﻿Salmos.
2.
¿Ibiga dulemar-yar-baid-baidgi-bukwamalad, Bab-Jehováʼgi binsarsunna urwebukwa? ¿Ibiga dulemar Bab-Jehováʼgi-aibinedgi binsarsunna binsabukwa? 
Reymar-negsemamaid, Bab-Jehováʼgi aibitemalad. Dulemar-nuga-nikamalad, Bab-Jehováʼgi isdar-binsadmalad. Bab-Jehová-na-nug-imaksadgi aibitemarbalid. 
We-dulemar, weyob sogdemalad: “Anmar e-gangued obeloge, e-negsemaidgi anmar ollorgumala.” 
Bab-Jehová-Niba-Neg-Dakmaid ega alled, Bab-Dummad amargi dodoged. 
Bab-Jehová a-dulemarse urwed. A-dulemar, Bab-Dummad-urwedba abin gwakidmalad. 
Bab-Jehová weyob ega sogded: “Ani an-yar-islidikid-Siónʼye-nugadgi, an-rey an mesisad.” 
Bab-Jehová-Igar-Mesisad an soggwelo. Bab-Dummad weyob anga sogsad: “Be an-machi gued, emi-ibagi, an be-babga gunonikid. 
Anse be ibmar egise, ar bela dulemar-yar-baid-baidgi-bukwamalad an bega ukoed, yarmar-nanaid bela ugakaase an bega ukbaloed. 
Sabsur-gandikidba be negseoed, sianar-irgwensur-mamariddaedyobi, be a-dulemar-imakoed.” 
Reymar, degisoggu, wisigarmar, nue-binsaed-nikaa damalo. Dulemar-negsemamaid, ¡nue salakarmar! Bab-Jehová bega ibmar-sognaidba be damar. 
Bemar, Bab-Jehová-e-nug nue-itoakwaa odummomalo, ise-itoakwaa Bab-Jehová-mag-dakedgi be wergudii gumalo. 
Bab-Jehová-mer-urwega, E-Machi-urbalikwaa be nanamarsun. Ar Bab-Jehová bemarse-uludele, bemar sunna ese oburgwilemalad. ¡Bab-Jehová dule-egi-bensuli-nanamaladgi, nued binsadaed! 
