﻿Salmos.
104.
Bab-Jehová-nug an odummoged. An-Bab-Dummad-Jehová, duledar-gandikid be gued, gandikidba yeerdakleged-mola be yosad, ibiyobi-mola-yeerdakle be yosa. 
Mola-dummad-yoiyobi nega-ibegwaledi begi ebirnaid, mola-dummad-nallaa-imaklegeyobi mogir-billi be imaked. 
Diigine, be-nega-dummagan-urbega be imaked, mogirmala, be-moli-ur-bila-onomaladga be saed. Bedi burwa-ooreged-birgi-sii nanaed. 
Burwamala, be-gayaburba-berbegedga be imaked, soo-gwabunyemaladi, be-maiganga be saed. 
Napanega, e-saila-birgi be sisad, e-siidgi, bipisaale gwen bar ainirosulid. 
Napanegga e-mor-dummad-naiyobi, muu-billi egi be nasiksad. Diimala, yalamar-birise nagusad. 
Diimarse be uludedbali, diimala ilided. Be-dolewala-gollomakedbali, diimala uboded. 
Diimala, yalamar-birise engusad, nebagansega diimala ilisbalid. Bia be ega neg-amisa, agi be diimala oambikusbalid. 
Dii melle bar napneg-odogega, ega be igar mesisad, adi, a-igarse galegegar. 
Bedi, ibe-diimar-ariogwichidi, dianganbali, oiirmakega be saed. Yalaganbali, suurmakega be imaked. 
Ibdurgan-sapurbarmaladi, a-dii gobmalad. A-diigine, moli-uayasuid-sapurmar immelemalad. 
A-dii-gakabali, sikwimala e-uu urbe damalad. Sapi-anagan-imbabali, nuumala namakbukwa damalad. 
Be-nega-akale, yalamar be ogmaid. Be-ibmar-saedbali, napaneg yeer itoged. 
Molimarga gagan-ara-aramalad-oniega be imaked, dulega ibmar-durgan-sanmakega be saed. Adi, agi we-masgunned amiega: 
Vino-weligwar-emar-saed-amiega, olivo-gwallu-wagar-daarmakar-imaked-amiega, mas-burba-dula-uked-amiega be imakbalid. 
Bab-Jehová e-sapimala-urbisadi, sapi-urwarmala Líbano-yargi urbisadi nue-obagwale gwigwichid. 
A-sapimargine, nuumala e-uu sobbukwad, e-anagangine, dabgalamar ambikubukwad. 
Yala-dummaganbali, sibad-sapurbarmalad bukwad. Akwa-olloganbali, nubimar dukubukwad. 
Bab-Jehováʼye, yolamar-nagumaid-magar-daklegega, bee be nii nasiksad. Bee be dad-ibeler e-doged-wisguega be imaksad. 
Neg-mutik-imakegala, be negsichidi nasikdaed. Agine, ibmar-durgan sapurba ainiardaed. 
Achumigur-nono-wawaamalad e-masbina uurmakdidaed. Bab-Dummadse na e-masgunned egisdidaed. 
Dad-ibeler-nakwialile, geb e-neg-olloledyaba gannar dogdedaed. 
Geb dulemala, arbaega gwisguardamarmogad, neg-gutulegedse e-arbaed gadapdamalad. 
Bab-Jehová, ibiyobi be ibmarmar-imaksadi, ichesur mergue. Be ibmar-wisidbali, bela we-ibmarmar be imaksad. Be ibmar-obinnisadi, bela napneggi nanaid. 
Agine muu-billi-dummadi naid, a-yagine ibmar-durgan-bukidar bukwad. Ibmar-durgan-dummagan, ibmar-durgan-bipigana bukwananaed. 
Muu-billigine, ulu-dummagan iirmakbukwad, agine, be, baka-dummaganyobid-obinnisadi gudiid, ulu-dummagangi dodogega be obinnisad. 
Bela we-ibmar-durgana begi gudidiid, ega be sogedba e-masgunned ukmaid. 
Ega be masgunned ukmaid, emardi be-abin gundidiid. Ega be-argan be oyomaid, nue-immeledidiid. 
Be wagar-biriar-dakdele, be-abin gwayiddamalad. Be e-annik-mas-susale, burgwiddamalad, gannar napaga binniddamalad. 
Be-Burba be barmialile, bela gannarse napneg obinoleddaed. Deyob gannarse napneg naguddaed. 
Bab-Jehová-e-gangued-yeerdakleged degisadegusun. Bab-Jehová, e-ibmar-imaksadgi wergusun. 
Bab-Dummadi napneg-dakdele, ese napneg wawanmakdedaed. Yalamar-ebudele, waa daasa sigisdaed. 
An dula-gudiidgine, Bab-Jehováʼga an namakoed. Amba an dula-gudiidgine, namaklemaladgi an-Bab-Dummadga an namakoed. 
Ulubgi-an-egi-binsaedi, Bab-Dummad yeer-itogoed, Bab-Jehováʼgi an weligwar itoged. 
Dule-isgudimalad napneggi bergumarsun. Napneggi, dule-isgudimalad bar daklesuli gusun. ¡Bab-Jehová-nug an odummoged! ¡Bab-Jehová-nug odummolesun! 
