﻿ᒉᒥᔅ.
2.
ᓃᒋᔖᓂᑎᒄ, ᐋ ᑖᑆᔮᔨᒫᒄ ᑎᐹᔨᐦᒋᒑᓯᐤ ᒌᓴᔅ ᙭ ᐊᓐ ᒫᐅᒡ ᒑᔅᑖᔨᐦᑖᑯᓯᑦ, ᒥᓯᐙ ᐊᐙᓐ ᐹᔨᑯᓂᐦᒡ ᒋᐱᐦ ᐄᑖᔨᒫᐙᐤ ᑭᔮᐦ ᒋᐱᐦ ᑐᑎᐙᐙᐤ᙮ 
ᐅᑎᐦᑎᑖᒄ ᒫᐦ ᐋ ᒥᓰᒋᓰᑦ ᓈᐹᐤ ᒫᒀᒡ ᐋ ᓂᔥᑐᐎᔮᒄ ᐋ ᐊᔨᒥᐦᐋᔮᒄ, ᐋ ᐅᔖᐅᔓᐎᔮᓈᐱᔥᑯᐎᔨᒡ ᒫᒃ ᑖᐱᒋᔅᒑᐦᐱᓱᓐ ᒋᒋᔥᑭᐙᑦ, ᑭᔮᐦ ᒫᒃ ᓈᔥᒡ ᒥᔻᔑᔨᔨᒡ ᐅᒑᒀᓂᒻ᙮ ᒑᒃ ᒫᒃ ᒦᓐ ᑯᑎᒃ ᓈᐹᐤ ᐅᐦᒋ ᐲᐦᒑᑦ, ᓈᔥᒡ ᐋ ᒋᔅᑎᒫᑎᓯᑦ ᑭᔮᐦ ᓈᔥᒡ ᐋ ᒋᔅᑎᒫᒋᓈᑯᓃᔨᔨᒡ ᐅᒑᒀᓂᒻ᙮ 
ᒋᔅᑖᔨᒥᑦ ᒫᒃ ᐊᓐ ᑳ ᒥᓰᒋᓰᑦ ᓈᐹᐤ ᐋᐦ ᐄᑎᑦ, “ᐋᔥᑎᒻ ᒫᐦ, ᐅᑖᐦ ᐋ ᒥᔻᔑᒡ ᐹᒋ ᐊᐱᐦ᙮” ᐋᒄ ᒫᒃ ᐄᑎᑦ ᐊᓐ ᑳ ᒋᔅᑎᒫᑎᓯᑦ ᓈᐹᐤ, “ᓈᑖᐦ ᓃᐴᒫᐦ,” ᑭᔮᐦ ᒫᒃ ᐄᑎᑦ, “ᐅᑖᐦ ᓂᓯᑎᐦᒡ ᐹᒋ ᐊᐱᐦ,” 
ᑯᐃᔅᒄ ᐋ ᒋᑎᐦᑎᓈᐙᐤ ᐆ ᐋᐃᐦᑎᔮᒄ? ᒌ ᒥᔪᑐᑎᐙᐤ ᐹᔨᒄ ᐋᒄ ᐊᓐ ᑯᑎᒃ ᓂᒧᐃ ᒧᔮᒻ ᒋᑎ ᑐᑎᐙᐤ ᒥᒄ ᐊᓂᔮᔨᐤ ᐋ ᐃᓯᓈᑯᓯᒡ ᐊᓂᑎᐦ ᐎᔥᒡ᙮ ᒋᐎᓂᑐᑖᓈᐙᐤ ᐊᓂᔮᔨᐤ ᐋ ᐄᔑ ᑭᓂᐙᐱᒫᑯᒡ᙮ 
ᔮᒀᐦ ᓂᑐᐦᑎᒧᒄ ᓃᒋᔖᓂᑎᒄ᙮ ᓂᒧᐃ ᐋ ᐊᓂᔮᔨᐤ ᑳ ᒋᔅᑎᒫᑎᓰᔨᒡ ᐅᑎᐦ ᐊᔅᒌᐦᒡ ᑳᐦ ᑖᔨᒡ ᐅᐦᒋ ᐎᔮᔨᒫᐤ ᒋᔖᒥᓂᑑ ᒥᔥᑏᐦ ᒑ ᒌ ᐃᔮᔨᒡ ᑖᑆᔮᔨᐦᑎᒧᐎᓂᔨᐤ ᑭᔮᐦ ᒑ ᒌ ᐃᔮᔨᒡ ᒋᐦᒋᐅᒋᒫᐎᓂᔨᐤ ᐊᓂᔮᔨᐤ ᑳᐦ ᐄᑖᑦ ᒑᔥᑎᓈᔥ ᒑ ᒥᔮᑦ ᐊᓂᔮᔨᐤ ᑳ ᓵᒋᐦᐄᑯᑦ? 
ᒥᒄ ᒫᒃ ᒌᔨᐙᐤ ᓂᒧᐃ ᒌ ᒋᔅᑖᔨᒫᐙᐅᒡ ᐊᓂᒌ ᑳ ᒋᔅᑎᒫᑎᓰᔨᒡ᙮ ᒥᒄ ᒫᒃ ᐊᐅᑯᓂᒡ ᐊᓂᒌ ᑳ ᒥᓯᒋᓰᔨᒡ ᓈᔥᒡ ᑳ ᐐᐦ ᐊᐄᑐᑖᑖᑯᒡ, ᑭᔮᐦ ᒫᒃ ᑎᐹᔅᑯᓂᒑᐅᑭᒥᑯᐦᒡ ᑳ ᐄᑐᐦᑎᐦᐄᑖᑯᒡ᙮ 
ᐋᐅᑯᓂᒡ ᐅᒌ ᑳ ᒦᓯᒋᓰᔨᒡ ᓈᔥᒡ ᒥᔮᔮᔨᐦᑎᐦᒡ ᐊᓂᔮᔨᐤ ᐃᔑᓂᐦᑳᓱᐎᓂᔨᐤ ᑳ ᒋᔅᑖᔨᐦᑖᑯᓃᔨᒡ᙮ ᐋᔪᐎᒄ ᐅᔮᔨᐤ ᐅᑎᔑᓂᐦᑳᓱᐎᓐ ᐊᓐ ᑖᐹᔨᒥᑖᒄ᙮ 
ᑖᑆᐦ ᒫᒃ ᒋᑭ ᒥᔪᑐᑖᓈᐙᐤ ᓂᓂᐦᐄᐦᑎᒫᒀ ᐊᓐ ᒫᐅᒡ ᑳ ᒋᔅᑖᔨᐦᑖᑯᐦᒡ ᐐᔓᐙᐎᓐ, ᐊᓐ ᑳᐦ ᐄᑎᔥᑖᒡ ᒋᐦᒋᒥᓯᓂᐦᐄᑭᓂᐦᒡ, “ᓵᒋᐦᐄᐦ ᒌᒋᐄᔨᔨᐤ ᒧᔮᒻ ᒌ ᐋ ᐃᔥᐱᔥ ᓵᒋᐦᐄᓱᔨᓐ᙮” 
ᒥᔔ ᒫᒃ ᐃᔨᐦᒡ ᐄᑖᔨᒫᒀ ᐹᔨᒄ ᐊᐙᓐ ᑖᓐ ᐋᐦ ᐄᑖᔨᒫᒄ ᑯᑎᒃ ᐊᐙᓐ ᒋᒥᒋᐦᑐᑖᓈᐙᐤ᙮ ᒋᑖᑆᒥᑯᓈᐙᐤ ᐋ ᒥᒋᐦᑑᑎᒫᒄ ᐐᔓᐙᐎᓂᐦᒡ ᐅᐦᒋ᙮ 
ᐙᔥ ᐊᓐ ᐊᐙᓐ ᒥᓯᐙ ᐊᓂᔮᔨᐤ ᐐᔓᐙᐎᓂᔨᐤ ᑳ ᓂᓃᐦᑎᐦᒃ ᐋᑦ ᒫᒃ ᒥᒄ ᐹᔨᒄ ᒑᒀᔨᐤ ᐊᓂᑎᐦ ᑖᓐ ᐋᐦ ᐄᑎᔥᑖᔨᒡ ᐲᑯᓂᐦᑳ ᒥᓯᐙ ᐊᓂᔮᔨᐤ ᐐᔓᐙᐎᓂᔨᐤ ᐋ ᐲᑯᓂᐦᒃ ᐃᓯᓈᑯᓯᐤ᙮ 
ᐊᓐ ᒋᔖᒥᓂᑑ ᑳᐦ ᐃᔨᑯᐱᓈ, “ᐊᑳᐐ ᒋᑭ ᐱᓯᒀᑎᓰᓐ,” ᐊᔮᐱᒡ ᑭᔮᐦ ᒌ ᐃᔨᑖᑯᐱᓐ, “ᐊᑳᐐ ᒋᑭ ᓂᐱᐦᐄᐙᓐ᙮” ᐋᑦ ᐋᑳ ᒫᒃ ᐙᐦᒋ ᐱᔑᒀᑎᓯᐅᓈ, ᑳ ᓂᐱᐦᐋᐅᑖ ᒫᒃ ᐊᐙᓐ, ᒌ ᐲᑯᓈᓐ ᒥᓯᐙ ᐐᔓᐙᐎᓐ᙮ 
ᒋᐱᐦ ᐄᔑ ᐋᔨᒥᓈᐙᐤ ᑭᔮᐦ ᒫᒃ ᒋᐱᐦ ᑎᓈᐙᐤ ᐄᔨᔨᐅᒡ ᐋᔥᒄ ᒑ ᑎᐹᔅᑯᓈᑭᓂᐎᒡ ᐊᓂᔮᔨᐤ ᐐᔓᐙᐎᓂᔨᐤ ᑳ ᐱᑯᐦᐄᐙᔨᒡ ᐅᐦᒋ᙮ 
ᐊᐙᓐ ᐋᑳ ᑳ ᒋᔅᑎᒫᒑᔨᒫᑦ ᑯᑎᒃ ᐊᐙᔨᐤᐦ ᓂᒧᐃ ᑭᔮᐦ ᐐᔨ ᑭᑎ ᐅᐦᒋ ᒋᔅᑎᒫᒑᔨᒥᑰ ᒋᔖᒥᓂᑑᐦ ᐄᔥᐱᐦ ᑎᐹᔅᑯᓈᑭᓄᒑ᙮ ᒥᒄ ᒫᒃ ᐊᓐ ᐊᐙᓐ ᑳ ᒋᔅᑎᒫᒑᔨᒫᑦ ᑯᑎᒃ ᐊᐙᔨᐤᐦ ᒋᔖᒥᓂᑑᐦ ᒋᑭ ᒋᔅᑎᒫᒑᔨᒥᑰ ᑎᐹᔅᑯᓈᑭᓅᒑ᙮ 
ᓃᒋᔖᓂᑎᒄ, ᑖᓐ ᐄᔑ ᔮᐦᐱᒡ ᐊᐙᓐ ᐋᐦ ᐃᔨᑦ, ᓂᑖᑆᔮᔨᒫᐤ ᒋᔖᒥᓂᑑ, ᐋᐦᐋᑳ ᒫᒃ ᒥᔪᑐᑎᐙᑦ ᐊᐙᔨᐤᐦ᙮ ᑭᑎ ᒌ ᐱᒫᒋᐦᐄᑰ ᐋ ᒥᒄ ᐊᓂᔮᔨᐤ ᐋᐦ ᐃᔨᑦ, ᓂᑖᑆᐦᑖᓐ᙮ 
ᐃᐦᑖᑦ ᒫᐦ ᒌᒋᔖᓂᐤ ᑭᔮᐦ ᒫᒃ ᒌᒋᔖᓂᔅᒀᒥᓂᐤ ᐋ ᓂᑎᐙᔨᐦᑎᐦᒃ ᒑᒀᔨᐤ ᒑ ᒋᒋᔥᑭᐦᒃ, ᑭᔮᐦ ᒫᒃ ᒦᒋᒥᔨᐤ ᐋ ᓅᐦᑖᐱᔨᑦ, 
ᑖᓐ ᐄᔑ ᔮᐦᐱᒡ ᒥᒄ ᐋᐦ ᐄᑎᑦ, “ᒋᔖᒥᓂᑑ ᒋᑭ ᒥᔪᑐᑖᒄ᙮ ᒌᔔᐎᓂᐦᒌᓈᑰᐦ ᑭᔮᐦ ᒌᔥᐳᐦᐄᓲ,” ᐋᑳ ᒫᒃ ᒥᔨᑖ ᐊᓂᔮᔨᐤ ᒑᒀᔨᐤ ᑖᓐ ᐋ ᐄᔑ ᓂᑎᐙᔨᐦᑎᐦᒃ? 
ᐋᐅᒄ ᒫᒃ ᒧᔮᒻ ᐋ ᐃᓯᓈᑯᐦᒡ ᐊᐙᓐ ᐋᐦ ᐃᔨᑦ, ᓂᑖᑆᔮᔨᒫᐤ ᒋᔖᒥᓂᑑ ᐋᐦᐋᑳ ᒫᒃ ᓅᑯᓃᔨᒡ ᑖᓐ ᐋ ᐄᔑ ᒥᔪᑐᑎᐦᒃ᙮ ᓂᒧᐃ ᐋᐱᑎᓂᔨᐤ ᐅᑖᑆᔮᔨᐦᑎᒧᐎᓐ᙮ 
ᑭᑎ ᒌ ᐃᓯᓈᑯᓐ ᐊᐙᓐ ᒑ ᒌ ᐃᔨᑦ, “ᒋᑎᔮᓐ ᑖᑆᔮᔨᐦᑎᒧᐎᓐ ᒌᔨ, ᐋᒄ ᓃᔨ ᓂᒥᔪᑐᑖᓐ᙮” ᓂᐱᐦ ᓂᔥᒀᐅᔑᐦᐋᐤ, “ᐹᒋ ᐙᐱᐦᑏ ᒫᐦ ᒋᑖᑆᔮᔨᐦᑎᒧᐎᓐ ᐋᐦᐋᑳ ᐊᓯᑎᓂᒥᓐ ᒌ ᒥᔪ ᑐᑎᒨᓐ ᐋᒄ ᒫᒃ ᓃᔨ ᒑ ᐙᐱᐦᑎᔨᑖᓐ ᓂᑖᑆᔮᔨᐦᑎᒧᐎᓂᒡ ᓂᒥᔪ ᑐᑎᒨᓐ ᐅᐦᒋ᙮” 
ᒋᑖᑆᐦᑖᓐ ᒋᔖᒥᓂᑑ ᒥᒄ ᐋ ᐹᔨᑯᔑᑦ᙮ ᑯᐃᔅᑯᓈᑯᓐ ᐆ ᐋ ᐄᔑ ᑖᑆᐦᑎᒥᓐ᙮ ᐙᐙᒡ ᑭᔮᐦ ᐐᔨᐙᐤ ᒥᒋᐊᐦᒑᐦᑯᒡ ᑖᑆᐦᑎᒧᒡ ᐅᔮᔨᐤ, ᐙᐐᐱᔫᒡ ᒫᒃ ᐋ ᐃᔥᐱᔥ ᓵᒋᓯᒡ᙮ 
ᒋᓂᑎᐙᔨᐦᑖᓐ ᐋ ᐆ ᒌᔨ ᒌᔥᒀᐦᑳᓐ, ᒑ ᒌ ᐙᐱᐦᑏᑭᐎᔨᓐ ᐋᐦᐋᑳ ᐎᔮᔥ ᐃᓯᓈᑯᓃᔨᒡ ᐊᐙᓐ ᐅᑖᑆᔮᔨᐦᑎᒧᐎᓐ ᒥᔔ ᐋᑳ ᓅᑯᓃᔨᒑ ᐅᑎᔨᐦᑑᑎᒧᐎᓐ᙮ 
ᑖᓂᑖᐦ ᑳ ᐅᐦᒋ ᑯᐃᔅᑯᓈᑯᐦᐋᑭᓅᑦ ᒋᔖᒥᓂᑑᐦ ᐄᔑ ᐋᐦ ᑖᔨᐦᒡ ᐊᓂᔮ ᑰᐦᑖᐐᓂᐤ ᐋᑉᕋᐦᐋᒻ? ᐋ ᒌ ᐱᒋᔅᑎᓂᒧᐙᑦ ᐅᑯᓯᔅᐦ ᐋᐃᓯᒃᐦ ᒋᔖᒥᓂᑑᐦ ᐄᔑ ᐋᐦ ᑖᔨᐦᒡ, ᐋᐅᒄ ᐙᐦᒌ ᑯᐃᔅᑯᓈᑯᐦᐋᑭᓅᑦ᙮ 
ᒋᐙᐱᐦᑎᒸᓐ ᑖᓐ ᑳ ᐄᔑ ᒫᒨ ᐋᐱᑎᓰᒥᑭᓃᔨᒡ ᐅᑖᑆᔮᔨᐦᑎᒧᐎᓐ ᑭᔮᐦ ᐅᑎᔨᐦᑐᐎᓐ᙮ ᐊᓂᔮᔨᐤ ᐅᑎᔨᐦᑑᐎᓂᐦᒡ ᐋᑯᑦ ᑳ ᐅᐦᒋ ᓅᑯᓃᔨᒡ ᒥᑐᓐ ᐋ ᒌ ᐃᔮᑦ ᑖᑆᔮᔨᐦᑎᒧᐎᓂᔨᐤ᙮ 
ᒌ ᑎᐱᐱᔨᐤ ᒫᒃ ᐊᓐ ᑳᐦ ᐄᑎᔥᑖᒡ ᒋᐦᒋᒥᓯᓂᐦᐄᑭᓂᐦᒡ, ᐊᓂᔮ ᐋᑉᕋᐦᐋᒻ ᒌ ᑖᑆᔮᔨᒫᐤ ᒋᔖᒥᓂᑑᐦ ᐋᔪᐎᒄ ᒫᒃ ᐙᐦᒋ ᐄᑖᔨᒥᑯᑦ ᐋ ᑯᐃᔅᑯᑖᑎᓰᑦ᙮ ᐊᓂᔮ ᐋᑉᕋᐦᐋᒻ ᒫᒃ ᒋᔖᒥᓂᑑ ᐅᐐᒑᐙᑭᓐᐦ ᒌ ᐃᔑᓂᐦᑳᑖᑭᓂᐤ᙮ 
ᒋᐙᐱᐦᑖᓐ ᒫᒃ, ᑯᐃᔅᑯᓈᑯᐦᐋᑭᓂᐤ ᐊᐙᓐ ᐋᔨᐦᑐᐎᓂᒡ ᐅᐦᒋ ᓂᒧᐃ ᒥᒄ ᑖᑆᔮᔨᐦᑎᒧᐎᓂᐦᒡ ᐅᐦᒋ᙮ 
ᐱᑯᓂᒑ ᐊᓐ ᐱᔑᑯᐙᑎᓯᐅᐃᔅᒀᐤ ᕃᐦᐋᑉ, ᒌ ᐐᒋᐦᐋᐤ ᒎᐤ ᑳ ᑭᒋᒨᓵᐱᔨᒡ ᐋ ᒌ ᐲᐦᑎᑭᐦᐋᑦ ᐐᒋᐦᒡ ᒑ ᒌ ᐊᑯᓯᒨᔨᒡ ᑭᔮᐦ ᒫᒃ ᐋ ᒌ ᒋᐦᒋᑎᔑᐦᐙᑦ ᑯᑎᒋᔨᐤ ᒫᔅᑭᓈᔨᐤ ᐋ ᒌ ᐙᐱᐦᑏᔮᑦ ᒑ ᐋᐱᒋᐦᑖᔨᒡ᙮ ᐋᔫᒃ ᑳᐦ ᑏᒃ ᐊᓐ ᕃᐦᐋᑉ ᐙᐦᒋ ᒌ ᑯᐃᔅᑯᓈᑯᐦᐋᑭᓅᑦ᙮ 
ᐙᔥ ᐋᐦᐋᑳ ᑎᑯᐦᒡ ᔮᐦᔮᐎᓐ ᒥᔮᐦᒡ ᐳᓂᐱᒫᑎᓰᒥᑭᓐ ᐊᓐ ᒥᔫ᙮ ᐋᐅᒄ ᒧᔮᒻ ᐋ ᐃᓯᓈᑯᐦᒡ ᑖᑆᔮᔨᐦᑎᒧᐎᓐ ᐋᐦᐋᑳ ᐃᔅᒡ ᑎᑯᐦᒡ ᒥᔪᑐᑎᒧᐎᓐ ᓂᐲᒥᑭᓐ ᐊᓐ ᑖᑆᔮᔨᐦᑎᒧᐎᓐ᙮ 
