omesisadbali, e-Igarmar-uksadbali, be ibsassurmalad. A-ulale, emi-ibagine we-bonigan bemargi nonikid.”
JER 44:24 Ani Jeremías bela dulemarga, degi, omeganga weyob sogsad: —Judá-dulemar-Egipto-yalagi-mamaimalad Bab-Jehová-gayaburba be nue itomala:
JER 44:25 Weyobi, Israel-dulemar-e-Bab-Dummad-Jehová Bela-Gangued-Nikadi soged: ‘Bemar, degine, be-omegan weyob sogmalad: Anmar Rey-Bundor-Nibnegginedga ina-wawadikid ogumakar-ukdii gumaloye, degi, vino-ukdii gumarbaloye. Be ibmar-imakmaloye-sogmaladi, be-ibmar-imakedgi be oyomardo. Degirdi be namar, be-ibmar-imakoye-sogsamalad be imaknamar, be ibmar-ukoye-sogsad be sedmar.’
JER 44:26 ”Degi-inigwele, bemar Judá-dulemar-Egipto-yalagi-mamaidi, Bab-Jehová-gayaburba be itomar. Bab-Jehová weyob soged: ‘Ani an Bab-Jehová-guedgi an-nuggine an soged, Judá-dule-wargwensaale Egipto-yalagi-maidi, an-nug bar ogannogosulid. Degi, dulemar bar weyob ise-sogar sogosurbalid: Bab-Jehová-Bela-Gangued-Nikad-Dulamaid-nuggi an ibmar-sogye sogosulid.
JER 44:27 ” ’An bemargi bonigan-barmidega nakulemai guoed, ibmar-nuegan bemarga imakega an nakulegosulid. Inniki an bemarga soged, bela Judá-dulemar-Egipto-yalagi-bukmaladi, ukud-dummadba, degi, bila-onolegedgi an obelogoed.
JER 44:28 ” ’Unnila dule-ichee Egiptoʼgi bila-onolegedgi-wakinmaloedi, Judá-yalase nonimaloed. Geb agi, Judá-dulemar-napi-besmaladi, wisgumaloed, doa-ibmar-soged bur nabir guoe. An-ibmar-sogeddibe, emar-ibmar-sogeddibe.’ ”
JER 44:29 Bab-Jehová soged: “We-ibmar-guoedgi be dakoed. An sabsur we-yalagi bemar-odurdakoed, adi, be wisgumalagar an-ibmar-sogedi, sogedba gue.
JER 44:30 Ani Bab-Jehová soged: Egipto-rey-Faraón-Hofra an e-isdarmaladga ukoed, e-oburgwebigudimaladga an urmakoed. Igi an Judá-Rey-Sedequías, e-isdarad-Babilonia-rey-Nabucodonosorʼga oburgwega an uksa, deyob an Egipto-rey-Faraón-Hofra an urmakmogoed.”
JER 45:1 Birgabakegus Josías-machi-Judá-rey-Joacim Judá-yalagi dummadga maigu, deunni, Nerías-machi-Baruc Jeremías-ega-ibmar-soged-narmaksiigu, Jeremías Barucʼga weyob sokalid:
JER 45:2 “Baruc, Israel-dulemar-e-Bab-Dummad-Jehová weyob be-annik soged:
JER 45:3 ‘Bede weyob sogye: ¡An duledar-wilesye! ¡Bab-Jehová anga gwage-nunmaked-dummad uknonibarye! An budar bogusye, obunnoged an gwen amisurye.’
JER 45:4 ”Emide, Bab-Jehová anga soged, weyob Barucʼga be sogoye: ‘An we-neggwebur-sobsadi gannar an obelogoed, an ibmar-digsadi gannar an oberguoed. Wegisundo, bela we-yala-naid an obelogoed.’
JER 45:5 ”Bab-Jehová bega soged: ‘¿Ar bede ibmar-dummagan abede? Melle be ibmar egise, ar bela dulemargi boni-dummagan an barmidasokalid. Ar bedi bia be naoe, abali, dula-gudiguega an be-imakoed. We be-ibmar-nuedga guoed.’ ”
JER 46:1 Bab-Jehová-gayaburba, e-gayaburba-barsoged-Jeremíasʼse nonikid, neggwebur-baigangi ega sunmaknonikid.
JER 46:2 Josías-machi-Judá-rey-Joacim, Judá-yalagi birgabakegus dummadga maigua, Babilonia-rey-Nabucodonosor, Egipto-rey-Faraón-Necao-ogalakus gusad. Deunni, Faraón-Necao, Carquemis-neggweburgi Éufrates-diwar-nagaba maigusad. Bab-Jehová, Faraón-Necao-sordamargi, degi, Egipto-dulemargi weyob sognonikid:
JER 46:3 “Guakwaa sigu-abgaed amimar, bila-onogega namar.
JER 46:4 Guakwaa moli nasikmar. Moligi-nanamalad, moligi be nakwemar. Guakwaa gudii be imakmar, bormo-gurgin be yomar. Eswarmar be oswiswimakmar. Esgoro-mor be yomar.”
JER 46:5 Bab-Jehová soged: “¿Ar wede igidi? Be-sorda-bila-onomalad galakudmalad, gannar sorsik sikirmakdemalad. Ise-gwayale, sorsik-ataksuli duurmakmamaid. Bela dobegwar neg itoleged.
JER 46:6 Dule-binnasuli-yeer-abarmakedi, geg wakinned, dule-gandikidi, geg dukued. Dad-nakwed-argan-sapiledsik Éufrates-diwar-gakaba, yoledapdamalad, aimukuddamalad.
JER 46:7 ”¿Ar wede doawa? Nilo-diwar-nodanikidyob nodaniki. ¿Wede doa diwar-sukamakdanikidyob daniki?
JER 46:8 Egipto-sordamar danikid, Nilo-diwar-engudanikidyob danikid, diwar-sukamakdanikidyob danikid. Ar Egipto-sordamar soged: ‘Yar-birise an nakoed, bela yalamar-naid an odogoed. Neggweburmar an osulogoed, degi, an e-dulemar obelogoed.
JER 46:9 ¡Molimar, be urwemar! ¡Bila-ur-napaginmalad, binnasuli be abarmakmar! ¡Sorda-bila-onomalad, ginemar! ¡Cus-sordamar, be-sigu-abgaed be gamar! ¡Fut-sordamar, be-sigu-abgaed be sumar! ¡Lidia-sordamar, be-warsi be yaa imakmar!’
JER 46:10 ”We-iba, Bab-Jehová-Bela-Gangued-Nikad-ibad. Buged-mai-imaked-ibaga guoed, e-isdarmaladgi buged-mai imakoed. Es-suid geg-itogusadse dulemar-gindakoed, es-suid na dulemar-ablisgine immelegoed. Dad-nakwed-argan-sapiledsik, Éufrates-diwar-gakaba, Bab-Jehová-Bela-Gangued-Nikadi, dulemar-oburgoed.
JER 46:11 ”Egipto-dulemar, Galaad-yalase be namar, ase, ina-wawadikid be aminamar. Inamar bukidar be amimalo-inigwele, gwen be nuguosurmalad.
JER 46:12 Bato neggwebur-baigan be-galakusad wismalad, binnasuli be-boedi bela napaneg-naidgi itoleged. Sorda-bila-onoged, sorda-baidbo-yolenanaidi, ebobela napagi aimukumamaid.”
JER 46:13 Bab-Dummad-gayaburba-barsoged-Jeremíasʼse weyob Bab-Jehová-gayaburba nonikid. Deunni, Babilonia-rey-Nabucodonosor, Egipto-yalagi gwichigudanigu, ega weyob sognonikid:
JER 46:14 “Egipto-yalagi we-ibmar be sogmalo, Migdol-neggweburgi, Menfis-neggweburgi, degine, Tafnes-neggweburgi be weyob sogmalo: ‘¡Guakwaa bukumalo, ise-neg-itogar ambikumalo! ¡Be-dikarbali, es-suidmar neg-gagadagoed!’
JER 46:15 ¿Ar ibiga be-sorda-bila-onomalad aimukumamai? Ar gege gannaa gwisgumalad, ar Bab-Jehová we-dulemar-omukusad.
JER 46:16 Be-sordamar, egi yolenanaid, na birgi-birgine aimukumamaid. Weyob sogmalad: ‘Gwichibin sae, anmar-neggweburse anmar nae, anmar-gwalulesad-yarse anmar nae, anmar-isdarmalad-es-suid-idu anmar wakinne.’
JER 46:17 Degi, binnasuli weyob sogmalad: ‘¡Faraón unnila binsa ee gordii! ¡Egipto-reyga-ibmar-soglesad bergusad!’ ”
JER 46:18 Ani an Rey gued, dula-maidid, Bab-Jehová-Bela-Gangued-Nikadye an nugad. An soged: “Igi yar-baiganba bur Tabor-yar-dummad nosii, igi demar-gakaba Carmelo-yar bipisur nosii, deyob-dungueyobi, be-isdarmalad begi danimaloed.
JER 46:19 Bemar Egipto-yalagi-bukmaladi, gales-ebipiledmaloed-idu be guakwaa ambikumalo. Ar Menfis-neggwebur bela ollobi naguoed, bela bibisgoed, dulemar egi megosulid.
JER 46:20 ”Egipto-yala, moli-bebe-nikad-bunolo-yeerdaklegeyob dakleged, degi-inigwele, obelolegegala dad-nakwed-argan-sapiledsik, moliburyobi egi danimalad.
JER 46:21 E-sordamar-manigi-bennuklegarmalad ilemakar-bukwad, moli-bebe-nikad-bunolomar-wardada-daklegedyob dakleged, amarmoga, gannar sorsik duurmakmaimarmogad, bela danagwena gwen gwisgusuli duurmakmamaid, ar e-bergued-ibagan ega mosad, degi, sabsur-odurdakleged-ibagan ega nagunonikid.
JER 46:22 Egipto-sordamar naibe-goleyobi-itolege duurmakmamaid, e-isdarmaladdi gandikidgi egi warmakdanikid. Sapi-sikmaladyobi, akan annik-annik e-bina danimalad.”
JER 46:23 Bab-Jehová soged: “Be-sapimar ise-gwamakar-bukwa-inigwele, bela naitinagase obelolegoed. Sapi-sikmaladi, bur bule sesmarba mergued, dule geg we-dulemar ebised.
JER 46:24 Egipto-yala-yeerdaklegedi, nue obingegsalegoed. Dulemar-dad-nakwed-argan-sapiledsikmaladga uklegoed.”
JER 46:25 Israel-dulemar-e-Bab-Dummad-Jehová Bela-Gangued-Nikadi soged: “An Tebas-dulemar-e-bab-dummad-Amónʼye-nugad sabsuli odurdakoed. Degi, Egipto-dulemar, e-bab-dummagan, degine, e-reymar an sabsur-odurdakbaloed. Degine, Faraón, degi, dulemar-Faraónʼgi-bensurmalad an sabsur-wiobaloed.”
JER 46:26 Bab-Jehová soged: “Dulemar-be-oburgwebi-gudimaladga an be-urmakoed, Babilonia-Rey-Nabucodonosorʼga, degi, ega-arbamaladga an be-ukoed. Geb a-sorbali, Egipto-neggwebur epennegwadyobi gannar ambikuoed.
JER 46:27 Be an-dula-Jacob-wagan-gumaladi, melle be gwayemar, Israel-wagan, melle be dobee itomar. Jacob-wagan, ar an we-yargi bemar-onogoed, ar be-wagan Babiloniaʼgi-gales-bukmaladgi an onogoed. Gannar be bogidik-gudii guoed, dobedsuli be garmakdii guoed.”
JER 46:28 Bab-Jehová soged: “Be an-dula-Jacob-wagan-gumaladi, melle be gwayemar. Be-bendakega an be-yalaba gudiid. Bia an be-oaisakismala, a-yalamar an bela-naitinagase obelogele, bemardi an be-obelogosulid. Unnila igar-innikigwadba an sabsur-bemar-odurdakoed, an bemar-odurdaksuli an guosulid, an bemar-odurdakedsegad.”
JER 47:1 Faraón, Gaza-neggweburgi-gwichigued-iduale, Bab-Jehová-gayaburba, e-gayaburba-barsoged-Jeremíasʼse nonikid, adi, Filistea-dulemargi ega sunmakegar.
JER 47:2 Bab-Jehová weyob soged: “¡Dad-nakwed-argan-sapiledsiki, diwar-nodanikid be dakmala! Bela yala-ododanikid, bela yalagi-ibmar-bukwad ododanikid, neggweburmar, degi, e-dulemar-bukwad ododanikid. ¡Dulemar bela oimakdemalad! ¡Napneggi-dulamar-bukwad bela ogormakdemalad!
JER 47:3 Babgan molimar-nag-gole itoarmargu, ur-napaginmalad-e-nagmar-bipirmaknaid-gole itoarmargu, degine, ur-napaginmalad-gole itoarmargu, babgan dobedbali niga-argwatemalad, na e-mimmigan iedmalad.
JER 47:4 Bela Filistea-dulemar-obeloged-iba nonikid, Tiro-sorda-bendakmalad-obeloged-iba, degi, Sidón-sorda-bendakmalad-obeloged-iba nonikid. Bab-Jehová, Filistea-dulemar obelogoed, Caftor-demar-gakaba-dulemar-bukmalad obelobaloed.
JER 47:5 Gaza-dulemar nono-swiri imakdemalad, Ascalón-dulemar geg-sunmake gudmalad. Bemar-nebagi-bukmaladi, ¿sanagwadse na be dukin san-daas-daas imaksuli gumaloe?
JER 47:6 ”¡Duledar-wiles! Bab-Jehová-es-suid begi nosa. ¿Ar sanagwadse be bar anmar-oburgosurye soge? ¡Es-suid, be-ukayaba be doge! ¡Boo be mege, melle be anmar-gindake!
JER 47:7 ”¿Ar sunna es-suidde boo megosi? Ar Bab-Jehová, Ascalón-dulemar-ogilogega, demar-gakaba-bukmalad-oburgwega ega igar uksad.”
JER 48:1 Bab-Jehová-Bela-Gangued-Nikadi weyob Moab-dulemarnik soged: “¡Nebo-neggwebur, be duledar-wiles! Ar bela be berguoed. ¡Quiriataim-neggwebur galegoed, obingegsalegoed! E-neggwebur-galu-matusulid-akwabiid, bela omukulegoed, bela obelolegoed.
JER 48:2 Moab-neggwebur-yeerdakleged, bela yogguded. Hesbón-neggweburgi egi weyob igar aminanaid: ‘¡Dagmar, anmar we-neggwebur obelonamala!’ Madmena-neggwebur, be amba gumogoed, be obelolemogoed, ar es-suid begi gwisgusuli guosulid.
JER 48:3 ”Horonaim-neggwebur-akale, binnasuli dule-gole itoleged, weyob soged: ¡Neg bela! ¡Neg bibichide!
JER 48:4 Moab-neggwebur bibichisad, bato e-burwigan-binnasuli-boed itoleged.
JER 48:5 Luhitʼye-neg-nugad-nakwemaidbali, dulemar ogormakar-ogormakar nakwemamaid. Moab-neggwebur-obelolenaid-ulale, Horonaim-neggwebur-aidemaidbali, dulemar nunmakedba-binnasuli-goled itoleged.
JER 48:6 ¡Be wakinmala! ¡San-onogega be abarmakdemala! ¡Moli-uayasuid-sapurbalidyob be abarmakdemala!
JER 48:7 Moab, be-ibmar-imakedgi be bensursoggu, degi, be-ibmar-nuegan-nikadgi be bensursoggu, be galemogoed. Be-bab-dummad-Quemos, e-dule-irwa-gormaladbo, degi, ega-arbamaladbo, gales seledmogoed.
JER 48:8 Bela neggweburmargine, dule-obeloged gwichigunonikoed. Neggwebur-gwagwensaale, gwen san onogosulid. Bab-Jehová-sogsadyob guoed: Neba-naidi bela swanga naguoed, neg-duturgan-naid bela berguoed.
JER 48:9 Moab-neggweburga be guakwaa napa mese, ar bato bergus siid. Bato e-neggweburmar bela ollo-ollo naid, ar dulemar neggweburmargi bar gudisulid.
JER 48:10 ”Dule an-sogedba ibmar-imaksulile, a-dule iwigusun. Dule an-sogedba dulemar-oburgwebisulile, a-dule iwigusun.
JER 48:11 ”Moab-dulemar ambikuded-akale, bonisuli bukwad. E-dulemala wargwensaale, neggwebur-baidse gales seledisulid. Vino-nuedyob Moab-dulemar gued. Igi vino gusgu siigudae, deyob, Moab-dulemar gumogad. A-ulale, bela ega nueganbi ibmar nadegusad, e-damalad gwen gwagmaisulid.”
JER 48:12 Bab-Jehová soged: “Ibagan dani. Moab-dulemar-isdarmalad, Moab-dulemargi an barmidagoed, adi, Moab-dulemar yar-baidse sedmalagar. Moab-yala ollomaklegoed, e-neggwebur bela bibisgoed.
JER 48:13 Geb agine, Moab-dulemar e-bab-dummad-Quemosʼye-nugadgi bingedar itomaloed. Igi Israel-dulemar bab-Betelʼye-nugadgi bingegusmala, deyob Moab-dulemar gumaloed. Deun, Israel-dulemar bab-dummad-Betelʼgi bengussurmalad, e-bendakoye bismalanad.
JER 48:14 ”Mer be sogmalo: ‘Anmar dule-bila-onomalad-buleganye, anmar bila-onoged-gandikmaladye.’
JER 48:15 Ani an Rey-guedi, Bab-Jehová-Bela-Gangued-Nikadye an nugad. Weyob an soged: Moab-dulemar bela oitolegoed, e-neggweburmar bela sulegoed. E-sapingana, oburgwileged-negse seledoed.
JER 48:16 Moab-neggwebur-bergued omosad. E-bonigan bato egi walikgusad.
JER 48:17 Bemar, Moab-yar-dikarba-bukmaladi, Moab-dulemarga be bomar. Moab-dulemar-nug-dummarba-nikad-wismalad, Moab-dulemarga be bomar. Weyob be sogmar: ‘Be dake, ibibayobi Moab-neggwebur bergusa. Ar Moab-neggwebur yeer-ganguedinad, degite bergusad.’
JER 48:18 ”Bemar, Dibón-neggweburgi-bukmaladi, be-mamaidgi be ainidamar, napa-dinnaregedgi be bukudamar. Ar Moab-e-isdarmaladi, bemargi yolenaid, be-neg-gandikmalad bemar-ibe bibisgenaid.
JER 48:19 Bemar, Aroer-neggweburgi-bukmaladi, igarba be gwisgudamar, be dakdamar. Machergan-wakinmamaidse, omegan-wakinmamaidse, be weyob egisdamar: ‘¿Wede igi neg gunai?’
JER 48:20 Moab-dulemar oitolesmalad, dule-baiganse galakusmalad. ¡Ega be bomala! ¡Ega be nunmak itomala! Arnón-diwarba be sogmalo, Moab-dulemar nue-oitolesye.
JER 48:21 ”Nebagi neggweburmar-bukmaladi, ega odurdakleged-iba omosad. We-neggweburmar odurdaklegoed: Holón-neggwebur, Jahaza-neggwebur, degi, Mefaat-neggwebur,
JER 48:22 Dibón-neggwebur, Nebo-neggwebur, Bet-Diblataim-neggwebur,
JER 48:23 Quiriataim-neggwebur, Bet-Gamul-neggwebur, degine, Bet-Meón-neggwebur,
JER 48:24 Queriot-neggwebur, Bosra-neggwebur, degi, bela Moab-neggweburmarga odurdakleged-iba omosad. ”Neggwebur itikiganaga, degine, dikasurmaladga odurdakleged-iba omosad.”
JER 48:25 Bab-Jehová soged: “Moab-neggwebur-gangued bergusad, e-garganguedi surgunonikid.
JER 48:26 ”Be Moab-dulemar-omumsamar ar Bab-Jehováʼba uayasuli nanasmalad. Moab-dulemar e-agedgi bindumakega be samar. Moab-dulemargi dodolegega gusun.
JER 48:27 Moab, ¿ar bede Israel-dulemargi dodoardasursi? ¿Egi mesagwar be sunmakardasursi? Dule-atursamaladbo-daklesayob, ¿egi be sunmakardasursi?
JER 48:28 ”Moab-dulemar, neggweburmargi be ainimar, akwa-dummagan-imbaba be megnamar. Nuu-gudiiyobi, be garmakdii imaknamar, akwa-yaba e-uu-sii-damaladyob be gudii imaknamarsun.
JER 48:29 Moab-dulemar-san-dummarba-imakedi anmar wisid, doggus na san-dummarbaa imakmalad. San-bule-bule samalad, san-dummarbaa imakmalad, san-gandiki samalad, dule-buled san-imakmalad.”
JER 48:30 Bab-Jehová soged: “Moab-dulemar-san-dummarba-imaked an wisid, ar e-bule-buledaedi gwen e-bendakosulid.
JER 48:31 ”A-ulale, Moabʼga an bukib-binsaoed, bela Moab-dulemarga an booed, degi, a-ulale, Kir-Hares-neggweburga an osgomakoed.
JER 48:32 Sibma-neggwebur-uva-nainu, an Jazer-neggweburga-boedba, an bega bur bule booed. Be-anagan bela demarse warmaked, bela Jazerʼse warmaked. Degi-inigwele, dule-obelogedi be-uva-nainugi, degi, be-uvaʼmargi gwichiguoed.
JER 48:33 Moabʼgi nainu-gadi-sanmakmalad-nanaidgi, yeer-itolegedi, degi, weligwar-itolegedi bar itolesulid. Uva-egured-galu an obelosad, bar dule weligwaledba uva-egurnai guosulid, binnasuli-dule-goledi bar weligwaledba golosulid.
JER 48:34 ”Hesbón-dulemar-boedi, Eleale-neggweburse itoleged, Jahaza-neggweburse e-boed warmaked. E-goledi, Zoar-neggwebur-akar, Horonaim-neggweburse itoleged, degi, Eglat-Selesiyáʼse warmaked. Ar Nimrim-diwarbela dinna guoed.”
JER 48:35 Bab-Jehová soged: “Moab-dulemar bab-dummadgan-aila-matusulidgi ibmar-ogumakar-ukmalad an obelogoed. Degine, e-bab-dummaganga ina-wawadikmalad-ukmalad an obelobaloed.
JER 48:36 ”A-ulale, gar-gammu-goledba, an-ulubgi an Moab-dulemarga boed. Gar-gammu-goledba, an-ulubgi an Kir-Hares-dulemarga boed. Ar e-ibmar-nuegan-onmaksadi bela bergusad.
JER 48:37 Bela Moab-dulemar bukib-itogedba sailagia-swiri ialedbimalad, degi, bela sigamar ialedbimalad. Bela arganmar daas-daas galadbimalad, degi, bela bukib-binsaed-mor yoyoidbimalad.”
JER 48:38 Bab-Jehová soged: “Mete-isgana-mamarisayobi, an Moab-dulemar imaksad. A-ulale, Moab-dulemar-negmar-birgine, degi, neg-galimbabali, unnila dulemar-boedbi itoleged.
JER 48:39 ”Moab-dulemarga be bomala. Moab ibiyobi bibichisa-sii be dake, ibiyobi bingegudmala, gannar sorsik aibiris imaksamalad. Dulemar-e-yar-dikarba-mamaidga, dodogedga guded, dule-ogwayedga guded.”
JER 48:40 Bab-Jehová weyob soged: “Be dakmar, Moab-isdarmaladi, suluba-gukuedyobi danimalad. Moab-dulemarbina guakwaa danimalad.
JER 48:41 Moab-neggweburmar bela sulegoed, e-neg-gandikmalad bela egadga imakmaloed. A-ibagine, Moab-sorda-bila-onomaladi, ome-ugakgunair boniganba-galitonaidaeyobi, wile itomaloed.
JER 48:42 Moab-dulemar bela berguoed, ar Bab-Jehováʼgine san-dummarbaa imaksad.”
JER 48:43 Bab-Jehová soged: “Moab-dulemar-iduale, yaa-dummadi e-abindaksiid, gwayed-dummadi e-abindaksiid, yardakleged-galu e-abindaksiid.”
JER 48:44 Bab-Jehová soged: “Dule, dobedba wakinmaile, yaa-dummadgi argwandapoed, dule, yaa-dummadgi-nosale, yardakleged-galugi galegoed. Ar ani an, Moab-dulemargi sabsur-odurdakleged-iba barmidagoed.
JER 48:45 ”Gwenna-gwenna nue-yegus Hesbónʼse modapmaloed. Ar Rey-Sehón-neggwebur-Hesbónʼgi, bela soo gwichiguoed. Soo bela Moab-yarsik-gwagmai, Moab-dulemar-san-dummarba-samalad obelogoed.
JER 48:46 Moab, be duledar-wiles, bab-dummad-Quemos-e-neggwebur bela bibichisad. Be-mimmigan, yar-baidse-selesmalad, be-bunamala, gales selesmalad.”
JER 48:47 Bab-Jehová soged: “Ibagan-danikoedgine, an Moab-dulemar gannar e-yarse-dagega an imakoed.” Wese, Moab-dulemar-sabsur-odurdaklegoedgi sunmaklenaid.
JER 49:1 Bab-Jehová weyob Amón-dulemarnik soged: “¿Ar Israel-dulemarde mimmigan satesi? ¿Ar e-sorba ibmar-gamaladde satesi? ¿Ar ibiga bab-dummad-Milcomʼde Gad-neggwebur-susa? ¿Ar ibiga Milcom-e-dulemar we-neggweburmargi mamai?”
JER 49:2 Bab-Jehová soged: “Ibagan dani, Rabáʼgi Amón-dulemar-bukmaladgi bila-onoleged-itolegega an imakoed. Bela e-neggweburmar bibisgoed, bela e-neggweburmar gummakoed. Israel-dulemar, dulemar e-annik neg-susmalad-annik, gannar neggwebur sumaloed.”
JER 49:3 Bab-Jehová soged: “Hesbón-dulemar, Hai-neggwebur-bibichisadga be bomar. Rabá-bunamala, Haiʼga be binnasuli gormakmar. Bukib-binsaed-mor be yomar, ega be bukib binsamar. Gannar-gannar abarmakgwichi be imakmar. Ar bab-dummad-Milcom dule-irwa-ese-gormaladbo, degi, ega-arbamaladbo-galesa selesad.
JER 49:4 Amón-dulemar, ¿ibiga be be-nebaganba san-dummarba imake? ¿Ibiga be be-nebagan-gadi-sanmakedba nug-dummarba itoge? Amón-dulemar-uayasulidaed, unnila be be-ibmar-nuegan-nikadgi-bensuli gudiid, be weyob soged: ‘¿Doa angi gwichiguoe? Dule angi gwichiguosuli.’ ”
JER 49:5 Bab-Jehová-Bela-Gangued-Nikadi soged: “Dulemar-be-yar-nagaba-bukmaladi, be-ogwayega an imakoed, degine, be-baleginnega an saoed. Bela bemar we-yalagi onilemaloed. Dule-wakinmaloedi, dule gwen gannarse bar-urbosulid.”
JER 49:6 Bab-Jehová soged: “Bela we-ibmar-guoed-sorbali, Amón-dulemar-gales-selesmaladi, gannar an sedagoed.”
JER 49:7 Bab-Jehová-Bela-Gangued-Nikadi weyob Edom-dulemar-annik soged: “¿Temán-yargi dule-binsaed-ibegan satesi? ¿Dule-binsaed-ibegan-ebinsaedde bergussi? ¿E-binsaed-nikad bela bergussi?
JER 49:8 Dedán-dulemar, be wakinmala, gannar sorsik be namala. Yaa-ollogan matusur-bukmaladba be dukunamala. An Esaú-wagangi boni-dummad barmidsokalid, sabsur-odurdakleged-iba ega omosad.
JER 49:9 Uvaʼmar welealile, abala obatilesdaed. Mutikidba atursaed-dule ibmar-atursanonikile, unnila e-ibmar-abegedbi na sesdaed.
JER 49:10 Degi-inigwele, andina, bela Esaú-dulemar obelogoed. E-dukubukmalad an balamioed, gwen bar dukuosurmalad. E-mimmigana, e-gwenadgana, degine, dulemar-e-neg-dikarba-mamaidi, an obelogoed, bar bukwa guosurmalad.
JER 49:11 Be anga be-mimmi-babgan-satemalad obego, ani an bega akoed, be-omegan-ei-sui-burgwismalad, ani an bega nioed.”
JER 49:12 Weyob Bab-Jehová soged: “Sabsur-odurdakleged-igar-ega-maisurmaladbela sabsur-odurdaklesad. Edom-dulemar, be-bulesunna, ¿sunna be sabsur-odurdaklegosur be insae? Be sabsur-odurdaklegergebed, be agi wakinnosulid.”
JER 49:13 Bab-Jehová soged: “An-nuggi an-dukin ise-sogar weyob soged: Bosra-neggwebur ukabsalegoed, isdar-daklegedga guoed, degi, mesagwar-daklegedga guoed, degine, ollobi-selenai guoed. Degisadegu, e-neggweburmar bibichis bukuoed.”
JER 49:14 Bab-Jehová-gayaburba an itosad, dule-gayaburba-nued-berbegedi dulemar-abargi weyob ibmar-soge an itosad: “Be danar-ambikumar, Edomʼgi be gwichigudamar. Bila-onoged-idu be guagwar bukumar.
JER 49:15 ”Edom, an, neggwebur-baiganba bipii be-imakoed, dulemar-abargi mesagwar an be-imakoed.
JER 49:16 Akwasaila-dummagan-olloganba be bukwamaladi, yala-dummaganba be mamaidi, be dukin emar-ogwayedgi yamolesmalad, be san-dummarba-samaladgi yamolesmalad.” Bab-Jehová soged: “Bemar sulubagiyobi nibaduku be-neg be sismalale, amba an bemar-ibe obelogoed.
JER 49:17 Edom-yala-wilegoedi, bela-belad wilegoed. Dulemar a-yar-nagaba-nasmaloedi, geger Edom-yala-wilesadi dakdamaloed.”
JER 49:18 Bab-Jehová soged: “Sodoma-neggwebur-wilesadyobi, Gomorra-neggwebur-wilesadyobi, degine, neggweburmar-e-dikarba-bukmalad-wilesadyobi, Edom-yala gumogoed. Dulemar, agine gwen bar gudii guosulid, degi, dulemar egi gwen bar ambikuosulid.
JER 49:19 ”Achumigur Jordán-diwar-bulaganba, gagan-nuegan-naidse nodanidaedyobi, ukiagwale, an Edom-dulemargi gwichigudagoed. Edom-dulemargi an dule-nug-imaksadi dummadga an mesoed. Ar ade, ¿doa anyobsunna? ¿Doa angi obinosunna? ¿Biti-sibad-edarbed angi gwisguosunna? Dule angi obinosuli.
JER 49:20 Be an-itomar. An Edom-dulemarga igar-mesisad be itomar. Temán-dulemarga igar-mesilesad be itomar: Emar-imbagi sapingan-senigana ebipiledmaloed, e-gagan-nanaidi, swanga naguoed.
JER 49:21 Edom-neggwebur-berguoedi neg-ogiglimakoed, Demar-Ginnidye-nugadse e-gollomaked itolegoed.
JER 49:22 Sulubagi sakan-nallaa-danidaeyobi Bosra-e-isdarmaladi, Bosra-neggweburgi gwichigudanikid. A-ibagangine, Edom-sorda-gandikmaladi, ome-e-boniganba-galitonaidaeyobi gumaloed.”
JER 49:23 Bab-Jehová weyob Damasco-dulemar-annik soged: “Hamat-neggwebur, degi, Arfad-neggwebur, bato garda-isgana-wisgusmaladba suli-suli itobukwad. Ar bela-belad nue-dobe itomalad, geg bogi na ambikumalad.
JER 49:24 Damasco-dulemar geger itogusad, aisaar wakinye sokalinad, degi-inigwele, dobedbali geg wakinne gusad. Ome-e-boniganba-galitonaidaeyobi, Damasco-dulemar dobed itobukwad.
JER 49:25 Ibiyobi neggwebur-nuga-nikad-idu duurmakmamai. We-neggweburde weligwar itosiidid.
JER 49:26 Ani Bab-Jehová-Bela-Gangued-Nikadi soged: A-ibagangine, e-sapingana, neg-imbabali, omilede guoed, degi, bela e-sorda-bila-onomaladi girgumaloed.
JER 49:27 Damasco-e-neg-gandikmalad an ogumakoed, Ben-Adad-negmar an obelogoed.”
JER 49:28 Cedar-neggwebur, degi, Hazor-neggwebur, Babilonia-rey-Nabucodonosorʼse oitolesgusad. Emide, Bab-Jehová weyob we-neggweburmar-annik soged: “¡Dakebinne! Cedarʼgi be gwichigumar. Be dad-nakwe-dorgan-obelomar.
JER 49:29 E-ibe e-dordonegmar, e-molimar, ei sulegoed. E-ibe e-atued-dummagan seledoed, degi, e-ibmar-nuegan, e-moli-yargan-muremalad seledoed. Dulemar ega weyob oimakdemaloed: ‘Bela aineba neg-dobegwale itoleged.’ ”
JER 49:30 Bab-Jehová soged: “Hazor-dulemar, gwae be abarmakdemar, be gwae wakinmar, yaa-ollogan-matusur-bukmaladba be dukunamar. Babilonia-rey-Nabucodonosor bemarbina igar aminaid, bemarbina igar amisgunaid.”
JER 49:31 Bab-Jehová soged: “Dakebinne, we-neggwebur-san-dummarba-itogedgi be gwichigunamar, amar na dukin bensuli gudidimalad. We-dulemar dobe itosulid, baisur itomalad, bannabaa bachikii mamaimalad, amargi be gwichigunamar.”
JER 49:32 Bab-Jehová soged: “E-moli-yargan-muremalad ei be sumalo, bela e-moli-bebe-nikamalad ei be sumalo. E-dulemar an yogasaar oaisakioed, napa-neg-bergunaidse an barmidoed, amba bia gudimalale, bonigan an egi barmidoed.
JER 49:33 Hazor-neggwebur, achu-sapur-uaya-gannagan-negga guoed, degisadegu olloo neg naguoed. Dule-wargwensaale, egi gudii guosulid, gwen dule egi bukwa guosurbalid.”
JER 49:34 Judá-e-rey-Sedequías gebe reyga megidedgine, Bab-Jehová, e-gayaburba-barsoged-Jeremíasʼga Elam-dulemargi sunmaknonikid.
JER 49:35 Ega weyob sognonikid: Bab-Jehová-Bela-Gangued-Nikadi soged: “Elam-e-warsi an bibisgoed, e-gangued-sunsogedi, an ei obelogoed.
JER 49:36 Burwa-dummagan an egi barmidoed, bela-napaneg-ebilis an egi burwa sedoed. Napaneg-ugakaase an oaisakioed. Elam-dulemar bela neggwebur-ugakaase ambikuoed, bela neggweburmargi ambikuoedbiid.”
JER 49:37 Bab-Jehová soged: “Elam-dulemar, e-isdarmalad-abin gwayega an imakoed, dule-e-oburgwebigudimalad-abin dobguega an saoed. An-sae-itogedi an egi oyogoed, boni-dummagan an egi barmidoed. Bila-onoleged an egi barmidoed, bela obelogedse an imakoed.”
JER 49:38 Bab-Jehová soged: “Elamʼgi an-ologana an sioed. Elam-e-rey an obelogoed, e-dummagana an obelobaloed.”
JER 49:39 Bab-Jehová soged: “Ibagan nonikoed, Elam-dulemar-gales-selesmaladi, gannar an sedagoed.”
JER 50:1 Bab-Jehová weyob e-gayaburba-barsoged-Jeremíasʼga Babilonia-yar-Caldea-dulemar-neggwebur-annik soged:
JER 50:2 “Dulemar be owisogo, dulemar bela-wisguega be imako. Dulemar-owisoged-bander be onako, melle be soggwenad odukuo. Weyob be sogo: ‘¡Babilonia-yala sulegoed! ¡Bab-dummad-Bel nue-bingedar itogoed! ¡Bab-dummad-Merodac nue-gwakidoed! E-wilubgan-sobarmaladi, bingedar itomaloed, e-babyob-imaklemaladi, bela wawanmakdoed.’
JER 50:3 Dad-nakwed-argan-sapiledsik-bukmaladi egi gwichiguoed, bela ollobi e-yala nasikoed. Dulemar, degi, ibmar-durganmar duurmakdemaloed, dulemar agi bar ambikuosulid.”
JER 50:4 Bab-Jehová soged: “A-ibagangine, Israel-dulemar, Judá-dulemar, ise-boale, an-e-Bab-Dummad-guedgi anse abarmakdanimaloed.
JER 50:5 Ansega egisdanimaloed, bia Siónʼse-naed-igar maiye. Ar a-igarbali nadapi gumaloed. Siónʼse modapile, anbo igar degisadegu omesmaloed, a-igar bar iegosurmalad.
JER 50:6 ”An-dulamar sibad-wawaad-yoggus-gudiiyobi gusmalad. E-edarbemaladi yogasaar-sesmalayob gusmalad, igar-oes sapurba-gudiiyobi imaksamalad. Yala-mulluganba-bipirmakdiiyobi gusmalad, e-galu-ies-gudimalayobi wilesmalad.
JER 50:7 E-isdarmalad dakarmalale, obelodamalad, e-isdarmaladi sokardamalad: ‘Anmargi sisuli. Ar wemar Bab-Jehováʼgi isgusmalad. Bab-Dummad ega ibmar ukmainad, e-dadgan we-Bab-Jehováʼgi ibmar-abdakdii gusmaladinad.’
JER 50:8 ”Mimmigan, Babiloniaʼgi-gudimalad be ainimar, we-yalagi be wakinmar. Sibad-machered, sibad-wawaad-idunadapdaeyobi, be dulemar-idumar.
JER 50:9 Ar ani an, Babilonia-idu, dad-nakwed-argan-sapiledsik, neggwebur-dummagan-bukwad gilamaknaid. Babilonia-yalabina guakwaa bukumaloed, dad-nakwed-argan-sapiled-akale, Babilonia-yalagi gwichigumaloed. E-sigumala, sunsogmaladid, sigu-miledele, nosaa maksurmaladid.”
JER 50:10 Bab-Jehová soged: “Babilonia-ibe bela ibmarmar welegoed, dulemar-ibmar-weemaloedi na yeer itomaloed.
JER 50:11 ”Bemar, Babilonia-dulemar, an-dulamar-ibe-ibmar-atursamalad, be weligwar itomar, be wergumar. Moli-bebe-nikad-sapingwagwadyobi, gagan-ara-aramalad-birgi be gwirmar, molimar-goleyobi be gormar.
JER 50:12 Ar bemar-yala, bela mesagwar guoed, egi be gwalulesmaladi, nue bingedar itogoed. Bemar-yala napa-negadulesulidga naguoed, nega-dinnaregedga, degi, bela napabi-nai guoed.
JER 50:13 An-urwed-ulale, bemar bar-ambikuosulid, bela swanga naguoed. Dulemar Babilonia-yalagi-nasmalale, geger dakdamaloed, nue-oitolesnai dakdamaloed.
JER 50:14 ”Bemar-sigugi-urwemalad, guagwar be Babilonia-dikarba ambikumar. Egi be sigu mimar, melle be sigu sabomalo, ar we-dulemar angi dummad-isgusmalad.
JER 50:15 Binnasuli be Babilonia-dikarba gormakmar, weyob be sogmar: ‘¡Babilonia-sordamar galakude! ¡E-neg-suigan marwide! ¡E-galu-matusulid-akwabimalad ayaride!’ We-ibmar-gunaidi Bab-Jehová buged imaknaid. Igi Babilonia-dulemar bemar-imaksa, deyobi bemar Babilonia-dulemar imakmogo. Bemar-wiosayobi be wiomarmogo.
JER 50:16 Babiloniaʼgi ibmar-digmalad be obelomar, degi, Babiloniaʼgi ibmar-gwag-wemalad be osulomar. Dulemar, bila-onolenaid dakdamalogu, Babiloniaʼginsurmaladi e-yalase gannar namaloed, e-neggweburse wakitemaloed.
JER 50:17 ”Israel-dulemar sibad-wawaad-yoggus-gudimalayob gued, achumigur-nono-wawaadse balegilledimaladyob gumalad. Gebegine, Israel-dulemar Asiria-reyse dolesad, geb sorba, Babilonia-rey-Nabucodonosorʼse bela e-garmar bibichilesad.”
JER 50:18 A-ulale, Israel-dulemar-e-Bab-Dummad-Jehová Bela-Gangued-Nikadi weyob soged: “An Babilonia-rey sabsur-odurdakoed, degi, an e-yala sabsur-wiobaloed, igi an Asiria-rey sabsur-odurdaksa, deyobi, an imakmogoed.
JER 50:19 An Israel-dulemar gannar e-yalase-naega imakoed, Carmelo-yalagi, Basán-yalagi nue mas-gunbukwa an imakoed. Degine, Efraín-yalagi, Galaad-yalagi nue-immelebukwa an imakoed.”
JER 50:20 Bab-Jehová soged: “A-ibagangine, Israel-dulemar-e-isguedi amilegoenad, degi-inigwele, amilegosulid. A-ibagangine, Judá-dulemar-e-isguedi amilegoenad, degi-inigwele, amilegosulid. Ar ani an bemaloedga isgued elioed.”
JER 50:21 Bab-Jehová soged: “Merataim-yalagi be gwichigunamar, degi, Pecod-dorgangi be gwichigunamar. ¡Ogilomalo, bela naitinagase be obelomalo! An bega igar-uksadba be imakmalo.
JER 50:22 ”Neggweburgine bila-onolegega binnasuli-oimake itoleged, nue-dummad wilemaloed.
JER 50:23 Babilonia-yala, be mardoyobi, dulemar-sabsur-imakedinad, emigindi, be yarmar-bamalad-imbagi olloo mellesiid.
JER 50:24 Bee be, yamoleged-galu sisad, agine na be dukin galesad. Galesadi gwen be itossulid, ukiagwale be galesad. Babilonia, ar be angi-gwisgusadba be daklenonikid, degidbali, be galesad.
JER 50:25 An-gingi-sabolebukwad an egasad, an-sae-itoged-gingimar an onisad. Ani an Bab-Jehová-bur-dutusulidi, Bela-Gangued-Nika-Maidi, Babilonia-yalagi igar-soggwen an imakergebed.
JER 50:26 Napneg-ugakagi-bukmalad, Babilonia-yalagi be gwichigumar. E-ibmar-gwag-sabolebukwad ei be egamar, ibmar-gwag-weemaloedi, danar-danar be oambikumalo. Bela nagase be obelomalo. ¡Melle ibmar be obemalo!
JER 50:27 E-moli-bebe-nikad-sapingana bela be oburgwemar. Oburgwileged-negse be sedmar. Babilonia-dulemar, duledar-wilesmalad, sabsur-odurdakleged-iba ega nonikid.
JER 50:28 Dulemar-duurmakmaid-e-sunmakedi be itomar. Babiloniaʼgi-wakinmamaid-e-sunmakedi be itomar: ‘Bab-Jehová, ese-goled-neg-earismalad-ular, Babilonia-yar buged-imaknaiye,’ Sión-yalase sogdanimalad.
JER 50:29 ”Be Babilonia-sordamar-idu sigugi-urwemalad danar oambikumar, dulemar-warsi-yaa-saemaladi bela be urbemar. Babilonia-ebilis be ambikumar, melle dulemar-wakinnega be samalo. E-ibmar-imaksamaladba be sabsur-imakmarmogo, dulemar-wiosmaladba be wiomarmogo. Ar we-dulemarde Israel-dulemar-e-Bab-Jehová-Gwage-Isligwaledgi gwichigusmalad.”
JER 50:30 Bab-Jehová soged: “A-ulale, a-ibagangine, e-sapingana neg-imbaba omiledoed, degi, bela e-sorda-bila-onomaladi, girgumaloed.”
JER 50:31 Bab-Jehová-Bela-Gangued-Nikad soged: “San-dummarba-imakmalad-yala, an begi gwichiguoed. Emide, sabsur-odurdakleged-ibagan bega nagunonikid.
JER 50:32 San-dummarba-imakedi, gowarmakdoed, aimukudoed, dule e-ogwisega bendakosulid. Bela e-neggweburmargi an soo ogaoed, bela e-neggwebur an soogi ogumakoed.”
JER 50:33 Bab-Jehová-Bela-Gangued-Nikadi, weyob soged: “Israel-dulemar, Judá-dulemar, mesagwar gudidimalad. E-isdarmaladi gasa bukwad, gwen onobisurmalad.
JER 50:34 Ar dule-e-bendakeddi, dule-dutusulidid, ani an Bab-Jehová-Bela-Gangued-Nikadye nugad. Gandikidgi an bendakoed, nega-bogidikid an ega nasikoed. Babilonia-yalagindina, an dobed-dummad nasikoed.”
JER 50:35 Bab-Jehová soged: “Babilonia-dulemar oburgwilegoed, e-dummagan, degi, e-dule-binsaed-ibegan, ogilolegoed.
JER 50:36 Ega-gayaburba-gakansaar-barsogmaladi, oburgwilegoed, amar binsaedsulidga naddamalad. E-sorda-bila-onomaladi nue-dobe-itomaladi ogilolegoed.
JER 50:37 E-molimar, oburgwilegoed, e-ur-napaginmaladi, osulolegoed. Sorda-bila-onomalad-ainebarmalad-bennuklegarmaladi, bela girgumaloed. Omeganyob dobgudmaloed. E-ibmar-nuegana obelolegoed, e-ibe atursalegoed.
JER 50:38 E-diimar dinguoed, bela dinna guoed. Ar Babilonia-yala bab-dummadyob-imaklemalad-yalad, amala, suli-suli dule-imakmaladid.
JER 50:39 ”A-ulale, nega-dulesulidganba ibdurgan-ursirmaladi, achu-sapurmarbo gudii gumaloed. Agine nuu-dummad-dukar-suidmar gudii gumarmogoed. Dulemardi Babiloniaʼgi bar-bukwa guosulid, degisadegu, olloo nai guoed.”
JER 50:40 Bab-Jehová soged: “An Sodoma-neggwebur-imaksayobi, Gomorra-neggwebur-imaksayobi, degine, amar-dikarbali neggweburmar-bukwad-wiosayobi, an Babilonia-yala imakoed. Bar agine dulemar bukwa guosulid, agine bipisaale dulemar bar megosulid.
JER 50:41 ”Dad-nakwed-argan-sapiledsiki, sorda-bila-onomalad danikid, napneg-ugaka-akale, bela neggwebur-dummagan-bukwad, degine, reymar-bukidar danikid.
JER 50:42 Sigumar-annik-annik danimalad, eswar-swiswidikmalad annik-annik danimalad. Dule-ursirmalad nanaed, wile-dule-daksurmaladid. Moligi-sii danimalad. E-uurmakedi, demar-uurmakmaidyobi gordanikid. Babilonia-yeerdakleged, we-dulemar bebina danimalad, we-dulemar begi gwichigudanimalad, bila-onoledanikiyob ilemakar danimalad, dule-wargwenadyob ilemakar danimalad.
JER 50:43 Babilonia-rey, dulemar-egi-bila-onodanikid wisgusad, deyob-itosgua, dobedbali wawanmakded, na egine suli-suli-itoged nagusad, ome-e-boniganba-galitonaidaeyobi, itoalid.
JER 50:44 Achumigur Jordán-diwar-bulaganba, gagan-nuegan-naidse danidaeyobi, ukiagwale an Babilonia-dulemargi gwichigudagoed. Babilonia-dulemargi an dule-susadi an onugsaoed. ¿Ar doa anyobsunna? ¿Doa angi obinosunna? ¿Biti-sibad-edarbed angi gwisguosunna? Dule angi obinosuli.”
JER 50:45 Ani Jeremías soged: “Bab-Jehová Babilonia-dulemarga-igar-mesisad, be itomar. Babilonia-dulemarga igar-mesilesad, be itomar: ‘Emar-imbagi sapingan-senigana ebipiledmaloed, e-gagan-nanaidi, swanga naguoed.
JER 50:46 Babilonia-neggwebur-berguoedi neg-ogiglimakoed, e-gollomakoedi neggwebur-baiganse itolegoed.’ ”
JER 51:1 Weyob Bab-Jehová soged: “Babilonia-yalagi dule-obeloged-burwa an ogoloed, Caldea-dulemar-angi-yoledimaladgi an burwa barmidoed.
JER 51:2 Dulemar oros-uka-milegedyob-dulemar-imakedi, Babilonia-dulemargi an barmidagoed. Adi, Babilonia-dulemar bela sate imakegar. E-sabsur-odurdaklegoed-ibagi, igar-baid-baidsik egi ainidamaloed.
JER 51:3 Dule-sigumiedi, melle warsi-yaa-imakega be imakmalo, degi, melle esgoro-mor-yoega be samalo. Melle e-sapingana wile be dakmalo, bela naitinagase e-sorda-bila-onomalad be obelomalo.
JER 51:4 Babilonia-yalagi burgwar omiledmaloed, neg-galimbabali e-muimar omiledoed.
JER 51:5 Israel-dulemar, degi, Judá-dulemala, angi-isgusmar-inigwele, we-yalagi isgued-omelosmar-inigwele, degite, ani Bab-Jehová-Bela-Gangued-Nikadi, Israel-dulemar-e-Bab-Dummadi, gwen an egi bangussulid.
JER 51:6 ”Babilonia-neggweburgi be wakinmar, be wala-walagwengi san bendakmar, melle Babilonia-isguedba be burgwemalo.
JER 51:7 Babilonia-dulemar an-argan-yaurgine, nog-gobed-orbiidyobi gued. Bela napaneg-naid-omumsadiid. Neggwebur-dummagana bela a-vino gobsamalad, degidbali, neggweburmar suli-suli itodmalad.
JER 51:8 Degi, ukiagwale, Babilonia-dulemar galakude gusmalad, degine, bela oitoles gusad. A-ulale, akigindemalad, ega be ina sedamala, nabir sunna nugualile.
JER 51:9 ” ‘Babilonia-dulemarga anmar ina-nued daksanad, degi-inigwele, gwen nugussulid. Anmar mete nasunna, e-yala-yalase gannar namarsun. Ar Babilonia-dulemar-e-isguedi bela nibnegse warmaknaid, degi, bela mogirsega warmaknaid.’
JER 51:10 ”Israel-dulemar soged: ‘Bab-Jehová anmarga igar nudaksad. Be dagmar, Sión-yalagine, Bab-Jehová-ibmarmar-imaksadgi anmar sunmakoed.’
JER 51:11 ”¡Sigumar be oswiswimakmar! ¡Sigu-abgamalad be nasikmar! Bab-Jehová, Babilonia-dulemar-obelogega, Medo-dulemar-e-reymar ogannosad. We-ibmar-guoedi, Bab-Jehová buged imakegalad, ar Babilonia-dulemar ese-goled-neg-bibichismalad-ular, deyob imakoed.
JER 51:12 Babilonia-galu-matusulidgi-gwichiguega, bander be oyomar. ¡Sordamar be ogannomar! ¡Dule-nakulemalad be urbemar! ¡Dukued-galu be sobmar! Bab-Jehová ibmar-imakbiedi imakoed, Babilonia-dulemargi-ibmar-sogsadi, sogedba imakoed.
JER 51:13 Bemar, Babilonia-dulemar, diwar-dummagan-nagaba be mamaimalad, ibmar-nuegan-bukidar be nikamalad. Emide, be-ibagan-bergued warmaknonikid, be-gudigued wese gwinmaknonikid.
JER 51:14 Bab-Jehová-Bela-Gangued-Nikad e-sunnad weyob ibmar-imakedse sogsad: ‘Ses-bukibayobi, an be-neggweburgine be-isdarmalad enogoed, begine obinmaloedbali, binnasuli gormakdemaloed.’
JER 51:15 ”Bab-Jehová, e-ganguedgi, napneg nasiksad, e-binsaed-nikadbali, napneg ilemaksad, e-ibmar-wisidbali, nibneg obinnisad.
JER 51:16 Bab-Dummad binnasur-sunmakedbali, nibneggi diimar-uurmakega imakdaed, magatibali, mogir-ainakwega imakdaed. Mala-ibyed-abalagi, dii-owiardaed, burwa-galumargi, burwa-oniardaed.
JER 51:17 ”Bela dulemar binsaedsulidamaladid, aku-neg-itomaladid. Bela dulemar-orgi-arbamaladi, e-ibmar-sobedgi bingedar itomalad, e-ibmar-sobarmaladi, dule-yardakmaladid, gwen burba-dulad nikasulid.
JER 51:18 We-ibmarmala, binsaledid, binsa egi dodolegedid, e-sabsur-odurdakleged-iba-nonikile, bela obelolemaloed.
JER 51:19 Jacob-e-Bab-Dummaddi, we-ibmar-sobarmaladyobsulid. Ar Jacob-e-Bab-Dummadi, bela ibmar-saedid, Bab-Jehová-Bela-Gangued-Nikadye nugad. A-Bab-Dummad Israel-dulemar, egadiga-guega na susad.”
JER 51:20 Bab-Jehová soged: “Babilonia, bemar anga mardoyobi gued, be angala bila-onogedgi ibmar-ebulegedyob gued. Bebali, an neggwebur-dummagan bibisged, degi, dulemar-baid-baid-bukmaladi beba an obelobalid.
JER 51:21 Bebali, molimar, degi, sorda-moligi-sii-urwemaladi, an obelobalid. Bebali, ur-napaginmalad-bila-onogedgi-ebulemaladi, degi, e-onanamaladi, an obelobalid.
JER 51:22 Degi, bebali, machergana, omeganse-bakale, an osulobalid. Bebali, sergana, sapingana an obelobalid. An bebali, masmala, yagana, obelobalid.
JER 51:23 Bebali, sibad-edarbemaladi, degi, e-sibad-wawaadmar an osulobalid. Bebali, sapurba-arbamaladi, e-moli-bebe-nikamalad-abin-abinnid-napa-imumaladse-bakale, an obelobalid. De-ukinbali, dummagan-negsemamaid, degine, dummadga-arbamaladi, bebali an obelobalid.”
JER 51:24 Bab-Jehová soged: “Babilonia-dulemar Sión-yalagi-ibmar-imaksadba, bemar-wagab an Babilonia-buged-imakoed, bela e-dulemar an buged-imakoed.”
JER 51:25 Bab-Jehová soged: “Babilonia, an begi-gwichid, be emar-obeloged-yalad, bela be napa-obelogedid. Begine an-surgan an oyodoed, akwasaila-akale an be-balimetoed, degi, yala-gummakaledga an be-imakoed.
JER 51:26 ”Ani Bab-Jehová soged: Be-akwamar, neg-sobega suosurmalad. Be-akwamar negsailaga-sigega bei suosurmalad. Ar bela be-yala ollobi naguoed.
JER 51:27 ”Neggweburgi bander be onakmar. Dulemar-imbagi gar-trompeta be ogormar. Babilonia-sordamargi-gwichiguega, Ararat-sordamar be urbemar. Mini-sordamar, degine, Askenaz-sordamar be urbemar. Bila-onolegedgi sorda-idued-dummad-dule-idugega be amimar. Sesmar-duurmakmaiyobi, molimar egi duurmakmai be imakmar.
JER 51:28 Babilonia-neggweburgi-gwisguega, neggweburmar guagwar be urbemar. Babilonia-sordamargi-gwisguega, Media-yar-e-reymarse be gormar. Degine, Media-e-dummagan, Media-e-negsemamaid be onmakmar, degi, Babilonia-neggweburgi gwisguega bela yalamarse be gormar.
JER 51:29 Napa wawanmaknaid, bela giglimaknaid. Bab-Dummadi, Babilonia-dulemargi-ibmar-sogsad imaknaid, Babilonia-yala nega-dulesulidga, degi, dulemar bar egi bukuosulidga imaknaid.
JER 51:30 Babilonia-sorda-bila-onomaladi, bila-onoged boggusmalad. Neg-gandikmaladba dukus bukusmalad. E-gala-ganguedi, nollomakdemalad, omeganyobi dobe itodmalad. E-negmar dule-isganamarse ogumaklesad, e-yawagak-bargamalad ei bibichismalad.
JER 51:31 Gayaburba-berbegedi, baid-gayaburba-berbeged-sorbali abarmakmaid, Babilonia-reyga-sogega: ‘Bela dule-baigan be-ibe neggwebur susye,
JER 51:32 dule-isdarmaladi, diwar-obaklemamaidgi bukusmarye, nakuleged-negmar-bukwad ogumaksamarye, degi, bela sorda-bila-onomaladi gwakidmarye.’ ”
JER 51:33 Ar Israel-dulemar-e-Bab-Dummad-Jehová-Bela-Gangued-Nikadi weyob soged: “Babilonia-yalaga odurdakleged-iba omosad, Babilonia-yala-yeerdaklegedi, orosgisaar-dakleged-welesayobi daklegoed. Bela swanga naguoed.”
JER 51:34 Jerusalén-dulemar soged: “Babilonia-rey-Nabucodonosor an-obelosmalad, suli-suli an-imaksamalad, bate-olloo-mellesiiyobi an-imaksamalad. Ibdula-dummad-demargined-dule-doeyob an-dosad, angi-immelesadba, a-sorbali, gannar agsad.”
JER 51:35 Jerusalén-dulemar sogmalad: “Babilonia-dulemala igi anmar-wiosa, deyobi, Babilonia-dulemar gumarmosun.” Sión-dulemar sogmalad: “Igi Babilonia-dulemar anmar-ablis eosmala, deyob e-ablis ei ariomosun.”
JER 51:36 A-ulale, Bab-Jehová weyob soged: “Israel-dulemar, be-ibmar-imaksadgi an bemar-bendakoed, ani an bemarga buged-mai imakoed. Ani an Babilonia-demar odinguoed, e-dii-sailagan-ariomamaid ani an dinnaa saoed.
JER 51:37 Babilonia-neggwebur akwamar-dunnumake-bukwadga gudoed, achu-sapur-uaya-gannagan-negga gudoed. Neg-dobed-dummadga gudoed, egi dodolegega gudoed. Nega-dulesulidga, gudoed.
JER 51:38 Babilonia-dulemar bulale achumigur-uurmakebayobi uurmakdemaloed, achumigur-bipiganabayobi akigindemaloed.”
JER 51:39 Bab-Jehová soged: “Neg-diopisur-itoarmalale, ani an ega gobed dakoed. Wergumalaga an omumsaoed, suitii gabemai-saegala, geg atake an imakoed.
JER 51:40 Igi sibad-wawaad-senigana e-oburgwileged-negse seleddae, debayobi, an sedoed. Igi sibad-machergana, degi, sibad-wawaad-machergana, e-oburgwileged-negse seleddae, debayobi an sedoed.
JER 51:41 ”¡Be dakena! Babilonia-neggwebur napneg-naidgi-nuga-nika-siidi, igi bergus-sii be dake. Igi dule-baiganse sabsuli-sules be dake. Be dake, igi Babilonia-yala, dulemar-baiganga dobed-yalaga-gude be dake.
JER 51:42 E-isdarmaladi Babiloniaʼgi demaryobi mulusad. Demar-weleganyobi egi arwisad.
JER 51:43 Babilonia-neggweburmar bela olloo nagusad. Nega-dinnaregedyobi-dakle nagusad, nega-dulesulidyob-dakle nagusad. Dulemar bar egi bukwasulid, a-yalagi dulemar gwen bar iirmakbuksulid.
JER 51:44 Babiloniaʼgine an bab-dummad-Bel sabsuli-odurdakoed. Ibmar-dosadi gannar agega an imakoed. Dulemar-baigan bar ese dagosurmalad, degine, Babilonia-galu-matusulid-akwabiid bela ayaroed.
JER 51:45 ”¡Mimmigan, Babiloniaʼgi be ainimar! Na be wala-walagwengi Bab-Dummad-urwedgi be san bendakmalo.
JER 51:46 Neggweburgine, dulemar-sunmakedgi, melle dobgumalo, melle gegegwa be itomalo. Birga-ilibali gayaburbamar baid-baid ainimai guoed. Babilonia-yalagi galagwensuli-neg-gued-gaya ainimai guoed, Dummagan-negsemaladi na muchub-muchub yolenanai gumaloed.
JER 51:47 Babilonia-bab-dummagan-obelogoed-ibagan bato omosad. Bela Babilonia-yala bingegunai guoed, muimarbi yala-enosa naguoed.”
JER 51:48 Bab-Jehová soged: “Babilonia-galakuoedga, nibnega, napnega, degi, bela egi ibmarmar-bukwadi, weligwaledba binnasuli namakmaloed. Ar e-isdarmaladi dad-nakwed-argan-sapiledsiki Babiloniaʼgi danimaloed.
JER 51:49 ”Babilonia-dulemala, Israel-dulemar-oburgwisadbali, oburgwilemarmogargebed. Degine, bukidar dulemar-baigan-oburgwisbalidbali, Babilonia-dulemar oburgwilemarmogargebed.
JER 51:50 Israel-dulemar, be es-suidgi-burgwissurmaladi, gwae be wakitemala. Ar bemar dikasuli be bukwamalale, Bab-Jehová-nug be odummomalo. Melle Jerusalén-neggwebur be iemarbalo.”
JER 51:51 Bemar sogmalad: “Anmargi dulemar isdar-sunmake-itogedba anmar bingedar itoye. Anmar-mesagwar-imaklegedi anmar-wagar-gisii imakye. Ar dule-bamaladi bese-goled-negse dogsamalad-ulale, anmar bingedar itoye.”
JER 51:52 A-ulale, Bab-Jehová soged: “Ibagan danikid, a-ibagi, an Babilonia-bab-dummagan obelogoed. Babilonia-yalagine dulemar-naibigumaloedi bukidara akigitemaloed.”
JER 51:53 Bab-Jehová soged: “Ar Babilonia amba e-galu-matusulid-akwabiidi nibnegse imakye-sogele, degi, nibali e-bubawarmar ogwisye-sogele, amba an e-obelogega e-isdarmaladi an egi barmidoed.
JER 51:54 ”Babilonia-yala-akale, binnasuli e-dulemar-sabsurgunaidba-bobukwadi magar itoleged.
JER 51:55 Bab-Jehová Babilonia-yala bela obelonaid, dulemar-oimakbukwad bela obelonaid. Babilonia-e-isdarmaladi demar-mullugan-uurmakmaiyobi, e-dolewar binnasuli uurmakbukwad.
JER 51:56 Babilonia-e-isdarmaladi Babilonia-yala-obelogega, egi gwichigudanimalad. Babilonia-sordamar-bulegan bela galemaloed, e-sigumala bela ei bibisgelegoed. Ar Bab-Dummad-Jehová dulemar na e-odurdaklemaloedbali ega ibmar imaked.”
JER 51:57 Ani an Rey-guedi, Bab-Jehová-Bela-Gangued-Nikadi weyob soged: “Babilonia-e-dummagan, degi, e-binsaed-ibegan, an omumsaoed. Ega-negsemamaid, an omumsaoed. E-sordamar-dummagan, degi, e-sorda-bila-onomaladi an omumsabaloed. We-dulemar degisadegu gabidmaloed, bali gannale atakosurmalad.”
JER 51:58 Bab-Jehová-Bela-Gangued-Nikadi weyob soged: “Babilonia-galu-matusulid-akwabiid e-mata-dummad, bela nagase babatoed. Degi, e-yawagak-matusurmaladi ogumaklegoed. Dulemar binsarsunna alamaksamalad, degine, binsarsunna gar-itosmalad, unnila sooga alamaksamalad.”
JER 51:59 Weyobi Bab-Dummad-gayaburba-barsoged-Jeremías, Nerías-machi-Seraíasʼga igar uksad. Deunni, Sedequías birgabakegus-negsemaidgined. Seraías, Judá-rey-Sedequíasʼbo Babiloniaʼse nadmalad. Agine Seraías dulemar-idumai gusad. Seraíasʼde Maasías-wagwad.
JER 51:60 Jeremías bela Babiloniaʼgi boni-dummagan-danikoedi garda-suid-bipirmakaledgi narmaksagusad. Wegisundo, Babilonia-yalagi ibmarmar-gumaloedi bela narmaklesad.
JER 51:61 Jeremías, Seraíasʼga weyob sogsad: “Babiloniaʼse be modapile, bela we-gardagi ibmarmar-sognaid be absogo.
JER 51:62 ”Seraías, geb a-sorbali, Bab-Jehováʼga weyob be sogo: ‘Bab-Jehováʼye, bede sogsa gusad: Ani an bela we-yala obelogoye, degisadegu ollobi-nai an imakoye. Dulemar, bipisaale bar urbega an imakosurye, degine, ibmar-durganse-bakale, dulemarba ambikuosurye. Bela ibmar-sate guoye, be sogsad.’
JER 51:63 ”Bela be we-garda-suid-bipirmakaled-absosale, egine be akwa edinno. Geb agine Éufrates-diwargine be a-garda metoed.
JER 51:64 Geb a-sorbali, be weyob sogo: ‘Igi we-garda dii-ulak-dogde, deyobi, Babilonia-yala dogdemogoed, bipisaale bar gannale Bab-Dummad egi bonigan barmidagoedgi san-onogosulid.’ ” Wesega Jeremías-sunmaksadi bergunaid.
JER 52:1 Sedequías gebe-yar-seargu, deun birga-durgwen-gakagwensak (21) nikad. Degi, Jerusalénʼgi birgambe-gakagwensak (11) yar-sesad. E-nana Hamutalʼye nugad. Hamutalʼde Jeremías-Libnaʼgined-e-sisgwad.
JER 52:2 Sedequías Bab-Jehová-ibmar-abemaisulidi, Bab-Dummad-asabin imaksad. Ar ade, Joacim-ibmar-imaksadba ibmar imaksamogad.
JER 52:3 Degidbali, Bab-Jehová sae-itogedbali, Jerusalén-dulemar e-asabinni ononnosad, degi, Judá-dulemar e-asabinni ononnosbalid. Geb a-sorbali, Sedequías Babilonia-reygi gwichigude gusad.
JER 52:4 Babilonia-dulemar-e-rey, Nabucodonosor Sedequías-birgabakebakgus Judá-yar-semaidgi, Tebet-nii-yoid-ibambegwadgi, Jerusalénʼgi-gwichiguega, Jerusalén-neggweburse sorda-bila-onomalad-abargi aligusad. Geb bela Jerusalén-neggwebur-ebilis ambakusmalad. Degine, egi gwichigumalaga neggwebur-dikarba napa-nakwemaid sobsamalad.
JER 52:5 Babilonia-sordamar birgabo Jerusalén-neggwebur-ebilis ambikusad. Deunni, Sedequías birgambe-gakagwensakgus (11) reyga maidgined.
JER 52:6 Amba a-birga-naidgi, nii-warbaked-ibabakebakgi, bela-belad ukud-dummad Jerusalén-neggweburgi nagunonikid. Degisoggu, neggweburgine dulemarga masgunned sate gunonikid.
JER 52:7 Geb degine, Jerusalén-dulemar galu-matusulid-akwabiid neggwebur-ebirnaidgi yaa ollomaksamalad. Ar Babilonia-sorda-bila-onomalad neggwebur-ebilis-bukwa-inigwele, degite, a-mutiki, rey, degi, e-sordaganmala, neggweburgi wakitemalad. Agine, galu-matusulid-darbogwad-imbagi yawagak-siidba rey-dutugalu-naidsik ainidmalad. Arabá-igarba wakitemalad.
JER 52:8 Degi-inigwele, Babilonia-sordamar, Rey-Sedequías-balegite gusmalad, geb, Jericó-nebagi bargadapmalad. Bela Sedequías-sorda-bila-onomalad, Sedequías-idu duurmakdemalad.
JER 52:9 Geb Babilonia-sordamar, Rey-Sedequías-gasmargu, Hamat-yarse Ribla-neggweburse Babilonia-e-reyse sesmalad. Agi ega Rey-Nabucodonosor odurdaklegoed-igar mesisad.
JER 52:10 Geb Babilonia-rey, Sedequías-wagab, Sedequías-mimmigan dukar-egwannar oburgwismalad. Deyobi, Judá-dulemar-nuga-nikamalad oburgwilesmarmogad.
JER 52:11 Geb a-sorbali, Babilonia-rey, Sedequías-ibe ibya-onomalaga imaksad, degine, esgoro-gordikid-dubgi-edinnega imaksabalid, adi, Babilonia-yarse sedmalagar. Agine, Sedequías e-burgwedse esgaryagi mellesii gusad.
JER 52:12 Nabucodonosor birgambe-gakabakebakgus Babilonia-yar-semaidgi, nii-walataled-ibambegi, dule-nakulemalad-e-dummad Nabuzaradánʼye-nugadi Jerusalén-neggweburse nonigusad. Nabuzaradánʼde Rey-Nabucodonosorʼga arbaedid.
JER 52:13 Nabuzaradán, Bab-Jehováʼse-goled-neg-siid ogumaksad, degi, reyneg-siid ogumaksabalid. Degine, negmar-bukwad bela ogumaksanaed, deginbali, sapin-dummagan-arbamalad-e-negmar, bela ogumaksabalid.
JER 52:14 Degi, Babilonia-sorda-bila-onomalad Nabuzaradánʼba-gudimarmogadi, galu-matusulid-akwabiid Jerusalén-neggwebur-ebirnaid bela wawannismalad.
JER 52:15 Deginbali, Nabuzaradán bela Jerusalén-neggweburgi napi-dulemar-besmaladi Babilonia-yarse sesad. Amardi, wemalad: Dule-ibmar-sobedgi-arbamalad, dulemar-rey-Nabucodonosorʼba-nagusmalad, bela sesad.
JER 52:16 Nabuzaradánʼdi dule-wileganabi napi-obesad. Adi, uva-nainumar-akwega, degi, nainumargi ibmar-digega obesad.
JER 52:17 Babilonia-sordamar, Bab-Dummadse-goled-neg-buarmar-esgoro-gordikidgi-sobaledi bibichismalad, degi, Bab-Dummadse-goled-neggi argan-enuked-dii-simalad esgoro-gordikidgi-sobarmalad bela ogoamaksamarbalid, degine, dii-sied-dummad esgoro-gordikidgi-sobaled ogoamaksamarbalid. Geb Babilonia-yarse esgoro-gordikid sesmalad.
JER 52:18 Deginbali, bormomar, degi, bormo-buru-wemalad, gwillo-dub-siked-dislamar, degi, nog-dummagan, degine, buru-weemaladi, sesmarbalid. Degine, Bab-Dummadse-goled-neggi bela ibmar-ebulemalad esgoro-gordikidgi-sobarmalad, bela Babilonia-yalase sesmalad.
JER 52:19 De-ukinbali, sorda-bila-onomalad-e-dummad-Nabuzaradán, san-gamalad-iko-dummagan sesbalid. Sianarmar, nog-dummagan-abe-bomimalad, nog-suigan, bormomar, gwallu-simalad, degine, nog-baigan, sesbalid. Bela-ibmarmar-olobimalad, degine, manibimaladi, sesbalid.
JER 52:20 Bab-Dummadse-goled-negga Salomón, buarmar-warbo esgoro-gordikidbiid-sobsagusadi, degi, dii-sied-dummad-e-urbali moli-bebe-nikad warambe-gakabo-siidi (12), degi, argan-enuked-dii-simalad-sobsagusadi, bela-belad aidikusoggu, e-aidikued wisguledsulid.
JER 52:21 Buarmar dalibake-binasgarse sugu-sugu nanaed, e-wardunguedi daligwen-bisgise dungued, e-songuedi goo-walabake-wilub songubalid. E-yaabali yaa-olloo siid.
JER 52:22 Buar-nono-e-esgoro-gordikidbi-sobaledi buar-nono-birgi-siidi, daligwen-gaka-bisgise sugued, degine, e-gakuligine guseb-dummaganyobi esgoro-gordikidbi sobarnanaid, geb a-sobaled-uki sakiyob ebilis naibalid. Buarmar-warbogwadgi ibmar-sobar-nanaidi bela emarbi dakleged.
JER 52:23 Buar-wargwengine, gwadulabake-gakambe-gakanergwa (96) guseb-dummaganyob magar-dakle nanaid. Bela saki-dikarba guseb-dummaganyob-nanaidi gwadulatar (100) mergued.
JER 52:24 Degine, sorda-bila-onomalad-e-dummad-Nabuzaradán, dule-irwa-Bab-Dummadse-goled-bur-dummad-Seraías gasbalid. Nabuzaradán, dule-irwa-Bab-Dummadse-goled-sorbalid-Sofonías, degi, dule-Bab-Dummadse-goled-neg-yawagak-dakmalad walapaa gasbalid.
JER 52:25 Geb degi, Nabuzaradán, Jerusalén-neggweburgi sorda-bila-onomalad-daked-gwensak gasbalid. Degine, walagugle (7) dule-reyga-ibmar-imakdimalad neggweburgi-gudimaladi gasbalid. Deginbali, sorda-bila-onomaladga-garda-narmaked-idued gasbalid, a-dule, dulemar-nug-semaidid. De-ukinbali, Nabuzaradán, dule-neggweburgi-gudimalad-dulapaa (60) gasbalid.
JER 52:26 Sorda-bila-onomalad-e-dummad-Nabuzaradán dulemar-gasgu, Ribla-neggweburse Babilonia-e-rey-maidse sesad.
JER 52:27 Geb Rey-Nabucodonosor, Hamat-yargi-neggwebur-Ribla-siidgi, dulemar-oburgoye sogsad. Weyobi, Judá-dulemar galesa e-neggweburgi selesgusad.
JER 52:28 Dulemar Nabucodonosorʼse weyob-mergue gales-selesmalad: Nabucodonosor birga-guglegus (7) Babiloniaʼgi reyga-maidgine, milipaa gaka dulagwen-gakapaa (3,023) Judío-dulemar gasa sesagusad.
JER 52:29 Geb birgambe-gakabaabakgus (18) Babiloniaʼgi reyga-maidgine, Nabucodonosor Jerusalén-dulemar dulataled-ilabaabak gaka dulagwen-gakambe-gakabo (832) gasa sesagusbalid.
JER 52:30 Nabucodonosor birga-dulagwen-gakapaagus (23) reyga-maidgine sorda-bila-onomalad-e-dummad-Nabuzaradán, Judá-machergan dulataled-ilagugle gaka dulabo-gakatar (745) gasa, Babiloniaʼse segagusad. Bela dulemar, milibake gaka dulataled-ilanergwa (4,600) galesa selesgusad.
JER 52:31 Babilonia-e-rey-Evil-Merodac, birgagwengus gaka iba-durgwen-gakatar-megidagedgi, Judá-e-rey-Joaquín esgaryagi-mellesiid onosad. Deunni, birga-durgwen-gakambe-gaka-guglegus (37), Joaquín, Babilonia-neggweburse galesa selenonigusad-akaled.
JER 52:32 Geb, Evil-Merodac, nueganbi Joaquín-akwisad, degi geb, Evil-Merodac, e-sorda-reymar-imbagi, Joaquín dummadga Babilonia-neggweburgi osisad.
JER 52:33 Deginbali, Joaquín, esgaryagi-mor-yoleged bar-yossulid, degi, rey-imbagi bane-bane mas-gundii gusad.
JER 52:34 De-ukinbali, Rey-Evil-Merodac, bane-bane Joaquínʼga ibmar-abelemalad-bakega mani-ukdii gusad. Deyobi, Joaquín burwa-dulega-gued-ibase nanadii gusad.
LAM 1:1 Sión-neggwebur dulemar-bukidar-nikagusanad, emidi, ibiyobi walagwen-ganna sigisa. Jerusalén-neggwebur, neggwebur-bamaladba-bur-nuga-nika-sigisanad, emidi, ome-ei-sui-burgwisadyobi siid. Jerusalén-neggwebur, neggwebur-bamalad-e-dummadga-sigisanad, emidi, neggwebur-bamalad-e-maiga siid.
LAM 1:2 Mutikidbali, naibid-dummad-itogedbali bela-bela boed, e-wagarbali e-ibyanis suurmakmaid. Dulemar-nue-sabye-sogdimalad-abargi, e-gwage-baisur-ito-imakedi, wargwensaale sated. Bela e-aimar egi aibichamalad, e-isdarmaladga gunonimalad.
LAM 1:3 Judá-dulemar esgoro-dubgi-atinnale, yar-baidse gales selesmalad. Dule-ainebarmalad-abalagi-gudidimalad, gwen obunnoged amisurmalad. Bela-balegindimalad, Judá-dulemar-bargasmalad, sabsur-odurdaksamalad.
LAM 1:4 Sión-neggweburse-naega igarmar-mamaidi, wiles dakleged, ar e-itoakwaa-ibagan-onolegedse dulemar bar nanasurmalad. Bela e-yawagakmar bergus gwigwichid. E-dule-irwa-Bab-Dummadse-gormalad bodimalad. E-yagana, wile itodimalad. Jerusalén-neggweburgi bela nunmakedbi neg-nagusad.
LAM 1:5 E-isdarmalad, e-dummaganga gunonimalad, e-isdar-dakmalad, ibmar bur bule nikudmalad. E-isgued-bukidar-nikad-ulale, Jerusalén-dulemar Bab-Dummadse sabsur-odurdaklenonimalad. E-mimmigan gales aineba selesmalad, e-isdarmaladse ebipilesmalad.
LAM 1:6 Sión-neggwebur epenne e-yeerdaklesigusadi, bela bergunonikid. E-dummagan, goe-sapur-gagan-maega-amididamaladyob gaamakdimalad. E-balegindimalad-abin geggus wakitemalad.
LAM 1:7 Jerusalén-neggwebur, e-ibagan-isgana-nasad ebinsaed, e-dulemar-gales-selemamaigusad, ebinsaed. Epenne bela-ibmar-nuegan-bukidar-nikagusad, ebinsaed. E-dulemar, e-isdarmaladse-galesmargua, dule-bamalad gwen bendaksasulid. E-isdarmalad, Jerusalén-dulemar-galakus-daksagua, egi dodonai gusmalad.
LAM 1:8 Jerusalén-neggwebur bela-bela isgusad. A-ulale, ib-isganaga gunonikid. Jerusalén-neggwebur-ayaris-sii-dakarmargua, dulemar, iduar Jerusalén-nug-odummodimalad, emidi, isdar dakmalad. Jerusalén-dulemar na boed, binge-itogedba na wagar odukued.
LAM 1:9 Bela e-mor nue-isgusad, na e-berguoedgi binsassulid. Ukiagwar oitolenonikid, dule-bamalad gwen-wile daksasulid. Emidi, soged: “Bab-Jehováʼye, an-wile-itoged be dake. An-isdarmalad angi obichad.”
LAM 1:10 Jerusalén-neggwebur e-ibmar-nuegan-nikadi, e-isdarad bela e-ibe susad, E-Bab-Dummadse-goled-neggi, dulemar-Bab-Dummad-akudakmalad-ubosmalad Jerusalén-dulemar daksamalad. Bab-Jehová, be a-dulemarga igar-mesisanad, mer an-igar-itoged-negse dogmaloye.
LAM 1:11 Bela Jerusalén-dulemar bodimalad, masgunned amidimalad. Na dulagudigumalaga, e-ibmar-bur-nuegan masbina ogwaed. Ise-boale sogmalad: “Bab-Jehováʼye, be dake, ibiyobi an-wionanai.”
LAM 1:12 Sogdebalid: “Bemar-igarba-nadapmalad, be an-dakmala, ¿gwen-bai be an-daksuli? Bab-Dummad-sabsur-an-wionaiyobi, ¿bia be deyob dule-wilenai daksamala? Ar Bab-Jehová na nue-uludgua, we-nunmaked anga barminonikid.
LAM 1:13 ”Bab-Jehová, nibneg-akale, soo barmialid. A-soo, garmarse-bakale, an-ogumaksad. An-iduale, saki nasiksad, gannar sikirmakega an-imaksad. Walagwen an-meted, bali-bali nunmaked-itogega an-imaksad.
LAM 1:14 ”Bab-Jehová-sunnad an-isgued oatosad, an-isgued akwa-dummad-aidikuedyob angi naid. An-dukarba anga nasiksad, an-gargangued nolloo imaksad. Bab-Jehová, an-isdarmaladga an-urmaksad, an geg amar-abin-imaked.
LAM 1:15 ”Bab-Jehová, an-neggweburgi bela sordamar-bulegan onisad. Angi yolemalagala, dule-bamaladse gochad, an-sapingan-oitogegala, dule-baiganse gochad. Igi uva-nis-egurega uva-birgi annaledae, deyobi Bab-Jehová, Judá-e-bunamala imaksad.
LAM 1:16 ”Bela we-ibmala boega an-imaked, boedba nue an ataksurgusad. Dule-an-gwage-baisur-ito-imaked an-walik gudisulid, dule-wis-gadi-gadi-an-imaked, an daksulid. Ar an-isdarmalad anmargi nakwissoggu, an-mimmigan wargwen melledmarsunnad.”
LAM 1:17 Sión-dulemar, bendaklegegala gornanaid, ar dule-e-gwage-baisur-ito-imaked sated. Bab-Jehová-igar-mesnonikidba, Jacob-yar-naid-dikarba-neggwebur-bukmalad, emidi, Jacob-e-isdarmaladga gunonikid. Jerusalén-neggwebur ibmar-durwaga gunonikid, ibmar-isganaga gunonikid.
LAM 1:18 “Bab-Jehová, innikigwadba ibmar-imakedid, ar andi, e-igar-mamaidgi aibichad. Bemar bela dulemar, nue an-itomala, an-wile-itonaid be nue dakmala. An-sapingana, bela-gales aineba selesmalad, an-bunamala, bela-gales aineba selesmalad.
LAM 1:19 ”An-aimarse, an iseedi gornai gusanad, aka bur angi aibichamalad. An-dule-irwa-Bab-Dummadse-gormalad, an-girmar-dummagan, na dulagudigumalaga mas-amidigu, neggweburgi burgwismalad.
LAM 1:20 ”Bab-Jehová, an-nunmak-itonaid, be dake. An burgwe itoged. An beba bela-bela ibsassursoggu, an-gwage suli-suli-ito naded. Neg-magabali, an-mimmigan, es-suidgi oburgwilenanaid, wegi negyabali, burgwed neg-gasa naid.
LAM 1:21 ”Dulemar an-gormaknaid itosmalad, ar dule-an-gwage-baisur-ito-imaked sated. Bela an-isdarmaladi, an-wilenaid wismalad, be igi-an-imaksadgi wergumalad. An igi-wilesa, deyobi wilemarmosun. Be sabsur-odurdaklemaloye-sogsagusadi, an-isdarmaladgi gwae be barmidasun.
LAM 1:22 ”Bab-Jehová, bela an-isdarad-e-isgumalad be dake. An-isgusad-ular, igi be sabsur-an-odurdaksagusa, deyobi be an-isdarmalad imakmoga. Bato an bukidargus nunmaked-itodanikid, nue-angi obin an itogusad.”
LAM 2:1 Bab-Jehová na e-uludedbali, ibiyobi Sión-neggwebur-yeerdaklegedgi negsichid nasiksa. Bab-Jehová nibneg-akale, Jerusalén-neggwebur-yeerdakle-siid omukusad. Bab-Jehová e-iba-uludedgi na ese-goled-neg, we-napneggi-siideeye binsassulid.
LAM 2:2 Bab-Jehová bela Jacob-wagan-e-negmar-bukwadi, gwen-wile-daksasuli obelosad. Bab-Jehová na e-uludedbali, Judá-yar-yeerdakleged-e-neg-gandikmalad bibichisad. Bab-Jehová, Judá-e-rey-dummadga-maid-egwachadba, Judá-yar-nug bipii imaksad. Judá-e-dummaganga-mamaid-egwachadba, Judá-yar-nug bipii imaksad.
LAM 2:3 Bab-Jehová, uludgua, bela Israel-e-gargangued obelosad. Anmar an-isdarmaladbo-urwenaigua, Bab-Jehová anmar-bendaksasulid. Soo-dummad-bela-ibmar-obelogedyobi, Jacob-e-yar-naidgi soo ogasad.
LAM 2:4 Bab-Jehová anmar-isdaradyob warsi guagwar gasad, e-swida-nuedsikid guagwar oyosgwichid. Bab-Jehová anmar-isdaradyob, anmar-gwenadgan-ogilosad. Bab-Jehová na e-urwedi, sooyobi Sión-yeerdakleged-e-negmargi odesad.
LAM 2:5 Bab-Jehová anmar-isdaradyob na imaked: Israel-yar obelosad. Bela Israel-e-reynegmar bibichisad, Israel-e-neg-gandikmalad omukusad. Bab-Jehová Judá-yar-yeerdaklegedgi boedbi, wile-itolegedbi, neg nasiksad.
LAM 2:6 Bab-Jehová e-maid-neg sosganeg-siiyobi earisad, e-onmakedneg-siidi omukusad. Bab-Jehová, Sión-dulemar na e-iba-itoakwaa-onoleged-iegega imaksad, e-obunnoged-iba-iegega imaksad. Bab-Jehová nue-uludedbali, rey-maid obachad. Dule-irwa-ese-goled obachad.
LAM 2:7 Bab-Jehová, na e-ibmar-ogumakar-ukleged-aila obachad, na e-neg-islidikid isdar daksad. E-reynegmar-e-galumar, e-isdarmaladga urmaksad. E-isdarmalad, iba-dummad-nonaiyob, Bab-Jehová-neggi oimakdemalad,
LAM 2:8 Bab-Jehová, Sión-neggwebur-yeerdakleged-e-galu-matusur-ebirmaidi, omukuedgi binsasad. Obeloged-igar ilemakar mesisad, gwen-wile-daksasuli galu-matusur-maid obelosad. E-arsanyob-maidgi, e-galumar-birgi nunmak-itoged nagusad, bela we-ibmarmar malusad.
LAM 2:9 Jerusalén-neggwebur-e-yawagakmar bela aimukusad, Bab-Jehová bela yawagak-edimalad bibichisad. Jerusalén-e-rey yar-baidsik yoggus gudiid, e-sapin-dummagan, yar-baidsik yoggus gudidimalad. Bab-Dummad-igar bergusad, Bab-Jehová, e-gayaburba-barsogmaladga bar negburgan oyossulid.
LAM 2:10 Sión-neggwebur-yeerdaklegedgi girmar-dummagan, napayala bogidik sigismalad. Girmar-dummagan, nunmak-itogedba na e-nonogine, sogun-buru eosmalad, wile-itoleged-mor yosmalad. Bunamala-Jerusalénʼginmalad, bingedbali, napase dulluu nono imaksamalad.
LAM 2:11 Boedbali, bar an nue ataksurgusad, an bela-bela gwage nunmak itoged. An-neggwebur-ibitosadbali, an-niga bela argwachad. Burwigana, degi, goemala, neg-imbabali, burgwemamaid.
LAM 2:12 Burwigana e-nanganse egichardamalad: “¿Bia masde? ¿Bia gobedde?” Mas-satedbali, burwigana neg-imbabali, binna-binna burgwiddamalad. E-nan-nukugi napi-bunnomai burgwiddamalad.
LAM 2:13 Jerusalén-yeerdakleged, ¿ibu an begi obarosunna? ¿Doabogwa an be-wilubsaosunna? Jerusalén-neggwebur-swilidikid, be-gwage-baisur-itogega, ¿ibu an bega oyogergebe? Be-naibi-gusad, demar-wiladyob gued. ¿Doa gannar be-nudakoe?
LAM 2:14 Be-Bab-Dummad-gayaburba-barsogmalad, gakansaale negburgan-daksad bega sogsamalad, be-yardakale bega sogsamalad. Be-isgued gwen barsogsasurmalad, melle be-gamalaga gwen be-bendaksasurmalad. Bemarga gayaburba-gakansaaled sogsamalad, a-gayaburbagi, melle be bensuliguega be-imaksamalad.
LAM 2:15 Dulemar-igarba-nadapmalad, be-dakarmalale, begi dodoar argan ogotedamalad. Jerusalén-neggwebur-yeerdakleged, be-asabin akar-akar gunanadaed. Wigoar-wigoar sognanaidaed: “¿Ar we-neggwebur nue-yeerdaklegedye sogmaladi? ¿Ar we-neggwebur, bela napneg-yeer-ito-imakedye sogmaladi?”
LAM 2:16 Jerusalén-dulemar, bela be-isdarmalad begi-sunmakdemalale, begi isdar sunmakdedamalad. Nue-sae-be-dake, dodoar weyob sognanaid: “Anmarse dula dolesad. Anmar bela-bela-iba-edarbediid nonikid, anmar-sunnad daksasunnad.”
LAM 2:17 Bab-Jehová ibmar-imakega na igar-amisadi, sogedba imaksad, na dikasurgus ibmar-sogsadi, bela imaksad. Bab-Jehová be-wiledaksasuli, be-obelosad, be-isdarmalad begi-dodogega imaksad, begi-yolenanaid-e-gangued ogannosad.
LAM 2:18 Sión-dulemar, Bab-Dummadse, ise-wilegar gornanaid. Sión-neggwebur-yeerdakleged-galu-matusulid-nika-siid, mutikidbali, ibginedbali, diwaryobi be-ibyanis aryomai be imake. Mer be boed bogigue, mer be be-ibyanis-aryomaid bogiguega imake.
LAM 2:19 Be gwisgue, mutikidbali be ise-gollar imake, wachi-iliba be ise-gollar imake. Bab-Jehová-asabin ibmar-ukleged-uknaiyob, gwage-nunmaked-itogedbali na be bosii imake. Be-mimmigan-mer-burgwegala, Bab-Dummadse argan-onakwar be gorsii imake. Be-mimmigan ukudbali burgwemamaid, neg-imbaba burgwis mellemamaid.
LAM 2:20 “Bab-Jehováʼye, be dake, nue be itogena: ¿Doa-dule be weyob imaksagusa? ¿Ar omegan na e-mimmigan gunmarsunnode? ¿Na e-mimmigan-egi-danimalad gunmarsunnode? Bab-Jehováʼse-goled-neggi, ¿ar dule-irwa-Bab-Dummadse-gormalad oburgwilemalode? ¿Ar Bab-Dummad-gayaburba-barsogmalad oburgwilemalode?
LAM 2:21 ”Sapingana, degi, dule-serganse-bakale, neg-imbaba burgwar mellemamaid. An-sapingana, degi, an-yagana, es-suidgi oburgwilesmalad. Be-uludedbali, be wemar oburgwisad, bela-bela-wiledaksuli, be wemar oburgwisad.
LAM 2:22 ”Iba-dummad-onolegedse-danimalayob bela bonigan angi dagega be imaksad. Bab-Jehová-Ulusad-ibagi, dule-wargwensaale, san-onossulid, bela burgwismalad. An-gwenadgan an odummosadi, an ibmargi-odurdaksagusadi, an-isdarmalad, bela an-ibe ogilosad.”
LAM 3:1 An-sunnagwad, Bab-Jehová-uludedbali sabsur-dule-odurdaked an itosad.
LAM 3:2 Negsichiganaba an-nimai gusad, neg-meegwadba an-nimai gussulid.
LAM 3:3 Bali-bali, wachi-iliba, sabsur-an-odurdaknai gusad.
LAM 3:4 Bab-Jehová, an-san, degi, an-uka-dunnumakega imaksad, an-ibe an-garmar bibichisad.
LAM 3:5 Bab-Jehová angi bonigan ebiris nasiksad, angi wileged-dummad ebiris nasiksad.
LAM 3:6 Dulemar-undargus-burgwismaladyob, negsichigangi-gudiguega an-imaked.
LAM 3:7 Bab-Jehová negyaba-mellesii an-imaksad, gege an wakinned, esgoro-dub-dummagangi an-edichad.
LAM 3:8 An-bendakegala, an binnasuli gornai-inigwele, Bab-Jehová an-ese-gornaid budar an-itoged.
LAM 3:9 An-iduar, an-igargi akwamar misad, an-ibe an-igar oburusad.
LAM 3:10 Bab-Jehová, wiob mas-gaega matarmakdiidyobi anbina gudiid, achumigur-nono-wawaad masbina matarmakdiidyobi anbina gudiid.
LAM 3:11 An-san-oichimakega igargi an-obachad, mer bendakleged-amiega, walagwen an-obesad.
LAM 3:12 Guagwar warsi-gasad, e-sigumar an-makega imaksad.
LAM 3:13 E-saboged-yaba sigumar-onosadgi gwagegi an-maksad.
LAM 3:14 Bela an-dulemarga an dodoedga gunonikid, bane-bane angi-dodolegar namakmalad.
LAM 3:15 Bab-Jehová nunmaked-dummad anga uksad, ina-gagbidgi an-ogobsad.
LAM 3:16 Bab-Jehová napagi an-omukusad, olli-maega an-imaksad.
LAM 3:17 Gwage-bogidikid an-ibe obelosad, weligwar-itoleged bar an ebinsasulid.
LAM 3:18 A-ulale, an soged: “An-gargangued bergusad, Bab-Dummadgi an ibmar-edarbediid bar an dakosulid.”
LAM 3:19 An-wile-itodiid, an-neg-sate-gaamakdiid, be ebinsao. Ar we-ibmarmar, naibid-dummad anga uked.
LAM 3:20 Bane-bane an we-ibmargi binsadiid, a-ulale, bar an ibmar imakbisuli itoged.
LAM 3:21 Degi-inigwele, an ibmar-soggwendi ebinsaed, we, mer suli-suli-itogega an-imaked.
LAM 3:22 Bab-Jehová-sabgued-dummad-nikad-ular, anmar bergussulid, e-wile-emar-daked gege bergued.
LAM 3:23 Bab-Jehová-e-wile-emar-daked bane-bane binoleged. Bab-Jehová-sogedba-ibmar-imaked dummarba gued.
LAM 3:24 Degisoggu, an soged: “Bab-Jehováʼbi anga unni gued, agala, an egi bensulid.”
LAM 3:25 Bab-Jehová, dule-egi-bensur-gudimaladgi nued daed, bela dule-e-amidimaladgi nued daed.
LAM 3:26 Bur-nuedid, anmar doga-doga-itosulidgi, Bab-Jehová-anmar-bendakdagoed edarbed.
LAM 3:27 Bur-nuedid, dule sapingwagwad-akale, bonigan-abalagi ganna-gudigued durdaked.
LAM 3:28 Melle ese be gole, itoba bogidik sigoed, ar Bab-Jehová deyob ega igar mesisad.
LAM 3:29 Nue-bingegusa, wagar napase dulluu imakoed, abakale, amba Bab-Dummad e-bendakalile.
LAM 3:30 Dule-e-ibe-wagar-bibyonaidga, baid-wagar oyobalo, deyobi, nue bingeguoed.
LAM 3:31 Bab-Jehová anmar-obachad, degi-inigwele, deyob-anmar-imakmai sadeguosulid.
LAM 3:32 Nunmak-itoge anmar-imaked, degi-inigwele, anmar-wile dakbalid, ar e-sabgued dummarba gued.
LAM 3:33 Bab-Jehová anmar-naibi imaked, anmar-wile-ito imaked, ar deyob-anmar-imakedgi wergudeeye soglesulid.
LAM 3:34 Bab-Jehová weyob-ibmar-imaklemalad abemaisulid: We-napneggi bela-dulemar-esgaryagi-mellebukwad sabsur-imakleged, abemaisulid.
LAM 3:35 Bab-Dummad-Bur-Birigined-asabin dulega-igar-nabolesulid, abemaisulid.
LAM 3:36 Bab-Dummad-Bur-Birigined-asabin dulega-innikigwadba-igar-itolesulid, abemaisulid.
LAM 3:37 ¿Doa Bab-Dummad-ega-igar-uksuli ibmar-soged nabir imakoe?
LAM 3:38 ¿Ar Bab-Dummad-Bur-Birigined-igar-ukedbali ibmar-nuegan, degi, ibmar-isgana gusursi?
LAM 3:39 ¿Ar ibiga dule na e-isgusadba sabsur-odurdaklealir urwedii guoe?
LAM 3:40 Anmar na anmar-daedgi nue-binsasii imakmala, anmar Bab-Jehová-amimala, gannar ese dagmala.
LAM 3:41 Anmar, Bab-Dummad-nibneggi-maidse-golega argan onakwe. Anmar, Bab-Dummad-nibneggi-maidga anmar-binsaed soge.
LAM 3:42 Anmar isgusad, anmar uayasuli nanadii gusad, Bab-Jehová, be anmarga anmar-isgued elissulid.
LAM 3:43 Bab-Jehová, be nue-urwedbali be anmar-baleginned, wile-be-anmar-daksuli, be anmar-obeloged.
LAM 3:44 Anmar-bese-goled mer be itogegala, be mogir-imbaba dukusad.
LAM 3:45 Dulemar-yar-baid-baid-bukwamalad-abargine, ibmar-isganayob be anmar-barmeted.
LAM 3:46 Bela-anmar-isdarmalad sunmakdemalale, anmargi ichakwaa sunmakdedamalad.
LAM 3:47 Anmar, dobgued-dummad itosmalad. Anmar, omukulesmalad. Anmar, ibmar-sate gusmalad. Anmar, nunmaked-dummad itosad.
LAM 3:48 An-neggwebur-e-saila-gusiid-nue-ibitosadbali, an-wagarba diwar-aryomaiyob ibyanis aryomaid.
LAM 3:49 An-ibyanis gwen bogigusuli aryomaid, dule-an-gwage-baisur-ito-imaked sated.
LAM 3:50 Bab-Jehová nibneggi-maid-akale, geb anmar-dakedse an gadi-gadi itononikoed.
LAM 3:51 An-neggweburgi-omegan-gudidiid sabsur-odurdaklenaid-ulale, bela-bela an-gwage an nunmak itoged.
LAM 3:52 An ibmar-akar-imaksasuli an-isdarmalad binsa an-baleginnanaid, nuuyobi an-gasmalad.
LAM 3:53 Dula napa-urba an-odosmalad, an-iduar noed akwa-dummadgi edismalad.
LAM 3:54 Bela diiba an-nono-dogdegua, an na belaye sogded.
LAM 3:55 Bab-Jehová, an dia-dummadgi gulluyaa mellesigua, an bese gochagusad.
LAM 3:56 An-bese-wilesagwa-gornaid be itosad, an-ise-gollar-gornaid be itononikid.
LAM 3:57 An bese gochad, be anse nonikid, be anga sognonikid: “Mer be dobguye.”
LAM 3:58 Bab-Jehová, bee be anbali nagusad, be an-bendaksad.
LAM 3:59 Bab-Jehová, nue-an-wiosmalad be daksad, be anga innikigwadba igar nudake.
LAM 3:60 Buged-mai angi-imakbimalad be daksad, an-oakalobimalad be daksad.
LAM 3:61 Bab-Jehová, dule-angi-urwe-nanaid be itosad, an-oakalobimalad be daksad.
LAM 3:62 Bab-Jehová, an-isdarmalad angi-sunmaknanai-osedoddaed be wisid, angi-gwisgumalaga igar-aminanaid be wisid.
LAM 3:63 Bab-Jehová, be dake, na ibu imaknanadibe, angi dodonanadamalad, e-namakedgi angi-dodoar namakmalad.
LAM 3:64 Bab-Jehová, wemar na bela e-ibmar-isgana-imaksad-ulale, be sabsur-odurdake.
LAM 3:65 Ibmar-aku-itogega be imake, be ukabsasunna.
LAM 3:66 Bab-Jehová, be-sae-itogedbali be wemar baleginne, we-napneggi be bela obeloge.
LAM 4:1 ¡Or gudure daklegusad! ¡Or-nued e-gaed bar nue dakarmaksulid! Bab-Dummadse-goled-neggi ormar-bukwadi, bela negmar-imbaba omileded.
LAM 4:2 Sión-dulemar bur bule epenne olo-nueganba e-bina soglegenad, emidi, napsa-nogyob daklemalad, dule-napsagi-arbaed e-ibmar-imakedyob dakleged.
LAM 4:3 Achu-sapurmarbela na e-mimmigan-onuegala ega mam uked. Ar Jerusalén-omegandina, igi nuu-dummad-dukar-suidmar dule-negasulidganba na e-mimmigan-mete-naddamala, deyobi, e-mimmigan metemalad.
LAM 4:4 Burwigana ukudmaad-itogedbali, e-gwabinmar achaa gayagi nagusad. Burwigana aisaar mas egisenad, degi-inigwele, dule gwen ega uksulid.
LAM 4:5 Dulemar iduar mas-nuegan gundidamalanad, emidi, igarbali ukudba burgwemamaid. Dulemar iduar mor-nuegan-gargerbamalad yodamalanad, emidi, ibmar-isgana-abargine gudimalad.
LAM 4:6 Jerusalén-dulemar-e-isguedi, bur bule Sodoma-dulemar-e-isgusadba gued. Sodoma-neggwebur yog-berguar gusad, gwen dule bendaksasulid.
LAM 4:7 Jerusalén-e-dummagan, boobali bur sibudik daklenanaenad, moli-nunisba bur sibudik daklenanaenad. E-abagan akwa-bisgi-ginnigwadba bur bule gisii daklenanaenad, akwa-nued-zafiroʼyob daklemalanad.
LAM 4:8 Emidi, e-daklegedi negsichidba bur gudure daklemalad, igarbali aku daklemalad. E-uka, sapanyobi dinnaa dakleged. E-uka-dinnagwadbali e-garmar buus-buus dakleged.
LAM 4:9 Dulemar-es-suidgi-burgwismalad bur nuedid, dulemar-ukudba-burgwismaladba. Ar wemala, napaneg ega ibmar-gwag-osanmaksasulid-ulale, binna-binna ukudba burgwemamai gusmalad.
LAM 4:10 Nangan-sabed-nikamalad, na dukin e-mimmigan-dunanai gusmalad. Jerusalén-neggwebur-ibitonaigua, we-nangan na e-mimmigan masga imaksamalad.
LAM 4:11 Bab-Jehová bela-bela e-sae-itoged bar bargassulid, bela-bela e-sabsur-urwed oyosad. Sión-neggwebur ogumaksad, bela Sión-neggwebur-e-neg-sailase-bakar, ogumaksad.
LAM 4:12 Reymar-we-napneggi-negsemamaidi, Jerusalén-e-isdarmalad, Jerusalén-e-yawagakgi dognonimaloye-soglesad, bengusmalad. Dulemar-we-napneggi-gudidimaladi, Jerusalénʼgi-gwisgudidimalad, Jerusalén-e-yawagakgi dognonimaloye-soglesad, bengusmarmogad.
LAM 4:13 Neg-gunonikidi, Bab-Dummad-gayaburba-barsogmalad-e-isgusad-ulale, deyob neg-gunonikid. Dule-irwa-Bab-Dummadse-gormalad-e-isgusad-ulale, deyob neg-gunonikid. Neggwebur-neg-imbaba dule-ibmar-oakalossurmalad-e-ablis-eosmalad-ulale, deyob neg-gunonikid.
LAM 4:14 We-dulemar ibyasuliyob igarba gudidimalad, e-argan ablis-sunnabi gudidimalad. Deyob-gudimaladbali, dule-wargwensaale, e-morse-bakale, gwen e-ibe ebubisulid.
LAM 4:15 Dulemar iseed ega sogmalad: “Dule-swilidiksurmalad, wegi be namala. Be nomala, be nomala. Mer be anmarse achamala.” Dulemar-Bab-Dummad-akudakmalad yar-baid-baid-bukwamaladi sogmalad: “We-dulemar neg-sate gaamakdidimaladid, wakindimaladid. Wegi geg bar gudii gumalad.”
LAM 4:16 Bab-Jehová uludedba wemar-obachad, bar we-dulemargi binsassulid. Dule-irwa-Bab-Dummadse-gormaladdeeye bar egi binsalesulid, dule-selebagusmalad bar wile daksurmarbalid.
LAM 4:17 Anmar binsarsunna bendakleged-edarbediidbali, geg nue atakgusad. Aisaale, anmar, anmar-neg-matusulid-birgi dule-gwen-anmar-bendakmalosulidsik atakgwis damalanad.
LAM 4:18 Ar anmargi nakuledidii nanaed, geg bar anmar galimbaba nanaed. Anmar-bergued modanikid, anmar-bergued-wachi bato nonikid, anmar-ibagan bato belad.
LAM 4:19 Anmar-balegindimalad, sulubagimarba bur bule nanamalad. Yalaganba anmar-balegichamalad, nega-dulesulidganba anmar-iduar dukuar bukus gusmalad.
LAM 4:20 Dule-Bab-Jehováʼse-nug-imaklesad, a-dule-isganamar-e-sakigi galesmogad. We-dule, anmar-bendakoedinad. Ar anmar we-dulegi sogdimalanad: “Dulemar-yar-baid-baidgi-bukmaladgi, we-dule, anmar-bendakdii guoye.”
LAM 4:21 Edom-dulemar, Uz-yargi rey-bundoryob be gudimalad, be yeer-itomala, be wergumala. Ar bemar sabsur-odurdaklegedsemarmogad. Be-ibmar-nikadi bela be-ibe surgunonikoed.
LAM 4:22 Sión-neggwebur-yeerdakleged, be-sabsur-odurdakleged bergunonisunnad. Bab-Dummad aineba gales-selemai bar be-imakosulid. Bedina, Edom-dulemar, Bab-Dummad, be-isgusadbali sabsur-be-odurdaknonikoed, bela be-isgusad magar-daklege imaknonikoed.
LAM 5:1 Bab-Jehováʼye, anmar-gusadi be ebinsae, anmar-wiolenaid nue be dake.
LAM 5:2 Anmarga-ibmar-uklegoye-soglesadi, dule-bamalad anmar-ibe susad. Anmar-negmar, dule-anmar-yarginsurmalad anmar-ibe susad.
LAM 5:3 Anmar bab-sated, anmar dule-sergan-satedga gunonikid. Anmar-nangan suisuli gunonimalad.
LAM 5:4 Anmar dii-gobedi bennukergebed, anmar sapanmar bakergebed.
LAM 5:5 Anmar-balegindimaladi, bato anmar-bargadanikid. Anmar nue-geggus gudidimalad, anmar obunnoged sated.
LAM 5:6 Anmar mas-gunned-amiegala, Egipto-dulemarse argan-oyonai gualid. Anmar mas-gunned-amiegala, Asiria-dulemarse argan-oyonai gualid.
LAM 5:7 Anmar-babgan isgusmaladba burgwismalad. Anmardi, amar-isgusad-ulale, Bab-Dummadse sabsur-odurdaklesmalad.
LAM 5:8 Emide, maiga-gudidimalad, anmar-dummadga gunonimalad. Amargi anmar-onogega dule sated.
LAM 5:9 Anmar mas-amiegala, nega-dulesulidganba burgwednaga gudii gusmalad.
LAM 5:10 Anmar ukudmaad-itogedbali, uelledmalad. Anmar-abagan diopi-diopisur itoleged.
LAM 5:11 Sión-neggweburgi omegangi nue-dodolesad, Judá-neggweburmargi yagangi nue-dodolesbalid.
LAM 5:12 Anmar-dummagan argangi-atinnar bannu-bannu nasiklesmalad, anmar-dadormargi dadormardeeye gwen binsalessulid.
LAM 5:13 Anmar-sapingan ibmar-gwag-nagega imaksamalad. Burwigana sapan-gwaad-seedbali ibitodii guarmalad.
LAM 5:14 Neggwebur-yawagak-noedgi sapin-dummagan bar ambikusurmalad. Sapingan bar namaksurmalad.
LAM 5:15 Anmar bar weligwar itosulid, anmar-weligwaledgi-gwiled wile-itogedga binyenonikid.
LAM 5:16 Anmar ologurgin bar sisurgusad. ¡Anmar duledar-wiles! ¡Anmar isgusad!
LAM 5:17 Anmar gargangued bergumaid, a-ulale, anmar nolloo atakgusad.
LAM 5:18 Ar Sión-yargi bar dule gudisulid, Sión-yargine, unnila ibdurgan-sapurbarmaladbi gudinanaed.
LAM 5:19 Degi-inigwele, be Bab-Jehová, degisadegu negsemaid, be reyga degisadegu maid.
LAM 5:20 Bab-Dummad, ¿ibiga be anmar-iesdae? ¿Ibiga be undar anmar-iege?
LAM 5:21 Bab-Jehová, gannar anmar bese-dagega be anmar-imake, geb gannar anmar bese dagoed. Anmar iduar igi-gudigusa, deyob be gannar anmar-imake.
LAM 5:22 Innikigwadba be anmar-obachad, bela-bela be anmar-isdar daksad.
EZE 1:1 Dakleargua, birga-dulagwen-gakambegwadgi gaka nii-walabakegwad-ibataledgine, dulemar-gales-selesmalad-abargi Quebar-diwar-gakaba-sii, nibneg argade an dakalid. Agine, Bab-Dummad anga negburgan oyosad.
EZE 1:2 Ezequiel negburgan-daksadi, deunni, Rey-Joaquín birgatargus gaka nii-walatargus gales-seleargusad-akaled.
EZE 1:3 A-ibagangine, dule-irwa-Bab-Dummadse-goled-Buzi-machi-Ezequielʼye-nugadi, Caldea-dulemar-yargi, Quebar-diwar-gakaba gudigu, Bab-Jehová ega ibmar-sognonikid. Agi, Bab-Jehová-e-gangued egi aidenonikid.
EZE 1:4 Geb degine, dad-nakwed-argan-sapiledsik burwa-dummad daniki, degi, soo-binnasur-gaed-abargi mogir-dummad neg-ibegwar-imakdaniki an dakalid. Soo-abargine, esgoro-gordikid-gaedyobi, ibmar gae an dakalid.
EZE 1:5 Soo-abargine ibdula walabake duleyob-daklege an dakarbalid.
EZE 1:6 A-ibdulamala, wagar darbake, sakan walabake nika nanaed.
EZE 1:7 E-malimar bela innikimakaled, e-nagmar moli-bebe-nikad-sapingwagwad-gooyob dakleged. Esgoro-gordikid-dakarmakedyobi e-nagmar dakarmaked.
EZE 1:8 E-sakanmar-urba, e-dikar-sogabakegwadgi dule-arganmar nanaid. We-ibdulamar-walabakegwadi wagarmar, degi, sakanmar nikadbimalad.
EZE 1:9 E-sakanmala na muchub-muchub egi warmaknanaid. Ar nanadmalale, geg bar sorsik namalad, unnila asabinbi darekwaa nadapdamalad.
EZE 1:10 Ibdula-walabakwegwad-e-wagarmar weyob-dakleged: Wagar-asabinnidi, dule-wagaryob dakleged. Wagar-argan-nuedsikidi, achumigur-nono-wawaad-wagaryob dakleged. Wagar-argan-sapiledsikidi, moli-bebe-nikad-wagaryob dakleged. Wagar-yarganbalidi, suluba-wagaryob dakleged.
EZE 1:11 Ibdulamar na e-sakan nallaa-imaknanaid, ibdula-baid-e-sakanbo warmaknanaid. Geb sakan-abinnid-baidgi na e-abagan-odukunanaid.
EZE 1:12 Ibdulamar-warbakegwadi asabinbi darekwaa nadapdamalad, geg bar sorsik namalad. Ar bia Bab-Dummad-Burba-niddae, abali naddamalad.
EZE 1:13 We-ibdulamar-dakarmakedi, sogun-aramaksiiyob dakleged. Ibdulamar-abargine, acha-gwallu-duurmaked-bipinmakwichiyob dakleged. Soo duurmakwichidgine, mar ibyegwichid.
EZE 1:14 Ibdulamar mala-ibyeyobi sabsur nanae, an daksad. Mala-ibyeyobi gannar noni damarbalid.
EZE 1:15 An ibdulamar-dakgwichidgine, an dakarbalid, napagi e-nagaba-e-nagaba ibmar-dirbiled-bipirmaked sii, deyob an dakarbalid
EZE 1:16 Ibmar-dirbiled-e-daklegedi, degi, e-sobaledi emarbi dakleged, emarbi sobarbalid. Akwa-nued-topacio-dakarmakeyobi dakarmakmalad. Ibmar-dirbiled-bipirmakedi, baid-ibmar-dirbiled-e-yagi yoibaliyob dakleged.
EZE 1:17 Ibmar-dirbiled-bipirmakmaladi, e-bipirmakedba bipirmaksidaed, geg bar sorsik bipirmakdaed.
EZE 1:18 Ibmar-dirbiled-gwabakegwadi, e-olasuga-gunanaid burwisur nanae an daksad. A-olasuga-gunanaidgine, bela ebilis ibyayob bubukwa an daksad. Nue-dobe an ito naded.
EZE 1:19 Ar ibdulamar nanadele, ibmar-dirbiled bipirmakdedamarmogad. Ibdulamar niba nakwidele, eba niba nakwiddamarmogad.
EZE 1:20 Ar bia Bab-Dummad-Burba niddae, abali ibdulamar naddamalad, ar ibmar-dirbiled-bipirmakmalad aba naddamarmogad, ar ade, ibdulamar-e-burba ibmar-dirbiled-bipirmakedgi maid.
EZE 1:21 Ar ibdulamar nanadmalale, ibmar-dirbiled bipirmakdedamarmogad. Ar ibdulamar boo-nagusmalale, ibmar-dirbiled-bipirmakmalad boo nagusdamarmogad. Ar ibdulamar niba nakwidele, ibmar-dirbiled-bipirmakmalad niba nakwiddamarmogad, ar ade, ibdulamar-e-burba ibmar-dirbiled-bipirmakedgi maid.
EZE 1:22 Ibdulamar-nono-birgi neg-ollor-dummadyob ise-dalallamakeyob-dakle naid. A-ibmala, yeerdakleged.
EZE 1:23 Neg-ollor-dummadyob-naid-urba, ibdulamar na e-sakan innikimakale, nallaa imakdedamalad. E-sakanmar, ibdula-baid-e-sakanbo warmaknanaid. Geb sakan-abinnid-baidgi na e-abagan-odukunanai an daksad.
EZE 1:24 E-nanamaladbali, e-sakanmar-goled an itosad. E-sakanmar-mermermakedba-goledi diwar-uurmakeyob gole an itosad. Bab-Dummad-Bela-Gangued-Nikad-binnasur-sunmakedyobi, gole an itosad. Dule-bukidar-oimakbukwadyob, e-sakanmar gole an itosad. Sorda-bila-onomalad-oimakbukwadyob, gole an itosad. Ibdulamar na boo-nagusmalale, e-sakan odeddamalad.
EZE 1:25 Ibdulamar na e-sakan-odesmaladba boo-nagusale, e-nono-birgi neg-ollor-dummadyob-naid-birgi gayaburba gollardaed.
EZE 1:26 Neg-olloled-dummad-naid-birgi rey-gan siid. Akwa-nued-zafiroʼgi-sobaledyob-daklege siid. Zafiro-ganayob-daklegedgine ibmar duleyob-daklege sii an daksad.
EZE 1:27 Ibmar duleyob-daklegedgi e-sader-akar, nonosega, soo-yagi esgoro-gordikid-dakarmakeyob, dakarmake an daksad. Geb e-sader-akar e-naga-dukusega, sooyobi ibmar-gae an daksad. Bela ebilis neg-mee nai an daksad.
EZE 1:28 Igi dii-wisale, sue megnonidae, deyobi bela ebilis neg-meegwad nai an daksad. Weyobi, Bab-Jehová-e-gangued-yeerdaklegedi an daksad. Deyob an daksagua, yokorgi-sindigale, napase-dulluu wagar-ebulegedse an imaksad. Geb dule anga-sunmake an itosad.
EZE 2:1 Bab-Jehová weyob anga soged: “Dule-machi, be gwisgue. An bebo sunmakgwelo.”
EZE 2:2 Anga-sunmaksad-sorbali, Bab-Dummad-Burba angi ubononikid, gwisguega an-imaksad. Geb degine, dule-anga-sunmaknaid an itosad.
EZE 2:3 Anga sogded: “Dule-machi, Israel-dulemarse an be-barminaid. We-dulemar uaya-satemalad, angi yoledmalad. We-dulemala, degi, e-dadganse-bakale, emi-ibadse angi yoledanigumalad.
EZE 2:4 ”Dulemar-aku-ibmar-itomaladse, dulemar-gwage-dutusurmaladse an be-barminaid, amarga be sogoed: ‘Bab-Jehová-Bela-Gangued-Nikadi weyob sogye.’
EZE 2:5 ”Ar we-dulemar beba ibsamalodibe, surbardibe, ar ade, dule-uayasatemaladid. Degi-inigwele, na wisgumaloed, emar-abargi Bab-Dummad-gayaburba-barsoged gudiiye.
EZE 2:6 Dule-machi, melle be we-dulemar-dobgue, e-sunmakmalad melle be dobgubali. Ar be iko-abargi, degi, diormar-abargi amba be gudii-inigwele, melle be we-dulemar-dobgue. E-ibmar-sogmalad melle be dobgue, degi, wemar-abin melle be gwaye. Ar wemardi, uaya-satemaladid.
EZE 2:7 Ar we-dulemar beba ibsamalodibe, surbardibe, ar ade, dule-uayasatemaladid. Degi-inigwele, we-dulemarga an-gayaburba be barsogoed.
EZE 2:8 Dule-machi, an-bega-ibmar-sogedi be itogo, melle wemaryob uaya-sate be guo. Be-gaya be egae, an-bega-ibmar-uksokalid be gunno.”
EZE 2:9 Geb degine, argan-gwensak ansik-oyolenai an dakalid. A-argangine, garda bipirmakar-mai an dakalid.
EZE 2:10 An-asabinni argangi garda-bipirmakar-maid egasad. A-garda abinbela narmakar naid. A-gardagine, bukib-itoleged-igar, wile-itoleged-dummad-igar, degi, buged-mai-imakleged-igar narmakar nai an dakalid.
EZE 3:1 Bab-Jehová anga sogded: “Dule-machi, we-garda-bipirmakaled be gunne. Geb a-sorba Israel-dulemarga be sunmaknao.”
EZE 3:2 Gaya an egasad, geb garda-bipirmakaled-gunnega an-imaksad.
EZE 3:3 Anga sogdebalid: “Dule-machi, an bega we-garda-bipirmakaled-uknaidi, immelegedse be gunne.” Geb agine, an guchad. An guchagua, we-garda achanisyob ochii gulleged.
EZE 3:4 Anga sogdebalid: “Dule-machi, Israel-dulemarse be nae, an-gayaburba be barsognae.
EZE 3:5 Dulemar-bebo-gwabin-akar-sunmakedse, degi, aku-be-itomaladse an be-barminaisulid. Israel-dulemarse an be-barminaid.
EZE 3:6 Dulemar-bukidar na gwabin-akar-akar-sunmakedse, degi, e-sunmaked be aku-itogedse an be-barminaisulid. Ar amba a-dulemarse an be-barminaina, we-dulemar be-itosmalaled.
EZE 3:7 Ar Israel-dulemardi be-itogosurmalad. Ar an-ega-ibmar-soged itobisurmalad. Ar bela Israel-dulemar uaya-satemaladid, gwage-dutusurmaladid.
EZE 3:8 Degi-inigwele, wemaryob uaya-sate, degi, gwage-dutusuli an be-imakoed.
EZE 3:9 Akwa-diamante-geg-mamaredyobi an be-imakoed. Akwa-dummadba bur-dutusur an be-imakoed. Degisoggu, amba we-dulemar uaya-sate-gumalad-inigwele, mer be dobguo, mer be ese gwayebalo.”
EZE 3:10 Anga sogdebalid: “Dule-machi, an bega-ibmar-sogoedi be nue itogo. Nonogi bela be gao.
EZE 3:11 Emigindi, be-dule-gales-bukwamaladse be nae. Ar beba ibsamalodibe, surbardibe, ar bedi ega be ibmar-sogoed. Weyob be sogoed: ‘Bab-Jehová-Bela-Gangued-Nikadi weyob sogye.’ ”
EZE 3:12 Geb agine, Bab-Dummad-Burba nakwaa an-imaksad, geb an-yarganbali gayaburba binnasuli mar-gollomakeyobi-gole an itoged. Weyob soge an itoged: “Bab-Jehová-e-gangued-yeerdaklegedi e-maidgi dummarba gued.”
EZE 3:13 Ibdulamar na muchub-muchub-e-sakanmar-warmakedba e-sakanmar-uurmakedi an itosbalid. Deginbali, ibmar-dirbiled-ibdulamar-walik-nanaid-e-goled an itosbalid. Wemar-goledi mar-gollomakedyobi binnasuli goled.
EZE 3:14 Bab-Dummad-Burba nakwaa an-imaksad, an-sesad. Ar andi sae-itogedgi, degi, urwedgi an naded. Bab-Jehová e-argangi gandikidba an-ganiki an itoged.
EZE 3:15 Deyobi, an Tel-Abibʼse, Israel-dulemar Quebar-diwar-gakaba-bukwamaladse an modapid. Geb agi, wemar-abargi ibagugle (7) an megisad. Aku-itoge, ibi-an-imakodibeye, ibi-an-sogbalodibeye, an binsadii gusad.
EZE 3:16 Ibagugle-gusgua (7), Bab-Jehová weyob anga sognonikid:
EZE 3:17 “Dule-machi, Israel-dulemar-owisogega an be-nug-imaksad. Degisoggu, an bega ibmar-sokalile, an-nuggine be sunmakoed.
EZE 3:18 An dule-isganaga weyob sogele: ‘Be burgoye.’ Ar we-dule-isgana nabir dula-gudiguega ega be ibmar-sogsulile, igar-isganaba-nanadiidgi ega be sunmaksulile, we-dule, na e-isgudiidba burgoed. Degi-inigwele, e-burgwisad an begi atakoed.
EZE 3:19 Ar be dule-isganaga ibmar-sogsale, degi-inigwele, na e-isgudiid amba iesulile, degi, e-sunnasurdaed ogwasulile, we-dule, na e-isgudiidba burgoed. Ar bedi be ollorguoed.
EZE 3:20 Deginbali, dule-nueddaedi na igar-nuedba-nanadiidgi bangudele, ibmar-isgana-imakdele, geb an we-dule burgwednaga-imakele, ega be ibmar-sogergebed. Ega be ibmar-sogsulile, we-dule, e-isgusadba burgoed, degi, bela na e-ibmar-nuegan-imaksad ebinsalegosulid. Degi-inigwele, e-burgwisad an begi atakoed.
EZE 3:21 Ar dule-nued melle-bar-isguega ega be ibmar-sogerdi, degi, na bar isgued-imaksasulile, dula-gudii guoed. Ar ade, ega be-ibmar-sogsadba ibsasad, bedi be ollorgunonikoed.”
EZE 3:22 Geb agi, Bab-Jehová na e-gangued angi odenonikid, degi, anga sogded: “Be-gwisgue, sapurba be nae. Agi, an bega sunmakoed.”
EZE 3:23 An gwisgusad, degi, an sapurba naded. Degi, Quebar-diwar-gakaba Bab-Jehová-e-gangued-yeerdakleged-daksayobi, e-gangued-yeerdakleged an daksabalid. Geb an napase-dulluu wagar-ebulegedse an imaksad.
EZE 3:24 Geb degine, Bab-Dummad-Burba angi aidenonikid, geb gwisguega an-imaksad. Weyob anga sogded: “Be-negse be nae, mer bar neg-magaba noo.
EZE 3:25 Dule-machi, mer be bar-noega dulemar be-edinmaloed. Mer bar emar-abargi-gudiguega deyob be-imakmaloed.
EZE 3:26 Be-gwabin aibirgi achaa-naguega an imakoed. Degidbali bar-sunmaksuli be guoed. Wemarga bar be ibmar-sogosulid, ar uaya-satemaladid.
EZE 3:27 Geb an bega ibmar-sogdele, be-gwabin nolloo an imakoed. Weyob ega be sogdoed: ‘Bab-Jehová-Bela-Gangued-Nikadi weyob sogye: Dule, an-ibmar-soged-itobiele, na itogodo. Dule, an-ibmar-soged-itobisulile, mer itogodo. Ar dulemarde uaya-satemaladid.’ ”
EZE 4:1 Bab-Dummad-Burba anga sogsabalid: “Dule-machi, napsa-ginnid-akwa be sue. A-akwagine, Jerusalén-neggwebur-e-wilub be sobo.
EZE 4:2 Sorda-bila-onomalad bela Jerusalén-neggwebur-ebilis-bukwa be sobo. Degi, sordamar-ambikued-neg-matusulid neggwebur-ebilis be sobbalo. Degine, napa-arsanyob-dakleged-wargwen neggwebur-galu-matusulidse-warmakgwichi be sobbalo. Deginbali, galu-matusulid-omukuega suar-wardummagan-ebuleged be sobbalo.
EZE 4:3 Esgoro-madareged be amibar. Geb a-esgoro-madareged, neggwebur-bebo-abingunaid-abargi, galu-matusulidyob be omeso. Geb Jerusalén-neggwebur-asabin be gwisguo, egi bila-onosokaliyob be gwisguo. We-ibmar-sobaledi, Israel-dulemarga neg-guoed-e-wilubga guoed.
EZE 4:4 ”Be-argan-sapiledsik yollekwaa be mego. Israel-dulemar-e-isgued-bargamai be guoed. Ar ibabigwa be deyob megoe, abali Israel-dulemar-e-isguedi begi naguoed.
EZE 4:5 Iba-dulataled-ilapaa gaka dulabake-gakambe (390) be deyob yollekwaa mai guoed. We-ibagan bega oyoged, wegi-birgamergu Israel-dulemar isgudii gusmarye.
EZE 4:6 ”Ar we-ibagan gwinmaksale, geb be-argan-nuedsik be yollekwaa megoed. Geb iba-dulabo (40) Judá-dulemar-e-isgued begi naguoed. Ar we-ibagan bega oyoged, wegi-birgamergu, Judá-dulemar isgudii gusmarye.
EZE 4:7 A-sorbali, sordamar-bila-onomalad Jerusalén-neggwebur-ebilis-bukwadsik be atakoed. Geb asiki surgan be oyogoed, agi sabsur-urwar ega be ibmar-guoed sogdoed.
EZE 4:8 Melle be bigni-bigni megegale, dubgi an be-edinnoed. Geb sorda-bila-onomalad Jerusalén-neggwebur-ebilis-bukwad-e-ibagan-gwinmakedse deyob be mai guoed.
EZE 4:9 ”Degine, we-ibmarmar be amibalo: Ibmar-gwag-trigoʼye-nugad, ibmar-gwag-cebadaʼye-nugad, ingwagi-dakleged-habasʼye-nugad, ingwa, obgi-dakleged-mijoʼye-nugad, degi, avena. We-ibmar-gwagmar bormogi be eogo. ”Geb madu-sobega be omukuo. We-ibmala iba-dulataled-ilapaa gaka dulabake-gakambe (390) sapiledsik yollekwaa be megoedgi be-masga guoed.
EZE 4:10 ”Bane-bane wachi-sekalaa be gundioed. Nibir-negabala be gundii guoed.
EZE 4:11 Deginbali, wachi-sekalaa nog-gwapaa be dii gobbaloed.
EZE 4:12 Dulemar-saa sapanga be imakoed. Agine, madu be yooed. Geb cebada-maduyob dulemar-wagab be gunnoed.”
EZE 4:13 A-sorbali, Bab-Jehová anga sogdebalid: “An Israel-dulemar yar-baid-baidse-oaisakioedgi weyobi na mas-isgana gunmaloed.”
EZE 4:14 Geb Bab-Jehováʼga an sogded: “¡Bab-Dummad-Jehová! An-gaya-yaba bipisaale ibmar-isgana dogdisulid. An-dungualid-akale, emi-ibase, bipisaale ibdurgan-burgwar-amilesad-e-san an gundisulid. Deginbali, ibdurgan achusapurmarse-oichimaklesad an gundisurbalid. Ibdurgan-isemalad-e-san an-gaya-yaba bipisaale dogdisulid.”
EZE 4:15 Geb Bab-Jehová an-abin sogded: “Degirdi, be-madu be yoegala dulemar-saa-anale, moli-bebe-nikad-e-saa sapanga be ebugo.”
EZE 4:16 Geb sorba anga sogdebalid: “Dule-machi, Jerusalén-neggweburgi mas-sate an imakoed. Dulemar mas-ise-mimiar gunmaloed, surbinsa-itogedgi mas-gunmaloed. Deginbali, dii-ise-mimiar gobmarbaloed, degi, dobedgi gobmarbaloed.
EZE 4:17 Ega mas galakudoed, dii galakudbaloed. Na muchub-muchub-e-gwenadgan-burgwemamai dakarmalale, na dobe itodmaloed. Na e-isgudimalad-ular, deyob burgwemamai gudoed.”
EZE 5:1 Bab-Jehová sogdebalid: “Dule-machi, esbipi-nugar-datarmakaled be ami. A-esbipigi, sailagia swiri be imako, siga be esibalo. A-sorbali, nibir be amio. Geb sailagia be sikoedi, dana-dana be urbo.
EZE 5:2 Ar sorda-bila-onomalad Jerusalén-neggwebur-ebilis-bukwamalad-e-ibagan gwinmaksale, be sailagia sogapaa-dana-dana-urbisad-soggwenad neggwebur-negabargi be ogumakoed. Baid-sailagia-soggwenadi es-suidgi be immi-immi imakoed, geb neggwebur-dikarmarba be mie-mie saoed. Sailagia-dangwen-napi-besadi, burwaba be mioed. Andi es-suidyalaba Jerusalén-dulemar-baleginnoed.
EZE 5:3 We-sailagia ichee be suoed, geb be-mordukugi be edinnoed.
EZE 5:4 A-sorbali, amba we-sailagia ichesaar be subaloed, geb ogumakega be soogi mioed. We-ibmar bela Israel-dulemar-gummakoed-e-wilubga guoed.”
EZE 5:5 Bab-Jehová-Bela-Gangued-Nikadi weyob soged: “We-Jerusalén-neggwebur-siidi, neggwebur-bamalad-abargi, degi, dulemar-yar-baid-baidgi-bukwamalad-abargi an sisad.
EZE 5:6 Ar Jerusalén-dulemardi an-Igar-Mamaidgi, an-Igar-Mesisadgi yolesmalad. Ar bur bule neggwebur-bamaladba, degi, dulemar-yar-baid-baidgi-bukwamaladba ege gusmalad, ar ade, an-Igar-Mamaidba, degi, an-Igar-Mesisadba ibsasurmalad.
EZE 5:7 ”A-ulale, ani, Bab-Jehová-Bela-Gangued-Nikadi weyob soged: Ar bemar be-dikarba-dulemar-bukwadba bur bule uaya-sate gusmalad, ar ade, an-Igar-Mamaidba, an-Igar-Mesisadba ibsassurmalad. Deginbali, we-dulemar-be-dikarba-bukmalad-e-igar-mamaidba bemar nanadisurbalid.
EZE 5:8 ”Degisoggu, ani, Bab-Jehová-Bela-Gangued-Nikadi weyob soged: Jerusalén, an begi gwichi, bela dulemar-yar-baid-baidgi-bukwamalad-wagab an sabsur-be-odurdakoed.
EZE 5:9 Be-galagwensuli-ibmar-imaksad-ulale, an-ibmar-imakdisulidi, an begi imakoed. Geb sorbali, we-ibmar-imakoedi an bar imakosulid.
EZE 5:10 A-ulale, bemar-abargine na babgana ukudbali e-mimmigan-gutemaloed, amba deyopira, na mimmigan e-babgan-gutemarmogoed. Ani an sabsur-bemar-odurdakoed. Dulemar-san-onomaloedi, bela we-napneg-dirbir-naidgi an oaisakioed.
EZE 5:11 ”Degisoggu, ani an, Bab-Jehová-Bela-Gangued-Nikadi dukin-ibmar-ise-sogar an soged: Ar bemar na be-ibmar-isgana be-bab-dummadyob-imaklegedgi, degi, be-ibmar-ima-daklemaladgi anse-goled-neg-islidikid be iwisasmalad. A-ulale, an bar wile bemar-dakosulid, an bemar-oberguoed.
EZE 5:12 Be-dulemar sogapaa-mimilegoed-soggwenadi, na boniganba, degi, ukudba girgumaloed. Neggwebur-galimbaba burgwemai gumaloed. Baid-sogapaa-mimilesad-soggwenadi, be-neggwebur-dikarmarba es-suidgi burgwemai gumaloed. Baid soggwen-besadi, bela we-napneg-dirbir-naidgi an oaisakioed. Andi es-suidyalaba Jerusalén-dulemar-baleginnoed.
EZE 5:13 ”Deyob anse-gusale, geb an-sae-itogedi bogilegoed. An deyob Jerusalén-dulemar-imaksale, geb an-urwedi galegoed, geb an yeer-itogoed. An-nobedgi an wemar-sabsur-odurdaksale, geb wemar wisgumaloed, ani an Bab-Jehová-guedi weyob ibmar-sogsale, sogedba imakdaed.
EZE 5:14 ”Jerusalén-neggwebur, akwamarbi-ganna-ganna-bukwa an be-imakoed. Bela dulemar-be-dikarba-bukwamaladi begi dodogega an imakoed. Bela dulemar be-walik nasmaloedi, be-gusadi dakmaloed.
EZE 5:15 An urwedgi, sae-itogedgi, an sabsur-bemar-odurdaksale, bela begi dododmaloed, isdar begi sunmakdemaloed. Dulemar-be-neggwebur-dikarba-bukmaladga iduakwaa-ibmar-sogedyob be gumaloed. Begi-binsaed-amimalaga be guoed. Ani an Bab-Jehová-guedi, we-ibmar soged.
EZE 5:16 ”An bemargi sigu-dule-ogilogedyobi ukud-dummad barmidagoed. An bemar-obelogega imakoed, mas sate be gumaloed. Ukud-dummad naguoed.
EZE 5:17 Ar an bemargi ukud-dummadi, degi, ibdurgan-ursilimaladi barmidagoed. Wemala, bei mimmigan-obelogoed. Bemala boni-buleganbali, ablis-aryomaidbali na be bukib-binsadii gudmaloed. Ar ade, be-dulemar es-suidgi-burgwega an imakoed. Ani an Bab-Jehová-guedi weyob soged.”
EZE 6:1 Bab-Jehová anga sogded:
EZE 6:2 “Dule-machi, Israel-yarmarsik be atake. Yoedse egi ibmar-guoed be soge.
EZE 6:3 Ega be soge: ‘Israel-yarmala, Bab-Jehová-Bela-Gangued-Nikad-gayaburba be itomala. Bab-Jehová-Bela-Gangued-Nikadi weyobi yarmarga, yarmar-mullumarga, diwarmarga, degi, nebamarga soged: Bemargi bila-onoed an barmidagoed. Be-bab-dummadyob-imaklemaladga-ailamar-bukwadi, an obelogoed.
EZE 6:4 E-ibmar-ogumakar-ukleged-ailamar an earoed, e-ina-wawadikid-ogumakar-ukleged-ailamar an bibisgoed. Deginbali, be-dulemar be-bab-dummadyob-imakleged-wawasur-yapanned-asabin burgwemalaga an imakbaloed.
EZE 6:5 Israel-dulemar-e-muimar na e-bab-dummadyob-ibmar-imakdimalad-asabin an mesoed. E-garmar e-ibmar-ogumakar-ukleged-aila-ebilis an mioed.
EZE 6:6 Ar bia be mamai, a-neggweburmar berguoed, e-bab-dummadyob-ibmar-imakdimaladse-goled-ailamar ayaroed. Na e-ibmar-ogumakar-ukleged-aila bela berguoed, e-bab-dummadyob-imakdimalad-wawasur-yapanmalad akwabi dunnumaksii guoed, degi, e-ina-wawadikid-ogumakmalad omukulegoed. Bela e-ibmar-sobsamalad berguoed.
EZE 6:7 Be-dulemar bemar-abargi, burgwemai guoed, degidbali geb bemar wisgumaloed, ani, an Bab-Jehová gued.
EZE 6:8 ” ’Degi-inigwele, abar an be-dulemar es-suidgi oburgosulid. Amardi, bela we-napneggi dulemar-yar-baid-baidgi-bukwamaladse an oaisakioed.
EZE 6:9 Dulemar-burgosurmalad na biti-yargi gales bukudapmaloe, agi, an-ebinsadamaloed. An-ebinsadamaloed, emar angi nosmalad-ulale, igi an wile-itosa, degi, igi angi aibachagusmala, deginbali, igi na e-bab-dummadyob-ibmar-imakdimalad-wawasur-yapanmaladba nadegusmala, bela ebinsadamaloed. Na e-isgusmaladba, degi, na e-ibmar-isgana-imaksadba na ima-itomaloed.
EZE 6:10 Geb degidbali na wisgumaloed, ani an Bab-Jehová gued. Ar an weyob ibmar-imakoye-sogsa-gusadi, an binsa sogsagussulid.’ ”
EZE 6:11 Bab-Jehová-Bela-Gangued-Nikadi weyob soged: “Be argan-ogole, be dii-dii-annae, be binnasur-gole, weyob be soge: ‘Israel-dulemar e-isgued-dummad-imaksad-ulale, nunmak-itoleye.’ Ar ade, es-suidgi burgwemaloed, ukudba, degi, boniganba burgwemaloed.
EZE 6:12 Dule-dikasur-bangu-gudiidi na boniganba burgoed. Dule-wegi-walikaa-gudiidi na es-suidgi burgoed. Dule dula-beoeddi ukudba burgoed. Ar ade, an bela-bela-sae-itogedgi an deyob wemar-imakoed.
EZE 6:13 E-muimala na e-bab-dummadyob-imakdimalad-wawasur-yapanmalad-imbaba, ega-ibmar-ogumakar-ukleged-aila-ebilis omiledoed. Bela dule-e-muimar yar-mullugan-matusulidgi, yarmar-birgi, bela sapimar-bulamakwichid-urba, bela sapi-encina-bulamaksiid-urba omiledoed. Ar wemargine, na e-bab-dummadyob-imakdimalad-wawasur-yapannedga ina-wawadikid ogumaksa gusmalad. Geb degidbali na wisgumaloed, ani an Bab-Jehová gued.
EZE 6:14 An wemar-sabsur-odurdakoed. An e-yala nega-dulesulidganga imakoed. Na e-mamaidi, nega-dulesulidgan-akale, Diblatʼye-neg-nugadse, bela dulemar-sate an imakoed. Geb degidbali na wisgumaloed, ani an Bab-Jehová gued.”
EZE 7:1 Bab-Jehová anga sogded:
EZE 7:2 “Dule-machi, Bab-Jehová-Bela-Gangued-Nikadi Israel-dulemarga weyob-sogye be soge: ‘¡Neg-bergued omosad! Bela Israel-yar-bergued omosad.
EZE 7:3 Israel-yar, be-bergued omosad, an-urwed be-itogoed. Be-daedba an bega igar-nabogoed, be-ibmar-isgana-imaksadba an sabsur-be-odurdakoed.
EZE 7:4 Bipisaale, isgussuliyob an be-dakosulid, an wile-be-dakosurbalid. Be-ichagwadaed-ulale, degi, be-ibmar-isgana-sae-daklemalad-imaked-ulale, an sabsur-be-odurdakoed. Degidbali be wisguoed, ani an Bab-Jehová gued.’ ”
EZE 7:5 Bab-Jehová-Bela-Gangued-Nikadi weyob soged: “Sabsur-odurdaklegedi ukin-ukin danikid.
EZE 7:6 Neg-bergued omosad. Israel-yar, be-bergued warmaksad, napiragwa, be-bergued warmaksad.
EZE 7:7 Israel-dulemar, be-wachi omos. Wachimar nae-naegus. Ibagan owarmas. Yarmargine, dobegwar neg-itoleged, weligwar-itoleged bergusad.
EZE 7:8 An-sae-itoged bemargi an barmidsokalid, an-urwedi bemargi an oyosokalid. Be-ibmar-isgana-imakedba an bega igar-nabogoed, be-ibmar-isgana-sae-daklemalad-imaksadba an sabsur-be-odurdakoed.
EZE 7:9 Bipisaale, isgussuliyob an be-dakosulid, an wile-be-dakosurbalid. Be-ichagwadaed-ulale, degi, be-ibmar-isgana-sae-daklemalad-imaked-ulale, an sabsur-be-odurdakoed. Degidbali be wisguoed, ani an Bab-Jehová gued.
EZE 7:10 ”Bato ibagan warmaksad, bato weginbinned. Israel-yar, be-ibagan-bergued nonikid. Igar-innikigwad-imakleged bar imaklesulid, bela san-dummarba-imakedbimalad.
EZE 7:11 Dule-sabsur-imakleged nasgumaid, ibmar-isgana imakedbi neg naid. Bemar-ibmarmar gwen bipisaale bar beosulid, bemar-ibmar-nuegan, bemar-ibmar-obinebaka-nikadi, gwen bipisaale bar bukuosulid.
EZE 7:12 Wachi mosad. Iba warmaknonikid. Dule-ibmar-baked, melle be yeer-itoge, dule-ibmar-uked, melle be bomoga. Ar an-urwed bela Israel-dulemar-sabsur-odurdakoed.
EZE 7:13 Ar dule-ibmar-uked amba dula-beo-inigwele, na ibmar-uksad bar amiosulid. Ar dulemar-sabsur-odurdaklegoed-negburgan-daklesad osulolegosulid, na dule-wargwensaale, e-isgued-ular durguosulid.
EZE 7:14 ”Ar amba gar-trompeta ogormaloen-inigwele, na guagwar-bukumaloen-inigwele, degite, dule wargwensaale bila-onolegedse naosulid. An-urwed bela Israel-dulemar-sabsur-odurdakoed.
EZE 7:15 ”Neggwebur-magaba bila-onolenai guoed. Neggweburgindi, bonigan-aininai gumogoed. Ukud-dummad-itoged nai guoed. Dule sapurba-gudiile, es-suidgi iblolegoed. Ar dule amba neggweburgi-gudiile, boniganba burgoed, degi, ukudba burgoed.
EZE 7:16 Dulemar-durgumaloeddi, wakitemaloed, nuu-sibu-sapurbarmaladyob yalaganba gudimaloed, na dukin e-isguedga bodimaloed.
EZE 7:17 Bela swidamar nollomakdoed, bela malimar dobedbali wawanmakdoed.
EZE 7:18 Wile-itoged-mor na yomaloed, dobed-dummad itodimaloed, bela na bingegudimaloed, bela na e-sailagia swiri gudimaloed.
EZE 7:19 Igarba e-mani midmaloed, ibmar-isganayob, ordi dakdemaloed. Bab-Jehová-urwed-ibagi e-mani, degi, e-or gwen e-bendakega guosulid. We-ibmar-nuegan e-ukud-itoged ega obelogosulid, immerba-imakega guosurbalid. Ar olo, emar-isguega imaksad.
EZE 7:20 Na ormar-yeerdakleged-nikadba, san-dummarbaa imakdemalad. A-ormargine, e-bab-dummaganyob-ibmar-imakdimalad sobsamalad. A-ulale, we-ormar an ibmar-isganaga imakoed.
EZE 7:21 Dule-ainebarmalad dagega an imakoed, adi, e-ibe ibmar-atursamalagar. Dule-isganamar e-ibe ibmar sedmaloed, e-ibe ibmar oichomaloed.
EZE 7:22 We-Israel-dulemargi an bangudoed, anse-goled-neg oicholegoed. Ar dule-yar-bamaladsikmalad we-yarse ubononikoed, anse-goled-neg oichononimaloed.
EZE 7:23 ”Esgoro-dub guagwar be urbe, ar we-yargine, dule-gindakmalad yaisulid, we-neggweburgine, sabsur-emar-imakmalad doggus obichagusad.
EZE 7:24 E-negmar-suega, dule-bur-isganamaladi an barmidagoed. Deyobi, dulemar-gandikmalad na san-dummarba-imakdimaladi, an obelogoed. Deyobi, e-bab-dummaganse-goled-negmar oicholegoed.
EZE 7:25 ¡Dobed-dummad nagunonikoed! Neg-bogidikid amimaloenad, degi-inigwele, neg-bogidikid nikuosurmalad.
EZE 7:26 Ibagan-sabsur-odurdaklemalad ukin-ukin danikoed, gayaburba-isganamar bali-bali itoledagoed. Bab-Dummad-gayaburba-barsoged ega negburgan-dakega amimaloenad. Ega gwen negburgan dakosulid. Dule-irwa-Bab-Dummadse-gormaladi, igar-maidgi geg bar dule-odurdake gumaloed, girmar-selegan, binsaed-nuegan bar ukdosurmalad.
EZE 7:27 Rey, wile-itodoed, dummad-negdakmaid, bukib-binsadoed. Dulemar, bela dobee-itodoed. E-damaladba an sabsur-odurdakoed, e-ibmar-imakedba an ega igar-nabogoed. Degidbali wisgumaloed, ani an Bab-Jehová gued.”
EZE 8:1 Birganergwagus gaka nii-walanergwagusad-ibataledgi anmar gales-selear-gusmaladgi, an Judá-girmar-dummaganmala an-neggi-sii, Bab-Jehová-Bela-Gangued-Nikad-E-Burba ukiagwar angi aidenonikid.
EZE 8:2 Geb agine an dakalid, ibmar duleyob-gwichi an dakalid. E-nono-akar saderwalabaladse esgoro-gordikid-dakarmakeyobi gaed. Geb saderwalabalad-akar, e-nagse sooyob gaed.
EZE 8:3 Ibmar-duleyob-daklegedi ansik argan oyoalid. Geb sailagiagi an-gasad. Geb agine, Bab-Dummad-Burba niba nakwaa an-imaksad. Geb burbar Jerusalén-neggwebur-dad-nakwed-argan-sapiledsik an-sesad, ar bia neggwebur-yaba yawagak gwichi, ase an sesad. Agi bab-dummadyob-ibmar-imakleged gwichid. We-ibmala Bab-Dummad-ourwega imaked.
EZE 8:4 Ar igi an nebagi negburgan-daksagu, Bab-Dummad-e-gangued-yeerdakleged an daksa gusa, deyobi, Israel-e-Bab-Dummad-e-gangued-yeerdakleged an dakarbalid.
EZE 8:5 Geb Bab-Dummad anga sogded: “Dule-machi, dad-nakwed-argan-sapiledsik be atake.” Asik an atakdesunnad. Asik an atakdegu an dakalid, ibmar-ogumakar-ukleged-aila-e-yawagak-naba, bab-dummadyob-ibmar-imakleged gwichi an dakalid. We-ibmar Bab-Jehová-ourwega imakedid.
EZE 8:6 Anga sogdebalid: “Dule-machi, Israel-dulemar we-neggi ibmar-isgana-imadaklemalad-imakmalad, ¿be dake? Weyob-ibmar-imakmaladi, an-neggi banguega an-imakmalad. Ar degi-inigwele, amba be yoo nue bela be ibmar daked. Ar bur bule be ibmar-isgana-imadaklemalad be dakoed.”
EZE 8:7 A-sorbali, Bab-Dummadse-goled-neg-imba-dogedse an-sesad. Geb galugine, yaa-gwagwen olloo-sii an daksad.
EZE 8:8 Geb anga sogded: “Dule-machi, galugi yaa-siid be odungue.” Geb yaa-siid an odungusad. Deyob an imaksagu, yawagak an dakalid.
EZE 8:9 Bab-Dummad anga sogded: “Be doge. Agi ibmar-isgana-imadaklemalad-imaklemalad be dake.”
EZE 8:10 An dogsagua, bela galu-ebilis ibmar-galagwensuli-sobarnanai an daksad: Ibmar-unimalad-sobarnanai, ibmar-durgan-imadaklemalad sobarnanai an daksad. Degine, bela Israel-e-bab-dummaganyob-ibmar-imasar-daklemalad sobarnanai an daksad.
EZE 8:11 Israel-girmar-dummagan dulapaa-gakambe (70) bab-dummaganyob-ibmar-imakleged-asabin gwichi, ega e-nug-odummonanai an daksad. Amar-abargine, Safán-machi-Jaazanías gwichimogad. War-wargwena sianar ganimalad. Agine, ina-wawadik-yapanmalad bupurmakbukwad an daksad.
EZE 8:12 Bab-Dummad anga sogdebalid: “Dule-machi, be dake, Israel-girmar-dummagan na weyob wala-walagwen dukuakwaa e-bab-dummagan-nug-odummomardake. ‘Bab-Jehová anmar-dakmaisurye sogmalad. Bab-Jehová we-yargi bar gudisurye sogmalad.’ ”
EZE 8:13 Anga sogdebalid: “Bur bule ibmar-isgana-imadaklemalad-imaknanai be dakbaloed.”
EZE 8:14 A-sorbali, dad-nakwed-argan-sapiledsik Bab-Jehováʼse-goled-neg-doged-yawagak-gwichidse an-sesad. Agi, omegan bab-dummad-Tamuzʼga bobukwa an daksad.
EZE 8:15 Geb degine, Bab-Jehová anga sogded: “Dule-machi, ¿we-ibmar be daksa? Ar bur bule omegan ibmar-isgana-imadaklemalad-imaknanai be dakoed.”
EZE 8:16 Geb degine, Bab-Jehová ese-goled-negyaba galu-imba-naidse an-sesad. Bab-Jehováʼse-goled-neg-dogedgi, neg-imba-naidbo ibmar-ukleged-aila-siid-abingunaid-imbagi, dulemar e-durgwen-gakatar (25) bukwa an dakarbalid. A-dulemar Bab-Dummadse-goled-negsik atakbuksulid, dad-nakwedsik atakbukwa an daksad. Yokorgi sindigar-sii dad-ibeler-nug odummobukwa an daksad.
EZE 8:17 Anga sogdebalid: “Dule-machi, ¿we-ibmar be daksabali? Judá-dulemar weyobi ibmar-isgana-imadaklemalad-imakmalad, na ibmar-baisuliyob dakmalad. Deginbali, dule-sabsur-emar-imaked bela we-yargi neg-gasa nabalid. Bali-bali isdar-itogega an-imakmalad. Be dakbalina, an-ourwega na e-bab-dummadyob-ibmar-imakmalad-e-dutumar wawasur-yapanned-uega an-imakmalad.
EZE 8:18 A-ulale, nue-urwedgi an sabsur-odurdakoed. Bipisaale, an sabguosulid, an wiledakosulid. Amba ise-wilegar anse gormaloen-inigwele, an itogosulid.”
EZE 9:1 Geb degine, Bab-Jehová binnasur-gole an itosad: “Bemar, Jerusalén-neggwebur-sabsur-odurdakmaloed dagmala, na ogilomalad-gingimar annik-annik be dagmala.”
EZE 9:2 Geb dad-nakwed-argan-sapiledsik-doged-siidba dulemar-e-nergwa (6) daniki an daksad, ogilomalad-gingi sedani an daksad. Amarbali, dule-wargwen lino-mor-yoi danikid. A-dule, e-saderba ibmar-narmakega-ebulemalad naid. Bela we-dulemar dogsamalad, degi, esgoro-gordikidgi ibmar-ogumakar-ukleged-aila-sobaled-walik gwisgunonimalad.
EZE 9:3 Israel-dulemar-e-Bab-Dummad-e-gangued-yeerdakleged, baliwiturmar-querubinʼye-nugmalad-birgi-nai nakwided, geb Bab-Dummadse-goled-neg-dogedsik naded. Bab-Jehová, dule-lino-mor-yoidse gochad. A-dule, e-sadergi ibmar-narmakega-ebulemalad naid.
EZE 9:4 Bab-Jehová ega sogded: “Jerusalén-neggweburgi be bipirmaknae. Geb neggweburgi ibmar-isgana-imakleged-ular, dulemar-bukib-binsadidimalad-e-bebegi, degi, bela wile-itodidimalad-e-bebegi, be wilub nasiknae.”
EZE 9:5 Ar dule-bamaladgardi weyob soge an itosad: “¡Eba be namala! ¡Neggweburgi be bipirmaknamala! ¡Wiledaksuli dulemar be ogilonamala!
EZE 9:6 Anse-goled-neggi be onodmalo. Sergan, sapingan, yagan, burwigan, degi, omegan be oburgwemalo, mer be wargwensaale dula-gudii imakmalo. Ar dulemar na e-bebegi wilub-nanaiddi mer be oburgwemalo.” Degisoggu, we-dulemala Bab-Dummadse-goled-neg-asabin sergan-bukwamalad-inse oburgwismalad.
EZE 9:7 Sorbali, ega sogdebalid: “Namala, Bab-Dummadse-goled-neg oichonamala, e-neg-imba-nanaidgi muimar ena be imaknamala.” We-dulemar nodmalad, geb bela neggweburgi dulemar-ogilodmalad.
EZE 9:8 Ar wemar dulemar-ogilonanaigua, andi wargwen besad, geb an wagar-napase-dulluu imaksad. Agine an ise-gandikidba Babse goted: “¡Bab-Dummad-Jehováʼye! ¿Bela-bela Jerusalén-dulemargi be gwichiguoe? ¿Bela be Israel-dulemar-ogilogoe?”
EZE 9:9 Bab-Dummad an-abin-imaksad: “Israel-dulemar-e-isgued, degi, Judá-dulemar-e-isgued bela-bela dummarba gued. We-yar-naidgi na sabsur-imakmalad doggusad, igar-innikigwad-imaklesulidi wilub-obichad. Ar ade, na binsamalad: ‘Bab-Jehová we-yargi wakiteye, Bab-Jehová e-dakmaisurye.’
EZE 9:10 A-ulale, an dulemar sabguosulid, an wiledakosulid, na e-damaladba an sabsur-odurdakoed.”
EZE 9:11 Geb degine, dule-lino-mor-yoid, na e-sadergi-ibmar-narmakega-ebulemalad-naid, Bab-Jehováʼga sogded: “Ibmar-imakoye be anga sogsadi, sogedba an bega imaksad.”
EZE 10:1 A-sorbali, baliwiturmar-querubinʼye-nugmalad e-nono-birgi neg-olloled-dummad nai an daksad. A-neg-olloled-nibali akwa-zafiroʼye-nugadyob ibmar siid, rey-ganyob dakleged.
EZE 10:2 Geb Bab-Jehová, dule-lino-mor-yoidga sogded: “Querubinʼmar-urba ibmar-dirbiled-bipirmakmalad-nanaid-imbaba be doge. Querubinʼmar-abargi sogun-gwabunye-bukwad argan-nukgwen be suo, geb bela neggweburgi be mie-mie imako.” Ar an atakgwichidgine, dule, ibmar-dirbiled-bipirmakmalad-nanaid-imbaba dogded.
EZE 10:3 Dule-dogsadgine, deunni, querubinʼmar Bab-Dummadse-goled-neg-dad-nakwed-argan-nuedsik bukmalad. Degi, yaba neg-imba-ollornaid mogir daasa sigisad.
EZE 10:4 Geb degine, Bab-Jehová-e-gangued-yeerdaklegedi querubinʼmar-birgi-naidgi nakwided, geb Bab-Dummadse-goled-neg-yawagak-dogedgi nagudapid. Bab-Dummadse-goled-neg mogir daasa sigisad. Degi, neg-imba-ollornaidi, Bab-Jehová-e-gangued-yeerdakleged-gaedba ibegwar sigisad.
EZE 10:5 Querubinʼmar-e-mermermakedi magaba neg-imba-ollor-naidse itoleged. Bab-Dummad-Bela-Gangued-Nikad-e-gaya-goleyobi e-sakan-mermermakedi goled.
EZE 10:6 Geb Bab-Jehová, dule-lino-mor-yoidga sogded: “Ibmar-dirbiled-bipirmakmalad-nanaid-imbaba querubinʼmar negabargi sogun-gabukwad be sue.” Dule nadsunnad, geb ibmar-dirbiled-bipirmakmalad-nanaid-imbaba gwisgudapid.
EZE 10:7 Querubin-wargwen, emar-negabargi sogun-gabukwad-suega, argan oyoalid. Geb dule-lino-mor-yoid e-argangi soo susad. Susgua, geb naded.
EZE 10:8 Querubinʼmar-e-sakan-urba dule-arganyob-dakle naid.
EZE 10:9 Querubinʼmar-dikarba gwabake ibmar-dirbiled-bipirmakmalad nai, an daksad. Querubinʼmar war-wargwen-walik gwa-gwagwen ibmar-dirbiled-bipirmakmalad nanaid. Ibmar-dirbiled-bipirmakmalad akwa-crisólitoʼyob gamalad.
EZE 10:10 Ibmar-dirbiled-bipirmakmalad-gwabakegwad emarbi dakleged, degi, na muchub-muchub imbaba-dogarnanaiyob dakleged.
EZE 10:11 Nanadmalale, ar bitisik nabie, aba naddamalad, bar wissur sorsik-aibirdamalad. Querubin-e-idunaid-nadedba naddamarmogad, geg gannar sorsik aibirdamalad.
EZE 10:12 Querubinʼmar e-abagan, e-yargan, e-argan, degi, e-sakanmar, bela ibyabiid. Ar amba ibmar-dirbiled-bipirmakmalad-gwabakegwad bela ibyabimogad.
EZE 10:13 Ibmar-dirbiled-bipirmakmalad, “Orokwaa-bipirmaknaidye” bilege an itosad.
EZE 10:14 Baliwitur-querubinʼmar war-wargwengi wagar darbake nikmalad: Gebesailagine, querubin-wagar nikad, sogbogine, dule-wagar nikad, sogbaagine, achumigur-nono-wawaad-wagar nikad, geb sogabakegine, sulubagi-wagar nikad.
EZE 10:15 We-querubinʼmar an Quebar-diwar-dikarba ibdulamar daksa-gusadid. Niba nakwide an daksad.
EZE 10:16 Querubinʼmar nanadmalale, e-dikarba ibmar-dirbiled-bipirmakmalad-nanaidi eba naddamarmogad. Niba-nakwega e-sakan nallaa-imakdemalale, ibmar-dirbiled-bipirmakmalad-nanaid egi bangusulid.
EZE 10:17 Boo nagusmalale, ibmar-dirbiled-bipirmakmalad boo-nagusdamarmogad. Niba nakwidmalale, ibmar-dirbiled-bipirmakmalad eba niba nakwiddamarmogad, ar ade, we-ibdulamar-e-burba ibmar-dirbiled-bipirmakmaladgi maid.
EZE 10:18 Geb degine, Bab-Jehová-e-gangued-yeerdakleged Babse-goled-neg-doged-birgi nakwided, geb querubinʼmar-birgi nagudapid.
EZE 10:19 An atakgwichidgine, querubinʼmar na e-sakanmar nallaa imakdemalad, geb niba nakwidmalad. Querubinʼmar nodmargua, ibmar-dirbiled-bipirmakmalad eba nakwidmarmogad, geb dad-nakwedsik Bab-Jehováʼse-goled-neg e-yawagak-dogedgi nagudapmalad. Israel-dulemar-e-Bab-Dummad-e-gangued-yeerdakleged wemar-birgi naid.
EZE 10:20 We-ibdulamar an Quebar-diwar-dikarba-gudigu, Israel-e-Bab-Dummad-urba-nai an daksa-gusadid. Geb degine, an iitoos naded, ar we-baliwiturmarde querubinʼye nugmaladid.
EZE 10:21 War-wargwen wagar darbake, degi, sakan warbake nikamalad. Sakanmar-urbali dule-arganyob nikamalad.
EZE 10:22 An Quebar-diwar-dikarba ibdulamar-wagar-daksadyob e-wagar daklemogad. War-wargwen asabin nanamalad.
EZE 11:1 Bab-Dummad-Burba nakwaa an-imaksad, Bab-Jehováʼse-goled-neg-yawagak-dad-nakwedsikidse an-sesad. A-dogedgi dulemar e-dulagwen-gakatar-bukwa (25) an dakalid. Amar-abargine, neggwebur-dummaganga-mamaid Azur-machi-Jaazaníasʼye-nugad, degi, Benaía-machi-Pelatíasʼye-nugad gwichi an daksabalid.
EZE 11:2 Bab-Jehová anga sogded: “Dule-machi, wemar igar-isgana amimaladid, degi, we-neggweburginmaladga binsaed-isgana ukmaladid.
EZE 11:3 Sogmalad: ‘Anmar emisgwasaar gannar negmar-sobed abelesurye. Anmarga we-neggwebur bormoga guye, anmardi, sanyob egi ambikumaloye.’
EZE 11:4 Degisoggu, dule-machi, be we-dulemargi-ibmarmar-guoedi ega iduakwaa be soge. ¡Iduakwaa ega ibmar-guoed be soge!”
EZE 11:5 Bab-Jehová-Burba angi aidenonikid, geb ibmar-sogega an-imaksad: “Bab-Jehová weyob sogye: ‘Israel-dulemar, bemar deyob ibmar-sogsamaladi, an wisye. Ar bela an bemar-binsaed wisid.
EZE 11:6 We-neggweburgine dulemar-bukidargus oburgwiledanikid, muimar igarmarba omiledanigusad.’
EZE 11:7 ”A-ulale, ani, Bab-Jehová-Bela-Gangued-Nikad weyob soged: ‘Bemar, neggwebur-negabargi-muimar-metemaladi, san gumalad. Bemar-neggweburdi, bormo gued. Andi we-neggweburgi bemar-ononnogoed.
EZE 11:8 ¿Bemar bila-onoged dobe? Degir nabir, ani an, Bab-Jehová-Bela-Gangued-Nikadi soged, an bemargi bila-onoged barmidagoye.
EZE 11:9 Neggweburgi an bemar-ononnogoed. Dulemar-yar-baidginmaladga an bemar-urmakoed. Innikigwadba an sabsur-be-odurdakoed.
EZE 11:10 Es-suidgi bemar burgwemaloed. Israel-yar-abingunaidgi an bega igar nabogoed. Degidbali, geb bemar wisguoed, ani an Bab-Jehová gue.
EZE 11:11 Neggwebur bemarga bormoga guosulid, deginbali, bemar sanga guosurmogad. Israel-yar-abingunaidgi an bega igar nabogoed.
EZE 11:12 Geb degidbali, bemar wisguoed, ani an Bab-Jehová gue. An-igar-mesisadba bemar nanadisurmalad, an-igar-mamaidba bemar ibmar-imakdisurmarbalid. Ar bur dulemar-yar-baid-baidginmalad-be-dikarba-bukwamalad-e-daed na be susmalad.’ ”
EZE 11:13 An dulemargi-ibmar-guoed-soggwichidgine, Benaía-machi-Pelatíasʼye-nugadi burgwided. Geb agine, napase wagar dulluu an imaksad. Geb binnasuli gandikidba an goted: “¡Bab-Dummad-Jehováʼye! Israel-dulemar-dula-besmalad, ¿bela be obelogoye?”
EZE 11:14 Bab-Jehová anga sogded:
EZE 11:15 “Dule-machi, Jerusalénʼginmalad weyob be-gwenadgangi, be-mesmaladgi, degi, bela Israel-dulemargi sogmalad: ‘Wemardi, Bab-Jehováʼgi aibachamalad. A-ulale, we-yar anmargadga-guega anmarga uklesad.’
EZE 11:16 Degisoggu, Bab-Dummad-Jehová weyob sogye, ega be soge: ‘Ar amba dikasur dulemar-yar-baid-baidgi-bukwamaladse, an bemar-barmis-inigwele, degi, yarmar-baiganse an bemar-barmis-inigwele, ar biti-yarse be nadegusmala, agi an sikwas bemarga anse-goled-negga gusad.’
EZE 11:17 ”Ega be sogbalo: ‘Bab-Jehová-Bela-Gangued-Nikadi weyob sogye: Bela neggwebur-baid-baidgi be bukwamaladgi, yar-baid-baidse be barmiles-gusmaladgi an be-onomaloye, adi, gannar wese be dagmalagarye. Ar danar an be-oambikusmalale, an gannar Israel-yar bemarga ukoye.
EZE 11:18 Wemar na gannar e-yarse nonimaloye. Agine, bab-dummaganyob-ibmar-imakdimalad-imadaklemalad bela mimaloye, degi, bela ibmar-isgana-imakdimalad obelomarbaloye.
EZE 11:19 An wemarga gwage-binid, degi, burba-binid ukoye. Emisgwa-gwage-dutusur-nikamalad an e-ibe obelogoye, gwage-gwapid an ega nasikoye.
EZE 11:20 Ar adi, an-Igar-Mesisadba-nanamalaga, an-Igar-Maidba-ibmar-imakmalagar. Geb degine, wemar an-dulamarga gumaloed, ani an e-Bab-Dummadga guoed.
EZE 11:21 Ar dulemar-bab-dummadyob-ibmar-imaklemaladba-nanaiddi, ibmar-isgana imakdimaladdi, na e-daedba an sabsur-odurdakoye. Ani an Bab-Jehová-Bela-Gangued-Nikadi sogye.’ ”
EZE 11:22 A-sorbali, baliwiturmar-querubinʼye-nugmaladi gukudmalad. Ibmar-dirbiled-bipirmakmalad-nanaid eba ebipiledmogad, degi, Israel-e-Bab-Dummad-e-gangued-yeerdakleged querubinʼmar-birgi naid.
EZE 11:23 Bab-Jehová-e-gangued-yeerdakleged neggwebur-abargi-nai nakwided. Geb Jerusalén-neggwebur-dad-nakwedsik yar-siid-birgi nagudapid.
EZE 11:24 A-sorbali, Bab-Dummad-Burba gannar an-susad, nakwaa an-imaksad. Geb burbale, Babilonia-yargi-dulemar-galesbukwamaladse an-sesad. Geb an negburgan-dakedi anga berguded.
EZE 11:25 Geb degine, Bab-Jehová anga burbar-ibmar-oyosadi, dulemar-galesbukwamaladga an sogsad.
EZE 12:1 Bab-Jehová anga sogded:
EZE 12:2 “Dule-machi, dulemar-uayasulidamalad-abargi be gudiid. Ibya nikamalanad, degite, aku atakmalad. Uaya nikamalanad, degite, aku dule-itomalad. Ar uayasulidamaladid.
EZE 12:3 ”Dule-machi, degisoggu, we-yargi-noega be-mormar be guagwar-dake. Neg-ibgine, dulemar-wagab be-neggi be nodoed. Ar igi dule yamo-yogasaar-ononnolenaidyobi be nodoed. Abakalegi, deyob be-dakmaloedba, we-dulemar-uayasulidamalad magar ibmar itoarmalale.
EZE 12:4 Neg-ibgine, dulemar-wagab be-ibmar be onogoed, geb sedogidba dulemar-wagab be naoed. Ar igi dule yargi yamo-yogasaar-ononnolenaidyobi, be nodoed.
EZE 12:5 Deginbali, bela-dulemar be-dakbukwad-wagab, galu-akwagi-sobaledgi be yaa ollomakoed. Geb a-yaa-olloledbali, be-mor-dukwa-annika be nodoed.
EZE 12:6 Neg-mutikgusale, be-mor-dukwa yarganba-nai dulemar bela be-dakbukwadgi, be nodoed. Mer yar-suid-dakega, wagar emurkwaa be imakoed, ar ade, Israel-dulemarga yoedse-ibmar-guoed e-wilubga be gued.”
EZE 12:7 Ar igi anga ibmar-soglesa, deyobi, an ibmar-imaksad. Neg-ibgine, an-mor-dukwa an onosad, ar igi dule yargi-yamo-yogasaar-ononnolenaidyobi, an nodoed. Sedogudgua, galugine an yaa ollomaksad. Geb mutikgudgua, bela dulemar-wagab an-mor-dukwa yarganba-nai an noded.
EZE 12:8 Oibosgu, wakudaryalaba Bab-Jehová anga sogded:
EZE 12:9 “Dule-machi, napira an bega soged, Israel-dulemar-uayasulidamalad bese egisdamaloed: ‘¿Ibu be imaknaiye?’
EZE 12:10 ”Ega be weyob odalogo: ‘Bab-Dummad-Jehová weyob sogye: We-ibmar-oyolenaidi, wedi Israel-dulemar Jerusalénʼgi-bukwamaladgi, degi, e-rey-maidgi, yoedse-ibmar-guoedi oyolenaiye.’
EZE 12:11 Israel-dulemarga be soge: ‘Ani an bemarga yoedse-ibmar-guoed-e-wilubga guye. ” ’An igi ibmar-imaksa, deyobi, bemar imaklemarmogoed, ar ade, bemar we-yargine gales ebipiledmaloed.’
EZE 12:12 ”E-reyga-maid na yarganba mor-dukwa nasiksa imakoed, geb galu-akwagi-sobaledgi yaa-ollomakmaloedgi mutikidba nodoed. Mer yar-suid-dakega na wagar emurkwaa imakoed.
EZE 12:13 Reygi an-saki an mioed, geb agi an gaoed. Deyobi, Babiloniaʼse Caldea-dulemar-yarse an sedoed. Bar we-yar dakosulid, ar Babiloniaʼgi burgoed.
EZE 12:14 Bela e-walik-dulemar-gudimalad, e-bendakdimalad, deginbali, e-sordamar-bila-onomalad, we-napneg-ugakaase an bela oaisakioed. An wemar es-suidgi baleginnoed.
EZE 12:15 ”Ar we-napneggi yar-baid-baid-ugakaase an oaisakisale, geb agi wisgumaloed, ani an Bab-Jehová gue.
EZE 12:16 Unnila dulemar bila-onolegedgi ichee wakinmaloed. Degine, ukudmaad-mesedgi, bonigan-dummagangi ichee san-onogega an imakbaloed. Adi, bia dulemar-yar-baid-baidgi-bukwamaladse modapile, e-ibmar-imadaklemalad-imaksamalad sogmalagar. Geb degidbali, wisgumaloed, ani an Bab-Jehová gue.”
EZE 12:17 Bab-Jehová anga sogded:
EZE 12:18 “Dule-machi, dobed-abalagine be mas gunne, surbinsa-itogedgi, wile-itogedgi be gobed gobe.
EZE 12:19 Dulemar-we-yarginmalad be owisoge, Bab-Jehová-Bela-Gangued-Nikadi weyob Israel-dulemargi, degi, Jerusalénʼginmaladgi, sogye: ‘Dobed-abalagi mas gunmaloye, surbinsa-itogedgi gobed gobmaloye. Sabsur dulemar-imakmalad-ulale, e-yargi ibmar-nikad bela berguoye.
EZE 12:20 Bela neggweburmar berguoye, e-yala napabi-nai guoye. Geb degine, bemar wisguoye, ani an Bab-Jehová guye.’ ”
EZE 12:21 Bab-Jehová anga sogdebalid:
EZE 12:22 “Dule-machi, ¿Israel-dulemar ibi obarmala? Ar sogdimalad: ‘Ibagan namaid, Bab-Dummad-gayaburba-barsoged-negburgan-daksad gwen gusurye.’
EZE 12:23 Degisoggu, we-dulemarga be sogo, Bab-Jehová-Bela-Gangued-Nikadi weyob sogye: ‘We-deyob-sogleged mer bar sogmalaga an imakoye, Israel-yargine gannar-gannar bar sogosurmalad.’ Deginbali, ega be sogbalo: ‘Ibagan daniye, negburgan-daklesad-sanar-gued-ibagan, daniye.
EZE 12:24 Ar ade, Israel-dulemar-abargi negburgan-emar-yardaked-dakleged bar daklegosulid. Deginbali, ibmar-yoedse-guoed-sogleged-gakansaaled bar itolegosurbalid.
EZE 12:25 Ar ade, ani, Bab-Jehová, sunmakoed, an-ibmar-soged emisgwa guoed. Dulemar-uayasulidamalad, amba bemar-dula-gudiidgine, an-ibmar-sogsad an imakoed. Ani an Bab-Jehová-Bela-Gangued-Nikadi weyob soged.’ ”
EZE 12:26 Bab-Jehová anga sogdebalid:
EZE 12:27 “Dule-machi, Israel-dulemar sogdimalad: ‘Be-negburgan-daksad, wedi yoedse ibmar-gumalagarye, deginbali, be-ibmar-yoedse-guoed-sogdiid, wedi ibagan-yoedse danimaloedgarye.’
EZE 12:28 ”Degisoggu, we-dulemarga be sogo, Bab-Jehová-Bela-Gangued-Nikadi weyob sogye: ‘An-ibmar-soged emisgwa guoye, an-ibmar-sogsad an imakoye. Ani an Bab-Jehová-Bela-Gangued-Nikadi weyob sogye.’ ”
EZE 13:1 Bab-Jehová anga sogded:
EZE 13:2 “Dule-machi, Israel-e-Bab-Dummad-gayaburba-barsogmalad e-sogedba-ibmar-sogdimaladga be ibmar soge. Ega be soge: ‘Bab-Jehová-e-gayaburba be itomarye.’
EZE 13:3 Bab-Jehová-Bela-Gangued-Nikadi weyob soged: ‘Duledar-wilesmar, Bab-Dummad-gayaburba-barsogmalad binsaed-sulidamalad, gwen negburgan-daksasuli, e-itogedba ibmar-sogdimalad, dule-wilesmar.’
EZE 13:4 Israel-dulemar, be-Bab-Dummad-gayaburba-barsogmalad, nega-dulesulidganba achu-bunnu-wawaad-asdubinyob gumalad.
EZE 13:5 Bemar yaa-mararmaladgi na bukussurmalad. Israel-e-neggwebur-galu-matusulid nudaksasurmarbalid, adi, Bab-Jehová-e-ibagi, bila-onolenaidgi nabir gandik gwisguegar.
EZE 13:6 Be negburgan-dakmaladi, napiragwadsulid. Binsa yamo be nabiritiyob ibmar sogmalad. ‘Bab-Jehová sogye,’ be sokardamalad. Ar Bab-Jehováʼdi bega deyob sogsulid. Degi-inigwele, bega-ibmar-soglesad-sanargued be abitodimalad.
EZE 13:7 ‘Bab-Jehová sogye,’ be sokardamalad. Ar Bab-Jehováʼdi bega deyob sogsulid. Ar be-negburgan-dakmalad gakanbiid, ibmar-guedgi-iduakwaa-sunmaklegedi gakanbibalid.
EZE 13:8 ”Degisoggu, Bab-Jehová-Bela-Gangued-Nikadi weyob soged: ‘Bemar-ibmar-noar-soged-ular, bemar-negburgan-daked-gakansaaled-ular, an bemargi gwisguoed. Ani an Bab-Jehová-Bela-Gangued-Nikadi soged.
EZE 13:9 Bab-Dummad-gayaburba-barsogmaladi napiragwad negburgan-daksurmalad, degi, gakansaar ibmar-guoed-sogdimaladi, an sabsur-odurdakoed. An-dulamar-onmakmaladgi bukuosurmalad. Israel-dulemar-e-nug-mamaid-gardagi e-nugmar megosurbalid. Deginbali, Israel-yarse bar gannar nonikosurmarbalid. Degidbali, geb bemar wisguoed, ani an Bab-Jehová-Bela-Gangued-Nikad gue.’
EZE 13:10 ”Ar deyobdo. We-an-gayaburba-barsogmalad an-dulamar-yardakdimalad, ega sogdimalad: ‘Bela neg-nueganbiiye.’ Ar degi-inigwele, neg-nueganbisulid. Galumar-asgi-eniraled-yeerdaklegeyobi, sunmakmalad. Binsa-asgi-eniraled yeerdakledaed.
EZE 13:11 Degisoggu, neg-sobmaladga be soge: Be-galumar-e-dikar-eniraled-yeerdaklemaladi, dii-dummad-burwaba-mesa-wiedba, dii-gwamakaled-wiedba, degine, burwa-ooregedba bei babatidoye.
EZE 13:12 Ar galu-e-dikar-eniraled babatisale, bese egisdamaloed: ¿Galu-e-dikar-eniraled-yeerdaklegedi, igi gude?
EZE 13:13 ”Degisoggu, Bab-Jehová-Bela-Gangued-Nikadi weyob soged: ‘Bela ibmar-obelogega, an bela-bela-urwemaisoggu, an bemargi burwa-ooreged onogoed. An nue-sae-itosoggu, an bemargi dii-dummad-burwaba-mesa owioed. An nue-urwesoggu, an bemargi dii-gwamakaled owioed.
EZE 13:14 Bemar, galu-e-dikar-eniraled-yeerdakle-imaksadi an obatoed. E-neg-sailamar-nollomamaid magar-daklegoed. Ar babatidele, bemar ese burgwemaloed. Degidbali, bemar wisgumaloed, ani an Bab-Jehová gue.
EZE 13:15 We-galu, degi, dule galu-e-dikar-enirismaladi, an-nue-urwed itomaloed. Geb an bemarga sogdoed, galu-yeerdaklegedi bar gwichisurye, degi, dulemar-e-dikarmar-enirismaladi, bar gudisurmarbarye.
EZE 13:16 Wemar, Israel-e-Bab-Dummad-gayaburba-barsogmaladid, Jerusalén-neggweburgi ibmar-guoed sogdii gusmaladid, negburgan-napiragwadsulid dakdigusmaladid, degi, neg-nueganbiiye gordii gusmaladid. Ar deunni, neg nueganbisulid. Ani an Bab-Jehová-Bela-Gangued-Nikadi weyob soged.’ ”
EZE 13:17 Bab-Jehová sogdebalid: “Dule-machi, emigindi, we-omegan-be-neggweburginedi na e-itogedba ibmar-guoed-sogdimaladga be ibmar-soge.
EZE 13:18 Ega be soge: ‘Bab-Jehová-Bela-Gangued-Nikadi weyob sogye: Bemar dule-wilesmar, dulemar-yardakega bemar sakwagi-nasikega morgo-inabagalad makdimalad. Degi, nonogi-nasikega dunwe-inabagalad imakdimalad, be duledar-wilesmar. Be dula-gudisamalaga, yardakedba, ¿an-dulamar-e-burba-gamaloye be binsamala?
EZE 13:19 Bemar, orosgi-dakleged-cebadaʼye-nugad argan-nukgwen-ular, degi, madu-wargwenad-ular, an-dulamar-asabin an-nug oichosmalad. Be-gakansamaladgi an-dulamar egi bensulid-ulale, dulemar-burgwed-wilubsulinad be oburgwemalad. Aka dulemar bur burgwed-wilubbinad dula-gudii be imakmalad.’
EZE 13:20 ”Degisoggu, Bab-Jehová-Bela-Gangued-Nikadi weyob soged: ‘An bemar-morgo-inaba-imakaledi isdar-daked. Bemar a-morgogi sikwimaryob dulemar-gamalad. Ar degi-inigwele, we-dulemar-yardaklesgudimalad bemar-ina-ganguedgi an ollor-imakoed, geb nuumaryob-gukuega an imakoed.
EZE 13:21 Amba deyopira, an-dulamar bemarse dunwe-inaba-galadgi-galesgudimaladgi an ollor-imakbaloed. Degidbali, be wisgumaloed, ani an Bab-Jehová gue.
EZE 13:22 Ar be-gakansaedba dule-nued wile-itogega be imaksamalad. Andi dule-nued wile-itogega gwen imaksasulid. Bur be dule-isganamar ogannosmalad. Adi, we-dule-isgana melle e-igar-isganagi banguega, degi, melle abonolegegar.
EZE 13:23 A-ulale, gakansaar-negburgan-daked bar be dakosulid. Ibmar-guoed-iduakwaa-wisgued bar be imakosurbalid. An-dulamar bemar-ganguedgi an ollor-imakoed. Degidbali, bemar wisgumaloed, ani an, Bab-Jehová gue.’ ”
EZE 14:1 Israel-girmar-dummagan-abala anse ataknonimalad, geb an-asabin sigismalad.
EZE 14:2 Geb Bab-Jehová anga sogded:
EZE 14:3 “Dule-machi, we-dulemar na e-gwagegi bab-dummadyob-ibmar-imakleged-nug odummodimalad, unnila ibmar-isgana-imakedgi binsadimalad. Degite, we-dulemarde, ¿anse idakmalode? Anse idaked, satemala.
EZE 14:4 Degisoggu, wemarbo be sunmake, ega be soge, Bab-Jehová-Bela-Gangued-Nikadi weyob sogye: ‘Bela Israel-dulemar e-gwagegi bab-dummadyob-ibmar-imakleged-nug odummosale, degi, geb ibmar-isganabi-imakdimaladgi an-gayaburba-barsogmaladse ibmar-wisgunadele, ani an Bab-Jehová, e-bab-dummadyob-ibmar-imakdimalad-mergued-nikadba, an sabsur-odurdakoed.
EZE 14:5 Bela Israel-dulemar, e-bab-dummadyob-ibmar-imakdimalad-ular, angi aibachamalad. Amar-e-gwage, an ebugoed.’
EZE 14:6 ”Degisoggu, Israel-dulemarga be soge, Bab-Jehová-Bela-Gangued-Nikadi weyob sogye: ‘Gannar be an-amimala, be-bab-dummaganga-imakdimalad be iemala, degi, bela ibmar-isgana-imakedgi be bangumala.’
EZE 14:7 ”Ar Israel-dulemar, degi, Israel-yargi dule-yar-baidgined-gudiid angi aibachamalad. Na e-bab-dummaganga-imakdimalad-e-nug odummosmalad, degi, ibmar-isganabi imakdii gusmalad. A-sorba, anse ibmar-wisguega an-gayaburba-barsogedse nadele, an-sunnad an abinsaoed.
EZE 14:8 A-dulegi an gwisguoed, sabsur-odurdaked-e-wilubga an imakoed. An-dulamar-abargi bar-gudii an imakosulid. Degidbali, wisgumaloed, ani an Bab-Jehová gue.
EZE 14:9 ”Ar Bab-Dummad-gayaburba-barsoged-gwensak gakansaar gayaburba sogele, ani an Bab-Jehová, we-dule yardaksad. Degisoggu, an we-dule sabsur-odurdakoed, geb an-dulamar-abargi bar-gudii an imakosulid.
EZE 14:10 An-gayaburba-barsoged, degi, dule-ese-ibmar-idakapid, na ebobela e-isgusadba sabsur-odurdaklemaloed,
EZE 14:11 adi, melle bar Israel-dulemar angi bangumalaga, degi, mer bar angi isgumalagarba. Geb degine, an-dulamarga guoed, degi, ani an e-Bab-Dummadga gumogoed. Ani an Bab-Jehová-Bela-Gangued-Nikadi weyob soged.”
EZE 14:12 Bab-Jehová anga sogdebalid:
EZE 14:13 “Dule-machi, yar-gwensak angi isgunonikile, degi, na e-isguedgi gannar-gannar isgudiile, an sabsur-odurdakoed. E-ibe an mas obelogoed, ukudmaad an imakoed. Degi, e-dulemar, e-ibmar-durgan an ogilogoed.
EZE 14:14 Ar a-yargi amba Noé gudina, Daniel, degi, Job, amba gudina, unnila amarbi dule-nueddamaladba bendaklesmalaled. Ani an Bab-Jehová-Bela-Gangued-Nikadi weyob soged.
EZE 14:15 ”Ar bela a-yargi dulemar-ogilogega, an ibmar-durgan-ursilimar barmialiled. A-yar nega-dulesulidganga gusaled. Degisoggu, dule-wargwensaar, ibmar-durgan-ursilimar-dobed-ulale, a-yarse nonisurmalaled.
EZE 14:16 Ar amba we-dulemar-warbaagwad a-yargi gudimalale, na e-machimala, degi, e-bunamala bendaklessurbaliled. Unnila na emarbi bendaklesmalaled. A-yala nega-dulesulidganga gusaled. Ani an Bab-Jehová-Bela-Gangued-Nikadi ise-sogar weyob soged.
EZE 14:17 ”Ar a-yargi an bila-onoged barmialile, geb bela e-dulemar, degi, e-ibmar-durgan es-suidgi ogiloye an sogele,
EZE 14:18 ar amba we-dulemar-warbaagwad a-yargi gudimalale, na e-machimala, degi, e-bunamala bendaklessurbaliled. Unnila emarbi bendaklesmalaled. Ani an Bab-Jehová-Bela-Gangued-Nikadi ise-sogar weyob soged.
EZE 14:19 ”Ar a-yargi an bonigan-bulegan barmialile, degi, bela dulemar, degine, ibmar-durgan-ogilogega an-sae-itogedi a-yargi burgwedbi neg-nasiksale,
EZE 14:20 ar amba a-yargi Noé, Daniel, degi, Job, gudimalale, na e-machimala, degi, e-bunamala bendaklessurbaliled. Na dule-nueddamaladba unnila emarbi bendaklesmalaled. Ani an Bab-Jehová-Bela-Gangued-Nikadi ise-sogar weyob soged.
EZE 14:21 ”A-ulale, ani an Bab-Jehová-Bela-Gangued-Nikadi weyob soged: ‘An wemar-sabsur-odurdaked-bulegan-sogabakegwad barmialile, Jerusalén-neggweburgi bur bule neg-guoed. Bila-onolegedgi, ukud-dummad-naguedgi, ibmar-durgan-ursilimargi, degi, bonigan-bulegangi, an e-dulemar, degi, e-ibmar-durgan ogilogoed.
EZE 14:22 Degi-inigwele, dulemar abala, a-bonigangi-wakinmaloedi durgumaloed. Geb na e-machimala, degi, e-bunamala, a-yargi onomaloed. Ar wemar bemar-bukwadse modapile, bemar wemar-e-damaladi, degi, e-ibmar-imakmaladi dakmaloed. Geb agine, bemar magar-itogoed, ar ibiga an Jerusalén-neggwebur sabsur-odurdaksa.
EZE 14:23 Wemar-e-daed, degi, e-ibmar-imakmalad bemar daksale, bemar magar-itononikoed, degi, bemar wisgubaloed, ar an binsa Jerusalén-neggwebur sabsur-odurdaksasuli. Ani an Bab-Jehová-Bela-Gangued-Nikadi weyob soged.’ ”
EZE 15:1 Bab-Jehová anga sogded:
EZE 15:2 “Dule-machi, ¿ibigine, uva-dub-e-saila, sapi-bamalad-e-sailamarba bur-nuedi? ¿Uva-dub-e-wala, sapi-bamalad-abargi ibuga gumoga?
EZE 15:3 We-uva-dub-e-saila ibmar-sobega gusulid, ibmar-nasikega gusurbalid.
EZE 15:4 Unnila sapanga gued. Ar e-dukumar gummaksale, e-gwaa sogunga-gusale, ¿ibmarga guo be ebinsae?
EZE 15:5 Ar amba yoo gummakubela, ibmarga gussulid. Emi-bulesunna, ¿sunna bar ibmarga guosi? Geg bar ibmarga gue.”
EZE 15:6 Degisoggu, Bab-Jehová-Bela-Gangued-Nikadi weyob soged: “Ar igi uva-dub-e-saila, soogi gummakega mellege, deyobi, an Jerusalén-e-dulemar imakmogoed.
EZE 15:7 An wemarbo urwoed. Amba soogi wakinmalo-inigwele, ar soo-baidse gummakmaloed. Ar an wemarbo ulusale, bemar wisgumaloed, ani an Bab-Jehová gue.
EZE 15:8 E-yala nega-dulesulidganga an imakoed, ar angi nosmalad. Ani an Bab-Jehová-Bela-Gangued-Nikadi weyob soged.”
EZE 16:1 Bab-Jehová anga sogded:
EZE 16:2 “Dule-machi, Jerusalén-dulemar e-ibmar-isgana-imakdiid ega be soge.
EZE 16:3 Bab-Jehová-Bela-Gangued-Nikadi weyob sogye: ‘Jerusalén-neggwebur, be Canaán-yargi danikid, agi be gwalulesad. Be-bab, Amorreo-duled, be-nandi, Het-duled.
EZE 16:4 Be-gwalulesad-ibagi be-ibe simudub siksasurmalad, be-ogsasurmalad, balugi be-magsasurmalad, deginbali, simu-edugega bega morgo edichasurmarbalid.
EZE 16:5 Weyob be-imakegala, dule-wargwensaale, gwen bai be-daksasulid, deginbali, dule wile-be-daksasurbalid. Be-gwalulesad-ibagi, aka bur ibmar-isganayob sapurba be-metemalad.
EZE 16:6 ” ’An be-nagaba nasa gusad, napagi be-ablisgi-moodmai an be-daksad. Ablisbi-moodomai an be-daksagua, ¡dula gudisaye! an bega sogsad.
EZE 16:7 Gagan-nuedyobi dunguoye, an bega sogsad. ” ’Be dungude gusad, be yalenonikid, geb be yeerdakle gunonikid. Be nuu-mulluu guded, degi, be-sailagia yeer daklenaded. Ar degi-inigwele, amba bedi uka-swana gudii gusad.
EZE 16:8 ” ’A-ibagan-nasad-sorbali, an gannar be-nagaba nasbalid, degi, bato be sui-nikuedgin an be-daksad. Geb degine, an-mor-dummad an bega uksad. A-morgine an be-obirmaksad. An bega ise-sogar sogsad, degi, an bebo igar-mesisad, geb angadga be-gunonisunnad. Ani an Bab-Jehová-Bela-Gangued-Nikadi weyob soged.
EZE 16:9 ” ’An be-ogsad, an bega ablis elisad, geb ina-wawadikidgi an be-magsad.
EZE 16:10 Dubgi-sobaled-mor an bega yosad. Nag-uka ibmar-ukagi-sobaled an bega yosad. Lino-dubgi-mor-makaled, degi, sedaʼgi-mor-makaled an bega yosad.
EZE 16:11 Ormar galagwensuli an bega nasiksad: Sakwagi-nagumalad, dukargi-nagumalad,
EZE 16:12 uayagi-nagumalad, olasu an bega yosad, degi, orgurgin-yeerdakleged nonogi an bega sisbalid.
EZE 16:13 Deyobi, be orbi, manibi, biini gudii gusad. Lino-dubgi-mor-makaled-mor, seda-dubgi-mor-makaled, degi, dubgi-sobaled-mor, be yoi gudii gusad. Trigo-bur-nued be gundii gusad, achanis be madii gusad, degi, olivo-gwalluba be mas gundii gusad. Bela-bela be yeerdakle gunonikid, be rey-omeyob-dakle gunonikid.
EZE 16:14 Be-yeerdakleged-ulale, dulemar-yar-baid-baidgi-bukwamalad-abargi be-nug dummarbaa gunonikid. Ar ade, ani an bur-birigine yeerdakle be-imaksad. Ani an Bab-Dummad-Jehová-Bela-Gangued-Nikadi weyob soged.
EZE 16:15 ” ’Ar degi-inigwele, be-yeerdaklegedgi be gannarbaa-itosad. Be-nug-dummarba-nikadba be gambanuchu-imakde gusad. Gwen bingedsuli be yogasaar dulemarga san-urmakdii gusad.
EZE 16:16 Napa-nibakwagwad-birgi Bab-dummadyob-ibmar-imaklegedse-goled-neg be-mormargi be sobsad. A-neggi galagwensuli be gusad. ¡Bipisaar deyob ibmar gwen dakledisulid!
EZE 16:17 Ormar-galagwensulidgi, degi, mani-an-bega-uksadgi, macherganyob-dakle be ibmar-wilub sobsad. Geb amar-e-nug be odummosad.
EZE 16:18 Amarga be-mor-dubgi-sobaled be yosad, degi, an-olivo-gwallu ega be uksad, an-ina-wawad ega be uksabalid.
EZE 16:19 An bega mas uksa-gusad: Trigo-bur-nued, olivo-gwallu, degi, achanis. We-masmar ega be ibmar-wawadik-yapanned-uklegedyob uksa gusad. Ani an Bab-Jehová-Bela-Gangued-Nikadi weyob soged.
EZE 16:20 ” ’Deginbali, an bebo machimala, degi, bunamala-baksagusad be susbalid. Geb be wemar bab-dummadyob-ibmar-imakleged-e-masga-gumalaga be oburgwisad. Be-galagwensuli-gudiid amba be nubin itossulid.
EZE 16:21 Ar ade, be an-mimmigan oburgwisbalid. Geb bab-dummadyob-ibmar-imaklemaladga ibmar-uklegedyob be soogi ogumakar uksad.
EZE 16:22 Bela be-ibmar-isgana-imakedba, be-galagwensuli-nanaedba, igi be bipigwaun-gudigusa be ieded, egi bar be binsassulid. Deunni, be uka-swana-gudigusad, be-ablisgi be moodmaigusad, bela be ieded.’ ”
EZE 16:23 Bab-Jehová-Bela-Gangued-Nikadi soged: “¡Be duledar-wiles! ¡Be duledar-wiles! Ar be bela ibmar-isgana imaksadginbali,
EZE 16:24 be bela neg-ollornanaidgi gambanuchu-megmalad-neg sobsabalid.
EZE 16:25 Bela igarmar abingunanaidgi, gambanuchu-megmalad-neg be sobsad. Degi, be-yeerdakleged ibmar-isgana-daklegedyob be imaksad. Be yogasaar dulemarga na san-urmakdii-gusad, degi, galagwensuli-gudiid gwen be bogilessulid.
EZE 16:26 Egipto-dulemarbo be galagwensuli-gudii gusad. Wemar na dulemar-dutusurmaladid. An-ourwega, aka bur bule be gambanuchu-imakdii gusad.
EZE 16:27 Degisoggu, an sabsur-be-odurdaksasunnad. A-ulale, an be-ibe be-yar-abar-sumalaga imaksad. Filistea-dulemarga an be-urmaksa gusad, wemar isdar-be-dakmaladid, degi, be-galagwensur-gudiidgi bingegudimaladid.
EZE 16:28 Deginbali, Asiria-dulemarbo be gannar-gannar galagwensuli-gudii gusbalid, ar degite, amba be nubin itossulid.
EZE 16:29 Ar amba deyobi, be Babilonia-dulemar-ibmar-ukmaladbo galagwensuli-gudii gusbalid, ar degite, amba be nubin itossurbalid.”
EZE 16:30 Bab-Jehová-Bela-Gangued-Nikadi soged: “¡Ibiyobi sunnasur be binsae! ¡Gambanuchu-bingedsulidyob be nanadii gusad!
EZE 16:31 Bela igarmar-abingunanaidgi, gambanuchu-megmalad-neg be sobsagusad, degi, bela neg-ollornanaidgi, gambanuchu-megmalad-neg be sobsagusad. Ar degi-inigwele, bedi gambanuchu-daedyob gussulid, ar be gwen mani-gassulid.
EZE 16:32 ”Ome-negsichigi-nanadiiyobi be gued. Be be-suibina-sogedba bur bule machergan-bamaladbina be soged.
EZE 16:33 Bela gambanuchumar bennuklemalad, ar aka bedi na bebo-galagwensuli-gudimalad bennuked. Bela dulemar-yar-baid-baidginmaladga be mani-ukdaed, adi, bebo galagwensuli gudamalagar.
EZE 16:34 Be gambanuchu-imakdiidgi, bedi omegan-bamaladba akarsaila gusad. Ar bebo galagwensuliguega, dulemar bar be-amisulid, deginbali, be-bennuksurbalid, aka bur bedi amar-bennuked. Weyob-daedgi, bedi gambanuchu-imakmaladbo akalad.”
EZE 16:35 Degisoggu, gambanuchu, Bab-Jehová ibmar-soged be itoge.
EZE 16:36 Bab-Jehová-Bela-Gangued-Nikadi weyob soged: “Na bebo galagwensuli-gudiidga, degi, be-bab-dummadyob-ibmar-imakdiidga, be bingesuli be-abgan oyodii gusad. Amarga be-mimmigan-e-ablis be ukdii nanasad.
EZE 16:37 Degidbali, bela bebo-galagwensuli-gusmaladi, amar-yeer-itogega be imaksadi, be sabgusgusadi, be isdar-daksabalidi, wemar an danar urboed. Be-dikarba an amar-urboed, geb amar-asabin an uka-swili be-ogwichoed. Bela amar uka-swana be-dakmaloed.
EZE 16:38 Ome-e-sui-dikarba-yolegedyob, degi, dule-gindakedyob an bega igar-nabogedgi sabsur-odurdaked an mesoed. An bela-bela sae-itosoggu, burgwega an be-imakoed.
EZE 16:39 Bebo-galagwensuli-gusmaladga an be-urmakoed, geb amar be-gambanuchu-samalad-neg earmaloed, degi, be-bab-dummagan-e-ailamar omukumaloed. Be-ibe mor sumaloed, be-ormar-galagwensulid sumarbaloed. Uka-swana be-obemaloed.
EZE 16:40 Dule-bukidar-begi-aibinega imakmaloed. Akwagi be-makmaloed, geb es-suidgi olo-olo be-imakmaloed.
EZE 16:41 Be-negmar ogumakmaloed, geb omegan-bukidarad-wagab deyob be-imakmaloed. Be-gambanuchu-imakdiid an obelogoed, bebo galagwensuli-gudimalad be bar bennukosulid.
EZE 16:42 Weyobi, an-urwed bogilegoed, an-nobgued berguoed. Bar an urwesuli, bogidik megoed.
EZE 16:43 ”Ar be na bipigwaun-gudigusad ebinsassursoggu, degi, be-galagwensuli-gudigusadgi be an-oulussoggu, a-ulale, an sabsur-be-odurdakoed. Ani an Bab-Jehová-Bela-Gangued-Nikadi weyob soged.
EZE 16:44 ”Dulemar-deyob-sogleged-gusgu-sogmaladi, weyob begi sogmaloed: ‘Na e-nan daedyobi, e-bunor damoye.’
EZE 16:45 Be-nanyobi be damogad. Be-nan na e-sui, degi, na e-mimmigan isdar-daksagusad. Be-ioryob, be-urbayob be damogad, na e-suimar, degi, na e-mimmigan isdar-daksagusmalad. Be-nana, Het-duled, be-babdi, Amorreo-duled.
EZE 16:46 Samaria, be-iorad, na e-neggwebur-burwiganmala be-dad-nakwed-argan-sapiledsik siid. Sodoma, be-urbad, na e-neggwebur-burwiganmala be-dad-nakwed-argan-nuedsik siid.
EZE 16:47 Unnila wemar-daedbarbi be nanadii gussulid, e-ibmar-isgana-imakdiid be imaksabalid. Wemarba bur bule be isgusad.
EZE 16:48 Ani an Bab-Jehová-Bela-Gangued-Nikadi na dukin ise-sogar-soged: Ar be, degi, dulemar-be-neggwebur-burwiganginmalad igi ibmar-imaksamala, deyobi, be-urba-Sodoma, degi, dulemar-e-neggwebur-burwiganginmalad bipisaar ibmar-imaksasurmalad.
EZE 16:49 ”Be-urba-Sodoma, degi, dulemar-e-neggwebur-burwiganginmalad na san-dummarba-imakedgi, mas-obinebaka-nikadgi, degi, dule-gwen-bai-daksulidgi isgusmalad. Deginbali, dule-wileged, degi, dule-ibmar-sate-gudiid bendaksasulidgi na isgusmarbalid.
EZE 16:50 Dule-bamaladba na san-dummarbaa itodii gusmalad, an-asabin ibmar-isgana-imaksamalad. A-ulale, an deyob-daksagua, an obelosad.
EZE 16:51 Degi-inigwele, Samaria, degi, dulemar-e-neggwebur-burwiganginmalad be-isgusadyobi isgussurmalad. Ar bedi we-dulemarba bur bule ibmar-isgana imaksad, ar bebo wilubsadele, beba bur dule-nued gumalad.
EZE 16:52 Emigindi, be bingegudii gusunna, ar be-iorba, degi, be-urbaba be bur bule ibmar-isgana imaksasoggu, be-ior, degi, be-urba beba bur dule-nuedyob daklesunnad. Be bingegusunna, begi dodoledii gusunna. Ar be-ior, degi, be-urba, beba bur dule-nueddaedyob be imaksad.
EZE 16:53 ”Degi-inigwele, an Sodoma-dulemar, degi, e-neggwebur-burwigan gannar nasguega an imakoed. Deginbali, Samaria-dulemar, degi, e-neggwebur-burwigan, gannar nasguega an imakbaloed. An deyobi, gannar be-imakmogoed.
EZE 16:54 Deyobi, begi dodoledii gusunnoed, ibmar-imaksadba be bingegudii guoed. Geb amarga gwage-gadi-gadi-imakedga be guoed.
EZE 16:55 Be-urba-Sodoma e-neggwebur-burwiganmala, be-ior-Samaria e-neggwebur-burwiganmala, iduar sigisadyob gannar signonimaloed. Be, be-neggwebur-burwiganmala iduar-sigisadyob be gannar signonimarmogoed.
EZE 16:56 Amba-yoo be-isgued-wisgulegu, be san-dummarbaa itodii gusad,
EZE 16:57 be-urba-Sodomaʼgi be dododii gusad. Ar emigindi, Siria-dulemar, Filistea-dulemar begi dodomalad. ¡Bela isdar be-dakmalad!
EZE 16:58 Be-doggus-galagwensuli-gudigusad, degi, be-ibmar-isgana-imaksadi be sedii gusunye. Ani an Bab-Jehová-guedi weyob soged.”
EZE 16:59 Bab-Jehová-Bela-Gangued-Nikadi weyob sogbalid: “An sabsur-be-odurdakoed, ar ade, be ibmar-ise-sogar-sogsad gwen be imaksasulid. Be anbo-igar-mesisadgi be annasad.
EZE 16:60 Degi-inigwele, andi be-bipigwaun an-bebo-igar-mesisad ebinsaoed, geb igar-degisadeguad an bebo mesoed.
EZE 16:61 An bega be-ior, be-urba, be-bunamalaga-guega uksale, iduar be nanadigusad ebinsadoed, degi, be bingegudabaloed. Degi-inigwele, amba wemar an bebo-igar-mesisadgi dogosurmalad.
EZE 16:62 An bebo igar mesoed. Be wisguoed, ani an Bab-Jehová gue.
EZE 16:63 An bela be-isgusad bega elinonikile, be-ibmar-isgana-imaksad be ebinsaoed, geb be bingegudoed. Na be-bingegued-ular, bar be sunmakosulid. Ani an Bab-Jehová-Bela-Gangued-Nikadi weyob soged.”
EZE 17:1 Bab-Jehová anga sogded:
EZE 17:2 “Dule-machi, Israel-dulemarga burbar-ibmar-sogleged be soge. Ega weyob be soge.
EZE 17:3 ‘Bab-Jehová-Bela-Gangued-Nikadi weyob sogye: Deunni, Líbano-yarsega sulubagi-dummad nonikid. We-sulubagi sakan-burwisur nikad, e-absar-daklegedi, akar-akar-dakleged. We-sulubagide, Líbano-yarse nonikid, urwar-sapi-dukugi signonikid.
EZE 17:4 Urwar-dukugi e-mimmi-dutugwad-noardaed-mullusulidi, biis imaksad. Geb a-e-mimmi-dutugwad-noardaed, dule-ibmar-ukmalad-e-yarse sesad. Geb agine, bukidar-ibmar-ukleged-neggweburgi digsad.
EZE 17:5 ” ’Geb ibmar-gwag-a-yargined susad, geb napa-nuedgi a-ibmar-gwag digsamogad. Diwar-aryomaid-gakaba sapi-Sauceʼyob digsad.
EZE 17:6 Ibmar-gwag aininonigu, uva-dub-matukwagwadga gunonikid, e-dubmar bukidar nallamakde gusad. E-dubmar sulubagisik suguded, e-malimardi neg-urba aideded. Deyobi, uva-dubga gunonikid, degidbali, na e-muu nikunonisunnad, e-dubmar bukidar nallamakebukwa gusad.
EZE 17:7 ” ’Daklearbargu, sulubagi-baid gudii daklealid, a-sulubagide sakan-burwisur nikamogad, absar yaisur nikabalid. Geb degine, uva-dub-e-malimar, degi, e-dubmar a-sulubagisik suguded, adi, na e-digar-gwichidba sano-maidbali sulubagise diigi-oglegwichi guegar.
EZE 17:8 Uva-dubde napa-nuedgi diglesad, diwar-aryomaid-dikarba gwisgusad, adi, na e-anagan nikuega, degi, sanmakegar. Deginbali, uva-dub yeerdaklegwichi guegar.’
EZE 17:9 ”Ega be sogbali, Bab-Jehová-Bela-Gangued-Nikadi weyob sogbarye: ‘¿We-uva-dubde, nasguo be ebinsae? ¿Sulubagide, bela sailanagase uva-ungosur be ebinsae? ¿E-sanmar e-ibe obatosur be ebinsae? ¿Degidba uva-dub odinguosur be ebinsae? Eye, uva-e-muumar-dutugwad dingudoed. Sailanagase-ungegala, arbaed-dummad abelegosulid, dulemar-bukidar abelegosurbalid.
EZE 17:10 Ar neg-baidsik-diglesbalile, ¿amba gannar nasguo be ebinsae? Ar burwa-ued egi gollalile, ¿odinguosur be ebinsae? Eye, ar bia na digar-gwichidgi agi na dingudoed.’ ”
EZE 17:11 Bab-Jehová anga sogdebalid:
EZE 17:12 “Emigindi, we-dulemar-uayasulidamaladse be egise: ‘Ar we-ibmar-bega-soglenaidi, ¿magar be itomar sogeye?’ Ega be soge: ‘Babilonia-e-rey Jerusalén-neggweburse nonigusad, agine, Judá-e-rey, degi, eba-arbamalad Babilonia-yarse sesagusad.
EZE 17:13 Geb sorbali, Babilonia-e-rey Judá-rey-machi-wargwenbo igar-mesisad, geb ibmar-ise-sogar-sogega imaksad, adi, melle e-yardakegar. Degidbali, Babilonia-e-rey, Judá-dule-bulegan, degi, Judá-dule-nuga-nikamalad Babiloniaʼse sesagusad,
EZE 17:14 adi, Judá-yar melle bar gannarba sigegar. Weyob-imaksadi, adi, Judá-dulemar melle egi aibinegar. Geb Judá-dulemar-dula-gudi-imakega ebo-igar-mesisad-imakega imaksad.
EZE 17:15 Degi-inigwele, we-rey-machi Babilonia-e-reygi aibinnoni gusad. Bila-onoegala, Egipto-yarse e-sordagan-barmis-gusad, adi, molimar, degi, sordamar-bila-onomalad bukidar ega barmidagegar. Degitega, ¿Judá-dulemar-e-rey nako, be ebinsae? ¿Ar dule weyob ibmar-imaksad wakinno, be ebinsae? Dule igar-mesisadgi annasadi, ¿na san-onogo, be ebinsae? Suli.
EZE 17:16 Ani an Bab-Jehová-Bela-Gangued-Nikadi soged, Judá-rey Babiloniaʼgi berguoe, rey-e-nug-imaksad-yargi burgoe. Na e-ibmar-ise-sogar-imaksad gwen imaksasulid, deginbali, Babilonia-reybo-igar-mesisadgi annasbalid.
EZE 17:17 ” ’Babilonia-sordamar bukidar-dulemar-ogilogega napa-arsanyob-sobarmalad sobbarmalale, degi, aila-matusurmalad-sordamar-ichomakmalad sobbarmalale, Faraón bukidar-sordamar-bila-onomalad-nika-inigwele, bila-onogedgi Judá-dulemar-bendakosulid.
EZE 17:18 Judá-dulemar-e-rey ibmar-ise-sogar-imaksadba gwen ibmar-imaksasulid. Deginbali, Babilonia-e-reybo-igar-mesisadgi annasbalid. We-igar-sogbo-imako-sogsadgi-yolesad-ulale, gwen-wakinnosulid.’
EZE 17:19 ”Degisoggu, Bab-Jehová-Bela-Gangued-Nikadi weyob soged: ‘An-sunnad an ise-sogar-soged, ar ibmar-ise-sogar-sogsadba gwen ibmar-imaksasursoggu, deginbali, ar igar-mesisadgi annasbarsoggu, an sabsur-odurdakoed.
EZE 17:20 An-saki an Judá-reygi mioed, geb agi an gaoed. An Babilonia-yarse nidoed. Agi angi-nosad-ulale, an ega igar-nabogoed.
EZE 17:21 E-sordamar-bila-onomalad-bur-bulegan es-suidgi burgwemaloed. Durgumaloeddi, bela we-napneg-dirbir-naidgi oaisakilemaloed. Deyobi, wisgumaloed, ani an Bab-Jehová we-ibmar-sogsadid.’
EZE 17:22 ”Bab-Jehová-Bela-Gangued-Nikadi weyob soged: ‘Urwar-duku-bur-matusulidgi an urwar-e-dutugwad sikoed, e-anagan-bur-matusulidgi an e-dutugwad wannoed, geb yar-matusulidgi an digoed.
EZE 17:23 Anagan-nikuega, sanmakega, Israel-e-yar-bur-matusulidgi an urwar-e-dutugwad digoed, geb urwar-nuedga guoed. Nuumar galagwensuli e-uumar egi soboed, e-anagan-urba dukumarbaloed.
EZE 17:24 Bela sapimar na wisgumaloed, ani an Bab-Jehová gued. Ani an sapi-dummad-omukuedid. Ani an sapi-bipigwadi odunguedbalid. Ani an sapi-gagan-aramaksiid odingubalid. Ani an sapi-dinnagwadi durbamakega imakbalid. Ani an Bab-Jehová-guedi we-ibmar sogsad, deyob an imakoed.’ ”
EZE 18:1 Bab-Jehová anga sogded:
EZE 18:2 “¿Ar ibiga Israel-yargi ibmar-odukuar-sogleged gannar-gannar sogdamala? Weyob sogdamalad: ‘Babgan uvaʼmar-soled-guchad, e-mimmigandi, nugar nusu-nusu gussunnad.’
EZE 18:3 ”Ani an Bab-Jehová-Bela-Gangued-Nikad, na dukin ise-sogar soged: Israel-yargine, we-ibmar-odukuar-soglegedi bipisaale bar gannar soglegosulid.
EZE 18:4 Ar dule isguele, burgoed. Bela dulemala angadid. Babgan, degi, mimmiganse-bakale, angadid.
EZE 18:5 ”Dule-innikidaedi, igar-inniki-maid-wisid, a-igar-maidba igar-innikigwad-imakele, dula-gudii guoed.
EZE 18:6 Dule-innikidaedi, bab-dummadyob-ibmar-imakleged-e-nug-odummogega, yar-birgi mas-gundamaladba akadisulile, dula-gudii guoed. Dule-innikidaedi, Israel-e-bab-dummadyob-ibmar-imaklegedse gordisulile, dule-baid-omebo negsichidgi galagwensuli-gudisulile, ome-igar-dakdiidse gordisulile, dula-gudii guoed.
EZE 18:7 Dule-innikidaedi, sabsur-dule-imakdisulile, ibmar-atursadisulile, egi mani-ganikidga gannar ega ormar ukele, dula-gudii guoed. Dule-innikidaedi, ukudmaad-gudiidga mas ukele, uka-swan-gudiidga mor ukele, dula-gudii guoed.
EZE 18:8 Dule-innikidaedi, mani-gaka-amisuli dulega mani-ukele, ibmar-isgana imakdisulile, dula-gudii guoed. Dule-innikidaedi, dulemarga igar-naboalile, innikigwadba igar-nabogele, dula-gudii guoed.
EZE 18:9 Dule-innikidaedi, an-igar-uksadba ibmar-imakele, degi, an-igar-mesisadba nanadiile, we-dule, dule-innikigwadid. Degisoggu, dula-gudii guoed. Ani an Bab-Jehová-Bela-Gangued-Nikadi weyob soged.
EZE 18:10 ”We-dule-innikidaed, machi-gadi-urwed-dule-gindaked nikusale, undarad. We-machigwa, e-bab-daedba gwen nanadisulile,
EZE 18:11 aka bur bab-dummadyob-ibmar-imakleged-e-nug-odummogega, yar-birgi mas-gundamaladba mas-gunnele, we-machigwade, ¿dulagudigued nuedi? ¡Suli! We-machigwa, dule-baid-omebo negsichidgi galagwensuli-gudiile,
EZE 18:12 dule-wileged-sabsur-imakdiile, degi, dule-ibmar-sated-sabsur-imakdiile, we-machigwade, ¿dulagudigued nuedi? ¡Suli! Ibmar-atursadibalile, egi mani-ganikidga bar gannar or ukdisulile, we-machigwade, ¿dulagudigued nuedi? ¡Suli! We-machigwa, bab-dummadyob-ibmar-imaklegedse gordiile, ibmar-isgana imakdibalile,
EZE 18:13 deginbali, mani-gaka-amiegala dulega mani-ukele, we-machigwade, ¿dulagudigued nuedi? ¡Suli! Ar we-ibmar-isgana-imaksad-ular, oburgwileged bur nabirid. E-burgwisadi, egi dukin ataklegoed.
EZE 18:14 ”We-machi-isgana, machi-nikunonimogale, e-machi na e-bab-ibmar-isgana-imaksad bela daksadibe, e-bab-daedba ibmar-imaksulile, dula-gudii guoed.
EZE 18:15 We-machi-nuedi, bab-dummadyob-ibmar-imakleged-e-nug-odummogega, yar-birgi mas-gunmaladba mas-gundisulile, Israel-e-bab-dummadyob-ibmar-imaklegedse gordisulile, dula-gudii guoed. We-machi-nuedi, dule-baid-omebo negsichidgi galagwensuli-gudisulile,
EZE 18:16 degi, we-machi sabsur-dule-imakdisulile, ibmar-atursadisulile, egi mani-ganikidga gannar ega or ukele, dula-gudii guoed. We-machi-nuedi, dule-ukudmaad-gudiidga mas-ukele, uka-swan-gudiidga mor-ukele, dula-gudii guoed.
EZE 18:17 We-machi-nuedi, ibmar-isgana imakdisulile, mani-gaka-amiegala dulega mani-uksulile, an-igar-mesisadba ibmar-imakele, deginbali, an-igar-uksadba nanadibalile, nuedid. We-machigwa, e-bab-ibmar-isgana-imaksad-ular, burgosulid, dula-gudii guoed.
EZE 18:18 ”Ar e-babdi, sabsur-dule-imakdii gusad, dule-baid-ibe ibmar-atursadii gusad, degi, e-dulemar-abargi ibmar-isgana-imakdii gusad. Degisoggu, e-isgued-ular, burgoed.
EZE 18:19 ”Ar bemardi soged: ‘¿Ar ibiga e-bab-isgued-ular, e-machidi sabsur-odurdaklegosuli?’ Ar machidi dule-nuedid, dule-innikigwadid, ar ade, an-igar-mesisadba ibmar-imaked, degi, eba nanadibalid. Weyob machi-daedi, dula-gudii guoed.
EZE 18:20 Dule isgusale, burgoed. Ar machi-wargwensaale, e-bab-isgued-ular, sabsur-odurdaklegosulid. Ar deyobmodo, bab-wargwensaale, e-machi-isgued-ular, sabsur-odurdaklegosurmogad. ”Dule-nued na ibmar-nued-imakedba ega ibmar-nuegan uklegoed. Dule-isgana na ibmar-isgana-imakedba ega ibmar-isgana uklegoed.”
EZE 18:21 Bab-Jehová sogdebalid: “Ar dule-isgana, bela e-isgued-imaksadgi banguele, an-Igar-Mesisadba ibmar-imakele, igar-inniki-maidba igar-saele, degi, igar-innikigwad imakele, burgosulid, dula-gudii guoed.
EZE 18:22 Bab-Jehová, we-dule-isgana-e-isgusad bar ebinsaosulid. Ar igar-innikigwad-imaked-ular, dula-gudii guoed.
EZE 18:23 ¿Ar ande, dule-isgana-burgwed yeerdak be ebinsae? Suli. Ar bur e-daed-ogwaed an abeged, dulagudigued an abeged. Ani an Bab-Jehová-Bela-Gangued-Nikadi weyob soged.
EZE 18:24 ”Ar dule-nued igar-innikigwad-imakdiidgi aibatele, degi, ibmar-isgana imakdele, dule-isgana-ibmar-imakedba ibmar-imakdemogale, ¿dula-gudii guo be ebinsae? Suli. Na e-nosad-ular, burgoed. E-isgued-ular, burgoed. E-ibmar-nuegan-imaksad bar-ebinsalegosulid.
EZE 18:25 ”Bemar soged: ‘Bab-Jehová, dule-isganaye.’ Emigindi, Israel-dulemar be an-itoge: ¿Ibigi an dule-isgana? ¿Ar bemar bur dule-isganasursi?
EZE 18:26 Ar dule-nued ibmar-nued-imaked bar imaksulile, ibmar-isgana imakdele, na e-ibmar-isgana-imaked-ular, burgoed.
EZE 18:27 Ar dule-isgana na e-isgudiidgi aibatele, igar-inniki-maidba igar-imakele, deginbali, igar-innikigwad imakbalile, na san bendakoed.
EZE 18:28 Na e-isgudiid magar-itononikile, degi, e-ibmar-isgana-imakdiidgi aibatele, burgosulid, ar dula-gudii guoed.
EZE 18:29 ”Degi-inigwele, Israel-dulemar sogdimalad: ‘Bab-Jehová, dule-isganaye.’ Israel-dulemar, ¿ibigi an dule-isgana? ¿Ar bemar bur dule-isganasursi?
EZE 18:30 ”Degisoggu, Israel-dulemar, war-wargwengi be-daedba an bega igar nabogoed. Ani Bab-Jehová-Bela-Gangued-Nikadi weyob soged. ”Degisoggu, mer isguedse be bergumalaga, be-isguedga be bukib-binsamar, be-ibmar-isgana-imakdiid be iemar.
EZE 18:31 Israel-dulemar, bela ibmar-isganamar isguega-be-imaksamaladi be mimar. Gwage-binid, burba-binid-nikued be amimar. ¿Ar ibiga isgued-ular, be burgwebimarsunna?
EZE 18:32 Ar dule-wargwensaale burgwed an abesulid. Be-daed be ogwamar, dula-gudii be gumaloed. Ani an Bab-Jehová-Bela-Gangued-Nikadi weyob soged.”
EZE 19:1 Bab-Jehová sogdebalid: “Israel-sapin-dummaganga, we-wile-itoged be soge:
EZE 19:2 ‘Be-nandi, achumigur-nono-wawaadmar-abargi, achumigur-nono-wawaad-omeyob guenad. Achumigur-nono-wawaad-e-burwigan-abargi-mai, e-mimmigan-onumadaed.
EZE 19:3 Na e-mimmi-wargwendi, odummosad, wedi achumigur-nono-wawaad gadi-urwedga gunonikid, e-mas-ichimaked durdaksad, dule-gunned durdaksabalid.
EZE 19:4 Dulemar-yar-baid-baidgi-bukwamaladi, achumigur-e-wilub-obichadaed itosmalad, geb yamo-yardakar achumigur-gasmalad, geb Egipto-yarse, esgoro-dubgi edinnar sesmalad.
EZE 19:5 ” ’Ar achumigur-nono-wawaad-ome, e-mimmi bar ese nonikosur daksoggu, e-mimmi-baid odummosbalid, geb achumigur-nono-wawaad-ursilidga imaksad.
EZE 19:6 Ar we-achumigur-nono-wawaad gangued-nika gunonigua, e-sordamar-bamalad-abargi dobsuli nanadii gusad. Na e-mas-ichimaked durdaksad, dule-gunned durdaksabalid.
EZE 19:7 Reynegmar omukusad, neggweburmar obelosad. E-uurmakedba bela dulemar-ogwayedii gusad.
EZE 19:8 Dulemar-yar-baid-baidgi-bukwamaladi, degi, dikarba neggwebur-baigan bukwamaladi, achumigurgi gwisguarmalad. Yardakega e-idu galeged sobsamalad, geb yaa-ollor-gwisaledgi galessunnad.
EZE 19:9 Galu-yaba esgoro-dubgi edinnar-sii Babilonia-e-reyse sesmalad. Israel-yalaganba melle bar e-uurmaked-itolegega, galu-yaba-sii sesmalad.
EZE 19:10 ” ’Be-nan uva-digaled-abargi uva-dubyobi, dii-dikarba digar-gwichi gusad. Ar bela-bela dii-sugwissoggu, yaisur-sanmakgwichi gusad, yaisur-aramakgwichi gusbalid.
EZE 19:11 E-anagan gandikidba-dutusuli-gumai gusad, reymar-e-suar-gaapoledga gusad. Bela-belad bipisuli gusad. Bela-belad muamakgwichi gusad. E-matusulidbali dulemar magar daksamalad. E-anagan-gandikidbali dulemar magar daksamalad.
EZE 19:12 Degi-inigwele, urwedgine sabsur-unnulesad, napagi balimetemalad. Dad-nakwedsik-burwa-uereged-goledi, uva-dub-odinnosad, dulemala e-san-nanaid wesmalad. E-anagan-dutusurmalad bela dinare gusad, geb soose ogumaklessunnad.
EZE 19:13 Emigindi, we-uva-dub nega-dulesulidganba, napa-dinnaregedgi, dii-satedgi, digar gwichid.
EZE 19:14 E-ana-wargwengi soo gaded, we-soo e-sanmar ogumaksad. E-anagan-dutusurmalad rey-e-suarmarga-guega, bar gwen bessulid.’ ”We-namakedi, wile-itogedid. Degisoggu, wile-itogedgi weyob namaklegergebed.”
EZE 20:1 Anmar birga-guglegus yogasaar-gales-selenonikidgine, a-nii-walataled-ibambegine, Israel-girmar-dummagan abala Bab-Jehováʼse idakega nonimalad. Geb an-asabin signonimalad.
EZE 20:2 Agi, Bab-Jehová anga sogded:
EZE 20:3 “Dule-machi, Israel-girmar-dummaganga be sunmake, ega be soge: ‘Bab-Jehová-Bur-Gandik-Maid weyob-sogye: ¿Anse be ibmar-wisguega danimala? Ar an na dukin ise-sogar-soged, bipisaar, an bemarga ibmar sogosulid. Ani an Bab-Jehová-Bela-Gangued-Nikadi weyob soged.’
EZE 20:4 ”Ega be igar-itoge. Dule-machi, ega be igar-itoge. Epenneun, na e-dadgan-ibmar-isgana-imaksad, ega be soge.
EZE 20:5 ‘Bab-Jehová-Bela-Gangued-Nikadi weyob sogye ega be soge: An Israel-susad-ibagine, an Jacob-waganga ibmar-ise-sogar sogsagusad. Egipto-yargi magar-an-dakmalaga an ega ibmar-imaksagusgu, an gannar wemarga ibmar-ise-sogar sogsabalid: Ani an Bab-Jehová, be-Bab-Dummadye.’
EZE 20:6 A-ibagi, an ega ibmar-ise-sogar sogsad: ‘An Egipto-yargi be-onomaloye, an bemarga-yar-amisadse be-nidmaloye. A-yargine moli-bebe-nikad-nunis, degi, achanis, obinebaka nikaye. ¡Bela yar-bamaladba bur yeerdakleye an bemarga sogsad!
EZE 20:7 Geb bela wemarga an igar-uksa gusad, be-bab-dummadyob-ibmar-imaklemalad be mimarye, Egipto-e-bab-dummadyob-ibmar-imakleged-imadaklemaladba mer be isgumaloye. Ani an bemar-Bab-Dummad-Jehová gued.’
EZE 20:8 ”Ar we-Israel-dulemar uayasuli gusmalad. An-sogedba ibmar imaksasurmalad. Ar wargwensaale, na e-bab-dummadyob-ibmar-imaklemalad gwen missurmalad, deginbali, Egipto-e-bab-dummadyob-ibmar-imakleged-imadaklemalad gwen iessurmarbalid. A-ulale, Egipto-yargi-bukwamargu, an bela-bela sae-itogedba sabsur-odurdaksokalinad.
EZE 20:9 Degi-inigwele, an-nug-dummarba-gued melle isguega, an sabsur-odurdaksasulid. Degiile, Israel-dulemar dulemar-bamalad-abargi-gudiidgi, an-nug oicholegodole. A-ulale, an Israel-dulemar obelossulid. Ar we-dulemar-bamaladi daksamalad, igi an Israel-dulemar Egipto-yargi-noega imaksa.
EZE 20:10 ”Egipto-yargi an wemar-onosad, geb an nega-dulesulidganba sesad.
EZE 20:11 An ega an-Igar-Maid uksad, an ega an-Igarmar-Mesisad oyosad. We-igarba dulemar ibsaele, san-burba-dula-gudii guoed.
EZE 20:12 Deginbali, an-ebinsamalaga an ega an-obunnoged-iba uksabalid. Adi, wisgumalaga, ani an Bab-Jehová we-obunnoged-iba, iba-islidikidga imaksa. A-ibagi, an-nug odummomalargebed.
EZE 20:13 ”Ar degi-inigwele, nega-dulesulidganba Israel-dulemar angi gwisgusmalad. An-Igar-Maidba ibsassurmalad, an-Igar-Mesisad isdar-daksamalad. An-igarba, dulemar ibsaele, san-burba-dula-gudii gued. Deginbali, an-obunnoged-iba-islidikidi, iba-islidikidsuliyob daksamalad. A-ibagi an-nug odummossurmalad. A-ulale, nega-dulesulidganba-gudimargu, an sae-itogedba bela-obelogedgi binsaded.
EZE 20:14 Degi-inigwele, an-nug-dummarba-guedi melle isguega, an sabsur-odurdaksasulid. Degiile, dulemar-yar-baid-baidginmaladi, an-nug oichogo itole. Ar we-dulemala, Egipto-yargi Israel-dulemar-onosad an-daksamalad.
EZE 20:15 ”Deginbali, nega-dulesulidganba an ega ise-sogar-sogsabalid, yar-nuedse-bemar-sedoye, an bemarga-sogsadse bar an bemar-sedosurye. Ar a-yala, yar-bamaladba bur yar-nuedid, moli-bebe-nikad-nunis bukidar nikadid, degi, achanis obinebaka nikadid.
EZE 20:16 Ar an-igar-mesisad isdar-daksamalad, an-Igar-Maidba ibsassurmalad. Degi, an-obunnoged-iba, iba-islidikidsulidyob daksamalad. Ar bur e-bab-dummadyob-ibmar-imaklemalad-e-nug-odummodii gudmalad.
EZE 20:17 Degi-inigwele, andi amba wiledaksad, nega-dulesulidgangi an obelossulid.
EZE 20:18 ”Ar an e-mimmiganga nega-dulesulidganba weyob sogsad: ‘Be-babgan-igar-maidba mer be nanamalo, e-igar-mesismaladba mer be ibsamalo, deginbali, e-bab-dummadyob-ibmar-imakleged-imadaklemaladba mer be isgumarbalo.
EZE 20:19 Ani an Bab-Jehová, be-Bab-Dummadid. An-Igar-Mamaidba be nanamala, an-Igar-Mesisadba be ibsamala.
EZE 20:20 An-obunnoged-iba anga-islidik-nuggusad be dakmala. A-ibagi, bemar an-nug odummogoed, adi, bemar magar-an-dakmalaga, ani Bab-Jehová, be-Bab-Dummadid.’
EZE 20:21 ”Ar degi-inigwele, e-mimmigan angi gwisgusmalad. An-Igar-Maidba nanassurmalad, an-Igar-Mesisadba ibsassurmalad. We-igardi dule-eba-ibsaedga san-dula-gudigued-igalad. Deginbali, an-obunnoged-iba islidiksulidyob daksamarbalid. A-ulale, nega-dulesulidganba-gudimargu, an sae-itogedba bela obelogedgi binsaded.
EZE 20:22 Ar degi-inigwele, an-nug-dummarba-gued-ular, an weyob imaksasulid, adi, dulemar-yar-baid-baidgi-bukwamalad mer an-nug oichomalaga, ar wemar, an Egipto-yargi Israel-dulemar-onosad an-daksamalad.
EZE 20:23 Deginbali, nega-dulesulidganba an ega ise-sogar sogsabalid, dulemar-yar-baid-baidgi-bukwamaladse, degi, bela yar-baiganse an bemar oaisakioye,
EZE 20:24 ar ade, an-Igar-Mesisadba ibsassurmalad, an-Igar-Mamaid isdar-daksamalad, an-obunnoged-iba islidik daksasurmalad, unnila e-dadgan-e-bab-dummadyob-ibmar-imakleged-e-nug odummodii gusmalad.
EZE 20:25 A-ulale, an ega igar-nuedsurmalad uksad, degi, san-dula-gudigusulid-igar mesisad.
EZE 20:26 An e-bab-dummaganga-ibmar-uklegedgi isgumalaga an imaksad. We-e-bab-dummadyob-ibmar-imaklegedga e-mimmi-sailaginmalad-ogumakar-ukega an imaksad. Weyob an imaksad, adi, dukin emar gwayega, degi, magar an-dakmalaga, ani an Bab-Jehová gued.
EZE 20:27 ”Dule-machi, degisoggu, Israel-dulemarga be soge, ‘Bab-Jehová-Bela-Gangued-Nikadi weyob sogye: Be-dadgan we-bab-dummadyob-ibmar-imaklegedgine angi yolesmarmoye, degi, angi dummad-nosmarbarye.
EZE 20:28 An be-dadganga ise-sogar yar-ukoye-sogsagusad uksagua, be-dadgandi yar-mullugan dakarmalale, degi, sapi-bulamakgwichid dakarmalale, nued dakdamalad. Agi ibdurgan-oburgwega, agi ibmar-ukleged-sae-ito-an-imaked-ukmalaga nued dakdamalad. Agi ina-wawad ogumaksamalad, agi vino eosmarbalid.
EZE 20:29 Geb an ese egicha gusad: ¿Ar ibu-bab-dummadyob-ibmar-imakleged-e-negse bemar naddaye? A-ulale, emi, we-garda-narmaklenaidse Bamaʼye we-neg bileged.’ ”
EZE 20:30 Bab-Jehová sogdebalid: “Degisoggu, Israel-dulemarga be soge, ‘Bab-Jehová-Bela-Gangued-Nikadi weyob sogye: ¿Bemar, be-dadganyob isgumarmogoe? ¿Bemar, bab-dummadyob-ibmar-imakleged-e-nug-odummogedgi angi nomarmogoe?
EZE 20:31 Emi-ibadse, bemar we-bab-dummadyob-ibmar-imaklegedga ibmar-ukleged-ukedgi, degi, be-mimmigan soogi-ogumakar ega ukedgi, be isgudimalad. ¿Ar emigindi, bemar anse ibmar-wisgudanimala? An na dukin ise-sogar-soged, ar bipisaar an bemarga ibmar-sogosulid. Ani an Bab-Jehová-Bela-Gangued-Nikadi weyob soged.
EZE 20:32 ” ’Na bemar-binsadiidyob ibmar bipisaar guosulid: Ar bemar binsadiid, anmar dulemar-yar-baid-baidgi-bukwamaladyob, degi, dulemar-bamaladyob gubimoye. Amardi, suar, degi, akwa e-bab-dummadyob imakbukwad.
EZE 20:33 Ani an Bab-Jehová-Bela-Gangued-Nikadi, na dukin ise-sogar-soged, gandikidba, degi, ise-sae-itogedgi an bemar-e-reyga megoed.
EZE 20:34 Ar bia na bemar aisakiles bukmala, a-yarmargi an be-onomaloed, geb gandikidba, degi, ise-sae-itogedba an be-oatomaloed.
EZE 20:35 Dulemar-yar-baid-baidgi-bukwamalad-e-neg-dulesulidganba an be-sedmaloed. Agi, an-sunnad an bemar-sabsur-odurdakoed.
EZE 20:36 Ar Egipto-yar-e-neg-dulesulidganba an igi be-dadgan sabsur-odurdaksagusa, deyobi an sabsur-be-odurdakmogoed. Ani an Bab-Jehová-Bela-Gangued-Nikadi weyob soged.
EZE 20:37 Ar igi sibad-wawaad-edarbed na sibad-wawaadmar egwae, deyobi, an bemar egwamarmogoed, adi, an be-dadganbo igar-mesisadgi bemar dogmarmogagar.
EZE 20:38 Be-yarsulidgi-be-gudimaladgi an be-onomaloed. Ar degi-inigwele, dule-uayasulidamalad, degi, dulemar-angi-gwisgudimalad an bachikii obanguoed. Amardi, Israel-yarse dogosurmalad. Geb degine, bemar wisgumaloed, ani an Bab-Jehová gued.’
EZE 20:39 ”Israel-dulemar, ar bemargardi Bab-Jehová-Bela-Gangued-Nikadi weyob soged: ‘Ar be anba ibsabisurmalale, be namardo. Bab-dummadyob-ibmar-imaklemalad-e-nug be odummonamardo. Ar degi-inigwele, an-nug-islidikid be-ibmar-ukedgi, degi, be-bab-dummadyob-ibmar-imakleged-e-nug-odummogedgi mer bar be oichodii gumala.
EZE 20:40 Bela Israel-dulemar, degi, bela Israel-yargi-dulemar-gudidimalad an-yar-islidikidgi, Israel-yar-mullu-siidgi, an-nug odummomaloed. Ani an Bab-Jehová-Bela-Gangued-Nikadi weyob soged. Agi an be-abindakoed, agi be-ibmar-ukleged an bese egisoed. Agi be-ibmar-gebe-wesad, degi, na be ibu-anga-ibmar-ukbimaladse-bakale, be sedagoed.
EZE 20:41 Bemar yar-baid-baidgi-aisakis-bukwamaladgi, degi, neggweburmargi-aisakis-bukwamaladgi an be-onomaloed, geb an bela be-oatosmalale, we-dulemar-wagab an-isligwaled an bemarga oyogoed. Geb ina-wawad-yeer-yapannedyob an bemar-abingaoed.
EZE 20:42 Israel-yarse an bemar-sesale, a-yar be-dadganga an ise-sogar-sogsagusad ega ukoye. Geb degine, bemar wisguoed, ani an Bab-Jehová gued.
EZE 20:43 Agi be-nanadigusad, degi, be-ibmar-isgana-imakdigusad be ebinsaoed. Geb we-ibmar-isgana-imaksad-ular, na be dukin ima-itogoed.
EZE 20:44 Israel-dulemar, an bemargi nued-binsadele, wedi bemar-isganadaed-ularsulid, bemar-ibmar-isgana-imaked-ularsurbalid. Suli. An nug-dummarba-gued-ulaled. Geb degine, bemar wisgumaloed, ani an Bab-Jehová gued. Ani an Bab-Jehová-Bela-Gangued-Nikadi weyob soged.’ ”
EZE 20:45 Bab-Jehová anga sogded:
EZE 20:46 “Dule-machi, dad-nakwed-argan-nuedsik be atake. Asiki, Neguev-sapurgi-ibmar-guoed iduakwaa be soge.
EZE 20:47 Be soge: ‘Neguev-sapur, Bab-Jehová-e-gayaburba be itoge. Bab-Jehová-Bela-Gangued-Nikadi weyob soged: Be-abargi an soo ogaoed, bela sapimar-gagan-aramaksiid, degi, sapimar-dinnagwad, ogumakoed. We-soo gwen-ginnosulid, ar dad-nakwed-argan-nuedsik-akale, dad-nakwed-argan-sapiledse bela neg-ogumakoed.
EZE 20:48 Bela-dulemar wisgumaloed, ani an Bab-Jehová-guedi we-soo ogasa. We-soo bar ginnosulid.’ ”
EZE 20:49 Geb degine, an goted: “Bab-Jehová-Bela-Gangued-Nikadye, bela we-dulemar an-annik-sogmalad, ande binsa ee gordiiye.”
EZE 21:1 Bab-Jehová anga sogded:
EZE 21:2 “Dule-machi, Jerusalénʼsik be atake, anse-goled-neggi-ibmar-guoedgi be sunmake, Israel-yargi-ibmar-guoed iduakwaa be soge.
EZE 21:3 Bab-Jehová weyob-sogye, ega be soge: ‘An begi yoleged. Begi dule-nuegan-bukwadi, dule-isganamar-bukwadi an-es-suidgi an oburgoed.
EZE 21:4 Begi dule-nuegan-bukwadi, dule-isganamar-bukwadi an oberguoed. A-ulale, dad-nakwed-sapiled-akale, dad-nakwed-argan-nuedsikidse, an-es-suid bela dulemar-ogilogoed.
EZE 21:5 Deyobi, bela dulemar wisgumaloed, ani an Bab-Jehová, an-es-suid e-uka-yaba-maid an onosa, e-uka-yaba bar an odogosuli.’
EZE 21:6 ”Dule-machi, na be gwage-ulubgi-nunmakedgi bela dulemar-wagab ise-boar imake.
EZE 21:7 Ar bese egichiarmalale: ‘¿Ar ibiga weyob be boe?’ Ega be sogoed: ‘Ar ibmar-guoed-gayaburba-ular, an boe. We-gayaburba bela dulemar-niga egwannoed, bela gargangued sate namaloed, bela dobedba wawanmakdemaloed.’ ¡Ibmar-guoedi bato modanikid! ¡Emisgwa guoed! Ani an Bab-Jehová-Bela-Gangued-Nikadi weyob soged.”
EZE 21:8 Bab-Jehová anga sogdebalid:
EZE 21:9 “Dule-machi, ibmar-guoed iduakwaa be soge: ‘Bab-Jehová-Bela-Gangued-Nikadi weyob sogye, be soge: ” ’Es-suid-nugar bato nue-imakar maid, Es-suid-nugar bato datarmakale maid.
EZE 21:10 Dulemar-ogilogega nugar imaklesad, dakarmakega odatarmaklesad. ” ’An-machi-e-gaapoledi, suar-binsaledyob daksamaladgi ¿anmarde, weligwar-itogoe?
EZE 21:11 ” ’Ebugega es-suid odatarmaklesad. Es-suid nugar imaklesad, datarmakale imaklesad, dule-gindakedga-ukega deyob imaklesad.
EZE 21:12 ” ’Dule-machi, be gole, be nunmak-itogedba boe, ar we-es-suid an-dulamar-oburgoed, ar we-es-suid bela Israel-dummagan ogilogoed. Bela Israel-dummagan, an-dulamarba burgwemarmogoed. ¡A-ulale, bukib-itogedba be binasgar-bibyoge!
EZE 21:13 ” ’Bab-Jehová-Bela-Gangued-Nikadi weyob soged: Ar we-ibmarde wilubdakleged-igalad. Ar es-suid amba rey-gaapoledse-bakar, gwen dobsulid. Reydi, berguoed.’
EZE 21:14 ”Dule-machi, ibmar-guoed iduakwaa be soge, argan be god-god sae, es-suidga be soge: ‘¡Dulemar-naibi-saye, be gannar naibisabarye!’ We-es-suid dule-oburgwedid, bela dulemar bela ese earwilegoed.
EZE 21:15 Bela ese-niga argwatemaloed, degi, bukidar ese burgwemaloed. Es-suid-dule-gindakedi, neggwebur-yawagakmargi bato an nasiksad. We-es-suid dakar-gaega odatarmaklesad, dule-ogilogega nugar onikulesad.
EZE 21:16 Es-suid-dule-gindaked, argan-nuedsik, be bipinmake, argan-sapiledsik be bipinmake, bela dulemar be naibisae. Es-suid-dule-gindaked, bitisiki be bipinmakbie, asiki be bipinmake.
EZE 21:17 ”Argan an god-god imakmogoed, an-urwemaid bogilegoed. Ani an Bab-Jehová-guedi, soged.”
EZE 21:18 Bab-Jehová anga sogsabalid:
EZE 21:19 “Dule-machi, igar warbo be sobe, adi, we-igarmarba Babilonia-e-rey es-suidyalaba dagegar. We-igar-warbogwad yar-soggwengi onodagoed. We-igarmar-doglemaidgi, nug be nasike, adi, magar daklegega, bitid-neggweburse igarmar warmakmai.
EZE 21:20 Igar-soggwengi nug-nasiklegoedi oyogoed, Amón-dulemar-neggwebur-Rabáʼse warmakmaiye. Igar-baidgi nug-nasiklegoedi oyomogoed, Judá-neggwebur-sakdigar-siid-Jerusalénʼse warmakmaiye. Wemar-igarbali, we-dulemarse Babilonia-e-rey es-suidyalaba naoed.
EZE 21:21 ”Babilonia-e-rey igar-warbogwad-abingunaidgi gwisgunonikoed. Geb sogdagoed biti-igarba ede naoye. Degidbali, ibmar-wisguega sigumar bigni-bigni imaknai guoed, e-nuchu-burwiganse idaknai guoed, degi, ibmar-durgan-e-binagi ibmar-wisgunai guoed. Adi, wisguega, ede, bitid-neggweburgi gwichiguoe.
EZE 21:22 E-argan-nuedsik, Jerusalén-neggwebursik ega neg-oyolegoed, ase bila-ononaoed. Rey weyob igar ukdoed: ‘Neggwebur-yawagakmar-omukuega suar-dummagan-bular-ebipilemaladi guagwar urboye, arsanyob napa onakwemaloye, degi, neg-matusurmalad-walaled sobmarbaloye. Bila-onogega binnasur gormakmarye, dulemar-ogilomarye.’
EZE 21:23 ”Ar Jerusalén-dulemar Babilonia-e-reybo bato igar-mesissoggu, ega be ibmar-guoed-iduakwaa-sogedi itogosurmalad, gakanye bimaloed. Degi-inigwele, Babilonia-e-rey deyob imakoedi, Israel-dulemar na e-isgusad-ebinsaega imakoed. A-ulale, Israel-dulemar yogasaar galemaloed.
EZE 21:24 ”A-ulale, Bab-Jehová-Bela-Gangued-Nikadi weyob soged: ‘Be-isgued-ebinsaega imaklesad, be-uayasulidaed wisgulesad, be-ibmar-isgana-imaked daklesad. A-ulale, bemar yogasaar galemaloed.’
EZE 21:25 ”Israel-e-rey, bedi dule-gindakedid, dule-isganad, be-iba omosad, be-sabsur-odurdakleged-wachi omosad.
EZE 21:26 Bab-Jehová-Bela-Gangued-Nikadi weyob soged: ‘Mor-gurgin-nonogi-bipirmakaled be unge, ologurgin be unge, ar bela ibmar gwagoed. Na dule-san-bipi-imakdiid odummolegoed, na dule-san-dummarba-imakdiid nug-mesagwar guoed.
EZE 21:27 An bela negmar bibisgoed, akwamarbi-ganna-ganna-bukwa an imakoed. Weyopira, Babilonia-e-rey neg-imaknonikoed. A-dulega an igar ukoed, adi, deyopira neg-saegar.’ ”
EZE 21:28 “Dule-machi, ibmar-guoed iduakwaa be soge: ‘Amón-dulemar Israel-dulemargi-dododimaladga, Bab-Jehová-Bela-Gangued-Nikadi weyob soged: Dulemar-ogilogega es-suid e-ukagi guagwar onolesmaid. Dulemar-oburgwega, odatarmaklesad.
EZE 21:29 Es-suid, we-dulemar-isgana-e-dukar egwannoed, ar e-negburgan-daked gakanad, degi, e-ibmar-guoed-soged gakanbalid. Ar e-iba omosad, e-sabsur-odurdakleged-wachi bato omosad.
EZE 21:30 ” ’Es-suid, be-ukayaba be gannar megnae. Na be ibi-yargi daniki, na be bia-soblesa, agi, an bega igar itogoed.
EZE 21:31 An-urwed be itogoed, an-sae-itoged sooyobi an begi barmidoed. Dulemar-ablis-eomaladga, dulemar-gindakmaladga an be-urmakoed.
EZE 21:32 Sooga be gaganyob guoed, be-ablis bela yar-ganai guoed. Napneggi bar be ebinsalegosulid. Ani an Bab-Jehová-guedi weyob soged.’ ”
EZE 22:1 Bab-Jehová anga sogded:
EZE 22:2 “Dule-machi, neggwebur-dule-gindakedga be igar-naboge, bela e-ibmar-isgana-imaksad be barsoge.
EZE 22:3 Bab-Jehová-Bela-Gangued-Nikadi weyob sogye, ega be soge: ‘Neggwebur-e-dulemar-gindaked, be nuedar-wiles. Neggwebur-na-dukin-san-oichogega bab-dummadyob-ibmar-imakleged-sobsamalad, be nue-wiles.
EZE 22:4 Ablis-eosad-ular be isgusad, bab-dummadyob-ibmar-imakleged be sobsadi, be-oichosad. Be-wachi-omogega be imaksad, be-birgamar-bergued owarmaksad. A-ulale, dulemar-yar-baid-baidgi-bukwamalad be-nug-oichomalaga, degi, bela neggweburmar-bukwamalad begi dodomalaga an imakoed.
EZE 22:5 Neggwebur-isgana, neggwebur-nug-isgana, be-walik neggweburmar-bukwamaladi, degi, begi-dikasur-bukwamaladi begi dodomaloed.
EZE 22:6 ” ’Be dakena, Israel-dummagan-negdakmamaidi e-gangued-nikadba unnila ablisbi be-igarmarba eomamaid.
EZE 22:7 Be-dulemar na e-babgan, na e-nangan, mesagwar imakmalad. Dule-yar-baidgined sabsur-imakmalad, sergan-sated-ibe, degi, ome-ei-sui-burgwisad-ibe ibmar sumalad.
EZE 22:8 An-ibmar-islidikmalad baisur-daksamalad, an-obunnoged-iba, iba-islidikidsulidyob dakmalad.
EZE 22:9 Be-abargi-dulemar-gudimaladi, na e-gakansaedba dulemar-ibe ablis-eodiid. Yargi bab-dummadyob-ibmar-imakleged-goled-neg-siidgi mas-gundii damalad, degine, ibmar-isgana-imakdii damarbalid.
EZE 22:10 Abala, e-bab-ome-ebo negsichigi galagwensuli nanadimalad, deginbali, ome-e-igar-dakdiidgi ese-goledse imakmarbalid.
EZE 22:11 Abala, dule-baid-e-ome-ebo negsichigi galagwensuli nanadimalad, baigan na e-bala-ebo negsichigi galagwensuli nanadimalad. Deginbali, abala na e-bun-e-babsikidgi aibindimarbalid.
EZE 22:12 Deginbali, be-abargi dulemar-wegiimalad gudidibalid: Dule-gindakega manigi-bennuklemalad. Dule bese mani-egichisadgi e-gaka be bipisur gaed. Sabsur-imakedgi dule-baid-ibe be ibmar-sued. Degidbali ¡be an-ieded! Ani an Bab-Jehová-Bela-Gangued-Nikadi weyob soged.
EZE 22:13 ” ’Be ibmar-isganagi mani-onosad-ular, degi, be-igarmarba ablis-aryosad-ular, an argan ogoloed.
EZE 22:14 An sabsur-be-odurdakye sogele, ¿an-abin be gwichigusar be itoge? ¿Gangued-nika nader be itoge? Ani an Bab-Jehová-guedi weyob soged, sogedba an imakoed.
EZE 22:15 Dulemar-yar-baid-baidgi-bukwamaladse, degi, neggwebur-bamaladse an be-oaisakioed. Degidbali, an be-isgued elioed.
EZE 22:16 Dulemar-yar-baid-baidgi-bukwamaladse be dukin nug-mesagwar guoed. Geb degidbali, be an-wisguoed, ani an Bab-Dummad-Jehová gue.’ ”
EZE 22:17 Bab-Jehová anga sogdebalid:
EZE 22:18 “Dule-machi, bela Israel-dulemar anga esgoro-gordikid-e-durwayob gued, esgoro-estañoʼye-nugad-e-durwayob gued, esgoro-e-durwayob gued, degi, gingwa-e-durwa madu-yolegedgi besdamaladyob anga gunonikid. Mani-e-durwayob gunonimalad.
EZE 22:19 A-ulale, ani an Bab-Jehová-Bela-Gangued-Nikadi weyob soged: ‘Ar bela bemar ibmar-durwaga gunonisoggu, Jerusalén-neggweburgi an bemar-urboed.
EZE 22:20 Ar igi mani, esgoro-gordikid, esgoro, gingwa, degi, esgoro-estañoʼye-nugad bela bular madu-yolegedgi oatolege, geb odurega soo ogannoledae, ar deyopira an-sae-itogedgi an be-atomaloed. Geb an-sae-itogedgi ibmar-odurelegeyob an be-odurmaloed.
EZE 22:21 Danakwaa an be-urbemaloed, geb an-sae-itogedi an bemargi soo-ganguddaedyob ogannogoed, geb neggwebur-negabargi an-sae-itogedgi an be-odurmaloed.
EZE 22:22 Ar bemar madu-yolegedgi mani-odurlegeyobi neggwebur-negabargi odurlemaloed. Deyobi bemar wisgumaloed, ani an Bab-Jehová an-sae-itogedgi an sabsur-be-odurdaksamala.’ ”
EZE 22:23 Bab-Jehová anga sogdebalid:
EZE 22:24 “Dule-machi, Israel-yarga be soge: ‘Be napa-sunnasulidga gued, sae-itoged-ibagi oglessulidyob be gued.’
EZE 22:25 Achumigur-nono-wawaadmar mas-ichimakedyobi, Bab-Dummad-gayaburba-barsogmaladi gumalad. E-yarmargine dulemar-wiodimalad, e-ibe ibmar-atursadimalad. Ibmar-nuegan emar-ibe egadga na imakdimalad. Deginbali, bukidar omegan-sui-surguega imakdimarbalid.
EZE 22:26 E-dule-irwa-anse-gormalad an-Igar-Maidgi yolesmalad, degi, an-ibmar-islidikmalad ibmar-islidikidsuliyob daksamalad. Wemar daksulid, biti ibmar-islidikidi, biti ibmar-isganabali. Deginbali, ibmar-islidikid, ibmar-islidikidsulidbo akar-dakedgi odurdaksurmarbalid. An-obunnoged-ibagi obunnosurmalad. A-ibagi, an-nug odummossurmalad.
EZE 22:27 Na e-negsemamaidi achu-burburud mas-ichimakedyob gumalad, ablis-eogega, degi, dulemar-gindakega guagwar gudidimalad, adi, mani bur bule nikumalagar.
EZE 22:28 An-gayaburba-barsogmaladi, negburgan-nabirsulid-dakedba ibmar-napiragwadga imakmalad. Ani an ega-ibmar-sogye sogdamalad. Degi-inigwele, we-ibmarmar napiragwadsulid. Ar an ega bipisaale sunmaksasulid.
EZE 22:29 Dulemar-nainu-dummagan-nikad atursamalad, dulemar-ibe sabsulidgi ibmar sumalad, dule-ibmar-abesagudiid sabsur-imakmalad, degi, dule-wileged sabsur-imakmalad, deginbali, dule-yar-baidgined sabsur-imakmarbalid.
EZE 22:30 ”Wemar-abargi dule-gwensak an-dulamar-bendakega, an-dulamar-irwa galu-matusulidyob an-asabin-gwisguega an amidii gusanad. Adi, we-dule, an-dulamar-anar anse golega, melle an-dulamar anse berguega, an amidii gusanad. Ar degi-inigwele, dule-wargwen an gwen amissur gusad.
EZE 22:31 Degisoggu, an-sae-itogedgi an sabsur-odurdakoed, soo ibmar-ogumakedyobi an-sae-itogedgi an obelogoed. Degi, na bela e-ibmar-isgana-imaksadba sabsur-odurdaklemaloed. Ani an Bab-Jehová-Bela-Gangued-Nikadi weyob soged.”
EZE 23:1 Bab-Jehová anga sogded:
EZE 23:2 “Dule-machi, omegan walabo nan-galagwenmalad gudii gusad.
EZE 23:3 Yagwaga-gunonimalad-akale, gambanuchu-imakdii gudmalad. Egipto-yargi abirgunagwarsuli galagwensur nanasmalad. Egipto-yalagine, niagwale e-mam-ebulesad na baisur-itosmalad. E-mam-gannarba-gannarbagwad e-ibe niagwale bele-bele imaksamalad. Bar yaganaga gunonisurmalad.
EZE 23:4 Bunagwa-sailaginedi, Aholaʼye nugad, e-urbadi, Aholibaʼye nugad. We-bunamala an nikusad. Anga mimmigan baksamalad. (Ahola, Samaria gued. Aholibaʼdi, Jerusalén gued.)
EZE 23:5 ”Amba an Ahola-nikadgine, Ahola an-dikarba yoledii gusad. Surbinsa Asiria-dulemar-abedii gusad, ar amar, e-ai-nuedga gusad.
EZE 23:6 Asiria-dulemarde, bela sorda-bila-onomalad mor-suir-akwagiid yomaladid, dummagan-negdakmamaidid, sordamar-e-dummaganad, sapingan-yeerdaklemaladid, sordamar-moli-birgi-sii urwemaladid.
EZE 23:7 ”Ahola gambanuchuyobi Asiria-dulemar bur nug-nikamaladga san-urmaksad. Na bela e-ai-nuedga-imakdii gusad, degine, bela Siria-dulemar-e-bab-dummadyob-ibmar-imaklemaladba isgusad.
EZE 23:8 Egipto-yargi gambanuchu-imakdigusadi, Ahola gwen-indaksasulid. Yagwad-akale, bukidar macherganbo-megdii gusad. E-mam-gannarba-gannarbagwad e-ibe niagwale bele-bele imaksamalad. Aholaʼgine bela-bela nialesmalad.
EZE 23:9 ”A-ulale, e-ai-nuedga-imakdiidga an urmaksad. Asiria-dulemarga an urmaksasunnad. Surbinsa amarbina sogdii gusad.
EZE 23:10 Asiria-dulemar Ahola-e-abgangi dodosmalad. Ahola-ibe machimala, degi, bunamala susmalad. Geb Aholaʼdi es-suidgi oburgwismalad. Bela omegan, Ahola e-isgusadba-sabsur-odurdaklesadi, wisgusmalad.
EZE 23:11 ”E-urba-Aholiba, weyob e-ior-gusad na daksa gusanad, degi-inigwele, aka bur bule e-iorba na galagwensuli guded. E-iorba bur bule gambanuchu-imakdii gusad.
EZE 23:12 Aholiba surbinsa Asiria-dulemar-abedii gusmogad. Asiria-dulemarde, bela dummagan-negdakmamaidid, sordamar-e-dummaganad, sorda-bila-onomalad mor-garge yomaladid, sapingan-yeerdaklemaladid, sordamar-moli-birgi-sii urwemaladid.
EZE 23:13 ”Aholiba isguedgi-gaamakdii an daknonikid. E-ior-Ahola-isgudigusadbali, na isgudii gusmogad.
EZE 23:14 ”Degi-inigwele, Aholiba bur bule gambanuchu-saed baligannosad. Aholiba dakalid, galugi ibmar-wilubmar weyob sobar nanai: Caldea-dulemar-wilub ginnidgi magar nanai,
EZE 23:15 a-dulemarde, molidub-ibmar-ukagi-sobaled nanai, degi, e-nonogi mor-gurgin-bipirmakaled-sii nanai dakalid. Degi, bela-we-wilubmar-sobarmaladi, sordamar-e-dummaganyob-daklege dakalid. Babilonia-dorgan-Caldea-yargi-gwalulesmaladyob e-wilubgan-sobarmalad dakleged.
EZE 23:16 ”Aholiba a-ibmar-wilubmar-sobaled dakargua, nue-e-bina-sogsad. Geb Caldea-yarse gayaburba-berbemalad barmisad.
EZE 23:17 Geb Babilonia-dorgan ese nonimalad, Aholiba-ebo na galagwensuli gusmalad. Babilonia-dorgan Aholibaʼbo bukidar gambanuchu-imakdii gusad. Geb Aholiba wemar-ima dakalid. A-sorbali, egi aibacha gusad.
EZE 23:18 Aholiba na bingesuli dulemar-wagab gambanuchu-imakdii gusad, na san-urmakdii gusad. Geb degine, an igi iduar e-ior ima dakargusa, deyobi an Aholiba ima daknonimogad.
EZE 23:19 Degi-inigwele, Aholiba bur bule gambanuchu-imakdii guded. Egipto-yargi yagwaun gambanuchu-imakdigusad ebinsad gusad.
EZE 23:20 Ar surbinsa Egipto-dulemar-abedii gusad, ar amar, e-ai-nuedga gusad. Egipto-dulemarde, moli-uayasuidyob na e-abgan nikamaladid, moliyob abgan-burba mimaladid.
EZE 23:21 Deebali, Aholibaʼde, yagwaun galagwensuli-gudigusad gannar ebinsad gusad. Deunni, Egipto-dulemar niagwale e-mam-ebusadi na baisur-itosad. E-mam-gannarba-gannarbagwad e-ibe niagwale bele-bele imaksamalad. Bar yagwaga gunonisurgusad.
EZE 23:22 ”Aholiba, a-ulale, Bab-Jehová-Bela-Gangued-Nikadi weyob soged: ‘Emide, be-aimar-nuedga-be-imakdigusad-imadakedi, begi-aibinega an imakoed. Emide, bela dulemar-napneggi-bukmalad an begi barmidagoed:
EZE 23:23 Babilonia-dorgan, bela Caldea-dulemar, Pecodʼginmalad, Soaʼginmalad, degi, Coaʼginmalad. ” ’Asiria-dulemar danimarmogoed, bela wemar, sapingan-yeerdaklemaladid, dummagan-negdakmamaidid, sordamar-e-dummaganad, sorda-bila-onomaladid, degi, dule-nuga-nikamaladid, bela wemar moli-birgi-sii nanamaladid. Bela we-dulemar an begi barmidagoed.
EZE 23:24 Bukidar begi ur-napaginmalad-bila-onomaladgi danimaloed. E-sorda-bila-onomaladi, bormo-gurgin-sii-sii, degi, sigu-abgaed-gani-gani begi danimaloed. We-dulemar bega igar-nabomalaga an imakoed. E-igar-mamaidba bega igar nabomaloed.
EZE 23:25 An-urwed be itogoed, wemar sabsur-be-imakmaloed. Be-ibe asu sikmaloed, uaya sikmarbaloed. Dulemar-a-ibagi-oburgwilegosurmaladdi, es-suidgi oburgwilemaloed. Deginbali, we-dulemar be-annik be-machimala sumaloed, be-bunamala sumarbaloed. Dulemar-oburgwilegosurmalad-baigandi soogi ogumaklegoed.
EZE 23:26 Mor be-ibe ungemaloed, ormar be-ibe sumarbaloed.
EZE 23:27 Degidbali, Egipto-yargi be-galagwensuli-gudigusad, be-gambanuchu-imakdigusad an obelogoed. Egipto-dulemar be bar-dakosulid, deginbali, Egipto-yargi be bar binsaosurbalid.’ ”
EZE 23:28 Bab-Jehová-Bela-Gangued-Nikadi weyob soged: “Be we-dule-isdar-dakedga, an be-urmakoed, be we-dule-ima-dakedga an be-ukoed.
EZE 23:29 A-dulemar, isdar-be-dakmaloed, degi, bela be-ibe ibmar-sumaloed. Uka-swanga be-obemaloed, bela be-gambanuchu-imakdigusad wisgulegoed. Be-galagwensuli-guedginbi-binsadigusad, be-bingesulidgi-galagwensuli-nanadigusad bela wisgulegoed.
EZE 23:30 We-ibmar-deyob-guoedi, dulemar-yar-baid-baidgi-bukwamaladbo be gambanuchu-imakdigusad-ulale, deyob guoed. Degi, e-bab-dummadyob-ibmar-imaklemalad-e-nug be odummodigusad-ulale, deyob guoed.
EZE 23:31 Ar be-ior-nanadigusadyob, be nanadimogad. A-ulale, be-ioryob sabsur-odurdaklegega an be-imakoed.
EZE 23:32 ”Bab-Jehová-Bela-Gangued-Nikadi weyob soged: ‘Be-ior-nog-gobsadi be goboed, we-noga, nog-nogaregedid, nog-dummadid. We-nog-yagine, begi-isdar-dodolegoedi, ena siid. Ibgwensur-be-daklegoedi, ena siid.
EZE 23:33 Mumguedi, nunmaked-itogedi, egi ena siid. We-noga, dule-obeloged-nogad, walagwen-suli-suli-itoged-nogad. We-noga, be-ior-Samaria-nogad.
EZE 23:34 E-asase-bakale, be goboed. Geb a-sorbali, a-nog be mamaroed. Geb e-goamargi, be dukin binasgar daas-daas imakdoed. Ani an we-ibmar-guoed soged. Ani an Bab-Jehová-Bela-Gangued-Nikadi weyob soged.’ ”
EZE 23:35 A-ulale, Bab-Jehová-Bela-Gangued-Nikadi weyob soged: “Ar be an-iessoggu, degi, be angi aibachasoggu, a-ulale, be-galagwensuli-gudigusad-ular, degi, be-gambanuchu-imakdigusad-ular, be sabsur-odurdaklegoed.”
EZE 23:36 Bab-Jehová anga sogded: “Dule-machi, ar be Aholaʼga, Aholibaʼga, ¿igar-nabogosursi? E-ibmar-isgana-imaksad ega be soge.
EZE 23:37 We-omegan sui-dikarba yolesmalad, degi, dulemar-ablis eosmalad. Na e-bab-dummadyob-ibmar-imaklegedbo e-sui-dikarba yolesmalad. An-ega-mimmigan-baksa-gusadi, we-bab-dummadyob-ibmar-imaklegedga soogi-ogumakar uksamalad, masyob ega uksamalad.
EZE 23:38 Deginbali, anse-goled-neg-oichosadgi angi nue-yolesmarbalid. Aginbali, an-obunnoged-iba-islidikid, iba-islidikidsulidyob daksamarbalid.
EZE 23:39 Na e-bab-dummadyob-ibmar-imakleged-e-nug-odummogega e-mimmigan-oburgwisad-ibagi, anse-goled-neggi uboddamalad. Degidba, an-neg-oichosmalad. We-ibmarmala, an-negyagi deyob imaksamalad.
EZE 23:40 Deginbali, dulemar-yar-baidginmalad-dikasulid-dagega imaksamarbalid. A-dulemar nonigua, we-omegan-warbogwad nue-obsamalad, ibya-siga magsamalad, degi, ormar-galagwensuli yosmalad.
EZE 23:41 A-sorbali, bato mese-guagwar-siid-asabin ganbuled-gargedgi sigismalad. A-mesegi ina-wawadikid, degi, olivo-gwallu-anga-nug-imaklesad sismalad.
EZE 23:42 ”Dule-bukidar iba-onolenaidgi-oimakbukwad itoleged. We-dulemardi Sabeo-dorganad, nega-dulesulidganba-danimaladid. Amardi we-omeganga ibmar-sakwagi-nasikleged nasiksamalad. E-nonogi orgurgin-yeerdakleged ega sismarbalid.
EZE 23:43 ”Geb we-ome na e-sui-dikarba-yoledii-sered-gudedgi an binsaded: ‘¿Emigindi, we-ome-gambanuchu-imakedbo amba galagwensuli gumarbalode?’
EZE 23:44 Ar ome-gambanuchubo-megedyobi, we-omebo megismalad. Weyobi, ome-gambanuchu-saed-Aholaʼye-nugadbo, degi, Aholibaʼye-nugadbo megismalad.
EZE 23:45 Degisoggu, negsichidgi-abirgunagwarsuli-nanaed-igar-maidba, degi, dule-gindaked-igar-maidba, dule-nuegan we-omeganga igar-nabogoed. Ar ade, we-omegan abirgunagwarsuli negsichidgi nanadimaladid, dule-gindakmaladbalid.”
EZE 23:46 Bab-Jehová-Bela-Gangued-Nikadi weyob soged: “We-omegangi-gwisgumalaga bela dulemar na atomala, dobee-itogega be imakmala, degi, e-ibe be ibmar-sumala.
EZE 23:47 Akwagi be we-omegan makmala. Es-suidgi be e-san goamakmala. E-machimala be oburgwemala, e-bunamala be oburgwemala. E-negmar be ogumakmala.
EZE 23:48 ”We-galagwensuli-guedi, an we-yargi obelogoed. Deyobi, bela-omegan na wisi-gudimaloed. We-omegan-ibmar-isgana-imaksadba ibmar imakosurmalad.
EZE 23:49 We-omegan-galagwenmalad-warbogwadi, galagwensuli-nanasadba sabsur-odurdaklemaloed, degi, bab-dummadyob-ibmar-imakleged-e-nug-odummosadba, sabsur-wilemaloed. Degidbali, wisgumaloed, ani an Bab-Jehová-Bela-Gangued-Nikad gue.”
EZE 24:1 Deunni, anmar birgabakebakgus Babiloniaʼgi-bukwadgine, gaka nii-warambegwad-ibambegine, Bab-Jehová weyob anga sokalid:
EZE 24:2 “Dule-machi, emi-iba-naid be narmake, ar Babilonia-e-rey Jerusalén-dulemargi-bila-onogega emi-ibagi Jerusalén-ebiris bukwad.
EZE 24:3 We-dulemar-uayasulidamaladga burbar-sunmakleged be soge. Bab-Jehová-Bela-Gangued-Nikadi, weyob sogye ega be soge: ‘Sooyagi bormo be onakwe, bormoyagi dii be eogo.
EZE 24:4 Bormoyagi sanmar-goamakaled be obato, e-dua-sanmar-bur-nuegan, e-yarganmar-bur-nuegan be obato. Degi, e-garmar-bur-nuegan bormoyagi be obatebalo.
EZE 24:5 Sibad-wawaad-wardadagwad be suo. Nue dii gwakwarmakegala, bormo-urba sapanmar be yoe-yoe sao, adi, garmar ise-akwiguar guegar.’ ”
EZE 24:6 Ar Bab-Jehová-Bela-Gangued-Nikadi weyob soged: “¡Neggwebur-ablis-eoged, be wiles! Bormo-saamechadyob be siid, be-saamechad geg elileged. Yamo ise-dakarsuli, gwa-gwagwen san-goagan-bormoyagi-bukwad be sue.
EZE 24:7 ”Ar neggweburgi dulemar-ibe-ablis-eolesgusadi, yaisur naid. Ar ade, akwa-dummad-birgi ablis milesad. Ukubba ablis-oubogega, napagi ablis-eossurmalad.
EZE 24:8 An sae-itogegala, an buged-mai imakegala, ablis-eolesad akwa-dummad-birgi-dinguega an imakoed.”
EZE 24:9 Degisoggu, Bab-Jehová-Bela-Gangued-Nikadi weyob soged: “¡Neggwebur-ablis-eoged, be wiles! An bela-belad soo duurmaksii imakoed.
EZE 24:10 Sapanmar gatik odunnumaksii an saoed, san ise-akwiguarguega, an soo ogaoed. Bela san-nis dinnaa guedse an imakoed, degi, bela garmar gummakedse an saoed.
EZE 24:11 Geb sorbali, sooyagi bormo-ollogwad an sioed, adi, bormo sooba ginnitibi sigegar. Degidbali, e-satemaksiid surgudoed, e-saamechad bergudoed.
EZE 24:12 Ar we-bormo bela-bela saamechasoggu, amba sooginbela geg osuloleged.
EZE 24:13 ”Jerusalén-neggwebur, be-galagwensuli-gudigusad an bega elibi gusanad, ar bedi bega-elied gwen abessulid. A-ulale, an-sae-itogedba-sabsur-be-odurdakoed-sorbali, geb be swilidik gunonisunnoed.
EZE 24:14 ”Ani an Bab-Jehová-guedi we-ibmar soged. An we-ibmar imakedsegad. An-sunnad an imakoed, an sikirmakosulid. An wile-be-dakosulid, deginbali, an ibmar-sogsad an gannar-osulogosurbalid. Be-daedba, be-ibmar-imakedba an bega igar-nabogoed. Ani an Bab-Jehová-Bela-Gangued-Nikadi weyob soged.”
EZE 24:15 Bab-Jehová anga sogdebalid:
EZE 24:16 “Dule-machi, be-ome na be bela-bela-binasogdiid ukiagwale, an be-ibe suoed. Melle be boo, melle be naibi itogo, degi, melle be ibyanis eobalo.
EZE 24:17 Unnila, gwage-ulubgi be nunmak itogo, melle be burgwismaladba nunmak itogo, mor-gurgin-bipirmakaled nonogi be sio, sapat be yoo, melle wagar-emurkwaa be imako, degi, melle dule-burgwedgi-masgulleged be gunbalo.”
EZE 24:18 Wakdaradba dulemarga an sunmaksagua, sedogidba an-ome burgwisad. Bangine, anga-ibmar-soglesadba, an ibmar imaksad.
EZE 24:19 Dulemar anga sokalid: —Anmarga be soge, be weyob-daedi, ¿ibi anmarga obare?
EZE 24:20 Geb dulemarga an sogde gusad: —Bab-Jehová weyob anga sogsad, weyob anga igar uksabalid.
EZE 24:21 Israel-dulemarga iduakwaa ibmar be sogo, weyob Bab-Jehová-Bela-Gangued-Nikadi sogye: ” ‘Anse-goled-nega an obelogoye. We-nega bemar-gangued-dummarba-imaked-negad. Na be we-neg yeer dakdimalad. Na be we-negbina bela-bela-sogdimaladi, an obelogoye. Degi, Jerusalénʼgi be machimala-obes alidi, bunamala-obes alidi, es-suidgi burgwemaloye.’ ”
EZE 24:22 Emide, bemar anyopira imakmarmogoed: Wagar-emurkwaa be imakosurmalad, dule-burgwedgi-masgulleged be gunnosurmarbalid.
EZE 24:23 Mor-gurgin-bipirmakaled nonogi be simaloed, sapat be yomaloed, be boosurmalad, be naibi itogosumarbalid. Ar be-isgued-ular, be bergumaloed. Na be muchub-muchub wiles-gornanai gumaloed.
EZE 24:24 Bab-Jehová sogdebalid: “Ezequiel bemarga wilubga guoed. Ezequiel-ibmar-imaksayob be samarmogoed. Ar ibmar weyob gusale, bemar wisgumaloed, ani an Bab-Jehová-Bela-Gangued-Nikadi gue.
EZE 24:25 ”Dule-machi-Ezequiel, anse-goled-neg an obelogoed. We-nega we-dulemar-gangued-dummarba-imaked-negad. Na we-dulemar, we-neg yeer dakdimalad. We-dulemar, we-negbina bela-bela-sogdimaladi, an obelogoed. Degi, Jerusalénʼgi e-machimala-besmaladi, e-bunamala-besmaladi, es-suidgi anse oburgwilegoed. Deyob-neg-guoed-ibagine,
EZE 24:26 dule-gwensak-wakinnoedi bega gayaburba sognonikoed.
EZE 24:27 A-ibagine, be-gwabin bega nollomakdoed, geb nabir be sunmakdoed. Geb degine, dule-wakicha-nonikidbo be sunmakoed. Wemarga be wilubga guoed, degidbali, na wisgumaloed, ani an Bab-Jehová gue.”
EZE 25:1 Bab-Jehová anga sogded:
EZE 25:2 “Dule-machi, Amón-dulemar-e-yarsik be atake, a-yargi ibmar-guoed iduakwaa be soge.
EZE 25:3 Bab-Jehová-Bela-Gangued-Nikad-e-gayaburba itomarye ega be soge: ‘Ar anse-goled-neg-obelolenaigua, Israel-yar-bergunaigua, degi, Judá-dulemar gales-ebipilemaigua, bemar yeer-itos gusmalad.
EZE 25:4 A-ulale, bemar-Amón-dulemar, dulemar-dad-nakwedsikmaladga an bemar-urmakoed. Amala, bemar-abargi e-dordonegmar urbemaloed, be-walik gudii gumaloed. Ibmar-bemar-weoed gunmaloed, be-moli-bebe-nikad-e-nunis gobmaloed.
EZE 25:5 Rabá-neggwebur, moli-yargan-mureged-e-masbi-digarnai an imakoed, degi, Amón-yardi sibad-wawaad-e-galuga an obinyoed. Geb degine, bemar wisgumaloed, ani an Bab-Jehová gue.’ ”
EZE 25:6 Bab-Jehová-Bela-Gangued-Nikadi weyob soged: “Amón-dorgan, ar bemar argan-ogochamalad, yeer-itogedba ichomaksamalad, degi, Israel-dulemargi dodosmalad.
EZE 25:7 A-ulale, an sabsur-be-odurdakoed, degi, dulemar-yar-baid-baidgi-bukmaladga an be-urmakoed, adi, be-ibmar-nikad be-ibe sumalagar. Neggweburmar-abargi an be-obelogoed, belagwable an be-oberguoed. Geb degine, be wisgumaloed, ani an Bab-Jehová gue.”
EZE 25:8 Bab-Jehová-Bela-Gangued-Nikadi weyob soged: “Ar Moab-dulemar, Seir-dulemar weyob Judá-dulemar-annik-sogmalad: ‘Judá-dulemar, bela dulemar-yar-baid-baidgi-bukwamaladyob damarmoye.’
EZE 25:9 A-ulale, an Moab-yargi igar-dummad egaoed. A-igarba we-neggweburmar-bukwad an obelogoed: Bet-Jesimot-neggwebur, Baal-Meón-neggwebur, degi, Quiriataim-neggwebur. We-neggweburmala, Moab-dulemar-e-nug-ogannogedga gumaladid.
EZE 25:10 Dulemar-dad-nakwedsikmaladga an Moab-dorgan, degi, Amón-dorgan an urmakoed. Amón-dulemardi bipisaale, bar-ebinsalegosulid.
EZE 25:11 An Moab-dorgan sabsur-odurdakoed. Degidbali, wisgumaloed, ani an Bab-Jehová gue.”
EZE 25:12 Bab-Jehová-Bela-Gangued-Nikad weyob soged: “Edom-dulemar, Judá-dulemar-buged-mai imaksad. Degisoggu, ibmar-imaksad bela-bela bur egi ataklesad.
EZE 25:13 A-ulale, ani Bab-Jehová-Bela-Gangued-Nikadi weyob soged: ‘An Edom-yar sabsur-odurdakoed, bela e-dulemar, e-ibmar-durgan an ogilogoed. Napabi-nai an imakoed. Temán-neggwebur-akale, Dedán-neggweburse bela es-suidgi burgwemaloed.
EZE 25:14 An-Israel-dulamarba an Edom-dorgan buged-mai imakoed. An-dulamar, Edom-dulemargi an-sae-itogedba, degi, an-urwedba ibmar imakmaloed. Weyobi, an-buged-mai-imaked dakmaloed. Ani an Bab-Jehová-Bela-Gangued-Nikadi weyob soged.’ ”
EZE 25:15 Bab-Jehová-Bela-Gangued-Nikadi weyob soged: “Filistea-dulemar ega-ibmar-isganaga-guosuliyob buged-mai imaksamalad. Ar dikasurgus Judá-dulemar e-isdarad-gued-ulale, Judá-neggwebur bela-bela isdar-dakedgi obelosmalad.
EZE 25:16 A-ulale, ani Bab-Jehová-Bela-Gangued-Nikadi weyob soged: ‘Filistea-dulemar an sabsur-odurdakoed. An Cereteo-dulemar ogilogoed. Degi, dulemar-amba-demar-gakaba-bukwamalad an obelogoed.
EZE 25:17 Anse Filistea-dulemar sabsur-buged-mai guoed. An-urwedgi an sabsur-odurdakoed. An buged-mai-imaksale, wisgumaloed, ani an Bab-Jehová gue.’ ”
EZE 26:1 Deunni, anmar birgambe-gakagwensakgus Babiloniaʼgi-bukwadgine, gaka nii-wargwenad-ibagwengine, Bab-Jehová weyob anga sokalid:
EZE 26:2 “Dule-machi, Tiro-dorgan weyob dodoakwaa Jerusalén-annik sogsad: ‘Dulemar-yar-baid-baidgi-bukwamalad-e-yawagakga-gwichidi bibichidye. E-yawagakmar anga bipisur argadye. Ani an mani-ibedga-gudmosunnoye, Jerusalénʼdi wese bergudsunye.’
EZE 26:3 A-ulale, ani an Bab-Jehová-Bela-Gangued-Nikadi weyob soged: ‘Tiro, an begi gwichiguoed. Ar igi bukidar demargi, demar-mullugana mullumakardae, deyobi, bukidar dulemar-yar-baid-baidgi-bukmalad begi gwichigudamalaga an imakoed.
EZE 26:4 Galu-matusulid-Tiro-neggwebur-ebiris-maid bibisgemaloed, e-neg-matusurmalad omukumaloed. E-ukubse-bakale, an durwioed, akwasaila-swirigwadyob an obegoed.
EZE 26:5 Tiro-neggwebur demar-abargi sakimar-oaedga guoed. Ani an Bab-Jehová-Bela-Gangued-Nikadi weyob soged. Dulemar-yar-baid-baidgi-bukwamaladi, Tiro-neggwebur-ibe ibmar-sumaloed.
EZE 26:6 E-dulemar gakaba-bukwamaladi es-suidgi ogilolemaloed. Degidbali wisgumaloed, ani an Bab-Jehová gue.’
EZE 26:7 ”Ani an Bab-Jehová-Bela-Gangued-Nikadi weyob soged: ‘Dad-nakwed-argan-sapiledsik Babilonia-rey-gandikid-Nabucodonosor, Tiro-neggweburgi-gwichiguega an barmidagoed. Bukidar sordamar-moli-birgi-sii-urwemalad-abargi, degi, ur-napagined-bila-onomalad-abargi danikoed.
EZE 26:8 Be-dulemar-demar-gakagi-bukwamalad es-suidgi ogilolemaloed. Nabucodonosor neg-matusurmalad-sordamar-bukumalad be-ebiris soboed, be-galu-matusur-maidgi-nakwega arsanyob napa onakoed, na e-sordamar sigu-abgaed-gani-gani begi barmidagoed.
EZE 26:9 Be-galu-matusulid suar-dummad-bular-ebipilemaladgi bibisgoed, degi, akangi be-neg-matusurmaladid earoed.
EZE 26:10 Babilonia-e-rey dule-bila-onoedgi nakwisar, yar-susdaedyobi be-yawagakgi dognonikoed. E-molimar bela-bela merguedbali ollibiin be-imakoed, be-galu-matusulidi e-sordamar-moli-birgi-sii-urwemalad-oimakedba, degi, ur-napagined-bila-onoged binnasur-oimakedba giglimakdoed.
EZE 26:11 Bela be-neggwebur-igarmar e-molimar-nagmarse gullumakoed. Babilonia-e-rey es-suidgi be-dulemar-ogilogoed, degi, neggwebur-e-buarmar-wardummagan omukuoed.
EZE 26:12 Deginbali, be-ibmar-nuegan bei subaloed, be-ibmar-manigi-uked bei atursabaloed. Be-galu-matusurmalad, be-rey-negmar-yeerdakleged bibisgemaloed. Be-akwamar, be-nagubirmar, demargi mimaloed. Degi, be-negmar-ayarisad demargi mimarbaloed.
EZE 26:13 Degidbali, ibagi-namakmalad an obelogoed, be-gar-arpa-goled bar-itolegosulid.
EZE 26:14 Akwasaila-swirigwadga, sakimar-oaedga an be-imakoed, degi, bar gannar begi negmar bukuosulid. Ani an Bab-Jehová-guedi sunmaknaid. Ani an Bab-Jehová-Bela-Gangued-Nikadi weyob soged.’ ”
EZE 26:15 Bab-Jehová-Bela-Gangued-Nikadi weyob Tiro-neggweburga sogbalid: “Neggweburmar-baigan-demar-gakaba-bukmaladi, be-negmar-ayarided-gollomakdedba giglimakdemaloed. Degine, be-dulemar-nailikgudmaloed-oimakdedba, neggweburmar gwakidmaloed, degi, be-dulemar-ogilolededba neggweburmar-baigan-demar-gakaba-bukmaladi dobgudmaloed.
EZE 26:16 Bela neggwebur-demar-gakaba-bukmalad-e-dummagan bar dummadga megosurmalad. E-mor-dummad-suid-yoidi, degi, mor dubgi-ise-nue-sobaled-yoidi esudmaloed. Dobed-dummad-itogedba napagi sigidmaloed. Be-neggwebur-sabsur-guoedbali e-wawanmaked galegosulid.
EZE 26:17 Be-neggwebur-sabsur-odurdaklegoedbali, wile-itoged-namaklegedgi bega weyob namakdemaloed: ‘Neggwebur-gandik-siid, demar-dorgan begi bukwad, ibiyobi be bergusa. ¡Be-dulemar demargi dule-bulegan guenad! Bela neggweburmar-be-dikarba-bukwamaladi, be-dulemar-dobdamalanad. Emide, ibiyobi be bergus-daklege.
EZE 26:18 Emigindi, be-bergusad-iba-akale, neggwebur-demar-gakaba-bukwamalad wawanmakbukwad. Neggwebur-dupmargi-bukwad bela-belad gwayebukwad.’ ”
EZE 26:19 Bab-Jehová-Bela-Gangued-Nikadi weyob Tiro-neggweburga sogbalid: “Akwamarbi-ganna-ganna-bukwad-neggweburga an be-imakoed. Dulemar-sated-neggweburga an be-saoed. Begi demar-dummad-murega an imakoed, bela demar-muredba be dogdoed.
EZE 26:20 Nega-uluba dulemar-odoledamaladba an be-odomogoed. Dulemar-dikasurgus-burgwismalad-mamaidgi, dulemar napa-gulluyaba-odolesmamaidgi an be-omesoed. Bar bemar egi bukuosulid. Degi, bar bemar egi gannar negmar urbosulid.
EZE 26:21 Dulemar-ogwayedga an be-imakoed, bar be daklegosulid. Be-amimaloenad, ar bipisaar bar be-amiosurmalad. Ani an Bab-Jehová-Bela-Gangued-Nikadi weyob soged.”
EZE 27:1 Bab-Jehová anga sogded:
EZE 27:2 “Dule-machi, wile-itoged-namaklegedgi Tiro-neggweburga be namake.
EZE 27:3 Tiro-neggweburde demar-gakaba-siid, neggwebur-baigan-gakaba-bukmaladga manigi ibmar uksiid. Weyob ega be namake: ”Bab-Jehová-Bela-Gangued-Nikadi weyob soged: ‘Tiro-neggwebur, na yeerdakleye be binsaenad, degi, na innikigwadye be binsaenad.
EZE 27:4 Be-urmar muu-billimargi negsemaid. Be-ur-sobsamalad, yeerdakle ur-sobsamalad.
EZE 27:5 Be-urgomarga-ebulesmaladi, baila-warmar-Senir-yargi-selealidgi soblesad. Be-buar-soblesadi, urwar-Líbano-yargi-selealidgi soblesad.
EZE 27:6 Be-gammimar-soblesadi, surgar-warmar-Basán-yargi-selealidgi soblesad. Be-edued-urgomar-soblesadi, baila-warmar-Quitim-dupgi-selealidgi soblesad. Be-edued-urgomargi Elefanteʼye-nugad-e-nugar-goamar yosmalad.
EZE 27:7 Lino-mor-nued-dubgi-ise-nue-sobaled-Egiptoʼgi-danikidgi, be-urmormar sobsamalad. A-urmormar, be-banderga gusad. Elisa-demar-gakagi, mor-suir-akwagiid, mor-ginnid, be-dordo-sobega searmalad.
EZE 27:8 Tiro, dule-bega-gammimalad Sidón-yargi, Arvad-yargi danimalad. Be-dulemar bega ursor-gamaladga gusad. Wemar, bur demar-nue-wisimaladid.
EZE 27:9 Gebal-girmar-selegan urgogi-arbamalad-bulegan, be-ur-marisad nudaksamalad. Bela urmar-galagwensurmalad-yagi-arbamalad, be-ibmar-uked baksamalad.
EZE 27:10 ” ’Persa-dorgan, Lud-dorgan, degi, Fut-dorgan be-sordagan-bila-onomaladga gusmalad. Sigu-abgaed, degi, bormo-gurgin, begi nasiksamalad. A-ibmarmar yeerdakle be imaksad.
EZE 27:11 ” ’Arvad-dorgan, degi, be-sordamar-bila-onomaladbo be-galumar-matusulid-neggwebur-ebilis-maidgi nakulebukwa gusmalad. Gamad-dorgandi, be-negmar-matusulid-warakwagwad-niba bukwa gusmalad. E-sigu-abgamalad bela be-galumar-maidgi nanai gusad. A yeerdakle be-imaksad.
EZE 27:12 ” ’Be ibmar-nuegan bela-bela nikasoggu, Tarsis-dorgan bebo muchub-muchub ibmar-ukedgi mani-onodaed. Tarsis-dorgan be-ibmar-anale, mani, esgoro, esgoro-estañoʼye-nugad, degi, gingwa bega ukdaed.
EZE 27:13 ” ’Deginbali, Javán-dorgan, Tubal-dorgan, Mesec-dorgan, bebo muchub-muchub ibmar-ukedgi mani onodamarmogad. Amardi, be-ibmar-anale, maimar, degi, ibmarmar-esgoro-gordikidgi-sobaled bega ukdamalad.
EZE 27:14 Togarmaʼginmalad, molimar-arbaedgi, molimar-bila-onoedgi, degi, moli-uaya-senigwadgi be-bennukdamalad.
EZE 27:15 Dedánʼginmalad, bebo muchub-muchub ibmar-ukedgi mani onodamarmogad. Bukidar-dupmar-nanaid-dorgan, bese ibmar-baknonidaed. Amardi, ébano-urgogi, degi, elefante-e-nugargi be-bennukdamalad.
EZE 27:16 Be ibmar-bukidar-nikadba, Siria-dorgan bebo muchub-muchub ibmar-ukedgi mani onodaed. Siria-dorgan, be-ibmar-anale, akwa-topacioʼye-nugad, mor suir-akwagiid, mor dubgi-ise-nue-sobaled, linoʼmor-nued, dimmurgiid-e-akwa-yeerdakleged, degi, akwa-rubíʼye-nugad bega ukdaed.
EZE 27:17 ” ’Judá-dorgan, degi, Israel-dorgan, bebo muchub-muchub ibmar-ukedgi mani onodamarmogad. Orosgi-dakleged-trigoʼye-nugad Minit-yargi-danikid, madu-ochimar, achanis, olivo-gwallu, degi, ina-wawadikid bega ukdamalad.
EZE 27:18 ” ’Be ibmar-bukidar-nikadba, degi, ibmar-nuegan obinebaka-nikadba, Damasco-dorgan bebo muchub-muchub ibmar-ukedgi mani onodamogad. Amar, vino Helbón-yargi-danikidgi, degi, sibad-wawaad-e-absar Sahar-yargi-danikidgi be-bennukdaed.
EZE 27:19 ” ’Dan-dorgan, degi, Javán-dorgan, be-ibmar-uked-anale, Uzal-yar-akar esgoro-sobaled, ina-wawadikid-mirra-diregwad, degi, ina-wawadikmalad bega seardaed.
EZE 27:20 ” ’Dedán-dorgan, moli-birgi-siged-gangi be-bennukdaed.
EZE 27:21 ” ’Arabia-dorgan, degi, Cedar-e-dummagan, bese ibmar-bakdaed. Amardi, sibad-wawaad-bipiganagi, sibad-wawaad-macheredgi, degi, sibad-macheredgi be-bennukdamalad.
EZE 27:22 ” ’Sabá-dulemar, degi, Raama-dulemar, mani-amiega ibmar-ukedgi-arbamalad bese ibmar-bakdamarmogad. Ibmarmar-anale, or, akwamar-garged-yeerdakleged, degi, ina-wawadikmalad-bur-nuegan bega ukdamalad.
EZE 27:23 ” ’Harán-dorgan, Cane-dorgan, Edén-dorgan, Sabá-dulemar, Asiria-dulemar, degi, Quilmad-dulemar, mani-amiega ibmar-ukedgi-arbamalad bebo muchub-muchub ibmar-ukedgi mani onobukdamalad.
EZE 27:24 Be-ibmar-uked-neggi, ibmar-bukidar-nikuega morsan-yeerdaklemalad, mor-dummad-suid suir-akwagiid, mormar dubgi-ise-nue-sobaled, mor-dummagan-galagwensur-sobaled, dubmar nue-sinni-sinnigalad, degi, urwar-urgo bega manigi ukdamalad.
EZE 27:25 Tarsis-e-urmar, be-ibmar-manigi-ukleged berbedii damalad. Ibmar-nuegana ena, muu-billiba be gwichigumadaed.
EZE 27:26 Bega gammimalad muu-billigan-dummaganba be-sesa gusad. Dii-burwadi muu-billigangi be-goamaksad.
EZE 27:27 Be demar-ulak-dogoed-ibagi, be-ibmar-nuegan, be-ibmar-manigi-ukleged, be-ibmarmar, be-selagan, be-ursor-gamalad, be-urmar-nudakmalad, be-dulemar mani-amiega ibmar-ukedgi-arbamaladi, be-bila-onomalad, degi, bela be-ur-yagi-arbamaladi, dii-ulakse dogdemaloed.
EZE 27:28 Bega-ursor-gamalad binnasur-goledba, demar-gakaba-bukmalad wawanmakdemaloed.
EZE 27:29 Bela-gammimalad diigi babatidmaloed, selagan, degi, ursor-gamalad napase aidedmaloed.
EZE 27:30 Be-ular, binnasur gormaloed, degi, nue-nunmak-itogedgi bomaloed. Nonogi buru-eomaloed, burugine baparmakmai gumaloed.
EZE 27:31 Be-ulale, na nono-swiri imakmaloed, wile-itoged-mor yomaloed. Be-ulale, nue-nunmak-itogedgi, degi, surbinsa-itogedgi dummad-bomaloed.
EZE 27:32 Be-ulale, wile-itoged-namaklegedgi namakmaloed, degi, nunmak-itogedgi weyob sogmaloed: ¿Doa demar-abargi sunna Tiroʼyob guoe?
EZE 27:33 Be-ibmarmar-uked urgi-odenana-gusale, bukidar dulemar-yar-baid-baidgi-bukwamalad yeer-itodamalad. Be-ibmar-nuedgi, degi, be bukidar-ibmar-nikadgi reymar-napneggi-mamaid mani-ibedga be imaksad.
EZE 27:34 Ar emigindi, demar be-goamaksad, dii-ulak be dogsamaid. Be-ibmar-manigi-ukleged, degi, bela be-yagi-arbamalad beba dii-ulak dogsamalad.
EZE 27:35 Bela dulemar-demar-gakaba-bukwamalad, be-ulale, gwayebukwad. E-reymar dobedba, wawanmakbukwad, dobed-dummad-itoged oyomalad.
EZE 27:36 Dulemar-yar-baidginmalad mani-amiega-ibmar-ukedgi-arbamaladi, begi dodomaloed. Emar-ogwayega be guoed, bar bipisaar be daklegosulid.’ ”
EZE 28:1 Bab-Jehová anga sogded:
EZE 28:2 “Dule-machi, Tiro-e-reyga be soge: Bab-Jehová-Bela-Gangued-Nikadi weyob sogye: ‘Be-gwagegi na be san-dummarba-itogedba sogsagusad: Ani an bab-dummadye. Muu-billiganbali bab-dummagan-e-rey-gangi an siiye. Ar bab-dummadyob na be ito-inigwele, ar bedi bab-dummad-sulid. ¡Unnila be dule gued!
EZE 28:3 ¿Ar Danielʼba bur be binsaed-ibedsi? ¿Ar ibmar-dukuar-mamaid be bela wissi?
EZE 28:4 Be-binsaed-nika-guedba, be-ibmar-nue-wisidba, ibmar-nuegan bukidar be nikad. Be-ulugwagine or-bukidar, mani-bukidar be sabosad.
EZE 28:5 Mani-onogedgi-arbaedi, be nue-wisid, a-ulale, mani-ibedga be gunonikid. Bukidar be-ibmar-nuegan-nikadba san-dummarba be imaked.’
EZE 28:6 ”A-ulale, ani Bab-Jehová-Bela-Gangued-Nikadi weyob soged: ‘Emide, bab-dummadyobi na be nue-ibmar-wisi imaked.
EZE 28:7 A-ulale, dulemar-ainebarmalad begi duurmakdagega an imakoed. Dulemar-yar-baid-baidgi-bukwamalad-bur-isganamar an begi barmidagoed. We-dulemala, es-suidgi be-ogilogoed, be-yeerdakleged, be-nue-binsaed-nikad obelogoed, degi, be-nug-dummarba-nikad oichomaloed.
EZE 28:8 Napa-yaba be-balimetemaloed, muu-billigine, sabsur be burgoed.
EZE 28:9 Dulemar-be-oburgwemaloed-asabin, ¿amba be sogoe: Ani an Bab-Dummadye? Ar dulemar-be-gindakmaladga bab-dummadga be guosulid, unnila be dule gued.
EZE 28:10 Dulemar-ainebarmalad sabsur-be-imakmaloed, dulemar-aku-an-dakedyob be burgoed. Ar ani Bab-Jehová-Bela-Gangued-Nikadi, weyob soged.’ ”
EZE 28:11 Bab-Jehová anga sogded:
EZE 28:12 “Dule-machi, Tiro-e-reyga wile-itoged-namaklegedgi be namake, ega be soge, Bab-Jehová-Bela-Gangued-Nikadi weyob sogye: ‘Innikigwad-e-wilubga be guenad, nue-binsaed-nikadae be guenad, yeerdaklege be guenad.
EZE 28:13 Bab-Dummad-nainu-Edénʼye-nugadgi, be galagwensuli-akwamar uniryeerdaklemalad, a yeerdaklemalad-nai gudii gusanad: Akwa-Cornerinaʼye-nugad, akwa-Topacioʼye-nugad, akwa-arad-Jaspeʼye-nugad, akwa-Crisólitoʼye-nugad, akwa-Beriloʼye-nugad, akwa-Óniceʼye-nugad, akwa-Zafiroʼye-nugad, akwa-Carbuncloʼye-nugad, akwa-Esmeraldaʼye-nugad, degine, ormar. We-akwa-nuegan-nai be aibirdii gusanad. Be-dukargi-nagued, be-sakwagi-nagued, degi, be-uaduki-nagued bela orgi soblesadbiid. Be-obinnilesad-akale, we-ormar bega guagwar-dakles bukwa gusad.
EZE 28:14 Baliwitur-querubinʼga an be-nug-imaksad, Emar-bendakedga be gwisgusad. Bab-Dummad-yar-islidikidgi an be-ogwichisad. A-yargi be gudii gusanad, soo-akwamar-birgi be nanadii gusanad.
EZE 28:15 Be-obinnilesad-iba-akale, geb isgued be-ulubgi-nai daklenonikidse, be-daedi innikigwadbiinad.
EZE 28:16 Be ibmar-manigi-uked-bukidar-nikadba, sabsur-emar-imakde gusad, degi, isgudegusad. A-ulale, Bab-Dummad-yargi ibmar-isganayob an be-onosad. Be, baliwitur-querubin-guedi, degi, dulemar-bendakedi, soo-akwamar-abargi bar gudii an be-imaksasulid.
EZE 28:17 Be-yeerdakleged-ulale, be san-dummarba imaksad. Be-nug-dummarba-nikad-ulale, be-binsaed-nikadaed be oichosad. A-ulale, napnegse an be-balimeted, degi, reymar-asabin-bingegu-gwichi an be-imaksad.
EZE 28:18 Bela-bela be-isgusad-ulale, be-mani-onogedgi-isgusad-ulale, be-bab-dummadse-goled-negmar be oichosad. A-ulale, an be-abargi soo ogasad, adi, bela be-ogumaksad. Bela dulemar-yeer-be-dakmalad-wagab an napagi be-balimeted, geb burubi-sii an be-imaksad.
EZE 28:19 Bela dulemar-yar-baid-baidgi-bukwamalad-magar-be-dakmaladi, be-dakarmalale, dobgus bukusdamalad. Ar bato be bela-bela bergus siid, bar be daklegosulid.’ ”
EZE 28:20 Bab-Jehová anga sogded:
EZE 28:21 “Dule-machi, Sidón-neggwebursik be atake, egi ibmar-guoed iduakwaa be soge.
EZE 28:22 Bab-Jehová-Bela-Gangued-Nikadi weyob sogye, ega be soge: ‘Sidón-neggwebur, an begi yolegega an wegi gwichi, an be-abargi nug-dummarbaa guoed. Igar-maidba an sabsur-be-odurdakalile, degi, an-isligwaled an begi oyoalile, wisgumaloed, ani an Bab-Jehová gue.
EZE 28:23 ” ’Uelleged-dummad an begi barmidagoed, be-igarba ablis suurmakmai guoed. Es-suidgi girgulenanaid-ulale, be-igarba dulemar-nailikgusmalad burgwemai gumaloed. Degidbali, wisgumaloed, ani an Bab-Jehová gue.
EZE 28:24 ” ’Dulemar-e-yar-dikarba-bukwamaladse Israel-dulemar bar isdar-daklegosulid. Israel-dulemar, we-isdar-dakleged esgoro-swichwigwadgi maklesadyob nunmaked-itomalad, bar itogosulid. Degi, ikogi sikaa-gusayob-itoleged, bar itogosulid. Degidbali wisgumaloed, ani an Bab-Jehová-Bela-Gangued-Nikadi, gue.’ ”
EZE 28:25 Bab-Jehová-Bela-Gangued-Nikadi weyob soged: “Ar Israel-dulemar yar-baid-baidse-oaisakiles-gusmalad, an gannar danar-oambikusale, an-isligwaled, dulemar-yar-baid-baidgi-bukwamalad-wagab an ega oyogoed. Geb degine, Israel-dulemar na e-yargi gudii gumaloed. We-yardi, an-mai-Jacobʼga an uksa gusad.
EZE 28:26 A-yargine, dobgued-sate gudimaloed, negmar sobmaloed, uvaʼmar digmaloed, ar ade, dulemar-e-yar-dikarba-bukwamalad, Israel-dulemar-isdar-dakdimalad, igar-maidba an sabsur-odurdakoed. Wisgumaloed, ani an e-Bab-Dummad-Jehová gue.”
EZE 29:1 Deunni, anmar birgambe gaka nii-warambegwad-gaka-ibambe-gakabogus, Babiloniaʼgi-bukwadgine, Bab-Jehová weyob anga sokalid:
EZE 29:2 “Dule-machi, Egipto-e-rey-Faraónʼga be ibmar-soge, degi, bela e-dulemarga ibmar-guoed iduakwaa be soge.
EZE 29:3 Bab-Jehová-Bela-Gangued-Nikadi weyob sogye, ega be soge: ‘Egipto-e-rey-Faraón, an begi gwichi. Bedi, ibdula-dummad-diwaryagi-maiyobid. Nilo-diwar angadye be sogmaid, ani an Nilo-diwar mesisye be sogmaid.
EZE 29:4 Esgoro-ake-nikadgi aku-darba an be-gaoed, diwar-uamar be-ukagi-naguega an imakoed. Bela be-ukagi uamar acha-acha-nai, diwaryagi an be-onogoed.
EZE 29:5 Be-diwar-uamarmala, nega-dulesulidganba an be-metoed. Neg-ollor-dummad-naidgi be melledoed, be-suosurmalad, be-digosurmarbalid. Ibmar-durgan-ursirmar, degi, mulamar, be-san-gunnega an imakoed.
EZE 29:6 Geb degine, bela Egipto-dulemar wisgumaloed, ani an Bab-Jehová gue. Unnila Israel-dulemarga suar-gaapoledga be gusad.
EZE 29:7 Ar be-argangi Israel-dulemar-akasmargua, abin be bichide gusad. Geb e-ibe be gukin bichis gusad. Ar Israel-dulemar e-bendakega be-gukingi akanonimargua, e-abin maadda be nade gusad. Geb e-ibe be e-dikar bichis gusad.’ ”
EZE 29:8 A-ulale, Bab-Jehová-Bela-Gangued-Nikadi soged: “Es-suid an begi barmidagoed, geb be-dulemar, degi, be-ibmar-durgan-ogilogega an imakoed.
EZE 29:9 Egipto-yar, nega-dulesulidganga guoed. Geb degine, wisgumaloed, ani an Bab-Jehová gue. ”Nilo-diwar angadye be sogsad, ani an Nilo-diwar mesisye be sogsad.
EZE 29:10 A-ulale, an begi gwichid, be-diwargi an gwichibalid. Migdol-akale, Seveneʼse, degi, Etiopía-yar-abingunaidse, Egipto-yar ollobi an metoed, nega-dulesulidganga an imakoed.
EZE 29:11 Birga-dulabo-wilub (40) dulemar egi bukuosulid. Dulemar, degi, ibmar-durganse-bakale, egi gudiguosurmalad.
EZE 29:12 Bela-yarmar-baiganba, an Egipto-yar bur bule nega-dulesulidganga imakoed. Degi, birga-dulabo (40) ollobi an nasikoed, akwamarbi-ganna-ganna-bukwa guoed. Neggwebur-bamaladba bur bela-bela bergus sigoed. Egipto-dulemar, dulemar-yar-baid-baidgi-bukwamaladse an oaisakioed, yarmar-baid-baidse an oduurmakoed.”
EZE 29:13 Bab-Jehová-Bela-Gangued-Nikadi weyob soged: “Birga-dulabogwad-sorbali (40), Egipto-dulemar bia yar-baid-baidse oaisakilesgusa, amargi-bukwa gannar e-yarse-dagmalaga an imakoed.
EZE 29:14 Egipto-dulemar-galesbukmalad gannar-Patrosʼse dagega an imakoed. We-Patrosʼde, e-dadgan-yarga gusadid. Agi, neggwebur-baisur-dakleged urbemaloed.
EZE 29:15 Bamalad-neggweburmarba bur-baisur-dakle guoed. Bamalad-yarmarba bar nug-dummarbaa guosulid. An-sunnad an bela-bela nug-bipii imakosoggu, bamalad-yarmargi bar-obinega guosulid.
EZE 29:16 Israel-dulemar e-bendakega Egipto-dulemarse bar wilegosurmalad. Ar bur Egipto-dulemar Israel-dulemarga e-isgusad-ebinsaega guoed, deunni Egipto-dulemarse bendakleged amidigusmargu. Deyobi wisgumaloed, ani an Bab-Jehová gue.”
EZE 29:17 Deunni, anmar birga-dulagwen-gakagugle gaka nii-wargwenad-ibagwengus Babiloniaʼgi-bukwadgine, Bab-Jehová weyob anga sokalid:
EZE 29:18 “Dule-machi, be wisid, Babilonia-Rey-Nabucodonosor e-sordaganmala Tiro-neggweburgi bila-onoap gusad. Bela wemar nono-swiri, degi, yargan-yaasa gusmalad. Tiro-neggwebur-suegala, bela-bela ibmar-imaksamalanad, degi-inigwele, Nabucodonosor e-sordaganmala gwen Tiro-neggweburgi ibmar-nued nikussurmalad.
EZE 29:19 A-ulale, ani Bab-Jehová-Bela-Gangued-Nikadi weyob soged: ‘Babilonia-Rey-Nabucodonosorʼga, an Egipto-yar ukoed. Nabucodonosor, Egipto-yar-ibe ibmar-nuegan suoed, bela e-ibmar-nikad atursaoed, degi, ibmar-susad na sedoed, adi, e-sordamar-bila-onomalad-bennukegar.
EZE 29:20 Tiro-yarse bila-onoap-gusad-ulale, Egipto-yar an Babilonia-e-reyga ukoed, ar ade, Babilonia-sordamar an-nuggi bila-onoapmalad.’ Ani an Bab-Jehová-Bela-Gangued-Nikadi weyob soged.
EZE 29:21 ”A-ibagine, Israel-dulemar gannar gangued-nikuega an imakoed. Geb degine, Ezequiel, be dobsuli dulemarga be sunmakoed. Geb degine, wisgumaloed, ani an Bab-Jehová gue.”
EZE 30:1 Bab-Jehová anga sogded:
EZE 30:2 “Dule-machi, ibmar-guoed iduakwaa be soge: ‘Bab-Jehová weyob soged: Nunmakedba binnasuli-gormala: ¡A-ibagi nunmaked-dummad naguoed!
EZE 30:3 An-iba warmakdanikid, a-iba bato omodanikid. Negasichid-iba omosad, dulemar-yar-baid-baidgi-bukwamaladga sabsur-odurdakleged-iba omosad.
EZE 30:4 Egipto-yargi bila-onoged danikoed, Etiopía-yargi surbinsa-itoged naguoed. Bukidar Egipto-dulemar-oburgwilesmalale, e-ibe ibmar-nuegan atursalegoed, e-negsaila-mamaid bibisgoed.
EZE 30:5 ” ’Etiopía-dorgan, Fut-dorgan, Lud-dorgan, bela Arabia-dorgan, Libia-dorgan, degi, yarmar-eba-nanaid-e-dulemar, es-suidgi burgwemaloed.’ ”
EZE 30:6 Bab-Jehová weyob soged: “Egipto-yar-bendakdimalad bergumaloed, Egipto-e-gangued san-dummarba-imaked berguoed. Migdol-akar, Seveneʼse es-suidgi burgwemaloed, ani Bab-Jehová-Bela-Gangued-Nikadi, weyob soged.
EZE 30:7 ”E-neggweburmar akwamarbi-ganna-ganna-bukwa guoed. Bela yarmar-baiganba bur bule nega-dulesulidganga guoed.
EZE 30:8 An Egipto-yargi soo ogadele, degi, bela yarmar-eba-nanaimalad bergusale, wisgumaloed, ani an Bab-Jehová gue.
EZE 30:9 ”A-ibagine, an-gayaburba-berbemaladi, Etiopía-dorgan-dobe-itobuksulid-ogwayega, ur-dummagangi ainidmaloed. Egipto-dorgan-sabsur-odurdaklegoed-ibagi, Etiopía-dorgan dummad-gwayemarmogoed. A-iba bato omodanikid.
EZE 30:10 Ani Bab-Jehová-Bela-Gangued-Nikadi, weyob soged: ‘Babilonia-rey-Nabucodonosor, Egipto-ibmar-nuegan-nikad-obelogega an imakoed.
EZE 30:11 Nabucodonosor, degi, e-sordagan-bila-onomalad, dulemar-yar-baid-baidgi-bukwamaladba bur dule-bulegan gumalad, amar Egipto-yar obergunonimaloed. Amar es-suidgi Egipto-dorgan-ogilononimaloed, Egipto-yargi, muimar-ena metemaloed.
EZE 30:12 An Nilo-dianmar odinguoed, degi, dule-isganamarga an Egipto-yar ukoed. Dule-ainebarmalad Egipto-yar, degi, egi-ibmar-bukwamalad-oberguega an imakoed.’ Ani an Bab-Jehová weyob soged.
EZE 30:13 ”Bab-Jehová-Bela-Gangued-Nikadi, weyob soged: ‘Bela Menfis-e-nuchumar an obelogoed, e-bab-dummadyob-ibmarmar-imakleged an osulogoed. Egipto-yar bar rey nikuosulid, bela Egipto-yargi dobed-dummad an nasikoed.
EZE 30:14 An Patros-neggwebur obelogoed, an Zoán-neggwebur soogi ogumakoed, an Tebas-neggwebur sabsur-odurdakoed.
EZE 30:15 ” ’Sin-neggwebur Egipto-yar-e-ganguedga-siidi, an-urwed itogoed. Tebas-neggwebur-e-ibmar-nuegan-nikad an obelogoed.
EZE 30:16 Egipto-yar an soogi ogumakoed, Sin-neggwebur nunmaked-dummad itogoed. Tebas-neggwebur-e-galu-matusur-maidgi yaamar olloo sigoed. Menfis-neggwebur bali-bali wile-itosii guoed.
EZE 30:17 Avén-neggwebur-sapingan, degi, Pibeset-neggwebur-sapingan es-suidgi burgwemaloed, e-omegandi, gales-ebipiledmaloed.
EZE 30:18 Egipto-yar-e-gangued an obelosale, Tafnesʼgi negsichid naguoed. Deyobi, na e-gargangued san-dummarba-imaked bergunonikoed. Egipto-yar negsichidbi naguoed, e-bunamala gales ebipiledmaloed.
EZE 30:19 Weyob Egipto-yar sabsur-odurdaklegoed. Geb degidbali, Egipto-dulemar na wisgumaloed, ani an Bab-Jehová gue.’ ”
EZE 30:20 Deunni, anmar birgambe-gakagwensakgus gaka nii-wargwenad-ibaguglegus Babiloniaʼgi-bukwadgine, Bab-Jehová weyob anga sokalid:
EZE 30:21 “Dule-machi, bato an Egipto-rey-Faraón-ibe sakwa-wargwen bichisad. E-sakwa gannar ganguega, degi, sunna gannar es-suid gaega, dule gwen ega e-sakwa morgi inaba-mesa obipirmassulid, deginbali, ega suarba-mesa edichasurbalid.
EZE 30:22 A-ulale, Bab-Jehová-Bela-Gangued-Nikadi weyob soged: ‘Egipto-rey-Faraónʼgi an gwichid. E-sakwa-nued, e-sakwa-bato-bisgaled, warbobela an e-ibe bisgoed, degi, e-argangi es-suid-argwanega an imakoed.
EZE 30:23 Egipto-dorgan dulemar-yar-baid-baidgi-bukwamaladse an oaisakioed, yar-baid-baidse an oduurmakoed.
EZE 30:24 Babilonia-rey-e-gargangued an ogannogoed, an-es-suid e-argangi an mesoed. Faraón-e-sakwamar an bibisgoed. Geb dule-nailikgusad burgwedani-akiginmaidyob e-isdarad-asabin nunmakedba akiginnoed.
EZE 30:25 Babilonia-rey-e-gargangued an ogannogoed. Faraón-e-gargangueddi an nolloo imakoed. Babilonia-rey-e-argangi an-es-suid an mesisale, geb agi Egipto-dulemar-ogilosale, wisgumaloed, ani an Bab-Jehová gue.
EZE 30:26 Egipto-dorgan dulemar-yar-baid-baidgi-bukwamaladse an oaisakioed, yar-baid-baidse an oduurmakoed. Geb degine, wisgumaloed, ani an Bab-Jehová gue.’ ”
EZE 31:1 Deunni, anmar birgambe-gakagwensakgus gaka nii-warbaagwad-ibagwengus, Babiloniaʼgi-bukwadgine, Bab-Jehová weyob anga sokalid:
EZE 31:2 “Dule-machi, Egipto-rey-Faraónʼga, degi, bela e-dulemarga be soge: ‘Be-gandikidyobi, ¿doa guoe?
EZE 31:3 Epenne, Asiria-yar Líbano-urwarga gusad. E-anagan yeerdakle gusad, e-gagan muamaksii gusad, matusulidba e-duku mogirse warmaksad.
EZE 31:4 Diimar Líbano-urwar-dunguega imaksad. Diimar-napa-urba-aryomamaid, e-mas-nuedga gusad. E-malimar-dikarba, e-diwarmar aryomai gusad. E-diwar-e-anagan bela sapi-bamalad-ogsa gusad.
EZE 31:5 Deyobi, Líbano-urwar sapi-bamaladba, bur bule matusuli gusad. Dii-yaisur egi-aryomaid-gusad-ulale, e-anagan-muamaksiid sugude gusad.
EZE 31:6 Bela nuumar-gukudimaladi, e-anagangi uumar-urbedii gusmalad. Bela ibmar-durgan-sapurbarmaladi, e-anagan-muamaksiid-urba milenonidamalad. Bela dulemar-yar-baid-baidgi-bukwamaladi, urwar-e-anagan-urba, negsichigwadgi-ambikudii gusmalad.
EZE 31:7 E-anagan-mullusur-nikadbali, bipisuli daklege gusad, yeerdaklege gusad. Ar diimar-yaisur-aryomaidgi e-malimar yoyoi gusad.
EZE 31:8 Bab-Dummad-nainugi urwar-bamalad-gwichigusmaladi, wegiid-urwargi-obined, sategusad. Baryawar-sargwensaale, Líbano-urwar-anagan-nikadyob, e-anagan nikasulid. Wag-ulu-sargwensaale, Líbano-urwar-gagan-nikadyob, e-gagan nikasulid. Bab-Dummad-nainugi sapi-sargwensaale, Líbano-urwar-yeerdaklegedyob daklesulid.
EZE 31:9 Ani an yeerdaklege, we-urwar imaksad, e-anagan-bukidar-nika an imaksad. Bab-Dummad-nainu-Edénʼgi, bela bamalad-sapimar egi nobdamalad.’ ”
EZE 31:10 Degisoggu, Bab-Jehová-Bela-Gangued-Nikadi weyob soged: “Ar sapi matusur dungusad, na deyob-dungu-itogedba e-duku mogirse-warmakedse imaksad.
EZE 31:11 A-ulale, an obachad. Yar-baid-e-garganguedga an urmaksad, adi, e-isgusadba sabsur-odurdakegar.
EZE 31:12 Dulemar-yar-baidsikmalad-bur-isganamar we-sapi sikmaloed, omukus mete namaloed. Yarmargi, nebagangi, e-anagan babatoed, bela e-anagan diwarmargi bibichis melledoed. Dulemar-yar-baid-baidgi-bukwamalad e-anagan-urba-negsichigi-dukudimalad wakite obes namaloed.
EZE 31:13 E-saila-aimukus-maid-birgi nuumar e-uumar urboed. E-anagan-birgi, ibmar-durgan-ursirmaladi megmaloed.
EZE 31:14 Weyob guoed, adi, diwar-dikarba sapimar-gwigwichid mer bar matusur dunguega, degi, amba sapimar-diigi-ise-oglegar-gwigwichid mer bar e-duku mogirse-moega, deyob guoed. Bela burgwemaloed, bela napa-yaba dogmaloed, degi, dulemar-napa-urba bato burgwar-mamaidse megdapmaloed.”
EZE 31:15 Bab-Jehová-Bela-Gangued-Nikadi weyob soged: “Urwar dulemar-napa-urba-burgwar-mamaidse megidapid-ibagi, napa-urba-demar-naid, bukib-binsaed-ulale, odinguega an imaksad. E-sukamakmaid, degi, e-diwarmar an gasad. Urwar-ulale, an, Líbano-yar-bukib-binsaega imaksad, degi, bela sapimar dinguded.
EZE 31:16 Urwar dulemar-napa-urba-odolemamaidmala, dulemar-burgwar-mamaidse an egwachagu, e-argwachad-binnasur-gochadba, dulemar-yar-baid-baidgi-bukwamalad wawanmakega an imaksad. Edénʼgi bela sapimar gwigwichid, Líbano-yargi sapimar-bur-yeerdakle gwigwichid, bur bule diigi-oglegwismalad, napa-urbali yeer-itosmalad.
EZE 31:17 Bela eba-nanaimalad, e-anagan-urba, negsichigi-dukudimalad, degi, dulemar-es-suidgi-burgwismalad, eba napa-urba dulemar-burgwismamaidse dogsamarmogad.
EZE 31:18 Edénʼgi sapimar-gwigwichid sargwensaale e-yeerdaklegedyob, e-dunguedyob daklesulid. Degi-inigwele, Edén-sapimarba napa-urba dogmogoed. Agi, dulemar-aku-an-dakmalad-abargi, degi, es-suidgi-burgwismaladmala megoed. ”Weyobi, Faraón e-dulemarmala burgoed. Ani an Bab-Jehová-Bela-Gangued-Nikad weyob soged.”
EZE 32:1 Deunni, anmar birgambe-gakabogus gaka nii-warambe-gakabogwad-ibagwengus Babiloniaʼgi-bukwadgine, Bab-Jehová weyob anga sokalid:
EZE 32:2 “Dule-machi, Egipto-rey-Faraónʼga, we-wile-itoged-namaklegedgi be namake: ‘Dulemar-yar-baid-baidgi-bukwamalad-abargi, achumigur-nono-wawaadyob be dakleged. Demar-ibdula-gacharsulid diwargi-nakwamaksiiyob dakleged. Be-naggi, dii gudure be imaked, e-sukemar binnasur-nakwamaksii be saed.’ ”
EZE 32:3 A-ulale, Bab-Jehová-Bela-Gangued-Nikadi, weyob soged: “Amba be dulemar-bukidar-abargi-gudi-inigwele, an-saki an begi mioed, agi an be-gaoed.
EZE 32:4 Napagi illi-illir an be-ebipioed, neg-ollornaidgi an be-metoed. Bela nuumar-gukudimaladi, be-birgi-bukuega an imakoed. Bela-ibmar-durgan-ursirmar, be-sangi immelegega an saoed.
EZE 32:5 Yalaganba, be-san an mioed, nebagangi, be-muimar-omilede, an imakoed.
EZE 32:6 Be-ablisgi napneg waladiki an imakoed, yarmar-e-birise waladiki an imakoed. Diwarmar be-ablisbi-mai an imakoed.
EZE 32:7 Be burgwenonikile, negsichidbi-nai nibneg an imakoed, niisgwamar akinnega an imakoed. Dad-ibeler-iduar mogirmar an nasikoed, bar bipisaale, nii gaosulid.
EZE 32:8 Be-ulale, bela nibneggi niis-dummagan-gananaidi, ginnega an imakoed. Be-yargi negsichidbi-nai an saoed. Ani an Bab-Jehová-Bela-Gangued-Nikad weyob soged.
EZE 32:9 ”Be yarmar-dakdisulidse gayaburba-moega an imakoed, bergusye be-wisgudamaloed. Bergusye be-wisguarmalale, bukidar dulemar-yar-baid-baidgi-bukwamalad dobedba wawanmakega an imakoed.
EZE 32:10 Deginbali, bergusye be-wisgumaloedbali, bukidar neggweburmargi dobed-dummad-naguega an imakbaloed. Amarga an-es-suid an oyodele, e-reymar gwayidmaloed. Be-berguoed-ibagi, reymar dobe-burgwedbali, wawanmakdemaloed.
EZE 32:11 ”Bab-Jehová-Bela-Gangued-Nikadi weyob soged: ‘Babilonia-e-rey, e-es-suidgi be-ogilogoed.
EZE 32:12 Dulemar-yar-baid-baidgi-bukwamalad-e-sordamar bur-isganamar, es-suidgi be-dulemar-ogilogega an imakoed. Amar Egipto-dulemar na san-dummarba-imakdiid obelogoed, bela Egipto-dulemar galakuoed.
EZE 32:13 Bela e-molimar-bebe-nikad diwarmar-dikarba-mas-gundimalad an obelogoed, we-diwarmar bar dulemarse, degi, ibmar-durganse gudure guosulid.
EZE 32:14 Geb degine, diimar an diree mesoed, olivo-gwalluyob binnaa aryomai an imakoed.’ ”Bab-Jehová-Bela-Gangued-Nikadi, soged:
EZE 32:15 ‘Egipto-yar, nega-dulesulidganga an imaksale, an e-ibe bela ibmar-nikad obergusale, degi, e-dulemar an bela ogilosale, geb wisgumaloed, ani an Bab-Jehová gue.’
EZE 32:16 ”Dulemar-yar-baid-baidgi-bukwamalad Egiptoʼga, degi, e-dulemarga we-wile-itoged-namaklegedgi namakmaloed. ”Ani an Bab-Jehová-Bela-Gangued-Nikad weyob soged.”
EZE 32:17 Deunni, anmar birgambe-gakabogus gaka nii-warambe-gakabogwad-ibatargus, Babiloniaʼgi-bukwadgine, Bab-Jehová weyob anga sokalid:
EZE 32:18 “Dule-machi, Egipto-dulemarga-wile-itoged-namaklegedgi be namake, dulemar-yar-baid-baidgi-bukwamalad-e-dulemar bur gandikidmaladba, napa-uluba-burgwar-mamaidse be odoge.
EZE 32:19 Ese be egise: ‘¿Ar bemar bamalad-dulemarba bur yeerdaklege? Emigindi, Bab-Dummad-akudakmalad-abargi, be napa-uluba-dogsa megmala.’
EZE 32:20 Dulemar-es-suidgi-burgwismalad-abargi burgwemarmogoed. Es-suid bato argangi ganimalad, Egipto-yar, degi, bela e-dulemar bergumaloed.
EZE 32:21 Dulemar-bila-onoged bur dutusurmaladi, bur gandikmaladi, napa-uluba-dulemar-burgwar-mamaidgi, Egipto-dulemargi, degi, eba-nanaimaladgi sunmakmaloed. Weyob sogmaloed: ‘¡Bato napa-uluba dogsamala! Dulemar-Bab-Dummad-akudakmalad-es-suidgi-burgwismalad-abargi mellemamai.’
EZE 32:22 ”Agi Asiria-dorgan maid, e-neg-uan-ebiris bela e-sordaganbo maid. Bela wemar es-suidgi burgwismalad.
EZE 32:23 Bela we-napneggi dulemar-ogwayedigusmaladi burgwar-mamaid, es-suidgi burgwismalad. Emigindi, napa-uluba digles mamaid, Asiria-e-neg-uan-dikarba mamaid.
EZE 32:24 ”Agi Elam maid, e-neg-uan-ebiris bela e-sordaganbo maid. Bela wemar es-suidgi burgwismalad. Bela we-napneggi dulemar-ogwayedii gusmalad, Bab-Dummad-akudakmaladyob napa-uluba odoles mamaid. Napa-uluba burgwismamaid-abargi, dule-nugsulidyob mamaid.
EZE 32:25 Elamʼga, Bab-Dummad-akudakmalad-es-suidgi-burgwismalad-abargi gas nasiksamalad. Emidi, Elam-e-neg-uan-dikarba mamaid. We-burgwismalad we-napneggi dulemar-ogwayedii gusmalad. Ar emigindi, napa-uluba burgwismamaid-abargi dule-nugsulidyob mamaid. Agi dulemar-gindaklesmalad-abargi megismalad.
EZE 32:26 ”Agi Mesec, degi, Tubal maid, e-neg-uan-ebiris e-sordaganbo maid. Bela wemar Bab-Dummad-akudakmaladid, es-suidgi oburgwilesmaladid, ar ade, we-napneggi dulemar-ogwayedii gusmalad.
EZE 32:27 Mesec, degi, Tubal, dulemar-Bab-Dummad-akudaked-e-dule-bulegan-abargi diglessurmalad. We-dule-bulegandi bila-onosadgi e-gingimar-ebusad-gani, degi, e-nono-urba es-suid-mai diglesmalad. We-dule-bulegan we-napneggi dulemar-ogwayedigusmarsoggu, amba burgwisad-sorba, e-isgusad-ulale, e-garmar sabsur-imaklesad.
EZE 32:28 ”Agi be, Egipto, dulemar-Bab-Dummad-akudakmalad-abargi be bergus megoed, dulemar-es-suidgi-burgwismaladba be diglegoed.
EZE 32:29 ”Agi Edom e-reymarmala, degi, e-dummaganmala maid. Ar amba bela-bela gangued-nika-inigwele, amar dulemar-es-suidgi-burgwismalad-abargi digar-mamaimogad. Dulemar-Bab-Dummad-akudakmalad-abargi, napa-uluba digles mamaid.
EZE 32:30 ”Agi dad-nakwed-argan-sapiledsikid-e-dummagan, degi, bela Sidónʼginmalad maid. Na e-gangued-nikadba dulemar-ogwayedigusmar-inigwele, wemar dulemar-es-suidgi-burgwismaladba dule-nugsulidyob napa-uluba dogsa maimarmogad. Wemar, dulemar-Bab-Dummad-akudakmaladid. Emigindi, dulemar-es-suidgi-burgwismalad-abargi, napa-uluba digles mamaimogad.
EZE 32:31 ”Ar Faraón wemar-dakalile, geb na e-sordamar-burgwismaladba wile-itodiid berguoed, ar ade, Faraón e-sordamarmala es-suidgi burgwismalad. Ani an Bab-Jehová-Bela-Gangued-Nikad weyob soged.
EZE 32:32 ”Ar we-napneggi, dulemar-ogwayega, an Faraón-imaksa-inigwele, Faraón e-sordamarmala dulemar-Bab-Dummad-akudakmalad-es-suidgi-burgwismalad-abargi, diglemarmogoed. Ani an Bab-Jehová-Bela-Gangued-Nikad weyob soged.”
EZE 33:1 Bab-Jehová anga sogded:
EZE 33:2 “Dule-machi, be-dulemarga be sunmake, ega be soge: ‘An yar-soggwengi bila-onoleged barmialile, a-yarginmalad na e-dule-wargwen amioed, adi, ega neggweburgi nakulegwichi guegar.
EZE 33:3 We-dule-neggweburgi-nakulegwichid, e-isdarmalad-bila-onomalad warmakdani dakalile, dulemar-owisogega gar-trompeta ogoloed.
EZE 33:4 Geb degine, ar dule-wargwen gar-trompeta-goledba ibsassulile, e-isdarmalad-nonikoedse, es-suidgi oburgwilegoed. E-burgwisad egi dukin ataklegoed.
EZE 33:5 Ar dule-wargwen gar-trompeta-goled itosanad, degi-inigwele, eba ibsassurgusad. Degidbali, e-burgwisad egi dukin ataklegoed. Ar gar-trompeta-goledba ibsasardi na san-onogoed.
EZE 33:6 ” ’Ar we-dule-neggweburgi-nakulegwichid, e-isdarmalad-bila-onomalad warmakdani dakalile, dulemar-owisogega gar-trompeta ogorsulile, e-isdarmalad-nonikoedi, dule-wargwen-oburgwisale, we-dule-burgwisad na e-isguedba burgwisad. Degi-inigwele, we-burgwisad dule-neggweburgi-nakulegwichidgi an atakoed.’
EZE 33:7 ”Be, dule-machi, Israel-neggweburgi-nakulegega an be-ogwichisad. Degisoggu, an-ibmar-soged be itogoed, geb dulemarga an-nuggi ibmar be sogoed.
EZE 33:8 An dule-isganaga sogdibe: ‘Be burgoye.’ Ar e-daed-ogwaye ega be sogsulile, dule-isgana e-isguedba burgoed, degi-inigwele, e-burgwisad an begi atakoed.
EZE 33:9 Ar be dule-isganaga e-daed-ogwaye sogerdina, geb e-daed-ogwasulile, wedi na e-isguedba burgoed, ar bedi na san-bendakoed.”
EZE 33:10 “Dule-machi, Israel-dulemarga be soge: ‘Bemar soged: Anmar-uayasulidaedye, degi, anmar-isgued anmargi naiye. A-ulale, anmar girgumaiye. Degite, ¿igi anmar dula-gudii guosunye?’
EZE 33:11 Ega be soge: ‘Bab-Jehová-Bela-Gangued-Nikadi na dukin ise-sogar-soged, dule-isgana-burgwed abemaisulid. Dula-gudiguega, e-isguedgi-nugued abeged. Israel-dulemar nugumala. Be-galagwensulidamaladgi nugumala. ¿Ibiga be burgwemaloe?’
EZE 33:12 ”Dule-machi, be-dulemarga be soge: ‘Ar dule-nued isgusale, na e-igar-innikigwad-imaked bendakosulid. Dule-isgana na e-daed-ogwasale, e-isgusad bela ega elilegoed. Dule-nued isgusale, iduar e-igar-innikigwad-imaksadba bendaklegosulid.
EZE 33:13 Ar dule-nuedga an sogdibe: Be dula-gudii guoye, ar edi e-igar-innikigwad-imakedgi-bensuli, ibmar-isgana imakdele, e-igar-innikigwad-imaked bipisaar ebinsalegosulid, ar e-ibmar-isgana-imaksadba burgoed.
EZE 33:14 Ar dule-isganaga an sogdibe: Be-burgoye. Ar edi e-isguedgi nugunonikile, geb igar-innikigwad-imakdele, degi, nued-nanadele, we-dule dula gudii guoed.
EZE 33:15 Ese mani-ular ibmar-sileapid gannar e-ibedga ukele, degi, ibmar-atursasad gannar ukbalile, we-dule, dula gudii guoed. Deginbali, gwen ibmar-isgana imakdisulile, dula-gudigued-igarba nanadiile, we-dule, dula gudii guoed, burgosulid.
EZE 33:16 Iduar e-isgusad ebinsalegosulid, ar ade, e-igar-innikigwad-imakdiidba, degi, nued-nanadiidba dula gudii guoed.’
EZE 33:17 ”Be-dulemar sogmalad: ‘Bab-Jehová igar-innikigwadba dasulid.’ Ar emar bur igar-innikigwadba dasulid.
EZE 33:18 Ar dule-nued e-igar-innikigwad-imakedgi aibatele, geb ibmar-isgana imakdele, burgoed.
EZE 33:19 Ar dule-isgana ibmar-isgana bar imaksulile, geb igar-innikigwad-imakdedibe, degi, nued-nanaddibe, dula gudii guoed.
EZE 33:20 Ar degi-inigwele, bemar gannar-gannar sogdimalad: ‘Bab-Jehová igar-innikigwadba dasulid.’ Israel-dulemar, ar andi be-damaladba an bemarga war-wargwengi igar-nabogoed.”
EZE 33:21 Anmar birgambe-gakabogus gaka nii-warambegwad-ibatargus, anmar gales-ebipilear-gusmaladgine, dule-Jerusalén-neggweburgi-wakichadi, anse nonikid, weyob anga sognonikid: “Jerusalén-neggwebur e-isdarmaladse-sulesye.”
EZE 33:22 Sae-mutik, dule-wakichad-nonikoed-iduar, Bab-Jehová-e-gangued angi aidenonikid, geg an bar sunmaknaded. A-bangine, dule-nonigua, Bab-Jehová gannar nabir-sunmake an-imaksad.
EZE 33:23 Agi, Bab-Jehová anga sogded:
EZE 33:24 “Dule-machi, Israel-yargi neg-bibichisadgi-gudidimalad sogdimalad: ‘Ar Abraham wargwen-guedgi bela yar-gasa gusad. Ar anmardi bur-bukidar mergusoggu, bur bule anmar yar gamogodo.’
EZE 33:25 Degisoggu, ani Bab-Jehová-Bela-Gangued-Nikadi weyob sogye, ega be soge: ‘Bemar, san ablisba-mesa gunmaladid, bab-dummadyob-ibmar-imakleged-e-nug odummomaladid, degi, dulemar-gindakmarbalidid. Degite, ¿amba be yar gabimarde?
EZE 33:26 Deginbali, bemar es-suid-nikadba dobsur-itomalad, ibmar-isgana imakdimalad, degi, dule-baid-omebo galagwensuli gudimalad. Degite, ¿amba be yar gabimarde?’
EZE 33:27 ”Degisoggu, ani Bab-Jehová-Bela-Gangued-Nikadi weyob sogye, ega be soge: ‘An-sunnad an ise-sogar soged, dulemar-neg-bibichisadgi-gudidimalad es-suidgi burgwemaloed. Dulemar-sapurba-gudidimalad ibmar-durgan-ursirmarse dolegega an imakoed. Dulemar-negmar-dutusulidgi, degi, ibe-ollor-siidgi-gudidimalad boniganba burgwemaloed.
EZE 33:28 An we-yar, nega-dulesulidganga obinyoed. E-gangued-san-dummarba-imakdiid berguoed. Israel-e-sapurmar swiri naguoed, agi dule-wargwensaale bar egi nasaosulid.
EZE 33:29 Ar Israel-dulemar-ibmar-isgana-imaksad-ular, an we-yar nega-dulesulidganga imaksale, Israel-dulemar wisgumaloed, ani an Bab-Jehová gue.’
EZE 33:30 ”Dule-machi, be-dulemardi begine galu-matusur-maid-dikarba, degi, e-neg-yawagakgi sunmakmalad, na muchub-muchub sogmalad: ‘¡Dagmala! Bab-Jehová-anmarga-gayaburba-soged, anmar itonae.’
EZE 33:31 Bela bese danidamalad, be-asabin an-dulamaryob bukunonidamalad, be-ibmar-soged itomalad, ar degite, eba imaksurmalad. Gayaginbi nued angi sunmakmalad, ar e-gwagedi maniginbi binsaed.
EZE 33:32 Wemarga, unnila bedi sabguedgi-namaked-dule gued, yeer-gammu-nikadid, degi, nued gar-ogorbalidid. Be-ibmar-soged itomalad, ar degite, eba imaksurmalad.
EZE 33:33 Degi-inigwele, bela an we-ibmar-sogsad guoed. Ar bela we-ibmar gualile, wisgumaloed, emar-abargi Bab-Dummad-gayaburba-barsoged-wargwen gudii gusye.”
EZE 34:1 Bab-Jehová anga sogded:
EZE 34:2 “Dule-machi, Israel-sibad-wawaad-edarbemaladgi ibmar-guoed iduakwaa be soge. Bab-Jehová-Bela-Gangued-Nikadi weyob sogye, ega be soge: ‘Israel-sibad-wawaad-edarbemalad, bemar duledar-wilesmar, na beginbi be binsamalad. ¿Sibad-wawaad-edarbemalad, na sibad-wawaadmar edarbergebsursi?
EZE 34:3 Bemar sibad-wawaad-e-mam-nis gobmalad, e-absar be-morga be imakmalad, degi, sibad-wawaad bur wardummagan be oburgwemalad, degi-inigwele, gwen be nue akwesurmalad.
EZE 34:4 Sibad-wawaad-nollo-itoged gwen be ogannosurmalad, gegumalad gwen be edarbesurmalad, nailikgusad gwen be nudaksurmarbalid. E-galugi-nosa-gudiid gwen be aminasurmalad, yoggus-gudiid gwen be amisurmarbalid. Bur bule bemar sibad-wawaad sarsoged, sabsur-imakdabalid.
EZE 34:5 Edarbed-sated-ular, sibad-wawaadmar aisakidmalad. A-ulale, ibmar-durgan-ursirmaladse ibgwensur-galegega gumalad.
EZE 34:6 An-sibad-wawaadmar yalaganba, degi, yala-mulluganba yoggus gudidimalad. Bela sibad-wawaadmar we-napneggi aisakisbukwamalad-aminaegala, dule gwen bai itosulid.
EZE 34:7 ” ’Degisoggu, sibad-wawaad-edarbemalad, Bab-Jehová-e-gayaburba nue-itomala:
EZE 34:8 Ani an Bab-Jehová-Bela-Gangued-Nikadi, na dukin ise-sogar-soged, an-sibad-wawaadmar edarbed-sated-ular, atur-imaklesmalad, degi, ibmar-durgan-ursirmaladse ibgwensur galesmalad. An-sibad-wawaad-edarbemalad an-sibad-wawaadmar edarbesulid, unnila na eginbi binsamalad, an-sibad-wawaadmargindi binsasurmalad.’
EZE 34:9 Degisoggu, sibad-wawaad-edarbemalad, Bab-Jehová e-gayaburba be itomala.
EZE 34:10 Bab-Jehová-Bela-Gangued-Nikadi weyob soged: ‘An-sibad-wawaad-edarbemaladgi an aibined. Weyob an-sibad-wawaadmar-imaksad-ulale, an ese ibmar egisoed. An-sibad-wawaadmar mer-bar-akwega an imakoed, degi, bar na eginbi binsaosurmalad. An-sibad-wawaadmar an e-annik suoed, adi, mer bar e-masga guegar.’ ”
EZE 34:11 Bab-Jehová-Bela-Gangued-Nikadi weyob soged: “An-sunnad, an-sibad-wawaadmar an aminaoed, an-sunnad an edarboed.
EZE 34:12 Ar igi sibad-wawaad-edarbed sibad-wawaadmar-aisakisbukwar edarbedae, deyobi, an-sibad-wawaadmar an edarboed. Ibagwengi dii-widanikir, negsichi-naguedgi, na bia aisakis-bukusmala, agi-bukwadgi, an gannar sedagoed.
EZE 34:13 ”Sibad-wawaadmar dulemar-yar-baid-baidgi-bukwamalad-abargi an onogoed, yar-baigangi-bukwamaladgi an onmakoed, degi, e-yarse an sedoed. Israel-e-yalagangi, dianmarba, degi, bela neggweburmargi an akoed.
EZE 34:14 Bur gagan-nuegan-nanaid-gunnega an imakoed, Israel-yarmar-matusulidgi e-gagan-gunned naioed. Agi, galu-nuedgi obunnomaloed, Israel-yarmargi bur-gagan-nuegan-naid gunmaloed.
EZE 34:15 An-sunnad an-sibad-wawaadmar an akoed, degi, obunnogega an sedoed. Bab-Jehová-Bela-Gangued-Nikadi weyob soged.
EZE 34:16 ”Sibad-wawaadmar-yoggusmalad an aminaoed, e-galugi-nosa-gudimalad an gannar sedagoed. Mali-bichis-gudimalad an ega morgi-obipirmakoed, degi, nollo-itodimalad an ogannogoed. Ar sibad-wawaad-wardummagandi, degi, dutusur-itomaladdi, an obelogoed. An-sibad-wawaadmar igar-innikigwadba an akoed.
EZE 34:17 ”An-sibad-wawaadmar, bemargardi ani Bab-Jehová-Bela-Gangued-Nikadi, weyob soged: ‘Sibad-wawaadmarga an war-wargwengi igar nabogoed, degi, sibad-wawaad-macherganga, sibad-macherganga an igar nabogoed.
EZE 34:18 ¿Bemar bur gagan-nuegan-gunned amba galaku itode? ¿Bemarde gagan-obichad-birgi annamarbalirgebe? ¿Bemar dii-ditiregwad-gobed amba galaku itode? ¿Bemarde dii-obicha-sigisadi naggi gudure-imaked aku itode?
EZE 34:19 A-ulale, an-sibad-wawaadmar, bemar-gagan-birgi-annasad gunmalad, degi, bemar-dii-gudure-imaksad gobmalad.
EZE 34:20 ” ’A-ulale, Bab-Jehová-Bela-Gangued-Nikadi weyob soged: An-sunnad an sibad-wawaad-wardummaganga, degi, garaganaga igar nabogoed.
EZE 34:21 Ar bemarde dikargi, degi, yargangi egee imaksamalad, deginbali, bur nollo-itomalad be-bebegi be sikaa imaksamalad, degii bemar oduurmaksamalad.
EZE 34:22 An-sibad-wawaadmar an bendakoed, bar bemarse galegosurmalad. Sibad-wawaadmarga an igar nabogoed. Ebo-ebogi ega an igar nabogoed.
EZE 34:23 Geb degine, sibad-wawaad-edarbed-wargwen an ega barmidagoed, an-mai-David, adi, wemar-akoed, degi, ebi walagwen sibad-edarbedga guoed.
EZE 34:24 Ani an Bab-Jehová, e-Bab-Dummadga guoed, degi, an-mai-David, e-dummadga guoed. Ani an Bab-Jehová sogsad.
EZE 34:25 ” ’An wemarbo igar-bogidikid mesoed: An we-yargine ibmar-durgan-ursirmar obelogoed, adi, an-sibad-wawaadmar nega-dulesulidganba sunna dobsuli megmalaga, degi, sapurba bogidikidgi gabmaloed.
EZE 34:26 An wemargi doggus-nued binsaoed, degi, an-yar-mullu-e-dikarmar ibmar-nuegan-nikuedga an imakoed. E-ibagan-sekalaa an dii owioed. We-dii ibmar-nuegan-nikuega imakoed.
EZE 34:27 Sapimar na sanmakdoed, napaneg ibmar-gwag osanmakoed. Israel-dulemar na e-yargi dobsuli gudimaloed. Dulemar-maiga-imaksamaladgi an-dulamar an onosale, geb wisgumaloed, ani an Bab-Jehová gue.
EZE 34:28 Dulemar-yar-baid-baidgi-bukwamaladse bar galegosurmalad, ibmar-durgan-ursirmarse bar dolemarbalosulid. Dobsuli gudimaloed, dule-wargwensaale odobguosulid.
EZE 34:29 E-ibmar-gwag-sanmakoedba, e-napaneg nuedga guoed. E-yargi bar ukudmaad itogosurmalad, deginbali, dulemar-yar-baid-baidgi-bukwamalad bar egi dodomarbalosulid.
EZE 34:30 Geb degine, wisgumaloed, ani an e-Bab-Jehová-Bela-Gangued-Nikadi eba gudii, degi, Israel-dulemar an-dulamar gue. Ani an Bab-Jehová-Bela-Gangued-Nikadi weyob soged.
EZE 34:31 Deginbali, ani an Bab-Jehová-Bela-Gangued-Nikadi weyob sogbalid, ani an bemar-Bab-Dummadid. Bemardi an-sibad-wawaadmalad. Ani an bemar-edarbedid.’ ”
EZE 35:1 Bab-Jehová anga sogded:
EZE 35:2 “Dule-machi, Seir-yarsik be atake, egi ibmar-guoed iduakwaa be soge.
EZE 35:3 Bab-Jehová-Bela-Gangued-Nikadi weyob sogye, ega be soge: ‘Seir-yar, an begi aibined. An sabsur-be-odurdakoed, nega-dulesulidganga an be-obinyoed.
EZE 35:4 Be-neggweburmar akwamarbi-ganna-ganna-bukwa an imakoed, bedi nega-dulesulidganga guoed. Geb degine, be wisguoed, ani an Bab-Jehová gue.
EZE 35:5 ” ’Ar be gusgu Israel-dulemar-e-isdarmaladsoggu, e-isgusad-ular, sabsur-odurdaklesad-ibagi, e-wilesad-ibagi, bemar egi bila onosad.
EZE 35:6 Degisoggu, ani an Bab-Jehová na dukin ise-sogar soged, burgwega an be-imakoed, burgwed begi banguosulid. Bab-Jehová-Bela-Gangued-Nikadi soged: Ar be ablis-aryoed isdar-daksasulid, a-ulale, ablis-aryoed begi banguosulid.
EZE 35:7 Seir-yar nega-dulesulidganga an imakoed. Agi dule-danikoed, dule-ese-nadapoed an ogilogoed.
EZE 35:8 Muimar e-yarmar-ena an nasikoed. Dulemar-es-suidgi-burgwismalad be-yar-mullugangi, be-nebamargi, degi, be-diwarmargi ena omiledoed.
EZE 35:9 Degisadegu nega-dulesulidganga an be-imakoed, dulemar be-neggweburmargi bar bukuosulid. Geb degidbali, be wisguoed, ani an Bab-Jehová gue.’
EZE 35:10 ”Seir, ar be sogsad: ‘Amba Bab-Jehová Israel-yargi-mai-inigwele, e-napaneg-sogbogwad, e-neggwebur-sogbogwad angadga guoed. Ani an e-ibedga guoed.’
EZE 35:11 A-ulale, ani an Bab-Jehová na dukin ise-sogar-soged, ar igi nobedba, isdar-dakedba, be Israel-dulemar-sabsur-imaksagusa, deyobi, an be-imakmogoed. Bab-Jehová-Bela-Gangued-Nikadi weyob soged. Ar an sabsur-be-odurdaksale, bemar magar an-daknonimaloed.
EZE 35:12 Geb degine, be wisguoed, ani an Bab-Jehová gue. Be Israel-dulemargi urwedii gusad an bela itosad. Urwedgi be sogsagusad: ‘¡Bela oitolesmala, emigindi, anmar sunna obergue!’
EZE 35:13 Urwedgi, binsaed-satedgi be angi-sunmaksadi an be-itosad.
EZE 35:14 ”Bab-Jehová-Bela-Gangued-Nikadi weyob soged: ‘Bela napneggi yeer-itomalaga, an be-obelogoed.
EZE 35:15 Ar igi Israel-dulemarga yar-uklesad-bergusgu, na be yeer-itosgusa, deyobi, an begi yeer-itomogoed. Be, Seir-yar, degi, bela Edom-yar, nega-dulesulidganga gumaloed. Degidbali, wisgumaloed, ani an Bab-Jehová gue.’ ”
EZE 36:1 Bab-Jehová sogdebalid: “Dule-machi, Israel-yarmargi ibmar-guoed iduakwaa be soge, ega weyob be soge: ‘¡Israel-yarmar, Bab-Jehová-e-gayaburba be itoge!
EZE 36:2 Bab-Jehová-Bela-Gangued-Nikadi weyob soged: Be-isdarmalad begi dodoar-sogmalad: Yar-sergan bato anmargadi.’
EZE 36:3 A-ulale, ibmar-guoed iduakwaa be soge, Bab-Jehová-Bela-Gangued-Nikadi weyob sogye, ega be soge: ‘Bela be-dikarba neggweburmar-bukwamaladi begi bila onosmalad, degi, be-neggweburmar obelosmalad. Dulemar-yar-baid-baidgi-bukwamalad bemar-ibe ibmar susmalad, deginbali, ibmar-dodoedga be gusmarbalid, dulemar begi dodogar sunmaksamalad.
EZE 36:4 Degisoggu, Israel-yarmar, Bab-Jehová-Bela-Gangued-Nikadi-e-gayaburba be itomala. Weyobi Bab-Jehová-Bela-Gangued-Nikadi sogsad: Yarmarga, yar-mulluganga, dianmarga, nebamarga, negmar-bibichismaladga, neggweburmar-ollosiid dulemar-e-dikarba-bukwamaladse-atursalesmaladga, degi, ibmar-dodogedga-gusmaladga, sogsad.’
EZE 36:5 ”Bab-Jehová-Bela-Gangued-Nikadi weyob soged: ‘An nue-sae-itogedgi dulemar-yar-baid-baidgi-bukwamalad-annik, degi, Edom-annik ibmar sogsad. Ar wemar weligwaledgi, nue-isdar-dakedgi an-yar susmalad, adi, obelogega, degi, e-ibe ibmar sumalagar.’
EZE 36:6 ”Degisoggu, Israel-dulemarga ibmar-guoed iduakwaa be soge: ‘Yarmarga, yar-mulluganga, dianmarga, degi, nebamarga, weyob Bab-Jehová-Bela-Gangued-Nikadi sogye ega be soge: Sae-itogedgine, isdar-itogedgine an ibmar sogsad. Ar ade, bemar dulemar-yar-baid-baidgi-bukwamaladse binge-gubukwa gusmalad.’
EZE 36:7 A-ulale, Bab-Jehová-Bela-Gangued-Nikadi weyob soged: ‘An ise-sogar-soged, be-dikarba dulemar-yar-baid-baidgi-bukwamalad bingegumarmogoed.
EZE 36:8 ” ’Israel-yalamar, ar bemardi, an-Israel-dulemarga sapimar nikudoed, degi, ibmar-gwag osanmakdoed, ar gannar-dakmalad bato modanikid.
EZE 36:9 Andi bemar-ulale gwichiguoed, an bemar-bendakoed. Bemar sapurmar, bemargi gannar ibmarmar-diglegoed, bemargi gannar ibmar-gwag welegoed.
EZE 36:10 Degi, Israel-dulemar an omerguoed. Neggweburmargi gannar dulemar ambikuoed, degi, negmar-bibichisad gannar soblegoed.
EZE 36:11 An bega be-dulemar, degi, ibmar-durgan bukidar omerguoed. Wemar na mimmigan nikudmaloed, na mergudmaloed. Epenneyobi, dulemar-bukidar-nika an imakoed, iduar-gudigusmaladba bur bule nued-gudii an imakoed. Geb degine, wisgumaloed, ani an Bab-Jehová gue.
EZE 36:12 Israel-yarmar bemargi, an-Israel-dulemar nanaega an imakoed. Israel-dulemar be-ibmarmar egadga imakoed, e-ibmar-abingaoedga be-guoed, e-mimmigan be bar ogilogosulid.’
EZE 36:13 ”Bab-Jehová-Bela-Gangued-Nikadi weyob soged: ‘Ar bemar-annik sogmalad, bemarde dulemar-domaladye, degi, be-mimmigan na be dukin oburgwedye.
EZE 36:14 A-ulale, bemar bar bipisaale, dulemar-doosulid, deginbali, be-mimmigan bar be oburgosurbalid. Ani Bab-Jehová-Bela-Gangued-Nikadi we-ibmar soged.
EZE 36:15 Dulemar-yar-baid-baidgi-bukwamaladi dodogar-begi-sunmaked bar itogega an be-imakosulid. Dule-bamaladse bar be binge-gudii guosurmalad, be-dulemar-ibe e-mimmigan be bar ogilogosulid. Ani Bab-Dummad-Jehová-Bela-Gangued-Nikadi weyob soged.’ ”
EZE 36:16 Bab-Jehová anga sogdebalid:
EZE 36:17 “Dule-machi, Israel-dulemar e-yargi gudimargua, emar na e-daedba, e-ibmar-imakedba napaneg oichosmalad. Ome-igar-dakdiidyob e-daed an-asabin gudii gusad.
EZE 36:18 Degisoggu, napneggi bukidar-ablis-eosad-ular, degi, e-bab-dummadyob-ibmar-imakleged-e-nug-odummosad-ular, an wemar sabsur-odurdaksad.
EZE 36:19 Dulemar-yar-baid-baidgi-bukwamaladse an oaisakisad, degi, bamalad-yalagangi aisakis bukusmalad. E-daedba, e-ibmar-imakedba an ega igar nabosad.
EZE 36:20 Ar dulemar-yar-baid-baidgi-bukwamaladse-mosmargua, emar an-nug-islidikid oichosmalad. Ar ade, weyob wemar-annik sogsamalad: ‘Bab-Jehová-e-dulamalanad, degi-inigwele e-yargi onolesmalad.’
EZE 36:21 Degisoggu, an-nug-islidikid an na bendake daklearsunnad. Ar ade, Israel-dulemar, dulemar-yar-baid-baidgi-bukwamaladse modapile, an-nug oichosdamalad.
EZE 36:22 ”A-ulale, Israel-dulemarga Bab-Jehová-Bela-Gangued-Nikadi weyob sogye, be soge: ‘An ibmar-imakoed, bemar-ular an imakosulid. Bemar an-nug-islidikid dulemar-yar-baid-baidgi-bukwamalad-abargi oichosmalad-ular, an imakoed.
EZE 36:23 An-nug-islidikid-dummarba-gued an oyogoed, we-nug dulemar-yar-baid-baidgi-bukwamalad-abargi oicholesad. Bemar we-nug dule-bamalad-abargi oichosmalad. Bemar-abargi, an-isligwaled an oyosale, dulemar-yar-baid-baidgi-bukwamalad wisgumaloed, ani an Bab-Jehová gue. Ani an Bab-Jehová-Bela-Gangued-Nikadi weyob soged.
EZE 36:24 Dulemar-yar-baid-baidgi-bukwamalad-abargi an be onomaloed, yar-baigangi-bukwadgi an be-onmakmaloed. Geb gannar be-yarse-dagega an be-imakmaloed.
EZE 36:25 Dii-diregwadgi an be-ogoed, geb bemar swilidik gumaloed. Bela be-isgusadgi, degi, be-bab-dummadyob-ibmar-imakleged-e-nug-odummosadgi, an swilidik be-imakmaloed.
EZE 36:26 An bemarga gwage-binid ukoed, an bemargi burba-binid oubogoed. Emi, bemar gwage-dutusur-nikadi, bemar-ibe an osulogoed, an bemarga gwage-nued ukoed.
EZE 36:27 An bemargi an-Burba oubogoed, geb an-igar-maidba-nanamalaga, an-Igar-Mesisadba-ibsamalaga an be-imakmaloed.
EZE 36:28 An be-dadganga yar-uksadgi bemar gudimaloed, degi, bemar an-dulamarga guoed. Ani an be-Bab-Dummadga guoed.
EZE 36:29 Isguega bar an be-imakosulid. Orosgwagyob-dakleged-trigo-bukidar nikuega an be-imakoed, degi, ukudmaad-itogega an be-imakosulid.
EZE 36:30 Sapi-sanmar, degi, ibmar-gwag-welemalad an omerguoed, adi, ukudmaad-itoged-ular, dulemar-yar-baid-baidgi-bukwamaladse mer bar be bingegumalagar.
EZE 36:31 Deyobi, be-isganadaed, degi, be-ibmar-isgana-imaksad be ebinsamaloed. Geb be-isgued-ular, be-ibmar-isgana-imaked-ular, be binge itomaloed.
EZE 36:32 Bemar wisgubi an abedo, ar we-ibmar, an bemar-ular imaksulid.’ Ani an Bab-Jehová-Bela-Gangued-Nikadi weyob soged. ‘Israel-dulemar, na be-daed-ular, be nug isgumala. Be-daed-ular, be binge itomala.’
EZE 36:33 ”Bab-Jehová-Bela-Gangued-Nikadi weyob soged: ‘Bela be-isgusadgi an swilidik be-imakoed-ibagi, an neggweburmargi dulemar-urboed, an gannar negmar-bibichisad soboed.
EZE 36:34 Napa-swiri-naidgi ibmar-gwag-diglegoed, bela dulemar-egi-nadapmaloed dakmaloed.’
EZE 36:35 Geb degine, soglegoed: ‘Iduar, we-napa nega-dulesulidganga naigusad. Emidi, Edén-nainu-nuedyob dakleged. Iduar, neggweburmar akwamarbi-ganna-ganna-bukwagusad, napabi-nai gusad, negmar-sate gusad. Emidi, na gangus simalad, egi dulemar bukwabalid.
EZE 36:36 Geb degine, e-dikarba dulemar-yar-baid-baidgi-bukwamalad-besmalad wisgumaloed, ani an Bab-Jehová, negmar-bibichisad an gannar sobed. Napaneg-nega-dulesulidganyob-nagusadgi, an gannar ibmar digoed. Ani an Bab-Jehová we-ibmar-sogedi, an imakedsegoed.’
EZE 36:37 ”Bab-Jehová-Bela-Gangued-Nikadi weyob soged: ‘Israel-dulemar sibad-wawaad-merguedyob ega e-dulemar-omerguye anse egisedi, an ega imakoed.
EZE 36:38 Geb degine, neggweburmar-dule-sate-gusadi, dulemar-ena guoed. Igi iba-onolealile, Jerusalén-neggwebur sibad-wawaadmar-ogumakar-ukleged ena gusdae, deyob e-dulemar neggweburmar enogoed. Geb degine, wisgumaloed, ani an Bab-Jehová gue.’ ”
EZE 37:1 Bab-Jehová-e-gangued angi aidenonikid, degi, e-Burba an-sesad. Geb nebagi bukidar garmar-omileded-abargi an-ogwichisad.
EZE 37:2 Garmar-abargi-nanaega an-imaksad, geb nebagi bukidar garmar milemamai an daksad. We-garmar bela dinnaa omilede an daksad.
EZE 37:3 Geb degine, Bab-Jehová anga sogded: “Dule-machi, igi be binsae, ¿we-garmar gannar-durguo be ebinsae?” An e-abin sogded: “Bab-Jehová-Bela-Gangued-Nikadi, unnila bebi we-ibmar wisid.”
EZE 37:4 Geb Bab-Jehová anga sogded: “Ezequiel, we-garmargi-ibmar-guoed iduakwaa be soge, ega be soge: ‘¡Gar-dinnagana, Bab-Jehová-gayaburba be itomala!’
EZE 37:5 Bab-Jehová-Bela-Gangued-Nikadi weyob bemargi soged: ‘An bemargi burba oubogoed, degi, bemar gannar durguoed.
EZE 37:6 An bemargi dub-gar-gwadimalad mesoed, an bemargi san nasikoed, uka nasikbaloed. An bemargi burba oubogoed, adi, bemar gannar durguegar. Geb degine, bemar wisguoed, ani an Bab-Jehová gue.’ ”
EZE 37:7 Bab-Jehová anga igar-uksadba garmargi-ibmar-guoed an sogsad. Garmargi-ibmar-guoed an soggwichidgine, ibmar-binnasuli-gole an itosad, degidbali, neg-giglimakde an daksad. Geb agine, garmar na egi atodmala an daksad.
EZE 37:8 Geb garmargi dub-gar-gwadimalad megide an dakded. Deginbali, san nagude, uka nikudbali an dakded. Degi-inigwele, amba we-garmar burbasuli-mamai an dakded.
EZE 37:9 Geb degine, Bab-Jehová anga sogded: “Dule-machi, burbaga ibmar-guoed iduakwaa be soge: ‘Bab-Jehová-Bela-Gangued-Nikadi weyob bega igar uked: Burba, bela napneg-ugakagi be dage, geb we-gar-burgwarmaladgi be uboge, adi, gannar durgumalagar.’ ”
EZE 37:10 Ar Bab-Jehová igi anga igar uksagusa, an deyobi, yoedse-ibmar-guoed sogsad. Geb garmargi burba ubosad, degi, garmar gannar durgusad, geb gwisgusmalad. Sordamar-bila-onomalad-bukidaryob mergumalad.
EZE 37:11 Geb degine, Bab-Jehová anga sogded: “Ezequiel, we-garmar Israel-dulemar gumalad. Wemar na sogdimalad: ‘Anmar bendakleged sateye, anmar dingudye. ¡Anmar bergus gudiiye!’
EZE 37:12 Degisoggu, Ezequiel, yoedse-ibmar-guoed be soge, Bab-Jehová-Bela-Gangued-Nikadi weyob sogye ega be soge: ‘An-dulamarye, be-neg-uanmar an egaoye, agi an be-onomaloye. Geb gannar Israel-yarse-naega an be-imakmaloye.
EZE 37:13 An-dulamarye, an be-neg-uanmar-egasale, agi an be-onosale, bemar wisguoed, ani an Bab-Jehová guye.’ ”
EZE 37:14 Bab-Jehová sogdebalid: “An-burba an begi oubogoed, geb gannar be durguoed. Be-yargi an be-ourboed. Degine, be wisgumaloed, ani an Bab-Jehová ibmar-sogsad, an imakedseye. Ani an Bab-Jehová-guedi, weyob soged.”
EZE 37:15 Bab-Jehová anga sogdebalid:
EZE 37:16 “Dule-machi, suar-wargwen be sue, agi be narmake: ‘Judá-yarga, degi, Israel-dulemar-eba-nanaidga.’ Geb suar-baid be subali, agi be narmake: ‘Joséʼga.’ Joséʼde, Efraín-e-gaapoled, degi, bela Israel-dulemar-bamalad-eba-nanaid-e-gaapoled gued.
EZE 37:17 We-suar-warbogwad be gwadie, adi, wargwen guega, deyobi suar-wargwenadga gunonikoed.
EZE 37:18 ”Ar be-dulemar bese egichialir: ‘¿We, ibu-obare?’
EZE 37:19 Be abin-sogoed, Bab-Jehová-Bela-Gangued-Nikadi weyob sogye: ‘Efraín-argangi José-e-gaapoled maid, degi, Israel-dorgan-ambegwad (10) abar-eba-atonanaid an suoed, geb Judá-e-gaapoledbo an gwadioed. Deyobi, gaapoled-wargwenadga an wemar-imakoed, an-argangi wargwenna gumaloed.’
EZE 37:20 Be suar-warbogwad-narmaksad, be-argangi be gani-gwisgue, adi, wemar dakmalaga,
EZE 37:21 geb wemarga be sogoed, weyob Bab-Jehová-Bela-Gangued-Nikadi sogye: ‘Israel-dulemar, dulemar-yar-baid-baidgi-bukwamaladse bia nadegusmala, agi an onogoed. Bela galagwensuli-mimilesbukwadgi an onmakoed, adi, an e-yarse gannar sedagegar.
EZE 37:22 A-yargi, Israel-yalagangi, an wemar dulemar-soggwenna imakoed. Unnila rey-wargwen nikumaloed, bar dulemar-sogabo guosurmalad, deginbali, akar-akar-sogabo bar negselebalosulid.
EZE 37:23 Na e-bab-dummadyob-ibmar-imakdimalad-e-nug bar odummogosurmalad, deginbali, e-isgued, degi, ibmar-isgana bar imakosurmarbalid. E-nodii-gusmaladgi an ollor-imakoed, degi, e-isgued an bela ega elioed. Wemar an-dulamarga guoed, andi e-Bab-Dummadga gumogoed.
EZE 37:24 An-mai-David e-reyga megoed, bela e-idued wargwenna nikumaloed. An-Igar-Mesisadba ibsamaloed, an-Igar-Maidba damaloed, abali, ibmar imakmaloed.
EZE 37:25 An-mai-Jacobʼga an yar-uksa-gusadgi, na bia e-dadgan megisgusmala, agi megmaloed. Agi wemar, e-mimmigan, degi, e-wagan degisadegu gudii gumaloed, an-mai-David e-dummad-degisadeguadga guoed.
EZE 37:26 An wemarbo igar-bogidikid mesoed. We-igar degisadeguoed. E-dulemar merguega an imakoed, geb wemar-abargi degisadegu anse-goled-neg an sioed.
EZE 37:27 Wemar-abargi an gudiguoed, an e-Bab-Dummadga guoed, degi, emar an-dulamarga guoed.
EZE 37:28 Wemar-abargi degisadegu anse-goled-neg sigisale, dulemar-yar-baid-baidgi-bukwamalad wisgumaloed, ani an Bab-Jehová, an Israel-yar islidikidga imaksad.’ ”
EZE 38:1 Bab-Jehová anga sogded:
EZE 38:2 “Dule-machi, Gog, Mesec-dulemar-e-dummadga, degi, Tubal-dulemar-e-dummadga, Magog-yargi maid. A-dulega ibmar-guoed iduakwaa be soge.
EZE 38:3 Bab-Jehová-Bela-Gangued-Nikadi weyob sogye ega be soge: ‘Gog, Mesec-dulemar-e-dummadga-maid, degi, Tubal-dulemar-e-dummadga-maibalid, an begi gwichi.
EZE 38:4 Gannar-dagega an be-imakoed, esgoromar-ake-nikad be-gayagi an bega nasikoed, geb bela be-sorda-bila-onomaladmala, be-molimarmala, degi, moli-birgi-sii-abarmakmaladmala an be-sedagoed. Bela wemar gingi nikamalad, bela-bela mergumalad, sigu-abgaed-galagwensuli nikamalad, degi, bela es-suid ganimalad.
EZE 38:5 Wemarba Persa-dulemar, Etiopía-dulemar, degi, Fut-dulemar danimarmogoed. Bela wemar sigu-abgaed nikamalad, degi, bormo-gurgin simalad.
EZE 38:6 Gomer e-sorda-bila-onomaladmala danimogoed, deginbali, dikasur-dad-nakwed-argan-sapiledsik Bet-Togarma e-sorda-bila-onomaladmala danimarmogoed. Bukidar dulemar-beba-nanaid, beba danimaloed.
EZE 38:7 ” ’Be, degi, bela be-walik-sordamar-bila-onomalad-bukwad, guagwar-bukumala, nue-atakmala. Be e-dummadga gue.
EZE 38:8 Ibagan-danikoedgi ibmar-soggwen-imaked bega uklegoed. Birgamar-bukidar-nasad-sorbali, yar-soggwen bila-onolesad-sorba e-neg gannar nugus-bukwadgi be ubononikoed. We-ibe, birgaba e-negmar bibichis-bukwa gusadid. E-dulemardi neggwebur-baid-baidsik mimiles gusbalidid. Ar andi we-dulemar gannar Israel-yalagangi obukunonikid. Dulemar-yar-baid-baidgi-bukwamalad-abargi onolesmalad, emigindi, dobsuli gudimalad.
EZE 38:9 Ar bedi burwa-ooredyobi e-yargi ubononikoed. Be, degi, be-dulemar-bila-onomaladmala, bela dulemar-beba-nanaimaladmala, bela Israel-yargi neg-gudure-sigisdaedyobi be bukunonimaloed.’
EZE 38:10 ”Bab-Jehová-Bela-Gangued-Nikadi weyob soged: ‘A-ibagine, ibmar-imaked be ilemakoed, geb igar-isgana be mesoed.
EZE 38:11 Be sogoed: Yar-soggwen dule-bendaked-satedgi an ubogoed. Dulemar-belagwadamalad na dobsuli-gudimaladgi an bila-ononaoed. Wemar neggweburmar-galu-matusulid-satedmargi, yawagak-satedmargi, degi, esgoro-yawagak-edied-satedmargi bukwamalad.
EZE 38:12 An e-ibe ibmar-atursaoed, geb an e-ibe ibmar-susad an sedoed. Negmar-bibichisadgi gannar neggweburmar-ambikunonikidgi an bila-ononaoed. Agi dulemar yarmar-baigangi-selearmalad bukwad. We-dulemar moli-bebe-nikamalad bukidar nikamalad, deginbali, napaneg bukidar nikamarbalid, bur yar-nuedgi bukwamalad.
EZE 38:13 Sabáʼginmalad, Dedánʼginmalad, Tarsisʼginmalad-manigi-ibmar-ukmalad, degi, Tarsis-e-dummagan-mani-ibgan, wemar bese egisdamaloed: ¿Ibiga be daniki? ¿Bela anmar-ibe ibmar-suega be daniki? ¿A-ulale, be bukidar be-sordamar-bila-onomalad oatosa? Anmar-ibe mani-suega, or-suega, moli-bebe-nikamalad-suega, degi, ibmar-bamalad-suega, ¿be-sordamar be oatosa? ¿Bukidar ibmar-suega be daniki?’
EZE 38:14 ”Dule-machi, Gogʼga ibmar-guoed iduakwaa be soge, Bab-Jehová-Bela-Gangued-Nikadi weyob sogye ega be soge: ‘A-ibagine, an-Israel-dulamar-dobsuli-gudimaloedi, ¿be wisguosuli?
EZE 38:15 Be-yar-akale, dikasur dad-nakwed-argan-sapiledsik, dulemar-bukidar-abargi be danikoed. Bela wemar molimar-birgi-sii danimaloed, bela-bela merguoed, sordamar-bila-onomalad-bulegan gumalad.
EZE 38:16 Ibagan-duku-mosale, an-Israel-dulamargi be bila-onodagoed. Neg-gudure-sigisdaedyobi bela Israel-yargi be bukunonikoed. Gog, an-yarse bila-onodagega an be-imakoed, adi, dulemar-yar-baid-baidgi-bukwamalad an-wisgumalaga, adi, an-isligwaled bemar-abargi wemarga oyolegegar.’
EZE 38:17 ”Ani Bab-Jehová-Bela-Gangued-Nikadi weyob soged: ‘Epenneunni, an begi sunmaksagusad, deunni, Israel-Bab-Dummad-gayaburba-barsogmalad-an-maimarba an sunmaksagusgu. Wemar, a-ibagangi, degi, birgaba ibmar-guoed iduakwaa sogdigusmalad, andi Israel-dulemargi bila-onodagega be-imakoye.
EZE 38:18 Ar Israel-yargi, Gog e-sordamarmala-ubononikoed-ibagi, an bela-bela sae-itogedba uludoed. Ani an Bab-Jehová-Bela-Gangued-Nikadi weyob soged.
EZE 38:19 An-sae-itogedgi, an soged, a-ibagine, Israel-yargi negabandur-dummad naguoye.
EZE 38:20 An-asabin uamar, nuumar, ibmar-durgan-ursirmar, ibmar-durgan-unimalad, degi, bela dulemar-napneggi-bukwamalad wawanmakoed. Yarmar maludoed, yar-mulluga-bubukwad babatidoed, degi, bela galumar-matusur-mamaid ayaridoed.
EZE 38:21 Bela yalaganba Gogʼgi bila-onomalaga an imakoed, e-sordamar-bila-onomalad na e-sordamargi dukin aibinmaloed. Ani an Bab-Jehová-Bela-Gangued-Nikadi weyob soged.
EZE 38:22 An Gog bonigan-dummagangi, degi, burgwedgi sabsur-odurdakoed. Gogʼgi, degi, e-sordamar-bila-onomaladgi, deginbali, bela dulemar-yar-baid-baidgi-bukwamalad eba-nanaidgi, an dii-dummad, dii-akwaga-binnisad, soo, degi, azufre, owioed.
EZE 38:23 Weyobi, an-dummarba-gued, an-isligwaled, an oyogoed. Geb bukidar dulemar-yar-baid-baidgi-bukwamalad magar an-dakmaloed. Geb degine, wisgumaloed, ani an Bab-Jehová gue.’ ”
EZE 39:1 “Dule-machi, Gogʼga ibmar-guoed iduakwaa be soge, Bab-Jehová-Bela-Gangued-Nikadi weyob sogye ega be soge: ‘Gog, Mesec-dulemar-e-dummadga, degi, Tubal-dulemar-e-dummadga-maid, an begi gwichi.
EZE 39:2 Gannar-dagega an be-imakoed, degi, an be-illillir imakoed. Dikasur dad-nakwed-argan-sapiledsik Israel-yalaganse bila-onodagega an be-imakoed.
EZE 39:3 Argan-sapiledsik be warsi-ganikid an bisgoed, degi, argan-nuedsik be sigumar-ganikid argwanega an imakoed.
EZE 39:4 Israel-yalagangi, be-sordamar-bila-onomaladmala, degi, dulemar-be-bardagdimaladmala be burgoed. Mulamarga, degi, ibmar-durgan-ursirmarga an be-metoed, adi, be-domalaga.
EZE 39:5 Neg-ollor-dummad-naidgi be omiledmaloed. Ani an Bab-Jehová-Bela-Gangued-Nikadi weyob soged.
EZE 39:6 An Magogʼgi, degi, dulemar-demar-gakaba-dobsuli-bukwamaladgi soo barmidagoed. Geb degine, wisgumaloed, ani an Bab-Jehová gue. Ani an Bab-Jehová-Bela-Gangued-Nikadi weyob soged.
EZE 39:7 ” ’An-Israel-dulamar-abargi an magarogoed. An-nug-islidikid bar-oicholegega an imakosulid. Dulemar-yar-baid-baidgi-bukwamalad, wisgumaloed, ani an Bab-Jehová, Israel-dulemar-e-Bab-Dummad-Isligwaled gue.
EZE 39:8 Bela we-ibmarmar-guoed modanikid, bato guesokalid. An we-iba obaris gusad. Ani an Bab-Jehová-Bela-Gangued-Nikadi weyob soged.
EZE 39:9 ” ’Geb degine, dulemar-Israel-neggweburginmalad ainidagoed, geb soo ogamaloed, adi, gingimar, sigu-abgamalad, warsibmar, sigumar, degi, eswarmar, ogumakmalagar. We-ibmarmar birgagugle (7) soo-ogaega, e-sapanga guoed.
EZE 39:10 Sapan-amiega bar yarse naosurmalad, deginbali, bar sapurba siknamarbalosulid, ar bela we-gingimar ega sapanga guoed. Deginbali, e-ibe-ibmar-atursasmalad-ibe ibmar-atursamarmogoed, e-ibe-ibmar-susmalad-ibe ibmar-sumarmogoed. Bab-Jehová-Bela-Gangued-Nikadi weyob soged.
EZE 39:11 ” ’A-ibagine, Israel-yargi, dulemar-iirmaked-nebagi, demar-asabin, an Gogʼga neg-uan mesoed. We-neg-uan dulemar iirmaked-igargi megoed. Agi Gog bela e-sordamar-bila-onomaladmala diglegoed, geb Hamón-Gog-nebaye bimaloed.
EZE 39:12 Israel-dulemar Gog-sordamar-digmalaga, degi, yar-swilidik-imakega, nii-walagugle (7) alamaknai gumaloed.
EZE 39:13 Bela Israel-dulemar wemar-digmaloed. A-ibagi, an-gangued-yeerdakleged an oyogoed, a-iba Israel-dulemarga iba-geg-ieleged guoed. Ani an Bab-Jehová-Bela-Gangued-Nikadi weyob soged.
EZE 39:14 ” ’We-nii-walagugled-sorbali (7) Israel-yargi-bipirmaknamalaga dulemar amilegoed. We-dulemardi dule-bamaladbo amba yoo-muimar-diglemamaid digmaloed. Deyobi, Israel-yar swilidik imakmaloed.
EZE 39:15 Ar we-dulemar-wargwenad, Israel-yargi-bipirmakdiidgi dule-gar-bukwa dakalile, a-dikarba wilubga ibmar ogwichoed. Deyobi, napadakmalad, we-gar Hamón-Gog-nebase sedoed, adi, agi digmalagar.
EZE 39:16 Weyobi, Israel-yar swilidik imakmaloed. Agi neggwebur-gwagwen Hamonaʼye-nugad sigbaloed.’
EZE 39:17 ”Dule-machi, Bab-Jehová-Bela-Gangued-Nikadi weyob soged: ‘Bela nuumar-san-gunmaladga, degi, bela ibdurgan-ursirmarga be soge, bela be baid-baidsik-gudidimaladgi Israel-yalaganse be dagmala, agi an bemarga masgulleged-dummad uksokalid. Agi, bemar san-gunmaloed, degi, ablis-gobmaloed.
EZE 39:18 Dulemar-bila-onomalad-bulegan-e-san be gunmaloed, degi, napneggi dummagan-negsemamaid-e-ablis be gobmaloed. Bela wemar Basán-e-sibad-wawaad-machered-e-sanyob, sibad-wawaad-bipigwad-e-sanyob, sibad-machered-e-sanyob, degi, Basán-e-moli-bebe-nikad-bipigwad-wardummagan-e-sanyob gumalad.
EZE 39:19 An bega masgulleged-dummad uksokalidgi, bemar budar-itogedse ibmar-gwallu gunmaloed, bemar mumguedse ablis gobmaloed.
EZE 39:20 Moli-san, dulemar-moli-birgi-sigmalad-san, dulemar-bila-onomalad-bulegan-san, degi, bela dulemar-bila-onomalad-san, an-mesegi immelegedse be gunnoed. Ani an Bab-Jehová-Bela-Gangued-Nikadi weyob soged.
EZE 39:21 ” ’Dulemar-yar-baid-baidgi-bukwamalad-abargi, an-gangued-yeerdakleged an oyogoed. Igi an ega igar-nabosa, degi, igi an sabsur-odurdaksa, bela we-dulemar dakmaloed.
EZE 39:22 A-iba-onodoed-akale, Israel-dulemar wisgumaloed, ani an Bab-Jehová, e-Bab-Dummad gued.
EZE 39:23 Dulemar-yar-baid-baidgi-bukwamalad wisgumaloed, Israel-dulemar e-isgued-ular, degi, angi-nosmalad-ular, e-yargi-onoles gusmalad. A-ulale, an obachagusad, degi, e-isdarmaladga an urmaksagusad, bela Israel-dulemar es-suidgi burgwisgusmalad.
EZE 39:24 E-isguedba, e-uayasulidaedba an sabsur-odurdaksad, an obachagusad.’
EZE 39:25 ”A-ulale, ani Bab-Jehová-Bela-Gangued-Nikadi weyob soged: ‘Emigindi, Jacob-dulemar-gales-bukmaladi, gannar dagega an imakoed. Bela Israel-dulemar an wiledakoed, an-nug-isligwaled-odummomalaga an imakoed.
EZE 39:26 Israel-dulemar e-napaneggi dobsuli, degi, dule-e-ogwayedsate-gudigusale, e-bingegusad, degi, angi bela-e-nodigusmalad iemaloed.
EZE 39:27 Dulemar-yar-baid-baidgi-bukwamalad-abargi, an gannar dagmalaga imaksale, degi, e-isdarmalad-yargi an onosale, dulemar-yar-baid-baidgi-bukwamalad-wagab, an-isligwaled Israel-dulemargi an oyogoed.
EZE 39:28 Geb degine, wisgumaloed, ani an Bab-Jehová, e-Bab-Dummad gue. Ani an dulemar-yar-baid-baidgi-bukwamaladse barmis gusad. Geb sorbali, an gannar e-yargi urbenonikid, dule-wargwensaar obelessulid.
EZE 39:29 An bipisaar bar obanosulid, ar an-Burba Israel-dulemargi an odegoed. Ani an Bab-Jehová-Bela-Gangued-Nikadi weyob soged.’ ”
EZE 40:1 Deunni, anmar birga-durgwen-gakatargus (25) Babiloniaʼgi-bukwadgine, Bab-Jehová-e-gangued angi aidenonikid, geb Jerusalén-neggweburse an-sesad. We-ibmar-gusadi, birga-onoded-nii-wargwenad-ibambegi gusad. Deunni, birgambe-gakabakegus (14) Jerusalén-neggwebur sulesad-akaled.
EZE 40:2 Negburgan-dakedgi, burbale Bab-Dummad Israel-yarse an-sesad, geb yar-matusulid-birgi an-ogwichisad. Agi an dad-nakwed-argan-nuedsik-atakgwichi, negmar-suigan-bukwa an dakalid. A-negmala, neggwebur-bukwayob dakleged.
EZE 40:3 A-neggweburse Bab-Dummad an-sesad. Agi, dule-wargwen esgoro-gordikidbi-sobaledyob gwichi an dakalid. A-dulede, e-argangi neg-inniki-wilubsaed-linoʼdub, degi, ibmar-wilubsaed-suar gani-gwichi an dakalid, yawagak-dikarba-gwichi an dakalid.
EZE 40:4 A-dule weyob anga sokalid: “Dule-machi, nue be itogo. An bega ibmar-oyosokalid be nue dako, a-ulale, wese be selealid. A-sorbali, bela-be-ibmar-dakoedi, Israel-dulemarga be sogmogoed.”
EZE 40:5 Geb degine, Bab-Dummadse-goled-neg-ebiris, galu-matusulid-mai an dakalid. Dule, e-argangi ibmar-wilubsaed-suar, daligwen-negabar-sugu-ganiki (1½) an dakalid. Geb galu-matusur-maid wilubsasad. E-songuedi, daligwen-negabar (1½) songued. E-nibguedi, daligwen-negabar (1½) nibgubalid.
EZE 40:6 A-sorbali, dule, yawagak-dad-nakwedsik-argasiidse naded. Arsan-maidba nakwisad, geb yawagak-doglemaid-e-gaka wilubsasad. E-matardunguedi, daligwen-negabar (1½) matardungued.
EZE 40:7 Yawagakgi igar-dogmaid-e-dikar-abinbeladgi neg-senigan-bukwad. E-suguedi, daligwen-negabar (1½) sugued, e-yaadungueddi daligwen-negabar dungubalid (1½). We-neg-senigan, daligwen-bisgise (1¼) egi bangu-bangu bukwamalad. A-sorbali, yawagak neg-imba-naidsik argasiid. We-neg-imba-naid, Bab-Dummadse-goled-negsik nomaid. We-yawagak-dogedi, daligwen-negabar (1½) yaadungu maid.
EZE 40:8 Amba deyobi neg-senigwad-akar neg-imba-siidse e-bangued wilubsasbalid. E-banguedi, daligwen-negabar (1½) bangued.
EZE 40:9 Neg-ollorsiid, Bab-Dummadse-goled-negsik-argasiid wilubsasad. E-suguedi, dalibo (2) sugued, e-buarmardi achabake wardungued.
EZE 40:10 Dad-nakwedsik yawagakgi-igar-dogmaid-e-dikar-abinbeladgi, neg-senigan gwapaa-gwapaa emarbi-dungu-dungu bukwad. Deginbali, yawagakgi-igar-dogmaid-e-dikar-abinbeladgi, buarmar emarbi-dungu-dungu gwigwisbalid.
EZE 40:11 Dule, yawagak-doged wilubsasbalid. E-matardunguedi, dalibo-negabar (2½) matardungued, e-sugueddi dalipaa-bisgise (3¼) sugued.
EZE 40:12 Neg-senigan-iduar galu-akwagi-sobaled-bipigwad maid. E-matardunguedi, achabo matardungued, e-nibgueddi achabo nibgued. Neg-senigan, daligwen-negabar (1½) sugued, e-matardungueddi daligwen-negabarbalid (1½).
EZE 40:13 Dule, neg-senigwad-yabalid-akar, baid neg-senigwad-obakar-siid-yabalidse, doged wilubsasad. E-yaadunguedi, dalinergwa-bisgise (6¼) dungued.
EZE 40:14 A-sorbali, neg-imba-siid wilubsasbalid. E-yaadunguedi, daliatar (5) dungued. Neg-ollorsiid, neg-imba-dummad-naidse-nomaid, we-neg-imba-dummad-naid bela ebirisnaid.
EZE 40:15 Dogedgi yawagak-gwichid-akar, neg-imba-siid-yawagak-gwichidse daliambe-gakabo gaka-negabar (12½) sugued.
EZE 40:16 Negmar-senigan-e-dikarmargi, degi, buarmar-e-dikarmargi, yabali yawagak-senigan-esgoro-biir-biir-mamaid bukwad. Deginbali, neg-imba-siid-e-dikargi, yabali yawagak-senigan bukwabalid. Geb buarmargi ogobwarmaryob sobarnanaid.
EZE 40:17 A-sorbali, galu-matusur-maid-imbagi, neg-imba-dummad-magabalidse an-sesad. Neg-ollor-dummad-naid-ebiris, gwadurgwen-gakambe (30) gabednegmar bukwad. We-gabednegmar-dogedgi akwa aryogar maid. We-akwa-aryogarmaid bela neg-imba-dummad-naidgi aryogar maid.
EZE 40:18 Akwa-aryogarmaid, nakwed-aidegedgi aryogar maid, yawagakgi-igar-dogmaid-neg-dikarse bela aryogar maid. Akwa-aryogarmaid-suguedi, yawagak-igar-dogmaid-suguedyobi sugu maid.
EZE 40:19 Urba-dogedgi yawagak-gwichid-akar, neg-imba-senigwad-naid-e-yawagak-magaba-gwichidse, e-bangued wilubsasad. Dad-nakwedsik, degi, dad-nakwed-argan-sapiledsik dali-dulagwen-gakatar (25) sugued.
EZE 40:20 Dule, dad-nakwed-argan-sapiledsik neg-imba-dummad-doged-siid e-sugued, degi, e-yaadungued wilubsasad.
EZE 40:21 Yawagakgi-igar-dogmaid-e-dikar-abinbeladgi, e-neg-senigan gwapaa-gwapaa bukwamogad. Deginbali, e-buarmar, degi, e-neg-imba-siid, dad-nakwedsik-doged-siid-e-buarmaryob, degi, e-neg-imba-siidyob dungumarmogad. E-yawagakgi-igar-dogmaid, dad-nakwedsik yawagakgi-igar-dogmaidyob dungumogad, adi, daliambe-gakabo gaka-negabar (12½) sugued, e-yaadungueddi dalinergwa-gaka-bisgise (6¼) dungued.
EZE 40:22 E-yawagak-senigana, e-neg-imba-naidi, dad-nakwedsik-doged-siidgi yawagak-senigan-bukwadyob, degi, neg-imba-naidyob dungumarmogad. Deginbali, e-buarmar dad-nakwedsik-doged-siidgi buarmar-bukwayob daklemogad. We-yawagakse arsan-gwagugle (7) nakwed-nikadba nakleged. E-neg-imba-naidi, yawagakgi-igar-dogmaid-yaba naid.
EZE 40:23 Neg-imba-senigwad-naid-e-yawagak-gwagwen dad-nakwed-argan-sapiledsik-yawagak-siid-asabin argasiid, igi dad-nakwedsik yawagakmar bukwamalayob argasiid. Dule, yawagakmar-bangu-gwigwichid wilubsasad. E-banguedi, dali-dulagwen-gakatar (25) bangued.
EZE 40:24 A-sorbali, dule, dad-nakwed-argan-nuedsik yawagak-argasiidsik an-sesad. Neg-senigan, buarmar, degi, neg-imba-naidi wilubsasad. Bela we-ibmarmar, bamalad-yawagak-e-igar-dogmaidgi-bukwamaladyob dungumarmogad.
EZE 40:25 Neg-ollorsiid-e-dikargi yawagak-senigan bukwad, igi bamalad-neg-imba-bukwadgi yawagak-senigan bukwadyobi bukwamogad. Yawagak-e-igar-dogmaid daliambe-gakabo gaka-negabar (12½) sugued, e-matardungueddi dalinergwa-gaka-bisgise (6¼) dungued.
EZE 40:26 Arsan-sogagugle (7) nakwed-nikadba yawagakse naklemogad. E-neg-imba-siid, yawagakgi-igar-dogmaid-yaba siid. Buarmar-e-dikarmargi ogobwarmaryob sobarnaid.
EZE 40:27 Neg-ollor-senigwad-naidgi, dad-nakwed-argan-nuedsik yawagak argasimogad. Dule, dad-nakwed-argan-nuedsik yawagakmar egi bangu gwigwichid wilubsasad. Dali-dulagwen-gakatar (25) bangued.
EZE 40:28 A-sorbali, dad-nakwed-argan-nuedsik yawagak-siidba neg-imba-senigwad-naidse we-dule an-sesad. Dad-nakwed-argan-nuedsik yawagak-gwichid wilubsasad, adi, bamalad-yawagakmar-gwigwichidyob dungumogad.
EZE 40:29 E-neg-senigan, e-buarmar, degi, e-neg-imba-siid-bamaladyobi dungumarmogad. Neg-ollorsiid-e-dikargi yawagak-senigan bukwad. Yawagak-e-igar-dogmaid daliambe-gakabo gaka-negabar (12½) sugued. E-yaadungueddi, dalinergwa-gaka-bisgise (6¼) dungued.
EZE 40:30 E-dikarmargi, neg-ollogana-bukwad dalinergwa-gaka-bisgise (6¼) sugued, e-yaadungueddi, daligwen-bisgise (1¼) dungued.
EZE 40:31 E-neg-imba-siid, neg-imba-dummad-naidse nomaid. E-buarmargi ogobwarmaryob sobarmogad. We-yawagakse arsan-baabak-nakwed-nikadba (8) nakleged.
EZE 40:32 Deginbali, dad-nakwedsik yawagak-siidba neg-imba-senigwad-naidse an-sesad, geb e-doged wilubsasad, bamalad-dogedyobi dungumogad.
EZE 40:33 E-neg-senigan, e-buarmar, degi, e-neg-imba-naid bamaladyobi dungumarmogad. Yawagak-e-igar-dogmaid daliambe-gakabo gaka-negabar (12½) sugued. E-matardungueddi, dalinergwa-gaka-bisgise (6¼) dungued.
EZE 40:34 E-neg-imba-siid neg-imba-dummad-naidse nomaid. E-buarmargi ogobwarmaryob sobarmogad. We-yawagakse arsan-baabak-nakwed-nikadba nakleged.
EZE 40:35 A-sorbali, dad-nakwed-argan-sapiledsik yawagak-gwichidse an-sesad, geb wilubsasad. We-yawagak bamalad-yawagakyob dungumogad.
EZE 40:36 Deginbali, neg-senigan, buarmar, neg-imba-siid nikamogad. E-dikarmargi yawagak-senigan bukwamogad. Yawagak-e-igar-dogmaid daliambe-gakabo gaka-negabar (12½) sugued. E-matardungueddi dalinergwa-gaka-bisgise (6¼) dungued.
EZE 40:37 E-neg-imba-siid neg-imba-dummad-naidse nomaid. E-buarmargi ogobwarmaryob sobarmogad. We-yawagakse arsan-baabak-nakwed-nikadba nakleged.
EZE 40:38 Dogedgi, neg-imba-naid-dikarba, neg-senigwad-gwagwen siid. A-neggi ibmar-durgan-ogumakar-uklegoed enukleged.
EZE 40:39 Dogedgi, neg-imba-naidgi gwabake mesemar siid. We-mesemar igar-dogmaid-e-dikar-abinbeladgi gwa-gwabo siid. A-mesemargi, ogumakar-uklegega, isgued-anar-uklegega, degi, dule-baidgi-nosad-anar-uklegega, ibmar-durgan oburgwileged.
EZE 40:40 Dad-nakwed-argan-sapiledsik neg-imba-naid-magaba, arsan-nakmaid-e-dikar-abinbeladgi, mesemar gwa-gwabo siid.
EZE 40:41 Degisoggu, neg-imba-naid-yaba gwabake mese siid, degi, neg-magaba gwabake simogad, bela gwabaabak (8) mese siid. We-mesemargi ibdurgan oburgwileged.
EZE 40:42 Ibdurgan-ogumakar-uklegedga, gwabake akwa-mese siid. We-mesemardi, achapaa sugued, e-matardungueddi, achapaabalid, e-nibgueddi achabo nibgued. We-mesemar-birgine, ibdurgan-ogumakar-ukleged-oburgwega-ibmar-ebulemalad urbeleged, degi, ibdurgan-oburgwilesad mesleged.
EZE 40:43 Negyabali, galu-ebiris ibmar-gamalad-nugar-darbogwad achagwen-sugued nanaid. Mesemar-birgi, sanmar-Bab-Dummadga-ukleged urbeleged.
EZE 40:44 Neg-ollor-senigwad-naidgi, dulemar-namakmaladga gwardumar gwabo siid. Gwagwenaddi, dad-nakwed-argan-sapiledsik yawagak-yabasiid-dikarba siid, adi, dad-nakwed-argan-nuedsik argasiid. Baiddi, dad-nakwed-argan-nuedsik yawagak-yabasiid-dikarba siid, adi, dad-nakwed-argan-sapiledsik argasiid.
EZE 40:45 We-dule anga sogsad: “Dad-nakwed-argan-nuedsik-neg-argasiidi, Bab-Dummadse-goled-neggi, dule-irwa-Bab-Dummadse-gormalad ibmar-imakmaladgadid.
EZE 40:46 Ar dad-nakwed-argan-sapiledsik-neg-argasiiddi, ibmar-ogumakar-ukleged-ailagi dule-irwa-Bab-Dummadse-gormalad ibmar-imakmaladgadid. Wemar, Sadoc-machimalad. Unnila wemarbi, Leví-e-wagan-abargi Bab-Jehováʼga ibmar-ogumakar-ukega sulesad.”
EZE 40:47 Dule, neg-imba-senigwad-naid wilubsasad, adi, e-sugued, e-yaadungued emarbi-sugued. E-sugued dali-dulagwen-gakataled (25). E-yaadungueddi dali-dulagwen-gakatarbalid (25). Ibmar-ogumakar-ukleged-aila Bab-Dummadse-goled-neg-asabin siid.
EZE 40:48 Geb degine, dule, Bab-Dummadse-goled-neg-e-neg-imba-naidse an-sesad, geb e-buarmar wilubsasad. We-buarmar-e-wardunguedi, daligwen-bisgise (1¼) wardungued. Yawagak-matardunguedi, dalipaa-negabar (3½) matardungued. E-dikar-bargamaladdi, achaatar songued.
EZE 40:49 Neg-ollor-naid, dalipaa (3) sugued, e-matardungueddi daliataled (5). We-neg-imba-naidse arsan-ambe-nakwed-nikadba (10) nakleged. Buarmar-dikarba e-bargamalad gwigwichid.
EZE 41:1 Geb sorbali, dule, Neg-Islidikidyaba an-odosad. Geb e-buarmar wilubsasad. We-buarmar e-dikar-nailikidsik, daligwen-negabar (1½) wardungued.
EZE 41:2 E-yawagak-doged, dalibo-gaka-abala (2½) yaadungued. E-dikar-bargamalad, abinbela daligwen-bisgise (1¼) matardungued. Deginbali, Neg-Islidikid-e-imba wilubsasbalid. E-suguedi, daliambe (10) sugued. E-yaadungueddi, daliatar (5) dungued.
EZE 41:3 A-sorbali, dule, Neg-Islidikid-yaba-solanapi-neg-senigwad-siidse dogsad, geb dogedgi e-buarmar-gwigwichid wilubsasad. A-buarmardi, bisgibo wardungued. E-yawagakdi, bisginergwa (6) matardungued. Yawagak-doged-yaadunguedi, bisgigugle (7) dungued.
EZE 41:4 Deginbali, Neg-Islidikid-yaba-solanapi-neg-senigwad-siid-e-sugued wilubsasbalid, adi, daliatar (5) sugued. E-yaadunguedi, amba deyobi daliatar (5) dungumogad. Geb degine, anga sogded: “We-nega, Neg-Ise-Islidikidye.”
EZE 41:5 A-sorbali, Bab-Dummadse-goled-e-neg-galu wilubsasad, adi, daligwen-negabar (1½) songued. Bab-Dummadse-goled-neg-dikarba-gwardumar-bukwad, daligwen-dungu (1 braza) nanaed.
EZE 41:6 We-gwardumar birgin-birgin bukwad. Gwardumar-bukwadi, ailapaa nika nanaed. Ailagwengi, gwadurgwen-gakambe (30) gwardumar bukwad. Gwardumar-bukwad-bargaegala, Bab-Dummadse-goled-neg-galu-ebiris nagubirmar nomamaid, adi, gwardumar mer Bab-Dummadse-goled-neg-galugi yolegegar.
EZE 41:7 Bab-Dummadse-goled-neg-dikarba-gwardumar-bukwadi, aila-nakmaidba e-yaamar dungumaidaed. Bab-Dummadse-goled-negyaba-e-dikargi, arsan-bipirmakaled nakmaid. Degisoggu, nakmaidbali gwardumar bur niba-bukwadi, yaamar dungumaidaed. Aila-urbalid-akar, aila-negabarginedse, degi, aila-nibalidse arsan nakmaid.
EZE 41:8 Bab-Dummadse-goled-neg-ebiris, napa-birgi nibakwaa akwa-aryoarmai an daksabalid. We-akwa-aryomaid-birgi, gwardumar sobar-bukwad. We-akwa-aryomaid, daligwen-negabar (1½) nibgued.
EZE 41:9 Gwardumar-e-galumar, daligwen-bisgise (1¼) songued. Bab-Dummadse-goled-neg-dikarba gwardumar-bukwadi,
EZE 41:10 dule-irwa-Bab-Dummadse-goled-e-gabednegmargi, daliatar (5) bangu siid.
EZE 41:11 Gwardumar, yawagak-gwabogwadba neg-imba-naidse nomaid. Yawagak-gwagwen, dad-nakwed-argan-sapiledsik argasiid. Baiddi, dad-nakwed-argan-nuedsik argasiid. Gwardumar-ebiris, daligwen-bisgise (1¼) matardungu neg-imba naid.
EZE 41:12 Neg-ollor-senigwad-naid-asabin, dad-argwanedsik-neg-siidi, daliambe-gakagugle-negabar (17½) matardungued, e-sugueddi dali-dulagwen-gaka-dalibo-negabar (22½) sugued. E-galudi, daligwen-bisgise (1¼) songued.
EZE 41:13 Dule, Bab-Dummadse-goled-neg wilubsasad, adi, dali-dulagwen-gakatar (25) sugued. Neg-ollor-senigwad-naid, neg-siid, degi, e-galumar, adi, dali-dulagwen-gakatar (25) sugued.
EZE 41:14 Bab-Dummadse-goled-neg-e-asabinnid-matardungued, degi, dad-nakwedsik e-dikarmargi neg-imba-naidbo, dali-dulagwen-gakatar (25) sugued.
EZE 41:15 A-sorbali, Bab-Dummadse-Goled-Neg-yarganbalid-e-sugued, neg-imba-naidsikid, e-dikarmargi negmar-bukwamaladbo wilubsasad, adi, dali-dulagwen-gakatar (25) sugued. Bab-Dummadse-goled-negyabalid, neg-imba-simalad,
EZE 41:16 yawagak-dogedgi-napagi-ibmar-mamaid, yawagak-senigan-egi-esgoro-biir-biir-mamaid, degi, Bab-Dummadse-goled-neg-ebiris-neg-ailapaa-nika-siid, wemar dogedgi-onoded-akar bela urgomar e-birgi nanaid. Niba urbalidse, degi, yawagak-seniganse-bakar, urgomar e-birgi madar-madar nanaid.
EZE 41:17 Bab-Dummadse-goled-neg-doged-akar, solanapi gwardu-siidse, degi, bela galu-ebiris, negyaba, neg-magaba,
EZE 41:18 muchub-muchub baliwitur-querubinʼmar sobar-nanaid, degi, ogobwarmaryob sobarnabalid. Baliwitur-querubinʼmar-sobar-nanaid, wagar darbo nikad.
EZE 41:19 Nailiksik, dule-wagaryob sobaled, adi, ogobwaryob-sobaledsik ataknaid. Geb wagar-baidi, achumigur-nono-wawaad-wagaryob dakleged, adi, ogobwaryob-sobaledsik ataknaimogad. We-baliwitur-querubinʼmar-sobarnaid, bela Bab-Dummadse-goled-neg-ebiris, negyaba, degi, neg-magaba mag-dakleged.
EZE 41:20 Bela Bab-Dummadse-goled-neg-e-galugi, napa-akar yawagak-e-nibalidse baliwitur-querubinʼmar, degi, ogobwaryob-daklemalad sobarnanaid.
EZE 41:21 Bab-Dummadse-goled-neg-dogedgi-buarmar-gwigwichid, e-suguedi, e-matardunguedi, emarbi-sugued. Neg-Islidikid-e-doged-asabin
EZE 41:22 ibmar-ukleged-aila urgobi-sobaled gwichid, adi, achaatar nibgued, e-sugueddi, achabakegwad, e-matardungueddi achabakebalid. E-abingunanaid, e-birgined, degi, e-dikarmar bela urgobi sobaled. Dule anga sogsad: “We-mese, Bab-Jehová-asabin siidye.”
EZE 41:23 Bab-Dummadse-goled-neg, degi, Neg-Ise-Islidikid yawagak-darbo nikamalad.
EZE 41:24 Yawagak-gwagwengi urgo matabo yoid. Yawagak-baidgi, urgo matabo yoibalid. We-urgo-matabogwad abinbela argaed.
EZE 41:25 Ar igi galumargi baliwitur-querubinʼmar, degi, ogobwarmaryob sobarnanai, deyobi, Bab-Dummadse-goled-neg e-yawagakgi sobarnanamogad. Neg-ollorsiid-e-asabinnidgi, magabali, uas-urgogi-sobaled naid.
EZE 41:26 Neg-ollor-naid-e-dikarmar-abinbeladgi yawagak-senigan-egi-esgoro-biir-biir-mamaid bukwad, degi, ogobwarmaryob egi sobarnanabalid. Bab-Dummadse-goled-neg-dikarba-gwardumar-bukwad amba uas-urgogi-sobaled nikamogad.
EZE 42:1 Dule, dad-nakwed-argan-sapiledsik neg-imba-dummad-naidse an-onosad. Geb Bab-Dummadse-goled-neg-yarganba, neg-imba-senigwad-naid-asabin, dad-nakwed-argan-sapiledsik, negmar-siid-yaba an-odosad.
EZE 42:2 We-negmar, dad-nakwed-argan-sapiledsik, dali-dulagwen-gakatar (25) sugued, e-matardungueddi daliambe-gakabo-negabar (12½) dungued.
EZE 42:3 Neg-ollor-senigwad-naidgi, daliatar-neg-matardungued-naid-asabin (5), degi, neg-imba-dummad-naid-akwa-aryoarmaid-asabin, neg ailapaa nika siid. Agi gwardumar asabin-asabin bukwad.
EZE 42:4 Gwardumar-asabin, igar negyaba-dogmaid, dalibo-negabar (2½) yaadungued, degi, dali-dulagwen-gakatar (25) sugubalid. Gwardumar-e-yawagakmar dad-nakwed-argan-sapiledsik argasiid
EZE 42:5 Aila-birginedgi gwardumar-bukwad, aila-abarginedgi-gwardumar-bukwadba bur senii nanaed. Aila-abarginedgi gwardumar-bukwad, aila-urbalidgi-gwardumar-bukwadba bur senii nanamogad, ar ade, aila-birginedgi gwardumar-bukwad-magaba neg-imba bipii naid. We-neg-imba-bipi-naidi, aila-birginmalad-gwardumar senii imaked.
EZE 42:6 Ailapaagi-gwardumar-bukwadi, neg-imba-senigwad-naidgi-gwardumar-bukwadyob buar-nikasulid. A-ulale, ailapaagi-gwardumar-bukwadi, aila-abarginedgi-gwardumar-bukwadba, degi, aila-urbalidgi-gwardumar-bukwadba bur senii gued.
EZE 42:7 Neg-ollor-dummad-naidgi, gwardumar-bukwad-asabin, galu-matusur-maidi, daliambe-gakabo-negabar (12½) sugued.
EZE 42:8 Neg-ollor-dummad-naidgi gwardumar-bukwadi, daliambe-gakabo-negabar (12½) sugued. Ar Bab-Dummadse-goled-neg-asabin gwardumar-bukwaddi, dali-dulagwen-gakatar (25) sugued.
EZE 42:9 Gwardumar-aila-urba-bukwadse-dogega, dad-nakwedsik neg-imba-dummad-naidba dogleged.
EZE 42:10 Gwardumar-baigan dad-nakwed-argan-nuedsik bukwabalid. We-gwardumardi, neg-imba-senigwad-naid-asabin, Bab-Dummadse-goled-neg-yarganba, bia neg-imba-dummad-naidgi galu-matusur-maidba bukwad.
EZE 42:11 Dad-nakwed-argan-sapiledsik-gwardumar-bukwad-yaba igi-igar-dogmai, deyobi, we-gwardumar-asabin igar dogmaimogad. Deginbali, e-sugued, e-matardungued, e-nomalad, e-yawagakmar, degi, e-dogmalad, na yobi dungubalid.
EZE 42:12 Dad-nakwed-argan-nuedsik-gwardumar-bukwadse-dogega, dad-nakwedsik galu-matusur-maid-asabin, neg-imba-bipi-naidgi yawagak siid. Abali, dad-nakwedsik dogleged.
EZE 42:13 Dule anga sogsad: “Dad-nakwed-argan-sapiledsik, degi, dad-nakwed-argan-nuedsik, gwardumar neg-imba-senigwad-naid-asabin-bukwadi, gwardumar-islidikidid. Agi, dule-irwa-Babse-gormalad Bab-Jehováʼga-ibmar-ukega ese-asabin-nonidamaladi, bur ibmar-ukleged-islidikid gunmaloed. Agi, orosgwaggi-dakleged-ibmar-ukleged, isgued-ular-ibmar-ukleged, degi, dule-baidgi-nosad-ular ibmar-ukleged urbemaloed, ar ade, we-gwardu, neg-islidikidid.
EZE 42:14 Dule-irwa-Babse-gormalad Neg-Islidikidgi dogsale, Babga-ibmar-imakedgi-e-mormar-yoid-unnussuli neg-imba-dummad-naidse geg nodaged. Ar we-mormarde, islidikidid. Dule-irwa-Babse-gormalad, dulemar-bukwadse nodaged-iduar, mor-baid yoergebed.”
EZE 42:15 Dule, Bab-Dummadse-goled-negyabalid-wilubsanaid bergusgua, dad-nakwedsik yawagak-siidba an-onosad. Geb bela neg-dikar-ebiris-naid wilubsasad.
EZE 42:16 Dad-nakwedsik neg-naid-wilubsaega suar-ibmar-wilubsaed susad, we-neg-naid dali-dulanergwa-gakatar (125) sugued.
EZE 42:17 A-sorbali, dad-nakwed-argan-sapiledsikid wilubsasbalid, amba dali-dulanergwa-gakatar (125) sugubalid.
EZE 42:18 Geb sorbali, dad-nakwed-argan-nuedsikid wilubsasbalid, adi, dali-dulanergwa-gakatar (125) sugubalid.
EZE 42:19 Geb napidgine, dad-argwanedsikid wilubsasad, dali-dulanergwa-gakatar (125) sugubalid.
EZE 42:20 Dule, bela dikar-sogabakegwad wilubsasad. Dali-dulanergwa-gakatar (125) sugu, degi, dali-dulanergwa-gakatar (125) matardungu galu-matusulid, neg-naid-ebiris, maid. We-galu-matusur-maid, neg-islidikid, neg-islidiksurmaladgi bachiki-sigega imaked.
EZE 43:1 A-sorbali, dule, dad-nakwedsik yawagak argasiidse an-sesad.
EZE 43:2 Geb Israel-e-Bab-Dummad-e-gangued-yeerdakleged dad-nakwedsiki daniki an daksad. E-goledi, diwar-dummad-uurmakedyob goled. Degi, Bab-Dummad-e-gangued-yeerdaklegedba napaneg ibegwar nagusad.
EZE 43:3 We-negburgana, Bab-Jehová Jerusalén-neggwebur-obelonaigusgu, an daksayobi an daksad, degi, an Quebar-diwargi-daksayobi, an daksad. An wagar napase-dulluu imaksad.
EZE 43:4 Bab-Jehová-e-gangued-yeerdakleged dad-nakwedsik yawagak-argasiidba dogsad.
EZE 43:5 Geb degine, Bab-Dummad-Burba an-ogwichisad, geb neg-imba-senigwad-naidse an-sesad. Geb Babse-goled-neggi, Bab-Jehová-e-gangued-yeerdakleged bela daasasii an daksad.
EZE 43:6 Dule an-dikarba gwisgusad, geb agine, Babse-goled-neg-akale, dule anga sunmake an itosad.
EZE 43:7 Anga sogded: “Dule-machi, we-neggi an-ologana siid, wegi an dummadga maid. Wegine, Israel-dulemar-abargi an degisadegu gudii guoed. Israel-dulemar, degi, e-reymar na e-galagwensurdamaladgi, na e-reymar-burgwisadse-gormaladgi, degi, bab-dummadyob-ibmar-imaklemalad-e-nug-odummogedgi bar an-nug-oichodii guosurmalad.
EZE 43:8 Israel-dulemar e-ibmar-isgana-imakedgi an-nug-oichosmalad, ar ade, e-neg-yawagakmar, an-neg-yawagakbo walikaa ogwichismalad, unnila galu-negabargi-gwichid bachikii imaked. A-ulale, an-isdar-itogedgi an Israel-dulemar-obelosad.
EZE 43:9 Na e-galagwensuli-gudimalad, degi, e-reymar-burgwismaladse-gordimalad bar imaksurmalale, andi Israel-dulemar-abargi degisadegu gudii guoed.
EZE 43:10 ”Dule-machi, Babse-goled-neg igi-dakle be daksa, Israel-dulemarga be soge. E-garda-ilemakar-maid, degi, e-dungued ega be oyoge, adi, e-isgudiidgi bingegumalagar.
EZE 43:11 Ar bela na e-ibmar-isgana-imaksadgi bingegumalale, ega be Bab-Dummadse-goled-neg-soblegoed-garda, egi ibmarmar-bukwad, e-yaa-nomalad, degi, e-yaa-dogmalad ega be oyoge. Deginbali, bela egi ibmar-imaklegoed-e-igar-maid ega be oyobali. Israel-dulemarga bela-sobale be oyoge, adi, we-sobaledyobi sobmalaga, degi, ibmar-imaklegoed-e-igar-maidba ibmar-imakmarbaligar.
EZE 43:12 ”We, Babse-goled-neg-e-igar maid: Yar-birgine, bela napa Babse-goled-neg-ebirisnaidi, neg-islidikidga guoed. Weyob, Bab-Dummadse-goled-neg-e-igar maid.”
EZE 43:13 Ibmar-ogumakar-ukleged-aila weyob dungued: Bela-ebiris, achabo-matugu napa akwiarmaid, e-yaadungued achabobalid. E-gakuli, achagwen mulluu ebiris-maid.
EZE 43:14 Ibmar-ogumakar-ukleged-aila weyob nibgued: Napa akwiarmaid-yabalid-akale, urba e-dikargi billi-maidse, achabake nibgued, e-matardungueddi achabogwad. Urba-billi-maid-akale, niba billi-maidse daligwen nibgued, e-matardungueddi, achabogwad.
EZE 43:15 Birgi, bia ibmar-durgan-ogumaklege, adi, daligwen nibgued, geb agi e-gakuli-abingunanaidgi, ibmar-bebe warbake gwichid.
EZE 43:16 Birgi, bia ibmar-durgan-ogumaklege, adi, dalipaa (3) sugued, e-matardunguedi dalipaabalid (3).
EZE 43:17 Billi-abargi-maid, dalipaa-negabar (3½) sugued, e-matardunguedi, dalipaa-negabarbalid (3½). Bela ibmar-ogumakar-ukleged-aila-e-dikar-ebiris, achagwen matardungu mulluu maid. Ibmar-ogumakar-ukleged-aila-ebiris napa-gwisarmaid, achabo matardungued. E-arsanmardi, dad-nakwedsik maid.
EZE 43:18 A-sorbali, dule anga sogdebalid: “Dule-machi, Bab-Jehová-Bela-Gangued-Nikadi weyob soged: ‘Ibmar-ogumakar-ukleged-aila-soblegoed-ibagi, e-birgi ibmar-durgan ogumakar-uklegega, degi, e-birgi ablis-eogegarba, we-igarmar-maidba be imakmaloed:
EZE 43:19 Levitaʼmar-dule-irwa-Babse-gormalad-Sadoc-e-wagan, anga ibmar-imakega an-asabin nonidamaladga, moli-bebe-nikad-sapingwagwad be ukoed, adi, isgued-anar oburgwegar.’ Bab-Jehová-Bela-Gangued-Nikadi weyob soged.
EZE 43:20 ” ‘A-sorbali, moli-bebe-nikad-sapingwagwad-e-ablis ichee be suoed. Geb ibmar-bebe-warbake-gwichidgi, niba billi-maid-e-dikarmar-sogabake-abingunanaidgi, degi, bela e-dikar-ebiris mulluu-maidgi, moli-bebe-nikad-sapingwagwad-e-ablis be bomioed. Weyobi, ibmar-ogumakar-ukleged-aila isguedgi-warmaksadi, be urukoed.
EZE 43:21 A-sorbali, isgued-anar moli-bebe-nikad-sapingwagwad-uklesad be suoed, geb bia ega neg-urmaklesadgi, anse-goled-neg-magaba be ogumakoed.
EZE 43:22 ” ’Ibbogine, isgued-anar sibad-machered-swilidikid-bonikwasulid be oburgoed. Ar igi ibmar-ogumakar-ukleged-aila, moli-bebe-nikad-sapingwagwad-e-ablisgi uruklesa, deyobi, sibad-machered-e-ablisgi ibmar-ogumakar-ukleged-aila uruklebaloed.
EZE 43:23 Ar be ibmar-ogumakar-ukleged-aila-uruknaid bergusale, moli-bebe-nikad-sapingwagwad-swilidikid-bonikwasulid, degi, sibad-wawaad-machered-swilidikid-bonikwasulid
EZE 43:24 anga be oburgoed. Geb amargi, dule-irwa-anse-gormaladi balu mioed, geb anga ogumakar ukmaloed.
EZE 43:25 Isgued-anar, bane-bane ibagugle (7) be sibad-machered oburgoed. Amba deyobi, moli-bebe-nikad-sapingwagwad-swilidikid-bonikwasulid, degi, sibad-wawaad-machered-swilidikid-bonikwasulid be oburgwebaloed.
EZE 43:26 Dule-irwa-anse-gormalad ibmar-ogumakar-ukleged-aila ibagugle (7) swilidik-imaknai gumaloed, deyobi, ibmar-ogumakar-ukleged-aila islidikidga gunonikoed.
EZE 43:27 We-ibagugle-nasad-sorbali, ibabaabakgine (8), anga-ibmar-durgan-ogumakega be uknaidi, degi, gwenatigwar-guega be uknaidi, dule-irwa-anse-gormaladi, ibmar-ogumakar-ukleged-aila-birgi ogumakdemaloed. Geb degine, an yeer-itogedgi be-abingamaloed. Ani Bab-Jehová-Bela-Gangued-Nikadi weyob soged.’ ”
EZE 44:1 Dule Bab-Dummadse-goled-neg-magaba yawagak-dad-nakwedsik-siidse gannar an-sesad, ar a-yawagak atiar siid.
EZE 44:2 Agi, Bab-Jehová anga sogded: “We-yawagak atisii guoed, argaosulid, egi dule dogosulid. Ar we-yawagakba, ani Bab-Jehová, Israel-e-Bab-Dummad dogsad. A-ulale, atisii guoed.
EZE 44:3 Neggwebur-dummadga-maidbi an-asabin-masgunnega sunna yawagak-dikarba sigoed. Dogedgi neg-imba-siidba dogoed. Abali, gannar nobaloed.”
EZE 44:4 A-sorbali, dule, Babse-goled-neg-asabin, dad-nakwed-argan-sapiledsik doged-siidba an-sesad. Babse-goled-neggi, Bab-Jehová-e-gangued-yeerdakleged daasasii an dakdegua, wagar napase-dulluu an imaksad.
EZE 44:5 Geb degine, Bab-Jehová anga sogded: “Dule-machi, nue-an-itogo. An bega anse-goled-negga igarmar-megoed sogsokalid. Be ise-nue-itogar imako. Nue be dakoed, doamar anse-goled-negse sunna dogmaloe, doamar dogosurmarbali.
EZE 44:6 ”Israel-dulemar-uaya-sulidamaladga, Bab-Jehová-Bela-Gangued-Nikadi weyob sogye, be soge: ‘¡Israel-dulemar, mer bar be ibmar-isgana imakmala!
EZE 44:7 Emide, bemar an-itoged-neg oichodimalad. Dulemar-yar-baidgined-aku-an-dakmaladi an-itoged-negse be ododimalad. We-dulemar gwen-ulubgi an-Igar-Mesisadgi-binsadisurmaladid, degi, abgan-uka-duku-sikarsurmaladid. Bemardi unnila anga masi, ibdurgan-e-gwallu, degi, e-ablis, ukdamalad. Weyob-ibmar-imakedgi, bemar an-igar-mesisadgi annadimalad.
EZE 44:8 Bemar an-nug-odummoged-e-igar-islidikid-maidba gwen ibmar imaksasurmalad. Aka bur dulemar-yar-baidginmalad an-neggi ibmar-imakega imaksamalad.’
EZE 44:9 Ani Bab-Jehová-Bela-Gangued-Nikadi weyob soged: ‘Dulemar-yar-baidgined-aku-an-dakmalad, gwen-ulubgi an-Igar-Mesisadgi-binsadisurmalad wargwensaale anse-goled-negse dogosurmalad, amba dule-yar-baidgined Israel-dulemar-abargi-mamaidbela dogosulid.
EZE 44:10 ” ’Israel-dulemar na e-bab-dummadyob-ibmar-imakleged-e-nug-odummogega angi aibachamargu, agi Levitaʼmar angi aibachagusmarmogadi, e-isgued-ular, sabsur-odurdaklemaloed.
EZE 44:11 We-Levitaʼmardi yawagak-edarbega, degi, ibmar-baigan-imakega sunna an-neggi arbamaloed. Wemar, dulemar-e-ibdurgan-ogumakega-uked oburgwemaloed, degi, dulemarga ibmar-imakega guagwar gudimaloed.
EZE 44:12 Wemar, Israel-dulemar e-bab-dummadyob-ibmar-imaklegedga ibmar-imakdii gusmalad, degi, Israel-dulemar-isguega imaksamarbalid. A-ular, amargi an gwisgusad. Degisoggu, e-isgued-ular, sabsur-odurdaklemaloed. Ani an Bab-Jehová-Bela-Gangued-Nikadi, weyob soged.
EZE 44:13 Dule-irwa-anse-gormaladyob anga ibmar imakosurmalad. An-ibmar-islidikidmaladse warmakosurmalad, deginbali, ibmar-bur-islidikidmaladse bur bule warmakosurmarbalid. E-ibmar-isgana-imaksad-ulale, bingegudii gumaloed.
EZE 44:14 Degisoggu, anse-goled-neg-edarbedga an ogwichoed, degi, an-neggi ibmar-imaklegega, bela ibmar-abeleged imakoed.’ ”
EZE 44:15 Bab-Jehová sogbalid: “Ar dule-irwa-anse-gormalad-Leví-dulemar, anga-ibmar-imakega an-asabin nonimaloed. Wemar Sadoc-e-wagan gumalad. Wemar Israel-dulemar angi aibachamargu, an-neggi ibmar-imakdigusmaladid. Wemardi, anga ibdurgan-e-gwallu-ukega, degi, e-ablis-ukega sunna an-asabin nonimaloed. Ani an Bab-Jehová-Bela-Gangued-Nikadi weyob soged.
EZE 44:16 ”Unni wemarbi an-neg-islidikidse dogmaloed. Anga ibmar-imakega sunna an-mesese warmakmaloed, degi, anga-ibmar-imakleged imakmaloed.
EZE 44:17 Neg-ollor-senigwad-naid-e-yawagakgi dogdemalale, lino-mor yomaloed. Neg-ollor-senigwad-naid e-yawagakgi, degi, anse-goled-neggi ibmar-imaknaile, sibad-wawaad-absar-mor yoosurmalad.
EZE 44:18 E-nonogi gurginyobi lino-mor obipirmakar simaloed, degi, garson-bipi linoʼdubgi-sobaled yomaloed. Melle wimakega saderba ibmar nasikosurmalad.
EZE 44:19 Neg-ollor-dummad-naidse, bia dulemar-bukwadse nodmalale, anse-goled-neggi-ibmar-imaknanaigu mor-yosadi, ungemaloed. Geb we-mor anse-goled-neg e-gwardumar-bukwadgi obemaloed. A-sorbali, baid-mor yomaloed, adi, mor-islidikidmaladgi dulemar mer warmakmalagar.
EZE 44:20 ”Sailagia swiri sikosurmalad, deginbali, sailagia suitii imakosurmarbalid, unnila wilubba sikmaloed.
EZE 44:21 ”Dule-irwa-anse-goled-wargwensaar, neg-imba-senigwad-naidse dogsokalile, vino gobosulid.
EZE 44:22 ”Dule-irwa-anse-goledi ome-ei-sui-burgwisad, degi, ome-sui-mete-gudiid nikuosulid. Unnila, Israel-yagwa amba yoo-sui-nikued, nikuoed. Sulile, dule-irwa-anse-goled-burgwisad-e-omega-gusad nikuoed.
EZE 44:23 ”Dule-irwa-anse-goledi, an-dulamar-odurdakmalargebed, bitid ibmar-islidikidi, bitid ibmar-islidikidsuli. Ega oyobalirgebed, bitid ibmar-nuedi, bitid ibmar-isgana.
EZE 44:24 ”Dule-irwa-anse-goledi, dulemar na abin-abin-imakarmalale, igar-nabomaladga guoed. Geb an-igar-mesisadba igar nabomaloed. Bela an-iba-onomaladgi an-igar-mamaidba, an-igar-mesisadba, ibmar imakmaloed, degi, an-obunnoged-ibagangi obunnomaloed. Ar a-ibagan, iba-islidikidid.
EZE 44:25 ”Dule-irwa-anse-goledi, muise warmakosulid, adi, mer isguega. Unnila, e-bab-mui, e-nan-mui, e-mimmigan-mui, e-ia-mui, e-urba-mui, e-bun-sui-nikussulid-e-mui sunna ebugoed.
EZE 44:26 Muigi warmaksale, na san-urukoed, geb sorbali, ibagugle (7) abitogoed.
EZE 44:27 Dule-irwa-anse-goledi, anse-goled-neg e-neg-imba-senigwad-naidse, ibmar-imakega gannar dogsokalid-ibagi, isgued-ular, e-ibdurgan-ogumakar-ukleged ukoed. Ani an Bab-Jehová-Bela-Gangued-Nikadi, weyob soged.
EZE 44:28 ”Dule-irwa-anse-gormalad bipisaar napa abingaosulid, ar ani an e-napa-abingalegedyob ega gued. Israel-yargine, bipisaar nainu nikuosulid. Ar ani an nainu-uklegedyob ega gued.
EZE 44:29 Wemar, ibmar-gwag-anga-ukleged sunna gunmaloed, deginbali, isgued-ular-ibmar-durgan-oburgwileged-ukleged, degi, egi-ataklesad-ular-ibmar-durgan-oburgwileged-ukleged, sunna gunmarbaloed. Deginbali, Israel-dulemar-bela-anga-ibmar-ukmalad, wemargadga gubaloed.
EZE 44:30 Gebe-ibmar-sanmaksad-bur-nuegan, degi, bela bemar-ibmar-uked, dule-irwa-anse-gormaladga gubaloed. Bemar ega be-madu-omukualed-bur-nuegan e-masga-guega be ukoed. Degidbali, an bemar-neguyagi ise-nued binsaoed.
EZE 44:31 Dule-irwa-anse-gormaladi, nuu-e-san-burgwar-amilesaddibe, ibdurgan-e-san-burgwar-amilesaddibe, wemar ibdurgan-ursirse san-oichimaklesaddibe, gunnosurmalad.”
EZE 45:1 Bab-Jehová sogdebalid: “Yar bemargadgaguega, be wilubdakar mimiarmalale, napa-soggwen be nasikmaloed, adi, anga nugsalegoed. We-napa-anga-nugsalegoedi, dali-milinergwa gaka dulataled-ilabo gaka durbo-gakambe (6,250) suguoed. E-yaadungueddi, dali-miliatar (5,000) dunguoed. We-napa bela islidikidga guoed.
EZE 45:2 We-napa-anga-nugsalesadgi, dali-dulanergwa-gakatar (125) sugue, degi, dali-dulanergwa-gakatar (125) yaa dungue, napa anse-goled-negga naguoed. Deginbali, napa-anse-goled-negga-naid-ebiris, daliambe-gakabo-negabar (12½) yaa dungue napa gagan-digar nagubaloed.
EZE 45:3 Napa-anga-nugsalesadgi, dali-milinergwa gaka dulataled-ilabo gaka durbo-gakambe (6,250) sugue, degi, dali-milibo gaka dulataled-ilatar (2,500) yaa dungue napa be nasikoed. A-napagi anse-goled-neg, degi, Neg-Ise-Islidikid sigoed.
EZE 45:4 A-napa, dule-irwa-anse-gormaladgadga guoed. Wemar, anse-goled-neggi-arbamalad anga-ibmar-imakega ese warmakmaladid. A-napagi, wemar-e-negmar, degi, anse-goled-nega, sobmaloed.
EZE 45:5 Deginbali, Levitaʼmar-anse-goled-neggi ibmar-imakmaladga, baid-napa dali-milinergwa gaka dulataled-ilabo gaka durbo-gakambe (6,250) sugue, degi, dali-milibo gaka dulataled-ilatar (2,500) yaa dungue, nagubaloed. Levitaʼmar na gudiguega, a-napagi gwadurgwen (20) gabednegmar sobmaloed.
EZE 45:6 Napidgine, anse-goled-negga-napa-naid-walik dali-milinergwa gaka dulataled-ilabo gaka durbo-gakambe (6,250) sugue, degi, dali-miligwen gaka dulataled-ilabo gaka durbo-gakambe (1,250) yaa dungue, neggwebur-bukuega napa uklegoed. We-napa bela Israel-dulemargad guoed.
EZE 45:7 ”Deginbali, dule-dummad-negdakmaidga, napa uklegoed. We-napa, anse-goled-negga-napa-naid-e-dikarmar-walik, degi, neggwebur-bukuoed-e-dikarmar-walik naioed. We-napa-soggwenad, dad-argwanedsik naioed. Napa-baid-ega-uklegoeddi, dad-nakwedsik naimogoed. E-napa-suguedi, igi Israel-dulemar-sogambe-gakabogwad-soggwenga napa-sugu-uklesa, deyobi, dad-nakwedsik, dad-argwanedse suguoed.
EZE 45:8 Israel-yargi, a-napa dule-dummad-negdakmaidgadga guoed. Deyobi, an-dummagan-negdakmamaid bar an-dulamar-sabsur-imakosulid. Dule-dummagan-negdakmamaid, Israel-dulemar-sogambe-gakabogwad (12) napa-gamalaga imakoed.
EZE 45:9 ”Ani an Bab-Jehová-Bela-Gangued-Nikadi weyob soged: ‘Israel-dummagan-negdakmamaid, mer bar dulemar-sabsur-imakmar, mer bar dulemar-ibgwensur-imakmar. Igar-innikigwad-imaklegedi, degi, ibmar-nueganbi-imaklegedi, imakdii gumala. An-dulamar-ibe mer bar ibmar-atursamala. Ani an Bab-Jehová-Bela-Gangued-Nikadi weyob soged.
EZE 45:10 Ibmar-wilubdaked, nibir-nued, degi, ibmar-wilubsaed-nuegan, be ebumala.
EZE 45:11 Ibmar-gwag-wilubsaega, degi, ibmar-diregwad-wilubsaega, e-wilubsaed emarbi be ebumaloed. Homer-gwagwen-wilub wilubsalegoed. Homer-gwagwena, galón gwadurbo-gakambe-gakatar gued (55 galónes). Abali be wilub-imakoed. Ibmar-diregwad-wilubsaed-bato-gwaambegwad (10) homer-gwagwen gued. Ibmar-gwag-wilubsaed-efa-gwaambegwad (10) homer-gwagwen gubalid.
EZE 45:12 Ibmar-aidikued weyob wilubsalegoed: Wilubsaed-geras-dulagwen (20) wilubsaed-siclo-gwagwen aidiku guoed. Wilubsaedsiclo-dulapaa (60), wilubsaed-mina-gwagwen aidiku guoed.’ ”
EZE 45:13 Bab-Jehová sogdebalid: “We-ibmar-ukleged be ukoed: Trigo wilubsaed-homer-gwanergwagine (6), wilubsaed-efa-gwagwen uklegoed. Cebada wilubsaed-homer-gwanergwagine, wilubsaed-efa-gwagwen uklegoed.
EZE 45:14 Olivo-gwallu-wilubsaega weyob igar megoed: Wilubsaed-coro-gwaambegi (10), wilubsaed-bato-gwagwen uklegoed. Wilubsaed-bato-gwaambegwad (10) wilubsaed-homer-gwagwen gued.
EZE 45:15 ”Israel-yargi sibad-wawaadmar bur wardadagan gudimalad, dulataled-ilabo (200) merguedgi, wargwen be suoed. We-sibad-wawaad, ibmar-gwagmar-orosgi-dakleged uklegedba, ibmar-ogumakar-uklegedba, degi, gwenatigwar-guega ibmar-uklegedba uklegoed. We-ibmar-uklemalad, adi, Israel-dulemar-e-isgued-osulogega ukleged. Ani an Bab-Jehová-Bela-Gangued-Nikadi weyob soged.
EZE 45:16 ”Bela dulemar, we-ibmar-ukleged Israel-yargi dule-dummad-negdakmaidga ukedsegad.
EZE 45:17 Dule-dummadga-negdakmaid, ibdurgan-ogumakar-ukleged, ibmar-gwagmar-orosgi-dakleged-ukleged, degi, vino eogega-ukleged we-ibamargine ukoed: Itoakwaa-iba-onolemaladgi, obunnoleged-ibamargi, nii-binid-yolesadgi, degi, Israel-yargi bela ibamar-onolegoedgi, we-ibmarmar ukoed. Deginbali, isgued-anar ibmar-durgan-ukleged ukbaloed. Amba deyobi, ibmar-gwagmar-orosgi-dakleged-ukleged, ibdurgan-ogumakar-ukleged, degi, gwenatigwar-guega-ibmar-ukleged ukbaloed, adi, Israel-dulemarga e-isgued osulogegar.
EZE 45:18 ”Bab-Jehová-Bela-Gangued-Nikadi weyob soged: ‘Gebe-nii-yolesad e-iba-onodedgi, moli-bebe-nikad-sapingwagwad-bonikwasulid be suoed. Geb anse-goled-neg-swilidik-imakega be ogumakar ukoed.
EZE 45:19 Isgued-anar, ibdurgan-oburgwilesad-e-ablis dule-irwa-anse-goled ichee-suoed. Geb anse-goled-neg-e-yawagak-buarmargi, ibmar-ogumakar-ukleged-aila-e-billi-niba-maid e-dikarmar-sogabake-abingunanaidgi, ablis magoed. Degi, neg-imba-senigwad-naid-e-yawagak-buarmargi ablis magbaloed.
EZE 45:20 Dule na wissulidba isgued-imaksadga, gebe-nii-yolesad-e-ibagugledgi (7) amba deyob imakbaloed. Deyobi, anse-goled-neg swilidik guoed.
EZE 45:21 ” ’Oburgwilegoenad-Iba, gebe-nii-yolesad-e-ibambe-gakabakegi (14) be onodmaloed. Ibagugle (7) madu-inasulid be gunnoed.
EZE 45:22 A-ibagi, dule-dummad-negdakmaid na e-isgued-ular, degi, bela dulemar-e-isgued-ular, moli-bebe-nikad-sapingwagwad ogumakar ukoed.
EZE 45:23 Ibagugle (7) iba-onolenaidgi, dule-dummad-negdakmaid Bab-Jehováʼga bane-bane moli-bebe-nikad-sapingwagwad-bonikwasulid, degi, sibad-wawaad-machered-bonikwasulid ogumakar ukoed. Bela moli-bebe-nikad-sapingwagwad-bonikwasulid walagugle (7), degi, sibad-wawaad-machered-bonikwasulid walagugle (7) uklegoed. Deginbali, bane-bane isgued-ular, sibad-machered ogumakar ukbaloed.
EZE 45:24 Moli-bebe-nikad-sapingwagwad-iliba, degi, sibad-wawaad-machered-iliba, wilubsaed-efa-gwagwen ibmar-gwagmar-orosgi-dakleged uklegoed. Degi, olivo-gwallu wilubsaed-efa-gwagwen-iliba, wilubsaed-hin-gwagwen uklegoed.
EZE 45:25 ” ’Nii-walagugle-gwisgusad e-ibambe-gakatargi, iba-onoledoedgi dule-dummadga-negdakmaid ibagugle (7) bane-bane isgued-ular we-ibmar-ukdioed: Ibdurgan-ogumakar-ukleged, ibmar-gwagmar-orosgi-dakleged-ukleged, degi, olivo-gwallu ukdioed.’ ”
EZE 46:1 Bab-Jehová-Bela-Gangued-Nikadi weyob soged: “Arbaleged-ibagangi, dad-nakwedsik neg-imba-senigwad-naidgi yawagak-gwichidi, atisii guoed. Ar obunnoged-ibagangindi, degi, nii-binid-yoleged-ibagangindi argaoed.
EZE 46:2 Dule-dummad-negdakmaid, neg-imba-dummad-naid-akale, yawagak-dogedgi neg-imba-siidba dogoed. Geb yawagak-e-buar-wargwen-dikarba gwisgunonikoed. Geb degidgine, dule-irwa-anse-gormalad ibdurgan-ogumakar-ukleged, degi, gwenatigwar-guega ibmar-ukleged ukmaloed. Dule-dummad-negdakmaid, an-nug-odummogega yawagak-doged-walik, napase wagar dulluu imakoed. Geb weyob-imaksad-sorbali, nodagoed. Degi-inigwele, neg-sedogidse yawagak atiosulid.
EZE 46:3 ”Dulemar-we-yarginmalad, we-yawagak-doged-asabin, obunnoged-ibagi, degi, nii-binid-yoleged-ibagi, an-nug odummomaloed.
EZE 46:4 Dule-dummad-negdakmaid anga ibdurgan-ogumakar-ukleged, obunnoged-ibagi, we-ibmar ukoed: Sibad-wawaadmar-bipigana, walanergwa (6), sibad-wawaad-machered, wargwen, bela we-ibdurgan bonikwasurmaloed.
EZE 46:5 Sibad-wawaad-machered-iliba, ibmar-gwagmar-orosgi-dakleged, wilubsaed-efa-gwagwen uklegoed. Sibad-wawaadmar-bipigana-ilibardi, e-ibmar-gwagmar-orosgi-dakleged ukbiedba ukoed. Wilubsaed-efa-ilibali, olivo-gwallu, wilubsaed-hin-gwagwen uklegoed.
EZE 46:6 Ar nii-binid-yolesad ibagindi, moli-bebe-nikad-sapingwagwad, wargwen, sibad-wawaadmar-bipigana, walanergwa (6), sibad-wawaad-machered, wargwen ukoed, bela-wemar, bonikwasurmaloed.
EZE 46:7 Moli-bebe-nikad-sapingwagwad-iliba, degi, sibad-wawaad-machered-iliba ibmar-gwagmar-orosgi-dakleged, wilubsaed-efa-gwagwen ukoed. Ar sibad-wawaadmar-bipigana-ilibardi, na e-ibmar-gwagmar-orosgi-dakleged, ukbiedba ukoed. Ibmar-gwagmar-orosgi-dakleged wilubsaed-efa-iliba, olivo-gwallu, wilubsaed-hin-gwagwen ukoed.
EZE 46:8 ”Dule-dummad-negdakmaid dogdele, yawagak-dogedgi neg-imba-naidba dogoed, abali gannar nobaloed.
EZE 46:9 Ar ibamar-onolegedgi, Bab-Jehová-nug-odummogega dulemar-dogdemalale, weyob imakmaloed: Dule yawagak dad-nakwed-argan-sapiledsik-siidgi dogsad, yawagak dad-nakwed-argan-nuedsik-siidgi nooed. Amba deyobmodo, dule yawagak dad-nakwed-argan-nuedsik-siidgi dogsad, yawagak dad-nakwed-argan-sapiledsik-siidgi nooed. Dule-wargwensaale, yawagak-dogsadba bar noosulid, ar asabin-yawagak-siidba nooed.
EZE 46:10 Dule-dummad-negdakmaid, dulemar-dogdele, eba dogmogoed. Noarmarbalile, eba nodabaloed.
EZE 46:11 Ibamar-onolegedgi, degi, ibamar-soglesadgi, ibmar-ukleged, weyob ukmaloed: Moli-bebe-nikad-sapingwagwad-iliba, degi, sibad-wawaad-machered-iliba, ibmar-gwagmar-orosgi-dakleged, wilubsaed-efa-gwagwen uklegoed. Sibad-wawaadmar-bipigana-ilibardi, e-ibmar-gwagmar-orosgi-dakleged, ukbiedba uklegoed. Ibmar-gwagmar-orosgi-dakleged, wilubsaed-efa-iliba, olivo-gwallu, wilubsaed-hin-gwagwen uklegoed.
EZE 46:12 ”Ar dule-dummad-negdakmaid anga na e-wargwengi, ibdurgan-ogumakar-ukleged, degi, gwenatigwar-guega-ibmar-ukleged ukbigualile, ega yawagak dad-nakwedsik-siid egalegoed. Ar igi obunnoged-ibagi ibmar-durgan-ogumakar-ukledae, degi, gwenatigwar-guega ibmar-ukledae, deyopira ibmar ukoed. We-ibmar-ukleged-uksad-sorbali, nodagoed. Geb nosad-sorbali, yawagak edimaloed.”
EZE 46:13 Sogdebalid: “Bane-bane wakudaryalaba, anga sibad-wawaad-bipigwad-birgagwen-nikad-bonikwasulid, be ogumakar ukoed.
EZE 46:14 Amba deyobi, bane-bane wakudaryalaba, weyob be ukoed: Ibmar-gwagmar-orosgi-dakleged, wilubsaed-efa-gwagwen-nergwa-mimilegoedgi (6), gwensak be ukoed. Degi, olivo-gwallu, wilubsaed-hin-gwagwen-sogbaa-mimilegoedgi, gwensak be ukbaloed. We-olivo-gwallu, madubur-nisakwaa-imakega egi be eogoed. Bab-Jehováʼga we-ibmar-ukleged, degisadegu ukledii guoed.
EZE 46:15 Degisoggu, bane-bane wakudaryalaba, degisadegu sibad-wawaad-bipigwad-ogumakar uklegoed, deginbali, ibmar-gwagmar-orosgi-dakleged, degi, olivo-gwallu uklebaloed.
EZE 46:16 ”Ani Bab-Jehová-Bela-Gangued-Nikadi weyob soged: ‘Ar dule-dummad-negdakmaid na e-mimmi-wargwenga e-nainu uksale, we-nainu, we-mimmi-e-wagangadga guoed, ar ade, ega uklesad.
EZE 46:17 Ar e-mai-wargwenga e-nainu uksardi, e-mai ibmar-e-ibed-gannar-Ibmar-Sued-Birgase, unni we-nainu gaoed. A-sorbali, mai, dule-dummad-negdakmaidga gannar nainu ukoed. Ar nainu, dule-dummad-negdakmaid-e-wagangadid.
EZE 46:18 Dule-dummad-negdakmaid, dulemar-ibe nainu, degi, ibmar-nikad suosulid. E-mimmiganga na ibmar-egadga-gued ukoed. Deyobi, an-dulamar-ibe ibmar-nikad sulegosulid.’ ”
EZE 46:19 A-sorbali, dule, yawagak-dikarba-doged-siidba an-sesad, dad-nakwed-argan-sapiledsik gwardumar-argasiidsik. We-gwardumar, dule-irwa-Babse-gormaladga nugsalesad. Agi gwichi, neg-yarganba, dad-argwanedsik neg-imba-naid anga oyosad.
EZE 46:20 Geb anga sogded: “Wegine, dule-irwa-Babse-gormalad, isgued-ular-ibdurgan-oburgwilesad-e-san dumaloed. Deginbali, wegi ibmar-gwagmar-orosgi-dakleged-ukleged dumarbaloed. Deyobi, neg-imba-dummad-naidse mas onolegosulid, adi, dulemar we-ibmar-islidikidgi mer warmakmalagar.”
EZE 46:21 Geb degine, neg-imba-dummad-naidse an-sesad, geb neg-imba-dummad-naid-e-sogabake-abingunanaid-ebirega an-imaksad. We-abingunanaidgi, neg-imba-senigan nanai an daksad.
EZE 46:22 Neg-imba-senigan sogabake-abingunanaidgi-nanaid, bela emakarmalad. Neg-imba-senigan bela yopira dungumalad, daliambe (10) sugued, e-matardungueddi daligugle-negabar (7½) matardungued.
EZE 46:23 Neg-imba-senigan-ebiris galu-matusulid maid. Geb galu-matusulid-ebiris napagi soomar gabukwad.
EZE 46:24 Geb dule anga sogded: “Wemar, negsogak-gumalad. Wegine, Bab-Dummadse-goled-neggi-ibmar-imakmalad, ibmar-uklegedga ibdurgan-oburgwismalad dumaloed.”
EZE 47:1 Dule, Babse-goled-neg-e-dogedse gannar an-senonikid, geb yawagak-urba, dad-nakwedsik dii aryomai an daksad. We-dii dad-nakwed-argan-nuedsik danikid. Geb Babse-goled-neg-argan-nuedsik dikarbali iirmakmaid, geb dad-nakwedsik ibmar-ogumakar-ukleged-aila-urbalidse dii suurmakmaid.
EZE 47:2 A-sorbali, dule, dad-nakwed-argan-sapiledsik yawagak-siidba an-onosad, geb magaba neg-ebiris dad-nakwedsik yawagak-siidse an-sesad. Agi, Babse-goled-neg-argan-nuedsik dii aryomai an daksad.
EZE 47:3 Dule, dub-ganiki dad-nakwedsik noded. Dali-dulataled-ilabo gaka dulabo-gakambe-nanasadse (250) wilubsasad, geb dii-obakega an-imaksad. Dii an-nag-simmurse wirgued.
EZE 47:4 A-sorbali, baid dali-dulataled-ilabo gaka dulabo-gakambe-nanasadse (250) wilubsasbalid, geb dii-obakega an-imaksabalid. Emidi, dii an-yokorse wirgued. Geb baid dali-dulataled-ilabo gaka dulabo-gakambe-nanasadse (250) wilubsasbalid, geb dii-obakega an-imaksabalid. Ar emigindi, dii an-musirse wirgued.
EZE 47:5 Deginbali, baid dali-dulataled-ilabo gaka dulabo-gakambe-nanasadse (250) wilubsasbalid, ar dii-suurmakmaid wiladga-gudsoggu, geg an bar obakgusad. Ar bela-bela wilasoggu, unnila dommo-dommo obakleged.
EZE 47:6 Geb degine, anse egichided: “Dule-machi, ¿bela be nue daksa?” Geb sorbali, diwar-gakase gannar an-senonikid.
EZE 47:7 Geb diwar-gaka-abinbermaidgi bukidar sapimar gwigwichi an daksad.
EZE 47:8 Agi, anga sogded: “We-dii, dad-nakwedsik suurmakmaid, Arabá-yalaganse aidemaid, geb Demar-Gagbidye-nugadse nomaid. Dii a-demarse warmakdapile, demar sayee guddaed.
EZE 47:9 We-diwar bia suurmakmaioe, agi, bela ibdurgan-gudimalad dula-gudii guoed. Ar we-diwar, dii-balu-balud dii-sayegwadga-imakosoggu, egi bukidar uamar gudii guoed. Bela ibdurgan-e-diigi-gudimaloed dula-gudii guoed.
EZE 47:10 Ua-gamalad Engadi-akale, En-Eglaimʼse diwar-gakaba gudii gumaloed. Agi, e-sakimar-odinguega nasikoed. A-diwargi, ar igi Demar-Dummadye-nugadgi uamar galagwensuli, degi, bukidar nika, deyobi nikumogoed.
EZE 47:11 Ar e-neg-olligandi, degi, e-matagandi dii-sayegwad nikuosulid, unni egi balu onolegega guoed.
EZE 47:12 Sapimar-nabir-e-san-gulleged-galagwensuli diwar-gaka-abinbermaidgi dungudoed. E-gagan dinguosulid, deginbali, e-san bipisaar berguosurbalid. Nii-irbali, sanmakgwichi-guoed, ar Babse-goled-neggi dii-suurmakmaid ogedga gued. E-sanmar masga guoed, e-gagandi inaga guoed.”
EZE 47:13 Bab-Jehová-Bela-Gangued-Nikadi weyob soged: “Wemar-yar-abingunanaidi, Israel-dadgan-dummagan-sogambe-gakabogwad-e-waganga (12) mimilegoed. Joséʼdi sogabo yar gaoed.
EZE 47:14 Be-dadganga an ise-sogar sogsagusad, an we-yar bemarga ukoye. Emigindi, bemar na be-dadgan-war-wargwengi yopira yar nikuoed, ar we-yar bemargadid.
EZE 47:15 ”Dad-nakwed-argan-sapiledsik yar-abingunaid, Demar-Dummadye-nugad-akale onodagoed. Geb Hetlón-neggweburgi nasaoed, Zedad-neggwebur-dogedse bergudapoed. We-neggweburmar yarmar-abinguega guoed:
EZE 47:16 ”Hamat-neggwebur, Berota-neggwebur, Sibraim-neggwebur. (We-neggweburmar-gwapaagwadi Damasco-yar, Hamat-yarbo-abingunaidgi bukwad). ”Geb degi, Hazar-Haticón-neggweburgi nasbaloed. (Hazar-Haticón-neggweburde Haurán-yarbo abingunaid).
EZE 47:17 ”Weyobi, dad-nakwed-argan-sapiledsik-yar-abingunaidi, Demar-Dummadye-nugad-akale onodagoed, Hazar-Enánʼse. Dad-nakwed-argan-sapiledsik Damasco-yar, Hamat-yar naguoed.
EZE 47:18 ”Dad-nakwedsik, Jordán-diwar yar-abinguedga guoed. Yar-abingunaidi, Haurán-yar, Damasco-yarbo-abingunaidgi onodoed. Geb Galaad-yar, Israel-yarbo-abingunaidgi nasaoed, Tamar-neggweburse. Tamarʼdi Demar-Gagbidye-nugad-walik siid. Weyob dad-nakwedsik yar abingunaioed.
EZE 47:19 ”Dad-nakwed-argan-nuedsik-yar-abingunaidi, Tamar-akale onodoed, geb Meriba-Cades-diimata-naidgi, degi, Egipto-diangi nasaoed, Demar-Dummadye-nugadse. Weyob dad-nakwed-argan-nuedsik yar abingunaioed.
EZE 47:20 ”Dad-argwanedsik, Demar-Dummad yar-abinguedga guoed. Egipto-yarbo-abingunaid-akale, Hamat-neggwebur-doged-asabin, demar-gaka-naidse yar abinguoed. Weyob dad-argwanedsik yar abingunaioed.”
EZE 47:21 “We-yar Israel-dadgan-sogambe-gakabo-gumaladba (12) be mimimaloed.
EZE 47:22 Bemargadga-guega bemar wilubdakar mimimaloed. Bemar napaneg-mimialile, dule-yar-baidgined bemar-abargi-maid be odomogoed, deginbali, bemar-abargi-maidgi e-mimmigan-gwalulesmalad be odomarmogoed. E-mimmigan, Israel-yargi-gwalulesad-ular, be Israel-dulemaryob dakoed. Degisoggu, we-dulemar-yar-baidginmalad bemarba, Israel-dadgan-sogambe-gakabogwad-e-waganba (12) napaneg nikumarmogoed.
EZE 47:23 Dule-yar-baidgined biti-Israel-dadgan-sogambe-gakabogwad-e-wagan-yargi mai, agi ega yar uklegoed. Ani an Bab-Jehová-Bela-Gangued-Nikadi weyob soged.”
EZE 48:1 Bab-Jehová sogdebalid: “Wemar Israel-dadgan-sogambe-gakabogwad (12) e-nugmalad. Weyobi, e-waganga yar mimilegoed: Dad-nakwed-argan-sapiledsik-yar-abingunaidgi onodagoed. Dad-nakwed-argan-nuedsikidse bergudapoed. ”Dan-e-wagan-yar-inse onodoed: Dad-nakwed-sapiledsikid-e-yar-abingunaidi, dad-argwanedsik Mediterráneo-demar-akale onodoed, Hetlón-neggweburgi nasaoed, Hamat-neggwebur, degi, Hazar-Enán-neggwebur-bukmaladse bergudapoed. We-neggweburmar-bukwadi, Damasco-yar-naid, degi, Hamat-yar-naid-imbagi bukwad. Dan-e-wagan-yar weyob naguoed.
EZE 48:2 Dan-yar-naid-urba, dad-nakwed-akale, demar-naidse, Aser-e-wagan yar gaoed.
EZE 48:3 Aser-yar-abingunaid-urba, dad-nakwed-akale, demar-naidse, Neftalí-e-wagan yar gaoed.
EZE 48:4 Neftalí-yar-naid-urbali, dad-nakwed-akale, demar-naidse, Manasés-e-wagan yar gaoed.
EZE 48:5 Manasés-yar-naid-urbali, dad-nakwed-akale, demar-naidse, Efraín-e-wagan yar gaoed.
EZE 48:6 Efraín-yar-abingunaid-urba, dad-nakwed-akale, demar-naidse, Rubén-e-wagan yar gaoed.
EZE 48:7 Rubén-yar-abingunaid-urba, dad-nakwed-akale, demar-naidse, Judá-e-wagan yar gaoed.
EZE 48:8 ”Judá-yar-dad-nakwed-argan-nuedsik, dad-nakwed-akale, demar-naidse, yar be nasikoed. Adi, dali-milinergwa gaka dulataled-ilabo gaka durbo-gakambe (6,250) matardungu guoed. E-sugueddi, dad-nakwed-akale, dad-argwanedse bamalad-yar-mimilesadyob sugumogoed. We-yar-abargi, Babse-goled-neg sigoed.
EZE 48:9 ”Bab-Jehováʼga bemar napa nasikoed. A-napa, dali-milinergwa gaka dulataled-ilabo gaka durbo-gakambe (6,250) suguoed. E-yaadungueddi, dali-miliatar (5,000) dungu guoed.
EZE 48:10 We-napa-islidikid-yagi, dule-irwa-Bab-Dummadse-gormaladga, dad-nakwed-argan-sapiledsik, degi, dad-nakwed-argan-nuedsik dali-milinergwa gaka dulataled-ilabo gaka durbo-gakambe (6,250) sugue napa uklegoed. Dad-nakwedsik, degi, dad-argwanedsik, dali-mili-dulabo-gakambe (2,500) yaa-dungu guoed. We-napa-abargi, Bab-Jehováʼse-goled-neg sigoed.
EZE 48:11 We-napa, Sadoc-e-wagan-dule-irwa-Babse-gormalad-islidikmaladga uklegoed. Wemardi, Israel-dulemar-angi-aibachamargu, an-neggi ibmar-imakdii gusmalad. Gwen Levitaʼmaryob angi aibachasurmalad.
EZE 48:12 A-ulale, dule-irwa-Babse-gormalad, Bab-Jehováʼga-napa-nugsalesadgi, Levitaʼmar-napa-walik, napa nikuoed. We-napa, islidikidga guoed.
EZE 48:13 Dule-irwa-Babse-gormalad-e-napa-walik, Levitaʼmar dali-milinergwa gaka dulataled-ilabo gaka durbo-gakambe (6,250) sugue, degi, dali-mili-dulabo-gakambe (2,500) yaa-dungue napa nikumarmogoed. Bela Bab-Jehováʼga napa-nugsalesad, dali-milinergwa gaka dulataled-ilabo gaka durbo-gakambe (6,250) suguoed. E-yaadungueddi, dali-miliatar (5,000) dunguoed.
EZE 48:14 Ar we-napa, we-yargi bur nued-gusoggu, bipisaar manigi uklegosulid. Ibmar-baidbo ogwalegosulid, dule-baidga uklebalosulid. Ar Bab-Jehováʼga nugsales naid.
EZE 48:15 ”Dali-milinergwa gaka dulataled-ilabo gaka durbo-gakambe (6,250) sugue, degi, dali-miligwen gaka dulataled-ilabo gaka durbo-gakambe (1,250) yaa-dungue napa-napi-nagusadi, napa, islidikidsulidid. A-napa, dulemargadga guoed. Agi, negmar-sobmaloed, degi, moli-mas-gagan naguoed. A-negabargi, neggwebur sigoed.
EZE 48:16 Neggwebur weyobi dunguoed: Dad-nakwed-argan-sapiledsiki, dali-miligwen gaka dula-nergwa-gakatar (1,125) suguoed, deyopira dad-nakwed-argan-nuedsik, dad-nakwedsik, dad-argwanedsik sugubaloed.
EZE 48:17 Moli-mas-gagan-naguoed, adi, dali-dulapaa-gakagwen gaka bisgise (61¼) yaa-dunguoed, bela neggwebur-ebiris naguoed.
EZE 48:18 Neggwebur-e-dikarmargi, Bab-Jehováʼga napa-nugsalesad-walik, nainu-soggwen dad-nakwedsik dali-mili-dulabo-gakambe (2,500) sugue naguoed. Amba deyopira dungu, nainu dad-argwanedsik nagubaloed. We-nainugi bela ibmar-gwag-diglegoedi, degi, bela ibmar-gwag-welegoedi, dulemar-neggweburgi-arbamalad-e-masga guoed.
EZE 48:19 Dulemar-neggweburgi-arbamalad bela Israel-dulemar-sogambe-gakabogwadgi (12) danimaloed. Amar ibmar-gwagmar digmaloed.
EZE 48:20 Bela Bab-Jehováʼga napa-nugsalesad, deginbali, neggweburga-uklesad-bakale, dali-milinergwa gaka dulataled-ilabo gaka durbo-gakambe (6,250) e-dikarmar suguoed.
EZE 48:21 ”Bab-Jehováʼga napa-nugsalesad-e-dikarmargi, degi, neggweburga-uklesad-e-dikarmargi napa naguoed. A-napa, dule-dummad-negdakmaidgadga guoed. We-napa-dad-nakwedsik, dad-nakwedsik-yar-abingunaidse, dali-milinergwa gaka dulataled-ilabo gaka durbo-gakambe (6,250) suguoed. Degi, dad-argwanedsik demar-naidse amba deyopira sugu gubaloed. We-yar-negabargi Bab-Jehováʼga napa-nugsalesad naguoed, degi, Babse-goled-neg a-abargi sigoed.
EZE 48:22 Deyobi, Judá-yar, Benjamín-yarbo-abingunaidbo-negabargi, dule-dummad-e-napa naguoed. A-napa-abargi, Levitaʼmar-e-napa, degi, neggweburga-napa-uklesad naguoed.
EZE 48:23 ”Israel-dadgan-sogambe-gakabogwad (12) e-wagan-bamalad weyob yar gamarmogoed: Benjamín-e-wagan, dad-nakwed-akale, demar-naidse yar gaoed.
EZE 48:24 Benjamín-yar-naid-urba, Simeón-e-wagan dad-nakwed-akale, demar-naidse, yar gaoed.
EZE 48:25 Simeón-yar-urba, Isacar-e-wagan, dad-nakwed-akale, demar-naidse, yar gaoed.
EZE 48:26 Isacar-yar-urba, Zabulón-e-wagan dad-nakwed-akale, demar-naidse, yar gaoed.
EZE 48:27 Zabulón-yar-urba, Gad-e-wagan, dad-nakwed-akale, demar-naidse, yar gaoed.
EZE 48:28 Gad-yar-naid-urba, yar-abingunaidi, dad-nakwedsik Tamar-akale, onodoed. Geb yar-abingunaidi, Meriba-Cades diimata-naidgi, degi, Egipto-diangi nasaoed, Mediterráneo-demarse bergudapoed.
EZE 48:29 ”Israel-dadgan-sogambe-gakabogwad-e-waganga (12), bemar we-yar wilubdakar mimimaloed, egadga gumalagar. Weyobi, yar mimilegoed. Bab-Jehová-Bela-Gangued-Nikadi weyob soged.”
EZE 48:30 “Neggwebur-e-yawagakmar, wemalad: Dad-nakwed-argan-sapiledsik, neggwebur-suguoedi, dali-miligwen gaka-dulanergwa-gakatar (1,125) suguoed.
EZE 48:31 ”Israel-dadgan-sogambe-gakabogwad-e-nugmar (12), neggwebur-e-yawagakmargi naguoed. Dad-nakwed-argan-sapiledsik, gwapaa-yawagak-sigoedgi: Rubén-e-nug, Judá-e-nug, degi, Leví-e-nug naguoed.
EZE 48:32 ”Dad-nakwedsik, neggwebur-suguoedi, dali-miligwen gaka-dulanergwa-gakatar (1,125) suguoed. Asik, gwapaa-yawagak-sigoedgi: José-e-nug, Benjamín-e-nug, degi, Dan-e-nug naguoed.
EZE 48:33 ”Dad-nakwed-argan-nuedsik, neggwebur-suguoedi, dali-miligwen gaka-dulanergwa-gakatar (1,125) suguoed. Asik, gwapaa-yawagak-sigoedgi: Simeón-e-nug, Isacar-e-nug, degi, Zabulón-e-nug naguoed.
EZE 48:34 ”Dad-argwanedsik, neggwebur-suguoedi, dali-miligwen gaka-dulanergwa-gakatar (1,125) suguoed. Asik, gwapaa-yawagak-sigoedgi: Gad-e-nug, Aser-e-nug, degi, Neftalí-e-nug naguoed.
EZE 48:35 ”Galu-matusulid-neggwebur-ebiris-megoedi, dali-milibake gaka dulataled-ilatar (4,500) suguoed. ”A-iba-onodoedgi neggwebur weyob nugguoed: ”BAB-JEHOVÁ WEGI MAIYE.”
DAN 1:1 Rey-Joacim, Judá-yargine birgapaagus negdakmaigua, Babilonia-Rey-Nabucodonosor Jerusalén-neggwebur-ebiris bukunonikid.
DAN 1:2 Bab-Jehová, Rey-Nabucodonosorʼga Judá-e-rey-Joacim-urmaksad. Degine, Bab-Dummadse-goled-neggi ibmar-ebulemalad-swilidikid-bukwad abala sulegega imaksabalid. We-ibmar, Nabucodonosor, Babilonia-yarse sesad. Babiloniaʼde, Sinarʼye nugbalid. Degine, Nabucodonosor a-ibmar-ebulemalad-olobiid e-bab-dummadse-goled-neggi, mani-saboleged-neggi urbenonikid.
DAN 1:3 Rey-Nabucodonosor, Aspenazʼga-igar-ukalid. Aspenazʼde, reyneg-dummadgi-arbamalad-e-dummadid. Rey ega sogded: “Israel-e-rey-gwenadgan-e-masmala, degine, Israel-dule-nuga-nikamalad-e-masmala abala be anga sedago.
DAN 1:4 We-masmala nued-daklemaloed, bonikwasurmaloed, degine, binsaed-nikarbamaloed, ibmar-wisirbamaloed, magar-neg-itomarbaloed. Adi, we-masmala reyneggine nabir arbadii gumalagar.” Degidbali, Aspenaz, a-masmala Babilonia-dulemar-e-gayagi odurdakoed, deginbali, Babilonia-dulemar-e-garda-narmaklegedgi odurdakbaloed.
DAN 1:5 We-ibmar birgapaa-wilub durdakmaloed. Geb bergusale, rey-asabin nonimaloed, ega arbaegar. Degidgine, Rey-Nabucodonosor, a-masmala na-e-masgunned bane-bane-gunnega igar uksad. Degine, bane-bane e-vino-gobega igar uksabalid.
DAN 1:6 We-sapingan-abargine, Judá-dule-sapingan gudiid. Amarde, Danielʼye, Ananíasʼye, Misaelʼye, degi, Azaríasʼye nugmalad.
DAN 1:7 Reyneggi-arbamalad-e-dummad-Aspenaz, we-sapingangala nug-ogwanonikid: Danielʼde, Beltsasarʼye nuggunonikid. Ananíasʼdi, Sadracʼye nuggunonikid. Misaelʼdina, Mesacʼye nuggunonikid. Degine, Azaríasʼdi Abednegoʼye nuggunonikid.
DAN 1:8 Danielʼdi na e-gwage-ulubgi sogsad: “Rey-e-masgunned an gunnosurye. Rey-e-gobed an gobosurbarye, adi, mer an Bab-Jehováʼgi isguegarye.” Degisoggu, Daniel, Aspenazʼse egichisad, mer be rey-e-masgunnega be an-imakoye, adi, mer an Bab-Dummadgi isguegarye.
DAN 1:9 Bab-Dummad, Aspenaz, Danielʼgi nued-binsaega imaksad.
DAN 1:10 Geb Aspenaz Danielʼga sogded: “An-dummad-rey an dobed. Emide, rey na e-masgunned bega uknaid, e-gobed bega uknaibalid. Ar rey, masmala-beun-sergumalad-e-wagarba, bur be-wagar-sipuu dakalile, be-nukine, rey an-gammu egwannoed.”
DAN 1:11 Aspenaz, Melsar-onug-imaksad, Daniel-dakdiguega, Ananías-dakdiguega, Misael-dakdiguega, degi, Azarías-dakdigubaligar. Agine, Daniel, Melsarʼga sogded:
DAN 1:12 “Wilesagwadgi an bese egised, ibambe-wilub (10) be anmar-wilubdake. Unnila gagan-nabir-gullemaladbi be anmarga ukoed. Degine, gobeddi diibi be anmarga ukbaloed.
DAN 1:13 Degidgine, be anmar-wagar masmala-bamalad-rey-e-masgundimalad-e-wagarbo be wilubdakoed. A-sorbali, be anmar-wagar-dakedbali, be-dakedba na be ibmar imaksunnoed.”
DAN 1:14 Agine, sorda-Melsar, Daniel e-aimarmala-ega-ibmar-sogsad nabir-itosad. Degisoggu, ibambe (10) wilubdaknai gualid.
DAN 1:15 Ibambegwad (10) bergunonigua, Daniel-wagar, degi, e-aimar-wagar, masmala-bamalad-rey-e-masgundimalad-e-wagarba bur yeerdakleged.
DAN 1:16 Degisoggu, Melsar, Danielʼga, degi, Daniel-e-aimarga, rey-e-masgunned bar sessulid, rey-e-gobed bar ega uksasurbalid. A-anale, Danielʼga, degi, Daniel-e-aimarga gagan-nabir-gullemalad uknai gualid.
DAN 1:17 Bab-Dummad, we-masmala-warbakegwadga ibmar-wisgued-gurgin uksad. Binsaed-nikagued-gurgin ega uksabalid, adi, nabir garda-bukidar-mamaid magar-itogega, degine, ibmar-bukidar-wisgulegedgi nergubaligar. Danielʼgardi, gabdakleged-magar-oduloged-gurgin uklesbalid, deginbali, negburgan-daked-oduloged-gurgin ega uklesbalid.
DAN 1:18 Degidbali, rey na e-asabin masmala-sedagoye-sogsad-e-ibagan warmaknonigua, reyneggi-arbamalad-e-dummad-Aspenaz, a-masmala Nabucodonosor-asabin senonikid.
DAN 1:19 Rey-Nabucodonosor a-masmalabogwa sunmakded. Geb rey dakalid, Danielʼyobid, Ananíasʼyobid, Misaelʼyobid, degi, Azaríasʼyobid dule-baid bur ibmar-wisid sated. Degisoggu, sapingan-warbakegwad na e-ibmar-wisidba reyga arbadii guarmalad.
DAN 1:20 Rey-Nabucodonosor a-sapingan-warbakegwadse binsaed-nuegan-egichagua, degine, burbar-magar-ibmar-itoged egichabargua, daknonikid, wemar, dule-ibmar-burbaled-oyoged-nergudimaladba, degine, ibmar-burbaled-wisid-nergudimaladba bur bule ilambe-wilub (10) e-non gangu nikamalad.
DAN 1:21 Deyob, Daniel, Babilonia-neggweburgi, Rey-Ciro-birga-gwengus-negdakmai-gusadse gudii gualid.
DAN 2:1 Nabucodonosor birgabogus-negsemaigua, gabdakardaed. We-ibmar-dakedbali sulibinsa-itodii gualid. Degisoggu, a-ulale, bar-nue gabdisulid.
DAN 2:2 Rey-Nabucodonosor na e-gabdaksad ega odulogegala, ibmar-burbaled-oyoged-dulese, ibmar-burbaled-wisid-nerguarmalad-dulese, ina-isgana-imakmalad-dulemarse, degi, Caldeo-dule-binsaed-ibedmarse gochad. Degisoggu, we-dulemar bela Rey-Nabucodonosor-asabin gwisgunonimalad.
DAN 2:3 Rey, amarga weyob sogded: —An-gabdaksad bukib-binsae an-imaked. Degisoggu, an wisgubied, we-gabdakedde, ¿ibu anga obare?
DAN 2:4 Geb rey-asabin Caldeo-dulemar-ambikunonimaladi, Arameo-gwabindukuba sogdemalad: —¡Rey, degisadegu be dula-gudiguena gadin! Anmarga be-gabdaksad be soge, geb anmar bega nabir odulogoed.
DAN 2:5 Rey-Nabucodonosor, Caldeo-dulemar-abin-imakde weyob ega sogded: —An-gabdaksad an iesad. Ar be anga an-gabdaksad sogsurmalale, degi, odulosurmarbalile, bemar-olomakega, degine, be-negmar burubi-sii imakega, an igar ukoed.
DAN 2:6 Ar bemar anga an-gabdaksad sogerdina, degi, odulomarbardibe, adi, an bemarga ibmar-nuegan ukoed, degi, be-nugmar an odummobaloed. Degisoggu, be anga an-gabdaksad sogmala, deginbali, be anga odulomarbali.
DAN 2:7 Dule-nergumalad gannar reyga sogdemalad: —Rey, be anmarga be-gabdaksad soge, geb anmar bega odulogoed.
DAN 2:8 Rey-Nabucodonosor abin-imakde, ega sogded: —Bato an igar-mesisad. A-igar bemar nue-wisid, a-ulale, bemar yamo weyob gunanaid.
DAN 2:9 Bemar anga an-gabdaksad sogsurmardibe, unnila igar-soggwen bemarga maid, sabsur-odurdakleged-igar. Bemar anga gakansamalaga gunanaid, anga yogasaar ibmar-sogega gunanaid, agala bemar yoggunanaid. Degisoggu, anga an-gabdaksad sogmala, deyobi, an wisguoed, bemar sunna anga nabir we-gabdaked odulomalodibe.
DAN 2:10 Geb Caldeo-dule-nerguarmalad rey-abin sogdemalad: —We-napneggine, dule-wargwensaale we-igar-be-egisnaid-oduloged gudisulid. Deginbali, rey-wargwensaale, dule-dummad-negdakmaid-wargwensaale, degi, dummad-wargwensaale, ibmar-burbaled-oyoged-nergudimaladse, dule-ibmar-burbaled-wisid-nerguarmaladse, degi, Caldeo-dulemar-binsaed-ibedmarse, weyobi, ibmar egisdisurmalad.
DAN 2:11 Ar dummad-rey anmarse-ibmar-egisnaidi yeer-gangued, ar dule-wargwensaale geg ega soged, unni bab-dummagan-dulemar-abargi-gudisurmaladbi, we-ibmar oduloged.
DAN 2:12 Rey-Nabucodonosor, weyob ega sogsa-itosgua, sae-itoded, nue-uluded. Degisoggu, rey bela Babilonia-neggweburgi dule-binsaed-ibegan-gudidimalad-ogilogega igar uksad.
DAN 2:13 Deyobi, gardamar meslenonikid, dulemar-binsaed-ibegan-gudidimalad bela oburgwilemaloye. Degisoggu, oburgwilegega, Daniel e-aimarmala amilearmogad.
DAN 2:14 Degidbali, Daniel, sorda-Ariocʼga nuedgi, degi, ise-binsaed-nikaa ega sunmaksad. Ariocʼde, rey-sordamar-e-dummadid. We-dulede, dule-binsaed-ibegan-Babiloniaʼgi-gudimalad bato oburgwesokalinad.
DAN 2:15 Daniel, Ariocʼga sogded: “Rey, dule-binsaed-ibegan-oburgoye garda-mesisadi, ¿ibiga gwae-gwae-imakbie?” Degidgine, Arioc, Danielʼga bela ibmar-ogwasad, ibiga rey weyob igar-uksa.
DAN 2:16 Geb agine, Daniel, rey-daknadgusad. Geb Daniel, gabdaked-odulogegala, reyse ibagan ega napi-osuguye egichisad.
DAN 2:17 A-sorbali, Daniel e-negse naded, geb e-aimar Ananíasʼga, Misaelʼga, degi, Azaríasʼga neg-gunaid sogdapid.
DAN 2:18 Degidgine, Daniel na e-aimarga sogsad, ede-nabir-rey-gabdaksad-odulogega, ega Bab-Dummad-Nibneggi-Maid-dule-wile-dakedse gormaloye. Adi, Daniel, degi, e-aimarmala, mer Babilonia-dulemar-binsaed-ibeganmarba oburgwilemalagar.
DAN 2:19 Mutikidbali, Danielʼga rey-gabdaksad negburgan-dakedba oyolesad. A-ulale, Daniel Bab-Dummad-Nibneggi-Maidgi nued sunmakded.
DAN 2:20 Daniel weyob sogded: “Bab-Dummad-nug, degisadegu odummolesun, ar bela gangued egadid, binsaed-nued-ibed egadid.
DAN 2:21 Bab-Dummad bela ibagan ogwamaid, yolamar ogwamaid. Bab-Dummad reymar-onugsamaid. Reymar-dummadga-maid obelobalid. Dule-binsaed-ibedga binsaed-nikagued uked. Dule-magar-neg-itomaladga ibmar-wisgued uked.
DAN 2:22 Bab-Dummad ibmar-burbarmalad bela oyomaid, ibmar-dukuar-mamaid bela oyomaibalid. Ibmar-negsichigi-mamaid bela magar-daked, ar Bab-Dummad neg-meegwad gued.
DAN 2:23 An-dadgan-e-Bab-Dummad, an begala, doggus-nuedye-soged, an be-nug odummobalid. Ar be anga binsaed-nikagued uksad, gargangued uksabalid. Emigindi, anmar ibmar-bese-egichad be anga oyononikid, ar rey-gabdaksad be anga odulosad.”
DAN 2:24 Degigusad-sorbali, Daniel, Arioc-daknaded. Rey, Arioc-onug-imaksagusad, Babilonia-dule-binsaed-ibegan-oburgwegar. Daniel, Ariocʼga sogded: —Mer be Babilonia-dule-binsaed-ibegan oburgwe. Rey-asabin be an-sede, an ega gabdaked odulogoed.
DAN 2:25 Degisoggu, Arioc rey-asabin gwae-gwae Daniel-sesad. Geb Arioc reyga weyob sogded: —Judá-dulemar-selenonikid-abargi dule-gwensak sunna bega gabdaked-oduloged an amisad.
DAN 2:26 Geb rey, Daniel-Beltsasarʼye-nugbalidse egichided, ega sogded: —¿An-gabdaksad, anga be sunna sogsale? ¿Anga be odulosbalile?
DAN 2:27 Daniel reyga weyob sogded: —Dule-binsaed-ibed-gudiid, dule-ibmar-wilubgan-burbaled-oyoged, dule-ibmar-burbaled-wisid, dule-niisgwamargi-nergualed, wemar-wargwensaale be-gabdaksad gege bega odulomalad.
DAN 2:28 Ar degi-inigwele, nibneggi Bab-Dummad gwensak-maid, abi ibmar-burbarmalad oduloged. Rey-Nabucodonosor, we-Bab-Dummad, ibagan-danikoedgi-ibmar-gumaloed, bega oyosad. Be gabmaigua, be weyob gabdaksad, degine, be weyob negburgan daksabalid.
DAN 2:29 ”Rey, be obunnomaigua, yoedse-neggumaloedgi be binsamai gualid. Geb Bab-Dummad-Nibneggi-Maid ibmar-burbarmalad-oduloged, yoedse-negguoed bega oyosad.
DAN 2:30 Angala be-gabdaksad oyolesmogad. We-soglesulid, andi bur dule-bamaladba ibmar nue-wisye. Rey, be-gabdaksad anga-oyolesad, adi, an bega odulogega, degi, be ibmargi-binsamaigusad be magar itogegar.
DAN 2:31 ”Rey, be gabdakmaigua, ibmar-duleyob-sobaled, be-asabin bipisur-gwichi be daksad. We-duleyob-sobaled yeer-dungued, degine, binnasur gabalid. E-daklegedi swirisur-dakleged.
DAN 2:32 E-nono, or-sunnadgi sobaled. E-binasgar, degi, e-sakwamar, manigi sobaled. E-saderwar, degine, e-duawarmar, esgoro-gordikidgi sobaled.
DAN 2:33 E-malimar, esgorogi sobaled. E-nagmardina, esgorogi, degi, napsagi, sobaled.
DAN 2:34 ”Rey, be we-ibmar-dakgwisgua, akwa-dummad dule-gwen-mecharsuli mellenonikid. We-akwa, ibmar-duleyob-sobaled e-nagmar-esgorogi, degi, napsagi-sobaledgi, yolenonikid, geb bela akwase goamaksad.
DAN 2:35 Geb degine, esgoro, napsa, esgoro-gordikid, mani, degi, or bela eba goamakdemarmogad. We-duleyob-ibmar-sobaled, ar igi oros-e-uka neg-yoladgine burwa-abinni mileddae, deyobi, burwa-abin miledmogad, bar gwen gwichi gussulid. Ar akwa-egi-yolenonikiddi yar-dummadga dungumai gusad. Bela napneg ganonikid.
DAN 2:36 ”Dummad, weyob be gabdaksa gusad. Emisgindi, an bega soggwelo, we ibu obare:
DAN 2:37 Be, rey-gued. Rey-bamalad-abargi, be rey-dummadga gued. Bab-Dummad-Nibneggi-Maid, rey-gangi-sigega be-imaksad. Gangued-nikadba-negseed, gargangued, degi, nug-dummarba-gued bega uksabalid.
DAN 2:38 Bela dulemar-we-napneggi-bukwad, be-argan-yaurgine bega uksad. Deginbali, ibmar-durgan-sapurba-bukwad, sikwimarse-bakale, be-argan-yaurgine uksabalid. Bela wemar-birgi-dummadga-megega be imaksad. Ibmar-duleyob-sobaled-e-nono-orbiidi, we, be gued.
DAN 2:39 ”Be-sorbali, rey-yar-baidgined beba bur dule-nug-nikasulid nonikoed. A-rey-sorbali, baid-rey-yar-baidgined esgoro-gordikid-e-wilubga-gued nonikoed, adi, bela we-napneggi neg-ganonikoed.
DAN 2:40 Napidgine, baid-rey-yar-baidgined esgoroyob-gangued-nikad nonikoed. Esgoro, igi bela ibmar-bibisge, degi, bela ubigwar-sii ibmar-imakbali, deyobi, baid-reymar-negsemamaid ese guoed.
DAN 2:41 ”Dummad-rey, e-nagmar, degi, e-nag-goomar, esgorogi-sobaled, degi, napsagi-sobaled be daksadi, wedi mamarar-negselegoed oyoged. Degi-inigwele, esgoro-gangued-nikadyob gangued wis nikumogoed.
DAN 2:42 Ar e-nag-goomar-esgorogi, degi, napsagi-sobaledi, wedi sogleged, we-yar wis gannarba negselegoed, gines nollo negselebaloed.
DAN 2:43 Dummad, esgoro, napsabo-oburar be daksad, we-ibmarmar na ebogwa gege achaa nagued. Deyobi, we-yar-e-dulemar na apurmaloenad, degi-inigwele, bulakwaa ambikumalosulid.
DAN 2:44 ”We-reymar-ibagangine, Bab-Dummad-Nibneggi-Maid, na rey-wargwen-degisadegu-reyga-megoed barmidagoed. We-reygi, dule-baid bipisaar obinosulid. Ar we-rey bur yar-bamalad-obelogoed. We-rey, degisadegu reyga megoed.
DAN 2:45 Dummad, be daksagusad, akwa-dummad dule-gwen-barmassuli yar-birgi argwannargusad. We-akwa ibmar-duleyob-sobaledgi yolenonigua, ese esgoro goa-goa-gusad, ese napsa ubi-ubi-gusad, ese esgoro-gordikid goa-goa-gusad, ese mani goa-goa-gusad, degi, ese or goa-goa-gusad. We-akwadi, we-rey-danikoed gued. ”Bab-Bur-Dummad, yoedsega igi-neg-guoe, bega oyosad. We-gabdaklesad napiragwadid, degi, e-odulolesad innikigwadid, egi bengulesulid.”
DAN 2:46 Rey-Nabucodonosor, weyob itosgua, Daniel-asabin bebe napase dulluu imaksad. Geb Danielʼga ina-wawagwad-ogaega, degine, ibmar-nuegan-ukega igar-uksabalid.
DAN 2:47 Rey-Nabucodonosor, Danielʼga weyob sogded: —Napirado. Be-Bab-Dummadi, bamalad-bab-dummagan-e-Bab-Dummadid, reymar-mamaid-e-Dummadbalid. Be-Bab-Dummad, bela igarmar-burbar-mamaid oduloged. A-ulale, an-gabdaksad be nabir odulosad.
DAN 2:48 Geb degine, Rey-Nabucodonosor dummadga Daniel-nug-imaksad, geb ibmar-nuegan-bukidar ega uksabalid. Deginbali, rey, bela Babilonia-yar-naidgi-negseega, degi, dule-binsaed-nued-nikamalad-e-dummadga-guega Daniel-nug-imaksabalid.
DAN 2:49 Geb degine, Daniel reyse egichisad, e-aimar-Sadrac, Mesac, degi, Abednego, dummaganga onugsamoye. A-sogedbali, rey, we-masmala Babilonia-yargi ega ibmar-akwega onugsasad. Danielʼdi rey-walik arbadii gusad.
DAN 3:1 Rey-Nabucodonosor ibmar-duleyob-orgi-sobaled-sobega igar-uksad. We-ibmar-duleyob-orgi-sobaledi, daliambe-gakatale (15) nibgued, e-wardunguedi daligwen-gaka-negabalad. We-ibmar Babilonia-yargi, Dura-neba-naidgi sobar-ogwichisad.
DAN 3:2 Geb Rey-Nabucodonosor igar-uksad, bela yar-nanaidgi-dummagan-mamaidse, igar-nabomalad-e-dummaganse, sordamar-bila-onomalad-e-dummaganse, neggwebur-danar-danar-bukwamalad-e-dummaganse, dule-binsaed-dakmaladse, dule-mani-dakmaladse, dule-igar-nabomaladse, bela dummagan-gudimaladse gornamarye, adi, Nabucodonosor-ibmar-duleyob-orgi-sobsad-oyolesokalid dakdamalagar.
DAN 3:3 Degisoggu, yar-nanaid-e-dummagan, igar-nabomalad-e-dummagan, neggwebur-danar-danar-bukwamalad-e-dummagan, dule-binsaed-dakmalad, dule-mani-dakmalad, dule-igar-nabomalad, bela dummagan-gudimalad, Nabucodonosor-ibmar-duleyob-orgi-sobsad-oyolesokalid-dakega, a-asabin bela ambikunonimalad.
DAN 3:4 Degine, reyga gayaburba-berbemalad, weyobi, iseedi gordii gusad: “Bemarga, neggweburmarga, dulemar-yar-baid-baidgi-bukwamaladga, degi, gwabindukumar-akar-akar-sunmakmaladga weyob igar-ukleged:
DAN 3:5 Ar bemar gar-trompeta, gar-flauta, gar-cítara, gar-salterio, gar-arpa, gar-zampoña, degi, garmar-gormalad-bamalad gote-itodele, Rey-ibmar-duleyob-orgi-sobaled-sobsad-asabin, napase wagar dullu-imakmaloed, degi, e-nug-odummomarbaloed.
DAN 3:6 Dule-gwensak ibmar-duleyob-orgi-sobaled-asabin, napase wagar dullu-imaksulile, degi, e-nug-odummosurbalile, soo-ginnitibi-gasiid-yagi yog-mellear guoed.”
DAN 3:7 Degisoggu, bela-dulemar-bukwamalad, neggwebur-danar-danar-bukwadginmalad, dulemar-yar-baid-baidginmalad, degi, dulemar-gwabinduku-akar-akar-sunmakmalad, gar-trompeta, gar-flauta, gar-cítara, gar-salterio, gar-arpa, gar-zampoña, degi, gar-gormalad gote-itodmargua, Rey-ibmar-duleyob-orgi-sobaled sobsagusad-asabin, napase wagar dullu-imakdemalad, degi, e-nug odummodmarbalid.
DAN 3:8 Degidgine, Rey-Nabucodonosor-asabin, Caldeo-dulemar-nonimaladi, Judío-dulemar-barsognonimalad.
DAN 3:9 Reyga weyob sogdemalad: —¡Rey, be degisadegu dulagudiguena gadin!
DAN 3:10 Rey, be igar-mesisad: ‘Bela dulemar gar-trompeta, gar-flauta, gar-cítara, gar-salterio, gar-arpa, gar-zampoña, degi, belagwable gar-gormalad gote-itogele, ibmar-duleyob-orgi-sobaled-asabin napase wagar dullu-imakmaloye, degi, e-nug odummomarbaloye.
DAN 3:11 Deginbali, be igar-uksabalid, dule-wargwen deyob imaksurdibe, soo-ginnitibi-gasiid-yagi egwanlegoye.’
DAN 3:12 We-Judío-dulemar-Babilonia-yarmar-seega, be onugsasadi, gwen dule-dummad-be-daksurmalad, be-bab-dummagan-e-nug odummosurmalad, deginbali, be ibmar-duleyob-orgi-sobaled sobsagusad-e-nug odummossurmarbalid. Amar wemalad: Sadrac, Mesac, degi, Abednego.
DAN 3:13 Rey-Nabucodonosor degi-itosgua, nue-uluded, isdar-itogedgi sogded, ega Sadrac, Mesac, degi, Abednego sedamarye. We-sapingan rey-asabin selenonimargua,
DAN 3:14 Rey-Nabucodonosor ega sogded: —Bemar warbaagwad, ¿ar wede, nabiri? Bemar an-bab-dummagan-e-nug, degi, an ibmar-duleyob-orgi-sobaled sobsagusad-e-nug odummosurye anga sogmalad.
DAN 3:15 Emigindi, Bemar guakwagwa gar-trompeta, gar-flauta, gar-cítara, gar-salterio, gar-arpa, gar-zampoña, degi, bela gar-gormalad gote-itodele, an ibmar-duleyob-orgi-sobaled sobsagusad-asabin, napase wagar dullu-imaked, degi, e-nug odummoged. Ar deyob bemar imaksulile, soo-ginnitibi-gasiid-yagi yog-mellear bemar guoed. Weyob an bemar-imakoedgi, ¿ar doa-bab-dummad be-bendakmaloe?
DAN 3:16 Sadrac, Mesac, degi, Abednego, Rey-Nabucodonosor-abin sogdemalad: —Dummad-rey, anmar na san-bendakegala bega akar sogosulid.
DAN 3:17 Ar soo-ginnitibi-gasiid-yagi anmar-metemalale, anmar-Bab-Dummad, anmar e-nug-odummodiidi sunna soogi, degi, begi, anmar-ollor-imaked.
DAN 3:18 Ar anmar-Bab-Dummad amba anmar-bendaksulile, rey na be wisguergebed, anmar be-bab-dummagan-e-nug, degi, be ibmar-duleyob-orgi-sobaled sobsagusad-e-nug odummogosulid.
DAN 3:19 Weyobi Sadrac, Mesac, degi, Abednego ega soge itosgua, Nabucodonosor nue-uluded, wemar-nue-sae dakded. Geb degine, soo-ginnitibi-gasiid bela-bela bur ogannogega imaksad.
DAN 3:20 Rey na e-sordamar-bila-onomalad-bur-dutusurmaladga igar-uksad, adi, wemar-warbaagwad-edinmalaga, degi, soo-ginnitibi-gasiid-yagi metemalagar.
DAN 3:21 Deyobi, we-sapingan gugmaklesmalad. E-mor-dummad-yoyoi, e-sapatmar-yoyoi, mor-bipirmakaled nonogi-sii, soo-ginnitibi-gasiid-yagi metemalad.
DAN 3:22 Rey na e-igar-uksadba gwae ibmar-imakmaloye sogsagussoggu, bela-bela bur soo ogannosmalad. Degisoggu, sorda-bila-onomalad we-sapingan-soo-yagi-metenadapmaladi, soogi gummaksamalad, geb burgwismalad.
DAN 3:23 We-sapingan-warbaagwad, Sadrac, Mesac, degi, Abednego, soo-ginnitibi-gasiid-yagi atinnar argwatemalad.
DAN 3:24 Geb deyob-neg-gunaidgine, Rey-Nabucodonosor gwichibin-imaksad, geb geger-ibmar-dakedba ega-binsaed-dakmaladga sogded: —¿Ar soo-yagi dule-warbaa atinnar metemarsursi? Rey-abin, sogdemalad: —Dummad. Ar deyobdo.
DAN 3:25 Geb degine, Rey sogdebalid: —Degite, soo-abargi dule-walabake achikar-gudii an daked. Gwen akar-gusuli an dakbalid. E-bakegwad-wargwenadi, baliwituryob dakleged.
DAN 3:26 Deyob sogsagua, Nabucodonosor soo-gasiid-e-yawagak-waliksaar gwisgudapid, geb sogded: —Sadrac, Mesac, Abednego, Bab-Dummad-Bur-Birigined-e-nug-odummodimalad, ¡be nodamala, dagmala! Sadrac, Mesac, degi, Abednego soo-gasiid-yagi-noarmargua,
DAN 3:27 yar-nanaid-e-dummagan, danar-danar-yar-sedimalad, sordamar-bila-onomalad-e-dummagan, degi, reyga-binsaed-ukmalad, we-sapingan-dakmalaga ebiris ambikunonimalad. Geb dakarmalad, soodi gwen wemar-akar-imaksasuli, degi, e-sailagia gwen gummaksasuli. Deginbali, e-mormar-yoyoid gwen soobi yapansulid, gwen gummaksasurbalid.
DAN 3:28 Geb agine, Nabucodonosor sogded: “We-sapingan-e-Bab-Dummad-nug odummolesunna. E-maimar-egi-bengussurmalad-bendakegala na e-baliwitur barmialid. We-sapingan, rey-igar-mesisadba ibsassurmalad, na e-Bab-Dummad-nug-odummoged-ular, burgwega guagwar-gudigusmalad, na e-sangi binsassurmalad, bab-dummagan-bamalad-e-nug odummossurmalad.
DAN 3:29 Degisoggu, an igar-messundo, bela dulemar, dulemar-yar-baid-baidgi-bukwamalad, degi, dule-gwabinduku-akar-akar-sunmakmalad, Sadrac, Mesac, degi, Abednego-e-Bab-Dummadgi galagwensur-sunmakele, na e-san-goamaklegoed, e-neg burubi-sii guoed. Ar Bab-Dummad-weyob-emar-bendakedi, sated.”
DAN 3:30 Geb Rey-Nabucodonosor, Sadrac, Mesac, degi, Abednego, Babilonia-yargi dule-dummaganga nug-imaksad.
DAN 4:1 Ani, an Rey-Nabucodonosor gued. Bela we-napneggi dulemar-neggweburmargi-bukwamaladga, dulemar-yar-baid-baidgi-bukwamaladga, degi, dulemar-gwabinduku-akar-akar-sunmakmaladga an soged: Neg-bogidikid bemarga nai guena gadin, degi, bela be ibmargi-nasgumai gusmalana gadin.
DAN 4:2 Bab-Dummad-Bur-Birigined anga ibmar-gegerdaklemalad-imaksadi, bemar wisgubi an abedo.
DAN 4:3 Ibiyobi, Bab-Dummad-e-ibmar-wilubgan dungue, degi, ibiyobi, e-ibmar-gegerdakleged gangubali. Bab-Dummad-Bur-Birgined-e-negganikid degisadeguad, e-negsemaid gege bergued.
DAN 4:4 Ani, Nabucodonosor, an-neggi an nuedgi-gudiidgine, an-ibmar-nasgumaidgi an weligwar-itodiidgine,
DAN 4:5 ibagwengi mutikidba an gabdakalid. We-gabdaked dobed anga uknonikid. An gabdakmaidgine, ibmar-galagwensuli an dakalid. A-ulale, an gwakialid.
DAN 4:6 Agala, Babilonia-neggweburgi bela dulemar-binsaed-ibed-gudimaladse an goted, adi, an-gabdaksad anga odulomalagar.
DAN 4:7 Ar dule-ibmar-burbar-oyomalad, dule-ibmar-burbaled-wisid-nerguarmalad, Caldeo-dulemar-binsaed-ibedmar, degi, nermar-yoedse-ibmar-guoed-sogmalad anse nonimargua, an ega an-gabdaksad sogsad. Degi-inigwele, gwen anga odulossurmalad.
DAN 4:8 Napidgine, Daniel an-bab-dummadba-Beltsasarʼye-nugbalid, anse nonikid. Danielʼgine bab-isligwaled gudiid. Danielʼga an-gabdaksad an ega weyob sogsad:
DAN 4:9 “Beltsasar, dule-ibmar-wilubgan-e-burba-oyoged-e-dummad. An wisdo, begi bab-dummagan-isligwaled-e-burba maid, begi ibmar-burbarmalad dukumaisulid. An-gabdaksad, an bega sogo, degi, be anga odulogo.
DAN 4:10 An obunnomaigua, an we-ibmar dakmai gualid: ”Napneg-naid-abargine, sapi matusur-gwichi an dakalid.
DAN 4:11 We-sapi dungumai gualid, geb warbipisuli gusad. E-anagan mogirse mosad, bela napneg-naid-ugakaasega, dikasuli magar daklegwichid.
DAN 4:12 E-gaganmar yeerdakleged, degi, bela-bela sanmakgwichid. Bela dulemar e-san gundidiid. A-sapi-urba, negsichigwadgi ibdurgan obunno-nonidamalad. E-anagangine, sikwimar na e-uu sobnonidamalad. We-sapigi bela-ibmar-dulamalad mas-gunbukwad.
DAN 4:13 ”An gabdakmaidgine, dule-gayaburba-berbeged-isligwaled nibneggi aidedaniki an dakarbalid.
DAN 4:14 We-dule binnasuli weyob sogded: ” ‘Sapi-gwichid olae, e-anagan sike-sike imakmala, e-gagan bela swiri imakmala, degi, e-sanmar bela mie-mie imakmala. Ibdurgan e-urba-gudidimalad, bela duurmakmala. Sikwimar e-anagangi-gudidiid, bela gukumala.
DAN 4:15 E-sailadi, degi, e-malimardi, mer napagi ungemalo. Wemar esgoro-dubgi, degi, esgoro-gordikid-dubgi edinnar gaganmar-abargi be ogwicho. Egi boo batenaidbali, waradik gwichiguoed, degi, ibdurgan-abargi gagan-gundii guoed.
DAN 4:16 E-binsaedi, duleyob bar binsaosulid, ibdurgan-daedyob gudoed. Birgagugle (7) deyob gudiguoed.’
DAN 4:17 ”Gayaburba-berbemalad-islidikmalad bela dulemar-gudidimalad Bab-Dummad-Bur-Birigined-magar-dakmalaga weyob sogsad: ”Bab-Dummad-Bur-Biriginedi bela dulemar-negsemamaid-e-dummadid, Ar doaga negseleged ukbie, na e-sogedba ukedid. Degine, dule-nug-bipi-nikad emar-iduega onug-imakedid.
DAN 4:18 ”Ani, Rey-Nabucodonosor, an weyob gabdaksad. Degisoggu, Beltsasar, be anga oduloge. Ar ade, an-yar-semaidgine, wargwensaar dule-binsaed-ibed anga gwen odulossulid. Ar begine bab-dummagan-islidikmalad-e-burba maidsoggu, bedi sunna anga oduloged.”
DAN 4:19 Degidgine, Daniel-Beltsasarʼye-nugbalid, we-ibmargi-binsa-gwichidbali na bela-bela bukib-itogwichi gualid. A-ulale, Rey-Nabucodonosor weyob ega sogded: —Beltsasar, we-gabdaklesadba, e-odulolegedba mer be bukib-binsae. Daniel weyob abin-imakded: —An-dummad, we-gabdaked, e-oduloged, bitigi be-isdarmaladgi, degi, begi-isdar-binsadimaladgi gusana gadin.
DAN 4:20 ”Dummad, be-gabdaksadgi, sapi-matusur, degi, wardummad be daksadi, a-sapi, bee be gued. A-sapi-e-duku mogirse-warmakgwichi, degi, bela napneg-ugakaase magar-daklegwichi gusad.
DAN 4:21 A-sapi na e-gagan yeerdaklegwichid, degi, e-san nue-sanmak-gwichid. Bela dulemar e-san gunbukwad. E-urbali, negsichigwadgi ibdurgan gudimalad, degi, sikwimar e-anagangi na e-uu sobbukwad.
DAN 4:22 Rey, a-sapi be gued. Be nue-dungunonikid, be yeer-gangu gunonikid. Be-nug-dummarba-guedi mogirse warmaknonikid. Bela napneg-ugakaase be neg ganikid.
DAN 4:23 ”Rey, be-gabdaksadgine, gayaburba-berbeged-isligwaled aidedani be daksadi, weyob sogsagusad: ‘Be sapi-sike, be obeloge. E-sailadi, degi, e-malimardi, melle be ungo. Wemar, esgoro-dubgi, degi, esgoro-gordikid-dubgi edinnar gaganmar-abargi be ogwicho. Egi boo batenaidbali, waradik-gwichi guoed. Deyobi, birgagugle (7) ibdurganyob gudii guoed.’
DAN 4:24 ”Rey, be-gabdaksad we obared, Bab-Dummad-Bur-Birigined sabsur-be-odurdaked-igar mesisad.
DAN 4:25 Dulemar-abargi bar be gudii guosulid, ibdurgan-abargi be gudii guoed. Molimaryobi be gaganbi-gundii guoed, degi, boobali be waragudii guoed. Dummad-rey, deyobi, birgagugle (7) be gudii guoed. A-sorbali, geb be magar-daknonikoed, unnila Bab-Dummad-Bur-Biriginedbi dummagan-negsemamaid-birgi dummadga-maiye, degi, abi na e-itolegedba dummadga dule-nug-imakye.
DAN 4:26 Dummad, ar sapi-e-saila, degi, e-malimar mer-ungoye-igar-uklesadi, gannar be negsenonikoed, obared. Unnila weyob ibmar gunonikoed, ar be magar neg-daknonikir, Bab-Dummad-Bur-Biriginedbi dummadga maiye.
DAN 4:27 Degisoggu, dummad-rey, an bega binsaed-ukoedba, be ibmar-imakoena gadin: Be-isgued be indake, innikigwadba be ibmar-imake. Be-ibmar-isgana-imaked be indake, dule-wiledimalad be bendake. Dummad-rey, weyob be ibmar-imakedba, abakale be bogidik, degi, weligwar-gudii gualile.”
DAN 4:28 Rey-Nabucodonosor na igi-gabdaksa, ar deyobi, egi ibmar gunonikid:
DAN 4:29 Birgagwen-nasad-sorbali, Rey-Nabucodonosor, Babilonia-neggweburgi na e-reyneg-dummad-siidgi-gudigua,
DAN 4:30 weyob sogded: “¡Dakmala! An ibiyobi Babilonia-neggwebur dungu sobsa. An-garganguedba an yeerdakle sobsad, adi, an-nug dummarba guegar.”
DAN 4:31 Rey amba deyob sunmakgwichidgi, nibneg-akale gayaburba gollalid: “Rey-Nabucodonosor, bega weyob sogleged: ‘Be, reyga-maid bar be megosulid.
DAN 4:32 Dulemar-abargi bar be gudii guosulid, ibdurgan-abargi be gudii guoed. Molimaryobi be gaganbi-gundii guoed, degi, boobali, be waragudii guoed. Dummad-rey, deyobi, birgagugle (7) be gudii guoed. A-sorbali, geb be magar-daknonikoed, unnila Bab-Dummad-Bur-Biriginedbi dummagan-negsemamaid-birgi dummadga-maiye, degi, abi na e-itolegedba dummadga-dule-nug-imakye.’ ”
DAN 4:33 Nabucodonosorʼga ibmar-soglesadba, yog-ega-ibmar-guar gusad. Dulemar-abargi oballenonikid, molimaryobi gagan-gundii gualid. Boobali na waradik-gudii gualid. Sulubagi-e-absaryob e-saila suguded, deginbali, sulubagi-e-nasiyob e-gonasimar sugudbalid.
DAN 4:34 “Birgagugle (7) nasad-sorbali, ani, Nabucodonosor, an niba atakded. Geb agi an magar neg-itononikid. Geb degine, Bab-Dummad-Bur-Birigined-e-nug, na degisadegu-dula-maid-e-nug an odummoded: E-negdakmaid degisadeguad, e-negsemaid gege-bergued.
DAN 4:35 E-asabinni, napneggi dulemar-bukwamalad, dule-binsaledga gumalad. Bab-Dummad, nibneggi sordamar-bukwadgine, degi, we-napneggi dulemar-bukwadgine, na e-abegedba ibmar-imaked. Na e-gangued-abinni dule-wargwensaale gwisguosulid, deginbali, geg ese egisbalid: ¿Ibu be imaknai?”
DAN 4:36 An weyob sogsagua, an gannar magar-neg-itononikid. Geb an-nug-dummarba-gued, an-negsemaid-e-gangued, degi, an-negdakmaid-e-yeerdakleged anga gannar uklenonikid. Anga binsaed-ukmalad, degi, anga dummaganga-mamaid anse nonimalad. Geb an gannar reyga megnonikid. Idualedbali an bur bule gangued-nika gunonikid.
DAN 4:37 Emigindi, ani Nabucodonosor, Rey-Nibneggi-Maid-e-nug, an bela-bela odummoged, degi, ogannobalid, ar ade, innikigwadba, degi, sogedba ibmar-imaked. Deginbali, dule-na-san-dummarba-imakdiid-e-nug bipii imakbalid.
DAN 5:1 Rey-Belsasar na e-sordagan dule-nuga-nikamalad-miligwen-merguedga (1,000) iba-dummad onosad. Na e-sordaganmala mumguedse vino-gobsamalad.
DAN 5:2 Belsasar mummudgine, na igar-ukded. E-bab-Nabucodonosor Jerusalén-neggweburgi Bab-Dummadse-goled-neggi nogmar-orgi-sobaled, degi, nogmar-manigi-sobaled-seargusad, ega sedamarye. Adi, a-nogmargi na e-sordaganmala, e-omeganmala, degi, e-omegan-dikarbarmaladmala vino gobmalagar.
DAN 5:3 Geb degine, Jerusalén-neggweburgi Bab-Dummadse-goled-neggi nogmar-orbiid-seargusmalad ega senonimalad. Geb a-nogmargi rey na e-sordaganmala, e-omeganmala, degi, e-omegan-dikarbarmaladmala vino gobsamalad.
DAN 5:4 Vino-gobnanaidgine, na e-bab-dummagan orgi-sobarmalad-e-nug, manigi-sobarmalad-e-nug, esgoro-gordikidgi-sobarmalad-e-nug, esgorogi-sobarmalad-e-nug, urgogi-sobarmalad-e-nug, degi, akwagi-sobarmalad-e-nug odummonanai guarmalad.
DAN 5:5 Deyob-gunanaidgine, ukiagwar reyneg-dummad-ollor-naid-e-galugi argan-gwensak daklealid. Geb we-goo galu-sipu-magaledgine ibmar-narmaknai dakalid. Gwallumar-gabukwadba we-ibmar-narmaklenaid magar-dakleged. Rey-Belsasar, goo ibmar-narmaknai-dakargua,
DAN 5:6 dobgudedbali e-wagar sipuu naded. Deginbali, wawanmakded, e-malimar nollomakded, aimukubigualid.
DAN 5:7 Geb Rey-Belsasar, dule-ibmar-burbaled-oyomalad, Caldeo-nelemar, dule-niisgwagi-nerguarmalad ese dagmalaga imaksad. Rey-Belsasar dule-binsaed-ibedmar-Babiloniaʼginmaladga sogded: —Anga dule we-narmaklesad absosdibe, degi, anga odulosbardibe, dule-nuga-nikadyob mor-suir-akwagiid an ega yooed, e-dukargine ordub an ega nasikoed, deginbali, rey-yarbalid-e-yarbalidga we-yar-dummad-naid-seega an nug-imakbaloed.
DAN 5:8 Geb degine, bela dule-binsaed-ibegan-reyga-binsaed-ukdimalad nonimalad. Degi-inigwele, amardi ibmar-narmakar-naid ibu-obarnai, aku-itomalad. Degisoggu, reyga gwen odulossurmalad.
DAN 5:9 A-ulale, Rey-Belsasar bela-bela bukib binsaded, geb e-wagar sipuu naded. E-sordagan-nuga-nikamaladdina oes-bukusmalad.
DAN 5:10 Rey-ome-itosgua, e-sui-rey, degi, e-sordagan-nuga-nikamaladmala oimakbukwa, iba-onolenaidse dognonikid, geb sogded: —¡Rey, be degisadegu mai gusun! ¡Mer be surbinsa-itoge, mer be dobgue!
DAN 5:11 Be-yar-semaidgine, dule-wargwen gudiid. A-dulegine, bab-dummagan-islidikid-e-burba maid. Be-bab-Nabucodonosor-dula-gudiunni, we-dule nue-ibmar-wisi, nue-binsaed-nikaa, degi, bab-dummaganyob nabir-ibmar-burbaled-oduloge daklealid. Be-bab-Rey-Nabucodonosor, we-dule, dulemar-ibmar-burbar-oyoged-e-dummadga, dulemar-burbar-ibmar-guoed-soged-e-dummadga, Caldeo-nermar-e-dummadga, dulemar-niisgwamargi-nergualed-e-dummadga onug-imaksagusad.
DAN 5:12 Ar we-dulede magasar-neg-itoged, bela-bela ibmar-wisid, nono-nued-nikad, ibgwensuli gabdaked oduloged, degi, igar-burbarmalad nabir odulobalid, deginbali, ibmar-undar-nudakleged baisur nudakbalid. We-dulese be gole, ar we-dule bega sogoed, we-ibmar-narmakar-naid ibu obare. We-dule Danielʼye-nugad. Dummad-rey, be-bab-Nabucodonosor we-dule Beltsasarʼye onug-imaksad.
DAN 5:13 Geb degine, Daniel rey-asabin selealid. Geb Rey, Danielʼga sogded: —¿Ar bee be Daniel? ¿An-bab Judá-yargi dulemar-gasa-seargusad-abargi be seleargusmogadi?
DAN 5:14 Anga sogmalad, begine bab-dummagan-islidikid-e-burba maiye. Be magasar-neg-itoye, be nue-ibmar-wisye, deginbali, be doggus binsaed-ibedbarye.
DAN 5:15 Dulemar-binsaed-ibed, degi, dule-ina-isgana-imakmalad anse selenonigusmalad, adi, anga we-ibmar-narmakar-naid odulomalaga, degi, anga sogmarbaliga, we, ibu-obare. Degi-inigwele, anga gwen odulossurmalad.
DAN 5:16 Anga sogsamalad, be sunna ibmar-oduloye, degi, ibmar-undar-nudakleged be baisur nudakbarye. Be anga we-ibmar-narmakar-naid nabir odulosdibe, degi, be anga sogsabardibe ibu obare, dule-nuga-nikadyob mor-suir-akwagiid an bega yooed. Be-dukargine, an ordub nasikoed. Deginbali, rey-yarbalid-e-yarbalidga we-yar-dummad-naid-seega an be-nug-imakbaloed.
DAN 5:17 Geb degine, Daniel, rey-abin-imakded. Ega sogded: —Be anga ibmar-binsa-ukbied mer be anga ukedgi binsae, dule-bamaladga be uke. Degi-inigwele, dummad, an bega we-ibmar-narmakar-naid absogoed, deginbali, an bega odulobaloed.
DAN 5:18 ”Rey, be-bab-Nabucodonosorʼga Bab-Dummad-Bur-Birigined we-yar-naid uksad. Dummarba-gued, gangued-nika-gued, degi, nug-dummarba-gued uksabalid.
DAN 5:19 Bab-Dummad ega gargangued-uksadbali, dulemar-yar-baid-baidgi-bukwamalad, bela neggweburmar-bukwad, degi, dulemar-gwabinduku-akar-akar-sunmakmalad, e-abin dobedba wawanmakdedamalad. Ar Nabucodonosor, dule-oburgwebidibe, na-e-sogedba oburgwedaed, ar dule-oburgwebisulile, na e-sogedba dula-gudii imakdaed. Ar dule-dummadga-imakbiele, na e-sogedba dule-odummoged, ar dule-nug-bipi-imakbiele, na e-sogedba dule-nug-bipi imakdaed.
DAN 5:20 Ar Nabucodonosor na bela-bela gargangued-nika-itoargua, degi, na san-dummarba-imakdegua, sabsur-emar-imakalid. A-ulale, e-yar-negsemaid, degi, e-gargangued e-ibe sulenonikid.
DAN 5:21 Nabucodonosor, dulemar-abargi bar gudii gunonisulid. Geb ibdurgan-daedyob gunonikid. Molimar-uayasuid-sapurginmalad-abargi gudii gusad, degi, moli-bebe-nikad-gagan-maedyobi, gagan-madii gusad. Mutik boo-batedbali waradik-gudii gusad. Geb Bab-Dummad-magar-daknonikidse weyobi gudii gusad. Bab-Dummad-Bur-Birigined dummagan-negsemamaid-birgi dummadga-maiye wisgunonikidse, degi, Bab-Dummadbi na e-itolegedba dummadga-dule-nug-imakye wisgunonikidse, deyob gudii gusad.
DAN 5:22 ”Degi-inigwele, be, Nabucodonosor-e-machi-Belsasar, amba be bela we-ibmar-wisi-inigwele, degite, gwen be na san-bipi-imaksasulid.
DAN 5:23 Aka be Bab-Dummad-Nibneggi-Maidgi dodonaigualid, e-neggi nogmar-selealid be wese-senonikid, adi, a-nogmargi be, be-sordagan, e-omegan, degi, e-omegan-dikarbarmalad vino-gobmalagar. Deginbali, bab-dummagan-orgi-sobaled-nug, manigi-sobaled-nug, esgoro-gordikidgi-sobaled-nug, be odummosmalad. Esgorogi-sobaled-nug, urgogi-sobaled-nug, degi, akwagi-sobaled-nug be odummosbalid. We-bab-dummagan aku-atakmalad, aku-ibmar-itomalad, degi, ibmar-wissurmarbalid. Aka bur Bab-Dummad be-dula-gudi-imaked-e-nug, bela be-ibmar-imaked-wisid-e-nug be odummossulid.
DAN 5:24 ”A-ulale, Bab-Dummad goo-wargwen we-narmakega imaksad.
DAN 5:25 Weyob narmaklesad: ‘Mene, Mene, Tekel, Parsin.’
DAN 5:26 ”Narmakar-naidi we-obared: ‘Mene’ sogleged: Bab-Dummad, be-negsemaid obelosokarye, e-berguoed-ibagan nasiksaye.
DAN 5:27 ‘Tekel’ sogleged: Nibirgi be wilubsalesgua, be-aidikued ukuu daklearye.
DAN 5:28 ‘Peres’ sogleged: Be-negsemaid mimilesye. Media-dulemarga, degi, Persa-dulemarga uklesye.”
DAN 5:29 Geb degine, Rey-Belsasar igar-uksad, dule-nuga-nikadyob Danielʼga mor-suir-akwagiid yomarye, e-dukargi ordub ega nasikmarye. Deginbali, dulemar-owisonamarye, Daniel na rey-yarbalid-e-yarbalid-sorba we-yar-dummad-naid-seega nug-imaklesbarye.
DAN 5:30 A-mutiki, Caldeo-dulemar-e-rey-Belsasar oburgwilesad.
DAN 5:31 Yar-naidi Mediaʼgined-Darío ganonikid. Darío, deunni birga-dulapaa-gakabo (62) nikad.
DAN 6:1 Rey-Darío na e-yar-semaid nuekwaa seegala, dulanergwa (120) dummagan-negsemalad onugsaed nabir-itosad.
DAN 6:2 Darío, dummagan-negsemalad-e-ibmar-imaked-dakegala warbaa dummagan-onug-imaksabalid. Daniel we-dummagan-warbaagwad wargwenadid. Dummagan-negsemalad-dulanergwadi (120), we-dummagan-warbaagwadga bela ibmar-imakmalad sogmaloed, adi, rey-ibmar-nikadi mer akar-guegar.
DAN 6:3 Daniel dummagan-baiganba bur yeer-ibmar-wisidbali nabir negsemai gualid. A-ulale, Rey-Darío bela we-dummagan-e-dummadga Daniel-onugsasad. Deginbali, rey na e-yar-semaid-e-dummadga Daniel-onug-imaked binsasbalid.
DAN 6:4 Geb degine, dummagan-negsemalad-dulanergwad (120), degi, dummagan-warbogwad, Daniel sikwas-ibmar-noar-imaked abitodimalad, adi, egi sogmalaga, Daniel dummad-guedgine, gwen nabir negsemaisurye. Degi-inigwele, egi gwisgumalaga Daniel-ibmar-noar-imakdiid gwen amissurmalad. Ar Danielʼdi na sogedba negsemaid, ibmar-noar-imakdisulid, egi bengulesurbalid.
DAN 6:5 A-ulale, we-dulemar na igar-amismalad, geb sogdemalad: “Anmar Danielʼgi gwisgumalaga, e-ibmar-noar-imakdiid gwen amiosurye. Anmar, unnila e-Bab-Dummad-E-Igar-Maidgi-yolegega imakoye.”
DAN 6:6 Degisoggu, we-dummagan-warbogwad, degi, dummagan-negsemamaid-dulanergwad (120) na sordagan-nug-imaksamalad, adi, reybo sunmaknamalaga. Geb wemar Rey-Darío-asabin-bukwa sogdemalad: —¡Rey-Darío, be degisadegu negsemai gusun!
DAN 6:7 Bela-dummagan-negsemamaid, igar-nabomalad-e-dummagan, dummagan-negsemamaid-dulanergwad (120), dule-nuga-nikamalad, degi, sordamar-e-dummagan bega weyob sogdo, be dummad-guedgine, na be weyob igar-mesye. Ar dule-wargwen iba-durgwen-gakambe (30) nagudoedgi na e-bab-dummadse, degi, dule-baidse gorbiele, geg gued. Unnila besebi bab-dummadyob goloed. Ar bab-dummad-baidse-gordibe, degi, dule-baidse-gordibe, achumigur-bukwad-yagi egwallegoed.
DAN 6:8 Rey, emigindi, we-igar be barmayed abeleged, degi, be-goo-burba-nai be gardagi narmakar mese, adi, we-igar mer bar ogwalegegar. Deyobi, Media-dulemar-e-igar-sogmaidba, degi, Persa-dulemar-e-igar-sogmaidba we-igar gege bar bisged.
DAN 6:9 Degisoggu, Rey-Darío igar-narmakar-mesisadgi e-goo-burba nasiksad. Geb we-igar gardagi narmakar mesisad.
DAN 6:10 Daniel, we-garda-narmaklesadgi na rey e-goo-burba-nasiksaye wisguargua, e-negse nadegusad. Geb e-gabed-e-yawagak-senigana egasad. We-yawagak-senigan Jerusalén-neggwebursik argasiid. Geb agi Daniel yokorgi sindigar sigisad, adi, e-Bab-Dummadse-golega, degi, e-Bab-Dummad-nug odummogegarbar. Ar ade, na gusgu iba-irbali, ilapaa Bab-Dummadse gordaed.
DAN 6:11 We-dule-dummagan Daniel-negse nonimargua, daknonimalad, Daniel Bab-Dummadse-gorsii, degi, nue-wilesakwaa ese bendakleged egichii.
DAN 6:12 Dule-dummagan, Daniel-weyob-daksamargua, Rey-Daríoʼse yog-naar-imaksamalad, adi, ega igar-mesisadgi sunmakmalaga: —Dummad, ¿gardagi-narmakar be igar-mesissursi? Ar iba-dulagwen-gakambe (30) nagudoedgi, dule-wargwen bipisaar bab-dummad-baid-nug, degi, dule-baid-nug odummogosurye, unnila be-nugbi odummogoye. Ar deyob dule imaksulile, achumigur-bukwad-yagi egwallegoed, ¿ar deyobsursi? Rey abin-imakded: —Ar napira bemar soged, igar-megisadi, Media-dulemar-e-igar-maidba, degi, Persa-dulemar-e-igar-maidba imaklegoed. Degisoggu, we-igar gege bisgeleged.
DAN 6:13 Geb degine, we-dulemar reyga sogdemarbalid: —Daniel, Judá-yargi-gales-selenonigusadi, gwen rey be-daksulid, deginbali, be-igar-mesisadba gwen ibsasurbalid. Aka bur e-Bab-Dummadse iba-irba ilapaa goled.
DAN 6:14 Rey deyob itosgua, bela-bela bukib-itonaded, Daniel-bendakbi gualid. Degisoggu, Daniel-bendakega igar-aminai osedosad.
DAN 6:15 Ar we-dulemardi rey-daknadmarbalid. Geb reygi alamaknai guarmalad: —Dummad, mer be iego, ar Media-dulemar-e-igar-maidba, degi, Persa-dulemar-e-igar-maidba, na rey gardagi igar-narmakar-mesisadgi e-goo-burba-nasiksale, dule-wargwensaale geg we-igar-megisad bar ogwaed.
DAN 6:16 Geb degine, rey Daniel-sedamalaga igar-uksad. Geb achumigur-bukwad-yagi Daniel egwachamalad. Agine, rey Daniel-niga-ogannogega ega sunmaknai gualid: —Be-Bab-Dummad, be gusgu e-nug-odummodiid, be-bendakena gadin.
DAN 6:17 Geb degine, akwa-dummad senonimalad. A-akwagi achumigur-bukwad-e-yaa edismalad. A-akwa-birgi, rey e-olargan-e-wilub, degi, nuga-nikamalad-e-olargan-wilubmar nasiksad, adi, Danielʼga-igar-megisadi melle gwagegar.
DAN 6:18 A-sorbali, rey na e-neg-dummadse gannar naded. Geb mas-guchasuli, degi, gar-goled-itossuli megisad. Deginbali, geg gabe guarbalid.
DAN 6:19 Neg-oibosgua, rey wakudaryalaba gwisgualid, geb gwae-gwae achumigur-bukwadse naded.
DAN 6:20 Rey achumigur-bukwad-walikgusgua, wile-itoge Danielʼse binnasur goted: —Daniel, Bab-Dummad-Dula-Maid-e-mai, be-Bab-Dummad, be gusgu e-nug odummodiid, ¿achumigurmargi nabir be-bendaksa?
DAN 6:21 Geb Daniel, rey-abin-imaksad: —¡Rey, be degisadegu negsemai gusun!
DAN 6:22 An-Bab-Dummad e-baliwitur barmialid, a achumigurmar-e-gaya edisad, adi, mer akar an-imakmalaga. Ar Bab-Dummad-asabin, an gwen ibmar-oakalossulid. Rey, an be-ibe gwen ibmar-oakalossurbalid.
DAN 6:23 Rey Daniel-bendaklesadba doggus yeer-itoded. Geb achumigur-bukwadgi Daniel-onomalaga igar-uksad. Onosmargua, dakarmalad, Daniel gwen akar gussuli, ar ade, Daniel na e-Bab-Dummadgine bengussulid.
DAN 6:24 Geb degine, rey igar-uksad, Danielʼgi dulemar-gakansaar-sunmaksamalad sedamarye, degi, e-omeganmala, e-mimmiganmala, achumigurmar-bukwadgi egwanmarye. Wemar amba yoo napase-warmakmala bato achumigurmarse galearmalad, geb bela e-ibe garmar bibichisad.
DAN 6:25 Geb degine, Rey-Darío bela we-napneggi neggweburmar-bukwamaladga, dulemar-yar-baid-baidgi-bukwamaladga, degi, dulemar-gwabinduku-akar-akar-sunmakmaladga garda narmaksad: “Neg-bogidikid bemarga nasgumai, degi, bela ibmargi-nasgumai be gusmalana gadin.
DAN 6:26 ”We-garda-meslenaidi, ani an mesnaid: Bela an-negsemaidgine, bela dulemar Daniel-e-Bab-Dummad-nug odummomalo, eba ibsamalo. Ar Daniel-e-Bab-Dummad, Bab-Dummad-Dula-Maidid, na degisadegu maidid. E-negsemaid bipisaar akar-guosulid. Deginbali, bela e-neg-ganikid bipisaar gwen berguosulid.
DAN 6:27 Bab-Dummad dule-abonogedid, dule-ollor-imakedid. Nibneggi, napneggi ibmar-bulegan, degi, ibmar-dakledisurmalad imaked. Bab-Dummad achumigurmargi Daniel-bendaksad.”
DAN 6:28 Daniel, Darío-negsemaigua, degi, Persa-dule-Ciroʼye-nugad-negsemaigua, nasgumai gusad.
DAN 7:1 Babilonia-e-rey-Belsasar birgagwengus negsemaidgine, Daniel e-obunnoged-neggi-maigua, gabdaknonikid. Degi, negburgan dakalid. Agine, na e-gabdaksad-bur-biriginmalad narmaksad.
DAN 7:2 Daniel weyob narmaksad: “Mutikidbali an negburgan daksad. Agine, an demar-dummad dakalid. A-demar burwa-sogabake-abin-abin-gormaidbali arwemai an daksad.
DAN 7:3 Demargine, ibdula-unid-dummagan walabake noalid, akar-akar dakleged.
DAN 7:4 ”Ibdula-unid-gebesailagined, achumigur-nono-wawaadyob dakleged. Sulubagi-e-sakan nikabalid. An dakgwichidgine, e-ibe sakan unnusmalad, napagi-mai ogwichismalad, degi, e-nag-sorbalidgi duleyobi-gwisguega imaksamalad. Geb dule-binsaedyobi, binsaed-nika gunonikid.
DAN 7:5 ”Ibdula-unid-sogbogwad an dakarbalid, adi, wiobyob dakleged. We-ibdula e-dikargi yollee maid. E-gayagine, ibmar-dikar-gar warbaa ganikid. We-ibdulaga soglesad: ‘Be gwisgue, be immeregedse san gunne.’
DAN 7:6 ”A-sorbali, ibdula-unid-baid nodaniki an dakarbalid. Adi, achu-barbadyob dakleged. E-yargangi nuu-sakanyob sakan walabake nikad, deginbali, nono gwabake nikabalid. Negseegala ega gangued uklesad.
DAN 7:7 ”We-sorbali, an negburgan-dakmaidgine, ibdula-unid-baid an dakarbalid. Adi, bela-bela sunnasur-dakleged, degi, bela-bela gargangued nikabalid. E-nugar-esgorobiid-dummagan-nikadgi dulemar-goa-goa imaked, degi, dulemar-dobalid. A-sorbali, sanmar-obichad-birgi dii-dii annadaed. We-ibdula-unid, iduar ibdula-unid-bamalad an daksadyob daklesulid, wedi warambe (10) bebe nikad.
DAN 7:8 ”An e-bebe-warambegwad-dakgwisgua (10), a-imbagi bebe-senigwad-baid noali an dakalid. We-bebe-senigwad-anar, walapaa bebe-iduarmalad unnulesad. We-bebe-senigwad dulemar-ibyayob ibya nikad. Degine, gaya nikabali. E-sunmakedi, bule-bule sunmaked.”
DAN 7:9 “An we-ibmar dakgwichidgine, ologanmar silenonikid. Geb Dule-Selebagwad-nuga-nikad signonikid. E-mor booyobi sipuu dakleged, e-sailagia sibad-wawaad-e-absaryobi dagudik dakleged. E-ologanagi, degi, e-ologan-e-nag-urba-orokwagwad-bipirmaked-naidgi, soo gwabunyear daed.
DAN 7:10 Dule-Selebagwad-siidgine soo noardaed. Dulemar mili-miliba ega ibmar-imaknanaid. Dulemar-bukidar-geg-ebisle e-asabin gwichimalad. Dule-Selebagwad igar-nabogega, gangi signonikid, geb garda-dummagan-mamaid egalesad.
DAN 7:11 ”Bebe-senigwad gandikidgi-bule-bule-sunmakedba, an dakgwichi gusad. An dakgwichidgine, we-ibdula-bakegwad oburgwelenonikid, goa-goa imaksamalad, geb soo-gwabunye-siidgine, e-san metemalad.
DAN 7:12 Ibdula-unid-bamalad-ibe e-gargangued sulesad, degi-inigwele, wis sikwas dula-gudii-gumalaga amba ega ibagan nagusad.
DAN 7:13 ”Mutikidba an we-negburgan dakmaidgine, dule-wargwen mogir-imbaba aidedaniki an dakalid. We-dule, Dule-Selebagwad-siidse nade gusad, geb ese walikaa warmakega imaksamalad.
DAN 7:14 Geb a-dulega gargangued, gandikidba-negseleged, degi, nug-dummarba-gued ega uklesad, adi, bela dulemar-gudidiid, dulemar-yar-baid-baidgi-bukwamalad, degi, gwabinduku-akar-akar-sunmakmalad, e-nug odummomalagar. E-neg-ganikidi degisadeguad, gege bergued. E-yar-ganikidi bipisaar berguosulid.”
DAN 7:15 “Ani, Daniel, an we-ibmar-daksadbali an bela-bela dobe-itoded, degi, nue an bukib-itodbalid.
DAN 7:16 Geb degine, dule-gwensak-gwichidse an walikaa-naded, geb an ese egichided, an we-ibmar-daksadi, ibu obarye. Geb weyobi anga odulosad:
DAN 7:17 ” ‘We-ibdula-unid-walabakegwad, we-napneggi reymar-walabake neg-ganonimaloedid.
DAN 7:18 Degi-inigwele, Bab-Dummad-Bur-Birigined-e-sordagan-islidikmaladga negseleged uklegoed. Wemar, degisadegu na negsemaloed.’
DAN 7:19 ”Geb degine, an nue-wisgubi gualid, we-ibdula-unid-bakegwad bur ibu-burba oyoge. We-ibdula-bakegwaddi bamaladba bur akarsaar-dakleged, bela-bela sunnasur-dakleged. Nugar esgorobi nikad, degi, gonasimar esgoro-gordikidbi nikbalid. We-ibdula, dulemar-goa-goa imaked, degi, dulemar-dobalid. A-sorbali, sanmar-obichad-birgi dii-dii annadaed.
DAN 7:20 Geb an egisdebalid, ibdula na e-nonogi ambe (10) bebe-nikad, we, ibu obarbarye. Amba deyobi an wisgubiguarbalid, e-nonogi bebe-senigwad noargusad, geb ese walapaa bebemar-idualed-bibichisad, ibu obarbarye. We-bebe-senigwad bur bule gargangued-nika dakleged, ar ade, ibyamar nikad, degine, bule-bule sunmakbalid.
DAN 7:21 ”An deyob dakgwichidgine, we-bebe-senigwad dule-islidikmaladbogwa bila-onod gusad, geb amargi nakwisad.
DAN 7:22 Geb degine, Dule-Selebagwad nonikid, geb Bab-Dummad-Bur-Birigined-e-dule-islidikmaladga igar-nabononikid. Geb agine, dule-islidikmaladga negsemalaga iba nonikid.
DAN 7:23 ”Dule-Selebagwad-nuga-nikadi, weyob anga odulosad: ‘Ibdula-unid-sogabakegwadi, we-napneggi negseleged-sogabakegwadga gunonikoed. Negseleged-bamaladbali dikasur-akar negseoed. Bela napneggi-dulemar-gudimalad ese dolemaloed, ese annalemaloed, degine, ese ubi-ubi gumaloed.
DAN 7:24 Bebe-ambegid (10) oyoged, a-negselegedgine warambe (10) reymar negsenonikoye. Amar-sorbali, rey-baid negsenonikoed. We-rey, reymar-idualedba akarsaila negsenonikoed. We-reyse walapaa reymar-idualed galakumaloed.
DAN 7:25 We-rey, Bab-Dummad-Bur-Biriginedgi isdar-sunmakoed. Bab-Dummad-Bur-Birigined-e-dule-islidikmalad-wiogega imakoed. Ibagan-mamaid, igarmar-mamaid ogwabigudagoed. Dule-islidikmalad we-rey-urbaligwa birgapaa-negabar gudimaloed.
DAN 7:26 Dule-Igar-Naboged signonikoed, bebe-senigwad-ibe e-gangued osulolegoed, geb obergulegoed. Degisadegu bebe-senigwad bar gwisguosulid.
DAN 7:27 Geb degine, Bab-Dummad-Bur-Birigined-e-sorda-islidikmaladgala, bela we-napneggi yarmar-nanaid-e-nug-dummarbagued, ega uklenonikoed, gandikidba-negseleged, ega uklenonikoed e-yarmar-dummarba-gued, ega uklenonikoed. Bab-Dummad-sorda-islidikidmalad-e-negseleged degisadegu guoed. Bela we-napneggi dummagan-negsedimaladi, e-urbaligwa nanadii gumaloed, degi, eba ibsadii gumarbaloed.’
DAN 7:28 ”Dule-Selebagwad-nuga-nikad wese anga sunmaksad. Andi, Daniel, an we-ibmar-daksadba an bela-bela bukib-itod gusad, abali an-wagar sipuu daklenaded. Degi-inigwele, an we-ibmar-daksad an na gwagegi wargwen sedii gusad.”
DAN 8:1 “Rey-Belsasar birgapaagus-negsemaidgine, ani, Daniel, an negburgan-baid daknonibalid.
DAN 8:2 A-negburgan-dakmaidgine, an Elam-yargi, Susa-neggweburgi, Ulai-diwar-dikarba an gudii an na dakalid. Susa-neggwebur neggwebur-bamalad-e-sailaga siid.
DAN 8:3 An gabdakmaidgine, sibad-wawaad-machered diwar-dikarba gunai, an dakalid. We-sibad-wawaad-machered bebe-gar warbo mullusur-nikad. Degi-inigwele, gwensak bur-baidba suid. We-bur-suidi sorba nosad.
DAN 8:4 ”Dad-argwanedsik, dad-nakwed-argan-sapiledsik, degi, dad-nakwed-argan-nuedsik sibad-wawaad-machered na e-bebe-gargi dulemar-naibi-imaknai, an daksad. Ibdula-wargwensaale, geg ebo urwed, deginbali, dule-wargwensaale, e-ganguedgi geg ollorgubalid. Sibad-wawaad-machered na e-itolegedba ibmar imaked, degi, e-gargangued bur bule gangumaid.
DAN 8:5 ”We-ibmar-daksadgi an binsagwisgua, ukiagwar dad-argwanedsik sibad-machered daniki an dakalid. We-sibad-machered e-ibya-gwabogwad-siid-abargi bebe-gar-dummad gwichid. Gwen-napagi-warmaksuli, gwae-gwae bela napneggi nasad.
DAN 8:6 We-sibad-machered, sibad-wawaad-machered-bebe-gar-warbo-nikadgi sabsur-yoledapid. We-sibad-wawaad diwar-gakagi an daksagusadid.
DAN 8:7 ”An daksad, igi sibad-machered, sibad-wawaad-macheredgi sabsur yoledapi. E-ibe bebe-gar-warbogwad bichisad. Sibad-wawaad-machered, sibad-machered-abinsaega gwen gargangued-nika gussulid. Degisoggu, sibad-macheredi, sibad-wawaad-machered-omukusad, e-birgi dii-dii annasad. Dule-wargwensaale, sibad-machered-e-ganguedgi, sibad-wawaad-bendaksasulid.
DAN 8:8 ”Sibad-machered bur bule gargangumai gualid. Ar na bela-bela bur gargangued-nikadgine, e-ibe bebe-gar-bur-suid bichisad. A-anale, walabake bebe-gar-dummagan noalid. We-bebe-gar-walabakegwadi burwa-sogabake-gormaidsiki nogwismalad.
DAN 8:9 We-bebe-gar-walabakegwad-gwensakgine bebe-gar-senigwad-baid noalid. We-bebe-gar-senigwad bela-bela dungusad, geb dad-nakwed-argan-nuedsik, dad-nakwedsik, degi, yar-yeerdaklegedsik e-gangued nasgumai gualid.
DAN 8:10 ”We-bebe-gar-senigwad bela-bela dungussoggu, niisgwamar-nanaidse warmaksad. Geb abar-niisgwamar obatisad, e-birgi dii-dii annasad.
DAN 8:11 We-bebe-gar-senigwad niisgwamar-e-dummadbali bur bule na san-dummarbaa imaksabalid. We-bebe-gar-senigwad bane-bane ibmar-ogumakar-ukleged osulosad. Degi, Bab-Dummadse-goled-neg oichasbalid.
DAN 8:12 Anmar-dulemar-uaya-sulidaed-ulale, e-dulemar-bila-onomalad igar-innikigwad-mamaid oichosmalad, deginbali, bane-bane ibmar-ogumakar-ukleged obelosmarbalid. We-bebe-gar-senigwad ibmar-imakbiedba ibmar imaksad. Bela ega ibmar nueganbi nosad.
DAN 8:13 ”Geb degine, dule-islidikid-gwensak sunmake an itosad. Dule-islidikid-baid, dule-islidikid-sunmaknaidse egisded: ‘Bane-bane-ibmar-ogumakar-ukleged-ailagi, anmar-ibmar-daknaidi, ¿sanagwadse berguoe? Isgued-dummad-gunaidi, ¿sanagwadse berguoe? Bab-Dummadse-goled-neggi isgued-imaklenaidi, ¿sanagwadse berguoe? Bab-Dummad-e-sordagan sabsur-imaklenaid, ¿sanagwadse berguoe?’
DAN 8:14 ”Geb we-dule ega sogded: ‘Milibo gaka dulataled-ilapaa (2,300) ibagan naguoed. Geb a-sorbali, Bab-Dummad-Neg-Islidikid, swilidik gunonikoed.’ ”
DAN 8:15 “Ani, Daniel, an negburgan-dakmaidgine, degi, an wisgubi-gumaidgine, we ibu-burba obare, ukiagwar an-asabin duleyob-daklege gwisgunonikid.
DAN 8:16 Geb Ulai-diwar-gakaba, dule-gwensak binnasur-gole an itosad. Weyob soged: ‘Gabriel, negburgan-oyolesad we-dulega be oduloge.’
DAN 8:17 ”Gabriel, an-gwichidse walikaa-nonigua, an ise-gwayar naded, geb an napase wagar dulluu imaksad. Ar edi anga sogded: ‘Dule, we-negburgan be daksadi, wedi yoedse neg-berguoedgi guoed.’
DAN 8:18 ”Gabriel anga sunmaknaigua, an negoeded, napagi an melleded. Agine, an-ebunonikid, geb gwisguega an-imaksad.
DAN 8:19 Anga sogdebalid: ‘Emigindi an bega sogo, yoedse Bab-Dummad-urwed-e-iba bergudele, igi neg-gunonikoe. Ar we-negburgan-daklesad napneg-bergued-mosar guoed.
DAN 8:20 Sibad-wawaad-machered-bebegar-warbo-nikad be daksadi, adi, Media-yar-e-rey-e-wilub, degi, Persia-yar-e-rey-e-wilub gued.
DAN 8:21 Sibad-machereddina, Grecia-yar-e-rey-e-wilub gumogad. We-sibad-machered e-ibya-gwabogwad-siid-abargi bebe-gar-dummad-gwichidi, gebesaila-Grecia-e-rey-megnonikoed-e-wilub gued.
DAN 8:22 Bebe-gar-bichisgusad-anar bebe-gar-walabake-noargusadi, Grecia-yargine neg-sogabake-selegoed-e-wilub gued. We-negseleged-sogabakegwad gebe-negselesadyobi gangued nikumalosulid.
DAN 8:23 ” ’We-negseleged-sogabakegwad-bergunadapile, dulemar-igar-mamaidgi-annadimalad-e-isgued wilub-obicha-gusale, rey-wargwen na san-dummarba-imaked, degi, igar-dukuar-mamaid magar-oduloged, negsenonikoed.
DAN 8:24 ” ’E-gangued bur bule gangumai guoed, degi-inigwele, we-gangued egi danisulid. We-rey, yeer ibmar-bibisgoed. Bela ibmar-imaked ega nueganbi guoed. Na e-itolegedba ibmar-imakoed. Dule-bulegan-obelogoed, Bab-Dummad-e-sordamar ese burgwemaloed.
DAN 8:25 ” ’We-rey nue-binsaed-nikadba emar-binsaed-gamai guoed, na emargi-obinye binsaoed. Ukiagwar, bukidar dulemar-gwen-akar-guosurye-binsamaladi ese berguoed. We-rey, Dule-Bur-Nuga-Nikadgine gwisgunonikoed, degi-inigwele, we-rey, burgwenonikoed, dulese burgosulid.
DAN 8:26 ” ’Bega we-negburgan-oyolesadi, napiragwadid. Degi-inigwele, mer be emarga sogo, ar emiskwaa guosulid, amba bukidar ibagan napid.’
DAN 8:27 ”Ani, Daniel, an bela-bela nolloo itonaded. Geb an undarsaar uellemai gusad. An gannar gwisgusadgine, reyga-negselemaidgi an gannar arbadbalid. Degi-inigwele, an we-negburgan-daksadbali, bela-bela bukib-binsadii gualid, ar ade, an magar-itosulid.”
DAN 9:1 “Media-yargined, Asuero-machi-Darío, Babilonia-dulemar-e-reyga megnonikid.
DAN 9:2 Rey-Darío birgagwengus negsemaigua, ani, Daniel, an ibagwengi Jeremías-garda-narmakar-maid-absosigua, an magar-itononikid, bia-narmakar-nai, deun Bab-Jehová Jeremíasʼga-sogsagusgu: ‘Birga-dulapaa-gakambe (70) Jerusalén-neggwebur bergus sigoye.’
DAN 9:3 Geb degine, an-Bab-Dummad-Dule-Dummadse an goted, an ega ise-wilegar ibmar-sogded. Aginbali, an mas guchasurbalid, an wile-itoged-mor yosbalid, degi, an bukib-itogedba, sogun-e-buru-birgi sigisbalid.
DAN 9:4 An-Bab-Dummad-Jehováʼse an goted, weyob anmar-isgued an barsogded: ” ‘Bab-Dummadye, be Dule-Dummadid, be Dule-Gandikidid. Ar bedi dulemar-be-sabgudimaladbo, degi, be-Igar-Mamaidba-ibsadimaladbo igar-mesisale, na sogedba be ibmar-imakdaed. A-ulale, an na magar-itoged:
DAN 9:5 Anmar nue-isgusad, anmar ibmar-isgana imaksad, anmar sunnasur-gudigusad, degi, anmar uayasuli-gudigusbalid. Anmar Be-Igar-Mamaidgi, degi, Be-Igar-Uksadgi bangusad.
DAN 9:6 Anmar be-maimar-be-gayaburba-barsogmaladba ibsassurmalad. We-dulemar be-nuggi anmar-reymarga, anmar-dummaganga, anmar-babganga, degi, bela anmar-dulemarga sunmaksagusmalad.
DAN 9:7 ” ’Bab-Jehová, bedi innikigwadba ibmar-imakedid. A-ulale, anmar binge-itoged. Anmar Judá-yarginmalad, Jerusalén-neggweburginmalad, degi, bela Israel-dulemar-bamalad, bela-bela emi-ibagi binge-itomarmogad. Deginbali, beba-uayasuli-gusmalad-ular, be itaka-yar-baid-baidse barmisgusmaladi, degi, be dikasur-yar-baid-baidse-barmilesgusadi, bela-bela emi-ibagi binge-itomarmogad.
DAN 9:8 ” ’Bab-Jehová, ar begi isgusmalad-ulale, anmar, anmar-reymar, anmar-dummagan, degi, anmar-dadgan, nue-binge-itomalad.
DAN 9:9 Ar anmar beba uayasuli-gusmala-inigwele, bedi, anmar-Bab-Dummad-Jehová, amba dule-wile dakmaid, degi, dulega isgued elibalid.
DAN 9:10 ” ’Anmar-Bab-Dummad-Jehová, anmar beba ibsassulid, degi, Be-Igar-Maidba ibsassurbalid. A-igarmar, be-maimar-be-gayaburba-barsogmaladba be anmarga uksanad.
DAN 9:11 Bela Israel-dulemar Be-Igar-Maidgi bangudmalad, beba ibsabisurmalad. A-ulale, anmar-isgusadbali, be anmarga ib-isganamar-sogsagusadi, anmargi aibinnonikid. We-ib-isganamar, be-mai-Moisés-Igar-narmaksadgi narmakar maid.
DAN 9:12 ” ’Be anmarga, anmar-dummaganga, weyob sogsagusad, bemar nuekwaa nanasulile, an bemargi boni-dummad barmidagoye. Emidi, bela be we-ibmar-sogsagusadi, be imaksad. Jerusalén-neggweburgi neggusadyobi, bipisaar we-napneggi deyob gudisulid.
DAN 9:13 ” ’Anmargi, bela we-bonigan, Moisés-Igar-narmaksadba gunonikid. Ar degite, anmar Bab-Dummad-Jehováʼse bendakleged gwen amissulid. Anmar-isgued anmar gwen iessulid, deginbali, anmar be-igar-innikigwad-maidba nanasurbalid.
DAN 9:14 A-ulale, Bab-Jehová, be we-bonigan-nasiksad, be anmargi barmialid. Ar be, anmar-Bab-Dummad-Jehová, bela be-ibmar-imaked innikigwadid. Ar degi-inigwele, anmar beba gwen ibsassulid.
DAN 9:15 ” ’Anmar-Bab-Dummad, deun be-dulamar be Egipto-yargi onosgusgu, be-gangued be oyosgusad. Deyobi, a-iba-akale, emi-ibase be-nug dummarbaa gunonikid. Anmardi isgusad, degi, ibmar-isgana imaksad.
DAN 9:16 Bab-Dummad, be-ibmar-innikigwad-imakedba, be-urwed, be-sae-itoged, Jerusalén-neggweburgi mer be bar imake. Ar Jerusalén be-neggwebur gued, be-yar-islidikid gued. Anmar-isgusadbali, degi, anmar-dadgan-isgusadbali, anmar-dikarba bela-dulemar-yar-baid-baidgi-bukwamalad Jerusalén-neggweburgi, degi, be-dulamargi dodobukwamalad.
DAN 9:17 ” ’Degisoggu, anmar-Bab-Dummadye, emi an bese goled, bese ise-wilegar-gornaid be an-itoge. Bab-Dummad, be-nug-dummarba-gued-ulale, be dake igi bese-goled-neg sigisa. Be-sabgued be anmarga oyoge.
DAN 9:18 Anmar-Bab-Dummad, be nue anmar-itoge. Be dake anmar-bergussiid, deginbali, be-nug-odummoleged-neggwebur-bergussiid be dakbali. Bab-Dummad, anmar bese anmar-innikidaed-ular, ise-wilegar gornaisulid. Unnila be-dule-wiledakmaid-ular, anmar bese wilenaid.
DAN 9:19 ” ’¡Bab-Dummadye, be anmar itoge! ¡Bab-Dummad, be anmarga isgued elie! ¡Bab-Dummad, be nue-anmar-itoge, be anmar-bendake! An-Bab-Dummadye, be-nug-dummarba-gued-ulale, be-neggwebur-ulale, degi, be-dulamar-be-nug-odummodimalad-ulale, be gwae anmar-bendakdage.’ ”
DAN 9:20 “An-Bab-Dummad-Jehováʼse amba an gorsii gualid, an ega an-isgusad barsognai gualid. Degi, an-Israel-dulemar-e-isgusad an barsognai guarbalid. An ese e-yar-islidikidga gorsii guarbalid.
DAN 9:21 An amba Babse gorsiidgine, baliwitur-Gabriel, an iduar-negburgan-daksadgi daksagusadi, an-siidsik binnasur gukualid. Deunni, sedogidba ibmar-ogumakar-ukleged-wachi modanikid.
DAN 9:22 Gabriel magar-ibmar-itogega an-imaksad, geb anga sogded: ” ‘Daniel, emidi an bese-nonikid, adi, bela we-ibmar be magar itogegar.
DAN 9:23 Gebe-onodeyala Bab-Dummadse be gotegua, bato Bab-Dummad be-abin-imaksad. A an bega sogega danikid, ar Bab-Dummad nue be-sabed. Degisoggu, an bega ibmar-sogsokalid be nue itogo, adi, be negburgan-daksad magar itogegar.
DAN 9:24 ” ’Be-dulemar, degi, be-neggwebur-islidikid, isgued mer bar imakmalaga, igar-maidgi-gwisgudiid mer bar egi gwisguega, itoged-dulapaa-gakambe (70) nasiklesad. Degi, e-ibmar-isgana-imaksad Bab-Dummad ega eliega, igar-inniki-imakleged degisadegu mesmalaga, itoged-dulapaa-gakambe (70) nasiklesad. Negburgan-daklesad, degi, ibmar-yoedse-guoed-soglesadguega, degi, Bab-Dummadse-Goled-Bur-Neg-Islidikid swilidik-imakmalaga, itoged-dulapaa-gakambe (70) nasiklesad.
DAN 9:25 ” ’We-ibmar be magar-itogergebed, be nue-wisguergebed: Jerusalén-neggwebur gannar-soblegega igar-uklesad-akale, Dule-Dummad-Nugsalesad nonikoedse, Itoged-gugle (7) naguoed. A-sorbali, itoged-dulapaa-gakabo (62) nagubaloed. Geb degine, Jerusalén-neggwebur, e-igar-dummagan, degi, e-galu-matusurmalad gannar soblenonikoed, A-ibagan, bukib-itoged-ibagan, degi, wile-itoged-ibagan guoed.
DAN 9:26 ” ’We-itoged-dulapaa-gakabo (62) nasad-sorbali, Dule-Dummadga-nug-Imaklesad oburgwilenonikoed. We-Dule-Dummadga-nug-imaklesad, neggwebur-sate, degi, Bab-Dummadse-goled-neg-sate guoed. Ar ade, rey-wargwen-yar-baidsikid e-sordamar-bila-onomaladmala obergunonikoed. Muu-dummad-noedyobi neg-bergued nonikoed. Neggweburmar-bergued bila-onoleged-berguedse bergudapoed.
DAN 9:27 ” ’Itoged-ilagwen, we-rey-isgana dulemar-bukidarbo igar-mesnai guoed. Ar degi-inigwele, itoged-negabar-gusale, ibmar-ogumakar-ukleged, degi, ibmar-uklemalad-mer-bar-ukmalaga imakoed. Geb ibmar-ogumakar-ukleged-ailagi ibmar-isgana-isemalad ogumaknai guoed. A-sorbali, Bab-Dummad, dule-weyob-ese-goled-neggi-ibmar-imaksadga, bergued-igar-megisadba obergunonikoed.’ ”
DAN 10:1 Persia-yar-e-rey-Ciro, birgapaagus negsemaidgine, Daniel, Beltsasarʼye-nugbalid, sorda-bila-onomalad-bukidar-merguedgi gabdaksad. We-gayaburba innikigwadid, degi, magar-itogega dutusur gued. Ar degi-inigwele, Daniel, we-gayaburba magar-itogedse na imaksad, geb negburgan-daksad magar itononikid.
DAN 10:2 “A-ibagangine, ani, Daniel, itoged-ilapaa an wile-itodii gusad.
DAN 10:3 Agine, an mas-nuegan guchasulid, an san guchasulid, an vino gobsasulid, deginbali, geb we-itoged-ilapaagwad gwinmaksadse an ina-wawagwad maksasurbalid.
DAN 10:4 Nii-gebe-yoleded e-iba-dulagwen-gakabakegi (24), an Hidekel-diwar-dummad-gakaba gudiidgine,
DAN 10:5 an niba atakded, geb an dakalid dule an-asabin lino-mor-yoi gwichi, degi, molidub-orbiid nai gwichid. We-orde Ufaz-yargi danikid.
DAN 10:6 E-abagan akwa-topacio-gordikidyob gaed. E-wagar mar-dakarmakmaiyob dakleged. E-ibyamar soo-gwabunye-gwichidyob dakleged. E-sakwamar, degi, e-nagmar esgoro-gordikid-dakar-dakar-gaedyob dakleged. E-sunmaked dulemar-bukidar-sunmakedyob itoleged.
DAN 10:7 ”Anbi, Daniel, we-negburgan daksad. Dulemar-anba-gudimalad we-ibmar-daksasurmalad, ar ade, gwakidmalad, dukuega abarmakdemalad.
DAN 10:8 An we-negburgan-daksagua, dule-wargwensaar an-walik bessulid. An nig-argwated, an-wagar sipuu naded, an bela nolloo itonaded.
DAN 10:9 Geb degine, dule anga sunmake an itoalid. Dule anga sunmaknai an itoargua, an negoeded, geb napagi asgunar an aimukuded.
DAN 10:10 Agine, dule an-ganonikid, geb napagi-akani yokorgi-sigega an-imaksad.
DAN 10:11 Anga sogded: ‘Daniel, be gwisgue, ar an be-dakega an-barmilealid. Bab-Dummad bela-bela be-sabed, degisoggu, an bega ibmar-sogsokalid be nue-itogo.’ ”Weyob anga sunmaknaidgine, an gwisgusad, degi-inigwele, amba an wawanmakgwichi gusad.
DAN 10:12 Geb degine, we-dule anga sogded: ‘Daniel, mer be dobgue. Gebe-iba-onodedgi be ibmar-egichisad Bab-Dummad be-itosad, deunni na be sogsagusgu, an we-ibmar magar-itogedseye, degi, Bab-Dummad-asabin an na san-bipii imakoye. A-ibmar-bega-sogega an wese nonikid.
DAN 10:13 An bese iduar danikoenad, degi-inigwele, an geg dagegusad, ar ade, iba-durgwen-gakagwensak (21) Persia-yar-e-dule-dummad mer an bese dagega an-imaksad. An walagwen Persia-yar-e-reymar-walik besagusad. Agine baliwitur-e-dummad-bur-nuga-nikamogad, Miguelʼye-nugad an-bendaknoni gusad.
DAN 10:14 Emigindi, an bega ibmar-odulogega nonikid, be-dulemar yoedse ibagan-bergudele igi gumaloe. Ar a-ibagangi ibmar-guoed-e-negburgan bega oyolesad.’
DAN 10:15 ”Weyob anga ibmar-sognaigua, unnila an napaginbi atakgwichid, an gaya-makles gwisgusad.
DAN 10:16 Geb degine, gwensak duleyob-itoged an-gakuli ebunonikid, geb an nabir sunmakded. Dule-an-asabin-gwichidga an weyob sogded: ‘Dummad, an we-negburgan-daksad-ulale, an surbinsa-itoged, an nolloo itoged.
DAN 10:17 Degisoggu, ¿igi an bebo sunmakosunna? Ar ade, an bela-bela nolloo itoged, ar uunnila an bunnogwisbalid.’
DAN 10:18 ”We-duleyob-itoged gannar an-ebusbalid, geb gargangued anga uksad,
DAN 10:19 agi anga sogdebalid: ‘Mer be dobgue, mer be bukib-binsae. Bab-Dummad be-sabed. ¡Niga be ogannoge! ¡Gandik be imake!’ ”Anga sunmaknaigua, an niga gangumai gualid, geb an ega sogded: ‘Dummad, ar be anga niga-ogannossoggu, be anga sunmake.’
DAN 10:20 Geb anga sogded: ‘¿Be wisi, an ibiga be-dakdaniki? Ar emigindi, Persia-yar-e-dule-dummadbo bila-onogega an gannar naergebed. An a-bogwa bila-onoged-bergusale, Grecia-yar-e-dule-dummad nonikoed.
DAN 10:21 Ar we-iduale, an bega sogoed, garda-sunsoged-maidgi ibu narmakar-mai. An wemarbo urwenaidgine, unnila Miguelʼbi an-bendaked an nikad. Miguel, be-sorda-bila-onomalad-iduedid.’ ”
DAN 11:1 “Dule-anbo-sunmaknaidi, anga sogdebalid: ‘Media-e-rey-Darío birgagwengus-negdakmaigua, ani an e-nig-ogannononigusad, degi, ani an bendaknonigusbalid.’ ”
DAN 11:2 “Dule-anbo-sunmaknaidi, anga sogdebalid: ‘Emigindi, an bega ibmar-innikigwad sogoed. Persia-yargine, amba rey walapaa megnonikoed. Wemar-warbaagwad-sorbali, rey-baid megnonikoed. We-rey, bur bule reymar-idualedmarba ibmar-ibed megoed. We-rey, e-ibmar-bukidar-nikadba gargangued-nikunonikile, bela dulemar Grecia-yar-selemaidgi-aibinmalaga imakoed.
DAN 11:3 ” ’Geb-sorbali, rey-wargwen-buled megnonikoed. We-rey yeer-ganguedgi yar-senonikoed, na e-ibmar-imakbiedba ibmar-imakoed.
DAN 11:4 Degi-inigwele, na-nue-yar-semaigusale, e-yar-semaid mamaridoed, geb sogabake e-yar mimilegoed. We-rey, e-waganga e-yar-semaid obegosulid. Deginbali, e-yar-semaid Bab-Dummad e-ibe mamarnonikoed, geb dule-bamaladgala uklegoed. We-rey-iduar-negsesayobi, reymar-sorba-megnonimaloed bar gangued nikuosulid.’
DAN 11:5 ”Dule-anbo-sunmaknaidi, anga sogdebalid: ‘Dad-nakwed-argan-nuedsikid-rey gangued-nikarbaa gunonikoed. Degi-inigwele, e-sordamar-bila-onomalad-dummad-gwensak eba bur bule gangued-nika gunonikoed. We-sorda-dummad na e-yar-semaidgi gannarbaa negseoed.
DAN 11:6 ” ’Birgamar-sikwas-nasadgine, dad-nakwed-argan-nuedsikid-rey, degi, dad-nakwed-argan-sapiledsikid-rey na atonai gumaloed: ” ’We-reymar-ebogwad, neg-bogidikid-amimalagala, dad-nakwed-argan-nuedsikid-rey na e-sisgwa dad-nakwed-argan-sapiledsikid-reyga ukoed, nikuegar. Degi-inigwele, we-ibmar igarga-guosulid. Ar rey-sisgwa negseosur guoed. Deginbali, e-sui-rey undar negsemogosulid. Ar ade, rey-sisgwa, e-sui-rey, e-bardakmalad, e-machi, degi, eba-nanaimalad bela oburgwilemaloed.’
DAN 11:7 ”Dule-anbo-sunmaknaidi, anga sogdebalid: ‘A-ibagangine, dad-nakwed-argan-nuedsikid-rey-e-sisgwa-ibe, rey-e-gwenad-gwensak rey-gana sunonikoed. Geb we-dule-rey-gan-susadi, e-sordamar-bila-onomaladmala, rey-dad-nakwed-argan-sapiledsikidgi bila-onodagoed. Amar, reyneg-gandik-siidgi ubononikoed, geb bila-onogedgi obinnonimaloed.
DAN 11:8 ” ’Aginbali, e-ibe Egipto-yarse e-bab-dummagan-bormogi-sobaled, degi, e-ibmar-bamalad-orgi-sobaled, manigi-sobaled, sedbaloed. Geb birgamar-undarsaar dad-nakwed-argan-sapiledsikid-reygi bar bila-onogosulid.
DAN 11:9 ” ’A-sorbali, dad-nakwed-argan-sapiledsikid-rey, dad-nakwed-argan-nuedsikid-rey-e-yargi doged-imakoenad. Ar degi-inigwele, dad-nakwed-argan-sapiledsikid-rey gannar e-yarse nae dakledagoed.’
DAN 11:10 ”Dule-anbo-sunmaknaidi, anga sogdebalid: ‘Geb degine, dad-nakwed-argan-sapiledsikid-rey-e-masmala nue sae-itodmaloed. Geb dad-nakwed-argan-nuedsikid-reygi-bila-onodagega sordamar-bukidar onmakoed. E-machimala e-sordamar-bila-onomaladmala, dad-nakwed-argan-nuedsikid-yar-suega dagoed. Diwar-dummad-noedyobi, bela e-idu-ibmar-bukwad bibisgoed, geb reyneg-gandik-siidse bila-onononikoed.
DAN 11:11 ” ’Weyob-negguoed-ulale, dad-nakwed-argan-nuedsikid-rey bela-bela uludoed. Geb dad-nakwed-argan-sapiledsikid-reygi bila-ononaoed. Dad-nakwed-argan-sapiledsikid-rey na sordamar-bukidar-nika-inigwele, ese galakuoed.
DAN 11:12 ” ’Dad-nakwed-argan-nuedsikid-rey na nakwis-itogedbali, na san-dummarba imakdoed, geb miliba dulemar-oburgoed. Degi-inigwele, e-nakwisadi, undar-degisadegu guosulid.
DAN 11:13 Ar dad-nakwed-argan-sapiledsikid-rey gannar sordamar-bila-onomalad-bamalad onmakoed. Idualedba bur bule sordamar-bukidar omelogoed, degi, bur gingi-nuegan nikamarbaloed. Geb sikwas birgamar-nasad-sorbali, gannar dad-nakwed-argan-nuedsikid-reygi bila-onononikoed.’
DAN 11:14 ”Dule-anbo-sunmaknaidi, anga sogdebalid: ‘Daniel, a-ibagangine, dulemar-bukidar dad-nakwed-argan-nuedsikid-reygi gwisgudamaloed. Igi be negburgan-daksagusa, deyobi be-dulemar-isganamar wemar-abargi naimogoed, degi-inigwele, dad-nakwed-argan-nuedsikid-reygi obinmalosulid.
DAN 11:15 ” ’Geb degine, dad-nakwed-argan-sapiledsikid-rey nonikoed, degi, neggwebur-galu-matusulid-dikarba arsanyob napa mesoed. Geb we-neggwebur-gandikid ese sulegoed. Dad-nakwed-argan-nuedsikid-sordamar-bila-onomalad abinsamalosulid. Amba e-sordamar-buleganse-bakale, abingwisgumalosulid, ar abinsamalad, sateoed.
DAN 11:16 ” ’We-rey-neggwebur-suoed na e-itolegedba ibmar-imakoed, ar dule e-abin-imaked, sateoed. Geb yeerdakleged-yargine ambikumaloed. Degi, we-yardi bela gaoed.
DAN 11:17 ” ’Deginbali, dad-nakwed-argan-sapiledsikid-rey bela-bela gangued-nikadbali, bela-dad-nakwed-argan-nuedsikid-yar-suega danikoed. A-ulale, dad-nakwed-argan-nuedsikid-reybo igar-mesnonikoed. Dad-nakwed-argan-sapiledsikid-rey na e-sisgwa ega ukoenad, adi, dad-nakwed-argan-nuedsikid-rey-e-negsemaid-oberguegar. Degi-inigwele, dad-nakwed-argan-nuedsikid-rey-e-negsemaid oberguosulid.
DAN 11:18 ” ’Degisoggu, demar-gakaba-neggwebur-bukwamaladgi bila-ononaoed. Degi, bukidar we-neggweburmar ese sulegoed. Degi-inigwele, sordamar-bila-onomalad-e-dummad-gwensak, we-rey-na-san-dummarba-imakdiid obelononikoed. Degidbali, we-rey-bingeguega imakoed.
DAN 11:19 ” ’A-sorbali, dad-nakwed-argan-sapiledsikid-rey, e-yargi negmar-gandikid-bukwadse gannar nonikoed. Degi-inigwele, we-rey nailikguoed, agi burgwenonikoed, bar amimalosulid.
DAN 11:20 ” ’Dad-nakwed-argan-sapiledsikid-rey-sorbali, rey-baid megnonikoed. We-rey, na e-yar-semaid ibmar-bukidar-nikuegala, dule-wargwen dulemargi-mani-gaega barmidoed. Degi-inigwele, we-rey sikwas ibagan-nasad-sorbali, oburgwilenonikoed, bila-onolenaidgi burgosulid.
DAN 11:21 ” ’We-rey-sorbali, dule-isgana negsenonikoed. We-dule gwen reyga megedwilubsulinad. We-dule-isgana, dulemar-baisur-binsabukwa, ukiagwar egi nonikoed. Ibmar-nueganbi-sogedbali dule-yardakar rey-gangi signonikoed.
DAN 11:22 ” ’Diwar-dummad-noed-ibmar-bukwad-bibisgedaeyobi, we-dule-isgana, e-isdarmalad-e-sorda-bila-onomalad bela oberguoed. Deginbali, dule-dummad-ebo-igar-mesisad oburgwebaloed.
DAN 11:23 Dulemar-ebo-igar-mesmaloed ese yardaklegoed, amba ichesaar-sordamar-nika-inigwele, rey-gangi signonikoed.
DAN 11:24 ” ’We-dule-isgana, dulemar-yar-baidginmalad baisur-binsabukwa egi dognonikoed. E-ibe bur nainu-nuegan-nanaid sunonikoed. E-babgan, degi, e-dadgan-ibmar-imaksasulid imakoed: Bila-onosadgi ibmar-nuegan-susad, e-sordamar-bila-onomaladga mimioed. Neggweburmar-galu-matusur-nikamalad-suega igar-aminai guoed. Ar weyob neg-guoedi, undarsaar-gunai guosulid.
DAN 11:25 ” ’We-dule-isgana na gargangued-nika-itogedba, degi, na gandikid-nika-itogedba e-sordamar-bila-onomalad-bukidar-abargi dad-nakwed-argan-nuedsikid-reygi bila-onononikoed. Dad-nakwed-argan-nuedsikid-rey e-sordamar-bila-onomalad-bukidar-abargi gandikidba abin-imakoed. Degi-inigwele, egi nakosulid, ar yardakmaloed.
DAN 11:26 Amba eba-mas-gundimaladse-bakale, egi aibinmaloed. E-sordamar-bila-onomalad galakumaloed, bukidar burgwemaloed.
DAN 11:27 ” ’We-reymar-warbogwad, na mese-gwagwengi mas-gunbukwa gumaloed, degi-inigwele, na muchub-muchub naibi-imakedginbi binsabukwa gumaloed. Na muchub-muchub gakansabukwa gumaloed. Ar we-ibmardi ega igarga guosulid, ar ade, amba yoo ibagan-bergued omoed.
DAN 11:28 ” ’Dad-nakwed-sapiledsikid-rey ibmar-nuegan-bukidar-nika e-yarse gannar nonikoed. Geb degine, Igar-Islidikid-Maidba ibmar imakosulid. E-igar-amisadba ibmar imakoed. Geb sorbali, e-yarse gannar naoed.
DAN 11:29 ” ’Ar ibagan-megisad-mosale, dad-nakwed-argan-sapiledsikid-rey gannar dad-nakwed-argan-nuedsikid-reygi bila-onononikoed. Ar emigindi, idualeyob bar nakosulid.
DAN 11:30 Ar abin-imakega, bila-onoged-urmar-diakined-Quitim-dupginmalad abin-nodagoed, geb dad-nakwed-argan-sapiledsikid-rey we-urmar-dobgudedba sikirmakdoed. Geb Igar-Islidikid-Maid sae-dakdoed. Gannar sorsik-nadapidgi, dulemar-Igar-Islidikid-Maid-obachamaladgi nued-binsaoed.
DAN 11:31 ” ’We-rey-e-sordamar-bila-onomalad, Bab-Dummadse-goled-neg-oichonai, degi, Bab-Dummadse-goled-neggi neg-gandikidsiid-oichonai gumaloed. Deginbali, bane-bane Bab-Jehováʼga ibmar-ogumakar-uklemalad osulomarbaloed. Geb ibmar-ised Bab-Dummad-ibmar-abesulid ogwismaloed.
DAN 11:32 ” ’We-rey, nued-dulemarga-sunmakedgi, dulemar-Igar-Maidgi-annadimalad-e-binsaed gaoed. Ar dulemar e-Bab-Dummad-sabgudimaladdi, we-rey-abin ganna-gwisgumaloed, eba ibsaosurmalad.
DAN 11:33 ” ’Dule-binsaed-ibegan dulemar-bukidar odurdakmaloed. Degi-inigwele, abar es-suidgi oburgwelemaloed, abar soogi ogumaklemaloed, abar bela-ibmar-nikmalad e-ibe-atursamaloed. Abar emar-maiga-gumalaga yar-baidse seledmaloed.
DAN 11:34 ” ’Abar dule-binsaed-ibegan, balegillearmalale, e-bendakmalad onogwen guoed. Unnila ibmar-abeged-ular, dulemar-bukidar eba atononimaloed.
DAN 11:35 Abar dule-binsaed-ibegan-balegillemaloedi, we-wilubdakleged ega bur bule swilidik-imakega guoed, bur nue-inniki-nanadigumalaga guoed, adi, ibagan-bergued-mosale, swilidik gutu-sate gumalagar. A-ibagan-moegala, amba dikasur napid.’ ”
DAN 11:36 “Dule-anbo-sunmaknaidi, anga sogdebalid: ‘Dad-nakwed-argan-sapiledsikid-rey na ibmar-imakbiedba ibmar imakoed. Na dukin san-dummarbaa imakoed, bab-dummagan-birgi na dummarbaa itogoed. Bab-Dummad-napiragwadgi bela-bela isdar-sunmakdii guoed. Bab-Dummad sabsur-odurdakedsega, e-ibmar-imaked nasgumai guoed. Ar Bab-Dummad na ibmar-imakoed, imakedsegad.
DAN 11:37 ” ’Dad-nakwed-argan-sapiledsikid-rey na e-dadgan-e-bab-dummagangi binsaosulid, omegan-e-bab-dummagan-bur-nue-sabgudiidgi binsaosulid, deginbali, bab-dummagan-baigangi binsabalosulid. Ar ade, we-bab-dummaganba bur bule na san-dummarbaa imakoed.
DAN 11:38 Wemar-anale, we-rey, neg-gandikmalad-e-bab-dummad-nug odummogoed. E-dadgan, we-bab-dummad-nug odummossurmalad. We-bab-dummadga or, mani, akwa-nuegan, ibmar-mani-gargerbamalad ukoed.
DAN 11:39 ” ’Neggwebur-gandikmalad-susad-bendakegala, sordamar-bab-dummagan-baid-nug-odummodimaladse goloed. We-rey, dulemar-dummadga-maid-magar-e-dakmalad-e-nug odummogoed, dule-bukidarad-e-dummadga onugsaoed, degi, ega nainumar ukbaloed.
DAN 11:40 ” ’Ar ibagan-bergued-nonikile, dad-nakwed-argan-nuedsikid-rey, dad-nakwed-argan-sapiledsikid-reygi bila-onononikoed. Degi-inigwele, dad-nakwed-argan-sapiledsikid-rey, bila-onoged-ur-napaginedgi, moli-birgi-sii-urwemaladgi, degi, bukidar bila-onoged-ur-diakinmaladgi abin-imakoed. Dad-nakwed-argan-sapiledsikid-rey, burwa-dummad-noedyobi yarmargi ubononikoed, diwar-dummad-noedyobi negmar ese bibisgoed.
DAN 11:41 ” ’Deginbali, anmar-yar-yeerdaklegedgi ubononimogoed. Bukidar dulemar-yar-baidginmalad ese burgwemaloed. Degi-inigwele, Edom-dulemardi, Moab-dulemardi, egi wakinmaloed. Deginbali, Amón-dulemar bur bule-mergue egi wakinmaloed.
DAN 11:42 ” ’Dad-nakwed-argan-sapiledsikid-rey-e-sordamar-bila-onomalad, yarmar-baigan-bukidar sunonikoed, Egipto-yarse-bakale, egi onogosulid.
DAN 11:43 Egipto-yar-ibe ibmar-ormargi-sobaled, ibmar-manigi-sobaled, degi, bela ibmar-nuegan-nikad suoed. Deginbali, Libia-yar, degi, Etiopía-yar subaloed.
DAN 11:44 ” ’Degi-inigwele, dad-nakwed-argan-sapiledsik-neg-gunaid, degi, dad-nakwedsik-neg-gunaid gardagan-isgana ese nonikile, bela-bela dobgudoed. Geb degine, bela-bela uludedba ibmar-oberguedgi, degi, dulemar-bukidar-ogilogedgi binsadoed.
DAN 11:45 ” ’Geb e-dordoneg-dummad, bia demar-nai, degi, bia yar-yeerdakleged-islidikid-sii, amar-imbagi dordoneg soboed. Agi e-ibagan-bergued nonikoed, dule-wargwensaale gwen bendakosulid.’ ”
DAN 12:1 “Dule-anbo-sunmaknaidi, anga sogdebalid: ‘A-ibagangine, Miguel daklenonikoed. Miguel, baliwiturmar-e-dummadid, degi, be-dulemar-bendakedid. A-ibagine, nunmaked-dummad nagunonikoed. We-napneggi dulemar-ambikusad-akale, deyobi nunmaked nagudisulid. Degi-inigwele, a-ibagangine, bela be-dule-e-nugmar Gardagi-Narmakar-Nanaid bendaklemaloed.
DAN 12:2 A-ibagi, dulemar-bukidar napa-urba-mamaid gannar durgudamaloed: Abala, degisadegu-dula-gudiguega durgumaloed. Bamaladdi, degisadegu-binge-itodiguega, degi, surbinsa-itodiguega durgumaloed.
DAN 12:3 Dule-binsaed-ibegana nibneg-gaeyobi, e-nug-ogannoledii guoed. Igar-innikigwadgi dulemar-odurdakdimaladi, niisgwamar-gaeyobi, degisadegu e-nug-ogannoledii guoed.
DAN 12:4 ” ’Be, Daniel, we-gayaburba mer be emarga sogo. Garda-dummad-maid ibagan-berguedse be ediar-mesoed. Ar dule-bukidar na gatik-ibmar-wisgubiedbali, baid-baidsik neg-onodii gumaloed.’
DAN 12:5 ”Ani, Daniel, an-asabin dule-warbo-gwichi an daksabalid. Wargwena diwar-gakaba gwichid, baiddi diwar-gaka-obakaledgi gwismogad.
DAN 12:6 We-ebogwad-wargwenad, diwargi dule-linoʼmor-yoid-gwichidse egisded: ‘We-ibmar-gegerdakleged-guega, ¿bule bangu napi?’
DAN 12:7 ”Diwargi-dule-linoʼmor-yoid-gwichid nibnegse argan-onaksad, geb Dule-Degisadegu-Dula-Maid-nuggi ise-sogar imaksad: ‘Birgapaa-negabar napid. Dule-islidikidmalad-e-balegilleged-bergusadse, bela we-ibmar gunonikoed.’
DAN 12:8 ”Ani Daniel, weyob-ibmar-sogsadi an itosanad, ar degite, an magar-itossulid. Degisoggu, an ese egisdesunnad: ‘An-dummad, bela weyob ibmar-gusad-sorbali, ¿igi neg-guoe?’
DAN 12:9 ”Dummad-linoʼmor-yoid an-abin-imaksad: ‘Daniel, mer be bukib-binsae, igi be emisgwa-gudii, na deyob be gudii sae. Ar bela we-ibmarmar dule wisguosulid, ibagan-berguedse dukuar megoed.
DAN 12:10 We-ibmar-soglesadgi dule-bukidar wilemaloed. A-sorbali, bur swilidik gunonimaloed, bur islidik gunonimaloed, degi, bur dule-nued gunonimaloed. Dule-isganamardi, amba na e-ibmar-isgana-imakdii gumaloed. Dule-isganamala, we-neg-gunaid magar dakmalosulid. Ar dule-binsaed-ibegandi, bela magar negdakmaloed.
DAN 12:11 ” ’Bane-bane-ibmar-ogumakar-ukleged osulolenonikid-iba-akale, geb Bab-Dummadse-goled-neggi ibmar-ised Bab-Dummad-ibmar-abesulid-ogwismaloedse, ibagan miligwen dulataled-ilabo gaka dulabake-gakambe (1,290) naguoed.
DAN 12:12 Dule bensuli iba-miligwen dulataled-ilapaa gaka durgwen-gakambe-gakatar (1,335) edarbedigusadgi, ise-nued binsalesad.
DAN 12:13 ” ’Bedi, Daniel, mer be galakuo. Be-ibagan-berguedse be dobsuligudii imako. Ar ibmar-bega-sabolemaid-abingaegala, bedi ibagan-bergunonikile, gannar burgwarmalad-abargi be gwisgunonikoed.’ ”
HOS 1:1 Deunni, Judá-dulemar-e-reymar Uzías, Jotam, Acaz, degi, Ezequías, negsemamaigusad-ibagangine, degi, Israel-dulemar-e-rey Joás-machi-Jeroboam neg-semaigusmogad-ibagangine, Bab-Jehová weyob Beeri-machi-Oseasʼga sunmaknonikid.
HOS 1:2 Gebedgi, Bab-Jehová weyob Oseasʼga sunmaksad. Weyob ega sogsad: “Be nao, ome-gambasaed be nikuna, ebo be anagan-nikuo. Ar Israel-dulemar bela nue-isgusbukwad, ar bela angi bangudmalad.”
HOS 1:3 Degine, geb Oseas Bab-Dummad-sogedba imaksad. Agi, Oseas Diblaim-e-sisgwa Gomerʼye-nugad nikunonikid. Degiidbali, Gomer gurgin-nika gunonikid, geb ega susugwa uklenonikid.
HOS 1:4 Geb degine, Bab-Jehová Oseasʼga sogded: “We-susugwa Jezreelʼye be onug-imako. Ar ade, emisgwasaale, an Jehú-e-gwenadgan sabsur-wiogoed. Ar Jehúʼde Jezreel-nebagi dulemar-ogilos gusad. Deyob an Israel-yar-selemaid ilagwen-obelogar imakoed.
HOS 1:5 We-ibagangine, Jezreel-nebagi Israel-dulemar-e-bila-onomalad-e-gargangued an obelogoed.”
HOS 1:6 Geb ibagan-nasadgi, Gomer gurgin-nika gunonibalid, geb ega bunolo uklenonikid. Degine, geb Bab-Jehová Oseasʼga sogded: “We-goe Lo-Ruhamaʼye be onugsao. A-sogleged, ‘wiledaklegarsulidye.’ Ar ade, bar an Israel-dulemar wiledakosulid, ar e-isgusmalad an ega eliosulid.
HOS 1:7 Unnila Judá-dulemarginbi an ise-wile binsaoed, a-dulemardi an bendakoed. Bila-onogedgi Judá-dulemar-bendakegala, warsi an abesulid, es-suid an abesurbalid, molimar an abesurbalid, dule-moligi-sii-urwemalad an abesurbalid. Ar anbi walagwen unni gued. Ar ani an e-Bab-Dummad gued, ani an bendakoed.”
HOS 1:8 Lo-Ruhama mam-iargusgu, Gomer, gannar gurgin-nika gunonibalid, geb gannar ega susugwa-uklenonikid.
HOS 1:9 Agine, Bab-Jehová Oseasʼga sogded: “Lo-Ammiʼye be onug-imako. A-sogleged, ‘an-dulamarsulidye.’ Ar bemar bar an-dulasurmalad, degine, bar an be-Bab-Dummadsurmogad.
HOS 1:10 ”Ar ibagwengine, Israel-dulemar ukub-merguedyob dule-bukib-gunonimaloed. Dogdar-merguedba geg wilubsalege, geg ebislege gunonimaloed. Bia e-annik soglesa, ‘an-neggwebursulidye,’ agine, ‘Bab-Dummad-Dula-Maid-e-mimmiganye’ bilenonikoed.
HOS 1:11 Judá-dulemar, Israel-dulemarbo ambikunonimaloed, agi, e-iduedga dule-gwensak onugsanonimaloed. Gannar dule-soggwennayob e-yargi ambikudmaloed. Ar Jezreelʼga iba-dummad nagunonikoed.”
HOS 2:1 Bab-Jehová soged: “Agine be-gwenadganse, ‘Bab-Dummad-dulamarye’ be gormaloed. Be-bunmarsedi, ‘Wiledaklegarmaladye’ be gormarbaloed.
HOS 2:2 ”Be-nan abargi-odolegega be imakmar, egi be yolemar. Ar we-ome, bar an-omesulid, bar an e-suisurmogad. Melle gambasamalad-damaladyob bar san-imake, machergan-egi-wergued obeloge.
HOS 2:3 Ar deyob imaksulile, igi-gwalulesad-ibagi aidenonigusadyobi an imakoed. Uka-swili an imakoed. Nega-dulesulidganga an imakoed. Napa-dinnaregedga an saoed, uku-uku-itogedba-burgwega an imakoed.
HOS 2:4 An e-mimmigan wile dakosulid, ade, gambasaed-mimmiganad.
HOS 2:5 E-nande, gambasaedid. Ar we-ome-mimmigan-baksadde bingedsulidaedid. Ar ade, we-ome weyob sogsad: ‘An-suiganmarba an nabie, amar anga masgunned ukdaed, amar anga gobed ukmarbalid, amar anga mor-wawaad, degi, lino-dubgi-mor-sobaled ukdamarbalid, amar anga olivo-gwallu, degine, gobed-nuegan ukdamarbalid.’
HOS 2:6 A-ulale, ani an Bab-Dummad, an e-iduar igar omuroed, e-iduar ikomar-mie-mie an saoed, adi, degidbali, bar igar amiosulid.
HOS 2:7 Ar e-suiganbina surbinsa miamakdii guoed. Gwen amisulidbali weyob sogdoed: ‘Bur an-sui-sailaginedse an gannar naoe, iduardi bur an nued gudiinad.’
HOS 2:8 Ar we-ome ani an ega masgunned-ukedye binsassulid, ani an ega vino-binigan-ukedye binsassulid, degi, olivo-gwallumar-ukedye, gwen binsassulid. Ar ani an ega manimar, olomar an ega omelosad. Degite, ¿igi-wede we-ibmarmar imaksasunna? ¡Aka Baal-bab-dummadyob-imaklemalad egi sobsad!
HOS 2:9 ”A-ulale, ibagan-omosadgi, e-annik gannar an bela an-ibmar-gwagmar-ega-uksad, an-vino-nuegan-ega-uksad an suoed. Mor-wawaad an ega yoega-uksad, degi, lino-dubgi-mor-sobarmalad an ega-uksad, bela gannar an ei sunonikoed.
HOS 2:10 E-suigan-asabinni obingegsaegala, uka-swana an ogwisguoed. We-ibmargi gwen wakinnosulid, ar guedsegad.
HOS 2:11 E-wergudiid bela an ei obelogoed: E-ibamar-onoged, e-nii-binigangi ibamar-onoged, degi, e-obunnoged-ibamar, e-itoakwaa-ibamar-onogedgi ibamar-onoged, e-ibe bela an obelogoed.
HOS 2:12 E-uva-nainumar an ei bela maada imakoed, higuera-sapimar an ei bela obelogoed. Ar ‘we-ibmar an-suigan anga uksaye’ gordiid. Sapurbi-moodo nai an imakoed, ibmar-durgan-sapurbarmalad bela e-ibmar-naid ei gunmalaga an imakoed.
HOS 2:13 An we-ome sabsur-odurdakoed, ar bab-dummadyob-imaklemaladga ina-wawagan-oburmakdii gusad. E-suiganba-naega olargan biiri yodii gusad, ordubmar ena nasikdii gusad, ar gwen angi binsassulid, agala, an sabsur-odurdakoed. Ani an Bab-Jehová-guedi we-ibmar soged.
HOS 2:14 ”Anbina-sogega an imakoed: Nega-dulesulidganba an sedoed, ega sabedgi nuekwaa an sunmakoed.
HOS 2:15 Agi, Acor-nebagi, uva-nainumar gannar an ega obiroed, sabsur-odurdakleged-neba an ega weligued-nebaga imakoed. A-nebagine igi-nuchukwa-unni angadga gusa, degi, igi-Egipto-yargi-noargusgu angadga an imaksa, deyob an gannar imakoed.”
HOS 2:16 Bab-Jehová weyob soged: “A-ibagangine, ‘an-dummadye’ be anse golosulid. ‘An-suiye’ be anse goloed.
HOS 2:17 Be-bab-dummadyob-imaklemalad-e-nug-biega bar an be-imakosulid, degi, bipisaale bar ese be gorsii guosulid.
HOS 2:18 A-ibagine, we-ibmar-durgan mer bese achamalaga an imakoed: Ibmar-durgan-sapurbarmalad, mulamar, ibmar-durgan-unimalad. Deginbali, we-yargine, warsigi-urweleged an obelobaloed, es-suidmargi-urweleged, bila-onolemaladi an obelobaloed, adi, bela na dobedsuli gabdii gumalagar.
HOS 2:19 An-omega degisadegu an be-imakoed, igar-soglemaidba an-ome-sunnadga an be-imakoed. Ar an bela-bela be-sabsoggu, deyob an be-imakoed.
HOS 2:20 An be-nikuoed, an be-dikarba noosulid. Degidbali, magar be an-daknonikoed, ani an Bab-Jehová gue.”
HOS 2:21 Bab-Jehová soged: “A-ibagine, mogirmar dii-wiega an imakoed, geb abali, napaneg ibmar-gwag-oniega an imakoed.
HOS 2:22 Degidbali, trigoʼmar ainidagoed, vino-binid bukidar ainidagoed, olivo-gwallumar obinebakaoed. Bela we-ibmarmala, an Jezreel-neba-onasguega imakoed.
HOS 2:23 An-dulamarga napaneg an uknonikoed, angadgarbi an-dulamar an imakoed. ‘Wiledaklegarsurmaladi’ an wiledaknonikoed. ‘An-dulasurmaladse, an-dulamarye,’ an gornonikoed ‘An-Bab-Dummadye,’ anse gormarmogoed.”
HOS 3:1 Bab-Jehová gannar anga sogdebalid: “Be nae, we-ome-negsichigi-galagwensuli-nanaedse be monae, ar ade, dule-baid-e-ai-nuedga gudiid. Igi an Israel-dulemar-sabe, deyob be sabguo. Ar Israel-dulemar amba bab-dummadyob-imaklemaladba nanamar-inigwele, degi, uva-madu-olo bab-dummadyob-imaklemaladga-uklemalad gundimar-inigwele, amba an wile daked.”
HOS 3:2 Degisoggu, mani-sibugan-gwaambe-gakatar (15) an-ome-e-ai-nuedga-gudiid an bennuksad, degi, orosgisaar-dakleged-cebadaʼye-nugad galón-gwadulabake-gakabo (82) an ega uksabalid.
HOS 3:3 Geb an-omega an sogsad: “Be anbo iba-undar-nanadii guo. Galagwensuli bar be nanaosur. Bar bipisaale be machered-baidbo negsichigi nanaosur. ¡Anbela an ome-baidse achaosulid!”
HOS 3:4 Ar Israel-dulemar undar reysuli, degi, dule-negseedsuli gudii gumaloed. Degine, bar ibmar-ogumakar-ukleged-ailagi ibmar-ukdii guosurmalad, degi, dule-irwa-Bab-Dummadse-goled-mor-yoi guosurmalad, degine, ibmar-wagar-wilubganmar-sedii guosurmarbalid.
HOS 3:5 Geb sorbali, Israel-dulemar gannar na e-Bab-Dummad-Jehová amidmaloed, degi, e-rey-David amidmaloed. Ibagan-bergued-mosale, Bab-Jehová-dobekwaa gunonimaloed, degi, Bab-Dummad-e-nued-binsaed-egisnai gunonimaloed.
HOS 4:1 Israel-dulemar, Bab-Jehová-gayaburba be nue itomar, Bab-Jehová dulamar-bukwadga igar-nabogesokalid. Bab-Dummad weyob soged: “Ar an-dulamar-abargine, dule-innikidaed bergusad, emar-sabgued bergusbalid, an-igar-amimalad bergusbalid.
HOS 4:2 Aka bur we-ibmarmar burgusad: Gakangi yamo-ise-sogar-sogleged, gakansaed, atursaed, negsichigi-abirgunagwarsuli-nanaed, dule-gindakmalad. ¡Dulemar gindaklemamaigus nanaed!
HOS 4:3 A-ulale, yar-naidgi wile-itoleged-dummad nagunonikoed, egi-dulemar-gudidiidi niga-galakudmaloed. Sapurgi ibmar-durgan-bukwamaladi, bela burgwidmaloed, nuumala, uamarse-bakale, bela girgudoed.
HOS 4:4 ”Melle bemar dule-bamaladgi na be gwisgumalo, melle be dule-bamaladse urwemarbalo. An-urwenaidi, unnila dule-irwa-anse-goledgi an urwenaid.
HOS 4:5 Ar bemala ibginedbali, degi, mutikidbali, oitolenonimaloed. Bemarbali dule-an-gayaburba-barsoged ibitononimarmogoed. ¡Be-nan an be-ibe obelogoed!
HOS 4:6 Ar an-dulamar aku an-daksamaladbali bela burgwismalad. ”Ar be aku an-daksamarsoggu, dule-irwa-anse-goled-igargi an be-obanmarmosunnad. Ar be an-igar-mamaid be obachasoggua, be-wagan-danimaloed an iemosunnoed.
HOS 4:7 Ar dule-irwa-anse-gormalad-mergudedbali, aka bur bule angi yoled-nanaed. Degisoggu, an e-nug-odummoged-anar, anse wilemaloed.
HOS 4:8 An-neggwebur-e-isguedgi mas gundimalad, aga bur gatik an-neggwebur-isgued abemalad.
HOS 4:9 Degi-inigwele, dule-irwa-anse-gormalad sabsur-anse odurdaklemaloed, degine, dulamar e-damaladba sabsur-anse odurdaklebaloed.
HOS 4:10 ”Bab-Jehováʼgi bangusmalad. Agala, aisaar mas-gunmalo-inigwele, gwen immelegosurmalad. Degine, negsichigi-galagwensur-nanamalo-inigwele, gwen dula-omelogosurmalad.
HOS 4:11 ”Vinoʼgi mumgudimaladbali, gambasamaladbali, oes gudidimalad, bar itodisurmalad.
HOS 4:12 An-neggwebur-dulamar suar-nuchuse idakmalad, a-suar ega ibmar sogdaed. Galagwensur-negsichigi-nanamaladbali aku-neg-itoge gudmalad. Negsichigi-galagwensur angi-yolegar nanadimalad.
HOS 4:13 Yar-birigangine, yar-mullugangine, sapimar-urba e-bab-dummaganga ina-wawad oburmakdamalad, degi, ibmar-ogumakar ukdamarbalid. A-ulale, e-bunamala, galagwensuli negsichigi-nanaddamalad, degi, e-balamar abirgunagwarsuli negsichigi yoleddamalad.
HOS 4:14 Be-bunamala galagwensuli negsichigi-nanadimalad-ular, be-balamar abirgunagwarsuli negsichigi-yoledimalad-ular, an sabsur-odurdakosulid. Ar ade, e-suimarmoga gambasamaladba nanadimarmogad, degi, bab-dummagan-neggi-gambasamaladbo ibmar-ogumakar ukmarbalid. Degisoggu, neggwebur aku-neg-itogedbali, bela bergudoed.
HOS 4:15 ”Ar Israel-dulemar galagwensuli negsichidgi nanadimalad, Judá-dulemar, bemardi mer be deyob damarmogad. ”Judá-dulemar, melle Gilgalʼye-neg-nugadse be namalo, melle be Bet-Avénʼye-negye-nugadse be namalo. Melle be ‘Bab-Jehová-nuggi’ ise-sogar-imakmalo.
HOS 4:16 Ar Israel-dulemar moli-bebe-nikad-bunolo-uayasulidyob guded. Degisoggu, ar igi sibad-wawaad-sapingana nainu-olloledgi gagangi omalenaidae, ¿ar Bab-Jehová, deyob Israel-dulemar-imakoe? Bar deyob imakosulid.
HOS 4:17 Efraín-dulemar bab-dummadyob-imaklemaladgi alakwaa seledimalad. Mer ese bar gormar, ar na deyob nanabimarye soged.
HOS 4:18 Ar Efraín-dulemar sisa-gobed ei bergudele, gambasaedgine burguddamalad. Ar e-dummagan-yar-semaladbela, igar-isgana-imakedbina sogdamalad,
HOS 4:19 A-ulale, e-bab-dummaganga ibmar-ogumakar-ukmalad-ular, bingegunanai gudmaloed, burwa-ooregedbali bela bergumaloed.”
HOS 5:1 “¡Dule-irwa-anse-gormalad, nue be an-itomalo! ¡Israel-e-dulemar, nue be bogi an-itomalo! ¡Reyneg-yaginmalad, nue be an-itomalo! ¡An bemargi yolesokalid! Bemar Mizpaʼye-neg-nugadgi an-neggwebur-yardaklegega imaksamalad, Bemar Tabor-yalagi an-dulamar-yardaklegega imaksamarbalid.
HOS 5:2 Bemar Sitim-nebagi dia-yaa-matusulidyobi an-neggweburga gusmalad. A-ulale, an sabsur-bemar-odurdakoed.
HOS 5:3 An wisid, Efraín-dulemar igi-damala, an Israel-dulemar-daed ise-wisimakarbalid. Emide, Efraín-dulemar galagwensuli-negsichigi nanadmalad. Israel-dulemar bela isgudmalad.
HOS 5:4 ”Na ibmar-isgana-imakmaladbali, geg anse gannar-dagega gumalad. Ar galagwensuli negsichigi-nanaedi, an-geg-magar-dake e-imaked.
HOS 5:5 Israel-dulemar na e-san-dummarba-imakdimaladi, na dukin-egi-yolegega imakoed. Ar Israel-dulemar, Efraín-dulemar, na e-isguedgine dukin yolemaloed. Judá-dulemarse-bela deyob eba gumarmogoed.
HOS 5:6 E-sibad-wawaadyalaba, e-molimaryalaba, an-amidii gumaloenad, degi-inigwele, gwen an-amiosurmalad. ¡Ar an e-idu bangudoed!
HOS 5:7 Ar angi bela dodosmalad. Bab-baigangad mimmi nikusmalad. Degisoggu, bemala, be-nainumala, niigwengi ilagwen-berguar guoed.” Bab-Jehová soged:
HOS 5:8 “Gabaa-neggweburgi moli-bebe-gar be ogormar, Ramá-neggweburgi gar-trompeta be ogormar. Bet-Avén-neggweburgi binnasuli be bila-onogedgi-gormakedyobi be gormakmar: ‘Benjamín-neggwebur, nue-salakar.’
HOS 5:9 Israel-dulemar, innikii an bemarga soged, ibmar-guoedi an oyogoed. Ar Efraín-neggwebur sabsur-odurdakleged-ibagi bela olloo melledoed.
HOS 5:10 Judá-dulemar-e-dummagana, dule-nainu-odogedyob gued. Degisoggu, an-urwedi, dii-dummad-noedyobi an emargi onogoed.
HOS 5:11 Efraín-dulemar mesagwar imakledisunnad, e-igar-nabolemaladgi egi gwisguledisunnad, ar ade, bab-dummadyob-imaklemaladba bur nanaed abemalad.
HOS 5:12 Degisoggu, an Efraín-dulemarga samuyob an guoed. Deginbali, Judá-dulemarga sibebyob an guoed.
HOS 5:13 ”Efraín-neggwebur, na e-boni-nika dakargua, Judá-neggwebur, e-boni-yaamar dakarmogua, Asiria-yalase abarmakdemaloenad, Asiria-e-reyse bendakleged aminamaloenad. Degi-inigwele, Asiria-e-rey gwen e-bendakosulid, degi, gwen Judá-neggweburga boni-yaamar nudakosurbalid.
HOS 5:14 An Efraín-neggweburgala, achumigur-nono-wawaadyobi an guoed, Judá-neggweburgala, achumigur-nono-wawaad-senigwadyobi an guoed. An-sunnagwad an gaoed, geb an saga-saga imakoed, dule-wargwensaale, gwen bendaknonikosulid.
HOS 5:15 Agine geb an gannar an-maidse nonikoed. Na magar e-isgusad-itononimaladse an indakoed. Na magar e-isgusad-itononimalale, degine, angi-yolesmalad na magar-itononimalale, suli-suli itodmaloed. Degidbali, geb bela-belad an-amidii gumaloed.”
HOS 6:1 Israel-dulemar sogdemalad: “Dagmar, gannar anmar Bab-Jehováʼse namalo. Bab-Dummad an-ichimaksa-inigwele, amba anmar-nudakoed. Anmar-onaglik-imaksad-inigwele, anmar-nudakoed.
HOS 6:2 Ibabogwad-sorbali, anmarga burba-dulad ukoed, ibapaagine, gannar anmar-ogwisguoed. Geb, anmar e-asabin deyob gudii gumaloed.
HOS 6:3 Anmar magar Bab-Jehová-dakmarsun, e-Igarmar-Mamaidi anmar durdakmarsun. Igi dad-ibeler-noedyobi, Bab-Dummad anmarse magar-guoed, dii-wiedyobi anmarse nonikoed. Igi gebe-dii-argwaned napa-nudakdae, deyobi anmarse nonikoed.”
HOS 6:4 Bab-Jehová sogded: “Efraín-dulemar, ¿igi-an bemar-saergebe? Judá-dulemar, ¿igi-an bemar-imakergebe? Ar bemar-an-sabed, mogir bolegoedba-ainakwialir-berguddaedyob guddaed, boo wakudaryalaba-ainakwialir-berguddaedyob guddabalid, deyobi, be-an-sabgued berguddaed.
HOS 6:5 A-ulale, an-gayaburba-barsogmaladbali, an bemar-wiosad. An-sunmakedgine an bemar-onaglik-imaksad. An-igar-naboged mar-aidegeyob bemar-oitononikoed.
HOS 6:6 Ibmar-uklemalad an abemaisulid, bur an-sabgued an bemar-abemaid. Ibmar-ogumakar-uklemalad an abemaisulid, unnila dulemar magar-an-dake-gumalad an abemaid.
HOS 6:7 Bemar Adánʼyobi gumalad: Bemar, anbo-igar-mesisad bichismalad. Ar bemar, angi aibichamalad.
HOS 6:8 Galaad-neggwebur dulemar-ibmar-isgana-imakmalad-neggweburad. E-dule-ibmar-imakmaladi, bela ber ablis-eogedbi gudinanaed.
HOS 6:9 Dule-irwa-anse-gormaladi, Siquem-neggwebursik igar-nalemaidbali, emar-atursaega danagwen bin itos-bukwadamalad. Igi dule-ibmar-atursamalad, yogasaar ibmar-isgana-imakmala, deyobi, dule-irwa-anse-gormalad ibmar-isgana imakdamalad.
HOS 6:10 Israel-yala-naidgi, ibmar-gwen-nabirsulid an daksad: A-yalagine, Efraín-dulemar galagwensuli negsichigi-nanabukmalad, Israel-dulemar bela isgus bukmalad.
HOS 6:11 ”Judá-dulemar, be-isgued-nukad, bemar sabsur-odurdakleged abdakdiid.”
HOS 7:1 Bab-Jehová sogdebalid: “An-dulamar an na bendakbienad, an Israel-yar nudakbienad, degi-inigwele, Efraín-dulemar-isgued wilub-obichad, degi, Samaria-dulemar-isgued wilub-obichabalid. Ar ade, wemar gakangi gudimalad. Ar dule-atursaedyobi ibmar-atursaegala, negyaba dogmalad, gandikidgi danagwen galimbaba ibmar-atursaddamalad.
HOS 7:2 Ar we-dulemar, gwen binsadasurmalad, na e-ibmar-isgana-imakmalad angi gwen yoggumaisurye. Ar e-ibmar-isgana-imakmaladi, bela na egi e-ebiris naid. We-ibmar, bela an-asabin oyolenaid.
HOS 7:3 ”E-ibmar-isgana-imakmaladgi, e-rey-yeer-itogega imakmalad. Degi, e-gakansamaladgi, e-dummagan-yeer-itogega imakmarbalid.
HOS 7:4 Bela we-dulemar, negsichigi abirgunagwarsuli yoledimaladid. Ar we-dulemar madu-yoed-soo ginnitibisiiyob gumalad, ar igi dule-madu-sobed bar soo-ogannoged abesurdae, unnila madu-mued edarbesidae, deyobi we-dulemar gumalad.
HOS 7:5 Rey-ibagi, dummagan, vinoʼgi mumguddamalad. Rey, galagwensuli guddamogad. Deyobi, rey, dule-galagwensuli-mumgumalad e-aimarye na sognagusdaed.
HOS 7:6 Urwed-onogega, e-gwage madu-yoed-diopisur-naddaedyob naddaed. Mutikgusale, e-urwed geb boggusiid. Neg-oibosale, e-urwed gannar egi noardaed.
HOS 7:7 We-dulemar, madu-yoed-soo-diopisulidyobi gumalad. E-dummagan-negsemamaid-obeloddamalad. Bela deyobi e-reymar-obelosdamalad. Degite, wemar-wargwensaale, an-amiega gwen anse gorsurmalad.
HOS 7:8 ”Efraín-dulemar neggwebur-baigan-angi-bengudimaladba apuruded. Ar an-dulamar, madu wagar-nailik-akwigusadyobi gumalad.
HOS 7:9 Dule-baigan Israel-dulemar-e-gangued ei obelonanaid, degite, Israel-dulemar, deyob-neg-gunaid akusunna itomalad. Bela e-ibe e-gargangued obelosmalad, degite, amba aku itomalad.
HOS 7:10 Israel-dulemar e-isguedga gwen wile-itobisurmalad, an e-Bab-Dummad-guedgi, gwen an-amibisurmalad. Na e-san-dummarba-imaked geg anse-dagega e-imaked.
HOS 7:11 ”Efraín-dulemar nuu-aku-neg-itogedyob gumalad, gwen magar neg-itosurmalad. Imbagwenale, Egipto-dulemarse bendakleged egisdedaed, imbagwenar, Asiria-dulemarse bendakleged egisdedabalid.
HOS 7:12 Ar deyob bendakleged-egisnadmalale, nuumar-galegeyobi an egi saki obatoed. E-isgued-ular, an ilagugle (7) sabsur odurdakoed.
HOS 7:13 ¡Duledar-wilesmarsun! Ar angi bangusmalad. Angi gwisgusmaladba bergumarsunnoed. Ar sunna an na bendakenad, degi-inigwele, ar emardi unnila anga gakansaar sunmakmalad.
HOS 7:14 Anse innikigwadgi gorsurmalad, unnila, e-gasgi bomamaidamalad. Ibmar-gwag-nikuegala, vino-binid-nikuegala, na dukin esgi san-wionanaidamarbalid. Degi, angi aibitedamarbalid.
HOS 7:15 Amba an-igargi an odurdaksad-inigwele, amba an ega e-surgan-ogannosad-inigwele, degite, amba angi-aibinega angi ichakwa-binsananaid.
HOS 7:16 Gwen anse Bab-Dummad-Bur-Biriginedse dagbisurmalad. Warsi-biir-daklegedyob gumalad. E-dummagan sabsur-sunmakmaladbali, es-suidgi oburgwilenai gumaloed, degine, Egipto-dulemar egi dodonanai gumarbaloed.”
HOS 8:1 Bab-Jehová sogdebalid: “¡Gar-trompeta be ogole! Ar sulubagi anse-goled-neggi sigdanikid. Ar Israel-dulemar, anbo-igar-mesisad obelosmalad, an-Igar-Maidgi yolesmalad.
HOS 8:2 Emide, anse wiledanimalad. Weyob sogmalad: ‘Israel-Bab-Dummadye, be anmar-Bab-Dummadid, anmar wisye.’
HOS 8:3 Degi-inigwele, Israel-dulemar igar-nued obachamalad, a-ulale, e-isdarmalad e-baleginmaloed.
HOS 8:4 An-sogedbarsuli reymar-omesdimalad. Yogasaar dulemar-an-akudaked dummaganga nug-imakdimalad. Na dukin san-wiomalaga e-manimargine, e-ormargine, bab-dummadyob-imaklemalad sobdimalad.
HOS 8:5 ¡Samaria-dulemar! Moli-bebe-nikad-sapingwagwad bab-dummadyob be sedimalad be metemala. An bemargi an nue-urwed. ¿Ar sana bemar san-swilidiksuli-gudii gumaloe?
HOS 8:6 ¡Israel-dulemar! We-moli-bebe-nikad-sapingwagwad Bab-Dummadsulid. Ar wede, dule-sobedid. Samaria-dulemar-e-moli-sobaled, an bela bibisgoed.
HOS 8:7 ”Ibmar-isgana be imaksamalad, degisoggu, boni-dummad begi aibinnonikoed. Trigo-e-war san sated, degisoggu, madubur nikuosulid. Ar trigo-e-war wis e-san-nikunonikile, dule-bamalad-e-masga guoed.
HOS 8:8 Israel-yar bela ibitosad, emi-ibagi, dulemar-yar-baid-baidgi-bukwamalad-abargi bai daklesulid.
HOS 8:9 Israel-dulemar aka Asiria-dulemarse bendakleged egichisgusmalad. Moli-sapur-uayasuid-aku-neg-itogedyob angi bangudmalad. Efraín-dulemar, igi-ome mani-amiega sui-bamaladbo mege, deyobi gudmalad.
HOS 8:10 Efraín, bendaked-amiega, we-neggwebur-bamalad-manigi-bennus-inigwele, gwen ega igarga guosulid. Anse neggwebur-bamalad-dikasuli-bukwadse gales barmiledmaloed. Rey-buledsega, dummagansega sikwas sabsur-odurdakledii gumargweloed.
HOS 8:11 ”Efraín-dulemar, na be-isgued-eliegala, bemar bab-dummadyob-imaklemaladga ibmar-ogumakar-ukleged-aila-bukidar sobsamalad. Ar wede, unnila isgued-ailaga be obinnismalad.
HOS 8:12 Ar sunna an bemarga igar-nuegan-narmakar bukidar uksaled, degi-inigwele, ar bemar an-igar gwen bai daksasurmalaled.
HOS 8:13 Be anga ibmar-ogumakar-uked yeer-itodamalad, be a-san gundamarbalid. Degi-inigwele, ulubgi-napiragwadgi-imaksulidba we-ibmar-imakleged, an gwen nabir daksulid. Degisoggu, bemar-isgued an iegosulid, an sabsur-bemar-odurdakedsemalad. Gannar bemar Egipto-yarse namaloed.
HOS 8:14 Israel-dulemar, ani an bemar-obinyedid, degite, bemar an-iedmalad. Nega-dummagan-yeerdaklemalad be sobdemalad. Judá-dulemar, neggwebur-galu-matusurmalad omelodmalad. Degi-inigwele, bela bergumalaga, e-neggweburmargi, e-galu-matusurmaladgi, soo an odegoed.”
HOS 9:1 Oseas, Israel-dulemarga sogded: “Israel-dulemar, mer be weligwar-itomar, mer be neggwebur-baiganyob iba-onomar. Ar bemar galagwensuli nanadmalad. Be-Bab-Dummadgi be bangudmalad, bab-dummad-baigan-nug be odummodmalad. Bela ibmar-gwag-omukuleged-neggi gambasaed-e-mani-bennukleged bur be abeged.
HOS 9:2 A-ulale, ibmar-gwagmar, uvaʼmar gwen be-oimmogosurmalad. Vino-binid bar yeer-goblege guosulid.
HOS 9:3 Efraín-dulemar Bab-Jehová-yargi bar ambikuosurmalad, gannar Egipto-yarse-namaloed. Asiria-yargi mas-isemalad gunmaloed.
HOS 9:4 Bab-Jehováʼga bar vino-eoleged ukosurmalad, e-ibmar-Bab-Dummadga-ukmalad, bar ega ibnuedga guosulid. Madu-gullegoedi dulemarga madu-dule-burgwaled-neggi-gullegedyob ega guoed. Dule a-madu-guchale, swilidiksuli guoed. Unnila sikwas nabir-itogega ega guoed. Degi-inigwele, we-madu, Bab-Jehová-negse seledosulid.
HOS 9:5 ”Bab-Dummadga-iba-onolegedgi ¿ibu-be imakmaloe? Bab-Dummadga-itoakwaa iba-onolegedgi, ¿ibu-be imakmarbaloe?
HOS 9:6 Amba sabsur-odurdaklegedgi be wakinye sogmalale, Egipto-dulemarse be galemaloed, degi, Menfis-neggweburgi be-digmaloed. Be-ibmar-nuegan-manigi-sobarmaladgi, dakemar ammurudoed, be-dordonegmargi ikomar ammurudoed.
HOS 9:7 Sabsur-odurdakleged-iba noni, buged-imakleged-iba noni. Israel-dulemar, ¡be wisigarmar! Be-isgued dogdargusad, isdar-emar-dakedi be baligannosad. Emide bemar, Bab-Dummad-gayaburba-barsoged dule-gegegwaga imakmalad. Deginbali, nia-saedga be Dule-Bab-Dummad-burbaba-ibmar-soged imakmalad.
HOS 9:8 Bab-Dummad-gayaburba-barsogedi, Bab-Dummadmala, Efraín-neggweburga nakulegedga gumalad. Wemar-yolemalagala, bemardi sakiyob e-idu galumar-urbedamalad, deginbali, Bab-Dummadse-goled-neggi bemardi wemar-sae-dakdamarbalid.
HOS 9:9 Bemar Gabaaʼgi-dulemar-gusmaladyobi, nue bela-belad be isgudmalad. Ar Bab-Dummadi, be-isgued iegosulid, be-isguedba sabsur-bemar-odurdakoed.”
HOS 9:10 Bab-Jehová sogded: “An Israel-dulemar-aminonigu, nega-dulesulidganba uva-san-amilegedyob an amisgusad. An gebe e-dadgan-dakargua, higuera-sapigi-e-san-dutuu-ainidanikiyob an daksad. Degi-inigwele, emar aka bab-dummadyob-imakleged-Baal-Peorʼba nanadmalad. Abali na isgudmalad, dule-isguedga gudmalad. We-bab-dummadbina sulibinsa-itode gudmalad.
HOS 9:11 Efraín-dulemar-e-ibmar-nuegan-bukidar-nikadi bar daklegosulid. Nuu-gukudeyob guoed. E-omegan bar gurgin-nika guosurmalad, bar mimmigan-nikuosulid. E-dula bar sapibeneggi-mai guosulid.
HOS 9:12 Ar amba e-mimmigan-dungumamai-dakdemalale, we-napneggi amba an ei obelogoed. An egi bangudele, ¡dummad-wilemaloed!
HOS 9:13 Efraín-yala, Tiro-yalayob-dakleged. Yala-nuedgi bukwamalad. Degi-inigwele, Efraín-dulemardi burgwed-igarba na e-mimmigan-semamaid.”
HOS 9:14 Oseas sogded: “Bab-Jehová, ega be ibmar-ukbied ukdo. Ega e-omegan mellegega be imake, e-omegan-e-nunismar be odinnoge.”
HOS 9:15 Bab-Jehová soged: “Israel-dulemala, Gilgal-neggweburgi bela isguali gudmalad. De-akale, an bemar isdar dakded. Bemar-isgued-ulale, anse-goled-neggi an bemar-onioed. Bar an bemar-sabguosulid, ar ade, bela be-dummagan uayasulidamalad.
HOS 9:16 Efraín-dulemar galakuded: Sapi-mali-dingudedyob nadmalad, sapi-bar-sanmaksurmaladyob nadmalad. Amba na mimmigan-nikudmalale, an ei oburgoed.”
HOS 9:17 Oseas Israel-dulemarga sogded: “Ar bemar, an-Bab-Dummadba ibsassurmarsoggu, Bab-Dummad bemar-obanoed. Neggwebur-baigan-abargi yarsuli be gudii gumaloed.”
HOS 10:1 Oseas sogdebalid: “Israel-dulemar uva-saila-yeer-sanmakedyob guenad, ichesuli sanmakdaenad. Ar bur bukidar-sanmakdedaed-inigwele, aka bur bab-dummadyob-imaklemaladga bukidar ailamar sobdedamalad. Ar e-yar nue-nasguddaed-inigwele, aka bur bule e-bab-dummaganga ailamar yeerdakle imakdedamalad.
HOS 10:2 Ar we-dulemar darbo-binsadamalad, agala, Bab-Dummad, e-isgumalad-ular sabsur odurdakoed. Bab-Jehová e-bab-dummagan-ailamar bela obelogoed, e-akwa-sobar-gwismalad bela ei obelobaloed.
HOS 10:3 ”Ar sunna weyob sogmalad: ‘Ar anmar Bab-Dummad-dobsuli-gudii gusye, a-ulale, anmar reysuli gudimarye. Ar anmar rey-nikana, ¿ibugi wis anmar-bendakoena?’
HOS 10:4 Ar unnila binsa sunmakdamalad, gakansaar ise-sogar ibmar-sogdamalad, binsa dulemarbo igar-omesdamalad. Agala, abin-abin-imakmalad, gagan-isgana-ainiardaedyobi noardaed.
HOS 10:5 Samaria-dulemar, Bet-Avén-yargi moli-bebe-nikad-sapingwagwad-orbiid-e-nug-odummodiidga bukib-binsanonimaloed. E-dulemar, a-ulale, na wiles itononimaloed, e-dule-irwa-ese-gormaladmoga bukib ega binsadmarmogoed, ar ade, e-ibe dikasuli yar-baidse sedmaloed.
HOS 10:6 Moli-bebe-nikad-sapingwagwad-orbiidi, Asiria-yarse rey-maniga-guega seledoed. Efraín-dulemar bingegumaloed. Israel-dulemardina, na e-bab-dummadga-ibmar-imakdimaladgi dummad-bingegunai guoed.
HOS 10:7 Samaria-dulemala, e-reybogwa obelolemaloed. Diwar-noedba suarmar-selemaidaedyobi selemai gumaloed.
HOS 10:8 Bab-dummadyob-imaklemalad-e-negmar, yarmar-birigi-bukwamaladi bela bibislegoed. Israel-dulemar egi isgudidamaladid. E-aila-matusurmaladgi gagan-ikobimalad egi ammurnai gudoed. Degisoggu, yarmarga sogdemaloed: ‘¡Be anmargi batedage!’ Yar-mulluganga sogdemaloed: ‘¡Be anmar-omursunna!’ ”
HOS 10:9 Bab-Jehová Israel-dulemarga sogded: “¡Bemar, Israel-dulemar! Gabaaʼgi-neggusad-akale, be isgudanigumalad. De-akale, bemar gwen isgued iesurmalad. A-ulale, bemar be-isguedba Gabaa-yargi bila-onolegoedgi be obelolemaloed.
HOS 10:10 An-itolegedba an bemar sabsur-odurdakoed. Bemargi-yolemalagala, neggwebur-baigan-atomalaga an imakoed. Agi bemar sogbo-ibmar-isgana-imaksadba, an sabsur-bemar-odurdakoed.
HOS 10:11 Efraín-dulemar moli-bebe-nikad-bipigwad-nuekwa-odurdaklegaledyobinad, ibmar-gwag-weed yeer-itodaenad. An ega yapa e-dukargi suar nasikgusanad. Emisgindi an, Efraín-dulemar-e-dukargi suar nasiksunnoed. Judá-dulemar napa-imuedga gudsunnoed, Jacob-wagan napa-imulesad-durwinai gudsunnoed.”
HOS 10:12 Oseas Israel-dulemarga sogded: “¡Bab-Jehová-amiega be guakwamalo! Ar bemar nainu-binidyob gumalad. Gwagegi igar-napiragwad be nasikmar, adi, egi sabgued-igar be amimaloed. Geb agine, Bab-Jehová, bemar-bendakegala, bemarbina danikoed. Ar igi dii-wiedi, napa-dinnaregedgi batenonidae, deyobi, Bab-Jehová bemar-bendaknonikoed.
HOS 10:13 Ar bemar, ibmar-isgana imaksamalad, agala, bemar boni-dummaganba galitonanaid, gakan-imaksadbali be ibitonanaid. Ar ade, bemar, be-moli-ur-bila-onomaladmargi bensulid nikusmalad, ar sorda-bila-onomaladgi be bensulid nikusmarbalid.
HOS 10:14 Emide, be-neggweburgine bila onoledoed, bela be-neg-gandikmalad bibichidoed. Igi Rey-Salmán bila-ononaidgi Bet-Arbel-neggwebur-obelosgusayob negguoed. Deunni, nangan na e-mimmiganbo sabsur-odurdaklegar burgwis nanaed. Deyob neg guoed.
HOS 10:15 Weyobi Betel-dulemar bemar-imakoed, ar bemar doggus-isgued wilub-obichaa nikad. Neg-oibononikile, Israel-e-rey yog-berguar guoed.”
HOS 11:1 Bab-Jehová Israel-dulemarga sogded: “Bipigwaunni an be-sabgusad, Egipto-yar-akale an-machise an gochagusad.
HOS 11:2 An bur bule bese gornaigusdae-inigwele, aka bur bule be angi banguddaed. Aka bur bule be bab-dummadyob-imaklemaladga ibmar-ogumakar ukdedaed. Bab-dummadyob-imaklemaladga ina-wawadikmalad be oburmakdedaed.
HOS 11:3 Ani an Efraín-dulemar nanaedgi odurdaksad, ani an argangi seali gusad. Ani an be-onudaked-gudiid-inigwele, degite, gwen deyob be an-daksasulid.
HOS 11:4 Sabedgi an be-nisad, wiledakedgi an be-sesad. Mailediidgi an be-onosad, wiledakedgi masgi an be-oguchad.
HOS 11:5 ”Egipto-yarse be naosurmalad, Asiria-dulemar bemar-dummadga guoed. Ar ade, anse bemar dagbisur-gusmarsoggua, a-nukad be deyob gumaloed.
HOS 11:6 Be-yargine bila-onoleged nagunonikoed, be-isdarmalad bela be-yawagak-bargamalad bibisgemaloed, bela be-ibmar-imakoed-igar-mamaid obelolenonikoed.
HOS 11:7 Bemar, an-neggwebur-gumaladi, angi nue-banguega be alamaknanaid. Degisoggu, amba anse gorye sogmalale, bar an bendakosulid.
HOS 11:8 ”Efraín-dulemar, ¿igi an be-iegosunna? Gege an be-ieged. Israel-dulemar, ¿igi an dule-bamaladga be-urmakosunna? Gege an be-urmaked. Ar gege an Adma-neggwebur-urmaksadyob bemar-urmaked, gege an Zeboim-neggwebur-iesayob bemar-ieged. An-ulubgine, an-gwage bemar-sabedba bipirmaksiiyob itoleged, bela an-samurmar bemar-sabedba nakwamaksiiyob itoleged.
HOS 11:9 Bar an begi urwosulid, bar an Efraín-obelogosurbalid, ar an dulemaryob gusulid. Ar an Bab-Dummad-Isligwaled gued, an-neggwebur-abargi an gudiid.
HOS 11:10 ”An achumigur-nono-wawaadyob uurmakdoed, geb bemar anba ibsadmaloed. An binnasuli-uurmakdele, be-wagan, dad-nakwed-akale, dobed-abalagi anse nonimaloed.
HOS 11:11 ”Egipto-yala-akale, nuu-emar-dobgudiiyobi, dobed-abalagi anse nonimaloed. Asiria-yala-akale, sikwi-emar-dobgudiiyobi, dobed-abalagi anse nonimaloed. Ani an e-negmargi-megmalaga imakoed. Ani an Bab-Jehová-guedi we-ibmar soged.” Bab-Jehová sogded:
HOS 11:12 “Efraín-dulemar dummad-anga gakansadimalad. Israel-dulemar gusgu an-yardakdimalad. Judá-dulemar angi aibacha gudimalad, bemar, angine dikasur-yoggus gudimalad.”
HOS 12:1 “Efraín-dulemar unnila burwa-goledba gudidimalad, dad-nakwedsik-burwa-goled-sorba gudidimalad. Aka bur bule emar-wionaigusdamalad, bane-bane gakanginbi gudimalad. Asiria-dulemarbo igar mesdidamalad, Egipto-dulemarga olivo-gwallu ukdidamarbalid.”
HOS 12:2 Oseas weyob sogded: “Bab-Jehová, Judá-dulemargi yolenonikoed, Jacob, e-ichakwadaedba sabsur-odurdaklegoed, e-ibmar-isgana-imaksadba sabsur-odurdaklegoed.
HOS 12:3 Jacob, gwaluleged-iduale, bato sapibeneggi e-ia-yamosad. Degine, bato uka-selebagwadgi, Bab-Dummadbo gala-maada nagusad.
HOS 12:4 Baliwiturbo bengusgusad, baliwiturgi obicha gusad. Jacob, ise-boale baliwiturga sognaigusad: ‘Wile be an-dakye.’ Ar Bab-Dummadi Betel-neggweburgi Jacob-abingusad, agine Jacobʼbo sunmaksad.
HOS 12:5 Jacob, Bab-Dummad-Bela-Gangued-Nikadbo sunmaksad. A-Bab-Dummadi, Bab-Jehováʼye nugad.
HOS 12:6 Israel-dulemar, ar bemardina, be-Bab-Dummadse be gannar dagergebed, sabgued be oyogergebed, igar-napiragwad be imakergebed, Bab-Dummadgi-bensuli be nanaergebbalid.”
HOS 12:7 Bab-Dummad Israel-dulemarga sogded: “Bemar Canaán-dulemar-ibmar-ukmaladyobid. Ar we-dulemar, gadi emar-yardakmalad, yamo nibir-isganagi dulemarga ibmar-wilubsadamalad.
HOS 12:8 Efraín-dulemar na san-bule-bule-sunmakmalad. Weyob sogmalad: ‘Ibiyobi an ibmar-ibedga gusa, ibmar-bukidar an nikad. Dule gwen angi isgued amiosulid, degine, an-arbadiidgi dule gwen isgued amiosurbalid.’
HOS 12:9 ”Ar bemar Egipto-yargi-bukwamalad-akale, bato ani an bemar-Bab-Dummadid. Gannar dordoneggi-megmalaga an bemar-imakoed. Igi nega-dulesulidganba an bemar-imaksagusa, deyob an bemar-imakoed.
HOS 12:10 Ani an anga-gayaburba-barsogmaladba an bemarga sunmaksad. Wemar bukidar-negburgan-dakega an imaksad. Wemarbali an burbar-sunmaklegedgi an sunmaksad.
HOS 12:11 ”Israel-dulemar-Galaad-yargi-gudimalad dule-isgumaladid. Gilgalʼye-neg-nugadse naddamalad, agi, moli-bebe-nikad oburgwedamalad, adi, e-bab-dummadyob-imaklemaladga ogumakar ukegar. Agala, e-aila-matusurmalad bela an ei bibisgoed, e-nainugi e-aila-akwamarbi-omilede an imakoed.”
HOS 12:12 Oseas weyob sogded: “Be-dad-Jacob, Aram-yarse wakite gusad, agi ome-nikuega sibad-wawaad-edarbedgi arbas gusad.
HOS 12:13 Bab-Jehováʼdi, Egipto-yargi Israel-dulemar-onogegala, degi, amar-akwebaligala, dule-e-gayaburba-barsoged ebusgusad,
HOS 12:14 Degi-inigwele, Efraín-dulemar e-Bab-Jehová-ourwega imaksamalad, Bab-Dummad-sae-itogega imaksamalad. Agala, Bab-Jehováʼdi, wemar emar-ablis-eosmalad-nukad sabsur-odurdakoed. E-isgumaladba na dukin odurdaklemaloed.”
HOS 13:1 Gebeunni, Efraín-dulemar, Israel-yargi nuga-nikarbamaladinad. Ibmar-sogdemalale, dulemar, dobee itodamalad. Emide, Efraín-dulemar, bab-dummad-Baalʼye-nugad-e-nug odummod gusmalad. A-isgued-nukad, Efraín-dulemar burgwenoni gusad.
HOS 13:2 Degi-inigwele, amba bur bule isguedgi nanabukmalad. Dulemar-ega-ibmar-sobmaladga sogdedamalad: “Be anga bab-dummagan-imaklegoyob-manibiid be sobye.” Geb a-dulemar na e-dakedba ega sobdamalad. Degi, bab-dummadyob-imaklemalad-e-wagar-uddamalad, degine, dule-ogumakar-ukleged ega ukdedamarbalid.
HOS 13:3 Agala, igi-bolegoe-boo-bate, igi-boo wakudaryalaba-milege, deyob gumaloed. Igi-gagan-dinnagana burwaba-seleddae, igi-waa soogi-ainakwider seleddae, deyob gumaloed.
HOS 13:4 Bab-Dummad Israel-dulemarga sogded: “Israel-dulemar, Egipto-yargi be bukwamargua, bato an bemar-Bab-Dummadid. An-imbagi Bab-Dummad-baid be nikuosurmalad, an-imbagi Abonoged-baid be nikuosurbalid. Unnila anbi be-Bab-Dummadga gued.
HOS 13:5 Ar ani an nega-dulesulidganba, napa-uedikidba be gudigu be-akwisad.
HOS 13:6 An bemarga masgunned uksagusad, agi bemar nue-immeles gusmalad. Degi-inigwele, ar bemardi san-dummarbaa itosgusmalad, degidbali, be an-ies gusmalad.
HOS 13:7 Degisoggu, an bemarga achumigur-nono-wawaadyob gumaloed. An bemar-idu achu-sapur-barbadyob dukumaloed.
HOS 13:8 Igi wiob-ome ei mimmigan-sulesale, uluardae, deyobi an bemargi gwichigudoed. Be-gwage-dubmar-mamaid an bei itiroed. Achumigur-nono-wawaadyobi an bemar-obelogoed. Ibdurgan-ursilimaladyob an bemar-ichimakoed.
HOS 13:9 ”Israel-dulemar, ani an bemar-obelogoed, ar bemar, be-bendakdiidgi be gwisgunanaid.
HOS 13:10 Ar bemar gordigusmalad: ‘Anga be rey-udaye, dule-negsemalad be anga udabarye.’ Degite, bemar-neggwebur-bendakega, ¿bia be-reymarde? ¿Bia dulemar-bega-negsemaladde?
HOS 13:11 An-urwedgi an bemarga rey-uksad, an-urwedgi an bemar-annik susbalid.
HOS 13:12 Efraín-dulemar-e-ibmar-isgana-imakmaladi nue-narmakar maid, bela an e-isgumalad semaid.
HOS 13:13 Israel-dulemarga gwaluleged-ibagan nonikinad, degi-inigwele, igi sikwi muu-neggi aidegega geg nuekwaa mege, deyobi be binsaedsuli gusmalad.
HOS 13:14 ”¿Degite, amba neg-uan-e-ganguedgi bemar-bendakbi be an-abede? ¿Burgwedgi an bemar-bendakode? Burgwed, ¿bia be-boni-dummadgande nadsunna? Neg-uan, ¿bia be-dule-obeloged nadsunna? Burgwed, neg-uan, be dagmar, wile bar an wemar-dakosulid.
HOS 13:15 ”Ar bemar, Efraín-dulemar, be-gwenadgan-abargi be nasgudele, ani an bemar-obelogoed. Igi-burwa-dad-nakwedsikid nega-dulesulidgansik-goledi, dianmaid, degi, diwarmaid dinnaa imake, deyobi an bemar-imakoed. Geb agi, be-isdarmalad be-ibe bela be-ibmar-nuegan sumaloed.
HOS 13:16 Samaria-dulemar, e-isgusad-nukad, an sabsur-odurdakoed, ar e-Bab-Dummadgi yolesmalad. E-dulemar bila-onogedgi burgwemaloed, e-mimmigan napagi sabsur-omukulenai gumaloed. E-omegan-gurgin-nikamalad-ibe, saban sabsur-egalenai guoed.”
HOS 14:1 Oseas Israel-dulemarga weyob sogded: “Israel-dulemar, be-Bab-Dummad-Jehováʼse be gannar dagmar. Ar bemar na be-isguedgi-argwanega na be imaksamalad.
HOS 14:2 Bab-Dummadga be ibmar-sogmaloedi, nue egi be binsamalo. Bab-Jehováʼse gannar be namar, ega be ise-wilesakwaa weyob be sogmaloed: ‘Be anmarga isgued elie, begi-isgussulidyob be anmar-dake. Wiledakedgi be anmar-abingae, ar anmar na be-nug odummobimalad.
HOS 14:3 Bab-Jehováʼye, Asiria-dulemar gwen anmar-bendakosulid, bar anmar molimar-bila-onoged-birgi nakosulid. Anmar, anmar-ibmar-sobsamaladse anmar-bab-dummaganye, bar golosulid. Bab-Jehová, unnila begine babgan-satemalad wile daklesiid.’ ”
HOS 14:4 Bab-Dummad Israel-dulemarga weyob sogded: “Ani an bemar-isgued nudakoed, wile-be-dakedba an be-sabgumaloed, ar ade, bar an bemarse urwosulid.
HOS 14:5 Boo-milegedyob an Israel-dulemarga guoed. Dutu-achunnedyob an Israel-dulemar-imakoed. Igi Líbano-urwarmar-e-sailamar neg-urba-diglegwichi, deyobi, an bemar-imakmaloed.
HOS 14:6 E-anagan nasgudoed, olivo-sapi-gandikidba-yeerdaklegwichiyob bemar guoed. E-yapannedi, Líbano-urwar-yeer-yapannedyob yapanmaloed.
HOS 14:7 An-argan-yaurgi gannar ambikunonimaloed, orosgi-dakleged-trigoʼyob dungudmaloed. Uva-dub-ainiedyob e-wagan ainidoed, Líbano-yar-e-vinoʼyobi, nug-dummarbaa gumaloed.
HOS 14:8 Efraín-dulemar, Bab-dummadyob-imaklemalad be iemarsun. Ani an bemar-abinsadiidid, ani an bemar-edarbediidid. Baryawar-aramakgwichiyob an gued, be-sanmakedi angi danikid.”
HOS 14:9 Ar dule, binsaed-ibedile, we-ibmarmar magar itogoed. Ar dule, nue-ibmar-wisile, we-ibmarmar magar itogoed. Bab-Jehová-igarmala bela innikigwadbiid. A-igarbali, dule-innikimalad nanamalad. Dule-uayasulidamaladdi, we-igargi yoleddamalad.
JOE 1:1 Bab-Jehová Petuel-machi-Joelʼga gayaburba sognonikid. Joel, Israel-dulemarga weyob sogded:
JOE 1:2 “Bemar, sapin-dummagan-gumalad, nue itomalo. Bela we-yargi-gudidimalad, nue itomalo. Ses-danagwen-gudimalad-ibmar-guchagusad-obesadi, sorba ses-dummagan-gudidimalad gunnonimalad. Geb ses-dummagan-gudidimalad-ibmar-guchagusad-obesadi, sorba ses-sapingana gunnonimarmogad. Geb ses-sapingana-ibmar-guchagusad-obesadi, sorba ses-burwigana gunnonimarmogad. Be-dadgan-ibagangi, ¿ar weyobi neg-gusa? Bemar-emi-dulagudimaladgi, ¿ar bemar weyob neg-dakdimala? Emi, be-mimmigangala, be we-ibmar sogmala, adi, be-mimmigan na e-mimmiganga sogmarmogaga, deginmoga, a-mimmigan na e-wagan-danimaloedga sogmarmogoed.
JOE 1:5 ”¡Mummugan, atakmala, be bomala! Bela-gadi-vino-gobmalad be nunmak itomala, ar ade, vino-binid bemar-annik sulesad.
JOE 1:6 Ar dule-yar-baidgi-bukmalad-gandikmalad-bukidar, an-yargine ubononikid. E-nugarmar, achumigur-nugarmaryobi nikamalad. E-nugar-suigan, achumigur-e-ome-nugaryobi nikamalad.
JOE 1:7 An-uva-dubmar-digar-naid obelosmalad. An-higuera-sapimar daas-daas-imaksad. Bela e-uka yaas-yaas-imaksamalad, e-anagan swanga imaksamalad. Bela omukusmalad.
JOE 1:8 ”An-dulemar, yagwa wile-itoged-mor-yoi na machered-abesiid-ei-burgwisadba-boedyobi, bomalad.
JOE 1:9 Bab-Jehováʼse-goled-neggi ibmar-gwag-orosgi-dakleged-ukleged bar uklesulid, degi, vinoʼmar bar uklesurbalid. Dule-irwa-Bab-Dummadse-gormalad Bab-Jehováʼga-arbamaladi, bomarmogad.
JOE 1:10 Nainumar bela swanga nanaid, e-napamar bela dinna naded. Bela ibmar-gwag-orosgi-dakleged bergusad, vinoʼmar bela dinguded, olivoʼmar bela berguded.
JOE 1:11 ”Bemar, sapurgi-arbamalad, bemar uva-dubgi-arbamalad, ibmar-gwag-trigoʼye-nugad-bela-dingusadba, ibmar-gwag-cebadaʼye-nugad-bela-dingusadba, be bomala. Ar bela ibmar-gwagmar-welesadi oitolesad.
JOE 1:12 Uva-dubmar bela dinguded, sapi-higueraʼye-nugad, bela burgwided. Sapi-granadoʼye-nugad bela dingudmogad, ogobgi-dakleged, manzana-sapimar, dingudmalad. Bela sapimar-gwigwichid dingudmalad. Dulemar-e-yeer-itodiidse-bakale, e-ibe bergunonikid.”
JOE 1:13 Dule-irwa-Bab-Dummadse-gormalad, be wile-itomar, wile-itoged-mor be yomar. Bab-Jehováʼga-ibmar-ukleged-ailagi-arbamalad, naibid-dummad be itomar. An-Bab-Dummadga-arbadimalad, be dagmala, wile-itoged-mor-yoi, be oibomar, ar ibmar-gwagmar, degi, vinoʼmar Bab-Dummadse-goled-neggi bar uklesulid.
JOE 1:14 Bela dulemarse gormala, mer-bar-mas-gulleged-iba be nasikmalo. Be-Bab-Dummad-Jehováʼse-goled-neggi, girmar-dummagan be onmakmala, bela dulemar-we-yargi-gudidimalad be onmakmala, agi Bab-Jehováʼse ise-gollar imakmala.
JOE 1:15 ¡Iba-buledi danikid! ¡Bab-Jehová-e-iba bato warmakdanikid! Bab-Dummad-Bela-Gangued-Nika-Maid-e-iba, ibmar-bergued-iba guoed.
JOE 1:16 Anmar-masgulleged, ¿anmar-wagab anmar-ibe sulenai gussursi? Anmar-Bab-Dummadse-goled-neggi anmar-wergued, anmar-yeer-itoged, ¿anmar-ibe osulolessursi?
JOE 1:17 Ibmar-gwag diglesa-inigwele, degite, bela nungusad. Ibmar-saboleged-neg isgus-sii. Ibmar-gwag-saboleged-negmar bela bibichisad. Ar ibmar-gwagmar bela dingusmalad.
JOE 1:18 Ibiyobi molimar masbina gornanai. Moli-bebe-nikamalad masgunned satedbali oes gaamakdidimalad. Sibad-wawaadmar deyobi gudidimarmogad.
JOE 1:19 Bab-Jehováʼye, an bese ise-wilegar goled, ar ade, nainumargi gagan-nanaid soo ogumaksad, bela sapimar-gwigwichid ogumaksad.
JOE 1:20 Bab-Jehová, amba ibmar-durganse-bakale, bela-bela be-amimalad, ar ade, bela diwarmar-mamaidi dingusad, nainumargi gagan-nanaid soo ogumaksad.
JOE 2:1 Sión-yargine gar-trompeta ogormar, an-yar-islidikidgi neg-owisoleged-gar be ogormar. Bela dulemar-we-yargi-gudimalad wawanmakmar, ar ade, Bab-Jehová-danikid-e-iba mosad, ar bato nue-warmaksad.
JOE 2:2 A-ibagi, negasichid nagunonikoed, neg gudure sigoed. Mogirmar-gudureged nagunonikoed, neg daas sigoed. 2. BAB-JEHOVÁ-E-IBA-DANIKIDGI GANNAR SUNMAKLENAID (2:2b-11) Igi neg-oibodanikile, bela yarmargi neg-mee imakdanidae, deyobi, dule-bukidar dule-bulegana danimaloed. Epenne we-dulemaryobid dulemar gwen dakledisulid, deginbali, yoedsega dulemar-deyobid gwen daklegosurbalid.
JOE 2:3 We-dulemar sooyobi gumalad, bela ese ibmar gummaked. We-dulemar-nonikoed-iduale, soo bela ibmar-ogumaked, we-dulemar-nasad-sorbali, soo bela ibmar-obeloged. We-dulemar, amba yoo dagegua, we-yar-naidi, Edén-nainuyobi daklegenad. We-dulemar, we-yargi-nasmargua, e-sorbali, yar, nega-dulesulidganyob nagusad. E-ganguedgi ibmarmar geg wakinned.
JOE 2:4 E-gangued, moliyob gangumalad. Dulemar-moli-birgi-abarmakmaidyob abarmakmalad.
JOE 2:5 Yar-birgi ichomakdemalale, bila-onomalad-ur-napagined-gollomakedyob, oimakmalad. Igi-gagan-dinnagana soose-gummakdele, gormamaidae, deyobi gollomakmalad. Igi-bila-onomalad-bulegan, bila-onogega guagwar bukmala, deyobi gumalad.
JOE 2:6 We-dulemar-asabin bela dulemar-we-napneggi-bukmalad gwakidmalad, bela e-niga argwatemalad.
JOE 2:7 Bila-onomalad-buleganyobi urwemalad, bila-onomaladyobi galumar-birgi nakwe-nakwe imakmalad. Bela ilekwaa na e-igarba namaloed gwen igar-baid-baidsik-nadapi gumalosulid.
JOE 2:8 Na muchub-muchub-yolenanai gumalosulid, na ilemakar nadapmaloed. Sigu-egi-milemamaid-abinni, amba ilekwaa nadapi gumaloed.
JOE 2:9 We-dulemar neggweburgi sabsur ubononimaloed, galumar-matusulid-mamaid-birgi abarmakdimaloed. Negmargi nakwe-nakwe imaknonimaloed, dule-atursamaladyobi, yawagak-seniganaba dognonimaloed.
JOE 2:10 We-dulemar-bila-onomalad-abin napneg wawanmakdoed, nibneg giglimakdoed. We-dulemar-abin dada, degi, nii sichii nadoed, bela niisgwamala bar gaosulid.
JOE 2:11 Bab-Jehová, e-sordamar-idu-nadapi, maryob e-gaya-goled itogega imakoed. Bab-Jehová-e-sordamala bukidarad, e-igar-uksadba-ibsamaladi, gege ebisleged. Bab-Jehová-danikid-e-iba gwayed-dummadid, dobed-dummadid. ¿Doa abin-gwisguoe?
JOE 2:12 Bab-Jehová weyob soged: “Emigindi, bela-bela be-gwage-ulubgine be an-amimala, mas-gunsuli be gudii gumar, be bomar, degi, be naibi itomar.”
JOE 2:13 Wile-itogedbali, mer mor-esirmakedgi be binsamar. Unnila gwagegi nunmaked-dummad-itonai be gumar. Be-Bab-Dummad-Jehová be gannar amimar, ar ade, Bab-Dummad, dule-nuedid, dule-wiledakedid, Gwae-gwae urwesulid, bela-bela emar-sabgumaid, sabsur-odurdakoye-sogda-inigwele, igi-barsaye sogdedaed.
JOE 2:14 Abakale, Bab-Dummad binsaed gwakalile, igi-barsaye sokalile, deyobi, anmargi ise-nued binsaoed. Ibmar-gwag-ukleged, degi, vinoʼmar, Bab-Dummad-Jehováʼgadga guoed.
JOE 2:15 Sión-yar-birgi gar-trompeta ogormalo, dulemar-onmakega ese gormalo, masgullesulid-iba nasikmalo.
JOE 2:16 Bela dulemar-bukwad-onmakega imakmalo, bela dulemar swilidik ambikumalo. Sapin-dummagan bela onmakmalo, burwigana onmakmalo, goemarse-bakale, onmakmalo. Emisgwa-ome-nikusad e-gabedneggi nodage, emisgwa-sui-nikusad e-gabedneggi-maidgi nodamoga.
JOE 2:17 Bab-Dummad-neg-yawagak-siid, degi, ibmar-ukleged-aila-siid, amar-imbagi, dule-irwa-Babse-gormalad Bab-Jehováʼga-arbamaladi, be bomala. Weyob sognanai be gumala: “Bab-Jehováʼye, be wile be-dulamar dake. Mer be-dulamar-nug-oichogega be imake, mer dulemar-yar-baid-baidgi-bukmalad be-dulamargi dodogega be imake. Ibiga dulemar-yar-baid-baidgi-bukmalad sogmaloe: ‘¿Ar bia e-Bab-Dummad nadsunna?’ ”
JOE 2:18 Geb degine, Bab-Jehová na e-sabgued e-yarga oyosad, e-dulamar egi-isgussuliyobi daksad.
JOE 2:19 Bab-Jehová e-dulamarga weyob sogded: “An bemarga ibmar-gwag ukoed, vinoʼmar, degi, olivo-gwallu ukbaloed. Bemar we-ibmarmargi immelemaloed. Dulemar-yar-baid-baidgi-bukmalad bemargi dodomalaga bar an imakosulid.
JOE 2:20 ”Dule-dad-nakwed-argan-sapiledsik-danikid an bemargi-banguega imakoed, a-dule, dule-buksurmaladsik, dule-negasulidganba an balimetoed. E-sordamar-idu-danimalad, dad-nakwedsik-demar-naidgi, didulegega an imakoed. E-sordamar-sorba-danimaladdi, dad-argwanedsik-demar-naidgi, didulegega an imakoed. E-muimar nunguega an imakoed, sunnasuli-yapannega an imakoed.” Bab-Jehová ibmar-dummagan imakoed.
JOE 2:21 An-yargi-bukmalad mer-dobgumala, bur weligwar itomala, wergumala. Ar Bab-Jehová ibmar-dummagan imakoed.
JOE 2:22 Ibdula-sapurbarmalad, mer dobgumala, ar gaganmar aramakdagoed. Sapimar bela sanmakdagoed, sapi-higueraʼye-nugadi, degi, uva-dubmar yeer sanmakdagoed.
JOE 2:23 Sión-dulemar weligwar-itomar, be-Bab-Dummad-Jehováʼba be wergumarsun. Ar be-Bab-Jehová e-iba-sogedba bega dii owioed. Ar igi epenneunni, ibmar-digleged-idu dii owidae, degi, ibmar-gwag-weleged-idu dii owidae, deyobi bemarga dii-wied-ibagan nasikoed.
JOE 2:24 Ibmar-gwag-saboged-negmar ibmar-gwag ena sigoed. Ibmar-gwagmar-egured-negmar vino ena sigoed. Olivo-gwallu ena sigbaloed.
JOE 2:25 Bab-Jehová soged: “Ses-danagwen-gudimalad, ses-dummagan, ses-sapingana, ses-burwigan, birga-nasmaladgine bemar-ibe bela ibmar-gwag guchagusad, gannar bemar a-ibmarmar-nikuega an be-imakoed.
JOE 2:26 Bemar obinebaka, nue-immelegedse gunmaloed, geb be-Bab-Dummad-Jehová-nug be odummomaloed. Ar ani be-Bab-Dummad-Jehová, bemarga ibmar-gegerdakleged imakoed. An-dulamar bar bipisaale, bingeguosurmalad.
JOE 2:27 Geb degine, wisgumaloed, ani an Israel-dulemar-abargi gudiiye. Ani an e-Bab-Dummad-Jehová gued. Anyobid dule-baid sated. An-dulamar bar bipisaale, bingeguosurmalad.”
JOE 2:28 Bab-Jehová sogdebalid: “We-ibmar-gusad-sorbali, An-Burba bela-dulemargi an odenonikoed. Be-masmala, degi, be-bunamala, an-gayaburbagi sunmakdemaloed. Selebagusmalad gabdakdemaloed, sapingana negburgan dakdemaloed.
JOE 2:29 A-ibagangi, An-Burba, mai-machergangi, mai-omegangi, an odenonibaloed.
JOE 2:30 Ibmar-gegerdakleged nibneggine, napneggine, an oyogoed. Ablisbi neg-nagunonikoed, soo-dummad oyolegoed, degi, waa-bupurmagwichi neg gudoed.”
JOE 2:31 Bab-Jehová-e-iba-dobegwar-itoleged-danikoed-idu, e-iba-gwayed-dummad-danikoed-idu, dad-ibegwar-ganaidi negasichidga gudoed, nii-ganaidi ablisgi-oglesayobi ginnitibi daklenonikoed.
JOE 2:32 Bela dulemar e-Bab-Dummadga Bab-Jehová-imakmaladi, abonolemaloed. Ar igi Bab-Jehová sogsagusa, deyobi, Sión-yargi, Jerusalén-neggweburgi, abonoleged nikaoed. Bab-Jehová na dulemar-susagusadi, dulemar-dula-bemaloed-abargi gudii imakoed.
JOE 3:1 Bab-Jehová weyob soged: “A-iba-nonikile, Judá-yarginmalad, degi, Jerusalén-dulemar, yar-baid-baidse-gales-selesgusmaladi, an gannar e-yarse senonikoed.
JOE 3:2 Bela dulemar-yar-baid-baidgi-bukmalad an onmakoed, Josafat-Nebase-ambikuega an imakoed. Agine, an-Israel-dulamar-sabed-nukad, an we-dulemala sabsur-odurdakoed. Ar we-dulemar, an-dulamar yar-baid-baidse-oaisakiega imaksamalad, an-yar-naid mimismalad.
JOE 3:3 We-dulemar ibmargi-wilubdakar an-dulamar-mimismalad. Omegan-gamba-imaked-muchub, burwigana uksamalad. We-dulemar na mumgumalaga, vino-muchub, bunamala manigi uksamalad.
JOE 3:4 ”Sidón-neggwebur, Tiro-neggwebur, degi, bela Filistea-yarginmalad, ¿ibiga bemar angi yolenanai? ¿Ar bemar bugedmai an-imakbimala? Ar deyob be an-imakbimalale, bemar-bugedmai-an-imakbimalad, bemargi emiskwaa aibinega an imakoed.
JOE 3:5 Ar bemar an-ibe or, mani atursasmalad. Deginbali, bemar an-ibmar-nuegan be-bab-dummadgan-negse be sesmarbalid.
JOE 3:6 E-yargi-dikasur-banguega bemar Grecia-dulemarga Judá-dulemar, degi, Jerusalén-dulemar uksamalad.
JOE 3:7 ”Emigindi, bemar wisgubi an abedo, bemar doa-dulemarga Israel-dulemar-uksamala, amar a-yargi-bukwadgi an onogoed. Ar igi bemar an-dulamar-imaksamala, deyobi an bemar-imakmarmogoed.
JOE 3:8 Judá-dulemarga be-masmala, be-bunamala, an manigi ukoed. Geb Judá-dulemar, Sabá-dulemarga ukmarmogoed. We-Sabá-dulemar dikasur yar-baidgi bukmalad.” Bab-Jehová weyob sogsad:
JOE 3:9 “Dulemar-yar-baid-baidgi-bukwamaladga, be weyob sogmala: ‘Bila-onogega guakwaa ambikumala, Sordamar bila-onogega be barmide, Bela dule-bila-onomalad-bulegan urwega be guagwar bukumala.
JOE 3:10 Napa-imumaladgi es-suigan be sobmala, es-doperegwadgi eswar be sobmala.’ Dule-gegegwad soge: ‘¡An dule-gandikidye!’
JOE 3:11 Dulemar-anmar-yar-dikarba-bukwamalad, gwae be dagmala, Josafat-Nebase be ambikudamala.” Bab-Jehová, be-dule-gandikmalad be odedage.
JOE 3:12 “Dulemar-yar-baidgi-bukwamalad, be dagmala, Josafat-Nebase be dagmala. A-nebagine, dulemar-yar-baidgi-bukwamaladga igar-nabogega an signonikoed.
JOE 3:13 Orosgi-dakleged-trigo goresale, igi es-doperegwadgi weledae, ayobi, an we-dulemar-imakoed. Uva-goresale e-nis-eguregala igi birgi gwirlege, ayobi, an we-dulemar-imakoed. Igi vino e-sigedgi engusadba dikarba aryomaidae, ayobi, we-dulemar-e-isgusad doggus wilub-obichad.”
JOE 3:14 Neba-Decisiónʼye-nugadgine, dulemar-bukidara onmakdanikid. Neba-Decisiónʼye-nugadgine Bab-Jehová-e-iba warmakdanikid.
JOE 3:15 Dad-ibeler-ganaid, degi, nii-ganaid bar gaosulid. Niisgwamar bar gaosurbalid.
JOE 3:16 Bab-Jehová Sión-yar-akale, achumigur-nono-wawaadyobi binnasuli gordagoed. Jerusalén-neggwebur-akale, mar-goleyobi binnasuli sunmakdagoed. Bela napneg-naid, nibneg-naid, giglimakdoed. Ar Bab-Jehováʼdi e-dulamarga dukued-negga gunonikoed, Israel-dulemarga ganguedga gunonikoed.
JOE 3:17 Bab-Jehová e-dulamarga sogded: “Geb degine, bemar wisgunonikoed, ani an be-Bab-Dummad-Jehová, an-yar-Sión-islidikidgi an maid. Jerusalén-neggwebur islidikidga gunonikoed. Sordamar-yar-baidginmalad gandikidba bar egi ubogosurmalad.
JOE 3:18 ”A-ibagi, yarmargine, vino-osidikid aryonai gudoed, yar-seniganagine, moli-nunismar aryomai gudoed, Judá-dianmargine, diimar aryomai gudoed. Anse-goled-neggine, dii aryodagoed, we-dii, neba-Sitimʼye-nugad-ognai gudoed.
JOE 3:19 Egipto-yar-naidi, sabsur-Judá-dulemar-imaksamalad-nukad, bela ibitogoed. Edom-yar-naidi, sabsur-Judá-dulemar-imaksamalad-nukad, nega-dulesulidganga binyoed. Ar wemar, Judá-yargine dulemar-gwen-ibmar-oakalossurmalad-ibe ablis eos gusmalad.
JOE 3:20 Judá-yargi, degi, Jerusalén-neggweburgi, degisadegu dulemar bukwa gudoed.
JOE 3:21 Dulemar-ibe-ablis-eosmalad, ¿baisur an dakoe? Suli, baisur geg an daked. An buged-mai imakedsegad.” Bab-Jehová, Sión-yargi megnonikoed.
AMO 1:1 We, Amós-e-gayaburbado. Amósʼde Tecoa-neggweburginedid, sibad-wawaad-akwed-duled. Amós, Israel-yargi birgabose negabandur-noed-iduar, negburgan daksad. Deunni, Uzías, Judá-e-reyga-maid, degi, Joás-machi-Jeroboam, Israel-e-reyga maidginmogad.
AMO 1:2 Amós sogded: “Sión-yala-akale, Bab-Jehová uludagoed, Jerusalén-akale, mar-goledyob e-gayaburba gordagoed. Sibad-wawaad-nikamalad-e-nainugi gagan-ara-ara-nanaid bela bergudoed. Carmelo-yar-birigi-gagan-nanaid dingudoed.”
AMO 1:3 Bab-Jehová weyob soged: “Damasco-dorgan-e-isgued nue-wilub-obicha naid. Sabsur-e-odurdaklegoedi, an ega osulogosulid. Ar ade, Damasco-dorgan undar-beedse Galaad-dulemar-wiosad. Esgoro-nugar-nikadgi-ibmar-durwilegeyobi Galaad-imaksamalad.
AMO 1:4 Ani an Rey-Hazael-e-neg, soogi ogumakoed, Ben-Adad-e-neg-gandikmalad bela gummakoed.
AMO 1:5 Damasco-neggwebur-yawagak-esgoromar an bibisgoed, Avén-nebagi dule-bukwad an obelogoed. Bet-Edénʼgi dummaganga-mamaid an osulogoed. Siria-dulemar yogasaar-gales Kirʼye-yar-nugadse barmiledmaloed. Ani an Bab-Jehová-guedi we-ibmar soged.”
AMO 1:6 Bab-Jehová weyob soged: “Gaza-dorgan-e-isgued nue-wilub-obicha naid. Sabsur-e-odurdaklegoedi, an ega osulogosulid. Ar ade, Gaza-dorgan, bela neggweburmargi-dulemar-bukwad galesa sesmalad, geb Edom-dorganga maiga manigi uksamalad.
AMO 1:7 Ani an Gaza-neggwebur-e-galu-matusulid, soogi ogumakoed. E-neg-gandikmalad-bukwad bela gummakoed.
AMO 1:8 Asdod-dorgan-bukwamalad an osulogoed. Ascalón-neggweburgi dummagan-mamaid an obelogoed. Ecrón-neggweburgi gannar an-ganguedba an gwichigudoed, Filistea-dule-napi-ambikumaloed bela an obelomogoed. Ani an Bab-Jehová Bela-Gangued-Nikadi we-ibmar soged.”
AMO 1:9 Bab-Jehová weyob soged: “Tiro-dorgan-e-isgued nue-wilub-obicha naid. Sabsur-e-odurdaklegoedi, an ega osulogosulid. Ar ade, Tiro-dorgan, bela dulemar-gasa-sesmaladi, Edom-dorganga maiga manigi uksamalad. Na gwenatigwar-gued-igar-ebo-mesismalad iesmalad.
AMO 1:10 Ani an Tiro-galu-matusurmalad, soogi ogumakoed. E-neg-gandikmalad-bukwad bela gummakoed.”
AMO 1:11 Bab-Jehová weyob soged: “Edom-dorgan-e-isgued nue-wilub-obicha-naid. Sabsur-e-odurdaklegoedi, an ega osulogosulid. Ar ade, Edom-dorgan, e-gwenadgan-wile-daksasulid. Es-suidyalaba balegicha gusmalad. Ar na saed-itoged ulubgi bargadsurmalad, e-urwed gwen iessurmalad.
AMO 1:12 Ani an Temán-neggwebur, soogi ogumakoed, Bosra-neggwebur-e-neg-gandikmalad bela gummakoed.”
AMO 1:13 Bab-Jehová weyob soged: “Amón-dorgan-e-isgued nue-wilub-obicha naid. Sabsur-e-odurdaklegoedi, an ega osulogosulid. Ar Amón-dorgan, na e-yarmar-abingunanaid onasogega, Galaad-omegan-gurgin-nikamalad-ibe saban-maris nanaed.
AMO 1:14 Ani an Rabá-neggwebur-e-galu-matusurmalad soogi ogumakoed, e-neg-gandikmalad bela gummakoed. Bila-onolenaidgi oimaknanaidaeyob, sabsur-oimaknanai gumaloed. Burwa-dummad-uurmakmaiyob, neg-oimaknai guoed.
AMO 1:15 Amón-dorgan-e-rey gales seledoed, bela e-dummagan eba gales seledmogoed. Ani an Bab-Jehová-guedi we-ibmar soged.”
AMO 2:1 Bab-Jehová weyob soged: “Moab-dorgan-e-isgued nue-wilub-obicha-naid. Sabsur-e-odurdaklegoedi, an ega osulogosulid. Ar Moab-dulemar, Edom-e-rey-garmar ogumaksad, burubi-guedse imaksad.
AMO 2:2 Ani an Moab-yala, soogi ogumakoed, Queriot-neg-gandikmalad bela gummakoed. Moab-dulemar bilagi-oimaknanaid-abalagi berguoed, gar-trompeta-gornaid-abalagi burgoed.
AMO 2:3 E-dummad-negsemaid, e-dulemar-wagab an osulogoed. E-dummagan belagwable an eba obelogoed. Ani an Bab-Jehová-guedi we-ibmar soged.”
AMO 2:4 Bab-Jehová weyob soged: “Judá-dorgan-e-isgued nue-wilub-obicha naid. Sabsur-e-odurdaklegoedi, an ega osulogosulid. Ar Judá-dorgan, e-gakansamaladba Bab-Jehová-Igar-Maidgi aibatemalad, Bab-Jehová-Igar-Sogmaidba nanassurmalad. Bab-dummadyob-imaklemaladba nanasmalad, e-dadgan-nanasadba nanasmarmogad.
AMO 2:5 A-ulale, ani an Judá-yargi soo barmidoed, Jerusalén-e-neg-gandikmalad bela gummakoed.”
AMO 2:6 Bab-Jehová weyob soged: “Israel-dorgan-e-isgued nue-wilub-obicha naid. Sabsur-e-odurdaklegoedi, an ega osulogosulid. Ar Israel-dorgan, dule-nued manigi uksamalad, Israel-dorgan, dule-wilese-gudimalad sapat-gwagwen-muchub uksamarbalid.
AMO 2:7 Dule-wilegana sabsur-ise-wilegar imaksamalad, mesagwale imaksamalad. Wileganaga igar-maidba igar nabossurmalad. Baba, galagwensuli ome-wargwengi nanadidaed, a-omegi, e-machi galagwensuli nanadidamogad. Weyob an-nug-isligwaled oichosmalad.
AMO 2:8 Amarde, yogasaaledgi bab-dummaganga-ibmar-ukleged-ailamar-dikarba, mor-manigi-siid, na megega ebudamalad. Dule-mani-ganikid-ibe-vino-sulesadi, e-bab-dummaganse-goled-neggi gobdamalad.
AMO 2:9 ”We-dulemar-wagab, Amorreo-dulemar an obelosad, amar-ibe e-ibmar-nikumaid an osulosad, e-gandik-bukwad an ei osulosad. Ar Amorreo-dulemar urwaryobi sugu-inigwele, encina-sapimaryob dutusur-inigwele, an obelosad.
AMO 2:10 ”Egipto-yargi-noega an bemar-imaksamalad. Nega-dulesulidganba birga-dulabo (40) an bemar-idudii gusad, adi, Amorreo-dulemar-bukwamalad-e-yala bemarga ukegar.
AMO 2:11 Deginbali, be-mimmigan-imbagi, an-gayaburba-barsogmalad an nugsasad. Be-sapingan-imbagi, dulemar-anga-nugsalesad an susbalid. A-dulemarde, Nazareo-duleye bilesmalad. Israel-dulemar, ¿weyob ibmar-gusadi napirasursi? Deyobdo. Ani an Bab-Jehová-guedi we-ibmar soged.
AMO 2:12 Degi-inigwele, dule-anga-nugsalesad Nazareoʼye-bileged, vino-gobega be imaksamalad. An-gayaburba-barsogedga be sogsamalad: ‘Mer Bab-Jehová-gayaburbagi sunmakoye.’
AMO 2:13 ”Israel-dorgan, a-ulale, an sabsur-apor bemar-imakoed, igi ur-dummad-napagined orosgwaggi-dakleged ena-danikir, ibmar-birgi-nasar ibmar gullu-gullu imake, deyob an bemar-imakoed.
AMO 2:14 Dule-gwae-gwae-abarmaked, angi wakinnosurguoed. Dule-dutusulid, dukin e-garganguedba bendaklegosulid. Dule-gandikidbela, dukin na e-san bendakosurmogad.
AMO 2:15 Dule-sigumied, an-abin gwisguosurguoed. Dule-gwae-gwae-nanaed, angi wakinnosurguoed, dule moligi-sii-wakinmaile, na san-onogosulid.
AMO 2:16 A-ibagi, sorda-bila-onomalad-bur-gandikmaladi, uka-swili wakinmai guoed. Ani an Bab-Jehová-guedi we-ibmar soged.”
AMO 3:1 ¡Israel-dulemar, we-gayaburba be nue itomalo! Bab-Jehová bemar-annik, degi, bela Egipto-yargi dulemar-noargusmalad-annik weyob soged:
AMO 3:2 “Bela-dulemar-napneggi-bukwad-abargi unnila bemarbi an be-susad. Degi-inigwele, bela-bemar-ibmar-isgana-imaksadbali, an sabsur-bemar-odurdakoed.”
AMO 3:3 ¿Dule na ebo igar-amisulile, sunna ebo-nued-gudiguo be ebinsae? Suli.
AMO 3:4 ¿Achumigur san ganisulile, uurmako be ebinsae? Suli. ¿Achumigur-sapingwa, e-gubya-yaba san ganisuli-maile, uurmako be ebinsae? Suli.
AMO 3:5 ¿Nuu-galu-yaba mas-sisulir, nuu galego be ebinsae? Suli. ¿Nuu-galu walagwengi ibmar-galesuli atido be ebinsae? Suli.
AMO 3:6 ¿Neggweburgi gar-trompeta gollalile, dulemar dobedba oimakardasur be ebinsae? Eye. ¿Neggweburgi boni-dummadgan-noedi, Bab-Jehová imaksur be ebinsae? Eye.
AMO 3:7 Ar napiragwad, Bab-Jehová-Bur-Gandik-Maidi, e-gayaburba-barsogmaladga ibmar-sogsasuli geg ibmar imaked.
AMO 3:8 Ar achumigur uurmakalile, ¿doa dobguosur be ebinsae? Bab-Jehová-Bur-Gandik-Maid sunmakele, ¿doa e-gayaburba barsogosur be ebinsamoga?
AMO 3:9 Asdod-e-neggandikmaladgi binnasur be sogmalo, Egipto-yar-neg-gandikmaladgi binnasur be sogmarbalo. Weyob be sogmalo: “Samaria-yar-birse be ambikudamar, agi dobed-dummad-naid be dakdamar, agi sabsur-wilenanaid be dakdamar.”
AMO 3:10 Bab-Jehová soged: “Bemar, igar-innikigwadba geg nanamalad: Ar bemar sabsur-urwedgi-ibmar-sumaladid, reyneggi a-ibmar sabomaladid.”
AMO 3:11 A-ulale, Bab-Jehová-Bur-Gandik-Maid weyob soged: “Be-isdarmalad-wargwen gandikidgi be-yar sunonikoed. Be-neggandikmaladi bela bei earmaloed. Be-reynegmargi-ibmar-nuegan-bukwad bela bei sumaloed.”
AMO 3:12 Bab-Jehová weyob soged: “Igi-sibad-wawaad-edarbedi, e-sibad-wawaad achumigurse-galealile, aisaar na bendaknaidae, degi-inigwele, unnila e-malibi, e-uayadukubidibe na gadapdae, deyobi, wis Israel-dorgan-Samariaʼgi-bukwadi san-onogoed. Deyobi, wis Israel-dorgan-Damasco-neggweburgi gan-mua-muadgi-sigmaladi, san-onogoed.”
AMO 3:13 Bab-Dummad-Jehová-Bela-Gangued-Nika-Maid weyob soged: “Nuekwa be an-itomalo. Jacob-dulemarga iduakwaa be ibmar sogmarmogo.
AMO 3:14 ”Israel-dorgan e-ibmar-isgana-imaksad-ulale, an sabsur-odurdakoed-ibagine, Betelʼgi e-ibmar-ogumakar-ukleged-ailamar an obelogoed. Ibmar-ogumakar-ukleged-ailagi moli-bebegiid-bukwad an bibisgoed, bela napagi an mioed.
AMO 3:15 Dii-wied-ibagi-obunnoged-negmar bela an bibisgoed, yorgi-obunnoged-negmar bela an eyaroed. Akwa-marfilʼye-nugadgi negmar-sobarmalad bela an osulogoed. Bukidar nega-dummagan-bubukwadi an eyaroed. Ani an Bab-Jehová-guedi we-ibmar soged.”
AMO 4:1 Bemar, omegan-Samariaʼginmalad, an bega ibmar-sogoed be itomar: Bemar, Basán-yalagi moli-bebe-nikad-ome-wardummaganyob gumalad. Bemar, dule-wilegana sabsur-wiobukmalad, ise-mesagwale, be dule-wilegana imakbukmalad. Be-suimargarbela be sogbukwadamalad: “Vino anga sedaye.”
AMO 4:2 Bab-Jehová-Bur-Gandik-Maidi, e-san-isligwaledba ise-sogar soged: “Bemargi ibagan-dani, bemar belagwable akegi ebipilemai gumaloed, achwer-nugar-dummagangi-gales be ebipilemai gumaloed.
AMO 4:3 Bemar neggwebur-galu-matusulid-ayaroedbali ilekwaa ainimai gumaloed. Geb Hermón-yarse be-metemaloed. Ani an Bab-Jehová-guedi weyob soged.”
AMO 4:4 “Betel-neggweburse be namar, ase be isgunamar. Gilgal-neggweburse be namar, bur bule ase isgudii be sanamar. Bane-bane wakudaryalaba ibmar-ukleged be uknamar. Ibapaagi ibmar-ambegi-gwensak-ukleged (10%) be uknamar.
AMO 4:5 Dog-nuedye-sogega, madu-ina-nikad be ogumaknamar. Bela dule be owisomala, na ibmar-ukleged e-itoleged-ukbiedba ibmar sedamaloye. Ar Israel-dulemar, weyob abemalad. Ani an Bab-Jehová-guedi weyob soged.”
AMO 4:6 “Ani an bela be-neggweburmargi ukud-dummad nasiksad, bela be-dulemar-bukwadga masgulleged an osulosad. Degite, bemar deyob-gusmar-inigwele, gwen gannar anse aibilissurmalad. Ani an Bab-Jehová-guedi weyob soged.
AMO 4:7 ”Nii-warbaase ibmar-gwag-welegoed-iduale, dii bar an owissulid. Unnila neggwebur-gwagwengi dii an owisad. Neggwebur-baidgindi dii an owissulid. Nainu-gwensakgi dii-winai gusad. Baid-nainugindi dii wissulid, abali, nainu dingude gusad.
AMO 4:8 Degisoggu, dulemar neggwebur-baid-baidse dii-amidii gusmalad. Wis-gobsamar-inigwele, amba uku-uku-itogedi surgussurmalad. Degite, bemar deyob-gusmar-inigwele, gwen gannar anse aibilissurmalad. Ani an Bab-Jehová-guedi weyob soged.
AMO 4:9 ”Be-ibmar-digarmalad bonigangi an obelosad, neg-uedikidba an dinare imaksad. Sesmar be-nainugan obelosad, sesmar be-uva-digar-nanaid oburgwisad. Sesmar be-higuera-sapimar obelosad, degi, be-olivo-sapimar obelosbalid. Degite, bemar-ibe deyob-ibmar-gus-inigwele, bemar gwen gannar anse aibilissurmalad. Ani an Bab-Jehová-guedi weyob soged.
AMO 4:10 ”Egipto-dulemargi bonigan an barmisgusayobi, an bemargi barmisgusad. Es-suidgi be-sapingan an oburgwisad, e-molimar-galesmalad an ogilosbalid. Dule-burgwismalad-e-mui-yapanned neg-gagasa an nasiksad. Degite, bemar deyob-gusmar-inigwele, gwen gannar anse aibilissurmalad. Ani an Bab-Jehová-guedi weyob soged.
AMO 4:11 ”An Sodoma-neggwebur-wiosayobi, degi, Gomorra-neggwebur-wiosayobi, an bemar-wiosmogad. Bemar suar soose-negabar-gummaksayobi gusmalad. Degite, bemar deyob-gusmar-inigwele, gwen gannar anse aibilissurmalad. Ani an Bab-Jehová-guedi weyob soged.
AMO 4:12 ”Israel-dulemar, be anse aibilissurmalad-ulale, an begi gwichigumogoed. Israel-dulemar, begi an gwisguosoggu, an-iduar guakwa be gudimalo. Ar bemar we-ibmar-guoedi igar-gaosurmalad.”
AMO 4:13 Dule-yarmar-nasiksadi, burwamar-obinnisadi, dulemarga-ibmar-guoed-sogedi, Bab-Jehováʼye nugad. Neg-meegwad, negsichidga obinyedi, yarmar-birgi-nanaedi, Bab-Jehováʼye nugad, Bab-Dummad-Bela-Gangued-Nikadid.
AMO 5:1 Israel-dulemar, nue itomalo, gayaburba-wile-itoged-namaklegedgi, an bega namaksokalid.
AMO 5:2 “Israel-dulemar yagwa-swilidik-yeerdaklegedyobid, be sabsur-omukulesmalad. Bar be gannar gwisguosulid. Napagi meremai be guoed, dule-be-ogwised sate guoed.”
AMO 5:3 Bab-Jehová-Bur-Gandik-Maid, Israel-dulemarga weyob soged: “Neggwebur-gwensak sorda-miligwen (1,000) bila-onogedse-naele, unnila dulatar (100) durgumaloed. Ar neggwebur-gwensak dulatar (100) bila-onogedse-naele, unnila e-ambe (10) durgumaloed.”
AMO 5:4 Bab-Jehová Israel-dulemarga weyob soged: “Be an-amimalale, be dula-gudii gumaloed.
AMO 5:5 Melle be Betel-neggweburse bar namala. Gilgal-neggweburse melle be bar namala, degi, Beerseba-neggweburse melle be bar namarbali, ar ade, Gilgal-dulemar galesa seledmaloed, degi, Betel-neggweburdi bela berguoed.”
AMO 5:6 Bab-Jehová be amimala, adi, be dula-gudii gumaloed. Degisulile, Bab-Jehová José-wagangi sooyobi aidenonikoed, We-soo, bela Betel-neggwebur ogumakoed. Dule we-soo-oginnega sate guoed.
AMO 5:7 Igar-innikigwadi, igar-isganaga be imakmalad. Bur Igar-napiragwadi obanagwar be imakmalad.
AMO 5:8 Bab-Dummad niisgwa-danaled Pléyadesʼye-bileged obinnisad, degi, niisgwa-baigan Oriónʼye-bileged obinnisbalid. Bab-Dummad neg-sipusulidi, neg-meegwadga imaked, degi, neg-meegwad, negsichidga imakbalid. Bab-Dummad demar-bukibse goled. Geb napneggi dii-owiega imaked. ¡E-nuga, Bab-Jehováʼye nugad!
AMO 5:9 Bab-Jehová neggandikmalad osuloged, dule-ambikued-neggandikmalad osulobalid.
AMO 5:10 Bemar, igar-nudaked-neggi dule-igar-nudakega-arbamaladi, isdar dakmalad, degi, dule-napira-ibmar-soged, isdar be dakmarbalid.
AMO 5:11 Ar bemar, dule-wilegana ibigwensuli imakmarsoggu, degi, orosgi-dakleged-trigoʼgi, mani-galeged-bennuked ega be igar-mesismarsoggu, a-ulale, be-akwa-neg-sobsamaladgi, be megosurmalad. Degine, nainugi be-uva-naid-e-vino gwen be gobosurmalad.
AMO 5:12 Bemar-ibmar-isgana-yaisur-imaksad an wisid, be-isgumalad-yaisulid an wisid. Bemar, dule-innikigwad ibgwensur imaked, igar-nabolemaladgi emarse be manigi baklemalad. Degine, igar-nabolegedgi dule-wileganagi be gwisgumalad.
AMO 5:13 Agala, weyob neg-gunaidgine, dule-binsaed-nikadaedi bogi gudidaed. Ar ade, we-ibagande nuedsulid.
AMO 5:14 Melle igar-isgana be amimala, bur igar-nued be amimala, adi, be dula-gudii gumaloed. Degidbali, Bab-Dummad-Jehová-Bela-Gangued-Nikadi, bemarba gudii guoed.
AMO 5:15 Igar-isgana be obane, igar-nuedbina be soge, igar-nabiroleged-neggi, igar-innikigwadba igar be nabomala. Abakale, Bab-Dummad-Jehová-Bela-Gangued-Nika-Maid, José-wagan-besmalad wile dakalile.
AMO 5:16 Agala, Bab-Dummad-Jehová-Bela-Gangued-Nika-Maid weyob soged: “Bela-dule-ambikumaladgi, dulemar-ise-boale itolegoed, degi, bela galimbaba wile-itolegedba binnasur-gornanai itolegoed. Bomalaga sapur-dorganse gorlegoed, degi, bomalaga dulemar-manigi-bomaladse gorlegoed.
AMO 5:17 An sabsur-bemar-wiodanikile, bela uva-digarmaladba dule-boe itolegoed. Ani an Bab-Jehová-guedi weyob soged.”
AMO 5:18 Dule, Bab-Jehová-sabsur-odurdaked-iba-abitogele, ¡duledar-wilesmar! ¿Ar ibiga we-ibade edarbesunna? Ar we-iba negasichidbi naguoed, neg-meegwad naguosulid.
AMO 5:19 Dule aisaar achumigur-idu-wakinmaiyob guoenad, degi-inigwele, wiob-abingudagoed. Deyobiyobi, a-iba ega guoed. Dule e-negyaba-dogmaile, galugi akadapiyob guoed, galugi-akadapidba naibegi-warmaksayobi guoed. Deyobiyobi, a-iba ega guoed.
AMO 5:20 Bab-Jehová-sabsur-odurdaked-ibade negasichidbi-nai guoed, neg-meegwad-nai guosulid. Bela neg-gubyagwaledbi-nai guoed, neg dale-dalesaar daklegosulid.
AMO 5:21 Bab-Jehová sogdebalid: “Ibamar be anga onogedi, an isdar-daked. Bemar bulakwaa an-nug-odummogega itoakwaa-anse-gormaladi, yeer-ito an-imaksulid.
AMO 5:22 Ar bemar anga be-ibmar-ogumakar-ukleged ukele, an abingaosulid. Ibmar-gwagmar anga be ukele, an abingaosurbalid. Amba gwenatigwar-guega moli-bebe-nikad-senigana-wardummagan-ukleged, an be-ibe abingaosurbalid.
AMO 5:23 Be-namaked-oimaksiid an itobisulid. Be-gar-cítara-goled, an itobisulid.
AMO 5:24 Bur, dii-aryomaiyobi, igar-naboleged galesuli selemai abeleged, degi, diwar-suurmakmaiyobi, igar-innikimalad selemai abeleged.
AMO 5:25 ”Israel-dulemar, bemar birga-dulabo (40) nega-dulesulidganba gudigusmargua, ¿anga be napiragwadgi ibmar-ogumakar-ukleged uksamarsi? ¿Anga be napiragwadgi ibmar-ukleged uksamarsi? Suli.
AMO 5:26 Emide, bemarde nuchu-Moloc-e-neg-sobaled be semamaid. Degi, nuchu-Quiún be semamaid. Wemarde niisgwa-e-nuchumar-nanaed, bemar we-ibmarmar-sobsamaladi, gwen Bab-Dummadsulid.
AMO 5:27 Degisoggu, dikasuli Damasco-neggwebur-dakasik an be-balimetemaloed.” Bab-Jehová deyob soged. E-nuga, Bab-Dummad-Bela-Gangued-Nikadye nugad.
AMO 6:1 Amós sogdebalid: “Dule-Sión-neggweburgi-baisuli-itodimalad, ¡duledar-wilesmar! Samaria-yargi-dobsulidba-gudidimalad, ¡duledar-wilesmar! Dule-nug-nikamalad neggwebur-dummagangi-mamaid, ¡duledar-wilesmar! A-dulemarse Israel-dulemar bendakleged egisnaddamalad.
AMO 6:2 Calne-neggweburse be namar, nue be dakmalo. Agi bukwa, Hamat-neggwebur-dummadse be namarbalo. Geb sorba Filistea-neggwebur-Gatʼye-nugadse be namarbalo. ¿Ar bemarde we-neggweburmargi bur obinmarde? ¿Bemar-yarde bur we-yarmarba dummadye sogde?
AMO 6:3 Bemar iba-isgana obangumarye be bimalad, aka, be neg-nue-gagaled-iba warmakega imakmalad.
AMO 6:4 Be-gabed-megmaladgi elefante-nugar-goamar nanaid, a-megedgi na be megdimalad, degi, be-gan-siged-mua-muad-dummadgi be bilikwaa sigdimalad. A-gangi-sii, bemar sibad-wawaad-mimmigan-e-galugi-sulearmalad gundimalad, degi, moli-bebe-nikad-senigana-wardummagan be gundimarbalid.
AMO 6:5 Bemar, David-namakeyob namakye be sogmalanad, yogasaar be namakmalad. Gar-cítaraʼba be namakdedamalad. Be-itoleged, gar-gormalad be obinyedamalad.
AMO 6:6 Bemar nog-dummagangi vino be gobdimalad. Degi, ina-wawadikid-nuegan be ebudimarbalid. Ar José-e-wagan-e-neg-bibichisadba nunmaked-dummad, eba nunmak be itosurmalad.
AMO 6:7 A-ulale, emidi bemar-inse dulemar-galesa-seledmaloed-iduar seledmaloed, deyobi, dulemar-galagwensur-iba-onomalad berguoed.”
AMO 6:8 Bab-Dummad-Jehová na dukin ise-sogar imaksad. Bab-Dummad-Jehová-Bela-Gangued-Nikad weyob soged: “Jacob-wagan san-dummarba-imaked an isdar-daked. E-neg-gandikmalad an sae-daked. Agala, e-neggwebur e-isdarmaladga an urmakoed, degi, bela e-ibmar-nikadi an e-isdarmaladga urmakoed.”
AMO 6:9 Weyob neg gudoed: Dule neg-gwagwengi e-ambe (10) dula besale, bela burgwemaloed.
AMO 6:10 Geb e-gwenad-gwensak muimar-ogumakega, a-negse muimar-sudanikile, dule-neggi-gudiidga weyob sogdoed: “¿Dule-baid amba be-walik gudii?” Geb dule weyob abin sogdoed: “Suli.” Geb degidgine, ega sogdoed: “¡Boogwa! Anmar geg Bab-Jehová-nug obared.”
AMO 6:11 Ar Bab-Jehová igar-ukdoed: Neg-dummagan bibisgeye, degi, neg-burwigana ubigwar imakye.
AMO 6:12 ¿Ar molimar akwa-dummagan-imbaba abarmaksi? ¿Ar akwa-dummagangi nabir moli-bebe-nikad napa imusi? Ar bemardi, igar-innikigwad, ibmar-isganaga obinnismalad. Igar-innikigwad-selemaid, boniga be obinnismalad.
AMO 6:13 Bemar ibmar-gwen-imaksasulidgi be wergudimalad. Be sogmalad: “Anmar-ganguedgi anmarde gargangued nikusmarye.”
AMO 6:14 Degisoggu, Israel-dulemar, Bab-Jehová-Bela-Gangued-Nikadi soged: “Bemargi neggwebur-soggwen gwichiguega an imakoed. A-neggwebur ise-mesagwale bemar-imakoed. Hamatʼse-doglemaid-akale, Arabá-diwar-maidse, bemar ese odurdaklegoed.”
AMO 7:1 Bab-Jehová-Bur-Gandik-Maid, we-negburgan anga oyosad: Reyga ibmar-gwag-orosgi-dakleged-ukleged-welesad-sorba, a-gwag gannar ainiali an dakalid. Agi Bab-Jehová sesmar-bukidar urbenai an dakarbalid.
AMO 7:2 Degi, sesmar napaneggi gaganse-bakale, bela obelosgua, binnasuli an goted: —An-Bab-Jehová-Bur-Gandik-Maidye, an bese wilesakwaa egisye, Jacob-waganga isgued be eliye. ¿Ar igi Jacob-wagande bar bukuosunna? Unnila ichee gumalad.
AMO 7:3 Degidgine, Bab-Jehová wiledakde, sogded: —Degir nabir, an deyob neg imakosulid.
AMO 7:4 Geb degi, Bab-Jehová-Bur-Gandik-Maid, negburgan-baid anse oyosbalid: An daked, Bab-Jehová dule-sabsur-odurdakega soose gote. Degi, soo napa-urba demar-wilasailad dinnaa imaksad. Degine, nainugan bela swanga imaksad.
AMO 7:5 Deyob an daksagu, binnasuli an goted: —Bab-Dummad-Jehováʼye, bese wilesakwaa an egisye, soo be oginye. Degisulile, ¿ar igi Jacob-wagande bar bukuosunna? Unnila iche gumalad.
AMO 7:6 Degidgine, Bab-Jehová wiledakde, sogded: —Degir nabir, an deyob neg imakosulid.
AMO 7:7 Bab-Jehová, anga negburgan-baid oyosbalid: An daked, Bab-Jehová galu-matusulid-nuekwa-sobaled-nagaba gwichi. Degi, neg-wilubsaed-dubgi-gingwa-naid e-argangi-gani, an dakalid.
AMO 7:8 Degi, Bab-Jehová anse egichialid: —Amós, ¿wede ibu be dake? An abin-sogded: —Dubgi gingwa-nai an daked. Degidgine, Bab-Jehová anga sogded: —Dubgi-gingwa-naidi, an-Israel-dulemar-abargi an obatoed, adi, wilubdakega, bule inniki-gudimardibeye. Inniki-gudisulile, bar an ega e-isgued eliosulid.
AMO 7:9 Isaac-wagan-e-bab-dummaganse-goled-ailamar bela osulolegoed, degi, Israel-e-bab-dummaganse-goled-negmar bela bibisgoed. Jeroboam-e-gwenadgan es-suidgi an oberguoed.
AMO 7:10 Degidgine, Betel-neggweburgined-dule-irwa-Babse-goled-Amasías, Israel-rey-Jeroboamʼga gayaburba barmisad: “Amós, Israel-sordamar-abargi begi gwisgudiid. Ar Amós-sunmakedba Israel-dulemar binsaed-galediid.
AMO 7:11 Ar ade, Amós sogdiid: ‘Rey-Jeroboam es-suidgi burgoye. Israel-dulemardi e-yargi gales seledmarmogoye.’ ”
AMO 7:12 Geb degi, Amasías, Amósʼga sogded: —¡Dule-negburgan-daked, be wegi-gudiid be nae! Ar be mas-gunbiele, Judá-yarse be nae. Agi, Bab-Jehová-igargi be sunmaknae.
AMO 7:13 Melle bar Betel-neggweburgi, Bab-Jehová-igargi be sunmaknoniko, ar Betelʼde, rey-e-neg-islidikidid, rey-e-bab-dummadse-goled-negad.
AMO 7:14 Amós, Amasías-abin sogded: —An Bab-Dummad-gayaburba-barsoged-dulesulid, an a-machisurbalid. Unnila, an sibad-wawaad-edarbed-dule gued, higuera-sapigi an arbaed-dulebalid.
AMO 7:15 Degi-inigwele, Bab-Jehová sibad-edarbedgi an-onosad. Anga sogsad: ‘An-gayaburbagi be an-Israel-dulemarga be sunmaknaye.’
AMO 7:16 Degisoggu, Amasías, Bab-Jehová-gayaburba be itoge: ”Bede soged: ‘Mer Bab-Jehová-ibmar-imakoedgi Israel-dulemarga gandikidgi sunmakoye. Mer Bab-Jehová-gayaburbagi Isaac-waganga gandikidgi sunmakbaloye.’
AMO 7:17 ”Agala, Bab-Jehová weyob bega soged: ‘Be-ome neggweburgi ibmarbina na san-urmakdii guoed. Be-masmala, degi, be-bunamala es-suidgi oburgwilegoed. Be-napamar wilubsaar mimilegoed. Degi, bedi, be-yargi burgosulid. Israel-dulemardi e-yargi dikasuli gales seledmaloed.’ ”
AMO 8:1 Bab-Jehová-Bur-Gandik-Maid, negburgan anga oyosbalid: Garbagi sapi-san-gorogwad-bukwa an daksad.
AMO 8:2 Degi, anse egichided: —Amós, we, ¿ibu be dake? Degi, an abin-sogde: —Garbagi sapi-san-gorogana-bukwa an daked. Degidgine, Bab-Jehová anga sogded: —Israel-dulemar-e-bergued-ibagan warmaknonikid. Ibmar-san-gorogwayobi berguoed. Israel-dulemarga e-isgued bar an eliosulid.
AMO 8:3 Bab-Jehová-Bur-Gandik-Maid sogded: —A-ibagangi, reyneggi-namaklemalad, boedga guoed. Dulemar-bukidar yogasaar burgwar-burgwar omilede gumaloed. Degi, bogidikidgi muimar yogasaar metemaloed.
AMO 8:4 Nue be an itomalo, bemar, dulemar-wilegana sabsur-imakmalad, bemar, dule-wilegana obelodimarbalid.
AMO 8:5 ”Bemar sogmalad: ‘Anmar ibmar-gwagmar manigi ukega, ¿sana we nii-gebe-gwisgusad-e-iba berguoe? Anmar ibmar-gwag-orosgi-dakleged-trigo manigi ukega, ¿sana we itoged-iba berguoe?’ ”Bemar ibmar-nibirgi-uked bur ichee-gued abediid. E-manidi odummoged abediid. Emar-yardakega nibir-nuedsulid ebudamalad.
AMO 8:6 Orosgwaggi-dakleged-e-solamar bemar manigi ukdamalad. Bemar dule-wilegana manigi bakdamarbalid, degi, dule-ibmar-abedimalad nag-uka-gwagwengi unnir bakdamarbalid.”
AMO 8:7 Bab-Jehová, Jacob-dulemar-e-san-dummarba-imakedgi, ise-sogar sogded: “Ibmar be imaksamaladi, an gwen iegosulid.
AMO 8:8 Deyob bela neg-guoed-ulale, ¿napade giglimakosuli? ¿Bela e-dulamar boosurmala? Bela napa, Nilo-diwar-engumaiyobi megoed, dogdoed. Agi Egipto-diwar-ilideyobi, ilidoed.”
AMO 8:9 Bab-Jehová-Bur-Gandik-Maid sogdebalid: “A-ibagi, yorukudba dad-galegega an imakoed, degi, napneggi ibginedba negsichid an nasikoed.
AMO 8:10 Be-iba-onomalad ise-bukib-binsaleged-ibaga an imakoed. Degi, be-namakmalad, namakmalad-ise-bukib-binsaedga an imakbaloed. Bukib-binsaleged-e-mor-yoega an bemar-imakbaloed. Degi, be-nono swanga-imakega an be-imakbaloed. Machi-wargwennagwad-burgwisar, ega bonanaidaeyob ise-boar bemar bomaloed, degi, ibagan nunmaked-dummad-nai bergudoed.”
AMO 8:11 Bab-Jehová-Bur-Gandik-Maid sogdebalid: “Ibagan-danikid, napneggi an ukud-dummad nasikoed. We-ukudde, masgulleged an obarsulid, degi, uku-uku-itogedgi-dii-gobleged an obarsurbalid. An obaredi, dulemar an-gayaburba-itobiedba uku-uku-gudiguoed, an obared.
AMO 8:12 Degisoggu, dulemar, Bab-Jehová-Gayaburba-amiega, igarsuli demar-mataganba namaloed. Igarsuli dad-nakwed-argan-sapiledsik, degi, dad-nakwedsik gudii gumaloed. Degi-inigwele, Bab-Jehová-gayaburba gwen amiosurmalad.
AMO 8:13 ”A-ibagine, yagana-yeerdaklemalad, sapingana-gandikmalad, uku-uku-itogedba negoedmaloed.
AMO 8:14 Dulemar Samaria-dorgan-e-isgudiidga ise-sogar sogdamaladi bergumaloed, bar-durguosurmalad Amarde sogmalad: ‘Dan-neggwebur-e-bab-dummad-dula-gudiidba ise-sogar an bega sogye.’ Degi, sogdamarbalid: ‘Beerseba-neggwebur-e-bab-dummad-dula-gudiidba ise-sogar an bega sogye.’ ”
AMO 9:1 Dule-Dummad ibmar-ogumakar-ukleged-aila-dikarba-gwichi an daksad, degi, anga sogded: “Buarmar-e-bargamalad be omukue, adi, buarmar giglimakega, dulemar-e-nonogi babatidoed. Dulemar-burgosurmaladdi es-suidgi an osulogoed. Dulemar-wargwensaar wakinnosulid, wargwensaagwar durguosulid.
AMO 9:2 Israel-dulemar neg-uan-napa-uluba dukuye-sogele, amba an onogoed. Ar amba nibanegse nakweye-sogele, amba an amar-odegoed.
AMO 9:3 Amba Carmelo-yar-birba dukuye-sogele, ase an aminaoed, degi, an gaoed. Demar-mata-wilasorse angi dukuye-sogele, amba naibe-demargined egi-warmakega an barmidoed.
AMO 9:4 Israel-dulemar, e-isdarmaladse-galesa selenadapidgine, an igar-ukoed, es-suidgi amar-oburgwegar. Israel-dulemargi nue an nakulegoed. An egi-nakulegoedi, ibmar-nued ega imakegarsulid. Ibmar-isganaga imakegalad.”
AMO 9:5 Bab-Jehová-Bur-Gandik-Maid, Bela-Gangued-Nikad-Maid napa ebugele, napa maludoed. Napa mullumakmai megoed, Egipto-diwar-Nilo-maiyob megoed, degi, bela dule-bukwamalad ise-boar gumaloed.
AMO 9:6 Bab-Dummad nibaneggi na e-neg nasiksad, degi, napaneggi e-neg-sailagan nasiksabalid. Dii napaneggi-owiegala, demar-mata-obupurmakega imaked. E-nuga, Bab-Jehováʼye nugad.
AMO 9:7 Israel-wagan, Bab-Jehová soged: “¿Ar bemarde anga Etiopía-dulemaryob-gusursi? ¿Ar ande Egiptoʼgi Israel-dulemar-onissursi? ¿Caftor-yargi Filistea-dulemar an onisbarsursi? Degi, ¿Kir-yargi Arameo-dulemar an onisbarsursi?
AMO 9:8 ”Ani an Bab-Jehová-Bur-Gandik-Maidi, we-yar-isgus-naidgi nakulemaid. Jacob-wagan napneg-naidgi an obelogoed, degi-inigwele, an bela obelogosulid.” Bab-Dummad-Jehová soged.
AMO 9:9 “Igi ukub bugbugi egwalealile, napagi akwa-gwagwensaar argwansuli, deyobi, Israel-dulemar neggwebur-baigan-abargi, an egwaoed.”
AMO 9:10 Bab-Jehová sogdebalid: “Bela an-dulamar-isgudimalad, es-suidgi burgwemaloed. Bela sogdimaladi: Bonigan anmarse gwen nonikosurye. Anmar-oakalogosurye. Dule-deyob-sogdimaladi, bela burgwemaloed.”
AMO 9:11 Bab-Jehová sogdebalid: “A-ibagi, David-meged-neg-ayarisadi, an soboed. Neg-yaa-ollogan-ambikusadi, an edioed, degi, e-neg-bibichismalad iduar-sobaledyob, gannar an sobbaloed.
AMO 9:12 Adi, Israel-dulemar, degi, bela dulemar an-nug-odummodimaladi, Edom-neggwebur, degi, bela neggwebur-bamalad suegar.”
AMO 9:13 Bab-Jehová sogdebalid: “Ibmar-san-bukidar-welegoed-ibagan danikid, ibmar-gwag-digleged-ibagan-naidgi, amba oros-gwaggiid-dakleged, welenai guoed. Uva-digleged-ibagan-naidgi, amba uva-egurlenai guoed. Yar-dummaganba vino-binid aryomamai guoed, bela yala-senigana-imbaganba suurmakmai guoed.
AMO 9:14 An-Israel-dulemar-galesmalad an gannar e-yarse sedagoed. Neggweburmar-bergusad gannar na sobmarbaloed, agi na ambikumaloed. Uva-dubmar digmaloed, degi, e-vino gobdii gumaloed. Ibmar-digedgi arbamaloed, a-ibmar-sanmakoedi, gundii gumaloed.”
AMO 9:15 Be-Bab-Dummad-Jehová soged: “Israel-dulemar e-yargi an urboed, adi, mer yar-an-ega-uksadgi, bar onilegegar.”
OBA 1:1 Abdías-negburgan-daksad. Anmar, Bab-Jehová-e-ibmar-soged itosad. E-gayaburba-berbeged-wargwen, dulemar-yar-baid-baidgi-bukwadse barmilesad. A-dule, weyob soged: “Anmar ogusmar. Anmar we-neggweburgi bila-ononamar.” Bab-Jehová-Bela-Gangued-Nikad Edom-dulemarnik weyob soged:
OBA 1:2 “Dulemar-yar-baid-baidgi-bukwamalad-abargi an bur san-bipii be-imakoed. Bela dulemar isdarsunna be-dakmaloed.
OBA 1:3 Na be-gwage-ulubgi be-san-dummarba-itogedi be-yardaksad, Akwa-dummagan-imbaba be-siid, nibaduku be siid. A-ulale, na be binsaed, ‘¿doa napagulluse an-egwannosunna?’ ”
OBA 1:4 Bab-Jehová soged: “Sulubagiyob amba be matusuli gukudiile, amba niisgwamar-imbaba be-uu siile, agi-gudiidgi amba an be-egwannoed.
OBA 1:5 ”Ar dule-ibmar-atursaed mutikidba be-ibe ibmar atursadanikile, ¿unnila ibmar-abegedbi be-ibe sussulir be insae? Eye. Ibmar-abegedbi be-ibe susaled. Ar bedi bur bule ibitogoed. Ar uva-weemalad, be uva-nainuse nonikile, ¿uva-e-solamar obessulir be insae? Obesale. Ar bedi bur bule ibitogoed.
OBA 1:6 Esaú-e-ibmar-nuegandi, bela sulegoed. Bela e-ibmar-nuegan-gargerbamalad e-ibe sulegoed.
OBA 1:7 Bela dule-beba-nanaidi, be-yar-abingunaidse be-ononnomaloed. Be-aimala be-yardakmaloed, be-dummadga gunonimaloed. Dulemar-bebo-masgundimalad, begi aibinmalaga be-yardakmaloed. Edom-dulemarde deyob-guoed itogosurmalad.”
OBA 1:8 Bab-Jehová soged: “A-ibagi, Edom-dulemar-dule-binsaed-ibegan, an obelogoed, Esaú-yargi dule-ibmar-wisimaladi, an obelogoed.
OBA 1:9 Temán-neggwebur, be-sorda-bila-onomalad, dobedba wawanmakdemaloed. Esaú-yargi bila-onolenaidgi bela dulemar burgwemaloed.
OBA 1:10 ”Esaú, be be-urba-Jacob-nue-wiosadbali, be dummad-bingeguoed, degisadegu be berguoed.
OBA 1:11 Jacob-e-sorda-bila-onomalad dule-baiganse gales-selemamaigua, bedi agi, unnila dakgwichi gusad, gwen be bendaksasulid. Dule-baigan, Jerusalén-e-yawagakba ubomamaigua, e-ibmar-nuegan-susmalad-miminanaigua, gwen be bendaksasulid. A-dulemaryob be gusmogad.
OBA 1:12 Esaú, be-urba-sabsur-imaklenaigusad-ibagi, ega be allewilubsulinad. Be-urba-sabsur-obingelenaigusad-ibagi, ega be allewilubsulinad. Judá-dulemar-ogilolenaigusad-ibagi, be yeer-itogewilubsulinad. E-suli-suli-itonaigusad-ibagi, egi be dodogewilubsulinad.
OBA 1:13 Esaú, an-dulamar-sabsur-odurdaklenaigusad-ibagi, e-neggwebur-yawagakba be dogewilubsulinad. E-sabsur-odurdaklenaigusad-ibagi, be yeerdakgwichi guewilubsulinad. E-wilenanaigusad-ibagi, e-ibe be ibmar-nuegan-gargerbamalad suewilubsulinad.
OBA 1:14 Jacob-dulemar-wakinmamaid-oburgwegala, igarmar-abingunanaidgi idu be gwisguewilubsulinad. E-suli-suli-itonaigusad-ibagi, dule-burgwissurmalad e-isdarmaladga be urmakewilubsulinad.”
OBA 1:15 Bab-Jehová soged: “Ar bela dulemar-sabsur-odurdaked-e-ibagan warmaksad, Edom, ar igi be dule-imaksa, deyobi, be gumogoed. Igi be dulemar-imaksagusa, emigi be bela itomogoed.
OBA 1:16 Israel-dulemar, igi-bemar anse an-yar-islidikidgi sabsur-odurdaklesgusmala, deyobi, dulemar-yar-baid-baidgi-bukmalad anse sabsur-odurdaklemogoed. Sabsur-odurdaklegoedba bergudmaloed. Dule-bukussuliyobi gumaloed.
OBA 1:17 Ar Sión-yargindina, dule-gwenna-gwenna san-onomaloed, amala swilidikidga gumaloed. Jacob-wagan gannar e-ibmar sumaloed.
OBA 1:18 Jacob-wagana, sooyobi gumaloed, José-wagandi, soo-gaeyobi gumaloed. Esaú-wagandina, gagan-dinnagwadyob gumaloed, soogi gummakmaloed, soose bergumaloed. Degisoggu, Esaú-wagan-abargine, dule-wargwensaar durguosulid. Ani an Bab-Jehová deyob soged.”
OBA 1:19 Neguevʼginmalad, Esaú-yar sumaloed. Sefelaʼginmaladdi, Filistea-dulemar-yar sumaloed. Israel-dulemar, Efraín-yar sumaloed, Samaria-yar sumarbaloed. Benjamín-wagan, Galaad-yar sumarmogoed.
OBA 1:20 Israel-sorda-bila-onomalad-gales-selesgusmalad Canaán-dulemar-abargi-gudimaladi, Sarepta-neggweburse yar-sumaloed. Jerusalén-dorgan-Sefarad-neggweburse-selesmaladdi, Neguev-neggweburmar sumaloed.
OBA 1:21 Israel-dulemar-galebukwa-nosmaladi, Esaú-e-yar-semai-gumalaga Sión-yarse naknonimaloed. Bab-Jehová na we-yar-dakmai guoed.
JON 1:1 Bab-Jehová, Amitai-e-machi-Jonásʼse gornonikid. Ega weyob sognonikid:
JON 1:2 “Jonás, Nínive-neggwebur-dummadse be nao. A-dulemarga be sogo, anse ibitomaloye. Ar Nínive-dulemar-e-isgued doggus wilub-obicha-gusad, e-ibmar-isgana-imakmalad anse warmaksad.”
JON 1:3 Ar Jonásʼdi Bab-Jehováʼba gwen ibsassulid. Bab-Jehováʼgi-wakinnegala aka Tarsis-neggweburse naedgi binsaali gusad. A-ular, Jope-neggweburgi urmar-naguedse nade gusad. Jopeʼse modapgua, Tarsis-neggweburse ur-nae-sognai dakdapid. Geb Jonás agi ur-bennuksad, eba naegar. Deyob Bab-Jehováʼgi dikasur-wakinnega Tarsis-neggweburse nadegusad.
JON 1:4 Agine, Bab-Jehová mataba burwa binnasur-golega imaksad. Geb degidbali, demar bela-bela dunguded, degisoggu, ur mared-naga-gualid.
JON 1:5 Ur-selamar bela-bela gwayidmalad, geb, neg-isgued-wis-bargaegala, war-wargwen na e-bab-dummad-e-bab-dummadse gotemalad. Deginbali, selamar ur ukuu imakegala, ur-yagi-ibmar-bukwadi demarse midmalad. Jonásʼdina, ur-sukun-yaba-aides megisad. Agi, ise-nue-gabar megisad.
JON 1:6 Agine, ur-seed Jonás-gabmaidse nonikid, geb ega sogded: —Ar bedi, ¿ibu be samai weyob be gabmaigu? ¡Gwisgue! ¡Be-Bab-Dummadse be gole! Ar abakale, be-Bab-Dummad wile anmar-dakalile, nabir anmar-bendakalile, adi, anmar burgosulid.
JON 1:7 Geb selamardi, na dukin-dukin sogdemalad: —Anmar wilubdakgwelo. Agi, anmar dakoed, doa gudiidibe, doa-nukad anmargi burwa-dummad noali. Agi, wilubdaknanai-guarmalad. Geb Jonásʼgi yolenonikid.
JON 1:8 Degisoggu, selamar Jonásʼse egisdemarsunnad: —Anmarga be soge, ¿wede ibiga anmargi burwa-dummad noali? ¿Be ibigi arbae? ¿Bia be daniki? ¿Be bialidi? ¿Bede, igid-dule?
JON 1:9 Geb Jonás dulemar-abin sogded: —Ani, an Hebreo-dule, Bab-Jehováʼse-gordiid-duled. Ar we-Bab-Dummad nibneg-e-dummadid, demar nasiksabalid, napneg nasiksabalid.
JON 1:10 Agi, selamar bela-bela dobgudmalad. Geb Jonásʼga sogdemalad: —¿Igi be neg-imaksa? Ar ega Jonás sogsasoggu, selamar wisgunonimarsunnad, Jonás Bab-Jehováʼgi wakindii.
JON 1:11 Degine, demar bur bule dungumaisoggu, Jonásʼse egichidmalad: —Anmarga demar nabir bogilegegala, ¿igi anmar be-imakosunna?
JON 1:12 Jonás abin-sogded: —Ar an-nukad we-burwa-dummad nomaid. Degisoggu, gasa be an-imakmala, demargi be an-metemala, ar degii geb demar bogilegoed.
JON 1:13 Degine, selamar aisaar gakase-warmakega sabsur-gamminanai-gusmalanad, degi-inigwele, demar-dungueddi baligannosad. E-urdina, sunnale dogsar gunaid, degisoggu, demar-gakase ur-sessur-gusmalad.
JON 1:14 Geb degine, selamar Bab-Jehováʼse binnasur gotemalad, ega sogdemalad: “Bab-Jehováʼye, melle be we-dule-ular anmar-oburgwe. Ar we-dule ibmar-oakalossulile, melle e-burgoed, anmargi be nasiko. Bab-Jehová, ar bedi na ibmar-imakbiedba be imakmaid.”
JON 1:15 Agine, selamar Jonás-gasmalad, geb, demargi metemalad. Jonás-melledgua, demar yog bogilegargusad.
JON 1:16 Selamar bela deyob daksamargua, Bab-Jehová-dobee-ito-nadmalad. Geb Bab-Jehováʼga ibmar-ogumakar uksamalad, deginbali, ise-sogar na weyob sognanai-guarmalad: “Bab-Jehová-sogedba anmar gudii-guoye, deyob anmar imakergebye.”
JON 1:17 Ar Bab-Jehováʼdi Jonás-ua-dummadse-dolegegala, idu guakwaa ua-dummad-nasiksad. Jonás ua-dummadse-dolesgua, e-saban-yaba ibapaa megisad.
JON 2:1 Geb degine, Jonás ua-sabanyaba-mai, e-Bab-Dummad-Jehováʼse goted.
JON 2:2 Ega sogded: “An dummad-wilenaidgi, an bese gochad. An bese gochagua, be an-itononikid. Bato an burgwarmalad-neg-gullugi-mai an gochad. Agi, Bab-Jehová be an-bendaknonikid.
JON 2:3 Demar-wilasolase, dii-ulak be an-barmeted. Be-demar-ebilemaid, bela angi nasad. Be-demar-dummagan-nukamakmaidi, bela angi bipirmaksad.
JON 2:4 Weyob an binsanonikid: Bab-Jehová nue an-obachasunye. Degi-inigwele, an gannar ese-goled-neg-swilidikidsik an nabaloye.
JON 2:5 Bela diimar dukarse an-ebiris-nagusad, demar-wilasailad bela an-ebirisad, demar-gaganmar an-nonogi bela bipirmaksad.
JON 2:6 Bela-bela demar-napa-ulubse an megdapid. ¡Bato an napa-ulubgi-mellesigua, gwen bar noed an itossulid! Degi-inigwele, be an-Bab-Dummad-Jehová-gued, an gulluba-mellesiidgi be an-onononikid.
JON 2:7 ”An na nue-burgwe-itogua, Bab-Jehová, an begi binsaded, agi an bese goted. An-bese-goled, bese mosad, bese-goled-neg-swilidikidse warmaksad.
JON 2:8 ”Dulemar-bab-dummaganse-gormaladdi, Bab-Dummad-e-sabgued gwen bai daksurmalad.
JON 2:9 Andina, an weligwar-namakedgi, an bega ibmar-ogumakar ukoed. An bega ibmar-imakoye ise-sogar an sogsad, an imakedsegoed. ¡Bab-Jehová, unnila bebi sunna dule-abonoged!”
JON 2:10 Geb agine, Bab-Jehová Jonás-onogegala, ua-dummad-agega imaksad. Geb neg-dinnagwadgi ua agsagua, Jonás neggunasse nononikid.
JON 3:1 Degine, geb ilabogi, Bab-Jehová Jonásʼga gannar sogdebalid:
JON 3:2 “¡Jonás! ¡Gwisgu! Nínive-neggwebur-dummadse be nae. An bega-ibmar-sogoed a-dulemarga be sognao.”
JON 3:3 Agi Jonás, gwichibin imaksad, geb, Nínive-neggweburse nadegusad, Bab-Jehová-ega-sogsadba. Ar Nínive-neggwebur bipisursoggua, egi naegala ibapaa-nanaleged.
JON 3:4 Jonás, Nínive-neggweburgi dognonikid, geb, ibagwen-dummad gandikidgi weyob sunmakdii gualid: “Iba-dulabose (40) Nínive-neggwebur berguoye.”
JON 3:5 Agine, Nínive-dorgan Bab-Dummad-ega-sogedi nue-itosmalad. Degisoggu, serganmala, degi, bipiganase-bakar, bar mas-guchasurmalad, bela mor-sommed-ai-aid yosmarbalid, adi, oyogegar, emarde e-isguedga na wile-itomarye.
JON 3:6 Nínive-e-rey we-gaya-itoargua, na e-rey-gangi-sii gwichibin-imaksad. Geb e-rey-mor-yoid-esusad, agi mor-sommereged yosad. Deginbali, buru-birgi sigisbalid, oyogegar, ede na e-isguedga bukib-binsamoye.
JON 3:7 Geb degine, rey na e-dummaganmala, Nínive-neggweburginmaladga igar-uknonikid. Weyob sognonikid: “Bela dule-gwablemakar melle mas-gunmalo, melle dii gobmarbalo, bela molimarse-bakar, sibad-wawaadmarse-bakar, bela-ibmar-durganse-bakar, melle masgi-ogunmalo.
JON 3:8 Deginbali, dulemar mor-sommed yomalo, degine, e-ibmar-durganse-bakale, egi mor-sommereged nasikmalo. Bab-Dummadse bela-bela gandikidgi gormalo. Degi, na war-wargwen e-daed-sunnasulid iemalo, degine, e-ibmar-isgana-sabsur-imakdimalad bela iemamarbalo.
JON 3:9 Abakale, Bab-Dummad, wile anmar-dakalile. Bela-bela sabsur-anmar-odurdaksokalidgi, bar sabsur-anmar-odurdakarsulile, adi, melle anmar burgwemalagar.”
JON 3:10 Bab-Dummad Nínive-dorgan e-isguedga na bukib-binsasa, degi, e-ibmar-isgana-imaked mete daksagua, na sognonisunnad, we-dulemar-osulogoye an sogsadi, emigindi, bar an sabsur-odurdakosurye.
JON 4:1 We-ibmar-gusad bela-bela Jonás-sae-itogega imaksad. Sae-itogedba, sabsur-uluded.
JON 4:2 Geb Jonás, Bab-Jehováʼse goted. Weyob ega sogded: —Bab-Jehová, ¿ar an we-obarissursi, deunni an-yargi an gudigu? Agala, an Tarsis-neggweburse nadegusanad. Ar an nue-wisid, be, Bab-Dummad-emar-saberbadid, be, wile-emar-dakedid. Be wissur-gwae-gwae urwebalidid. Ar be, dulemar-nue-sabsoggu, emar-sabsur-odurdakoye be sogdaenad, degite, be sorba sogdedabalid, be-isgued bergusye.
JON 4:3 Bab-Jehováʼye, degisoggu, an bega soged, bur be an-oburgwesunna. Bur an dula-gudiidba burgwisunnana gadinad.
JON 4:4 Bab-Jehová, Jonás-abin sogded: —Ar weyob be urwenaidde, ¿ibmar-nued na be sanaye sogsunde? Gwen ibmar-nuedsulid.
JON 4:5 Geb Jonás neggweburgi nodegusad, dad-nakwedsik sigwidapid. Agi, neg-matarkwaa sobsad. A-neg-urba, negsichigwagi sigisad. Geb neggwebursik ataksii gusad, adi, dakegar, igi Nínive-neggwebur gudodibeye.
JON 4:6 Geb degine, Bab-Dummad-Jehová Jonás-siidgi dagargii-dakleged-urwa dunguega imaksad, adi, Jonás a-urwa-urba dukuegar, degine, urwesiidbali wis yeer-itobaligar. Agi Jonás, we-urwa-urba-dukusiidgi yeer-itos-gusad.
JON 4:7 Neg-oiboargua, Bab-Dummad, dagargii-dakleged-urwa nusse gullegega imaksad. Degisoggu, urwa dingussunnad.
JON 4:8 Dad nakwiargu, Bab-Dummad, dad-nakwedsikid-burwa diopisur-golega imaksad. Degisoggu, Jonásʼgi dad-dummadi-ganai-gualid. Degidbali, Jonás, sulibinsa-ito-naded, na neg negoe-itoged. Agala, burgwebi-guarsunnad, geb, weyob sogded: “Bitigi an burgwissunnana gadina, ar dula-gudiidba bur-nuedid.”
JON 4:9 Agine, Bab-Dummaddi Jonásʼga sogded: —¿Ar dagargii-dakleged-dingusadbina nue be urwe? Jonás, Bab-Dummad-abin sogded: —Eye, nue-bela-bela an sae-itoged.
JON 4:10 Geb degine, Bab-Jehová Jonásʼga sogdebalid: —¿We-dagargii-dakleged-urwa, mutiki-dungusad, a-banedgine, mutiki burgwisbalid, a-bina be bukib-binsade? Emide be, gwen digsasulid, be gwen odummossurbalid.
JON 4:11 Ar deyob be itogele, an-bulesunna, ¿ar an Nínive-neggwebur wiledakosur be an-insae? Ar we-Nínive-neggwebur-dummadgi dulemar-aku-neg-itomalad mili-dulanergwa-gaka (120,000+) bukwad, degine, moli-bebe-nikamalad bukidar-bukwabalid. ¿Amarde an wiledakosursi? An wile dakoed.
MIC 1:1 Judá-dule-e-reymar Jotam, Acaz, degi, Ezequías, negsemamaid-ibagangine, Bab-Jehová dule-Moreset-neggweburgined-Miqueasʼye-nugadga sunmaksad. Miqueas, Samaria-yalagi-negguoed, degi, Jerusalén-yalagi-negguoed weyob negburgan daksad. Miqueas, Bab-Jehová-ega-sogsadba weyob sogded:
MIC 1:2 “Dulemar, bela we-yalagi-bukmalad be an-itomar, bela napneggi-bukmalad, nue-bogimakar be itomalo. Bab-Dummad-Jehová-Bela-Gangued-Nika-Maid, ese-goled-neg-akale, bemargi-gwisguega sunmakoed.
MIC 1:3 ¡Dakmala! Bab-Jehová, e-maidgi bato noalid, bato aidealid, yar-mullugan-imbaba gannamakdanikid.
MIC 1:4 E-nanaedbali yarmar abin maludoed. Ibmar-gwallu-soo-abin-daluddaedyobi yar gudoed, igi diwar-noedbali, nebagan negabar-argaddae, deyobi, nebagan argadoed.
MIC 1:5 Bela we-ibmarmar Jacob-wagan-Bab-Dummadgi-gwisgusadbali guoed. Israel-dulemar-isgued-ular, deyob, guoed. ¿Ar bia Jacob-wagan Bab-Dummadgi gwisgusmala? ¿Ar Samaria-neggweburgi isgusmarsursi? ¿Ar Jerusalén-neggweburgi, Judá-dulemar e-bab-dummaganse-gorleged-neggi isgusmarsursi?
MIC 1:6 A-ulale, Bab-Jehová soged: ‘An Samaria-neggwebur akwamarbi dunnumaksii an imakoed. E-akwamar nebaganba an mioed, bela swanga an imakoed. Unnila e-yala uvaʼmar-digega guoed.
MIC 1:7 Bela e-bab-dummadyob-imaklemalad bibislegoed. Bela bab-dummagan-neggi-gambasamaladga ibmar-uklesmalad, ogumaklegoed. Bela we-ibmarmar-soblesmalad an obelogoed. Ar ade, galagwensuli-nanamalad-manigi, we-ibmarmar-soblesadi, gannar amar-maniga an imakoed.’ ”
MIC 1:8 Miqueas sogded: “Agala, an booed, bukib-binsaedba an binnasuli goloed, nag-swili an gudii guoed, uka-swili an gudii guoed. Achu-boeyobi an gordii guoed. Irmonyobi an akigindii guoed.
MIC 1:9 Ar ade, Samaria-e-naibigusadi, gege nudakleged. E-naibigusadi, bela Judá-yalase warmaksad. Bela Jerusalén-neggweburse an-dulemar-bukwadse nasgusad.
MIC 1:10 Melle be bomalo, melle Gat-neggweburgi be ibmar sogmalo. Napayala nunmakedba, Bet-Le-Afra-neg-ukubgi be bindumakmar.
MIC 1:11 Safirʼginmalad, uka-swiri binged-abalagi be-yargi be nomar. Zaanánʼginmaladdi, ainiega sikirmaksamalad. Betesel-neggweburgi ogormakdemalad, bar bemar bendaklegosulid.
MIC 1:12 Marotʼginmalad, ibmar-nued-gued abebukwad, ar Bab-Jehováʼdi, Jerusalén-neggwebur-dogedse bonigan barmialid.
MIC 1:13 ”Laquis-dorgan, bemar ur-bila-onomaladgi moli be nasikmar. Ar ade, be-neggwebur-Jerusalénʼgi isgued noalid, bemargine, Israel-dulemar-e-isgued noalid.
MIC 1:14 Degisoggu, Moreset-Gat-neggweburga degimaloye be sogmalo. Aczib-neggwebur-e-negmar, Israel-dulemar-e-reymar-yardakega gued.
MIC 1:15 ”Maresa-dorgan, dule-wargwen be-ibe-yarsuega, an bemargi barmidoed. Adulam-akwasaila-yaa-ollogwadyaba Israel-dule-bulegan dukunamaloed.
MIC 1:16 Degisoggu, be-mimmigan-sabed-ulale, be bukib-binsae, aku-siga be esie, mula-nono-swirigwadyobi be-nono swiri be imake, ar ade, be-mimmigan yogasaar-gales dikasuli begi seledmaloed.”
MIC 2:1 Dule, igar-isgana-imakedgi-binsamalad, duledar-wilesmar. Ar megidele, igar-isgana-imakedgi, binsamaidamalad. Neg-oibosale, igar-isgana imakdedamalad, ar ade, e-ibmar-imakbiedba imakdamalad.
MIC 2:2 We-dulemar, emar-nainubina sokalile, e-ibe susdamalad, egadga imakdedamalad. Emar-ibe negmar susdamalad, egadga imakdedamalad. E-neg-ibed-mesagwar imakdedamalad, degi, e-neg-ibed-mimmigan-mesagwar imakdedamarbalid. E-nainu-ibed-mesagwar imakdedamalad, degi, e-nainu e-ibe susdamarbalid.
MIC 2:3 Degisoggu, Bab-Jehová weyob soged: “Emigine, ani, an we-dulemar-isganagi bonigan barmidamogoed, we-bonigangi gwen wakinnosurmalad. Bar san-dummarbaa na itogosurmalad, ar ade, e-sabsur-odurdakleged-wachimar omosad.
MIC 2:4 A-ibagan-omosale, dule-bamalad egi dododmaloed, ega we-naibi-itoleged-namakleged weyob egi dodoar namakmaloed: ‘Anmar bela bergusmala. An-dulamar-ibe nainumar miminanaid, ibiyobi anmar-ibe nainumar sunanai. Dule-isganamar, anmar-nainumar miminanaid.’ ”
MIC 2:5 A-ulale, Bab-Jehová-sordagan-onmakbukwad-abargi, we-dulemarga napa-mimilegedgi ega napa uklegosulid.
MIC 2:6 We-gayaburba-barsoged-napiragwadsurmalad anga soged: “Mer bar be anmarga ee-gordii samala. Mer be anmarga soge, be wilemaloye.”
MIC 2:7 Jacob-wagan weyob sogmalad: “¿Bab-Jehová e-san-bargaagwar-imaked bergussi? E-daedde, ¿weyobsi? ¿Ar dule-inniki-nanadiidga Bab-Dummad-gayaburba ibnuedga gusursi?”
MIC 2:8 Bab-Jehová soged: “Ar bemar an-dulamarga gumalanad, degi-inigwele, emi-ibagi be an-isdarmaladga gudmalad. Dulemar-igarba-baisurbinsa-nadapdamalad-ibe sordamar-be-isdarmaladyobi, e-ibe be mor-nuegan atursasdamalad.
MIC 2:9 An-dulamar-omegan e-neg-nuegangi be ononnosmalad. A-omegan-e-mimmigan-ibe, be e-wergued osulosmalad.
MIC 2:10 ”¡Ogusmar! ¡Be namar! We-nega, obunnoged-negsulid. Bela nue-isgus naid, bela oitoles siid.
MIC 2:11 Ar dule-gwensak yogasaar-gakansaedgi weyob sognonikile: ‘An bemarga-sunmakega, vino be anga udamaloye, sisa be anga udamaloye.’ We-neggwebur Bab-Dummad-gayaburba-barsogedyobi, we-dule-dakdoed.”
MIC 2:12 Bab-Jehová sogdebalid: “Jacob-wagan, an bemarga nue-napira-soged, bela be-dulemar gannar nuekwa an urboed. Israel-wagan, an bemarga nue-napira-soged, bemar-napi-besmaladi, an gannar danar urboed. Igi sibad-wawaad galu-yaba danale-bukwadae, deyobi, an bemar-urboed. Degi, igi sibad-wawaad gagan-araramaladgi bukwadae, deyobi, an bemar-urboed, degine, binnasuli dule-bukidarayob oimakdemaloed.”
MIC 2:13 Ega igar-mayedi, emar-idumai guoed, deginbali, emarmoga, igar-egamai gumarmogoed. Amar, igar-bulegangi ollorgumaloed, degi, namaloed. E-reydi, amar-idumai guoed. Bab-Jehová, na e-sunnagwadi emar-idumai guoed.
MIC 3:1 Geb degine, an sogded: “Jacob-dulemar-negsemamaid, Israel-dulemar-e-dummagan, nue be an-itomar: Bemar bur igar-innikigwad-imaked-durdaked ¿nabirsursi?
MIC 3:2 Ar bemar igar-nued bur isdar dakmalad, igar-isgana aka be yeer dakmalad. An-dulamar be wiodimalad, mesagwar be imakdimalad.
MIC 3:3 Bemar ibgwensur an-dulamar imakdimalad. E-ukamar e-ibe be edared. E-garmar bis-bis e-ibe be imaked. Igi san-olomakar esmed-yagi onakledae, deyobi, an-dulamar be wiodimalad. San-narilegedyobi, an-dulamar be imakdimalad.”
MIC 3:4 Bemar ibagwengi Bab-Jehováʼse gotemaloed, edina, bemar-abin imakosulid. Ar bemar dogdar isgusgudiidba, a-ibagangine, bemar-idu banguoed.
MIC 3:5 Bab-Jehová weyob bemar-annik soged: “Bemar Bab-gayaburba-barsogmalad, dulemar-yamodimalad, igar-noaledba an-dulamar-sedimalad: Unnila dule-bega-masgunned-ukmaladgarbi, igar-bogidikidgi be sunmakdamalad, ar dule-bega-masgunned-uksurmaladgardi, bila-onoged be obariddamalad.
MIC 3:6 Degisoggu, an bar bemarga an-ibmar-sabiedi sogosulid. Bipisaale bar an bemarga an-gayaburba sogosulid. Bar anga-gayaburba-barsogmalad bemarga yoedse-ibmar-guoedgi sunmakosurmalad. ”An-gayaburba-barsogmalad bar sunmaksuli guoed e-ibagan bergudoed.
MIC 3:7 An-gayaburba-barsogmaladi, bingedar itodmaloed. Nergan aku neg-dake gudmaloed. Ar bela wemar bar-ibmar sogosurmalad, ar ade, an gwen ega ibmar sogosulid.”
MIC 3:8 Andi, Miqueas, Bab-Jehová-Burba nue-nika gudiid. Igar-napiragwadi, degi, garganguedi, an nue-nika gudiid. Adi, Jacob-dulemar ibmar-isgana-imakmaladgi an sunmakegar, degi, Israel-dulemar-isgudiidgi an sunmakegar.
MIC 3:9 Jacob-dulemar-negsemamaid, Israel-dulemar-e-dummagan, be nue an-itomalo. Bemar igar-innikimalad bur be obandimalad. Bipisaale, bemar igar-maidgi binsaed-nika dasurmalad.
MIC 3:10 Ablis-eogedgi Sión-neggwebur be sobsamalad igar-isgana-imaklegedba be Jerusalén-neggwebur sebukmalad.
MIC 3:11 Be-dummagan-negsemaladi, dule-baiganse-manigi-baklegar igar nabomalad. Be-dule-irwa-Bab-Jehováʼse-gormaladi, manigi-bennuklegar dule-odurdakmalad, degi, be-Bab-Jehová-gayaburba-barsogmaladi, manigi-bennuklegar dulega sunmakmalad, aka bur Bab-Jehováʼga weyob sogdedamalad: “¿Ar Bab-Jehováʼde anmarba gudisursi? Degisoggu, anmar akar-guosulid.”
MIC 3:12 A-ulale, bemar-nukine Sión-neggwebur nainu-imuar-naidaedyob guoed. Jerusalén-neggwebur akwamarbi ganna-ganna-bubukwa guoed. Bab-Jehováʼse-goled-neg-e-yala, gannar sapurbi moodo naguoed.
MIC 4:1 Ibagan-bergued-mosale, Bab-Jehováʼse-goled-neg-yala bur yala-biriginedga guoed, yala-mulluganba bur nuga-nika guoed. Dulemar-yar-baid-baidgi-bukmalad bela ase nonimaloed.
MIC 4:2 Dule-yar-baid-baidgi-bukmalad-bukidar-nonikoedi, sognonimaloed: “Dagmar, anmar Bab-Jehová-yalase nakwenamar, Jacob-e-Bab-Dummadse-goled-negse anmar namar. Bab-Dummad, e-sunnad, e-igar-maidba anmar-odurdakoed, degi, anmar e-igarba nanadii gumaloed.” Ar ade, Sión-yalagi Bab-Dummad-Igar-Maid-odurdakleged danikid, Jerusalén-neggweburgi Bab-Jehová-gayaburba ainidagoed.
MIC 4:3 Bab-Dummad, dulemar-yar-baid-baid-abargi dulemarga igar-nabogoed, neggwebur-gandikmalad-bukibga, degi, dikasurmaladga igar-nabogega guoed. E-es-suidmar napa-imuedga gudoed, e-ila-swiswidikmalad es-dopegwadga gudoed. Dule-yar-baid-baidginmalad, bar abin-abin urwosurmalad. Bila-onogega, bar guagwar-gudii guosurmalad.
MIC 4:4 Bela dulemar bogidik e-uva-dubmar-urba-bukwa gumaloed, degi, bogidik e-higuera-sapi-urba-bukwa gumaloed, dule-bamaladi, gwen amar-ogwayosulid, ar ade, deyobi, Bab-Jehová-Bela-Gangued-Nikad sogsad.
MIC 4:5 Ar bela dulemar e-bab-dummagan-nug ogannomalale, akarsulid, ar anmardi, anmar-Bab-Dummad-Jehová-Bela-Gangued-Nikad-e-nugbi odummodii guoed.
MIC 4:6 Bab-Jehová weyob sogded: “A-ibagangine, dulemar-nailikguarmalad nuekwa an urboed. Dulemar-yar-baid-baidse-mimilesmalad bulakwaa an oambikuoed, degi, sabsur-imakledimalad nuekwa an oambikuoed.
MIC 4:7 Dulemar-nailikguarmalad napi besmaloed. Amarde, neggweburga an imakoed. Dulemar-yar-baid-baidse-mimilesmaladgi, dulamar-bela-bela-gangued-nikadga an imakoed. Ani Bab-Jehová ega Sión-yalagi yar-seoed, degisadegu yar-semai guoed.
MIC 4:8 Sión-yala, Jerusalén-neggweburgi be siid, neg-matusulid-nakulegedga be gunonikid. Be epennegwadyobi, gannar gangued-nika be guoed, Jerusalén, epenne be negsesadyobi, gannar be negseoed.”
MIC 4:9 Emide, Jerusalén, ¿ibiga be binnasuli gole? ¿Ar be, rey satesi? ¿Ibiga begi naibid-dummad noniki? ¿Ar bega-binsaed-uked burgwissi?
MIC 4:10 Sión-dulemar, ome-ugakgunaidaedyob, be binnasuli gole, be binnasuli akiginne. Ar be-neggweburgi be nooed, magabali gaamakdii be guoed. Babilonia-yalase be naoed. Geb agine, be ollorgunonikoed, Bab-Jehová be-isdarmaladgine be-onogoed.
MIC 4:11 Emigindi, dulemar-yar-baid-baidgi-bukwad-bukidar begi-gwisguega atosmalad. Weyob sogmalad: “Sión-yala-ibe anmar ibmar sunae. ¡Bitigi, Sión-yala galakusa an daksamalana yeerbanye!”
MIC 4:12 Degi-inigwele, we-dulemar Bab-Jehová-e-binsanaidi, degi, e-ibmar-imakbiedi wissurmalad. Ar wemar wissurmalad, Bab-Jehová oros-dugmaklegedyobi e-saboleged-neggi e-urbemaloed.
MIC 4:13 Bab-Jehová sogdebalid: “Sión-dulemar, ¡ogusmar! Oros-omukueyob be dulemar imaknamar. Ar ani an moli-bebe-esgorogi-sobaledyobi gargangued an bega ukoed. Moli-e-nag-goonasi-esgoro-gordikidgi-sobaledyobi, an bega gargangued ukbaloed. Adi, bukidar neggwebur-bamalad napabi-nai be imakegar, degi, bela e-ibmar-nuegan be ei subaligar. Geb agine, a-ibmarmar anga be ukoed. Ani an Bab-Jehová Napneg-E-Dummadga gued.”
MIC 5:1 Jerusalén-dorgan, be-sorda-bila-onomalad guagwar be urbemar. Ar ade, anmar-isdarmalad bela anmar-ebiris bukmalad. Israel-dulemar-e-dummad-negsemaidi, sabsur-wiolegoed.
MIC 5:2 Bab-Jehová sogdebalid: “Belén-Efrata, ar bedi Judá-yargi-neggweburmar-bukwadba bur bipigwadid. Begine, dule-Israel-yala-seoed nodagoed. We-dulede, amba yoo-napaneg-nague bato gudibinned.”
MIC 5:3 A-ulale, Bab-Dummad, omegwa-goe-baknonikoedse be-isdarmaladga be-urmakmaloed. Geb degine, Israel-dulemar-yar-baid-baidgi-napi-besmaladi, Israel-dulemar-baiganbo bular bukunonikoed.
MIC 5:4 Geb a-dule Bab-Jehová-e-ganguedba, e-Bab-Dummad-Jehová-e-nug-gandikidba, e-dulemar-idugoed. Dulemar, dobedsuli gudii gumaloed, ar ade, a-dule bela napaneg-naid seoed.
MIC 5:5 Ar a-dule neg-bogidikid senonikoed. Ar Asiria-dulemar anmar-yar-subiguarmalale, anmar-neg-gandikmalad-bibisbiguarmalale, a-dule, anmar-bendaknonikoed. E-abin e-gugle (7) dummagan barmidoed, degi, e-baabak (8) neggwebur-sapin-dummagan barmidabaloed.
MIC 5:6 Wemala, gandikidba dadsaila-Nimrod-yala Asiriaʼye-nugad semai gumaloed, Asiria-dulemar anmar-yar subiguarmalale, degi, anmar-yar-abingunanaidgi dogbiguarmalale, a-dule, anmar-bendakoed.
MIC 5:7 Igi Bab-Jehová wakudaryala boo-bomiardae, degi, igi gagangi dii-owiardabali, debayobi, Jacob-wagan-napi-besmaladi, neggwebur-bamalad-abargine gudii gumaloed. Gaganmar gwen dule-eoged abdakdasulid deyobi, gumaloed.
MIC 5:8 Igi achumigur-nono-wawaad, ibdurgan-sapurbarmalad-imbagi gudidae, debayobi, Jacob-wagan-napi-besmaladi gumaloed. Igi achumigur-senigwad sibad-wawaad-bukwadgi-gudiidgi, sibad-wawaad-gasadae, gwen-odulodasuli, debayobi, Jacob-wagan neggwebur-bamalad-imbagine gudigumaloed.
MIC 5:9 Bab-Jehová, bee be, be-isdarmaladgi gwichiguoed, bela be-isdarmalad be obelogoed.
MIC 5:10 Bab-Jehová weyob Israel-dulemarga sogded: “A-ibagangine, an be-molimar ogilogoed, degi, be-moli-ur-bila-onomalad an obelogoed.
MIC 5:11 An bela be-neggweburmar obelogoed, degi, be-neg-gandikmalad bela an obelogoed.
MIC 5:12 Bela dulemar ina-isgana-imakmalad an obelogoed, degi, bar be nergan-nika guosurmalad.
MIC 5:13 An bela be-bab-dummadyob-imaklemalad obelogoed, degi, akwa-dummagan-islidikmalad an bela obelobaloed. Bipisaale, be-ibmar-sobsamalad-asabin bar sindigar be sigosurmalad.
MIC 5:14 Be-bab-bundor-Asera-e-wilub-gwismalad an bemar-ibe ungoed, degi, bela be-neggweburmar an obelogoed.
MIC 5:15 Dule-yar-baid-baidgi-bukmalad an-sogedba-dasurmalad ise-urwedgi, degi, sae-itogedgine, an buged imakoed.”
MIC 6:1 Israel-dulemar, Bab-Jehová-ibmar-sogedi be nue itomar: “Be gwichigumar. Be boni-nikagudiid yarmar-asabin be sognamar. Yar-mullugana be-itogega be imakmar.”
MIC 6:2 Yalamar, Bab-Jehová-urwed be itomar, napa-e-saila-gandikmalad, nue be bogimakar itomar, Bab-Jehová, e-dulemarga igar itosokalid, Israel-dulemargi gwisgusokalid.
MIC 6:3 Bab-Jehová sogded: “An-dulamar, ¿igi an bemar-imaksa? Be anga-sogmala, ¿ibigi an begi nosa?
MIC 6:4 Ar ani an Egipto-yalagi bemar-onosadid, maigagudiid-yalagi an bemar-ollor-imaksadid. Ani an bemarga Moisés, Aarón, María, barmisgusadid, adi, amar bemar-idumalagar.
MIC 6:5 An-dulamar, be-ebinsamala, Moab-dulemar-e-rey-Balac bemar-wiogega bemar-idu igar amisgusanad. Beor-machi-Balaam, igi Balac-abin sogsagusa, a be nue-ebinsamala. Deginbali, Sitimʼye-neg-nugad-akale, Gilgal-neg-nugadse-be-nonigusmaladi, be ebinsabali. Magar be an-dakmala, ani an, Bab-Jehová bemar-onosadid.”
MIC 6:6 Emide be sogmalad: “Anmarde, ¿igi Bab-Jehová-walikaa gumalosunna? ¿Igi anmar Bab-Dummad-Bur-Birigined-asabin sindigar sigmalosunna? ¿Moli-bebe-nikad-birgagwenad-ogumakar-ukleged, an ega ukega sedoe?
MIC 6:7 An sibad-wawaad-machered miliba (1000) Bab-Jehováʼga uker, Bab-Jehová ¿yeer itogoe? Olivo-gwallu bute-miliambe (10,000) an ega uker, ¿yeer itogoe? An ibmar-isgana-imaksad-ular, ¿an-machi-sailagined an ukoe? An-machi-sunnad, ¿an-isgued-ular, an ukoe?”
MIC 6:8 Ar Bab-Jehová bato bega sogsad ibu ibmar-nuedi. Bab-Jehová be-daed-abemaidi, bato bega sogsad: Igar-napiragwad-imaked be-abemaid, dule-wiledaked be-abemaid, e-asabin gwage-eikwadaed be-abemaid.
MIC 6:9 Jerusalén-dulemar, Bab-Jehová-ibmar-soged nue be itomar: Dule Bab-Dummad-dobee-nanadiile, a-dule, dule-binsaed-ibedid. Sabsur-odurdaklenaid nue be itomala. Bega dule-odurdakleged-barmialidi, nue be itomala.
MIC 6:10 “¡Dule-isganamar! Ande be-ibmar-nuegan ibmar-isgana-imakedba-amisad, ¿baisurdakode? Degi, ande be ibmar-wilubsamalad-isgana, ¿baisurdakode? ¡Adi surbali!
MIC 6:11 Ar ande, dule ibmar-wilubsaed-nuegansulid-ebudiid ¿igi yeer dakosunna? Degi, ibmar-wilubdaked-ebudiid, ¿an igi yeer dakosunna? ¡Geg an yeer daked!
MIC 6:12 Dule-mani-ibegan, sabsur dule-imakedid. Bela neggweburginmalad, gakansilimalad. Na e-ibmar-sogedi bela gakansaedbiid.
MIC 6:13 Emisgine, ani an sabsur-be-imakmaloed, bemar-isgued-ular, an bemar-obelogoed.
MIC 6:14 Na be mas-gunmalo-inigwele, gwen be immelegosurmalad, amba ukudmaada be gudii gumaloed. Be ibmar-gwag weemaloe-inigwele, be-ibe berguoed. Ar be ibmar-soggwensaar-gaoedi, ani an bila-onolegedgi be-ibe obelogoed.
MIC 6:15 Be ibmar-digmaloedi, gwen be weosurmalad, degi, be olivo-gwallu-egurmaloedi, gwen be ebugosurmalad. Vino-onogega uva-nis-egurusadi, be gobosurmarbalid.
MIC 6:16 ”Rey-Omri-igar-mesisadba be nanadimalad, bela Rey-Acab-e-wagan-ibmar-isgana-imaksadba be ibmar-imakdimalad. Amar-ibmar-imaksadyobi be nanadiid. A-ulale, an bemar-obeloged imakoed. Be-dulemar bingedar-itogega an saoed. Dulemar-begi-dodoedi, an imakoed.”
MIC 7:1 Miqueas sogded: “¡An duledar-wiles! Ibmar-gwag-yorgi-weleged-abin an nonisulid. Uva-solagan-weleged-abin an nonisulid. Degisoggu, uva-san-dukgwenad bar an daksulid, degi, an higuera-san-gunnegala gwen an daksurbalid.
MIC 7:2 Dule-wiledakmalad bela neggweburgi obelolesad, we-yargi dule-innikimalad bergusad. Bela dule-oburgwedgi-binsadimaladi, na muchub-muchub yamodidimalad.
MIC 7:3 Ibmar-isgana-imakedgi dule gwen egi obinsulid. Dule-dummagan-negsemamaid, degi, dule-igar-nabomalad, dule-bamaladse manigi-baklegar, igar nabomalad. Dule-gandikmalad e-itolegedba ibmar egismalad, e-ibmar-abegedba ega ukdamalad.
MIC 7:4 A-dulemar-abargi wis-dule-nuegan-gudimaladdina, bur bule sapi-ikobiidyob gued. A-dulemar-abargi dule-bur-innikigwaddina, bur bule ikomaryob gued. Suli-suli-itoleged-e-ibadi begi danikid, Bab-gayaburba-barsogmalad bega-ibmar-sogsadyobi, sabsur-odurdakleged-iba bato bega warmaksad.
MIC 7:5 Degisoggu, melle be-ai-ibmar-soged be itogo, degi, melle dule-baid-bega-ibmar-soged be itogo. Be-ome-ebo be sunmakalile, nue-itoakwaa be sunmako.
MIC 7:6 Ar ade, masmala, e-sergangi binsaedsuli guded, bunamala, nangangi obited, balamar, sak-omegangi obited, degi, e-isdarmaladi, e-neguyaginmalad nanaed.
MIC 7:7 Degi-inigwele, ani Miqueas, Bab-Jehováʼgi an bensulid, Bab-Dummad-an-abonogedi, an edarbedii guoed. An-Bab-Dummadi, an-itogoed.”
MIC 7:8 Miqueas weyob sogded: “An-isdarmalad-yar-baid-baidgi-bukmalad, mer be an-odurdaklegedgi weligwar itomala. Ar an galakus-inigwele, amba an gannar gwisguoed. An negsichidgi gudii-inigwele, ar Bab-Jehová neg-meegwadga anga gued.
MIC 7:9 Ar Bab-Jehováʼgi an isgusad, degisoggu, Bab-Dummad-anga-igar-nudakedse, degi, anga-igar-nabogedse an e-urwed itogoed. Geb Bab-Jehová, igar-nued anga oyogoed, degi, e-an-abonosadgi an werguoed.
MIC 7:10 An-isdarad anga sokardaed: ‘¿Bia be-Bab-Jehováʼde? A-dule, an-dakalile, bingedar itodoed.’ An-sunnagwad an-ibya-nuki e-wilegoed an dakoed. A-dule, neg-imbaba-olligi-annalegedyobi guoed.
MIC 7:11 ”Jerusalén, gannar be-galu-matusurmalad-sobledele, be-yar-abingunanaid nasgudoed.
MIC 7:12 A-ibagangine, dule-bamalad, Asiria-yala-akale, Egipto-yalase-dulemar-bukwad, bese nonimaloed. Nilo-diwar-akale, Éufrates-diwarse-dulemar-bukwad, bese nonimaloed. Demarsik-bukmalad-akale, demar-baidsik-bukmaladse-dulemar-bukwad, bese nonimaloed. Deginbali, yar-dummagansik-bukmalad-akale, yar-dummagan-baidsik-bukmaladse-dulemar-bukwad, bela bese nonimaloed.
MIC 7:13 Dule-isgusmalad-ular, we-napneg olloo naguoed, deyobi, neg naguoed.”
MIC 7:14 Bab-Jehová, be-dulamar be nue ako, be-mimmigan walagwengi sapur-nuedgi-bukmalad be nue akwedii be guo. Epennegwadyobi be Basán-yalase, degi, Galaad-yalase be sede.
MIC 7:15 Egipto-yalagi Israel-dulemar-onosgu, ibmar-dakledisurmalad-oyosayobi, be oyoge.
MIC 7:16 Dulemar-yar-baid-baidgi-bukmaladi, be-ibmar-gegerdaklemalad dakmaloed. Be-gandikid-dakoedba bingedar itodmaloed, geger-dakedba gaya-gadmaloed, degi, uaya-atidmaloed.
MIC 7:17 Igi-naibe napagi yaarmakar-nanae, deyobi, nanamaloed. Ibdula-unimalad-unimakedyob gumaloed. E-dukued-neggi dobed-abalagi nodamaloed, be-asabin dobedgi ainidamaloed. Anmar-Bab-Dummad-Jehová, bese, gannar we-dulemar nonimaloed.
MIC 7:18 Bab-Dummad, ¿ar doa beyobid e-mimmigan-besmaladga isgusad-elied gudii? ¿Doa beyobid ibmar-isgana-imaksad bela ei-ieged gudii? Ar be degisadegu, urwedii guosulid, ar ade, bur bule anmar-sabguedgi be binsaed.
MIC 7:19 Gannar wile be anmar-dake. Anmar-isgued be osuloge, anmar-isguedgi mer bar be binsae.
MIC 7:20 Jacob-waganga, be-ibmar-inniki-imaked, be oyoge, Abraham-waganga, dule-ise-wiledaked be oyoge. Epennegwa anmar-dadganga ise-sogar-imaksayobi, be ibmar imake.
NAH 1:1 Nahúm-negburgan-daksad-e-garda. Nahúmʼde Elcos-neggweburgined. We-gardagi Bab-Jehová Nínive-neggweburgi neg-guoed sogsad.
NAH 1:2 Bab-Jehová, unnila dule-ebarbi-nanabi abeged, buged-mai dule-imakedbalid. Bab-Jehová dule-buged-mai-imakedid, e-isdarmaladse urwedid. Bab-Jehová, dule-egi-yoledimalad buged-mai imaked, e-isdarmalad ese sabsur-odurdakleged.
NAH 1:3 Bab-Jehová wissur gwae-gwae urwed. Bab-Jehová bela-bela gangued nikad. Bab-Jehová dule-ibmar-oakalosad sabsur-odurdakedsegad. Bab-Jehová burwa-oored-abargi, burwa-dummad-abargi gudidaed, mogir Bab-Jehová-e-nanaedba ukub-ainakweyobi gued.
NAH 1:4 Bab-Jehová demarga ibmar binnasur sogdele, demar dinnaa naddaed. Bela diwarmar dinnaa guega imakbalid. Basán-yar, degi, Carmelo-yar bela dinguded, Líbano-yar-dutumar bela dingudbalid.
NAH 1:5 Bab-Jehová-asabin yarmar giglimakdedaed, yar-mullugan babatiddaed. Bab-Jehová-asabin napneg giglimakdedaed, Bab-Jehová-asabin napneg-dirbir-naid, degi, bela egi bukmalad wawanmakdedaed.
NAH 1:6 Bab-Jehová-e-urwed-abin, ¿doa gwisguoe? Bab-Jehová-e-sae-itoged-abin, ¿doa gannarbaa gwisguoe? Bab-Jehová-e-urwedi, soo-gwabunye-gwichidyobi gued, e-asabin akwasailagan bela ese ubigwar gued.
NAH 1:7 Bab-Jehová, duledar-nuedid, suli-suli-itogedgine, anmar-odukuedid. Dule-egi-bensurmalad-bendakedid.
NAH 1:8 Bab-Jehová Nínive-neggwebur diwar-dummad-noedbali obelogoed. Bab-Jehová amba negsichidgine e-isdarmalad-baleginnoed.
NAH 1:9 Bab-Jehováʼgi-gwisguega, ¿ibiga bemar igar-isgana aminanai? Bab-Jehová bela bemar-giir imakoed, bemar-wiledakega bar iba-baid nasikosulid.
NAH 1:10 Bemar gagan-dinnagwadyobi bergumaloed, ikomar-dinnagwadyobi bergumaloed, Dule vino-doggus-gobsadba bar-itodisurdaedyobi bemar guoed.
NAH 1:11 Be, Nínive-neggwebur, begi dule-binsaed-uked-isgana gwalulesad. A-dule, Bab-Jehováʼgi igar-isgana amied.
NAH 1:12 Bab-Jehová weyob soged: “Asiria-dulemar nollosurgumala-inigwele, bergumaloed. Asiria-dulemar dula-bukidar-inigwele, burgwemaloed. Bedi, Judá-dulemar, an sabsuli-be-wiosmala-inigwele, bar deyobi, an be-wiogosurmalad.
NAH 1:13 Dulemar-sabsur-be-imakdimaladgi an be-ollor-imakoed, bar be maiga-gudii guosurmalad.”
NAH 1:14 Bemardi, Nínive-dorgan, Bab-Jehová bemarga igar-mesisad: “Mimmigan bar be nikuosurmarye, adi, be-nug mer bar degisadegu obarledii guegarye. Be-bab-dummadse-goled-neggi ibmar-wagar-sobarmar-bukwad, esgoro-gordikidgi ibmar-bab-dummadyob-sobar-bukwad, an obelogoed. Ar be dule-isganasoggu, an bega neg-uan guagwar sioed.”
NAH 1:15 ¡Be dakmala! Dule-gayaburba-nuegan-berbegedi, dule neg-bogidik-naguoedgi-sunmakedi, bato yalaganba danikid. Judá-dulemar, be-iba-onomaladgi, be wergumala, Bab-Jehováʼga be ibmar-ukoye-sogsad be uke. Ar dule-isganamar bar be-yarse ubogosurmalad, ar bela Bab-Jehováʼse giir gusmalad.
NAH 2:1 Nínive-dorgan, bemargi dule-ibmar-obeloged gwichigudanikid, be-neggandikidgi, be nakulegwichi imake. Be-igarmarba be nakulemala, es-suid be guagwar gamala, bela bemar na niga ogannomala. Danale be ambikumala, adi, na be gargangued nikumalagar.
NAH 2:2 Ar Bab-Jehová Jacob-dulemar-e-yeerdakleged gannar obinoged. Israel-dulemar-e-yeerdakleged gannar obinoged. Ar dule-atursamalad e-ibe ibmar susmalanad, bela e-ibe uva-dub obelosmalanad.
NAH 2:3 E-sorda-bila-onomalad-bulegan-e-sigu-abgamalad, ginnitibi magaled, sordamar-bila-onomalad mor-ginnigan yoimalad. E-ur-napaginmalad guagwar bila-onogega-nanaidi, soo-gaeyobi dakarmaknanaid. Sorda-bila-onomalad e-eswarmar-gani-gani, sakwa bipinmakdanimalad.
NAH 2:4 E-ur-napaginmalad neg-imbaba gwae-gwae oabarmakdemalad, binnasuli dulemar-danar-bukumaladgi iirmakdidimalad. Acha-gwallu-gaeyobi urmar daklenanaed, mar-gaeyobi dakar-dakar gamalad.
NAH 2:5 Nínive-e-rey e-sordagan-bila-onomalad-buleganse goled, we-sordagan duurmakdegua, na muchub-muchub yolenanai gusad. Egi-ubodanimalad-abin-bukuega, galu-matusulidsik abarmakdemalad,
NAH 2:6 degi-inigwele, yawagak-dummagan-diwar-abgamaid argaded, reyneg aimukuded.
NAH 2:7 Rey-ome gales selemaid, omegan-ega-arbamaladi nuu-akiginmaiyobi selemamaid, nue-nunmak-itogedbali bonadapmalad.
NAH 2:8 Nínive-neggwebur dii-sied-mamarisadyob gued, e-diimar ariomaid. Ese gornanaid: “¡Mer be abarmakmala! ¡Be gannar dagmala!” Ar dule-wargwensaar gwen gannar aibirsulid.
NAH 2:9 ¡Mani be sumala! ¡Or be atursamala! Nínive-neggwebur e-ibmar-nuegan yaisulid, manimar bukidar nikad, ibmar-yeerdaklemalad bukidar nikbalid.
NAH 2:10 Nínive-neggwebur bergus siid, dule-sate siid, napabi-nai nagusad. Dobedbali dulemar nig-argwatemalad, e-yokormar nollomakded. Bela e-abagan wawanmakded, e-wagarmar bela sibudiki daklenaded.
NAH 2:11 Achumigur-nono-wawaad-e-neg, ¿bia nade? Achumigur-e-mimmigan-e-neg, ¿bia nade? A-neggine, achumigur-machered, e-ome, degi, e-mimmigan, dule-e-ogwayed-sate, dobsuli mamaidaenad.
NAH 2:12 Achumigur-machered na e-mimmiganga san-goa-goa-imakdidaedi, ¿bia nade? Na e-omeganga ibdurgan-oburgwedaedi, ¿bia nade? Na e-megedgi ibdurgan-oburgwisad-urbedidaedi, ¿bia nade? Na e-neggi san-sabodidaedi, ¿bia nade?
NAH 2:13 Bab-Jehová Bela-Gangued-Nikad weyob soged: “Emigindi, an bemargi gwisguega danikid. Be-urmar-napagined-bila-onomalad burubi-sii an imakoed, be-achumigur-burwigana an es-suidgi oburgoed. Ibmar-atursamaladi be-yargi an osulogoed, be-dule-gayaburba-barsogmalad bar bipisaale itolegosulid.”
NAH 3:1 Neggwebur-dulemar-ablis-eogedbi-siid, be ¡duledar-wiles! Bela begi neg-gakansalegedbi naid, begi bela-bela ibmar-atursalegedbi naid, ibmar-atursaedi gwen be indaksulid. Be deyob gusiidi, be ¡duledar-wiles!
NAH 3:2 Molidub-suid-goledi bato itoleged. Ur-napaginmalad-e-nagmar-bipirmaknaid-goled bato itoleged. Moli-nag-goledi bato itoleged, bila-onomalad-ur-napaginmalad e-gollomakedi bato itoleged.
NAH 3:3 Sorda-moli-birgi-sii-bila-onomalad-danimalad itoleged. Es-suid-e-dakarmaked mag dakleged, eswar-dakar-dakar-gaed mag dakleged. Dulemar-burgwarmaladi yaisulid. Muimar odunnumakded, muimar baid-baidsik omileded, dulemar a-muimargi yolenanaid.
NAH 3:4 Ar ome-gambasaed macherganga yamo-yamo-gudidaed-ular, deyobi neg-gunonikid. We-omede, dule-binsaed-gaed-buledid. E-gambanuchu-saedgi dulemar-yardaksad, e-inamar-isgana-imakedgi dulemar-yardaksabalid.
NAH 3:5 Bab-Jehová-Bela-Gangued-Nikad weyob soged: “¡An bemargi gwisguega danikid! Be-sabure wagarse an be-ibe onakoed, adi, dulemar-yar-baid-baidgi-bukmalad uka-swiri be-dakmalaga, dule-yar-dummaganginmalad be-binge-itoged dakmalagar.
NAH 3:6 Begine an ibmar-isgana mioed, an be-nug oichogoed, dulemar-abargi-oyolegega an be-imakoed.
NAH 3:7 Bela dule-be-dakmaloedi begi bangudoed. Sogdemaloed: ‘Nínive-neggwebur bergusye. ¿Doa eba wile itogoe? ¿Bia dule-wile-e-daked an ega amioe?’ ”
NAH 3:8 ¿Ar bede Tebas-neggweburba bur-nuedsi? Ar Tebas-neggweburde diimar-abargi siinad, Nilo-diwar-sukamakmaid-walik siinad, Demar e-napa-odinnogaledyob guenad, diimar e-galu-matusulidyob guenad.
NAH 3:9 Etiopía-yar, Egipto-yar, Tebas-neggwebur-bendaksimalanad, bela-bela gangued nikamalanad. Fut-yar, Libia-yar, Tebasʼba naimalanad.
NAH 3:10 Degi-inigwele, Tebas-dulemar yar-baidse ononnolesmalad, yar-baidse gales-selesmalad. E-mimmigan igar-abingunanaidgi sabsur-omukulenai gusmalad. E-dule-nuga-nikamalad ibmarba-wilubdakar mimilesgusmalad, e-dule-dummagan-negsediid esgoro-dubgi edilles gusmalad.
NAH 3:11 Be, Nínive-neggwebur, be-omumsamarmogoed, neg-itosuli be gudii guoed. Be-isdarmalad-ulale, neg-dukued amidii be gumogoed.
NAH 3:12 Bela be-neg-gandikmaladi higuera-sapi-san-gordik-siiyobi gued, ar dule osiamakele, dule-gunnega-gwichid-e-gaya-yaba argwaned.
NAH 3:13 Be dake, be-isdarmaladbo be bila-ononaidgi, be-sorda-bila-onomalad omeganyobi damalad. Be-neggwebur-e-yawagakmar argasii guoed, ar be-yawagakgi-suar-biir-biir-megmalad soose gummakoed.
NAH 3:14 Nínive-neggwebur, be-isdarmalad be-neggwebur-ebiris-ambikunonimaloed-iduar, dii be enomar, be-neg-gandikmalad be ogannomala. Napa-olli-ollid-birgi be gwisgue, napsa-ginnid-birgi be annae, akwa-napsa-ginnidgi-sobaled be sobe.
NAH 3:15 Degi-inigwele, soogi be burgwemaloed, es-suidgi be girgumaloed, be-isdarmalad sesmaryobi giir be-imakmaloed. Ses-burwiganayobi be mergumai gumala, sesmaryobi be gwalulemai gumala.
NAH 3:16 Be-dula ibmar-ukedgi-arbamaladi, bur bule nibneggi-niisgwamar-nanaidba merguded.
NAH 3:17 Be-dummagan seseyobi gumalad, be-sordamar-e-dummagan ibmar-gukumalad-gar-satedyobi gumalad. We-ibmarmar neg-dambegwadgine galu-matusurmaladgi achaa nagudamalad. Ar dad-nakwialirdi gukuddamalad, bar daklegosulid, dule wissulid bia naddamala.
NAH 3:18 Asiria-e-Rey, dule-bega-negdakmamaid bela-bela gabmamaid, be-sordamar-ise-welegar-imaklesmalad gabidmalad. Be-dulamar yala-imbaganba aisakis gudidiid, amar-onmakega dule sated.
NAH 3:19 Be-nailikgusadi gege nudakleged, be-yaa-siid-nudakega ina sated. Dulemar deyob-be-gusadi be-wisgumaloedi, bega yeer-itomaloed. Ar ade, dulemar-yar-baid-baidgi-bukmalad-bukidara be sabsur-imaksa gusad.
HAB 1:1 Bab-Dummad-gayaburba-barsoged-Habacuc negburgan-daksagua, we-gayaburba ega soglesad.
HAB 1:2 Bab-Jehováʼye, ¿sanagwadse an bese bendakleged egisnaiguoe? Emide, gwen be an-itosulid. ¿Sanagwadse dulemar-sabsur-imakledimalad-ular, an bese gornaiguoe? Emide, gwen be anmar-bendaksulid.
HAB 1:3 ¿Ibigala, igar-innikwad-imaklesulid-dakega be an-imake? ¿Ibiga ibmar-isgana-imaklenaid-dakega be an-imake? Unnila neg-gagalenaidbi, degi, dule-sabsur-imaklegedbi an daked. Urwelegedbi, degi, na abin-abin-imakmaladbi neg-naid.
HAB 1:4 Agala, igar-maidba ibmar-imaklesulid, igar-innikigwad-imakleged bar imaklesulid. Dule-isgana dule-nued-balegindiid, dulemarga igar-innikigwadba igar nabolesulid.
HAB 1:5 Bab-Jehová sogded: “Dule-yar-baid-baidgi-bukwamalad be dakmala. Nuekwaa be dakmala, geger-dakbukwa be gumala. We-ibagangi ibmar-gegerdaklemalad an imaksokalid, amba dule bemarga a-ibmar-imaklegoed-odulogele, bemar amba bengumaloed.
HAB 1:6 Caldea-dulemar an bemargi bila-onodagega imaknaid, we-dulemar, dule-isgana-nanaed, binna-binnasuli ibmar-imakmaladid. Dule-baid-ibe napa-suega bela napneg-ebirdii damalad.
HAB 1:7 We-dulemar dule-buleganad, dule-ogwayemaladid, na e-sogedba igar-innikigwad-imakleged imakmaladid. Na e-nugbi-dummarbagued amidimaladid.
HAB 1:8 E-molimar, achu-barbadba bur bule abarmakmalad, achu-sapurba bur bule ursirmalad. E-sordamar-moli-birgi-bila-onomalad sabsur-abarmakmalad, we-sordamar dikasur danimalad. Igi sulubagi e-mas-daksale, binnasuli egi melleardae, deyobi dulemargi mellear damalad.
HAB 1:9 We-dulemar unnila emar-sabsur-imakega danimalad, e-nadapmaladba neg-dobedbi nasiknadapmalad. Ukub-weeyobi dulemar-gamalad.
HAB 1:10 Reymar-mamaidgi burgunagus damalad, sapin-dummagan-negsemamaidgi dodonagus damarbalid. Neggwebur-galu-matusur-nikamaladga allenana damalad, ar ade, a-neggweburmargi-dogegala arsanyob napamar sobmalad.
HAB 1:11 We-dulemar burwa-dummadyobi bela ese ibmar oitoledaed. E-gangued e-bab-dummadga imakdimalad. Agi e-isgued siid.”
HAB 1:12 Be, Bab-Jehová, bato be negasaila-akale gudiid. Be, an-Bab-Dummad-isligwaled, be degisadegu dula maid. Be, Bab-Jehová, igar-innikigwad-imakmalaga be Babilonia-dorgan urbisad. Be, akwasaila-dukuedyob anmarga gued. Anmar-sabsur-odurdaked-oyogega be Babilonia-dorgan urbisad.
HAB 1:13 Be, bela-bela dule-swilidikgusoggu, ibmar-isgana be abesulid. Dule-sabsur-imakleged be yeer daksurbalid, degite, ¿ibiga be dule-isganamar baisur-daksunna? Dule-isganamar dule-nuegan-sabsur-imaknaid be dakmaidgi, ¿ibiga be gayamakar maisunna?
HAB 1:14 Uamar-e-idued-satedyobi be dulemar-imaksad, ibmar-unimalad-e-idued-satedyob be dulemar-imaksad.
HAB 1:15 A-ulale, Babilonia-dorgan achwergi-uasoeyobi dulemar-gamalad. E-sakigi ua-galesar-ebipidamaladyobi dulemar-ebipimalad. E-saki-ollo-ollogwad-imbaba ua-galesnanaid-weedyobi dulemar-wemalad, degidba, yeer itomalad, weligwar itomalad.
HAB 1:16 A-ulale, Babilonia-dorgan na e-sakiga bab-dummadyobi ega ibmar-ukleged ukmalad. E-sakiga ina-wawadikid ogumakmalad. Ar e-saki-nukad na e-masgunned bukidar nikad, e-mas yeer gullebalid.
HAB 1:17 Ar deyobi, Babilonia-dorgan, dulemar-wiogega, ¿na e-saki-midii gumaloe? ¿Dulemar-gwen-wiledaksuli gindakdii gumaloe?
HAB 2:1 Habacuc sogdebalid: An nakuledii imakoed, aila-birgi an edarbegwichi imakoed. Bab-Jehová anga-ibmar-sogdagoed an nue-itoagwar itogoed, an ega ibmar-sogsad igi-an-abin-imakdagodibe.
HAB 2:2 Bab-Jehová an-abin-imaksad: “Be negburgan-daknaid narmake, urgogi magar-daklege, be nuekwaa narmako, adi, nabir baisursunna absolegegar.
HAB 2:3 Ar negburgan-oyolenaidi, na e-iba-sogedba gunonikoed, bela a-ibmarmar-gunadapid, bela guedsegad. Ar we-ibmar gwen emiskwaa guosur-inigwele, be abitogo, ar bela guedsegad.
HAB 2:4 ”Dule-isgana e-gwagegi innikidasulid. Dule-gwage-swilidikiddi, Bab-Jehováʼgi-bensulidgi gudii guoed.
HAB 2:5 Napiragwa, ibmar-bukidar-nikuedi dulegi aibined. A-ulale, dule-na-san-dummarba-imakedi, undar-gudii guosulid. Ar a-dule, neg-uan-mui-dodaeyobi sulibinsa ibmarbina itoged. Burgwedyobi bogigudisulid, napi-ibmar abedaed. Bela yarmar-nanaid ese sulemaid, bela dulemar ese galemamaid.”
HAB 2:6 Bab-Jehová sogdebalid: “Dulemar-galesmaladi, yoedsega, dulemar-e-gasmaladgi burgunanai gumaloed, galagwensuli egi sunmaknanai gumaloed. Weyobi ega namaknanai gumaloed: ‘Dule, emar-ibe-ibmar-suedba mani-ibedga-guedi, ¡duledar-wiles! Dule, emar-ibe ibmar-galemalad egadga-omelodimaladi, ¡duledar-wiles! ¿Sanagwadse be deyob-gudiid indakoe?’
HAB 2:7 Bese dulemar-mesagwar-imaklediid, ukiagwar begi gwisgudagoed. We-dulemar wawanmakega be-imaknonimaloed, sabsuli be-annik ibmar sunonimaloed.
HAB 2:8 Ar be yarmar-bamalad-ibe ibmar atur-imaksasoggu, yarmar-bamalad-bese-atursalessurmaladdi, be-ibe ibmar atursamarmogoed. Ar emar-ibe be wilub-obicha ablis-eosad, degi, we-yar-naidi be sabsur-imaksad, e-neggwebur be sabsur-imaksad, e-dulemar be sabsur-imaksabalid, a-ulale, deyobi be-imakmarmogoed.
HAB 2:9 ”Dule atursaale ibmar-ena na e-neg-siedi, ¡duledar-wiles! Ar na binsasanad, deyobi na e-neguya bendakoye, deyobi bar an wiledii guosurye.
HAB 2:10 ”Weyobi be binsaedba na be-neguya bingeguega imaksad. Bukidar be dulemar-ogilonai-gusadba, na be dukin obeloed amisad.
HAB 2:11 A-ulale, akwa-galumarse-bakale, degi, urgomar nagubirga-mamaid-bakale, begi aibitemaloed.
HAB 2:12 ”Dule emar-ibe-ablis-eogar neggwebur-sobed, ¡duledar-wiles! Dule-sabsur-imakedgi neggwebur-urbed, ¡duledar-wiles!
HAB 2:13 Ar ani Bab-Jehová-Bur-Gangued-Nikadi, dulemar-e-ibmar-imaked, ¿soogi-ogumaklegega igar mesissursi? Dulemar binsarsunna, ¿geggus-alamaknaiguega igar mesissursi?
HAB 2:14 Ar igi-dii demar-enarkwaa sigisdae, deyobi napnega Bab-Jehová-e-gargangued-yeerdakleged magar-dake guoed.
HAB 2:15 ”Dule e-ai-omumguedi, ¡duledar-wiles! Dule e-ai-uka-swana-dakega, vinoʼgi e-ai-omumguoedi, ¡duledar-wiles!
HAB 2:16 Degidba na be dukin be-nug oichosad, gwen be na be-nug odummossulid. Degisoggu, be vino gobmosunna, an na be Bab-Dummad-akudaked oyosunna. Bab-Jehová e-argan-nuedgi bingegued-nog-ganisiid gobega be-imake, be-nug-dummarba-nikad, bipii imakega imake.
HAB 2:17 Babilonia-dorgan, be Líbano-yar-sabsur-imaksagusad begi aibinoed. Be ibdurgan-ogilosgusad, dobguega be-imakoed. Ar be dulemar-ibe doggus ablis eosad, e-yar-naid be sabsur-imaksad, e-neggweburmar, degi, e-dulemar be sabsur-imaksad. A-ulale, be sabsur-odurdaklemogoed.
HAB 2:18 ”Duleyob-ibmar-sobaledi, ¿ibi-nuedga wis gue? Ibmar-nuedga gusuli. Nuchu-esgoro-diregwadgi-sobaledi, ¿ibi-nuedga wis gue? Unnila gakansaedginbi emar-odurdaked. Dule nuchu-gege-sunmaked-sobedi, unnila na e-arbaedginbi bensulid.
HAB 2:19 Dule suar-sobaledga sogdibe: ‘¡Atake!’ ¡We-dule, duledar-wiles! Dule akwa-sobaledga sogdibe: ‘¡Gwisgue!’ ¡We-dule, duledar-wiles! Ar we-ibmarmar amba bela or egi-ebiris-nai-inigwele, amba bela mani egi-ebiris-nai-inigwele, gege ibmargi be-odurdaked, ar burba sated, unnila uka-ollobi gued.
HAB 2:20 Ar Bab-Jehováʼdi na e-neg-islidikidgi maid. Bela dulemar Bab-Jehová-asabin gaya-bogidik gumala.”
HAB 3:1 Bab-Dummad-gayaburba-barsoged-Habacuc, Bab-Dummadse-goled. We-Bab-Dummadse-goledi, Sigionot-gar-goledba gorlegoed.
HAB 3:2 Bab-Jehová, be-nug-dummarba-gued an itosad, Bab-Jehová be-ibmar-imaksadi, be-dobekwaa-nanaega an-imaked. Bab-Jehováʼye, emi anmar-dulagudiidgi be gannar a-ibmarmar imake, be gannar a-ibmarmar oyoge. Bab-Jehováʼye, be uludele, be-dule-wiledaked mer be iego.
HAB 3:3 Bab-Dummad neg-Temánʼye-nugad-akale, danikid, Dule-Isligwaled yar-Paránʼye-nugad-akale, danikid. Bab-Dummad-e-gangued-yeerdakleged bela nibneg-gasad, bela dulemar-we-napneggi-bukwadi e-nug odummomalad.
HAB 3:4 E-dakarmakedi, mala-dakarmakmaiyobi gued. E-argangine malamar milemaid, agine, e-gargangued dukuar maid.
HAB 3:5 Bab-Dummad-daged-idu, bonigan-bulegan ainied. Bab-Dummad-sorbali, soo-ginnitibi danidaed.
HAB 3:6 Bab-Dummad gwisgunonikile, napaneg giglimakde daed. Dulemar-yar-baid-baidgi-bukwad-dakdele, dulemar wawanmakde daed. Bela yar-dummagan-dikasurgus-bubukwad malud daed, yar-senigana-sergan-bubukwad babatid daed, ar Bab-Dummad-igardi degisadeguad.
HAB 3:7 Cusán-dulemar-danar-danar-bukwadi, suli-suli-itobukwa an daksad. Madián-dulemar-bukwadi, bela-bela dobe-itobukwa an daksad.
HAB 3:8 Bab-Jehová, ¿diwarmarse be ulus gusa? ¿Suke-iirmakmaidse be urwemai gusa? Be-moli-birgi-sii be abarmakmaigua, be-ur-napagined-gege-galakuedgi be nakwisgua, ¿demarse be nue-urwemai gusa?
HAB 3:9 Be-warsi na be guagwar ganikid, be-saguyaba sigumar be enosad. Be napaneg-marisadgi dii-iirmakega imaksad.
HAB 3:10 Yarmar-bubukwad be-dakdedba wawanmakdemalad. Mogirmala, diidar-dummad owinonikid, muu-billi binnasuli uurmakded, demar-mullugana dunguded.
HAB 3:11 Be-mala-ibyemaidba, dad-ibeler geg gaed, be-mala-dakarmakmaidba nii geg noed.
HAB 3:12 Sae-itodiidba, napneggi be bipirmakdiid. Urwedgine, be dulemar-sabsur-imaked.
HAB 3:13 Be-dulamar-bendakegala, be noalid, na be dule-nug-imaksad-bendakegala, be noalid. Dule-isganamar-e-rey-nono, be maad imaksad, bela e-negsemaid e-ibe be obelosad.
HAB 3:14 E-sordamar-e-nono, be-eswargi be buudu imaksad, we-sordamar an-oaisakiega burwa-dummadyobi, angi yolenonikid. Dule-wileged dule-e-bendaked-satedba, igi dule egi yolenonidae, deyobi, we-sordamar bela-bela-yeer-itogedba angi yolenonikid.
HAB 3:15 Be-moli-birgi-sii, be demargi bipirmakdiid, demar-binnasuli-arwemamaid-birgi, be bipirmakdiid.
HAB 3:16 An deyob itosgua, bela an-gwage-ulubse an-ebusad, an be-gaya-itosgua, an-gakuli wawanmakded. Bela an-garmala gulleded, an-nagmar bela nollomakded. Degi-inigwele, andi binnalee, anmar-wionanaid-e-sabsur-odurdaklegoed-iba-nonikoedi, an edarbed.
HAB 3:17 Ar amba sapi-higuera sanmaksulile, uva-dubmar sanmaksurbalile, andi Bab-Jehováʼgi yeer itogoed, Bab-Dummad-an-abonogedgi, an weligwar itogoed. Amba olivo-sapi e-san nikusulile, amba nainumargi ibmar-gwag welesurbalile, andi Bab-Jehováʼgi yeer itogoed, Bab-Dummad-an-abonogedgi, an weligwar itogoed. Amba sibad-wawaadmar e-galugi bar bukwasulile, amba moli-bebe-nikad wargwensaale, e-galugi bar bukwasurbalile,
HAB 3:18 andi Bab-Jehováʼgi yeer itogoed, Bab-Dummad-an-abonogedgi, an weligwar itogoed.
HAB 3:19 Bab-Jehová-Bela-Gangued-Nikadi, an-ogannogedid. Goe-sapur-gwae-gwae-abarmakeyobi, an-imaked, nega-matusulidganba nanaega an-imaked. Gar-gormalad-dub-nikadba-namaklegega narmaklesad. Namakmalad-e-iduedga narmaklesad.
ZEP 1:1 We, Bab-Jehová-e-gayaburbad. Amón-machi-Josías, Judá-yargi-reyga-maiunni, Bab-Jehová we-gayaburba Cusi-machi-Sofoníasʼga sognonigusad. Sofoníasʼde Gedalías-wagwad, Amarías-wagwa-yokorginedid, degi, Ezequías-wagwa-daksikidid.
ZEP 1:2 Bab-Jehová soged: “We-napneggi bela ibmar-bukwadi, an obelogoed.
ZEP 1:3 Dulemar-bukwadi, ibdurgan-bukwadi, an obelogoed. Sikwimar-gukudimaladi, uamar-gudimaladi, an obelogoed. Bab-dummadyob-ibmar-imakledimalad, an obelogoed, dule-isganamar, an obelogoed. Dule-we-napneggi-gudiid, an obelogoed.” Bab-Jehová deyob soged.
ZEP 1:4 Bab-Jehová sogbalid: “Judá-yarginmalad an sabsur-odurdakoed, bela Jerusalénʼgi-gudimalad an sabsur-odurdakoed. Jerusalénʼgi ibmar-Baal-bab-dummadyob-imaklediidi, an bela obelogoed. Dule-Baalʼga-arbadimalad-e-nug, an obelogoed. Dule-irwa-Baalʼse-gormalad-e-nugse-bakale, an obelogoed.
ZEP 1:5 Dulemar na e-neg-niba niisgwamar-nug-odummogega, niisgwamar-asabin-sindigar-sigmalad, an obelogoed. Dulemar, sindigar-sii an-nuggi ise-sogar-ibmar-sognaid, degi, bab-Milcom ise-sogar-ibmar-sognaidamarbalid, an obelogoed.
ZEP 1:6 Dulemar-angi-bangudmalad, degi, an amisurmarbalid, degi, anse idaksurmarbalid, an obelogoed.”
ZEP 1:7 Bab-Jehová-Bur-Gandik-Maid-asabin bogidik sigmalo, ar Bab-Jehová-e-iba bato mosad. Bab-Jehová ibmar-ogumakar-ukleged guakwaa urbisad, ese-dagega-gorlesmaladi swilidik imaklesmalad.
ZEP 1:8 Bab-Jehová sogbalid: “Anga-ibmar-uklegoed-e-ibagi, dule-dummaganga-mamaid, an sabsur-odurdakoed, rey-masmala, an sabsur-odurdakoed. Bela dulemar dule-ainebalidyob-mor-yomalad, an sabsur-odurdakoed.
ZEP 1:9 A-ibagine, anse-goled-neg-yawagak-dogedgi nag-obiar-dogmaladi, an sabsur-odurdakoed. Dulemar, emar-sabsur-imakedba e-bab-dummagan-neg ibmar-enasii-imakdimalad, an sabsur-odurdakoed. Emar-yardakedba e-bab-dummagan-neg ibmar-enasii-imakdimalad, an sabsur-odurdakoed.”
ZEP 1:10 Bab-Jehová weyob sogbalid: “A-ibagine, Yawagak-Uaye-nugad-akale, dule-e-bendakega binnasuli-gornanai-gumaloedi, itolegoed. Neggwebur-binid-akale, dule-akiginmalad, itolegoed. Yarmar-mullugan-akale, wile-itogedba-binnasur-oimakmaladi, itolegoed.
ZEP 1:11 ”Mactesʼginmalad, binnasur be gormakmarmoga. Ar a-ibagine, dule-manigi-ibmar-ukmalad bergunonikoed. Mani-muchub-ibmar-ogwamalad bela burgwemaloed.
ZEP 1:12 A-ibagine, Jerusalén-neggweburgi gwallu-mee an imaknonikoed. Dulemar-vino-sabolebukwadyob dobsuli-bukwamalad, an sabsur-odurdakoed. We-dulemar binsamalad: ‘Bab-Jehová ibmar-nued imakosulid, ibmar-isgana imakosurbalid.’
ZEP 1:13 A-ulale, ibmar-nuegan bela e-ibe sulegoed, e-negmar, bela swana naguoed. Neg-sobnanai-gumaloenad, degi-inigwele, egi gwen megosurmalad. Uva-dub digmaloenad, degi-inigwele, e-vinoʼdi gwen gobosurmalad.”
ZEP 1:14 “Bab-Jehová-e-urwed-dummad-iba bato walikgudanikid, a-iba gwae-gwae modanikid. Bab-Jehová-e-urwed-dummad-ibagine, sabsur-gormaknanai gumaloed. Dule-buledse-bakale, binnasuli-gornai guoed.
ZEP 1:15 A-iba, urwed-dummad-iba, naguoed. Wile-itoged-iba, surbinsa-itoged-iba, naguoed. Bela ibmar-bergued-iba, ibmar-bibisged-iba, naguoed. Negsichid-nagued-iba, neg-gudureged-iba, naguoed. Boo-bela-bela-babated-iba, mogirmar-sichigan-nagued-iba, naguoed.
ZEP 1:16 Gar-trompeta-goled-iba, bila-onogega oimaknanaigumaloed-iba, naguoed. A-ibagi, neggweburmar-sakdigar-bukwadgi-bila-ononaegala, igar uklegoed. Negmar-matusur-gwigwichidgi-urwenamalaga, igar uklegoed.”
ZEP 1:17 Bab-Jehová soged: “Dulemar angi isgusmalad. A-ulale, bela-bela-surbinsa-itogega an imakoed. Ibyasuliyob gudii gumaloed.” E-ablis ukubyob milemai guoed. E-sanmar ibmar-isganayob milemamai guoed.
ZEP 1:18 Bab-Jehová-urwed-ibagi, e-mani gwen e-bendakosulid, e-or gwen e-bendakosurbalid. Bab-Jehová-e-sae-itogedbali, bela napneg-naid berguoed. Bela-dulemar-napneggi-gudidimalad, ilagwen-obelolegar ese imaklemaloed.
ZEP 2:1 Geb ani an Sofonías sogded: “Dulemar-bingedsurmalad, be bulakwaa ambikudamala, Bab-Jehová-asabin na be san-bipii imakmala.
ZEP 2:2 Bab-Jehová-igi-neg-imakoye-sogsagusad-guoed-idu, be deyob na be san-bipii imakmala. A-iba, ar igi-gagan-dinnagana burwaba-seleder berguddae, deyobi bergudoed. Bab-Jehová-bela-bela-e-urwed bemargi-yoleged-idu, be bulakwaa ambikudamala. Bab-Jehová-e-urwed-iba bemargi-yoleged-idu, Bab-Jehová-asabin na be san-bipii imakmala.
ZEP 2:3 Napneggi bela na san-bipi-imakdimalad, Bab-Jehová amimala. Bab-Jehová-Igar-Maidba-gudidimalad, Bab-Jehová amimala. Igar-inniki-imaked be amimala, san-bipi-imaked be amimala, abakalegi, Bab-Jehová-e-urwed-ibagi, na be dukued amiarmalale.”
ZEP 2:4 Gaza-neggwebur dule-sate guoed, Ascalón-neggwebur napabi-nai guoed. Asdod-neggweburgi-dulemar-bukwadi, ibginedbali onilegoed. Ecrón-neggwebur bela swiri naguoed.
ZEP 2:5 Demar-gakaba-bukwamalad-Cereteo-dorgan, ¡be duledar-wilesmar! Filistea-dulemar-e-yar-Canaán, Bab-Jehová weyob be-annik soged: “An be-oberguoed, begi dulemar bar gudii an imakosulid.”
ZEP 2:6 Bela-demar-gakagi-neg-naidi gaganga binyoed. Agi dulemar sibad-wawaad-akwedii gumaloed. A-neg-naidi sibad-wawaadmar-bukuega naguoed.
ZEP 2:7 A-neg-naidi, Judá-dulemar-napi-besmaladgadga guoed, agi e-sibad-wawaadmar gagan-madii guoed. Mutikgusale, Ascalón-neggwebur-e-negmargi gabnonimaloed. E-Bab-Dummad-Jehová amar-bendakega ese nonikoed. E-dulemar-galesbukwad, gannar e-yarse dagega imakoed.
ZEP 2:8 Bab-Jehová soged: “Moab-dulemar an-dulamargi-isdar-sunmaknanaigusad an itosad. Amón-dulemar an-dulamargi-dodonanaigusad an itosbalid. We-dulemar, an-dulamar-nug oichosmalad, an-dulamar-ibe e-yar-naid susmalad.
ZEP 2:9 A-ulale, ani Israel-e-Bab-Dummad-Jehová-Bela-Gangued-Nikad soged: An na dukin ise-sogar soged, Moab-yar, Sodoma-yaryob gunonikoed, Amón-dulemar, Gomorra-dulemaryob gunonimarmogoed. E-napaneg ikobiin nagunonikoed, balu-negga gunonikoed, degisadegu napabi-nai guoed. An-dulamar-napi-besmaladi, a-dulemar-ibe ibmar sumaloed. An-dulamar-dula-bemaloedi, a-dulemar-napaneg egadga imaknonimaloed.”
ZEP 2:10 Moab-dulemar, degi, Amón-dulemar, na san-dummarba-imaksad-ulale, deyob gunonimaloed. Bab-Jehová-Bela-Gangued-Nikad-e-dulamargi-isdar-sunmaksad-ular, deyob gunonimaloed. Bab-Jehová-Bela-Gangued-Nikad-e-dulamar-isdar-daksad-ular, deyob gunonimaloed.
ZEP 2:11 Bab-Jehová, amar-sabsur-odurdakoed. Bela napneggi ibmar-bab-dummadga-imakledimaladi, obelogoed. Deyobi, bela dulemar-we-napneg-ugakaase-bukmaladi, na e-yar-e-yargi Bab-Jehová-asabin sindigar sigmaloed.
ZEP 2:12 Bemar Etiopía-dulemar, Bab-Jehová-e-es-suidse be oburgwilemarmogoed.
ZEP 2:13 Bab-Jehová na e-argan dad-nakwed-argan-sapiledsik oyodoed, Asiria-dulemar-obelogoed. Napabi-swanga Nínive-neggwebur nasikoed, nega-dulesulidgan-dinnagwadyob nasikoed.
ZEP 2:14 Agi sibad-wawaadmar obunnomamai guoed, bela-ibdurgan-ursirmar egi gudii guoed. E-buarmargi, mutikidbali gorgimar, dabgalamar, gabdidii gumaloed. Irmon yawagak-seniganaba gorsii guoed. Sikwisichid yawagak-dogedgi gorsii guoed, urwar nagubirga-mamaid magar-dakle megoed.
ZEP 2:15 Weyobi Nínive-neggwebur-na-gannarba-imakdiid, na gwen-dulemar e-akar-imakosuli-itodiid, gunonikoed. Na e-dulemar sogdimalad: “Anmar-neggweburyobid, baid-neggwebur sate.” Ibiyobi swanga nagunoniki, ibdurgan-ursirmalad-e-galuga gunonikid. Bela dulemar e-dikarba-nasmaloed, egi dododmaloed, argan-olole egi oyonanai gumaloed.
ZEP 3:1 Neggwebur-emar-sabsur-imaksiid, uayasuli-siid, nue-isgussiid. ¡Be duledar-wiles!
ZEP 3:2 Dule-ega-binsaed-daked itosulid, nabir-gudiguega ega-ibmar-soged, abesulid. We-dulemar Bab-Jehová-bened, e-Bab-Dummad amisulid.
ZEP 3:3 We-neggweburgi dule-dummagan-negsedimaladi, achumigur-nono-wawaad-uurmakdiiyob gudimalad. E-negsedimalad, igi achu-sapur-burburud mutikidba mas-gasale, gwen banedga mas sabosuli, deyobi damalad.
ZEP 3:4 E-Bab-Dummad-gayaburba-barsogmalad, na san-dummarba-imakmaladid, emar-yardakmaladid. E-dule-irwa-Bab-Dummadse-gormalad, neg-islidikidi oichodimalad. Bab-Jehová-Igar-Mamaidgi annadimalad.
ZEP 3:5 Dule, Bab-Jehová-e-dulamar-abargi-gudiiddi, igar-inniki-imakedid, ibmar-isgana imaksulid. Bane-bane wakudaryalaba e-igar-inniki-imaked imakdiid, bangi-oibosale, geg imaksuli gued. Dule-isganadina, gwen binged itosulid.
ZEP 3:6 Bab-Jehová soged: “Dule-yar-baid-baidgi-bukwamalad an obelosad, e-neg-matusurmalad an earisad. E-neg-imbamar dule-sate an imaksad, gwen bar dulemar egi nanasulid. E-neggweburmar napabi nagusad, e-dulemar bela girgusad.
ZEP 3:7 An binsanaigualid: ‘Jerusalén-dulemardi an-dobguoergebye, anba ibsaoergebye.’ Adi, deyobi, an e-neg-bukwadse ataknadele, e-negmar an oberguosurye. Degi-inigwele, aka Jerusalén-dulemar bur gwae-gwae ibmar-isgana-imakde gusmalad.”
ZEP 3:8 Agala, Bab-Jehová soged: “Degisoggu, an-bemargi-yolegega-danikoed-ibagi be an-abitomalo. Ar dule-yar-baid-baidgi-bukwamalad-onmakega an imaksokalid, bela-neg-selemamaid-atoega an imaksokalid, adi, an-bela-bela-sae-itogedgi wemar sabsur-odurdakega, an-bela-bela-urwedgi wemar sabsur-odurdakegar. An uludele, an sooyob gued, anse bela napneg ogumaklegoed.
ZEP 3:9 ”Bela Bab-Jehová-nug-odummomalaga, bela bulakwaa Bab-Jehováʼga arbamalaga, an dulemar-e-gwabinduku swilidik imakoed.
ZEP 3:10 Etiopía-diwarmargi dikasur-daksik-bukwamaladi, an-nug-odummodimaladi, an-dulamar-aisakis-bukwamaladi, anga ibmar-ukleged senonimaloed.
ZEP 3:11 A-ibagine, be angi-yoledigusadgine, bar be bingeguosulid. Be-abargi dule-na-san-dummarba-imakdiid, dule-na-nuga-nikadga-imakdiid, an obelogoed. Deyobi, an-yar-islidikidgi, bar na san-dummarba-imakdii guosulid.
ZEP 3:12 Be-abargi unnila dule-wileganabi, dule-na-san-dummarba-imaksurmaladbi, an obegoed. Wemar unnila Bab-Jehováʼgi bensurgudii gumaloed.
ZEP 3:13 Israel-dulemar-napi-bemaloedi, ibmar-isgana imakosurmalad, bar gakansaosurmalad, bar emar-yardakosurmarbalid. Unnila nuedgi mas-gundii, dobsulidgi obunnodii gumaloed.”
ZEP 3:14 Ani an Sofonías bega sogmalad: “Sión-dulemar, weligwar-itogedba be iseed gormala, Israel-dulemar, nakwisadba be oimakmala. Jerusalén-dulemar, gwage-ulubgi be yeer-itomala, be wergumala.
ZEP 3:15 Bab-Jehová bar sabsur be-imakosulid, Bab-Jehová be-isdarmalad gannar sorsik-duurmakega imaksad. Israel-e-rey-Bab-Jehová, bemar-abargi gudiid. Bar be ibmar-isgana dobguosurmalad.
ZEP 3:16 A-ibagine, Jerusalén-dulemarga sogdemaloed: ‘Sión-dulemar mer be dobgumarye, gandik-imakmarye.’
ZEP 3:17 Ar be-Bab-Dummad-Jehová bemar-abargi gudiid. Ar Bab-Jehová dule-bila-onoged-nakwisad gued. Ibamargineyobi, Bab-Jehová begi weligwar itogoed. Gannaryobi e-sabgued bega oyogoed,
ZEP 3:18 be-nuggine weligwaledba namakoed.” Bab-Jehová soged: “Wile-itogedgi an be-ollor-imakoed, ar we, bingedar-itoge be imaked.
ZEP 3:19 A-ibagine, an-sunnagwad dule-mesagwar-be-imakdimalad an obelogoed. Sibad-wawaad-yaku-yaku-nanaed an bendakoed. Sibad-wawaad-yoggus-gudiid gannar an sedagoed. Ibi-yarmargi be bingegudii gusmala, agi an be-nug-odummomaloed, agi nuga-nikamaladga an be-imakmaloed.
ZEP 3:20 A-ibagine, an bemar-senonikoed, an bemar-onmaknonikoed. An bemar-wagab, be-dule-galesbukmalad an gannar senonikile, bela dulemar-we-napneggi-bukwamalad-abargi, an be-nug-odummomaloed. Nuga-nikamaladga an be-imakmaloed.” Bab-Jehová deyob soged.
HAG 1:1 Rey-Darío birgabogus negdakmaidgi, nii-walanergwad gebe-e-iba-onodedgine, Bab-Jehová Judá-yar-dakmaid-Salatiel-machi-Zorobabelʼse, degi, dule-irwa-Babse-goled-bur-dummad-Josadac-machi-Josuéʼse, e-gayaburba-barsoged-Hageoʼye-nugadba e-gayaburba barmialid. Weyobi sognaid:
HAG 1:2 “Bab-Jehová-Bela-Gangued-Nikad weyob sogye: ‘We-dulemar soged, gannar Bab-Jehováʼse-goled-neg-sobegala amba yoo e-ibagan warmakye.’ ”
HAG 1:3 Bab-Jehová, e-gayaburba-barsoged-Hageoʼba weyob sogsabalid:
HAG 1:4 “Ar bemardi neg-nuegangi mamaid, degite, an-negdi amba bela bibisgar siid.”
HAG 1:5 Bab-Jehová-Bela-Gangued-Nikadi, weyob soged: “Bemar-ibmar-imaknanaidgi be nue binsamar.
HAG 1:6 ”Bemar ibmar-durba bukidar makenad, degi-inigwele, ichee wis be wemalad. Be mas gunmalanad, degi-inigwele, amba be ukudmaada itodamalad. Be gobmalanad, degi-inigwele, amba be uku-uku itodamalad. Be mor yodamalanad, degi-inigwele, amba be dambe itodamalad. Arbasadgi be-mani-bennuklegedi, ibmar-bakega amba bega unnisurdaed.”
HAG 1:7 Bab-Jehová-Bela-Gangued-Nikad weyob sogbalid: “Bemar-ibmar-imaknanaidgi be nue binsamar.
HAG 1:8 ”An-neg gannar-sobega, bemar sapurba urgo aminamala. Anse-goled-neg-soblegoedi an yeerdakoed. Agine an-gangued-yeerdakleged an oyogoed. Ani Bab-Jehová deyob soged.
HAG 1:9 ”Bemar ibmar-bukidar abitodimalanad, degi-inigwele, wis be ichee ibmar abingamalad. Bemar na neggi ibmar-sabomaladi, an bemar-ibe yoga-obelogar imaked. ¿An ibiga deyob imaksa? ‘Ar an-neg bela bibisgar-siid-ular, an deyob imaksad. Bemardi, unnila be-negginbi be binsamalad.’ Ani Bab-Jehová-Bela-Gangued-Nikad deyob soged.
HAG 1:10 ”Degisoggu, bemar-ulale, dii bar wisulid, degi, napneggi geg bar ibmar sanmakbalid
HAG 1:11 Ani an wemargi mer bar dii-wiega imaksad: Orosyob-dakleged-trigo-digar-nanaidgi, uva-digar-nanaidgi, olivo-gwallu-nuegan-digar-nanaidgi, ibmar-durbamar-digarmaladgi, dulemar-bukwadgi, ibdurgan-bukwadgi, degi, dulemar-e-ibmarmar-imakmaladgi, ani an mer bar dii-wiega imaksad.”
HAG 1:12 Geb degine, Salatiel-machi-Zorobabel, degi, dule-irwa-Babse-goled-e-dummad-Josadac-machi-Josué, deginbali, bela dulemar e-Bab-Dummad-Jehováʼba ibsasmalad. Ar igi Bab-Dummad na e-gayaburba-barsoged-Hageoʼga ibmar-sogsadi, dulemar itosmalad. Geb dulemar Bab-Jehová dobgudmalad.
HAG 1:13 Geb degine, Bab-Jehová-gayaburba-barsoged-Hageo, Bab-Jehová ega ibmar-sogsadi, dulemarga sogded: “Bab-Jehová sogye, an beba gudimarye.”
HAG 1:14 Weyobi Bab-Jehová Judá-yar-dakmaid-Salatiel-machi-Zorobabel-ogannosad, degi, dule-irwa-Bab-Dummadse-goled-e-dummad-Josadac-machi-Josué-ogannosad, deginbali, bela-dulemar-ogannosbalid. Geb bela wemar, e-Bab-Dummad-Jehová-Bur-Gangued-Nikad-e-neg-sobmalaga arbadmalad.
HAG 1:15 Deunni, Rey-Darío birgabogus negsemaid. A-Nii-walanergwagi, e-iba-durgwen-gakabakegi neg sobdemalad.
HAG 2:1 Nii-walaguglegi, e-iba-durgwen-gakagwensakgi, Bab-Jehová na e-gayaburba-barsoged-Hageoʼba sunmaknonikid:
HAG 2:2 “Judá-yar-dakmaid-Salatiel-machi-Zorobabelʼse be egiso, degi, dule-irwa-Babse-goled-e-dummad-Josadac-machi-Josuéʼse be egiso, deginbali, bela dulemarse be egisbalo:
HAG 2:3 ‘Dule-gwensak, epenne Bab-Dummadse-goled-neg-sigisad-e-yeerdakleged-daksagusadi, ¿amba bemar-abargi gudii? Amar sogmardena, emi Bab-Dummadse-goled-neg-binid-siidi ¿igi be dakmarsunna? ¿Ar idualedba, bur baisur-daklesursi? Eye, bur baisur-daklege.’ ”
HAG 2:4 Degi-inigwele, Bab-Jehová bemarga soged: “Zorobabel, be gandik imake. Josadac-e-machi-Josué be gandik imake. Ar be dule-irwa-Bab-Dummadse-goled-e-dummadid. Bela dulemar be gandik-imakmarmoga, be arbamala, ar an beba gudiid.” Ar Bab-Jehová-Bela-Gangued-Nikad weyob soged:
HAG 2:5 “Bemar Egipto-yargi-nosmargua, an bemarbo igar-mesisad, an bemarba gudii guoye. A-ulale, an-burba bemar-abargi gudiid. ”Degisoggu, mer be dobgumar.
HAG 2:6 Ar Bab-Jehová-Bela-Gangued-Nikad weyob soged: ‘Ar emisgwasaar, an nibneg, napneg ogiglimakoed. Demar, demar-gaka-ugakaase an osukamakoed.’ ”
HAG 2:7 Bab-Jehová-Bela-Gangued-Nikad weyob soged: “Bela dulemar-yar-baid-baidgi-bukwamalad an owawanmakoed. Dulemar-yar-baid-baidgi-bukmalad na e-ibmar-nuegan senonimaloed, deyobi, anse-goled-neg yeerdaklegega an imakoed.”
HAG 2:8 Bab-Jehová-Bela-Gangued-Nikad weyob soged: “Mani, degi, ormar angadid.”
HAG 2:9 Bab-Jehová-Bela-Gangued-Nikad weyob soged: “Anse-goled-neg-binid, bur idualedba, yeerdakle guoed. We-neggi neg-bogidik an nasikoed.” Bab-Jehová-Bela-Gangued-Nikad deyob soged.
HAG 2:10 Rey-Darío birgabogus negdakmaidgi, nii-walabakebakgi, e-iba-durgwen-gakabakegi, Bab-Jehová na e-gayaburba-barsoged-Hageoʼga sunmaknonikid:
HAG 2:11 Bab-Jehová-Bela-Gangued-Nikad weyob soged: “Dule-irwa-Bab-Dummadse-gormaladse, anga ibmar-swilidikmalad-uklegedsik be egiso.” Geb Hageo amarse egisdesunnad:
HAG 2:12 —Anmar binsa-sogmalo. Dule-gwensak ibmar-san-swilidikid-Bab-Dummadga-uksadi, e-mor-saburedgi obipirmakar semaid, agine, e-mor-sabured-duku madugi warmaksadibe, igi, san-gisi-dualedgindibe, vinoʼgindibe, olivo-gwallugindibe, igi, ibmar-baigan-gullegedgindibe, ¿bela we-ibmarmar ibmar-swilidikga gumogoe? Dule-irwa-Babse-gormalad Hageo-abin sogdemalad: —Suli.
HAG 2:13 Hageo sogdebalid: —An bega binsa-sogbargwelo. Ar dule-gwensak mui-ebusadba-swilidik-gudisulid, a-dule, we-ibmar-soggwenad ebunonikile, ¿ar bela we-ibmarmar bar swilidik guosuli? Dule-irwa-Babse-gormalad sogdemalad: —Eye, swilidik guosuli.
HAG 2:14 Geb degine, Hageo amar-abin sogded: “Bab-Jehová-Bela-Gangued-Nikad weyob soged: ‘Ar deyobi, we-neggwebur gued. Ar deyobi, an-asabin we-dulemar gumalad. Ar deyobi, bela e-ibmar-imakmaladi gued, amba anga e-ibmar-ukmaladse-bakale, deyobi gubalid.’ ”
HAG 2:15 Degisoggu, emi-iba-onoded-akale, bemar gwage-ulubgi we-ibmargi nue binsamar. Bemar yoo Bab-Jehováʼse-goled-neg-sobgua,
HAG 2:16 ¿igi bemar gubukwana? Be-dule-gwensak sagu-wardurgwen (20) ibmar-gwag-weoye binsadaenad, degi-inigwele, unnila sagu-warambe (10) wesdaed. Vino ega bari-gwadurbo-gakambe (50) guoye binsadaenad, degi-inigwele, unnila bari-gwadurgwen (20) ega gusdaed.
HAG 2:17 Bab-Jehová weyob soged: “Ani an e-nainumargi ibmar-digarmalad ogumaksad, boni an ega uksad. Bela e-ibmar-imaksadgi dii-gwamakaled-babatega an imaksad. Degi-inigwele, gwen an-amiedgi binsassurmalad.
HAG 2:18 Emi-iba-onoded-akale, bemar gwage-ulubgi nue binsamar. Emi nii-walabakebak e-iba-durgwen-gakabake-naidgi, bemar anse-goled-neg-e-saila mesided. A-akale, bemar gwage-ulubgi nue-binsadii gumalo.
HAG 2:19 Ibmar-gwag-saboleged-neggi, ¿amba ibmar-gwag wis bukwa? Uva-dub, higo-sapi, sapi-granada, degi, olivo-sapi ¿amba yoo sanmakmarde? Degiirdi, emi-iba-onodoedgine, an bemargi nued binsaoed.”
HAG 2:20 Amba a-niigi, e-iba-durgwen-gakabakegi, Bab-Jehová, Hageoʼga gannar ibmar sognonibalid:
HAG 2:21 “Judá-yar-dakmaid-Zorobabelʼga be soge: ‘Ani, Bab-Jehová, nibneg, napneg, an ogiglimaksokalid.
HAG 2:22 Reymar bar yar-seega an imakosulid. Reymar-gargangued an obelosokalid. Moli-ur-bila-onomalad, degi, egi nanamalad an osulogoed. Molimar, degi, egi-sordamar-sigmalad burgwemaloed. Wemar na muchub-muchub es-suidgi gindakmaloed.’
HAG 2:23 Bab-Jehová-Bela-Gangued-Nikad soged: ‘A-ibagi, be, Salatiel-machi-Zorobabel, be-an-mai gued, an be-suoed. An-wilub-sied-or-arganyob an be-imakoed. Ar ani an be-susad.’ Bab-Jehová-Bela-Gangued-Nikad deyob soged.”
ZEC 1:1 Rey-Darío birgabogus negsemaidgine, nii-walabaabakgine, Bab-Jehová Iddo-wagwa-Berequías-e-machi-Zacaríasʼga weyob sunmaknonikid:
ZEC 1:2 “Ani Bab-Jehová be-dadgangi bela-bela urwemai gusad.
ZEC 1:3 Degisoggu, dulemarga be sogo, Bab-Jehová-Bela-Gangued-Nikad weyob sogye: ‘Be gannar an-amimala, geb, an gannar bemarba gudii saoed.’ ”
ZEC 1:4 Bab-Jehová-Bela-Gangued-Nikad weyob soged: “Mer be be-dadgan-gudigusmaladyob gumala. Be-dadgangala Bab-Dummad-gayaburba-barsogmalad, Bab-Dummad-Bela-Gangued-Nikad weyob sogye sogsamalanad: ‘Mer bar galagwensuli-gudii gumarye. Mer bar ibmar-isgana imakmarye.’ Degi-inigwele, gwen anba ibsassurmalad, gwen an-itossurmalad.”
ZEC 1:5 Bab-Jehová sogdebalid: “Emide, be-dadgan, ¿bia nadmala? ¿Ar an-gayaburba-barsogmalad amba dula-gudidimala?
ZEC 1:6 Ar an-maimar-an-gayaburba-barsogmaladga an-gayaburbamar, degi, an-igarmar-an-sogsagusadi, ¿be-dadgangi deyob gunonisursi? Deyob gunoniki.” A-ulale, be-dadgan gannar Bab-Jehová-aminonimalad, geb weyob sogsamalad: “Ar anmar-daedbali, degi, anmar-ibmar-imakedbali, na igi Bab-Dummad-Bela-Gangued-Nikad anmar-imakoye sogsa-gusa, deyobi anmar-imaksad.”
ZEC 1:7 Rey-Darío-birgabogus-negsemaidgi, nii-warambe-gakagwensakgi, nii-Sebatʼye-bilegedgi, a-iba-dulagwen-gakabakegi, Bab-Jehová, e-gayaburba-barsoged-Zacaríasʼga gabgine ibmar oyosad. Zacaríasʼde Iddo-wagwad, Berequías-e-machid.
ZEC 1:8 Ani Zacarías mutikidbali negburgan dakalid. Dule-gwensak moli-gisigwad-birgi-sii-daniki an dakalid. We-dule, neba-naidgi, sapimar-arrayánʼye-nugad-imbaba nagunonikid. We-dule-yarganbali dulemar-bukidar molimar-gisigwad-birgi-sii, molimar-goro-goro-dakleged-birgi-sii, degi, molimar-sipugwad-birgi-sii an daksad.
ZEC 1:9 Geb an dulese egichided: “Dummad, we-dulemar-moli-birgi-bukwamalad, ¿wede ibu obare?” Agine, baliwitur-anbo-sunmaknaid an-abin-imakded: “An bega sogoed, wede ibu obare.”
ZEC 1:10 Dule-sapimar-arrayánʼye-nugad-imbaba-gwichid anga sogded: “Bab-Jehová we-dulemar-moli-birgi-bukwamaladi, bela we-napneggi-bipirmakega barmialid.”
ZEC 1:11 Geb dulemar-moli-birgi-bukwamaladi Bab-Jehová-e-baliwitur-sapi-arrayánʼmarye-nugad-abargi-gwichidga sogdemalad: “Anmar bela we-napneggi bipirmaksad. Anmar napneg bogidik-nai daksamalad, bonisuli an daksamarbalid.”
ZEC 1:12 Bab-Jehová-e-baliwitur weyob-itosgua, sogded: “Bab-Jehová-Bela-Gangued-Nikadye, birga-dulapaa-gakambegusa (70) be Jerusalén-dulemargi-urwedanikid, degi, be Judá-dulemargi-urwedanikid, ¿wede, we-neggweburmar be gannar wiledakega birgabigwa napi?”
ZEC 1:13 Bab-Jehová, baliwitur-anga-sunmaknaidga nuekwaa sunmaksad, mer bukib-binsaed-gayaburba ega sogsad.
ZEC 1:14 Geb baliwitur anga sogded: “Weyob be sogo: ‘Bab-Jehová-Bela-Gangued-Nikad weyob sogye: An bela-bela Sión-yar-sabedbali, an nue egi nobed. An bela-bela Jerusalén-neggwebur-sabedbali, an nue egi nobed.
ZEC 1:15 Ar dulemar-yar-baid-baidgi-bukwad-san-dummarba-imakdimaladgindi, an urwemaid. An bela-bela urwemaisulinad, ar emar bela-bela-an-ourwega an-imaksamalad.
ZEC 1:16 ” ’Degisoggu, Bab-Jehová weyob soged: An gannar Jerusalén-neggwebur wiledaknonikoed. Agine, anse-goled-neg gannar soblenonikoed, an gannar neggwebur nue-ilemaknai imakoed.’ ” Bab-Jehová-Bela-Gangued-Nikadi weyob soged:
ZEC 1:17 “Aginbali, Bab-Jehová-Bela-Gangued-Nikad-e-nuggi be weyob sogbali: ‘Gannar an-neggweburmar ibmar-nuegan-nikuega an imakoed. Gannar Bab-Jehová Sión-yar-wiledaknonikoed. Gannar Jerusalén-neggwebur egadga imaknonikoed.’ ”
ZEC 1:18 An niba-atakdegua, an-asabin walabake moli-bebemar nodaniki an daksad.
ZEC 1:19 Geb an baliwitur-anbo-sunmaknaidsega egisded: “We-bebemarde, ¿ibu obare?” Baliwitur anga weyob sogded: “We-moli-bebemar reymar-gangued-nikamalad oyoged. We-reymar e-gangued-nikadbali Judá-dulemar, Israel-dulemar, degi, Jerusalén-dulemar-oaisakiega imaksamalad.”
ZEC 1:20 Geb sorbali, Bab-Jehová anga walabake dule-esgorogi-arbamalad oyosad.
ZEC 1:21 Geb Bab-Jehováʼse an egisded: “Wemardi, ¿ibu imakega danimala?” Geb Bab-Jehová anga sogded: “We-moli-bebemar, reymar-gargangued-nikamalad oyoged. We-reymar Judá-dulemar-oaisakiega imaksamalad. Dule-wargwensaale e-abin gwisgussulid. We-dule-esgorogi-arbamaladi, we-bebemar-walabakegwad ogwayega nonimalad. Deginbali, dulemar-yar-baid-baidgi-bukwamalad-e-gangued-nikad-obelogega nonimarbalid. Ar we-bebemar Judá-dulemar-oaisakis gusmalad.”
ZEC 2:1 An niba atakdegua, dule-gwensak e-argangine wilubsaed-dub-ganiki an dakalid.
ZEC 2:2 An a-dulese egisded: “¿Bia be nae?” Geb an-abin-imaksad: “An Jerusalén-neggwebur wilubsasokalid. An wisgubied, bule sugudibe, degi, bule matardungubardibe.”
ZEC 2:3 We-baliwitur-anbogwa-sunmaknaid bato nasokalidgine, baliwitur-baid ese nonikid,
ZEC 2:4 ega sogded: “We-sapingwaga gwae ega be weyob sognae: ‘Jerusalén-neggweburgi dule-bukidar ambikunonikoed, moli-bukidar ambikunonikoed. Jerusalén neggwebur-galu-matusulid-satedga gunonikoed.’
ZEC 2:5 ”Bab-Jehová soged: ‘Jerusalén-neggweburgala an soo-galu-matusulidyob ebiris gunonikoed. An Jerusalén-neggweburga e-gangued-yeerdaklegedga gunonikoed.’
ZEC 2:6 ”Bab-Jehová weyob soged: ‘¡Be nomala! ¡Be wakinmala! Yar-dad-nakwed-argan-sapiledsik-naidgi be nomala.’ ”Bab-Jehová weyob soged: ‘Ani an bela-we-napneg-ugakaase, bemar-oaisakiega imaksad.’
ZEC 2:7 ”Bemar Sión-dulemar, Babilonia-yargi-gudimalad, egi be nomala, egi be wakinmala.”
ZEC 2:8 Ar Bab-Jehová-Bela-Gangued-Nikad, dule-yar-baid-baidgi-bukmalad-bemar-ibe-ibmar-susmaladga, weyob gandikidba ibmar-sogega an-barmialid: “Dule-bamalad an-dulamar-naibi-imakele, an-naibi-imaknaimogad.
ZEC 2:9 A-ulale, an-sunnad, an we-dulemargi gwisgunonikoed, e-maimar bela e-ibe ibmar atursanonimaloed.” Weyobi wisgunonimaloed, Bab-Jehová-Bela-Gangued-Nikad an-barmiarye.
ZEC 2:10 Bab-Jehová weyob soged: “¡Sión-dulemar, weligwaledbali be gormakmala! ¡An bemar-abargi megnonikoed!
ZEC 2:11 ”A-ibagine, bukidar dule-yar-baid-baidgi-bukmalad anba nagumaloed. A-dulemar-bukidarad an-dulamarga gunonimaloed, a-dulemar-abargi an megnonikoed.” Deyobi, wisgunonimaloed, Bab-Jehová-Bela-Gangued-Nikad bemarse an-barmiarye.
ZEC 2:12 Bab-Jehová yar-islidikid-naidgi Judá-yar na egadga imaknonikoed. Degine, Jerusalén-neggwebur gannar sunonibaloed.
ZEC 2:13 Bela-dulemar Bab-Jehová-asabin bogidik ambikumala, ar Bab-Jehová e-neg-islidikidgi-maid-akar bato danikid.
ZEC 3:1 Geb degine, Bab-Jehová anga negburganbali dule-irwa-Bab-Dummadse-gormalad-e-dummad-Josué oyosad. Josué, Bab-Jehová-e-baliwitur-asabin-gwichi an daksad. Degine, nia-saila Josuéʼgi-yolegega Josué-e-argan-nuedsik-gwichi an daksad.
ZEC 3:2 Geb agine, Bab-Jehová-e-baliwitur nia-saila-Satanásʼga sogded: “Satanás, Bab-Jehová bese sabsur-urwesun. ¡Bab-Jehová-Jerusalén-neggwebur-susad, bese sabsur-urwesun! ¡Nia-saila, Bab-Jehová bese sabsur-urwesun! ¡Satanás! Ar we-Josuéʼde, ¿sapan-gummakmai-sulesadyob bendaklessursi?”
ZEC 3:3 Josué baliwitur-asabin mor-ollibi-yoi-gwichi an daksad.
ZEC 3:4 Degisoggu, baliwitur dulemar-ega-ibmar-samalaga-guakwa-bukmaladga sogded: “Josué-mor-ollibi-yoid ega ungemar.” Geb Josuéʼgardi sogded: “Be dake, be-isgued an bega osulosad. Emigindi, mor-nuedi an bega yooed.”
ZEC 3:5 Agine, baliwitur sogdebalid: “Josué-e-nonogine morgurgin-gutu-sated ega be sibali.” Bab-Jehová-e-baliwitur amba gwisgua, Josué-nonogi morgurgin-gutu-sated sismalad, mor-nued ega yosmarbalid.
ZEC 3:6 Geb sorbali, Bab-Jehová-e-baliwitur Josuéʼga weyobi sogded:
ZEC 3:7 “Bab-Jehová-Bela-Gangued-Nikadi weyob sogye: ‘Ar an-igar-maidba be nanadidibe, dule-irwa-anse-goled-ibmar-imaked be imakdidibe, anse-goled-neg-seega an be-imakoed, an-neg-imbamar-nanaid-dakega an be-imakbaloed. We-dulemar-anga-ibmarsamalad-abargi, be anga-arbaega an be-imakoed.
ZEC 3:8 ” ’Dule-irwa-Babse-goled-bur-dummad-Josué, nue be itogo. Be-sordagan-be-asabin-sigdimaladi, nue itomarmogo. Ar bemar yoedse-ibmar-guoed-wilubga gumalad. An-mai sapi-siklesad-gannar-ainieyobid an sedasokalid.
ZEC 3:9 Josué, an be-asabin akwa-sisad nue be dake. We-akwa wagar-gwagugle (7) nikad. An-sunnagwad an we-akwagi ibmar-soggwen narmakoed. Ani Bab-Jehová-Bela-Gangued-Nikad soged, We-yargi-bukmalad-e-isgued ibagwen-unni an elioed.’
ZEC 3:10 ”Bab-Jehová-Bela-Gangued-Nikad soged: ‘A-ibagine, uva-dub-urba-ambikumalaga, degi, sapi-higueraʼye-nugad-urba-ambikumalaga, bemar na be muchub-muchub be-neg-dikarba-mamaidse gormaloed.’ ”
ZEC 4:1 Geb baliwitur-anbo-sunmaknaidi anse gannar nonikid. Agine, ar igi-dule-gabmaile, odakledae, deyobi an-odaknonikid.
ZEC 4:2 Geb anse egisded: “¿Ibu be dake?” An abin-sogded: “Gwallu-olo-sunnabiid-candelabroʼye-nugad an daked. Geb birgine, olivo-gwallu-siged-nika an dakbalid. Gwallu-olo-sunnabiid-birgine, gwallu-senigana gugle (7) siid. Degi, e-warmar gugle (7) nikabalid. A-warmarbali, olivo-gwallu ese warmaked.
ZEC 4:3 Deginbali, gwallu-olo-sunnabiid-dikarbali olivo-sapi sarbo gwichibalid. Olivo-sapi-wargwen, gwallu-olo-sunnabiid-nuedsik gwichid, baiddina, argan-sapiledsik gwisbalid.”
ZEC 4:4 Geb baliwitur-anbo-sunmaknaidse an egisded: “Dummad, wede, ¿bela ibu obare?”
ZEC 4:5 Baliwitur anga sogded: “¿Ar be wissurde, we ibu-obare?” An ega sogded: “Dummad, an wissuli.”
ZEC 4:6 Degisoggu, baliwitur anga sogdesunnad: “Bab-Jehová Zorobabelʼga weyob sunmaknaid: ‘Sordamar-bila-onogedginsulid, garganguedginsurbalid. Unnila An-Burbaba ibmar imaklegoed.’ Deyob, Bab-Jehová-Bela-Gangued-Nikad soged.
ZEC 4:7 Yar-dummad-siid, ¿ar na be doa-itosunna? ¡Ar be Zorobabel-asabinni unnila neba gued! Zorobabel akwa-nued begi ononai guoed. We akwa-yeerdakmaladba sognanai gumaloed: ‘¡Doggus yeerdakleye!’ ”
ZEC 4:8 Geb sorbali, Bab-Jehová weyob anga sogded:
ZEC 4:9 “Zorobabel Babse-goled-neg-sobegala, akwasailamar urbisad. Na e-sunnad neg-sobnaid obelononikoed.” Deyobi, bemar wisgumaloed, Bab-Dummad-Bela-Gangued-Nikad bemarse an-barmiarye.
ZEC 4:10 Dulemar-gebesaila-ibmar-burwigan-imakledgu egi-bengusmaladi, Zorobabel e-argangi dubgi-gingwa-naid-gani dakarmalale, weligwar itodmaloed. We-gwallu-gwagugle-guedi (7), Bab-Jehová-e-ibya gued, bela neg-dirbir-naidgi nakulediid.
ZEC 4:11 Geb baliwiturse an egisded: “We-olivo-sapi-warbogwad-gwichid, wargwen, gwallu-olo-sunnabiid-nuedsik-gwichid, baiddi, sapiledsik-gwichid, wede, ¿ibu obare?”
ZEC 4:12 An baliwiturse egisdebalid: “Gwallu-e-war-olobiid-warbogwad-dikarba olivo-anagan-walabogwad-gwigwichid, agi e-gwallu iirmakmaid, wede, ¿ibu obarbali?”
ZEC 4:13 Baliwitur an-abin-imakded: “¿Ar be wissurde, wede ibu-obare?” Geb an ega sogded: “Dummad, an wissuli.”
ZEC 4:14 Geb baliwitur anga odulodsunnad: “We-olivo-sarbogwadi, dule-nug-imaklegarmaladid. Bab-Jehováʼga-arbaega, nug-imaklesmaladid. Ar Bab-Jehová, bela napaneg-naid-ibedid.”
ZEC 5:1 Gannar an niba atakdebargua, an negburgan dakarbalid. Garda-bipirmakaled gukumai an dakalid.
ZEC 5:2 Baliwitur anse egisded: “¿Ibu be dake?” An abin-sogded: “Garda-bipirmakaled gukumai an daked. We-garda, daliatar sugue an daked. E-matardungueddi, dalibo-negabar dungue an daked.”
ZEC 5:3 Geb baliwitur anga sogded: “We-be-dakedi, bela-napneg-ukabsalenaid be daked. Ar garda-wagar-soggwengi igi narmakar-nai, deyobi dule-atursaed bela ibitogoed. Ar garda-wagar-baidsik igi narmakar-nai, deyobi dule-gakansaar-ibmar-ise-sogar-soged ibitogoed.
ZEC 5:4 Degisoggu, we-bonigan dule-atursaed-e-neggi-yolegega an barmialid, degi, dule-gakansaar-an-nuggi-sunmaked-e-neggi-yolegega an barmialid. We-bonigan we-negmar-yagi dogoed, degi, bela e-neg-nagubirmala, e-neg-akwamar, obelogoed. Bab-Dummad-Bela-Gangued-Nikad deyob soged.”
ZEC 5:5 Geb degine, baliwitur-anbo-sunmaknaid nodegusad, geb anga sogded: “Niba be atake, ibmar-nodanikid nue be dake.”
ZEC 5:6 Agine, an ese egisded: “Ar we, ¿ibua?” Geb an-abin-imaksad: “We, mete-dummadid, ibmar-gwag oaidikuegalad. We, bela dulemar-we-yargi-bukmalad-e-isgued-e-wilub gued.”
ZEC 5:7 Geb degine, mete-dummad-edued-gingwabiid onakwismalad. We-mete-dummad-yagine ome-gwensak sii daklealid.
ZEC 5:8 Agine, baliwitur anga sogded: “We-ome, isgued-e-wilub gued.” Geb baliwitur ome-mete-dummad-yagi-siidi gindiis imaksad. Geb edued-gingwabiidgi mete-dummad edunonikid.
ZEC 5:9 Geb an niba atakdebargua, omegan-walabo burwaba gukudaniki an dakalid. E-sakanmar dabgala-e-sakanmaryob nikamalad. Geb a-omegan gukumai mete-dummad sesmalad.
ZEC 5:10 Baliwitur-anbo-sunmaknaidse an egisded: “¿Bia we-mete-dummad semamai?”
ZEC 5:11 Baliwitur an-abin-imakded: “Babilonia-yarse semamai, adi, e-neg ega sobmalagar. E-neg-ogulesale, agi we-mete-dummad aila-soblesad-birgi sinonimaloed.”
ZEC 6:1 Gannar an niba atakdebargua, an negburgan dakarbalid. Agine, yar-gwabo-siid-imbaba bila-onoged-urmar-napagined-walabake nodaniki an dakalid. A-yar-gwabogwadi esgoro-gordikidbi nanaed.
ZEC 6:2 Ur-napagined-gebed moli-ginniganase ebipilenaid. Ur-napagined-sogbogined moli-sichiganase ebipilenaid.
ZEC 6:3 Ur-napagined-sogbaagined moli-sipuganase ebipilenaid. Ur-napagined-napisorbaliddina moli-goto-gotomaladse ebipilenaid. Bela we-molimala, dutusur itomalad.
ZEC 6:4 Baliwitur-anbo-sunmaknaidse an egisded: “Dummad, we-urmar, ¿ibu obarsunna?”
ZEC 6:5 Baliwitur anga sogded: “We-urmar, burwa-sogabakegwad-gormamaidid. We-burwamar, Bab-Jehová-bela-napneg-ganikid-asabin-arbimalad-sorba, noarmaladid.
ZEC 6:6 Ur-napagined-moli-sichigan-egi-nanaidi, dad-nakwed-argan-sapiledsik-yar-naidsik nadapid. Ur-napagined-moli-sipugan-egi-nanaidi, dad-argwanedsik nadapid. Ur-napagined-moli-goto-gotomalad-egi-nanaidi, dad-nakwed-argan-nuedsik-yar-naidsik nadapid.”
ZEC 6:7 We-moli-nollosurmaladi, napneg-ebirega gwae-gwae itomalad. Baliwitur ega weyob sogded: “Namala, bela napneg-ugakaase bipirmaknamar.” Geb nadmarsunnad.
ZEC 6:8 Geb degine, baliwitur anse goted, weyob anga sogded: “Be dake, molimar-dad-nakwed-argan-sapiledsik-yar-naidse-nadmaladi, a-yargi an-urwed-boo-imakega nadmalad.”
ZEC 6:9 Bab-Jehová weyob anga sogsabalid:
ZEC 6:10 “Emi, Sofonías-e-machi-Josías-negse be nae. A-negsega, Heldaiʼye-nugad, Tobíasʼye-nugad, Jedaíasʼye-nugad nonimalad. Amar Babilonia-neggweburgi-galesbukwa nonimalad.
ZEC 6:11 We-dulemarse or-senonimaladi, mani-senonimaladi, be egiso. We-ormargine, we-manimargine, ologurgin be sobo. We-ologurgin, dule-irwa-anse-gormalad-e-dummad-Josué-nonogi be sioed. Josuéʼde, Josadac-e-machid.
ZEC 6:12 Ani, Bab-Jehová-Bela-Gangued-Nikad-gued. Geb Josuéʼga an-nuggi, weyob be sogoed: ‘Wegi-dule-gwichidi, Sapi-Siklesad-Gannar-Ainieyobidye nugadid. Ar na e-sailagi gannar ainidagoed, Bab-Jehováʼse-goled-neg gannar sobnonikoed.
ZEC 6:13 We-dule Bab-Jehováʼse-goled-neg gannar sobnonikoed. E-gangued-yeerdakleged nikunonikoed, e-ologangi-sii negsemai guoed. Deginbali, dule-irwa-Babse-goled e-ologangi signonimogoed. Wemar-ebogwadi, nuedgi neg-bogidikidgi negsemai gumaloed.’
ZEC 6:14 ”Ologurginmar anse-goled-neggi bukuoed. Adi deyobi, Helem, Tobías, Jedaías, degi, Sofonías-e-machi-Hen, degisadegu an-gayaburba-ebinsadii gumaloed.”
ZEC 6:15 Ar bemar, be-Bab-Dummad-Jehováʼba ibsaele, dulemar-dikasuli-gudidimaladi, Bab-Jehováʼse-goled-neg-soblealile, bemar-bendaknonimaloed. Deyobi, bemar wisguoed, Bab-Jehová-Bela-Gangued-Nikad bemarse an-barmiarye.
ZEC 7:1 Rey-Darío birgabakegus negsemaidgine, nii-walabakebak-ibabakegi, Bab-Jehová Zacaríasʼga sunmaknonikid. A-nii Quisleuʼye nugad.
ZEC 7:2 A-ibagangine, Betelʼginmalad, Bab-Jehováʼse wilesagwa-ibmar-egisega we-dulemar-barmisad: Sarezer, Regem-Melec, degi, e-dule-bamalad.
ZEC 7:3 We-dulemar, Bab-Jehováʼse-goled-neggi dule-irwa-Babse-gormalad-gudidimaladse-ibmar-egisega, degi, Bab-Dummad-e-gayaburba-barsogmaladse, weyob ibmar-egisegala barmilesmalad: “Ar igi anmar gusgu birga-irba nii-walataledgi, iba-onodaeyobi, ¿ibagwen wile-itoged-iba, degi, mas-gunsuli-gued-iba nasikoe?”
ZEC 7:4 Geb Bab-Jehová-Bela-Gangued-Nikad-e-gayaburba anse weyob nonikid:
ZEC 7:5 “Bela dulemar we-yargi-bukwamaladga be sogo, dule-irwa-anse-gormaladga be sogmogo: ‘Bemar birga-irba, birga-dulapaa-gakambegus (70), nii-walataledgine, degi, nii-walagugledgine (7), mas-gunsulid-iba, degi, wile-itoged-iba onodamargua, ¿bemar nue anga mas-gunsulid-iba ononanaidamala?
ZEC 7:6 Ar bemar mas-gunnarmalale, gobbarmarbalile, ¿na be bemarga imakmarsursi?’ ”
ZEC 7:7 Jerusalén-neggweburgi, degi, neggweburmar-e-dikarba-bukwadgi-dulemar-bukwaunni, degi, neg-bogidikid-naiunni, Bab-Jehová we-gayaburba na e-gayaburba-barsogmaladba, ¿deyob sogsa gussursi? Deginbali, Neguev-yargi, dad-argwanedsik-neba-nanaidgi-dulemar-bukwamarmounni, Bab-Jehová we-gayaburba na e-gayaburba-barsogmaladba, ¿deyob sogsa gussursi?
ZEC 7:8 Geb Bab-Jehová Zacaríasʼga weyob sognonibalid:
ZEC 7:9 “Ani Bab-Jehová-Bela-Gangued-Nikad weyob soged: ‘Innikigwadba igar be nabomala. Na be muchub-muchub sabgumala, na be muchub-muchub wiledakmala.
ZEC 7:10 Mer omegan-ei-sui-burgwismalad be sabsur-imakmala, mer dule-babgan-satemalad be sabsur-imakmala. Mer dule-ainebarmalad be sabsur-imakmala, mer dule-wilemalad be sabsur-imakmala. Mer be na be gwage-ulubgine, muchub-muchub isdar binsamala.’
ZEC 7:11 ”Degi-inigwele, dulemar gwen eba ibsassulid. Urwedgine, wagar-biir imaksamalad. Mer itogega uaya gasmalad.
ZEC 7:12 Dulemar Bab-Jehová-Bela-Gangued-Nikad na E-Burbaba e-gayaburba-barsogmaladba-ibmar-sogsagusad, degi, e-igar-mesisgusad-mer-itomalaga, na e-gwage, akwayobi, dutusur imaksamalad. Degisoggu, Bab-Jehová-Bela-Gangued-Nikad uludsunnad.”
ZEC 7:13 Bab-Jehová-Bela-Gangued-Nikad weyob sogded: “An ese gornaigua, gwen an-itossurmalad. Degisoggu, anse-gollarmalale, an itogosurmogad.
ZEC 7:14 Agala, igi-burwa-dummadba ibmar-seleddae, deyobi, dule-akudakmalad-yar-baid-baidgi-bukwamaladse, an we-dulemar oaisakis gusad. E-yar-metemaladi, swanga nagunonikid, dulemar gwen bar egi nabi dasurmalad. Deyobi, iduar yar napa-nuedga-naigusadi, nega-dulesulidganga nagunonikid.”
ZEC 8:1 Bab-Jehová-Bela-Gangued-Nikad-gayaburba anse nonibalid. Weyob anga sognonikid:
ZEC 8:2 “Ani Bab-Jehová-Bela-Gangued-Nikad, weyob soged: Sión-dulemarbina an bela-bela nue soged. An bela-bela nue-binasogedbali, an e-isdarmaladse sabsur-ulud gusad.”
ZEC 8:3 Bab-Jehová weyob soged: “An Sión-yarse gannar nonikoed, an Jerusalén-neggweburgi megnonikoed. Jerusalén-neggwebur Napiragwad-Neggweburye nuggunonikoed. Bab-Jehová-Bela-Gangued-Nikad-e-yar Islidikid-Yarye nuggunonikoed.”
ZEC 8:4 Bab-Jehová-Bela-Gangued-Nikad weyob soged: “Dadgana, muugana, Jerusalén-e-igarbali gannar sigdii gumaloed. Na seredgusmaladbali, e-gaapoled-sedii gumaloed.
ZEC 8:5 Masmala, bunamala, Jerusalén-igarganbali gannar dododii gumaloed.”
ZEC 8:6 Bab-Jehová-Bela-Gangued-Nikad weyob soged: “A-ibagan nonikile, dulemar-dula-napi-besmaladi, binsamaloed, gwen deyob ibmar-gued daklesurye. Ar angardina, ibmar-geg-gued nikasulid, Ani Bab-Jehová-Bela-Gangued-Nikad deyob soged.”
ZEC 8:7 Bab-Jehová-Bela-Gangued-Nikad weyob soged: “An-dulamar-dad-nakwedsik-bukwamalad an bendakoed, an-dulamar-dad-argwanedsik-bukwamalad an bendakbaloed.
ZEC 8:8 Jerusalén-neggweburgi-gudigumalaga, gannar dagmalaga an imakoed. Wemar an-dulamarga gunonimaloed. Ani an e-Bab-Dummadga gunonikoed, e-Bab-Dummad-innikigwad, e-Bab-Dummad-igar-innikigwad-imaked.”
ZEC 8:9 Bab-Jehová-Bela-Gangued-Nikad weyob soged: “Bemar, we-ibagangi, Bab-Dummad-gayaburba-barsogmalad e-ibmar-sogsad-itosmalad, be niga-gandik imakmala. Anse-goled-neg-soblesokargu, akwa-gebesaila-silesad-akale, we-gayaburba be itosmalad.
ZEC 8:10 Ar we-ibagan-iduale, dule-arbamalad gwen bennuklesurmalad, ibdurganmala gwen-masgi ogullesurbalid. Dule e-isdarmalad-ulale, aineba nadele, dobgunadapdaed. Ar an bela dulemar, na dukin-dukin-urwemalaga imaksad.
ZEC 8:11 Ar epenne an igi-dulemar-napibesmalad-imaksagusa, bar an deyobi imakosulid. Ani Bab-Dummad-Bela-Gangued-Nikad deyob soged.
ZEC 8:12 ”Neg-bogidikidgi be ibmar digmaloed, uva-dubmar sanmakega guoed, napamar ibmar-sanmaknai guoed, nibnega e-boomar obadnai guoed. We-neggweburgi-napibesmaladga, bela we-ibmar egadga-guega an ukoed.
ZEC 8:13 Judá-dulemar, Israel-dulemar, mer dobgumalo, gatik niga-ogannomalo. Bemar, dule-yar-baid-baidgi-bukmalad-abargi, ibmar-isganayob ukabsales gusmalad. Emigindi, an be-bendakmaloed, ibnuedga be gunonimaloed.”
ZEC 8:14 Ar Bab-Jehová-Bela-Gangued-Nikad weyob soged: “Ar be-dadgan an-oulus-gusmargua, bar an wiledaksuli obelogedgi an binsasgusad. Ani Bab-Jehová-Bela-Gangued-Nikad deyob soged.
ZEC 8:15 ”Emigindi, Jerusalén-dulemarga, Judá-dulemarga ibmar-nued-imakedgi an binsaed. Degisoggu, ¡mer dobgumalo!
ZEC 8:16 ”Bemar we-ibmarmar imakergebed: Napiragwadgi ibmar sogmalo. Igar-nabolemalad-neggi, napiragwadgi, igar-inniki-maidba igar nabomalo. Ar deyob imaklegedi, ¡neg-bogidikid nasiked!
ZEC 8:17 Be-gwenadgangine, mer ichakwa be binsao, mer gakansaale emargi be gwisguo. Ar bela we-ibmarmar an isdardaked. Ani Bab-Jehová deyob soged.”
ZEC 8:18 Bab-Jehová-Bela-Gangued-Nikad anga sogdebalid:
ZEC 8:19 “Ani Bab-Jehová-Bela-Gangued-Nikad weyob soged: ‘Judá-dulemargala nii-walabakedgi, nii-walataledgi, nii-walagugledgi (7), nii-warambedgi (10), mas-gunsuli-gudiguedi, weligwaledga, yeer-itolegedga guoed, iba-dummad-weligwaledga guoed. Degisoggu, neg-bogidikidbina be sogmar, igar-napiragwadbina be sogmar.’ ”
ZEC 8:20 Bab-Jehová-Bela-Gangued-Nikad weyob soged: “Amba dulemar-yar-baidginmalad, dulemar-neggwebur-bamaladginmalad danimaloed.
ZEC 8:21 We-dulemar neggwebur-baid-baid-onodii gumaloed. Dulemar-a-neggweburgi-gudimaladga sogdimaloed: ‘¡Bab-Jehová anmargi nued-binsaega, anmar ese namarye! ¡Anmar Bab-Jehová-Bela-Gangued-Nikad amimarye! ¡Ar an Bab-Jehová-amimogoeddeeye!’ ”
ZEC 8:22 Bab-Jehová-Bela-Gangued-Nikad-amimalaga, Bab-Jehová-egi-nued-binsaed-amimalaga, Jerusalén-neggweburse, neggweburmar-bukidar, neggweburmar-yar-baid-baidgi-dutusur-bukmaladi, nonimaloed.
ZEC 8:23 Bab-Jehová-Bela-Gangued-Nikad weyob soged: “A-ibagangine, dule-bukidara gwabinduku-akar-akar-sunmakmaladi, bela-dulemar-yar-baid-baidgi-bukwamaladi, Judío-dule-wargwen-e-mordukugi akanai gumaloed, ega weyob sogmaloed: ‘¡Anmar beba-naega be anmar-imake! ¡Ar anmar wisgusad, Bab-Dummad bemarba gudiiye!’ ”
ZEC 9:1 Bab-Jehová we-gayaburba Hadrac-neggwebur-annik, degi, Damasco-neggweburnik sogsagusad. Bab-Jehová bela-dulemar-bukwadi dakmaid, degi, bela Israel-dulemar-danar-danar-bukwamalad dakmaibalid.
ZEC 9:2 Deginbali, Bab-Jehová Israel-dikarba-yar-naid Hamatʼye-nugad dakmaibalid. Bab-Jehová, neggwebur-nasgusbukmalad: Tiro, degi, Sidón, dakmaibalid.
ZEC 9:3 Tiro-dulemar galu-matusulid-gandikmalad sobsad. Ukub-mergueyob mani onmaksad. Igarba olli-nanaiyob ormar onmaksad.
ZEC 9:4 Degi-inigwele, Bab-Jehová bela e-ibe ibmar sunonikoed, bela e-ibe e-ibmar-nuegan demargi mioed. Soogi bela e-neggwebur ogumakoed.
ZEC 9:5 Ascalón-dulemar deyob-neg-guoedi dakmaloed, geb dobgudmaloed. Gaza-dulemar, naibid-dummad itomaloed. Ecrón-dulemar e-bendakleged-edarbediid-sate-dakarmalale, nunmaked-dummad itomarmogoed. Gaza-dulemar, rey-sate gumaloed. Ascalón-neggwebur dulemar-sate sigoed.
ZEC 9:6 Asdod-neggweburgi dule-isganamar megnonikoed, Filistea-dulemar-na-e-nug-dummarba-imakdiid, an obelogoed.
ZEC 9:7 Filistea-dulemar ablisba-mesa-san-gunmaladi, an obelogoed. Mas-ise-gulleged-gunmaladi, an obelogoed. Filistea-dulemar-abar-bemaloedi, anmar-Bab-Dummadgadga gunonimarmogoed. Amala, Judá-dulemar-e-dummaganga gunonimaloed. Ecrón-dulemar, Jebuseo-dulemaryob gumaloed.
ZEC 9:8 Mer dulemar anse-goled-neggi yogasaar dogsa-dogsa-gumalaga, an egi nakuledii guoed. An-neggweburgi dule-emar-sabsur-imaked bar dognonikosulid, ar an-sunnagwad an egi nakuledii guoed.
ZEC 9:9 Sión-dulemar, ¡be nue-wergumala! Jerusalén-dulemar, ¡weligwaledba be binnasur gormala! ¡Weligwaledba be gormakmala! Be dake, be-rey bese danikid. Be-rey, dule-innikigwadid, emar-abonogedid, na san-dummarba imaksulidid. Moli-uayasuid-bipigwad-birgi-sii danikid, we-moli-bipigwad, moli-uayasuid-ome-e-mimmid.
ZEC 9:10 We-rey, Efraín-e-moli-urmar-bila-onoged obelogoed, Jerusalén-e-molimar obelogoed. Warsib-bila-onoged bibisgoed, bela dulemar-yar-baid-baidgi-bukmaladga, neg-bogidikidgi sunmaknonikoed. We-rey, bela demar-nanaid-ugakaase neg-ganonikoed. Éufrates-diwar-maid-akar, bela we-napneg-bergunaidse, neg-ganonikoed.
ZEC 9:11 “An bebo-ablisba-igar-mesisad-ulale, be-dulemar-dia-dummad-dinnagwadgi-galesbukwamaladi, an onogoed.
ZEC 9:12 Dule-galesbukmalad-bendakleged-edarbebukmalad, gannar e-neg-gandikid-bukwadse dagmala. Ar emi an bega soged, bemar-wilesadbali, bur bule ilabo-wilub wergued an bemar-imakoed.
ZEC 9:13 An-warsiyob an Judá-dulemar gachii gaoed, an-siguyob an Efraín-dulemar imakoed. Sión-yar, an be-mimmigan, Grecia-mimmigangi-yolegega an imakoed. Bila-onogedgi-es-suid-ebulegeyob an be-imakoed.”
ZEC 9:14 Bab-Jehová Grecia-dulemargi nonikoed. E-sigu, mala-aidegeyobi miledoed. Bab-Jehová-Bela-Gangued-Nikad gar-trompeta ogornonikoed, dad-nakwed-argan-nuedsik-burwa-dummad-goled-abargi naoed.
ZEC 9:15 Bab-Jehová-Bela-Gangued-Nikad na e-sordamar-bendaknonikoed. E-sordamar, e-isdarmalad-e-gingimar bela obelogoed. Vino-gobeyobi ablis gobmaloed abali, mummu-gunanaiyobi, allenanaioed. Igi ablis ibmar-ogumakar-ukleged-ailagi-eolegega nogmargi enoledae, deyobi, ablisbi-moodo gudimaloed.
ZEC 9:16 A-ibagine, e-Bab-Dummad-Jehová, na e-sordamar sibad-wawaadyobi bendaknonikoed. E-sordamar Bab-Jehová-e-yargine, ologurgingi-akwa-nuegan-bukwadyob dakarmakdemaloed.
ZEC 9:17 Ibiyobi bela we-ibmarmar, doggus-nued daklenonikoe. Ibmar-gwag-gulleged sapingan-ogannogoed. Vino-ochigwad, weligwar bunamala-imaknonikoed.
ZEC 10:1 Bab-Jehováʼse dad-dummad-ganaidgi dii-wied be egismala. Ar Bab-Jehová mar-golega imakedid, na e dii-owimaidid. Bab-Jehová bela dulemargala, ibmar nabir-sanmakega imaked.
ZEC 10:2 Ibmar-bab-dummadyob-imaklemalad, dule-yardakmaladid. Nergan gabgi-ibmar-gakanad dakmalad. Gakansaar-negburgan-dakmaladgi sunmakmalad, yamo-nabir-emar-obinsaega sunmakmalad. Dulemar na e-idued-satesoggu, ibdurgan-igarsuli-gudiidyobi, yogasaar gudimalad.
ZEC 10:3 A-ulale, Bab-Jehová sogded: “Dule-emar-idudimaladgi an nue-urwed, we-dulemar, sibad-wawaad-macheredyob-gudidimaladi, an sabsur-odurdakoed.” Napiragwa, Bab-Jehová-Bela-Gangued-Nikadi, Judá-dulemar-edarbed. Ar Judá-dulemar e-sibad-wawaadyob gued. Bab-Jehová moli-bulegan-bilagi-ebulemaladyobi, Judá-dulemar-imakoed.
ZEC 10:4 Judá-dulemar-abargine, negsaila-gaed-akwadummad nodagoed, neg-abgaed-suar nodagoed. Bila-onogedgi warsib-ebuleged nodagoed, bela dummagan-negsemaloed nodagoed.
ZEC 10:5 Wemala, ollimar-nanaidgi bila-onomalad-bulegan-urwenanaidyob gumaloed, moli-birgi-sii-urwemaladbogwa urwenai gumaloed. Ar Bab-Jehová eba gudisoggu, a-dulemargi nakwemaloed.
ZEC 10:6 Bab-Jehová sogdebalid: “An Judá-dulemar ogannononikoed, an José-e-wagan bendaknonikoed. An wemar-wiledaked, degisoggu, gannar dagmalaga an imakoed, gwen-mesagwar-anse-gussuliyob gunonimaloed. Ar ani an e-Bab-Dummad-Jehová gued, e-anse-goled, an itogoed.
ZEC 10:7 Efraín-dulemar dule-bila-onogedyob gunonimaloed. Igi-dule vino-gobsadba yeer-itodae, deyobi, yeer itononimaloed. E-mimmigan e-babgan-yeer-ito-dakarmalale, weligwar itodmarmogoed. Bab-Jehová-ega-ibmar-imakoedba, yeer itononimaloed.
ZEC 10:8 ”Ani an ese goloed, ani an gannar danar oambikuoed. An wemar-ollor-imaknonikile, igi iduale dule-bukidar-gumalana, deyobi, gannar gunonimaloed.
ZEC 10:9 An wemar neggwebur-bamaladse oaisakis-inigwele, amba-dikasuli yar-baidgi mamai-inigwele, angi binsadii gumaloed. A-neggweburmargi e-mimmiganmala gudigusmalan-inigwele, gannar e-yarse nonimaloed.
ZEC 10:10 Egipto-yargi-bukwa an sedagoed, Asiria-yargi-bukwa an ninonikoed. Galaad-yar-naidse, Líbano-yar-naidse, an sedoed. Bela wemargala, yar unni-guosulid.
ZEC 10:11 Bukib-itoged-abalagi, demar-obakmaloed, degi-inigwele, ani an ega demar-bogidik imakoed, Nilo-diwar-wilasailad an bela odinnogoed. Asiria-dulemar na san-dummarba-imakdimalad an osulogoed, Egipto-dulemar-negsemaid an obelobaloed.
ZEC 10:12 An-sunnad an-dulamar an ogannogoed, dobsuli an-nuggine nanamaloed. Ani an Bab-Jehová deyob soged.”
ZEC 11:1 Líbano-yar, be-yawagakmar be egae, adi, be-urwarmar soose gummakegar.
ZEC 11:2 Baryawar, be boe, ar urwarmar aimukusad, sapi-dummagan ailasad. Basán-wag-uluwarmar, be bomala, ar bela sapi-dummagan-gwigwichid omukulesad.
ZEC 11:3 Sibad-wawaad-edarbemalad-bonanaid, be itomala, ar bela e-gagan-aragana-nuegan bergusad. Achumigur-nono-wawaad-uurmaked, be itomala, ar bela Jordán-e-sapur-naidi napabi-swiri nagusad.
ZEC 11:4 An-Bab-Dummad-Jehová weyob soged: “Sibad-wawaad-oburgwilegega-bukwad nue be sabguo.
ZEC 11:5 Ar dulemar a-sibad-wawaad-bakmalad yogasaar sabsuli oburgwemalad. Ar dule-sibad-wawaad-manigi-ukmalad sogmalad: ‘Bab-Jehová-e-nug odummolesun, emigindi an mani-ibedid.’ Ar sibad-wawaad-akwed-dulemarbela gwen bai e-sibad-wawaad daksurmalad.”
ZEC 11:6 Bab-Jehová soged: “Deyopira, dulemar-we-yargi-gudimalad bar an sabguosurmogad. Dulemar-e-dikarba-yar-baid-baidgi-bukwamaladga an urmakoed, degi, e-reyga an urmakbaloed. Ar e-yar-naidi bela oitonanaile, bendakega an naosulid.”
ZEC 11:7 Degisoggu, ibmar-ukmalad sibad-wawaad-oburgwega-urbisadi, an akwedigussunnad. Sibad-wawaad-edarbed-e-suar-walabo an susad: Suar-wargwen Graciaʼye an onug-imaksad. Baiddi, Uniónʼye an onug-imaksabalid. An sibad-wawaadmar-akwedigussunnad.
ZEC 11:8 Nii-wargwengi, sibad-wawaad-edarbemalad-walapaa an e-arbaedgi onosad. Degi-inigwele, an sibad-wawaadmar budar dakalid, sibad-wawaadmarmoga budar an-dakarmarmogad.
ZEC 11:9 Degisoggu, an ega sogdesunnad: “Bar an bemar-akwega guosulid. Ar na be burgwebimaladi, burgwemarsundo. Ar na be yoggubimaladi, yoggumarsundo. Ar dula-bemaloeddi, na dukin-dukin gunmarsunna.”
ZEC 11:10 Geb degine, an suar-Graciaʼye-onugsasad sussunnad, geb an a-suar bichisad. Deyobi, an bela dulemar-yar-baid-baidgi-bukwamaladbo-igar-mesisadi, obelononikid.
ZEC 11:11 A-ibagine, igar-maid bela bergunonikid. Dule-sibad-wawaad-manigi-ukmalad an-dakbukmaladi, wisgunonimalad, we, Bab-Jehová-gayaburba guye.
ZEC 11:12 An ega sogded: “Ar be nabir-itomalale, an-arbasad be an-bennukmala. Degisulile, mani na be sumarsunna.” Unnila mani-gwadurgwen-gakambe (30) an-bennuksamalad.
ZEC 11:13 ¡Weyob-gargegu an-uklegega anga nasiksamalad! Geb degine, Bab-Jehová anga sogded: “Anse-goled-neggi mani-ulu-siidgi be egwannae.” Degisoggu, an mani-gwadurgwen-gakambegwad (30) susad. Bab-Jehová-neggi mani-ulu-siidgi an egwannonikid.
ZEC 11:14 Geb sorbali, suar-baid-Uniónʼye an onug-imaksadi, an bichisad. Deyobi, Judá-dulemar Israel-dulemarbogwa gwenatigwar-igar-maidi, an obelononikid.
ZEC 11:15 Geb Bab-Jehová anga sogded: “Sibad-wawaad-edarbed-binsaedsulidaedyob be mor-yoe.
ZEC 11:16 Ar we-yar-naidgi, sibad-wawaad-edarbed, sibad-wawaad-burgwedani-gudimalad-gwen-baisur-daked, an ogwisgunonikoed. We-dule, sibad-wawaad-senigana gwen aminaosulid. Sibad-wawaad-nailikgusmalad gwen onudakosurbalid, sibad-wawaad-bonisurmalad gwen masgi omaosurbalid. We-dule, aka sibad-wawaad-wardadamalad gutoed, sibad-wawaad-e-gonasimar e-ibe-ungenai gudoed.”
ZEC 11:17 ¡Sibad-wawaad-edarbed-isgana, be duledar-wiles! ¡E-Sibad-wawaadmar-metenaded, be duledar-wiles! E-swida es-suidgi nailikguena gadin, e-ibya-nuedsikid esbipise onolesana gadin. E-swida bela e-ibe burgwar-gusana gadin. E-ibya-nued sommoor-gusana gadin.
ZEC 12:1 Bab-Jehová Israel-dulemargi we-gayaburbaba sunmaknaid. Bab-Jehová-bela-mogirmar-nasiksad, napa-e-billigan-mesisad, dulemarga-burba-dulad-uksad, weyob soged:
ZEC 12:2 “Jerusalén-neggwebur inna-gagbidga an obinyoed. Bela neggweburmar-e-dikarba-bukmalad ese omumsalemaloed. Judá-yar, degi, Jerusalén-neggwebur, e-isdarmalad ebiris bukunonikoed.
ZEC 12:3 Bela we-napneggi dulemar-yar-baid-baidgi-bukwamalad Jerusalén-obelogega na atomaloed. ”A-ibagine, bela neggweburmarga Jerusalén-neggwebur akwa-dummad-sabsur-aidikuedyob an imakoed. Dulemar, a-akwa-onirbiedi ese maad guoed.”
ZEC 12:4 Bab-Jehová soged: “A-ibagi, molimar an bela ogwayoed, dule-moli-birgi-simalad surbinsa-itogega an imakoed. Ani, an Judá-dulemargi nakulegoed. Bela dulemar-yar-baid-baidgi-bukmalad-e-molimar aku-atake an imakoed.
ZEC 12:5 Geb degine, Judá-dule-dummagan-nuga-nikamalad, sogdemaloed: ‘Jerusalén-dulemar-e-ganguedi, e-Bab-Dummad-Jehová-Bela-Gangued-Nika-Maid gued.’
ZEC 12:6 ”A-ibagine, Judá-dulemar-e-dummagan sapurgi soo-gamaiyob an imakoed. Ibmar-duk-dukgwen-bukwad-abargi soo-gamaiyob an imakoed. Bela neggweburmar-e-dikarba-bukwamalad ese gummakoed. Jerusalén-dulemardina, gannar e-neggweburgi ambikunonimaloed.
ZEC 12:7 ”Ani, Bab-Jehová, Judá-dulemar-inse bendakoed, adi, David-e-wagan, degi, Jerusalén-dulemar, mer bur Judá-dulemarba nuga-nika itomalagar.
ZEC 12:8 ”A-ibagine, ani, Bab-Jehová, Jerusalén-dulemar an bendaknonikoed. A-dulemar-abargi dule-nollogudiidi, Davidʼyob gunonikoed. Rey-David-neguya, Bab-Dummadyob gunonikoed. Bab-Jehová-e-baliwituryob emar-idu-nadapi gunonikoed.
ZEC 12:9 ”A-ibagine, bela dulemar Jerusalén-neggwebur-obelogega-danimaloedi anse bergumaloed.
ZEC 12:10 Rey-David-neguyagi, degi, Jerusalén-dulemargi burba-nued-binsaed, degi, burba-Bab-Dummadse-goled an odegoed, geb ansik atakdemaloed. Ar igi-dule e-machi-wargwenna-nikad-e-ibe-burgwisadba wile-itonadae, deyobi, Jerusalén-dulemar dule-sabsur-naibigusadga wile-itonanai gumaloed. Ar igi-dule e-machi-sailagined-burgwisadba bonaidae, deyobi, bela-bela bonanai gumaloed.
ZEC 12:11 ”A-ibagine, ar igi Meguido-nebagi bab-dummad-Hadad-Rimónʼga bonanaidae, deyobi, Jerusalén-neggweburgi dummad-bonanai gumaloed.
ZEC 12:12 Bela yar-naidgi, neguya-neguyagi wile-itonanai gumaloed: David-e-gwenadgan bonanai gumaloed, e-omegan, bonanai gumarmogoed. Natán-e-gwenadgan bonanai gumaloed, e-omegan, bonanai gumarmogoed.
ZEC 12:13 Leví-e-gwenadgan bonanai gumaloed, e-omegan, bonanai gumarmogoed. Simei-e-gwenadgan bonanai gumaloed, e-omegan, bonanai gumarmogoed.
ZEC 12:14 Bela gwenadgan-bamalad bonanai gumaloed, e-omegan, bonanai gumarmogoed.”
ZEC 13:1 Bab-Jehová sogdebalid: “A-ibagine, Rey-David-e-gwenadgan-e-isgued-eliega, degi, Jerusalén-dulemar-e-isgued-eliega, dii ariomai guoed.
ZEC 13:2 ”A-ibagine, we-yargi ibmar-bab-dummadga-imaklediid-e-nugmar an elinonikoed. Bipisaale bar ese gorlenai guosulid.” Bab-Jehová-Bela-Gangued-Nikad weyob soged: “Deginbali, we-yargine, e-bab-dummagan-gayaburba-barsogmalad, degi, bela burba-isgana an obelogoed.
ZEC 13:3 Ar amba dule-gwensak Bab-gayaburba-barsogdii gualile, e-babgan ega sogdemaloed: ‘Bab-Jehová-nuggi be gakansadiiye. Degisoggu, be-oburgwilegergebye.’ Ar na Bab-Jehová-gayaburba-barsogedga-imaksad-ular, e-babgan es-suidgi ewarar a-dule-oburgoed.
ZEC 13:4 ”A-ibagine, Bab-gayaburba-barsogmalad gakansaar-sunmaksad-ulale, bingegudmaloed. E-mor-ibmar-ukagi-makaled-yoi bar emar-yardakosurmalad.
ZEC 13:5 We-dulemar sogdemaloed: ‘An Bab-Dummad-gayaburba-barsogedsulid. Unnila an sapurgi-arbaed-duled. An sapingwa-akale, sapur-duled.’
ZEC 13:6 Ar dule-wargwen, ese egichialile: ‘Be-argangi nailikgusad-igar-maidi, ¿igi be gusa?’ Weyob emar-abin-imakdoed: ‘We-an-nailikgusadi, an-aimar-neggi an-naibi-imaksamalad.’ ”
ZEC 13:7 “Es-suid, be an-sibad-wawaad-edarbed onailiksae. An dulegi-bensurgudiidgi be yoledage. Ani Bab-Jehová-Bela-Gangued-Nikad weyob soged. Sibad-wawaad-edarbed be oburgwe. Deyobi, sibad-wawaadmar duurmakdemaloed, geb an e-burwigana obelogoed.
ZEC 13:8 Dulemar we-yargi-bukmalad-e-walapaagwadgi, warbo bergumaloed. Unnila wargwen burgosulid. Ani Bab-Jehová weyob soged.
ZEC 13:9 Degi-inigwele, we-dule-durgusmaladdi, an soogi odurdakoed. Ar igi mani swilidik-guega soogi-dulege, deyobi, an swilidik imakoed, ar igi or soogi wilubdaklege, deyobi, an wilubdakoed. Geb degine, we-dulemar anse gornanai gumaloed, geb an, abin-imakoed. An sogdoed: ‘Wemar, an-dulamalad.’ Wemar sogdemogoed: ‘Bab-Jehová, anmar-Bab-Dummadid.’ ”
ZEC 14:1 “¡Jerusalén-neggwebur! Bab-Jehová-e-iba danikid. A-ibagine, be-ibmar be-galimbabali mimilenai gudoed.
ZEC 14:2 Bela dulemar-yar-baid-baidgi-bukmalad bemargi bila-onodagega an imakoed. We-dulemar be-yar sunonimaloed, be-neggi-ibmar-nikadi be-ibe sumaloed, degi, be-omegangi dodomaloed. Be-dulemar-negabar aineba gales seledmaloed. Bamaladdi, bemaloed.
ZEC 14:3 Geb degine, Bab-Jehová nonikoed. Igi-bila-onoleged-ibagi urwelegeyob, we-dulemarbogwa urwenonikoed.
ZEC 14:4 ”A-ibagine, Bab-Jehová Olivo-Yar-birgi gwisgunonikoed. We-yar Jerusalén-neggwebur-dad-nakwedsik siid. Olivo-yar dad-nakwedsiki dad-argwanedse sogabo maridoed. A-abargine, neba-dummad nagunonikoed. Yar-marisad-gwensak, dad-nakwed-argan-sapiledsik signonikoed, yar-baid-marisaddina, dad-nakwed-argan-nuedsik signonimogoed.
ZEC 14:5 Bemar yarmar-imbaba-neba-naguoedba wakitemaloed. Ar we-neba Azal-neg-nugadse nai guoed. Ar igi Judá-e-rey-Uzías-ibagangi negabandur-nasgua, dulemar wakinmamaigusa, deyobi, bemar wakinmaloed. Geb degine, an-Bab-Dummad-Jehová e-sordamarmala danikoed.
ZEC 14:6 ”A-ibagine, neg-ibgined, degi, neg-dambed naguosulid.
ZEC 14:7 A-ibayobi iba-baigan naguosulid. A-ibagi, igi-ibmar-guoe, unnila ani Bab-Jehováʼbi wisid. A-ibagi, neg-ibgined, degi, neg-mutikid naguosulid. Ar unnila neg mee nai guoed.
ZEC 14:8 ”A-ibagine, Jerusalén-neggwebur-akale, diwar ariomai guoed. A-diwar, yorgine, degi, dii-wiedgi, dinguosulid. E-dii, abala Demar-Gagbidye-nugadsik ariomai guoed. Abala, Demar-Dummadye-nugadsik ariomai gubaloed.
ZEC 14:9 Bab-Jehová, bela-napneg-naid-e-reyga megnonikoed. A-ibagine, Bab-Jehováʼbi Bab-Dummadga mai guoed. E-nugbi unnila itolegoed.
ZEC 14:10 ”Jerusalén-neggwebur-dad-nakwed-argan-nuedsik Gebaʼye-neg-nugad-akale, Rimónʼye-neg-nugadse, bela yar neba-dummadga nagunonikoed. Jerusalén-neggweburdina na e-yar-niba sii guoed. Agine, e-yawagak-Benjamínʼye-nugad-akar, e-yawagak-Ánguloʼye-nugadse dulemar megega ambikunonimaloed. Yawagak-Ánguloʼye-nugad-iduar yawagak-sered gwisgusgusad. Deginbali, Hananeel-neg-suid-gwichid-akale, rey-uva-eguruleged-negse dulemar megega ambikunonibaloed.
ZEC 14:11 Jerusalén-neggweburgi gannar dulemar megega ambikunonimaloed, agi neg-bogidik nagunonikoed, bar bipisaale obergulegosulid.
ZEC 14:12 ”Ar Bab-Jehováʼdi, bela dulemar-yar-baidsikid-nonimalad Jerusalén-dulemargi-bila-onosmaladi, we-bonigangi naibigumaloed: We-dulemargala e-san nungudoed, e-ibyagwag nungudoed, e-gwabin ega nungudbaloed.
ZEC 14:13 A-ibagine, Bab-Jehová a-dulemar bela-bela-dobguega imakoed. Na e-sordamargi aibinnanai gumaloed, degi, na muchub-muchub oburgwenanai gumaloed.
ZEC 14:14 Judá-dulemar a-dulemargi Jerusalén-neggweburse bila-onononimarmogoed. E-dikarba neggweburmar-baigan-bukwamalad-ibe, ibmar-nuegan-wenanai gumaloed. Deginbali, ormar-bukidar, mani-bukidar, mormar-bukidar e-ibe sumarbaloed.
ZEC 14:15 Deyobi, boniganse molimar, moli-uaya-senigan, moli-yargan-muregedmar, moli-uayasuidmar, degi, e-neg-danar-danar-bukwadgi bela ibdurgan-gudimalad oitolemarmogoed.
ZEC 14:16 ”A-sorbali, Jerusalén-dulemargi bela dulemar-yar-baid-baidginmalad-bila-onoapgusmalad-durgusmaladi, birga-ilibali, Rey-Bab-Jehová-Bela-Gangued-Nikad-e-nug-odummogega nanagwisgumaloed, deginbali, Neg-Matargana-E-Iba-onomalaga nanagwisgumarbaloed.
ZEC 14:17 Ar abar-dulemar-we-napneggi-bukwamalad, Rey-Bab-Jehová-Bela-Gangued-Nikad-e-nug-odummogega, Jerusalén-neggweburse-dagsurdibe, e-yargine dii wiosulid.
ZEC 14:18 Ar Egipto-dulemar dagsurmardibe, e-yargi dii wiosulid. Deginbali, Bab-Jehová dulemar-yar-baigangi-bukmalad Neg-Matargana-E-Iba-onogega-dagsurmaladgi boni-barmidagoedi, Egipto-dulemargi barmidabaloed.
ZEC 14:19 Deyobi, Egipto-dulemar, degi, dulemar-yar-baid-baidgi-bukmalad Neg-Matargana-E-Iba-onogega-dagsurmaladi, sabsur-odurdaklemaloed.
ZEC 14:20 ”A-ibagine, moli-e-dolo-den-den-gornanaidgi weyob narmakar naguoed: ‘BAB-JEHOVÁʼGA NUG-IMAKLEGALED.’ Bab-Jehová-neggi bormomar-bukwadi, nogmar ibmar-ogumakar-ukleged-aila-asabin-bukwadyob islidiki gunonimogoed.
ZEC 14:21 Bela Jerusalén-neggweburgi-bormomar-bukwad, degi, bela Judá-yargi-bormomar-bukwad, Bab-Jehová-Bela-Gangued-Nikadga nug-imaklenonikoed. Bela dulemar ibmar-ogumakar-ukalile, we-bormomar ebumaloed, agi ibmar-dunai gumaloed. A-ibagine, Bab-Jehová-Bela-Gangued-Nikad-neggi, dulemar-manigi-ibmar-ukmaladi bar gudii guosulid.”
MAL 1:1 We-gayaburba Bab-Jehová-gayaburbad. Israel-dulemarga Malaquíasʼba soglenoni gusad.
MAL 1:2 Bab-Jehová soged: “An bemar-sabgusad. ”Bemardi anga sogmalad: ‘¿Igi be anmar-sabgusa?’ ” Bab-Jehová sogbalid: “¿Ar Esaúʼde, Jacob-e-ia-sursi? Deyobdo. Degi-inigwele, Jacob bur an sabgusad.
MAL 1:3 Esaúʼdi an isdar daksad. Esaú-yarmar nega-dulesulidganga an imaksad. E-nainumar achu-sapur-chacalʼye-nugad-e-negga an imaksad.”
MAL 1:4 Edom-dulemar soged: “Ar anmar-obergus-inigwele, anmar gannar neggwebur-ayarisad-birgi negmar sobbaloed.” Ar Bab-Jehová-Bela-Gangued-Nikaddi soged: “Ar Edom-dulemar sunna gannar negmar-sobed. Degi-inigwele, amba an gannar e-ibe obelobaloed. E-yar-naidi, yar-isganaye onugsalegoed. A-dulemargi, Bab-Jehová degisadegu urwemai guoed.
MAL 1:5 Bemar-sunnagwad be dakmaloed, geb be sogdemaloed: ‘Bab-Jehová-e-nug Israel-yarginbi odummolesurye, bela yar-baigansik e-nug odummolebarye.’ ”
MAL 1:6 Bab-Jehová-Bela-Gangued-Nikad dule-irwa-ese-gormaladga soged: “Mimmigan, e-bab-nug odummoged, degi, maimar e-dummadgi binsaed-nikaa damalad. Emide, an bemar-bab-guele, degite, ¿ibiga geg be an-nug odummomarsunna? An bemar-dummad-gubalile, degite, ¿ibiga geg be angi-binsaed-nikaa damarbarsunna? Bemar an-nug oichodimalad. ”A-ukinbali, be sogmarbalid: ‘¿Ibigi an be-nug oichodimala?’
MAL 1:7 ”Bemar, anga mas-ise-gullemalad ibmar-ogumakar-ukleged-ailase-seardamaladgi, be an-nug oichodimalad. ”Amba be sogmarbalid: ‘¿Ibigi an begi dodosmala?’ ”Be angi dodosmalad, ar bemar binsasad, Bab-Jehová-e-mas-gullegedi ibmar baisur-daklegedye.”
MAL 1:8 Bab-Jehová-Bela-Gangued-Nikad weyob soged: “Bemar, ogumakar-ukega ibdurgan-ibyasurmalad seardamalad. Ar bemar binsaed, wede ibmar-ichakwasurye. Bemar, ogumakar-ukega ibdurgan-muya-muyamalad, degi, boni-nikamalad oburgwedamalad. Ar bemar binsaed, wede ibmar-ichakwasurye. Ar deyob be binsamalale, degite, ¿ibiga geg be-saila-dummad-negdakmaidga ibdurgan-deyobmaladi ukmarsunna? Be ebinsamargua, ¿be-saila-dummad-negdakmaidde yeer-itosar be insae? ¿Nabir be-daksamalar be insae? Suli.
MAL 1:9 ”Be sogmalad: ‘Degisoggu, emigindi, anmar Bab-Dummadse gormala, adi, Bab-Dummad wile anmar-dakegar.’ ” Bab-Jehová-Bela-Gangued-Nikad weyob soged: “Bemar anga weyob ibdurgan-daklemalad-uked-sorbali, ¿an yeer bemar-dako be insae?”
MAL 1:10 Bab-Jehová-Bela-Gangued-Nikad weyob sogbalid: “Bitigi be-dule-wargwen anse-goled-neg ediena gadin, adi, mer binsarsunna anga-ibmar-ukleged-ailagi soo-ogamalagar. Ar an bemar-yeer daksulid, deginbali, an bipisaagwale bemar-anga-ibmar-uked abingaosurbalid.”
MAL 1:11 Bab-Jehová-Bela-Gangued-Nikadi weyob sogbalid: “Dad-nakwiardaed-akale, dad-argwanedsega, bela dulemar-yar-baid-baidgi-bukwamalad-abargi, an-nug dummarbaa gued. Bela yar-baid-baidgine an-nugga ina-wawadikid ukmalad, degi, an-nugga ibmar-ukleged-swilidikid ukmarbalid. Ar bela dulemar-yar-baid-baidgi-bukwamalad-abargi, an-nug dummarbaa gued.”
MAL 1:12 Bab-Jehová-Bela-Gangued-Nikadi weyob sogbalid: “Ar bemardi an-nug oichodimalad. Ar bemar sogmargu: ‘Bab-Jehováʼga-ibmar-ogumakar-ukleged-aila swilidiksurye, degi, e-masgulleged gwen-nabirsurye.’ ”
MAL 1:13 Bab-Jehová-Bela-Gangued-Nikadi weyob sogbalid: “Be sokardamarbalid: ‘Bela we-ibmarmar anmar budarsunna dakgusad.’ Weyob bemar soged-ilibali be isdarsunna an-dakmalad. Ar ibdurgan-atursalegarmalad, ibdurgan-muya-muyamalad, degi, ibdurgan-bonigwakwamalad, be anga ogumakar-ukega-sedanidamalad, ¿an be-abin abingao be ebinsamala? Suli.”
MAL 1:14 Bab-Jehová-Bela-Gangued-Nikadi sogbalid: “Dule anga ise-sogar-sogedi an bega sibad-wawaad-machered-nued ukoye, degi-inigwele, aka a-anale anga ibdurgan-bonigwaled-ukdaedi, we-dule ukabsalesun. Ar ani an Rey-Dummadid. Ar bela dulemar-yar-baid-baidgi-bukwamaladi an-nuga dobmalad.”
MAL 2:1 Bab-Jehová-Bela-Gangued-Nikad soged: “Emigindi, dule-irwa-anse-gormalad, we-igar-uklenaidi bemargadid.
MAL 2:2 Bemar anba ibsasulile, deginbali, an-nug odummosurbalile, an be-ukabsamaloed. Bemarga-ibmar-nuegan-uklegedi an ibmar-isganaga obinyoed. Bato an bemar-ukabsasad, ar ade, bemar, gwage-ulubgi yapa an-nug odummomalad.
MAL 2:3 ”A-ulale, an be-waganse urwoed. Bemar ibdurgan-ogumakar-ukleged-iba-onolegedgi ibmar-durgan-e-saa, an bemar-wagargi mioed. Geb bela a-ibmar-isganaba-mesa an bemar-metoed.
MAL 2:4 Geb agi bemar wisguoed, ani an Bab-Jehová bemarga we-igar uksadye, adi, an Levíʼbo-igar-mesisadi, mer berguegar.
MAL 2:5 ”An Levíʼbo-igar-mesisadi, sanburba-dula-gudigued-igalad, deginbali, bogidik-gudigued-igarbalid. An-dobekwaa-nanadiguega an ega uksad. Leví an-dobekwaa-nanadii gusad, bela-bela angi binsaed-nikaa gudigusad.
MAL 2:6 Igar-napiragwadgi sunmakdii gusad, e-sunmaked ibmar-isganagi sunmaksulid. Anbogwa bogidikidgi, degi, innikigwadgi nanasad. Dulemar-bukidar isguedgi-banguega imaksad.
MAL 2:7 Ar dule-irwa-anse-goled-e-sunmakedi binsaed-nikaa sunmakergebed. E-sunmakedgi dulemar an-igar-mamaid amimaloed. Ar ade, wemar Bab-Jehová-Bela-Gangued-Nikad-e-gayaburba-berbegedid.”
MAL 2:8 Bab-Jehová-Bela-Gangued-Nikad sogbalid: “Ar bemardi, an-igargi aibatemalad. Be-ibmar-odurdakedba dulemar-bukidar isguega be imakdimalad. Bemar, an Levíʼbo-igar-mesisadi bichismalad.
MAL 2:9 Ar bemar an-igar-maidba-nanasurmalad-ulale, degi, dulemarga igar-maidba innikigwadba igar-nabosurbalid-ulale, andi, dulemar bemar-isdar-dakega an be-imaksamalad, dulemar-asabin dule-isganaga-gumalaga an be-imaksamarbalid.”
MAL 2:10 Ani, Malaquías, an bemarga soged: ¿Ar bela anmarde unnila Bab-wargwenna niksursi? ¿Ar Bab-Dummad-wargwenna anmar-obinnissursi? Ar degite, ¿ibiga anmar na muchub-muchub yardakedgi Anmar-Babgan-Bab-Dummadbo-Igar-Mesisad oichodimarsunna?
MAL 2:11 Judá-wagan, Bab-Dummadgi nosmalad. Israel-yargi, degi, Jerusalénʼgi, igar-maisulid, we-igar-isgana imaksamalad: Ar Judá-e-wagan, omegan-bab-dummad-baidse-gormalad-nikudmaladba, Bab-Jehová-e-neg-sabed-islidikid oichosmalad.
MAL 2:12 Ar dule weyob ibmar-imakedi, amba Bab-Jehováʼga ibmar-ukleged ukele, Bab-Jehová-Bela-Gangued-Nikad, a-dule, Jacob-e-wagan-danar-danar-bukwad-abargi osulogoed.
MAL 2:13 Baid-ibmar be imakdimarbalidi, wedid: Bemar Bab-Jehováʼga-ibmar-ogumakar-ukleged-ailagi ibyanis eodidimalad. Ar Bab-Jehová be-ibmar-uked bar-bai daksursoggu, deginbali, ega be ibmar-uked bar be-ibe nuedgi abingasurbarsoggu, be bomalad, degi, be ise-wilegar itomarbalid.
MAL 2:14 Degite, amba be egismalad: “¿Ibiga deyob gue?” Ar be na ome-sapingwaun-gasadgi-be-nosadi, Bab-Jehová be-barsogedga gued. Ar we-ome bebogwadinad, deginbali, ebo-be igar-mesisad-omebalinad.
MAL 2:15 ¿Ar Bab-Jehová dule-gwenna, san-nika, burba-nika imaksasursi? ¿Ar ibiga dule-gwenna imaksa? Ar Bab-Dummad deyob anmar-imaksad, adi, anmar egadgadbi nugsalemalagar. Degisoggu, nue-salakarmalo. Be-san be nue-sedii imakmalo. Mer be na ome-sapingwaun-nikusadgi nomalo.
MAL 2:16 Ar Israel-e-Bab-Dummad-Jehová soged: “Ar ome-meted-igar gwen an abesulid, degi, dule-sabsur-emar-imaked an sae dakbalid.” Deyob Bab-Jehová-Bela-Gangued-Nikad soged. Degisoggu, nue-salakarmalo. Be-san be nue-sedii imakmalo. Mer be na egi nodii gumalo.
MAL 2:17 Bemar na be-sunmakedgi Bab-Jehová-budar-itogega imaksamalad. A-ukinbali, bemar egismarbalid: “¿Ibugi anmar Bab-Jehová-budar-itogega imaksasunna?” Ar bemar weyob egi sogmaladgi: “Bab-Jehová bela dulemar ibmar-isgana-imakedi, yeerdakye, a-dulemargi werguye.” Be sogmarbalid: “¿Bia Bab-Dummad-igar-innikigwad-imaked nadsunye?”
MAL 3:1 Bab-Dummad-Bela-Gangued-Nikad weyob soged: “An-gayaburba-berbeged an barmidasokalid, adi, an-iduar igar-mayegar. Ukiagwale be dule-dummad-amidimalad Bab-Jehováʼse-goled-negse nonikoed. Bemar bela-bela-dule-edarbediid igar-mesisad-gayaburba-berbeged-dule bato danikid.”
MAL 3:2 Degi-inigwele, ¿doa, e-iba-danikid-abin baisur-itogoe? ¿Doa, a-dule-danikir, e-asabin unni gwisguoe? Ar a-dule, soo-ibmar-swilidik-imakedyobi gued, morgauk olli-nanaid-eliedyobi gued.
MAL 3:3 A-dule, ibmar-swilidik-imakedga sigoed, mani-swilidik imakoed. Dule-irwa-Babse-gormalad-Leví-wagan-swilidik imaknonikoed. Or, degi, mani, soogi-swilidik-imakedyobi imakoed. Geb, igar-innikigwad-maidba Bab-Jehováʼga ibmar-ukleged senonimaloed.
MAL 3:4 Ar igi-birga-nasmaladgi, degi, igi-epenneyobi, Bab-Jehová ega ibmar-ukleged yeer-itogedgi abingadae, deyobi Judá-dulemar-e-ibmar-uked, degi, Jerusalén-dulemar-e-ibmar-uked Bab-Jehová abingaoed.
MAL 3:5 Bab-Jehová-Bela-Gangued-Nikad soged: “Degisoggu, an bemarga igar-nabogega an bemarse warmaknonikoed. We-dulemargi-ibmar-sogega an guagwar danikoed: Ina-isgana-imakdimaladgi, abirgunagwarsuli negsichigi galagwensuli-nanadimaladgi, gakansaar ise-sogar ibmar-sogmaladgi, ega-arbamalad-sabsur-imakdimaladgi, siamar-ei-sui-burgwismalad-sabsur-imakdimaladgi, dule-sergan-sated-sabsur-imakdimaladgi, degi, gwen an-dobsuli, dule-yar-baidsikmalad-sabsur-imakdimaladgi, amargi dobsulidba-gwisguega an danikoed.”
MAL 3:6 “Ani Bab-Jehová, an gege gwaged. A-ulale, bemar Jacob-wagan be bergussurmalad.”
MAL 3:7 Bab-Jehová-Bela-Gangued-Nikad soged: “Be-dadgan-ibagan-akale, bemar an-igar-maidgi aibandimalad, eba be ibsadisurmalad. Be gannar anse dagmala, an gannar bemarse namogoed. ”Degi-inigwele, bemar sogmalad: ‘¿Ar ibiga anmar gannar bese naosunna?’
MAL 3:8 ”¿Ar Bab-Dummad-ibe sunna dule ibmar-atursaoe? Ar bemar an-ibe ibmar atursadimalad. ”Degite, amba be sogmarbalid: ‘¿Ibu anmar be-ibe atursadimala?’ ”Ibmar-ambegi-gwensak-ukleged (10%), degi, anga ibmar-ukleged be atursadimalad.
MAL 3:9 Bemar, bela-dulemar-bukwamalad, be ukabsales bukwamalad, ar be an-ibe atursadimalad.”
MAL 3:10 Bab-Jehová-Bela-Gangued-Nikad soged: “Bela-ibmar-ambegi-gwensak-uklegedi (10%), sogedba anse-goled-neggi-mani-ulu-siidse be sedamar, deyobi, an-neggi masgulleged nika guoed. We-ibmargi be an-wilubdakmardo, bule an bemarga nibneg-akale bendakleged barmidagosurdibe, degi, bule an bemarga ise-obinagwale ibmar ukosurbardibe.”
MAL 3:11 Bab-Jehová-Bela-Gangued-Nikad sogbalid: “Sesmar an bega obelogoed, adi, bemar-ibe ibmar-digar-nanaid mer obelogega, degi, nainugi uva-dub-digar-nanaid-e-san mer berguegar.
MAL 3:12 ”Geb degine, bela dulemar-yar-baid-baidgi-bukwamaladi, bemarga sogmaloed, bemargi nued-binsalesye, ar bemarde, yar-yeerdakleged nikumaloed. Ani Bab-Jehová-Bela-Gangued-Nikad deyob soged.”
MAL 3:13 Bab-Jehová soged: “Ar bemar ise-apole angi sunmakdimalad. ”Degite, amba be sogmarbalid: ‘¿Ibugi an begi ise-apole sunmakdimala?’
MAL 3:14 ”Bemar sogsamalad: ‘Ar Bab-Dummadga-arbaedi, binsaledid. Ar Bab-Dummad-Bela-Gangued-Nikad-asabin, anmar e-igar-maidba-ibsaele, degi, wile-itoged-mor-yoele, ¿ibu wis anmar egi ibmar-nued amioe?
MAL 3:15 Ar anmar dakdimalad, dule-na-san-dummarba-imakdimaladi weligwar gudidiid. Dule-ibmar-isgana-imakdimaladga ibmar nueganbi guddaed. Amala, Bab-Dummad-ourwega-imakdamalad, degite, gwen-sabsur odurdaklesurmalad.’ ”
MAL 3:16 Dulemar-Bab-Jehová-dobee-nanadimaladi, na muchub-muchub-sunmaksamalad, geb Bab-Jehová, a-dulemar-ibmar-soged nue-itogar imaksad. Geb degine, Bab-Dummad-wagab dulemar-Bab-Jehová-dobee-nanadimalad-e-nugmar, degi, Bab-Jehová-e-nug-odummodimalad-e-nugmar, ebinsalegega gardagi narmaklesad.
MAL 3:17 Bab-Jehová-Bela-Gangued-Nikad soged: “We-ibmar-imaked-iba bato danikid, we-dulemar unnila angadbi gumalaga an imakoed. We-dulemar an wiledakoed, igi baba na e-machi-ega-arbaed wiledake, deyobi an wiledakoed.”
MAL 3:18 Geb degine, bemar gannar magar-daknonimaloed, doa dule-nuedi, doa dule-isgana. Doa Bab-Dummad-nug odummoge, doa Bab-Dummad-nug odummosuli.
MAL 4:1 Bab-Jehová-Bela-Gangued-Nikad soged: “Be dakmar, bato iba danikid, igi-maduyoedgi soo gwabunyesiidae, deyobi iba danikid. Bela dulemar-na-san-dummarba-imakdimalad, degi, bela dule-isganamar gagan-dinnagwadyobi gumaloed. A-ibagine, an wemargi soo ogaoed, bela-e-malimarse-bakale, degi, e-anaganse-bakale, an swanga imakoed.
MAL 4:2 Ar bemar-an-dobee-nanadimaladgardi, dad-gaedyobi igar-innikigwad-imakleged nagunonikoed, degi, bemar-abonoleged-igar bemarga nonikoed. Bemar moli-bebe-nikad-sapingana-emisgwa-mas-guchadyob ichomakdemaloed.
MAL 4:3 Iba bato an nasiksad, a-ibagine, bemar, dulemar-isgana-birgi dii-dii annamaloed. Ibmar-ubigwar-gueyob bemarse dule-isganamar gumaloed.”
MAL 4:4 Bab-Dummad-Bela-Gangued-Nikad sogbalid: “An-mai-Moisés-Igar-Mesisad be ebinsamala. Horeb-yargi, an bela Israel-dulemarga-Igar-Uksad, degi, Igar-Mesisad, be ebinsamalo.
MAL 4:5 ”An-iba-daged bato danikid, a-iba buleganad, degi, sabsur-odurdakleged-ibabalid. A-iba-iduale, an-gayaburba-barsoged-Elías, an barmidagoed.
MAL 4:6 Elías imakoed, babgan e-mimmiganbo na gannar igar-naboged, degi, mimmiganmoga e-babganbo igar-naboged. Deyobi, napneg-naidi, an bela obergunonikosulid.”
MAT 1:1 Jesucristo e-dadgansiki ilekwaa-danikid-e-garda. Jesucristo, David-e-wagwad, degi, Abraham-e-wagwabalid.
MAT 1:2 Abraham-machidi, Isaacʼye nugad, Isaac-machidi, Jacobʼye nugad, Jacob-machidi, Judáʼye nugad, degi, e-masmala-baigan.
MAT 1:3 Judá-machidi, Faresʼye nugad, degi, e-machi-baiddi, Zaraʼye nugad. We-machi-warbogwad-e-nandi, Tamarʼye nugad. Fares-machidi, Esromʼye nugad, Esrom-machidi, Aramʼye nugad.
MAT 1:4 Aram-machidi, Aminadabʼye nugad, Aminadab-machidi, Naasónʼye nugad, Naasón-machidi, Salmónʼye nugad.
MAT 1:5 Salmónʼdi, Rahab-ebo Booz-baksad. Boozʼdi, Rut-ebo Obed-baksad. Obed-machidi, Isaíʼye nugad.
MAT 1:6 Isaí-machidi, Rey-Davidʼye nugad, Rey-David-machidi, Salomónʼye nugad. Salomón-e-nandi Urías-e-omega-gusadid.
MAT 1:7 Salomón-machidi, Roboamʼye nugad, Roboam-machidi, Abíasʼye nugad, Abías-machidi, Asaʼye nugad,
MAT 1:8 Asa-machidi, Josafatʼye nugad, Josafat-machidi, Joramʼye nugad, Joram-machidi, Uzíasʼye nugad,
MAT 1:9 Uzías-machidi, Jotamʼye nugad, Jotam-machidi, Acazʼye nugad, Acaz-machidi, Ezequíasʼye nugad,
MAT 1:10 Ezequías-machidi, Manasésʼye nugad, Manasés-machidi, Amónʼye nugad, Amón-machidi, Josíasʼye nugad.
MAT 1:11 Judíoʼmar Babiloniaʼse gales ebipilesmargu, Josías machimala-nikunonikid: Jeconías, degi, e-masmala-baigan.
MAT 1:12 Judíoʼmar gales Babiloniaʼse ebipilesmalad-sorba, Jeconías, Babiloniaʼgi e-machi-Salatiel-baknonikid. Salatiel-machidi, Zorobabelʼye nugad.
MAT 1:13 Zorobabel-machidi, Abiudʼye nugad, Abiud-machidi, Eliaquimʼye nugad, Eliaquim-machidi, Azorʼye nugad.
MAT 1:14 Azor-machidi, Sadocʼye nugad, Sadoc-machidi, Aquimʼye nugad, Aquim-machidi, Eliudʼye nugad.
MAT 1:15 Eliud-machidi, Eleazarʼye nugad, Eleazar-machidi, Matánʼye nugad, Matán-machidi, Jacobʼye nugad.
MAT 1:16 Jacob-machidi Joséʼye nugad. José, María-e-suiga gusadid, geb agi Jesús gwalulesad. We-Jesús, Cristoʼye nugad.
MAT 1:17 Degisoggu, Jesús-e-dadgan, Abraham-akar, Davidʼse, e-ambe-gakabake (14) gued. Degi, David-akar, Judíoʼmar gales Babiloniaʼse-ebipilesmaladse, Jesús-e-dadgan e-ambe-gakabakebalid (14). Degi, Judíoʼmar gales Babiloniaʼse ebipilesmalad-akar, Cristoʼse, Jesús-e-dadgan e-ambe-gakabakebalid (14).
MAT 1:18 Jesucristo weyob gwalulesad: María, Jesús-e-nan, deun José-ebo igar nabosmalad na nikumaloye. Nikued-idu, María daklealid, Bab-Dummad-Burba-Isligwaled-egi-ataksadba bato gurgin-nika gudii.
MAT 1:19 María-e-sui-José, dule-gwage-nuedsoggu, yapa-María-obingegsaedba arbakee mete-sokalinad.
MAT 1:20 Ar José degi-binsadii, gabgi Bab-Dummad-e-baliwitur ese nonikid, ega sognonikid: “David-wagwa-José, mer be dobgu. María be-omega-guega be abingae. Ar María-bonigwar be dakedi, Bab-Dummad-Burba-Isligwaled-sogedba deyob gusad.
MAT 1:21 María, machi-wargwen nikuoed, Jesúsʼye be onugsaoed, ar ade, isguedgi e-neggwebur abonogoed.”
MAT 1:22 Weyob bela ibmar-gusadi, deyob gusad, adi, Bab-Dummad na e-gayaburba-barsogedba ibmar-sogsadba guegar, deun sogsagusgu:
MAT 1:23 “Emi be dake, yagwa-wargwen gurgin-nika guoed, goe nikunonikoed. Emanuelʼye onugsaoed.” Isaías 7:14 Emanuel sogleged, “Bab-Dummad anmarba gudiiye.”
MAT 1:24 José gabdakmai ataksagu, ar igi Bab-Dummad-e-baliwitur ega sogsa, deyob imaksad. José, María-nikunonisunnad.
MAT 1:25 Degi-inigwele, amba Maríaʼse gochasurgweled. José, María-machi-gebe-nikusad-sorba geb Maríaʼse gochad. Machigwa-gwalulesadi, Jesúsʼye onugsasad.
MAT 2:1 Jesús Judea-yalagi Belén-neggweburgi gwalulesgu, deun Rey-Herodes-negdakmaidgi, girmar-dad-nakwe-dorgan-ibmar-nue-wisimalad Jerusalénʼse nonimalad,
MAT 2:2 sognonimalad: —¿Bia Judíoʼmar-E-Rey-gwalulesad mai? Ar ade, anmar dad-nakwedba e-niisgwa daksamalad. Anmar e-nug-odummogega ese danimalad.
MAT 2:3 Rey-Herodes degi-soge-itoargu, surbinsa itonaded, degi, bela Jerusalénʼgi-bukmalad eba surbinsa itonadmarmogad.
MAT 2:4 Herodes, bela dule-irwa-Bab-Dummadse-gormalad-e-dummaganse, degi, Garda-Narmaked-Dulemarse-gochagu, amarse egichialid, bia Cristo gwalulegoye.
MAT 2:5 Amar, abin-imakdemalad: —Cristo Judea-yalagi Belén-neggweburgi gwalulegoed. Ar deyob Bab-Dummad-gayaburba-barsoged-narmakar-maid sognaid:
MAT 2:6 “Be, Belén-neggwebur, Judea-yalagi-siid, be baisur-dakle-inigwele, ar neggwebur-baiganba be bur nue nug nikad. Ar ade, begi dule-neggwebur-seoed nodagoed, adi, an-dulemar-Israel-akwegar.”
MAT 2:7 Degi, Herodes, girmar-dad-nakwe-dorganse arbakee gochagua, ese nue-egichialid, emarde sana nue-niisgwa daksamarye. Herodesʼga-sogsamargu,
MAT 2:8 Herodes Belén-neggweburse amar-barminai gualid. Amarga sogded: —Weba Belén-neggweburse be namar, nue be mimmi-amimalo. Ar be amismalale, an-owisononiko, adi, an ese namogagar, an e-nug odummonamogagar.
MAT 2:9 Girmar-dad-nakwe-dorgan, degi-ega Rey-Herodes-soge-itosmargu, nadmarsunnad. Amar dad-nakwedba-niisgwa-daksamalad, a-niisgwa e-idu-nadapi gualid. Geb mosmargu, bia-mimmi-mai, agi niisgwa bogi nagunonikid.
MAT 2:10 Girmar-dad-nakwe-dorgan niisgwa-daksamargu, bela nue-weligwar itosmalad.
MAT 2:11 Girmar-dad-nakwe-dorgan, negyaba-dogdemargu, mimmi e-nan-María-walik-gudii dakdapmalad, degi, mimmi-e-nug-odummomalaga yokorgi-sindigar sigidmalad. Degine, girmar-dad-nakwe-dorgan mimmiga ibmar-nuegan-ukmalaga e-ulu egadmalad. Ega we-ibmarmar uksamalad: Olo, ibmar-wawadik-yapanned, degine, sapi-gunnugiid-wawadikmalad-mirraʼye-nugad.
MAT 2:12 Bab-Dummad, gabgi girmar-dad-nakwe-dorgan owisosad, melle gannar Herodesʼse bar namaloye. Degisoggu, girmar-dad-nakwe-dorgan igar-baidba e-neggweburse nadmalad.
MAT 2:13 Ar girmar-dad-nakwe-dorgan-naded-sorba, agi, Bab-Dummad-e-baliwitur gabgi Joséʼse nonikid, ega sognonikid: “Be gwisgu, mimmi be sue, e-nan be sue, Egiptoʼse be wakinmar. An-bega-sogedse be weba gudigumalo. Ar ade, Herodes mimmi-oburgwega mimmi-amidagoed.”
MAT 2:14 José atakargu, mimmi, degi, e-nanbo, yog sear imaksad. A-mutikidba Egiptoʼse ega wakitesunnad.
MAT 2:15 Agi Herodes-burgwisadse gudigusmalad. Bab-Dummad-ibmar-sogsadba-guegala, deyob gusad. Deun Bab-Dummad-gayaburba-barsoged sogsagusgu: “Egipto-yar-akale, an-machise an gochagusad.”
MAT 2:16 Herodes dakdegu, girmar-dada-nakwe-dorgan e-yar-daksa, nue sae-itoded. Degisoggu, a-ulale, bela Belén-neggweburgi, degi, neggwebur-dikarbarmalad machimala-birgabo-akuar-nikmalad-oburgoye igar uksasunnad. Ar ade, Herodes nue-itosad, mimmi birgabosaar nikargebye.
MAT 2:17 Herodes mimmigan-oburgwisad. Ar igi Bab-Dummad-gayaburba-barsoged-Jeremías sogsa-gusa, deyob gusad. Deun sogsagusgu:
MAT 2:18 “Dulemar Ramáʼgi binnasuli-oimake itoleged, dulemar ise-boale, degi, nunmakedba-bukib-binsae itoleged. Wede Raquel, e-mimmiganga bonaid, dule-e-gwage-gadi-gadi-imaked abesulid, e-mimmigana bela ei girgusad.”
MAT 2:19 Herodes-burgwisad-sorba, Bab-Dummad-baliwitur-wargwen, Egiptoʼgi Joséʼse gabgi nonikid,
MAT 2:20 ega sognonikid: “Be gwisgu, mimmi, e-nanbo be sede. Israel-yalase be nae, ar dulemar-mimmi-oburgwebi-gusmaladi bato bela burgwismalad.”
MAT 2:21 Geb degi, José gwisgussunnad. Geb mimmi, e-nanbo sessunnad, agi geb Israel-yalase nonikid.
MAT 2:22 Ar José itoargu, Arquelao Judea-yalagi e-bab-Herodes-sorba negdakmaiye, ase dobe naegualid. Ar gabgi Bab-Dummad-ega-sogsadba José, Galilea-yarse nadsunnad.
MAT 2:23 José Galilea-yarse nonigua, neggwebur-Nazaretʼye-nugadse megnonikid, adi, Bab-Dummad-gayaburba-barsogmalad-sogsamaladba guega, deun sogsamargu: “Nazaretʼginedye bilegoye.”
MAT 3:1 Deun a-ibagangi, Diigi-dule-oged-Juan Bab-Dummad-igargi Judea-yargi, nega-dulesulidganba sunmaknonikid.
MAT 3:2 Weyob sognonikid: “Be-isguedga na be ulubgi bukib-binsamar, be-daed be ogwamarsun, ar Bab-Dummad-e-negdakmaid bemar-mosad.”
MAT 3:3 Ar Bab-Dummad-gayaburba-barsoged-Isaías, deun weyob Juanʼnik sogsagusgu: “Dule-wargwen nega-dulesulidganba binnasur sunmaknonikoed, dulemarga sognonikoed: ‘Dule-Dummad-idu igar mayemar, igar swilidik mesmar.’ ”
MAT 3:4 We-dule, Diigi-dule-oged-Juan, moli-yargan-mureged-e-absar na e-morga imakdii gualid, degi, e-molidubga moli-uka imakdii guarbalid. Geb ses-nabir-gulleged, degi, achanis, e-masga imakdii gusbalid.
MAT 3:5 Jerusalénʼginmalad, bela Judea-yalaganbarmalad, degi, Jordán-diwar-dikarba-dulemar-bukmalad, Juanʼse duurmaknonimalad.
MAT 3:6 E-isgudiid na dukin-dukin barsognanai guarmalad. Geb Juan Bab-Dummad-diigi-ogleged-igar Jordán-diwargi imaknai gualid.
MAT 3:7 Juan dakalid, Fariseo-sordamar, degi, Saduceo-sordamar, bukidar ese Bab-Dummad-diigi-ogleged-igar imakdaniki, amarga sogded: “¡Ar bemar naibe-bulegan-e-mimmiganyob gumalad! ¿Ar doa bega sogsamala, bemar Bab-Dummad-nue-urwedanikoedgi sunna be wakinmaloye?
MAT 3:8 Degisoggu, be-isguedga na be bukib-binsasmaladba-nue-gwagsamaladi, be-daedgi na be oyomarsun.
MAT 3:9 ”Mer unnila na be sogmalo: ‘Anmar Abraham-wagan gumarye.’ Ar an bemarga soged: ‘Ar Bab-Dummad sunna we-akwamar Abraham-e-waganga imaked.’
MAT 3:10 ”Deginbali, ar bato akan guar sapi-maligi yoid. Degisoggu, sapi nue-sanmaksulile, a-sapi ogumaklegega siklegoed, soogi melledoed.
MAT 3:11 ”Ar andi Bab-Dummad-diigi-ogleged-igar-imakedi, unnila bemar isgusmaladgi-bukib-binsaed-oyogegalad. Ar dule-an-sorba-danikiddi, anba bur dule-dummadsoggu, e-sapatse-bakar, geg an ega seed. Ar we-dule, Bab-Dummad-Burba-Isligwaledgi, degi, soogi be-ognonikoed.
MAT 3:12 ”Dule-an-sorba-danikidi, igi-dule burwa-abin oros-uka-miega bigbi guagwar-ganiki, deyob we-dule bigbi-gani gwichid. Geb trigo-gwagdi suoed, e-ukadi soogi ogumakoed. Ar we-soode, geg soo ginnedid.”
MAT 3:13 Degi, Jesús, Galilea-akale, Jordán-diwarse nonikid, adi, Juan diigi e-ogegar.
MAT 3:14 Ar Juanʼdi Jesúsʼga sokalinad, an diigi be-ogosurye. Ega weyob sognai gualid: —Ar be bur, Bab-Dummad-diigi-ogleged-igargi be an-ogedinad. Ar be bur anba dummadid. ¿Degite, be anse danide?
MAT 3:15 Jesús abin-sogded: —Ar emigindi, anmar deyob saergebed, igar-maidba anmar imakergebed. Degisoggu, Juan Bab-Dummad-diigi-ogleged-igargi Jesús-ogsasunnad.
MAT 3:16 Ar Jesús Bab-Dummad-diigi-ogleged-igar-imaksad-sorba, diwargi-gwichi nakwiarsunnad. Geb agi nibneg ega argaded, degi, Jesús, Bab-Dummad-Burba-Isligwaled nuuyobi egi aidedani daksad.
MAT 3:17 Geb degi nibneg-akar gayaburba gollalid, sogded: “We, An-Machi-sabed-sunnad gued, weba weligwar an itoged.”
MAT 4:1 Juan Bab-Dummad-diigi-ogleged-igargi Jesús-ogsad-sorbali, Bab-Dummad-Burba-Isligwaled, Jesús nia-sailase-wilubdaklegega, nega-dulesulidganba Jesús-sessunnad.
MAT 4:2 Jesús Bab-Dummadse-golegala, iba-dulabogus (40) mutikidba, degi, ibginedba mas-gunsuli gudii gusad. A-sorba, ukur itoalid.
MAT 4:3 Degi, nia-saila-emar-wilubdaked ese nonikid, ega sognonikid: —Ar be Bab-Dummad-Machi-sunnadiile, we-akwamarga be soge: ‘Maduga be binyeye.’
MAT 4:4 Jesús, nia-saila-abin sogded: —Noar be soged. Ar Bab-Dummad-Gardagi narmakar maid: ‘Dule maduginbi dula-gudii guosulid, bela Bab-Dummad-gayaburba-itogedgi dula gudigubaloed.’
MAT 4:5 Geb degi, nia-saila Jerusalén-neggwebur-islidikidse Jesús-sesad. Agi Bab-Dummadse-goled-neg-uas-birgi ogwisdapgu,
MAT 4:6 Jesúsʼga sogded: —Ar be Bab-Dummad-Machi-sunnadiile, be napase ichomakdo. Ar Bab-Dummad-Gardagi narmakar maid: ‘Na e-baliwiturmar bega barmidagoed, e-argangi be-gamalagar, adi, melle be akwagi gowarmakegar.’
MAT 4:7 Jesús, nia-saila-abin sogded: —Nabir be sogendo. Ar Bab-Dummad-Gardagi narmakar maibalid: ‘Melle Bab-Dummad-be-Dummad, be wilubdako.’
MAT 4:8 Geb degi gannar nia-saila yar-matusulidse Jesús-sesbalid. Agi belagwable napa-naid, degi, e-gangumalad ese oyosgu,
MAT 4:9 Jesúsʼga sogded: —An-nug-odummogega be sindigar an-asabin sigele, geb we-ibmar belagwapa an bega ukoed.
MAT 4:10 Geb degi, Jesús, abin-sogded: —Nia-saila-Satanás, be angi bangu. Ar Bab-Dummad-Gardagi narmakar maid: ‘Bab-Dummad-be-Dummad-e-nug be odummodii nanao. Unnila agarbi be ibmar imako.’
MAT 4:11 Geb degi, nia-saila Jesúsʼgi bangussunnad. A-sorba, baliwiturmar Jesúsʼse nonikid, ega ibmar imaknonimalad.
MAT 4:12 Jesús itoargu, Diigi-dule-oged-Juan esgaryagi mellesiiye, Jesús gannar Galilea-yarse nonikid.
MAT 4:13 Nazaret-neggweburgi-maid bangudgu, Capernaúm-neggweburgi megnonikid. We-neggwebur, Zabulón-yar-naidgi, degi, Neftalí-yar-naidgi mata-dummad-naid-walik siid.
MAT 4:14 Ar epenne Bab-Dummad-gayaburba-barsoged-Isaías-sogsagusadba-guegala, deyob gunonikid. Deun sogsagusgu:
MAT 4:15 “Zabulón-yala, degi, Neftalí-yala, mata-dummad-naidsik, Jordán-diwar-obakar-bukmalad, Galilea-dolad, Judíoʼsurmalad.
MAT 4:16 Dulemar-negsichidgi-gudigusmaladi, neg-meegwad daksamalad. Negsichidgi-bukwagusmaladga, neg mee gunonikid.”
MAT 4:17 Degi, agi Jesús Bab-Dummad-gayaburbagi sunmakarsunnad. Weyob sogded: “Ar Bab-Dummad-e-negdakmaid bemarse warmaksad. Degisoggu, be-isgudiidga na be bukib binsamar. Be-daed na be ogwamar.”
MAT 4:18 Jesús Galilea-mata-dummad-gakaba nadapgu, dule e-urba-ebo mata-dummadgi saki-minai dakalid. Gwensak Simónʼye nugad. A-dule, Pedroʼye nugbalid. E-urbadi, Andrésʼye nugad. Amarde gusgu ua-gaedgi arbamaladid.
MAT 4:19 Jesús amarga sogded: —Anba be dagmar. Igi bemar ua-gae, deyobi, dulemar-anba-nagumalaga, dulemar-gaega an be-imakmaloed.
MAT 4:20 Simón, degi, Andrés, e-saki abga yog-indakar imaksamalad, Jesúsʼba yog-naar imaksamalad.
MAT 4:21 Jesús sikwas nadbargu, Jacobo, e-urba-Juanʼbo, urgi e-bab-Zebedeoʼmala saki-matumakbukwa dakdapid. Jesús, eba-dagega, e-sapinganga-guega, amar-ebogwadse gochamogad.
MAT 4:22 Amar, Jesúsʼba-naegala, yog ur-mete, degi, e-bab-Zebedeo-mete nadmalad.
MAT 4:23 Jesús bela Galilea-yargi, Judíoʼmar-onmakedneggi dulemar-odurdakdii gusad, Bab-Dummad-e-negdakmaid-gayaburba-nuedgi sunmakdii gusad. Degine, bela dule-uellemalad, degi, galagwensuli ibmar-nunmak-itomalad-nudakdii gusad.
MAT 4:24 Jesús dulemar-nudakdiidba, bela Siria-yalase e-nug dunguded. A-ular, dulemar bela ibmar-naibi-itodimalad, galagwensuli-gegudimalad, abagan-nunmakdimalad, niasamalad, suu-itodimalad, abagan-burgwarmalad, Jesúsʼse senonimalad. Bela Jesús amar-nudaksad.
MAT 4:25 Dule-bukidar Jesúsʼba duurmaknadap gusmalad: Galilea-dorgan, Neggwebur-Gwaambe-bukmaladginmalad (10), Jerusalénʼginmalad, Judeaʼginmalad, degi, Jordán-diwar-obakarmalad, amar Jesúsʼba duurmaknadap gusmalad.
MAT 5:1 Jesús dulemar-bukidar ese duurmakdani-dakdegu, yar-birse nakwisad. Agi sigisgu, e-sapingan ese nonimalad.
MAT 5:2 Degi, Jesús dulemar-odurdakdegu, sogded:
MAT 5:3 “Dulemar bela-belad Bab-Dummad-abedidimaladi, amargi nued binsalesad. Ar ade, Bab-Dummad-e-negdakmaid amargadid.
MAT 5:4 Dulemar-bodidimalad, amargi nued binsalesad. Ar amar-bodidimaladi, bar bukib-binsasuli guoed.
MAT 5:5 Dulemar-na-san-dummarba-imaksurmalad, amargi nued binsalesad. Ar amar we-napneg-naid egadga guoed.
MAT 5:6 Dulemar igar-napiragwadbina mas-gunbiedyob-itodimalad, degi, igar-napiragwadbina uku-uku-itodimalad, amargi nued binsalesad. Ar Bab-Dummad, amar nabir igar-innikigwad-imaked imakoed.
MAT 5:7 Dulemar-nue-wile-emar-daked, amargi nued binsalesad. Ar amar wile daklemogoed.
MAT 5:8 Dulemar-gwage-swilidikmalad, amargi nued binsalesad. Ar amar Bab-Dummad-dakmaloed.
MAT 5:9 Dulemar emar-gwage-bogidik-imakmalad, amargi nued binsalesad. Ar amar Bab-Dummad-mimmiganye bilenonimaloed.
MAT 5:10 Dulemar igar-innikigwadbina baregilledimalad, amargi nued binsalesad. Ar ade, Bab-Dummad-e-negdakmaid amargadid.
MAT 5:11 ”Dulemar an-nug-ular be-ichoarmalar, be-bareginnarmalar, degi, galagwensuli binsa gakansaar begi sunmakarmalar, bemargi nued binsalesad.
MAT 5:12 Bemar yeer itomar, wergumar, ar nibneggi bemarga ibmar-uklegoed dummarbad. Ar ayobi, Bab-Dummad-gayaburba-barsogmalad epenne bemar-idu baregillesmarmogad.”
MAT 5:13 Jesús sogdebalid: “Bemar we-napneggi baluyob gumalad. Ar balu e-gagbid-surgudele, ¿igi bar balu-balu guosunna? Geg bar ibnuedga gued. Unnila, igargi-milegega gued, dulemar-egi-annaega gued.”
MAT 5:14 Jesús sogdebalid: “Bemar we-napneggi gwallu-meegwadga gumalad. Ar neggwebur-gwagwen yar-birgi siile, geg we-neggwebur dukued.
MAT 5:15 Degine, gwallu, ulu-urba-sigega ogalesulid. Gwallu, e-siged-birgi-sigega ogaleged, adi, bela dulemar-neg-yagi-bukmaladga neg-mee saegar.
MAT 5:16 Debayobi, gwallu gaeyobi, bemar dulemar-asabin damarmogo, adi, dule-baigan be-ibmar-nuegan-imakdiid dakmalagar, degine, be-Bab-Dummad-nibneggi-maid-e-nug ogannomalagar.”
MAT 5:17 Jesús sogdebalid: “Mer be binsamalo, an Moisés-Igar-Mesisad-osulolega noniye. An Bab-Dummad-gayaburba-barsogmalad-igar-mesisad-osulogegarbardibeye. Suli, an aga nonisulid. An nonikidi, a-igar gatik bur-nue-odulogega an nonikid.
MAT 5:18 ”Ar napira an bemarga soged, we-napneg-naid-bergued-idu, degi, nibneg-naid-bergued-idu, Moisés-Igar-Narmakar-Naid e-bichugwad-bur-bipigwad gwen bipisaar wis ogwalegosulid. Ar bela narmakar-naidba guedsegad.
MAT 5:19 Degisoggu, ar doa-dule we-Igar-Maidgi wis bipisaar egi gwatirisale, degine, ar deyob dulemar-odurdakele, a-dule, dule-bipigwadye Bab-Dummad-e-negdakmaidgi bilegoed. Ar dule bela Moisés-Igar-Maidba daele, degine, ar deyob dulemar-odurdakbalile, we-dule, dule-dummadye Bab-Dummad-e-negdakmaidgi bilemogoed.
MAT 5:20 ”Ar napira an bemarga soged, bemar-igar-napiragwad-imaked, Garda-Narmaked-Dulemarba, degi, Fariseoʼmarba bur nuedsulile, Bab-Dummad-e-negdakmaidse bemar gwen dogosurmalad.”
MAT 5:21 Degi, Jesús sogdebalid: “Be itosmalad, epenne igi serganga soglesgusa: ‘Melle be dule-oburgo.’ Éxodo 20:13 ‘Ar dule-wargwen dule-oburgwisale, a-dulega odurdakleged-igar ega megnonikoed.’
MAT 5:22 ”Ar andi an bemarga soged, ar dule-wargwen binsarsunna-sae-itoge e-gwenadse urwedibe, a-dulega igar-itoleged megoed. Ar doa-dule e-gwenadga sogdibe, ‘Be gegegwa an be-dakye,’ a-dulega Judío-dummagan ega igar-amiega igar-itogoed. Ar doa-dule e-gwenadga sogdibe, ‘Be akargubi an be-dakye,’ a-dule soo-sailase odurdakleged bur-nabirid.
MAT 5:23 ”Degisoggu, Bab-Dummadga be ibmar-uksokalid e-ukleged-ailase be sedanikir, agi be be-gwenad-begi-gwatirisad be ebinsaalile,
MAT 5:24 be ibmar-Bab-Dummadga-uksokalid, e-ukleged-ailagi be obes imako, be-gwenadbo be igar nabonagwer. Geb degi, a-sorba, gannar be dagoed, be Bab-Dummadga-ibmar-uksokalid geb be ukoed.
MAT 5:25 ”Dule-bebo-igar-gwatirnaidbo amba-igarba-nadapidgi gwae ebo be igar naboge. Ar degi be imaksulile, abakalegi dule igar-naboged-dummadga be-ukalile, degi, a-dulemoga, suar-ibedga be-ukarmogale. Ar degiile, a esgaryagi be-metoed.
MAT 5:26 Napira an bega soged, be esgaryagi mellesiidi, be noosurguoed. Bela begi-mani-galesad be bennukedsegad.”
MAT 5:27 Jesús sogdebalid: “Ar be itosmalad, igi serganga soglesa: ‘Melle be be-abirginsulid-ebo galagwensuli nanao.’
MAT 5:28 ”Ar andi an soged: Ar dule-wargwen e-ulubgi sunnasur ome-wargwengi binsasale, bato we-dule na abirgunagwarsuli negsichigi omegi yolesdo.
MAT 5:29 Degisoggu, be-ibya-nuedsikid, be-gwage-ichogega be-imakdibe, bur be onodo, bikiin be metedo. Ar bur be-san bela soo-sailagi mellegedba bur nabirsursi, unnila be-sangi-akanaid-gwensak bei yoggued.
MAT 5:30 Ar be-argan-nued be-gwage-ichogega be-imakdibe, bur be sikdo, bikiin be metedo. Ar bur be-san bela soo-sailagi mellegedba bur nabirsursi, unnila be-sangi-akanaid-gwensak bei yoggued.”
MAT 5:31 Jesús sogdebalid: “Bemar itosmalad, igi epenne bemar-serganga soglesbali: ‘Ar dule-wargwen ome-metele, omega ome-meted-garda ukoed.’
MAT 5:32 ”Ar andi an soged: Ar dule-wargwen unnila e-ome e-dikarba nosarbi sunna ome-meted. Ar degisulile, ome-meted-igar ega gwen maisulid. Ar dule ome-metele, degiir ome negsichigi-yolegega imako-itole, degine, dule ome-melleded-nikusale, a-dule ome-dikarba negsichigi yoledimodo.”
MAT 5:33 Jesús sogdebalid: “Degine, bemar itosbalid, igi epenne bemar-serganga soglesbali: ‘Be ibmar-ise-sogar-sogsadi, be imako, mer be imaksuli guo. Ar Bab-Dummad-asabin be ibmar-imakoye-sogsadi, imakedse be sao.’
MAT 5:34 ”Ar andi an soged: Mer bipisaagwale ibmar-nug-gaale be ise-sogar sogo, an napira imakoye. Mer be ise-sogar sogbalo: We-nibneg-naid-ular an sogye, ar ade, nibneg Bab-Dummad-siged-ologanad.
MAT 5:35 ”Mer be ise-sogar sogbalo, we-napneg-naid-ular napira an sogye an imakoye, ar ade, napneg Bab-Dummad-e-nag-onakwed-ganad. Mer be ise-sogar sogbalo, Jerusalén-neggwebur-ular an napira sogye an imakoye, ar ade, Jerusalén Rey-Dummad-e-neggwebur gued.
MAT 5:36 Degine, mer be-sanse-bakar, egi be ise-sogar sogo, an-san-ular an napira ibmar imakoye, ar be-sailagiabela geg be gagwensaagwar sipuu imaked, geg sichii imakbalid.
MAT 5:37 ”Ar unnila be soge, eyeye, an imakoye. Be sogodibe, an imakosurye. Ar weyob-sogsadgi bur bule be obulosale, adi, niagi danidaed.”
MAT 5:38 Jesús sogdebalid: “Ar bemar itosmarbalid, epenne be-serganga soglesad: ‘Ibya-gwagwen dule bei onosale, buged maiye, degi, nugar-wargwen dule bei bichisale, buged maibarye.’
MAT 5:39 ”Ar andi an soged: Dule-isgana sabsur-be-imakalile, mer be abin-imako. Dule-wargwen be-wagar-nuedsikid bei bibyosale, baid-wagar ega be oyobardo.
MAT 5:40 Ar dule-wargwen bei-mor-dummad-suega igar-itogedgi bebo abin-abin imakardibe, ega be be-mor-baid uksa be imakbalo.
MAT 5:41 Ar dule-wargwen ise-barmiar wachi-abalasaar ega-ibmar-seedbi be abedibe, ega bur wachi-irgwen ibmar-seded be sae.
MAT 5:42 Ar dule bese ibmar egichialir, ega be uke. Dule bega sokalir, wis anga be ibmar udagwerye, an gannar bega ukbaloye, dulegi mer be ibmar nalleguo.”
MAT 5:43 Jesús sogdebalid: “Ar bemar itosmalad, epenne be-serganga soglesad: ‘Be dule-baigan-sabgumar, dule-be-isdaraddi, isdar be dakoed.’
MAT 5:44 ”Ar andi an soged: Be-isdarmalad be sabgumar. Dulemar-be-nug-ichodimaladga, degi, be-baregindimaladga Bab-Dummadse ega be gormar.
MAT 5:45 Adi, bemar, be-Bab-nibneggi-maid-e-mimmiganga gumalagar, ar Bab-Dummaddi bela dulemar-nuegan, degi, dulemar-isganaga, dad-ibeler ogamaid. Degine, Bab-Dummad bela dulemar igar-innikii-imakmaladga, degi, igar-innikii-imaksurmaladga, dii owimaibalid.
MAT 5:46 ”Ar dule-be-sabmaladbi be sabguele, ¿ar ibu-nued egi be amiosunna? Ibmar-nued egi be amiosuli. Ar dule-isganamar, Roma-dummadga-mani-gaedgi-arbamalad, ¿deyob na imakmarmosursi?
MAT 5:47 Ar be-gwenadgangarbi be soger, ‘be nued sogeye,’ ¿ar ibu-bur-nued be imakmarsunna? Gwen ibmar-bur-nued be imaksulid. ¿Ar deyob dulemar-Bab-Dummad-wissurmalad imakmarmosursi? Eye, ar deyob imakmarmogad.
MAT 5:48 Ar be-Bab-nibneggi-maid ibmar-nuegan imaksoggu, a-ular, bemar ulubgi dule-nueganga gumarmosundo.”
MAT 6:1 Jesús sogdebalid: “Mer yamo-be-dakmalaga dulemar-asabinbi igar-napiragwad-imaked be sao. Ar deyob be daele, be-Bab-nibneggi-maid bega-ibmar-ukoed bar bega ukosulid.
MAT 6:2 ”Degisoggu, be dule-wileganaga mani-uksokalile, mer be gar-trompeta binnasur-ogornai be sao. Ar dulemar-wagar-darbodamaladdi, Judíoʼmar-onmakedneggi, degi, igarba mani-ukmalaga gar-binnasur-ogornai damalad, adi, dulemar e-nug ogannomalagar. Ar napira an bemarga soged, ar a-dulemardi bato e-nug ogannolesmalad, degisoggu, Bab-Dummad bar amar-nug ogannogosulid.
MAT 6:3 ”Ar bedi wileganga be mani-uknair, be-ibmar-imaknaid mer be dule-baiganga soge-soge dao.
MAT 6:4 Adi, be wileganaga-mani-uksad mer dule-baigan be-wisguegar. Ar be-Bab bela-odukuar-be-ibmar-imaksad be-daksasoggu, na e emar-wagab bega ibmar-ukoed.”
MAT 6:5 Jesús sogdebalid: “Ar bemar Bab-Dummadse gollalile, mer bemar dulemar-wagar-darbo-damaladyob be damalo. Ar amardi, Bab-Dummadse-gormalaga, gusgu Judíoʼmar-onmakedneggi yamo gwisgusdamalad, degine, yamo igar-abingunaidgi gwisgus damarbalid, adi, dulemar e-dakmalagar. Ar napira an bemarga soged, ar a-dulemardi bato ega ibmar uklesad. Degisoggu, Bab-Dummad bar amarga ibmar ukosulid.
MAT 6:6 ”Ar bedi Bab-Dummadse be gollalile, be-negyaba be doge, nue yawagak edis be imako, be-Bab-Dummadbo-apinni be sunmako. Ar be-Bab bela-be-dukuar-ibmar-imaked be-daksoggu, na e emar-wagab bega ibmar ukoed.
MAT 6:7 ”Ar Bab-Dummadse be gollarmalale, melle be dulemar-Bab-Dummad-wissurmaladyob gannar-gannar ibmar be sogo. Ar amardi binsamalad, gannar-gannar ibmar-sogedba Bab-Dummad e-itogoye.
MAT 6:8 Degisoggu, mer dulemar-Bab-Dummad-wissurmalad-damaladyob be damalo. Ar be-Bab amba yoo ese be ibmar egise, bato bemar-wisid, ibu be abemala.
MAT 6:9 Degisoggu, bemar weyob Bab-Dummadse be gormalo: ‘Anmar-Bab-nibneggi-maid, be-nug swilidik obariledii gusun.
MAT 6:10 Be-neg-dakmaid anmarse be sedage. Igi nibneggi be-sogedba be ibmar imake, deyob, we-napneggi be imakdamo.
MAT 6:11 Emi-ibagi mas unnitibali anmarga be udage.
MAT 6:12 Igi dulemar anmargi nosale, anmargi-nossulidyob anmar dakdae, deyobi, anmar-begi-isgusad begi-isgussuliyob be anmar-dakmo.
MAT 6:13 Isguedgi-wilubdaklegedse mer warmaked be anmar-imak. Bur isguedgi-obined be anmar-sae. Birga-miliba degisadegu, be-neg-dakmaid begadid. Be-gangued, degi, be-gangued-yeerdakleged, begadbalid. Deyob gusun.’ ”
MAT 6:14 Jesús sogdebalid: “Ar dulemar-begi-nodimalad, begi nossuliyob be dakele, deyobi, be-Bab-Nibneggi-Maid be-dakmogoed. Be-isgusad bega osulogoed, egi-nossuliyobi be-dakmogoed.
MAT 6:15 Ar dulemar-begi-yoledimalad begi nossuliyob be daksurmogale, be-Bab bega isgued osulogosurmogad, egi-nossuliyob be-dakosurmogad.”
MAT 6:16 Jesús sogdebalid: “Ar bemar Bab-Dummadse-golega mas-gunsuli-gudiile, mer bemar dulemar-wagar-darbodamalad-imakedyob, wagar bukib-binsa na be imakmalo. Ar amardi yamo e-wagar ogwadamalad, adi, dulemar e-dakega, emardi Bab-Dummadse-golega mas-gunsuli gudiiye. Ar napira an bemarga soged, amardi bato ibmar nikusmalad.
MAT 6:17 ”Ar bedi Bab-Dummadse-golega mas-gunsuli gudiile, na be nono gwallu-wawagi mage, degi, be wagar nue enukbalo.
MAT 6:18 Adi, dulemar mer be-dakmalagar, Bab-Dummadse-golega mas-gunsuli be gudiiye. Unnila be-Babgarbi be oyogoed, ar egi ibmar dukumaisursoggu, na e dulemar-abargi bega ibmar ukoed.”
MAT 6:19 Jesús sogdebalid: “Mer we-napneggined-ibmar-nuegan-saboleged be we-napneggi sabomar. Ar we-napneggi amardi udumesed, saa-biin gued, degi, atursamalad we-ibmar atursamalad.
MAT 6:20 Ar bemardi bur nibneggi ibmar-nuegan be sabomar. Ar agindi geg ibmar udumesed, ibmar geg saa-biin gubalid, degine, atursamalad, ibmar-atursaega geg dogmarbalid.
MAT 6:21 ”Ar be-ibmar-nuegan nibneggi sabolesiile, nibneggi be binsadii gudoed. Ar be-ibmar-nuegan we-napneggi-sabolesiirdi, adi, be we-napneggi binsadii gudoed.”
MAT 6:22 Jesús sogdebalid: “Ibya anmar-sanga gwalluga gued. Ar be-ibya nuedile, bela be-san ibegwar naido.
MAT 6:23 Ar be-ibya isganale, bela be-san negsichidgi gudido. Degisoggu, begi neg-meegwad-naidi sichigwalele, geg be nue ataked. Ar negsichid-bursunna, bur bule goro be insae.
MAT 6:24 ”Dule geg dummad-warboga maileged. Ar unnila wargwen sabgudoed, baiddi, isdar dakdoed. Wargwenga nue-alamaknai guoed, baiddi, mesagwar dakoed. Degisoggu, geg be Bab-Dummad-maiga gued, deginbali, geg be maniga mailenai gubalid.”
MAT 6:25 Jesús sogdebalid: “Degisoggu, an bemarga soged, na be-san-dula-gudiidgi mer surbinsa be itomar, ibu an gunnodibeye, ibu an gobodibeye. Degine, mer be-sangi be binsabar, ibu mor an yoodibeye. ¿Ar be-san-burbade mas-gunnedba bur nuedsursi? ¿Ar be-sande mor-yoedba bur nuedsursi?
MAT 6:26 ”Ar nue be dakmalana, sikwimar-niba-gukudimalad, gwen ibmar-gwag digdisurmalad, degi, gwen ibmar-gwag wedisurmarbalid. Deginbali, ibmar-gwag-urbed-neggine ibmar-gwag gwen urbedisurmarbalid. Degite, be-Bab-Nibneggi-Maid mas ega ukmaid. ¿Ar bemarde sikwimarba bur bule nuedsurmarsi? Eye, bur-nuedi.
MAT 6:27 ¿Ar doa-dule na gatik egi binsaedbali sunna na e-san bisgigwen osugusar be insae? Suli, geg osugue.
MAT 6:28 ”¿Ibiga mor-yoedbina, surbinsa be itomala? Ar be dakmalana, sapur-dutumardi arbasurmar-inigwele, degi, na e-mor sobsurmar-inigwele, degite, dungumai daed.
MAT 6:29 An bemarga sogmardo, degite, Salomónʼbela, mor-yeerdaklemalad-yosan-inigwele, ar dutumaryob gwen mor yossurgusad. Ar dutumar bur Salomón-morba yeer dakleged.
MAT 6:30 Be daksundo, ar Bab-Dummadde gagan-sapurbarmalad deyob-dakle-imak-inigwele, banedgi a-gaganmarde soo-yagi bato ogumaklesiid. Emide be, ¿Bab-Dummadgi benmarde? ¿Ar bemarga bur bule Bab-Dummad geg mor ukde?
MAT 6:31 Degisoggu, mer surbinsa be itomar, mer be sogmar: ‘¿Ar ibu an gunmaloe? ¿Ibu an gobmaloe? ¿Ibu an yomaloe?’
MAT 6:32 Ar dulemar-Bab-Dummad-wissurmalad wegiid-ibmar bela amididimalad. Ar be-Bab-Nibneggi-Maiddi bela we-ibmarmar-be-abemalad bemar-wisid.
MAT 6:33 ”Bur be Bab-Dummad-e-negdakmaid-inse be amimar, e-igar-napiragwad-imaked-inse be amimar. Geb agi, Bab-Dummad, belagwapa we-ibmarmar bemarga ukdagoed.
MAT 6:34 Degisoggu, bane-bega-ibmar-guoedba mer surbinsa be itomar, ar ade, baneddina, na egad-surbinsa-itoged sedanimogoed. Ar iba-irbali na e-bonigan egad-egad nikamalad.”
MAT 7:1 Jesús sogdebalid: “Mer yogsaar be sogo, we-dule, dule-isganaye, adi, melle deyob begi soglemogagar.
MAT 7:2 Ar dulemargi be sogsadyobi, begi soglemogoed, degine, dulemarga be igar-mesisadyobi, bega igar-megnonimogoed.
MAT 7:3 ”¿Ar ibiga be-gwenad-ibyagi durgan-maid magar be dake? Ar be-ibya-yabardi suar-maiddi aku be daked.
MAT 7:4 ¿Ar igi be-gwenadgardi be sogoe: ‘Be-ibya-yaba durgan-maid an bega onogweloye?’ Ar be-ibya-yabardi suar-maiddi aku be daked.
MAT 7:5 ”¡Ar bemar wagar-darbomaladid! Suar be-ibya-yaba-maid-inse be onoge, geb agi nabir be atakoed. Ar deyob geb be be-gwenad-ibya-yaba-durgan-maid onogoed.
MAT 7:6 ”Mer be ibmar-nuegan-islidikmalad achumarga ukmar. Ar abakalegi begi aibinnarmalale, be-san ichimakarmalale. Degine, dimmurgiid-e-akwa-yeerdaklemalad mer be sinmarga mimar, ar abakalegi egi dii-dii annaarmalale.”
MAT 7:7 Jesús sogdebalid: “Be Bab-Dummadse ibmar egismar, ar Bab-Dummad bemarga ukoed. Be Bab-Dummadgi ibmar amimar, be amimaloed. Be Bab-Dummadse gole, bega Bab-Dummad yawagak egaoed.
MAT 7:8 ”Ar dule ibmar-bela-egiser, ibmar nikued. Ar dule ibmar-amier, ibmar amioed. Ar dule yawagakgi-dulese-golele, ega yawagak egalegoed.
MAT 7:9 ”¿Ar doa-dule, e-mimmi ese madu-egichialile, ega akwa ukode?
MAT 7:10 ¿Ar ua ese egichiardibe, ega naibe ukode? Gege uked.
MAT 7:11 Ar bemarde dule-isgana-gumar-inigwele, degite, be-mimmiganga ibmar-nuegan ukmalad. Ar be-Bab-nibneggi-maid-bulesunna, ¿dulemar-ese-ibmar-egismaladga ibmar-nuegan ukosur be insade? Ukergebed.
MAT 7:12 ”Degisoggu, dulemar igi bega ibmar-imakbi be abege, deyob ega be imakmodo. Ar weyob Moisés Igar-Mesisad, degi, weyob Bab-Dummad-gayaburba-barsogmalad sogsamogad.”
MAT 7:13 Jesús sogdebalid: “Yawagak-yaa-osogwadba be dogmar. Ar yawagak-yaa-dummaddi, e-igar mata-bipisulid. A-igardi, yoggued-negse dulemar-semaid, degine, bukidar agi dulemar bur dogmalad.
MAT 7:14 ”Ar burba-geg-bergued-nikadsedi yawagak-yaa-osogwadba, degine, igar-warakwagwadba dogleged. Dulemar ichee a-yawagak amimalad.”
MAT 7:15 Jesús sogdebalid: “Bab-Dummad-gayaburba-barsogmalad-sunnadsurmaladgi nue salakarmar. Ar amar yamo sibad-wawaadyob nonimaloed. Ar e-ulubgindi, achu-burburudyob sabsur-damalad-dulemalad.
MAT 7:16 ”A-dulemar e-daedgi be dakmaloed. ¿Ar uvaʼde, iko-sapigi-sanmaksi? ¿Ar higoʼde, iko-sapigi welesi? Degisulid.
MAT 7:17 Ar deyobdo. Sapi-nuegana, e-durba nueganbi sanmaked. Ar sapi-isganadi, e-durba-sanmaked isganabimogad.
MAT 7:18 Ar sapi-nuedi geg e-durba isgana sanmaked. Degine, sapi-isgana, geg e-durba nued sanmakmogad.
MAT 7:19 ”Ar sapimar e-durba nued sanmaksulile, olalegodo, soogi ogumaklegodo.
MAT 7:20 Degisoggu, Bab-Dummad-gayaburba-barsogmalad-sunnadsurmalad e-daedgi mag be dakmaloed.”
MAT 7:21 Jesús sogdebalid: “Ar bela dulemar anga ‘Dummadye, Dummadye’ sogedba, Bab-Dummad-e-negdakmaidse gwen dogosulid. Unnila, dulemar an-Bab-nibneggi-maid-sogedba ibmar-saedi nibneggi dogmaloed.
MAT 7:22 ”Bukidar a-ibagangi anga sogdamaloed. ‘Dummad, ¿ar anmarde be-nuggi sunmaksasursi? ¿Ar anmarde be-nuggi bukidar niamar-onosmarsursi? ¿Ar anmarde be-nuggine bukidar ibmar-dakledisurmalad imaksasursi?’
MAT 7:23 Geb degi an abin-sogoed: ‘Aku an be-dake. Angi be bangumar. Bemar, unnila ibmar-isgana-saedginbi arbadimalad.’ ”
MAT 7:24 Jesús sogdebalid: “Ar doa-dule we-an-sunmaked itosale, degine, eba daele, we-dule, dule-binsaed-nikadaed na e-neg akwa-birgi-sobsayobidid.
MAT 7:25 Dii-wiargu, diwarmar noalid, burwamar binnasur gollalid. Bela-bela a-neggi signonigu, a-neg gwen aimukussulid, ar ade, neg akwa-birgi sobar siid.
MAT 7:26 ”Degine, ar doa-dule we-an-sunmaked itosale, degite, eba ibmar-imaksasulile, we-dule, dule-binsaedsulid na e-neg ukub-birgi-sobsayobidid.
MAT 7:27 Dii-wiargu, diwarmar noalid, burwamar binnasur gollalid. Bela-bela a-neggi signonigu, e-neg ayarided, a-neg nue-dummad bisgenonikid.”
MAT 7:28 Ar Jesús weyob-ibmar-sogsad-sorba, dulemar Jesús-weyob-e-ibmar-odurdaked geger daksa gusmalad.
MAT 7:29 Ar ade, Jesús e-ibmar-odurdakedi, Garda-Narmaked-Dulemar-odurdakeyob odurdaksulid. Edi na gangued-nika odurdaked.
MAT 8:1 Jesús yar-birgi-sii aideargu, dulemar-bukidar eba duurmakdani gusmalad.
MAT 8:2 Agi dule-wargwen, naibe-buna-yaa-maleged-nikad ese sindigar signonikid, ega sognonikid: —Dummad, an wisi, be an-nudakbier, sunna be an-nudaked.
MAT 8:3 Jesús e-argan oyodgu, e-argangi ebusgu, ega sogded: —Nugubi an be-abe. ¡Be nugusun! Dule-naibe-buna-yaa-maleged-nikad yog nuguar naded.
MAT 8:4 Geb degi Jesús dulega sogdebalid: —Mer dule-baiganga be-nugusad be sogo. Unnila be nae, dule-irwa-Bab-Dummadse-gormaladga na be-san oyona. Ar igi Moisés Igar-Mesisa, a-sogedba be ibmar imakna, adi, dulemar nue-be-nugusad mag be-dakegar.
MAT 8:5 Jesús Capernaúm-neggweburse dogsagu, Roma-dule-sorda-dulatar-sediid-wargwen (100) ese nonikid, egi wilenonikid,
MAT 8:6 ega sognonikid: —Dummadye, an-mai neggi bela abagan-burgwar maid, nue bela-bela nunmaked itomaid.
MAT 8:7 Geb degi Jesús, abin-sogde: —An daknao. Bega an be-mai nudaknao.
MAT 8:8 Degi, Roma-dule-sorda-dulatar-sediid (100), Jesús-abin sogded: —Dummad, ¿ande doasunna an-negse be dognaer? Unnila ibmar be sogsa-sae, agi an-mai yog nuguar naoed.
MAT 8:9 Amba an dummad-nikmogad, degine, ani, an dummadmogad, sordamar ani an sediid. Ar wargwenga an sogdibe, ‘Be nae,’ yog naardaed. Baidga an sogbardibe, ‘Be dage,’ yog dagardaed. Degine, an-maiga an sogdibe, ‘We be imake,’ yog imakardaed. Ar deyobmogad, unnila be sogsa-sae, agi an-mai yog nuguar naoed.
MAT 8:10 Jesús weyob Roma-sorda-dummad ega soge itoargu, geger-ito naded, geb degi, dulemar-e-sorba-duurmakdanimaladga sogdesun: —Napira an bemarga soged, Israel-dulemargi weyob dule nue an-bensulid an dakdisulid.
MAT 8:11 ”Ar an bega sogdo, bukidar dad-nakwedsik, degine, dad-argwanedsik dule-Judíoʼsurmalad Bab-Dummad-negdakmaidse nonimaloed, adi, Abrahamʼba, Isaacʼba, degine, Jacobʼba mas gunmalagar.
MAT 8:12 Ar dulemar Bab-Dummad-e-negdakmaidse-dogmaloenadi, dogosurmalad, negsichidgi magaba melledmaloed. Agi bosii gumaloed, nunmakedba nugar-ogorsii gumaloed.”
MAT 8:13 Geb degi Jesús Roma-dule-sorda-dulatar-sediidga sogded: “Be nae, ar be bengussursoggu, be-mai an bega nudaksasun.” A-wachigi dummad-e-mai-uellemaid yog nuguar naded.
MAT 8:14 Jesús Pedro-negse nonigu, daknonikid, Pedro-e-sakbundor nue uellemai.
MAT 8:15 Jesús Pedro-sakbundor-e-argangi-ebusgu, uelleged yog surguar naded. Degi, Pedro-e-sakbundor yog gwisguar imaksad, geb a-sorba, Jesúsʼga yog ibmar-imakar naded.
MAT 8:16 A-ibagi, neg-sedosgu, dulemar bukidar ese niaburba-nikmalad senonimalad. Jesús unnila e-sunmakedgi niaburbamar-onosad, degi, bela dulemar-uellemalad nudaksabalid.
MAT 8:17 We-ibmar-gusadi, ar Bab-Dummad-gayaburba-barsoged-Isaías epenne sogsagusadba guegalad. Deun sogsagusgu: “Anmarga anmar-bonigan sesad, anmar-anar, anmar-nunmaked itosad.”
MAT 8:18 Jesús dulemar-bukidar e-dikarba-gudii daksoggu, e-sapinganga igar uksad, adi, mata-dummad-obakar namalagar.
MAT 8:19 Degine, geb garda-narmaked-dule-wargwen Jesúsʼse nonikid, ega sognonikid: —Odurdaked-saila, ar bia be naoe, an beba naiguodo.
MAT 8:20 Jesús abin-sogded: —Ar usmardi na e-gubya nikamalad, sikwimardi e-uu nikamarmogad. Ar andi, Dule-Machi, neg sated. Anyob be unni nanamogale, anba be dagodo.
MAT 8:21 E-sapin-baid Jesúsʼga sogdemogad: —Dummad, bina an-babse an nagwelo, an-bab-burgwedse geb beba an naoed.
MAT 8:22 Jesús, abin-sogded: —An-sapinga-guega anba be dage. Ar dule-baigan, e-dule-burgwarmalad digoed.
MAT 8:23 Agine, Jesús urgi nakwis imaksad. E-sapingan eba nadmarmosunnad.
MAT 8:24 Mata-abargusgu, burwa-dummad egi noalid. Ar demar bipisursoggu, bela ur demarba doged gualid. Jesúsʼdi uryagi ise-gabar maid.
MAT 8:25 Geb degi, e-sapingan Jesús-gabmaidse nadmalad, odaksamalad, ega binnasur sogdemalad: —¡Dummad! Anmar-ur dogmai, be anmar-bendake. Anmar bergumaloed.
MAT 8:26 Jesús abin-sogded: —¿Ar ibi be dobmala? ¿Ar be an-benmarsi? Bemar dobguewilubsulinad. Degine, geb Jesús gwisgusgua, burwaga, degi, demarga sabsur sogded: “Be bogidik gumar.” Geb degi, bela neg bogidik nadsunnad.
MAT 8:27 Bela e-sapingan geger dakdemalad: —¿Ar we-dulede doasunna, burwase-bakale, demarse-bakale, eba ibsaed?
MAT 8:28 Jesús, degi, e-sapingan, mata-dummad obaksamargu, Gadara-yalase modapmalad. Napase aidesmargu, walabo dule-niasamalad ese nonimalad, neg-uangi gudii noarmalad. Ar we-ebogwad gadi urwemarsoggu, dulemar geg a-igarba nanamalad.
MAT 8:29 Niasamalad-warbogwad binnasur gotemalad, sogdemalad: —Jesús Bab-Dummad-Machi, ¿ibiga be anmargi yoledaniki? ¿Ar be anmarse danikidi, amba yoo anmar-odurdaked-ibagan-moed-iduar bato be sabsur anmar-odurdakega daniki?
MAT 8:30 Emar-gunaidgi undar-banguedgi deun sinmar bukidar mas-mananaid.
MAT 8:31 Niamar Jesúsʼgi wilenai gusmalad, ega sogdemalad: —Ar dulegi be anmar-onogele, weba-sinmar-bukidar-mas-mananaidse be anmar-barmide.
MAT 8:32 Jesús ega sogded: —Eye, sinmarse be dognamar. Niamar dulegi nodgu, sinmarse nadmarsunnad, agi ubodapmalad. Bela sinmar-ichesulid, danagwen yar-weregedgi babatidmalad. Demarse sinmar bela batismargu, bela gundilegar burgwismalad.
MAT 8:33 Sin-edarbemalad dobguar duurmakdemalad. Neggweburse modapmargu, bela sogdapmalad, igi sinmar gundilegar burgwismala, degine, igi warbo niasamalad nugusmarbali.
MAT 8:34 Degi-itosmargua, bela a-neggweburginmalad Jesús-abin ainiarmalad. Jesús-daksamargu, egi wilenaigusmalad, adi, e-yargi naegar. Agi Jesús urgi nakwissunnad.
MAT 9:1 Degi, Jesús urgi nakwisgu, mata-dummad-gaka-baidse nadsunnad, na e-neggweburse nonisunnad.
MAT 9:2 Agi dule-wargwen, bela-abagan-burgwar-nikad ese dule-megedgi-mai senonimalad. Ar Jesús dule-senonimalad-egi-gwen-bensuli-dakdegu, dule-abagan-burgwaledga sogded: —An-ai, gandik na be imako. Be-isgued an bega elisun.
MAT 9:3 Degi, Garda-Narmaked-Dulemar gwenna-gwenna ulubgi sogdemalad: “We-dule, Bab-Dummad-nuggi nue dodonaid.”
MAT 9:4 Ar Jesús dulemar-ulubgi-binsanaid sunna mag daksoggu, ega sogded: —¿Ar ibiga bemar na be-gwagegi ichakwa binsanai? ¿Geg-isgued-osulo be an-insae?
MAT 9:5 Be anga sogmardo, biti bur baisursunna soglege: ‘Be-isgunaid an bega osulos.’ An sogbarsundibe: ‘Be nugu, be gwisgu, be nae.’ Suli, ebobela baisursunna imaklesulid.
MAT 9:6 Degisoggu, ani Dule-Machi, dule-bonigwaled an nudakoed, adi, be wisgumalagar, igi an dule-bonigwaled sunna nudake, debayobi we-napneggi dule-gwage-isgued an sunna nudakbalid. Degi, Jesús dule-abagan-burgwar-nikadga sogdesun: —Be gwisgu, be-meged be sede. Be-negse be nasun.
MAT 9:7 Geb degi, dule-bonigwaled yog gwisguar imaksad, e-negse nadsunnad.
MAT 9:8 Ar dulemar dule-nugusad-dakdegu, geger dakdemalad. Bab-Dummad dulega we-gangued-uksadba, dulemar Bab-Dummad-nug odummodmarsunnad.
MAT 9:9 Jesús dule-nudaksadgi-gwichi nadgu, dule-wargwen-Mateoʼye-nugad dakalid. A-dulede, Roma-dummadga-mani-galeged-neggi, mani-gaedgi arbasiid. Jesús, Mateoʼse goted, ega sogded: —An-sapinga-guega anba be dage. Degi, Mateo gwisgusgu, eba yog naar imaksad.
MAT 9:10 Jesús, e-sapinganmala Mateo-neggi mas gunsigu, dulemar-Roma-dummadga-mani-gaedgi-arbamalad, degi, dule-baigan-galagwensuli-isgudimalad eba mas-gunbukwa gusmarmogad.
MAT 9:11 Fariseoʼmar, Jesús-dakarmargu, dule-isganamarba mas-gunsii, Jesús-sapinganga sogdemalad: —¿Ar ibiga bemar-odurdaked-saila dulemar-Roma-dummadga-mani-gaedgi-arbamaladba, degi, dule-baigan-isgudimaladba wede mas gunne?
MAT 9:12 Jesús, deyob Fariseoʼmar-soge-itosgu, sogded: —Dulemar-gegusurmalad ina-duled abesulid, unnila gegumaladbi ina-duled abe damalad.
MAT 9:13 Degisoggu, be namar, be baraminamar, igi-Bab-Dummad na E-Gardagi sogbie, deun sogsagu: ‘Anga ibmar-ogumakar-ukedba nue-wile-emar-daked bur an abeged.’ Oseas 6:6 ”Ar we-napnegse an nonikidi, dule-nueganse, isgudisur-itomaladse-golega an nonisulid. An nonikidi, dule-isgudimaladse-golega an nonikid.”
MAT 9:14 Agi Juan-sapingan Jesúsʼse nonimalad, ega sognonimalad: —Anmar, degi, Fariseoʼmar, imbagwenar Bab-Dummadse-golega mas-gunsuli gudidamalad. ¿Ar ibiga be-sapingandi Bab-Dummadse-golega gwen mas-gunsuli gudidasurmala?
MAT 9:15 Jesús, abin-sogded: —Dulemar ome-nikued-ibagi masgullegedse nonikile, ar dule-ome-nikuoed e-abargi-siir, ¿bukib binsamalo be insae? Geg bukib binsaed. Ar dule-ome-nikunaid e-idu-seledoed-ibagan nonikoed. A-ibagan-nonikile, agindi, Bab-Dummadse-golega mas-gunsuli gudigumalodo.
MAT 9:16 Jesús sogdebalid: “Ar dule morgoa-binid matuga mor-seredgi-nasikega gwen imakdisulid. Degir, morgoa-binid sinnii nadele, mor-sered aka bur bule achirmakdo-itole.
MAT 9:17 ”Deginbali, vino-binid gwen ibmar-uka-bugluga-sobaled-seredgi baliledisulid. Degir, vino-binid mudele, buglu-sered esirmako-itole. Degir binsa vino-binid milego-itole, degi, bugluse-bakar binsa miledo-itole. A-ulale, vino-binid buglu-binidgi baliledo, adi, ebobela nabir igarga guegar.”
MAT 9:18 Jesús wegi-sunmaksii, machered-wargwen, dule-nue-nug-nikagwad ese abarmaknonikid, yokorgi sindigar asabin signonikid, ega sognonikid: —An-bunolo emiskwaa burgwisad. Anba be dage. An-bunologi be-argan be mesdage, adi, gannar durguegar.
MAT 9:19 Jesús gwisgus-imaksagu, eba naded. E-sapinganmar eba nadmarmogad.
MAT 9:20 Degine, ome-gwensak birgambe-gakabogus (12) boni-nalur-nika-gudiid, Jesús-yarganba nonikid, e-morduku ebunonikid.
MAT 9:21 Ome na ulubgi binsaed: “Ar unnila Jesús-mordukubi an ebusale, an nudaklegoye.”
MAT 9:22 Ar Jesús aibiris imaksagu, ome-gwichi dakalid. Geb ega sogded: —Omegwa, mer be dobgu. Ar be nue an-bengussursoggu, be nugussun. Agine, ome yog nuguar naded.
MAT 9:23 Jesús dule-nug-nikagwad-negse modapsunnad. Agi dogdegu, dakded, dulemar-gar-ogormalad bato guagwar bukwa, degi, dulemar bukidar oimakbukwa.
MAT 9:24 Jesús amarga sogded: —Bemar ainirmar. Ar bunolo burgwar maisulid, unnila gabmaid. Dulemar, Jesúsʼgi dododmar.
MAT 9:25 Jesús bela dulemar-onisgua, geb negyaba bunolo-maidse dogded. Jesús bunolo-argangi-gadapgu, ogwichis imaksad.
MAT 9:26 Bela a-yargi Jesús-bunolo-odurgusad, wisgunoni gusmalad.
MAT 9:27 Jesús bunolo-neggi nodgu, dulemar-warbo ibyasurmalad Jesús-sorba dani gusmalad, binnasur-gordani gusmalad: —Be David-wagwa, be dule-dummadid, wile be anmar-dake.
MAT 9:28 Degi, Jesús negse dogsagu, dulemar-warbo-ibyasurmalad ese nonimalad. Jesús amarga sogded: —¿Ar bemar insagua, sunna an bemar-nudak be insamala? Amar abin-sogdemalad: —Dummad, eye, sunna be anmar-nudake.
MAT 9:29 Geb degi, Jesús amar-ibya ebusad. Amarga sogded: —Ar bemar an-bensurmarsoggu, be nugumarsun.
MAT 9:30 Geb degi, amar nabir ataknadsunnad. Geb Jesús amarga ise-sogar imaksad: —Melle an-bemar-nudaksad dule-baiganga be sogmalo.
MAT 9:31 Ar dule-warbogwad-nugusmalad a-neggi nodmargu, bela neggwebur-iliba sogdemalad, igi Jesús e-onudaksa.
MAT 9:32 Ar ibya-nugusmalad nodmargu, Jesúsʼse dule-niasaed-geg-sunmaked senonimalad.
MAT 9:33 Jesús a-dulegi nia-onosgua, dule-geg-sunmaked nabir sunmaknaded. Dulemar-bukidar geger dakdemalad, sogdemalad: —Ar Israel-yargi wegiid-ibmar iduar gwen dakledisulid.
MAT 9:34 Ar Fariseoʼmardi sogdemalad: —Ar wedi, nia-sailaba niamar-onodiid.
MAT 9:35 Jesús bela neggweburmar-dummaganba-nanadii gusad, degi, neggweburmar-burwiganaba-nanadii gusbalid, Judíoʼmar-onmakedneggi dulemar-odurdakdii gusbalid, Bab-Dummad-e-negdakmaid, a-e-gayaburba-nuedgi sunmakdii gusbalid, degine, dulemar-abargi bela galagwensuli-gegumalad, degi, uellemalad-nudakdii gusbalid.
MAT 9:36 Ar Jesús dulemar-bukidar-dakdegu, nue wile amar-dakded, ar ade, dulemar e-bendaked-sate-gudidii daked, degine, e-idued sate dakbalid, igi sibad-wawaad e-idued-sate-gudii damalayob.
MAT 9:37 Geb degi, Jesús burbar e-sapinganga sogded: —Napira an bemarga soged, nainugi ibmar-gwag-weleged bukidarad, ar e-weemaladdina ichee gued.
MAT 9:38 Degisoggu, nainugi-ibmar-gwag-weleged-e-ibedse be wilesakwaa egismar, adi, e-nainuse ibmar-gwag-wemalad barmidagegar.
MAT 10:1 Degi, Jesús na e-sapingan-ambe-gakabogwadse (12) gochagua, ega gangued uksad, adi, niaburbamar onogega, dule-galagwensuli-gegumalad nudakega, degi, bela uellemalad nudakegarbar.
MAT 10:2 Jesús na e-sapingan-bur-dummagan-ambe-gakabogwad (12) weyob nugmalad: Gebedgi, Simón, Pedroʼye nugbalid. Agine, Andrés, Simón-e-urba. Zebedeo-machimala: Jacobo, degine, e-urba-Juan.
MAT 10:3 Degine, Felipe, Bartolomé, Tomás. Deginbali, Mateo, Roma-dummadga-mani-gaedgi-arbasad. Jacobo, Alfeo-machid. Lebeo, Tadeoʼye nugbalid.
MAT 10:4 Simón, a-dule Cananeo-sordad. Degine, Judas-Iscariote, darba-Jesús-uksad-dule.
MAT 10:5 Jesús wemar, e-ambe-gakabogwad (12) barmisad, ega igar uksad: “Mer Judíoʼsurmaladse be namalo, degine, Samaria-neggweburmargi mer dogmarbalo.
MAT 10:6 Ar bur be Israel-dulemar sibad-wawaadyob-yoggus-gudimaladse be namaloed.
MAT 10:7 ”Ar be nadmalale, Bab-Dummad-gayaburbagi be weyob sunmakmaloed: ‘Emigindi, Bab-Dummad-e-negdakmaid anmarse warmaksasunye.’
MAT 10:8 Degine, dule-uellemalad be nudakmaloed, dule-naibe-buna-yaa-maleged-nikmalad be nudakmarbaloed. Dulemar-burgwar-mamaid be gannar odurgumaloed, dulemargi be niamar onomaloed. ”Ar we-gangued manigi bemarga uklessursoggu, binsa bemar aimar-bendakmarmogoed, mer egi mani gamarmogo.
MAT 10:9 ”Degine, olo, mani, esnon-mani, mer be sagu-yaba sedmalo.
MAT 10:10 Mordukwa amba igarba be sedosurmarbalid, amba mor gobo sedosurbalid, amba sapat-ogwaed satebar, amba gaapoled sedosurbar. Ar ade, dule-arbaedi na e-arbaedgi mas gunnergebed. Degisoggu, dulemarga be-ibmar-saoedi, a-dulemar masgi bemar-ogunnoed.
MAT 10:11 ”Ar ibu-neggwebur-dummadse be dogdapdibe, neggwebur-bipigwadse be dogdapdibe, dule-nabir-be-sunmaked-abingaoed be amimaloed. A-neggi be a-neggweburgi-noedse be megmaloed.
MAT 10:12 Ar bemar a-negyase dogdapile, neg-ibedse be golo, ega sogo, bemar nued sogeye.
MAT 10:13 Ar a-negginmalad nued-egi-be-binsaed abingaele, a-negyagi dulemar neg-bogidikid ega nagunonikoed. Ar degisulirdi, neg-bogidikid nikuosulid.
MAT 10:14 ”Ar dule-wargwen be-abingasulile, degine, be-sunmaked itosurbalile, a-neggindibe, a-neggweburgindibe, be nodagoed. Agi be noalile, be-naggi-olli-nanaid nue eli-eli be imakoed, oyogega, ese bemar bar dagosurye.
MAT 10:15 Napira an bemarga soged, Bab-Dummad-igar-nabirogoed-ibagi, we-neggweburginmalad-be-abingassurmalad, Sodoma-neggweburginmaladba, degi, Gomorra-neggweburginmaladba bur bule sabsur odurdaklemaloed.”
MAT 10:16 Jesús, e-sapinganga sogded: “Emigi bemar, sibad-wawaadyob, achu-burburumalad-abargi an na be-barmidmar. Degisoggu, naibeyob bemar guagwar gudimaloed. Deginbali, baisursunna nuu-daeyob be damarbaloed.
MAT 10:17 Dulemargi nue salakarmar. Ar amar, Judío-dummagan-igar-nabiromaladga be-ukmaloed, degine, Judíoʼmar-onmakedneggine, sabsur be-bibyomarbaloed.
MAT 10:18 Degine, ar be an-sapingan-gusoggu, dulemar, dummagan-negdakmamaid-asabin, degi, reymar-asabin be-ebipidmaloed, adi, dummaganga, degi, Judíoʼsurmaladga bemar angi sunmakmalagar.
MAT 10:19 ”Ar dulemar a-dummaganga be-uksamalale, mer be bukib binsamalo, igi an sogodibeye. Ar be sunmak-sokalile, Bab bega binsaed ukoed, igi be sogoe.
MAT 10:20 Ar ade, bemar sunmakosulid, Bab-Dummad-Burba-Isligwaled bemarba sunmakoed.”
MAT 10:21 Jesús, e-sapinganga sogdebalid: “Dulemar e-gwenadgan-oburgwega na muchub-muchub urmaknanai gumaloed. Bab na mimmigi aibinnai guoed. Mimmigan babgangi gwisgunanai gumogoed. Na oburgwenanai gumaloed.
MAT 10:22 Bemar an-sapingan-gumarsoggu, a-ular, bela dulemar isdar be-dakmaloed. Ar galakussurmaladdina, igar-bulegan-berguedse nue abonolemaloed.
MAT 10:23 ”Ar neggwebur-gwensakgi be-bareginnarmalale, baid-neggweburse be idu wakinmalo. Ar napira an bemarga soged, amba yoo Israel-neggweburmar-bela-onoge, ani Dule-Machi, an danikoed.
MAT 10:24 ”Ar bemar wisid, ar e-sailaba bur sapin dummadsulid, degine, e-ibedba bur mai dummadsurbalid.
MAT 10:25 Degisoggu, sapin e-sailayob-gusale bato gusbindo, degine, mai e-ibedyob-gusmogale, bato yeer itogewilubmodo. Ar dulemar an-annik sogmalad, ande Nia-Saila-Beelzebúʼye, ¿ar bemar-bursunna? Deyob bemarse gorlemarmogodo.”
MAT 10:26 Jesús sogdebar: “Degisoggu, dule-isdar-be-dakmalad mer be dobgumar. Ar bipisaale ibmar-dukuar-imaklegedi, magadse buud noosurdeeye gwen soglesulid. Degi, ar emi amba ibmar-dukualed wisgulegosurdeeye gwen soglesurbalid. Ar wisgulegedsegad.
MAT 10:27 Ar begarbi an-ibmar-sogedi, bela dulemarga be sogmala. Ar unnila be uaya-nabarbi an bega ibmar-sogedi, bela dulemarga gatik be sogmaloed.
MAT 10:28 ”Dulemar-be-oburgwebimalad, mer be dobgumar, ar be-burbadi oburgosurmalad. Bur Bab-Dummad be dobgumar, ar adi, sunna soo-sailagi dule-burba, degi, dule-san meted.
MAT 10:29 ”¿Ar ade, sikwi-gwabo, esnon-gwagwengi uklesursi? Ar degite, sikwi-gwagwensaale napase be-Bab-sogsuli gwen argwanosulid.
MAT 10:30 Ar bemar-sailagiase-bakar, be-Bab-Dummad bela ebisar sediid.
MAT 10:31 Degisoggu, mer be dobgumar, ar bemar bur bule sikwimarba bur ibmar-nueganad.
MAT 10:32 ”Ar doa-dule dulemar-asabin na sogdibe, ‘an Cristoʼba naiye,’ an-Bab-nibneggi-maid-asabin an sogmogodo, ‘we-dule an-sapinye.’
MAT 10:33 Ar doa-dule dulemar-asabin an-osulosardi, adi, an-Bab-nibneggi-maid-asabin an a-dule osulomogodo.”
MAT 10:34 Jesús sogdebalid: “Mer be binsamalo, we-napnegse an neg-bogidik-saega an noniye. Neg-bogidik-saega an nonisulid. An nonikidi, urwed-onogega an nonikid.
MAT 10:35 ‘An nonikidi, dule na e-bab-ebo ourwega an nonikid, bunagwa na e-nan-ebo ourwega an nonikid, bala na e-saka-bundor-ebo ourwega an nonikid.
MAT 10:36 Ar neguyaginmalad na e-isdarmaladga gunonimaloed.’
MAT 10:37 ”Ar dule, an-sabedba bur bule e-bab-sabele, e-nan-sabele, we-dule an-sapinga gege gued. Ar dule an-sabedba bur bule e-bunagwa-sabele, e-machigwa-sabele, an-sapinga gege gued.
MAT 10:38 Igi dule burgwegala, nakrus semaidae, deyobi, dule guakwaa burgwega anba nanasulile, a-dule an-sapinga gege gued.
MAT 10:39 ”Ar dule-wargwen na e-san-bendakedgi binsaele, e-san-burba ei berguoed. Ar anba-naid-ular, burgwenonikirdi, adi, e-san-burba bendaknonikoed.”
MAT 10:40 Jesús sogdebalid: “Ar dule bemar-abingaele, an-abinganaido. Ar dule an-abingaele, Bab-Dummad-an-barmialid-abinganaido.
MAT 10:41 Ar dule Bab-gayaburba-barsoged-abingaele, ar Bab-gayaburba-barsoged-ibmar-abingaeyobi, Bab-Dummad ega ibmar-nuegan ukmogoed. Degine, dule, dule-innikidaed-abingaele, ar dule-innikidaed-ibmar-abingaeyobi, Bab-Dummad ega ibmar-nuegan ukmogoed.”
MAT 10:42 Jesús sogdebalid: “Ar doa-dule dule-bipigwadga nog-gwagwen dii-diopigwad uksadibe, ar dule-bipigwad-an-sapingusoggu, napira an bemarga soged, Bab-Dummad ibmar-nuegan ega ukosurdeeye soglesurdo, ega ukedsedo.”
MAT 11:1 Jesús, e-sapingan-ambe-gakabo-guedga (12) igar-uksad-bergusad-sorbali, Galilea-neggweburmarse, Bab-Dummad-gayaburbagi sunmakega, degine, dulemar-odurdakega, nade gusad.
MAT 11:2 Diigi-dule-oged-Juan esgaryagi-mellesigua, Cristo-ibmar-imakdiid itoalid. Geb agi, Juan, e-sapingan-warbo Cristoʼse barmialid,
MAT 11:3 adi, ese egisegar: —Ar epenne Bab-Dummad-sogsad, yoedse dule-wargwen an bemarga barmidagoye, ¿ar be a-dule? ¿Anmar dule-baid amba edarbemaloe?
MAT 11:4 Jesús, abin-sogded: —Be namar, Juanʼga be ibmar-itosmalad sognamar, be ibmar-daksamalad sognamar:
MAT 11:5 Dulemar-ibyasurmalad, emisgi mag-atakmalad, dulemar-muya-muya-nanamalad, nabir-nanamalad, dulemar-naibe-buna-yaa-maleged-nikmalad, swilidik gusmalad, dulemar-uaya-yallirmalad, nabir-mag-ito gudmalad, dulemar-burgwismalad, gannar durgudmalad, degine, dulemar-wileganaga, Bab-Dummad-Gayaburba-Nuedgi ega sunmakleded.
MAT 11:6 ”Degine, Juanʼga be sogbalo: ‘Ar dule-an-bensulidgindi, nued egi binsalesye.’ ”
MAT 11:7 Juan-sapingan-warbogwad nadmargu, Jesús, Diigi-dule-oged-Juanʼgi dulemarga sunmakded. Sogded: “¿Ar ibi-dakega bemar nega-dulesulidganba arbimarsunna? ¿Nargammu burwaba-aibangwichi-dakega be arbimala? Suli, a-dakega be arbisurmalad.
MAT 11:8 ¿Degite, ar ibi-dakega be arbimarsunna? ¿Dule-wargwen mor-nued-yoi-gudiid-dakega be arbimala? Suli, a-dakega be arbisurmalad. Ar dulemar-mor-nued-yoi-gudimaladdi, reymar-negyagi gudidimalad.
MAT 11:9 Ar degite, ¿ibi-dakega be arbimarsunna? ¿Bab-Dummad-gayaburba-barsoged-dakegala? Eye, an bemarga sogmar, a be daksamalad. Degine, Bab-Dummad-gayaburba-barsogedba bur dule-dummad be daksamalad.
MAT 11:10 Ar we-dulegine bato narmakar Bab-Dummad sognaid: ‘Be-iduale, anga-gayaburba-berbeged an barmidoed, Adi, be-iduar bega igar-mayegar.’
MAT 11:11 ”Napira an bemarga soged: Dulemar-we-napneggi-gwalulemaid Diigi-dule-oged-Juanʼba-bur-dummad sulid, ar degite, Bab-Dummad-e-negdakmaidgi bur-dule-bipigwadi, a-dule, Diigi-dule-oged-Juanʼba bur dule-dummadid.
MAT 11:12 ”Diigi-dule-oged-Juan-akale, emi-ibadsega, Bab-Dummad-e-negdakmaidse-dogegala, dutusulidgi dogleged, unnila dulemar-dutusurmaladbi ese dogmaloed.
MAT 11:13 Ar bela Bab-Dummad-gayaburba-barsogmalad, degi, Moisés-Igar-Mesisad, Diigi-dule-oged-Juan-nonikidse Bab-Dummad-gayaburbagi sunmaksamalad.
MAT 11:14 Ar bemarga-an-soged bemar abingabiele, Diigi-dule-oged-Juan, we Elías-danikoye-soglesad-duledo.
MAT 11:15 Bemar mag nue-itobiele, an bemarga ibmar soged nue-itomar.”
MAT 11:16 Geb degi, Jesús sogdebalid: “Degite, emi we-dulemar-bukmaladde, ¿doasunnaa damar be insae? Wemar-damaladi, machimala neg-magaba ambikuedgi-ambikumaladyobid, muchub-muchub agi gorbukdamalad,
MAT 11:17 ega sogbukdamalad: ‘An bemarga gar-ogochamalad, degite, gwen be dodossurmalad. An bemarga bukib-binsa namaksamalad, degite, gwen be bossurmalad.’
MAT 11:18 ”Ar Juan we-napnegse-nonigu, dule-baigan-mas-gunnedyob mas-gunsuli gudigusad, dule-baigan-gobedyob gobsuli gudigusad. Egi be sogsagusmalad, ‘Wedi nia naiye.’
MAT 11:19 Ani Dule-Machi, andi nonigu, mas gunnonikid, gobnonibalid. Emide, angi be sogmalad: ‘We-dule be dakmalana, gadi-masgunned-duled, gadi-vino-gobed-duled.’ Deginbali, be sogmarbalid: ‘Dulemar-Roma-dummadga-mani-gaedgi-arbamalad-e-aiye, degine, dulemar-galagwensuli-isgudimalad-e-aiye.’ ” Geb degine, Jesús sogdesunnad: “Ar dule-Bab-Dummad-ibmar-wisidi, ibmar-nuegan-imakedgi mag-dakle daed.”
MAT 11:20 Geb degi, Jesús neggweburmargi-bukidar-ibmar-dakledisurmalad-imaksadgi sabsur ega ibmar sokarsunnad. Ar ade, a-neggweburginmalad na e-isgudiidga gwen bukib binsasurmalad, e-isgudiid gwen iesurmalad.
MAT 11:21 Jesús sogdesunnad: “¡Corazín-dorgan, be duledar-wilesmar! ¡Betsaida-dorgan, be duledar-wilesmar! Ar bemar Bab-Dummadse sabsur-odurdaklenonimaloed. Ar Tiro-neggweburgi, degi, Sidón-neggweburgi we-ibmar-dakledisurmalad imaklesana, a-neggweburmar bato dikasurgus wile-itoged-mor yosmalanad, degine, burugi obsamarbalinad, adi, oyogega, emarde na e-isguedga bukib ulubgi nue-itosmarye.
MAT 11:22 Degisoggu, an bemarga sogsun, Bab-Dummad-igar-nabogoed-ibagangi, bemar bur bule Tiro-dorganba, degi, Sidón-dorganba sabsur odurdaklemaloed.
MAT 11:23 ”Emide, bemar Capernaúm-dorgan, ¿nibneggi, nued abingalegoye be binsamala? Suli. Aka be nega-uluba odurdakleged-negse be balimelledmaloed.” Ar Sodoma-neggweburgi we-ibmar-dakledisurmalad be-neggweburgi-imaklesadyob imaklesana, we-Sodoma-neggwebur amba emi-ibaganse siinad.
MAT 11:24 Degisoggu, an bemarga sogsun, Bab-Dummad-igar-naboged-ibagangi, bemar bur bule Sodoma-dorganba sabsur odurdaklemaloed.”
MAT 11:25 A-ibagangi, Jesús Bab-Dummadga-sunmakdegua, sogded: “Baba, an be-nug odummosun, bedi nibnegsemaidid, we-napneg-e-Dummadbalid. Ar bedi dule-ibmar-wismaladgi, dule-ibmar-magar-itomaladgi, an-we-ibmarmar-imaksad aku-ito be imaksad. Dule-baisursunnagwadmargardi bur be osanalosad, adi, amar magar itomalagar.
MAT 11:26 Eye, Baba, ar deyob be abesad.”
MAT 11:27 Jesús sogdebalid: “An-Bab anga bela ibmarmar uksad. Dulemar-wargwensaar Bab-Dummad-Machi-mag-daked satemalad, unnila Babbi mag daked. Degi, dulemar Bab-akudakmarbalid, unnila E-Machibi mag Bab-daked. Ar doaga E-Machi na e-Bab-osanalobie, agarbi na osanaloged.
MAT 11:28 ”Bela bemar-yegus-alamaknaimalad, degi, yegus-itodidimalad, anse be dagmar, ani an bemarga obunnoged ukoed.
MAT 11:29 An-igar-maid be sumar. Moli-bebe-nikad warbo-ebo-arbaegala, suar-biir e-dukargi edindamaladyob be angi akamar. Angi be durdakmar, ar an san-dummarba imaksulid, degine, an gwage-eikwaa-daed-duled. Agi na be-burbagala, be obunnoged amioed.
MAT 11:30 Ar an-igar-maid dutusursulid, nollogwad, degine, an-ibmar-seed ukubalid.”
MAT 12:1 Deun a-ibagangine, Jesús obunnoged-ibagi orosgi-dakleged-digaled-imbaba nadapgu, e-sapingan ukur itoarmargu, ibmar-digaled-gunnega gwane-gwane imaksamalad.
MAT 12:2 Fariseoʼmar-Jesúsʼba-nadapmalad deyob dakarmargu, Jesúsʼga sogdemalad: —Be dakena, be-sapingan obunnoged-ibagi ibmar-ise-imakleged imaknadapmalad.
MAT 12:3 Jesús, Fariseoʼmar-abin sogded: —¿Ar bemarde Bab-garda absodisurmarsi, igi David imaksa, deun David, degi, e-sordamar ukumecharmargu?
MAT 12:4 A-ibagi David Bab-Dummadse-goled-negse dognonigusad, degi, madu-Bab-Dummadga-uklesad guchagusad. Ar David, degi, e-sordamar, a-madu gunnedsulinad, ar ade, madu isedid. ¿Ar we-madu unnila dule-irwa-Bab-Dummadse-gormaladbi gunnoye igar-mainsursi? Degisoggu, an-sapingan nabir imaksamarmodo.
MAT 12:5 Deginbali, ¿ar bemarde Moisés-Igar-Maid absodisurmarsi? Agi igi-dule-irwa-Bab-Dummadse-gormalad, Bab-Dummadse-goled-neggi, obunnoged-ibagi annadimala, ¿ar degite amar igar-noar imakdimala? Suli, igar-noar imakdisurmala.
MAT 12:6 Inniki an bemarga soged, wegi Bab-Dummadse-goled-negba dule-bur-dummad gudiid.
MAT 12:7 Ar bemar Bab-Dummad-soged nue mag itomalana ibu we obare: ‘Anga ibmar-ogumakar-ukedba nue wile-emar-daked bur an abeged.’ Oseas 6:6 ”Ar we be insamalana, an-sordamar noar-ibmar-imaknaiye be sogosurmalanad.
MAT 12:8 Degisoggu, be wisgumalagar, ani Dule-Machi, Obunnoged-Iba-e-Dummadid.”
MAT 12:9 Jesús, a-nainu-naidgi nadgu, Judíoʼmar-onmakednegse nonikid.
MAT 12:10 Agine dule-wargwen-argan-burgwaled sii gusmogad. Jesúsʼgi gwisguegala, yamo ese egichiarmalad. Ega sogdemalad: —¿Ar obunnoged-ibagi sunna dule nudaklege?
MAT 12:11 Jesús abin-sogded: —¿Ar doa-dule, bemar na sibad-wawaad-wargwen nikadibe, ar bei obunnoged-ibagi yaa-gureged-yaba argwachale, be onossurmalale? Be onosmalale.
MAT 12:12 Ar degite, ¿dule, sibad-wawaadba bur-ibmar-nuedsursi? Ar degisoggu, obunnoged-ibagi ibmar-nued-imaked, sunna imaked.
MAT 12:13 Geb degi, Jesús dule-argan-burgwaledga sogdesunnad: —Be-argan be onak. Dule e-argan onakwidgu, yog nuguar naded. Ar igi e-argan-baid nuedi, deyob e-argan gunonikid.
MAT 12:14 Fariseoʼmar Judíoʼmar-onmakedneggi-bukmalad yog ainiar imaksamalad. Geb igar amiarmalad, igi-saele Jesús-oburgwemalodibeye.
MAT 12:15 Ar Jesús, Fariseoʼmar-e-oburgwebied wissoggu, agi-gudiidgi bangudsunnad. Dulemar-bukidar eba nadegusmalad. Degine, geb Jesús dulemar-uellemalad bela nudaksad.
MAT 12:16 Jesús dulemar-nudaksadga igar uksad, mer an-barsogmaloye, an doa guye.
MAT 12:17 Ar epenne, Bab-Dummad-gayaburba-barsoged-Isaías idu-sogsagusadba guega, deyob gusad. Deun sogsagusgu, Bab-Dummad sogye:
MAT 12:18 “We an-mai, anga arbaega an susad. An nue na sabed, an egi nue-weligwar itoged. An-Burba an ega ukoed, ar dulemar-yar-baid-baidgi-bukmaladga igar-naboged-igargi sunmakoed.
MAT 12:19 A-dule gwen urwosulid, degi, binnasur golosurbalid. Ar neg-imbaba binnasur-gordii, e-gaya dule gwen itogosulid.
MAT 12:20 Ar gammu-maraled gwen bisgosulid, degine, gwallu-gwillo-binna-gamaid, gwen oginnosulid, igar-napiragwad imakedsegad.
MAT 12:21 Ar bela-dulemar-yar-baid-baidgi-bukmalad e-bendakega, a-dule-edarbebukwa gumaloed.”
MAT 12:22 Geb degi Jesúsʼse dule-niasaed senonimalad. We-dulede, geg-ataked, degine, geg-sunmakbalid. Jesús a-dule-nudaksad. Degisoggu, nabir-atake, degi, nabir-sunmake gussunnad.
MAT 12:23 Jesús-dule-nudaksad bela dulemar geger dakdemalad, sogdemarsunnad: “¿Ar we-dulede, inso David-wagwa-yoedse-danikoye-soglesad-sunnad be insae?”
MAT 12:24 Ar Fariseoʼmardi degi-dulemar-soge-itoarmargu, sogdemalad: “Suli, we Mesíasʼsuli. Wede niamar-e-dummad-Beelzebúʼye-nugadba, niamar-onodiid.”
MAT 12:25 Ar Jesús, Fariseoʼmar-binsanaid mag daksoggu, amarga sogded: “Rey-gwensak-neggwebur-dakmaidgi, e-sordamar na dukin-dukin aibinnarmalale, we-neggwebur bergudeled. Degine, ar neggweburdibe, neg-yagindibe, e-neg-yaginmalad na egi aibinnarmalale, we-neg bergudeled.
MAT 12:26 Ar nia-saila-Satanás e-sapingan-onodele, ar na dukin egi aibinna-itole. Ar degiile, ¿igi e-neg-na-dakmaid degisadeguosunna? Suli, e-neg bergudele.
MAT 12:27 ”Ar ani, nia-saila-Beelzebú-nuggi an niamar-onodiile, ¿be-sapingandi doa-nuggi niamar-onodimarmosunna? Ar be sogmardibe Bab-Dummad ega gargangued ukye. Degisoggu, bemarga oyolenaido, be noar sogdimalad, nia-saila-sogedba an niamar-onodiiye.
MAT 12:28 ”Ar an Bab-Dummad-Burba-Isligwaledgi niamar-onodiile, we bemarga oyonado, Bab-Dummad-e-negdakmaid bemarse warmaknoniye.
MAT 12:29 ”Ar dule, dule-dutusulid-negyaba ibmar-atursaega dule-dutusulid-edingwelergebed. Deyob imaksulile, gege atursaed. Deyobi, an nia-sailagi-nakwisadba niamar-onodiid.
MAT 12:30 ”Ar dule anba dasulile, angi gwisgudido. Ar dule anga dulemar-anba-naguega danar urbedisulile, bur we-dule, angi dule-banguega imakdido.
MAT 12:31 ”Ar degisoggu, an bemarga sogsun, ar bela dulemar-e-isgued, degine, dulemar-galagwensuli Bab-Dummadgi-dodoar-sunmaked, Bab-Dummad sunna amarga isgued elioed. Ar dulemar Bab-Dummad-Burbagi galagwensuli dodoar-sunmaksardi, Bab-Dummad gege ega isgued elied.
MAT 12:32 Ar doa-dule galagwensuli Dule-Machigi dodoar sunmaksadibe, Bab-Dummad sunna amarga isgued elioed. Ar dule Bab-Dummad-Burba-Isligwaledgi galagwensuli egi dodoar sunmaksardi, Bab-Dummad ega e-isgusad emi, degi, yoedse, gwen eliosulid.
MAT 12:33 ”Ar sapi nuedile, e-durbamaked nuedmodo. Sapi isganale, e-durbamaked isganamodo. Ar ade, sapi e-sanmakedgi dakleged, sapi-nueddibe, sapi-isganadibe. Dulemar deyobmodo, e-daedgine mag daklenonimogoed.
MAT 12:34 ”¡Ar bemar naibe-bulegan-e-mimmiganyob gumalad! Ar bemar isgana damarsoggu, degite, ¿ar igi ibmar-nuegangi be sunmakmalosunna? Geg ibmar-nuegangi be sunmakmala. Ar ade, dule gwagegi-binsaedba sunmakdaed.
MAT 12:35 ”Ar dule, dule-nuedile, e-gwage-nuedba ibmar-nued sunmakdo. Ar dule, dule-isganale, e-gwage-isganaba ibmar-isgana sunmakmodo.
MAT 12:36 Ar andi an bemarga sogdo, ar dule yogasaar galagwensuli sunmaksale, Bab-Dummad-igar-nabogoed-ibagangine, Bab-Dummadga na dukin barsoggwichi gumalodo.
MAT 12:37 Ar be sunmaksadbali, bega soglegoed, be sabsur odurdaklegoye. Bega soglegodibe, be sabsur-odurdaklegosurye.”
MAT 12:38 Agi geb gwen-gwen Garda-Narmaked-Dulemar, degi, Fariseoʼmar, Jesúsʼga sogdemalad: —Odurdaked-saila, anmar-wagab ibmar-wilubgan-dakledisulid anmarga be imake, adi, anmar mag dakega, be Bab-Dummad-nuggi-sunmaked napiragwadi.
MAT 12:39 Jesús, abin-sogded: —Be, dule-isganamalad. Be, negsichigi-galagwensuli-yoledimaladid. Be, Bab-Dummadgi nodimaladid. Emide, be ibmar-wilubgan-dakledisulid bega imaked be abemalad. Ar an bega sogmar, wilubgan bega oyolegosulid. Unnila bemarga-oyolegoedi, Bab-Dummad-gaya-barsoged-Jonásʼye-nugad-gusadyob bega oyolegoed.
MAT 12:40 ”Ar igi Jonás ua-dummad-saban-yaba ibapaa ibginedba, degi, mutikidba megisa, ayobi, ani Dule-Machi, napa-urba ibapaa ibginedba, degi, mutikidba megmogoed.
MAT 12:41 Bab-Dummad-igar-nabogoed-ibagangi, Níniveʼginmalad, bemar-emi-dula-gudidimaladgi gwisgudamalogua, bemar-sabsur-odurdakye sogdamaloed. Ar ade, Jonás Bab-Dummad-igargi sunmaksagu, Nínive-dorgan na e-isguedga bukib-binsas gusmalad, e-daed gwagsa gusmalad. Ar emigindi, Jonásʼba bur bule dule-dummad wegi bemar-abargi gudiinad. Ar degite, bemar be-isguedga na be bukib binsasurmalad, be-daed na be ogwasurmalad.
MAT 12:42 ”Rey-bundor-dad-nakwed-argan-nuedsikid-yar-dakmaid Bab-Dummad-igar-nabogoed-ibagangi bemar-emi-dula-gudidimaladgi gwisgudagogu, bemar-sabsur-odurdakye sogdagoed. Ar ade, we-omegwa dad-Salomón-dule-binsaed-ibed-nikad-itogega bela-bela-dikasur danigusad. Ar emigindi, Salomónʼba bur bule dule-binsaed-nikadi, wegi bemar-abargi gudiinad. Ar degite, bemar an-itobisurmalad.”
MAT 12:43 Ar Jesús sogdebalid: “Ar niaburba dulegi nodele, neg-dinnaganaba obunnoged-neg amidii daed. Ar neg-obunnoged amisursoggu,
MAT 12:44 sogdasunnoed, ‘An-neg-an-mete-alidse gannar an dognaoye.’ Ar na e-negse modapogu, dakdapoed, neg ollobi sii, nue durwiar sii, degi, nue nudakar sibali.
MAT 12:45 ”Geb degi, niaburba deyob daksale, e-sordamar-walagugle (7) eba-bur bulegandamalad-sedagega gannar naoed. Niaburbamar a-negse dognonimalogu, na e-negga imakdemaloed. Geb we-dule epenne-e-daedba aka bur bule isgudsunnoed. Ayobi bemar-emi-dula-gudidimalad-isganamalad gumarmogoed.”
MAT 12:46 Ar amba Jesús dulemarga sunmaksiidgine, Jesús-e-nan, degine, Jesús-e-urbamar Jesúsʼbo-sunmakmalaga neg-magaba Jesús-edarbebukwa-gusmalad.
MAT 12:47 Geb dule-wargwen Jesúsʼga sognonikid: —Emi be-nan, be-urbamar, neg-magaba be-edarbebukmalad, bebo sunmakbimalad.
MAT 12:48 Jesús, dule-deyob-ega-sogedga abin-sogded: —¿Ar doa an-nan-sunna? ¿Doamar an-urbamar-sunna?
MAT 12:49 Jesús na e-argan e-sapingansik-oyodgua, sogded: —Wemar an-nanad, wemar an-urbamalad.
MAT 12:50 Ar doa-dule an-Bab-nibneggi-maidba, ibmar imakele, ar a, an-nando, a, an-bundo, a, an-urbamardo.
MAT 13:1 A-ibagi Jesús negyagi-sii nodgua, mata-dummad-gakase nadegusad. Geb agi sigdapid.
MAT 13:2 Geb dulemar-bukidar ese nonimalad. Jesús dulemar-odurdakega, urgi-nakwis imaksasunnad. Geb uryagi sigisad. Dulemardi, Jesús-itogegala, bela mata-dummad-gakagi ambikusmalad.
MAT 13:3 Jesús bukidar ibmar-burbarmaladgi akar-akar dulemarga sunmaksii gusad, dulemar-odurdaksii gusad. Jesús weyob sogde gusad: “Ibagwengine, dule-wargwen-ibmar-gwag-digedi, ibmar-gwag dignaded.
MAT 13:4 Ibmar-gwag-dignaigusgu, abala igargi babatidapid. Sikwimar nonigua, ibmar-gwag-igargi-babatismalad manonimalad.
MAT 13:5 ”Ibmar-gwag abala napa-asginegwadgi akwa-yaisulidgi babatismalad. Agi ibmar-gwag gwae-gwae ainialid, ar ade, napa asginegwad.
MAT 13:6 Dad gaargu, ibmar-gwag gummakded, ar ade, e-maligan asginesoggu, dinguded.
MAT 13:7 ”Ibmar-gwag abala iko-abargi babatisad. Ibmar-gwag dungudgu, ikomar ichosad, degisoggu, gwen sanmaksasursunnad.
MAT 13:8 ”Ar ibmar-gwag-napa-nuedgi-babatismaladdi, nue-sanmaksamalad: Ibmar-gwag-abala, wilubba sanmaksamalad. Abala, nued-mergu sanmaksamalad. Abala, bela-belagwad sanmaksamalad.”
MAT 13:9 Geb Jesús sogdebalid: “An-bemarga-ibmar-soged bemar mag nue-itobiele, nue-itomar.”
MAT 13:10 Geb degi, Jesús-e-sapingan Jesúsʼse nonimargu, ega sogdemalad: —¿Ar ibiga be dulemarga burbar ibmar sogdae?
MAT 13:11 Jesús abin-sogded: —Ar bemargardi, Bab-Dummad-e-negdakmaid igar-burbar-mamaid osanalogoye maid. Dule-baigangardi, ega osanalegosulid.
MAT 13:12 Ar dule-ibmar-nikadga, amba ega ibmar-uklebalodo, adi, bur bule gatik ibmar-nikuegar. Ar dule-ibmar-suliddina, ar bipi-wis-ibmar-nikadi, aka bur e-annik sulegoed. We sogleged, bemardi bur bule ibmar-mag-ito guoye.
MAT 13:13 A-ular, we-dulemarga burbar an sunmakdaed: ‘Ar amba dakmar-inigwele, aku dakmalad. Ar itomar-inigwele, aku itomalad.’
MAT 13:14 ”Ar degisoggu, igi epenne Bab-Dummad-gayaburba-barsoged-Isaías sogsagusa, ar deyob gunonisundo, deun sogsagusgu: ‘Ar na e-uayagwar itomalo-inigwele, aku itomaloed. Ar na e-ibyagwar dakmalo-inigwele, amba aku dakmaloed.
MAT 13:15 Ar we-dulemar an-itobisurmalad, ar na e-uayagi nue aku-itomalad, ar e-ibya na murdik imaksamalad. Ar adi, mer na e-ibyagi mag dakmalagar, degi, mer na e-uayagi mag itomalagar, deginbali, mer e-ulubgi mag itomalagar. Ar degiile, Bab-Dummadsik namalo-itole, ar degiile, an nudak dakledagoed.’
MAT 13:16 ”Ar bemargindi, nued binsalesmalad, ar bemar-ibyadi, magar ibmar daked. Bemar-uayadi, magar neg-itobalid.
MAT 13:17 Ar napira an bemarga soged, bukidar Bab-Dummad-gayaburba-barsogmalad, degi, bukidar dule-innikidamalad, emi-bemar-ibmar-daknanaid aisaar dakbigusmalanad, emide, gwen daksasurgusmalad. Degi, emi-bemar-ibmar-itoged, aisaar itobi-gusmalanad, emide, gwen itossurgusmalad.”
MAT 13:18 Jesús sogdebalid: “Emisgi, ibmar-gwag-digedgi an-bemarga-sunmaksad-e-burba be nue itomarsun:
MAT 13:19 Ar dule-wargwen Bab-Dummad-gayaburba-itosad aku-itodibe, nia-saila nonikogua, a-dule-gwagegi gayaburba-nued-diglesad ei ungenonikoed. Ar we sogleged, we ibmar-gwag igargi diglesadye.
MAT 13:20 ”Ar ibmar-gwag-akwa-imbaba-babatismaladdi, adi, Bab-Dummad-gayaburba itosmargu, nue weligwar abingasmalanad.
MAT 13:21 Ar wemar unnila asginbi Bab-abingasmarsoggu, ibmar-gwag-digaled-e-maligan asgine digaleyobid. Degisoggu, Bab-Dummad-gayaburba-ular wilearmargu, degine, dulemar sabsur e-imakarmargu, Bab-Dummadgi bangudmalad.
MAT 13:22 ”Ar ikomar-abargi-batismaladdi, we-dulemar Bab-Dummad-gayaburba abingasmalando, ar we-napneggi ibmarbina bukib-binsaedbali, degi, maniginbi bur binsamarsoggu, binsaed-galedmalad, abali, Bab-Dummad-gayaburba-e-gwagegi-naid iedmarsunnad. Degisoggu, amar ibmar-gwag gwen sanmaksasulidyob gunonisunnad.
MAT 13:23 ”Ar ibmar-gwag-napa-nuedgi-diglesmaladdi, we-dulemardi Bab-Dummad-gayaburba-itosmargu, magasar nue itosmalad. Degisoggu, amar ibmar-gwag-nue-sanmaksamaladyob gunonisunnad: Amar-abala, wilubba sanmaksamalad. Amar-abala, nued-mergu sanmaksamalad. Amar-abala, bela-belagwad sanmaksamalad.”
MAT 13:24 Jesús burbar dulemarga sunmakdebalid. Sogdebalid: “Bab-Dummad-e-negdakmaid-igar weyob gued: Dule-wargwen na e-nainugi ibmar-gwag-nued digsad.
MAT 13:25 Ar dulemar gabidmargu, e-isdarad orosgiid-digaled-abargi gagan-isgana dignonimogad. Geb degine, naded.
MAT 13:26 ”Ibmar-gwag nue aramaksagu, sanmakargu, gagan-isgana abargi daklearmogad.
MAT 13:27 ”Ar e-maigan nainu-ibedse nonimalad, ega sognonimalad: ‘Dummad, ¿ar be-nainugi ibmar-gwag-nued be digsasursi? ¿Ar degite, bia we-gagan-isganamarde danisunna?’
MAT 13:28 Nainu-ibed, abin-sogded: ‘An-isdarad we-gagan-isgana digsad.’ E-maigan, abin-sogdemarmogad: ‘¿We-gagan-isgana ungenabi be anmar-abege?’
MAT 13:29 ”Nainu-ibed, abin-sogded: ‘Suli, mer be ungenamalo. Ar abakalegi gagan-isgana-bemar-ungenaidgi be orosgi-dakleged ungiarbalile.
MAT 13:30 Bur ebobela, ibmar-gwag-weleged-ibaganse itoba na dungumamaimaloed. A-ibagangi ibmar-gwag-weemaladga an sogoed, bina gagan-isgana-inse be weemargwerye, ogumakega danar-danar edinmarye. Orosgi-daklegeddi, be an-ibmar-gwag-urbilegedse urbenamaloye.’ ”
MAT 13:31 Jesús, baid-igar-burbar-sunmaklegedgi sunmakdebalid. Sogdebalid: “Bab-Dummad-e-negdakmaid-igar, dule-wargwen e-nainugi mostaza-e-gwag-digsayob gued.
MAT 13:32 Ar mostaza-gwag ibmar-gwagba bur-bipi-inigwele, ar dunguderdi, ibmar-dubaled-masga-gued-birgi obitedaed. Degisoggu, ar sapiga gunonikogu, sikwimar-niba-gukudimalad, sunna e-anagangi gabmalad.”
MAT 13:33 Jesús baid-igar-burbar-sunmaklegedgi sunmakdebalid. Sogdebalid: “Bab-Dummad-e-negdakmaid-igar weyob gued: Ar igi ome-wargwen ilapaa-madubur-wilubsaedgi, madubur-ina obatisa, geb degi madubur-ina binna-binna bela omuedse madubur-ganonidaed.”
MAT 13:34 Ar bela Jesús burbar-sunmaklegedgi dulemarga sunmakdedaed, burbar-sunmaksuli gwen gussulid.
MAT 13:35 Ar Bab-Dummad-gayaburba-barsoged sogsagusadba guegala, deyob Jesús sunmakdii gusad, deun sogsagusgu: “An sunmakdogu, burbar an sunmakoed, negasaila-akar ibmar-dukuar-mamaid an odulogega, burbar an sunmakoed.”
MAT 13:36 Geb degi dulemar Jesúsʼgi-bangudgua, Jesús negyaba dogdegusad. E-sapingan Jesúsʼse walik-gunonimargu, ega sogdemalad: —Gagan-isganagi be burbar-anmarga-sunmaksad, anmarga be oduloge, ar wede ibi obare.
MAT 13:37 Jesús abin-sogded: —Dule-ibmar-gwag-nued-digedi, we Dule-Machid.
MAT 13:38 Nainu-obaredi, we-napneg gued. Ibmar-gwag-nuedi, we Bab-Dummad-e-negdakmaid-e-mimmigan gued. Gagan-isganadi, we nia-saila-e-mimmigan gued.
MAT 13:39 Ar dule-isdarad-gagan-isgana-digsadi, nia-saila gued. Ibmar-gwag-weleged-ibagan, we-napneg-berguoed-ibaganad. Dulemar-ibmar-gwag-weemaladi, baliwiturmar gued.
MAT 13:40 ”Ar igi gagan-isgana unnulege, degi, ogumaklege, deyobi, we-napneg-berguedse guoed.
MAT 13:41 Ar Dule-Machi na e-baliwiturmar-barmidagoed, e-negdakmaidgi dulemar-ibmar-ichodimalad, degi, ibmar-isgana-imakdimalad, soo-sailase-ogumaknaega, weenonikoed.
MAT 13:42 Agi amar bobukwa, degi, beedse-wilebukwadba nugar-ogorbukwa, gumaloed.
MAT 13:43 Geb degi, dule-ibmar-inniki-imakmaladdi, e-Bab-negdakmaidgi dad-ibeler-gaeyob mag daklenonikoed. Ar dulemar magar-itobiele, an-ibmar-soged nue itomar.”
MAT 13:44 Jesús sogdebalid: “Aginbali, Bab-Dummad-e-negdakmaiddi, or-nuegan nainugi odukuar-bukwadyob gued. Dule-wargwen a-or-nuegan amisgu, gannar odukusad. Or-amisadba, weligwar-ito nadegusad. Geb a-nainu-bakega, bela na e-ibmar-nikadi uksad, adi, a-or-nuegan na egadga imakegar.”
MAT 13:45 Jesús sogdebalid: “Bab-Dummad-e-negdakmaid, dule-wargwen-ibmar-baked dimmurgiid-e-akwa-yeerdakleged-amidiidyob gued.
MAT 13:46 We-dule, dimmurgiid-e-akwa-yeerdakleged-amisgua, nadegusad. Na ibmar-nikadi, bela uksa gusad, agi dimmurgiid-e-akwa-yeerdakleged baknonikid.”
MAT 13:47 Jesús sogdebalid: “Amba deyobbardo, Bab-Dummad-e-negdakmaid sakiyob gubalid. Saki demargi-miledogua, bela galagwensuli uamar egi galeged.
MAT 13:48 Saki ua-ena-gusale, demar-gakase saki-sedmaloed. Dulemar ambikudmalogu, uamar-nueganbi garbagi urbedamaloed. Uamar-isganadi, miledoed.
MAT 13:49 ”Ar debayobi, we-napneg-berguedse guoed. Baliwiturmar ainidogua, dule-inniki-ibmar-imakmalad, dule-isganamargi bachik urbenonikoed.
MAT 13:50 Geb soo-sailase, dule-isganamar-midmaloed. Agi dule-isganamar bobukwa, degi, beedse-wilebukwadba, nugar-ogorbukwa gumaloed.”
MAT 13:51 Jesús geb e-sapinganga sogded: —¿Ar bela Bab-Dummad-e-negdakmaidgi an-bega-sunmaksamalad mag be itomala? Jesús-abin, sogdemalad: —Eye, Dummad. Anmar bela mag itomalad.
MAT 13:52 Jesús sogdebalid: —Ar Garda-Narmaked-Dule-wargwen bela Bab-Dummad-e-negdakmaid-igar nue-wisgunonikile, bab-neguya-sediid-gwensakyob gued. Igi we-bab na e-ulu-ibmar-sabogedgi ibmar-binigan, degi, ibmar-sergan, onodae, deyobi, we-dule-nue-igar-wisid, baigan-odurdakega, ibmar-epenne-durdaksad, degine, ibmar-bini-durdaksad, ebumogad.
MAT 13:53 Jesús igar-burbamaladgi-sunmaksiid-bergusad-sorba, nade gusad.
MAT 13:54 Jesús e-dungusad-neggweburse nonigu, Judíoʼmar-onmakedneggi emar-odurdaksigisad. Bukidar agi geger dakdemalad, sogdemalad: “¿Ar wede, bia binsaed-nuegan amidae? ¿Ar ibiga nabir wede, ibmar-dakledisurmalad imakdae?
MAT 13:55 ¿Ar wede, urgogi-arbaed-dule-machisursi? ¿Ar e-nande, Maríaʼye-nugsursi? ¿Santiagoʼde, Joséʼde, Simónʼde, degine, Judasʼde, e-urbamarsursi?
MAT 13:56 ¿Ar bela-e-bunmarde, anmar-abargi gudisursi? Ar degite, wede, ¿bia we ibmarmar durdaksasunna?”
MAT 13:57 Degisoggu, a-ular, dulemar geger Jesús-dakdemalad, Jesúsʼgi uludmarsunnad. Ar Jesúsʼdi amarga sogded: “Bela-neggwebur-baigangi Bab-Dummad-gayaburba-barsogmaladbina nue sogdamalad. Ar e-neggweburginmaladbi, degi, e-neg-yaurginmaladbi baisur dakdamalad. Agala, bemar an-abingassurmarmogad.”
MAT 13:58 Degisoggu, a-ulale, Jesús, ibmar-dakledisurmalad Nazaretʼgi dogdar imaksasulid, ar bukidar egi benmalad.
MAT 14:1 Deun, a-ibagangi, Rey-Herodes itoalid, bela dulemar Jesúsʼgi sunmakedbimala.
MAT 14:2 Agi Herodes e-maiganga sogded: “We-dule-gudiid, we Diigi-dule-oged-Juanʼye-nugadid. Ar wede, gannar durgus gudiid. A-ulale, nabir ibmar-dakledisulid imaked.”
MAT 14:3 Ar ade, Herodes, Herodías-ular Diigi-dule-oged-Juanʼye-nugad gasa gusad. Esgoro-dubgi-edicha, esgaryagi metegusad. Herodíasʼdi, Felipe-omenad. Geb Herodes e-urba-Felipeʼgi ome-egwacha gusad.
MAT 14:4 Ar ade, Juan Herodesʼga sogsa gusad: “We-ome be nikuedsulinye.”
MAT 14:5 Deun, Herodes Juan-oburgwebien-inigwele, dulemar-dobedba geg oburgwe gusad. Ar ade, dulemar Juanʼgi binsamalad, we Bab-Dummad-gayaburba-barsogedye.
MAT 14:6 Deun, Herodes-gwalulesad-ibagi iba-ononanaigua, Herodías-e-sisgwa emar-abargi-dodosgua, Herodes, nue-yeer daksagusad.
MAT 14:7 Deyob-daksadbali, Herodes bunagwaga sogdegusad: “Napira ise-sogar an bega soged, ar ibu be anse egisbie, an bega ukoed.”
MAT 14:8 Geb a-bunagwade, e-nan-ega-sogedba Herodesʼga sogded: —Diigi-dule-oged-Juanʼye-nugad-e-nono be bategi anga udaye.
MAT 14:9 Rey-Herodes deyob bunagwa-ega-soge-itosgua, nue-bukib-ito naded, ar bato bunagwaga sogsasoggu, “Napira an bega sogye, ar ibu be anse egisbiele, an bega ukoye,” degine, dulemar-eba-mese-naba-siid e-itosmarmosoggu, Herodes e-sordamarga sogdesunnad: “Bunagwaga Diigi-dule-oged-Juanʼye-nugad-e-nono ukmarye.”
MAT 14:10 Degisoggu, Herodes, Diigi-dule-oged-Juan-esgaryagi-mellesiid-e-dukar-egwannega igar-uksasunnad.
MAT 14:11 Sordamar Diigi-dule-oged-Juanʼye-nugad-e-nono bategi senonimargu, bunagwaga uknonimarsunnad, geb degi bunagwa e-nanga uksamosunnad.
MAT 14:12 Geb degi, Juan-sapingan, Juan-e-san sunonimalad, geb neg-uangi digsamarsunnad. Degine, Juan-e-sapingan Jesúsʼse-nadmargu, ega sogdapmalad, igi Juan burgwisa.
MAT 14:13 Jesús Diigi-dule-oged-Juan-burgwisad-wisgusgu, dulemargi banguded, bachikii nega-dulesulidgansik urgi nadegusad. Ar dulemar Jesús-naded-wisgusmargu, e-neggweburmar-akar nagab ese nadegusmalad.
MAT 14:14 Jesús urgi aidesgu, dulemar-bukidar e-idu bukwa dakalid. Nue-wile dulemar-dakded, degine, dulemar-uellemalad bela nudaksad.
MAT 14:15 Bato neg-sedodgu, e-sapingana Jesúsʼse nonimalad, ega sogdemalad: —Anmar nega-dulesulidgangi bukwamalad, degine, bato neg-sedodbalid. Degisoggu, dulemar be barmid, adi, neggweburmarse namalagar, agi masgunned na bakmaloed.
MAT 14:16 Jesús e-sapingan-abin sogded: —Wemar naed abelesulid. Bemar ega masgunned ukmala.
MAT 14:17 E-sapingan, abin-sogdemalad: —Anmar wegi mas sated. Unnila madu gwaatar, degi, ua ukabo nikmalad. Degisoggu, geg anmar masgi ogunned.
MAT 14:18 Jesús e-sapinganga sogded: —Be anga madu sedamar, ua be anga sedabar.
MAT 14:19 Geb degi, Jesús gagan-birgi dulemar-oambikuega imaksad. Jesús madu-gwaataled, degi, ua-ukabogwad-susgua, niba atakdegu, Bab-Dummadga dog-nuedye sogsad. Geb degi, Jesús madu, degi, ua bisge-bisge imaksagu, e-sapinganga ukded. Degi, e-sapingan dulemarga ukdemosunnad.
MAT 14:20 Degine, bela-dulemar-gudidimalad nue-immeles mas guchamalad. Jesús-sapingan mas-obichad-wesmargu, garba-gwaambe-gakabo-mergu (12) enosmalad.
MAT 14:21 Dulemar-mas-guchamalad, unnila macherganbi miliatarsaar (5,000) mergued. Omegandi, degi, mimmigandi, obarilesulid.
MAT 14:22 Geb degi, Jesús e-sapingan-urgi-gwae-nakwega imaksad, adi, e-iduar mata-dummad-gaka-obakar namalagar. Edi, dulemar-napi-dakega besgweled.
MAT 14:23 Jesús bela dulemar-barmisgu, Bab-Dummadse golega yar-birse walagwen-nakwisad. Neg-mutikgudgu, walagwen Bab-Dummadse gorsigisad.
MAT 14:24 Ur Jesús-sapingan-egi-nadapiddi mataba demar-dummadba omukulenadapid, ar ade, burwa asabin gormaid.
MAT 14:25 Bolegoedba, Jesús e-sapinganse mata-dummad-birgi ganna-ganna nadegusad.
MAT 14:26 Jesús-sapingan, mata-dummad-birgi dule-dani-dakarmargua, bela-bela gwakidmalad, dobedba binnasur gotemalad. Sogdemalad: —¡Girmar anmargi dani!
MAT 14:27 Degisoggu, a-ular, Jesús e-sapinganse yog gotebin imaksad. Ega sogded: —¡Mer be dobgumar! ¡Be gandik imakmar! ¡Ani an gudii!
MAT 14:28 Geb degi, Pedro, abin-sogded: —Dummad, ar beele, an bese mata-dummad-birgi ganna-ganna-daged be an-imakdo.
MAT 14:29 Jesús Pedroʼga sogded: —Be dagdena. Pedro urgi-siid mata-dummadgi-aidesgu, mata-birgi ganna-ganna Jesúsʼse nadegusad.
MAT 14:30 Pedro burwa-binnasur-gormai dakdegu, dobe-ito naded. Geb degi, matagi dogdegu, binnasur goted, sogded: —¡Dummad! ¡An-bendake!
MAT 14:31 Geb degi, Jesús argangi Pedro-gasgu, Pedroʼga sogded: —Ibiyob be an-bengue. ¿Ar ibiga be an-bengusa?
MAT 14:32 Ar Jesús, Pedro-ebo urgi nakwismargu, burwa bogidik naded.
MAT 14:33 Degine, urgi-bukwamaladi bela deyob daksamargu, Jesús-nug odummodmarsunnad. Jesús-abin dulluu nono-imaksamalad. Geb Jesúsʼga sogdemalad: —Ar nue be Bab-Dummad-Machi-sunnadid.
MAT 14:34 Geb degi, Jesús e-sapinganmala mata-dummad obaksamargua, Genesaret-neggweburse nonimarsunnad.
MAT 14:35 Dulemar-a-neggweburginmalad Jesús-gudiid mag daksamargu, neggwebur-dikarbarmaladse gayaburba-mimidmalad. Geb bela dulemar-uellemalad Jesúsʼse senonimalad.
MAT 14:36 Dulemar Jesúsʼgi wilenaigus damalad. Ega sognai damalad: “Unnila be mordukubi wis ebuged be anmar-imakye.” Ar bela e-morduku-ebusmalale, bela nugusdamalad.
MAT 15:1 Geb degi, Garda-Narmaked-Dulemar, Fariseoʼmar-Jerusalénʼgi-danimalad Jesúsʼse nonimargu, Jesúsʼga sogdemalad:
MAT 15:2 —¿Ibiga be-sapingan dadgan-Igar-Maidgi-wede yoledimala? ¿Ar ibiga be-sapingan masgunned-iduar argan enukdasurmala?
MAT 15:3 Jesús abin-sogded: —¿Ar ibiga bemarmode dadgan-igar-maidba-daed-ular, Bab-Dummad-Igar-Maidgi yoledimarmosunna?
MAT 15:4 Ar Bab-Dummad sogsad: ‘Be-bab-nug-odummodii, degi, be-nan-nug-odummodii be nanamalo.’ Éxodo 20:12; Deuteronomio 5:16 Degine: ‘Dule, e-bab-ukabsasale, e-nan-ukabsasale, we-dule, oburgwilegoed.’
MAT 15:5 ”Ar emigindi, bemardi soged: ‘Ar doa e-babga sogdibe, e-nanga sogdibe: Geg an be-bendakye, ar bela-an-ibmar-nikadi, bato an Bab-Dummadga uksaye.
MAT 15:6 Degisoggu, a-dule, e-bab-bar-bendaksulir, degi, e-nan-bar-bendaksulir, gwen akarsurye.’ Ar weyob be be-dadgan-igar-maidba-daed-ular, Bab-Dummad-Igar-Maidgi be yoledimardo.
MAT 15:7 ¡Bemar wagar-darbodamalad! Ar nabir Bab-Dummad-gayaburba-barsoged-Isaías, epenne bemarnik sogsagusad, deun Bab-Dummad-sogye sogsagusgu:
MAT 15:8 ‘We-dulemar unnila asginbi an-nug odummomalad, ar e-gwage-ulubgindi angi gwen binsasurmalad.
MAT 15:9 Ar binsa asginbi an-nug odummodimalad. E-igar-maid odurdakedi, dulemar-igar-mesisadba bur odurdakmalad.’ ”
MAT 15:10 Degi, Jesús dulemar-bukidar-bukwadse gotegu, amarga sogded: —Nue bela be an-itomalo:
MAT 15:11 Ar masgunned dule-oichosulid. Dule galagwensuli-sunmakerdi, adi, dule-oichodo.
MAT 15:12 Geb degi, e-sapingan Jesúsʼse walik-gunonigua, ega sogdemalad: —¿Be wisi, emi Fariseoʼmar weyob be-ibmar-soge-itoarmargu, sae-itodmalad?
MAT 15:13 Jesús, abin-sogded: —Ar an-Bab-nibneggi-maid sapi-digsasulidi, e-sailanagase a-sapi ungoed.
MAT 15:14 Mer be Fariseoʼmar bai-dake. Ar ibyasuliyob gudidimalad, amar aku-atakmalad-iduedmalad. Ar dule-ibyasulid, dule-ibyasulid-idumaile, ebobela neg-gullu-dummadgi argwanmaloed.
MAT 15:15 Pedro, Jesús-abin sogded: —We, be ibmar-burbar-soged, masgunned-dule-oichosulid, wede, ¿ibu obare? Anmarga be oduloge.
MAT 15:16 Jesús abin-sogded: —¿Ar bemarmode amba aku-itomarmoga?
MAT 15:17 ¿Ar bemar aku-itoge, bela masgunned, unnila sabanse uboddaed, degi, geb gannar mileddabalid?
MAT 15:18 Ar dule-galagwensuli-sunmakeddi, e-gwagegi deyob-binsaed noardaed. Degisoggu, deyob-sunmakeddi, dule-oichosundo.
MAT 15:19 Ar dule-gwagegi binsaed-isganamar ainiardaed: Iblomalad, ome-dikarba yolemalad, degi, sui-dikarba yolemalad, na abirgunagwarsuli negsichigi nanamalad, ibmar-atursamalad, gakansaar aimar-barsoged, isdar-dulemargi-sunmaked.
MAT 15:20 Ar we-ibmarmardi, dule-oichomaladdo. Dule argan-enuksuli-mas-gunneddi, dule-oichogedsulid.
MAT 15:21 Jesús Genesaretʼgi-gudiid, Tiro-yarse, degi, Sidón-yarse nade gusad.
MAT 15:22 Agi ome-wargwen, Judíoʼsulid, Cananeaʼgined, a-yalaganba-daniki, binnasur Jesúsʼse gordani gusad. Weyob ese gordani gusad: —¡Dummad, David-Wagwa, wile be an-dake! An-bunagwa sabsur niasamaid.
MAT 15:23 Ar Jesúsʼdi gwen abin-imaksasulid. Geb degi, Jesús-sapingan Jesúsʼse nonimargu, egi wilenaigusmalad, ega sogdemalad: —We-omega be soge, be naye. Ar anmar-sorba binnasur gordanikid.
MAT 15:24 Jesús abin-sogded: —An barmilealidi, dulemar-baiganse an barmilearsulid. Unnila Israel-dulemar-sibad-wawaadyob-yoggus-gudimaladse an barmilealid.
MAT 15:25 Degi, geb ome Jesús-abin yokorgi signonikid, ega sognonikid: —¡Dummad, be an-bendake, anga an-bunolo be nudake!
MAT 15:26 Jesús abin-sogded: —Be Judíoʼsursoggu, an be-bendakele, mimmigan-mas achuga-uknaiyob an imako-itole. Ar mimmigan-mas achuga be ukoye igar maisulid.
MAT 15:27 Ome, Jesús-abin sogded: —Dummad, nabir be sogendo. Ar degi-inigwele, achumarse-bakar, sunna mimmigan-mas mese-urba-batemamaid gunmogad.
MAT 15:28 Geb Jesús, ome-abin sogded: —Ome, ibibayobi be an-bensuli. An bega be-bunolo an nudakoed. Degisoggu, deyob be ibmar-egisnaid gusun. Ar a-wachigi e-bunolo yog nuguar naded.
MAT 15:29 Jesús Tiro-yargi, degi, Sidón-yargi, bangudgua, Galilea-mata-dummad-naidse nonikid. Geb degi, Jesús yargi-nakwisgu, agi sigidapid.
MAT 15:30 Agi dulemar-bukidar Jesúsʼse nonimalad, ese senonimalad: Dulemar-muya-muya-nanamalad, dulemar-ibyasurmalad, dulemar-geg-sunmakmalad, swida-burgwarmalad, degi, bukidar dulemar-galagwensuli-uellemalad. Bela wemala, Jesús-nagaba mesnonimalad. Jesús amar bela nudaksagusad.
MAT 15:31 Degisoggu, bela dulemar-bukwamalad dakdegu, Jesús, dulemar-geg-sunmakmalad sunmak imaksa, dulemar-swida-burgwarmalad nudaksa, dulemar-muya-muya-nanamalad nabir-nanae imaksa, dulemar-ibyasurmalad mag-dake imaksa, dulemala, geger dakdemalad. Degisoggu, Israel-Bab-Dummad-nug odummodmarsunnad.
MAT 15:32 Degi, Jesús e-sapinganse gochagua, amarga sogded: —We-dulemar an nue-wile daked. Ar ibapaagus anmarba bipirmakdanimalad, masgunned sate gudimalad. Degisoggu, an mas-gunsuli dulemar-barmidele, abakalegi igarba negoearmalale.
MAT 15:33 Geb degi, e-sapingan abin-sogdemalad: —We-dulemar-ichesulid-masgi-ogunnegala, ¿ar wede bia anmar neg-dulesulidgangi mas-ichesur amimalosunna?
MAT 15:34 Jesús e-sapinganga sogdebalid: —¿Gwabigwa be madu nikmarsunna? E-sapingan abin-sogded: —Wis anmar madu-gwagugle (7) nikmalad, wis ua-burwi ichesaar nikbalid.
MAT 15:35 Jesús dulemar-bukidarmalad napagi sigega imaksad.
MAT 15:36 Jesús madu-gwagugled-susgua, degi, uamar-susbargua, Bab-Dummadga dog-nuedye sogded. A-sorba, madu, degi, ua, bisge-bisge imaksagu, e-sapinganga ukded. Geb degi, e-sapingan dulemarga mimidmogad.
MAT 15:37 Bela dulemar madu-guchamargu, degi, ua-guchamargu, nue-immelesmalad. Jesús-sapingan mas-gwabgusad bela wesmargu, garba-gwagugle (7) enosmalad.
MAT 15:38 Bela madu-guchamalad, degi, ua-guchamalad, macherganbi milibake-mergu (4,000) daklealid. Omegan, degi, mimmigandi gwen obarilesulid.
MAT 15:39 Degi, Jesús dulemar-barmisgu, urgi nakwissunnad. Geb degi, Magdala-yalaganse nadsunnad.
MAT 16:1 Fariseoʼmar, degi, Saduceoʼmar, yamo Jesús-wilubdakega Jesúsʼse nonimalad. Jesúsʼga sogdemalad: —Be Bab-Dummad-ganguedba, ibmar-wilubgan-dakledisulid anmar-wagab be imake, adi, anmar mag be-dakoed, be Bab-Dummad-nuggi nue-daniye.
MAT 16:2 Jesús amar-abin sogded: —Wegi anmar-yargi neg-sedodele, be sokardamalad: ‘Mogir, ber ginnitibiid, degisoggu, neg-yolasaila guoed.’
MAT 16:3 Degine, neg-wakdaradba be sokardamarbalid: ‘Emi mogir ber ginnitibiid, degine, gutumar yaisurbalid. Degisoggu, dii burwaba-mesa wioed.’ ¡Bemar wagar-darbodamalad-dulemalad! Ar dii-wioeddi magar be dakmalad. Degite, bemar-abargi ibmar-gunaiddi, be aku dakmalad.
MAT 16:4 ”We-dulemar-galagwensulidamalad, we-dulemar-negsichigi-galagwensuli-yolemalad Bab-Dummad-sogedba ibsasurmalad. Amardi ega ibmar-wilubgan-dakledisurmalad oyobi abedamalad. Ar we-wilubgan ega bar oyolegosurmalad. Unnila ega oyolegoedi, Bab-gayaburba-barsoged-Jonás-gusadyob, ega a-wilubgan oyolegoed, adi, wisgumalaga, an doa-dule gue.” Jesús degi-sogsagu, emargi bangudsunnad.
MAT 16:5 Jesús e-sapinganmala mata-dummad-gaka-obakar mosgua, e-sapingan dakarmalad, madu iesmala.
MAT 16:6 Jesús e-sapinganga sogdesunnad: —Fariseo-madubur-inagi, Saduceo-madubur-inagi, nue salakarmar.
MAT 16:7 Jesús-sapingan ulubgi binsadmalad. Sogdemalad: —Anmar madu-searsulidba, Jesús anmarga deyob sogergebed.
MAT 16:8 Jesús, e-sapingan madu-senonisulidgi-sunmakmalad mag daksagu, amarga sogdesunnad: —¿Ar ibiga be sunmaknanai, anmar madu searsurye? ¿Ar amba be an-benmarde?
MAT 16:9 ¿Ar amba be nue-akusunna itomala? ¿Madu-gwaataledgi dulemar-miliatar (5,000) madu-guchamaladi be insasurmarsi? ¿Agi madu-obichad garba-gwaambe-gakabo-mergu (12) be wesmarbarsursi?
MAT 16:10 Deginbali, ¿amba be insasurmarbali, madu-gwagugledgine (7) dule-milibake (4,000) madu guchamalad? ¿Agi madu-obichad, garba-gwagugle (7) bemar wesmarbarsursi?
MAT 16:11 ¿Ar ibiga bemar nue-akusunna itomala? Madu an bemarga obarsulid. Bemar Fariseo-madubur-inagi, degi, Saduceo-madubur-inagi nue salakarmarye an bega soged.
MAT 16:12 Geb degi, Jesús-sapingan Jesús-ega-sogsadi, madubur-inagi nue salakarmarye, nue magar itosmalad. Madubur-ina-sunnadgi ega sunmaksulid. Ega sunmakedi, Fariseo-ibmar-odurdakedgi, degi, Saduceo-ibmar-odurdakedgi ega sunmaked, nue salakarmarye.
MAT 16:13 Jesús Cesarea-Filipos-neggwebur-walikgusgu, e-sapinganse egichialid. Ega sogded: —Ani Dule-Machi, ¿wede doaye an-annik sogmala?
MAT 16:14 E-sapingan abin-sogdemalad: —Gwenna-gwenna Diigi-dule-oged-Juanʼye benik sogmalad. Baigandi sogmalad, be Bab-Dummad-gayaburba-barsoged-Elías-nugadye. Baigan sogmarbalid, be Jeremíasʼye. Baigan sogmarbalid, be Bab-Dummad-gayaburba-barsoged epenne-gudigusad-wargwenadye.
MAT 16:15 Jesús e-sapinganga sogded: —Bemardina, ¿doaye be an-annik sogmarmosunna?
MAT 16:16 Simón-Pedro Jesús-abin sogded: —Be Cristo, Bab-Dummad-dule-wargwen-barmidagoye-sogsad-dule, Bab-Dummad-Dula-Maid-E-Machi-sunnad.
MAT 16:17 Geb degi, Jesús abin-sogdemogad: —Simón, be Jonás-machi, begi nued binsalesad. Ar dule we-ibmar bega sogsasulid. An-Bab-nibneggi-maid, a bega we osanalosad, an Cristoʼye, an Bab-Dummad-Machi-sunnadye.
MAT 16:18 Ani an bega sogsun: Be, Pedroʼd. We-akwa-birgi anba-nanaimalad an omelomai an imakoed. Burgwedi gwen egi obinosulid.
MAT 16:19 Degine, ani an Bab-Dummad-e-negdakmaid-yabe an bega ukoed. Ar bela we-napneggi be-ibmar-sogsadba galenonikile, nibneggi bela galenonimogoed. Ar we-napneggi be-ibmar-sogsadba igar-egasale, nibneggi bela deyob igar-egalemogoed.
MAT 16:20 Geb degi, Jesús e-sapinganga gandikidgi sogdesunnad: —Melle dulemar-baiganga bipisaar be sogo, ani an Jesús, an Cristoʼye, Bab-Dummad-dule-wargwen-barmidagoye-sogsad-dule-sunnadye.
MAT 16:21 A-iba-akale, Jesús, e-sapinganga e-burgoedgine sunmakded. Ede Jerusalénʼse naergebye, Judíoʼmar-girmar-dummaganse nue-odurdaklegoye, dule-irwa-Bab-Dummadse-gormalad-e-dummaganse nue-wilegoye, degine, Garda-Narmaked-Dulemarse wilebaloye. Ede amarse oburgwilegoye, geb degi, ede ibapaagi gannar durguoye.
MAT 16:22 Pedro, deyob-Jesús-sogsad-itosgu, bachikii Jesús-sesad, Jesúsʼga sabsur-ibmar sogded: —¡Dummad! Deyob be gued, sate. Ar bela we-ibmar-be-sogsadi, guosulid.
MAT 16:23 Jesús, Pedroʼsik aibiris-imaksagu, Pedroʼga sogded: —¡Nia-saila-Satanás, wegi be nae! Ar bedi igar-isganagi an-egwanbi gudiid. Be-binsaedi, Bab-Dummad-Igar-Maidgi be binsasulid. Unnila dule-e-igarmar-mamaidginbi be binsaed.
MAT 16:24 Geb degi, Jesús e-sapinganga sogded: —Ar dule-wargwen an-sapinga gubiele, na dukin san iegergebed, bato burgwenadapidgi-nakrus-semaiyob nanaergebed, geb a-dule anba dagodo, geb a an-sapinga guodo.
MAT 16:25 ”Ar dule-wargwen anba-naid-ular, burgwebisulir, e-san-burba ei yogguodo. Ar anba-naid-ular, burgwenonikirdi, adi, e-san-burba yogguosurdo.
MAT 16:26 Ar dule napneg-naid bela egadga imaksar, ar e-san-burbadi yoggusar, we-dulega, ¿ibi-nuedga ega gusar be insae? Gwen ega ibmar-nuedga guosulid. Deginbali, dule-gwensak e-san-burba mer ei yogguega, ¿ibi na uksar be insae? Ibmar-uked, sate.
MAT 16:27 ”Ar Dule-Machi E-Bab-ganguedgi-yeerdaklegedgi, e-baliwiturmar-abargi we-napnegse danikoed. Geb agi, bela wala-walagwen-dulemarga, e-ibmar-imaksamaladba ibmar uknonikoed.
MAT 16:28 Napira an bemarga soged, gwenna-gwenna wegi-bemar-bukwadi, burgosurmalad. Amba dula-gudiidgi Dule-Machi-negdakmaid dakedsemalad.”
MAT 17:1 A-ibanergwad-sorbali (6), Jesús, bachik Pedro, Jacobo, degine, Jacobo-e-urba-Juan, yar-birse sesad.
MAT 17:2 Jesús amar-asabin yar-birgi-gwichi, Jesús-e-san-dakleged gwagdegusad, na e-wagar dad-ibeler-gaeyobi gadegusad, degine, e-mormala, bela ise-sipumakar, bela dagudik, gwallubayobi daklenaded.
MAT 17:3 Geb agi, Jesús-sapingan-warbaagwad dakdemalad, Jesús, Moisésʼmala, degi, Elíasʼmala sunmakgwichi.
MAT 17:4 Geb degi, Pedro Jesúsʼga sogded: —Dummad, we nueddo, anmar wegi gudisaed. Ar be abegele, anmar wegi neg-matargana-gwapaa sobmalodo: Gwagwen bega, baid Moisésʼga, geb baid Elíasʼgarmo.
MAT 17:5 Amba Pedro-sunmakgwichi, mogir mee emar-birgi nagunonikid. Geb agi mogir-imbaba gayaburba gollalid, sogded: “We, An-Machi-sabedid. We-Machigi an yeer itoged. We-Machi nue be itomar.”
MAT 17:6 Ar Jesús-sapingan degi-gayaburba-itosmargua, yog napase asgun-sindigar sigidmalad, bela nue-dobe-ito nadmalad.
MAT 17:7 Geb agi, Jesús e-sapingan-walik nonikid, geb ebunonikid. Ega sogded: —Be gwisgumar, mer be dobgumar.
MAT 17:8 E-sapingan nono-onakwidmargu, dakdemalad, unnila bato Jesúsʼbi walagwen gwichi.
MAT 17:9 Jesús e-sapingan-warbaagwadmala yar-birgi-aidearmargu, e-sapinganga ise-sabsur sogded: —Mer bipisaar bemar an-san-gwagsad dulemarga sogmalo. Geb ani Dule-Machi burgwisar, degi, gannar durgusad-sorba, geb be sogmalo.
MAT 17:10 Geb degi, e-sapingan Jesúsʼse egichiarmarsunnad: —¿Ibiga degite, Garda-Narmaked-Dulemar sogmarsunna, Bab-Dummad-dule-wargwen-barmidagoye-sogsad-idu, Elías-inse nonigweloye?
MAT 17:11 Jesús abin-sogded: —Ar napiragwad. Elías-inse nonikoed. Bela dulemar Bab-Dummad-Igargi-binsaega igar-nudaknonikoed.
MAT 17:12 Ar andi an bemarga soged, Elías bato nonikid. Nonikid akudaksa gusmalad. Ar dulemar, igi imakbi-gusmala, deyob Elías-imaksamalad. Amba deyob ani Dule-Machi, amarse an odurdaklemogoed.
MAT 17:13 Geb degi, e-sapingan Diigi-dule-oged-Juanʼnik-ega-ibmar-soged mag itosmalad.
MAT 17:14 Jesús e-sapingan-warbaagwadmala dulemar-bukidar-bukmaladse aidenonimargu, dule-wargwen Jesúsʼse nonikid. Yokorgi sindigar Jesús-abin signonikid, ega sognonikid:
MAT 17:15 —Dummad, an-machi wis be wiledake. Ar an-machi nue-odurdaklediid. Ani burwa-saar-daed. Imbagwenale, soogi argwatedaed. Imbagwenale, diigi argwatedaed.
MAT 17:16 Ar be-sapinganga an-machi an senonikinad, be-sapingan anga gwen nudaksasurmalad.
MAT 17:17 Jesús abin-sogded: —¡Be Babgi-bengumalad-dulemar! ¡Be Bab-igar-oakaloged-dulemar! ¿Ar bemarde an-suli geg be ibmar imakmarde? ¿Ar sana be ibmar durdakmaloe? Machigwa anga be sedamarsun.
MAT 17:18 Geb degi, machigwa Jesúsʼse senonimargu, Jesús niaga binnasur ibmar sogded. Geb nia machigwagi noded. A-akale, machigwa nugussunnad.
MAT 17:19 Jesús-e-sapingan Jesúsʼse bachikii ese gochamalad, ega sogdemalad: —¿Ar ibiga anmardi geg niaburba ono gusmala?
MAT 17:20 Jesús abin-sogded: —Ar bemar ulubgi amba angi benmarsoggu, a-ular, geg be niaburba ono gusmalad. Ar napira an bemarga soged, ar bemar mostaza-gwagyob, wis bipi be angi bensurmalale, sunna be we-yarga sogsamalaled: ‘Wegi-siid be weba ainir,’ ar yar ainirisaled. Ar ibmar bela be imakedbimardo.
MAT 17:21 [”An-emis-nia-onosadgiid-onogegala, yogasaar geg dule onoged. Unnila mas-gunsuli, degi, Bab-Dummadse-goledgi, geb bemar sunna wegiid-niamar onoged.”]
MAT 17:22 Jesús Galilea-yargi e-sapinganmala bipirmakdimaladgi, ega sokalid: —Ani Dule-Machi, an-isdarmalad an-ganonimaloed, dulemarga an-ukmaloed.
MAT 17:23 Geb agi dulemar an-oburgwemaloed. Degi-inigwele, ibapaagi gannar an durguoed. E-sapingan Jesús-deyob-ega-soge itoarmargu, nue-wile itodmalad.
MAT 17:24 Jesús e-sapinganmala Capernaúmʼse modapmalad, dulemar-Bab-Dummadse-goled-negga-mani-galeged-weemalad Pedroʼse nonimalad, ega sognonimalad: —¿Ar bemar-odurdaked-saila, wede Bab-Dummadse-goled-negga-mani-galeged bennuksuli?
MAT 17:25 Pedro abin-sogded: —Anmar-odurdaked-saila bennuked. Pedro negse dogdegua, Jesús-inse ega sunmakalid, ega sogded: —Simón, be dakegua, reymar-we-napnegginmalad, ¿doamargi we-mani gadamar be insae? ¿E-sordamargine? ¿Dulemar-baigangine?
MAT 17:26 Pedro abin-sogded: —E-sordasurmaladgi mani galeged. Jesús, Pedroʼga sogdesunnad: —Degisoggu, e-sordamardi geg bennuksundo.
MAT 17:27 Ar degi-inigwele, dulemar mer anmargi urwemalagala, mata-dummadse be nae, be ua-sona. Ua-gebe-be-sooedi, e-gaya be egaoed. A-e-gaya-yaba be mani-amioed. A-manigi bega, degi, anga, be mani-galeged bennukoed.
MAT 18:1 A-ibagangi, deun Jesús-e-sapingan Jesúsʼse nonimalad, ega sognonimalad: —Bab-Dummad-e-negdakmaidgi, ¿doa bur-dule-dummadi?
MAT 18:2 Jesús machi-bipigwad-wargwense gochad. Emar-abargi ogwisgunonikid.
MAT 18:3 Geb e-sapinganga sogded: —Napira an bemarga soged, ar bemar machi-bipigwa-daedyob gusulile, Bab-Dummad-e-negdakmaidse geg be dogmalad.
MAT 18:4 Ar degisoggu, dule we-mimmiyob na san-bipii imakele, a-dule, Bab-Dummad-e-negdakmaidgi dule-dummaddo.
MAT 18:5 Ar dule an-nuggine we-mimmiyobid-wargwen ber nue-weligwar abingaele, ar an-abinganaiyob gunaido.
MAT 18:6 Jesús sogdebalid: “Ar dule we-mimmi-burwigana-angi-bensurmalad-isguega-imakele, nue-dummad wilegoed. We-dule-deyob-emar-oichosad e-dukargi akwamuu-dummad-edilleged, degi, deyob, dii-wilagi-egwaleged bur-nabirid.
MAT 18:7 We-napneggi ibmar-galagwensuli Bab-Dummadgi-isguega-emar-imaked, doggus wilub-obichagusad, gwen bargalegosulid. Ar dule emar-gwage-ichodiiddina, duledar-wilesdo.
MAT 18:8 ”Degisoggu, ar be-argan isguega be-imakdibe, be-nag isguega be-imakdibe, bur be sike, begi-dikasur be mete. Ar argan-wargwen-nika degisadegudigued, bur nabirid. Ar nag-wargwen-nika degisadegudigued bur nabirid. Ar bur undarad, be argan-warbo-nika, degi, mali-warbo-nika, be soo-saila-geg-berguedse bur melleder.
MAT 18:9 Ar be-ibya isguega be-imakdibe, bur ibya be onoge, begi-dikasur-meted be imake. Ar bur-nabirsursi, ibya-gwagwen-nika dulagudigued. Ar bur undarad, ibya-gwabo-nika soo-saila-geg-berguedse melleder.”
MAT 18:10 Jesús sogdebalid: “Nue be salakarmar, mer ibgwensur we-burwigana be dakmalo. Ar napira an bemarga soged, ar nibneggi e-baliwiturmar an-Bab-nibneggi-maid-walik gudigumalad.
MAT 18:11 [Ar ani, Dule-Machi, an nonigu, dulemar-yoggus-gudimalad-abonogega an nonikid.]
MAT 18:12 ”Igi be binsamala. Dule-wargwen dulatar-na-sibad-wawaad-nikad (100) ei wargwen yoggusale, ¿ar dulabake-gakambe-gakabakebakad (99) sapurba-obes nadsulir be insae, ei-wargwen-yoggusad aminaega? Obesale, ei-wargwen-yoggusad aminaegar.
MAT 18:13 ”Napira an bemarga soged. Ar we-sibad-wawaad-wargwenad-aminonikile, sibad-wawaad-dulabake-gakambe-gakabakebak-yoggussulidba (99) bur weligwar itosaled.
MAT 18:14 Degisoggu, be-Bab-nibneggi-maid, sibad-wawaadyob we-bipigana-wargwensaar ei yoggubisur abemaid.”
MAT 18:15 Jesús sogdebalid: “Degisoggu, be-gwenad begi nosale, ese be nao. Unnila bebo-apinni-siidgi nue ega be sogo, nue be angi nosye. Ar be-gwenad nabir be-itosale, be-gwenad be-aiga gannar gunonikoed.
MAT 18:16 ”Ar be-gwenad be-itosulile, dule-wargwendibe, dule-warbodibe, beba be nidoed, adi, bela be-ibmar-sogoed, wemar bela be-itomarmogoed.
MAT 18:17 ”Ar be-gwenad wemar-wagab be-itosulile, geb bela Jesúsʼba-nanaimalad-abargi ega be ibmar sogoed. Ar be-gwenad amba amar-abargi be-itosulile, dule-Bab-Dummad-wissurmaladyob be we-gwenad-daksunnoed, degine, Roma-dummadga-mani-gaedgi-arbamaladyob be we-dule dakbaloed.
MAT 18:18 ”Napira an bega soged, ar bela be we-napneggi be-ibmar-sogsadba galenonikile, nibneggi bela galenonimogoed. Ar bela be we-napneggi be-ibmar-sogsadba igar-egasale, nibneggi bela deyob igar-egalemogoed.
MAT 18:19 ”Inniki an bemarga soged. Ar bemar-warbo we-napneggi Bab-Dummadse-ibmar-egisega, be emarbi-binsamalale, ar ibu be egisbimala, an-Bab-nibneggi-maid a-ibmar bemarga imakoed.
MAT 18:20 Ar bia bemar-warbo, warbaadibe, an-nuggi ambikunonimalale, an bato bemar-abargi gudiid.”
MAT 18:21 Geb degi, Pedro Jesúsʼse walikgunonikid, ega sogded: —Dummad, An-gwenad-angi-nosadga, ¿ilabigwa angi nossulidyob an dakoe? ¿Ilagugledsega (7)?
MAT 18:22 Jesús abin-sogded: —Unnila ilagugleye (7) an bega sogsulid. An bega soged, dulapaagwad-gakambe-ilaguglese (77) be-gwenad begi nossulidyob be dakoed.
MAT 18:23 Jesús sogdebalid: “A-ulale, Bab-Dummad-e-negdakmaiddi, ar rey-wargwen e-maimar-egi-mani-ganikid-ebo igar-nabirogega ese gocha-gusadyobdo.
MAT 18:24 Wargwen-egi-mani-ganikid ese nonigu, dakleardo, mani-sibu-mili-miliba (10,000) egi ganiki.
MAT 18:25 Ar we-dule mani-satesoggu, geg e-dummad-bennuked. A-ular, e-dummad ega sogdesunnad, ‘Be-ome, be-mimmimar, degi, bela be-ibmar-nikad be manigi ukna, adi, agi be an-bennukoed.’
MAT 18:26 ”Geb a-maide, yokorgi e-dummad-asabin sindigar sigis imaksad, egi wilenaigusad, ega sognaigualid: ‘Dummad, mer be doga-doga an-imakgwele. Bela an be-bennukoed.’
MAT 18:27 Ar rey, wile na e-mai-dakdegu, ega sogdesunnad: ‘Be angi bar mani ganisurdo.’ Degisoggu, e-mai-ollor-imaksad.
MAT 18:28 ”Geb rey-e-mai, e-dummad-walik-sii nodgu, dule-ebo-arbaed egi mani-sibu-dulatar-ganikid (100) abingualid. Geb rey-e-mai a-dule-gammuyaa ganonikid, ega sogded: ‘Angi be-mani-ganikid, be an-bennuk.’
MAT 18:29 ”Geb agi ebo-arbaed egi wilenaigusanad, ega sognaigusanad: ‘Mer doga-doga be an-imake. Bela an be-bennukoed.’
MAT 18:30 ”Ar rey-e-mai, we-dule-ebo-arbaed-gwen-itobi gussulid. Aka esgaryase dule-egi-mani-ganikid-metedapid, adi, bela-egi-mani-ganikid e-bennukegar.
MAT 18:31 Rey-e-maibo-arbamalad deyob daksamargu, bukib binsadmalad. Geb e-dummad-reyga emar-na-ibmar-daksamalad bela sogdapmalad.
MAT 18:32 ”Geb degi, e-dummad-rey, e-mai-egi-mani-gani-gusadse gochad, ega sogded: ‘¡Mai, be dule-isgana! Be angi wilenaigusgu, bela-be-angi-mani-ganikid an bela bega osulosad.
MAT 18:33 Ar igi an wile be-daksamoga, ¿ar be deyob bebo-arbaed geg be wile-dakmosi?’
MAT 18:34 Geb degi, e-dummad uludgu, we-mai-isgana dulemar-sabsur-odurdakmaloedga urmaksasunnad, adi, bela-egi-mani-ganikid e-bennukegar.”
MAT 18:35 Geb degi, Jesús sogded: “Ar bemar bela gwagegi na be-gwenad-begi-nosad be ega sogsurmalar, igi-barsaye, deyobi an-Bab-nibneggi-maid bemar-sabsur-imakmarmogoed.”
MAT 19:1 Emi Jesús deyob-ibmar-sogsad-sorba, Galileaʼgi bangudsunnad. Judea-yalaganba, degi, Jordán-diwar-obakar nade gusad.
MAT 19:2 Dulemar-bukidar Jesúsʼba nade gusmalad, agi Jesús dule-uellemalad onudaksad.
MAT 19:3 Geb agi gwenna-gwenna Fariseoʼmar Jesúsʼse nonimalad, yamo yardakega ese nonimalad. Ega sognonimalad: —¿Wede yogsaar sunna ome-meteleye igar mai?
MAT 19:4 Jesús abin-sogded: —¿Ar bemarde Bab-Dummad-Gardagi absodisurmarsi? Gebesailagi Bab-Dummad we-napneg-nasikargu, ‘machered ome-ebo abirgunagwar ogwisnonikid.’
MAT 19:5 Degi, Jesús sogdebalid: —Bab-Dummad-Gardagi sognaibalid: ‘A-ulale, machered ome-nikusale, e-babgi bangudoed, e-nangi bangudoed. Geb machered e-ome-ebo garmakdii guoed. Ebogwadi, san-wargwennagwadga gunonikoed.’
MAT 19:6 ”Ar degisoggu, bar warbosulid. Unnila san-wargwenna gunonimarsunnad. Ar degisoggu, dule, Bab-Dummad-dule-abirgunagwar-imaksadi, gwen na metemalaga imakosur.”
MAT 19:7 Fariseoʼmar, Jesús-abin sogdemalad: —Ar degite, ome-metega, ¿ibiga Moisés ome-meted-garda-imakoye igar-mesissunna?
MAT 19:8 Jesús abin-sogded: —Ar Moisés bemar-gwage-dutusulidba, ome-metega, sunna bemar ome-meted-garda imakye bemarga igar mesisgusad. Ar iduardi, deyob igar maisulinad.
MAT 19:9 Andi an bemarga soged, ar doa-dule, unnila e-ome e-dikarba-nosardi, nabir meted. Ar degisulirdi, we-machered ome-baid-nikusale, ome-dikarba negsichigi yolediid. Ar doa-dule, ome-melleded-nikusale, we-dule, negsichigi yoledimogad.
MAT 19:10 Jesús-sapingan Jesúsʼga sokarmarsunnad: —Ar weyob macheredga ome-nikuedsik ega igar maile, mer bur ome-nikued nabirsundo.
MAT 19:11 Geb degi, Jesús e-sapingan-abin sogded: —Suli, be noar sogmala. We-ibmar-soglenaid be aku itomalad. Unnila, Bab-Dummad, dulemarga-igar-uksadga, amarbi nabir ome-nikuosuli nanamaloed.
MAT 19:12 Ar gwen-gwen gusgu muu-neg-akale, geg-ome-nikued danikid. Ar gwen-gwen yamo siamar-baisur-dakega alu-gwasuar imaklesmalad. Ar gwen-gwenbali, na dukin Bab-Dummad-e-negdakmaid-ular, mer-ome-nikued imaksamalad. Ar dule na unni omesuli nanao-itogele, omesuli-nanaed-igar na abingado.
MAT 19:13 Geb degi, Jesúsʼse mimmigan-senonimalad, e-argan mimmigan-nonogi mesega, adi, Bab-Dummadse ega golegar. Jesús-sapingan dulemar-mimmigan-senonimaladse uluarmalad.
MAT 19:14 Jesúsʼdi e-sapinganga sogded: “Mer ese urwemar. Mimmigan anse daged be imakmar. Mer be igar gamala. Ar Bab-Dummad-e-negdakmaid we-mimmiganyob-damaladgadid.”
MAT 19:15 Geb Jesús mimmigan-e-nono-birgi e-argan mesisgu, Bab-Dummadse ega gochad. A-sorba, Jesús nade gusad.
MAT 19:16 Geb degi, dule-wargwen Jesúsʼse nonikid, ega sognonikid: —Odurdaked-saila-nued, burba-geg-bergued an nikuega, ¿ibi-nued an saergebe?
MAT 19:17 Jesús abin-sogded: —¿Ibiga dule-nuedye be anga soge? Ar dule-nued niksulid. Unnila Bab-Dummadbi wargwenna dule-nued gued. Ar burba-geg-bergued be nikubiele, Bab-Dummad-Igar-Mesisadba be nanaergebed.
MAT 19:18 Dule abin-sogded: —¿Igid-igarmala? Geb Jesús abin-sogded: —‘Melle be dule-oburgo. Melle be be-abirginsulid-ebo galagwensuli nanao. Melle be ibmar-atursao. Melle be gakansaar aimargi sunmako.
MAT 19:19 Be-bab-nug-odummodii, degi, be-nan-nug-odummodii be nanamalo. Degine, na be dukin san-sabeyobi, emar be sabgumogo.’
MAT 19:20 Sapingwa Jesús-abin sogded: —Gusgu an sapingwagwad-akar bela we-Igarmar-Mamaidba an nanadiid. Emidi, ¿ibubi napi-imaked an abesunna?
MAT 19:21 Jesús abin-sogded: —Ar igar-napiragwadbi-imakdii be nanabiele, be-negse be nae. Bela be-ibmar-nikadi, manigi be uko. Geb a-mani, dule-wileganaga be mimio. Degiir, geb be nibneggi ibmar-nued nikuoed. Geb a-sorba, anba be dago, an-sapinga guegar.
MAT 19:22 Sapingwa, deyob Jesús ega soge itosgu, naibi-ito naded, ar ade, dule-mani-ibedid.
MAT 19:23 Geb degi, Jesús e-sapinganga sogdesunnad: —Napira an bemarga soged, ibiyobi dule-mani-ibganga Bab-Dummad-e-negdakmaidse-doged igar dutusuli, ar ade, dogdar maniginbi binsamalad.
MAT 19:24 Gannar an bemarga soged, moli-yargan-mureged bur-baisursunna iko-ibyagi doged, ar dule-mani-ibeddi bur beedse Bab-Dummad-e-negdakmaidse doged.
MAT 19:25 Jesús-e-sapingan, Jesús-wegi-soge-itosgu, nue-geger-ito nadmalad. Agala, sogdemarsunnad: —¿Ar doa degite, sunna abonolegosunna?
MAT 19:26 Jesús e-sapingan-dakdegu, ega sogded: —Ar dulemargardi, geg ibmar gued. Bab-Dummadgardi, bela ibmar nabir guedbiid.
MAT 19:27 Geb degi, Pedro abin-imakdegu, sogded: —Anmardi beba-naega belagwapa ibmar obesad. Degite, anmardi, ¿ibu nikumarmogosunna?
MAT 19:28 Jesús abin-sogded: —Napira an bemarga soged, Bab-Dummad we-ibmar-bela-ogwaoed-ibagangi, ani Dule-Machi, an-ologan-yeerdaklegedgi an sigidapir, bemar-anba-nagusmalad ologan gwaambe-gakabogwadgi (12) sigmarmogoed, adi, Israel-dorgan-sogambe-gakabogwadga igar-nabosii be gumalagar.
MAT 19:29 ”Ar doa-dule anba-naid-ular ibmar-metele, e-negmar-metele, e-gwenadgan-metele, e-bunmar-metele, e-bab, e-nan, e-ome, e-mimmigan, degine, e-nainumar-metele, we-dule ibmar-dulataledba (100) bur bule abingaoed, degine, burba-geg-berguedi nikubaloed.
MAT 19:30 ”Ar bukidar emar-idudimaladi, emar-sorbalidga gumaloed. Bukidar emar-sorbarmaladdi, emar-idumaladga gumaloed.”
MAT 20:1 Jesús sogdebalid: “Ar Bab-Dummad-e-negdakmaid weyobdo: Dule-wargwen neg-neguya-sediid, wakudar neggi nodgua, e-nainugi-ega-arbamalaga dule-ega-arbamalad aminaded.
MAT 20:2 Dule-nainu-ibed arbamalad-ebo igar nabosad. Arbamaladga sogsad, ibagwena denario-gwagwen an be-bennukoye. Geb agi ega arbaega e-nainuse barmissunnad.
MAT 20:3 ”Dad-abar-dummad-gusgu, gannar nainu-ibed, nodbalid. Geb dakdapid, ibmar-ukleged-naba dulemar arbaedsuli binsa bukwa dakdapid.
MAT 20:4 Agi nainu-ibed amarga sogded: ‘Ar bemar an-nainuse arbanamarmodo, ar sogedba an be-bennukmaloed.’ Amala, arbaegala, nade gusmalad.
MAT 20:5 ”Yorukugusgua, nainu-ibed dulemar-amiega gannar nodbalid. Dulemar-amisgu, ega arbamalaga e-nainuse barmisbalid. Wachi-ilapaagi, amba deyob imaksabalid, degine amarga baiganga-sogsayob sogsabalid.
MAT 20:6 Wachi-ilatargi, nainu-ibed gannar nodbalid. Dulemar binsa bukwa dakdapbalid. Amarga sogded: ‘¿Ar ibiga bemar arbasuli emi be osedosmala?’
MAT 20:7 ”Abin-imakdemalad: ‘Ar dule anmarga arbaed uksurmalad.’ Nainu-ibed amarga sogded: ‘Bemar an-nainuse arbanamarmoga, ar sogedba an bemar-bennukmaloed.’
MAT 20:8 ”Neg-mutikgudgu, nainu-ibed ega-neg-dakedga sogded: ‘Arbamaladse be gole, ibagwen-arbasad-wilub be bennuk. Napisolaba-modapmalad-inse be bennuko. Geb degi, wakudarad-akar-arbananaid napisolaba be bennuko.’
MAT 20:9 ”Napisolaba-arbasmalad nonimargu, denario-gwagwen bennuklesmalad.
MAT 20:10 Wakudar-yalaba-arbadmalad nonimarmogu, binsasmalad, emardi bur melu bennuklegoergebye. Ar amar bennuklearmargu, amba denario-gwagwen bennuklesmarmogad.
MAT 20:11 ”Wakudar-yalaba-arbasmalad bennuklesmargu, nainu-ibedgi uluarmalad,
MAT 20:12 sogdemalad: ‘Wemar-sorba-nonimalad, unnila wachi-irgwen wis arbasmalad. Anmardi bur dummad-arbasad, dadba dummad-galitosad, degite, anmar-sunnaa bennuklesmarmogad.’
MAT 20:13 ”Nainu-ibed, amar-wargwen-abinsadgu, sogded: ‘An-ai, an gwen begi dodossulid. ¿Ar bemarbo igar an nabossursi, denario-gwagwen an be-bennukoye?
MAT 20:14 Degisoggu, be-mani be sue, ar begadid. Be nae. Ar wemar-napisolaba-nonimalad bemar-sunnaa an bennukbiele, an-itolegeddo.
MAT 20:15 An-itolegedba an-mani an imakbier, ar wede akarsi. An dule-nued-daedba, ¿ar be angi nobsi?’
MAT 20:16 ”Ar bukidar emar-idudimaladi, emar-sorbalidga gumaloed. Bukidar emar-sorbarmaladdi, emar-idumaladga gumaloed. [Ar ade, bukidar dulemarse gorleged, degite, unnila wis ichee dulemar sulegoed.]”
MAT 20:17 Jerusalénʼse nadapmargu, Jesús na e-sapingan-ambe-gakabogwadse (12) bachikii gochad. Amarga sogded:
MAT 20:18 “Emi anmar Jerusalénʼse nadapid. Ani Dule-Machi, dule-irwa-Bab-Dummadse-gormalad-e-dummaganga, degi, Garda-Narmaked-Dulemarga an uklegoed. Amar anga igar-itosmalar, sogmaloed, oburgwemarye.
MAT 20:19 Wemar-Judío-dummagan, Judíoʼsurmaladga an-ukmaloed, adi, angi dodomalagar, an-bibyomalagar, degi, nakrusgi an-biokmalagar. Ar degi-inigwele, ibapaagi gannar an durguoed.”
MAT 20:20 Geb degi, Zebedeo-machimala-e-nan, Jesúsʼse e-machimalamala nonikid. Yokorgi sindigar abin signonigu, Jesúsʼse ibmar egisnonikid.
MAT 20:21 Jesús ega sogded: —¿Ibu be abege? Ome, abin-sogded: —Be negdakmai-gusale, we an-masmala-warbogwad dummaganga be nugsao. Gwensak be-argan-nuedsik-siged be imako. Baid be-argan-sapiledsik-siged be imakbalo.
MAT 20:22 Jesús sogded: —Ibmar be egisnanaid, be wissurmalad ibu be egisnanai. ¿Ar sunna be, an-nue-dummad-wilegoedyobi, be wilemarmogosi? Degine, ¿ar sunna be, an-dii-oglesadgi be oglemarmogosi? Jesús-abin sogdemalad: —Anmar sunna imakmala.
MAT 20:23 Jesús abin-sogded: —Be nabir sogmalad, ar be deyob gumarmogoed. Degi-inigwele, ar dummaganga-nug-imakeddi, adi, angi sisulid. Unnila an-Babgi siid. Bato an-Bab we-ganmargi-sigmaloed nug-imaksad.
MAT 20:24 Jesús-e-sapingan-e-ambedi (10) wemar-warbogwad-dummaganga-gubimalad itosmalad. Degisoggu, wemar gwenad-warbogwadgi uludmarsunnad.
MAT 20:25 Geb degi, Jesús e-sapinganse goted. Ega sogded: “Be nue wismalad, we-napneggi dulemar-dummaganga-gudimaladi e-sordamarba bur dule-dummad na san-imakdamalad. Degine, bela ega ibmar imakbi abedamalad. Deginbali, e-dulamala geg yogasaar ibmar imakdamalad, ar e-dummagan sabsur-gandikidba ega negsemaidaed.
MAT 20:26 ”Bemardi mer deyob gumalo. Ar be dummadga-gubiele, maiyob be daergebed. Bela be dulemar-bendakergebed.
MAT 20:27 Ar be dulemar-iduedga-gubiele, bela be dulemar-maiga be guergebed.
MAT 20:28 ”Ar ani Dule-Machi, we-napnegse an nonikidi, mai-nikuega an nonisulid. Maiyob dulemar-bendakega an nonikid, degi, an na-san-burba-ukega an nonikid, degine, dule-isgudimalad-anar-burgwega an nonikid.”
MAT 20:29 Jesús e-sapinganmala Jericó-neggweburgi-noarmargu, dulemar-bukidar eba armalad.
MAT 20:30 Deun, ibyasurmalad-warbo, igar-dikarba-simalad. Amar, Jesús-nadapye-itosmargu, binnasur Jesúsʼse gotemalad, sogdemalad: —¡Dummad, Rey-David-wagwa! ¡Anmar-bendake, wile be anmar-dake!
MAT 20:31 Boo sigmalaga, dulemar ese uluarmalad. Aka bur bule dule-ibyasurmalad binnasur Jesúsʼse gotemalad, sogdemalad: —¡Dummad, Rey-David-wagwa! ¡Wile be anmar-dake!
MAT 20:32 Jesús, ibyasurmalad-itosgu, gwisgusad. Amarse goted. Ega sogded: —¿Ibu bemarga imakbi be an-abemarsunna?
MAT 20:33 Dule-ibyasurmalad sogdemalad: —Dummad, mag-atake be anmar-imake.
MAT 20:34 Geb Jesús amar-wile-dakdegusad. Wiledakedba, amar-ibya-ebus imaksad. Agi ega ibya yog-nuguar nadmalad. Wemar-warbo-ibya-nugusad Jesúsʼba nadegusmalad.
MAT 21:1 Jesús e-sapinganmala Jerusalén-modanimargu, Olivos-yar-dikarba, Betfagé-neggwebur-walikgusgu, e-sapingan-warbo barmisad.
MAT 21:2 Barmisgu, ega weyob sogsad: —Neggwebur-bipi-anmar-asabin-siidse be namar. Agi be moli-uayasuid-atinnar-nai, degi, e-mimmi-e-dikarba-gudii be dakdapmaloed. A-molimar be esikmalo, geb be anse sedamalo.
MAT 21:3 Ar dule-wargwen bemarga akar sokardibe, ega be sogmalo: ‘Ar Dummad sogye, ede bina-sogye. Ebusad-sorba bega gannar yog-sear imakoye.’
MAT 21:4 Ar we deyob bela we-ibmar-gusadi, igi Bab-Dummad-gayaburba-barsoged sogsagusa, deyob-guegala gunonikid, deun sogsagusgu:
MAT 21:5 “Siónʼgi-bukmaladga be soge: ‘Be dake, be-Rey bese danikid. Gwage-eikwaa, moli-uayasuid-bipigwad-birgi-sii danikid. We-moli-bipigwad, moli-uayasuid-ibmar-berbeged-e-mimmid.’ ”
MAT 21:6 Jesús-sapingan-warbogwad nadmarsunnad. Jesús ega igi sogsa, deyob, imakdapmalad.
MAT 21:7 Jesús-sapingan moli-uayasuid, degi, e-mimmi, Jesúsʼse senonimalad. Geb degi, a-moli-birgi e-mormar ogichamargu, a-birgi Jesús sigisad. Jesús moli-birgi-sigisgu, Jerusalénʼse nadsunnad.
MAT 21:8 Dulemar-bukidara, Jesús-iduar igargi e-mormar-ogitemalad. Abala ogob-gagangiid gwane-gwane imakdemalad, geb Jesús-iduar igargi mese-mese imaksamalad.
MAT 21:9 Ar dulemar-bukidar-idu-nadapmaladi, degi, sorba-danimaladi, binnasur gornadapmalad, sognadapmalad: “¡Bab-Dummad-nug odummomar! ¡We, David-Wagwa! ¡We, Bab-Dummad-nuggi-danikid, bela ega ibnuedga gusun! ¡Nibneggi e-nug odummomarbar!”
MAT 21:10 Jesús Jerusalénʼse-dogdapgu, bela Jerusalénʼginmalad oimakdemalad, sogdemalad: —¿Wede doasunna?
MAT 21:11 Dulemar-bukidarad-Jesúsʼba-danimalad sogdemalad: —We-dule, Jesús Bab-Dummad-gayaburba-barsoged, Nazaret-neggweburginedid, Galilea-yarginedid.
MAT 21:12 Jesús Bab-Dummadse-goled-negse-dogdapgu, bela dulemar-ibmar-baknanaid, degi, ibmar-ukbukmalad sabsur-onisad. Degi, dulemar-mani-ogwabukmalad-e-mese binnasur-barbikiin meted, degi, dulemar nuu-ukbukmalad-e-gan barbikiin metebalid.
MAT 21:13 Jesús amarga sogded: —Bab-Dummad-Gardagi narmakar naid: Bab-Dummad soged: ‘An-nega, anse-goled-negye nugguoed.’ Isaías 56:7 ”Ar emigindi bemardi atursamalad-negga imaksamalad.”
MAT 21:14 Bab-Dummadse-goled-neggi, dulemar-ibyasurmalad, degi, dulemar-nue-geg-nanamalad Jesúsʼse-nonimargu, Jesús amar bela-nudaksad.
MAT 21:15 Deginbali, burwigana-bukidar Bab-Dummadse-goled-neggi oimakbukwad, sogbukwad: “¡We David-Wagwa, e-nug odummomar!” Geb dule-irwa-Bab-Dummadse-gormalad-e-dummagan, degi, Garda-Narmaked-Dulemar Jesús-ibmar-dakledisulid-imaknai-dakedba, degine, burwigana-oimakbukwa-itosmaladba, sae-itodmalad, Jesúsʼgi uludmalad.
MAT 21:16 Amar Jesúsʼga sogdemalad: —¿Burwigana ibmar sogbukmalad be itoge? Jesús, abin-sogded: —Eye, an itoge. ”¿Ar bemar Bab-Dummad-Gardagi absodisurmarsi? ‘Burwigangi, degi, amba mimmigan-nunanaidgi, amar-sunmakedgi be-nug-odummoged be imaksad.’ ”
MAT 21:17 Agi, Jesús, Judío-dummagan-mete naded, Betania-e-neggweburse nadegusad. Geb agi megidapid.
MAT 21:18 Oibosgu, Jesús wakdar Jerusalén-neggweburse-gannar-danigu, ukur itoalid.
MAT 21:19 Igar-dikarba higuera-sapi-gwichi-dakargu, ese nadegusad. Ese modapgu, san sate dakalid, unnila e-gaganbi-nika dakalid. Jesús a-sapiga sogdesunnad: —Bipisaale bar gwen be durbamakosur. Agi higuera-sapi yog-dinguar naded.
MAT 21:20 Jesús-e-sapingan higuera-sapi dingud-gusad-daksagu, geger dakdemalad, sogdemalad: —¿Ar wede ibiga gwae-gwae higuera-sapi dingude?
MAT 21:21 Jesús abin-sogded: —Napira an bemarga soged. Ar bemar ibmar-imaknaid nue-bensulile, we-sapi-higuera-an-imaksayobi, be abi imaksasurmalaled. Ar sunna we-yarga be sogsamalaled: ‘Wegi be siid be ainir, demarse be nae,’ ar bemar-sogedba gusaled.
MAT 21:22 Ar bela be nue-bensuli Bab-Dummadse-goledgi be egisele, be-ibmar-egised be abingaodo.
MAT 21:23 Jesús Bab-Dummadse-goled-negse-nonikid. Agi emar-odurdaksigu, dule-irwa-Bab-Dummadse-gormalad-e-dummagan, degi, Judío-girmar-dummagan ese nonimalad. Ega sogdemalad: —¿Doa-nuggine wede be we-ibmar imakdii? ¿Ar doa bega igar uksasunna?
MAT 21:24 Jesús abin-sogded: —An bemarse ibmar-soggwen egismogodo. Bemar an-abin-imaksale, geb an bemarga sogmogoed, an we-ibmar-imakega, wede doa anga igar-uksa.
MAT 21:25 An bese egismosun, Diigi-dule-oged-Juan, Bab-Dummad-diigi-ogleged-imaksad, we, ¿bia daniki? ¿Bab-Dummad barmiali? ¿Dulemar barmiali? Anga be sogmalana. Degi-itosmargu, Judío-dummagan muchub-muchub na sogdemalad: “Anmar sogmalale, Bab-Dummad Diigi-dule-oged-Juan-barmiarye, anmarga sogdagoed, ‘degite, ¿ibiga bemar Diigi-dule-oged-Juan-bengusmarsunna?’
MAT 21:26 Anmar sogbalile, dulemar Diigi-dule-oged-Juan-barmiarye, anmarse neggwebur urwedagoed. Ar ade, bela sogmalad, ‘Diigi-dule-oged-Juan, Bab-Dummad-gayaburba-barsoged-sunnadye.’ ”
MAT 21:27 Degisoggu, Judío-dummagan, Jesús-abin sogdemarsunnad: —Anmar wissurmalad, doa Diigi-dule-oged-Juan barmiali. Degi, Jesús, abin-imakdemosunnad: —An bemarga sogosurmarmodo, wede doa-nuggi we-ibmar an imakdii.
MAT 21:28 Jesús Judío-dummaganga sogded: “We-ibmar an bemarga-sogoedi be igi-binsamalodibe. Dule-wargwen machimala warbo nikad. A-dulede e-machi-wargwenga sogded: ‘Machi, an-nainuse be arbana, uva eminae.’
MAT 21:29 Machi, e-bab-abin-imakded, sogded: ‘Yapa an nae.’ Geb a-sorba, bukib-itoargu, nadegusad, arbanad gusad.
MAT 21:30 Bab e-machi-baidse nadbalid, ega amba deyob sogdapbalid: ‘An-nainuse be uva eminae.’ E-machi-baid e-bab-abin sogded: ‘Baba, eye, an arbanao.’ Ar degite, we-machidi arbanadsurgusad.”
MAT 21:31 Jesús Judío-dummaganse egisdesunnad: —We-masmala-warbogwad, ¿doa bur e-bab-sogedba ibmar imaksa be insae? Abin-sogdemalad: —Machigwa arbaapid. Jesús emarga sogded: —Deyobdo. Ar napira an bemarga soged, dulemar-Roma-dummadga-mani-gaedgi-arbamalad, degi, omegan-gambasamalad, amar bur bemarba Bab-Dummad-e-negdakmaidse dogoed.
MAT 21:32 Ar bemarse Juan igar-napiragwadgi sunmaknonimar-inigwele, bemar eba ib-imaksasurmalad. Ar Roma-dummadga-mani-gaedgi-arbamaladdi, degi, omegan-gambasamaladdi, e-sogsad bengussurmalad. Ar bemar a-ibmar daksamarmo-inigwele, bemar we-igar abingamogaga, degite, gwagegala, be-isguedga gwen bukib be itossurmalad.
MAT 21:33 Jesús Judío-dummaganga sogdebalid: “Igar-burbar-baid-maid be itomarbalo: Ibagwengi dule-wargwen-nainu-ibedi, e-nainugi na uva-digsad. Geb bela egi galu ebiris-imaksad. A-abargi uva-egured sobsabalid. Geb degi, bela nainugi nakulegegala, aila-matusulid sobsabalid. Dule-nainu-ibed dulemar-arbamaladga e-nainu-urmaksad, adi, a-dulemar nainugi uva-wealir, e-ibedga wis ukmogagar. Deyob ebo igar mesisad. Geb nainu-ibeddi neggwebur-baidse dikasur nadsunnad.
MAT 21:34 ”Uva-weed-ibagan-mosgu, nainu-ibed uva-na-egadid-suega, e-nainugi-arbamaladse e-maigan-barmisad.
MAT 21:35 ”Ar nainugi-arbamaladdi, nainu-ibed-e-maigan-ese-nonimargu, gasmalad. Geb gwensak sarsosmalad, baiddi oburgwismalad. Mai-baiddi akwagi maksamalad.
MAT 21:36 A-sorba, nainu-ibed e-maigan-baigan bur melu barmidbarsunnad. Degine, amba deyob sabsur-imaksamarbalid.
MAT 21:37 ”Napidgi, nainu-ibed e-machi-barmiarsunnad, ar ade, binsaded: ‘An-machisoggu, gwen oakalogosurmar an insaye.’
MAT 21:38 ”Ar nainugi-arbamalad, nainu-ibed-machi dani dakarmargu, na ega sogdemalad: ‘We-dule-danikidi e-bab-burgwisar, nainu bela egadbi guoed. Degisoggu, anmar ei nainu suega, anmar we-machi oburgwemarsun.’
MAT 21:39 Machigwa-gasmargu, nainu-magaba metemalad, geb agi oburgwismalad.”
MAT 21:40 Jesús Judío-dummaganse egisded: —Ar nainu-ibed e-nainuse nonikir, ¿igi nainugi-arbamalad-imaknoniko be insae?
MAT 21:41 Jesús-abin sogdemalad: —Ar nainu-ibed-nonikogu, bela sabsuli nainugi-arbamalad-isganamar-oburgwenonikoed. Na e-nainu, baigan-arbamaladga urmaknonikoed, adi, amar iba-sekalaa ega e-uva ukmalagar.
MAT 21:42 Jesús Judío-dummaganga sogded: —¿Ar bemarde Bab-Dummad-Gardagi absodisurmarsi? Bab-Dummad-Garda soged: ‘Akwa dule-neg-sobmaladse-oballesadi, neg-sobleged-e-akwasailaga gunonikid. Bab-Jehová deyob we-ibmar imaknonikid, anmarga geger-dakle gunonikid.’
MAT 21:43 ”Degisoggu, an bemarga sogmar, Bab-Dummad-e-negdakmaid-bemargadid, be-annik sulemaloed. Dulemar-baigan-nabir-ibmar-nuegan-imakmaloedga uklegoed.
MAT 21:44 [Ar dule-wargwen we-akwa-nuedgi argwachale, we-dule bibisgoed. Ar we-akwa dulegi-argwachardi, we-dule ese ubigwar guoed.”]
MAT 21:45 Jesús we-igar-burbar-sunmaklemaladgi-sunmaksadi, dule-irwa-Bab-Dummadse-gormalad-e-dummagan, degi, Fariseoʼmar, magar itosmalad, Jesúsʼde emargi sunmake.
MAT 21:46 Amar, Jesús-gabi guarmalanad, degi-inigwele, oakalossurgusmalad, ar ade, neggwebur-dobgusmalad. Ar dulemarde we-Jesús Bab-Dummad-gayaburba-barsogedye-nik sogmalad.
MAT 22:1 Jesús, gannar igar-burbar-maidgi sunmakdebargu, Judío-dummaganga sogdebalid:
MAT 22:2 “Bab-Dummad-e-negdakmaid weyob gubalid: Rey-gwensak e-machi-ome-nikunaidgi iba-dummad onoalid.
MAT 22:3 Rey dulemar-ibase-nonimaloedse-gornaega e-maigan-barmisad, adi, e-machi ome-nikusokalid-e-ibase dagmalagar. Ar a-dulemarse-gollesmalad ibase budar dage gusmalad. Gwen nonisurgusmalad.
MAT 22:4 ”Geb agi rey e-maigan-baigan-barmisbalid, ega sogsad: ‘Dulemar-ibase-danimaloedga sogo: Emi wegine, guagwar bemarga an mas imaksamar, molisan, degine, sibad-wawaad-gwallu-ibegan an bemarga oburgwismar. Bato bemarga guagwar bukwad, degisoggu mer ikumalo, ibase dagmalo.’
MAT 22:5 ”Ar ese-gollesmalad bai gwen itossurmar, aka ibmar-baid imaknadmalad. Gwensak e-nainuse arbanaded, baiddi ibmar-uked-negse ibmar-uknaded.
MAT 22:6 Bamaladdi, rey-e-maigan-sarsodmalad, geb oburgwismalad.
MAT 22:7 ”Rey wisguargu, ibase-dagega-ese-gollesmalad deyob e-maigan-imaksamarye, nue-sae itoded. Geb e-sordamar-barmisad, bela e-maigan-oburgwismalad ogilosad. Deginbali, rey, bela ese-gollesmalanad-e-neggwebur ogumaksasunnad.
MAT 22:8 ”Geb degi, rey e-maiganga sogded: ‘Ar an-machi-ome-nikued-ibagi masgunned bato guagwar siid. We-dulemar ibase-dagega-ese-gollesmaladdi, ibase-daged bar ega igar maisulid.
MAT 22:9 Degisoggu, igarganba be namarsun, ar agi be dulemar-dakalir, masgunned-ibase-dagmalaga, ese be gormalo.’
MAT 22:10 Rey-maigan igarganba nadmargu, dulemar-abingusmaladse bela gochamalad. Dule-nueganse, degi, dule-isganamarse-bakar, ese gochad. Degisoggu, ome-nikued-ibagi bela neg engussunnad.
MAT 22:11 ”Rey masgunned-ibase-dognonigu, dule-nonimalad-daknonikid. Agi dakalid, dule-wargwen ome-nikued-ibagi-mor-yoleged yoisuli.
MAT 22:12 Rey a-dulega sogded: ‘An-ai, ¿igi be ome-nikued-ibagi-mor-yoleged-yoisuli be dogsa?’ Dule gwen abin-imaksasulid.
MAT 22:13 ”Geb degi, rey e-maiganga sogdesunnad: ‘We-dule-ibe e-argan be edinmar, e-mali be edinmarbar. Magaba negsichidgi be metemar, agi dummad-wilesiidba bosii guoed, nugar-gorsii guoed.’
MAT 22:14 ”Ar Bab-Dummad bukidar dulemarse gochad, degi-inigwele, unnila ichee wis sulesmalad.”
MAT 22:15 Jesús sunmaked-bergusgu, Fariseoʼmar nadmalad. Geb igar amiarmalad, igi-saele e-sunmakedgi Jesús-gaodibeye.
MAT 22:16 Degisoggu, Fariseoʼmar, e-sapingan Herodes-sordamarmala, Jesúsʼse barmisad. Jesúsʼse nonimargu, ega sogdemalad: —Odurdaked-saila, anmar be-wisdo, be dule-ibmar-napiragwad-soged-duled, igar-napiragwadba Bab-Dummad-igar be odurdaked, degine, baisur be itoged igi dulemar begi binsae, ar ade, bedi emarbi be dulemar-daked.
MAT 22:17 Degisoggu, anmarga be sogena, emide, Roma-Dummad-Césarʼye-nugad anmargi-mani-gaed-bennuked, ¿we igar-nuedi? ¿Anmar bennukoe? ¿Anmar bennukosuli? ¿Igi be sogmosunna?
MAT 22:18 Ar Jesúsʼdi wemar-egi-isdar-binsananaid mag daksoggu, amarga sogded: —¡Bemar wagar-darbodamaladid! ¿Ar ibiga bemar yamo an-wilubdakdanimala?
MAT 22:19 Roma-dummadga-mani-ukleged anga be oyogena. Geb Jesúsʼga mani-gwagwen oyoarmalad.
MAT 22:20 Geb degi, Jesús amarga sogded: —¿Ar wede we-manigi doa-wagar-wilub sisunna, degine, doa-nug narmakar naibarsunna?
MAT 22:21 Jesús-abin sogdemalad: —Roma-Dummad-César-wagar-wilub, degi, a-nug narmakarbalid. Geb degi, Jesús sogded: —Ar ibmar Césarʼgadir, Césarʼga be ukdo. Ar ibmar Bab-Dummadgadirdi, Bab-Dummadga be ukdo.
MAT 22:22 Dulemar-Jesúsʼse-ibmar-egisnonimalad weyob Jesús-ega-soge-itosmargu, geger abin itodmalad. Geb degi, emardi Jesúsʼgi bangudmarsunnad.
MAT 22:23 Amba a-ibagi, Saduceoʼmar Jesúsʼse nonimalad. Wemar sogmalad, dule burgwisale, gannar geg bar durguye. Agala, Saduceoʼmar Jesúsʼse we-igar egichiarmalad,
MAT 22:24 ega sogdemalad: —Odurdaked-saila, Moisés sogsagusad: ‘Ia mimmi-nikussuli ome-idu burgwisale, e-urba a-ome-nikuoye, adi, e-iaga anagan-urbegar.’
MAT 22:25 ”Anmar-abargi machimala e-gwenadgan-walagugle-na-gumaladi (7) weyob gusdo: Ia-dummad ome-nikusgu, anagan-urbissuli burgwisad. A-sorbalid, a-ome-nikunonimogu,
MAT 22:26 amba e-iayob mimmi-nikussuli burgwismogad. Geb degi, a-sorbalid, e-urba-baid amba a-ome-nikunonimogad. Deyob bela e-walagugled (7) a-ome nikusmaladbiid. Anagan-gwen-obessuli bela burgwismalad.
MAT 22:27 Geb a-sorba, ome burgwismosunnad.
MAT 22:28 ”Ar dule-gannar-durguoed-iba-nonikile, a-omede, ¿doa-omega gunonikosunna, ar bela na e-gugle (7) nikusmaladbiid?”
MAT 22:29 Geb Jesús, Saduceoʼmar-abin sogded: —Bab-Dummad-Garda-narmakar-maid-wissulidba, degi, Bab-Dummad-gangued-wissulidba, be noar sogmalad.
MAT 22:30 Ar ade, dulemar gannar-durgued-ibagi ome-bar-nikuosurmalad, degine, gannar ome sui-nikunai bar guosurmogad, ar ade, dulemar Bab-Dummad-baliwiturmar-nibnegginmaladyob gumaloed.
MAT 22:31 Jesús Saduceoʼmarga sogdebalid: —Ar dule-burgwismalad-gannar-durgued-igardina, be ¿Bab-Dummad-gayaburba-maidde be absodisurmarsi? Ar Bab-Dummad Moisésʼga sogsa gusad:
MAT 22:32 ‘Ani an Abraham, Isaac, degi, Jacob, amar-e-Bab-Dummadid.’ Éxodo 3:6 ”A-ular, Bab-Dummad, dulemar-burgwarmalad-e-Bab-Dummadsulid. Bab-Dummad, dulemar-dula-gudidimalad-e-Bab-Dummadid. Degisoggu, bemar nue-noar sogmalad.”
MAT 22:33 Ar dulemar weyob Jesús-dulemar-odurdaked-itosmargu, geger-dakmalad.
MAT 22:34 Degi, Fariseoʼmar wisguarmargu, Jesús nue-Saduceoʼmar-abin-imaksaye, agi Fariseoʼmar igar-itoarmalad.
MAT 22:35 Geb Fariseo-wargwen Moisés-Igar-nue-wisidi, Jesús-yamo-wilubdakega, ese egisnonikid:
MAT 22:36 —Odurdaked-saila, Bab-Dummad-Igar-Maidgi, ¿igid bur igar-biriginedi?
MAT 22:37 Jesús, abin-sogded: —‘Bab-Dummad-be-Dummad, bela-belad be-gwagegi be sabguoed, bela-belad be-san-burbagi, degi, bela-belad be-binsaedgi be sabguoed.’
MAT 22:38 ”Gebegi, Bab-Dummad-sabguleged, bur igar-biriginedid, degi, bur igar-dummarbadbalid.
MAT 22:39 Sogbogwadgi, amba deyobsaarbalid: ‘Ar na be-san na be sabguedyobi, dule-baid be sabgumogoed.’
MAT 22:40 ”Ar we-igar-warbogwadgi, bela igar-baigan-mamaidi, degi, Bab-Dummad-gayaburba-barsogmalad-sunmaksamaladi, ase bergusiid.”
MAT 22:41 Jesús, Fariseoʼmar-danar-bukwadse egichialid,
MAT 22:42 ega sogded: —¿Cristoʼgi bemar igi binsamarsunna? ¿Wede Cristo, doa-wagwasunna? Abin-sogdemalad: —Rey-David-wagwa.
MAT 22:43 Jesús amarga sogdebalid: —Ar degite, ibiga David Bab-Dummad-Burbaba Cristoʼga sogsunna, ‘An-Dummadye,’ deun soggu:
MAT 22:44 ‘Bab-Dummad an-Dummadga sogsad: An-argan-nuedsik be sige, be-isdarmalad an bela ogalakuedse be sige.’
MAT 22:45 ”Ar David Cristoʼga-sogedde, ‘Be an-Dummadye,’ degite, ¿igi Cristo e-wagwaga gubarsunnoe?”
MAT 22:46 Ar dule-wargwensaar gwen Jesús-abin-imaksasurmalad. A-iba-akale, dulemala, bipisaale Jesúsʼse ibmar gwen bar egisbi itossurmalad.
MAT 23:1 Geb degi, Jesús dulemar-bukidaradga, degi, e-sapinganga sunmakded. Ega sogded:
MAT 23:2 “Ar Fariseoʼmar, degi, Garda-Narmaked-Dulemar, Moisés-Igar-Mamaid bur nue-wismaladid, bur nabir odulomaladid.
MAT 23:3 Degisoggu, bemar bela bemarga, Fariseoʼmar Moisés-Igar-Maidgi bega-sunmakmaladba be damar, eba be imakmar. Ar Fariseoʼmar-damaladbardi, mer be damalo, ar ade, unni nabir sunmakmalad, imakeddi eba geg imakmalad.
MAT 23:4 Ar we-Fariseoʼmar dulemarga beedse dutusur igar mesmalad. Ar degite, emardi igar-mesisadba bipisaagwale gwen imakbisurmalad.
MAT 23:5 ”Ar Fariseoʼmardi bela ibmar-imakmaladi, yamo dulemar-e-dakmalaga imakmalad. Degine, amardi bebegi, degi, sakwagi, Bab-Dummad-Garda-saboged-sagu nasikdamalad. E-mor-dummad-duku-durbamakarmalad ise-sobar imakmaladid, adi, dulemar egi binsamalagar, nue Babba ibsadimarye.
MAT 23:6 ”We-Fariseoʼmar ibagi-mas-gullealir, dummagan-gan-sigedginbi sigbidamalad, degine, Judíoʼmar-onmakedneggi dummagan-gan-sigedginbi sigbidamarbalid.
MAT 23:7 We-Fariseoʼmar ibmar-ukleged-neggi dulemar bela ese goledbimalar yeer itodamalad. Degine, ‘odurdaked-sailaye,’ dulemar-ese-goled yeer itodamarbalid.
MAT 23:8 ”Ar bemardi odurdaked-sailaye mer bese-gormalad na be imakmalo. Ar bemargardi, unnila Cristoʼbi bemar-odurdaked-saila wargwenna maid. Ar bela bemar na gwenadgan gumalad.
MAT 23:9 We-napneggi, an-babye mer dulemarse be golo. Ar unnila wargwenna be bab nikamalad, ar a-Bab nibneggi maid.
MAT 23:10 Mer odurdaked-duleye na be bimalo. Ar bemargardi, unnila Cristoʼbi bemar-odurdaked-dule wargwenna maid.
MAT 23:11 ”Ar bemar-abargi bur-dummad-gudiidi, a-bela bemar-maiga guoed.
MAT 23:12 Ar dule-wargwen na nug-dummarba-imakele, a-dule-nug bur bipii guoed. Ar dule na nug-bipi-imakerdi, a-dule-nug bur odummolegoed.
MAT 23:13 ”Bemar, Garda-Narmaked-Dulemar, Fariseoʼmar, ¡be duledar-wilesmar! ¡Wagar-darbomalad! ”Ar bemar, Bab-Dummad-e-negdakmaidse dulemar-dogbigudimalad-idu be yawagak edidimalad. Ar bemarbela ase dogsurmalad. Ar bemar, dulemar-ase-dogbigudimalad-gwen-dogega be imaksurmalad.
MAT 23:14 ”Bemar Garda-Narmaked-Dulemar, Fariseoʼmar, ¡be duledar-wilesmar! ¡Wagar-darbomalad! ”Ar bemar yamo yardakar ammormar-ei-sui-burgwismalad-ibe neg atursadamalad. Degine, dulemar yeer bemar-dakegala, bemar yamo suitii Bab-Dummadse gorgwisdamalad. A-ular, bemar, deyob damaladba bur bule sabsur be odurdaklemaloed.
MAT 23:15 ”Bemar Garda-Narmaked-Dulemar, Fariseoʼmar, ¡be duledar-wilesmar! ¡Wagar-darbomalad! ”Ar bemar, dule-wargwen-e-gwage-ogwaega, bemarba-naguega, demar-ebirdimalad, degi, bela be yar-ebirdimalad. Ar dule bemarba-nagusale, aka be ilabo bur bule soo-sailagi-odurdaklegoedga be imakdimalad.
MAT 23:16 ”¡Ar bemar duledar-wilesmar! ¡Bemar dule-idumalad-ibyasulidmaladid! ”Emide, be sogmalad: ‘Ar dule-wargwen ise-sogar-sogsadibeye, Bab-Dummadse-goled-neg-nuggi napira an bega sogye, an ibmar imakoye. Degisogsadba-ibmar-imaksulir, gwen akarsurye. Ar dule Bab-Dummadse-goled-neggi-or-siid-nuggi ise-sogar-imakoye-sogsardi, adi, degi-sogsadba imakergebye.’
MAT 23:17 ”¡Bemar gwen binsaed-nikasurmalad! ¡Ibyasulidyob be damalad! ”Ar biti bur sunsogedi, ¿or bur sunsogedi? ¿Bab-Dummadse-goled-neg bur sunsogedi? ¿Ar Bab-Dummadse-goled-neg, swilidikidga or-imaksursi?
MAT 23:18 ”Ar bemar sogmarbalid: ‘Dule-wargwen ise-sogar-sogsadibeye: Bab-Dummadga-ibmar-ogumakar-ukleged-aila-nuggi napira an bega sogye, an ibmar imakoye. Degisogsadba imaksasulir, gwen akarsurye. Ar dule Bab-Dummadga-ibmar-ukleged-nuggi ise-sogar-sogsardi, na degi-sogsadba eba saergebye.’
MAT 23:19 ”¡Bemar gwen binsaed-nikasurmalad! ¡Ibyasulidyob be damalad! ”Ar biti bur-sunsogedi, ¿Bab-Dummadga-ibmar-ogumakar-ukleged-aila? ¿We-galu-birgi ibmar-ogumakar-uklegedi? ¿Ar Bab-Dummadga-ibmar-ogumakar-ukleged-aila, swilidikidga ibmar-ogumakar-ukleged imaksursi?
MAT 23:20 Ar dule Bab-Dummadga-ibmar-ukleged-aila-nuggi ise-sogar-sogsale, napira an bega sogye, an ibmar imakoye, a-dule bato Bab-Dummadga-ibmar-ogumakar-ukleged-aila-nuggi, degisogsadba, ¿bela agi ibmar-ambikued eba galesmosursi? Bela eba galesmogad.
MAT 23:21 ”Ar dule Bab-Dummadse-goled-neg-nuggi ise-sogar-sogsale, napira-an-sogye, an ibmar imakoye. Ar a-nugginbi sogsasulid, ar Bab-Dummad-a-negyaba-maid-nuggi bato ise-sogar sogsabalid, an imakoye.
MAT 23:22 Ar dule nibneg-naid-nuggi ise-sogar-sogsale, an ibmar imakoye, bato Bab-Dummad-e-ologana-siged-nuggi sogsado, degine, Bab-Dummad-a-ganagi-siged-nuggi bato sogsabalid.
MAT 23:23 ”Bemar Garda-Narmaked-Dulemar, Fariseoʼmar, ¡be duledar-wilesmar! ¡Wagar-darbomalad! ”Ar bemar ibmar-gagan-burwiganase-bakale, be Bab-Dummadga ukdimalad, mentaʼye-nugad, eneldoʼye-nugad, degi, cominoʼye-nugad, amar ambegi-gwensak (10%) be Bab-Dummadga ukdimalad. Ar degite, Moisés-Igar-Maidgi igar-bur-sunsoged-maiddi, be imakdisurmalad: Dulega-igar-nudaked, dulemar-wiledaked, degi, nue-innikii-nanaed. Amardi, gwen be imakdisurmalad. ”Ar bemar we-ibmar-imakmalad bur nabirid. Ar degine, amba ibmar-burwigana-be-imakdimalad be imakmarbalodo.
MAT 23:24 ”¡Bemar ibyasulidyob emar-idudimalad! Bemar ibmar-burwiganagi alamaknanaimalad. Ibmar-dummagandi be gwen imaksurmalad. Ar gwii gobedgi-nairdi, nabir be sumalad. Degite, moli-yargan-mureged gobedgi-nairdi, be domalad.
MAT 23:25 ”Bemar Garda-Narmaked-Dulemar, Fariseoʼmar, ¡be duledar-wilesmar! ¡Wagar-darbomalad! ”Ar bemar asginbi-na-dule-nued-imakmalad-dulemalad. Ar bemar nog-asginbi-enuklegeyob gumalad, degi, bate-asginbi-enuklegeyob gumalad. Ar be-ulubgindi, ibmar-atursamalad gumalad. Igar-innikigwad-gwen-imaksurmalad, ibmar-isgana ena be sedidimalad.
MAT 23:26 ”¡Be Fariseo-ibyasulidid! Ar nog-enuklealir, degi, bate-enuklealir, e-yagi-inse be enukgwelergebed. Ar deyob-enuklegeyob na be ulubgi nue-nudaked bur nabirid, ar deyobi, asgine be nued guoed.
MAT 23:27 ”Bemar Garda-Narmaked-Dulemar, Fariseoʼmar, ¡be duledar-wilesmar! ¡Wagar-darbomalad! ”Ar bemar neg-uan-asgi-sipu-magaleyob gumalad. Asgindi, yeerdakleged, ar yabardi, garbi ena, degi, ibmar-isganabi ena bukwad.
MAT 23:28 Ar bemar amba deyobmarmogad. Asgindi, ar nue be baiganse oyomalad, bemar igar-maidba-innikii-ibmar-imakmalad-dulemarye. Ar ulubgindi, be wagar-darbo damalad. Ulubgi galagwensulid-bukidar be sedimalad.
MAT 23:29 ”Bemar Garda-Narmaked-Dulemar, Fariseoʼmar, ¡be duledar-wilesmar! ¡Wagar-darbomalad! ”Ar bemardi Bab-Dummad-gayaburba-barsogsamaladga e-neg-uan be sobmaladid, degi, innikii-dule-nanasmaladga be yeerdakle e-neg-uan-wilubgan imakmaladid.
MAT 23:30 Be sogmalad: ‘Anmar-dadgan-ibagi anmar gudigusana, Bab-Dummad-gayaburba-barsogmalad-oburgwenanai-gusmargua, anmardi eba gwen akassurmalanye.’
MAT 23:31 Ar bemar dukin na be san oyomalad, bemarde we-dulemar-Bab-Dummad-gayaburba-barsogmalad-oburgwismalad-e-wagan gumarye.
MAT 23:32 Degisoggu, be-dadgan ibmar-isgana-imaksamalad amba napidi, obelogegala, be deyob imakmarmosunna.
MAT 23:33 ”¡Naibe-buleganayob be isgana gumalad! ¿Ar igi na be soo-sailagi-odurdaklemaloedgi wakinno na be itomala? Be wakinnosurmala.
MAT 23:34 Degisoggu, an bemarga Bab-Dummad-gayaburba-barsogmalad barmidagoed, binsaed-ibegan barmidagoed, degi, Garda-Narmaked-Dulemar an bemarga barmidagoed. Degi-inigwele, gwen-gwen be amar-oburgwemaloed, nakrusgi biokmaloed, baigandi, be Judíoʼmar-onmakedneggi sabsur-bibyomaloed, neggwebur-baid-baidse be amar-baregindii gumaloed.
MAT 23:35 ”Deyob be imakmaloedgi, geb bemargi ataklenonikoed. Bela we-napneggi be-dadgan binsa dule-ibmar-oakalossurmalad oburgwismalad. Abel-dule-nued-akale, degi, Berequías-machi-Zacaríasʼse, a-nukad bemargi bonigan yolenonikoed. Deun, be-dadgan, Bab-Dummadse-goled-neg-sunnad-siid, degi, Bab-Dummadga-ibmar-ogumakar-ukleged-aila-siid-abargi, Zacarías-oburgwisgusmalad.
MAT 23:36 Napira an bemarga soged, we-dule-nuegan-oburgwilesmalad, emi, bemar-dula-gudidimaladgi ataklemaloed.”
MAT 23:37 Jesús sogdebalid: “Jerusalén-dulemar, Jerusalén-dulemar, Bab-Dummad-gayaburba-barsogmalad be oburgwedimalad. Bemarse-barmilearmalad aka be akwagi makdemalad. Ilabigwa bela be-mimmigan danar an na urbebi-gusana, ar igi gannir na e-sakan-urba e-mimmigan-urbedaedyob, an urbebi gusanad. Ar bemar abessurgusad.
MAT 23:38 Degisoggu, be-neg, nega-dulesulidganyob gunonisunnoed, bei walagwen melledoed.
MAT 23:39 Ar an bemarga sogsun, emigindi, bar be an-dakosurmalad. Ar bemar geb weyob-sogedse be an-dakmaloed: ‘We, Bab-Dummad-nuggi-dule-danikid, Bab-Dummad egi nued-binsasun.’ ”
MAT 24:1 Jesús Bab-Dummadse-goled-neggi-nodgua, agi bangudgu, e-sapingan ese walikgunonikid, geb ega Bab-Dummadse-goled-neg yeerdakle-siid oyoarmalad.
MAT 24:2 Jesús e-sapinganga sogded: —¿We-negmar be dakmala? Napira an bemarga soged, bela we-neg-bemar-dakedi, bipisaale neg-gwagwensaar bar sigosulid, bela ayaroedbiid.
MAT 24:3 Jesús, Olivos-yarse naded. Agi sii, e-sapingan bachikii ese nonimalad, ese egisnonimalad: —¿Sana degite Bab-Dummadse-goled-neg ayarosunna? Be-danikid-iduar, ¿ibi-wilubgan oyoledagosunna? Neg-dukumosar, ¿igi neg gudagosunna? Anmarga be soge.
MAT 24:4 Jesús e-sapingan-abin sogded: —¡Nue salakarmar! Mer dulemar be-yardaked be imakmalo.
MAT 24:5 Ar bukidar yamo anyob imaknonimaloed, sognonimaloed: ‘Ani an Cristo, Bab-Dummad-dule-wargwen-barmidagoye-sogsad-dule.’ A-dule, dulemar-bukidar yardakoed, eba bukidar nagudmaloed.
MAT 24:6 ”Bila-onolegedgibi neg-naguar, be itoardibe, degine, bila-onoleged daniye, agibi sunmakarmar be itoarbardibe, nue salakarmar, mer surbinsa be itomalo, ar wegiid-igargan guedsegad. Degi-inigwele, negdi amba yoo dukumoed.
MAT 24:7 Dulemar-yar-baid-baidgi-bukwamalad bila-ononanai gudamaloed, degi, reymar muchub-muchub egi yolenanai gudamarbaloed. Yar-baid-baidgi uellemalad-bukidar ainidagoed, ukud-dummad nagudabaloed, degine, negabandur-dummagan nagumai gudabaloed.
MAT 24:8 Degi-inigwele, bela we-ibagan-bulegan, igi bunor sikwi-bakesokalile, e-bonigan-itoar-dae, deyob guoed. Ar a-sorbardi, bur bule ibagan-bulegan nonikoed.
MAT 24:9 ”Neg deyob gunonikile, dulemar bemar-sabsur-odurdaklegega, dummaganse be-ukmaloed, amar be-oburgwemaloed. Ar bemar an-sapingansoggu, a-ular, bela-dulemar-yar-baid-baidgi-bukmalad isdar be-dakdemaloed.
MAT 24:10 A-ibagangine, bukidar anba-naigusmalad angi bangudmaloed. Na muchub-muchub urmaknanai gumaloed, degine, muchub-muchub isdar-dake gumaloed.
MAT 24:11 ”Degine, yamo bukidar Bab-Dummad-gayaburba-barsogmaladyobi, na san imaknonimaloed, amar, eba-nagumalaga dulemar-bukidar yardakmaloed.
MAT 24:12 Ar ibmar-isgana-yaisulidba, bukidar-anba-nagusmalad-e-sabgued bergudoed.
MAT 24:13 Ar ibagan-bulegan-berguedse, dule gwen galakussuliddina, adi, nue-bendaklegoed.
MAT 24:14 ”We-Bab-Dummad-e-negdakmaid-gayaburba-nued bela we-napneg-naidgi sunmaklegedsegad. Geb bela dulemar-yar-baid-baidgi-bukmalad Bab-Dummad-e-negdakmaid-gayaburba-nued wisgunonimalale, geb agi we-napneg bergunonikoed.”
MAT 24:15 Jesús sogdebalid: “Bab-Dummad-gayaburba-barsoged-Daniel, weyob narmaksagusad: ‘Bab-Dummadga bela-bela-ibmar-isgana-guedi, ese-goled-neg-islidikidse dognonikogu, we-ibmar-isgana, e-neg-nued, neg-isganaga imakoed.’ Daniel 9:27; 11:31 ”Ani Jesús, an bemarga soged: Bemar deyob neg-dakalile, we-Bab-Dummad-gayaburba-barsoged-Daniel-sogsagusadba gunaido. Emi, be nabir-garda-absodimalad, nue be itomalo.
MAT 24:16 Degisoggu, a-ibagi, Judeaʼgi be gudiile, yalaganba be wakinsun.
MAT 24:17 Ar agi dule-wargwen neg-uas-birgi-siile, aidealir, ibmar-oniega mer negyaba-dogedgi binsao, bur yog wakinnar imako.
MAT 24:18 Ar dule-wargwen sapurba-gudiile, mor sudagega, mer gannar negse-dagedgi binsao, bur yog wakinnar imaked nabirid.
MAT 24:19 ”Ar ammormar-gurgin-nika-gudidimalad, degi, mimmigan-gwaru-onunanaimaladdi, a-ibagangi nue-wilemaloed, ar ade, geg abarmak gumaloed.
MAT 24:20 Bab-Dummadse be gormarsun, we-ibagan-bulegan mer dii-wied-ibagi guega, degi, obunnoged-ibagi mer guegarbar.
MAT 24:21 Ar a-ibagangi, naibi-itoleged-dummad naiguoed. We-ibagan-bulegana, Bab-Dummad-neg-obinnisad-akale, gwen itoledisulid, degi, a-sorba ayobid bar itolegosurbalid.
MAT 24:22 ”Ar Bab-Dummad a-ibagan-wileged giar imaksasulina, dulemar a-ibagangi gwen wakinnosurmalanad, bela burgwemaloenad. Emigindi, Bab-Dummad na e-sordamar-bato-nugsaar-ese-gollesmalad-sabedba, a-ibagan giar nasiksad.
MAT 24:23 ”Degisoggu, dule-wargwen bemarga sokardibe: ‘¡Be dakena, Bab-Dummad-dule-wargwen-barmidagoye-sogsad-dule wegi gudii!’ Degi, bemarga sokarbardibe: ‘¡Be dakena, weba Cristo gudibar!’ Degi-dule-bega-sogedba mer be ibsamalo.
MAT 24:24 Ar ade, yamo binsa Cristoʼyob nonimaloed, degi, Bab-Dummad-gayaburba-barsogedyob nonimaloed. Amar dulemar-yardakegala, galagwensuli ibmar-wilubgan-dummagan imakdamaloed, degi, ibmar-dakledisurmalad imakdamarbaloed. Amba Bab-Dummad-sunnad-na-nug-imaksamaladse-bakar, sunna ese yardaklesmarmogaled.
MAT 24:25 Degisoggu, nue salakarmar, ar iduakwaa bato an bemarga sogsamalad, mer yardaklemaloye.
MAT 24:26 ”Degisoggu, bemarga sokarmardibe: ‘Cristo nega-dulesulidganba gudiiye.’ Mer ase be namalo. Ar igi bemarga sokarmarbardibe: ‘Cristo negyaba maiye.’ Mer be itomalo.
MAT 24:27 ”Ar igi mar-ibyed ukiagwar bela neg-ibegwar nasiknonidae, debayobi, ani Dule-Machi, an-danikoed-iba guoed.
MAT 24:28 Ar dulemar mulamar-danar-bukwa-dakele, na wismalad, agi san-burgwaled mai. Debayobi, an gannar we-napnegse danikile, dulemar mag dakmogoed.”
MAT 24:29 Jesús sogdebalid: “ ‘Ibagan-naibi-itoleged-sorba dad-ibeler bar gaosulid, nii bar gaosurbalid. Niisgwamar-nibneggi-nanaid babatidagoed. Nibneggi ibmar-dummagan-gala-nika-nanaid bela giglimakoed.’
MAT 24:30 ”Geb degine, ani Dule-Machi, an-danikoed-wilubgan mogir-imbaba dakledagoed. Geb degi, we-napneggi bela dulemar-baid-baid-danar-danar-bukmalad bukib binsadmaloed, degi, ani Dule-Machi, mogir-imbaba an-ganguedba, degi, an bela-bela-yeerdaklegedba-dani, bela an-dakdamaloed.
MAT 24:31 Napneg-ugakaase, degi, bela nibneg-ugakaase, an-sordamar-nugsalesmalad-anga-weenaega, an-baliwiturmar gala-binnasur-goled-abargi an barmidagoed. Geb degi, bela danar ambikunonimaloed.
MAT 24:32 ”Sapi-higuera-e-wilubgangi be durdakmar. Ar e-anagan dudumaksale, degi, e-gagan aramaksale, bemar yor-omodanikid nue-wisid.
MAT 24:33 Amba deyobmodo, we-ibmarmar-an-bemarga-sogsamaladi, bela deyob bemar neg-guar-dakalir, bemar wisdo, ani Dule-Machi, an-danikid nue-omosad.
MAT 24:34 ”Napira an bemarga soged, we-dulemar-gudidimalad-burgwed-idu we-ibmargan bela guedsegad.
MAT 24:35 Nibnegdi, napnegdi bela berguoed. An-gayaburbadi gege bergued, degisadeguoed.”
MAT 24:36 Jesús sogdebalid: “Ar an-danikoed-ibadi, degi, a-wachidi, dule gwen wissulid. Baliwiturmar-nibnegginmaladse-bakar, gwen wissurmalad. Degi, anbela wissurmogad. Unnila Bab-Dummadbi wisid, sana an danikoe.
MAT 24:37 ”Ar igi Noé-ibagangi neg-gusa, deyobi, Dule-Machi-gannar-danikoed-ibagangi neg gumogoed.
MAT 24:38 Ar a-ibagangi, deun, dii-mured-iduar, mas gunbukwa, gobbukwa, ome-nikubukwa, degi, na e-sisgwaga sui-ukbukwa gusmalad. Geb Noé ur-dummad-sobsad-yaba-dogsadse, deyob gubukwa gusmalad.
MAT 24:39 A-dulemar magar gwen itossurmalad. Dii-muludgu, bela a-dulemar burgwismalad. Amba deyobi, ani Dule-Machi, an-danikoed-ibagangi neg gumogoed.
MAT 24:40 ”A-ibagangi, dule-warbo sapurba-gudiidgine, wargwen nibnegse seledoed, baiddi, obelegoed.
MAT 24:41 Omegan-warbo ibmar-gwag-nagnaidgine, wargwen nibnegse seledoed, baiddi, obelegoed.
MAT 24:42 ”Degisoggu, nue salakarmar, nue atakmar, ar ade, bemar wissulid sana be-Dummad danikoe.
MAT 24:43 Ar wedi be nue wismalad, ar dule-neg-ibed wisina igi-wachigi dule-ibmar-atursaed danikoe, dule-neg-ibed edarbisaled. Ar ei-ibmar-atursaega imaksasuliled.
MAT 24:44 Degisoggu, be guagwar-gudii imakmar, ar ade, ani Dule-Machi, an-danikoed bemar wissulid. Ar ukiagwar an danikoed.”
MAT 24:45 Jesús egisdesunnad: “Ar degite, ¿doa-mai-nuedi, binsaed-nikadaed, e-dummad-sogedba gudii? Mai-deyobdaedi, e-dummad, e-neguya-akwega onugsaed. Adi, mai-baiganga wachi-sekalaa mas-dakegar.
MAT 24:46 Ar we-mai nue-deyob-arbanai e-dummad daknonikile, egi nued binsalegoed.”
MAT 24:47 Geb degi, Jesús sogded: “Napira an bemarga soged, mai-e-dummadi, bela na e-ibmar-nikad ega akwegala, we-maiga ukoed.”
MAT 24:48 Jesús sogdebalid: “Ar mai-isganadi, na e-gwagegi binsaded: ‘An-dummad amba yoggumaid.’
MAT 24:49 Degidbali, geb mai-baigan-sabsur-imakdesunnad, dulemar-mumgumaladba akadsunnad, eba mas gutebarsunnad, degi, eba gobdebarsunnad.
MAT 24:50 Geb iba-edarbedisulidgi, wachi-edarbedisulidgi e-dummad danikile,
MAT 24:51 e-dummad daknonikoed, mai galagwensur-gudii. Degisoggu, e-dummad sabsur e-mai-odurdaknonikoed. E-dummad, a-e-mai dulemar-wagar-darbo-damaladba esgaryagi metoed. Agi dummad-odurdaklesiidba bosii, degi, nugar-gorsii gusunnoed.”
MAT 25:1 Degi Jesús sogdebalid: “Bab-Dummad-e-negdakmaid ome-nikunaid-ibagi-gusayob gued: A-ibagi yagana-ambegwad (10) ome-nikulenaid-ibase-naega, na gwallu egad-egad sesmalad, adi, suiga-guoed-abindaknaegar.
MAT 25:2 Dakleargu, e-ataledi, nue-binsaed-nikaa damalad. Bamaladdi, gwen binsaed nikasurmalad.
MAT 25:3 E-ataled-binsaed-surmaladi, gwallu-sesmargua, gwen e-gwallu-dii bute-baidgi enossurmalad.
MAT 25:4 Ar e-atar-binsaed-nikadamaladdi, gwallu-sesmargua, bute-baidgi gwallu-dii sesmarbalid.
MAT 25:5 Ar suiga-guoed amba yoggudsoggu, bela yagana gabed-itoarmargu, gabidmarsunnad.
MAT 25:6 ”Nega-gabigwengi binnasur dule-gole itoarmalad: ‘¡Suiga-guoed dani! ¡Abin-daknamar!’
MAT 25:7 ”Geb degi, bela yagana gwisguarmalad. E-gwallu gatik-nued-gaega, nudakarmalad.
MAT 25:8 E-atar-binsaedsulidi, e-atar-binsaed-nikadamaladga sogdemalad: ‘Be anmarga wis gwallu-dii ukdage, ar anmar-ibe gwallu akinmaid.’
MAT 25:9 ”Yagan-binsaed-nikadamalad abin-sogdemalad: ‘Suli. Ar anmar bemarga gwallu-dii abar-ukye-sogele, anmarga galakuoed, degi, bemarga galakumogoed. Bur be dulemar-gwalludii-ukmaladse baknamala.’
MAT 25:10 ”Geb yagan-binsaed-sulidamalad gwallu-dii baknadmargu, a-sorba suiga-guoedi nonikid. Yagan-binsaed-nikadamaladdi, guakwaa-bukmarsoggu, eba mas-gunnega dogdemalad. A-sorba, yawagak edilessunnad.
MAT 25:11 ”Geb agi yagan-ataled-gwallu-dii-bakdimalad nonimarmogad. Suiga-guoedga wilesakwaa sognai guarmalad: ‘¡Dummad, anmarga be yawagak wis egae!’
MAT 25:12 ”Ar dummad abin-imakdegu, sogded: ‘Napira an bemarga soged, aku an bemar-daked.’ ”
MAT 25:13 Degi Jesús sogdebalid: “Degisoggu, nue nakulemar. Ar be wissurmalad ibi-ibagi, igi-wachigi Dule-Machi danikoe.”
MAT 25:14 Jesús sogdebalid: “Ar Bab-Dummad-e-negdakmaid weyob gued: Dule-wargwen dikasur na e-neggi nasokargu, e-maigan-ega-ibmar-akwega ese gochagusad. Degisoggu, amarga bela na e-ibmar-obes naded.
MAT 25:15 Mani-onogedsik e-maigan-gurgin-nikadbali, ega or-mani-mimis naded. Wargwenga or-mani-gwaatar ega uksad, baidga or-mani-gwabo uksad, degi, baidga or-mani-gwagwen uksamogad. Mani-ibeddi, dikasur nadsunnad.
MAT 25:16 ”Dule-or-mani-gwaatar-abingasad naded. Geb mani-e-sangi mani-gwaatar onosbalid.
MAT 25:17 Ar dule-or-mani-gwabo-abingasadi, amba deyob imaksamogad, mani-gwabo egi onosmogad.
MAT 25:18 Ar dule-or-mani-gwagwen-abingasaddi, nadgu, napagi digdapid. E-dummad-mani napa-yaba odukusad.
MAT 25:19 ”Undaradgine, we-maigan-e-dummad nonikid, e-maigan-ebo mani-igar naboalid.
MAT 25:20 Dule-or-mani-gwaatar-abingasadi nonigu, baid-or-mani-gwaatar senonibalid. E-dummadga sognonikid: ‘Dummad, or-mani-gwaatar be anga uksad, an baid-or-mani-gwaatar egi onosbalid. Degisoggu, or-mani-gwaambe (10) an bega sedanisunnad, be sue.’
MAT 25:21 ”E-dummad ega sogded: ‘Nued, be mai-nued, be gwen-galakussulid. Ar ibmar-ichesaaledgi gwen galakussuli be arbasad, ibmar-ichesur an bega uksun. Degisoggu, anba be wergudasun.’
MAT 25:22 ”Ar dule-or-mani-gwabo-abingasad nonimogu, e-dummadga sognonimogad: ‘Dummad, or-mani-gwabo be anga uksad, baid-gwabo an egi onosbalid. Degisoggu, or-mani-gwabake an bega sedanisunnad, be sue.’
MAT 25:23 ”E-dummad ega sogded: ‘Nued, be mai-nued, be gwen galakussulid. Ar ibmar-ichesaaledgi gwen galakussuli be arbasad, ibmar-ichesur an bega uksun. Degisoggu, anba be wergudasun.’
MAT 25:24 ”Ar dule-or-mani-gwagwen-abingasad nonimogu, e-dummadga sognonimogad: ‘Dummad, an be-wisdo, be dule-buledid. Be ibmar-digsasulidgi ibmar be weed, degine, be-arbassulidgi ibmar be weebalid.
MAT 25:25 Degisoggu, an be-dobgusad. An nadgu, be-or-mani napa-yaba an odukusad. Ar begadid, an bega uksun.’
MAT 25:26 ”E-dummad, abin-sogdegu, ega sogded: ‘Be mai-isgana, mai-wiegala. Be wisinad, an-ibmar-digsulidgi an ibmar-weed, degine, an arbasulidgi ibmar an weebalid.
MAT 25:27 Ar degisoggu, mani-onogosur be itogu, mani-urbemalad-negse be an-mani uknaenad, adi, an nonikogu, an-mani, degi, e-gaka, an na sunonikoenad.’
MAT 25:28 ”Dule-mani-ibed e-mai-baiganga sogded: ‘Degisoggu, e-annik or-mani be sumarsun, dule-or-mani-gwaambe-nikadga (10) be ukmarsun.
MAT 25:29 Ar dule-ibmar-nikadga bur bule ega ibmar uklegoed. Degisoggu, bur bule ibmar nikunonikoed. Ar dule-ibmar-sateddi, wis-ibmar-nikadse-bakale, ei sulenonikoed.
MAT 25:30 Ar we-mai-wissur-arbaedi, magaba negsichidse metnamar. Agi bosii guoed, dummad-wilesiidba nugar-gorsii guoed.’ ”
MAT 25:31 Jesús sogded: “Ani Dule-Machi, an-iba-danikoedgi, bela an-baliwiturmar-gwage-swilidikmaladmala an-gangued-yeerdaklegedgi an danikoed. Geb an-ologan-yeerdaklegedgi an signonikoed.
MAT 25:32 Geb degi, bela dulemar-yar-baid-baidgi-bukmalad an-asabin ambikunonimaloed. Agi geb bachik-bachik an oambikuoed. Igi sibad-wawaad-edarbed, sibad-wawaad, degi, sibad-ebo bachiki urbe, deyob an dulemar-imakmogoed.
MAT 25:33 An-argan-nuedsiki, sibad-wawaadmar an urboed. An-argan-sapiledsikdi, sibadmar an urboed.
MAT 25:34 ”Geb degi, an reyga-maidba, an-argan-nuedsik-bukmaladga an sogdagoed: ‘Be dagmar, ar an-Bab-Dummad bemargi nued binsasad. An-Bab-neg-dakmaid-bemargadid be abingadamar. Ar we-napneg-nagusad-akale, bato bemarga nugsales nagusad.
MAT 25:35 Ar an ukur-itosgu, masgi be an-oguchamalad. An uku-uku-itosgu, be an-ogobsamalad. An-neggwebursulidgi an gudigusgu, be an-akwismalad.
MAT 25:36 An mor-sate-gudigusgu, mor be anga uksamalad. An uellesgu, an-bendakega be anse atakapmalad. An esgaryagi-mellesigusgu, be anse arbimalad.’
MAT 25:37 ”Geb degi, dulemar-igar-napiragwadba-damalad an-abin-imakdemaloed, sogdamaloed: ‘Dummad, ¿sana ukudmaada an be-daksamala? Masgi an be-oguchaye bede soged. ¿Sana be uku-uku-itodii an be-daksamala? An be-ogobsaye bede soged.
MAT 25:38 ¿Sana be-neggwebursulidgi be gudigu, anmar be-akwismala? ¿Sana mor-sate an be-daksagu, an bega mor yosmala?
MAT 25:39 Be uellemaigu, be-bendakega, ¿sana anmar bese atakapmala? Be esgaryagi-mellesigu, ¿sana anmar bese atakapmala?’
MAT 25:40 ”Ani Rey, an abin-imakdoed: ‘Napira an bemarga soged, ar an-gwenadgan-binsarmaladse-bakar, deyob bemar bendaksasoggu, be deyob an-bendaksamalad.’
MAT 25:41 ”Geb degi, dulemar an-argan-sapiledsik-bukmaladga an sogdagoed: ‘Angi be bangumar, bemar bato ukabsalesmalad. Nia-sailaga, degi, e-baliwiturmarga, soo-saila-geg-bergued bato guagwar-siidse be namar.
MAT 25:42 Ar ade, ukudmaada an gudigusgu, gwen masgi be an-oguchasurmalad. Uku-uku an itosgu, gwen be an-ogobsasurmalad.
MAT 25:43 An-neggwebursulidgi an gudigusgu, gwen be an-akwissurmalad. Mor-sate an gudigusgu, gwen be anga mor yossurmalad. An uellemaigusgu, gwen be an-bendakapsurmalad, degi, esgaryagi an mellesi-gusgu, gwen be anse atakapsurmalad.’
MAT 25:44 ”Geb degi, amar an-abin imakdemarmogoed: ‘Dummad, ¿sana be ukudmaad-gudii, uku-uku-itodii, an be-daksamala? ¿Sana be be-neggwebursulidgi-gudii, mor-sate-gudii, an be-daksamala? ¿Sana be uelledigu, esgaryagi-mellesigu, anmar be-bendaksasuli?’
MAT 25:45 ”Geb degi, an wemar-abin-sogoed: ‘Napira an bemarga soged, ar an-gwenadgan-binsarmaladga deyob bemar imaksasursoggu, anga bemar imaksasulid.’
MAT 25:46 ”Degisoggu, we-dule-isganamar, odurdakleged-neg-sadeguoedse barmiledmaloed. Dule-nuegandi, san-burba-geg-bergued-negse namaloed.”
MAT 26:1 Jesús bela-weyob-ibmar-sogsad-sorba, e-sapinganga sokalid:
MAT 26:2 “Be wismalad, Oburgwilegoenad-Iba ibabose nagudoed. Agine, ani Dule-Machi, nakrusgi-an-biokmalaga an-gamaloed.”
MAT 26:3 Degine, dule-irwa-Bab-Dummadse-gormalad-e-dummagan, Garda-Narmaked-Dulemar, Judíoʼmar-girmar-dummagan-neggwebur-sedimalad, bela amar danar dule-irwa-Bab-Dummadse-goled-bur-dummad-Caifásʼye-nugad-neg-imbase ambikunonimalad.
MAT 26:4 Yamo-yardakar-Jesús-gaega, degi, oburgwemalaga, agi igar itosmalad.
MAT 26:5 Judío-dummagan-abar sogdemalad: “Mer ibagi anmar Jesús-gamalo. Degiir, dulemar Jesúsʼbina urwedamaloed.”
MAT 26:6 Jesús Betania-neggweburgi gudiid. Simón-naibe-buna-yaa-maleged-nika-gudigusad-neggi siid.
MAT 26:7 Agi Jesús mese-naba mas gunsigu, ome-wargwen ese nonikid. Ome, bute-akwa-alabastro-sobaledgi-sii gwallu-wawad-nuedi senonikid, geb Jesús-nonogi eononikid. A-gwallu-wawad gargerba bakleged.
MAT 26:8 Jesús-sapingan ome-weyob-imaksad-daksamargu, uludmalad, sogdemalad: —¿Wede ibiga binsarsunna we-ome we-gwallu-wawa-nued wiosa?
MAT 26:9 Ar sunna we-gwallu-wawad mani-dummad uklegoenad, adi, we-mani, nabir dule-wileganaga uklegegar.
MAT 26:10 Ar Jesús degi-sogmalad-mag-daksagu, sogded: —¿Ar ibiga bemar omese-urwemala? Mer ese be gormar. Ar ome ibmar-nued anga imaksad.
MAT 26:11 Ar dule-wilemaladdi, gusgu bemar-abargi-gudigu guoed. Andi bemarba-gudigu guosulid.
MAT 26:12 ”Ar ome we-gwallu-wawad an-sangi-eosadi, an-diglegoed-iduar eosad.
MAT 26:13 ”Napira an bemarga soged, bia we-napneggi an-gayaburba-nuedgi sunmaklegoe, we-ome-ibmar-imaksadgi sunmaklemogoed, adi, we-ome-ibmar-imaksad ebinsamalagar.”
MAT 26:14 Jesús-e-sapingan-ambe-gakabogwad-wargwen (12), Judas-Iscarioteʼye-nugad, dule-irwa-Bab-Dummadse-gormalad-e-dummaganse nadegusad.
MAT 26:15 Amarga sogdapid: —An bemarga Jesús-ukmalale, ¿ibi be anga ukmaloe? Judío-dummagan Judasʼga mani-sibu gwadulagwen-gakambe (30) uksamalad.
MAT 26:16 Geb agi Judas igar-amiarsunnad, igi saele darba Jesús-ukodibeye.
MAT 26:17 Judío-ibagi, Madu-Inasuli-Gulleged-Iba-gebe-onodedgi, e-sapingan Jesúsʼse nonimalad, ega sognonimalad: —Oburgwilegoenad-Ibagi-masgulleged-gunnega, ¿bia anmar bega neg amimaloe?
MAT 26:18 Jesús amarga sogded: “Neggweburse be namar. Dule-gwensak-negse be namar. A-dulega be sogmalo: ‘Odurdaked-saila sogye: An-ibagan omosye. Be-neggine, an-sapinganmala, Oburgwilegoenad-Iba an dakmaloye.’ ”
MAT 26:19 Ar igi Jesús e-sapinganmarga sogsa, e-sapingan deyob imaksamalad. A-neggi, ibagi mas-gunmalaga, bela ibmar guagwar urbismarsunnad.
MAT 26:20 A-ibagi, neg-mutikgudgu, Jesús e-sapingan-ambe-gakabogwadmala (12) mese-naba mas-gunnega signonimalad.
MAT 26:21 Mas gunbukmargu, Jesús sogded: —Napira an bemarga soged, bemar-gwensak darba an-ukoed.
MAT 26:22 A-ular, e-sapingan nue-wile itodmalad, na wargwen-wargwen Jesúsʼga sogdemarsunnad: —Dummad, ¿ani an be-ukoe? Andi suli.
MAT 26:23 Jesús abin-sogded: —Ar dule-wargwen e-argan bategi anba odogoedi, a darba an-ukoed.
MAT 26:24 Napira an bemarga soged, ani Dule-Machi, ar igi Bab-Dummad-Gardagi angi narmakar nai, ar deyob an guoed, an burgoed. Ar dule-darba-an-ukoeddina, sabsur-odurdaklegoedba nue wilegoed. A-dule gwalulessulina, bur nabirinad.
MAT 26:25 Geb degi, Judas, darba-Jesús-ukoedi, Jesúsʼga sogded: —Odurdaked-saila, ¿ani an be-ukoye? Jesús ega sogded: —Eye. Ar bato na be sogsad.
MAT 26:26 Mas gunbukmargu, Jesús madu-susgua, Bab-Dummadga dog-nuedye sogsagusad. Geb a-sorba, Jesús madu bisge-bisge imaksad, e-sapinganga ukded, sogded: —Be sumar, be gunmar, we-madu, an-sanad. Jesús e-sapinganmala we-madu guchamarsunnad.
MAT 26:27 A-sorba, Jesús nog susbalid. Bab-Dummadga dog-nuedye-sogsabargu, e-sapinganga ukdebalid, sogdebalid: —Bemar bela we gobmar.
MAT 26:28 We, an-abe. An-abe Bab-Dummad dulemarbo igar-bini-mesnaid-wilubganad, degi, an-abe, isgued-eliega, dulemar-bukidar-ular milegoed.
MAT 26:29 An bemarga soged, emigindi, vinoʼdi we-sorba bar an gobosulid, geb an-Bab-negdakmaidse an bemar-abargi an gobdapbaloed. Jesús e-sapinganmala we-vino gobsamarsunnad.
MAT 26:30 Geb Bab-Dummad-nuggi namaksamalad-sorba, Olivos-yarse nadmarsunnad.
MAT 26:31 Geb agi, Jesús e-sapinganga sogded: —Belagwapa emi-mutik bemar angi bangudmaloed, ar ade, Bab-Dummad-Gardagi narmakar naid, sognaid: ‘Sibad-wawaad-edarbed an oburgoed, Geb agi sibad-wawaadmar bela duurmakdoed.’
MAT 26:32 Jesús sogdebalid: —Geb gannar-an-durgusad-sorba, bemar-idu Galileaʼse an naoed.
MAT 26:33 Pedro, abin-sogded: —Bela begi bangudmalale, andi begi gwen banguosulid.
MAT 26:34 Jesús, Pedro-abin sogded: —Napira an bega soged, emi-mutik, gannir-namaked-iduar, ilapaa be an-osulogoed.
MAT 26:35 Pedro, abin-sogded: —Ar an beba burgweye sogele, amba an be-osulogosulid. E-sapingan-baigan bela degibi sogdemarmogad.
MAT 26:36 Jesús e-sapinganmala Getsemaní-neg-nugadse nonimarsun. Agi Jesús e-sapinganga sogded: “Wegi bemar ambikumar, andi weba Bab-Dummadse gornagwelo.”
MAT 26:37 Pedro, degi, Zebedeo-machimala-warbogwadbi eba sesagusad. Geb agi, Jesús na nue-wilegoedba nue-wile itoalid, degi, nue-surbinsa itoarbalid.
MAT 26:38 Geb degi, Jesús e-sapingan-walapaagwadga sogded: —Andi an ulubgi nue-bukib-itogedba sunna an burgwisar-itoleged. Wegi be ambikumar, nue atakmalo, Bab-Dummadse be gormalo.
MAT 26:39 Jesús sikwas nadgu, napagi asgun megdapid. Geb Bab-Dummadse-gotegu, sogded: “Baba, an-idu igar-buled naid, sunna be anga osulogena gadin. We-igar, ina-gagbid-gobedyob beedse an egi wilegoed. Degi-inigwele, melle be an-sogedba be imako. Unnila be-sogedbarbi be imako.”
MAT 26:40 Geb degi, Jesús Bab-Dummadse-gorsiid-bergusgu, na e-sapinganse nonikid, daknonikid, bela gabmamai. Geb degi, Jesús Pedroʼga sogded: “¿Ar Babse-golega wachi-irgwensaar wis ataksii geg be gude?
MAT 26:41 Nue atak, Bab-Dummadse be gole, adi, isguedgi-wilubdakleged mer bemarse warmakegar. An wisi, Babse golega, bemar-burbadi guagwar gudiid. Bemar-sandi degisulid, nolloo gued.”
MAT 26:42 Jesús gannar nadbargu, gannar Bab-Dummadse gotebalid, sogdebalid: “Baba, an-idu igar-buled naid, ina-gagbid gobedyob beedse an egi wilegoed. Geg be anga osulogele, igi-barsa. Degisoggu, be-sogedba be imaksun.”
MAT 26:43 Jesús Bab-Dummadse-gorsiid bergusgu, gannar e-sapinganse-nonibargu, gabmamai daknonikid. Ar gabed nue egi obin itomalad.
MAT 26:44 Degi, Jesús e-sapingan-gabmamai obesad. Geb gannar nadbalid. Degi, ilapaagi Bab-Dummadse gotegu, gannar-idu-sogsadgii sogdebalid.
MAT 26:45 Geb degi, Jesús e-sapinganse gannar nonikid, ega sognonikid: “¿Amba be gabmamaide? ¿Amba be obunnomamaide? Emigindi, wachidi omossun. Ani Dule-Machi, an-oburgwemalaga, dulemar-isgudidimaladse darba uklesokarsun.
MAT 26:46 Degisoggu, be gwisgumarsun, namarsun. Be dakmar, dule-darba-an-uksokalidi bato anmar-walikgusad.”
MAT 26:47 Jesús amba e-sapinganga sunmakgwichi, e-sapingan-warambe-gakabogwad-wargwen (12), Judasʼye-nugad, ese nonikid. Aba dule-irwa-Babse-gormalad-e-dummagan, degi, Judío-girmar-dummagan-neggwebur-sedimalad dulemar-bukidar barmiargusmalad. We-dulemar-bukidar es-suidyalaba, degi, suarmar annik-annik, Judasʼba duurmakdani gusmalad.
MAT 26:48 Judas Jesús-darba-ukoedi, dulemar-nonimalad-ebo igar-nabosad, ega sogsad: “An dule-e-wagar-uoed, an ega sogoedi, be nued sogeye, a-dule bemar gaoed.”
MAT 26:49 Geb Judas yog Jesúsʼse naar imaksad, ega sogded: —Odurdaked-saila, ¿be nuedi? Geb degi, ei wagar usa imaksad.
MAT 26:50 Degi, Jesús, Judasʼga sogded: —Gwenad, ¿ibiga be daniki? Geb degi, dulemar Jesúsʼse nonimalad. Geb Jesúsʼse achadmargu, Jesús-gasmarsunnad.
MAT 26:51 Ar e-sapin-wargwen Jesús-naba-gwichidi, es-suid-onosgu, dule-irwa-Babse-gormalad-bur-dummad-e-mai naibi imaksad. E-uaya ei siksad.
MAT 26:52 Geb degi, Jesús e-sapinga sogded: —Be es-suid e-uka-yaba be odo. Ar bela dulemar-es-suid-ebumaladi, es-suidgi burgoed.
MAT 26:53 Ar emisbinne, mili-miliba baliwiturmar anga barmidagega, ¿geg an-Babse an gor be ebinsasi? Ar an gotele, anga barmialiled.
MAT 26:54 Ar deyob gusale, degite, ¿igi Bab-Dummad-Gardagi narmakar-naidba bar gusarsunna? Ar a-Gardagi sognaid, an burgwergebye.
MAT 26:55 Geb agi, Jesús dulemarga sogded: —¿Ibiga bemar dule-isgana-ibmar-atursaedyob an-gadanimala? Emide, es-suidyalaba, suarmaryalaba, bemar an-gadanimalad. Bane-bane bemarba an gudigusad, Bab-Dummadse-goled-neggi dulemar-odurdakdii an gusad. Degite, agindi bemar gwen an-gassurmalad.
MAT 26:56 Ar emigindi, igar-maidbali, Bab-Dummad-gayaburba-barsogmalad-narmaksadba-guegala, deyob gunonikid. Degi, Jesús-sapingan Jesús-wargwen-mete, e-idu bela duurmakdemarsunnad.
MAT 26:57 Dulemar-Jesús-gasmaladi, dule-irwa-Bab-Dummadse-gormalad-bur-dummad, Caifásʼye-nugadse Jesús-sesmalad. Agi Garda-Narmaked-Dulemar, Judíoʼmar-girmar-dummagan igar-itogega bukmalad.
MAT 26:58 Pedroʼdi bannabasaar Jesúsʼba nadapgusmogad, dule-irwa-Babse-gormalad-bur-dummad-neg-imbase warmakdapid. A-neg-imbase dogsagua, suar-ibedmar-abargi sigdapid, adi, dakega, igi Jesús-imakmalodibeye.
MAT 26:59 Dule-irwa-Babse-gormalad-e-dummagan, degi, bela Judío-dummagan-igar-nabiromalad, igar-aminanai guarmalad, igi-saele Jesúsʼgi yolemalodibeye, igi-yamo-gakansaale Jesús-oburgwemalodibeye.
MAT 26:60 Degite, ar bukidar yamo-gakansaar sunmaknonimar-inigwele, Jesús-nodiid gwen amissurgusmalad. Geb dule-warbo yamo-gakansaar-ibmar-soged nonimalad.
MAT 26:61 Dule-warbogwad weyob sognonimalad: —We-dule weyob sunmaksad: ‘An sunna Bab-Dummadse-goled-neg-siid an earye, degi, ibapaagi sunna gannar an sobbarye.’
MAT 26:62 Dule-irwa-Babse-gormalad-bur-dummad gwisgusgu, Jesúsʼga sogded: —¿Be dulemar-abin-imakosuli? Begi-sunmaknanaidgi, ¿igi be sogmosunna?
MAT 26:63 Ar Jesúsʼdi bipisaar gwen abin-imaksasulid. Geb degi, dule-irwa-Babse-gormalad-bur-dummad ega sogdesunnad: —Bab-Dummad-Dula-Maid-nuggi an bega soged, anmarga be soge, ¿ar be Cristo, Bab-Dummad-Machi-sunnadi?
MAT 26:64 Jesús abin-sogded: —Ar bede soged. A-uki an bega sogbalid, emigi ani Dule-Machi, Bab-Dummad-Bela-Gangued-Nikad-e-argan-nuedsik dule-dummadga an sii be an-dakmaloed, degine, nibneggi mogir-imbaba-daniki be an-dakmarbaloed.
MAT 26:65 Geb degi, dule-irwa-Babse-gormalad-bur-dummad e-mor na siir irmaksad, oyogegar, Jesús-degisogsad ede sae-itoye. Degine, geb dummaganga sogded: —¡Bab-Dummad-nuggi we, dodos! ¿Ar ibiga e-barsogmalad anmar bar abesunna? Ar bemar-sunnad, emiskwaa be itosmalad, we-Jesús Bab-Dummad-nuggi dodosad.
MAT 26:66 ¿Igi be itomarmosunna? Dummagan-igar-itobukmalad abin-imakdemargu, sogdemalad: —Oburgwilegergebed.
MAT 26:67 Geb degi, dummagan Jesús-wagargi wiakdemalad, argan-olor sarsodmarbalid, degine, baigan wagargi Jesús-bibyodmarbalid.
MAT 26:68 Ega sogdemalad: —Cristo, bela be ibmar-wissoggu, anmarga be soge, ¿doa be-bibyossunna?
MAT 26:69 Pedro neg-imbagi sii, bunagwa-mai-wargwen ese nonikid, ega sognonikid: —Be, Jesús-Galileaʼginedba gudii an be-daksamogad.
MAT 26:70 Pedro, bela dulemar-asabin osuloded, sogded: —Aku an itoged, ibu be anga obare.
MAT 26:71 Pedro yawagakse-nadgu, bunagwa-baid Pedro-dakarbalid. A-bunagwa, dulemar-bukmaladga sogded: —We-dule, Jesús-Nazaretʼginedba gudii an daksamogad.
MAT 26:72 Pedro gannar osulodbalid, sogded: —Bab-Dummad-nuggi napira an bemarga soged: Andi, an we-dule-akudaked.
MAT 26:73 Degine, sikwas sanargusadgine, walik-bukmalad Pedroʼse-nonimargu, ega sogdemarmogad: —Napira an bega soged, be Jesús-sordamogad, ar be-sunmaked mag-itoleged, be a-sordamogad.
MAT 26:74 Geb degi, Pedro ukabsaar ibmar sokalid, degi sogdebalid: —Bab-Dummad-nuggi napira an bemarga soged: Andi, an we-dule-akudaked. Geb degidgine, yog gannir namakaled.
MAT 26:75 Geb degi, Pedro ebinsaas naded, igi Jesús ega ibmar sogsa, “gannir-namaked-iduar, ilapaa be an-osulogoye.” Degi, Pedro magaba-nadgu, nue-ise-boar nadsunnad.
MAT 27:1 Wakdargusgu, bela dule-irwa-Babse-gormalad-e-dummagan, degi, Judío-girmar-dummagan-neggwebur-sedimalad igar-itosmargu, igar-mesismalad, Jesús-oburgwemaloye.
MAT 27:2 Edinnar neggwebur-dakmaid-Poncio-Pilatoʼye-nugadse Jesús-sesmalad. Jesúsʼga igar-itogega aga ukdapmalad.
MAT 27:3 Geb degi, Jesús-darba-uksad-dule-Judas, Jesús-oburgwilego-daksagu, bukib-binsaded. A-ular, Judas mani-sibu-dulagwen-gakambegwad (30) gannar dule-irwa-Babse-gormalad-e-dummaganse, degi, Judío-girmar-dummaganse senonikid.
MAT 27:4 Amarga sognonikid: —An dummad-nosad, dule-ibmar-gwen-oakalossulid binsa darba an uksad. Ar dummagandi, abin-imakdemalad: —¿Ar anmargardi baisi? ¡Ar wedi, begindo!
MAT 27:5 Geb degi, Judas Bab-Dummadse-goled-neggi mani-mide nadsunnad. Geb agi na dukin gammu gadapid.
MAT 27:6 Dule-irwa-Babse-gormalad-e-dummagan, Judas-mani-mided-wesmargu, sogdemalad: “We-mani anmar Bab-Dummadga-mani-sabogedgi uker, igar-nuedsulid, ar ade, we-mani bato ukabsalegaled, dule-gindakega-imakoed-manid.”
MAT 27:7 Geb dummagan igar-itosmargu, napsa-ibmarga-sobleged-nainu baksamalad, adi, agi dulemar-ainebarmalad-burgwisar, digmalagar.
MAT 27:8 A-ular, a-nainu amba emi-ibase bileged: “Ablis-Nainuye.”
MAT 27:9 Ar deyob gunonikid, igi Bab-Dummad-gayaburba-barsoged Jeremíasʼye-nugad, deun sogsagusgu: “Mani-sibu-dulagwen-gakambe (30) susmalad, dule-nued-uklesad-e-mani, Israel-dulemar-an-uksad-mani.
MAT 27:10 A-mani napsa-ibmar-sobed-nainu-bakega uksamalad, ar igi Bab-Dummad anga sogsa, aba igar imaklesad.”
MAT 27:11 Dule-dummad-negdakmaid-Pilatoʼye-nugad-asabin Jesús gwisgudapid. Pilato Jesúsʼse egichialid, ega sogded: —¿Ar be Judíoʼmar-E-Rey? Jesús, abin-sogded: —Ar bede soged.
MAT 27:12 Dule-irwa-Babse-gormalad-e-dummagan, degi, Judío-girmar-dummagan ar Jesúsʼgi sognanai-guarmalad, we, igar-isgana imakdiiye. Ar Jesúsʼdi gwen abin-imaksasulid.
MAT 27:13 Geb degi, Pilato Jesúsʼga sogded: —¿Begi-sunmaknanaid be itosuli, bede ibmar-isgana imakdiiye?
MAT 27:14 Ar Jesúsʼdi bipisaale gwen abin-imaksasulid. Degisoggu, Pilato nue-geger daksunnad, ar ibiga wede Jesús dulemar-abin-imaksuli.
MAT 27:15 Emide dakleargu, iba-onolealile, Pilato gusgu Judíoʼmar-abemaladba dule-wargwen-esgaryagi-mellesiid ega onodaed.
MAT 27:16 Deunni, a-ibagangine, dule-Barrabásʼye nugad esgaryagi mellesiid. We-dule, dule-isgana-nug-nikagwadid.
MAT 27:17 Dulemar-bukidar ambikunonimargu, Pilato amarga sokalid: —¿Doa bemarga onobi be an-abemarsunna? ¿An bemarga Barrabás-onoge? ¿Jesús, Cristoʼye-nugad an onoge?
MAT 27:18 Ar ade, Pilato wisid, Judío-dummagan nobedbali ega Jesús-uksamala.
MAT 27:19 Pilato igar-naboged-gangi-sigu, e-ome ese gaya barmialid: “We-dule, dule-nuedid, dule-isgudisulidid. Mer egi be yolemogo. Emi an ichakwa-gabdakmai oibosad, an egi gabdaksadgi nue-nunmak an itodiid.”
MAT 27:20 Ar dule-irwa-Babse-gormalad-e-dummagandi, degi, Judío-girmar-dummagan yamo dulemar-binsaed gasmalad, adi, Pilatoʼse Barrabás-egismalaga, ega onogega, Jesúsʼdi oburgwemalagar.
MAT 27:21 Pilato gannar dulemarga sogdebalid: —¿Doa bur wemar-warbogwad bemarga onobi be an-abemala? Emar abin-sogdemalad: —Barrabás bur be anmarga onoge.
MAT 27:22 Geb degi, Pilato dulemarga sogdesunnad: —Ar degite, Jesús, Cristoʼye-nugad, ¿igi an imakosunna? Bela abin-sogdemalad: —¡We-duledi be nakrusgi bioke!
MAT 27:23 Pilato dulemarga sogdebalid: —¿Ar degite, we-dulede ibu ibmar-isgana wede imaksasunna? Agi dulemar bur bule oimakdemalad, sogdemalad: —¡We-dule nakrusgi bioke!
MAT 27:24 Pilato dakdegu gwen igar nabolesuli, aka bur bule dulemar oimakbukwa, bormogi dii-susgua, na e-argan dulemar-wagab enukded, sogded: —Bemar we-dule-nued-oburgoed, anginsurdo, bemargindo.
MAT 27:25 Bela-dulemar abin-sogdemalad: —We-dule-oburgwilegoed anmargi naguoe, degi, anmar-mimmigangi nagumogoe.
MAT 27:26 Geb degi, Pilato, Barrabás-onossunnad. Pilato, Jesús-sabsur-bibyosad-sorba, nakrusgi Jesús-biokmalaga, suar-ibmalaga uksasunnad.
MAT 27:27 Degi, Pilato-e-suaribmala, Pilato-neg-Pretorioʼye-nugadse Jesús-sesmalad. Agi suar-ibmala, degi, e-sordamar bela-danagwenad, Jesús-ebilis ambikunonimalad.
MAT 27:28 Suar-ibmala Jesús-ibe mor-esusmargu, reymor-ginnid-yoedgiid Jesúsʼga yosmarsunnad.
MAT 27:29 E-nonogi iko-sobaled-gurgin ega sismarbalid, ega masargiid gaapoledyob e-argan-nuedgi ega uksamarbalid. Geb degine, Jesús-asabin yokorgi-sindigar sigisdamalad, yamo egi dodonaigusdamalad, ega sogdedamalad: —¡Be Judíoʼmar-E-Rey, suibaksaar be ani gudigusana gadin!
MAT 27:30 Suar-ibgan Jesúsʼgi wiaksadamarbalid, masargiid e-annik sudamalad, geb agi e-nonogi sarsodamarbalid.
MAT 27:31 Suar-ibgan Jesúsʼgi-dodosmalad-sorba, mor-ginnid ega esusmalad, gannar ega e-mor yosmalad. Geb degi, nakrusgi-biokmalaga Jesús-sesmarsunnad.
MAT 27:32 Roma-dulemar-suar-ibgan Jesús-nakrusgi-biokegala, Jerusalén-neggweburgi nodmargu, dule-wargwen-Cirene-neggweburgined Simónʼye-nugad dakarmalad. A-dule, Jesúsʼga nakrus-seega ise-barmiar imaksamalad.
MAT 27:33 Gólgotaʼye-neg-nugadse modapmalad. Gólgota sogleged, Dule-Nonogar-Negye.
MAT 27:34 A-negse modapmargu, suar-ibgan vino ina-gagbidbo-oburaledgi Jesús-ogobdemalad, adi, dog mer bar nunmaked itogegar. Ar Jesúsʼdi wis-itosgua, yapa abin-gobgusad.
MAT 27:35 Suar-ibgan Jesús-nakrusgi-bioksamargu, Jesús-morgi dodoarmalad, doa suoeddibeye. Wilubdakar Jesús-mor mimismarsunnad. Deyob gusad, adi, Bab-Dummad-gayaburba-barsoged-epenne-sogsadyob guegar, deun sogsagusgu: “An-mormar mimismarsunnad, degi, an-mor-suega, egi wilubdaknanai gusmalad.”
MAT 27:36 Degine, geb Jesúsʼgi-nakulemalaga suar-ibgan sigismalad.
MAT 27:37 E-nakrus-birgi narmaksamalad, sogega, ibiga Jesús burgwenai. Narmakaled weyob sognaid:
MAT 27:38 Geb degi, suar-ibgan dulemar-atursamalad-warbo nakrusgi bioksamarbalid. Wargwen, Jesús-argan-nuedsik ogwichisad, baiddi Jesús-argan-sapiledsik ogwichisbalid.
MAT 27:39 Dulemar-Jesús-dikarba-nasdamalad ise-dodoar egi nasdamalad, yamo ega nono-ege-ege-gunadap nasdamalad,
MAT 27:40 ega sogdedamalad: —Ar be Bab-Dummadse-goled-neg be earoye sogsad, degi, ibapaagi gannar sobbaloye be sogsad. Emigindi, na be dukin bendakdo. Ar be Bab-Dummad-Machile, nakrusgi-naid be aidedage.
MAT 27:41 Amba deyob, dule-irwa-Babse-gormalad-e-dummagan, Garda-Narmaked-Dulemar, Fariseoʼmar, degi, Judío-girmar-dummagan, amar bela Jesúsʼgi dododmarmogad, sogdemarmogad:
MAT 27:42 —We-Jesús, dule-baigandi nabir bendaksad, edi dukin geg na bendaked. Ar Jesús Israel-Dulemar-E-Reyle, nakrusgi-naid aidedadeen, geb agi anmar egi benguosulid.
MAT 27:43 We-dule Bab-Dummadgi-gwen-bengusurye-sogedde, Bab-Dummad nabir e-dakye-sogele, degite, Bab-Dummad e-bendakdado. ¿Ar na sogsasursi, ‘Ani an Bab-Dummad-Machiye?’
MAT 27:44 Amba deyob atursamalad-Jesúsʼba-nakrusgi-bioklegar-naimalad Jesúsʼgi-dodonanai gusmarmogad.
MAT 27:45 Dad yorukugusgu, bela we-napa-naidgi negasichid nagunonikid, wachi-irbaase naigusad.
MAT 27:46 Wachi-irbaa-gusgu, Jesús binnasur goted, sogded: —Elí, Elí, ¿lama sabactani? A sogleged: ‘¡An-Bab-Dummadye, an-Bab-Dummadye! ¿Ibiga be an-obacha?’
MAT 27:47 Abar Jesús-nakrus-walik-bukmalad Jesús-degi-soge-itosmargu, sogdemalad: —Wede Elíasʼse gornaid.
MAT 27:48 Degine, dule-wargwen, yoga-abarmakar naded, ibmar-buta-butad-susgua vino-gagbidgi owardikusad, geb suar-dukugi edichagu, wis gobega Jesúsʼga uksad.
MAT 27:49 Ar baigandi sogdemalad: —Mer ese achamar, dakmalo bule Elías odenonikodibe.
MAT 27:50 Geb Jesús gannar binnasur-gotebargu, agi yasuu naded.
MAT 27:51 Deyob-gunaidgine, Jerusalénʼgi, Bab-Dummadse-goled-neggi, Neg-Islidikid-irwa-mor-naid siir naded. Niba-akar urbalidse achirmakde gusad. Degine, napneg giglimakded, akwa-dummagan mamaridbalid.
MAT 27:52 Neg-uanmar argadbalid, bukidar-dule-gwage-swilidikmalad-burgwismalad durgudmalad.
MAT 27:53 Amar neg-uangi-mamaid ainidmalad. Wemala, Jesús-gannar-durgusad-sorba, geb Jerusalén-neggwebur-islidikidse dognonimalad. Dulemar-bukidarse magarosmalad.
MAT 27:54 Roma-suar-ibed-sordamar-dulatar-sediid (100), degine, e-sordamar, Jesús-edarbebukmalad, negabandur-nagusad-daksamargu, degi, bela ibmargusad-daksamargu, bela nue-dobe-ito nadmalad, sogdemalad: —We-dule, nue-Bab-Dummad-Machi-sunnadid.
MAT 27:55 Agi bukidar-omegan bannabasaar Jesús-dakbuk-gusmarmogad. Ar a-omegan Galilea-akar Jesúsʼba bipirmakdanimalad, ega ibmar-imakdii gusmalad.
MAT 27:56 A-omegan-abargi María-Magdalena gwichid, degi, María-gwichimogad. A-María, Santiago-e-nanad, degi, José e-nanad. Deginbali, Zebedeo-machimala-e-nan gwichi gusmogad.
MAT 27:57 Neg-sedodgu, mani-ibed-wargwen, Joséʼye-nugad nonikid. We-dulede Arimateaʼginedid, Jesús-e-sapinga gusmogad.
MAT 27:58 We-dule, Pilatoʼse nadegusad, Jesús-mui neg-uanse-dignaega egisdapid. Geb degi, Pilato, Joséʼga-Jesús-mui-ukmalaga igar uksad.
MAT 27:59 José, Jesús-mui-nakrusgi-naid-odesgu, atued-binidgi nue-obipirmaksad.
MAT 27:60 Geb degi, José na e-neg-uan-binidgi Jesús-mesisad. A-neg-uande akwa-imbaba nuesaale akwiargalad. Geb José neg-uan-doged-eduega egi akwa-dummad obaparmaksad. Geb agi nadsunnad.
MAT 27:61 José, Jesús-mui-dignaigu, María-Magdalena, baid Maríaʼye-nugbalid, neg-uan-asabin bukwa gusmarmogad.
MAT 27:62 Banedgine, Judíoʼmar-obunnoged-ibagine, dule-irwa-Bab-Dummadse-gormalad-e-dummagan, degi, Fariseoʼmar Pilatoʼse nonimalad,
MAT 27:63 ega sogdemalad: —Dummad, anmar insado, we-dule-yardakegwad amba dula gudigu, sogsagusad: ‘Ibapaagwad-sorba gannar an durguoye.’
MAT 27:64 Degisoggu, neg-uangi mer dule yogasaar-dogega ibapaa-wilub be igar mese. Ar abakalegi, e-sapingan mutik Jesús-mui atursanonimalale, geb dulemarga sokarmalale: ‘Burgwar-mamaimalad-abargi Jesús durgusye.’ Ar degiir, bur bule idualedba dulemar-yardakoed.
MAT 27:65 Geb degi, Pilato amarga sogded: —Nabir. Ar degiile, wegi-suar-ibmala-bukwad be neg-uanse sedmar. Na be-itogedba be imakmarsun.
MAT 27:66 Geb degi, amar neg-uanse nadmarsunnad. Dulemar mer neg-uan egamalaga, akwa-yawagakgi-siidgi Roma-saila-wilub nasiksamalad. Degine, neg-uan edarbemalaga, suar-ibmala ogwichismarbalid.
MAT 28:1 Obunnoged-iba-nasgu, itoged-iba-geb-naguded-oiboargu, María-Magdalena, degi, María-baid, neg-uan-dakega nonimalad.
MAT 28:2 Degi, negabandur-dummad nagunonikid, ar ade, Bab-Dummad-e-baliwitur-nibneggi-danikid, napnegse nonikid. A-baliwitur, akwa-dummad neg-uan-yawagak-idu-siid onirnonikid, geb a-akwa-birgi sigisad.
MAT 28:3 Baliwitur-e-dakleged mar-gaedyob dakleged, degine, e-mor ise-sibudik, dakuu daklebalid.
MAT 28:4 A-dobedbali, suar-ibmala wawanmakdemalad, burgwisayob nadmalad.
MAT 28:5 Ar baliwiturdi omeganga sogded: —Mer be dobgumar. Ar bemar Jesús-nakrusgi-bioklesgusad-amidanimalad an wisid.
MAT 28:6 Jesús wegi bar maisulid. Ar igi bemarga sogsagusa, deyob gusad. Jesús gannar durgusad. Be dakdamar, Dummad-Jesús-mai-gusad-e-gannar be dakmar.
MAT 28:7 Be gwae namar, e-sapinganga be sognamar: ‘Emi, Jesús burgwar-mamaid-abargi gannar durgusye. Bemar-idu Galilea-yarse nadmarye, agi be dakmaloye.’ Bato be wismarsoggu, be sognamarsun.
MAT 28:8 Degi, omegan neg-uangi-nodgu, Jesús-sapinganga Jesús-durgusye-sognamalaga, dobed-abargi, degi, nue-weligwar-itogedgi, abarmakdemalad.
MAT 28:9 Degine, omegan gayaburba-nued sognadmargu, egi Jesús noalid, ega sogded: “¡Na, degite!” Degi, omegan ese walikgunonimargu, e-mali angaagwar gasmalad, degi, Jesús-nug odummodmarsunnad.
MAT 28:10 Geb degi, Jesús amarga sogded: —Mer be dobgumar, be namar. An-gwenadmarga gayaburba-nued be sognamar, adi, Galilea-yarse namalagar, agi an-dakmalagar.
MAT 28:11 Ar omegan nadapmargu, suar-ibmala-abar, bela neg-uangi-ibmar-gusad dule-irwa-Babse-gormalad-e-dummaganga-sogega neggweburse nadmarmogad.
MAT 28:12 Dule-irwa-Babse-gormalad-e-dummagan, Judío-girmar-dummaganse gochamargu, igar itosmalad. Degi, Judío-dummagan, suar-ibmalaga mani-ichesur uksamalad.
MAT 28:13 Amarga sogsamalad: —Bemar sogo: ‘Anmar gabmamaigu, Jesús-sapingan mutikidba nonimarye, Jesús-mui atursasmarye.’
MAT 28:14 Ar Roma-dummad-negdakmaid degi-itoalile, anmar-ebo sunmakoed, mer be-oakalomalagar.
MAT 28:15 Suar-ibmala mani-susmargu, ar igi Judío-dummagan ega sogsamala, deyob imaksamalad. Ar deyob, Judíoʼmar-abargi we-gaya amba emi-ibase soglediid: “Suar-ibmala-gabmamaigu, Jesús-e-sapingan Jesús-mui atursasmarye.”
MAT 28:16 Jesús-e-sapingan-ambe-gakagwensak-guedi (11), Galileaʼse nadmalad. Bia Jesús ega sogsagusa, a-yar-mulluse be naoye, ase nadmarsunnad.
MAT 28:17 E-sapingan Jesús-dakarmargu, e-abin sindigar sigidmalad, e-nug odummodmalad. Amba gwenna-gwenna e-sapingan egi bengusmalad.
MAT 28:18 Jesús e-sapingan-walikgunonigu, amarga sogded: —We-napneggi-negdakega, degine, nibneggi-negdakega, Bab-Dummad bela gangued anga uksad.
MAT 28:19 Degisoggu, be namar, bela-dulemar-yar-baid-baidgi-bukwamalad an-sapinganga gued be imaknamar. Amar Bab-Dummad-nuggi, Bab-Dummad-Machi-nuggi, degi, Bab-Dummad-Burba-Isligwaled-nuggi, Bab-diigi-ogleged-igargi-oglegega, be imaknamar.
MAT 28:20 An bemar-odurdaksadba bela eba nue-nanamaloye be amar-odurdako. Napira an bemarga soged, an emi bemarba we-napneg-berguedse, bane-bane an gudiguoed. Be itogua.
MAR 1:1 Jesucristo, Bab-Dummad-Machi, egi-gayaburba-nued-sunmaklesad, weyobi onoded.
MAR 1:2 Igi Bab-Dummad-gayaburba-barsoged-Isaías-e-gardagi-narmakar-naiyob, ibmar gusad: “An be-iduale, anga-gayaburba-berbeged an barmided, we-dule, be-iduale bega igar-mayoed.”
MAR 1:3 “Dule-wargwen nega-dulesulidganba binnasur goled: ‘Dule-Dummad-idu igar-mayemar, igar-swilidik mesmar.’ ”
MAR 1:4 Weyobi Diigi-dule-oged-Juan nonikid, nega-dulesulidganba Bab-Dummad-diigi-ogleged-igar imaknonikid, degi, weyobi sunmaknonikid: “Bemar na be-isguedga ulubgi bukib binsamar, be-daed be ogwamar. Bab-Dummad be-isgued bega eliega, Bab-Dummad-diigi-ogleged-igar be imakmar.”
MAR 1:5 Bela Judea-yalaganbarmalad, degi, bela Jerusalén-neggweburginmalad, Diigi-dule-oged-Juanʼse nonidamalad. Na e-isgued dukin barsogsamalale, Juan, Jordán-diwargi, Bab-Dummad-diigi-ogleged-igar ega imakdaed.
MAR 1:6 Diigi-dule-oged-Juan moli-yargan-mureged-e-absar na morga imakdii gualid, degi, moli-uka e-molidubga imakdii guarbalid. Sese, degi, achanis e-masga imakdii gusbalid.
MAR 1:7 Juan weyob dulemarga sunmakdii gualid: “An-sorbali, dule-wargwen anba bur-gangued-nikad danikid. Amba an e-sapat-dubse-bakar, geg ei an esiked.
MAR 1:8 Andi Bab-Dummad-diigi-ogleged-igargi, unnila diigi an be-ogsamalad. Dule-an-sorba-danikiddi, Bab-Dummad-Burba-Isligwaledgi be-ogmaloed.”
MAR 1:9 A-ibagangi, Jesús Galilea-yargi, Nazaretʼye-neggwebur-nugadgi gudiid. Agi gudiidgi, Jordán-diwarse nadegusad. Geb a-diwargi Diigi-dule-oged-Juan Bab-Dummad-diigi-ogleged-igargi Jesús-ogsad.
MAR 1:10 Jesús diwargi nakwiargu, nibnega argad daksad, degine, Bab-Dummad-Burba-Isligwaled nuuyobi egi aidedani daksad.
MAR 1:11 Degidgine, nibneggi gayaburba gollalid, sogded: “Be, An-Machi-sabedid. An beba weligwar itoged.”
MAR 1:12 A-sorbali, Bab-Dummad-Burba-Isligwaled nega-dulesulidganba Jesús-sesa gusad.
MAR 1:13 Agi Jesús iba-dulabo (40) ibmar-durgan-abargi gudigusad. Agi nia-saila-Satanás Jesús-wilubdaknai gualid. Baliwiturmar Jesúsʼga ibmar-imaknai guarmalad.
MAR 1:14 Diigi-dule-oged-Juan-esgaryagi-metemalad-sorba, Jesús Galilea-yarse Bab-Dummad-e-negdakmaid-gayaburba-nuedgi sunmakega nonikid.
MAR 1:15 Jesús sogdii gualid: “Ibagandi nonisun, Bab-Dummad-e-negdakmaid anmarse warmaknonisun. Degisoggu, be-isgudiidga na be wile itomar, degi, Bab-Dummad-Gayaburba-Nued, bensulidgi be abingamar.”
MAR 1:16 Jesús Galilea-mata-dummad-gakaba-nadapgu, dakalid, Simón, degi, e-urba-Andrésʼbo, sakigi ua-ganai. Ar we-dulemarde, gusgu ua-gaedgi arbamaladid.
MAR 1:17 Jesús amarga sogded: “Anba be dagmar, igi bemar ua-gae, ayobi, dulemar-we-napneggi-bukwad-gaega an be-imakmaloed.”
MAR 1:18 Geb Simón, degi, Andrés, yog e-saki indakar imaksamalad, degi, Jesúsʼba nadmalad.
MAR 1:19 Jesús sikwas nadbargu, Zebedeo-machimala-Jacobo, degi, e-urba-Juanʼbo, urgi saki-matumakbukwa dakdapid.
MAR 1:20 Jesús amarse yog-gollar imaksad. Geb Jacobo, Juan-ebo, e-bab-Zebedeo, degi, ega-arbamalad urgi-obesa, Jesúsʼba nadmalad.
MAR 1:21 Jesús na e-sapinganmala, Capernaúm-neggweburse nonimalad. Obunnoged-iba-nagunonigu, Judíoʼmar-onmakednegse nadmalad. Agi Jesús Bab-Dummad-Igargi dulemar-odurdakdegusad.
MAR 1:22 Dulemar, Jesús-ibmar-odurdaked geger itomalad, ar ade, Garda-Narmaked-Dulemargii dulemar-odurdaksulid, nue-gangued-nika dulemar-odurdaked.
MAR 1:23 Ukiagwar Judíoʼmar-onmakedneggi dule-wargwen-niaburba-nikad-siid binnasur gollalid, sogded:
MAR 1:24 —Jesús-Nazaretʼgined, ¿ibiga be anmargi gwisgudaniki? ¿Be anmar-obelogega daniki? Ar an be-wisid, be doa-dule gue. Be, Bab-Dummad-E-Dule-Isligwaledid.
MAR 1:25 Geb Jesús niase uluded, ega sabsur ibmar sogded: —Mer be sunmak, dulegi-maid be noe.
MAR 1:26 Geb niaburba binnasur-dule-bindumake imaksad, degi, binnasur-gote dulegi noded.
MAR 1:27 Bela dulemar geger dakmalad. Degisoggu, na muchub-muchub sogdemarsunnad: “¿Wede igidbarsunna? ¿Odurdaked-binidi? Ar ade, nue-gangued-nika dulemar-odurdaked. Amba niaburbamargarse-bakar, igar-ukbalid, amar eba ibsamalad.”
MAR 1:28 Deyob ibmar-gusadba, bela Galilea-yalaganba, Jesús-nug dummarba gusad.
MAR 1:29 Judíoʼmar-onmakedneggi-noarmargua, Simón-negse nadmalad. A-neg, Andrés-negmogad. Jesúsʼba, Jacobo, degi, Juan, nadmalad.
MAR 1:30 Jesús Simón-negse-dogdapgua, ega sogsamalad, Simón-sakbundor ise-uellegar maiye.
MAR 1:31 Jesús, Simón-sakbundorse naded, argangi gadapid, degi, ogwichis imaksad. Agine, yog-nuguar naded. Geb Simón-sakbundor emarga yog-ibmar-imakar imakded.
MAR 1:32 Neg-sedodgu, bato dad-argwategua, dulemar Jesúsʼse bela uellemalad, degi, niaburba-nikamalad sesmalad.
MAR 1:33 Dulemar bukidar Simón-yawagak-naba ambikunonimalad.
MAR 1:34 Jesús bukidar dule-gegumalad nudaksad. Deginbali, bukidar dulemargi-niamar-mamaid onisbalid. Ar a-niamar e-abin-sunmakega gwen imaksasulid, ar amarde wismalad, we-Jesús doa-dule gue.
MAR 1:35 Bolegoedba, amba negsichi-sichigwa, Jesús gwisgusad. Neggweburgi-node, nega-dulesulidganba naded, agi Babse gorsigusad.
MAR 1:36 Simón-Pedro, degi, e-sordamar Jesús-amiarmalad.
MAR 1:37 Geb Jesús-amismargu, ega sogdemalad: —Bela dulemar be-amidimalad.
MAR 1:38 Jesús, e-sapinganga sogded: —Anmar neggwebur-bamalad-wegi-itaka-bukmaladse namala, ar amargi an Bab-Dummad-Igargi sunmakbalirgebed. Ar aga an we-napnegse nonikid.
MAR 1:39 Bela Galilea-yalaganba Jesús garmakdii gualid. Judíoʼmar-onmakednegmargi Bab-Dummad-Igargi sunmakdii, degi, dulemargi-niamar-mamaid-onidii gusad.
MAR 1:40 Dule-naibe-buna-yaa-maleged-nikad, Jesús-asabin yokorgi-sindigar-sii, egi wilenaigusad: —An wisi, sunna be an-nudaked, be an-nudakbier.
MAR 1:41 Jesús dule-wiledake, e-argangi dule-ebus imaksad. Geb ega sogded: —Nugubi an be-abeged. ¡Be nugusun!
MAR 1:42 Jesús deyob sogsagu, dule-naibe-buna-yaa-maleged-nikad yog-nuguar naded.
MAR 1:43 Jesús, dule-nugusadga sabsur-ibmar-sogsagu, yog-barmiar imaksad. Weyob ega sogsad:
MAR 1:44 —Be-nugusad mer dulemar-baiganga be sogo. Unnila dule-irwa-Bab-Dummadse-goledse be nae, adi, be-san-nugusad dakegar. Degine, Moisés-Igar-Mesisadba, Bab-Dummadga-ukega nuu-gwabo be sedbaloed. Deyobi, dulemar dakmaloed, be a-boni bar nikasurye.
MAR 1:45 Ar dule-nugusad nadgua, bela emarga sogded, igi Jesús e-nudaksa. A-ulale, Jesús geg-basursunna neggweburmargi doge gualid. Unnila dulemarsulidba besdasunnad. Ar degi-inigwele, bukidar dulemar-neggwebur-baidsik-baidsikmalad Jesúsʼse nonidamalad.
MAR 2:1 A-undarad-sorbali, Jesús gannar Capernaúmʼse nonikid. Dulemar wisguarmargu Jesús neggi maiye,
MAR 2:2 dule-bukidar ese noni gusmalad. Degisoggu, yawagak-nagase-bakale, bela ena sigisad. Agi Jesús, Bab-Dummad-gayaburbagi dulemarga sunmaksii gusad.
MAR 2:3 Geb degine, dule-walabake e-ai-abagan-burgwar-nikad, gabedgi-mai Jesúsʼse senonimalad.
MAR 2:4 Ar dule-bukidar neg-ena siisoggu, Jesúsʼse geg-warmak guarmalad. Degisoggu, neg-birgi nakwismalad, geb bia Jesús-siid-innik uas egasmalad. Geb abali, Jesús-innik dule-gegumaid gabedgi-mai odesmalad.
MAR 2:5 Jesús dulemar egi gwen-bensulid-nika dakdegu, dule-gegumaidga sogded: —Machi, be-isgumalad bega elilessun.
MAR 2:6 Agi gwenna-gwenna Garda-Narmaked-Dulemar bukwamalad. Amar na binsabukwad:
MAR 2:7 “¿Ibiga we-dule degi-soge? Bab-Dummadgi dodonaid. ¿Unnila Bab-Dummadbi sunna dulega isgued elisursi?”
MAR 2:8 Ar Jesúsʼdi sunna ulubgi dulemar-binsaed mag-daksoggu, amarga sogded: —¿Ibiga be deyob binsabukmala?
MAR 2:9 An dule-bonigwaledga sogdibe: ‘¡Be-isgunaid an bega osulos!’ Ar igi, an sogbarsundibe: ‘¡Be nugu, be gwisgu, be nae, be-egi-gabed na be sede!’ Degite, ¿igid bur baisursunna imaklesunna? Suli, ebobela baisursunna imaklesuli.
MAR 2:10 An bemarga oyomaloed, ani Dule-Machi, we-napneggine gangued-nikad dulemarga e-isgued elied. Geb Jesús dule-abagan-burgwar-nikadga sogded:
MAR 2:11 —Be gwisgu, be-egi-gabed be sue, be-negse be nae.
MAR 2:12 Dule-bonigwaled gwisgusad, yog na-egi-gabed suar imaksad, geb bela dulemar-wagab ganna-ganna naded. Dulemar geger dakdemalad, geb Bab-Dummad-nug odummodmalad, sogdemalad: —Wegiid-ibmar anmar gwen dakdisulid.
MAR 2:13 Jesús gannar Galilea-mata-dummad-gakaba nadegusad. Dule-bukidar eba nadmarmogad. Geb agi Jesús, Bab-Dummad-igargi emar-odurdakded.
MAR 2:14 Jesús nadapgu, Alfeo-machi-Leví, Roma-dummadga-mani-galeged-neggi mani-gasii dakalid. Geb ega sogded: —Anba be dage. Leví gwisgusgu, Jesúsʼba naded.
MAR 2:15 Jesús, na e-sapinganmala Leví-neggi mas-gunsigu, dule-Roma-dummadga-mani-gaedgi-arbamalad, degi, dule-baigan-galagwensuli-isgudimalad eba mas-gunsii gusmarmogad, ar ade, dulemar-bukidar Jesúsʼba gudidimalad.
MAR 2:16 Garda-narmaked-dulemar, degi, Fariseoʼmar, Jesús dule-isganamarbo mas-gunsii dakarmargu, Jesús-e-sapinganse egichiarmalad: —¿Ibiga be-odurdaked-saila dulemar-Roma-dummadga-mani-gaedgi-arbamaladbo, degi, dule-baigan-isgudimaladbo mas gunne?
MAR 2:17 Weyob soge itosgua, Jesús Fariseoʼmarga sogded: —Dulemar-gegusurmalad ina-duled abesulid, unnila dulemar-gegumaladbi ina-duled abemalad. An we-napnegse dulemar-nueganse-golega an nonisulid, an nonikid, dulemar-isgudimaladse golegar.
MAR 2:18 Ibagwengine, Juan-e-sapingan, degi, Fariseoʼmar-e-sapingan Bab-Dummadse-golega mas-gunsuli gudimalad. Dulemar deyob dakarmargua, Jesúsʼse egisnonimalad: —Juan-sapingan, degi, Fariseoʼmar-sapingan, Bab-Dummadse-golega mas-gunsuli gudimalad. ¿Ibiga be-sapingandi, Bab-Dummadse-golega mas-gunsuli geg-gudii gue?
MAR 2:19 Jesús, abin-sogded: —¿Ar dulemar ome-nikued-ibase mas-gunnega nonikile, dule-ome-nikuoed e-abargi-siile, sunna mas-gunsuli gumalo be insae? Dule-ome-nikunaid e-abargi-siile, dulemar geg mas-gunsuli gumalad.
MAR 2:20 Ar ibagan nonikoed, dule-ome-nikunaid e-idu seledoed. A-ibagindi, Bab-Dummadse-golega mas-gunsuli gudigumaloed.
MAR 2:21 ”Dule morgoa-binid mor-seredgi matuga-nasikega gwen imakdisulid. Degiir, morgoa-binid sinnii nadele, mor-sered aka bur bule achirmakdo-itole.
MAR 2:22 ”Deginbali, dule vino-binid gwen ibmar-uka-bugluga-sobaled-seredgi bardisurbalid. Ar deyob imakele, vino-binid mudele, buglu-sered esirmako-itole. Degiir, binsa vino-binid milego-itole, degi, bugluse-bakar binsa miledbaloed. A-ulale, vino-binid buglu-binidgi balileged.”
MAR 2:23 Ibagwengine, obunnoged-ibagi, Jesús orosgi-dakleged-digaled-imbaba nadapgu, e-sapingan ibmar-digaled gwane-gwane imakdemalad.
MAR 2:24 Geb Fariseoʼmar, Jesúsʼse egisdemalad: —Be dakena, ¿ibiga be-sapingan igar-maisulidba obunnoged-ibagi ibmar-gwag gwane-gwane imaknadapmala?
MAR 2:25 Jesús, abin-sogded: —¿Bemar Bab-Dummad-Gardagi absodisurmarsi, igi David na e-sordaganmala ibmar-abeargu, degi, ukumecharmargu, imaksamala?
MAR 2:26 David Bab-Dummadse-goled-negse dogsad, deun Abiatar dule-irwa-Bab-Dummadse-gormalad-e-dummadga-maid. Agi, madu-Bab-Dummadgad-gued guchad. Unnila we-madu dule-irwa-Bab-Dummadse-gormaladbi gunnoye igar maid. E-sordaganga we-madu uksamogad.
MAR 2:27 Sogdebalid: —Obunnoged-iba dulega nasiklesad, dule obunnoged-ibaga obinnilessulid.
MAR 2:28 Degisoggu, ani Dule-Machi, obunnoged-iba-e-Dummadbalid.
MAR 3:1 Ibagwengine, Jesús gannar Judíoʼmar-onmakedneggi dognonibalid. Agine, dule-wargwen argan-burgwar-nikad siid.
MAR 3:2 Dulemar Jesús-argabukwa gusmalad, dakega, Jesúsʼde, obunnoged-ibagi dule-nudakodibeye, adi, egi sunmakmalaga, obunnoged-igar-maidgi annadiiye.
MAR 3:3 Geb Jesús dule-argan-burgwaledga sogded: —Dage, be abarse gwisguda.
MAR 3:4 Geb Jesús agi dulemar-bukwadga sogded: —¿Wede igar-nuedi obunnoged-ibagi ibmar-nued-imaked, igi, ibmar-isgana-imakeddibe? ¿Igid bur-nabiri, dule-odurguedi, dule-oburgwedi? Dulemar gwen abin-imaksasulid, bela boo ambikusmalad.
MAR 3:5 Jesús sae-itogedgi dulemar-dakded, dulemar gwage-dutusur-nikadba, ulubgi nue bukib-itoge dule-argan-burgwaledga sogded: —Be-argan onak. Dule e-argan-onakgwidgu, e-argan yog nuguar naded.
MAR 3:6 Fariseoʼmar Judíoʼmar-onmakedneggi-sii nodmalad, geb Herodes-sordamar-ebo igar-aminanai guarmalad, igi-saele Jesús-oburgwemalodibeye.
MAR 3:7 Jesús na e-sapinganmala mata-dummad-gakase nade gusad. Bukidar Galilea-dorgan eba nade gusmogad.
MAR 3:8 Dulemar Jesús-ibmar-dummagan-imakdiid-wisguarmargu, bukidar Judeaʼginmalad, Jerusalénʼginmalad, Idumea-dorgan, Jordán-diwar-gakabarmalad, Tiro-yarginmalad, degi, Sidón-neggweburginmalad Jesúsʼse nonimarmogad.
MAR 3:9 Geb degine, Jesús e-sapinganga sogded, ega ur guakwaa nasikmaloye, adi, dulemar mer e-barmesnanai gumalagar.
MAR 3:10 Ar Jesús dule-bukidar nudaksasoggu, bela dule-uellemalad Jesús-ebugega egi megnanaid.
MAR 3:11 Deginbali, burba-isganamar, Jesús-dakalile, e-asabin sindigar yokorgi sigisdamalad, geb binnasur gotedamalad: “¡Be, Bab-Dummad-Machi-sunnadid!”
MAR 3:12 Jesúsʼdi niaburbamarga sabsur-sogsad, mer dulemarga sogoye, ede doa-dule gue.
MAR 3:13 A-sorbali, Jesús yar-birse naded. Doamar ese dagbi abesa, amarse gochad. Geb amar ese nonimalad.
MAR 3:14 Agine, Jesús e-ambe-gakabo (12) susad, adi, eba gudii imakmalaga, degi, Bab-Dummad-gayaburba-barsogega barmidegarba. Geb amar-onugsasad, e-nuggi-barmilenanaidye.
MAR 3:15 Amarga Jesús gangued uksad, adi, dulemargi-niamar-mamaid oniegar.
MAR 3:16 Jesús e-ambe-gakabo-susad (12), wemardo: Simón, a Pedroʼye onugsasbalid.
MAR 3:17 Zebedeo-machimala Jacobo, degi, e-urba-Juan. Jesús amar-onugsasad Boanergesʼye. A sogleged: Mar-goled-machimalaye.
MAR 3:18 Andrés, Felipe, Bartolomé, Mateo, Tomás, degi, Alfeo-machi-Jacobo, aginbali, Tadeo, Simón Cananeo-dule,
MAR 3:19 degi, Judas-Iscariote, darba-Jesús-uksad-dule.
MAR 3:20 A-sorba, Jesús na e-sapinganmala negse dognonimalad. Gannar dulemar-bukidar ese ambikunonimalad, degisoggu, geg mas-gunne guarmalad.
MAR 3:21 E-gwenadgan wisguarmargu, Jesús-sedega armalad, ar ade, sogmalad: “Wis dargwen-itoye.”
MAR 3:22 Garda-Narmaked-Dulemar-Jerusalénʼgi-danimalad, sogdemalad: “Jesúsʼgi nia-saila-Beelzebú naiye. Nia-saila-gangued-nikadba niamar-oniye.”
MAR 3:23 Geb Jesús, Garda-Narmaked-Dulemarse gochad, geb burbar amarga sunmakded: “¿Igi nia-saila-Satanás na e-sordamar sunna onogo be insae?
MAR 3:24 Ar neggwebur-gwensakgi e-dulemar na egi dukin-dukin aibitemalale, we-neggwebur bergudeled.
MAR 3:25 Ar dulemar-na-negyagi-gudimalad, na egi dukin-dukin aibitemalale, we-negyaur bergudeled.
MAR 3:26 Debayobi, nia-saila-Satanás na dukin e-sordamargi aibitele, e-negdakmaid bergudoed.
MAR 3:27 ”Ar dule-wargwen dule-dutusulid-e-neggi dogbiele, degi, e-ibe-ibmar-atursabiele, gebedgi a-dule-edingwelergebed. Deyobi, geb sunna e-ibe-ibmar atursaoed.
MAR 3:28 ”Napira an bemarga soged, bela isgumalad, degi, galagwensuli Bab-Dummadgi-dodoar-sunmaked, Bab-Dummad dulemarga elioed.
MAR 3:29 Ar doa-dule Bab-Dummad-Burba-Isligwaledgi galagwensuli dodoar-sunmaksardi, Bab-Dummad a-dulega we-isgued eliosulid. Ar a-isgued egi-nai degisadeguoed.”
MAR 3:30 Ar ade, Jesúsʼnik sogmalad: “Jesús niaburba nikaye.”
MAR 3:31 Degidgine, Jesús e-nan, degi, Jesús-urbamar nonimalad. Neg-magaba gwisgunonimalad, geb dule-wargwen Jesúsʼse-gornaega barmismalad.
MAR 3:32 Dulemar-Jesús-dikarba-bukmalad, Jesúsʼga sogdemalad: —Be-nan, degi, be-urbamar magaba be-edarbebukmalad.
MAR 3:33 Jesús, abin-sogded: —¿Doamar an-nana, degi, an-urbamala?
MAR 3:34 Geb Jesús dulemar-e-dikarba-bukwad-dakdegu, sogded: —Wegi an-nan, degi, an-urbamar bukmala.
MAR 3:35 Ar doa-dule Bab-Dummad-sogedba-ibmar-imaked, a-dule, an-urbad, an-bunad, degi, an-nanad.
MAR 4:1 Jesús gannar Galilea-mata-dummad-gaka-naba-sii emar-odurdakdebalid. Dulemar-bukidar ese ambikunonisoggu, Jesús ur-naidgi nakwisad. Dulemardi, gakagi ambikusmalad.
MAR 4:2 Geb degine, Jesús urgi sii, bukidar ibmar-burbamaladgi dulemar-odurdakded. Ega sogded:
MAR 4:3 “Bemar nue itomar: Ibagwengine, dule-wargwen-ibmar-gwag-digedi ibmar-gwag dignaded.
MAR 4:4 Digega ibmar-gwag-bikin-midgua, abar ibmar-gwag igargi babatidapid. Sikwimar nonigua, a-ibmar-gwag guchad.
MAR 4:5 Abar akwa-yaisulidgi, napa-asginegwadgi babatismalad. Agi gwae-gwae ibmar-gwag ainialid, ar ade, napa-asginegwad.
MAR 4:6 Ar dad gaargudii, ibmar-gwag gummakded, ar e-maligan asgin-nikasoggu, dinguded.
MAR 4:7 Baid-ibmar-gwag iko-abargi babatisad. Ikomar dungudgua, bur bule ibmar-gwag-birgi obited, degisoggu, ibmar-gwag gwen sanmaksasulid.
MAR 4:8 Bamalad-ibmar-gwagdi, napa-nuedgi babatisad. Ainided, dunguded, geb nue sanmaksad. Gwenna-gwenna akusaar sanmaksad, abala bur-nuegwad sanmaksad, baigandi bur bule sanmaksad.”
MAR 4:9 Jesús sogdebalid: “Bemar mag nue-itobiele, nue-itomar.”
MAR 4:10 Sorbali, Jesús walagwen besgua, e-sapingan-e-ambe-gakabogwad (12), degi, dulemar-e-walik-bukmalad, Jesúsʼse egichiarmalad, burbar-sunmakleged wede, ibi obarye.
MAR 4:11 Jesús, abin-sogded: “Ar bemargardi, Bab-Dummad-e-negdakmaid-igar-burbar-mamaid osanolesad. Ar dulemar-baigangardi, unnila burbale an odurdaked,
MAR 4:12 adi, dulemar ise-dakar imakmar-inigwele, mer mag dakmalaga, degi, ise-itogar-imakmar-inigwele, mer mag itomalaga, adi, mer Bab-Dummadse gannar namalaga, degi, Bab-Dummad mer e-isgued ega eliegar.”
MAR 4:13 Jesús e-sapinganga sogdebalid: “Burbar an ibmar-sogsad, ¿bemar aku-itomala? Degite, ¿igi bemar ibmar-baigan-burbaled magar itomalosunna?
MAR 4:14 ”Dule-ibmar-gwag-digedi, dule-Bab-Dummad-gayaburbagi-sunmaked-e-wilub gued.
MAR 4:15 ”Abar-dulemar ibmar-gwag-igarba-babatismaladyob gued. Amar Bab-Dummad-gayaburba itosmalad. Itosad-sorbali, nia-saila-Satanás danidaed. Geb e-gwagegi Bab-Dummad-Gayaburba-Nued-diglesad ei ungenonidaed.
MAR 4:16 ”Bamalad ibmar-gwag-akwa-yaisulidgi-babatismaladyob gued. Amar Bab-Dummad-gayaburba itomalad, degi, nue-weligwaledgi abingamalad.
MAR 4:17 Ar wemar unnila asginbi Bab-Dummad-abingasmarsoggu, unnila sikwas Bab-Dummadba nagumalad. Ar Bab-Dummad-gayaburba-ular-wilearmargu, degi, dulemar sabsur-e-imakarmargu, Bab-Dummadgi bangudmalad.
MAR 4:18 ”Bamalad ibmar-gwag-iko-imbaba-babatismaladyob gued. Amar Bab-Dummad-gayaburba itosmalad.
MAR 4:19 Ar we-napneggi ibmarba bukib-binsaed, maniginbi bur binsaed, degi, bela-ibmar-nikubied, e-gwagegi dognonigu, Bab-Dummad-gayaburba-e-gwagegi-naid iedmarsunnad. Degisoggu, amar ibmar-gwag-gwen-sanmaksasulidyob gunonisunnad.
MAR 4:20 ”Ar bamaladdi ibmar-gwag-napa-nuedgi-babatismaladyob gued. Amar Bab-Dummad-gayaburba itosmalad, e-gwagegi nue-abingasmalad. Degisoggu, amar ibmar-gwag napa-nuedgi diglesadyob gued. Gwenna-gwenna akusaar sanmaksad, abala bur-nuegwad sanmaksad, deginbali, baigandi bur-napiragwad sanmaksad.”
MAR 4:21 A-sorbali, Jesús sogdebalid: “¿Ar gwallu mese-urba-siega, igi, gabed-urba-siegardibe ogalesi? Suli, gwallu neg-mee-saega niba sileged.
MAR 4:22 Deyobi, ibmar bipisaale gwen dukuosurguoed. Deginbali, ibmar-dukuar-imakleged bela wisgulegedsegad.
MAR 4:23 Bemar mag nue-itobiele, nue-itomar.”
MAR 4:24 Jesús sogdebalid: “Nue itomalo, ar igi bemar dulemarga ibmar-mergu-uke, deyobi Bab-Dummad bemarga ibmar-mergu ukmogoed, degi, bur bule-mergu bemarga ukbaloed.
MAR 4:25 Ar dule-ibmar-nikadga, aka bur bule ega ibmar uklebaloed. Ar dule-ibmar-sateddina, amba wis-bipi-ibmar-nikadse-bakale, e-ibe sulegoed.”
MAR 4:26 Jesús sogdebalid: “Bab-Dummad-e-negdakmaid weyobid, dule-gwensak ibmar-gwag napagi digedyobid.
MAR 4:27 Baisulid, we-dule gabmaidibe, atakdidibe, mutikidbadibe, neg-ibginedbadibe, gusgu ibmar-gwag na e-itolegedba ainied. We-dule aku-itoged ibiga nabir ibmar-gwag dunguar dae.
MAR 4:28 Ar napade, ibmar-gwag nabir dunguega imaked. Gebesaila, e-gagan-inse aramakdagoed, a-sorba, durbamakdagoed, geb agine, sanmakdagoed.
MAR 4:29 Geb ibmar-gwag nue goresale, geb weledagoed, ar ade weleged-ibagan warmaksad.”
MAR 4:30 Jesús sogdebalid: “¿Bab-Dummad-e-negdakmaid ibiyob gue? Anmar egi sunmakega, ¿Ibu burbar-sunmakleged anmar sunna ebusale?
MAR 4:31 ”Bab-Dummad-e-negdakmaid, ar mostaza-e-gwag-napagi-diglesayob gued. Ar mostaza-e-gwag bur ibmar-gwag-bamaladba bipii gue-inigwele,
MAR 4:32 ar dunguderdi, ibmar-dubaled-masga-gued-birgi bur dumma naddaed. E-anagan-dummagan nikuddaed, degisoggu, sunna sikwimar e-anagan-urba, negsichigwadgi obunnomalad.”
MAR 4:33 Dulemar-magar-e-itogedse, weyobi Jesús burbar-sunmakale, Bab-gayaburbagi dulemar-odurdakdaed.
MAR 4:34 Jesús dulemar-odurdakdele, burbar-sunmaksuli geg dulemar-odurdakdaed. Ar e-sapingangardi bachikii bela ega osanalodaed.
MAR 4:35 A-ibagi, neg-sedodgusgu, Jesús e-sapinganga sogded: —Anmar mata-dummad-abin-obakar namala.
MAR 4:36 Geb dulemar-idu nadmalad, degi, Jesús-urgi-siidgi e-sapingan eba nadmalad. Dule-baigan ur-baidgangi eba nadmarmogad.
MAR 4:37 Geb degine, mataba egi burwa-dummad noalid. Burwa binnasursoggu, demar-arwedba ur dogedgualid.
MAR 4:38 Jesúsʼdi ursorba nono-onakwed-birgi nono-onakwiis gabmaid. Degisoggu, e-sapingan Jesús-odaksamalad, ega sogdemalad: —Odurdaked-saila, ¿baisur be anmar-dake anmar burgwisar?
MAR 4:39 Geb Jesús gwisgusgu, burwaga sabsur ibmar sogsad, degi, demarga sogded: “Be bogidik gue.” Geb burwa bogidik naded, bela neg bogidik sigisad.
MAR 4:40 Geb Jesús e-sapinganga sogded: —¿Ibiga bemar yaisur dobgue? ¿Ar bemar amba Bab-Dummad-benmala?
MAR 4:41 Jesús-e-sapingan bela nue-dobe itodmalad, degi, na muchub-muchub sognanai guarmalad: —¿Wede doa-dulesunna, burwase-bakar, degi, demarse-bakar, eba ibsamargu?
MAR 5:1 Jesús na e-sapinganmala mata-dummad-gaka-obakar Gadaraʼye-neg-nugadse modapmalad.
MAR 5:2 Jesús urgi-aidedgu, dule-gwensak-niaburba-nikad, neg-uan-imbaba e-abin noalid.
MAR 5:3 A-dule neg-uangi gudiid. Dule geg gaed, esgoro-dubginbela geg edillebalid.
MAR 5:4 Bukidargus esgoro-dubgi e-nag, degi, e-argan edindanigusmalanad, degi-inigwele, esgoro-dub iid-iid imakdaed. Gaega, dule gangued nikasulid.
MAR 5:5 Dule-niaburba-nikad mutikidba, ibginedba, yala-imbaganba, neg-uan-imbaba binnasur gordii, degi, na dukin akwagi sarsodii daed.
MAR 5:6 Bannaba-Jesús-daksagua, abarmakalid, Jesús-asabin yokorgi-sindigar signonikid.
MAR 5:7 Geb binnasur-gote, Jesúsʼga sogded: —Jesús-Bab-Dummad-Bur-Birigined-Machi. ¡Mer be ibgwensur an-sao! Bab-Dummad-nuggi mer be ise-mesagwar an-imake.
MAR 5:8 Ar ade, Jesús weyob niaburbaga sogdegusad: “Niaburba, dulegi-be-maid be noe.”
MAR 5:9 Jesús a-dulese egichialid: —¿Igi be nuga? Dule, abin-sogded: —Bukidaradye an nuga, ar ade, anmar niamar-ichesulid.
MAR 5:10 Niamar Jesúsʼgi gannar-gannar wilenai gusad, mer be dikasur anmar-barmidye.
MAR 5:11 Deunni, sinmar-bukidar yar-naba mas-mananaid.
MAR 5:12 Niaburbamar Jesúsʼgi wilenaigusad, ega sogdemalad: —Anmar, sinmargi-ubogega, sinmar-bukwadse be anmar-barmide.
MAR 5:13 Degisoggu, Jesús, sinmar-bukwadse niaburbamar-barmisad. Niaburbamar dulegi-nodmargua, sinmargi ubodapid. Sinmar-milibo-yar-wereged-naba-bukwadi (2,000), mata-dummadse babatidapid, bela sinmar gundilegar burgwismalad.
MAR 5:14 Sin-edarbemalad dobguar duurmakdemalad. Neggweburgi, degi, sapurba-negmar-bubukwadgi, bela ibmar-gusad sogdapmalad. Geb dulemar degi-neggusad daknadmarsunnad.
MAR 5:15 Jesúsʼse nonimargua, dakarmalad, dule-nia-bukidar-nika-gudidaed sii. Mor-yoi, degi, nugus-sii dakarmalad. Dulemar dobe itodmalad.
MAR 5:16 Dulemar-we-ibmar-daksamalad, dulemar-daksasurmaladga sogsamalad, dule-nia-nika-gudigusad igi nugusa, degi, igi sinmar mata-dummadse bela babatisbali.
MAR 5:17 Geb Gadara-dulemar Jesúsʼgi wilenaigusad, we-yargi-be-gudiid be naye.
MAR 5:18 Jesús urgi nainagu, dule-nia-nika-gudigusad, Jesúsʼba-naega Jesúsʼgi wilenaigusad.
MAR 5:19 Jesús eba-dagega imaksasulid, ega sogded: —Be-negse, be-gwenadganse be nae, Bab-Dummad bela bega ibmar-imaksad be sogna, degi, igi nue-wile be-daksabali be sogbalo.
MAR 5:20 Degisoggu, dule-niaburba-nika-gudigusad nadsunnad. Geb Decápolis-yargi-neggweburmar-bukwadgi igi-Jesús e-nudaksagusa, sogdii gualid. Bela dulemar geger dakmalad.
MAR 5:21 Jesús gannar urgi mata-dummad-gaka-baidse obaksabargu, a-mata-gaka-naba besad, ar ade, dulemar-bukidar e-dikarba bukunonimalad.
MAR 5:22 Geb degine, Judíoʼmar-onmakedneg-daked-e-dummad-wargwen, Jairoʼye-nugad, Jesúsʼse nonikid. Jesús-dakargu, yokorgi sindigar Jesús-asabin signonikid.
MAR 5:23 Jesúsʼgi nue-wilenaigusad, ega sogded: —An-bunagwa burgwedani maid. Anba be dage, be-argan egi be mesdage, adi, nuguegar, degi, mer burgwegar.
MAR 5:24 Jesús Jairoʼba nadegusad. Dule-bukidar eba nadmarmogad, ali-ali Jesúsʼgi yolenanai guarmalad.
MAR 5:25 Dulemar-nadapmalad-abargi ome-gwensak birgambe-gakabogus (12) boni-nalur-nika-gudiid nadap gusmogad.
MAR 5:26 A-ome, ina-duleganse nue-san-odurdakledii gusad. Aisaar nuguoeyob, bela mani-nikad binsa inadurgangi misgusad. Aka bur bule ega bonigan burgumai gualid.
MAR 5:27 Ome-boni-nikad Jesúsʼgi sunmakmar-itoargu, emar-abargi, Jesús-yarganba nonikid, degi, e-ibe e-mordummad ebusad.
MAR 5:28 Ar ome binsaed: “Unnila an e-mordukubi wis-ebusale, an yog-nuguar naoed.”
MAR 5:29 Ome Jesús-e-morduku-ebusgu, yog-nuguar naded. Geb ome na magasaila itosad, ede nugusa.
MAR 5:30 Jesús magar itosmogad egi gangued node, degisoggu, dulemarsik yog-aibiris imaksad, geb egisded: —¿Doa an-mor ebusa?
MAR 5:31 E-sapingan, abin-sogded: —Be dake, dule-bukidar ali-ali begi yolenanaid, degite, be egisde, ¿doa an ebusye?
MAR 5:32 Jesús nue-nuu e-dikarba-bukmalad-dakdegu, aminagusad, doa e-ebusa.
MAR 5:33 Ome e-san-nugusad mag itossoggu, dobe-itogedba ise-wawanmakar Jesús-asabin yokorgi sindigar signonikid. Geb Jesúsʼga bela napiragwadgi ibmar sogsad.
MAR 5:34 Jesús omega sogded: —Bunor, ar be Bab-Dummadgi bengussursoggu, be nugussun. Be gwage-bogidikidgi nae, degi, be-bonigan bela bei bergussun.
MAR 5:35 Jesús amba sunmakgwichidgine, dulemar Judíoʼmar-onmakedneg-daked-e-dummad-Jairo-neggi-danimalad, Jairoʼga sognonimalad: —Be-bunolo burgwisa, ¿ibiga bar be odurdaked-sailagi wilenai?
MAR 5:36 Jesús deyob-dulemar-soge itosgu, Judíoʼmar-onmakedneg-daked-e-dummad-Jairoʼga sogded: —Mer be bukib-binsae, unnila mer be bengue.
MAR 5:37 Jesús, dule-bamalad eba-naed imaksasulid. Unnila Pedro, Jacobo, degi, Jacobo-urba-Juan, amarbi eba-naed imaksad.
MAR 5:38 Jairo-negse modapmargu, Jesús dulemar-dakdapid bela oimakbukwa, bobukwa, degi, binnasur gorbukwa.
MAR 5:39 Jesús negyaba dogdegu, amarga sogded: —¿Ibiga bemar oimakbukwa, degi, bobukwa? Bunolo burgwar maisulid, unnila gabmaid.
MAR 5:40 Jesús-deyob-soge-itosmargu, dulemar bela egi dododmalad. Geb Jesús bela dulemar-bukwad-oniega imaksad. Geb bia bunolo maidse, unnila bunolo-e-bab, e-nan, degi, eba-nadapmaladbi dogega imaksad.
MAR 5:41 Jesús, argangi bunolo-gasgu, Arameo-e-gayaba bunologa sogded: —¡Talita-cumi! A sogleged: “Bunolo an bega soge, be gwisgu.”
MAR 5:42 Jesús weyob ega sogsagu, bunolo birgambe-gakabo-nikad (12) yog-gwisguar imaksad, geb yog nanaaled. Dulemar bunolo-durgus-daksagu, geger dakmalad.
MAR 5:43 Jesús dulemar-bukwadga ise-binnasur sogsad, mer bipisaale dulemar-baiganga bunolo-durgusad sogmaloye. Geb masgi bunolo-ogunmalaga imaksad.
MAR 6:1 Jesús na e-sapinganmala Capernaúmʼgi-gudii e-neggwebur-Nazaretʼse naded.
MAR 6:2 Obunnoged-iba nonigua, Jesús Judíoʼmar-onmakedneggi dulemar-odurdakded. Dulemar-bukidar Jesús-ibmar-odurdaked-itobukmalad geger-itomaladba egichiarmalad: —¿Wede bia ibmar-durdaksa? ¿Ibiga nabir binsaed-nikarba sunmake? ¿Ibiga nabir ibmar-dakledisurmalad imakbali?
MAR 6:3 ¿Ar wede urgogi-ibmar-sobed-dulesursi? ¿María-machisursi? ¿Santiago, José, Judas, degi, Simón, amarde e-urbamarsursi? ¿E-bunmarde anmar-abargi gudimarsursi? Degisoggu, suli-suli-itoge oes-bukusmalad.
MAR 6:4 A-ulale, Jesús dulemarga sogded: —Bab-Dummad-gayaburba-barsoged bela neggwebur-baigangi bina nue-sogdamalad. Ar e-neggweburginmaladdi, e-gwenadgandi, degi, e-neg-yaginmaladdi baisur dakdamalad.
MAR 6:5 Aga Jesús agi ibmar-dakledisurmalad gwen imaksasulid. Dule-gegumaladgi e-argan mesisgu, unnila wis ichee nudaksad.
MAR 6:6 Jesúsʼdi geger-itoged, ar ibiyobi na e-neggweburginmalad amba e-benmala. 3c. Jesús sogsad, ede, Mesías, Dule-Wargwen-Barmiledagoye soglesadye (6:7–8:30) Jesús neggwebur-iliba Bab-Dummad-Gayaburbagi dulemar-odurdakdii gusad.
MAR 6:7 Jesús e-sapingan-ambe-gakabogwadse (12) gochad. Geb ebo-ebo barminai gusad. Dulemargi-niamar-mamaid-oniega, ega gangued uksad.
MAR 6:8 Amarga igar uksad: “Be nasokalidba mer ibmar, sagu, madu, degi, manise-bakar, be sedmalo. Unnila gaapoledbi be sedmalo.
MAR 6:9 Nag-uka be yoi namalo, mer mor-ogwaed sedmalo.”
MAR 6:10 Jesús e-sapinganga sogdebalid: “Ar bemar neg-gwagwense dogdapile, a-neggweburgi-gannar-noedse, a-negginbi bemar obunnomaloed.
MAR 6:11 ”Ar ibi-neggwebur nuedgi bemar-abingasurmardibe, degi, bemar-itosurmarbardibe, a-neggweburgi bemar nodele, be-naggi olli-nanaid be nue eli-eli saoed, adi, dulemarga oyogega, emarde Bab-Dummad-dulamar-guega abingalessurmarye. ”Napira an bemarga soged, Bab-Dummad-igar-nabirogoed-ibagi, we-neggweburginmalad-be-abingassurmalad, Sodomaʼginmaladba, degi, Gomorraʼginmaladba bur bule sabsur odurdaklemaloed.”
MAR 6:12 Jesús-sapingan nadmargu, dulemarga sogdemalad, be-isguedga na be bukib itomar, be-daed be ogwamar.
MAR 6:13 Deginbali, niamar-bukidar onismarbalid, degi, olivo-gwallugi dule-gegumalad-bukidar mage-mage-imaksamargu, nudaksamarbalid.
MAR 6:14 Rey-Herodes, dulemar Jesúsʼgi sunmakmar itoalid, ar ade, bela neggwebur-iliba Jesús-nug mag-itomalad. Gwen-gwen sogmalad: “Diigi-dule-oged-Juan gannar durgusye, aga ibmar-dakledisurmalad-imakega nabir gangued nikaye.”
MAR 6:15 Baigandi sogmalad: “We, Bab-Dummad-gayaburba-barsoged-Elíasʼye.” Baigandi sogmarmogad: “We, epenne Bab-Dummad-gayaburba-barsogmalad-gudigusmalad wargwenadye.”
MAR 6:16 Herodesʼdi, dulemar weyob soge itoargu, sogded: “We, Diigi-dule-oged-Juan, an e-ibe-dukar-egwachagusadid, a gannar durgus gudiid.”
MAR 6:17 Ar ade, Herodes, Herodías-ular esgaryagi Juan-mete-gusad, degi, esgoro-dubgi edicha sisbalid. Herodíasʼde, Herodes-e-urba-Felipe-omenad. Herodesʼdi e-urbagi ome-egwachad.
MAR 6:18 Juan, Herodesʼga sogsagusad: “Ar Bab-Dummad-igargi maisulid, be-urba-ome be nikued.”
MAR 6:19 A-ulale, Herodíasʼde Juan-isdar-daked, degi, binsadiid igi-saele an oburgodibeye. Degi-inigwele, geg-oakalo gusad.
MAR 6:20 Ar Herodes, Juan-dobe itoged. Ar wisid, Juanʼde dule-nuedid, degi, dule-gwage-swilidikidbalid. A-ulale, dule gwen-Juan-okalobisuli abesad. Herodes, Juan-ega-ibmar-soged-itoalile, surbinsa itoddaed, degi-inigwele, Juan-sunmaked yeer-itodaed.
MAR 6:21 Herodes na e-gwalulesad-ibagi iba-dummad onosad. A-ibase-dagmalaga, Herodes ega dummaganga-gudimaladse, sordamar-idudimaladse, degi, Galilea-yargi nuga-nikamaladse gochad. Herodías daksad, we-iba ega nagunonikid, adi, Juan-oburgwegar.
MAR 6:22 Dummagan-mas-gunbukwadgi, Herodías-sisgwa negyaba dognonikid, degi, amar-asabin gwilenai gusad. Herodes, degi, eba-mas-gunbukmalad, bunagwa-gwilesad nue-yeer-daksamalad. Degisoggu, Rey-Herodes bunagwaga sogdesunnad: —Ibu be anse egisbie, an bega ukoed.
MAR 6:23 Rey-Herodes bunagwaga ise-sogar sogsad: —Napira an bega soged, ar an yar-ganikid sunna amba negabar an bega uksabaliled, ar be anse egiser.
MAR 6:24 Bunagwa noded, geb e-nanse egisdapid: —¿Ibu an Herodesʼse egisoe? E-nan ega sogded: —Diigi-dule-oged-Juan-e-nono be egise.
MAR 6:25 Bunagwa ise-abarmakar Herodesʼse dognonikid, ega sognonikid: —Diigi-dule-oged-Juan-e-nono emisbinne bategi be anga udage.
MAR 6:26 Rey-Herodes nue bukib-binsaded, degi-inigwele, be anse ibmar-egisnaid an bega ukosurye yapa bunagwaga soge gusad, ar ade, bato dulemar-eba-mas-gunbukwad-wagab ega ise-sogar sogsa gusad, an bega ibmar ukoye.
MAR 6:27 Degisoggu, Herodes sorda-wargwenga yog-igar-ukar imaksad, ega Diigi-dule-oged-Juan-e-nono bategi sedaye. Sorda esgaryase naded. Agi Diigi-dule-oged-Juan-e-dukar egwachad.
MAR 6:28 Sorda Diigi-dule-oged-Juan-e-nono bategi-sii senonikid, geb bunagwa uksad, degi, bunagwa e-nanga uksamogad.
MAR 6:29 Diigi-dule-oged-Juan-e-sapingan, Juan-deyob-gusad wisguarmargu, e-san sunadmalad, geb e-san neg-uangi digsamalad.
MAR 6:30 Geb Jesús-e-sapingan-bur-dummagan-e-ambe-gakabogwad (12) gannar Jesúsʼse nonimalad, geb ibmar-imaksamalad, degi, igi-emar-odurdaksamalad bela ega sognonimalad.
MAR 6:31 Ar dule-bukidar muchub-muchub iirmakbuksoggu, geg mas-gunne guarmalad. Geb Jesús e-sapinganga sogded: —Nega-dulesulidganba bemarbi be anba dagmar, agi bemar obunnogegar.
MAR 6:32 Degisoggu, Jesús na e-sapinganmala urgi bachikii nadegusmalad.
MAR 6:33 Ar dule-bukidar-Jesús-nade-daksamaladi, magar-daksamalad bia nadmala. Degisoggu, bela dulemar-neggwebur-baid-baidginmalad, Jesús-iduar nagab duurmakde gusmalad. A-dulemar Jesús-idu mosmalad. Geb Jesús-walik bukunonimalad.
MAR 6:34 Jesús urgi aidesgu, dulemar-bukidar e-idu-bukwa dakdapid. Geb Jesús amar-nue-wile daksad, ar ade, sibad-wawaad edarbed-satedyob, dule-e-iduged-satedyob gudidimalad. Geb degine, Jesús Bab-Dummad-Igar-Mamaidgi dulemar-odurdakde gusad.
MAR 6:35 Neg-sedodgu, e-sapingan Jesúsʼse nonimalad, ega sogdemalad: —Wegine negmar gwen buksurmalad, emide nue-neg sedoded.
MAR 6:36 Be dulemarga sogsunna, bemar namarye, adi, neg-sapurba-bukmaladse, degi, neggweburmar-wegi-walikaa-bukmaladse madu-baknamalagar.
MAR 6:37 Jesús, e-sapingan-abin sogded: —Ar bemar ega masgunned uke. E-sapingan, abin-sogdemalad: —Anmar we-dulemar-masgi-ogunnega, ¿nabi be anmar-abege? ¿Dule-wargwen nii-walabaabak-arbanai-bennukleged-wilub (8) madugi mani-mied be abege?
MAR 6:38 Jesús, abin-sogded: —¿Bule-melu, bemar madu nikasunna? Be daknamala. Dakapmargu, e-sapingan Jesúsʼga sognonimalad: —Madu-gwaatar, degi, ua-ukabo anmar nikad.
MAR 6:39 Geb Jesús e-sapinganga igar uksad, gagan-ara-arad-birgi dulemar dana-dana oambikumarye.
MAR 6:40 Degisoggu, dulabogakambe-dulabogakambe (50-50), degi, dulatar-dulatar (100-100) dulemar danar-danar ambikusmalad.
MAR 6:41 Geb Jesús madu-gwaataled-susgu, degi, ua-ukabogwad-susgu, niba atakde, Bab-Dummadga dog-nuedye sogsad. A-sorba, Jesús madu bisge-bisge imaksad, geb e-sapinganga uksad, adi, dulemarga madu mimiega. Deginbali, ua-ukabogwad bela dulemarga mimisbalid.
MAR 6:42 Bela-dulemar nue-immeles mas guchamalad.
MAR 6:43 Geb sorbali, Jesús-sapingan madu, degi, ua-obichad garba-gwaambe-gakabo-mergu (12) wesmalad.
MAR 6:44 Bela-dulemar-madu-guchamalad, macherganbi, miliatar (5,000) gued.
MAR 6:45 A-sorbali, Jesús urgi e-sapingan-onakwisad, adi, e-idu mata-naid-obakar, Betsaidaʼse namalagar. Jesúsʼdi besad, dulemarga sogega, degimaloye.
MAR 6:46 Jesús dulemar-bela-barmisgu, yar-birse Bab-Dummadse gornaded.
MAR 6:47 Mutikgudgua, e-sapingan mata-abala nanaid. Jesúsʼdi walagwen yarbirgi Bab-Dummadse gorsiid.
MAR 6:48 Jesús na e-sapingan ise-gammiar alamaknanai dakalid, ar ade, burwa asabinnid. Bolegwadba, Jesús na e-sapinganse demar-birgi ganna-ganna danigusad. Walikgusgua, yamo e-sapingan-dikarba nasaoeyobi imaksad.
MAR 6:49 Jesús-sapingan dule-demar-birgi-dani dakargu, serganye bimalad, degi, binnasur gotemalad.
MAR 6:50 Bela daksamarsoggu, egi gwakidmalad. Jesús e-sapinganse yog-gollar imaksad, ega sogded: —Mer dobgumar, gandik samar, ani an gudiid.
MAR 6:51 Geb degine, Jesús na e-sapinganse urgi nakwenonikid. Geb burwa yog-bogilegar naded. E-sapingan bela-bela geger dakmalad.
MAR 6:52 Ar e-sapingan Jesús-madu-omelosad-daksa-inigwele, amba nue-aku itomalad. Ar e-gwage amba dutusur nikmalad.
MAR 6:53 Jesús na e-sapinganmala mata-dummad-obaksamargu, Genesaret-yarse nonimalad, geb agi gakagi ur edichamalad.
MAR 6:54 Urgi-bukwa aidedmargu, dulemar bato yog-magasaila Jesús-daksamalad.
MAR 6:55 Jesús na e-sapinganmala bela Genesaret-yargi gudii gusmalad. Dulemar wisguarmalale bia Jesús gudii, bela ase dule-gegumalad e-megedgi-mai Jesúsʼse senonidamalad.
MAR 6:56 Ar bia Jesús nadele, neggwebur-burwiganbardibe, neggwebur-dummaganbardibe, neg-sapurba-bukmaladbardibe, bela-gegumalad Jesús-iduar dulemar-ambikuedgi igargi mesisdamalad. Dulemar egi wilenaigusdamalad, wis be-mordukubi ebugega be an-imakye. Dulemar-Jesús-morduku-ebusmaladi yog-nuguar naddamalad.
MAR 7:1 Fariseoʼmar, degi, Garda-Narmaked-Dulemar gwen-gwen-Jerusalénʼgi-danimalad, Jesús-walik bukunonimalad.
MAR 7:2 Amar, abar-Jesús-sapingan argan-swilisuli, argan-enuksasuli mas-gunne-dakarmargua, egi sunmakarmalad.
MAR 7:3 Ar Fariseoʼmar, degi, Judíoʼmar-baigan, e-dadgan-igar-mesisadba argan-enuksasulir geg mas gunmalad, ar e-dadgan-ega-igar-metenadedba damalad.
MAR 7:4 Fariseoʼmar ibmar-ukleged-neggi danimalar, argan-enuksasulir geg mas gunmalad. Deginbali, e-dadgan ega igar-bamalad-metenadedba damarbalid, nog-enukedsik, ibmar-simalad-enukedsik, bormomar-enukedsik, degi, megmalad-enukedsik.
MAR 7:5 A-ulale, Fariseoʼmar, degi, Garda-Narmaked-Dulemar Jesúsʼse egichiarmalad: —¿Ibiga be-sapingan anmar-dadgan-igar-maidba dasurmala? Emide argan-enuksuli mas gunmalad.
MAR 7:6 Jesús, abin-sogded: —Bemar wagar-darbodaed-dulemalad. Aga Bab-Dummad-gayaburba-barsoged-Isaías, garda-narmaksagu nabir bemarnik sogsagusad, Bab-Dummad weyob sogye: ‘We-dulemar unnila asginbi an-nug odummomalad, ar e-gwage-ulubgindi, angi gwen binsasurmalad.
MAR 7:7 Ar binsa asginbi an-nug odummodimalad. E-igar-maid odurdakedi, dulemar-igar-mesisadba bur odurdakmalad.’
MAR 7:8 ”Ar bemar dulemar-igar-mesisadba-damalaga, Bab-Dummad-Igar-Mesisadba dasurmalad.”
MAR 7:9 Jesús sogdebalid: —Bemar be-dadgan-igar-mamaidgi bur bule binsasoggu, Bab-Dummad-Igar-Mamaid be iedmarsunnad.
MAR 7:10 Ar Moisés sogsagusad: ‘Be-babgi, degi, be-nangi, be binsaed-nikaa damaloye.’ Degi sogsabalid: ‘Dule-gwensak na e-babgi, degi, e-nangi, gaya-ichakwa sunmaksale, a-dule oburgwilegoye.’
MAR 7:11 ”Ar bemardi, odurdakmalad sunna dule-wargwen e-babga, degi, e-nanga sogye: ‘Geg an be-bendake, ar bela an be-bendakega-ibmar-nikadi bato an Bab-Dummadga uksaye.’
MAR 7:12 Degidbali, mimmi na e-bab-bendaked, degi, e-nan-bendaked, bar be imakega imaksurmalad.
MAR 7:13 Wegi-bemar-daed-odurdakedba, bemar Bab-Dummad-Igar-Maidba geg damalad. Wegi-damalad-baigan bukidar be imakmarbalid.”
MAR 7:14 Geb Jesús dulemarse gannar gochad, ega sogded: —Bela an-itomalo. We, be magar-itomala:
MAR 7:15 Ibmar-neg-asgi-danikid dulegi-uboder, geg dule-gwage ichoged. Ar gwagegi-ibmar-naid-ainieddi, dule-gwage ichoged.
MAR 7:16 Bemar nue-itobiele, nue itomar.
MAR 7:17 Jesús dulemargi-bangudgu, negyaba dogdapid. Agi e-sapingan ese egichialid: —Emisgwa be ibmar-burbar-odurdaksigusad, wede ibi nue obare.
MAR 7:18 Jesús e-sapingan-abin sogded: —¿Amba bemar akusunna itomarmoga? ¿Bemar wissursi, ibmar-neg-asginmalad dulegi uboder, geg dule-gwage ichoged?
MAR 7:19 Ar ade, e-gwagese ubosulid, unnila e-sabanse ubodapdaed, geb gannar ber mileddabalid. A-Jesús sognaisundo, bela Bab-Dummadga mas swilidikidbiye.
MAR 7:20 Jesús sogdebalid: —Ar dule-gwagegi ibmar-ainiedi dule-ichoged.
MAR 7:21 Ar ade, e-gwagegi binsaed-isgana ainiardaed: Omegangi-galagwensuli-binsaed, atursaed, emar-ibloged,
MAR 7:22 ome-dikarba, degi, machered-dikarba-yoleged, aimar-ibmarbina-soged, aimargi-isdar-binsaed, emar-yardaked, e-itolegedba-galagwensulidaed, nobgued, dulegi-gakansaar-sunmaked, san-dummarba-imaked, degi, binsaed-satedaed.
MAR 7:23 Bela we-ibmar-isganamar dule-gwagegi ainied, degi, dulemar-ichoged.
MAR 7:24 Jesús Genesaretʼgi-gudii, Tiro-yarse, degi, Sidón-yarse, nadegusad. Neg-gwagwengi dogdapid, dule-gwen-e-wisgubisuli abesad, degi-inigwele, geg-duku gusad.
MAR 7:25 Ome-wargwen e-bunolo-niaburba-nikad, Jesúsʼgi sunmakmar-itoargu, Jesúsʼse nonikid, yokorgi asabin sindigar signonikid.
MAR 7:26 A-ome Judío-dulesulid, Sirofeniciaʼginedid. Geb ome Jesúsʼgi wilenaigusad, e-bunologi-nia-maid ega onoye.
MAR 7:27 Jesúsʼdi ome abin-sogded: —Bina mimmigan-inse mas-gunnega be imake. Ar ade, ibnuedsulid mimmigan-annik mas-sued, degi, achuga a-mas uked.
MAR 7:28 Ome, Jesús-abin sogded: —Dummad, napira be soge, degi-inigwele, mimmigan-mese-urba-mas-obatemamaid amba achumarse-bakar, gunmogad.
MAR 7:29 Jesús omega sogded: —Ar weyob be anga sogsad-ular, gwage-bogidikidgi be-negse be nae. Be-bunologi-nia-maid bato nosad.
MAR 7:30 Ome na e-negse mosgua, e-bunolo e-gabedgi-mai dakdapid. Bunologi-nia-maid bato nosad.
MAR 7:31 Jesús Tiro-yargi-gudii gannar alid. Geb Sidón-yarsik-argua, Decápolis-yala-imbaganba Galilea-mata-dummad-naidse nodapid.
MAR 7:32 Agi, dule-uaya-yalliled, degi, naya-naya-sunmakbalid Jesúsʼse senonimalad. Dulemar Jesúsʼgi wilenaigusmalad, a-dule-nudakega argan egi mesye.
MAR 7:33 Jesús a-dule dulesulidba bachikii sesad. Geb Jesús dule-bonigwaled-uaya-yaba e-goo odos imaksad, degi, e-googi wiaksagu, dule-bonigwaled-e-gwabin, e-googi ebus imaksabalid.
MAR 7:34 Geb Jesús niba atakdegu, ise-bunnoar imaksad, geb dule-bonigwaledga sogded: “¡Efata!” A sogleged: “Be argaye.”
MAR 7:35 Geb dule-bonigwaled yog-magar-ito naded, degi, nued sunmaknadbalid.
MAR 7:36 Jesús dulemarga sogsad, mer dule-baiganga bipisaar sogmaloye. Ar Jesús dulemarga degi-sogdele, aka bur bule dulemar Jesús-barsogde damalad.
MAR 7:37 Dulemar bela-bela geger Jesús-dakmalad, sogdemalad: “We-dule ibmar-nueganbi imaked. Ar dule-uaya-yalliledse-bakar, magar-ito imaked, degi, dule-geg-sunmaked nabir sunmak imakbalid.”
MAR 8:1 Ibagwengine, dule-bukidar gannar Jesús-walik ambikunonimarbalid. Dulemar masgunned satesoggu, Jesús na e-sapinganse gochad, ega sogded:
MAR 8:2 —An wile we-dulemar-daked, ar ibapaagus anmarba garmakdimalad, emide, masgunned satemalad.
MAR 8:3 Mas-guchasuli an e-negse barmidele, igarba ukudba negoedmaloed, ar ade, bukidar dikasur danimalad.
MAR 8:4 E-sapingan, Jesús-abin sogdemalad: —Ar wegine dulemar mamaisulid. ¿Bia anmar dule-bukidaradga mas unniguar amiosunna?
MAR 8:5 Jesús na e-sapinganse egisded: —¿Bemar gwabigwa madu nikasunna? E-sapingan, Jesús-abin sogdemalad: —Anmar gwagugle (7) madu nika.
MAR 8:6 Geb Jesús dulemar napagi oambikued imaksad. E-argangi madu-gwagugled-susgua, Bab-Dummadga doggus-nuedye sogsad. Geb Jesús madu-bisge-bisge-imasgu, e-sapinganga madu uksad, adi, dulemarga mimiegar. Deyobi e-sapingan imaksad.
MAR 8:7 Deginbali, ua-burwigana wis-ichesaar nikamarbalid. Jesús Bab-Dummadga doggus-nuedye sogsabalid, geb e-sapinganga sogsad, dulemarga mimimarye.
MAR 8:8 Dulemar bela-nue-immeles mas guchamalad. Geb sorbali, Jesús-sapingan garba-gwagugle (7) mas-obichad wesmalad.
MAR 8:9 Bela-dule-milibakesaar (4,000) mas guchamalad. Geb Jesús e-neg-e-negse dulemar-barmisad.
MAR 8:10 A-sorbali, Jesús na e-sapinganmala urgi nakwisgu, Dalmanuta-yalaganba nadegusmalad.
MAR 8:11 Fariseoʼmar, Jesúsʼse nonimalad, geb Jesúsʼbo abin-abin imakarmalad. Yamo Jesús-wilubdakega, nibneggined-ibmar-wilubgan-dakledisulid emarga oyoye ese egichiarmalad.
MAR 8:12 Jesús ulubgi ise-nue-bunnoar imaksad, geb sogded: “¿Ibiga we-dulemar-emmisgwamalad ibmar-wilubgan-dakledisulid imakbi an-abege? Napira an bemarga soged, bemar anse-ibmar-egisnaid, an bemarga oyogosulid.”
MAR 8:13 Geb degine, Jesús Fariseoʼmar-idu naded. Geb gannar urgi nakwisgu, mata-abin-obakar naded.
MAR 8:14 Jesús-sapingan madu-seded ies nadmalad. Unnila madu-gwagwen uryagi semamaid.
MAR 8:15 Jesús na e-sapinganga sogded: —Fariseoʼmar-madubur-inagi, degi, Herodes-madubur-inagi, nue salakarmar.
MAR 8:16 E-sapingan na muchub-muchub sognanai guarmalad: “Ar anmar madu satedbali, wede weyob soged.”
MAR 8:17 Jesús na e-sapingan degi-soge-itosgu, ega sogded: —¿Ibiga bemar madu surye sogmala? ¿Amba bemar aku dakmala, degi, nue aku itomarbali? ¿Amba be gwage dutusurmala?
MAR 8:18 Bemar ibya nikanad, degite ¿amba be aku dakmarde? Bemar uaya nikamarbalid, degite ¿amba bemar aku itomarbarde? ¿Bemar insasursi?
MAR 8:19 An dule-miliataledga (5,000) madu-gwaataled-mimisgu, ¿bemar garba-gwabigwa madu-obichad wesagusmala? E-sapingan, abin-sogdemalad: —Garba gwaambe-gakabo (12) anmar wesmalad.
MAR 8:20 Jesús sogdebalid: —Dule-milibaked-abargi (4,000) an madu-gwagugled-mimisbargu (7), ¿Bemar garba-gwabigwa wesagusmarbali? E-sapingan, abin-sogdemalad: —Garba gwagugle (7) anmar wesmalad.
MAR 8:21 Geb Jesús na e-sapinganga sogdebalid: —Degite ¿Ibiga bemar amba aku-itosunna?
MAR 8:22 Betsaida-neggweburse-nonimargu, dulemar dule-wargwen aku-ataked Jesúsʼse senonimalad. Dulemar, Jesúsʼgi wilenaigusmalad, dule-ebuye.
MAR 8:23 Jesús dule-aku-ataked argangi-gasgu, neggweburgi ega banguded. Geb Jesús dule-aku-ataked-ibyagi-wiaksagu, degi, e-argan egi mesisgu, ese egichided: —¿Emigindi, sunna mag be atake?
MAR 8:24 Dule-aku-ataked, atakdegu sogded: —Ar dulemar sapimaryob an daked, degi-inigwele, nanamar an daked.
MAR 8:25 Geb Jesús na e-argan gannar dule-aku-ataked-e-ibyagi mesisad, geb dule nugusad, magar atakded, degi, nue-swilidik atakdesunnad.
MAR 8:26 Jesús dule-nugusad e-negse barmisad, ega sogsad: —Mer be neggweburse doggwelo, degi, mer dulemarga be we-ibmar sogbalo.
MAR 8:27 Jesús na e-sapinganmala, Cesarea-De-Filipos-neggwebur-burwigana-bukwadse nade gusmalad. Igarba-nadapidgi, Jesús na e-sapinganse egichialid: —Dulemar, ¿doaye an-annik sogmala?
MAR 8:28 E-sapingan, abin-sogdemalad: —Gwenna-gwenna Diigi-dule-oged-Juanʼye benik sogmalad. Baigandi, Elíasʼye benik sogmalad. Bamaladdi, be Bab-Dummad-gayaburba-barsoged-wargwenadye benik sogmalad.
MAR 8:29 Jesús na e-sapinganga sogded: —Bemardina, ¿doaye be an-annik sogmarmosunna? Pedro, Jesús-abin sogded: —Be, Cristo. (Griego-gayaba we-sogleged, Bab-Dummad epenne dule-wargwen-barmidagoye-sogsad-duleye).
MAR 8:30 Jesús na e-sapinganga igar uksad, melle dulemar-baiganga bipisaar sogoye, ede Cristoʼye, Bab-Dummad-dule-wargwen-barmidagoye-sogsad-duleye.
MAR 8:31 Jesús na e-sapingan-odurdakde, sogded: —Ani Dule-Machi, nue wilegergebed. Judíoʼmar-girmar-dummagan, dule-irwa-Bab-Dummadse-gormalad-e-dummagan, degi, Garda-Narmaked-Dulemar, gwen an-abingaosulid. An-oburgwemaloed, degi-inigwele, ibapaagi an gannar durgubaloed.
MAR 8:32 Jesús na e-sapinganga e-burgoedgi ise-bakarbud sunmaksad. Geb degine, Pedro Jesús-bachikii sesad. Jesús weyob-sogsad-ulale, Pedro Jesúsʼga binnasur ibmar sogded.
MAR 8:33 Jesúsʼdi biir-imaksagu, e-sapingan-dakdegu, Pedroʼga sabsur sogded: —Nia-saila-Satanás, be angi bangusunna. Be Bab-Dummad-binsaeyob binsasulid, unnila dulemar-sunnaa be binsaed.
MAR 8:34 Geb Jesús na e-sapinganse, degi, dulemar-baiganse-gochagua, ega sogded: —Ar dule-gwensak an-sapinga gubiele, na dukin san-iegergebed. Bato burgwenadapidgi-nakrus-semaiyob nanaergebed, geb a-dule anba dagodo.
MAR 8:35 Ar dule-wargwen, unnila na e-san-bendakbiedginbi binsaele, na e-san-burba ei yogguoed. Ar dule anba-naid-ular, degi, an-gayaburba-nued-ular, burgwenonikirdi, na e-san-burba yogguosulid.
MAR 8:36 ”Dule bela napneg-naid egadga imakele, ¿ar ega ibi-nued-gue, na e-san-burbadi yogguer?
MAR 8:37 Igidibe, dule-gwensak na e-san-burba-ular, ¿ibi na uksar be insae? Ibmar sate, san-burba-ular uked.
MAR 8:38 Degisoggu, dule-gwensak, we-dulemar-galagwensulidamalad-abargi, degi, dule-isganamar-abargi, anba-naid-ular, degi, an-gayaburba-nuedgi, bingeguele, ani Dule-Machi, an-baliwiturmar-islidikidmalad-abargi, an-Bab-Dummad-gangued-yeerdakleged-nikadgi an danikir, an we-dulegi bingegumogoed.”
MAR 9:1 Jesús sogdebalid: —Napira an bemarga soged, gwenna-gwenna bemar-wegi-bukmalad burgosulid, amba-dula-gudii Bab-Dummad-e-negdakmaid bela e-ganguedba-dani be dakedsemalad.
MAR 9:2 A-ibanergwad-sorbali (6), Jesús na e-sapingan-warbaa eba sesgusad: Pedro, Jacobo, degi, Juan. Geb yar-matusulidse bachikii, amarbi eba nadegusmalad. Jesús yar-birgi-gwichi, amar-asabin e-san-dakleged gwagdegusad.
MAR 9:3 E-mor, isedar-dagudik dakar-dakar-gae dakle naded. Dule napneggi ayobi geg-mor-sibudik enuked.
MAR 9:4 Geb Jesús-sapingan-warbaagwad dulemar-epenne-dula-gudigusmalad dakarmalad, Elías, degi, Moisés. Amar Jesúsʼmala sunmakgwichid.
MAR 9:5 Geb Pedro Jesúsʼga sogded: —Odurdaked-saila, wegi anmar gudiid, we nueddo. Anmar neg-matargana-gwapaa sunna sobmalad: Gwagwen bega, baid Moisésʼga, degi, baidbali Elíasʼgarmo.
MAR 9:6 Ar Jesús-sapingan bela gwakidmalad. Pedro yogasaar gole-gole gwisgusad.
MAR 9:7 Geb agine, mogir emar-birgi nagunonikid. Negsichii nadsunnad. A-mogir-imbaba gayaburba gollalid: “We, An-Machi-sabedi gued. A, be nue itomar.”
MAR 9:8 Jesús-sapingan ukiar e-dikarba-atakdemargu, unnila Jesúsʼbi walagwen-gwichi dakarmalad, dule-bamaladdi bar daksasurmalad.
MAR 9:9 Yargi aidedanimargu, Jesús e-sapinganga igar-uksad, bemar ibmar-daksamaladi mer emarga sogmaloye. Geb ani Dule-Machi, an burgwisar, geb an gannar-durgusad-sorbardi, be sunna sogmarye.
MAR 9:10 Agala na emarbi wisi gudigusmalad. Degi-inigwele, na muchub-muchub egisnanai-guarmalad, wede burgwisar-gannar-durgued ibi nue-obarye.
MAR 9:11 Jesúsʼse egichiarmalad: —¿Ibiga Garda-Narmaked-Dulemar soge, Elías-inse Mesías-idu bina danigweloye?
MAR 9:12 Jesús, abin-imaksad: —Ar napiragwa Elías-inse nonikoed, adi, bela igar-nabogegar. Deginbali, ¿Bab-Dummad-Gardagi sognaisursi? Ani Dule-Machi, nue ise-wilegar guoye, degi, isdar dakmarbaloye.
MAR 9:13 Degisoggu, an bemarga sogsundo, bato Elías arbi. Igi Bab-Dummad-Gardagi egi narmakar-nai, deyobi, dulemar, imakbiedba imaksamalad.
MAR 9:14 Jesús na e-sapingan-warbaagwadmala e-sapingan-baigan-bukwadse modapmargu, dule-bukidar e-sapingan-ebirbukwa dakdapmalad. Deginbali, Garda-Narmaked-Dulemar e-sapingan-bamalad-ebo abin-abin-imaknanai daknonibalid.
MAR 9:15 Dulemar Jesús-nonikid-dakarmargua, geger dakdemalad. Geb Jesúsʼga be-dog-nued-sogeye-sogega ese duurmakarmalad.
MAR 9:16 Jesús e-sapinganse egichisided: —¿Ibi igargi bemar Garda-Narmaked-Dulemar-ebo abin-abin imaknanai?
MAR 9:17 Dule-wargwen dulemar-abargi-gwichid gollalid: —Odurdaked-saila, an wegi an-machi begala sedanikid, ar ade, an-machigi niaburba-geg-sunmaked maid.
MAR 9:18 An-machigi nia nagunonikir, aimukud-daed. Wii maku-maku guardaed, nugar ogornagusdabalid, degi, gannarkwaa megisdabalid. Be-sapinganga an sogsanad, bemar an-machigi-niaburba-maid onoye. Degi-inigwele, be-sapingan gwen nia-onossurmalad.
MAR 9:19 Jesús, abin-sogded: —¡Bemar Bab-Dummadgi-bengumalad-dulemar! ¿Sanagwadse an bemar-abargi gudiguoe? ¿Sanagwadse be ibmar durdakmaloe? Anga be-machigwa be seda.
MAR 9:20 Geb degine, Jesúsʼse machigwa searmalad. Niaburba Jesús-daksagu, machigwa-binnasur-wawanmakega imaksad. Degisoggu, machigwa napagi aimukussunnad, geb napagi bindu-bindu-mai, gaya-yaba wii makumakmai gusad.
MAR 9:21 Jesús machigwa-e-babse egichided: —¿Wede sana bei weyob-guali? Machigwa-e-bab, abin-sogded: —Bipigwad-akar weyob gualid.
MAR 9:22 Imbagwena niaburba machigwa-oburgwega, soo-yagi, degi, dii-yagi omukudaed. Ar be sunna anmar-bendakele, be wile anmar-dake, be anmar-bendake.
MAR 9:23 Jesús, abin-sogded: —¿Ibiga be anga soge, be sunna an-bendaksar-sogeye? ¡Dule-Bab-Dummadgi-bensulidga, bela ega ibmar sunna gued!
MAR 9:24 Geb degine, machigwa-e-bab binnasur-gote sogded: —An wisi be sunna an-bendaked, an be-bensulid. ¡Be an-bendake! ¡Bur bule mer-begi-bengued be an-imake!
MAR 9:25 Jesús e-dikarba dule-bukidar-ambikumai-dakargu, niaburbaga binnasur sogded: —Niaburba-dule-geg-sunmaksaed, degi, dule-uaya-yallir-sabalid, an bega soged, we-machigwagi be noe, mer be gannar bar ese dognoniko.
MAR 9:26 Niaburba binnasur goted, degi, binnasur machigwa-wawanmakega imaksagu, geb egi noded. Geb machigwa burgwaleyob megisad. Degisoggu, dule-bukidar sogdemalad: “Machigwa burgwis maiye.”
MAR 9:27 Ar Jesúsʼdi argangi machigwa-gasgu, ogwichis imaksad. Geb machigwa gwisgusad.
MAR 9:28 A-sorbali, Jesús negyaba-dogsagua, e-sapingan bachikii ese egichiarmalad: —¿Ibiga anmardi geg we-niaburba onogusa?
MAR 9:29 Jesús, abin-sogded: —Nia-wegiimalad, unnila Bab-Dummadse-goledgi, degi, mas-gunsuli-gudiguedgi onoleged.
MAR 9:30 Agi-gudii Jesús na e-sapinganmala nadmargu, Galilea-yalaganba nasmalad. Jesús, dule gwen-e-wisgubisur abesad, ede nadapye.
MAR 9:31 Ade, e-sapingan-odurdakdiid, ega sogdiid: “Ani, an Dule-Machi, dulemarga uklegoed, degi, dulemar an-oburgwemaloed. Geb an burgwisad-sorbali, ibapaagi an gannar durguoed.”
MAR 9:32 E-sapingandi nue-aku-itomalad, wede ibi nue emarga obare. Dobedbali Jesúsʼse gwen egichissurmalad.
MAR 9:33 Jesús na e-sapinganmala Capernaúm-neggweburse nonimalad. Geb negyaba-dogsagu, Jesús e-sapinganse egichialid: —¿Ibigi bemar igarba na abin-abin imakdani gusmala?
MAR 9:34 E-sapingandi gwen abin-imaksasurmalad. Ar ade, igarba na abin-abin imakdani gusmalad, doa bur-dummadga guodibeye.
MAR 9:35 Geb Jesús sigisgua, e-ambe-gakabogwadse (12) gochad, amarga sogded: —Dule-wargwen dule-iduedga-gubiele, bela-aimar-sorbalidga guergebed, degi, bela-aimar-maiga guergebbalid.
MAR 9:36 Geb Jesús mimmi-wargwen-susgua, e-sapingan-abargi mimmi-ogwichisad. Geb Jesús mimmi-angaagwar-gasgua, sogded:
MAR 9:37 —Ar dule-wargwen we-mimmiyobid-wargwen an-nuggi abingaele, an-abinganaiyob gunaid. Ar dule-gwensak an-abingaele, anbi an-abingasulid, dule-an-barmialid abinganaibalid.
MAR 9:38 Jesús-e-sapin-wargwen, Juanʼye-nugad Jesúsʼga sokalid: —Odurdaked-saila, anmar dule-wargwen-daksado be-nuggi niamar-onodii. Ar anmar-sordasursoggu, anmar ega sogsad, mer be Jesús-nuggi niamar-dulemargi-maid bar onogoye.
MAR 9:39 Jesús, abin-sogded: —Mer be a-dule-ibe igar-bisgo, ar ade, dule-wargwen an-nuggi ibmar-dakledisurmalad-imakdiile, a-dule geg angi ichakwa-sunmaknai gued.
MAR 9:40 Ar dule anmargi yoledisulile, a-dule, anmarba naido.
MAR 9:41 ”Napira an bemarga soged, ar bemar Cristo-sapinga-gued-ular, dule-wargwen an-nuggi bemarga nog-gwagwen dii uksale, a-dulega, Bab-Dummad bur bule ibmar ukoed.
MAR 9:42 ”Ar dule-wargwen, we-mimmi-burwigana-angi-bensur-gudidiid isguega-imaksale, we-dulega bur-nuedirdo, akwamuu-dummad e-dukargi ega nasikmalar, degi, demar-wilase metemalar.
MAR 9:43 Ar be-argan isguega be-imakdibe, bur be sike. Ar argan-warbo-nika nia-negse-naedba, bur nuedid, argan-wargwen-nika dulagudigued. Ar nia-neggindi,
MAR 9:44 [‘nusmar geg burgwed, soo geg ginbalid.’]
MAR 9:45 ”Ar be-nag isguega be-imakdibe, bur be sike. Ar nag-warbo-nika nia-negse-naedba, bur nuedid, nag-wargwen dulagudigued. Ar nia-neggindi,
MAR 9:46 [‘nusmar geg burgwed, soo geg ginbalid.’]
MAR 9:47 ”Ar be-ibya isguega be-imakdibe, bur be be-ibya onoge. Ar ibya-gwabo-nika nia-negse-naedba, ibya-gwagwen-nika Bab-Dummad-e-negdakmaidse-doged bur nuedid.
MAR 9:48 Ar nia-neggindi, ‘nusmar geg burgwed, soo geg ginbalid.’
MAR 9:49 ”Ar igi-ibmar baluba-narilege, deyobi anmar belagwapa soogi-wilubdaklegega balugi maglegoed.
MAR 9:50 ”Balu ibnuedid. Ar balu sayee naderdi, ¿igi be bar balu-balu gannar saosunna? Geg be sae. Degisoggu, balu-nuedyob be gumar, adi, na be muchub-muchub bogidik-gudii gumalagar.”
MAR 10:1 Jesús Capernaúmʼgi nodegusad, geb Judea-yalaganba, degi, Jordán-diwar-obakar-yar-naidse naded. Agi gannar dulemar-bukidar ese nonimalad. Ar igi Jesús na gusgu dulemar-odurdakdae, deyob dulemar-odurdakdebarsunnad.
MAR 10:2 Agine, Fariseoʼmar Jesúsʼse nonimalad. Geb yamo Jesús-wilubdakega, ese egisnonimalad: —¿Wede sunna ome-metoye igar mai?
MAR 10:3 Jesús, abin-imakded: —Moisés, ¿igi igar bemarga mesissunna?
MAR 10:4 Fariseoʼmar, abin-sogdemalad: —Moisés igar-mesisad, sui ome-metebiele, omega ome-meted-garda narmakoye, geb agi ome-metoed.
MAR 10:5 Jesús, Fariseoʼmar-abin sogded: —Bemar-uayasulidaed-ulale, Moisés bemarga we-igar mesisad.
MAR 10:6 Ar Bab-Dummad gebesaila-ibmar-obinnisgudii, ‘Bab-Dummad machered, ome-ebo abirgunagwar ogwisnonikid.’
MAR 10:7 ” ‘A-ular, machered ome-nikusar, e-babgi, degi, e-nangi, banguoed, adi, unnila na e-ome-ebo gudiguegar.
MAR 10:8 Ebogwad dule-wargwennaga gunonikoed. Degisoggu, bar dule-warbo gusurmalad, unnila dule-wargwen gumalad.’
MAR 10:9 ”Degisoggu, Bab-Dummad dule-abirgunagwar-imaksadi, dule, mer metega imako.”
MAR 10:10 A-sorba, negse nonimargua, Jesús-sapingan Jesúsʼse gannar ome-meted-igar egichiarmalad.
MAR 10:11 Jesús, ega sogded: —Ar doa-dule ome-metedibe, degi, ome-baid-nikusale, we-machered ome-gebe-nikusad-dikarba negsichigi yoledido.
MAR 10:12 Ar ome sui-metedibe, degi, sui-baid-nikusale, we-ome sui-gebe-nikusad-dikarba negsichigi yoledimodo.
MAR 10:13 Jesúsʼse mimmigan senonigusmalad, adi, Jesús mimmigan-ebugega, egi ise-nued binsalegegar. Ar Jesús-sapingandi, dule-mimmigan-senonidamaladse uluarmalad.
MAR 10:14 Jesús deyob daksagua, sae-itode, na e-sapinganga sogded: “Mimmigan be anse-daged imakmar, mer be igar-gamar, ar Bab-Dummad-e-negdakmaid we-mimmigan-damaladyob-damaladgadid.
MAR 10:15 Napira an bemarga sogmalad, ar dule-wargwen Bab-Dummad-e-negdakmaid mimmiganyob abingasulile, bipisaale Bab-Dummad-e-negdakmaidse dogosulid.”
MAR 10:16 Jesús mimmigan-angaagwar-gasgua, e-argan mimmigan-birgi-mesisad, nued mimmigangi binsasad.
MAR 10:17 Jesús bato nasokargu, dule-wargwen ese abarmaknonikid, geb Jesús-abin yokorgi-sindigar-sii ese egichided: —Odurdaked-saila-nued, an burba-geg-bergued-nikuega, ¿ibi an imakergebe?
MAR 10:18 Jesús, abin-sogded: —¿Ibiga dule-nuedye be anga soge? Dule-wargwen nued, sated, unnila Bab-Dummadbi wargwenna dule-nued gued.
MAR 10:19 Ar be Bab-Dummad-Igar-Mesisad bato be wisid: ‘Mer dule-oburgo. Mer sui-dikarba, degi, ome-dikarba yolemalo. Mer atursamalo. Mer gakansaar aimargi sunmakmalo. Mer aimar-yardakmalo. Be-babgi, degi, be-nangi nue-binsaed-nikaa be damalo.’
MAR 10:20 Dule, abin-sogded: —Odurdaked-saila, gusgu an-sapingwagwad-akar bela we-Igarmar-Mamaidba an nanadiid.
MAR 10:21 Jesús dule-dakdegu, nue-sabedba ega sogded: —Ibmar-gwensak amba be napi: Be nae, bela be ibmar-nikadi, be manigi ukna. Geb a-mani wileganaga be mimioed. Deyobi be nibneggi ibmar-nued nikuoed. Geb a-sorba, be an-sapinga-guega be dagoed.
MAR 10:22 Dule, weyob ega sogles-itosgu, wile-itoded, degi, undar-naibi-itoded, ar ade, dule mani-ibedid.
MAR 10:23 Jesús e-dikarba atakdegu, e-sapinganga sogded: —Ibiyobi dulemar-mani-ibganga Bab-Dummad-e-negdakmaidse-doged dutusur gue.
MAR 10:24 E-sapingan weyob-Jesús-ibmar-sogsadi, geger itodmalad. Ar Jesúsʼdi gannar ega sogdebalid: —Sapingan, ibiyobi dule-maniginbi-dogdar-binsadimaladga, Bab-Dummad-e-negdakmaidse-doged dutusur gue.
MAR 10:25 Ar moli-yargan-muregedga bur baisursunna gued, iko-ibyagi doged. Ar dule-mani-ibeddi, bur-beedse Bab-Dummad-e-negdakmaidse doged.
MAR 10:26 Ar Jesús weyob sogsabargu, bur bule e-sapingan geger itodmalad, na dukin-dukin egisnanai guarmalad: “Degite, ¿ar doa sunna abonolegosunna?”
MAR 10:27 Jesús e-sapingan-dakdegu, ega sogded: —Dulemargardi, geg gued, Bab-Dummadgardi, nabir gued, ar Bab-Dummadgala bela ibmar nabir guedbiid.
MAR 10:28 Pedro Jesúsʼga sogdesunnad: —¿Anmardi igi guoe? Anmardi beba-gudigumalaga, bela-ibmar-nikadi obesad.
MAR 10:29 Jesús, Pedro-abin sogded: —Napira an bemarga soged, ar dule an-nug-ular, degi, An-Gayaburba-Nued-ular, na e-neg, e-gwenadgan, e-bunmar, e-bab, e-nan, e-ome, e-mimmigan, degi, e-nainu metele,
MAR 10:30 we-napneggi we-dule dulataledba (100) bur bule we-ibmarmar abingaoed: Negmar, gwenadgan, bunmar, nangan, mimmigan, degine, nainugan. Ar mesagwar we-napneggi gudiguo-inigwele, ibagan-danikoedsedi, burba-geg-bergued nikuoed.
MAR 10:31 Ar emi, dule-dummagan-gumalad, dule-sorbarmaladga guoed. Dule-sorbarmaladdi, dummaganga guoed.
MAR 10:32 Jerusalén-neggweburse nakwemai gusmalad. Jesús e-sapingan-idu nadapi gusad. E-sapingan geger dakmalad, degi, dule-bamalad-sorba-danimarmogad nue-dobe itomalad. Geb Jesús gannar na e-sapingan-ambe-gakabogwad (12) bachikii sesad. Geb agi amarga sogded, ede igi guoe:
MAR 10:33 “Anmar Jerusalén-neggweburse nadapmalad. Ani an Dule-Machi, dule-irwa-Bab-Dummadse-gormalad-e-dummaganga, degi, Garda-Narmaked-Dulemarga an-ukmaloed. Amar sogmaloed oburgwemarye, geb Judíoʼsurmaladga an-ukmaloed.
MAR 10:34 Amar angi dodomaloed, angi wiakmaloed, an-bibyomaloed, degi, an-oburgwemaloed. A-sorbali, ibapaagi an gannar durguoed.”
MAR 10:35 Zebedeo-machimala Jacobo, degi, Juan, Jesúsʼse nonimalad, ega sogdemalad: —Odurdaked-saila, anmar bese ibmar-egisoedi, be anmarga ukbi anmar abedo.
MAR 10:36 Jesús, abin-sogded: —¿Ibi bemarga ukbi be an-abesunna?
MAR 10:37 Jesús-abin imakdemalad: —Yoedse bela-ganguedgi be-ologangi be sigisale, be-dikarba anmar-sied be anmar-imako. Gwensak be-argan-nuedsik, baid be-argan-sapiledsik.
MAR 10:38 Geb Jesús amarga sogded: —Bemar wissulid ibi be anse egisnanai. ¿Bemar sunna dummad-wilegoed-nog an goboed, gobmaloe? Degi, ¿bemar sunna an-diigi-oglegoedgi, oglemogoe?
MAR 10:39 Jesús-abin sogdemalad: —Eye, anmar sunna gumala. Jesús amarga sogded: —Eye napiragwa, an-nog-goboed bemar gobmarmogoed. An-diigi-oglegoedgi bemar oglemarmogoed.
MAR 10:40 Ar an-argan-nuedsik, degi, an-argan-sapiledsik-sigeddi an-sogedba uklegosulid. Adi, bato dulemarga-uklegoye-soglesadga uklegoed.
MAR 10:41 E-sapingan-baigan-ambemalad (10), Juan, degi, Jacobo, dummadga-gubimalad-egisnai-itosmargu, ese uludmalad.
MAR 10:42 Degisoggu, Jesús na e-sapinganse gochad, geb amarga sogded: —Bemar nue wismalad, dulemar-we-napneggi na dummagan-itomalad, e-sordamar-irgwensuli imakdaed. Degi, e-dummaganga-gudimalad gandikidba dulemar-barmidaed.
MAR 10:43 Ar bemardi, mer deyob gumalo. Ar be dummadga-gubiele, emar-maiga be guergebed.
MAR 10:44 Ar dule emar-iduedga-gubiele, bela-dulemar-maiga guergebed.
MAR 10:45 Ar ani Dule-Machi, we-napnegse anga ibmar-imakmalaga an nonisulid. Ar an emarga ibmar-imakega nonikid, deginbali, an san-ukega an nonibalid, adi, dule-bukidar-isgudimalad-anar an burgwegar.
MAR 10:46 Geb degine, Jericó-neggweburse nonimalad. Geb gannar Jesús, e-sapinganmala, degi, dule-bukidarmala Jericó-neggweburgi noarmargua, dule-aku-ataked, Timeo-machi-Bartimeoʼye-nugad igargi siid, mani-egissiid.
MAR 10:47 Bartimeo itoargu Jesús-Nazaretʼgined nadapye, binnasur gotegusad: —¡Jesús, Rey-David-Machi, wile be an-dake!
MAR 10:48 Bukidara, Bartimeoʼse uluarmalad, adi, mer sunmakegar. Aka bur bule Bartimeoʼdi binnasur-gorsii gusad: —David-Machi, ¡wile be an-dake!
MAR 10:49 Geb Jesús gwisgusunnad, degi, sogded: —Ese gornamar. Degisoggu, Bartimeoʼse gochamalad, ega sogdemalad: —Bartimeo, be gandik sae, be gwisgu, Jesús bese goled.
MAR 10:50 Geb Bartimeo e-suba-mide yog-gwisguar imaksad, degi, Jesúsʼse nonisunnad.
MAR 10:51 Jesús Bartimeoʼga sogded: —¿Ibi bega imakbi be an-abege? Dule-aku-ataked-Bartimeo, abin-sogded: —Odurdaked-saila, ibya an nugubied.
MAR 10:52 Jesús, abin-sogded: —Be nae, be an-bengussursoggu, be nugussun. Geb agi, Bartimeo yog-magasaila atake naded, degi, Jesúsʼba nade gussunnad.
MAR 11:1 Bato Jerusalén-neggwebur-modanimargu, Betfagé-neggweburse, degi, Betania-neggweburse warmakdanimargu, Yar-Olivosʼye-nugad-siidgi, Jesús na e-sapingan-warbo barmisad,
MAR 11:2 amarga sogsad: “Anmar-asabin neggwebur-bipi-siidse be namar. A-neggweburgi bemar dogdapmalale, bemar moli-bipi-uayasuid, dule-egi-yoo-gwen-siged, atinnar-nai be dakdapmaloed. Be esikmaloed, geb be sedamaloed.
MAR 11:3 Dule-wargwen bemarga sokardibe: ‘¿Ibiga bemar moli-bipi esiknanai?’ Bemar, abin-sogoed: ‘Ar Dummad we-moli abeged. Ebusad-sorba, bega yog-gannar sedabaloed.’ ”
MAR 11:4 Jesús-sapingan nadmalad, geb moli-bipi-uayasuid, igargi magaba, yawagakgi atinnai dakdapmalad. Geb a-moli esiksamalad.
MAR 11:5 Geb degine, dulemar-agi-gunanaid, ega sogdemalad: “¿Ibiga bemar moli-bipi-uayasuid esiknanai?”
MAR 11:6 Jesús-sapingan-warbogwad, Jesús-ega-sogsadba, abin-imakdemalad, geb moli-bipi-esikega imaksamalad.
MAR 11:7 Jesúsʼse moli-bipi-uayasuid senonimalad. Geb sorbali, moli-bipi-birgi na e-mormar ogichamalad, geb Jesús moli-birgi sigisad.
MAR 11:8 Jesús bia igargi nasaoe, agi dulemar-bukidar na e-mor ogitemalad, abala ogob-gagangiid-e-gagan gwachamalad, degi, Jesús-iduar igargi mesismalad.
MAR 11:9 Dulemar-Jesús-idu-nadapmalad, degi, sorba-danimalad, bela oimakdemalad: “¡Bab-Dummad-nug odummomar! ¡Dule-Bab-Dummad-nuggi-danikid, bela ega ibnuedga gusun!”
MAR 11:10 “¡Anmar-dad-Rey-David-yar-ganiguoedgi, Bab-Dummad nued-binsasun! ¡Nibneggi e-nug odummomarbar!”
MAR 11:11 Jesús Jerusalénʼse dogdapid, geb Bab-Dummadse-goled-negse naded. A-neggi bela ibmar-daksad-sorbali, bato neg-osedodsoggu, e-sapingan-ambe-gakabogwadmala (12), Betania-neggweburse nadmalad.
MAR 11:12 Banedgine, Betaniaʼgi noarmargu, Jesús ukudmaad itoalid.
MAR 11:13 Jesús bannaba higuera-sapi gagan-aramakbukwa-daksagua, ese nadegusad, adi, dakega e-san nikadibeye. Sapise mosgua, unnila gaganbi aramakwichi dakdapid, ar ade, amba yoo san-nikued-e-ibagan moed.
MAR 11:14 Jesús higuera-sapiga sogdesunnad: “Be-san dule bipisaale gwen bar gunnosulid.” Jesús-degi-sogsad bela e-sapingan itosmalad.
MAR 11:15 Jesús, na e-sapinganmala gannar Jerusalénʼse nonimargu, Bab-Dummadse-goled-neggi dognonikid, geb agi dulemar-ibmar-baknanaid, degi, ibmar-ukbukmalad onisad. Dulemar-mani-ogwabukmalad-e-mese binnasur-bikiin meted, degi, dulemar-nuu-ukbukmalad-e-gan bikiin metebalid.
MAR 11:16 Jesús dule-wargwensaar ibmar-semai Bab-Dummadse-goled-neggi gwen imaksasulid.
MAR 11:17 Geb Jesús dulemar-odurdakde, weyob sogded: “Bab-Dummad-Gardagi weyob narmakar naid: ‘An-neg bela dulemar-yar-baid-baidgi-bukwamaladga, anse-goled-negye nugguoed.’ Ar bemardi, atursamalad-negga imaksamalad.”
MAR 11:18 Dule-irwa-Bab-Dummadse-gormalad-e-dummagan, degi, Garda-Narmaked-Dulemar, weyob soge itosmargu, igar-amiarmalad igi-saer Jesús-oburgwemalodibeye. Ar Jesús-dobmalad, ar ade, bela dulemar Jesús-emar-odurdaked geger dakmalad.
MAR 11:19 Neg-mutikgudgu, Jesús, Jerusalénʼgi banguded.
MAR 11:20 Jesús na e-sapinganmala, banedgi wakudaryalaba higuera-sapi-walik-nadapmargu, dakarmalad, bela higuera-sapi e-malise-bakar, dingus gwichi.
MAR 11:21 Agi Pedro ebinsaargu, Jesúsʼga sogded: —Odurdaked-saila, be dake, be higuera-sapi-ukabsasgusad, dinguded.
MAR 11:22 Jesús ega sogded: —Bab-Dummadgi mer be bengumala.
MAR 11:23 Ar napira an bemarga soged, ar doa-dule we-yarga sogdibe: ‘Wegi-siid be ainire, be demarse nae’, a-dule bensulidgi deyob sogdibe, ar e-sogedba ibmar-ega-guo daksoggu, ar deyob ega ibmar guodo.
MAR 11:24 A-ulale, an bemarga soged: Bab-Dummadse be gorsigusar, bela be-ibmar-egissiid bato be bela abingasye binsae, ar deyob be binsaele, be ibmar nikuoed.
MAR 11:25 Bab-Dummadse be gorsiidgine, dule begi-nosale, be igi-barsaye binsae. Deyobi, be-Bab-nibneggi-maid be-isgusad bega elimogoed.
MAR 11:26 Ar bemar dule-begi-nosad igi-barsaye be sogsulile, be-Bab-Dummad-nibneggi-maid be-isgusad bega eliosurmogad.
MAR 11:27 Jesús na e-sapinganmala Jerusalénʼse gannar nonimarbalid. Jesús Bab-Dummadse-goled-negyaba nadapgu, dule-irwa-Bab-Dummadse-gormalad-e-dummagan, Garda-Narmaked-Dulemar, degi, Judíoʼmar-girmar-dummagan ese nonimalad,
MAR 11:28 Jesúsʼga sogdemalad: —¿Doa-nuggine wede be we-ibmar imakdii? ¿Ar doa bega gangued uksa, be weyob ibmar imakega?
MAR 11:29 Jesús, abin-imakdegu, sogded: —An bemarse ibmar-soggwen egismogo. Bemar an-abin-imaksale, geb an bemarga sogmogoed, ar doa we-gangued anga uksa, an weyob we-ibmar imakegar.
MAR 11:30 Diigi dulemar-ogega, ¿doa Diigi-dule-oged-Juan-barmiali? ¿Bab-Dummadi, igi dulemala? Anga be sogmala.
MAR 11:31 Judío-dummagan na muchub-muchub sognanai guarmalad: “Anmar sogdibe: ‘Bab-Dummad barmiarye’, anmarga sogdagoed: ‘Degite, ¿ibiga bemar bengusmarsunna?’
MAR 11:32 Ar anmar sogbardibe: ‘Dulemarye.’ ” Ar dulemar-dobmarsoggu, geg weyob sogmarbalid, ar ade, bela dulemar sogmalad, Juanʼde, Bab-Dummad-gayaburba-barsoged-sunnadye.
MAR 11:33 Degisoggu, Judío-dummagan Jesús-abin sogdemarsunnad: —Anmar wissurmala. Jesús, abin-imakdemogad: —An bemarga sogosurmogad, wede doa-nuggine an weyob we-ibmar imakdii.
MAR 12:1 Geb degine, Jesús dulemarga burbar sunmakdesunnad: “Dule-wargwen nainugi uva-digsad. Ber ebilis emaksad, agi uva-egured-neg sobsad, degi, nakulegega neg-warakgwagad-matusulid sobsabalid. Geb nainu-ibed dule-arbamaladga e-nainu manigi-urmaksad. Nainu-ibeddi dikasur neggwebur-baidse naded.
MAR 12:2 ”Uva-weed-ibagan-mosgu, nainu-ibed na e-mai-wargwen nainugi-arbamaladse barmialid, adi, uva-egadga-gued suegar.
MAR 12:3 Ar nainugi-arbamaladdi nainu-ibed-e-mai gasmalad, sabsur sarsosmalad, degi, unni-arganagwabi gannar barmismalad.
MAR 12:4 Geb nainu-ibed e-mai-baid barmiarbalid. Adi, e-ibe nono marismalad, degi, egi dodosmarbalid.
MAR 12:5 Nainu-ibed gannar e-mai-baid barmiarbalid, adi, oburgwismalad. Deyobi, bukidar maigan-bamalad barmiarbalid. Gwen-gwen sarsosmalad, baigandi oburgwismalad.
MAR 12:6 ”Napi, e-ibe wargwen bedapid, adi, e-machi-sabed. Napidgine, na e-machi-sabed barmialid, ar ade, binsaed: ‘An-machigindi binsaed-nikaadamalo an insaye.’
MAR 12:7 Ar nainugi-arbamaladdi, na muchub-muchub sogdemalad: ‘We-dule nainu-gaoedid. Anmar oburgwemala. Deyobi, nainu anmargadga guoed.’
MAR 12:8 Degisoggu, machigwa-gasmarsunnad, degi, oburgwismalad. Geb nainu-dikarba machi-metemalad.”
MAR 12:9 Jesús dulemar-e-itobukmaladga sogded: “¿Nainu-ibed, igi dulemar-imako be insae? Nonikogu, nainugi-arbamalad-oburgwenonikoed. Geb dule-bamaladga e-nainu urmakoed.
MAR 12:10 ¿Ar bemar Bab-Dummad-Garda absodisurmarsi? Agi weyob sognaid: ‘Akwa dule-neg-sobmaladse-oballesadi, neg-sobleged-e-akwasailaga gunonikid.
MAR 12:11 Bab-Jehová deyob we-ibmar imaknonikid, anmarga geger-dakle gunonikid.’ ”
MAR 12:12 Judío-dummagan, degi, dule-irwa-Bab-Dummadse-gormalad-e-dummagan, Jesús-burbar-ibmar-sogsad emargi-sunmaknaid magar itosmalad. A-ulale, Jesús-gabi guarmalanad, degi-inigwele, dulemar-dobe-itomalad. Degisoggu, Jesús-akar-imaksasurmalad, geb nadmalad.
MAR 12:13 Geb sorbali, Jesúsʼse abar Fariseoʼmar, degi, Herodes-sordamar barmiarmalad, adi, Jesús na e-ibmar-sogedgi egi gwisgumalagar.
MAR 12:14 Jesúsʼse-nonimargu, ega sogdemalad: —Odurdaked-saila, anmar be-wisdo, be dule-innikigwadid. Be dule-ibmar-sogedba binsaed galesulid, ar ade, be dulemar-e-daklegedgi ataksulid. Ar be napiragwadgi Bab-Dummad-Igar-Maid odurdaked. Be anmarga soge, ¿ar we igar-nuedi, Roma-Dummad-Césarʼye-nugad anmargi-mani-gaed, anmar bennuked?
MAR 12:15 ¿Anmar bennukoe, igi bennuko suli? Ar Jesúsʼdi we-dulemar yamo e-yardakdanimalad-wissoggu, amarga sogded: —¿Ar ibiga bemar yamo an-yardakdanimala? An dakegala, be anga Roma-mani-gwagwen sedamala.
MAR 12:16 Ega mani senonimalad, geb Jesús ese egichided: —¿Ar wede we-manigi doa-wagar-wilub sii? ¿Doa-nug narmakar naibali? Jesús-abin sogdemalad: —Roma-Dummad-Césarʼye-nugad-e-wagar-wilub sii.
MAR 12:17 Jesús, abin-imakdegu, ega sogded: —Ar ibmar Césarʼgadir, be Césarʼga ukmardo. Ar ibmar Bab-Dummadgadir, be Bab-Dummadga ukmardo. Ar weyob Jesús ega soge itosmargu, bela dulemar geger Jesús-dake bukusmalad.
MAR 12:18 Geb degine, Saduceoʼmar Jesúsʼse nonimalad. Amar sogmalad, dule burgwisale, gannar geg bar durguye. A-ulale, a-igar Jesúsʼse egisdemalad:
MAR 12:19 —Odurdaked-saila, Moisés anmarga Bab-Dummad-Gardagi narmakar obesad, dule-wargwen burgwisale, degi, mimmi-nikussuli ome-obesale, e-urba a-ome-nikuoye, adi, e-iaga anagan-urbegarye.
MAR 12:20 Dakargua, machimala na e-gwenadgan-walagugle (7) gumalad. Ia-dummad ome-nikusgu, anagan-urbissuli burgwisad.
MAR 12:21 E-urba-sorbalid, e-ia-omega-gusad nikunonikid, amba e-iayob mimmi-nikussuli burgwismogad. Amba deyobi e-urba-sorbalid-baid a-ome nikunonimogad.
MAR 12:22 Bela-e-walagugled (7) a-ome-nikusmaladbiid, anagan-gwen-obessuli burgwismalad. Geb a-sorbali, ome burgwenonimogad.
MAR 12:23 Ar dule-gannar-durguoed-iba-nonikile, a-omede, ¿doa-omega guosunna, ar ade, bela e-gugledi nikusmaladbiid?
MAR 12:24 Geb Jesús, abin-imakdegu, sogded: —Ar bemar we-igar noar-ganimalad. Ar ade, bemar Bab-Dummad-Garda-narmakar-maid wissurmalad, degi, Bab-Dummad-gangued aku-itomarbalid.
MAR 12:25 Ar dulemar gannar durguarmalale, bar ome-nikunai, degi, sui-nikunai guosurmalad. Ar ade, baliwitur-nibnegginmaladyob gumaloed.
MAR 12:26 Ar dulemar-gannar-durgued-igarsikdi, ¿bemar Moisés-gardagi-narmakar-maid absodisurmarsi? Deun Moisés sapi-bula-gummakgwichi-dakargu, ese nadgu, igi Bab Dummad ega sogsa-gusa: ‘Ani an Abraham, Isaac, degi, Jacob e-Bab-Dummad gued.’
MAR 12:27 Bab-Dummad dulemar-burgwarmalad-e-Bab-Dummadsulid, Bab-Dummad dulemar-dula-gudidimalad-e-Bab-Dummadid. Bemar nue-noar sunmakdimalad.
MAR 12:28 Garda-Narmaked-Dule-wargwen Jesúsʼse nonikid, geb Jesús Saduceoʼmarbo abin-abin-imaknanai itosad. Ar Jesús nue-yeer Saduceoʼmar-abin-imaksa itossoggu, Jesúsʼse egichialid: —Bela Bab-Dummad-Igar-Maid, ¿igid bur-biriginedi?
MAR 12:29 Jesús, abin-sogded: —Igar-bur-birigined, wedo: ‘Israel-dulemar be itomar. Anmar-Bab-Dummad, abi unnila Dummad gued.
MAR 12:30 Bab-Dummad-be-Dummad, bela-belad be-gwagegi, be-san-burbagi, be-binsaedgi, degi, be-ganguedgi be sabgue.’ We bur-igar-biriginedid.
MAR 12:31 A-igar-sorbalid amba degisaarbalid: ‘Na be-san-sabgueyob, be, dule-baid sabgumoga.’ We-igarmarba bur igar-baid-birigined sated.
MAR 12:32 Garda-Narmaked-Dule, Jesús-abin sogded: —Odurdaked-saila, nue-napira be soged, ar Bab-Dummadbi unnila wargwennaa gued, ayobid baid sated.
MAR 12:33 Bab-Dummadga bela ibmar-ogumakar-ukedba, degi, ibmar-baigan-ega-ukedba, bur-biriginedid, bela-belad gwagegi Bab-Dummad-sabgued, mag-ito-guedgi sabgued, san-burbagi sabgued, ganguedgi sabgued, degi, na be-san-sabgueyob dule-baid-sabgued.
MAR 12:34 Jesús, Garda-Narmaked-Dule nue-binsaed-nikaa e-abin-imaksa-itosgu, ega sogded: —Bab-Dummad-negdakmaidgi be dikasur gudisulid. A-sorbali, Jesúsʼse dule-baid bar-gwen-ibmar-egisbi itossurmalad.
MAR 12:35 Jesús, Bab-Dummadse-goled-neggi dulemar-odurdaksigu, sogded: —Garda-Narmaked-Dulemar, Bab-Dummad-dule-wargwen-barmidagoye-sogsadnik sogmalad, a-dule, Rey-David-e-machiye.
MAR 12:36 Ar Rey-David-sunnaddi, Bab-Dummad-Burba-Isligwaledba, sogsagusad: ‘Bab-Dummad, an-Dummadga sogsad: An-argan-nuedsik be sige, be-isdarmalad an bela ogalakuedse be sige.’
MAR 12:37 ”Ar David-sunnad ‘Dummadye’ ese goled, degite, ¿Cristo igi e-machiga gubarsunnoe?” Dulemar-bukidar bela nue-yeer Jesús-itobukwa gusmalad.
MAR 12:38 Jesús dulemar-odurdakdebali, sogded: —Garda-Narmaked-Dulemargi nue salakarmar. Amardi, mor-oyaarmakdiir na yeer-itodamalad, degi, dulemar bela ese ibmar-ukleged-neggi-goledbimalar, yeer-itodamarbalid.
MAR 12:39 Amar Judíoʼmar-onmakedneggi dule-dummagan-gan-sigedginbi sigbidamalad, degi, mas gullealir, dummagan-gan-sigedginbi sigbidamarbalid.
MAR 12:40 Omegan-ei-sui-burgwismalad-ibe ibmar susdamalad, deginbali, dulemar yeer e-dakegala, yamo suitii Bab-Dummadse gorgwisdamarbalid. Ar amar bur bule sabsur-odurdaklemaloed.
MAR 12:41 Jesús Bab-Dummadse-goled-neggi, bia mani-Bab-Dummad-ukleged-e-ulu-siid-asabin signonikid. Agi, daksigualid, igi dulemar ulu-yagi mani-urbenonidamala. Bukidar mani-ibgan ulu-yagi mani-ichesur egwadnonidamalad.
MAR 12:42 Agine, ome-ei-sui-burgwisad-wileged-wargwen nonimogad, geb mani-esnon-gwabo wis egwachad.
MAR 12:43 Geb Jesús na e-sapinganse gochad, ega sogded: “Napira an bemarga soged, we-ome-ei-sui-burgwisad-wileged bur bule ulu-yagi dule-baiganba mani-egwachad.
MAR 12:44 Ar dule-baigandi, mani-ei-gwabgusad egwachamalad. Ar we-omedi, na e-wilesagwadgine bela-mani-nika-gudiid egwachad. We-maniginbi gudiinad.”
MAR 13:1 Jesús Bab-Dummadse-goled-neggi-nomaigua, e-sapin-wargwen ega sogded: —Odurdaked-saila, akwamar bule-burwi be dake, degi, negmar yeerdaklebalid.
MAR 13:2 Jesús, abin-imakdegu, ega sogded: —Bela we-neg-dummagan be dakedi, e-akwa-dummagan bipisaale gwagwensaar birgin-birgin bar sigosulid, bela egwallegoedbiid.
MAR 13:3 A-sorbali, Jesús Olivo-yargi, Bab-Dummadse-goled-neg-asabin sigdapid. Geb Pedro, Jacobo, Juan, degi, Andrés, bachikii ese egichiarmalad:
MAR 13:4 —Be anmarga soge, ¿sanagwadse we-ibmar guoe? ¿Ibi-wilubgan oyoledagosunna, adi, oyogega bela we-ibmarmar gusokarye?
MAR 13:5 Jesús, abin-sogdegu, amarga sogded: —Nue salakarmar, mer dulemar be-yardaked be-imakmalo.
MAR 13:6 ”Ar bukidar yamo anyob na imaknonimaloed. ”Sognonimaloed: ‘Ani an Cristoʼye,’ dulemar-bukidar ese yardaklemaloed.
MAR 13:7 ”Bemar bila-onolenaiye itoardibe, degi, bila-onoleged-daniye be itoarmardibe, mer be gwayemalo. ”Ar weyob ibmarmar gugwelergebed, degi-inigwele, amba yoo negdi bergued-moed.
MAR 13:8 ”Dulemar-yar-baid-baidgi-bukmalad na muchub-muchub bila-ononanai gudamaloed, degi, reymar na muchub-muchub egi-yolenanai gudamarbaloed. ”Bela yar-baid-baidgi negabandur-dummagan nagumai gudagoed. Ukud-dummad nagubaloed. ”We-ibagan-bulegan, igi ome gebe e-bonigan-nunmaked-itoardaedyobi guoed.
MAR 13:9 ”Ar bemardi nue salakarmar. Ar dulemar dulemar-igar-nabiromaladga bemar-ukmaloed, degi, Judíoʼmar-onmakedneggine sabsur be-bibyomarbaloed. An-nug-ulale, dummagan-negdakmamaid-asabin, degi, reymar-asabin be-sedmaloed, adi, bemar angi amarga sunmakmalagar.
MAR 13:10 Degi-inigwele, bela bin dulemar-yar-baid-baidgi-bukmaladga Bab-Dummad-Gayaburba-Nuedgi sunmaklegwelergebed.
MAR 13:11 ”Ar bemar-gasmalale, degi, bemarga igar-itolealile, mer bukib binsamalo, ibu an sogodibeye. Unnila Bab-Dummad-bega-binsaed-ukoed be sogmaloed. Ar ade, bemar sunmakosulid, Bab-Dummad-Burba-Isligwaled bemar-ular sunmakoed.
MAR 13:12 ”Oburgwega na gwenadgan muchub-muchub-urmaknanai gumaloed. Bab, na mimmigi-aibinnai guoed. Mimmigan, babgangi gwisgunai gumaloed, degi, na oburgwemaloed.
MAR 13:13 Bela dulemar an-nug-ulale, isdar-be-dakmaloed. Ar we-ibmar-berguedse dule-gwen-sikirmaksasuliddina, bendaklegoed.
MAR 13:14 ”Bab-Dummad-gayaburba-barsoged-Daniel, weyob narmaksad: ‘Bemar Bab-Dummadga bela-bela-ibmar-isgana-guedi Bab-Dummadse-goled-neggi sige-wilubsulinadgi sii be dakalile, bemar Judea-yargi-gudimalad, be yalaganba wakinmarsun.’
MAR 13:15 ”Dule-neg-uas-birgi-siid mer aidedago, deginbali, ibmar-oniega mer be negyaba dogbalo.
MAR 13:16 Dule-sapurba-gudiid, mor-sudagega mer gannar negse dago.
MAR 13:17 Ar omegan-gurgin-nika-gudidimalad, degi, a-ibagangi mimmigan-gwaru-onunanaimalad, duledar-wilesmar.
MAR 13:18 Bab-Dummadse be gormala, adi, we-ibagan-bulegan mer dii-wied-niigi guegar.
MAR 13:19 Ar a-ibagan, naibi-dummad-itoleged-ibaganad. Ayobi, Bab-Dummad-neg-obinnisad-akar, emi-ibadse, dulemar bela-bela wiledisurmalad. A-sorbali, ayobi, bar gannar wilemalosurbalid.
MAR 13:20 Ar Bab-Dummad, a-ibagan giar imaksasulina, dule gwen durguosulinad. Ar Bab-Dummad na e-sordamar-susad-ulale, a-ibagan giar nasiksad.
MAR 13:21 Degisoggu, dule-wargwen bemarga sokardibe: ‘Be dakena, wegi Cristo gudii, igidibe, weba Cristo gudii,’ mer be itomalo.
MAR 13:22 Ar ade, Bab-Dummad-dule-wargwen-barmidagoye-sogsad-duleyob, degi, Bab-Dummad-gayaburba-barsogedyob dulemar nonimaloed. Amar dulemar-yardakega galagwensuli ibmar-wilubgan, degi, ibmar-dakledisurmalad imakdamaloed. Amba Bab-Dummad-na-dulemar-susmaladse-bakar, sunna ese yardaklesmalaled.
MAR 13:23 Degisoggu, nue salakarmar, an bato iduakwaa bela bemarga ibmar sogsad.”
MAR 13:24 Jesús sogdebalid: “Ar a-ibagangine, a-ibagan-naibi-itoleged-sorbali, ‘dad-ibeler bar gaosulid, nii bar gaosurbalid.
MAR 13:25 Niisgwamar-nibneggi-nanaid babatidagoed. Nibneggi ibmar-dummagan-gala-nika-nanaid bela giglimakoed.’
MAR 13:26 ”Geb degine, ani Dule-Machi, mogir-imbaba bela-bela-ganguedba, degi, bela-bela-yeerdaklegedba dani dakdamaloed.
MAR 13:27 Geb degi, an-baliwiturmar bela napneg-ugakaase, degi, nibneg-ugakaase, an-sordamar-nugsalesmalad anga weenaega an barmidoed.
MAR 13:28 ”Sapi-higuera-e-wilubgangi we-ibmar be durdakmar: Ar e-anagan dudumaksale, degi, e-gagan aramaksale, bemar nue-wisid bato yor omodanikid.
MAR 13:29 Amba deyobmodo, bemar we-ibmarmar an-bemarga-sogsad deyob guar bemar dakalir, bemar wisdo, gannar an-danikid bato nue omosad.
MAR 13:30 Napira an bemarga soged, we-dulemar-emi-dula-gudimalad-burgwed-idu, we-ibmarmar bela guedsegad.
MAR 13:31 Nibneg, degi, napneg, bela berguoed. An-gayaburbadi bipisaar berguosulid, degisadeguoed.
MAR 13:32 ”Ar an-danikoed-ibadi, degi, e-wachidi, dule gwen wissulid. Amba baliwiturmar-nibneggi-bukwamaladse-bakar wissurmalad. Anse bakale, an wissurmogad. Unnila Bab-Dummadbi wisid.
MAR 13:33 Degisoggu, nue atakmar, guagwar ambikumar, gatik Babse gormar, ar ade, bemar wissulid sanagwadse an danikoe.
MAR 13:34 ”Ar dule-wargwen neggwebur-baidse nasokaliyob gued. A-dule, ega-neg-akwemalaga e-neg obesnaded. Ega-arbamaladga arbaed uksa naded. Yawagak-dakedga nue-nakulegoye sogsa naded.
MAR 13:35 Degisoggu, mer gabmalo, ar be wissurmalad sanagwadse dummad-neg-ibed danikoe. Neg-sedogwendibe, neggabgwendibe, gebe-gannir-namakedgindibe, wakdardibe, bemar wissulid.
MAR 13:36 Ar ade, ukiagwar bemargi danikir, mer gabmai bemar-dakegar.
MAR 13:37 An bemarga sogedi, an bela dule-bamaladga sogmogad: ¡Mer gabmalo, nue nakulemalo!”
MAR 14:1 Oburgwilegoenad-Iba-onoleged, degi, Madu-Inasuli-Gulleged-Iba-onoleged ibabo-napid. Dule-irwa-Bab-Dummadse-gormalad-e-dummagan, degi, Garda-Narmaked-Dulemar igar-amiarmalad, igi-saele, yamo-yardakar Jesús-gamalodibeye, adi, oburgwemalagar.
MAR 14:2 A-ulale, na muchub-muchub sogdemalad: “Mer anmar ibagi Jesús-gamaloye. Abakale, Jesúsʼbina dulemar urwearmalarye.”
MAR 14:3 Jesús Betania-neggweburgi Simón-naibe-buna-yaa-maleged-nika-gudigusad-neggi mas-gunsigua, ome-wargwen gwallu-wawa-nued, nardoʼye-nugad, gargerba-baklegedi, bute-akwa-alabastroʼgi-sii senonikid. Ome bute-nono-bichisgu, Jesús-nonogi gwallu-wawa eosad.
MAR 14:4 Gwenna-gwenna-bukmalad sae-itode sogdemalad: —¿Ibiga we-ome binsarsunna gwallu-wawa-nued wiosa?
MAR 14:5 Ar we gwallu-wawa mani-dummarba nabir uklegoenad, adi, wileganaga a-mani uklegegar. Dulemar omegi sunmaknanai guarmalad.
MAR 14:6 Jesúsʼdi sogded: —Mer be omegi sunmakmar. ¿Ar ibiga bemar ese urwemala? Ar we-ome ibmar-imaksad dog-nued angi binsasad.
MAR 14:7 Ar bemar-abargi dule-wilegana degisadegu gudiguoed. Bemar dule-wilegana-bendakbiele, sunna be bendakoed.
MAR 14:8 We-ome, unnila na sunna-ibmar-imakedba ibmar-imaksad. An-diglegoedga iduakwaa an-san gwallu-wawagi magsad.
MAR 14:9 Napira an bemarga soged, we-napneggi bia Bab-Dummad-Gayaburba-Nuedgi sunmaklegoe, we-ome-ibmar-imaksad-ebinsamalaga egi sunmaklemogoed.
MAR 14:10 Judas Iscariote, Jesús-sapingan-ambe-gakabogwad-wargwenad (12), darba Jesús-ukega dule-irwa-Bab-Dummadse-gormalad-e-dummaganse nadegusad.
MAR 14:11 Judío-dummagan, Judas-itosmargu, weligwar itosmalad, ega mani ukmaloye sogsamalad. Degisoggu, Judas igar-amiarsunnad, igi-saele darba Jesús-ukodibeye.
MAR 14:12 Madu-Inasuli-Gulleged-Iba gebe-onodedgi, gusgu Oburgwilegoenad-Ibagi-sibad-wawaad-oburgwiledaedgi, e-sapingan Jesúsʼse egichiarmalad: —Oburgwilegoenad-Ibagi-mas-gulleged gunnega, ¿bia anmar bega guagwar ibmar-imaknabi be anmar abege?
MAR 14:13 Jesús na e-sapingan-warbo barmisad, ega sogsad: —Neggweburse be namar. Agi dule-wargwen gwidugi dii-semai bemargi nodagoed, eba be namalo.
MAR 14:14 A-dule bia dogdapoe, a-neg-ibedga be sogmaloed: ‘Odurdaked-saila sogye: ¿Bia Oburgwilegoenad-Ibagi an, an-sapinganmala mas-gunnoed-neg siiye?’
MAR 14:15 Geb neg-ibed, niba-aila-birgi neg-dummad bato guagwar nuesaar-sii bemarga oyogoed. Agi bemar anmar-mas-gunnoed guagwar urbemaloed.
MAR 14:16 Jesús-sapingan-warbogwad neggweburse nadmarsunnad. Neggweburse dogdapmalad, ar igi Jesús emarga sogsagusa, deyobi dakdapmalad. Degisoggu, masgullegoed guagwar urbismalad.
MAR 14:17 Neg-mutikgudgu, Jesús na e-sapingan-ambe-gakabogwadmala (12) nonimalad.
MAR 14:18 Mese-naba mas-gunsimargu, Jesús sogded: —Napira an bemarga soged, bemar-wargwen-anba-mas-gunsiidi, darba an-ukoed.
MAR 14:19 Geb e-sapingan wile itodmalad, na warwargwengi Jesúsʼse egisdemalad: —¿Ani an be-ukoe? Baid sogdemogad: —¿Ani an be-ukoe?
MAR 14:20 Jesús e-sapingan-abin sogded: —Bemar-ambe-gakabogwad-wargwenad, bategi anba-madu-wara-imaknaid, a darba an-ukoed.
MAR 14:21 Napira an bemarga soged, ani Dule-Machi, ar igi Bab-Dummad-Gardagi angi narmakar-nai, ar deyob an burgoed. Ar dule-darba-an-ukoeddina nue-wilegoed. A-dule gwalulessulina, bur nabirindo.
MAR 14:22 Mas gunbukmargu, Jesús madu-susgua, Bab-Dummadga dog-nuedye sogsad. Geb a-sorba, madu-bisge-bisge-imaksagua, e-sapinganga uksad, ega sogded: —Be sumar, we-madu an-sanad.
MAR 14:23 A-sorbali, Jesús nog susbalid. Geb Bab-Dummadga dog-nuedye-sogsagu, e-sapinganga uksad, agi e-sapingan bela gobsamalad.
MAR 14:24 Jesús e-sapinganga sogded: —We, an-ablisad. An-ablisgi Bab-Dummad dulemarbo igar-bini mesnaid. An-ablis dulemar-bukidar-ulale, milegoed.
MAR 14:25 Napira an bemarga soged, bar an vino gobosulid. Geb iba-nonikoedse, Bab-Dummad-e-negdakmaidgi an vino-binid gobdapoed.
MAR 14:26 Namaksamalad-sorbali, geb Olivo-yarse nadmalad.
MAR 14:27 Geb Jesús na e-sapinganga sogded: —Belagwapa bemar emi-mutik angi bangudmaloed. Ar ade, Bab-Dummad-Gardagi narmakar naid: ‘Sibad-wawaad-edarbed an oburgoed, Geb agi sibad-wawaadmar bela duurmakdoed.’
MAR 14:28 Jesús sogdebalid: —Ar an gannar durgusad-sorbali, an bemar-idu Galilea-yarse naoed.
MAR 14:29 Geb degine, Pedro, Jesúsʼga sogded: —Bela begi bangudmalale, andi begi banguosulid.
MAR 14:30 Jesús, Pedro-abin sogded: —Napira an bega soged, emi-mutiki, gannir-irbo-namaked-iduar, be ilapaa an-osulogoed.
MAR 14:31 Aka bur bule Pedroʼdi sogded: —Ar an beba burgweye sogele, an be-osulogosulid. E-sapingan-baigan bela degibi sogdemalad.
MAR 14:32 Jesús na e-sapinganmala Getsemaníʼye-neg-nugadse nadmalad. Agi Jesús e-sapinganga sogded: “Wegi be ambikumar, andi an Bab-Dummadse gorgwelo.”
MAR 14:33 Unnila Pedro, Jacobo, degi, Juan, eba sesagusad. Agi, Jesús nue-wile itoalid, degi, nue-surbinsa itoarbalid.
MAR 14:34 Jesús na e-sapingan-walapaagwadga sogded: —Andi an ulubgi nue-bukib-itoged, sunna an burgwisar an itoged. Wegi be ambikumar, mer be gabmalo.
MAR 14:35 Jesús sikwas nadgu, napagi yokorgi-sindigar sigdapid. Geb Bab-Dummadse gorsigusad, egi-nunmaked-danikoedi bitigi ega sunna osulogena gadinye.
MAR 14:36 Jesús weyob sogsigusad: “¡Abba! (Abba obared Baba). Begardi, bela ibmar sunna guedbiid. Bitigi be anga dummad-an-wilegoed osulogena gadin. Degi-inigwele, an-ibmar-abegedba mer ibmar guo, unnila be-ibmar-abegedbarbi be ibmar imaksun.”
MAR 14:37 Jesús gannar nonigua, e-sapingan-gabmai daknonikid. Geb Pedroʼga sogded: —Simón, ¿be gabmade? ¿Bipisaar wis be wachi-irgwensaar atakdii gussurde?
MAR 14:38 ¡Atakmala! ¡Bab-Dummadse-gormala! Adi, bemar isguedse mer galakumalagar. Napiragwa bemar-burbadi ibmar-nued-imakega guagwar gudiinad, ar bemar-sandi nolloo gued.
MAR 14:39 Jesús gannar nadbalid. Igi iduar Bab-Dummadse-gocha, deyobi gannar Babse gochabalid.
MAR 14:40 Jesús gannar nonibargua, e-sapingan gannar gabmamai daknonibalid, ar ade, gabed egi nue-obin itomalad. Degisoggu, aku-itomalad igi Jesús-abin sogmaloe.
MAR 14:41 Jesús gannar ilapaagus e-sapinganse nanadanikid, geb ega sogded: “¿Bemar amba gabmamade? ¿Amba obunnomamade? Mer bar be gabmarsun. Wachidi bato omosad. Ani Dule-Machi, dulemar-isgudidimaladga uklesokalid.
MAR 14:42 ”¡Be gwisgumala! ¡Anmar nae! Dule-darba-an-uksokalid bato anmar-walikgusad.”
MAR 14:43 Jesús amba sunmakgwichidgi, e-sapingan-warambe-gakabogwad-wargwenad, Judasʼye-nugad nonikid. Judasʼba dulemar-bukidar es-suidyalaba, degi, suarmar-annik-annik danimalad. A-dulemar, dule-irwa-Babse-gormalad-e-dummagan, Garda-Narmaked-Dulemar, degi, Judíoʼmar-girmar-dummagan, barmiar gusmalad.
MAR 14:44 Judas, Jesús-darba-uksad, dulemarga weyob sogsagusad: “An dule-e-wagar-uoedi, a-duled. A be gamaloed, degi, nue-atinnar be sedmaloed.”
MAR 14:45 Judas nonigua, Jesús-walikaa naded, geb ega sogded: —Odurdaked-saila. Geb ei-wagar usad.
MAR 14:46 Geb degine, dulemar Jesús-gasmarsunnad.
MAR 14:47 Agi Jesús-sapin-wargwen-gwichidi, es-suid-onosgu, dule-irwa-Bab-Dummadse-gormalad-e-dummad-e-mai naibi imaksad, e-ibe uaduk siksad.
MAR 14:48 Jesús dulemarga sogded: —¿Ibiga dule-ibmar-atursaedyob es-suidyalaba, degi, suarmaryalaba be an-gadanimala?
MAR 14:49 Bane-bane an bemar-abargi gudigusad. Bab-Dummadse-goled-neggi, an dulemar-odurdakdii gusad, degite, gwen be an-gassurmalad. Degi-inigwele, ar Bab-Dummad-Gardagi-narmakar-naidba ibmar guergebed.
MAR 14:50 Geb degine, bela e-sapingan Jesús-metenadmalad, e-idu wakitemalad.
MAR 14:51 Sapingwa-wargwen unnila atuedgi-bipirmakar Jesúsʼba nadapgusad. A-sapingwa gasmalad.
MAR 14:52 Edi binnasur-guargu, atued-mide uka-swiri wakited.
MAR 14:53 Dulemar dule-irwa-Bab-Dummadse-gormalad-bur-dummadse Jesús-senonimalad. Agi bela dule-irwa-Bab-Dummadse-gormalad-e-dummagan, Judíoʼmar-girmar-dummagan, degi, Garda-Narmaked-Dulemar ambikunonimalad.
MAR 14:54 Pedroʼdi bannaba Jesúsʼba nadapgusad, degi, dule-irwa-Bab-Dummadse-gormalad-bur-dummad-neg-imbase warmakdapid. Agi Pedro waega suar-ibmala-abargi soo-walik sigdapid.
MAR 14:55 Dule-irwa-Bab-Dummadse-gormalad-e-dummagan, degi, bela-Judío-dummagan-igar-nabiromalad, igar-aminanai-guarmalad, igi-saele Jesús-nodiid amimalodibeye, adi, Jesús-oburgwemalagar. Degi-inigwele, Jesús-nodiid gwen amissurgusmalad.
MAR 14:56 Bukidar yamo-gakansaar Jesúsʼgi sunmaknanai gusad. Degi-inigwele, na e-ibmar-sognanaidi gwen balillaa sogsasurmalad.
MAR 14:57 Geb degine, gwen-gwen gwisgusmargu, yamo-gakansaar weyob Jesúsʼgi sunmakdemalad:
MAR 14:58 —Anmar weyob Jesús soge itosmalad: ‘We-neg-Bab-Dummadse-goled-dulemar-sobsadi, an earoye. Geb ibapaagi an baid soboye, dulemar sobosurye.’
MAR 14:59 Degi-inigwele, amba e-ibmar-sognanaid gwen balillaa sogsurmalad.
MAR 14:60 Geb dule-irwa-Bab-Dummadse-goled-bur-dummad, dummagan-abargi-gwisgusgu, Jesúsʼga sogded: —¿Be dulemar-abin-imakosuli? Be wemar-abin-imakega, ¿igi be sogmogoe?
MAR 14:61 Ar Jesúsʼdi bipisaar sunmaksasulid, gwen abin-imaksasulid. Geb dule-irwa-Bab-Dummadse-goled-bur-dummad gannar Jesúsʼse egisdebalid: —¿Ar be Cristo, Bab-Dummad-Bur-Odummolediid-E-Machi?
MAR 14:62 Jesús, abin-sogded: —Eye, ani an adi. Ani Dule-Machi, Bab-Dummad-Bela-Gangued-Nikad-e-argan-nuedsik sii be an-dakmaloed, degi, nibneggi mogir-imbaba-dani be an-dakmarbaloed.
MAR 14:63 Geb dule-irwa-Bab-Dummadse-goled-bur-dummad, na e-mor siir-imaksad, oyogega, ede Jesús deyob-ibmar-sogsadi sae-itoye. Geb sogded: —¿Ar ibiga e-barsogmalad bar anmar abesunna?
MAR 14:64 We-Jesús Bab-Dummad-nuggi-dodosad, bemar-sunnad itosmalad. ¿Igi bemar itomarmosunna? Bela dummagan-igar-itobukmalad sogsamalad, Jesúsʼga burgwed-igar maiye, degisoggu, oburgwilegergebye.
MAR 14:65 Gwenna-gwenna Jesúsʼgi wiakdemalad. Jesús-ibya-edichamalad, geb e-wagar-bibyonai gusmalad. Ega sognanai guarmalad: —Ar be soge, doa be-sarsosa. Suar-ibmala wagargi Jesús-bibyonai gusmarmogad.
MAR 14:66 Pedro aila-urba neg-imbagi sii, dule-irwa-Bab-Dummadse-goled-bur-dummadga-bunagwa-arbaed nonikid.
MAR 14:67 Bunagwa, Pedro soogi wasii dakargua, nue-nuu dakdegu, ega sogded: —Be Jesús-Nazaretʼginedba gudidamogad.
MAR 14:68 Pedroʼdi bunagwa-abin-osulosa, sogded: —Aku an dake. Deginbali, aku an itobalid ibu be anga soge. Geb Pedro neg-imba-dogedse, magaba noded. Geb agi gannir namakded.
MAR 14:69 Bunagwa gannar Pedro-dakarbargu, dulemar-bukmaladga sogded: —We-dule, Jesúsʼba naimogadid.
MAR 14:70 Pedro gannar osulosbalid. Sikwas-sorbali, dulemar agi bukmalad Pedroʼga sogdemalad: —Napiragwa be Jesúsʼba naimogadid, ar be Galilea-dolad, degi, be-sunmakedi a-dulemaryob be sunmakmogad.
MAR 14:71 Geb Pedro gakansaar, gandikidba ise-sogar sogded: —We-dulegi be sunmakmaladi, an aku dake.
MAR 14:72 Degi-sogsagu, gannir gannar namakdebalid, ase ilabogus namaked. Agi Pedro ebinsaas-naded igi Jesús ega ibmar sogsa: “Gannir-ilabo-namaked-iduar, be ilapaa an-osulogoye.” Geb Pedro ise-boar naded.
MAR 15:1 Wakudaryalaba, dule-irwa-Bab-Dummadse-gormalad-e-dummagan, Judíoʼmar-girmar-dummaganmala, Garda-Narmaked-Dulemarmala, degi, Judío-dummagan-igar-nabiromaladmala igar-amismalad. Igar-itoged-bergusgua, Jesús-edichamalad. Geb Jesús-sesmalad, degi, Pilatoʼga Jesús-ukdapmalad.
MAR 15:2 Geb Pilato Jesúsʼse egichided: —¿Ar be, Judíoʼmar-E-Rey? Jesús, abin-imaksad: —Ar be-sunnad soged.
MAR 15:3 Dule-irwa-Bab-Dummadse-gormalad-e-dummagan Jesús ibmar-isgana-imakdiiye egi sognanai guarmalad.
MAR 15:4 Pilato gannar Jesúsʼse egichided: —¿Be dulemar-abin imakosuli? Be dake, bule begi sognanai, bede ibmar-isgana imakdiiye.
MAR 15:5 Ar Jesúsʼdi amba gwen bipisaale abin-imaksasurbalid. Degisoggu, Pilato geger daksunnad.
MAR 15:6 Ibagine, gusgu Pilato Judíoʼmar-egismaladba dule-wargwen-esgaryagi-mellesiid ega onodaed.
MAR 15:7 Agine, deun dule-wargwen, Barrabásʼye-nugad, e-sordamarmala esgaryagi mellesiid. Amar Roma-dulemargi-gwisgusmargu, dulemar-oburgwis gusmalad.
MAR 15:8 Dulemar-bukidar Pilatoʼse nonimalad. Geb ese egisnonimalad, igi gusgu dule-wargwen-esgaryagi-mellesiid onodae, deyob ega onobarye.
MAR 15:9 Pilato dulemar-abin sogded: —¿Bemarga Judíoʼmar-E-Rey onobi be an-abemala?
MAR 15:10 Ar ade, Pilato magar-daksad, dule-irwa-Bab-Dummadse-gormalad-e-dummagan binsa-Jesúsʼgi-nobedba ega uksamala.
MAR 15:11 Ar dule-irwa-Bab-Dummadse-gormalad-e-dummagandi, dulemar-oimakega imaksamalad, adi, dulemar Pilatoʼse egisega, ega bur Barrabás onoye.
MAR 15:12 Pilato dulemarse gannar egisdebalid: —¿Judíoʼmar-E-Reyye bemar biedi, igi imakbi be an-abemarsunna?
MAR 15:13 Dulemar, Pilato-abin-oimakdemalad: —¡Nakrusgi bioke!
MAR 15:14 Pilato, dulemar-abin-sogded: —¿Ibigala? ¿Ar we-dulede ibu-ibmar-isgana imaksasunna? Ar dulemar bur bule oimakdemalad, sogdemalad: —¡Nakrusgi bioke!
MAR 15:15 Ar Pilato nabir-dulemar-ito-imakbisoggu, ega Barrabás onossunnad. Geb Jesús-bibyosad-sorba, suar-ibmalaga Jesús-uksad, adi, nakrusgi bioknamalagar.
MAR 15:16 Geb degine, suar-ibmala Pilato-neg-Pretorioʼye-nugad-imbase Jesús-sesmalad. Agi suar-ibmala, bela-e-sordamar-danagwenad oambikusmalad.
MAR 15:17 Jesúsʼga mor-suir-akwagiid yosmalad. Geb sorbali, gurgin-ikobiid sobsamalad, geb Jesús-nonogi sismalad.
MAR 15:18 Geb Jesúsʼgi dododmalad, binnasur gotemalad: “¡Judíoʼmar-E-Rey, be-nug dummarba gusunna!”
MAR 15:19 Suargi Jesús-nono-sarsonanai, degi, egi wiaknanai gusmalad. Jesús-nug-odummogega yamo Jesús-abin yokorgi-sindigar signonidamalad.
MAR 15:20 Suar-ibgan Jesúsʼgi-dodosmalad-sorba, e-ibe mor-suir-akwagiid esusmalad, geb e-mor ega gannar yosmalad. Geb neggi Jesús-onosmalad, adi, nakrusgi bioknamalagar.
MAR 15:21 Suar-ibgan igarba Jesús-semaigu, dule-wargwen Cireneʼgined Simónʼye-nugad sapurba-gudidaniki dakarmalad. A-dulede, Alejandro-e-babad, degi, Rufo-e-babad. Suar-ibgan a-dule nakrus-seega imaksamalad.
MAR 15:22 Deyobi suar-ibgan Gólgotaʼye-neg-nugadse Jesús-sesmalad. Gólgota sogleged, Dule-Nonogar-Negye.
MAR 15:23 Agi Jesúsʼga vino ina-gagbid-oburaled uksamalad, adi, Jesús mer dogdar nunmaked-itogegar. Ar Jesúsʼdi gobsasulid.
MAR 15:24 Geb suar-ibgan nakrusgi Jesús-bioksamalad. Jesús-mor siir-siir imaksamalad. Geb dodoar wilubdaknai-guarmalad, Jesús-mor-igid na emargadga guodibeye.
MAR 15:25 Wakdar-wachi-ilabakebaki, nakrusgi Jesús-bioksamalad.
MAR 15:26 E-nakrus-birgi narmaksamalad, ibiga Jesús burgwenai. Narmakaled weyob sognaid:
MAR 15:27 Jesúsʼba dulemar-atursamalad-warbo nakrusgi bioksamarmogad. Wargwen Jesús-argan-nuedsik ogwichismalad, baiddi Jesús-argan-sapiledsik.
MAR 15:28 Deyobi Bab-Dummad-Gardagi-sognaiyob ibmar gusad. A-gardagi weyob sognaid: “Dulemar-isgumaladyob imaklesmogad.”
MAR 15:29 Dulemar-Jesús-dikarba-nasdamalad nono-ege-ege imakdamalad, geb egi dodoar ega sogdedamalad: —Be-dule, be sunna Babse-goled-neg-earye sogsad, degi, ibapaagi be gannar sobsabalirye sogsad,
MAR 15:30 be nakrusgi-naid aidedage, na be-dukin bendake.
MAR 15:31 Deyopira dule-irwa-Bab-Dummadse-gormalad-e-dummagan, degi, Garda-Narmaked-Dulemar Jesúsʼgi dododmarmogad, sogdedamalad: —Dule-baigandi nabir bendaksad, na edi dukin geg bendaked.
MAR 15:32 Ede na sogsagusad, ani an Bab-Dummad-dule-wargwen-barmidagoye-sogsad-duleye, Israel-dulemar-E-Reyye. Ar nabirile, nakrusgi-naidgi emisgwa aidedage, adi, anmar dakega, degi, anmar egi benguosulid. Jesúsʼba-nakrusgi-bioklegar-naimarmogad egi dodonanai gusmarmogad.
MAR 15:33 Dad-yorukugusgu, bela-napneggi negsichid nagunonikid, wachi-irbaase nai gusad.
MAR 15:34 Wachi-irbaa-gusgu, Jesús binnasur-gote, sogded: —¡Eloi, Eloi! ¿Lama sabactani? A-sogleged: ‘¡An-Bab-Dummadye, an-Bab-Dummadye! ¿Ibiga be an-obacha?’
MAR 15:35 Gwenna-gwenna-walik-bukmalad, Jesús deyob soge itosmargu, sogdemalad: —Be itomala, Elíasʼse gornaid.
MAR 15:36 Dule-wargwen abarmakded, ibmar-buta-butad vino-gagbidgi-owardikusgu, suar-dukugi edichad, geb Jesús-gobega Jesús-walikaa imaksad. Geb sogded: —Anmar dakmalo, bule Elías odenonikodibe. Degisoggu, mer ese achamalo.
MAR 15:37 Geb agi, Jesús napi-binnasur-gote, burgwided.
MAR 15:38 Geb a-wachigi, Jerusalénʼgi, Bab-Dummadse-goled-neg-siidgi, Neg-Islidikid-irwa-mor-naid niba achirmakded, urbalidse.
MAR 15:39 Roma-suar-ibed-sordamar-dulatar-sediid (100), Jesús-asabin-gwichid, Jesús-binnasur-gote-itosgu, degi, igi-burgwis-daksagua, sogded: —Napiragwa, we-dule, nue-Bab-Dummad-Machi-sunnadid.
MAR 15:40 Omegan gwenna-gwenna bannaba dakbuk gusmalad. Amar-abargine María-Magdalena, Salomé, degi, María Jacobo-bipigwad-e-nan, degi, José-e-nanbalid, dakbukwa gusmarmogad.
MAR 15:41 We-omegan, Jesús-Galileaʼgi-gudidagu, gusgu Jesúsʼba gudidamarmogad, degi, ega ibmar-imakdii gusmalad. Deginbali, omegan-baigan-bukidar Jesúsʼba-Jerusalénʼse-nonigusmaladi, dakbukwa gusmarmogad.
MAR 15:42 Deun a-ibagi ibmar-guagwar-sied-ibad, a-sogleged, bato obunnoged-iba nagusokarye. Degisoggu, neg-sedodgu,
MAR 15:43 dule-wargwen Arimatea-neggweburgined-Joséʼye-nugad, Jesús-e-mui-egisega Pilatoʼse dobsuli nonigusad. A-dulede, Judío-igar-nabiromalad-abargi dule-nue-nug-nikadid. Deginbali, José, Bab-Dummad-e-negdakmaid nue edarbedibalid.
MAR 15:44 Pilato, bato-Jesús-burgwisad geg-itogedba, Roma-dule-sorda-dulatar-sediidse (100) gochasunnad. Ese egichided, Jesús bato burgwis-sogeye.
MAR 15:45 Roma-dule-sorda-dulatar-sediid, Pilatoʼga bela ibmar sogsagu, Pilato Joséʼga Jesús-mui uksasunnad.
MAR 15:46 Geb degine, José Jesús-mui-nakrusgi-naid odesad. Atued-baksadgi nue-obipirmaksad, geb akwa-gwisar-neg-uanga-siid-yaba Jesús-mesisad. Geb sorbali, neg-uan-yawagak-doged-idu akwa-dummad sisad.
MAR 15:47 María-Magdalena, degi, José-e-nan-María, bia Jesús-megisad daksamalad.
MAR 16:1 Obunnoged-iba-nasgu, María-Magdalena, Santiago-e-nan-María, degi, Salomé, gwallu-wawa-nuegan baksamalad, adi, Jesús-muigi eonamalagar.
MAR 16:2 A-omegan gebe-itoged-iba-nagudedgi, wakudaryalaba, gebe dad-nakwialidgi, neg-uanse nadmalad.
MAR 16:3 Igarba na muchub-muchub sunmaknadapmalad: “¿Doa wede anmarga akwa-dummad-neg-uan-yawagakgi-siid oniroe?”
MAR 16:4 Ar akwade, bela-bela dungued. Ar neg-uan-mosmargu, dakarmalad, akwa-dummad-neg-uan-yawagakgi-siidi bato onirar sii.
MAR 16:5 Omegan neg-uan-yaba-dogdemargu, dakarmalad, Jesús-mai-gusad-argan-nuedsik sapin-gwensak mola-sibu-suid-yoi sii. Deyob dakarmargu, omegan gwakidmalad.
MAR 16:6 Sapingwa omeganga sogded: —Mer be dobgumar. Ar bemar Jesús-Nazaretʼgined, nakrusgi-biokles-gusad amidanimalad. Wegi bar maisulid, bato gannar durgusad. Bia e-mui-mesisgusmalad-e-gannar be dakmala.
MAR 16:7 Ar bemar e-sapinganga, degi, Pedroʼga sognamar: ‘Jesús bemar-idu Galileaʼse nadye.’ Igi bemarga sogsagusa, agi bemar dakoed.
MAR 16:8 Omegan dobedba wawanmakgwichi neg-uangi wakitemalad. Ar nue-dobe-itomarsoggu, dulemarga gwen ibmar sogsasurmalad.
MAR 16:9 [Jesús gebe-itoged-iba-naguded-wakudaryalaba-durgusgua, gebesaila María-Magdalenaʼse na sanar magarosad. A-omegi, Jesús nia-walagugle (7) onosgusad.
MAR 16:10 A-ome nadgua, geb dulemar-Jesúsʼba-gudigusmalad owisosad. Amardi bukib-binsabukwad, degi, bobukmarbalid.
MAR 16:11 Ar amar, Jesús dula-gudiiye itoarmargu, degi, María-Magdalena daksaye itoarmarbargu, bengusmalad.
MAR 16:12 A-sorba, Jesús na e-sapingan-warbo-sapurba-nadapidse dule-baidyob magarosad.
MAR 16:13 Amar-warbogwad, gannar Jerusalén-neggweburse nonimalad, geb sapingan-baigan owisosmalad. Ar sapingan-warbogwad-ibmar-sognonikid, sapingan-baigandi bengusmarbalid.
MAR 16:14 Geb napidgine, Jesús na e-sapingan-ambe-gakagwensakad-mas-gunbukwadse (11) na sanar magarosad. Jesús, e-sapingan amba egi benmarsoggu, degi, dulemar-gannar-e-durgusad-daksamalad-ega-sogsad benmarbarsoggu, na e-sapinganga binnasur ibmar sogsagussunnad.
MAR 16:15 Jesús e-sapinganga sogded: “Bela dulemar-we-napneggi-bukmaladse be namar, bela amarga Bab-Dummad-Gayaburba-Nuedgi be sunmaknamar.
MAR 16:16 ”Ar dule-angi-bensulid, degi, Bab-Dummad-diigi-ogleged-igar-imaked, abonolegoed. ”Ar dule-angi-benguerdi, na e-san-burba degi-odurdakle-sii sadeguoed.
MAR 16:17 ”Dulemar-angi-bensurmalad, we-ibmar-wilubgan-dakledisurmalad imakoed: An-nuggi niamar-onioed, degi, gaya-gwapidba sunmak gumaloed.
MAR 16:18 E-argangi naibe-bulegan gamaloed. Ina-nusu-gobsamalale, gwen-akar gumalosulid. Dulemar-gegumalad-birgi e-argan-mesmaloed, geb a-dulemar nugumaloed.”
MAR 16:19 Bab-Jesús e-sapinganga ibmar-sogsad-sorba, Bab-Dummad, Jesús nibnegse sesad. Geb Bab-Dummad-argan-nuedsik sigidapid.
MAR 16:20 Jesús-sapingan nadmargu, bela neggwebur-iliba Bab-Dummad-Gayaburba-Nuedgi sunmakdemalad. Bab-Jesús nue amar-bendaksad, degi, ibmar-wilubgan-dakledisurmalad-imakdemaladba Bab-Jesús oyosad, e-sapingan e-Gayaburba-napiragwadgi sunmakdimarye.] Be itomargua.
LUK 1:1 Aisaar bukidar dulemar igar-napiragwad anmar-abargi-gusadi ilemakar-nasikoeyobi na binsasmalad.
LUK 1:2 Igi gebesaila Jesús-sapingan na e-sunnad Jesús-daksamala, deyobi a-igargi anmar-odurdaksamarmogad. Ar Bab-Jesús we-dulemar e-igargi-sunmakega barmisgusad.
LUK 1:3 Dummad-Teófilo, nue an we-igargi ise-nergusmogad. Degisoggu, an dakdo, bur an bega Jesús-igar gebesaila-onoded-akar, nue ilemakar narmakergebe.
LUK 1:4 Adi, be nue-wisgumogagar Jesús-igargi-be-odurdaklesadi we napiragwadi, gakansuli.
LUK 1:5 Deunni, Rey-Herodes, Judea-yargi negdakmaigu, dule-irwa-Bab-Dummadse-goled-wargwen, Abíasʼsikid mai-gusad. A-dulede, Zacaríasʼye nugad, e-omedi Aarón-wagansikidid, Elisabetʼye-nugad.
LUK 1:6 Emide, ebobela, Bab-Dummad-asabin igar-innikigwadba damaladid. Bab-igar-uksadba, degine, Bab-Dummad-sogsadbali nanamalad-dulemalad. Agala, Bab-Dummad egi ibmar akarsoged sated.
LUK 1:7 Ar amarde, mimmi-satemalad, ar ade, Elisabet geg mimmi-baked, degine, bato amarde, seredgusmarbalid.
LUK 1:8 Ibagwengine, Abías-e-gwenadgansikmaladga Bab-Dummadse-goled-neggi-arbaega ibagan nonikid. Deunni, Zacarías Bab-Dummadse-goled-neggi dule-irwa-Bab-Dummadse-golega arbanonimogad.
LUK 1:9 Na gusgu igi dule-irwa-Bab-Dummadse-gormalad nugsalege, deyob Zacarías nugsalealid, adi, Bab-Dummadse-Goled-Neg-Islidikidgi dogegar, ina-wawadikid obupurmakegar.
LUK 1:10 Degine, ina-wawadikid-ogumaked-wachigi, deun bela-dulemar magaba Bab-Dummadse gorbukwa gusmalad.
LUK 1:11 Zacarías, Bab-Dummad-Neg-Islidikidgi ina-wawadikid ogumaknaidgi, Bab-Dummad-baliwitur-wargwen, Zacaríasʼse ukiar magar-gunonikid. Ina-wawadikid-ogumakleged-aila-naba, argan-nuedsik gwichi dakalid.
LUK 1:12 Zacarías, deyob Bab-Dummad-baliwitur-dakargu, gwakided, bela nue-dobee ito naded.
LUK 1:13 Ar baliwiturdi ega sogded: “Zacarías, melle be dobgu, ar Bab-Dummadse-be-goledi Bab-Dummad be-itosad, be-ome-Elisabet bega mimmi-wargwen-bakoedi, Juanʼye be onugsao.
LUK 1:14 Be mimmi-nikuoedba, be yeer itogoed, be weligwar itogoed, degine, be-mimmi gwalulenonikir, bukidar dulemar egi weligwar itomarmogoed.
LUK 1:15 ”Ar be-mimmide, Bab-Dummad-asabin dule-dummadga guoed. Vino gobosulid, degi, inna-gagbid gobosurbalid. Degine, amba muu-neggi mai, bato Bab-Dummad-Burba-Isligwaled bela-bela nika guoed.
LUK 1:16 Deginbali, we-mimmi gannar Israel-dulemar Bab-Dummad-Jehováʼba-nanamalaga imakoed.
LUK 1:17 Ar be-mimmi-Juan, Elíasʼyobi Dule-Dummad-idu-nadapi guoed. Deyob Bab-Dummad-Burba, degi, Bab-Dummad-gangued-nika guoed. Adi, babgan gannar na e-mimmiganbina itogerba guega, degi, dule-galagwensuli-gudimaladi dule-nueganga imakega, binsaed-nikaa damalaga, degi, guagwar dulemar-urbega, adi, Bab-Dummad-abingamalagar.”
LUK 1:18 Degi, Zacarías baliwiturga sogded: —Degite we-deyob-guoedi, ¿igi-an wisguosunna? Ar ande seredgusad, an-omede bato seredgusmogad.
LUK 1:19 Baliwitur abin-imakdegu, ega sogded: —Ani an Gabriel-gued, Bab-Dummad-asabin, Bab-Dummad-sogedba an ibmar imakega an gwichid. Ani an bega sunmakega, we-gayaburba-nued-sogega an barmilealid.
LUK 1:20 We-ibmar-an-bega-sogsad e-ibagan mosale, we deyob gunonikoed. Emide, be an-bengussoggu, geg bar sunmake be guoed. Be-mimmi-gwalulesad-sorba, geb be gannar sunna sunmake gunonibaloed.
LUK 1:21 Ar dulemardi, magaba Zacarías edarbebukmalad. Degi, ibiga Zacarías dikasurgus Bab-dummadse-goled-neg-islidikidyaba yoggumaiye binsaarmalad.
LUK 1:22 Zacarías agi noargu, geg emarga sunmake gusad. Agi magar daksamalad, we, Bab-Dummadse-Goled-Neg-Islidikidgi wis ibya-apurus danikirgebye. Zacarías dulemarga sunmaksasulid, unnila argangi-oyogar emarga sunmaksad.
LUK 1:23 Geb Zacarías, dule-irwa-Bab-Dummadse-goled-ibmar-imaked bergusgu, na e-negse nadsunnad.
LUK 1:24 Geb a-ibagan-sorbali, e-ome-Elisabet gurgin-nika gunonikid. Agine, Elisabet nii-walatar bar nossulid. Agi sokalid:
LUK 1:25 “Bab-Dummad angi nabir binsanonikid. An mimmi-niksulidba dulemar-mer-bar-isdar-an-dakmalaga, aga anga mimmi-uknonikid.”
LUK 1:26 Elisabet nii-walanergwagus (6) bonigwar gudiidgi, Bab-Dummadi, Galilea-yarse, Nazaret-neggweburse, yagwa-gwensak Maríaʼye-nugadse baliwitur-Gabriel-barmialid.
LUK 1:27 A-yagwade, na Joséʼye-nugad-ebo-nikuega bato igar-nabogar gudiid. Joséʼde Rey-David-wagwad.
LUK 1:28 Baliwitur María-maidse dognonigu, ega sognonikid: —¡Naa, degite! ¡Bab-Dummad begi nued binsasad! Bab-Dummad beba gudiguad. Baigan-omeganba Bab-Dummad bur nued begi binsasad.
LUK 1:29 Maríaʼdi baliwitur-dakargu, ibmar-ega-sogedba dobe-itoded, binsaded, wede, baliwitur weyob anse gornonikid ibi obarsunye.
LUK 1:30 Degi, baliwitur ega sogdesunnad: —María, mer be dobgu, ar Bab-Dummad nabir begi binsasad.
LUK 1:31 Emigindi, be gurgin-nika gunonikoed, mimmi-gwensak be nikuoed, Jesúsʼye a-mimmi be onugsaoed.
LUK 1:32 We-mimmide dule-dummadga guoed, Bab-Dummad-Bur-Birigined-e-Machiye soglegoed, degine, Bab-Dummad, igi epenne Rey-David, reyga-mesisgusa, deyobi Bab-Dummadi Rey-David-e-wagwa-imakmogoed.
LUK 1:33 Degine, we-Jesús, Jacob-dulemar-negsemai degisadegu guoed. E-negsemai-guoedi gwen berguosulid.
LUK 1:34 Geb degi, María, baliwiturga sogded: —¿Ar wede igi guosunna? Ar amba an yagwad.
LUK 1:35 Baliwitur, Maríaʼga sogded: —Bab-Dummad-Burba-Isligwaled begi aidenonikoed. Bab-Dummad-Bur-Birigined-e-gangued be-edunonikoed. Degisoggu, Dule-gwage-islidikid-gwalulegoedi, Bab-Dummad-Machiye soglenonikoed.
LUK 1:36 Degine, be-gwenad-Elisabet, bato seredgusadgi, geg mimmi-bakye-enik sogmaladi a-bela gurgin-nika gunonikid. Emide, nii-walanergwagus (6) gurgin-nika gudiid.
LUK 1:37 Ar ade, Bab-Dummadgardi ibmar-geg-gudeeye soglesulid, bela ega ibmar guedbiid.
LUK 1:38 Geb degi, María sogdesunnad: —Andi, Bab-Dummad-e-mai gued. Be-sogedba be anga imakdo. Degi, baliwitur, Maríaʼgi banguded.
LUK 1:39 A-ibagangi, María, Judea-yalaganba neggwebur-gwagwense gwae nade gusad.
LUK 1:40 Zacarías-negse dogdapgu, Elisabetʼse gordapid.
LUK 1:41 Elisabet, María-ese-gole-itosgu, dule-e-sapi-dukugi-maid ber dulagwar itoded. Degi, Elisabet bela-bela Bab-Dummad-Burba-Isligwaled-nika gunonikid.
LUK 1:42 Elisabet binnasur goted, sogded: —Baigan-omeganba bur nued Bab-Dummad begi binsasad, be-dula-sapi-dukugi-maidgi bur-nued binsasbalid.
LUK 1:43 Ar wede, ¿ibiga weyob angi nued binsalesa, emide, an-Dummad-e-nan anse ataknonigu?
LUK 1:44 ”Be anse gornonikid-itodeyalaba, an-sapi-dukugi-maid weligwar-itogedba ber dulagwar itoded.
LUK 1:45 Be we-ibmar bengussulidba begi nued-binsalesad. Ar Bab-Dummad-bega-ibmar-sogsadba we-ibmar bela bega guoed.”
LUK 1:46 Geb degi, María, sogdemogad: “An-ulub-akar Bab-Dummad-nug an odummosun.
LUK 1:47 An-burba, Bab-Dummad-an-abonogedgi weligwar itosun.
LUK 1:48 An e-mai-bundor-binsaled-inigwele, Bab-Dummad an-sunonikid, nued angi binsanonikid, emigindi, bela dulemar angi sogmaloed, nued-egi-binsalesad-duleye.
LUK 1:49 Bab-Dummad-Bela-Gangued-Nikadi, anga ibmar-dummagan imaksad, e-nug, Isligwaledye nugad.
LUK 1:50 Bab-Dummad dulemar-e-dobee-nanadimalad wile daked, degine, a-e-waganse-bakar, wiledakdii sadeguoed.
LUK 1:51 Bab-Dummadi, e-gangued na e-arbaedgi oyosad, dulemar-na-san-dummarba-imakdimalad-osulosad.
LUK 1:52 Bab-Dummadi, dule-dummagan-negsemamaid-obelosad. Dulemar-na-san-bipi-imakdimalad-odummosad.
LUK 1:53 Degine, dulemar-ukumesdimaladga ibmar-bukidar uksad. Degine, dulemar-mani-ibgan, ibmar-sate barmisad.
LUK 1:54 Bab-Dummadi, e-mai-Israel-dulamar-bendaksad, amar-wile-daked gwen iessulid.
LUK 1:55 Bab-Dummadi deyob anmar-dad-Abrahamʼga sogsad, degi, e-waganga sogsagusad, e-wiledaked degisadeguoye.”
LUK 1:56 María, Elisabet-walik nii-walapaa megialid, geb a-sorba María, na e-negse gannar aligusad.
LUK 1:57 Elisabet e-ibagan warmaknonigu, mimmi-nikunonikid, susugwa ega uklenonikid.
LUK 1:58 E-neg-dikarba-mamaid, degine, e-gwenadgan itoarmargu, Bab-Dummad Elisabetʼgi nabir binsasye, degi, nue wile daksaye, Elisabetʼba wergusmarmogad.
LUK 1:59 Geb ibabaabakgine (8), susugwa-gwalulesad-sorba, e-abgan-uka-duku-sikega, Moisés-Igar-Maidba-imakega, senonimalad. Degine, e-bab-Zacaríasʼba mimmi-nug-imakbiguarmalad.
LUK 1:60 Ar e-nandi, weyob sokalid: —Suli. Deyob-nugguosuli. Juanʼye nugguoe.
LUK 1:61 Elisabetʼga sogdemalad: —¿Ibiga deyob be onugsabie? Ar be-gwenadgande deyob nugsurmalad.
LUK 1:62 Geb e-babse argangi-sunmakar egichiarmalad, goe igi-onugsaoye.
LUK 1:63 Zacarías urgo-bipigwa egichisad, agi susugwa-nug narmaksad. Juanʼye nugguoye sogsad. Bukmaladi bela geger itoarmalad, wede ibiga deyob onugsabie.
LUK 1:64 Geb a-gines, Zacarías gannar nabir sunmakded. E-gwabin-bipinmakdegu, Bab-Dummad-nug ogannoded.
LUK 1:65 Bela-e-neg-dikarba-mamaid dobe itonadmalad. Bela Judea-yalaganba we-ibmar-deyob-gusadi gaya mimileded.
LUK 1:66 Ar dulemar deyob bela-we-gayagan-itoarmalale, na e-gwagegi binsadmalad, sogdemalad: “Ar we-mimmide, ¿doa-dulega guosunna?” Ar dulemar bela wismalad, we-mimmibali Bab-Dummad-gangued gudii.
LUK 1:67 Juan-e-bab-Zacarías, Bab-Dummad-Burba-Isligwaled bela-bela nika gunonikid. Bab-Dummad-nuggi sunmakdesunnad, sogded:
LUK 1:68 “Israel-dulemar-e-Bab-Dummad-nug odummomarsun, ar ade, e-dulamarse na ataknonikid, degine, isguedgine, e-dulamar-onononikid.
LUK 1:69 Bab-Dummadi, e-mai-David-wagwa anmarga barmialid. Bab-Dummadi, anmar-Abonoged-gandikid anmarga ogwisnonikid.
LUK 1:70 Ar igi gebesaila anmarga e-gayaburba-barsogmalad-islidikmaladba-sunmaksa, deyob gusad.
LUK 1:71 Isdar-anmar-dakdimaladgi, degi, sae-anmar-dakdimaladgi anmar-bendakoye sogsad.
LUK 1:72 Adi, Bab-Dummad anmar-babgan wile dakegar. Degine, amar-ebo-igar-islidik-mesisad ebinsaegar.
LUK 1:73 Bab-Dummad na e-nuggi anmar-dad-Abraham-ebo napiragwadgi igar-mesisadi, ede, imakedseye sogsad.
LUK 1:74 Bab-Dummadi isdar-anmar-dakdimaladgi anmar-onogoye sogsad, adi, dobsuli anmar ega arbaegar.
LUK 1:75 Bab-Dummadga nue-gwage-islidikidgi, degi, nue-napiragwadgi burgwedse anmar ega arbadii guegar.
LUK 1:76 ”Mimmi, bedina, Bab-Dummad-Bur-Dummad-e-gayaburba-barsogedye be bilegoed. Ar bede, Dule-Dummad-barmiledagoye-sogsad-idu, igar-mayega nadapi guoed.
LUK 1:77 Be abonoged-igargi e-neggwebur-odurdakega be guoed. Adi, Bab-Dummad dulemarga isgumalad-eliegar.
LUK 1:78 Ar anmar-Bab-Dummadi ise-wile-anmar-dakedba, neg-meegwadyob anmarga dule-barmialid. A-dule, nibneg-akale, dad-nakwedanikiyobi danikid.
LUK 1:79 Adi, negsichidgi-bukmalayobid, Bab-Dummad-akudakmalad, gwallu-mee-imaklegeyobi, Bab-Dummad-magar dakegar. Degi, dule burgwileged-dobmalad ega osulogegar. Degine, igar-bogidikidba anmar-niegar.”
LUK 1:80 Degine, mimmi dungumai, e-burba gangumai gusad. Juan, Israel-dulemarga Bab-Igargi-sunmakdedse nega-dulesulidganba gudii gusad.
LUK 2:1 Amba yoo Jesús-gwaluleged-idu, deun Augusto-César saila-dummadga Romaʼgi maigu, igar mesialid, bela-dulemar-bukwad ebisoye, igi mergudibeye.
LUK 2:2 Deun, Cirenio, Siria-yargi dummadga negdakmaiun, dule-ebisleged gebe imaklesad.
LUK 2:3 Bela ebislemalagala na e-neggwebur-e-neggweburse nadegusmalad.
LUK 2:4 José, Galilea-yargi, Nazaret-neggweburgi-gudii Judea-yarse, Rey-David-neggweburse, Belénʼye-neg-nugadse aligusmogad. Ade, José, David-e-wagwad, aga Belénʼse nonigusad.
LUK 2:5 Adi, a-neggweburgi e-ome-Maríaʼmala ebislegegar. Deun bato ebo nikuoye igar-maid. Degine, deun María bato gurgin-nika gudiid.
LUK 2:6 Belén-neggweburgi-gudimaladgine, Maríaʼga nagued-ibagan warmaknonikid.
LUK 2:7 Degine, gebe ega susugwa uklenonikid. Geb samorgi-obirmas, moli-omaed-urgi mimmi-mesisad, ar ade, emarga gabedneg sate gusad.
LUK 2:8 Deun, a-ibagi Belén-neggwebur-dikarba, sibad-wawaad-edarbemalad, e-sibad-wawaad mutik edarbebukwa gusmalad.
LUK 2:9 Agine, Bab-Dummad-e-baliwitur-wargwen ukiar amarse nonikid, degine, Bab-Dummad-e-yeerdaklegedi bela emar-ebilis ibegwar ganonikid. Degidbali, sibad-wawaad-edarbemaladi nue dobe itoarmalad.
LUK 2:10 Ar baliwiturdi amarga sogded: —Mer be dobgumar, ar bemarga gayaburba-nued, bela dulemar-weligwar-saed an sedanikid.
LUK 2:11 Rey-David-gwalulesad-neggweburgi, Belénʼgi, emi-ibagi bemarga Cristo gwalulesad. A-dule, Dule-Abonogedid, Dule-Bur-Dummadid, Bab-Dummad-dule-wargwen-barmidagoye-sogsad-duled.
LUK 2:12 Magar be itomalagala, weyob-mai be dakdapmaloed: Mimmi samorgi-anwar moli-omaed-urgi mai be dakmaloed.
LUK 2:13 Degine, ukiar, baliwitur-abargi bukidar baliwiturmar-nibnegginmalad-baigan, Bab-Dummad-nug ogannonanai daklealid. Weyob sognanaid:
LUK 2:14 “Nibneggi bela-bela Bab-Dummad-nug odummomarsun. Dule-nuegangi-yeer-binsalesmaladga, we-napneggi neg-bogidikid nagusun.”
LUK 2:15 Degine, gannar baliwiturmar nibnegse nadmargu, sibad-wawaad-edarbemalad na ga sokarmalad: “Anmar Belén-neggweburse nae. Neg-gusad anmar daknae. Ar Bab-Dummad anmar-owisosad.”
LUK 2:16 Degisoggu, gwae-gwae armarsunnad. José, Maríaʼbo sii, degi, mimmidi, moli-omaed-urgi mai daknonimalad.
LUK 2:17 Deyob daksamargu, sibad-wawaad-edarbemaladi, baliwiturmar-ega-mimmigi-sunmaksadba, dule-baiganga sogsamalad.
LUK 2:18 Ar bela-dulemar sibad-wawaad-edarbemalad-ibmar-sogedi, geger itosmalad.
LUK 2:19 Ar Maríaʼdi, bela na e-gwagegi wargwen sedii gusad, agi binsadii gusad.
LUK 2:20 Ar sibad-wawaad-edarbemaladi, ega-ibmar-soglesadba-ibmar-gusadi bela-daksamalad, degi, bela itosmalad. Degidbali, gannar armargu, Bab-Dummad-nug-odummodani, degi, ogannodani gusmalad.
LUK 2:21 Jesús ibabaabakgus (8) gwalulesadgi, Judíoʼmar-igar-maidba imakegala, e-abgan-uka-duku siksamalad. Jesúsʼye onugsasmalad. Ar igi baliwitur amba yoo María gurgin-nikued-idu ega sogsagusa, aba deyob onugsasmalad.
LUK 2:22 Moisés-Igar-Mesisadba na san-uruked-ibagan-imaked-bergusmargua, José, María-ebo, Bab-Dummadga Jesús-ukega Jerusalénʼse Jesús-senonimalad.
LUK 2:23 Ar igi Bab-Dummad-igargi narmakar mai: “Ar gebesaila machigwa-inse nangi aidenonikile, Bab-Dummadga be ukoed, adi, unnila egadga guegar.”
LUK 2:24 Degine, Bab-Dummad-gardagi narmakar-naibalid, Bab-Dummadga we-ibmar-ukoye: “Sapur-nuu-gwabodibe, wagnuu-mimmigan-gwabodibe.” Levítico 12:8 We-igar-maidba imakegala, na nonimalad.
LUK 2:25 A-ibagangine, dule-wargwen, Simeónʼye-nugadi, Jerusalénʼgi gudigusad. A-dulede, dule-gwage-nuedid, Bab-Dummad-dobee-nanadiidid, na Israel-bendakleged-edarbedimogad-duled. Bab-Dummad-Burba-Isligwaled a-duleba gudiguad.
LUK 2:26 Bab-Dummad-Burba-Isligwaledi Simeónʼga sogsad: “Be burgosurye, Bab-Dummadi, dule-wargwen-barmidagoye-sogsadi be dakedsegoye.”
LUK 2:27 Geb Bab-Dummad-Burba-Isligwaled-sogedba, Simeón Bab-Dummadse-goled-negse nonikid. José, María-ebo Moisés-Igar-Maidba-imakegala Bab-Dummadse-goled-negse mimmi-Jesús-senonimalad.
LUK 2:28 Agine, Simeón na e-swidagi mimmi-mesisgua, Bab-Dummad-nug-odummoded, weyob sogded:
LUK 2:29 “Bab-Dummad-Bela-Negsemaid, an be-mai gued. Emigindi, be-ibmar-sogsadyob, bogidikidgi be an-sedsun,
LUK 2:30 ar ade, an-ibyagwar Bab-Dummad-dule-abonogoed-barmialid an daksad.
LUK 2:31 Bab-Dummad, we-mimmi, dulemar-bukwad-abargi be guagwar barmialid.
LUK 2:32 Dulemar-yar-baid-baidgi-bukmaladga neg-meegwadga guoed. Degi, we-mimmi, Israel-dulemarga gandikidba-be-nug-odummogedga guoed.”
LUK 2:33 José, degi, María, Simeón-Jesúsʼgi-ibmar-sognaid geger itomalad.
LUK 2:34 Geb degi, Simeón, Joséʼga, degi, Maríaʼga sogsagu, Bab-Dummad begi nued binsaoye. A-sorbali, mimmi-e-nan-Maríaʼga sogded: —We-mimmi sulesad, Israel-yargi dulemar-dummagan-bukidar onogegar, degi, dulemar-binsarmalad dummaganga imakegar. We-mimmi Bab-Dummad-wilubga guega nonikid, oyogegar, Bab-Dummad sunna nabir dulemar-abonoye. Ar degi-inigwele, dulemar-bukidar mimmi-abingaosurmalad.
LUK 2:35 We-mimmiba bukidar-dulemar-gwage-binsananaid magar daklegoed. María, ar begardi be-san-burbagi es-suid-yolenaiyob be nunmak itogoed.
LUK 2:36 Agine, Bab-Dummad-gayaburba-barsoged-bundor Anaʼye-nugadi, Bab-Dummadse-goled-neggi gudimogad. A-omede, Fanuel-sisgwad, Aser-e-wagansik danikidid. Anaʼde bato nue-seredgusad. Unnila birgagugle (7) sui-nika gudigusad.
LUK 2:37 Emide, birga-dulabake-gakabake (84) nikad. A-mukwade Bab-Dummadse-goled-neggi gudigudaed, gwen nodisulid. Ibginedba, degi, mutikidba Bab-Dummadse gordii, degi, Bab-Dummadse-golega mas-gunsuli gudidaed.
LUK 2:38 Simeón deyob sunmakgwichidgi, Ana nonimogad. A-mukwa, Bab-Dummadga Jesúsʼgi dog-nuedye sogsagusad. Degi, Ana bela Jerusalénʼgi dulemar-Bab-Dummad-abonogoed-edarbedimaladga mimmigi sunmakdedaed.
LUK 2:39 José, María-ebo bela Bab-Dummad-Igar-Maidba ibmar-imaksad-sorba, gannar Galilea-yarse na e-neggwebur-Nazaretʼse-nonimalad.
LUK 2:40 Degine, mimmidi dungumai, gangumai, degine, nue-binsaed-ibed-gumai gusad. Ar Bab-Dummad a-machi-bipigi nue nabir binsadii gusad.
LUK 2:41 Birga-irba Jesús-e-babgan, Oburgwilegoenad-Iba-daknaega Jerusalénʼse naddamalad.
LUK 2:42 Jesús birgambe-gakabo-nikadgi (12), e-babganba Jerusalénʼse nadmogad.
LUK 2:43 Ibamar-bergusgu, Jesús-babgan gannar Nazaretʼse armargu, machigwa-Jesúsʼdi Jerusalénʼgi besad. José, degi, e-nan-Maríaʼdi Jesús-besad wissurmalad.
LUK 2:44 E-babgandi, dulemar-danar-danimaladba Jesús daniye bimalanad. Ibagwengus-nanaedgine e-gwenadgan-abargi, degine, mag-dakmalad-abargi Jesús-amiarmalad, gwen amissurmalad.
LUK 2:45 Ar amissurmarsoggu, gannar Jerusalénʼse Jesús-aminonimalad.
LUK 2:46 Geb ibapaagine amidapmalad. Bab-Dummadse-goled-neggi, Moisés-Igar-Mesisad-nue-wisimalad-abargi-sii, amar-itosii, degi, amarse ibmar-egichii dakdapmalad.
LUK 2:47 Ar itobukmaladi bela geger dakmalad. Nue-ibmar-wisi Jesús-dakmalad. Degine, nue-imas Garda-Narmaked-Dulemar-abin-imake dakmarbalid.
LUK 2:48 E-babgan, dummagan-abargi-sii Jesús-dakarmargu, geger dakarmalad. E-nan Jesúsʼga sogded: —Machi, ¿ibiga we deyob be anmar-imaksa? Emide, an be-babmala surbinsa bebina miamakdimalad.
LUK 2:49 Geb degi, Jesús ega sogded: —¿Ar ibiga be an-amidimala? ¿Ar be wissurmarsi an-Bab-arbaedgi an arbaergebed?
LUK 2:50 Ar e-babgandi, Jesús-ega-ibmar-sogedi magar-itossurmalad.
LUK 2:51 Jesús e-babganba gannar arsunnad, Nazaretʼse nonisunnad. Jesús na e-babgan-sogedba gudigussunnad. Ar e-nandi bela we-ibmarmar na e-gwageginbi sedii, egi binsadii gusad.
LUK 2:52 Ar Jesúsʼdi ibmar-nue-wisidgi, e-dunguedgi, degine, Bab-Dummad-nue-nabir-egi-binsaedgi, degi, dulemar-nued-egi-binsaedgi, dungumai gusad.
LUK 3:1 Birgambe-gakatargus (15) Tiberio-César Romaʼgi-negdakmaidgi, Poncio-Pilato deun Judea-yargi dummadga maid. Degi, Herodes Galilea-yargi dummadga maimogad, e-urba-Felipe Iturea-yargi, degi, Traconite-yargi dummadga maimogad. Degine, Lisanias, Abilinia-yargi dummadga maimogad.
LUK 3:2 Deunni, Anás, Caifás-ebo dule-irwa-Bab-Dummadse-goled-bur-dummadga maimogad. A-ibagangine, Bab-Dummad Zacarías-machi-Juanʼse gornonikid. Deun, Juan nega-dulesulidganba gudiid.
LUK 3:3 Juan bela Jordán-diwar-dikarba-neggwebur-bukmaladse nadegusad. Dulemarga Bab-Dummad-diigi-ogleged-igargi sunmakdii gusad, degi, na e-isgumaladga bukib-binsamarye sogdii gusad. Adi, e-daed gwagmalagar, adi, isguedgi abonolemalagar.
LUK 3:4 Epenne Bab-Dummad-gayaburba-barsoged-Isaías, Juanʼnik weyob narmaksagusad, deun sogsagusgu: “Dule-wargwen nega-dulesulidganba binnasur sunmaknonikoed, dulemarga sognonikoed: ‘Dule-Dummad-idu igar-mayemar, igar-swilidik mesmar.
LUK 3:5 Bela nebagan swilidik guoed, yarmala, degi, neg-mullugana, omatolegoed. Igar-bire-bire-mamaid innikii imaklegoed, igar-muru-muru-mamaid oswirmaklebaloed.
LUK 3:6 Bela dulemar Bab-Dummad-abonoged-wisgumaloed.’ ”
LUK 3:7 Dulemar-bukidar Bab-Dummad-diigi-ogleged-igar-imakega Juanʼse duurmaknonidamalad. Juan amarga sogdedaed: “¡Ar bemar naibe-bulegan-mimmiganyob gumalad! ¿Ar doa Bab-Dummad nue-urwe-danikoed-idu-wakinned bemar-odurdaksa? Bab-Dummad-diigi-oglegedgi bemar nuguosurmalad.
LUK 3:8 Degisoggu, be-daedgine na be oyomar, bemar nue-gwagsamalad, be-isguedga na be bukib binsasmalad. ”Mer unnila na be sogmalo: ‘Anmar Abraham-wagan gumarye. A-ulale, Bab-Dummad anmargi nabir binsaergebye.’ Suli, degisuli. Ar be Abraham-wagwasulile, akarsulid, ar Bab-Dummad sunna we-akwamar Abraham-waganga imaked.
LUK 3:9 ”Deginbali, ar bato akan guar sapi-maligi yoid. Ar degisoggu, sapi nue sanmaksulile, a-sapi siklegoed, ogumaklegega soogi melledoed. Deyob Bab-Dummad dulemar-imakmogoed.”
LUK 3:10 Ar degi, dulemar Juanʼse egichiar dasunnad, ega sogdedamalad: —Degite, ¿ibu anmar imakmarsunnoe?
LUK 3:11 Juan, abin-imakdegu, sogded: —Dule suba-gobo nikale, dule-subasulidga gogwen ukmogo. Amba deyob masgunnedsik imakbaloed.
LUK 3:12 Roma-dummadga-mani-gaedgi-arbamaladi, Bab-Dummad-diigi-ogleged-igar-imakega Juanʼse nonimarmogad. Amar ega sogdemarmogad: —Odurdaked-saila, ¿anmardi ibi imakmarmogoe?
LUK 3:13 Juan amarga sogded: —Melle dulemargi wilub-obichaa be mani gamalo, ar unnila bemarga igar-uklesadba be mani gamaloed.
LUK 3:14 Degine, suar-ibmala ese egichiarmarmogad: —Anmardi ¿ibi imakmarmogoe? Juan, abin-sogded: —Mer emar-annik gannadba mani suo, degine, mer binsa aimar-ogakansao. Ar bemar na be-bennuklegedgi, gusbin be itomalo.
LUK 3:15 Dulemar Juan-sunmaked-itobukmaladi Cristo-edarbebukmarsoggu, na e-gwagegi binsabukmalad, we-Juan, Cristo-sogeye. Cristo sogleged, Bab-Dummad-dule-wargwen-barmidagoye-sogsad-duleye.
LUK 3:16 Juan abin-imakdegu, bela dulemarga sogded: “Ar andi, Bab-Dummad-diigi-ogleged-igar-imakedid. Unnila diigi an emar-ogdiid, ar dule-baid-danikoeddi, ar bur anba dule-dummadid. Ar e-sapat-dubse-bakar, geg an ei esiked. Ar a-duledi, Bab-Dummad-Burba-Isligwaledgi, degi, soogi be-ognonimaloed.
LUK 3:17 ”Igi dulemar oros-gwag egwamala, deyob, a-dule, oros-gwag-egwaega bato guagwar e-argangi bigbi-gani gwichid. Degi, oros-gwag-nued e-urbed-neggi nue urboed, e-ukadi soogi ogumakoed. Ar we-soode, geg soo-ginnedid, degi-gasii-sadeguad-sood.” We sogledo, dule-dummad oros-gwagyob dulemar-imaknonikoye.
LUK 3:18 Weyobi, Juan bukidar dulemar-unadii gusad, Bab-Dummad-Gayaburba-Nuedgi dulemarga sunmakdii gusad.
LUK 3:19 Herodes dummadga-maigu, e-urba-Felipe-ome-Herodíasʼye-nugad-nikusad-ular, degi, bela-ibmar-isganamar-imaksad-ular, Juan sabsur Herodesʼga ibmar sogsad.
LUK 3:20 Ibmar-baid-isgana imaksadbali, Herodes esgaryagi Juan-meted.
LUK 3:21 Degidgine, bela dulemar Bab-Dummad-diigi-ogleged-igar-imaknanaigua, Jesús Bab-Dummad-diigi-ogleged-igar imaksamogad. Jesús Bab-Dummadse gotegu, nibnega argade gusad.
LUK 3:22 Jesúsʼgi Bab-Dummad-Burba-Isligwaled sanale, nuuyobi aidenonikid, degi, nibneggi gayaburba gollar gusad, sogded: “Be An-Machi-sabed-sunnad gued. An beba weligwar itoged.”
LUK 3:23 Jesús na e-arbaed imakdegu, deun birga-durgwen-gakambe (30) nikad. Jesús, José-e-machiye bimalanad. Jesús-e-dad-dummagan, wemalad: José, Elí-machi.
LUK 3:24 Elíʼdi, Matat-machid. Matatʼdi, Leví-machid. Levíʼdi, Melqui-machid. Melquiʼdi, Jana-machid. Janaʼdi, José-machid.
LUK 3:25 Joséʼdi, Matatías-machid. Matatíasʼdi, Amós-machid. Amósʼdi, Nahúm-machid. Nahumʼdi, Esli-machid. Esliʼdi, Nagai-machid.
LUK 3:26 Nagaiʼdi, Maat-machid. Maatʼdi, Matatías-machid. Matatíasʼdi, Semei-machid. Semeiʼdi, José-machid. Joséʼdi, Judá-machid.
LUK 3:27 Judáʼdi, Joana-machid. Joanaʼdi, Resa-machid. Resaʼdi, Zorobabel-machid. Zorobabelʼdi, Salatiel-machid. Salatielʼdi, Neri-machid.
LUK 3:28 Neriʼdi, Melqui-machid. Melquiʼdi, Adi-machid. Adiʼdi, Cosam-machid. Cosamʼdi, Elmodam-machid. Elmodamʼdi, Er-machid.
LUK 3:29 Erʼdi, Josué-machid. Josuéʼdi, Eliezer-machid. Eliezerʼdi, Jorim-machid. Jorimʼdi, Matat-machid.
LUK 3:30 Matatʼdi, Leví-machid. Levíʼdi, Simeón-machid. Simeónʼdi, Judá-machid. Judáʼdi, José-machid. Joséʼdi, Jonán-machid. Jonánʼdi, Eliaquim-machid.
LUK 3:31 Eliaquimʼdi, Melea-machid. Meleaʼdi, Mainán-machid. Mainánʼdi, Matata-machid. Matataʼdi, Natán-machid.
LUK 3:32 Natánʼdi, David-machid. Davidʼdi, Isaí-machid. Isaíʼdi, Obed-machid. Obedʼdi, Booz-machid. Boozʼdi, Salmón-machid. Salmónʼdi, Naasón-machid.
LUK 3:33 Naasónʼdi, Aminadab-machid. Aminadabʼdi, Aram-machid. Aramʼdi, Esrom-machid. Esromʼdi, Fares-machid. Faresʼdi, Judá-machid.
LUK 3:34 Judáʼdi, Jacob-machid. Jacobʼdi, Isaac-machid. Isaacʼdi, Abraham-machid. Abrahamʼdi, Taré-machid. Taréʼdi, Nacor-machid.
LUK 3:35 Nacorʼdi, Serug-machid. Serugʼdi, Ragau-machid. Ragauʼdi, Peleg-machid. Pelegʼdi, Heber-machid. Heberʼdi, Sala-machid.
LUK 3:36 Salaʼdi, Cainán-machid. Cainánʼdi, Arfaxad-machid. Arfaxadʼdi, Sem-machid. Semʼdi, Noé-machid. Noéʼdi, Lamec-machid.
LUK 3:37 Lamecʼdi, Matusalén-machid. Matusalénʼdi, Enoc-machid. Enocʼdi, Jared-machid. Jaredʼdi, Mahalaleel-machid. Mahalaleelʼdi Cainán-machid.
LUK 3:38 Cainánʼdi, Enós-machid. Enósʼdi, Set-machid. Setʼdi, Adán-machid. Adánʼdi, Bab-Dummad-machid.
LUK 4:1 Jesús, Bab-Dummad-Burba-Isligwaled nue-nikagudii, Jordán-diwargi banguded. Geb degi, Bab-Dummad-Burba-Isligwaled nega-dulesulidganba Jesús-sesa gusad.
LUK 4:2 Agi iba-dulabo (40), nia-saila Jesús-wilubdakdii gualid. A-ibagangine, Jesús mas-gunsuli gudigusad, degisoggu, ukudmaada itoalid.
LUK 4:3 Agi Jesúsʼga nia-saila sokalid: —Ar be Bab-Dummad-Machi-sunnadiile, we-akwaga be soge: ‘Maduga be binyeye.’
LUK 4:4 Jesús, abin-imakdegu, nia-sailaga sogded: —Noar be soge, ar Bab-Dummad-gayaburbagi weyob narmakar naid: ‘Dule maduginbi dula-gudii guosulid, [bela Bab-Dummad-gayaburba-itogedgi dula gudigubaloed].’
LUK 4:5 Geb degi, nia-saila yar-matusulidse Jesús-sesad. Agi belagwable-napneg-naid-ugakse ega ukiagwar ilagwen-oyoar imaksad.
LUK 4:6 Agi nia-saila Jesúsʼga sokalid: —We-neggweburmar-an-bega-oyosadi bela e-ganguedi, degi, e-gandikidba-yeerdaklegedi an bega ukoed. Ar bela we-neggweburmar anga uklesad. Degisoggu, ar doaga an ukbie, an aga ukoed.
LUK 4:7 Degisoggu, be an-asabin Bab-Dummadyob an-nug-odummogega yokorgi sindigar sigele, we-neggweburmar bela begadga guoed.
LUK 4:8 Jesús, abin-imakdegu, sogded: —Nia-saila be angi bangu. Ar Bab-Dummad-Gardagi weyob narmakar naid: ‘Bab-Dummad-be-Dummad-e-nug be odummodii nanao. Unnila agarbi be ibmar imako.’
LUK 4:9 Geb degi, nia-saila Jerusalénʼse Jesús-sesbalid, Bab-Dummadse-goled-neg-uas-birgi ogwisdapid. Geb Jesúsʼga sogded: —Ar be Bab-Dummad-Machi-sunnadiile, napase be ichomakdo.
LUK 4:10 Ar Bab-Dummad-Gardagi weyob narmakar naid: ‘Na e-baliwiturmar be-edarbega bega barmidagoed, e-argangi be-gamalagar.
LUK 4:11 Adi, melle be akwagi gowarmakegar.’
LUK 4:12 Jesús, abin-imakdegu, sogded: —Nabir be sogendo, ar Bab-Dummad-Gardagi weyob narmakar sognaibalid: ‘Melle Bab-Dummad-be-Dummad, be wilubdako.’
LUK 4:13 Ar nia-saila bela Jesús-wilubdaked bergusgua, sikwas wis egi bangud gusad.
LUK 4:14 Jesús gannar Galileaʼse nonigu, nue Bab-Dummad-Burba-Isligwaled-gangued-nikadba nonikid, degi, bela neggweburmar-dikarba-bubukwad Jesús-ibmar-imakdiid wisguarmalad.
LUK 4:15 Jesús, Judíoʼmar-onmakedneggi dulemar-odurdakdii gualid. Bela Jesús-nug-odummogedbi gusmalad.
LUK 4:16 Jesús Nazaret-neggweburse nonikid, ar ade, agi dungusadid. Obunnoged-ibagi, Jesús na gusgu e-daedba Judíoʼmar-onmakednegse dogdapid. Agi Bab-Dummad-Garda-absogega gwisguded.
LUK 4:17 Ar ade, Jesúsʼga Bab-Dummad-gayaburba-barsoged-Isaías-narmaksad uksamalad. Jesús a-garda-egasgu, weyob-narmakar-naid absoded:
LUK 4:18 “Bab-Dummad-e-Burba angi maid. Ar ade, dule-wilemaladga gayaburba-nuegangi-sunmakega, Bab-Dummad an-susad. Bab-Dummad an-barmialid: Dule-gwage-nunmak-itodimaladga gwage-armakegar. Dule-galesbukmaladga binnasur sogegar, bemar ainimarye. Dule-ibyasuli-gudimaladga ibya-egaegar. Dule-mesagwar-gudimalad-ollor-imakegar.
LUK 4:19 Bab-Dummad-e-birga-nuedgi sunmakega, an-barmialid.”
LUK 4:20 A-sorba, Jesús Bab-Dummad-Garda-obipirmasgu, Judíoʼmar-onmakednegdaked-dulega garda-uksagu, sigisad. Agi-bukmalad bela Jesúsʼginbi atakbukwa gusmalad.
LUK 4:21 Geb degi, Jesús sogded: —Emi-ibagi, bemar-abargi we Bab-Dummad-Gardagi-narmakar-naid sanar-gunonikid.
LUK 4:22 Bela-dulemar-bukmaladi, Jesúsʼgi nuedbi sunmakedbimalad. Geger dakmalad, ibiyobi Jesús yeer sunmake. Degine, sogdemalad: —¿Ar wede, José-machisursi?
LUK 4:23 Jesús amarga sogded: —An wisi, wegi-sogleged be anga sogdamaloed: ‘Ina-duled, na be dukin san nudake, adi, be anmarga nue-ibmar-wisid oyogegar. Ar Capernaúm-neggweburgi bukidar ibmar-imaksaye anmar be-itosmaladi, wegi be-neggweburgine be imakmoga.’
LUK 4:24 Degi, Jesús sogdebalid: “Napira an bemarga soged, Bab-Dummad-gayaburba-barsoged-wargwensaar na e-neggweburgi geg e-nug odummoleged.
LUK 4:25 Napira an bemarga soged, deunni, Elías-ibagangi, bukidar Israel-yargi, mukwamar-ei-sui-burgwismalad gudigusad. A-ibagangine, deun birgapaa-abala dii gwen wissulid, degidbali, bela napneggine ukud-dummad nagunonigusad.
LUK 4:26 Degite, Elías a-mukwamarse gwen barmilessulid. Bur Sarepta-neggwebur-Sidónʼgi-siidse mukwa-wargwen-ei-sui-burgwisadse barmilesgusad, adi, a-mukwa ega mas-ukegar.
LUK 4:27 ”Deginbali, Bab-Dummad-gayaburba-barsoged-Eliseo-ibagangi, bukidar Israel-yargi, dulemar-naibe-buna-yaa-maleged nikagusmalad, degite, amar gwen nudaklessulid. Bur Siria-dule-Naamánʼye-nugadi nudaklesad.”
LUK 4:28 Ar deyob Jesús-ibmar-soge-itosmargu, onmakedneggi-bukwamalad bela sae-itodmalad.
LUK 4:29 Dulemar gwisgudmargu, Jesús-ise-onoar imaksamalad, geb neggwebur-magaba yar-birse Jesús-sesmalad, ar ade, a-yar-birgi neggwebur siid. Adi, a-neggwebur-gulluba egwanmalagar.
LUK 4:30 Degi-inigwele, Jesúsʼdi emar-abargi ganna-ganna noded, emar-abargi bangudsunnad.
LUK 4:31 Jesús, Galileaʼse Capernaúmʼye-neggwebur-nugadse nonikid. Geb obunnoged-ibagi dulemar-odurdakdii gualid.
LUK 4:32 Dulemar Jesús-ibmar-odurdakedi, geger-itomalad igi-Jesús dulemar-odurdake. Ar ade, Jesúsʼde nue-igar-wisi sunmaked.
LUK 4:33 Agi onmakedneggi dule-wargwen, niaburba-isgana-nikad-siid binnasur goted,
LUK 4:34 sogded: —Jesús-Nazaretʼgined, mer anmarse be achao, ¿ibiga be anmar-wiodaniki? ¿Be anmar-obelogega daniki? An be-wisi be doa-dule, be-dule-gwage-islidikidid, be Bab-Dummad-nuggi-danikid-duled.
LUK 4:35 Jesús niase binnasur-uluded, ega sabsur weyob ibmar-sogded: —¡Mer be sunmak! Dulegi-maid be noe. Geb degi, nia emar-abargi dule-balimetegu, dulegi-maid nodegusad. Dule gwen akar-gussulid.
LUK 4:36 Deyob ibmar-gusadi bela geger dakdemalad. Na agi sokarmarsunnad: —¿Wede igid-gayaburba-barsunna? Nue-burba-nika, gandikidba, niamarga ibmar soged. Niamar Jesús-ega-sogedba ibmar-imakdedamalad.
LUK 4:37 Degi, bela Galilea-yalaganba Jesús-dulemar-nudakdiid wisgudmalad.
LUK 4:38 Geb degi, Jesús Judíoʼmar-onmakedneggi-siidgi nodsunnad. Geb Simón-negse nadsunnad. Simón-sakbundor ise-uellegar mai dakdapid. Jesúsʼgi wilenaigusmalad, adi, Simón-sakbundor-nudakegar.
LUK 4:39 Degi, Jesús Simón-sakbundor-walik gwisgunonigu, uellegedga sabsur-ibmar sogded. Agi uelleged yog-akinnar naded. Geb Simón-sakbundor yog gwisguar imaksad, geb a-sorba emarga yog-ibmar-imakar imaksad.
LUK 4:40 Dad-argwategu, obunnoged-iba-bergusgu, bela galagwensuli-bonigan-nikamalad Jesúsʼse senonimalad. Jesús bonigan-nikamaladgi e-argan mesisad, geb bela amar-nudaksad.
LUK 4:41 Deginbali, Jesús bukidar niamar-onisbalid. Niamar ainider, binnasur-gote, sogdedamalad: “¡Bedi Bab-Dummad-Machi!” Ar Jesúsʼdi niamarse uluddaed, osunmakega gwen imakdasulid, ar ade, niamar wismalad, we, Bab-Dummad-dule-wargwen-barmidagoye-sogsad-dule-gue.
LUK 4:42 Neg-oibosgu, Jesús neggweburgi bangudsunnad, nega-dulesulidganba nadsunnad. Dulemar Jesús-amidii guarmalad. Dulemar Jesús-amismargu, mer-egi-banguega, egi wilenaigusmalad.
LUK 4:43 Ar Jesúsʼdi amarga sogded: —Ar neggwebur-baiganse Bab-Dummad-negdakmaid-e-gayaburba-nuedgi an sunmaknabalirgebed, ar a-ular, an barmilealid.
LUK 4:44 Jesús Galileaʼgi Judíoʼmar-onmakednegmargi Bab-Dummad-Gayaburba-Nuedgi sunmakdii gusad.
LUK 5:1 Ibagwengine, Jesús Genesaret-mata-dummad-naid-gakaba gudii, dulemar-bukidar ese nonimalad. Bab-Dummad-gayaburba itomalagala na barmesnanai guarmalad.
LUK 5:2 Agi Jesús ur-warbo gakagi-nai dakalid. E-ibmaladi dii gakagi, saki enukbukmalad.
LUK 5:3 A-ur-wargwengi Jesús nakwisad. Dakleargu, a-ur Simónʼgad daklealid. Jesús, Simónʼga sogded: —Wis be-ur matasik be onoge. Jesús a-urgi sigisad, agi-sii dulemar-bukidar-gakagi-bukwad-odurdakded.
LUK 5:4 Jesús odurdaked-bergusgu, Simónʼga sogded: —Matasik be-ur be sede. Be agi ua-gaega saki mioed.
LUK 5:5 Simón, abin-imakdegu, ega sogded: —Odurdaked-saila, anmar ua-gananai oiboalid, degite, anmar gwen gassurmalad. Degiile, be-sogedba an saki miodo.
LUK 5:6 Na saki-mismargu, bukidar-ua-gasmalad, agidbali saki achirmakbigualid.
LUK 5:7 Geb degi, na e-aimar-ur-baidgi-gunanaidse achasmalad, adi, emar-bendakdamalagar. Geb ese nonimargu, ulu-walabo ua-enosmalad. Ua-enadbali ur-dogbi-gualid.
LUK 5:8 Simón-Pedro ua-bukidar gales dakdegu, Jesús-abin yokorgi sindigar sigisad, ega sogded: —Dummad, angi be bangu, andi isgudiid-duled.
LUK 5:9 Ar ua-bukidar-galesadba, Simón bela-belad dobe itoalid, degine, bela-eba-gunanaid bela-belad dobe itodmarmogad.
LUK 5:10 Degine, Simón-e-aimar Jacobo, degi, Juan, wemarde Zebedeo-masmalad, amarde dobee itodmarmogad. Geb Jesús Simónʼga sogded: —Mer be dobgu. Emisgindi, igi bemar ua-gae, debayobi, napneggi dulemar-gaega an be-odurdakmaloed, adi, dulemar anba nagumalagar.
LUK 5:11 Geb gakase ur senonimargu, bela ibmar obesmalad. Degi, geb Jesúsʼba nadmarsunnad e-sapinganga guegar.
LUK 5:12 Jesús neggwebur-gwensakgi-gudigu, dule-wargwen naibe-buna-yaa-maleged-yaisur-nikad ese nonikid, yokorgi sindigar Jesús-asabin signonikid. We-dule Jesúsʼgi wilenaigusad, ega sokalid: —Dummad, an wisid, be an-nudakbiele, sunna be an-nudaked.
LUK 5:13 Geb degi, Jesús e-argan ese achadgu, dule-ebusad, geb degi, ega sogded: —Nugubi an be-abe. ¡Be nugusun! Degi, dule-boni-nikadi yog-nuguar-gusad.
LUK 5:14 Jesús dule-nugusadga sogded: —Melle dule-baiganga an be-onudaksad be sogo. Unnila dule-irwa-Bab-Dummadse-goledse be nae, aga be-nugusad be oyonae. Degine, be swilidik guegala, Moisés-Igar-Mesisadba-imakega Bab-Dummadga-ibmar-ukleged be sedo. Adi, amar be-nugusadi nue-wisgumalagar.
LUK 5:15 Aka bur bela-belad Jesús-nug dungumai gualid. Bela Jesús-ibmar-imakdiid wisguarmalad. Dulemar-bukidar Jesús-itogega, degine, e-nudakega duurmaknonidamalad.
LUK 5:16 Ar Jesúsʼdi walagwen-Bab-Dummadse-golega dulemar-satedba dulemargi banguddaed.
LUK 5:17 Ibagwengine, Jesús dulemar-odurdaksigu, Fariseoʼmar, degi, Judío-igar-nue-wisimalad bukwagusmogad. Amar bela Galilea-yargi, degi, Judea-yargi, degi, neggweburmar-bubukwadgi danimalad. Degine, Jerusalén-neggweburgi danimarbalid. Agi Bab-Dummad-gangued dulemar-gegumalad-nudakega Jesúsʼba gudigusad.
LUK 5:18 Degi, daklealid, dulemar e-ai-wargwen-abagan-burgwar-nikad e-gabedgi-mai sedanimala. Amar Jesús-siidse negyaba e-ai-odobiguarmalanad, adi, Jesús-asabin mesmalagar, ega nudakegar.
LUK 5:19 Ar dulemar bukidarsoggu, geg odogedbali, neg-birgi nakwismalad. Geb neg-uas-egasmalad, abali, dule-abagan-burgwaled e-gabedgi-mai odesmalad. Jesús-siid-innik omesismalad.
LUK 5:20 Jesús a-dulemar egi gwen bensuli dakdegu, dule-gegumaidga sogded: —An-ai, be-isgudigusad, bega obelolesun.
LUK 5:21 Garda-Narmaked-Dulemar, degi, Fariseoʼmar, na e-gwagegi binsadmalad, sogdemalad: “¿Wede doa-dule, Bab-Dummadgi dodogu? ¿Unnila Bab-Dummadbi dulega isgued elisursi?”
LUK 5:22 Ar Jesús ulubgi-dulemar-binsaedi magar-daksad. Degisoggu, amarga sogded: —¿Ibiga ulubgi be deyob binsabukmala? ¿Geg isgued osulo be an-insasi?
LUK 5:23 An dule-bonigwaledga sogdibe: ‘¡Be-isgunaid an bega osulos!’ Ar igi an sogbarsundibe: ‘¡Nugusun, be nae!’ Degite, ¿igid bur-baisursunna imaklesunna? Suli, ebobela baisursunna imaklesuli.
LUK 5:24 Degisoggu, ani Dule-Machi, dule-bonigwaled an nudakoed, adi, bemar wisguegar, igi dule-bonigwaled an sunna nudake, debayobi, we-napneggi dule-gwage-isgunaid sunna an nudakbalid. Jesús dule-abagan-burgwar-nikadga sogdesun: —Ani an bega soged: Be gwisgu, be-egi-maid na be sede, be-negse be nae.
LUK 5:25 Degi, dule-bonigwaled yog-nuguar-gusgu, emar-abargi yog-gwichibin imaksad, degi, na e-gabedgi-maid na gadebin imaksad, degi, geb e-negse nadsunnad. Na Bab-Dummad-nug-odummonadapi gusad.
LUK 5:26 Agi belagwapa geger-dakedbimalad, bela Bab-Dummad-nug odummodmalad. Nue-dobe-itomala, sogdemarsunnad: “Emi-ibagi, ibmar-gegerdakleged an daksamalad.”
LUK 5:27 Jesús dule-nudaksadgi-gwichi nadgu, dule-wargwen Roma-dummadga-mani-gaedgi-arbaed-Levíʼye-nugadi dakalid. Mani-galeged-neggi sii, mani-gasii dakalid. Jesús, Levíʼse gote, ega sogded: —Anba be dage, an-sapinga guegar.
LUK 5:28 Degi, Leví gwisgusgu, Jesús-sapinga-guega bela ibmar-obes, Jesúsʼba naded.
LUK 5:29 Leví, e-neggi Jesúsʼga iba-dummad onosad. Agi dulemar-Roma-dummadga-mani-gaedgi-arbamalad bukidar bukwa gusmalad, degi, dule-baigan mese-naba emarba mas-gunbukwa gusmarmogad.
LUK 5:30 Agi Garda-Narmaked-Dulemar, degi, Fariseoʼmar, Jesús-sapinganga sunmakarmalad, sokarmalad: —¿Ibiga dulemar-Roma-dummadga-mani-gaedgi-arbamaladba, degi, dulemar-baigan-isgudidimaladba, we-Jesús mas gunne, degine, eba gobbali?
LUK 5:31 Jesús, abin-imakdegu, sogded: —Dule-gegusurmalad ina-duled abesulid, unnila dule-gegumaladbi ina-duled abedamalad.
LUK 5:32 Dule-innikii-nanadimaladse-golega an nonisulid. Dule-isgudimaladse-golega, an nonikid. Adi, na e-isguedga bukib binsamalagar, mer bar isgumalagar.
LUK 5:33 Geb degi, dulemar Jesúsʼga sokarmalad: —Juan-sapingan imbagwenar Bab-Dummadse-golega mas-gunsuli gudidamalad. Amba deyob Fariseo-sapingan gudidamarmogad. ¿Ibiga be-sapingandi geg deyob damala? Be-sapingandi mas-gundii damalad, gobdidamarbalid.
LUK 5:34 Jesús, abin burbar sogded: —Dulemar, ome-nikued-ibase nonimalale, mas gunsurmar be insae. Suli, mas gunmala. Ar dule-ome-nikunaidi ega mas uked. Ar ade, ome-nikunaidi amar-abargi gudiid.
LUK 5:35 Ar ibagan nonikoed, dule-ome-nikunaid e-idu seledoed. A-ibagan nonikile, agindi, Bab-Dummadse-golega mas-gunsuli gudigumalodo.
LUK 5:36 Geb degi, Jesús ega burbar sunmakdebalid, sogdebalid: “Ar dule, mor-seredgi matu-nasikega, geg mor-binid matuga nasiked. Ar deyob imakele, unnila mor-binidbi achirmakosulid, deginbali, mor-binid mor-seredgi-matumakar-naid isdar daklebalid.
LUK 5:37 ”Deginbali, dule bipisaale, vino-binid ibmar-uka-bugluga-sobaled-seredgi bardisulid. Degir, vino-binid mudele, we-buglu-sered esirmako-itole. Degir, binsa vino-wiogo-itole, degi, bugluse-bakar, binsa miledo-itole.
LUK 5:38 A-ulale, vino-binid buglu-binidgi balileged, adi, ebobela nabir igarga guegar.
LUK 5:39 ”Deginbali, dule vino-sered gobsale, sorba vino-binid bar gobbisurguardaed, ar ade sogdedaed: ‘Vino-sered bur vino-binidba nuedye.’ Dule-igar deyobmodo, igar-sered geg igar-binid-ebo atoged.”
LUK 6:1 Ibagwengine, obunnoged-ibagi, Jesús orosgi-dakleged-digaled-abargi-nadapgu, e-sapingan orosgi-dakleged gwane-gwane imaknadapi gusmalad, degine, e-san-onogegala e-argan-abin iir-iir-imaknadapgusmalad, geb gutedamalad.
LUK 6:2 Degi, gwen-gwen Fariseoʼmar-Jesúsʼba-nadapmaladi, Jesús-sapinganga sokarmalad: —¿Ar ibiga bemar ibmar-gwag gwane-gwane nadapmala? ¿Obunnoged-ibagi mer arbaoye igar-maisursi? Emide bemar igar-maidgi annanaimalad.
LUK 6:3 Jesús, abin-imakdegu, ega sogded: —An-sapingan igar-maidgi annanaisulid. ¿Ar bemar David-ibmar-imaksad absodisurmarsi? Deun, David, degi, e-sordamar ukumecharmargu, igi imaksamala.
LUK 6:4 ”Ar David Bab-Dummadse-goled-negse dognoni gusad, degi, Bab-Dummadga-madu-uklesad guchagusad. Ar David, degi, e-sordamar a-madu gunnedsulinad, ar ade, madu-isedid. ¿Unnila dule-irwa-Babse-gormaladbi we-madu-gunnoye igar-maisursi? Degite, ¿David, degi, e-sordamar igar-noar-imaksar be insae? Suli, ar ukudba nabir madu guchamalad. Degisoggu, an-sapingan nabir imaksamarmodo.”
LUK 6:5 Geb degi, Jesús sogdebalid: “Ani Dule-Machi, obunnoged-iba-e-Dummadid.”
LUK 6:6 Obunnoged-iba-baidgi, Jesús, Judíoʼmar-onmakednegse dognonigu, emar-odurdaksii gusbalid. Agine, dule-wargwen, sakwa-nuedsik-argan-burgwaled sii gusad.
LUK 6:7 Agi Garda-Narmaked-Dulemar, degi, Fariseoʼmar, Jesús-argabukwa-gusmalad, dakega, bule obunnoged-ibagi Jesús dule-nudakodibeye, adi, egi sogmalagar, obunnoged-igar-maidgi annadiiye.
LUK 6:8 Ar Jesúsʼdi nue-wisid igi binsabukmala, a-ular dule-argan-burgwaledga sogded: —Dage, neg-abarse be gwisguda. Geb agi neg-abargi dule gwisgunonikid.
LUK 6:9 Geb degi, Jesús sogded: —Ibmar-soggwen an bemarse egisbimardo: Obunnoged-ibagi ibmar-nued-imakedi, wede, ¿igar-nuedi? Ibmar-isgana-imakedi, wede, ¿igar-nuedi? ¿Igid bur-nabiri? ¿Dule-oburgwedi? ¿Dule-odurguedi? ¿Igi bemar sogsunna?
LUK 6:10 Jesús bela dulemar-dikarba-bukmalad-daksagu, dule-argan-burgwaledga sogded: —Be-argan be onak. Dule na e-argan-onakgwidgu, yog-nuguar-naded.
LUK 6:11 Dummagan-bukmalad sae-itodmalad, na sunmakarmalad, igi anmar Jesús-imakmalargebye.
LUK 6:12 Deun, a-ibagangine, Jesús Bab-Dummadse-golega yarse nade gusad. Agi Bab-Dummadse-gorsii oibosad.
LUK 6:13 Oibosgu, eba-nanaimaladse gochad. Agi ambe-gakabo (12), e-sapingan-bur-dummaganga-guega susad. Amar-sulesad, e-sapingan-bur-dummaganye onugsanonikid.
LUK 6:14 Sulesmaladi, wemalad: Simón, a Jesús, Pedroʼye onugsasbalid, degi, Simón-e-urba-Andrés, Jacobo, Juan, Felipe, Bartolomé,
LUK 6:15 Mateo, Tomás, Alfeo-machi-Jacobo, Simón, Zeloteʼye-bimarbalid,
LUK 6:16 Jacobo-e-machi-Judas, degine, Judas-Iscariote, darba-Jesús-uknonikid-dule.
LUK 6:17 Jesús e-sapingan-ambe-gakabogwadmala (12), e-sordagan-bamaladmala, gulluse aidenonikid. Agi nebagi dulemar-bukidar-bukwamalad. Amar, wemalad: Jesúsʼba-nanaimalad-baigan, Judea-yalaginmalad, Jerusalénʼginmalad, degi, demar-gakaba-bukmalad: Tiro-dorgan, degi, Sidón-dorgan. Amarde, bela Jesús-itogega nonimalad, degi, ega bonigan-osulogega nonimalad.
LUK 6:18 Agi dulemar niaburbase-nue-wiledigusmalad nudaklesmalad.
LUK 6:19 Bela dulemar-bukidar Jesús-ebubidamalad, ar ade, e-gangued-nikadba, bela dulemar-onudakdiid.
LUK 6:20 Jesús e-sapingan-dakdegu, sogded: “Bemar-wilemalad, bemargi nued binsalesad, ar Bab-Dummad-e-negdakmaid, bemargadid.
LUK 6:21 Bemar-emi-uku-mesdimalad, bemargi nued binsalesad, ar bemar immerbaa itononimaloed. Bemar-emi-bodidimalad, bemargi nued binsalesad, ar bemar allenonimaloed.
LUK 6:22 Ani Dule-Machi, an-nug-ular, dulemar isdar be-dakarmalar, dulemar be-obannarmalar, dulemar be-ichoarmalar, degi, be-nuggi sunmakarmalar be dule-isganamarye, bemargi nued binsalesad.
LUK 6:23 A-ibagangi, dulemar sabsur-be-imaksadba, be wergumaloed, be weligwar itomaloed, ar nibneggi bemarga ibmar-uklegoedi dummarbagwad. Ar e-babgan bemar-idu amba sabsur Bab-Dummad-gayaburba-barsogmalad-wiosmarmogad.
LUK 6:24 Ar bemar mani-ibgan, ¡duledar-wilesmar! Ar bato bemardi wegi yeer itodimalad.
LUK 6:25 Ar bemar wegi-immedik-itodimalad, ¡duledar-wilesmar! Ar be ukud itononimaloed. Ar bemar emi-alledimalad, ¡duledar-wilesmar! Ar bemar nunmaked itononimaloed, degine, bemar bononimaloed.
LUK 6:26 Ar bemargi bela-dulemar nuedbi sunmakarmalar, ¡be duledar-wilesmar! Ar deyob e-babgan Bab-Dummad-gayaburba-barsogmalad-napiragwadsulid imaksamarmogad.”
LUK 6:27 Jesús sogdebalid: “Ar bemar an-itobukmaladgardi an sogdo: Dule-isdar-be-dakdimalad be sabgumar, dule sae-be-dakmaladga ibmar-nuegan be imakmar.
LUK 6:28 Dulemar-be-ukabsadimaladgi nued be binsamar. Dulemar-be-ogakansadimaladga Bab-Dummadse ega be gormar.
LUK 6:29 ”Ar dule-wargwen wagargi be-bibyosale, wagar-baid ega be oyobalo. Dule mor-suid bei susale, mer be-mor-baid ega be uksuli guo, ega be ukbalo.
LUK 6:30 Ar doa-dule bese ibmar egichialir, ega be uko. Ar dule be-ibe-ibmar susale, mer ese be gannar bar egiso.
LUK 6:31 Ar igi-dulemar be-imakbi be abege, deyob dulemar be imakmogoed.
LUK 6:32 ”Ar dulemar-be-sabmaladbi be sabguele, ¿Bab-Dummadgi ibi-nued be amiosunna? Be ibmar-nued amiosuli. Ar dulemar-isgudimalad deyob dule-e-sabmalad sabgumarmogad.
LUK 6:33 Ar dulemar-ibmar-nued-bega-imakmaladgarbi ibmar-nued be imakmogale, ¿Bab-Dummadgi ibi-nued be amiosunna? Ibnued be amiosuli. Ar dulemar-isgudidimalad amba deyob imakmarmogad.
LUK 6:34 ”Ar unnila dule-gannar-bega-ibmar-ukoedgarbi be ibmar ukele, ¿Bab-Dummadgi ibi-nued be amiosunna? Ibnued be amiosuli. Ar dule-isgudimaladi dule-isgudimaladga ibmar ukdamarmogad, adi, sorba gannar ega ukbaligar.
LUK 6:35 ”Degisoggu, be-isdarmalad be sabgumar, ibmar-nued ega be imakmar. Ibmar-bei-abeged ega be ukmar, mer gannar-bega-ibmar-uked edarbedii be gumalo. Ar bemarga ibmar-uklegoed bur-dummarba gued. Degine, Bab-Dummad-Bur-Birigined-e-mimmiga bemar gunonikoed. Ar Bab-Dummad bela dulemar-sunnasurdamalad, degi, dulemar-isganamar wiledakmaid.
LUK 6:36 Ar igi be-Bab, dulemar-wiledakmaimoga, ayob bemar dulemar-wiledakmarmosundo.”
LUK 6:37 Jesús sogdebar: “Mer yogsaar be sogo, we dule-isganaye, adi, melle Bab-Dummad deyob begi sogmogagar. Mer be sogo, we-dule-sabsur-odurdakye, adi, melle Bab-Dummad sabsur be-odurdakmogagar. Dulemar begi nossuliyob be dako, adi, Bab-Dummad egi nossuliyob bemar-dakmogagar.
LUK 6:38 ”Aimarga ibmar be uko, adi, Bab-Dummad bega ibmar ukmogoed. Bab-Dummad bega ibmar-wilubsaleged-nuedgi, nue-gindilegar, nue-gwamakar, degi, nue-enargwaagwadgi ibmar ukoed. Ar be ibmar wilub-imakedgine, Bab-Dummad bega ibmar wilubsamogoed.”
LUK 6:39 Geb degi, Jesús burbar emarga ibmar sogded: “¿Ar dule-ibyasulid, sunna dule-ibyasulid-idumai guosi? Suli. ¿Ar ebobela yaa-guregedgi argwachasulir be insae? Argwachale.
LUK 6:40 ”Dule-ibmar-durdaknaid geg e-sailaba dummad gued. Ar ibmar-durdaknaid obelosardi, sunna e-odurdakedyob gumogodo.”
LUK 6:41 Jesús burbar sogdebalid: “¿Ar ibiga be-gwenad-ibyagi durgan-maid magarsunna be dake? ¿Ar ibiga be-ibya-yaba-suar-maiddi akusunna be dake?
LUK 6:42 ”Ar igi be-gwenadga be sogoe: ‘Be-ibya-yaba-durgan-maid an bega onogweloye.’ ¿Ar be-ibya-yaba suar-maiddina? ¡Bemar yogasaar-darba-sunmakmaladid! Suar be-ibya-yaba-maid-insa be onoge. Geb agi nabir be atakoed. Adi, agi nabir be-gwenad-ibya-yaba-durgan-maid be onogoed.”
LUK 6:43 Jesús sogdebalid: “Sapi nuedile, geg san-isgana nikued, e-sanmaked nued sanmaked. Ar sapi isganale, geg san-nued nikued, e-sanmaked ichakwa sanmaked.
LUK 6:44 Ar sapimar war-wargwen na e-sanmakedgi dakleged. Ar higo-san ikogi sanmaksulid, degine, uva-san gwen sapi-ikogangi welesulid.
LUK 6:45 ”Anmar-dule amba deyobmodo, dule-nued, na e-gwagegi ibmar-nued-nikadba ibmar-nued onoged. Ar dule-isganadi, na e-gwagegi ibmar-isgana-nikadba ibmar-isgana onomogad. Ar dule-sunmakedi, gwagegi-ibmar-naidba na sunmaked.”
LUK 6:46 Jesús sogdebalid: “¿Ibiga be anse, ‘Dummadye, Dummadye,’ gormala? Ar degite an-ibmar-sogedba be dasurmalad.
LUK 6:47 ”Ar bela dulemar anse danikile, an-ibmar-soged itogele, degi, eba daele, an bega sogmalo, we-dule doasunnaa dae. Weyobdo:
LUK 6:48 We-dule-gwensak na neg-sobbargu, yaa akwisad, matusur akwisad, degi, neg-e-saila akwa-birgi mesisad. Diwar noargu, diwar binnasur a-neggi yolenonikid, degite, gwen neg ogiglimaksasulid, ar ade akwasaila-birgi neg nue-sobar siid.
LUK 6:49 ”Ar dule an-gayaburba-itogele, ar a-sogedba imaksasulile, adi, we-dule weyobmodo: Dule neg-sobsagu, unnila napa-birgi sobsad, neg-e-saila mesissulid. Diwar noargu, a-neggi binnasur yolenonikid, neg-ayarided, neg dummad-bibichisdo. Be itogua.”
LUK 7:1 Jesús bela dule-e-itobukmaladga ibmar-sogsad-sorba Capernaúmʼse dognonikid.
LUK 7:2 Roma-dule-sorda-dulatar-sediid-e-mai (100) ise-uellegar maid, burgwedani maid. A-dulede, na e-mai nue-sabed.
LUK 7:3 Roma-dule-sorda-dulatar-sediid dulemar-Jesúsʼgi-sunmak-itoargu, Jesúsʼse Judío-girmar-dummagan barmialid, adi, Jesúsʼga sogega e-negse dagye, e-mai ega nudakdaye.
LUK 7:4 Judío-dummagan Jesúsʼse nonimargu, egi nue-wilenai gusmalad, ega weyob sognanai gusmalad: “We-dule-e-mai wis be bendakergebed,
LUK 7:5 ar Roma-sordamar-dummadde, anmar-neggwebur-nue-sabed, degine, anmarga onmakedneg sobsabalid.”
LUK 7:6 Jesús amarba nadsunnad. Neg-modanigusgu, Roma-dule-sorda-dulatar-sediid Jesús-abin e-aimar barmialid. Adi, amar Jesúsʼga weyob sogmalagar: “Dummad, an-negse be dogsulir, akarsulid, ar be an-negse gwen dogedwilubsulid,
LUK 7:7 degine, an bese gwen dagedsurmoganad. Ar unnila be sogsa-sae, an-mai yog-nuguar naoed.
LUK 7:8 ”Amba an dummad nikmogad, a-sogedba an damogad. Degine, ani an dummadmogad, ani an sordamar-sedimogad. Ar sorda-wargwenga an sogdibe: ‘Be nae,’ yog naar daed. Sorda-baidga an sogbardibe: ‘Be dage,’ yog dagar daed. Degine, an-maiga an sogdibe: ‘Be we-imake,’ yog-imakar daed.”
LUK 7:9 Jesús deyob Roma-dule-sorda-dulatar-sediid ega ibmar-soge itoargu, geger-itoded. Geb degi, Jesús dulemar-e-sorba-duurmakdanimaladga sogded: “An bemarga sogmar, gwen an Israel-yargi weyob dule-angi-nue-bensulid an dakdisulid.”
LUK 7:10 Ar dule-barmilesmalad gannar negse nonimargu, daknonimalad, mai-uellemai-gusad bato nugusa. Ar ade, bato Jesús bannapaa we-dule nudaksad.
LUK 7:11 Jesús, Roma-sordamar-dummad-e-mai-nudaksad-sorba, Naínʼye-neggwebur-nugadse nadapgu, e-sapingan eba nadapi gusmarmogad, degine, bukidar dule-baigan eba nadapi gusmarmogad.
LUK 7:12 Neggweburse-doged-yawagak-mosgu, dulemar neg-uanse dule-burgwisad-dignadapi gusmalad. A-burgwaled, ome-ei-sui-burgwisad-e-machi-wargwensakadid. Naín-neggweburginmalad bukidar a-omeba nadapi gusmarmogad.
LUK 7:13 Agi Dummad-Jesús dakargu, nue-wile a-ome-dakded, ega sogded: —Mer be boe.
LUK 7:14 Jesús dule-burgwar-maid-selemaidse warmakdapgu, dule-mui-semamaid gwisgusmalad. Geb degi, Jesús a-egi-selemaid-ebusgu, sogded: —Sapingwa, an bega soge, be gwisgu.
LUK 7:15 Geb degi, dule-burgwar-maid gwisgusad, geb agi yog sunmakdeguad. Geb Jesús a-sapingwa e-nanse sessunnad.
LUK 7:16 Bela-dulemar dobee itodmalad, geb degi, Bab-Dummad-nug odummodmalad, sogdemalad: “Bab-Dummad-gayaburba-barsoged-wargwen anmar-abargi gwisgunoni. Bab-Dummad na e-dulemarse ataknoni.”
LUK 7:17 Bela Judea-yalaganba, degi, neggweburmar-a-dikarba-bubukwad bela Jesús dule-burgwaled-odulosad wisguarmalad.
LUK 7:18 Deunni, Diigi-dule-oged-Juan-e-sapingan bela Jesús-ibmar-imaksad Juanʼga sognonimalad. Agi Juan na e-sapingan-warbose gochad.
LUK 7:19 Geb Jesúsʼse barmisad, adi, ese egisegar: —Ar epenne Bab-Dummad-dule-wargwen-an-bemarga-barmidagoye-sogsadi, ¿ar be a-dule? ¿Anmar dule-baid amba edarbemaloe?
LUK 7:20 Dule-warbo-barmilearmalad Jesúsʼse nonimalad, ega sognonimalad: —Anmar bese ibmar-egisega Diigi-dule-oged-Juan anmar-barmialid. Bega sogega, bede, Bab-Dummad-epenne-dule-wargwen-an-bemarga-barmidagoye-sogsad-dule-sogeye. Anmar dule-baid amba edarbemalo-sogeye.
LUK 7:21 Agine, Jesús, Juan-sapingan-wagab, bukidar dulemar-gegumalad, galagwensuli-bonigan-nikmalad, niaburba-nikmalad, degine, dulemar-ibyasurmalad nudaksad.
LUK 7:22 Geb degi, Jesús, Juan-sapingan-abin-imakdegu, sogded: —Be namar, Juanʼga be ibmar-itosmalad sognamar, degi, ega be ibmar-daksamalad sognamar: Dulemar-ibyasurmalad mag-atak an imaksad, dule-muya-muya-nanamalad nued-nanae an imaksad, dulemar-naibe-buna-yaa-maleged-nikmalad swilidik an imaksad, dulemar-uaya-yallirmalad nabir-mag-ito an imaksad, dulemar-burgwismalad gannar-durguega an imaksad, degine, dulemar-wileganaga Bab-Dummad-Gayaburba-Nuedgi an ega sunmaknonikid.
LUK 7:23 ”Degine, Juanʼga be sogbalo: ‘Ar dule-an-bensuliddi, a-dulegindi nued binsalesye.’ ”
LUK 7:24 Diigi-dule-oged-Juan-sapingan-warbogwad nadmargu, Jesús, Juanʼgi dulemarga sunmakalid, sogded: “¿Ar ibiga nega-dulesulidganba bemar arbisunna? ¿Nargammu-burwaba-aibangwichi-dakega bemar arbi? Suli.
LUK 7:25 ”Degite, ¿ar ibi-dakega bemar arbisunna? ¿Bemar dule-wargwen-mor-nued-yoi-gudiid-dakega arbimala? Suli. Ar dulemar mor-nued-yoi-gudimaladdi, wergudimalad, amardi reymar-negyagi gudidimalad.
LUK 7:26 ”Ar degite, ¿ibi-dakega bemar arbimarsunna? ¿Bab-Dummad-gayaburba-barsoged-dakegala? Eye. An bemarga sogmalad, a be daksamalad, degine, Bab-Dummad-gayaburba-barsogedba bur bule bemar daksamalad, ar ade, we-bur-dule-dummadid.
LUK 7:27 Ar we-dulegine bato narmakar sognaid, Mesíasʼgi sunmaknaigu, Bab-Dummad soged: ‘Be-iduale, anga-gayaburba-berbeged an barmidoed, Adi, be-iduar bega igar-mayegar.’ Malaquías 3:1 We-gayaburba-barsoged, Diigi-dule-oged-Juanʼdo.
LUK 7:28 ”Ani an bemarga soged: Dulemar we-napneggi-gwalulemaid, Diigi-dule-oged-Juanʼba bur-dummad sated. Ar degite, Bab-Dummad-e-negdakmaidgi bur dule-bipigwadi, Juanʼba bur-dule-dummadid.”
LUK 7:29 Bela dulemar Jesús-itosmalad, degi, Roma-dummadga-mani-gaedgi-arbamaladse-bakar, sogdemalad, Bab-Dummad-igar-napira-maid inniki-maiye, ar amar, Diigi-dule-oged-Juan-diigi-ogedgi oglesmalad.
LUK 7:30 Ar Fariseoʼmardi, degi, Moisés-Igar-odulomaladdi, Bab-Dummad-igar-emarga-uklenaid gwen abingassurmalad, Bab-Dummad-diigi-ogleged-igar Juan-imakedi, gwen imaksasurmalad.
LUK 7:31 Geb degi, Jesús sogdebalid: “Degite, emi we-dulemar-bukmaladde, ¿ibubo wilubdakar an egi sunmakoe? ¿Doa sunnaa damar be insae?
LUK 7:32 Wemar-damaladi, masmala dulemar-bukidar-ambikuedgi ambikumaladyobdo. Ar dulemar-bukidar-ambikumaladgi muchub-muchub na gorbukmalad. Weyob sogbukwa damalad: ‘Anmar gar ogochamalanad, gwen be dodossurmalad. Anmar bukib-binsae namaksamalanad, gwen be bossurmalad.’ Degisoggu, bemar we-masmala-binsaedsulidyob damalad.
LUK 7:33 ”Diigi-dule-oged-Juan we-napnegse nonigu, dule-baiganyob mas-gunsuli, degi, gobsuli gudigusad. E-annik bemar sogsamalad: ‘Wedi nia egi naiye.’
LUK 7:34 ”Ani Dule-Machi, andi nonigu, mas gunnonikid, gobnonikid, an-annik be sogmalad: ‘We-dule, gadi-masgunned-duleye, gadi-vino-gobed-duleye. Roma-dummadga-mani-gaedgi-arbamalad-e-aiye, degi, dulemar-galagwensuli-isgudimalad-e-aiye, be an-annik sogmalad.’ ”
LUK 7:35 Geb degine, Jesús sogded: “Ar dule Bab-Dummad-e-ibmar-wisidi, ibmar-nuegan-imakedgi mag dakledaed.”
LUK 7:36 Ibagwengine, Fariseo-wargwen Jesúsʼgi wilenaigusad, e-negse mas gunnaegar. Jesús, Fariseo-negyaba dogsagua, mese-naba mas gunnega sigidapid.
LUK 7:37 A-neggweburgine, ome-wargwen, ome-isgudiid-dule, itoargu, Jesús, Fariseo-neggi mas-gunsiiye, gwallu-wawagwad alabastro-akwagi-bute-sobaledgi senonikid.
LUK 7:38 Ome Jesús-yarganba, e-mali-dikarba ise-boar signonikid. Agi, ome na e-ibyanisgi Jesús-e-mali owardikusad. Geb degi, e-sailagiagi odinnosbalid. Ome Jesús-mali suk imaksad, gwallu-wawad Jesús-maligi eosbalid.
LUK 7:39 Fariseo-Jesúsʼnik-gochadi degi-daksagua, na e-gwagegi binsasigualid: “Ar Jesús, Bab-Dummad-gayaburba-barsogeddina, wisindo, we-ome, doa-dule, degine, we-ome-e-ebunaidi, igidaedbali. Ar we-ome isgudiid-duled.”
LUK 7:40 Geb degi, Jesús sunmakdegu, sogded: —Simón, ibmar-gwensak an bega sogbido. Simón, abin-sogded: —Odurdaked-saila, be soge.
LUK 7:41 Jesús sogded: —Dulemar-walabo dule-gwensakgi mani gasmalad: Wargwen egi dulataled-ilatar (500) mani gasad, baiddi, dulatar (100) egi mani gasad.
LUK 7:42 Ar ebobela geg bennuke gusmalad. Degisoggu, mani-ibed amarga sogsagusad: ‘Akarsurye, mer bar an-bennukmaloye.’ Emide, be anga sogena: We-dule, ¿doa bur sab be insae?
LUK 7:43 Simón, abin-imakdegu, sogded: —An insagua, bur dumma-egi-mani-ganigusad, an insado. Jesús, abin-sogded: —Napiragwad be sogsado.
LUK 7:44 Jesús ome-siidsik aibilisgua, Simónʼga sogded: —We-ome be dakena. An be-negse dognonigu, gwen be anga an-nag enukega dii uksasulid. Ar we-omedi e-ibyanisgi an-nag enuksad, degine, e-sailagiagi anga an-nag odinnosbalid.
LUK 7:45 Dog-nued-noniye be anga sogega, be an-wagar ussulid. Ar we-omedi an be-negse dogsad-akar an-nag usiguad.
LUK 7:46 ”Be an-nonogi anga gwallu-wawad gwen eossulid, ar we-omedi an-naggi gwallu-wawad eosad.
LUK 7:47 Ar degisoggu, an bega sogsun, we-ome-dummad-isgudiid ega bela elilesad, ar ade, we-omede dummad-an-sabgusad. Ar dule unnila ichee ega isgued-elilesale, ichee sabgumogad.”
LUK 7:48 Geb degi, Jesús omega sogded: —Be-gwagegi be isgudigusad nugussun.
LUK 7:49 Dulemar-mesegi-eba-mas-gunbukmalad, na ulubgi binsadmalad, sogdemalad: —¿Ar wede doa-dulesunna, isguedse-bakar, elied?
LUK 7:50 Ar Jesúsʼdi omega sogded: —Be-angi-bensulidba isguedgi be abonolesun. Degisoggu, ulubgi gwage-bogidikidba be nasun.
LUK 8:1 A-ibagan-sorbali, Jesús bela neggwebur-dummagan-onodii, degi, neggwebur-burwigana-onodii gualid. Bab-Dummad-e-negdakmaid-gayaburba-nuedgi sunmakdii gualid. E-sapingan-e-ambe-gakabogwad (12) eba gudigusmarmogad.
LUK 8:2 Degi, abala omegan niaburba-isgana-nika-gusmalad nugusmalad, gwen-gwen-gegudiid nugusmalad. A-omegan, wemalad: María, Magdalenaʼye ese gordamalad. We-omegine sogagugle (7) niaburba onolesad.
LUK 8:3 Degine, Chuza-e-ome-Juana. We-Chuzaʼde Rey-Herodesʼga neg-daked-dummadid. Deginbali, Susana, degi, omegan-baigan-bukidar Jesúsʼba gudigusmarmogad. A-omegan, na ibmar-nikamaladba Jesúsʼga ibmar-imakdii gusmalad.
LUK 8:4 Dulemar-bukidar neggwebur-baid-baidginmalad Jesúsʼse ambikunonimalad. Amarga, Jesús burbar sunmakded, sogded:
LUK 8:5 “Ibagwengine, dule-wargwen-ibmar-gwag-digedi ibmar-gwag dignaded. Ibmar-gwag-dignaigusgu, abala ibmar-gwag igargi babatisad. Igargi-babatismaladgi dulemar annasmalad. Geb degi, a-sorbali, sikwimar-gukudimalad a-ibmar-gwag manonimalad.
LUK 8:6 ”Abala, ibmar-gwag, akwamar-birgi babatisad. Dunguargu, dinguded, ar ade, akwamar-birgi neg nisarsulid, dinnagwad.
LUK 8:7 ”Abala, ibmar-gwag, iko-abargi babatisad. Ibmar-gwag dunguargu, ikomar eba dungudmogad. Ikomar ibmar-gwag-ichosad. Degisoggu, ibmar-gwag gwen sanmaksasulid.
LUK 8:8 ”Ar ibmar-gwag napa-nuedgi-babatismaladdi, dungudgu, nue-sanmaksad, bela-bela san-nikusad.” Ar weyob Jesús dulemarga sunmaksigu, binnasur sogded: “An-bemarga-ibmar-soged bemar mag nue-itobiele, nue-itomar.”
LUK 8:9 Geb degi, e-sapingan Jesúsʼse egichialid: —Ibmar burbar be anmarga sogsadi, ¿wede be, ibu obarsunna?
LUK 8:10 Jesús na e-sapinganga sogded: —Ar bemargardi, Bab-Dummad-e-negdakmaid-igar-burbar-mamaid osanalegoye maid. Dulemar-baigangardi, ega burbar soglegoed: ‘Adi, dulemar ise-dakar imakmar-inigwele, mer mag dakmalaga, degi, ise-itogar-imakmar-inigwele, mer mag itomalagar.’
LUK 8:11 ”Ar emi burbar an bemarga sogsadi, weyobdo: Ibmar-gwag, Bab-Dummad-gayaburbad.
LUK 8:12 ”Ibmar-gwag-igargi-babatismaladi, we Bab-Dummad-gayaburba-sunmaked-e-wilubganad. Nia-saila sorba nonigu, dulemar-gwagegi Bab-Dummad-gayaburba-nagusad ei osulononikid, adi, mer Bab-Dummadba damalaga, mer isguedgi abonolemalagar.
LUK 8:13 ”Ar akwagi-babatismaladdi, Bab-Dummad-gayaburba itosmargu, nue-weligwar abingasmalad. Ar wemar unnila asginbi Bab-abingasmarsoggu, ibmar-gwag-digaled-maligan-askinnegwadyobdo. Degisoggu, ichee wis Bab-Dummadba nanasmalad, ibagan-bulegan ega nonigu, Bab-Dummadgi bangudmalad.
LUK 8:14 ”Ar iko-imbaba-babatismaladdi, we-dulemar Bab-Dummad-gayaburba abingasmalando. Ar undargusgu, we-napneggi-ibmar-nanaidse, degi, manise, degi, we-napneggi-unnila-yeer-itodiguedse, binsaed-galedmalad. Amar ibmar-gwag-gwen-sanmaksasulidyob gunonikid.
LUK 8:15 ”Ar napa-nuedgi-babatismaladdi, wemardi, Bab-Dummad-gayaburba-itosad nue abingasmalad. Gwage-nuedgi, gwage-napiragwadgi, gwen-galakussuli Bab-Dummad-gayaburbaba nanasmalad. Degisoggu, amar ibmar-gwag-nue-sanmaksamaladyob gunonikid.”
LUK 8:16 Jesús sogdebar: “Dule gwallu ogasale, gwen ulu-yaba sisulid, degi, e-gabed-urba siega amba gwen imakdisurbalid. Dule gwallu ogasale, niba gwallu-siedgi osidaed, adi, dulemar dognonikir, gwallu-meegwad mag dakegar.
LUK 8:17 Debayobi ibmar bipisaale dukusulid. Be-ibmar-saed bela wisgulegedsegad. Amba be dukuar ibmar-saoen-inigwele, bela dulemar wisguedsegad, bela negache noedsegad.
LUK 8:18 ”Degisoggu, nue be binsaergebed. Ar dule-ibmar-nikadga bur bule ega gatik ibmar uklegoed, ar degine, dule-ibmar-satele, amba ibmar-nikuo-itogedi e-annik sulegoed.”
LUK 8:19 Jesús dulemar-odurdaksigu, geb degi, e-nan, degine, Jesús-urbamar, Jesúsʼse nonimalad. Ar dulemar bukidarsoggu, geg Jesúsʼse warmak guarmalad.
LUK 8:20 Jesús-owisosmarsunnad, ega sognonimalad: —Be-nan, degi, be-urbamar magaba gwismalad, be-dakbimalad.
LUK 8:21 Jesús, abin-imakdegu, sogded: —Dule-Bab-Dummad-gayaburba-itomalad, degi, ebadamalad, a an-nanad, degine, amar an-urbamalad.
LUK 8:22 Ibagwengi, Jesús na e-sapinganmala urgi nakwisgu, amarga sogded: —Mata-dummad-obakar namargwelo. Geb degi, nadmarsunnad.
LUK 8:23 Urgi nadapmargu, Jesús gabided. Geb degi, egi mataba burwa-dummad noalid. Ur, dii-ena nagusad. Degidbali, ur doged gualid.
LUK 8:24 Geb degi, e-sapingan Jesúsʼse nonimargu, Jesús-odaksamalad, ega sogdemalad: —¡Odurdaked-saila, anmar-ur dogmai, anmar bela! Jesús ataksagu, burwaga, degi, demarga binnasur sogded: “Be bogidik sae.” Geb degi, burwa boo naded, neg swilidik sigisad.
LUK 8:25 Jesús e-sapinganga sogded: —¿Ar ibiga be Bab-Dummad-bengusmala? E-sapingan dobe itodmalad, degine, geger dakdemarbalid. Na muchub-muchub sogdemalad: “¿Wede, doa-dulesunna? Burwa, degi, demarse-bakar, eba ibsaed.”
LUK 8:26 Geb degi, Jesús na e-sapinganmala Gadara-dulemar-bukwadse modapmalad. A-negde, Galilea-mata-obakar naid.
LUK 8:27 Jesús urgi-aidesgu, dule-wargwen dule-nia-dikasurgus-nikad, Gadara-neggweburgined, ese nonikid. A-dule mor-yoisur gudidaed, degine, neggi gabsurbalid, neg-uan-yaba gabdidaed.
LUK 8:28 We-dule Jesús-dakargu, binnasur gormakded. Jesús-asabin yokorgi sindigar sigisad, sogded: —Jesús, Bab-Dummad-Bur-Birigined-Machi, ¿ibiga be anse achadaniki? ¡Melle be mesagwar an-imako!
LUK 8:29 Ar Jesús niaburbaga sogsad, “dulegi-maid be noe.” Dakargu, dikasurgusa dulegi niaburba maid. Ar esgoro-dubgi a-dule-mali, degi, e-argan edindamar-inigwele, degite, iidi esgoro-imakdaed. Degine, nega-dulesulidganba, nia, dule-sesdaed.
LUK 8:30 Jesús, a-dulese egichiarsun: —¿Igi be nuga? Dule, abin-sogded: —Ichesulidye an nuga. Ar ade, niamar-bukidar egi maid.
LUK 8:31 Niamar Jesúsʼgi wilenai gusad, melle niamar-wilegoed-galuse e-barmidye.
LUK 8:32 Deun, sinmar-bukidar yargi mas mananai gusad. Niamar Jesúsʼgi wilenai gusad, sinmargi e-odoye. Jesús amarga sogded, nabirye, ase be dognamarye.
LUK 8:33 Niamar, dulegi ainidgu, sinmarse ubodapid. Sinmar yar-weregedgi babatidgu, matase babatidapid. Agi bela gundoledapmalad.
LUK 8:34 Ar sinmar-edarbemalad sin-gundilesad-daksamargu, duurmakdemalad, neg-igarba-bukmaladga, degine, neggweburgi, sinmar-gusad sogdapmalad.
LUK 8:35 Degi, dulemar neggusad-dakega ainiarmalad. Jesúsʼse nonimargu, daknonimalad, dule-nia-nika-gudigusadi Jesús-naba nue mor-yoi sii, nue-nugus sii. Dulemar deyob dakarmargu, dobee itodmalad.
LUK 8:36 Ar dulemar-dule-nugusad-daksamaladi, dulemar-nonimaladga sogdemalad, dule-nia-nika-gudigusadi igi nugusa.
LUK 8:37 Geb degi, bela dulemar Gadara-yar-dikarbarmalad, bela dobee itodmargu, Jesús e-yargi-noega, egi wilenaigusmalad. Degi, Jesús urgi-nakwisgu, gannar nadsunnad.
LUK 8:38 Dule-nia-nika-gusadi, Jesús-e-sedega, Jesúsʼgi wilenaigusad. Ar Jesús egi bangusokargua, ega sogded:
LUK 8:39 “Be-negse be nae, be sogna, ibibayobi Bab-Dummad nue-wile be-daksa.” Dule nadgua, bela neggweburgi sunmakdii gualid, igi Jesús ega ibmar-dummagan imaksa.
LUK 8:40 Jesús gannar Capernaúm-neggweburse nonigu, dulemar-bukidaradi weligwar Jesús-abingasmalad, ar ade, bela Jesús-edarbedimalad.
LUK 8:41 Geb degi, machered-wargwen, Jairoʼye-nugadi Jesúsʼse nonikid. Jesús-mali-naba sindigar yokorgi signonikid. E-negse naega, Jesúsʼgi wilenaigusad. Jairoʼde, Judíoʼmar-onmakedneggi dule-dummadga gudiid.
LUK 8:42 Dakargu, Jairo unnila bunolo-wargwenna nikad, birgambe-gakabo nikad (12). A-bunolode, burgwedani maid. Jesús, Jairo-negse nadapgu, dulemar-bukidara, ali-ali Jesúsʼgi yolenanai gualid.
LUK 8:43 Dulemar-bukidarad-abargi ome-gwensak birgambe-gakabogus (12) boni-nalur-nika-gudiidi, gudimogad. A-ome, bela mani-nikadi inadurgangi ollomaksad, ar degite, gwen nudaklessulid.
LUK 8:44 A-ome, Jesús-yarganba nonikid, ei-morduku ebunonikid. Ome, Jesús-morduku ebusgu, boni-nalur-nika-gudiid yog-galegar naded, yog-nuguar gusad.
LUK 8:45 Geb degi, Jesús sogded: —¿Wede doa an-ebusa? Bela sulidbiye ega sogmalad. Pedro, degi, e-walik-bukmalad, Jesúsʼga sogdemalad: —Odurdaked-saila, dulemar-bukidar ali-ali be-barmesnana-naded, degite, be sogde: ‘Wede, ¿doa an-ebusye?’
LUK 8:46 Ar Jesús, abin-imakdegu, sogded: —Dule-an-ebusad mag an itoged. Ar angi an-gangued node an itosad.
LUK 8:47 Degi, ome dakdegu, ibmar-gusadi gwen dukuar gussuli, ise-wawanmakar Jesúsʼse nonikid, e-mali-naba yokorgi sindigar signonikid. Bela-dulemar-bukwad-abargi sognonikid, ede, ibiga Jesús-morduku ebusye, degine, ede, Jesús-morduku-ebusgu, yog-nuguar nadye sognonikid.
LUK 8:48 Jesús omega sogded: —Omegwa, be nue an-bengussursoggu, be nugussun. Gwage-bogidikidgi be-negse be nasun.
LUK 8:49 Amba Jesús omega sunmakgwichi, dule-wargwen, Jairo-neggi-danikid, Jairoʼga sognonikid: —Be-bunolo bato burgwisye, mer bar odurdaked-sailagi bega be-bunolo-nudakega bar wileye.
LUK 8:50 Jesús deyob dule-soge itosgu, Jairoʼga sogded: —Melle be dobgu. Unnila melle be bengu, be-bunolo nuguoed.
LUK 8:51 Jesús, Jairo-negse dogdapgu, dulemar eba gwen doged imaksasulid, unnila, Pedro, Jacobo, Juan, degi, bunolo-e-bab, degine, bunolo-e-nan, amarbi eba dogsamalad.
LUK 8:52 Jesús modapgu, dakdapid bela bobukmala, degi, binnasur ise-wilegar bunologa bonanai. Jesús amarga sogded: —Mer bomar, bunolo burgwar-maisuli, unnila gabmai.
LUK 8:53 Bela-dulemar-bukmalad Jesúsʼgi dodoarmalad, ar ade, wismalad we-bunolo burgwar mai.
LUK 8:54 Ar Jesúsʼdi, bunolo-argangi-gasgua, binnasur sogded: —Bunolo, be gwisgu.
LUK 8:55 Geb degi, bunolo-e-burba gannar ese nonigu, yog-gwisguar imaksad. Geb degi, Jesús sogded, bunologa masgunned ukmarye.
LUK 8:56 Bunolo-e-babgan deyob ibmar-gusadi geger dakarmalad. Jesúsʼdi sogded, mer dule-baiganga sogmaloye.
LUK 9:1 Jesús na e-sapingan-ambe-gakabogwad-danar-oambikusgu (12), bela amarga igar-uksad, Bab-Dummad-ganguedba dulemargi niamar-oniegar, degine, dule-uellemalad-nudakegar.
LUK 9:2 Geb degi, Jesús e-sapingan-barmisad, adi, Bab-Dummad-e-negdakmaidgi sunmakegar, degi, dulemar-uellemalad nudakbaligar.
LUK 9:3 Jesús e-sapinganga weyob sogsad: “Mer igarba ibmar sedmalo, suar-gaapoled suli, sagu suli, masgunned suli, degine, mani surbar. Deginbali, unnila mor-yoigwabi be namaloed.
LUK 9:4 Ar doa-negse be dogdapoe, a-negginbi be megoed. Ar a-neggi-mai geb be baid-neggweburse namaloed.
LUK 9:5 ”Ar bia be-abingassurmalar, a-neggweburgi be nodmaloed, geb be-naggi-olli-nanaid be nue eli-eli samaloed, adi, dulemar mag be-dakmalaga bemar ega Bab-Dummad-igargi sunmakapmala. Degisoggu, emargindo, ar Bab-Dummad-igar yapa abingamalar.”
LUK 9:6 Jesús-sapingan-ambe-gakabo-guedi (12) bela neggweburmar-burwiganase Bab-Dummad-Gayaburba-Nuedgi sunmakdii guarmalad, degi, dulemar-gegumalad-nudakdii gusmarbalid.
LUK 9:7 Dummadga Herodes-Antipas-maidi, Jesús-bela-ibmar-imakdiid-itoargu, geger nue-ito naded. Ar ade, abar sogmalad: “We-Jesús, Diigi-dule-oged-Juan-burgwisad gannar durgusye.”
LUK 9:8 Baigan sogmarbalid: “We-Jesús, epenne-Bab-Dummad-gayaburba-barsoged-Elíasʼye-nugad, gannar noniye.” Degine, baigandi sogmalad: “We-Jesús, epenne-Bab-Dummad-gayaburba-barsoged-wargwen-gudigusad gannar durgusye.”
LUK 9:9 Herodes-Antipasʼdi sogded: “An diigi-dule-oged-Juan-ibe dukar-egwachadde, degite, dulemar an egi-sunmake-itogedde, ¿wede doasunna?” Degisoggu, Herodes-Antipas Jesús-dakbiguarsunnad.
LUK 9:10 Jesús-e-sapingan-bur-dummagan-e-ambe-gakabo-gued (12), gannar Jesúsʼse nonimargu, bela ibmar-imaksamalad Jesúsʼga sognonimalad. Jesús amarbi bachikii, nega-dulesulidganba neggwebur-Betsaidaʼye-nugad-dikarba sesad.
LUK 9:11 Dulemar wisguargu, Jesús Betsaida-neggwebursik nadye, dulemar ase nadegusmarmogad. Jesúsʼse nonimargu, Jesús dulemar-abingasad. Geb degi, amarga Bab-Dummad-e-negdakmaidgi sunmaksigisad, degine, dulemar-nudakleged-abemalad nudaksabalid.
LUK 9:12 Ar neg-sedogusgu, e-sapingan-ambe-gakabogwad (12) Jesúsʼse nonimalad, ega sognonimalad: —Dulemar be barmid, adi, igarba negmar-bukwadse, degi, negmar-gwa-gwagwen igarba-bukwadgi sunna obunnomaloed, degi, agi masgunned sunna amimarbaloed. Ar wegindi, anmar nega-dulesulidgangi bukmalad.
LUK 9:13 Jesús e-sapingan-abin sogded: —Bemar ega masgunned ukmar. E-sapingan, abin-imakdemarmogad: —Anmar unnila madu gwaatar, degi, ua ukabo nikmalad. Ar degiir anmar we-dulemar-ichesulidga mas baknaergebed.
LUK 9:14 Ar ade, macherganbi miliatar (5,000) mergued. Geb degi, Jesús e-sapinganga sogded: —Danar-danar, e-dulabogakambe-dulabogakambe, (50-50) be urbemar.
LUK 9:15 E-sapingan deyob imaksamalad, bela deyob dulemar-urbismalad.
LUK 9:16 Geb degi, Jesús madu-gwaataled susgu, ua-ukabogwad susbargu, niba atakdegu, Bab-Dummadga dog-nuedye sogsad. A-sorba, madu bisge-bisge imaksad, degidbali ega merguded. Geb e-sapinganga ukded, adi, amar dulemarga ukmarmogagar.
LUK 9:17 Degine, bela-dulemar-gudidimalad nue-immeles mas guchamalad. Mas-guchad-sorba, Jesús-sapingan madu-obichadi, degi, ua-obichadi, garba-gwaambe-gakabo-mergu (12) wesmalad.
LUK 9:18 Ibagwengi, Jesús, Bab-Dummadse bachiki gorsigusgu, deun e-sapingan eba bukwa-gusmogad. Amarse Jesús egichialid: —¿Doaye dulemar an-annik sogmala?
LUK 9:19 E-sapingan, abin-sogdemalad: —Gwenna-gwenna Diigi-dule-oged-Juanʼye benik sogmalad. Baigandi sogmalad, be Bab-Dummad-gayaburba-barsoged-Elíasʼye. Agi baigan sogmarbalid, be Bab-Dummad-gayaburba-barsoged-wargwen-epenne-gudigusad, gannar durgusadye.
LUK 9:20 Jesús na e-sapinganga sogded: —Bemardina, ¿doaye an-annik sogmarmosunna? Geb degi, Pedro, Jesús-abin sogded: —Be Cristo, Bab-Dummad-dule-wargwen-barmidagoye-sogsad-dule.
LUK 9:21 Geb degi, Jesús e-sapinganga sabsur sogded, melle dulemar-baiganga bipisaar sogoye ede Cristoʼye, Bab-Dummad-dule-wargwen-barmidagoye-sogsad-dule-sunnadye.
LUK 9:22 Degi, Jesús sogdebar: —Ani Dule-Machi, nue-wilegergebed. Judíoʼmar-girmar-dummagan, dule-irwa-Bab-Dummadse-gormalad-e-dummagan, degine, Garda-Narmaked-Dulemar, amar gwen an-abingaosurmalad, an-oburgwemaloed. Geb degine, ibapaagi gannar an durgubaloed.
LUK 9:23 Degine, Jesús bela-dulemarga sogded: “Ar dule-wargwen an-sapinga gubiele, na dukin san iegergebed. Bato burgwenadapidyobi, bane-bane nakrus-semaiyob anba nanaergebed.
LUK 9:24 ”Ar dule-wargwen anba-naid-ular burgwebisulir, e-san-burba ei yogguodo. Ar anba-naid-ular burgwenonikirdi, adi, na-e-san-burba yogguosurdo.
LUK 9:25 Ar dule-wargwen napneg-naid bela egadga imaksar, degi-inigwele, edi na bergusar, e-san-burbadi yoggusale, ega, ¿ibi-nuedga napneg-naid-egadga-imaksad gus be insae? Suli. Ega ibmar-nuedga gussuli.
LUK 9:26 ”Ar dule-gwensak an-nuggi bingegusale, degi, an-gayaburbagi bingegusbalile, ani Dule-Machi, a-dulegi an bingegumogoed. An-gangued-yeerdaklegedgi an danikoedgi, degi, an-Bab-gangued-yeerddaklegedgi an danikoedgi, degine, baliwitur-yeerddaklegedgi an danikoedgi, a-dulegi an bingegumogoed.
LUK 9:27 ”Ar napira an bemarga soged, gwenna-gwenna wegi-bemar-bukmalad burgosulid, amba dula-gudii, Bab-Dummad-e-negdakmaid bese noni be dakedsegad.”
LUK 9:28 Jesús ibabaabakgus-e-burgoedgi-sunmaksad-sorba (8), Jesús, Pedro, Juan, degi, Jacobo-sesagusad. Bab-Dummadse-golega yar-birse nakwided.
LUK 9:29 Jesús Bab-Dummadse gorsigusgu, e-san-dakleged gwagded, e-mor bela dagudik, dakar-dakar dakle naded.
LUK 9:30 Geb agi Jesús-sapingan-warbaagwadi dakarmalad, dulemar-epenne-dula-gudigusmalad, Moisés, degi, Elías, Jesúsʼmala sunmakgwichi.
LUK 9:31 Amar, gwallu-meegwad-abargi, Jesús-Jerusalénʼgi-burgoedgi-sunmakgwichi, degi, Jesús-we-napneggi-bangudoedgi-sunmakgwichi, dakarmalad.
LUK 9:32 Pedro, degi, baigan-eba-gudidimalad, gabed egi nue-obin itomar-inigwele, nue ataksamargu, Jesús-gangued-yeerdakleged daksamalad, degi, dule-warbo Jesúsʼba-gwichid daksamarbalid.
LUK 9:33 Degi, amar-warbogwad Jesúsʼgi bangudsokarmargu, Pedro, Jesúsʼga sogded: —Odurdaked-saila, we, anmar wegi gudiid nueddo. Anmar wegi neg-matargana-gwapaa sobmalodo: Gwagwen bega, baid Moisésʼgar, geb baid Elíasʼgarmo. Ar ade, Pedro itosulid, yogsaar gole-gole gwichid.
LUK 9:34 Ar weyob Pedro sunmakgwichi, mogir emar-birgi nagunonikid. Mogir emargi dognonigu, dobe itodmalad.
LUK 9:35 Degi, mogir-imbaba gayaburba gollalid, sogded: “We An-Machi-sabedi gued. We, be nue-itomar.”
LUK 9:36 Degi-sunmaked-bergusgu, Jesús-sapingan dakarmalad, unnila Jesúsʼbi wargwen gwichi. A-ibagangi, Jesús-sapingan dulemar-baiganga ibmar-daksamalad gwen sogsasurmalad, bela daksadi, odukusmalad.
LUK 9:37 A-oibosadgine, Jesús na e-sapingan-warbaagwadmala yar-birgi-gudiidgi aidearmargu, dulemar-bukidar ese nonimalad.
LUK 9:38 Agi dule-wargwen, dulemar-bukidarad-abargi binnasur gote, sogded: —Odurdaked-saila, an-machi anga wis be dake, ar webi wargwen an wis nikad.
LUK 9:39 Dakargu, burba-isgana an-machigi nagunonikir, binnasur gotedaed, degine, binnasur wawanmakdedaed. Gayaba maku-maku guardaed, burba-isgana sabsur-imakdaed, degine, bar indakbisur guardaed.
LUK 9:40 Be-sapingangi an wilesanad, adi, ega burba-isgana onogegar. Be-sapingan gwen ega burba-isgana onossurmalad.
LUK 9:41 Jesús, abin-imakdegu, sogded: —Bemar, Bab-Dummadgi-bengumalad-dulemar. Bemar, Bab-Dummad-igar-oakaloged-dulemar. ¿Sanase bemar-abargi an gudiguosunna? ¿Sanase mag be itomaloe? Budar an bemar-daked danikid. ”Be-machigwa anse be sedage.”
LUK 9:42 Machigwa Jesúsʼse danikidgi, niaburba machigwa-balimeted, degi, binnasur owawanmakded. Geb degi, Jesús burba-isganase sabsur-uluded. Geb machigwa-onudaksasunnad. Geb a-sorba, e-babga machigwa-uksasunnad.
LUK 9:43 Bela dulemar, Bab-Dummad-e-gangued geger dakedbimalad. Bela dulemar Jesús-ibmar-imakedi, geger-dakbukmaladgine, Jesús e-sapinganga sogded:
LUK 9:44 “We an-ibmar-sogoedi nue be itomalo, mer be iemalo. Ani Dule-Machi, an-oburgwemalaga dulemarse uklegoed.”
LUK 9:45 Weyob Jesús ega ibmar-sogedi e-sapingan aku itosmalad. Ar ade, emarga odukuar sunmaklesad, adi, aku-itomalagar. E-sapingan na dobedbali Jesúsʼse egichissurmalad, wede ibi ega nue-obarena.
LUK 9:46 Geb degi, Jesús-e-sapingan na muchub-muchub abin-abin imakarmalad, doa-bur-dummadga guoye.
LUK 9:47 Ar Jesús, e-sapingan-gwage-binsanaid mag daksagu, machi-bipi-wargwen-susad. Geb e-nagaba ogwichisad.
LUK 9:48 Agine, e-sapinganga sogded: “Ar dule, an-nuggine we-machi-bipi-abingaele, an-abinganaido. Degi, ar dule, an-abingaele, dule-an-barmialid abinganaido. Ar ade, bemar-imbagi doa-bur-bipigwadi, a, bur dule-dummadid.”
LUK 9:49 Juan, Jesús-abin imakdegu, sogded: —Odurdaked-saila, anmar dule-wargwen be-nuggi niamar-onodii daksado. A-dule, anmar-sordasursoggu, anmar ega sogsado, mer bar Jesús-nuggi niamar-onogoye.
LUK 9:50 Jesús, abin-sogded: —Mer a-dule-ibe igar-bisgo. Ar dule anmargi yoledisulile, a-dule, anmar-sordado.
LUK 9:51 Jesús nibnegse-naed-e-ibagan warmaknonigu, Jesús, Jerusalénʼse nue-nae sokarsunnad.
LUK 9:52 Jesús igarba nadapgu, e-iduale dulemar-barmisad. Amar nadgu, Samaria-neggwebur-bipigwadse dogdapmalad, adi, agi guagwar idu neg-amimalagar.
LUK 9:53 Ar dulemar-aginmaladi Jesús-Jerusalénʼse-nadapid magar daksamarsoggu, gwen-abingassurmalad.
LUK 9:54 E-sapingan Jacobo, degi, Juan, deyob daksamargu, Jesúsʼga sogdemalad: —Dummad, igi epenne Elías nibneg-akar soo odesa, ¿deyob anmar nibneg-akar soo odedabi be abege? Adi, wemar bela-ogumakegar.
LUK 9:55 Geb degi, Jesús amarsik atakdegu, amarga sabsur sogded: —Ar bemar wissulid igid-burba be gumala.
LUK 9:56 Ar ani Dule-Machi, nonigua, dulemar-san-burba-obelogega an nonisulid. An nonikid, dulemar-san-burba-abonogegar. Geb degi, Jesús na e-sapinganmala neggwebur-baidse nadmarsunnad.
LUK 9:57 Jesús na e-sapinganmala nadgua, dule-wargwen igarba ega sokalid: —Dummad, ar bia be naoe, an beba naiguoed.
LUK 9:58 Jesús a-dulega sogded: —Ar usmardi na e-gubya nikad, sikwimar-gukudimaladi na e-uu nikamarmogad. Ar andi Dule-Machi, neg sated.
LUK 9:59 Jesús, dule-baidga sogded: —An-sapinga-guega, anba be dage. Dule abin-sogded: —Dummad, bina an-babse an nagwelo, an-bab-burgwedse geb beba an naoed.
LUK 9:60 Jesús ega sogded: —Ar dulemar-burbar-bato-burgwar-gudidimaladi, na e-burgwarmalad digoed. Ar bedi, nae, Bab-Dummad-e-negdakmaidgi dulemarga be sunmaknae.
LUK 9:61 Geb degi, dule-baid Jesúsʼga sogdemogad: —Dummad, an beba naoed, ar bina an-neg-yaginmaladga degimaloye an sognagwelo.
LUK 9:62 Jesús aga sogded: —Ar dule neg-imuddibe, gwen yarganba bar-ataksurdaed. Ar degisulile, dule yarganba atakele, e-napa-imunaid ega biir-biir imulego-itole.
LUK 10:1 Deyob we-ibmar-gusad-sorba, Jesús e-sapingan-baigan e-dulapaa-gakambe (70), bela na e-naoed-neggweburmarse ebo-ebo e-iduar barmisad.
LUK 10:2 Jesús amarga sogded: “Napira an bemarga soged, nainugi ibmar-gwag-weleged bukidarad, ar e-weemaladdina ichee gued. Degisoggu, nainugi ibdula-gwag-weleged-e-ibedse be wilesakwaa egismar, adi, e-nainuse ibdula-gwag-wemalad-barmidagegar.
LUK 10:3 ”Be namar, sibad-wawaad-sapingwagwadyob, achu-burburmalad-abargi, an bemar barmidmar.
LUK 10:4 Mer mor-sagu sedmalo, mani-sagu surbar, degi, sapat surbar, degine, melle igarba dule-absomarbalo.
LUK 10:5 ”Ar doa-negse be dogdapmalale, agi bina be soggweloed: ‘We-neggi bemar gwage-bogidikidgi gudigusunye.’
LUK 10:6 ”Ar a-neggine dule-gwage-bogidikidgi-nanaed maile, be-ega-sogsadyob a-dulegi gwage-bogidikidi beoed. Ar degisulirdi, ega-be-sogsadyob gwen guosulid.
LUK 10:7 Bemar unnila neg-gwagwenginbi be gabmaloed. Degine, ibu bemarga gunnega, gobega ukarmardibe, be gunno, be gobo. Ar ade, dule-arbaedi bennuklegergebed. Mer neg-baid-baidgi gabdii gumalo.
LUK 10:8 ”Ar biti-neggweburse be dogdapmardibe, agine, be-abingasmalale, ibi-masgunned bega ukarmalale, be gunnoed.
LUK 10:9 A-neggweburgi dule-gegumaladi be nudakoed, degine, dulemarga be sogoed: ‘Bab-Dummad-e-negdakmaid bemarse warmaksasunye.’
LUK 10:10 ”Ar biti-neggweburse be dogdapmardibe, agine be-abingassurmalale, be e-galimbaba noalidgi, be sogmaloed:
LUK 10:11 ‘Be-neggwebur-olli-anmar-sapatgi-nagusadse-bakar, anmar elimarsun. We oyoged, bemarginye, bemar yapa Bab-Dummad-igar-abingamaladye. Degi-inigwele, be wisgumalo, Bab-Dummad-e-negdakmaid bemarse warmaksad.’
LUK 10:12 ”Ani, Jesús, an bemarga soged, Bab-Dummad-igar-nabogoed-ibagangi, neggwebur-be-abingaosulid, Sodoma-neggweburba bur bule sabsur-odurdaklegoed.”
LUK 10:13 Jesús sogdebar: “¡Corazín-dorgan be duledar-wilesmar! ¡Betsaida-dorgan be duledar-wilesmar! Ar bemar sabsur-odurdaklenonikoed. Ar Tiro-neggweburgi, degi, Sidón-neggweburgi we-ibmar-dakledisurmalad imaklesana, a-neggweburmar bato dikasurgus sagumor-ai-aid yosmalanad, degine, burugi obsamarbalinad, adi, oyogegar, emarde, na e-isguedga bukib ulubgi nue-itosmarye.
LUK 10:14 Degisoggu, an bemarga sogsun, Bab-Dummad-igar-nabogoed-ibagangi, bemar bur bule Tiro-dorganba, degi, Sidón-dorganba sabsur-odurdaklemaloed.
LUK 10:15 ”Emide, bemar Capernaúm-dorgan, ¿nibneggi, nued abingalegoye be binsamala? Suli. Aka be nega-uluba odurdakleged-negse be balimelledmaloed.”
LUK 10:16 Jesús, dulapaa-gakambe-barminaidga (70) sogdebar: “Ar dulemar be-itomalale, an-ega-ibmar-soged-itonaiyob gumalodo. Ar dulemar be-abingasurmalale, an-abingasurmalayob gumalodo. Ar dulemar an-abingasulile, dule-an-barmialid-abingasurmardo.”
LUK 10:17 Jesús e-dulapaa-gakambe-barmisadi (70), gannar nonimargu, ise-weligwar-ito nonimalad, Jesúsʼga sognonimalad: —Dummad, niamarse-bakar, be-nuggine anmar-sogedba ibmar imaksamalad.
LUK 10:18 Jesús amarga sogded: “Mer be na san-dummarba itomalo. Nia-saila-Satanás, mar-gaedyob nibneggi argwannali an daksad.”
LUK 10:19 Jesús e-sapinganga sogdebar: “Emide, bemarga gangued an uked, naibemar-birgi, degine, diormar-birgi annaegar. Degine, bela be-isdarad-Satanás-ganguedgi-nakwega bemarga gangued an uked. Amar gwen be-oakalogosurmalad.
LUK 10:20 Degi-inigwele, niaburbamar bemar-sogedba ibmar-imakedgi mer be weligwar itomar. Bur be bemar-nug-nibneggi-narmakar-naid-ular be wergumar.”
LUK 10:21 Geb agi Jesús, Bab-Dummad-Burba-Isligwaledba nue-weligwar ito naded, sogded: “Baba, an be-nug odummosun. Bedi, nibneg-e-dummadid, napneg-e-dummadid, degine, bedi, dulemar-ibmar-wismalad-idu, dulemar-ibmar-magar-itomalad-idu, we-ibmarmar odukusad, aku-ito be imaksad. Dulemar-baisursunnagwadga bur be osanalosad, adi, amar magar itomalagar. Eye, Baba, ar ade, deyob be abesad.”
LUK 10:22 Jesús sogdebar: “Bela-ibmarmar an-Bab anga uksad. Dulemar wargwensaar Bab-Dummad-Machi-mag-daked satemalad, unnila Bab-Dummadbi mag daked, degi, Bab-Dummad-akudakmarbalid. Unnila E-Machibi mag Bab-daked, ar doaga E-Machi na e-Bab-osanalobie, agarbi na osanaloged.”
LUK 10:23 Jesús na e-sapinganse aibilidgu, amargarbi sogded: “Dulemar bemar-ibmar-dakedyob-dakmarmogadgi egi ise-nued binsalesad.
LUK 10:24 Ar ani an bemarga sogmalad, bukidar Bab-Dummad-gayaburba-barsogmalad, degi, reymar, emi-bemar-ibmar-daked, dakbigusmalanad, amar gwen daksasurmalad, degi, amar emi-bemar-ibmar-itoged, itobigusmalanad, amar gwen itossurmalad.”
LUK 10:25 Agine, Moisés-Igar-Mamaid-oduloged-wargwen, gwisgualid, Jesús-yardakega yamo sogded: —Odurdaked-saila, ¿burba-geg-bergued an nikuegala, ibu an imakergebe?
LUK 10:26 Jesús, abin-sogded: —¿Bab-Dummad-Igar-Maidgi igi narmakar maisunna? ¿Igi be absodisunna?
LUK 10:27 A-dule, abin-imakdegu, sogded: —‘Bab-Dummad-be-Dummadbi, bela-belad be-gwagegi be sabguoed, bela-belad be-san-burbagi, bela-belad be-ganguedgi, bela-belad be-binsaedgi be sabguoed.’ Deuteronomio 6:5 ” ‘Ar igi na be san-sabgue, deyobi dule-baid be sabgumogoed.’ ”
LUK 10:28 Jesús aga sogded: —Nued be an-abin-imaksad. Ar be sogsadyob be imakdo, geb agi be degisadegu dula gudiguoed.
LUK 10:29 Ar Moisés-Igar-Maid-oduloged-nue-wisid na dukin dule-nuedga-imakbisoggu, Jesúsʼga sogded: —¿Degite, doa-dule-baid an sabguergebsunna?
LUK 10:30 Jesús, abin-imakdegu, sogded: “Ibagwengi, dule-wargwen Jericó-neggweburse, Jerusalén-neggweburgi aidedani gusad. Igarba danigu, atursamalad-argangi gusad. Atursamalad sarsosmargu, bela ei ibmar susmalad, burgwedani mete nadmalad.
LUK 10:31 ”Dakargu, Judío-wargwen, dule-irwa-Bab-Dummadse-goled, a-igarba aidedani gusad. Dule-naibigus-mellemaid-daksagu, egi bakar nasad.
LUK 10:32 ”Amba deyob Judío-baid, dule-irwa-Bab-Dummadse-goled-e-bendaked-Levita-dule, dule-naibigus-maid-walikgusgu, daksamogu, egi bakar nasa gusmogad.
LUK 10:33 ”Ar dule-wargwen, Samariaʼgined, igarba nadapmogu, dule-naibigus-maid-daknonimogad. Ar we-dule, Judíoʼsur-inigwele, dule-naibigus-maid-dakdegu, nue-wile dakded.
LUK 10:34 Samariaʼgined dule-naibigus-maidse-warmakdapgu, e-nailikgusmaladgi ega ina imaksad, ibmar-gwallu, degi, vino, egi eosad. Geb degi, ega nue-morgogi edichabalid. Geb moli-uayasuid-birgi-onakwisa meged-negse senonikid. Agi nue-akwisad.
LUK 10:35 ”A-banedgine, Samariaʼgined nasokargu, mani-gwabo onosad. Neg-dakedga mani uksad, geb ega sogded: ‘Nue we-dule be anga ako. Degine, igi-mani-napi egi be misale, gannar an aibilisar, an be-bennuknonikoed.’ ”
LUK 10:36 Moisés-Igar-Maid-oduloged-nue-wisidga Jesús sogded: —Be itogua, we-dulemar-e-warbaagwad ¿doa bur dule-nailikgusad sabedgi bendas be itosunna?
LUK 10:37 Moisés-Igar-Maid-oduloged-nue-wisid Jesúsʼga sogded: —Ar dule bur-nue dule-nailikgusad-wile-daksad, a-dule, bur dule-baid nue-sabgusdo. Geb degi, Jesús ega sogded: —Igi-Samariaʼgined dule-baid-bendaksad, deyob be imaknamosundo.
LUK 10:38 Jesús na e-sapinganmala igarba nadapgu, neggwebur-gwensakse dogdapid. A-neggweburgi ome-wargwen, Martaʼye-nugadi, e-neggi Jesús-abindaksad.
LUK 10:39 We-omede urba-nikad, Maríaʼye-nugad. María, Jesús-walik sigisad, Jesús-ibmar-odurdaked itosii gusad.
LUK 10:40 Ar Martaʼdi ibmar-saedginbi binsanaisoggu, obir-obir gunaid. Marta, Jesúsʼga sogded: —Dummad, an-urba wargwen arbaega-an-imaknaid ¿be baisur dake? Ega be soge, wis an-bendakye.
LUK 10:41 Jesús, abin-imakdegu, ega sogded: —Marta, Marta, ibmar-imakedba be surbinsa itonaid, obir-obir be itonaid.
LUK 10:42 Ar unnila ibmar-soggwenbi bur-nuedid. Ar Maríaʼdi ibmar-soggwen-bur-nued susad, an-sunmaked-itoged. A-ibmar Maríaʼgi gwen egwallegosulid.
LUK 11:1 Ibagwengi Jesús neg-soggwengi Bab-Dummadse-gorsiid-bergusgu, e-sapin-wargwen ega sokalid: —Dummad, Bab-Dummadse-goledgi be anmar-odurdake. Igi Diigi-dule-oged-Juan e-sapingan-odurdaksamoga.
LUK 11:2 Jesús, ega sogded: —Be Bab-Dummadse gollarmalar, weyob be sogmaloed: ‘Anmar-Bab, bedi nibneggi-maid, be-nug islidik obariledii gusun. Be-neg-dakmaid anmarse be sedage. Igi nibneggi be-sogedba ibmar-imaklege, deyob we-napneggi be anmarga imakdamo.
LUK 11:3 Bane-bane anmarga mas ukmai be sae.
LUK 11:4 Anmar-begi-isgusadi anmarga be osulo, igi dulemar anmargi nosale, anmargi-nossulidyob anmar dakdae, deyob be anmar-dakmoga. Melle isguedse-wilubdaklegega be anmar-imak, bur isguedgi-obinega be anmar-sae.’
LUK 11:5 Jesús e-sapinganga sogsabalid: “Binsa-sogmalo, bemar-wargwen ai-gwensak be nikasunnad, degi, nega-gabigwengi ese be nadsunnad, ega be weyob sogdapsunnad: ‘An-ai, madu-walapaa be anga wis udagwer.
LUK 11:6 Ar an-ai-gwensak dikasur-danikid, anse ataknonikid. Emide, ibmar-an-ega-uked, sated.’
LUK 11:7 ”Dule negyaba-maid be abin-imakarsunnad: ‘Mer be anse gole, an-yawagak bato atiar-sii, bato anmar gabmamai, an-mimmigan bato anbo gabmamaimogad. An bega madu-ukega geg bar an gwisgued.’
LUK 11:8 ”Ani Jesús, an bemarga soged: Ar be-ai-inigwele, bega gwisgusulile, ar egi be alamaknaidba bega gwisgualiled, adi, be-ibmar-abeged bela bega ukegar.
LUK 11:9 ”Degisoggu, an bemarga sogdo: Bab-Dummadse be ibmar egismar, ar Bab-Dummad bega ukoed. Bab-Dummadgi be ibmar amimar, be amimaloed. Bab-Dummadse gatik be gormar, bega Bab-Dummad yawagak egaoed.
LUK 11:10 ”Ar bela dulemar-ibmar-egismaladi, ibmar abingamalad. Bab-Dummadgi-ibmar-amimaladi, ibmar amimalad. Degi, Bab-Dummadse gatik golele, ega yawagak egaleged.
LUK 11:11 ”Bemar abala babgan-gumaladi, be-mimmi bese madu egichialile, ¿ega be akwa ukoe? Bese ua egichialile, ¿ega be naibe ukoe?
LUK 11:12 Bese gannir-akwa egichialile, ¿ega be dior ukoe? Suli. Ar e-ibmar-abeged ega be uksaled.
LUK 11:13 Ar bemarde, dule-isganamar-inigwele, be-mimmiganga ibmar-nuegan-uked be wismalad. Ar be-Bab-Nibneggi-Maid-bursunna, dulemar-ese-egismaladga E-Burba-Isligwaled ukodo.”
LUK 11:14 Ibagwengi Jesús dule-geg-sunmakedgi nia-ononaigusad. Nia dulegi nodgu, dule nabir-sunmak naded. Dulemar, degigusad geger dakdemalad.
LUK 11:15 Gwenna-gwenna sogdemalad: “Wedi nia-saila-Beelzebú-sogedba niamar-onodiid.”
LUK 11:16 Baigandi, yamo Jesús-wilubdakega ega sokarmalad, ega Bab-Dummad-ganguedba ibmar-wilubgan-dakledisulid imakye. Adi, nue wisgumalagar, Bab-Dummad-nuggi nue-ibmar imakdiiye.
LUK 11:17 Ar Jesúsʼdi, emar-binsanaid mag daksoggu, amarga sogded: “Rey-gwensak-negsemaid-e-sordagan na dukin-dukin egi aibinnarmalale, we-yar bergudeled. Aginbali, dulemar-na-e-neg-yaginmalad na dukin-dukin egi aibinnarmalale, we-neg bergudeled.
LUK 11:18 Ar ambamodo, nia-saila-Satanás na dukin egi aibinnalir, ¿sunna na e-negdakmaid bergussulir be insae? Bergudele. Emide, bemar sogmalad, Beelzebú-nuggi an niamar-onodiiye.
LUK 11:19 ”Ar ani, nia-saila-Beelzebú-nuggi an niamar-onodiile, ¿be-sapingandi doa-nuggi niamar-onodisunna? A-ulale, be-sapingan bemargi gwisgumaloed.
LUK 11:20 ”Ar an Bab-Dummad-sogedba niamar-onodiile, we bemarga oyonaido, Bab-Dummad-e-negdakmaid bemarse warmaknoniye.”
LUK 11:21 Jesús sogdebar: “Ar dule-wargwen-dutusulid, guagwar na es-suid-gani e-neg akwediile, na bela e-ibmar-neggi-nikad dule geg ei atursaed.
LUK 11:22 Ar dule-baid eba-bur-dutusulid nonikirdi, egi nakwenonikile, bela gingimar-e-bendakoye-binsaedi ei susaled. Geb bela e-aimarga mimisaled. Ani Jesús, an deyobmodo, ar an-bur-dutusulid. Nia-sailagi an obinsoggu, sunna niamar an onosundo.
LUK 11:23 ”Ar dule anba dasulile, angi gwisgudido. Ar dule anga dulemar-danar-urbedisulile, bur we-dule, dulemar-ichodido, adi, mer anba nagumalagar.”
LUK 11:24 Jesús sogdebar: “Ar niaburba dulegi nodele, neg-dinnaganaba obunnoged-neg amididaed. Ar neg-obunnoged amisulile, sokardaed: ‘An-neg an mete-alidse gannar an dognaoye.’
LUK 11:25 ”Ar e-negse na modapogu, dakdapoed, nue neg durwiar sii, degi, nue neg nudakar sibali.
LUK 11:26 Geb degi, niaburba, deyob daksale, gannar naodo, e-sordamar-walagugle (7) eba-bur bulegandamalad sedagegar. Niaburbamar a-negse dognonimalogu, na e-negga imakdemaloed. Ar dule epenne-e-daedba aka bur bule isgudsunnodo.”
LUK 11:27 Ar Jesús deyob sunmaksigu, dulemar-bukidar-bukmalad-abargi ome-wargwen binnasur-gote, Jesúsʼga sogded: —Ome-we-napnegse-be-senonikid, degine, e-nuugi-be-onusad, a-omegi bur-nued binsalesad.
LUK 11:28 Jesús, abin-sogded: —Dulemar Bab-Dummad-gayaburba-itomaladgi, degi, a-sogedba nanadimaladgi Bab-Dummad bur-nued binsasad.
LUK 11:29 Dulemar-bukidar ese duurmaknonimargu, Jesús sogded: “Emi-ibagi we-dule-isganamar, unnila ibmar-wilubgan-dakledisurmalad-oyolegedbi amidimalad. Ar a-e-wilubgan ega oyolegosulid, ega bur Jonás-gusadyob oyolegoed.
LUK 11:30 ”Ar igi Jonás Nínive-dorgan-e-wilubganga-gusa, deyob, ani Dule-Machi, dulemar-emi-dula-gudidimaladga oyolemogoed.
LUK 11:31 ”Dad-nakwed-argan-nuedsik Rey-bundor-negdakmaidi, Bab-Dummad-igar-nabogoed-ibagangi, bemar-emi-dula-gudidimalad-abargi gwisgudagogu, sabsur-bemar-odurdakye sogdagoed. Ar ade, we-omegwa bela-bela dikasur dani gusad, dad-Salomón dule-binsaed-ibed-nikad itogegar. Ar emigindi, Salomónʼba bur bule dule-binsaed-nikad wegi bemar-abargi gudiid. Ar degite, bemardi, an-itobisurmalad.
LUK 11:32 ”Machergan-Níniveʼginmalad, Bab-Dummad-igar-nabogoed-ibagangi, we-dulemar bemar-emi-dula-gudidimalad-abargi gwisgudagogu, sabsur-bemar-odurdakye sogdagoed. Ar ade, Jonás, Bab-Dummad-igargi sunmaksagu, Nínive-dorgan na e-isguedga bukib binsas gusmalad, na e-daed gwagsamalad. Ar emigindi, Jonásʼba bur bule dule-dummad wegi bemar-abargi gudiid. Ar degite, bemardi, be-isguedga na be bukib binsasurmalad, be-daed na be ogwasurmalad.”
LUK 11:33 Jesús sogdebar: “Ar dule gwallu ogasale, odukuega ogasulid. Ulu-urba-sigega ogasurbalid, e-sied-birgi-siega ogaed. Adi, dulemar-ubomaid mag neg dakegar.
LUK 11:34 ”Gwallu-anmar-san-mee-saedi, we, anmar-ibyado. Ar be-ibya nuedile, bela be-san ibegwar naido. Ar be-ibya isganale, bela be-san negsichidgi gudimodo.
LUK 11:35 ”Degisoggu, nue be salakarmar. We-neg-meegwad-begi-naidi, melle negsichidga-gued be imakmar.
LUK 11:36 Ar degisoggu, bela be-san ibegwalele, negsichid egi naisulile, bela ibegwar guodo. Ar igi gwallu bela ibegwar neg-imake, deyobmodo.”
LUK 11:37 Jesús sunmaked-bergusgu, Fariseo-wargwen ese nonikid, e-negse mas gunnaega egi wilenonikid. Jesús a-Fariseo-negse dogdapgu, mas-gunnega mese-naba signonikid.
LUK 11:38 Fariseo, Jesús-daksagu, masgunned-idu gwen argan enuksasuli, geger dakded.
LUK 11:39 Ar Jesúsʼdi ega sogded: “Nabir, emi bemardi, Fariseoʼmar, asginbi be dule-nuedga-imakmaladid. Bemar unnila asginbi nog-enuklegedyobid, degi, asginbi bate-enuklegedyobid. Ar be-ulubgindi, ibmar-atursamalad-dule gumalad, degi, galagwensulidamalad-dule gumalad.
LUK 11:40 ”¡Bemar nue-akusunna-itomalad! Ar Bab-Dummad ibmar-asgined imaksadde, ¿ar a amba ibmar-ulubgined imaksabarsursi?
LUK 11:41 Degisoggu, be-ibmar-nikad, wileganaga be ukmar, geb degi, bela bega ibmar swilidik guoed.
LUK 11:42 ”Ar bemar-Fariseoʼmar, ¡be duledar-wilesmar! Ar unnila bemar Bab-Dummadga we-ibmarmar ukdimalad: Mentaʼye-nugad, rudaʼye-nugad, degi, gagan-nuegan-nabir-gullemalad. We-ibmarmar ambegi-gwensak (10%) unnila Bab-Dummadga be ukdimalad. ”Ar bur dulega-igar-nudaked be imaksurmalad, degi, Bab-Dummad-sabgued gwen be imakdisurmarbalid. Ar bemar we-ibmar-sogbogwad-imaked bur nabirid, degine, amba nabir Bab-Dummadga-ibmar-baisursunnamalad-ukleged be imakbalid.
LUK 11:43 ”Ar bemar-Fariseoʼmar, ¡be duledar-wilesmar! Ar bemar Judíoʼmar-onmakedneggi dummagan-gan-sigedginbi sigbidamalad, degi, ibmar-ukleged-neggi dulemar bela bese goledbimalar, bemar yeer-itodamalad.
LUK 11:44 ”Ar bemar-Garda-Narmaked-Dulemar, degi, Fariseoʼmar, ¡be duledar-wilesmar! ¡Be yogasaar-darba-sunmakmaladid! Be neg-uan-akudaklemamaidyobmalad. A-neg-uan-birgi dulemar nanadimalad wissurmalad.”
LUK 11:45 Moisés-Igar-Maid-oduloged-wargwen, Jesúsʼga sogded: —Odurdaked-saila, weyob be ibmar sogele, anmargi nue be gwisgumogad.
LUK 11:46 Jesús, abin-sogded: —Ar bemar Moisés-Igar-Maid-odulomarmogadi, ¡be duledar-wilesmarmo! Ar bemar dulemarga beedse-dutusur igar mesmalad. Ar degite, bemar-igar-mesisadba dulemar-nanaegala, gwen be bendaksurmalad.
LUK 11:47 ”¡Ar bemar duledar-wilesmar! Ar be-dadgan Bab-Dummad-gayaburba-barsogmalad-oburgwismalad-e-neg-uan be sobdimalad.
LUK 11:48 Degisoggu, bemar-sunnad nue wismarmodo, degine, be-dadgan-ibmar-imaksad, Bab-Dummad-gayaburba-barsogmalad-oburgwismalad, be nabir-dakmalad-dulemalad. Ar e-neg-uan ega be sobdimalad.
LUK 11:49 ”A-ulale, Bab-Dummad bela-bela binsaed-nued-nikadba sogsabalid: ‘An amarga anga-gayaburba-barsogmalad, degine, an-sapingan-bur-dummagan, an barmidoed. An-dule-barmismalad gwen-gwen oburgwemaloed, degine, abar dulemarse-balegilledii gumaloed.’
LUK 11:50 ”Deyob bemar imakoed, adi, bela, gebesaila napneg-naguded-akar be-dadgan Bab-Dummad-gayaburba-barsogmalad-oburgwisgusmalad, bemargi ataklemaloed.
LUK 11:51 Abel-oburgwilesad-akar, Zacarías-oburgwilesadse, emi bemar-dula-gudidimaladgi dulemar-oburgwilesmalad begi ataklemaloed. Deun, be-dadgan Bab-Dummadga-ibmar-ogumakar-ukleged-aila-siid, degi, Bab-Dummadse-goled-neg-sunnad-siid-abargi Zacarías-oburgwisgusmalad.
LUK 11:52 ”Ar bemar, Moisés-Igar-Maid-odulomaladi, ¡be duledar-wilesmar! Ar bemar Bab-Dummad-igar-wisgulegoed-yabe be susmalad, degi-inigwele, bemar Bab-Dummad-e-negdakmaid-e-dulamarga gwen-gussurmalad, degine, dulemar-Bab-Dummad-negdakmaidse-dogbimaladga igar-dutusur bemar mesdimalad.”
LUK 11:53 Ar weyob Jesús sogsagua, Garda-Narmaked-Dulemar, degi, Fariseoʼmar nue-sae-itodmaladbali, Jesús-gatik-sunmakega imakdemalad.
LUK 11:54 Dakega, abakalegi Jesús ibmar-wis-akar sokalile, adi, Jesús-ibmar-sogedgi egi sorba gwisgumalagar.
LUK 12:1 Degidgine dule-bukidar mili-miliba Jesúsʼse nonimalad, barmesnanai guarmalad, degidgine, Jesús e-sapinganga-inse sokalid: “Fariseoʼmar-madubur-inagi, nue salakarmar, ar amar yogasaar-darba-sunmakdamalad.
LUK 12:2 ”Ar bipisaale ibmar-dukuar-imaklegedi magadse buud noosurdeeye gwen soglesulid, degi, ar emi amba ibmar-dukualed, wisgulegosurdeeye gwen soglesulid, wisgulegedsedaed.
LUK 12:3 Ar degisoggu, bela negsichidgi be-ibmar-sogsad, gwallu-meegwadse onolegoed. Ar na be-binnaa uayagi negyaba ise yawagak-edualedgi be sogsan-inigwele, be-ibmar-sogsad neg-uas-birgi binnasur soglegoed.”
LUK 12:4 Jesús sogdebar: “An-aimar, an bega sogmar: Dulemar-be-oburgwebimalad mer be dobgumar. Ar a-sorbardina, geg bar be oakalomalad.
LUK 12:5 An be-odurdakmaloed, doa bur bemar dobguewilubmala. Bur Bab-Dummad be dobgumar, ar adi, be-oburgwisale, a-sorba sunna soo-saila-geg-berguedse be-metebalid. Eye, nabir an bega sogmar, bur Bab-Dummad be dobgumar.
LUK 12:6 ”¿Ar ade sikwi-gwaatar esnon-gwabogi uklesursi? Ar degite, Bab-Dummad sikwi-gwagwensaale iemaisulid.
LUK 12:7 Ar Bab-Dummad bemar-sailagiase-bakar, bela-ebisar sediid. Degisoggu, mer be dobgumar, ar bemar bur bule sikwimarba ibmar-nueganad.”
LUK 12:8 Jesús sogdebar: “An bega sogmar, ar doa-dule dulemar-asabin na sogdibe, an Cristoʼba naiye, ani Dule-Machi, Bab-Dummad-baliwiturmar-asabin, an sogmogodo, we an-sordaye.
LUK 12:9 Ar doa-dule dulemar-asabin an-osulosardi, Bab-Dummad-baliwiturmar-asabin an osulomogodo.
LUK 12:10 ”Ar bela dulemar Dule-Machigi isgana-sunmaksadibe, Bab-Dummad sunna amarga isgued elioed. Ar dule Bab-Dummad-Burba-Isligwaledgi galagwensuli egi dodoar sunmaksardi, adi, e-isgusad Bab-Dummad ega gwen eliosulid.
LUK 12:11 ”Dulemar Judíoʼmar-onmakednegse be-senonimalar, igi dulemar-igar-nabiromaladsedibe, degi, dummagan-baigansedibe bega igar-itomalaga, mer be bukib binsamalo, ibi an sogodibeye, degi, igi an sunmakodibeye.
LUK 12:12 Ar be sunmak-sokalile, Bab-Dummad-Burba-Isligwaled bemarga sogoed, igi be sogoe.”
LUK 12:13 Dulemar-bukidar-bukwad-abargi dule-wargwen Jesúsʼga sokar: —Odurdaked-saila, an-iaga be soge, an-bab burgwisgu, anmarga-ibmar-obesad, anga udamoye.
LUK 12:14 Jesúsʼdi, abin-sogded: —Dule, ¿doa igar-naboged-dummadga an-nug-imaksa? Bemarga ibmar-mamarega, ¿doa ibmar-mimied-dummadga an-nug-imaksa?
LUK 12:15 Degi, Jesús dulega sogdebar: —Nue salakar, ibmar-we-napnegginedbina-yaisur-itogeddaedgi nue salakarmar, ar ibmar-ichesur-nikadgi dule san-dula-gudiguosulid.
LUK 12:16 Geb degi, Jesús emarga burbar sunmakde, sogded: “Dule-mani-ibed ibmar-yaisur-nikad, e-nainugi ibmar-digsagu, ega nue-sanmaksado.
LUK 12:17 Na wargwen dukin ulubgi binsadii, sogded: ‘¿Igi an saoe, ar bia an ibmar-gwag an sabogoe?’
LUK 12:18 ”Na sogdesun: ‘Weyob an saoed, ibmar-gwag-saboged-neg an earoed, bur-dummad an soboed, agi an bela ibmar-gwag, degi, an-ibmarmar an sabogoed.
LUK 12:19 Geb degi, an na ga dukin sogoed: Na ibmar-bukidar bega birga-ichesulidba an sabos, degisoggu, be obunno, be gobe, be mas gunne, be wergusun.’
LUK 12:20 ”Ar Bab-Dummaddi a-dulega sogdedo: ‘Be dule-aku-ibmar-itoged-dule, emi-mutikidba be-san-burba an sudanikir, be ibmar-urbisad, ¿degite, doagadga guosunna?’
LUK 12:21 Ar dule deyob gunonidado, unnila na dukin egadga ibmar urbed, ar Bab-Dummadgindi gwen binsasulir.”
LUK 12:22 Geb degi, Jesús na e-sapinganga sogded: “Degisoggu an bemarga sogmar, mer surbinsa be san-dula-gudiidgi be itomar, ibu an gunnodibeye, degine, be-sangi mer be binsabar, ibu an yoodibeye.
LUK 12:23 Ar be-san-burba mas-gunnedba bur sunsogedid, degi, be-mor-yoedba bur nuedid.
LUK 12:24 ”Emi be dakmalana, sikwisichidmar, gwen ibmar-gwag digdisurmalad, degi, ibmar-gwag gwen sabogega wedisurmarbalid, deginbali, ibmar-urbed-neg satemarbalid, degi, ibmar-gwag-urbed-neg amba satebalid. Degite, Bab-Dummad ega mas ukmaid. Ar bemarde sikwimarba bur bule ibnuedid. Degisoggu, Bab-Dummad bemarga masgunned ukmogodo.
LUK 12:25 ”¿Ar doa-dule na gatik egi binsaedbali sunna na e-san bisgigwen osugusar be insae? Suli, geg osugue.
LUK 12:26 Degisoggu, melle be ibmar-baiganbina surbinsa itomala.
LUK 12:27 ”Be dakmalana, sapur-dutumar ibibayobi dunguddae, gwen arbasurmalad, gwen na e-mor sobsurmarbalid. Ar an bemarga sogmardo, degite, Salomón, bela mor-yeerdaklemalad-yosan-inigwele, ar dutumaryob gwen mor yossurgusad, dutumar bur Salomón-morba yeerdakleged.
LUK 12:28 Ar gagan-sapurbarmalad emi dulad, banedgi bato a-gaganmarde soo-yagi ogumaklesiid. Degite, Bab-Dummad yeerdakle ega mor yoed. Ar bemar amba Bab-Dummadgi-benmar-inigwele, degite, Bab-Dummad bemarga mor uked.
LUK 12:29 ”Degisoggu, mer be bukib binsamar, ibu an gunnodibeye, ibu an gobodibeye. Melle surbinsa be itomar.
LUK 12:30 ”Ar dulemar-we-napneggi-Bab-Dummad-wissurmaladi, we-ibmarmar amidimalad. Ar be-Bab be-wisid, be we-ibmarmar abemala.
LUK 12:31 ”Bab-Dummad-e-negdakmaid-inse bur be amimar, geb bela bega we-ibmarmar uklemai guoed.”
LUK 12:32 Jesús sogdebar: “Mer be dobgumar, ar bemar an-sibad-wawaad-ichegwadyobid. Ar be-Bab nabir na e-binsaedbali bemarga na e-negdakmaid ukoed.
LUK 12:33 ”Ibmar-nikamalad na be ukmarsun, degine, wileganaga mani be ukmar. Mani-sagu-geg-nungued be sobmar, ibmar-nuegan geg-nibneggi-berguedgi be urbemar. Nibneggi atursamalad sated, degine, geg ibmarmar udumesed.
LUK 12:34 ”Ar be-ibmar-nuegan nibneggi sabolesiile, nibnegginbi be binsadii gudoed. Be-ibmar-nuegan napneggi-sabolesiirdi, napnegginbi be binsadii gudoed.”
LUK 12:35 Jesús sogdebar: “Bemar guagwar gudii samar, igi-dule-arbamalad guagwar molidub-nai e-sasirba gudidamala, degine, be gwallu guagwar ogaar simar, we-a sogledo, be guakwaa gudigumarye.
LUK 12:36 Igi dulemar, na e-dummad-ome-nikued-ibase-nader, guagwar edarbedii damala, adi, e-dummad gannar danikile, ese gornonikile, yawagak ega yog egaar imakmalagar.
LUK 12:37 ”E-dummad nonikile, e-idu e-maimar guagwar sii daknonikile, we-maimargi nued-binsaodo. Ar napira an bemarga soged, e-dummad na dukin molidub e-sasirba edinnoed, agine, mese-nagaba e-maimar-osioed, na e ega mas-daknai guoed.
LUK 12:38 ”Ar e-dummad neg-gabgwengi nonikodibe, bolegwadbardibe, daknonikir nue-nakulebukwa, we-maimargi nued binsalegodo.”
LUK 12:39 Jesús sogdebar: “We-igar nue be itomalo, ar dule-neg-ibed wisile, igi-wachigi atursaed danikoe, idu guagwar sigisaled, ei-ibmar atursaega imaksasuliled.
LUK 12:40 Degisoggu, bemar guagwar gudii samar. Ani-Dule-machi, ukiagwale, bemar an-abindakdisulidgi an nonikoed.”
LUK 12:41 Geb degi, Pedro, Jesúsʼga sogded: —Dummad, ¿we-burbar-anmarga-be-ibmar-sogsad, anmargarbi be sognai? ¿Dule-baiganga be sognaimoga?
LUK 12:42 Degi, Dummad-Jesús abin-sogded: “¿Ar doa degite mai-nued, nue binsaed nikaa, geg galakuedga guosunna? Mai-deyobidi, na e-dummad na e-neg-dakega nugsaodo, adi, wachi-sekalaa mai-baiganga masgunned dakegar.
LUK 12:43 E-dummad gannar nonikile, daknonikile, nue deyob arbanai, we-maigi nued binsaodo.”
LUK 12:44 Geb degi, Jesús sogded: “Napira an bemarga soged, mai-e-dummad bela na e-ibmar-nikadi we-maiga ukoed, bela ega ibmar dakegar.”
LUK 12:45 Jesús sogdebar: “Ar we-mai, na e-gwagegi sokardibe: ‘An-dummad amba yoggumaiye.’ Geb agi, mai-machergan, degi, mai-omegan-sarsoalid, degi, yaisur mas-guted, yaisur-gobded, degi, mumguded,
LUK 12:46 geb a-ibagi a-wachigi e-dummad-danikoed-edarbesisulidgi e-dummad nonikoed. Geb deyob-gudidaknonikile, e-dummad sabsur-odurdaknonikodo. Igi dulemar-Bab-Dummad-wissurmalad sabsur-odurdaklege deyob odurdaklemogodo.
LUK 12:47 ”Ar we-mai, igi-e-dummad-ibmar-abedaed wisinad, degi-inigwele, guagwar gudigussulid, degine, e-dummad-sogedba ibmar imaksasulid. Degisoggu, sabsur odurdaklesunnodo, ichesur bibyolesunnodo.
LUK 12:48 Ar dule-wargwendi ibmar-odurdakleged-imaksan-inigwele, wissulidba deyob imaksasoggu, unnila ichee wis bibyolegodo. Ar ade, dule-wargwenga ibmar-ichesur imakega ega uklesale, ase ibmar-ichesur egislemogoed. Ar ichesur ega ibmar-akwed ega uklesale, ase bur bule ese egislemogoed.”
LUK 12:49 Jesús sogdebar: “We-napnegse soo-ogaega an nonikid. ¡Bato we-soo gamaina yeerban!
LUK 12:50 Nue an dummad-wilegergebed. An nue-wile-itogoedsega an nue-wile itodii guoed.
LUK 12:51 ”Ar we-napnegse an nonikidi, ¿napneg bogidik-saega an noni be insae? Suli. Aga an nonisuli. An nonikidi, dulemar na muchub-muchub urwed onogegar.
LUK 12:52 ”Ar emi-onodoedgi, gwenadgan-ataledi, e-warbaagwadi, e-gwenadgan-warbogwadse urwenanai gumaloed. Gwenadgan-warbogwadi, e-gwenadgan-warbaagwadse urwenanai gumarmogoed.
LUK 12:53 Bab, na machigi yolenai guoed, machi, na babgi gwisgunai gumogoed. Nana, na sisgwagi yolenai guoed, sisgwa, na nangi gwisgunai gumogoed. Sak-ome, na balagi yolenai guoed, degi, bala, na sak-omegi gwisgunai gumogoed.”
LUK 12:54 Jesús dulemar-bukidaradga sogdebar: “Ar bemar dad-argwanedsik mogir-ainaksii be dakmalale, bemar sogmalad: ‘Dii-wied daniye.’ Ar deyob gunonidaed.
LUK 12:55 Ar dad-nakwed-argan-nuedsik burwa gormairdi, bemar sogmalad: ‘Neg-ued daniye.’ Ar deyob gunonidaed.
LUK 12:56 ”¡Bemar yogasaar-darba-sunmakmalad! Ar bemar napneg, degi, nibneg-igargan-gumaloed mag dakmaladde, degite, ¿ibiga we-ibagangi-ibmar-gunaiddi aku be dakmarsunna? Bemar mag dakewilubmardo.”
LUK 12:57 Jesús sogdebar: “¿Ar ibiga bemar-sunnad geg be dakmala, wede bule igar-napiragwaddibe?
LUK 12:58 Ar be, dule-isdar-be-dakdiid-ebo dule-igar-nabogedse nadapile, igarbali, bebo-igar-nabogega be imake, adi, melle dule-igar-nabogedse be-sedegar, degi, adi, melle suar-ibedga be ukegar, degi, suar-ibed melle esgaryagi be-metegar.
LUK 12:59 Napira an bega soged, be esgaryagi-mellesiile, be nosurguodo. Bela begi-mani-galesad be bennukedse, geb be noed.”
LUK 13:1 Deun a-ibagangi dulemar Jesúsʼga sognonimalad, igi Pilato Galilea-dorgan-oburgwismala, degi, igi a-abe ibmar-durgan-Bab-Dummadga-ogumakar-ukleged-abe-ebo oburus gusmala.
LUK 13:2 Jesús amar-abin-imakdegu, sogded: “Bemar insagua, wemar-Galilea-dor weyob burgwismarsoggu, Galilea-dorgan-baiganba, ¿bur bule isganamar be insae?
LUK 13:3 An bega sogmar, suli, degisuli. Ar bemar na be-isguedga be bukib binsasurmalale, be-daed be gwagsurmalale, bemar burgwemarmogodo.
LUK 13:4 ”Siloéʼgi e-ambe-gakabaabakgi (18) neg malusad, deun amar burgwis gusmalad, ¿be insagua, amar Jerusalénʼgi-bukmaladba bur bule dule-isganamar be insae?
LUK 13:5 Suli, degisuli. Ar bemar na be-isguedga be bukib binsasurmalale, be-daed be gwagsurmalale, bemar burgwemarmogodo.”
LUK 13:6 Weyob Jesús burbar sogdegusbalid: “Ibagwengine, dule-wargwen na e-nainugi higuera-sapi digsagusad. Higuera-sapi-san-maked omosgu, e-san-aminonigu, sate daknonikid.
LUK 13:7 ”Dule-sapigi-nakulegedga e-nainu-ibed sogded: ‘Emide birgapaagus we-higuera-sapise an nanadanikid, e-san-gwanegar. We-sapi geg sanmaksoggu, be omukusun. ¿Ar ibiga binsa napa-gani guosunna?’
LUK 13:8 ”Sapigi-nakuleged sogded: ‘Dummad, mer be omukugwer, amba we-birgagi wis napi be ogwise, bina ebilis napa an imugwelo, sapi-osanmaked-ina an urbegwelo.
LUK 13:9 Ar sanmaker, sanmakoed. Ar degisulirdi, geb be we-sapi omukusunnodo.’ ”
LUK 13:10 Ibagwengi obunnoged-ibagi deun Jesús Judíoʼmar-onmakedneggi dulemar-odurdaksiidgine,
LUK 13:11 ome-wargwen birgambe-gakabaabakgus (18) boni-yargan-durenanaed-nikad sii gusmogad. Burba-isgana deyob durenanae imaksad.
LUK 13:12 Jesús a-ome-dakargu, a-omese gocha, ega sogded: —Omegwa, we-boni-nika-gudiidgi be ollorgussun.
LUK 13:13 Jesús a-omegi e-argan-mesisgu, ome-yargan yog innikii naded, geb degi, ome Bab-Dummad-nug ogannodsunnad.
LUK 13:14 Ar Jesús obunnoged-ibagi ome-nudaksadba Judíoʼmar-onmakedneggi-dummadga-gudiid sae-itoded. A-ular, dulemarga sogded: —Ar iba, ibanergwa (6) arbaega naisursi, a-ibagi be nuguegar dagmardo. Mer obunnoged-ibagi nuguega be dagmala.
LUK 13:15 Geb degi, Dummad-Jesús, abin-sogded: —¡Be yogasaar-darba-sunmakedid! Ar bemar belagwapa obunnoged-ibagi be-moli-bebe-nikad, degi, moli-uayasuid-sedega, diigi-ogobnaega, ¿e-gabedgi be esikdisurmarsi?
LUK 13:16 We-omede, Judío-duled, Abraham-wagwad. Nia-saila-Satanásʼde birgambe-gakabaabakgus (18) we-bonigi edinnar sediid. ¿Ar ande we-ome obunnoged-ibagi geg nudakde?
LUK 13:17 Ar Jesús weyob sogsagu, Jesús-isdarmalad bela binge itodmalad. Ar dulemar-baigandi bela Jesús-ibmar-dakledisulid-nuegan-imaksadba weligwar itodmalad.
LUK 13:18 Jesús sogdebar: “Bab-Dummad-e-negdakmaid, we, ¿igi an sogmalargebe, ibi-ebo an wilubdakmalargebsunna?
LUK 13:19 Ar weyobsundo, mostaza-e-gwag dule-wargwen e-nainugi digsayobdo. Dungudgu, sapiga gusdo, geb degi, sikwimar-niba-gukudimalad a-sapi-anagangi e-uumar na urbismalad.”
LUK 13:20 Degi, Jesús gannar sogdebar: “Bab-Dummad-e-negdakmaid, ¿ibu-ebo an wilubdakosunna?
LUK 13:21 Ar weyobsundo, madubur-inayobdo, ome-wargwen ilapaa-madubur-wilubsaedgi, madubur-ina obatisad, geb degi, madubur-ina binna-binna madubur omusad.”
LUK 13:22 Jesús Jerusalénʼse nadapgu, neggwebur-dummaganba, degi, neggwebur-burwiganba dulemar-odurdakdii gusad.
LUK 13:23 Degi, dule-wargwen ega sokalid: —Dummad, ¿unnila ichee dulemar abonolemaloe? Jesús, abin-sogded:
LUK 13:24 —Gatik yawagak-garagwadgi doged be imakmar. Ar nabir an bemarga sogmalad, ar bukidar a-yawagakgi dogbigudamaloed, degi-inigwele, ar degite, geg doge gumaloed.
LUK 13:25 ”Ar e-neg-ibedi bato yawagak-edugega gwisgusar, yawagak-edisad-sorba, be magaba-gwichi gollalir, ega be sokalir: ‘Dummad, yawagak be anga egae.’ We-dule, be-abin-imakdoed, bemarga sogdoed: ‘An bemar-wissuli be bia danimala.’
LUK 13:26 ”Geb bemar ega sogdamaloed: ‘Anmar beba mas-guchamalad, anmar beba gobsamarbalid, anmar-ambikued-neg-imbagi be anmar-odurdakdii gusad.’
LUK 13:27 ”Ar we-dule, be-abin-imakdamarbaloed: ‘An bega sogmar, an be-wissurmala, be bia danimala. Bela bemar angi bangumar, bemar ibmar-isgana-imakmalad-dulemalad.’
LUK 13:28 ”Ar bemar dakarmalale, Abraham, Isaac, Jacob, degi, bela Bab-Dummad-gayaburba-barsogmalad, Bab-Dummad-e-negdakmaidgi gudii, ar bemardi agi gudisuli, geb agi be bodmaloed, degi, nue-dummad-wilesiidba nugar-gorsii be gudmaloed.
LUK 13:29 ”Ar dulemar dad-nakwedsikid, dad-argwanedsikid, dad-nakwed-argan-nuedsikid, dad-nakwed-argan-sapiledsikid, danimaloed, Bab-Dummad-e-negdakmaidgi mas-gunnega mese-naba signonimaloed.
LUK 13:30 Emigi, ar dummagan-bukidar dule-sorbarmaladga guoed, degine, dule-sorbarmalad, dummaganga gumogoed.”
LUK 13:31 A-ibagi, Fariseoʼmar abar Jesúsʼse nonimalad, ega sognonimalad: —Wegi be noe, be nae, ar Rey-Herodes be-oburgwebied.
LUK 13:32 Jesús, abin-sogded: —Be namar, we-dule-usyobdaedga be sognamar: ‘Be dake, an niamar-onodiid, degine, emi-ibagi an dulemar-nudakdiid, degine, banedse an dulemar-nudakbaloed, geb an-arbaed an achur obelogoed.’
LUK 13:33 Ar degi-inigwele, emi, banedse, degi, achur, an naergebed. Ar ade, Bab-Dummad-gayaburba-barsoged, Jerusalén-neggweburgi bannaba-burgwed geg gued, Jerusalénʼgi burgwergebed.
LUK 13:34 ”Jerusalén-dor, Jerusalén-dor, Bab-Dummad-gayaburba-barsogmalad be oburgwedimalad, bemarse-barmilearmalad bemar akwagi makdimalad. Igi gannir na e-sakan-urba-e-mimmigan-urbedae, debayobi, ilabigwa an bela-be-mimmigan danar urbebi-gusana, degite, bemar yapa-gusmalad.
LUK 13:35 A-ulale, be-neg, nega-dulesulidganyob gunonisunnoed. Ar an bemarga sogsun, emigindi bar be an-dakosurmalad, ar geb bemar sogedse: ‘We, Bab-Dummad-nuggi-dule-danikid, Bab-Dummad egi nued-binsasun.’ ”
LUK 14:1 Ibagwengine, obunnoged-ibagi, Jesús, Fariseoʼmar-e-dummad-wargwen-negse mas-gunnega nade gusad. Agi Fariseoʼmar Jesús-argabukwa gusmalad.
LUK 14:2 Degi, Jesús-asabin dule-abagan-mued-nikad siigusmogad.
LUK 14:3 Geb degi, Jesús, Moisés-Igar-Mamaid-odulomaladga, degi, Fariseoʼmarga, sunmakalid, sogded: —¿Ar wede obunnoged-ibagi dule-nudaked igar-mai?
LUK 14:4 Ar amar gwen Jesús-abin-imaksasurmalad. Jesús, dule-bonigwaled-ebusgua, nudaksad. Geb degine, negse dule-nugusad barmisad.
LUK 14:5 Geb degi, Jesús Fariseoʼmarga sogded: —¿Doa bemar wegi, be-moli-uayasuid-gwensakdibe, be-moli-bebe-nikaddibe, obunnoged-ibagi bei dia-yaagi argwachale, be onossurmalar be insae? Suli, be onosmalale.
LUK 14:6 Ar Jesús-weyob-ibmar-sogsad geg abin-imakgusmalad.
LUK 14:7 Jesús dulemar-mas-gunnega-ese-gorlesmalad-daksagu, dummagan-gan-sigedse bur signaddamala, Jesús burbar sunmakded, sogded:
LUK 14:8 “Dule-wargwen, ome-nikued-ibase-dagega bese gochadibe, mer dummagan-siged-gangi be sigo, ar abakalegi dule-baid-beba-bur-nug-nikadse, gorlesmogale.
LUK 14:9 ”Ar dule-bese-gochadi be-dakarsunnad, degine, dule-baid-beba-bur-dummad dakarbarsunnad, geb bega sokarsunnad: ‘We-gangi-be-siid, we-dulega be ukye.’ Degidbali, be nue-binge itodasunnodo. Gan-napi-solaba-siidse signae be dakledasunnodo.
LUK 14:10 ”Ar bese ibase-dagega gorlesale, bur gan-napi-solaba-siidgi be sigo, ar adi, dule-ibase-dagega-bese-gochad be-dakalile, bega sogegar: ‘An-ai, dummagan-siged-gangi bur be sigdage.’ Geb agindi, dulemar-beba-mesegi-siid-abargi bur be-nug dummaa guoed.
LUK 14:11 ”Ar ade, dule-wargwen na-nug dummarba-saele, a-dule bur-nug-bipii guoed. Ar dule, na-nug-bipi-saerdi, bur e-nug odummolegoed.”
LUK 14:12 Dule-mas-gunnega-ese-gochadga Jesús sogded: “Masgi dulemar be ogunbiele, mer be-aimarse be golo, mer be-urbamarse, mer be-iamarse, mer be-gwenadganse, degine, mer be-neg-dikarba-mani-ibed-mamaidse be gorbalo. ”Ar deyob be imakele, amar bese muchub gotamogoed ese mas gundamogagar. Ar degidbali ese be gochadba, be-abinsae dakledamogoed.
LUK 14:13 ”Ar be masgulleged-iba onoalir, bur dulemar-wileganase be golo, dulemar-argansurmaladse, dulemar-muya-muya-nanamaladse, degi, dulemar-ibyasurmaladse, be golo.
LUK 14:14 Geb agi begi nued binsalegoed. Ar ade, we-dulemardi masgi be-ogunnega geg muchub bese goled. Dulemar-gwage-nuegan-gannar-durgumaloed-ibagine, geb Bab-Dummaddi bega ibmar-nued ukoed.”
LUK 14:15 Dule-wargwen-mesegi-Jesúsʼba-siidi Jesús-ibmar-sogsad-itosgu, ega sogded: —Dule, Bab-Dummad-e-negdakmaidgi mas-gunnoedgi, nued binsalesdo.
LUK 14:16 Jesús ega sogded: —Ibagwengine, dule-wargwen masgunned-iba-dummad onosad. Geb bukidar dulemarbina gochad, ese mas gundamalagar.
LUK 14:17 Masgulleged-wachi mosgu, na e-mai-barmisad dulemar-gollesmaladga sogegar: ‘Dagmar, bato bela mas guagwar sii.’
LUK 14:18 ”Ar bela wargwen-wargwen sogdemalad, ar emarde geg dagmarye. Gebesailadi sogded: ‘Nainu an na baksad, an a-daknaergebed, degisoggu, an bega sogsun an bese wis naosurye.’
LUK 14:19 Baid sogdemogad: ‘Moli-bebe-nikad-warambe (10) an baksad, an daknaergebed, degisoggu, an bese naosurmogad.’
LUK 14:20 Baid sogdebalid: ‘Emiskwaa an ome-nikusad, degisoggu, an bese naosulid.’
LUK 14:21 ”Mai, e-dummadse gannar nonigu, bela e-dummadga sognonikid, igi dulemar ega sogsamala. Dule-iba-onosiid e-mai-ega-sogsad-itosgu, nue sae-itoded, e-maiga sogded: ‘Gwae be dulemar-bukidar-ambikumaladse be nae, neggwebur-igarba dulemar-wilegana be sedago, dulemar-argansurmalad, dulemar-muya-muya-nanamalad, degi, dulemar ibyasurmalad, amar be sedago.’
LUK 14:22 ”Geb degi, a-sorba mai sognonikid: ‘Dummad, be-anga-ibmar-sogsadba an imaksad, degite, amba neg engussulid.’
LUK 14:23 ”Geb degi, dummad na e-maiga sogded: ‘Be nae, igar-dummaganba-dulemar-gudiid sedago, igar-burwiganba-dulemar-gudiid sedago, adi, an-neg enguegar.
LUK 14:24 Ar an bega sogmar, iduar-dulemarse-an-gochad, a-dulemardi an-mas gunnosurmalad.’ ”
LUK 14:25 Ibagwengine, dulemar-bukidar Jesúsʼba duurmaknadap gusmalad. Jesús amarsik atakdegu, amarga sogded:
LUK 14:26 “Ar dule-wargwen anse danikile, ar e-bab, e-nan, e-ome, e-mimmigan, e-iamar, e-urbamar, e-bunmar, degi, e-san-burbase-bakale, anba-bur-bule sabele, geg an-sapinga gued.
LUK 14:27 Igi-dule burgwenadapile, na e-nakrus semaidae, deyobi dule-anba-naid guakwaa burgwega nanasulile, a-dule geg an-sapinga gued.”
LUK 14:28 Jesús sogdebar: “Ar bemar-wargwen na neg-matusur-warakwagwad sobbiele, ¿idu sigsursi, itogega, igi-mani abelegoe, degine, mani unnitiba nikbardibe a-neg oguegar?
LUK 14:29 Ar be deyob imaksulile, degir abakalegi neg-e-saila-mesisar mani-akudedba oguarsulile, degiir, bela dulemar begi dododago-itole.
LUK 14:30 Sogdamalo-itole: ‘We-dule neg-matusur-warakwagwad sobdendo. Be dakena, gwen ogussurgusdo.’
LUK 14:31 ”¿Deginbali, ar doa-rey, baid-rey ese urwe-danikir, gebesaila sigsursi, dakegar, sunna miliambe-sordamar-na-nikad (10,000) mili-dulagwen (1,000) baid-rey-sordamar-sedanikidgi obinodibeye?
LUK 14:32 Ar rey na galakuo itogele, baid amba dikasur-danikidgi sunna ese dulemar-barmided, rey-baidse egisega igi saele ebo igar-nabogodibeye, mer ebo urwemalagar.
LUK 14:33 ”Ar amba deyobmodo, bemar an-sapinganga-gued-iduar, nue bela na be ibmar ise-binsaar be saergebed, bela na be-ibmar-nikmalad bela iesulile, geg an-sapinga be gumardo.
LUK 14:34 ”Balu, ibnuedid, ar balu sayee naderdi, ¿igi be bar balu-balu gannar saosunna? Bar saosuli.
LUK 14:35 Balu, napaga, degi, napa-nudakedga bar gussuliled, neg-magaba miledsunnardo. An bemarga-ibmar-soged mag be nue itobiele, nue itomar.”
LUK 15:1 Bela Roma-dummadga-mani-gaedgi-arbamalad, degi, dulemar-galagwensuli-isgudimaladye-nik-sogmalad Jesús-itogegala ese nonimalad.
LUK 15:2 Fariseoʼmar, degi, Garda-Narmaked-Dulemar uurmakarmalad, sogdemalad: —We-duledi, dule-isgudimalad-abingaedid, degine, eba-mas-gunbalid-dulebalid.
LUK 15:3 Geb degi, Jesús burbar emarga sunmakde, sogded:
LUK 15:4 “Sogmalo, bemar-gwensak sibad-wawaad dulatar-nikasunnad (100), bei wargwen yoggussunnad, sibad-wawaad-wargwen-yoggusad-aminaega, ¿nega-dulesulidganba sibad-wawaad dulabake-gakambe-gakabakebakad (99) obessulir be insae? Eye. Be obesale.
LUK 15:5 Be amisale, be-gukingi weligwar-ito be mesisaled.
LUK 15:6 ”Ar na negse be nonikile, be-aimarse, degi, be-neg-dikarba-mamaidse be-negse-dagega be gochaled, ega be sogdeled: ‘Anba be wergumarmo, an-sibad-wawaad-ani-yoggusad, an amisad.’
LUK 15:7 ”Degisoggu, an bega sogmar, ar dule-isgudiid-wargwen na e-isguedga bukib binsasar, gwagnonikir, nibneggi bur bule we-werguedba wergumaloed. We-dulabake-gakambe-gakabakebak-nuegandi (99), na e-isguedga bar-bukib-binsaed abesulid.”
LUK 15:8 Jesús sogdebar: “Ar ome-wargwen, mani-gwaambe-nikad (10), ei gwagwen yoggusar, ¿gwallu ogassulir be insae? ¿Neg durwinagusar, mani-amiedse imaksasulir be insae? Eye. Mani-amiedse imaksale.
LUK 15:9 ”Ar mani amisale, na e-aimarse gologu, e-neg-dikarba-mamaidse gorbalogu, amarga sogdagodo: ‘Weligwar be anba itomarmo, ani-mani-yoggusad an amisad.’
LUK 15:10 ”An bemarga sogmardo: Deyobmodo, dule-wargwen na e-isgudiidga bukib binsasadba nugunonikir, Bab-Dummad-baliwiturmar, ber weligwar itodamalad.”
LUK 15:11 Jesús sogdebar: “Ibagwengine, dule-wargwen masmala warbo nikagusad.
LUK 15:12 Machi-bipigwad e-babga sokalid: ‘Baba, angadga-ibmar-yoedse-guoedi anga be udage.’ Degine, e-bab ibmar mimidsunnad.
LUK 15:13 ”A-ibagan-ichee-nasad-sorbali, machi-bipigwad bela na ibmar onmaksagu, dikasur yar-baidse nadsunnad. Agine, ibmar-nikadi bela obelosad, galagwensuli gaamakdii gualid.
LUK 15:14 Na mani-nikadi bela obelosgu, a-yargi ukud-dummad nagunonikid. Degisoggu, nue wilearsunnad.
LUK 15:15 ”Degi, machigwa a-yargi dule-wargwense arbaed-aminade gusad. Dule na e-nainuse ega sin-akwega machigwa-barmissunnad.
LUK 15:16 Dule machigwaga masgunned uksursoggu, na bela-bela ukudmaada-itogedbali, sin-mas-gunnedi gunbiguali gussunnad.
LUK 15:17 ”Degi, machigwa mag neg-itoargu sogded: ‘Ibibayobi an-bab-neggi an-babga-arbamaladdi masgunned bukidar-nika an insado. Andi wegi ukudba burgwedanikid.
LUK 15:18 Gannar an an-babse naergebodo, an ega sogdapoed: Baba, Bab-Dummadgi an dummad-nosad, degine, begi an dummad-nosbalid.
LUK 15:19 Degisoggu, bar be-machiga an guedsulid. Bega arbaed-wargwenga be an-imaksun.’
LUK 15:20 Machigwa gwichibin imaksad, na e-babse arsunnad. ”Machigwa amba dikasur daniki, bato e-bab daksabinned, na wile e-machi-dakdedbali, e-machi-abin abarmakded, ise-angaagwar e-machi-gadapid, degi, ei wagar udsunnad.
LUK 15:21 ”E-machi na e-babga sogded: ‘Baba, Bab-Dummadgi an dummad-nosad, degi, begi an dummad-nosbalid. Degisoggu, bar an be-machiga guedsulid.’
LUK 15:22 ”Ar e-babdi e-maimarga sogded: ‘Bur mola-nued an-machiga be sedamar. Ega mor yomar, degi, argan-yoed ega googi yomarbalo, degine, sapat ega yomarbalo.
LUK 15:23 Moli-bebe-nikad-e-mimmi-wardummad sedamar, oburgwemar. A, anmar gunnoed, anmar iba-onomarsun.
LUK 15:24 Ar wede an-machi burgwisanad, emigindi gannar durgunonikid, yoggusanad, emigindi amilenonikid.’ Bela-dulemar, weligwar-ito nadmarsunnad.
LUK 15:25 ”Ar e-machi-dummaddi deun sapurba gudiid. Nonigua, neg-walikgusgu, garmar-gole itoalid, degine, dodonanai dakarbalid.
LUK 15:26 Machi-dummad ega-arbaed-wargwense gochagu, ese egichialid: ‘¿Igi-neg-gunai?’
LUK 15:27 Ega-arbaed sogded: ‘Be-urba gannar nonikid, bonisuli nonikid. A-ulale, Be-bab moli-bebe-nikad-e-mimmi-wardummad oburgwisad.’
LUK 15:28 ”Geb degi, machigwa sae-itoded, yapa negyaba dogegualid. Degisoggu, e-bab magaba noarsunnad, negyaba-dogega egi wilenaigusad.
LUK 15:29 Ar machigwadi e-bab-abin-imakdegu, sogded: ‘Emide birgabargus an bega arbadiid, uayasuli an bega gudisulid. Degite, gwen be angardi an-aimar-abargi iba-onogega sibad-bipisaar be ukdisulid.
LUK 15:30 Ar we-be-machidi bela omegan-gambasamaladgi bei ibmar bela obelosad. Emide nonigu, agardi moli-bebe-nikad-e-mimmi-wardummad be oburgwisad.’
LUK 15:31 ”Bab, machi-abin sogded: ‘Machi, be anba gudiguad, bela-an-ibmar begadid.
LUK 15:32 Ar emigindi, anmar werguega, iba-onoged nonikid. Ar we-be-urba burgwisayob gusad. Emigindi, gannar-durgusayob gunonikid. Yoggusanad, emigindi, gannar amilesad. Degisoggu, anmar werguergebed.’ ”
LUK 16:1 Jesús e-sapinganga sogdebalid: “Dule-wargwen mani-ibed, ega na e-ibmar-akwed nika gusad. Ibagwengine, mani-ibedga soglealid: ‘Dule-bega-ibmar-akwed be-ibmargi, degi, be-manigi dododiiye.’
LUK 16:2 ”Geb degi, mani-ibed ega-ibmar-akwedse gochasun, ega sogded: ‘¿Wede igi be gudisunna, an-manigi dododii an be-itodo? Anga-be-ibmar-dakdiid bela anga be nue sogdasun. Ar bar be anga ibmar-dakega guosulid.’
LUK 16:3 ”Geb degi, dule-ibmar-akwediid na dukin sokalid: ‘¿Wede ibi an bar saosunna? Ar an-dummadde an-ega-ibmar-dakdiid angi suesokalid. Sapurgi an arbaye soger, geg an gued. Wileganayob mani an egisye soger, an bingebalid.
LUK 16:4 An wisi igi an saoe, adi, angi arbaed sulesale, dulemar e-neggi an-abingamalagar.’
LUK 16:5 ”Degine, dule-ibmar-akwed dulemar-e-dummadgi-mani-ganimaladse gochagu, gebesailadga sogded: ‘¿Igi-mani an-dummadgi be ganiki?’
LUK 16:6 Abin-sogded: ‘Ibmar-gwallu bari-dulatar (100).’ Geb degi, dule-ibmar-akwed ega sogdemogad: ‘Mani-ganikid-garda be sue. Be sige, mani-ganikid-gardagi be narmake: Ibmar-gwallu bari-dulabo-gakambe (50) an ganiye.’
LUK 16:7 ”Geb a-sorba baidga sogdebalid: ‘Bedina, ¿igi-mani be ganimoga?’ Mani-ganikid, abin-sogded: ‘Madubur-gwagwaled-wilubsaleged-dulatar (100).’ Geb degi, dule-ibmar-akwed ega sogded: ‘Mani-ganikid-garda be sue. Madubur-wilubsaleged-dulabake (80) an ganiye be narmake.’
LUK 16:8 ”Geb degi, mani-ibed ega-ibmar-daked-nug odummosad, ar ade, we-ibmar-daked-isgana, nue-binsaed-nikaa ibmar imaksad. Ar ade, dulemar-Bab-Dummad-akudakmalad nue-binsaed-nikaa bur dulemar-gwallu-meegwadgi-nanadimaladba baigan-ebo igar imaked.”
LUK 16:9 Jesús sogded: “Andi an bega sogsun: We-napneggi be mani-nikadgi, aimar-nuegan nikued be sae. Adi, be we-mani bega bergudele, yoedse geg-neg-berguedgi be-abingamalagar.
LUK 16:10 ”Ar ibmar-ichegwadgi be galakussulile, amba ibmar-ichesur bega uklesale, be galakuosurbardo. Ar ibmar-ichegwadgi be galakusale, amba ibmar-ichesulidgi be galakubalodo.
LUK 16:11 Ar we-napneggi ibmar-nika-guedse be galakusale, ¿ar doa begi bensuli bar guosunna we-ibmar-napiragwad nikuedgi? Bab-Dummad begi bengumogodo.
LUK 16:12 Ar ibmar-dulemar-baidgad be nued akwissulile, ¿ar doa ibmar bega ukosunna begadga guegar? Bab-Dummad bega ukosuli.
LUK 16:13 ”Mai-wargwensaar dummad-warbo geg nikued, ar ade, wargwen-sabguoed, baiddi isdar dakoed. Wargwenga nue-alamaknai guoed, baiddi mesagwar dakoed. Geg be Bab-Dummad-maiga gued, degi, geg be maniga mailenai gubalid, unnila wargwen bur bule be sabguoed.”
LUK 16:14 We-ibmar bela Jesús-sogsadi, Fariseoʼmar itobukwa gusmarmogad, ar ade, amar unnila mani-nikuedginbi binsadii damalad. Amar Jesúsʼgi dodobukwa gusmalad, binsa be gordiiye.
LUK 16:15 Geb degi, Jesús amarga sogdesun: —Ar bemardi dulemar-asabin na dukin na san ogannodimalad. Ar Bab-Dummaddi bemar-gwage wisid. Ar dulemarga ibmar-nuediddi, Bab-Dummad-asabindi, ibmar-isganad.
LUK 16:16 Jesús sogdebar: “Moisés-Igar-Mesisadi, degi, Bab-Dummad-gayaburba-barsogmalad-sunmaksadi, Diigi-dule-oged-Juan-nonikidse egi sunmakledii gusad. Juan-nonikid-akale, Bab-Dummad-e-negdakmaid-gayaburba-nuedgi bemarga sunmaklenaid, degine, dulemar-bela-ase-dogbimalad dogbi gunanaid.
LUK 16:17 ”Ar bur-baisursunna we-napneg, degi, nibneg-naid, surgued. Moisés-Igar-Narmakar-Naid-e-bichugwad-bur-bipigwaddi gwen bipisaale ogwalegosurguoed.”
LUK 16:18 Jesús sogdebar: “Ar dule-wargwen ome-metele, ome-baid-nikusale, we-machered, ome-dikarba negsichigi yolediido. Ar doa-dule, ome-melleded-nikusale, we-dule, ome-dikarba negsichigi yoledimodo.”
LUK 16:19 Jesús sunmakdegu, sogded: “Dule-wargwen mani-ibed mai gusdo. A-dule, mor-gwalugiid, degi, mola-sibu-nuedbi yodaed, degine, bane-bane bur mas-nueganbi gundii daed.
LUK 16:20 Agi dule-wileged-wargwen, mani-egisdidaed gudigusmogad, Lázaroʼye-nugad. A-dulede, mani-ibed-yawagakgi yaa-sunnabi meremaidaed.
LUK 16:21 We-dule-wileged, mani-ibed-masgunned-mese-urba mas-durgan-batemaidgi immelegoeyob binsadii daed. Ar achumarse-bakale, e-yaa emanonidaed.
LUK 16:22 ”Ibagwengine, dule-wileged burgwisgu, baliwiturmar Abraham-maidse sesad. Dule-mani-ibed burgwismogu, neg-uanse digleapid.
LUK 16:23 ”Dule-mani-ibed odurdakleged-neggi nue-wilesii atakargu, Abraham dikasur-sii dakalid. Lázaro a-walik simogad.
LUK 16:24 Agi dule-mani-ibed binnasur gotegu, sogded: ‘Dad-Abraham, wile be wis an-dake, Lázaro be anga barmidage, adi, e-goo-dukugi dii wis eogogu, an-gwabindukugi nasikoed, ar andi wegi nue soo-sailagi wilesiid.’
LUK 16:25 ”Ar Abrahamʼdi abin-imakde, ega sogded: ‘Machi, be insae, be dula gudigusgu, ibmar-nuegan be nikusad, ar Lázaroʼdi wiledii gusad. Ar emigindi, Lázaro wegi wergusisunnad, bedi wegi wilesisundo.
LUK 16:26 Aginbali, neg-gullu-dummad anmar-abargi naid. Degisoggu, dulemar-obakbied bese geg obaked, degine, bemar anmarse geg obakmogad.’
LUK 16:27 ”Geb degi, dule-mani-ibed Abrahamʼga sogdesun: ‘Degirdina, dad-Abraham, an bese ise-wilegar egisdo. An-bab-negse Lázaro be barmide.
LUK 16:28 Ar ade, urbamar-walatar an nikad, adi, amar-owisogegar, mer adi, we-odurdakleged-negse dagegar.’
LUK 16:29 Abraham ega sogded: ‘Moisés-Igar-Mesisad, degi, Bab-Dummad-gayaburba-barsogmalad-sogsamalad narmakar nikmalad, ar a-sogedba damalargebed.’
LUK 16:30 ”Geb dule-mani-ibed abin-sogded: ‘Dad-Abraham, webi unnisuli. Ar dule-wargwen-burgwisad gannar-durgusale, an-urbamarga sunmaknaele, adi, na e-isgumaladga bukib binsasmalaled, e-daed gwagsamalaled.’
LUK 16:31 ”Ar Abrahamʼdi ega sogded: ‘Ar Moisés-Igar-Maidba, degi, Bab-Dummad-gayaburba-barsogmalad-garda-narmakar-maidba dasurmalad. Ar dule-burgwisad amba ega sunmaknaerbela itossurmalaled.’ ”
LUK 17:1 Jesús na e-sapinganga sogded: “Gwage-ichoged-igargandi danikosurdeeye gwen soglesulid. Ar dule gwage-ichogedga-gueddi, nue-wilegoed.
LUK 17:2 Ar dule we-mimmigan-anba-nanadimalad Bab-Dummadgi-isguega imakele, sabsur-odurdaklegoed. Akwamuu-dummad e-dukargi-nai demar-wilase melledoed, we-dule nue-dummad wilegoed, burgoed.
LUK 17:3 ”Degisoggu, be nue salakarmar. Ar be-gwenad begi nosale, ega be soge, nue be angi nos-itoleye. Ar be-gwenad nabir be-itosale, ar na gwagegi bukib binsasale, e-daed gwagsale, begi-nossuliyob be dakoed.
LUK 17:4 Ar be-gwenad ibagwen ilagugle (7) begi nosale, degi, ilagugle (7) bese gannar-gannar nonikile, bega sognonikile: ‘An-isgusadga an bukib binsaye, bar an deyob guosurye,’ begi nossuliyob be dakoed.”
LUK 17:5 Geb degi, Jesús-e-sapingan-bur-dummagan, Jesúsʼga sogdemar: —Dummad, gatik begi bensuli be anmar-imake.
LUK 17:6 Geb Dummad-Jesús sogded: —Ar bemar mostaza-e-gwagyob wis bipii be angi bensurmalale, sunna we-Sicómoro-sapiga be sogsamalaled: ‘Wegi be gwichid be unge, demarse be diglenae.’ We-sapi bemar-sogedba imaksaled.
LUK 17:7 Jesús sogdebar: “Ar bemar be-mai-wargwen bega napa-imuega be nikadibe, igi, moli akwegardibe, sapurba-arbadii danikid-sorba, ¿ega be sogdimala?: ‘Be doge, mas-gunnega mesese be sigdage.’
LUK 17:8 ¿Ar ega be sogdamarsursi? ‘Guakwaa be gudisae, masgunned be anga due, anga be mas dake. An-mas-gucha-sorba, an-gobsad-sorba, geb be mas gunmogoed, geb be gobmogoed.’
LUK 17:9 ”Ar degine, be-mai bega be-sogsadba ibmar-imaksadba, ¿dog-nuedye ega be sogdasi? Sulirgebed.
LUK 17:10 Ar amba bemar deyobmodo, ar bela bemarga Bab-Dummad-ibmar-sogsadba be ibmar imaksamalale, be sogmalodo: ‘Anmar mai-nued arbasurmaladye, ibmar-imakoye-anmarga-soglesadbi an imaksamaladdeeye.’ ”
LUK 17:11 Jesús Jerusalénʼse nadapgu, Samaria, degi, Galilea, a-abargi nadap gusad.
LUK 17:12 Jesús neggwebur-bipise dognadapgu, machergan-warambe (10) naibe-buna-yaa-maleged-nikmalad egi noarmalad, dikasur egi ambikunonimalad.
LUK 17:13 Amar binnasur goted, sogdemalad: —¡Odurdaked-saila-Jesús, wile be anmar-dake!
LUK 17:14 Jesús amar-dakdegu, amarga sogded: —Be namar, dule-irwa-Bab-Dummadse-gormaladga na be-san oyonamar, adi, amar bemarga sogmalagar bemar nugusmarye. Ar degi, dule-warambegwad (10) amba igarba dule-irwa-Bab-Dummadse-gormaladse nadapmargu, nugudmalad.
LUK 17:15 E-ambe-gued-wargwen, nugus-itoargu, binnasur Bab-Dummad-nug ogannodani Jesúsʼse gannar nonikid.
LUK 17:16 Dule-nugusad yokorgi-sindigar e-wagar-napase-ebulegedse dulluu Jesús-mali-naba signonikid, geb Jesúsʼga sogdebalid: —Dog-nued, be an-nudaksagu. Dakargu, we-dulede, Samariaʼginedid.
LUK 17:17 Jesús sogded: —¿Ar warambe (10) nugusmarsursi? Emide, ¿bia walabakebakaddi (9) nade?
LUK 17:18 ¿Na nugusmalad-ular, Bab-Dummad-nug-ogannomalagar gwen bilissurmala? ¿Unnila we-dule-ainebalidbi, Judíoʼsulid, Bab-Dummad-nug odummononide?
LUK 17:19 A-dulega Jesús sogdesun: —Be gwisgu, nae. Nue-an-bensulidba be nugussun.
LUK 17:20 Fariseoʼmar Jesúsʼse egichialid: —¿Sana Bab-Dummad wegi negdakmai guoe? Jesús, abin-imakdegu, sogded: —Bab-Dummad-e-negdakmaid bemarse danikile, bemar owisogar gwen nonikosulid.
LUK 17:21 Degine, sogosurmarbalid: ‘Be dakena, wegi gudii,’ igi: ‘Weba gudii.’ Ar ade, Bab-Dummad-e-negdakmaid bemar-abargi gudiid.
LUK 17:22 Jesús na e-sapinganga sogded: “Iba-nonikoed, ani Dule-Machi, an-iba-danikoedgi bemar gudii gubigudamaloenad. A-iba bemar gwen dakosurmalad.
LUK 17:23 Degine, bemarga sogdamaloed: ‘Be dakena, wegi Cristo gudii.’ Baigan bemarga sogdamarbaloed: ‘Weba Cristo gudii.’ Mer be daknamalo, degine, mer eba be nagumarbalo.
LUK 17:24 ”Ar igi mar-ibyed gadele, bela nibneg mee imakdedaed, deyobi ani Dule-Machi, an-danikoed-ibagi bela an-dakmaloed.
LUK 17:25 Ar gebe bina, ani Dule-Machi, nue wilegwelergebed, wegi dula-gudidimaladse mesagwar gugwelergebed.
LUK 17:26 ”Ar igi Noé-maigu gusa, deyob, ani Dule-Machi, an-gannar-danikoed-ibagangi gumogoed.
LUK 17:27 ”Noé-maigu, dulemar mas-gunnanai gusmalad, gobnanai, ome-nikunanai, na ga ome-uknanai gusmalad. Geb Noé ur-dummad-sobsad-yaba-dogsagu, dii muluded, geb degi, bela dulemar burgwisad.
LUK 17:28 ”Amba deyob Lot-maigu, gusbalid, mas-gunnanai, gobnanai, ibmar-baknanai, ibmar-uknanai, ibmar-dignanai, neg-sobnanai gusmalad.
LUK 17:29 ”Ar Lot, Sodoma-neggweburgi-noded-ibagi, nibneggi soo, degi, soo-olliled-azufre batisad. Geb degi, bela dulemar burgwisad.
LUK 17:30 Deyob Dule-Machi-danikoed-ibagi neg gumogoed.
LUK 17:31 ”Ar a-ibagi, dule-wargwen neg-uas-birgi siile, e-ibmar-nuegan negyaba-bukwadbina aidealir, mer sunaed imakoed, bur yog wakinnar imakoed. Ar dule-wargwen sapurba gudiile, amba mer e-negse gannar dagmogoed, bur yog wakinnar imakoed.
LUK 17:32 Be ebinsamalo, Lot-ome sorba-ataksagua, burgwisgusad.
LUK 17:33 ”Ar dule-wargwen anba-naid-ular burgwebisulir, e-san-burba ei yogguodo. Ar anba-naid-ular burgwenonikirdi, adi, na e-san-burba yogguosurdo.”
LUK 17:34 Jesús sogdebar: “An bemarga sogmalad, a-mutikidgi na-ebo-dikarba gabmamaid, wargwen nibnegse seledoed, baiddi obelegoed.
LUK 17:35 Omegan-warbo na ibmar-gwag-nagnanaid, wargwen nibnegse seledoed, baiddi obelegoed.
LUK 17:36 Warbo sapurba na gudimalad, wargwen nibnegse seledoed, baiddi obelegoed.”
LUK 17:37 E-sapingan Jesúsʼga sogdemar: —Dummad, ¿bia deyob guoe? Jesús, abin-sogded: —Ar bia san-burgwaled mai, agi mulamar danar-ambikunonidamalad. Debayobi dulemar mag dakmogoed, an gannar we-napnegse danikir.
LUK 18:1 Degi, Jesús na e-sapingan-odurdakega burbar sunmakded, amarga sogded: “Bab-Dummadse-goled nue-abeleged, melle be galakumalo.”
LUK 18:2 Jesús burbar sogdesun: “Ibagwengi, neggweburgi dule-igar-naboged maigusad. A-dulede, Bab-Dummad-gwen-dobsulid, degi, dulemargi gwen binsaed-nikaa dasurbalid.
LUK 18:3 ”A-neggweburgi mukwa-wargwen ei-sui-burgwisad gudigusmogad. A-mukwade, dule-igar-nabogedgi gannar-gannar alamaknaidaed, ega sognonidaed: ‘Dule-isdar-an-dakdiid-ebo anga igar-nabiroye.’
LUK 18:4 Gebe, dule-igar-naboged yapa mukwaga igar-naboge guargusad. ”A-undaradgine, dule-igar-naboged na ulubgi sokalid: ‘Bab-Dummad an dobsur-inigwele, degine, dulemargi-gwen-binsaed-nikaa an dasurbar-inigwele,
LUK 18:5 ar we-mukwa angi alamaknaigusoggu, ega igar an nabogoye. Ar degiile, abakalegi anse-nanagwichidba budar an dakalirye.’ ”
LUK 18:6 Geb degi, Dummad-Jesús sogdebar: “Nue be itomalana, dule-igar-naboged-isganadaed-ibmar-sogsadi igi-sogsagusa.
LUK 18:7 Ar bemar insagu, Bab-Dummad na e-dulemar-susadi ese mutikidba, degine, ibginedba gordimaladga igar-napiragwad ¿imakosur be insae? Imakoe. ¿Bab-Dummad abgayala abinsaosur be insae? Eye.
LUK 18:8 An bega sogmar, Bab-Dummad abga e-sordamarga igar-napiragwad imakoed. ”Ar ani Dule-Machi, we-napnegse gannar danikir, ¿dulemar we-napneggi Bab-Dummadgi-bensurmalad-nika daknoniko be insae?”
LUK 18:9 Ar dulemar, na dukin nuedye, baigandi isganaye, sogdimaladga, Jesús we-igar-burbar-maidgi-sunmaklegedgi sogded:
LUK 18:10 “Ibagwengine, machergan-warbo Bab-Dummadse-goled-negse nadmalad. Gwensak Fariseo, baiddina Roma-dummadga-manigaedgi-arbaed-dule.
LUK 18:11 ”Fariseo gwichi Bab-Dummadse gorgwichid, na dukin weyob soggwichid: ‘Bab-Dummad, dog-nuedye an bega soged, an dulemar-baidyob dasulid, an atursilisulid, igar-innikigwadbi aimarga an imaked, ome-dikarba an yoledisulid, degine, we-dule-Roma-dummadga-manigaedgi-arbaeddaedyob an dasulid.
LUK 18:12 Bab-Dummadse-golega itoged-irgwengi, ilabo an mas-gunsuli gudidaed, bela an mani-onoged-irba ambegi-gwensak (10%) an ukdaed.’
LUK 18:13 ”Ar dule-Roma-dummadga-manigaedgi-arbaeddi Bab-Dummadse gorgwisgu, bannabaa gwichi, nonose-bakar, gwen onakbisur gwichid, na e-binasgar sarsogwichid, na soggwichid: ‘Bab-Dummad wile be an-dake, an dule-isgudiid-duled.’
LUK 18:14 ”Ani Jesús, an bega sogmar, ar we-dule Fariseoʼba bur gwage nugus-naddo. ”Ar ade, dule-wargwen na nug dummarbaa saele, a-dule, bur nug bipii guoed. Ar dule na nug bipii saerdi, adi, a-dule, bur nug odummolegoed.”
LUK 18:15 Degine, Jesúsʼse mimmigan-sedanigusmalad, Jesús ega ebugegar. Adi, Bab-Dummad nued mimmigangi binsaegar. Jesús-sapingan deyob dakarmargu, dulemar-mimmigan-senonimaladse uluarmalad.
LUK 18:16 Ar Jesús e-sapinganse-gochagu, ega sogded: —Mer ese urwemar. Akarsuli, itoba mimmigan anse dagoed, mer be igar-gamar. Ar Bab-Dummad-e-negdakmaid we-mimmiganyob-damaladgadid.
LUK 18:17 Napira an bemarga sogmalad, ar dule-wargwen Bab-Dummad-e-negdakmaid mimmiganyob abingasulile, geg Bab-Dummad-e-negdakmaidse doged.
LUK 18:18 Dule-wargwen nue-nug-nikagwad Jesúsʼse nonikid, ese egisnonikid: —Odurdaked-saila-nued, burba-geg-bergued an abingaega, ¿ibi an imakergebe?
LUK 18:19 Jesús, abin-sogded: —¿Ibiga dule-nuedye be anga soge? Dule-nued sulid, unnila Bab-Dummadbi wargwennaa dule-nued gued.
LUK 18:20 Bab-Dummad-Igar-Mesisad be wisid: ‘Melle be be-abirginsulid-ebo galagwensuli nanao. Melle be dule-oburgo. Melle be ibmar-atursao. Melle be gakansaar aimargi sunmako. Be-bab-nug-odummodii, degi, be-nan-nug-odummodii be nanamalo.’
LUK 18:21 Dule, abin-sogded: —Gusgu an sapingwagwad-akar bela we-Igarmar-Mamaidba an nanadiid.
LUK 18:22 Jesús, weyob dule-ega-soge itosgu, ega sogded: —Ibmar-gwensak amba be napi. Bela ibmar-be-nikadi manigi be uknae, geb agi, mani wileganaga be mimioed. Geb degiir nibneggi ibmar-nued be nikuoed. Geb a-sorba, an-sapinga-guega anba be dagoed.
LUK 18:23 Dule, weyob Jesús-ega-soge itosgu, nue-bukib binsaded. Ar ade, dulede nue-mani-ibedid.
LUK 18:24 Jesús, dule-nue-bukib-binsa-ito daksagu, sogded: —Ibiyobi dule-mani-ibganga Bab-Dummad-e-negdakmaidse-doged-igar dutusuli. Ar ade, dogdar maniginbi binsamalad.
LUK 18:25 Ar ade, bur moli-yargan-mureged iko-ibyagi bursursunna dogsaled. Ar dule-mani-ibeddi bur-beedse Bab-Dummad-e-negdakmaidse doged.
LUK 18:26 Ar dulemar weyob Jesús-ibmar-soge-itosmalad, sogdemalad: —Ar degite, ¿doa nabir abonolegosunna?
LUK 18:27 Jesús, dulemar-abin sogded: —Ar dulemargardi, ibmar-geg-guedi, Bab-Dummadgardi, bela ibmar guedbiid.
LUK 18:28 Geb degi, Pedro, Jesúsʼga sogded: —¿Anmardina? Emide, wegi anmar ibmar-nikamalad bela an na obesmalad, adi, anmar beba naegar.
LUK 18:29 Geb degi, Jesús, abin-sogded: —Napira an bemarga soged, ar dule Bab-Dummad-e-negdakmaid-ular, na e-ome-obesale, e-mimmigan-obesale, e-babgan-obesale, degine, e-neg obes-nadele,
LUK 18:30 bur bule, we-napneggi ibmar-obesadba ibmar abingaoed. Degine, yoedse amba deyob burba-geg-bergued nikubaloed.
LUK 18:31 Jesús na e-sapingan-warambe-gakabogwad (12) bachikii sesgua, ega sogded: “Anmar Jerusalénʼse nadapid. Bab-Dummad-gayaburba-barsogmalad bela angi Dule-Machigi narmaksadba igargan anga guedsegad.
LUK 18:32 ”Ani Dule-Machi, Bab-Dummad-wissurmaladse uklegoed, amar angi dodomaloed, isdar angi sunmakmaloed, degi, angi wii-agmarbaloed.
LUK 18:33 Geb sabsur an-bibyosmalad-sorba, an-oburgwemaloed. Geb ibapaagwadgi gannar an durguoed.”
LUK 18:34 Ar Jesús-e-sapingan-ambe-gakabogwad (12) Jesús-ega-ibmar-sogedi magasaila-itossurmalad. Aku-itosmalad, ibiga ega deyob soge.
LUK 18:35 Ibagwengine, Jesús Jericó-neggwebur-modanigua, deunni dule-ibyasulidi, igar-naba sii, mani egichii gusad.
LUK 18:36 Dule-aku-ataked dulemar-bukidar duurmaknadap itoargu, amarse egichided: —¿Igi neg-gunai?
LUK 18:37 Ega sogdemalad: —Jesús-Nazaretʼgined nadapye.
LUK 18:38 Geb degi, dule-aku-ataked binnasur goted, sogded: —Jesús, Rey-David-wagwa, ¡wile be an-dake!
LUK 18:39 Dulemar-Jesús-iduar-nadapmalad dule-aku-atakedse uludmalad, adi, mer binnasur golegar. Ar dule-aku-ataked aka bur bule binnasur gorsigisad: —Rey-David-wagwa, ¡wile be an-dake!
LUK 18:40 Geb degi, Jesús gwisgusgua, dule-aku-ataked ese sedagega imaksad. Dule-aku-ataked ese nonigu, Jesús ese egichialid,
LUK 18:41 ega sogded: —¿Ibu bega imakbi be an-abege? Dule-aku-ataked, Jesús-abin-sogded: —Dummad, magar-atak be an-imake.
LUK 18:42 Jesús ega sogded: —Magar-atak be gusun. Be an-bengussursoggu, be nugusun.
LUK 18:43 Geb degi, dule magar-atake gussunnad. Dule-nugusad Jesúsʼba nadapgu, Bab-Dummad-nug-ogannonadap gusad. Bela-dulemar dule-nugusad-daksamargu, Bab-Dummad-nug ogannodmarsunnad.
LUK 19:1 Jericó-neggweburse Jesús modapgu, a-neggweburgi nadap gusad.
LUK 19:2 Agi dakleargu, machered-wargwen, Zaqueoʼye-nugad, mai-gusad. Zaqueo dakleargu, dulemar-Roma-dummadga-manigaedgi-arbamalad-e-dummadid, degine, dule-mani-ibedbalid.
LUK 19:3 A-dulede, Jesús-dakbigualid, wede Jesús doasunye. Ar Jesúsʼba-dulemar-nadapmalad bukidarsoggu, Zaqueo geg Jesús-dake-gualid, ar ade, Zaqueo dule-matukwagwad.
LUK 19:4 Zaqueo, Jesús-dakegala aimar-idu gwae abarmakde gusad, adi, sapi-Sicómoroʼgi nakwegar, ar ade, Jesús a-igargi nasoed.
LUK 19:5 Jesús a-sapi-gwichid mosgua, niba atakded, geb Zaqueoʼga sogded: —Zaqueo, gwae be dage, aidedage. Ar ade, emi-ibagi an be-neggi obunnogergebed.
LUK 19:6 Geb degi, Zaqueo gwae-gwae aidesad. Zaqueo weligwar na e-neggi Jesús-abingasad.
LUK 19:7 Dulemar daksamargu, Jesús, Zaqueo-negse dogsa, bela sunmakedbi-guarmalad, sogdemalad: “Jesús dule-isgudiid-negse dogsaye.”
LUK 19:8 Geb degi, Zaqueo gwisgusgu, Jesúsʼga sogded: —Dummad, emide, wegi an-ibmar an-na-nikadi, negabar dule-wileganaga an ukoed. Ar dule-gwensak-ibe an ibmar-atursasale, an ega ilabake bur-melu ukoed.
LUK 19:9 Jesús, abin-sogded: —Emi-iba, we-neg-yaginmaladga isguedgi-abonoleged nonisun. Ar ade, we-dule, Abraham-e-wagwamogad.
LUK 19:10 Ar ade, ani Dule-Machi, dulemar-yoggusmalad-amiega nonikid, degi, dulemar-isguedgi-gudiid-abonogega nonikid.
LUK 19:11 Jesús Jerusalén-neggwebur-walik gudisoggu, dulemar Bab-Dummad-e-negdakmaid bato emarse oyolesokarye bimalanad. A-ular, Jesús dulemar-e-itosimaladga
LUK 19:12 burbar sunmakedgi sogded: “Dule-wargwen, nue-nug-nikadi, dikasuli yar-baidse reyga-nugsalegega nade gusad. A-dulede, gannar-danibaloye sogsa naded.
LUK 19:13 ”A-dulede, nasokargu, ega-arbamalad-warambegwadse (10) gochad. Amarga mani-ichesur-uksagu, sogded: ‘An gannar dagedse, we-manigine be anga e-gaka onomalo.’
LUK 19:14 ”Ar e-neggweburginmalad dule-reyga-guoed isdar-dakmarsoggu, naded-sorba dulemar-barmisad, dummaganga sogegar: ‘We-dule anmar-reyga-guega anmar abesurye.’
LUK 19:15 ”Degi-inigwele, we-dulede reyga nugsalesad. Geb gannar e-yarse nonigua, e-maiganga-mani-uksadse gochad, adi, amarse egisega mani igi imaksamarye.
LUK 19:16 ”Mai-gebesailad nonigu, reyga sognonikid: ‘Dummad, be-mani. An bega e-gaka ambe (10) an onosbalid.’
LUK 19:17 ”Dummad ega sogdesun: ‘Nued, be, mai-nued. Ar ibmar-ichegwadgi be nued arbassoggu, neggwebur-gwaambedgi (10) dummadga be guo.’
LUK 19:18 ”Mai-baid reyse nonimogu, ega sognonikid: ‘Dummad, be-mani. An bega e-gaka gwaatar onosbalid.’
LUK 19:19 ”Dummad we-maiga amba deyob sogdebalid: ‘Neggwebur-gwaataledgi dummadga be gumogo.’
LUK 19:20 ”Mai-baid nonibargu, reyga sognonikid: ‘Dummad, wegi an bega be-mani sedani, muswegi an bega nue-sabosad.
LUK 19:21 Ar an be-dobgusad, ar bede dule-yaisurdaed-duled. Ar be ibmar-urbissulidi be sudaed, ibmar-be-digsasulid be weedaed.’
LUK 19:22 ”Geb degi, rey a-maiga sogdesun: ‘Be mai-isgana, na be-ibmar-sogsadba an bega sogsun. Ar be wisinad an dule-yaisurdaed-duled, an-ibmar-urbissulid an sudaed, an-ibmar-digsasulid an weedaed.
LUK 19:23 ¿Ar ibiga degite, mani-urbileged-neggi be mani urbiapsuli? Adi, gannar an nonikogu, e-gaka-nosad an sunonikoenad.’
LUK 19:24 ”Ar rey dulemar-bukmaladga sogdesun: ‘We-dule-mani-ukdanikid e-annik be sumar, dule-mani-ambe-onosadga (10) be ukmar.’
LUK 19:25 ”Dulemar, rey-abin sogdemalad: ‘Dummad, ar we-dule mani-ambe (10) bato nikad.’
LUK 19:26 ”E-dummad, amar-abin sogded: ‘Ar dulemar-bela-ibmar-nikmalad aga bur napi uklegoed. Ar dule-ibmar-suliddi, amba ar ibu wis nika, ei bur sulegoed.
LUK 19:27 ” ’Deginbali, isdar-an-dakmalad, egi-dummadga-gubisur an-abesmaladi, anse be sedamar, an-asabin amar-e-dukar be egwanmalo.’ ”
LUK 19:28 Jesús weyob ibmar-sogsad-sorba, Jerusalénʼse e-sapingan-idumai gusad.
LUK 19:29 Jesús, Betfagé-neggweburse, degine, Betania-neggweburse modanigu, Olivos-yar-innikgusgu, Jesús e-sapingan-warbo barmisad.
LUK 19:30 Amarga sogsad: —Anmar-asabin neggwebur-bipigwad-siidse be namar. A-neggweburgi bemar dogdapmalar, moli-bipi-uayasuid, dule-egi-yoo-gwen-siged, be-idu atinnar-nai bemar dakdapoed. Be esikmalo, geb degi, be anse sedamalo.
LUK 19:31 Ar dule-wargwen bemarse egichialile: ‘¿Ibiga bemar moli-bipi-uayasuid esiknai?’ Ega bemar weyob sogmaloed: ‘Ar Dummad we-molibina soged.’
LUK 19:32 Jesús-e-sapingan-warbogwad nadmargu, igi-Jesús-ega-ibmar-sogsa deyob dakdapmalad.
LUK 19:33 Jesús-sapingan moli-bipi-uayasuid esiknanaigu, e-ibmala ega sokarmalad: —¿Ibiga moli-bipi-uayasuid bemar esiknai?
LUK 19:34 Abin sogdemalad: —Ar Dummad moli-bipi-uayasuidbina soged.
LUK 19:35 Jesús-sapingan moli-bipi-uayasuid Jesúsʼse senonimarsunnad. Geb degi, moli-bipi-birgi na e-mormar ogichamalad. Geb a-birgi, Jesús-onakwismalad.
LUK 19:36 Jesús, Jerusalénʼse nadapgu, e-iduar igargi dulemar mor ogitemalad.
LUK 19:37 Olivos-yar-aidemaid-walikgusgu, bela bukidar dulemar-Jesúsʼba-nanaimalad, weligwar itodmalad, bela ibmar-dakledisulid-daksamaladba, binnasur Bab-Dummad-nug ogannodmalad,
LUK 19:38 sogdemalad: “We, rey Bab-Dummad-nuggi danikid, bela ega ibnuedga gusun. Nibneggi bogidikid gusun, degi, nibneggine Bab-Dummad-nug odummomarsun.”
LUK 19:39 Abala Fariseoʼmar dulemar-bukidarad-abargi gudimarmogadi Jesúsʼga sokarmalad: —Odurdaked-saila, beba-nanaimaladse be urwe, mer deyob sogmarye.
LUK 19:40 Jesús, weyob amar-abin sogded: —An bega sogmar, ar wemar bogiledele, an-nug-odummomalaga akwamar oimakarmalaled.
LUK 19:41 Jesús Jerusalén-neggwebur-mosgu, Jerusalén-neggwebur-dakdegu, ega boded,
LUK 19:42 sogded: “¡Bitigi emi-ibagi be wisgusana gadin! Igi bogidiki be ambikusmalale. Ar emigindi, begi odukuar nagusad, adi, mer be magar itomalagar.
LUK 19:43 ”Ar ibagan begi danikoed, be-isdarmalad be-ebilis napa gwisnonikoed, be-ebilis ambikunonikogu, geb degi, bela begi gwichigudamaloed.
LUK 19:44 Degi, geb napagi be-omukumaloed, be-dulamar-oburgwemaloed, degine, akwamar be-birgi-bubukwad bar be-birgi ambikuosurmalad. Bab-Dummad be-abonogega bese-atakleapid-iba aku be daksad-ular, deyob be guoed.”
LUK 19:45 Jesús, Bab-Dummadse-goled-negse dogdapgu, dulemar-agi-ibmar-baknanaid, degi, ibmar-ukbukmalad sabsur onisad.
LUK 19:46 Jesús amarga sogded: —Bab-Dummad-Gardagi narmakar naid: ‘Bab-Dummad soged: An-nega, anse-goled-negad.’ Isaías 56:7 ”Ar emigindi, bemardi atursamalad-negga imaksamalad.”
LUK 19:47 Jesús bane-bane Bab-Dummadse-goled-neggi Bab-Dummad-igargi dulemar-odurdakdii gusad. Ar dule-irwa-Bab-Dummadse-gormalad-e-dummagandi, Garda-Narmaked-Dulemardi, degi, dule-dummagan-neggweburgi-negsemamaiddi, Jesús-oburgwebigusmalad.
LUK 19:48 Ar amar geg Jesús-oakalogusmalad, ar ade, bela dulemar Jesús-nue-itobukwadamalad.
LUK 20:1 Ibagwengine, Jesús Bab-Dummadse-goled-neggi dulemar-odurdaksigu, degine, Bab-Dummad-Gayaburba-Nuedgi-sunmaksigu, dule-irwa-Bab-Dummadse-gormalad-e-dummagan, Garda-Narmaked-Dulemar, degine, Judíoʼmar-girmar-dummagan Jesúsʼse nonimalad.
LUK 20:2 Amar Jesúsʼga sognonimalad: —Be anmarga soge: ¿Doa-nuggine wede be we-ibmar imakdii? We deyob be ibmar imakega, ¿ar doa bega gangued uksasunna?
LUK 20:3 Jesús, abin-sogded: —An bemarse ibmar-soggwen an egismogodo. Bemar anga sogmalana:
LUK 20:4 Bab-Dummad-diigi-ogleged-igar imakega, ¿doa Diigi-dule-oged-Juan-barmiar be insae? ¿Bab-Dummad barmiali, igi, dulemar barmiali? Anga be sogmalana.
LUK 20:5 Degi, Judío-dummagan muchub-muchub na sogdemalad: “Bab-Dummad barmiarye anmar sogmalale, anmarga sogdagoed: ‘Degite, ¿ibiga bemar Diigi-dule-oged-Juan-bengusmarsunna?’
LUK 20:6 Dulemar barmiarye anmar sogbalile, dulemar bela akwagi anmar-makmaloed. Ar ade, bela nue sogmalad, ‘Diigi-dule-oged-Juan, Bab-Dummad-gayaburba-barsoged-sunnadye.’ ”
LUK 20:7 Degisoggu, Judío-dummagan, Jesús-abin sogdemarsun: —Anmar wissurmala, doa Diigi-dule-oged-Juan-barmiali.
LUK 20:8 Degi, Jesús, abin-imakdemosun: —An bemarga sogosurmarmodo, wede doa-nuggi we-ibmar an imakdiiye.
LUK 20:9 Geb degi, Jesús dulemarga burbar-sunmaklegedgi sunmakdesun, sogded: “Ibagwengi, dule-wargwen nainugi uva digsado. Nainu-ibed dulemar-arbamaladga na e-nainu urmaksado. Geb degi, nainu-ibeddi undar na yoggunaded.
LUK 20:10 ”Uva-weed-ibagan-mosgu, nainu-ibed na e-mai nainugi-arbamaladse barmialid. Adi, uva-na-egadid abala suegar. Ar nainugi-arbamaladdi nainu-ibed-e-mai ese nonigu, sabsur sarsosmalad. Geb degi, unnila arganagwabi gannar barmismalad.
LUK 20:11 ”Geb degi, nainu-ibed e-mai-baid-barmiarbalid. Ar we-mai sabsur sarsosmarbalid, degi, sabsur-wiosmarbalid. Geb degi, unnila arganagwabi barmismalad.
LUK 20:12 Degi, nainu-ibed irbaagi gannar na e-mai-baid barmiarbalid. Ar dulemar-nainugi-arbamalad we-mai nue-naibi imaksamarbargu, nainu-dikarba metemalad.
LUK 20:13 ”Geb degi, nainu-ibed sokarsunnad: ‘¿Emide, igi an saosunna? An-machi na nue-sabedi an barmidodo. Ar an-machi-dakdamalogu, adi, egi-binsaed-nikaadamaladba gwen oakalogosurmarsua.’
LUK 20:14 ”Ar nainugi-arbamalad, nainu-ibed-machi dani dakarmargu, na ega sogdemalad: ‘We-dule-danikidi e-bab-burgwisar, nainu bela egadbi guoed. Degisoggu, anmar we-machi-oburgwemarsun, adi, nainu anmargadga guegar.’
LUK 20:15 Machigwa-gasmargu, nainu-dikarba metemalad, geb degi, oburgwismarsunnad.” Jesús dulemar-e-itobukmaladga sogded: “¿Degite, nainu-ibed, igi dulemar-nainugi-arbamalad-imaknoniko be insae?
LUK 20:16 Nonikogu, dulemar-nainugi-arbamalad-oburgwenonikoed. Geb degi, dule-baiganga na e-nainu urmaknonikoed.” Ar weyob Jesús ibmar soge itosmargu, sogdemalad: —Bab-Dummad mer deyob anmar-imakena gadin.
LUK 20:17 Jesús, nuu Judío-dummagan-dakdegu, amarga sogded: —Bab-Dummad-Gardagi narmakar naid: ‘Akwa dule-neg-sobmaladse-oballesadi, neg-sobleged-e-akwasailaga gunonikid.’ Salmo 118:22 ”¿Wede ibi obarsunna?
LUK 20:18 Ar we-akwa-nuedgi dule argwachale, we-dule, ese bibisgoed. Ar we-akwa dulegi argwachardi, we-dule ese ubigwar guoed.”
LUK 20:19 Dule-irwa-Bab-Dummadse-gormalad-e-dummagan, degine, Garda-Narmaked-Dulemar, magar-itosmalad, Jesús we-ibmar-burbar-sogsadi yamo emarga sognaid. Degisoggu, Jesús-gabi guarmalanad. Degi-inigwele, dummagan dulemar-dobedba Jesús-gassurmalad.
LUK 20:20 Judío-dummagan yamo-Jesús-argaega dulemar-barmisad. Amar yamo dule-nuedyob na imakarmalad, adi, Jesús ibmar-noar-sunmakedgi gamalagar. Jesús ibmar-noar-sogele, dummad-negdakmaidga-ukmalaga gamaloed. Adi, Jesúsʼga igar-itogegar.
LUK 20:21 Yamo-Jesús-argamaladi Jesúsʼse egichiarmalad, ega sogdemalad: —Odurdaked-saila, anmar be-wisdo, be innikigwadba ibmar soged, degi, innikigwadba be ibmar odurdakbalid. Degine, bedi dulemar emarbi be daked, ar ade, Bab-Dummad-Igar-Maidgi napiragwadba be dulemar-odurdakdiid.
LUK 20:22 Emide, anmar bese egisdo, Roma-dummad-Césarʼye-nugad-bennuked, ¿wede igar-nuedi? ¿Anmar bennukoe, igi, bennukosuli? ¿Igi be sogmosunna?
LUK 20:23 Ar Jesúsʼdi wemar-yamo-e-yardakdanikid mag daksoggu, amarga sogded: —¿Ar ibiga bemar yamo an-wilubdakdanimala?
LUK 20:24 Mani be anga oyogena. Jesúsʼse mani oyosmargu, Jesús sogded: —¿Ar wede we-manigi doa-wagar-wilub sisunna, degine, doa-nug narmakar-naibarsunna? Jesús-abin sogdemalad: —Roma-Dummad-César-wagar-wilub sii, degine, a-nug narmakar naibali.
LUK 20:25 Geb degi, Jesús, abin-imakdemosunnad: —Ar ibmar, Césarʼgadir, Césarʼba be ibsamardo. Ar ibmar Bab-Dummadgadirdi, Bab-Dummadba be ibsamardo.
LUK 20:26 Ar we-dulemar Jesús-sunmakedgi dulemar-asabin geg Jesús-yardakgusmalad. Ar bur bule geger dakdemalad igi Jesús e-abin imaksad. Degisoggu, gwen bar-akar ega sogsasurmalad.
LUK 20:27 Geb degi, Saduceoʼmar Jesúsʼse nonimarmogad. Amarde sogmalad, “Dule burgwisale, gannar geg bar durguye.” Agala, Saduceoʼmar Jesúsʼse we-igar egichiarmalad,
LUK 20:28 ega sogdemalad: “Odurdaked-saila, Moisés anmarga Bab-Dummad-Gardagi narmakar obesad: ‘Ia mimmi-nikussuli ome-idu burgwisale, e-urba a-ome-nikuoye, adi, e-iaga anagan-urbegar.’
LUK 20:29 ”Dakargu, machimala gwenadgan-walagugle-gumaladi (7) weyob gusdo. Ia-dummad ome-nikusgu, anagan-urbissuli burgwisad.
LUK 20:30 A-sorbalid, a-ome-nikunonimogu, amba e-iayob mimmi-nikussuli burgwismogad.
LUK 20:31 Geb degi, a-sorbalid, amba a-ome-nikunonimogad. Deyob bela e-walagugled (7) a-ome-nikusmaladbiid, anagan-gwen-obessuli bela burgwismalad.
LUK 20:32 Geb a-sorba ome burgwismosunnad.
LUK 20:33 ”Ar dule-gannar-durguoed-iba nonikile, a-omede, ¿doa-omega guosunna, ar bela na e-gugle-nikusmaladbiid (7)?”
LUK 20:34 Geb degi, Jesús, Saduceoʼmar-abin-imakdegu, sogded: “Dulemar we-napneggi, na ome nikumalad, degi, sui-na-nikudamalad.
LUK 20:35 Ar dulemar-nabir-Bab-Dummad-negse-dogmaloeddi, degi, gannar-durgumaloeddi, gannar ome-nikunai, degi, sui-nikunai guosurmalad.
LUK 20:36 Ar ade, we-dulemar bar burgosurmalad. Amar baliwiturmaryob gunonimaloed, Bab-mimmiganga gumaloed.
LUK 20:37 ”Ar burgwismalad-gannar-durguoye-soglegedi, Moisés anmarga oyosmogad. Deun sapi-bula-gummakmai-daksadgi narmaksagu, Bab-Dummadgi sogsagusad, Bab-Dummadi Abraham-e-Bab-Dummadye, Isaac-e-Bab-Dummadye, degine, Jacob-e-Bab-Dummadye. Degisoggu, Moisés anmarga oyodo, dule-burgwismalad gannar durguoye.
LUK 20:38 Ar ade, Bab-Dummad, dulemar-burgwarmalad-e-Bab-Dummadsulid. Bab-Dummad, dulemar-dula-gudidimalad-e-Bab-Dummadid. Ar Abraham, Isaac, degi, Jacob burgwismar-inigwele, Bab-Dummadgardi amba we-dulemar dula gudidimalad.”
LUK 20:39 Abala Garda-Narmaked-Dulemar Jesúsʼga sogdemalad: —Odurdaked-saila, nue imas be sogsado.
LUK 20:40 A-sorbali, dulemar gwen bar Jesúsʼse ibmar-egisbi ito nadsurmalad.
LUK 20:41 Geb degi, Jesús Judío-dummaganga sogded: “¿Degite, ibiga sogmarsunna, we-Cristo, Rey-David-wagwaye?
LUK 20:42 Ar David-sunnad soged, Namakleged-Gardagi: ‘Bab-Dummad an-Dummadga sogsad: An-argan-nuedsik be sige,
LUK 20:43 be-isdarmalad an bela ogalakuedse be sige.’ ”
LUK 20:44 “Ar David, Cristoʼga soged, be an-Dummadye. Degite, ¿Igi-e-wagwaga Cristoʼde gubarsunnoe?”
LUK 20:45 Bela dulemar Jesús-itobukwadgi, Jesús na e-sapinganga sogded:
LUK 20:46 “Garda-Narmaked-Dulemargi nue salakarmar, mer amaryob be damalo. Ar amardi mor oyaarmakdiir na yeer itodamalad, degine, dulemar bela ese ibmar-ukleged-neggi goledbimalale, yeer itodamarbalid. Amardi Judíoʼmar-onmakedneggi dule-dummagan-gan-sigedginbi sigbidamalad, degine, ibagi mas-gullealir, dummagan-gan-sigedginbi sigbidamarbalid.
LUK 20:47 ”We-Garda-Narmaked-Dulemar yamo-yardakar ammormar-ei-sui-burgwismalad-ibe neg atursadamalad, degine, dulemar yeer e-dakegala yamo suitii Bab-Dummadse-gorgwisdamalad. Ar we-Garda-Narmaked-Dulemar deyob damaladba bur bule dule-baiganba sabsur-odurdaklemaloed.”
LUK 21:1 Jesús Bab-Dummadse-goled-neggi sigua, daksigusad, dule-mani-ibgan mani-urbed-ulu-yagi Bab-Dummadga mani urbenonidamalad.
LUK 21:2 Degi, mukwa-wileged-wargwen, ei-sui-burgwisad, mani-esnon-gwabo egwachamogad, daksabalid.
LUK 21:3 Jesús sogded: —Napira an bemarga soged, we-mukwa-wileged, ei-sui-burgwisad, we bur bule dulemar-baiganba mani uksad.
LUK 21:4 Ar baigan Bab-Dummadga-mani-uksaddi, gwabgusad uksamalad. We-mukwadi e-wilesaa-gudiidgine, belagwapa e-mani-bukwad uknonikid.
LUK 21:5 Bab-Dummadse-goled-neg-sobaledgi dulemar sunmakbukmalad, e-akwamar yeerdakleye, degine, dulemar a-neg-yeerdaklegega-ibmar-uksamalad yeerdaklebarye. Agi, Jesús sogded:
LUK 21:6 —Ar bemar weyob we-negdakedi, ibagan nonikoed, bipisaale akwa-gwagwensaar birgi-birgi bar sigosulid, bela ayaroed.
LUK 21:7 Jesús-sapingan, Jesúsʼse egichiarmalad: —Odurdaked-saila, ¿sana degite, Bab-Dummadse-goled-neg ayarosunna? We-ibagan-mosar, ¿igi-neg-gudagosunna?
LUK 21:8 Geb degi, Jesús sogded: “Nue salakarmar, mer dulemarse yardaklemalo. Ar bukidar yamo anyob imaknonimaloed, sognonimaloed: ‘Ani an Cristo, Bab-Dummad-dule-wargwen-barmidagoye-sogsad-duleye.’ Degine, sognonimarbaloed: ‘Neg nue-dukumossunye.’ Degi-inigwele, mer eba be nagumalo.
LUK 21:9 ”Bila-onogedginbi neg-naguar be itodamaloed, degi, neg-urwedgibi naguar be itodamarbaloed. Deyob neg-gualile, mer be dobgumalo. Ar we-ibmarmar-inse guergebed, degi-inigwele, neg bato emiskwaa berguodeeye soglesulid.”
LUK 21:10 Geb degi, Jesús amarga sogdebar: “Dulemar-yar-baid-baidgi-bukmalad na bila ononanai gudamaloed, degi, reymar na muchub-muchub egi yolenanai gudamarbaloed.
LUK 21:11 Degine, negabandur-dummagan nagumai gudagoed. Yar-baid-baidgi ukud-dummad, degi, uellemalad-bukidar-ainimai gudabaloed. Dobed-dummad nagumai, degine, nibneggi ibmarmar-wilubgan-dakledisulid-dummagan oyolemai gudagoed.
LUK 21:12 ”Ar bela we-ibagan-bulegan-iduale, dulemar bemar-baregindamaloed, bemar-gamaloed, degine, Judíoʼmar-onmakednegse bemar-sedmaloed, esgaryagi bemar-metemaloed. Ar bemar, an-sapinganga gumalad-ulale, reymar-asabin, degi, dummagan-negdakmamaid-asabin bemar-sedmaloed.
LUK 21:13 ”Ar deyob ibmarmar-guoedi, adi, bemar angi sunmakegalad.
LUK 21:14 Degisoggu, mer bai-itomalo, mer be binsamalo, an na san bendakegala, ¿igi an sogodibeye?
LUK 21:15 Ar ani an bega binsaed-nued ukoed igi be sogoe. Bela dulemar-begi-gwisgudimalad begi obinosurmalad, ar ade, geg be-abinsae gumaloed.
LUK 21:16 ”Ar be-babganse-bakar, be-ukmaloed, be-iamar, be-urbamar, be-gwenadgan, be-aimar, dummaganga be-ukmaloed, degine, gwen-gwen bemar oburgwilemaloed.
LUK 21:17 Be an-sapinganga-gumalad-ulale, bela-dulemar isdar be-dakmaloed.
LUK 21:18 Ar degi-inigwele, be sailagia-wargwensaar bei gwen yogguosulid.
LUK 21:19 Ar bemar galakusulile, be abonolemaloed.
LUK 21:20 ”Ar bemar dakalir, sorda-bila-onomalad Jerusalén-ebiris bukwa, be wismardo, we-Jerusalén-neggwebur-bibisged-ibagan warmaknoniki.
LUK 21:21 Degisoggu, a-ibagi, Judeaʼgi be gudiile, yalaganba be wakinno. Bemar-Jerusalén-neggwebur-abargi-gudiile, be nomalo, degine, bemar-sapurba-gudimalale, mer bar neggweburse dagmalo.
LUK 21:22 ”Ar a-ibagangine, Bab-Dummadi dulemar-e-sogedba-nanadisurmalad sabsur-odurdakoed. Ar igi Bab-Dummad-Gardagi-narmakar-nai, deyobi guoed.
LUK 21:23 Degine, a-ibagangine, ammormar-gurgin-nikagudimalad, degi, mimmigan-gwaru-sedimalad, nue-wilemaloed. Ar ade, a-ibagangi we-napneggi ibagan-nunmak-itoleged naiguoed. Degine, Bab-Dummad we-dulemargi nue-odurdaked-dummad nasikoed.
LUK 21:24 ”Degine, dulemar es-suidgi-ewarar burgwemaloed. Deginbali, galesmalad bela neggwebur-bamaladse seledmaloed. Degine, dule-Judíoʼsurmalad, Jerusalén-neggwebur nue-wiononimaloed. We-dulemar, Jerusalénʼgi-gudigumaloed-e-ibagan-berguoedse, deyob-gudii gumaloed.”
LUK 21:25 Jesús sogdebar: “Geb degine, dad-ibelergi wilubgan dakledagoed, niigi, degine, niisgwamargi wilubgan dakledagoed. Degine, napneggi dulemar-yar-baid-baidgi-bukmalad demar-uurmakedba, degi, demar-arwedba, surbinsa itodamaloed.
LUK 21:26 Dulemar-bukidar dobedba, degine, ibmar-dummagan we-napneggi-akar-gudagoedba negoedmaloed. Ar ade, nibneggi ibmar-dummagan gala-nika-nanaid bela giglimakoed.
LUK 21:27 ”Geb degine, ani Dule-Machi, mogir-imbaba an-ganguedba, degi, bela-bela an-gangued-yeerdaklegedba-dani an-dakdamaloed.
LUK 21:28 Ar ibmar-wegiimalad deyob guar be dakele, gandik be samalo, degi, na be guakwaa gudigumalo. Ar ade, be-san-burba-abonoleged-ibagan warmaksad.”
LUK 21:29 Degi, Jesús na e-sapinganga burbar sogdebalid: “Nue be higuera-sapi, degi, sapi-baigan, be dakmar.
LUK 21:30 Wegi anmar-yargi sapimar bato gannar aramaksale, bemar nue wisid, yor omodaniki.
LUK 21:31 Amba deyobmodo, we-ibmarmar an-bemarga-sogsamaladi, deyob guar bemar dakalir, bemar wisdo, Bab-Dummad-e-negdakmaid bato warmakdaniki.
LUK 21:32 ”Napira an bemarga soged, we-dulemar-dula-gudimalad-burgwed-idu, we-ibmarmar bela guedsegad.
LUK 21:33 Nibnega, degi, napnega bela berguoed, ar an-gayaburbadi berguosulid, degisadeguoed.
LUK 21:34 ”Bemargi na be-dukin salakarmarmo. Mer mas-gunnedginbi be binsadii gumalo. Degine, mumguedginbi, degi, we-napneggi-ibmar-naidginbi mer binsadii be gumalo. Ar degiile, abakalegi, bemar we-ibagan-edarbedisulid ukiarmakale bemargi danikile.
LUK 21:35 ”Ar igi ibmar-durgan ibmar-galegedgi ukiar galedae, deyobi, we-ibagan bela-dulemar-we-napneggi-bukmaladgi ukiar nonikoed.
LUK 21:36 Degisoggu, nue neg-itoagwar be gudii gumar. Gatik Bab-Dummadse gordii gumar. Adi, bemar unnitiba we-ibmar-gudagoedgi be wakinmalagar, degine, a-ibagangi, Dule-Machi-asabin gwage-swilidik gwichigumogagar.”
LUK 21:37 Jesús, Bab-Dummadse-goled-neggi bane-bane neg-ibgi dulemar-odurdakdii gualid, degine, neg-mutikdi, Olivosʼye-yar-nugadse naddaed.
LUK 21:38 Degine, bela dulemar neg-wakdar Bab-Dummadse-goled-negse, Jesúsʼse e-odurdaked-itogega nonidamalad.
LUK 22:1 Dakleargu, Madu-Inasuli-Gulleged-Iba warmakdanikid. A-iba, Oburgwilegoenad-Ibaye bilebalid.
LUK 22:2 A-ibagan-warmakdanikidgine, dule-irwa-Bab-Dummadse-gormalad-e-dummagan, degi, Garda-Narmaked-Dulemar, igar-amiarmalad, igi-saele Jesús-oburgwemalodibeye. Degi-inigwele, wemar dulemar-dobmarbalid.
LUK 22:3 Degi, nia-saila-Satanás Judasʼgi dognonikid. We-Judasʼde, Jesús-sapingan-e-ambe-gakabogwad-wargwenad-gued, Iscarioteʼye nugbalid.
LUK 22:4 Degi, Judas dule-irwa-Bab-Dummadse-gormalad-e-dummaganse, degi, suar-ibmala-e-dummaganse nadegusad. Amarse-modapgu, ega sogdapid, ede Jesús emarga ukoye.
LUK 22:5 Judío-dummagan weligwar itosmalad. Judasʼga-mani-ukega Judas-ebo igar-nabosmarsunnad.
LUK 22:6 Geb Judas sogsad, nueganbiye. Degisoggu, Judas, sana Jesús-darba-ukodibeye, binsadii gualid.
LUK 22:7 Madu-Inasulid-Gulleged-Ibagan mosgu, Oburgwilegoenad-Iba-insaega, sibad-wawaad-gunnega sibad-wawaad-oburgwergebed.
LUK 22:8 Agine, Jesús, Pedro, Juan-ebo, barmisad. Amarga sogsad: —Anmar-idu be namar. Iba-onogegala ibmar guagwar be imaknamar, adi, agi anmar mas gunmalagar.
LUK 22:9 E-sapingan-warbogwad Jesúsʼga sogdemalad: —Degite, ¿bia anmar be-idu neg-guagwar imakbi be abege?
LUK 22:10 Jesús, abin-sogded: —An bega sogmalo, neggweburse be dogdapmalale, dule-wargwen be abingudamaloed. Geb a-dule gwidugi dii-semai be dakdamaloed. A-dule-sorba be namalo. Ar bia dogdapoe, a-neggi bemar dogdapmogoed.
LUK 22:11 A-neg-ibedga be sogmalo: ‘Odurdaked-saila sogye: ¿Bia Oburgwilegoenad-Ibagi an-sapinganmala an mas-gunnoed-neg siiye?’
LUK 22:12 Geb neg-ibed neg-dummad guagwar bato nuesaale niba-aila-birgi bemarga oyogoed. Agi bemar guar anmar-idu mas simaloed.
LUK 22:13 Jesús-sapingan-warbogwad nadmarsunnad. Ar igi Jesús emarga sogsa, deyob dakdapmalad. A-neggi ibagi mas-gunmalagala, bela-ibmar guagwar urbismalad.
LUK 22:14 Degine, masgunned-wachi-mosgu, Jesús mese-naba na e-sapingan-bur-dummagan-warambe-gakabogwadmala (12) signonikid.
LUK 22:15 Jesús na e-sapinganga sogded: —Ibiyobi an bemarbo, an-burgwed-iduar Oburgwilegoenad-Ibagi-mas-gulleged an edarbedii gusa.
LUK 22:16 Ar napira an bemarga soged, we-mas bar an gunnosulid. Bab-Dummad-e-negdakmaidgi geb an gundapbaloed.
LUK 22:17 Degine, Jesús nog-susgua, dog-nuedye Bab-Dummadga sogsad, a-sorba, sogded: —We be gobmar, na be mimimar.
LUK 22:18 Ar an bemarga soged, emigindi, vinoʼdi we-sorba bar an gobosulid, Bab-Dummad-e-negdakmaid-nonikidse geb an gobdapbaloed.
LUK 22:19 Geb degi, Jesús madu susbalid, dog-nuedye Bab-Dummadga sogsabalid. Geb madu bisge-bisge-imaksagu, e-sapinganga uke-uke imaksad. A-sorba sogded: —We-madu an-sanad, bemar-ular uklegoedid. Weyob be imakmaloed, adi, angi be binsamalagar. Geb we-madu guchamarsunnad.
LUK 22:20 Mas-guchamalad-sorba, Jesús noggi-vino-siid susbalid. Jesús nog susgua, sogded: —We-vino, an-ablisad. An-ablis, Bab-Dummad-Israel-Dulemarbo-Igar-Bini-Mesnaid-wilubganad. We-an-ablis, bemar-ular milegoed.
LUK 22:21 Ar emigindi, dule-darba-an-ukoeddi we-mesegi an-abargi simogad.
LUK 22:22 Napira an bemarga soged, ani Dule-Machi, ar igi Bab-Dummad bato epenne angi sogsagusa, ar deyob an guoed, an burgoed. Ar dule-darba-an-ukoeddina, nue-wilegoed.
LUK 22:23 Geb degi, e-sapingan muchub-muchub sogdemalad, wede doa darba Jesús-ukodibeye.
LUK 22:24 Jesús-sapingan na muchub-muchub gaarmalad, ar doa bur emarba dummad guodibeye.
LUK 22:25 Jesús e-sapinganga sogded: “Reymar-neggwebur-semamaidi, dulemargi bur-dule-dummad na san-imakdaed. Degisoggu, bela ega ibmar imakbi abedamarsunnad. Dule-neggwebur-semaid, nued ibmar-imakmaiye na dukin sogdamalad.
LUK 22:26 Ar bemardi deyob guewilubsulid. Bemar-abargi dummadga-gudiid dule-bipigwadyob san-imakewilupid. Be dulemar-iduedile, dulemar-maiga be guergebed.
LUK 22:27 Ar ¿doa bur dule-dummad-sunna? ¿Dule mese-naba-sigedi? ¿Dulemar mese-naba-simaladga mas-dakedi? ¿Dule-mese-naba-siid bur-dule-dummadsursi? Deyobdo. ”Ar an bemar-dummad-inigwele, bemar-abargi bemar-maiyob an gudiid.
LUK 22:28 ”An-wilubdakleged-abargi, bemar anba gudigudamalad.
LUK 22:29 Degisoggu, igi-Bab-Dummad, ega-negseega, an-nug-imaksa, deyobi ani, an bemar-nug-imakmogad, adi, bemar negsemogagar.
LUK 22:30 Adi, bemar an-negdakmaidgi an-mese-naba mas gunmogagar, degi, gobmogagar, degine, ologan-nuedgi-sii Israel-dorgan-sogambe-gakabogwadga (12) igar-nabosii gumogagar.”
LUK 22:31 Dummad-Jesús sogdebalid: —Simón, Simón, be dake, nia-saila-Satanás trigo-madubur-omukulegedyob-bemar-imakega bemar-egichis gudiid, adi, isguedgi bemar-egwanegar.
LUK 22:32 Ar andi, Bab-Dummadse bega gochad, adi, ulubgi be angi-bensulid mer galakuegar. Unnila ichesaale be angi bangudoed, gannar be anse aibilisale, be-gwenadgan be ogannogo, adi, gatik anba nagumalagar.
LUK 22:33 Pedro, Jesús-abin sogded: —Dummad, an beba naegale an guagwar gudiid. An beba esgaryase-melleye sogele, beba an burgweye sogele, an guakwagwad.
LUK 22:34 Jesús, abin-sogded: —Pedro, an bega soged, gannir-namaked-iduar ilapaa be an-osulogoed.
LUK 22:35 Jesús e-sapinganga sogded: —Deunni, sagu suli, mani-seed-sagu suli, degi, sapat suli an be-barmisgu, ¿bemarga ibmar akusmala? Jesús-abin, sogdemalad: —Suli. Unniguar anmar ibmar-nikagusmala.
LUK 22:36 Jesús sogdebalid: —Emisgindi, an bega sogmardo: Dule sagu-nikale, sedo. Mani-urbed-sagu-nikale, sedbalo. Ar dule es-suid sulile, na e-suba uko, adi, a-manigi es-suid bakegar.
LUK 22:37 An bemarga sogmalad, ar angi Bab-Dummad-Gardagi-narmakar-naid-sogedba guergebed. Weyob sognaid: ‘Dulemar-isgumaladyob imaklesmogad.’ Isaías 53:12 ”Ar deyob angi-narmakar-naidyob guergebed.”
LUK 22:38 Geb degi, e-sapingan sogded: —Dummad, anmar es-suid-warbo nikmala. Jesús, abin-sogded: —Mer bar we-ibmargi sunmakmar.
LUK 22:39 Jesús neggweburgi-nodgua, Olivos-yarse nadegusad, ar ade, gusgu a-yarse naddaed. E-sapingan eba nade gusmarmogad.
LUK 22:40 Emar-nadapidse warmaksamargu, Jesús e-sapinganga sogded: —Bemar isguedgi-wilubdaklegedgi mer galakumalaga, Bab-Dummadse gormar.
LUK 22:41 Jesús na e-sapingangi bannabasaar naded. Agi yokorgi sindigar sigisgu, Bab-Dummadse goted.
LUK 22:42 Sogded: “Baba, an-idu, ina-gagbid-gobedyob beedse igar-buled-naidgi wilebisur be an-abegele, melle be an-wiogodo. Degi-inigwele, an-sogedbarsuli, unnila be-sogedba be imakoed.”
LUK 22:43 Geb agine, baliwitur-wargwen Jesús-ogannogega nibneg-akar aidenonikid, ese magarononikid.
LUK 22:44 Ar Jesús bela-bela nue-surbinsa-itogusgu, bur bule Bab-Dummadse gorsigisad. E-wimakedi abeyob napase dedemaknai gusad.
LUK 22:45 Jesús Bab-Dummadse-gorsiid-gwisgusgu, e-sapingan-bukwadse nonikid, daknonikid, bukib-binsamaladba gabmamai.
LUK 22:46 Jesús amarga sogded: —¿Ar ibiga bemar gabmamai? Gwisgumala, Bab-Dummadse gormala, adi, isguedse be wilubdaklearmalar melle galakuegar.
LUK 22:47 Jesús amba e-sapinganga sunmakgwichi, dulemar-bukidar ese duurmaknonikid. E-ambe-gakabogwad-wargwenad-Judas, emar-idudanikid. A-dule Jesúsʼse warmaknonigu, ega nuedye-sogega ei-wagar unonikid.
LUK 22:48 Degi, Jesús ega sogded: —Judas, ¿wagar-uar, Dule-Machi darba be uke?
LUK 22:49 Jesúsʼba-gudimalad dakdegu, igi igargan gudagoe, Jesúsʼga sogdemalad: —Dummad, ¿anmar es-suidgi dulemar-eware?
LUK 22:50 Jesús amba yoo abin-imake, e-sapin-wargwen dule-irwa-Bab-Dummadse-goled-bur-dummad-e-mai naibi-imaksad, e-uaya-nuedsikid ei siksad.
LUK 22:51 Geb degi, Jesús ega sogded: —¡Gusa! Mer bar ese achae. Geb Jesús dule-uaya-ebusa imaksad, dule-onudaksad.
LUK 22:52 Degi, Jesús dule-irwa-Bab-Dummadse-gormalad-e-dummadga, suar-ibmala-Bab-Dummadse-goled-negdakmalad-e-dummaganga, degi, Judío-girmar-dummagan-ese-nonimaladga sogded: —¿Ibiga bemar dule-ibmar-atursaed-gaeyobi anbina es-suiganyalaba, suarmaryalaba be danimala?
LUK 22:53 Bane-bane an bemar-abargi Bab-Dummadse-goled-neggi gudigusgu, gwen be an-gassurmalad. Ar emigindi, bemar-an-gamalaga, ibagan nonikid, degi, nia-sogedba ibmar-imaked-iba nonibalid.
LUK 22:54 Dulemar Jesús-gasmargu, dule-irwa-Bab-Dummadse-goled-bur-dummad-negse sesmalad. Agine, Pedro bannabasaar Jesúsʼba nadap gusad.
LUK 22:55 Degi, suar-ibmala neg-imba-abargi soo-ogasmalad, a-dikarba sigismalad. Geb Pedro amar-abargi signonimogad.
LUK 22:56 Bunagwa-arbaedi, soo-naba Pedro-sii dakargu, nuu dakded, sogded: —We-dule Jesúsʼba gudigusmoga.
LUK 22:57 Pedro osulosad, sogded: —Bunagwa, we-dule aku an dake.
LUK 22:58 Degi, doga-nadsuli, dule-baid Pedro-dakarmogad, ega sogdemogad: —Be-dule amba Jesús-sordamogad. Pedro, abin-sogded: —An a-sordasuli.
LUK 22:59 A-wachi-irgwen-nasad-sorba dule-baid sokarmogad: —Nabiri, we-dule Jesúsʼba gudigusmoga. Be dake, Galilea-dolad.
LUK 22:60 Geb degi, Pedro sogded: —An wissuli ibugi be anga sunmakgwichi. Pedro amba sunmakgwichidgi gannir namakalid.
LUK 22:61 Geb degi, Dummad-Jesús, Pedro-dakdegu, Pedro, ebinsaas-naded, igi Jesús ega ibmar sogsa: “Gannir-namaked-iduar ilapaa be an-osulogoye.”
LUK 22:62 Degi, Pedro magaba nodgu, ise-boar naded.
LUK 22:63 Dulemar-Jesús-mer-wakinnega-edarbebukmalad Jesúsʼgi dodoarmalad, degi, Jesús-sarsoarmarbalid.
LUK 22:64 Ei-ibya edichamargu, wagargi bibyosdamalad, geb ese egichiardamalad: —Degite, soge, ¿doa be-bibyosa? Jesúsʼdi gwen dulemar-abin-imakdasulid.
LUK 22:65 Degine, dulemar Jesús-nug-ichoegala, bukidar egi sunnasur sunmakdemarbalid.
LUK 22:66 Neg-oibosgu, Judíoʼmar-girmar-dummagan-neggwebur-sedimalad, dule-irwa-Bab-Dummadse-gormalad-e-dummagan, degi, Garda-Narmaked-Dulemar ambikunonimalad. Geb degi, igar-nabiromalad-negse Jesús-senonimalad.
LUK 22:67 Geb agi ese egichiarmalad: —Anmarga be soge: ‘¿Be Cristo?’ Jesús, amar-abin sogded: —Ar an bemarga sogdele, an Cristoʼye, be an-itossurmalaled.
LUK 22:68 Deginbali, an bemarse ibmar egichidele, bemar an-abin imaksasurmalaled, degine, be an-onossurmarbaliled.
LUK 22:69 Ar emigindi, ani Dule-Machi, dummadga-guega, Bab-Dummad-Bela-Gangued-Nikad-e-argan-nuedsik sigidapoed.
LUK 22:70 Bela ega sogdemalad: —Degisoggu, ¿be Bab-Dummad-Machisunde? Jesús, abin-sogded: —Ar bemar-sunnagwad bato sognanaid.
LUK 22:71 Geb na sogdemalad: —¿Ar ibiga dule-baid anmarga Jesúsʼgi bar ibmar-sogbi an abemarsunna? Ar anmar-sunnad na-dukin-sogsad itosmalad, ede, Bab-Dummad-Machiye.
LUK 23:1 Geb degi, bela-dulemar-igar-itobukmalad ainidmargu, Pilatoʼse Jesús-sesmalad, adi, ega igar-itogegar.
LUK 23:2 Geb degi, Judío-dummagan weyob Jesúsʼgi sognai guarmalad: —Anmar we-dule dulemar-binsaed-gadii itosad, sogdii, mer Roma-Dummad-Césarʼga mani ukoye. We-Jesús na dukin sogdiid, ede reyye, ede Cristoʼye.
LUK 23:3 Geb degi, Pilato Jesúsʼse egichialid, ega sogded: —¿Ar be Judíoʼmar-e-Rey? Jesús, abin-imakdegu, sogded: —Ar bede soged. Napirado.
LUK 23:4 Degine, Pilato, dule-irwa-Bab-Dummadse-gormalad-e-dummaganga, degi, dulemar-bukmaladga sogded: —An dakgua, we-dule gwen ibmar-oakalossur an daked.
LUK 23:5 Ar dulemar bur bule sogdemalad: —We-Jesús dulemar-oimakdiid. Bela Judea-yalaganba dulemar-odurdakdiid. Galilea-akar onoalid, emide, wesegus naid.
LUK 23:6 Geb degi, Pilato itoargu, dulemar soge, we-dule Galilea-akar noarye, egisdesunnad: —¿We-dulede, Galileaʼginedi?
LUK 23:7 Pilato itoargu, Herodes-negdakmaidgi Jesús daniki, Herodesʼse barmissunnad. Ar ade, deun Herodes Jerusalén-neggweburse gudimogad.
LUK 23:8 Herodes, Jesús-dakargu, weligwar itosad. Ar ade, dikasurgus Jesús-dakbigudiid. Degi, Herodesʼde, dulemar Jesúsʼgi-bukidar-sunmaked itodiid. Degisoggu, Herodes binsadsunnad, Jesús e-wagab ibmar-dakledisulid ega imakoergebye.
LUK 23:9 Herodes, Jesúsʼse bukidar ibmar-egisnai gualid. Ar Jesúsʼdi gwen abin-imaksasulid.
LUK 23:10 Degine, dule-irwa-Bab-Dummadse-gormalad-e-dummagan, degi, Garda-Narmaked-Dulemar Herodesʼga gannar-gannar Jesúsʼgi sunmaknanai guarmalad.
LUK 23:11 Geb degidbali, Herodes, e-suar-ibganmala, ibgwensur Jesús-dakded, egi dododed. Reymaryob ega mor-nued yosmarsunnad. Geb degi, Herodes, gannar Pilatoʼse Jesús-barmisad.
LUK 23:12 A-ibagine, Pilato, Herodes-ebo gannar ai-nuedga gunonikid. Ar ade, iduardi ebo urwedimalanad.
LUK 23:13 Geb degi, Pilato, dule-irwa-Bab-Dummadse-gormalad-e-dummaganse, negsemamaidse, degi, bela-dulemarse, gochad.
LUK 23:14 Geb amarga sogded: —We-dule-be-anga-senonimalad, egi be anga sognonimalad, we-dule, neg-gagadiiye. Ar bemar-wagab an ese ibmar egichisad. Degite, we-dule neg-ichodiiye bemar sogedi, gwen an deyob daksulid.
LUK 23:15 Ar Herodesʼbela gwen-neg-oakalossuli daksamogad. A-ulale, gannar anse we-dule barmialid. Degisoggu, Jesús gwen-neg-oakalossursoggu, oburgwilegewilubsulid.
LUK 23:16 Unnila an nue-sabsur-odurdakoed. A-sorba, an we-dule onogoed.
LUK 23:17 Ar ibagi, gusgu Pilatoʼde igar-maidba dule-wargwen-esgaryagi-mellesiid onodaed.
LUK 23:18 Ar dulemar-bukidar-bukwaddi bela dule-wargwennayob oimakdemalad, sogdemalad: —¡We-Jesús be oburgwe! ¡Barrabás be anmarga onoge!
LUK 23:19 We-Barrabásʼde Jerusalénʼgi, Roma-dulemargi gwisgusad-ular, degi, dule-oburgwisbalid-ular, esgaryagi metegusmalad.
LUK 23:20 Pilato Jesús-onobiedba idu-sogsadyobi gannar dulemarga sogdebalid.
LUK 23:21 Ar dulemardi oimakdemarbalid: —¡Nakrusgi bioke! ¡Nakrusgi bioke!
LUK 23:22 Geb Pilato gannar ilapaagi dulemarga sogdebalid: —Ar degite, we-dulede, ¿ibu-ibmar-isgana-imaksa be dakmarsunna? Ar gwen ibmar-isgana imaksasur an daked. Degisoggu, oburgwilegewilubsulid. Unnila an nue-sabsur-odurdakoed. A-sorba, an we-dule onogoed.
LUK 23:23 Ar dulemardi binnasuli oimakdemalad, nakrusgi Jesús-biokye, sogdemalad. Ar degite, dule-irwa-Bab-Dummadse-gormalad-e-dummagan, degi, dulemar-oimakbukwad-sogedba bur imaklesad.
LUK 23:24 Geb degi, Pilato dulemar-egisbukwadba imaksasunnad, Jesúsʼga nakrusgi-oburgwed-igar mesissunnad.
LUK 23:25 Pilato, dulemarga, Barrabás-Roma-dulemargi-gwisgusadi, emar-oburgwisad-ular-esgaryagi-mellesiid, onossunnad. Geb Pilato suar-ibmalaga Jesús-uksasunnad, adi, dulemar, e-itolegedba Jesús-imakmalagar.
LUK 23:26 Roma-suar-ibgan Jesús-sesmargu, dule-wargwen Jerusalénʼse-dani abinguarmalad. We-dulede, Cireneʼginedid, Simónʼye nugad. Gandikidgi a-dule-gasmalad, agine, e-gukingi nakrus-mesismalad, adi, Jesús-sorba nakrus-semai guegar.
LUK 23:27 Dulemar-bukidar Jesús-sorba duurmaknadap gusmalad. Omegandi, Jesúsʼga bonadapi, degi, bukib-binsaedba ega oimaknadapi gusmalad.
LUK 23:28 Jesús omegansik aibiridgua, amarga sogded: “Omegan-Jerusalénʼginmalad, mer anga be bomar. Na dukin be bomar, be-mimmiganga be bomar.
LUK 23:29 Ibagan nonikoed, dulemar sogdamaloed: ‘Omegan-geg-mimmi-nikumaladgi ise-nued binsalesye. Omegan-gusgu-muu-neggi-geg-gurgin-nikumaladgi ise-nued binsalesye. Degi, omegan-mimmigan-onussurmaladgi ise-nued binsalesye,’ sogdamaloed. ‘Ar we-omegandi na-e-mimmiganba gwen wilegosulid.’
LUK 23:30 Geb degi, dulemar sabsur-wilenaidba yarmarga sogdemaloed: ‘¡Be anmargi batedage!’ Yar-mulluganga sogdemaloed: ‘¡Be anmar-omursunna!’
LUK 23:31 ”Anbela an gwen-neg-oakalossulid-inigwele, weyob an-imaknanaid. Dule-neg-oakalosar-bulesunna, bur bule wiomalodo.”
LUK 23:32 Suar-ibgan dule-isganamar-warbo oburgwemalaga Jesúsʼba semai gusmarbalid.
LUK 23:33 Nonogarye-neg-nugadse mosmargu, agi nakrusgi Jesús-bioksamalad. Dulemar-isgana-warbogwad nakrusgi bioklesmarmogad. Wargwen, Jesús-argan-nuedsik ogwichismalad. Baiddi, Jesús-argan-sapiledsik ogwichismalad.
LUK 23:34 Degi, Jesús sogded: “Bab-Dummad, we-dulemar isgussuliyob be dako, ar wissurmalad ibu imaknanai.” Degi, suar-ibgan Jesús-morgi dodoarmalad, wilubdaknai-guarmalad, igid-mor emargadga guodibeye. A-sorba, Jesús-mor mimismarsunnad.
LUK 23:35 Degine, dulemar-bukidar neg-gunaid dakbukwa gusmalad. Ar neggwebur-dakmamaidi, Jesúsʼgi dodonai gusmalad, sogdedamalad: —Ar ede, dule-baigandi nabir bendaksad. Ar we Cristoʼle, Bab-Dummad-susadile, na dukin bendakdo.
LUK 23:36 Amba suar-ibgan Jesúsʼgi dodonanai gusmarmogad. Geb gobega, vino-gagbid ega senonimalad,
LUK 23:37 ega sogdemalad: —Ar be Judíoʼmar-e-Reyle, na be dukin bendakdo.
LUK 23:38 Jesús-nakrus-birgi, Griego-gayaba, Latín-gayaba, degi, Hebreo-gayaba, weyob narmakar-nai gusad:
LUK 23:39 Dule-isgana-wargwen, Jesús-dikarba-nakrusgi-biokar-naimogad, Jesúsʼgi isdar-sunmaknai gusmogad, ega sogded: —Ar be Bab-Dummad-dule-yoedse-barmidagoye-sogsad-dulesursi. Degite, na be dukin bendake. Be anmar-bendakmoga.
LUK 23:40 Agine, nakrusgi-biokar-naid-baid, Jesúsʼgi-isdar-sunmaknaid-abin-imakded, ese uluded, ega sogded: —Ar Jesús-sunnaa be burgwe-sognaimogad. Degite, ¿be Bab-Dummad-dobsurde?
LUK 23:41 Ar anmardi nabiridba wilenaid. Ar anmardi, ibmar-isgana-imaksadba odurdaklenaid. Ar we-duledi, gwen ibmar-isgana imaksasulid.
LUK 23:42 Geb degi, Jesúsʼga sogded: —Be Reyga-negdakmaidgi-danikir, be an-insao.
LUK 23:43 Geb degi, Jesús, abin-sogded: —Napira an bega soged, emi-ibagi Neg-Nued-naidgi be anba gudiguoed.
LUK 23:44 Degine, yorukugusgua, bela napneggi negsichid nagusad, wachi-irbaase naigusad.
LUK 23:45 Degine, dad-ibeler gwen bar gassulid. Jerusalénʼgi Bab-Dummadse-goled-neggi, Neg-Islidikid-irwa-mor-naid, negabar achirmakde gusad.
LUK 23:46 Geb degi, Jesús binnasur goted, sogded: “Baba, be-argangi an-san-burba an uksun.” Deyob-sogsad-sorba, Jesús burgwided.
LUK 23:47 Roma-sorda-dulatar-sediid (100), weyob-ibmar-gusad daksagu, Bab-Dummad-nug ogannoded, sogded: “Ar we-dule, dule-nueddaed-napiragwadid, gwen-ibmar-oakalossulid.”
LUK 23:48 Bela dulemar-bukidar, Jesús nakrusgi-burgwenaid-dakbukmalad, bela we-ibmargan-gusad daksamargu, bela-bela na bukib binsadmalad, na dukin-dukin binasgargi sarsonanai negse nadmalad.
LUK 23:49 Ar bela Jesús-mag-dakmaladi, degi, omegan-Galilea-akar-eba-bipirmakdimaladi, bannaba we-ibmar-gunaid-dakbukwa gusmalad.
LUK 23:50 Deun, Judío-igar-nabiromalad-wargwen, Joséʼye-nugad mai-gusmogad. A-dulede, Arimatea-neggweburginedid, Judea-yala-dolad. José dakleargu, dule-nuedid, dule-igar-napiragwadbadaed-duled.
LUK 23:51 We-dulede, Bab-Dummad-e-negdakmaid nue edarbedimogad-duled. Joséʼdi, Jesús-oburgweye sogsamaladba gwen naigussulid, degine, emar-ibmar-imaksamaladba gwen akassurbalid.
LUK 23:52 We-dulede, Pilatoʼse nadegusad, Jesús-mui egisdapid.
LUK 23:53 José, Jesús-nakrusgi-burgwar-naid odesgu, atued-sibugi nue-obipirmaksad. Geb degi, José akwa-gwisar neg-uanga-siid-yaba, yoo-dule-egi-diglegedgi Jesús-mesisad.
LUK 23:54 Deun, a-ibagi, Ibmar-Guagwar-Sied-Ibad, bato obunnoged-iba warmakdanikid.
LUK 23:55 Omegan-Galilea-akar-Jesúsʼba-danigusmalad, José-Arimatea-sorba nadegusmalad. Neg-uan-siid daksamalad, degi, Jesús-diglesad bia mesilesad daksamarbalid.
LUK 23:56 Omegan negse-nonimargu, ina-biseb-wawaad, degine, gwallu-wawagwad-nuegan guagwar urbismalad, adi, Jesús-muigi eonamalagar. Geb degine, omegan Moisés-Igar-Maidba obunnoged-ibagi obunnosmarsunnad.
LUK 24:1 Itoged-iba-gebe-nagudedgine, wakudaryalaba omegan neg-uanse nadmalad. Gwallu-wawagwad-guagwar-imaksamalad sesmalad.
LUK 24:2 Omegan neg-uanse-mosmargu, bato akwa-dummad-neg-uan-yawagakgi-siid ainirar-sii dakdapmalad.
LUK 24:3 Neg-uan-yaba dogdemargu, Bab-Jesús-e-mui sate dakarmalad.
LUK 24:4 Jesús-mui-satedbali, omegan aku itobukmalad, wede igi gusa. Agine, machergan-warbo, mola-sibu-ise-dakar-dakargaed-yoimalad ese gwisgunonimalad.
LUK 24:5 Ar omegan nue dobe itomaladbali, napase e-bebe-ebulegedse dulluu imaksamalad. Machergan-warbogwad omeganga sogded: “¿Ar ibiga bemar dule-burgwarmalad-abargi dule-dula-gudiid be amimala?
LUK 24:6 Wegi bar maisuli, gannar durgusa. Ar Jesús amba Galileaʼgi-gudigu, igi bemarga sunmaksa, a be insamala.
LUK 24:7 Deun, Jesús bemarga sogsagusmalad: ‘Ani Dule-Machi, dulemar-isgudimaladse an uklegergebye, nakrusgi an bioklegergebye, degi, ibapaagi an gannar durguergebye.’ ”
LUK 24:8 Geb omegan Jesús-ibmar-sogsad ebinsadmalad.
LUK 24:9 Omegan-neg-uanse-gudimalad nonimargu, bela ibmar-gusad Jesús-sapingan-ambe-gakagwensakadga (11), degi, bela dule-baiganga, sogsamalad.
LUK 24:10 Omegan Jesús-e-sapingan-bur-dummaganga ibmar-sognonimaladi, wemalad: María-Magdalena, Juana, María Jacobo-e-nan, degi, omegan-baigan-eba-gudimalad.
LUK 24:11 Ar Jesús-sapingandi omegan-ega-ibmar-soged itossurmalad, binsa ee gordii daksamalad, egi bengusmalad.
LUK 24:12 Ar Pedroʼdi neg-uanse abarmakde gusad. Neg-uan-mosgu, yaba atakdegu, atuedbi bukwa daksad. Ar Pedro weyob-ibmar-gusad geger daksad, gannar negse aligusad.
LUK 24:13 Degine, amba a-ibagi dulemar-Jesúsʼba-nanaimalad-warbo Emaús-neggweburse nadap gusmalad. A-neggwebur Jerusalénʼgi wachi-irbo-nanalegedgi egi siid.
LUK 24:14 Amar-ebogwadi bela ibmarmar-gusadgi sunmaknadap gusmalad.
LUK 24:15 Degi-muchub-muchub-sunmaknadapmaladgine, Jesús-sunnad ese warmaknonikid, eba nade gusmogad.
LUK 24:16 Ar wemar-warbogwad aku Jesús-dake gusmalad. Ar ade, Jesús-dakega emar-ibya bargalesad.
LUK 24:17 Jesús amarga sogded: —¿Ibigi be sunmaknadapmala? ¿Ibiga be bukib itomarbali?
LUK 24:18 Gwensak, Cleofasʼye-nugadi, abin sogded: —¿Ar bebi wegi Jerusalénʼgi bela emi-ibmar-gusad wissurde?
LUK 24:19 Geb Jesús, abin-sogded: —¿Ibu-ibmala? Geb abin-imakdemalad: —Jesús-Nazaretʼginedgi bela-ibmarmar-gusad ¿be wissursi? We-Jesús Bab-Dummad-gayaburba-barsoged, gandikidba nued Bab-Dummad-asabin, degi, dulemar-asabin ibmar saed. Degi, gandikidba-sunmaked-dulebalid.
LUK 24:20 Degine, dule-irwa-Bab-Dummadse-gormalad-e-dummagan, degi, anmar-neggwebur-dakmamaid Roma-dummadga Jesús-uksamalad, adi, oburgwemalagar. Geb nakrusgi Jesús-bioksamalad.
LUK 24:21 ”Ar anmardi we-Jesúsʼgi, Israel-dulemar-abonogoedye binsadii gusad. Emide, ibapaagus deyob neggusad-akalad.
LUK 24:22 ”Ar omegan-anmar-abargi-bipirmakdimarmogadi, geger-ito anmar-imaksad. Ar a-omegande wakudaryalaba neg-uanse nadegusmalad,
LUK 24:23 degi-inigwele, Jesús-mui neg-uangi amissurmarlad. Degisoggu, gannar anmarse nonimargu, anmarga sognonimalad, emarde ibya apurusmarye, baliwiturmar-daksamarye. A-baliwiturmar ega sogsamarye, Jesús dula gudiiye.
LUK 24:24 ”Degine, a-sorba, abala anmar-sordamar neg-uanse nadegusmarmogad. Ar igi-omegan-sogsamala, deyob dakdapmalad. Gwen-Jesús daksasurmarmogad.”
LUK 24:25 Geb degi, Jesús amar-warbogwadga sogded: —Bemar akusunna itomalad. Bemar Bab-gayaburba-barsogmalad-sogsamalad-bengumalad-dulemarbalid.
LUK 24:26 Ar Cristoʼde nibnegse dummadga-megnaed-iduar bela-bela weyob wilegergebed.
LUK 24:27 Geb Jesús we-dulemarga Bab-Garda-narmakar-maidba egi-sunmaklenaid bela sogsad. Moisés-sogsad-narmakar-naidgi onoded, degi, bela Bab-Dummad-gayaburba-barsogsamalad egi-sogsamaladse ega ibmar sogsad.
LUK 24:28 Neggwebur-nadapmaladse warmaksamargu, Jesúsʼdi yamo nadegusaeyob imaksad.
LUK 24:29 Ar emar-warbogwad Jesúsʼgi ise-alamaknai gusmalad, ega sogdemalad: —Anmarba be beeye, bato neg sedogusye, bato neg mutikgudaniye. Degisoggu, Jesús, emarba bessunnad.
LUK 24:30 Degi, mas-gunnega mese-naba sigdemargu, Jesús madu-susa imaksad. Geb Bab-Dummadga dog-nuedye-sogsagu, madu bisge-bisge imaksad, geb emarga uksad.
LUK 24:31 Geb degi, e-warbogwad Jesús-mag-dakdemalad. Degi-sii emar-idu binnided, gwen bar daksasurmalad.
LUK 24:32 Geb degi, ebogwad na muchub-muchub sokarmalad: “Anmarga igarba Bab-Dummad-Gardagi sunmakdanigu, anmar-gwagede, ¿nue-weligwar itodani-gussursi?”
LUK 24:33 Wemar-warbogwad a-gines, a-wachigi, gannar Jerusalénʼse aligusmalad. Jerusalénʼse nonimargu, Jesús-sapingan-ambe-gakagwensakad (11), degi, dulemar-baigan-eba-bukmarmogad danar-bukwa daknonimalad,
LUK 24:34 sogbukmalad: —Ar Dummad-Jesús nue-gannar durgusye, Simónʼse Jesús magarosye.
LUK 24:35 Geb emar-ebogwadi, e-sordagan-bukmaladga sogsamarmogad, igi-igarba gusmala, degine, igi-emarde Jesús madu-bisge-bisge-imaksagu, magar daksamala.
LUK 24:36 Jesús-sapingan amba we-ibmar-gusadgi sunmakbukmala, Jesús emar-abargi gwisgunonikid. Amarga sogded: —¡Na, degite! Ulubgi bogidik be gudii gumarsun.
LUK 24:37 Abin bela-bela gwakidmalad, nue-dobe itodmalad, emarde sergan-dakye bimalad.
LUK 24:38 Ar Jesúsʼdi amarga sogded: —¿Ar ibiga be nue-dobe itomarsunna? ¿Ibiga be beneyob itomarsunna?
LUK 24:39 An-argan be dakmala, an-nag be dakmarbali. Ar amba an-sunnad an gued. Be an-dakmar, be an-ebumar, ar an-sunnad an gued. Ar burbadi san sulid, garmar surbalid. Ar andi san nikad, garmar nikbalid. Be an-dakmalana.
LUK 24:40 Deyob-soggwichidgi, emarga e-argan, degi, e-nag oyoded.
LUK 24:41 Ar e-sapingandi yeer-itogedbali, degi, weligwaledbali, Jesús-durgusad geger dakmalad. Degisoggu, Jesús amarga sogdesunnad: —¿Masgunned be wis nikmala?
LUK 24:42 Geb ega ua-naraled bisgar uksamalad.
LUK 24:43 Jesús e-sapingan-annik susgua, amar-asabin guchad.
LUK 24:44 Jesús amarga sogded: —Amba an bemar-abargi gudigu, bemarga bato weyob an sogsad: ‘Moisés-Igargi-Angi-Narmakar-Maidi, bela angi guergebye. Degi, Bab-gayaburba-barsogmalad-angi-narmaksamaladba, degine, Salmosʼgi angi-narmakar-maidba bela angi guergebye an bemarga sogsamalad.’
LUK 24:45 Degisoggu, Jesús Bab-Dummad-Gardagi-ibmar-sognaid e-sapingan-magar-itogega imaksad.
LUK 24:46 Jesús amarga sogded: “Weyob-narmakar-naid: ‘Cristo wilegergebye, ibapaagi gannar durguoye.
LUK 24:47 Degine, bela we-napneg-naid-ugakaase angi sunmaklegoye. Adi, na dulemar e-isguedga-bukib-binsamalagarye, e-daed ogwamalagarye, degidbali, Bab-Dummad dulemarga isgued elinonikoye. We-igarmargi sunmaklegedi Jerusalén-akar onodoye sognaid.’
LUK 24:48 Ar bemar-sunnad we-igargan-angi-gusad daksamarsoggu, baiganga bemar sogmarmogo.
LUK 24:49 ”Emide, an-Bab bemarga sogsagusad, an bemarga ukoye, a an bemarga barmidagoed. Jerusalén-neggweburgi be edarbemalo, nibneg-akar burba-gangued bemarse nonikoedse.”
LUK 24:50 Degi, Jesús, Betaniaʼse e-sapingan sesagusad. Agi na e-argan niba-onakwidgu, e-sapingangi ise-nued binsasad.
LUK 24:51 E-sapingangi-ise-nued-binsagwichidgi, Jesús emargi banguded, nibnegse nakwide gusad.
LUK 24:52 Geb e-sapingana, Jesús-nug-ogannodmalad. Nue-weligwaledba gannar Jerusalénʼse aligusmalad.
LUK 24:53 Bab-Dummadse-goled-neggi gudigudamalad, Bab-Dummad-nug-ogannodii, degi, Bab-Dummadgi-nued-binsabukwa damalad. Be itomargua.
JOH 1:1 Gebe-negasailaunni bato Gayaburba gudiid. We-Gayaburba, Bab-Dummadba gudiid, degi, we-Gayaburba, Bab-Dummad gued.
JOH 1:2 We-Gayaburba, gebe-negasailaunni bato Bab-Dummadba gudiid.
JOH 1:3 We-Gayaburbaba bela ibmar obinnilesad. We-Gayaburba-imaksasuli, ibmar-obinnilesad gwen ambikussulid.
JOH 1:4 We-Gayaburbagi san-burba-dulad maid. We-san-burba-dulad, dulemarga gwallu-meegwadga gued.
JOH 1:5 Gwallu-meegwad, negsichid-mee imaked, degine, negsichid gege gwallu-meegwadgi obined.
JOH 1:6 Bab-Dummad, dule-wargwen barmiargusad. We-dule, Juanʼye nugad.
JOH 1:7 We-dule, gwallu-meegwad-barsogega nonikid, adi, bela dulemar a-gwallu-meegwad mer bengumalagar.
JOH 1:8 We-dule-Juanʼye-nugadi, gwallu-meegwadsulid. We-dule, unnila gwallu-meegwad-barsogegala nonikid.
JOH 1:9 We-gwallu-meegwad we-napnegse-danikidi, napiragwadid. We-gwallu-meegwad bela dulemarga neg-mee imaked.
JOH 1:10 We-gwallu-meegwad we-napneggi gudigusad. Ar we-napneg a-sogedba nagus-inigwele, degite, dulemar-we-napneggi-bukmalad akudaksamalad.
JOH 1:11 We-gwallu-meegwad e-dulemarse nonikinad, e-dulemar gwen abingassurmalad.
JOH 1:12 Ar bela dulemar we-Gayaburba-abingasmaladdi, e-nuggi-bengussurmaladba, amarga Bab-Dummad-e-mimmiganga-guega igar-uknonikid.
JOH 1:13 We-dulemala, Bab-Dummad-Burba-Isligwaledba gwalulenonimalad. Dulemar-sogedba gwalulessurmalad, dulemar-igarginsulid, dulemar-binsaedginsurbalid. Wemar Bab-Dummad-sogedba Bab-Burba-Isligwaledgi gwalulenonimalad.
JOH 1:14 We-Gayaburba, anmaryobi sanale san-nika gunonimogad, degine, anmar-abargi sanale gudigusmogad. Anmar e-gangued-yeerdakleged daksamalad. Unnila Bab-Machi-Wargwenna-Gued-e-gangued-yeerdakleged anmar daksamalad. We-dule, nue-dulemar-sabe nanadii gusad. Degine, igar-napiragwadgi nanadii gusbalid.
JOH 1:15 Diigi-dule-oged-Juan a-dulegi sunmaksagusad, sogdegusad, deun binnasur gotegusgu: “An a-dulegi bemarga sunmaksa gusmalad: ‘Dule-wargwen an-sorba-danikoedi, a, an-iduedid, ar a-inse an-idu gudiguad.’ ”
JOH 1:16 Ar a-dule, bela-bela anmargi nued binsamaisoggu, belagwapa ibmar-nikadba ibmar-nuegan anmarga ukmaiguad.
JOH 1:17 Ar Bab-Dummad Moisésʼba dulemarga igar mesisad, dulemar igi nanaergebe. Ar Bab-Dummad na e-nue-sabeddi, degi, e-igar-napiragwaddi, Jesucristoʼba anmarga uknonikid.
JOH 1:18 Dule gwen Bab-Dummad dakdisulid. Unnila Bab-Dummad-Machi-Wargwennagwad, e-Babba-mesa-gudiid, a, anmarga Bab-Dummad-osanalononikid.
JOH 1:19 Diigi-dule-oged-Juan weyobi Jesúsʼgi sunmaksagusgu, weyob gusdo. Deunni, Judíoʼmar-dummagan Jerusalén-akar dule-irwa-Bab-Dummadse-gormalad, degi, a-bendakmalad-Levitaʼmar barmiargusad, Juanʼse-egismalaga: —¿Be doa-dulesunna?
JOH 1:20 Juan gwen yapa-soge gussulid. Innikigwadba sogsad: —Ani an Cristoʼsulid.
JOH 1:21 Degi, gannar Juanʼse egichidmarbalid: —Degite, ¿be doa-dulesunna? ¿Be Elías? Juan, abin-imaksad: —Suli, an a-dulesurbali. Juanʼga sogdemarbarsunnad: —Degite, ¿be Bab-Dummad-gayaburba-barsoged anmar edarbediiddi? Juan, abin-imakdebalid: —Suli, an a-dulesuli.
JOH 1:22 Degi ega sogdemarsunnad: —Degite, ¿be doa-dulesunna? Ar anmar dule-anmar-barmialidga sogergebed, be doa-dule. Degite, ¿doa-duleye na be sogsunna?
JOH 1:23 Juan, abin-sogdegusad: —Bab-Dummad-gayaburba-barsoged-Isaías sogsa gusad: ‘Dule-wargwen nega-dulesulidganba binnasur sunmaknonikoed, dulemarga sognonikoed: Dule-Dummad-idu igar mayemar, igar swilidik mesmar.’ Isaías 40:3 Ani an a-duledo.
JOH 1:24 Dulemar-Juanʼse-barmilear-gusadi, Fariseo-sapingan gumalad.
JOH 1:25 Amar Juanʼse egichiarmalad, ega sogdemalad: —Ar bede Cristo-sulidde, degi, Elías-surbalidde, degine, Bab-Dummad-gayaburba-barsoged-anmar-edarbediid-surbalidde. Ar degite, ¿ibiga be Bab-Dummad-diigi-ogleged-igar imakdisunna?
JOH 1:26 Juan, amar-abin-imakdegu, sogded: —Andi Bab-Dummad-diigi-ogleged-igar-imakedi, unnila diigi dule-ogdiid. Ar bemar-abargi dule-wargwen-gudiiddi aku be dakmalad.
JOH 1:27 A-dule an-sorba-danikidi, we an-iduedid. Ar anba bur dule-dummadsoggu, e-sapat-dubse-bakar geg an ei esiked.
JOH 1:28 We-degigusadi, Betania-neg-nugadgi, Jordán-diwar-obakar, bia Juan Bab-Dummad-diigi-ogleged-igar-imaknai, agi deyob gusdo.
JOH 1:29 A-banedgine, Juan, Jesús-ese-dani-dakargua, sogded: “Be dakmalana, we-dule, Bab-Dummad-Sibad-Wawaad-E-Mimmid, bela dulemarga we-napneggi isgued-osulogedid.
JOH 1:30 We-dulenik an sogsagusad: ‘Dule-wargwen an-sorba danikid, a-dule an-iduedid, ar ade, a-inse an-idu gudiguad.’
JOH 1:31 Aku a-dule an dakmoganad. A-ulale, Bab-Dummad-diigi-ogleged-igar an imaknonikid. Adi, Israel-dulemar Bab-Dummad-epenne-barmidagoye-sogsad-dule magar dakmalagar.”
JOH 1:32 Juan, Jesúsʼnik sogsagusbalid: “Nibneg-akar Bab-Dummad-Burba-Isligwaled nuuyobi aidedani, an daksad. Degi, a-dulegi signoni an daksad.
JOH 1:33 An a-dule akudakmoganad. Ar Bab-Dummad E-diigi-ogleged-igar-imakega-an-barmialidi, anga sogsad: ‘Dule-wargwengi Bab-Dummad-Burba-Isligwaled nuuyob-aidedani, degi, egi signoni, be daksale, we-dule, Bab-Dummad-Burba-Isligwaledgi dulemar-ogoed-duledo.’
JOH 1:34 We deyob an daksad. Degisoggu, an sogdo, we-dule, nue-Bab-Dummad-Machi-sunnadye.”
JOH 1:35 A-banedgine, Diigi-dule-oged-Juan, degine, e-sapingan-warbogwadmala iduar-gudigusadgi gannar gudiid.
JOH 1:36 Deunni dakalid, Jesús e-walik gudii. Geb Juan sogded: —Be dakmalana, we-dule, Bab-Dummad-Sibad-Wawaad-E-Mimmid.
JOH 1:37 Juan-e-sapingan-warbogwad degi-soge-itosgu, Jesúsʼba nadegusmalad.
JOH 1:38 Jesús sorba-atakdegu, dule-warbogwad eba-dani-dakargu, amarga sogded: —¿Ibu be amimala? Amar, abin-sogdemalad: —Rabí, ¿bia be mai? (Rabí sogleged, odurdaked-sailaye).
JOH 1:39 Jesús amarga sogded: —Be dagmar. Degi, be dakmaloed bia an mai. Amar Jesúsʼba nadegusmalad, degi, daksamalad bia Jesús mai. A-ibagi Jesús-walik osedosmalad, ar ade, bato sedosad.
JOH 1:40 Dule-warbogwad Juan-sunmak-itosgu Jesúsʼba nadegusmaladi, wargwenadi Andrésʼye-nugad, Simón-Pedro-e-urbad.
JOH 1:41 Andrésʼde, e-ia-Simón-inse aminaded. Simón-amisgu, ega sogded: —Anmar Mesías-amisad. (Mesías sogleged, Cristoʼye).
JOH 1:42 Geb degi, Andrés, Jesúsʼse e-ia-Simón-senonikid. Jesús, Simón-nuu-dakdegu, ega sogded: —Be, Simón Jonás-machi, emigindi, Cefasʼye be nugguoed. (A sogleged, Pedroʼye).
JOH 1:43 A-banedgine, Jesús Galileaʼse naesokargu, Felipe-dakalid, ega sogded: —Anba be dage.
JOH 1:44 Felipe, Betsaida-neggweburginedid. Andrés, degi, Pedro, a-neggweburginmarmogadid.
JOH 1:45 Felipe, Natanael-aminaded. Amisgu, ega sogded: —Anmar dule-wargwen amisad. Igi Moisés e-Igar-Mesisadgi-narmaksagusa, degi, igi Bab-Dummad-gayaburba-barsogmalad narmaksagusmarmoga, yoedse dule-wargwen danikoye, a-dule anmar amisad. A-dule, Jesúsʼye-nugad, Nazaretʼginedid, José-machid.
JOH 1:46 Natanael, abin-sogded: —¿Ar Nazaret-neggweburgi sunna ibmar-nued nodasi? Felipe, abin-sogded: —Be anba dage, adi, be-sunnad be dakoed.
JOH 1:47 Jesús, Natanael-ese-warmakdani-dakargu, Natanaelʼgi sogded: —Wedi, Israel-dule-sunnadid, dule-nuedid. We-dule, e-gwagegi emar-yardaked gwen naisulid.
JOH 1:48 Natanael Jesúsʼga sogded: —¿Wede igi be an-wisi an deyobid? Jesús, abin-sogded: —Amba yoo Felipe bese goleunni, deun sapi-higuera-urba amba be sigua, bato an be-daksad.
JOH 1:49 Natanael Jesúsʼga sogdesunnad: —Rabí, be Bab-Dummad-Machid, Israel-e-Rey-sunnadid. A-ular, be an-wisid.
JOH 1:50 Jesús, abin-sogded: —¿Higuera-sapi-urba-sii an be-daksaye an bega sogsad-ulale, be an-bensuli? Weba bur bule ibmar-dummagan be dakoed.
JOH 1:51 Jesús sogdebar: —Napira an bemarga soged, emi-onodedgi bemar nibneg-argade, degi, Bab-Dummad-e-baliwiturmar Dule-Machigi nakwemai, degi, aidemai, be dakoed.
JOH 2:1 A-ibapaagwad-sorba Galilea-yargi, Caná-neggweburgi, dule-wargwen ome-nikuna gusad. Agine, Jesús-e-nan sii gusmogad.
JOH 2:2 Dule-ome-nikusokalid, Jesúsʼse, degi, e-sapinganse, a-ibase-dagmalaga ese gochamogad.
JOH 2:3 Iba-onolenaidgi emarga-vino-galadgua, Jesús-e-nan Jesúsʼga sokalid: —Vino emarga berguded.
JOH 2:4 Jesús, e-nan-abin sogded: —Omegwa, ¿ibiga deyob be anga soge? An-ibagan amba yoo warmaked.
JOH 2:5 Jesús-e-nan, neg-ibed-e-maiganga sokalid: —Jesús, ibi imakye bemarga sokalile, a-sogedba, bela be imakmalo.
JOH 2:6 Deunni, agine mete-akwa gwanergwa (6) dii-siega bukwad. We-metemar, Judíoʼmar e-iba-swilidik-gued-ibagi ebumalad. A-mete-gwagwengi sunna galón-gwadulagwen-wilubdibe (20), galón-gwadulagwen-gakambe-wilubdibe (30), dii siged.
JOH 2:7 Jesús maimarga sogded: —Bela metemargi dii enomar. Bela nue-ena mete-enosmarsunnad.
JOH 2:8 Geb Jesús amarga sogdebar: —Emigi be dii weemar, dule-iba-sailaga-gusiidse be sedmar. Degi ase sesmarsunnad.
JOH 2:9 Iba-sailaga-gusiid bia vino-danikid-wissuli, dii-vinoʼga-binnisad gobsad. Ar maigan-dii-wesmaladdi, wismalad, bia vino daniki.
JOH 2:10 Geb iba-sailaga-gusiid ome-nikunaidga sogded: —Ar bela dulemar vino-nued-inse mimidamalad. Geb bukidargus-gobmalad-sorba vino-akusaaled mimiddamalad. Ar bedi, vino-nued amba we-wachise sabosad.
JOH 2:11 Jesús we-ibmar-wilubgan-dakledisurmalad gebe Galilea-yargi, Caná-neggweburgi, imaksa gusad. Agi Jesús, e-gangued-yeerdaklegedi oyosad. Degine, e-sapingan Jesús-nue-bensuli gunonimarsunnad.
JOH 2:12 We-degigusad-sorbali, Jesús, e-nanmala, e-urbamarmala, degi, e-sapinganmala, Capernaúmʼse aided gusmalad. Agine, dogdar melu megissurmalad.
JOH 2:13 Deunni, Judíoʼmar-iba, Oburgwilegoenad-Iba-warmakdanikidgi, Jesús Jerusalén-neggweburse nadegusad.
JOH 2:14 Jesús Babse-goled-negse-dogdapgu, dulemar-moli-bebe-nikad-ukmalad, sibad-wawaad-ukmalad, degi, nuu-ukmalad, bukwa dakdapid. Degine, dulemar agi-mani-ogwabukwa dakdapalid.
JOH 2:15 Jesús ibmar-bibyoged-dub-sobsagu, Babse-goled-neggi bela dule-ibmar-ukbukmalad onosad. Sibad-wawaadmar, moli-bebe-nikamalad, onisbalid. Deginbali, dulemar-mani-ogwabukwad-e-mani bikin midbalid. E-ibe mesemar obichabalid.
JOH 2:16 Jesús dulemar-nuu-ukbukmaladga sogded: —We-ibmarmar bela be seedmar. Melle an-Bab-nega ibmar-ukleged-negga be imakmar.
JOH 2:17 Degi, Jesús-e-sapingan ebinsadmalad, igi Bab-Dummad-gardagi narmakar nai: “An bese-goled-negbina-nue-soged-ular, egi nue-nobe an itoged.”
JOH 2:18 Judíoʼmar, Jesús-abin-imakdemala, ese egisdemalad: —Be anmarse oyogega, Bab-Dummad bega-igar-uksaye weyob be ibmar-imakega, ¿ibi-ibmar-wilubgan-dakledisulid be anmarga imakosunna?
JOH 2:19 Jesús, abin-imakded, amarga sogded: —We-Bab-Dummadse-goled-neg-siid be earmar. An ibapaagi gannar soboed.
JOH 2:20 Judíoʼmar geb abin-sogdemalad: —We-Bab-Dummadse-goled-negde, birga-dulabo-gakanergwa (46) soblenai gusad. Emide, ¿bede ibapaagi gannar sobode? Geg be sobed.
JOH 2:21 Ar Jesúsʼdi na e-sangi sunmaknaid, akwa-neg-sobaledgi sunmaknaisulid.
JOH 2:22 Degisoggu, Jesús-burgwisgu, gannar durgusgu, geb e-sapingan insaas-nadmalad, Jesúsʼde bato deyob sogsagusad. A-ular, Jesús-e-sapingan, Bab-Dummad-Gardagi-narmakar-naidi, degine, Jesús-ibmar-sogsadi, nue-ulubgi abingasmalad, gwen bengussurmalad.
JOH 2:23 Jesús, Oburgwilegoenad-Ibagi Jerusalénʼgi-gudigu, ibmar-wilubgan-dakledisurmalad-imaksadba, bukidar Jesús-bensuli gunonimalad.
JOH 2:24 Ar Jesúsʼdi bela dulemar-daed wissoggu, dulemar-bengusad, ar wisid dulemar eba nue-naisuli.
JOH 2:25 Jesús dule-ega-ibmar-soged gwen abesulid, ar wisid dulemar ulubgi igi binsamala.
JOH 3:1 Dule-wargwen Fariseo-sorda, Nicodemoʼye-nugadi, Judíoʼmar-abargi nue-nug-nika gudigusad.
JOH 3:2 We-dulede, mutik Jesúsʼse nonikid, ega sognonikid: —Rabí, odurdaked-saila-dummad, anmar wisid, be anmar-odurdakegala Bab-Dummad be-barmialid. Ar Bab-Dummad we-duleba gudisulile, we-dule gege ibmar-wilubgan-dakledisurmalad imaked.
JOH 3:3 Jesús, Nicodemo-abin-imakded, ega sogded: —Napira an bega soged, dule gannar gwalulesulile, gege Bab-Dummad-e-negdakmaid daked.
JOH 3:4 Nicodemo Jesúsʼse egisdesunnad: —¿Ar igi dule-sered gannar gwalulegosunna? ¿Ar sunna gannar gwalulegega e-nan-nukugi gannar megosi?
JOH 3:5 Jesús, abin-sogded: —Napira an bega soged, ar dule diigi, degi, Bab-Dummad-Burba-Isligwaledgi gwalulesulile, gege Bab-Dummad-e-negdakmaidse doged.
JOH 3:6 Ar dule wegi-sanale gwalulesale, we, sanaledgadid. Ar dule Bab-Dummad-Burba-Isligwaledgi gwalulesardi, we, burbaledgadid.
JOH 3:7 Degisoggu, mer geg be itoge, an bega soged: Be gannar gwalulegergebye.
JOH 3:8 ”Burwa-goledi e-itolegedba goled, unnila, e-goledbi be itoged. Burwa-danikiddi be wissulid, degi, be wissurbalid, bia nadapbali. Deyobmodo, dule Bab-Dummad-Burba-Isligwaledgi gwalulesar.”
JOH 3:9 Nicodemo, Jesús-abin-sogded: —¿Wede, igi gusunna?
JOH 3:10 Jesús, Nicodemo-abin-sogded: —Bede Israel-dulemar-odurdakedsailadde, ¿we-igar amba be aku itode?
JOH 3:11 Napira an bega soged, anmar ibmar-wisidba sunmakmalad. Anmar ibmar-daksadba sogmalad, degi-inigwele, bemar anmar-ibmar-bega-sogedi yapa be abingamalad.
JOH 3:12 Ar ibmar-we-napnegginmaladgi an bemarga sunmaksad, degite, be benmalad. ¿Ar igi be bengussurmalarsunna an bega ibmar-nibneggined sogdemalar? Be bengusmalaled.
JOH 3:13 ”Dule nibnegse gwen nakwissulid, unnila, ani Dule-Machibi nibneggi-mai aidenonikid.
JOH 3:14 ”Ar igi Moisés nega-dulesulidganba naibe-onakwisgusa, debayobi, ani Dule-Machi, nakrusgi niba onailemogargebed.
JOH 3:15 Adi, doa-dule angi bengussulile, mer yogguega, burba-geg-bergued angi nikuegar.”
JOH 3:16 “Ar Bab-Dummad bela we-napneggi-dule-bukwad nue-sabgussoggu, E-Machi-Wargwenna-Guedi barmialid, adi, dulemar-isgued-anar burgwegar. Ar doa-dule Bab-Dummad-Machigi bensuli-gunonikile, burba-geg-bergued nikuoed, adi, mer bar degisadegu, sabsur-odurdaklesii guegar.
JOH 3:17 Ar Bab-Dummad we-napnegse na E-Machi-barmiargu, dule-we-napneggi-bukmalad-sabsur-odurdakega barmiarsulid. Na E-Machi-barmialid, adi, dule-we-napneggi-bukmalad E-Machigi abonolemalagar.
JOH 3:18 ”Ar doa-dule Bab-Dummad-Machigi bensulile, we-dule sabsur-odurdaklegosulid. Ar dule, Bab-Dummad-Machi-Wargwenna-Gued-e-nuggi-benerdi, bato ega sabsur-odurdakleged-igar maid.
JOH 3:19 ”Gwallu-meegwad we-napnegse nonikid. Degi-inigwele, dulemar bur ibmar-isgana-imakmalad-ulale, bur gwallu-meegwadba negsichid sabgusmalad. A-ular, dulemar sabsur-odurdaklegoed.
JOH 3:20 ”Ar bela dule-ibmar-isgana-imakmaladi, gwallu-meegwad isdar dakdamalad, gwalluse dagbisurdamalad, adi, melle e-ibmar-isgana-imakdiid neg-meegwadse osanalolegegar.
JOH 3:21 ”Ar dule igar-napiragwad-imakdiiddina, gwalluse nonidamalad, adi, e-ibmar-imakdiid na oyogega, ede Bab-Dummadba ibsadiiye.”
JOH 3:22 A-sorbali, Jesús e-sapinganmala Judea-yalase nadmalad. Agi undar gudii gusmalad, Bab-Dummad-diigi-ogleged-igar imakdii gusad.
JOH 3:23 Deunni, Diigi-dule-oged-Juan Salim-neggwebur-walik, Enón-neg-nugadgi, Bab-Dummad-diigi-ogleged-igar-imaknai gusmogad, ar ade, agi dii wilarbad. Dulemar Bab-Dummad-diigi-oglegega Juanʼse nonigusmalad.
JOH 3:24 Ar deunni, amba yoo Juan esgaryagi melleged.
JOH 3:25 Agi Juan-sapingan Judíoʼmar-ebo swilidik-gued-igargi abin-abin imakarmalad.
JOH 3:26 Juan-sapingan, e-dummad-Juanʼse nonimalad, ega sognonimalad: —Odurdaked-saila, dule-Jordán-diwar-obakar-beba-gudigusad, egi be nued-sunmaksad, a-dule, Bab-Dummad-diigi-ogleged-igar imaknaimogad. Dule-bukidar ese duurmaknadapmalad. Degisoggu, be sordamar-sate guoed.
JOH 3:27 Juan, e-sapingan-abin-imakdegu, sogded: —Ar dule Bab-Dummad-ega-ibmar-uksulile, gege ibmar nikued.
JOH 3:28 Ar bemar-sunnad an-itosmalad, an sogsagu: ‘Ani an Cristoʼsurye, andi unnila e-idu-igar-mayega barmilearye.’
JOH 3:29 ”Ar ome-nikulenaid-ibagi, dule-ome-nikunaidbi ome-nikuoed. Ar machered-e-aidi, e-dikarba-gwichid, unnila sui-e-sunmaked-itogwichid. Weligwar sui-ibmar-soggwichid itogwichid. Emigindi, an dule-ome-nikunaid-e-aiyobmogad. An nue-weligwar itomogad.
JOH 3:30 Jesús-nug bur dunguergebed, andi bur nug-bipii guergebed.”
JOH 3:31 Diigi-dule-oged-Juan sogdebalid: “Ar dule-nibneggi-danikidi, bela dulemargi obined. Dule-napneggineddi, unnila napnegginedid, napneggined-ibmarbi sunmaked. Ar dule-nibneggi-danikiddi, bela dulemargi obined.
JOH 3:32 ”We-dule-nibneggi-danikidi nibneggi-ibmar-daksadba, degi, nibneggi-ibmar-itosadba, sunmaked. Degite, dulemar a-dule gwen-itobisurmalad.
JOH 3:33 Ar dule, dule-nibneggi-danikid-sunmaked abingaele, we sognaido, Bab-Dummad-ibmar-soged, napiraye.
JOH 3:34 Ar Bab-Dummad we-dule-barmiarsoggu, a-ulale, we-dule-nibneggi-danikidi, Bab-Dummad-e-gayaburba sunmaked. Ar Bab-Dummad E-Burba ise-obinagwar uked, ise-wilubsaar uksulid.
JOH 3:35 ”Ar Bab-Dummad nue na e-Machi-sabsoggu, bela ibmar E-Machiga uksasunnad.
JOH 3:36 ”Ar doa-dule Bab-Dummad-Machigi bensuli-gunonikile, a-dule, burba-geg-bergued nikuoed. Ar dule Bab-Dummad-Machigi bengunonikirdi, burba-geg-bergued gwen nikuosulid. Aka bur Bab-Dummad-dule-sabsur-odurdaked-igar itogoed.”
JOH 4:1 Dummad-Jesús wisguargu, Fariseoʼmar weyob dulemar-sunmake itoye: Jesús, diigi-dule-oged-Juanʼba bur bule dulemar-Bab-Dummad-diigi-ogleged imakdiiye, degi, bur bule sapingan nikbarye.
JOH 4:2 (Ar Jesúsʼdi Bab-Dummad-diigi-ogleged-igar imakdisulindo, e-sapingan imakdiinad).
JOH 4:3 A-ular, Jesús Judea-yargi bangudsunnad, gannar Galilea-yarse nadegusad.
JOH 4:4 Galileaʼse naegala, Samaria-yargi naergebed.
JOH 4:5 Jesús, Samaria-yalase, Sicar-neggweburse nonisunnad. Bia dad-Jacob e-machi-Joséʼga nainu-uksad-walik, ase nonisunnad.
JOH 4:6 Agine Jacob-dia-akwisad siid. Jesús nanasadba yegussoggu, obunnogega a-dia-dikarba sigisad. Deun, bato yorukugusad.
JOH 4:7 Ome-wargwen, Samariaʼgined, dii-suega a-diase nonikid. Jesús a-omega sogded: —Anga be dii wis-udage.
JOH 4:8 Ar ade, Jesús-sapingan neggweburse mas-bakega naded.
JOH 4:9 Judíoʼmar, degi, Samaria-dorgan na ebo geg sunmakmarsoggu, ome-Samariaʼgined, Jesús-abin sogded: —Ar be, Judío-duled. Andi Samariaʼginedid, ar ¿ibiga be anse dii egise?
JOH 4:10 Jesús, abin-imakdegu, ega sogded: —Ar Bab-Dummad-ibmar-uked be wisina, degine, doa-dule bega soge: ‘Anga dii gobega be udaye,’ ese be dii egisoenad, degine, e bega dii-burba-nikad ukoenad.
JOH 4:11 Ome, Jesús-abin sogded: —Dummad, ar be dii-weed sated, deginbali, dia matusurbalid, degite, ¿bia be dii-burba-nikadi onogosunna?
JOH 4:12 ¿Ar be anmar-dad-Jacobʼba bur dummadsi? Anmar-dad we-dia anmarga uksad. We-dii na gobsad, degi, e-mimmigan, e-molimar, we-dii gobsamarmogad.
JOH 4:13 Jesús, ome-abin sogded: —Ar doa-dule we-dii-gobsale, gannar uku-uku itobaloed.
JOH 4:14 Ar dii-an-ega-ukoed gobsardi, bar gannar uku-uku itogosulid. Ar dii-an-ega-ukoeddi, dii napa-urba-aryomaiyobi, burba-geg-bergued e-ulubgi nikuoed.
JOH 4:15 Ome, Jesúsʼga sogded: —Dummad, melle an bar gannar uku-uku itogega, we-dii be anga udage. Adi, an melle wese gannar bar dii wedagegar.
JOH 4:16 Jesús, abin-sogded: —Be nae. Be-suise be gornae, degi, gannar be dagbalo.
JOH 4:17 Ome, abin-sogded: —An, sui sated. Jesús, abin-imakded: —Nabir be soged: ‘An, sui sateye.’
JOH 4:18 Ar be walatargus sui ogwadanikid. Emi sui-be-nikadi be-suisurbalid. Ar nabir be-sogsad.
JOH 4:19 Ome, Jesús-abin sogded: —Dummad, an be-dakgua, be Bab-Dummad-gayaburba-barsoged an be-dakdo.
JOH 4:20 Anmar-dadgan-Samaria-dulemar, we-yargi Bab-Dummad-nug odummosmalad. Ar bemar-Judíoʼmardi soged, Bab-Dummad-nug-odummogega Jerusalénʼgi, Bab-Dummadse golergebye.
JOH 4:21 Jesús omega sogded: —Omegwa, napira an bega soged, mer be an-bengu. Ibagan dani, be Babse-golega, be Bab-nug-odummogega, be we-yarse danikosulid, degine, be Jerusalénʼse naosurbalid.
JOH 4:22 Bemar Samaria-dulemar be wissurmalad, doa-e-nug bemar odummonanai. Anmar-Judíoʼmardi wismalad, ar doa-e-nug anmar odummomala. Ar ade, dulemar-abonoleged Judíoʼmargi danikid.
JOH 4:23 Ar ibagan dani, emigindi, bato nonikid, ar dulemar-Bab-Dummad-nug-odummomalad, nue-burbar, degi, napiragwadgi Bab-Dummad-nug odummomaloed. Ar Bab-Dummad dulemar-degi-ese-goled amidimogad.
JOH 4:24 Bab-Dummad, burbaled. Ar dule-Bab-Dummadse-goledi, burbar, degi, napiragwadgi ese gormogargebed.
JOH 4:25 Ome, Jesúsʼga sogded: —An wisi, Mesías nonikoed. (Mesías sogleged, yoedse-Dule-Wargwen-Barmiledagoye-soglesad). We Cristoʼye soglebalid. A-Cristo nonikile, bela anmarga ibmar sognonikoed.
JOH 4:26 Jesús, ome-abin sogded: —Ani an a-duled, bebo-sunmaksiid.
JOH 4:27 Agi e-sapingan nonikid, amar Jesús ome-ebo-sunmaksiid, geger dakdemalad. Degi-inigwele, gwen ega sogsasurmalad: “¿Ibu omese be egichii? ¿Ibigi ome-bebo be sunmaksii?”
JOH 4:28 Degi, ome e-gwidu-mete neggweburse nadsunnad. Neggweburse modapgu, macherganga sogdapid:
JOH 4:29 —Be dagmar, dule-wargwen bela an-ibmar-imaksad-anga-sogsad, be dakdamar, ¿abakalegi we-dule Cristoʼsua?
JOH 4:30 Degi, dulemar neggweburgi ainiarmargu, bela Jesúsʼse nonimalad.
JOH 4:31 Degi-gunaigua, e-sapingan Jesúsʼgi wilenai gusmalad, ega sognai guarmalad: —Odurdaked-saila, wis mas be gungwele.
JOH 4:32 Jesús, abin-sogded: —Andi masgunned an nikad, a-masgunned bemar wissurmalad.
JOH 4:33 Degi, e-sapingan muchub-muchub sokarmalad: “Ar dule-wargwen masgunned ega senonisua.”
JOH 4:34 Jesús, abin-sogded: —Dule-an-barmialidba an ibmar-imaked, degi, an e-arbaed-obeloged, an-masgunnedid.
JOH 4:35 Ar bemarde sogsursi: Ibmar-gwag-weed-iba, amba nii-walabake napye. Andi an bemarga sogdo, nue be atakmar, nainu be dakmar. Ibmar-gwag welegega bato guagwar naid. Deyobi, dulemar abonolegega, guagwar bukwad.
JOH 4:36 ”Ar dule-abonolegedgi-arbaedi bennukleged. Degi, burba-geg-berguedga arbabalid. Degisoggu, dule-abonolegega, dule-gebe-Bab-gayaburba-odurdakedi, degi, dulemar-Babgadga-guega-imaked-ebo, na wergumalad.
JOH 4:37 ”Ar we-ibmar-sogleged nue-napira sogleged: ‘Dule-gwensak ibmar-gwag-digedid, dule-baiddi, ibmar-gwag-weedid.’
JOH 4:38 Bemar ibmar-gwaggi-arbassurmalad-weega an bemar-barminanaid. Dule-baigan arbasmalad, bemar a-arbasadgi dogdemalad.”
JOH 4:39 Bukidar Samaria-dorgan, Sicar-neggweburginmalad Jesús-bengussurmalad, ar ade, ome Jesúsʼgi sogdiid: “Bela an-ibmar-imaksad anga sogsaye.”
JOH 4:40 Degine, bukidar Jesúsʼse Samaria-dorgan duurmaknonimalad, egi wilenaigusmalad: “Anmar-walik be beeye.” Jesús amar-walik ibabo dulemar-odurdakega megissunnad.
JOH 4:41 Ome-ibmar-sogsadba, bur bule bukidar dulemar Jesús-ibmar-sogsadgi bengussurmalad.
JOH 4:42 A-ulale, omega sokarmalad: —Anmar-Jesúsʼgi-bensulidi unnila be anmarga ibmar sogedginsulid. Ar anmar-sunnad itosmarmogad. Anmar nue-wisid, we-dule napneggi dule-isgubukmalad-abonoged-sunnadid. We-dule, Bab-Dummad-Dule-Wargwen-Barmiledagoye sogsad-duled.
JOH 4:43 Jesús, Sicar-neggweburgi ibabo megisad-sorbali, Galileaʼse naega Samaria-yargi nodegusad.
JOH 4:44 Ar Jesús na e-sunnad sogsa gusmogad, Bab-Dummad-gayaburba-barsogedi e-neggweburgi geg e-nug odummoleye.
JOH 4:45 Jesús Galileaʼse nonigu, Galilea-dorgan nuedgi abindaksamalad, ar ade, ibase arbimarmosoggu, agi daksamalad, igi Jesús Jerusalénʼgi ibmar imaksa.
JOH 4:46 Degisoggu, Jesús gannar Galilea-yarse nonigu, Caná-neggweburse, bia dii vinoʼga obinnisadse, nadegusad. Deun, Capernaúm-neggweburgi dule-dummad-reyga-arbaed-e-machi uellemaid.
JOH 4:47 We-dule itoargu, Jesús, Judea-yarba-gudiid Galilea-yarse noniye, Jesúsʼse nadegusad. Jesúsʼgi wilenaigualid, adi, e-machi ega nudaknaegar. Ar ade, e-machi burgwedani maid.
JOH 4:48 Jesús, abin-sogded: —Ibmar-wilubgan-dakledisurmalad, degi, ibmar-gegerdaklemalad bemar daksasulina, be an-benmalanad.
JOH 4:49 Dule-dummad-reyga-arbaed, sogded: —Dummad, an-machi-burgwed-idu gwae be anba dage.
JOH 4:50 Jesús, abin-sogded: —Be nae, be-machi dula gudiid. Reyga-arbaed Jesús-degi-ega-sogsad gwen bengussulid. Degisoggu, e-negse nadegusad.
JOH 4:51 Negse monadapgu, e-maigan abin-noarmalad. E-dummad-abingusmargu, ega sogdemalad: —Be-machi bato nugusad.
JOH 4:52 Degi, dummad e-maiganse egichialid igi-wachigi e-machi nuguar gusye. Abin-sogdemalad: —Sae, wachi-irgwengi uelleged gichaye.
JOH 4:53 Machigwa-e-bab mag itosad, a-wachigi Jesús ega sogsa gusad, be-machi dula gudiiye. Machigwa-e-bab, degine, bela e-negginmalad, Jesúsʼgi bensuli gunonimarsunnad.
JOH 4:54 Jesús Judea-yargi-gudiid Galilea-yarse nonigu, we-ibmar-wilubgan-dakledisulid ilabogus Galileaʼgi imaknonido.
JOH 5:1 We-ibmar-degigusad-sorbali, Judíoʼmar-iba nagunonikid. Agi Jesús Jerusalénʼse nonikid.
JOH 5:2 Jerusalénʼgi, Sibad-Wawaadye-Yawagak-nugad-naba, dii wilasar naid. A-dii-wilasar-naidi, Hebreo-gayaba Betesdaʼye bileged. A-dii-naid-ebiris doged-imba gwaatar siid.
JOH 5:3 A-neg-doged-imbamargi bukidar bonikwamalad mamaid, ibyasurmalad, geg-nanamalad, bela-abagan-burgwarmalad, mamaid. Amar dii-sukamaked edarbe mamaimalad.
JOH 5:4 Ar ade, imbagwenar baliwitur, dii-wilasar-naid-osukamakega aidenonidaed. Ar doa-dule-inse a-dii-wilasar-naid-sukamaksad-sorba diigi-aidesale, ibi-boni-nikadibe, yog-nuguar naddaed.
JOH 5:5 Agine, dule-wargwen birga-dulagwen-gakambe-gakabaabakgus-uellemaid (38) maimogad.
JOH 5:6 Jesús a-dule meremai dakalid. Jesús wisguargu, we-dule dikasurgus boni-abgan-burgwaled-nikamaiye, a-dulega sogded: —¿Be nugubie?
JOH 5:7 Dule-abagan-burgwaled abin-sogded: —Dummad, dii-sukamaksad-sorba dule-diise-an-odeged sate daed. Ar an aidedogu, bato dule-baid an-iduar aidesdaed.
JOH 5:8 Jesús ega sogded: —Be gwisgu, be-egi-gabed na be sede, be nae.
JOH 5:9 Jesús-degisogsad-sorba, dule yog-nuguar naded, e-gabed na susa nadsunnad. A-ibagi, deun obunnoged-iba naid.
JOH 5:10 Agi Judíoʼmar dule-nugusadga sogdemalad: —Emi-ibagi obunnoged-iba naid. Degisoggu, be-egi-gabed be sededsulid.
JOH 5:11 Dule-nugusad, abin-sogded: —Dule-an-nudaksad, ar anga sogsad: ‘Be-egi-gabed be sedye, be naye.’
JOH 5:12 Degi, dule-nugusadse egisdemarsunnad: —¿Ar doa bega sogsa, Be-egi-gabed be sedye, be naye?
JOH 5:13 Ar Jesúsʼde bato dulemar-bukidar-gunanaid-abargi banguded. Degisoggu, ar dule-nugusad, wissulid, doa ega deyob sogsa.
JOH 5:14 A-sorbali, Jesús, dule-nugusad Bab-Dummadse-goled-neggi-dakargu, ega sogded: —Emide be nugussoggu, mer be bar isguo. Abakalegi aka bur bule boni-dummad begi danikile.
JOH 5:15 Dule-nugusad nadegusad, geb Judíoʼmar-owisodapid, Jesús e-onudaksaye.
JOH 5:16 A-ulale, Judíoʼmar Jesús-bareginnarmarsunnad, Jesús-oburgwebi guarmalad. Ar ade, obunnoged-ibagi we-ibmarmar imakdiid.
JOH 5:17 Degi, Jesús abin-sogded: —An-Bab gusgu arbanaiguad, degisoggu, an arbadimosundo.
JOH 5:18 A-ulale, Judíoʼmar bur Jesús-oburgwebi guarmalad, ar ade, Jesús obunnoged-ibabi bisgedisulid. Ar Bab-Dummad an-Bab-sunnadye sogdibalid. Deyob sogdiidbali na Bab-Dummadbo emar imakdiid.
JOH 5:19 Geb degi, Jesús Judíoʼmarga sogded: —Napira an bemarga soged, Bab-Dummad-Machi wargwengi e-ibmar-imakbiedba ibmar imaksulid, unnila e-Bab-dakedba ibmar imaked. Ar bela e-Bab-ibmar-imakedi, E-Machi a-sunnaa bela ibmar imakmogad.
JOH 5:20 Ar Bab na Machi-sabsoggu, bela ibmar-imakedi E-Machiga oyoged. Ar weba bur bule ibmar-dummagan Bab ega oyogoed, adi, bemar bur bule geger dakmalagar.
JOH 5:21 Ar igi Bab dule-burgwar-maid gannar oduloge, ega san-burba-dula-gued uke, amba E-Machi deyobmodo, ar doaga san-burba-dulad ukbie, ega ukodo.
JOH 5:22 Ar emigi Bab bar dulemarga igar itogosulid. Ar ade, E-Machiga we-igargan uksad,
JOH 5:23 adi, igi E-Bab-nug ogannodamarmoga, deyobi bela dulemar E-Machi-nug ogannomogagar. Ar dule E-Machi-nug odummosulile, E-Bab-nug odummosurmogad. Ar ade, Bab na E-Machi barmialid.
JOH 5:24 ”Napira an bemarga soged: Ar dule an-sunmakedba daele, degi, Bab-an-barmialidgi bengusulile, a-dule burba-geg-bergued nikuodo. A-dule bar sabsur-odurdaklegosulid. Ar burgwar-gudiidgi nosad, dula gudii gunonisunnad.
JOH 5:25 Napira an bemarga soged: Ibagan danikoed, emigindi, ibagan nonisunnad. Dule-burbar-burgwar-gudimalad Bab-Dummad-Machi-e-gayaburba itononikoed. Ar dule-a-gayaburba-itomaloedi durgunonikoed.
JOH 5:26 Ar igi Bab na-dukin dula-gudigued-nika, amba deyob, na E-Machiga na-dukin dulagudigued uksamogad.
JOH 5:27 Deginbali, ar Dule-Machi-gusoggu, Bab ega dulemarga-igar-itogega igar uksabalid.
JOH 5:28 ”We-igar mer geger be itomar. Ar ibagan danikoed, dulemar-neg-uangi-burgwar-mamaidi, bela Bab-Dummad-Machi-e-gayaburba itomaloed.
JOH 5:29 Ar dule-ibmar-nued-imaksamaladi, burba-dulad-nikuega gannar durgunonimaloed. Ar dule-ibmar-isgana-imaksamaladdi, odurdakleged-negse-naega gannar durgunonimarmogoed.”
JOH 5:30 Jesús Judíoʼmarga sogdebalid: “Geg an na dukin wargwengi ibmar imaked, unnila an-Bab-anga-sogedba an dulemarga igar itoged. An-igar-itogedi, innikigwadgi an itoged. Ar wargwen an-itolegedba an ibmar imaksulid, an-ibmar-imakedi, an-Bab-an-barmialid-sogedba an imaked.
JOH 5:31 ”Ar an na dukin ibmar barsogele, an-ibmar-sogedi napiragwadsuliled.
JOH 5:32 Emigindi, dule-baid an-barsoged, a-ular, an wisid, dule-an-barsoged napiragwadba an-barsogdiid.
JOH 5:33 ”Bemar, Diigi-dule-oged-Juanʼse dulemar-barmiargusad, egisega, be Mesías-sogeye. Juan dulemar-abin-imaksagu, napiragwadgi sogsagusad.
JOH 5:34 Ar dule-we-napneggined an-barsogega an abingasulid. Degi-inigwele, bemar-abonolemalaga Juan-ibmar-sogsad an bemarga sogmalad.
JOH 5:35 Ar igi acha-gwallu gummake, degine, mee-gae, deyobi, Juan gudigusad. Ar bemar unnila a-gwallugine wis-ichesaar yeer-itodii abesmalad.
JOH 5:36 ”Ar Juan-an-barsogdigusadba bur bule an na dukin ibmar-barsoged nikad, an doa-dule gue. We, an-barsogedid: Ibmar-imakega Bab arbaed anga igar-uksad. We-ibmar-an-imakdiidi bato oyonaid, Bab an-barmiarye.
JOH 5:37 Bab-an-barmialidi, bato angi sunmaksa gusad. Bemala bipisaale e-gaya-sunmaked be itodisurmalad, degine, e-dakleged be dakdisurmarbalid.
JOH 5:38 Deginbali, E-gayaburba bemargi gwen naisurbalid. Ar ade, bemar Bab-bemarse-dule-barmialidi, be a-dule benmalad.
JOH 5:39 Bab-Dummad-garda-narmakar-maid nue be baramimar, ar agi burba-geg-bergued baramilesiye, be sogmalad. Ar a-gardagi angi sunmaknaid, an doa-dule gue.
JOH 5:40 Degi-inigwele, bemar burba-geg-bergued-nikuega anse yapa dagmalad.
JOH 5:41 ”Dulemar-an-nug-odummoged, an abingasulid.
JOH 5:42 Ar an bemar-wisid, bemar, Bab-Dummad-sabsurmalad.
JOH 5:43 An-Bab-nuggi an bemarse nonikid, degite, be an-abingasurmalad. Ar dule-baid na e-nuggi danikirdi, be a-dule abingasmalaled.
JOH 5:44 ¿Ar igi bemar Bab-Dummad-bensuli gumalosunna? An na be muchub-muchub-san-ogannoed amidimalad. Ar Bab-Dummad-wargwenna-guedgi nug-gangued-danikiddi, bemar amisurmalad.
JOH 5:45 ”Mer be binsamalo, ani an-Bab-asabin bemargi gwisgumaloye. Suli. Moisésʼgi be bendaklegoye binsadimaladi, a-dule, bemargi gwisgumaloed.
JOH 5:46 Ar Moisés-ibmar-sogsad be bensurmalana, be an-bensurmarmogando. Ar Moisés angi ibmar narmaksad.
JOH 5:47 Ar Moisés-ibmar-narmaksad be benmalale, degite, ¿igi an-ibmar-sogedgi be bensuli gumalosunna? Geg gued.”
JOH 6:1 We-degigusad-sorbali, Jesús Galilea-mata-dummad-obakar nade gusad. We-mata-dummad Tiberias-Mataye nugbalid.
JOH 6:2 Dule-bukidar Jesúsʼba nadegusmalad, ar ade, boni-nikamaladgi ibmar-wilubgan-dakledisulid-imakdiid daksamalad.
JOH 6:3 Degidgine, Jesús yar-birse-nakwisgu, agi e-sapinganmala sigdapmalad.
JOH 6:4 Deun Judíoʼmar-iba, Oburgwilegoenad-Iba bato omosad.
JOH 6:5 Jesús atakdegu, dakded, dulemar-bukidar ese nonimala. Agi Felipeʼga sogded: —Wemar madu-gunmalaga, ¿wede bia anmar madu bakoe?
JOH 6:6 Unnila Jesús binsa Felipe-wilubdakega weyob Felipeʼga sogsagusad, ar edi bato wisid igi imakoe.
JOH 6:7 Felipe, Jesús-abin sogded: —Belagwapa wis madu bipi-bipi-gunmalaga dule-nii-walabaabak-arbasad-manigi (8), madu-bakele, amba madu unnisuliled.
JOH 6:8 Geb degi, e-sapin-baid-Andrés, Simón-Pedro-e-urba, Jesúsʼga sogded:
JOH 6:9 —Wegi machigwa-wargwen cebada-madu-gwaatar wis sediid, degine, ua-burwigana wis ukabo sedibalid. ¿Ar wede unniosi? Ar dule bukidarad.
JOH 6:10 Geb degi, Jesús sogded: —Nabir. Dulemar be urbemar. Agine, gagan-bukidar naid. Agine, dulemar ambikusmargu, geb machergan miliatar-wilub-mergu (5,000) daklealid.
JOH 6:11 Jesús madu-susgua, Bab-Dummadga dog-nuedye-sogsagu, e-sapinganga madu uke-uke imaksad. Geb e-sapingan dulemar-gagan-birgi-bukmaladga ukdemogad. Jesús amba deyob ua-imaksabalid, ar bule-mergu abemala, abali ega uksamalad.
JOH 6:12 Bela dulemar immelesmargu, Jesús, e-sapinganga sogded: —Mer binsa mas milegega, bela gwabgusad be wemar.
JOH 6:13 Cebada-madu-gwaataled bela guchamalad-sorba, gwabgusadi garba-gwaambe-gakabo-mergu (12) wesmalad.
JOH 6:14 Dulemar, Jesús-madu-gwaataled-omelosad-daksamaladi, sogdemalad: “We, Bab-Dummad-gayaburba-barsoged we-napnegse-nonikoed-sunnadye.”
JOH 6:15 Ar Jesús, dulemar ise-ebipiar reyga-guega e-imakdanimalo-daksagu, e-iduar yarse walagwengi banguded.
JOH 6:16 Dad-argwategu, Jesús-sapingan, Jesús-ega-sogsadba demar-gakase aidenonimalad.
JOH 6:17 Urgi nakwismargu, Capernaúmʼse-namalaga mata-dummad obakdemalad. Deun, bato neg nue-mutikgusad, Jesúsʼdi amba yoggumaid.
JOH 6:18 Ar burwa binnasur-gormaisoggu, demar dunguded.
JOH 6:19 Jesús-sapingan wachi-irbogus, igi, wachi-irbaagus-gammimaladgindibe, dakarmalad, Jesús demar-birgi daniki, e-urse warmakdaniki. Deyob dakarmargu, dobguarmalad.
JOH 6:20 Jesús e-sapinganga sogded: “Ani an daniki, mer be dobgumar.”
JOH 6:21 Geb degi, e-sapingan weligwar urgi Jesús-abindaksamalad, degine, bia na nadapmaladse warmaksamarsunnad.
JOH 6:22 A-banedgine, dule-bukidar Jesúsʼba-mata-obakar-gudimaladi, wisguarmalad ur-wargwen-naigusadgi unnila Jesús-sapinganbi nadmarye. Jesúsʼdi e-sapinganba urgi nadsurye.
JOH 6:23 Ur-baigan-Tiberias-neggweburgi-danimaladdi, bia dulemar Bab-Jesús Babga-dog-nuedye-sogsad-sorba madu-omelosad-guchamalad-walik nagunonikid.
JOH 6:24 Ar dulemar, Jesús-daklesur-dakargu, degi, e-sapingan-sate-dakarmargu, Jesús-amiegala, urgi Capernaúm-neggweburse nadegusmalad.
JOH 6:25 Dulemar mata-dummad-obakar Jesús-amismargu, ega sogdemalad: —Odurdaked-saila, ¿sana wese be noniki?
JOH 6:26 Jesús, abin-imakdegu, emarga sogded: —Napira an bemarga soged, be an-amimaladi, an-ibmar-dakledisulid-imaksadba be an-amisurmalad. Ar bemar madu-nue-immedik-guchadba be an-amimalad.
JOH 6:27 Mas-baisursunna-bergumaladga mer be arbamar. Mas-anmarga-burba-geg-bergued-ukedga be arbamar. Ar a-masdi, sunna bemarga, Dule-Machi ukoed. Ar a-dulegine, Bab-Dummad bato e-wilub nasiksad, burba-geg-bergued nikumalagar.
JOH 6:28 Degi, Jesús-abin sogdemarsun: —Degite, ¿ibu an imakmalosunna Bab-Dummadga ibmar-imakegar?
JOH 6:29 Jesús, abin-imakded: —Bab-Dummadga-ibmar-imaked wedo: Bab-Dummad-bemarga-dule-barmialidgi-bengusuli gued.
JOH 6:30 Jesús-abin sogdemalad: —Degite, ¿ibi-ibmar-wilubgan-dakledisulid be anmarga imakosunna? Adi, anmar dakega, degi, mer begi anmar benguegar, ¿Ibi-ibmar be imaksunna?
JOH 6:31 Ar anmar-dadgandi nega-dulesulidgangi maná-guchamalad. Bab-Dummad-gardagi sognaid: ‘Madu-nibneggined-gunmalaga an imaksad.’
JOH 6:32 Jesús amarga sogded: —Napira an bemarga soged, Moisés bemarga madu-nibneggi-danikid uksasulid. Ar an-Bab madu-nibneggi-danikid-sunnad bemarga uked.
JOH 6:33 Ar Bab-Dummad-madu nibneggi-aidenonikidi, we-napnegginmaladga burba-duladi uked.
JOH 6:34 Jesúsʼga sogdemalad: —Dummad, madu-degiid be anmarga ukdigu imake.
JOH 6:35 Jesús, abin-sogded: —Ani an madu-burba-duladid. Ar dule anse danikile, bar gwen ukumesosulid. Ar dule an-bengusulile, bar gwen uku-uku itogosulid.
JOH 6:36 ”An bemarga epenne bato sogsad, ibmar-dakledisulid imaksa be an-daksamar-inigwele, degite, amba be an-benmalad.
JOH 6:37 Ar Bab bela dulemar-anga-ukedi, anba-naguega anse dagoed. Ar dule anse danikile, gwen an obanosulid.
JOH 6:38 ”An-itolegedba ibmar-saega nibneggi an danisulid. Dule-an-barmialid-sogedba an ibmar-imakega nonikid.
JOH 6:39 Bab-an-barmialidi we abemaid: Bela dulemar-anse-nonikidi gwen wargwensaar oyoggubisur an-abeged. Adi, ibagan-napi-naguoedgi a-dulemar an gannar odulogegar.
JOH 6:40 ”Dule-an-barmialid we abemaid: Bela dulemar-E-Machi-dakoedi, degi, egi bensuli-gunonikile, burba-geg-bergued nikued. Degine, ani, ibagan-napi-naguoedgi a-dulemar an odulogoed.”
JOH 6:41 Degi, Judíoʼmar, Jesúsʼgi sunmakedbi guarmalad, ar ade, Jesús sogsad, ani an madu-nibneggi aidenonikidye.
JOH 6:42 Judíoʼmar Jesúsʼgi sogdemalad: —¿Ar wede Jesús, José-machisursi? Degine, e-bab, e-nan, ¿anmar mag daksursi? Ar degite, ¿ibiga sogsunna? ‘Nibneggi an aidenoniye.’
JOH 6:43 Jesús amar-abin-imakde, sogded: —Mer be muchub-muchub angi isdar sunmakmar.
JOH 6:44 Ar Bab-an-barmialid, anse-dule-dagega imaksulile, gege dule-wargwensaale anse daged. Ibagan-napi-naguoedgi, dule-anse-nonimaladdi, ani an a-dule-odulogoed.
JOH 6:45 Bab-Dummad-gayaburba-barsogmalad-gardagi narmakar maid: ‘Bab-Dummad na e-igargi bela dulemar-odurdakoed.’ Isaías 54:13 ”Degisoggu, bela Bab-itosmalad, degi, egi durdaksamarbalid, anba-naguegala anse danimaloed.
JOH 6:46 ”Dule-wargwensaar Bab-daksaye an sogsulid. Unnila dule-Bab-Dummadgi-danikidbi Bab-daksad.
JOH 6:47 Napira an bemarga soged: Ar dule angi bensulidi, a-dule, burba-geg-bergued nikad.
JOH 6:48 ”Ani an madu-burba-duladid.
JOH 6:49 Ar be-dadgan nega-dulesulidgangi maná-guchamar-inigwele, bela burgwismalad.
JOH 6:50 ”An bemarga madu-nibneggi-aidenonikidgi-an-sunmakedi, a-madu dule guchale, bar burgosulid.
JOH 6:51 Ani an a-madu-duladid, nibneggi aidenonikidid. Ar dule-wargwen a-madu-guchale, bar burgosulid, degidula sadeguoed. An madu-ukoedi, we an-sanad. We-napneg-naidgi dule-bukmalad-dula-gudiguega an-san an ukoed.”
JOH 6:52 Agi Judíoʼmar abin-abin imakarmalad, sokarmalad: “Anmar e-san-gunnegala ¿igi anmarga e-san ukosunna? Geg gued.”
JOH 6:53 Jesús amarga sogded: —Napira an bemarga soged: Ar bemar Dule-Machi-e-san gunsulile, degine, e-abe gobsurbalile, bemar burba-dulad nikuosurmalad.
JOH 6:54 Ar dule an-san gunnele, degi, an-abe gobele, a-dule burba-geg-bergued nikuodo, degine, ibagan-napi-naguoedgi, ani an a-dule odulogoed.
JOH 6:55 Ar an-sana, masgunned-sunsogedid, degine, an-abe, gobed-sunsogedbalid.
JOH 6:56 Ar dule-an-san-gunmalad, degi, an-abe-gobmalad, anginbi gudigumalad, degine, an egi gudigumogad.
JOH 6:57 ”Ar igi Bab-dulamaid an-barmiali, degine, igi Babgi an dula gudimoga, deyobi, dule an-san-guchale, a-dule angi dula-gudii gumogoed.
JOH 6:58 Ani an madu-nibneggi-aidesadid. We-madu-nibneggi-aidesadi, be-dadgan-maná-guchadyobsulid. Ar maná-gucha-inigwele, amardi amba burgwismalad. Ar dule we-madu-guchardi, bar burgosulid, degisadeguoed.”
JOH 6:59 Jesús Capernaúmʼgi dulemar-odurdaksigusgu, Judíoʼmar-onmakedneggi we-ibmar sogsagusad.
JOH 6:60 Bukidar-Jesúsʼba-gudimaladi weyob Jesús-soge-itosmargu, sogdemalad: “We-ibmar-sogedi gwen nollo sogsulid. ¿Ar doa eba ibsaoe?”
JOH 6:61 Ar Jesús na wissoggu, e-sapingan muchub-muchub we-igargi sunmaknanai, amarga sogdesun: —¿We-an-bemarga-sogedi, be isdar itomala?
JOH 6:62 Ar Dule-Machi nibneggi-mai-gusadse gannar nakwemai be dakarmalar, ¿igi be sogsamalarsunna?
JOH 6:63 Ar Bab-Dummad-Burbabi dulagudigued uked. Dule-sandi, binsaledid. An bemarga-ibmar-sogsadi, we burba-napiragwadid, degine, dula-gudiguedbalid.
JOH 6:64 Ar gwenna-gwenna bemar an-benmalad. Ar ade, Jesús gebesaila-akar bato wisid doamala e-benmala, degine, doa darba e-ukbaloe.
JOH 6:65 Jesús sogded: —A-ulale, an sogsad, dule, anba-naguegala Bab anse-sedasulir, gege anse dagye.
JOH 6:66 Degidgine, bukidar Jesús-sapingan Jesúsʼgi bangudmalad, bar Jesúsʼba gudigussurmalad.
JOH 6:67 Geb degi, Jesús na e-sapingan-warambe-gakabogwadga (12) sokalid: —¿Bemar nabimarmoga?
JOH 6:68 Simón-Pedro, abin-sogded: —Dummad, ¿doaba anmar naosunna? Ar bebi unnila burba-geg-bergued-igar nikad.
JOH 6:69 Ar anmar begi bensulid, degine, anmar wisid, be Bab-Dummad-dule-wargwen-barmidagoye-sogsad-duled. Bab-Dummad-Dula-Maid-E-Machi-sunnadid.
JOH 6:70 Jesús, Pedro-abin sogded: —¿Ar warambe-gakabo (12) an be-susmarsursi? Gwensak bemar nia gued.
JOH 6:71 Jesús, e-sapingan-ambe-gakabogwad-wargwengi Simón-machi-Judas-Iscarioteʼgi deyob sogsagusad, ar a-dule, Jesús-darba-uknai guoedid.
JOH 7:1 We-degigusad-sorba, Jesús Galilea-yalaganba bipirmakdii gusad. Ar ade, yapa Judeaʼgi gudigued, ar Judíoʼmar e-oburgwebimalad.
JOH 7:2 Deun, Judíoʼmar-Neg-Matargana-Iba-onoged bato mosadgined.
JOH 7:3 E-urbamar Jesúsʼga sokalid: —Wegi be noe, Judeaʼse be nae. Adi, be-sapingan be-ibmar-imaked dakoed.
JOH 7:4 Ar dule-wargwen mag-e-dakbi abegele, geg odukuar ibmar imaked. Ar be ibmar-dakledisulid-imakdiid, bela dulemar-wagab be imakdo.
JOH 7:5 E-urbamar weyob Jesúsʼga sogsamardo, ar ade, e-urbamarse-bakar, Jesús-benmalad, we Mesíasʼye.
JOH 7:6 Jesús e-urbamarga sogdesun: —An Jerusalénʼse-naed-ibagan angardi amba yoo moed. Ar bemargardi ibagan bato gusgu guagwar naidaed.
JOH 7:7 Ar we-napneg-naidgi-dulemar-bukwad geg isdar bemar-daked. Ar andi isdar an-dakmardo, ar ade, an ega sogdiid, bemar-ibmar-imakdimaladi isganaye.
JOH 7:8 Bemardi, ibase be namala. Ar angardi, amba an-ibagan yoo mosoggu, andi naosurgweled.
JOH 7:9 Deyob Jesúsʼdi, e-urbamarga sogsagu, Galileaʼgi bessunnad.
JOH 7:10 Jesús, e-urbamar-ibase-naded-sorba, ibase nade gusmogad. Jesús emar-wagab nadsulid. Arbakee nadegusad.
JOH 7:11 Judíoʼmar ibagi Jesús-amidii guarmalad, sokarmalad: “¿Wede bia dule nade?”
JOH 7:12 Agine dulemar-bukidarad-abargi Jesúsʼgi uurmakarmalad, gwenna-gwenna sokarmalad: “We-Jesús, dule-nuedid.” Baigandi sogmarmogad: “Suli, we, dule-yardakdiidi.”
JOH 7:13 Ar dulemar Judíoʼmar-dummagan-dobedba, bakar-buud Jesúsʼgi gwen sunmaksasurmalad.
JOH 7:14 Ar Neg-Matargana-Sobarmalad-E-Iba-onolenaid negabargusgu, Jesús Bab-Dummadse-goled-negse nonikid. Agi dulemar-odurdaksii gusad.
JOH 7:15 Judíoʼmar-dummagan geger Jesús-dakdemalad, sogdemalad: “We-dule dummaganse gwen ibmar durdaksasulid, ar degite, ¿igi nabir ibmar-nue-wisi dulemar-odurdake?”
JOH 7:16 Jesús amarga sogdesun: —An-ibmar-odurdaked angadsulid, Bab-Dummad-an-barmialid-sogedba an dulemar-odurdaked.
JOH 7:17 Ar dule Bab-Dummad-sogedba nanabiele, mag dakoed, an-ibmar-odurdakdiid Bab-Dummadgi danidibe, igidibe, an-ibmar-odurdakdiid an na dukin onosdibe.
JOH 7:18 Ar dule wargwengi e-sogedba ibmar-sogdiile, a-dule na nug-dungued amidii daed. Ar e-barmialid-nug-odummogega gudiirdina, adi, we napiragwaddo, a-dulegine, gakan naisurdo.
JOH 7:19 ”¿Ar Moisés bemarga igar-uksasursi? Degite, bemar a-igargi nanadisurmalad. ¿Ibiga be an-oburgwebimarsunna?”
JOH 7:20 Dulemar, Jesús-abin sogdemalad: —Nia begi nai. ¿Ar doamar be-oburgwebie?
JOH 7:21 Jesús amarga sogded: —Obunnoged-ibagi unnila ibmar-dakledisulid-soggwen an imaksad-ulale, ¿geger be an-dakmarde? Emide, be sogmargu, an dule-isganaye.
JOH 7:22 Moisés bemarga abgan-uka-duku-siked-igar mesismalad. Degi-inigwele, we-igar Moisésʼgi noarsulid, ar dadgan-akar bato gusgu a-igar danikid. Obunnoged-ibagi mer arbaoye igar-mai-inigwele, degite, bemar Obunnoged-ibagi abgan-uka-duku-siked-igar imakbukwad.
JOH 7:23 ”Ar bemar Moisés-Igar-Mesisadba ibmar-imakegala, amba obunnoged-ibagi-bakar, bemar abgan-uka-duku-siked-igar imakbukwad. Degite, ¿ibiga bemardi obunnoged-ibagi an dule-nudaked, sae be an-dakmarsunna?
JOH 7:24 Melle dule-daklegedba be sogo we-dule, dule-nuedye, igi, we-dule, dule-isganaye. Suli. Innikigwadba be sogoed.”
JOH 7:25 Jerusalénʼginmalad gwenna-gwenna sokarmalad: “¿Ar dummagan we-dule-oburgwega amidimarsursi?
JOH 7:26 Emide, be dakena, bela-dulemar-abargi sunmakgwisgu, degite, gwen ega akar sogsurmalad. ¿Ar dummagande nue-magar itononimarsi? We, Cristo-sunnadid, Bab-Dummad-dule-wargwen-barmidagoye sogsad-dule.
JOH 7:27 ”Ar anmar wisid, we bia daniki. Ar Cristoʼdi nonikile, anmar wisguosulid, bia daniki.”
JOH 7:28 Jesús Bab-Dummadse-goled-neggi dulemar-odurdaksigu, binnasur sunmakde, sogded: —Bemar mag-an-dakmalad, degine, be an-wismarbalid an bialidi. An-itolegedba wargwen an danisulid, ar Bab-Dummad-napiragwadid an-barmialid. A-duledi bemar akudakmalad.
JOH 7:29 Andi a-dule mag an daked, ar agi an danikid. Ar a an-barmialid.
JOH 7:30 Agine, dummagan Jesús-gabiguarmalanad, degite, gwen gassurmalad, ar ade, yoo e-burgwed-ibagan omoged.
JOH 7:31 Dulemar-bukidar Jesúsʼgi bengussurmalad, sokarmalad: “Cristo nonikile, ¿bur bule we-dulebali ibmar-wilubgan-dakledisulid imako be insae? Gwen deyob imako an insasurdo.”
JOH 7:32 Fariseoʼmar dulemar-sognanaid itosmalad, Jesús, Mesíasʼye. Degisoggu, Fariseoʼmar, degine, dule-irwa-Bab-Dummadse-gormalad-e-dummagan Jesús-gaega suar-ibmala barmismalad.
JOH 7:33 Geb Jesús dulemar-e-itobukwadga sogded: —Napi-ichesaar an bemar-abargi gudiid. Dule-an-barmialidse an naesokalid.
JOH 7:34 Be an-amimalo-inigwele, gwen be an-amimalosulid. An gudiguoedsega geg be namalad.
JOH 7:35 Degi Judíoʼmar na ga sokarmarsunnad: “¿Ar wede bia naoe? Anmarde bar amiosurmalad. Griegoʼmar-abargi-Judíoʼmar-aisakis-bukmalad-odurdakega, ¿wede naoe?
JOH 7:36 ¿We ibi obarsunna? We sogsad: ‘Be an-amimalo-inigwele, gwen be an-amimalosurye. An gudiguoedsega, geg be namarye.’ ”
JOH 7:37 Napi-iba-dummad-naidgi, Jesús gwisgusgu, binnasur sunmakded, sogded: —Ar dule-wargwen uku-uku itodiile, anse dage. Anse dii gobdage.
JOH 7:38 Ar dule an-bensulile, Bab-Dummad-gardagi sognaiyobi, e-ulubgi diwar-burba-nikad aryomai guoed.
JOH 7:39 Jesús diwar-burba-nikadye-sogsagusadi, we Bab-Dummad-Burba dulemar-egi-benguosurmalad-abingaoedgi sunmaksad. Deunni, amba yoo Bab-Dummad-Burba nonikid, ar ade, Jesús-nug amba yoo bela-bela ogannoleged.
JOH 7:40 Bukidar-dulemar-abargi gwenna-gwenna weyob-Jesús-ibmar-soged itosmargu, sokarmalad: “Ar we-dule, Bab-Dummad-gayaburba-barsoged-napiragwadid.”
JOH 7:41 Baigandi sogmalad: “We, Cristo-sunnadid.” Degine, baiganmo sogmarmogad: “¿Ar Cristoʼde, Galileaʼgi danikosi? Suli, agi danikosulid.
JOH 7:42 ¿Ar Bab-Dummad-gardagi sognaisursi? Cristo Davidʼgi danikoye. Belén-neggweburgi, David-epenne-gwalulesadgi danikoye.”
JOH 7:43 Ar Jesús-ulale dulemar na egi bachikgudmalad.
JOH 7:44 Gwenna-gwenna Jesús-gabiguarmalan-inigwele, gwen gassurgusmalad.
JOH 7:45 Suar-ibmala-Babse-goled-neg-edarbemalad-barmilesmaladi gannar dule-irwa-Bab-Dummadse-gormalad-e-dummaganse, degi, Fariseoʼmarse nonimalad. Fariseoʼmar ega sogdemalad: —¿Ibiga bemar Jesús-sedanisurmala?
JOH 7:46 Suar-ibmala abin-imakdemalad: —Dule-wargwensaale we-duleyobi gwen sunmakdisulid, nue-yeer sunmaked.
JOH 7:47 Geb Fariseoʼmar, abin-imakdemalad: —¿Bemar ese yardaklesmarmosunde?
JOH 7:48 Be dakdimala, dummad-wargwen, degine, Fariseoʼmar, a-dulegi, ¿bensur gued? Suli.
JOH 7:49 We-dule-baigandi, Moisés-Igar-Mesisad-wissurmaladba Jesúsʼba nagudmalad. A-ulale, we-dulemardi bato nue-ukabsales bukmarsunnad.
JOH 7:50 Nicodemo, ibagwengi mutik Jesúsʼse-nonigusadi, e-sordamar-Fariseoʼga sokalid:
JOH 7:51 —Anmar-igar-maidgi, sunna dule-wargwenga amba yoo igar-itoged-iduar bato soglesi, ¿be dummad-nosye, bega sabsur-odurdakleged-igar maiye? Suli, degisulid.
JOH 7:52 Fariseoʼmar, Nicodemo-abin-imakdemalad: —¿Ar be Galileaʼginmogadi? Bab-Dummad-Garda-narmakar-naidgi nue be baramie. Be dakoed, bipisaale Bab-Dummad-gayaburba-barsoged gwen Galileaʼgi danisulid.
JOH 7:53 [Geb degi, dummagan e-neg-e-negse nadmarsunnad.
JOH 8:1 Geb degi, Jesús Olivos-yarse nadsunnad.
JOH 8:2 Banedgine, Jesús wakudaryala Bab-Dummadse-goled-negse gannar nonigu, dulemar-bukidar ese nonimalad. Jesús sigisgua, dulemar-odurdakded.
JOH 8:3 Deun Garda-Narmaked-Dulemar, degi, Fariseoʼmar, Jesúsʼse ome-wargwen-negsichigi-galagwensuligunai-galesad senonimalad. Dummagan dulemar-abargi ome-ogwisnonimargu,
JOH 8:4 Jesúsʼga sogdemalad: —Odurdaked-saila, we-ome negsichigi galagwensuligunai gasmalad.
JOH 8:5 Emi anmarga Moisés igar mesisad, omegan-deyobdamalad akwagi-makar oburgoye. Degite, bedina, ¿igi be sogmosunna?
JOH 8:6 Fariseoʼmar Jesús-wilubdakegala yamo deyob ese egichismalad. Adi, Jesúsʼgi sorba gwisgumalagar. Jesúsʼdi, napase dulluu imakdegu, e-googi napa narmak-narmak imaksigisad.
JOH 8:7 Ar Fariseoʼmar Jesúsʼse gannar-gannar egisnanaimarsoggu, Jesús gwisgusad, geb abin-sogded: —Ar bemar-wargwenad na be isguedsuli-itogele, a-inse akwa omegi metedo.
JOH 8:8 Jesús gannar napase dulluu imakdebargu, gannar napagi narmaksigisbalid.
JOH 8:9 Ar Fariseoʼmar degii-Jesús-soge-itosmargu, mag na ulubgi e-isgudiid itosmarsoggu, war-wargwen ainidmalad. Dule-sergan-inse ainidmalad, geb sapinganse-bakar, ainidmarmogad. Unnila Jesús ome-negabargi-gwichid-ebo bessunnad.
JOH 8:10 Jesús gannar gwisgusgu dakded, dulemar sate, unnila omebi-gwichi, geb omega sogded: —Omegwa, ¿bia dulemar-begi-gwisgunanaid nadmala? ¿Wargwensaar bar begi gwisgussurmala?
JOH 8:11 Ome, abin-sogded: —Dummad, dule-wargwensaar angi gwisgussulid. Geb Jesús omega sogdemosun: —An begi gwisguosurmogad. Be nae. Mer be bar isguo.]
JOH 8:12 Gannar Jesús dulemarga sunmakdebargu, sogded: —Ani an we-napneg-naid-e-gwallu-meegwadid. Ar dule anba dagele, negsichidgi nanaosulid, gwallu-meegwad nikuoed.
JOH 8:13 Fariseoʼmar Jesúsʼga sogdemalad: —Be-ibmar-sogedi, na be dukin-barsogsoggu, a-ular, be-ibmar-sogedi, geg anmar abingaed.
JOH 8:14 Jesús, Fariseoʼmar-abin sogded: —An-ibmar-sogedi, an na dukin soge-inigwele, ar wedi napiragwadid. Ar an wisid, bia an daniki, degine, bia an nabaloe. Ar bemardi wissurmalad, bia an daniki, degine, bia an nabaloe.
JOH 8:15 Ar bemardi unnila we-napneg-igar-maidba sogmalad, we, dule-isganaye, we, dule-nuedye. Andi an sogsulid we, dule-isganaye, we, dule-nuedye.
JOH 8:16 Ar dule-wargwenga an igar-nabogele, an-igar-nabogedi napiragwadba an imaked. Ar ande, wargwengi an igar-nabosulid, an-Bab-an-barmialid, a-anbo an imaked.
JOH 8:17 Bemar-igar-maidgi sogmaid, dule-warbo barsoged-nikale, wemar-ibmar-sogedi napiragwadye, abingalegoye.
JOH 8:18 Ani an na dukin angi an ibmar-barsoged. Bab-an-barmialid, angi ibmar sogmogad. Degisoggu, an-ibmar-sogedi, napiragwaddo.
JOH 8:19 Geb degi, Jesúsʼga sogdemarsun: —¿Bia be-babde maisunna? Jesús, dulemar-abin sogded: —Ar be aku an-dakmalad, degine, be aku an-Bab-dakmarbalid. Ar be mag an-dakmalana, be an-Bab-mag-dakmarmogoenad.
JOH 8:20 Weyob Jesús Bab-Dummadse-goled-neggi, mani-weleged-naba-sii, dulemar-odurdaksigu sunmaksagusad. Dule-wargwensaale gwen Jesús-gassurmalad, ar ade, amba yoo e-galeged-ibagan omoged.
JOH 8:21 Jesús gannar Judío-dummaganga sogdebalid: —An naesokar. Be an-amimalo-inigwele, be an-amimalosulid. Bemardi be-isguedba be burgwidmaloed. An-naedse, geg bemar warmaked.
JOH 8:22 Geb degi, Judío-dummagan sogdemar: “Ar ibiga soge: ‘An-naedse, geg bemar namarye.’ ¿Ar ede na dukin oburgwedgi binsae?”
JOH 8:23 Jesús amarga sogded: —Bemardi weginmaladid, andi nibnegginedid. Bemardi we-napnegginmaladid, andi we-napnegginedsulid.
JOH 8:24 A-ulale, an bega sogsagusmalad, be an-bengumalale, degi, an doa-dule-gue be bengumarbalile, be-isguedba na be burgwemaloye.
JOH 8:25 Judío-dummagan Jesúsʼga sogdemarsun: —¿Ar be doasunna? Geb Jesús, abin-sogded: —Ar iduar bato an bega sogsamalad, an doa-gue.
JOH 8:26 Bemar-noar-nanadiidbali ibmar-bukidar an bemargi-soged nikad. Ar dule-an-barmialiddi napiragwadbi ibmar soged. Andi, an a-itosadba, we-napneggi-bukmaladga an ibmar sogdimogad.
JOH 8:27 Judío-dummagan, Jesús e-Babgi-ega-sunmaked, aku-itosmalad.
JOH 8:28 A-ulale, Jesús sogdebar: —Ar bemar, ani Dule-Machi, nakrusgi-biokegala niba onakwismalale, geb bemar wisgunonimaloed, an doa-gue. Degine, an-itolegedba an ibmar imakdisulid. Ar an-Bab-an-odurdaksadba an sunmakdiid.
JOH 8:29 Ar an-Bab-an-barmialid anba gudiid, wargwen an-metedisulid. Ar ade, an bela-ibmar-imakedi, an-Bab-nabir-itoge an imaked.
JOH 8:30 Jesús-weyob-sunmakedba, bukidar egi bensuli gunonimalad.
JOH 8:31 Jesús, Judíoʼmar-egi-bengussurmaladga sogded: —Ar bemar an-gayaburba-sunmakedgi nue eba nanaele, bemar an-sapingan-sunnadga gumaloed.
JOH 8:32 Degine, bemar igar-napiragwad wisgunonimaloed, degine, igar-napiragwad isguedgi bemar-ollorsanonikoed.
JOH 8:33 Judíoʼmar, Jesús-abin sogdemalad: —Anmar, Abraham-e-wagan gumalad. Anmar dule-maiga gwen gudisurmalad. Degisoggu, ¿ibiga be anmarga soge: ‘Bemar ollorgunonikoye?’
JOH 8:34 Jesús, abin-sogded: —Napira an bemarga soged, dule-isguedgi-gudimaladi, isgued-maiga gudidimalad.
JOH 8:35 Dule-maiga-arbaedi geg neg-yagi gudigu gued. Ar neg-ibed-e-mimmirdi negyagi gudigu guodo.
JOH 8:36 Degisoggu, Bab-Dummad-Machi isguedgi bemar-onononikir, geb be nue-napira ollorgunonimaloed.
JOH 8:37 An wisi bemar Abraham-wagan gumalad, degi-inigwele, an-ibmar-sogsad be benmalad-ulale, an-oburgwebimalad.
JOH 8:38 An-ibmar-sogedi, an-Bab-walik-an-ibmar-daksadba an sunmaked. Ar bemardi ibmar-imakedi, be-bab-ibmar-itosadba be imakmarmogad.
JOH 8:39 Judío-dummagan Jesús-abinsadmargu, sogdemalad: —Abraham, anmar-dadad. Jesús, abin-sogded: —Bemar Abraham-wagan-sunnadina, Abraham-ibmar-imaksadyob be ibmar imakdimarmoganad.
JOH 8:40 Bab-Dummadgi an-ibmar-napiragwad-itosad an bemarga-sogsad. Degite, be an-oburgwebimalad. Dad-Abrahamʼdi gwen deyob gussulid.
JOH 8:41 Bemardi, be-bab-Satanás-ibmar-imaked be imakdimalad. Geb degi, Judíoʼmar Jesúsʼga sogdemalad: —Anmar negsichidgi gwalulesadsurmalad. Anmar bab-nika gwalulesmalad. Bab-Dummad anmar-babad.
JOH 8:42 Geb Jesús amarga sogded: —Ar Bab-Dummad bemar-babana, be an-sabmalando. Ar an Bab-Dummadgi danikid. An-itolegedgi an danisulid, Bab-Dummad an-barmialid.
JOH 8:43 ¿Ibiga nue-akusunna an-ibmar-soged be itomala? Ar ade, bemar an-ibmar-soged yeer-itosurmalad, aga be aku itomalad.
JOH 8:44 Ar nia-saila bemar-babad, degine, be-bab-ibmar-abegedba be damalad. Ar gusgu, gebesailaunni nia-saila dule-gindakedid, degine, igar-napiragwadgi bangusad, ar igar-napiragwad nia-sailagi naisulid. Ar nia-saila gakansaar sunmakdele, gusgu na e-daedba sunmakdedaed. Ar ade, gusgu gakansaerbad, degine, dulemar-gakansaed-e-babad.
JOH 8:45 Ar andi ibmar-napiragwad bemarga soged, degite, be an-abingasurmalad.
JOH 8:46 ”¿Doa-dule, isgudiiye angi sogoe? Ar igar-napiragwad an sogele, degite, ¿ibiga be an-itosurmarsunna?
JOH 8:47 Ar dule Bab-Dummadgadile, Bab-Dummad-gayaburba-sunmaked itoged. Bemar, Bab-Dummadgadsulid, a-ulale, bemar Bab-Dummad-gayaburba itosulid.”
JOH 8:48 Judíoʼmar, Jesús-abinsadmalad, ega sogdemalad: —Anmar nabir sogmalad, be Samaria-dulemar-isganayobmoye, degine, nia begi naiye.
JOH 8:49 Jesús, abin-sogded: —Angi nia naisulid. An-Bab-nug bur an odummodiid. Bemardi an-nug ichodimalad.
JOH 8:50 An-nug-odummoged an amidisulid. Ar dule-wargwen an-nug-odummoged maid, a sogoed, an dule-nueddibe, an dule-isganadibe.
JOH 8:51 Napira an bemarga soged, dule an-gayaburba-sogedba-daele, we-dule burgosulid.
JOH 8:52 Geb degi, Judíoʼmar Jesúsʼga sogdemalad: —Emigindi, anmar nue-wisdo, begi nia naid. Abraham, degi, Bab-Dummad-gayaburba-barsogmaladdi burgwismalad. Emide, bedi soged: ‘Ar dule-wargwen an-gayaburba-sogedba-daele, burgwed itogosurye.’
JOH 8:53 Ar bede anmar-dad-Abrahamʼba ¿bur dummadsi? Dad-Abrahamʼdi burgwisad. Bab-Dummad-gayaburba-barsogmalad burgwismarmogad. ¿Ar be doaye sogsunna? Amarba, ¿be-bur dummadye be sogsunde?
JOH 8:54 Jesús, Judíoʼmar-abin sogded: —An na dukin san-odummogele, an-san-odummodiidi, we binsaleddo. Bab-Dummad bemar-Bab-Dummadye be sogmaladi, a-Bab-Dummadi an-Babad, a, an-nug odummoged.
JOH 8:55 Bemardi a-Bab-Dummad akudakmalad, andi a-Bab-Dummad mag daked. An bemarga sogdibe, a-Bab-Dummad aku an dakye, bemar-sunnaa an gakansasaled. Andi a-Bab-Dummad mag an daked, degine, e-gayaburbaba an nanadibalid.
JOH 8:56 Anmar-dad-Abraham weligwar an-danikoed-dakoedba itosad. An-nonikid-daksagu, nue-weligwar itononikid.
JOH 8:57 Geb degi, Judíoʼmar ega sogdemalad: —Amba be birga-dulabo-gakambe (50) niksulid, degite, ¿Abraham be daksade? Be daksasulid.
JOH 8:58 Jesús, abin-sogded: —Napira an bemarga soged, amba yoo Abraham-gwalulege, bato an gudiid.
JOH 8:59 Degidgine, Judíoʼmar akwagi-Jesús-makega akwa gadebinmalad. Jesúsʼdi emar-idu dukusad, degi, Bab-Dummadse-goled-neggi nodsunnad. Degi, emar-abargi-node nadsunnad.
JOH 9:1 Jesús nadapgu, machered-wargwen muu-neggi-ibyasuli-gwalulesad dakalid.
JOH 9:2 Jesús-sapingan Jesúsʼse egichiarmalad: —Odurdaked-saila: ¿Ibiga we-dule, ibyasuli gwalulesa? Weyob we gwalulesadi, ¿e-babgan-isgusad-ulale, igi, e-isgusad-ulale?
JOH 9:3 Jesús e-sapingan-abin sogded: —We-dule, e-isgusad-ulale, weyob gwalulessulid. Degi, e-babgan-isgusad-ular, weyob gwalulessurbalid. We-dule ibyasuli-gwalulesadi, adi, Bab-Dummad-ibmar-imaked we-dulegi oyolegegalad.
JOH 9:4 Yoo mutik-gued-iduar, anmar dule-an-barmialidga arbaed imakergebed. Ar neg-mutik-gued danikid. Agi, dulemar bar arbaosulid.
JOH 9:5 An we-napneggi-gudiidgi, an gwallu-meegwadyob gued. Ani an dulemar-bukwadga igar-napiragwad oyonaid.
JOH 9:6 Jesús deyob-sogsad-sorba, napagi-wiaksagu, napa wiigi olli-olli imaksad. Degine, e-googi olli-ollid-wesgu, dule-ibyagi mage-mage imaksad.
JOH 9:7 Geb degi, Jesús dule-ibyasulidga sogded: —Dii-wilasar-naid-Siloéʼye-nugadse be-ibya be enukna. (Siloé sogleged, Barmilesadye). Agine dule-ibyasulid ibya-enukega nadsunnad. Ibya enuksagu, bato sunna mag-atake gunonikid.
JOH 9:8 E-neg-dikarba-mamaid, degine, dule-ibyasuli-gudidaed-mag-dakmaladi, sogdemalad: “¿Ar we, dule-ibyasuli, degi, aimarse mani-egisdidaedsursi?”
JOH 9:9 Abar sokarmalad: “We, a-dule.” Baigandi sokarmarmogad: “Suli, binsa we a-sunnaa dakleged.” Geb degi, e-ibeddi sokalid: “Ani an a-dule.”
JOH 9:10 Ese egichiarmarsunnad: —¿Igi nabir magar be atake gusa?
JOH 9:11 Dule-nugusad, abin-imakdegu, sogded: —Dule-wargwen, Jesús-nugadi, napa olli-olli imaksad. Agine an-ibyagi mage-mage imaksad. Geb anga sokalid: ‘Siloéʼse be-ibya be enuknae.’ Degisoggu, an ase nadsunnad. An-ibya an enuksagu, mag-atake an gunonisunnad.
JOH 9:12 Geb degi, ega sogdemalad: —¿Bia a-dule nadsunna? Dule-nugusad abin-sogded: —An wissuli, bia nade.
JOH 9:13 Dule-ibyasuli-gudigusad Fariseoʼmarse senonimalad.
JOH 9:14 Ar ade, Jesús napa olli-olli-imaksadi, degi, dule-ibyasulid-onudaksadi, obunnoged-ibagi imaksad.
JOH 9:15 Fariseoʼmar dule-ibyasuli-gudigusadse egisdemarmogad: —¿Igi nabir be ibya nugusa? Dule-nugusad, abin-sogded: —Jesús an-ibyagi olli mage-mage imaksad. Degi, an ibya-enuksagu, mag-atake an gunonikid.
JOH 9:16 Fariseoʼmar abar sogdemalad: “We-dule Bab-Dummadgi danisulid. Agala, we-dule obunnoged-ibagi dule-nudaksad.” Fariseo-baigandi sogmalad: “Ar dule isgudiile, ¿sunna ibmar-wilubgan-dakledisurmalad imaksi? Suli, geg imake.” Agala, Fariseoʼmar na abin-abin imakarmarsunnad.
JOH 9:17 Fariseoʼmar gannar dule-ibyasuli-gudigusadga sokarmalad: —Dule-bega-ibya-nudaksadgi, ¿igi be sogmosunna? Dule-nugusad, abin-sogded: —Andi an soged, we, Bab-Dummad-gayaburba-barsoged-duleye.
JOH 9:18 Ar Judíoʼmardi we-dule-ibyasuli-gudigusadi benmalad. Emidi, ibya-nikusye mag-atakye-soged benmalad. A-ulale, dule-ibyasuli-gudigusad-e-serganse gochamarsunnad.
JOH 9:19 Ese egisdemalad: —¿Ar we be-machi-sunnadi? ¿We, be-ibe ibyasuli-gwalulesye be sogmaladi? Ar degite, ¿ibiga emigindi nabir ataksunna?
JOH 9:20 E-sergan sogdemalad: —Anmar wisi, we anmar-machid, ibyasuli gwalulesad.
JOH 9:21 Emigindi, mag-atakeddi an wissurmalad, ibiga nabir mag-atake. Anmar wissurbalid, doa ega nabir ibya nudaksa. Ar bato dummadsoggu, ese be egismardo, na e bemarga sogoed, doa ega ibya nudaksa.
JOH 9:22 Dule-ibyasuli-gudigusad-e-sergan Judío-dummagan-dobedbali, weyob sogsamalad. Ar ade, Judío-dummagan bato igar-itosmalad, dule-wargwen sogdibeye, Jesús, Bab-Dummad-dule-wargwen-barmidagoye-sogsad-duleye, Judíoʼmar-onmakedneggi onomaloye.
JOH 9:23 A-ulale, dule-ibyasuli-gudigusad-e-sergan sogsamalad: “Bato dummadsoggu, ese be egismarye, doa e-onudaksa.”
JOH 9:24 Degine, Fariseoʼmar dule-ibyasuli-gudigusadse gannar gochamargu, ese egisdemalad, ega sogdemalad: —Bab-Dummad-asabin napiragwadba be anmarga sogo, igi be nugusa. Anmardi wismalad, we-dule, dule-isganad.
JOH 9:25 Dule-nugusad, abin-imakdegu, sogded: —An wissulid, we-dule, dule-isgudiiddibe. Unnila ibmar-soggwennaa an wisid. Iduardi, aku an atakenad, emigindi, mag an ataked.
JOH 9:26 Fariseoʼmar gannar dule-ibyasuli-gudigusadse egichiarmarbalid: —¿Igi be-imaksa? ¿Igi-nabir bega ibya nudaksa?
JOH 9:27 Dule-nugusad, abin-sogded: —Ar bato bega an sogsamalad. Be an-itossurmalad. ¿Degite, ibiga gannar be itobimarsunna? ¿Ar bemar e-sapinganga gubimarmosi?
JOH 9:28 Fariseoʼmar dule-ibyasuli-gudigusadse uluarmalad, ega sogdemalad: —Bee be, Jesús-e-sapindo. Anmardi, Moisés-e-sapinganad.
JOH 9:29 Anmardi wisid, Bab-Dummad Moisésʼga sunmaksad. We-duledi, anmar wissulid, bia daniki.
JOH 9:30 Dule-ibyasuli-gudigusad abinsadgu, sogded: —¡Ar deyobi! ¡We-ibmar nue-aku itolegedid! Bemardi wissurmalad we-dule bia daniki, degite, angardi ibya nudaksad.
JOH 9:31 Ar anmar wisid, Bab-Dummad dule-isgudimalad ese gollalile, itosurdaed. Ar dule-wargwen Bab-Dummad-dobee nanadiirdi, degine, Bab-Dummad-sogedba ibmar imakdiirdi, Bab-Dummad, a-dule ese gollalile, adi, itodaed.
JOH 9:32 Ar bipisaale, gwen itoledisulid, dule-wargwen, dule-gusgu-ibyasuli-gwalulesadga ibya nudaksaye.
JOH 9:33 We-dule Bab-Dummadgi danisulina, gege deyob ibmar imakenad. Ar emigindi, deyob, ibmar-imakdisoggu, we-dule, Bab-Dummad-akar danido.
JOH 9:34 Fariseoʼmar abinsadmargu, ega sogdemalad: —Bede, isguedgi gwalulesadde, ¿be anmar-odurdakde? Be anmar-odurdakosulid. Degi, Judío-dummagan, dule-ibyasuli-gudigusad, Judíoʼmar-onmakedneggi onosmarsunnad.
JOH 9:35 Jesús itoalid, Fariseoʼmar Judíoʼmar-onmakedneggi dule-ibyasuli-gudigusad onosmarye. Geb degi, Jesús a-dule-amisgu, ega sogded: —¿Dule-Machigi be bensuli?
JOH 9:36 Dule-nugusad, abin-imakdegu, sogded: —Dummad, ¿a-dule, doa-dulesunna? Adi, mer an egi benguegar.
JOH 9:37 Jesús, abin-sogded: —A-dule bato be daksad. Ani an a-duled, bebo sunmakgwichid.
JOH 9:38 Dule-ibyasuli-gudigusad, abin-sogded: —Dummad, an begi bensulid. Geb degi, Jesús-nug-odummogega Jesús-abin yokorgi-sindigar sigisad.
JOH 9:39 Jesús sogded: —An dulemarga-igar-nabogega, we-napnegse an nonikid. Dule-aku-atakdimalad mag-ataksaega an nonikid. Degi, dulemar-mag-atakmalad, aku-atak-imakega an nonikid.
JOH 9:40 Degine, Fariseo-gwenna-gwenna Jesús-walik-gwichimalad, Jesús-degi-soge-itosmargu, ega sogdemalad: —Ar ¿anmar aku atakmarmode?
JOH 9:41 Jesús, amar-abin sogded: —Ar bemar aku-atakena, be isgued niksurmalanad. Emigindi, bemar sogsoggu, Bab-Dummad-Igar-Maid nue mag an dakmarye. A-ulale, be-isgued begi naimarsundo.
JOH 10:1 Jesús sogdebar: “Napira an bemarga soged: Dule sibad-wawaad-galu-emakaled-yawagakgi dogsulile, yarganba dukuar dogele, we-dule, sibad-wawaad-atursaeddo, degi, dule-atursili-sunnaddo.
JOH 10:2 Ar dule yawagak-siidgi dogerdi, we-dule, sibad-wawaad-ibedsunnadid.
JOH 10:3 ”Yawagak-daked we-dulega yawagak-egaed, geb sibad-wawaad na e-edarbed-gayaburba mag itoged. Sibad-wawaad-edarbed e-sibad-wawaadse na nugba-nugba goled. Degine, galu-yaba-bukwadgi onoged.
JOH 10:4 Sibad-wawaad-edarbed bela e-sibad-wawaad-onisale, sibad-wawaad-idunadap daed. Sibad-wawaad eba nadapi daed, ar ade, e-edarbed-e-gayaburba mag itomalad.
JOH 10:5 Ar e-edarbedsulidbardi naddasurmalad, aka bur e-idu duurmakdedamalad, ar ade, e-gayaburba aku-itomalad.”
JOH 10:6 Jesús weyob dulemarga odukuar-ibmar-sogsadi, aku-itos gusmalad, ibi ega obarisa.
JOH 10:7 Jesús gannar emarga sogdebarsun: “Napira an bemarga soged: Ani an sibad-wawaad-galu-emakaled-e-yawagak-sunnadid.
JOH 10:8 Dulemar-odurdakega an-idu-nonimaladi, atursamaladid, degi, gandikidgi atursamaladid. Degi-inigwele, Sibad-wawaadmardi amar-gayaburba itossurmalad.
JOH 10:9 Ani an yawagak gued. Dule angi dogele, a-dule abonolegoed. Sunna doged, degi, sunna nobalid, masgunned gusgu nikaguoed.
JOH 10:10 ”Dule-atursaed danikile, unnila sibad-wawaad-atursaegala, oburgwegala, degine, osulogega, nonidamalad. Andi an nonigua, burba-dulagudigued-ukega an nonikid, degine, bela ulubgi yeer-itodiguega an nonikid.
JOH 10:11 ”Ani an sibad-wawaad-edarbed-nuedid. Sibad-wawaad-edarbed-nued na sibad-wawaad-ular, e-san-burba na uked.
JOH 10:12 ”Ar sibad-wawaad-edarbed-manigi-arbaeddi, sibad-wawaad-edarbed-nuedsulid, ar ade, sibad-wawaad egadsulid. A-ulale, achu-burburud-danikile, sibad-wawaad-mete naddaed. Degisoggu, achu-burburud sibad-wawaad-ganonikogu, sibad-wawaad-oduurmakega imaked.
JOH 10:13 Dule-manigi-arbaed wakitedaed, ar ade, unnila bennuklegega arbaed. Degisoggu, sibad-wawaad-baisur daksundo.
JOH 10:14 ”Ani an sibad-wawaad-edarbed-nuedid. An-sibad-wawaad mag an daked, degi, mag an-dakmarmogad.
JOH 10:15 Igi Bab nue-an-wisi, deyobi, an Bab-wismogad. Degine, an-sibad-wawaad-ular, an-san-burba an na uked.
JOH 10:16 An Sibad-wawaad-baigan we-galu-yabalidsulid, an nikbalid. Amar anse an sedamogargebed. Deyobi, amar an-gayaburba itomaloed. Degine, sibad-wawaad dangwennaa guoed, degine, e-edarbed wargwennaa nikubaloed.
JOH 10:17 ”Burgwega an-san-burba an uked, adi, gannar an subaligar. A-ulale, Bab nue an-sabed.
JOH 10:18 Gege dule an-san-burba angi sued, ar ade, an-sunnad na wargwengi an uked. Ar ani an-san-ukega, degi, an gannar subaliga, an gangued nikad. An-Bab we-igar-anga-uksadba an imaked.”
JOH 10:19 Judíoʼmar Jesús-wegi-sogsad-ular, muchub-muchub abin-abin na imakarmalad.
JOH 10:20 Bukidar Jesúsʼgi sogdemalad: “We, nia-nika gudiid. We, akargualid: ¿Ar ibiga be itomala? Mer be itomala.”
JOH 10:21 Baigandi sogmogad: “We-ibmar-sogedi, we nia-gayasulid. ¿Ar niade sunna dule-ibyasurmaladga ibya nudaksi? Suli, degisulid.”
JOH 10:22 Deunni, Jerusalénʼgi Bab-Dummadse-Goled-Neg-Gannar-Nudaklesad-Iba naid. A-ibagangine, dii-wied-nii naid.
JOH 10:23 Deunni, Jesús Bab-Dummadse-goled-neg-ubeb-Salomónʼye-nugadsik, bipirmakdiid.
JOH 10:24 Judíoʼmar bela Jesús-ebilis-ambikusmargu, ega sogdemalad: —¿Bule-undar-sui yootee be anmar-obinsaega imakoe? Ar be Bab-Dummad-dule-wargwen-barmidagoye-sogsad-dulele, anmarga bakar be soge. ¿Ar be Cristo-sunnadi?
JOH 10:25 Jesús, amar-abin sogded: —Ar bato an bega sogsamalad, bemar an-benmalad. An-Bab-nuggi-an-ibmar-saedi, a bemarga sognaid, an doa-dule gue.
JOH 10:26 Ar bemar an-sibad-wawaadsursoggu, a-ular, be an-itosurmalad.
JOH 10:27 An-sibad-wawaad an-gayaburba mag-itomalad, an mag daked, degine, anba naddamalad.
JOH 10:28 Ani an ega burba-geg-bergued uked, bipisaale amar gwen berguosurmalad, degisadegumaloed. Degine, bipisaale dule gege angi an-sibad-wawaad sued.
JOH 10:29 An-Bab anga-sibad-wawaad-uksadi, a-Bab, bela bur dule-dummadid. Degine, bipisaale dule-baid gege an-Babgi an-sibad-wawaad sued.
JOH 10:30 Ani, an-Babbo, anmar wargwenna gued.
JOH 10:31 Degi, Judíoʼmar, Jesús-makega gannar akwa gasmarbalid.
JOH 10:32 Jesús Judíoʼmarga sogded: —Ibmar-nuegan-bukidar an-Bab-nuggi an bega oyosmalad. ¿Igid-imaksad-ular, akwagi be an-makbimarsunna?
JOH 10:33 Judíoʼmar, abin-imakdemargu, sogdemalad: —Be-ibmar-nued-imakdiid-ular, anmar akwagi be-makbisurmalad. Be Bab-Dummad-nuggi-dododiid-ular, anmar akwagi be-makbied. Ar be we-napnegginedid, emide, Bab-Dummadga na be imaked.
JOH 10:34 Jesús, abin-sogded: —¿Ar bemargi Moisés-Igargi narmakar maisursi? ‘An bemarga sogsa gusad, bemar bab-dummagan gumarye.’
JOH 10:35 ”Ar Bab-Dummad Bab-Dummad-gayaburba-abingasmaladse, bab-dummaganye gochagusad. Ar Bab-Dummad-Garda geg anmar bisged. Degisoggu, noar an sogsasurdo.
JOH 10:36 Ar Bab ega-arbaega an-susad, degine, we-napnegse an-barmialid. Ani an Bab-Dummad-Machiye, an sogsad-ulale, ¿be anga sogmalode: ‘Be Bab-Dummad-nuggi dododiiye?’
JOH 10:37 An-Bab-ibmar-imaked an imaksulile, mer be an-ibmar-soged itomardo.
JOH 10:38 Ar an an-Bab-ibmar-imaked imakerdi, be an-benmar-inigwele, an-ibmar-imakdiidgindi, mer be bengumalo. Adi, be wisgumalaga, degine, mer be bengumalaga, Bab angi gudiid, degine, an Babgi gudimogad.”
JOH 10:39 Agine, Judíoʼmar gannar Jesús-gabiguarmalanad, degi-inigwele, Jesús egi nabir wakichagusad.
JOH 10:40 Jesús gannar Jordán-diwar-obakar, bia Juan iduar Bab-Dummad-diigi-ogleged-igar-imaknaigusa, ase nadegusad. Agi Jesús megidapid.
JOH 10:41 Ase dulemar-bukidar Jesúsʼse nonigusmalad, degi, sogdemalad: “Ar Juan ibmar-wilubgan-imakledisulid imaksasur-inigwele, bela we-Jesúsʼgi-ibmar-sogsadi napira sogsad.”
JOH 10:42 Agine, dulemar-bukidar Jesúsʼgi-bensuli gunonimarsunnad.
JOH 11:1 Dule-wargwen, Betaniaʼgined, Lázaroʼye-nugadi uellemaid. We-Betania-neggweburde María, degine, e-ior-Marta-e-neggweburad. We-omegan, Lázaro-e-bunmalad.
JOH 11:2 We-María, gwallu-wawadgi Bab-Jesús-magsagusadid. María e-sailagiagi Dummad-Jesús-e-nag odingusii gusadid. Deunni, María-e-sus-Lázaro uellemaid.
JOH 11:3 A-ulale, Lázaro-e-bunmar dulemar-barmisad, adi, Jesúsʼga sogega: “Dummad, dule-nue-be-sabedi, uellemaiye.”
JOH 11:4 Jesús, degi-itosgua, sogded: “We-Lázaro-uellemaidi, burgwegarsulid. Bab-Dummad-nug-odummogega we uellemaid. Adi, we-uellemaidgi Bab-Dummad-Machi-e-nug odummolegegar.”
JOH 11:5 Dakargua, Jesús, nue-Marta-sabed, e-urba-María-sabbalid, degine, nue-Lázaro-sabbalid.
JOH 11:6 Ar deyob sabe-inigwele, Jesús Lázaro-uellemaiye-wisgusgu, amba ibabo e-gudiidgine gudii gusad.
JOH 11:7 Geb a-sorba, Jesús e-sapinganga sokalid: —Anmar gannar Judeaʼse namala.
JOH 11:8 E-sapingan ega sogded: —Odurdaked-saila, emichaale Judíoʼmar akwagi be-makbigusmaladde, degite, be ¿gannar nabarde?
JOH 11:9 Jesús, abin-sogded: —Ar neg-ibgined ¿wachi-irambe-gakabo (12) niksursi? Dule neg-ibgi gudiile, geg yoleged. Ar ade, we-napneggined-neg-meegwadba gudiid.
JOH 11:10 Ar dule neg-mutikidgi gudiirdi, yoledo, ar agindi gwallu-meegwad sulid.
JOH 11:11 Jesús deyob-sogsad-sorba, e-sapinganga sogdesunnad: —Anmar-ai-Lázaro gabmaid, odakega an ese naergebed.
JOH 11:12 E-sapingan ega sogdemalad: —Dummad, ar Lázaro gabmaile, nuguodo. Degite, ¿ibiga be nabisunna? Mer be nae.
JOH 11:13 Jesús degisogsagusadi, sognaindo: “Lázaro burgwar maiye.” Ar e-sapingandi, gabed-sunnad ega obarye bienad.
JOH 11:14 Geb agi Jesús bakar-buud sogdesunnad: —Lázaro burgwis maiye.
JOH 11:15 An Lázaro-walik gudigussulid-ular, an yeer itoged, adi, bemar mer angi bengumalagar. Degisoggu, anmar Lázaroʼse namargwelo.
JOH 11:16 Degi, Tomás, Dídimoʼye-bimarbalid, e-sordamarga sogdesunnad: —Anmar Jesúsʼba burgwega eba namarmoga.
JOH 11:17 Degi, Jesús Betania-neggweburse nonigu, Lázaro bato ibabakegus neg-uangi diglesmai daknonikid.
JOH 11:18 Betania-neggwebur, Jerusalénʼgi itakaa siid, unnila wachi-abala-nanae-wilub bangu siid.
JOH 11:19 Judíoʼmar-bukidar, Lázaro-burgwisad-ular, Martaʼse, degi, Maríaʼse nonigusmalad. Adi, amar-e-gwage baisur-itoge imakegar.
JOH 11:20 Marta, Jesús-daniye-itosgu, e-abin nadegusad. Maríaʼdi neggi besad.
JOH 11:21 Marta Jesúsʼga sogded: —Dummad, be wegi anmar-abargi-gudigusana, an-sus burgwissulinad.
JOH 11:22 Degi-inigwele, an wisbardo, ar ibu Bab-Dummadse be egisele, Bab-Dummad bega ukoed.
JOH 11:23 Jesús, abin-sogded: —Be-sus gannar durguoed.
JOH 11:24 Marta, abin-sogded: —An wisi, ibagan-berguder, an-sus dulemar-gannar-durguoed-ibagi gannar durguoed.
JOH 11:25 Jesús, abin-sogded: —Ani an gannar dule-odurguedid, degi, ani an burba-geg-bergued ukbalidid. Ar dule angi bensulile, ar burgwar-mai-inigwele, gannar durguoed.
JOH 11:26 Bela-dula-gudidimaladi angi bensulile, e-san-burba berguosulid, degisadeguoed. Weyob-an-bega-soged, ¿be bensuli?
JOH 11:27 Marta, Jesús-abin sogded: —Dummad, eye, an bensuli. Be, Bab-Dummad-Machid. Be Cristo, we-napnegse-danikoye-soglesgusadid.
JOH 11:28 Marta deyob sogsad-sorbali, e-urba-Maríaʼse gornaded. Ega arbakee sogdapid: —Odurdaked-saila noniye. Bese gorye.
JOH 11:29 Deyob ega-soge-itosgu, María yog-gwisguar imaksad. Jesúsʼse nade gusad.
JOH 11:30 Jesús deun amba yoo neggweburse doged, ar bia-Marta-e-abingusadgi amba gudiid.
JOH 11:31 Judíoʼmar-wis-María-gwage-baisur-itogega-imakega eba e-neggi-bukmaladi, María gwae-gwisgus-node-daksamargu, eba nodmarmogad. Amardi binsamalad: “María neg-uanse nad-dakleye, ase bonad-dakleye.”
JOH 11:32 María, Jesús-siidse-modapgu, Jesús-dakdegu, e-abin sindigar sigdapid, ega sogded: —Dummad, be wegi anmar-abargi gudigusana, an-sus burgwissulinad.
JOH 11:33 Jesús, María-ise-boale dakdegu, degine, Judíoʼmar-María-gwage-baisur-itoge-imakega-nonimaladi, ise-boarmarmoga dakdegu, ulubgi nue-nunmak itonadmogad, degi, nue-María-wile dakded.
JOH 11:34 Jesús Maríaʼga sogded: —¿Bia bemar Lázaro-digsamala? Jesúsʼga sogdemalad: —Dummad, be dage, be dakdage.
JOH 11:35 Degi, Jesús boded.
JOH 11:36 Geb Judíoʼmar sogdemalad: —Nue be dake. Ibiyobi Jesús, nue-Lázaro-sabe.
JOH 11:37 Geb Judío-baigan sogdemarmogad: —Ar we-Jesús, dule-ibyasulidga ibya egasad. Lázaro-mer-burgwega ibmar imakewilubbinad.
JOH 11:38 Jesús nue-ulubgi-bukib-itodbargu, neg-uanse nonikid. Neg-uandina, akwa-yaa-ollogwadid, e-doged-idu akwa-dummad siid.
JOH 11:39 Jesús dulemarga sogdesunnad: —Akwa-dummad onirmar. Dule-burgwisad-e-bun-Marta, sogded: —Dummad, ¿Ibiga akwa be onirbie? Bato ibabakegus diglesad. Degisoggu, bato nun yapanned.
JOH 11:40 Jesús, Marta-abin sogded: —¿An bega sogsasursi? Be angi bensulile, Bab-Dummad-gangued be dakoye.
JOH 11:41 Geb dule-burgwisad-diglesad-dogedgi akwa-dummad-siid onirismalad. Geb degi, Jesús niba-atakdegu, sogded: —Baba, be an-itossoggu dog-nuedye an bega soged.
JOH 11:42 An wisid, be gusgu an-itodaed. Ar we-ibmar-an-sogsadi, dule-an-dikarba-bukwamalad-ular, an sogsad, adi, mer angi bengumalaga bee be an-barmiarye.
JOH 11:43 Jesús deyob-sogsad-sorbali, binnasur goted: —¡Lázaro, magaba be nodage!
JOH 11:44 Lázaro-burgwis-maidi, noargu, bela naga, degine, arganmar morgogi bipirmakale ise-atinnar noalid. Degine, e-wagar ise-morgogi bipirmakarbalid. Jesús dulemarga sogded: —Be Lázaro-esikmar. Nanaega be imakmarsun.
JOH 11:45 Judío-bukidar Maríaʼse-nonigusmaladi, Jesús, gannar-Lázaro-odulosad daksamargu, Jesús-bensuli gunonimalad.
JOH 11:46 Gwenna-gwenna Fariseoʼmarse nadmalad, ega sogdapmalad, igi Jesús Lázaro-odulosa.
JOH 11:47 Degine, dule-irwa-Bab-Dummadse-gormalad-e-dummagan, degi, Fariseoʼmar, igar-itogega dummagan-onmaksad, geb sogdemalad: —¿Igi anmar Jesús-imakmaloe? Ar emide, Jesús ibmar-wilubgan-imakledisulid bukidar imakdiid.
JOH 11:48 Anmar we-Jesús ibmar-dakledisulid-imakdii imakele, bela eba nagudmaloed. Geb degi, Roma-dummagan nonimaloed, anmar-Bab-Dummadse-goled-neg, degi, anmar-yar osulononimaloed.
JOH 11:49 Judío-dummad-wargwen, Caifásʼye-nugadi, a-birgagi dule-irwa-Bab-Dummadse-gormalad-bur-dummadga maid. A e-sordamarga sogded: —Bemar aku-itomalad.
JOH 11:50 Ar bemar magar itosurmalad. Bela dulemar-anar dule-wargwen-burgwed bur nabirid, adi, melle bela dulemar-we-yargi-bukmalad obelolegegar.
JOH 11:51 We-Caifás-ibmar-sogsadi, na wargwen e-itolegedba ibmar sogsasulid. Ar ade, a-birgagi dule-irwa-Bab-Dummadse-gormalad-bur-dummadsoggu, iduakwaa sogsad: “Jesús bela Judío-dulemar-anar burgoye.”
JOH 11:52 Jesús unnila Judío-dulemar-anarbi burgosulid. Bela Bab-Dummad-mimmigan-aisakis-bukmalad-danakwaa-urbega burgwebaloed.
JOH 11:53 Degisoggu, Judío-dummagan, a-iba-akale Jesús-oburgwemaloye sogsamardo.
JOH 11:54 Degisoggu, Jesús Judíoʼmar-abargi bar gudii gussulid. Agala, Judea-yargi nodegusad, nega-dulesulid-dikarba, neggwebur-Efraínʼye-nugadse, naded. Jesús a-neggweburgi e-sapinganmala megidapsunnad.
JOH 11:55 Deun, Judíoʼmar-Oburgwilegoenad-Iba-onoleged bato omosad. Degisoggu, bukidar neggwebur-baid-baidginmalad san-swilidik-imakmalaga Jerusalénʼse iduakwasaar nonimalad.
JOH 11:56 A-dulemar Bab-Dummadse-goled-neggi-bukmargu, Jesús-amiarmalad, na muchub-muchub egisnanai guarmalad: “Be dakgua, ¿Jesús ibase noniko be insae?”
JOH 11:57 Dule-irwa-Bab-Dummadse-gormalad-e-dummagan, degi, Fariseoʼmar, igar uksamalad. “Dule bia-Jesús-gudiid wisgunonikile, sogmaloye,” adi, Jesús-ganamalagarye.
JOH 12:1 Ibanergwase (6), Oburgwilegoenad-Iba-naguoele, Jesús Betania-neggweburse Lázaro-maidse nonikid. Jesús, we-Lázaro-burgwisgusgu, gannar odulos gusadid.
JOH 12:2 Agine, Jesúsʼga sedo masgunned imaksamalad. Deunni, Marta ega mas-daknai gusad. Lázaroʼdi, Jesús-mas-gunsigu, sii gusmogad.
JOH 12:3 Agi María, bute-wargwen gwallu-wawad-nued-nardoʼye-nugad, ber gargesailadi, Jesúsʼse senonikid. Geb degi, María Jesús-naggi a-gwallu-wawagwad eosad. Geb e-sailagiagi Jesús-nag odinnosad. Gwallu-wawagwad-e-yapanned bela neg-gasa sigisad.
JOH 12:4 Jesús-sapin-wargwen, Simón-machi-Judas-Iscarioteʼye-nugad, Jesús-darba-ukoed-dule, sokalid:
JOH 12:5 —¿Ibiga we-gwallu-wawagwad mani-birgagwen-amilege-wilubyobi, uklessuli? Adi, a-mani wileganaga uklegoenad.
JOH 12:6 Ar Judas degisogsadi, dule-wilegana-sabedbali, deyob sogsasulid. Ar ade, dule-atursilid. Ar mani-sagu-sedidasoggu, agi mani-urbilemaid gusgu arbak atursadii daed.
JOH 12:7 Geb degi, Jesús, Judas-abin sogded: —Mer Maríaʼga akar-soge. We gwallu-wawadgi-an-magsadi, an-diglegoed-ular, an-magsad.
JOH 12:8 Ar bemar-abargi wileganadi gusgu gudiguoed. Andi bemar-abargi sadeguosulid.
JOH 12:9 Judíoʼmar-bukidar Jesús Betaniaʼgi-gudiiye wisguarmargu, ese duurmaknonimalad. Unnila Jesús-dakegarbi nonisurmalad. Lázaro-dakega nonimarbalid. Ar ade, Jesús, Lázaro-burgwar-mai odulosad.
JOH 12:10 Dule-irwa-Bab-Dummadse-gormalad-e-dummagan deyob itosmargu, igar amismalad, Lázaro-oburgwemarmogoye.
JOH 12:11 Ar ade, Lázaro-durgusadba, Judíoʼmar-bukidar Judío-igar-odurdakmaladgi bangudmalad, Jesúsʼgi-bensuli gunonimalad.
JOH 12:12 A-banedgine, dule-bukidar-ibase-nonimalad itoarmargu, Jesús Jerusalénʼse daniye,
JOH 12:13 ogob-gagangiid-e-gagan gwachamalad. Degine, Jesús-nug-odummogega Jesús-abin nadmalad. Jesús-dakarmargu, binnasur gotemalad, sogdemalad: “¡Bab-Dummad-nug odummomar! We-dule, Bab-Dummad-nuggi danikid, bela ega ibnuedga gusun. We-Israel-e-Reygi nued binsalesun.”
JOH 12:14 Jesús moli-uayasuid-e-mimmi amisad. Geb e-birgi sigisad, ar igi Bab-Dummad-gardagi narmakar-sognaiyob:
JOH 12:15 “Siónʼgi-bukmalad, mer be dobgu. Be dake, be-Rey, moli-uayasuid-e-mimmi-birgi-sii bese danikid.”
JOH 12:16 Ar Jesús-sapingan gebesailagi aku-itosmalad, wede ibi-obare. Ar Jesús-nug Bab-Dummadse-ogannolesad-sorbali, geb e-sapingan insadmalad, Bab-Dummad-gardagi we-Jesúsʼgi bato degi-narmakar-naidba ega imaklesa.
JOH 12:17 Dulemar-Jesúsʼba-gudigusmaladi, Jesús Lázaro-neg-uan-yaba-maigu-ese-gochad-daksamaladi, degi, gannar-odulosad-daksamarbalidi, dule-baiganga a-ibmar-gusad sogedbimalad.
JOH 12:18 A-ulale, dulemar-bukidar Jesús-abin nonigusmalad. Ar ade, itosmalad, igi Lázaro gannar odulolesgusa.
JOH 12:19 Ar Fariseoʼmardi muchub-muchub sokarmalad: “Anmar, dulemar-mer-Jesúsʼba-naguegala, geg oakaloged. Be dake, ar bela dulemar eba duurmakmaid.”
JOH 12:20 Griego-dulemarmoga, Judíoʼmar-ibagi Bab-Dummadse-golega, Judíoʼmar-abargi nonimarmogad.
JOH 12:21 Amar, Felipeʼse nonimalad. Felipeʼde, Galilea-yargi-Betsaida-neggweburginedid. Griego-dulemar Felipeʼgi wilenaigusmalad, ega sogdemalad: —Dummad, anmar Jesús-dakbimalad.
JOH 12:22 Felipe nadgu, Andrésʼga sogdapid. Degine, Felipe, Andrés-ebogwa Jesúsʼga sogdapmarsunnad.
JOH 12:23 Jesús, abin-imakdegu, sogded: —Emigindi, ani Dule-Machi, an-nug-odummolegega iba nagunonisun.
JOH 12:24 Napira an bemarga soged, ar ibmar-gwag napagi argwansulile, e-uka nungusulile, geg ainied. Ar napagi-argwanerdi, degi, e-uka-nunguerdi, ainidagogu, bukidar sanmakodo.
JOH 12:25 ”Ar amba deyobmodo. Dule e-san-burba-sabele, binsa sabguodo. Ar we-napneggi e-san-burba na sabsulirdi, burba-geg-bergued nikuoed.
JOH 12:26 Ar dule anga arbabiele, an-sogedba-nanaega anba dagodo. Dule-anga-arbaedi, an-gudiguoedgine gudii gumogoed. Ar dule anga arbaele, an-Bab a-dule-nug odummomogoed.”
JOH 12:27 Jesús sogdebar: “Emigindi, ulubgi an surbinsa itoged. Degi-an-itogedba, ¿an sogoe, ‘Bab-Dummad, emigindi we-ibmar-nunmaked-dummad be anga osuloye?’ Suli, degi-an-sogosuli. Ar burgwega an we-napnegse nonikid.
JOH 12:28 Bur an sogodo: Bab-Dummad, be-nug be odummoge.” Degidgine, nibneggi gayaburba gornonikid: “An-nug bato an ogannosad. An-nug gannar an ogannobaloed.”
JOH 12:29 Dule-bukmalad, gayaburba-sunmak-itosmaladi, sogdemalad: “Mar gocha.” Baigandi sogmalad: “Baliwitur-wargwen ega sunmaksa.”
JOH 12:30 Jesús sunmakdegu, sogded: —We-gayaburba-be-itosmaladi, anga nonisulid, bemarga nonikid.
JOH 12:31 Emigindi, we-napneggi-dule-bukmalad-sabsur-odurdakleged-iba nagunonikid. Emigindi, nia-saila we-napneg-dummadga-gudiid-onoleged-iba nonisunnad.
JOH 12:32 Ar napagi-onakwiles an nagusale, bela dulemar anba nagumalaga an ebioed.
JOH 12:33 Jesús weyob sogsagusadi, mag-ito imaknaid, ede nakrusgi bioklegar burgoye.
JOH 12:34 Dulemar, Jesús-abin sogdemalad: —Anmar wismalad Moisés-igargi sognaid, ‘Bab-Dummad-dule-wargwen-barmidagoye-sogsad-dule-Cristo nonikile, burgosulid, degisadeguoed.’ ¿Ar ibiga bedi sogsunna, Dule-Machi nakrusgi bioklegar onakwilegergebye? Ar Dule-Machi, ¿we doasunna?
JOH 12:35 Geb degi, Jesús, abin-sogded: —Emigindi, ani gwallu-meegwadga ichesaar amba bemar-abargi an gudiid. Gwallu-meegwad amba bemar-abargi-gudiidgi eba be nanamar, adi, melle negsichid ukiarmakar begi nonimalagar. Ar dule negsichidgi-nadapile, wissurdaed, bia nadapi.
JOH 12:36 Emigindi, amba be gwallu-meegwad-nikmarsoggu, gwallugi mer be bengumar, adi, bemar neg-meegwad-mimmiganga gumalagar. Jesús degi-ibmar-sogsagusad-sorba nadsunnad. Mer e-amimalaga emar-idu dukusad.
JOH 12:37 Ar Jesús emar-wagab ibmar-wilubgan-dakledisurmalad-bukidar imaksa-inigwele, dulemar amba Jesúsʼgi bengusmalad.
JOH 12:38 Ar epenne Bab-gayaburba-barsoged-Isaías-sogsagusadyob-guegala, deyob gunonikid, deun sogsagusgu: “Bab-Dummad, ¿doa anmar-ibmar-sogsad bengussuli? ¿Doase Bab-Dummad na e-gangued oyosa?”
JOH 12:39 A-ulale, dulemar Jesús-abingassurmalad. Ar ade, Isaías amba sogsagusbalid:
JOH 12:40 “Bab-Dummad amar-e-ibya akudake imaksad, degi, amar uayasurdaega imaksabalid, adi, melle na e-ibyagi mag dakmalagar, degi, e-gwagegi melle mag itomarbaligar. Ar degiile, abonolemalo-itole. Ar degiile, amar an nudake dakledago-itole.”
JOH 12:41 Deunni, Isaías Jesús-e-gangued-daksagu, weyob sogsagusad. Degi, egi sunmaksa gusad.
JOH 12:42 Degi-inigwele, bukidar dummagan-neg-dakmamaid, ulubgi Jesúsʼgi-bensuli gusmalad. Ar we-dummagan Fariseoʼmar Judíoʼmar-onmakedneggi e-onomaloed-dobedbali bakar-buud gwen sogsasurmalad, emarde, Jesúsʼba naimoye.
JOH 12:43 Deginbali, ar dummagan, dulemar-ei-nug-odummoged bur abeged. Ar Bab-Dummad-ei-nug-odummogeddi, abesurmalad.
JOH 12:44 Jesús binnasur sunmakde, sogded: “Ar dule an-bensulile, anbi an-bengusuli gusulid, Bab-Dummad-an-barmialid bensurbalid.
JOH 12:45 Ar dule mag an-dakale an-doa-dule, dule-an-barmialid mag-dakbardo.
JOH 12:46 Ani, we-napnegse gwallu-meegwadga, an nonikid. Adi, bela-angi-bensurmalad, mer bar negsichidgi-gudii gumalagar.
JOH 12:47 ”Ar dule an-gayaburba-itogedba dasulile, ani an sogosulid, be dummad-nosye. An we-napnegse nonisulid, dulemarga sogega be nue-isgusmarye. An dulemar-abonogegala nonikid.
JOH 12:48 Ar dule an-abingasulile, degine, an-gayaburba-sunmaked abingasurbalile, e-sabsur-odurdakoed bato nikad. Ibagan-berguoedgi an-ibmar-sogsadba dulemar-an-abingassurmalad Bab-Dummadse sabsur-odurdaklegoed.
JOH 12:49 ”An-itolegedba an ibmar sogsasulid. Bab-Dummad an-barmialid, a, igar anga uksad, igi an sogoe, degi, igi an sunmakbaloe.
JOH 12:50 An wisdo, an-Bab-igar-anga-uksadi, dulemar-anba-nagumaloedga burba-geg-bergued uked. Degisoggu, an ibmar-sogedi, ar igi Bab-Dummad anga sogsa, deyob an soged.”
JOH 13:1 Jesús Oburgwilegoenad-Iba bane-nagudoed-iduar, Jerusalénʼgi gudiid. Jesús na wisid, we-napneggi-gudiid e-Babse-gannar-naed-ibagan ega warmaksad. Ar Jesús we-napneggi-e-sapingan-bukwad nue-sabsoggu, nue bela-bela-sabgudii, e-burgwedse gussunnad.
JOH 13:2 Jesús, e-sapinganmala sedo mas-gunbukwagua, nia-saila, Simón-machi-Judas-Iscarioteʼgi, Jesús-darba-ukega, burba-isgana oubosad.
JOH 13:3 Jesús wisid, e-Bab bela ibmar-imakega ega igar-uksad. Degine, Jesús wisbalid, na ede Bab-Dummadgi danikid. Degi, ede Bab-Dummadse gannar nabaloed.
JOH 13:4 A-ulale, Jesús mas-gunsigua, gwisgus-imaksad. E-mordummad esusad. Geb uka-elied-susgua, e-sadergi edichad.
JOH 13:5 Geb degi, Jesús e-sapingan-nag-enukega bormoyagi dii eosad. Geb degi, e-sapinganga nag-enukded, degi, uka-elied-e-sadergi-naidgi ega nag-odinnosbalid.
JOH 13:6 Geb degi, Jesús Simón-Pedroʼse nonikid. Geb Pedro ega sokalid: —Dummad, ¿be anga nag enukode? Sulirgebed. Be anga nag enukosulid.
JOH 13:7 Jesús, abin-sogded: —An-emi-ibmar-imaknaid aku amba be itoged. Geb sorba mag be itodapoed.
JOH 13:8 Pedro, Jesúsʼga sogded: —Be an-nag enukosur guoed. Jesús, abin-sogded: —An bega nag-enuksulile, geg be an-sapinga gued.
JOH 13:9 Geb degi, Simón-Pedro Jesúsʼga sogdesunnad: —Dummad, ar be deyob-sogele, an-nagbi be anga enukosulid. An-argan, an-nono be anga enukbalirgebed.
JOH 13:10 Jesús, abin-sogded: —Ar dule-obsamalad bar obed abesulid. Unnila e-nagbi napi-enuked abeleged. Ar ade, bato swilidik gudiid. Bemar bato swilidik gudimalad. Degi-inigwele, bela bemar swilidiksurmalad.
JOH 13:11 Ar ade, Jesús wisid doa darba e-ukoe. A-ulale, sogsagusad: “Bela bemar swilidiksurmarye.”
JOH 13:12 Jesús, e-sapinganga nag-enuksad-sorba, gannar e-mor-yosgu, mesese gannar signonikid. Geb degi, e-sapinganga sokalid: —Bemarga an nag-enuksad, ¿mag be itomala, wede ibi obare?
JOH 13:13 Ar bemar nabir Odurdaked-Sailaye, degine, Dummadye, anse be gormalad. Ar ani an adid.
JOH 13:14 Ar ani an Dummadid, an Odurdaked-Sailabalid. Degite, an bemar-nag enuksad. Bemar deyobi, muchub-muchub nag na ga enukewilubmarmodo.
JOH 13:15 An bemarga oyosad, adi, bemar an-bega-imaksamaladyobi, bemar imakegarmo.
JOH 13:16 Napira an bemarga soged: Dule-maiga-arbaedi, e-dummadba geg dummad gued. Degine, dule-barmilenaid, gege e-dummad-barmisiidba bur dummad gued.
JOH 13:17 Ar we-ibmar bemar bato wismarsoggu, bemar eba imakele, bemargi nued binsalegodo.
JOH 13:18 ”Bela bemargi an sogsulid. Ar an wisid doamar an susa. Degi-inigwele, Bab-Dummad-garda-narmaklegaledba-guegala, bemar-wargwen darba-an-ukoed. Ar Bab-Dummad-garda-narmaklegaledgi sognaid: ‘Ar dule anba madu gunsiidi, angi aibinnoniye, an-isdaradga gunoniye.’
JOH 13:19 ”Deyob-guoed-iduar, an bemarga soged, adi, degi-gunonikile, bemar mag-itos-namalagar, ani an Cristo gued.
JOH 13:20 Napira an bemarga soged: An dule-barmidoed abingamalale, an-abinganaid. Ar dule an-abinganaile, Bab-Dummad-an-barmialid-abinganamogad.”
JOH 13:21 Jesús deyob-sogsad-sorba, e-ulubgi bukib-binsaded, degi, e-sapinganga sogdesunnad: —Napira an bemarga soged, bemar-wargwenadi darba an-ukoed.
JOH 13:22 Geb degi, e-sapingan muchub-muchub dakdemalad, wissurmalad doagi Jesús degisoge.
JOH 13:23 E-sapin-wargwen, Jesús na nue-sabedi, e-dikarba sii gusad.
JOH 13:24 A-dulesega, Simón-Pedro arbak achasad, adi, a, Jesúsʼse egisega, doa-dulegi wede deyob soge.
JOH 13:25 Degi, a-dule, Jesús-binasgargi biligwa-mai Jesúsʼga sogded: —Dummad, ¿doa-dule arbak be-ukoe?
JOH 13:26 Jesús, abin-sogded: —Ar doa-dulega madu waraa an ukoe, a-dule, darba an-ukoed. Jesús madu-owardikusgu, Simón-machi-Judas-Iscarioteʼga a-madu uksad.
JOH 13:27 Judas, madu-bipi-ega-uklesad guchagu, nia-saila-Satanás egi dognonikid. Geb degi, Jesús Judasʼga sogdesunnad: —Ibmar-be-imakoedi, gwae bur be imaknasun.
JOH 13:28 Ar e-sapingan-mese-naba-bukmaladi aku-itosmalad, ibiga Jesús deyob Judasʼga soge.
JOH 13:29 Ar abar binsadmalad, Judas mani-saboged-sagu-sedisoggu, Jesús Judasʼga sogdakleye: “Anmar-ibmar-ibaga-abegedi be baknaye.” Ar ega sogbardibe: “Wileganaga wis be mani uknaye.”
JOH 13:30 Judas madu-guchagua, yog-noar imaksad. Nodgua, bato neg mutikid.
JOH 13:31 Geb degine, Judas-naded-sorba Jesús sogdesunnad: —Ar emigindi ani Dule-Machi, an-nug odummolesunnoed. Degine, anba Bab-Dummad-e-nug odummolemogoed.
JOH 13:32 Ar ani Dule-Machi, Bab-Dummad-nug an odummogele, Bab-Dummad an-nug odummomogoed. Degi, ar emiskwaa an-nug odummogoed.
JOH 13:33 ”Mimmigan, wis-ichesaar amba an bemar-abargi gudii guoed. Igi Judíoʼmarga an sogsa, deyob, an bemarga sogmarmogad. Be an-amimalo-inigwele, bemar an-amiosurmalad. An-naesokalidse, geg be anba namalad.
JOH 13:34 ”Igar-binid an bemarga ukmarsunnad. Na be muchub-muchub sabgumalo. Ar igi an be-sabgusmarmoga, deyob be muchub-muchub sabgumarmogo.
JOH 13:35 Ar na be muchub-muchub nue sabgumalale, bela dulemar mag be-dakmaloed, bemar an-sapingan gumalad.”
JOH 13:36 Simón-Pedro Jesúsʼga sogded: —Dummad, ¿bia be nae? Jesús, abin-sogded: —Emigindi, an-naesokalidse geg be anba nagweled. Sorbardi, geb be anse naoed.
JOH 13:37 Pedro ega sogded: —Dummad, ¿ibiga emigindi geg an beba nae? An be-ular-burgwega guakwaa an gudiid.
JOH 13:38 Jesús, abin-sogded: —¿Be an-ular-burgwega guakwaa gudii? Suli, be guakwaa gudisuli. Napira an bega soged: Gannir-namaked-iduar, ilapaa be an-osulogoed.
JOH 14:1 Jesús e-sapinganga sogded: “Mer surbinsa be-gwagegi be itomalo. Bab-Dummadgi mer be bengumalo. Degine, mer angi be bengumarbalo.
JOH 14:2 An-Bab-neggi neg-nuegan-bukidar nikad. Ar degisulina, an bega sogosurmalanad, an bemar-idu guagwar neg-sii-naega an naye.
JOH 14:3 An bemar-idu-naogu, an bemarga neg-guagwar-sisale, an bemar-sudagega gannar an danibaloed. Adi, an-gudiguoedgi, bemar anba gudii gumogagar.
JOH 14:4 Bemar wismalad bia an nasokali, degine, igar-maid bemar wismarbalid.”
JOH 14:5 Tomás Jesúsʼga sogded: —Dummad, anmar wissulid bia be nasokali, degite, ¿igi anmar igar-maid wisiosunna?
JOH 14:6 Jesús, abin-sogded: —Anbi unnila Bab-Dummadse be-sedoed. Ani an napiragwadid, degine, dulagudigued angi danikid. Dule angi nasulile, geg Bab-Dummadse warmaked.
JOH 14:7 Ar magar be an-dakmalana, an doa-dule, ar be an-Bab magar dakmarmoganad. Ar emigindi, bato bemar mag an-Bab-dakmalad, ar ade, bemar bato an-Bab-daksamalad.
JOH 14:8 Felipe Jesúsʼga sogded: —Dummad, Bab-Dummad be anmarga oyoge. Geb anmar gusbin itogoed.
JOH 14:9 Jesús, abin-sogded: —Felipe, an bemar-abargi dikasurgus an gudiidde, ¿amba be aku an-dakde? Ar dule an-daksale, a-dule bato an-Bab-daksado. ¿Ibiga be anse egise, Bab be anga oyoye?
JOH 14:10 ¿Ar bemar Babgi-an-gudiid bensi? ¿Ar bemar Bab-angi-gudimogad benmarbarsi? Ibmar-an-sogedi, an-itolegedba wargwengi an sogsulid. Bab-angi-maidi, angi ibmar imakmaid.
JOH 14:11 Mer be an-bengumar. An-Babgi an gudiid, degi, Bab angi gudimogad. Degisulile, an-ibmar-dakledisulid-imakedgi mer be an-bengumar.
JOH 14:12 An napira bemarga soged, ar dule angi bensulile, an-ibmar-imakedi, a-dule imakmogoed. Degine, a-dule bur bule ibmar-dummagan imakoed. Ar ade, an-Babse an naesokalid.
JOH 14:13 An-nuggi bela an-Babse be ibmar egisele, an bega imakoed, adi, Bab na E-Machigi nug ganguegar.
JOH 14:14 Ibmar-gwensak an-nuggi be egisele, an bega imakoed.
JOH 14:15 Jesús sogdebar: “Ar be an-sabmalale, an-igar-mamaidba be damaloed.
JOH 14:16 An-Babse an bemarga egisoed, be-bendaked-baid, bemar-Gwage-Armaked, bemarga barmidaye. Adi, degisadegu bemarba gudiguegar.
JOH 14:17 Dule-Bab-Dummad-wissurmalad gege we-Burba-Napiragwadi, abingaed. Ar ade, sanar daksurmalad, deginbali, amba aku dakmarbalid. Ar bemardi, we-Burba-Napiragwad mag-daked, ar bemarba gudiid, degine, bemargi gudii gubaloed.
JOH 14:18 ”Bemar, nusgana-babgansulidyob wargwen an be-metosurmalad. An bemarse gannar danibaloed.
JOH 14:19 Ichesaar napid, we-napneg-naidgi-bukmalad bipisaale bar an-dakosulid. Bemardi, an-dakmaloed. Ar an dula gudisoggu, bemar dula-gudigumosunnoed.
JOH 14:20 A-ibagine, an-Babgi-an-gudiid bemar magar itogoed. Bemar-angi-gudimogad, degine, an-bemargi-gudimogad, magar be itomarbaloed.
JOH 14:21 Ar dule, an-igar-mamaid sediile, degine, ar aba gudiile, we-dule, nue-an-sabed. Ar dule, an-sabele, an-Bab a-dule sabgumogoed. An a-dule sabgumogoed, degine, an ese magarobaloed, an doa-dule gue.”
JOH 14:22 Judas (Judas-Iscarioteʼsulid) Jesúsʼga sogded: —Dummad, ¿ibiga be anmarsebi magarogoe? ¿Dulemar-beba-naisurmaladsedi be magarogosuli?
JOH 14:23 Jesús abin-imakdegu, sogded: —Ar dule an-sabele, an-gayaburba-sunmakedba daoed, degine, an-Bab a-dule-sabgumogoed, degine, anmar a-dulegi-megega ese nonikoed.
JOH 14:24 Ar dule an-sabsulile, an-gayaburba-sunmakedba daosulid. Bemar an-ibmar-sogsad-itosmaladi, an-itolegedba an ibmar sogsasulid. An-Bab-an-barmialid-sogedba an ibmar soged.
JOH 14:25 ”An bemar-abargi-dula-gudiidgi we-ibmar-an-bemarga sognaid.
JOH 14:26 Bab an-nuggi Dule-Gwage-Armaked barmidagoed. A-dule, Bab-Dummad-Burba-Isligwaledid. A bela bemar-odurdaknonikoed, degine, bela-an-ibmar-sogsad gannar insaega bemar-imakoed.
JOH 14:27 ”Ulubgi-bogidik-itogega an bemar-imaked. An na ulubgi-bogidik-itogedyob an bemar-imakmogad. Ulubgi-bogidik-itogega-an-bemar-imakedi, dule-we-napnegginmalad-gwage-bogidik-ukedyob an bemarga uksulid. Mer be surbinsa be-gwagegi be itomar, mer be dobgumar.
JOH 14:28 ”An-bega-sogsamaladi be an-itosmalad: ‘An nae, gannar an bemarse danibaloed.’ Ar bemar an-sabmalana weligwar be itosmalanad. Ar ade, an bemarga sogsad an-Babse an naesokarye. An-Bab anba bur dummadid.
JOH 14:29 Emigindi, iduakwaa an bemarga sognaid, adi, deyob gunonikile, mer angi be bengumalagar.
JOH 14:30 ”Bemarga bar suitii an sunmakosulid. Ar ade, we-napneggi-dummadga-gudiid, Nia-saila, danikid. We-dule, angi obinega gangued-sated.
JOH 14:31 Degi-inigwele, we-napneggi-dule-bukmalad, an Bab-sabed, degi, Bab-Dummad-an-barmialidba an ibmar-imaked, wisguer gebed.” Jesús bela weyob sogsad-sorba, e-sapinganga sogded: “Gwisgumar, anmar namarsun.”
JOH 15:1 Jesús sogdebalid: “Ani an uva-e-saila-sunnadid. An-Babdi agi arbaedid.
JOH 15:2 An-dub-gigwengi e-san nagusulile, an-Bab siked. Ar an-dub-gigwengi e-san nairdina, bur bule sanmakega, an-Bab nue-nudaked.
JOH 15:3 An-gayaburba-sunmaksadgi bemar bato gwage-nudakles bukmalad.
JOH 15:4 Angi be akamar, an bemargi akamarmogoed. Ar igi uva-dubmar e-sailagi akanaisulile, geg wargwen sanmake, deyobi, bemar angi akanaisulile, gege an-Babga ibmar-nuegan be imakmalad.
JOH 15:5 ”Ani an uva-e-saila-sunnadid, bemardi e-dubmar-giagan gumalad. Ar dule angi akanaile, degine, an egi naimogale, we-dule, bela-bela ibmar-nuegan imaked. Ar be angi ollormalale, gege be ibmar-nuegan imakmalad.
JOH 15:6 Ar angi dule akanaisulile, uva-dub-giagan-miled-daedyobi melledoed. We-uva-dub-giagan dingudoed, geb degi, dulemar weemalogu, soogi-ogumakega midmaloed.
JOH 15:7 ”Ar bemar angi akanaile, degine, an bemarga an-gayaburba-sogsadba be damalale, bemar ibu Babse egisbimala, bela bemarga guoed.
JOH 15:8 Ar bemar-ibmar-nuegan-imakedba an-Bab-nug odummoleged. Geb degine, bemar an-sapingan-sunnadga gunonimaloed.
JOH 15:9 ”Ar igi Bab an-sabgusa, deyob an bemar-sabgusmogad. An-sabguedgi be gudii gumar.
JOH 15:10 Ar igi an an-Bab-Igar-Mamaidba an dae, degi, e-sabguedgi an akanai, deyobi, bemar an-igar-mamaidba-daele, an-sabguedgi bemar gudii gumarmogoed.
JOH 15:11 ”We-ibmar an bega sogsamalad, adi, an-weligwaled-itogedyob bemar wergumarmogagar. Degi, bemar nue-bela-bela weligwar itomalagar.
JOH 15:12 We-an-igar an bemarga ukmar: Ar igi an bemar-sabgusmarmoga, deyob na be muchub-muchub sabgumarmogo.
JOH 15:13 Sabgued-dummarbad-weyobid sated: Dule, e-aimar-ular-burgwed.
JOH 15:14 Bemar an-ibmar-sogedba be ibmar imakmalale, be an-aimardo.
JOH 15:15 Bar an bemarse an-maimarye an golosulid. Ar ade, mai wissulid ibu e-dummad imaknai. An bemarse an-aimarye an gochad, ar ade, bela an-Bab-anga-ibmar-sogsadi, bela bemarga an odulosmalad.
JOH 15:16 ”Bemar an-sussurmalad, ani an be-susmalad. An be-susmaladi, adi, bemar ibmar-nuegan imaknamalagar. Degine, bemar-ibmar-saedi, degisadegu guegar. Adi, ibu bela Babse an-nuggi be-egisbimardibe, Bab bemarga ukegar.
JOH 15:17 We an bemarga sogmarsun: Na be muchub-muchub sabgumar.”
JOH 15:18 Jesús e-sapinganga sogdebar: “Ar we-napneggi-dulemar-bukwad isdar be-dakarmalale, be insamalo, bemar-idu bato isdar an-daksamarmogad.
JOH 15:19 Ar bemar dule-we-napnegginedyob-damalana, we-napneggi-dulemar-bukwad be-sabmalanad. Ar emigindi, bemar we-napneggined-sursoggu, a-ular, we-napneggi-dulemar-bukwad isdar be-dakmalad. Dule-we-napneg-naidgi-bukmalad-abargi an be-susmalad.
JOH 15:20 Be insamalo, an bemarga sogsad: ‘Dule maiga-gudiid e-dummadba geg dummad guye.’ Dulemar an-baregichamarsoggu, bemar-bareginmarmogoed. Degine, an-ibmar-sogsadba nanasmalale, bemar-ibmar-sogedba nanamarmogoed.
JOH 15:21 Ar bemar-anba-naid-ular, weyob bemar-imakmaloed, ar ade, dule-an-barmialid aku dakmalad.
JOH 15:22 ”An we-napnegse nonisulina, an wemarga sunmaksasulina, egi soglegosulinad, wemar isgudiiye. Emigindi, geg sogmalad, anmar isgued surye.
JOH 15:23 Ar dule isdar-an-dakele, an-Bab-isdar dakbalid.
JOH 15:24 An emar-abargi ibmar-dakledisulid, dule-gwen-ibmar-imakdisulid, an imaksasulina, wemargi soglegosulinad, isgudimarye. Emigindi, ibmar-dakledisulid daksamalad, degi-inigwele, amba isdar an-daksamalad, degi, an-Bab-isdar daksamarbalid.
JOH 15:25 Ar weyob degigusadi, adi, emarga-Moisés-Igar-Maidgi-narmakar-maidba guegalad. Bab-Dummad-Garda sognaid: ‘Binsa igarsuli isdar an-daksamalad.’
JOH 15:26 ”Ar Dule-Gwage-Armaked, an-Bab-nuggi an barmidagoedi, Burba-Napiragwad gued. A an-Babgi danikid. A bemarse nonikile, angi sunmaknonikoed.
JOH 15:27 Ar bemar gebe-an-arbaded-onoded-akar be anba gudimalad-ulale, be angi sunmakdemarmogoed.”
JOH 16:1 Jesús sogdebar: “Melle bemar burba-galakuegala we-ibmar an bemarga sogsamalad.
JOH 16:2 Dulemar Judíoʼmar-onmakedneggi be-onomaloed. Ibagan danikoed, dulemar be-oburgwismalale, Bab-Dummadga ibmar-nued-imaknaiye bimaloed.
JOH 16:3 We-dulemar Bab-wissulidba, degine, aku an-dakedba, deyob be-imakmaloed.
JOH 16:4 An we-ibmar bega sogsamalad, adi, a-ibagan-nonikile, be insamalagar, bato we-ibmar idu an bega sogsamalad: ”Iduale, an bemar-abargi-gudiidba, an bega sogsasurmalad.”
JOH 16:5 Jesús na e-sapinganga sogdebalid: “Emigindi, dule-an-barmialidse an naesokalid. Bipisaale bemar wis anse egissurmalad: ‘¿Bia be nae?’
JOH 16:6 We-ibmar-an-bemarga-sogsadba aka bemar gwagegi nue-bukib-binsa-itoge nadmalad.
JOH 16:7 Ar nue-napira an bemarga sogmalad: An bemar-idu naele, bur bemarga ibnuedid. An bemar-idu nasulile, Dule-Gwage-Armaked geg bemarse daged. Ar an bemar-idu naerdina, a-dule, an bemarga barmidagoed.
JOH 16:8 ”Dule-Gwage-Armaked nonikile, isgued-magar-itoge, dule-imaknonikoed. Igar-innikigwad-maid-magar-itoge, dule-imaknonikoed, degi, Bab-Dummad-sabsur-odurdakoed-magar-itoge, dule-imaknonibaloed.
JOH 16:9 Dule-Gwage-Armaked, ¿ibiga isguedgi sunmakoe? Ar dulemar an-benmalad-ular, isguedgi sunmakoed.
JOH 16:10 ¿Ibiga Igar-innikigwadgi sunmakoe? Ar ani Jesús, Bab-Dummad-negse nasokalid, bar be an-dakmalosulid.
JOH 16:11 ¿Ibiga Bab-Dummad-dule-sabsur-odurdakoedgi sunmakoe? Ar nia-saila bato sabsur-odurdaklesad-ular, we-igargi sunmakoed.
JOH 16:12 ”Amba an bemarga ibmar-bukidar-soged-nika-inigwele, an bemarga sogosurmalad, ar ade, bemar aku itomaloed.
JOH 16:13 Ar Burba-Napiragwad-nonikoeddi, igar-napiragwadba ibmar-magar-itoge be-imakmaloed. Ar na e-itolegedba sunmakosulid. Sunmakoedi, Bab-ega-ibmar-sogedba sunmakoed. Degine, yoedse-ibmar-guoed, idu bemar-owisononikoed.
JOH 16:14 A-Burba-Napiragwad an-nug ogannononikoed, degi, an-ibmar bemarga odalononikoed.
JOH 16:15 Ar bela Bab-ibmar-nikadi angadmogad. A-ular, an bemarga sogsad: A-Burba an-igarmar suoye, geb degi, bemarga odalononikoye.”
JOH 16:16 Jesús e-sapinganga sogdebar: —Ar ichesaar bemar napi-an-dakmaloed. Geb ichesaar-nasad-sorba gannar bemar an-daknonimarbaloed, ar ade, an-Bab-maidse an naesokalid.
JOH 16:17 Geb degi, abar e-sapingan muchub-muchub sokarmalad: “Ar wede ibu anmarga obare: Ichesaale bemar napi-an-dakmaloye, geb ichesaar-nasad-sorba gannar be an-daknonimarbaloye. An-Babse an naesokaliddeeye.”
JOH 16:18 Degi sogdemarbalid: “Ar wede ibu obare: ‘¿Napi ichesaarye?’ We-ibmar-soggwichid anmar aku itomalad.”
JOH 16:19 Jesús, e-sapingan ese ibmar-egisbied mag daksasoggu, a-ulale, amarga sogdesunnad: —Bemar na be muchub-muchub egisnamalad, wede ibi ande obarye, an sogsagu: ‘Ichesaale napi bemar an-dakmaloye, geb ichesaar-nasad-sorba gannar bemar an-daknonimarbaloye.’
JOH 16:20 ”Napira an bemarga soged, bemar bukib-binsamaloed, bemar bomarbaloed. Dulemar-we-napnegginmaladdi, weligwar itomaloed. Ar bemar bukib-binsamalo-inigwele, we-bukib-binsaed, bemarga weligwaledga guoed.
JOH 16:21 Omegwa-gwensak ugakgusokalile, e-wachigan-mosadba abagan-nunmaked itononidaed. Ar sikwi-aidesad-sorbardi, dule-wargwen-we-napnegse-aidenonikid-ular, bar na e-naibi-itosadgi binsaosulid, unnila weligwar itononidaed.
JOH 16:22 Ar emigindi, amba bemar deyob bukib itomarmogad. Degi-inigwele, an gannar be-daknonimarbaloed, agi, be weligwar itononimaloed. We-weligwaledi, bipisaale dule bei osulogosurmalad.
JOH 16:23 A-ibagangi bemar bar anse ibmar-egised nikuosurmalad. ”Napira an bemarga soged, bemar an-nuggi Babse ibu egisbimardibe, Bab bega ukoed.
JOH 16:24 Ar emidsega, bipisaale amba yoo be an-nuggi Babse ibmar egismalad. Babse be ibmar egismar, Bab bega ibmar ukoed, adi, bemar nue-weligwar itomalagar.”
JOH 16:25 Jesús na e-sapinganga sogdebar: “We-ibmargi an bemarga sunmaksamaladi, odukuar an bega sogsamalad. Ibagan nonikoed, bar bemarga an odukuar sunmakosulid, bakar-buud an bemarga Babgi sunmaknonikoed.
JOH 16:26 A-ibagangi, an-nuggi bemar Babse ibmar egismaloed. An sogsurdo, an bemar-ular, an Babgi-wilenai guoye.
JOH 16:27 Suli, degisuli. Ar bemar an-sabgusad-ular, degine, Bab-Dummadgi-an-danikid-bengussurmalad-ular, Bab na e-sunnad bemar-sabmogad.
JOH 16:28 An we-napnegse dagegala, Babgi an bangualid. Emigindi, gannar we-napneg an mete-naesokalid, Babse gannar an naesokalid.”
JOH 16:29 E-sapingan Jesúsʼga sogdemar: —Ar emigindi, nue bakar-buud be anmarga sunmaksad, odukuar be anmarga ibmar sogsasulid.
JOH 16:30 Emigindi, anmar nue mag-itodo, bela be ibmar wisid. Ar be abesulid dule bese ibmar egised, bato be wisdaed. A-ular, anmar wissundo, be Bab-Dummadgi danikid.
JOH 16:31 Jesús, abin-sogded: —¿Ar emigindi, be an-bensurmala?
JOH 16:32 Emigindi, ibagan danikid, ibagan nonisunnad. Bemar wala-walagwen aisakidmaloed, wargwen be an-metemaloed. Degi-inigwele, wargwen an beosulid, ar ade, Bab anba gudiid.
JOH 16:33 ”An we-ibmar an bega sogsamalad, adi, bemar angi ulubgi-bogidik-itoleged nikumalagar. We-napneggi be naibi-itodii gumaloed, degi-inigwele, gandik be imakmalo, mer be bengumalo. Ar an burba-isganamar-we-napneg-semamaidgi bato an nakwisad.”
JOH 17:1 Jesús bela we-ibmargi sunmaksad-sorba, niba atakdegu, sogded: “Baba, wachidi nonisun: Be-Machi-nug be odummo, adi, Be-Machi be-nug odummomogagar.
JOH 17:2 Be-Machiga bela dulemar-birgi-gangued-nikagued ega be uksad. Adi, bela dulemar-ega-be-uksadga burba-geg-bergued ukegar.
JOH 17:3 Burba-geg-berguedi wedid: Dule magar be-daked, bebi unnila Bab-Dummad-sunsoged-wargwenadi. Deginbali, Jesucristo-magar-dakmarbalid. Ar bee be, Jesucristo-barmialidid.
JOH 17:4 ”Baba, an we-napneggi be-nug odummosad, deginbali, arbaed-be-anga-uksad an obelosadbalid.
JOH 17:5 Baba, emigindi, be-nagaba an-nug be odummosun. Ar igi we-napneg-nagued-iduar, an bebogwa nug-dummarbaa nika-gudigusad, deyobi, be gannar an-nug odummosun.
JOH 17:6 ”We-napneggi dulemar-be-anga-uksadga an be-oyosad, be doa gue. A-dulemar begadinad, be anga uksad. Amar, be-gayaburbaba nanadimalad.
JOH 17:7 Emigindi, amar mag-itosmalad, bela be-anga-ibmar-uksadi, begi daniki.
JOH 17:8 Ar ade, be-gayaburba-be-anga-uksadi amarga an uksamogad. Amar, be-gayaburba abingasmalad. Degine, amar an-begi-danikid mag nue-itosmalad. Deginbali, bee be an-barmialid gwen bengussurmalad.
JOH 17:9 ”Degisoggu, Baba, amar-ular ise-wilegar na bese egised. Dulemar-be-anga-uksasulid-ular, an ise-wilegar bese egissulid. Dulemar-be-anga-uksamalad-nukad an ise-wilegar bese egised, ar amar begadmalad.
JOH 17:10 Bela dulemar-angadid, begadmogad. Bela dulemar-begadid, angadmogad. A-dulemargine, an nug odummolesad.
JOH 17:11 Andi we-napneggi bar gudii guosulid. An bese naesokalid. Wemardi, amba-we-napneggi gudii gumaloed. ”Bab-Dummad-Isligwaled, dulemar-be-anga-uksad, be-nuggi be nue ako, adi, amar, anmar-wargwenna-gumogayobi wargwenna gumogagar.
JOH 17:12 An we-napneggi amarba-gudigu, an be-nuggi amar-nue-akwedii gusad. Amar gwen yoggussurmalad, unnila dule-wargwen-gusgu-yogguoye-soglesadbi yoggusad, adi, be-garda-narmakar-naidba guegar.
JOH 17:13 ”Emigindi, an bese naesokalid. An we-napneggi amba gudiidba we-ibmar an soged, adi, an-weligwar-itogedyob wemar bela-bela wergumarmogagar.
JOH 17:14 Be-gayaburba wemarga an uksad. Ar igi an we-napnegginedsuli, wemar deyobi we-napneggined-surmarmogad. A-ulale, dule-we-napnegginmalad wemar-isdar dakmalad.
JOH 17:15 An bese egissulid, dulemar-be-anga-uksadi we-napneggi-gudiidgi be onoye. Suli. An bese egised, nia-saila mer akar-imaked be imakye.
JOH 17:16 Ar wemarde we-napnegginedsurmalad, ar igi an we-napnegginedsurmoga.
JOH 17:17 Baba, wemar, be-gayaburba-napiragwadgi bela-bela begadga-gumalaga be imake.
JOH 17:18 Ar igi be we-napnegse an-barmiali, deyobi, dulemar-be-anga-uksad, napneggi-dulemar-bukwadse, an barminamogad.
JOH 17:19 An wemar-ulale, an na dukin bela begadga an gusun, adi, wemar napiragwadgi bela begadga gumarmogagar.
JOH 17:20 ”Baba, unnila we-an-sapingan-bukwamaladgarbi an bese wilesakwaa egissulid. Wemar-angi-sunmakmaloedba dulemar-angi-benguosurmaladga an wilesakwaa bese egisbalid.
JOH 17:21 Adi, bela-angi-bengussurmalad unnila wargwennayob guegar. Baba, ar igi be angi gudii, degi, an begi gudimoga, deyobi, angi-benguosurmalad anmarba wargwenna-gudiguega be imakmo, adi, dulemar-we-napneggi-bukwad be-an-barmialid mer bengumalagar.
JOH 17:22 Baba, gangued-be-anga-uksadi, angi-bengusurmaladga a-gangued an uksamogad. Adi, wemar, igi anmar-wargwennague, deyobi, wargwenna gumarmogagar.
JOH 17:23 Ani an wemarba gudiid, degi, be angi gudimogad. Baba, wemar wargwennayob gumalaga be imake, adi, we-napneggi-dulemar-bukwad mag dakega be an-barmialid, deginbali, mag dakmarbaliga, igi be an-sabgusa, deyobi, be wemar-sabgusmogad.
JOH 17:24 ”Baba, be anga-dulemar-uksadi, an neg-megoedgi, anba megbi an abemogad. Adi, wemar an-gangued-yeerdakleged be anga uksadi dakmalagar. Ar ade, amba yoo we-napneg-nagued-iduar bato be an-sabgusad.
JOH 17:25 ”Baba, bedi dule-innikigwadid. We-napneggi-dulemar-bukwad aku-be-daked. Andi an magar be-daked. Degine, anba-nanaimaladi magar-itomalad be bee, an-barmialid.
JOH 17:26 Anba-nanaimaladga an osanalosad, bede doa gue. Degine, amba an gatik wemarga osanalodii guoed, adi, igi be an-sabgusa, a-sabgued wemargi nai gumogagar, degi, amargi an gudii guegar.”
JOH 18:1 Jesús, Babga-wegi-ibmar-sogsad-sorbali, e-sapinganmala dian-Cedrónʼye-nugad-obakar nadegusad. We-dian-dikarba, sapimar, degi, dutumar digar-naid. Agi Jesús e-sapinganmala ambikudapid.
JOH 18:2 Judas, darba-Jesús-uknaid, a-neg wismogad. Ar ade, gusgu Jesús e-sapinganmala ase ambikunad damalad.
JOH 18:3 Degisoggu, Judas, a-negsega Roma-sordamar-idudani gusad. Eba danigusmarmogad, dule-irwa-Bab-Dummadse-gormalad-e-dummagan-sogedba, degi, Fariseoʼmar-sogedba suar-ibmala-nugsalesmalad. A-suar-ibmala, Judasʼba gwallu-yalaba, acha-gwallu-sedani, degi, es-suid-sedani, gusmalad.
JOH 18:4 Ar Jesúsʼdi bela egi-ibmar-guoed wissoggu, dulemar-abin noalid. Ega sogded: —¿Doa be amimala?
JOH 18:5 Abin-sogdemar: —Jesús-Nazaretʼgined an amimalad. Jesús, abin-sogded: —Ani an a-duled. Judas, darba-Jesús-uknaid, amar-abargi deun gwichi gusmogad.
JOH 18:6 Jesús amarga sogsagu, ani an a-duleye, amar sorsik sikirmakdemalad, degi, napagi aimukudmalad.
JOH 18:7 Jesús gannar amarse egisdebarsun: —¿Doa be amimala? Gannar amar, abin-sogdemar: —Jesús-Nazaretʼgined an amimalad.
JOH 18:8 Jesús, abin-sogded: —An bega bato sogsamalad, ani an a-duleye. Be an-amimalale, nabirdo. An-sapingansedi mer be achamalo. Be naega imakmalo.
JOH 18:9 Ar weyob gusdo, adi, Jesús-ibmar-sogsadba guega: “Be-anga-dulemar-uksadi, wargwensaar an oyoggussulid.”
JOH 18:10 Degi, Simón-Pedro, es-suid-sediid e-uka-yaba-maid-onosgu, dule-irwa-Bab-Dummadse-gormalad-bur-dummad-e-mai naibi-imaksad. E-uaya-nuedsikid ibe siksad. A-maide, Malcoʼye nugad.
JOH 18:11 Geb degi, Jesús, Pedroʼga sogded: —Be-es-suid e-uka-yaba be odoge. Bab anga dummad-naibiguoedi ina-gagbid-gobedyobi, anga-uknaidgi ¿an wilegosurde? Suli. An wilegergebed.
JOH 18:12 Geb Roma-suar-ibedmar, e-dummad, degine, Judíoʼmar-Bab-Dummadse-goled-neg-suar-ibmala, Jesús-gasmarsunnad, edichamalad.
JOH 18:13 Anásʼye-nugadse Jesús-sesmargweled. Anásʼde, Caifás-e-sakad. Caifásʼdi, a-birgagi, dule-irwa-Bab-Dummadse-gormalad-bur-dummadga maid.
JOH 18:14 We-dule-Caifás, deun, Judíoʼmarga binsaed-uksadid, ega sogsagusad, dule-wargwen neggwebur-anar bur burgwer, nabirye.
JOH 18:15 Simón-Pedro, degi, Jesús-sapin-wargwen, Jesús-sorba nadapgusmalad. We-sapin-wargwenad, dule-irwa-Bab-Dummadse-gormalad-bur-dummad mag daksoggu, dule-irwa-Bab-Dummadse-gormalad-bur-dummad-e-neg-imbase Jesúsʼba dogsamogad.
JOH 18:16 Ar Pedroʼdi magaba yawagak-naba gwisgusad. We-sapin-wargwen, dule-irwa-Bab-Dummadse-gormalad-bur-dummad-mag-dakedi magaba gannar noalid, geb ome-yawagak-dakedbo-sunmaksagu, negyaba Pedro-odosad.
JOH 18:17 Geb degi, ome-yawagak-dakedi, Pedroʼga sokalid: —¿Ar be Jesús-e-sapinmosursi? Pedro, abin-sogded: —Suli, an e-sapinsuli.
JOH 18:18 Ar neg damberbasoggu, Bab-Dummadse-goled-e-dummad-maigan, degi, suar-ibmala-Bab-Dummadse-goled-neggi-arbamalad, soo ogasmalad. Amar soogi wabukmargu, Pedro soogi-wamogaga, amar-abargi gwichi gusmogad.
JOH 18:19 Degidgine, dule-irwa-Bab-Dummadse-gormalad-bur-dummad, Jesúsʼse e-sapingan-egichialid, degi, e-igar-odurdakdiid ese egichiarbalid.
JOH 18:20 Jesús, abin-sogded: —An-sunmaksadi bela bakar-buud dulemar-asabin an sunmaksad. An gusgu Judíoʼmar-onmakedneggi, degi, Bab-Dummadse-goled-neggi bia Judíoʼmar ambikunoni-daedgi, an dulemar-odurdaksad. An-sunmaksadi, dukuar an sunmaksasulid.
JOH 18:21 ¿Ar ibiga be anse egissunna? Dulemar-an-itosmaladse, be egise, igi an sunmaksa. Ar amar wisid, igi an sogsa.
JOH 18:22 Jesús degisogsagua, Babse-goled-neg-daked-suar-ibed-wargwen, Jesús-walik-gwichidi, wagargi Jesús-bibyosgu, ega sogded: —¿Ar weyob dule-irwa-Babse-gormalad-bur-dummad abinsalesi?
JOH 18:23 Jesús, abin-sogded: —An noar ibmar sogsale, be anga sogdo, ibigi noar an sogsa. An ibmar napira sogsardi, ¿ibiga be an-sarsosunna?
JOH 18:24 Geb degi, Anás, Jesús-atinnar dule-irwa-Babse-gormalad-bur-dummad-Caifásʼse barmissunnad.
JOH 18:25 Deunni, Pedroʼdi amba soo-naba-wagwichidgi ega sogdemalad: —¿Ar be Jesús-e-sapin-wargwenadmosursi? Degi, Pedro osuloded, abin-sogded: —Suli, an a-e-sapinsuli.
JOH 18:26 Dule-irwa-Babse-gormalad-bur-dummad-mai-wargwen, dule Pedro-e-ibe-uaya-siksad-e-gwenad, Pedroʼga sokalid: —Sapimar-digar-naidgi, degi, dutumar-digar-naidgi, Jesúsʼba be gudii, ¿an be-daksasursi?
JOH 18:27 Pedro gannar osulodbalid, geb agi gannir yog namakaled.
JOH 18:28 Geb degi, Caifás-neggi-gunanai, Pilato-neg-Pretorioʼye-nugadse Jesús-sesmalad. Deun, bato oibodanisoggu, Judío-dummagan melle na ised-nikuegala, Pilato-negse dogsasurmalad. Ar dogele, ised-nikumalodole, degi, Judíoʼmar-ibagi sibad-wawaad gunmalosurdole. We-sibad-wawaad Oburgwilegoenad-Ibagi gundamalad.
JOH 18:29 Degidbali, Pilato Judíoʼmarse nononisunnad, ega sogded: —Degite, ¿ibi-ular we-dulede be anse sedanimarsunna? ¿Ibi oakalossunna?
JOH 18:30 Abin-sogdemar: —We dule-isganasulina, anmar bese sedanisulinad.
JOH 18:31 Geb degi, Pilato Judío-dummaganga sogdesun: —Be we-dule nidmar, be-igar-maidba ega be igar amimalo. Judíoʼmar, abin-imakdemalad: —An geg ega igar amimalad. Bemar-Roma-dulemar anmarga igar uksasulid, dule-isgudimalad oburgodeeye.
JOH 18:32 Jesús-ibmar-sogsadba-guega, deyob gusad, ar ade, sogsagusad, ede igi burgoe.
JOH 18:33 Geb degi, Pilato e-neg-Pretorioʼye-nugadse gannar dogdebarsunnad, degi, Jesúsʼse gordapid, ega sogded: —¿Ar be Judíoʼmar-e-Rey-sunnadi?
JOH 18:34 Jesús, abin-sogded: —¿Bee be, na be deyob soge? Igi, ¿dule-baid-bega-sogsadba be soge?
JOH 18:35 Pilato, abin-sogded: —¿Judío-dule be an-daksi? Be-dulemar, degi, dule-irwa-Babse-gormalad-e-dummagan anga be-sedanimalad. ¿Ar ibu be oakalossunna?
JOH 18:36 Jesús, abin-imakded: —An Reyga-meged-igar we-napnegginedsulid. An Reyga-megedi, we-napnegginedina, an-sordamar anbina urwemaloenad, adi, melle Judíoʼmarse an galegegar. Ar emigindi, an Reyga-megedi, we-napnegginedsulid.
JOH 18:37 Geb degi, Pilato ega sogdesun: —Degisoggu, ¿be reysunde? Jesús, abin-sogded: —Ar bede soged, an reyye. Igar-napiragwadgi-sunmakega an gwalulesad. Agala an we-napnegse nonikid. Ar dule igar-napiragwad-sordale, an-gayaburba-soged itoged.
JOH 18:38 Geb Pilato ega sogded: —¿Ar ibu igar-napiragwadsunna? Ar deyob Pilato Jesúsʼga sogsagu, gannar magaba Judíoʼmarse noalid, amarga sognonikid: —Ar we-dule gwen-ibmar-oakalos an daksulid.
JOH 18:39 Ar bemar gusgu Oburgwilegoenad-Ibagi, dule-wargwen-esgaryagi-mellesiid bega onogega be anse egisdamarsoggu, ¿an bemarga Judíoʼmar-e-Rey-onobi be abemala?
JOH 18:40 Geb degi, bela gannar binnasur gotemarbalid, sogdemalad: —Suli, we-duledi suli. Anmarga be Barrabás onoge. Barrabásʼdina, atursaed-duled.
JOH 19:1 Geb degi, Pilato Jesús-sesgua, Jesús-bibyogega imaksad.
JOH 19:2 Geb degi, suar-ibmala iko-gurgin sobsamalad. Geb Jesúsʼgi-dododmargu, Jesús-nonogi a-gurgin rey-gurginyob sismalad. Degi, reymor-yoeyobi, ega mor-suir-akwagiid yosmarbalid.
JOH 19:3 Degi, Jesúsʼga sogdedamalad: —Judíoʼmar-e-Rey, be-nug dungusun. Degine, e-wagar bibyosdamarbalid.
JOH 19:4 Geb degi, Pilato gannar noarbargu, Judíoʼmarga sogded: —Be dakmar, an bemarga magaba Jesús-sedanimalad, adi, be magar-itomalaga, andi gwen-ibmar-oakalossuli an daked.
JOH 19:5 Degi, Jesús iko-gurgin-sobaled-sii, degi, mor-suir-akwagiid-yoi noarsunnad. Geb degi, Pilato emarga sogded: —Emigi, we-dule be dakmarsun.
JOH 19:6 Dule-irwa-Babse-gormalad-e-dummagan, degi, Babse-goled-neg-suar-ibedmar Jesús-dakarmargu, binnasur oimakdemalad, sogdemalad: —¡Nakrusgi bioke! ¡Nakrusgi bioke! Geb Pilato emarga sogded: —Na be sedmarsun. Nakrusgi be bioknamarsun. Andi gwen-ibmar-oakalossuli an daked.
JOH 19:7 Judíoʼmar, Pilato-abin sogdemalad: —Anmar igar nikamalad. We-dule anmar-igar-maidba we burgwergebed, ar ade, na soged ani an Bab-Dummad-Machiye.
JOH 19:8 Pilato dulemar-deyob-soge-itoargu, aka bur bule dobguded.
JOH 19:9 Geb degi, Pilato e-neg-Pretorioʼye-nugadse gannar dogdebarsunnad. Agi Jesúsʼse-gochagu ega sogdesunnad: —¿Be bialidi? Ar Jesúsʼdi gwen abin-imaksasulid.
JOH 19:10 Geb degi, Pilato Jesúsʼga sogded: —¿Ar be anga sunmakbisuli? ¿Ar be wissursi? An-sogedba sunna be nakrusgi biokleged. An-sogedba sunna be onolebalid.
JOH 19:11 Jesús, abin-sogded: —Ar Bab-Dummad bega we-gangued uksasulina, be-sogedba angi ibmar imaklegosulinad. Degisoggu, dule-bega-an-uksadi, a bur bule nue-isgusad.
JOH 19:12 Degidbali, Pilato Jesús-ollor-imakega igar-aminai gualid. Degi-inigwele, Judíoʼmardi binnasur-oimakbukwa, sogbukmalad: —Be we-dule onosale, be Roma-saila-César-e-aisurdo. Ar dule na reyga san-saele, Césarʼgi yolenaido.
JOH 19:13 Pilato dulemar-degi-soge-itoargu, Jesús-magaba onosad. Geb edi, neg-akwabiidye-nugadgi, igar-itoged-gangi sigisad. A-neg, Hebreo-gayagindi Gábataʼye nugad.
JOH 19:14 Deunni, a-ibagi Oburgwilegoenad-Iba-idu guagwar ibmar imaklenaid, yorukugubinned. Geb degi, Pilato Judíoʼmarga sogdesun: —Emigi, we-dule bemar-e-Rey be dakmarsun.
JOH 19:15 Ar Judíoʼmardi oimakarmalad: —¡Oburgwe! ¡Oburgwe! ¡Nakrusgi bioke! Pilato, abin-imakde, sogded: —¿An, bemar-e-Rey nakrusgi biokode? Dule-irwa-Babse-gormalad-e-dummagan, abin-sogdemalad: —Anmar rey-baid sulid, unnila Césarʼbi anmar-e-reyd.
JOH 19:16 Degisoggu, Pilato a-dulemarga Jesús-nakrusgi-biokega uksasunnad. Geb Roma-sordamar Jesús-sesmarsunnad.
JOH 19:17 Geb degi, Jesús Dule-Nonogarye-neg-nugadse, na dukin e-nakrus-semai nadsunnad. A-neg Hebreo-gayagindi Gólgotaʼye-bileged.
JOH 19:18 Agi Roma-suar-ibmala nakrusgi Jesús-bioksamalad. Eba dule-walabo, e-dikarba bioksamarmogad. Jesúsʼdi amar-negabargi bioklegar gwisgusad.
JOH 19:19 Pilato Jesús-nakrus-birgi-nasikega nug-narmaksad. Weyob nug-narmakar sognaid:
JOH 19:20 Judíoʼmar-bukidar weyob-narmakar-naid absosmalad. Ar ade, Jesús-nakrusgi-bioklesad, neggwebur-walikagwad. Nug-narmakar Hebreo-gayaba, Griego-gayaba, degi, Latín-gayaba naid.
JOH 19:21 Judíoʼmar-irwa-Babse-gormalad-e-dummagan Pilatoʼga sogdemalad: —Mer be narmake: ‘We, Judíoʼmar-e-Reyye.’ Be narmake: ‘Ede Judíoʼmar-e-Reyye-sogye.’
JOH 19:22 Pilato, abin-sogded: —An-narmaksadi, bato an narmaksado. An-narmaksad, an ogwaosulid.
JOH 19:23 Roma-suar-ibmala Jesús-nakrusgi-bioksamargu, e-mor susmalad, geb a-mor esirmaksamalad. Geb dule-warbake-wilub mor-danar-danar urbismalad, adi, sordamar na egad-egad sumalagar. Degine, e-mor-asgi-yolegeddi, unnila irgwen-matar-dummadsoggu,
JOH 19:24 na sokarmalad: —Mer we-mor esirmakmalo. Anmar wilubdakmaloed, ar doagadga we-mor guodibe. Weyob gusdo, ar adi, Bab-Dummad-Gardagi-narmakar-naidba guegar. Ar Bab-Dummad-gardagi weyob sognaid: “An-mormar mimismarsunnad, degi, an-mor-suega, egi wilubdaknanai gusmalad.” Salmo 22:18 Ar weyob Roma-suar-ibmala imaksamardo.
JOH 19:25 Jesús-nakrus-walik omegan-bukwagusmaladi, wemalad: E-nan, e-ammor e-nansikid, Cleofas-ome-María, degi, María Magdalena.
JOH 19:26 Jesús e-nan-dakargu, degi, e-sapin-na-nue-sabed-dakargu, e-nanga sogded: —Omegwa, we, be-machiga guoed.
JOH 19:27 A-sorba, Jesús e-sapinga sogdemogad: —We, be-nanga gumogoed. A-ibagi, we-sapin e-negse María-yogsear imaksad.
JOH 19:28 A-sorbali, Jesús bela na e-igargan bergunoni wissoggu, Bab-Dummad-gardagi-narmakar-naidba-guega sogdesunnad: —An uku-uku itoged.
JOH 19:29 Nakrus-dikarba noggi vino-gagbid siid. Degi geb agi dulemar ibmar-buta-butad vino-gagbid owardikusad. Geb hisopo-suargi-edichagu, Jesús-gayagi nasiksamalad.
JOH 19:30 Jesús a-vino-gagbid-gobsagu, sogded: —Bergussun. Geb degi, Jesús nono-dukin-nadgu, burgwided.
JOH 19:31 Deunni, a-ibagi, Israel-Dulemar-Oburgwilegoenad-Iba-iduar guagwar-ibmar-imakleged-iba naid. Judío-dummagan melle banedgi, obunnoged-ibagi, muimar nakrusgi-nanai abesurmalad. Ar we-obunnoged-iba, iba-dummadid. Agala, Pilatoʼgi wilenaigusmalad, dulemar-nakrusgi-nanaid-ibe e-dua bisgeye, adi, gwae burgwemalagar. Geb degi, muimar-nakrusgi-nanaid odemalagar.
JOH 19:32 Geb degi, Roma-suar-ibmala nadmarsunnad, Jesúsʼmala dule-bioklesad-ibe dua bichismalagar. Geb sorbali, dule-baid-bioklesmogad-ibe, dua bichismarbalid.
JOH 19:33 Ar Jesúsʼse warmaksamargudii, dakarmalad bato Jesúsʼdi-burgwar-nai, degisoggu, bar e-ibe dua bichissurmalad.
JOH 19:34 Suar-ibed-wargwendi es-suidgi Jesús-dikar-sikaa imaksad, geb agi, abe, degi, dii, yog-aryoar gusad.
JOH 19:35 Dule we-ibmar-daksadi, bemarga soged. A-ibmar-sogedi napiragwadid, gakansasulid. Ar we-dule na wisid, ede napiragwadba ibmar sogye, adi, bemar mer bengumalagarmo.
JOH 19:36 We-ibmar deyob gusad, adi, Bab-Dummad-Gardagi-narmakar-maidba guegar: “E-gar bipisaale gwen bisgelegosulid.”
JOH 19:37 Deginbali, baidgi narmakar naibalid: “Dulemar-eswargi-ewarismalad a-dule-dakmaloed.”
JOH 19:38 Bela-wegigusad-sorbali, José, Arimateaʼgined, Pilatoʼse nonikid. José Pilatoʼse Jesús-mui-sedega wilenaigusad. We-Joséʼde, Jesús-sapin-wargwenadmogad. Degi-inigwele, Judíoʼmar-dobedbali gwen-bakar-buud sogsasulid, ede Jesúsʼba naimoye. Geb Pilato Joséʼga igar-uksasunnad, Jesús-mui-sedegar. Geb degi, José, Jesús-nakrusgi-naidse nadsunnad, geb Jesús-e-mui-neg-uanse-dignaega sessunnad.
JOH 19:39 Nicodemo nonimogad. We-dule, ibagwengi Jesúsʼse mutik nonigusadid. Nicodemo nibir-dulataled-aidiku (100) sapi-gunnugiid-wawad-mirra, áloe-ebo-oburale senonikid.
JOH 19:40 Wemar Jesús-mui-susmargu, ar igi Judíoʼmar na gusgu mui-digdamala, deyobi, ina-wawadba-mesa atued-sibugi Jesús-mui anwismalad.
JOH 19:41 Jesús-nakrusgi-bioklesad-walik nainu naid. Agi neg-uan bini siid, dule-wargwensaar amba yoo agi digleged.
JOH 19:42 Ar Judíoʼmar-Oburgwilegoenad-Iba-iduar guagwar-ibmar-imakleged-iba naisoggu, a-ular, a-neg-uangi Jesús-digsamarsunnad. Ar a-neg-uande bur itakaa siid.
JOH 20:1 Gebe-itoged-iba-onodedgi, wakudaryalaba, amba negsichi-sichigwa María-Magdalena neg-uanse nadegusad. Neg-uanse modapgu, dakdapid akwa-dummad onirar sii.
JOH 20:2 Degisoggu, María-Magdalena, Simón-Pedroʼse, degi, Jesús-sapin-baidse abarmakalid. A-sapinde, Jesús na-nue-sabesailadid. Amarga sogdapid: —Anmar-Dummad-neg-uangi-digar-maid anmar-ibe sesmalad. Anmar wissulid bia mesismardibe.
JOH 20:3 Geb degi, Pedro, Jesús-sapin-baidbo, neg-uanse armalad.
JOH 20:4 Ebobela dare neg-uanse abarmakarmalad, degi-inigwele, Jesús-sapin-baid-Juanʼye-nugad bur Pedroʼba binnasur abarmaksasoggu, a-inse neg-uanse modapid.
JOH 20:5 Juan neg-uanyaba nue-dakega, dulluu imaksad. Agi atued-sibu bukwa daksad. Ar neg-uanyabardi dogsasulid.
JOH 20:6 A-sorbali, Simón-Pedro nonimogad. Simón-Pedroʼdi neg-uanyaba-dogsagu, atued-sibu bukwa daksad.
JOH 20:7 Degine, mor-Jesús-nonogi-obirmaklesad bukwa daksabalid. We-mor-Jesús-nonogi-obirmaklesad atued-sibu-walik buksulid. Nue-obipirmakar bachikii bukwad.
JOH 20:8 Geb degi, Juan, we-inse neg-uanse nonigusadi, neg-uan-yaba dogsamosunnad. A-sapin, deyob ibmar-gusad-daksagu, Jesús-durgusadgi bengussulid.
JOH 20:9 Ar ade, amba akusunna Bab-Dummad-Garda-narmakaled itomalad. Agi sognaid, Jesús burgwisar, gannar durguergebye.
JOH 20:10 Geb, wemar-Jesús-sapingan-warbogwad gannar e-negse nadmarsunnad.
JOH 20:11 Ar María-Magdalenaʼdi neg-uan-dikarba, neg-magaba bogwichid. Bogwichidgine, neg-uanyaba nue-atakegala, dulluu imaksad.
JOH 20:12 Geb agine, María baliwiturmar-warbo mor-sibu-yoyoi-sii dakalid. Baliwitur-wargwen Jesús-e-nono-megisadgi siid. Baiddi, e-mali-duku-megisadgi siid.
JOH 20:13 Baliwiturmar Maríaʼga sogded: —Omegwa, ¿ibiga be boe? María, abin-sogded: —An-ibe an-Dummad sesmalad. An wissulid, bia an-ibe mesismala.
JOH 20:14 María degisogsagu, aibiridgu, dakalid, Jesús e-walik-gwichi. Degi-inigwele, María wissulid, dule-e-walik-gwichidi, we, Jesúsʼdeeye.
JOH 20:15 Jesús ega sogded: —Omegwa, ¿ibiga be boe? ¿Doa be amie? Ar María, we-dule dule-nainu-akwedye-bisoggu, ega sogded: —Dule, ar mui be sesale, anga be soge, bia be mesisa, adi, an ase aminaoed.
JOH 20:16 Jesús ega sogded: —¡María! María Jesúsʼsik-aibiris-imasgu, binnasur sogded: —¡Raboni! (Arameo-gayaba sogleged, Odurdaked-Saila).
JOH 20:17 Jesús Maríaʼga sogded: —Mer be an-gae, ar amba yoo an-Babse an nakwed. Degi-inigwele, be an-gwenadganse nae, amarga be sogna: ‘An-Babse an nae sokarye. A-Baba, bemar-Babmogad, ase an nasokarye. An-Bab-Dummadse an nae sokarye. A-Baba, bemar-Bab-Dummadmogad, ase an nasokarye.’
JOH 20:18 Geb María-Magdalena, Jesús-sapinganse gayaburba sognadsunnad: “An Dummad-Jesús-daksaye.” Degine, María bela-Jesús-ega-ibmarsogsadi, amarga sogdapid.
JOH 20:19 Gebe-itoged-iba-nagudedgi, mutikusgu, Jesús-sapingana Judíoʼmar-dobed-ular, bela yawagak atibukwa, neg-gwagwengi na danar ambikusmalad. Agi-bukwa Jesús nonikid. Geb amar-abargi-gwisgunoniki, ega sogded: —¡Na, degite! Ulubgi-bogidik be itomarsun.
JOH 20:20 Jesús deyob e-sapinganga sogsagu, e-argan, degi, e-dikar amarga oyoded. Geb e-sapingan e-Dummad-dakarmargu, bela weligwar-ito nadmalad.
JOH 20:21 Degi, gannar Jesús e-sapinganga sogdebalid: —Ulubgi-bogidik be itomarsun. Ar igi Bab an-barmiali, deyobi an bemar-barmidmogad.
JOH 20:22 Ar Jesús amarga degisogsagu, e-burba amargi buu imaksad, geb amarga sogded: —Bemar Bab-Burba-Isligwaled nikumarsun.
JOH 20:23 Ar bemar doamarga isgued-osuloye-sogele, amar isguedsuli gunonikoed. Ar bemar doamarga isgued-osulosulile, amarga isgued osulolegosulid.
JOH 20:24 Tomásʼdi, e-sapin-ambe-gakabogwad-wargwenadid, Dídimoʼye nugbalid. A-dule, Jesús-nonigusgu, deun Jesús-sapinganba sisurgusad.
JOH 20:25 Degisoggu, Jesús-sapingan-baigan ega sogsamalad: —Anmar, Dummad-daksamalad. Tomás, abin-sogded: —An Jesús-argangi esgoro-yolesad-e-wilubgan an daksulile, degi, an-goo an agi odosulile, gege an itoged. Deginbali, an-argan e-dikargi an odosurbalile, gege an itobalid.
JOH 20:26 Itoged-irgwenad-nasad-sorba, gannar Jesús-e-sapingan negyaba bukwamalad, agi Tomás emarba sii gusmogad. Deun, bela yawagakmar atibukwa-inigwele, Jesús dognonikid. Geb amar-abargi-gwisgunoniki, ega sogded: —¡Na, degite! Ulubgi-bogidik be itomarsun.
JOH 20:27 Geb degi, Jesús Tomásʼga sogded: —Wegi be-goo be odoge, an-argan be dake. Be-argan be seda, an-dikargi be ododage. Mer be an-bengue. An-gannar-durgusad mer be bengue.
JOH 20:28 Geb degi, Tomás, abin-imakde, sogded: —¡An-Dummad, an-Bab-Dummad!
JOH 20:29 Geb Jesús, Tomásʼga sogded: —Be an-daksad-ular, be angi bengussulid. Dule-an-daksasurmaladgi, degi, angi-bengussurmaladgi, bur nued binsalessun.
JOH 20:30 Jesús ibmar-wilubgan-dakledisurmalad-bukidar e-sapingan-abargi imaksad. Degi-inigwele, we-gardagi bela narmakar naisulid.
JOH 20:31 Ar wemar-narmaklesaddi, bemar mer bengumalagalad: We-Jesús, Bab-Dummad-dule-wargwen-barmidagoye-sogsad-dule-sunnadye. We-Jesús, Bab-Dummad-Machi-sunnadye. Adi deyobi, bemar Jesúsʼgi-bensulid-nikadba burba-geg-bergued nikumalaga.
JOH 21:1 We-degigusad-sorbali, Jesús Tiberias-mata-dummad-gakaba, e-sapinganse gannar magarosad. Weyob magarosad:
JOH 21:2 Deun danar-bukwamalad, Simón-Pedro, Tomás Dídimoʼye-nugbalid, Galilea-yargi-Caná-neggweburgined-Natanael, degi, Zebedeo-machimala, deginbali, Jesús-sapingan-baigan-warbogwad.
JOH 21:3 Simón-Pedro e-sordamarga sokalid: —An ua-ganagwelo. Amar ega sogdemarmogad: —Anmar beba namarmogoed. Degine, urgi nadmarsunnad. Deun a-mutik ua bipisaar gwen gassurmalad.
JOH 21:4 Neg-oibodanigu, Jesús mata-dummad-gakagi gudiid. Ar e-sapingandi wissurmalad, we-dule-gudiidde Jesúsʼdeeye.
JOH 21:5 Jesús amarga sogded: —An-aimar, bemar masgunned, ¿wis nikamala? Abin-sogdemalad: —Suli, sate.
JOH 21:6 Geb Jesús amarga sogded: —Be saki ur-argan-nuedsik mimar, geb bemar ua gamaloed. Geb degi, saki-mismargua, ua-bukidar-gasmalad. A-ular, geg saki onakguarmalad.
JOH 21:7 Geb degi, Jesús-na-nue-sapin-sabesailadid, Pedroʼga sokalid: —¡We, anmar-Dummad-Jesús gudiid! Simón-Pedro itoargu, we Dummad-Jesúsʼye, e-mordummad yosa imaksad. Ar ade, mor-esus gunaid, geb Jesúsʼse-naega demargi yog-argwannar imaksad.
JOH 21:8 Jesús-sapingan-baigandi urgi armalad, saki ua-ena ebipiarmalad, ar ade, dogdar mata-gakagi dikasur gunaisurmalad, unnila mor-suar dulataled-wilub-bangu (100) gunanaid.
JOH 21:9 Jesús-sapingan gakase aidenonimargu, soo gasii daknonimalad. Geb ua, degi, madu, soo-birgi-mai dakarmalad.
JOH 21:10 Jesús amarga sogded: —Emisgwa be ua-gasmalad wis-sedamar.
JOH 21:11 Simón-Pedro urgi nakwisad. Geb saki ua-dummagan-ena-bukwa mata-gakase ebipialid. Ua-dummagan uka-dulagugle-gakambe-gakapaa (153) gasmalad. Ua ichesur-inigwele, saki gwen achirmaksasulid.
JOH 21:12 Jesús e-sapinganga sogded: —Dagmar, mas gundamar. Ar e-sapingan-wargwensaar gwen wis-ese-egisbi itossurmalad, ¿be doaye? Ar ade, wismalad, we e-Dummadid.
JOH 21:13 Geb Jesús madu-susgua, e-sapinganga madu uksad, degi, ua-susbargu, e-sapinganga uksabalid.
JOH 21:14 Jesús gannar-durgusad-sorba, wesega, ilapaagus e-sapinganse magarogusad.
JOH 21:15 Mas-guchamargua, Jesús, Simón-Pedroʼga sogded: —Jonás-machi-Simón, be wemarba, ¿bur bule be an-sabe? Pedro, abin-sogded: —Eye, Dummad. Ar be wisid an be-sabed. Geb Jesús ega sogdesun: —Degirdi, an-dulamar-sibad-wawaad-mimmiganyob-gudiid nue be anga sedii imako.
JOH 21:16 Irbogwadgi gannar Jesús sogdebalid: —Jonás-machi-Simón, ¿be an-sabe? Pedro, abin-sogded: —Eye, Dummad. Be wisid an be-sabed. Geb Jesús, abin-sogded: —Degirdi, an-dulamar-sibad-wawaadyob-gudiid nue be anga akwedii imako.
JOH 21:17 Gannar irbaagwadgi Jesús sogdebar: —Jonás-machi-Simón, ¿be an-sabe? Pedro, Jesús ega gannar-gannar irbaagus-soge-itogedba bukib-ito naded. Ega soggu: “¿Be an-sabe?” Pedro, abin-sogded: —Dummad, bela ibmar be wisid. An nue-be-sabed be wisid. Jesús ega sogded: —Degirdi, an-dulamar-sibad-wawaadyob-gudiid nue be anga sedii imako.
JOH 21:18 Jesús Simón-Pedroʼga sogdebar: —Napira an bega soged, be sapingwaunni, wargwengi be mor yodaed, degi, bia-be-nabiedba be naddaed. Ar be seredgusardi, bega argan onakmaloed, degi, bega mor yomarbaloed, degine, be nabisulidba be-sedmaloed.
JOH 21:19 Jesús degisogsadi, sogsagusdo, Pedroʼde igi-burgoe, degi, igi Bab-Dummad-nug odummogoe. Jesús weyob-sogsagu, Pedroʼga sogdebar: —Anba be dage.
JOH 21:20 Pedro aibiriargu, dakalid, Jesús-na-nue-sapin-sabedi, Jesúsʼba, degi, eba daniki. A-sapinde napi-sedomas-gunbukwa-gusmargu, Jesús-e-dikarba-sii gusadid. Weyob Jesúsʼse-egichii gusadid, dummad, ¿doa darba be ukoye?
JOH 21:21 Pedro a-daksagu, Jesúsʼga sogded: —Dummad, ¿we-duledina?
JOH 21:22 Jesús ega sogded: —We-dule an-gannar-dagedse amba dula-gudii an abegele, ¿be anga akar sogosi? Geg be anga akar soged. ”Bedi be anba dage.”
JOH 21:23 We-degisoglesadi, Jesús-sapingan-abargi nasguddo, we-Jesús-e-sapin burgosurye. Ar Jesús sogsasulid: “We-sapin burgosurye.” Sogsado: “An we-dule an-gannar-dagedse amba dula-gudii an abegele, ¿be anga akar sogosi? Geg be akar soged.”
JOH 21:24 We-Jesús-sapin-Juanʼye-nugad e-ibmar-daksad bemarga soged, degine, we-ibmar-gusad narmaksad. Anmar wisdo, we-ibmar-sogedi, napiragwadid.
JOH 21:25 Jesús ibmar-bukidar imaksabalid. A-ibmar bela gwensak-gwensak narmaklesana, bela we-napneg-naid, we-gardamar-narmaklesad-sabogegala, unnigussuliled. Be itomargua.
ACT 1:1 An-ai-Teófilo, gebesaila an garda-narmaksadi, an narmaksado, igi-Jesús we-napneggi-gudigu, gebe ibmar-imaksa, degi, igi-dulemar-odurdaksabali,
ACT 1:2 degine, igi-Jesús nibnegse-nakwide gusbali, ase an narmaksado. Emisgindi, an bega sogbalodo, igi-Jesús yoo nibnegse-nakwed-iduale, e-sapingan-bur-dummagan-susadga, Bab-Dummad-Burba-Isligwaledbali sogsagusa, ibu imakmaloe.
ACT 1:3 Jesús burgwisad-sorbali, na e-sapinganse magarodii nanasad, adi, e-annik sogmalaga, Jesús nue-dula gudiiye. Iba-dulabo (40) e-sapinganse na san magarodii gusad. Degine, amba Bab-Dummad-e-negdakmaidgi ega sunmakdii gusbalid.
ACT 1:4 Deunni, Jesús e-sapingan-abargi amba gudigu, e-sapinganga sogsagusad: “Mer Jerusalénʼgi bangumargweloye. Igi bato an bemarga sogsa, Bab-Dummadi, E-Burba-Isligwaled bemarga ukoye. Degisoggu, Bab-Dummad-Burba-Isligwaled-nonikidse, bemar geb Jerusalénʼgi bangudmaloye.
ACT 1:5 Ar Diigi-dule-oged-Juanʼdi Bab-Dummad-diigi-ogleged-igar-imaksadi unnila diiginbi dulemar-ogsad. Emiskwaa, ibagan-danikoedgindi Bab-Dummad-Burba-Isligwaledgi bemardi oglemaloye.”
ACT 1:6 Degi, bela Jesús-walik-danar-bukwamaladi, Jesúsʼse egichiarmalad, ega sogdemalad: —Dummad, ¿Israel-dulemar epenne yar-wargwen-ganigusadyobi, ega we-ibagangi be imakoe?
ACT 1:7 Jesús, abin-sogded: —We-ibagan bemar wisguegarsulid, ar unnila Baba na e-ganguedgi ibagan-mesisad na ebi wisid, sana we-ibagan deyob guoe.
ACT 1:8 ”Bab-Dummad-Burba-Isligwaled bemargi aidenonikile, bemar niga-gangudmaloed, degine, bemar angi-sunmakdemaloed. Gebe Jerusalénʼgi-onodoed, geb bela Judea-yalaganba-nadoed, geb degi, Samaria-yalaganba-bipirmakdoed, geb bela napneg-naid-ugakaase, an-gayaburbagi bemar sunmakdemaloed.”
ACT 1:9 Jesús deyob-ibmar-sogsad-sorba, e-sapingan-wagab, nibnegse nakwid gusad, mogir-darba emargi yoggudsunnad.
ACT 1:10 Amba e-sapingan Jesús-nakwemaid-nue-dakbukwadgi, dule-warbo, mola-sibu-yoi e-dikarba gwisgunonimalad.
ACT 1:11 Amar Jesús-sapinganga sogdemalad: —Galilea-dorgan, ¿ibiga be niba-atakbukmala? We-Jesús, igi bemargi sulesa, igi niba nakwid be daksamala, weyopira we-Jesúsʼsunnad, napnegse gannar danikoed.
ACT 1:12 Degi, Jesús-sapingan Yar-Olivosʼye-nugad-birgi-bukwa, gannar Jerusalénʼse nonimalad. A-yarde dogdar Jerusalénʼgi dikasur sisulid, nabir obunnoged-ibagi minuto-durgwen (20) nanalegedwilub egi siid.
ACT 1:13 Jerusalén-neggweburse dognonimargu, emar-mamaidse aila-niba ambikunonimalad. A-neggi wemar mamaimalad: Pedro, Juan, Jacobo, Andrés, Felipe, Tomás, Bartolomé, Mateo, Alfeo-machi-Jacobo, Zelote-dule-Simón, degi, Jacobo-mesad-Judas.
ACT 1:14 Bela bulakwaa danar Bab-Dummadse gorbukwadamalad. Degi, omegan-bamalad, Jesús-urbamar, degine, Jesús-e-nan-María, Babse-golega nonidamarmogad.
ACT 1:15 Deunni, gwenadgan e-dulanergwasaar (120) ambikunonimalad. Amar-abargi Pedro gwisguded, weyob sogded:
ACT 1:16 “Gwenadgan, Bab-Dummad-Garda-narmakar-naidba ibmar guergebed. Epenne bato Bab-Dummad-Burba-Isligwaled, Davidʼba Judas-Iscarioteʼgi sunmaksad. We-dulede, Jesús-gamalaga dulemar-idumai gusad.
ACT 1:17 Judasʼde anmar-sordamoganad, anmarba arbadii gusmoganad.
ACT 1:18 Judas, Jesús-uksad-manigi nainu baksad. Geb a-nainugine niba-nai soladukin napase argwachad. E-saban nued-sate gusad, bela siir gusad. E-samurmar bela buud-ainided.
ACT 1:19 Jerusalénʼginmalad deyob-neggusad bela wisgusmalad. Degidbali, a-nainu ‘Acéldamaʼye’ onugsasmalad. A sogleged, ‘Ablis-Nainuye.’
ACT 1:20 ”Bato Salmosʼgi narmakar naid: ‘E-nega olloo melledoed, dule a-neggi gwen megosulid.’ Salmo 69:25 ”Degine, sognaibalid: ‘Dule-baid e-sorba e-arbaed imaknonikoed.’
ACT 1:21 ”Degisoggu, anmar Judas-sorba dule-wargwen amiergebed. Dule, Jesús-gudigusgu, anmarba bipirmakdaniguad anmar amiergebed.
ACT 1:22 Degi, we-dule, Juan-Bab-diigi-ogleged-igar-imakded-akar, Jesús-nibnegse-nakwidedse, dule-anmarba-gudigusadi anmar amiergebed. Adi, a-dule, anmarba Jesús-gannar-durgusadgi sunmakmogagar.”
ACT 1:23 Geb degine, dule-warbo amismalad: Gwensak Joséʼye nugad, baiddi, Matíasʼye nugad. Joséʼde Barsabásʼye nugbalid, Justoʼye bur ese gordamalad.
ACT 1:24 Dulemar-bukmalad Bab-Dummadse gotemargu, sogdemalad: “Bab-Dummadye, bedi bela anmar-binsaed mag daksoggu, anmarga be oyoge, we-ebogwadi, Judas-ular-dogega, biti bur be susadi.
ACT 1:25 Adi, anmarba arbaegar, Jesús-e-sapin-bur-dummadga gumogagar. Ar Judasʼdi e-isgusad-ular, e-neg-soo-sailase-naega we-igargi node gusad.”
ACT 1:26 Geb a-sorbali, wilubdaksamalad, doa bur sulegoe. Wilubdaksamargu, Matías sulenonikid. A-ibagine, Matías Jesús-e-sapingan-bur-dummagan-ambe-gakagwensakadba (11) dognonimosunnad.
ACT 2:1 Pentecostés-Iba-nonigu, bela Jesúsʼba-nanaimalad danakwaa na bukwagusmalad.
ACT 2:2 Ukiagwale, nibneg-akar burwa-dummad-uurmakeyobi binnasuli neg-uurmakenonikid. Bela emar-bukwadgi neg-uurmakedi neg-gasa sigenonikid.
ACT 2:3 Agi, daklealid soo-dululurmaksiidyob bela dulemar-irba signonikid.
ACT 2:4 Belagwapa dulemar-bukwadgi Bab-Dummad-Burba-Isligwaled ubononikid. Degidbali, gangudmalad, gaya akar-akar sunmakdemalad. Bab-Dummad-Burba-Isligwaled ega gaya-ukedba, sunmakdemalad.
ACT 2:5 Deunni, bela Judíoʼmar-we-yar-naid-ugakse-bukmalad nue-islikwaa-nanadimaladi, iba-dakega Jerusalénʼse nonigusmalad.
ACT 2:6 A-dulemar ibmar binnasur uurmake itoarmargu, bela danar ambikunonimalad. Neggunaid geger-dakarmalad, ar itoarmalad, Jesúsʼba-nanaimaladde emar-sunmaked-gayaba sunmakbukmala.
ACT 2:7 Neggunaid geger-dakmalad, aku-itomarbalid, wede ibiga deyob gunai. Degisoggu, sokarmalad: “Be dake, we-dulemar-sunmakbukmaladde, ¿we Galilea-dorgansursi?
ACT 2:8 Degite, ¿ibiga we-dulemarde nabir anmar-gayaba sunmakmarsunna?
ACT 2:9 ”Ar anmar-wegi-bukwamaladi neggwebur-baid-baidsikmaladid. Gwen-gwen anmar: Partiaʼginmaladid, Mediaʼginmaladid, Elamʼginmaladid. ”Degi, abala anmar, Mesopotamiaʼgi-mamaimaladid. Judeaʼginmaladid, Capadociaʼginmaladid, Pontoʼginmaladid, degine, Asiaʼginmaladid.
ACT 2:10 Frigiaʼginmaladid, Panfiliaʼginmaladid, Egiptoʼginmaladid, Cirene-nagaba-Libia-siid-ginmaladid, Judío-dulemar-Roma-akar-danimaladid, degi, dule-Judío-igarba-dogsamaladid.
ACT 2:11 Cretaʼginmaladid, degine, abala anmar Arabiaʼginmaladid. Emide, anmar bela Galilea-dorgan anmar-gayaba Bab-Dummad ibmar-gegerdaklemalad-imaksadgi-sunmakbukwad itobukmalad.”
ACT 2:12 Geger dakmalad, nue-aku itomarbalid, na muchub-muchub ega sokarmarsunnad: “Weyob-ibmar-gunaidde, ¿ibi nue obare?”
ACT 2:13 Abala we-dulemala, Jesúsʼba-nanaimaladgi dododmalad, sunmakdemalad: “Wemardi mummu-bukwamarye, e-annik sogdemalad.”
ACT 2:14 Degi, Pedro na e-ambe-gakagwensakadmala (11), dulemar-abargi gwisgusad. Geb binnasur sunmakded, sogded: “Gwenadgan-Judea-dorgan, degi, bela bemar-Jerusalén-neggweburgi-bukwamaladi, nue be an-itomalo. An bemarga sogodo, wede ibi nue obare.
ACT 2:15 Bemar-we-dulemar-mummuye-bimaladi, mummusurmalad. Ar geb dad-abala-nikad be daksurmarsi. ¿Dulemar dad-abala mumgudii bemar dakdisi?
ACT 2:16 ”Ar we-bemar-dakedi, bato Bab-Dummad-gayaburba-barsoged-Joel weyob sogsagusad:
ACT 2:17 ”Bab-Dummad soged: ‘An-Burba bela-dulemargi an odenonikoed. Be-masmala, degine, be-bunamala, an-gayaburbagi sunmakdemaloed. Degine, dule-selebagusmalad gabdakdemaloed, be-sapinganmala neg-burbagan dakdemaloed.
ACT 2:18 Deginbali, an-mai-machergangi, an-mai-omegangi, An-Burba an odebaloed. Geb amar an-gayaburba-barsogega gudmaloed.
ACT 2:19 Degine, nibneggi ibmar-gegerdaklemalad an oyogoed. We-napneggi ibmar-dakledisurmalad an oyobaloed. Ablisbi neg-nagunonikoed, soo-dummadi oyolegoed, degine, waa-bupurmagwichi neg gudoed.
ACT 2:20 Dad-ibeler a-ibagangi bar gaosulid, nii ablisyob ginnitibi nagumogoed, Bab-Dummad-e-iba-danikid-idu, deyob neg-gunonikoed. We-Bab-Dummad-iba, gwayed-dummadid, boni-dummad-ibad.
ACT 2:21 Dule Bab-Dummad e-abonogega-imakdibe, a-dule abonolenonikoed.’ ”
ACT 2:22 Pedro sogdebalid: “Israel-dorgan, an-bemarga-ibmar-sogoedi nue be itomalo: Jesús Nazaret-dolad, bemardi nue-wismalad, bemar-abargi Bab-Dummad-nuggi ibmar-dakledisurmaladi, ibmar-wilubgan, degi, ibmar-gegerdaklemaladi oyosad, ar a bemar bela-wisi bukwamalad, adi, bemar dakega, Jesús doa-dule gue.
ACT 2:23 Ar gebesaila Bab-Dummadi bato sogsad, Jesús nue-wilegergebye, degine, e-isdarmaladga uklegoye sogsad. Emide, bemar oburgwemalaga Jesús-gasgusmalad, bemar Roma-sordamarga uksagusmalad.
ACT 2:24 ”Degi-inigwele, Bab-Dummaddi Jesús-odulosad, burgwed-abargi onosad. Ar ade, burgwed Jesúsʼgi geg obined.
ACT 2:25 A-ular, epenne, David, Jesúsʼgi weyob sogsagusad: ‘Mer an isguedse galakuega, Bab-Dummad an-argan-nuedsik gudiguad, deyob an-idudii an dakdiguad.
ACT 2:26 A-ulale, an-gwagegi an yeer-itoged. Weligwaledba an namaksun. Degi, bela an-sana gannar-durguoedi bensuli edarbesun.
ACT 2:27 Gwen be an-san-burba neg-uangi oyogsaosulid. Ar be-mai-gwage-swilidikid-e-mui gwen neg-uangi onunsaega be imakosulid
ACT 2:28 Igar-nuedba-gudigued be anga oyosad, be-asabinni bela-belad weligwar-gudii be an-imaked.’ ”
ACT 2:29 Pedro sogdebalid: “Gwenadgan, anmar bela dad-dummad-David-burgwisad, degine, diglesad, wismalad. Emi-ibagine, amba e-neg-uan siid. David na e-sangi sunmaksasulid.
ACT 2:30 ”Ar David Bab-Dummad-gayaburba-barsogedid, degisoggu, nue-wissunnad, igi-Bab-Dummad ega ise-sogar imaksa. Ega weyob sogsagusad: ‘Be-wagwa-gwensak beyob reyga an omesoye.’
ACT 2:31 ”Degisoggu, David bato daknaiyobi, iduakwaa Cristo-gannar-durguoedgi sunmaksad. David deun weyob sogsagusad: ‘Bab-Dummad-dule-wargwen-bega-barmidagoye-sogsad-dule neg-uangi sadegumai guosulid, agi nungumai guosurbalid.’
ACT 2:32 ”A-Jesús-sunnad, Bab-Dummad gannar odulosad. Jesús-gannar-durgusad, bela anmar daksamalad.
ACT 2:33 Degisoggu, Bab-Dummad-argan-nuedsik dummadga Jesús sigidapsunnad, degi, Bab-Dummad-Burba-Isligwaled-uklegoye-soglesadi, Jesúsʼga uklessunnad. Geb a-Burba-Isligwaled, Jesús anmarga uknaimogad. Emide, a-igar bemar daknaimalad, degi, itobukwamarbalid.
ACT 2:34 Ar ade, David nibnegse nakwiapsulid, degite, David-sunnad sogbalid: ‘Bab-Dummad an-Dummadga sogsad: An-argan-nuedsik be sige,
ACT 2:35 be-isdarmalad an bela ogalakuedse be sige.’
ACT 2:36 ”Degisoggu, bemar-Israel-dulemar, bela be we-igar wisgumalargebed. We-Jesús bemar nakrusgine-oburgwismaladi, Bab-Dummadi, Dule-Dummadga imaksad, degi, E-nuggi-sulealedga imaksabalid.”
ACT 2:37 Dulemar, Pedro-deyob-ibmar-soged itosmargu, nue-bukib itodmalad. Geb Pedroʼga, degi, Jesús-e-sapingan-bur-dummagan-baiganga sogdemalad: —Degite, gwenadgan, ¿igi anmar saergebe?
ACT 2:38 Pedro, abin-sogded: —Be-isgudiidga na be bukib-itomarsun, egi be bangumarsun. Bab-Dummad-sogedba be nanamarsun, degi, Jesucristo-nuggi Bab-Dummad-diigi-ogleged-igar be imakmarsun, adi, Bab-Dummad be-isgudiid bemarga elioed, E-Burba-Isligwaled bemarga ukoed.
ACT 2:39 ”Ar Bab-Dummad E-Burba-Isligwaled-ukoye-sogsadi, bemarga, be-mimmiganga, degi, dulemar-ainebarmaladga ukegarmogad. Wegisundo, Bab-Dummad doa-dulemarse gorbie, a-dulemarga E-Burba-Isligwaled ukoed.”
ACT 2:40 Deyob Pedro suibaksaar Jesús-igargi sunmakgwisgu, aimarga binsaed-nued-ukgwichi gusad. Degine, sogdebalid: “Bemar we-dulemar-isgudidimaladgi be bangumarsun. Adi, melle be we-dulemar-isganaba sabsur-odurdaklemalagar.”
ACT 2:41 Dulemar Pedro-ibmar-sogsad-abingasmaladi, Bab-Jesús-diigi-ogleged-igar imaksamalad. Geb Jesúsʼba-nanaimaladba atosmalad. A-ibagi, milipaa-wilub (3,000) eba nagusmalad.
ACT 2:42 Amar unnila Bab-Jesús-e-sapingan-bur-dummagan-e-odurdakedgi nue-alamaknai gusmalad. Degi, bulakwaa na muchub-muchub bendakbukwa, Bab-Dummadse-gorbukwa, degi, Bab-Jesús-burgwisad-insaegala, danakwaa na mas-gunbukwa gusmalad.
ACT 2:43 Bela dulemar geger Jesúsʼba-nanaimalad-dakbukwa gusmalad. Ar ade, Jesús-e-sapingan-bur-dummagan bukidar ibmar-gegerdaklemalad, degine, ibmar-wilubgan-imakledisurmalad imaknanai gusmalad.
ACT 2:44 Bela Bab-Jesúsʼgi-bensurmaladi danakwaa na bipirmakdii guarmalad, degi, e-ibmar-nikamaladi muchub-muchub na ega uknanai guarmarbalid.
ACT 2:45 Nainu-nikamaladi na maniga-imaknanai guarmalad, degi, ibmar-nikamaladi bela maniga-imaknanai guarmalad. Ibmar-abelegedba na uknanai guarmalad.
ACT 2:46 Degi, bane-bane Bab-Dummadse-goled-neggi na ambikubukwa damalad. Degi, na muchub-muchub neg-irba madu-mimibukwa damalad. Weligwaledgi, danakwaa na gwagegi yeer-itogedgi na mas-gunbukwa damalad.
ACT 2:47 Na bulakwaa Bab-Dummad-nug-ogannobukwa damalad. Dule-neggweburginmaladi yeer Jesúsʼba-nanaimalad-dakbukwa gusmalad. Bab-Dummadi bane-bane dulemar-gwage-abonolesmalad-omelomai gusad.
ACT 3:1 Ibagwengine, sedo wachi-irbaagi, Bab-Dummadse-goled-wachigi, Pedro, Juan-ebo Bab-Dummadse-goled-negse nadapi gusmalad.
ACT 3:2 Degidgine, Babse-goled-neg-yawagak-Yeerdaklegedye-nugad-naba dule-wargwen mellesii gusad. We-dulede, gwalulesad-akar gusgu geg nanaed. Bane-bane Bab-Dummadse-goled-neg-yawagak-naba we-dule-sinonidamalad, adi, dulemar-ubomaidse mani egisegar.
ACT 3:3 Dule-geg-nanaed daksagu, Pedro, Juan-ebo Bab-Dummadse-goled-negse dognadapi, ese mani egichialid.
ACT 3:4 Pedro, Juan-ebo nue-nuu dakdegu, ega sogdemalad: —Nue be anmar-dake.
ACT 3:5 Dule-geg-nanaed nue-nuu dakded, ar mani ega ukoye bienad.
ACT 3:6 Pedroʼdi ega sogded: —An mani sate, or satebalid. Degi-inigwele, an-ibmar-nikad an bega ukodo: ‘Jesucristo-Nazaretʼgined-nuggi an bega-soged, be gwisgu, yog-nanaar be gusun.’
ACT 3:7 Pedro deyob dulega-sogsagu, Pedro dule-argan-nuedsik gasa imaksad, ogwichis imaksad. Agi yog e-nag gannaleded, degi, e-nag-garbirmar yog nuguar naded.
ACT 3:8 Dule-geg-nanaed yog-gwichibin imaksad, geb nanadeguad. A-sorba, dule-nugusadi, Pedroʼmala, degi, Juanʼmala, Bab-Dummadse-goled-negse dogdemogad. Dule-nugusadi ichomaknadapi, Bab-Dummad-nug odummonadapi gusad.
ACT 3:9 Ar dulemar bela dakarmargu, we-dule nabir-nanae, degi, Bab-Dummad-nug-odummonadapi, geger dakarmalad.
ACT 3:10 Ar ade, magar-dakmalad, we-dulede, Bab-Dummadse-goled-neg-yawagak-Yeerdaklegedye-nugad-naba siidae, dulemarse mani-egichidae. Emide, nabir-nanae-dakarmargu, geger dakdemalad, degine, nue-aku itomarbalid, wede igi-gusa.
ACT 3:11 Dule-geg-nanaed-nugusadi, Pedroʼba, degi, Juanʼba, bipirmakdii gusad, amargi gwen bangussurgusad. Ar dulemarde ibmar-gusad geger-dakmarsoggu, bela Babse-goled-neg-ubeb-Salomónʼye-nugadse duurmaknonimalad. Ar ade, agi gunanaimalad.
ACT 3:12 Pedro deyob dulemar-dakargu, dulemarga sogdesunnad: “Israel-dulemar, ¿ibiga bemar ibmar-gusad geger dakmarsunna? ¿Ar ibiga bemar nuu anmar-dake? ¿Ar anmar-ganguedba anmar we-dule-nudaksa be daksi? Ar anmar-ganguedba anmar we-dule nudaksasuli, Jesús-Nazaretʼgined-nuggi anmar nudaksad.
ACT 3:13 ”Anmar-dadgan-Abraham, Isaac, Jacob, amar-e-Bab-Dummadi, na E-Machi-Jesús-nug odummosad. Ar bemar a-Jesús-oburgwega, Roma-dummad-Pilatoʼga uksa gusmalad. Ar Pilato Jesús-onobigusanad, bemardi gwen onogega imaksasurmalad.
ACT 3:14 Bemar, a-Jesús Dule-Gwage-Swilidikid, Dule-Igar-Napiragwadba-Ibmar-Imaked, egichissurmalad. Bur dule-isgana, dulemar-oburgwisad, a bemar Pilatoʼse egichismalad bemarga onogegar.
ACT 3:15 Deyob bemar dulega-san-burba-dulad-ukedi oburgwisgusmalad. Degi-inigwele, Bab-Dummad, Jesús-burgwarmaigu, odurgusad. Jesús-durgusad, bela anmar-ibyanugi anmar daksamalad.
ACT 3:16 ”Bemar we-dule-mag-dakedi, nue-nugus be dakedi, na Jesús-nuggi-bensulidba nugusad. Jesús we-dule-onudaksad. Ar Jesúsʼgi bensursoggu, we-dule, nue-nudakles bemar daksunnad.
ACT 3:17 ”Gwenadgan, ar an wisid, bemar, degi, be-dummagan aku-neg-itomaladba Jesús-oburgwismalad.
ACT 3:18 We deyob-gusadi, ar Bab-Dummad bato idu anmarga e-gayaburba-barsogmaladba sogsagusad, an-Machi-Cristo nue-wilegoye. Agala, deyob gusad.
ACT 3:19 Be-isgued bega elilemalaga, be-isgudiidga ulubgi na be bukib binsamarsun. Be-daed be ogwamarsun, Bab-Dummadse gannar be dagmarsun, adi, Bab-Dummad bemarga gwage-bogidikid ukoed.
ACT 3:20 Adi, Bab-Dummad, Cristo bato bemarga iduar uklegoye soglesad, barmidagoed. Ar a-dule, Jesucristoʼdo.
ACT 3:21 ”Emidi, a-Jesucristo bina nibneggi meggwelergebed, bela Bab-Dummad ibmar nue-nudakedse-mai gugwelergebed. Ar deyob bato Bab-Dummad epenne E-gayaburba-barsogmalad-gwage-swilidikmaladba sogsagusad.
ACT 3:22 Degisoggu, Moisés anmar-dadganga weyob sogsagusad: ‘Be-Dummad-be-Bab-Dummad, e-gayaburba-barsoged-anyobid be-gwenadgan-abargi gwensak bemarga barmidagoed. A-dule, nue be itomalo.
ACT 3:23 Ar doa-dule, we-dule-ibmar-sogedba ibmar-imaksulile, dulemar-abargi onolegoed.’
ACT 3:24 ”Bab-Dummad-gayaburba-barsogmaladi, bela Samuel-akale, we-ibagi-ibmar-gunaidgi bato sunmaksamalad.
ACT 3:25 Bemar Bab-Dummad-gayaburba-barsoged-e-wagan-gumarsoggu, Bab-Dummad E-gayaburba-barsogmaladga ibmar-sogsadi bemargadmogad. Agi Bab-Dummad anmar-dadganbo igar nabosad, deun Abrahamʼga weyob sogsagusgu: ‘Bela dula-we-napneggi-bukwamalad be-waganba an egi ise-nued binsamogoed.’
ACT 3:26 ”Emide, Bab-Dummadi na E-Machi-odulosad-sorba, gebe bemarse-inse barmialid, adi, bemargi ise-nued binsalemalagar, isguedgi bangumalagar, mer isguedgi bar nanamalagar.”
ACT 4:1 Pedro, Juan-ebo amba dulemarga sunmakgwichi, abala dule-irwa-Babse-gormaladi, degi, Babse-goled-neg-edarbed-e-dummad, degine, Saduceoʼmar, Pedroʼse, degi, Juanʼse nonimalad.
ACT 4:2 Amar, Pedro, Juan-ebogwa aimar-odurdaknanai-dakedbali sae-itodmalad. Degine, Pedro, Juan-ebogwa gannar-durgued-igargi emar-odurdaknanaid. Jesús gannar-durgusaddeeye sognanaid.
ACT 4:3 Degidbali, dummagan, Juan, degi, Pedro-ebogwa gasmalad. Bato neg gutulemaisoggu, esgaryagi odosmarsunnad. Pedro, Juan-ebogwa esgaryagi-sii oibosmalad.
ACT 4:4 Dulemar-bukidar Jesús-igar-itosmaladi Jesúsʼgi bensuli gunonimalad. A-ibagi, machergan-Jesúsʼba-nagusmalad bela miliatar-wilub (5,000) gunonimalad.
ACT 4:5 Banedgine, Jerusalénʼgi Judío-dummagan-negsemamaid, degi, Judío-girmar-dummagan, degine, Moisés-Igar-Maid-wisimaladi, igar-itogega ambikunonimarsunnad.
ACT 4:6 Dule-irwa-Babse-gormalad-bur-dummad-Anás, Caifás, Juan, Alejandro, degine, dule-irwa-Babse-gormalad-e-dummad-e-gwenadgan, bela igar-itogega gudigusmarmogad.
ACT 4:7 Geb dummagan, Pedroʼbina, degi, Juanʼbina gochamarsunnad. E-abarse gwisgunonimargu, ese egichidmalad: “¿Doa-sogedba, doa-nuggi wede bemar dule-nudaksamala?”
ACT 4:8 Degi, Pedro nue-Bab-Dummad-Burba-Isligwaled-nika sunmakded, sogded: “Neggwebur-e-dummagan, degi, girmar-dummagan, bemar dummagan gumalad.
ACT 4:9 Emide, anmarse we-dule-bonigwaled-nugusad-ular ibmar-egislenaid, we-dulede igi-nugusye.
ACT 4:10 Emide, bemar wisgumalodo, degine, bela Israel-dulemar wisgumarmogodo we-dulede igi-nugusa. We-dule, bemar-abargi-nue-nugus-gwichidi, Jesucristo-Nazaretʼgined-nuggi nugusad. A-Jesucristo bemar nakrusgi bioksagusmalad. Degi-inigwele, Bab-Dummadi, a-Jesús-burgwarmai gannar odurgusad.
ACT 4:11 A-Jesús, ‘akwa-isganayob bemar-neg-sobmaladse oballesadid. A-akwa, neg-sobleged-e-akwasailaga gunonikid.’
ACT 4:12 ”Degisoggu, dule-baid-nuggi geg anmar abonoleged. Ar we-napneggi abonolegega anmarga dule-baid uklessulid, unnila Jesús-nugginbi anmar abonoleged.”
ACT 4:13 Dummagan dakarmargu, Pedro, degi, Juan, dobsuli ibmar soge-soge gwichi, geger dakdemalad. Ar ade, wismalad, we-dulemarde dogdar garda wissurmaladi, degine, dule-binsarmaladi. Degi-inigwele, magar daksamalad, wemarde Jesúsʼba-gudigusmaladi. Degisoggu, a-ular binsaed-nikarba sunmakmarye annik sogdemalad.
ACT 4:14 Ar dule-nugusadi amar-abargi-gwichi-daksamarsoggu, geg Pedro-oakaloge gusmalad, degi, geg Juan-oakaloge gusmarbalid.
ACT 4:15 Geb degi, dummagan Pedroʼga, degi, Juanʼga sogdemarsunnad: —Wegi anmar-igar-itobukwad-abargi be wis nomargwerye. Emardi na igar-amimalaga bukusmalad.
ACT 4:16 Na sogdemalad: —¿We-dulemar anmar igi-imakoe? Ar bela wegi-Jerusalénʼgi-bukwamalad dule-nudaklesad wismalad. Ar wemar ibmar-dakledisurmalad imaksasoggu, anmar we-ibmar-gusad geg osulomalad.
ACT 4:17 Mer we-igar dulemar-abargi nasgumai-guegala, Pedroʼse, degi, Juanʼse anmar urwemaloed, anmarse be-oitolemaloye anmar ega sogoed, adi, mer Jesús-nuggi bar dulemar-baiganga sunmakmalagar.
ACT 4:18 Geb dummagan Pedroʼse, degi, Juanʼse, gannar gochamalad. Geb ega igar uksamalad: —Mer bar Jesús-nuggi sunmakmaloye, degine, mer bar a-nuggi odurdakmarbaloye.
ACT 4:19 Pedro, Juan-ebogwa abin sogdemalad: —Nue bemar-sunnad itomarmogana, ¿igid-bur-nabirsunna? ¿Bemar-sogedba ibsaedi? ¿Bab-Dummadba bur ibsaedi? Be anmarga sogena.
ACT 4:20 Ar anmar-sunnad na ibyagwar ibmar daksamarsoggu, degi, an-uayagwar an ibmar itosmarsoggu, geg sogsuli an gumalad. Anmar sogergebed.
ACT 4:21 Geb degine, dummagan unnila Pedroʼse, degi, Juanʼse, gandikidba-ulusmargua, gannar onosmarsunnad. Dummagan geg Pedro, degi, Juan, oakalogusmalad. Ar ade, dulemar, dule-nugusad-ular, Bab-Dummad-nug-ogannonanai guarmalad.
ACT 4:22 Ar dule-geg-nanaed-ibmar-dakledisulidba-nugusadi, birga-durbo-gaka (40+) nikad.
ACT 4:23 Pedro, Juan-ebogwa onolesmargu, e-sordamar-bukwadse nadegusmalad. Geb bela e-sordamarga sogdemalad, dule-irwa-Bab-Dummadse-gormalad-e-dummagan, degi, Judíoʼmar-girmar-dummagan anmarga sogye, “mer Jesús-nuggi bar sunmakmaloye.”
ACT 4:24 Jesúsʼba-nanaimalad, Pedro-deyob-ega-soge, Juan-deyob-ega-soge itosmargua, belagwapa na danale Bab-Dummadse gotemalad, sogdemalad: “Bab-Dummad-Bela-Negsemaidye, bee be nibneg obinnisad, bee be napneg obinnisad, bee be demar obinnisad, degine, bee be bela ibmar obinnisad.
ACT 4:25 Be-Burba-Isligwaledba be-mai-Davidʼga be sogsagusad: ‘¿Ibiga dulemar-yar-baid-baidgi-bukwamalad, Bab-Dummadgi binsarsunna urwebukwa? ¿Ibiga dulemar Bab-Dummadgi-aibinedgi binsarsunna binsabukwa?
ACT 4:26 Reymar-negsemamaid, Bab-Dummadgi aibitemalad. Dulemar-nuga-nikamalad, Bab-Dummadgi isdar-binsadmalad. Bab-Dummad-na-nug-imaksadgi aibitemarbalid.’
ACT 4:27 ”Ar ade, nue-napiragwad, Herodes, Poncio-Pilato, degine, Judíoʼsurmalad, degi, Israel-dulemarmala, we-neggweburgi igar-itogega ambikusmalad. Be-Machi-gwage-isligwaled-Jesús-oburgwega igar-amibukwa gusmalad. A-Jesús, Cristoʼga-guega be susagusad.
ACT 4:28 Bab-Dummad, weyob-Jesús-gusadi, bato iduakwaa-be-ibmar-sogsadba gusad.
ACT 4:29 ”Emigindi, Bab-Dummad, nue be dake, ibiyobi anmar bega-arbamalad-ulale, dummagan, anmargi yolenanai. Degisoggu, anmarga gangued be uksun, adi, dobsuli be-gayaburbagi anmar sunmakmalagar,
ACT 4:30 degine, be-ganguedgi nabir dule-uellemalad nudakmalagar. Aginbali, Be-Machi-Jesús-gwage-isligwaled-nuggi nabir ibmar-wilubgan-dakledisurmalad, degine, ibmar-gegerdaklemalad imakmalagar.”
ACT 4:31 Jesúsʼba-nanaimalad Bab-Dummadse-goled-bergusmargu, danar-bukwamaladgi neg giglimakded. Agine, bela Bab-Dummad-Burba-Isligwaled egi ubononisunnad, geb degine, dobsuli Bab-Dummad-gayaburbagi sunmakdemarsunnad.
ACT 4:32 Bela Jesúsʼgi-bensurmaladi, na binsaed-gwennagwadyob ulubgi itobukwa gusmalad. Dule-wargwensaale na ibmar egadye itobukwa gussurmalad. Ar ibmar bela na emargadye itobukwa gusmalad.
ACT 4:33 Jesús-e-sapingan-bur-dummagan, Bab-Dummad-Burba-Isligwaled-ganguedba Bab-Jesús-gannar-durgusadgi, dobsuli sunmakdii guarmalad. Degine, Bab-Dummad, Jesúsʼba-nanaimaladgi bela-bela dulemargi-nabir-binsaed-burba odemai gualid.
ACT 4:34 Jesúsʼba-nanaimalad emar-abargi ibmar-galakudii gwen gussurmalad. Ar ade, nainu-nikamaladi, degi, neg-nikamaladi, na manigi uknai guarmalad. Geb a-mani senonidamalad.
ACT 4:35 Agine, Jesús-e-sapingan-bur-dummaganga mani uknonidamalad. A-mani na yopiraa ibmar-abemaladba mimiddamalad.
ACT 4:36 Deun, Chipreʼgined-wargwen, Joséʼye-nugad, deyob imaksagusmogad. A-dulede, Leví-wagwad, Jesús-e-sapingan-bur-dummagana, Bernabéʼye we-dule-onugsasmalad. Bernabé sogleged, Nabir-Itole-Dule-Saed-Machiye.
ACT 4:37 A-dulede, nainu nikasoggu, na manigi nainu-uksadi, a-mani Jesús-e-sapingan-bur-dummaganse senonikid, adi, Jesúsʼba-nanaimalad-wilemaladga, a-mani mimimalagar.
ACT 5:1 Deunni, dule-wargwen, Ananíasʼye-nugadi, e-ome-Safira-ebo nainu manigi uksamogad.
ACT 5:2 A-mani yamo Jesús-e-sapingan-bur-dummaganga bela-senonikidyob imaksad, ar edi, abala na obesad. E-ome, Ananías-mani-abala-obesad, nue-wisi gusmogad.
ACT 5:3 Ananías mani-uknonigu, Pedro ega sogded: —Ananías, ¿Ibiga nia-saila-Satanás burba-isgana begi oubononiki? Emide, Bab-Dummad-Burba-Isligwaledga be gakansanonigu, mani-abala be susgu.
ACT 5:4 Yoo be nainu-ukegu, ¿nainu begadinsursi? Nainu be uksagu, ¿a-manide begadinsursi? ¿Ibiga be-gwagegi anmarga gakansaedgi be binsanoniki? Dulemarga be gakan-imaksasulid, Bab-Dummadga be gakan-imaksad.
ACT 5:5 Ananías, weyob Pedro-ega-soge-itosgu, Ananías yog-aimukudeguad, ilagwen-burgwar naded. Belagwapa dulemar degigusad-itosmaladi, bela-nue-dobee itonadmalad.
ACT 5:6 Degine, sapingana, atuedgi Ananías-mui-obipirmaksamalad, geb sesmarsunnad, neg-uanse dikapmalad.
ACT 5:7 Deyob-neggusad-wachi-ilapaagwad-sorbali, Ananías-ome nonimogad. E-iduar-neggusad-wissuli dognonikid.
ACT 5:8 Geb Pedro ese egichialid: —Anga be soge, ¿mani-senonikidgii gargegu bemar nainu uksa? Ome, abin-sogded: —Eye, degi-mani-gargegu anmar nainu uksa.
ACT 5:9 Geb degi, Pedro ega sogded: —¿Ibiga bemar-bebogwad Bab-Dummad-Burba-Isligwaled-wilubdakye sogmala? Be-dake, sapingana-be-sui-mui-digdimaladi emiskwaa nonimalad. Emisgindi, wemar neg-uanse be-dignamarmogoed.
ACT 5:10 Agi Safira, Pedro-asabin yog-aimukudeguad, ilagwen-burgwar naded. Geb sapingana ubononimargu, Safira-burgwar-mai daknonimalad. Sesmalad, e-sui-dikarba digsamalad.
ACT 5:11 Agine, belagwapa Jesúsʼba-nanaimalad-danar-ambikunonidamalad, degine, bela degigusa-itosmaladi, bela dobee itonadmarsunnad.
ACT 5:12 Jesús-e-sapingan-bur-dummagana, dulemar-abargi ibmar-wilubgan-dakledisurmalad, degine, ibmar-gegerdaklemalad imaknai guarmalad. Degi, bela Jesúsʼba-nanaimaladi dule-wargwennayobi Babse-goled-neggi Salomónʼye-neg-ubeb-nugadba ambikunonidamalad.
ACT 5:13 Dule-baigandi, dobedba geg ese atoge guarmalad. Degi-inigwele, a-dulemala, Jesúsʼba-nanaimaladgi binsaed-nikaa gudmalad, degi, egi nued sunmake gudmarbalid.
ACT 5:14 Bukidar Bab-Jesúsʼgi bensuli gudmalad. Machergan, degi, omegan, Jesúsʼba-nanaimaladba nagumai gudmalad.
ACT 5:15 Degine, dulemar-gegumalad magaba gablegedgi-mai onosdamalad. Igargi Pedro-idu mesisdamalad, adi, Pedro-e-burba egi wis nasale, dule-gegumaid nabir nuguegar.
ACT 5:16 Dulemar-Jerusalén-neggwebur-dikarba-bukwamalad bukidar Jerusalénʼse nonidamarmogad, dule-gegumalad, degi, dule-niaburba-nikamalad senonidamalad. Jesús-e-sapingan-bur-dummagan a-dulemar belagwapa nudaksamalad.
ACT 5:17 Dule-irwa-Bab-Dummadse-goled-bur-dummad, degi, e-sordamala, Jesús-e-sapingan-bur-dummagangi nobguarmalad. Wemarde, Saduceo-igarba-gudimaladid.
ACT 5:18 Amar Jesús-e-sapingan-bur-dummagan-gasmalad, geb neggwebur-esgaryagi metemalad.
ACT 5:19 Neg-mutikidba, Bab-Dummad-baliwitur esgarya-yawagak eganonikid, Jesús-e-sapingan-bur-dummagan onosad, geb amarga sogded:
ACT 5:20 “Be namar, Bab-Dummadse-goled-negse be namalo, agi Cristoʼgi dula-gudigued-igargi dulemarga be sunmakmalo.”
ACT 5:21 Deyob baliwitur ega sogsa itosmargu, banedgine wakudar Babse-goled-negse nadmalad, degi, agi dulemar-odurdakdemarsunnad. Ar dule-irwa-Babse-goled-bur-dummaddi, degi, eba-gudidimaladdi, igar-itomalaga Judío-dummagan-igar-nabiromaladse gochamalad. Geb Israel-girmar-dummagan nonimargu, suar-ibmala barmismalad, Jesús-e-sapingan-bur-dummagan-esgaryagi-bukwad ese sedamalagar.
ACT 5:22 Esgaryase suar-ibmala modapgu, Jesús-e-sapingan-bur-dummagan-sate dakdapmalad. Degisoggu, suar-ibmala gannar nonimarsunnad, dummagan-owisononimarsunnad.
ACT 5:23 Weyob sognonimalad: —Anmar modapgu, esgarya nue-atiar-sii anmar dakdapid, suar-ibmala yawagakgi nue-edarbe-gwichi anmar dakdapid. Degite, anmar yawagak-egasgu, ar dulemar sated.
ACT 5:24 Dule-irwa-Babse-goled-bur-dummad, Babse-goled-neg-edarbed-e-dummad, degi, dule-irwa-Babse-gormalad-e-dummagan, geger itodmalad, wede igi-neg-gudodibeye, sogdemarsunnad.
ACT 5:25 Deyob-sunmakbukwa dule-wargwen nonikid, sognonikid: —Bemar dulemar-esgaryagi-metemaladi, Babse-goled-neggi dulemar-odurdakbukwad.
ACT 5:26 Degi, Babse-goled-neg-edarbed-e-dummad, suar-ibmalamala amar-gaega nadegusmalad. Geb Jesús-e-sapingan-bur-dummagan-gasmalad, nuedgi senonimalad, ar ade, dobmalad, abakalegi dulemar akwagi e-makarmalarye binsamalad.
ACT 5:27 Senonimargu, Judío-dummagan-igar-nabiromalad-abarse ogwisnonimalad. Geb degi, dule-irwa-Babse-goled-bur-dummad Jesús-e-sapingan-bur-dummaganga sogded:
ACT 5:28 —Anmar bemarga sogsamarsursi: ‘Melle bar Jesús-nuggi dulemar-odurdakmaloye. Emide, bela Jerusalénʼgi bemar-odurdakdiid-igar, bela neg-gassunnad, degine, bemar Jesús-burgwisad anmargi nasikbi gunaid.’
ACT 5:29 Pedro, degi, Jesús-e-sapingan-bur-dummagan-baigan, abin-sogdemalad: “Anmar dulemarba-ibsaed-iduale, bur Bab-Dummad-sogedba anmar ibsaergebed.
ACT 5:30 Anmar-dadgan-e-Bab-Dummad gannar Jesús-odulos gusad. Bemar, a-Jesús nakrusgi-biokar oburgwisgusmalad.
ACT 5:31 ”Bab-Dummadi, a-Jesús-nug-odummosad, e-argan-nuedsik Jesús-sisad. Degine, dulemar-idugega, dulemar-abonogega nug-imaksad. Adi, bela Israel-dulemar e-isgudiidga bukib binsamalagar, e-daed ogwamalagar. Adi, e-isgudiid Bab-Dummad ega osulogegar.
ACT 5:32 We deyob-gusadi, anmar-sunnad daksamalad, we-igar-barsogega anmar gunonikid, degi, Bab-Dummad-Burba-Isligwaled amba we-igar-barsogega gunonimogad. Bab-Dummadi we-Burba-Isligwaled dulemar-eba-damaladga ukmaid.”
ACT 5:33 Jesús-e-sapingan-bur-dummagan weyob emarga soge itoarmargua, dummagan sae-itoarmalad, oburgwebi guarmalad.
ACT 5:34 Judío-dummagan-igar-nabiromalad-abargi Fariseo-wargwen, Gamalielʼye-nugadi, igar-ukdesunnad: Jesús-e-sapingan-bur-dummagan sikwas wis onogwerye. We-Gamalielʼde Judíoʼmar-igar-mamaid-nue-wisidid, emar-abargi dule-bur-nug-nikagwadid.
ACT 5:35 A-sorba geb Gamaliel, dummaganga sogded: —Israel-dorgan, nue salakarmar, nue binsakwaa ibmar-imakmalo.
ACT 5:36 Nue be insamalo, epennegwa igi neg-gusa. Deun, Teudas dulemar-idudii gusad, na sogdii gusad, ede Dule-Dummadye. Degi, dulataled-ilabakegubin (400) dulemar eba nagus gusad. Geb Teudas-oburgwilesgu, Teudasʼba-nanaimalad bela aisakid duurmakde gusmalad, bar daklessurmalad.
ACT 5:37 A-sorba, dulemar-ebisleged-ibagangi, Galilea-dor-wargwen, Judasʼye-nugadi, dulemar-obulamakdii gusmogad. Geb a-Judas-oburgwilesmogu, eba-nanaimalad bela duurmakde gusmogad, bar daklessurmarmogad.
ACT 5:38 ”Degisoggu, an bega sogmar, we-dulemar be onomar, mer be oakalomalo. Ar wemarde binsa-e-sogedba we-igar-imakdimalale, we-igar walagwen bergudoed.
ACT 5:39 Ar we-igar Bab-Dummadgadirdina, bemar obelogosulid. Degisoggu, nue salakarmar, abakalegi bemar Bab-Dummadgi yolenaile.”
ACT 5:40 Igar-nabiromaladi Gamaliel-soged nabir itosmalad. Geb Jesús-e-sapingan-bur-dummaganse gochamalad. Geb bibyosmalad-sorba, ega sogdemalad: Mer Jesús-nuggine bar sunmakmaloye. Geb agi onosmarsunnad.
ACT 5:41 Jesús-e-sapingan-bur-dummagan, Judío-dummagan-igar-nabiromalad-abargi noarmargu, weligwar noarmalad, ar Bab-Jesús-nug-nuggi nabir-ise-mesagwar-gusadba yeer itosmalad.
ACT 5:42 Jesús-e-sapingan-bur-dummagan bane-bane Bab-Dummadse-goled-neggi, degi, negayaa-negayaa dulemar odurdakdii gusmalad. We-Jesucristoʼde, Bab-Dummad-dule-wargwen-barmidagoye-sogsad-dule-sunnadye sogdii gusmalad.
ACT 6:1 Deunni a-ibagangine, Jesúsʼba-nanaimalad mergumaisoggu, Judío-dulemar-Griegoʼgaya-sunmakmaladi, Judío-dulemar-Hebreoʼgaya-sunmakmaladgi sunmakarmalad. Sokarmalad, bane-bane mas mimilealile, anmar-omegan-ei-sui-burgwismaladdi baisur dakdamarye.
ACT 6:2 Degi, Jesús-e-sapingan-bur-dummagan-e-ambe-gakabo-guedi (12), bela Jesúsʼba-nanaimaladse gochamalad, amarga sogdemalad: “Anmar mas-mimied-ular, Bab-Dummad-gayaburbagi-sunmaked-indaker, noaled.
ACT 6:3 Degisoggu gwenadgan, dulemar-bemar-abargi-gudimalad walagugle (7) be sumalo. Bemar-abargi nueddaed, Bab-Dummad-Burba-Isligwaled-nikad, degine, nue-binsaed-nikadaed, be sumalo. Adi, a-dulemar mas-mimied-dakegar.
ACT 6:4 Anmardi, Bab-Dummadse-goledginbi, degi, E-gayaburbagi-sunmakedginbi arbamaloed.”
ACT 6:5 Belagwapa Jesúsʼba-nanaimalad nabir itosmalad. Degisoggu, Estebanʼye-nugad susmalad, a-dulede Babgi nue bensulid, degine, nue Bab-Dummad-Burba-Isligwaled nikabalid. Deginbali, Felipe, Prócoro, Nicanor, Timón, Parmenas, degine, dule Antioquíaʼgined-Nicolásʼye-nugad, susmarbalid.
ACT 6:6 We-dulemar Jesús-e-sapingan-bur-dummaganse senonimalad. Geb Jesús-e-sapingan-bur-dummagan amarga Bab-Dummadse gochamalad. Na e-argan dulemar-walagugled-e-nonogi (7) mesismalad, adi, oyogegar, we-dulemar Bab-Dummadga-arbaega sulesmarye.
ACT 6:7 Bab-Jesús-gayaburba nasgumai gualid, degi, Jerusalén-neggweburgi Jesúsʼba-nanaimalad mergumai gualid. Agine, bukidar dule-irwa-Bab-Dummadse-gormaladse-bakar, Bab-Jesús-igarba nagudmarmogad.
ACT 6:8 Bab-Dummad bela-bela Esteban-nabir-daksoggu, degine, Esteban Bab-Dummad-Burba-Isligwaled-gangued bela-bela nikabarsoggu, dulemar-abargi ibmar-dummagan-gegerdaklemalad, degine, ibmar-wilubgan-dakledisurmalad imakdii gualid.
ACT 6:9 Degi, gwenna-gwenna dulemar Judíoʼmar-Libertosʼye-bilemalad-e-onmakednegginmaladi, degi, Cireneʼginmaladi, Alejandríaʼginmaladi, Cilicia-dorgana, degi, Asia-yalaganbarmaladi, Esteban-ebo undar abin-abin imaknanai guarmalad.
ACT 6:10 Amardi geg Esteban nue abin-imakguarmalad, ar ade, Estebanʼde nue-binsaed-nikaa, Bab-Dummad-Burba-Isligwaled-ega-sogedba sunmaked.
ACT 6:11 Degisoggu, amar dulemar-bennuksamalad, yamo-gakansaale Estebanʼgi sunmakmalagar, adi, sogmalagar, Esteban Moisés-nuggi, degi, Bab-Dummad-nuggi dododii anmar itosye.
ACT 6:12 Degidbali, a-dulemala, Judíoʼmar-girmar-dummagan, degi, Garda-Narmaked-Dulemar oulusmarsunnad, adi, Estebanʼgi gwisgumalagar. Agine, Judíoʼmar Esteban-gasmarsunnad, geb Judío-dummagan-igar-nabiromaladse Esteban-seargusmalad.
ACT 6:13 Agine, dulemar-yamo-gakansaar Estebanʼgi-sunmaksamaladi, Esteban-barsogega nonimarsunnad. A-dulemala weyob sogdemalad: “We-dule, Babse-goled-neg-islidikidgi, degi, Bab-Dummad-Moisésʼga-Igar-Uksadgi dodoar-sunmakdiiye, gwen boggudisurye.
ACT 6:14 Degi, we-dule sogdii, Jesús-Nazaretʼgined Bab-Dummadse-goled-neg-siid obelogoye, degine, Moisés-anmarga-gusgu-igarmar-mesisad oakalobaloye.”
ACT 6:15 Bela dummagan Judíoʼmar-igar-nabirolenaidgi-bukwamaladi, Esteban-dakdemargu, Esteban-wagar-daklegedi baliwitur-wagarsuun-daklege dakarmalad.
ACT 7:1 Degi, dule-irwa-Babse-goled-bur-dummad Estebanʼse egichialid: —¿Ar wede nabiri, begi sunmaknanaid?
ACT 7:2 Degi, Esteban, abin-imakdegu, sogded: —Gwenadgan, degi, babgan, nue an-itomalo. Anmar-dad-Abraham amba yoo Haránʼse megdageunni, amba Mesopotamiaʼgi gudiidgi, Bab-Dummad gandikidba-yeerdaklegedgi ese magaros gusad.
ACT 7:3 Deun, Bab-Dummad ega sogsagusad: ‘Be-neggweburgi be noe, be-gwenadgangi be bangu. An bega neg-oyogoedse be nae.’
ACT 7:4 ”Degi, Abraham Mesopotamia-yalagi, Caldeo-neggweburgi-mai noali gusad, Harán-yarse megidap gusad. Geb agi e-bab-burgwisgu, Bab-Dummad we-yarse Abraham-senonigusad. Emigindi, a-yargi anmar bukwamalad.
ACT 7:5 A-yargi Bab-Dummad Abrahamʼga nainu gwen uksasulid, wis bipi-goakwasaarbela ega uksasulid, sate gusad. Degite, Bab-Dummad ega sogsagusad: ‘We-yar an bega uko, degi, be-waganga an ukbaloye.’ Génesis 12:7 A-unni, amba yoo Abraham mimmi nikued.
ACT 7:6 ”Weyob Bab-Dummad Abrahamʼga sogsagusbalid: ‘Be-wagan e-yarsulidgi-gudii gumaloed. Agi, maiganga gumaloed, degine, a-yargi birga-dulataled-ilabake (400) sabsuli be-wagan-wiomaloed.’
ACT 7:7 ”Bab-Dummad weyob-ega-sogsabalid: ‘Dulemar-be-wagan-maiga-imakoedi, ani, an sabsur-odurdakoed. Agi be-wagan ainidamalogu, we-yargi an-nug-odummobukwa gumaloed.’ ”
ACT 7:8 Degi, Esteban sogdebalid: “Bab-Dummad Abraham-ebo na igar mesisad. We-igar-megisad-e-wilub magar-daklegegala, abgan-uka-duku-siked-igar Bab-Dummad Abrahamʼga uksad. Degisoggu, Abraham, na e-machi-Isaac ibabaabakgus-gwalulesad-sorba (8) ei abgan-uka-duku siksa gusad. Degine, Isaac, na e-machi-Jacobʼga abgan-uka-duku siksa gusmogad. Geb Jacob na e-masmala-anmar-dadgan-ambe-gakabogwadga (12) abgan-uka-duku-siked-igar imaksa gusmogad.
ACT 7:9 ”Degine, anmar-dadgana na e-urba-Joséʼgi nobguarmargu, maiga-guega dulemar-ibmar-ukmaladga manigi uksagusmalad. Geb a-dulemar Egipto-yarse José-sesa gusmalad. Ar Bab-Dummadi Joséʼba gudigu gusad. Igar-bulegangi ollorsamai gusad.
ACT 7:10 Degine, Bab-Dummadi Joséʼga binsaed-nikarbadaed uksad, adi, nabir Egipto-rey-Faraón José-nued-dakegar. Degidbali, Faraón, Egipto-yar-dakega José-onug-imaksad, deginbali, e-neggi-neg-dakedga, José-onugsasbalid.
ACT 7:11 ”A-ibagangi, Egipto-yalagi, Canaán-yalagi, ukud-dummad, wile-itoged-dummad nagus gusad. Degidbali, anmar-dadgan masgunned-satedba ukumechar gusmalad.
ACT 7:12 Jacob wisguargu, Egipto-yalagi madubur-gwagwaled nikaye, a-bakega gebe Egipto-yalase anmar-dadgan-barmis gusad.
ACT 7:13 ”Geb gannar anmar-dadgan Egipto-yarse mas bakarbalidgi, José e-iamarse na magarosad. Geb agi Faraón wisgunonigusad, doamar José-gwenadgan gue.
ACT 7:14 A-sorba, José e-babbina gochasunnad, adi, e-bab-Jacob, degi, e-gwenadgan belagwable e-dulapaa-gakambe-gakataled (75) Egipto-yarse dagmalagar.
ACT 7:15 Geb Jacob Egipto-yarse nonigusad, degi, a-yargi burgwisad. Geb a-yargi anmar-dadgan-e-ambe-gakabogwadi (12) burgwismarmogad.
ACT 7:16 Anmar-dadgan burgwisgu, Siquemʼye-neg-nugadse seles gusmalad, bia dad-Abraham Hamor-e-mimmiganse manigi napa-baksagusadgi digledapmalad.”
ACT 7:17 Esteban sogdebalid: “Degine, Bab-Dummad Abrahamʼga sogsad, yoedse an bega we-napa ukoye. A-ibagan modanigu, deun Egipto-yargi anmar-dadgan dula-mergud gusad.
ACT 7:18 A-ibagangi, rey-gwensak Egipto-yalagine dummadga megnonigusad. A-dulede, José-Egipto-yar-bendaksad wissulid.
ACT 7:19 A-rey yamo-yardakakwaa anmar-dadgan-sabsur-wioali gusad. Anmar-dadgan-mimmigan burgwemai-guegala, e-mimmigan-wargwen-obegega imakdaed. Adi, melle Israel-dula bar mergumai guegar.
ACT 7:20 ”A-ibagangi, Moisés gwalulesad. Bab-Dummad a-machigwa mimmi-nued daksad. E-babgandi na neggi nii-warbaa arbakee na odungudani gusmalad.
ACT 7:21 E-babgan geg bar e-neggi-sediguedba, diwarse Moisés-berbeapi gusmalad. Agi Faraón-sisgwadi Moisés-sussunnad, geb degi, e-mimmiyobi na akwis gusad.
ACT 7:22 Agine, Moisés Egipto-igargan nue durdaksad, degi, nue balamisad. Moisés gannarbaa ibmar-sae, degi, gannarbaa nue-yeer-sunmake gunoni gusad.
ACT 7:23 ”Moisés birga-dulabo-nikadgi (40) na e-gwenadgan-Israel-dulemar daknaye binsaali gusad.
ACT 7:24 Modapgu, Egipto-dule-wargwen binsarsunna Israel-dule-sabsur-imaknai dakdapid. Degidbali, Moisés na e-gwenad-bendakega, Egipto-dule-oburgwisad, deyob buged-mai e-gwenad-Israel-dulega imaksad.
ACT 7:25 Moisésʼdi e-gwenadgan-Israel-dulemar eba Bab-Dummad emar-wilebukwad-onogoed magar itomaloye bienad. Dakleargu, Israel-dulemar magar itossurmalad.
ACT 7:26 A-banedgine, Moisés, Israel-dule, Israel-dule-baidbo sarsonanai dakargu, aisaar emarga igar-naboye sokalinad, ega sogded: ‘Gwenadgan, ¿ibiga na be sarsonanai? Melle be urwemar, ar bemar na gargwenad gumalad.’
ACT 7:27 ”Degi, dule-e-ai-sabsur-imaknaid Moisés-egee imaksad, ega sogded: ‘¿Ar doa anmar-dummadga, anmarga-igar-nabogedga be-onugsasa?
ACT 7:28 ¿Sae Egipto-dule-oburgwisadyob be an-oburgwebimoga?’
ACT 7:29 ”Deyob dule ega soge itosgu, Moisés, Madián-yalaganba wakite gusad. A-yalagine, e-yarsulidgi gudigualid. Moisés, a-yargi machimala-warbo nikusad.
ACT 7:30 ”A-birgadulabogus (40) ibmar-gusad-sorbali, nega-dulesulidganba, Sinaíʼye-yar-nugad-itakasaar, sapi-gwabunye-gwichid-gummakmaidyob-abargi baliwitur-wargwen Moisésʼse magarosad.
ACT 7:31 Moisés a-sapi-gwabunye-gwichid-gummakmaid geg-bergu dakargu, geger dakedba, walikaa nue-nuu daknadgu, Bab-Dummad ega soge itoalid:
ACT 7:32 ‘Ani an be-dadgan-e-Bab-Dummadid. Ani an Abraham, Isaac, degi, Jacob-e-Bab-Dummadid.’ Éxodo 3:6 ”Moisés dobedba wawanmakde gusad, sapi-gwabunye-gwichid gwen bar dakbi-itonadsulid.
ACT 7:33 ”Degi, Bab-Dummad ega sogdesunnad: ‘Be-naggi nag-uka-yoid be unge. Ar be napa-annagwichid, napa-nuedid, nega-isligwaled-napad.
ACT 7:34 Emide, an nue-daksad, an nue-itosbalid, igi an-dulamar-Egipto-yargi-bukwadi wilebukwa. A-ulale, an-dulamar-bendakega an aidenonikid. Emide, an-dulamar-ononaega Egipto-yarse an be-barmidoed.’ ”
ACT 7:35 Degi, Esteban sogdebalid: “We-Moisés-yapa-abingamaladbali, ega sogsagusmalad: ‘Anmar-dummadga-guega, degi, anmarga-igar-nabogedga-guega, ¿doa-dule be-onugsasa?’ Emide, a-Moisés Bab-Dummadi Israel-dulemar-e-dummadga-guega onugsasad, degi, Israel-dulemar-onogega onugsasbalid. Bab-Dummadi e-baliwitur-ganguedba deyob imaksad. We-baliwiturde, epenne sapi-gwabunye-gwichid-abargi Moisésʼse magaros-gusadid.
ACT 7:36 ”We-Moisés Egipto-yargi, ibmar-gegerdaklemalad-oyosad, degine, ibmar-wilubgan-dakledisurmalad oyosbalid. Degidbali, Moisés anmar-dadgan-Egipto-yargi-bukwad onosad. Degi, Demar-Ginnidye-nugadgi, degi, birga-dulabo (40) nega-dulesulidganba ibmar-gegerdaklemalad oyodii gusad, degine, ibmar-wilubgan-dakledisurmalad oyodii gusbalid.
ACT 7:37 ”Amba we-Moisésʼsunnad Israel-dulemarga sogsagusad: ‘Bab-Dummad e-gayaburba-barsoged-anyobid be-gwenadgan-abargi gwensak bemarga barmidagoed. A-dule, nue be itomalo.’
ACT 7:38 ”Amba we-Moisés anmar-dadgan-abargi nega-dulesulidganba gudigusad. Deunni, yar-Sinaíʼgi baliwitur-ese-magarosad-ebo na sunmakdii gusad. Degi, Moisés anmar-dadganga sunmakdii gusmogad. We-Moisés Bab-Dummad-gayaburba burba-dula-uked abingasgusad, adi, anmarse ogwamarmogagar.
ACT 7:39 ”Degite, dadgandi Moisésʼba ibmar imakbisur-gusmalad, bur obacha-gusmalad, gannar Egipto-yarse dagbi-guarmalad.
ACT 7:40 Aga Aarónʼga sogdemalad: ‘¡Aarón! Be anmarga bab-dummagan sobe, adi, anmar-idu-nadap gumalagar. Ar Moisés-Egipto-yargi-anmar-onosad, anmar wissulid, wede igi-gusa.’
ACT 7:41 ”Degisoggu, moli-bebe-nikad-sapingwagwadgiid sobsamalad, a e-bab-dummadga na imaksamalad. Geb aga iba-dummad onosmalad, ega ibmar-durgan bukidar oburgwismalad, na dukin ibmar-sobsamaladgi wergunai gusmalad.
ACT 7:42 ”Degisoggu, Bab-Dummad anmar-dadgangi bangudsunnad. Nibneggi-ibdula-nanaidse ulubgi bab-dummadyob egi binsabukwa-guega imaksasunnad. Ar weyob Bab-Dummad-Gardagi E-gayaburba-barsogmalad bato narmaksad: ‘Israel-dulemar, bemar birga-dulabo (40) nega-dulesulidganba gudigusmargua, ¿anga be napiragwadgi ibmar-ogumakar-ukleged uksamarsi? ¿Anga be napiragwadgi ibmar-ukleged uksamarsi? Suli.
ACT 7:43 Aka nuchu-Moloc-e-neg-sobaled be semamaid, Degi, niisgwa-Refán bab-dummadyob e-nug-odummogega bemar sobsamalad. A-ulale, dikasuli Babilonia-neggwebur-dakasiki an be-balimetemaloed.’
ACT 7:44 ”Nega-dulesulidganba anmar-dadgan bipirmakdigu, Babse-goled-neg-sunna-seleged-nika gusmalad. A-neg Bab-ebo na igar-mesisad mag-daklegega anmar-dadganga uklesad. We-negde, igi Bab-Dummad Moisésʼga oyosa, deyob Moisés neg-sobsagusad.
ACT 7:45 ”Degi, anmar-dadgande, e-dadgan-burgwisad-sorba, we-neg abingasmarsunnad. A-neg anmar-dadgan Josuéʼmala, we-yarse-ubononimargu, sear gusmalad. Bab-Dummad gandikidba dulemar-e-idu-bukwadi onosgusad. We-negde, David reyga-megisadse siigusad.
ACT 7:46 Bab-Dummad nabir Davidʼgi binsassoggu, David Bab-Dummadse-goled-neg sobesokalinad, adi, Jacob-wagan-e-Bab-Dummad na meged-neg nikuegar.
ACT 7:47 Degi-inigwele, geb e-machi, Salomónʼye-nugad, Bab-Dummadse-goled-neg sobsagusad.
ACT 7:48 Bab-Dummad-Bur-Birigined dulemar-neg-sobedgi gwen-megosur guoed, Bab-Dummad-gayaburba-barsoged-sogsadyob:
ACT 7:49 ‘Bab-Dummad weyob soged: Nibnega an-ologanaga gued, degi, napnega an-nag-onakwed-ganaga gued. Degite, ¿ibi-neg bemar anga sobmalosunna? ¿Bia be anga obunnoged-neg ukmalosunna?
ACT 7:50 ¿Ar belagwable we-ibmarmarde an obinnissursi?’ ”
ACT 7:51 Esteban sogdebalid: “Bemar gusgu Bab-Dummad-Burba-Isligwaledgi yoledigumalad, bemar-dadgan-gusadyobi be gumalad. Bemar uaya-gwen-niksurmalad, degi, bemar gwagegi dule-Bab-Dummad-akudakmaladyob damalad.
ACT 7:52 Ar be-dadgan, ¿biti Bab-Dummad-gayaburba-barsogmalad wiossurmar be insae? Bela wiosmaladbiid. Bab-Dummad-gayaburba-barsogmalad sogsagusmalad, yoedse dule-wargwen, dule-gwage-swilidikid, bemarse danikoye. Degi-sogsamalad, be-dadgan a-dule-oburgwisgusmalad. Degite, emigindi, we-dule-gwage-swilidikid bemarse nonigu, bemar, darba manigi uksamalad, degi, bemar oburgwismarbalid.
ACT 7:53 Bab-Dummad igar-mesisad na e-baliwiturmarba bemarga uksanad, degite, a-igarba gwen be ibmar imaksasurmalad.”
ACT 7:54 Judío-igar-nabiromalad-dummagan weyob Esteban emarga ibmar-soge-itosmargu, e-gwagegi sae-itodmalad, degi, bela-belad ise-urwar Estebanʼgi uludmalad.
ACT 7:55 Estebanʼdi Bab-Dummad-Burba-Isligwaled nue nikasoggu, niba atakdegua, Bab-Dummad-e-gangued-yeerdakleged dakalid, degi, Jesús Bab-Dummad-argan-nuedsik gwichi dakarbalid.
ACT 7:56 Degi, Esteban sogded: “¡Be dakmar! Nibneg argaar an daked, degi, Dule-Machi Bab-Dummad-argan-nuedsik gwichi an dakbalid.”
ACT 7:57 Judíoʼmar mer-Esteban-itomalagala uaya gasa imaksamalad, degi, binnasur oimakdemalad. Geb bela Estebanʼgi buladik duurmakdemalad.
ACT 7:58 Esteban-gasmargu, neggwebur-magaba ebipidmalad. Geb agi akwagi-makar oburgwismalad. Dulemar akwagi-Esteban-maknanaid sapin-wargwen-Sauloʼye-nugadga Esteban-mor uksamalad, adi, ega gamalagar.
ACT 7:59 Akwagi Esteban-maknanaimargu, Estebanʼdi weyob Bab-Dummadse gochad: “Dummad-Jesús, an-san-burba be susun.”
ACT 7:60 A-sorba Esteban yokorgi sindigar sigisad, geb binnasur goted, sogded: “Dummad, we-dulemar-sabsur-an-imaknanaidgi mer isdar be binsao, isgunanaisurmalayobi be dakoed.” Weyob-sogsad-sorba, Esteban burgwissunnad.
ACT 8:1 Judíoʼmar Esteban-iblosmargu, Saulo yeer-itogwichi gusmogad. Deunni, Jerusalén-neggweburgi Jesúsʼba-nanaimalad-danar-ambikunonidamalad nue-ise-wilegar baregillearmalad. Degisoggu, bela amala Judea-yalaganba, degi, Samaria-neggweburse duurmakde gusmalad. Unnila Jesús-e-sapingan-bur-dummaganbi Jerusalénʼgi besa gusmalad.
ACT 8:2 Dulemar-Bab-Jesúsʼba-nue-nanaimaladi nuedgi Esteban-mui dikapmalad. Amar Estebanʼba nue-bukib-binsadii gusmalad.
ACT 8:3 Deun, Sauloʼdi Jesúsʼba-nanaimalad-danar-ambikunonidamalad-baregindii gualid, negayaa-negayaase machergan-baregindii, omegan-baregindii gualid. Geb agine esgaryaba metedaed.
ACT 8:4 Jesúsʼba-nanaimalad Jerusalénʼgi-ainidmaladi bela aisakidmargu, Bab-Jesúsʼgi-abonoleged-igargi bela dulemarga sunmaknadap gusmalad.
ACT 8:5 Dule-wargwen, Felipeʼye-nugadi, Samaria-neggweburse nadegusad, agi Cristoʼgine dulemarga sunmakdapid.
ACT 8:6 Dulemar, Felipe-sunmaked itoarmargu, degine, ibmar-wilubgan-dakledisulid-imaked dakarmarbargu, dulemar ese ambikunonidamalad.
ACT 8:7 Deginbali, bukidar niaburba-nikamaladi, binnasur-gote, niaburbamar egi ainiddamalad. Degi, bukidar dule-abagan-burgwar-nikamaladi, dule-muya-muya-nanamaladi, Felipe onudakmai gusad.
ACT 8:8 Degisoggu, Samaria-neggweburgi nue-weligwar-itobukwa gusmalad.
ACT 8:9 A-ibagi Samaria-neggweburgine dule-wargwen, Simónʼye-nugadi, gudigusmogad. A-dulede, ibmar-burba-wisid-duledid. Iduar dulemar-yardakdii gusad, ar ade, bukidar ibmar-dakledisurmalad-imakdii gusad. Dule-dummadye na san-sadii gusad.
ACT 8:10 Bela dulemar-burwigana, degi, serganse-bakar, nue boo itobukwadamalad, degi, bukidar sogdamalad: “We-dule, Bab-Dummad-gangued-nue-nikad-duleye.”
ACT 8:11 Bukidar Simón-ibmar-sogedba imakdedamalad, ar ade, dikasurgus Simón dulemar-yardakar, ibmar-dakledisulid-imakdisoggu, ese binsaed galeddamarsunnad.
ACT 8:12 Ar dulemar, Felipe gayaburba-nuedgi-sunmakdiid itosmargua, degi, Bab-Dummad-e-negdakmaidgi-sunmakdiid itosmargua, degine, Jesucristo-nuggi-sunmakdiid itosmargua, Samaria-dulemar e-gwagegi Jesús-abingasmalad. Geb machergan, degi, omeganse-bakale, Bab-diigi-ogleged-igar imaksamarsunnad.
ACT 8:13 Simón Bab-Jesúsʼgi bengussurmogad. Simón Bab-diigi-oglesad-sorba, Felipeʼba bipirmakdii gualid, ar ade, Simón, Felipe-ibmar-wilubgan-imaked, degi, ibmar-dakledisurmalad-dummagan-imaked geger-dakdii gualid.
ACT 8:14 Jesús-e-sapingan-bur-dummagan-Jerusalénʼgi-bukmalad wisguarmargu, Samaria-dulemar Bab-Dummad-gayaburba abingasmarye. Geb esega, Pedro, degi, Juan-ebogwa, barmismalad.
ACT 8:15 Pedro, Juan-ebogwa Samariaʼse mosmargu, Bab-Dummad-gayaburba-abingasmaladga Bab-Dummadse gotemalad, adi, Bab-Dummad-Burba-Isligwaled abingamarmogagar.
ACT 8:16 Ar ade, Bab-Dummad-Burba-Isligwaled Samaria-dorgangi amba yoo nonikid. Unnila Jesús-nugginbi diigi oglesmalad.
ACT 8:17 Degi, Pedro, Juan-ebo, Samaria-dorgangi argan mesismargu, amar Bab-Dummad-Burba-Isligwaled-abinganonimarmosunnad.
ACT 8:18 Jesús-e-sapingan-bur-dummagan e-argan dulemargi mesisale, Bab-Dummad-Burba-Isligwaled abingasdamalad. Deyob, Simón daksagu, Jesús-e-sapingan-bur-dummaganga mani ukbigualid.
ACT 8:19 Amarga sogded: —We-gangued-bemar-nikad anga udamoye, adi, doa-dulegi an-argan an mesisale, nabir Bab-Dummad-Burba-Isligwaled-abingaegarmoye.
ACT 8:20 Pedro, Simón-abin sogded: —Be-manibo be soo-sailase nasun. Ar Bab-Dummad-nabir-anmargi-binsaed, anmarga ibmar-uked, manigi bakleye be bidager.
ACT 8:21 Degisoggu, bega anmarba Bab-Dummad-Burba-Isligwaled-uked-igar gwen maisulid. Ar be-gwage Bab-Dummadgi dikasur bangus naid.
ACT 8:22 Degisoggu, be-gwagegi be-sunnasur-binsasad bukib be binsasun, na be nugusun. Bab-Dummadse be gole, adi, abakalegi be-gwagegi-sunnasur-binsasad Bab-Dummad bega osuloalile.
ACT 8:23 Ar an be-dakgua, be-ulubgi ibmar-gagbidyob aimargi-nobed begi naid, degine, isguedse be bipirmasgudii an be-daked.
ACT 8:24 Simón, Pedroʼga, degi, Juanʼga sogdesun: —Anga Bab-Dummadse be gormar, adi, bela be-anga-ibmar-sogsad mer degiguegar.
ACT 8:25 Pedro, Juan-ebogwa, Bab-Dummad-Gayaburba-Nued-barsogsamalad-sorba, degi, Jesús-nuggi sunmaksamargu, gannar Jerusalénʼse armarsunnad. Jerusalénʼse danimargu, igarba Samaria-yargi neggwebur-burwigana-bukmaladga Bab-Dummad-Gayaburba-Nuedgi sunmakdani gusmalad.
ACT 8:26 Bab-Dummad-e-baliwitur-wargwen Felipeʼga sognonikid: “Be nae, nega-dulesulidgansik dad-nakwed-argan-nuedsik be nao. Jerusalénʼgi Gaza-neggweburse-aibillemaid-igarba be naoed.”
ACT 8:27 Degidbali, Felipe nade gussunnad. Igarba nadapgu, dule-wargwen Etiopíaʼgined dakalid, dule-alugwag-gwasualed. A-dulede, dule-dummadid, ar ade, Etiopíaʼmar-rey-bundor-Candaceʼga mani-daked-duled. A-dulede, Jerusalén-neggweburse Bab-nug odummogega arbigusad.
ACT 8:28 Etiopía-dule gannar na e-negse nadapgu, e-moli-urgi sii, Bab-Dummad-gayaburba-barsoged-Isaías-narmaksagusad-absonadapi gusad.
ACT 8:29 Agi Bab-Dummad-Burba-Isligwaled Felipeʼga sogded: “Ese be nae, e-moli-ur-yase walikaa be nae.”
ACT 8:30 Felipe ese nadsunnad. Walikgusgu, Bab-Dummad-gayaburba-barsoged-Isaías-narmaksadi, a-absonadap itoalid. Degi, Felipe ese egisdesunnad: —Degite, be-absonadapid, ¿mag be itoge?
ACT 8:31 Dule-Etiopíaʼgined, abin-sogded: —¿Sunna mag an itogosi, ar dule anga odulosulir, we ibi-obare? Degisoggu, Felipeʼga sogdesunnad: —An-moli-urse be nakwe, an-dikarba be sigdage.
ACT 8:32 Etiopía-dule, Bab-Dummad-Garda-narmakaled-absonadapid, wegi-narmakar naido: “Igi-sibad-wawaad-senigwad e-oburgwilegedse selesdae, deyobi, selemai gusad. Igi-sibad-wawaad ega-e-absar-siked-abin, gordasuli, deyobi, dulemar-asabin Bab-Jehová-e-mai gaya nikussulid, degi, dulemar-asabin gwen gochasurbalid.
ACT 8:33 Bela-bela egi dodosmaladgi, igar-maidba gwen ega imaksasurmalad, igar gwen nabirossurmalad. Degisoggu, ¿doa e-wagangi bar sunmakosunna? Ar ade, oburgwismalad.”
ACT 8:34 Etiopía-dule Felipeʼse egisdesun: —Anga be soge, ¿we doagi Bab-Dummad-gayaburba-barsoged sunmake? ¿An na dukin soge, igi, dule-baidgi sunmake?
ACT 8:35 Degi, Felipe, Isaías-garda-narmakar-gebe-onogedgi ega sunmakded. Geb Bab-Dummad-Gayaburba-Nued-Jesúsʼgi-soglesadgi ega sunmaksabalid.
ACT 8:36 Degi, igarba nadapmargu, dii nai dakarmalad. Agi Etiopía-dule Felipeʼga sogded: —Dii be dake. ¿Bab-diigi-ogleged-igargi geg an oglege?
ACT 8:37 Felipe, abin-imakded: —Ar na be Jesucristoʼgi nue-bensulile, be sunna Jesús-nuggi diigi oglegodo. Etiopía-dule, Felipe-abin sogded: —An bensulid, Jesucristo Bab-Dummad-Machi-sunnadid.
ACT 8:38 Degi, Etiopía-dule moli-ur-nasiksasunnad. Degine, ebo diise aidesmarsunnad. Geb Felipe Etiopía-dule Bab-diigi-ogleged-igargi ogsasunnad.
ACT 8:39 Dii-yagi-gwichi nakwiarmargu, Bab-Dummad-Burba-Isligwaled ukiar Felipe-sesagusad. Etiopía-duledi bar gwen Felipe-daksasulid, degi-inigwele, bela-bela weligwar e-negse nadapgusad.
ACT 8:40 Felipeʼdi bato Azoto-neggweburgi gudii daklealid. Felipe neggwebur-ilibali, Bab-Dummad-Gayaburba-Nuedgi sunmaknadapgusad, deyob Cesarea-neggweburse warmaksad.
ACT 9:1 Saulo Jesúsʼba-nanaimalad-isdar-dakedbali, emar-ogilogedginbi binsadiid. A-ulale, Saulo garda-amiega, dule-irwa-Babse-goled-bur-dummadse nadegusad.
ACT 9:2 Adi, nabir Damascoʼgi Judíoʼmar-onmakedneg-bukmaladse dogegar. A-gardade Sauloʼga igar-uknaid, adi, nabir machergan, omegan Jesúsʼba-nanaimalad gaegar. Amar gugmakar Jerusalénʼse sedagegar.
ACT 9:3 Saulo igarba-nadapgu, Damasco-neggwebur-omodanigu, ukiar nibneggi gwallu mee egi ganonikid.
ACT 9:4 Agi, napase aimukud gusad. Geb nibneggi dule ega soge itoalid: —Saulo, Saulo, ¿ibiga be an-baregindii?
ACT 9:5 Saulo abin-sogded: —Dummad, ¿be doasunna? Dule, abin-imakded: —Ani an Jesús, ar ani be an-balegindiid, ani an a-duled. [Ikogi be didii annaye sogele, na be dukin nunmaked amioed.]
ACT 9:6 Saulo nue-dobed-abalagine, wawanmakale, sogded: —Dummad, ¿ibi imakbi be an-abesunna? Dummad, abin-imakde, ega sogded: —Be gwisgu, neggweburse be nae, agi bega sogmaloed, ibu be imakoe.
ACT 9:7 Dule-Sauloʼba-nadapgusmalad bela-bela dobe itodmalad, geg sunmake gudmalad. Ar ade, gayaburba gole itosmalad, degi-inigwele, gwen dule daksurmalad.
ACT 9:8 Saulo napagi-mai gwisgudgu, aku-dulemar-dake gwisgualid, e-ibya bela sobmor gusad. Degisoggu, e-sordamar argangi-annikaa Damascoʼse Saulo-searmarsunnad.
ACT 9:9 Saulo, ibapaa Damasco-neggweburgi aku-atake megisad. Mas guchasulid, gobsasurbalid.
ACT 9:10 Deun, Damasco-neggweburgi Bab-Jesúsʼba-naid-wargwen maigusad. A-dulede, Ananíasʼye-nugad. A-dulega Bab-Jesús gabgi ibmar sognonikid. Weyob sognonikid: —¡Ananías! Geb Ananías abin-sogded: —Naa, Dummad, wegi an mai, an be-itomai.
ACT 9:11 Agi Bab-Jesús ega sogded: —Gwisgu, Judas-negse be nae, Igar-Innikigwadye-nugadba be nao. Be modapile, Tarso-dule-Sauloʼye-nugadi be egisdapoed. A-dulede, a-neggi Bab-Dummadse gormaid.
ACT 9:12 Ar Saulo bato gabgi dule-wargwen-Ananíasʼye-nugad daksad. Ese dogdani, degi, egi argan-mesnai daksad, adi, nabir gannar atakegar.
ACT 9:13 Ananías, Bab-Jesús ega degi-soge itosgu, sogded: —Dummad, dule-bukidar we-dulegi sunmakmar an-itodiid, igi Jerusalénʼgi beba-nanaimalad beedse wiosa.
ACT 9:14 Deginbali, wegi Damascoʼgi dule-irwa-Bab-Dummadse-gormalad-e-dummagan ega igar-uksamogad, adi, nabir beba-nanaimalad bela gaegar, esgaryagi metegar.
ACT 9:15 Bab-Jesús, abin-imakded: —Be nae, ar we-dule an-sapinga-guega an susmogad. Adi, nabir Judíoʼsurmaladga, reymarga, degi, amba Israel-dulemarga, an-nuggi sunmakegar.
ACT 9:16 Degisoggu, ani an Sauloʼga oyogoed, an-sapinga-guedi, beedse an-nug-ular wilegergebye.
ACT 9:17 Deyob Bab-Jesús ega sogsagu, Ananías Judas-negse nadsunnad. Modapgu, Ananías, e-argan Sauloʼgi-mesisgu, ega sogded: —Gwenad-Saulo, Dummad-Jesús igarba-danigu bese-magarosad-dule, a an-barmialid. Adi, nabir gannar be atakbaligar, degi, Bab-Dummad-Burba-Isligwaled bela-bela be nikubaligar.
ACT 9:18 Degi-ega-sogsagu, Saulo-ibyagi ua-ukayobi-naidi, yog babatiargusad. Geb degi, nabir gannar ataknaded. Geb Saulo a-sorba, yog Bab-diigi-ogleged-igargi oglessunnad.
ACT 9:19 Saulo geb mas guchagu, wis gannaledsunnad. Agi, Damascoʼgi dulemar-Jesúsʼba-nanaimalad-walik ibbigbasaar gudigusad.
ACT 9:20 Geb agi Saulo, Jesucristo-igargi yog sunmakar imakded. Judíoʼmar-onmakedneg-irba, sogdii gusad, Jesús Bab-Dummad-Machi-sunnadye.
ACT 9:21 Saulo-itoarmalale, bela geger itoddamalad. Sogdedamalad: “¿We-dulede, Jerusalénʼgine dulemar-Jesúsʼba-nanaimalad-baregindii dasursi? ¿Ar amba we-dulede dulemar-Jesúsʼba-nanaimalad-gaega wese nonisursi? Adi, Jerusalénʼse sedega, dule-irwa-Babse-gormalad-e-dummaganga ukegar.”
ACT 9:22 Ar Saulo aka bur bule Bab-Jesús-igargi-sunmaked gangumai gusad. Jesús we, Cristo-sunnadye, Bab-Dummad-dule-wargwen-barmidagoye-sogsad-duleye sogdii gusad. Degisoggu, Damascoʼgi Judíoʼmar-bukwadi geg Pablo-abin-imake gusmalad.
ACT 9:23 A-ibagan-nasad-sorba, Judíoʼmar Saulo-oburgwemalaga igar amismalad.
ACT 9:24 Saulo dulemar-e-oburgwebimalad wisgusad. Saulo-oburgwemalagala, Judíoʼmar bane-bane neggwebur-yawagak-nagaba, mutikidba, ibginse-bakar, Saulo-edarbebukwa gusmalad.
ACT 9:25 Jesúsʼba-nanaimaladdi, Saulo-nabir-wakinnega, mutikidba neggwebur-galu-dikarba garbagi Saulo-odesmarsunnad.
ACT 9:26 Saulo Jerusalén-mosgu, Jesúsʼba-nanaimaladba ambikubi gualinad. Ar Jesúsʼba-nanaimaladdi dobe itomalad, ar ade, Bab-Jesúsʼba-naimodeeye gwen Sauloʼgi binsasurmalad.
ACT 9:27 Degi-inigwele, Bernabéʼdi Jesús-e-sapingan-bur-dummagan-bukwadse Saulo-sesagusad. Amarga sogdesunnad, igi Saulo Damasco-igarba-nadapgu, Bab-Jesús-daksagusa. Agine, igi Jesús ega sogsagusbali, deginbali, igi Saulo Damascoʼgi dobsuli, nue-gandikidba Jesús-nuggine sunmaksagusbali.
ACT 9:28 Agi, Saulo Jerusalénʼgi bessunnad, degi, Jesús-e-sapingan-bur-dummaganba bipirmakdii guarsunnad.
ACT 9:29 Deun, Saulo, dobsuli Bab-Jesús-nuggi sunmakdii gualid. Judíoʼmar-Griego-gaya-sunmakmalad-ebo dobsuli na abin-abin imakdii gualid. Amardi, Saulo-oburgwebi-gusmalanad, degite, gwen oburgwissurmalad.
ACT 9:30 Gwenadgan-Jesúsʼba-nanaimalad degi-wisguarmargu, Cesarea-neggweburse Saulo-sesmalad, geb Tarso-neggweburse Saulo-barmismarsunnad.
ACT 9:31 Degisoggu, Jesúsʼba-nanaimalad-danar-ambikunonidamalad bela Judea-yalagi, Galileaʼgi, degi, Samariaʼgi, nue-bogidiki, dule-e-bareginnedsuli bukwa gusmarsunnad. A-ulale, Jesúsʼba-nanaimalad burbar nue-gangumai, Bab-Jesús-dobee-nanabukwa gusmalad. Degine, Bab-Dummad-Burba-Isligwaled amar-ogannomai-gussunnad, ega Jesúsʼba-nanaimalad-omelomai gussunnad.
ACT 9:32 Pedro bela gwenadgan-bukmaladse atakdigua, Lida-neggweburgi gwenadgan-Jesucristoʼgi-akananaimaladse ataknad gusmogad.
ACT 9:33 A-neggweburgi Pedro dule-wargwen Eneasʼye-nugad birgabaabakgus (8) abagan-burgwaled-nika-mai dakdapid.
ACT 9:34 Pedro Eneasʼga sogdesun: —Eneas, Jesucristo be-nudakoed. Be gwisgu, be-meged be nudake, be nae. Agi Eneas nugusgu, yog gwisguar imaksad.
ACT 9:35 Pedro, Eneas-onudaksad-sorba belagwapa Lida-neggweburgi-bukwamalad, Sarón-nebagi-bukwamalad Eneas-nugusad daksamalad. A-ulale, amar Bab-Jesúsʼba nue nagusmarmogad.
ACT 9:36 A-ibagangi, Jope-neggweburgi ome-wargwen Bab-Jesúsʼba-nue-nai gusmogad. A-omede, Tabitaʼye-nugad, Griego-gayabardi, Dorcasʼye bileged. A-omede, igar-nueganbi imakdiid, degi, wilegana-nue-bendakdidaed.
ACT 9:37 A-ibagangi, Dorcasʼde uellealid, geb burgwisad. Burgwisgu, nue ogsamalad. A-sorba, neg-aila-niba mesismalad.
ACT 9:38 Jope-neggwebur Lida-neggweburgi itakasaar siid. Geb Jesúsʼba-nanaimalad wisguargu, Pedro Lida-neggweburgi gudiiye, dule-warbo Pedroʼse barmisgusmalad, Pedro-sunamalagar. Amar Pedroʼga sogdapmalad: “Gwae Jopeʼse be dagoye, mer be yoggudoye.”
ACT 9:39 Pedro dulemar-warbogwadba Jopeʼse arsunnad. Jopeʼse-nonimargu, neg-aila-niba Dorcas-mui-maidse Pedro-sesmalad. Omegan-ei-sui-burgwismalad ise-boale Pedro-ebilis ambikunonimalad. Geb omegan, Dorcas-subamar-ega-maksad, degi, mormar-ega-maksad, Pedroʼga oyonanaiguarmalad.
ACT 9:40 A-sorba, Pedro bela dulemar-bukwad onisad. Geb Pedro yokorgi sindigar-sigisgu, Bab-Dummadse goted. Pedro, Dorcas-muisik aibiridgu, ega sogded: “Tabita, gwisgu.” Geb degi, Dorcas ibya argaalid, Pedro-dakargu, sigisa imaksad.
ACT 9:41 Pedro, argangi Dorcas-gasaa ogwichisa imaksad. Geb Pedro a-sorba, Jesucristoʼba-nanaimaladse, omegan-ei-sui-burgwismaladse, dula Dorcas-senonikid.
ACT 9:42 Weyob-gusadi, bela Jope-neggweburgi wisgusmalad. Bukidar a-neggweburginmalad Bab-Jesúsʼgi bensur-gunonimalad.
ACT 9:43 Agi, Pedro undar Jopeʼgi megialid. Simónʼye-nugad-neggi mai-gusad. Simónʼde ibmar-ukagi-arbaed-duled.
ACT 10:1 Deun, Cesarea-neggweburgi dule-wargwen Cornelioʼye-nugadi, mai-gusmogad. A-dulede, Roma-sorda-dulatar-sediid-duled (100), Roma-sorda-danagwen-Italianaʼye-nugad-e-dummadid.
ACT 10:2 Cornelio, bane-bane Bab-Dummadgi binsadiid-duled, nue bela e-neg-yaginmaladmala Bab-Dummad-dobee-nanadimogad-duled. Cornelio, nue dule-wileganaga mani ukdibalid, deginbali, bane-bane Bab-Dummadse gordiidabalid-duled.
ACT 10:3 We-dulede, sedo wachi-irbaagi gabdakeyobi negburgan dakded. Cornelio Bab-Dummad-baliwitur ise-dakaled. Baliwitur Cornelio-maidse dognonikid, ega sognonikid: —Cornelio.
ACT 10:4 Cornelio nue-nuu baliwitur-dakdegu, dobe itoded, ega sogded: —Dummad, ¿wede igid barsunna? Baliwitur, abin-sogded: —Be Bab-Dummadse goledi, degi, be wileganaga mani ukedi, we-ibmar Bab-Dummadse nakwisad, Bab-Dummad we-ibmar gwen iegosulid.
ACT 10:5 Degisoggu, Jope-neggweburse Simón-sunamalaga dulemar be barmid. We-Simón, Pedroʼye-bimarbalid.
ACT 10:6 We-Simónʼde, dule-Simónʼye-nugmogad-neggi maid, a-dulede, ibmar-ukagi-arbaed-duled. A-nega demar-gakasik siid. A-Simón-Pedro bega sogoed, ibu be imakoe.
ACT 10:7 Baliwitur-Cornelioʼga-ibmar-sogsad-sorba-nadgu, Cornelio ega-warbo-arbamaladse gochad, degi, suar-ibed-wargwense gochabalid. A-dulede, Bab-Dummadse-goled-dulemogad. Degisoggu, Cornelio a-dule-ega-ibmar-saoed bensulid.
ACT 10:8 Cornelioʼde amarga bela ibmar sogsagu, Pedro-sunamalaga Jope-neggweburse dulemar-barmisad.
ACT 10:9 Banedgine, Pedro-sunadapmaladi igarba nadapmargu, bato Jope-neggwebur-walikgusmargu, Pedroʼdi yorukudbali Bab-Dummadse-golega neg-birgi nakwisad.
ACT 10:10 A-wachigi Pedro nue-ukuur itoalid, mas gunbigualid. Ega mas-imaknanaigua, gabdakeyob negburgan dakalid.
ACT 10:11 Agi Pedro nibneg argaali dakalid. Mor-sibu-dummadyob e-dukumar-bakegwadgi atinnar nibneggi napnegse aidedani dakalid.
ACT 10:12 Mor-sibu-dummad-yagi ibdula-unimalad, ibdula napagi-musgi-musgi nanamalad, degi, ibdula-gukumalad, galagwensuli bukwa dakalid.
ACT 10:13 Degi, dule ega soge itoalid: —Pedro, gwisgu, ibmar-dula oburgwe, be gunne.
ACT 10:14 Degi, Pedro, abin-sogded: —Dummad, suli, an gunnosuli, ar ibmar-isgana, ibmar-isemaladi gwen an-gaya-yaba dogdisulid.
ACT 10:15 Degi, gayaburba gannar gollarbalid, ega sogded: —Bab-Dummad ibmar-ised-osulosadi, geg bar isedye be soged.
ACT 10:16 Deyob ilapaa Pedroʼse gayaburba gochagusad. A-sorba ibmar mor-sibuyob-daklegedi gannar nibnegse nakwid gusad.
ACT 10:17 Pedro gabdakeyob na ibmar-daksadgi binsamaigualid, wede, ibi nue obardibeye. Pedro degi-binsamai, Cornelio machergan-walapaa-barmialidi, Simón-neg aminonimalad, degi, Simón-yawagak-naba gwisgunonimarsunnad.
ACT 10:18 A-neggi, egisdemalad, “Wegi dule Simónʼye-nugad Pedroʼye-bimarbalid, mai sogeye.”
ACT 10:19 Pedro negburgan-daksadgi amba binsamai, Bab-Dummad-Burba-Isligwaled ega sognonikid: “Simón, be dake, dule-warbaa be-amidimalad.
ACT 10:20 Be gwisgu, be aidege, amarba be nae. Mer eba nasuli be guo. Ar ani an bese we-dulemar barmialid.”
ACT 10:21 Geb Pedro, Cornelio-dulemar-barmialid-bukwadse aidearsunnad, amarga sognonikid: —Ani an Pedro, be an-amidimalad. ¿Degite, ibiga bemar an-amidimarsunna?
ACT 10:22 Amar, Pedro-abin sogded: —Roma-dule-sorda-dulatar-sediid, Cornelioʼye-nugad-nuggi anmar danikid. A-dulede, igar-napiragwadbadaed-duled, Bab-Dummad-dobekwaa-nanadiid-dulebalid. Deginbali, Judíoʼmar bela a-dule nabir dakmalad, bela bina sogedbimarbalid. Bab-Dummad e-baliwitur-isligwaledba Cornelioʼga sogsad bese gordaye, Pedro-ibmar-bega-sogoed, be nue itogoye.
ACT 10:23 Pedro degi-ega-ibmar-soge-itosgua, negyaba amar-odossunnad. Agi ibagwen Pedro-walik gabismalad. Banedgine, amarba Pedro nadsunnad, degi, gwenadgan-Jopeʼginmalad eba nadegusmarmogad.
ACT 10:24 A-banedgine, Pedroʼba-nadapmalad Cesarea-neggweburse modapmalad. Agi Cornelio, degi, e-gwenadgan, degine, e-aimar-nuegan, Pedro-edarbebukwa gusmalad.
ACT 10:25 Pedro, Cornelio-negse dogdegu, Cornelio, Pedro-abin magaba noalid, degi, Pedro-nug-odummogega Pedro-abin yokorgi sindigar signonikid.
ACT 10:26 Pedro, Cornelio-ogwichis imaksad, ega sogded: —Mer Bab-Dummadyob be an-imako. Be gwisgu, ar be-sunnaa an dulemogad.
ACT 10:27 Pedro, Cornelio-ebo sunmaknadap negyaba dogdemargu, dulemar-bukidar-bukwa dakdapmalad.
ACT 10:28 Geb Pedro amarga sogdesunnad: —Bemar nue wismalad, Judío-dule, Judíoʼsulid-ebo sunmaker, Judíoʼsulid-negse doger, igar maisulid. Ise-sailad. Degi-inigwele, Bab-Dummad anga oyosad, mer ibmar-iseyobi, degi, ibmar-isganayobi dulemar be dakoye.
ACT 10:29 A-ulale, bemar anse gochamargu, gwen an binsassulid, mer naodeeye, yog bemarse aligu an imaksad. Emigindi, an wisgubisundo: ¿Ibiga bemar nue anbina gorsimarsunna?
ACT 10:30 Cornelio, Pedro-abin sogded: —Ibabakedo, we-wachigi, an-neggi Bab-Dummadse-golega, deun mas-gunsuli an gudigu, sedogidbali, wachi-ilapaagi, Bab-Dummadse an gorsigu, dule-wargwen, mola-dakar-dakargaed-yoi anse nonikid.
ACT 10:31 Anga sognonikid: ‘Cornelio, Bab-Dummadi ese-goled be-itosad, degi, emar-wilegana-bendakedgi yeer be-dakbalid.
ACT 10:32 Degisoggu, Jope-neggweburse Simón-sunaega be dulemar-barmid. A-dule, Pedroʼye-bimarbalid. We-Simónʼde, demar-gakasik maid, dule-ibmar-ukagi-arbaed-neggi, Simónʼye-nugmogad-walik maid. We-Simón-Pedro bese nonikile, bega ibmar sognonikoed.’
ACT 10:33 ”Aga be-sunaega dulemar an barmisad. Nued be imaksado, anmarse be argu. Emigindi, bela anmar Bab-Dummad-asabin ambikunonisunnad. Anmar be-itobimalad igi Bab-Dummad anmarga sogoye bega sogsa.”
ACT 10:34 Pedro sunmakdesun, sogded: “Inso emigindi, nue magar an itoged, Bab-Dummadi bela dulemar emarbi-daked.
ACT 10:35 Ar doa-duledibe, Judíoʼdibe, Judíoʼsurdibe, a-dule nue Bab-Dummad-dobee nanadiile, degi, e-sogedbarbi gudiile, Bab-Dummad a-dule geg obaned.
ACT 10:36 Ar bemar wismalad, Bab-Dummad gayaburba-nued Israel-dulemarga sogsad, ‘Gwage-bogidik-itoleged Jesucristoʼba an bemarga ukoye.’ We-Jesucristoʼde bela dulemar-Dummadga maisunnad.
ACT 10:37 ”Emigindi, belagwapa bemardi nue-wismalad, Juan Bab-Dummad-diigi-ogleged-igargi sunmaksad-sorbali, igi Galilea-yargi neg gude, degi, Judea-yalase neg-gusa.
ACT 10:38 Deginbali, bemardi nue wismarbalid, igi Bab-Dummad Jesús-Nazaretʼginedga E-Burba-Isligwaled uksa, degine, e-gangued ega uksabali. Degine, igi Jesús ibmar-nueganbi imakdii gusbali, degi, igi dulemar-niaburbase-wiledimalad nudakdii gusbali. Ar Jesús weyob gudigusad, ar ade, Bab-Dummad eba gudiguad.
ACT 10:39 ”Emide, Judea-yargi, degi, Jerusalén-neggweburgi bela Jesús we-ibmar-imaksad nue-anmar ibyagwar daksamalad. Anmar bela daksamarbalid, igi Judíoʼmar nakrusgi biokar Jesús-oburgwismarbali.
ACT 10:40 Degi-inigwele, Bab-Dummaddi ibapaagi Jesús-gannar-odulosad, degi, anmarse magaroged imaksad.
ACT 10:41 Bab-Dummad bela dulemarse Jesús-magarossulid. Bab-Dummad unnila idu anmar-sulesmaladsebi Jesús-magarogega imaksad. Anmar, Jesús-gannar-durgusad-sorba, eba-mas-guchamalad, eba-gobsamarbalid.
ACT 10:42 ”Jesús anmarga sogsad: ‘Be an-barsognamar, an-gayaburbagi sunmaknamar, dulemarga sognamar: Bab-Dummad, dulemar-bukwadga, degi, dulemar-burgwismaladga igar-nabogega Jesús-nugsasye.
ACT 10:43 Deginbali, bato Bab-Dummad-gayaburba-barsogmalad iduar sogsagusmogad, we-Jesúsʼgi dulemar nue-bensulile, a-dulemar abonolegoye, e-isgudiid, Jesús-nuggi Bab-Dummad ega elioye.’ ”
ACT 10:44 Pedro amba sunmakgwichi, Bab-Dummad-Burba-Isligwaled belagwapa Pedro-itobukmaladgi ubononikid.
ACT 10:45 Judíoʼmar-Jesúsʼba-nanaimalad Pedroʼba-nonimaladi, geger dakdemalad, Judíoʼsurmaladga Bab-Dummad bela-bela E-Burba-Isligwaled uksamoga.
ACT 10:46 Ar ade, itoarmalad, Judíoʼsurmalad gaya-baid-baid sunmake, degi, Bab-Dummad-nug odummonanai.
ACT 10:47 Geb Pedro sogded: —¿Doa Bab-diigi-ogleged-igargi we-dulemar mer ogoye sogmalosunna? ¿Ar anmar-sunnaa wemar Bab-Dummad-Burba-Isligwaled-abingasmarmosursi?
ACT 10:48 Degisoggu, Pedroʼdi Jesucristo-nuggi Bab-diigi-ogleged-igar-imakega, a-dulemarga igar uksasunnad. A-sorba, a-dulemar, Pedroʼgi wilenaigusmalad, wis ibbigbasaar emar-walik gudiguye.
ACT 11:1 Jesús-e-sapingan-bur-dummagan, degi, gwenadgan-Jesúsʼba-nanaimalad Judeaʼgi-bukwamalad, itoarmalad, dulemar-Judíoʼsurmalad Bab-Dummad-gayaburba abingasmarmoye.
ACT 11:2 Pedro Jerusalénʼse gannar nonigu, Judíoʼmar-Jesúsʼba-nanaimalad, Pedroʼse uluarmalad,
ACT 11:3 ega sogdemalad: —¿Ibiga Judíoʼsurmalad-negyaba be dogdii? ¿Ibiga eba be mas gundibali? ¿Wede isesursi?
ACT 11:4 Agi Pedro ibmar-gebe-gualid-akar, ilekwaa bela amarga sogdesunnad:
ACT 11:5 —Jope-neggweburgi an mai, Bab-Dummadse an gorsigu, negburgan an daksad. Agi, mola-sibu-dummadyobi, e-dukumar-bakegwadgi-atinnar nibneggi anse aidedani an daksad.
ACT 11:6 Nue an dakdegu, an dakalid, galagwensuli we-napneggi ibmar-durgan-unimalad, achu-sapur-ursilimalad, ibdurgan-napagi-musgimakdimalad, degi, ibdula-sakan-nikamaladi, a-mola-sibu-dummadyagi, bukwa an dakalid.
ACT 11:7 ”Degi, dule niba anse gole an itosad: ‘Pedro, be gwisgu, we-ibmar be oburgwe, be gunne.’
ACT 11:8 An abin-sogded: ‘Dummad, suli, an gunnosuli, ar ibmar-isgana, ibmar-isemaladi gwen an-gaya-yaba dogdisulid.’
ACT 11:9 Degi, dule niba gannar anse gollarbalid: ‘Bab-Dummad ibmar-ised-osulosadi, mer isedye be bar bie.’
ACT 11:10 Weyob-gusadi, ilapaa gannar-gannar anga soglesad. A-sorbali, gannar bela we-ibmar niba seledgusad.
ACT 11:11 ”A-sorbali, dulemar-warbaa Cesarea-neggwebur-akar an-aminonimalad, an-neg-maidse nonimalad.
ACT 11:12 Bab-Dummad-Burba-Isligwaled anga sokalid: ‘Eba be nae, mer benguo.’ Wemar-gwenadgan-walanergwadi (6) anba nadmarmogad, degi, dule-anse-gorsiid-negse an dogdapmarsunnad.
ACT 11:13 Agi, a-dule anmarga sokalid, igi e-neggi ede baliwitur-gwichi daksa, ega soge: ‘Jope-neggweburse Simónʼbina-naega dulemar be barmidye, a-dulede, Pedroʼye-bimarye.
ACT 11:14 A-Simón-Pedro bega sunmaknonikoye, agi, be abonolegoye, degi, bela be-negginmalad abonolemogoye, ega soge itosad.’
ACT 11:15 ”A-neggi an sunmakgwichi Bab-Dummad-Burba-Isligwaled Judíoʼsurmaladgi aidenonikid, igi gebesaila anmargi aidenonigusmogadyob gusmogad.
ACT 11:16 Degi, Bab-Jesús-anmarga-ibmar-sogsad insaas an naded, deun, sogsagusgu: ‘Ar Juanʼdi Bab-Dummad-diigi-ogleged-igar-imaksadi, unnila diigi dulemar-ogsaye, bemardi Bab-Dummad-Burba-Isligwaledgi oglemaloye.’
ACT 11:17 Anmar Bab-Jesucristoʼgi-bensulidba Bab-Dummad anmarga E-Burba-Isligwaled uksad. Ayobi, Bab-Dummad dule-Judíoʼsurmaladga E-Burba-Isligwaled uksamogad. Degite, ¿ande doasunna, Bab-Dummad igar an bisgeye soger? Geg an bisge.”
ACT 11:18 Bela Pedro-ega-ibmar-sogsad itosmargu, bogidik ambikusmalad. Geb degi, Bab-Dummad-nug ogannodmarsunnad, sogdemalad: “Bab-Dummad, Judíoʼsurmalad na e-isguedga ulubgi-bukib-binsaed ega uksamogad, e-daed ogwaegar, adi, nabir burba-geg-bergued nikumarmogagar.”
ACT 11:19 Degidgine, Jesúsʼba-nanaimalad, Esteban-oburgwilesad-sorba-baregilleargu, aisakid gusmalad. Gwen-gwen Fenicia-yarse, Chipre-yarse, degi, Antioquía-neggweburse nadegusmalad. Amar unnila Bab-Jesús-gayaburbagi Judíoʼmargarbi sunmaksamalad. Dulemar-baigangardi, gwen sunmaksasurmalad.
ACT 11:20 Degi-inigwele, gwenadgan-aisakid-gusmalad gwen-gwen Chipreʼginmaladid, degi, Cireneʼginmaladid. Amar Antioquíaʼse modapmargu, Griego-dulemarga Bab-Jesús-gayaburba-nuedgi sunmakdapmalad.
ACT 11:21 A-gwenadganba Bab-Dummad-gangued nue-gudigusoggu, bukidar Bab-Jesúsʼgi bengussurmalad, Bab-Jesúsʼba nagusmalad.
ACT 11:22 Jerusalénʼgi Jesúsʼba-nanaimalad-danar-ambikunonidamalad itoarmargu, Antioquía-neggweburgi Judíoʼsurmalad Bab-Jesúsʼba nagusmarmoye, Antioquíaʼse Bernabé-barmiar gusmalad.
ACT 11:23 Bernabé Antioquíaʼse nonigu, daknonikid, Bab-Dummad Judíoʼmargi nued binsasayobi, Judíoʼsurmaladgi nued binsasmogad. Bernabé degi-daksagu, weligwar itosad, degi, gwenadgan-ogannoarsunnad, mer Bab-Jesús-igargi galakumaloye, ega sokarsunnad.
ACT 11:24 Ar ade, Bernabéʼde dule-nueddaed, degi, Bab-Dummad-Burba-Isligwaled nue-nikabalid. Antioquíaʼgi bukidar dulemar e-gwagegi Bab-Jesús-abingasmarbalid.
ACT 11:25 A-sorba, Bernabé, Saulo-aminaega Tarso-neggweburse nadegusad. Bernabé Saulo-amisgu, Antioquíaʼse Saulo-senonikid.
ACT 11:26 Agine, Jesúsʼba-nanaimalad-danar-ambikunonidamalad-walik birgagwen gudigusmalad, Jesús-igargi dulemar-bukidar-odurdakdii gusmalad. Deun, a-neggweburgi gebe Jesúsʼba-nanaimalad, Cristianoʼye bilenonimalad.
ACT 11:27 A-ibagangi, Bab-Dummad-gayaburba-barsogmalad Jerusalénʼgi-bukwad, Antioquíaʼse nonimalad.
ACT 11:28 Agi Bab-Dummad-gayaburba-barsoged-wargwen, Agaboʼye-nugadi sunmakdii gualid, Bab-Dummad-Burba-Isligwaled-nikadba dulemarga sokalid: Bela we-napneg-naidgi, ukud-dummad daniye. Dakleargu, Claudio Romaʼgi dummadga maiunni, Agabo-sogsadyob gusad.
ACT 11:29 Degisoggu, Antioquíaʼgi-Jesúsʼba-nanaimalad, gwenadgan-Judeaʼgi-bukwamalad-bendake guarmalad. Na ibmar-nikadba ukdemalad.
ACT 11:30 Degisoggu, gwenadgan-bendakega Sauloʼba, degi, Bernabéʼba, gwenadgan-idudimalad-Judeaʼgi-bukwamaladga ibmar barmismalad.
ACT 12:1 A-ibagangine, Rey-Herodes gwen-gwen-Jesúsʼba-nanaimalad wioargusad.
ACT 12:2 Rey-Herodes, deun, Jacobo-es-suidgi-oburgwega imaksad. Jacoboʼde, Juan-e-iad.
ACT 12:3 Herodes daksagu, ede-Jacobo-oburgwisadba Judíoʼmar yeer-itosa, a-ulale, Pedro-esgaryagi-meteye sokarsunnad. Deunni, a-ibagangi Madu-Inasuli-Gulleged-Iba naid.
ACT 12:4 Herodes Pedro-gaega imaksagu, esgaryase metemalad. Geb degine, Pedroʼgi-nakulemalagala, suar-ibmala-danabake urbisbalid. Danagwengi, e-walabake urbisad. Herodesʼdi binsasad, Pedro-oburgwega iba-sorba dulemar-wagab Pedroʼga igar itogoye.
ACT 12:5 Pedro deyob esgaryagi mellesii gusad. Suar-ibmala Pedroʼgi nakulebukwa gusmalad. Jesúsʼba-nanaimalad-danar-ambikunonidamaladdi, Pedroʼga ise Bab-Dummadse gorbukwa gusmalad.
ACT 12:6 Herodes, Pedroʼga igar-itogoye sogsad-ibagi, mutik, deun, oibodanigu, Pedro suar-ibmala-warbogwad-abargi, nue esgoro-dub-goabogwadgi ise-atinnar gabmai gusad. Deginbali, suar-ibmala-baigan, yawagak-naba esgarya-edarbegwichi gusmarbalid.
ACT 12:7 Agi, Bab-Dummad-e-baliwitur-wargwen Pedroʼse ukiar nonikid, esgaryagi gwallu-mee imaknonikid. Pedro-odakegala, dikargi ebunonikid, ega sogded: “Gwae be gwisgu.” Geb esgoro-dub-e-argangi-atinnaledi, yog achikar naded.
ACT 12:8 Degi, baliwitur ega sogdebalid: “Mor be yoe, nag-uka be yobar.” Baliwitur-sogedba Pedro imaksasunnad. Degi, baliwitur Pedroʼga sogdebalid: “Be-mor-dummad be yobar, anba be dage.”
ACT 12:9 Pedro esgaryagi noargu, baliwitur-sorba-nai noalid. Pedro baliwitur-e-onodanikid nabirsurye bienad, na gabdakmaiye bienad.
ACT 12:10 Baliwitur, Pedro-ebo suar-ibmala-esgarya-edarbemalad-gebe-gwichimaladgi nasmalad, degi, a-sorba-gwichimaladgi nasmarbalid. Neggweburse-naed-yawagak-esgoro-biidse modapmargu, yawagak ega wargwen argaded. Yawagakgi nosmargu, igar-wargwengi nasmalad. Geb baliwitur Pedroʼgi bangudsunnad.
ACT 12:11 Pedro nue neg-itoargu, sogdesunnad: “Emigindi, nue mag an neg-itosundo. An Herodesʼgi-wakinnega, Bab-Dummad e-baliwitur barmialid. Judíoʼmar bato an-oburgoedba-weligwar-itobukmaladgi an-onosad.”
ACT 12:12 Pedro wegi-binsasad-sorba, María-negse modapid. Maríaʼde, Juan-e-nanad. Juan, Marcosʼye bimarbalid. A-neggine, deun, dule-bukidar Bab-Dummadse gorbukwa gusmalad.
ACT 12:13 Pedro gebe-yawagak-idu-gwichidse gordapgu, yagwa-gwensak Rodeʼye-nugadi, abin noalid.
ACT 12:14 A-bunagwade Pedro-gaya mag itosgu, weligwar-itogedba ega yawagak gwen egassulid, aka gannar yaba abarmakde gusad. Rode dulemarga sogdapid: Pedro yawagak-naba gwichiye.
ACT 12:15 Amar bunagwaga sokarmalad: —Be yogasaar gole-gole be gudanikid. Bunagwa amarga sognaigualid: —Napiragwa. Degi, amar sokarsunnad: —Wedi, Pedro-e-burba gudiid.
ACT 12:16 Pedroʼdi binnasur yawagak ogornagusad. Ega yawagak-egasmargu, Pedroʼsunnad-gwichi dakarmargu, nue-geger dakdemalad.
ACT 12:17 Mer dulemar-oimakegala, Pedro argangi emarse achasad, degi, geb amarga sogdesunnad, igi Bab-Jesús esgaryagi-siid e-onosa. Degi, Pedro sogdebalid: Santiagoʼga e-ibmar-gusad bela bemar sogoye, degi, gwenadgan-baiganga sogmarbaloye. A-sorba, Pedro nodegusad, degi, neg-baidsik edi nadsunnad.
ACT 12:18 Neg-oibosgu, suar-ibmaladi beedse nue-akusunna itoarmalad. Ar wissurmalad, igi Pedro gusa, bia nade.
ACT 12:19 Herodes, Pedro-aminaega, suar-ibmala-barmissunnad. Suar-ibmalade gwen Pedro-amissurgusmalad. Herodes, Pedro-edarbismaladse nue-egisnai gualid. Ar ega nue-ibmar-sogmarsursoggu, igar uksasunnad, a-suar-ibmala oburgwemalagar. A-sorba, Herodes Judea-yar-akar Cesareaʼse nadsunnad. A-neggweburgi megdapsunnad.
ACT 12:20 Deun a-ibagangi, Herodes Tiro-dorganbo, Sidón-dorganbo urwediid. A-dulemar na igar-amismargu, Herodesʼse nonimalad. Igar-nabogega Rey-gabednegyaa-daked-Blastoʼye-nugadse gornonimalad. Adi, e-irwa Herodesʼga sunmakegar, ega igar nabogegar. Ar ade, Tiro-dorgan, degi, Sidón-dorgan Herodesʼse mas-bakbukmarsoggu, nue-igar-nabobi guarmarsunnad.
ACT 12:21 Herodes, Tiro-dorganga, degi, Sidón-dorganga iba uksagu, a-ibagi ese nonimarsunnad. A-ibagi, Herodes reymarmor-yoed yosad, degi, reymar-gan-sigedgi sigisad. Agi ega igar-nikaa yeer sunmaksad.
ACT 12:22 Dulemar-Herodes-itobukwad binnasur gotemalad: “We-dule-ibmar-sogsiidi, gwen dule sunmaksulid, Bab-Dummad sunmak an itomalad.”
ACT 12:23 A-wachigi, Bab-Dummad-baliwitur Herodesʼgi boni yononikid. Ar ade, Herodes Bab-Dummad-nug odummossulid. Degisoggu, Herodes nusubi e-san-malemai burgwisad.
ACT 12:24 Bab-Jesús-Gayaburbadi nasgumai gusad. We-gayaburba-nued bela egi sunmaklemai gusad.
ACT 12:25 Bernabé, Saulo-ebo Jerusalénʼgi arbaed bergusmargu, Antioquíaʼse nadmarsunnad. Juan eba-nade gusmogad. Juan, Marcosʼye-nugbalid.
ACT 13:1 Antioquía-neggweburgine Jesúsʼba-nanaimalad-danar-ambikunonidamalad-abargi, Bab-Dummad-gayaburba-barsogmalad, dulemar-odurdakmalad, gudigusmalad. Amardi, wemalad: Gwensak, Bernabéʼye-nugad, baidi, Simónʼye-nugad. A-dulede, dule-sichidye bimarbalid. Geb baidi, Lucioʼye-nugad. A-dulede, Cireneʼginedid. Degi, Manaén, We-dulede, Rey-Herodes-Tetrarcaʼbo dungusadid, degine, Saulo.
ACT 13:2 Wemar, ibagwengi mas-gunsuli Bab-Dummadse-gorbukmargu, Bab-Dummad-Burba-Isligwaled ega sognonikid: “Bernabé, Saulo-ebo anga nugsamalo, adi, an oarbabi-gunaidse barmidegar.”
ACT 13:3 Mas-gunsuli-Babse-gochamalad-sorba, Bernabé-nonogi, degi, Saulo-nonogi argan mesismalad, adi, oyogegar, Bab-Dummad wemar-susye. A-sorba, Bernabé, Saulo-ebo barmismarsunnad.
ACT 13:4 Bernabé, Saulo-ebo Bab-Dummad-Burba-Isligwaled-sogedba barmilesmargu, Seleucia-neggweburse nadmalad. Agi mai, urgi Chipre-dupse obakde gusmalad.
ACT 13:5 Ar Bernabé, Saulo-ebo Salamina-neggweburse-mosmargu, Judíoʼmar-onmakednegmargi Bab-Dummad-gayaburbagi sunmakdemalad. Juan-Marcos, emar-bendakegala, eba nadapgusmogad.
ACT 13:6 Bela Chipre-dupugi neggwebur-bukmaladse ataksamargu, Pafos-neggweburse modapmalad. Agi Judío-wargwen, Barjesúsʼye-nugad abinguarmalad. We-dulede, ibmar-burba-wisidid. Bab-Dummad-gayaburba-barsoged napiragwadsulidid.
ACT 13:7 We-dulede, neggwebur-dummad-saila-Sergio-Pauloʼba gudiid. Sergio-Pauloʼde, dule-binsaed-ibedid. Geb a-Saila-dummadde Bab-Dummad-gayaburba itomogaga Bernabéʼbina, Sauloʼbina gochagusad.
ACT 13:8 Ar ibmar-burba-wisid-Barjesús, saila-Sergio-Paulo-binsaed-ganai gualid, adi, mer Bab-Jesús-igar itogegar. Ar Barjesúsʼde, Elimasʼye Griego-gayaba sogleged.
ACT 13:9 Degi, Saulo, Pabloʼye-nugbalidi, nue Bab-Dummad-Burba-Isligwaled nikasoggu, ise-atakar Elimasʼgi-atakdegu, ega sogded:
ACT 13:10 “Be bela-bela aimar-yardaked-duled, be dule-isganad, be nia-saila-machid, ibmar-nued-e-isdaradid. Bab-Dummad-Igar-nued-maid be ichodiid, ¿be indakosurde?
ACT 13:11 Emigindi, Bab-Dummad begi gwisgunonisunnoed, aku-atake be guoed, ibabigbasaale be dad-ibeler bar dakosulid.” Geb a-gines, Elimasʼgi negasichid nagunonikid, aku-atake gunonikid. Dule-argangi-e-nidmalaga aka-aka dule-amidii gualid.
ACT 13:12 Saila-dummad bela-Bab-Jesús-igar-maid-itosadi, geger nue-itosad. Degidbali, Bab-Jesúsʼgi-bensuli gunonikid.
ACT 13:13 Pablo, eba-gudimaladbo Pafos-neggweburgi-mai, urgi Perge-neggweburse obakdemalad. Pergeʼde Panfilia-yalagangi siid. Juan-Marcosʼdi egi bangude, gannar Jerusalénʼse nade gusad.
ACT 13:14 A-sorba, Pergeʼgi gudii, Pisidia-yarse, Antioquía-neggweburse nade gusmalad. Degi, obunnoged-ibagi Judíoʼmar-onmakednegse dogdapmalad, agi sigidapmarsunnad.
ACT 13:15 Moisés-Igar-Maid-absolesad-sorba, degi, Bab-Dummad-gayaburba-barsogmalad-garda-maid-absolesad-sorba, Judíoʼmar-onmakedneg-e-dummagan Pabloʼga, degi, Bernabéʼga sokarmalad: “Gwenadgan, bemar gakagwensaar girmarga ibmar sogbiele, sunna be sogmalad.”
ACT 13:16 Pablo gwisgusa imaksad. Bogidik-ambikumalaga, argan onakwis imaksad. Geb weyob sogded: “Bemar-Israel-dulemar, degi, bela bemar-Bab-Dummad-dobee-nanadimalad, nue an-itomalo:
ACT 13:17 Bab-Dummad, anmar-Israel-dulemar-e-Bab-Dummad, anmar-dadgan-susagusad. Amba Egipto-yargi maiga gubukwamargu, Bab-Dummad anmar-dadgan-omelosad. Geb degi, Canaán-yarse sedagega, e-ganguedba Egipto-yargi-bukwa onosad.
ACT 13:18 ”Birga-dulabosaar (40) nega-dulesulidganba, anmar-dadgan na e-isdar-nanaedba, gaamakdii gusad.
ACT 13:19 Anmar-dadgan Canaán-yarse dognonigu, dulemar-akar-akar-sogagugle-bukmalad (7) obelosad, geb amar-yar Bab-Dummad anmar-dadganga uksad.
ACT 13:20 Bela we-ibmar-gusadi, birga-dulataled-ilabake-gaka-dulabo-gakambe-wilub (450) gusad. ”Geb a-sorbali, Bab-Dummad anmar-dadganga dule-igar-nabiromalad uksagusad, Bab-gayaburba-barsoged-Samuel-mai-gusadse.
ACT 13:21 Geb degi, anmar-dadgan, rey-nikubi guarmalad. Bab-Dummadse rey-egichismargu, Bab-Dummad ega, Quis-machi-Saúl, uksa-gusad. A-dulede, dad-dummad-Benjamínʼgi danikidid. Saúl birga-dulabo (40) reyga mai-gusad.
ACT 13:22 Bab-Dummad, Saúl-reyga-maidgi Saúl-obachagusad, geb reyga David-mesnonikid. Bab-Dummad David-annik sogsagusad: ‘We-David, Isaí-machi, an-ibmar-abegedyob binsaed. We, an-ibmar-abeged bela anga imakoed.’
ACT 13:23 ”Bab-Dummad-Igar-Mesisadba-guegala, we-dad-Davidʼgi Israel-dulemar-abonoged ogwisnonikid. A-dulede, Jesúsʼye-nugad.
ACT 13:24 Jesús amba yoo nonikid-iduar, Diigi-dule-oged-Juan Bab-Dummad-igargi sunmaknonikid. Israel-dulemarga sognonikid: ‘Na be-ulubgi be-isguedga bukib binsamar, be-daed be ogwamarsun, Bab-Dummad-diigi-ogleged-igar be imakmarsun.’
ACT 13:25 Juan e-arbaed-wilubgan-bergunaigua, sogdegusad: ‘¿Doaye bemar an-bimala? ¿Bab-Dummad-dule-wargwen-barmidagoye-sogsad-duleye be an-bimala? An a-dulesuli. An-sorba-dule-danikiddi, anba bur-dule-dummadid. Degisoggu, e-sapat-dubse-bakar, geg an ei esiked.’ ”
ACT 13:26 Pablo sogdebalid: “Gwenadgan, bemar-Abraham-e-waganye-sogbukmalad, degi, bemar-Judíoʼsurmalad-Bab-Dummad-dobee-nanadimalad, bemarga we-gayaburba-nued barmilenaid, adi, bemar abonolemalagar.
ACT 13:27 ”Ar Jerusalénʼgi-bukmalad, degi, e-dummagan, aku Jesús-daksamalad. Degine, Bab-Dummad-gayaburba-barsogmalad-narmakar-maid, itoged-irba obunnoged-ibagi absodimalan-inigwele, aku amba itosmalad. Degite, dummagan, Bab-Dummad-Gardagi-narmakar-naidba imaksamalad, deun, Jesús-oburgweye sognonimargu.
ACT 13:28 Amarde, Jesús-gwen-oburgwele-wilubsuli daksamalanad-inigwele, degite, Jesús-oburgwega Pilatoʼse egisnanai gusmalad.
ACT 13:29 Ar igi Bab-Dummad-Gardagi Jesúsʼgi narmakar nai, deyob bela gusgua, nakrusgi-naid-odesmargu, neg-uangi digsa gusmalad.
ACT 13:30 ”Ar Bab-Dummaddi, Jesús-burgwar-mai gannar odulos gusad.
ACT 13:31 A-Jesúsʼde, Galilea-akar Jerusalénʼse-eba-nade-gusmaladse na ibabigbasaale magarodii gusad. Emide, a-dulemar dulemar-baiganga Jesúsʼgi ibmar-daksamaladba sunmakdimarsunnad.
ACT 13:32 ”We-gayaburba-nued anmar-dadganga-sogles-gusadi, anmar bemarga egi sunmakdimarmosundo.
ACT 13:33 Ar anmar e-wagan-gusoggu, Bab-Dummad anmarga we-Jesús-burgwar-maid odulononikid, igi bato Salmo-sogbogwadgi narmakar nai. Agi sognaid: ‘Be an-machi gued, emi-ibagi, an be-babga gunonikid.’
ACT 13:34 ”Melle Jesús-san-nunguegala, Bab-Dummad gannar Jesús-odulosad. Degidbali, Bab-Dummad-gayaburba-maid-sogedba gusad: ‘Davidʼga ibmar-napiragwad an nue-ukoye sogsadi, bega an ukoed.’
ACT 13:35 ”Degine, Salmosʼgi sognaibalid: ‘Ar be-mai-gwage-swilidikid-e-mui gwen neg-uangi onunsaega be imakosulid.’
ACT 13:36 ”Ar David, Bab-Dummad-sogedba e-dulamarga ibmar imaksad. David burgwisgu, e-dadgan-abargi diglesad, geb e-san nungusad. Degisoggu, David na dukin egi sunmaksasulid, Jesús-annik sogsagusad.
ACT 13:37 Ar we-Jesúsʼdi, Bab-Dummad ogwichisad, e-san nungussurgusad, ar ade, Bab-Dummadi Jesús-burgwar-mai odulosad. Degisoggu, Jesús-e-san nungussulid.
ACT 13:38 ”Degisoggu gwenadgan, bemar wisgue-wilubbid, anmar bemarga-sogdiid anmar-gwage-isgudimalad, Jesúsʼgi nabir gwage-isgussuliyob gunonidaye.
ACT 13:39 A-ulale, bela dulemar Jesúsʼgi-bensurmalad, gwage nudaklenonidaed, ar Moisés-Igar-Maiddi geg dule-gwage nudaked.
ACT 13:40 ¡Nue-salakarmar! Abakalegi Bab-Dummad-gayaburba-barsogmalad-narmaksad bemar-annik we sogele, deun, weyob sogsagusgu:
ACT 13:41 ‘Bemar Bab-Dummadgi-dododimaladi, nue be itomar. An ibmar-bemar-abargi-imakoedi, be geger dakmaloed, be bergumaloed. An bemar-abargi-ibmar-imakesokalidi, dule-baid bemarga sogena, bemar bengusmalaled.’ ”
ACT 13:42 Pablo, e-sordamarbo Judíoʼmar-onmakedneggi noarmargu, Judíoʼsurmaladi egi wilenaigusmalad, adi, emarga gannar obunnoged-iba-baidse Jesús-igargi ega sunmakdamalagar.
ACT 13:43 Pablo, Bernabéʼmala Judíoʼmar-onmakedneggi nodmargu, Judíoʼmar, degi, Judío-igar-abingasmalad, Pabloʼba, degi, Bernabéʼba bukidar nadegusmalad. Amarga Pablo sunmakalid: “Nue salakarmar, bemar Bab-Jesús-igar-amismalad, mer a-igar be iemalo.”
ACT 13:44 Obunnoged-iba-nagunonigu, Bab-Dummad-gayaburba-itomalaga, neggwebur-belasaale ambikunonimalad.
ACT 13:45 Judíoʼmar dulemar-bukidar-bukwa dakargu, nobgudmalad. Pablo-ibmar-soggwichidi ichodmalad, degi, ukabsadmarbalid.
ACT 13:46 Pablo, Bernabé-ebo nue-dobsuli gannadgi Judíoʼmar-abin sogded: “Ar bemargar-inse Bab-Dummad-gayaburba soglegoye igar mainad. Ar bemar we-gayaburba obanmarsoggu, burba-geg-bergued be abesurmarsoggu, emigindi, Judíoʼsurmaladga anmar we-gayaburbagi sunmaksunnoed.
ACT 13:47 Ar Bab-Jesús bato weyob anmarga igar uksad: ‘Dulemar-yar-baid-baidgi-bukmaladga, neg-meegwadga-guega an be-imaksad. Bela napneg-naid-ugakaasega, an-abonoleged-igar-sedega, an be-imaksad.’ ”
ACT 13:48 Judíoʼsurmalad deyob Pablo-soge-itosmargu, yeer itodmalad, Bab-Dummad-gayaburba nuedye, sogdemalad. Degi, bukidar burba-geg-bergued-abingaoye ega igar-maimaladi Bab-Jesúsʼgi-bengussurmalad.
ACT 13:49 Agi Bab-Jesús-gayaburba-nued a-yalaganba bela aisakidsunnad.
ACT 13:50 Ar Judíoʼmardi, Pablo-bareginmalaga, Bernabé-bareginmalaga, omegan-nug-nikamalad-nue-Babgi-binsadiiye-sogdimaladbo, degi, machergan-neggweburgi-nug-nika-gudimaladbo sunmaksa gusmalad. Degidbali, a-yargi Pablo-onogedse, degi, Bernabé-onogedse imaksamalad.
ACT 13:51 Pablo, degi, Bernabé-ebo a-neggweburgi nodmargu, e-naggi-olli-nanaid obad-obad imaksamalad, adi, oyogega, an be bar wissurmarye, an bega Bab-Jesús-igargi sunmaksamarmoganye. Emigindi, na be-itolegedmarsunye. Pablo, Bernabéʼbo Iconio-neggweburse nadmarsunnad.
ACT 13:52 Jesúsʼba-nanaimalad Antioquía-neggweburgi-bukwamaladi bela nue-weligwar itosmalad, degi, nue Bab-Dummad-Burba-Isligwaled-nika gudigusmalad.
ACT 14:1 Iconio-neggweburgi Pablo, Bernabé-ebo Judíoʼmar-onmakednegse dogdapmalad. Agi Bab-Jesús-igargi nue-yeer sunmaksamarsoggu, bukidar Judíoʼmar, degi, Grecia-dulemar Bab-Jesúsʼgi bengussurmalad.
ACT 14:2 Ar Judíoʼmar-Bab-Jesús-benmaladdina yamo Judíoʼsurmalad-binsaed gaarmalad, adi, Jesúsʼba-nanaimaladgi aibinmalagar.
ACT 14:3 Pablo, Bernabé-ebo suibaksaar Iconio-neggweburgi megiarmarsunnad. Nue-dobsuli gandikidba Bab-Jesús-dulemar-abonoged-igargi sunmakarmalad. Dulemar Bab-Jesúsʼgi bensuli gudiguarmalad. Pablo, Bernabé-ebo ibmar-soged nabir guegala, Bab-Dummad amarba ibmar-wilubgan-dakledisurmalad-imakega, degi, ibmar-gegerdaklemalad-imakega imaksad.
ACT 14:4 Iconio-neggweburginmalad darbo binsabukwa guarmalad: Abar Judíoʼmarba naiguarmalad. Abar Bab-Jesús-e-sapingan-bur-dummaganba naiguarmalad.
ACT 14:5 Judíoʼmar, degi, Judíoʼsurmalad, neggwebur-sailamarbo Bab-Jesús-e-sapingan-bur-dummagan-sabsur-imakmalaga, degi, akwagi-makar oburgwemalaga igar amiar gusmalad.
ACT 14:6 Ar Pablo, Bernabé-ebo degi-wisguarmargu, Listra-neggweburse, degi, Derbe-neggweburse wakite gusmalad. We-neggweburmarde Licaonia-yargi siid. Degine, neggweburmar-walik-bukwamaladse nade gusmarbalid.
ACT 14:7 A-neggweburmargi Bab-Dummad-Gayaburba-Nuedgi sunmakdii gusmarbalid.
ACT 14:8 Listra-neggweburgi dule-wargwen muu-neggi-geg-nanae-aidenonikid sii gusad.
ACT 14:9 A-dulede, Pablo-sunmaked-itosii gusmogad. Pablo, dule-geg-nanaed nue-nuu dakdegu, mag daksad, we-dule sunna nudaklegega nue-bensulid nika.
ACT 14:10 Degisoggu, Pablo a-dulega binnasur sogded: “Gwichibin be sae, be nanasun.” Dule gwichibin-imaksagu, yog-ichomakar, yog nanaar-naded.
ACT 14:11 Dulemar Pablo-deyob-ibmar-imaksad daksamargu, Licaonia-gayaba oimakdemalad, sogdemalad: “Bab-dummagan dulemaryob anmar-abargi aidenonimar.”
ACT 14:12 Amarde, bab-dummad-Jupiterʼye Bernabé-annik sogdemalad, degi, Pablo-annikdi bab-dummad-Mercurioʼye sogdemalad. Ar ade, Pablo bur sunmakedid.
ACT 14:13 Bab-dummad-Jupiterʼse-goled-neg, neggwebur-dogegwagi siid. A-neg-yawagakse, dule-irwa-Jupiterʼse-goled, molimar-bebe-nikad, degi, dutumar-sobarmalad-nue-nudakar senonikid. Ar ade, dule-irwa-Jupiterʼse-goledi, degi, dulemala, Pabloʼga, degine, Bernabéʼga, moli-oburgwebi guarmalad.
ACT 14:14 Jesús-e-sapingan-bur-dummagana Pablo, Bernabé-ebo deyob-dakarmargu, na e-mor esirmakdemalad, degi, dulemar-bukidarad-abargi dogdemalad, geb agi binnasur gotemalad, sogdemalad:
ACT 14:15 “¡Girmar! ¿Ibiga be deyob damala? Anmar bemaryobmogad, anmar dule gumalad. Aga anmar bemarga sogmalad, we-igar-isganamar-binsarmalad, be obelomarye. Bab-Dummad-sunnadba bur be nagumarye. Ar a-Bab dula-maid, a nibneg nasiksad, napneg nasiksad, demar nasiksabalid, degi, bela agi ibmar-bukwad urbisbalid.
ACT 14:16 Epennedi, Bab-Dummad dulemar-yar-baid-baidgi-bukmalad na e-itoleged na e-daedba-nanaega imaksad, baidaksasulid.
ACT 14:17 Degi-inigwele, Bab-Dummad wargwen anmar-obessulid, anmarga ibmar-nuegan-imakedba e-gangued, degi, e-sabgued oyomai gusad. Anmarga dii-owimai, yor-nued-ibmar-osanmaked nasikmai, mas unniguale ukmai, degi, weligwar-itoleged anmarga ukmai gusad.”
ACT 14:18 Ar weyob Pablo, degi, Bernabé dulemarga ibmar sogsamargu, dulemar Pabloʼga, degi, Bernabéʼga moli-bebe-nikad-oburgwebimalad ugak bargasmalad.
ACT 14:19 A-ibagangi, Judíoʼmar-Antioquía-neggweburginmalad, degi, Iconio-neggweburginmalad nonimalad, geb amar girmar-binsaed gasmalad. Degidbali, akwagi Pablo-maksamalad. Amar bato Pablo-oburgwisye bismalad, geb neggwebur-dikarba illillir Pablo-onosmalad.
ACT 14:20 Ar Jesúsʼba-nanaimaladi Pablo-ebilis ambikunonimalad. Pablo neg-wisguargu, gwisgus imaksad, geb gannar neggwebur-yaba dogde gusad. Banedgine, Pablo, Bernabé-ebo, Derbe-neggweburse nade gusmalad.
ACT 14:21 Pablo, Bernabéʼmala Derbe-neggweburgi Bab-Dummad-Gayaburba-Nuedgi sunmaksamargu, bukidar Bab-Jesúsʼba nagusmalad. A-sorba Listraʼse, Iconioʼse, degi, Antioquíaʼse gannar nonimalad.
ACT 14:22 We-neggweburmargine, Pablo, Bernabé-ebo Jesúsʼba-nanaimalad-gwage ogannosmalad, degi, Jesúsʼgi-bensulid-igargi nue-unasmarbalid. Amarga sogsamarbalid, “Bab-Dummad-e-negdakmaidse dogegala, anmar-idu beedse igar maid, nue naibi-itoleged-igar maid.”
ACT 14:23 Pablo, Bernabé-ebo Jesúsʼba-nanaimalad-danar-ambikunonidamalad-irba e-idumalad nugsasmalad. Pablo, Bernabéʼbo, mas-gunsuli-Bab-Dummadse-gochad-sorba, Bab-Jesús-argan-nuggi we-dummagan-obessunnad. Ar a-dummagande, Jesúsʼgi bengussurmaladid.
ACT 14:24 A-sorba Pablo, degi, Bernabé-ebo Pisidia-yargi nasmargu, Panfilia-yarse mosmalad.
ACT 14:25 Agi Perge-neggweburgi Bab-Jesús-igargi sunmaksamarbargu, a-sorba, Atalía-neggweburse nonimalad.
ACT 14:26 Agi, Pablo, Bernabé-ebo, urgi nakwismalad, Antioquíaʼse nadmarsunnad. Deun, ega soglesad Antioquíaʼse Bab-Dummadga-arbaega namaloye. Emide, Pablo, Bernabé-ebo, a-arbaed nue-imaksamalad, arbaed-obelosmalad.
ACT 14:27 Antioquía-neggweburse nonimargu, gwenadgan-Jesúsʼba-nanaimalad-danar-ambikunonidamaladse gochamalad. Agi Pablo, Bernabé-ebo amarga sogsamalad, igi Bab-Dummad Judíoʼsurmaladga nabir igar egasmoga, adi, amar nabir Bab-Jesúsʼgi-bensuli gumarmogagar.
ACT 14:28 Pablo, Bernabé-ebo Antioquía-neggweburgi suibaksaar gwenadgan-abargi megiar gusmalad.
ACT 15:1 A-ibagangi, dulemar-Judeaʼgi-danimalad Antioquíaʼse nonimaladi, gwenadgan-odurdakarmalad, sogdemalad: “Ar be abonolebiele, Moisés-Igar-Mesisadba abgan-uka-duku-siked-igar be imakergebye.”
ACT 15:2 Pablo, Bernabéʼmala, dulemar-Judeaʼgi-danimalad-ebo binnasur abin-abin na imakarmalad. Degidbali, Pablo, Bernabéʼmala, Jerusalénʼse nadegusad, degi, abala gwenadgan eba nade gusmarmogad. Adi, Jerusalénʼse, Jesús-e-sapingan-bur-dummaganse, degi, Jesúsʼba-nanaimalad-e-idumaladse abgan-uka-duku-siked-igarsik igar-nudakegar.
ACT 15:3 Pablo, Bernabé, degi, gwenadgan-baigan, Jesúsʼba-nanaimalad-Antioquíaʼgi-danar-ambikunonidamalad-sogedba barmilesmargu, Fenicia-yalaganba, degi, Samaria-yalaganba nadapgusmalad. Igarba gwenadganga sognadap-gusmalad, igi Judíoʼsurmalad yeer Bab-Jesús-abingasmarmoga. Deyob itoarmargu, gwenadgan nue-yeer itosmalad.
ACT 15:4 Pablo, Bernabé-ebo Jerusalénʼse mosmargu, Jesúsʼba-nanaimalad-danar-ambikunonidamalad nue yeer abindaksamalad, degi, Jesús-e-sapingan-bur-dummagan, degine, Jesúsʼba-nanaimalad-e-idumaladga-gubukwad, nue yeer abindaksamarmogad. Pablo, Bernabéʼmala, Bab-Dummad emargi ibmar-imaksad dummaganga bela sogsad.
ACT 15:5 Gwen-gwen Fariseoʼmar, Bab-Jesúsʼgi-bensurmarmogad, sokarmalad: “Judíoʼsurmalad-Bab-Jesúsʼba-nagusmarmogad Moisés-Igar-Mesisadba abgan-uka-duku-siked-igar imakergebye, degi, bela Moisés-Igar-Maidba daergebye.”
ACT 15:6 Jesús-e-sapingan-bur-dummagan, degi, Jesúsʼba-nanaimalad-e-idumalad igar-baramimalaga ambikunonimarsunnad.
ACT 15:7 Undar na abin-abin imaksamalad-sorba, Pedro gwisgualid, sogded: “Gwenadgan, bemar nue wismalad, undargus Bab-Dummad we-gayaburba-nuedgi Judíoʼsurmaladga-sunmakega, adi, amar nabir abonolemogaga, bemar-abargi an-susad.
ACT 15:8 Bab-Dummad ulubgi dulemar mag daksoggu, anmarga oyosad, a-dulemar ede abingamoye, degi, E-Burba-Isligwaled anmar-sunnaa amarga uksamoye.
ACT 15:9 Bab-Dummad, Judíoʼsurmalad, anmar-ebo akar gwen daksasulid. Amar anmar-sunnaa Bab-Jesúsʼgi-bensurmogale, amarga gwage-swilidik imaksamogad.
ACT 15:10 ”Emide, bemar, ¿ibiga Bab-Dummad-wilubdakmarsunna? Emide, gwenadgan-Judíoʼsurmalad-Bab-Jesús-abingasmaladga bemar soggu: ‘Ar bemar Moisés-Igar-Mesisadba dasurmalale, geg be abonolemarye.’ Ar anmar-dadgan, degi, anmarbela, a-igarba nanabidamar-inigwele, anmar ese galakuddaed.
ACT 15:11 Ar anmar wisid, Bab-Jesús anmar-abonoge-wilubsulinad. Ar emigindi, nabir-anmargi-binsaedba, anmar-abonosad. Ar Judíoʼsurmaladga anmaryob-abonoleged-igar ega maimogad.”
ACT 15:12 Pedro-itobukmalad bela bogidik ambikusmalad. Geb a-sorba, Bernabé, Pablo-ebo dulemarga sunmakarmogad, igi-Bab-Dummad na emarba Judíoʼsurmalad-abargi ibmar-wilubgan-dakledisurmalad-dummagan, degine, ibmar-gegerdaklemalad imaksa.
ACT 15:13 Bernabé, Pablo-ebo, bela ibmar sogsamargu, Santiago sogded: “Gwenadgan, nue be an-itomarmogo:
ACT 15:14 Simón-Pedro anmarga sogsad, igi gebesaila, Bab-Dummad, Judíoʼsurmalad e-dulemarga-gumogaga na susmoga.
ACT 15:15 We-igar bato Bab-Dummad-gayaburba-barsogmalad-sogsadyob gunonido, deun, Bab-Dummad-Gardagi narmaksamargu, Bab-Dummad sogye:
ACT 15:16 ‘Ar sorba gannar an nonibaloed, David-neg-sobsad ayarar-siid, gannar an sobnonikoed. A-neg-bibisgar-siid, gannar an nudaknonikoed,
ACT 15:17 adi, bela dulemar an-amimalagar, degi, Judíoʼsurmalad-anse-gordimaladi, an-amimarmogagar.
ACT 15:18 Weyob, ani, Bab-Dummad soged, ar ade, nega-gebesailaunni bato weyob idu an owisosgusad.’ ”
ACT 15:19 Santiago sogdebalid: “Degisoggu, a-ular an sogsundo, Judíoʼsurmalad-Bab-Jesúsʼba-nagumamaidga melle anmar igar oburmaloye.
ACT 15:20 Unnila anmar ese garda narmakmalodo, ega sogmalodo: Bab-dummadyob-imaklemaladga-ibmar-uklemalad, melle gunmaloye. Melle galagwensuli negsichigi ome-dikarba, sui-dikarba yoledii gumarbaloye. Ibmar-gammu-gaar-oburgwilesmalad, melle gunmarbaloye, degi, melle ibmar abebii gunmarbaloye.
ACT 15:21 ”Ar aga epenne neggwebur-irba, Judíoʼmar-onmakedneggi, Moisés-Igar-Mesisad-odurdakmalad nikagusad. Aginbali, itoged-irba obunnoged-ibagi Moisés-Garda absoledabalid.”
ACT 15:22 Jesús-e-sapingan-bur-dummagan, Jesúsʼba-nanaimalad-e-idumalad, degine, bela Jesúsʼba-nanaimalad-danar-ambikunonidamaladi, Santiago-sunmaksad yeer itosmalad. Amar, Pabloʼba, degi, Bernabéʼba e-sordamar Antioquíaʼse-barmided nabir itosmarbalid. Amar Judas-susmalad. Judasʼde, Barsabásʼye-bimarbalid, degi, Silas-susmarbalid. We-ebogwad, gwenadgan-abargi nue-nug-nika gudimarmogad.
ACT 15:23 Amarbali, weyob garda-narmakar barmismardo: “Anmar Jesús-e-sapingan-bur-dummagana, degi, gwenadgan-Jesúsʼba-nanaimalad-danar-ambikunonidamaladi, degi, e-idumaladi, bemar-Judíoʼsurmaladse wis garda narmaksimalad. Anmar bemar-Antioquíaʼgi-bukmaladse, Siria-yargi-bukmaladse, degi, Cilicia-yargi-bukmaladse garda narmaksiid. ”Dog-nuedye sogledo.
ACT 15:24 ”Emide, anmar wisgualid, anmar-walik-gudimaladi bese nadmarye. Ar anmar ega gwen igar-uksasulid. Wemarde, na e-odurdakedbali bemar-igar-oburusad. Bemarga sogsamalad: ‘Bemar abgan-uka-duku-siked-igar imakergebye, degi, Moisés-Igar-Mesisadba bemar dabalirgebbarye.’
ACT 15:25 ”Degisoggu, aga anmar wegi sogsamardo, bemarga gwenadgan-baigan barmidmaloye. We-gwenadgande, gwenadgan-nue-sabesailad Bernabéʼba, degi, Pabloʼba, namaloed. Adi, amar, anmar-nuggi bemarga ibmar sogoed.
ACT 15:26 We-gwenad-ebogwad Bernabé, degi, Pablo, Bab-Jesucristoʼga-arbaedba burgwednaga gusmalad.
ACT 15:27 ”Degisoggu, anmar bega Judas, Silasʼbo barmisiid, adi, bemarga bela ibmar nue gayagi sogegar.
ACT 15:28 Bab-Dummad-Burba-Isligwaledi, degi, anmarmoga mer bemarga igar-dutusur-mesed nabir itosmalad. Unnila we-igarmar nue-imaklebi abeleged:
ACT 15:29 Bab-dummadyob-imaklemaladga-ibmar-uklemalad, melle gunmalo. Melle galagwensuli negsichigi ome-dikarba, sui-dikarba yolemarbalo. Ibmar-gammu-gaar-oburgwilesmalad, melle gunmarbalo, degi, melle ibmar abebii gunmarbalo. ”Ar bemar we-ibmar imaksulile, nueddo. Be itomargua.”
ACT 15:30 Degi, Judas, Silas, Bernabé, Pablo, Antioquíaʼse nadmarsunnad. Antioquíaʼse modapmargu, gwenadgan-Jesúsʼba-nanaimalad-danar-ambikunonidamaladse gochamalad, geb ega garda uksamalad.
ACT 15:31 Gwenadgan garda absosmargu, bela weligwar itosmalad, ar ade, ulubgi nue e-ogannonai itosmalad.
ACT 15:32 Ar Judas, degi, Silas, Bab-Dummad-gayaburba-barsogmaladbarsoggu, gwenadganga bela-bela sunmakdegu, gwenadgan yeer-ito imaksad, degi, gwenadgan aka bur bule Bab-Jesús-igargi gangudmarsunnad.
ACT 15:33 Jerusalén-akar-nonimalad-undar-megedgine, gwenadgan-Antioquíaʼginmalad gannar Jerusalénʼse, Judas, degi, gwenadgan-baigan-eba-nonimalad nuedgi barmismalad.
ACT 15:34 Silasʼdi na Antioquíaʼgi beoye binsaalid.
ACT 15:35 Pablo, degi, Bernabé Antioquíaʼgi besmarmogad. Amar, gwenadgan-baiganmala, Bab-Jesús-igargi dulemar-odurdakdii, degi, Bab-Dummad-Gayaburba-Nuedgi sunmakdii dulemarga guarmalad.
ACT 15:36 A-undarad-sorbali, Pablo Bernabéʼga sogded: “Anmar gannar neggwebur-irba namar, bia anmar Bab-Jesús-gayaburbagi sunmakdigusadse namar. Anmar daknamar, gwenadgande igi gubukmardibe.”
ACT 15:37 Bernabé, emarba Juan-sedbi gualid. Juan, Marcosʼye bimarbalid.
ACT 15:38 Pabloʼdi yapa Juan-Marcos-sedegualid. Ar ade, we-dulede, Panfilia-yargi emargi bangud-gusad, emarba Bab-Jesús-igargi bar arbadsulid.
ACT 15:39 Pablo, Bernabé-ebo nue-undar abin-abin imaksamalad. Degisoggu, na egi bangudmarsunnad. Bernabé, Marcos-sesagusad, degi, Chipreʼse urgi nadmarsunnad.
ACT 15:40 Pabloʼdi eba naega Silas-susad. Gwenadgan-Jesúsʼba-nanaimalad ega Babse gochamargu, Bab-Dummad-argan-nuki uksamarsunnad, adi, Bab-Jesús amar-dakegar. Degi, geb Pablo, Silas-ebo nadsunnad.
ACT 15:41 Pablo Siria-yargi, degi, Cilicia-yargi Jesúsʼba-nanaimalad-danar-ambikunonidamalad-ogannodii gusad.
ACT 16:1 Pablo Derbe-neggweburse, degi, Listra-neggweburse modapsunnad. Agi dule-wargwen Bab-Jesúsʼba-naid mai dakdapid. A-dulede, Timoteoʼye-nugad. E-nan Judío-duled, Bab-Jesúsʼba-nue-naimogad. E-babdi, Griego-duled.
ACT 16:2 Gwenadgan Listraʼginmalad, degi, Iconioʼginmalad, bela yeer Timoteoʼgi sunmakedbimalad.
ACT 16:3 Pablo Timoteo-eba-naega imaksad. Aga abgan-uka-duku-siked-igar imakega imaksad, adi, Judíoʼmar mer Timoteoʼgi akar sogmalagar. Ar bela wismalad, Timoteo-e-babde Griego-dule gue.
ACT 16:4 Pablo, Silas-ebo belagwapa neggwebur-irba gwenadganga sognadap-gusmalad, igi Jesús-e-sapingan-bur-dummagan, degi, Jesúsʼba-nanaimalad-e-idumalad-Jerusalénʼgi-bukmalad, Judíoʼsurmaladga igar-mesismala.
ACT 16:5 Degisoggu, Jesúsʼba-nanaimalad-danar-ambikunonidamalad ulubgi Bab-Jesús-igargi gannalemai gusad, degine, bane-bane Jesúsʼba-nanaimalad mergumai gusad.
ACT 16:6 Pablo, Silas-ebo Frigia-yalaganba, degi, Galacia-yalaganba nadmalad. Ar Bab-Dummad-Burba-Isligwaled Asia-yargi Pablo Bab-Jesús-gayaburbagi sunmaked gwen imaksasulid.
ACT 16:7 Pablo, Silas-ebo Misia-yar-abingunaidse modapmargu, Bitinia-yarse dogoye sogsamalanad. Degi-inigwele, Bab-Jesús-Burba-Isligwaled a-yarse dogega gwen imaksasurbalid.
ACT 16:8 Degisoggu, Misia-yargi bakar nasmargu, Troas-neggweburse modapmarsunnad.
ACT 16:9 A-neggweburgi Pablo mutikidba gabdakalid, negburgan-dakalid, dule-wargwen Macedoniaʼgined, e-asabin gwichi dakalid, egi wilenai, ega sognai: “Anmar-bendakega Macedonia-yarse be dage.”
ACT 16:10 Pablo-we-negburgan-daksad-sorba, anmar gwae Macedonia-yarse-naega guagwar ibmar amiarmarsunnad. Ar anmar bensuli gusad, wede, Bab-Dummad we-yalase-naega anmar-abege, degine, e-gayaburba-nuedgi we-neggweburse dulemarga-sunmaknaega anmar-abeged.
ACT 16:11 Anmar urgi Troas-neggweburgi-nodgu, Samotracia-dupuse bakar nadeguad. A-banedgi, anmar Neápolis-neggweburse modapid.
ACT 16:12 Geb anmar Neápolisʼgi nadbalid, Filipos-neggweburse. A-neggweburgi Roma-yar-selemaiyob negselemaid, degi, Filipos-neggwebur Macedonia-yargi bur nug-nikaa simogad. Agi anmar ibbigbasaar megialid.
ACT 16:13 Obunnoged-ibagi, anmar wis neggweburgi nodmalad, diwar-gakase anmar nade gusad. Bia gusgu Bab-Dummadse-golega naddamaladse anmar bukudapid. Agi anmar sigisgua, Bab-Jesús-gayaburba-nuedgi omegan-ambikunonimaladga anmar sunmakdemalad.
ACT 16:14 Ome-wargwen, Tiatira-neggweburgined-Lidiaʼye-nugad, anmar-itosii gusmogad. A-omede, mor-nued suir-akwagii-dakleged ukedid. Lidiaʼde nue Bab-Dummadse gordimosoggu, Bab-Jesús e-gwage ebunonisunnad, adi, Pablo-ibmar-soged abingaegar.
ACT 16:15 Lidia, Bab-Jesús-abingasadgi Bab-diigi-ogleged-igar imaksad, degi, e-neg-yaurginmalad deyob imaksamogad. A-sorba, Lidia anmargi wilenaigusad, anmarga sogded: “Nue-Bab-Jesúsʼba-nai be an-dakele, an-negse be wis obunnodamardo.” Degisoggu, anmar e-neggi megissunnad.
ACT 16:16 Ibagwengi, anmar Bab-Dummadse gornadapgu, bunagwa-wargwen, anmar-abin noalid. A-bunagwade nelegwad, dule-baid-maiga gudibalid. A-bunorde, idu-ibmar-guoed-sogedgi e-akwemaladga mani-dummad onodiid.
ACT 16:17 We-bunagwade, Pablo-sorba, degi, anmar-sorba-nai, binnasuli gordani gusad. Weyob sogdani gusad: “We-dulemar, Bab-Dummad-Bur-Biriginedga-arbamalad-dulemalad. Bemarga abonoleged-igargi sunmakdanimalad.”
ACT 16:18 Degibi, bane-bane bunagwa anmar-sorba gordiguad. Degidbali, Pablo sae-itoalid. Bunagwasik aibilis-imaksad, niaburba-bunagwagi-maidga sogded: “Jesucristo-nuggi an bega sogsun, bunagwagi-be-maid emisbinne be nosun.” Niaburba bunagwagi yog nodeguad.
ACT 16:19 Bunagwa-e-akwemalad bar mani-dummad ega onogosur dakarmargu, Pablo-gasmalad, Silas-gasmalad. Geb dummaganse igar-itoged-negse senonimalad.
ACT 16:20 Igar-nabiromalad-asabin ogwisnonimargu, sogdemalad: “We-dulemar, Judío-dulemalad, anmar-neggwebur-oimakega imakdimalad.
ACT 16:21 E-damaladba dulemar-odurdakdimalad. Ar anmardi Roma-dulemarsoggu, e-damalad geg anmar abingamalad, geg anmar eba damarbalid.”
ACT 16:22 Degisoggu, bukidar dulemar Pabloʼgi, degi, Silasʼgi gwisgudmalad, ese uludmalad. Igar-nabiromalad e-mor-yoid ei siir-siir-imakega imaksamalad. Geb suargi bibyogega imaksamarbalid.
ACT 16:23 Pablo-sabsur-sarsosmalad-sorba, degi, Silas-sabsur-sarsosmalad-sorba, esgaryagi metemalad. Esgarya-dakedga igar uksamalad: “Nue we-dulemargi nakulegoye.”
ACT 16:24 Esgarya-daked deyob-ega-igar-uklesgu, gatik bur esgarya-yaa-solabalidse Pablo-odossunnad, degi, Silas-odosbarsunnad. Aginbali, sepogi ei e-nagmar ise-odogar imaksabalid.
ACT 16:25 Nega-gabigwenadba Pablo, Silas-ebogwa Bab-Dummadse gorbukwa, degi, namakar Bab-Dummad-nug odummobukwa gusmalad. Deun, dule-baigan-esgaryagi-mellesimalad, Pablo, degi, Silas-itobukwa gusmalad.
ACT 16:26 Degidgine, ukiar negabandur nagunonigu, neg giglimakded, esgarya-e-sailagan-mamaidse-bakar, giglimakdemogad. Esgarya-yawagakmar bela argaded, degi, dulemar-esgoro-dubgi-atinbukmalad bela ega esgoro-dub achikdemalad.
ACT 16:27 Esgarya-daked atakargu, dakalid, bela yawagakmar argabubuk-nanae, esgaryagi-mellebukmalad bela wakitemarye bialid. Degidbali, na dukin oburgwegala, e-es-suid onosa imaksad.
ACT 16:28 Pablo deyob-daksagu, binnasur esgarya-dakedse goted, ega sogded: “¡Mer be dukin oburgwe! Anmar amba bela wegi bukmala.”
ACT 16:29 Esgarya-daked gwallu egichisgu, esgarya-yaba dogdegu, ber-dobedba wawanmakded. Pablo-asabin, degi, Silas-asabin, yokorgi sindigar sigisad.
ACT 16:30 Esgarya-daked, magaba Pablo-onosgu, degi, Silas-onosgu, egi wilenaigusad, ega sogded: “Dummagan, an nabir abonolegega, ¿ibu an imaksale?”
ACT 16:31 Geb esgarya-dakedga sogdemalad: “Bab-Jesucristoʼgi mer be bengu, ar degiir, geb be abonolegoed, degi, be-neg-yaurginmalad deyob nabir abonolemogoed.”
ACT 16:32 Agi Pablo, Silas-ebo esgarya-dakedga, degi, bela e-negginmaladga Bab-Jesús-gayaburba-nuedgi sunmaksamarsunnad.
ACT 16:33 Esgarya-daked, a-mutikidbali, Pablo-naibigusad, degi, Silas-naibigusad ega nue enuksad. Esgarya-daked, degi, e-neg-yaurginmalad bela a-mutikidbali, Bab-diigi-ogleged-igar imaksamarsunnad.
ACT 16:34 A-sorba, esgarya-daked, e-negse, Pablo-sesa, degi, Silas-sesa gusad. Geb masgi oguchabalid. Esgarya-daked, degi, e-neg-yaurginmalad Bab-Jesús-bengusur-gunonimalad-ular, bela weligwar itosmalad.
ACT 16:35 Neg-oibosgu, wakudaryalaba igar-nabiromalad suar-ibmala barmismalad, adi, esgarya-dakedga sogega, we-dulemar be onogoye.
ACT 16:36 Agi esgarya-daked Pabloʼga sogded: “Igar-nabiromalad-dummagan be-onomalaga anga igar-uksado. Degisoggu, akarsurdo, bemar boni-gwen-niksurmardo, nuedgi be namalo.”
ACT 16:37 Pablo suar-ibmalaga sogded: “Anmar, emide, Roma-dulemar-gue-inigwele, igar-nabiromalad dulemar-bukidarad-abargi, yoo-anmarga-igar-itolege, sabsuli anmar-bibyosmalad, degi, esgaryagi anmar-metemarbalid. ¿Emide, dukuakwagwa anmar-onoye sogmarde? ¡Adi suli! Igar-nabiromalad-sunnad wese anmar-onodagodo.”
ACT 16:38 Suar-ibmala gannar modapmargu, igar-nabiromaladga bela sogdapmalad, igi Pablo emarga sogsa. Roma-dulemarye wisguarmargu, nue-dobgudmalad.
ACT 16:39 Igar-nabiromalad, Pabloʼse, degi, Silasʼse nonimarsunnad, ega sognonimalad: “Anmar beedse begi nosmarye, degisoggu, esgaryagi-siid be nomarsunye, bemar neggwebur-baidse namarsunye.”
ACT 16:40 Pablo, Silas-ebo esgaryagi nosmargu, Lidia-negse nadegusmalad. Gwenadgan-Jesúsʼba-nanaimalad-daksamargu, gwenadgan-gwage nue ogannosmalad. Geb a-sorba, nadmarsunnad.
ACT 17:1 Pablo, Silas-ebo nadmargu, Anfípolis-neggweburgi, degi, Apolonia-neggweburgi nasmalad. Geb Tesalónica-neggweburse Judíoʼmar-onmakednegsiidse modapmalad.
ACT 17:2 Ar gusgu Pablo Judíoʼmar-onmakednegse naddasoggu, ase nadegusad. Agi itoged-ilapaa, obunnoged-ibagi dulemar-Judíoʼmar-onmakednegse-nonidamaladga, Bab-Jesús-igargi sunmakdii gualid.
ACT 17:3 Amarga Bab-Jesús-igar nue osanalodii gusad. Sogdii gusad, bato Bab-Dummad-Gardagi sognaiye: “We-Cristo nue-wilegergebye, degi, burgwisad-sorba gannar durgubalirgebye. Ar bato deyob ega igar maiddeeye sogdii gualid.” Degi, Pablo emarga sogdii guarbalid: “We-Jesúsʼgi an bega sunmakedi, we Cristo-sunnadye.”
ACT 17:4 Agi gwen-gwen Judíoʼmar Bab-Jesúsʼgi bengussurmalad. Amar Pabloʼba, degi, Silasʼba akasmarsunnad. Deginbali, Griegoʼmar-Bab-Dummad-dobee-nanadimaladi, degi, omegan-nue-nug-nikamaladi, bukidar Bab-Jesúsʼgi-bengussurmarmogad.
ACT 17:5 Degine, bukidar Judíoʼmar-Bab-Jesús-bengusmalad, nobedba, dulemar-isgana-galimbaba-arbaedsuli-gudimalad amismalad. Degidbali, we-dule-isganamar, Pabloʼgi oimakega imaksamalad. Geb sabsur-Pablo-ononaega, degi, Silas-ononaega, Jasón-negse duurmakdemalad, adi, dulemarga ukmalagar.
ACT 17:6 Pablo, Silas-ebo Jasón-neggi satemarsoggu, dulemar neggwebur-dummaganga-gudimaladse Jasón-ebipidmarsunnad, degi, gwenadgan-baigan-a-neggi-bukwamalad-ebipidmarbarsunnad. A-dulemar dummaganga binnasur sogdemalad: “Dulemar-bela-neggwebur-irba-neg-oimakega-imakdimalad, emide, anmarse nonimarmogad.
ACT 17:7 Degine, we-Jasón, e-neggi a-dulemar-abingasad. Bela a-dulemar Roma-Dummad-César-e-igargi annadimalad. Ar sogdimalad, rey-baid maiye, a-rey Jesúsʼye nugye.”
ACT 17:8 Weyob dulemar-ega-ibmar-soge-itoarmargu, dulemar, degi, dummagan-neg-dakmamaid oimakarmalad, uluarmarsunnad.
ACT 17:9 Geb Jasónʼga, degi, baiganga sogsamalad, nabir be nomalagala, be bennukmalargebye. Degisoggu, bennuksamalad. Geb agi, dummagan nabir amar-onossunnad.
ACT 17:10 A-mutikidba, Jesúsʼba-nanaimalad, neggweburgi yog Pablo-onoar, degi, Silas-onoar imaksamalad, adi, Berea-neggweburse namalagar. Pablo, degi, Silas Bereaʼse modapmargu, Judíoʼmar-onmakednegse yog naar imaksamalad.
ACT 17:11 Judíoʼmar-Bereaʼginmaladi, Tesalónicaʼginmaladba, bur dule-nuegan-dae daklealid, ar ade, bur nue-yeer Bab-Jesús-gayaburba abingasmalad. Degine, bane-bane Bab-Dummad-Gardagi na emar-sunnad amibukwadamalad, dakega, bule nabir Pablo emarga ibmar sogdibeye.
ACT 17:12 Degisoggu, bukidar Judíoʼmar Bab-Jesúsʼgi bengussurmalad. Deginbali, gwenna-gwenna Grecia-dulemar-omegan-nue-nug-nikamalad, degi, bukidar Grecia-machergan Bab-Jesúsʼgi bengussurmarmogad.
ACT 17:13 Ar Judíoʼmar-Tesalónicaʼginmalad wisguarmargu, Pablo, Bereaʼgi Bab-Dummad-gayaburbagi sunmakdibarye, amar Bereaʼse nadegusmalad, degi, agi neg-oimakdapmarbalid.
ACT 17:14 Ar gwenadgan-Jesúsʼba-nanaimalad gwae-gwae demar-gakase Pablo-barmismarsunnad, Silasʼdi Timoteo-ebo Bereaʼgi besmalad.
ACT 17:15 Gwenadgan-Pabloʼba-nade-gusmaladi, Atenas-neggweburse Pablo-berbeapmalad. Geb gannar Bereaʼse nonimalad. Amarga soglesad, Silasʼga, degi, Timoteoʼga sogoye, gwae-gwae ese dakmaloye, Pablo sogye.
ACT 17:16 Pablo, Atenas-neggweburgi, Silas-edarbemaigua, degi, Timoteo-edarbemaigua, dakalid, Atenas-dulemar bukidar ibmar-bab-dummaganga-imakleged e-bab-dummadga na imakbukmala. Degidbali, Pablo a-dulemar-ular ulubgi nunmaked-dummad itoalid.
ACT 17:17 Degisoggu, Pablo Judíoʼmar-onmakednegse Bab-Jesús-igargi Judíoʼmarga, degi, Judíoʼsurmalad-nue-Bab-Dummad-dobee-nanadimaladga sunmaknaddaed. Degi, Pablo, dulemarbo Bab-Jesús-igargi abin-abin imakardaed. Deginbali, bane-bane, Pablo, dulemar-danar-ambikumaladgi, dulemar-bukwamaladga Bab-Igargi sunmaknaddabalid.
ACT 17:18 Dulemar-binsaed-ibegan Epicúreo-igar-durdaksamalad, degi, Estoico-igar-nue-wisimalad Pablo-ebo nue-abin-abin imakarmalad. Gwen-gwen sokarmalad: “¿Wede dule-sunmakerbad ibi obare?” Baigandi sokarmalad: “We-dule bab-dummagan-baigangi-sunmaked-dule an dakdo.” Ar ade, Pablo Bab-Dummad-Gayaburba-Nued-Jesúsʼgi-soglesadgi sunmakdiid, degi, gannar-durguleged-igargi sunmakdiid.
ACT 17:19 Dulemar-nue-binsaed-nikamalad-igar-itoged-neg-Aerópagoʼye-nugadse Pablo-sesmalad, ega sogdemalad: “Anmar nue-wisgubimardo, ¿wede ibu-odurdaked-gwapidgi be sunmakdii?
ACT 17:20 Ar igar-gwapidsailadgi be anmar-uaya oburnonikid. Degisoggu, anmar wisgubisundo, wede ibi be nue obare.”
ACT 17:21 Ar ade, Atenasʼginmaladi, degi, baigan-neg-ainesikmalad-Atenasʼgi-mamaidi, unnila ibmar-binigan-itogedginbi, ibmar-binigan-sogedginbi binsabukdamalad.
ACT 17:22 Degisoggu, Pablo, igar-itoged-neg-Areópagoʼye-nugadgi emar-abargi gwisgudgu, sogded: “Girmar-Atenasʼgi-be-bukmalad, an be-dakmargu, bemar bab-dummadye-sogmaladga-ibmar-imakbukwad nue-dobee nanabukmar an be-dakmardo.
ACT 17:23 Bemar-babse-gormalad-negse an atakdigu an dakardo, babga-ibmar-ukleged-aila-gwensakgi weyob nug narmakar nai: We-aila, Bab-Dummad-Dakledisulidgadid. ”Nabir, we-Bab-Dummadse-bemar-goledi, amba bemar wissurmar-inigwele, a-Bab-Dummadgi an bemarga sunmakmalad.
ACT 17:24 ”A-Bab-Dummad we-napneg-naid nasiksad, bela-agi-ibmar-bukwad obinnisad. Ar we-Bab-Dummad nibneg egadsoggu, we-napneg egadsoggu, dule-ese-goled-neg-sobedgi megosurguoed.
ACT 17:25 Degi, dulemar geg Bab-Dummad-bendaked, ar Bab-Dummad ibmar abedeeye gwen binsamaisulid. Ar e belagwapa san-burba ukmaid, bunnoged ukmaid, degi, belagwapa ibmar ukmaibalid.
ACT 17:26 ”Unnila ablis-gwennagi Bab-Dummad dulemar-akar-akar urbisad, adi, bela yarmar-naid-ugakaase dulemar ambikuegar. Bab-Dummad sogsabalid, sanagwadse dulemar-akar-akar ambikuoe, degi, biase ambikumarbaloe.
ACT 17:27 Bab-Dummad deyob-neg-imaksadi, adi, bela dulemar e-amimalagalad. Abakalegi nabir amiarmalale. Ar Bab-Dummad anmargi dikasur maisulid.
ACT 17:28 Ar anmar Bab-Dummadgi gudimalad, a-nuki anmar nabir-nanadimalad, degi, Bab-Dummad-nuki anmar dula gudibalid. Ar igi gwen-gwen bemarga-namaked-onomaladi, weyob sogsamarmoga: ‘Anmar Bab-Dummad-mimmigan guye.’
ACT 17:29 ”Ar anmar Bab-Dummad-mimmigan guedde, anmar binsaewilubsulid, Bab-Dummadi or-sobaled guye, mani-sobaled-guye, akwa-sobaled guye, deyob anmar binsaewilubsulid. Ar unnila we-ibmarmarde dulemar na ibmar-wisidba, e-binsaedba sobsamalad.
ACT 17:30 Epennedi, Bab-Dummad dulemar-ibmar-wissurgudigusad baisur-dakeyob gusad. Emigindi, bela dulemarga soged: ‘Be-isgudimaladga be bukib binsamarye, be-daed be ogwamarsunye.’
ACT 17:31 Ar Bab-Dummad dule-wargwenbali bato iba nasiksad. A-ibagi bela dulemarga napiragwadba igar itogoed. We-dule-wargwen bato idu na nug-imaksad. We-dulede, Jesúsʼye nugad. We-Jesúsʼde burgwar-maigu, Bab-Dummad gannar odulosad. Abali, oyosad, na e-ibmar-sogsadi napiragwadye.”
ACT 17:32 Ar dulemar gannar-durgued-igar-itoarmargu, Pabloʼgi dododmalad, abar sogdemalad: “Anmar we-igar ibagwengi gannar itobalo.”
ACT 17:33 Geb degi, Pablo amar-abargi nodegussunnad.
ACT 17:34 Dulemar bokwasar Pabloʼba nagusmalad. Amar Bab-Jesúsʼgi bensuli gunonimalad. Gwensak Bab-Jesúsʼgi bensuli-gunonikidi, Dionisioʼye nugad. A-dulede, igar-itoleged-neg-Areópagoʼye-nugadgi nug nikamogadid. Degi, ome Dámarisʼye nugad, degi, baigan Bab-Jesúsʼgi bensuli gunonimarmogad.
ACT 18:1 Geb a-sorba, Pablo Atenasʼgi bangudsunnad, Corinto-neggweburse nadegusad.
ACT 18:2 A-neggweburgi Judío-wargwen-abingualid, Aquilaʼye nugad. A-dulede, Ponto-yalaginedid. Na-e-ome-Priscila-ebo Italia-yargi-mai emissaar nonimalad. Ar Roma-saila-Claudioʼye-nugad, igar-mesisad, bela Judíoʼmar-Roma-neggweburgi-gudimalad ainioye. Pablo, Aquilaʼse ataknad gusad.
ACT 18:3 Ar we-dulemarde, Pabloʼyob dordoneg-makedgi arbamogad. Degisoggu, Pablo amar-walik bessunnad, adi, na amarbo dordoneg-makedgi arbaegar.
ACT 18:4 Obunnoged-ibagi Pablo Judíoʼmar-onmakednegse Judíoʼmarga-sunmakega, degi, Judíoʼsurmaladga-sunmakega naddaed. Adi, Bab-Jesús-igarba nagumalagar.
ACT 18:5 Silas, Timoteo-ebo Macedonia-yargi-mai Pabloʼse nonimargua, Pablo Bab-Jesús-gayaburbaginbi Judíoʼmarga-sunmakega alamakdii guarsunnad. Judíoʼmarga sogdii gualid, we-Jesús, Bab-Dummad-dule-wargwen-anmarga-barmidagoye-sogsad-dule-sunnadye.
ACT 18:6 Judíoʼmar Pablo-sunmaked gwen nabir itossurmalad, egi oimakarmalad, ukabsaarmarbalid. Agi Pablo e-mor mor-mor imaksad. A sogleged, an bemarga Bab-Jesús-igargi-sunmakdiid wesesunnoye. Geb Pablo sogded: “Andi bato bemarga Jesús-igargi sunmaksando, emigindi, bemarginsundo. Ar Bab-Dummad sabsur-bemar-odurdakarmalale, dukin be samarsunnodo. Emigindi, Judíoʼsurmaladga Bab-Jesús-igargi an sunmaknasunnoed.”
ACT 18:7 Pablo Judíoʼmar-onmakedneggi nodgu, Justo-negse naded. A-negde, Judíoʼmar-onmakedneg-nagaba siid. Justoʼde nue Bab-Dummad-dobee-nanadimogad-duled.
ACT 18:8 Degi, Judíoʼmar-onmakedneg-e-dummad-Crispoʼye-nugadi, degi, bela e-neg-yaurginmalad Bab-Jesúsʼgi bensuli gunonimalad. Deginbali, bukidar Corintoʼginmalad Bab-Jesús-igar itoarmargu, Bab-Jesúsʼgi bensuli gunonimogad, degine, Bab-diigi-ogleged-igargi oglesmarbalid.
ACT 18:9 Ibagwengi neg-mutikidba Pablo negburgan dakalid. Agi Bab-Jesús Pabloʼga sunmaknonikid, ega sognonikid: “Mer be dobguo, gatik an-gayaburba-nuedgi be sunmako, mer bogilego.
ACT 18:10 Ar an beba gudiguad, degisoggu, dule gwen be-oakalogosulid. Ar ade, we-neggweburgi dulemar-bukidar-anba-nagumaloed an nikad.”
ACT 18:11 Degisoggu, Pablo Corinto-neggweburgi birgagwen-abala megisad, Bab-Dummad-gayaburbagi dulemar-odurdakdii gusad.
ACT 18:12 Deunni, Galión Acaya-neggweburgi sailaga-maid-ibagi, Judíoʼmar bular Pabloʼgi gwisguar gusmalad, igar-nabiroged-negse Pablo-sesmalad.
ACT 18:13 Galiónʼga sokarmalad: —We-dule, igar-maisulidba Bab-Dummad-nug-odummogega aimar-binsaed gadiiye.
ACT 18:14 Pablo nue sunmaksokali, Galión Judíoʼmarga sogded: —Ar emi we-dule neg-oakalodina, degi, igar-mamaidgi dummad-gwisgudiina, an nue be itosmalardo.
ACT 18:15 Emigindi, unnila gayaginbi ibmar-sogdiid, degi, dule-nugmarginbi sunmakdiid, aginbali, bemar-igar-mamaidginbi sunmakdiid. Degisoggu, we-igar na be dukin nabiromardo. Andi we-igar bemarga nabirogosulid.
ACT 18:16 Degi, Galiónʼdi igar-nabiroged-neggi Judíoʼmar-bukwad onidsunnad.
ACT 18:17 Degi, bela dulemar, Judíoʼmar-onmakedneg-e-dummad-Sóstenesʼye-nugad gasmargu, Galión-wagab sarsosmalad. Degite, Dummad-Galión Sóstenes-sarsolesad gwen bai daksasulid.
ACT 18:18 Pablo amba ibbigbasaar Corintoʼgi megialid. A-sorba, gwenadgan-Jesúsʼba-nanaimaladga napi-sunmas, egi bangudsunnad. Degimaloye, gwenadganga-sogsad-sorba, Pablo, Aquilaʼmala, degi, Priscilaʼmala, Cencrea-neggweburse armalad. Cencreaʼse-nonigu, Pablo sailagia na gwiri siksad. A oyoged: Bab-Dummadga napira na ibmar-saoye-sogsadi, an imakedseye. Degi, Cencrea-akar urgi Siria-yarse armarsunnad. Aquila, degi, Priscila, Pabloʼba aligusmarmogad.
ACT 18:19 Éfeso-neggweburse modapmargu, Pablo, a-neggweburgi, Priscilaʼgi, degi, Aquilaʼgi bachikgusad. Edi Judíoʼmar-onmakednegse naded. Agi Jesús-igargi Judíoʼmar-bukwamaladga sunmakdapid.
ACT 18:20 Judíoʼmar egi wilenaigusmalad, wis be wegi ibbigbasaar anmar-walik megye. Pabloʼdi yapa begusad.
ACT 18:21 Degi, Pablo amargi bangudgu, sogded: “Iba-danikid-daknaega an Jerusalén-neggweburse naergebed. Andi bemar-dakega gannar bemarse dagbiendo, Bab-Dummadbi wissundo, an gannar bemarse danibalodibe.” Pablo Éfesoʼgi-mai urgi arsunnad.
ACT 18:22 Pablo Cesareaʼse modapgu, Jerusalénʼse nadegusad, adi, Jesúsʼba-nanaimalad-danar-ambikunonidamalad wis daknaegar. A-sorba, geb Antioquíaʼse nadsunnad.
ACT 18:23 Pablo a-neggweburgi undar-megedgi, bela Galacia-yargi, degi, Frigia-yargi-neggweburmar-bukmaladse gwenadgan-daknad gusbalid. Agi Pablo gwenadgan-ogannodii gusad.
ACT 18:24 A-ibagangi Éfeso-neggweburse Judío-wargwen nonikid, Apolosʼye nugad. A-dulede, Alejandría-neggweburgi gwalulesad. Apolosʼde yeer sunmaked, degi, Bab-Dummad-Garda nue wisbalid.
ACT 18:25 A-dulede, Bab-Jesús-igar-maidgi nue-odurdaklesad, degisoggu, nue-yeer aimar-odurdakdimosundo. Unnila Juan-diigi-ogleged-igarbi-wisin-inigwele, ise-sanagwar aimarga Jesúsʼgi sunmakdii gusad.
ACT 18:26 Apolos, Judíoʼmar-onmakedneggi nue-gandikidba, dobsuli aimarga sunmaksad. Priscila, Aquila-ebo Apolos-sunmaked itosmargu, sorba bachikii Apolos-sesagusmalad. Geb degi, Apolosʼga Bab-Dummad-Igar-Maid nue osanalosmalad.
ACT 18:27 A-sorba, Apolos Acaya-yarse naesokargu, gwenadgan Apolos-ogannosmalad, ega garda narmakar barmismalad, adi, Jesúsʼba-nanaimalad weba nued abingamalagar. Apolos, Acayaʼse modapgu, nue Jesúsʼba-nanaimalad-bendakdapid. A-gwenadgande, abonolege-wilubsulinad, degi-inigwele, Bab-Jesúsʼgi abonolesmalad.
ACT 18:28 Apolos gwenadgan-nue-bendakdapid, ar ade, bela dulemar-abargi Bab-Dummad-Gardagi-naidba Judíoʼmarga nue-oyosad, we-Jesúsʼde, Cristo-sunnadye, Bab-Dummad-dule-wargwen-barmidagoye-sogsad-duleye. Degisoggu, Judíoʼmar geg abinsae gusmalad.
ACT 19:1 Apolos Corinto-neggweburgi-maigua, Pablo, yarba aibite gusad, geb Éfeso-neggweburse modapid. Agi gwenadgan-Jesúsʼba-nanaimalad-bukwa dakdapid.
ACT 19:2 Pablo amarse egichialid: —Deun bemar Bab-Jesúsʼgi bensur-gunonimargu, ¿bemar Bab-Dummad-Burba-Isligwaled abingasmala? Gwenadgan abin-imakdemalad: —Ar anmar Bab-Dummad-Burba-Isligwaled wissurmalad, ar dule gwen agi anmarga sunmakdisulid.
ACT 19:3 Geb Pablo amarga sogded: —Degite, ¿doa-nuggi bemar diigi oglesmarsunna? Geb abin-imakdemalad: —Juan-diigi-ogleged-igargi anmar oglesad.
ACT 19:4 Pablo amar-abin sogded: —Nabir be sogmalad, Juan Bab-Dummad-diigi-ogleged-igar-imaksagu, oyogegalad, e-isgudimaladga na bukib itomarye. Juan dulemarga sogsagusad: ‘An-sorba dule-wargwen-danikoeddi, mer egi bemar bengumaloye.’ We-dule-obarisad, Cristo-Jesús-annik sogsagusad.
ACT 19:5 Degi-emarga-soge itosmargu, Bab-Jesús-nuggi-diigi-ogleged-igar imaksamarsunnad.
ACT 19:6 Pablo a-dulemargi e-argan mesisgu, amargi Bab-Dummad-Burba-Isligwaled aidenonikid. Degi, amar gaya-baid-baid sunmakdemalad, degi, Bab-Dummad-Burba-Isligwaled Jesús-igargi-sunmakega amar-imaksabalid.
ACT 19:7 Bela amar e-ambe-gakabosaar (12) gumalad.
ACT 19:8 Degine, Pabloʼdi Judíoʼmar-onmakednegse nii-walapaa nanadii gusad. Aimarga dobsuli Bab-Igargi sunmakdii gusad. Dulemarga Bab-Dummad-e-negdakmaid nue osanalodii gusad.
ACT 19:9 Bukidar dulemar Pablo-ibmar-sogsadgi gwisgusmalad, Bab-Jesús-bengudmalad. Igar-nued-maid-ichodmalad, sunnasur aimar-abargi Bab-Jesús-igargi sunmakdemalad. Pablo deyob-dakargu, amargi aibate gusad. Degidbali, Pablo Jesúsʼba-nanaimalad bachikii sesagusad. Geb Tirano-e-odurdaked-ambikued-neggi, Pablo, bane-bane Bab-Jesús-igargi gwenadganga sunmakdii gussunnad.
ACT 19:10 We-igargangi birgabo Pablo dulemarga sunmakdii gusad. Degisoggu, bela Asia-yargi-bukmalad, Judíoʼmar, degi, Griegoʼmarse-bakar, Bab-Jesús-igar-maid itosmalad.
ACT 19:11 Degi, Bab-Dummadi Pabloʼba ibmar-dakledisurmalad-gegerdaklemalad imaksad.
ACT 19:12 Degidbali, dulemar e-muswemar, degi, e-sadergi-mor-nagusmaladse-bakar, Pablo-e-san-ebusale, uellemaladse sesdamalad. Agi, dule-geguedi a-mor-egi-warmaksale, yog-nuguar naddaed, degi, niaburba-nikale, yog egi niaburba noddabalid.
ACT 19:13 Éfeso-neggweburgi gwen-gwen Judíoʼmar-gudimaladi, niaburba-onoged-wisye sogdimalad. Aisaar Bab-Jesús-nuggi niaburbamar-onoye sokarmalanad. Niaburbamarga weyob sogdamalanad: “Jesús-nuggi an bega soged, Pablo-egi-sunmakdiid-nuggi, be ainimar.”
ACT 19:14 Deyobi, Esceva-masmala-walagugle-guedi (7) imakdimalad. Escevaʼde, Judíoʼmar-irwa-Babse-gormalad-e-iduedid.
ACT 19:15 Ibagwengine, niaburba Esceva-masmalaga weyob sokalid: “An Jesús mag-dake, an wisbali Pablo doabali. Ar bemardina, ¿doamarsunna?”
ACT 19:16 Degidgine, dule-niaburba-nikadi a-masmalagi ichomakalid, bela amar-gasa imaksad, degi, binnasur amar-sarsosad. Degidbali, masmala, a-neggi, uka-swiri, nue-naibigus duurmakdemalad.
ACT 19:17 Judíoʼmar, degi, Griego-dorgan-Éfesoʼgi-mamaid we-masmala-naibigusad bela wisguarmargu, bela dobe itonadmalad. Degisoggu, Bab-Jesús-nug bela-bela ogannodmarsunnad.
ACT 19:18 Degisoggu, bukidar Bab-Jesús-bensuli-gunonimalad, dani-damalad, dulemar-abargi e-isgudiid dukin-dukin na sognanai guarmalad.
ACT 19:19 Degi, bukidar ina-isganagi-arbadigusamaladi, e-gardamar senonimalad. Dulemar-abargi bela e-ina-isgana-gardamar ogumaksamalad. E-gardamar-ogumaksad-mani-nug-itoarmargu, mani-sibu-gwa-mili-dulabo-gakambe-wilub (50,000), gardamar gummaksa itoarmalad.
ACT 19:20 Weyobi, Bab-Jesús-gayaburba nasgumai, degi, Bab-Jesús-e-gangued oyolemai gusad.
ACT 19:21 Wegi-gusad-sorbali, Pablo Jerusalénʼse naye sokalid. Jerusalénʼse naegala, Macedoniaʼgi nasoye, degi, Acayaʼgi nasoye soged. Degi, sogsabalid, Jerusalénʼgi-mai Romaʼse nabaloye.
ACT 19:22 Degisoggu, Macedoniaʼse e-bendakmalad-warbo barmisad. Amarde, wemalad: Timoteo, degi, Erasto. Ar Pabloʼdi amba undarsaar Asia-yargi megialid.
ACT 19:23 A-ibagangi, Éfeso-neggweburgi Jesús-igar-maidgi dulemar beedse oimaksamalad.
ACT 19:24 Dule Demetrioʼye-nugadi neg-gagasad. A-dulede, manigi-nuchu-burwigan-sobedgi arbaed. Na e-sordamar-e-bendakmaladbo bab-bundor-Dianaʼse-goled-negga neg-burwigan-sobedgi mani-dummad onodiid.
ACT 19:25 Geb Demetrio, e-sordamar-e-bendakdimaladse gochad, degine, baigan-a-ibmar-sobedgi-arbamarmogadse gochabalid. Demetrio, amarga sokalid: “Aimar, bemar nue wismalad, anmar we-arbaedgi wis mani-nued onodimalad.
ACT 19:26 Ar emide, we-Pablo dulemar-binsaed-gadiid be dakdimalad, degi, be nue itodimarbalid. Unnila Éfesoʼginbisulid, bela Asia-yalaganba dulemar-binsaed-gadiid. Wede sogdiid: ‘Dulemar-yamo-e-argangi-ibmar-sobmaladi, Bab-Dummadsurye.’
ACT 19:27 ”Emide, anmar-arbaed, sunna anmar-ibe bergudeled. Deginbali, bab-bundor-Dianaʼse-goled-neg-nue-nug-nika-siid bergudbaliled. De-ukinbali, bab-bundor-Dianaʼse-bakar, bela Asia-yalagi, degi, bela napneg-naid-ugakaase, e-nug-odummobukmalad bergudbaloed, bar e-nug odummodmalosulid.”
ACT 19:28 Demetrio-itobukmalad weyob itosgu, bela sae-itodmalad, oimakdemalad, sogdemalad: “¡Éfeso-dorganga, bab-bundor-Diana bur-dule-dummadid!”
ACT 19:29 Degisoggu, neggweburgi bela surbinsa itonadmalad. Uludmargu, Gayo-gasmalad, degi, Aristarco-gasmalad. Wemar-ebogwadde, Pablo-e-sordaganad, Macedoniaʼginmaladid. Pabloʼba nonimalad. Amar galesgu, dulemar-danar-ambikumaladse illillir ebipidmalad, geb degi bukidar ase danar duurmakdemalad.
ACT 19:30 Pablo deyob wisguargu, danar-ambikumalad-negse dulemarbo igar-amiega dogbigualid. Ar gwenadgan-Jesúsʼba-nanaimalad Pablo-dogega gwen imaksasurmalad.
ACT 19:31 Deginbali, e-aimar Asiaʼginmalad Éfesoʼgi-dummaganga-mamaid Pabloʼga weyob gayaburba barmiarmalad, mer danar-ambikued-negse-dogedgi be binsaoye.
ACT 19:32 Danar-ambikumalad-negyaba nue-igar-nikaa igar gunasulid. Bela uurmakbukmalad, degine, bur-melu wissurmalad, emarde, ibiga igar itonanai.
ACT 19:33 Judíoʼmar yamo Alejandro-osunmakega abarse Alejandro-barmetemalad. Geb Alejandro, Judíoʼmar-bendakegala, dulemar-bela-bogi-e-itomalaga argan onakwisad.
ACT 19:34 Ar Éfeso-dorgan dakarmargu, we-dule, Judío-duleye, bela bulale oimakdemalad, Éfeso-dorganga, bab-bundor-Diana bur-dule-dummadye sogdemalad. Wachi-ilabo-wilub oimakbukwa gusmalad.
ACT 19:35 Neggweburga-garda-narmaked-dummad dulemar-obogilesgu, dulemarga sogded: “Éfeso-dorgan, ar bela dulemar wismalad, Éfeso-dulemarde, bab-bundor-Dianaʼse-goled-neg-edarbemaladye, degi, bab-bundor-Diana-wagar-burba-sobaled nibneg-akar-aidenonikid-edarbemarbalidye, wismalad.
ACT 19:36 Ar deyobid be wismarsoggu, bogi be ambikumar. Mer ukurmakar, binsasuli, be ibmar imakmar.
ACT 19:37 Ar we-dulemar-be-senonimaladi, bab-bundor-Dianaʼse-goled-neg gwen oichodisurmalad, degi, bemar-bab-bundor-Diana-nuggi gwen dododisurmarbalid.
ACT 19:38 Ar Demetrio, degi, e-sordamar-manigi-arbamarmogad dule-egi-gwisgudii itogele, sunna igar-nabiromaladse igar-itonamalodo. Ar aga igar-nabiromalad-negmar bubukwad, agala, igar-nabiromalaga dummagan mamaid.
ACT 19:39 Ar bemar ibmar-baid-soged nikamalale, adi, onmakedneggi be igar nabomalo.
ACT 19:40 ”Emi bemar oimaksamalad sunna anmargi soglealiled, yamo sailaga-negdakmaidgi-urwega oimakbukmarye. Anmarse egislealile, ‘¿wede ibiga bemar oimakbukmarye?’ ¿Igi an abin-sogmalosunna? Ar anmar abin ibmar-sogedi, satemalad.”
ACT 19:41 Garda-narmaked-dummad wegi-sogsad-sorba, bela e-neg-e-negse dulemar-barmissunnad.
ACT 20:1 Bela dulemar-oimaksad-bergusad-sorba, Pablo Jesúsʼba-nanaimalad-napi-unaega ese napi gochad. Napi-unasad-sorba, degi, nue angaagwar gwenadgan-gasgu, egi bangudsunnad. Degimaloye sogsagu, Macedonia-yarse nadsunnad.
ACT 20:2 Pablo, Macedonia-yalaganba bela gwenadgan-bukwamaladse atakapid-sorba, degi, nue Bab-Jesús-igargi gwenadgan-unaapid-sorba, Grecia-yalase naded.
ACT 20:3 Pablo agi nii-warbaa megisad. Pablo, Siria-yarse urgi-nasokargu, wisgualid, Judíoʼmar egi-gwisguegala, igar-amismarye, e-oburgwega arbak e-iduar dukuar ambikusmarye. Deyob Pablo wisgusgua, nagab Macedonia-yarsik gannar nadegusad.
ACT 20:4 Pablo gannar nadgu, we-gwenadgan eba nade gusmarmogad: Pirro-machi-Sópater. Wede, Bereaʼginedid. Aristarco, degi, Segundo. Wemardi, Tesalónicaʼginmaladid. Gayo. Wede, Derbeʼginedid. Degi, Timoteo. Degine, Tíquico, degi, Trófimo. Wemardi, Asiaʼginmaladid.
ACT 20:5 We-gwenadgan anmar-idu nadegusmalad. Troas-neggweburgi anmar-edarbedapmalad.
ACT 20:6 Anmardi, Madu-Ina-Niksuli-Gulleged-Iba-sorba, Filipos-neggweburgi-mai urgi aligusad. Degi, ibatargi anmar Troas-neggweburgi we-gwenadgan-barganonimalad. Agi anmar ibagugle (7) megismalad.
ACT 20:7 Itoged-iba-gebe-nagudedgine, anmar Jesúsʼba-nanaimaladi, Jesús-burgwisad-ebinsaega, madu gunnega ambikunonimalad. Ar Pabloʼde banedgi neggwebur-baidse-naosoggu, aga undar nega-gabigwenadse gwenadgan-odurdakgwis gusad.
ACT 20:8 Deunni, anmar-niba-bukwadgine, bukidar gwallumar gabubukwa gusad.
ACT 20:9 Agine, sapin-gwensak, Euticoʼye-nugad, ataked-yawagakgi siigusmogad. Ar Pablo suitigus sunmakgwisgussoggu, machigwagi gabed nagunonikid. Geb ataked-yawagakgi-nue-gabsii machigwa argwated. Aila-darbaagi-sii argwachad, aidoarmargu, bato burgwar-mai aidoarmalad.
ACT 20:10 Pablo aidenonigu, gadebin machigwa-imaksad, degi, yog angaagwar-gasa imaksad. Geb Pablo gwenadganga sogded: “Mer be bukib binsamar, machigwa amba dula.”
ACT 20:11 Pablo machigwa-odulosad-sorba, gannar aila-darbaase nakwidbalid. Agi madu bisge-bisge imaksagu, madu-guchamalad. Geb madu-guchamalad-sorba, Pablo gannar sunmakdebalid, neg-oibogedse sunmaknai gusad. Oibosgu, neggwebur-baidse nadsunnad.
ACT 20:12 Euticoʼdi dula e-negse sesmalad. Degidbali, gwenadgan nue-yeer itosmalad.
ACT 20:13 Pablo Troasʼgi-argua, nagab Asón-neggweburse aligusad. Anmardi, Asónʼgi Pablo-onakwe-naega, Pablo-iduakwaa urgi Asón-neggweburse aligusad.
ACT 20:14 Geb anmar Asónʼgi Pablo-abingunonigu, anmarba-nakwis arsunnad. Geb agi anmar Mitilene-neggweburse aligusad.
ACT 20:15 Banedgine, anmar Mitileneʼgi nodbalid, Quío-dupgi anmar nasad. Geb a-banedgi, anmar Samos-dupse modapid. Degi, anmar Trogilioʼye-neggwebur-nugadgi obunnodapid. Geb a-banedgi, anmar Mileto-neggweburse warmakdapid.
ACT 20:16 Pablo yapa Asia-yargi ibamar-osuguega Éfeso-neggweburgi bakar-nasad. Ar Pablo gwae-gwae Jerusalénʼse Pentecostés-Iba-dakega nadapgusad.
ACT 20:17 Pablo Mileto-neggwebur-akar, Jesúsʼba-nanaimalad-e-idumalad-Éfesoʼgi-bukwadbina gochad.
ACT 20:18 Amar nonigua, Pablo amarga sogded: “Bemar nue wismalad, igi gebe Asia-yarse an nonikid-akar, bemar-abargi an nanadigusa.
ACT 20:19 Bemar-abargi an gudigusgu, Bab-Jesúsʼga an arbasgu, dule-dummarba an na san imaksasulid. Agine, boed-abargi an nanadii gusad, degi, nue wilubdakledii an gusbalid, ar ade, Judíoʼmar an-oburgwebidamalad.
ACT 20:20 Degi-inigwele, mer an bemarga Bab-Jesús-igargi sunmakodeeye an gwen-sogsasulid. Dulemar-bukidar-ambikuedgi, degi, negayaa-negayaa an bemar-odurdakdii nanasad, adi, Bab-Jesús-igargi bemar nue nanamalagar.
ACT 20:21 Judíoʼmarga, degi, Judíoʼsurmaladga an sogdii nanasad, Bab-Dummad-asabin be-damaladi na be ogwaewilubmarye, degi, Bab-Jesucristoʼgi bensuli be guewilubmarye.
ACT 20:22 ”Emigindi, Bab-Dummad-Burba-Isligwaled-sogedba an Jerusalénʼse naesokalid. Agine, gwen an wissulid igi an-sandi guodibe.
ACT 20:23 Unnila Bab-Dummad-Burba-Isligwaledbi neggwebur-iliba anga soge an itoged, esgaryagi-melleged, degi, nue-naibi-itogoedi, be-edarbenaiye.
ACT 20:24 Ar degite, an gwen bai itosulid. An-san-burba na sabesaila saodeeye gwen an binsasulid. Unnila bitigi an-arbaed weligwaledgi an obelosdibeye an binsaed. Bab-Jesús e-igar barsogega anga arbaed-uksad. A-igar, Bab-Dummad-Gayaburba-Nuedid, dule-abonoleged-wilubsulinad-igalad, emigindi, dule-abonononikid. A-igar bitigi nuedgi an obelosana gadinye an binsaed.
ACT 20:25 ”Bemar-abargi, Bab-Dummad-e-negdakmaidgi an bemarga sunmakdii gusad. Emigindi, an wisid, bemar bar an-wagar dakosurmalad.
ACT 20:26 A-ulale, emi-ibagi an bemarga sogsunnad,
ACT 20:27 ar bemargi bipisaale Bab-Dummad-Igar-Nued-Maid an gwen odukussulid. Degisoggu, bemar igi-gualile, bemargindo, bar anginsurdo.
ACT 20:28 ”Bab-Jesús dulemar-egadga-guega na e-abegi baksad. Emide, Bab-Dummad-Burba-Isligwaled bemarga a-dulemar-dakega be-nug-imasmalad. Degisoggu, bemar nue-salakarmar, degi, a-dulemar nue-akwemalo. Ar igi dulemar sibad-wawaad-edarbemala, deyob Jesúsʼba-nanaimalad be edarbemarmogoed.
ACT 20:29 Ar an wisid, an bemar-idu-nadele, an-sorba, dule-bamalad achu-burburud sibad-wawaad-gunnedyob dognonimaloed, gwenadgan-Jesúsʼba-nanaimalad-oichononimaloed.
ACT 20:30 Ar bemar-abarginbela gwenna-gwenna Bab-Jesús-gayaburba oakalodmaloed. Bukidar Jesúsʼba-nanaimalad eba-naguega gakangi dulemar-odurdakdagoed.
ACT 20:31 Degisoggu, nue-salakarmar. Nue-insamalo, birgapaa bane-bane, ibginedba, mutikidba, ibyanis-abalagi, an bemarga binsaed-nued-ukdii nanasad.
ACT 20:32 ”Gwenadgan, emigindi, Bab-Dummadga an-na bemar-uksun, adi, nued bemar-akwega, degine, Bab-Dummad-dulemargi-nabir-binsaed na bemarga obemarbalid. We-gayaburba-nuedi nabir be-ogannomalaga gangued nikad. Degi, Jesucristoʼgi-akasmaladba nibneggi-ibmar-nuegan-uklegoedi, bemarga uklemogoed.
ACT 20:33 Be-manibina, be-olobina, degi, be-molabina an gwen-sogdii nanassulid.
ACT 20:34 Ar bemar nue-wismalad, an-ibmar-abeged-bakegala, degi, anba-gudimaladga-ibmar-bakmogagala an arbasad, an-surgangi an na mani onosad.
ACT 20:35 An bemar-odurdaksad, anmar arbae-wilubbinye, adi, gwenadgan-ibmarbina-sogdimalad bendakegar. Bab-Jesús-sogsadi, bemar ebinsae-wilubmalad. Weyob sogsad: ‘Dule-ibmar-abingaedba, dulemarga-ibmar-ukedgi Bab-Dummad bur dulegi ise-nued binsaed.’ ”
ACT 20:36 Pablo weyob-ibmar-sogsad-sorba, Bab-Dummadse-golega bela gwenadganbogwa yokorgi sindigar sigisad.
ACT 20:37 Bela gwenadgan bodmalad, degi, bela angaagwale Pablo-gasmalad, na e-wagar usmalad, adi, ega sogega, degimaloye.
ACT 20:38 Bela bukib-binsabukwa gusmalad, ar ade, Pablo ega sogsad, bar be an-wagar dakosurmarye. Degi, a-sorba, bela Pabloʼba urse nadegusmalad.
ACT 21:1 Gwenadgangi anmar bangudgu, urgi anmar Cos-dupse nadegumalad. Banedgine, Rodas-dupse anmar obaksamalad, geb agi, Pátara-neggweburse anmar obaksamarbalid.
ACT 21:2 Geb anmar Pátaraʼgi ur Fenicia-yarse-nae-sognai dakdapid. Anmar a-urba nakwis nadsunnad.
ACT 21:3 Anmar nadapgu, Chipre-dupgi bakar anmar-ur nasad. Anmar nasmargu, anmar-argan-sapiledsik Chipre-dup-nai anmar egi nasmalad. Geb Siria-yarse anmarga ur nagudapid. Geb agine, Tiro-neggweburse anmarga nadbalid. Ar ade, ur-anmarga-nadapidi, ibmar-semaidi Tiroʼgi obegoye sognadapid.
ACT 21:4 Agi anmar gwenadgan-Jesúsʼba-nanaimalad dakalid. A-walik anmar ibagugle (7) megialid. Gwenadgan Bab-Dummad-Burba-Isligwaledba Pabloʼga sokarmalad: “Mer Jerusalénʼse be nae.”
ACT 21:5 Ibaguglegusad-sorba (7) anmar gannar ali gusmalad. Anmar argua, bela gwenadgan-Jesúsʼba-nanaimalad na e-omeganmala, degi, e-mimmiganse-bakar, neggwebur-noedse anmar berbealid. Agi anmar demar-gaka-naba bela yokorgi sindigar-sii, Bab-Dummadse gochamarsunnad.
ACT 21:6 Agi, anmar degimaloye sogsamargu, na bela angaagwar na gasmargua, anmar urgi nakwisad. Emardi, gannar na e-negse nadmarsunnad.
ACT 21:7 Degi, anmar Tiroʼgi-nai urgi argua, Tolemaida-neggweburse an nonimalad. Agi Bab-Jesús-nuggi anmar gwenadganga doggus-nuedye sogsad. Ibagwen amar-walik anmar megismalad.
ACT 21:8 Oibosgu, anmar nagab Cesarea-neggweburse nadmalad. A-neggweburse anmar modapgu, Felipe-negse anmar dogdapid. A-dulede, Jesúsʼgi-abonolegedgi-sunmakedid, degi, dulemar-walagugle (7) Jerusalén-neggweburgi gwenadgan-bendakega-sulesmalad-wargwenadid. A-neggi, anmar wis obunnodapid.
ACT 21:9 Felipeʼde sisgan walabake nikad, amba yoo-sui-nikumalad. Amarde, Bab-Dummad-gayaburba-barsogmalad gumarmogad.
ACT 21:10 Anmar ibbigbagus-megdaedgine, dule-wargwen Bab-Dummad-gayaburba-barsoged, Judea-yargi-mai nonikid. A-dulede, Agaboʼye nugad.
ACT 21:11 Agaboʼde anmarse ataknonikid. Geb Agaboʼde Pablo-e-molidub susa imaksad. Geb agi na dukin e-mali-edichad, e-argan na edichabalid. Deyob imaksagu, weyob sogded: “Bab-Dummad-Burba-Isligwaled soged: ‘Weyobi Jerusalénʼgi Judíoʼmar we-molidub-ibed-edinmaloed, degi, Judíoʼsurmaladga a-dule-ukmarbaloed.’ ”
ACT 21:12 Anmar Agabo-degi-soge-itosgu, anmar Cesarea-dorganmala, Pablo mer Jerusalénʼse-naega, egi wilenai gusmalad.
ACT 21:13 Pabloʼdi anmarga sokalid: “¿Ibiga be bomarsunna? Bukib-binsaega be an-imakarmalad. Bato an guagwar gudiid, ar an-edinmarye-sogele, akarsulid. Jerusalén-neggweburgi Jesucristo-nuggi-burgweye an sogele, an guakwagwad.”
ACT 21:14 Ar anmar geg Pablo-binsaed ogwagussoggu, anmar ega sogdesunnad: “Bab-Dummad-sogedba bega ibmar gusun.”
ACT 21:15 Geb a-ibagan-sorbali, anmar guagwar ibmar-sedmaloed amismalad. Geb Jerusalén-neggweburse anmar nadsunnad.
ACT 21:16 Anmarba Cesarea-akar gwenadgan-Jesúsʼba-nanaimalad, nadmarmogad. Gwenadgan-Cesareaʼginmaladba Chipreʼgined-wargwen, Mnasónʼye-nugadi danigusmogad. Anmar Jerusalénʼse modapgu, gwenadgan Mnasón-negse anmar-sesmalad, ar ade, a-neggi anmar megoye sogsad. Mnasónʼde gebe-Bab-Jesúsʼba-naigusad-duled.
ACT 21:17 Jerusalénʼse anmar mosgu, gwenadgan-Jesúsʼba-nanaimalad bela weligwar anmar-abindaksamalad.
ACT 21:18 A-banedgine, anmar Pabloʼba Santiagoʼse atakapid. Agine, Jesúsʼba-nanaimalad-e-idumalad bela bukwa gusmalad.
ACT 21:19 Pablo amar-argan-gasad-sorbali, amarga bela Judíoʼsurmaladgi eba-Bab-Dummad-ibmar-imaksadi sognai gusad.
ACT 21:20 Bela Pablo-itosmargu, Bab-Dummad-nug ogannodmalad, geb Pabloʼga sogdemalad: “Gwenad, be dakena, ibiyobi miliba (1,000) bukidar Judíoʼmar Bab-Jesúsʼgi bengussuli, degite, wemarde amba Moisés-Igar-Mesisadba dabimarbalid.
ACT 21:21 Emide, Judíoʼmar-Jesúsʼgi-bengussurmalad begi sunmakmalad, Pablo, Judíoʼsurmalad-abargi Judíoʼmar-mamaid-odurdakdiiye, ega sogdiiye: ‘Melle Moisés-Igar-Mesisadba bemar damaloye, abgan-uka-duku-siked-igar mer imakmarbaloye, degine, anmar-dadgan-igar-mamaidba mer damarbaloye.’
ACT 21:22 Ar dulemar be-wisgudamalogua, bede noniye, ¿igi anmar ega sogoe?
ACT 21:23 ”Degisoggu, anmar-bega-ibmar-sogedba be imako: Anmar-abargi wegi walabake-dulemar-gudiidi, bato Bab-Dummadga sogsamalad: ‘An bega ibmar samaloye.’ Amar degi-sogsamaladi, Bab-Dummadga deyob imakedsegad.
ACT 21:24 Degisoggu, a-sapingana be sedo, amarbo be na san-swilidik-imaked-igar imako. Degi, sailagia-swiri-imalaga ega be bennukbaloed. Adi, dulemar magar be-dakoed, begi-sunmakmaladi, we gakanye. Degine, magar dakmarbaloed, bede, be Moisés-Igar-Mesisadba nue-nanadimoye.
ACT 21:25 ”Ar Judíoʼsurmalad-Bab-Jesúsʼba-nagusmaladgardi, anmar bato garda narmaksad. Ega anmar sogsad: ‘Ibmar-bab-dummadga-imaklegedga ibmar-uklesmalad mer gunmaloye, degi, mer abe gobmarbaloye, agine, ibmar gammu-gaar-oburgwilesmalad mer gunmarbaloye, degi, mer galagwensuli negsichigi ome-dikarba, degi, sui-dikarba yoledii gumarbaloye.’ ”
ACT 21:26 Degisoggu, Pablo dulemar-warbakegwad sessunnad, degine, banedgine, amarbo Moisés-Igar-Maidba na san-uruksamarsunnad. A-sorba, Pablo, Bab-Dummadse-goled-negse dogded, adi, dule-irwa-Babse-gormalad-owisogega, sana na san-burba-uruked-ibagan ega berguoe, adi, a-ibagi, na wala-walagwenad-nuggi Bab-Dummadga ibmar-ogumakar-ukleged ukegar.
ACT 21:27 Deun, bato san-uruksad-ibagan ibagugle-modanikidgi (7), Judíoʼmar-Asia-yarginmaladi Pablo-dakarmalad, Bab-Dummadse-goled-negyaba gudii. Amar bela dulemar-oulusmalad. Geb degi, Pablo-gasmargu,
ACT 21:28 binnasur gotemalad: “¡Israel-dulemar, an-bendakdamar! We-dule bela-neggweburmar-irba anmar-dulegi isdar-sunmakdiid. Dule-odurdakdiid, mer Moisés-Igar-Maidba be damarye, degine, we-Bab-Dummadse-goled-neg-siidgi isdar-sunmakdibalid. Deginbali, we-dule, Bab-Dummadse-goled-negse Griego-dulemar-odosbalid. Ar wede deyob igar maisulid, ar ised. Degisoggu, we-neg-nued-isligwar-siid iwisasad.”
ACT 21:29 Ar ade, Jerusalén-neggweburgi Pablo-daksagusmalad, Éfesoʼgined-Trófimoʼye-nugadbo gudii. Degidbali, na binsasmalad, Pablo Bab-Dummadse-goled-negse Trófimo-odosye.
ACT 21:30 Degisoggu, bela-dulemar-neggweburginmaladi oimakarmarsunnad, ber-bulale Pablo-gaega duurmakdemalad. Pablo-gasmargu, ise-ebipiar Bab-Dummadse-goled-neggi onosmalad. Yog e-iduar yawagak edisa imaksamalad.
ACT 21:31 Dulemar Pablo-iblogednaga-gunanaidgine, Roma-sorda-dummad-owisosmalad, ega sogsamalad, bela Jerusalén-neggweburgine dulemar urwebukmarye.
ACT 21:32 Degisoggu, Roma-dule-sorda-dulatar-sediid e-sordamarse gochad, degi, sordagan-dummaganse gochabalid, geb dulemar-urwebukmaladse bela duurmakarmalad. Dulemar, Roma-sorda-dummad, e-sordamarmala-dani dakarmargu, Pablo-sarsonanaid indaas imaksamalad.
ACT 21:33 Geb Roma-sorda-dummad dulemarse warmakdapgu, Pablo-gadapid. Geb esgoro-dub-goabogi edinnoye igar uksad. A-sorba, geb dulemarse egichided: “¿We doa-dule? ¿Wede ibu oakalosa?”
ACT 21:34 Ar dulemar bela goledigibisoggu, Roma-sorda-dummad aku-itosunnad, ar ibiga wede nue urwebukmala, ar ade, bela oimakbukwad. Degisoggu, Roma-sordamar-ambikued-negse Pablo-sesmarsunnad.
ACT 21:35 Sordamar-ambikued-neg-arsan-mosgu, sordamar gukingi-mai Pablo-sesmalad, ar dulemar ber na barmesnanaid.
ACT 21:36 Ar ade, dulemar sorba-duurmakdanimalad, binnasur gordanimalad, we-dule oburgwileged bur nabirye.
ACT 21:37 Roma-sordamar-ambikued-negse Pablo-odosokarmargu, Pablo, sordamar-e-dummadga sogded: —¿Sunna an bega wis ibmar sogsale? Roma-sorda-dummad Pablo-abin sogded: —¿Sunna Griego-gaya be sunmaksi? Wissurye an be-biendo.
ACT 21:38 Andi Egipto-duleye an be-biendo, ar a-dulede, emisgwasaar neg-oimakdii gusad. A-dule, sordamar-milibake (4,000) nega-dulesulidganba sesa gusad. Andi a-duleye an be-biendo.
ACT 21:39 Geb Pablo abin-sogded: —Suli. An Judío-duled. Tarso-neggweburgi an gwalulesad. Tarso-neggweburde, Cilicia-yargi nue-nug-nikamogadid, an a-duledo. Wis dulemarga sunmakega be an-imake.
ACT 21:40 Roma-sorda-dummad Pablo-sunmakega imaksasunnad. Pablo arsangi gwisgusgua, dulemar-boo-imakega argan oyosad. Dulemar bela boo ambikusgua, Hebreo-gayaba amarga sunmakded. Weyob sogded:
ACT 22:1 “Babgan, gwenadgan, nue be an-itomalo, an na san-bendakega an ibmar sogoed.”
ACT 22:2 Dulemar Pablo ega Hebreo-gayaba sunmakar itoarmargu, bur bule bogidik ambikusmalad. Pablo weyob sogded:
ACT 22:3 “An Judío-dule gued. Cilicia-yargi, Tarso-neggweburgi an gwalulesad. Degi-inigwele, wegi Jerusalénʼgi an dungusad, odurdaked-saila-dummad-Gamalielʼye-nugadi, an-odurdakedga gusad. A-dule, anmar-dadgan-igar-maidba nue an-odurdaksad. Igi bemar emi-ibagi dulemar Bab-Igargi yolebisur be abemala, an deyobi, dulemar Bab-Igar-Maidgi yolebisur an abedii gusmogad.
ACT 22:4 Iduardi, Jesús-igarba-nanaimalad-oburgwegala baregindii an gusad. Omegan, degi, machergan esgaryase-metega ebipidii an nanasad.
ACT 22:5 Deyob an gudigusadi, dule-irwa-Bab-Dummadse-goled-bur-dummadi, bela Judío-girmar-dummagana nue wismalad. Ar amar anga garda uksagusmarbalid, adi, gwenadgan-Judíoʼmar-Damascoʼgi-bukmaladga ukegar. Adi, degidbali, Jesúsʼba-nanaimalad-gaegar. Degisoggu, dulemar-Jesúsʼba-nanaimalad-gaega, degi, sabsur-odurdakbaliga, geb Jerusalénʼse-sedagega Damascoʼse an nadegusad.”
ACT 22:6 Pablo sogdebalid: “Igarba an nadapgu, bato Damasco-neggwebur-walikgusgu, nega-yorukudsik, ukiar nibneggi binnasur angi gwallu-mee ganonikid.
ACT 22:7 Degidbali, napase an aimukuded. Agi gayaburba gole, anga soge an itosad: ‘Saulo, Saulo, ¿Ibiga be an-baregindii?’
ACT 22:8 ”Abin an sogded: ‘¿Dummad, be doasunna?’ A-dule an-abin imaksad: ‘Ani an Jesús-Nazaretʼginedid. Ar ani be an-baregindiid.’
ACT 22:9 Ar anba-nadapmaladdi gwallu-mee-gasad nue daksamalad, degi, nue gwayismarbalid, degi-inigwele, dule-anga-ibmar-sogsaddi aku itosmalad.
ACT 22:10 ”Geb ega an sogdesunnad: ‘Degite, Dummad, ¿ibu imakbi be an-abesunna?’ Degi, Dummad-Jesús weyob anga sokalid: ‘Be gwisgu, Damasco-neggweburse be nae, agi be-ibmar-imakoye-soglesad, bega soglegoed.’
ACT 22:11 Geb an-sordamar argangi-ise-sear Damasco-neggweburse an-sesmalad. Ar ade, gwallu-mee-angi-gasadbali, ibya-sobmor an gusad, geg bar-atake an naded.
ACT 22:12 ”Damascoʼgi dule-wargwen, Ananíasʼye-nugad, mai-gusad. A-dulede, Moisés-Igar-Maidba nue nanadimogad-duled, degine, bela Judíoʼmar-Damascoʼgi-mamaid egi nueganbi sunmakmalad.
ACT 22:13 Ananías anse nonigu, anga sognonikid: ‘Gwenad-Saulo, gannar mag be atak gubarsun.’ A-wachigi yog gannar atakar an naded. Geb an Ananías magar daksad.
ACT 22:14 ”Ananías anga sogdebalid: ‘Anmar-dadgan-e-Bab-Dummad be-susad, adi, na e-ibmar-abemaid be wisguegar, degi, Bab-Dummad dule-napiragwad-barminonigusad mag be dakegar, degine, e-gayaburba sanar be nue itobaligar.
ACT 22:15 Emide, be nue-daksadi, degi, be nue-itosbalidi, bela dulemarga be sogoed.
ACT 22:16 Emide, ¿ibu be bar abdaksunna? Be gwisgue, Bab-diigi-ogleged-igargi be obnasun. Jesús-nuggi Bab-Dummadse be gorsun, adi, ulubgi be gwage-isgunaid bega eliegar.’ ”
ACT 22:17 Pablo sogdebalid: “Jerusalénʼse an gannar nonigua, Babse-goled-negse Babse-golega an nadegusad. An nue Babse-gorsiidgine, an ibya-apurusad.
ACT 22:18 Agi Dummad-Jesús an dakalid, anga soge: ‘Gwae Jerusalénʼgi be nae, ar dulemar-weginmaladi, be angi-sunmakoedgi beba ibsaosurmalad.’
ACT 22:19 ”An ega sogded: ‘Dummad-Jesús, bela dulemar an-wismalad, an dulemar esgaryase sedega Judíoʼmar-onmakednegse dulemar-begi-bensurmalad-baregindiidaed wismalad, degi, sabsuli an a-dulemar-sarsodidaed wismarbalid.
ACT 22:20 Aginbali, wismarbalid, Esteban-begi-sunmaked-oburgwenanaimargu, an gwichi gusmogad. Nabir an itogwichi gusad, degine, Esteban-oburgwenanaimalad-e-mor-gaega an gwichigusad wismarbalid.’
ACT 22:21 ”Ar Dummad-Jesús anga sokalid: ‘Suli, be-itogosurmalad. Degisoggu, dikasur be nae, ar dulemar-Judíoʼsurmaladse an be-barmidoed.’ ”
ACT 22:22 Dulemar Pablo-deyob-sogsa-itosmargu, bela itobukmalad oimakarmalad, sogdemalad: “¡We-dule be oburgwe! ¡Bar-dulagudii abelesuli!”
ACT 22:23 Ar bela binnasur oimakbukwad, na e-mor-dummad-yoyoid mie-mie imakdemalad, ukub niba mie-mie imakdemarbalid. Adi, oyogega Pablo-ibmar-soged abingasurmarye.
ACT 22:24 Geb Roma-sorda-dummad e-sordamarga sogded, neg-gandikid-yaba Pablo-odoye. Igar uksabalid bibyobaloye, adi, Pablo ega sogega, ibiga dulemar egi nue-oimakarmarye.
ACT 22:25 Ar bato Pablo-bibyogegala edinnar ganimargua, Pablo, Roma-dule-sorda-dulatar-sediid (100) e-walik-gwichidga, sogded: —¿Ar bega igar maisi, Roma-dulega igar-itossuli bibyogoye?
ACT 22:26 Roma-dule-sorda-dulatar-sediid deyob-ega-soge itosgua, e-dummadse naded, ega sogdapid: —¿Ibi be imaksokali? Nue salakar. Ar we-dule, Roma-duled.
ACT 22:27 Roma-sorda-bur-dummad Pabloʼse naded, ese egisdapid: —¿Ar wede nue-nabiri, be Roma-dule? Pablo, abin-sogded: —Eye, nabiri, an Roma-dule.
ACT 22:28 Degi, Roma-sorda-bur-dummad Pablo-abin sogded: —¿Degbali? Andi Roma-dulega-guega mani-dummad an misad. Pablo abin-sogded: —Andi bato gusgu gwalulesad-akale, Roma-dule gued.
ACT 22:29 Sordamar-Pablo-bibyosokarmaladi, degi-soge-itosmargu, egi bangudmalad. Roma-sorda-bur-dummadse-bakar, itoargu, Pablo Roma-duleye, dobe itonadmogad, ar ade, igar-maisulidba Pablo-edinnega igar-uksa gusad.
ACT 22:30 A-banedgine, Roma-sorda-bur-dummad, ar nue wisgubisoggu, ibiga Judíoʼmar Pablo-isdar-dakmala, a-ular, Pablo-esgoro-dubgi-atinnaled esiksad. Geb dule-irwa-Babse-gormalad-e-dummaganse, degi, Judío-dummagan-igar-nabiromaladse gochasunnad, adi, Pabloʼga igar-itomalagar. Geb dummagan-abarse Pablo-ogwisnonisunnad.
ACT 23:1 Pablo, Judío-dummagan-igar-nabiromalad-nue-nuu-dakdegu, amarga sogded: —Gwenadgan, emi-ibadse Bab-Dummadgi gwen an nodii itolesulinad, nueganbi an nanadii itolemoganad.
ACT 23:2 Dule-irwa-Babse-goled-bur-dummad-Ananíasʼye-nugadi, Pablo-walik-bukmaladga sogded: “Pablo be gayagi bibyoye.”
ACT 23:3 Pabloʼdi abin-sogded: —¡Be yogasaar-darba-sunmake-dule gued! ¡Bab-Dummad sabsur-be-sarsomogoed! ¿Dummadga be siidgi, igar-nikaa igar-maidba be anga igar-amiega sisursi? Emide, be-sunnad Igar-Maidgi be yolenaid. An-bibyomalaga be igar-uknaid. ¡Deyobsuli!
ACT 23:4 Pablo-dikarba-bukmalad Pabloʼga sogdemalad: —¿Ibiga be dule-irwa-Babse-goled-bur-dummadga weyob ibmar-soge?
ACT 23:5 Pablo, abin-imakded: —Gwenadgan, andi we dule-irwa-Babse-goled-bur-dummadsurye an bienad. Ar Bab-Dummad-Gardagi weyob narmakar naid: ‘Melle dule-be-neggwebur-semaid be ukabsao.’
ACT 23:6 Pablo, magar-daksagu, abala Saduceoʼmar bukwa, degi, abala Fariseoʼmar bukwa, gandikidba binnasuli goted. Sogded: —Gwenadgan, an Fariseo-sunsogedid. An-baba, Fariseoʼga gusmogad. Emide, dule-burgwisar-gannar-durguoye-sogleged-igargi an bensulid-ular, be angi gwisgunanaid.
ACT 23:7 Pablo weyob sogsagua, Fariseoʼmar, degi, Saduceoʼmar, na abin-abin imakarmalad. Degidbali, bar igar itolessulid. Ar Saduceoʼmarde akar binsamalad, Fariseoʼmarde akar binsamarmogad.
ACT 23:8 Ar ade, Saduceoʼmarde sogmalad, dule burgwisale, geg bar gannar durguye. Degi, baliwiturmar surbarye, aginbali, ibmar-burbaled surbarye. Fariseoʼmardi, akar sogmarmogad, bela we-ibmar nikaye sogmalad.
ACT 23:9 Degisoggu, bela oimakedigibimalad. Abala Garda-Narmaked-Dulemar, Fariseoʼmarmogad. Amar sogdemalad: “We-dule, gwen ibmar-isgana-imakdii an daksulid. Ar burba-nued ega ibmar sogsale, baliwitur ega sunmaksadibe, nue salakarmalo, abakalegi Bab-Dummadgi an yoledamalale.”
ACT 23:10 Na abin-abin-imaknanaid aka bur-gannaleded. Degidbali, Roma-sorda-bur-dummad dobe itoalid, abakalegi Pablo emarse san-dubamakalirye binsaalid. Agala, sordamar barmisad, adi, gandikidgi oimakbukwad-abargi, Pablo-sedagega, gannar Roma-sordamar-negse nidagegar.
ACT 23:11 A-banedgi mutikidgine, Bab-Jesús, Pabloʼse magarosad, ega sokalid: “Pablo, mer sikirmako, gandik-sao. Igi wegi Jerusalénʼgi an-nuggi be sunmaksa, deyob Roma-neggweburgi an-nuggi be sunmakdapaloed.”
ACT 23:12 A-banedgine, gwenna-gwenna Judíoʼmar Pablo-oburgwega igar amismalad. We-Judíoʼmarde ise-sogar sogsamalad, emarde, Pablo-oburgwedse geb mas gunmaloye, geb ase gobmarbaloye. Emisgindi, emarde mas gunnosurye, gobosurmarbarye sogsamalad. Ar deyob imaksulile, emarde sabsur-odurdakleged bur nabirye.
ACT 23:13 Dulemar-deyob-sogsamaladi e-dulabo-gwena (40+) mergumalad.
ACT 23:14 Geb dule-irwa-Babse-gormalad-e-dummaganse, Judíoʼmar-girmar-dummaganse, nadmarsunnad. Amarga weyob sogdapmalad: “Anmar igar-geg-bar-osuloged mesismarye, anmar sogsamarye, Pablo-oburgwedse geb mas gunmaloye, geb ase gobmarbaloye. Emisgindi, anmar mas gunnosurye, gobosurmarbarye. Ar anmar deyob imaksulile, sabsur-odurdakleged bur nabirye, anmar sogsamalad.
ACT 23:15 Degisoggu, bemar, degi, Judío-dummagan-igar-nabiromaladi, anmarga Roma-sorda-dummadse be egismaloed, ega yamo be sogmaloed: ‘Bane, anmarga be Pablo sedabi an abeye, anmar nue ega igar baramiegarye, ega be sogmaloed.’ Anmardi igarba guagwar Pablo-oburgwega ambikumaloed.”
ACT 23:16 Pablo-e-niga, dulemar-deyob-sognanaid-itosgu, Pablo-owisogega Roma-sordamar-ambikued-negse nadegusad.
ACT 23:17 Degi, Pablo Roma-dule-sorda-dulatar-sediid-wargwense (100) gochad, ega sogded: —Be-dummadse we-machigwa be sede. We-machigwa be-dummadga ibmar-soged nikad.
ACT 23:18 Roma-dule-sorda-dulatar-sediid (100) e-dummadse machigwa-sessunnad. E-dummadga sogdapid: —Pablo-esgaryagi-mellesiid anse gochado, anga sogdo, besega we-machigwa sedaye. Ar ade, we-machigwa bega ibmar sogoye.
ACT 23:19 Roma-sorda-bur-dummad argangi-gasa machigwa-imaksad, geb bachikii sesad. Geb ega sogded: —Degite, ¿ibi be anga sogbie?
ACT 23:20 Geb machigwa ega ibmar sokarsunnad: —Judíoʼmar na igar-amismalad bese egismalagar, bane Judío-dummagan-igar-nabiromaladse Pablo-sedaye, emarde nuekwaa Pabloʼga igar amibimarye, yamo bega sogmaloed.
ACT 23:21 Mer be amar-itogo. Machergan-e-dulabo-gwena (40+) igarba dukuar edarbebukmaloed. Amar sogsamalad, Pablo-oburgwedse geb mas gunmaloye, geb ase gobmarbaloye. Emisgindi, emarde mas gunnosurye, gobosurmarbarye, sogsamalad. Ar deyob imaksulile, emarde sabsur-odurdakleged bur nabirye, sogsamalad. ”Emide, guakwaa bato bukwamalad. Unnila be-ibmar-sogoed edarbebukmalad.”
ACT 23:22 Degi, Roma-sorda-bur-dummad gannar machigwa-barmisad, ega sogsad: —We-ibmar be-anga-sogsadi melle dulemarga sogoye.
ACT 23:23 Roma-sorda-bur-dummadi sordamar-dulatar-sediid-warbogwadse gochad, ega weyob igar uksad: —Emi-mutik Cesarea-neggweburse be Pablo-sedmalaga wachi-ilabakebakad-idu (9), guakwaa sordamar be urbemalo. Weyob-mergu sordamar be sedoed: Sordamar-nagab-nanamalad, dulataled-ilabo (200). Moli-birgi-sii-nanamalad, dulapaa-gakambe (70). Degi, sordamar-eswar-swiswidikidgi-urwemalad, dulataled-ilabo (200).
ACT 23:24 ”Deginbali, Pablo-sedega moli-amimarbalo, adi, nuedgi, gwen akar-gussuli Dummad-Negdakmaid-Félixʼye-nugadse, Pablo moegar.”
ACT 23:25 Roma-sorda-bur-dummad amarba weyob garda narmakar barmisad:
ACT 23:26 “Wegi Claudio-Lisias, Dummad-Félixʼga garda-barmisiid. ”Bitigi be nued-gudina gadin.
ACT 23:27 ”Emide, Judíoʼmar, we-dule-gasmalad. Oburgwesokarmalanad. An wisguargua, we-dule, Roma-duleye, an-sordamar-abargi, Judíoʼmar-annik an suapmalad.
ACT 23:28 Nue-wisguegala, wede ibiga Judíoʼmar Pablo-isdar-dakmala, Judío-dummagan-igar-nabiromaladse igar-itogegala an seapid.
ACT 23:29 Agi an dakalid, unnila Judíoʼmar na e-igar-maidgi-yolediiye-sogedbali we-dulegi gwisgunanai. Ar andi an dakedi, gwen neg-oakalossur an daked. Degisoggu, gwen-oburgwileged-igar ega maisulid, degi, esgaryagi meted-igar ega gwen-maisurbalid.
ACT 23:30 ”Ar emide, an wisguargu, Judíoʼmar we-dule-oburgwega, igar amismarye, aga an bega we-dule barmisiid. Degine, e-isdarmaladga an sogsabalid, bese igar itonamaloye. Adi, bega nue sogmalaga, we-dulede ibigi nue-nodii dakmala. Wese an bega sogdo. Be itogua, deese.”
ACT 23:31 Degine, sordamar ega igar-uklesadba mutiki Antípatrisʼye-neg-nugadse Pablo-sesmalad.
ACT 23:32 A-oibosadgine, sordamar-nagab-nadmaladi gannar e-negse nonimalad. Sordamar-moli-birgi-sii-nadmaladdi Pabloʼba nadegumalad.
ACT 23:33 Amar, Cesarea-neggweburse modapmargu, Dummad-Negdakmaidga garda ukdapmalad, degi, aga Pablo-uksamarbalid.
ACT 23:34 Dummad-Félix garda-absosad-sorba, be bialidye Pabloʼga sokalid. Ciliciaʼginedye wisguargu,
ACT 23:35 ega sogded: —Dulemar-begi-gwisgunanaid-nonikile, an bega igar itogoed. Félix e-sordamarga igar uksad, “Nue edarbiagwar Herodes-neg-Pretorioʼye-nugadgi we-dule be omesmaloye.”
ACT 24:1 A-ibataled-sorba, dule-irwa-Babse-goled-bur-dummad-Ananíasʼye-nugadi, Judíoʼmar-girmar-dummagan-abargi Cesareaʼse nonikid. Degine, dule-irwa-sunmaked-wargwen Tértuloʼye-nugad, senonimalad. Bela wemala, Pabloʼgi-gwisguega, Dummad-Negdakmaid-asabin nonimalad.
ACT 24:2 Pablo-senonimargu, Tértulo, Pabloʼgi-gwisguega, Dummad-Félixʼga sogded: —Dummad, binsaed-nikaa be negsemaidbali, doggus-nuedye anmar bega sogdo. Emide, be-nuggine, anmar-yargi bogidiki negselemaid. Degi, be anmarga ibmar-barmimaidi, ibnuedga anmarga gumaid.
ACT 24:3 Degisoggu, Dummad-Félixʼye, bela be anmarga ibmar-ukmaidbali, doggus-nuedye anmar bega sogmarsundo.
ACT 24:4 Mer bar bega undar-suitii sunmakegala, anmar bega sogsundo, wis anmar-itobi an be-abeye.
ACT 24:5 ”Nabir, emide we-dule dakleargu, dule-isgana-sunnad dakleardo, anmarga neg-oichodiid. Bela Judíoʼmar-bukwad-iliba gudii daed. Yamo Judíoʼmar-ourwedii daed. Aginbali, Jesús-Nazaretʼgined-sordamar-e-dummadga gudibalid.
ACT 24:6 Deginbali, Bab-Dummadse-goled-neg-siid ichobiguarbalinad. A-ular, anmar we-dule-gasmalanad, degi, anmar-igar-mamaidba anmar saesokarmalanad.
ACT 24:7 Degi-inigwele, Roma-sorda-bur-dummad, Lisiasʼye-nugadi, anmarse achanonikid, gandikidba anmargi we-dule-sunonikid.
ACT 24:8 Degine, anmarga soglealid: ‘Bemar we-dulegi sunmakbiele, Dummad-Félixʼse naergebye.’ Aga anmar bese nonimarsundo. Emidi, be-sunnad sunna ese be egised, agi be dakoed, wede anmar-egi-sunmaknaid, bule nabir anmar egi sognai.”
ACT 24:9 Judíoʼmar igar-itolenaidgi-bukwamarmogadi sogmarmogad, bela Tértulo-ibmar-sogedi nabiridbi sogye.
ACT 24:10 Geb Félix, Pablo-osunmakegala, ese achasad. Pablo weyob sogded: —Emide be dikasurgusa we-yalaga igar-nabogedga-be-maidi an nue-be-wisid. Degisoggu, an na dukin be-asabin san-bendakesokalidi an yeer itoged.
ACT 24:11 Ar be-sunnad sunna aimarse be egismogad, wede sana Jerusalénʼse an noniki. An Jerusalénʼse Bab-Dummad-nug-odummogega-nonikid-akale, amba yoo an ibambe-gakabo (12) gued.
ACT 24:12 Ar dulemar-angi-gwisgunanaidi, gwen dulemarbo abin-abin-imaknai an-daksasurmalad. Bab-Dummadse-goled-neggi, Judíoʼmar-onmakedneggi, degi, neggweburgi dulemar-ourwenai gwen an-daksasurmarbalid.
ACT 24:13 Degisoggu, we-dulemar geg bega sogmalad, e-ibmar-sognanaid, we nabirye.
ACT 24:14 ”Soggwendi, napira an bega sogodo: Anmar-dadgan-e-Bab-Dummad-nug an odummodiid. Na emardi sogmalad we-igar, igar-isganaye. Degine, Moisés-Igar-Maidgi an bensulid. Bab-Dummad-gayaburba-barsogmalad-e-narmaksadgi an bensurbalid.
ACT 24:15 Deginbali, we-dulemar bensurmalad, dule-nuegan-burgwismaladi, dule-isganamar-burgwismaladi, gannar-ega-durgued-ibagan nonikoye. Ar we-dulemaryopira an Babgi-bensulidgi ibagan-deyob-gued an abdakdimogad.
ACT 24:16 A-ulale, Bab-Dummad-asabin, degi, dulemar-asabin, mer bingegugwichi guegala, Bab-Dummadgi gwen isgubi an itodasulid. Degisoggu, an na gwen neg-oakalos itosulinad.
ACT 24:17 ”Emide, birgabargusa neggwebur-baiganba an bipirmakdiidgine, gannar Jerusalénʼse, an-dulemarse an nonikid. Dulemar-wileganaga-mani-berbegega an nonikid, degi, Bab-Dummadga ibmar-ukbaliga an nonibalid.
ACT 24:18 Degi-gunai, bato igar-maidba an na san-uruksadgine, Judíoʼmar-Asia-yarginmaladi Babse-goled-neggi an-dakarmalad. Dulemar-bukidarad-abargi-gudii gwen an-daksasurmalad, degi, neg-oimaknai gwen an-daksasurmarbalid.
ACT 24:19 ”Dulemar-an-daksamaladi, be-asabin gwichiwilubmalanad, adi, angi sunmakmalagar, ibigi an nue-nosa an-daksamala.
ACT 24:20 Ar sulile, wemarse be egisdo, deun, Judío-dummagan-igar-nabiromalad-asabin an gwisgusgu, bule nue-nosa an-daksamarmoga.
ACT 24:21 Unnila amar-abargi an gwichigua, binnasuli an gandikidba weyob gote gusad, dule burgwisar gannar durguye. An deyob-sogsad-ulale, emi-ibagi bemar angi yolenanaiye.”
ACT 24:22 Félixʼde Bab-Jesús-igar bato nue-wissoggu, Pablo-ega-deyob-soge-itosgua, ega igar-itolenaid itirisad, obelossurgusad. Geb Félix, Judíoʼmarga sogded: —Roma-sorda-bur-dummad-Lisiasʼye-nugad, wese-nonikidse gannar an bemarse gormarbalo.
ACT 24:23 Degi, Félix, Roma-dule-sorda-dulatar-sediidga (100) igar uksad, gannar Pablo-e-maidse Pablo-seedye. Degine, ega igar uksabalid, Pablo nabir wis garmakdii imakmaloye. Deginbali, e-aimar ese atakdanikile, melle igar-gaoye.
ACT 24:24 A-ibagan-nasad-sorba, Félix gannar nonikid, e-ome-Drusila-ebo nonikid. E-omede, Judío-duled. Félix Pabloʼse gannar gochabalid. Agine, Pablo ega Jesucristoʼgi-bensuli-guedgi-sunmaksigusad itosii gusad.
ACT 24:25 Ar Pablo ega igar-napiragwadgi, na dukin-san-bargaedgi, degi, Bab-Dummad-yoedse-na-igar-nabirogoedgi ega sunmakargu, Félix dobe-itonaded, Pabloʼga sogded: —Emidi be nagwer. Ibagwengi, an binsa-gudiidgi, an gannar bese gorbaloed.
ACT 24:26 Félix gannar-gannar Pablo-ebo-sunmakega ese gornai gusad. Ar ade, Félix binsaed, abakalegi Pablo esgaryagi-mellesiidgi-noegala, ega mani ukalirye.
ACT 24:27 Birgabo-nasad-sorbali, Félix dummadga-maid bergunonikid. Geb e-sorba, Porcio-Festoʼye-nugadi dummadga megnonimogad. Ar Félix, Judíoʼmar egi nued-sunmakegala, esgaryagi Pablo-mete naded.
ACT 25:1 Festo Cesarea-neggweburse dummadga megnonigusad. Ibapaagus-dummadga-megedgine, Festo Jerusalénʼse nadegusad.
ACT 25:2 Agi dule-irwa-Bab-Dummadse-gormalad-e-dummagan, degi, Judíoʼmar-nuga-nikamaladi Pabloʼgi-ise-yolegar Festoʼga sunmaksamalad.
ACT 25:3 Dummad-Festoʼse egichiarmalad, bitigi be anmarga gannar Jerusalénʼse Pablo-sealina gadinye. Ar emardi yamo deyob sogsamalad, adi, Pablo-sedanimalale, igarba oburgwemalagar.
ACT 25:4 Ar Festo amar-abin sogded: “Pablo bato Cesareaʼgi esgaryagi mellesiid. Ar emisgwasaar an Cesareaʼse-naedgi binsamaibalid.
ACT 25:5 Ar bemar igar-nudakbimalale, sunna be-sapin-dummagan anba namardo, adi, weba bemar Pabloʼgi-yolegar-ibmar-sogbimalad sogmaloed.”
ACT 25:6 Ar Festo unnila ibabaabakdibe (8), ibambedibe (10) Jerusalénʼgi gudigusad, geb agi, Cesareaʼse gannar nonikid. A-banedgine, Festo Igar-naboged-gangine sigisgu, Pabloʼbina gochad, e-asabin sedamalagar.
ACT 25:7 Pablo igar-itoged-negse dognonigu, Judíoʼmar-Jerusalénʼgi-danimaladi Pablo-ebiris igar-itoged-neggi ambikunonimalad. Sogdemalad: “Pablo nue-yaisur neg-ichodiiye.” Degite, geg nue-sogmarbardo, ar igi nue neg-ichodii.
ACT 25:8 Geb Pablo na san bendakegala, sunmakded. Weyob sogded: —Emi, an gwen ibmar oakalossulid. Judíoʼmar-igar-mamaidginbela an gwen yolessulid, Bab-Dummadse-goled-negginbela an gwen ichakwaa sunmaksasulid, degi, Roma-saila-dummadginbela an gwen yolessulid.
ACT 25:9 Ar Festo Judíoʼmargi warmakbisursoggu, Pabloʼga sogded: —Jerusalénʼgi an bega igar-itogega ¿Jerusalénʼse be nabie?
ACT 25:10 Pablo, Festo-abin sogded: —Roma-saila-dummad-igar-itoged-neggi bato an gwichibinned. Ar wegi anga igar nabirogergebed. Ar be nue wisid, Judíoʼmar-igar-mamaidgi an gwen annassulid.
ACT 25:11 Ar an nue-dummad-nosale, igar-dummad an oakalosale, akarsurdo, an burgweye soger, an burgodo. Ar emigindi, wemar angi-sunmaknanaid ar nabirsursoggu, geg dule, Judíoʼmarga an-ukdo. Degisoggu, an egissundo, Roma-saila-dummad-César anga igar-nabogoye.
ACT 25:12 Geb Festo, ega-binsaed-ukmalad-ebo-sunmaksad-sorba, Pabloʼga sogded: —Ar Roma-saila-dummad-César bega igar-nabobi be abeye sogsoggu, Roma-saila-dummad-Césarʼse be naodo.
ACT 25:13 A-ibagan-nasad-sorba, Rey-Agripa e-bun-Berenice-ebo Cesarea-neggweburse Festoʼse ataknonimalad. Nued-sogeye ega sognonimalad.
ACT 25:14 Ar undar Festo-walik megiarmargu, Festo, Rey-Agripaʼga Pablo-igar ogwaarsunnad, ega sokalid: —Wegine, Dummad-Félix, dule-wargwen-esgaryagi-mellesiid obes naded.
ACT 25:15 Jerusalénʼse an arbigu, dule-irwa-Babse-gormalad-e-dummagan, Judíoʼmar-girmar-dummagan, we-dulegi ise-yolegar anga sunmaksamalad. Ega oburgweye anse egichismalad.
ACT 25:16 An weyob amar-abin-imaksad, anmar-Roma-dulemar-igar-nabiromalad-dummaganga deyob igar maisurye. Geg dule na san bendaksasuli yogsaar oburgwileye. Dulegi-sunmaklenaid na san-bendakegala, dulemar-egi-yolegar-sunmaknanaid-abargi sigmogargebye.
ACT 25:17 ”Degisoggu, aga Judíoʼmar wese nonimargu, gwen an sanargussulid, a-banedgi yog Igar-naboged-gangi an sigisad. Geb Pabloʼbina an gochad, anse sedamalagar.
ACT 25:18 Pabloʼgi-ise-yolegar-sunmakdimalad egi sunmakarmargu, andi, Pablo igar-dummad-oakalosye, sogdamaloye an bienad. Ar dakargu suli, gwen Pablo neg-oakalodii an itossulid.
ACT 25:19 Unnila na Judíoʼmar e-Bab-Dummad-igarginbi Pablo-ebo abin-abin imaksamalad. Degi, dule-wargwen Jesúsʼye-nugad burgwisadi, Pabloʼdi soged, we-Jesús gannar durgusye, emi dula gudiiye.
ACT 25:20 ”An we-igar nue-wissursoggu, igi an baramioe. A-ulale, Pabloʼga an sogded, Jerusalénʼgi an bega igar-itogega, Jerusalénʼse be nabi sogeye.
ACT 25:21 Ar Pablo, Roma-saila-dummad-César-Augustoʼye-nugad, ega-igar-itogoye egichissoggu, Césarʼse barmidedse an esgaryase odosbarsundo.”
ACT 25:22 Geb Agripa, Festoʼga sogded: —We-dule, an-uayagwar an itobimodo. Festo, abin-sogded: —Degir banebakas, we-dule be-uayagwar be itogodo.
ACT 25:23 A-banedgine, Agripa, Berenice-ebo ise-nue-nudakale nonikid. Roma-sorda-dummagan-abargi, neggweburgi-girmar-nuga-nikamalad-abargi, Igar-naboleged-negse dognonikid. Festo Pabloʼbina gochad. Geb igar-itogedse Pablo selenonisunnad.
ACT 25:24 Degi, Festo weyob sogded: “Rey-Agripa, degi, girmar bela bemar anmar-abargi-bukmalad, emigindi, we-dule be dakmar. Judíoʼmar bukidar we-dulegi anga ise-yolegar egi sunmakedbimalad. Judíoʼmar-Jerusalénʼgi-bukmaladi, degi, wegi Cesareaʼgi-bukmarbalidi, anga sogedbimalad, we-dule-oburgwed bur nabirye.
ACT 25:25 Ar andi an dakedi, gwen ibmar-oakalossur an daked. Degisoggu, an binsa oburgwedago-itole. Ar na e-dukin Roma-Dummad-Augusto-César ega igar-itoye egichisad. Degisoggu, an ase barmidedgi binsasundo.
ACT 25:26 ”Degine, an-dummad-Césarʼse an we-dule-barmidegala, an wissulid igi an we-dulegi sogoe. A-ulale, we-dule an bemarse sedanisundo. Rey-Agripa, bega bur an urmaksundo, adi, we-dulese be ibmar egismogagar. Degidbali sunna we-ibmar-egislegoedba an-dummadga an garda narmakmogoed.
ACT 25:27 Dummad-Césarʼse an we-dule barmidegala, nue-sogergebed ibiga we-dule esgaryagi odurdaklesii. Ar degisulile, an binsa we-dule barmido-itole.”
ACT 26:1 Degi, Agripa, Pabloʼga sogded: —Na be dukin-san-bendakega sunmakdeen. Pablo argan onakwisa imaksad, weyob sogded:
ACT 26:2 —Rey-Agripa, emi-ibagi, an be-asabin-sunmakesokalidi, ibiyobi an weligwar itoge. Judíoʼmar angi ise-yolegar-sunmaknaidgi na san-bendakesokalidi, an yeer-itoged.
ACT 26:3 Ar Judíoʼmar-daed be nue-wisid. Degine, ibu-igargi anmar na abin-abin imaknanai, be nue-wisbalid. Degisoggu, na bega sogsun, bitigi bargaakwaa be wis-an-itosii gusana gadinye.
ACT 26:4 Pablo sogded: “Ar bela Judíoʼmar an-wisid, an sapingwagwad-akar an-dulemar-abargi, igi an gudii gusa, degine, an-wismarbalid, igi an Jerusalénʼgi gudii gusbali.
ACT 26:5 Deginbali, bela an-wismarbalid, an gusgu sapingwagwad-akar Fariseo-sunnadga an nanadii gusad. Ar bega sogbimalale, sunna bega sogmalad, ar nue-wismalad. Anmar-dadgan-igar-gannarba-mesisadba an nanadii gusad.
ACT 26:6 ”Emidega, Bab-Dummad anmar-dadganga-ibmar-ise-sogar-sogsadgi an bensulidgine, we-dulemar sabsur-angi-ise-yolegar sunmaknanaimarsunnad.
ACT 26:7 Anmar na dadgan-sogambe-gakabo-gumaladi (12), Bab-Dummad-ise-sogar-ibmar-sogsad-guoed edarbedimalad. A-ulale, bane-bane mutik-mutik Bab-Dummad-nug-ogannodimarsunnad. Rey-Agripa, ar an we-igar-nue-bensuli-edarbediid-ular, we-Judíoʼmarse solegagwar an be-asabin selenonisunnad.
ACT 26:8 Pablo Judíoʼmar-bukmaladga sogded: ¿Ar bemarde benmosi? ¿Ar Bab-Dummadde dule-burgwisad gannar geg odulo be insae? ¿Ibiga bemar bensunna? Suli, sunna oduloge.”
ACT 26:9 Pablo sogdebar: “Gebeunni, an binsadaenad, Jesús-Nazaretʼginedgi an galagwensuli egi gwisguergebye.
ACT 26:10 Deyob, Jerusalénʼgi an imaksad. Dule-irwa-Babse-gormalad-e-dummagan anga igar uksadbali, Jesucristoʼba-nanaimalad bukidar esgaryagi an metegusad. Degine, amar-oburgwenanaile, oburgweye, an gorgwisdamogad.
ACT 26:11 Imbagwenale, Judíoʼmar-onmakednegyaba doge-doge an gudii daed. Jesúsʼba-nanaimalad-sabsur-imakdidaed. Jesúsʼgi ichakwa-sunmakmalaga an imakdidaed. Weyob, an Jesúsʼba-nanaimalad-baregindii an nanasad. Bela amar an nue-isdardakdii gussoggu, neggwebur-baiganse-bakar, an amar-baregindii gusad.”
ACT 26:12 Pablo sogdebalid: “Degidbali, dule-irwa-Babse-gormalad-e-dummagan-sogedbali Damasco-neggweburse an nadapidgine,
ACT 26:13 yorukudba nibneggi binnasur dad-gaedba bur dutusur angi gwallu-mee ganoniki an daksad. ”Rey Agripa, nue be itogena. A-gwallu-gaedi bela anmar-ebilis ganonikid.
ACT 26:14 Degi, bela anmar napase aimukudmalad. Geb agi, anga gayaburba Hebreo-gayaba soge an itoalid: ‘Saulo, Saulo, ¿ibiga be an-baregindii? Ikogi be didii annaye sogele, na be dukin nunmaked amioed.’
ACT 26:15 ”Geb an sogdesun: ‘Dummad, ¿be doasunna?’ Degi, Dummad anga sogded: ‘Ani an Jesús, ar ani be an-baregindiid.
ACT 26:16 Emigindi, be gwisgusun, nue an-itogo. An-maiga-guega an bese magarononikid. Dule-baiganga ibmar-daksadgi-sunmakega, degine, ibmar-guoed-an-bega-sogbaloed-sogega an bese magar-gunonikid.’
ACT 26:17 ”Dummad-Jesús anga sogdebar: ‘Judíoʼmarse, degi, Judíoʼsurmaladse an be-barmid. Amar be-oakalobigualile, ani an be-ollor-imakoed. Amarse, an be-barmid:
ACT 26:18 Adi, amarga be ibya egaegar, mer negsichidgi bar garmakdii gumalagar, nabir bur gwallu-meegwadgi gudigumalagar, mer nia-saila-Satanás-ganguedba bar-nanamalagar, nabir Bab-Dummad-igarba nanamalagar. Amarse an be-barmid, angi mer bar bengumalagar. Geb degiir, e-isgudiid Bab-Dummad ega elioed, degi, nabir nibneggi angi-akasmaladba ibmar-nued nikumarmogoed.’ ”
ACT 26:19 Pablo sogdebalid: “Dummad-Rey-Agripa, Bab-Jesús nibneggi anse gochadba, mer ibmar saodeeye, an gwen-binsassulid.
ACT 26:20 Gebesaila Damascoʼgi-bukwamaladgar-inse an sunmaksad, degi, Jerusalénʼginmaladga, geb bela Judea-yalaganba, degine, bela Judíoʼsurmaladga, an we-igargi sunmaksad. Amarga an sogsad: ‘Be Bab-Dummadse be aibirmar, be-isguedga be bukib binsamar, be-daed be ogwamar, degi, ibmar-nuegan be imakmar. Adi, bemar be-isguedga be bukib-binsasmaladi, be-daed-gwagsamaladi, magar daklemalagar.’
ACT 26:21 ”An-deyob-sunmakdiid-ulale, Judíoʼmar Bab-Dummadse-goled-neggi an-gasmalad, agi, an-iblobi guarmalanad.
ACT 26:22 Bab-Dummad-an-bendaksad-ular, amba emi-ibagi an dula bemar-abargi an gwichisunnad. Dule-dummaganga, degi, dule-yaiganaga Jesucristo-igargi an sunmakdisunnad. Igar-baigangindi gwen an sunmakdisulid. Unnila Moisés, degi, Bab-Dummad-gayaburba-barsogmaladi ibmar-guoye-sogsadginbi an sunmakdiid.
ACT 26:23 Weyob sogsamalad: ‘Cristo, Bab-Dummad-dule-wargwen-barmidagoye-sogsad-dule, burgwega we-napnegse nonikoye. Burgwisad-sorba, e-inse gannar durguoye, degi, gwallu-neg-mee-imakedyob anmar-Judío-dulemarga, degi, Judíoʼsurmaladga gunonikoye.’ ”
ACT 26:24 Pablo na dukin san-bendakegala, weyob-soggwisgu, Festo binnasur goted, sogded: —Pablo, be oessi, weyob be sunmaked. Doggus-ibmar-durdakedbali be oes itoged.
ACT 26:25 Pablo, Festo-abin sogded: —Dummad-Festo, an oes-itosuli. An-ibmar-soggwichid nue-napiragwadba an soggwichid.
ACT 26:26 Ar Rey-Agripa we-ibmar nue-wisid. Agala, an e-a-asabin gwen dobsuli sunmakgwichid. An insagua, we-ibmar-gusad bela Rey-Agripa wis an insado, ar we-ibmar arbakee imaklessulid.
ACT 26:27 Geb degi, Pablo, Rey-Agripaʼga sogded: —Degite, Rey-Agripa: ¿Bab-Dummad-gayaburba-barsogmalad, we-ibmar-sogsamalad, be bensuli? An wisi, be bensulid.
ACT 26:28 Degi, Agripa Pablo-abin sogded: —Ichee-napin, sunna Bab-Jesucristoʼba naguega be an-imaksar-itole.
ACT 26:29 Degi, Pablo, Agripa-abin sogded: —Bab-Jesucristoʼba-naiguega, ichee-napindibe, ichesur-napibalindibe, an binsado, bitigi Bab-Dummadgi be, degine, bela-an-itobukmaladi anyobi gusmalana gadin. Unnila esgoro-dubgi-an-atinnar-gwichiyobdi an be-abesurmalad.
ACT 26:30 Geb Rey-Agripa gwisgusad, degi, dummad-negdakmaid-Festo, degine, Berenice, degi, bela-eba-igar-itogegedgi-sigismalad gwisgusmarmogad.
ACT 26:31 Degi, dummagan ainidmargu, bachikii na sunmakarmalad. Muchub-muchub sogdemalad: —We-dule gwen-ibmar-oakalossulid, oburgwilegewilubsulid, esgaryagi-mellesii guedwilubsurbalid.
ACT 26:32 Degi, Agripa, Festoʼga sogded: —We-dule-esgaryagi-mellesiid na sogsasulina, Roma-saila-dummad-César ega igar-nabogoye, nabir onolegoendo. Emide, bato sogsabinned. Geg bar oakaloledo.
ACT 27:1 Dummagan Italiaʼse anmar-barmidye sogsamargu, Pablo, degi, dule-baigan-esgaryagi-bukmalad, Roma-sorda-dulatar-sediid-Julioʼye-nugadga (100) uksamalad. We-Julioʼde Roma-sorda-danagwen-sediid-Augustaʼye-nugad-e-dummad-gwensakgadid.
ACT 27:2 Degi, bela anmar Adramitio-neggwebur-urgi nakwismalad. A-ur Asia-yarse nae sognaid. Deun, anmarba Aristarco nadmogad. Aristarcoʼde, Macedonia-yarginedid, Tesalónica-dolad.
ACT 27:3 A-banedgine, Sidón-neggweburse anmar modapid. Julio, Pabloʼgi nued binsassoggu, Pabloʼga igar uksad, adi, nabir e-aimarse ataknaegar, adi, e-aimar sunna ega ibmar ukmalagar.
ACT 27:4 Sidónʼgi anmar bangudbargu, burwa anmar-asabin gormaid. Degisoggu, anmar burwa-idu-dukuega Chipre-dup-gakaba nasmalad.
ACT 27:5 Geb anmar Cilicia-yar-asabin, degi, Panfilia-yar-asabin-nasmarbargu, Mira-neggwebur-Licia-yargi-siidse modapid.
ACT 27:6 Roma-sorda-dummad-Julio, Miraʼgi Alejandríaʼgined-ur amisad. A-ur Italiaʼse naesognaisoggu, a-urgi anmar-onakwisad.
ACT 27:7 Degine, ibbigbasaale anmar undar binnaa nadapgusad. Undar anmar imaksadgine, Gnido-neggwebur-asabin anmar nasagusad. Ar burwa anmar-asabinsoggu, Creta-muru-Salmónʼye-nugad-asabin Creta-dup-urba gakaba anmar nassunnad.
ACT 27:8 Creta-gakaba beedse anmar na imaknadapmargu, ur-nagumalad-Buenos-Puertosʼye-nugadse, anmar modapid. A-waliksaar, Lasea-neggwebur siid.
ACT 27:9 Ar ibagan-beedsegus nadapgussoggu, anmar urgi-naed undar guarsunnad, ar ade, bato Mas-Gunsuli-Gudigued-Iba nasad. Degisoggu, demar-dummad-gued-e-wilubgan omosad. Agala, Pablo dummaganga binsaed ukarsunnad,
ACT 27:10 sogded: “Aimar, an dakgua, anmar nasokalidi anmar beedse naibigudago an dakdo. Anmar-ibmarbi yoggussuliled, anmar-urse-bakar, degi, anmar-sanburbase-bakar, berguer berguoed.”
ACT 27:11 Roma-dule-sorda-dulatar-sediid (100) Pablo-ega-ibmar-sogedba gwen imaksasulid, ar bur bule ur-sorgaed-sogedba, degi, ur-ibed-ega-sogedba igar-imaksad.
ACT 27:12 Ar ur-naguegala, ur-nagued-neg nuedsursoggu, bur bule sokarmalad, anmar nadegumaloye, adi, Fenice-neggweburse momalagar, agi nagumalagar. Feniceʼdi Creta-dupgi urmar-nagued-nuegan nikad. Agi ur-naguedgi be gwichile, dad-nakwed-argan-sapiledsiki-baksaar, degi, dad-nakwed-argan-nuedsiki-baksaar bela atakleged.
ACT 27:13 Degi, dad-nakwed-argan-nuedsiki burwa-nued binnasdikii gollargu, degibi ega sadeguoye bismalad. Degisoggu, naegala, esnas ebismarsunnad. Geb Creta-dup-gaka-naga-nagaba nadmarsunnad.
ACT 27:14 Sikwas anmar nanaedgine, anmargi burwa-dummad-Euroclidónʼye-nugadi noalid.
ACT 27:15 Anmar geg ur abingagussoggu, anmar-ur burwa-dummadba selemai-selemai guded.
ACT 27:16 Dad-nakwed-argan-nuedsiki dupu-senigwad-Claudaʼye-nugad-urba anmar nasad. A-urbardi, burwa-binnasur gormaisulid. Agine, wis nabir anmar urbode gadapid.
ACT 27:17 Geb anmar urbode ur-dummadse onakwismalad. Geb ur-dummad mer-marega dubgi anmar ebirmaksamalad. Abakalegi ukub-naid-Sirteʼye-nugadgi, ur mellealirye-binsaedba, anmar urmor esusmalad, adi, anmar binna-binna selemai-selemai guegar.
ACT 27:18 A-banedgine, amba burwa binnasur gormaisoggu, anmar-ur dogbigualid. A-ular, anmar ibmar-semaidi demarse mie daklearsunnad.
ACT 27:19 Degi, a-ibapaagwad-sorba, ur-ibmarse-bakar, anmar mie daklealid.
ACT 27:20 Nue-neg-atinaidba ibbigbasaar dada, degi, niisgwamar gwen bar daklessulid. Ar burwa binnasur nomaisoggu, gwen anmar bar san-onogodeeye binsassulid.
ACT 27:21 Ar ibbigbagus anmar mas-gunsursoggu, Pablo emar-abargi gwisgusgu, emarga sogded: “Aimar, an-bemarga-ibmar-sogsadba bemar ibmar-imaksamalana, anmar Creta-dupgi noarsulindo. Weyob anmar wilenaisulindo, degi, weyob anmar-ibmar yoggunaisurbalindo.
ACT 27:22 Ar degi-inigwele, mer bukib binsamalo, gandik na be imakmalo, ar dule-wargwensaar na san-burba yogguosulid, unnila urbi yogguoed.
ACT 27:23 ”Ar mutiki Bab-Dummad-baliwitur anse arbid. Ar an Bab-Dummadgadsoggu, ar an ega arbabarsoggu, e-baliwitur anga barmialid.
ACT 27:24 A-baliwitur anga weyob sogsad: ‘Pablo, mer dobguo. Ar Roma-saila-dummad-asabin be gwisgunaergebed. Bab-Dummadi be-ulale, dulemar-urgi-nadapmalad bela abonogoed. Wargwensaar dule gwen burgosulid.’
ACT 27:25 Degisoggu, an-aimar, gandik be imakmar. Ar Bab-Dummadgi an nue-bensursoggu, an wisdo, baliwitur-anga-ibmar-sogsadba ibmar guoe.
ACT 27:26 Degisoggu, anmar dupu-gwensakse ukubnaidgi biokoo megdapirgebed.”
ACT 27:27 Degine, anmar ibambe-gakabakegus (14) gannar-gannar Adriático-demargi-seledigua, nega-gabigwenadbali, selamar gaka-modaniye biarmalad.
ACT 27:28 Degisoggu, selamar urdubgi dii wilub-imaksamalad, wisguega, bule dii wiladibeye. Wilub-imaksamargua, dali-dulagwen (20) wirgu daklealid. Agi sikwas nadbargu, gannar wilub-imakdemarbalid. Agindi, daliambe-gakatar (15) wirgu daklealid.
ACT 27:29 Abakalegi ur akwamargi-yolealirye anmar binsaedbali, esnas-gwabake ursorba anmar egwachamalad. Bitigi gwae-oibosana gadinye anmar binsabukwa guarmalad.
ACT 27:30 Degi, selagan, arbak-wakinnedgi binsaarmargu, demarse urbode-odesmalad, yamo ur-asuba esnas-egwansokaliyob imaksamalad.
ACT 27:31 Ar Pablo Roma-dule-sorda-dulatar-sediidga (100), degi, sordamarga sogded: “We-selamar uryagi ambikusulile, bemar bar san-onogosulid.”
ACT 27:32 Degi, sordamar urbode-atillenaid-dub siksamalad. Demargi urbode argwatesunnad.
ACT 27:33 Bolegoedbali, Pablo mas-gunmalaga aimar-ogannonai gusad. Pablo weyob sogded: “Ibambe-gakabakegus (14) bemar gwen nue gabdisulid, gwen nue mas gundisurbalid.
ACT 27:34 Degisoggu, bemar wis mas gunmar, ar a wis bemar-ogannogoed. Be-sailagia-gagwensaale gwen bei yogguosurmalad, bela bemar durgumaloed.”
ACT 27:35 Pablo deyob-sogsad-sorba, madu susad, geb bela aimar-wagab Bab-Dummadga dog-nuedye sogsagu, madu bichisad, geb guted.
ACT 27:36 Agine, belagwapa niga gangudmalad, degi, mas guchamarmosunnad.
ACT 27:37 Belagwapa anmar urgi-nadapidi, dulataled-ilabo-gakadulapaa-gakambe-gakanergwa (276) mergued.
ACT 27:38 Bela nue-immeles-mas-guchamalad-sorba, madubur-bukwad demarse mismalad, adi, wis ur ukuu saegar.
ACT 27:39 Oibosgu, ur-selamar aku neg dakmalad bia gunanai. Degine, sukun-bipigwadgi ukub-nued nai dakarmalad. A-ukub-nued-naidse dogega demar-gakase ur sedye sokarmalanad.
ACT 27:40 Degisoggu, urdub-esnasmargi-atinnanaid siksamarsunnad. Esnasmardi bar-onakwissurmalad. Degi, ur-sorgaed-atinnaid-dub siksamarbalid. Geb urmor-asubalid onakwismalad, burwa-gormaidba ukub-nued-naidse ur-sesmalanad.
ACT 27:41 Amba yoo gakase nue-moe, ur demar-nukamaksiidsik melleded, ukubgi yoledapid. E-asu ukubgi nue-dogsa megisad, e-sordi, demar-daomakmaidba mamarided.
ACT 27:42 Roma-sordamar dulemar-esgaryagi-bukmalalad-selemamaid oburgwemaloye sogdemalad, adi, melle dapumakar wakinmalagarye.
ACT 27:43 Ar Roma-dule-sorda-dulatar-sediid (100) yapa-Pablo-oburgwesoggu, dule-galebukmalad-oburgwega imaksasulid. Aka bur sogded, dulemar-sunna-dapumakmalad-inse demarse babatoye, adi, dapumakar ukubse warmakegarye.
ACT 27:44 Baigandi urgogi, degi, ur-goamargi obakmaloye sogsad. Degidbali, belagwapa dulemar nueganbi gakase warmaksamalad.
ACT 28:1 Anmar bela neg-dinnase-obaksadba bendaklesmargu, anmar wisgualid, dupude Maltaʼye nugad.
ACT 28:2 Malta-dupginmalad nue-yeer anmar-abindaksamalad. Ar dii-winaisoggu, degi, neg-diopibarsoggu, soo-abin-waega anmarga soo ogasmalad.
ACT 28:3 Pablo sapan-dinnagana amisgusad. Soogi sapan-urbenaigua, naibe-nuedi, neg-uee-itoalidba noalid, geb Pablo-e-argangi warmaknonikid.
ACT 28:4 Dulemar-dupginmaladi Pablo-argangi naibe-nued bannumaknai daksamargu, na ga sokarmalad: “We-dule, nue-dule-gindaked an dakdo. Aisaar demargi wakichanad, degi-inigwele, anmar-bab-dummad-igar-napira-imakedi, gwen dula-gudii imakbisur an daked.”
ACT 28:5 Pablo na e-argan mid-mid-imaksagu, naibe-e-argangi-naid soo-yagi argwated. Pablo gwen akar-gussulid.
ACT 28:6 Bela-dakbukmalad Pabloʼga argan-engudagoye bismalad, degi, ukiar yasuu burgwidoye bismalanad. Undar-sanarguedgi, gwen Pablo akar-gussuli dakarmargu, e-binsaed gwagdemalad, nab bab-dummad an dakye sogdemalad.
ACT 28:7 Anmar-bukwad-waliksaar nainu naid. A-nainude, dule Publioʼye-nugadgadid. Publioʼde Malta-dupugine dummadga-maid. A-dule, ise-nuedgi anmar-abindaksad, ibapaa anmar-akwisad.
ACT 28:8 Dakargu, Publio-bab uellemaid, uelleged daarmaknaid, disegad naibalid. Pablo ase ataknad gusad. Pablo ega Bab-Dummadse gochad-sorba, a-dulegi argan mesisgu, nuguded.
ACT 28:9 Deyob gusad-sorba, dulemar-Malta-dupginmalad-uellemamaidi, nuguega Pabloʼse nonidamarmogad. Pablo bela amar-onudaksad.
ACT 28:10 Degi, Malta-dupginmaladi anmarga nue ibmar uksamalad. Geb anmar urgi naesokargu, anmar-ibmar-abemaladi, anmarga nue-uksamarbalid.
ACT 28:11 Anmar nii-walapaa dupugi-megisad-sorba, gannar urgi nadmarbarsunnad. A-urde, a-dupugi dii-wied-nii-naigusad-akar naimogad. A-ur, Alejandría-neggweburginedid. E-asu-dukugi, Griego-e-bab-dummad-wilub walabo sobar naid: Cástor, degi, Pólux.
ACT 28:12 Degine, anmar Siracusa-neggweburse modapmargu, agi ibapaa anmar nagusmalad.
ACT 28:13 Agi anmar bangudbargu, gaka-gakaba anmar nadapgusmalad, geb Regio-neggweburse anmar modapid. Ibagwen-gusad-sorba anmarga dad-nakwed-argan-nuedsik burwa gollalid, degi, banedgine, neggwebur Puteoliʼye-nugadse anmar modapid.
ACT 28:14 Agi anmar gwenadgan-Jesúsʼba-nanaimalad dakarmalad. E-walik wis itoged-irgwensaar megye anmarga sokalid. A-sorba, anmar Roma-neggweburse nadsunnad.
ACT 28:15 Gwenadgan-Jesúsʼba-nanaimalad-Romaʼginmalad, bato anmar-danikid wisgusmarsoggu, anmar-abin Foro-De-Apioʼye-neg-nugadse, degi, Tres-Tabernasʼye-neg-nugadse nonimalad. Pablo gwenadgan-dakargu, yeer itosad. Bab-Dummadga dog-nuedye sogsagu, e-gwage gannaled.
ACT 28:16 Romaʼse anmar modapgu, Roma-sorda-dulatar-sediid (100) galesmalad-edarbemalad-e-dummadga bergwapa gales-semamaid ukdapid. Ar Pabloʼgardi neg akar amismalad, adi, wargwen bachikii megegar. Unnila nue egi nakulegega, Roma-sorda-wargwen ega amismalad.
ACT 28:17 Ibapaagus Pablo Romaʼgi meged-sorba, Judíoʼmar-dummaganse Pablo gochad. Amar bela ambikusmargu, amarga sogded: “Gwenadgan, an Judío-dulemargi, degi, anmar-dadgan-igar-mamaidgi gwen annasur-inigwele, Jerusalén-neggweburgi gales an barmilealid. Roma-dulemarga an urmakles gwichisunnad.
ACT 28:18 ”Roma-dummagan anga igar itosmargu, ar an ibmar oakalossursoggu, burgwed-igar gwen anga maisur daksamalad. Degisoggu, an-onobi guarmalanad.
ACT 28:19 Ar Judíoʼmar-Jerusalénʼginmalad yapa an-onogedbali, an sogdesunnad: ‘Roma-saila-dummad-César anga igar nudakoye.’ An deyob-sogsadi an-dulemargi ise-yolegar-sunmaknaega an sogsasulid.
ACT 28:20 A-ulale, an bemar-dakega, degi, bemarbo-sunmakbaliga, an bemarse gochasunnad. Epenne, Bab-Dummad Israel-dulemarga sogsad: ‘Yoedse bega dule-wargwen an barmidagoye.’ Emide, Israel-dorgan nue-bensulidgi a-edarbediidgi an sunmakdiid-ular, wegi esgoro-dubgi gugmakles an gwichisunnad.”
ACT 28:21 Degi, Judíoʼmar-dummagan Pablo-abin sogdemalad: “Anmar bipisaale Judea-yargi garda gwen abin-dakmaisulid, degi, gwenadgan begi galagwensuli sunmakega gwen nanamaisurbalid.
ACT 28:22 Ar degi-inigwele, ar anmar-sunnad be-itobimogad, igi we-igar-gwapidgi be binsae. Ar we-igar-gwapid-nosadgi, ber mesagwar neg-ugakaase egi sunmakedbimalad.”
ACT 28:23 Degisoggu, ambikued-iba ega nasismarsunnad. A-ibagi, bukidar Judío-dummagan Pablo-maidse nonimalad. Pablo agi wakudaryala sunmakded, emarga Bab-Dummad-e-negdakmaidgi sunmaksii osedosad. Jesús-igargi aisaar emar-gwage-ogwaena-gadinye-binsaedba, emarga aisaar oyonai gualinad, igi Moisés-Igar-Mesisadi, degi, Bab-gayaburba-barsogmalad-ibmar-sogsadi, Jesúsʼgi bela deyob gusa.
ACT 28:24 Abala, Pablo-ibmar-sogsad nabir sogye sogdemalad, degi, abala, gwen-abingassurmalad.
ACT 28:25 Ar na balibi binsabuksurmarsoggu, ainied-iduar Pablo amarga napi sogdesunnad: “Nabir, Bab-Dummad-Burba-Isligwaled anmar-dadganga sogsagusad, deun, Bab-Dummad e-gayaburba-barsoged-Isaíasʼga weyob sogsagusgu:
ACT 28:26 ”Be nae, we-dulemarga be sogna: ‘Be ibmar nue-itomalo-inigwele, akusunna be itomaloed, be ibmar nue-dakmalo-inigwele, akusunna be dakmaloed.
ACT 28:27 We-dulemar-e-gwage dutusuli gudmalad, akusunna-ibmar-itoge nadmalad. Akusunna-ibmar-dakedga gudmalad, akusunna ibmar itodmalad. Degisulile, e-ibyagwale ibmar-dakdoed, e-uayagwale ibmar-itodoed, degi, e-gwagegi magar-ibmar-itodoed, e-isguedga bukib binsadmaloed. Degidbali, nudake an dakledagoed.’ ”
ACT 28:28 ”Degisoggu, bemar wisigar, we-ulubgi-Bab-Dummadgi-abonolegedi, Judíoʼsurmaladga uklenaisunnad, ar amardi itogoed.”
ACT 28:29 Pablo wegi-sogsad-sorba, Judíoʼmar ainidmarsunnad, na beedse abin-abin igarba imaknadap gusmalad.
ACT 28:30 Agi Pablo nue birgabo e-neg-bennukmai-gusadgi megisad. Bela dulemar-ese-iirmakmai-gusmalad-abindakmai gusad.
ACT 28:31 Pablo, dobsuli, dule-e-igar-gadisuli, aimarga Bab-Dummad-e-negdakmaidgi sunmakdii gusad. Degi, Dummad-Jesucristo-igargi aimar-odurdakdii gusbalid. Be itogua.
ROM 1:1 Ani an Pablo, Jesucristo-e-mai. Bab-Dummad anse gochad, Jesús-e-sapin-bur-dummadga-gumogaga, degine, Bab-Dummad na e-Gayaburba-Nuedgi-sunmakega, an-susbalid.
ROM 1:2 Ar Bab-Dummadi, we-Gayaburba-Nued, E-Garda-swilidikidgi e-gayaburba-barsogmaladba bato iduar sogsagusad.
ROM 1:3 We-Gayaburba-Nued na E-Machi ukoedgi sunmaked. We-dule, anmar-Dummad-Jesucristoʼd. Dulesiki, David-wagwad.
ROM 1:4 Bab-Dummad-Burba-Isligwaledsikdi, we-Jesucristo, Bab-Dummad-Machid. Ar Bab na e-ganguedgi Jesucristo-burgwar-mai gannar-odurgusadba mag daklenonikid, Jesucristoʼde, Bab-Machid.
ROM 1:5 Jesucristo, na e-nug-dummarba-nikadba anmargi-nued binsasad, degi, e-nuggi-barmilealidga anmar-imaksabalid. Adi, bela yar-baid-baidgi-dulemar-bukmalad Jesucristoʼgi bensuli gumalagar, degi, eba ibsamalagarba.
ROM 1:6 We-dulemar-abargi, Jesucristo bemarse gochamarmogad, adi, bemar egadga gumarmogagar.
ROM 1:7 Bemar, Roma-neggweburgi-bukmalad Bab-Dummadse-nue-sabguledimalad, degi, na egadga-guega bese-gochamalad, an bemarse garda narmaksiid: Bab-Dummad-anmar-baba, degi, Dummad-Jesucristo, bemargi nued binsamarsun, degi, ulubgi-bogidikid-itogega bemar imakbarsun.
ROM 1:8 Gebegine, an Jesucristo-nuggi, bemar-ulale, an-Bab-Dummadga an dog-nuedye sogdo. Ar bela we-napneg-naidgi be-Jesucristoʼgi-bensulidgi bemargi sunmakedbimalad.
ROM 1:9 Ar Bab-Dummadga an E-Gayaburba-Nued-E-Machigi-soglesadgi-sunmakdiidgi, an bela-bela gwage-ulubgi ega mailediid. A-Bab-Dummad nue an-wisid, an ese-goledgi an bemar-iedisulid.
ROM 1:10 An-Babse-goledgi an egisdiguad, ar Bab-sogedbalile, bitigi emisbinne an bemarse ataknaega anga igarmar nolloo imaksana gadinye.
ROM 1:11 An nue bemar-daknabied, adi, bemarga ibmar-burbar-nuedid ukegar. Adi abali, bemar gatik Jesús-igargi nasgumai guegar.
ROM 1:12 We-bur-an-sogedi, adi, anmar Jesúsʼgi-bensulid-emar-nikadba, na muchub-muchub ogannomalaga.
ROM 1:13 Gwenadgan, bemar wisgubi an abedo, ichesurgus an bemarse ataknaye sokardaenad, adi, an bemar-abargi Jesúsʼba-dulemar-nagued imakega, ar igi an dulemar-baigan-abargi imaksayob. Degi-inigwele, an bemarse ataknaegala, emi-ibadse an idu igar biir megisdaed.
ROM 1:14 Griego-dorganga, degi, Griego-dorgansulidga, dulemar-binsaed-ibeganga, degi, dulemar-binsaedsulidmarga, an bela Bab-Jesús-igargi sunmakergebed.
ROM 1:15 Degisoggu, a-ulale, andi bemar-Romaʼgi-bukmaladga bela-bela Bab-Dummad-Gayaburba-Nuedgi sunmakbied.
ROM 1:16 Ar Bab-Dummad-Gayaburba-Nuedgi gwen an bingesulid, ar Bab-Dummad-e-gangued gued. Adi, bela dulemar-Jesucristoʼgi-bensuli-gunonimalad abonogegar. Gebe Judíoʼmargala abonoleged-igar uklesad. Geb Judíoʼsurmaladga abonoleged-igar uklenonimogad.
ROM 1:17 Ar Bab-Dummad-Gayaburba-Nuedgi, Jesucristoʼgi-bengusulidba, Bab-Dummad-dulemar-innikisaed oyolesiid. We-Jesucristoʼgi-bengusulidi nasgumai-nasgumai gudoed. Ar igi Bab-Dummad-Gardagi narmakar-nai: “Ar dule-gwage-swilidikiddi, Bab-Dummadgi-bensulidgi gudii guoed.”
ROM 1:18 Bab-Dummad-e-urwedi nibneg-akale, dulemar-igar-inniki-imaksurmaladgi, degi, isguedgi-nanadimaladgi, oyolemaid. We-dulemar e-ibmar-isgana-imakedba, Bab-Dummad-igar-napiragwad odukudimalad.
ROM 1:19 Ar we-dulemar Bab-Dummad-maid-e-ibmar-sunna-wisguleged bela wismalad. Ar Bab-Dummad-sunnad ega bela magarosad.
ROM 1:20 Ar Bab-Dummad-e-ibmar-nikad-akudakleged, e-gangued-degisadeguad, degi, na e Bab-Dummadga-gued, napneg-nagusad-akar, na e-ibmar-obinnisadgine mag-dakle gunonikid. Degisoggu, geg dule-wargwensaale sogdo, an Bab-Dummad akudakye.
ROM 1:21 Ar dulemar-we-napneggi-bukmalad Bab-Dummad-wisgusmar-inigwele, degite, Bab-Dummad-nug gwen odummossurmalad. Degine, dog-nuedye ega gwen sogsasurmarbalid. Aka bur yogasaar ibmar-isgana-galagwensuli-imakedgi binsamalad. Degine, e-binsaed-isgusadbali, igar-nued-akudake gunonimarbarsunnad.
ROM 1:22 Dulemar-binsaed-nikamaladye na sogmar-inigwele, dulemar-binsaedsulidga gudmalad.
ROM 1:23 Degine, Bab-Dummad-gangued-yeerdakleged-nika-maid-geg-bergued-anar, e-bab-dummadga-imakega, nuchumar galagwensuli sobsamalad. Weyob-dakle nuchumar sobsamalad: Dulemar-baisursunna-berguedyob, nuumaryob, ibdula-unimaladyob, degine, ibmar-musgimakdimaladyob. We-nuchumar-nug odummosmalad.
ROM 1:24 A-ulale, Bab-Dummadi, dulemar na e-gwagegi-ibmar-isgana-imakbi-gudiid-imakega, imaksasunnad. Bab-Dummadi, dulemar-na-e-galagwensuli-binsadiid-imakega, imaksad. Abali, bingedsuli, na e-abagangi muchub-muchub dododmarsunnad.
ROM 1:25 Ar Bab-Dummad-e-igar-napiragwad-anar, bur gakan, igar-napiragwadga imakdemalad. Ar Bab-Dummad-ibmar-obinnisad-e-nug-anar, aka bur ibmar-obinnilesad-nug odummodmalad, we-ibmarga mailedmalad. Ar Bab-Dummad-e-nugdi degisadegu odummoleged. Ar deyobdo.
ROM 1:26 Degisoggu, Bab-Dummadi, dulemar bingesuli galagwensuli-guega imaksasunnad. A-ulale, abar e-omegan bar macherganbo megbisulid, aka bur ome-baidbo megbied. Na omegan-omegan igar-maisulidba galagwensuli gudmalad.
ROM 1:27 Amba deyobmogad, machergan ome-ebogwa-na-abirgunagwar-nanaed metemarmogad. Aka bur machergan-baidbo galagwensuli gudmalad. Na bingedsuli machergan-machergan galagwensuli gudmalad. Emigindi, na e-galagwensuli-daedba sabsur-odurdakleged-amismalad, na e-sangi itonanaisunnad.
ROM 1:28 Deginbali, we-dulemar Bab-Dummad-amideeye bar binsasurmarsoggu, Bab-Dummad, we-dulemar na e-galagwensuli-binsaed-imakega imaksad, adi, ibmar-isgana-imakedsulid imakmalagar.
ROM 1:29 We-dulemar, we-ibmarmarbi imakdimalad: Igar-innikigwadba igar-imaksulid, abirgunagwarsuli negsichigi nanaed, bela ibmar-isgana-galagwensuli, manibina surbinsa-itoged, bela-galagwensuli-isgued. Degine, nobedginbi binsaed, dule-gindakmalad, na abin-abin-imaked, dule-yardaked, bela ibmar-isganabi ibmakbied.
ROM 1:30 Deginbali, dulemar-dikarba-sunmaked, emargi-gakansaar-sunmaked, isdar Bab-Dummad-daked, gadi aimargi-burgued, na san-dummarba-imaked, dule-gwen-eyobsurye-soged, ibmar-isgana-imakega igar-amied, babganba ibsasulid.
ROM 1:31 Deginbali, igar-napiragwad-itobisulid, igar-maidgi-yoleged, dule-baiganbo-igar-nabobisulid, sabsur-dule-imaked, dule-wiledaksulid.
ROM 1:32 Ar we-dulemar, Bab-Dummad na e-igar-innikigwad-mesisadgi-weyob-sogmaid, nue wismalad, ar dule-we-ibmar-isgana-imakmaladgala burgwed-igar maiye. Degi-inigwele, we-dulemar unnila ibmar-isganabi imakdisurmalad, yeer-dakdamarbalid, dulemar we-ibmar-isgana imakmalar.
ROM 2:1 A-ulale, ar be doa-dule gudibe, geg na be soged, andi an isgussurye. Ar be dule-baidnik sogele, we-dule isgudiiye, ar be deyob sogedbali, na be dukin sognaido, an isgudimoye. Ar be dule-baid-ibmar-isgana-imakdiiyob be ibmar-isgana imakdimogad.
ROM 2:2 Ar anmar wisid, Bab-Dummad dulemar-we-ibmar-isgana-imakdimaladga, igar-nabogoedi, napiragwadba ega igar nabogoed.
ROM 2:3 Ar bedi, dulemar-we-ibmar-isgana-imakdimaladnik be soged, we-dule isgudiiye, degite, be deyob imakdimogad. Na be binsasunde, ¿andi Bab-Dummad-dulemar-sabsur-odurdakedgi an wakinnoye? Suli, be wakinned sate.
ROM 2:4 Ar Bab-Dummad dule-nued-daedbali bega e-ibmar-nuegan-ukmaid, be, ¿baisur dakde? Bab-Dummad mer sabsur-be-odurdakega na e-san-bargamaid, be, ¿baisur dakde? Degine, Bab-Dummad be-ibmar-isgana-imaked na e-baisur-itogeyob-maid, be, ¿baisur dakde? Ar Bab-Dummad begi-nued-binsaedba, isguedgi bangued be imakbied, ¿ar be aku itosi?
ROM 2:5 Ar be Bab-Dummadba-dabisulidbali, degi, be-isgued-mibisulidbali, Bab-Dummad-dulemar-sabsur-odurdakoed-ibagan-nonikoedga, na be dukin odurdakleged-dummad aminaid. A-ibagi, Bab-Dummad na e-igar-naboged-innikigwadi oyononikoed.
ROM 2:6 A-ibagangine, Bab-Dummad, dulemar-na-e-ibmar-imaksamaladba, ega ibmar ukoed.
ROM 2:7 Dule-ibmar-nued-imakedgi-gwen-galakussurmaladga, burba-geg-bergued ukoed. We-dulemar ibmar-nued-imakedgi nug-gangued amidimalad, nug-nued-nikued amidimalad, degi, e-nug-degisadegu-biledigued amidimalad.
ROM 2:8 Ar dulemar-gadi-urwemaladdi, igar-napiragwadba-ibsasurmaladdi, degi, ibmar-isgana-imakedgi-alamakdimaladdi, Bab-Dummad-e-urwed, e-nue-sae-itoged, itomaloed.
ROM 2:9 Bela dule-ibmar-isgana-imakdimaladga naibi-itoleged, degi, surbinsa-itoleged, Bab-Dummad ukoed. Baba, gebesailagi Judíoʼmarga-inse ukoed, geb sorba, Judíoʼsurmaladga ukmogoed.
ROM 2:10 Ar dulemar bela-ibmar-nued-imakdimaladgardi, nug-gangued, nug-nued-nikued, ulubgi-bogidik-itoleged, Bab-dummad ukoed. Gebesaila Judíoʼmargar-inse ukoed, geb sorba, Judíoʼsurmaladga ukmogoed.
ROM 2:11 Ar ade, Bab-Dummaddi bela dulemar emarbi daked.
ROM 2:12 Ar bela dulemar-Moisés-Igar-Maid-wissuli isgudiile, Moisés-Igar-Maidba gwen odurdaklegosulid. Na e-isgudiidba Bab-Dummadse sabsur-odurdaklegoed. Bela dulemar-Moisés-Igar-Maid-wisi-isgusmaladdi, Moisés-Igar-Maidba Bab-Dummadga ega igar-nabogoed.
ROM 2:13 Ar Bab-Dummad, dule-Moisés-Igar-Maidba-ibsaed, isgussuliyob daked. Ar Bab-Dummad, dule-Moisés-Igar-Maid-unnila-uayaganbi-itogeddi, eba ibsasuliddi, isgussuliyob daksulid.
ROM 2:14 Ar Judíoʼsurmalad Moisés-Igar-Maid-wissurmalad na gusgu e-daedba, Moisés-Igar-Maidba nanaele, na emar dukin igarga gumardo, ar igar-niksurmar-inigwer.
ROM 2:15 Wemar, deyobi, na e-daedgi oyomardo, ar igi-Moisés-Igar-Maid-ibmar-imakoye-sogmaidi, emarde na e-gwagegi sedimarye. Na e-ulubgi-itogedba ega igar nabolegoed. Ar ade, imbagwena, na e-binsaedi egi gwisgunonidaed, we-ibmar be noar imaksaye, igidibe, we-ibmar be nabir imaksaye.
ROM 2:16 Ar igi an Bab-Dummad-Gayaburba-Nuedgi-sunmakdii, deyobi, Bab-Dummad, Jesucristoʼba dulemarga igar-nabononikoed. A-ibagine, Bab-Dummad dulemar-na-gwagegi-ibmar-odukuar-sedimalad magar imaknonikoed. Abali, ega igar nabogoed.
ROM 2:17 Emigi nued, bemar, na be san-dummarba-itogedgi, an-Judíoʼye be sogdimalad. An Moisés-Igar-Mesisadba-nanadiiye be sogdimalad, na be san-dummarba-imakedgi an-Bab-Dummad-walikagudiiye be sogdimalad.
ROM 2:18 Degine, Bab-Dummad-ibmar-imakbied, an wisye be sogdimalad. Ar be Moisés-Igar-Maid-nue-wisidba biti bur ibmar-nuedid, an wisye be sogdimalad.
ROM 2:19 An dule-ibmar-wissurmalad-e-iduedye be sogdimalad. Ani an dulemar-negsichidgi-gudimaladga neg-mee-imakedye, be sogdimalad.
ROM 2:20 Degi, an dulemar-ibmar-wissulid-odurdakedye, be sogdimalad. Deginbali, dulemar-gebe-Bab-Dummad-igargi-onoded-odurdakedsailaye, be sogdimalad. Moisés-Igar-Maidgi bela ibmar-wisgued-danikid, degi, igar-napiragwad-danikid, an wisye be sogdimalad.
ROM 2:21 Emide, bede dule-baid-odurdakdiid, degite, ¿geg na be dukin odurdakde? Bede Bab-Igargi be sunmakdiid, mer atursamaloye, degite, ¿be atursadide?
ROM 2:22 Bede na be sogdiid, melle abirgunagwarsuli negsichigi yolemaloye, degite, ¿abirgunagwarsuli negsichigi be yoledide? Bede bab-dummadyob-ibmar-imaklemalad-isdar-dakye be soged, degite, ¿ibiga be ese-goled-neg-e-ibmar be atursasunna?
ROM 2:23 Bede Moisés-Igar-Mesisadgi na nug gannarkwaa itodiid, degite, ¿we-Igar-Maid-bisgedgi be Bab-Dummad-nug oichodide?
ROM 2:24 Ar Bab-Dummad-Gardagi narmakar naid: “Bab-Dummad-nug bemar-ular Judíoʼsurmalad-abargi icholediiye.”
ROM 2:25 Ar Moisés-Igar-Maidba be nanadiile, abgan-uka-duku-sikleged-igar bega igar-nuedga gusiid. Ar Moisés-Igar-Maidba be nanadisulirdi, abgan-uka-duku-sikleged-igar-yoo-imakedyob amba be gued.
ROM 2:26 Degisoggu, ar dule-abgan-uka-duku-sikarsulid, Moisés-Igar-Mesisadba nanadiile, dule-abgan-uka-duku-sikaledyob gued.
ROM 2:27 Ar be Moisés-Igar-Maid-wisi-inigwele, degi, abgan-uka-duku-sikleged-igar imaksa-inigwele, degite, amba be we-Igargi yolediid. A-ulale, dule-abgan-uka-duku-sikarsulid Moisés-Igar-Maidba-ibsadiidi, bemargi yolegoed.
ROM 2:28 Ar dule Judíoʼga-guega, unnila asginbi e-daklegedgi Judíoʼga gusulid. Deginbali, dule abgan-uka-duku-sikleged-igar-imaksadbali, Judíoʼga gusurbalid.
ROM 2:29 Ar Judío-dule-sunnadi na e-ulubgi gued. Degine, abgan-uka-duku-sikleged-imakleged-sunsogedi, gwageginedid, Bab-Burba-Isligwaled imaked. Moisés-Igar-Narmakar-Maidba gusulid. Judíoʼmar-deyobmaladi, Bab-Dummad amar-nug ogannoged, dulemar amar-nug ogannosulid.
ROM 3:1 Degite, we-Judíoʼga-guedi, ¿ibi-nuedga gusunna? Abgan-uka-duku-siklegedgi, ¿ibi-nued egi amilesunna?
ROM 3:2 Bela ibmar-nued-bukidar egi amilesii. Ar Bab-Dummadi, gebedgine, e-gayaburba Judíoʼmarga uksad.
ROM 3:3 Ar napiragwa, Judíoʼmar-gwen-gwena Bab-Dummadgi-bengusmalad. Ar deyob-gusadbali, ¿Bab-Dummad na e-ibmar-imakoye-sogsadi, bar imakosur be insae?
ROM 3:4 ¡Bab-Dummad na e-sogsadba imakoe! Ar Bab-Dummadi bela napiragwadbi ibmar soged, gakansasulid. Ar bela dulemardi gakansaedbiid. Ar Bab-Dummad-Gardagi sognaid: “Bab-Dummad, be-igar-nabogedgi be-Igar-Mesedi innikigwadid. Bab-Dummad, bega igar-itobimalale, be nakoed.”
ROM 3:5 Ar anmar-isgudiid, Bab-Dummad-e-igar-innikigwadba-ibmar-imaked-magardakle imakele, ¿an igi Babgi sogmalosunna? Bab-Dummad sabsur-anmar-odurdaknaid-ulale, ¿dule-isgana guye? Suli, degisuli. (We an-ibmar-sogedi, wedi dule-binsaedba an soged).
ROM 3:6 Ar deyobile, ¿igi Bab-Dummad dulemar-we-napneggi-bukmaladga igar nabogosunna?
ROM 3:7 Dule sunna soged: “An-gakansaedi, Bab-Dummad-e-ibmar-napiragwadba-soged bur bule magar-dakle imakele, deyobi, bur bule Bab-Dummad-nug odummolegele, degite, ¿ar ibiga amba an dule-isganayob an-dakmarsunna? Deyob angi soglegewilubsurdo.
ROM 3:8 Ar ibiga geg weyob soglesunna: Anmar ibmar-isgana imakmarye, adi, ibmar-nued nikuegarye.” (Weyobi dulemar gakansaar anmargi sunmakdimalad, anmarde, weyob odurdakdiiye). Ar Bab-Dummad igar-innikigwadba-ibmar-imakedsoggu, innikigwadba dulemar-degi-anmargi-sunmakdimalad-sabsur-odurdakoed.
ROM 3:9 Degite, ¿igi anmargi an sogmalosunna? ¿Anmar Judío-gumalad dule-baiganba bur dule-nuegande? Suli, degisuli. Ar bato anmar sogsabinned, Judíoʼmar, degine, Judíoʼsurmalad bela isguedbimarye.
ROM 3:10 Ar Bab-Dummad-Gardagi sognaid: “Dule-gwage-nued, wargwensaar sated.
ROM 3:11 Dule wargwensaar ibmar-mag-itoged sated, dule wargwensaar Bab-Dummad-amied sated.
ROM 3:12 Bela Bab-Dummadgi bangusmaladbiid, ibmar-nuedga gwen gusurmalad. Dule ibmar-nued-imaked, sated, wargwensaar ibmar-nued-imaked gwen nikasulid.”
ROM 3:13 “E-sunmaked neg-uan-argas-maiyob maid, E-sunmakedgi dulemar-yardakmalad.” Salmo 5:9 “Naibe-nued-e-gichi-boniyobi, e-sunmaked sedimalad.”
ROM 3:14 “E-gaya bela-bela-sae-itogedbi sedimalad. E-gaya dule-ukabsaedbi sedimalad.”
ROM 3:15 “Dulemar-oburgwega guagwar gudimalad,
ROM 3:16 We-dulemar bia nade sogele, neg-oakalos, degi, dulemar-wios naddamalad.
ROM 3:17 Degine, dulemarba bogidik-nanaed gwen wissurmalad.”
ROM 3:18 “We-dulemar, Bab-Dummad-dobe-nanaodeeye gwen binsasurmalad.”
ROM 3:19 Ar anmar wisid, bela Moisés-Igar-Maid-sogmaidi, dulemar-a-Igar-Maid-urbaligwa-gudimaladga sogmaid. Adi, bela dulemar mer sogmalaga, anmar gwen isgudisurye. Adi, bela dulemar Bab-Dummad-asabin isgusadbi daklegegar.
ROM 3:20 Degisoggu, dule-wargwensaar Moisés-Igar-Maidba-ibmar-saedgi, Bab-Dummad-asabin gwage-swilidik daklegosulid. Ar Moisés-Igar-Maidi, unnila magar-itogega anmar-imaked, anmarde dule-isganaye.
ROM 3:21 Emigindi, anmarga oyolenonikid, igi-anmar Moisés-Igar-Maidba-nanaedbarsuli, Bab-Dummad isgussulidyob anmar-daknonidae. Ar bato deyobi Moisés-Igar-Maidgi-sognaid, degi, Bab-Dummad-Gayaburba-Barsogmalad-Gardagi bato narmakar sognaibalid.
ROM 3:22 Bab-Dummad-isgussuliyob-anmar-dakedi, Jesucristoʼgi-bensulidba deyob gunonidaed. Bab-Dummad bela dulemar-Jesucristoʼgi-bensurmaladi, deyobi daked. Ar ade, Bab-Dummad, bela dulemar emarbi dakmaid, gwen akar-akar daksulid.
ROM 3:23 Ar dulemar belagwapa isgusadbisoggu, Bab-Dummad-e-gangued-yeerdaklegedgi bangus gudimalad. A-ulale, geg Bab-Dummad-walikaa gumarsunnad.
ROM 3:24 Degi-inigwele, Bab-Dummad e-anmargi-nued-binsaed-wilubsulinadba, na-e-abegedba isgussuliyob dule-daknonidaed. Cristo-Jesús dulemar-abonogega-burgwisadba, dulemar-baknonikidgi, Bab-Dummad isgussuliyob dule-daknonidaed.
ROM 3:25 Bab-Dummad isgued-eliegala nakrusgi Cristo-Jesús-oburgwisad. Ar Cristo-e-ablis-ariosadgi-bensulidgi, isgued elileged. Deyobi, Bab-Dummad imaksad, adi, e-igar-innikigwad-imaked oyogegar. Iduardi, Bab-Dummad na san-bargaed-nikadbali, isgued-epennemalad bela elinonikid.
ROM 3:26 Ar emigindi, Bab-Dummadi, na e-igar-innikigwad-imaked-oyogegala, Jesucristo-uksad. Deyobi, Bab-Dummad, dule-innikigwad gued, deginbali, dulemar-Jesúsʼgi-bensurmalad-isgussuliyob imakbalid.
ROM 3:27 Degite, ¿bia san-dummarba-imakleged nadsunna? We-igar bergunoniki. ¿Ar ibi-igar-maidba bergunonisunna? ¿Moisés-Igar-Maid-imakedba bergusa? Suli, abarsuli. Ar unnila Jesúsʼgi-bensuli-guedba bergunonikid.
ROM 3:28 Degisoggu, anmar sogsundo, dule Bab-Jesúsʼgi-bensulidba isgussuliyob daklenonidaye. Moisés-Igar-Mesisad-ibmar-imaklegedba isgussuliyob daklenonidasurye.
ROM 3:29 ¿Ar Bab-Dummadde unnila Judíoʼmar-e-Bab-Dummadbisi? ¿Ar Judíoʼsurmalad-e-Bab-Dummadmosursi? Napiragwad, ar Bab-Dummad Judíoʼsurmalad-e-Bab-Dummadmogad.
ROM 3:30 Ar ade, unnila Bab-Dummad wargwenna gued. Bab-Dummad, Judíoʼmar-Jesúsʼgi-bensulidba, degi, Judíoʼsurmalad-Jesúsʼgi-bensulidba, we-dulemar-isgussuliyob daknonikoed.
ROM 3:31 Degisoggu, anmar Jesúsʼgi-bensulidba Moisés-Igar-Maidi, ¿bar maisuliyob dakode? Suli. Aka bur anmar, we-Moisés-Igar-Mesisad bur ogannoged.
ROM 4:1 Ar degite, anmar-dad-dummad-Abrahamʼgindi, ¿igi anmar sogmalosunna?
ROM 4:2 Ar Abraham na e-ibmar-imaksadba isgussuliyob daklenonikina, dulemar-asabin, sunna na san dummarba itogoenad. Ar Bab-Dummad-asabindi deyob na itogosulinad.
ROM 4:3 Emigindi, ¿igi Bab-Dummad-Gardagi sognaisunna? “Abraham, Bab-Dummad-bengussurye, degisoggu, Bab-Dummadi, isgussuliyob Abraham-daknoniye.”
ROM 4:4 Ar dule arbasale, mani-ega-ukleged binsa ega uklesulid, arbasad-ular, bennukleged.
ROM 4:5 Ar dule-arbasuliddi, Bab-Dummad-isgussulidyob-dule-imakedgi bensulid. We-e-bensulidi, Bab-Dummad-asabinni isgussulidyob-dakle we-dule-imaked.
ROM 4:6 David deyob sogmogad, deunsoggu, Bab-Dummadi, dule-na-ibmar-imaksasulidba isgussuliyob we-dule-daknonikile, Bab-Dummad we-dulegi nued binsasye.
ROM 4:7 David Bab-Dummad-Gardagi soged: “Bab-Dummad, dulega e-galagwensuli-gudigusad elinonikile, e-isgusad ega osurgunonikile, Bab-Dummad egi nued binsanonidaed.
ROM 4:8 Bab-Dummad, dulega e-isgudigusad bar insasuli gunonikile, egi-isgued-naid ega osulononikile, Bab-Dummad egi nued binsanonidaed.”
ROM 4:9 Degisoggu, we dulegi-nued-binsaleged ¿unnila Judíoʼmargarbisi? ¿Ar Judíoʼsurmaladgarmosursi? Ar ade, an sogmalad, Abraham Bab-Dummad-bensulidbali, Bab-Dummad isgussulidyob Abraham-daknoniye.
ROM 4:10 Degite, ¿sana wede Abraham deyob gunonisunna? ¿Abgan-uka-duku-sikleged-igar-imaksad-iduale? ¿Abgan-uka-duku-sikleged-igar-imaksad-sorbali? Suli, a-sorbarsuli. Abraham amba yoo abgan-uka-duku-siked-iduale, dule-isgussuliyob daklenonikid.
ROM 4:11 Abraham Bab-Dummadgi-bensulid-e-wilub-nasikegala, abgan-uka-duku-siked-igar imaksad. Adi, oyogega, bato Bab-Dummad, amba yoo ede abgan-uka-duku-sikeunni, egi-bensulidbali isgussulidyob e-daksaye. Degisoggu, Abraham bela dulemar-Bab-Dummadgi-bensurmalad-abgan-uka-duku-sikarsurmalad-e-babga, gunonisunnad. Adi, Bab-Dummad, we-dulemar-egi-bensulidba isgussulidyob dakmogagar.
ROM 4:12 Deginbali, Abraham dulemar-abgan-uka-duku-sikarmalad-e-babbalid. We-dulemar, unnila abgan-uka-dukubi sikarsurmalad, igi anmar-dad-Abraham amba-yoo-abgan-uka-duku-siked-iduar Bab-Dummadgi-bensuli-nanadigusa, deyob nanadimarbalid.
ROM 4:13 Bab-Dummad, Abrahamʼga, degi, e-waganga sogsad, yoedse we-napneg-naid an bega ukoye. Weyob ega ise-sogar-sogsadi, Moisés-Igar-Maidba-nanadimalad-ularsulid. Bab-Dummadgi-bensulidba isgussuliyob-daklenonikidba, Bab deyob ega sogsad.
ROM 4:14 Ar Bab-Dummad-ibmar-ukoye-sogsad dulemar-Moisés-Igar-Maidba-nanadimalad-gadina, Bab-Dummadgi-bensulid-igar binsaledga gunonikiled. Degine, Bab-Dummad-ibmar-ukoye-sogsad, bar igarga gussuliled.
ROM 4:15 Bab-Dummad dule-Moisés-Igar-Maidba-dasulid sabsur-odurdaked. Ar igar maisulirdi, dule a-igar geg bisged, ar ade, igar maisulid.
ROM 4:16 A-ulale, Bab-Dummad Abrahamʼga sogsad, an bega ibmar-nuegan-ukoye. A-ibmar-ukoye-sogsadi, Bab-Dummadgi-bensulidgi abingaleged, dule ibmar-imakedginsulid. Bab-Dummad deyob imaksad, adi, na e-ibmar-nuegan-ukbiedba Abraham-waganga ukmogagar. Unnila dulemar Moisés-Igar-Mesisadba Abraham-waganga gudimaladgarbisulid, dulemar-belagwapa Bab-Dummadgi-Abraham-bengussulidyob-nanadimarmogadga, a-ibmar ukmogagalad. Ar Abraham bela anmar-dadga Bab-asabin gunonisunnad.
ROM 4:17 Ar igi Bab-Dummad-Gardagi narmakar nai: Bab-Dummad soged: “Ani an dulemar-bukidarad-akar-akar-bukmalad-e-dad-sailaga an be-imaksad.” Génesis 17:5 Degisoggu, Abraham, Bab-Dummad-asabin anmar-dad-dummadga gunonisunnad. Bab-Dummad dulemar-burgwismalad gannar odulogedid. Degine, ibmar-amba yoo-ambikued, bato ibmar-ambikusadyob e-nugba ese goledid. We-Bab-Dummadgi Abraham bengussulid.
ROM 4:18 Gwen igarga-gued daklesulid-inigwele, Abraham, nue-bensulidgi Bab-Dummad-ega-sogsad-edarbedii gusad. Deyob-bengussulidbali, dulemar-bukidarad-akar-akar-bukmalad-e-dad-sailaga gunonikid. Ar igi Bab-Dummad ega sogsadyob: “Be-wagan weyob ichesur-mergu guoye.”
ROM 4:19 Abraham na e-sangi binsadgu, bato burgwed omosa-itoged. Deun bato birga-dulatar-gubin (± 100) nikad. Degite, Bab-Dummadgi-bensulid gwen galakussulid. Degine, Abraham, e-ome-Saraʼgi binsadgu, mimmi-baked-e-ibagan bergusye, geg guodeeye gwen binsassurbalid.
ROM 4:20 Abraham ibmar-ega-uklegoye-soglesad, ega guosur-dakle-inigwele, degite, gwen bengussulid. Aka bur bule Bab-Dummad-bengusulidgi gannaledii gusad, Bab-Dummad-nug-ogannodii nanasad.
ROM 4:21 Abraham nue-wisi gudii gusad, Bab-Dummad-ibmar-ukoye-sogsad na e-ganguedba bela e-sogsadba ibmar imaked.
ROM 4:22 Degisoggu, “Abraham deyob Bab-Dummadgi-bensulidba, Bab-Dummad isgussuliyob Abraham-daknonisunnad.”
ROM 4:23 Abraham Bab-Dummadgi-bensulidba, Bab-Dummad-isgussuliyob-daknonikid-narmaklesadi, unnila Abrahamʼgarbi deyob narmaklessulid.
ROM 4:24 Anmarga narmaklesmogad, anmar Bab-Dummadgi-bensurmarmogad-ular, Bab-Dummad isgussuliyob anmar-daknoni-damarmogadga. We-Bab-Dummadde, anmar-Dummad-Jesús burgwar-maigu, gannar odulosadid.
ROM 4:25 We-Jesús, anmar-isgued-ular-oburgwilegegala uklesad, degine, gannar durgus gusad, adi, anmar isgussuliyob daklegegar.
ROM 5:1 Degisoggu, anmar Jesucristoʼgi-bensulidba isgussuliyob daklenonidasoggu, anmar-Dummad-Jesucristoʼba, anmar Bab-Dummad-ebo igar nudaknonisunnad.
ROM 5:2 Anmar Jesucristoʼgi-bensulidba, Bab-Dummad nabir anmargi binsanonibalid. Ar anmar deyob Bab-Dummadba nue akananaisoggu, Bab-Dummad-gangued-yeerdakleged-dakega anmar nue-bensulidgi edarbedimarsunnad. A-ular, anmar wergudimarsunnad.
ROM 5:3 Degine, unnila anmar weginbi wergudisurmalad. Ar anmar ibmar-naibi-itodiidgi wergumarbalid. Ar anmar wisid, ibmar-naibi-itogedi, anmarga niga ogannoged, adi, nabir na san-burdiar-gudii guegar.
ROM 5:4 Degine, san-burdiar-gudigued bur-nued-gangumaidaed-dulega anmar-imaked. Bur-nued-gangumaidaed-dulega-guedi Bab-Dummad-anmarga-ibmar-imakoed-edarbedii anmar-imaked.
ROM 5:5 Bab-Dummad-anmarga-ibmar-imakoed-edarbediidi, anmarga igarga guedsegad. A-ular, anmar gwen bingeguosurmalad. Ar Bab-Dummad E-Burba-Isligwaled-anmarga-uksadba, bela-bela e-sabedi anmargi oyononikid.
ROM 5:6 Ar ade, anmar gege na dukin abonomarsoggu, Cristo dule-isgudimalad-anar, burgoed-iba-ega-nasiklesadgi burgwisad.
ROM 5:7 Dule-wargwen dule-nued-anar burgweye-sogele, burgwissuliled. Ar amba dule, dule-nued-anar-burgwed wis gudiirdibe, degiid-dule undar amileged.
ROM 5:8 Degi-inigwele, Bab-Dummaddi e-sabgued anmarga wegi nue-oyosad: Ar amba anmar isgudimalad-inigwele, degite, Cristo anmar-anar burgwisad.
ROM 5:9 Ar emigindi, Cristo-e-abegine bato anmar isgussuliyobi daklenonisoggu, bur buledo, Cristo Bab-Dummad-sabsur-emar-odurdakoedgi anmar-abonononikoed.
ROM 5:10 Ar anmar, deunni e-isdaradga amba gudigua, degite, Bab-Dummad E-Machi-burgwisadgi anmarbogwa igar-nabononigusad. Ar emi bulesunna, ar bato Bab-Dummad anmarbo igar-nabossoggu, Jesús-durgusadba, anmar abonolemarsunnodo.
ROM 5:11 Deginbali, amba webisulid. Anmar amba Bab-Dummadgi anmar-Dummad-Jesucristoʼbali weligwar itodimarbalid, ar ade, Jesucristoʼbali anmar Bab-Dummad-ebo igar nabosad.
ROM 5:12 Degisoggu, isgued dule-wargwengi we-napnegse dognonikid. Degine, isguedba burgwed-igar nonibalid, degidbali, bela dulemar burgwedbi gunonisunnad. Ar ade, bela isgusmaladbiid.
ROM 5:13 Ar amba yoo Moisés-Igar-Meged-iduale, bato isgued we-napneggi naid. Ar Igar maisulile, dule-ibmar-oakalosadga geg sogleged, be ibmar oakalosye.
ROM 5:14 Degi-inigwele, Adán-akale, Moisésʼsega, dulemar burgwedbi gunonisunnad. Dulemar, Adánʼyobi, igar-maidgi-gwisgusadba-isgussur-inigwele, amba burgwismarmogad. We-Adánʼde yoo-Cristo-danikoed-e-wilubga gunai gusanad.
ROM 5:15 Ar Adán, Cristo-e-wilubga-gusad-inigwele, Adán-e-isgusad Bab-Dummad-anmargi-nued-binsaedba yobisulid. Ar Adán-isgusadba bela dulemar burgwenonikid. Jesucristoʼbardi, Bab-Dummad-anmargi-nued-binsaedbali, Bab-Dummad anmarga ibmar-nued uknonikid. We-ibmar-nued, Jesucristo-burgwisadbali bela dulemarga obinebaka uklenonikid.
ROM 5:16 Deginbali, ar Bab-Dummad-na-e-itogedba-e-dulemar-abonomaidi, gege Adán-e-isgusadbo wilubdakleged. Ar dulega irgwen-isgulesadgi sabsur-odurdakleged-igar megnonikid. Bab-Dummad-anmargi-nued-binsaedbardi, anmar-bukidar-isgusad-inigwele, isgussulidyob anmar-daknonikid.
ROM 5:17 Dule-wargwen-isgusadgi burgwed-igar neg-ganonikid. Ar degiile, bur buledo, dulemar Bab-Dummad-bela-bela-nabir-binsamaid-abingamaladi, Bab-Dummad-na-e-itogedba-dule-isgussuliyob-daked-abingamaladi, dule-wargwen-Jesucristoʼgi, dula-gudiidgi negdakmaloed.
ROM 5:18 Ar igi dule-wargwen-isgusadgi dulemarga sabsur-odurdakleged-igar megnoniki, deyobi, dule-wargwen-ibmar-nued-imaksadgi, dulemarga dule-isgussuliyob-daklenonikid-igar megnonimogad, adi, dula-gudii gumalagar.
ROM 5:19 Ar igi dule-wargwen-Bab-Dummad-sogsadba-ibmar-imaksasulidbali, dulemar-bukidar isguedbi nade, deyobi, dule-wargwen-Bab-Dummad-sogsadba-ibmar-imaksadbali, bukidar isgussuliyobi daklenonimaloed.
ROM 5:20 Ar Moisés-Igar-Megnonigu, isgued bur merguded. Agi, Bab-Dummad-nabir-dulemargi-binsamaid bur bule mergudmogad.
ROM 5:21 Ar isgued, burgwed-igar nasiknonikid. Bab-Dummad-bela-bela-e-sabeddi, dulagudigued nasiknonimogad. Agala, Bab-Dummad dule-isgussuliyob anmar-daknonikid. Degine, anmar-Dummad-Jesucristoʼba anmar burba-geg-bergued nikunonikid.
ROM 6:1 Degite, ¿igi an sogmalosunna? Bab-Dummad-anmargi-nabir-binsa-maid bur bule oyolegegala, ¿anmarde isgudii sadeguode? Suli, degisuli.
ROM 6:2 Ar anmarde isguedga burgwar-gudiyobidde, degite, ¿igi anmar bar isguedgi nanaosunna?
ROM 6:3 ¿Ar be wissurmarsi? Bela anmar Cristo-Jesús-nuggi Bab-Dummad-diigi-ogleged-igar-imaksamaladi, anmar Cristo-Jesús-burgwisadyob gunonimogad.
ROM 6:4 Ar anmar Bab-Dummad-diigi-ogleged-igar-imaksadgi, anmar Cristo-burgwisadba burgwismogad, degi, eba diglesmogad. Adi, Cristo burgwarmalad-abargi-maigusadgi, degi, Bab-Dummad-ganguedba gannar durgusadgi, anmar san-binidgi dula-gudii gumogagar.
ROM 6:5 Ar anmar Cristo-burgwisadgi eba akanonikid, amba deyob anmar e-durgusadgi eba durgubalodo.
ROM 6:6 Ar anmar nue-wismalad. Anmar-san-isgudiid-osulolegega, anmar-sanburba-epennegwad Cristoʼba nakrusgi bioklesad, adi, melle bar isguedba anmar mailedii guegar.
ROM 6:7 Ar dule burgwisale, bato isgued geg bar oakaloged.
ROM 6:8 Ar Cristoʼba anmar burgwisale, anmar eba dula-gudigubaloed bensurdo.
ROM 6:9 Ar anmar wisid, Cristo burgwisgu, gannar durgusad, emi bar burgosulid, burgwed geg bar egi obined.
ROM 6:10 Ar Cristo burgwisgua, Cristoʼgi isgued-e-gangued degisadegu bergunonikid. Ar emi, Cristo dula-gudiidi, Bab-Dummadga dula gudisunnad.
ROM 6:11 Degisoggu, deyob be binsamarmosundo, isguedga an burgwar gudimarye. An dula gudiiddi, anmar-Dummad-Cristo-Jesúsʼba Bab-Dummadga an dula gudimarye.
ROM 6:12 Degisoggu, isgued be-san-sunna-berguedgi mer obined be imakmar, adi, galagwensuli-isgu-dule-saed-imakbiedba mer eba be damalagar.
ROM 6:13 Deginbali, melle be be-abaganmar ibmar-isgana-imakegala be imakmar. Bur be Bab-Dummad-urbaligwa be nanamar, dule-burgwis-gannar-durgusadyob be nanamar. Deginbali, be-abaganmar Bab-Dummadga ibmar-nuegan-imakega be imakmarbar.
ROM 6:14 Ar isgued bar bemargi obinosurmalad, ar ade, bemar Moisés-Igar-Mesisadba bar gudisurmalad. Bab-Dummad-nabir-dulemargi-binsamaid-igarba be gudimalad.
ROM 6:15 Degitega, ar anmarde Moisés-Igar-Maidba bar gudisurmarsoggu, emidi, Bab-Dummad-dulemargi-nabir-binsamaid-igarba-gudimarsoggu, degite, ¿anmar isgumarsunnode? Suli, degisuli.
ROM 6:16 Ar dule-wargwen-sogedba be nanadiile, e-maiyob eba be ibmar-imakele, deyob-gudiidba be, we-dule-e-maiga be gunonidamalad. A-ulale, isgued-sogedba be nanadiile, be burgwemalodo. Ar Bab-Dummad-sogedba be nanaerdi, dule-innikigwadga be gumalodo.
ROM 6:17 Ar Bab-Dummadga anmar dog-nuedye sogsun. Ar iduar bemar isgued-maiga gudiinad. Emigindi, igar-nued-bemarga-soglesadba be napiragwadba nanadmalad.
ROM 6:18 Degidbali, be isguedgi ollorgunonimarsoggu, bemar igar-inniki-imakleged-e-maiga gunonimarsunnad.
ROM 6:19 An-bemarga-sunmaknaidi, amba bemar aku-itomarsoggu, sanar-sanar an bemarga sunmaknasunnad, adi, be magar itomalagar. Ar iduardi, bemar ibmar-isganaga be-abaganmar be ukdii gusmalad. Ar deyob-imakedi, aka bur bule-isguega be-imaked. Emisgindi, be, igar-innikigwad-maid-imakmalaga, deyob, be be-abaganmar ukmarbar, adi, be san-swilidik gumalagar.
ROM 6:20 Ar bemar isgued-maiga-gudimargua, bemar, igar-innikii-imaklegedgi bangus-gudii gusmalad.
ROM 6:21 Ar deyob gudimargua, degite, ¿ibi-nued egi be amismarsunna? Ar emigindi, egi be bingegudimarsunnad. Ar we-ibmarmardi unnila burgwedse dule-nied.
ROM 6:22 Emigindi, be isguedgi-ollorgunonimaladgi, Bab-Dummad-maiga be gunonimaladgi, bega we-ibmardi ibmar-nuedga gunonimalad, be san-swilidik gunonimarsunnad, adi, be burba-geg-bergued nikumalagar.
ROM 6:23 Ar isgued, burgwedgi dule-bennuked. Bab-Dummad-nabir-anmargi-binsamaiddi, anmar-Dummad-Cristo-Jesúsʼgi burba-geg-bergued anmarga uked.
ROM 7:1 Gwenadgan, dulemar-Moisés-Igar-Maid-wismaladga an soged: We-Moisés-Igar-Maid, dule dula-gudiirbi a-Igar-Maid-urbalikwaa nanaoed.
ROM 7:2 Ome sui-nikadyobdo: E-sui dula-gudiile, abirgunagwar-nanaleged-igar-maidba suiba nanaoed. Ar e-sui burgwenonikirdi, a-igar-maidgi ollorgunonikoed. Ome, bar a-igarba nanaosulid.
ROM 7:3 Degisoggu, amba e-sui-dula-gudiidgi machered-baid-nikunonikile, we soglegodo, ome igarsuli negsichigi e-sui-dikarba yolediiye. Ar e-sui-burgwisardi, sui-nikued-igar-maidgi ollorgunonido. Degisoggu, ar sui-baid-nikunonikile, we-ome negsichigi yoledisurdo.
ROM 7:4 Gwenadgan, bemar amba deyobmodo. Cristo burgwisgu, bemar Cristoʼba-burgwisayob gunonimarmogad. A-ular, bemar Moisés-Igar-Maidgi ollorgunonimalad. Emisgindi, bemar dule-burgwisad-gannar-durgus-gusadgadga gunonikid. Adi, bemar, Bab-Dummadga ibmar-nuegan-imakmalagar.
ROM 7:5 Ar anmar-ibmar-isgana-imakbiedbarbi an gudimargua, Moisés-Igar-Maiddi, ibmar-isgana-imaked-imakega anmar-imakdedaed. Degisoggu, we, bur bule Bab-Dummadgi-banguega anmar-imaked, burgwedse anmar-seddaed.
ROM 7:6 Ar emigindi, igar-isgana-anmar-ganikidgi an burgwismarsoggu, Moisés-Igar-Maidgi an ollorgusmalad. Degisoggu, a-ular, Bab-Burba anmarga-gargangued-ukedba Bab-Dummadga arbamarsundo. Bar Moisés-Igar-sered-narmakar-maidginsurdo.
ROM 7:7 Degite, ¿igi an sogmalosunna? ¿Moisés-Igar-Maid wede isguedi? Suli, degisuli. Ar Moisés-Igar-Maid maisulina, we-isgued an wisguosulinad. Ar Moisés-Igar-Maidgi sognasulina: “Mer dulemar-baid-e-ibmarbina yaisur-sogoye.” An dule-baid-ibmarbina-yaisur-soged wisguosulinad.
ROM 7:8 Ar Igar-Maid deyob sognaisoggu, isgued bela-bela dule-baid-e-ibmarbina-yaisur-soged angi nasiksad. Ar Moisés-Igar maisulina, isgued gangued sulinad. Isgued-igar burgwar mainad.
ROM 7:9 Ani, epennedi an Moisés-Igar-Maid-wissuli an gudigusad. An Moisés-Igar-Maid-wisgunonigu, isgued-angi-naid durguded. Agine, an burgwenonisunnad.
ROM 7:10 Degine, an daknonisunnad, an dula-gudiguega we-Igar-uklesadi, anga burgwedga gubali.
ROM 7:11 Ar ade, isgued, Igar-Sogmaidba an-yardaknonikid, agi, an-oburgwenonisunnad.
ROM 7:12 Degisoggu, an sogmarsunnad, Moisés-Igar-Maid-swilidikid, Bab-Dummad mesisad. Bela we-Igargan-Mamaidi nue-swilidikidid, igar-innikigwadid, degine, igar-nuedid.
ROM 7:13 Ar degite, ¿wede ibmar-nuedidde, burgwedga we-ibmar-nued anga gunonisunde? Suli, degisuli. Ar isgued, oyogegala we isguedye, anga ibmar-nuedba burgwed-uknonikid, adi, Igar-Maidba oyolegegar, we-isgued bela-bela isganaye.
ROM 7:14 Ar anmar wismalad, Moisés-Igar-Mesisad, we-igar-nuedid, burbaledid. Ar an-sandi we-napnegginedsoggu, isgued-e-maiga-guega isguedse bakles gudiid.
ROM 7:15 Ar an ibmar-imaked an aku itoged. Ar an ibmar-imakbied an imakdasulid, aka bur an ibmar-isdar-daked an imakdedaed.
ROM 7:16 Ar an ibmar-abesulid an imakele, an sognaido, we-Moisés-Igar-Maidi, nuedye.
ROM 7:17 Degisoggu, an-sunnad an ibmar-imaksursundo. An ibmar-imakedi, isgued-angi-naid ibmar-imakega an-imaked.
ROM 7:18 Degine, an nue wisid, we angi ibmar-nued naisulid. Ar ibmar-nued an imakbien-inigwele, gege an ibmar-imak itodaed.
ROM 7:19 Ar ade, ibmar-nued-an-imakbiedi, an imaksulid. Aka bur an ibmar-isgana-imakbisulidi, imakdedaed.
ROM 7:20 Ar an ibmar-imakbisulid imakele, ani an bar imaksurdo. An-ibmar-imakedi, isgued-angi-naid ibmar-imakega an-imaked.
ROM 7:21 Degisoggu, weyob igar mai an daksundo, ibmar-nued an imakbien-inigwele, isgued angi naid.
ROM 7:22 Ar an-san-burba-ulubgindi, Bab-Dummad-Igar-Maidgi an nue yeer itoged.
ROM 7:23 Degine, an-sangi baid-igar-mai an dakbardo. We-igar, an-binsaedgi yolenonidaed. Degisoggu, we-igarse an gales gudisunnad. An ibmar-imakedi, isguedbi an imakdisunnad.
ROM 7:24 Degisoggu, ¡nue an dule-wilesdo! ¿Doa-wede we-burgwed-angi-naid anga osulogosunna?
ROM 7:25 Ar Bab-Dummadga dog-nuedye an sogsunnad. Ar mer anmar bar isguedgi nanamalaga, Bab-Dummad, anmar-Dummad-Jesucristoʼba anmar-abonoged. Degisoggu, an-sunnad an-binsaedgi Bab-Dummad-Igar-Maidba an mailedisunnad. Ar an-sangindi, isgued-igar-maidba an mailediid.
ROM 8:1 Degisoggu, dule-Cristo-Jesúsʼgi-akanimaladga, bar odurdakleged-igar maisulid. Amarde, na-e-san-sogedba-bar-nanadisurmalad. Unnila, Bab-Dummad-Burba-Isligwaledba nanadimalad.
ROM 8:2 Cristo-Jesúsʼba Bab-Dummad-Burba-e-igar-dule-odulogedi isgued-igargi an-ollor-imaksad, degine, burgwed-igargi an-ollor-imaksabalid.
ROM 8:3 Ar napiragwa, Moisés-Igar-Maid anmar-abonogega gwen unnigussulid, ar ade, anmar-isguedi Moisés-Igar-Maid-e-gangued-obelosad. Degisoggu, Bab-Dummad, dulemarga isgued-bennukega, sanar na E-Machi duleyobi we-napnegse barminonikid. Deyob, Bab-Dummad, Cristo-sangine isgued-e-gargangued obelononisunnad.
ROM 8:4 Deyob imaksad, adi, anmar, anmar-san-sogedba mer bar gudii gumalagar. Adi, anmar-Bab-Dummad-Burba-sogedba-gudimaladga, igar-inniki-maid nabir guegar.
ROM 8:5 Ar dule-na-e-san-sogedba-nanadimaladi, na e-ibmar-abegedgi binsadaed. Ar Bab-Dummad-Burba-sogedba-nanadimaladdi, Bab-Dummad-Burba-e-ibmar-imakbiedginbi binsadaed.
ROM 8:6 Ar dule, na e-san-sogedba binsadiile, wedi burgoed. Ar dule, Bab-Dummad-Burba-sogedba binsadiirdina, dula gudiguoed. Degine, ulubgi bogidik na itogoed.
ROM 8:7 Ar dule na e-san-sogedba nanaele, we-dule Bab-Dummad-e-isdaradid. Ar ade, Bab-Dummad-Igar-Maid-sogedba nanabisulid, degine, a-igarba-nanaed geg gubalid.
ROM 8:8 Degine, dulemar-na-e-san-sogedba-nanadimalad geg Bab-Dummad-yeer-ito imaked.
ROM 8:9 Ar bemardi na be-san-sogedba be nanadisurmalad, Bab-Dummad-Burba-sogedba nanadimalad. Ar Bab-Dummad-Burba bemargi maile, deyob be nanamaloed. Ar dule Bab-Cristo-Burba nikasulile, we-dule, Cristoʼgadsulid.
ROM 8:10 Ar Cristo bemargi maile, be-sandi isguedga bar gudisulid. Ar Bab-Dummad-Burba-bemargi-maidi, Bab-Dummad isgussuliyob bemar-imaksad-ulale, be-burba-dula-gudii imaked.
ROM 8:11 Ar Bab-Dummad-Burba Jesús-burgwarmalad-abargi-mai-odulosad bemargi maidi, a-Burba-Cristo-odulosad bemargi-maidba, bemar-san-burgoed gannar odulomogoed.
ROM 8:12 Degisoggu, gwenadgan, anmar-ibmar-imaked unnila soggwenna imakergebed, mer anmar ibmar-isgana-imakdii gued.
ROM 8:13 Ar be-san-sogedba be nanaele, be burgoed. Bab-Dummad-Burbaba-nanaedgi be-san-ibmar-isganabina-soged be obelogele, be dula-gudii guoed.
ROM 8:14 Ar bela dulemar Bab-Dummad-Burba-sogedba-nanadimaladi, we Bab-Dummad-mimmigan gumalad.
ROM 8:15 Ar bemar maiga-gued-burba abingassulid, adi, bemar gannar dobgudii gumalagarsulid. Ar bemar Bab-Burba-abingasadi, Bab-Dummad-mimmiga-gued-e-burbad. Abali, anmar binnasur gorsunnad: ¡Abba! A sogleged, babye.
ROM 8:16 Bab-Dummad-Burba, e-sunnad anmar-burbaga oyonaid, anmar Bab-Dummad-mimmigan gumarye.
ROM 8:17 Degine, ar anmar Bab-Dummad-e-mimmigan-gumarsoggu, eba anmar ibmar gamogoed. Bab-Dummad-ibmar-nikad anmargadga gumogoed, degine, Cristoʼba-mesa anmar ibmar-nikumogoed. Ar anmar Cristoʼba wilemalar, Cristo-nug-dungued-nikadbali, anmar-nug dungumogoed.
ROM 8:18 Ar an nue-wisid, Bab-Dummad-e-gangued-e-yeerdakleged, e-walik-gudiguoedgi anmargi-oyolegoedi, emi-anmar-boniganba-wilediidba, bur bela-bela nuedid.
ROM 8:19 Ar bela Bab-Dummad-bela-ibmarmar-nasiksad, bela-bela guakwaa Bab-Dummad-e-mimmigan-oyolegoed edarbebukwad.
ROM 8:20 Ar bela-ibmar-obinnilesad bela isgunonikid. Ibmar-obinnilesad na-e-sogedba deyob gussulid. Bab-Dummad deyob igar-mesisadba gunonikid. Degi-inigwele, ibmar-obinnilesad amba e-bendakleged nue-bensulidgi edarbediid.
ROM 8:21 Ar ade, bela ibmar-obinnilesad, we-ibmar-isgana-e-maiga-gudiidgi ollorgunonikoed, Bab-Dummad-e-mimmigan ibmar-nuedga-gunonimogadyob gunonimogoed.
ROM 8:22 Ar anmar nue-wismalad, bela ibmar-obinnilesad emi-iba-naidse akiginbukwad, igi siamar na e-boni-itoalir, nunmaked-itodamaladyob.
ROM 8:23 Unnila ibmar-obinnilesmaladbi deyob-itosurmalad. Anmarmoga, Bab-Dummad-e-Burba-gebe-uklesad-nikamalad, ulubgi deyob akigindimarmogad. Emisgindi, anmar Bab-Dummad-e-mimmiganga-gued edarbedimalad. We-sogleged, anmar-san-galesiid-ollorgued bensulidgi ebarbediiye.
ROM 8:24 We deyob anmar Bab-Dummadgi-bensulidgi-edarbediidba abonolenonikid. Ar anmar-ibmar-edarbediid bato an daksamalale, geg bar ibmar-edarbelegedga gued. Ar dule ibmar daksale, ¿ibi bar edarbosunna? Suli, bar edarbosuli.
ROM 8:25 Ar an ibmar-daksulid bensulidgi edarbedimalale, gwae-gwae-itogedgi an edarbedisurmalad, binnalegwadgi bensulidgi an edarbedimalad.
ROM 8:26 Amba deyobi, ar anmar Bab-Dummadgi-bensurgued nollosoggu, Bab-Dummad-Burba anmar-nollogwadgi anmar-bendaked. Ar anmar wissulid, igi-Babse-goledgi bur-nabir ibmar egisoe. A-ulale, Bab-Dummad-Burba, akiginneyobi gayagi-geg-soglegedba, anmar-ular Bab-Dummadse ibmar-egised.
ROM 8:27 Ar Bab-Dummad ulubse magar emar-daksoggu, Bab-Dummad-Burba-igi-nue-soged, nue-wisimakaled. Ar Bab-Burba Jesucristoʼgi-akananaimaladga Bab-Dummad-ibmar-abegedba Babse goled.
ROM 8:28 Degine, anmar wisid, Bab-Dummadi, e-sabmaladga, e-sogedba-ese-gollesmaladga, bela ibmar-guedi, ibmar-nuedga ega imakdaed.
ROM 8:29 Ar Bab-Dummad gebesailaunni bato wisid, ede doamar-susa, degi, E-Machiyob-guegala, bato idu amar-nug-imaksad. Adi, na E-Machi e-urbamar-abargi e-urbamar-iduedga guegar.
ROM 8:30 Ar bato-idu-nug-imaklesmaladse, Bab-Dummad, gochabalid. Dulemarse-gollesmaladse, Bab-Dummad, isgussulidyob amar-imaknonibalid. Dulemar-isgussulidyob-imaklenonimaladse, Bab-Dummad, amar-nug ogannononibalid.
ROM 8:31 Degite, we-ibmar-soglesadgi, ¿igi-an bar sogmalosunna? Ar Bab-Dummad anmarba naile, ¿doa anmargi gwisguosunna? Dule anmargi gwisgued, sate.
ROM 8:32 Ar Bab-Dummad na-E-Machibela mer ukodeeye gwen sogsasulid, bela anmar-ular uksagusadi, degite, ¿igi-anmarga E-Machiba obinebaka bela ibmar-ukosur be insasunna? Bela ukoed.
ROM 8:33 Degite, ¿doa Bab-Dummad-na-dulemar-susmaladnik sogosunna, isgudiiye? Suli, dule sogosulid. Ar Bab-Dummad, isgussuliyob dulemar-imaked.
ROM 8:34 Ar degite, Bab-Dummad-na-dulemar-susmaladga, ¿doa sabsur-odurdakleged-igar ega mesosunna? Suli, gege dulemar ega mesed. Ar Cristo amar-ular burgwisadid, deginbali, Cristo burgwar-maigu, durgusbalidid. A-ukinbali, Cristo Bab-Dummad-argan-nuedsik siibalid, adi, anmar-ular Bab-Dummadse-golegar, adi, anmar mer odurdaklegegar.
ROM 8:35 ¿Ar doa Cristo-anmar-sabedgi-banguega anmar-imakosunna? Ar naibi-itoged, ¿banguega be-imakoe? Suli-suli-itoged, ¿banguega be-imakoe? Baregilleged, ¿banguega be-imakoe? Ukumesed, ¿banguega be-imakoe? Mor-sate-gudigued, ¿banguega be-imakoe? Bonigan-abargi-gudigued, ¿banguega be-imakoe? Burgwed, ¿banguega be-imakoe?
ROM 8:36 Ar weyob Bab-Dummad-Gardagi narmakar naid: “Be-ular, anmar bane-bane oburgwilediid. Sibad-wawaad-oburgwelegedyob anmar imaklediid.”
ROM 8:37 Ar bela anmar bonigan-abalagi-gudiidgine, Cristo anmar-sabgusad-ular, bela we-ibmargi-obinega anmar-imaksad.
ROM 8:38 Degisoggu, a-ulale, nue an wissunnad, Cristo-sabguedgi we-ibmarmar gege anmar-obanmalad: Burgweddibe, dula-gudigueddibe, baliwiturmardibe, niamardibe, emi-ibmar-gudiiddibe, yoedse-ibmar-danikoeddibe, burbar-gandikid-nikmaladdibe,
ROM 8:39 nibgueddibe, neg-urbar-matusuliddibe, degine, ibmar-bela-obinnilesaddibe, we-ibmarmala bipisaale, Bab-Dummad-e-sabguedgi gwen-anmar-obanosulid. Ar Bab-Dummad e-sabgued anmar-Dummad-Cristo-Jesúsʼgi oyosad.
ROM 9:1 Cristoʼgi napira an soged, an gakansasulid. Degine, Bab-Dummad-Burba-Isligwaled an-ulubgi anga sogbalid, an napira ibmar sogye.
ROM 9:2 An-Israel-dulemar bela Cristoʼba naisurmarsoggu, a-ular, an nue-bukib-binsadiid. An-gwagegine, nue-nunmak an itodibalid.
ROM 9:3 Ar an-sunnad an-gwenadgan-ablis-emalad-sabed-ulale, an ukabsales-gudisunnana gadin. Ar sogledibe, amar-abonolegegala, Cristoʼgi be banguergebye, an Cristoʼgi bangusaled, adi, an-gwenadgan nabir abonolegegar.
ROM 9:4 Ar wemar Israel-dula gumalad. Ar Bab-Dummad, amar na e-mimmiga imaksad. Amar-abargi na e-gangued-yeerdaklegedba gudii gusad. Amarbo, Bab-Dummad igarmar-mesisad. Amarga Moisés-Igar uksad. Bab-Dummad-nug-odummoged-igar ega uksabalid. Degine, amarga sogsabalid, an napira bemarga ibmar ukoye.
ROM 9:5 Ar Israel-dulamargi anmar-dadgan-gebe-negsesmalad danikid. Geb degine, anmar-Israel-dulemargi Cristo sanar danimogad. We-Cristo Bab-Dummad-sunnadid, degine, bela-ibmarmar-e-dummadga maibalid. Cristo-nug birga-irba degisadegu ogannolesun. Ar deyobdo.
ROM 9:6 Israel-dulemar Cristo-abingassursoggu, we soglesulid, Bab-Dummad-sunmaksadba we-ibmar gussurdeeye. Ar ade, Israel-dulemar, belagwapa Israel-wagan-sunnadsurmalad.
ROM 9:7 Deginbali, Abraham-wagan-guedbali soglesulid bela Abraham-waganga guye. Suli. Unnila Bab-Dummad sogsad: “Be-machi-Isaacʼgine be-waganye soglegoye.”
ROM 9:8 Weyobsundo: Bab-Dummad-mimmi-guedi, Abrahamʼgi-gwalulesadba Bab-Dummad-mimmi-gudeeye soglesulid. Ar ade, Bab-Dummad Abrahamʼga sogsagusad, machi-wargwen an bega ukoye. A-machigi-danimaladi, amar Abraham-wagwaga gunonimalad.
ROM 9:9 Ar Bab-Dummad weyob Abrahamʼga sogsad: “Baid-birgase gannar an bese nonibaloed. A-ibagangi, be-ome-Sara bato susugwa-nika gudioed.”
ROM 9:10 Ar webisurdo. Rebeca-machimala-warbogwad na bab-gargwenad nikusmalad. We-bab, anmar-dad-Isaac gued.
ROM 9:11 Amba yoo masmala-warbogwad gwalulemargua, amba yoo neg-wisgumargua, ibu ibmar-nuedi, ibu ibmar-isgana, Bab-Dummad e-sogedba dule-suedgi bato we-masmala-wargwen susad. Degisoggu, Bab-Dummad dule-ibmar-imakedgi dule-susulid.
ROM 9:12 Degi-inigwele, Bab-Dummad Rebecaʼga sogsad: “Ia, urba-sogedba nanadii guoed.”
ROM 9:13 Ar igi-Bab-Dummad-Gardagi narmakar naibali: Bab-Dummad sogsad: “Jacob bur an sabgusad. Esaúʼdi an isdar-daksad.”
ROM 9:14 Degite, ¿igi an sogmalosunna? ¿Bab-Dummad igar-innikii imaksurye? Suli, gege an degi-sogmalad.
ROM 9:15 Ar Bab-Dummad Moisésʼga sogsad: “Doa an wiledakbie, an wile dakoed. Degi, an wiledakedba an doa bendakbie, an bendakoed.”
ROM 9:16 Ar degisoggu, Bab-Dummadse-sulegedi, dule-ibmar-abegedbarsulid, dule-ibmar-imakedbarsurbalid. Bab-Dummad na wile-dule-dakedba dule-sued.
ROM 9:17 Ar Bab-Dummad-Gardagi narmakar naid, deun Bab-Dummad Faraónʼga sogsagusgu: “A-ulale, dummadga an be-imaksad, adi, begi an-gangued an oyogegar, degine, bela we-napneg-naidgi an-nug ogannomalagar.”
ROM 9:18 Degisoggu, Bab-Dummad ar doa wile dakbie, a-wile-dakodo. Degine, doa uayasuli imakbie, a-uayasuli-imakodo.
ROM 9:19 Ar dule anga sogele: “Degite, ¿ibiga Bab-Dummad anmar-isgudiidba amba anmargi atakosunna? ¿Ar doa Bab-Dummad-e-ibmar-imaked-abegedgi gwisguosunna?”
ROM 9:20 An we-dulega weyob sogoed: ¿Ar doa na be itoge, emide, be Bab-Dummad-abin-imaknagu? “Ar napsa-metega-sobaled, dule-e-sobsadga sogosi: ‘¿Wede ibiga deyob be an-sobsa?’ ”
ROM 9:21 ¿Ar dule-napsa-sobed, wede na e-itolegedba geg napsa-imaksi? Ar sunna we-napsa-mete-ibmar-nued-ebulegega sobed, degine, sunna napsa-mete-ibmar-baisurmalad-ebulegega sobbalid.
ROM 9:22 Deyobi, Bab-Dummad e-sogedba ibmar imaksamogad. Bab-Dummad dulemar-sabsur-odurdakoye-sogsad-oyogegala, degi, e-gangued-sabsur-oyobaligala, dulemar-odurdaklegoenadgi mer e-urwed-oyogegala, na bargaagwar gudii gusad. ¿Doa Bab-Dummadga sogosunna, mer deyob imakye?
ROM 9:23 Deginbali, Bab-Dummad e-gangued-yeerdakleged-yaisur-nikad-oyogega, degi, e-sabgued-dummarba-nikadi, anmargi ise-oyoar imaksad. Ar Bab-Dummad, iduakwaa wile anmar-daksad, degine, guakwaa anmar-urbisad, adi, eba-gudii gumalagar.
ROM 9:24 We-dulemarse Bab-Dummad-gochadi, sogleged, anmarse-gochaye. Unnila anmar-Judíoʼmarsebi gochasulid, Judíoʼsurmaladse gochamogad.
ROM 9:25 Ar Bab-Dummad Oseas-gardagi, deyob sogsad: “An-dulasurmaladse, an-dulamarye an gornonikoed. An sabed-egi-niksulidse, an-sabesailadye an goloed.”
ROM 9:26 Deginbali, Oseas-gardagi sogbalid: “Bia e-annik soglesa, ‘an-neggwebursulidye,’ agine, ‘Bab-Dummad-dula-maid-e-mimmiganye’ bilenonikoed.”
ROM 9:27 Amba Isaías Israel-dulemargi sogmogad: “Ar Israel-dulemar ukub-demar-gakaba-naidyob merguen-inigwele, unnila ichee wis gwabgumaloedbi abonolemaloed.
ROM 9:28 Ar Bab-Dummad e-igar-nabogedgi e-Igar-Mesedi, we-napneggi gwae-gwaegwadgi bela imakedsegad.”
ROM 9:29 Degine, Isaías idu weyob sogsagusbalid: “Ar Bab-Dummad-Bela-Gangued-Nikad, anmarga anagan-obessulina, Sodoma-dulemaryob anmar gumogoenad, Gomorra-dulemaryob anmar obelolemogoenad.”
ROM 9:30 Degite, ¿igi an sogmalosunna? Ar Judíoʼsurmalad, Bab-Dummad-isgussuliyob-e-daked-amidisurmalanadi, degite, amismalad. Jesucristoʼgi-bensulidba Bab-Dummad-isgussuliyob-e-daked aminonimalad.
ROM 9:31 Israel-dulemardi, Moisés-Igar-Maid-imakedba Bab-Dummad-isgussuliyob-e-daked-amidigusmalanad, gwen egi isgussuliyob-dakleged-igar amissurgusmalad.
ROM 9:32 ¿Ar ibiga amissurgusmarsunna? Ar Bab-Dummadgi-bensulidgi amissurmalad. Ar Moisés-Igar-Maid-imakedgi amidii gusmalad. Degisoggu, akwamur-idu-siidgi yoledapmarsundo. We-akwa obaredi, we Cristoʼdo.
ROM 9:33 Ar weyob Bab-Dummad-Gardagi narmakar naid: Bab-Dummad soged: “¡Be dakmala! Siónʼgi akwamur-dule-egi-gowarmaked an sied, we-akwa-dummad-dule-egi-aimukued an sied. Ar dule we-akwagi bensurgunonikile, egi gwen bingeguosulid.”
ROM 10:1 Gwenadgan, bela-bela an ibmar-abegedi, degine, Babse Israel-dulemarga an goledi, an binsaed, bitigi wemar abonolesmalana gadinye.
ROM 10:2 Ar an nue-wisid, an nue bemarga sogmalad, we-Israel-dulemala Bab-Dummadbina nue-sogmalanad. Degi-inigwele, ibmar-nue-wissulidba noar ese gormalad.
ROM 10:3 Ar Israel-dulemar, Bab-Dummad-isgussuliyob-dulemar-imaked wissurmalad. A-ulale, Israel-dulemar na e-ibmar-imakedba isgussuliyob-gued amididimarsunnad. Degisoggu, Bab-Dummad-isgussuliyob-emar-imaked-igar-maidba dasurmalad.
ROM 10:4 Ar Moisés-Igar-Mesisad, Cristoʼgi bela gunonikid. Adi, Bab-Dummad bela dulemar-Cristoʼgi-bensurmalad isgussuliyob dakegar.
ROM 10:5 Ar Moisés Igar-Maidgi Bab-Dummad-dule-isgussuliyob-dakedgi soged: “Ar dule we-Igar-Maidba innikidaele, dula gudiguodo.”
ROM 10:6 Ar Cristoʼgi-bensulid-ular, dule-isgussuliyob-gunonidaedgindina soged: “Mer be-gwagegi be soge: ‘¿Doa wede niba nakoe?’ ” Deuteronomio 30:12 (Ar adi, napnegse Cristo-sedagega soged).
ROM 10:7 Mer be sogbalo: “¿Doa wede napa-urba aidegoe?” Deuteronomio 30:13 (Ar adi, dulemar-burgwarmalad-abargi Cristo-onakwega soged).
ROM 10:8 Degite, ¿igi Bab-Dummad-Gardagi sogsunna? “Bab-Dummad-Gayaburba begi itakaa gudiid. Ar be-gwabindukugi naid, degi, be-gwagegi maibalid.” Deuteronomio 30:14 We-Bab-Dummad-gayaburba-Cristoʼgi-bensulidgi anmar sunmakdimalad.
ROM 10:9 Ar dulemarga bela be sogele, “Jesús, Bab-Dummadye,” degine, be-gwagegi be bensulile, Bab-Dummad, we-Jesús burgwarmalad-abargi gannar odulosye, be abonolegodo.
ROM 10:10 Ar be isgussuliyob-daklegega, gwagegi Jesúsʼgi-bensuli be guergebed. Be abonolegegardi, gayagi be sogergebed, Jesús, Bab-Dummadye.
ROM 10:11 Ar Bab-Dummad-Gardagi soged: “Ar dule agi bensulile, suli-suli itogosulid.”
ROM 10:12 Ar Bab-Dummad Judíoʼmar, degi, Judíoʼsurmalad, akar-akar daksulid, emarbi daked. Ar Bab-Dummad ebi wargwenna bela dulemar-e-Dummadga maid, bela obinagwar dulemar-ese-goledga ibmar ukmaid.
ROM 10:13 Ar Bab-Dummad-Gardagi sognaid: “Bela dulemar Bab-Dummad e-Bab-Dummadga imakmaladi, bela abonolemaloed.”
ROM 10:14 Emisgi, ar Jesucristoʼgi amba benmalale, ¿igi-degite, e-Bab-Dummadga imakosunna? Ar Jesucristo-nug itodisurmalale, ¿igi egi bensuli gumalosunna? Ar dule ega Bab-Dummad-Gayaburba-Nuedgi-sunmaksulile, ¿igi-Jesucristo-nug itomalosunna?
ROM 10:15 Ar dule barmilesulile, ¿doa Bab-Dummad-Gayaburba-Nuedgi sunmakosunna? Ar weyob Bab-Dummad-Gardagi narmakar naid: “Ibibayobi nuedi, we-dulemar-gayaburba-nuegan-berbemalad-danikid, Bab-Dummad-Gayaburba-Nued sedanikid.”
ROM 10:16 Ar degite, bela Israel-dulemar Bab-Dummad-Gayaburba-Nued-sogedba imaksasurmalad. Agala Isaías sogsad: “Bab-Dummad, wede, ¿doa anmar-ibmar-sogsad bengussuli?”
ROM 10:17 Degisoggu, ar dule e-uayagwar Bab-Dummad-Gayaburba itogergebed. Geb agi Jesucristoʼgi bensuli gunonikoed. We-gayaburba-itogoedi, Cristoʼgi-sunmaklenaid itogoed.
ROM 10:18 Ar an egismosundo: ¿Wede Israel-dulemar, Bab-Dummad-gayaburba itossurmarsi? Itosmala. Ar Bab-Dummad-Garda soged: “Bab-Dummad-gayaburba-barsoglenaid, bela napneg-naidgi barmilesad. Ar sukun-gwen-bessuli e-gayaburba warmaknaid.”
ROM 10:19 Degine, an egisbarsundo: ¿Wede, Israel-dulemarde we gayaburba wisgussurmarsi? Wisgusmala. Ar Moisés-inse gebe-sogsad: Bab-Dummad soged: “An-dulasurmalad an sabguoed, bemar, a-dulemargi nobgumaloed. An dule-binsaed-satemaladgi nabir binsaoed, bemar, a-dulemargi uludoed.”
ROM 10:20 Sorbali, Isaías bur-bakar-buud soged: Bab-Dummad soged: “Dulemar-an-amidisulid, an-amimalaga an imaksad, dulemar-an-egisdisurmaladse an magarosad, an doa-dule gue.”
ROM 10:21 Ar Israel-dulemargindi, Isaías weyob sogsad: Bab-Dummad soged: “Dule-uayasulidamaladse, degine, dule-ega-ibmar-sogedba-ibsasurmaladse, bane-bane, an-argan an oyomai gusanad.”
ROM 11:1 Degisoggu, an sogsundo: ¿Bab-Dummad na e-dulemar metesunde? Suli, degisuli. Ar be dakdo, ar amba an Israel-dulemogad, Abraham-e-wagwad, dad-Benjamínʼsikidid.
ROM 11:2 Degisoggu, Bab-Dummad na e-dulemar metesurdo, ar bato iduar na susad. ¿Ar be wissurmarsi, igi Elíasʼgi Bab-Dummad-Garda soge? Deun, Elías Bab-Dummadse gotegu, Israel-dulemarnik sogdegu:
ROM 11:3 “Bab-Dummad, we-Israel-dulemar be-gayaburba-barsogmalad-oburgwismalad. Degine, bega-ibmar-ogumakar-ukleged-ailamar earismarbalid. Deginbali, napi anbi walagwen an besad, emigi an-oburgwebimarmogad.”
ROM 11:4 Degite, ¿igi Bab-Dummad Elías-abin sogsasunna? Ega sogsado: “Machergan-miligugle (7,000) an na sabosad. Wemar, bab-dummadga-imaklediid-Baal-asabin, Bab-Dummadyob-dakega, yokorgi-sindigar-sigissurmaladid.”
ROM 11:5 Emi-ibagi, Bab-Dummad amba deyob ichesaar Israel-dulemar-susa bukwad. Bab-Dummad we-dulemar-suewilubsulinad, ar emidi, na wiledakedba susad.
ROM 11:6 Ar Bab-Dummad e-nued-binsaedba dule-sued, dule-ibmar-nued-imakedba susulid. Ar Bab-Dummad dule-ibmar-imakedba dule-suele, degirdi, e-nued-binsaedba bar susurdo.
ROM 11:7 Degite, ¿igi gussunna? Israel-dulemar bela-bela-ibmar-abedigusad gwen abingassurmalad. Bab-Dummadse-sulesmaladdi, abingasmalad. Israel-dulemar-bamaladdi, Bab-Dummad, amar-uayasuli imaksad, adi, egi bengumalagar.
ROM 11:8 Ar weyob e-Gardagi sognaid: “Bab-Dummad dulemar-e-gwage dutusur imaksad, e-ibya akudake imaksad, degi, e-uaya aku-ito imaksabalid. Emi-ibase, amba deyob gudimalad.”
ROM 11:9 Degine, Bab-Dummad-Gardagi David sogmogad: “Weligwar-e-iba-onobukwad ega boniga gusun, sakigi-ibmar-galegedyob egi galesun, e-iba ega yolegedga-gusun, degi, ega sabsur-odurdaklegedga gusun.
ROM 11:10 Melle-atakmalaga, amar-e-ibya mommoo be imaksun. Nolloo namalaga, e-gangued e-ibe be obelosun.”
ROM 11:11 Degine, an egisbarsundo: ¿Ar Israel-dulemarde Bab-Dummad-abingassurmarsoggu, degisadegu bar Bab-Dummad-abingaosurmarsunde? Suli, degisuli. Israel-dulemar-yolesadba Judíoʼsurmalad abonolenonimalad, adi, Judíoʼmar amargi nobgumalagar.
ROM 11:12 Ar Israel-dulemar Bab-Dummad-abingassurmalad, we-deyob-gusadi, dulemar-we-napneggi-bukmaladga, ibmar-nuedga gunonikid. Degine, Israel-dulemar igarga gussurmalad, we-deyob-gusadi, Judíoʼsurmaladga ibmar-nuedga gunonikid. Degisoggu, bela Judíoʼmar gannar Bab-Dummadse sulenonikir-bursunna. Bela bur bule Judíoʼsurmaladga ibmar-nuedga guodo.
ROM 11:13 Ar an bemarga, bemar-Judíoʼsurmaladga an sunmaked. Ar ande bemarse Bab-Jesús-nuggi-sunmakega an barmilessoggu, an-arbaed an nue-ogannosunnad.
ROM 11:14 An bemar-Judíoʼsurmaladgi-arbanaidba, bitigi nabir an-na-ablis-mesamalad bemargi-nobgumalana gadindo, adi, amar abar nabir abonolemogagar.
ROM 11:15 Ar Bab-Dummad Israel-dulemar-barmetedbali, dule-baigan-we-napneggi-bukmalad nabir Bab-Dummad-ebo-igar-nabogega gunonikid. Degisoggu, Bab-Dummad gannar Israel-dulemar-sunonikile, ¿igi guosunna? Bur bule Israel-dulemar-burgwaledyob-gudimalad burba-geg-bergued nikunonimaloed.
ROM 11:16 Ar madu-omukulesad Bab-Dummadga uklesale, we-madu-omukulesad-besadi, amba Bab-Dummadgadbalid, bela Babgadbiid. Ar sapi-e-saila nuedile, amba sapi-e-anagan nuedmodo. We sogledo, Israel-dulemar-gebemalad ar Bab-Dummadgadile, Israel-dulemar-sorbarmalad amba Bab-Dummadgadmoye.
ROM 11:17 Ar Israel-dulemar sapi-olivo-nuegan-anaganyobid. We-sapi-anagan-abala siklesad. Bemar-Judíoʼsurmaladdi olivo-sapi-isganayobid. Sapi-anagan-napiragwad-siklesad-ular, bemar e-war-sunnadgi gwadilenonimalad. Emigindi, e-mali-bakadga, degine, e-gichi-sunnad-bakadga be gunonimarsunnad.
ROM 11:18 Degisoggu, sapi-e-anagan-sunnadba mer san-dummaa na be imakmar. Ar na be san-dummarba saele, be insao, be sapi-mali ganisulid, sapi-mali be-ganikid.
ROM 11:19 Abakale be sokalile: “Ar sapi-anagan siklesad, adi, an e-war-sunnadgi nabir gwadilegegar.”
ROM 11:20 Ar nabir be sogendo. Emar Bab-Dummad-ibmar-sogsadgi-bengusmaladba siklesad. Bedi, Jesúsʼgi-bensulidba egi be akanaid. Melle san-dummarba na be imakmar. Bur be dobee itogewilubmalad.
ROM 11:21 Ar Bab-Dummad sapi-ana-sunsogedbela siksadde, be-bursunna. Bedi e-ana-sunsogedsulid. Degisoggu, be egi benguder, be-sikmogodo.
ROM 11:22 Degisoggu, Bab-Dummad-ibmar-nuegan-dulemarga-imaked, degine, Bab-Dummad-gandikidba-sabsur-dulemar-odurdaked nue be dakmar. Ar Bab-Dummad e-gandikidba-sabsur-dulemar-odurdaked dulemar-galakusmaladga oyoged. E-ibmar-nuegan-imakeddi, bega oyoged. Ar be Bab-Dummad-ibmar-nuegan-imakedgi be nanadisulile, amba be oballemogoed.
ROM 11:23 Ar Israel-dulemarmoga, Bab-Dummad-bar-bengunonisurmarmogale, abonolenonimarmogoed. Igi sapi-anagan-sunnad sunna gannar gwadilege, deyob Israel-dulemar gunonimaloed. Ar Bab-Dummad gangued nikad gannar sapi-ana sapigi gwadied.
ROM 11:24 Ar bedi olivo-sapi-isganagi be siklesad. Gwen olivo-sapi-nuedgi be gwadilegedsulinad, degite, olivo-sapi-nuedgi be gwadilesad. Israel-dulemar-bursunna. Ar Israel-dulemardi e-anagan-sunnadsoggu, ¿e-olivo-sapi-sunnadgi gannar gwadilegosur be insae? Gwendina, gannar gwadilegoe.
ROM 11:25 Gwenadgan, an abesurdo, we-igar-dukuar-maid bemar wissuli-gudigued. Adi, wissulidbali, melle na be dukin san-dummarba itomalagar. Ar Israel-dulemar Bab-Gayaburba-abala benmalad. Deyobi, Israel-dulemala, bela Judíoʼsurmalad-nabir-abonolemaloed abonolemaladse, bengudii gumaloed.
ROM 11:26 Geb a-sorbali, Israel-dulemar bela abonolenonikoed, Bab-Dummad-Gardagi narmakar naidyob: “Sión-akale, Dule-Bendaked danikoed. We-dule, Israel-dulemar-bar-ibmar-isgana-imakbisuli imaknonikoed.”
ROM 11:27 “An Israel-dulemarga isgued elisar, geb weyob an amarga igar-mesoed.”
ROM 11:28 Degisoggu, Israel-dulemar Bab-Dummad-Gayaburba-Nued-sunmaklegedsikdi, Bab-Dummad-e-isdaraddo, adi, bemar abonolemalagar. Ar Israel-dulemar Bab-Dummad-na-susadsikdi, nue-sabgulegaleddo, ar e-dad-dummagan-sulesad-ular.
ROM 11:29 Ar Bab-Dummad-ibmar-ukedi dulemar-annik gannar bar susulid, degine, dulemar-susale, geg gannar bar meted.
ROM 11:30 Ar bemar-Judíoʼsurmalad, iduardi, Bab-Dummadba gwen uaya-niksur-gudii gusmarmoganad. Emigindi, Bab-Dummad, Judíoʼmar-uayasuli-gunonikid-ular, wile-bemar-dakedba bemar-abinganonimalad.
ROM 11:31 Amba deyobi, Judíoʼmar-uayasate-gusmalad, emidi, Bab-Dummad, wile-bemar-daksadba, nabir amar-wile dakmogoed.
ROM 11:32 Ar ade, Bab-Dummad bela dulemar-uaya-sate imaksad, adi, bela dulemar-wiledakegar.
ROM 11:33 ¡Ibibayobi Bab-Dummad bela-bela binsaed nika! ¡Ibibayobi bela-bela ibmar wisbali! Bab-Dummad-e-igar-naboleged, dule bela mag itogosurguoed, degine, e-ibmar-imaked ibiga wede deyob-imake, dule amba aku-itobalid.
ROM 11:34 Bab-Dummad-Gardagi sognaid: “¿Doa Bab-Dummad-binsaed bela mag itosa? ¿Doa Bab-Dummadga binsaed-ukedga gussunna?”
ROM 11:35 “¿Doa Bab-Dummadga e-inse gebe ibmar-uksa, adi, Bab-Dummad a-dulega ibmar-ukmogagar?”
ROM 11:36 Ar ade, bela ibmarmar Bab-Dummadgi danikid. Bab-Dummadgi bela ibmarmar nabir selemaid. Bela ibmarmar Bab-Dummadgadga gubalid. Bab-Dummad-nug degisadegu ogannolemai gusun. Ar deyobdo.
ROM 12:1 Degisoggu, gwenadgan, Bab-Dummad-dule-wiledaked-ular, ise-wilegar an bemarse egismarsun. Ibdurgan-Bab-Dummadga-ogumakar-uklegedyob na be-san-gudiid, ega be ukmar, be-san swilidikidgi ega be ukmar. Degi, Bab-Dummad-yeer-be-dakedgi be-san ega be ukmar. Ar weyob Bab-Dummadga be-san be ukele, we Bab-nug-odummoleged-napiragwadid.
ROM 12:2 Dulemar-Bab-wissurmalad-daedba mer be damar. Aka bur bemar be-binsaed-gwagmaidba be-daed be ogwamai imakmar. Adi, bemar mag dakega, Bab-Dummad na e-sogedba igi-ibmar abemai. Ar Bab-Dummad-e-ibmar-abegedi, ibnuedid, yeer-itolegedid, degine, innikigwadbalid.
ROM 12:3 Bab-Dummad nued angi binsaewilubsulinad, degite, nued angi binsasad. A-ular, anga igar uklesad, adi, bemarga sogega, melle bemar wala-walagwensaar, na be dukin wilub-obis itomalo. Suli, degisuli. Bab-Dummad egi-bensuli-gued bega uksadba na be itoakwaa binsamalo.
ROM 12:4 Ar igi anmar-sana gwennaa guen-inigwele, degite, eba-akamalad bukidar egi akananaid, degine, we-eba-akamalad bela emarbi ibmar imaksulid.
ROM 12:5 Ar anmar Cristoʼba-nanaimalad deyobmodo, anmar ichesur-gumar-inigwele, Cristoʼgindi anmar san-wargwennaa gued, degine, anmar unnila san-wargwengi bela na akananai gumalad.
ROM 12:6 Degisoggu, Bab-Dummad-Burba-Isligwaled anmargi dog-nued-binsasadba, anmar gurgin-burbaled akar-akar nikamalad: Bab-Dummad-gayaburba-barsoged-gurgin-burbaled be nikale, Bab-Dummad egi-bensuli-gued bega-uksadba be ebusunna.
ROM 12:7 Dulemar-baid-bendaked-gurgin-burbaled be nikale, nue be dulemar-baid-bendakodo. Ar dulemar-odurdaked-gurgin-burbaled be nikale, nue be dulemar-odurdakodo.
ROM 12:8 Bab-Jesús-igargi-dulemar-ogannoged-gurgin-burbaled be nikale, nue be dulemar-ogannogodo. Be dulemarga ibmar-uked-gurgin-burbaled be nikale, nabir gatik ibmar obinebakar be ukodo. Be dulemar-idued-gurgin-burbaled be nikale, nuedgi be dulemar-iduodo. Be dulemar-wiledaked-gurgin-burbaled be nikale, weligwar-itogedgi be dulemar-bendakodo.
ROM 12:9 Napiragwadgi na be sabgumar, mer yamo-daedgi na be sabgumar. Ibmar-isgana sae be-dakmar, unnila ibmar-nuedbarbi be nanamar, mer igar-nued be metemar.
ROM 12:10 Na be muchub-muchub sabgumar, na gwenatigwale be sabgumar. Na be muchub-muchub dummaganyob be dakmar.
ROM 12:11 Arbaed be nuedgi-imakmar, mer be wiedgi imakmalo. Bab-Burba-yeer-itoged-anmar-imakedba Bab-Dummadga be arbamar.
ROM 12:12 Bab-Dummad ibmar-nued-yoedse-bemarga-ukoed-ular, bemar nue-weligwar itomarsun. Be nue-naibi-itodiidgi burdied be imakmar. Bab-Dummadse-gordigu be imakmar.
ROM 12:13 Jesucristoʼgi-akananaimalad ibmar-sate be dakele, be-ibmar-nikadba ega be ukmalo. Aimar bese atakdanikir, nue ogabmalo.
ROM 12:14 Dulemar-be-baregindimaladga be sogo, bela bega ibmar-nueganbi guena gadinye, mer amar be ukabsamalo.
ROM 12:15 Dulemar-weligwar-itodimaladba be wergumar. Dulemar-bodimaladba be bomarmo.
ROM 12:16 Bemar na be bulakwaa nuedgi gudii gumar. Mer san-dummarba na be imakmar. Suli, degisuli. Dule-binsarmalad be-sordaga be imakmar. Mer be binsamar, bemarbi be ibmar wismarye.
ROM 12:17 Dule ibmar-isgana begi imakele, bedi mer a-dulegi ibmar-isgana imako. Nue salakarmar, bela dulemar-abargi ibmar-nueganbi-imaked be imakmar.
ROM 12:18 Ar dule-baiganbo-igar-nudaked begi siile, imaked be imake. Adi, be dule-baiganbo bogidik-gudii gumalagar.
ROM 12:19 Gwenadgan-sabemalad, dule be-oakalosale, melle buged-mai be imakmar. Suli, degisuli. Bur bemar, Bab-Dummad-dule-sabsur-odurdakega imakmar. Ar Bab-Dummad-Gardagi narmakar naid: Bab-Dummad soged: “Buged-mai-imakleged angadid, ani an buged-mai imakoed.”
ROM 12:20 Degisoggu: “Be-isdarad ukudmaada-itogele, masgi ogunno, uku-uku-itogele, ogobo. Deyob be a-dule-imakele, be nue-obingegsaoed.”
ROM 12:21 Ibmar-isgana mer begi obined be sae. Ibmar-nued-saedgi ibmar-isganagi obined be imake.
ROM 13:1 Bela dulemar dummagan-negdakmamaidba nanaewilubmalad. Ar ade, Bab-Dummad belagwapa na dummagan-mesed. Ar dummagan-negdakmamaidi, Bab-Dummad-sogedba mamaid.
ROM 13:2 Degisoggu, dule-wargwen dummad-maidba-dasulile, Bab-Dummad-dule-mesisadgi yolenaido. Degine, dulemar dummaganba-ibsasurmaladi, na dukin sabsur-odurdakleged amimaloed.
ROM 13:3 Ar dummagan-negdakmamaidi, dulemar-ibmar-nued-imakdimalad-ogwayega maisulid. Wemar-maidi, dulemar-ibmar-isgana-imakdimalad-ogwayega mamaid. Degisoggu, dummagan-negdakmamaidse, ¿be dobgudii gubisuli? Ibmar-nued be imakdo, adi, amar be-nug ogannogoed.
ROM 13:4 Ar dummagande, bemarga ibmar-nuegan-imakmalaga, Bab-Dummadga-arbamalad gued. Ar be ibmar-isgana-imakele, be dobe itomaloed. Ar ade, dummagan binsa gangued nikasulid, ar Bab-Dummadga-ibmar-inniki-imakega maid, dule-ibmar-isgana-imakdiid-sabsur-odurdakega maid.
ROM 13:5 Degisoggu, a-ulale, anmar dummagan-urbalikwaa gudiguergebed, adi, anmar mer sabsur-odurdaklegegar. Unnila agarbisurdo, ar anmar dummagan-urbalikwaa nanaergebed, adi, anmar ulubgi akarsur itobaligar.
ROM 13:6 Ar agala, bemar, mani-bennuklegergebed bennukmalad, adi, nabir dummagan negsedii gumalagar. Ar dummagan Bab-Dummadga-arbamalad gumalad, ar a e-arbaed gued.
ROM 13:7 Bemar ibmar-ganikid igarmar-sogmaidba be imakmar: Mani-bennuklegergebed-be-ganikid be bennukmar. Neggweburgi-mani-weleged-be-ganikid, be ukmar. Doa-dulegi be binsaed-nikaa-dae-wilubbina, ega be binsaed-nikaa-daed oyogo. Doa-dule-nug be ogannogewilubbina, a-e-nug be ogannomar.
ROM 13:8 Melle dule-baidgi mani-gani-gudii be imakmar. Bur na be muchub-muchub sabgued-oyodii gumar. Ar ade, be dule-baid sabele, Moisés-Igar-Maidba be imaksamardo.
ROM 13:9 Ar weyob igar maid: “Melle be be-abirginsulid-ebo galagwensuli nanao. Melle be dule-oburgo. Melle be ibmar-atursao. Melle be gakansaar aimargi sunmako. Melle be dule-baid-ibmarbina be sogo.” Éxodo 20:13-17 We-igarmar-soglesad, degi, bela igarmar-bamalad-mamaid, wegi bela irgwen-sogar weyob soglesiid: “Ar igi na be san-sabgue, deyobi dule-baid be sabgumogoed.”
ROM 13:10 Ar be dule-baid-sabele, geg egi be ibmar-isgana imaked. Degisoggu, dule-baid-sabguedi, we bela-Igar-Maidba nanaedid.
ROM 13:11 Degisoggu, na be sabgumar, ar anmar ibagan-isgana-naid wisid. Emigi wachi bato omossoggu, anmar gabmamaiyob-gudimalad atakmarsun. Ar anmar-gebe-Jesúsʼgi-bensuli-gunonikidba, emigindi, bela-abonolegoed-iba anmarga bur-nue walikgusad.
ROM 13:12 Neg-mutikid-bergudanikidyob, we-napneg bergudanimogad. Degine, neg-ibgued bato warmakdanikidyob Jesús-gannar-danikid bato warmakdanimogad. Degisoggu, negsichidgi-ibmar-imakleged anmar mimarsun. Sordamar-urwed-mor-yoedyobi, anmar neg-meegwadgi Bab-Jesús-Igargi nanamarsun.
ROM 13:13 Neg-ibgin-nanalegedyob, ibmar-nued-imakdii an nanamarsun. Mer dogdar-mas-gunnedginbi be nanamar. Mer mumgudii be nanamar. Mer galagwensuli abirgunagwarsuli negsichigi be nanamar. Degine, mer be-abagangi-bingedsuli-nanaed be imakmar. Mer na urwedgi be nanamar. Degine, mer na nobguedgi be nanamar.
ROM 13:14 Bur be Bab-Jesucristoʼga na be san-uksadba nanamar, adi, Bab-Jesucristo-daedba nanaegar. Deginbali, melle be ibmar-isgana-imakbiedba be nanamar.
ROM 14:1 Ar dule-gwensak Jesúsʼgi-bensulid nollogwale, be abingao. Melle ebo be abin-abin imaknai guo.
ROM 14:2 Ar dule-Jesúsʼgi-bensulid-nollosurmalad binsamala, bela ibmar-gunnele, akarsurye. Dule-Jesúsʼgi-bensulid-nollomaladdi, unnila ibmar-gagan-durbabi gunmalad.
ROM 14:3 Dule-bela-ibmar-gunmalad, mer isdar dule-bela-ibmar-gunsurmalad dako. Degine, dule-bela-ibmar-gunsulidi, mer dule-bela-ibmar-gunnedgi yolego, ar ade, Bab-Dummad we-ebobela abingasad.
ROM 14:4 Jesúsʼba-nanaimalad bela Bab-Dummad-mai gumalad. Degisoggu, ¿ar bede doa-dulesunna, be dule-baid-maigi sunmaked? Ar mai na e-dummadga nabir ibmar-imaksadibe, noar ibmar-imaksadibe, we-e-dummad na ega sogoed, be nabir imaksaye, be noar imaksaye. Deyobi, Bab-Dummadbi Bab-Jesús-Igargi-gwen-galakuosuli-nanaega dule-imaked.
ROM 14:5 Abar-dulemar ibagwensak iba-baidba bur iba-birigined daked. Abar-dulemar ibamar ber emarbi daked. Dule-wala-walagwen na e-binsaedba gudii gumalargebmalad.
ROM 14:6 Ar dule iba-naid bur-nued dakele, we Bab-Dummadga nued iba dakdo. Ar dule iba-naid baisur-dakele, we Bab-Dummadga iba baisur-dakodo. Ar dule ibi-mas-gunnele, Bab-Dummad-nug-ogannogega gunned, ar ade, Bab-Dummadga soged dog-nuedye. Ar dule a-mas-gunsulile, Bab-Dummad-nug-ogannogega gunsulid, degine, a-dule Bab-Dummadga dog-nuedye sogmogad.
ROM 14:7 Ar anmar-dula-gudiid, na anmarga dukin dula gudisulid, degine, anmarga na dukin burgwesurmarbalid.
ROM 14:8 Ar an dula-gudimalale, Bab-Jesúsʼga an dula-gudimalad. An burgwemalale, Bab-Jesúsʼga an burgwemalad. Degisoggu, ar an dula-gudimardibe, an burgwemardibe, anmar Bab-Jesúsʼgadga gumalad.
ROM 14:9 Ar a-ulale, Cristo burgwisad, gannar durgunonikid, adi, Cristo dulemar-burgwismalad-e-Dummadga, degine, dulemar-dula-gudidimalad-e-Dummadga guegar.
ROM 14:10 Ar degite, bedi ¿ibiga be-gwenadgi be sunmaksunna, we nodiiye? Deginbali, bede, ¿ibiga be-gwenad-ibgwensur be daksunna? Ar bela anmar Bab-Dummad-asabin ambikudapmaloedbiid, adi, Bab-Dummad anmarga igar-itogegar.
ROM 14:11 Ar Bab-Dummad-Gardagi narmakar naid: “Ar an dulasaila maidgi weyob soged: Bela-dulemar an-asabin yokorgi-sindigar sigmaloed, bela-dulemar anga ise-sogar imakmaloed, be Bab-Dummadye.”
ROM 14:12 Degisoggu, anmar Bab-Dummadga an-ibmar-imaksamalad na wala-walagwen sogmaloed, ibiga deyob an imaksamala.
ROM 14:13 Degisoggu, melle anmar bar na muchub-muchub egi sogmar, we isgudiiye. Anmar melle-gwenad-yoleged, melle-isgued bur imakewilupid.
ROM 14:14 An wisdo, Bab-Jesúsʼgi an bensurdo, masgulleged-gwensakgi bipisaar ised sated. Ar dule binsaele, masgulleged-gwensak iseye, ar agardi a-mas isedga gudo.
ROM 14:15 Ar be-mas-gunnedba be-gwenad bukib-binsaega be imakdibe, ar bar be sabguedgi nanadisurdo. Melle be be-masgunned-ular, be-gwenad-isgued be imako, ar be-gwenad-ular Cristo burgwismogad.
ROM 14:16 Degisoggu, melle dule-baigan ibmar-nued-be-imakdiidgi isdar-sunmaked be imako.
ROM 14:17 Ar Bab-Dummad-e-negdakmaidi, masgullegedsulid, degine, goblegedsurbalid. We-Bab-Dummad-e-negdakmaid-igar, Bab-Burba-Isligwaledgi innikii ibmar-imaklegedid, ulubgi bogidik-itolegedid, degine, weligwar-itolegedid.
ROM 14:18 Ar weyob, dule Cristoʼga arbadiile, Bab-Dummad yeer a-dule-daked, degine, dulemar nabir a-dule-dakmogad.
ROM 14:19 Degisoggu, bogidik-gudiguega be ibmar imakmarsun. Be muchub-muchub-ogannogega be ibmar imakmarsun.
ROM 14:20 Mer mas-ulale, Bab-Dummad-dulegi-arbasad-ichogega be imako. Ar nue-napiragwad, bela masgulleged nueganbiid. Degi-inigwele, dule na e-mas-gunnedgi dule-baid-isguega-imakele, wedi ibnuedsulid.
ROM 14:21 Ar deyobile, bur-nueddo, san gunsulid, vino gobsulid. Degine, ibu-imakedgindibe, be-gwenad-isguega-imakele, bur amar melle be imakodo.
ROM 14:22 We-igar-an-bega-sogsadgi, ar igi na be itoge, unnila, Bab-Dummad bebo deyob na be wisii gudo. Ar dule, na e-ibmar-imaked egi yolesur-itogele, we-dulegi nued binsalesdo.
ROM 14:23 Ar dule na ibmar-gunnedgi wis naibaisaar itogele, we bato nue-nosdo, ar ade, benedgi mas guchad. Ar bela ulubgi benedgi ibmar-imakele, we, isgueddo.
ROM 15:1 Degisoggu, anmar Jesúsʼgi-bensuli-gannarba-gudimalad, gwenadgan-Jesúsʼgi-bensulid-nollo-gudimalad-bendakewilubmar. Mer dukin anmar na yeer-itogedginbi binsamar.
ROM 15:2 Anmar na war-wargwen gwenad-baid ibmar-nuedgi-yeer-itogega imakmar, adi, anmar a-gwenad e-ulubgi ogannogegar.
ROM 15:3 Ar Cristoʼbela ibmar na dukin-yeer-itogega imaksasulid. Ar igi-Bab-Dummad-Gardagi narmakar nai, deyob gusad: “Dulemar-begi-isdar-sunmaknanaid angi yolenonimogad.”
ROM 15:4 Ar ade, iduar Bab-Dummad-Gardagi ibmar-narmaklesmaladi, anmar-odurdakegala narmaklesad. Adi, anmar Bab-Dummad-Garda-wisidba, gwae-gwae-itosulidgi, degi, gwage-ogannolegedgi, degine, bensulidgi, ibmar-edarbedii gumalagar.
ROM 15:5 Bab-Dummad-gwae-gwae-itosuli-anmar-imakedi, degine, anmar-gwage-ogannogedi, bitigi Cristo-Jesús-nanasadyobi, gwenatigwar-gudigumalaga, degi, na emarbi-itoge bemar-imakena gadin.
ROM 15:6 Adi, bemar bela bulakwaa, unnila gaya-gwennagwayobi, Bab-Dummad anmar-Dummad-Jesucristo-e-Bab-e-nug, odummomalagar.
ROM 15:7 Degisoggu, ar igi Cristo anmar-abingasmoga, deyob na be muchub-muchub abingamarmo. Adi, Bab-Dummad-nug ogannolegegar.
ROM 15:8 An bemarga sogsun: Cristo-Jesús Judíoʼmar-maiga-guega nonikid, adi, Bab-Dummad-napira-ibmar-imaked oyogegar. Degi, Bab-Dummad-anmar-dadganga-ibmar-imakoye-sogsad, imakbaligar. Deyob guegala, Cristo nonikid.
ROM 15:9 Degine, Cristo nonibalid, adi, Judíoʼsurmalad Bab-Dummad-wilesakwaa-e-daked-ular, Bab-Dummad-nug ogannomalagar. Ar igi Bab-Dummad-Gardagi narmakar nai: “Degisoggu, agala, dule-yar-baid-baiginmalad-abargi an be-nug odummoged. An be-nug-odummogega an namakbaloed.”
ROM 15:10 Amba Bab-Dummad-Gardagi sognaibalid: “Dulemar-yar-baid-baidginmalad, Bab-Dummad-dulamarba be wergumar.”
ROM 15:11 Degine, Bab-Dummad-Gardagi amba sognaibalid: “Bela dulemar-yar-baid-baidgi-bukwad, Bab-Jehová-nug odummomar. Degi, bela dulemar-baid-baid-danar-danar-bukwamalad, Bab-Dummad-nug ogannomar.”
ROM 15:12 Amba Isaías weyob narmaksamogad: “Igi sapi-saila nie, deyob Isaí-e-wagwa nodamogoed. Degi, we-dule, belagwapa dulemar-yar-baid-baidgi-bukwamalad-ugakaase negdakmai guoed. Degine, dulemar-baid-baid-danar-danar-bukwamaladi, abonolemalaga, a-dulegi nue-bensuli-edarbedii gumaloed.”
ROM 15:13 Bab-Dummad-ibmar-bensuli-edarbedi-anmar-imakedi, bemar-egi-bensuli-gunonikidba bela weligwar-itogega, degine, ulubgi bogidik-itogega bemar-imakena gadin. Adi, bemar Bab-Burba-Isligwaled-gangued-nikadba, bur bule Bab-Dummadgi-bensuli-edarbedii be gumalagar.
ROM 15:14 Gwenadgan, bemargi an bensurdo. Ar an nue-wisid, bemar ibmar-nued-imakbiedbina gudimalad, degine, be Bab-Jesús-igar nue-wismarbalid. Degisoggu, sunna na be muchub-muchub ogannomardo.
ROM 15:15 Degi-inigwele, gwenadgan, Bab-Dummad nabir angi binsaewilubsulinad. Degite, nabir angi binsasad. A-ular, anga-igar-uksadi, an bemarga gannabasaar narmaksado, adi, bemar insamalagar.
ROM 15:16 Ar Judíoʼsurmaladga-sunmakegala Jesucristoʼga-arbaega an nugsalesad. Degisoggu, Bab-Gayaburba-Nuedgi an sunmakdisunnad, adi, Judíoʼsurmalad Bab-Dummadga-ibmar-nued-uklegedyob gumalaga, Bab-Burba-Isligwaledba swilidik gumalagar.
ROM 15:17 Degisoggu, Bab-Dummadga an Cristo-Jesúsʼba-ibmar-imakedgi an bela-bela yeer itoged.
ROM 15:18 Ar degisulile, an sunmakbi itossuliled. Emigindi, an sunmakdo, igi angi Cristo Bab-Dummadba-ibsaega Judíoʼsurmalad-imaksa. An imaksadi, an-sunmaksadginbi an imaksasulid, an-ibmar-imaksadgi an imaksabalid.
ROM 15:19 Weyob-an-imaksadi, Bab-Burba-Isligwaled-ganguedba ibmar-wilubgan-dakledisulid an imaksad, degine, ibmar-gegerdaklemalad an imaksabalid. Degisoggu, Jerusalén-neggwebur, degine, a-neggweburmar-dikarbarmalad-akale, Ilírico-yarsega, bela Cristo-Gayaburba-Nuedgi an sunmaksad.
ROM 15:20 Weyobi, Bab-Gayaburba-Nuedgi-sunmakegala, bia amba yoo Cristoʼgi sunmaklege, agi an alamaknai gudigusad, adi, melle dule-baid-Bab-Gayaburba-Nuedgi-sunmaksad-sorba an sunmakegar.
ROM 15:21 Ar Bab-Dummad-Gardagi narmakar naidyob: “Dulemar-Bab-Dummadgi-sunmakleged-itodisurmaladi, Bab-Dummad-itononimaloed. Degi, dulemar-Bab-Dummad-gwen-itodisurmaladi, mag itononimaloed.”
ROM 15:22 Agala, we-arbaed-ular, geg an bemarse nue-nae an gusad.
ROM 15:23 Ar emigindi, wegi an-arbaed anga bergunonisoggu, degine, birga-dikasurgus an bemarse ataknabi gudisoggu,
ROM 15:24 España-yarse an nadele, bemarse an atakee naoed. Bemar-walik an weligwar-gudiguoed-sorba, Españaʼse be an-barmidmalaga, be an-bendakmalo an insado.
ROM 15:25 Ar emigindi, an Jerusalén-neggweburse naesokalid, Jesucristoʼgi-akananaimalad-agi-bukmaladga mani berbenaegar.
ROM 15:26 Ar ade, gwenadgan-Macedonia-yarginmalad, degine, gwenadgan-Acaya-yarginmalad, Jesúsʼba-nanaimalad-Jerusalénʼgi-bukmalad-abargi-wilegana-gudimaladga mani-weed nue-yeer itosmalad.
ROM 15:27 Ar we-gwenadgan nue-yeer-itogedgi mani-wesmalad, ar amba emar-bendakergebmalad. Ar Judíoʼsurmalad Judíoʼmarba nabir ibmar-burbaled nikusmarmosoggu, Judíoʼsurmalad Judíoʼmarga ibmar-sanaled ukmarmogargebed.
ROM 15:28 Degisoggu, we-ibmar-imaked an obelosale, we-mani an uksad-sorbali, España-yarse an nadoed, agi an bemarse atakee nadapoed.
ROM 15:29 An nue-wisdo, an bemarse modapile, Cristo-Gayaburba-Nuedgi an bemarga sunmakdele, Bab-Dummad bela-bela anmargi nued binsaoed.
ROM 15:30 Degi-inigwele, gwenadgan, bemarse nue-ise-wilesakwaa anmar-Dummad-Jesucristo-nuggi an egis, degine, Bab-Burba-Isligwaled-anmar-sabedba an egisba, Bab-Dummadse-anga-goledgi be an-bendakmar.
ROM 15:31 Adi, Judea-yargi Bab-Jesúsʼba-ibsabisurmaladi melle angi yolemalagar, degine, an mani-semaid, Jerusalénʼgi Jesucristoʼgi-akananaimalad-bukmalad nuedgi abingamalagar.
ROM 15:32 Adi, an bemarse warmakdapir, weligwaledgi Bab-Dummad-sogedba an modapi-guegar, adi, bemar-abargi an obunnogegar.
ROM 15:33 Degine, Bab-Dummad-Ulubgi-bogidik-itoge-anmar-imaked, bela bemarba gudii guo. Deyob gusun.
ROM 16:1 Anmar-buna-Febe, Jesúsʼba-nanaimalad-Cencrea-neggweburgi-danar-ambikunonidamalad-e-bendakedga gudiid.
ROM 16:2 An bemarga soged, a-buna Bab-Jesús-nuggi be nued abingamalo. Igi Jesucristoʼgi-akananaimalad gusgu-igar-maidba nued abingalege, deyob be abingamalo. Degine, Febe ibi-ibmar-abealile, be bendakmalo. Ar ade, we-buna dulemar-bukidar-bendaksad, degine, anse-bakar, an-bendaksamogad.
ROM 16:3 Priscila, degi, Aquila, anba Cristo-Jesúsʼga-arbamalad gumalad. Amarga sogo, be nuedmar sogeye.
ROM 16:4 Wemar an-ular burgwednaga gusmalad. Priscilaʼga, degi, Aquilaʼga, anbi dog-nuedye an sogsulid. Bela Judíoʼsurmalad Jesúsʼba-nanaimalad-danar-ambikunonidamalad amarga dog-nuedye sogmarmogad.
ROM 16:5 Deginbali, Jesúsʼba-nanaimalad-amar-neggi-danar-ambikunonidamaladga be sogbalo, bemar nued sogeye. Degine, Epeneto, an nue-sabedga be sogo, be nued sogeye. We-inse Acaya-yargi Cristoʼba nagus gusad.
ROM 16:6 Maríaʼga be sogo, be nued sogeye. We bemarga nue-arbasad.
ROM 16:7 Andrónicoʼga, degine, Juniasʼga, be sogo, be nuedmar sogeye. Wemar-an-gwenadgan, an-dare esgaryagi mellesii gusmalad. Gwenadgan-Jesús-e-sapingan-bur-dummagan-abargi, wemar nue-nug-nikamarmogadid. Degine, wemar-inse an-idu Cristo-abingas gusmalad.
ROM 16:8 Ampliasʼga be sogo, be nued sogeye. We-dule, Bab-Jesús-nuggi an nue-sabedid.
ROM 16:9 Urbanoʼga be sogo, be nued sogeye. Urbano Cristo-Jesúsʼgi anmarba arbaedid. Degi, Estaquisʼga, be sogo, be nued-sogeye. Estaquis an nue-sabedid.
ROM 16:10 Apelesʼga be sogo, be nued sogeye. We-dule, Cristoʼgi-nue-bensulid na oyosad. Aristóbulo-negginmaladga be sogo, be nuedmar sogeye.
ROM 16:11 An-gwenad-Herodiónʼga be sogo, be nued sogeye. Narciso-negginmalad-Jesúsʼba-nanaimaladga be sogo, be nuedmar sogeye.
ROM 16:12 Trifenaʼga, degine, Trifosaʼga be sogo, be nuedmar-sogeye. Wemar Bab-Jesúsʼga-arbamalad gumalad. Pérsidaʼga be sogmogo, be nued sogeye. We-buna, anmar nue-sabedid, Bab-Jesús-igargi nue-arbasmogad.
ROM 16:13 Rufoʼga be sogo, be nued sogeye. We-dulede, Bab-Jesúsʼgi nue-nug-nikamogadid. Degine, Rufo-e-nanga be sogbalo, be nued sogeye. We-omede, an-nanyobi an daked.
ROM 16:14 Asíncritoʼga, Flegonteʼga, Hermasʼga, Patrobasʼga, Hermesʼga, degine, gwenadgan-amarba-gudimaladga be sogo, be nueganbimar sogeye.
ROM 16:15 Filólogoʼga, Juliaʼga, Nereoʼga, Nereo-e-bunga, Olimpasʼga, degine, bela Jesucristoʼgi-akananaimalad-amarba-gudimaladga be sogo, bemar nueganbi sogeye.
ROM 16:16 Na be nue-angaagwaledgi na be muchub-muchub sogmar, be nued sogeye. Bela Cristoʼba-nanaimalad-danar-ambikunonidamalad bemarga sogsiid, be nuedmar sogeye.
ROM 16:17 Gwenadgan, wilesagwadgi an bemarga soged, nue salakarmar. Be dulemar-danar-danar-sordamar-mamarmaladgi, degine, dulemar-Bab-Jesús-Igargi-banguega-imakedgi be bangumar. Ar bemar-ibmar-durdaksadi, weyob be durdaksasurmalad. We-dulemargi be bangumar.
ROM 16:18 Ar dule-degidamalad anmar-Dummad-Jesucristoʼga arbadisurmalad. Wemardi, e-sabanginbi-binsaedba arbamalad. Degine, yeer-gayamar-bilegedgine, yamo-binsa-nued-sunmaklegedgine, dulemar-binsaedsurmalad-e-binsaed gaddamalad.
ROM 16:19 Ar ade, bela dulemar bemar-Bab-Jesús-sogedba-ibsadiidi wisgumamaid, degisoggu, an bemarba weligwar itoged. Degi-inigwele, ibmar-nued-imakegala be binsaed-nikaa-nanaed an bemar-abeged. Ibmar-isgana-imakegardi, mer be deyob nanamalo.
ROM 16:20 Degine, Bab-Dummad-Ulubgi-bogidik-itogega-anmar-imaked, a emisgwasaar nia-saila-Satanásʼgi-nakwed be-imakmaloed. Bemar nia-saila-birgi annasayobi be gumaloed. Anmar-Dummad-Jesucristo bemargi nued binsasun.
ROM 16:21 Anbo-arbaed-Timoteo, an-gwenadgan-Lucio, Jasón, degine, Sosípater, amar bemarga sogsiid, be nuedmar sogeye.
ROM 16:22 Ani Tercio, we garda an-googi an bemarga narmaksad. Bab-Jesús-nuggi an bemarga soged, be nuedmar sogeye.
ROM 16:23 Gayo bela bemarga sogmogad, be nuedmar sogeye. Gayo, e-neggi nue-an-akwisad, degine, bela Jesúsʼba-nanaimalad-danar-ambikunonidamalad ese nue-akwilesmarmogad. Erasto, bemarga sogmogad, be nuedmar-sogeye. We-dule, neggweburga-mani-saboged-duled. Degine, gwenad-Cuarto bemarga sogsimogad, bemarde nueganbi sogeye.
ROM 16:24 Anmar-Dummad-Jesucristo bemargi nued binsasun. Deyob gusun.
ROM 16:25 Ar Bab-Dummad, an Gayaburba-Nued-Jesucristoʼgi-an-sunmakdiidyob sunna gandik bemar-imaked. A-e-nug be ogannomarsun. We-Igarde, iduar gusgu gebe-negasailaunni odukuar mainad.
ROM 16:26 Emigindi, Bab-Dummad-degisadegumaid-sogsadba e-gaya-barsogmalad Bab-Dummad-Gardagi-narmaksamaladbali, we-igar osanolenonikid. Adi, bela dulemar-yar-baid-baidgi-bukmalad Jesucristoʼgi mer bengumalaga, eba uaya-nikaa damalagar.
ROM 16:27 Ar unnila Bab-Dummadbi wargwennagwad, degine, bela-ibmar-wisi maid. A-e-nug Jesucristoʼba, degisadegu ogannomarsun. Deyob gusun.
1CO 1:1 Ani Pablo, Bab-Dummad-sogedba, Jesucristo-sapin-bur-dummadga-gumogaga anse gorlesad. An gwenad-Sóstenesʼbo bemarse garda narmaksiid.
1CO 1:2 Bemar-Bab-Jesúsʼba-nanaimalad-Corintoʼgi-danar-bukwad anmar bemarse garda narmaksiid. Bemar, Cristo-Jesúsʼgi-gwage-swilidik gunonimalad. Bab-Dummad e-neggwebur-isligwaledga-guega bemarse gochad. Bela dulemar gwen neg-sukungan-bessuli Bab-Jesucristoʼse-gorbukmaladba-mesa isligwaledga-guega bemarse gochad. A-Jesucristoʼde amar-Dummadga gunonikid, degine, anmar-Dummadga gunonimogad.
1CO 1:3 Bab-Dummad anmar-baba, degi, Dummad-Jesucristo, bemargi nued binsamarsun, degine, ulubgi-bogidikid bemar-itogega imakbarsun.
1CO 1:4 Bab-Dummad, Cristo-Jesúsʼgi bemargi-ise-nued-binsasadba dog-nuedye gusgu an Bab-Dummadga bemar-nuki sogdaed.
1CO 1:5 Bemar Jesucristoʼbali bela ibmar-nuegan-burbaled nikunonikid. Bemar yeer-sunmake, degi, ibmar-wisi be gunonimalad.
1CO 1:6 Degisoggu, Cristoʼgi-Gayaburba-Nued-sunmakleged bemargi oyolenonikid, we-igar, napiragwadye.
1CO 1:7 Degisoggu, Bab-Dummad-gurgin-burbarmalad-nuegan-ukedi, be galakudeeye binsasurmalad, bela be nikmalad. Unnila anmar-Dummad-Jesucristo-danikoed-e-ibagan-edarbedii be gumarsun.
1CO 1:8 Bab-Dummaddi mer isguedse be galakuegala, burgwedse be-bendakdii guoed. Adi, anmar-Dummad-Jesucristo-e-danikoed-ibagangi, bega igar-itolealile, ibmar-gwen-oakalossuliyob be daklegegar.
1CO 1:9 Bab-Dummad e-ibmar-sogsadba na imakedsedasoggu, bemarga e-ibmar-sogsadba na imakodo. Bab-Dummad na e bemarse gochad, adi, E-Machi anmar-Dummad-Jesucristo-walikaa anmar gudii guegar.
1CO 1:10 Gwenadgan, anmar-Dummad-Jesucristo-nuggi an bemarse nue-wilesakwaa an gorsun. Mer na be akar-akar sunmakmar, bela balibi be-bukwa gumar. Bela be-damaladgi, be-binsamaladgi yopira na be binsabukwa gumar.
1CO 1:11 Gwenadgan, an weyob bemarga soged, ar ade, Cloé-neg-yaginmalad-anga-sogsadba an bemar-itoged, bemarde na abin-abin imakdimarye.
1CO 1:12 Ar bemar abar-sogdimalad: “Andi, Pablo-sordaye,” baigandi sogmogad: “Andi, Apolos-sordaye,” degi, baigandi sogdimogad: “Andi, Pedro-sordaye.” Deginbali, abar baigandi sogmogad: “Andi, Cristo-sordaye.”
1CO 1:13 ¿Ar Cristoʼde sordamar-mamaredsi? ¿Ande bemarga nakrusgi burgwissi? Ar bemarde ¿Pablo-nuggi Bab-Dummad-diigi-ogleged-igargi-oglessi? Degisulid.
1CO 1:14 Bab-diigi-ogleged-igargi an bemar-ogsasurmalad. Agala, Bab-Dummadga dog-nuedye an sogsundo. Unnila Crispo, degi, Gayo, amarbi an Bab-diigi-ogleged-igargi ogsad.
1CO 1:15 Degisoggu, geg bemar sogmalad: “An Pablo-nuggi Bab-Dummad-diigi-ogleged-igargi oglesye.”
1CO 1:16 Deginbali, an Estéfanas-neg-yaginmaladbi Bab-diigi-ogleged-igargi an ogsabalid. Baigandi, an insasulid an Bab-diigi-ogleged-igargi ogsabardibe.
1CO 1:17 Ar ade, Cristo e-diigi-ogleged-igargi dulemar-ogega an-barmissulid. Deginbali, Cristo an-ibmar-wisidba-sunmakedgi an-barmissurbalid. Cristo an-barmialid, Bab-Dummad-Gayaburba-Nuedgi sunmakegar. Ar deyobsulile, Cristo-nakrusgi-burgwisad-e-igar gwen-gangued-nikasuli imaklego-itole.
1CO 1:18 Ar dule-yoggus-gudimaladgala, Cristo-nakrusgi-burgwisadgi-sunmakleged-igar, igar-binsaledga gued. Anmar-abonolesmaladgardi, we-Bab-Dummad-Gayaburba-Nuedgi-sunmakleged, Bab-Dummad-e-gangued gued.
1CO 1:19 Ar Bab-Dummad-Gardagi narmakar naid: Bab-Dummad soged: “Dule-binsaed-ibegan e-binsaed-nikadi, an osulogoed. Dule-nue-ibmar-wismalad, ibmar-wissulidga an imakoed.”
1CO 1:20 Degite, ¿bia dule-nue-binsaed-ibed nadsunna? ¿Bia Bab-Garda-ogwamalad nadsunna? ¿Bia dule-we-napneggi-igar-dummagan-mamaid-wisimalad nadsunna? Bab-Dummad, ¿we-napneggi-ibmar-wisimalad, ibmar-wissulidyob imaksasursi? Eye, deyob imaksa.
1CO 1:21 Bab-Dummad, bela e-binsaed-nikadba we-napnegginmaladi dule-binsaedgi, gwen e-amiega imaksasulid. Agala, Bab-Gayaburba-sunmakleged-binsaledga-guedyobidba egi-bensurmalad abonogega imaksad.
1CO 1:22 Ar Judíoʼmardi ibmar-wilubgan-dakledisurmalad-ega-oyobi abemalad, Griegoʼmardina, ibmar-nue-wisigued amidimalad.
1CO 1:23 Ar anmardi, Cristo-nakrusgi-burgwisad-igargi sunmakdiid. We-igar, Judíoʼmarga igar-egi-gwisgued gued. Judíoʼsurmaladdi, a-igar, igar-binsaled dakmalad.
1CO 1:24 Bab-Dummad-dulemarse-gochamaladgardi, Judíoʼmardibe, Griegoʼmardibe, amargardina, Cristo, Bab-Dummad-e-ganguedid, degine, bela e-ibmar-wisid gubalid.
1CO 1:25 Ar Bab-Dummad-Igar-binsaled-daklegedi, dulemar-e-binsaedba bur binsaed-biriginedid. Degine, Bab-Dummad-ibmar-saed bur nollo-dakle-inigwele, degite, dulemar-ibmar-saedba bur gangued nikad.
1CO 1:26 Degisoggu gwenadgan, nue na be itomala, Bab-Dummad bese-gochagu, igi be gudimalana. Dulemar sogmalad, bemar-abargi, bemar wis ichee dule-binsaed-ibegan nikmarye, bemar ichee dule-dummagan nikmarbarye, degi, bemar ichee dule-nuga-nikamalad nikamarbarye.
1CO 1:27 Degi-inigwele, Bab-Dummad we-napneggi dule-ibmar-wissurmaladse gochad, adi, dule-ibmar-nue-wismalad-obingegsaegar. Degine, we-napneggi dule-nollomaladse gochad, adi, dule-nollosurmalad-obingegsaegar.
1CO 1:28 Bab-Dummad we-napneggi dule-baisur-dakledimalad, degi, dule-isdar-dakledimalad bur susad. Bab-Dummad dule-nug-nikasurmalad susad, adi, nug-nikamalad-osulogegar.
1CO 1:29 Adi, melle dule Bab-Dummad-asabin na dukin san-odummomalagar.
1CO 1:30 Ar Bab-Dummad-sunnad Cristo-Jesúsʼgi bemar-oakanonikid. Degi, Cristo anmar-ibmar-nue-wisidga gunonikid. Cristo anmar-isgussulidyob-guedga gunonikid. Cristo anmar-gwage-swilidikga gunonikid. Degi, Cristo anmar-baknonikidga gunonikid.
1CO 1:31 Adi, Bab-Dummad-Gardagi-narmakar-naidyob guegar: “Ar dule na san-dummarba itobiele, Bab-Dummad-nuggi bur san-dummarba na itodo.”
1CO 2:1 Nabir gwenadgan, Bab-Dummad-igar-napiragwad-maid-sogega an bemarse arbigu, yeer-sunmakedba, degi, an-ibmar-wisidba an bemarga gwen sunmaksasurmalad.
1CO 2:2 An bemar-abargi-gudigusgu, ibmar-baidgi an gwen sunmakosurye sogsad. Unnila Jesucristoʼginbi bemarga an sunmakoye sogsad, bur bule Jesucristo-nakrusgi-burgwisad-igargi an sunmakoye sogsad.
1CO 2:3 An bemar-abargi-gudigusgu, an na wargwen unnisur-itogedgi, dobedgi, degi, ise-wawanmakaledgi an bemar-abargi gudii gusad.
1CO 2:4 An bemarga sunmaksagua, degi, an bemarga Bab-Dummad-Gayaburba-Nued-bisgua, ibmar-wisidba, yamo bemar-binsaed-gaega an sunmaksasulid. Suli, degisuli. Bab-Burbaba, degi, e-gangued-nikadba bemar mag itosad. Agala, bemar Bab-Jesúsʼba nagusmalad.
1CO 2:5 Adi, bemar-Jesúsʼgi-bensulidi melle dulemar-ibmar-wisid-sogedba bensuli be gumalagar. Suli, degisuli. Unnila Bab-Dummad-ganguedba Jesúsʼgi bensuli be gumarsun.
1CO 2:6 Degi-inigwele, anmar gwenadgan-Bab-Jesúsʼgi-bensulidgi-nue-nasgusmalad-abargi nue-binsaed-nikaa sunmakdimalad. Nue-binsaed-nikaa anmar sunmakedi, we-napneggined-binsaedbarsulid, degi, we-napneggi dule-dummagan-negdakmamaid binsaedyobsurbalid. Ar a-dulemardi bergudoed.
1CO 2:7 Anmardi, epenne Bab-Dummad-binsaed-nued-dukuar-maigusadgi an sunmakmalad. Amba yoo we-napneg-nague, Bab-Dummad bato anmarga we-binsaed-nued sabosad, adi, anmarga ibnuedga guegar.
1CO 2:8 We-napneggined-dummagan we-binsaed-nued aku daksamalad. Ar we-binsaed-nued mag-itosmalana, nibneg-yeerdakleged-e-Dummad-Jesús nakrusgi oburgwissurmalanad.
1CO 2:9 Ar weyob bato Bab-Dummad-Gardagi narmakar sognaid: “Bab-Dummad ibmar-nuegan guagwar na e-sabmaladga bato nasiksad. We-ibmarmar dule gwen dakdisulid, dule gwen itodisurbalid, degi, dule gwen egi bipisaar binsadisurbalid.”
1CO 2:10 Bab-Dummad anmargardi, E-Burbaba e-binsadiid odalosad. Ar ade, Bab-Burba bela ibmar baramied, Bab-Dummad-ulubgi-binsadiidse-bakar, baramied.
1CO 2:11 ¿Ar doa-dule, dule-ulubgi-binsanaid wisguo be insae? ¿Ar unnila na dule-e-burbabi e-ulubgi-binsanaid wisgusursi? Amba deyobmodo, unnila Bab-Dummad-Burbabi wisdo, igi Bab-Dummad binsanai.
1CO 2:12 Anmarga we-napneggined-burba uklessulid, anmarga Bab-Dummadgi-Burba-danikid uklesad. Adi, anmar Bab-Dummad-e-nued-daedgi anmarga-e-ibmar-uksad wisguegar.
1CO 2:13 Anmar-ibmar-nue-wisidba, ibmar-durdaksamaladba, anmar sunmaksulid. Suli, degisuli. Anmar sunmakedi, Bab-Burba anmarga binsaed uksadba, degi, E-Burba anmar-odurdaksadba, anmar sunmaked. Deyob dulemar-Bab-Burba-nikmaladga ibmar-burbarmalad an odulodimalad.
1CO 2:14 Ar dule Bab-Burba-niksulile, Igarmar-Bab-Burbagi-danikid geg abingaed, ar igar-binsaled daked. Deginbali, a-dule, Igarmar-Bab-Burbagi-danikid amba aku-itobalid, ar ade, burbar mag-itogergebed.
1CO 2:15 Ar dule-burbar-duladdi bela mag itoged, igid igar-nuedi, igid igar-isganabali. Degisoggu, dule-baigan a-dulegi geg akar soged.
1CO 2:16 Ar Bab-Dummad-Gardagi soged: “Degite, ¿doa Bab-Dummadga-binsaed-ukega, Bab-Dummad-e-binsaed wissunna?” Isaías 40:13 Suli, dule geg deyob imake. Anmardi, Cristo-binsaed nikamalad.
1CO 3:1 Gwenadgan, degisoggu, Bab-Jesús-Igargi dulemar-bela-bela-Bab-Dummadgi-burbar-nanadimaladga-sunmakeyobi an bemarga sunmaksasulid. An bemarga, dule-Bab-Dummad-wissuliyobi sunmaksad, ar ade, amba Cristoʼgi burwiganayob be gumalad.
1CO 3:2 An bemarga Bab-Jesús-Igargi-sunmaksamargu, ibgwensuli-magar-itolegedgi an bemarga sunmaksad. Ar igi mimmi-bipi amba bipigwadba geg san-gunne, bur nunisgi-onulege, debayobi an bemarga sunmaksad. Ar deun, amba bemar Bab-Burbagi mimmiganyobi gumalad, geg bemar san gunmalad. Ar amba emibela san-dutusulid geg bemar gunmalad.
1CO 3:3 Ar amba bemar dule-Bab-wissulidyobi gumalad. Na be muchub-muchub nobmalad, na be muchub-muchub urwemalad, degine, na be danar-danar sorda-gadimalad. Ar deyob-be-damaladde, ¿dule-Bab-wissuliyob be damarsi?
1CO 3:4 Ar gwenna-gwenna bemar soged: “Andi Pablo-sordaye.” Baigandi sogmogad: “Andi Apolos-sordamoye.” Ar deyob-sogedba, ¿amba dule-Bab-wissuliyob be damarsursi? Ar deyobdo.
1CO 3:5 ¿Ar Pabloʼde, doasunna? ¿Ar Apolosʼde, doamosunna? Anmar unnila Bab-Jesúsʼga-arbamalad gumalad. Bab-Dummad-anmarga-arbaed-uksadba, anmar bemarga Bab-Jesús-Igargi-sunmaksagu, bemar Bab-Jesúsʼgi-bensuli gunonimalad.
1CO 3:6 Ani an dule-ibmar-gwag-digedyobi gusad. An-inse an bemarga Bab-Dummad-Gayaburba-Nuedgi sunmaksad. Apolosʼdi, an-sorba, bemarga Bab-Jesús-Igargi sunmaksamogad. Apolos dule-ibmar-gwag-diigi-ogedyobi gusmogad. Ar ibmar-gwag-odungudaeddi, Bab-Dummad odungued. Deyobi, Bab-Dummad bemargi na e-Gayaburba-onasgumai imaksad.
1CO 3:7 Degisoggu, dule-ibmar-digedi dule-dummadsulid, degi, dule-diigi-ibmar-ogedi amba dule-dummadsurbalid, unnila Bab-Dummadbi dule-dummadid. Ar ade, Bab-Dummadbi ibmar-gwag odungued.
1CO 3:8 Degisoggu, dule-ibmar-diged, degine, dule-ibmar-gwag-diigi-oged, ebo-emar gumarsundo. Na e-ibmar-imaksadba wala-walagwengi ibmar-nuegan nikumaloed.
1CO 3:9 Ar anmar unnila Bab-Dummadga-bulakwa-arbamalad gumalad. Bemar Bab-Dummad-nainuyob gumalad, bemar Bab-Dummad-neg-soblenaidyob gumalad.
1CO 3:10 An Bab-Dummad-sogedba, akwa-neg-sobed-igar-nue-wisidyob an e-saila-mesega Bab-Dummad an-imaksad. Dule-baid a-birgi sobmogoed. Degisoggu, wala-walagwengi na nue-salakarmalargebed, igi na neg sobmaloe. We sogledo, Bab-Jesús-Igargi dulemar-odurdakoedgi nue salakarmalargebye.
1CO 3:11 Ar negsailaga-gued bato megisale, dule-baid geg negsaila-baid mesed. Ar ade, we-Jesucristo e-saila-sunnad gued.
1CO 3:12 Ar dule we-negsaila-megisad-birgi olo, mani, akwa-nuegan, degi, urgo, gagan-dinnagwad, oros-gagangiid sobele,
1CO 3:13 bela na war-wargwengi-e-arbasadi Bab-Jesús-dulemarga-igar-naboged-ibagangi magar daklenonikoed. Ar ade, a-ibagi soogi dule-e-ibmar-imaksamalad wilub-daklenonikoed, bule nued arbasmardibeye.
1CO 3:14 Ar dule neg-saila-birgi neg-sobsad ei gummaksasulile, a-dule ibmar-nuegan abingaodo.
1CO 3:15 Ar neg-sobsad ei gummaksar, ibmar sate guoed. Ar e-san-sunnaddi dule-soogi-nabir-onosayobi abonolegoed.
1CO 3:16 ¿Ar be wissurmarsi? Bemar Bab-Dummadse-goled-negga gumalad. Bab-Burba be-ulubgi maimalad
1CO 3:17 Ar dule-wargwen Bab-Dummadse-goled-neg obelogele, Bab-Dummad a-dule-obelomogoed. Ar ade, Bab-Dummadse-goled-neg swilidikidid, bemar a-negga gumalad.
1CO 3:18 Mer na be dukin yardakmar. Ar bemar-abargi dule-wargwen we-napneggi-binsaedba binsaed-ibedye-sogdiile, binsaedsulidyob na imakergebed, adi, binsaed-ibedga guegar.
1CO 3:19 Ar Bab-Dummaddi, we-napneggined-binsaed-nuedi, binsaled daked, ar Bab-Dummad-Gardagi sognaid: “Bab-Dummadi, dule-emar-binsaed-gaed-e-binsaed, egi aibinega imaked.”
1CO 3:20 Degine, amba Bab-Dummad-Gardagi sognaibalid: “Bab-Dummad, dulemar-binsaed-ibegan-e-binsaed nue-wisid. Ar amar-binsaed, binsaled daked.”
1CO 3:21 Degisoggu, dule, dule-wargwenba-nadapile, san-dummarba saewilubsulid, ar ade, bela bemargadga gued.
1CO 3:22 Degisoggu, Pabloʼdibe, Apolosʼdibe, Pedroʼdibe, we-napneg-naiddibe, bemar-san-burba-dula-gudiiddibe, burgwaleddibe, emisgwagwaddibe, yoo-ibmar-danikoeddibe, we-ibmar belagwapa bemargadga guoedbiid.
1CO 3:23 Deginbali, bemar Cristoʼgadid, degine, Cristo, Bab-Dummadgadmogad.
1CO 4:1 Degisoggu, bemar anmar-dake-wilubbid, unnila anmarde Cristoʼga-arbamalad-dulemar gumala. Ar anmar unnila Bab-Dummad-igar-dukuar-maidgi-arbamalad gumalad.
1CO 4:2 Emigindi, dule-baidga-arbamaladi na oyogergebed, ede nue-innikigwadba arbaye.
1CO 4:3 Angardi gwen akarsulid, igi be angi sogbimardibe, an nued ibmar imakdidibe, igi, an ichakwa imakdidibe. Amba akarsurbalid, we-napneggi-igar-nabiromalad igi angi sogmogoe, an nued ibmar imakdidibe, igi, an ichakwa imakdidibe. Anbela na dukin geg na soged, an nued ibmar imakdiiye, igi, an ichakwa imakdiiye.
1CO 4:4 An ulubgi na itogua, gwen ibmar-oakalodi an itolesulinad. Degi-inigwele, geg an soged, ibmar gwen an oakalodisurye. Ar unnila Bab-Dummadbi sogoed, an ibmar-nued-imaksadibe, ibmar-ichakwa an imaksadibe.
1CO 4:5 Degisoggu, Bab-Jesús-igar-nabogoed-ibagan-danikoed-iduar mer be sogmar: “Dule-wargwen nued arbasye, ichakwa arbasye.” Bab-Jesús-gannar-danikid be edarbemar. Ar a-dule, ibmar-negsichidgi-bukwad gwallu-meegwadse onononikoed. Bab-Jesús dulemar-e-gwagegi-binsanaid osanalogoed. Geb degi, wala-walagwen Bab-Dummad amarga sogoed, “Be nued ibmar-imaksaye.” Geb agi, dule-nug-odummogoed.
1CO 4:6 Agala, gwenadgan, bemarga ibmar-nuedga-guegala, an bemarga soged, adi, bemar angi, degi, Apolosʼgi durdakmalagar, Bab-Dummad-Gardagi narmakar naidyob, mer dogdar dule-dummagan wilub-obichaa be dako. Adi, mer dummad-wargwen bur dummarba be dakegar, degi, baiddi mesagwar dakegar.
1CO 4:7 Degite, ¿ar doa nug-dummarba dule-baiganba be-imaksunna? ¿Ar ibu Bab-Dummad bega uksasulid be niksunna? Bab-Dummad bela bega ibmar uksad. Degite, ¿ibiga na wargwen be-ganguedgi-ibmar-amisayob be san-dummarba imaksunna?
1CO 4:8 Ar bemar bato unnitiba ibmar nikmalad. Bato bemar mani-ibedmalad, anmar be-bendaksasuli bato bemar reyga gunonimalad. Bitigi bemar rey-sunsogedina gadin, adi, anmar bemarba negdakmogagar.
1CO 4:9 Degisoggu, an dakgua, anmar-Bab-Jesús-sapingan-bur-dummagana, anmar-oburgwilesokaliyobi, Bab-Dummad, solaba an-nasiksamalayob an dakdo. Anmar baliwiturmarga, degi, dulemarga, ibmar-akargunaid-oyolenaidyob bela napneg-naidga oyolenaid.
1CO 4:10 Anmar Cristo-sabedba dule-ibmar-wissulidga an gunonimalad. Bemardi, Cristoʼba dule-ibmar-nue-wisidga gunonimalad. Anmar dule-nolloganaga gunonimalad, bemardi, dule-gannarbagwadga gunonimalad. Bemardi, nue-nug-odummolesmalad, anmardi, mesagwar gunonimalad.
1CO 4:11 Emidsega, anmar ukumaada-gudimalad, uku-uku itodimalad, degi, mor-sate an gudimalad. Dulemar sabsur-anmar-imakdimalad, degi, neg-sate an gudimalad.
1CO 4:12 Anmar bela-belad na arganagwar ise-arbadii na gudimalad. Dulemar anmargi isdar-sunmakalile, anmardi, egi nued-sunmakdedaed. Anmardi emarse baregillediid, degite anmar baisur itodiid.
1CO 4:13 Anmargi binsa isdar sunmaklealir, anmardi ise-itoagwar aimar-abinsadimalad. Emi-ibadse, we-napneg-naid-ibmar-isganayob anmar-dakmalad. Degi, we-napneg-naid-ibmar-mileganayob anmar-imakdidimarbalid.
1CO 4:14 We-garda an-bese-narmaksiidi bemar-obingegsaegarsulid. Suli, degisuli. Bemarga binsaed-ukegalad. Ar bemar an-mimmigan-sabed gumalad.
1CO 4:15 Ar bemar miliambe (10,000) Cristoʼgi-bemarga-sunmakmalad sunna be nikumar-inigwele, geg bab-sunnaddi ichesur be nikumalad. An Cristo-Jesús-Gayaburba-Nuedgi-sunmakedgi an burbar be-babga gunonimalad.
1CO 4:16 Degisoggu, an bese wilesakwaa an egismarsun, be an-daedba be damaloye.
1CO 4:17 A-ulale, an bemarse Timoteo-barminadapid. We-Timoteoʼde, Cristoʼgi an-machi-sabedid, degine, Bab-Jesúsʼgi nue-akanaid-dulebalid. An wisdo, we-dule, anga galakuosulid. Timoteo bemar-gannar-insaega imakoed, igi an Cristoʼgi nanadii, degi, igi an bela Jesúsʼba-nanaimalad danar-ambikunonidamalad-abargi, degi, bela neggweburmargi dule-odurdakdibali.
1CO 4:18 Bemar gwenna-gwenna dukin san-ogannodimar an itoged, an bemarse naosuliyob be angi binsamalad.
1CO 4:19 Bab-Dummad bemarse ataknabi an-abegele, an bemarse emisgwasaar nadapoed. An bemarse omosar, dule-san-dummarba-imakdimalad an dakdapoed, bule amar gannarba Bab-Jesúsʼgi nanadimardibe, igi, unnila binsa gayaginbi asginnee gordii an dakdapodidibe.
1CO 4:20 Ar dule Bab-Dummad-e-negdakmaid wisile, unnila gayaginbi binsa ibmar sogsulid, eba gudii imaked.
1CO 4:21 Degite, ¿ibi be abemarsunna? An bemar-omosale, ¿sabsur-bemar-odurdakbi be an-abemala? ¿Sabedgi binnalee bemarga sunmakbi be an-abemala? Be-itolegedmardo.
1CO 5:1 Emi an wisgusdo, bemar-abargi dule-wargwen e-omesulidba negsichigi yolediiye. A-dule, e-bab-ome e-omega imakdiiye. We-dule, igar-nabirid gwen imakdisulid. Bab-wissurrmaladbela weyob gwen itoledisulid.
1CO 5:2 ¿Degite, bemar san-dummarba imakmarde? Bemar we-isguedba bur wile-itogewilubbinad. Ar dule-degigusadi, bemar-abargi bemar onogewilubbinad.
1CO 5:3 Andi an sogdo. An bemar-abargi sanar-gudisurmar-inigwele, an bemar-abargi-gudiiyob be angi binsamaloed. An bemar-abargi-gudiiyob, an-daklesulidgi dule-degigusadi, bato an ega igar itosad.
1CO 5:4 Anmar-Dummad-Jesucristo-nuggi bemar danar ambikumalale, an bemar-abargi-gudiiyobi sigmogoed, degine, Bab-Jesús-e-gangued bemarba gudii gumogoed.
1CO 5:5 We-dule-isgudiid nia-saila-Satanásʼga be urmakmalo. Adi, e-san-obelolegega, degi, Dummad-Jesús-danikoed-ibagi e-burbadi abonolegegar.
1CO 5:6 Degisoggu, bemar-san-dummarba-imakedi, gwen nuedsulid. ¿Ar be wissurmarsi, madugi e-ina wis bipii egwachale, bela madu omuddaed? Ar deyobmodo, dule-wargwen-isgudiid, bela sunna dulemar-ichoged.
1CO 5:7 Degisoggu, madubur-ina-sered-mieyobi ibmar-be-oichogedgi be bangumar. Adi, bemar madubur-inasuli, madubur-binidyob be gumalagar. Ar ade, Cristo, Oburgwilegoenad-Iba e-sibad-wawaad-sunnadid. Ar a-sibad-wawaad bato anmarga burgwisad.
1CO 5:8 Degisoggu, anmar Oburgwilegoenad-Iba onomarsun. Anmar-isguedi madubur-ina-seredyobi gued. Degisoggu, madubur-ina-seredyob, binsaed-isganagi, degi, galagwensurdaedgi, iba onogosurmalad. Bemar madubur-inasulidyob, nued-binsaedgi, nue-napiragwadgi, be iba onomalo.
1CO 5:9 An bemarga garda-iduar-narmaksadgi an sogsamalad: Mer bemar dule-negsichigi-yoledimaladba be akamaloye.
1CO 5:10 An bemarga, dulemar-yoo-Bab-Jesús-amimaladba be mer akamaloye an sogsulid. Dule wegimaladba: Negsichigi-yoledimalad, dule-maniginbi-binsadimalad, emar-yardakar-atursamalad, bab-dummagan e-bab-dummadga-imakdimalad. An sogsulid, mer be we-dulemarba akamaloye. Ar deyob an bemarga sogele, we-napneg-naidgi be bangumalar-itole.
1CO 5:11 Unnila an bemarga sogdo, dule-wargwen, Bab-Jesúsʼba-naiye-sogdiid, degite, dule-negsichigi-yolediid, maniginbi-binsadiid, binsa bab-dummadga-imakleged e-bab-dummadga-imakdiid, gadi-gakan-berbeged, gadi-mumgued, gadi-emar-yardakar-atursaed, amar-dulemarba mer be akamarye, degi, mer eba be mas gunmarye.
1CO 5:12 Amba-yoo-Bab-Jesús-amimaladga geg an igar itoged. Ar bemar, Bab-Jesús-amismaladgardi igar itogergebed.
1CO 5:13 Bab-Dummadi, dule-yoo-Bab-Jesús-amimaladga igar itogoed. Degisoggu, Bab-Dummad-Gardagi-sognaidyob be imakmarsundo: “Dule-isgana bemar-abargi be onomarsun.”
1CO 6:1 Bemar abin-abin imakarmalale, ¿ibiga dummagan-Bab-Jesús-wissurmaladse be igar nabironaddamala? ¿Geg bemar Jesucristoʼgi-akananaimaladse igar-nabironamarsi?
1CO 6:2 Ar bemar Jesucristoʼgi-akananaimalad dule-we-napneggi-bukmaladga igar nabirogoed. Ar bemar wemarga igar-nabirogoedde, be-igar-burwiganadi, ¿geg na be nabomarde?
1CO 6:3 Deginbali, ¿ar bemar wissurmarbarsi, anmar baliwiturmarga igar-nabirogega gumaloed? Degisoggu, we-napneggined-igar-bursunna, sunna be nabomardo.
1CO 6:4 We-napneggined-igargangi be abin-abin imakarmalale, ¿ibiga dule-Bab-Jesúsʼba-naisurmalad bemarga igar-nabogega be imakdamala?
1CO 6:5 Bemar-obingegsaega an bemarga soged. ¿Ar bemar-abargi gwenadganga igar-nabogega gwenad-wargwensaar nue-binsaed-nikadaed sursi?
1CO 6:6 Emide, bemar dule-igar-nabomalad-Jesúsʼba-naisurmalad-asabin, gwenadgan-gwenadgan abin-abin na imakmargu. Mer deyob be damala.
1CO 6:7 Ar bemar na abin-abin-imaknanaidgine, bato na be nue-nosmalad. ¿Bur nuedinsursi, binsa dule be-wioarmalar? ¿Bur nuedinsursi, binsa dule bei ibmar atursasmalar?
1CO 6:8 Emide, bemar gwenadgangi binsa yoledimalad, degine, e-ibe ibmar atursadimalad. Deyob bemar be-gwenadgan-imakewilubsulid.
1CO 6:9 ¿Ar be wissurmarsi, dulemar-igar-napira-imaksurmalad Bab-Dummad-e-negdakmaidse dogosurmalad? Degisoggu, mer be yardaklemalo. Dule-Bab-negse-dogosurmalad, wemalad: Dulemar yoo-abirgin-niku negsichigi-yoledimalad, ibmar-sobarmalad-e-bab-dummadga-imakdimalad, ome-dikarba, degi, sui-dikarba yoledimalad, omegangii damalad, machergan na machered e-omega-imakmalad, omegan na ome e-macheredga-imakmalad.
1CO 6:10 Atursamalad, dogdar-maniginbi-binsamalad, mumguerbamalad, gadi-dulemar-ukabsamalad, dule-yardakar mani-atursamalad. Dulemar wegidamalad, Bab-Dummad-e-negdakmaidse gwen dogosurmalad.
1CO 6:11 Bemar epenne gwenna-gwenna deyob nanadii gusmalanad. Emigindi, bemar, gwage uruklesmalad, gwage-swilidik gusmalad, isgussuliyob Dummad-Jesús-nuggi, degi, Bab-Dummad-Burbagi bemar gunonimarsunnad.
1CO 6:12 Belagwapa an sunna ibmar saedbiid. Degi-inigwele, belagwapa ibmar-nueganbi anga guosulid. Ar belagwapa sunna ibmar an sae-inigwele, ibmar an-nidiguega geg an imaked.
1CO 6:13 Deginbali, masgullegedi sabangalad. Sabanmoga, masgullegedgarmogad. Saban, degine, masgulleged, Bab-Dummad ebobela osulogoed. Anmar-sandina, negsichigi abirgunagwarsuli yolegegarsulid. Anmar-san, Bab-Jesúsʼga arbaegalad, degi, Bab-Jesús anmar-sangi na e-nug ogannolegegalad.
1CO 6:14 Bab-Dummad, igi-Bab-Jesús-burgwarmaigu, gannar odulosgusa, abayobi, gannar na e-ganguedgi Bab-Dummad anmar-san burgwarmai odulomogoed.
1CO 6:15 ¿Ar be wissurmarsi, Cristoʼgi bemar-san akanaid? ¿An-san Cristoʼgaditega, degite, an-san ome-gambanuchuga-ukega an imakode? Suli, degisulid.
1CO 6:16 ¿Ar be wissurmarbarsi, dule ome-gambanuchu na e-omega imaksar, ebogwad na san-wargwennagwadga gunonidaed? Ar Bab-Dummad-Gardagi sognaid: “Ome na sui-ebogwa san-wargwennagwadga gunonikoed.”
1CO 6:17 Ar dule Bab-Jesúsʼgi akanonikile, burbaledgine, san-wargwennaa Bab-Jesúsʼba gunonidasunnad.
1CO 6:18 Degisoggu, negsichigi-yolegedgi be bangumarsun. Ar isgued-baidgi dule-wargwen isgusar, e-sangi isgussulid. Ar negsichigi-yolegeddi, na dukin e-sangi isgudiid.
1CO 6:19 ¿Ar be wissurmarsi, bemar-san, Bab-Dummad-Burba-Isligwaled-e-neg gued? Bab-Dummad, E-Burba-Nued bemarga uksad. Emigindi, E-Burba-Nued bemargi maid. Degisoggu, bemar na bemargadsulid, bemar Bab-Dummadgadid.
1CO 6:20 Ar Bab-Dummad gargedgi bemar-baksad. Degisoggu, bemar-sangi, degi, bemar-burbagi, Bab-Dummad-nug odummomarsun, ar sogbobela, be-san, degi, be-burba, Bab-Dummadgad gued.
1CO 7:1 Be anse gardagi-narmakar igar-soggwen-egichismalad an be-abin imakmardo. Ar nuedindo, dule ome-nikusulir.
1CO 7:2 Degi-inigwele, ar negsichigi-yolemalad dogdar-nikasoggu, bur-nabirid, dule na ome-nikued. Degi, omemoga, na sui-nikumogad.
1CO 7:3 Sui na e-ome-ebogwa abirgunagwar nanae-wilubbid, degi, ome deyobi, na e-sui-ebogwa nanae-wilubmogad.
1CO 7:4 Ar ome na e-san bar egadsulid, e-suigadid. Degi, e-suimoga, na e-san bar egadsurmogad, e-omegadmogad.
1CO 7:5 Degisoggu, mer bemar na be gorsuli gudii gumalo. Degi-inigwele, ar bebogwa na be Bab-Dummadse-gorbied-ular, gatik ise-bagagwar gudii imakbied-ulale, na be igar-nabosmalardi, nabirdo. A-sorbali, na be gannar golewilubmalad. Deyob be dasurmalale, abakalegi na be geg-san-bargamaladba, nia-saila-Satanás isguega be-imakarmalale.
1CO 7:6 We an-bemarga-sogedi, an bemarga nui soged. An bemarga sogsulid deyob be imakmarye.
1CO 7:7 An binsaendo, bitigi bela machergan anyob gusana gadinye. Ar degi-inigwele, Bab-Dummad anmarga igar akar-akar uksad. Dule-gwensakga ome-nikusulid-igar uksad. Baidgardina, ome-nikued-igar uksamogad.
1CO 7:8 Degisoggu, abirgin-niksurmaladga, degi, ei-sui-burgwismaladga an sogsundo, ar nuedirdo, bemar anyob gudii gumarmogar.
1CO 7:9 Ar bemar geg na san-bargamalardi, bur abirgined be nikumarsundo. ¿Ar bur galagwensuli isgudiidba bur nuedsursi abirgunagwar gudimalar?
1CO 7:10 Abirgunagwar-gudimaladgardi an igar-uked, we-igar-ukedi ani an sogsulid, Bab-Jesús soged: “Ome mer e-sui metoye.”
1CO 7:11 Ar ome sui-metele, mer bar sui-nikuodo. Ar gannar e-suise-moerdi, nabirdo. Degi, macheredmo, mer ome-metemogodo.
1CO 7:12 Baigangardi, ani an soged, Bab-Jesús sogsulid, gwenad-wargwen, ome-Bab-Jesúsʼba-naisulid-nikadibe, e-ome ar e-metebisulile, mer a-gwenad e-ome-metodo.
1CO 7:13 Degine, ar ome-wargwen sui-Bab-Jesúsʼba-naisulid-nikadibe, e-sui ar e-metebisulir, mer a-ome e-sui-metodo.
1CO 7:14 Ar ade, sui-Bab-Jesúsʼba-naisulid e-omeba nugusiid, degi, ome-Bab-Jesúsʼba-naisulid e-suiba nugusimogad. Ar degisulile, be-mimmigan Bab-Dummadgi isganamardo. Ar emigindi, be-mimmigan bato Bab-Dummadgi nugusiid.
1CO 7:15 Ar dule-Bab-Jesúsʼba-naisulid, ebo-nikumaidgi bangubidibe, dule-Bab-Jesúsʼba-naidgi banguodo. Ar gwenad-machered, degi, gwenad-bundor, a-dule-Bab-wissulid-nikumai degisadeguodeeye ega igar maisulid. Ar Bab-Dummad anmarse gochad, anmar dulemar-baid-ebo ulubgi-bogidik-itogedgi nanamalagar.
1CO 7:16 Omegwa, ¿be-sui beba sunna abonoleye be wissi? Machered, ¿be-ome beba sunna abonoleye be wissi?
1CO 7:17 Bab-Dummad-bega-igar-uksadbali, na be gudii gumalargebed. Ar igidgi Bab-Dummad bese gornoniki, deyob be gudii gumalodo. Weyob an bega, bela Bab-Jesúsʼgi-bensurmaladga igar ukmardo.
1CO 7:18 Ar Bab-Dummad bese gochagua, ¿be abgan-uka-duku sikale? Ar degiile, deyob be gudiguodo. Bab-Dummad bese gochagua, ¿be abgan-uka-duku sikarsuli? Ar degiile, mer be abgan-uka-duku sikodo.
1CO 7:19 Be abgan-uka-duku-sikardibe, sikarsurbardibe, gwen akarsulid. Unnila Bab-Dummad-Igar-Mamaidba-nanaed abeleged.
1CO 7:20 Ar Bab-Dummad bese gochagua, igi-gudii bese gocha, deyob be gudigodo.
1CO 7:21 Ar be dule-maiga-gudii ¿Bab-Jesús bese gocha? Ar deyobile, mer be isdar-itogo. Ar sunna dule-maiga-gudiidgi be nabir-noe-itogele, ar be nodo.
1CO 7:22 Ar Bab-Jesús maiga-be-gudiidgi bese gochagu, Bab-Jesúsʼga maiga-gudiid be bergunonikid. Amba deyobmodo, maiga-be-gudisulidgi, na be-itolegedba-be-gudiidgi, Bab-Jesús-bese-gornonigu, be Cristo-maiga gunonikid.
1CO 7:23 Bab-Dummad gargesaila be-baksamalad, degisoggu, melle dule-baid-maiga be gumarsun.
1CO 7:24 Degisoggu gwenadgan, bemar wala-walagwen igi-gudii Bab-Dummad bemarse gocha, ar deyob, Bab-Dummadga be nanamarsundo.
1CO 7:25 Ar yaganagardi, Bab-Jesús-sogedba an sogsulid. Ani an soged, an nabir mag neg-itogedba, Bab-Dummad-wile-an-daknonikidba an soged.
1CO 7:26 Andi an itogua, neg-galagwensuli-gunaidba an sogsundo, dule omesulile, ome-nikusulir bur-nabir an itoye.
1CO 7:27 Ar be ome-nikale, mer be ome-metodo. Amba be omesulile, mer ome-nikuedgi be binsaodo.
1CO 7:28 Ar be ome-nikuele, gwen be isguosulid. Ar yagwa-gwensak sui-nikuele, gwen isguosurmogad. Degi-inigwele, na abirgunagwar-nikumaladdi, we-napneggi igar-buled nikumaloed. Ar we-igargan-buled-nikubisuli an be-abemalanad.
1CO 7:29 Gwenadgan, we an-bega-sogmalad, ibagan-giakwasoggu, an bemarga sogsun, bemar-ome-nikamalad, ome-nikasuliyob be nanamarsun.
1CO 7:30 Ar bemar-bodimalad, bodisurmaladyob be nanamarsun. Bemar-alledimalad, alledisurmaladyob be nanamar. Degi, bemar-ibmar-bakdimalad, we-ibmar begadsulidyob be nanamarsun.
1CO 7:31 Degi, we-napneggined-ibmarmargi be yeer itodimalad, we-napneggined-ibmarmargi yeer itodisulidyob be nanamarsun, ar ade, we-napneg-daklegedi bergudoed.
1CO 7:32 Bemar mer bukib-binsadii gumarsun. Dule ome-niksulidi Bab-Jesús-ibmarginbi binsadiid, igi-Bab-Jesús-weligwar-ito-imakodibeye binsadiid.
1CO 7:33 Ar dule ome-nikaddi, we-napneg-naid-ibmargi binsadiid, igi-e-ome-weligwar-ito-imakodibeye na binsadiid.
1CO 7:34 Amba deyobmodo, ome-sui-sated, yagwa-ebogwa ebo emalad. Wemardi, unnila na e-san-swilidik-guega, degi, e-burba-swilidik-guega Bab-Jesús-ibmarginbi binsadimalad. Ar ome-sui-nikaddi, we-napneg-ibmargi binsadiid, igi-e-sui-weligwar-ito-imakodibeye bur binsadiid.
1CO 7:35 We-an-bemarga-sogedi, bemar-idu igar-nollosur-mesega an sogsulid. Suli, agarsuli. Bemarga igar-nuedga-guega an soged, adi, bemar igar-napiragwadgi, igar-dule-yardaksulidgi, unnila Bab-Jesús-igargi binsanai-guega an soged.
1CO 7:36 Ar dule-wargwen binsadibe, e-yagwa-abesiidbo bato nikued nabirye, yagwa sui-nikued-e-birga bato mosye. Ar nikubiele, nikuodo. Ar nikusale, nueddo, isguosulid.
1CO 7:37 Ar dule-baiddi, akarsur-itogele, e-yagwa-abesiidbo na nikubisulile, e-itogedba imakmogodo. Ar a-dule igar-nued imaknamodo.
1CO 7:38 Degisoggu, dule, e-yagwa-abesiidbo nikuele, nueddo. Dule-baiddi, e-yagwa-abesiidbo nikubisulile, bur nueddo.
1CO 7:39 Ome-sui-nikadi, e-sui amba dula gudiile, igar-maidba e-suigi alakwaa gudiguoed. Ar e-sui-burgwisardi, a-ome gannar sui nikubiele, e-itolegedba nikuodo. Unnila Bab-Jesúsʼba-naid-nikued abelesunnad.
1CO 7:40 Andi an itogua, a-ome bar sui-nikusulile, bur-weligwar-gudigusar an itoged. We-an-bemarga-sogedi, an binsado Bab-Dummad-Burba we nabir itomoye.
1CO 8:1 Emigindi, bab-dummaganga-imaklegedga masgulleged-ukmaladsik an bemarga sogbido. Nabir sogmardo, “Bela anmar ibmar wisidbimarye.” Ibmar-wisiguedi, dule-san-dummarba-itoge dule-imaked. Dule-sabgueddi, ulubgi anmar-ogannoged.
1CO 8:2 Dule-wargwen na ibmar-wisye gordiile, amba yoo ibmar nue-wisgu gudiid.
1CO 8:3 Ar dule Bab-Dummad-sabele, Bab-Dummad na wisdo, we-dule e-sabed.
1CO 8:4 Nabirdo, bab-dummaganga-imaklegedga masgulleged-uked-igar weyobid. Anmar wisid, bab-dummaganga-imakleged, we-napneggi bab-dummad-sunnadsulid, unnila Bab-Dummad-sunnad wargwenna gued.
1CO 8:5 Ibmar-baigan we-napneggineddibe, nibaliddibe, bab-dummaganye-sogledimar-inigwele, Bab-Dummadsulid. (Ar bab-dummagan bukidarye sogmalad, degine, dule-dummagan-nug-nikamalad bukidarbarye sogmarbalid.)
1CO 8:6 Ar anmargardina, unnila Bab-Dummad-sunnad wargwenna gued. A-Bab-Dummad anmar-babad, aginbi bela ibmar danikid, degine, anmar Bab-Dummadga dula gudimogad. Degine, Dule-Dummad, wargwenna gubalid, adi, Jesucristo gued. Agine, bela ibmar danibalid, degine, anmar aba dula gudimogad.
1CO 8:7 Ar degi-inigwele, we-ibmar dulemar bela wisidbisurmalad. Ar gwenna-gwennaa amba binsaed we-san bab-dummadga-imaklegedga uklesye. Degisoggu, we-san bab-dummadga-imaklegedga-uklesad-gundogu, e-binsaed nollosoggu, isguddasunnad.
1CO 8:8 Bab-Dummad anmar-mas-gunnedba anmar-abingasulid. Anmar-mas-gunnedba bur dule-nuedga anmar gunonidasulid. Anmar-mas-gunsulidba bur dule-isganaga anmar gunonidasurbalid.
1CO 8:9 Unnila nue salakarmar, be-akarsuli-itogedba be mas-gunmaladi, mer gwenadgan-amba-ulubgi-nollomalad-ichogega be imakmalo.
1CO 8:10 Be we-igar-wisidba, bab-dummagan-neggi, gwenad-wargwen mas gunsii be-dakalir, a-gwenad amba Jesúsʼgi-bensulid nollogwale, ¿bab-dummaganga-san-uklesad guchasurmogar be insae? Guchamogaled.
1CO 8:11 Bedi, mag-neg-itoged-ular, be-nuggi we-gwenad-e-san-burba be oyogsaoed. Ar a-gwenadga Cristo burgwismogad.
1CO 8:12 Degisoggu, gwenadgan-amba-nollomalad isguega be imakele, Cristoʼgi be isgunaimodo.
1CO 8:13 Degisoggu, an-san-gunnedba, gwenad-amba-nollogwad, isguega-an-imakele, bar an san gunnosurdo, adi, melle an-gwenad isguega an imakegar.
1CO 9:1 ¿An Jesús-e-sapin-bur-dummadga gumosursi? ¿An wargwen an-itogedba gudisursi? ¿Anmar-Dummad-Jesús an daksasursi? ¿Ar Bab-Jesús-nuggi-an-arbaed-ular, bemar Jesúsʼba-nanaimaladga gunonisursi?
1CO 9:2 Ar dule-baiganga an Bab-Jesús-e-sapin-bur-dummadga-gumogadsulile, bemargardi, an Bab-Jesús-e-sapin-bur-dummadga-gumogaddo. Ar bemar Bab-Jesúsʼgi-bensuli-gunonikidba an nue-oyolenaid, an nue Jesús-e-sapin-bur-dummadga-gumogadye.
1CO 9:3 Ar dule-angi-sunmakdimalad-abin weyob an sogdedaed:
1CO 9:4 ¿Anmar Bab-Jesúsʼga-arbaedgi geg mas-gunmosi? ¿Geg anmar gobbarsi?
1CO 9:5 ¿Anmar ome-Bab-Jesúsʼba-naid geg nikumar be insae, degi, geg an sedabar be insae? Ar Bab-Jesús-e-sapingan-bur-dummagan-baigan, Bab-Jesús-urbamar, degine, Cefas Pedroʼye-nugbalid, amar na ome-nikamarmogad, degine, eba seddamarmogad. ¿Deyob geg anmar imakmarmode?
1CO 9:6 Anmar Bab-Jesús-Igargi-sunmaked-ular, ¿ibiga anmar Bab-Jesús-e-sapingan-bur-dummagan-baiganyob geg bendaklemarmoga? ¿Unnila Bernabé-anbo masgunned-amiega arbaed-baidgi arbabalirgebe?
1CO 9:7 ¿Ar sordaga-arbadiid-wargwensaar na dukin bennukdii guo be insae? Deyob guosuli. ¿Dule-uva-digsadi e-uva-sanmakoed gunnosur be insae? Gunnoe. ¿Dule-sibad-wawaad-edarbed, na e-sibad-wawaad-nunis gobdisur be insae? Gobdii.
1CO 9:8 Mer be binsamalo, an we-ibmar-sogedi, unnila we-napneggi-dulemar-sogedba an sogye. Suli. Ar Bab-Dummad Moisésʼga-Igar-Uksadgi ¿degi-sognaimosursi?
1CO 9:9 Ar Moisés-Igar-Mesisadgi igar narmakar sognaid: “Moli-bebe-nikad ibmar-gwag-egwirmaknair, melle e-gaya edinno, adi, sunna ibmar-gwag maoed.” Deuteronomio 25:4 ¿Ar Bab-Dummad unnila moli-bebe-nikad-wiledakedba deyob sogsa be insae?
1CO 9:10 Suli, degisuli. Anmargi sunmaknaimogad. We, Bab-Dummad igar-mesisadi anmar-ular weyob igar mesisad. Ar dule napa imunair, degi, baiddi ibmar-gwag-e-uka-minair, bato na ulubgi binsanaidamalad, ibmar-gwag na egadga gumogoye.
1CO 9:11 Ar anmar bemar-abargi san-burbaledga ibmar digele, ¿anmar ibmar-sanaled bemar-abargi geg wee be insae?
1CO 9:12 Ar baiganbela bemar-ibmar-uked abingadiid. Anmar-bursunna, anmar be-ibmar-uked abingaewilubmarmogad. Emidi, anmar bemar-ibmar-ukewilubbinad gwen abingadisurmalad. Aka bur anmar wiledimalad. Adi, Cristo-Gayaburba-Nued mer galegegar.
1CO 9:13 Dule-Babse-goled-neggi-arbamaladi, a-neggi-mas-nikad gundamalad, ¿be wissurmarsi? Degine, dule-Babga-ibmar-ogumakar-ukleged-ailagi-arbamaladi, ibmar-uklesad-e-san gundamarmogad.
1CO 9:14 Amba deyob Bab-Jesús sogsamogad, dule-Bab-Gayaburba-Nuedgi-sunmakdimaladi, agi gudigumarmogoye.
1CO 9:15 Degi-inigwele, andi we-igar-maidba an bese ibmar egisdisurmalad. Degine, we-garda an bemarse narmaksisurbalid, adi, bemar anga ibmar ukmalagar. Bab-Jesús-Igargi-sunmaked-ular, be an-bendakmarye-sogele, a-idu an burgwed bur-nabir an itoged. Amba bemar anga ibmar-uksurmalale, ar Bab-Jesús-Igargi-sunmaked bur-weligwar an itoged.
1CO 9:16 Ar Bab-Gayaburba-Nuedgi an sunmakdele, na san-dummarba-imakedba an sunmaksulid. Ar deyob an sunmakergebed. Ar igi an gusale, an Bab-Gayaburba-Nuedgi sunmaksulir.
1CO 9:17 Degisoggu, ar an yeer-itogedgi an Bab-Jesús-Gayaburba-Nuedgi an sunmakdiile, ibmar-nued anga uklegodo. An imakbisulidba sunmakerdi, dule-anga-ibmar-sogsadba an imaknaido.
1CO 9:18 Degite, ¿igi an bennuklesunna? An-bennukleged wegiido: Binsa maniginsuli Cristo-Gayaburba-Nuedgi an sunmakdiid. Adi, Bab-Gayaburbagi-sunmakedba-bendaklege-wilubbinad mer imaklegegar. Wegiidba an yeer-itodiid.
1CO 9:19 Degisoggu, bar an dule-sogedba gudiwilubsulinad. An wargwen ibmar-imakbiedba imakdiinad. Degi-inigwele, bela emar-maiga an gunonikid, adi, bur dulemar-bukidar Bab-Jesúsʼba nagumalagar.
1CO 9:20 Judíoʼmarga, Judío na san-imaksad, adi, Judíoʼmar, Bab-Jesúsʼba nagumalagar. An Moisés-Igar-Mesisadba an dasulile, akarsur-inigwele, Moisés-Igarba an dae na san-imaksad, adi, Moisés-Igarba-nanadimalad Bab-Jesúsʼba nagumarmogagar.
1CO 9:21 Dulemar-Moisés-Igarba-dasurmalad-abargi, Moisés-Igarba-dasuli an na san-imaksabalid, adi, amar Bab-Jesúsʼba nagumarmogagar. (An Bab-Dummad-Igar-Maidba dasurye an sogsulid, an soged, Cristo-Igar-Maidba an nanadimoye.)
1CO 9:22 Dule-burba-nollomaladga, an an-burba nollo imaksamogad, adi, amar Bab-Jesús-Igarba nagumarmogagar. Bela dule-damaladyob an na san-imaksad, adi, bela dule-akar-akar-bukwad abakalegi gwenna-gwenna Bab-Jesúsʼba naguarmalale.
1CO 9:23 Bab-Gayaburba-Nued-ular, deyob an imakdaed, adi, dulemar Bab-Jesúsʼba-naigunonikir, an yeer-itogwichi gumogagar.
1CO 9:24 ¿Ar bemar wissursi? Bela abarmaked-neggi na bengunanair, bela abarmakedbidamalad. Degi-inigwele, unnila wargwennaa nakwisadbi ibmar-bur-nued sued. Bemar we-ibmar-bur-nued-suega, abarmaked be imakmar.
1CO 9:25 Bela dule-dodomaladgi-abarmakmaladi, bela-bela durdakmalad. Weyob imakmaladi, adi, dulemargi-nakwega imakmalad. Unnila nabir we-napneggi ibmar-bur-nued baisursunna-berguedbina sognanaid. Anmardi ologurgin-geg-berguedbina alamaknanaid.
1CO 9:26 Degisoggu, an yogasaar abarmaknaisulid. Degi, an urwenaibalidi, daksuli an yogasaar urwenaisurbalid.
1CO 9:27 Suli, degisuli. An na dukin na san-odurdaknaid, degine, an-san anba-ibmar-imaked an imaked. Ar degisulile, an dule-baigan-odurdakdii-nanasadi, anba bur obinnalile, andi bur sorba mellealile.
1CO 10:1 Gwenadgan, bemar nue insamalo, igi Bab-Dummad bela anmar-dadgan mogir-urba-semaigusa, degi, igi bela Demar-Ginnidye-nugad-abargi obaksamala, deun demar ega dinnaa imaksagusgu.
1CO 10:2 Degisoggu, bela anmar-dadgan Moisés-ebo-bulakwaa mogirgine, degine, demargine, Bab-Dummad-diigi-oglesmaladyobi gusmalad.
1CO 10:3 Deginbali, bela anmar-dadgan mas-burbaled emaladbi guchadbimalad.
1CO 10:4 Degine, bela amar gobed-burbaled emaladbi gobsadbimarbalid. Ar ade, akwa-burbaled eba nadapgusad, agi dii-ainied gobsamalad. Ar we-akwa Cristo gued.
1CO 10:5 Degi-inigwele, anmar-dadgan-bur-melu Bab-Dummad-yeer-itoge imaksasurmalad, a-ulale, nega-dulesulidganba anmar-dadgan burgwismarsunnad.
1CO 10:6 We-ibmarmar-gusadi, anmar-odurdakega deyob gusad, adi, anmar mer anmar-dadgan ibmar-isganabina-sogsamaladyob ibmar-isganabina sogegar.
1CO 10:7 Degine, melle be-dadgan-abar-gusmaladyob bab-dummaganga-imaklegedse be gormalo. Bab-Dummad-Gardagi weyob narmakar naid: “Dulemar ambikusmalad, orgi-moli-sobaledga mas guchamalad, degi, ega gobsamalad, geb a-sorba ega dodonanai gusmarbalid.”
1CO 10:8 Degine, melle be abirgunagwarsuli negsichigi yoledii gumalo, igi be-dadgan gwenna-gwenna degigusmaladba, mili-dulagwen-gakapaa (23,000) ibagwengi burgwisgusmala.
1CO 10:9 Degine, melle Bab-Jesús-wilubdaknai gumarbalo, igi be-dadgan-gwenna-gwenna Bab-Dummad-wilubdakbi-guarmaladba, naibe-buledgi bukidar warmaksamala, degi, burgwisgusmala.
1CO 10:10 Degi, melle Bab-Dummadgi urwale be sunmakmalo, igi be-dadgan-abar Bab-Dummadgi-urwale-sunmaksamaladba, baliwitur-dule-oburgwedse anmar-dadgan oburgwilesgusmala.
1CO 10:11 We-ibmar bela degigusadi, anmarga oyolegegalad, adi, anmar mer deyob damalagar. Degine, Bab-Dummad-Gardagi narmakar naibalid, adi, anmar emi negdukumosadgi dula-gudidimaladga sogegar, nue-salakarmarye.
1CO 10:12 Degisoggu, ar dule Bab-Jesús-igargi gannasgwa-nanadii itogele, nue-salakar, mer isguo.
1CO 10:13 Be isguedgi-wilubdaklear sogele, be binsao, we-wilubdaklegedgi, dule-baigan wilubdaklesmoye. Ar Bab-Dummad gwen galakumaisursoggu, wilubdakleged anmarga-nagumaid ise-anmargi-obicha-imaked imakosulid. Isguedgi-wilubdakleged anmargi noni-sogele, Bab-Dummad anmarga igar-egabaloed, adi, anmar wilubdaklegedgi mer galakuega, gannarbaa gudii guegar.
1CO 10:14 Degisoggu gwenadgan-sabemalad, mer bab-dummaganga-imaklegedse gordii gumalo.
1CO 10:15 Ar be binsaed-nue-nika-damaladsoggu, an-ibmar-bega-sogedgi be nue-binsadii gumalo, wede ibnued-an-sogdibe, ib-isgana-an-sogdibe.
1CO 10:16 Anmar vino-gobbalile, Bab-Dummadga dog-nuedye-sogmaladgine, ¿we soglesursi, Cristo-abe-milesadba anmar bato Cristoʼgadmoye? Deginbali, anmar madu-gunnega bisge-bisge mimimaladgine, ¿we soglesursi, bato anmar Cristoʼgadye?
1CO 10:17 Anmar ichesur-gumar-inigwele, unnila madu-wargwenna an gunmalad. Debayobi, anmar-ichesulid, san-wargwenna Cristoʼgi anmar gunonimarmogad.
1CO 10:18 Emigindi, Israel-dulemar-e-ibmar-imakmalad be dakmalana: Bab-Dummad-ailagi-ibmar-ogumakar-uksad guchamalale, ¿oyonaisursi, ede, Bab-Dummadba-mesa akanonimarye?
1CO 10:19 Emide, ¿igi an sogsunna? ¿An sogsi, bab-dummaganga-imakleged, we gangued nikaye? ¿An sogsi, bab-dummaganga-imaklegedga-ibmar-ogumakar-ukleged, we ibnuedye? Suli, degi an sogsulid.
1CO 10:20 An sognaido, Judíoʼsurmalad ibmar-ogumakar-ukmalad, we niaga ukmarye, Bab-Dummadgarsurye. An bemar-abesurdo, niaba bemar akanai gued.
1CO 10:21 Ar bemar geg Bab-Jesús-nog-gobnai, degi, nia-nog-gobnai gued. Degine, Bab-Jesús-mesegi mas-gunsii, degi, nia-mesegi mas-gunsii, geg bemar gumarbalid.
1CO 10:22 ¿Ar Bab-Dummad bemargi nobgubi be abemarsi? ¿Ar anmar Bab-Dummadba bur dutusursi? Suli, degisuli.
1CO 10:23 Belagwapa sunna an ibmar-imakedbiid, degi-inigwele, belagwapa ibmar nueganbisulid. Belagwapa sunna an ibmar-imakedbiid, degi-inigwele, belagwapa burbar-nasguega an-imakosulid.
1CO 10:24 Melle begadbi-ibmar-nued-imakedgi be binsamalo. Suli, degisuli. Aimar-baigangi be binsamarmogoed.
1CO 10:25 San-ukleged-neggi bela san-ukleged be gunmar. Mer be egismalo, we-sande bia daniye, adi, be-ulubgi mer be ichakwa be itogegar.
1CO 10:26 “Bela we-napneg-naidi, bela egi ibmarmar-bukwadi, Bab-Dummadgadid.”
1CO 10:27 Dule-wargwen-Bab-Jesúsʼba-naisulid mas-gunnega bese gochale, be nabiele, be naoed. Bela bega masgunned ukalile, be gunnoed. Mer be egiso, we-masde bia daniki, adi, mer ichakwa ulubgi be itogegar.
1CO 10:28 Ar dule-wargwen bega sokalirdi: “We-mas, bab-dummaganga-uklegega imaklesye,” a-san, mer be gunno. Ar ade, dule-bega-sogsadba, be wisgunonikidba, melle be gunno. “Bela we-napneg-naidi, bela egi ibmarmar-bukwadi, Bab-Dummadgadid.”
1CO 10:29 An sogedi, be-ulubgi-binsaed-ular, an sogsulid. Suli. Dule-baid-e-ulubgi-binsaed-ular, an soged. Dule-gwensak sunna sogdaged: “¿Ibiga an wargwen-yeer-itodiidgi, dule-baid-angi-akar-binsaedba, angi ichakwa sunmakledagoe?
1CO 10:30 An Bab-Dummadga dog-nuedye masgunned-idu sogsale, ¿ibiga angi ichakwa sunmakledabalosunna? ¿An masgunned-iduar dog-nuedye Bab-Dummadga an sogsasursi?”
1CO 10:31 Degisoggu, be mas gundibe, be gobdibe, ibu be imakdibe, bela Bab-Dummad-nug-odummogega be imake.
1CO 10:32 Judíoʼmardibe, degi, Judíoʼsurmaladdibe Jesúsʼba-nanaimaladdibe, mer be-nuki isguega-imaked be imako.
1CO 10:33 Anyob be imakmar. Andi an bela an-ibmar-saedi, dulemar-baigan yeer-itogega an imaked. Unnila anginbi an binsabisulid, adi, bukidar Bab-Jesúsʼba abonolemarmogagar.
1CO 11:1 Igi an Cristo-daedba gudimoga, deyob, be an-daedba damar.
1CO 11:2 Gwenadgan an be-nug ogannomar, ar bemar an-iedisurmalad, degine, igi an be-odurdaksamala, amba bemar deyob nue-ganimalad.
1CO 11:3 Bemar nue-wisgubi an be-abemardo, Cristo bela machergan-e-nonoga gued, degine, machergan, omegan-nonoga gumogad, degine, Bab-Dummad Cristo-nonoga gusimogad.
1CO 11:4 Bela dule-machergan nonogi gurgin-sii Bab-Dummadse golele, Bab-Dummad-Gayaburba barsogdibe, gwen nabirsurdo. Ar dule Cristo-e-nonoga-guedgi dodonaiyob gunaid.
1CO 11:5 Ar omedi, dunwesuli Bab-Dummadse gorgwichile, igi, Bab-Dummad-gayaburba-abingasad-barsoggwichile, gwen nabirsulid, e-suigi isdar-binsanaiyob gunaido, ar sailagia-gwiri na isayobi gunaido.
1CO 11:6 Ar ome, e-nono dunwesulile, bur bela saila-gwiri-siked nabirid. Ar ome na saila-siked binge-itogele, igi, nono-gwiri-saed binge-itogele, ar degirdi, na nono dunwesunnodo.
1CO 11:7 Ar machereddi, nono-dunwed abelesulid, ar ade, Bab-Dummad-yopira-dakleged-e-wilub na san-sediid, degine, dule-macheredba Bab-Dummad-nug ogannolegoed. Machereddi, e-omeba nug ogannolemogoed.
1CO 11:8 Ar machered omegi danisulid, ome macheredgi danikid.
1CO 11:9 Deginbali, Bab-Dummad, ome-nukad machered-obinnissulid. Bab-Dummad, machered-nukad ome-obinnisad.
1CO 11:10 Degisoggu, a-ulale, ome e-nono dunwergebed, adi, machered-urbalidaed mag-daklegegar, deginbali, baliwiturmar mag-dakmogagar, omede, machered-urbali nanadiiye.
1CO 11:11 Degisoggu, anmar Bab-Jesúsʼgindi, machergan, omegansuli geg gued, degi, omegan, machergansuli geg gumogad.
1CO 11:12 Ar igi ome macheredgi daniki, deyob, machered omegi gwalulenonimogad. Degi-inigwele, belagwapa anmar Bab-Dummadgi danimalad.
1CO 11:13 Bemar-sunnad be itomarmogana, ¿wede ome Bab-Dummadse nono-dunwarsuli-goled nabir be itoge?
1CO 11:14 ¿Ar machergan sailagia-suiti-gudigued binge itodasursi?
1CO 11:15 Ar omegangardina, sailagia-suitisaed bur nabirid. Ar sailagia ega uklesad, musweyobguegar.
1CO 11:16 Ar dule-wargwen we-igargi abin-abin sunmakbiele, an bega sogmardo, anmar igar-baidgi gwen odurdakdisurye, degi, Jesúsʼba-nanaimalad-danar-ambikunonidamalad, Bab-Dummadse-goledsik, igar-baid nikasurbarye.
1CO 11:17 We-ibmar an bemarga sogsokalidsikdi, an bemar-nug gwen odummosurmalad. Ar bemar ambikualile, gwen ibmar-nued-imakega be ambikusurmalad. Aka ibmar-ichogega be imakdedamalad.
1CO 11:18 Gebedgine, anga sogmardo, bemar-Jesúsʼba-nanaimaladi, danar ambikunonikile, na be boni-nikadamaladbali be bachik-bachik ambikubukwa damarye. An insagua, ar deyobsaar bemar gubuk an insado.
1CO 11:19 Ar deyob sordamar-akar-akar-ambikumalad guergebed, adi, magar daklegegar, doamar nue-Jesúsʼba-nanaimalad-sunnadi.
1CO 11:20 Bemar danar-ambikunonimalale, Bab-Jesús-burgwisad-e-binsaega mas-gunye-sogmalan-inigwele, gwen agala be ambikunoni dasurmalad.
1CO 11:21 Bab-Jesús-burgwisad-e-binsaega-masgulleged-omosale, bemar emar-abitosuli wala-walagwengi masgulleged gutedamalad. Abala amba ukumaada besdamalad, abala, doggusadba, mumguddamalad.
1CO 11:22 Ar bemar mas-gunmalaga degi, gobmalaga ¿be neg niksursi? ¿Ibiga be Jesúsʼba-nanaimalad-ambikunonidamalad be mesagwar imakmala? ¿Ibiga be gwenadgan-wilemalad obingegsabukmala? ¿Igi an bemarga sogo be insae? ¿An be-nug ogannomaloe? Suli. Wesikdi geg an be-nug ogannomalad.
1CO 11:23 Bab-Jesús-sunnad igi an-odurdaksa, deyobi, an bemar-odurdaksamarmogad: Dummad-Jesús, darba-uklegoed-mutik madu susagusad.
1CO 11:24 Geb Bab-Dummadga dog-nuedye-sogsad-sorba, madu bisge-bisge imaksad, degi, sogded: “Be gunmar, we, an-san. Bemar-ular weyob ichimakoed. Bemar an-insamalaga weyob be imakdii gumalo.”
1CO 11:25 Jesús mas-guchad-sorba, amba deyob nog susbalid. Geb sogdebalid: “We-gobeddina, an-abed. Wedi, Bab-Dummad dulemar-ebo igar-bini-mesisad-e-wilub gued. Angi be binsamalaga weyob be gobdii imakmalo.”
1CO 11:26 Degisoggu, we-madu be gunnarmalale, degi, we-gobed be gobbarmalale, Bab-Jesús-gannar-danikoed-ibase, bemar Bab-Jesús-burgwisad-igar be oyonanaid.
1CO 11:27 Degisoggu, doa-dule igarsuli, dodoakwaa we-madu-guchale, degi, igarsuli gobed-gobsale, a-dule, Bab-Jesús-abegi, degi, e-sangi, nue-isgusdo.
1CO 11:28 Degisoggu, madu-gunnoed-iduale, degi, gobed-goboed-iduale, na dukin wala-walagwengi ulubgi be itomalo, igi be gudidibe, isgudidibe, surdibe.
1CO 11:29 Ar dule-wargwen isgued-nika we-madu-gunnele, degi, gobed-gobele, Bab-Jesús-sangi binsasulid-ular, dukin na san wiononikoed.
1CO 11:30 A-ulale, bemar bukidar uelledimalad, degi, nolloo be itodimalad. Deginbali, bato bukidargus burgwismalad.
1CO 11:31 Ar an na dukin-dukin ulubgi na san-magar-dakmalale, Bab-Jesús sabsur-anmar-odurdaknai gussuliled.
1CO 11:32 Ar Bab-Jesús anmar-gudiid dakele, anmar-odurdaked, adi, anmar mer dule-baigan-Bab-Jesúsʼba-naisurmaladba sabsur odurdaklesii gumogagar.
1CO 11:33 Degisoggu gwenadgan, bemar mas-gunnega danar-ambikunonikile, na be muchub-muchub edarbemalo.
1CO 11:34 Ar dule-wargwen ukurba-itogele, na e-neggi mas gunnodo, adi, mer Bab-Dummad bemar-danar-ambikumaladgi yogasaar-guardamaladba bemar-sabsur-odurdakmalagar. An modapile, igar-baigandi an bemarga nudakdapoed.
1CO 12:1 Gwenadgan, anmarga-gurgin-burbaled-Bab-Dummad-uked nue-wisi-gudigued an be-abemardo.
1CO 12:2 Bemar nue wismalad, amba be Bab-Jesús-wissuli-gudimargu, bab-dummagan-sobarmalad-geg-sunmakedse be ebipiledii gusmalad.
1CO 12:3 Agala, emigindi, nue-wisgubi an be-abemardo, Bab-Dummad-Burba-ganguedba, dule geg Bab-Jesús-ukabsaed, degine, na e-itolegedba geg sogbalid, “Jesús, Dummad-Biriginedye,” ar Bab-Dummad-Burba-Isligwaled ega sogergebed, deyob be sogye.
1CO 12:4 Degirdi nabir. Gurgin-burbaled akar-akar nika-inigwele, unnila Bab-Burbadi, wargwennaa gued.
1CO 12:5 Ar Babga-arbaed akar-akar-nika-inigwele, unnila Bab-Jesúsʼdi wargwennaa gued.
1CO 12:6 Ar Babga-ibmar-imakleged akar-akar nikad, degi-inigwele, a-Bab-Dummadi e-sunnad anmargi-ibmar-imakega imaked.
1CO 12:7 Gwenadgan-war-wargwengala, Bab-Burba gurgin-burbaled-akar-akar-ibmar-imaked uksad, adi, gwenadgan bela egi nabir bendaklemalagar.
1CO 12:8 Bab-Burba, dule-war-wargwenga, nue-binsaed-nikaa-sunmaked ega uked. Baidgardi, nue-ibmar-wisid ega ukmogad, ar Bab-Burbadi, wargwennado.
1CO 12:9 Amba Bab-Burba dule-baidga, nue-Jesúsʼgi-bensuli-nanaed ega uked. Degi, baidgardi, dule-uellemalad-sunna-nudaked ega ukmogad.
1CO 12:10 Bab-Burba, baidgardi, ibmar-dakledisurmalad-imaked ega uked. Baidgardi, Bab-Gayaburba-barsoged uked. Baidgarmoga, nabir magar-burbar-ibmar-itoged, we, Bab-Burbadibe, we, burbamar-isganadibe. Degine, baidgarmoga, nabir gaya-baid-baid-sunmaked uked. Deginbali, baidgarmoga, nabir gaya-baid-baid-oduloged uked.
1CO 12:11 Ar bela we-gurgin-burbaled-akar-akar-uklegedi, unnila Bab-Burba-wargwenna-guedbi uked. Degine, na e-itolegedba doamarga we-gurgin-burbaled ukbie, amarga uked.
1CO 12:12 Ar igi anmar-sana wargwenna gue, degite, eba-akananaimalad bukidar gued. Eba-akananaimalad bukidar-gue-inigwele, sandi unnila wargwenna gued. Amba Cristo deyobmogad.
1CO 12:13 Ar anmar bela unnila Bab-Burba-wargwenna-guedgi oglesmalad. Agi anmar bela san-wargwenna gunonikid, Judíoʼdibe, Judíoʼsurdibe, maidibe, maisurdibe, ar bela anmargi Bab-Burba ubosadbimalad.
1CO 12:14 Dule-san unnila wargwenna gusulid, bukidar egi-akananaid nikad.
1CO 12:15 Ar mali sokardibe: “Ar an argansursoggu, an san-e-sordasurye.” Degi-sogedba, soglesurdo, mali, san-e-sordasurye.
1CO 12:16 Ar uaya sokardibe: “Ar an ibyasursoggu, an san-e-sordasurye.” Degi-sogedba, soglesurdo, uaya, san-e-sordasurye.
1CO 12:17 Ar bela dule-san ibyabiile, ¿igi ibmar itosarsunna? Ar bela dule-san uayabiile, ¿igi ibmar usarsunna?
1CO 12:18 Emigindi, Bab-Dummad na e-itolegedba dule-sangi eba-akananaid nasiksad.
1CO 12:19 Ar belagwapa dule-sangi-akananaid emarbiina, ¿bia dule-san nagusarsunna?
1CO 12:20 Ar emigindi, dule-sangi-akananaid bukidar-inigwele, unnila dule-sandi, wargwenna gued.
1CO 12:21 Geg ibya arganga soged: “An be-abesurye, an wargwen unniye.” Degi, nono geg malimarga sogmogad: “An be-abesurmarye, an wargwen unniye.”
1CO 12:22 Ar dule-sangi-akananaid-bur-nollo-daklemalad, amar bur-nue-abelemalad.
1CO 12:23 Anmar-sangi-akananaid bur-baisurdaklemalad, a bur anmar ega nue-mor yodamalad. Degi, anmar-abagan-daklebisur-abeleged, a anmar odukuar, ise ega mor-yoigu sedidamalad.
1CO 12:24 Ar anmar-san-odukuarsuli-baisur-dakleged, adi, ega mor-yosulir, akarsulid. Bab-Dummad ibiyobi anmar-san imaksa, bur baisur-dakleged, aka bur-nue akwega anmar-imaksad, ega nue-mor-yoe anmar-imaksad.
1CO 12:25 Adi, melle san-akananaid na muchub-muchub sogmalagar, an bur nue-abelegedye. Bela sanmar-akananaid na bulakwaa bendakmalagalad.
1CO 12:26 Degisoggu, san-akananaid-gwensak, ibmar nunmak-itogele, bela eba nunmaked itodamarmogad. Ar san-gwensakga nug-odummolenaile, bela eba weligwar itodamarmogad.
1CO 12:27 Ar emigindi bemar Cristo-sanga gumarsunnad, degi, war-wargwena eba akananaidga gumarmosunnad.
1CO 12:28 Bab-Dummad, Jesúsʼba-nanaimalad-danar-ambikunonidamalad-abargi gwenna-gwenna nug-imaksad: Gebegine, Bab-Jesús-e-sapingan-bur-dummaganga dule-nug-imaksad. A-sorba, Bab-Dummad-gayaburba-barsogmaladga dule-nug-imaksad. A-sorba, odurdaked-sailamarga dule-nug-imaksad. Geb, ibmar-dakledisulid-imakmaladga dule-nug-imaksad. Geb, dule-uellemalad-nudakmaladga dule-nug-imaksad. Dule-bendakmaladga dule-nug-imaksad. Dulemar-neg-akwemaladga dule-nug-imaksad. Dule-gaya-baid-baid-sunmakmaladga dule-nug-imaksad.
1CO 12:29 ¿Ar bela Bab-Jesús-e-sapingan-bur-dummaganbi gumarsi? ¿Bela Bab-Dummad-gayaburba-barsogmaladbisi? ¿Bela odurdaked-sailamaladbisi? ¿Ar bela ibmar-dakledisurmalad-imakmaladbisi?
1CO 12:30 ¿Ar bela dule-gegumair-nudakmaladbisi? ¿Bela gaya-baid-baid-sunmakmaladbisi? ¿Bela sunna gaya-baid-baid-odulomaladbisi? Suli, degisuli.
1CO 12:31 Degisoggu, bur be gurgin-burbaled-nued amimarsun. Emigindi, andi bemarga igar-birigined-nued bur oyogoed.
1CO 13:1 Igidibe, sunna dulemar-gaya-baid-baid-sunmakmalad an sunmakdibe, degine, baliwiturmar-gaya an wisbardibe, ar degite, sabedgi an imaksulile, an binsa esnon ee oimakeyob, degine, bormo-matargana na abin-abin sarsolenaiyob an gudiido.
1CO 13:2 Bab-Dummad-Gayaburba-an-abingasad, an baiganga sogdibe, degine, bela Bab-Dummad-ibmarmar-dukuar-mamaid an wisbardibe, ar sabedgi an imaksulile, binsa an gudiido. Degine, e-ibmarmar-bela-wisguleged an wisgunonibardibe, degine, bela ulubgi-bensulidba sunna yarmar an onirbardibe, ar sabedgi an imaksulile, binsa an gudiido.
1CO 13:3 An bela-ibmar-nuegan-an-nikad an bela wileganga ukdibe, degine, an-san-ogumaklegegala an ukbardibe, ar sabedgi an imaksulile, bela we ibmarmar-binsaleddo.
1CO 13:4 Sabguedi, weyobid: Na urwed bargaed, nued-binsaedgi dulemar-bendaked. Geg nobgued, geg na san dummarba itoged, degi, geg baiganba dummarba na san imaked.
1CO 13:5 Geg gwinni-gwinni daed, ibmar imakalir, geg eginbi binsaed, geg gwae-gwae urwed, degine, dule egi nosale geg bar ebinsaed, egi nossulidyob dakdedaed.
1CO 13:6 Isguedgi geg wergued, unnila igar-napiragwadginbi wergued.
1CO 13:7 Sabguedi, bela ibmar-nunmaked-abin burdidaed, bela ibmar bensurdaed, bela bensulidgi edarbedidaed, degi, bela ibmar-naibid-abin burdidaed.
1CO 13:8 We sabgued-igar geg bergued, degi-sadeguoed. Bab-Gayaburba-barsogleged-igardi bergudoed, gaya-baid-baid-sunmaklemalad bar sunmaklegosulid, degi, ibmar-nue-wisigumalad bergudmogoed.
1CO 13:9 Ar emigindi, abala ibmar an wismalad, degi, iche-iche yoo-ibmar-guoedgi an sunmakmalad.
1CO 13:10 Ar bela ibmar-napiramalad nonikirdi, we-ibmar-amba-galakuar-bukwad bergudoed.
1CO 13:11 An bipigwaunni, bipiganayob an sunmaksad, bipiganayob an binsasad, bipiganayob ibmar an daksad. An dule-macheredga gunonigu, bar mimmiganayob an dae gussulid.
1CO 13:12 Emigindi, isbegi ibmar sunnasuli bolle-bolle-dakeyob Bab-Dummad-ibmar an dakmalad. Ibagan danikoed, anmar na nue-asabin dule-dakeyob Bab-Dummad-ibmar daknonikoed. Emigindi, bukidar amba an wissurmalad, igi-Bab-Dummad an-wisi, yoedsedi deyob an Bab-Dummad-wisgunonimogoed.
1CO 13:13 Emigindi, Bab-Dummad-bensulid-igar, nue-bensulidgi Bab-Jesúsʼgi-ibmar-nuegan-edarbediid-igar, degine, sabgued-igar, wemar-sogbaagwadi, degisadeguoed. Degi-inigwele, wemar-sogbaagwadgi, sabgued-igar bur emargi obinsiid.
1CO 14:1 Degisoggu, bela-bela dulemar-baigan-sabgudii be nanamarsun. Degine, Bab-Dummad-gurgin-burbarmalad-ukedbina bur be sogmar. Bur bule Bab-Dummad-gayaburba-abingasad-barsogedbina be itogewilubmalad.
1CO 14:2 Ar dule, gaya-baid-baidgi sunmakele, Bab-Dummadgarbi sunmaked, dulemarga sunmaksulid. Ar ade, dulemardi aku e-itoged, e-ibmar-sogedi Bab-Burbaba ibmar-dukuar-maidgi sunmaked.
1CO 14:3 Dule Bab-Dummad-Gayaburba-barsogedba dulemarga sunmakele, adi, dulemar-odurdakegalad, dulemar-ogannogegalad, degi, dulemar-bukib-binsadiid yeer-ito imakegalad.
1CO 14:4 Ar dule gaya-aku-itolegedgi sunmakele, unnila we-dule na dukin e-burba-ogannogega sunmaked. Dule Bab-Dummad-Gayaburba-barsogerdi, adi, Jesúsʼba-nanaimalad danar-ambikunonidamalad-e-burba-ogannogega sunmakdaed.
1CO 14:5 Bela bemar gaya-baid-baidgi sunmaked an be-abemalanad, degi-inigwele, bur bule bemar Bab-Dummad-Gayaburba-barsoged an abeged. Ar ade, dule-gaya-baid-baid-sunmakedba, Bab-Dummad-Gayaburba-barsoged bur-sunsogedid. Degine, dule-gaya-baid-baid-sunmaked nabir odulobalirdi, nueddo. Adi, nabir Jesúsʼba-nanaimalad-danar-ambikunonidamalad-e-burba ogannogegar.
1CO 14:6 A-ulale, gwenadgan, emi an bemarse ataknadele, agi an bemarga gaya-aku-itolegedgi an sunmakdele, ¿ar wede ibnuedga bemarga guosi? Suli, ibnuedga bemarga guosuli. Ar Bab-Dummad-bemar-ibmar-wisgubi-abemaidgi an bemarga sunmakerdi, nueddo. Ibmar-nue-wisidgi-sunmakedgindibe, Bab-Dummad-gayaburba an abingasadgindibe, bemar-odurdakedginbardibe, amardi nueddo.
1CO 14:7 Garmar-sunna-ogorlemalad gammudibe, gar-duba-nikaddibe, akar-akar nue ogorsulile, ¿igi mag be itogosunna igid-gar gornai?
1CO 14:8 Deginbali, gar-trompeta nuekwa ogorlesulile, aku-itolegele, ¿doa urwenaega na guagwar gudioe? Guagwar gudigussurmalaled.
1CO 14:9 Ar amba bemar deyobmodo. Ar be-gaya-sunmaked aku-itolegele ¿igi mag itolegosunna ibu be obare? Ar unnila binsa ee be sunmakgwisdo.
1CO 14:10 We-napneggi bukidar-gaya-baid-baid-sunmakleged-nika an insado. A-gayamar bela mag itolegedbiid ibi na obarmala.
1CO 14:11 Ar dule-anga-sunmaked mag an itosulile, a-dule-anbo gaya-emar-sunmaksulidga gued.
1CO 14:12 Ar bemarga amba deyobmodo. Ar bemar gurgin-burbarmalad nue-abebuksoggu, bemar gurgin-burbaled nabir Jesúsʼba-nanaimalad-ogannogedbina bur bule be sogmarsun.
1CO 14:13 Degisoggu, dule-wargwen gaya-aku-itoleged-sunmakdibe, Bab-Dummadse gaya-aku-itoleged-oduloged-gurgin egisbardo.
1CO 14:14 Ar gaya-aku-itolegedgi Bab-Dummadse an gordibe, an-burbabi Bab-Dummadse gornaido, ar andi an aku itodo, gwen an gannalegosurdo.
1CO 14:15 ¿Degite, igi an saosunna? Burbar Bab-Dummadse an goloed, degine, mag-itogedgi an Bab-Dummadse gorbaloed. An burbar namakoed, degine, mag-itogedgi an namakbaloed.
1CO 14:16 Ar Bab-Dummad-nug unnila burbar be ogannogwichile, ¿igi dule-be-abargigwichid, “Nabirye” sogosunna? Ar aku be-itoged, ibi be sogsa.
1CO 14:17 Bedi na dog-nuedye Bab-Dummadga sogsado, ar dule-baiddi Bab-Dummad-nuggi gwen gannalegosulid.
1CO 14:18 Bab-Dummadga dog-nuedye an sogdo, an bemarba bur bule gaya-baid-baid an sunmaked.
1CO 14:19 Jesúsʼba-nanaimalad-danar-ambikunonidamalad-abargindina unnila gayaburba-sogatar an sogsaled, adi, magar an-sunmakgwichid itomalagar. Adi, agi gwenadgan-odurdakgwichi-gued bur nuedid, gaya-aku-itolegedba sunmakgwichi guedba.
1CO 14:20 Gwenadgan, bemar-binsaedgi mer burwiganyob be binsamar. Isguedsikdi burwiganyob be damardo, be-binsaedgindi, dule-sergan-binsaedyob be binsamar.
1CO 14:21 Moisés-Igargi narmakar maid: Bab-Dummad soged: “We Israel-dulemarga, gaya-baidgi, degine, gwabin-baidgi an sunmakoed, ar degite, gwen an-itogosurmalad.”
1CO 14:22 Degisoggu, dulemar-Bab-Jesúsʼgi-bengudimaladga gaya-aku-itolegedgi-sunmakleged wilubga gued. Dulemar-Bab-Jesúsʼba-nanaimaladgardi, we-gaya-aku-itoleged wilubga gusulid. Dulemar-Jesúsʼba-nanaimaladgala, Bab-Dummad-Gayaburba-barsogleged, wilubga gued. Dule-Bab-Jesúsʼgi-bengudimaladgardi, Bab-Gayaburba-barsogleged wilubga gusulid.
1CO 14:23 Degisoggu, Jesúsʼba-nanaimalad Bab-Dummadse-golega bela danar ambikunonikile, bela gaya-baid-baid sunmakedbimalale, agi dule-yogsaled, igi, dule-Bab-Jesúsʼba-naisuliddibe, bemar-abargi dognonikile, ¿bemargi sogosur be insae, bemar oes bukmarye?
1CO 14:24 Ar bela bemar Bab-Dummad-Gayaburba-barsognanaidgi, dule-wargwen-Bab-Jesúsʼba-naisulid dognonidibe, dule-binsaled dognonidibe, bemar-ibmar-sogedba e-isgudiid magar itogoed.
1CO 14:25 E-gwage-ulubgi-isgued-dukuar-naid osanalononikoed, degi, Bab-Dummad-nug odummogega yokorgi-sindigar Bab-Dummad-asabin signonikoed. Geb degi sogdagoed: “Nue-napira bemar-abargi Bab-Dummad gudiiye.”
1CO 14:26 Degite gwenadgan, ¿igi an bemarga sogosunna? Bemar danar ambikunonikile, bemar nikamalad: Gwenna-gwenna namaked, baiddi, Bab-Jesús-Igargi odurdaked, baiddi, gaya-baid-baidgi sunmaked, baiddi, gaya-baid-baidgi-sunmaked-oduloged, degi, baiddi, Bab-Dummad-ibmar-dukuar-bukwad odaloged. Ar bela bemar Jesúsʼba-nanaimalad-danar-bukwad-ogannogega, we-ibmar imakewilubmalad.
1CO 14:27 Ar bemar gaya-aku-itolegedgi sunmakele, unnila warbodibe, warbaadibe, sunmakewilubbid. Degine, gwensak-sunmaksad-sorba, geb baid sunmakmogoed. Degine, dule-gwensak ega odulogewilubbalid, wede ibu obare.
1CO 14:28 Ar dule-e-oduloged sulile, mer bur Jesúsʼba-nanaimalad-danar-ambikunonimalad-abargi sunmakodo, unnila na dukin egarbi ibmar sogodo, degine, Bab-Dummadgarbi sogbalodo.
1CO 14:29 Bab-Dummad-Gayaburba-barsogmalad amba deyobmodo, unnila warbodibe, warbaadibe, sunmakoed. Baigandi nue bar-itogoed, bule nue-nabir soggwisdibeye.
1CO 14:30 Ar dule-gwensak dule-sunmakgwichid-itosiidgi, Bab-Dummad ega ibmar-soggwen oyononidibe, dule-sunmakgwichid bar sunmakosulid, adi, dule Bab-Dummad-ega-ibmar-soggwen-oyosad sogegar.
1CO 14:31 Deyobi, bela bemar Bab-Dummad-Gayaburba sunna war-wargwen baid-sunmaksad-sorba sogmarmogad, adi, bela bemar durdakmalagar, degi, bela bemar na burba ogannomalagar.
1CO 14:32 Bab-Dummad-Gayaburba-barsogmalad na e-burba bargamalad.
1CO 14:33 Ar Bab-Dummad yogasaar-ibmar-imaked-dulesulid. Bab-Dummad ibmar-innikii-saed-duled. Anmar Jesucristoʼgi-akananaimalad danar-ambikunonikile,
1CO 14:34 omegan danar-bukwadgi sunmakodeeye ega igar maisulid, bogidik sigmaloed. Ar ade, Moisés-Igar deyob narmakar sogmaimogad, omegan machergan-urbaligwa nanaoye.
1CO 14:35 Ar omegan ibmar wisgubiele, e-neggi e-suise na egisoed. Ar ade, sunnasur dakleged, Jesúsʼba-nanaimalad-danar-ambikunonimaladgi omegan-sunmaked.
1CO 14:36 An wisid, an bemarga-ibmar-sognaid be isdar-itomaloed. ¿Ar bemargi Bab-Dummad-Gayaburba ainiarsi? ¿Unnila bemarsebi Bab-Dummad-Gayaburba warmaksasi?
1CO 14:37 Ar dule-gwensak na itogele, ede Bab-Dummad-Gayaburba-barsogedi, itobardibe, ede burbaledgi gannarba gudii, mag-itogewilubdo, we-igar-an-bemarse-narmakedi, we Bab-Dummad-igar-uked-sunnadye.
1CO 14:38 Ar dule we-igar deyob daksulile, Bab-Dummad, E-Gayaburba-barsogedye dakosulid.
1CO 14:39 Degisoggu, gwenadgan, Bab-Dummad-Gayaburba-barsogedbina be sogmardo. Deginbali, mer be dule gaya-baidgi-sunmakbi-itoged be bargamar.
1CO 14:40 Bela igar-nikaa, nuekwaa be ibmar imakmalo.
1CO 15:1 Gwenadgan, emigindi an bemarga Bab-Dummad-Gayaburba-Nuedgi-sunmakapid bemar ebinsamarsun. A-gayaburba-nued bemar abingasmalad, abali, amba bemar galakusuli nanadimalad.
1CO 15:2 Deginbali, an bemarga Gayaburba-Nuedgi-sunmaksadba bemar nue nanadiile, egi be abonolesmardo, ar bemar unnila asginbi bengusur gussurmalar.
1CO 15:3 Igi an odurdaklesmoga, ayob an bemar-odurdaksamarmogad: Cristo anmar-isgued-ular burgwisad, Bab-Dummad-Gardagi narmakar naidyob, gunonikid.
1CO 15:4 Cristo napa-urba diglesad, degine, ibapaagi gannar durgusad, Bab-Dummad-Gardagi narmakar naidyob, gunonikid.
1CO 15:5 Cristo gannar durgusgu, Cefasʼse na magarosad. We-Cefasʼde, Pedroʼye nugbalid. A-sorba, Cristo e-ambe-gakabogwadse (12) magarosbalid.
1CO 15:6 A-sorba gwenadgan-e-dulataled-ilatar-gwena-bukwadse (500+) magarosbalid, a-gwenadgan amba bukidar dula gudidiid, abar bato burgwismarbalid.
1CO 15:7 A-sorba, Jacoboʼse Jesús magarosad. A-sorbali, e-sapingan-bur-dummaganse magarosbalid.
1CO 15:8 Geb a-sorba, napidgi, Cristo anse magarosmogad. An dule-wargwen gwaluleged-e-ibagan-maisulidba gwalulesayob, an gunonikid.
1CO 15:9 Ar ani an Bab-Jesús-e-sapingan-bur-dummagan-e-solabalidid. Degine, Jesús-e-sapin-bur-dummadga-gumogaga an nugsalegewilubsulinad, ar ade, Jesúsʼba-nanaimalad-baregindii an gusad-duled.
1CO 15:10 Ar Bab-Dummad nabir angi binsasadbali, ar emigindi an a-dulega gunonido. A-ular, weyob an gudisunnad. Ar Bab-Dummad angi arbasadi, binsarsunna arbassulid. Ar ade, emarba an bur bule arbasad. Ar ani an arbassulid, Bab-Dummad gangued-anga-uksadba an deyob arbasad.
1CO 15:11 Degisoggu, andibe, Jesús-e-sapingan-bur-dummagan-baigandibe, anmar bemarga weyob Bab-Dummad-Gayaburba-Nuedgi sunmaksamalad, degine, bemar weyob A-Gayaburba-Nued abingasmalad.
1CO 15:12 Ar Cristoʼgi sunmaklediile, Cristo burgwisgu, gannar durgusye, ¿ar degite, ibiga bemar-abargi gwen-gwen sogsunna, dule burgwisale, gannar bar-durguosurye?
1CO 15:13 Ar dule burgwisale, gannar bar durgusulile, Cristo burgwisgu, gannar bar-durgussurmodo.
1CO 15:14 Ar Cristo gannar durgussulile, binsa Bab-Igargi anmar sunmakdido, degine, bemar binsa Cristoʼgi bensuli gudimardo.
1CO 15:15 Degisoggu, anmar gakanba binsa Bab-Dummad-barsogdimarsundo, ar ade, anmar sogdiid, “Bab-Dummad Cristo-burgwisad gannar odulosye.” Ar burgwismalad gannar durgusulile, Bab-Dummad Cristo-odulossurdo.
1CO 15:16 Ar burgwismalad gannar durgusulile, Cristo gannar durgussurmodo.
1CO 15:17 Ar Cristo gannar durgussulile, binsa bemar Jesúsʼgi bensuli gudimardo. Ar degisoggu, amba bemar be-isguedgi gudimarsundo.
1CO 15:18 Degisoggu, Cristoʼba-nai-burgwismalad abonolessurmarmosundo.
1CO 15:19 Ar Cristo unnila we-napnegginedginbi anmarga ibmar-nuedga guele, anmar bela dulemar-we-napnegginmaladba nue-wiledimardo.
1CO 15:20 Emigindi, Cristo dule-burgwismalad-abargi gannar durgusad. Cristo gannar-durgusadgi, dule-burgwismalad-iduedga gunonisunnad.
1CO 15:21 Ar dule-wargwengi burgwed-igar nonisoggu, dule-wargwengi gannar-durgued-igar nonibardo.
1CO 15:22 Ar igi bela dulemarga Adánʼgi burgwed-igar noniki, debayobi, bela dulemar Cristoʼgi durgunonimaloed.
1CO 15:23 Dule-burgwismalad Bab-Dummad-igar-mesisadba gannar durgunonimaloed: Cristo-inse durgusad, geb a-sorba, Cristo gannar danikile, eba-nanaimalad gannar odurgunonikoed.
1CO 15:24 Degi, geb neg-bergued nonikoed, bela burbar-dummagan-negsemamaid, bela burbar-sailaganga-gumaid, degine, bela burbar-gandikidba-gangued-nikmalad osulosale, geb degi, Cristo na e-ganguedba negdakmaid, Bab-Dummadga-gumaidga na uknonikoed.
1CO 15:25 Ar Cristo bela e-isdarmalad-birgi-nakwedse negsemai guergebed.
1CO 15:26 Cristo solaba e-isdarad-napi-osulogoedi, burgwedid.
1CO 15:27 “Ar bela Bab-Dummad, Cristo-nag-urba ibmar-urbisad.” Salmo 8:6 Degisoggu, mag-itoledo, Bab-Dummaddi Cristo-urbaligwa gunonisulid, ar ade, Bab-Dummad bela Cristo-urba ibmar urbisad.
1CO 15:28 Ar bela ibmar Cristo-urba urbilenonikile, geb Cristo Bab-Dummad-Machi na e-sunnad Bab-Dummad-urbaligwa nanadoed, ar ade, Bab-Dummad bela Cristoʼga ibmar uksad. Geb agi bela Bab-Dummad-sogedba ibmar gunonisunnoed.
1CO 15:29 Deginbali, gannar-durguleged-igar sulile, degite, ¿ibiga burgwarmalad-anar Bab-diigi-ogleged-igar imakmarsunna? Ar dule-burgwarmalad durgusulile, degite, ¿ibiga burgwarmalad-anar Bab-diigi-ogleged-igar imakmarsunna?
1CO 15:30 Ar degite, anmar ¿ibiga wachi-iliba boni-abargi gudimarsunna?
1CO 15:31 Gwenadgan, napira an bemarga soged, bemar Bab-Jesucristoʼba-naidba, igi an weligwar itoge, ayobi, napiragwadba an bemarga sogbalid, an bane-bane burgwednaga gudiid.
1CO 15:32 Ar we-napneggi-gudiguedbi nikale, ibmar-baid satele, ¿ibiga an Éfeso-neggweburgi achu-ursilimarbo garitodii gussunna? Ar dule-burgwarmalad durgusulile, “Anmar mas-gunmala, anmar gobed-gobmala, ar anmar banedse burgwemaloed.”
1CO 15:33 Mer be yardaklemar: “Dulemar-nuegan, dulemar-isganaba-akaele, isguddamalad.”
1CO 15:34 Nue be binsamar, mer bar be isgumar, isguedgi be nomar. Bemar-obingesaegala an bemarga soged, bemar bukidar amba Bab-Dummad-nue-wissuli gudimalad.
1CO 15:35 Ar gwenna-gwenna egisdamaloed, degite: “¿Dule-burgwismalad igi gannar durguoe? ¿Igi e-san daklegosunna?”
1CO 15:36 ¿Aku be itosi? Ar ibmar-gwag-niega be ibmar-gwag-digedi, ¿bina ibmar-gwag-e-uka nunguergebsursi?
1CO 15:37 Be oros-gwaggi-dakleged digdibe, be ibmar-gwag-baid digdibe, e-war-sunnad be digsulid, e-gwag be diged.
1CO 15:38 Ar Bab-Dummad ega e-san-ukedi, na igi-dakle ega ukbiedba uked. Degine, ibmar-gwaggala na egad-egadba e-san ega uked.
1CO 15:39 Ar sanmar bela emarbi daklesulid. Dulemar-san akar-dakleged, ibdula-sanmar akar-daklemogad, ibmar-gukuarmalad-san akarmogad, degine, uamar-san akarmogad.
1CO 15:40 Amba deyobmodo, nibneggined san-nikmogad, degine, napneggined san-nikmogad. Nibneggined-e-san-daklegedi, napneggined-e-sanbo akar dakleged. Degine, e-yeerdakleged ebo akar daklebalid.
1CO 15:41 Dad-ibeler-gaed, nii-gaed-ebo, akalad, degine, niisgwamar-gaed amba akarmogad. Ar niisgwamar na akar-akar-gaed nikananaed.
1CO 15:42 Amba deyobi, dule-gannar-durguedsik gumogoed. Dule burgwisale, diglesale, e-san nungudoed. Ar gannar-durgusad-sorbardi, bar nunguosulid.
1CO 15:43 Degi, dule-san isdar-daklegedgi digleged. Durgunonikogudi, yeerdakle durgunonikoed. Dule-san nollogwadgi digleged. Durgunonikile, nollosulidgi durgunonikoed.
1CO 15:44 Degine, dule burgwisale, e-san-we-napneggined digleged. Durgudagogudii, bato san-gwagsa san-burbaled-nika durgudagoed. We-napneggined-san-nikale, burbaled-san nikamodo.
1CO 15:45 Ar weyob Bab-Dummad-Gardagi sognaid: “Adán, dule-gebesailadga gunonikid. We-dule, dulasaila gunonikid.” Génesis 2:7 Adán-napid, Cristoʼd. Cristoʼdi, dulega burba-dulad uked.
1CO 15:46 Ar san-burbaled-inse nonisulid, san-we-napneggined-inse nonikid. Geb a-sorba, san-burbaled nonikid.
1CO 15:47 Dule-gebe-we-napneggi-aideged, unnila we-napnegginedid. Dule sorba-nonimogadi, adi, nibnegginedid.
1CO 15:48 Adán-san-nikusmaladyob we-napnegginmalad san-nikmarmogad. Ar Cristoʼba-nanaimaladdi, Cristoʼyob san nikumarmogoed.
1CO 15:49 Ar igi anmar dule-we-napnegginedyobi daklemala, deyobi, anmar dule-nibneggi-danikidyobi daklemarmogoed.
1CO 15:50 Gwenadgan, we an bemarga sogdo, ar san-we-napneggined, geg Bab-Dummad-e-negdakmaidse doged. Deginbali, ar ibmar-nunguoed nibneg-geg-nunguedse geg dogbalid.
1CO 15:51 Igar-dukuar-maid an bemarga soggwelo: Bela anmar burgoedbisurmalad, degi-inigwele, bela anmar-san gwagoedbiid.
1CO 15:52 Ar napi-gar-trompeta-goloedgi, anmar-san ukiar, anmar ibya-muru-sade-daedyob gwagoed. Ar ade, gar-trompeta goloed, geb agi dulemar-burgwismalad durgudagoed, san-gwapid-geg-nungued-nika durgudagoed. Degine, anmarmoga, anmar-san gwagdemarmogoed.
1CO 15:53 Ar ade, we anmar-san-nabir-nunguedi, gwagergebed, san-gwapid-geg-nunguedga guergebed. Degi, anmar-san-nabir-burgwedi, gwagergebed, san-geg-bar-burgwedga guergebed.
1CO 15:54 We anmar-san-nabir-nunguedi geg-bar-nungue gusale, anmar-san-sunna-burgwedi geg-bar-burgwe gusale, geb agi, Bab-Dummad-Garda-narmakar-maidba gunonisunnoed: “Burgwed-igargi-nakwilesadba, burgwed-igar bergussun.” Isaías 25:8 Bab-Dummad-Gardagi sognaibalid:
1CO 15:55 “Burgwed, ¿bia be-boni-dummadgande nadsunna? Burgwed, ¿bia dulegi-be-obined nadsunna?”
1CO 15:56 Ar burgwed-e-bonigana, isguedid, degine, Moisés-Igar-Mesisad isguedga gangued uksad.
1CO 15:57 Anmar emigindi, anmar Bab-Dummadga dog-nuedye sogmarsundo, ar anmar-Dummad-Jesucristoʼba burgwed-igargi-nakwega anmar-imaknonikid.
1CO 15:58 Degisoggu gwenadgan-sabemalad, gatik gannaa be imakmar, mer be galakumalo, gatik Bab-Jesús-Igargi arbanai be gumar. Ar bemar wisid, emi, bemar Bab-Jesús-Igargi arbananaid, binsa be alamaknanaisulid, bemarga igar-nuedga gumaloed.
1CO 16:1 Gwenadgan, Jesucristoʼgi-akananaimaladga, mani-welegedsik an sogbido, igi Jesúsʼba-nanaimalad-Galacia-yalagi-bukmaladga an sogsa, ayob bemar imakmarmogo.
1CO 16:2 Itoged-iliba gebe-iba-nagudedgi bemar wis-mani-amismaladba be mani urbemalo, adi, mer geb an monadapir, bemar mani-weenai gumalagar.
1CO 16:3 An bemarse modapile, a-mani-bemar-wesad, bemar dule-Jerusalénʼse-a-mani-sedega-be-susmaladi, garda-nika an barmidoed.
1CO 16:4 Ar an-sunnad bemarba-nabi be an-abemarmogale, dulemar-Jerusalénʼse-mani-sedmaloed anba namarmogodo.
1CO 16:5 An Macedonia-yarse-arbid-sorba, an bemarse nadapoed, ar ade, Macedoniaʼse-naed anga igar maid.
1CO 16:6 An bemar-walik undarsaar-meger an megodo. Sulirdi, dii-wied-nii-berguedse an bemar-abargi mego an insado. Geb a-sorba, an-nadapidba-naega bemar an-bendakoed.
1CO 16:7 Ar an bemarse-naoedgi, Bab-Dummad bemar-walik undarsaar-meged an-abegele, an megodo. Sikwas an bemar-dakbisulid.
1CO 16:8 Ar emigindi, Pentecostés-Ibagan-naguedse Éfeso-neggweburgi an maiguoed.
1CO 16:9 Ar dulemar-bukidar Bab-Jesús-Igar-isdar-dakmalad-nika-inigwele, Bab-Jesús-Igargi gatik-sunmakega anga yawagakmar nue-argaded.
1CO 16:10 Bemarse Timoteo modapile, nue akwemalo, adi, bemar-abargi weligwar gudiguegar, ar ade, an-arbadiiyobi, Bab-Dummadga arbadimogad.
1CO 16:11 Degisoggu, mer Timoteo ibgwensur be dakmalo. Anse nuedgi bonisuli barmidaged be imakmalo, ar an gwenadgan-baiganmala Timoteo-edarbedimalad.
1CO 16:12 An gwenad-Apolosʼgi wilenaigusando, gwenadgan-baiganmala bemarse ataknaegar. Degi-inigwele, yapa emisgwadi bemarse naegusad. Ega igargan-argader, bemarse ataknadapo an insado.
1CO 16:13 ¡Nue atakmalo! ¡Nue salakarmalo! ¡Bab-Jesúsʼba inniki nanamalo! Dobsuli be nanamalo, gandik be imakmalo.
1CO 16:14 Bela bemar-ibmar-imakedi, sabedgi be imakmalo.
1CO 16:15 Gwenadgan, bemar wisid, Estéfanas-negginmalad-inse Acaya-yargi Bab-Jesús-abingasad. Emigindi, amar Jesucristoʼgi-akananaimalad-bendakdimaladid.
1CO 16:16 Degisoggu, an be-abemarsundo, bemar dulemar-weyobdamalad-urbalii gudigued, degine, dulemar-gadi-arbamalad-urbali, degi, dulemar-Jesúsʼba-nanaimalad-gadi-bendakmalad-urbali bemar gudigumalad.
1CO 16:17 An yeer itodo, Estéfanas, Fortunato, degine, Acaico anse nonimargu, ar ade, amar bemar-nuggi an-bendaknonimalad.
1CO 16:18 A-dulemar burbar nue an-ogannononimalad, degine, burbar bemar-ogannosmarmogad. Dule-degidamalad bemar a-dulemar mag-dake nanae-wilubmalad.
1CO 16:19 Asia-yargi Jesúsʼba-nanaimalad-ambikunonidamaladga, nued-sogeye, an sogsiid. Aquila, Priscila-ebo, Bab-Jesús-nuggi, Jesúsʼba-nanaimalad-e-neggi-danar-ambikunonidamalad, bemar nueganbi-sogeye, bemarga sogsimogad.
1CO 16:20 Gwenadgan bela bemarga-sogsimalad, bemarde nueganbi sogeye. Na be muchub-muchub bela angaagwale be nued-sogeye, na ga be sogmar.
1CO 16:21 Ani Pablo, an-sunnad an garda narmaksadgi bemarga sogsiid nued-sogeye.
1CO 16:22 Ar dule-gwensak Bab-Jesucristo-sabsulile, a-dule ukabsaleged, nabirid. ¡Anmar-Dummad-Jesucristo, be dage!
1CO 16:23 Bab-Jesucristo bemargi nued binsamarsun.
1CO 16:24 An bela Cristo-Jesúsʼgi bemar-sabed. Be itomargua.
2CO 1:1 Ani Pablo, Bab-Dummad-sogedba Cristo-Jesús-e-sapin-bur-dummadga-gumogadid, degine, gwenad-Timoteo, anbo bemar Corintoʼgi Jesúsʼba-nanaimalad, degine, bela bemar Jesucristoʼba-nanaimalad bela Acaya-yalagi-bukmaladse anmar garda narmaksimalad.
2CO 1:2 Bab-Dummad, anmar-baba, degi, Bab-Jesucristo, bemargi nued-binsamarsun, degine, ulubgi-bogidik bemar-itogega imakbarsun.
2CO 1:3 Bab-Dummad, anmar-Dummad-Jesucristo-e-bab, wile anmar-dakmaid, degine, we-Bab-Dummad bela dulemar-gwage armaked. A-Bab-Dummad-e-nug anmar odummomarsun.
2CO 1:4 We-Bab-Dummad bela anmar-wilediidgine anmar-gwage armaked, adi, anmar dulemar-baigan-wiledimalad-e-gwage Bab-Dummad-anmar-gwage-armakeyobi, armakmogagar.
2CO 1:5 Ar igi anmar Cristo-naibigusadyobi, bukidar wiledimarmoga, deyobi, anmar-gwage Cristoʼba armakledibalid.
2CO 1:6 Ar anmar-wilemaladi, bemar mer gwage-naibi itomalagalad, degine, abonoleged-igar abingamalagarbalid. Ar Bab-Dummad anmar-gwage-naibi-itogedgi baisur-itoge anmar-imakele, bemar-gwage-ogannolegegarmogad, adi, bemar anmar-sunnaa wilegarmogale, mer be galakumalagalad.
2CO 1:7 Anmar be-bensurmalad, anmar be-wismardo, igi be anmarba wiledimala, amba deyobi, bemar anmarba gwage-naibi-itogedgi baisur-itoge gunonidamarmogad.
2CO 1:8 Gwenadgan, bemar anmar-Asia-yalagi-wilesad wissuli-gudigued an abesurmardo. Asiaʼgi anmar nue-dummad-wilesad, nue-geger-itoge anmargi-nue-obine, anmar burgoye an bismalanad.
2CO 1:9 Anmar bato burgwed itosad. Deyob gusad, adi, anmar Bab-Dummad-gannar-dule-odurguedgi bensuli guegar. Adi, melle anmar-wargwengi an na san-unniye sogmalagar.
2CO 1:10 Bab-Dummadbi unnila burgwedgi anmar-abonosad, abi unnila burgwedgi anmar-abonoged. Degine, aginbi anmar bensulid. Ede, burgwedgine anmar-abonodii gudoed.
2CO 1:11 Ar bemar anmarga Bab-Dummadse gormalo. Deyobi, bemar, Bab-Dummad-anmarga-ibmar-nued-imakedba, anmarga be Bab-Dummadga dog-nuedye sogmaloed.
2CO 1:12 Anmar-nug dummarba imaked wedid: Ulubgi anmarga sognaid, anmar, nued we-napneggi nanasmarye, degine, anmar bemar-abargi bur bule nued nanasmarbarye. Anmar-nanasmaladi, na san-dummarba-imakedgi nanassulid, gwage-innikigwadgi anmar nanasad. Anmar, Bab-Dummad-nabir-anmargi-binsaedba nanasmalad, dulemar-binsaed-nikaa-daedba anmar nanassulid.
2CO 1:13 Anmar unnila bese garda magar-itolege, degi, nuekwaa narmakale barmisiid. We-garda bela bemar mag ittos-namarsun.
2CO 1:14 Ar igi emi bemar abala mag itosmala, deyobi, Bab-Jesús-danikoed-ibagangi bemar anmargine nug-dungumaloed, degi, anmarmoga bemargi nug-dungumarmogoed.
2CO 1:15 An wegiid-wisidbali, anmar bese-naoye sogsad, adi, ilabo an bemarse atakega, agi, bemar weligwar itogwichi gumalagar.
2CO 1:16 Macedonia-yarse an nadapidgi bemarse ataknaoye an sogsad, degine, Macedoniaʼgi an danikile, bemarse gannar dogee dagoye an sogsad. Geb a-sorba, bemar Judea-yarse an-berbenamaloye.
2CO 1:17 Deyob an bemarga-sogsadi, ¿nuekwa-binsassuli an bemarga sogsa be insae? ¿An-ibmar-imakbiedi, wargwengi ibmar imakbiedba an imakbi be insae? Adi, ani an sognaiguegar eyeye, degine, a-sorba sogbaligar surye. Suli, degisuli.
2CO 1:18 Ar Bab-Dummad geg gakansasoggu, anmar bemarga-ibmar-sogedgi eyeye sogsulid, geb sorba, surye sogsurbalid. Unnila irgwen-sogar anmar ibmar imaked.
2CO 1:19 Ar Bab-Dummad-Machi-Jesucristo, bemar-abargi ibmar-soged ogwa-ogwa-gudii gussulid. A-gayaburbagine, an sunmaksamogad, Silvano, degine, Timoteo, egi sunmaksamogad.
2CO 1:20 Ar Bab-Dummad bela ibmar-nuegan-imakoye-sogsadi, Jesucristoʼba bela imaksagusad. Ar a-ular, anmar Bab-Dummad-nug ogannodele, Jesucristo-nuggi anmar sogdasunnad, deyob gusunye.
2CO 1:21 Degine, Bab-Dummad-sunnad, bemar, degi, anmar, Cristoʼgi-gandik-gwisguega anmar-imaksad, degine, anmar-susbalid, ega arbaegar.
2CO 1:22 Degine, Bab-Dummad e-wilub anmarga nasiksabalid, degine, anmarga E-Burba-Nued anmar-gwagegi nasiknonibalid, adi, oyogega, anmarde egadye, degine, anmarga bur bule ibmar-nuegan imakbaloye.
2CO 1:23 Napira an bemarga soged, mer bemarse urwegala, Corintoʼse an nadsurgusad. Bab-Dummad nue-wisid weyob an-bemarga-sogedi, napiragwad.
2CO 1:24 Anmar bemar-Bab-Jesúsʼgi-bensulid-e-ibedsulid. Anmar bemar-bendakbimalad, adi, bemar yeer itomalagar. Ar bemar bato Bab-Jesúsʼgi nue-bensuli gudimalad.
2CO 2:1 Melle bukib be-obinsamalaga, an bemarse bar naosurye an sogsad.
2CO 2:2 Ar bukib-ito an be-imaksamalale, ¿doa weligwar-ito an-imakosunna? Ar dule-baid sated. Unnila bemarbi, weligwar-ito an-imakoed.
2CO 2:3 A-ular, an bemarse garda narmaksad, adi, an bemarse modapile, bemar weligwar anmar-imakegar, bukib-itosuli weligwar-itogwichi an guegar. An nue-wisdo, an-weligwar-itogedbali, bela bemar weligwar anba itomogoed.
2CO 2:4 An we-garda bemarse narmaksigua, bukib-itogedba, degi, gwagegi nue-wile-itogedba, boed-abalagine, an bese narmaksamalad. We an-bemarga-sogsiidi, bukib bemar-obinsaegala an sogsisulid. An-bemarga-sogedi, adi, bemar wisguegalad, bule an nue-bemar-sab be an-dake.
2CO 2:5 Ar dule-gwensak bukib-ito-an-imaksadi, anbi wile-ito an-imaksasulid, bela bukib-binsa bemar-imaksad. We an-bega-sogedi an bemarga obulonaisulid, napira an bemarga soged, bukib-ito bela be-imaksamarye.
2CO 2:6 A-dulega unnitiba odurdakleged-igar bemar ega mesismalad.
2CO 2:7 Emigindi, bemar a-dulega sogewilubdo, dule-angi-nosad, ies an imakoye. Degine, e-gwagegi-baisur-itoge be imakmalawilupid, ar abakalegi degiile, a-dule dogdar-bukib-binsadii gualile.
2CO 2:8 A-ulale, nue-ise-wilegar an bese egismarsundo, emigindi, a-dule be nue sabgumarsunye.
2CO 2:9 A-ular, iduar an bese garda-narmaksamalad, an be-dakmalagar, bule bemar bela an-ibmar-sogedba imakmalodibeye.
2CO 2:10 Degisoggu, dule-begi-nosadga ies-an-imakoye ega be sogsale, an a-dulega deyob sogmogoed. An deyob-sogedi, bemar-ular Cristo-asabin an deyob soged.
2CO 2:11 Ar anmar nia-saila-e-daed nue-wismarsoggu, anmar, nia-saila-Satanás anmargi-obinega imakosulid.
2CO 2:12 Bab-Gayaburba-Nued-Cristoʼgi-soglesadgi-sunmakegala, Troas-neggweburse an modapgu, Bab-Jesús nabir bela-bela E-Gayaburba-Nuedgi-sunmakega an-imaksad.
2CO 2:13 Degi-inigwele, an-gwenad-Tito, Troas-neggweburgi an daksulidbali ulubgi surbinsa an itosad. Degisoggu, gwenadgangi an bangudgu, an Macedonia-yarse nade gusad.
2CO 2:14 Bab-Dummadga dog-nuedye an sogsunnad, ar ade, Cristo-Jesúsʼba Bab-Dummad bela nakwega anmar-imaked. Degine, dulemar anmarba Cristo-Jesús-nug wisgumamaid, ibmar-wawadik-yeer-yapanned bela neg-gaedyobi gued.
2CO 2:15 Ar anmala, abonolesmalad-abargi, degi, dule-yoggus-gudimalad-abargi, Bab-Dummadga Cristo-ina-wawadikid-ukeyobi gued.
2CO 2:16 Ar anmar, Cristoʼgi-bensurmaladga ina-wawadikid-burba-dula-ukedyob gued. Dule-Cristoʼgi-benmaladgardi, anmar ina-isgana-yapanned-emar-oburgwedyob gued. Ar Cristo-Jesúsʼgi-sunmakega, ¿doa degite, unniguar gudii guosunna? Anmardi unnido.
2CO 2:17 Anmardi, bukidar-dulemar-baigan-imakedyobi imaksulid. Anmardi, Bab-Dummad-gayaburbagi mani-onodisurmalad. Aka anmardi, nue-napiragwadgi Bab-Dummad-nuggi, degi, Bab-Dummad-asabin Cristoʼgi sunmakdimalad.
2CO 3:1 Anmar we-ibmar sogsale, ¿anmar na dukin gannar san-ogannonai be anmar-dake? Ar igi-baigan na e-daed-barsognaid-garda sesdamala, ¿deyob an bese sedabi be an-abemarsunde? ¿Be-garda deyob baiganse seedbi be an-abemarsunde?
2CO 3:2 Ar bemar anmar-gardayob gumalad, bemar anmar-gwagegi narmakar-naid. Bela mag be-dakmalad, degine, bela-dulemar absogedbimarbalid.
2CO 3:3 Ar bemar Cristo-garda-narmaksad gumalad. Anmar we-garda-uksamalad gumalad. We-garda-narmaklesadi, ibmar-nisgi narmaklearsulid. Narmakaledi, Bab-Dummad-Dula-Maid E-Burbagi narmakaled. Akwagi epenne igi-narmaklesa, deyobi, narmaklearsurbalid. Narmakaledi, dulemar-gwage-dula-naidgi narmakaled.
2CO 3:4 Ar anmar we-ibmar Bab-Dummadgi Cristoʼba bensulid, we-an-bemarga-sogedi napiragwad.
2CO 3:5 Anmar bela sunna ibmar dukin imakmardeeye an sogsurdo. Suli, degisuli. Anmar sunna Bab-Dummad-e-gangued-ukmaidba bela ibmar imaked.
2CO 3:6 Degine, Bab-Dummad na e, igar-binid-megisad-e-maiga-guega anmar-imaksad. Igar-narmakar-maidbarsulid. Burbaledba narmakaled. Ar epenne garda-sanar-narmaklesaddi, sunna dule-oburgwed. Ar igar-biniddi, burbaledid, adi, dule-odulogedid.
2CO 3:7 Ar we-igar-gebedi dule-oburgwe-inigwele, akwagi-narmakar-uklesgu, gandikidba-gae uklesad. Degisoggu, Israel-dulemar Moisés-e-wagar-gandikidba-dakarmaked-berguoed-inigwele, geg-dake gusmalad.
2CO 3:8 Degisoggu, Bab-Burba-e-arbaed-bursunna, bur bule yeerdakle gued.
2CO 3:9 Ar we-igar-dule-sabsur-odurdaked yeerdaklegedga gusadde, ar dule-isgussulidyob-imaked-igar-bursunna, bur bule yeerdakle gudo.
2CO 3:10 We-igar-idualed-yeerdaklegedga-gusadi, igar-burbaled bur nue-yeerdakle-danikoed-ebo be dakdele, danikoedi, bur bule nue-yeerdakle danikoed.
2CO 3:11 Ar igar-sunna-bergued nue-yeerdaklegedga nabir gusadde, ar ibmar-degisadeguoed-bursunna, bur bule nue-yeerdaklegedga guodo.
2CO 3:12 Degisoggu, anmar bensulidgi deyob edarbedisoggu, innikigwadba anmar dobsuli ibmar sogdisunnad.
2CO 3:13 Anmardi, Moisésʼyobi imaksurmalad. Anmardi, sanakwaa ibmar sogdiid. Moisésʼdina, e-wagar-idu dunwed nasikdaed, adi, melle Israel-dulemar e-wagar-dakarmaknaid-bergumaid dakegar.
2CO 3:14 Ar Israel-dulemar we-ibmar aku-itogusmalad. Amba emidsega, Moisés-Igar-Maid-absodmalale, dunwe-e-idu-nasiklesadyobi e-idu naid. Ar Cristoʼbi a-dunwed unnila osuloged.
2CO 3:15 Amba emi-ibase, Israel-dulemar Moisés-Igar-Maid-absodmalale, amba e-gwagegi aku-itomalad.
2CO 3:16 Ar dule Bab-Jesúsʼba-naigunonikile, we-dunweyob-naidaedi, ega surgunonidaed.
2CO 3:17 Ar Bab-Jesúsʼde, Bab-Burba gued. Degisoggu, bia Bab-Jesús-Burba gudii, agine, ollorguleged-amileged.
2CO 3:18 Degisoggu, bela anmar-wagar-idu ibmar bar naisursoggu, anmar ispeyobi gusunnad. Bab-Jesús-e-gandik-gaed anmar oyonaisunnad. Degisoggu, anmar bur bule Bab-Jesús-e-yeerdakleged nikumaisoggu, Cristoʼyobi dakledanigussunnad. Weyobi, Bab-Jesús ibmar imaked. Ar Bab-Jesúsʼde, Bab-Burba gued.
2CO 4:1 Bab-Dummad we-arbaed wile-anmar-dakedba anmarga uksasoggu, mer galakued anmar imakmarsun.
2CO 4:2 Agala, ibmar-dukuar-imakleged, ibmar-dule-obingegsaed, an metemarsun. Mer dule-yardakdii gumalo, degi, mer Bab-Dummad-Gayaburba ibnuedsulise ogwamalo. Bur unnila napiragwadgi Bab-Dummad-asabin dulemar ibmar-mag-itogega an imakdiid.
2CO 4:3 Ar anmar-Bab-Dummad-Gayaburba-Nued anba dulemarga dukuar maile, we-dulemar-amba-yoggus-gudidimaladga dukuar maido.
2CO 4:4 Ar amar we-Gayaburba-Nued yapa-abingamarsoggu, a-ulale, bab-dummad-we-napneggined amar-binsaed-gassunnad, aku-ito imaksasunnad. Adi, Bab-Gayaburba-Cristo-yeerdaklegedgi-sunmaklesad, mer magar itomalagar. We-Cristo, Bab-Dummad-e-wilub-napiragwad-sunnadid.
2CO 4:5 Ar anmar na dukin anmargi na sunmaksurmalad. Anmar-sunmakedi Jesucristoʼgi an sunmakmalad, we-Jesucristo, Dule-Bur-Dummadye. Anmardi, Jesús-sabed-ular, be-maiga gumarsunnad.
2CO 4:6 Ar Bab-Dummad sogsad: “Negsichidgi gwallu-mee gasun.” Génesis 1:3 A-Bab-Dummad anmar-gwagegi ibmar-magar-itoge anmar-imaknonikid, adi, Bab-Dummad-e-yeerdakleged Jesucristoʼbali anmar wisgumalagar.
2CO 4:7 Anmar we-ibmar-bur-nued-nikadi, napsa-nog-sobaledyobidgi anmar-sangi an sedimalad, adi, mag dakmalagar, we-gangued-dummad Bab-Dummadgi danikid, anmargi danisulid.
2CO 4:8 Degisoggu, anmar bonigan-abargi gudigusmar-inigwele, geg egi anmar nomardeeye soglesulid. Anmar imbagwenale sulibinsa-itononidamar-inigwele, geg an bar guye gwen an sogdisurmalad.
2CO 4:9 Dulemar anmar-balegindimar-inigwele, Bab-Dummad walagwen gwen anmar-metedisulid. Anmar aimukud-damar-inigwele, gwen anmar-obelodisulid.
2CO 4:10 Ar anmar bia-naoe, an wiledimaladgi anmar-sangi Jesús-burgwisad-e-wilubgan an sedigumalad, adi, Jesús-dula-gudiid anmar-sangi mag daklegegar.
2CO 4:11 Anmar emi-dula-gudimaladi, Jesús-nuki, anmar burgwega guagwar gudiid. Adi, anmar-san-sunna-berguedgi Jesús-dula-gudiid mag daklegegar.
2CO 4:12 Degisoggu, anmardi binna-binna bergumaid, bemardi gannar burba-binid nikumaid.
2CO 4:13 Ar Bab-Dummad-Gardagi sognaid: “Bab-Dummadgi an bengussulid, a-ular, an sunmaknonikid.” Salmo 116:10 Ar deyobi, anmar Bab-Dummadgi bensulid. Deyob, an bensurmosoggu, a-ular, an sunmakmosunnad.
2CO 4:14 Anmar wisid, Bab-Dummad, Bab-Jesús-odulosad. Jesús-odulosayobi, Bab-Dummad, gannar anmar-odulomogoed, degi, bulale bemarmala, na e-asabin anmar-sedoed.
2CO 4:15 Bela-anmar-wilesadi, bemarga ibmar-nueganga-guega, deyob gusad. Adi, dulemar Bab-Dummad dulemargi-nabir-nued-binsamaid mag-dakegar. Degisoggu, dulemar Bab-Dummadga dog-nuedye-sogdagoedba Bab-Dummad-nug bela-bela ogannoledii guoed.
2CO 4:16 A-ulale, anmar mer galakumalo. Ar we-anmar-san-sanaled mommolema-inigwele, anmar-burbadi bane-bane gangumaid.
2CO 4:17 Ar wegi-an-wiledimaladi, dogdarsulid, unnila ichesaar an wiledimalad, bergudoed. An-wiledimalad-ular, Bab-Dummad degisadegu anmar-nug ogannogoed, anmarga ibmar-nuegan bur bule ukoed.
2CO 4:18 Anmar melle ibmar-magar-daklemaladgi binsamalo. Bur anmar ibmar-akudaklemaladgi-binsaed abeleged. Ar ibmar-sanaleddi, bergudoed. Ar ibmar-akudaklemaladdi, degisadeguoed.
2CO 5:1 Ar anmar nue-wismalad, anmar-san-we-napneggined dordonegyob gued. We-san-dordoneyobgued surgusale, gwen akarsulid. Ar Bab-Dummad anmarga neg-binidyob, san-gwapid nibneggi ukoed. We-san geg-bergued, dule-argangi-sobarsulidid, degisadeguoed-sanad.
2CO 5:2 A-ulale, anmar we-san-sedimaladgi an akigindimarsunnad. Bitigi anmar-san-nibalid, an nikudapmaloedse-nadena gadinye an binsadimarsunnad.
2CO 5:3 Adi, anmar nibneggi-megdapogua, anmar nuekwaa akwelegegar.
2CO 5:4 Amba deyob anmar-san dordonegyob-gued-an-sedimaladgi nunmakedba an akigindimalad. Ar anmarde, uka-swiri-gudii gubisulid, san-binid bur an yobimalad. Adi, san-we-napneggi-sunna-bergued, burba-duladse berguegar. Adi, dulagudigu anmar degisadeguegar.
2CO 5:5 Ar a-ular, Bab-Dummad anmar-obinnisad. Deginbali, anmarga E-Burba uksabalid, anmarga iduakwaa oyogegar, ede, nue-napira ibmar-nuegan anmarga imakoye.
2CO 5:6 A-ulale, anmar bensuli gudimarsunnad. Ar anmar wisid, amba we-sangi an gudimalale, anmar Bab-Jesús-walikasurmalad.
2CO 5:7 Ar anmar Jesús-daksurmar-inigwele, degite, Jesúsʼgi bensuli an nanadimalad.
2CO 5:8 Ar an nue-bensuli gudimalad. Agala, we-sangi an bangusmalana gadinye binsadimalad, adi, Bab-Jesús-walik an gudigumalagar.
2CO 5:9 Degisoggu, anmar bia gudidibe, we-napneggindibe, we-napnegginsurdibe, Bab-Jesús-bur-yeer-itoged an imakbimalad.
2CO 5:10 Ar ade, anmar bela Cristo-igar-itogoed-asabin gwisgumaloedbiid, adi, anmar na wala-walagwen anmar-ibmar-imaksadba ibmar-abingamalagar. Ibmar-nued-imaksadbardibe, ibmar-isgana-imaksadbardibe, ibmar anmar abingaoed.
2CO 5:11 Ar anmar Bab-Dummad-dobee-nanaed wismarsoggu, a-ular, anmar dulemargi alamaknaimarsunnad, adi, Jesúsʼba nagumalagar. Ar Bab-Dummad nue-anmar-wisid, anmar igi-damala. Degine, bemar nue-anmar-daed wisi-wilubmarmogad.
2CO 5:12 Anmar na dukin bemarga sogsurmalad, anmar dule-nuegan gumarye. Anmar-ibmar-imakedba, bemar anmargi yeer-itogegalad. Adi, bemar, dulemar-unnila-asginbi-ibmar-dakmalad-abinsaegar. We-dulemar, gwagegi ibmar-daksurmalad.
2CO 5:13 Ar akarguarye anmarnik-soglealile, we Bab-Dummadga anmar deyob gudido. Anmar gwen-akarguarsurye anmarnik-soglegele, adi, bemarga anmar deyobdo.
2CO 5:14 Ar Cristo-sabgued, weyob bela-bela binsae anmar-imaked: Ar Cristo bela dulemarga burgwisale, degisoggu, bela dulemar eba burgwismarmogad.
2CO 5:15 Cristo bela dulemarga burgwisad, adi, dulemar-dula-gudimalad, melle bar na ega gudigumalagar. Adi, dule-ega-burgwisadga, ega-durgusadga, dula-gudii gumalagar.
2CO 5:16 Degisoggu, a-ulale, dule-Bab-wissurmalad-binsaedyob, bar an dulemar-daksurmalad. Ar iduar dule-Bab-wissurmalad-binsaedyob, an Cristo-daksamar-inigwele, emigindi, bar deyob an Cristo-daksurmalad.
2CO 5:17 Degisoggu, dule Cristoʼgi akanonikile, dule-gwapidga gued. Ibmar-sergandi bela ega bato nasad. Emigindi, bela ibmar-biniganbi ega gued.
2CO 5:18 We-ibmar bela Bab-Dummadgi danikid. Ar Bab-Dummad na dukin anmarbo Cristoʼgi igar-naboleged imaksad. Degine, anmarga we-igar uksad, adi, dulemar Bab-Dummad-ebo igar-nabogegar.
2CO 5:19 Bab-Dummad Cristoʼgi dule-we-napneggi-bukmalad-ebo igar nabosad. Dule-e-isguedgi Bab-Dummad bar binsadasulid. Degine, Bab-Dummad dulemarbo-igar-nabogedgi-sunmakega anmarga igar uksad.
2CO 5:20 Degisoggu, anmar Cristo-nuggi-barmilealidga gumarsunnad. Bab-Dummad anmarba bemarse-wilesakwaa-gornaiyob, Cristo-nuggi anmar bemarse wilesunnad: “Bab-Dummad-ebo bemar igar nabomarsunye.”
2CO 5:21 Bab-Dummad, Cristo-anmar-isgued-seega imaksad. We-Cristo gwen isgussulid. Degite, dule-isgusadyob gunonikid, adi, Bab-Dummad, isgussuliyob Cristoʼgi anmar-dakegar.
2CO 6:1 Ar anmar Bab-Jesúsʼba-mesa-arbamalad-gumarsoggu, anmar bemarse wilenaisunnad: Bab-Dummad-bemar-abonosadi, melle be binsa ibmar-baisulidyob be dakmalo.
2CO 6:2 Ar Bab-Dummad na E-Gardagi soged: “Iba-nuegangi an be-itosad, degi, abonoleged-ibagangi an be-bendaksad.” Isaías 49:8 Emigindi, iba-nued nagunonikid. Emigindi, Bab-Dummad-dule-abonoged-iba nagunonikid.
2CO 6:3 Anmar bemarga igar-isgana oyodisurmalad, adi, melle dulemar anmar-Bab-Jesúsʼga-arbaedgi ichakwa sunmakmalagar.
2CO 6:4 Aka bur anmar ibmar-imakedgi oyodimalad, anmarde Bab-Dummadga-arbaed gumarye: Anmar ise-burdigar bargaagwale nue-naibi-itodimaladgi nanadimalad. Nue-wilediidgi, nue-surbinsa-itodiidgi, nanadimalad.
2CO 6:5 Bibyolediidgi, esgaryagi-mellediidgi, anmargi bukidar-oimaksamaladgi, arbaed-dummad-imakdiidgi, gabsuli-gudiidgi, ukumaada-gudiidgi, anmar oyodimalad.
2CO 6:6 Deginbali, gwage-swilidik-nanaedgi, ibmar-wisii-daedgi, baisur-itogedgi, nued-binsaedba-ibmar-imakedgi, Bab-Dummad-Burba-Isligwaled-nikadgi, emar-nue-napira-sabguedgi, anmar oyodimalad.
2CO 6:7 Degine, igar-napiragwadba-sunmakedgi, Bab-Dummad-gangued-nikadgi, anmar oyodimalad. Anmar boniganba-galitoalile, abinsaegala, degi, na-san-bendakegala, igar-innikigwadba nanadiid, degi, sunmakdibalid.
2CO 6:8 Anmar Bab-Dummadga arbaed-gumalad an oyomarbalid: Dulemar anmar-nug-odummomaladgi, degi, anmar-nug-ichomaladgi anmar oyomarbalid. Deginbali, anmargi nueganbi-sunmakmaladgi, anmargi isdar-sunmakmaladgi an oyomarbalid. Anmar ibmar-napiragwadba-sogdimalad, degi-inigwele, dule-emar-yardakedyob anmar-dakdamalad.
2CO 6:9 Ar bela dulemar magar anmar-dakmar-inigwele, degite, yamo-aku-anmar-dakeyobi imakdamalad. Anmar burgwednaga-gudidaed, degi-inigwele, anmar amba dula gudimalad. Anmar nue-sabsur-odurdaklediid, degi-inigwele, anmar-oburgwesurmalad.
2CO 6:10 Anmar bukib-binsaeyob dakleged, degi-inigwele, ulubgindi anmar nue-weligwar itodimalad. Dule-nue-wilegedyob anmar gudimalad, degi-inigwele, aimar-bukidar nue-ibmar-nikuega an imakdimalad. Ibmar-sateyob an gudimalad, degi-inigwele, anmar bela ibmar-nika gudimalad. Bela weyob an gudimaladgi anmar oyodimalad, anmar Bab-Dummadga arbaed-sunnad gumarye.
2CO 6:11 Gwenadgan-Corintoʼginmalad, anmar nue-be-sabmarsoggu, ibmar bakar-bakar anmar bemarga sogsamarsunnad.
2CO 6:12 Anmar nue-be-sabmalad, degi-inigwele, bemardi nue-anmar-sabsurmalad.
2CO 6:13 Ar anmar bemar-sabedyobi, bemar anmar-sabgumogargebed. We-an-bega-sogedi, be an-mimmigan-gumalad-ular, deyob an bega sogmalad.
2CO 6:14 Melle dulemar-Bab-Jesúsʼba-nanaisurmaladba akamalo. ¿Ar igar-innikigwad isgued-ebo sunna ailesi? Degite, ¿igi neg-meegwad negsichigwad-ebo ailegosunna? Geg deyob gued.
2CO 6:15 ¿Ar Cristo nia-saila-ebo emar binsamalo be insae? ¿Dule-Bab-Jesúsʼba-naid, dule-Bab-Jesúsʼba-naisulidbo nabir nanao be insae? Suli, deyob geg gued.
2CO 6:16 Degine, ¿Bab-Dummadse-goled-neg, bab-dummadga-imaklemalad-ebo sunna emar guo be insae? Suli, geg gued. Ar ade, bemar Bab-Dummad-Dula-Maid-goled-negga gumalad. Igi Bab-Dummad na sogsagusa: “Amar-abargi an gudiguoed, amarba an nanadioed. Ani an E-Bab-Dummadga an guoed, degine, amar an-dulamarga guoed.”
2CO 6:17 A-ulale, Bab-Dummad-Bela-Gangued-Nikad weyob sogbalid: “Dulemar-an-wissurmalad-abargi-bemar-gudiid ainimar, egi bemar bangumarsun. Ibmar-isgana mer ebumalo, geb degiir, an be-abingamaloed.”
2CO 6:18 “Ani an bemar-Babga guoed, bemardi an-masmalaga guoed. Bemardi an-bunamalaga guoed. Deyob Bab-Dummad soged.”
2CO 7:1 Degisoggu, gwenadgan, an na be-sabemalad, weyob anmarga ibmar-nuegan uklegoye soglessoggu, bela ibmar-isgana-anmar-sangi-nanaid, degi, anmar-burbagi-nanaid osulomarsun, adi, Bab-Dummad-dobekwagwadba, gatik gwage-swilidikgumai anmar gumarsun.
2CO 7:2 Bemar nue-anmar-abingaewilubbid: Ar ade, an bemar-naibi-imaksasurmalad, gwen an bemar-ichossurmarbalid, gwen an bemar-yardaksasurmarbalid.
2CO 7:3 We an-bemarga-sogedi, bemar-isdar-itogega an sogsulid. Ar bato iduar an bemarga sogsamalad, anmar nue be-sabmarye. Dula-gued-igar, burgwed-igar, an-bemar-sabed gwen osulogosulid.
2CO 7:4 Ar an bemarga ibmar-sogedi nue-ise-sogar an soged. Bemargi an yeer itoged. We, an-gwage baisur-ito imaked. We, wile-itoged-abargi bela-bela nue-weligwar an-imakbalid, nue be an-ogannosmalad.
2CO 7:5 Ar nue-napiragwad, anmar Macedonia-yarse-nonigu, anmar obunnoged gwen nikagussulid. Aka bur anmar bela iba-bulegangi gudigusad, dulemar anmargi urwedii gusmalad, anmar a-dulemar-ulubgi-dobee-itodii gusmalad.
2CO 7:6 Ar Bab-Dummad, dule-wile-itodimalad-e-gwage armaksoggu, Tito-anmarse-nonikidba Bab-Dummad anmar-gwage armaknonikid.
2CO 7:7 Unnila Tito-nonikidbarbi anmar yeer-itossulid. Anmar yeer-itosbalid, ar ade, Tito-e-gwage bemar yeer-ito imaksamarmogad. Tito anmarga sognonikid, bemar nue-an-sabmarye, bemar nue-bosye, degine, bemar angi nue-binsamarbarye. Degisoggu, a-ulale, nue-weligwar an itononisunnad.
2CO 7:8 Ar garda-an-bese-narmaksamaladgi bukib-binsa an-be-imaksamar-inigwele, andi gwen akar an itosulid. Ar an garda-gebe-narmaksagudi, bukib an itosad. Ar ade, garda-an-bese-narmaksamalad unnila wis sikwas bukib-ito an bemar-imaksad.
2CO 7:9 Emigindi, an weligwar-itogedi, bukib-binsa bemar-imaksadbarsulid. An weligwar itoged, ar ade, bemar-bukib-itosadi, isguedga-wile-itogega be-imaksamalad. Ar Bab-Dummad-sogedba bemar bukib-itosmalad, adi, gannar Bab-Dummadse bemar dagmalagar. Anmar gwen be-ichossurmalad.
2CO 7:10 Ar bukib-binsaed Bab-Dummad-sogedba-danikidi, isguedgi-banguega dule-imaked, adi, abonolegegar. We-ibmar-guedi ibiga-an-imaksadibeye-binsaega anmar-imaksulid. We-napneggined-bukib-binsaeddi, dule-oburgwed.
2CO 7:11 Bemar bukib-itosadi, Bab-Dummad-sogedbardo. Emigindi, deyob-bemar-gusadi be dakmalana, igi be-imaksamala: Bemar napira Bab-Dummadga ibmar imaknonimalad. Na be san-arsodmalad, nue-be-oulusmalad, nue-dobee-ito be-imaksamalad, degine, be an-dakbiguarmarbalid. Degine, dule-ibmar-noar-imaksad be sabsur-odurdaksamalad. Bela we-ibmarmargi be oyononimalad, we-dule-deyob-isgusadgi be nued imaksamarye, be gwen ibmar akar imaksasurmarye.
2CO 7:12 Degisoggu, an bemarse garda narmaksamargu, dule-emargi-nosad-ular, an narmaksasulid, dulegi-gwisgulesad-ular, an narmaksasurbalid. An narmaksadi, adi, bemar dakegar, bemar Bab-Dummad-asabin nue-anmargi binsadimarye.
2CO 7:13 Degisoggu, a-ular, anmar yeer itononikid. Anmar bur bule Tito-weligwar-itosad-ular, weligwar an itomalad. Ar ade, bela bemar Tito-nue-ogannosmalad.
2CO 7:14 An Titoʼga bato an sogsagusad an bemargi nug-dummarba-itoye, gwen binge an itossurye. Ar bela ibmar an Titoʼga-sogsad, napiragwadid. An bemargi nued Titoʼga-sunmaksad. Bela an a-ibmar-sogsadi, napiragwadga gunonibalid.
2CO 7:15 Tito bemargi-binsaalir, bemargi sabedgi sunmakardaed, igi bemarde uaya-nikaa-daedba belagwapa e-ibmar-sogsadba, dobed-abargi bela eba be ibmar imaksamala. A-ular, Tito bur bule bemar-sabgunonikid.
2CO 7:16 Degisoggu, bela bemargi an bensulidba, an weligwar itosunnad.
2CO 8:1 Gwenadgan, bemar wisguegala, an bemarga sogmarbardo, Bab-Dummad Macedonia-yargi Jesúsʼba-nanaimaladgi igi-nued binsasa.
2CO 8:2 Amar nue-naibi-itodiid-abargi, nue-wilemalad-inigwele, nue-weligwar-itomaladbali, mani-ibedyobi, mani-obinebaka uksamalad.
2CO 8:3 Napira an bemarga soged, amar nue-yeer-itogedgine, na ukbiedbali, mani-nikadba uksamalad. Degi, bur bule mani-nikadba ise-obinagwar uksamalad.
2CO 8:4 Gwenadgan-Macedonia-yargi-bukmalad anmarse ise-egisar gunaigusmalad, emarde Jesucristoʼgi-akananaimaladga mani-ukbimarmoye.
2CO 8:5 Ichesur-mani-ukosurye anmar bisanad, bur wilub-obicha ibmar-baigan uksamarbalid. Ar ade, Bab-Dummad-sogedba na emar-inse Bab-Dummadga san-uksamalad, geb degi, anmar-bendakega, guakwaa-gudii gusmarbalid.
2CO 8:6 Degisoggu, Corinto-dorgan, Titoʼga an sogsundo, igi iduar bemar-abargi mani-wedegusa, deyob emi bemar-abargi obelegedse mani-weed imakoye.
2CO 8:7 Ar bela bemar yeer Bab-Jesús-igargi weyob nanadimarsoggu, Bab-Jesús-bensulidgi, sunmakedgi, ibmar-nue-wisidgi, bela-bela Bab-Jesús-igargi-alamaknaidgi, degine, anmar-sabedgi. Amba deyobi, we-mani-ukedgi gatik ise-obinagwar ukdii gumarbalo.
2CO 8:8 Gandikidgi an bemarga sogsulid, deyob be imakmarye. Unnila bemar wisgubi an abeged, gwenadgan-Macedonia-yarginmalad deyob-imaksamarye. Deyobi bemar imakmarmogale, bemar oyomarmogoed, bemar gwenadgan-nue-sabmarmoye.
2CO 8:9 Ar anmar-Dummad-Jesucristo-nabir-dulemargi-binsaed bato bemar wismalad. Bemar-sabed-ular, na bela-ibmar-nika-inigwele, wilegedga na imaksad, adi, e-wilegedgine, bemar bela-ibmar-nika gumalagar.
2CO 8:10 A-igargine, an bemarga binsaed ukmarsundo. We-igar bemarga ibnuedid. Birga-nasadgi, bemar-inse mani wesgusmalad. Baisur-itogedgi be uksasurmalad. Bela-bela ukbiedba nuedgi be uksamalad.
2CO 8:11 Emigindi, nued-obelogedse be imakmalo, igi bemar onodgua, nue-imakbiedgine be onodmala, deyob be imakmalo. Na be mani-nikadba be ukmalo.
2CO 8:12 Ar be nuedgi ibmar-ukele, Bab-Dummad nuedgi a-ibmar abingaed. Bab-Dummadga be ibmar-nikadba ukoed. Ar be ibmar sulile, geg be uked.
2CO 8:13 An sogsurdo, dule-baidga gatik ise-obinagwar ibmar-ukedba, a-anar bur sate be guye. An bega sognaidi, bemar yopira ibmar nika gumalagalad.
2CO 8:14 Bemar emi-ibagi ibmar-obinekwaa-nikadi, we-ibmar we-dulemar-ibmarsulidga be ukmogoed. Adi, bemar ibmar-sate-gunonikile, we-dule-ibmarsulid sunna ibmar-nikadgine, bemarga ukmogoed, adi, bela bemar yopiragwadbi ibmar nika gumalagar.
2CO 8:15 Ar igi Bab-Dummad-Gardagi narmakar nai: “Dule ibmar-ichesur-wesadi, ega gwabgussulid. Dule ibmar-ichee-wesadi, gwen ega akussurmogad.”
2CO 8:16 Bab-Dummadga doggus-nuedye an sogdo, igi-an bemarbina nue-soge, deyobi Bab-Dummad Tito-gwagegi nasiksamogad.
2CO 8:17 An-ibmar-ega-sogsadba Tito imaksado, ar ade, na e-sunnad bemarbina nue-itomosoggu, bemarse na e-itogedba nadegusad.
2CO 8:18 Titoʼbali gwenad-wargwen anmar barmisad. We-gwenadgi bela Jesúsʼba-nanaimaladi, bela nueganbi egi sunmakmalad, we-gwenadde, Bab-Dummad-Gayaburba-Nuedgi nued arbadiiye.
2CO 8:19 Deginbali, unnila abisulid, Jesúsʼba-nanaimalad, we-gwenad anmarba we-mani-welenaid-berbenaega susmarbalid. Bela we-ibmar anmar Bab-Dummad-nug-ogannogega imaked. Deginbali, oyogegarbar, anmarde, nue-gwenadgan-bendakbimarbarye.
2CO 8:20 Melle dulemar anmargi-ichakwa-sunmakegala, we-mani-melubaksaar-anmar-akwediid, we-gwenadgan anmarba we-mani dakdimosunnad.
2CO 8:21 Bela ibmar-nueganbi-imakdii anmar gubied. Unnila Bab-Dummad-asabinbisulid, dulemar-asabin ibmar-nued-imakdii anmar gubibalid.
2CO 8:22 Amar-ebogwadba anmar-gwenad-baid anmar barmisibalid. We-gwenad anmarga e-ibmar-sabidaed nue-oyodidaed. Emidi, we-gwenad, bemargi-bensulidba, bur bule bemarga ibmar imakbied.
2CO 8:23 Ar Titoʼdi anbo-arbaedid, bemar-ular anba alamaknaidaed-duled. Gwenadgan-ebogwad-baigandina, wedi, Jesúsʼba-nanaimalad barmisimalad. Degine, amar Cristo-nug-ogannomarbalidid.
2CO 8:24 Degisoggu, we-dulemarga bemar oyogoed, degine, Jesúsʼba-nanaimaladga be oyobaloed, we-dulemar be nue-sabmarye, degine, be oyomarbaloed, ibiga bemargine anmar dummarba itodae.
2CO 9:1 Gwenadgan, Jesucristoʼgi-akananaimaladga-mani-weleged-igargi an bemarga garda-narmaked dogdar be abesurmalad,
2CO 9:2 ar an nue-bemar-wisid, bemar nue-gwenadgan-bendakbidamalad. Macedonia-yargi-bukmaladga bemar-nug nue an ogannodiid. An sogdiid, bemar-Acayaʼgi-bukmalad, bato birgagwengus mani-ukega guagwar bukmarye. Bemar nue-mani-ukbi-gudimaladba, bukidar-baigan, mani-ukega, bemarba gannaledmarmogad.
2CO 9:3 Agala, gwenadgan an bemarse barmisad, adi, an bemar-nug-ogannodiid, melle binsa an bemar-nug-ogannodii guegar. An bemargi-sogsagusadyob bemar guagwar gudiguegar.
2CO 9:4 Ar abakalegi, gwenadgan-Macedonia-yarginmalad anba-danimaladgine, anmar bemar-owisossulidba guagwar-buksuli be-daknonimalale. Deyobile, binged-dummad-itole, ar ade, anmar bemargi nued sunmakdiid.
2CO 9:5 Degisoggu, a-ular, an gwenadganga sogsad, bemarse an-idu ataknamargwerye, adi, guagwar bemar-mani-ukoye-sogsad-welegedgi bemar-bendakegar. Adi, mani-welegoed daklegegar, sabedgi nue-wilub-obicha mani-uklenaiye, gwen nalledginsurye.
2CO 9:6 An bemarga sogdo: Ar dule ibmar-ichee digsale, ibmar-ichee weemogoed. Ar dule ibmar-ichesur digsale, ibmar-ichesur weemogoed.
2CO 9:7 Na wala-walagwen igi na e-gwagegi ibmar-ukbie, abali ukoed. Mer be nunmak-itogedgi ibmar-uko, mer be dule-ise-bega-sogedgi ibmar-uko. Ar ade, Bab-Dummad dule-weligwar-ibmar-uked yeer dakdaed.
2CO 9:8 Bab-Dummad unnitiba gangu maisoggu, sunna bela bega ise-obinagwar ibmar uked. Adi, unnitiba ibmar-abelemalad be nikaguegar, adi, bela ibmar-nuegangi be gwenadgan-bendakegar.
2CO 9:9 Ar Bab-Dummad-Gardagi narmakar naid: “E-ibmar-nikadi, dule-wilemaladga mimisad. E-igar-inniki-imaked degisadegu maigu gued.”
2CO 9:10 Bab-Dummad dule-ibmar-digmaladga ibmar-gwag-digega-ukedi, degine, masgunned-ukbalidi, a-Bab-Dummad be-ibmar-nuegan-imaked bemarga unnitiba ise-omelogar imakoed, adi, bemar dule-baigan-bendakegar.
2CO 9:11 Deyobi, bemar unnitibali bela-ibmar-nuegan be nikumaloed, adi, melubaksaar bemar ibmar ukmarmogagar. Adi, bemar-mani-weoedi, anmar gwenadganga bemar-nuggi-ukogua, gwenadgan Bab-Dummadga-dog-nuedye-sogega guoed.
2CO 9:12 Ar we-ibmar anmar Jesucristoʼgi-akananaimaladga ukdogua, unnila ibmar-abemaladbi anmar ega uknai guosulid. Gwenadgan Bab-Dummadga dog-nuedye-sogega anmar imakmarbaloed.
2CO 9:13 Ar bemar wemar-gwenadgan-bendaknaidbali we-gwenadgan Bab-Dummad-nug ogannodmaloed. Ar ade, bemar we-gwenadganga oyonaid, igi-bemar Bab-Dummad-Gayaburba-Nued-Cristoʼgi-soglesadba nue-nanadimala, degine, bemar-ibmar-uked ise-obinagwar be weemarga, degine, bela-dulemarga, be uknanaimarbali. Agala, we-gwenadgan Bab-Dummad-nug ogannodmaloed.
2CO 9:14 Deginbali, Bab-Dummad-bemargi-ise-nabir-obinagwar-binsasadba, gwenadgan bemar-nue-sabedgine, bemarga Bab-Dummadse gotemaloed.
2CO 9:15 Bab-Dummad na e-machi-anmarga-uksadba, ega dog-nuedye anmar sogsunnad. Ar E-Machi dogdar dule-nuedid, geg-sogle-itolegedid.
2CO 10:1 Ani Pablo, Cristo-nue-dulemar-sabedgi, degi, e-san-dummarba-imaksulidgi, bemarse wilesakwaa an egised. Emidi, an-annik sogmalad: An bemar-abargi gudiile, an naisdikii sunmakye. An bemar-abargi daklesulirdi, ibmar sabsur an bemarga sogdamarye.
2CO 10:2 Degisoggu, bemarse wilesakwaa an egised, nue nanamarye, adi, an bemarse mosale, melle ise-urwedgi an bemarga ibmar-sogegar. Ar dulemar anmargi sogdimalad, anmarde dule-binsaedba nanadimarye. Amargardi, sabsur-ibmar-soged, egi gwisgued, an guagwar gudiid.
2CO 10:3 Ar anmar we-napneggined-inigwele, anmar we-napneggi-dulemar-urwemaladyob urwenanaisurmalad.
2CO 10:4 Ar anmar, urwenaidgi, we-napneggi-gingimar-bulegan-ebulemalad an ebusurmalad. Anmar ebugedi, Bab-Dummad-gangued an ebumalad, adi, niamar-galu earegar.
2CO 10:5 Degine, anmar igarmar-Bab-Dummadgi-yolemamaid an obelodimalad. Deginbali, san-dummarba-imakleged Bab-Dummad-mer-wisguega-imaked an obelodimarbalid. We-ganguedba, anmar dulemar-isgudiid-e-binsaed-ogwaega an alamaknanaimalad, adi, Cristoʼba ibmar-imakmalagar.
2CO 10:6 Deginbali, bemar bela Bab-Dummad-sogedba be ibmar-imaksamalale, dule-Babba-ibsadisurmalad-sabsur-odurdakega an guagwar gudimalad.
2CO 10:7 Unnila asginbi bemar ibmar dakmalad. Ar dule-wargwen na Cristoʼgadye-sogele, insaodo, igi na ede Cristoʼgadi, deyob anmar Cristoʼgadmogad.
2CO 10:8 Ar an-ganguedgi an dummarba amba an sunmak-inigwele, gwen an bingeguosulid. Ar Bab-Jesús we-gangued anga uksad, bemar-ogannogegar, bemar-obelogegarsulid.
2CO 10:9 Mer be binsamalo, an be-odobgumalaga gardagi an bemarse urwesimarye.
2CO 10:10 Ar ade, gwen-gwen sogmalad, an gardagi ibmar sabsuli, degine, binnasuli an sogdaye. An bemar-asabindi, an nolloo daye, degine, an-sunmakedi gwen-bai itoledasurye.
2CO 10:11 We-dule-degisoged nue-insao, igi-anmar bemar-asabin-gwichisulile, gardagi ibmar sabsur-soge, an bemar-asabin deyob an ibmar imakbalid.
2CO 10:12 Dulemar-na-dukin-san-ogannoar-sunmakdimaladyob geg an yobi gumalad. Degine, anmar amar-ebo geg bengumarbalid. Ar we-dulemar na dukin ede-nued-gudiiye-sogdimaladi, degi, na emarbo muchub-muchub wilubdakdimaladi, weyob-damaladi igar-binsaedsuli-daedid, igar-nabiridsulid.
2CO 10:13 Anmar dogdar na-san-dummarba na imakosurmalad. Ar Bab-Dummad anmarga igar-uksadba an arbaed imakmaloed. Ar Bab-Dummad bemarse-bakar, bemargi-arbaega anmar-imaksad.
2CO 10:14 Ar anmar iduar bemarse arbisulina, soglegenad, anmar anmarga-igar-uklessulidba ibmar imaknaiye. Ar emigindi, anmar-inse bemarga Cristo-Gayaburba-Nuedgi sunmakapmalad.
2CO 10:15 Anmar dulemar-baid-arbaedgi san-dummarba imaksurmalad. Unnila anmar abedimalad bemar-Jesúsʼgi-bensulid gatik-nasgumaigued, adi, bemar-abargi gatik igar-maidba anmar arbaegar.
2CO 10:16 Adi, Bab-Dummad-Gayaburba-Nued baigan-yarse yoo dule-baid-ese-warmakedse, an egi sunmaknaegar. Adi, melle dule-baid-arbasadgi an-nug ogannolegegar.
2CO 10:17 Bab-Dummad-Gardagi soged: “Ar dule na san-dummarba sabiele, bur Bab-Dummadgi na san-dummarba-itoged, nabirye.”
2CO 10:18 Dule-na-dukin-san-ogannogedi, Bab-Dummad a-dule-abingasulid. Dule-Bab-Dummad-nug-ogannogeddi, Bab-Dummad a-dule-abingaed.
2CO 11:1 ¡Bitigi an sikwas-bina-gutudaedgi wis baisur be an-daksamalana gadin! Wis baisur be an-itomalo.
2CO 11:2 Ar Bab-Dummad-bemargi-nobedyobi an bemargi nobmarmogad. Unnila sui-wargwennaga, yagwa-swilidik sui-nikusokalidyob an be-imaksamalad, Cristoʼga an deyob be-ukmalad.
2CO 11:3 An dobe-itoged, igi-epenne naibe binsaed-ibedba Eva-yardaksa, abakalegi deyob bemar yardaklearmogale, binsaed-galearmogale. Degidbali, Cristoʼbina-nue-sogedgi bemar bangualile.
2CO 11:4 Ar dulemar Jesús-baidgi, bemarga sunmaknonikir, be abingadamalad. Ar a-Jesúsʼgi anmar bemarga sunmaksasulid. Burba-baid, bemar idu-abingasadba-akarsailadi, be abingadamalad. Bab-Dummad-Gayaburba-Nued be abingasmaladba-akaladi, be abingadamarbalid.
2CO 11:5 Bab-Jesús-e-sapingan-bur-dummaganga-gumoye-na-sogdimaladba, an egesur-itomogad.
2CO 11:6 Ar an-sunmakedi dogdar-nued-sunmaksur-inigwele, an-ibmar-wisiddi, bela-bela an ibmar wisid. An bela ibmar-imakdiidgi an bela bemarga oyodiid.
2CO 11:7 Bab-Dummad-Gayaburba-Nuedgi an bemarga sunmaksagu, an bemargi mani gassurmalad. Degine, na san-bipii an imaksad, adi, bemar anba bur dummaganga gumalagar. Ar weyob an na imaksadi, ¿wede ichakwaa an imaksade?
2CO 11:8 An bemar-abargi-arbaega gwenadgan-baigan-Jesúsʼba-nanaimalad, mani anga uksamalad.
2CO 11:9 An bemar-abargi arbanaigu, ibmar an abedii gusad. Degite, bemarse ibmar gwen an egichasulid, ar an-ibmar-abegedi, gwenadgan-Macedoniaʼginmalad-nonimaladi, anga ibmar uknonimalad. Anga-ibmar-ukega bemarga an arbaed onossulid. Degine, anga-ibmar-ukmalaga, an bemarga arbaed gwen onogosurbalid.
2CO 11:10 An napiragwadgi-Cristo-wisidba, an-bemargi-gwen-mani-gaosurye-an-sogdiidba-yeer-itodiid, Acayaʼginmaladi gwen an-ibe osulogega imakosulid.
2CO 11:11 ¿Ar ibiga deyob an soge? ¿An bemar-sabsulidba deyob an soge? Suli. Ar Bab-Dummad nue-wisid an nue bemar-sabed.
2CO 11:12 Amba an bemarse mani-egisdii gudiguosulid. Adi, dulemar-na-binsa-nug-odummodimalad, anyob-arbamarye-sogdimalad, mer anyob arbadiiye sogmalagar.
2CO 11:13 Ar we-dulemar Bab-Jesús-e-sapingan-bur-dummagan-sunnadsurmalad, Bab-Jesúsʼga-arbaedgi emar-yardaked-dulemalad, binsa yamo Cristo-e-sapingan-bur-dummaganyob na san imakdimalad.
2CO 11:14 Weyob-dulemar-daedi, anmar geger-dakewilubsulid. Ar nia-saila-Satanásʼbela baliwitur-neg-mee-saedga na san-obinyedaed.
2CO 11:15 Degisoggu, we-dulemar-nia-sailaga-arbamaladi dule-igar-napiragwad-imakmaladyob na san obinyer, geger be dakewilubsurmalad. Ar amar na ibmar-imaksamaladba sabsur-odurdakledapoed.
2CO 11:16 Gannar an bemarga sogbalid: Melle be angi binsamalo, an bina-gutuu daedye. Ar degi-be-angi-binsamar-inigwele, be an-abingamardo. Adi, an na dukin wis-nug-dummarba itogegarmo.
2CO 11:17 Ar an emi ibmar-bemarga-sogoedi, Bab-Jesús-anga-sogedba an bemarga sogosulid. An sogoedi, an bina-gutudaedba, na dukin an dummarba itogedba an sogoed.
2CO 11:18 Ar dulemar-bukidar we-napneg-naid-igarba na san-dummarba-imakdimarsoggu, an na deyob na san imakmosunnoed.
2CO 11:19 Ar bemarde binsaed-ibedye-sogmaladde, ¿ibiga degite be dulemar-binsa-ee-gordimalad itodimala?
2CO 11:20 Ar dule maiga be-imakmalar, be amar-abingamalad. Ar nuekwaa be-bennuksulir, degi, yamo begi ibmar-suega-guardamalad, be amar-abingamalad. Degi, dule na dummad-na-san-imaker, degi, be-wagar-bibyoger, bemar bela amar-abingamalad.
2CO 11:21 Ar binged-abargi an weyob bemarga soged, ar anmar bemarse warmaksagua, sabsur an bemarga ibmar sogsasulid. Ar dule-baigan sabsur-ibmar-imakye-sogedyobi, sunna an ibmar imakmogad. We an-deyob-sogedi, dule-binsaedsuli-ibmar-sogedyob an bega ibmar sogdemarmosunnad.
2CO 11:22 ¿Ar a-dulemar Hebreo-dule gumala? Ar an Hebreo-dule gumogad. ¿Ar emar Israel-dulemala? An Israel-dule gumogad. ¿Emarde Abraham-wagan gumala? An Abraham-wagwa gumogad.
2CO 11:23 ¿Ar emarde Cristoʼga-arbaed gumala? Andi bur bule Cristoʼga-arbaed bur gued. (Dule-binsaedsuliyob an sunmakdesunnad). Amarba an bur bule Cristoʼga-arbadii an gusad. An-bibyolesad geg ebisleged, esgaryagi bukidar an mellesad, bukidar burgwednaga an gusad.
2CO 11:24 Ilatale, Judíoʼmarse ila-dulagwen-gakambe-gakabakebak (39) an bibyolesad.
2CO 11:25 Ilapaa, suargi an bibyolesbalid, irgwen, akwagi an maklesad, ilapaa, ur mataba anga dogsad. Ibgine, mutiki demargi selenai an gusad.
2CO 11:26 Bukidar bonigan-abargi, igarba nagab an nanadii gusad. Diwar-noed-abalagi, an alamakdii gusad, atursamalad-yaisulidba, an alamakdii gusad. An-dulemarse, an ibitodii gusad. Degi, Judíoʼsurmaladse, an ibitodii gusbalid. Neggwebur-dummaganba, nega-dulesulidganba, demarba, an bonigangi gudii gusad. Bab-sordaye-binsa-sogdimaladse an ibitodii gusbalid.
2CO 11:27 Arbaed-dummad an imakdigusad, nue-yegus an gudii gusbalid. Gabsuli, ukudmaada, uku-uku-itodii, mas-gunsuli, dambe-mesdii, mor-sategudii, an gudii gusad.
2CO 11:28 A-ukinbali, we-ibmar-ukine, sulibinsa bane-bane Jesúsʼba-nanaimalad-danar-ambikunonidamaladba bukib-binsadii an gusbalid.
2CO 11:29 An gwenad-wargwen Bab-Jesúsʼgi-nollogudii an dakele, ¿ega bukib-binsasur be an-insae? An bukib binsae. Dule gwenad-wargwen-isguega imaksale, ¿an sae-itosur be insae? An sae-itoge.
2CO 11:30 Ar an na san-dummarba saye-sogele, an na nollo-itogedgi san-dummarba an imakoed.
2CO 11:31 Bab-Dummad, anmar-Dummad-Jesucristo-e-Bab, nue-wisid, an gakansasulid. Degisadegu Bab-Dummad-nug odummoledii gusun.
2CO 11:32 Damasco-neggweburgi, dule-dummad Rey-Aretasʼga-neg-dakmaid, an-gaegala, neggwebur-yawagakgi sordamar-urbis gusad.
2CO 11:33 A-neggweburgi galu-dummad-emakaled-birgi garba-yaba-sii gwenadgan an-odesmalad. Deyobi, an a-dummad-negdakmaidgi wakicha gusad.
2CO 12:1 Dule na dukin san-ogannogar-sunmakedi, ibmar-nued egi amisulid. Degi-inigwele, an bemarga negburgan-daksad, degine, Bab-Jesús burbar-ibmar-anga-oyosad an sogoed.
2CO 12:2 An wisdo, birgambe-gakabakedo (14), dule-Cristoʼba-naid nibneg-billipaase selesgusad. Unnila Bab-Dummadbi wisid we-dule sanar-selesdibe, burbar-selesdibe.
2CO 12:3 A-dule mag an dakdo, sanar-selesdibe, burbar-selesdibe, unnila Bab-Dummadbi wisid.
2CO 12:4 A-dule nibneg-nued-naidse selesgusad. Agi gayaburba-nued-dukuar-mamaid-geg-sogleged itosad. Dulemar a-gayaburba-nued-barsoged ega igar maisulid.
2CO 12:5 A-dulegi an san-dummarba itogoed. Angindi, san-dummarba an itogosulid. Unnila an-san-nollogwadginbi an san-dummarba itogoed.
2CO 12:6 Ar degi-inigwele, ar na san-dummarba-imakbiena an imaksaled, binsa ee an gordisuliled, ar ibmar-napiragwad an sogsaled. Degi-inigwele, an san-dummarba imakosulid, adi, dulemar melle an-ibmar-dakdiidba dogdar an-odummomalagar, degi, an-ibmar-itodimaladba dogdar odummomalagar.
2CO 12:7 Ar we-ibmar-dummagan-burbar-anga-oyolesadba an mer dogdar na san-dummarba-imakegala, iko-sapurbalid-yoiyob boni an-sangi yolesad. We-bonide, an-wiogega nia-saila-Satanás-akar danikid.
2CO 12:8 A-boni-an-sangi-naid anga obelogegala, ilapaagus Bab-Jesúsʼse an egisdanikid, a-boni anga osuloye.
2CO 12:9 Bab-Jesús an-abin-imaksad: “Unniguar bato an begi nued binsadiid, an be-bendakdiguad. Ar an-gangued dule-nollomaladgi bur ganna oyoleged.” Degisoggu, an-nollo-guedgi an na nug-dummarba itogodo. Adi, Cristo-gangued-e-burba-angi-maid oyolemai guegar.
2CO 12:10 A-ulale, an Cristo-sabed-ular, an-nollogwadgi weligwar an itosunnad. Dule an-ichogedgi, an ibmar-nue-abegedgi, dule an-bareginnedgi, sulibinsa-an-itogedgi, weligwar an itosunnad. Ar ade, an nollogwale, Cristoʼba an gangusiid.
2CO 12:11 Emide, an na san-dummarba-sunmaknonigu, dule-binsaedsulidyob an gunonisunnad. Ar bemar an na san-odummogega be an-imaksamalad, ar bemar an-nug-odummosana, an deyob sunmaksasulinad. Ar bemar an-nug odummogewilubbinad. An dule-dummadsur-inigwele, Bab-Jesús-e-sapingan-bur-dummagan-biriginmaladye-sogdimaladba an bur egesulid.
2CO 12:12 Ar an bemar-abargi binnalee-ibmar-imaksagu, ibmar-wilubgan-imaksagu, ibmar-gegerdaklemalad-imaksagu, degine, ibmar-dakledisurmalad-imaksagu, agi bemarse an nue-oyolesad, ande Bab-Jesús-e-sapin-bur-dummadga-gumogadye.
2CO 12:13 Ar bemar Jesúsʼba-nanaimalad-danar-ambikunonidamalad-baiganba, ¿ibugi bemar eba galakumarsunna? Ar bemar an-bendaksasurmaladgine ese galakumalad. Degisoggu, an bemargi-nue-nosale, bemargi-nossuliyob be an-dakmalo.
2CO 12:14 Emigindi, an bemarse naed guagwar gudiid. An bemarse-ataknaed ilapaa-gudoed. Bemarga arbaed an onogosulid, ar an bemar-ibmarbina sogsulid, unnila bemarbina an soged. Ar ade, mimmigan babganga mani sabosulid, babgan mimmiganga mani saboged.
2CO 12:15 An nue-yeer-itogedgine an-mani-nikad an bemargi mioed, degine, an bemar-san-burba-sabed-ular, an-sunnad bela an na ukmogoed. Bur bule an bemar-sabguedde, degite, ¿bemar dogdar an-sabguosurmarmode? Bemar bur bule an-sabguewilubmalad.
2CO 12:16 Ar bemar bukidar mag-itomalad, an bemarga arbaed gwen onossuli. Degite, sogmalad, an ibmar-nue-wisidba an bemar-yardakar bemar-binsaed gasye.
2CO 12:17 Ar dulemar-an-bemarse-barmisadgi, ¿an bemar-yardakar bemar-binsaed gassi? Suli, an bemar-yardaksasulid.
2CO 12:18 Tito bemarse-ataknaega, an ese wilenai gusad. Geb Titoʼbali, gwenad-wargwen an bemarse barmisad. ¿Ar Titoʼde bemar-yardaksasi? ¿Ar Tito-binsaedyob ande binsamosursi? Ar Tito-daedyob an nanadimogad.
2CO 12:19 Abakalegi bemar binsamalale ibmar-gusadi, anmar bemar-asabin ibmar-gussuliyobi-guega imaknanaye. Deyobsulid. Anmar Bab-Dummad-asabin, Cristo-nuggi bemarga sunmaknaid. Gwenadgan-sabesailamalad, anmar weyob sunmaknaidi, bela bemar gatik Bab-Jesúsʼgi-nasgumai gumalagalad.
2CO 12:20 An dobe-itoged, abakalegi an bemarse-modapile, an-ibmar-abegedyob an be-dakdapsurmalale. An dobe-itobalid, abakalegi bemar-an-dakbiedyob be an-dakarsurmalale. An dobe-itobalid, abakalegi amba bemar isgubukwa an be-dakdapmalale. Ar degiile, an bemarga binnasur-ibmar-sogdogua, be bukib-binsaarmalale. An dobe-itobalid, abakalegi bemar na abin-abin-imakbukwa, na nobgubukwa, urwebukwa, danar-danar sorda-gabukwa, an be-dakdapmalale. Degi, nalle-gubukwa, na egi muchub-muchub sunmakbukwa, gakan-berbe-bukwa, san-dummarba imakbukwa, degine, yogsaar-galagwensuli-gubukwa an be-dakdapmalale.
2CO 12:21 An dobee-itoged, abakalegi gannar an bemarse ataknadele, an-Bab-Dummad bemar-abargi an-obingegsagwichi an-imakalile. Bukidar bemar galagwensuli-gudigusadba, negsichidgi-yoledigusadba, isgudiidgi-nabir-bemar-itodigusadba, bemar na be-isgusadgi be bukib-binsasurmalad-ular, an-Bab-Dummad an-obinge-imakalile. Ar deyob bemar imaksasurmalad-ular, an bogwichi gualile.
2CO 13:1 Emide, ilapaa-gudodo an bemarse ataknasokalidse. “Bela igarmar, dule-ibmar-daksad-warbogwadbardibe, warbaagwadbardibe, nabirolegoed.”
2CO 13:2 Igi iduar irbogi an bemarse atakapidgine an bemarga sogsagusa, emigindi, an bemar-abargi-gudisulidgi an bemarse garda narmaked. Bemar-iduar-isgusmaladga, degine, bela-bemarga gannar an sogbardo, an bemarse modapile, sabsur bemarga an ibmar sogdapoye.
2CO 13:3 Ar ade, bemar nue-dakbi-soged, bule Cristo angi arbanaidibeye. Ar Cristo bemarga nolloo gusulid, bemar-abargi Cristo dutusur arbaed.
2CO 13:4 Cristo san-nollogwadyob nakrusgi-biokles-inigwele, Bab-Dummad-ganguedgi emigindi dula gudiid. Ar anmar Cristoʼgi nollo-gumarmogadyob gudiid, degisoggu, anmar Cristoʼgi-gudii gumogargebed, adi, Bab-Dummad-gangued anmargi-gudiidba, anmar bendaklegegar.
2CO 13:5 Na san-dukin-be-itomar bule bemar Bab-Jesúsʼba nue na be naimardibe. Na be dukin nue-wilubdakmala. ¿Ar bemar-sunnad be wissurmarsi, Jesucristo bemargi maid? Ar binsa bemar Bab-Jesúsʼba naiye bemar gordisunnargebsundo.
2CO 13:6 Bitigi bemar mag-anmar-dakena gadin, anmarde nue-Bab-Jesúsʼba nanaid.
2CO 13:7 Bab-Dummadse an bemarga gormalad, bitigi, bemar ibmar-isgana imaksulina gadinye. An bemarga Bab-Dummadse-goledi, an gorsurdo anmar Jesús-e-sapingan-bur-dummagan-sunnad oyogegar. Suli, degisuli. An Bab-Dummadse gordo, melle bemar ibmar-isgana imakmalagar, ar anmardi, Jesús-e-sapingan-bur-dummaganad.
2CO 13:8 Ar anmar igar-napiragwadgi geg gwisgued, igar-napiragwadba damalargebed.
2CO 13:9 A-ulale, anmar nue-weligwar-itoged, anmar nolloguedgi, bemardi gannargwa itomaladgi. Anmar bemarga Bab-Dummadse gormalad, adi, gatik bemar Bab-Jesús-igargi nasgumai gumalagar.
2CO 13:10 A-ular, an bemar-abargi-gudisulidgi, an bese garda narmakmalad, adi, an bemarse-modapir, Bab-Jesús gangued-anga-uksadba melle dogdar sabsur-ibmar bemarga-sogegar. Bab-Jesús we-gangued-anga-uksadi bemar-burba-ogannogegalad, bemar-obelogegarsulid.
2CO 13:11 Napidgine gwenadgan, weligwar be itomar, gatik Bab-Jesúsʼgi-nasgumai be gumar, na be muchub-muchub gwage-ogannomar, unnila wargwenna-gueyob be itomar, degine, be-ulubgi gwage-bogidik na be itomar. Bab-Dummad-u1lubgi-bogidik-itogega-dule-imaked, degi, Bab-Dummad-dule-sabgumaidi, a-Bab-Dummad bemarba gudii guoed.
2CO 13:12 Na be muchub-muchub bela angaagwale na be nued-sogeye be sogmar.
2CO 13:13 Bela Jesucristoʼgi-akananaimalad bemarga sogsimalad, bemarde nued sogeye.
2CO 13:14 Bab-Jesucristo-bemargi-nued-binsaed, Bab-Dummad-bemar-sabgumaid, degi, Bab-Dummad-Burba-Isligwaled-bemarba-gudiid bemarba gudigusun. Be itomargua.
GAL 1:1 Ani Pablo, an Bab-e-sapin-bur-dummadga gumogadid, an dulemar-nuggi barmilealidsulid, dulemar gwen an-nug-imaksasulid. Jesucristo, degine, Bab-Dummad-anmar-baba Jesucristo-burgwar-maigusad-odulosad, amar an-nug-imaksad.
GAL 1:2 Ani Pablo, degine, bela gwenadgan-anba-gudimalad, Galacia-yargi Jesúsʼba-nanaimalad-danar-bukmaladse, anmar garda narmaksiid.
GAL 1:3 Bab-Dummad anmar-baba, degi, anmar-Dummad-Jesucristo, bemargi nued binsamarsun, degi, ulubgi bogidik bemar-itogega imakbarsun.
GAL 1:4 A-Jesucristo anmar-Bab-Dummad-sogedba anmar-isgued-ular-burgwega na san uksad, adi, emi-ibagangi anmar mer bar ibmar-isganaba ebipiledii gumalaga, adi, mer bar neg-galagwensur-gunanaidba selemalagar.
GAL 1:5 Degisoggu, degisadegu Bab-Dummad-nug ogannomarsun. Deyob gusun.
GAL 1:6 Cristoʼgi bemar abonolege-wilubsulinad, degite, Bab-Dummad Cristoʼgi-bemar-abonolegega bemarse gochad. An geger be-dakmardo, ibiyobi degite, bato be agi bangudmala, adi, abonoleged-igar-akarsailadba naegar.
GAL 1:7 Ar abonoleged-igar-baid nikaye soglesulid. Suli. Ar ade, dulemar, unnila bemar-binsaed-gaega gudimalad, degi, Cristoʼgi-abonoleged-igar oburdimalad.
GAL 1:8 Ar anmar-sorda-wargwendibe, baliwitur-nibneggined-wargwendibe, Bab-Dummad-Gayaburba-Nuedgi-an-bemar-odurdaksadba akar bemarga igar-ukalile, we-dule, Bab-Dummadse sabsur-ukabsalesun.
GAL 1:9 Ar igi bato an bemarga sogsa, emigi gannar an bemarga sogbar: Ar dule-wargwen Bab-Dummad-gayaburba-barsokalile, abonoleged-igargi-an-be-odurdaksamaladba akar bemar-odurdakalile, we-dule, Bab-Dummadse sabsur-ukabsalesun.
GAL 1:10 Bemar insagua, ¿dulemar-nabir-ito-saed an amidii be insae? Dulemar-yeer-ito-imaked an amidisulid. ¿Unnila Bab-Dummad-nabir-ito-saed an amidii be insae? Eye. Ar dulemar-yeer-ito-saed amba an amidiile, ar an Cristoʼga-arbaed-dulesurdo.
GAL 1:11 Gwenadgan, bemar nue-wisgubi an bemar-abedo, Bab-Jesúsʼgi-abonoleged-igargi an bemarga sunmaksadi, we-igar dulemargi danisulid.
GAL 1:12 Ar dulemar Bab-Jesús-Igargi gwen an-odurdaksasulid, degine, dulemar we-Igar anga uksasurbalid. Jesucristo-sunnad we-Igar anga osanalosad, Jesucristo-sunnad anga uksad.
GAL 1:13 Ar epenne igi-an Judíoʼmar-igar-maidba an nanadigusad bato be wismalad. Jesúsʼba-nanaimalad-danar-ambikunonidamalad-baregindii an gusad, degi, bela amar-osulogegala, an sabsur-amar-imakdii gusad.
GAL 1:14 Degine, Judíoʼmar-igar-mamaidgi an-sordamar-an-un-sergumaladgi an bur bule obindii gusad. Amarba bur-bule an-dadgan-igar-mamaidba an gudii gusad.
GAL 1:15 Ar Bab-Dummad na nabir-itogedba, amba an sapibeneggi-mai, an-susad. Ar Bab-Dummad nabir angi binsaewilubsulinad, degite, an-abonogega anse gochad.
GAL 1:16 Deginbali, Bab-Dummad, Judíoʼsurmaladga E-Machigi-sunmakega anga oyononikid, doa E-Machi gue. We degigusadi, dulemarse gwen an idaksasulid.
GAL 1:17 Degine, Jerusalén-neggweburse an-iduar-Bab-Jesús-e-sapingan-bur-dummagan-bukmaladse igar-amiega gwen an arbisurbalid. Arabia-yarse bur an nade gusad, geb degi, gannar Damasco-neggweburse an nonigusbalid.
GAL 1:18 Geb a-birgapaagwad-sorba, Pedro-dakega an Jerusalénʼse nadegusad. Pedro-walik ibambe-gakatar (15) an megialid.
GAL 1:19 Bab-Jesús-e-sapingan-bur-dummagan-baigan Jerusalénʼgi gwen an daksasulid. Unnila Bab-Jesús-e-urba-Santiagoʼbi an daksad.
GAL 1:20 We an bemarga narmaksiidi, Bab-Dummad-asabin, napiragwad an bemarga soged, an gakansasulid.
GAL 1:21 Geb a-sorba, an Siria-yalaganba, degi, Cilicia-yalaganba nade gusad.
GAL 1:22 Judea-yalagangi Cristoʼba-nanaimalad-danar-bukmaladdi, gwen an-dakdisurmalad, aku an-dakmalad.
GAL 1:23 A-dulemar unnila sunmak itomalad: “We-dule, epenne anmar-baregindidaedi, emigindi, Bab-Jesús-Bensulid-Igargi sunmakdiiye. Epennedi, unnila Jesús-Igar-osulogedgi-binsadii daye.”
GAL 1:24 Degisoggu, we-gwenadgan an-nuki Bab-Dummad-e-nug odummodmarsunnad.
GAL 2:1 Degine, birgambe-gakabakegwad-sorbali (14) gannar Jerusalén-neggweburse Bernabé-anbo an nade gusad. Deun, anmarba Tito an sesa gusad.
GAL 2:2 Bab-Dummad-anga-sogsadba Jerusalén-neggweburse an nade gusad. Ase an modapgu, Jesúsʼba-nanaimalad-nug-nikamaladbo bachikii an sunmaksad. Amarga an sogsad, igi an Bab-Dummad-Gayaburba-Nuedgi Judíoʼsurmaladga an sunmakdii. Ar an Jesús-Igargi-odurdaksadi, degi, an odurdakbaloedi, abakalegi binsarsun an odurdakdiile.
GAL 2:3 Ar Tito-anba-gudigusadgarbela, Judíoʼsur-inigwele, gwen ega sogledsulid, Moisés-Igar-Maidba, emi be abgan-uka-duku sikoye.
GAL 2:4 Ar bukidar yamo gwenadganyob, Jesúsʼba-nanaimaladyob san imakdimalad. Amar, dukuar anmar-argaega anmar-abargi dogsamalad. Adi, anmar-Cristo-Jesúsʼgi-akanonimaladba-ollorgunonikidi, Moisés-Igar-Maidba gannar maiga anmar-imakegar.
GAL 2:5 A-dulemar-sogedba bipisaale anmar ibmar-imaksasurmalad. Ar ade, anmar Bab-Dummad-Gayaburba-Nued, napiragwadgi, bemar-abargi degisadegu-guega abesmalad.
GAL 2:6 Dulemar-nue-nug-nikaye-sogdimalad, gwen anga binsaed-gwapid uksasurmalad. Ar amar iduardi nue-nug-nikaa gudigusdibe, angardi gwen akarsulid. Ar Bab-Dummaddi bela emarbi-anmar-daked, asginbi dulemar-daksulid, bela ulubgi dulemar-daked.
GAL 2:7 Ar amar mag daksamalad, igi Pedroʼga Bab-Dummad-Gayaburba-Nued Judíoʼmarga-sunmakega uklesa, deyobi, amar mag daksamarbalid, igi-Bab-Dummad anga E-Gayaburba-Nued Judíoʼsurmaladga-sunmakmogaga igar uksamoga.
GAL 2:8 Ar igi-Pedroʼgi Bab-Dummad arbasa, E-Gayaburba-Nuedgi Judíoʼmarga-sunmakega, a-Bab-Dummadi, deyob angi arbasmogad. E-Gayaburba-Nuedgi an Judíoʼsurmaladga-sunmakega an-barmisad.
GAL 2:9 Santiago, Cefas Pedroʼye-nugbalid, degi, Juan, amar Jesúsʼba-nanaimalad-abargi buar-neg-ganikidyob gudidimarsoggu, amar Bab-Dummad nabir-angi-binsaedba E-Gayaburba-Nuedgi-sunmakega-an-susad magar an-daksamalad. Agala, an-argan, degi, Bernabé-e-argan gasmalad, sogegar, anmar na mesa-arbamalad gumarye. Deyob imaksamalad, adi, anmar Judíoʼsurmalad-abargi arbaegar. Emardi, Judíoʼmar-abargi arbamogagar.
GAL 2:10 Unnila amar anmarse egichismalad, mer dule-wilegana-iemaloye. Degi-anmarse-egichisadi, degi-imakdii an nanasad.
GAL 2:11 Ibagwengine, Pedro Antioquía-neggweburse-nonigu, an ega bakar ibmar sogsad. Ar ade, Pedro ibmar-imaksadi, igar-nabirid imaksasulid.
GAL 2:12 Ar ade, Santiago-sordamar-yoo-nonikid-iduar, Pedroʼdi, Judíoʼsurmaladba nabir mas gundidaenad. Geb Santiago-sordamar-Judío-igargi-bur-nanadimalad-nonigudi, Pedro, amar-dobedba Judíoʼsurmaladgi banguded, bar eba mas-gunsuli gusad.
GAL 2:13 Degi, Judíoʼmar-baigan-Jesúsʼba-nanaimalad, Pedro-degidae-dakalidba eba akadgusmalad. Bernabéʼse-bakar, we-Pedro-wagar-darbo-daedba, binsaed-galedgusmogad.
GAL 2:14 Ar we-gwenadgan Bab-Dummad-Gayaburba-Nued-maidba napiragwadba nanasur an dakargu, bela gwenadgan-wagab Pedroʼga an bakar ibmar sogsad: “Pedro, bede Judíoʼye soged, degi-inigwele, be Judíoʼsuliyob be nanadiid. Deyob be nanadisoggu, degite, ¿ibiga be Judíoʼsurmaladdi Judíoʼmar-daedyob nanabi be abesunna?”
GAL 2:15 Ar anmardi Judío-gwalulesmalad. Anmardi, Judíoʼsurmalad-Bab-Dummad-wissurmalad-isgudimaladyobsulid.
GAL 2:16 Anmar nue-wisid, Moisés-Igar-Maid-imakedba, dule isgussuliyob daklenonidasulid. Dule Jesucristoʼgi-bensulidba isgussuliyob daklenonidaed. Anmar-Judíoʼmar deyob Jesucristoʼgi bensuli-gunonimogad, ar Cristoʼgi-bensulidba isgussuliyob an daklenonimalad. Moisés-Igar-Mesisad-daedba anmar isgussuliyob daklenonisurmalad. Ar Moisés-Igar-Maidba-nanaedgi dule bipisaale gwen isgussuliyob daklenonikodeeye soglesulid.
GAL 2:17 Ar anmar-Judíoʼmar isgussuliyob Cristoʼgi gunonidaedi, a oyodo, anmar isgudimogad-dulemarmoye. Ar a-ulale, ¿Cristo isguega dule-imaksunde? Suli, degisuli.
GAL 2:18 Ar an Moisés-Igar-Maid metele, sorba an gannar egi nanaarbalile, bato an oyonaido, ani an isgudiiye.
GAL 2:19 Ar Moisés-Igar-Maid an-oburgwissoggu, Moisés-Igar-Maidga bar an gudisulid. Emisgindi, Bab-Dummadga an dula gudiid.
GAL 2:20 Ar bato Cristoʼba an nakrusgi bioklesad. Degisoggu, an dula-gudiidi bar ani an dula gudisulid. Cristo dula angi gudisunnad. We-an-sangi an dula-gudiidi, an Bab-Dummad-Machigi-bensulidba an dula gudiid, ar a an-sabgusad, degi, an-abonogegala, an-ular na san uksa gusad.
GAL 2:21 Bab-Dummad an-abonoge-wilubsulinad, degite, an-abonosad. A-abonoged an obansulid. Ar Moisés-Igar-Maid-imakedba dule isgussuliyob guena, ar Cristo binsa anmar-ular burgwisanad.
GAL 3:1 Galacia-dorgan, bemar gwen binsaed nikasurmalad. Mer bemar igar-napiragwadba nanamalaga, ¿doa bemar-binsaed gasmala? Anmar-sunmakedgi anmar bemarga nue-oyosad, we-Jesucristo nakrusgi bioklesye.
GAL 3:2 Unnila bemarse an we egisbimardo: Be Bab-Burba-Isligwaled-abingasmargu, ar Moisés-Igar-Maid-imakedba, ¿be Bab-Burba-Isligwaled abingasmarsi? Bemar unnila Bab-Dummad-Gayaburba-Nued-itosgu, nue-bensuli-itosadba, ¿be Bab-Burba-Isligwaled abingasmarsursi? Eye.
GAL 3:3 ¿Ar bemar nue binsaedsurmarsi? Ar bemar Bab-Burba-Isligwaledgi Bab-Jesús-Igargi onodmaladde, ¿na be dukin gannar ibmar-imakmaladgi be swilidik-gumaloye sogmarde? Suli, degisuli.
GAL 3:4 ¿Ar binsarsunna bemarde Bab-Jesucristo-nuggi wilesmarsi? Ar bemarde nue-binsa-wilesmalardi, nue-be binsa wilesmardo.
GAL 3:5 Ar Bab-Dummad bemarga E-Burba uked, degine, ibmar-dakledisulid bemar-abargi imaked. Deyob ibmar-imakedi, ¿Moisés-Igar-Maid-imaked-ular bemarga imaksi? Suli, deyob suli. Bemarga-imakedi, bemar Jesucristoʼgi-bengulesulid-itosadba imaked.
GAL 3:6 Bab-Dummad-Gardagi narmakar naid: “Abraham Bab-Dummadgi-bengussulidba, Bab-Dummad isgussuliyob Abraham-daknonigusad.”
GAL 3:7 Degisoggu, bemar nue wisgumar, dulemar-Bab-Dummad-bensurmalad Abraham-waganga gunonidamalad.
GAL 3:8 Bab-Dummad E-Gardagi bato idu sogsasoggu, Judíoʼsurmalad egi-benguosulidba isgussuliyob daknonikoye. Bab-Dummad a-wisidbali, Abrahamʼga iduar we-Gayaburba-Nued sogsagusad: “Be-nuggi, bela dula-we-napneggi-bukwamaladgi ise-nued an binsaoed.”
GAL 3:9 Degisoggu, dulemar-Bab-Dummad-bensurmalad, Abrahamʼyob bengussurmarmosoggu, Abrahamʼba Bab-Dummad amar-bendaknonidasunnad.
GAL 3:10 Ar bela dulemar Moisés-Igar-Mesisadba-nanamaladi bela bato ukabsales bukmalad. Ar ade, Bab-Dummad-Gardagi narmakar naid: “Dulemar Moisés-Igar-Maidba bela eba dasulile, amar Bab-Dummadse bato ukabsales bukmalad.”
GAL 3:11 Ar mag itolesundo, Moisés-Igar-Maidgi-nanadiidba, dulemar isgussuliyob Bab-Dummad-asabin guosulid. Ar ade, Bab-Dummad-Gardagi sognaid: “Dule-gwage-swilidikiddi, Bab-Dummadgi-bensulidgi gudii guoed.”
GAL 3:12 Moisés-Igar-Mesisadba nanaed, Bab-Dummadgi-bensulidgi eba nanalesulid, ar ade, Bab-Dummad-Gardagi sognaid: “Ar dule we-Moisés-Igar-Maid dula-e-imakbi abegele, a-Igar-Maidba bela nanadii guoye.”
GAL 3:13 Dule Moisés-Igar-Maidba-dasulir, ukabsalegoye-soglegedi, Cristo, anmar-abonogegala, we-ukabsaleged anmar-anar sunonikid. Deyob anmar-baknonikid. Ar Bab-Dummad-Gardagi narmakar naid: “Dule-wargwen urgogi bannumakar nasiklesale, we-dule Bab-Dummadse nue-ukabsalegaledid.”
GAL 3:14 Cristo deyob anmar-baknonikid, adi, Judíoʼsurmalad Cristo-Jesúsʼgi Bab-Dummad-Abrahamʼgi-nued-binsasad abingamogagar. Adi, Bab-Dummad-anmarga-E-Burba-ukoye-sogsad, Cristo-Jesúsʼgi-bensulidgi we-Burba anmar abingaegalad.
GAL 3:15 Gwenadgan, dule-igar-mesedba an bega sogmalo: Dule-ebo na igar-mesismalale, bato deyob-guoye-soglesad-sorba, gege dule igar na wargwengi ogwaed, degine, gege igar-baid odobalid.
GAL 3:16 Emigi, nabir. Bab-Dummad Abrahamʼga, degine, Abraham-e-wagwaga, ibmar-ukoye sogsad. Sogsasulid: “E-wagangarye.” Deyobile, dulemar-bukidarnik sogle-itole, emigindi soged, wargwenye: “Be-wagwagarye.” Génesis 12:7 A sogledo, Cristoʼye.
GAL 3:17 Degisoggu, an sogsundo: Bab-Dummad Abraham-ebo-gebe-igar-mesisad, Cristoʼgi ebo igar-nabosad. Geb a-sorba, birga-dulataled-ilabake-gaka-dulagwen-gakambegi (430), Moisés-Igar megnonikid. We-Igar-Megnonikidi, gege Bab-Dummad-Abraham-ebo-igar-mesisad bisged. Degisoggu, deyob gusana, Bab-Dummad-Abraham-ebo-igar-mesisad bergunonikoenad.
GAL 3:18 Ar Bab-Dummad dulemarga-ibmar-ukoedi, Moisés-Igar-Mesisadgi-nanadiidba uklegena, we-ibmar-ukoedi, bar Bab-Dummad na e-ibmar-ukoye-sogsadba uksasuliled. Ar emigindi, Bab-Dummad, Abrahamʼga e-ibmar-ukoye-sogsadba uksad.
GAL 3:19 Degite, ¿ibiga Moisés-Igar anmarga uklessunna? Anmarga uklesadi, Abraham-wagwa-nonikoye-soglesad-nonikidse oyogegalad, ibu isguedi. Moisés-Igar-uklesadi, baliwiturmarba uklesad. Degi, Moisés dulemar-irwa-sunmakedga gunonikid.
GAL 3:20 Ar Bab-Dummad Abrahamʼga-sogsagu, an bega ibmar-imakoye, dule-baid e-ular-sunmakega amissulid. Bab-Dummad na e-sunnad Abrahamʼga sunmaksad.
GAL 3:21 Degisoggu, Moisés-Igar-Mesisad, ¿Bab-Dummad Abrahamʼga ibmar-imakoye-sogsadgi yolenaisunde? Suli, degisuli. Ar Moisés-Igar-Mesisad sunna-dule-odulogena, Bab-Dummad dule-a-Igarba-nanaedba isgussuliyob a-dule-dakoenad.
GAL 3:22 Ar emigindi, a-ular, Bab-Dummad-Garda soged: “Dulemar belagwapa isguedbiiye.” Deyob soged, adi, Bab-Dummad dulemar-Jesucristoʼgi-benguosurmaladga ibmar-ukoye-sogsad ukegar.
GAL 3:23 Jesucristoʼgi-bensulid-igar-nonikoed-iduardi, anmar bela Moisés-Igar-Mesisadse gales gudigusmalad. Bab-Dummad Jesucristoʼgi-bensulid-igar-anmarga-oyononikidse anmar gales gudigusmalad.
GAL 3:24 Degisoggu, Moisés-Igar-Mesisad unnila Cristoʼse-anmar-nidega, dule mimmigan-odurdakeyob, anmar-odurdaksad, adi, anmar Jesucristoʼgi-bensulidba, isgussuliyob daklegegar.
GAL 3:25 Ar Jesucristoʼgi-bensulid-igar-nonigua, Moisés-Igar-anmar-odurdaked, bar abelenonisulid.
GAL 3:26 Ar emigindi, Cristo-Jesúsʼgi-bensuli be gunonimalad-ular, bemar belagwapa Bab-Dummad-mimmiganga gunonisunnad.
GAL 3:27 Ar bela bemar Cristo-nuggi-diigi-oglesmaladi, Cristo-binsaedyob, be binsanonimarmosunnad.
GAL 3:28 Ar emigindi, a-ular, dulemar bar akar-akardeeye soglesulid: Judíoʼmar, Griegoʼmar-ebo bar akarsulid. Maigan, e-itoleged-gudidimalad-ebo bar akarsurmogad. Machergan, omegan-ebo bar akarsurmarmogad. Ar ade, bemar belagwapa soggwennaa Cristo-Jesúsʼgi gunonimalad.
GAL 3:29 Ar bemar Cristoʼgadile, bemar Abraham-e-waganmodo. Degisoggu, Bab-Dummad-Abrahamʼga-ibmar-ukoye-sogsad, bemar a-abingamarmogodo.
GAL 4:1 Ar an sogbardo: Ar mimmi e-bab-sorba-ibmar-gaoed amba bipigwale, dule-maiga-gudiid-ebo emalad. Ar we-mimmi-bipigwad bela ibmar-gaoed-e-ibed-inigwele, ar e-ibmar-gaoed amba geg e-sogedba imaked.
GAL 4:2 We-mimmi e-bab-ega-ibmar-ukoye-sogsad-e-ibagan-warmakedse, geb na e-sogedba imakoed. Ar emigindi, dule-baigan a-mimmi akwedigweled, ega ibmar imakdimargweled.
GAL 4:3 Anmar deyobmodo, anmar bipigwaunni, anmar we-napneggi-igar-mamaid-e-maiga-gudii gusad.
GAL 4:4 Ar Bab-Dummad na E-Machi-barmidagoed-e-ibagan-nasiksad oarmaknonigu, na E-Machi ome-wargwengi barmialid, degi, Moisés-Igar-Mesisad-urbaligwa-nanaega aidenonibalid.
GAL 4:5 Bab-Dummad E-Machi barmialid, adi, dulemar-Moisés-Igar-Maid-urba-nanadimalad-onogegar, degine, amar Bab-Dummad-mimmigan-sunnadga gumalagar.
GAL 4:6 Ar bemar Bab-Dummad-mimmigan gumarsoggu, Bab-Dummad na E-Machi-Burba-Isligwaled bemar-gwagese barmialid. Ar a emigindi gornaisunnad: “¡Abba!” We sogleged, ¡babaye!
GAL 4:7 Ar degisoggu, bar be maiga gudisulid, Bab-Dummad-mimmiga be gunonisunnad. Ar bato be Bab-Dummad-mimmile, Cristoʼgi Bab-Dummad-ibmar-ukoye-soglesad bato begadmogad.
GAL 4:8 Ar iduardi, aku be Bab-Dummad-dakmarsoggu, bab-dummagansurmaladga be mailedii gusmalad.
GAL 4:9 Ar emigindi, bemar Bab-Dummad-mag-dake gunonikid. Bur sogleged, Bab-Dummad e bemar-susadba, magar be-dake gunoniye. Ar degite, ¿ibiga bemar we-igar-yogasaarmaladse, igar-nollomaladse, e-maiga-gannar-guega be gannar nabimarbali?
GAL 4:10 Emide, amba bemar ibaganga, niimarga, degi, birgamarga iba onodimalad.
GAL 4:11 An bemarba dobee itodo, ar ade, binsarsunna an bemar-abargi arbasayob an itoged.
GAL 4:12 Gwenadgan, bemarse an wilesakwaa egisnaid, anyob be imakmar. Ar an bemarsunna na san imaksamogad. Ar bemar gwen angi yolessurmalad.
GAL 4:13 Be nue wismalad, deunni an uellemaid-ular, an bemarga Bab-Dummad-Gayaburba-Nuedgi gebe sunmaksad.
GAL 4:14 Ar an-uellesad bemarga arbaed-dummad-onos-inigwele, bemar isdar an-daksasurmalad, gwen an-obachasurmarbalid. Aka bur be Bab-Dummad-e-baliwituryob an-daksamalad, Cristo-Jesúsʼyob be an-abingasmalad.
GAL 4:15 Epennedi, be yeer-itodimalanad. Emide be ¿igi gudmarsunna? Ar an nue-wisid, sunna be-ibya anga-ukegala, na be onosmalanad. Ar emidi, ¿igi be anga gudmarsunna?
GAL 4:16 Ar an ibmar-napiragwad-bemarga-soged-ular, emigindi, ¿bemar-isdaradga an gunonisunde?
GAL 4:17 Dulemar-Moisés-Igar-Maidgi bemar-odurdakdanimaladi, nue bebina-sogeyob daklemalad. Napiragwadgi bebina sogsurmalad. Ar unnila binsadimalad, bitigi bemar angi bangusdibeye, adi, bemar emarba naguegar.
GAL 4:18 Na bina-nue-itogerba-gued igar-nuedinad, ar ibmar-nuedga be imakmalar. Unnila an bemar-abargi-gudiidginbi mer be angi-nued-daed oyomalo. Amba an bemar-abargi-gudisulir, deyob be imakmarbaloed.
GAL 4:19 Mimmigan, ar igi-ome bonigan-itoardae, deyob be anga nunmaked ukmalad. Bemar Cristo-e-daedyob-guedse an deyob itodii guoed.
GAL 4:20 Bitigi bemar-walik emisbinne an gudina yeerban, adi, bemarga wis binnasaar sunmakoenad. Wissurmosundo, igi an bemargi binsamalargebe.
GAL 4:21 Emigi anga be sogmalana, bemar Moisés-Igar-Mesisadba-nanabimalad: ¿Ar bemarde Moisés-Igar-Mesisad itodisurmarsi?
GAL 4:22 Ar Bab-Dummad-Gardagi narmakar naid, Abraham mimmi-warbo nikusye. Wargwen, e-mai-Agar-ebo nikusad. Baid, e-ome-sunnad-Sara-ebo nikusbalid.
GAL 4:23 E-mai-ebo-machi-nikusad dule-sogedba gwalulesad. E-ome-ebo-nikusaddi, igi Bab-Dummad idu Abrahamʼga sogsagusa, an bega machi-wargwen ukoye, a-sogsadba gwalulenonikid.
GAL 4:24 We-omegan-warbogwad, Bab-Dummad dulemarbo-igar-warbo-mesisad-e-wilubganad. A-igar-soggwendi, Agar gued. A Sinaí-yalagi danikid. We-igargi-gwalulemaladi, maiganga-guega gwalulemaladid.
GAL 4:25 Ar Agar, Arabia-yalagi Sinaí-yar-siid-e-wilubganad. We, Jerusalén-neggwebur-emi-siid-e-wilubganmosundo. We-Jerusalén, degine, na e-mimmiganmala amba maiga gudidimalad.
GAL 4:26 Jerusalén-nibneggineddi, Saraʼyob maiga gudisurmalad. Ar adi, bela anmar-nanga gusiid.
GAL 4:27 Ar ade, Bab-Dummad-Gardagi weyob sognaibalid: “Be, omegwa-geg-baked, gwen be mimmi-nikudisulid, ¡weligwaledba be binnasuli-gole! Be, gwen-muu-neggi-boniba-galitodisulid, ¡weligwaledba be binnasuli-gole! Ome-wilesagudiid, bur bule ome-sui-nikadba mimmigan nikuoed.”
GAL 4:28 Degisoggu, gwenadgan, Isaac Bab-Dummad-sogsagusadyob gwalulenonikid. Anmar deyob Bab-Dummad-mimmiganga gunonimarmogad.
GAL 4:29 Epenne, Ismael-dule-sogedba-gwalulesad, Isaac-Bab-Dummad-Burbaba-gwalulesad-baregindii gusad. Emi, deyob gunaimogad: Dulemar-Moisés-Igar-Maidba-gormakdimalad, anmar-Bab-Burbaba-gwalulesmalad-baregindii gudimarmosunnad.
GAL 4:30 Ar Bab-Dummad-Gardade, ¿igi sognaisunna? Sognaisursi: “Ome-maiga-gudiidi, degi, e-machi, be onoye. Adi, melle ome-maiga-gudiid-e-machi, ome-maiga-gudisulid-e-machiba ibmar nikuegar.”
GAL 4:31 Degisoggu, gwenadgan, anmar ome-maiga-gudigusad-e-mimmigansurmalad. Anmar ome-maiga-gudigussulid-e-mimmigan gumalad.
GAL 5:1 Cristo, Moisés-Igar-Mesisadgi anmar-ollor-imaknonikid. Agi-anmar-maiga-gudigusadgi anmar-onosad. Degisoggu, mer gannar be maiga-gumalaga, gandik na be imakmar.
GAL 5:2 Degisoggu, ani Pablo, an bemarga sogmardo: Ar bemar be abgan-uka-duku-siked-igar Judíoʼmar-imakmaladyob be imakmalale, Cristo bemarga ibnuedga gwen guosurmalad.
GAL 5:3 Bela-dulemarga gannar an sogbar: Ar doa-dule abgan-uka-duku-siked-igar imaksadibe, a-dule, Moisés-Igar-Mesisadba bela daergebed.
GAL 5:4 Dulemar Moisés-Igar-Mesisadba-nanaedgi isgussuliyobgued-amimaladi, Cristoʼgi bangunonimarsunnad. Bab-Dummad-abonoge-wilubsulinadgi, bangusmalad.
GAL 5:5 Ar anmardi, Bab-Dummad-Burbaba, Jesúsʼgi-bensulidgi isgussuliyob daklegoedi, anmar bensuli edarbedimalad.
GAL 5:6 Ar Cristo-Jesúsʼgi-akanimaladgi, dule-abgan-uka-duku-sikaled, degi, dule-abgan-uka-duku-sikarsulid-ebo gwen akarsulid. Unnila dulemar Bab-Jesúsʼgi-bensulidba sabedgi-ibmar-imaked bur napiragwad.
GAL 5:7 Ar bemar Bab-Jesúsʼba nue-nagus an be-daksamalanad. Ar emide, ¿doa mer igar-napiragwadba-nanaega bemar-igar-oburusmala?
GAL 5:8 We-igar-be-oburusmaladi, Bab-Dummad-bemarse-gochadgi gwen danisulid.
GAL 5:9 “Ar madu-ina ichegwale, degite, bela madu-omued.” Deyobdo, dule-wargwen neg-ichononidibe, belagwapa dulemar-ichoddaed.
GAL 5:10 Bab-Jesúsʼgi an bensulid, bemar gwen akar be binsaosurmalad, anyob be binsamarmogad. Ar dule-bemar-binsaed-gadiiddi, ar doa-duledibe, we-duledi, nue-sabsur odurdaklegoed.
GAL 5:11 Gwenadgan, abgan-uka-duku-siked-igargi amba an sunmakdiina, degite, ¿ibiga Judíoʼmarse amba an baregilledisunna? Ar deyob an sunmakdiina, Judíoʼmar Cristo-nakrusgi-bioklesad-igar baisur-itosmalanad.
GAL 5:12 Bitigi, dulemar-abgan-uka-duku-siked-igargi bemargi-yoledimaladi bur bela na alugwagse-bakale, gwasumarsunnana, gadin.
GAL 5:13 Gwenadgan, Bab-Dummad, Moisés-Igargi-bachik-guega, bemarse gochad. Emide, bemar Moisés-Igargi bachikgusmaladid. Degisoggu, Moisés-Igargi-bachikgusadi, melle be igar-isgana-imakega be imako. Suli, degisuli. Na be muchub-muchub sabguedgi bendakmar.
GAL 5:14 Ar Moisés-Igar-Mesisad bela irgwen-sogar weyob soglesiid: “Ar igi na be san-sabgue, deyobi dule-baid be sabgumogoed.”
GAL 5:15 Ar na be muchub-muchub uludmalale, nue salakarmar, ar na be dukin-dukin obelodmaloed.
GAL 5:16 Degisoggu, bemarga an sogsun: Bab-Burba-sogedba be nanamar, melle be-san-ibmar-imakbiedba be damar.
GAL 5:17 Ar ade, anmar-san-ibmar-sabied Bab-Burbagi gwisgunonidaed. Degi, Bab-Burba anmar-san-ibmar-sabiedgi gwisgunonidamogad. Degisoggu, na muchub-muchub egi gwisgumardo, adi, bemar na be-ibmar-sabiedi, melle imakmalagar.
GAL 5:18 Ar Bab-Burba bemar-idumaile, bemar Moisés-Igar-Mesisadgi bar gudisurmardo.
GAL 5:19 Dulemar na e-san-ibmar-sabiedba-damaladi, weyob damalad: E-omesuli, degi, e-suisuli na dikarba yolemalad. Yoo-abirgunagwar-na-nikue ebo negsichigi nanamalad. Galagwensuli sunnasur damalad. E-gwagegi galagwensuli nisaedginbi binsamalad.
GAL 5:20 Bab-dummadyob-imakleged-e-nug odummoged. Emargi ina-isgana imaked. Na isdar-dakmalad. Gadi ourwemalad. Gadi nobgumalad. Sae ibmar-itomalad. Abin-abin imakmalad. Na abin-abin urwemalad. Igar-nued-maidgi bangumalad.
GAL 5:21 Sae emar-ibmar-nikad dakmalad. Dulemar-oburgwemalad. Gadi mumgumalad. Agumakar iba onomalad. Degi, bela ibmar-wegi-gumalad imakmalad. Idu bato an bemarga sogsadyob, gannar an bemarga sogbalid, dulemar-degidamalad Bab-Dummad-e-negdakmaidse gwen dogosurmarye.
GAL 5:22 Bab-Burbadi, weyob dule-dae imaked: Dule-sabee-nanae imaked. Weligwar-itoge imaked. Ulubgi-bogidik-itoge imaked. Ukurmakar-ibmar-imaksuli imaked. Yeer-itogedgi-dulemar-bendake imaked. Emargi-nueddae imaked. Bab-Dummadgi-bensulidae imaked.
GAL 5:23 Binnalegwadgi-ibmar-sae imaked. Dukin-na-san-bargae imaked. Weyob Bab-Burba-dule-dae-imakedgi bela igarmar-mamaid geg egi gwisgued.
GAL 5:24 Ar dule-Cristoʼgadid, na e-sanginbi-binsaedi, degi, galagwensuli-ibmar-isganabina-itogedi bar sedisulid, ar bato nakrusgi we-ibmar bioksad.
GAL 5:25 Ar anmar Bab-Burbaba-gudiile, anmar Bab-Burba-sogedba nanamarbarsundo.
GAL 5:26 Degisoggu, mer na san-dummarbaa imakmar. Mer na be muchub-muchub emar-ourwedii gumar, degi, mer be aimar-ibmar-nikad-isdardakdii gumarbar.
GAL 6:1 Gwenadgan, ar gwenad-wargwen ibmar-isgana-imaknai daklesale, bemar-Bab-Burbagi-bur-gannarba-gudimaladdi, binnalegwadgi be a-dule-bendakewilubmalad. Adi, gannar a-dule Bab-Jesús-igarse dagegar. Na begi be binsamarmogo, abakalegi bemar agi wilubdaklearmogale.
GAL 6:2 Wilubdakleged begi nonimalale, na be muchub-muchub ogannomalo, na be bendakmalo. Ar deyob be imakmalale, Cristo-igar-maidba be nanadimardo.
GAL 6:3 Ar dule-wargwen-nug-dummadsulid na dummarba binsa san-imakdiir, we-dule dukin na yardakdido.
GAL 6:4 Degisoggu, wala-walagwen na e-gudimalad dakoed. Geb dule na e-daed nued-gudi-itogele, mer dule-baid-e-daedba be wilubdaknai guo.
GAL 6:5 Ar dule na san-wala-walagwen Bab-Dummad-asabin e-daed oyodii guoed.
GAL 6:6 Ar dule-wargwen Bab-Dummad-Gayaburbagi odurdaklenair, dule-e-odurdaknaidga bela ibmar-nuegan ega ukmogoed.
GAL 6:7 Na be mer dukin yardakmar. Bab-Dummadgi gege be dodomalad. Ar dule bela-ibmar-digsadi, a-ibmar gannar na weedsebalid.
GAL 6:8 Ar deyobmodo, dule na e-san-ibmar-isgana-abegedba daele, na e-isguedba bergudodo. Ar dule Bab-Burbaba ibmar-imakerdi, adi, Bab-Burbaba burba-geg-bergued nikuoed.
GAL 6:9 Degisoggu, mer anmar ibmar-nued-imakedgi wiegumar. Ar ibmar-nuegan-abingaed-e-ibagan-warmaksale, anmar nued abingaoed. Deyob guoed, ar anmar wiegussuli arbasmalar.
GAL 6:10 Degisoggu, anmar ibmar-nued-imaked-nikale, bela dulemarga ibmar-nuegan imakmalo. Bur buledo, gwenadgan-Jesúsʼba-nanaimaladga ibmar-nuegan-imaked.
GAL 6:11 Nue be dakmar, we an-bemarga-narmaked bule burwi-narmakar be dake. Ar an-sunnad an bemarga narmaksiid, adi, bemar dakega, we-garda-narmaklesad an-sunnad an narmaksad.
GAL 6:12 Ar dulemar-abgan-uka-duku-sikbi-abemaladi, dulemar-nued-e-dakmalaga bemarga sogdimalad, “bemar be-abgan-uka-duku be sikmalargebye.” Adi, melle bemar Cristo-nakrusgi-burgwisad-ular, baregilledii gumalagar.
GAL 6:13 Ar we-dulemar na-e-abgan-uka-duku sikar-gudimalad-inigwele, Moisés-Igar-Mesisadba dasurmalad. Degite, we-dulemardi abgan-uka-duku-sikbi be-abemalad, adi, bemargi na san-odummomalagar.
GAL 6:14 Ar andi gege na san-dummarba an imaked. Ar unnila andi anmar-Dummad-Jesucristo-nakrusgi-burgwisadgi dummarba an itoged. Degisoggu, Cristo-nakrusgi-burgwisad-ular an soged, ar bela-dulemar igi-angi-binsabimala, e-itolegedmardo, igi binsabimala. Degine, an we-dulemargala bato an burgwis gudiid.
GAL 6:15 Ar Cristo-Jesúsʼgi dule abgan-uka-duku-sikardibe, e-abgan-uka-duku-sikarsurdibe, gwen akarsulid. Unnila dule gannar burbar-gwalulesardi, adi, nabirdo.
GAL 6:16 Bab-Dummad dulemar-gannar-burbar-gwalulesadba-nanadimaladga, ulubgi-bogidik-itoleged, degi, dule-wiledaked uksun. Deginbali, Bab-Dummad Israel-dulemar-egadidga, ulubgi-bogidik-itoleged, degi, dule-wiledaked uksun.
GAL 6:17 Ar an Bab-Jesús-naibigusad-e-gannar an-sangi an sediid. Degisoggu, mer dule bar angi yolemalo.
GAL 6:18 Gwenadgan, anmar-Dummad-Jesucristo nued bemargi binsasun. Deyob gusun.
EPH 1:1 Ani Pablo, an Bab-Dummad-sogedba Bab-Jesucristo-e-sapin-bur-dummadga gumogadid. Bemar-Jesucristoʼgi-akananaimaladga, gwenadgan-Éfesoʼgi Cristo-Jesúsʼgi-gwen-galakudisurmaladga, an garda barmisiid.
EPH 1:2 Bab-Dummad anmar-baba, degi, anmar-Dummad-Jesucristo, bemargi nued binsamarsun, degi, ulubgi bogidik bemar-itogega imakbarsun.
EPH 1:3 Bab-Dummad, anmar-Dummad-Jesucristo-e-Bab, a-e-nug anmar odummomarsun. Ar anmargi nued binsasad, bela ibmar-nuegan nibneggi-ibmar-burbarmalad-bukmalad Cristoʼgi anmarga uksad.
EPH 1:4 Amba yoo we-napneg-nagued-idu, Bab-Dummad, bato Cristoʼgi anmar-susad. Adi, anmar Bab-Dummadgadga guegar, degi, bela anmar dule-gwage-swilidikidga e-asabin gumalagar.
EPH 1:5 Bab-Dummad anmar-sabedba Jesucristoʼgi-e-mimmiganga-anmar-imakega, iduar bato anmar-susad. Ar ade, Bab-Dummad na yeer-itogedba, na e-sogedba deyob anmar-susad.
EPH 1:6 Adi, anmar Bab-Dummad-nug ogannogegar. Ar ade, Bab-Dummad e-mimmiganga anmar-imake-wilubsulinad, emigindi, na E-Machi-sabesailadba e-mimmiganga anmar-imaknonikid.
EPH 1:7 Ar Jesucristo-ablis-aryosadgi, anmar isguedgi ollorgunonikid. Anmar isgussuliyob gunonisunnad. Bab-Dummad nabir anmargi binsaewilubsulinad, emigindi, bela-bela nabir-anmargi-binsaedba anmarga sognonisunnad: “Be-isgued bato bergussunye.”
EPH 1:8 Ar Bab-Dummad na e-sabgued bela-bela anmarse oyosad. Bela ibmar nue-wisi-guega, degine, mag-ibmar-itogega anmar-imaknonikid.
EPH 1:9 Deyob Bab-Dummad, Cristoʼgi bato dikasurgus na e-ibmar-saoye-sogsad-odukuar-maid, na e-itogedba anmarga odalononisunnad.
EPH 1:10 Adi, Bab-Dummad na-ibmar-imakoed-ibagan-nonikile, bela ibmar nibneggi-bukmalad, degi, ibmar-napneggi-bukmalad, Cristoʼgi atononikoed.
EPH 1:11 Bab-Dummad na e-itolegedba ibmar-sabied-imakedba iduar Cristoʼgi anmar-susad, adi, Cristoʼba anmar ibmar nikumalagar.
EPH 1:12 Ar adi, anmar-inse Cristo-bengussurmalad-ulale, Bab-Dummad-gangued-e-nug anmargi-odummoledii guegar.
EPH 1:13 Bemar ambamogad. Bemar, Bab-Dummad-Gayaburba-Nued Bab-Jesús-sunna-dule-abonoged, a-gayaburba be itosmargu, we-gayaburba-napiragwad be abingasmarmogad. Agi, bemar Cristoʼgi bensur-gunonimargu, Bab-Dummad-Burba-Isligwaled anmarga-uklegoye-sogsad, bemargi e-wilub nagunonisunnad, adi, oyogega, bemar Cristoʼgad-sunnadye.
EPH 1:14 Bab-Dummad anmarga E-Burba-Isligwaled-uksadba bato anmarga sognaid, ibmar-nuegan-baigan anmarga-ukoye-sogsad anmarga bela ukedseye. Bab-Dummad bela dulemar-egadga-guoye-sogsad isguedgi-onosale, bela anmarga ibmar ukoed. Agi, Bab-Dummad-nug bela-bela ogannoledii guoed.
EPH 1:15 An bemar-itoardo, bemar Bab-Jesúsʼgi nue bensurmarye, degine, bemar bela Jesucristoʼgi-akananaimalad nue-sabmarbarye.
EPH 1:16 Deyob an itoargu, an bemarga Bab-Dummadga-dog-nuedye-soged gwen an bogigudisulid. Bab-Dummadse an goter, bemargi an binsaddaed.
EPH 1:17 Anmar-Dummad-Jesucristo-e-Bab-Dummad, Bab-Gandikid-Yeerdakleged, ase an bemarga egisdaed, bemarga ibmar-burbar-mag-itoged ukegar, adi, bemar mag itogegar, doa Bab-Dummad-gue.
EPH 1:18 Bab-Dummadse an egisbar, ulubse ise mag-ibmar-itogega bemar-imakye, adi, bemar bur bule wisguega, ibiyobi Bab-Dummad ibmar-yoedse-ukoye-sogsad dummarba gue, degi, ibiyobi yeerdaklebali. We-ibmar, Bab-Dummad, e-sordaganga sabos siid.
EPH 1:19 Degine, bemar wisguegarbar, Bab-Dummad-e-gangued ibibayobi-gannarba, degi, sogedba anmar-Bab-Jesúsʼgi-bensurmaladga ibmar-imake.
EPH 1:20 We-gangued-gannarbagwadba, Cristo burgwar-maigu, Bab-Dummad gannar Cristo-odulosad. Agine, Bab-Dummad, Cristo Dummadga-guega nibneggi e-argan-nuedsik Cristo-sinonisunnad.
EPH 1:21 We-ganguedbali, Bab-Dummad, Cristoʼgala bela burbamar-gargangued-nikamalad-birgi, degi, burbarmar-negsemamaid-birgi, bur bule dule-dummadga-guega imaksad. Degine, we-ibagangi dummaganga-mamaid-birgi, degi, ibagan-binid-danikoedgi dummaganga-gumaloed-birgi, Jesús bur-dummadga nugsalesad.
EPH 1:22 Bab-Dummad belagwapa Cristo-urbali ibmar urbisad. Degine, Bab-Dummad, Jesúsʼba-nanaimalad-danar-ambikunonidamalad-e-sailaga, Cristo-nug-imaksabalid.
EPH 1:23 Degisoggu, Jesúsʼba-nanaimalad-danar-ambikunonidamalad-belagwapa Cristo-e-sanyobsundo. Degine, Cristo, bela amar-e-ganguedid. Cristoʼgi bela Jesúsʼba-nanaimalad dogar siid. Gwen Cristoʼgi ibmar galakudeeye soglesulid.
EPH 2:1 Bab-Dummad bemar-odulononikid deun, bemar galagwensuli-gudimargu, degi, be-isguedgi be burgwar gudimargu,
EPH 2:2 bemar we napneggi-igar-mamaidba nanadii gusmalad. Nia-saila-burbar-negsemaidba be ibmar-imakdii gusmalad. Emide, amba a-nia-saila-burba dulemar-yapa-Bab-Dummad-itomaladgi alamaknaid.
EPH 2:3 Iduar anmar belagwapa, we-dulemaryob gudii gusmogad. Anmar san-isguedbina-sogedba nanadii gusad. Anmar e-itolegedba-ibmar-imakbiedba nanadii gusad. Degine, anmar anmar-binsaedba ibmar-imakdii gusad. Degisoggu, gusgu-anmar-daedba, baigan-Bab-Dummad-wissurmaladyob, anmar Bab-Dummadse sabsur-odurdaklemogoenad.
EPH 2:4 Emigindi, Bab-Dummad, bela-bela wile anmar-daksoggu, nue dummarba anmar-sabgusad.
EPH 2:5 Degisoggu, amba anmar isguedgi burgwar-gudigu, Bab-Dummad dula-Cristo-imaknonikidyob, dula anmar-imaknonimogad. Bab-Dummad anmar-abonoge-wilubsulinad, degite, anmar-abonononikid.
EPH 2:6 Bab-Dummad Cristo-odulosadyob anmar-odulononimogad, degine, nibneggi Cristo-Jesúsʼba-sigega anmar-imaksad.
EPH 2:7 Adi, yoedse-ibagan-danikoedgi mag daklegegar, Bab-Dummad anmargi nued binsaewilubsulinye. Emigindi, Cristo-Jesúsʼbali bela-bela nued anmargi-binsaedba anmar-bendaknoniye.
EPH 2:8 Ar bemar abonolege-wilubsulinad, emigindi, Jesucristoʼgi-bensulidba Bab-Dummad bemar-abonononikid. Ar bemar na dukin Jesucristoʼgi abonoleged amissulid. Ar Bab-Dummad na e bemarga abonoleged-igar uksad.
EPH 2:9 We-abonolegedi, na be ibmar-imakedgi abonolessulid, adi, bemar mer na san-dummarba imakmalagar.
EPH 2:10 Bab-Dummad anmar-ogwanonikid. Cristo-Jesúsʼgi ibmar-nuegan-imakega anmar-ogwanonikid. Ar Bab-Dummad bato we-ibmar-nuegan iduar mesisad, adi, anmar a-ibmar-nuegan imakegar.
EPH 2:11 Degisoggu be insamalo, be gwalulesmaladi, Judío-dulesur be gwalulesmalad. Judíoʼmar, abgan-uka-duku-sikarmaladye na dukin bimalad. Wemarde, abgan-uka-duku-sikarsurmaladye be-bismalad. We-abgan-uka-duku-siklegedi, dule-imakedid.
EPH 2:12 Epennedi, bemar Cristo-wissuli gudigusmalad. Bemar Israel-dulemargi-akanisurmalad. Degisoggu, Bab-Dummad-Israel-Dulemar-Ebo-Igar-Mesisad geg bemargadga gusundo. We-napneggi Bab-Dummad-sate be gudigusmalad, degine, bendakleged-igar-sate be gudigusmarbalid.
EPH 2:13 Iduardi, bemar Bab-Dummadgi dikasur-bangus gudigusmalad. Emigindi, bemar Cristo-Jesúsʼgi-bengusurmaladba, Bab-Dummad Cristo-e-abegi e-walikaa bemar-imaknonikid.
EPH 2:14 Cristo anmarga gwage-bogidik-imakedsoggu, Judíoʼmar, degi, Judíoʼsurmaladbo oatononikid, neggwebur-unnila-soggwennagwadga imaknonikid. Igi na isdar-dakmaladba neg-abargi galu-emakmala, deyob galu-gwichid Cristo anmarga osulononikid.
EPH 2:15 Cristo e-burgwisadgi isdar-dakmalad osulononikid. Moisés-Igargi igar-sabsur-soglemamaid-e-gangued, degi, e-ibmar-imakleged-e-gangued, obelononikid. Adi, Judíoʼmar, degi, Judíoʼsurmalad na-isdar-dakdimalad, Cristo na egi dulemar-binidga imaknonikid, degi, neggwebur-soggwennagwadga imaknonikid.
EPH 2:16 Degine, Jesucristo nakrusgi-burgwisad-ular, neggwebur-gwabo, Judíoʼmar, degi, Judíoʼsurmalad na abin-abin-imakdigusmalad osulononikid. Neggwebur-gwagwenga imaknonikid. Cristo neggwebur-gwabobela Bab-Dummad-ebo ega igar-naboged imaksad.
EPH 2:17 Cristo-nonikidi, Bab-Dummad-walikaa-gudimaladga, degi, Bab-Dummadgi-dikasur-bangus-gudimaladga Gayaburba-Nuedgi-sunmakega nonikid, dule-gwage-bogidik-saedgi-sunmakega nonikid.
EPH 2:18 Ar Judíoʼmar, degi, Judíoʼsurmalad, bela anmar unnila Cristoʼginbi Bab-Dummad-Burba-Isligwaledba Babse-walikaguega anmar-imaksasunnad.
EPH 2:19 Ar degisoggu, bar bemar, dule-ainebalidsulid, dule-yar-baidginedsurbalid. Bemar, bemar-iduar-Bab-Dummadgi-akananaimalad-yopiramarmogad, bemar Bab-Dummadgi gwenadgan-sunnadmarmogad.
EPH 2:20 Bemar Jesúsʼba-nanaimalad, Jesús-e-sapingan-bur-dummagan-igar-odurdaksamaladgi, degi, Bab-Dummad-gayaburba-barsogmalad-igar-odurdaksamaladgi akwa-neg-sobaledyobi be gumaladid. A-igarmargi be negyob soblesmaladid. We-neg-soblesadi, Jesucristo e-akwasailaga gued.
EPH 2:21 Ar Jesucristoʼgi, we-neg-Jesúsʼba-nanaimalad ise soblegar siid, degi, nasgumaibalid. Adi, anmar, Bab-Jesúsʼgi Bab-Dummadse-goled-neg-islidikidga guegar.
EPH 2:22 Agi bemar, Cristoʼgi-akani, nue-soblemaimarmogad, adi, bela bemar neg-nuedga guegar. A-neggi Bab-Dummad na E-Burbabali anmargi megegar.
EPH 3:1 Ani, Pablo, Cristo-Jesúsʼgi an sunmakdiidbali esgaryagi an mellesisunnad. Bemar-Judíoʼsurmaladga an nue-arbadiid. A-ulale, an anmar-Dummad-Jesucristo-e-Bab-asabinni, an yokorgi sindigar sigdiid.
EPH 3:2 Ar bato bemar Bab-Dummad-anga-arbaed-uksad itosmalargebed, bemarga sogega, dulemar abonole-wilubsulinye, degite, Bab-Dummad nabir na e bemargi-binsaedba bemar-abonodaye.
EPH 3:3 We-igar-dukuarmai-gusad, Bab-Dummad anse oyosad, igi bato iduar an bemarse bipisaar narmaksadyob.
EPH 3:4 Ar an-bemarse-narmaksad be absodmalale, mag be itomaloed, bule an bannase Cristo-igar-dukuar-maid mag an itoge.
EPH 3:5 We-Bab-Jesús-igar-dukuarmai-gusad, dulemar-iduar-ambikusmaladgardi gwen osanaloledsulid. Emigindi, we-igar-dukuarmai-gusad, Bab-Dummad-Burbaba Jesús-e-sapingan-bur-dummagan gwage-swilidikmaladga, degi, e-gayaburba-barsogmaladga osanalolesad.
EPH 3:6 We-igar-dukuarmai-gusad, wedo: Dulemar-Judíoʼsurmalad Bab-Jesúsʼgi-bensulidba Gayaburba-Nued-abingasadgi, Judíoʼmarba-mesa Bab-Dummad-ibmar abingamogoed. Amar san-wargwennayob gunonikid, degi, Bab-Dummad Israel-dulemarga-ibmar-ukoye-sogsad Cristo-Jesúsʼgi egadga gunonimogad.
EPH 3:7 We-Gayaburba-Nuedgi an sunmakewilubsulinad. Ar emigindi, Bab-Dummad, nabir-e-angi-binsasadba, e-gangued-angi-arbasadba, a-ulale, E-Gayaburba-Nuedgi-sunmakega an-nug-imaksad.
EPH 3:8 Ar an-bur Jesucristoʼba-nanaimaladba bur-bipi-inigwele, degite, Bab-Dummad, Judíoʼsurmaladga E-Gayaburba-Nued-Cristoʼgi-soglesadgi-an-sunmakega an-susad. We-Cristo-igar, bur igar-nuedid, dulemar bela-mag-itogosulid-igalad.
EPH 3:9 Degine, belagwapa dulemar-baiganga-oyogega anga igar uklesad. We-igar, Bab-Dummad-bela-we-napneg-naidgi-ibmar-urbisadbi iduar wisi mainad. Emigindi, Cristoʼgi magar itolenonisunnad.
EPH 3:10 Adi, emigindi, Jesúsʼba-nanaimalad-ambikunonidamaladba nibneggi-burbar-dummaganga-gumaid, degine, nibneggi-burbar-gandikidba-gangued-nikmalad, Bab-Dummad-e-binsaed-dummarba-nikad wisgumalagar.
EPH 3:11 Ar gusgu Bab-Dummad na weyob igar-mesisadi, anmar-Dummad-Cristo-Jesúsʼgi bela ibmar imaksad.
EPH 3:12 Emigindi, Cristo-ibmar-imaksadba, degine, Cristoʼgi anmar nue-bensulidba, anmar Bab-Dummadse dobsuli nabir ese dogsunnad.
EPH 3:13 Degisoggu, a-ular, an bemarga sogmarsun, an Bab-Jesús-Igargi bemar-ular-wiledimar-inigwele, mer galakumalo. Ar ade, an bemar-ular-wilediidbali be-nug ogannoledimalad.
EPH 3:14 A-ulale, anmar-Dummad-Jesucristo-e-Bab-asabinni an yokorgi sindigar sigsunnad,
EPH 3:15 ar ade, bela dulemar akar-akar-nibneggi-bukmalad, degi, napneggi-bukmalad Bab-Dummadgi nug nikunonidaed.
EPH 3:16 An Bab-Dummadse egissun, e-gangued-dummarba-nikadba, bemarga e-gangued ukegar. Adi, bemar ulubgi, E-Burbagi ganguegar.
EPH 3:17 Adi, bemar ulubgi Cristo-bensulidba, Cristo bemar-gwagegi megegar. An Bab-Dummadse bemarga egisbar, ar bela-bela-sabguedgi ise-diglegaledgi,
EPH 3:18 bemar bela dulemar-Jesucristoʼgi-akananaimaladba Cristo-sabgued ise mag itoar-gumarmogarsun. Bule Cristo-sabgued matardungue, bule sugubali, bule wilasailabali, degine, bule nibgubali.
EPH 3:19 Deginbali, Cristo-sabgued-dule-geg-bela-wisguedi, a bemar magar-itogemarsun, adi, Bab-Dummad bela-bela bemargi gudii guegar.
EPH 3:20 Emigindi, Bab-Dummad e-gangued-anmargi-arbanaidba, anmar ese ibmar-egised, anmar-ibmar-mag-itoged, bur bule nabir anmarga ibmar imaked.
EPH 3:21 A-ular, Jesúsʼba-nanaimalad-ambikunonidamaladba Cristo-Jesúsʼgi, degisadegu, Bab-Dummad-nug odummoledii gusun. Ar deyobdo.
EPH 4:1 Ani Pablo, Bab-Jesús-nug-ular, an esgaryagi-mellesiid-duled, an bemarse ise-wilesakwaa egismar, be nue nanamar. Ar igi Bab-mimmigan nanaewilubmala, deyob be nanamar.
EPH 4:2 Bipisaale mer be san-dummarba na be imakmalo. Binnalegwadgi be ibmar imakmarbalo. Melle be itosur sae-itomalo. Na be sabmaladgi, nossurmaladyob be muchub-muchub dakmalo.
EPH 4:3 Bab-Dummad-Burbagi ulubgi-bogidikidgi be alamaknai imakmar, adi, na be danakwaa gudii gumalagar.
EPH 4:4 Unnila Jesúsʼba-nanaimalad san wargwennaa gued, degi, Bab-Dummad-Burba wargwennaa gubalid. Degine, Bab-Dummad, abonoleged-igar-soggwennaa-maid-nikuega bemarse gochad.
EPH 4:5 Unnila Jesúsʼba-nanaimalad-e-Dummad wargwennaa gued. Akar-akar-Jesúsʼgi-bensuliguled sated. Bab-Jesús-diigi-ogleged-igar gwennaa gubalid.
EPH 4:6 Bab-Dummad unnila wargwennaa gued. A-Bab-Dummad bela dulemar-e-babad. A-Bab-Dummad belagwapa dulemargi negsemaid, a bela dulemargi arbanaibalid, degi, bela dulemarba gudibalid.
EPH 4:7 Degi-inigwele, Cristo nabir-anmargi-binsaedba na e-itolegedba, igi-mergu-gurgin-ukbiedba bela anmarga akar-akar uksad.
EPH 4:8 Degisoggu, a-ular, Bab-Dummad-Garda wegi-soged: “Nibnegse nakwisgu, dule-galesmalad eba sesad, Dulemarga gurgin-nuegan uksad.”
EPH 4:9 (¿Ar wede, ibi obarsunna, nibnegse nakwisye? A sogledo, Jesús napase aidesye.
EPH 4:10 Ar dule-aidesadi, amba e-sunnad niba nakwisbardo, adi, bela niba, degi, napneggi, neg-gaegar.)
EPH 4:11 Bab-Jesús-sunnad na e-sordamarga akar-akar gurgin uksad. Gwenna-gwenna E-sapingan-bur-dummaganga nug-imaksad. Baigandi, Bab-gayaburba-barsogedga nug-imaksad. Baigan, Bab-Jesúsʼgi-Abonoleged-Igargi-sunmakega nug-imaksad. Degi, baigan Bab-Jesúsʼba-nanaimalad-iduedga, degi, Jesús-igargi dule-bamalad-odurdakega nug-imaksad.
EPH 4:12 Wemar Jesucristoʼgi-akananaimalad-odurdaksad, adi, Bab-Jesúsʼga arbaegar, degi, gatik Bab-Jesús-igargi nasgumai guegar.
EPH 4:13 Degidbali, bela anmar na danakwaa wargwennayob Cristoʼgi-bensuli gumalagar, degine, Bab-Dummad-Machi-gatik-nue-magar-dake gumarbaligar. Anmar Jesúsʼba-nanaimalad, nue-nasgumai Cristoʼyobidse gumalagar.
EPH 4:14 Deyob anmar gusale, anmar bar mimmigan-baisursunna-binsaed-galegedyob guosulid. Anmar baisursunna igar-baiganse binsaed-galedii guosulid, eba ebipiledii guosulid. Adi, anmar dulemar-emar-yardakmaladse, yamo-binsaed-nikadyob-sunmakmaladse, mer baisursunna binsaed-galedii gumalagar.
EPH 4:15 Unnila anmar sabedgine, igar-napiragwadgi-nadapi, nue bela ibmar-nuegangi, Cristoʼgi-nasgumai gumalagar. Ar Cristo bela Jesúsʼba-nanaimalad-e-sailaga gusiid.
EPH 4:16 Ar anmar Cristo-sanyob-gumarsoggu, Cristo anmarga war-wargwen-arbaed-uksadbali, egi-akaega anmar-imaked. Degine, bela war-wargwengi na muchub-muchub bulakwa-arbaega anmar-imaked. Adi, bela Jesúsʼba-nanaimalad sabguedgi nasgumai-nasgumai guega, degi, bela-bela gangumai-gangumai gubaligar.
EPH 4:17 We an bemarga soged, Bab-Jesúsʼgi weyob abeleged: Mer be dulemar-Bab-Dummad-wissurmaladyob bar damalo. Ar amardi, binsaed-isganagi gudimalad.
EPH 4:18 Ar amardi, e-binsaedgi galagwensuli gudimalad. Bab-Dummadgi-dula-gudigued gwen niksurmalad. Amar yapa Bab-Dummadba-ibsamaladba, a-igar-wissuli gudimalad. Deyob gudimarsunnad.
EPH 4:19 A-dulemar gwen bar binge itosurmalad. Isguedga na san urmaksa gudimarsunnad. Bela ibmar-sunnasur-imakdimaladgi na wergudimarsunnad.
EPH 4:20 Ar bemardi wegi-galagwensulidaedi, ar Cristoʼgi be gwen deyob durdaksasurmalad.
EPH 4:21 Ar bemardi nue Cristo-igar itosmalad. Ar nue Cristo-igargi bemar odurdaklesmalad, degi, igar-napiragwad Jesúsʼgi-maidba be odurdaklesmarbalid.
EPH 4:22 Epenne be igar-seredba-nanadigusad, be metemarsun. Ar a-igardi bato isgus maid, unnila dulemar-yardakedgi binsamaid.
EPH 4:23 Degisoggu, be binsaed obinomarsun.
EPH 4:24 Degi, be igar-nuegan sumarsun, adi, dule-gwapidga be gumalagar. Ar Bab-Dummad na eyob bemar-obinnisad, adi, igar-napiragwadgi, degi, gwage-swilidikidgi be innikii nanamalagar.
EPH 4:25 Degisoggu, be gakansaed mimarsun, unnila be igar-napiragwadgi na ga be sunmakmarsun, ar ade, anmar bela Cristoʼgi unnila san-wargwennaa gumalad.
EPH 4:26 Be urwele, mer we-urwed isguega be-imakega be sao. Degine, be ulusale, mer egi be bar binsadii sao. Ulusar, abga ies be imako.
EPH 4:27 Adi, mer nia-sailaga be-san be ukegar.
EPH 4:28 Ar dule ibmar-atursaerbale, mer bar ibmar-atursao. Emigindi, arbao, adi, e-arbaedgi, dulemar-baigan-ibmar-abedimaladga sunna ibmar-ukmogoed.
EPH 4:29 Gaya-isgana mer be sunmako. Unnila be gaya-nueganbi-sunmako, adi, nabir be dule-baigan-ogannogega, baigan-be-itobukmalad yeer-ito be imakegar.
EPH 4:30 Mer Bab-Dummad-Burba-Isligwaled bukib-binsaed be imakmar, ar Bab-Dummad-Burba-Isligwaled wilubga bemargi nagunonikid, adi, Bab-Dummad bela-isguedgi-bemar-onogoed-ibaganse bemar mag daklemalagar, be Cristoʼgad gumalad.
EPH 4:31 Bemargi, bela isdar-itoged, sae-itoged, urwed-naid, binnasur-aimarse-urwed, dulemar-ukabsaed, degine, bela isdar-binsaedgi-ibmar-imaked, osulomarsun.
EPH 4:32 Unnila na be yeer-itogedgi muchub-muchub bendakmar, na be wile dakmar. Degi, na egi be warmaksamalale, ar igi-Bab-Dummad be-isgusad Cristoʼgi bega-osulosmoga, deyob ies na be imakmarmo.
EPH 5:1 Degisoggu, bemar Bab-Dummad-mimmigan-sabesailadmarsoggu, Bab-Dummad-daedba be damarsun.
EPH 5:2 Degi, sabguedgi be nanamar, ar igi Cristo anmar-sabgusmoga, degine, ise-wawadik Bab-Dummadga ibmar-ogumakar-uklegedyob anmar-ular na e-san uksamoga, ayob be nanamar.
EPH 5:3 Ar bemar Jesucristoʼgi be akananaimarsoggu, bipisaale, bemargi we-ibmar soglegewilubsulid: Abirgunagwarsuli negsichigi-nanaleged, galagwensuli-nanaleged-igar, ibmarbina surbinsa-itoleged-igar.
EPH 5:4 Deginbali, melle weyob be sunmako: Gaya-isganase-bakale, mer egi be sunmakmar, mer binsa galagwensuli be sunmakmar, mer sunnasur gaya-isganagi-sunmaklemaladgi be sunmakmar. Suli, we-gaya-degimalad, ibnuedsulid. Bur Bab-Dummadga dog-nuedye, be sogmar.
EPH 5:5 Ar bato bemar wisid, dule abirgunagwarsuli-na-negsichigi-yolediidi, dule galagwensuli-gudiidi, degi, dule dogdar-ibmarbina-surbinsa-itodiidi, (we-ibmar e-bab-dummadga na imakdiid), Cristo-negdakmaidse, degi, Bab-Dummad-e-negdakmaidse, doged-igar ega gwen maisulid.
EPH 5:6 Mer dulemar-emar-binsaed-gaega yogasaar-sunmakmaladse be yardaklemalo. Ar Bab-Dummad, eba-dasurmalad galagwensulidaedbali, sabsur-odurdakdedaed.
EPH 5:7 Degisoggu, amar-degidamaladbali, mer eba ibmar-isgana be imakmar.
EPH 5:8 Ar epennedi, bemar negsichigi galagwensuli gudigusmalanad. Ar emigindi, bemar, Bab-Jesúsʼgi neg-meegwadgi gudimalad. Degisoggu, Bab-Dummad-mag-daked-dule na be san oyomar,
EPH 5:9 (ar Bab-Dummad-mag-daked-dule weyob daed: Bela igar-nuegangi nanae, igar-innikigwadbi imake, degine, igar-napiragwadbi sae),
EPH 5:10 degi, be durdakbarmarsun, igid-igar Bab-Jesús-nabir-ito imakedi.
EPH 5:11 Mer ibmar-isgana-negsichidgi-imaklemalad be imakmar. Dulemar-deyob-ibmar-imakmaladga bur be oyoge, emarde nue nodimarye.
EPH 5:12 Ar ade, bemar we-dulemar-ibmar-isgana-dukuar-imakdiidgi-sunmakedbela ibnuedsulid, agi be sunmaked be binge-itogewilubbid.
EPH 5:13 Ar bela ibmar gwallu-meegwadse onolesale, mag dakledaed, we-ibmar ibmar-isganamarye. Ar gwallu bela ibmar-mag-dakle imaked.
EPH 5:14 Ar a-ulale, sogleged: “Be gabmaid, ataksun, dulemar-burgwarmalad-abargi be gwisgusun, degi, Cristo gwallu-meegwadga bega gunonisunnoed.”
EPH 5:15 Degisoggu, be-daedgine nue be nanamarsun, melle dule-ibmar-wissurmaladyob be damar, dule-nue-ibmar-wisidyob be nanamarsun.
EPH 5:16 Ibagan-nagumaidgi nue egi be gudii imakmar, ar ibagan-isganade bukidargusad.
EPH 5:17 Degisoggu, melle binsaedsuli be nanamar. Aka bur be Bab-Jesús igi-nanabi bemar-abemai, a bur be imakdii gumar.
EPH 5:18 Degine, melle be mumgumar. Ar mumguedi, galagwensuli dule-onanae imaked. Bur bela-bela Bab-Dummad-Burba-Isligwaledse-seledii na be imakmar.
EPH 5:19 Na be muchub-muchub salmosʼgi namakmar. Bab-Dummad-nug-odummoged-namaklegedgi be namakmar, burba-ogannoged-namaklegedgi be namakdii imakmar, degi, Bab-Jesús-nug ogannodii be-gwagegi be imakmarsun.
EPH 5:20 Anmar-Bab-Jesucristo-nuggi, Bab-Dummad-anmar-babga, bela dogdar-nuedye sogdigu be imakmarsun.
EPH 5:21 Bab-Dummad-dobekwaa-nanaedgi na be muchub-muchub urbaligwa-nanadii gumalo.
EPH 5:22 Omegan-sui-nikmalad, na be-sui-urbaligwa nanamar. Igi Bab-Jesús-urbalikwaa be nanadimala, deyob be-sui-urbaligwa be nanamar.
EPH 5:23 Ar sui, ome-e-dummadga gued. Deyobi, Cristo na eba-nanaimalad-e-dummadga gumogad. Degi, Cristo, eba-nanaimalad-e-Abonogedga gubalid. Degisoggu, Jesúsʼba-nanaimalad, Cristo-e-sanga gusiid.
EPH 5:24 Degisoggu, ar igi Cristoʼba-nanaimalad Cristo-sogedba nanadii, debayobi omegan e-sui-urbaligwa bela nanamogoed.
EPH 5:25 Ar igi Cristo na eba-nanaimalad-sabgusa, degine, Bab-Dummadgadga-imakega eba-nanaimaladbina-burgwisa, deyobi, machergan, be-ome na be sabgumar.
EPH 5:26 Ar Cristo, deyob eba-nanaimalad E-Gayaburba-sogedba, degi, Bab-diigi-ogleged-igar-imaklegedba swilidik imaksad.
EPH 5:27 Adi, Cristo, eba-nanaimalad nue-swilidikidgi, isgued-naisulidgi, bela yeerdaklege, gwen gutu-naisuli, bapi-bapidsuli, bela nued-daklege, deyob na ega-ukega, na eba-nanaimalad-imaksad.
EPH 5:28 Ar sui, igi Cristo na eba-nanaimalad-sabgue, deyob, na e-ome-sabgumogargebed. Ar sui, igi na e-san sabgue, deyob, na e-ome-sabgumogo. Ar dule na e-ome-sabele, dukin na e-san sabgued.
EPH 5:29 Ar dule bipisaale e-san geg na isdardaked, bur bule e-san na nued akwed, degi, nue na masgi ogunbalid. Ar deyob, Cristo na eba-nanaimalad-imakmogad.
EPH 5:30 Ar ade, anmar Cristo-e-san-mesadid. Anmar, e-san gued, degi, e-galagan gued.
EPH 5:31 “A-ulale, machered e-babgi bangudoed, e-nangi bangudoed. Geb machered e-ome-ebo garmakdii guoed. Ebogwadi, san-wargwennagwadga gunonikoed.”
EPH 5:32 We wargwenna-gunonidaedi, igar-dummadid, nue aku itolegedid. We degi-an-sogedi, Cristo, degine, na eba-nanaimalad-ebo-igar-maidgi an deyob soged.
EPH 5:33 Degisoggu, bemar na wala-walagwen, ar igi na-be-san-sabmala, deyob na-be be-ome sabgumogoed. Degine, ome, e-suigi binsaed-nikaa nanadii guoed.
EPH 6:1 Mimmigan, Bab-Jesús-nuggine, nue be-babganba uaya-nikaa be damalo, ar we, igar-nuedid.
EPH 6:2 “Be-babba, degine, be-nanba be ibsadii nanamalo.” Deuteronomio 5:16a Ar we bur igar-sunsogedid. Agi Bab-Dummad anmarga sogsad: “Weba be damalale, ibmar-nued an bega ukoye.
EPH 6:3 Adi, bemarga bela igar-nueganbi naegar, degine, adi, we-napneggine bemar sereddii megegar.”
EPH 6:4 Degine, babgan, bemarmoga, mer binsa be-mimmigan-ourwed be sao. Suli, degisuli. Bur be Bab-Dummad-urbaligwa-nanaedgi be odurdako, degine, Bab-Dummad-igar-nuedgi-unadii be imako.
EPH 6:5 Maigan, bemar be-dummagan-we-napnegginmaladgi nue eba be uaya-nikaa damalo, dobekwaa egi be gudimalo. Mer egi be isdaradgi-gudii gumalo, egi-nued-binsaedgi be damalo, Cristoʼga-arbanaiyob be imakmalo.
EPH 6:6 Be nue arbamar. Mer be be-dummad-be-dakdiidginbi arbamalo, be ega oyogega be nued arbamar-dakleye. Ar bemar Cristo-maiga-gusoggu, Bab-Dummad-sogedba be nue ulubgi ise-arbaar imakmar.
EPH 6:7 Bemar nue weligwar ulubgi ise-arbaar be imakmar. Bab-Jesúsʼga-arbanaiyob be imakmar, dulemarga arbanaisuliyob be imakmar.
EPH 6:8 Ar be nue-wismalad, be maiga-gudiidgindibe, maiga-gudiidginsurdibe, gwenna-gwenna be ibmar-nued-imaksadba, Bab-Jesús bemar-bennukoed.
EPH 6:9 Degine, dummagan, bemarmoga, be mai-nikmalad, bemar be-maigan be nue akwemarmogo, mer be be-mai-sabsur-imakmalo. Nue be insamalo, bemala, degi, be-maigan, dummad-wargwenna nikamalad. We-bemar-Dummadi, nibneggi maid. A-Dule-Dummadi bela emarbi dulemar-dakmaid.
EPH 6:10 Emigindi gwenadgan, Bab-Jesúsʼgi gandik be akamar. Cristo-e-ganguedgi gatik be gangumai gumarsun.
EPH 6:11 Igi sordamar urwenasokalir, urwed-mor yosdamala, deyob Bab-Dummad-e-gangued-burbaled-uked be yomar, adi, nia-saila bemar-yardakarsogele, bemar nia-saila-abin ganna gwisguegar.
EPH 6:12 Ar anmar dulemarbo urwenanaisurmalad, burba-gandikidba-gangued-nikmaladbo urwenaid, anmar burba-isgana-dummaganga-gumamaidbo urwenaid, we-napnegsichidnaid-isganamar-semamaid-e-dummaganbo urwenaid, degine, niba niamar-e-dummagan-gudimaladbo anmar urwenaid.
EPH 6:13 Degisoggu, a-ulale, bemar Bab-Dummad-e-gangued-uked-e-mor-burbaled be yomarsun, adi, bemar ibagan-isganagi nabir bela ulusad-sorba amba gandik gwichi guegar.
EPH 6:14 Degisoggu, be gandik gwisgumar. Nue salakarmar. Ar igi sordamar urwed-idu guakwaa gudiguegala, e-saderba molidub-nasikdamala, deyob be Bab-Dummad-igar-napiragwad-wisidba be guakwaa gudigumar. Mer nailikguega, igi sordamar na binasgargi arsoged yodamala, deyob be igar-innikigwadgi nanamar.
EPH 6:15 Ar igi sordamar bato naegala, guakwaa sapat-yoi gudidae, deyob be Bab-Gayaburba-Nued-gwage-bogidik-saed-barsogega, be guakwaa gudisamar.
EPH 6:16 Ar igi sordamar na e-sigu-abgaedgi dukue, deyob be Jesucristoʼgi napiragwadgi-bensuli be nanamar. Adi, sunna bemar sigu-gwabunyearmalad nia-saila-miedi, oginnegar.
EPH 6:17 Igi sordamar nono-arsogega bormo-gurgin e-nonogi-sii dae, deyobi abonoleged-igargi be nanadii imako. Degine, nia-abinsaega, Bab-Dummad-Burba-e-es-suid be sue. We-es-suid an bega sogedi, Bab-Dummad-e-gayaburba gued.
EPH 6:18 Bab-Dummad-Burbaba bela-bela be Bab-Dummadse gordii imako. Babse-akar-akar-gorlegedgi, degine, bela ese ibmar-egisedgi be Bab-Dummadse gole. Be guagwar gudii imakmar, degine, bela Jesucristoʼgi-akananaimaladga Bab-Dummadse be gordigu imakmar.
EPH 6:19 Degine, be anga Bab-Dummadse gormarmogo, adi, Bab-Dummad-Igargi an sunmakdele, Bab-Dummad anga an-ibmar-soged ukegar, degine, an dobsuli e-Gayaburba-dule-sunna-abonoged-epenne-dukuar-maigusadgi an sunmakegar.
EPH 6:20 Ar ade, Bab-Dummad-nuggi-an-sunmakdiid-ular an esgoro-dubgi emi an edilles mellesisunnad. Anga Bab-Dummadse gatik gormalo, adi, an dobsuli we-Gayaburbagi an sunmakegar. Ar deyob an dobsuli sunmakergebed.
EPH 6:21 Tíquico, anmar-gwenad-sabed, degi, Bab-Jesúsʼga-arbadiid-dule, a-dule, gwen galakudisulid, a bemarga sognadapoed, igi an gudii, degine, ibimar an imaknaibali.
EPH 6:22 Ar a-ulale, an bemarse Tíquico-barminaid, adi, be wisgumalaga igi anmar gudidii, degine, adi, bemar-gwage-ogannomalagarbar.
EPH 6:23 Gwenadgan, Bab-Dummad-anmar-babga-gumaid, degi, Bab-Jesucristo, ulubgi bogidik bemar-ito imaksun. Degine, sabgued, degi, egi bensulid, bemarga ukbarsun.
EPH 6:24 Deginbali, Bab-Dummad bela-anmar-Dummad-Jesucristo-nue-sabmaladgi nued binsasun.
PHI 1:1 Ani Pablo, degi, Timoteo anbo, Jesucristo-e-maimalad. Anmar Filipos-neggweburgi belagwapa Cristo-Jesúsʼgi-akananaimaladse, gwenadgan-Jesúsʼba-nanaimalad-e-dummaganse, degi, Jesúsʼba-nanaimalad-bendakdimaladse, we-garda barmisimalad:
PHI 1:2 Bab-Dummad anmar-Bab, degi, Dummad-Jesucristo, bemargi nued binsamarsun, degi, ulubgi bemarga gwage-bogidik uksabarmarsun.
PHI 1:3 An bemargi binsadele, an-Bab-Dummadga an dog-nuedye sogdedaed.
PHI 1:4 Bab-Dummadse an bemarga goled-irba, an weligwaledba Babse gordaed.
PHI 1:5 Ar ade, bemar Bab-Dummad-Gayaburba-Nued-abingasmalad-akar, emidse, amba be agi alamaknanaid.
PHI 1:6 Ar we an bensulid: Bab-Dummad bemargi ibmar-nued-imakdedi, Jesucristo-gannar-danikoed-ibase, gatik bemargi ibmar-nudakmai imakoed.
PHI 1:7 Ar weyob an bela bemargi binsaed, ar ade, an bemar-nue-sabed. Ar an esgaryagi mellesidibe, an Bab-Dummad-Gayaburba-ular, dummagan-asabin sunmakgwisdibe, deginbali, an Bab-Dummad-Gayaburba-Nued gatik bargindinadibe, bela bemar Bab-Dummad-nabir-angi-binsaedba we-arbaed-anga-uksadgi be an-barmaknai damarmogad.
PHI 1:8 Bab-Dummad nue-an-wisid, Jesucristo-e-sabesailadgi an bela-bela bemar-sabmalad.
PHI 1:9 We an Bab-Dummadse egised: Bemar-sabguedi, bitigi bela-Bab-igar-nue-wisiguedgi, degi, bela-mag-neg-itoguedgi, nasgumai-gusana gadinye.
PHI 1:10 Adi, bemar nabir igar-nueganbi sunai guega, degi, Cristo-danikoed-ibagi, bemar san swilidik guega, degi, mer bemargi soglebaliga, bemar galagwensuli gudimarye.
PHI 1:11 Ar dulemar Bab-Dummad-nug-odummomalaga, bemar Jesucristo-nuggi ibmar-nueganbi oyodii gumaloed.
PHI 1:12 Gwenadgan, bemar wisgubi an abedo, ibmar-angi-akargusmaladi, aka bur bule Bab-Dummad-Gayaburba-Nued-onasogega gusad.
PHI 1:13 Ar emide, bela Roma-Dummad-César-neguyagi sordamar-neg-dakmalad, degi, bela dule-bamalad, nue-wismalad, an Cristoʼba-naid-ular, esgaryagi mellesiiye.
PHI 1:14 Gwenadgan-bukidar esgaryagi-mellesi-an-dakedbali, Bab-Dummadgi gangudmalad. Gwenadgan dobsuli, degi, Bab-Jesúsʼgi-bur-bensulidba Bab-Dummad-gayaburbagi sunmakdemalad.
PHI 1:15 An wisdo, gwen-gwen angi-nobedba, degi, anbo bengubiedba Cristo-igargi sunmakdimalad. Baigandi, gwen-akar-binsasuli, nuedgi, Cristo-igargi sunmakdimalad.
PHI 1:16 Wemar nue-sabedba Cristo-igargi-sunmakdimaladi, nue-wismalad, an Bab-Dummad-gayaburba-ular, dummagan-asabin-gwisguega an esgaryagi mellesiid.
PHI 1:17 Ar baigandi innikigwadginsuli, unnila na san dukin-odummogega Cristo-igargi sunmakdimalad. Amala, an esgaryagi-mellesiidgi bur bule-gatik-nunmak-an-imakmalad abemalad.
PHI 1:18 Ar Cristo-igargi gwage-innikigwadgi sunmakdidibe, surdibe, akarsulid. Ar Cristo-igargi sunmaklenaido. We, weligwar an-imaked, deginbali, an wergudii gubaloed.
PHI 1:19 Ar an wisid, bemar anga Bab-Dummadse-goled-ulale, degi, Jesucristo-Burba-an-bendaked-ulale, we, an-esgaryagi-mellesiidgi, an-onogega guoed.
PHI 1:20 Ar an bela-bela ibmar-abegedba, degi, an bensurbalidba, Bab-Dummad bingeguega an-imakosulid. Aka bur bule an bensulidgi, igi Cristo-nug an-sangi-odummoledii, emi degisadegua, an dula gudiidgindibe, an-burgwedgindibe, Cristo-nug an-sangi odummolebaloed.
PHI 1:21 Ar angardi dula-gudiguedi, Cristoʼgarbi gudiguedid. Burgweddi, ibmar-nued egi nikuleged.
PHI 1:22 Ar an we-napneggi dula-gudiguedi bur-gatik Cristoʼga-arbaega an-imakele, an aku itosunnad, we-sogbogwad igid bur an suoe.
PHI 1:23 Ar sogbobela anga ibnuedid: An burgwebied, adi, an Cristo-walik gudii saegar. Ar a bur ibnuedid.
PHI 1:24 Degi-inigwele, ar an bemar-ular we-napneggi-dula-gudiguedi bur nuedsunnad.
PHI 1:25 Ar an bensursoggu, an wisdo, an bemar-bendakega amba bemar-abargi an beoed, adi, bemar gatik Bab-Jesúsʼgi-bensulid nikumalaga, degi, bemar weligwar-gudii gumarbaligar.
PHI 1:26 Degisoggu, an gannar bemarse nonikile, bemar bur bule Cristo-Jesúsʼgi wergumaloed.
PHI 1:27 Degisoggu, unnila Cristo-gayaburba-nued-soglemaidba be damarsun. Ar an bemarse ataknaddibe, an bemarse nadsurdibe, unnila an itobied, bemarde na wargwennayobi danakwaa gudimarye, degi, Bab-Dummad-gayaburba-barsogega na danakwaa arbananaimarye.
PHI 1:28 Be-isdarmalad mer be dobgumala. Ar be weyob-damaladi, be-isdarmaladga oyonaid, emardi bergumaloye. Ar bemargardi abonoleged-e-wilub gued, wedi Bab-Dummadgi danikid.
PHI 1:29 Ar bemarga unnila Cristoʼgi-bensurguedbi uklessulid, bemarga uklesbalid, Cristo-nug-ular naibi-itodii gued.
PHI 1:30 Ar iduar, an Cristo-ular igi-wiledigusa bemar daksad. Ar deyobi bemar wilenaimarmogad. Emi, amba an deyob-wilediid, bemar nue-wisid.
PHI 2:1 Degisoggu, bemar Cristoʼgi-akanaidgi gangued-nika be itomardibe, e-sabguedgi be-ogannomar be itodibe, E-Burba-Isligwaledgi na be walikaa gudimardibe, na be wile dakdimardibe,
PHI 2:2 na be nuedgi-gudidimaladgi, weligwar-ito be an-imakmala. Na be muchub-muchub sabgubukmaladgi, na be emarbi binsaedgi, degi, na be emarbi ibmarbina-sogedgi, weligwar-itoge be an-imakmala.
PHI 2:3 Na be san-dummarba-imakega, degi, dule-baiganbo-benguega, mer be ibmar imakmalo. Na be san-bipi-imakedgi ibmar-imakmala, degi, dule-baigan bemarba-bur-dummadyob be dakmaloed.
PHI 2:4 Mer be na be-sanginbi binsamalo, gwenadgan-baigangi be binsamogoed.
PHI 2:5 Ar igi Cristo-Jesús na dukin san-bipi imaksa, debayobi, bemar binsamarmoga.
PHI 2:6 Ar Cristo-Jesús gusgu Bab-Dummad gued, Bab-Dummaddeeye na bar-binsassulid, agi alamaknai gussulid.
PHI 2:7 Aka bur Bab-Dummadsuliyobi na imaksad, maiga na san-imaksad, degi, dulega na san-imaksad.
PHI 2:8 Jesús nue-dule-sunnadga gunonigu, dukin na san-bipii imaksad. Bab-Dummad-sogedba burgwedse ibsasad, nakrusgi bioklegar burgwisad.
PHI 2:9 A-ulale, Bab-Dummad, Cristo-Jesús dulemar-baiganba bur bule dummadga imaksasunnad. Ega bur dule-baiganba nug-dummarba-gued uksasunnad.
PHI 2:10 Adi, belagwapa nibneggi-bukmalad, napneggi-bukmalad, degi, napneg-urba-bukmalad, Jesús-asabin yokorgi sindigar sigmalagar.
PHI 2:11 Degi, belagwapa sogmalaga, Jesucristo bur-Dule-Dummadye, adi, Bab-Dummad-nug odummolegegar.
PHI 2:12 Degisoggu, an-gwenadgan-sabesailamalad, an bemar-abargi-gudigusgu, bemar gusgu an-ibmar-sogedba ibsadamalad. Emigindi, an bemarba-gudisulidgi bur bule be anba ibsamala. Bab-Dummad-dobegwadgi, degi, Bab-Dummadgi-nue-binsaed-nikagwadgi, be-abonolesadgi be alamaknai samala.
PHI 2:13 Ar Bab-Dummad na e-nued-binsaedbali, bemargi ibmar-nued-imakedbinasoged, degi, ibmar-nued-imakbied nasiked.
PHI 2:14 Mer bemar ibmar-isdar-itogedgi, degi, mer na abin-abin-imakmaladgi, be ibmar imakmala.
PHI 2:15 Adi, mer bemar isgumalaga, degi, dulemar mer bemargi sogmalaga, bemarde galagwensuli gudimarye. Ar bemar Bab-Dummad-mimmigan-gumarsoggu, dulemar-galagwensuli-gudidimalad-abargi, degi, dulemar-isganamar-abargi, gutu-gwen-naisuli gudii gumalargebed. Ar bemar we-napneggi niisgwamar-gaedyobi gumalad.
PHI 2:16 Melle San-Burba-Dulagudigued-Gayaburbagi be bengumalo. Adi, Cristo we-napnegse gannar danikile, an bemargi yeer-itogwichi guoed. Deyobi, an wisguoed, an Bab-igarba-nanasadi, degi, an Bab-Jesúsʼga-arbadigusadi gwen an binsa arbassurye.
PHI 2:17 Bemar Bab-Dummadgi bensurmalad, degi, Bab-Dummadga ibmar imakmalad. Wemala, Bab-Dummadga-ibmar-uklegedyob gued. An-oburgwemalodibe, ar deyobile, an-burgwisadi bemarga Bab-Dummadga-ibmar-ukmalad-birgi napi-e-nis-eolegedyob gued. Ar deyob gunonikile, an weligwar itogoed, degi, an bemarbo werguoed.
PHI 2:18 Deyopira bemar wergumarmoga, degi, anbali wergumarbali.
PHI 2:19 Bab-Jesús-sogedba emisgwasaar an bemarse Timoteo-barmidoed, adi, an bemar nueganbi-gudiiye-gwisgualile, an nue-yeer itogoed.
PHI 2:20 Ar an be-sabmaladyobi, dule-baid sated. Unnila Timoteoʼbi deyob be-sabmarmogad, degi, bemarba nue-bukib binsabalid.
PHI 2:21 Ar bela dule-baigandi na eginbi binsamalad, Jesucristo-ibmargindi binsasurmalad.
PHI 2:22 Ar bemardi bato nue wismalad, igi Timoteo na e-daed oyodii. Ar bemar wisbalid, igi Timoteo an-machiyobi Bab-Dummad-Gayaburba-Nued-berbegedgi an-bendakdibali.
PHI 2:23 Degisoggu, igi-anga-wegi-igar-guoed an wisgusale, yog-barmiar an bemarse Timoteo-imakoed.
PHI 2:24 An Bab-Jesúsʼgi bensulid, an bemarse emisgwasaar nadapmogoed.
PHI 2:25 Emigindi, an-gwenad-Epafrodito, anbo-arbaed-dule, degi, Bab-Jesús-igargi-anbo-alamakdiid-dule, bemarse-gannar-barmided bela-bela abele an itodo. We-dule, an-ibmar-abegedgi an-bendakega be anga barmiar gusmalad.
PHI 2:26 Epafrodito bela-bela gannar nue bemar-dakbied. Beedse nue-oakudii gusad, ar ade, bemar gegumaiye wisgusmalad.
PHI 2:27 Ar nue-napiragwa, Epafrodito bela-bela uellemai gusad, burgwednaga gusad. Ar Bab-Dummaddi nue-wile daksad, degi, nue-wile an-daksamogad, adi, an-eba-wile-itodiidgi mer bur bule an wile-itogegar.
PHI 2:28 A-ulale, an bemarse gwae Epafrodito barmisiid, adi, bemar Epafrodito-dakalile, wergumalaga, degi, anmoga bar an wile mer itomogogar.
PHI 2:29 Bab-Jesús-nuggi weligwaledgi bemar Epafrodito abingamalo. Deginbali, bemar dulemar-Epafroditoʼyob-damalad-e-nug be ogannomala.
PHI 2:30 Ar Epafrodito Cristoʼga-arbaed-ular burgwednaga gusad. Ar bemargi an dikasur-maisoggu, bemar-sunnad geg an-bendakmarsunnad. A-ulale, bemar-nuggi anga-arbaega, Epafrodito na san sabsuli uksa gusad.
PHI 3:1 Deginbali, gwenadgan, Bab-Jesúsʼgi wergumarsun. Angardi an gannar-gannar bemarga ibmar-narmakedi gwen akar an itosulid. Ar an gannar-gannar narmakedi, bemarga ibnued gued.
PHI 3:2 Dulemar-achuyob-damaladgi nue-salakarmar. We-dulemar-ibmar-isgana-imakmaladgi nue-salakarmar. We-dulemar Bab-Jesúsʼba-naiguega abgan-uka-duku-sikergebye-sogmaladgi, nue-salakarmar.
PHI 3:3 Ar anmardi burbar bur abgan-uka-duku-sikarmaladid. Ar ade, anmar Bab-Dummad-Burbaba Bab-Dummad-nug odummodimalad, ar anmar Cristo-Jesúsʼginbi san-dummarba itodimalad, ar anmar, abonolegega, dulemar-e-ibmar-imakedgi benmaladid.
PHI 3:4 Ar an dulemar-ibmar-imakedgi-bensurguega ibmar-soged sunna an sogmogad. Ar dule-baid dule-ibmar-imakedgi bensurye-sogele, andi bur bule a-duleba we-ibmar-soged nikad:
PHI 3:5 Ar an gwalulesgu, ibabaabakgi (8) an-abgan-e-uka-duku siklesad. An Israel-duled, Benjamín-wagwad, an Hebreo-dule-sunnadid. An Judíoʼmar-igar-mamaid-odulogedsiki, an Fariseo-sordad.
PHI 3:6 Ar an, igar-baidba dulemar-nanabisur-abeged-ular, an Jesúsʼba-nanaimalad-baregindii gusad. An Moisés-Igar-Mesisadba nue-nanadigussoggu, dule geg annik-soged, an a-Igar-Maidba ibsassurye.
PHI 3:7 Degi-inigwele, iduar we-ibmarmar bela anga ibnueganbi an dakdigusanad. Emidi, an Cristo-sabed-ular, bela we-ibmarmar, ibmar-isganayob an daknonikid.
PHI 3:8 Ar napiragwad, an-Dummad-Cristo-Jesús an bur bela-bela-wisgubied-ular, we-ibmarmar an indaksad. Ar an Cristo-sabed-ular, bela we-ibmarmar, ibmar-isganayob an daked. Degi, an Cristo-nue-baramiega we-ibmar binsa-ibmar-isgana-milegedyob an daked.
PHI 3:9 Deginbali, Bab-Dummad Cristoʼgi-nue-akanai an-dakbaligar. Moisés-Igar-Mesisadba an-isgussuliyob-dakleye-sogleged an abesulid. Ar unnila Cristoʼgi-bensur-gunonikidba isgussuliyob-dakleged an abeged. Dule-isgussuliyob-dakleged Bab-Dummadgi danikid. We-igar, dule Cristoʼgi-bensuliguedba nikued.
PHI 3:10 An bela nue-Cristo-wisgubied-ular, bela ibmarmar-an-imaksad an meted. Unnila na e-gannar-durgusadgi gangued-oyolesadi an nue itobied. E-wilesadgi an wilebied, degi, e-burgwisadgii an burgwebimogad.
PHI 3:11 Deyobi, an dulemar-burgwismalad-abargi, an gannar-durgumogad abitoged.
PHI 3:12 Ar we soglesulid, bato an bela ibmar amisye, igidibe, bato an dule-innikigwadye. Degi-inigwele, amba an alamaknaimogad, adi, an baramiega, ar Cristo-Jesús ibiga-an-susmoga.
PHI 3:13 Gwenadgan, an-sunnad, we-ibmar bato an bela baramisdeeye an sogsulid. Unnila ibmar-soggwen an imaked, ibmar-nasmalad ies-imaked. Emigindi, an unnila ibmar-danimaladginbi alamaknaisunnad.
PHI 3:14 Degisoggu, amba an alamaknaid, adi, Bab-Dummad Jesucristoʼba-anse-gochadba nibneggi-ibmar-nued-ukoed an nikuegar.
PHI 3:15 Degisoggu, bela anmar Jesucristoʼgi-ulubgi-bensulidgi-nasgumamaid, anmar weyob binsaewilubmalad. Ar bemar we-ibmargi akar binsadibe, Bab-Dummad magar-ito be-imakmarbaloed.
PHI 3:16 Degisoggu, anmar bato Cristo-igar-durdaksadba nanadii gumarsun.
PHI 3:17 Gwenadgan, an-daedba be damar. Ar igi-an-daed an bemarga oyodigusa, ayob gwenadgan-nanadimaladba be damarmosun.
PHI 3:18 Bato an bukidargus bemarga sogdanikid, emidi, an boed-abalagi, an gannar bemarga sogbalid, ar bukidar Cristo-nakrusgi-burgwisad-e-isdarmaladyob gudidimalad.
PHI 3:19 Amargardi, bergued-igar maid. Ar na e-saban e-bab-dummadga imakdimalad. E-ibmar-imakdiidgi san-dummarbaa itodimalad. Ar a-ibmar-imakedgi bur binge itowilubmalanad. Unnila we-napneggi-ibmar-nikadginbi binsamalad.
PHI 3:20 Ar anmardi nibneggined gumalad. Ar anmar-Dummad-Jesucristo anmar-Abonoged, a-nibneg-akar-danikoed, anmar edarbebuksunnad.
PHI 3:21 Jesucristo gangued-nikadba belagwapa ibmar ganikid. A-gangued-nikadba, Jesucristo anmar-san-napaga-guoed, e-san-nibneggined-nikadyob anmarga ogwanonikoed.
PHI 4:1 Degisoggu, an-gwenadgan-sabesailamalad, an nue-bemar-sabmalad, degi, an nue-be-dakbimarbalid. Bemar an-weligwar-imakmaladid, degi, an-ologurginyob gumaladid. Wegibi bemar Bab-Jesúsʼgi gandik gudigumalo.
PHI 4:2 Emigindi, Evodiaʼse, degi, Síntiqueʼse, we-omegan-warbogwadse an wilesakwaa goled. Bemar Bab-Jesúsʼba-naid-ular, na be igar-nabomar.
PHI 4:3 Bedina, be an-sorda-innikigwad gued. An wis bese egised, we-bunmar be bendakye. We-bunmar, Clementeʼmala, degi, an-bendaked-baiganmala, Bab-Dummad-gayaburba-barsogedgi nue-an-bendakdii gusmalad. Bela wemar-e-nug burba-geg-bergued-gardagi bato narmakar nanaid.
PHI 4:4 Bab-Jesúsʼgi degisadegu be wergudii gumar. Gannar an bemarga sogbalid, be wergumarye.
PHI 4:5 Bitigi bela dulemar be-daksamalana gadin, bemarde, sabedgi ibmar-imaked-dulemarye. Bab-Jesús-gannar-danikid bato nue-warmaksad.
PHI 4:6 Mer be surbinsa itomar. Aka bur be Bab-Dummadse gormar. Bela na be ibmar-abediid Bab-Dummadse egise, degi, dog-nuedye ega be sogmarbar.
PHI 4:7 Deyobi, Bab-Dummad e-ulubgi-bogidik-itoged bemarga ukoed. We-ulubgi-bogidik-itoleged dummarbasoggu, dulemar nue-aku itoged. We-ulubgi-bogidik-itoleged, bemar-Cristo-Jesúsʼgi-bensulidba, be-gwagegi, degi, be-binsaedgi be nikunonimaloed.
PHI 4:8 Napidgine, gwenadgan, bela ibmar-napiragwadgi, bela nug-nued-nikuedgi, bela igar-innikigwadgi, bela ibmar-swilidikidgi, bela sabguedgi, degi, bela ibmar-nued-egi-soglediidgi be binsamala. Degine, bela igar-nued-mamaidgi, degi, egi nabir-nug-odummolegedgi be binsamala.
PHI 4:9 Ar igi an be-odurdaksamala, ar igi an bega igar uksagusmala, ar igi an bega sogsagusmala, degi, ar igi an ibmar-imaksad be daksagusmala, aba be damarsun. Deyob bemar gudiile, Bab-Dummad-ulubgi-bogidik-itoleged-uked, bemarba gudiguoed.
PHI 4:10 Ibibayobi, Bab-Jesúsʼgi an weligwar itoge, ar ade, bemar geb angi gannar binsaarbargu. Ar an wisdo, bemar an-ies gudisurmalanad. Bemar an-bendakbi gusmalanad, ar bemarga geg gue gusmalad.
PHI 4:11 An ibmar-satedba weyob sogsulid. Ar ade, an bato durdaksa gudiid, an ibmar nikadibe, an ibmar niksurbardibe, an gusgu weligwar itodaed.
PHI 4:12 An wisid, igi-wilesakwagudii gulege, degi, an wisbalid, igi-ibmar-bukidar-nikadgi-gudii gulebali. Bela wemargi-gudigued an durdaksad, ise-immedikidgi-gudigued, degi, ise-ukudmadadgi-gudigued, an durdaksabalid. Deginbali, ibmar-ise-obinagwar-nikadgi-gudigued, degi, ibmar-satedgi-gudigued, an durdaksabalid.
PHI 4:13 Ar Cristo na e-gangued-anga-ukedba, an nabir bela ibmar saed.
PHI 4:14 Degi-inigwele, ar bemar nued imaksamardo, an-nunmakedyob be anba itononimarmogu.
PHI 4:15 Bemar Filipos-dorgan, na be nue-wismalad, an gebe Bab-Dummad-Gayaburba-Nuedgi-sunmakdegu, an Macedoniaʼgi-noargu, unnila bemarbi anga mani barmiar gusmalad, Jesúsʼba-nanaimalad-baigandi, gwen anga mani uksasurmalad.
PHI 4:16 Amba an Tesalónicaʼgi-maigu, an nabir ibmarbina-sogdiid-nikuega bemar anga irbigbasaar mani barmiar gusbalid.
PHI 4:17 We an bemarga sogsulid, adi, bemar anga gatik mani ukmalagar. Ar an bur binsaed, Bab-Dummad bemarga bur ibmar omergumai-gusun.
PHI 4:18 Ar an ibmar-abeged bato an bela abindaksad, degi, obinegwa an ibmar nikbalid. Ar bemar Epafroditoʼba anga ibmar barmiarmarsoggu, emigindi, bato an unniguar ibmar niksunnad. We-ibmar be anga barmiarmaladi, ina-wawadikid-ogumakar-uklegedyob gusad. We-ibmar, Bab-Dummad, nue-yeer-itoge abingasad.
PHI 4:19 Degisoggu, an-Bab-Dummad, nibneggi unnitiba-ibmar-nikadba, bemar-ibmar-abedimalad, Cristo-Jesúsʼgi bemarga ukoed.
PHI 4:20 Bab-Dummad-anmar-bab-gued-e-nug, degisadegu odummolesun. ¡Ar deyobdo!
PHI 4:21 Bela Cristo-Jesúsʼba-nanaimaladga, an-nuggi be dog-nued-sogeye ega be sogmalo. Gwenadgan-anba-gudimalad, bemarga dog-nued-sogeye sogsimalad.
PHI 4:22 Bela wegi Jesucristoʼba-nanaimalad, bur-Roma-Dummad-César-neggi-bukmalad, bemarga sogmalad, bemarde nued-sogeye.
PHI 4:23 Anmar-Bab-Jesucristo, bela bemargi-nued-binsasun. Be itomargua.
COL 1:1 Ani Pablo, Bab-Dummad-sogedba Jesucristo-e-sapin-bur-dummadga gumogadid. Gwenad-Timoteo anbo,
COL 1:2 gwenadgan Colosas-neggweburgi Cristoʼba-nanaidse, degi, gwenadgan-gwen-galakudisurmaladse, we-garda anmar barmisiid: Bab-Dummad anmar-Baba, degi, Bab-Jesucristo, bemargi nued binsamarsun, degi, ulubgi-bogidik bemar-itogega-imakbarsun.
COL 1:3 Anmar bemarga Babse-goled-irba, Bab-Dummadga, anmar-Bab-Jesucristo-e-Babga dog-nuedye sogdaed.
COL 1:4 Ar anmar be-itomalad, bemarde Cristo-Jesúsʼgi nue-bensurmarye, degi, Jesucristoʼba-nanaimalad nue-sabmarbarye.
COL 1:5 Ar bemar deyob gudimalad, ar ade, bemar nibneggi-megmaloed nue-bensuli edarbedimalad. Ar we-nibneggi-megmaloed nue-bensuli bemar edarbedimaladi, bato bemar Gayaburba-Nued-napiragwadba wisgusmalad.
COL 1:6 Ar we-Bab-Dummad-Gayaburba-Nued bemarse mosad. We-Gayaburba-Nued gebe bemar itononimargu, bemar nue mag itosmalad, Bab-Dummad bemar-abonoge-wilubsulinad. Emigindi, na e nabir-bemargi-binsaedba bemar-abonononikid. Deyobi, a-Gayaburba-Nued bela we-napneggi nasgumaid, degi, bemar-abonolesadyobi, dule-baigan abonolemaimogad.
COL 1:7 Anmarba-arbaed-Epafrasʼye-nugad, an nue-sabmalad, weyobi we-igargi bemar-odurdaksad. Epafrasʼde bemar-abargi Cristoʼga gwen galakusuli arbanaid.
COL 1:8 Epafras anmarga sognonikid, Bab-Dummad-Burba-Isligwaledba bemarde na muchub-muchub nue-sabmarye.
COL 1:9 A-ulale, anmar degi-itosad-akale, anmar bemarga Bab-Dummadse-goled gwen iedisulid. Anmar bega Bab-Dummadse egisdisunnad, bitigi bemar Bab-Dummad-e-binsamaid gatik magar itosmalana gadinye, degi, Bab-Burba-Isligwaled nue-binsaed-nikagued-uked, degi, burbar-ibmar-mag-bela-itoged-uked, bemar nikusbalina gadinye.
COL 1:10 Adi, bemar nabir Jesúsʼba-nanaimalad-daed-sunnadyob nanamalagar. Unnila Bab-Dummad-ibmar-yeerdakedbi-imakdii gumalagar. We-obared, ibmar-nuegan-imaked-oyodii guedye, degine, Bab-Dummad-bur-gatik-wisgumai guedye.
COL 1:11 Anmar Bab-Dummadse bemarga egisbalid, na e-gangued-gandikidbali be-ogannomarye, adi, bemar bonigan-dummagan-abin gandikidgi, degi, baisur-itogedgi gwisgumalagar.
COL 1:12 Bemar Bab-Dummadga weligwaledgi dog-nuedye sogmaloed. Ar Bab-Dummad anmarga igar-egasad, adi, anmar nabir Bab-Dummad-gwallu-meegwad-neggi Jesucristoʼba-nanaimalad-e-ibmar-abingamaloed abingamarmogagar.
COL 1:13 Bab-Dummad nia-saila-anmar-ganikidgi anmar-onononikid. Geb E-Machi-sabed-negdakmaidse anmar-odosad.
COL 1:14 Jesucristo na e-abe-aryosadgi anmarga isgued nabosad, anmarga isgued elinonikid.
COL 1:15 Cristo-Jesús, Bab-Dummad-akudakleged-e-wilub gued, Cristo-Jesús bela ibmar-obinnilesad-iduar bato gudibinned.
COL 1:16 Ar Cristoʼgi belagwapa ibmar-nibneggined, ibmar-napneggined, ibmar mag-dakleged, degi, ibmar-akudakleged, obinnilesad. Deginbali, burbar-dummagan-gangi-bukmalad, burbar-dummagan-negsemamaid, burbar-dummaganga-mamaid, degi, burbar-gandikidba-gangued-nikmaladse-bakale, bela Cristoʼgi, degi, Cristoʼga obinnilesad.
COL 1:17 Cristo bato bela we-ibmar-iduale, gudiid, Cristoʼgi bela ibmar nabir selemaid.
COL 1:18 Cristo, eba-nanaimalad-danar-ambikunonidamalad-e-nonoga gued, wemar Cristo-sanye sogleged. Ar Cristo, gebesailadid, e-inse burgwismalad-abargi gannar durgusadid. Adi, Cristo na e-inse bela-ibmar-iduedga guegar.
COL 1:19 Ar Bab-Dummad na e-abegedbali, bela Cristoʼga na Bab-Dummadga-gued uksad.
COL 1:20 Bab-Dummad, Cristoʼgi bela ibmar-we-napneggined, degi, ibmar-nibneggined, na ebo igar-naboged imaksad. Bab-Dummad Cristo-e-abe-nakrusgi-aryonai-gusadba igar nabononikid.
COL 1:21 Iduale, bemar be-binsaedgi-gudiidbali, degi, ibmar-isgana-imakdiidbali, Bab-Dummadgi bangus gudimalanad, degi, bemar e-isdaradmarbalinad.
COL 1:22 Emigindi, Bab-Dummad, Cristo-dulega-imaksadgi, nakrusgi-burgwenai-gusadba bemarbo igar nabononikid. Deyob Bab-Dummad imaksad, adi, bemar swilidiki, gwen gutu-naisuli, degi, begi dule-ibmar-akar-soged-sate, Bab-Dummad-asabin gwisgumalagar.
COL 1:23 Ar deyob be gumalaga, bemar Bab-Jesúsʼgi-bensulidgi gandikidba, ise-sakdigale, degi, sikirmaksuli, alamaknai gumalargebed. Degi, Bab-Dummad-Gayaburba-Nued-be-abonogedgi, be bangusur-gudii gumalargebed. We-Gayaburba-Nued bemar itosad, degi, we-napneg-naidgi bela dulemarga egi sunmaklenaid. Ani, Pablo, we-igar-barsogegala an nugsalenonikid.
COL 1:24 Emigindi, an bemar-ular-wilediidgi an weligwar itoged. Ar deyobi, Cristoʼba-nanaimalad-danar-ambikunonidamaladga, Cristo-wileged-yoo-bergued an-sangi an wiledisunnad.
COL 1:25 Bemar-bendakega, Bab-Dummad, Jesúsʼba-nanaimalad-danar-ambikunonidamalad-e-maiga-guega an-sunonikid. Bab-Dummad e-Gayaburbagi-sunmakega an-barmisad.
COL 1:26 We-Gayaburba bela dikasurgus, degi, gebe-dula-ambikusad-akale, Bab-Dummad igar-odukuar-mesisgusadgi sunmaked. Emigindi, Bab-Dummad, Jesucristoʼgi-akananaimaladga a-igar magarononikid.
COL 1:27 Amarga, Bab-Dummad we-igar-dukuar-maidgi Judíoʼsurmaladga ibmar-nuegan-mamaid oyononisunnad. We-igar-dukuar-maidi, Cristo gued. We-Cristo bemargi-maid, a bemarga yoedse ibmar-nued-uklegoye-soglesad gued.
COL 1:28 Anmar we-Cristoʼgi bela dulemarga sunmakdiid, dulemar-unadiid, degi, nue-binsaed-nikaa dulemar-odurdakdiid, adi, bela dulemar Cristo-Jesúsʼgi isgussuliyob Bab-Dummadga oyogegar.
COL 1:29 A-ular, Cristo na bela e-gangued-anga-ukedba an arbanaid, degi, an alamaknaibalid.
COL 2:1 Ar bemar nue-wisgubi an abedo. An bemarga, degi, Laodicea-neggweburgi-bukmaladga, deginbali, dulemar-amba yoo-an-wagar-dakmaladga an nue-dummad alamaknaid.
COL 2:2 An alamaknaid, adi, bemar niga-gangumalaga, bemar bulakwaa sabguedgi nanamalaga, degine, bemar bela mag-itogedgine, Bab-Dummad-igar-dukuar-maigusad, nuekwaa wisguegar. Ar we-igar-dukuarmai-gusad, Cristo-sunnad gued.
COL 2:3 Bela Cristoʼginbi binsaed-nuegan-mamaid, degi, ibmar-mag-itogued danikid.
COL 2:4 Ar we an bemarga sogdo, adi, bemar mer dulemar-yamo-binsaed-nikaa-yeer-sunmakdimaladse yardaklemalagar.
COL 2:5 Ar an bemar-abargi sanagwar gudisur-inigwele, an burbardi bemar-abargi gudiid. Deginbali, an weligwar itobalid, ar an bemar-wisgugu, bemarde innikii nanadimarye, degine, Cristoʼgi nue-bensuli bemar nanadimarbarye.
COL 2:6 Ar bemar Bab-Jesucristo be-Dummadga be abingasmalad. A-ulale, bemar Cristoʼgi nanamalargebed.
COL 2:7 Gatik bur bule Cristoʼgi-akanai, degi, egi-gandik-gwichi be gumarsun. Ar igi be-odurdaksamala, deyobi, bemar Cristoʼgi bur gatik bensuli gumala. Bab-Dummadga dog-nuedye-sogdii gumala.
COL 2:8 Nue salakarmar. Mer dulemar-yamo-binsa-na-ibmar-wisi-sogdimaladse binsaed galemalo. Ar wemar unnila dulemar-igar-maidba, degi, we-napneg-igar-maidba sunmakdimalad. Cristo-igar-maidba sunmakdisurmalad.
COL 2:9 Ar Cristoʼgi bela Bab-Dummad-gued sanar dakleged.
COL 2:10 Ar Cristoʼgi bemar unnitiba e-gangued nikad. Cristoʼgi Bab-Dummad na e-gangued-itogega bemar-imaked. Ar Cristo, bela burbar-gangued-nikamalad-e-dummadid, degi, burbar-gandikidba-sunna-ibmar-imakmalad-e-dummadbalid.
COL 2:11 Deginbali, bemar Cristoʼgi burbar abgan-e-uka-duku siklesmalad. Dule deyobi be-imaksasurmalad. Bab-Dummad-sunnad Cristoʼgi-bemar-oakasgu, deyob be-imaksamalad. Deyobi, be-san-isguedgi be-ollor-imaknonimalad.
COL 2:12 Ar bemar Bab-diigi-ogleged-igar-imaksamargu, Cristoʼba napa-urba diglesmalad. Deginbali, bemar Bab-Dummad na e-ganguedgi gannar Cristo-odulosadgi bengussurmarsoggu, bemar Cristoʼba burbar gannar durgunonikid.
COL 2:13 Bemar burbar abgan-e-uka-duku-sikleged-yoo-imaklegua, bemar na be-isguedgi burgwar gudimalanad. Ar emigindi, Bab-Dummad Cristoʼgi-bemar-oakasgu, bemarga san-burba-dulad uksad, degi, bemarga bela be-isgued elisad.
COL 2:14 Anmar Igar-Maidgi-annadigusad-ular, anmarga sabsur-odurdakleged-igar mainad. Ar Bab-Dummaddi, Cristo-nakrusgi-burgwenonigu, anmarga sabsur-odurdakleged-igar-maidi, osulosad.
COL 2:15 Bab-Dummad bela burbar-gangued-nikamalad-e-gangued, degi, burbar-gandikidba-sunna-ibmar-imakmalad-e-gangued obelosad. Bab-Dummad bela dulemar-wagab, Cristo nakrusgi burgwisgua, we-burbamar-ibgwensuli imaksad, degi, egi nakwisbalid.
COL 2:16 Degisoggu, be-ibmar-gunnedgi, igi, be-gobedgindibe, be-ibagan-dakedgindibe, nii-binid-ibagi, igi, obunnoged-ibagindibe, dulemar mer begi sunmakmalo.
COL 2:17 Ar belagwapa wemar yoo-ibmar-danikoed-e-burbagan gued. Ar Cristoʼgi ibmar-napiragwad maid.
COL 2:18 Dulemar-na-yamo-san-bipi-imakdimalad, degi, baliwitur-nug-odummodimalad, mer Bab-neggi-be-ibmar-nued-maid begi sued be imako. Ar amardi, ibmar-daksasuli binsa gordiid, degi, na e-galagwensuli-binsaedba san-odummodimalad.
COL 2:19 Amardi, Cristoʼgi gwen akanaisurmalad. Ar Cristoʼdi na e-ibmar-imakedbali, bela egi-akananaimalad, san-dubamar-mamaidba-nasgumaiyob, nasgumai imaked, degi, Bab-Dummad-igar-mesisadba, bela-dulemar-egi-akananaimalad oatoed.
COL 2:20 Ar bemar Cristoʼba bato burgwismalale, we-napneg-e-igar-mamaidba bar be gudisurmalad. Ar degite, ¿ibiga bemar amba we-napneg-e-igar-weyob-mamaidba be damala?
COL 2:21 We-igar-weyob-sogmaidba: “Mer be ebugo, mer be gunno, mer be be-argangi suo.”
COL 2:22 We-igargan, unnila dulemar-sogedba, degi, dulemar-igar-odurdakedba mamaid. E-gangued-nika-maid ibagan-nadapidbali, bergumai guoed.
COL 2:23 Ar napiragwad, we-ibmar igar-nuedyob dakleged, ar ade, dule-wiledakedgi, na san-bipi-imakedgi, degi, sabsur na-san-saedgi dule-odurdaked. Ar degi-inigwele, we-ibmarmar anmar-isgubiedgi geg anmar-bendaked.
COL 3:1 Ar bemar bato Cristoʼba gannar durgussoggu, nibneggined-ibmarmar be amimar, ar bia Cristo Bab-Dummad-argan-nuedsik sii.
COL 3:2 Nibneggined-ibmargi bur be binsamar, mer we-napaneggined-ibmargi be binsamar.
COL 3:3 Ar bemar bato burgwismarsoggu, emigindi, Bab-Dummad bemar Cristoʼba-gudiguega be-imaksamalad.
COL 3:4 Ar Cristo, bemar-san-burba-dula-imaknonikid, we-napnegse-danikile, bemar eba e-gangued-yeerdaklegedba danimarmogoed.
COL 3:5 Degisoggu, belagwapa bemargi wemar-napneggined-ibmar-naid be osulomar: Abirgunagwarsuli negsichigi galagwensuli-daed, ibmar-isgana-imaked, yogasaar igarsuli-daed, isgued-imakedgi-binsaed, degi, ibmarbina-surbinsa-itoged. Ar dule deyob itogele, we-ibmar na e-bab-dummadga imakdiid.
COL 3:6 A-ulale, dule-uayasatedamalad, Bab-Dummad-dule-sabsur-odurdaked-e-igar itononidamalad.
COL 3:7 Bemar epenne we-igargangi nanadii gusmalad. Deun, bemar we-igargan-sogedba gudigusgu.
COL 3:8 Emigindi, bela we-igargan be indakmarba: Urwed, sae-itoged, isdar-dulemargi-binsaed, dulemargi-gakansaar-sunmaked, degi, galagwensuli-nisaar sunmaked.
COL 3:9 Mer na ga be gakansamar, ar bemarde bato epenne-be-damalad osulosmalad.
COL 3:10 Emigindi, bemar burba-binidgi gudimalad. We-burba e-obinnisad-Bab-Dummadyob-guedse, bur bule gatik Bab-Dummad-wisguedse gwagmaioed.
COL 3:11 We-burba-binidgine bar binsalesulid, we-dule, Griego-duleye, Judío-duleye, abgan-e-uka-duku-sikaledye, abgan-uka-duku-sikarsulidye, dule-ainebalidye, dule-ibmar-gwen-wissulidye, dule-maiga-gudiidye, degi, dule-maiga-gudisulidye. Bela wemar, Cristoʼgi emarbi gued, degi, Cristo bela wemargi maidbibalid.
COL 3:12 Bab-Dummad bemar-sabed, degi, bemar-susbalid, adi, bemar egadga gumalagar. Degisoggu, nue-emar-wiledake be nanamar, igar-nuegangi-nanadii be gumar, na san-bipi-imakdii be damar, binnalegwadgi ibmar-imakdii be imakmar, degi, ukurmakar ibmar-imaksuli be nanamar.
COL 3:13 Na be muchub-muchub ibmar-akalar, baisur-itoged be imakmar. Ar dule-wargwen dule-baidgi akar-ibmar-sogele, igi-barsaye be sogmar. Ar igi Cristo be-isgued bega osulosa, deyobi, bemar na be muchub-muchub igi-barsaye sogmarmo.
COL 3:14 Wemar-ukine, bur bule, bemar sabedgi nanamar, ar ade, sabguedi, bela egi ibmar gwamaklesiid.
COL 3:15 Cristo-bogidik-nikad be-ulubgi-nikagudii be gumar. Ar bemar unnila wargwenna-guega, Bab-Dummad bemarse gochad. Bemar, Bab-Dummadga dog-nuedye sogmar.
COL 3:16 Cristo-gayaburba bela-bela bemar-gwagegi-nai be imakmarsun. Nue-binsaed-nikaa na be muchub-muchub odurdakmar, degi, na be muchub-muchub binsaed-dakmarba. Gwagegi doggus-nuedye-sogedgi, be Bab-Dummadga ega-namaklegedmar, namaklemalad-nuegan, degi, burbar-namaklemalad namakmar.
COL 3:17 Ar bela be ibmar-imaked, degi, bela be ibmar-soged, bela Bab-Jesús-nuggi be imakmar. Jesús-nuggi Bab-Dummadga be doggus-nuedye sogmar.
COL 3:18 Omegan, be-sui-urbaligwa be nanamar. Ar bemar Bab-Jesúsʼba naimarsoggu, deyob be nanamalargebed.
COL 3:19 Suigan, be-ome be nue sabgumar, mer be sabsur-imako.
COL 3:20 Mimmigan, be-babganba bela be ibsamalo, ar deyob be damalale, Bab-Dummad yeer-itodaed.
COL 3:21 Babgan, mer be be-mimmigan-ourwed imakmar, adi, mer ibmar-imakbisuli gumalagar.
COL 3:22 Maigan, bela be-dummagan-we-napnegginmalad bega ibmar-sogedba be damar. Yamo uaya-nikaa be damarye benik sogmalaga, mer be unnila be-daknaidginbi deyob be damalo. Suli, amba be-daksulile, gwage-napiragwadgi be ibmar imakmar, degi, be Bab-Dummad-dobegwa-nanaedba be ibmar imakmar.
COL 3:23 Ar ibu be imaknaimardibe, bela weligwaledba be imakmar. Bab-Jesucristoʼga ibmar-imaknaiyob be imakmar, dulemarga imaknaisuliyob.
COL 3:24 Ar Bab-Jesús bemarga-ibmar-ukoye-sogsadi, bato bemar wisid. Ar bemar Dummad-Cristoʼga arbananaid.
COL 3:25 Ar dule ibmar-ichakwa-imaked na e-ibmar-imaksadba sabsur-odurdaklegoed. Ar ade, Bab-Dummadi bela dule emarbi daked.
COL 4:1 Dummagan, bemar be-maigan nue-igar-nikaa, degi, napiragwadgi be nimalo. Ar bemar insamarmogo, bemar nibneggi Dummad nikamarmogad.
COL 4:2 Bab-Dummadse gatik be gormar. Gatik nue be atakmar, degi, Bab-Dummadga dog-nuedye be sogmar.
COL 4:3 Deginbali, Bab-Dummadse be anmarga gormarmogo, adi, Bab-Dummad, E-Gayaburba-Nuedgi-sunmakega nabir anmarga yawagak-egaega, degi, anmar Cristo-igar-dukuar-maigusad osanalogegar. Ar a-Gayaburbagi an sunmakdiid-ular, an emidi, esgaryagi mellesiid.
COL 4:4 Bab-Dummadse gormala, adi, an Cristo-igar-dukuar-maigusad nue-bakarmakar an osanalogega.
COL 4:5 Dulemar-Bab-Dummadba-naisurmalad-abargi, nue-binsaed-nikaa be nanamar. Cristoʼgi-sunmaked-e-iba-nagunonikile, be sunmako.
COL 4:6 Nuedgi, degi, nabir-itolegedgi be sunmakdii gumar. Deyob geb be wisgumaloed, igi nabir bemar dulemar-abinsaoe.
COL 4:7 Anmar-gwenad-sabed-Tíquico, Bab-Jesúsʼgi innikigwadba-arbadiid, degi, nue-an-bendakdiid, bemarga bela an gudiid sogdapoed.
COL 4:8 Ar a-ular, an bemarse Tíquico barmisiid, adi, bemarga sogega, igi anmar wegi gudii, degi, bemar-ogannomarbaligar.
COL 4:9 Tíquicoʼba bemar-neggined-Onésimoʼye-nugad nadapid. Onésimoʼde, anmar-gwenad-sabedid, degi, Bab-Igargi innikigwadba nanadiidid. Wemar-ebogwad bela bemarga sogdapmaloed, igi an wegi gudimala.
COL 4:10 Aristarco, anbo-esgaryagi-mellesiid, degi, Marcos, Bernabé-e-niga bemarga sogsimalad, bemarde, nued sogeye. Marcosʼgi bato an bemarga sunmaksa gusad. Ar bemarse ataknadele, bemar nue abindakmalo.
COL 4:11 Deginbali, Jesús, Justoʼye-bimarbalid, bemarga sogsimogad, bemarde nued-sogeye. Bela Judíoʼmar-Jesúsʼba-nanaimalad-abargi, unnila wemarbi Bab-Dummad-e-negdakmaid-igar-onasguedgi anba arbasmalad. Wemar nue-an-ogannodimalad.
COL 4:12 Bemar-sorda-wargwen-Epafrasʼye-nugad bemarga sogsiid, bemarde, nued sogeye. We-Epafras, Cristo-maiga-gudiid, bemarga Bab-Dummadse nue-gordiid, adi, bemar bensuli, degi, gandikidgi, mer galakumalaga, Bab-Dummad-sogedba bela bemar ibmar-imakmalagar.
COL 4:13 An-sunnad an nue wisid, igi Epafras bela-bela bemarga, Laodiceaʼginmaladga, degi, Hierápolis-neggweburgi-bukmaladga bela-bela-alamanaid.
COL 4:14 Ina-duled-Lucas, anmar nue-sabed, degi, Demas, bemarga sogsimalad, bemarde, nued-sogeye.
COL 4:15 Gwenadgan-Laodicea-neggweburgi-bukmaladga, Ninfasʼga, degi, e-negyagi Jesúsʼba-nanaimalad-danar-ambikunonidamaladga be sogmalo, bemarde, nued-sogeye.
COL 4:16 Bemar we-garda-absosad-sorba, Jesúsʼba-nanaimalad-danar-Laodicea-neggweburgi-ambikunonidamaladse be barmidoed, adi, amar we-garda absomarmogagar. Bemar, an Laodiceaʼse-garda-barmisad absomarmogoed.
COL 4:17 Arquipoʼga be sogmalo, Bab-Jesúsʼgi be arbaed-abingasad be imakye.
COL 4:18 Ani Pablo, an-argan-sunnadgi napi an bemarga narmaked, bemar nued sogeye. Be insao, an esgaryagi mellesiid. Bab-Dummad nued bemargi binsamaloed. Be itomargua.
1TH 1:1 Anmar Pablo, Silvano, degi, Timoteo, bemar-Jesúsʼba-nanaimalad-danar-Tesalónica-neggweburgi-ambikunonidamaladga, garda narmakmalad. Bemar Bab-Dummadgi, degi, Bab-Jesucristoʼgi-akananaimalad. Anmar-Bab-Dummad, degi, Bab-Jesucristo, bemargi nued binsamarsun, degi, e-ulubgi-bogidik bemarga uksabarsun.
1TH 1:2 Anmar Bab-Dummadse gorsigusale, anmar gusgu bemar-ular Bab-Dummadga dog-nuedye sogdamalad.
1TH 1:3 Bemar Jesúsʼgi-bensuli arbasmalad-ular, bemar sabedgi ibmar-imakmalad-ular, degi, anmar-Bab-Jesucristoʼbina nue bensuli-edarbedimaladgi be alamaknanaimalad-ular, anmar, anmar-Bab-Dummad-asabin, bemar-gwen-iedisurmalad.
1TH 1:4 Gwenadgan, Bab-Dummad be-sabmalad, anmar wisid, na e bemar-susad.
1TH 1:5 Ar anmar bemarga Bab-Dummad-Gayaburba-Nuedgi-sunmaksagua, unnila gayaginbi anmar bemarga sogsasulid. Anmar Bab-Dummad-gangued-nikadba, degi, Bab-Dummad-Burba-Isligwaled-e-arbaedba, degi, nue-bensulidba, anmar bemarga nue-oyosmalad. Aginbali, bemar nue-wismarbalid, bemar-sabed-ular, igi-anmar bemar-abargi gudigusmala.
1TH 1:6 Bemar anmar-daedba, degi, Bab-Jesús-daedba nanadigusmalad. Bemar beedse-wilesmar-inigwele, degite, Bab-Dummad-Burba-Isligwaled-bela-bela-weligwaled-ukedba, bemar we-Gayaburba abingasmalad.
1TH 1:7 Weyobi, bemar belagwapa Bab-Jesúsʼgi-bensurmalad-Macedonia-yargi-bukmaladga, degi, Acaya-yargi-bukmaladga, nue-oyosmalad, igi Jesúsʼba-nanaimalad damalargebe.
1TH 1:8 Ar bemargi-onode Bab-Dummad-Gayaburba mimilesad. Unnila Macedonia-yalaganbarbisur, degi, Acaya-yalaganbarbisurba, bela nega-iliba mimilesad. A-dulemar, bemar Bab-Dummadgi-bensulid-nikad wismalad. Degisoggu, geg anmar bemargi bar sunmaksundo, ar bela bato bemar-wismalad.
1TH 1:9 Amar sogedbimalad, igi bemar anmar-abingasa, degi, igi bemar bab-dummadga-imakleged-e-nug-odummodiid metemala, adi, Bab-Dummad-dulasaila-maid, Bab-Dummad-napiragwadga-e-nug odummogegar.
1TH 1:10 A-dulemar wisid, bemarde Bab-Dummad-Machi nibneg-akar gannar-danikoed edarbebukmarye. Bab-Dummad na E-Machi-Jesús burgwar-maigu, gannar odulosad. A-Jesúsʼde, dulemar-Bab-Dummadse-dummad-odurdaklegoedgi anmar-abonosad.
1TH 2:1 Gwenadgan, ar bemar-sunnad wismalad, anmar bese atakapgu, binsa an gwen gaamaksasurmalad.
1TH 2:2 Ar bemar wismarbalid, iduar anmar Filipos-neggweburgi ise-bibyolegar gusad, degi, ise-mesagwar gusbalid. Ar anmarga amba igar nollo-gussuli-inigwele, Bab-Dummad anmar-gwage-ogannosad, adi, dobsuli, anmar Bab-Dummad-Gayaburba-Nuedgi sunmakegar.
1TH 2:3 Ar anmar bemarga we-Gayaburbagi noar sunmaksasulid. Ichakwa-binsaedgi, degi, yamo-bemar-yardakar sunmaksasurmarbalid.
1TH 2:4 Aka bur Bab-Dummad anmar-susad, degi, e-sogedba anmarga igar-uksad, adi, anmar E-Gayaburba-Nuedgi sunmakegar. A-ular, anmar deyob sunmakmalad. Anmar dulemar-nabir-anmar-yeerdaked amidisulid. Unnila Bab-Dummadbi nabir-anmar-yeerdaked an amimalad. Ar Bab-Dummadbi anmar-binsaed dakmaid.
1TH 2:5 Ar bemar wismalad, anmar be-binsaed-gamalaga, anmar yamo bemarga ibmar-nueganbi sogsasulid, degi, anmar mani-amiegala, anmar bemar-yardaksasurbalid. We an bega sogmaladi, Bab-Dummad we nue-wisid.
1TH 2:6 Anmar amidisurmalad, dulemar, bemar, degi, dule-baigan, anmar-nug-odummoged. Ar anmar Cristo-e-sapingan-bur-dummagansoggu, bemar anmar-ibmar-abeged anmarga ukewilubbinad. Anmar deyob bemar-imaksasulid.
1TH 2:7 Emigindi, anmar bemar-abargi-gudigusgu, igi na nan mimmi-ise-sabguar, degi, ise-edarbiar imake, ayobi anmar be-imaksamalad.
1TH 2:8 Ar anmar nue-be-sabmarsoggu, unnila Bab-Dummad-Gayaburba-Nuedbi anmar bega ukbi-gussurmalad. Ar anmar-sanse-bakale, anmar bemarga ukye sogena, anmar uksamalanad.
1TH 2:9 Gwenadgan, bemar ebinsamalargebed, anmar mani-amiegala, igi-anmar arbasa, degi, igi-anmar alamaknai gusbali. Anmar bemarga Bab-Dummad-Gayaburba-Nuedgi-sunmakdigusgu, mutikidba, ibginedba, arbanai gusmalad, adi, mer anmar bemarga arbaed-dummadga guegar.
1TH 2:10 Bab-Dummad, degi, bemar-sunnad, nue wismalad, igi-anmar bemar-Jesúsʼgi-bensurmalad-abargi-gudigusgu, nue-gwage-swilidikidgi, nue-napiragwadgine, degi, dulemar anmargi ibmar-akar-soged-satedgine, anmar nanadigusa.
1TH 2:11 Deginbali, bemar wismarbalid, igi bab na e-mimmigan-unae, degi, igi e-gwage-ogannoge, deyobi, an bela bemar-war-wargwengi imaksamalad.
1TH 2:12 Anmar bemarga sogdii gusmarbalid, igi Bab-Dummad-mimmigan-nanamala, deyobi, bemar nanamarye. Ar Bab-Dummad na e-negdakmaid, degi, na e-gangued-yeerdakleged bemarbo-nikuega bemarse gochad.
1TH 2:13 A-ulale, anmar Bab-Dummadga dog-nuedye sogdimarsunnad. Ar anmar bemarga Bab-Dummad-Gayaburbagi-sunmaksad be itosmargua, bemar dule-gayaburbayob abingassurmalad. Suli. Ar nue-Bab-Dummad-Gayaburba-napiragwad-dake be abingasmalad. Ar we-Bab-Dummad-Gayaburba-sunsoged, bemar-Jesúsʼgi-bensurmaladgi arbanaid.
1TH 2:14 Gwenadgan, bemar Jesúsʼba-nanaimalad-danar-Judea-yargi-ambikunonidamalad-sunnaa be gusmarmogad. Ar bemar be-yarginmaladse ise-wilegagwar gusmalad. Ar deyopira, Judeaʼginmalad na e-gwenadgan-Judíoʼmarse wilesmarmogad.
1TH 2:15 We-Judíoʼmala, Bab-Jesús, degi, Bab-Dummad-gayaburba-barsogmalad oburgwismalad. Anmardi ese e-yargi onolesmalad. Amar Bab-Dummad-nabir-ito imaksurmalad, degi, bela-dulemargi gwisgudimarbalid.
1TH 2:16 Ar amar anmar-abesulid, anmar Judíoʼsurmaladga Bab-Jesús-Igargi sunmaked, adi, Judíoʼsurmalad mer abonolemalagar. Deyobi, na e-isgued bur bule omelomalad. Amar-obelogega, Bab-Dummad odurdakleged-iba ega nasiknonisunnad.
1TH 2:17 Gwenadgan, anmar bemargi sikwas bangusgua, anmar be-wagar daksasurmar-inigwele, anmar bemargi degisadegu gwagegi-binsadii gusmalad. Anmar bemar-dakega bela-bela bemarse nabigusanad.
1TH 2:18 A-ulale, anmar nue bese ataknabi gusmalanad. Ani Pablo, irbigbagus nue bese ataknaoye sokardaenad. Degi-inigwele, nia-saila-Satanás anmargi igar oburnonidaed.
1TH 2:19 Degite, anmar-Bab-Jesucristo-gannar-danikoed-ibagi, e-asabin, ¿doagi anmar benguosursunna? ¿Doagi anmar yeer itogosunna? ¿Doagi anmar nug-dummarba itogosunna? ¿Ar bemarginsursi?
1TH 2:20 Eye, ar bemargine. Ar bemar nug-dummarba anmar-imakedid, degi, anmar-weligwar-ito imakbalidid.
1TH 3:1 Ar anmar bela-bela nue-bemar-wisgubigussoggu, anmar walagwen Atenas-neggweburgi beoye sogsamarsunnad.
1TH 3:2 Degisoggu, anmar-gwenad-Timoteo an bemarse barmismalad. We-Timoteo, Bab-Dummadga-arbadiid-duled, degi, anmarba Cristo-Gayaburba-Nued-barsogedgi arbadibalid. Anmar, Timoteo bemarse barmisad, adi, be-niga-ogannomalaga, degi, bemar bur-bela-bela Cristoʼgi-bensuli gumalagar.
1TH 3:3 Adi, bemar we-bonigan-itonanaid-ular, mer Cristoʼgi bengumalagar. Ar bemar wisid, anmar we-boniganbo-garitogega sulesmalad.
1TH 3:4 Ar anmar bemar-abargi-gudigusgu, anmar bato bemarga sogsagusad, anmar nue-wilemaloye. Ar deyob gunonisunnad.
1TH 3:5 A-ulale, ani Pablo, ar an nue bemar-wisgubigussoggu, an Timoteo-barmisad. Ar an bemar-wisgubigusad, bemarde amba Jesúsʼgi-bensuli gudimardibeye. Ar an dobe-itosad, abakalegi nia-saila, ibmar-isgana-imakega bemar-binsaed-gaalile. Ar deyob gunonikile, anmar binsa arbanai gusdo.
1TH 3:6 Emide, Timoteo Tesalónicaʼse-gudiid gannar nonikid. Anmarga gaya-nued senonikid, bemarde Bab-Jesúsʼgi nue-bensurmarye, degi, na be-muchub-muchub nue-sabmarbarye. Anmarga sognonibalid, bemarde nue-sabedgine anmargi binsadiiye, degi, bemar nue-anmar-dakbiye, igi anmar bemar-dakbi gudimoga.
1TH 3:7 A-ulale, gwenadgan, anmar bonigan-nika-gudiid-abargi, degi, nue-naibi-itoged-abargi, anmar yeer-itononikid, anmar bemar-wisguargu, bemarde Bab-Jesúsʼgi nue-bensuli gudimarye.
1TH 3:8 Emigindi, anmar bemar-wissoggu, bemarde weyob-gudiiye, we anmar-ogannoged, anmar dula-gudii guegar.
1TH 3:9 Degisoggu, anmar aku itoged, bemar-ulale, ¿igi anmar Bab-Dummadga doggus-nuedye sogoe? Ar ade, bemar nue-weligwar Bab-Dummad-asabin anmar-imaked.
1TH 3:10 Mutikidba, ibginedba, anmar Bab-Dummadse ise-egisar gornaid, bitigi bemarse-ataknaed anmar-imaksana gadinye, adi, bemar-bendakega, bemar-Cristoʼgi-bensulid-nikad ogannogegar.
1TH 3:11 Bitigi Bab-Dummad anmar-Baba, degi, anmar-Bab-Jesucristo, anmarga igar-egaena gadin, adi, anmar bemar-daknamalagar.
1TH 3:12 Bitigi Bab-Jesús gatik bemar-onasgumai imakena gadin, adi, bemar na muchub-muchub bur bule-sabgumalaga, igi anmar bemar-sabmarmoga.
1TH 3:13 Bitigi Bab-Dummad, burbale be ogannosmalana gadin, adi, anmar-Bab-Jesucristo bela-eba-nanaimalad-abargi-danikile, bemar-gwage-swilidik, anmar-Bab-Dummad, degi, anmar-Bab-asabin, gutu-naisuli guegar.
1TH 4:1 Emigindi, gwenadgan, anmar, Bab-Jesús-nuggi ise-wilesagwar bemarse egissun, degi, bemarga sogmarsun, ar anmar igi-bemar-odurdaksa, igi-be-nanamalargebe, bemar Bab-Dummad-nabir-ito-imakega, deyob be gatik bur bule nanamarsun.
1TH 4:2 Ar bemar bato wisid, igi-anmar bemarga Bab-Jesús-nuggi ibmar sogsamala.
1TH 4:3 Bab-Dummad abemaid, bemar gwage-swilidik gudii gued. Bemar mer negsichigi galagwensuli gudii gued.
1TH 4:4 Bemar, wala-walagwengi unnila be-ome-ebo be nanadii imakmarsun. Be-ome na-be gwage-swilidikidgi, degi, nue-binsaed-nikadgi, be sedii imakmarsun.
1TH 4:5 Dulemar-Bab-Dummad-wissurmalad-nanamaladyob, melle be be-omegi yogasaar binsao.
1TH 4:6 We-igargi, mer be-gwenad-bensudii, degi, yardakdii be nanamalo. Ar bato iduar an bemarga sogsamalad, Bab-Dummad beedse dulemar-degi-gudimalad odurdakoye.
1TH 4:7 Bab-Dummad anmarse gochasulid, igar-isganaba-nanaega. Gwage-swilidikidgi nanaega, anmarse gochad.
1TH 4:8 Degisoggu, ar doa-dule weyob-ibmar-soglenaid isdar-itogele, dule-isdar-daksulid, Bab-Dummad-isdar-daked. Ar a-Bab-Dummad anmarga E-Burba-Isligwaled uksad.
1TH 4:9 Na gwenadgan-sabgumalad-igarsikdi, an-bemarga-garda-narmaked bemar abesulid. Ar Bab-Dummad-sunnad na bemar-odurdaksad, na be muchub-muchub sabgumarye.
1TH 4:10 Ar deyobi, bemar bela gwenadgan-Macedoniaʼgi-bukmalad sabgubukwad. Degi-inigwele, gwenadgan, an bemarse ise-wilesagwar egissundo, gatik bur bule na be sabgumarye.
1TH 4:11 Bela dulemarbo be bogidik gudigued imako, unnila be-ibmar-imakedginbi be alamakdii guo, degi, na be dukin arbadii guo, ar igi an bemar-odurdaksa.
1TH 4:12 Deyobi, dulemar-Bab-Jesúsʼba-naisurmalad bemargi binsaed-nikaa gumaloed. Deginbali, bemar dule-baidse ibmar-egisdii gumarbalosulid.
1TH 4:13 Gwenadgan, dulemar-bato-burgwismalad igi-gumaloed-igar, bemar wisgubi an abemardo, adi, mer bemar dule-Bab-negse-dogosurmaladyob bukib binsamalagar.
1TH 4:14 Ar Jesús-burgwisadgi, degi, gannar-durgusadgi, igi anmar egi bensuli, debayobi anmar bensurbalid, Bab-Dummad dule-Jesúsʼgi-bensurmalad-burgwismalad gannar Jesúsʼba-dagega imakoed.
1TH 4:15 Ar Bab-Jesús igi-anmar-odurdaksa, deyobi anmar bemarga sogmarmogad, anmar we-napneggi dula-gudimalad, anmar Bab-Jesús-danikidse we-napneggi besmalad, anmar-inse gwenadgan-burgwismalad-idugosulid.
1TH 4:16 Bab-Jesús-sunnad Bab-Dummad-gayaburba-ganguedba, baliwitur-dummad-gayaba, degi, Bab-Dummad-gar-trompetaʼba, nibneggi aidedagoed. Geb dulemar-Cristoʼgi-bengussuli-burgwismalad-inse durgudagoed.
1TH 4:17 A-sorbali, anmar-dula-gudimalad, anmar-besmalad, gwenadgan-Bab-Jesúsʼgi-burgwismaladba-mesa nibnegse seledmarmogoed. Adi, agi anmar mogir-imbaba Bab-Jesús-abinguegar. Deyobi, anmar Bab-Jesúsʼba degisadegu gudii gumaloed.
1TH 4:18 Degisoggu, we-gayaburbagi na be muchub-muchub ogannodii imakmarsun.
1TH 5:1 Gwenadgan, an bemarga Bab-Jesús-danikoed-ibagansik, degi, e-wachi-danikoedsik, narmaked be abesurmalad.
1TH 5:2 Ar bemar nue-wismalad, Bab-Jesús-danikoed-e-iba, ukiagwar nonikoed, igi-atursamalad ukiagwar mutik nonidae, deyob nonikoed.
1TH 5:3 Dulemar weyob-sogmaladgine: “Bela neg-bogidik-naiye, ar ibiga anmar dobgudagoye.” A-dulemargine, ukiagwale bergued-ibagan nonikoed. Igi ome-wargwen ukiar na e-bonigan itoardae, deyob nonikoed. Dulemar we-igargangi gwen wakinnosulid.
1TH 5:4 Gwenadgan, bemardi, negsichidgi gudisurmalad, adi, Bab-Jesús-danikoed-iba dule-atursaedyob ukiagwar bemar-imakmalagar.
1TH 5:5 Ar bela bemar gwallu-meegwad-mimmi gumalad, degi, ibgined-mimmi gumalad. Anmar neg-mutikinedsulid, degi, negsichidginedsulid.
1TH 5:6 Degisoggu, anmar dule-baiganyob gabewilubsulid. Anmar nue-atakdii, degi, nue-neg-itoakwaa-gudii gumalargebed.
1TH 5:7 Dule-gabmalad, mutik gabmalad. Dule-mumgumalad, mutik mumgumalad.
1TH 5:8 Ar anmardi neg-ibgined-mimmigan-gumarsoggu, nue-neg-itoakwaa-itodii nanamala. Anmar binasgargi-mor-esgorobiid-nasikedyob Jesucristoʼgi-bensulidi, degi, Bab-Dummad-sabguedi, isguedgi anmar-bendakoed. Deginbali, bormo-gurginyob Bab-anmar-abonoged-edarbediidi, isguedgi anmar-bendakoed.
1TH 5:9 Ar Bab-Dummad beedse-anmar-odurdakega anmarse gochasulid. Anmarse gochad, anmar-Bab-Jesucristoʼba anmar abonolegegar.
1TH 5:10 Jesucristo anmar-ular burgwisad, adi, anmar dulagudiidgindibe, burgwisadgindibe, anmar Jesucristoʼba gudii guegar.
1TH 5:11 A-ulale, ar igi na be imakdimalayob, na be muchub-muchub ogannomarsun, degi, Bab-Igargi nasgumai-gumalaga na be bendakdii gumarsun.
1TH 5:12 Gwenadgan, anmar bese egised, bela-bela bemar-abargi-arbadimaladgi be nue-binsaed-nikaa damala. Bemar-idudimalad, degi, Bab-Jesús-nuggi be-unadimalad, mag be dake nanamala.
1TH 5:13 Amargi bemar nue-binsaed-nikaa damalo, degi, Bab-Jesús-Igargi-arbadiid-ular, bemar amar nue-sabgumarbalo. Na be muchub-muchub bogidikidgi gudii imakmarsun.
1TH 5:14 Gwenadgan, anmar bese wilenaimarbalid, dulemar-arbabisurmalad be nue-unao, gwage-nollo-gudimalad be ogannogo, dule-burba-gege-itomalad be bendako, degi, binnalegwadgi bela dulemar-sedii be nanamalo.
1TH 5:15 Nue be dakmalo, dule-gwensak dule-egi-ibmar-isgana-imaksadgi mer ibmar-isgana-imakmogad be imakmalo. Aka bur bule ibmar-nueganbi-imaked be imakmar. Unnila bemarbi na be deyob mer be imakmala, bela dulemar-baigan be deyob imakmarbali.
1TH 5:16 Weligwarbi itodii be gumar.
1TH 5:17 Bali-bali Bab-Dummadse-gordii be gumar.
1TH 5:18 Bela ibmar-gunaidgi Bab-Dummadga be doggus-nuedye sogmala, ar Cristo-Jesúsʼgi Bab-Dummad weyob-sogbi be abemaid.
1TH 5:19 Bab-Dummad-Burba-Isligwaled-e-arbaed mer bargaed be imako.
1TH 5:20 Bab-Dummad-gayaburba-barsogmalad Bab-Dummad-Gayaburbagi bega sunmakalir, mer be baisur dako.
1TH 5:21 Bela ibmar nue wilubdako, unnila igar-nueganbi be suoed.
1TH 5:22 Bela ibmar-isganamargi be bangu.
1TH 5:23 Bab-Dummad-sunnad, ulubgi-bogidik-uked-Bab-Dummad, bela gwage-swilidik bemar-imaksun. Bab-Dummad anmar-Dummad-Jesucristo-danikoedse, bela be-sana, be-san-burba, degi, be-burba gutusuli bemar-imaksun.
1TH 5:24 Ar Bab-bemarse-gochadi, dule-yardakedsulid, anmarga-ibmar-saoye-sogsadi, bela imakedsegad.
1TH 5:25 Gwenadgan, anmarga Babse gormarmogo.
1TH 5:26 Bela gwenadganga nue-angaagwaledgi, be nued sogeye be sogmar.
1TH 5:27 Bab-Jesús-nuggi an bemarga sogmarsun, we-garda bela gwenadgan-Jesúsʼba-nanaimaladga be absomalo.
1TH 5:28 Anmar-Dummad-Jesucristo bela bemargi nued binsamarsun. Be itomargua.
2TH 1:1 Anmar Pablo, Silvano, degi, Timoteo, bemar-Jesúsʼba-nanaimalad-danar-Tesalónica-neggweburgi-ambikunonidamaladga, garda narmakmalad. Bemar Bab-Dummadgi, degi, Bab-Jesucristoʼgi-akananaimalad.
2TH 1:2 Anmar-Bab-Dummad, degi, Bab-Jesucristo, bemargi nued binsamarsun, degi, e-ulubgi-bogidik bemarga uksabarsun.
2TH 1:3 Gwenadgan, anmar bemar-ular gusgu Bab-Dummadga dog-nuedye sogergebed. Ar deyob anmar sogele, wede ibnuedid, ar bemar Cristoʼgi-bensulid-nikad bur bule nasgumaid, deginbali, na bemar muchub-muchub-sabgued bur bule nasgumaibalid.
2TH 1:4 Degisoggu, anmar Bab-Dummadba-nanaimalad-danar-ambikunoni-damalad-abargi bemargi sunmakalile, anmar bemarba nug-dummarba itodamalad. Ar be-baregilledimalad-abargi, degine, ise-solegagwar-gudimalad-abargi, na be san-bargadimalad, degi, Jesúsʼgi-bensulid nue oyodimalad.
2TH 1:5 Bela weyob ibmar-guedi nue oyonaid, Bab-Dummad igar-nabogedi bela innikigwadba imakye. Degisoggu, Bab-Dummad e-negdakmaidse bemar nabir-dogega be-imaknanaid. Ar a-ular, bemar sabsur-wiledimalad.
2TH 1:6 Ar Bab-Dummad dule-innikigwadsoggu, emi dulemar-be-wiodimalad, Bab-Dummadse sabsur-odurdaklemarmogoed.
2TH 1:7 Ar bemar-naibi-itodimaladgardi Bab-Dummad obunnoged ukoed, ar igi anmarga obunnoged ukmogoe. Ar Bab-Jesús nibneggi e-baliwitur-dutusurmalad-abargi, soo-gwabunye-danikid-abalagi-danikir, we-ibmar weyob guoed.
2TH 1:8 Bab-Jesús, dulemar-aku-Bab-Dummad-dakdimalad-sabsur-odurdakega, degi, dulemar-anmar-Dummad-Jesucristo-e-Gayaburba-Nuedba-nanadisurmalad sabsur-odurdakega, danikoed.
2TH 1:9 A-dulemar degisadegu odurdaklesii gumaloed, Bab-Jesús-e-maidgi dikasur-bangu barmelledmaloed, gwen Bab-Jesús-yeerdakleged-e-gangued dakosurmalad.
2TH 1:10 Bab-Jesús gannar danikir, weyob we-ibmar guoed. A-ibagi, bela Jesúsʼba-nanaimalad-gwage-swilidikmalad Bab-Jesús-nug odummomaloed, degi, bela Jesúsʼgi-bengussurmalad geger Jesús-dakmaloed. Ar bemar amar-abargi nanaimogad, ar ade, anmar bemarga Jesúsʼgi-sunmaksagua, bemar bengussurmalad.
2TH 1:11 A-ulale, anmar bemarga Bab-Dummadse bali-bali gordimalad, adi, anmar-Bab-Dummad eba-naguega bese-gochadi nabir be-dagmalagar. Anmar Bab-Dummadse egisbalid, bitigi Bab-Dummad na e-gangued-nikadba bela bemar ibmar-nuegan-abedimalad bemarga ukena gadinye. Deginbali, bitigi bemar Jesúsʼgi-bensulidgi-arbaed-imakdemalad bemarga obelosana gadinye.
2TH 1:12 Anmar weyob Bab-Dummadse gormalad, adi, deyobi anmar-Bab-Jesucristo-e-nug bemarba dunguoed. Jesucristo anmar-Bab-Dummad-sabgued-dummarba-nikadba, degi, na e dulemargi-nabir-binsaedba, bemar-nug odunguoed.
2TH 2:1 Emigindi, gwenadgan, anmar-Dummad-Jesucristo-danikoedsik, degi, anmar-ebo-abinguoedsik, anmar wilesakwaa bemarse egised,
2TH 2:2 melle bemar baisursunna binsaed galemalo. Melle be gwayemarbalo, ar dule-gwensak bemarga sokalir, an negburgan daksaye, igidibe, gakansaar bemarga sokalir, Pablo deyob sogye, igi, bemarga sogmarbardibe, ani Pablo, weyob garda narmaksaye: “Bab-Jesús-gannar-danikoed-ibadi bato nonisunye.”
2TH 2:3 Melle bipisaar dule-be-yardaked be imako. Ar we-ibagan-danikoed-idu, dulemar-bukidar bina Bab-Dummadgi gwisgumargweloed. Degi, bina Dule-Isgana nonigweloed. A-dulega bato igar-maid, soo-saila-odurdakleged-negse naed.
2TH 2:4 A-dule, bela Bab-Dummadye-bilemalad-e-isdaradid, degi, bela Bab-Dummadga ibmar-nugsalesad e-isdaradid. A-dule, Bab-Dummadse-goled-neggi na Bab-Dummadyobi signonikoed. Bab Dummadyobi na san saoed.
2TH 2:5 ¿Ar bemar insasursi, an bemar-abargi-gudigusgu, bato an bega we-ibmargi sunmaksamalad?
2TH 2:6 Ar emigindi, bemar nue-wisid, ibu amba we-Dule-Isgana-bargaega-imake, adi, mer e-iba-danikoed-iduar dakledagegar.
2TH 2:7 Ar napiragwa isgued-gandik-e-igar-dukuar-maid bato imaklenaid. Emidi, dule-wargwen Dule-Isgana barganikid. We-dule-onirilegedse Dule-Isgana-barganai guoed.
2TH 2:8 Deyob gusad-sorbali, geb Dule-Isgana dakledagoed. Bab-Jesús e-bunnogedgi a-dule-oburgoed, degi, e-gangued-nikadba danikoedgi a-dule-obelogoed.
2TH 2:9 A-Dule-Isgana, nia-saila-Satanás-sogedba danikoed. A-dule, nue-gangued-nika nonikoed, bela ibmar-dakledisurmalad imaknonikoed, ibmar-wilubgan-dakledisurmalad oyononikoed, degi, ibmar-gegerdaklemalad gakansaar imaknonikoed.
2TH 2:10 A-dule, bela ibmar-isgana-galagwensulidgi dulemar-odurdakleged-negse-yoggumaloed yardaknonikoed. Ar we-dulemarde abonolegega igar-napiragwad yapa abingagusmalad.
2TH 2:11 A-ulale, Bab-Dummad, we-dule-gakansili, we-dulemar-yardakega imaked. Adi, dulemar gakan napiragwadyob itomalagar.
2TH 2:12 Deyobi, bela-dulemar-igar-napiragwadba-abingassurmalad, sabsur-odurdaklemaloed, ar ade, bur isguedgi yeer itosmalad.
2TH 2:13 Bemar Bab-Jesúsʼse-gwenadgan-sabgulesmalad, anmardi, bemar-ular Bab-Dummadga doggus-nuedye sogergebed. Ar ade, Bab-Dummad gebe-negasailaunni be-abonomalaga be-susmalad. Bab-Dummad na E-Burbaba bemar egadga-guega bemar-susad, ar ade, bemar igar-napiragwadgi bengussurmalad.
2TH 2:14 Wegala, anmar bemarga Bab-Dummad-gayaburba-dule-abonolegedgi-sunmaksagu, Bab-Dummad bese gochamalad, adi, bemar Dummad-Jesucristo-e-gangued-yeerdaklegedba yeer daklemarmogagar.
2TH 2:15 Degisoggu, gwenadgan, mer galakumalo. Anmar bemarga sunmakar be-odurdaksamalad, igi, gardagi anmar be-odurdaksamalad, mer be iemalo.
2TH 2:16 Anmar-Dummad-Jesucristo-sunnad, degi, Bab-Dummad anmar-baba, anmar-sabgusadi, anmar-wiledakedba anmarga gwage-armaked-geg-bergued-uksadi, degi, nue-bensulidgi anmarga ibmar-edarbediid-uksadi,
2TH 2:17 bemarga niga-ogannossun, degi, bemarga gwage-ogannosbarsun. Adi, bemar sunmakedgi, degi, ibmar-imakedgi bela ibmar-nuegan imakmalagar.
2TH 3:1 Napidgine gwenadgan, an bemarse egisdo, anmarga Bab-Dummadse gormalo. Adi, Bab-Jesús-Gayaburba bela neggwebur-bamaladse gwae warmakega, degi, igi bemar we-Gayaburba-Nued bela nuedgi abingasgusmala, deyobi, dulemar abingamarmogagar.
2TH 3:2 Deginbali, anmarga Bab-Dummadse gormarbalo, adi, anmar dulemar-isganamargi ollorgumalaga, ar ade, bela dulemar Bab-Jesúsʼgi bensulidbisurmalad.
2TH 3:3 Ar Bab-Jesús na ibmar-sogsar ibmar-imakedsedaed, na e bemar-ogannomaloed, degi, dulemar-isganagi bemar-bendakoed.
2TH 3:4 Anmar Bab-Jesúsʼgine gwen-bemargi-bensurmalad, anmar bemar-odurdaksadba be ibmar imakmalad, degi, amba deyobi be imakdii gumarbaloed.
2TH 3:5 Bemar Bab-Jesús Bab-Dummad-dulemar-sabgueyobi dule-bamalad-sabguega be-imaksun, degi, wile-itogedgine Cristo-baisursunna-ibmar-itoged-nika bemar-imaksun.
2TH 3:6 Gwenadgan, anmar-Dummad-Jesucristo-nuggi an bemarga sogmar, bela gwenadgan-wie-itodimaladgi be bangumar. Amar, anmar-igi-e-odurdaksagusa, aba nanadisurmalad.
2TH 3:7 Ar bemar-sunnad nue wismalad, igi-bemar-abargi anmar gudigusmala, deyobi, bemar anmarba damalargebed. Anmar bemar-abargi-gudigusgua, anmar arbasuli gudigussurmalad.
2TH 3:8 Deginbali, anmar bengir mas guchasurmarbalid. Aka bur anmar mutikidba, ibginedba, ise-arbanai, degi, ise-alamaknai gusmalad, adi, anmar mer bemarginbi gudigumalagar.
2TH 3:9 Anmar sunna bemarse bendakleged-egised nikanad, degi-inigwele, anmar arbasmalad, adi, bemar anmar-daedba damarmogagar.
2TH 3:10 Anmar bemar-abargi-gudigu, an bemarga weyob igar uksagusad: “Ar dule-wargwen arbabisulile, mas gunnosurdo.”
2TH 3:11 Ar anmar wisgusad, gwen-gwen bemar-abargi arbabisuli binsa gudimarye. Amar na e-igargi binsasurmalad, unnila dule-bamalad-igargi yogasaar gotebin-gotebin gudimalad.
2TH 3:12 A-dulemarga anmar-Dummad-Jesucristo-nuggi anmar ega igar uked, degi, ese gormarbalid, bemar mas-gunnega bogidikidgi arbadii imakmarye.
2TH 3:13 Gwenadgan, bemar ibmar-nued-imakdimaladgi mer be wiegumar.
2TH 3:14 Dule-gwensak we-gardagi-anmar-bemarga-ibmar-sognaidba ibsasulile, bemar dulemarga barsogmar, degi, bingeguega egi be bangumar, mer be eba gudii imakmar.
2TH 3:15 Degi-inigwele, a-dule, melle be-isdaradyob be dako. Be-gwenadgusoggu, nue be unao, ega binsaed-nued uko.
2TH 3:16 Bab-Jesús-ulubgi-bogidik-uked, bemar nued-gudiidgindibe, boni-nikadgindibe, bemarga e-ulubgi-bogidikid-nikad degisadegu uksun. Deginbali, Bab-Jesús bemarba degisadegu gudigusun.
2TH 3:17 Ani Pablo, garda-bergunaidgi an-sunnad, an-argan-sunnadgi an bemarga narmaksiid. Weyob-an-narmaked bela an-gardamar dule-bamalad-gardabo akardakle imaked. Weyobi, an gardamar narmaked.
2TH 3:18 Anmar-Dummad-Jesucristo, bemargi bela nued binsadii gumarsun. Be itomargua.
1TI 1:1 Ani Pablo, Jesucristo-e-sapin-bur-dummadga-gumogaga nugsalesmogadid. Bab-Dummad-anmar-Abonoged, a an-barmialid, degi, anmar-Dummad-Jesucristo anmar-bensulidgi-edarbediid, a-nuggi an barmilealidbalid.
1TI 1:2 Timoteo, we-garda na bese narmaked, be Bab-Jesúsʼba-naid-ular, an-machi-sunnadyob gunonikid. Bab-Dummad-anmar-Baba, degi, anmar-Dummad-Jesucristo, begi nued binsamarsun, degine, wile be-dakbarsun, deginbali, ulubgi bogidik be-itogega imakbarsun.
1TI 1:3 Macedonia-yarse an naed-iduar igi bega an sogsa, Éfeso-neggweburgi be beoye, deyob gannar an bega sogbar, adi, dulemar-noar-odurdakdimaladga be sogegar, mer be Bab-Igar noar odurdakmarye.
1TI 1:4 Sergan-igar-nui-sunmaklemalad, degi, dadgan-e-anagan-dikasur-danimaladgi, mer egi be sunmakdii gumalo. We-igargan binsa unnila na abin-abin-imakmalad-igalad, Bab-igarsikdi gwen anmar-ogannogosulid. Bab-Dummad-Igar-Maiddi unnila bensulidgi abingaleged. Deyob be dulemar-odurdakoed.
1TI 1:5 We an bega igar-ukedi, adi, na be muchub-muchub nue-napiragwadgi gwage-swilidikidgi sabgumalagalad, degine, ulubgi akar-itosulidgi sabgumalagalad, deginbali, napiragwadgi Jesúsʼgi-bensulidbali na be sabgumarbaligalad.
1TI 1:6 Gwenna-gwenna dulemar weyob-sabgued-igargi bangudmalad. Agala, binsa yogasaar sunmakdemalad.
1TI 1:7 A-dulemardi, Moisés-Igar-Maid-odurdaked-nue-wisye sogdimalad. Ar degite, emarbela we-Igar-Maid amba aku itomalad, degine, wissurmarbalid, ibigi sunmakdimarbali.
1TI 1:8 Ar anmar nue-wismalad, Moisés-Igar-Mesisad, igar-nikaa anmar nue-ebudiile, igar-nuedid.
1TI 1:9 Anmar nue wisid, Bab-Dummad anmarga Moisés-Igar-Uksadi, dule-nuegangarsulid. Unnila wemarga uklesad: Dule-isganamarga, dule-uaya-nikaadasurmaladga, dule-Bab-Dummadgi-binsasurmaladga, dule-isgudimaladga, dule-Bab-Dummad-Igargangi-dododimaladga, degi, Bab-Dummad-nuggi-dododimaladga, dule-na-e-bab-oburgwemaladga, na-e-nan-oburgwemaladga, dule-aimar-gindakmaladga,
1TI 1:10 abirgunagwarsuli-negsichigi-yolemaladga, omegiidmaladga, machergangiidmaladga, dule-emar-atursamaladga, dule-gakansamaladga, gakansaar-ise-sogar ibmar-samaladga, degi, bela dulemar-Bab-Igargi-gwisgudimaladgar. A-ular, Bab-Dummad amarga Moisés-Igar mesisad. Degisoggu, Moisés-Igar-Megisadi, bela dulemar Bab-Igargi-yoledimaladga megisad.
1TI 1:11 Bab-Dummad-nuedid E-Gayaburba-Nued-Birigined, an egi sunmakega anga uksad. Ar we-Gayaburbadi igar-nueganginbi dulemar-odurdaked.
1TI 1:12 Emi Cristo-Jesús-anmar-Dummad-an-ogannogedga, dog-nuedye an soged. Ar angi-bengussulidba, ega arbaega an-nug-imaksad.
1TI 1:13 Epennedi, galagwensuli Jesucristoʼgi-dodoar an sunmakdii gusad, e-sapingan-baregindii an nanasad, degine, egi urwedii an nanasbalid. Degi-inigwele, Bab-Dummad wile an-daksad, ar ade, aku an ibmar-itogedba, amba an Bab-Jesús-bengudigusadba, an deyob gudii gusad.
1TI 1:14 Ar a-ular, anmar-Bab-Dummad ibiyobi bela-bela nued angi binsasa. Abali, Jesúsʼgi-bensuli-gued, degi, e-sabgued anga uknonikid. Ar Cristo-Jesúsʼgi anmar akanaid-ular, wemar bela anmarga uksad.
1TI 1:15 We gayaburba-napiragwadid, bela dulemar bensulidgi abingaewilubbid: “Cristo-Jesús bela dulemar-isgudimalad-abonogega we-napnegse noniye.” Ar andi bur bule amarba dule-isgusad-duled.
1TI 1:16 Ar an bur bule isgus-inigwele, Bab-Dummad nue-wile an-daknonikid, an-abonononikid. Adi, angin-inse Cristo-Jesús bela na e-sabgued-geg-bergued angi oyogegar. Degisoggu, e-wilubga an gunonisunnad, adi, dulemar-an-sorba-Jesucristoʼgi-benguosurguoed burba-geg-bergued-nikumaloedga, oyogegar.
1TI 1:17 Degisoggu, aga anmar-Rey-Dummad-degisadegu-maid, geg burgwed, a-e-nug odummolesun. We-Rey-Dummad sanar dakledisulidid, unnila abi bela-ibmar-wisimaidid, a e-nug odummolesun. Ar deyobdo.
1TI 1:18 Degisoggu, Timoteo, be an-machiyobsoggu, we-igar na bega uksunnad. Bab-Dummad-gayaburba-barsogmalad iduakwaa bato begi sogsamaladyob an bega sogmosunnad, adi, be nue-napiragwadgi-alamaknai guegar. Be nue salakar.
1TI 1:19 Gatik Jesucristoʼgi be bensuli guo, degine, ulubgi gwen-akar-itosuli be gudii guo. Gwenna-gwennadi weyob gwen imaksasurmarsoggu, galakudmarsunnad, Bab-Jesúsʼgi bangudmarsunnad.
1TI 1:20 Deyob Himeneo, degi, Alejandro gusmalad. Degisoggu, amar mer bar Bab-Dummadgi isdar sunmakmalaga, an nia-saila-Satanásʼga urmaksasunnad.
1TI 2:1 Degisoggu, a-ular an be-ogannomar, an bemarga sogmarsun: Bela dulemarga be Bab-Dummadse ibmar-egismar, Bab-Dummadse gormar, Bab-Dummadse wilemar, degi, bela dog-nuedye be Bab-Dummadga sogmar.
1TI 2:2 Reymarga Bab-Dummadse be gormar, degi, bela dulemar-negdakmamaidga be gormar, adi, anmar bogidikidgi, dule-anmargi-gwisgusulidgi, Bab-Dummadgi-binsabukwa, degi, nue-nanabukwa anmar guegar.
1TI 2:3 Ar wede, deyob-Babse-goled, igar-nuedid, degi, Bab-Dummad-anmar-Abonoged yeer we-igar itomogad.
1TI 2:4 Ar ade, Bab-Dummad binsamaid, bela-dulemar bitigi abonolesana gadinye, degine, bela igar-napiragwad wisgumalana yeerbanye.
1TI 2:5 Ar Bab-Dummad unnila wargwenna gued. Degine, dulemar-anar Bab-Dummad-irwa-gwisguedi unnila wargwenna gubalid. A-dulede, dule-sunnadid, Cristo-Jesúsʼye-nugad.
1TI 2:6 A-Jesucristoʼde bela dulemar-abonogega, burgwega na san-uksa gusad. We-ibmar, Bab-Dummadi, e-wilubgan-mosgu, deyob-guega imaksad, adi, oyogega, Bab-Dummad bela dulemar-abonomaiye.
1TI 2:7 A-ular, a-igargi-sunmakega an barmialealid, degi, Jesucristo-e-sapin-bur-dummadga-gumogaga an nug-imaklesad. Napira an bemarga soged, an gakansasulid. Jesúsʼgi-bensulidgi, degi, napiragwadgi Judíoʼsurmalad-odurdakega an nug-imaklesad.
1TI 2:8 Degisoggu, a-ular, an abedo, machergan bela-yar-baid-baidgi-bukwamaladi, urwedginsuli, degi, na abin-abin imakedginsurbali, unnila gwage-swilidikidgi, Babse goled.
1TI 2:9 Aginbali, an abebardo, omeganmo, nue-wilubbali, dogdar wilub-obichasuli, nuedgi, mor yomarmogad. Omegan, mer dogdar wilub-obicha sailagia nudakmalo, degi, olomar, winimar, molamar-gargemalad dogdar-obichaa mer yomarbalo.
1TI 2:10 Ar unnila ibmar-nuegan-imakedbarbi omegan san ogannomalad. Mor-yeerdakle-yoedgi na san ogannosurmalad. Ar igi omegan-nue-Jesúsʼba-nanaimalad damala, deyob bemar daewilubmarmogad.
1TI 2:11 Ome nue-bogidikidgi, ibmar-itosiidgi, degi, urbaligwa-daedgi, ibmar-durdakewilubbid.
1TI 2:12 Ar ome machered-odurdaked an abesurbalid, degine, mer machered-birgi obichaa dabalo. Unnila bogidik nue-itosii guoed.
1TI 2:13 Ar ade, Bab-Dummad Adán-inse ogwichisad, geb a-sorba, Eva-ogwisnonikid.
1TI 2:14 Deginbali, Adán gwen nia-sailase binsaed-galessulid, Eva nia-sailase yardaklesgusad. Degisoggu, Eva isgunonisunnad. A-ulale, omegan machergan-birgi daewilubsulid.
1TI 2:15 Degi-inigwele, ome dula-urbedgi, bendaklegoed. Bab-Jesúsʼgi-bensulile, sabguele, gwage-swilidikile, degi, dogdar-obichadasulile, bendaklegoed.
1TI 3:1 We igar-napiragwaddo: Dule Jesúsʼba-nanaimalad-e-dummadga gubiele, arbaed-nuedbina soged.
1TI 3:2 A-ulale, dule Jesúsʼba-nanaimalad-e-idumalad-e-dummadga gubiele, dule-weyobid abeleged: Dule-egi-ichakwa-sunmaked-sated, dule-unnila-ome-wargwenna-nikad, dule na-dukin-sunna-san-bargaed, dule-binsaed-nikadaed, dule-mag-emar-dakeedaed, dule-nabir-emar-akwed, dule-yeer-dulemar-odurdaked,
1TI 3:3 dule-geg-mumgued, dule-geg-abin-abin-daed-amied, dule-geg-ibmar-isganagi-mani-onoged, dule-gwenadgan-sabguerbad, dule-binnalee-na-san-bargaar-ibmar-saed, dule-maniginbi-dogdar-binsasulid.
1TI 3:4 Dule na-neguya-nued-sediid, dule na-mimmigan-uaya-nikadaed-sediid, degi, e-mimmigan egi-binsaed-nikaa damarmogad.
1TI 3:5 Ar dule na e-neguyagi neg wissur-seele, degite, ¿igi nabir Jesúsʼba-nanaimalad-sebalosunna? Geg nabir sebardo.
1TI 3:6 Deginbali, dule Jesúsʼba-nanaimalad-e-dummadga gubiele, dule-geb-emisgwa-Bab-Jesúsʼba-nagusad, geg gued. Abakalegi, na san dummarba-saedba, nia-saila-isgusadgii isguarmogale.
1TI 3:7 Deginbali, dule Jesúsʼba-nanaimalad-e-dummadga gubiele, dulemar-Bab-Jesúsʼba-nanaisurmalad-abargi e-daed nued oyodibalirgebed. Adi, mer amar egi ichakwa sunmakmalagar. Ar abakalegi, nia-sailase binsaed galealile.
1TI 3:8 Jesúsʼba-nanaimalad-bendakmalad amba weyob damarmogargebed: Dule-nued-nanaed, dule-unnila-inniki-ibmar-soged, dule-geg-mumgued, dule-ibmar-isganagi-geg-mani-onoged,
1TI 3:9 dule binsaed-swilidikidgi Bab-Jesúsʼgi-bensulid-igar-epenne-dukuar-maigusad sediid.
1TI 3:10 Ar we-dule, nue wilubdaklegwelergebed. E-daedgi, dule gwen egi akar-sunmaksulile, geb Jesúsʼba-nanaimalad-bendakedga nugsalegodo.
1TI 3:11 Jesúsʼba-nanaimalad-bendaked-omegan amba weyob damogargebed: Dule-nued-nanaed, wissur-gakangi-sunmaked, nue-binsaed-nikadaed, degi, bela ibmar-saedgi dulemar-geg-yardaked.
1TI 3:12 Jesúsʼba-nanaimalad-bendakmalad weyob abeleged: Unnila ome-wargwen-nikad, nue-neguya-wisi-seed-dule, degi, e-mimmigana, nue-akwedibalid-dulebar.
1TI 3:13 Ar ade, Jesúsʼba-nanaimalad-bendakmalad nued arbaele, nue nug-nikaa gwenadgan-abargi gunonidaed. Degine, Cristo-Jesúsʼgi-bensulidgi bur-nue-dobsuli sunmakdamalad.
1TI 3:14 Emisgwasaar, an be-daknaega bese nadapo an insado. Degi-inigwele, an bese garda narmakdo,
1TI 3:15 adi, be wisguega an wis-yoggud be an-dakele, igi be Bab-Dummad-neg-yaginmalad-abargi be nanaergebe. Bab-Dummad-negyaginmalad-soglegedi, Bab-Dummad-Dula-Maid-e-sordamarye. Amala, igar-napiragwad-ganimaladid, igi buar neg-ganiki, ayobmodo. Degi, amar a-igar-irwa gwisgumarbalidid.
1TI 3:16 Emide, Bab-Jesús-igar geg benguleged. Ar we-igar igar-dakledisulid-igalad, igala-dummadid, ar ade: Bab-Dummad anmarse oyolesad, anmar-dule-sunnadyob napnegse aidenonikid. Bab-Dummad-Burba-Isligwaled dule-ibmar-oakalossulidye-nik sogsad. Baliwiturmar, Bab-Jesús-nue-daksamarmogad, Judíoʼsurmaladga Jesús-igar-nuedgi ega sunmaklesad. Dulemar-napneggi-bukmalad Jesúsʼgi bengussurmalad. Degi, Bab-Dummad na e-nibnegse Jesús-onakwisad, agi e-nug odummossunnad.
1TI 4:1 Bab-Dummad-Burba anmarga nue ise-sogar imaknaid. Anmarga soged, ibagan bergudanikile, bukidar Bab-Igargi bangudmaloye. Ar amarde, burba-isgana-dule-yardakmaladba akadmaloed, degi, niamar-igar-odurdakmaladba nadmaloed.
1TI 4:2 We-dulemarde, dulemar-wagar-darbo-damalad-itodmaloed, degi, dulemar-gakansaerbamalad itodmarbaloed. Ar we-odurdakmaladde e-ulubgi igar-isgana-imaknair, esgoro-uedgi wilubgan-nasiklegeyob, gwen bai itogosurmalad.
1TI 4:3 A-dulemarde noar odurdakmalad. Sogdamaloed: “Machergan mer ome-nikumaloye. Omeganmo, mer machergan-nikumarmogoye.” Degine, sogdamarbaloed: “Mas gwen-gwen ise gulleye.” Ar ade, Bab-Dummad mas obinnissursi, adi, Bab-Jesúsʼgi-bensurmalad, igar-napiragwad-wismalad mas gunmalagar.
1TI 4:4 Ar Bab-Dummad-bela-ibmar-obinnisadi, ibmar-nueganbiid. Degisoggu, ar Bab-Dummadga-dogdar-nuedye-soglegedgi, ibmar-abingaleger, gwen oballege-wilubsulid. Bela abingalege-wilubbiid.
1TI 4:5 Ar Bab-Dummad-Gayaburbagi, degi, Bab-Dummadse-goledgi we-ibmar bela swilidik gued.
1TI 4:6 Ar be we-igargi gwenadgan-odurdakele, be Jesucristoʼga-arbaed-nuedga guoed. Bab-Dummad-e-gayaburba-nued-bensulidgi na be nasgumai-gumogoed, degine, igar-nuegan-maidba-daedba be nasgumai gudbaloed. Ar be we-igar-nuegan-durdaksadba be nanadimogad.
1TI 4:7 Mer we-napneggi-binsa-nabir-nue-sunmaklemalad be itogo, degi, mer be binsa-igar-onolegedgi-sunmakmaladgi binsabalo. Bab-Dummad-sabedbali e-igargi-dobekwaa-nanaedgi be alamaknai gusun.
1TI 4:8 Ar abaganmar-ogannolegedi igar-nuedindo, degi-inigwele, ulubgi-burba-ogannoleged bur-igar-nuedid. We-burba-ogannoleged, emisgwa-gudiguedgarbisulid, yoedse Bab-neggi-gudii guedgarbalid.
1TI 4:9 We-igar napiragwadid, bela dulemar benguewilubsurmalad, bela abingaewilubmalad.
1TI 4:10 Ar a-ular, anmar dulemar-anmargi-urwed-abargi, Bab-Igargi alamaknaimarsunnad. Ar anmarde, Bab-Dummad-Dula-Maidginbi bensuli edarbedimalad. Ar Bab-Dummad bela dulemar-abonoged maid. Bur bule, dulemar-egi-bensurmalad-bendakmaid.
1TI 4:11 We-ibmar an bega sogsadyob, be Bab-Jesúsʼgi-bensurmaladga sogmogoed, deyob be odurdakbaloed.
1TI 4:12 Be sapingwagwad-ular, mer dulemar ibgwensur-be-dakega be imako. Aka bur gwenadgan-Jesúsʼba-nanaimaladga na be-daed-nued be oyogoed, be-sunmakedgi, be-daedgi, be-sabguedgi, be Bab-Jesúsʼgi-bensulidgi, degi, be-san-burba-swilidik-nanaedgi.
1TI 4:13 Timoteo, an-bese-nadapoedse, gwenadganga gatik be Bab-Dummad-Garda absogo, gatik be gwenadgan-ogannogo, degi, gatik be gwenadgan-odurdakbalo.
1TI 4:14 Bab-Dummad bega-gurgin-nued-uksadi be nue ebugo, ar wede bega uklesad. Deun, Jesúsʼba-nanaimalad-e-idumalad-danar-bukwa Bab-Dummad-sogedba na e-arganmar be-nonogi mesismargu, bega uklesad.
1TI 4:15 We igargan an-bega-sogsadginbi be gatik alamaknai sao. Aginbi be nanao, adi, baigan Bab-Jesús-Igargi be-nasgumaid mag be-dakmalagar.
1TI 4:16 Timoteo, nue-salakar, be-daed nued-oyodii be guo. Deginbali, be-ibmar-odurdaked nuekwaa be odurdakdii gubalo. Ar deyob be imakele, na be san-bendakoed. Deginbali, dulemar-be-itodimalad be bendakbaloed.
1TI 5:1 Mer serganga be sabsur-urwedgi ibmar sogo. Ega be ibmar-sogbiele, be-babyob-be-dakedgi be nuedgi unao. Degine, sapingana be-gargwenadyobi be dako.
1TI 5:2 Omegan-sergan be-nanyobi be dakbalo. Yagana be-bunsunnadyob be dakbalo. Mer egi be akarbinsao.
1TI 5:3 Ammormar-ei-sui-burgwismalad-nue-bendakleged-abediid walagwen-gudimalad, be gatik bendako.
1TI 5:4 Ar ome-gwensak-ei-sui-burgwisad mimmigan-nikadibe, wagan-nikadibe, wemar-inse a-ome-akwemalargebed. Ar igi bipigwaunni e-babgan na e-akwismarmoga, deyobi, e-dadgan, degi, e-babgan-akwemarmogargebed. Ar deyob imakele, we igar-nuedid, degine, Bab-Dummad we-igar yeer daked.
1TI 5:5 Ar ome-ei-sui-burgwisad walagwen bessoggu, unnila Bab-Dummadginbi ibmar abdakdisunnad, degi, Bab-Dummadse mutikidba-goledi, ibginedba-goledi, gwen bogiledisulid.
1TI 5:6 Ar ome-ei-sui-burgwisad galagwensuli-gudiiddi, amba dula-gudi-inigwer, bato burgwisayob gudido.
1TI 5:7 Weyob we-igarmar gwenadganga be ukoed, adi, gwenadgan we-igarmar nue-wisi gudiguega, mer akar egi sunmaknai gumalagar.
1TI 5:8 Ar Jesúsʼba-naid-gwensak wissur na e-gwenadgan-akwele, bur bule e-neguyaginmalad-wissur-akwele, a-dule bato Bab-Jesús-Igar-Maidgi annasdo. Deginbali, a-dule, dule-Bab-Jesúsʼba-naisulidba aka bur-ege gudido.
1TI 5:9 Degisoggu, mer be yogasaar omegan-sui-ei-burgwismalad-nugmar be nasiko. Unnila, we-omegan-nug naguoed: Ome-birga-dulapaa-gwena-nikamalad. (60+) We-ome sui-baid-ogwassulid.
1TI 5:10 We-ome we-ibmar-nueganbi-imakdiidba egi-nued-sunmaklediid: E-mimmigan-na-nued-akwisad. E-neggi nuedgi dulemar-abindaksad. Jesucristoʼgi-akananaimalad-gadi-bendaked. Dule-wiledimalad-bendaksad. Degi, belagwapa akar-akar ibmar-nuegan-imaksad. Degiid-omeganbi, be e-nug nasikoed.
1TI 5:11 Omegan-ei-sui-burgwismalad-nuchukwagana-e-nugmardi, mer be nasiko. Ar sui-nikubigualid-ular, Cristo-Igargi-arbaedgi aibatoed.
1TI 5:12 Ar gebegi Bab-Jesúsʼga-na-ibmar-sogsad-imaksasursoggu, dukin ega boniga gunonisunnoed.
1TI 5:13 A-ukinbali, a-omegande wierba gudagoed, neg-baid-baidse doge-doge-gudii gudagoed. Abisurbar, gakan-berbegedga gudagoed, gotebin-gotebin-gudii gudagoed, ibmar-sogedsulidgi sunmakdii gudagoed.
1TI 5:14 Degisoggu, omegan-ei-sui-burgwismalad amba nuchukwagwale, bur sui-nikued an abeged, nusgana-nikued, an abebalid. Degine, e-neguya-nued-akwedigued an abeged. Adi, dulemar-Cristo-isdarmalad mer egi ichakwa sunmakmalagar.
1TI 5:15 Ar ade, bato omegan-ei-sui-burgwismalad gwen-gwen galakudmalad, bato nia-saila-Satanásʼba ebipiledmalad.
1TI 5:16 Degisoggu, dule-Bab-Jesúsʼba-naid machereddibe, omedibe, e-neguyagi ome-ei-sui-burgwisad gudidibe, we-dule a-ome-bendakergebed. Adi, Jesúsʼba-nanaimalad bur bule ome-ei-sui-burgwisad-bur-wilediid bendakmalagar.
1TI 5:17 Jesúsʼba-nanaimalad-e-idumalad nued-arbaele, ilabo-wilub nued bennuklegewilubmalad. Ar we-dummagan Bab-Igargi-sunmakmalad, degi, Bab-Igar-odurdakmalad, wemar bur bule nued bennuklegewilubbid.
1TI 5:18 Ar Bab-Dummad-Gardagi bato sognaid: “Moli-bebe-nikad ibmar-gwag-egwirmaknair, melle e-gaya edinno, adi, sunna ibmar-gwag maoed.” Deuteronomio 25:4 Deginbali: “Dule-arbaedga, bennukleged-igar ega nue maid.”
1TI 5:19 Jesúsʼba-nanaimalad-e-idumalad-gwensak isgudiiye soglealile, mer be itogo. E-barsogmalad warbo nikadibe, warbaa nikadibe, geb ega be igar itogo.
1TI 5:20 Ar amba Jesúsʼba-nanamalad-e-idumalad isgued gwen-iesurmalale, bela Jesúsʼba-nanaimalad-abargi bakar ega ibmar be sogoed, adi, baigan dobee itomarmogagar.
1TI 5:21 Bese an Bab-Dummad-asabin, degi, Bab-Jesucristo-asabin, degi, e-baliwiturmar-na-sulesmalad-asabin, ise egisar imaked: An bega we-igargan-uknaidi, sogedba be imako. Bela dummagan emarbi be dako, mer wargwenbarbi be nai guo.
1TI 5:22 Mer be ukurmakar Jesúsʼba-nanaimalad-e-dummadga be dule-nug-imako. Abakalegi igar nue-baramissuli we-dule isgunonikile, begi ataklemogoed. Be gwage-swilidik gudii sao.
1TI 5:23 Ar be-saban baisursunna-isgusoggu, degi, be baisursunna-uellebarsoggu, mer bar diibi be gobo. Wis be vino gobbalo.
1TI 5:24 Abala dulemar amba yoo igar-itolegedse-selede bato magar e-isgudiid dakledaed. Abaladi, igar-itolesad-sorba geb wisgulenonidaed, isgudiiye.
1TI 5:25 Ibmar-nued-imaklegedi deyobmodo. Imbagwenale, ibmar-nued-imakleged magasar dakledaed. Imbagwenale, ibmar-nued-imakleged akudakledaed. Degi-inigwele, magasar daklenonidaed, wisgulegedsedaed.
1TI 6:1 Dulemar maiganga-imakledimalad, be-ibed mag be-dummadye be dakdii gumalo. Adi, dulemar melle Bab-Dummad-nuggi isdar sunmakmalagar, degi, mer isdar Bab-Igar-odurdaklegedgi sunmakmarbaligar.
1TI 6:2 Maigan, bemar-ibed Bab-Jesúsʼba-naiddibe, Bab-Jesúsʼgi be-gwenadsoggu, a-ular, mer be ibgwensur dakmalo. Bur bule ega be nued arbae-wilubmalad, ar ade, wemala, Jesúsʼba-nanaimalad, degine, gwenadgan-sabesailamarbalidid. Weyob be gwenadgan-ounao, degi, weyob be odurdakbalo.
1TI 6:3 Ar dule, anmar-Dummad-Jesucristo-odurdaksadyob igar odurdaksulile, igar-baidgi yogasaar odurdakalile, degine, Bab-Dummad-Igar-Maidba nue odurdaksulile,
1TI 6:4 binsa na san-dummarba imakdiid, ibmar gwen wissulid, unnila binsa emarbo abin-abin-sunmaked amidiid. Ar degidaedba nobguleged noed, urwed amileged, aimargi-binsa-sunmakleged amileged, aimargi-gadi-ichakwa-binsaed onoddamarsunnad.
1TI 6:5 Deginbali, na abin-abin-sunmaklegedi, dulemar-galagwensuli-binsaed-igalad. Degine, ibmar-napiragwad gwen wissurmalad. Ar unnila binsamalad, Bab-Igarba-nagued dule-mani-ibed-imakye.
1TI 6:6 Ar napiragwad. Bab-Dummad-Igarba-nanaed, igar-nuedid, ibmar-bukidar egi nikulegedid. Ar deyob ega gued, dule e-ibmar-nikadgi weligwar itodiir.
1TI 6:7 Ar anmar we-napnegse-aidenonigu, gwen ibmar an senonisurmalad. Anmar burgwidbalir, amba ibmar gwen sedosurbalid.
1TI 6:8 Degisoggu, ar anmar masgunned nikadibe, degine, mor-yoed nikabardibe, anmar weligwar itogewilubbid.
1TI 6:9 Ar dulemar-mani-ibedga-gubimalad, wilubdakleged-igar ega nonikile, galakuddamalad. Ar ibmar-isganabina-surbinsa-itoged-e-maiga guddamalad. Ar we-ibmar-isgana-ibmar-baisursunnagwadse, dule-bukidar san-burba isgudiid, degi, san yoggudimarbalid.
1TI 6:10 Ar maniginbi binsalegedi, boni-dummadid, ar ade, isgumalad bela agi gwalulesiid. Ar bukidar unnila mani-nikuedginbi binsadisoggu, Bab-Jesús-Igargi banguddamarsunnad, degine, na dukin nunmaked amiddamarsunnad.
1TI 6:11 Degisoggu, bedina, Bab-Dummadba naisoggu, we-igar-isganamargi be bangue, igar-innikigwadba bur be nanae, Bab-Dummad-Igarba bur be dae, Jesucristoʼgi-bensulidba bur be nanae, sabguedba bur be dae, gwae-gwae itosulidba bur be dae, binnalegwadgi ibmar imakedba bur be dae.
1TI 6:12 Bab-Jesús-Igargi be alamaknai-imake, burba-geg-berguedgi be alakwaa nagu. Ar a-ular, Bab-Dummad bese gochad, deginbali, dulemar-bukidar-asabin be nue sogsagusad, Bab-Jesúsʼgi an nue bensurye.
1TI 6:13 Bab-Dummad-bela-ibdulaga-burba-ukmaid-asabin, degine, Jesucristo-asabin an bega soged, igi Cristo-Jesús Poncio-Pilato-asabin napiragwad sogsamoga, an bega deyob sogmogad:
1TI 6:14 Anmar-Dummad-Jesucristo-gannar-danikidse an bega-igar-uksadba be dao. A-igar mer be oichogo, degi, a-igarba swilidikidgi be nanadii guo.
1TI 6:15 Ar Bab-Dummad e-ibagan-mosale, anmarse Jesucristo-gannar-danikoed oyogoed. Unnila we-dulebi, bela Neggani-Maid-Bur-Nuedid, reymar-e-Reyd, degi, dule-dummagan-e-Dummadid.
1TI 6:16 Ar unnila Bab-Dummadbi geg burgwed, neg-meegwad-dule-geg-ese-warmakedgi maid. Dule-wargwensaale, Bab-Dummad-dakdisulid, degine, dakosurgumarbaloed. A-e-gangued-degisadeguad geg bergued. A-e-nug anmar odummomarsun. Ar deyobdo.
1TI 6:17 Mani-ibgan-we-napnegginmaladga be sogo: “Mer na san dummarbaa be imakmar, degi, mer manigi alakwaa be nagumar. Ar we-ibmardi baisursunna bergued. Bur Bab-Dummad-Dula-Maidgi be atakmar, degine, anmarga ibmar unnitiba ukmaid, adi, anmar egi yeer itogegar.”
1TI 6:18 We-mani-ibmaladga be sogo: “Igar-nueganbi imakdii nanamar, ar ibmar-nuegan-imakedgi bur be mani-ibed gumar. Deginbali, gwenadganga-ibmar-ukega guagwar-gudii gumar, ibmar-ukedi melubaksaaledgi be emar-bendakdii gumar.”
1TI 6:19 Ar mani-ibgan weyob damalale, yoedse-ibagan-danikoed-idu ibmar urbenaid. Geb degidbali, na e-san-burba-geg-berguedgi wergudii guoed.
1TI 6:20 Timoteo, igargan-an-bega-uksadgi nue salakar, mer galakuo. Mer gaya-isgana, gaya-binsarmalad, binsa-igargan-nuedye-sogledimaladgi be sunmako. Ar wemardi gaya-binsaledid, binsa ibmar-wisiguedye soglegedid.
1TI 6:21 Ar bukidar-we-igarba-nadmaladba, Bab-Jesús-igar metemalad. Degisoggu, nue salakar. Bab-Dummad nued begi binsadii gusun.
2TI 1:1 Ani Pablo, Bab-Dummad-sogedba Jesucristo-e-sapin-bur-dummadga-gumogaga nugsalesmogadid. Ar Cristo-Jesúsʼgi san-burba-geg-bergued-danikidi, a-san-burba-baramilegoye-soglesad-barsogegala, an barmilenaid.
2TI 1:2 Timoteo, be Bab-Jesúsʼba-naid-ular an-machi-sunnadyob an be-daked. An na nue be-sabed. We-garda na bese narmaked. Bab-Dummad-anmar-Baba, degi, anmar-Dummad-Jesucristo, begi nued binsamarsun, degine, wile be-dakbarsun, deginbali, ulubgi bogidik be-itogega imakbarsun.
2TI 1:3 An bega Babse gotele, mutikidba, neg-ibginedba, dog-nuedye Bab-Dummadga an sogdedaed. Igi an-dadgan Bab-Dummadga arbasa, abayobi an binsaed-swilidikidgi Bab-Dummadga alamaknaimogad.
2TI 1:4 An wisdo, be angi bangudgu, boed-abalagi be naded. Nue an be-dakbido, adi, an be-dakalile, weligwar an itogwichiguegar.
2TI 1:5 Deginbali, nue an wisbardo, be-Jesucristoʼgi-bensulid, napiragwadid. Be-muu-Loida, degine, be-nan-Eunice Jesucristoʼgi nue-bensuli gusmarmogad. Degisoggu, an wisdo, be amaryob Jesucristoʼgi nue-bensuli gudimogad.
2TI 1:6 Degisoggu, an bega sogsun, an-argan an begi mesisgu, deun Bab-Dummad bega gurgin-burbaled uksagusad. A-gurgin mer ebusuli guo, gatik be ebugo. Dule soo-ogannonaidyob be-gurgin be ogannomogo.
2TI 1:7 Ar Bab-Dummad anmarga burba-dobee-itogedi uksasulid, anmarga burba-gandikid uksad, sabgued uksad, degine, sunna-na-dukin-san-bargaed uksabalid.
2TI 1:8 Degisoggu, mer be anmar-Dummad-Jesúsʼgi-sunmakedgi bingeguo. Degine, an Bab-Jesúsʼgi-sunmaked-ular, esgaryagi-mellesiidgi mer bingegubalo. Bur be Bab-Dummad-Gayaburba-Nuedgi sunmaked-ular, an-gudimogayob be naibi-itodii gusun. Ar Bab-Dummad na e-gangued-bega-ukedba be-bendakdii guoed.
2TI 1:9 Bab-Dummad anmar-abonosad. Egadga guegala anmarse gochad, anmar-ibmar-nued-imaksadba anmarse gochasulid. Ar na wargwen na e-igar-mesisadba, na e-sogedba, amba yoo napneg-nagued-iduar, bato Cristo-Jesúsʼgi Bab-Dummad nabir-anmargi-binsasadbali anmarse gochad.
2TI 1:10 Bab-Dummad, anmarga anmar-Abonoged-Jesucristo-barmiargu, we-sabgued anmarga oyosad. A-Jesucristo burgwed-igar bisgenonikid, E-Gayaburba-Nuedba dulagudigued anmarga senonikid, degi, burba-geg-bergued anmarga uknonisunnad.
2TI 1:11 A-ulale, we-Gayaburba-Nuedgi-sunmakega Bab-Dummad an-nug-imaksad. An Jesucristo-e-sapin-bur-dummadga-gumogaga, an-nug-imaksabalid. Degine, Judíoʼsurmalad-odurdakega an-nugsasbalid.
2TI 1:12 Ar A-Gayaburbagi an sunmakdiidba, an esgaryagi mellesisunnad. Degi-inigwele, gwen binge an itosulid, ar an wisid doagi an bensuli gudii. Ar an nue-wisid, a-dule, gangued-nue-nikadba an-yardakosulid, an-edarbedii guoed. Anga-igar-uksad-obelogedse anba gudii guoed. We-napnegse-gannar-danikidse deyob guoed.
2TI 1:13 Bab-Jesús-Igar-napiragwad be-angi-durdaksad nue-akwedii be sao. Jesúsʼgi-bensulidgine, degine, sabguedgine, nue-nanadii be-sao.
2TI 1:14 Ar Bab-Burba-Isligwaled-anmargi-maidi be-bendakdii-guoedba bega-igar-nuegan-uklesad be nue-akwedii sao.
2TI 1:15 Emide, bato be wisbalid, bela Asia-yarginmalad an-obachamalad. Figelo, degine, Hermógenesʼse-bakar, an-metemarmogad.
2TI 1:16 Bab-Dummad Onesíforo-e-neguyaginmalad nue-wile daksun. Ar ade, a-dule yeer an-ogannodii gusad. An esgaryagi mellesi-inigwele, gwen angi binge itossulid.
2TI 1:17 Onesíforo Roma-neggweburse-nonigu, bela-bela nue an-amidii gusad, geb an-aminonigusad.
2TI 1:18 Bab-Jesús-danikoed-ibagi, Bab-Dummad, Onesíforo-nue-wile-daksun. Onesíforo Éfeso-neggweburgi-nue-anmar-bendaksagusad, be nue-wisimakarmogad.
2TI 2:1 Timoteo, be an-machi-guedgi an bega soged, Cristo-Jesús-bela-bela-anmargi-nued-binsasadgi be gatik ganguo.
2TI 2:2 Igi an dule-bukidarad-abargi emar-odurdake be an-itosa, deyob be dulemar-Bab-Igargi-nue-inniki-nanadimalad odurdakmogoed. Adi, amar nabir baigan-odurdakmarmogagar.
2TI 2:3 Be Jesucristoʼga-nued-arbaed-dulesoggu, naibi-itoged-abargi-be-gudiidi mer be bai itogo.
2TI 2:4 Dule sordaga-gubiele, geg dulemar-yogsaar-gudimalad-igarba akadii gued. Ar ade, e-dummad-sogedbarbi gudiguergebed, adi, e-dummad-yeer-ito imakegar.
2TI 2:5 Deginbali, dule-dodomalad bengunanair, dodoleged-igar-maidba-dasulir, geg emargi obined.
2TI 2:6 Dule-nainugi-arbaed, ibmar-gunbiele, bina arbagwelergebed.
2TI 2:7 An bega-ibmar-soged nue be itogo. Ar we an bega-ibmar-soged, Bab-Dummad magasaila-ito be-imakoed.
2TI 2:8 David-wagwa-Jesucristo be insao, burgwisgu, gannar durgusad. We-Gayaburba-Nuedgi an sunmakdiid.
2TI 2:9 We-Bab-Dummad-Gayaburbagi an sunmakdiid-ular, an naibid itosisunnad. Dule-isgana neg-ichodiidyob an esgoro-dubgi edilles siid. Ar Bab-Dummad-Gayaburbadi gwen galenaisulid, bur bule nasgumai gued.
2TI 2:10 Degisoggu, Bab-Dummad-na-dulemar-susad-ular, an wiledisunnad, igi-barsaye an sogdisunnad, adi, amar nabir Cristo-Jesúsʼgi abonoleged-nikumarmogagar, degine, degisadegu eba wergudii gubaligar.
2TI 2:11 Ar we napira sogleged: “Ar anmar Cristoʼba burgwisale, anmar eba dula gudigubaloed.
2TI 2:12 Anmar Jesúsʼba naibigued itosale, Jesús-negsemaidba anmar eba neg semogoed. Ar anmar Jesús-osulosale, Jesús anmar-osulomogoed.
2TI 2:13 Anmar Jesús-obanmalale, Jesúsʼdi anmar-obanosurguoed. Ar Bab-Jesúsʼdi gege na gakansaed.”
2TI 2:14 We-ibmar an bega Bab-Dummad-asabin-sogsiidi, dulemarga be nue sogmogo. Ega be sogo: Mer na be binsa abin-abin sunmakmaloye. Ar ade, we-ibmardi anmar-bendakosulid, ar igar nabiridsulid, binsa dulemar-baigan-be-itobukmalad-oichogedid.
2TI 2:15 Be-arbaedgi gatik nue arbanai be sae, adi, be nued-arbasadba Bab Dummad yeer be-dakegar. Be Bab-Dummad-Gayaburba-napiragwad, nued dulemarga-odulogedba be-arbaedgi be bingegugwichi guosulid.
2TI 2:16 Galagwensuli binsa ee sunmaklemaladba mer be dao. Ar degi-sunmaklemalad bur bule isgumai dule-imaked.
2TI 2:17 Ar we-odurdaklegedi, boni dule-san-malemaiyob emar-imaked. Himeneo, degine, Filetoʼmala, dule-degimaladid.
2TI 2:18 Wemar, Bab-Jesús-Igar-Napiragwad-Maidgi bangudmalad. Wemar-ebogwad sogmalad, dulemar-gannar-durguleged-iba bato nasye. Degisoggu, wemala, gwenadgan-Jesúsʼba-nanaimalad-gwenna-gwenna-e-binsaed gadisundo.
2TI 2:19 Degi-inigwele, Bab-Dummad-Igar-Mesisaddi, geg gwaged. Ar weyob anmarga oyomaid: “Bab-Dummad na wisid, doamar e-sordamala.” Números 16:5 Degine, weyob oyomaibalid: “Bela dulemar-Cristoʼba-nanaimaladi, isguedgi banguergebed.”
2TI 2:20 Ar neg-dummagangi unnila or-nogbi, degi, mani-batebi niksulid. Suar-bate, degi, napa-bate nikabalid. Amar-bate gwenna-gwenna iba-gualirginbi ebuleged, baigandi bane-bane ebuleged.
2TI 2:21 Degisoggu, ar Bab-Dummadga ibmar-nuedga be gubiele, ibmar-isganagi be banguergebed, gwage-swilidik na be imakergebed. Geb degi, Bab-Dummadga ibmar-nuedga be gunonikoed, degi geb be, bela ibmar-nuegan imakega guagwar gudii guoed.
2TI 2:22 Ibmar-galagwensuli sapingana-oichomaladgi be banguo. Bur be dule-gwage-swilidikidgi-Bab-Dummadse-gordimaladba be we-igarmargi alamaknai guo: Igar-inniki-imaklegedgi, Jesúsʼgi-bensulidgi, sabguedgi, degi, ulubgi-bogidik-itogedba, be nanadii guo.
2TI 2:23 Mer binsa na galagwensuli-abin-abin-imakmalad be itogo, ar be wisid, we-degimalad urwedga guddaed.
2TI 2:24 Ar dule-Bab-Dummadga-arbaedi dulemar-baiganbo abin-abin-imaknai guedsulid. Bur dulemar-baigangi nued daergebed, nued emar-odurdakbalirgebed, deginbali, na san-bargaakwaar nanabalirgebed.
2TI 2:25 Degisoggu, be dule-begi-gwisgudimaladga binnalee sunmakoed, ar abakalegi Bab-Dummad a-dule-e-gwage ogwaalile, adi, a-dule igar-napiragwad amiarmogale,
2TI 2:26 degi, nabir nia-sailagi wakinnalile. Ar ade, a-dule nia-sogedba gudiid.
2TI 3:1 Deginbali, we-igargan be wisgubalirgebed: Neg-dukumosale, iba-bulegan nagunonikoed.
2TI 3:2 Ar ade, dulemar-weyobid nonikoed: Dukin-e-sanginbi binsamalad. Maniginbi-binsamalad. Sunmakedgi-na-san-dummarba-imakmalad. Dukin-san-ogannomalad. Bab-Dummadgi-dodoar-sunmakmalad. E-babgan-sogedba-dasurmalad. Dule-ega-ibmar-imaksar, dog-nuedye-gwen-sogsurmalad. Bab-Dummadgi-gwen-binsasurmalad.
2TI 3:3 Dule-sabed-gwen-niksurmalad. Dulemar egi yolesar, geg-na-san-bargamalad. Gadi-gakan-berbemalad. Wissur-na-san-bargamalad. Sabsur-aimar-imakmalad. Ibmar-nuegan-isdar-dakmalad.
2TI 3:4 E-aimargi-aibinmalad. Dake-dakesur-ibmar-imakmalad. Dukin-san-dummarba-itomalad. Unnila bur bule na dukin san-yeer-itogedgi binsamalad, Bab-Dummadgindi-binsasurmalad.
2TI 3:5 Yamo Bab-Dummad-Igar-Maidba-daeyob damalad. Degi-inigwele, binsa asgi gordidimalad, Bab-Igar-sunsogedba nanasurmalad. Dule-degidamaladba mer be akao.
2TI 3:6 Ar we-dulemar, negayaa-negayaa doge-doge gudidamalad, adi, omegan-binsaed-satemalad-binsaed-gaegar. Degi, omegan-isguedgi-nanadimalad-binsaed-gaegar. Ar we-omegana galagwensuli bina-gutuu damaladid.
2TI 3:7 Ar we-omegan, ibmar-durdakdimalan-inigwele, gege igar-napiragwad-maid durdakmalad.
2TI 3:8 Ar we-dulemala, igi Janes, Jambresʼbogwa Moisés-abin-gwisgusmala, abayobi we-dulemarde, igar-napiragwadgi gwisgudimarmogad. We-dulemar-e-binsaed nue-isgusmalad. Jesúsʼgi-bensulid-igargi amba benmalad.
2TI 3:9 Ar we-dulemar-e-igar gwen nasguosulid. Igi Moisés-e-ibagangi, Janes, Jambres-ebo-igar-noar-imaksamalad magar-daksamala, deyob, we-dulemar-noar-e-ibmar-imaked magar daklemogoed.
2TI 3:10 Timoteo, bedi, an-ibmar-odurdaksadba be nanadiid. Degi, an-daedba be nanadiid. Ibi-ular-an-gudigusadba be nanadibalid. Degi, igi an Jesúsʼgi-bensuli-nanadii, deyob be nanadiid. An bonigan-abin-galakusurdaed be daksad. An-sabgued, degine, gwae-gwae-an-itosulid be nue-daksabalid.
2TI 3:11 Deginbali, dulemar an-baregindiid nue be wisbalid, an-solegagwar-naibi-itodiid be wisbalid. Degine, igi-an Antioquíaʼgi-gusa, igi-an Iconioʼgi-gusa, degi, igi-an Listraʼgi-gusa, be wisbalid. Bab-Dummaddi ise-baregillear-an-wilesad bela amargi an-bendaksad.
2TI 3:12 Ar deyobi, bela Cristo-Jesúsʼgi-nue-islimakar-nanabimaladga solegagwar-naibi-itoged-igar ega nue-maibalid.
2TI 3:13 Dule-isganamardi, dulemar-yardakdimaladdi, aka bur bule isgumai gudoed. Dulemar-yardakdii, degine, na dukin yardakledii gudmaloed.
2TI 3:14 Timoteo, bedina, ibmar-durdaksadgi-bensuli be gudii guo, ibmar-durdaksadba be gatik nanao. Ar be wisid, doamar be-odurdaksananae.
2TI 3:15 Ar bato be bipigwaunni Bab-Dummad-Garda-Islidikid-Maid be wisi gudiid. Ar we-gardade sunna igar-abonolegedsik, Cristo-Jesúsʼgi-bensuliguedgi, ibmar-wisi be-imaked.
2TI 3:16 Bab-Dummad-Garda-Narmakar-Maid bela Bab-Dummad-sogsadba narmaklesad. Bab-Dummad-Garda ibnuedid: Dulemar-odurdakega, dulemarga-sabsur-ibmar-sogega, dulemar-unaega, degi, igar-innikigwadgi dulemar-odurdakegar.
2TI 3:17 Adi, Bab-Dummad-sordamar inniki-Bab-Dummad-Garda-durdaksadba, bela guagwar nabir ibmar-nueganbi imakdii guegar.
2TI 4:1 Bab-Jesucristo we-napneg-naid-seegala gannar danikoed. Adi, dule-burgwismaladga, degi, dula-gudidimaladga igar-itogegar. Degisoggu, we-Bab-Jesucristo-asabin, degi, Bab-Dummad-asabin, an bega soged:
2TI 4:2 Gatik Bab-Dummad-Gayaburbagi nue be sunmako. Dulemar be-itobidibe, dulemar be-itobisurbardibe, amba ega be sunmako. Dule-nodimaladga be gandikidgi-ibmar-sogo, adi, bur-nuekwaa Bab-Igargi nanamalagar. Degi, Bab-Igarba dulemar-nodimalad be nuekwaa odurdako, adi, mer noar bar nanamalagar. Binnalegwadgi be dulemar nue-ogannodii imako, adi, Bab-Jesúsʼba bur-bule nagumalagar. Mer be Bab-Igargi odurdaksuli guo.
2TI 4:3 Ar Bab-Jesús-Igar-Nued-Maid-gwen-itobisur-gudamaloed-ibagan danikoed, unnila e-itogedba nanadmaloed. Amar bukidar na e-dule-odurdakmalad amidmaloed, adi, na e-ibmar-itobiedbi ega sogegar.
2TI 4:4 Amar degisoggu, igar-napiragwadgi bangudmaloed, unnila igar-sergan-binsarmaladbi itobi gudamaloed.
2TI 4:5 Timoteo, bedina, itoakwaa be nanadii sao, naibid mer bai be itogo. Gatik Bab-Jesús-Gayaburba-Nuedgi sunmakdii be sao, gatik a-igar-bega-uklesadgi be nue arbao.
2TI 4:6 Ar andi bato ibmar-Babga-uklegedyob-gued-ibagan warmakdanikid, an-burgwed-iba omosad.
2TI 4:7 Bab-Dummadba-ibsaedgi an alamakdigusad. Emide, Babga-arbaed an ogwinmaknonisunnad. Bab-Jesús-Igargi gwen an galakussulid.
2TI 4:8 Degisoggu, emigindi, dule-inniki-ibmar-imakmaladga ologurgin-nued-ukleged anga sabolesisunnad. Igar-naboged-napiragwad-Bab-Jesús e-gannar-danikoed-ibagangi, anga ologurgin ukoed. Unnila angarbi uklegosulid. Dulemar-sabedgi-Bab-Jesús-edarbedimarmogadga ologurgin uklemogoed.
2TI 4:9 Timoteo, gwae-gwaesaar anse be daged imako.
2TI 4:10 Crescente, Galacia-yalaganba naded. Titoʼdi, Dalmacia-yarse nadmogad. Demasʼdi, we-napneg-naid-e-ibmarbina bur-nue sogsoggu, an-mete, Tesalónicaʼse naded.
2TI 4:11 Unnila Lucasʼbi an-walik gudiid. Be anse alir, Marcos be nidago, ar ade, an-arbaedgi an-bendakoed.
2TI 4:12 Tíquicoʼdi, Éfeso-neggweburse an barmisad.
2TI 4:13 Be anse alile, Troasʼgi Carpo-neggi-an-suba-obesad be anga sedago. Gardamar anga sedabalo, gardamar-bipirmakaled-mamaid bur be sedago.
2TI 4:14 Esnongi-ibmar-sobed-Alejandro, beedse angi yoledii gusad, an-ichodii gusad. Degisoggu, Bab-Dummad na e-sogedba, a-dule e-ibmar-imaksadba sabsur-odurdaksun.
2TI 4:15 Degisoggu, a-dulegi nue-salakarmo, ar ade, anmar-Gayaburba-Nued-sunmakdidgi nue-dummad yolediid.
2TI 4:16 Gebe dummagan anga igar-itoarmargu, amar-asabin an na sanawalagwen san-bendaksad, dule gwen an-bendaksasulid. Bela angi bangudgusmalad. Bab-Dummad a-dulemar degigussuliyob-dakena gadin.
2TI 4:17 Ar Bab-Jesúsʼdi anba gudigusad an-metesulid. Geb an-bendaksad, degine, an-ogannosbalid, adi, Bab-Jesúsʼgi-Abonoleged-Igargi an sunmakegar. Adi, bela Judíoʼsurmalad a-igar itomarmogagar. Degidbali, nabir Bab-Jesús burgwedgi an-abonosad.
2TI 4:18 Degine, Bab-Dummad bela ibmar-isgana-birgi an-bendakoed. Na E-negdakmaidse nuedgi an-odogoed. Degisoggu, Bab-Dummad-nug ogannomarsun, degisadegu gusun. Ar deyobdo.
2TI 4:19 Priscilaʼga, degi, Aquilaʼga, degine, Onesíforo-e-neguyaginmaladga, bela bemar nueganbimar-sogeye ega be sogoed.
2TI 4:20 Erastoʼdi Corinto-neggweburgi besad, Trófimoʼdi, Mileto-neggweburgi uelle an obesad.
2TI 4:21 Dii-wied-nii-iduar be daged-sao. Gwenadgan Eubulo, Pudente, Lino, Claudia, degine, bela gwenadgan-baiganmo, bemargi binsadimalad.
2TI 4:22 Dummad-Jesucristo be-burbaba gudii guoed. Bab-Dummad nued bemargi binsamarsun.
TIT 1:1 Ani Pablo, Bab-Dummad-e-mai, degine, Jesucristo-e-sapin-bur-dummadga-gumogaga nugsalesbalidid. Dulemar-Bab-Dummadgi-sulearmalad Jesucristoʼgi-bensuli-guegala, degine, Bab-Igar-Maidba igar-napiragwad-wisgumalagala, Bab-Dummad anse gochad.
TIT 1:2 We-dule-sulearmalad bensulidgi burba-geg-bergued edarbedii gumaloed. Ar ade, Bab-Dummad geg-gakansaedi, bato iduar, gebe-negasailaun sogsagusad, burba-geg-bergued ukoye.
TIT 1:3 Bab-Dummad-anmar-Abonoged e-ibagan-nasiksadbali, we-gayaburba anga uknonikid, adi, dulemarga an we-igargi sunmakegar.
TIT 1:4 Tito, we-garda an bese narmaked. Jesúsʼgi-bensulid be anbo-emar-nikadba be an-machi-sunnadyob gunonikid. Bab-Dummad-anmar-baba, degi, Bab-Jesucristo-anmar-Abonoged, begi nued binsamarsun, degine, wile be-dakbarsun, deginbali, ulubgi bogidik be-itogega imakbarsun.
TIT 1:5 Tito, Creta-dupugi igarmar-besmalad-nudakega an be-obesgusad. Deginbali, an bega sogsagusadyob, neggweburmar-iliba Jesúsʼba-nanaimalad-e-idumalad-urbega an be-obesgusbalid.
TIT 1:6 Jesúsʼba-nanaimalad-e-idumalad, dule-nued-daed abeleged: Dule-egi-ichakwa-sunmaked-sated, dule-unnila-ome-wargwenna-nikad, e-mimmigan-Bab-Jesúsʼba-nanaid, degine, dulemar-geg-e-mimmigangi-sunmakmalad, e-mimmigan-uaya-nikaa-damalad.
TIT 1:7 Ar Jesúsʼba-nanaimalad-e-idumalad-e-dummad, Bab-Dummad-igargi-arbaedsoggu, abeledo: Dule-egi-ichakwa-sunmaked-sated, dule-na-ebi-ibmar-wisye-na-san-imaksulid, dule-itosur-urwesulid, dule-geg-mumgued, dule-geg-abin-abin-daed-amied, dule-geg-ibmar-isganagi-mani-onoged.
TIT 1:8 Dule bur weyob-daed abeledo: Dule-nabir-emar-akwed, dule-ibmar-nueganbina-soged, dule-binsaed-nikadaed, dule-igar-napiragwadbi-imaked, dule-gwage-swilidikid, dule-nabir-na-san-bargaed.
TIT 1:9 Deginbali, we-dule, igi Bab-Dummad-Gayaburbagi odurdaklesa, amba deyob e-gwagegi na sediirgebed. Adi, dulemar-baigan-odurdakalir, igar-napiragwadgi e-gwage ogannogegar. Degine, dulemar-igar-nabiridgi-noar-binsadimalad-e-gwage ogwaegar.
TIT 1:10 Ar amba bukidar Bab-Jesús-Igargi annadimalad, dulemar-yardakdimalad, degi, binsa-ee-sunmakdimalad. We-dulemar bur bule dule-abgan-duku-uka-sikergebe-sogmalad gued.
TIT 1:11 We-dulemar-mer-bar-sunmakega be imakergebed. We-dulemar ibmar-odurdaklegewilubsulid-odurdakedba bela negyagi-bukmalad-oichononidamalad, ibmar-isgana-odurdakedgi mani-onodimalad.
TIT 1:12 Ar e-dule-wargwen, gayaburba-barsoged, Creta-dupuginmogad, na e-dulemargi sogsagusad: “Creta-dupuginmalad, gusgu gadi gakansamalad, achu-sapurdamaladyobi damaladid. Unnila-mas-gunnedginbi-binsadimaladid, degine, wiegala-dulemalad.”
TIT 1:13 We-dule-ibmar-sogsad ar nue-napira soged. Degisoggu, gatik be amarga gandik ibmar sogo, adi, Jesús-Igargi nued-nanadii gumalagar.
TIT 1:14 Degine, mer binsa Judíoʼmar-nui-sunmakedba damarbaligar, deginbali, dulemar-igar-napiragwadgi-banguddamalad-e-igar-mesedba mer damarbaligar.
TIT 1:15 Dulemar-gwage-nuegangardi, ibmar-belagwapa swilidik naid. Ar dulemar-gwage-sunnasur-gudimaladgardi, Bab-Jesús-bengudimaladgardi, belagwapa ibmar isgusadbi naid. Ar ade, a-dulemarga e-binsaedse-bakale, e-ulubgi-ibmar-itogedse-bakale, bato isgus naid.
TIT 1:16 Ar Bab-Dummad-wisye sogmalando, ar na e-damaladgindi, Bab-Dummad-osulodimalad. A-dulemar ibmar-isgana imakmalad, Bab-Dummad-sogedba ibmar-imaksurmaladsoggu, bela ibmar-nuegan-imakleged geg imakmarsundo.
TIT 2:1 Tito, ar bedi Jesús-Igar-nuegan-mamaidba be innikii sunmako.
TIT 2:2 Dadormarga be sogo: Mer dogdar wilub-obichaa damaloye, mer dodoakwaa damaloye, nue-binsaed-nikaa damaloye, Jesúsʼgi-nue-bensuli gumaloye, nue sabgumaloye, degine, mer ukurmakar ibmar abemaloye.
TIT 2:3 Amba deyob mukwamarga be sogmogoed: E-daedgi Bab-Dummad-dobee nanamaloye, mer dule-baigan-ogakansamaloye, mer mumgudii nanamaloye, ibmar-nueganginbi dulemar-baigan-odurdakdii nanamaloye.
TIT 2:4 Deginbali, mukwamarga be sogbalo, omegan-odurdakbaloye: E-nusgana-sabguedgi, e-suimar-sabguedgi,
TIT 2:5 nue-binsaed-nikadaedgi, san-swilidik-nanaedgi, neg-nued-akwedgi, nueddaedgi, e-sui-urbaligwa-nanaedgi, adi, dulemar mer Bab-Dummad-Gayaburbagi isdar sunmakmalagarye.
TIT 2:6 Deginbali, sapingana be weyob unabalo: Nue-binsaed-nikaa damaloye.
TIT 2:7 Tito, bedi be bela ibmar-nuegan-saedgi sapinganga be oyogoed, igi nanamalargebe. Ulubgi akar-binsasulidgi, degi, sunmaked-napiragwadgi dodoakwaadasulidgi, be sapingan-odurdakoed.
TIT 2:8 Gaya-nuegangi be sunmakoed. We-gayagi dule geg akar soged. Weyob be odurdakele, be-isdarmalad be obingegsaoed. Ar ade, begi ibmar-isdarmalad geg soge-gumaloed.
TIT 2:9 Maigan be weyob ounabalo: Be-dummagan-ibmar-sogedba be damarye, bela yeer-itoged be imakye, melle abin be sunmakmarye.
TIT 2:10 Degine, mer e-ibe be ibmar atursamaloye. Na be oyoged imakmarye, bemar geg-dulemar-yardakmaladye, adi, begi dakmalagar, Bab-Dummad-anmar-Abonoged-e-Igar, igar-nuedi.
TIT 2:11 Bab-Dummad bela nabir dulemargi binsamaid. Ar Bab-Dummad nabir dulemargi binsaewilubsulinad. Emigindi, isguedgi bela dulemar-abonogega, e-nabir-binsaed bela dulemarga oyononikid.
TIT 2:12 Bab-Dummad nabir-anmargi-binsaedba we-igarmargi anmar-odurdaknonikid: Bab-Dummadgi-binsasuli-nanaed-obaned, ibmar-isganagi-binsaed-obaned. Adi, weyobi anmar we-napneg-naidgi nue-binsaed-nikaa nanaegar, ibmar-innikigwadbi-imakdii guegar, nue-Bab-Dummad-dobee-nanadii guegar.
TIT 2:13 Emide anmar, bensulidgi anmar-Bab-Jesucristo-Abonoged-nuedid e-gangued-yeerdaklegedgi-gannar-danikoed edarbedimarsunnad.
TIT 2:14 We-Jesucristoʼde isguedgi anmar-onogegala, anmar-anar na san-burba uksagusad, anmar-anar burgwisad. Adi, bela anmar-isgudiid eliega, egadga anmar-imakega swilidik anmar-imaksad. Adi, anmar ibmar-nueganbi imakdii guegar.
TIT 2:15 Tito, weyob bega ibmar-soglesadba be sunmako, be dule-unao, gandikidba weyob be ibmar sogo. Mer dulemar ibgwensur-be-daked be imako.
TIT 3:1 Tito, gwenadganga gannar be sogo, insamaloye: Dule-negsemamaid-urbaligwa be nanamaloye, dummagan-mamaid-urbaligwa be nanamaloye, amar-sogedba damaloye. Ibmar-nueganbi-imakegala, be guagwar gudii gumaloye.
TIT 3:2 Mer dulemargi ichakwa sunmakmaloye, bur be bogidik gudiguo. Bur dulemargi binsaed-nikaa damaloye, bela dulemar-baigan-urbaligwadaed na be imakmaloye.
TIT 3:3 Ar anmar epenne deyob binsaedsuli-gudii gusmogad, Bab-Dummadba ibmar-imaksuli-gudii gusmogad. Weyob anmar gudii gusad: Yardakles-gudii, ibmar-isgana-maiga-gudii, ibmar-isganagi-wergudii, ibmar-isganagi-binsadii, nobgudii, dulemarse-isdar-dakledii, degine, muchub-muchub-na-isdar-dakdii, anmar gusmalad.
TIT 3:4 Ar Bab-Dummad-anmar-Abonoged-e-nued-dulemargi-binsaed-oyolenonigu, degine, bela e-sabgued dulemarse-oyolenonigu,
TIT 3:5 Bab Dummad wile-anmar-daksadba anmar-abonononikid. Anmar ibmar-innikii-imaksadbarsulid. Bab-Dummad-Burba-Isligwaled-uksadba anmarga isgued-elinonikid, burba-dulad anmarga uknonikid. Deyob anmar-abonononikid.
TIT 3:6 Anmar-Abonoged-Jesucristoʼba, Bab-Dummad anmarga E-Burba-Isligwaled unnitiba uknonikid.
TIT 3:7 Bab-Dummad anmargi-nabir-binsamaidba, isgussuliyob anmar-daknonikid, degine, bensulidgi burba-geg-bergued-edarbediguega anmar-imaksad.
TIT 3:8 Tito, we-Gayaburba, napiragwadid. We-Gayaburbagi nue-gandikidba dule-odurdaknai an be-abeged, adi, dulemar-Bab-Dummad-bensurmalad ibmar-nueganbi imakdigumalagar. We-ibmarmar, ibmar-nueganad, degine, dulemarga ibmar-nueganga gubalid.
TIT 3:9 Ar ibmargi-binsa-ee-sunmaklemaladgi, dadgan-danimalad-igargi, mer be sunmakdii guo. Muchub-muchub-abin-abin-imakmaladgi, Moisés-Igar-Mesisadgi-abin-abin-urwemaladgi, mer be sunmakdii guo. Ar weyob sunmaklegedi, binsaledid, gwen ibmar-nueganga gusulid.
TIT 3:10 Ar dule-wargwen sordamar-mamardiile, ese be goloed. Irbo-goledgi be-itosulile, a-dule be onogoed.
TIT 3:11 Ar be wisid, we-dule-degidaedi, isgudiid, galagwensuli gudiid. Ar na e-daedbali, bato odurdakleged-igar ega megisdo.
TIT 3:12 Artemas an bese barmidodibe, Tíquicoʼdibe. We-gwensak bese-modapile, be gwae anse Nicópolis-neggweburse-daged imako. Ar a-neggweburgi an dii-wied-niigi mai guoed.
TIT 3:13 Dule-irwa-gwisgued-Zenas, degine, Apolos, amarga ibmar be ukmalo, adi, neggwebur-baidsik-nadmalar, melle ibmar-sate igarba nadapi gumalagar.
TIT 3:14 Degine, anmar-sordamarmoga, ibmar-nuegan-imaked durdakmarmogoed, adi, dule-ibmarsurmaladga ibmar-nuegan-imakega, mer binsa Bab-Jesúsʼba nanadii gumalagar.
TIT 3:15 Bela an-walik-bukmalad bega sogsimardo, bemarde nued sogeye. Dulemar-Jesúsʼgi-bensurmalad-anmar-sabmaladga be sogo, bemar nued sogeye. Bab-Dummad nued bemargi binsasun.
PHM 1:1 Ani Pablo, Jesucristo-nuki-sunmakedba an esgaryagi mellesiid. Gwenad-Timoteo-anbo gwenad-sabesailad-Filemónʼse we-garda narmaksiid. We-gwenadde, anmarba-Jesús-igargi-arbamogadid.
PHM 1:2 Anmar-bun-Cristoʼgi-gusad-Apiaʼye-nugadse anmar narmaksibalid. Degi, anmarba-arbaed-Arquipoʼse narmaksibalid. Deginbali, be-neggi Jesúsʼba-nanaimalad, anmar narmaksibalid:
PHM 1:3 Anmar-Bab-Dummad anmar-baba, degi, anmar-Dummad-Jesucristo, bemargi nued binsamarsun, degi, ulubgi bogidik bemar-itogega imakbarsun.
PHM 1:4 Filemón, an Bab-Dummadse-gorsiidgi an begi binsader, an gusgu Bab-Dummadga dog-nuedye sogdaed.
PHM 1:5 Ar ade, an be-itoged bede Bab-Jesús, degi, eba-nanaimalad nue-sabye, degi, Bab-Jesúsʼgi be nue-bensulid nikabarye.
PHM 1:6 Andi an bega Babse-goled, adi, Bab-Jesúsʼgi-bensulid-nikadgi be sunmakele, bela be igarmar-nuegan-mamaid-wisgusad, napiragwadba Cristo-sabedbali be odurdaksun.
PHM 1:7 Be dulemar-nue-sabedba, anmar nue-weligwar itoged, degi, anmar-gwage nue-ogannolenonibalid. Gwenad, ar be-ulale, gwenadgan-Jesucristoʼgi-akananaimalad nue gwage gannalesmalad.
PHM 1:8 A-ulale, an Cristo-nuggi, sunna an bega sabsur-ibmar-soge-wilubbinad, ibi be imakergebe.
PHM 1:9 Degi-inigwele, an bur sabedgine bese egised. Ani Pablo, bato selebagus, deginbali, emi, Jesucristo-nuggi-sunmaked-ular, esgaryagi mellesiid.
PHM 1:10 An wilesakwaa an-machi-Onésimo-ular, an bese egised. Onésimo, an wegi-esgaryagi-mellesiidgi an-machiga gunonikid.
PHM 1:11 We-be-mai-Onésimo, iduardi, gwen ibmar-nuedga bega gussulid. Emigindi, bega, degi, anga, ibmar-nuedga gunonikid.
PHM 1:12 We-Onésimo, gannar an bese barmisiid. Degisoggu, an-abinganaiyob we-dule be abingao.
PHM 1:13 An Bab-Jesús-Gayaburba-Nuedgi-sunmakdiid-ular, esgaryagi-mellesiidgine, wegi an Onésimo obebiendo, adi, be-anar an-bendakegar.
PHM 1:14 Degi-inigwele, be-ibmar-wissuli an yapa ibmar imakgusad. Adi, be-anga-ibmar-imaked an bega-ise-sogar-sogedba melle be imakegar. Bur be-itolegedba be anga ibmar imakegar.
PHM 1:15 Emigi, be degisadegu Onésimo-abingaega, begi-sikwas wis bangusargebed.
PHM 1:16 Mer maiyob bar be Onésimo-dako. Suli, aba bur bule be dakoed, gwenad-nue-sabedyob be abingaoed. Ar we-gwenad an bela-belad sabed, ar bedi bur bule nue-sabguergebed. Dule-yogasaaledyob be sabguosulid, Bab-Jesúsʼgi-be-gwenadyob be sabguoed.
PHM 1:17 Degisoggu, be-sordayob be an-dakele, an-abinganaiyob be Onésimo-abingado.
PHM 1:18 Be-ibe ibmar-oichosale, igi, begi mani-ganikile, an-nuggi be nasiko.
PHM 1:19 Ani Pablo, an-sunnad an-argangi an bega narmaksiid, an-sunnad an bela be-bennukoed. Ar an napiragwadgi an bega soged, be angi mani gaewilubsulinad. Ar emi be gudiidi, be-sunnad be angi mani-ganikidyob gudimogad.
PHM 1:20 Eye, gwenad, Bab-Jesús-nuki an begi ibmar-nued nikusana gadin. Anmar Bab-Jesúsʼgi-gwenad-guedgi, be an-gwage ogannoge.
PHM 1:21 An-bega-ibmar-sogedba-be-ibsaoedi, an begi-bensulidba, an bega garda narmaksiid. Ar an nue-wisid, an bese-ibmar-egisnaidba bur bule be ibmar imakoed.
PHM 1:22 Deginbali, an-megoed be anga guagwar sio. Ar an wisid, bemar anga-Bab-Dummadse-goled-ular, Bab-Dummad nabir an bemarse-ataknaega, an-imakoed.
PHM 1:23 Epafras, Cristo-Jesús-nug-ular, anbo-esgaryagi-mellesiid bega sogdo, bede nued sogeye.
PHM 1:24 Deginbali, Marcos, Aristarco, Demas, Lucas, wemar anba-arbamaladi, bega sogsimarmogad, bede nued sogeye.
PHM 1:25 Anmar-Bab-Jesucristo be-burbagi nued binsasun. Be itomargua.
HEB 1:1 Bab-Dummad, dikasurgus na E-gayaburba-barsogmaladba akar-akar anmar-babganga sunmakdanikid.
HEB 1:2 Emisgwasaardi, Bab-Dummad na e-Machiba anmarga sunmaksad. Bab-Dummad bela ibmar na e-Machigadga-guega imaksad, degine, na e-Machiba bela napneg-naid, degine, nibneg-naid nasiksabalid.
HEB 1:3 Bab-Dummad-e-Machi Bab-Dummad-gangued-yeerdakleged nikamogad. Bela Bab-Dummadga-guedi, E-Machi deyob gumogad. Degine, Bab-Dummad-Machi na e-gayaburba-gandik-nikadba, bela ibmar semaid. Bab-Dummad-Machi anmar-isgued-uruknonigu, nibneggi Bab-Dummad-ologana-argan-nuedsik sigidapsunnad.
HEB 1:4 Bab-Dummad-Machi, baliwiturmarba bur dule-dummadga gunonikid, ar ade, gusgu baliwiturmarba bur nug-dummarba-nika danikid.
HEB 1:5 Ar bipisaale Bab-Dummad baliwitur-gwensakga gwen weyob sogsasulid: “Be an-machi gued, emi-ibagi, an be-babga gunonikid.” Salmo 2:7 Deginbali, Bab-Dummad baliwitur-gwensakga gwen sogsasurbalid: “Ani an be-babga guoed. Bee be, an-machiga gumogoed.”
HEB 1:6 Bab-Dummad na e-Machi-wargwenna-gued we-napnegse-odenonigu, a-nikdi sogsagusad: “Bela Bab-Dummad-baliwiturmar we-dule-nug odummomarsun.”
HEB 1:7 Baliwiturmargindi, Bab-Dummad sogsagusad: “Bab-Dummad, e-baliwiturmar burwayob imaked, degi, e-maigandi, soo-gwabunye-gwichiyob imakbalid.”
HEB 1:8 Bab-Dummad, na e-Machinikdi soged: “Bab-Dummad, be-negsemaid degisadeguoed. Be-negsemaid igar-maidba be imaked.
HEB 1:9 Igar-innikigwad-imaked be yeer-itodaed, igar-isganadi be isdar-daked. A-ulale, Bab-Dummad be-Bab-Dummadi, be-aimar-baiganba be-susad. Be-Bab-Dummad, ina-wawadikidgi be-wawamaksad, weligwar-ito be-imaksad.”
HEB 1:10 Degine, Bab-Dummad e-Machinik sogbalid: “Be, Dule-Dummad, we-napneg-naid gebesailaunni be nasiksad. Degi, nibneg-naid be-argangi be nasiksabalid.
HEB 1:11 We-napnegdina berguoed, nibnegmoga bergumogoed. Bedina berguosulid. Igi mormar serguddae, deyobi, bela nibneg, degi, napneg, sergudoed.
HEB 1:12 Be dule-mor-dummad-obipirmakeyobi we-napneg, nibneg imakoed. Degine, dule mor-baid-ogwaeyobi, be we-napneg, nibneg be ogwamogoed. Ar bedi gwen gwagmaisulid, be-birgamardi gwen berguosulid.”
HEB 1:13 Ar bipisaale Bab-Dummad baliwitur-gwensakga gwen weyob sogsasulid: “An argan-nuedsik be sige, be-isdarmalad an bela ogalakuedse be sige.”
HEB 1:14 Bela baliwiturmar-Bab-Dummadga-arbamaladi, burbaled gumalad. Bab-Dummad dulemar-abonolemaloed-bendakega, a-baliwiturmar barmialid.
HEB 2:1 Bab-Machi baliwiturmarba bur dule-dummadsoggu, a-ulale, anmar nue-ibmar-itosmaladgi nue-alakwaa nagumalargebed. Adi, melle anmar Bab-Machi-e-Igar-Nuedgi bangumai gumalagar.
HEB 2:2 Ar epenne gayaburba baliwiturba-soglesad, napiragwadid. A-ulale, dulemar-isgusad, Bab-Dummadba ibsassurmalad, napiragwadba odurdaklemai gusdo.
HEB 2:3 Degisoggu, we-abonoleged-dummad an baisur dakmalale, ¿igi anmarde sabsur-odurdaklegedgi wakinmalosunna? Geg anmar wakinmalad. We-abonoleged gebegi Bab-Jesús-inse sogsagusad, geb we-gayaburba-itosmaladi, anmarga sogsamarmogad, we napiraye.
HEB 2:4 Degine, Bab-Dummad anmarga na oyosad, ibmar-wilubgan-imaklegedgi, dule-geger-ibmar-daked-imaklegedgi, degine, ibmar-dakledisurmalad-akar-akar-imaklegedgi, degi, e-Bab-Burba-Isligwaled na e-sogedba gurgin-burbarmalad-nuegan-uksadgi, anmarga oyosad.
HEB 2:5 Napneg-binid-danikoedgi an sunmakdanimaladgi, Bab-Dummad a-napneg-seega gwen baliwiturmar-nug-imaksasulid.
HEB 2:6 Dule-gwensak Bab-Dummad-Gardagi sogsagusad: “¿Wede, dule ibusunna, egi be binsanonigu? ¿Wede, dule ibusunna, be akwenonigu?
HEB 2:7 Ar dule baliwiturmarba wis yaisaale be imaksad. Napneggi, dummadga-guega, gangued-yeerdakleged bela-bela-nikuega be nug-imaksad. Degi, nug-dummarba-nikuega be imaksabalid. Bela e-argan-yaurgi ibmar-obinnilesad-akwega be we-dule imaksabalid.
HEB 2:8 Bela ibmarmar-bukwad dule-urbaligwa be urbisad.” Salmo 8:4-6 Bela-ibmarmar dule-urba-ambikusgua, gwen ibsoggwensaar dule-urba ambikussurdeeye soglesulid. Degi-inigwele, emi amba deyob daklesulid.
HEB 2:9 Jesús dulega-gunonikidba, baliwiturba wis yaisaar gusad. Emisgindina, anmar Jesús daked e-burgwisadbali, Bab-Dummad ega gangued-yeerdakleged uksa, degi, nug-dummarba-nikuega imaksabali. Deyobi, Bab-Dummad dulemargi-nabir-binsaedba burgwedgi naibid-dummad-itogega Jesús-imaksad, adi, bela dulemar-anar burgwegar.
HEB 2:10 Bab-Dummad deyob Jesúsʼgi-imaksadi, ega ibnuedid. Ar Bab-Dummadgi bela ibmar danikid, degi, bela ibmar Bab-Dummadgad gubalid. Degisoggu, Bab-Dummad na e-gangued-yeerdakleged e-mimmigan-eba-nikumogaga, imaksad. Bab-Dummad, Abonoged-Dule-wilegega imaksad, adi, ibmar-naibid-imaksadba, nabir dulemar-abonogedga guegar.
HEB 2:11 Ar dule-gwage-swilidik-saedi, degine, dule-gwage-swilidik-guedi, ar ebobela bab-wargwengi danikid. A-ulale, Jesucristo bingesuli, dule-eba-nanaimaladse, an-gwenadye goled.
HEB 2:12 Jesús, Bab-Dummadga soged: “An-gwenadganga an begi sunmakoed, an-gwenadgan-danar-ambikued-abargine, namakedgine an be-nug-odummogoed.”
HEB 2:13 Deginbali, Jesús sogbalid: “Andi, Bab-Dummadgi benguosulid.” Isaías 8:17 Degi, sogbalid: “Wegi an Bab-Dummad-mimmigan-anga-uksadmala an gudiid.”
HEB 2:14 We-mimmigan-sanar-gwalulemaladyobi, we-Jesús, sanar gwalulesmogad. Adi, na e-burgwisadgi burgwed-igar-semaid-e-dummad obelogegar. We-burgwed-e-dummadde, nia-sailad-Satanásʼye nugad.
HEB 2:15 Jesús e-burgwisadba burgwed-dobedba-wiledimalad, onosad.
HEB 2:16 Ar Jesús baliwitur-bendakega nonisulid. Jesús, Abraham-wagan-bendakega nonikid.
HEB 2:17 Degisoggu, a-ulale, Jesús e-gwenadmar-sunnaa gunonikid. Adi, dulemar-nue-wiledakdii guegar, degi, Bab-Dummad-asabin dule-irwa-Bab-Dummadse-goled-bur-dummad gwen galakussuli guegar. Jesús deyob gunonikid, adi, dulemar-isgudimalad-e-isgued, na e-burgwisadgi ega eliegar.
HEB 2:18 Ar Jesús na e-sunnad wilubdakledigusadgi-wilessoggu, a-ulale, sunna wilubdaklegedgi dulemar-bendakmosunnad.
HEB 3:1 Degisoggu, gwenadgan, bemar Jesucristoʼgi-akananaimalad, Bab-Dummad bemarse gochamarmogad. Be weyob Jesús-dakmaloed: We-Cristo-Jesús, Bab-Dummad-e-sapin-bur-dummad gued. Degi, anmarga-igar-nabosadgi anmar-irwa-Bab-Dummadse-goled-bur-dummadga gubalid.
HEB 3:2 Igi Moisés, Bab-Dummad-negyagi-bukmalad-abargi gwen galakussuli-arbasgusa, deyobi, Jesús dule-e-nug-imaksadga nuekwaa arbasmogad, gwen galakussuli gusad.
HEB 3:3 We-Jesús, Moisésʼba bur bule nug-odummolesad, ar igi dule-neg-sobedi, negsobsadba bur bule e-nug-odummolege, deyob Jesús-nug bur bule odummolesmogad.
HEB 3:4 Ar bela-negmar e-sobed nikad. Ar ibmarmar-imaklesadi, bela Bab-Dummad imaksad.
HEB 3:5 Moisés, Bab-Dummad-e-mai, yoedse Bab-Dummad-ibmar-sogoed-e-wilubganga-guega gwen galakussuli Bab-Dummad-neg-yagi arbadii gusad.
HEB 3:6 Ar Bab-Dummad-Machi-Cristoʼdi, gwen galakussuli na e-neg-yaurga nanadii gusad. We-neg-obaredi, we, anmardo. Ar anmar Bab-Dummad-ibmar-ukoye-sogsadi, nue an abingasmalale, degi, anmar galakussuli edarbedii gusmalale, anmar egadga gumaloed.
HEB 3:7 A-ulale, Bab-Burba-Isligwaled-sogedyob be imakmalo: “Emi-ibagi Bab-Dummad-gayaburba be itomalale,
HEB 3:8 melle be-dadgan Bab-Dummadgi gwisgus-gusmaladyob, bur bule burgumalo. Deun, be-dadgan nega-dulesulidganbali Bab-Dummad-wilubdakdii nanasmalad.
HEB 3:9 Deun agine, be-dadgan birga-dulabo (40) amba an-ibmar-imaksad-daksamar-inigwele, an-wilubdaksa gusmalad, an-urwega an-imaksa gusmalad.
HEB 3:10 A-ulale, a-dulemarse an ulud-gusad, an ega sogsa gusad: ‘Bemar gusgu gwagegi ibmar-isgana-saedginbi-binsamaladid. Degi, an-Igar-Maidba bemar gwen nanadisurmalad.’
HEB 3:11 Degisoggu, an sae-itogedgine, an weyob ise-sogar sogsa gusad: ¡An-obunnogedgi bemar bipisaale gwen obunnogosurmarye!”
HEB 3:12 Gwenadgan, nue salakarmar. Melle be Bab-Dummad-Dula-Maidgi bangumalo. Melle be-gwagegi-isdar-binsaedba Bab-Dummadgi bengumalo.
HEB 3:13 Bur bane-bane na be ogannodii imakmar, emi amba soglenaidgi, emi-ibaginye, adi, melle bemar-isguedse-yardakleged-ular, uayasuli guegar.
HEB 3:14 Ar anmar gebesaila igi Cristoʼgi bengussuligusa, deyob anmar degisadegu berguedse egi bengusuli guele, Cristoʼba ibmar nikumogoed.
HEB 3:15 Anmarga sognaid: “Emi-ibagi Bab-Dummad-gayaburba be itomalale, melle be-dadgan Bab-Dummadgi gwisgus-gusmaladyob, bur bule burgumalo.”
HEB 3:16 ¿Ar doamar Bab-Dummad-itosmargu, egi gwisgus gusmarsunna? ¿Ar Egipto-yargi bela Moisés-dulemar-onosad Bab-Dummadgi gwisgus gusmarsursi?
HEB 3:17 ¿Bab-Dummad doamarse birga-dulabo (40) urwedii gussunna? ¿Dule-isgusmaladsesursi? Ar amar nega-dulesulidganbali bela burgwisgusmalad.
HEB 3:18 ¿Ar doamarga Bab-Dummad sogsagusa, bemar Canaán-yargi obunnomai guosurmarye? Dule-uayasuligusmaladga deyob sogsagusad.
HEB 3:19 Anmar daksundo, amala Bab-Dummad-bengusmalad-ulale, obunnoged-yarse dogsasurmalad.
HEB 4:1 Bab-Dummad sogsad, an-obunnogedgi be obunnomaloye. Deyob-anmarga-sogsadyob amba igar anmarga-maisoggu, nue salakarmar, abakalegi bemar gwenna-gwenna a-obunnogedgi obunnoarsurmalale.
HEB 4:2 We-Gayaburba-Nued anmarga soglesadyob anmar-dadganga soglesmoganad. A-gayaburba-nued-itosmar-inigwele, gwen bendaklessurmalad. Ar ade, itosmargu, Bab-Dummad-bengusmalad.
HEB 4:3 Ar Bab-Dummad egi-bengusmaladga sogsagusad: “Degisoggu, an sae-itogedgine, an weyob ise-sogar sogsa gusad: ¡An-obunnogedgi bemar bipisaale gwen obunnogosurmarye!” Salmo 95:11 Ar anmardi Bab-Dummad-bengussurmarsoggu, a-ular, anmardi Bab-Dummad-obunnogedgi obunnomarsunnoed. Ar Bab-Dummad napneg-nasiksagu, bato bela ibmar-imaksad.
HEB 4:4 Ar Bab-Dummad-Gardagi obunnoged-ibagi weyob sognaid: “Ibagugled-nagunonigu (7), Bab-Dummad obunnosad, bar arbassulid.”
HEB 4:5 Bab-Dummad-Garda-sogedyob gannar an sogbardo, Bab-Dummad sogye: “¡An-obunnogedgi bemar bipisaale gwen obunnogosurmarye!”
HEB 4:6 Anmar-dadgan gayaburba-nued-itosmar-inigwele, Bab-Dummad-sogedba ibmar imaksasurmalad. Agala, gwen obunnogedse dogsasurmalad. Degi-inigwele, baigandi amba bukidar Bab-Dummad-obunnogedgi sunna obunnodamarsundo.
HEB 4:7 A-ular, Bab-Dummad gannar iba nasiknonikid, soged: “Emi-ibaginye.” Dikasurgus deyob-sogsad, emidi, Davidʼbali anmarga sognaid: “Emi-ibagi Bab-Dummad-Gayaburba be itomalale, melle be-dadgan Bab-Dummadgi gwisgus-gusmaladyob, bur bule burgumalo.”
HEB 4:8 Ar Josué anmar-dadgan obunnogega-imaksana, Bab-Dummad a-sorbali, bar obunnoged-baidgi sunmaksasulinad.
HEB 4:9 Degisoggu, Babba-nanaimalad obunnoged-baid ega nue-maisunnad.
HEB 4:10 Ar dule Bab-Dummad-obunnogedgi obunnosale, na e-arbaedgi obunnomogad. Ar igi Bab-Dummad e-arbasad-sorba obunnosmoga, deyobi, obunnomogad.
HEB 4:11 Degisoggu, a-obunnogedgi anmar obunnomogagala, nue-alamaknai imakmarsun, adi, melle anmar uayasuli anmar-dadgan-gusadyob gumarmogagar.
HEB 4:12 Ar Bab-Dummad-Gayaburba dulasailad, degi, gannarbabalid. We-Gayaburba, es-suid-nugar-darbogwadba bur bule dogbalid. Dogedi, san-burbaginse-bakar, doged, anmar-burbase amba dogbalid. Yokormar-gwadilenaidse, degi, galagan-e-nisse-bakar, doged. Deginbali, dule-binsaed, e-gwage-ibmar-imakbied bela mag dakbalid.
HEB 4:13 Bela-ibmar-obinnilesadi, Bab-Dummadgi dukunaisulid, bela e-asabin magar-daklenaidbiid. Anmar-Bab-Dummadga-ibmar-sogoedgi, ibmar dukunaisulid.
HEB 4:14 Jesús, Bab-Dummad-Machi dule-irwa-Bab-Dummadse-goled-bur-dummad nibnegse dogsad. Agala, anmar Jesúsʼgi-bensulidgi gatik-akanai gumarsun.
HEB 4:15 Ar anmar-irwa-Bab-Dummadse-goled-bur-dummad anmar-sunna wilubdaklesmogad, degite, gwen isgussulid, a-ular, anmar-nollo-itogedgi nabir wile anmar-daksunnad.
HEB 4:16 Degisoggu, anmar Bab-Dummad-dulemar-sabgumaid-e-ologanase bensulidba walikgumarsun. Adi, Bab-Dummad wile-anmar-dakega, degi, bonigan-abargi anmar-bendake-wilubsulinadgi anmar-bendakegar.
HEB 5:1 Ar bela dule-irwa-Bab-Dummadse-gormalad-bur-dummagan-megismalad dulemar-abargi sules daed. Sulegogua, dulemar-irwa Bab-Dummad-asabin gwisguega, Bab-Dummadga ibmar-ukleged ukega, degine, dulemar-isgued-ular Bab-Dummadga-ibmar-ogumakar-ukleged-ukega nugsalesdaed.
HEB 5:2 Adi, mer mesagwar dulemar-ibmar-wissurmalad-imakega, degi, dulemar-igar-nuedgi-bangudmalad-imakegar. Ar ade, na e-sunna nolloo gumogad, sunna isgumogad.
HEB 5:3 A-ulale, na e-isgued-ular, degi, dulemar-isgued-ular, Bab-Dummadga-ibmar-ukleged ukmogargebed.
HEB 5:4 Dule na-dukin geg wargwengi dule-irwa-Bab-Dummadse-goled-bur-dummadga na nugsaed. Unnila Bab-Dummad ese golergebed, igi-Bab-Dummad Aarónʼse gocha-gusmoga, deyobi, ese gormogargebed.
HEB 5:5 Ar Cristoʼmoga na-dukin dule-irwa-Bab-Dummadse-goled-bur-dummadga nug-imaksasurmogad. Bab-Dummadi Jesús-nug-imaksad. Bab-Dummad ega sogsagusad: “Be an-machi gued, emi-ibagi, an be-babga gunonikid.”
HEB 5:6 Ar Bab-Dummad-Gardagi narmakar naibalid: “Be, Bab-Dummad-asabin Dule-Irwa-Gwisgued-Dummad-Degisadeguadid. Igi Melquisedec maigusa, deyob be gumogad.”
HEB 5:7 Cristo we-napneggi-gudigusgu, Bab-Dummad-nabir-burgwedgi-e-ollor-imakedse ibyanis-abalagi ise-wilegar binnasuli-gordii gusad. Bab-Dummad we-Cristo-ese-binnasur-gochad itosad. Ar Bab-Dummad, Cristo eba-nue-uaya-nika-nanadigusadba itosad.
HEB 5:8 Ar Cristo Bab-Dummad-Machi-inigwele, na nue-wilesadbali, Bab-Dummadba-ibsaed durdaksad.
HEB 5:9 Agi nue-durdaksasoggu, bela dulemar-eba-ibsaedga abonoleged-degisadeguad-ibedga gunonisunnad.
HEB 5:10 Geb Bab-Dummad sognonisunnad, Melquisedecʼyob be dule-irwa-Bab-Dummadse-goled-bur-dummadga an be-nug imaksunye.
HEB 5:11 We-igargangine, bukidar anmar egi sunmaked-nika-inigwele, nuegwadsun bela bega sogegala, dutusulid, ar ade, bemar amba nue-aku itomalad.
HEB 5:12 Ar bemar bato dikasurgus odurdaked-sailaga gusawilubmalanad. Emigindi, amba bemarga gannar Bab-Dummad-Gayaburba-onodedgi ibgwensuli-durdaklemaladgi bega sunmaked be abemalad. Ar bemar deyob gunonisoggu, amba bemar nunis gobergebed, ar geg be amba san gunmalad.
HEB 5:13 Ar dule amba nunis-gobnaile, amba Bab-Dummad-Gayaburba-napiragwad nue-wissulid. Ar ade, amba Bab-Dummadgi mimmiga gued.
HEB 5:14 Ar san-gunmaladdi bato wedi dule-nue-Bab-Dummad-igargi-nasgumaimaladgadid. Ar dule-magasar-ibmar-itogedgadid, igid igar-nuedi, igid igar-isganabali.
HEB 6:1 Degisoggu, anmar Cristo-igargi-gebe-onoleddaed-odurdaklemaladgi mer bar egi naigu gumarsun. Nasgumarsun. Mer bar we-igargebe-odurdaklemaladgi gannar-gannar sunmaknai be gumarsun: Bab-Jesúsʼba-naigued-igargi, napneg-igargan-burgwedse-dule-semaid-igargi, Bab-Dummadgi-bensuli-gued-igargi,
HEB 6:2 Bab-diigi-ogleged-igargi, dulemar-nugsaega egi-argan-mesed-igargi, dulemar-burgwisad-gannar-durgued-igargi, degisadegu-sabsur-odurdaklegoed-igargi, We-igarmargi mer bar gannar-gannar sunmakmarsun.
HEB 6:3 Gannar-gannar we-igargangi an bemar-odurdakbisulid, bur an bemar-odurdakbied yoo amba bemar ibmar-durdakmaladgi. Ar Bab-Dummad deyob anga igar-uksale, ar deyob an bemar-odurdakmalodo.
HEB 6:4 Ar irgwenna dulemar-Bab-Igar-abingasgusmalad, Bab-Dummad-dulemarga-ibmar-uked-abingasmalad, degi, Bab-Dummad-Burba-Isligwaled-nikusmalad.
HEB 6:5 Bab-Dummad-Gayaburbagi-nanadigusmalad, degi, yoedse-ibmarmar-guoed-e-gangued-itosgusmalad.
HEB 6:6 We-dulemar, Bab-Jesús-metele, gannar Jesúsʼse aibirye-sogele, gege gannar bar aibired. Ar degiile, gannar Bab-Dummad-Machi-Jesús-nakrusgi-bioknaido, degi, dulemar-asabin egi dodonaido.
HEB 6:7 Ar dii bali-bali-wiedbali, napa nue-dii gobed. Degidbali, a-napa dule-ibmar-digedga, gagan-nuegan-nabir-gullemalad nue-sanmakega imaked. Bab-Dummadi, a-napagi nued binsaed.
HEB 6:8 Ar we-napagi ikomar-ainiele, gagan-isganamar-ainiele, gwen nabirsurdo. Bab-Dummadse ukabsaleged bato ega danido, geb we-nainu unni-ogumakleged edarbenai guoed.
HEB 6:9 Gwenadgan-sabesailamalad, ar anmar weyob sunmakmar-inigwele, anmardi nue-wismalad, bemargardi ibmar-nuegan danikoed. A-ibmardi, abonoleged-igalad.
HEB 6:10 Ar Bab-Dummad dule-innikidaedsoggu, ega-be-ibmar-imaksad geg ieged. Degi, be Jesucristoʼgi-akananaimaladga-ibmar-imaksagu, Bab-Dummad-nug-sabguedba-be-imaksadi, Bab-Dummad geg ieged.
HEB 6:11 Degi-inigwele, anmar abedo, bemar na wala-walagwen ibmar-nued-imakdii degisadegu na be-burgwedse imaked. Adi, bemar ibmar-bensulidgi-edarbediid nue-abingamalagar.
HEB 6:12 Melle be wiegalaga gumar. Bur be dule-Bab-Dummad-bensuli-gudidimaladba, degi, gwae-gwaesulidgi Bab-ibmar-ukoye-sogsad-abingasmaladba, be damarmosun.
HEB 6:13 Bab-Dummad Abrahamʼga ise-sogar-sogsagusgu, an bega-ibmar-ukoye, dule-baid eba-bur-dummad-satesoggu, na dukin Bab-Dummad e-nuggi napiragwadgi sognaigusad.
HEB 6:14 Deun, sogsad gusad: “Napira an bega soged, an bela-bela ise-nued begi binsaoed. Be-wagan bela-bela-mergu an imakoed.”
HEB 6:15 Abraham we-ega-ibmar-soglesad gwae-gwae abessursoggu, Bab-Dummad-ega-ibmar-ukoye-sogsad abinganonisunnad.
HEB 6:16 Ar dulemar napiragwadgi ise-sogar-ibmar-sogegala, dule-eba-bur-nug-nikad-nuggi imakdamalad. Ise-sogar-soglegedbi unnigualed, ibmar-baid-bar-niksulid, yog berguardaed.
HEB 6:17 A-ulale, Bab-Dummad, Abrahamʼga-ibmar-ukoye-sogsad, Abraham-waganga-nue-oyogegala, ede, ibmar-soged-geg-bar-ogwaye, degi, we-ibmar-sogsad-napiraye-sogegala, na dukin e-nuggi-napiragwadgi ise-sogar-imaknonikid, an imakedseye.
HEB 6:18 Yoedse-ibmar-imakoye-sogsadba, degi, ise-sogar-sogsadba, imaksad. We-ibmar-sogbogwad-geg-gwagedgi, Bab-Dummad sogsad. Degisoggu Bab-Dummad geg gakansaed. Bab-Dummad-anmar-edarbed-abediidgi anmar-gwage nue ogannosmarsunnad.
HEB 6:19 Igi esnas ur-gasa naidae deyobi, anmar-bensurmalad-edarbediid, anmar-sanburba Bab-Dummadgi nai gumogoed. Degisoggu, sunna anmar Bab-Dummadse dogsunnad, igi dule-irwa-Bab-Dummadse-gormalad-bur-dummad Bab-Dummadse-goled-neggi-mor-naid-yaba dogdae, deyob anmar nabir dogmarmogad.
HEB 6:20 A-negse Jesús, e-inse anmar-idu dogsad. Adi, anmarga igar egaegar. Agi Melquisedecʼyob dule-irwa-Bab-Dummadse-goled-bur-dummadga degisadegu gunonikid.
HEB 7:1 Ar we-Melquisedec, neggwebur-Salemʼye-nugad-e-reyd, dule-irwa-Bab-Dummad-Bur-Biriginedse-goledid. Abraham reymar-baid-ebo ulusadgi-nakwisdanigua, we-Melquisedec Abraham-abin noargusad. Geb agi Melquisedec ega sogsagusad: “Bab-Dummad begi nued-binsasun.”
HEB 7:2 Geb degine, Abraham bela ulusadgi-ibmar-amisadi sogambe-gued-gwensak (10%) Melquisedecʼga uksad. Melquisedec-nug sogleged: “Rey-Igar-Innikii-Imakedye,” degine, Salem-E-Reyye-soglebalidi, sogledo: “Rey-Gwage-Bogidikidye.”
HEB 7:3 Dule wissulid doa Melquisedec-e-baba, degine, doa e-nana, deginbali, doa e-dadganbali, dule gwen wissurmalad. Deginbali, Melquisedec-gwalulesad, degine, e-burgwisad dulemar gwen wissurmarbalid. A-ulale, Bab-Dummad-Machiyobi gumosundo, dule-irwa-Bab-Dummadse-goled degisadeguad-dulesundo.
HEB 7:4 Nue be itomalana, we-Melquisedecʼde bule-dumma-be-itosunna. Anmar-dad-Abraham dule-dummadye-soged, reymar-baigan-ebo-ulusad-ibe-ibmar-susadi, sogambe-gued-gwensak (10%) Bab-Dummadga-ukleged Melquisedecʼga uksad.
HEB 7:5 Emigindi, nabir. Leví-e-wagan dule-irwa-Babse-goledga nugsalesmalad. Amarga igar maid, sogambe-gued-gwensak (10%) neggwebur-ibmar-Babga-ukedi, ega-uklegoye. We sogleged, e-gwenadgan ega ukoye. Ar e-gwenadgan amba Abrahamʼgi-danimarmo-inigwer, ega ukergebed.
HEB 7:6 Ar Melquisedecʼdi Levíʼgi-danisur-inigwele, sogambe-gued-gwensak (10%) Bab-Dummadga-ukleged Abraham-annik susa gusad. Degine, Melquisedec Abrahamʼga sogsagusad, Bab-Dummad nued begi binsasunye. We-Abrahamʼgi, Bab-Dummad ibmar-nuegan-imakoye sogsagusad.
HEB 7:7 Dule-soged Bab-Dummad-begi-nued-binsasunye, we-dule, dule-baidga-sognaidba, bur dummadid.
HEB 7:8 Leví-wagan-abargi dulemar-ibmar-sogambe-gwensak (10%) Babga-ukleged-suedi, wedi, burgwemaladid. Melquisedecʼnikdi amba dula-gudiiyob Bab-Dummad-Garda egi sunmaked.
HEB 7:9 Weyob soglegeyobsundo, Abraham deun Melquisedecʼga ibmar-sogambegid-gwensak-Babga-uklegedi (10%) uksagusgu, dule-irwa-Babse-gormalad-Leví-wagan ibmar-sogambegid-gwensak-Babga-ukleged-abingamaladi (10%), uksamarmoye.
HEB 7:10 Melquisedec Abraham-abin noargusgu, deunni, Leví e-dad-Abrahamʼgi burbar oyolenaid.
HEB 7:11 Bab-Dummad Israel-dulemarga Moisés-Igar-Maid uksagusad. Leví-wagan-dule-irwa-Babse-gormalad Moisés-Igar-Maidgi dulemar-odurdaksagusmalad. Wemar, nabir dule-inniki-nanaega-imakena, ¿ar ibiga bar dule-irwa-Bab-Dummadse-goled-Melquisedecʼyobid, bar abelegoensunna? Emigindi, dule-irwa-Bab-Dummadse-goledga-guega Aarón-wagansulid sulenonikid.
HEB 7:12 Ar dule-irwa-Bab-Dummadse-goled ogwalenonikile, igar-maid amba ogwalemogargebed.
HEB 7:13 We anmar-Dummad-Jesúsʼgi, Bab-Dummad-Garda sunmaked. We-dule Leví-e-wagwasulid, dule-baid e-dadad. Jesús-dadgan-e-wagandi dule-irwa-Bab-Dummadga-ibmar-ogumakar-ukleged-ailagi arbadisurmalad.
HEB 7:14 Ar anmar wisid, anmar-Dummad-Jesús, Judá-e-wagwad, a-anagangi nonikid. Moisés, Judá-wagangindi gwen sogsasurgusad, we-dulemar dule-irwa-Bab-Dummadse-goledga gumaloye.
HEB 7:15 Ar dule-irwa-Bab-Dummadse-goled-gwapid, Melquisedecʼyobid nonikile, we anmarse ise-nue-sogar oyolenaibarsundo.
HEB 7:16 We-dule-danikidi, Moisés-Igar-Uksadba Leví-wagangi gwen danisurye. We-Cristo na gusgu-e-gangued-nikadba, geg-san-burba-bergued-nikadba danikid.
HEB 7:17 Cristoʼgine, weyob Bab-Dummad-Gardagi sunmaknaid: “Be, Bab-Dummad-asabin Dule-Irwa-Gwisgued-Dummad-Degisadeguadid. Igi Melquisedec maigusa, deyob be gumogad.”
HEB 7:18 Ar idu-igar-maid nollosoggu, degi, geg igarga gubarsoggu, a-ulale, we-igar osulolenonisunnad.
HEB 7:19 Ar Moisés-Igar-Maid isguedgi-mer-bar-nanaega gwen dule-bendaksasulid. Igar-binidgindi, anmar ibmar-nue-bensulidgi edarbedimarsunnad. Abali, emigindi, anmar sunna Bab-Dummadse warmakmarsunnad.
HEB 7:20 We-igar-uklesadi, Bab-Dummad ise-sogar-sogsadba na-oyosad, we napiraye. Baid-dule-irwa-Babse-gormalad-baigandi, ise-sogar-soglessulidba nugsalesmalad.
HEB 7:21 Ar we-Dummad-Jesúsʼgardi, ise-sogar-ega-soglesadgi dule-irwa-Babse-goledga gunonikid. Bab-Dummad ega sogsagusad: “An-ibmar-ise-sogar-sogsad, bar an ogwaosurye. Be, Bab-Dummad-asabin Dule-Irwa-Gwisgued-Dummad-Degisadeguadid. Igi Melquisedec maigusa, deyob be gumogad.”
HEB 7:22 A-ulale, Bab-Dummad napiraye-Jesúsʼgi-sogsadgi nue-oyonaisunnad. Epenne Moisés-Igar-Mesisadba, dulemar-ebo-igar-binid-mesisad, bur nuedye.
HEB 7:23 Leví-wagandi, dule-irwa-Bab-Dummadse-gormaladga ichesur gusmalad. Ar amarde, burgwiddamarsoggu, ase bergusdamalad.
HEB 7:24 Ar Jesúsʼdi geg burgwesoggu, dule-irwa-Bab-Dummadse-goledga degisadeguadga gunonisunnad.
HEB 7:25 A-ulale, dulemar Jesús-nuggi Bab-Dummadse-danimalale, Jesús degisadegu a-dulemar-abonoged. Ar ade, Jesús degisadegu Bab-Dummadse amarga gormaiguad.
HEB 7:26 Ar dule-irwa-Bab-Dummadse-goled-bur-dummad-weyobid anmar nika abeleged: Dule-gwage-swilidikid, neg-oakalossulid, gwagegi-gutu-naisulid, dule-isgumaladgi-aibacha-gudiid, degi, nibnegba-bur-bule-dule-dummadga-maklesbalid.
HEB 7:27 Jesúsʼdina dule-irwa-Babse-gormalad-baiganba akarsailad. Dule-irwa-Babse-gormalad-baigandi, bane-bane na e-isgudiidga Bab-Dummadga ibmar uked. Geb degine, a-sorba dulemar-baigan-isgudiidga Bab-Dummadga ibmar ukbalid. Jesúsʼdi deyobsulid. Dulemar-isgued osulogegala, unniguar bato na e-san irgwen-ukar Bab-Dummadga imaksad.
HEB 7:28 Ar Moisés-Igar-Mesilesadba dule-irwa-Bab-Dummadse-gormalad-bur-dummad-nugsalegedi, wemardi, nolloo gumalad. Ar Moisés-Igar-Mesilesad-sorba, Bab-Dummadi ise-sogar-sogsadgi E-Machi-nug-imaksad, dule-innikigwad-degisadeguadga imaksad.
HEB 8:1 Nabir. Emi anmar egi-sunmakdanikidi, anmar sogdanido, dule-irwa-Bab-Dummadse-goled-bur-dummad an nikamarye. A-dule, Bab-Dummad-ologana-argan-nuedsik nibneggi sigdapye.
HEB 8:2 We-dule, Bab-Dummad na ese-goled-neg-islidikid-sobsadgi, dule gwen a-neg-sobsasulidgi, arbaedid.
HEB 8:3 Ar bela dule-irwa-Babse-goled-bur-dummagan nugsaleged, Bab-Dummadga-ibmar-ukega, degi, Bab-Dummadga-ibmar-ogumakar-ukega, nugsaleged. Amba deyobmodo, Jesucristo Bab-Dummadga ibmar ukmogargebed.
HEB 8:4 Ar Jesús we-napneggi-gudiina, dule-irwa-Bab-Dummadse-goledga guosulinad. Ar ade, anmar bato we-napneggi dule-irwa-Babse-gormalad Moisés-Igar-Maidba Bab-Dummadga-ibmar-ukmalad nikamalad.
HEB 8:5 Neg-Islidikidgi, dule-irwa-Babse-gormalad-e-arbamaladi, Bab-Dummad-neggi-ibmar-imaklegedyobsulid. Unnila nibneggined-e-wilubgan gued. A-ular, Moisés Bab-Dummadse-goled-neg-sobesokargu, Bab-Dummad Moisésʼga sogsagusad: “Nue be dako, be imakoedi, igi yarbirgi bega e-dakleged oyolesa, a-sunnagwad be imakoed.”
HEB 8:6 Ar emigindi, Jesús dule-irwa-Babse-goled-e-arbaedi, dule-irwa-Babse-gormalad-baigan-e-arbaedba bur-nuedid. Ar ade, Jesucristo, Igar-Bini-megisad-irwa-gwisguega nug-imaklesad. We-Igar-Binid igar-seredba bur-nuedid. Ar we-Igar-Binid Bab-Dummad-yoedse-ibmar-bur-birigined-ukoye-sogsadba megisad.
HEB 8:7 Ar gebe-igar-megisad bela unnitiba-maina, bar a-sorba we-igar-baid abelegosulinad.
HEB 8:8 Ar Bab-Dummad, dulemar geg e-igar-idu-megisadba nue-nana-daksasoggu, Bab-Dummad sogsad: “Ani an soged, ibagan danikoed, Israel-dulemarbo, degi, Judá-dulemarbo, igar-binid an mesoed.
HEB 8:9 E-dadganbo-Igar-Mesisadyobi, an igar mesosulid. Deunni, Egipto-yalagi an e-dadgan-onosgu, anbo Igar Mesisgusad. Amar anbo-Igar-Mesisadgi gwen nanassurmarsoggu, a-ular, a-dulemar an indaksasunnad.” Jeremías 31:31-32 Deyob Bab-Dummad soged.
HEB 8:10 “Degisoggu, a-ular, a-ibagan-sorbali, Israel-dulemar-ebo an weyob igar mesoed: E-gwage-ulubgi an-igar an ega nasikoed, e-binsaedgi an-igar an ega narmakoed. Ani an e-Bab-Dummadga guoed, emar an-dulaga gumarmogoed.
HEB 8:11 Bar dule, dule-baid odurdakosulid, e-gwenad-odurdakosurbalid, ega sogosulid: ‘Bab-Dummad be amimala.’ Ar bela burwiganase, degi, serganse-bakale, an-amimaloed.
HEB 8:12 E-isgumalad bela an ega elioed, isgussulidyob an dakoed. Bipisaale bar an e-isgusadgi binsaosulid.”
HEB 8:13 Bab-Dummad Igar-Binidye-sogedgi, sognaido: Igar-idualed seredgusye. Ar Igar-Seredye-sogedi, we-igar-sered bato e-bergued warmakdanisundo.
HEB 9:1 Nabir. Gebe igar-megisadgi soglenaid, Bab-Dummad-nug-odummolealile, igi-imaklegoe, degi, Bab-Dummadse-goled-neggi, igi-ibmar-bukubaloe.
HEB 9:2 Ar weyob Babse-goled-neg-sunna-seleged soblesad: Gebe-dogdedgi mordummad-naidgi Neg-Islidikid naigusad. Agi gwallumar-sied siid, degi, mese siibalid, agi madu-Bab-Dummadga-ukleged bukwabalid.
HEB 9:3 Bab-Dummadse-goled-neggi, baid-mor-dummad-yaba-naid-dakasiki, Nega-Nued-Ise-Islidikid naigusad.
HEB 9:4 Agine, Bab-Dummadga-ina-wawadik-yapanned-ogumakega olo-aila-yaigwad siid, degine, Bab-Dummad Dadganbo-Igar-Mesisad-Ulu siibalid. A-Ulude, bela olo-sunnabi egi nasikaled. A-Ulugine, nog-orbiid-siidgi masi manáʼye-nugad bukwad. Agi Aarón-gaapoled maibalid. We-gaapoledgi ber gagan-aradiki egi ainisgusad. Degine, a-Ulugi akwagi Bab-Dummad-Israel-Dulemarbo-Igar-nabosad-narmaklegaled maibalid.
HEB 9:5 Bab-Dummad-Dadganbo-Igar-Mesisad-Ulu-birgi, baliwiturmar-querubinʼye-nugad-warbo abin-abin bukwad. We-baliwiturmar e-sakangi Ulu-Eduged bela eunbukwad. Emigindi, agi geg an belallaa bemarga sunmaked.
HEB 9:6 Bab-Dummadse-goled-neg-sunna-selegedgi deyob ibmarmar bukwa gusad. Geb, dule-irwa-Babse-gormalad bane-bane Bab-Dummadga-ibmar-imakega Neg-Islidikidgi dogbukwadamalad.
HEB 9:7 We-Bab-Dummadse-goled-neg-Ise-Islidikidyabardi, dule-irwa-Bab-Dummadse-goled-bur-dummadbi birgagi irgwenna doged. Ase dogsokalir, ibmar-dula-Bab-Dummadga-uklesad-e-abe na e-isgudiidga sedergebed. Degine, dulemar-baigan na isgudisurye-bimalad-ular, abe sedergebbalid.
HEB 9:8 Wegine, Bab-Dummad-Burba-Isligwaled anmarga oyonaisundo, Bab-Dummadse-goled-neg-idualed amba-siile, Neg-Ise-Islidikid-naidse dulemar-dogegala amba igar maisulid.
HEB 9:9 Wedi emi-ibaga unnila binsa nabir oyolegega gusad. Babga-ibmar-ukleged, degi, Babga-ibmar-ogumakar-uklegedi, dule-we-ibmar-imakmaladga, e-isgued geg ega elied.
HEB 9:10 Ar unnila masgulleged, gobleged, degine, igar-nikaa ibmar-uruked-maidba-imakleged, binsa asginbi wemar-ibmarmar imakleged. We-ibmarmar-imaklegedi, Bab-Dummad ogwanonikoedse bergunonikoed.
HEB 9:11 Ar emigindi, Cristo, ibmar-nuegan-yoedse-danimaloed-dakega dule-irwa-Bab-Dummadse-goled-bur-dummadga nugsalesad. Cristo Bab-Dummad-meged-neguya-bur-nuedidse, bur-sunsogedidse dogsad. We-Bab-Dummad-meged-negdi, dulemar-argangi sobarsulid. A sogleged, we-napnegginedsurye, nibnegginedye.
HEB 9:12 Cristo Neg-Ise-Islidikidse unnila irgwenna dogsad. Cristo sibad-abe-ukedba, degi, moli-sapingana-abe-ukedba gwen dogsasulid, na e-abe-uksadba dogsad. Agi anmarga isgued-bennuksad. We-anmarga-isgued-bennuksadi, degisadeguad.
HEB 9:13 We moli-bebe-nikad-machered-abe, degine, sibadmar-machered-abe, degine, moli-ome-bebe-nikad-amba yoo-mimmi-nikued-ogumaklesad-buru, dulemar-isgudimalad-birgi-eolesale, we-dulemar-san uruked. Degidbali, dulemar asginbi swilidik gued.
HEB 9:14 Ar deyobile, Cristo-abe-bursunna, ar a-bur bule gangued nikad. Cristo, Bab-Dummadgala Bab-Dummad-Burba-geg-berguedbali na-san-gutu-gwen-naisulidi, burgwega na san-uksa gusad. A-ular, Cristo-e-abe, anmar-ibmar-ichakwa-imaksadgi-binsaed-naid burgwedsik-anmar-semaid, anmarga obelosunnad. Adi, Bab-Dummad-Dula-Maid-e-maiga anmar gumalagar.
HEB 9:15 A-ulale, Cristo Igar-Bini-Megisad-irwa-gwisguedga gunonisunnad. Gebe-Igar-Megisadgi-yolesmalad e-isguedgi-abonogegala, Cristo burgwenonikid. Adi, Bab-Dummad-dulemarse-gochamaladi, ibmar-nuegan-geg-bergued abingamalagar.
HEB 9:16 Dule e-burgoed-iduar na-igar-mesed, doa e-sorba ibmar-gaoe. Dule-ibmar-gaoye-soglesad ibmar-gaega we-dule-igar-mesisad burgwegwelergebed.
HEB 9:17 Ar ade, dule-igar-mesisad burgwisar, geb nabir igarga gued. Ar dule-igar-mesisad amba dula-gudiile, dule-ibmar-gaoye-soglesad geg amba ibmar gaed.
HEB 9:18 Bab-Dummad Anmar-Dadganbo-Gebe-Igar-Mesisadgi ibmar-unimalad-burgwisadgi, a-e-abe-milesadgi ebo-igar nabosad.
HEB 9:19 Moisés bela-igargan-megisad neggweburga-sogsagua, sibad-wawaad-e-absar-ginnid, hisopo-e-anagi yosad, geb agi molimar-sapingana-e-abe, degi, sibad-e-abemar-diiba-oburaledgi, owardikusad. Geb agine, garda-narmakar-mesisadgi abe-bomisad, geb bela dulemargi abe bomisbargu, sogded:
HEB 9:20 “We-abe, Bab-Jehová-bemar-ebo-Igar-Mesnaid-e-wilubganad.”
HEB 9:21 Deginbali, Bab-Dummadse-goled-neg-sunna-selegedgi, degi, bela nogmar-Bab-Dummadse-goled-neggi-ebulegedgi abe bomisbalid.
HEB 9:22 A-ukinbali, Moisés-Igar-Maidgi sognaido, ibmar-belasaale ibmar-durgan-abegi swilidik gusiiye. Abe milesulile, dule-isgued geg elileye.
HEB 9:23 Degisoggu, we-ibmarmar-nibneggined-e-wilubganga-gued swilidik-imakegala, ibdula-oburgwed-igar imakergebed. We-ibmar-nibnegginmalad-sunnadgardi, ibmar-dulad-oburgwed-bur-nued abeleged.
HEB 9:24 Ar Cristo, dulemar-argangi-Bab-Dummadse-goled-neg-sobsadse dogsasulid. Dulemar-argangi-neg-sobaleddi unnila nibneggined-e-wilubgan gued. Cristo nibneg-sunnadse-dogsad, anmar-irwa emigindi Bab-Dummad-asabin gwisgudasunnad.
HEB 9:25 Dule-irwa-Bab-Dummadse-gormalad-bur-dummad birga-irba unnila irgwennaa Neg-Ise-Islidikidse ibdula-abe-semai doged. Ar Cristoʼdi irgwenna nibnegse dogsad.
HEB 9:26 Ar Cristo deyob gannar-gannar dogsana, gebe-negasaila-naguded-akar gannar-gannar burgwediindo. Emigindi, unnila irgwenna ibagan-bergunaidgi degisadegu, nonikid. Na e-sunnad e-san-sabsuli uknonikid, adi, e-burgwisadgine isgued osulogegar.
HEB 9:27 Ar dulemarga, unnila irgwenna-burgwed igar maid. Geb a-sorbali, Bab-Dummad ega e-nanasad-igar itogoed.
HEB 9:28 Amba deyob Cristo, dule-bukidar-isgudimalad-e-isgued-eliega, unnila irgwenna na san sabsur-uksagusmogad. Ar Cristo gannar-dakledagogua, dulemar-e-edarbedimalad-abonogega danikoed. Bar isguedga-burgwega nonikosulid.
HEB 10:1 Ar Moisés-Igar-Mesisad ibmar-nuegan-danikoed-sunnadsulid, unnila ibmar-nuegan-danikoed-e-burbagan gued. A-ulale, dule-Bab-Dummadse-warmakmalad ibmar-dula birga-irba-uklegedgi geg inniki-nanaega imaked.
HEB 10:2 Ar ibdula-oburgwileged dulemar-isgued bela eliena, ibmar-dula-ukleged bar uklessulirdo. Ar dule bar-binsassuliled, an-ulubgi isgued naideeye.
HEB 10:3 Emigindi, we-ibmar-oburgwileged birga-irba isgusmaladgi-anmar-insaega imakdisunnad.
HEB 10:4 Ar moli-bebe-nikad-machered-e-abe, degine, sibadmar-e-abe geg isgued elied.
HEB 10:5 A-ulale, Cristo we-napnegse-nonigu, Bab-Dummadga soged: “Bega-ibdula-uklemalad, gwen be abessulid, bega-ibmar-gwag-gullemalad-ukleged gwen be abessurbalid. Emidi, anga be san guakwaa uksad.
HEB 10:6 Bega-ibdula-ogumakar-uklegedi, isgued-eliega ibdula-uklegedi, gwen-nabir-ito be-imaksasulid.
HEB 10:7 A-ulale, an sogdesunnad: ‘Bab-Dummad, be-gardagi angi-narmakar-maiyob an danisun. Bab-Dummad be-sogedba-ibmar-imakega an danikid.’ ”
HEB 10:8 Cristo gebe-iduar Bab-Dummadga sogsagusad: “Ibdula-ukleged, ibmar-gwag-gullemalad-ukleged, ibdula-ogumakar-ukleged, degi, isgued-eliega ibmar-dula-uked gwen be abingabi gussulid. Amar yeer-ito gwen be-imaksasulid.” Salmo 40:6 (Ar weyob Moisés-Igar-Maidba ukoye sogmai-inigwer gwen be abessulid.)
HEB 10:9 A-sorbali, Cristo sogdebalid: “Bab-Dummad, emigi an danikid, be-sogedba be-ibmar-imakbied an bega imakega danikid.” Salmo 40:7-8 Weyob sogsagu, Bab-Dummad-Gebe-Igar-Megisad, ibmar-dula-ega-ukleged osulossunnad. Igar-Binid a-anar mesissunnad.
HEB 10:10 Agi anmar Bab-Dummad-sogedba degisadegu, Jesucristo-na-burgwega san-irgwenna-uksadgi gwage-swilidik gunonisunnad.
HEB 10:11 Ar bela dule-irwa-Bab-Dummadse-gormalad bane-bane e-arbaed-imakdidaed, degi, gannar-gannar ibmar-dula-ukleged ukdidaed, ar degite, geg isgued osuloged.
HEB 10:12 Ar Cristoʼdi unnila irgwenna degisadegu, isgued-ular burgwega na san uksagusad. Ar emigindi, Cristo Bab-Dummad-argan-nuedsik sigidapsunnad.
HEB 10:13 Agine Cristo edarbesisunnad, Bab-Dummad bela e-isdarmalad e-urbali-gudiguega imaked.
HEB 10:14 Ar Cristo unnila na irgwenna burgwega-san-uksadgine, unniguar degisadegu Bab-Dummadgadga-gunonimalad-gwage swilidik imaknonikid.
HEB 10:15 Bab-Dummad-Burba-Isligwaled amba anmarga oyomogad, we napiraye. Ar gebegi Bab-Dummad-Gardagi sognaid:
HEB 10:16 “Bab-Dummad soged: ‘A-ibagan-sorbali, Israel-dulemar-ebo an weyob igar mesoed: E-gwage-ulubgi an-igar an ega nasikoed, e-binsaedgi an-igar an ega narmakoed.’ ”
HEB 10:17 Degine, Bab-Dummad sogbalid: “Ar e-isgumaladi, isgussulidyob an dakoed, bipisaale bar an e-isgusadgi binsaosulid.”
HEB 10:18 Ar isgued bato osulolesale, geg bar isgued-ular ibmar-dula ukleged.
HEB 10:19 Degisoggu, gwenadgan, igar-nued, igar-dula-dule-imaked, Jesucristo Bab-Dummad-neggi-mor-naid anmarga egasye. We sogledo, Jesucristo na e-sangi anmarga igar egasye.
HEB 10:20 Abali, anmar Nega-Nued-Ise-Islidikidse Jesucristo-abeba dobsuli-doge gussunnad.
HEB 10:21 Deginbali, anmar Bab-Dummad-e-neggi dule-irwa-Bab-Dummadse-goled-bur-dummad an nikamarbalid.
HEB 10:22 A-ulale, gwagegi-innikigwadgi Bab-Dummadse an namarsun. Nue-Jesúsʼgi-bensulidgi, galagwensuli-ulubgi-binsaed-bela-elilesadgi, degi, dii-swilidikidgi nue-san-enuklesadgi, Bab-Dummadse an namarsun.
HEB 10:23 Anmar bensulidgi Bab-Dummad anmar-abonogoye-an-sogdimaladgi nue-nanamarsun. Ar ade, anmar-abonogoye-sogsadi, dule-innikigwadid na e-sogsadba ibmar imakedsegad, anmar-yardakosulid.
HEB 10:24 Degisoggu, anmar binsamarsun igi anmar saergebe, adi, na muchub-muchub na gatik sabgumalagar, degi, na ibmar-nuegan imakmarbaligar.
HEB 10:25 Melle dulemar-baigan-damaladyobi, bular danakwaa onmaksuli be gumalo. Bur na be muchub-muchub ogannobukwa be gumar, adi, gatik Bab-Dummadba nanamalagar. Bab-Dummad-ibagan warmakdani be dakarmalar, bur bule be onmakbukwa gumalo.
HEB 10:26 Anmar igar-napiragwad-wisid-sorba yamo isgudele, gannar isgued-eliegala Bab-Dummadga-ibmar-uked bar-nikasulid.
HEB 10:27 Deyob anmar isgusale, unnila sabsur-odurdakleged, degine, Bab-Dummad-e-isdarmalad-soo-gwabunye-siidgi-odurdaklegoedi, an edarbedimarsunnad.
HEB 10:28 Dule-warbo, igi, warbaa sognonikile, we-dule Moisés-Igar-Mesisadgi-annasye, we-dulega burgwed-igar megoed, wiledaklegodeeye soglesulid.
HEB 10:29 Ar dule Bab-Dummad-Machigi annasale, degine, e-abe-igar-nabosad-mesisadgi annasale, degi, a-abe, abe-isganaga-imaksale, degi, Bab-Dummad-Burba-Isligwaled-nabir-dulemargi-binsamaidgi-dodogele, a-dule, bur bule, ¿odurdaklegosur be insae? Bur bule odurdaklegoe.
HEB 10:30 Ar anmar Bab-Dummad-wisid, na e-sunnad sogsagusad: “Ar buged-mai-imakleged angadid, anse berguoed.” Deuteronomio 32:35 Degine, sogbalid: “Bab-Dummad na e-dulamarga igar nabogoed.”
HEB 10:31 Dule Bab-Dummad-Dula-Maid-e-sabsur-odurdaked itogele, we, beedse nunmaked-dummaddo.
HEB 10:32 Idu-ibagan-nasmalad nue be insamalana, deun, a-ibagangine, bemar Bab-Jesús-Igar gwallu-meegwadyob-abingasmalad-sorba, nue-galitonai be gusmalad, degi, bemar naibi-itodimalad-abin gandik gwisgusmalad.
HEB 10:33 Imbagwenale, dulemar-abargi bemargi sabsur-sunmaklesad, degine, emar-wagab bemar sabsur-imaklesmarbalid. Imbagwenale, emar-sabsur-naibi-gunaimaladyalaba bemar gwichigusmarmogad.
HEB 10:34 Deginbali, dulemar-esgaryagi-mellesimalad bemar wiledaksamarbalid, degine, bemar weligwar-itogedgine, bemar-ibe-ibmar-sulearmargu, igi-barsaye be sogsamalad. Ar bemar wisid, nibneggine bur ibmar-nued, ibmar-geg-bergued be nikamalad.
HEB 10:35 Degisoggu, melle Bab-Dummadgi bensuli nanamalo, ar ade, bemar wisid, bemarga bur-ibmar-dummad uklegoed.
HEB 10:36 Bur-gatik alamaknai bemar imakergebed, adi, Bab-Dummad-sogedba be ibmar-imaksad-sorba, Bab-Dummad-ibmar-ukoye-sogsad be abingamalagar.
HEB 10:37 Bab-Dummad E-Gardagi soged: “Ar ade, ichenapid, dule-danikoye-sogsad, danikoed, emiskwaa danikoed.
HEB 10:38 Dule-gwage-swilidikiddi Bab-Dummadgi-bensulidgi gudii guoed. Ar we-dule gannar sorsik-naderdi, gwen weligwar an-imakosulid.”
HEB 10:39 Ar anmardi, anmar-sanburba-yoggumalaga gannar-sorsik-naed-dulesurmalad. Anmardi, Jesucristoʼgi-bensulidba anmar-sanburba abonolemaloed-dulemalad.
HEB 11:1 Emisgindi, nabir. Dule ibmar bensulile, wisid, ibmar-edarbediid na nue-abingaoe. Amba ibmar-daksur-inigwele, na wisid, we-ibmar, napiragwadid.
HEB 11:2 Anmar-dadgan-epennemalad, Bab-Dummadgi-bensuli-gusmaladba Bab-Dummad yeer anmar-dadgan-daksa gusad.
HEB 11:3 Anmar Bab-Dummadgi-bensulidba wismalad, Bab-Dummad na e-gayaburba-sogsadbali bela nibneg, napneg obinnisad. Degisoggu, bela emi-ibmar-magar-daklemaladi, ibmar-akudaklemaladgi danikid.
HEB 11:4 Abel, Bab-Dummadgi-bensulidbali Bab-Dummadga-ibmar-uksadi, bur Caínʼba ibmar-nued uksa gusad. Agala, Bab-Dummad Abel-dule-nuedga daknonisunnad. Bab-Dummad we deyob-oyogegala Abel-ega-ibmar-uksad abingas gusad. Abel bato burgwis-inigwele, Bab-Dummadgi-bensuli-gudiguedgi amba anmar-odurdaknaid.
HEB 11:5 Enoc, Bab-Dummadgi-bensulidba burgwissuli nibnegse seles gusad. E-san gwen amissurgusmalad, ar ade, Bab-Dummad sesa gusad. Bab-Dummad-Gardagi soged, nibnegse-seledoed-idu, Enoc, mag-daklesye, ede, Bab-Dummad-yeer-ito imaksaye.
HEB 11:6 Ar dule Bab-Dummad-benele, geg Bab-Dummad-yeer-ito imaked. Ar dule Bab-Dummadse warmakbiele, nue-bensulirgebed, Bab-Dummad maiye. Degine, Bab-Dummad dulemar-e-amidimalad e-wisguega imakye.
HEB 11:7 Bab-Dummad iduakwaa Noé-owisononigu, Noé ur-dummad sobsa gusad. Noé, Bab-Dummad-bensulidbali, amba yoo ibmar-dake-inigwele, nue-Bab-Dummad-dobee-itogedbali, ur sobsagusad. Adi, e-ome, degine, e-mimmigan abonolemalagar. Noé, Bab-Dummad-bensulidbali, we-napneggi-bukmalad Bab-Dummadse-sabsur-odurdaklegega imaksad. Degi, Noé Bab-Dummadgi-bensulidbali, dule-gwage-swilidikidga gunonisunnad.
HEB 11:8 Abraham Bab-Dummadgi-bensulidba, Bab-Dummad ese-gornonigu, Bab-Dummad-sogedba ibmar imaksad. Abraham yar-ega-uklegoye-sogsadse nade gusad. E-yargi wissulidba nadegusad, ede, bia naoe.
HEB 11:9 Abraham Bab-Dummadgi-bensulidbali, Bab-Dummad-ega-yar-ukoye-sogsadgi, a-napagi dule-baidyob, e-napasuliyob dordoneg-sobaledgi maigusad. Isaac, degi, Jacob a-dordoneggi amba deyob maigusmogad. Bab-Dummad Abrahamʼga sogsagusad, yoedse ibmar-an-bega-ukoye, a-ibmar, Isaac, degine, Jacob, edarbedii gusmarmogad.
HEB 11:10 Ar ade, Abraham neggwebur-nued edarbedii gusad. A-neggwebur-nibneggined neg-nuedid. Bab-Dummad a-neg na obinnisad, degine, na e sobsabalid.
HEB 11:11 Abraham Bab-Dummadgi-bensulidbali, degi, Sara, Bab-Dummadgi-bensurmogadbali, geg mimmi-bake-gudigu, nabir mimmi nikunonikid. Sara seredgusadba mimmi-baked-e-wilubgan obicha-inigwele, mimmi nikunonikid. Ar ade, Sara, Bab-Dummad-ega-sogsad bengussulid, an bega machigwa ukoye.
HEB 11:12 Degisoggu, Abraham, bato seredgus-inigwele, e-anagan niisgwamar-nibnegginedyobi ichesuli, ukubmar-ichesur-demar-gakaba-bukwad-geg-ebislegedyobi, ainiar gusad.
HEB 11:13 Bela-we-dulemar ibmar-ega-uklegoye-soglesad-abingassuli burgwismalad. Ar wemar gwen bengussurmarsoggu, dikasuli-ibmar-daksamaladgi bengussurmalad, bato abingasayobi, egi wergusmalad. Na wismalad, emarde dule-yar-baidginmaladye, unnila we-napneggi sikwas garmakdimarye.
HEB 11:14 Ar weyob-sogsamaladi nue anmarga sognaido, emarde yar-baid amidimarye.
HEB 11:15 Ar na e-yargi-noarmaladgi binsadigusmalana, ar gannar a-yarse nadegusmalanad.
HEB 11:16 Ar emigindi, yar-bur-nued, nibneggined, a-amidii gusmalad. Degisoggu, a-ulale, Bab-Dummad bingesuli na sogsundo, ede a-dulemar-Bab-Dummadye, ar ede, bato na neggwebur guagwar sisad.
HEB 11:17 Abraham wilubdakleargu, Bab-Dummadgi-bensulidbali, Isaac-uksa gusad. Bab-Dummad a-Abrahamʼga sogsagusanad, ibmar-nuegan an bega imakoye, degite, Abraham na e-machi-wargwenna-guedi ogumakar Bab-Dummadga ukesokalinad.
HEB 11:18 Ar Bab-Dummad idu Abrahamʼga sogsa gusad: “Isaac-waganbi be-wagan-sunnadga gumaloed.”
HEB 11:19 Abraham nue-wisid, Bab-Dummad, gandikidbali sunna Isaac-burgwar-maid gannar oduloged. Degisoggu, deyobiyobsundo, Isaac-burgwar-mai, Abraham gannar susad.
HEB 11:20 Isaac Bab-Dummad-bensulidbali Jacobʼga, Esaúʼga sogsagusad yoedse-ibmar-danikoedgi Bab-Dummad nued-begi-binsaoye.
HEB 11:21 Jacob, Bab-Dummadgi-bensulidbali, burgwedanimaigu, José-e-machimar-warbogwadga sogsagusad, Bab-Dummad nued-bemargi-binsaoye. Deunni, e-suar-gaapoled-nonogi-akani Bab-Dummad-nug odummomai gusad.
HEB 11:22 José Bab-Dummadgi-bensulidbali, burgwed-idu sogsagusad, Israel-dulemar Egipto-yargi ainioye. Degi, e-gar-burba sedmaloye igar-uksa gusad.
HEB 11:23 Moisés gwalulesgu, Moisés-e-sergan Bab-Dummadgi-bensulidbali, rey, machimala-oburgoye-igar-mesisadgi, dobgussuli nii-walapaa Moisés-odukudii gusmalad. Ar e-sergan, goe-nuedi na daksamalad.
HEB 11:24 Moisés Bab-Dummadgi-bensulidbali na sapingusgua, Faraón-e-sisgwa-machiye yapa bilegusad.
HEB 11:25 Moisés sikwas isgued-igargi yeer-itodiguedba bur Bab-Dummad-mimmiganba sabsur-wilegedi, na abesad.
HEB 11:26 Moisés sogsagusad, Egiptoʼginmalad bela-bela-ibmar-nuegan-nikadba bur Cristoʼga-wilegedi bur ibmar-nuedye. Ar ade, Bab-Dummad-ega-ibmar-ukoedgi bur ataknai gusad.
HEB 11:27 Moisés Bab-Dummadgi-bensulidbali, rey-urwoed-gwen-dobgussuli, Egipto-yar-mete gusad. Ar ade, Bab-Dummad-akudaklegedgi unnila akanai gusad.
HEB 11:28 Moisés Bab-Dummadgi-bensulidbali, Oburgwilegoenad-Iba onosad. Degi, sibad-wawaad-e-abe yawagakgi magsagusbalid. Adi, melle baliwitur, Israel-machimala-gebesailagined oburgwegar.
HEB 11:29 Israel-dulemar Bab-Dummadgi-bensulidbali neg-dinnagwadgi-nadapiyobi Demar-Ginnidye-nugadgi obaksa gusad. Deunni, Egipto-dulemar deyob obakesokarmarmoganad, degi-inigwele, emardi bela gundoles gusmalad.
HEB 11:30 Israel-dulemar Bab-Dummadgi-bensulidbali Jericó-neggwebur-e-galu-dummad-maid ibaguglegus-ebirmaladgine (7), ayarid gusad.
HEB 11:31 Gambanuchusaed-Rahab, Bab-Dummadgi-bensulidbali, dulemar-uayasuli-gusmaladbali gwen burgwissur gusad. Ar ade, Israel-dulemar-arbak-neg-argamalad nuedgi abindaksa gusad.
HEB 11:32 Degite, ¿igi-gwena an bemarga barsogosunna? Ar baigangi an bemarga sunmakye-sogele, an bemarga obelossuliled, Gedeónʼgi-sunmaked, Baracʼgi, Sansónʼgi, Jeftéʼgi, Davidʼgi, Samuelʼgi, degi, Bab-Dummad-gayaburba-barsogmaladgi-sunmaked obelossuliled.
HEB 11:33 A-dulemar, Bab-Dummadgi-bensulidbali neggweburmar-dummagan susagusmalad, igar-nued imaksamalad, Bab-Dummad-ega-ibmar-ukoye-sogsad abingasmalad, achumigur-nono-wawaad-e-gaya edismalad,
HEB 11:34 soo-gwabunye-gwichid ogichamalad, mer es-suidgi-e-oburgwemalaga wakichamalad, na nollo-guedgine gangued nikusmalad, bila-ononaidgi dutusuli na itosmalad, sordamar-neggwebur-baidginmaladgi nakwismalad.
HEB 11:35 Agine, omegan, ei-burgwismalad gannar ega odulolesmalad. Baigan, sabsur-odurdaklegar-oburgwismaladdi, dule-e-onosokalid gwen e-onogega imaksasurmalad, ar wisid, burgogua, gannar durguoed, burba-nued bur amioed.
HEB 11:36 Baigandi, egi sabsur-dodolesmalad, bibyolesmalad, esgoro-dubgi edillesmalad, degi, esgaryagi mellesmalad.
HEB 11:37 Akwagi-maklear burgwismalad, esnaligi negabar-sikar burgwismalad, wilubdaklesmalad, es-suidgi earwilesmalad, neg-baid-baidse gaamakdii gusmalad, sibad-wawaad-e-absar, degi, sibad-e-ukabi-yoi gudii gusmalad, wiledii gusmalad, dummad-odurdakledii, sabsur-imakledii gusmalad.
HEB 11:38 Wemar dule-nuegansoggu, we-napneggi-dulemar-bukwadba gudii guewilubsulinad. We-dulemar-nuegan nega-dulesulidganba gudii gusmalad, yalaganba, akwa-olloganayaba, napa-olloganayaba, gudii gusmalad.
HEB 11:39 Bela-wemar Bab-Dummadgi-bensulidbali Bab-Dummad ega sogsagusad, bemar dule-nuegan gumarye. Degi-inigwele, ibmar-ega-uklegoye-soglesadi, gwen abingassur gusmalad.
HEB 11:40 Ar ade, Bab-Dummad anmarga bur-igar-nued amisad. Adi, amar anmarba-akaniki Bab-Dummad-e-abegedyob bela anmarga ibmar guegar.
HEB 12:1 Degisoggu, Bab-Dummadgi-bengussurmalad bukidar-anmar-ebilis anmar-dakbukmarsoggu, ibmar-isgana-bela-anmar-ganikidi mimarsun, isgued-anmar-ganikid indakmarsun. Anmar-abarmakoedgine nue-ise-itoagwar abarmakmalo.
HEB 12:2 Anmar Jesúsʼginbi-ataknai gumarsun, ar Bab-Dummadgi-bensuligued agi danikid. Degi, anmar-Bab-Dummadgi-bensulid nasgumai napiragwadse imaked. Jesús nakrusgi-wilenaigu, egi dodolenaigu, bingegued-dummadgi bai-itossulid. Ar ade, wisid, we-degi-odurdaklenaid-sorbali, weligwaled danikoe. Emigindi, Jesús, Bab-Dummad-ologana-argan-nuedsik sigidapsunnad.
HEB 12:3 Degisoggu, Jesús dule-isgumaladse-wiledigusad be nue ebinsamalo. Degisoggu, bemar alamaknai imakmarsun, mer galakumarsun.
HEB 12:4 Ar bemar isgued-abin-gwisguedgi amba yoo burgwednaga isgued-abin be gumalad.
HEB 12:5 Ar bemarde bato iesmarde, Bab-Dummad na e-mimmi-bemar-dakedba bemar-unaed. E-Gardagi bemarga soged: “Machi, Bab-Dummad sabsur-be-odurdakalile, melle isdar be itogo. Bab-Dummad sabsur bega ibmar sokalir, mer be wile-itogo.
HEB 12:6 Ar ade, Bab-Dummad na dule-sabedi, a-dule-odurdakdaed, degi, bela na e-mimmiga-imaksad odurdakega wis bibyodaed.”
HEB 12:7 Ar be nuedgi-sabsur-odurdaklealir, san bargamalo. Ar Bab-Dummadi na-e-mimmiyobi nued-nanaega nuedgi-sabsur-be-odurdakbied. Ar ade, ¿doa na-e-mimmi-odurdaksuli gue be insae? Babgan bela na-e-mimmigan-odurdakedbidaed.
HEB 12:8 Ar Bab-Dummad bela nuedgi anmar-sabsur-odurdaksadbiid, degisoggu, ar nuedgi-sabsur-be-odurdaklesulile, be Bab-Dummad-mimmisurdo, be negsichigineddo.
HEB 12:9 Degi, anmar-babgan-we-napnegginmalad nuedgi-anmar-sabsur-odurdakedba, anmar egi nue-binsaed-nikaa gusmalad. Degisoggu, bur bule Bab-Dummad-Burbaledba anmar uaya-nikaa daewilubmardo, adi, anmar dula-gudii guegar.
HEB 12:10 Anmar-babgan-we-napneggined unnila na edakedba anmar-sabsur-odurdakdii gusad. Bab-Dummad-anmar-odurdakeddi, anmarga bur-nuedid, adi, anmar eba burba-swilidikid nikumogagar.
HEB 12:11 Ar nue-napiragwad, be-odurdaklenaile, we yeer-itoledasulid, wile-itoledaed. Geb a-sorbardi, we-dulemar-agi-nue-odurdaklesmaladga ulubgi-bogidik-itogedga, igar-innikigwadga, gunonidaed.
HEB 12:12 Degisoggu, gatik-Bab-Jesús-igarba-nanamalaga, na be dukin ogannomar. Ar igi dulemar na argan-yegus-gudimalad na e-argan-ogannodamala, deyob be imakmar. Degi, mer be budar Bab-Jesús-igargi-itomalaga na be gwage ogannomarbar. Ar igi dulemar na yokor-nollo-guddamalad na e-yokor-ogannodamala, deyob be imakmar.
HEB 12:13 Degine, bemar inniki-nanaegala igar-inniki be mesmala. Adi, melle dule-muya-muya-nanamalad-e-mali bisgegar, adi, bur nuguegar.
HEB 12:14 Dulemar-baiganbo bela bogidik-nanaed be imakmar, degine, gwage-swilidik-nanadii be imakmarbar. Ar dule gwage-swilidiksulile, gege Bab-Dummad-daked.
HEB 12:15 Degisoggu, nue-salakarmar, melle dule-wargwen Bab-Dummad-dule-abonomaidgi bangued be imakmalo. Degine, nue-salakarmarbar, melle bemar-abargi dule-boni-onoged be imakmalo. Ar degiile, dulemar-baigan-oichodmogo-itole.
HEB 12:16 Degine, nue-salakarmarbar, melle bemar negsichigi-yoledii gumalo, degine, melle ibmar-isgana Esaú-imaksayobi imakdii gumalo. Ar a-dule, na machi-dummadsoggu, e-ibmar-gaoed unnila mas-bate-gwagwenbina e-urbaga uksa gusad.
HEB 12:17 Bemar wismalad, a-sorba Esaú e-bab-ega Bab-Dummad nued-begi-binsaena gadinye-sogedbina sognaigusanad. Gwen ega gussulid. Geg oakalogusad, ar a-bina ise-boar gunai gusanad.
HEB 12:18 Ar bemar Israel-dulemaryobi yar-sunna-ebulegedse warmaksasurmalad. A-yargi soo gasigusad, negsichid naigusad, neg sakdigar naigusad, degi, dii-burwa-dummad gormai gusad.
HEB 12:19 Degine, Israel-dorgan gar-trompeta-goled agi itosmalad, degine, Bab-Dummad-e-gayaburba itosgusmarbalid. Dulemar-a-gayaburba-itosmalad sogdegusmalad mer anmarga bar sunmakye.
HEB 12:20 Ar ade, ibmar-ega-sognaid geg itomalad. Weyob ega sognaid: “Ar ibmar-dulase-bakale, we-yar ebusale, akwagi-makar oburgwilegodibe, sigugi-makar oburgwilegodibe.”
HEB 12:21 Moisés ibmar-dakgwichid geg-dakedbali sogdegusad: “An nue-dobe itoged, nue-wawanmak an itobalid.”
HEB 12:22 Ar bemardi, Sión-yalase Bab-Dummad-Dula-Maid-e-neggweburse, Nibneggined-Jerusalén-neggweburse warmaknonikid. Baliwitur-ichesur miliba-mergumalad-abalagi be ase warmaknonimalad.
HEB 12:23 Bab-Dummad-mimmigan-gebemalad bato e-nug-nibneggi-narmakarmaladse be nonimalad. Bab-Dummad-bela-dulemarga-igar-itogedse be nonimalad, degine, dulemar-nuegan-e-burba-inniki-imaklesmaladse be nonimalad.
HEB 12:24 Jesús, Igar-Bini-Megisad-irwa-gwisguedse be nonimalad. We-Igar-Binid, Jesús-abe-aryosadba megnonikid. Ar Jesús-abe-aryosad, Abel-abe-aryosadba bur-nued anmarga sunmaknaid.
HEB 12:25 Nue salakarmar, Bab-Dummad-bega-sunmaknaid mer baisur be itomalo. Ar anmar-dadgan we-napneggi ega sunmaklenaigusgu, itossurmaladba nue-odurdaklesmalad. Anmar-bursunna, Bab-Dummad-nibneggi-anmarga-sunmaknaid anmar eba dasurmalale, anmar bur bule odurdaklemalodo.
HEB 12:26 Bab-Dummad sunmaksagusgu, we-napneg ogiglimaksa gusad. Emigindi, na sogsasunnad: “Napi-ilagwen an neg-ogiglimakbaloed, unnila we-napnegbi an ogiglimakosulid, nibnegse-bakar, an ogiglimakoed.”
HEB 12:27 We-degisogedi: “Napi-ilagwenye.” We obardo, sunna-ibmar-ainirmaladdi, ibmar-obinnilesmaladdi, onirleye, adi, ibmar-geg-ainirmaladdi degisadegu nai guegar.
HEB 12:28 Degisoggu, Bab-Dummad anmarga negdakmaid-geg-bergued-uknaisoggu, dog-nuedye anmar Bab-Dummadga sogmarsun. Agi, Bab-Dummadga anmar arbamarsun, nue-dobedgi, degi, nue-egi-binsaed-nikadaedgi, arbamarsun.
HEB 12:29 Ar ade, “anmar-Bab-Dummad sooyobi bela ibmar osuloged.”
HEB 13:1 Na be Cristoʼgi gwenadganga gunonikidgi na be muchub-muchub sabgudii nanamalo.
HEB 13:2 Melle be iemalo, dulemar-ainebarmalad bese atakdanikile, melle ogabsuli be gumalo. Ar degidaedbali, bukidar na-wissulidba baliwitur-ogabidmalad.
HEB 13:3 Melle dule-esgaryagi-mellesimalad be iemalo. Esgaryagi eba mellesiidyob na be itomogo. Degine, dule-sabsur-odurdakledimalad be insamarbalo, bemar-sunnad na be sabsur-odurdaklenaiyob na be itomarmogo.
HEB 13:4 Bela ome-nikued-igargi binsaed-nikaa nanamalo, degine, na abirgunagwar-nanaleged-igargi nue-nanadii imakmalo. Ar dulemar-neg-sichigi-yoledimaladi, abirgin-nika-dikarba-yolemaladi, Bab-Dummadse sabsur-odurdaklegoed.
HEB 13:5 Mer dogdar manibina be sogmar, na emi be ibmar-nikadgi yeer-itodii be gumar. Ar Bab-Dummad sogsad: “An be-iegosurye, an be-metosurye.”
HEB 13:6 Degisoggu, sunna Bab-Dummadgi-bensulidgi an sogmarsunnad: “Bab-Dummad an-bendakedid, degisoggu, an ibmar dobsulid, ar dule akar an-imakosulid.”
HEB 13:7 Bab-Dummad-Igargi-bemar-idudimalad, bemarga-Bab-Dummad-gayaburbagi-sunmaksamalad be ebinsamalo. Nue be ebinsamalo, e-nanasad igi bemarga oyosmala. Amar-Bab-Jesúsʼgi-bensuli-nanasmaladyob be nanamarmosundo.
HEB 13:8 Jesucristo sae-gudigusadyob gudiid, emi-ibagi amba deyob gudibalid. Degisadegu gudii gubaloed, gwen gwagmaisulid.
HEB 13:9 Melle akar-akar igar-yogasaar-odurdaklemaladse be binsaed galemalo. Ar ibnuedid, Bab-Jesús-anmargi-nued-binsaedgi anmar-gwage ogannoleged. Masgulleged-igar-mamaidba-nanaedgi anmar-gwage ogannolesulid. Ar dule-mas-gundimalad-igarba-damalad gwen Bab-Jesús-igargi gannaledisurmalad.
HEB 13:10 Anmar Bab-Dummadga-ibmar-ukleged-aila nikad. Agine, Babse-goled-neg-sunna-selegedgi-arbamaladga, ibmar-uklemalad-e-san-gunned ega igar maisulid.
HEB 13:11 Dule-irwa-Bab-Dummadse-gormalad-bur-dummad unnila ibmar-durgan-abebi, Nega-Ise-Islidikidse isgumalad-ular sesdaed. Ar ibmar-durgan-e-sandi neggwebur-dikarba ogumakledaed.
HEB 13:12 Ar Jesús, e-abegine dulemar-gwage-swilidik-imakegala, neggwebur-dikarba amba burgwismogad.
HEB 13:13 Degisoggu, Jesúsʼse neg-magaba anmar nonamarsun. E-wiledigusad, e-naibi-itosad, egi dodolesad, ayob anmar eba gunamarmosun.
HEB 13:14 Ar ade, anmar we-napneggi neggwebur-sadeguad nikasulid. Anmar yoo neggwebur-sadeguad-danikoed edarbedimalad.
HEB 13:15 Degisoggu, anmar Bab-Dummadga ibmar-ogumakar-uklegeyobi, Jesucristo-nuggi Bab-Dummad-nug degisadegu odummodii gusun. Ar anmar Bab-Jesúsʼba-naisoggu, Bab-Dummad-nug-odummodii gumarsun.
HEB 13:16 Melle ibmar-nued-saed be iemalo. Na be muchub-muchub bendakmalo. Ar ade, weyob ibmar-imaklegedi, Bab-Dummad-yeer-ito imaked, ega ibmar-ogumakar-uklegeyobi itodaed.
HEB 13:17 Be-idumalad-Bab-Jesús-igargi-bega-sunmakmaladba be uaya-nikaa damar, a-sogedba be nanamar. Ar wemala bali-bali be-san-burbagi nakuledimalad. Ar ade, igi be-akwismala, agi Bab-Dummadga sunmakgwichi gumaloed. Degisoggu, mer bukib-itogwichi gumalaga, e-arbaed weligwar-imaked be imakmalo. Ar bemar dummagan-bukib-ito-imakele, bemarga ibnuedga guosurmalad.
HEB 13:18 Anmarga Bab-Dummadse gormalo. Ar anmar wisid, anmar ulubgi gwen akar-binsaed an niksurmalad, bela nueganbi nanadii an gubimalad.
HEB 13:19 Bur bule an bemarga sogmar, gatik anmarga Bab-Dummadse gormalo, adi, emisgwasaar an bemar-abargi gudii gumalagar.
HEB 13:20 Bab-Dummad, ulubgi-bogidik-itogega anmar-imakedid. Degine, anmar-Dummad-Jesucristo-burgwar-mai odulosadid. We-Jesucristoʼde, sibad-wawaad-edarbed-nued-dummadid. Na e-abegi anmarbo degisadegu igar-mesisad.
HEB 13:21 A-Bab-Dummad bela ibmar-nuegan-imakega bemar-imaksun. Adi, bemar Bab-Dummad-sogedba nanamalagar. Bab-Dummad bemar-gwage-swilidik Jesucristoʼba bemar-imaksun. ¡Jesucristo-nug odummolemai degisadegu gusun! Ar deyobdo.
HEB 13:22 Gwenadgan, nue-ise-wilesakwaa an bemarse egismalad, bemar-ogannomalagala we-ibmar-an-bemarga-sogsamaladi, nabir-be-itosmarsun. Ar wis garda giakwasaale an bemarga narmaksamalad.
HEB 13:23 An be-owisomalad, anmar-gwenad-Timoteo-esgaryagi-mellesiid bato nosad. Anse emiskwaa nonikile, a-anbo anmar bese ataknadapmaloed.
HEB 13:24 Bela Bab-Jesús-Igargi-bemar-idudimaladga, degine, bela Jesucristoʼgi-akananaimaladga be sogo, anmar be-obarmarye. Gwenadgan-Italia-dorgan bemar-obarsimarmogad.
HEB 13:25 Bab-Dummad nued-bemargi-binsasun. Be itomargua.
JAM 1:1 Ani Santiago, Bab-Dummad-e-mai, degi, Bab-Jesucristo-e-maibar. Israel-dulemar-sogambe-gakabo (12) we-napneggi-aisakis-bukwadga nued-sogeye sogsiid.
JAM 1:2 An-gwenadgan, bemar igar-bulegangi akar-akar-wilubdaklealile, bemar yeer-itogewilubmalad.
JAM 1:3 Bemar wismalad, be-Bab-Jesúsʼgi-bensulid-wilubdakleged, bemarga ukurmakar-ibmar-imaksulid uked.
JAM 1:4 We-ukurmakar-ibmar-imaksulid, ibmar-imaklenaid weligwaledgi obelogergebed, adi, bemar dule-innikigwadga guega, dulemar mer be-nug-oichogega, degi, bela bemar unniguar ibmar nikuegar.
JAM 1:5 Ar bemar gwenna-gwenna amba binsaed-nikagued sulile, Bab-Dummadse be egismar, ar Bab-Dummad bega ukoed. Bab-Dummad dule-gwen-obansuli bela dulemarga binsaed-nikagued ise-obinagwar uked.
JAM 1:6 Ar be bensulidgi Bab-Dummadse binsaed-nikagued egisergebed. Ar dule-bened-nikad, demar-mulluganyob gued. Demar-mullugandi unnila burwa-goledba seleddaed.
JAM 1:7 Ar dule deyob-daedi mer binsao, Bab-Dummad ega ibmar ukodeeye.
JAM 1:8 Ar a-dule, e-binsaed innikisulid, emi ibmar-soggwengi-binsaed, banegi bato ibmar-baidgi binsabalid. Geg innikii nanaed, e-daed gwage-gwage daed.
JAM 1:9 Gwenad-wis-wilesakwaa-gudiid Bab-Dummad-asabin-nug-dummarba-nikadba weligwar itogewilubbid.
JAM 1:10 Gwenad-mani-ibeddi, Bab-Dummadse nug-bipi-imaklenonikile, weligwar itogewilubmogad. Ar dule-mani-ibed dutuyob baisursunna bergudoed.
JAM 1:11 Ar dad-ibeler nakwialile, na e-dutusur-gaedba, dutu-e-gagan odingudaed. E-dutu argwatoed, e-yeerdakleged bergudoed. Debayobi dule-mani-ibed na e-ibmar-nikadi e-ibe bergudmogoed.
JAM 1:12 Dule isguedgi-wilubdaklenaidgi sikirmaksulile, Bab-Dummad we-dulegi nued binsaed. Ar wilubdaklenaidgi obichale, Bab-Dummad na e-sabmaladga dula-gudigued-ologurgin-ukoye-sogsad ega ukoed.
JAM 1:13 Ar dule-wargwen isguedgi wilubdaklear-sogele, mer sogo: “Bab-Dummad isguedgi an-wilubdaknaiye.” Ar Bab-Dummad isguedse geg wilubdakleged, deginbali, Bab-Dummad isguedgi dulemar-wilubdaksurbalid.
JAM 1:14 Ar anmar isguedgi wilubdaklealir, anmar-ibmar-isgana-imakbied, degi, galagwensuli-binsaed, isguega anmar-imaked.
JAM 1:15 We-ibmar-isgana-imakbiedgi isgued noardaed. We-isgued-imaklesad-sorba, burgwed nonisunnoed.
JAM 1:16 Gwenadgan-sabesailamalad, mer be yardaklemala.
JAM 1:17 Bela ibmar-nuegan, degi, ibmar-innikimalad, Bab-Dummadgi nibneggi danikid. Bab-Dummad-nibneggi-gwallumar-obinnisadgi danikid. We-Bab-Dummad niisgwamar-gwagdedaeyob gwagsulid, degi, burbamaryob bergusulid. Degisadegu maid.
JAM 1:18 Bab-Dummad na e-binsaedba, E-Gayaburba-Nued-napiragwad-sogedba anmarga burba-dulad uksad, adi, e-ibmar-obinnisad-abargi anmar-inse e-mimmiganga guegar.
JAM 1:19 Gwenadgan-sabesailamalad, we-ibmar an bega sogsokalid nue itomalo: Bemar ibmar-sogleged-itogega bela guakwaa gudii gumalargebed. Be-sunmakeddi, be-urweddi, na be bargamalargebed.
JAM 1:20 Ar dule-urwedi Bab-Dummad-asabin igar-innikigwad imaksulid.
JAM 1:21 A-ulale, bela igar-isgana-imaked, degi, ibmar-isgana bukidar-nikadi be mimarsun. Adi, Bab-Dummad-Gayaburba-be-gwagegi-diglesad be san-bipi-itogedgi abingamalagar. Ar we-Gayaburba be-san-burba-abonogega gangued nikad.
JAM 1:22 Bab-Dummad-Gayaburba-itogedginbi mer be yeer-itomar, bur eba be ibmar-imakmar. Ar degisulile, na be dukin yardakdimardo.
JAM 1:23 Ar dule unnila Bab-Dummad-Gayaburbabi-itogele, eba dasulile, dule-wargwen na isbegi wagar-dakeyob gued.
JAM 1:24 Geb na isbegi wagar-daksad-sorbali, nadele, na yog-iear naddaed ede igi-daklege.
JAM 1:25 Ar dule-wargwen ibmar-itosad iesulirdi, aka bur igar-innikigwad-dule-ollor-imakedgi nue atakele, degi, egi alamaknaile, Bab-Dummad egi nued binsaoed.
JAM 1:26 Ar dule-wargwen Bab-Dummad-igarba nue-nanadiiye binsaele, degi-inigwele, na wissur gwabin bargaele, na dukin yardakdiid. Bab-igar-wisye-sogdiid, binsa gordido.
JAM 1:27 Ar anmar-Bab-Dummad-asabin e-igar-nuedba-swilidik-nanaedi, wedo: Dule-sergan-sated bendaked, mukwamar-sui-ei-burgwismalad-wile-itodimalad bendaked, degi, san-swilidik-gudiguega we-napneggi-ibmar-isganagi bangued.
JAM 2:1 Gwenadgan, bemar anmar-Dummad-Jesucristoʼgi-bensuligued nikusmalad, degisoggu, bela dulemar emarbi be dakmalo.
JAM 2:2 Binsa-sogmalo, bemar Bab-Dummadse-gorbukwadgi dule-wargwen bemar-abargi olargan-yoi, degi, mola-nued-yoi dognonikid. Aginmoga, dule-wileged, mor-wilesakwaa-yoi bemarse dognonimogad.
JAM 2:3 Ar bemar dule-mor-nued-yoid, nued be abindakmalale, degi, ega be sogmardibe: “Wese, gana-nuedse be sigdage.” Ar dule-wilegedgardi be sogmardibe: “Bedi weba be gwisgue,” igidibe: “Wegi napagi an-nag-naba be sige.”
JAM 2:4 Ar deyob be damalale, bato be dulemar emarbi daksurmalad. Bemar, dule-igar-nabomalad-isganayob gumaloed. Ar amardi, dulegi-isdar-binsaedba ega igar-noar nabodamalad.
JAM 2:5 Gwenadgan-sabesailamalad, nue an-itomar: Ar Bab-Dummad we-napneggi dule-wilegana susad, adi, Bab-Jesúsʼgi-bensuligued bur bule nikumalaga, degi, Bab-Dummad na e-sabmaladga na-e-negdakmaid-ukoye-sogsadi ega ukegarba.
JAM 2:6 Ar bemardi dule-wilegana ibgwensur imakdimalad. ¿Ar mani-ibmala bemar-wiodimarsursi? Ar wemar, ¿igar-itomalad-dummaganse bemar-ebipidimarsursi?
JAM 2:7 ¿Ar mani-ibmala bemar-Bab-Jesús-nug-nuedgi isdar sunmakdimarsursi?
JAM 2:8 Bemar igar-dummad-sunsoged-maidba nanaele, igar-nued be imakdimardo, ar igi Bab-Dummad-Gardagi sognaiyob: “Ar igi na be san-sabgue, deyobi dule-baid be sabgumogoed.”
JAM 2:9 Ar bemar emarbi dule-daksulirdi, bato bemar isgusad, bemar dummad-nosdo, ar Bab-Dummad-Igar-Maidba be ibsassurmalad.
JAM 2:10 Ar dule-wargwen belagwapa Moisés-Igar-Mesisadba nanadiile, unnila igar-soggwengi annanonikile, a-dule, bato belagwapa igar-mamaidgi annasdo.
JAM 2:11 Ar Bab-Dummad-sunnad sogsad: “Melle be be-abirginsulid-ebo galagwensuli nanao.” Éxodo 20:14 Degine, sogsabalid: “Mer be dule-oburgo.” Éxodo 20:13 Degisoggu, dule-negsichigi-yoledisulid, ar dule-baid-oburgwisardi, bato igar-maidgi yolesdo.
JAM 2:12 Degisoggu, bemar nuekwaa sunmakewilubbid, degi, nuekwaa nanae-wilubbalid, ar ibagwengi Bab-Dummad igar-anmar-ollor-imakedba bemarga igar-itogoed.
JAM 2:13 Ar dulemar dule-bamalad-wiledaksasurmalad, Bab-Dummad ega igar-naboalile, Bab-Dummad wile dakosurmogad. Ar wiledakleged-igar, igar-nabolegedgi obindaed.
JAM 2:14 Gwenadgan, ar dule-wargwen na sogdibe, an Jesúsʼgi-bensulid nikye, degite, e-ibmar-imakedgi oyosulir, ¿ibuga ega e-bensulid gue? ¿Ar igi e-bensulid e-bendakosunna? Suli, e-bendakosulid.
JAM 2:15 Binsa-sogmalo, gwenad-machered-wargwen, igi gwenad-bundor-wargwendibe, mor-yoed sate gudiid, degi, masgunned sate gudibalid,
JAM 2:16 geb bemar unnila gayagi ega soged: “Gwenad, nuedgi be nae, be mor yoo, degi, immerbaa be mas gunno.” Ar we-ibmarmardi ega be uksulile, unnila gayaginbi-sogedgi ¿we-dule be bendakosi? Suli, be bendakosuli.
JAM 2:17 Ar deyobi Jesúsʼgi-bensulid gumogad. Ar anmar sogdibe, an Jesúsʼgi-bensurye, degite, ibmar-imakedba be oyosulile, be binsa gordido, be-bensulid burgwaleyob gudo.
JAM 2:18 Degi-inigwele, sunna dule-wargwen sogdagoed: “Be Jesúsʼgi-bensurye sogdiid, andi ibmar-nued imakdiid.” Be anga be-Jesúsʼgi-bensulid ibmar-imaksuli oyodo, andi, an-ibmar-imakdiidgi an-Jesúsʼgi-bensulidi bega oyogoed.
JAM 2:19 Unnila-Bab-Dummadbi-wargwenna-maid be bensulid. Deyob be binsaedi, nueddo. Ar niamarse-bakale, bensurmogad, degi, Bab-Dummad-asabin dobedba wawanmakbukwad.
JAM 2:20 Mer be nono-sered gue, ¿ar amba be nue-aku itoge? Ar Jesúsʼgi-bensulidi ibmar-imakedgi be oyosulile, ar be binsa gordido, an Jesúsʼgi bensurye.
JAM 2:21 Abraham Babgi-bensulidba na e-machi-Isaac Bab-Dummad-ailagi ogumakar uksokalinad. Deyob-imaksadbali, Bab-Dummad, anmar-dad-Abraham-isgussuliyob daksad.
JAM 2:22 ¿Emide, mag be itononisunna? Abraham na e-Bab-Dummadgi-bensulidi e-ibmar-imakedba-mesa nue-oyosad. E-Bab-Dummadgi-bensulidi e-ibmar-imaksadba innikii gunonikid.
JAM 2:23 Deyobi, Bab-Dummad-Garda-narmakar-maidba gunonikid: “Abraham Bab-Dummadgi bengussulid. A-ulale, Bab-Dummad Abraham-isgussuliyob daknonikid.” Génesis 15:6 Abraham Bab-Dummad-e-aiye bilenonisunnad.
JAM 2:24 Emide, be dakena, Bab-Dummad unnila Jesúsʼgi-bensulidginbi isgussuliyob dule-daksulid, dule-ibmar-imakedba isgussuliyob dule-dakbalid.
JAM 2:25 Deyobi Rahab, ome-gambanuchu-imaked, na e-ibmar-imaksadba Bab-Dummad Rahab-isgussuliyob daknonigusmogad. Deun, Rahab na e-neggi dulemar-neg-argadimalad ogabisgusad, degi, igar-baidba wakinnega imaksagusad.
JAM 2:26 Ar igi anmar-san, burbasulile, burgwar-gue, debayobi, Jesúsʼgi-bensulid ibmar-imaksulir burgwarmogad.
JAM 3:1 Gwenadgan, mer bemar odurdaked-sailaga yamo bukidar san-imakmalo, ar bemar wismalad, Bab-Dummad dule-bamaladba bur bule odurdaked-sailamarse gannabasaar ibmar egisoed.
JAM 3:2 Anmar belagwapa noedbimalad. Ar dule-wargwen na e-sunmakedgi nodisulile, a-duledi, dule-innikigwaddo. Deginbali, sunna na bela e-daed bargabalid.
JAM 3:3 Moli anmarba-ibsaega, anmar e-gayagi e-bargaed-yosale, bela anmar-sogedba sunna anmar moli semalad.
JAM 3:4 Be ur-dummagan dakmarbalina. Urmar dummagandibe, burwa-binnasur-goledba-selemaidibe, degite, dule-ursorgaed bia ur-seedbie, abali, ursorgaed-bipi-guedi, ur-sesdaed.
JAM 3:5 Amba deyobi, anmar-sangi gwabin bur-ibmar-baiganba bipii gumogad. Degi-inigwele, gwabin sunna ibmar-dummagan-imakye soged. Be dakena, soo-bipi-gaed sunna bela nainu-dummad ogumaked.
JAM 3:6 Gwabin sooyobi gued. Neg-gagaega bela-bela gangued nikad. Anmar-sangi-gwabin-naidi, bela anmar-san-oichoged, degi, sunna nianeggi be-ogumakega imaked.
JAM 3:7 Dule bela ibdurgan-ursirmalad, nuugimalad, naibegimalad, degi, ibdula-demargi-bukmalad, be sunna urwesuli imaked.
JAM 3:8 Degi-inigwele, gwabindi dule geg-bargaed. Gwabin, ib-isgana-geg-bargalegedid, dule-gindaked-inabi sediid.
JAM 3:9 Anmar, gwabingi anmar-baba-Bab-Dummad-e-nug odummomalad. Amba a-gwabingine anmar dulemar-ukabsabalid. We-dulemar Bab-Dummadyobi obinnilesad.
JAM 3:10 Gwabingi dulegi-nued-binsaleged sogleged, degi, dule-ukabsaleged soglebalid. Gwenadgan, we deyob guewilubsulinad.
JAM 3:11 ¿Ar sunna dii-gammu-wargwengi dii-nued dii-gagbiredba-mesa aryodasi? Suli, degisuli.
JAM 3:12 Gwenadgan, ¿ar sunna higuera-sapigi, olivo-san sanmako be insae? Igidibe, ¿sunna uva-dubgi higuera-san sanmako be insae? Suli, degisuli. Ar deyobmodo, dii-gammu-wargwengi dii-gagbired-aryomaidba-mesa geg dii-nued aryoed.
JAM 3:13 Ar bemar-abargi, ¿doa dule-binsaed-ibed gue? ¿Doa bela ibmar nue mag itoge? A-dule, na e-nued-daedgi oyodo. Na binsaed-nikaguedba na san-bipi-imakedgi ibmar-imakedba oyodo.
JAM 3:14 Ar bemar nobgued-dummad nikale, degi, gwagegi na muchub-muchub-urwed naibalile, mer be na san-dummarbaa itomardo. Ar bemar igar-napiragwadgi yoledimalad.
JAM 3:15 Ar weyob daedi, binsaed-nikaguedsulid, Bab-Dummadgi danisulid. Ar wegiid-binsaedi, napnegginedid, dulegi danikidid, degi, niagi danibalid.
JAM 3:16 Ar bemar-abargi nobed-nikale, degi, urwed-nikabalile, agi neg-isgued nikad, degi, bela ibmar-isgana-imaked nikabalid.
JAM 3:17 Ar binsaed-nikagued-Bab-Dummadgi-danikiddi, gebedgine, swilidikidid, deginbali, bogidikidbalid, dulemargi-nued-daedid, duleba-ibsaedid, emar-wiledakedid, ibmar-nueganbi imakedid, emarbi dulemar-dakedid, degi, innikigwadbi ibmar-sogbalidid.
JAM 3:18 Dulemar-ulubgi-bogidikdaed-amidimaladga, Bab-Dummad gwage-bogidikid, degi, igar-innikigwad-imaked ega ukoed.
JAM 4:1 ¿Wede, bia urweleged danisunna, degi, wede, bia bemar na abin-abin-imakmalad danibarsunna? Ar bemargi ibmar-isgana-imakbied-naidgi danikid. Ar amar be-ulubgi abin-abin imaknanaid.
JAM 4:2 Bemar ibmarbina sogenad, degite, a-ibmar geg be nikumalad. Na be gindakmalad, na be ibmarbina nobgudimalad. Bemar ibmar-abegedi geg nikumalad. Na be urwedimalad, na be abin-abin imakdimalad. Bemar ibmar satemalad, ar ade, be egissurmalad.
JAM 4:3 Ar be ibmar-egisdemalale, bemarga ibmar uklesurmalad, ar ade, noar be egismalad. Ar be ibmar-abemaladi unnila be-sanginbi-nabir-itodiguegala be egisdedamalad.
JAM 4:4 Bemar ¡Na-abirgunagwarsuli negsichidgi-yoledimaladid! Dule we-napneg-naidbo ai-imakele, Bab-Dummad-e-isdaradga-gunonidaed, ¿ar be wissurmarsi? Ar dule we-napneg-naidbo ai-imakbiele, Bab-Dummad-e-isdaradga gunonidaed.
JAM 4:5 Ar Bab-Dummad-Gardagi binsa weyob-sognai be insae: Bab-Dummad na E-Burba-anmargi-oubosgusad-nue-sabedbali anmargi-nobguye.
JAM 4:6 Ar Bab-Dummad na e-anmar-wiledakedba bur bule anmar-bendaked. A-ulale, weyobi e-gardagi soged: “Bab-Dummad, dule-na-san-dummarba-imakdimaladgi gwisgudaed. Ar dule-na-san-bipi-imakdimaladdi, Bab-Dummad amar-bendakdaed.”
JAM 4:7 Degisoggu, Bab-Dummad-urbaligwa be nanamar. Nia-saila-abin gandikidba be gwisgumar, ar deyob be imakele, nia-saila bemargi bangudoed.
JAM 4:8 Bab-Dummadse be dagmar, Bab-Dummad bemarse dagoed. ¡Dule-isgudimalad, mer be bar isgudii gumar! ¡Bemar-gwage-darbo-binsamalad, na be gwage nudakmar!
JAM 4:9 Na be isgudiidba bukib binsamar. Be bomar, degi, ise-wilegar be itomar. Mer be bar allemar, be bomarsun. Mer be bar wergumar, be naibi itomarsun.
JAM 4:10 Bab-Dummad-asabin na be san-bipi-imakmar, ar deyob be imakele, Bab-Dummad be-nug-odummomaloed.
JAM 4:11 Gwenadgan, mer na egi be muchub-muchub isdar sunmakmalo. Ar dule gwenad-wargwengi isdar sunmakele, igi egi sogdibe, gwenad bato nosye, we-dule igar-maidgi isdar sunmakdo, degi, igar-maidgi sognaido, we-igar noar maiye. Ar be igar-maidgi noar-maiye sogele, bato be igar-maidba-nanaed-dulesurdo, be dule-igar-nabogedga gunonido.
JAM 4:12 Unnila dule-wargwena igar-uked-maid, degi, dule-igar-nabogedbalid. Abi sunna be-abonoged, degi, sunna be-oburgwebalid. Ar bedina, ¿be doasunna, be emargi sogdigu, bato we-dule nosye?
JAM 4:13 Emigi, we be nue itomala, bemar sogmalad: “Emi, igi bandibe, anmar a-neggweburse namaloed. A-neggweburgi anmar birgagwen megmaloed. Agi anmar ibmar-ukmaloed, degi, mani-dummad anmar onomaloed.”
JAM 4:14 ¿Ar ibiga be weyob sunmakmala? Ar be wissurmalad igi banedse neg-gudagoe, degi, igi be gumaloe. Ar bemar booyobi gumalad, ar boo sikwas wis dakleardaed, bato ichee wis naogua, yog-berguar naddaed.
JAM 4:15 Ar bemar bur-sogewilubmalanad: “Ar Bab-Dummad abegele, anmar dula-gudiguodo. Anmar we-ibmarmar imakodibe, igi ibmarmar-baid imakodibe.”
JAM 4:16 Ar emidi, bur bemar san-dummarba-itogedba sunmakdimalad. Bela weyob na san-dummarba-imaked nuedsulid, isganad.
JAM 4:17 Degisoggu, dule na ibmar-nued-saed wisile, degite, imaksulile, bato we-dule isgudido.
JAM 5:1 ¡Bemar mani-ibgan, emigi nue an-itomar! Bemar naibid-dummad-itogoedba be bomar, degi, nunmak-itogoedba be ise-gollar imakmar.
JAM 5:2 Be-ibmar-nue-nikad bela nungusad, degi, be-mormar bela bugbu-bugbu gusad.
JAM 5:3 Be-or, degi, be-mani, bela saamechad. We-samechadi, begi aibinnonikoed, sooyobi bela be-san-ogumakoed. Bemar be-ibagan-bergudanikidga mani na be onmaksamalad.
JAM 5:4 Bemar dule-be-nainugi-bega-arbasmalad be bennuksasulid. Be itomala, a-mani ibibayobi bemargi binnasur gornanai. We-dulemar-bega-arbasad-e-binnasur-gordidimalad, Bab-Dummad-Bela-Gangued-Nikadse warmaksad.
JAM 5:5 Bemar we-napneggi bela ibmar-nika gudigusad, degi, bela galagwensuli gudigusmarbalid. Oburgwileged-ibaga bemar na bela-bela dukin owardungusmalad.
JAM 5:6 Bemar dule-ibmar-gwen-oakalossulid ibmar-oakalosayob egi be nasiksamalad, degi, be oburgwismalad. We-dulemar gwen be-abin imaksasurmalad.
JAM 5:7 Degisoggu, gwenadgan, Bab-Jesús-danikoed-ibase na be san-bargaagwar-gudii gumarsun. Be dakmala, igi-dule-nainugi-arbaed, na e-ibmar-gwag-digsad-sanmaked abitodidae, degi, ibagan-dii-wied gwen-gwae-gwaesuli abitodidabalid.
JAM 5:8 Bemar deyobi mer be gwae-gwae itomarmoga, na be gwage ogannomarsun. Ar Bab-Jesús-gannar-danikid-e-ibagan warmakdanikid.
JAM 5:9 Gwenadgan, melle bemar sabsur-odurdaklemalaga na be muchub-muchub urwemar. Ar dule-igar-naboged bato emiskwaa danikid.
JAM 5:10 Gwenadgan, Bab-Jehová-nuggi Bab-Dummad-gayaburba-barsogmalad sunmakdigusmalad. Amar-nanasmaladyob be gudii gumarmoga. Ar amar anmarga oyosmalad, igi naibi-itoleged-abargi nanalege, degi, igi gwae-gwae ibmar imaklesurbali.
JAM 5:11 Ar anmar wisid, dule nunmaked-birgi-nakwisadgi nued binsalesye. Ar bemar bato itosad, igi-Job baisur-itosgusa. Degi, bemar wisbalid, a-sorbali, Bab-Dummad igi Jobʼga ibmar-uksa gusa. Ar Bab-Dummad dulemar-nue-sabed, degi, dulemar-nue-wiledakbalid.
JAM 5:12 Deginbali, gwenadgan, nibneg-naid-nuggi, we-napneg-naid-nuggi, degi, ibmar-baid-nuggi, mer be ibmar ise-sogar sogmalo, an imakedseye. Ar “eyeye” be sogele, ar eyedo. Ar “surye” be sogele, ar surdo. Unnila irgwen sogsa be sae, adi, Bab-Dummad mer sabsur-be-odurdakegar.
JAM 5:13 ¿Ar dule-wargwen bemar-abargi naibi-itodii? Bab-Dummadse gordo. ¿Ar dule-wargwen bemar-abargi weligwar-itodii? Bab-Dummadga namakdo.
JAM 5:14 ¿Ar bemar-abargi dule uellege? Jesúsʼba-nanaimalad-e-idumaladse be gole, adi, amar Bab-Dummadse ega golega, degi, Bab-Jesús-nuggi ega olivo-gwallu magmalagar.
JAM 5:15 Ar bensulidba-Bab-Dummadse-goled dule-uellemaid-nudakoed, Bab-Jesús a-dule-ogwichoed. Ar dule isgusale, e-isgued ega elilenonikoed, isgussuliyob gunonikoed.
JAM 5:16 A-ulale, na be be-isgued muchub-muchub sogmar, degi, muchub-muchub na be Bab-Dummadse-gormar, adi, bemar nugumalagar. Dule-gwage-swilidikid-Bab-Dummadse-goledi, gangued nikad, ega nabir ibmar gued.
JAM 5:17 Bab-Dummad-gayaburba-barsoged-Elías, anmaryobi sunna isgumoga gusad. Degite, mer dii-wiega, Bab-Dummadse ise-egisar-gochagua, birgapaa-abala we-napneggi dii bar wissulid.
JAM 5:18 Elías, gannar Bab-Dummadse-gochabargua, dii gannar wiargusad, degi, napa bela-ibmar-gullemalad nued osanmaksad.
JAM 5:19 Gwenadgan, ar bemar-abargi dule-wargwen Jesús-igar-napiragwadgi-bangudele, degi, dule-baid, dule-bangusad gannar igar-nuedse seardibe,
JAM 5:20 bemar wisigarmar, ar doa-dule, dule-isgana-igar-nuedgi-bangusgudiid gannar igar-nuedse senonikile, burgwedgi bendakoed, degi, e-isgudiid-bukidar Bab-Dummad ega elioed.
1PE 1:1 Ani Pedro, Jesucristo-e-sapin-dummadga-nugsalesmogadid. We-garda, an bemar-na-e-yargi-gudisurmaladse an narmaknaid: Ponto-yargi-bukmaladse, Galacia-yargi-bukmaladse, Capadocia-yargi-bukmaladse, Asia-yargi-bukmaladse, degine, Bitinia-yargi bukmaladse an narmaknaid.
1PE 1:2 Bab-Dummad anmar-Babga-gumaid, bato e-igar-maidba, e-ibmar-wisidba be e-dulamarga-guega sulesmalad. Bemar Bab-Burba-Isligwaledgi Bab-Dummadgadgarbi-gumalaga be sulesmalad, adi, uaya-nikaa damalaga, degi, Jesucristo-abegi nugumalagar. Bab-Dummad bemargi bela-bela nued binsasun, degine, bela-bela ulubgi-bogidik-itogega be-imakbarsun.
1PE 1:3 Bab-Dummad-nug odummolesun. We-Bab-Dummad anmar-Dummad-Jesucristo-e-babad. Bab-Dummad nue-wile anmar-dakedba Jesucristo-burgwar-mai-durgusadgi gannar-gwalulegega anmar-imaksad. Adi, agi anmar Jesús-dula-maidgi dulagudigued-edarbedii guegar.
1PE 1:4 Adi, bemarga ibmar-nibneggi-abingaoed uklegegar. We-ibmar-anmarga-uklegoye-sogsad geg bergued, geg isgued, degine, geg gaganyob dingubalid.
1PE 1:5 Bemar-Jesucristoʼgi-bensulidba, Bab-Dummad na e-ganguedgi bemar-akwedisunnad. Adi, bemar-abonolesad bemarga-guagwar-sabolesadi, ibagan-berguoedgi-ogwinmaklegoed bemarga oyolegegar.
1PE 1:6 Ar a-ular, emigindi be wergudimarsunnad. Degi-inigwele, amba be wegi sikwas wilubdaklenanaimalad.
1PE 1:7 Ar Jesucristoʼgi-be-bensulidi, oloyob gued: Ar orde wilubdaklegegala, soogi dulegergebed. Deyobi, be-nue-Jesucristoʼgi-bensulid wilubdaklemogargebed. Ar be-we-Jesucristoʼgi-bensulid wilubdaklegedgi-obichale, or-sunna-berguedba bur gandik gued. A-ular, Jesucristo-danikoed-ibagangi bega soglegoed nued be imaksaye, be-nug odummolegoed, degi, begi nueganbi sunmaklegoed.
1PE 1:8 Ar we-Jesucristo-e-wagar be daksurmar-inigwele, amba be sabmalad, amba bemar egi bensurmalad. A-ular, bemar nue Jesucristoʼgi wergudimalad. We-werguedi geg gayagi sogleged, bela-bela nue-yeer itolegedid.
1PE 1:9 Ar ade, bemar Jesucristoʼgi-bensulidba, bemar abonolenonimalad.
1PE 1:10 We-abonoleged-igar Bab-Dummad-gayaburba-barsogmalad iduakwaa deun sogsagusmalad, Bab-Dummad na e-itolegedba bemar-abonogoye. A-dulemar we-abonoleged-igar nue-ise-egisagwar baramididii gusmalad.
1PE 1:11 Jesucristo-daged-iduale, Bab-Dummad-gayaburba-barsogmaladga Cristo-Burba-Isligwaled-egi-naid, ega iduar sognai-gusad, wede igi Cristo naibi-itogoe, degine, a-sorbali, igi Cristo-nug odummolebaloe. Degidbali, wemar baramidii gusmalad, wede doa-dule, degine, sana wede deyob gubaloe.
1PE 1:12 Bab-Dummad, e-gayaburba-barsogmaladga oyosad, we-igar bemargadsurye, dulemar-bemar-sorba-danimaloedgadye. Amar unnila we-ibmar-ega-oyosad akwedidii gusmalad. Emigindi, bemarga Bab-Burba-Isligwaled-nibneggi-danikidba Bab-Gayaburba-Nued sogledisunnad. Ar we-ibmar baliwiturmar aisaar nue-dakbi gudidimarmoganad.
1PE 1:13 Degisoggu, ibmar-mag-itogega guakwaa be gudii imakmar, nue-itoakwaa be nanamar, degine, Bab-Dummad-ibmar-bega-ukoed, abi unnila bensuli edarbedii be imakmarsun. A-ibmarmar, Jesucristo-gannar-danikoed-ibagi, Bab-Dummad nued-bemargi-binsamaidba bemarga ukoed.
1PE 1:14 Bemar Bab-Dummad-mimmigan uaya-nikaa-damaladsoggu, mer epenne igar-napiragwad-wissuli-gudigusmaladyob gannar be damalo. Deun, bemar na ibmar-abegedba, na be-itolegedba gudii gusmalad.
1PE 1:15 Melle deyob be bar damalo. Emigindi, Bab-Dummad-bese-gochadi, dule-gwage-isligwaledsoggu, ayob bemar-daedgine na be gwage-swilidik nanamarsun.
1PE 1:16 Ar Bab-Dummad na E-Gardagi sognaid: “Gwage-swilidik be gumar, ar igi an gwage-isligwale, deyob be gumar.”
1PE 1:17 Bab-Dummad dulemar ber emarbi dakmaid, degine, dulemar-na-ibmar-imaksamaladba ega igar-nabogoed. A-Bab-Dummadse, Babye, ese be golele, we-napneggi-be-gudiidgi, a-Bab-Dummad-dobekwaa be nanamarsundo.
1PE 1:18 Be nue wismalad, be-dadgan-be-odurdaksamalad-igargi be gales gudimalanad. A-igargi, Bab-Dummad bemar-onosad. Be-onolesadi, ologi-baklegar be onolessulid, manigi-baklegar be onolessulid. Ar we-ibmardi sunna bergumalad.
1PE 1:19 Be-onolesadi, Bab-Dummad Cristo-abe-sunsoged-nakrusgi-aryosadgi bemar-onosad. We-Cristo, sibad-wawaad-gutu-gwen-nikasulidyob, degine, swilidik-gwen-boni-nikasulidyob, anmar-anar Bab-Dummadga uklesad.
1PE 1:20 Bab-Dummad, amba yoo we-napneg-nagued-idu bato Cristo-sunonikid, bemarga-uklegegar. Bemar-sabed-ulale, emigine, geb bemarga oyolenonisunnad.
1PE 1:21 A-ular, bemar Cristoʼba Bab-Dummadgi-bensuli gunonikid. We-Bab-Dummad Cristo-burgwisad gannar odulosad, degi, Cristo-nug odungunonikid. Adi, bemar Bab-Dummadgi-dulagudigued edarbedii gumalaga, degine, egi bensuli gumalagar.
1PE 1:22 Emide, bemar Bab-Burba-Isligwaledgi, igar-napiragwadba nanaed-ular, Bab-Dummad bemar-san-burba uruknonikid. Adi, be gwenadgan nue-napiragwadgi sabgumalagar. Degisoggu, gwage-swilidikidgi na be muchub-muchub ise-nue-sabguar nanamarsun.
1PE 1:23 Ar bemar gannar gwalulenonimalad. Be-gwalulesmaladi, we-ibmar-sunna-berguedgi be gwalulessurmalad. Geg ibmar-berguedgi be gwalulesmalad. We-ibmar-geg-bergued Bab-Dummad-gayaburba-degisadegu-dula-gudiidid. Agi be gwalulesmalad.
1PE 1:24 Ar ade, Bab-Dummad-Gardagi sognaid: “Dulemar gaganyobi gued. E-yeerdaklegedi, nainugi-dutu-achunneyobi gued. Gaganmala baisur-dinguddaed, dutumala, baisur-batiddaed.
1PE 1:25 Ar Bab-Dummad-Gayaburbadi degisadegu maiguad, berguosulid.” Isaías 40:6-8 Ar we-Bab-Gayaburba-Nued bemarga emide soglenonisunnad.
1PE 2:1 Degisoggu, a-ular, be bela ibmar-isgana-imaked mimarsun, bela emar-yardaked, wagar-darbodaed, aimargi-nobgued, degi, bela gakansaar-aimargi-sunmaked, be obelomarsun.
1PE 2:2 Mimmigan-emisgwa-aidenonikidyob bemar nunis-burbaled-nuedbina be sogmar. We-nunis Bab-Dummad-Gayaburba gued. Adi, agi be gatik nasgumai be-abonolesmaladgi gumalagar.
1PE 2:3 Ar bemar bato Bab-Dummad-dulemar-sabed begi na be itosmalad.
1PE 2:4 Degisoggu, Jesucristo-akwa-dulayobidse be dagmar. Dulemardi isdar a-akwa daksamalad. Bab-Dummaddi na susagusad, degine, we-akwa, akwa-garged-sunnadid, akwa-nuedid.
1PE 2:5 Amba deyob be akwa-duladyob gumarmogad. A-akwa-duladgi Babse-goled-neg-burbaled-soblegedga be gumalad. Deyobi, be dule-irwa-Bab-Dummadse-gormalad-swilidikidga be gumalad, adi, Bab-Dummadga Babga-ibmar-ukleged-burbaled-nuegan be Cristo-nuggi ukmalagar.
1PE 2:6 A-ulale, Bab-Dummad-Gardagi, Cristo-akwa-nuedye-sognaidgi sognaibalid: “¡Be dakmala! Ani an Sión-yalagi akwa-bur-nued-sulealed, negsailaga mesisad. Ar dule agi bensulile, suli-suli itogosulid.”
1PE 2:7 Ar a-akwa-Jesucristoʼgi be bensurmarsoggu, bemargardi, we-Cristo, ibmar-sunsogedid. Ar dulemar-egi-benmaladgardi, Bab-Dummad-Gardagi Cristoʼgi-sognaidba gunonikid: “Akwa dule-neg-sobmaladse-oballesadi, neg-sobleged-e-akwasailaga gunonikid.”
1PE 2:8 Degine, Bab-Dummad-Gardagi sognaibalid: “A-akwa, dule-egi-goo-warmakedga gunonikid, A-akwa-dummad, dule-omukuedga gued.” Isaías 8:14-15 Ar ade, uaya surmarsoggu, Bab-Dummad-Gayaburbagi yoledimarsunnad, ar ade, bato iduar deyob amarga igar-megisad.
1PE 2:9 Ar bemardi, dula-sulegaled gumalad. Bemar Bab-Dummad-e-negdakmaidgi, dule-irwa-Bab-Dummadse-gormaladga gumalad. Bemar dulamar-swilidikid gumalad. Degine, bemar Bab-Dummad-e-dulamar gumalad. Bab-Dummad deyob be-susmalad, adi, Bab-Dummad-ibmar-nued-imakedgi be dulemar-baiganga sunmakmalagar, sogmalagar, igi bemar negsichidgi-gudigu, Bab-Dummad be-onosmala, e-neg-meegwad-nuedse be-searmala.
1PE 2:10 Bemar iduardi, Bab-Dummadgadsurmalanad, emigindi, Bab-Dummadgadga be gunonimalad. Ar iduardi, Bab-Dummad wile be-daksasurmalanad, emigindi, Bab-Dummad wile bemar-daknonikisunnad.
1PE 2:11 Gwenadgan-sabesarmalad, an bemargi wilemar, we-napneg bemar-negsursoggu, we-napneggi be sikwas gudimarsoggu, mer be-san-ibmar-isganabina-soged be imakmar. Ar we-ibmar-isgana anmar-burba-nued-ebo urwenaid.
1PE 2:12 Gwenadgan, bemar dule-Bab-Dummad-wissurmalad-abargi nued-nanadii be imakmar. Adi, gakansaar-dule-isganaye-begi-sunmakdimaladi be ibmar-nuegan-imakedbali, a-dulemar, Bab-Dummad-bela-dulemarga-igar-nabodanikid-ibagi, Bab-Dummad-nug odummomalagar.
1PE 2:13 Bab-Dummad-abemaidba bemar bela dule-dummagan-nugsalesmalad-urbaligwa be nanamar. Rey, bur-dummadsoggu, a-urbaligwa be nanamar.
1PE 2:14 Dummagan-negdakmamaid-urbaligwa be nanamar. Ar wemar, rey-nuggi dule-ibmar-isgana-imakmalad-sabsur-odurdakega barmilearmalad, degi, dule-ibmar-nuegan-imakmalad-e-nug-ogannomalaga barmilearmalad.
1PE 2:15 Ar Bab-Dummad weyob abemaid: Be ibmar-nued-imakedba, dule-ibmar-wissurmalad, isdar-begi-sunmakmalad, begi geg ibmar-soge gumalagar.
1PE 2:16 Ar bemar be-binsaedba be nanamar. Melle we-be-deyob-nanaedi, ibmar-isgana-imakega be ebumar. Bemar Bab-Dummad-mai-napiragwadsunnadsoggu, deyob na be san oyomar.
1PE 2:17 Bela dulemargi binsaed-nikaa be damar. Na be gwenadgan sabgumar, Bab-Dummad-dobekwaa be nanamar. Reygi binsaed-nikaa be damar.
1PE 2:18 Bemar maiga-gudidimalad, be-dummadgi bela nue-binsaed-nikaa be nanamar. Dummagan-nuegan-daedginbi mer be deyob nanamalo. Amba dummagan-ichakwa-daedgi be binsaed-nikaa dabaloed.
1PE 2:19 Dulemar-Bab-Dummadba-daedba-sabsur-wiledimaladgi Bab-Dummad nued binsadaed. Ar we-dulemala ibmar-oakalossulidba wiledimalad.
1PE 2:20 Ar be-isgudiid-ular dulemar sabsur-be-odurdaker, ¿ar ibi-nued egi be amiosunna, ar bede isgudiid? Ar ibmar-nued-imaked-ular, dulemar sabsur-be-odurdakerdi, wedi Bab-Dummad yeer be-dakdo.
1PE 2:21 Ar Bab-Dummad a-ular anmarse gochad. Ar Cristo amba deyob anmar-anar wilesmogad, anmarga e-wilub na oyosad, adi, anmar eba daegar.
1PE 2:22 Ar Bab-Dummad-Gardagi we-Cristoʼgi sognaid: “We-dule gwen isgussulid, degi, dulemarga gwen gakan-imaksasurbalid.”
1PE 2:23 Cristoʼgi dulemar isdar sunmaknanaigusgua, edi gwen dulemargi isdar sunmaksasulid. Dulemar e-wionanai-gusgua, edi gwen dulemar-abin-sogsasulid, anse be oitolemogoye. Ar deyob wilenaigusgua, Cristo bela ega igar-nudakega, Bab-Dummad-igar-inniki-naboged-maidga e-igar na uksagusad.
1PE 2:24 Ar e-sunnad nakrusgi-bioklenai-gusgua, anmar-isgued e-sangi sesagusad, adi, anmar isguedga burgwar gudiguega, igar-innikigwadginbi nanadii guegar. We-Cristo-bemar-anar-naibigusadgi be nugunonimarsunnad.
1PE 2:25 Ar bemar sibad-wawaad-yoggus-gudigusmaladyob gudigusanad. Emigindi, igi-sibad-wawaad e-dule-edarbedse gannar noniki, deyob be gannar Cristo-be-san-burba-akwemaidse nonimarsunnad.
1PE 3:1 Ar amba deyobmo, omegan, bemar be-sui-urbaligwa be nanamar. Deyobile, be-sui-Bab-Dummad-Gayaburba-abingabisulile, ega be sunmakedba, bur be-daedba Bab-Dummadba nagumaloed.
1PE 3:2 Be-sui nue-innikii-nanae be-dakdagoed, egi nue-binsaed-nikaa-nanae be-dakdagoed. Abali, Bab-Dummad-Gayaburba abingaoed.
1PE 3:3 Omegan, bemar nue-yeerdakle-guegala, we asgi ise-nudakar imakedginsulid, sailagia ise-nudakar imakedginsulid, ormar-nasikedginsulid, degi, mormar-gargemalad-yoedginsulid.
1PE 3:4 Be-yeerdakleged-napiragwad be-gwage-ulubgi siid. We-yeerdakleged-napiragwaddi geg bergued. We, yeer-itogedgi-ibmar-imakedid, urwedgi ibmar imaksulidid. We, degidaedi, Bab-Dummadga bur ibi-nuedid.
1PE 3:5 Ar epenne weyobi omegan-ulubgi-nue-Bab-Dummadba-akanai-gusmaladi, gudigusmarmogad, gwen Bab-Dummad-bengussurmalad. Amar na e-sui-sogedba ibmar-imakdii gusmalad.
1PE 3:6 Sara be dakena, na e-sui-Abraham-sogedba ibmar-imakdii gusad. E-suise an-dummadye na gordii gusad. Emigindi, be ibmar-nuegan imakmalar, degine, dobsulidba be nanamalar, a-e-sisganga be gunonimaloed.
1PE 3:7 Bemar, macherganmo, be-omegangi be nue-binsaed-nikaa-nanadii imakmarmo. Be-ome be nue akwemar, ar omegan anmarba bur nollogwad. Degi-inigwele, Bab-Dummad amba amarga anmar-sunnaa burba-geg-bergued ega uksamogad. Degisoggu, be-ome-e-nug-odummodii be nanamar. Adi, bemar Bab-Dummadse-gotele, Bab-Dummad be-itomalagar.
1PE 3:8 Deginbali, napi an bemarga sogsun: Bela na be emarbi binsabukwa gumar, wile na be dakmaladba, na be muchub-muchub-bendakbukwa gumar, gwenatigwar na be nue sabgumar, wile na be dakmar, aigwar na be nanamar.
1PE 3:9 Dule ibmar-isgana begi imaksale, mer abin ibmar-isgana be imako. Dule be-ukabsasale, mer abin imako, bur ibmar-nued ega be uke. Ar bemar wisid, Bab-Dummad bese gochamaladi, be-susmaladi, bega ibmar-nuegan ukegalad.
1PE 3:10 Ar ade, Bab-Dummad-Gardagi sognaid: “Na dule nued-gudii gubiele, iba-nuegangi weligwar nanadii gubiele, ibmar-isganagi-sunmakedgi na e-gwabin bargaergebed. E-gaya na gakangi sunmaksuli guergebed.
1PE 3:11 We-dule ibmar-isganagi banguergebed, ibmar-nued imakergebed. Ulubgi-bogidik-itoged bur amiergebed, aba bur nanadii guergebed.
1PE 3:12 Ar ade, Bab-Dummad dule-gwage-swilidikid-nue-akwedaed, wemar-ese-goled nue itodaed. Ar dule-ibmar-isgana-imakmaladgindina, egi yoleged.”
1PE 3:13 Ar bemar ibmar-nueganbi imakdiile, ¿doa-dule bemar-oakalogosunna? Geg be-oakalomala.
1PE 3:14 Ar be igar-innikii-maidba-nanaed-ular, dulemar be-wiodiile, begi nued binsalesdo. “Melle be we-dulemar-ibmar-dobedi dobgumalo, melle be gwayebalo.”
1PE 3:15 Bur be-gwagegi be sogmar, we-Cristoʼbi an-Dummadye. Ar dulemar bela bese egichialir, ibiga be Cristoʼgi-bensulidba degisadegu-dulagudigued be edarbedimarye. Amar-abinsaega be guagwar-gudii imakmar.
1PE 3:16 Be a-dulemar-abin-imakder, mer na san-odummogar be sunmako. Nue na san-bargaagwar be a-dulemar abinsaoed. Ulubgi-gwen-isgudisuli-itogedgi be abin-imako, adi, be Cristo-sorda-guedgi dulemar-begi-binsa-gakansaar-sunmakmalad obingegsaegar.
1PE 3:17 Ar ibmar-nued-saed-ular be-wioarmalar, we bur nuedid, ibmar-isgana-saed-ular be wiomaladba. Ar Bab-Dummad deyob abegele, nueddo.
1PE 3:18 Ar Cristo unnila irgwennaa anmar-isgued-anar burgwisad. Cristo-dule-gwage-swilidikid, dulemar-isgana-anar burgwisad, adi, Bab-Dummadse dulemar-nidegar. Napiragwad. Cristo sanar burgwisad. Bab-Burba gannar-dulagudiguega Cristo-imaknonikid.
1PE 3:19 Cristo burbale nadegusad, geb burbamar-galugi-gales-bukmaladga sunmakapid.
1PE 3:20 Ar wemar, epenne Noé-ibagangi, Noé-ur-dummad-sobnaigusgu, Bab-Dummad-igarba gwen nanassurmalad. Bab-Dummad we-dulemar a-urse-doged-edarbedii gusad. Deunni, unnila e-walabaabak (8), muu-mulusadba san-onos gusmalad.
1PE 3:21 Igi Bab-diigi-ogleged emi anmar-abonomogadyobi, we-Noé-ibagangi-dii-mulusad anmarga abonoleged-e-wilubga gunaid. We-anmar-abonolegedi, Jesucristo-gannar-durgusadgi anmar isguedgi abonolesimalad. (Ar diigi-ogleged anmar-sangi ibmar-isgana-naid elisulid. Unnila Bab-Dummadsik-nued-binsaega anmar-imaknonidaed).
1PE 3:22 Ar emigi Cristo nibnegse-nadedgi, Bab-Dummad-argan-nuedsik sigidapid. Cristo bela wemargi obinnonikid: Baliwiturmargi, sailagan-burbarmaladgi, burbar-gangued-nikamaladgi obinnonikid. Degisoggu, bela wemar Cristo-sogedba-nanae gunonimarsunnad.
1PE 4:1 Ar Cristo igi anmar-ular we-napneggi dulagudigu naibigusa, anmar deyob naibiguedsik guagwar gudigumogargebed. Ar dule deyob dula-gudiidgi naibiguele, isgued-igargi bar nanasulid.
1PE 4:2 Adi, na e-burgwedse, we-napneggi mer dulemar-galagwensuli-nanaedba bar gudii guegar. Unnila Bab-Dummad-sogedba nanadii guegar.
1PE 4:3 Ar bemarde, epenne dulemar-Bab-Dummad-wissurmalad-ibmar-imaked be imakdii gusmalad. Ar bemar we-ibmar-isgana-imakdii gusmalad: Be-abgangi-galagwensuli-bingesur-nisaed, ibmar-isgana-imakedbina-soged, mumguedginbi-nanaed, agumakar-iba-onoged, bular galagwensuli yeer-itodiid, degi, ibmar-bab-dummadga-imakleged-e-nug-odummoged.
1PE 4:4 Ar emigindi, bemar bar we-dulemarba bar akasursoggu, degi, e-ibmar-isgana-imakedba bar imakbarsursoggu, we-dulemar-Bab-Dummad-wissurmalad geger be-dakmalad. Bemargi binnasur urwedidimarsundo.
1PE 4:5 Ar we-dulemar Bab-Dummadga bela na e-ibmar-imaksad sogedsemaloed. We-Bab-Dummad, dulemar-dula-gudimaladga-igar-itoged, degi, dulemar-burgwismaladga-igar-itoged, guakwaa maid.
1PE 4:6 Ar a-ular, Bab-Dummad-Gayaburba-Nued dulemar-burgwismaladga sogleapmogad. Ar amar-e-san sabsur-odurdaklesmarmo-inigwer, e-burbadi Bab-Dummadba dulagudii gumalagar.
1PE 4:7 We-napneg-bergued-ibagandi owarmaksad. Degisoggu, nue-binsaed-nikaa be gudii gusun, degine, nue be ataksun, Bab-Dummadse gatik be gorsun.
1PE 4:8 A-ukine, bela bur bule na be muchub-muchub sabgumar. Ar sabguedi, isgumalad-bukidar elied, na muchub-muchub igbarsaye-sogega emar-imaked.
1PE 4:9 Na be muchub-muchub gwenadgan weligwar-itogedgi be akwemar.
1PE 4:10 Bemar-war-wargwen gurgin-burbaled-bemarga-uklesadba na be muchub-muchub bendakmarsun. Bemar Bab-Dummadga ibmar nue-akwemaladsoggu, Bab-Dummad-nabir-bemargi-binsaedba gurgin-burbaled-bemarga-uksad nue be ebumarsun.
1PE 4:11 Ar gwenad-wargwen sunmakele, Bab-Dummad-gayaburba-maid-sogedba sunmakoed. Ar gwenad-wargwen dule-bendakele, Bab-Dummad-ega-gangued-ukedba bendakoed, adi, bela e-ibmar-imakedgi Jesucristoʼba Bab-Dummad-nug dunguegar. Ar Bab-Dummad dummarbaa maid, degi, e-gangued-yeerdaklegedba bela degisadegu-negdakmaid egadid. Ar deyobdo.
1PE 4:12 Gwenadgan-sabesailamalad, boni-dummaganba beedse be wilub-daklenonidibe, mer be geger itomalo. Ar deyob be gumalargebed.
1PE 4:13 Deyob be wilearmalar, bemar weligwar itogewilubbid. Ar Cristo-wilesadgi bemar wilenaimogad, adi, Cristo bela-bela-na-yeerdaklegedgi wese gannar magarononikir, eba bemar bela-bela weligwar-itogwichi gumogagar.
1PE 4:14 Ar Cristo-nukad begi-uluarmalar, bemargi nued-binsalesye be itogewilubmalad. Ar Bab-Dummad-Burba-Isligwaled-gandikid bemargi maid. Ar dulemar-bemargi-urwedimaladdi, Bab-Jesúsʼgi isdar sunmakdimalad. Ar bemardi, Bab-Jesús-nug odummodimalad.
1PE 4:15 Degisoggu, we-ibmar-imakedgi melle be wilemar: Dule-gindakedgi, ibmar-atursaedgi, ibmar-isgana-saedgi, yogsaar-gotebindaedgi. Bemar-wargwensaale we-ibmar-imakedgi, be wilege-wilubsurmalad. Be wilemalale, Cristoʼba-naidgi bur be wilemalawilubbid.
1PE 4:16 Ar be Cristoʼba-naid-ular be wilemalardi, mer be bingegumalodo, bur Bab-Dummad-e-sordaga-guedba Bab-Dummad-nug be ogannomardo.
1PE 4:17 Ar odurdakleged-ibagan Bab-Dummad-mimmigangar-inse nonikid. Emide anmar-inse weyob odurdaklenaid, degite, dulemar-Bab-Dummad-Gayaburba-Nuedba-dasurmaladdi, ¿igi gumalo be insasunna? Ar amardi nue-dummad odurdaklemaloed.
1PE 4:18 Ar Bab-Dummad-Gardagi soged: “Dule-gwage-swilidikid ugak wis abonoledaedde, dule-isganamar-bursunna, degi, gwagegi-galagwensuli-gudimalad-bursunna, ¿sunna abonolego be insae? Suli. Geg abonolemala.”
1PE 4:19 Degisoggu, bemar Bab-Dummad-sogedba-wiledimalad, we-Bab-Dummad-be-obinnisad, bela bega ibmar imakedsedasoggu, a-Bab-Dummadga na be san urmakdii gumarsun. Deginbali, bemar gatik ibmar-nueganbi imakdii nanamarsun.
1PE 5:1 Bemar-abargi Jesúsʼba-nanaimalad-e-idumalad-gudimaladse wilesakwaa an goled. Ani an amaryob Jesúsʼba-nanaimalad-e-idumogadid. An-sunnagwad an Cristo-wilesad daksamogad. Deginbali, yoo Cristo-e-nug-ogannolealir, an eba nug ogannolemogoed.
1PE 5:2 Bemarga, an weyob sogdo: Bab-Dummad-e-dulamar-bemar-abargi-bukwad be nue akwemar. Igi dule-sibad-wawaad-akwed na e-sibad-wawaad-akwe, deyob be akwemar. Nue yeer-itogedgi dule bega ise-sogar-sogedginsuli Bab-Dummad-sogedba be gwenadgan akwemalo. Degine, mer manibina-sogedgi be gwenadgan akwemalo. Be weligwar-itogedgi gwenadgan akwemalo.
1PE 5:3 Degine, be dummadsoggu, mer be dulemar-akwediid bega gandikidgi ibmar-imakega be imakmar. Bur amarga be-daed nued be oyogoed, adi, be-ibmar-imakedba damalagar.
1PE 5:4 Ar deyob be nanamalale, Cristo sibad-wawaad-e-idued-bur-dummad gannar danikile, bemarga ologurgin-yeerdakleged-geg-bergued uknonikoed.
1PE 5:5 Sapingana, bemarmoga, girmar-selegan-urbaligwa ibmar-imakdii be gumarmo. Degine, bela na be muchub-muchub urbaligwa be nanamar, degi, san-bipi na be imakmar. Ar ade: “Bab-Dummad, dule-na-san-dummarba-imakdimaladgi gwisgudaed. Ar dule-san-bipi-imakmaladdi, Bab-Dummad amar-bendakdaed.”
1PE 5:6 Degisoggu, Bab-Dummad-gangued-asabin na be san-bipii imakmar, adi, be-nug-dungued-ibagan-mosale, Bab-Dummad be-nug odummogegar.
1PE 5:7 Bemar-surbinsa-itodiidi, bela Bab-Dummadga be ukmar, ar Bab-Dummad bela bemar-nue-akwediid.
1PE 5:8 Degisoggu, nue binsaed-nikaa be damar, nue atakmar. Ar nia-saila-be-isdarad, achumigur-nono-wawaad-uurmakdiiyob be-ebilis gudiid. Dule-amidiid, doa-gunnodibeye.
1PE 5:9 Be Bab-Jesúsʼgi-bensulidba gandik nia-saila-abin be gwisgu. Ar be wisid bela napneg-naidgi be-gwenadgan weyob wiledimarmogad.
1PE 5:10 Ar Bab-Dummad-dulemargi-bela-bela-nabir-binsamaid bemarse Jesucristoʼgi gochad. Adi, na e-ibmar-nuegan-geg-bergued bemar eba nikumalagar. Bab-Dummad bemar-ichesaar-wilesad-sorba, na e-sunnad bemar-nudakoed, bemarga bela ibmar-imakoed, bemar-ogannogoed, degine, bogidik-megegala bemar-imakoed.
1PE 5:11 Degisoggu, Bab-Dummad-nug ogannolesun, degine, na e-ganguedba bela degisadegu-negdakmaid egadga gusun. Ar deyobdo.
1PE 5:12 Gwenad-Silvano, Bab-Dummadba nue-naimogadid. Abali, an bemar-ogannogega an bemarga garda wis bipisaar narmaksiid. Degine, bemarga oyogegar, we-Bab-Dummadi bemar-abonogewilubsulinad, degite, bemar-abonosad. We-igar, napiragwadid. Degisoggu, a-igargi gatik nanamalo, mer galakumalo.
1PE 5:13 Jesúsʼba-nanaimalad-Babiloniaʼgi-bukmalad, bemar-sunna-sulesmarmogad, degi, Marcos, Bab-Jesúsʼba-naidba an-machiga-gunonikidi, bemarga sogsimalad, bemar nued sogeye.
1PE 5:14 Na be muchub-muchub sabguedgi ise-nue-angaagwaledgi nued-sogeye na ga be sogmar. Bemar-Jesucristoʼgi-akananaid, bemar bela ulubgi bogidik-itosun. Deyobdo.
2PE 1:1 Ani Simón-Pedro, Jesucristo-e-mai, degi, e-sapin-bur-dummadga-gumogaga nugsalesmogadid. Jesucristo-anmar-Bab-Dummad, anmar-Abonogedid, e-ibmar-inniki-imaked-ular, bemar anmaryob Jesucristoʼgi-bensuli gunonimarmogad. An bemarse garda narmaksiid. Be we-Jesucristoʼgi-bensuliguedi, anmarga, degi, bemarga ibnuedga gunonikid.
2PE 1:2 Bemar, Bab-Dummad-mag-dakedbali, degi, anmar-Dummad-Jesús-mag-dakedbali, Bab-Dummad bemargi bela-bela nued binsasun, degi, bela-bela ulubgi-bogidik bemar-itogega bemar-imakbarsun.
2PE 1:3 Bab-Dummad na gangued-nika-maidba, degi, na ibmar-innikii-imakedba Jesucristo-mag-dakega anmar-imaksad. A-ular, Bab-Dummad na e-ganguedbali anmarga belagwapa ibmar-abeleged uksad, adi, anmar dula-gudii guegar, degi, anmar nue eba nanadii guegar.
2PE 1:4 We-ibmarmarbali, Bab-Dummad, anmarga ibmar-nuegan-gargerbasailad, degi, ibmar-dummaganad-ukoye-sogsad uksad. Adi, anmar, abali, nabir Bab-Dummad-daedyob nanadii guega, degi, anmar we-napneggi dule-ibmar-isganaginbi-binsadiidgi banguegar. Ar we-dulemar-e-ibmar-isgana-imaked emar-oichoged.
2PE 1:5 Degisoggu, a-ular, nue be we-ibmargi alamaknai gumarsun. Jesucristoʼgi-bensuli-be-gued ogannogo. Be-nueddaed nue-oyodii be nanabalo. Be-nueddaedgi, Bab-Dummad-magar-dake be nanabalo.
2PE 1:6 Bab-Dummad-magar-dakedgi, sunna-san-dukin-bargaed-imakdii be gubalo. Sunna-san-dukin-bargaedgi, ukurmakar-ibmar-imaksuli be nanadii gubalo. Ukurmakar-ibmar-imaksulidgi, Bab-Dummad-ibmarbina-sogee be nanabalo.
2PE 1:7 Bab-Dummad-ibmarbina-sogedgi, gwenadganbina-itogee be nanabalo. Gwenadganbina-itogedgi, gwenadgan-sabee be nanabalo.
2PE 1:8 Ar weyob be nanaele, Jesús-Igar-wisgulegedgi be nasgumai guoed, degi, anmar-Dummad-Jesucristoʼga bela-bela be ibmar-nuegan imakbaloed.
2PE 1:9 Ar dule weyob nanasulirdi, e-ataked amba itakaa atakdo, ibyasuli gudiido, epenne-isgudigusad-ega-elilesad iesdo.
2PE 1:10 Degisoggu, gwenadgan, Bab-Dummad napiragwadba bese gochamarsoggu, degi, napiragwadba be-susmarsoggu, begi we-ibmarmar ise-nue-diglegar be imakmarsun. Ar deyob be nanamalale, be isguosurmalad.
2PE 1:11 Ar degidbali, anmar-Dummad-Jesucristo-anmar-Abonoged, e-negdakmaid-degisadeguadse bela-bela nuedgine anmar-abingaoed.
2PE 1:12 A-ulale, ar amba be igar-soglesad wismar-inigwele, degi, egi napiragwadgi be odurdakles-inigwele, be ebinsadii gumalaga an bemarga we-ibmarmar obardii guoed.
2PE 1:13 Amba an dula-gudiidgi we-igargi be-unaed bur nuedid.
2PE 1:14 Ar an wisid, an emisgwasaar-gudiid an berguoed, ar anmar-Dummad-Jesucristo bato an-owisosad, ande emisgwasaar burgoye.
2PE 1:15 A-ulale, an bemar-unaega bela-bela an alamaknaid, adi, an-burgwisad-sorba, bela we-ibmarmar be ebinsadii gumalagar.
2PE 1:16 Anmar-Dummad-Jesucristo-e-ganguedgi, degine, e-danikoedgi anmar bemarga-sunmaksadi, binsa yogasaar dulemar-na-e-nonogi-onoged an bemarga sogsasurmalad. Anmar-bemarga-sogsamaladi, anmar-sunnad anmar-ibyagwar, e-gangued-daksadba anmar bemarga sogsamalad.
2PE 1:17 Bab-Dummad Jesucristo-nug-odummosad, degine, gangued-ega-uksabalid, anmar daksad. Deun, nibneg-yeerdakleged-akar gayaburba gandikidba gollar gusad, Jesucristoʼgi sogsagusad: “We, An-Machi-sabedid. We-Machigi an yeer itoged.”
2PE 1:18 Deun, anmar Dummad-Jesucristoʼba yala-islidikidgi gudigusgu, we-gayaburba-niba-gollar-gusad anmar itosad.
2PE 1:19 We-ibmar-gusadi, Bab-Dummad-gayaburba-barsogmalad iduar yoedse-ibmar-guoye-sogsagusad, bur bule barsognonikid. We-gayaburba, neg-ibguedse anmarga negsichidgi acha-gwallu-neg-mee-imakedyob, gued. Degi, bolegwadba-niis-dummad-nakwiardaeyobi, bemar-gwagegi imakmogoed.
2PE 1:20 Bab-Dummad-Gardagi yoedse-ibmar-guoed-narmakaled geg dule na ebi-wargwen-e-itolegedba oduloged. We bela-bela anmar mag itogergebed.
2PE 1:21 Ar ade, Bab-Dummad-gayaburba-barsogmalad, wargwensaale yoedse-ibmar-guoed-Bab-Dummad-sogsadgi na-e-itolegedba sogsasurmalad. Ar Bab-Dummad-sordamar-gwage-swilidikmalad Bab-Dummad-Burba-Isligwaled-sogedba sunmaksagusmalad.
2PE 2:1 Israel-dulemar-abargi Bab-gayaburba-barsogmalad-napiragwadsulid gudii gusmalad. Ar deyob bemar-abargi dule-odurdakmalad-napiragwadsulid gudidii gumarmogoed. Amar, odukuale, burbar emar-wiogega, Bab-Igar-Maid noar odurdakdamaloed. Amar, Dummad-Jesús-isguedgi-e-onosadbela osulodmaloed. A-ulale, Bab-Dummad ukiagwar we-dulemar-sabsur-odurdakega imaknonikoed.
2PE 2:2 Dule-bukidar amar-galagwensuli-isgudimaladba akadmaloed. A-dulemar-nukad, dulemar Bab-Jesús-Igar-napiragwadgi galagwensuli sunmakdamarsunnoed, Bab-Igar, igar-isganaye.
2PE 2:3 Dule-odurdakmalad-napiragwadsulid maniginbi-dogdar-binsamalad-ular, gakansaar bemargi mani-onodamaloed. Amar dulemarga-sabsur-odurdakleged-igar-maidgi gwen wakinnosurmalad, ar Bab-Dummad bato amargi sogsad, wemar sabsur-odurdaklegedsemaloye.
2PE 2:4 Ar Bab-Dummad, baliwiturmar-isgusmaladgarbela, mer sabsur-be-odurdakoye ega gwen sogsasulid, sabsur-odurdaksagusad. Bab-Dummad a-baliwiturmar nianegsichidgi sabsur-odurdakega galu-yaba metegusad. Agi Bab-Dummad-ega-igar-itogedse galesii gumaloed.
2PE 2:5 Degine, Bab-Dummad epenne-dulemar-galagwensuli-isgudigusmalad sabsur-odurdaksa gusad, gwen wile daksasulid. Deun, Bab-Dummad belagwapa dulemar-we-napneggi-bukmalad e-galagwensuli-isgudimalad-ular, muu-dummad egi omulusgu, unnila igar-innikigwadgi-sunmakdigusad-dule-Noé, degine, e-gwenadgan-walagugled (7), amarbi abonos gusad.
2PE 2:6 Deginbali, muu-dummad-nosad-sorba, Bab-Dummad, neggweburmar-gwabo, Sodoma, degi, Gomorra, osulos gusad, burubi-nai imaksad. Adi, dule-galagwensuli-nanamaladga oyolegega, degi, wemar, a-dakalir, egi binsamalagar.
2PE 2:7 Deunni, Bab-Dummad, unnila dule-nueddaed-Lot, degi, e-sisganmala abonos gusad. A-Lotʼde, dulemar-galagwensuli-isgudimaladba bukib binsadii gusad.
2PE 2:8 We-Lot, we-dulemar-galagwensulidamalad-abargi-gudigusgu, amar-galagwensuli-nanaed-dakdigusgu, degine, amar-galagwensuli-sunmakmalad-itodigusbargu, bane-bane nue-e-gwagegi bukib amarba binsadii nanasad.
2PE 2:9 Ar Bab-Dummad, dulemar-nuegan, e-dobee-nanamalad, isguedgi-wilubdaklealir, bendakdaed, adi, mer isguegar. Ar dule-isganamardi, sabsur-odurdaklegoed-ibaganga osabosad, adi, a-ibagangi sabsur-odurdaklemalagar.
2PE 2:10 Dulemar-we-napneggi-san-isgumaladba-nanadimalad, galagwensulidamalad, Bab-Dummad-e-iduedga-imakbisurmalad, amar bur bule sabsur-odurdaklemaloed. Amar yogasaar gotebin damalad, degine, dobsuli burbar-dummagan-gandikmaladgi galagwensuli-sunmakmalad-dulemalad.
2PE 2:11 Ar baliwiturmar bur a-dulemarba dutusur-inigwele, gannarba-inigwele, degite, a-baliwiturmar Bab-Dummad-asabin we-dulemar-burbar-gandikmaladgi gwen sabsur-gandikidgi egi sunmakdisurmalad.
2PE 2:12 Ar we-dulemardi ibdurganyobid: Binsaed-satemalad, e-itolegedba gudimalad. Ibdurganyob, galegega gwalulesmalad, degine, oburgwilegega gwalulesmalad. We-dulemardi na dukin e-isguedgi bergudmaloed.
2PE 2:13 Ibmar-galagwensuli-imaksadba na dukin wilemaloed. Ar ade, isguedgi bane-bane yeer-wergudii na abemalad. Wemar, bemar-abargi mas gunnarmalar, yosgudamaladba, neg-gagadamaladba, binge-dakledamalad, bemar-oichononimaloed.
2PE 2:14 We-dule-odurdakmalad-napiragwadsulid omegan-dakder, yog egi galagwensur binsaddamalad, unnila isguedginbi binsadimalad. Wemar, dulemar-baisur-binsaed-galemalad-e-binsaed gadimalad. E-gwagegi unnila surbinsa ibmarbina sogdimalad. We-dulemar bato ukabsales-gudimalad-dulemalad.
2PE 2:15 We-dulemar igar-innikigwadgi aibachamalad. Degisoggu, igar-napiragwadgi yoggus gudimarsunnad. Igi Beor-machi-Balaam-gusa, igar-isgana-imakedba manibina bur-yaisur-itosadyob, a-igarba we-dulemar nadmarmogad.
2PE 2:16 Ar we-Bab-Dummad-gayaburba-barsoged-Balaam, ichakwadaedbali, moli-uayasuid-ibmar-berbeged, ega duleyob ise-urwar sunmaksad. Deyob we-moli Balaam-ibmar-isgana-imaknadapid bargasad.
2PE 2:17 We-dule-odurdakmalad-napiragwadsulid dia-dinnagwadyobmalad, mogir-gorosur-aibindanikidyob diisuli burwaba selegedyob gumalad. We-dulemar, degisadegu odurdaklesigumalaga, negsichid-naidse seledmaloed.
2PE 2:18 Ar ade, dule-odurdakmalad-napiragwadsulid na bule-bule-sunmakedgine ibmar-nued-soged satemalad, binsa ee sunmakdimalad. Galagwensuli-daedgine, degi, ibmar-galagwensulidbina-sogmaladgine, dulemar-gebe-ibmar-isganagi-wakicha-gudimalanad-e-binsaed gadimalad.
2PE 2:19 Amar sogdimalad, na-be-itolegedba-gudisaed an bega ukmaloye, ar degite, emardi amba na dukin isguedgi gales gudimalad. Ar dule-gwensak ibmar-isganase galakuele, dule-galakusad ibmar-isgana-egi-obichad-e-maiga gunonidaed.
2PE 2:20 Ar dulemar anmar-Dummad-Jesucristo-anmar-Abonoged-wisgunonikidba we-napneggi isguedgi anmar bachikgunonikid. Geb a-sorba, gannar a-isguedgi gannar bipirmakder, agi gannar nanaarbalir, epenne-daedba bur bule ege gunonidaed.
2PE 2:21 A-dulemar a-igar-swilidik-maid-wisgunonikid-sorba, we-igar-nued-maid-wisgussulina, bur nabirindo. Emigindi, igar-swilidik metenonimalad.
2PE 2:22 Aga we-binsaed-nikaa-sunmakleged-soglegedi amargi nabir gunonikid: “Achu na e-agsad gannar maddaed, degi, sin nue-oglesar gannar ollimatase naddaed.”
2PE 3:1 Gwenadgan-sabesailamalad, wese ilabogus an bemarse garda narmaked. An be-unamalaga, ilabogus an we-gardamar bemarse barmisiid, adi, bemar nuekwaa binsamalagar.
2PE 3:2 Bab-Dummad-gayaburba-barsogmalad-gwage-swilidikmalad epenne-ibmar-sogsad be nue insamalo. Degine, anmar-Dummad-Jesucristo-anmar-Abonoged-ibmar-odurdaksad, e-sapin-bur-dummaganba-sogsad, be insamarbalo.
2PE 3:3 Gebedgine an bega sogedi, nue be ebinsamalo, negdukumosar, dulemar na e-itoleged e-isguedgi galagwensuli-nanamalad bukidar ainidagoed.
2PE 3:4 Amar Bab-Dummad-Igargi-dodogar weyob sogdamaloed: “Wede Bab-Jesús we-napnegse-gannar-danikoye-soglesadde, ¿igi gudsunna? Ar anmar-dadgan-burgwisad-akar, gebesaila-napneg-nagusadyob amba gannar napneg naid, amba yoo napneg gwen-gwage naid.”
2PE 3:5 Wemar, epenne Bab-Dummad sunmaksadba nibneg-nasiknonikidi, degi, napneg-nasiknonikidi, yamo wissuliyob gubukmalad. We-napneg diigi danikid, degi, dii napneg ganikid.
2PE 3:6 Degine, Bab-Gayaburba-sogedbali, diibali, gebe-napneg-nagusad dii-mulusadba bela-bela oitolesad.
2PE 3:7 Emi Bab-Gayaburba-sogsadba-nibneg-naidi, degi, napneg-naidi, soo-sailaga sabolenaid, igar-naboleged-ibagan edarbenaid. Degine, dulemar-galagwensuli-isgudimalad-sabsur-odurdaklegoed-ibagan edarbenaibalid.
2PE 3:8 Gwenadgan-sabesailamalad, mer be iemalo. Be ebinsamalo: Bab-Dummadga ibagwenadi, birga-miligwenadyob (1,000) gued. Birga-miligwenadi (1,000), ibagwenadyob gued.
2PE 3:9 Bab-Dummad na ibmar-saoye-sogsad imakosurye soglesulid, igi gwenna-gwenna bemar deyob binsamala. Bab-Dummad ibmar-imakedi, ukurmakar imaksulid, ar ade, dule-wargwensaar mer-yogguena gadinye binsamaid. Gwagegala, bela e-isguedga bukib-binsamalana gadinye binsamaid.
2PE 3:10 Bab-Jesús-danikoed-iba, igi atursamalad dule-wissuli ukiagwar nonidamala, deyob Bab-Jesús-iba ukiar nonikoed. A-ibagi, nibneggi binnasur ibmarmar gollomakdoedba, nibneg bergudoed. Agine, bela ibmar-sailaga-gubukmalad soo-sailaba daludoed. Napneg, degi, egi-ibmar-bukmalad bela eba gummakdemogoed.
2PE 3:11 Ar bela weyob we-ibmarde berguosoggu, degite, ¿ibiga bemarde nue Bab-Dummad-dobekwaa, gwage-swilidik nanaosurmar be itosunna?
2PE 3:12 Bab-Dummad-iba-danikoed-abdakbukwa, gwae a-iba dagega be imakmar. A-ibagangi, nibneg gummakdoed, bela bergudoed. Bela ibmar-sailaga-gubukmalad gummakosoggu, bela daludsunnoed.
2PE 3:13 Ar anmardi, Bab-Dummad anmarga napneg-binid, degi, nibneg-binid-ukoye-sogsad edarbebukmarsunnad. Ar agi unnila igar-innikimaladbi gumai guoed.
2PE 3:14 Degisoggu, gwenadgan-sabesailamalad, we-ibmarmar bemar abdakbukwagumarsoggu, bemar gatik alamakmarsun. Adi, Bab-Dummad bemar gutu-gwen-naisuli, gwage-swilidik-isguedsuli, degi, unnila ulubgi-bogidikidbi be nanadii bemar daknonikigar.
2PE 3:15 Degine, be ebinsamalo, anmar-Bab-Dummad-e-ibmar-gwae-gwae-imaksulidi, dule-abonogega gued. Igi anmar-gwenad-sabesailad-Pablo, Bab-Dummad-ega-binsaed-nue-nika-imaksadba, bemarga narmaksamoga.
2PE 3:16 Pablo bela-e-gardamar-narmaksadgi we-igargangi bemarga sunmaknaid. We-igargan abala aku-itoledaed. A-ulale, dulemar-ibmar-wissurmalad, degi, Bab-Jesús-Igargi-nollo-gudimalad, yamo a-igar ogwaddamalad. Deyob bela Bab-Dummad-Garda-narmakar-baidsik-nanaid yamo ogwadamalad. Degisoggu, amar sabsur-odurdaklemarsunnoed.
2PE 3:17 Gwenadgan-sabesailamalad, degisoggu, bato be wisigarmar, nue-salakarmar. Dulemar-igarsuli-gudimaladse ebipiledamalar. Deyobile, be nue-Bab-Jesúsʼba-naidgi be bangudoed.
2PE 3:18 Bemar bur bule anmar-Dummad-Jesucristo-anmar-Abonoged be magar-nue-dakedgi nasgumai gumar. Degine, e-bemargi-nabir-binsamaidba bur bule be nasgumai gumarbarsun. Emi-ibagi, degisadegu, Jesucristo-nug ogannolesun. Ar deyobdo.
1JO 1:1 Gebe-negasailaunni, Gayaburba-Nued, Gayaburba-Dulad bato gudiid. A-Gayaburba-Nued anmar itosad, anmar-sunnad anmar-ibyanugi daksad. Ar anmar-sunnad ise-dakarmalad, an-argangi an ebusmalad.
1JO 1:2 Ar San-Burba-Dulad sanar anmarse oyolenonikid, anmar-sunnad daksad. A-dule, anmar barsogmalad, a-dule-Burba-Geg-Berguedgi an bega sunmakmalad. A-dule-Burba-Geg-Bergued Babba gudii gusad. A anmarse sanar oyolenonikid.
1JO 1:3 Bemar anmarba-akanai-gumarmogaga, anmar-sunnad-dule-daksadgi, anmar-sunnad-dule-itosadgi, anmar bemarga sunmakmalad. Adi, bemar anmar-sunna Babgi, degi, E-Machi-Jesucristoʼgi-akanai gumarmogagar.
1JO 1:4 Bemar weligwar-itogedgi nue-wergumalaga we-igargan anmar bemarse narmaked.
1JO 1:5 We-gayaburba anmar Jesucristoʼgi itosgusadi, anmar bemarga sunmaked: Bab-Dummad gwallu-meegwadye. Bab-Dummadgi negsichid bipisaar naisurye.
1JO 1:6 Anmar Bab-Dummadgi-akanaiye an sogmalale, degite, negsichidgi an nanadimarbalile, an gakansadimardo, igar-napiragwadba an nanadisurmardo.
1JO 1:7 Ar igi Bab-Dummad na gwallu-meegwadgi gudii, deyob anmar gwallu-meegwadgi an nanadimalale, anmar na muchub-muchub mesa danakwaa gudimardo. Geb degine, E-Machi-Jesucristo-abegi anmar-isgued bela elilesiid.
1JO 1:8 Anmar sogdibe an isgudisurye, an na dukin yardakdimardo, napira gwen an sogdisurmardo.
1JO 1:9 Anmar an na dukin anmar-isgued Bab-Dummadga barsogmalale, anmar wisdo, Bab-Dummad dule-innikigwadid, dule-napiragwadid, degisoggu, anmarga isgued elioed. Bela-isguedi anmarga osulogoed.
1JO 1:10 Ar anmar sogdibe, anmar isgudisurmarye, anmar dule-gakansiliga Bab-Dummad-imaknaid. Degisoggu, e-gayaburba anmargi gwen naisulid.
1JO 2:1 Mimmigan, melle bemar isgumalaga, we-ibmarmar an bese narmakmalad. Ar dule-wargwen isgusardi, insao, Bab-asabin anmar-irwa-sunmakega anmar-arsoged-wargwen an nikmalad. We-dule, Jesucristoʼdo, innikii-ibmar-saed-duled.
1JO 2:2 Jesucristo anmar-isgued-nabogega anmar-anar na dukin san-uksa gusad. Anmar-isguedgarbi na san uksasulid, bela dulemar we-napneg-naidgi-isgusgudimalad-anar san uksabalid.
1JO 2:3 Bab-Dummad-Igar-Mamaidba an damalale, an nue-wismardo, an, Bab-Dummad mag-dakmarye.
1JO 2:4 Ar dule-wargwen sogele: “Bab-Dummad an wisye,” ar degite, Bab-Dummad-Igargan-Mamaidba dasulile, we-dule binsa-gordido, napiragwadgi sogdisurdo.
1JO 2:5 Ar dule-wargwen Bab-Dummad-Gayaburba-Maidba ibmar-saele, we-dulegi Bab-Dummad-sabgued nue nasgumaido. Ar agi anmar wisgusunnodo, anmar Bab-Dummadgi nue-akanaimarye.
1JO 2:6 Ar dule sogele, “An Bab-Dummadgi akanaiye,” we-dule, Jesucristo-nanasadyob nanamogargebed.
1JO 2:7 Gwenadgan, igar-binid an bemarse narmaksurmalad. An bemarse narmaksiidi, igar-epennegwad, gebesailaun bato bemar nikagudigusad an narmaksiid. We-igar-epennegwad, gebesailaun-gayaburba bemar itosadid.
1JO 2:8 Degi-inigwele, igar-binid an bemarse narmaksiid. Ar we-igar-napiragwad Cristoʼgi oyoleged, degine, bemargi we-igar napiragwad oyolemogad. Ar ade, negsichid bato bergumaid, gwallu-napiragwad bato mee ganaid.
1JO 2:9 Ar dule sogdibe, ede gwallu-meegwadgi gudiiye, degite, e-gwenad-sae-dakele, ar we-dule amba negsichidgi gudido.
1JO 2:10 Ar dule e-gwenad-sabdibe, we-dule neg-meegwadgi gudido. Degisoggu, geg dule-baid-yolegega imaksundo.
1JO 2:11 Ar dule e-gwenad-sae-dakeddi, negsichidgi gudido, amba negsichidgi garmakdido. Degisoggu, wissurdo bia nadapi, ar negsichid e-ibya ibmar-akudake imaksad.
1JO 2:12 Mimmigan, bemar-isgued, Jesucristo-nuggi bemarga elilesad-ular, an bemarse garda narmakmalad.
1JO 2:13 Babgan, bemar Cristo-gebesailad-mag-daksamalad-ular, an bemarse garda narmakmalad. Sapingana, bemar nia-saila-birgi-nakwismalad-ular, an bemarse garda narmakmalad. Mimmigan, bemar Bab-Dummad Babga-gumaid-mag-daknonigusmalad-ular, an bemarse garda narmakmalad.
1JO 2:14 Babgan, bemar Cristo-gebesailad-mag-daksamalad-ular, an bemarse garda narmakmalad. Sapingana, bemar dutusurmalad-ular, Bab-Dummad-Gayaburba bemargi-naid-ular, degi, nia-saila-birgi-nakwismalad-ular, an bemarse garda narmakmalad.
1JO 2:15 Napneg-naidgi igar-isgana-mamaid mer be sabgumalo, degine, napneggi-ibmar-isgana-bukwamalad mer be sabgumarbalo. Ar dule-wargwen we-napneggi-igar-isgana sabele, a-dule Bab-Dummad-sabsulid.
1JO 2:16 Ar bela we-napneggi-ibmar-naid, anmar-san-ibmar-imakbied, ibmar-dakedba-ibmar-abeged, san-dummarba imaked. A-ibmarmala, Babgi danisulid, we-napneg-naidgi danikid.
1JO 2:17 We-napneg-naid berguoed, degine, e-ibmar-abeleged bergubaloed, ar dule Bab-Dummad-sogedba-ibmar-saeddina degisadeguoed.
1JO 2:18 Mimmigan, we-napneg dukumosad. Ar bemar-sunnad itosmalad, dule-Cristoʼgi-gwisgued danikoye. Degisoggu, emidi, bukidar Cristoʼgi-gwisgumalad bato gudimalad. A-ular, anmar wismarsundo, ibagan dukumosad.
1JO 2:19 We-dulemar anmar-sordasurmarsoggu, anmargi nodmarsunnad. Ar we, anmar-sordamalana, anmarba amba akanai gumaloenad. Emigindi, mag daklemalaga anmargi nodmalad, we-bela-anmarba-gudidiid, bela anmar-sordasurmarye.
1JO 2:20 Ar Cristo bemargardi, Bab-Dummad-Burba-Isligwaled uksamalad, degisoggu, bemar bela ibmar wisgunonimarsunnad.
1JO 2:21 Bemar ibmar-napiragwad wissurmardeeye an sogedba bemarse an garda narmaksulid. Ar bemar ibmar-napiragwad-wisidba an bemarse garda narmaksad, degine, gakansaedi, ibmar-napiragwad-soglegedgi danisulid.
1JO 2:22 Degisoggu, ¿ar doa we gakansilisunna? Dule soged, Jesús, Cristoʼsurye, ¿a-dule, gakansaed-dulesursi? We-dule, Cristoʼgi-gwisgued-duledo. We-dule Bab-Machi-osuloged, E-Bab-osulobalid.
1JO 2:23 Ar dule-gwensak Bab-Dummad-E-Machi-abingasulile, a-dule amba Bab-abingasurbardo. Dule soger, Bab-Dummad-Machi magar an dakye, a-dule, Bab-Dummad magar dakbardo.
1JO 2:24 Gebesaila-gayaburba-bemar-itosad, be-gwagegi-naigu be imakmar. Ar gebesaila-gayaburba-bemar-itosad bemargi naiguale, bemar Bab-Machigi, degine, Babgi-akanai gumaloed.
1JO 2:25 Ar we Bab-Dummad anmarga sogsagusad, burba-geg-bergued an bemarga ukoye.
1JO 2:26 We an bemarga narmaksimalad, adi, dulemar-be-yardakbimalad mer bemar-yardakmalagar.
1JO 2:27 Ar Cristo bemarga Bab-Burba-Isligwaled-uksad amba bemarba gudiid. Degisoggu, dule-baid bemar-odurdaked be abesurmarsunnad. Ar Bab-Burba-Isligwaledi bela ibmarmargi bemar-odurdaked. Ar Bab-Burba-Isligwaledi napiragwadid, gakansulid. Ar igi Bab-Burba-Isligwaled bemar-odurdaksamala, deyobi, Cristoʼgi-akanai bemar gumarsun.
1JO 2:28 Emisgindi mimmigan, Cristoʼgi-akanai be gumarsun, adi, Cristo gannar-danikile, bemar dobsuli, bingesuli, e-asabin gwisgumalagar.
1JO 2:29 Ar bemar wisir, we-Cristo igar-innikigwad imakye, bemar wisi-wilubmarbardo, dulemar-bela-igar-innikii-imakmaladi, we, Bab-Dummadgi gwalulesmaladid.
1JO 3:1 Bemar dakmalana, anmar Bab-Dummad-mimmiganye-bilemalaga, ibiyobi, Bab-Dummadi anmar-sabgusa. We-napneggi-bukwamalad Bab-Dummad-akudakmarsoggu, a-ular, we-napneggi-bukmalad aku anmar-dakmarmosunnad.
1JO 3:2 Gwenadgan-sabesailamalad, anmar emigindi, Bab-Dummad-mimmigan gumalad. Amba anmar wissurmalad, igi an nue gudapmaloe. Ar an wisiddi an wismardo, Cristo anmarse na san-oyononikile, Cristoʼyob anmar gunonimogoed. Ar anmar Cristo-daklegedyobi, an daklemaloed. Ar anmar-sunnad dakoed, igi Cristo-daklege.
1JO 3:3 Ar bela dule-we-ibmar-Cristoʼgi-bensulidba-edarbedimalad na dukin san-swilidik-guega imake. Igi Cristo na san-swilidik nika, deyob be imake.
1JO 3:4 Ar dule isgusale, igar-maidgi annasdo. Ar ade, isgued, igar-maidgi annaedid.
1JO 3:5 Ar bemar wisid, Cristo anmar-isgued-eliegala we-napnegse nonikid. Cristoʼgi isgued gwen naisulid.
1JO 3:6 Ar dule-wargwen Cristoʼgi akanaile, geg isgued-igargi nanaed. Dule-wargwen isguedgi nanaele, we-dule amba yoo Cristo-dakdo, degine, amba aku Cristo-dakdo.
1JO 3:7 Mimmigan, mer dule be-yardaked be imakmalo. Ar dule-igar-napiragwad-saedi, we dule-nueddo. Ar igi Cristo dule-gwage-nuedmoga, deyob we-dule gumodo.
1JO 3:8 Dule isguedgi-nanaedi, we-dule nia-saila-sordado. Ar nia-saila gusgu gebesaila-akale, isgudiguad. Agala, Bab-Dummad-Machi wese sanar-gunonikid, adi, nia-ibmarmar-imaked obelogegar.
1JO 3:9 Ar dule-wargwen Bab-Dummadgi-burbar-gwalulesale, geg isguedgi nanaed. Ar ade, Bab-Dummad-e-mimmiga-guedi, egi naid. Degisoggu, geg isguedgi nanasundo, ar Bab-Dummadgi bato gwalulesad.
1JO 3:10 Ar weyob-magar-daklenoni dasunnad, dule nia-saila-e-mimmidibe, Bab-Dummad-mimmidibe. Ar dule-wargwen igar-maidba innikii ibmar imaksulile, degine, na e-gwenad-sabsulile, we Bab-Dummad-mimmisulid.
1JO 3:11 Ar we-gayaburba gebesailaunni bemar itosmalad: Na muchub-muchub anmar sabgumarye.
1JO 3:12 Melle Caínʼyobi gumalo. Ar Caín nia-saila-sordasoggu, a-ular, na e-urba-oburgwisad. ¿Ibiga e-urba-oburgwis be insae? Ar ade, ibmar-isgana imaksad. E-urbadi, ibmar-inniki-imaksasoggu, egi nobedba e-urba-oburgwissunnad.
1JO 3:13 An-gwenadgan, we-napneggi-dulemar-bukwad isdar be-dakmalale, melle geger be itomalo.
1JO 3:14 Anmar gwenadgan-sabmaladbali, an wisgunonimalad, anmar burgwar-gudii, dula gunonimalad. Ar dule na e-gwenad-sabsulile, we-dule amba burgwar gudido.
1JO 3:15 Ar dule-gwensak e-gwenad-isdar-dakele, we-dule, dule-gindakeddo. Ar bemar wismalad, dule-gindaked geg e-gwagegi burba-geg-bergued-nika gued.
1JO 3:16 Cristo-e-san-burba-anmar-ular-uksadba an wismalad, ibi sabgued obarilege. Degisoggu, anmar an-gwenadgan-ular-burgwega guagwar gudigue-wilubmarmogad.
1JO 3:17 Ar dule-we-napneggi-ibmar-nikadi, e-gwenad ibmar-sate-dakele, ega uksulile, degite, ¿igi we-dulegi soglegosunna, we-dulegi Bab-Dummad-sabgued naiye?
1JO 3:18 Mimmigan, melle unnila gayaginbi be sogmalo, dulemar an sabye. Anmar an-ibmar-imakedgi oyogoed, anmar napira dulemar-sabye.
1JO 3:19 Ar anmar dulemar-sabguele, agi an na wisgumalodo, anmar napiragwadba gudiid, degine, anmar gwagegi Bab-Dummad-asabin gwen dobee itogosulid.
1JO 3:20 Ar anmar-gwagegi anmar wis-nosa-itomalale, insamalo, Bab-Dummad anmar-gwage-itogedba bur dummadid, degine, Bab-Dummad bela ibmar wisid.
1JO 3:21 Degisoggu, gwenadgan-sabesailamalad, ar anmar gwagegi akar itosulile, Bab-Dummad-asabin anmar gwen dobee itogosurmalad.
1JO 3:22 Ar ibu anmar Bab-Dummadse-egichidele, anmarga Bab-Dummad ukoed. Ar ade, anmar e-Igar-Mamaidba nanadiid, degine, ar anmar Bab-Dummad-asabin ibmar-nuegan imakdiid.
1JO 3:23 We, Bab-Dummad-igalad: E-Machi-Jesucristo-nuggi anmar bensuli gumar, degine, anmar na muchub-muchub sabgumar. Ar igi Cristo anmarga bato sogsagusa, deyob be imakmalo.
1JO 3:24 Ar dule Bab-Dummad-e-Igar-Maidba-gudiid, Bab-Dummadgi akanaid, degine, Bab-Dummad a-dulegi maid. Ar Bab-Dummad na E-Burba anmarga uksad-ular, anmar wismarsunnad, Bab-Dummad anmargi maid.
1JO 4:1 Gwenadgan-sabesailamalad, melle dulemar Bab-Burbaba-sunmakdiiye-sogdimalad be itomalo. Bina be dakmargweloed, we-burba, Bab-Burbadibe, Bab-Burbasurdibe. Ar bukidar we-napneggi Bab-Dummad-gayaburba-barsoged-sunnadsurmalad gudimalad.
1JO 4:2 Wegi be wilubdakmaloed, we Bab-Burbaba sunmakdidibe: Ar dule-wargwen sogele, Jesucristo we-napnegse-nonigu, dulega gunoniye, we-dule Bab-Burbaba sunmakdido.
1JO 4:3 Ar dule sogele, Jesucristo we-napnegse-nonigu, dulega gunonisurye, we-dule Bab-Burbaba sunmakdisurdo. We-duledi, Cristoʼgi-gwisguedid, ar bato bemar itosad, we-degiid-burba danikoye. Ar emigindi, a-burba bato we-napneggi gudiid.
1JO 4:4 Mimmigan-sabesailamalad, bemar Bab-Dummadgad gumalad. Bemar we-dule-gakansamaladgi be obichamalad. Ar Bab-Burba-bemargi-maid bur we-napneggined-burbaba bur dummad.
1JO 4:5 Ar we-dule-gakansamaladi we-napnegginedsoggu, we-napneggined-igargi sunmakmarsunnad. Degisoggu, dule-we-napnegginmalad a-sunmakmalad itodamarsundo.
1JO 4:6 Anmardi, Bab-Dummadgad gumalad. Ar dule Bab-Dummad-mag-dakele, anmar-ibmar-soged itodamalad. Ar dule Bab-Dummadgadsulirdi, anmar-itodasulid. Ar wegi anmar wisgusisundo, burba-napiragwaddibe, burba-napiragwadsurdibe.
1JO 4:7 Gwenadgan-sabesailamalad, sabguedi Bab-Dummadgi danikid, degisoggu, na be muchub-muchub sabgumarsun. Bela dule-sabgumaladi, we-dulemar Bab-Dummadgi burbar gwalulesmaladid, degisoggu, Bab-dakmalad.
1JO 4:8 Ar dule, dule-sabgusulile, amba Bab-Dummad-akudakdo, ar ade, Bab-Dummad bela-bela dulemar-sabgumaid.
1JO 4:9 Bab-Dummad weyobi anmarse dulemar-sabed oyononikid. Deunni, E-Machi-wargwennaa-gued we-napnegse anmarga barmiargu, adi, abali anmar dula-gudiguegar.
1JO 4:10 We-sabgued-napiragwadi, weyobid: Ar anmar Bab-Dummad-sabgussulid. Bab-Dummad, e anmar-sabgusad. Bab-Dummad, anmarga isgued-nabogega E-Machi barmiargusad.
1JO 4:11 Gwenadgan-sabesailamalad, ar Bab-Dummad weyob anmar-sabgussoggu, anmar na muchub-muchub sabguewilubmarmodo.
1JO 4:12 Ar dule bipisaale Bab-Dummad-gwen-dakdisulid. Ar anmar na muchub-muchub sabgumalale, Bab-Dummad anmargi maido, degine, E-sabgued bur bule anmargi oyolemaido.
1JO 4:13 Ar Bab-Dummad E-Burba-anmarga-uksadba anmar wissundo, anmar Bab-Dummadgi akanaid, degi, Bab-Dummad anmargi maimogad.
1JO 4:14 Ar anmar-sunnad an daksamalad, degisoggu, anmar sogsundo, Baba na E-Machi-we-napneg-Abonoged, we-napnegse na barmiarye.
1JO 4:15 Ar bela dule sogmaladi, we-Jesús, Bab-Dummad-Machiye, Bab-Dummad we-a-dulemargi maido, degine, we-dulemar Bab-Dummadgi akanaimodo.
1JO 4:16 Anmar wismalad, Bab-Dummad anmar-sabed, degine, anmar gwen bensurmarbalid, Bab-Dummad nue-anmar-sabed. Bab-Dummad bela-bela dulemar-sabed. Ar dule dule-sabele, we-dule Bab-Dummadgi akanaid, degi, Bab-Dummad a-dulegi maimogad.
1JO 4:17 Ar anmar nue-napira dulemar-sabguegala, weyob dulemar-sabguergebed, adi, Bab-Dummad igar-naboged-ibagi an dobsuli itomalagar. Ar anmar we-napneggi Cristoʼyobi nanadimogad.
1JO 4:18 Ar dule sabgued-nikale, dobee itosulid. Ar ade, sabgued-igargi-nanalegedi, dobed-osulodaed. Ar dobed-igar, gusgu san-odurdakleged-igar sedanidaed. Degisoggu, ar dule dobele, amba yoo nue-napira sabgued durdaked.
1JO 4:19 Anmar Bab-Dummad sabed, ar ade, Bab-Dummad e-inse anmar-sabgusad.
1JO 4:20 Ar dule-wargwen sogdibe, an Bab-Dummad-sabye, degite, e-gwenad-sae-dakele, we-dule binsa gakansadido. Ar dule e-gwenad-dakdiguad sabsulile, ¿igi Bab-Dummad-sabguosunna? Ar adi-daksulid, geg sabgudo.
1JO 4:21 Ar Bab-Dummadi anmarga weyob igar-uksad: “Dule Bab-Dummad-sabele, e-gwenad sabgubaloye.”
1JO 5:1 Bela-dulemar-bensurmaladi, na sogmaladi, we-Jesús, Bab-Dummad-dule-wargwen-barmidagoye-sogsad-duleye, a-dulemala Bab-Dummadgi burbar gwalulesmalad. Ar dulemar bela Bab-Dummad-sabmaladi, Bab-Dummad-mimmigan sabgumarbaloed.
1JO 5:2 Ar deyob, anmar Bab-Dummad-sabgumalale, degi, E-Igar-Maidba an nanamalale, an wismarsundo, anmar Bab-Dummad-mimmigan sabmalad.
1JO 5:3 Ar Bab-Dummad-sabgulegedi, E-Igar-Mamaidba-nanalegedgi sabguleged, ar E-Igar-Mamaid dutusursulid.
1JO 5:4 Ar bela dule-Bab-Dummadgi-gwalulesmaladi, we-napneggi-isgued-galagwensuli-nikad-birgi obined. Ar anmar Jesucristoʼgi bensulidbali, we-napneggi-isgued-naid-birgi obichamardo.
1JO 5:5 ¿Ar doa we-napneggi-isgued-naid-birgi obinsunna? Dule-bensulidba-sogedi, Jesús, Bab-Dummad-Machiye, a-dule, we-napneggi-isgued-naid-birgi obined.
1JO 5:6 Jesucristo we-napnegse nonigu, diigi-oglesad, degi, burgwisadgi ablis-milesbalid. Unnila diiginbi-oglessulid, e-ablis-milesbalid. We-gusadi, Bab-Burba, anmarga soged, ar ade, Bab-Burbadi, napira-ibmar-soged.
1JO 5:7 Ar e-warbaa anmarga nibneggi sunmaked: Baba, Gayaburba-Nued, degi, Bab-Burba-Isligwaled. Ar wemar-warbaagwadi, wargwennaa gued.
1JO 5:8 Degine, napneggi we-warbaagumaladi, Jesucristoʼgi anmarga sunmaked: Bab-Burba, dii, abe. Ar wemar-warbaagwad bela na emarbi sunmaked.
1JO 5:9 Anmar dulemar-ibmar-soged itodamalad, Bab-Dummad-ibmar-soged-bursunna, bur itogergebed. Ar Bab-Dummad dulemarba bur dummadid. Deginbali, Bab-Dummad na E-Machigi anmarga sunmakbalid.
1JO 5:10 Ar dule Bab-Dummad-Machigi-bensulile, na e-gwagegine bato ega sognaido, we Bab-Dummad-soged, nabirye. Ar dule, Bab-Dummad-soged abingasulirdi, Bab-Dummadga sognaido, be gakansaed-duleye. Ar ade, Bab-Dummad-E-Machigi-ibmar-sogsad abingasulid.
1JO 5:11 Ar Bab-Dummad anmarga weyob sunmaknaid: Bab-Dummad anmarga san-burba-geg-bergued uksad. We burba-geg-bergued Bab-Dummad-Machigi danikid.
1JO 5:12 Ar dule Bab-Dummad-Machi-abingasadi, san-burba-geg-bergued bato nikad. Ar dule Bab-Dummad-Machi-abingasuliddi, san-burba-geg-bergued niksulid.
1JO 5:13 Bemar Bab-Dummad-Machigi-bensurmaladga, we-ibmarmar an narmaked, adi, bemar wisgumalagar, bemar burba-geg-bergued nikamarye. Degine, adi, Bab-Dummad-Machi-nuggi be bensuli gumalagar.
1JO 5:14 Ar anmar weyob Bab-Dummadgi-bensulid: Ar anmar e-sogedba ese ibmar egichidele, Bab-Dummad anmar-itoged.
1JO 5:15 Ar anmar wisile, Bab-Dummadse-anmar-ibmar-egisedi, Bab-Dummad anmar-itodaye. Degisoggu, anmar wismarsundo, anmar ibmar-ese-egichisad bato nikamalad.
1JO 5:16 Ar dule-wargwen e-gwenad isgudi-dakele, we-isgued dule-oburgwedsulile, Bab-Dummadse ega golo. Adi, Bab-Dummad we-dule-dulagudii saoed. We-an-bega-sogedi, isgued dule-oburgwegaga-imaksulidgi an soged. Ar isgued-burgwedse-dule-sededgardi, Bab-Dummadse-ega-be-gorye an sogsulid.
1JO 5:17 Ar igar-innikigwad-maidba ibmar-imaklesulile, we isgueddo. Isgued sogbo nikado: Dule-oburgwed, degi, dule-oburgwesulid.
1JO 5:18 Anmar wisid, dule Bab-Dummadgi gwalulesale, geg isguedgi yeer-itodii gued. Ar ade, Bab-Dummad-Machi we-dule-edarbedidaed. Degisoggu, nia-saila geg ebusunnad.
1JO 5:19 Anmar wismardo, anmardina Bab-Dummadgad gumalad, degine, bela dule-we-napneg-naidgi-bukmaladi nia-saila-sogedba gudidimalad.
1JO 5:20 Ar anmar wisbardo, Bab-Dummad-Machi we-napnegse nonikid. A Bab-Dummad-napiragwad-maid magar-ito anmar-imaknonikid. Degisoggu, anmar E-Machi-Jesucristoʼgi, dule-napiragwadba gudisunnad. Ar we-Jesucristo Bab-Dummad-napiragwadid, degi, san-burba-geg-bergued-sunnadbalid.
1JO 5:21 Mimmigan, ibmar-bab-dummadyob-imaklemaladgi nue salakarmalo, egi bangumalo. Be itomargua.
2JO 1:1 Ani an Jesúsʼba-nanaimalad-e-idued, omegwa-Bab-Dummad-na-susadse, degi, e-mimmiganse an garda narmaksiid. Ar an amar napiragwadgi sabed. Unnila anbi an amar-sabsulid, bela dulemar-igar-napiragwad-wisgunonimalad amar-sabmarmogad.
2JO 1:2 Anmargi igar-napiragwad-naid-ular, an be-sabmalad, degi, we-igar-napiragwad anmarba degisadeguoed.
2JO 1:3 Bab-Dummad, degi, Jesucristo Bab-Dummad-Machi, napiragwadgi, degi, sabedgi, bemargi nued binsasun, wile-bemar-daksun, degi, ulubgi bogidikid bemarga ukbarsun.
2JO 1:4 Gwen-gwen be-mimmigan, Bab-Dummad-anmarga-igar-uksadba, igar-napiragwadgi nue-inniki-nanadii an dakargu, an nue-weligwar itosad.
2JO 1:5 Emigindi, omegwa, an bese wilesunnad, anmar na muchub-muchub gwenadgan-sabgumarsunye. An weyob bese garda narmakedi, wedi igar-binidsulid, ar gusgu bato negasailaun-akale, we-igar anmarga uklesad.
2JO 1:6 Bab-Dummad-Igar-islidikid-maidba-nanaedgi, sabgued oyoleged. Ar bemar negasailaun-akale, we-igar-islidikid-maid-bega-sognaid bato itodimalad, na be sabgudii nanamarye.
2JO 1:7 Ar bukidar dule-yardakmalad we-napneggi ainis gudimalad. We-dulemar sogmalad, Jesucristo we-napnegse dulemaryob gwalulessurye. Ar dule-deyob-sogedi, Cristoʼgi-yolegedid, dule-yardakedid.
2JO 1:8 Bemar nue-salakarmar, bemar-arbasadgi-ibmar-nikusad oyoggudamalar. Ar bur bule belagwapa ibmar-abingaed be imakmar.
2JO 1:9 Ar dule-wargwen Cristo-Igar-Maidgi-bangudele, Cristo-Igar-odurdaksadgi alamaknai gusulile, we-dule, Bab-Dummadba naisulid. Ar dule Cristo-Igar-odurdaksadgi alamaknairdi, we-dule, Bab-Dummadba naido, degi, Bab-Dummad-Machiba naibardo.
2JO 1:10 Ar dule-wargwen be-negse danikile, degi, we-Igar-Maidyob be-odurdakdanisulile, mer be abingao, degi, mer ega be sogbalo, wese-be-nonikid, nuedye.
2JO 1:11 Ar be a-dulega sogele, wese-be-nonikid, nuedye, a-dule-ibmar-isgana-imakedba, ibmar-isgana-imaknaiyob be gumogoed.
2JO 1:12 Amba an ibmar-bukidar bemarga narmaked nikanad, degi-inigwele, an yapa gardagindi bemarga an soged. Ar an bemarse ataknadapo an insado, agi, an-sunnad an bemarga ibmar-sogmaloed. Deyobi, anmar weligwar itomaloed.
2JO 1:13 Emi, be-gwenad-Bab-Dummad-na-susad-e-mimmigan, bega sogsimalad, bemarde nued sogeye. Be itomargua.
3JO 1:1 Ani an Jesúsʼba-nanaimalad-e-idued, gwenad-sabesailad-Gayoʼse garda narmaksiid. Ar an Gayo napiragwadgi sabed.
3JO 1:2 Gwenad-sabesailad, an bega Bab-Dummadse goled, igi be-san-burbaled nueganbi nadapi, bitigi deyobi bega bela ibmar-nueganbi nadsunye, degi, gwen-uellesuli be gudii gusun.
3JO 1:3 Ibibayobi weligwar an itosa, gwenadgan-nonikid anga sognonigu, be innikigwadba gudiiye, degi, igar-napiragwadgi nue-nanadibarye.
3JO 1:4 Bur-weligwar an-imaked, an itoalir, an-mimmigan igar-napiragwadgi nued nanadimarye.
3JO 1:5 Gwenad-sabesailad-Gayo, be bamalad-gwenadgan-bendakalile, be innikigwadgi bendakdaed. Bur bule gwenadgan-yar-baidgi-danimalad be deyob imakdaed.
3JO 1:6 We-gwenadgan Jesúsʼba-nanaimalad-abargi sogmardo, bede nue-sabedgi gwenadgan-bendakdaye. Bab-Dummad-abegedyob, we-ibmar be imakoed. Degisoggu, neggwebur-baidse-naegala, nue-gatik we-dulemar be bendako.
3JO 1:7 Ar we-gwenadgan, Bab-Jesús-nug-sabed-ular, Bab-akudakmaladse gwen bendaklessuli noargusmalad.
3JO 1:8 A-ulale, anmar, we-gwenadgan-abingae-wilubbid. Ar deyobi, anmar, Bab-Igar-napiragwadba-sunmakedgi bendakmogoed.
3JO 1:9 An Jesúsʼba-nanaimaladse garda narmaksad. Ar Diótrefesʼdi, an-ega-ibmar-soged gwen itobisulid, ar ade, e na emar-iduedga-gued abedaed.
3JO 1:10 A-ulale, an bemarse nadele, Diótrefesʼga an ibmar-bakar sogoed, ar ade, anmargi sunnasur sunmakdiid. Unnila wegibi gudisulid, ar gwenadgan-Jesúsʼba-nanaimalad-yar-baidgi-danimalad, wissur-abingabalid. Ar gwenad-wargwen na e-neggi gwenadgan-abingabiele, Diótrefes, a-idu igar-biir mesdaed, degi, Jesúsʼba-nanaimalad-abargi a-gwenad-onodabalid.
3JO 1:11 Gwenad-sabesailad-Gayo, mer dulemar-ibmar-isgana-imakmalad-daedba be dae, dulemar-ibmar-nuegan-imakmalad-daedba bur be dae. Ar dule-ibmar-nued-imakedi, Bab-Dummadgadid. Ar dule-ibmar-isgana-imakedi, amba aku-Bab-Dummad-daked.
3JO 1:12 Bela-dulemar Demetrioʼgi nuedbi sunmakedbimalad, degi, e-daedi anmarga oyomogad napira sogmarye. Ar anmar amba deyob sogmarmogad, Demetrio dule-nuedye. Ar bemar wisid, anmar-ibmar-sogedi, we napiragwadid.
3JO 1:13 Ar bukidar an bega-ibmar-soged nikanad, degi-inigwele, an bega gardagi narmakbisulid.
3JO 1:14 Ar emisgwasaar an be-dako an-insado, agi anmar na asabin sunmakmaloed.
3JO 1:15 Ulubgi bogidik be nikusun. Be-aimar bega sogsimalad, bede nued sogeye. Anmar-aimarga, wargwen-wargwengi ega be sogo, bemarde nueganbimar sogeye.
JUD 1:1 Judas, Jesucristo-e-mai, degine, Santiago-e-urba, bemarse garda narmaksiid. We-garda bemarse-gollesmaladse, Bab-Dummad-anmar-babga-gumaidse-sabgulesmaladse, degine, Jesucristoʼgi-sabgules-bukwadse narmaksiid.
JUD 1:2 Bab-Dummad bela-bela wile-bemar-daksun, ulubgi bela-bela bogidik-itogega bemar-imakbarsun, degi, bela-bela bemar-sabgubarsun.
JUD 1:3 Gwenadgan-sabesailamalad, an bemarga Bab-Dummad-Anmar-Abonosad-Igargi an garda narmakesokalinad. Agi bar an narmakosurgweled. Emigindi, an bemarse-garda-narmakedi, an bemarga wilesakwaa sogsunnad, bemar Bab-Jesús-Igar-Maid-geg-gwagedgi gatik nue-alamaknai be gumarsunye. We-Igar Jesucristoʼgi-akananaimaladga unnila irgwenna degisadegu uklesgusad.
JUD 1:4 Ar dulemar-gwenna-gwenna yamo-dule-yardakar bemar-abargi dogsagudimalad. Amargi gusgu bato soglesad, wemar sabsur odurdaklemaloye. We-dule-isganamar, Bab-Dummad-dule-abonoge-wilubsulinad-igar ogwadmalad. Sogmalad, baisurye, be-itolegedba be galagwensuli nanaer akarsurye, ar amba Bab-Dummad be-sabgumaiddeeye. Degine, we-dulemar anmar-Dummad-Jesucristo-Bela-Negsemaid-wargwenna-maid abingasurmalad.
JUD 1:5 Ar bemar bato wismar-inigwele, ebinsabi an be-abemardo, Bab-Dummad, Israel-dulemar-Egipto-yargi-bukwad-onosgu, a-sorba, dulemar-egi-bengusmalad bela oburgwisad.
JUD 1:6 Degine, baliwiturmar na e-arbaedgi nue-arbassurmaladi, aka e-neg na metegusmaladi, Bab-Dummad a-baliwiturmar nianegsichidgi sabsur-odurdakega degisadegu galu-yaba metegusad, adi, yoedse igar-nabolegoed-ibagi sabsur odurdaklegegar.
JUD 1:7 We-baliwiturmaryob Sodoma-neggwebur, Gomorra-neggwebur, degine, neggweburmar-dikarba-bukwamalad isgusmalad. We-dulemala, galagwensuli abirgunagwarsuli negsichigi yoledii gudmalad, igar-maisulidba na dukin abgangi dododii gudmalad. Agala, we-neggweburmar soo-geg-berguedgi odurdaklenonikid, adi, anmarga wilubganga guegar.
JUD 1:8 Amba deyobi, we-dulemar Jesucristo-igargi-yogasaar-binsadimalad, e-sangi na dukin dododimalad. Dummagangi isdar sunmakmalad, degi, dummagan-burbarmaladgi ukabsaar sunmakdimarbalid.
JUD 1:9 Ar baliwitur-dummad-Miguelʼbela nia-saila-ebo Moisés-sanbina abin-abin na imaknanaigua, nia-sailaga binnasur gwen ukabsassulid, unnila ega sogsagusad: “Bab-Dummad bese sabsur-urwesun.”
JUD 1:10 Ar we-dulemardi ibmar-aku-itogedbali, a-ibmargi ise-sabsur sunmakdedamalad, degine, ibmar-wisiddi aka bur ichoddamalad, ibdurgan-unimalad-damaladyob isguddamalad.
JUD 1:11 ¡We-dulemar, duledar-wilesmar! Ar Caín-igar-nanasadba nadmarmogad. Igi Balaam manibina yaisur-itosa, deyob we-dulemar gudmarmogad, degine, igi Coré Bab-Dummad-sogedba-ibmar-imaksasulidba na san bergusa, deyob wemar gudmarmogoed.
JUD 1:12 Ar we-dulemala bemar-danar-Bab-Jesús-burgwisad-e-binsaega-mas-gunmalad-abargi neg-gagamaladid. Ar wemala bingedsuli mas-gunmalad, degi, bingedsuli gobmarbalid. Na e-sanginbi binsamalad. Wemar, mogir-diisuli burwaba seleddaedyob gumalad. We-dulemala sapi-wissur-e-ibagangi-sanmakmaladyobid, e-malise-bakar, ungar gwichiyobid. Degisoggu, bela bato burgwar gwichid. We-dulemarde deyobmalad.
JUD 1:13 Wemar, demar-welegan-binnasur-arwemaladyobid, demar-e-makumar-sibudik-arwedyobid. Deyob e-isgued oyodidimalad. We-dulemar segargupuyobi gumalad. We-dulemarga, negsichid-gudureged-degisadeguad ega saboles naid.
JUD 1:14 Ar we-dulemargi gusgu epenne iduar Enoc Adán-sorba-guglegi-nonikid (7) sogsagusad: “Dule-Dummad e-baliwiturmar-mili-miliba-mergued-abargi-dani (1,000-1,000) an daksad,
JUD 1:15 bela dulemarga igar-itogega danikid. Bela dulemar-galagwensuli-isgudimalad, bela e-ibmar-isgana-galagwensuli-imaksamalad sabsur-odurdakega danikid, degine, bela dulemar-sabsur-isgudimalad ibmar-sabsur-Bab-Dummadgi-sunmaksamalad odurdakdanikid.”
JUD 1:16 We-dulemala ibmar-isdaradbi dakmalad, ibmar-isdaradbiye sogdimalad. Unnila na e-san-yeer-itogedginbi binsadimalad. Na bule-bule sunmakmalad, degine, dule-binsaed-gaega yamo dulemarga nued sunmakmalad, adi, na e-ibmar-abeged ega udamalagar.
JUD 1:17 Gwenadgan-sabesailamalad, bemardi anmar-Dummad-Jesucristo-e-sapingan-bur-dummaganga-gumalad bato-idu-anmarga-sogsamalad, nue insamalo.
JUD 1:18 Deun, wemar anmarga sogsagusmargu: “Neg-dukumosale, dulemar-Bab-Dummad-igargi-dodomalad bukidar ainidagoye, na e-ibmar-isgana-sabiedba nanadii gudamaloye.”
JUD 1:19 We-dulemar sorda-mamarmalad-dulemalad. Wemar unnila na e-sanginbi binsamalad. Bab-Dummad-Burba-Isligwaled gwen e-gwagegi na sedisurmalad.
JUD 1:20 Gwenadgan-sabesailamalad, bemardi gatik Bab-Jesús-Igar-napiragwadgi gangumai gumarsun, Bab-Burba-Isligwaledgi Babse gordii gumarsun.
JUD 1:21 Bab-Dummad-sabguedgi be akamar, anmar-Dummad-Jesucristo anmar-nue-wile-dakedba anmarga burba-geg-bergued-ukoed-edarbedii imakmarsun.
JUD 1:22 Ar gwen-gwen-amba-bengudimalad, amar wile be dako, be bendako.
JUD 1:23 Degi, gwen-gwen abonoged be imako, soo-sailagi-ononaiyob be imako. Degi, baigan, nue wile be dako. Bedina, nue salakarmo. E-mor-yoidse-bakale, isdar be dako, ar bato we-mor ese-bela-isgusmogad.
JUD 1:24 Ar Bab-Dummad-wargwennaa-gued, anmar-Abonoged, isguedgi-argwansuli sunna anmar-sedii imaked. Degine, e-gangued-nikadbali weligwaledgi e-gangued-yeerdakleged-asabin, mola-binid-gutusuliyobi anmar-ogwiched.
JUD 1:25 Ar Bab-Dummad-anmar-Abonoged, wargwennaa gued, nue-binsaed-nikaa-maid. Emi, degisadegu, anmar-Dummad-Jesucristoʼba, e-nug odummoledii gusun. E-nug ogannoledii gusun, bela negdakmai gusun, degi, bela-bela gangued-nika gusun. Deyob gusun.
REV 1:1 We-yoedse-ibmar-guoed-oyolesadi, Jesucristoʼgadid. Bab-Dummad Jesucristoʼga we-yoedse-ibmar-gumaloed oyosad. Jesucristo, na e-maigan we-ibmar-emissaar-gumaloed-wisgumalaga oyosad. Wisgumalagala, Jesucristo na e-baliwitur e-mai-Juanʼse barmialid.
REV 1:2 We-Juan, na e-sunnad-daksadbali, Bab-Dummad-bela-ega-sogsadba, degine, Jesucristo-bela-ega-oyosbalidba, narmaknonikid.
REV 1:3 Dule-we-garda-absomaladga, yoo-ibmar-guoed-itomarbalidga, degine, bela narmakar-naidba-eba-damaladga ibnuedga gued. Ar we-ibmar-guoed-ibagan emiskwaa deyob gunonikoed.
REV 1:4 Ani Juan, Jesúsʼba-nanaimalad Asiaʼgi-bukmalad-sogagugledse (7) an we-garda narmaksiid. Bab-Dummad-Dula-Maidi, gusgu-danikidi, degisadegu-mai-guoedi, degi, burbamar-walagugle (7) Bab-Dummad-ologana-asabin-bukwamaladi, degine, Jesucristoʼmala, bemargi nued binsasun, degine, ulubgi bogidik bemar-itogega-imakbarsun.
REV 1:5 Ar Jesucristo we-ibmar-napiragwad-daksadid, e-inse-durgusadid, reymar-napneggi-negsemamaid-e-dummadid. We-Jesucristo anmar-sabgusadid, e-abegi anmar-isgued-osulononikid.
REV 1:6 E-Bab-Dummadga reymarga-guega anmar-imaksad, dule-irwa-Bab-Dummadse-gormaladga-guega anmar-imaknonikid. A-Jesucristo-nug odummolesun, e-gangued degisadegu odummomarsun. Ar deyob gusun.
REV 1:7 Bela-dulemar Jesús-mogir-imbaba-aidedani dakmaloed. Dulemar-Jesús-ewarismalad amba dakmogoed. Bela-dulemar-baid-baid-we-napneggi-danar-danar-bukmalad Jesús-dani-dakdagogu, bodmaloed. Eye, deyob gusun.
REV 1:8 Bab-Dummad-Bur-Birigined weyob soged: Ani an Gebesailaginedid, (Alfa). Ani an Napisoladbalid, (Omega). Ani an Bela-Gangued-Nikad, gudiid, ani an Bela-Gangued-Nikad, gudigusad, ani an Bela-Gangued-Nikad, gudigubaloed.
REV 1:9 Ani Juan bemar-gwenad, bemar-sunnaa wiledimogad. Bemar-sunnaa Bab-Dummad negdakmaidgi dogarmogad, degi, bemar-sunnaa binnalegwadgi Bab-Jesús-igargi alamaknaimogad-duled. An Bab-Dummad-gayaburba-barsogdiid-ular, degi, Jesucristoʼgi-sunmakdiid-ular, an Patmos-dupgi odurdaklesiid.
REV 1:10 Bab-itoged-ibagi Bab-Dummad-Burba-Isligwaled bela-bela angi nonikid, an-yarganba gar-trompeta-goleyob binnasur gayaburba gornonikid,
REV 1:11 sognonikid: “[Ani an Gebesailaginedid (Alfa), ani an Napisoladbalid (Omega)]. We-ibmar be dakedi, gardagi be narmake. Jesúsʼba-nanaimalad-Asia-yargi-bukmalad-sogagugledse (7) be we-garda barmide: Éfesoʼgi-bukmaladse, Esmirnaʼgi-bukmaladse, Pérgamoʼgi-bukmaladse, Tiatiraʼgi-bukmaladse, Sardisʼgi-bukmaladse, Filadelfiaʼgi-bukmaladse, degi, Laodiceaʼgi-bukmaladse.”
REV 1:12 Dule-anga-sunmaknaid-dakega an aibirided. An aibirisgu, gwallu-sied-orbiid gwagugle (7) gwichi an dakalid.
REV 1:13 We gwallu-sied-gwagugled-abargi, Dule-Machi-sunnaa gwichi an daksad, mola-suid naga-dukuse-yoi an daksad. E-binasgargi-molidubyob-ebirnai olo-sunnabi-nai an daksabalid.
REV 1:14 E-nonodi, degi, e-sailagiadi, bela dagudik, sibad-wawaad-e-absar-sibudikidyob an daksabalid, dambed-bated-sibudikidyobid. E-ibyadi, sooyob-gae an daksabalid.
REV 1:15 Degine, e-nagmar, igi esgordikid-soo-yagi-dulenair dakarmake, ayob gaed. E-sunmaked suke-dummad-aryomaidyob goled.
REV 1:16 E-argan-nuedsik niisgwa-gwagugle (7) ganibalid, e-gaya-yaba es-suid isedar-swiswimakaled nugar-abinbela-nikad nogwichid. E-wagar, dad-ibe isedar-daarmakar-gaedyob dakleged.
REV 1:17 A-dule deyob an dakargu, burgwisayob an e-nag-naba aimukuded. We-dule, e-argan-nued an-birgi-mesisgu, anga sogded: “Mer dobgu, ani an Gebesailaginedid, ani an Napisoladbalid.
REV 1:18 An dula gudiid. Ani an burgwis gusadid. Emigindi, degisadegu an dula gudiid. Ar napiragwad. Deginbali, ani an burgwed-yabe, degine, burgwarmalad-e-neg-Hadesʼye-nugad-yabe an ganikidbalid.
REV 1:19 ”Be ibmarmar-daksad narmake, be ibmar-daked narmakbalo, we-sorba-ibmar-gumaloed-dakoed be narmakbalo.
REV 1:20 Niisgwa-gwagugle (7) an-argan-nuedsik-gani be an-daksadi, degine, gwallu-sied-gwagugled-olobiid be daksabalidi, ¿wede ibu obarilesunna? Niisgwamar-gwagugle (7) be daksadi, wemar Jesúsʼba-nanaimalad-bukmalad-sogagugled-e-baliwiturmalad. Gwallu-sied-gwagugled (7) be daksabalidi, wemar Jesúsʼba-nanaimalad-sogagugledid.”
REV 2:1 Jesús sogdebar: “Anba-nanaimalad-Éfesoʼgi-bukmalad-e-baliwiturse garda narmak: ” ‘E-argan-nuedsik niisgwa-gwagugle-ganikid (7), gwallu-sied-gwagugle-olobiid-abargi-gudiid, weyob bemarga soged:
REV 2:2 ” ’Bela be-ibmar-imakedi, be-arbaed-dummad-imakdiidi, be-anba-nai-guega be dummad-alamakdiidi, an nue-wisid. An be-wisbalid, dulemar-ibmar-isgana-imaked be nabir daksurbalid. Deginbali, Bab-Jesús-e-sapingan-bur-dummaganye-binsa-sogdimalad be wilubdaksabalid. Wemar daklenonimalad, gwen a-surmala, binsa gakansadimar be daknonikid.
REV 2:3 Degine, an-nug-ular be nue-wiledi-inigwele, be bai gwen-itossulid. Be ise-arbaar-gudiidgi, be gwen galakussulid.
REV 2:4 ” ’Degi-inigwele, ibmar-soggwengi an begi gwisgued. Gebesailagi be an-sabgusadyob be bar an-sabsulid.
REV 2:5 Degisoggu, be insae, igi idu be gudigusa. Be-isgusadga na be bukib binsae. Mer bar isgued be imake. Gebe be ibmar imakdigusadyob be gannar imakbardo. Degisulir, emisgwasaar an begi danikoed. Ar be-daed gwagsulir, be-gwallu-sied an bei oniroed.
REV 2:6 ” ’Degi-inigwele, ibmar-soggwendi be nued imakdimalad. Nicolás-ibmar-imaksadyob-imakdimalad be isdar dakmalad. Anyob be a-dulemar-isdar-dakdimalad.
REV 2:7 ” ’Ar dule magar-itogele, Bab-Burba-Isligwaled anba-nanaimaladga-soged nue itogo. Dule-ibmar-isgana-birgi-nakwismaladga sapi-durba dula-dule-saed-gunnega an imakoed. We-sapi, Bab-Dummad-nainu-nued-abargi gwichid.’ ”
REV 2:8 “Anba-nanaimalad-Esmirnaʼgi-bukmalad-e-baliwiturse garda narmak: ” ‘Dule-Gebesailaginedid, Dule-Napisoladbalid, dule-burgwis-gusad, dule-durgus-gusbalid, weyob bemarga soged:
REV 2:9 Bela-be-ibmar-imakedi, an nue wisid. Boniganba-be-galitodiid an nue-wisbalid. Be-wilediid an nue-wisbalid, degi-inigwele, be ibmar nue-nika gudiid. Degine, Judíoʼmarye-na-sogdimalad, amar-be-ukabsadimalad an wisbalid. Ar wemar burbar Judíoʼsurmalad, unnila nia-saila-Satanásʼga-danar-ambikumalad-dulemalad.
REV 2:10 ” ’Be ibmar-nunmak-itogoed-begi-danikoed mer be dobguo. Emi, gwen-gwen bemar nia-sailase esgaryagi melledmaloed, adi, bemar wilubdaklegegar, degine, ibambe (10) nue-ise-wilegar be gumaloed. Burgwedse mer galakued be imakmalo. Deyob be gusale, ani an bemarga ologurgin-burba-dula-gudigued ukoed.
REV 2:11 ” ’Ar dule magar-itogele, Bab-Burba-Isligwaled anba-nanaimalad-bukmaladga-soged, nue itogo. Ar dule gwen galakussulile, gannar-burgwed-danibaloedgi bar wilegosulid.’ ”
REV 2:12 “Anba-nanaimalad-Pérgamoʼgi-bukmalad-e-baliwiturse garda narmak: ” ‘Dule es-suid-isedar-swiswimakaled nugar-abinbela-nikad-ganikid, weyob bemarga soged:
REV 2:13 An be-ibmar-imakdiid an wisid. Be-maid an wisbalid. Be gudiidi, nia-saila-Satanás-ologan-siidgi be gudiid. Degi-inigwele, amba an-nug be sediid, be angi amba be bensurbalid. Antipas, an-barsoged-sunsoged, bemar-abargi nia-saila-Satanás-maidgi burgwisad. A-ibaganginbela bemar an-osulossurmalad.
REV 2:14 ” ’Degi-inigwele, ibmar sog-soggwengi an bemargi gwisgued. Bemar-abargi gwenna-gwenna Balaam-igar-odurdaksadgi dule-odurdakdimalad gudidimalad. Bemar a-dulemar onobisurmalad. Ar Balaam, Israel-dulemar-gwage-ichogega Rey-Balac-odurdaksa gusad. Balaam bab-dummagan-imaklegedga san-ogumakar-ukleged-gunned-igargi, degi, abirgunagwarsuli-negsichigi-yoleged-igargi Israel-dulemar-gwage-ichogega Rey-Balac-odurdaksad.
REV 2:15 ” ’Gwen-gwen amba bemar-abargi Nicolás-igarmar-odurdaksadgi dulemar-odurdakdimalad gwen onobisurmarbalid. Ayob-dulemar-odurdakmalad an nue isdar dakmogad.
REV 2:16 ” ’Degisoggu, be-isgusadga na be bukib binsasun, mer bar isgued be sae. Ar degisulir, an emisgwasaar begi danikoed, a-dulemarse an-gaya-yaba-es-suid-yoidgi an urwenonikoed.
REV 2:17 ” ’Ar dule magar-itogele, Bab-Burba-Isligwaled anba-nanaimalad-bukmaladga-soged nue itogo. Dule-gwen-galakussulidga, mas-Manáʼye-nugad-odukuar-maid-gunnega an ega ukoed. Degi, akwa-sipugwad-bipigwad an ega ukbaloed. A-akwagi nug-binid narmakar naid. A-nug-narmakar-naid dule-baid gwen wissulid. Unnila, we-nug-narmakar-naid, dule-akwa-abingaoedbi wisid.’ ”
REV 2:18 “Anba-nanaimalad-Tiatiraʼgi-bukmalad-e-baliwiturse garda narmak: ” ‘Bab-Dummad-Machi-soo-gaedyob-ibya-nikadi, e-nagmar-esgordikid-dakarmakedyob-nikadi, weyob bemarga soged:
REV 2:19 Be-ibmar-imakdiid an wisid. Be an-sabed, be an-bensulid, degi, be aimarga-ibmar-imaked, be anba-nai-guegala be alamakdiid, an wisbalid. Degi, emi-be-ibmar-imaked, idu-be-ibmar-imaksadba bur bule-nuedid, an wisbalid.
REV 2:20 ” ’Degi-inigwele, ibmar-soggwengi an bemargi gwisgued: We-ome-Jezabel, Bab-Dummad-gayaburba-barsoged-bundorye-sogdiid, gwen egi be gwisgussulid. We-ome, e-ibmar-odurdakedgi anga-arbadimalad-binsaed-galemalaga imaksad, negsichigi-abirgunagwarsuli-yolegega imaksad. Degine, bab-dummadga-imaklegedga san-ogumakar-ukleged-gunnega-imaked, be baisur dakmarbalid.
REV 2:21 A-omega e-daed-ogwaega, mer bar isguega, ibagan an nasiksad. Degi-inigwele, Jezabel negsichigi-galagwensuli-yolediid gwen indakbisulid.
REV 2:22 ” ’Emide an, a-omegi uelleged-dummad an nasikoed. Degine, negsichigi eba-galagwensuli-yoledimalad an nunmaked-dummad-nikuega imakoed. Ar we-ome-isgudiidgi bangubisurmalar, deyob guoed.
REV 2:23 Jezabel-e-mimmigan an oburgoed. Deyobi, bela anba-nanaimalad wisgumaloed, ani an dulemar-gwage-ulubse-bakar, igi-binsa-bukmalad an wisye. Deginbali, dulemar na-e-ibmar-imaksadba an bennukoed.
REV 2:24 ” ’Ar bemar-abar-anba-nanaimalad-Tiatiraʼginmalad, bemar-igargan-isganaba-nanadisurmalad, degi, nia-Satanás-igargan-beedse-mamaidye-bimalad-durdakdisurmalad, an bemarga sogdo: Bemarga bar ibmar-baid-dutusur-imakleged an ukosurye.
REV 2:25 Ar bato be igarmar-durdaksamaladgi, an-dagedse, be aginbi alamaknai imakmarsun.
REV 2:26 ” ’Ar dule galakussulile, an-ibmar-imakbiedba imaksale, e-burgwedse eba nanadigusale, a-dulegala, ani an dulemar-yar-baid-baidgi-bukmalad-seega an igar ukoed.
REV 2:27 Ar igi an-Bab e-gangued anga uksamoga, deyob, a-dule, sabsur-gandikidba negseoed, sianar-irgwensur-mamariddaedyobi, a-dule, dulemar-imakoed.
REV 2:28 ” ’Degine, a-dulega, niisgwa-wakudarad an ukoed.
REV 2:29 Ar dule magar-itogele, Bab-Burba-Isligwaled anba-nanaimaladga-soged nue itogo.’ ”
REV 3:1 “Anba-nanaimalad-Sardisʼgi-bukmalad-e-baliwiturse garda narmak: ” ‘Dule Bab-Dummad-burba-gugle-nikad (7), degi, niisgwa-gwagugle-ganibalid, weyob bemarga soged: An bela be-ibmar-imaked wisid. Ar bemar-dulagudiiye benik-sogmar-inigwele, bemar burgwar gudidiid.
REV 3:2 Degisoggu, nue be atake, be An-Igar-burgwedani-sedimalad be oganno. Ar be Bab-Dummad-asabin-ibmar-imakedi, dogdar-nued gwen an daksulid.
REV 3:3 Degisoggu, Bab-Igar-abingasad, Bab-Igar-itosbalid, nue be insae. A-sogedba be dae. Mer bar be isguega, be-isdardaed be ogwae. Ar be nue-ataksulile, ukiagwar an begi nonikoed. Dule-atursaed-ukiar-noni-daedyob an nonikoed. An-wachi-danikoed be wissulid.
REV 3:4 ” ’Ar Sardisʼgi abar-gwenna-gwenna mor-gutu-satemaladyob e-daed nikad. Wemar mola-sibu-yoi anba gudigumaloed. Ar wemar-degiguedi, ega igar nue-maid.
REV 3:5 ” ’Ar dule galakussulile, a-dule mola-sibudikid yooed. A-e-nug burba-dulad-gardagi-narmakar-naid an gwen eliosulid. An-bab-asabin, degi, e-baliwiturmar-asabin a-dulegi an sogoed, we, anba-naidye.
REV 3:6 Ar dule magar-itogele, Bab-Burba-Isligwaled anba-nanaimaladga-soged nue itogo.’ ”
REV 3:7 “Anba-nanaimalad-Filadelfiaʼgi-bukmalad-e-baliwiturse garda narmak: ” ‘Dule-isligwaledid, Dule-napiragwadid, Dule-David-yabe-ganikidid sunmakdebalid. We-dule, yawagak-egasar, geg dule bar edied. Yawagak-edisar, geg dule bar egabalid. A-dule, weyob bemarga soged:
REV 3:8 An bela be-ibmar-imaked wisid. An bega yawagak-egaar-ogwichisadyob an bega igar uknaid. Degisoggu, we-yawagak-dule-geg-ediedyob, dule geg be-igar gaed. An wisbalid, amba be nollosaar-inigwele, an-gayaburbaba be nanadiid, degine, an-nug gwen be osulodisurbalid.
REV 3:9 ” ’Nia-Satanásʼga-onmakmalad Judíoʼmarye-sogmaladi, binsa unnila gakansadimalad. Amar bemarse-daged an imakoed, be-asabin-sindigar-siged an imakoed. Adi, amar an-nue-bemar-sabgusad magar-dakmalagar.
REV 3:10 Ar an-gayaburbagi bemar nue-galakussuli eba nanasmarsoggu, dule-we-napneggi-bukmalad-wilubdakega ibagan-buled-danikoedgi an nue bemar-sabomogoed.
REV 3:11 ” ’An emisgwasaar bemargi danikoed. Na be An-Igar-durdaksadgi, gatik nue-alamaknai guo. Adi, melle dule-baid bei ologurgin suegar.
REV 3:12 ” ’Ar dule gwen galakussulile, an Babse-goled-neg-e-bubawaryob an imakoed. A-dule gwen bar agi onolegosulid. A-dulegine, an-Bab-Dummad-nug, degine, an-Bab-Dummad-neggwebur-e-nug, an narmakoed. We-neggweburde Jerusalén-binidid, nibneggi-aidedanikidid, an-Bab-Dummad-barmialidid. Degine, an-nug-binid an a-dulegi narmakbaloed.
REV 3:13 Ar dule magar-itogele, Bab-Burba-Isligwaled anba-nanaimaladga-soged nue itogo.’ ”
REV 3:14 “Anba-nanaimalad-Laodiceaʼgi-bukmalad-e-baliwiturse garda narmak: ” ‘Napiragwad-soged-dule, degi, ibmar-daksad-barsoged-napiragwad-dule, degine, Bab-Dummad-ibmar-obinnisad-e-Dummad, weyob bemarga soged:
REV 3:15 An bela be-ibmar-imaked wisid. Bela-bela be anba naisulid. Wis-sikwas-be-anba-naid, an wisbalid. Bitigi bur bela-bela be anba gudiguoena gadin. Degisulile, mer bur be anba nagusun.
REV 3:16 Ar bela-bela be anbanaisursoggu, degi, wis sikwas be anba naisoggu, an sabsur-be-barmetoed.
REV 3:17 Ar bede sogdiid: An mani-ibedye, nue-mani-nika an gudiiye. Ibmar bela nika an gudiiye. Ar na be ise-wilegar-gued gwen na be magar-itosulid, be dule-wileged-gued aku na be itobalid. Be mani-sate-gudiid, be aku-atake-gudiid, be mor-sate-gudiid, aku na be itobalid.
REV 3:18 ” ’Degisoggu, an be-unasun, anse or-soogi-nudaklegaled be bake, adi, mani-ibedga be guegar. Anse mola-sibu-yoega be bakbar, adi, be ukaswiri-gudiid, melle be bingeguegar. Degine, anse ibya-ina be bakbar, ibyagi na be ina-imakegar, adi, nabir be atak guegar.
REV 3:19 ” ’An bela dulemar-sabedga binnasur ibmar an sogdaed, sabsur an odurdakdabalid. Degisoggu, gatik Bab-Dummad-ibmarbina be sogmar. Mer bar isguega, be-daed be ogwamarsun.
REV 3:20 Ar emigindi, yawagakgi an bese gorgwichid. Ar dule-wargwen an-ese-goled-itosale, anga yawagak-egasale, an ese dogoed. An ebo mas gunnoed, a-dule anbo mas gunmogoed.
REV 3:21 ” ’Ar dule gwen galakussulile, a-dule anba an-ologanagi-siged an imakoed. Igi an galakussurmoga, an-Bab-e-ologangi an sigismoga, a-dule deyob gumogoed.
REV 3:22 Ar dule magar-itogele, Bab-Burba-Isligwaled anba-nanaimaladga-soged nue itogo.’ ”
REV 4:1 Geb a-sorba, an atakdebargu, nibneggi yawagak-argaar-sii an dakded. Gayaburba-gar-goleyob-gebedgi-anga-sunmaksad an itoarbalid. Anga soged: “Wese anse be nakweda, we-sorba-ibmarmar-guoed an bega oyogoed.”
REV 4:2 Agine, Bab-Burba-Isligwaled burbar ikiir an-sunonikid. Geb nibneggine, ologana-sii an dakalid. Agine, dule-wargwen a-ologangi-sii an daksad.
REV 4:3 Dule-a-ologanagi-siid, e-daklegedi akwa-nued-jaspeʼye-nugadyob dakleged, akwa-cornalinaʼye-nugadyob daklebalid. Degine, sue ologana-ebiris maid, akwa-esmeraldaʼye-nugadyob-dakle dakarmakmaid.
REV 4:4 We-ologana-dikarba, ologan-gwadulagwen-gakabake (24) ebiris-bukwa an daksad. A-ologangi e-dulagwen-gakabake (24) girmar-selegan egi simalad. A-girmar mola-sibudikidi-yoi bukwamalad, degine, e-nonogi ologurgin-sii bukwamarbalid.
REV 4:5 Ologan-siidgi mala ibyemaid, mala gollomakmaid, mala uurmakmaid. Ologan-asabin gwallu-gwagugle (7) gasibalid. A sogleged, Bab-Dummad-burba-sogagugle-gued-e-wilubganye (7).
REV 4:6 Ologan-siid-asabin, demar-isbe-daledyob-dakleged daklenaid. A-abargine, bia ologan-sii, degi, a-ebirisa ibdula-walabake bukwamarmogad. We-ibdulamar bela yargansik, degine, asabin, ibyagibi daklemalad.
REV 4:7 Ibdula-bukmalad-gebedi, achumigur-nono-wawaadyob dakleged. Ibdula-baiddi, moli-bebe-nikadyob dakleged. Baagwaddi, e-wagar dule-wagaryob dakleged, degine, bakegwaddi, sulubagi-gukunaiyob dakleged.
REV 4:8 Wemar-ibdula-walabakegwadi bela sakan nergwa (6) nikadbimalad. E-sakan-birgine, degine, e-sakan-urbali, bela ibyagibi dakleged. Mutikidbali, degi, ibginedbali, weyob-soged gwen bogilenaisurmalad: “Bab-Dummad-Bur-Biriginedi, Bab-Dummad-Isligwaledid, Bab-Dummad-Isligwaledid, Bab-Dummad-Isligwaledid. Bab-Dummad-Bela-Gangued-Nikad, gudigusad, Bab-Dummad-Bela-Gangued-Nikad, gudiid, Bab-Dummad-Bela-Gangued-Nikad, gudigubaloed.”
REV 4:9 Ar we-ibdula-walabakegwadi, Dule-ologanagi-siid-degisadegu-dula-maid-e-nug odummoddamalad, ogannoddamalad, dog-nuedye ega sogdedamalad.
REV 4:10 We-ibdulamar deyob-sogdemalale, girmar-selegan-dulagwen-gakabakegwadi (24), Bab-Dummad-na-e-ologanagi-siid-asabinni yog-yokorgi sindigar sigiddamalad. Degine, e-ologurgin, Bab-Dummad-ologana-asabin urbiddamalad, gandikidgi sogdedamalad:
REV 4:11 “Bab-Dummad, anmar-Dummad, be-nug ogannoleged, be-nug odummoleged, degi, be dummadga gued. Ar bela ibmar-naid be obinnisad, be-sogedba bela ibmar gudiid, bela be-sogedba ibmar binnis bukwabalid.”
REV 5:1 Dule-ologanagi-siid e-argan-nuedgi garda-bipirmakar-gani an daksad. A-garda abinbela narmakaled. Degine, e-wilubgan-sogagugle (7) egi sakdigar-nai an daksabalid.
REV 5:2 Deginbali, baliwitur-gandikid binnasur-gorgwichi an daksad. Weyob soggwichid: “Ar we-gardade, ¿doa sunna egaoe? Ar we-garda-e-wilubgan-nanaidde, ¿doa sunna bisgoe?”
REV 5:3 Degidgine, nibneggine, napneggine, napaneg-urbali, dule-sunna-we-garda-egaed gwen amilessulid. Amba absogegarbela satebalid.
REV 5:4 Ar dule-sunna-garda-egaed, dule-sunna-garda-absoged, gwen amilessursoggu, an ise-boaled.
REV 5:5 Degidgine, girmar-selegan-wargwen anga sokalid: “Melle be boe. Emigi, Achumigur-Nono-Wawaad Judá-e-wagwasikid-Davidʼgi-danikid bato nakwisad. We-dulebi sunna we-garda egaed, sunna e-wilubgan-gugle-naid (7) bisgebalid.”
REV 5:6 Degine, an dakdebalid, ologan-siid-abargi, ibdula-warbakegwad-abargi, degine, girmar-selegan-abargi, Sibad-Wawaad-Mimmi-Babga-oburgwilegar-uklesad-gwichi an daksad. A-Sibad-Wawaad-Mimmi bebe-walagugle (7) nikad, degine, ibya-gwagugle nikabalid. A sogleged, Bab-Dummad-Burba-gugle-bela-we-napneg-naidse-barmilesad (7) e-wilubganye.
REV 5:7 Sibad-Wawaad-Mimmi Dule-ologanagi-siid-e-argan-nuedgi-garda-ganikid sunonikid.
REV 5:8 Sibad-Wawaad-Mimmi garda-susgua, ibdula-walabakegwadi, degi, girmar-selegan-dulagwen-gakabakegwadi (24), bela yokorgi-sindigar Sibad-Wawaad-Mimmi-asabin sigidmalad. Amar bela gar-arpa ganikidbimalad, degine, olo-noga ibmar-wawadik-yapanmalad-ena sedidimalad. We-olo-noga, Jesucristoʼgi-akananaimalad-Babse-goled-e-burbagan gued.
REV 5:9 Ibdula-walabakegwadi, degine, girmar-selegan-dulagwen-gakabakegwadi (24), namaked-binidgi weyob namakbukmalad: “Be burgwisad-ular, bebi sunna garda egaed, bebi sunna e-wilubgan-naid be bisgebalid. Be-ablisgi be Bab-Dummadga dulemar-baksad. Bela dule-ablis-akar-akarmalad, dule-gaya-akar-akar-sunmakmalad, neggwebur-bukwamalad, dule-yar-baid-baidgi-bukwamalad, amar belagwapa be Bab-Dummadga baksad.
REV 5:10 Wemar, be anmar-Bab-Dummadga reymarga be imaknonikid, dule-irwa-Bab-Dummadse-gormaladga, be imaknonibalid. Wemar, we-napneggi negsemarbaloed.”
REV 5:11 An dakdebargu, an itoalid, baliwiturmar-e-gayaburba bukidar miyon-miyonʼba gole. We-baliwiturmala, ologan-ebilis, ibdula-walabakegwad-ebilis, girmar-selegan-ologana-ebilis gorbukwad.
REV 5:12 Amar binnasur namakbukmalad: “Sibad-Wawaad-Mimmi-oburgwiles-gusadgarbi, gargangued ega uklegergebed. Bela-ibmar-nikad ega uklegergebed, binsaed-ibed-gued ega uklegergebed, gandikidba-daed ega uklegergebed, e-nug odummolegergebed, gangued-yeerdakleged ega uklegergebed, egarbi namakalegergebed.”
REV 5:13 Degine, bela nibneggi-ibmar-obinniles-bukmalad, bela napneggi-bukmalad, napneg-urba-bukmalad, demargi-bukmalad, agi bela ibmar-bukmalad namakbukwa an itosad: “Nug-odummoleged, Nug-ogannoleged, bela-yeerdakleged, bela-gangued, Dule-e-ologanagi-siidga, degi, Sibad-Wawaad-Mimmiga, uklesun. Degisadegu deyob gusun.”
REV 5:14 Ibdula-walabakegwad sogbukmalad: “Deyob gusun.” Girmar-selegan-dulagwen-gakabakegwaddina (24), yokorgi sindigar sigidmalad. Dule-degisadegu-dula-maid-e-nug odummodmarsunnad.
REV 6:1 Sibad-Wawaad-Mimmi, gardagi-wilubgan-sogagugle-sakdigar-nanaid-gebed bichis an daksad. Geb ibdula-walabakegwad-gwensak mar-goledyob binnasur weyob soge an itosad: “Be dage. Be dakdage.”
REV 6:2 Geb moli-sipugwad noali an dakalid. A-moli-sipugwad-birgi-dule-siidi, warsi-gani siid. A-dulegala, ologurgin ega uklesad. E-isdarmalad-birgi obichasoggu, bela dule-baigangi-nakwemai-guega nadsunnad.
REV 6:3 Sibad-Wawaad-Mimmi, gardagi-wilub-sogbogwad-sakdigar-naid bichisgua, ibdula-walabakegwad-baid soge an itosad: “Be dage. Be dakdage.”
REV 6:4 An dakdegu, moli-baid moli-ginnitibi-dakleged, noarbalid. Dule-a-moli-birgi-siidga napneg-bogidik-naid-obelogega, degi, dulemar-na-muchub-muchub-oburgwemalaga, ega es-suid uklesad.
REV 6:5 Sibad-Wawaad-Mimmi, gardagi-wilub-sogbaagwad-sakdigar-naid bichisgu, ibdula-warbaagwad soge an itosad: “Be dage, be dakdage.” An dakdebargu, moli-sichid noarbalid. Dule-a-moli-birgi-siidi e-argangi ibmar-wilubsaed-gani an daksad.
REV 6:6 Agine, ibdula-warbakegwad-abargi gayaburba soge an itosad: “Unnila madubur-gwagwaled-nibirbo ibagwen-arbaoedgi baklegoed. Ibagwen-arbaedgi cebada-nibirnergwa (6) wis baklege gubaloed. Ar olivo-gwallud-e-gargegueddi, degi, vino-e-gargegueddi mer gwagega be imako.”
REV 6:7 Sibad-Wawaad-Mimmi, gardagi-wilub-bakegwad-sakdigar-naid bichisgu, ibdula-warbakegwad-bakegwadi soge an itosad: “Be dage, be dakdage.”
REV 6:8 An dakdegu, moli-gordikid noarbali an dakalid. Dule-a-moli-birgi-siidi Burgwedye nugad. A-sorba, Dule-Burgwarmalad-Meged-Nega nadapmogad. Wemarga, napneggi-dula-bukwad-sogabake-mamarisad-soggwen ogilogega ega gangued uklesad. We-ibmarmargi oburgwega: Es-suidgi oburgwega, ukudgi oburgwega, gegumalad-dummadgi oburgwega, ibdurgan-sapurbarmalad-ursirmaladgi, ogilogegar.
REV 6:9 Sibad-Wawaad-Mimmi, gardagi-wilub-ataled-sakdigar-naid bichisgu, Babga-ibmar-ogumakar-ukleged-e-aila-urba, dulemar-Bab-Dummad-Gayaburba-ular-burgwismalad-e-burbamar an daksad. We-dulemar, Bab-Jesús-barsogedgi-galakussurmaladid.
REV 6:10 Amar binnasur-gorbukwa an itosad. Weyob sogbukwad: “Dummad, be isligwaledid, be napiragwadid, ¿wede sana we-dulemar-anmar-oburgwisad be buged-mai imakoe? ¿Sanadse be we-dulemar sabsur-odurdakoe?”
REV 6:11 Geb dulemar-binnasur-gorbukwadga war-wargwenga mor-sibugan uklesmalad. Geb amarga soglesad: “Amba yoogwer, napi be obunnomargwer. Ar bemar-gwenadgan bemar-sunnaa anga-arbamarmogad, bemaryob burgwemarmogargebed, igi-mergu-burgoye an sogsa, a-warmakedse.”
REV 6:12 Sibad-Wawaad-Mimmi, gardagi-wilub-nergwad-sakdigar-naid-bichis (6) an daksagu, negabandur-dummad nagunonikid. Dad-ibeler, mor-sichidyob sipusur nagunonikid. Nii abeyob ginnitibi nagunonimogad.
REV 6:13 Niisgwamar-nibneggi-nanaid napase babatided, higuera-sapi-e-durba burwa-binnasur-goledba-babatid-daeyob babatided.
REV 6:14 Igi garda-obipirmakaled-egaar-maid, atuder bipirmakdae, deyob nibneg atuded, sate naded. Yarmala, dupumala, bela e-naidgi gwen bar nai gussulid.
REV 6:15 Degine, bela reymar-we-napnegginmalad, dule-dummagan, mani-ibedmar, sorda-dummagan, dule-gandik-gudimalad, bela maigan, maiga-gudisurmalad, bela wemar, ibe-dummagan-yaba dukudmalad, degi, yargi akwa-dummagan-bukmalad-imbaba dukudmarbalid.
REV 6:16 Geb amar, yarmarga, akwamarga, binnasuli weyob sogdemalad: “Anmargi be babatidage, Dule-e-ologanagi-siid-idu be anmar-odukue. Sibad-Wawaad-Mimmi sabsur-ulualid-idu be anmar-odukue.
REV 6:17 Ar wemar-ibagan-buled-e-iba nonikid. Degisoggu, ¿doa wemar-asabin gwisguoe? Geg dule gwisgued.”
REV 7:1 A-sorbali, baliwiturmar-walabake napneg-naid-sukun-sogabakegi gwichi an daksad. Gwensak, dad-nakwedsik gwichid, baiddi, dad-argwanedsik gwichid, baiddi, dad-nakwed-argan-nuedsik gwichid, baiddi, dad-nakwed-argan-sapiledsik gwichid. Deyobi, we-baliwiturmar, burwa-goled-sogabakegwad-bargani gwichimalad. Adi, we-burwamar melle napagi, demargi, degi, sapimargi, gormalagar.
REV 7:2 Degine, baliwitur-baid dad-ibeler-nakwedsik-daniki an daksabalid, Bab-Dummad-Dula-Maid-e-wilub-nasikleged sedanikid. A-baliwitur, baliwiturmar-walabakegwadse binnasur goted. We-baliwitur-warbakegwadga, napneg-ichogega, demar-ichogega, gangued uklesgusad.
REV 7:3 We-baliwitur-wargwenad baliwiturmar-walabakegwadga sogded: “Melle be napneg oichomargwer, melle be demar oichomargwer, melle be sapimar oichomargwer. Bina anmar Bab-Dummad-e-maiga-gudimalad-e-bebegi Bab-Dummad-wilub bela nasikgweloed. A-sorbali, geb be napneg oichomalo.”
REV 7:4 Agi geb an egi-wilubgan-nasiklesmalad-mergued-bileged an itosad. Bela, mili-dulagugle-gakabake (144,000) gumalad. Wemar, Israel-dorgan sogambe-gakabogwad-bukwadgi (12) sulesmalad.
REV 7:5 Judá-e-wagangi, miliambe-gakabo wilubgan nasiklesad (12,000). Rubén-e-wagangi, miliambe-gakabo wilubgan nasiklesad. Gad-e-wagangi, miliambe-gakabo wilubgan nasiklesad.
REV 7:6 Aser-e-wagangi, miliambe-gakabo wilubgan nasiklesad. Neftalí-e-wagangi, miliambe-gakabo wilubgan nasiklesad. Manasés-e-wagangi, miliambe-gakabo wilubgan nasiklesad.
REV 7:7 Simeón-e-wagangi, miliambe-gakabo wilubgan nasiklesad (12,000). Leví-e-wagangi, miliambe-gakabo wilubgan nasiklesad. Isacar-e-wagangi, miliambe-gakabo wilubgan nasiklesad.
REV 7:8 Zabulón-e-wagangi, miliambe-gakabo wilubgan nasiklesad. José-e-wagangi, miliambe-gakabo wilubgan nasiklesad. Degi, Benjamín-e-wagangi, miliambe-gakabo wilubgan nasiklesmogad.
REV 7:9 A-sorbali, an dulemar-bukidar dakdebalid. Dog-merguedba geg ebisleged: Bela dulemar bukwadi, soga-iliba dulemar-yar-baid-baidginmalad bukwamalad, bela soga-iliba dulemar-ablis-galagwenmalad bukwamalad, bela soga-iliba dulemar-baid-baid-danar-danar-bukwamalad, degi, bela soga-iliba dulemar-gaya-akar-akar-sunmakmalad bukwamalad. Wemar, ologana-asabin, degine, Sibad-Wawaad-Mimmi-asabin bukwamalad. Bela mola-sibu-yoyoi bukwamalad. E-arganmargine, ogob-gagangiid-gagan gani bukmarbalid.
REV 7:10 Wemar binnasur gorbukmalad, sogbukmalad: “Anmar-abonolegedi, anmar-Bab-Dummad-ologanagi-siidgi danikid, degi, Sibad-Wawaad-Mimmigi danikid.”
REV 7:11 Baliwiturmar belagwapa ologan-ebilis, girmar-selegan-ebilis, degine, ibdula-walabakegwad-ebilis, gwichimalad. Amar Bab-Dummad-na-e-ologanagi-siid-asabin, dulluu napase imakdemalad, Bab-Dummadse gotemalad, e-nug ogannodmalad,
REV 7:12 sogdemalad: “¡Napiragwad! Bab-Dummad degisadegu be-nug odummolesun, be yeerdakleged degisadegu gusun, be binsaed-nue-nikarbad degisadegu gusun, bega dog-nuedye sogledii gusun, be nug-nued-nikad degisadegu gusun, be-gargangued degisadegu gusun, be-gandikidid degisadegu gusun. Bab-Dummad, bela deyob degisadegu be gusun. ¡Napira deyob guo!”
REV 7:13 Geb degi, girmar-selegan-wargwen anse egichialid: “¿Be wisi wemar mola-sibu-yoyoimaladde, doamala? Wemarde, ¿bia danimala?”
REV 7:14 An ega sogded: “Dummad, be wisid, wemar, doa gumala.” Geb anga sogdebalid: “Wemala, ise-nue-wilegagwar-gudigusmaladgi nosmalad-dulemalad. Wemar, na-e-mor Sibad-Wawaad-Mimmi-e-abegi enuksamaladid, agi sibudik na e-mor imaksamalad-dulemalad.
REV 7:15 A-ular, wemar Bab-Dummad-e-ologana-asabin bukmalad. Mutikidba, ibginedba Bab-Dummad-maid-neggi ega ibmar-imaknaigu gumalad. Dule-ologanagi-siid, e-sunnad a-dulemar edarboed.
REV 7:16 A-dulemar bar ukud itogosurmalad, bar uku-ukud itogosurbalid. Degine, bar dad-ibelerba gummakosurmalad, bar neg-diopisulid itogosurbalid.
REV 7:17 Ar Sibad-Wawaad-Mimmi-ologan-abargi-siid, sibad-wawaad-edarbedamaladyob, amar-edarboed. Dianmar-burba-dulad-ukedse sedoed. Agine, Bab-Dummad bela amarga ibyanis elioed.”
REV 8:1 Sibad-Wawaad-Mimmi, gardagi-wilubgan-sogagugled-naid-bichisgu (7), nibneggi wachi-abala-wilub bogidik neg-nagusad.
REV 8:2 Geb baliwiturmar-walagugle (7), Bab-Dummad-asabin-gwichi an dakalid. Amarga gar-trompeta-walagugle uklesad.
REV 8:3 Agi, baliwitur-baid aila-gwichid-asabin gwisgunonikid. Olo-sianar sedanikid. We-baliwiturga ina-wawadikid ichesur ega uklesad, adi, bela Jesucristoʼgi-akananaimalad-e-Babse-gormaladba-mesa, ologana-asabin olo-aila-gwichid-birgi, Bab-Dummadga ogumakar ukegar.
REV 8:4 Ina-wawadikid-e-waa, Babse-gollegedba-mesa baliwitur-e-argangi Bab-Dummadse nakwided. We-Babse-gollegedi, Jesucristoʼgi-akananaimalad-goledid.
REV 8:5 Geb baliwitur sianar-susgua, Bab-Dummadga-ibmar-ogumakar-ukleged-ailagi soo-siid egi enosad. Geb napnegse meted. Agi, mala-bukidar goted, uurmakded, mar ibyeded, degi, negabandur nagunonikid.
REV 8:6 Baliwiturmar-walagugle-guedi (7), gala-trompeta-walagugle-ganimaladi ogolesokarmalad.
REV 8:7 Baliwitur-gebedi gala-trompeta-ogotegu, dii-gwamakaled, soo abeba-oburar napnegse babatiargusad. Napneggi-dula-bukwad-sogapaa-soggwen gummaksad. Sapimar-bukwad-sogapaa-soggwen gummaksabalid, degi, gagan-aradgan bela gummaksabalid.
REV 8:8 Baliwitur-bogwad e-gar-trompeta-ogochagu, yala-dummad sooba-gwabunyemai demarse babatided, degi, demar-sogapaa-naid-soggwen bela abega binnided.
REV 8:9 Degi, demargi-ibdulagan-sogapaa-bukmalad-soggwen bela burgwismalad, degi, urmar-naid-sogapaa-bukmalad-soggwen bela bibichisbalid.
REV 8:10 Baliwitur-baagwad e-gar-trompeta-ogochagu, nibneggi niisgwa-dummad-soo-gadani argwannali gusad. Diwarmar-sogapaa-mamaid-soggwengi argwannonikid, degi, dianmar-sogapaa-mamaid-soggwengi argwannonibalid.
REV 8:11 Niisgwa-argwannonikid Gagbisailadye-nugad. Diimar-sogapaa-mamai-soggwenad, bela gagbisailad naded. A-ular, bukidar dulemar burgwisad, ar ade, diimar bela-bela gagbisailad naded.
REV 8:12 Baliwitur-bakegwad e-gala-ogotegu, dad-ibeler-naid-sogapaagwad-soggwen ebulenonikid. Nii-naid-sogapaagwad-soggwen ebulenonimogad. Niisgwamar-naid-sogapaagwad-soggwen ebulenonibalid. Bela amargi sogapaagwad-soggwengi negsichid nagunonikid. Deyobi, neg-ibginedga, sogapaagwad-soggwen ega negsichii nagunonikid, degi, neg-mutikidga, deyob nagunonimogad.
REV 8:13 Deyob an dakgwisgu, sulubagi nibneggi-gukue an itoged, binnasur-soge an itoged: “Dulemar-we-napneggi-bukmalad, ¡duledar-wilesmar! Baliwitur-baigan-warbaagwad gar-trompeta-ogotemalale, we-dulemar nue-wilemaloed.”
REV 9:1 Baliwitur-ataled gar-trompeta-ogochagu, nibneggi niisgwa-gwagwen napnegse argwannar an daksad. A-niisgwaga yabe uklesad, burba-isgana-ambikued-yaa-dummad-egaed-yabe ega uklesad.
REV 9:2 Niisgwa we-yaa-dummad-egasgua, soogi-waa-ainiar-daedyob waa ainialid. We-waa, dad-ibeler sobmor imaksad. Burwa gudure nadbalid.
REV 9:3 We-waagine, sesmar ainialid, we-napnegse batenonikid. We-sesmarga, napneggi-diormar-gangued-nikadyob ega gangued uklesad.
REV 9:4 A-sesmarga soglesad, mer gagan-nebagangi-nanaid ichogoye, mer bela gaganmar-digarmalad oichobaloye, sapimarse-bakale, mer ebubaloye. Unnila, dulemar-e-bebegi-Bab-Dummad-wilubgan-naisulidbi, be ebugoye.
REV 9:5 Ar a-sesmarga soglesbalid, melle dulemar be oburgoye. Unnila, nii-walatar ega nunmaked be ukoye. We-nunmakedi, dior-emar-guchar-nunmak-itolegedyobid.
REV 9:6 A-ibagangi, dulemar burgwebi gudagoenad, degi-inigwele, gwen burgosurmalad. Ar burgwebi-gumaloen-inigwele, burgwed egi bangudoed.
REV 9:7 We-sesmar-daklegedi, molimar-urwenasokalir guagwar-ambikudamaladyob dakleged. E-nonomargi, ologurgin-siiyob dakleged, e-wagarmardi, dule-wagaryob dakleged.
REV 9:8 E-sailagiamar, omegan-sailagiayob dakleged. E-nugarmardi, achumigur-nono-wawaad-e-nugarmaryob dakleged.
REV 9:9 We-sesmar-e-binasgarmargi, esgoroyob bela egi ebilis nanaid. E-sakan-uurmakedi, igi molimar urwedgi-abarmaknadapir-gole, deyob goled.
REV 9:10 E-bunnu, dior-bunnuyob nikad, degine, iko nikbalid. E-bunnu-gangued nii-walatar dulega nunmaked-uked nikad.
REV 9:11 We-sesmar-e-idudanikidi, burba-isgana-ambikued-yaa-dummad-baliwitur gued. A-baliwitur, sesmar-e-reyga gumaid. A-dummadde, Hebreo-gayabali, Abadónʼye bileged. Griego-gayabardi, Apoliónʼye bileged. A sogleged: “Dulemar-obelogedye.”
REV 9:12 Beedse-dummad-wileged-soggwen nasad. We-sorba, beedse-dummad-wileged amba sogabo danikid.
REV 9:13 Baliwitur-nergwad (6) gala-trompeta-ogochagu, Babga-ibmar-ukleged-oloaila-bebe-walabakegwad-imbaba gayaburba-sunmak an itosad. A-aila, Bab-Dummad-asabin siid.
REV 9:14 Gayaburba-sunmaked weyob baliwitur-gar-trompeta-ogochadga soge an itosad: “Baliwiturmar-walabakegwad diwar-dummad-Éufratesʼgi-edillebukwad be esikye.”
REV 9:15 Deyob baliwiturmar-walabakegwad-atinnar-bukwad esiklesmalad. We-baliwiturmarde, dulemar-we-napneggi-sogapaagwad-bukwad-soggwen-oburgwega bato guagwar bukwamaladid. Ar amar, a-wachiga, a-ibaga, a-niiga, a-birgaga, dulemar-oburgwega guagwar bukusmaladid.
REV 9:16 Moli-birgi-sordamar-siidi, miyon-dulataled-ilabo-merguye (200,000,000) an itosad.
REV 9:17 An negburgan-dakdegu, weyob an molimar daksad, e-dulemar-birgi-simalad weyob an daksabalid: Sordamar-na-e-binasgar-odukunaidi soo-ginnitibiyob dakleged, arad-akwa-jacintoʼye-nugadyob dakleged, degine, gordikid-azufreʼgiidyob dakleged. Molimar-e-nono achumigur-nono-wawaadyob nikad, e-gayagi soo, waa, degine, azufre, ainimai an daksad.
REV 9:18 Dulemar-sogapaagwad-bukwad-soggwen, we-bonimar-sogapaagwad-moli-gaya-yaba-ainisadgi burgwismalad: Soo-ainisadgi, waa-ainisadgi, degi, azufre-ainisadgi, burgwismalad.
REV 9:19 Ar molimar-e-gangued e-gayagi, degine, e-bunnugi siid. Ar e-bunnu naibe-e-nonoyob-nikad. Ar agi dulemar-naibi-imakdaed.
REV 9:20 Dulemar, we-bonimargi-burgwissurmaladi, e-daed-ogwaega, gwen e-isguedga bukib-itossurmalad. Niamarse-goled gwen iessurmalad. Or-nuchugi-sobarmaladse-goled gwen iessurmalad, mani-sobarmaladse-goled gwen iessurmalad, esgoro-gordikid-sobarmaladse-goled gwen iessurmalad, akwa-sobarmaladse-goled gwen iessurmalad, suarmar-sobarmaladse-goled gwen iessurmalad. Ar we-bab-dummaganga-imaklebukwad aku atakmalad, geg dule-itomalad, geg nanamarbalid.
REV 9:21 We-dulemar-burgwissurmaladi, dule-oburgwismaladgi gwen nunmak itossurmalad. Emargi-ina-isgana-imakedgi gwen bangussurmalad, abirgunagwarsuli-negsichigi-yoleged gwen iessurmalad, degine, atursaedgi gwen bangussurmarbalid.
REV 10:1 Degi nibneggi baliwitur-baid-gala-ibed aidedani an daksabalid. A-baliwitur mogirgi-atuar aidedanikid. E-nonogi sue maid, e-wagar dad-ibeleryob gaed, degine, e-malimar soowala-gwabunye-gwichiyob daklemalad.
REV 10:2 E-argangi garda-bipigwad egaar ganikid. E-mali-nued demar-birgi ogwichisad, e-mali-sapileddi, napagi ogwichisad.
REV 10:3 Geb we-baliwitur achumigur-nono-wawaad uurmakeyob binnasur goted. Deyob binnasur-gochagu, mala-ilagugled (7) gollomakded, sunmakded.
REV 10:4 Mala-ilagugled-sunmaksad (7) an narmaksokalinad. Agi, nibneggi gayaburba anga weyob soged: “Melle be mala-ilagugled-sunmaksad narmako. Ibmar-sogsad bela be odukuar sedio.”
REV 10:5 Geb baliwitur-demar-birgi, napagi-annagwichidi, niba e-argan-nued onakwided.
REV 10:6 Weyob ise-sogar sogded: “Bab-Dummad-degisadegu-birga-irba-maid, nibneg-nasiksad, napneg-nasiksad, demar-nasiksad, degi, bela amargi ibmar-bukwad urbisad. A-Bab-Dummad-nuggi napira an soged, we-ibmar-guoed-e-ibagandi bato warmaksad.
REV 10:7 Baliwitur-sogagugled-sunmakdedgi (7), gar-trompeta-ogotele, agi Bab-Dummad iduar igi-ega-arbamaladga, degi, e-gayaburba-barsogmaladga ibmar sogsagusa, bela a-ibmar gunonisunnoed. A-igar odukuar mainad.”
REV 10:8 Nibneggi-gayaburba-sunmak-an-itosadi, gannar anga sunmakalid, anga sogded: “Be nae. Baliwitur-demar-birgi-degi-napagi-annagwichid-e-argangi garda-bipigwad-argaar-maid be sunae.”
REV 10:9 Geb degi, a-baliwiturse an nadsunnad, an ega sogdapid: “Anga garda-bipigwad udaye.” Geb baliwitur anga sogded: “Be sue, be gunne. Be guchale, be-gayagi achanisyob be ochii itogoed. Be-sabangindi gagbire be itogoed.”
REV 10:10 Garda-bipigwad baliwitur-e-argangi-maid an susgua, geb an guchasunnad. An guchagua, an gayagi achanisyob ochii an itosad. An-sabanse ubosgudi, an-saban gagbire naded.
REV 10:11 Geb anga soglesad: “Bab-Dummad-ibmar-bega-sogoed be owisogergebed. Bukidar dulemar-baid-baid-danar-danar-bukmalad, dulemar-yar-baid-baidgi-bukwamalad, dulemar-gaya-akar-akar-sunmakmalad-bukwamalad, degi, reymar-bukidar-mamaid, be owisogergebed.”
REV 11:1 Geb suar nargammugii-dakle ibmar-wilubsaega anga uklesad. Geb anga soglesad: “Be gwisgu. Babse-goled-neg be wilubsa, Bab-Dummadga-ibmar-ukleged-e-aila be wilubsabalo. Be ebisbalo, bule melu dulemar a-yagine Bab-Dummadse gorbukmala.
REV 11:2 Ar Babse-goled-neg-magaba neg-imba-naiddi mer be wilubsao, ar adi, Judíoʼsurmaladga uklesad. A-dulemar nii-waladulabo-gakabo (42) sabsur Neggwebur-Islidikid-imakmaloed.
REV 11:3 “Degine, an-barsogmalad an warbo barmidoed. Bemar-iduar iba-miligwen gaka-dulataled-ilabo gaka-dulapaa (1,260) wile-itoged-mor-yoi ibmar-gumaloedgi sunmakdimaloed.”
REV 11:4 Wemar-warbo-an-barsogmaladgi an bemarga sunmaksadi, we-olivo-sapi-warbogwad gued. Degine, gwallu-sied-gwabogwad we-napneg-e-Dummad-asabin-gwichid gued. Wemar, an-barsogmalad gumalad.
REV 11:5 Ar dule wemar-warbogwad-naibisabi-sogele, we-warbogwad e-gaya-yaba-soo-ainidagoedgi bela e-isdarmalad-ogumakoed. Ar deyobi, dule-wemar-ebogwad-naibi-imakbied, gummakar burgwedsegad.
REV 11:6 Wemar-warbogwad nibneg-ediega gangued-nikmalad, adi, emar-sunmakdiid-ibagangi mer dii-wiegar. Deginbali, dii abega-obinyega gangued nikamarbalid. Degine, amar we-napneggi boni-bulegan-galagwensulid, ilabigwa e-itolegedba onibaliga, gangued nikamarbalid.
REV 11:7 Ar wemar-warbogwad-sunmakdimalad-e-ibagan bergunonikile, yaa-dummadyaba burba-isgana-ambikuedgi ibdula-unid nodagoed. Geb amargi bila onononikoed. We-ibdula-unid nakoed, we-dule-warbogwad-oburgoed.
REV 11:8 Dule-warbogwad-e-mui neggwebur-dummad-igargi metemaloed. A-neggwebur burbar Sodoma, degine, Egiptoʼye, bileged. Agi anmar-Dummad nakrusgi-bioklegar oburgwilesmogad.
REV 11:9 Dulemar-baid-baid-danar-danar-bukwamalad, dule-ablis-galagwenmalad-bukwamalad, dule-gaya-akar-akar-sunmakmalad-bukwamalad, dule-yar-baid-baidginmalad-bukwamalad, amar ibapaa-abala, we-dule-warbogwad-e-mui dakmaloed, degine, wemar, dule gwen digega imakosulid.
REV 11:10 Dulemar-we-napneggi-bukmalad Bab-Dummad-gayaburba-barsogmalad-warbogwad-burgwisadgi yeer itodmaloed, iba-onodmaloed. Degine, weligwar-itogedba na muchub-muchub ibmar-uknanai gumaloed, ar ade, wemar-warbogwad, Bab-Dummad-Igargi-sunmakdigusgu, dulemar-we-napneggi-bukmalad-naibi-itodii imaksamalad.
REV 11:11 Ibapaa-abalad-sorbali, Bab-Dummad burba-dulad barmialid, we-dulemar-warbogwadgi ubononikid. Geb we-dulemar-warbogwad gwisgudmalad. Dulemar-weyob-daksamaladi, bela-dobee-ito nadmalad.
REV 11:12 Geb wemar-warbogwad, nibneg-akale, binnasuli gayaburba-gole itosmalad. Ega weyob soged: “Niba be nakwedamar.” Geb wemar-warbogwad mogir-abalagi nibnegse nakwidmarsunnad. Degine, bela-e-isdarmalad wemar-warbogwad-nibnegse-nakwided daksamalad.
REV 11:13 A-wachigi negabandur-dummad nagunonikid. A-neggwebur-e-neg-sogambegwad-iliba gwensak (10%) bibichisad. A-negabandur-nagusadgi dulemar-miligugle (7,000) burgwismalad. Degine, dule-baigandi dobee-ito nadmalad, amar Bab-Dummad-Nibneggi-Maid-e-nug ogannodmarsunnad.
REV 11:14 Beedse-we-nunmaked-sogbogwad nasad. Emigindi, beedse-nunmaked-sogapaagwad bato emisgwasaar danibaloed.
REV 11:15 Baliwitur-gugled (7) e-gala-trompeta-ogotegu, nibneggi gayaburbamar-bukidar gole an itosad. Weyob sogmalad: “We-napneggi-negselemaid, bela anmar-Bab-Dummadgadga gunonikid, degi, E-Cristoʼgadga gunonibalid. Degisoggu, degisadegu, amar negdakmai guoed.”
REV 11:16 Geb degi, girmar-selegan-e-dulagwen-gakabake (24) e-ologangi Bab-Dummad-asabin-bukmaladi, bela napase e-wagar dulluu imakdemalad, Bab-Dummad-e-nug ogannodmalad,
REV 11:17 sogdemalad: “Bab-Dummad-Bur-Birigined, be bela gangued-nika maidid. Be dula gudiidid, dula gudigusadid. Ar bela be gangued-susadba, anmar bega dog-nuedye sogmalad. Emigindi, bela na be negdakmaisunnad.
REV 11:18 Geb degi, yar-baid-baidgi-bukmalad sae-itodmalad. Be-emar-sabsur-odurdakoed-e-ibagan nonisunnad. Be dule-burgwismaladga-igar-itogoed-ibagan warmaknonisunnad. Be-maigan-be-gayaburba-barsogmalad, begi-akananaimalad, degine, be-dobee-nanadimalad-bennuked-ibagandi nonisunnad. Wemar, dummagandibe, burwiganadibe, amar-bennuked-ibagandi nonisunnad. Degine, dule-we-napnegginmalad-ichodimalad-osuloged-ibagan nonibarsunnad.”
REV 11:19 Degine, nibneggi Babse-goled-neg argade an daksad. Agine, Babse-goled-neg-yagi Bab-Dummad-Dadganbo-Igar-Mesisad-Ulu-siidi mag-dakle-sii an daksad. Geb mala ibyided geb uurmakded, gollomakded, negabandur naguded. Geb dii-gwamakaled-gwaburwisur-babatide an daksabalid.
REV 12:1 Degine, nibneggi ibmar-wilub-dummad daklealid: Ome-wargwen dad-ibeler-mola yoid, e-mali-urba nii naid, degine, e-nonogi ologurgin-niisgwa-gwaambe-gakabo-nikad (12) siid.
REV 12:2 Omegwa gurgin-nika gudiid. E-ibagan mossoggu, nue e-bonigan-itoalidba, ise-ogormakar maid.
REV 12:3 Geb nibneggi wilub-baid daklearbalid. Achu-simudubaled-ginnid noalid. Nono gwagugle (7) nikad, bebe ambe (10) nikbalid, degine, e-nonomar-irba ologurgin bukwabalid.
REV 12:4 Achu-simudubaled, e-bunnugi niisgwamar-niba-nanaid-sogapaagwad-soggwen ebipisad, geb napnegse obatisad. Geb achu-simudubaled ome-ega-mimmi-uklesokalid-asabin gwisgunonikid, adi, ome-e-mimmi-megnonikir, gunnegar.
REV 12:5 Omega susugwa uklenonikid. We-susugwa bela yar-mamaidgi, sabsur-gandikidba negsemai guoed. We-machigwa ikiir sulenonikid. Bab-Dummad-e-ologanagi-siid-asabin selesad.
REV 12:6 Omegwadi nega-dulesulidganba wakited. Bia Bab-Dummad-ega-neg-guagwar-sisadse wakited. Adi, agi iba-miligwen gaka-dulataled-ilabo gaka-dulapaa (1,260) ome-akwedii imakmalagar.
REV 12:7 Geb degine, nibneggi urwed-dummad nagunonikid: Miguel, degi, Miguel-e-baliwiturmar, achu-simudubaled-ebo urwenai gusad. Achu-simudubaled, degine, Achu-simudubaled-e-baliwiturmar, abin-imaksamarmogad.
REV 12:8 Degi-inigwele, wemar, urwenanaidgi gwen Miguelʼgi nakwissurmalad. Degisoggu, nibneggi onolesmarsunnad.
REV 12:9 Degidbali, achu-simudubaled-dummad barmelledsunnad. We-achu-simudubaledde naibe-gebesailadid, nia-saila-Satanásʼye nugad. We-nia-saila-Satanás, dulemar-bela-napneg-naidgi-yardakdiid-duled. We-achu-simudubaled we-napnegse egwadlenonisunnad, e-baliwiturmar bela eba egwallenonimarmosunnad.
REV 12:10 Geb nibneggi gayaburba binnasur gole an itosad. Weyob soged: “Emigindi, anmar-Bab-Dummad-e-abonoged-igar nonisun. Anmar-Bab-Dummad-e-gangued nonisun. Anmar-Bab-Dummad-e-negsemaid nonisun. E-Cristo-e-gargangued nonisun. Ar ade, nia-saila, Bab-Dummad-asabin anmar-gwenadgangi mutikidba, ibginedba, isdar-sunmakdidaedi, onolessunnad.
REV 12:11 Ar anmar-gwenadgan, Sibad-Wawaad-Mimmi-ablisba nia-sailagi obichamalad. Gayaburba-napiragwadgi-sunmakdigusmaladgi nia-sailagi obichamarbalid. Ar anmar-gwenadgan naibi-itoged bai gwen itossurmalad. Ar burgweye-soger, guagwar gudigusmalad.
REV 12:12 Degisoggu, nibnegmar be wergumar. Bemar, nibneggi-bukmalad, wergumarsun. Bemar, napneggi-bukmaladdi, demargi-bukmaladdi, ¡be duledar-wilesmar! Ar ade, bemarse nia-saila nue-urwedigine aidenonikid. Ar nia-sailade na wisid, e-ibagan ichee napi naid.”
REV 12:13 Achu-simudubaled napnegse egwalles na itoargua, ome-susugwa-ega-uklesad-baregitesunnad.
REV 12:14 A-omega sulubagi-dummad-e-sakan-warbo ega uklesad, adi, naibe-idu, na e-negse, nega-dulesulidganba gukuegar. Agi birgapaa-abala akwemaloed.
REV 12:15 Naibe e-gaya-yaba diwaryobi omegi dii eoalid, adi, ome diiba selegegar.
REV 12:16 Degi-inigwele, napa ome-bendaknonikid. Napa argaded, adi, achu-simudubaled-e-gaya-yaba-diwar-eosad napa-yaba ubogegar.
REV 12:17 Geb achu-simudubaled omegi nue-sae-itoded. A-ular, ome-e-mimmi-baiganse urwenadsunnad. Amar Bab-Dummad-Igar-Mamaidba-nanadimalad, degi, Jesucristo-Igar-sogsadba-nue-nanadimalad. Wemarse, urwenadsunnad.
REV 12:18 Geb achu-simudubaled demar-gaka-naba gwisgusad.
REV 13:1 Geb an dakdebalid, ibdula-unid-wargwen demargi-dani an dakded. A-ibdulade nono-gwagugle (7) nikad, degine, bebe-warambe (10) nikabalid, degine, e-bebe-irba ologurgin-siidbibalid, degine, e-nono-irba nuga-buled Bab-Dummad-nuggi-dodoar narmakar nanaid.
REV 13:2 Ibdula-unidi achu-barbadyob dakleged. E-naga, wiob-nagyob dakleged. E-gayadi, achumigur-nono-wawaad-gayayob dakleged. Achu-simudubaledi, e-nuggi-ibmar-imaked-igar ibdula-unidga uksad. Ibmar-gegerdakleged-imaked-igar, ibdula-unidga uksabalid. Deginbali, negseed-igar ibdula-unidga uksabalid.
REV 13:3 An daksad, e-nono-gwagwena nue-ibitos dakleged, burgwednaga-gusa dakleged. Emidi, e-nono-nue-dummad-oitolesad nugusad. Degidbali, bela dulemar-napneggi-bukmalad geger dakdemalad, bela we-ibdulaba nagudmarsunnad.
REV 13:4 Bela dulemala, achu-simudubaled ibdula-unidga-gangued-uksadba, achu-simudubaled-e-nug odummodmarsunnad. Degi, dulemar, ibdula-unid-e-nug odummodmarbalid. Sogdemalad: “¿Doa we-ibdula-unidyobsunna? ¿Doa ebo urwosunna? Dule ebo-urwed, sated.”
REV 13:5 Deginbali, ibdula-unidga Bab-Dummadgi-bule-bule-sunmaked ega igar-uklesad, Bab-Dummadgi-galagwensuli-sunmaked ega igar-uklesbalid. Deginbali, ibdula-unidga, nii-dulabo-gakabo (42) e-itolegedba na ibmar-imakbied-imakega ega gangued uklesbalid.
REV 13:6 Ibdula-unid sunmakdegu, Bab-Dummadgi ise-sabsur gwisguar sunmakded, Bab-Dummadgi sunnasur-sunmakded, Bab-Dummad-neggi sunnasur-sunmakded, degine, nibneggi-bukmaladgi sunnasur-sunmakdebalid.
REV 13:7 We-ibdula-unidga igar-uklesbalid, dulemar-Jesucristoʼgi-akananaimalad-ebo urwega, degi, egi nakwega. Deginbali, ibdula-unidga gangued-uklesbalid, adi, wemar-negsemai guega: Bela dule-ablis-galagwen-bukwamalad-semai guega, bela dule-baid-baid-danar-danar-bukwamalad-semai guega, bela dule-gaya-akar-akar-sunmakmalad-semai guega, bela dule-yar-baid-baidgi-bukwamalad-semai guegar.
REV 13:8 Dule-bela-we-napneggi-bukwamalad, ibdula-unid-e-nug odummodmalad. We-dulemar-nug, Sibad-Wawaad-Mimmi-e-gardagi, naisulid. We-garda, dulemar-dula-gudiguoed-gardad. We-garda, sibad-wawaad-mimmi napneg-nasiklesad-akale-oburgwilesad-e-gardad.
REV 13:9 Ar dule nue-ibmar-itobiele, nue itogo.
REV 13:10 “Ar dulega esgaryagi-melleged maidibe, esgaryagi mellegodo. Ar dulega es-suidgi burgwed maidibe, es-suidgi oburgwilegodo.” Wegine, dulemar-Jesucristoʼgi-akananaimalad gwagegi-bai-itosulid daklesiid, Jesúsʼgi-nue-bensuli-nanadiid, daklesibalid.
REV 13:11 A-sorbali, ibdula-unid-baid napagi-dani an daksabalid. A-ibdula sibad-wawaad-sapingwagwad-e-bebeyob-dakle bebe-warbo nikad, degi-inigwele, achu-simudubaledyob sunmaked.
REV 13:12 Degine, we-ibdula-sorbalid, gebe-ibdula-unid-e-gangued-nikadba ibmar imakalid. We-ibdula-sorbalid, we-napneg, degi, bela dulemar-we-napneggi-bukmalad ibdula-nono-nue-naibigusad-nugusad-e-nug-odummogega, imaksad.
REV 13:13 Deginbali, ibdula-sorbalid-bebe-warbo-nikad, ibmar-wilubgan-dakledisurmalad-dummagan imaked. Soose-bakale, nibneg-akar napnegse dulemar-asabin odeged.
REV 13:14 Degine, ibdula-bebe-warbo-nikad, ibdula-gebed-gangued-ega-uksadba, ega ibmar-wilubgan-dakledisurmalad imakdisunnad. Abali, dulemar-we-napneggi-bukmalad yardakdisunnad. Degine, we-ibdula-sorbalid, ibdula-es-suidgi-naibigus-gusad-gannar-nugusad e-wilub-sobega dulemar-imaksad, adi, we-ibdula-gebedgi binsamalagar.
REV 13:15 Ibdula-sorbalid-bebe-warbogwad, ibdula-gebed-e-wilub-soblesad-sunna-dula-imakega ega igar uklesad, adi, we-ibdula-wilub nabir sunmakegar. Deginbali, bela ibdula-wilub-e-nug-odummosurmalad-oburgwega ega igar uklesbalid.
REV 13:16 Ibdula-bebe-warbogwad, deyobi, bela dulemar-burwigana, dummagan, mani-ibmala, wilegana, dule-maiga-gudimalad, maiga-gudisurmalad, wemar-e-argan-nuedgindibe, e-bebegindibe, wilub-nasikega imaknonibalid.
REV 13:17 Degine, dule-we-wilub-naisulid gege ibmar baked, gege ibmar ukmarbalid. Unnila dule-ibdula-e-nug-e-wilub-naidbi, e-ebisleged-nug-naidbi, nabir ibmar baked, nabir manigi ibmar ukmarbalid.
REV 13:18 Wegine, nue-binsaed-nikadaed naido. Ar dule nue mag neg-itogele, sunna ibdula-ebised-naid onogodo, ar wede ebisleged-naid, dule-nugad. E-ebisleged-nug-naid wedid: Dulataled-ilanergwa gaka-dulapaa-gaka-nergwa (666).
REV 14:1 Geb sorba an dakdebargu, Sibad-Wawaad-Mimmi Sión-yargi gwichi an dakded. Dulemar mili-dulagugle-gakabake (144,000) eba gwichimalad. We-dulemar, e-bebegine, Sibad-Wawaad-Mimmi-nuga, degi, e-Bab-Dummad-nuga, narmakar naimalad.
REV 14:2 Geb degi, nibneggi gayaburba diwar-dummad-aryogwichidyob-gole, mar-binnasur-goledyob-gorbali, an itosad. Gayaburba-gole-an-itosadi, dulemar-gar-arpa-ogormalad-ogorbukwadyob an itosad.
REV 14:3 Wemar, ologana-asabin, degi, ibdula-walabakegwad-asabin, degi, girmar-selegan-asabin, namaked-binid namakbukmalad. We-namaked-binid gege dule-baigan durdaked. Unnila dulemar-mili-dulagugle-gakabake-we-napneggi-abonolesmaladbi (144,000), we-namaked wismalad.
REV 14:4 Wemala, omeganse-gochasurmaladid, na san-swilidik sedigusmaladid. Wemar, Sibad-Wawaad-Mimmi bia naoe, eba naddamalad. Wemar-insega Bab-Dummadgadga-gumalaga, degi, Sibad-Wawaad-Mimmigadga-gumalaga, dulemar-abargi abonolesmalad.
REV 14:5 Degine, wemar gwen gakansadii gussurmalad. Ar Bab-Dummad-asabinni, isgued gwen egi-nai daklessurmalad.
REV 14:6 Degine, nibneggine baliwitur-wargwen gukudii an dakarbalid. A-baliwitur Bab-Gayaburba-Nued-geg-bergued dule-napneggi-bukmaladga-sunmakega sediid. We-dulemarga: Dule-bela-yar-baid-baidgi bukmaladga, dule-ablis-galagwenmaladga, dule-gaya-akar-akar-sunmakmaladga, degi, dule-baid-baid-danar-danar-bukmaladga, Bab-Gayaburba-Nued-geg-berguedi sediid.
REV 14:7 Baliwitur-gukudiid binnasur sogdiid: “Bab-Dummad-dobee be nanamar, e-nug be ogannomar. Ar e-igar-nabogoed-ibagan omosad. Bab-Dummad-nibneg-nasiksad, napneg-nasiksad, demar-nasiksad, dii-gammumar-mesisad, a-e-nug be odummomarsun.”
REV 14:8 A-sorbali, baliwitur-baid nonikid, binnasur sogded: “¡Babilonia-neggwebur-dummad bergussun! ¡Obelolessun! ”We-neggwebur, bela-dulemar-yar-baid-baidgi-bukmalad-isguega imaksad. We-neggwebur, e-ibmar-isganagi-mumguega, negsichigi-abirgunagwarsuli-gudiguega, yar-baid-baidgi-bukwamalad-imaksad.”
REV 14:9 Geb degi, baliwitur-baagwad nonimogad. Binnasur sogdemogad: “Ar dule, we-ibdula-unid-e-nug odummogele, we-ibdula-e-wilub-sobaled-e-nug odummogele, degine, e-bebegi e-wilub-nasikdibe, e-argangi e-wilub-nasikdibe,
REV 14:10 we-dulegi, noggi vino-siid-murudeyobi, Bab-Dummad-bela-bela-e-urwed egi yolenonikoed. Ar Bab-Dummad-bela-bela-e-urwedi, noggi-vino-enoles-siiyobi, bato guagwar siid. Degisoggu, we-dule, baliwiturmar-gwage-swilidikmalad-wagab, degi, Sibad-Wawaad-Mimmi-wagab, soo-azufreʼba-mesa-siid-yagi bela-bela wilesii guoed.
REV 14:11 ”E-wilesiguoed-e-waa-bupurmaksiid degisadeguoed, gwen bogilesii guosulid. ”We-dulemar-ibdula-unid-e-nug-odummomaladga, degi, a-ibdula-unid-e-nug-wilubgan-narmakar-naidga, obunnoged gwen nikuosulid. Bane-bane oibomai, degisadegu wilesii gumaloed.”
REV 14:12 Wegine, dule-Jesucristoʼgi-akananaimalad-e-gangued daklegoed. Wemar, Bab-Dummad-Igar-Maidba-nanadimalad, Jesúsʼgi-bensuli-gudimalad, gwen-galakubisuli abeleged.
REV 14:13 Geb agi, nibneggi gayaburba anse gole an itosad, anga soged: “Be narmak: ‘Emi-onodedgi dule-Bab-Jesúsʼba-nai-burgwemaloedgi, nued binsalesad.’ ” Bab-Burba soged: “Eye. We-dulemar, boni-dummagan-abargi-arbanai-gusmaladgi obunnomaloed. Ar wemar ibmar-nuegan-imaksadba, Bab-Dummad ega ibmar-nuegan-uknai guoed.”
REV 14:14 An dakdebargu, mogir-sibudikid nai an dakded. Mogir-birgi Dule-Machiyob-dakle siid. E-nonogi ologurgin siid, e-argangi esa-dopegwad-nugar-ibed ganikid.
REV 14:15 Degine, Babse-goled-neggi baliwitur-baid noarbalid, binnasur goted, dule-mogir-birgi-siidga sogded: “Be esa-dopegwad-nugar-ibed odoge, be ibmar-gwag wee. Ar ibmar-gwag-weed-iba omosad. Ar ibmar-gwag-napneggi-naid, bato nue-gores naid.”
REV 14:16 Degine, dule-mogir-birgi-siidi e-esa-dopegwad-nugar-ibed napneggi odosad, geb napneggi-ibmar-gwag-naid welessunnad.
REV 14:17 Degine, baliwitur-baid Babse-goled-neg-nibneggi-siidgi noarbalid. A-baliwitur amba esa-dopegwad-nugar-ibed-gani noarbalid.
REV 14:18 Bab-Dummadga-ibmar-ukleged-e-ailagi baliwitur-baid noarbalid. A-baliwitur soo-e-sailad. We-baliwitur binnasur dule-esa-dopegwad-nugar-ibed-ganikidse goted. Ega sogded: “Be esa-dopegwad-nugar-ibed napneggi odoge. Uvaʼmar-napneggi-nanaid be wee. Ar uvaʼmar bato nue-gores nanaid.”
REV 14:19 Geb degine, baliwitur esa-dopegwad-nugar-ibed napneggi odosad. Geb napneggi uvaʼmar-e-dubagi-nanaid wesad. Geb degi, uva-eguruleged-yaa-dummadse uva-mided. We-yaa-dummadi, Bab-Dummad nue-dummad-e-urwed-e-wilub gued.
REV 14:20 Uvaʼmar neggwebur-dikarba egurulesad. Geb uvaʼmar-egurulenaidgi abe-aryoalid. We-abe, kilómetro-dulataled-ilapaa (300) mata-suguewilubbid, degine, daligwen-nibgu sigisad. Deyob abe neg-gasa nagusad.
REV 15:1 Geb nibneggi wilub-dummad-baid an daksabalid, geger dakleged: Baliwiturmar-walagugle (7), boni-sogagugled napi sedimalad. A-bonimarbali, Bab-Dummad-bela-bela-nue-urwed napi-oyolegoed.
REV 15:2 Degine, demar-isbe-daledyob-dakleged sooba-oburaled an daksabalid. We-isbe-birgi dulemar, ibdula-gebedgi-obichamalad, e-wilub-sobaledgi-obichamalad, degine, e-ebised-nuggi-obichamalad, gwismalad. Wemar, gar-arpa-Bab-Dummad-ega-uksad-gani, gwichimalad.
REV 15:3 Amar, Bab-Dummadga-arbaed-Moisés-e-namaksad namakbukwad, degine, Sibad-Wawaad-Mimmigi-namaklegedgi namakbukwamalad. Weyob namakbukwad: “Bab-Dummad-Bur-Birigined-Bela-Gangued-Nikad, be-ibmar-imakedi, nue-dummarbad. Be ibmar-imakedi, geger-daklegedid. Be, dulemar-yar-baid-baidgi-bukmalad-e-Reyd. Igar-innikigwad, igar-napiragwad be imakbalid.
REV 15:4 Bab-Dummad, ¿doa be-dobguosuli? ¿Doa be-nug ogannogosuli? Ar bebi unnila dule-isligwaledid. Bela dule-yar-baid-baidgi-bukmalad bese nonimaloed. Amar, Bab-Dummad-be-dakedba, be-nug ogannomaloed. Ar be igar-innikigwad-imaked be oyononikid.”
REV 15:5 We-ibmarmar-gusad-sorba an atakdegu, nibneggi Babse-goled-neg argade an daksad. We-negde, Bab-Dummad-Israel-dulemar-na-ebo-Igar-Mesisad-negad.
REV 15:6 Babse-goled-neggi baliwiturmar-walagugled (7) bonigan-bulegan-sogagugle-nika (7) ainiarmalad. A-baliwiturmar mola-sibu-nued-dakarmakaled-yoi noarmalad. Degine, e-binasgarba, e-molidub ber olobi naimarbalid.
REV 15:7 Ibdula-walabakegwad-wargwen, baliwiturmar-walagugledga (7) olo-noga-gwagugle uksad. We-olo-nogamar Bab-Dummad-degisadegu-dulagudiid-e-urwed ena bukwad.
REV 15:8 Degine, Babse-goled-neg Bab-Dummad-e-yeerdakleged-nikadba, e-gangued-nikadba, waa-ena sigisad. Dulemar Babse-goled-negse gege doged. Geb Baliwiturmar-walagugled (7) bela bonigan-sogagugle-sediid-berguedse, dogmaloed.
REV 16:1 Geb degi, Babse-goled-neg-akar baliwiturmar-walagugledse (7) gayaburba-binnasur-gole an itosad. Ega weyob soged: “Be namar. Bab-Dummad-urwed-noga-gwagugle-ena-siidi (7), napnegse be eonamar.”
REV 16:2 Baliwitur-gebed nadgua, e-noga napneggi eodapid. Bela dule-ibdula-unid-e-wilub-nanai-gudimaladgi, ibdula-unid-e-wilub-sobaled-e-nug-odummodimaladgi, yaa-dummagan-nunumakesailadi, e-sangi ainialid.
REV 16:3 Baliwitur-bogwad e-noga demargi eodapid. Geb demar dule-oburgwilesmalad-ablisyob binnided. Degisoggu, ibdurgan-demargi-bukmalad bela burgwismarsunnad.
REV 16:4 Baliwitur-baagwad e-noga diwarmargi, degine, dii-gammumargi eodapid. Degisoggu, diwarmar, degine, dii-gammumar ablisga binnidmarsunnad.
REV 16:5 Geb baliwitur-dii-e-saila soge an itosad: “Bab-Dummad-Isligwaled, bedi napiragwadid. Be gudiid, be gudigusadid, be gudigubaloedid. Be-emarga-igar-nabogedi, innikigwadba be weyob imaked:
REV 16:6 Ar dule-be-isdarmaladi, bukidar begi-akananaimalad oburgwismalad, bukidar be-gayaburba-barsogmalad-e-abe eosmarbalid. Degisoggu, amar emigindi abe-gobega be imaksamosunnad. Ar na e-ibmar-imaksadba, deyob gusmarmosunnad.”
REV 16:7 Baliwitur-baid, Bab-Dummadga-ibmar-ukleged-aila-akar soge an itosbalid: “Eye, Bab-Dummad-Bur-Birigined-Bela-Gangued-Nikad, be-igargan-nabogedi, igar-napiragwadid, igar-innikigwadbi be imaked.”
REV 16:8 Baliwitur-bakegwad e-nog dad-ibelergi eodapid. Soogi-dulemar-ogumakega ega igar-uklesad.
REV 16:9 Dulemar, neg-diopisulidba gummadmalad. Degite, gwen gwage gwagsasurmalad. Bab-Dummad-nug gwen ogannodsurmarbalid. Aka bur Bab-Dummad-nuggi isdarsunna sunmakdemalad. Ar Bab-Dummaddi we-bonimar-obelogega gangued nikad.
REV 16:10 Baliwitur-ataledi ibdula-unid-gebed-e-ologanagi e-nog eodapid. We-ibdula-unid-e-negdakmaidgi bela negsichid nagunonikid. Degine, dulemar nunmakedbali, gwabin gutemalad.
REV 16:11 Dulemar nunmak-itogedba, degine, yaa-dummagan-nikadba, Bab-Dummad-nibnegginedgi dodoar egi isdar sunmakdemalad. Degi-inigwele, e-ibmar-isgana-imaksadba bukib itossurmalad.
REV 16:12 Baliwitur-nergwadi (6), e-noga diwar-dummad-Éufratesʼye-nugadgi eodapid. Geb diwar-Éufrates dinguded. Degidbali, reymar-dad-nakwed-dorgan dinnagwadgi-nabir-obakega deyob dingusad.
REV 16:13 Deginbali, achu-simudubaled-gaya-yaba, ibdula-unid-gaya-yaba, degine, Bab-gayaburba-barsoged-nabirsulid-gaya-yaba, burba-isgana-sogapaa ammanooyob-dakle ainiar an daksad.
REV 16:14 We-noomar niaburbamalad, sunna ibmar-wilubgan-dakledisurmalad imakmalad. Amar bela-napneg-ugakse reymar-mamaid-danar-oambikumalaga nadmalad, adi, Bab-Dummad-Bur-Birigined-e-ibagi bila-onomalagar.
REV 16:15 Cristo soged: “Nue salakarmar. Ar dule-atursaedyobi ukiagwar an nonikoed. Ar dule na guagwar-gudiir, e-mor na guagwar sediir, we-dulegi nued-binsalesdo. Ar deyob-gudiile, uka-swiri gudiguosulid, dulemar-abargi bingeguosulid.”
REV 16:16 Burba-isgana-warbaagwad, Hebreo-gayaba neg-Armagedónʼye-nugadgi bela reymar-danar oambikunonikid.
REV 16:17 Baliwitur-gugledi (7), e-noga burwagi eodapid. Geb nibneggi Babse-goled-neggi-ologana-siidgi, gayaburba gollalid. Sogded: “Bato bela bergussun.”
REV 16:18 Geb degine, mala ibyided, mala uurmakded, mala gollomakded, geb napneg giglimakded, negabandur-dummad nagunonikid. Negabandur-deyobid dulemar-we-napneggi-ambikuded-akar gwen nagudisulid.
REV 16:19 Neggwebur-dummad sogapaa mamarided. Degine, bela yar-baid-baidgi neggweburmar-bukmalad bibichided. Bab-Dummad Babilonia-neggwebur-dummad ebinsaded, igi epenne dulemar-isguega imaksa, degisoggu, Bab-Dummad e-urwed vino-nogagi-siidyobidgi Babilonia-ogobsasunnad.
REV 16:20 Bela dupumar-nanaidi, degine, bela yalamar-mamaidi, gwen bar daklessulid.
REV 16:21 Degine, nibneggi dii-akwayob-gwamakaled nibir-dulataledyob-aidikued (100) dulemargi babatialid. Dulemar we-dii-akwayob-gwamakaled egi beedse babatisad-ular, Bab-Dummadgi ukabsaar egi isdar sunmakdemalad.
REV 17:1 Geb degi, baliwiturmar-walagugled-wargwen anse nonikid. We-baliwiturmar, noga-gwa-gwagwen ganimalad. Geb we-wargwenad-anse-nonikid, anga sunmaknonikid: “Be dage, we-ome-gambanuchu-diimar-birgi-siid-sabsur-odurdaklegoed an bega oyogwelo.
REV 17:2 We-napneggi-reymarga-mamaid we-omeba galagwensuli negsichigi yoledii gusmalad. Degine, dulemar-we-napneggi-bukmalad, vinoʼgi-mumgusmaladyob, we-omeba bela-bela galagwensuli negsichigi nanadii gusmarmogad.”
REV 17:3 Geb baliwitur, Bab-Burbaba nega-dulesulidganba burbar an-sesad. An dakdegu, ome ibdula-unid-ginnid-birgi-sii an daksad. We-ibdula-ginnidgi nugmar-ena egi narmakar naid. We-nugmar-narmakaledi, Bab-Dummadgi ise-urwar gaya-isganamar sunmaknanaid. We-ibdula nono-gwagugle-nikad (7), degine, e-bebe warambe (10) nikabalid.
REV 17:4 We-ome mor-suir-akwagiid-yoi, degine, mor-ginnid-yoi siid. Deginbali, olo-nai, akwa-nuegan-nai, dimmurgiid-e-akwa-yeerdakleged-nai siibalid. E-argangi, olo-noga egi ibmar-isgana-ena, degi, negsichigi-yoledigusad-ena ganikid.
REV 17:5 E-bebegine, dule-gwen-wissulid-nug narmakar naibalid:
REV 17:6 An daksabalid, ome, dulemar-Bab-Dummadgi-akananaimalad-e-ablisgi, degine, Jesúsʼba-naid-ular-burgwismalad-e-ablisgi, mumgusii an daksad. An deyob ome-daksagu, nue-geger an daksad.
REV 17:7 Geb baliwitur anga sokalid: “¿Ar ibiga wede be geger dake? An bega we-ome-e-igar-dukuar-maid sogoed, degine, ibdula-unid-we-ome-sedanikid-e-igar-maid an bega sogbaloed. We-ibdula, nono-gwagugle-nikadid (7), degine, bebe-warambe-nikabalidid (10).
REV 17:8 Ibdula-unid be daksadi, iduar dula gudigusad. Emigindi, bar dula gudisulid. Degine, we-ibdula-unid burba-isgana-yaa-dummad-ambikuedgi nodagoed. Geb e-berguoed-negse barmelledoed. Dulemar-napneggi-bukmaladi, gebe-napneg-nagusad-akar garda-burba-duladgi-e-nugmar-naisurmaladi, geger we-ibdula-unid-dula-gudigusad dakmaloed. Emigindi, bar dula gudisulid. Degi-inigwele, we-ibdula gannar durgunonikoed.
REV 17:9 ”Wegi-mag-dulemar-magar-itomaladga sognaid: ” ‘Nono-gwagugle-sogedi (7), we-yala-gwagugled-birgi-ome-siid-e-wilubganad.
REV 17:10 Deginbali, nono-gwagugledi (7), reymar-walagugle-gubalid-e-wilubganbalid. E-atargus bato we-reymar bergusmalad. Wargwendi negdakmaid. Baiddi amba yoo reyga meged. We-dule reyga gunonikile, unnila ichesaar reyga megnonikoed.
REV 17:11 We-ibdula-unid-dula-gudigusad, emigindi, bar dula gudisulid, we emi rey-baabakad (8) gued. We-rey-baabakadi, e-gugled-sordamogad (7). E-berguoedse we nadapmogad.’
REV 17:12 ”Bebe-warambe (10) be daksadi, we-reymar-warambegwadid (10), amba yoo negdakedga megmaladid. Ibdula-unidba wemar wachi-irgwen negdakega nugsalemarmogoed.
REV 17:13 We-reymar bela na emarbi binsamalad. Ibdula-unidga e-gangued, e-negdakmaid, ukmaloed.
REV 17:14 We-reymar Sibad-Wawaad-Mimmi-ebo urwemaloed. Sibad-Wawaad-Mimmi egi obinoed. Ar Sibad-Wawaad-Mimmi dummagan-e-Dummadid, degine, reymar-e-Reyd. Degine, eba-nanaidi, ese gorlesmaladid, sulesmaladid, degine, gwen galakussurmarbalidid.”
REV 17:15 Degine, baliwitur anga sogdebalid: “Bia dii ome-gambanuchu-egi-birgi-sii-be-daksadi, we-dii, we-obared: Neggweburmar obared. Dulemar-bukidarad obared. Dulemar yar-baid-baidgi-bukwamalad obared. Degi, gaya-akar-akar-sunmakmalad-e-wilubgan gued.
REV 17:16 Degine, bebe-warambe (10), degi, ibdula-unid, be daksadi, wemar, ome-gambanuchu-isdar dakdamaloed. Walagwen metemaloed, uka-swiri-sii metemaloed, e-san ei gunmaloed, degine, soogi ogumakmarbaloed.
REV 17:17 Bab-Dummad na e-sogedba-imakegala, reymar-binsamalaga imaksad. Agala, bela we-reymar, bulakwaa na emar-negsemamaid-e-gangued ibdula-unidga ukmaloed. Bab-Dummad-ibmar-sogsad-guedse, deyob guoed.
REV 17:18 Be ome-daksadi, Neggwebur-Nue-Nug-Nikadid. We-neggwebur, we-napneggi reymar-birgi negdakmaid-e-wilubganad.”
REV 18:1 We-degigusad-sorbali, baliwitur-baid nibneggi-aidedani an daksad. Bela-belad gangued nikad. Baliwitur-sabsur-mee-gaedbali, napneg bela mee gaded.
REV 18:2 Degine, we-baliwitur binnasuli goted. Weyob sogded: “Babilonia-Neggwebur-Nue-Nug-Nikad bergudsun, Babilonia bibichissun. Niamar-e-negga gunonisun, bela burba-isganamar-negga gunonisun. Sikwimar-isgana sae-daklemalad-ambikued-negga gunonisun.
REV 18:3 Ar bela dulemar-yar-baid-baidgi-bukmalad, galagwensuli we-Babilonia-isguedgi eba isgusmarmogad. Reymar-we-napnegginmalad, a-omeba negsichigi nanadii gusmalad. Dule-we-napneggi-ibmar-ukedgi-arbadimaladi, we-ome-geg-na-san-barga-gudigusadgi mani-ibedga gusmalad.”
REV 18:4 Geb degi, nibneggi gayaburba-baid gole an itosbalid. Weyob soged: “An-dulamar, we-Babilonia-abargi-gudiidgi be nomar. Mer be we-isgudiidba-galemalaga, mer be we-bonimarba-wilemogaga, be nomar.
REV 18:5 Ar Babilonia-dorgan-e-isgued dummarbasoggu, e-isgued nibnegse warmaksad, degine, Bab-Dummad we-isgued gwen iessulid, bela ebinsasad.
REV 18:6 Igi Babilonia-dorgan dulemar-baigan-imaksa, deyob be imakmo. E-ibmar-imaksad, a-ilabo-wilub be bennuke. Gobedgi-aimar-ogobsadi, a-ilabo-wilub a-gobed ega be ukmo.
REV 18:7 Dukin na e-nug-ogannodii-gusadba, na yeer-itodii-gusadba, ayob gangu be odurdakmoga, deyob be obomosun. Ar ade, Babilonia na e-gwagegi soged: ‘Ani an rey-omeyobi an siid, an-sui burgwissulid, gwen an boosulid.’
REV 18:8 Degisoggu, unnila ibagwen-abalakwaa e-bonigan egi yolenonikoed: Burgwed egi nonikoed, boed egi nonikoed, ukudmesed egi nonikoed, degine, soogi gummakoed. Ar ade, Bab-Dummad-Bur-Birigined-Igar-Nabogedid, bela-bela gangued nikad.”
REV 18:9 Degine, we-napneggi-reyga-mamaid we-omeba-galagwensuli-negsichigi-nanadigusmalad, we-omeba-yeer-itodigusmalad, Babilonia-neg-gummakmaidba waa-bupurmakmai-dakarmalar, eba dummad-bomaloed, wile-itomaloed.
REV 18:10 Reymar Babilonia-e-naibigunaidba dobed-ular egi bannaba gwisgumaloed, binnasur gotemaloed, sogdemaloed: “Babilonia-Neggwebur-Nue-Nug-Nikad, be neggwebur-dutusulinad, nuedar-wiles. Unnila, wachi-irgwengi bato be-odurdakleged nonikid.”
REV 18:11 Degine, dulemar we-napneggi-ibmar-ukedgi-mani-onomalad ega nue-bomalad, nue-bukib binsamalad, ar ade, bar ese we-ibmarmar bakosurmalad:
REV 18:12 Olo, mani, akwa-nuegan, dimmurgiid-e-akwa-yeerdakleged, mola-sibu-nuegan, mola-suir-akwagiid, mola-sedaʼye-nugad, mormar-ginnid, bela suarmar-wawadik-yapanmalad, bela ibmar-marfilʼgi-sobarmalad, bela suar-walagan-nuegangi-sobarmalad, esnon, esgoro, degi, akwa-swilidikmalad,
REV 18:13 canela, inamar-wawad, Ina-wawadikid-incienso, mirra, ina-wawad-diregwad, vino, olivo-gwallu, madubur-nued, ibmar-gwag-orosyob-dakleged-trigo, moli-bebe-nikamalad, sibad-wawaadmar, molimar, moli-urmar, degi, dule-maiganga-uklesgudimaladse-bakar, bar bakosurmalad.
REV 18:14 Dule-ibmar-ukedgi-mani-onomalad we-Babilonia-neggweburga sogdamaloed: “Ibmar-nuegan-na-gi-be-yeer-itodigusadi, begi bangussun. Be-ibmar-nue-nikad-yeerdakleged be nikagusadi, bei bergussun, bar be gwen dakosulid.”
REV 18:15 Ibmar-ukedgi-mani-onodigusmalad, we-ibmar-ukedgi mani-ibedga gusmalad. Wemar, Babilonia-neggwebur-sabsur-odurdaklenaid-dobed-ular, bannabaa gwisgumaloed, bobukwa, degi, bukib-binsabukwa ega gumaloed,
REV 18:16 sogbukwagumaloed: “We-neggwebur-nue-nug-nikad, ¡duledar-wiles! Mola-sibu-nued, mola-suir-akwagiid, mola-ginnid-yoi gusmalad. Olo-nai, akwa-nuegan-nai, degi, dimmurgiid-e-akwa-yeerdakleged-nai, e-ogannodii gusmalad.
REV 18:17 Ar unnila wachi-irgwengi bela be-ibmar-gargemalad bato surguus naded.” Degine, bela sour-onanamalad, urgi-nanamalad, ur-selagan, degine, bela demargi-mani-onomalad, Babiloniaʼgi dikasur ambikusmalad.
REV 18:18 Degine, neggwebur-gummakmaid-e-waa dakarmargua, binnasur gotemalad, sogdemalad: “¿Ibi-neggwebur weyob nue-nug-nika-sii gusbalinsunna?”
REV 18:19 Degine, we-dulemar-neg-gummakmaid-dakbukmalad na e-nonogi ukub mismalad, oyogegar, emarde nue-bukib-binsamarye. Wemar binnasur gotemalad, ise-boar, ise-bukib-binsaar sogdemalad: “We-neggwebur-nue-nug-nikad, ¡duledar-wiles! Babilonia, be mani-nue-nikadba bela dulemar-ur-demargi-nikamalad mani-ibedga be imaksad. Emigindi, unnila wachi-irgwengi bela ibmar bato sate be gusad.
REV 18:20 Emigindi, bemar nibneggi-bukmalad, ¡be wergumarsun! Jesucristoʼgi-akananaimalad, Bab-Jesús-e-sapingan-bur-dummagan, degi, Bab-Dummad-gayaburba-barsogmalad, ¡be wergumarmosun! Ar we-neggwebur sabsur-bemar-imaksadyob, Bab-Dummad we-neggwebur imaksamogad.”
REV 18:21 Degine, baliwitur-wargwen-dutusulid, akwa susad, akwamuu-dummadyobid. Geb demarse-metegu, sogded: “Babilonia-neggwebur-dummarbad, we-akwa-binnasur-melledeyobi, be berguoed. We-napneggi bar be daklegosulid.
REV 18:22 Babilonia, gala-arpa-ogormalad, gar-ogormalad, gammu-ogormalad, gala-trompeta-ogormalad, begi bar gwen itolegosulid. Degine, galagwensuli ibmargi-arbamalad gwen bar daklegosurbalid, degi, orsar bar gornai gwen itolegosurbalid.
REV 18:23 Gwallumar bar be-abargi gwen gaosulid, abirgin-nikuleged-iba, bar begi gwen itolegosulid. Ar be-dulemar begi-mani-onomaladi, we-napneggi dule-dummagan guenad. Ar be ina-isgana-imakedba, bela dulemar-yar-baid-baidgi-bukmalad bese yardaklesmalad.
REV 18:24 Bab-Dummad-gayaburba-barsogmalad-oburgwilesmalad, Jesucristoʼgi-akananaimalad-oburgwilesmalad, degi, bela dulemar-we-napneggi-oburgwilesmalad, bee be oburgwisa, daklealid.”
REV 19:1 We degigusad-sorbali, nibneggi dulemar-bukidara-gole an itosad. Binnasuli weyob sogbukwad: “¡Aleluya! Abonoleged, nug-odummoleged, gandikidba-yeerdakleged, degi, gangued, bela anmar-Bab-Dummadgadid.
REV 19:2 Ar na dulemarga-igar-naboged napiragwadba, degi, innikigwadba, imaked. Gambanuchu-imakdiidba, we-napneggi-dulemar-ichodigusadba, we-ome-sabsur-odurdaksad. Degi, Bab-Dummad-e-maimar-oburgwisadba, Bab-Dummad we-ome-sabsur-odurdaksad.”
REV 19:3 Degine, bela gannar sogdemarbalid: “¡Aleluya! We-neggwebur-gummakmaid-e-waa degisadegu niba-nakwemai gusun.”
REV 19:4 Degi, girmar-selegan-dulagwen-gakabakegwad (24), deginbali, ibdula-walabakegwad Bab-Dummad-na-e-ologanagi-siid-asabin, bela yokorgi-sindigar e-bebe napase-ebulegedse sigidmalad. Bab-Dummad-nug ogannodmalad. Weyob sogdemalad: “¡Aleluya! ¡Deyob gusun!”
REV 19:5 Degine, ologana-siidgi gayaburba gollalid. Weyob sogded: “Bela Bab-Dummad-maimar, Bab-Dummad-dobee-nanadimalad, dule-dummagan, degi, bipiganase-bakale, dobekwaa Bab-Dummadga-arbadimaladi, bela anmar-Bab-Dummad-nug ogannomarsun.”
REV 19:6 Dulemar-bukidar-sunmakeyob, diwarmar-bukidar aryomaiyob, mar-dummagan gollomakmaiyob, gayaburba sunmak an itosad. Weyob sogmalad: “¡Aleluya! Ar Bab-Dummad-anmar-Dummad bela-gangued-nika-maid, bela negdakmai gunonisunnad.
REV 19:7 Anmar wergumarsun, anmar yeer itomarsun, anmar e-nug odummomarsun. Ar Sibad-Wawaad-Mimmi na-ome-nikued-e-iba nonisunnad, e-ome bato guagwar edarbediid.
REV 19:8 A-omega igar uklenonikid, mola-sibu-nued yoed, mola-gutusulidi, mola-dakar-dakarmakaledi yoed.” Ar adega, mola-sibu-nued, Jesucristoʼgi-akananaimalad-innikii-ibmar-imakmalad-e-wilubganad.
REV 19:9 Geb degi, baliwitur anga sokalid: “Be narmak: ‘Dulemar-Sibad-Wawaad-Mimmi-ome-nikuoedgi mas-gunnega-ese-gorlesmaladgi, nued binsalesad.’ ” Degine, baliwitur anga sokarbalid: “We an bega sogedi, Bab-Dummad-gayaburba-napiragwad-sogedba an bega soged.”
REV 19:10 An Baliwitur-asabin e-nug-odummogega, yokorgi-sindigar an sigided. A-baliwitur anga sogded: “Mer be deyob imak. Mer yokorgi an-asabin sindigar be sige. Ar an, be-sunnaamogad, gwenadgan-Jesúsʼba-nanaimalad-gwen-galakussurmaladyob an Jesús-e-maimogad. Unnila, Bab-Dummad-e-nugbi be odummoge.” Ar Jesús-gayaburba-odurdaksadi, Bab-Dummad-gayaburba-barsogmalad gatik-dulemarga-sunmakega imaked.
REV 19:11 Geb degi, nibneg argaar an daksad. Agi moli-sibudikid an dakalid, dule-moli-sibudikid-birgi-siidi nugad: Sogedba-Daed-Dule, Dule-Napiragwad. We-dule, igar-inniki-maidba dulemarga igar-naboged, degine, igar-napiragwadba bila-onobalidid.
REV 19:12 E-ibya-daklegedi, sooyob-dakleged. E-nonogi, ologurgin-bukidar siid, deginbali, nug narmakar naibalid. We-nug-narmakaled, dule gwen wissulid, unnila na ebi wisid, igi-narmakar nai.
REV 19:13 We-dule ablisgi-diduar-imaklesad-mola yoid, degine, e-nugdi, weyob nugad:
REV 19:14 Sordamar-nibnegginmalad, mola-sibu-nued-dagudikid yoimalad. Sordamar-nibnegginmalad, dule-moli-sibudikid-birgi-siid-sorba, moli-sibumar-birgi-sii nadapmalad.
REV 19:15 Dule-moli-sibudikid-birgi-siid-e-gaya-yaba, dule-yar-baid-baidgi-bukmalad-naibisaega, es-suid-nugar-ibed nogwichid. Degine, bela-bela gandikidba negseoed. We-dule, uva-egured-neggi uva-egurelegeyobi, Bab-Dummad-Bela-Gangued-Nika-Maid-e-urwedgi dulemar-sabsur-imakoed.
REV 19:16 Dule-moli-sibudikid-birgi-siid-e-mor-yoidgi, degi, e-duawargi, weyob nug narmakar naid:
REV 19:17 Geb degi, baliwitur-wargwen dad-ibeler-birgi gwichi an dakalid. A-baliwitur binnasur goted, bela mulamar-gukudimaladga sogded: “Bela be dagmar. Bab-Dummad-bemarga-masgunned-uksadse danar be ambikudamar.
REV 19:18 Adi, bemar we-sanmar gunmalagar: Reymar-san gunmalagar: Kaptanmar-e-san gunmalagar, dulemar-gandikmalad-e-san gunmalagar, moli-e-san gunmalagar, moli-birgi-sigmalad-e-san gunmalagar. ”Bela we-dulemar-e-san gunmalagar: Dulemar-maiga-gudimalad-e-san, dulemar-maiga-gudisurmalad-e-san, dule-dummagan-e-san, degi, dule-burwigana-e-san.”
REV 19:19 Geb ibdula-unid, degi, we-napneggi-reyga-mamaid, bela-e-sordamarmala, danar ambikunonimala an dakalid. Dule-moli-sibudikid-birgi-siid-ebo-urwega, degi, a-e-sordamar-ebo-urwega, ambikunonimalad.
REV 19:20 Degine, ibdula-unid galenonikid. Bab-Dummad-gayaburba-barsoged-nabirsulid galenonimogad. We-dule, ibdula-unid-asabin ibmar-wilubgan-dakledisulid-imakdigusadba, dulemar-ibdula-unid-e-wilub-na-e-sangi-nasiksamalad, degine, ibdula-unid-wilub-sobaled-asabin-sigismalad yardaksagusad. Wemar-ebobela, soo azufreʼba gwabunye-gwichidgi dula melledmalad.
REV 19:21 Bela ibdula-unid-sordamar-baigan dule-moli-sibudikid-birgi-siid e-gaya-yaba-es-suid-noalidgi oburgwilesmalad. Degine, bela mulamar, dulemar-burgwismalad-e-san guchamalad.
REV 20:1 Degine, nibneggi baliwitur-wargwen aidedani an daksad, burba-isgana-ambikued-e-yaa-dummad-e-yabe sedanikid. Degine, e-argangi esgoro-dub-dummad sedanibalid.
REV 20:2 A-baliwitur achu-simudubaled ganonikid. We, naibe-seredid, nia-saila-Satanás gued. A-gasgua, birga-miligwen (1,000) edichad.
REV 20:3 Geb degi, burba-isgana-ambikued-e-yaa-dummad-siidgi meted. A-yaa nue-sakdigar edisad, adi, achu-simudubaled melle bar dulemar-yar-baid-baidgi-bukmalad yardakegar. Birga-miligwen (1,000) guedse edisad. A-sorbali, achu-simudubaled ichesaar wis gannar esiklegoed.
REV 20:4 Geb degi, ologanamar bukwa an daksad. A-ganmargi, dulemar-igar-nabomalaga-ega-igar-uklesmalad sigismalad. Geb dulemar-Bab-Jesús-nuggi-sunmakdigusmalad-ular, Bab-Dummad-Gayaburba-ular, dukar-argwachamalad-e-burbagan an dakalid. Ibdula-unid-e-nug gwen odummossurmalad. E-wilub-sobaled-nug gwen odummossurmarbalid. Wemar, e-bebegine, e-argangine, ibdula-unid-e-wilub nasissurmaladid. Amar an dakalid. Amar gannar durgunonimalad. Cristoʼba birga-miligwen (1,000) negdakmai gunonimalad.
REV 20:5 We, gebe-gannar-durgumalad-igardo. Ar baigan-burgwismaladdi, birga-miligwenad-sorba (1,000) geb durgumaloed.
REV 20:6 Dule-gebe-gannar-durguedgi-durgusad, we-dulegi nued binsalesad, degine, we-dule gwage-swilidikidid. Ar we-dule burgwed-sorba-danikoedgi bar burgosulid. Ar we-dule, dule-irwa-Bab-Dummadse-golega guoed. We-dule Bab-Dummadgadid, degine, Cristoʼgadbalid. We-dule Cristoʼba birga-miliba (1,000) negdakmai guoed.
REV 20:7 Birga-miligwen (1,000) gunonikile, geb nia-saila-Satanás-edinnar-mellesiid esiklegoed.
REV 20:8 Nia-saila, e-odurdakleged-neggi-mellesiid nodogu, dulemar-yar-baid-baidgi-bukmalad-yardakega bela napneg-naidse naoed. Dulemar-yar-Gogʼye-nugadgi-bukmaladse naoed, degine, dulemar-yar-Magogʼye-nugadgi-bukmaladse nabaloed, adi, bela e-sordamar danar urbega, Bab-Dummad-ebo bila-onogegar. Nia-saila-e-sordamar-mergued, demar-gakaba-ukub-merguedyobi mergued.
REV 20:9 Nia-saila-sordamar, bela napneg-naid-ugakaase duurmaknonimalad, Jesucristoʼgi-akananaimalad-bukwadse, Bab-Dummad-neggwebur-na-nue-sabed bela-ebilis ambikunonimalad. Degidgine, Bab-Dummad nibneggi soo-odenonikid, agi bela nia-saila-sordamar-ogilosad.
REV 20:10 Geb degi, nia-saila-dulemar-yardakdiid soo-mata-dummad azufreʼba-mesa-gwakwarmaksiidgi melleded. Bia ibdula-unid, degi, gakansaar-gayaburba-berbeged-mellesii, agi nia-saila melledmogad. Degine, mutikidba, ibginedba, wemar odurdaklesii degisadeguoed.
REV 20:11 Geb degi, ologana-sipugwad-dummad an dakalid. Dule a-ologangi-sii an daksad. A-asabin, napnega, degine, nibnega, berguus-naded. Amar bar gwen daklessulid.
REV 20:12 Geb degi, dule-dummagan-burgwismalad, dule-binsarmalad-burgwismalad, ologana-sipugwad-asabin gwichi an dakalid. Degine, gardamar argad an daksabalid. Deginbali, garda-baid argadbalid. We-garda-baiddi, dule-dula-gudimaloed-e-nug-narmakaled-gardad. Dulemar-burgwismaladga, gardamargi-ibmar-narmakar-naidba, na e-ibmar-imaksamaladba ega igar itolesad.
REV 20:13 Geb degi, demargi dulemar-burgwismalad ainialid. Burgwed-igar, degi, Neg-uan-Hadesʼye-nugad, burgwarmalad-mamaid uksad. Bela amarga, emar-ibmar-imaksamaladba ega igar itolesmalad.
REV 20:14 Degine, burgwed-igar, degi, burgwarmalad-meged-Hadesʼye-nugad, soo-mata-dummad-gwakwarmaksiidgi melledmarmogad. We, soo-mata-dummad-gwakwarmaksiidi, burgwed-ilabogwad gued.
REV 20:15 Ar dule, dule-dula-gudimaloed-e-nug-narmakaled-gardagi e-nug-naisuliddi, soo-mata-dummad-gwakwarmaksiidgi melleded.
REV 21:1 A-sorba, nibneg-binid, napneg-binid, an daksad. Ar nibneg-gebe-naigusad, degi, napneg-gebe-naigusad, bergusad. Degine, demar bar naisulid.
REV 21:2 Degi geb ani Juan, neggwebur-islidikid, Jerusalén-binid an daksad. We-Jerusalén, bia Bab-Dummad-mai, a-akale aidedanikid. Igi ome sui-nikunair, guagwar mola-nued-yoi, deyob Jerusalén-neggwebur guagwar-aidedani an daksad.
REV 21:3 Geb degi, nibneggi gayaburba binnasur gole an itosad. Weyob soged: “Emigindi, Bab-Dummad-meged-neg dulemar-abargi signonisunnad. Bab-Dummad dulemar-abargi gudigusunnoed. Dulemar Bab-Dummad-sordamarga gunonikoed. Bab-Dummad-sunnad we-dulemar-e-Bab-Dummadga gumogoed.
REV 21:4 ”Bab-Dummad we-dulemarga bela ibyanis elioed. We-dulemar bar burgosurmalad. Bab-Dummad, boed ega obelobaloed, bukib-itoged ega obelobaloed. Deginbali, we-dulemar nunmaked bar itogosurmarbalid, ar ade, bela ibmar-iduarmalad bergusad.”
REV 21:5 Degine, Dule-ologanagi-siid sogded: “Emigindi, bela ibmar biniganbi an imaked.” Geb degi, anga sogded: “Be narmak, ar ibmar-an-sogedi napiragwadid, innikigwadid.”
REV 21:6 Anga sogdebalid: “Bato bela gwinmaksad. ”Ani an, Gebesailaginedid (Alfa), ani an, Napisoladbalid (Omega). Ar dule uku-uku itogele, ani an ega dii binsa ukoed. We-dii, dii-saila-degisadegu-dule-dula-imakedid.
REV 21:7 ”Ar dule gwen galakussulile, we-ibmar bela ega uklegoed. Ani an e-Bab-Dummadga guoed, e an-machiga gumogoed.
REV 21:8 Dule-doberbamaladdi, angi-gadi-bengumaladdi, ibmar-isgana-imakedba isdar-daklemaladdi, dule-gindakmaladdi, na-abirgunagwarsuli-negsichigi-yoledimaladdi, ina-isganagi-dulemar-yardakmaladdi, bab-dummaganga-imaklegedse-gormaladdi, degine, bela dule-gakansilimaladdi, soo-mata-dummad azufreʼba-mesa-gwakwarmaksiidgi melledmaloed. Ar we, burgwed-ilabogwad gued.”
REV 21:9 Baliwiturmar-walagugled (7) bonimar-sogagugled-napid noga-gwagugledgi (7) ena sedigusmalad, an daksa gusad. A-baliwitur-wargwenad anse nonikid. Anga weyob sunmaknonikid: “Wesik be dage, Sibad-Wawaad-Mimmi-e-omega-guoed an bega oyogoed.”
REV 21:10 Geb degine, baliwitur yala-dummad-matusulidse burbale an-sesad. Agi Jerusalén-neggwebur-dummad-islidikid, Bab-Dummad-maid-akale-aidedanikid anga oyosad.
REV 21:11 A-neggwebur, Bab-Dummad-yeerdaklegedyob daklemogad. E-gaedi, akwa-nuedi, akwa-garged-jaspeʼyobi gaed, degine, isbe-daledyob swilidik dakleged.
REV 21:12 Neggwebur-ebiris e-galu-dummadi, matusur maid. A-galu, yawagak-gwaambe-gakabo (12) nikad. E-yawagak-irba baliwitur gwigwis-naded, degi, a-yawagak-irba Israel-dorgan-sogambe-gakabo-gued-e-nugmar (12) narmakar naibalid.
REV 21:13 Dad-nakwedsik yawagak gwapaa siid, dad-nakwed-argan-nuedsik gwapaa siibalid, dad-nakwed-argan-sapiledsik gwapaa siibalid, degi, dad-argwanedsik gwapaa siibalid.
REV 21:14 Neggwebur-e-galu-matusulidi, e-sailagan gwaambe-gakabo nikad (12). Geb amargi Sibad-Wawaad-Mimmi-e-sapin-bur-dummagan-e-ambe-gakabogwad-e-nugmar (12) narmakar nanaid.
REV 21:15 Baliwitur-anga-sunmakgwichidi, neggwebur-wilubsaega, e-yawagakmar-wilubsaega, degi, e-galu-matusulid-wilubsaega, olo-nargammu-gani gwichid.
REV 21:16 Neggwebur-e-galu-matusulid-e-dikar-sogabake-nikadi, ber emarbi dungued. E-suguedi, e-yaadunguedi, ebobela emar dungued. Baliwitur nargammugi neggwebur-wilub-imaksad. Daklealid, kilómetro-milibo-gaka-dulataled-ilabo (2,200) sugu. E-sugued, e-nibgued, degi, e-matardungued, ber emarbi dungued.
REV 21:17 Deginbali, baliwitur neggwebur-e-galu-matusulid-maid-wilubsasgua, daklealid, dali-dulagwen-gakambe-gakabo-negabar (32½) nibgue. Dulemar-gusgu-wilubsaed, baliwitur-e-wilubsaed-ebo emalad.
REV 21:18 Neggwebur-e-galu-matusulidi, akwa-nued-jaspeʼgi sobaled. Ar neggweburdi olobi sobaled, isbe-daled-swilidikidyob dakleged.
REV 21:19 Neggwebur-e-galu-matusulid-e-sailaga-gumaidi, akwa-nuegan akar-akaledgi ogannolemaid: Gebe-maidi, jaspe. Bogwadgi, zafiro. Baagwadgi, ágata. Bakegwadgi, esmeralda.
REV 21:20 Ataledgi, ónice. Nergwadgi (6), cornalina. Gugledgi (7), crisólitoʼye. Baabakadgi (8), berilo. Bakebakadgi (9), topacio. Ambedgi (1), crisopraso. Ambe-gakagwensakgi (11), jacinto. Degi, ambe-gakabogwadgi (12), amatista.
REV 21:21 Yawagak-gwaambe-gakabo-bukmaladi (12) bela dimmurgiid-e-akwa-yeerdaklegedbi gued. Yawagak-irba, dimmurgiid-e-akwa-yeerdakleged gwagwagwen bukwad. Neggwebur-igarmar bela olo-sunnadbi gued, isbe-daledyobi ber swilidik dakleged.
REV 21:22 We-neggweburgi Bab-Dummadse-goled-neg sii, an daksasulid. Ar ade, Bab-Dummad-Bur-Birigined-Bela-Gangued-Nikadi, degi, Sibad-Wawaad-Mimmi na Babse-goled-negga gubukwad.
REV 21:23 We-neggwebur ibegwar-sigegala, dad-ibeler abesulid, nii abesurbalid. Ar ade, Bab-Dummad-gaedba we-neg ibegwar siid, degi, Sibad-Wawaad-Mimmi ega neg-ibegwaledga gubalid.
REV 21:24 Bela-dulemar-yar-baid-baidgi-bukmalad-abonolesmalad a-gwalluba nanamaloed, degi, reymar-we-napnegginmalad bela e-ibmar-nuegan-nikadi, degi, e-nug-ogannolegedi, we-Jerusalénʼse sedamaloed.
REV 21:25 E-yawagakmar neg-ibgin gwen atiosulid, ar ade, neg-mutikid sulioed.
REV 21:26 Asega, dulemar-yar-baid-baidgi-bukmalad-e-ibmar-nuegan-nikadi, degi, e-nug-ogannoleged, senonimaloed.
REV 21:27 A-Jerusalén-neggwebursega ibmar-isgana gwen dogosulid, ibmar-isgana-sae-daklemalad, gakansamalad, gwen dogosulid. Unnila dule-dula-gudimaloed-gardagi e-nug-narmakar-nanaidbi dogmaloed. We-garda, Sibad-Wawaad-Mimmi-gardad.
REV 22:1 Degine, a-sorbali, baliwitur diwar-nued, diwar-burba-dula-dule-imaked, anse oyosbalid. We-diwar isbe-daledyobi dakarmakmaid. We-diwar, Bab-Dummad-ologanagi, degi, Sibad-Wawaad-Mimmi-ologanagi, danikid.
REV 22:2 We-diwar, neggwebur-igar-dummad-abargi iirmakmaid. Degi, diwar-gaka-abinbela, sapi-dula-dule-imakmalad gwichi-nanaed. A-sapimar, birgagi irambe-gakabo (12) sanmaked. Nii-irba sanmaked. We-sapi-e-gaganmar, dulemar-yar-baid-baidgi-bukmalad-nudakega gued.
REV 22:3 Agine, bar ukabsaleged nikuosulid. A-neggweburgi Bab-Dummad-ologana, degi, Sibad-Wawaad-Mimmi-e-ologana, sii guoed. Agi e-maimar ega nug odummobukwa guoed.
REV 22:4 Amar Bab-Dummad-wagar asabinmakar dakmaloed, degi, Bab-Dummad-e-nuga e-bebemargi narmakar-nai gumarbaloed.
REV 22:5 Agine, mutikid bar naguosulid. Gwallu-gaed bar abelegosulid. Dad-ibelerbela amba abelegosurbalid, ar Bab-Dummad anmar-Dummad, bela neg-ibegwar imakoed. E-maigana, eba degisadegu negdakmai guoed.
REV 22:6 Geb degi, baliwitur anga sogdebalid: “We-gayaburbamar-bega-soglesadi, napiragwadid, nue-innikigwadid. Degine, Bab-Dummad-anmar-Dummad na e-gayaburba-barsogmaladga-e-burba-ukedi, e-baliwitur barmialid, adi, e-maimarga ibmar-emisgwa-gumaloed oyogegar.”
REV 22:7 Bab-Jesús soged: “¡Emiskwaa an danikoed! Dule we-gayaburba-we-gardagi-narmakar-naidba-nanadiile, we-dulegi nued binsalesad.”
REV 22:8 Ani Juan, we-ibmar an-sunnagwad an itosad, an-sunnagwad an daksabalid. Deyob-an-ibmar-itosad-sorbali, deyob-an-daksad-sorbali, baliwitur-anga-ibmar-oyogwichid-nag-asabin, e-nug-odummogega, yokorgi sindigar an sigided.
REV 22:9 A-baliwitur anga sogded: “Mer be deyob imak. Mer yokorgi an-asabin sindigar be sige. Ar an be-sunnaamogad, be-gwenadgan-Bab-Dummad-gayaburba-barsogmaladyobmogad. Ar an dulemar-we-garda-narmakar-naidba-nanadimaladyobmogad. Unnila Bab-Dummad-e-nugbi be odummoge.”
REV 22:10 Geb degi, baliwitur anga sogdebalid: “We-gardagi gayaburba-narmakar-naidba-ibmar-guoed, mer be odukuo. Ar ibmar-guoed-e-ibagan bato omosad.
REV 22:11 Ar dule-igar-noar-imakdimalad, amba igar-noaled-imakdii gumarsun. Dule-nue-isgusgudimalad, amba isgudii gumarsun. Ar dule-ibmar-nued-imakdimalad, amba ibmar-nued imakdii gumarsun. Ar dule-gwage-swilidik-nanadimalad, amba gwage-swilidik-nanadii gumarsun.”
REV 22:12 Degi, Bab-Jesús sogded: “Emisgwasaar, an bemarse-daged omosad. An danikir, ibmar-imaksadba-ibmar-nued-ukleged an sedanikoed. Adi, an dulemarga na-e-ibmar-imaksamaladba ega ukegar.
REV 22:13 Ani an Gebesailaginedid, (Alfa). Ani an Napisoladbalid, (Omega). Ani an gebedid, anse bergunaibalid.
REV 22:14 ”Dule na-e-mor-enukdimalale, egi nued binsalesad. Ar deyob imakdimaladba nabir sapi-dula-dule-imaked-e-san gunnoed, degine, nabir neggwebur-e-yawagakba dogbaloed.
REV 22:15 ”Ar neggwebur-magabardi, dulemar-galagwensulidamalad, ina-isgana-imakmalad, abirgunagwarsuli-negsichigi-yolemalad, dule-gindakmalad, dule bab-dummaganga-imaklegedse-gormalad, bela dule-gakansilimar gakan-saed-yeer-itodamalad. Wemar, neg-magaba milebukwa gumaloed.
REV 22:16 ”Ani an Jesús. An-baliwitur an bese barmialid, adi, anba-nanaimalad-danar-ambikunonidamaladga we-ibmarmar sogegar. Ani an David-e-wagwad, ani an sapi-siklesadgi-e-dutugwad-noardaeyobi Davidʼgi danikid. Ani an niisgwa-wakudar-binnasur-mee-nakwiar-daedbalid.”
REV 22:17 Bab-Burba, degine, Sibad-Wawaad-Mimmi-e-ome soged: “Dage.” Ar dule itogele, soge: “Dage.” Dule uku-uku itogele, dage. Ar dule dii-dula-dule-imaked gobbiele, maniginsuli binsa gobdage.
REV 22:18 Bela-dulemar we-gardagi-ibmar-guoed-narmakaled-itomaloedga an iduakwaa soged: Ar dule-wargwen we-gardagi ibmar-narmakar-naidgi ibmar-baid nasiksale, Bab-Dummad, a-dulega bonimar-we-gardagi-narmakar-nanaid, e-boniga imakoed.
REV 22:19 Degine, dule-wargwen we-gardagi ibmar-guoed-narmakar-naid elisale, Bab-Dummad, a-dule sapi-dule-dula-gudigued-uked-e-san-egadid bar ega uklegosulid. Degine, Jerusalén-neggwebur-islidikidgi-gudiguega bar imakosulid. Deginbali, we-gardagi-ibmar-narmakar-naid-ega-uklegoed e-ibe osulobaloed.
REV 22:20 Ar dule-we-ibmar-gunaidgi-sunmaknaid, soged: “Napiragwad. Emiskwaa an danikoed.” Ani Juan soged: ¡Deyob gusun! ¡Dummad-Jesús, be dage!
REV 22:21 Anmar-Dummad-Jesucristo nued bemargi binsamarsun. Deyob gusun.
