﻿ᓃᔥᑎᒻ ᒞᓐ ᓃᔥᑎᒻ ᐅᒥᓯᓂᐦᐋᒫᒑᐎᓐ ᒞᓐ.
1.
ᒋᒥᓯᓂᐦᐋᒫᑎᓈᓐ ᐋᐦ ᐋᔨᒧᒥᒋᐦᑦ ᐊᓐ ᔖᔥ ᑳ ᑖᐦᑖᑯᐱᓐ ᐊᓂᑖᐦ ᒫᐅᒡ ᐅᔅᑭᒡ, ᐋᒸᔮ ᐅᐦᒋ ᑎᑯᐦᒡ ᒑᒀᓐ, ᐋᔪᐎᒄ ᐊᓐ ᐊᔨᒧᐎᓐ ᑳ ᐃᔑᓂᐦᑳᑖᑭᓅᑦ ᐊᓐ ᒫᔨᐙᑦ ᑳᒋᒡ ᐱᒫᑎᓰᐎᓂᔨᐤ᙮ ᓂᒌ ᐹᐦᑎᐙᓈᓐ, ᓈᐦᐄᔨᐤ ᓂᒌᐙᐱᒫᓈᓐ ᓂᔅᒌᓯᑰᓈᐦᒡ ᑭᔮᐦ ᓂᒌ ᑖᐦᒋᓈᓐ ᑎᐱᔨᐙ ᓂᑎᐦᒋᓈᐦᒡ᙮ 
ᒌ ᓅᑯᓲ ᐊᓐ ᑳᒋᒡ ᐱᒫᑎᓰᐎᓂᔨᐤ ᒫᔨᐙᑦ, ᒨᔥ ᐅᐦᑖᐐᒫᐤ ᐋᐦ ᑖᔨᒡ ᒌ ᑖᐦᑖᑯᐱᓐ᙮ ᒌ ᑎᑯᔑᓐ ᐋᐦ ᐄᔨᔨᐅᑦ ᐅᑎᐦ ᐊᔅᒌᐦᒡ, ᐋ ᒌ ᐙᐱᒥᒋᐦᒡ ᑭᔮᐦ ᒋᐐᐦᑎᒫᑎᓈᓐ ᐋ ᑖᑆᒥᑭᓃᔨᒡ ᐋ ᒌ ᓅᑯᓰᔅᑑᔨᒥᐦᑦ᙮ 
ᐊᓐ ᑳ ᐙᐱᒥᒋᐦᑦ ᑭᔮᐦ ᑳ ᐹᐦᑎᐎᒋᐦᑦ ᐋ ᐊᔨᒥᑦ ᒋᐐᐦ ᐋᔨᒨᑎᒫᑎᓈᓐ᙮ ᐋᒄ ᒫᒃ ᒑ ᒌ ᐐᒑᐎᔮᐦᒡ ᒸᐦᒡ ᐋ ᐄᔑ ᐐᒑᐎᒋᐦᒡ ᐅᐦᑖᐐᒫᐤ ᑭᔮᐦ ᒫᒃ ᐅᑯᓯᔅᐦ ᒌᓴᔅ ᙭᙮ 
ᐋᐅᒄ ᐆ ᐙᐦᒋ ᒥᓯᓂᐦᐋᒫᑖᐦᒡ ᒑ ᒌ ᓵᑭᔅᒋᓈᔥᑳᑯᔨᐦᒄ ᒨᒋᒑᔨᐦᑎᒧᐎᓐ᙮ 
ᒋᐐᐦ ᐐᐦᑎᒫᑎᓈᓐ ᑖᓐ ᑳ ᐄᔑ ᐐᐦᑎᒧᔨᒥᐦᑦ ᒌᓴᔅ᙮ ᐋᒄ ᑳᐦ ᐃᔨᑦ, ᒋᔖᒥᓂᑑ ᐋᐅᒄ ᐙᔥᑖᐎᓐ, ᓂᒧᐃ ᒥᑐᓐ ᐲᐦᒋᔥᑳᑰ ᐊᐅᑳᔅᑖᐎᓂᔨᐤ᙮ 
ᒥᔔ ᐄᔨᔨᐦᒀ ᒋᔖᒥᓂᑑ ᐋ ᐐᒑᐅᐦᒄ, ᐊᐅᑳᔥᑖᔮᐎᓂᐦᒡ ᒫᒃ ᐋ ᐄᔑ ᐱᒫᑎᓰᔨᐦᒄ, ᒌ ᓂᑎᔨᓈᓂᐤ ᑭᔮᐦ ᓂᒧᐃ ᑖᑆᐎᓂᐦᒡ ᒋᑎ ᐄᔑ ᐱᒫᑎᓰᓈᓂᐤ᙮ 
ᒥᔔ ᐙᔥᑖᐎᓂᐦᒡ ᐄᔑ ᐱᒫᑎᓰᔨᒀ ᒧᔮᒻ ᐐᔨ ᐙᔥᑖᐎᓂᐦᒡ ᐋᐦ ᑖᑦ, ᑖᑆᐦ ᒋᑭ ᒥᔪ ᐐᒑᐅᑐᓈᓂᐤ, ᑭᔮᐦ ᒌᓴᔅ, ᒋᔖᒥᓂᑑ ᐅᑯᓯᔅᐦ, ᐅᒥᐦᒄ ᒌ ᐱᔮᐦᒋᐦᐄᑯᐙᓈᓂᐤ ᒥᓯᐙ ᒥᒋᐃᐦᑣᐎᓂᐦᒡ ᐅᐦᒋ᙮ 
ᒥᔔ ᐄᔨᔨᐦᒀ ᐋᐦᐋᑳ ᒥᒋᐦᑑᑎᒧᒄ, ᒌ ᑳᒌᔑᒦᓱᓈᓂᐤ, ᑭᔮᐦ ᓂᒧᐃ ᒋᒋᔅᒑᔨᐦᑖᓈᓂᐤ ᑖᑆᐎᓐ᙮ 
ᒥᔔ ᒫᒃ ᑯᐃᔅᒄ ᐐᐦᑎᒨᐦᒀ ᒋᔖᒥᓂᑑ ᐋ ᒌ ᒥᒋᐦᑐᑎᒥᐦᒄ, ᑖᑆᐅᒑᔨᐦᑖᑯᓯᐤ ᒑ ᑐᑎᐦᒃ ᐊᓂᔮᔨᐤ ᑳᐦ ᐃᔨᑦ ᒑ ᑐᑎᐦᒃ᙮ ᑭᔮᐦ ᒑᔥᑎᓈᔥ ᑯᐃᔅᒄ ᑭᑎ ᐄᐦᑐ᙮ ᒋᑭ ᐙᐹᔨᐦᑎᒫᑯᓂᐤ ᒋᒥᒋᐦᑣᐎᓂᓂᐤ ᑭᔮᐦ ᒋᑭ ᐱᔮᐦᒋᐦᐄᑯᓂᐤ ᑖᓐ ᐋ ᐄᔑ ᐋᑳ ᑯᐃᔅᑯᑖᑎᓯᐅᒄ᙮ 
ᒥᔔ ᐄᔨᔨᐦᒀ ᐋᐦᐋᑳ ᒥᒋᐦᑐᑎᒥᐦᒄ ᒧᔮᒻ ᐋ ᓂᓂᑎᔨᑦ ᒋᑎᐄᔑᓈᑯᐦᐋᓂᐤ ᒋᔖᒥᓂᑑ ᑭᔮᐦ ᓂᒧᐃ ᒌ ᐲᐦᒋᔥᑳᑯᐙᓈᓂᐤ ᐅᑎᔨᒧᐎᓐᐦ᙮ 
