﻿Isaías.
10.
Dule, igar-isgana-omesmalad, be duledar-wilesmar. Dule, dulemar-idu igar-yeer-gangu-omesmalad, be duledar-wilesmar. 
Bemar, dule-wilemalad-ibmar-nikuega be imaksurmalad, an-dula-wilesagwa-gudimaladga be igar nudaksurmalad. Siamar-ei-sui-burgwisadi, be wiodimalad, dule-sergan-sated-ibe be ibmar atursadimalad. 
Bemar sabsur-odurdaklealile, ¿bemar igi imakoe? Boni-dummad bannaba-nosa begi-dani be dakalile, be-bendakega, ¿doase be goloe? ¿Bia be-ibmar-nuegan be odukumaloe? 
Ar be bar oakalogosurmalad. Ar bemar gales seledmaloed. Emar-gales-bukwad-abargi be mesagwar gumarmogoed. Sulile, burgwarmalad-imbagi be oburgwilemarmogoed. Weyob bemar imaklego-inigwele, Bab-Dummad-urwedi, amba bogigumaiosulid, Bab-Dummad amba amargi urwemaioed. 
Bab-Jehová weyob soged: “An bela-bela sae-itoged, Asiria-e-Rey anga sabsur-odurdaked-suaryobi guoed. A-suargine, an sabsur-dulemar-odurdakoed. An isdar-itogedbali, a-suar an ebugoed. 
Yala-nue-isgus-naidse an barmidoed, dulemar an-ourwega-imakbukwadse an barmidoed, adi, ibmar ei atursanaega, e-ibmar ei bela weenaegar. Igi-dule dii-dii napa-imake, deyob-emar-imaklegega an barmidoed. 
Ar Asiria-e-reydi deyob-imakodeeye gwen binsassulid, deyob-imakedgi gwen binsassulid. Unnila dulemar-obelogedginbi binsaed, unnila bukidar yar-baigan-osulogedginbi binsaed.” 
Bab-Jehová weyob soged: “Ar ade, Asiria-e-rey weyob soged: ‘¿Ar reymarde anga dummaganga-arbabukwadbisursi? 
¿Ar Calno-neggwebur, Carquemis-neggweburyob gussursi? ¿Hamat-neggwebur, Arfad-neggweburyob gussursi? ¿Ar Samaria-neggwebur, Damasco-neggweburyob gusmosursi? 
An ibmar-bab-dummadyob-imakleged-yalamar obelos gusad. A-yalamar, Jerusalén-neggweburba, degi, Samaria-neggweburba, bur bule melu ibmar-bab-dummadyob-imaklemalad nikagusana, degite, an obelosad. 
An igi Samaria-neggwebur-imaksa, degi, igi e-ibmar-bab-dummadyob-imaklemaladse-bakale, an obelosa, deyob an Jerusalén-neggwebur imakoed. E-ibmar-bab-dummadyob-imaklemaladse-bakale, an obelomogoed.’ ” 
Bab-Jehová, Sión-yalagi-ibmar-imakoed bela-obelosale, degi, Jerusalén-neggweburgi-ibmar-imakoed bela-obelosale, sogdagoed: “Asiria-e-rey-san-dummarba-itogedba an sabsur-odurdakoed, emar-saedakedba an sabsur-odurdakoed.” 
Ar ade, Asiria-e-rey weyob soged: “We-ibmar an-ganguedba an imaksad, an-binsaed-nikaa-daedba an imaksad, ar ande, nue-ibmar-wisid-duled. Ani an neggweburmar-e-abingunanaid ogwasad, ani an e-ibe ibmar-nuegan atursasad, ani an sorda-bila-onoged-buled-guedsoggu, an e-reymar-obelosad. 
E-yalamar bela e-ibe an susad. Igi dule sikwi-e-akwa-bukwad weedae, deyobi, an e-ibe e-yalamar susad. Igi dule sikwi-uu sudae, deyobi, dule-e-ibmar-nuegan-nikad an susad. An-abinni, dule-wargwensaale gochasulid, dule gwen akar sogsasulid.” 
Isaías weyob soged: “¿Ar akande sunna dule-e-ebunaidba bur san-gannarbaa na imaksi? ¿Ar sunna esnali-sapisikedde dule-e-ebunaidba bur bule-bule na san-imaksi? ¿Gaapoledde, dule-e-ganikidgi obinosi? ¿E-nabiedba naosi? ¿Bia be daksa, suar-garagwadi, sapiwar-dummad-nakwaa imake? Deyob be dakdisulid. 
”A-ulale, Bab-Jehová, Bab-Jehová-Bela-Gangued-Nikadi, Asiria-e-rey-sorda-bila-onomalad-bulegangi boni-dummad barmidagoed. Amar-e-nug-odummoleged-muchubbi, uelleged-dummad ega ukoed, uellegedi sooyobi uegu egi nasikoed. 
Bab-Dummad-wargwenna-guedi, Israel-dulemarga-neg-meegwadyobi-guedi, soo-gaeyobi gudoed. Bab-Jehová-Isligwaled soo-gwichigumaidyob gudoed. Ibagwen-nuedi, Asiria-sordamar-obelogoed, ikomaryobi, gagan-ikomaryobi, soogi bela obelogoed. 
Bab-Dummad, bela Asiria-e-sapur-yeerdakle-nanaidi, e-nainu-nanaidi, obelogoed. Dule-geg-bar-gugus-gegumaiyobi bela ibmar nasikoed. 
Sapur-naidgi sapimar napi-ichee ambikuoed. Ichegwadbali, burwigana sunna ebisge guoed.” 
A-ibagangine, Israel-dulemar-napi-bemaloedi, Jacob-wagan-napi-gudimaloedi, dule-e-obelosmaladba bar naguosurmalad. We-napi-bemaloedi, Israel-e-Bab-Dummad-Jehová-Isligwaledba, nue innikigwadba nagumaloed. 
Israel-dulemar-napi-bemaloedi, gannar Bab-Dummadba nagudmaloed, Jacob-wagan-dula-napi-gudimaloedi, Bab-Dummad-Bela-Gangued-Nikadba gannar nagudmaloed. 
Israel-dulemar, bemar ukub-demar-gakaba-mergueyob-guen-inigwele, unnila bemar napi-ichee gannar nonimaloed. Israel-dulemar-obelolegoye bato soglesmaid. Bela ega igar nabolegoed. 
Ar Bab-Dummad-Jehová-Bela-Gangued-Nikad, Israel-dulemar-obelolegoye bato sogsad. Ar deyob yargi-gudimaladgi imakoed. 
A-ulale, Bab-Dummad-Jehová-Bela-Gangued-Nika-Maid weyob soged: “An-dulamar, be Sión-yalagi-bukwamalad, melle be Asiria-dulemar dobee itomalo. Asiria-sordamar gaapoledgi be-sarsomalo-inigwele, begi suar-oyodamalo-inigwele, melle dobgumalo. Igi-Egipto-dulemar bemar-imaksagusa, deyob bemar-imakdago-inigwele, melle be dobgumalo. 
Emisgwasaale, bemargi an-nue-sae-itogedi berguoed. An-urwedi, be-isdarmaladgi yoledoed.” 
Bab-Jehová-Bela-Gangued-Nikad, Asiria-dulemar-sabsur-odurdakoed. Bab-Jehová, igi-akwasaila-Orebʼye-nugadgi Madián-dulemar-imaksagusa, deyob Asiria-dulemar-imakoed. Bab-Dummad, igi-Egipto-dulemar-igarba-nadapgu e-gaapoled-oyosgu, egi demar-arwega-imaksagusa, deyob Asiria-dulemar-sabsur-imakoed. 
A-ibagangine, bemar we-boniganba-galitodiidi bela bega berguoed, bemar gangudoedba, sabsur-wilediidgi be ollorgudmaloed. 
Be-isdarmalad-Asiria-sordamar Ajatʼye-neg-nugadgingus naid, Migrónʼye-neg-nugadgi nadapid, Micmasʼye-neg-nugadgi e-ibmarmar obesad. 
Diwar-dinnagwadgi obakmamaid, degi weyob sogmalad: “Gebaʼye-neg-nugadgi anmar obunnomaloye.” Ramá-dulemar dobedba wawanmakdemalad, Saúl-neggwebur-Gabaaʼginmalad duurmakdemalad. 
¡Omegan-Galim-neggweburginmalad binnasur be oimakmala! ¡Omegan-Lais-neggweburginmalad be itomala! ¡Anatot-neggwebur be abinsamarmoga! 
Madmena-dulemar wakitemalad, Gebim-dulemar dukudmalad. 
Emi-ibagi, Asiria-sordamar Nobʼye-neg-nugadse ambikunonimaloed. Sión-yalagi gwichiguega, guagwar ambikumaloed. Siónʼde, Jerusalén-e-yalad. 
¡Nue be dake! Bab-Dummad-Jehová-Bela-Gangued-Nikad-abin, sapi-anagan doos-doos naded. Sapi-suigan bibichis nanaed, sapi-dummagan e-abin ailade nanaed. 
Sapi-moodo-naidi, akangi immided, Líbano-yargi sapimar-yeerdakle-bukwad bela berguded. 
