﻿Salmos.
46.
Coré-wagan we-namaked narmaksad. Namakmalad-e-iduedga soglenaid: “We-namaked-Alamotʼgi-namaklegoye.” Bab-Dummad anmar-niga-ogannogedid. Bab-Dummad anmar-irwa-gwisguedid. Bab-Dummad wilubdaklegedgi, anmar-bendaked-sunsogedid. 
Degisoggu, ar neg giglimakde-sogele, anmar dobguosulid. Yala-dummagan demar-wilagangi-dogdedibe, amba anmar dobguosulid. 
Demar-dummagan-urwedbali, yala-dummagan giglimakdedibe, amba anmar dobguosulid. 
Diwar-iirmakemaidi, weligwar Bab-Dummad-e-neggwebur imaked. Weligwar Bab-Dummad-Bur-Birigined-e-neg-Islidikid imaked. 
Bab-Dummad e-neggwebur-abargi gudiid, degisoggu, e-neggwebur akar-guosulid. Bab-Dummad, neg-oibosale, na e-neggwebur-bendakoed. 
Bab-Dummad-sunmakdele, dulemar-yar-baid-baidgi-bukwamalad dobguddamalad, neggweburmar-bubukwad giglimakdedaed. 
Bab-Jehová-Bela-Gangued-Nikad anmarba gudiid, Jacob-e-Bab-Dummad an-dukuedga gued. 
¡Dagmala! Bab-Jehová-e-ibmar-imaksad be dakdamala. We-napneggi-ibmar-dakledisulid-imaksad be dakdamala. 
Bab-Dummad we-napneg-ugakaase bela bila-onoleged obelosad. Warsimar bibisgisad, eswarmar bibisgisbalid, moli-urmar soogi ogumaksabalid. 
“Boo be ambikumalo, magar be an-dakmalo, ani an Bab-Dummadid. Dulemar-yar-baid-baidgi-bukwamalad-abargi an-nug odummolegoed, we-napneggi an-nug odummolegoed.” 
Bab-Jehová-Bela-Gangued-Nikad anmarba gudiid, Jacob-e-Bab-Dummad an-dukuedga gued. 
