﻿ᑳᓓᔑᔨᓐ ᑆᓪ ᑳ ᒥᓯᓂᐦᐋᒧᐙᑦ ᐅᒫᒨᐊᔨᒥᐦᐋᐤ ᑳᓓᓰᔮᐦᒡ ᑳᐦ ᑖᔨᒡ.
1.
ᓃᔨ ᑆᓪ ᑳ ᒥᓯᓂᐦᐋᒫᑎᑯᒡ᙮ ᐐᔨ ᒌᓴᔅ ᙭ ᐙᒌᐦᒡ ᓂᒌ ᐅᐙᔮᐱᒥᒄ ᐋᑆᔅᑎᓪ ᒑ ᒌ ᐄᑖᐱᒋᐦᐄᑦ᙮ ᑭᔮᐦ ᒫᒃ ᒋᔖᒥᓂᑑ ᑰᐦᑖᐐᓂᐤ ᓂᒌ ᐅᐙᔮᐱᒧᒄ, ᐊᓐ ᑳ ᐙᓂᔥᑳᓈᑦ ᒌᓴᔅᐦ ᓂᐱᐎᓂᐦᒡ ᐅᐦᒋ᙮ ᓂᒥᔮᐤ ᐐᔨ ᓈᐹᐤ ᑳ ᐅᐙᔮᐱᒥᑦ ᑭᔮᐦ ᓂᒥᔮᐤ ᓈᐹᐤ ᑳ ᒥᔨᑦ ᐅᔮᔨᐤ ᒑ ᒌ ᐄᑖᐱᑎᓯᐎᒡ᙮ 
ᒌᔨᐙᐤ ᐐᒋᔖᓂᒫᐅᒡ ᑳᓓᓰᔮ ᑳ ᐃᔑᓂᐦᑳᑖᒡ ᐊᔅᒌ ᑳᐦ ᑖᔮᒄ ᒋᐙᒋᔮᒥᑎᓈᓐ᙮ ᓃᔨ ᑭᔮᐦ ᒫᒃ ᒥᓯᐙ ᐊᓂᒌ ᐅᒫᒨᐊᔨᒥᐦᐋᐅᒡ ᐅᑎᐦ ᑳᐦ ᑖᒡ ᒋᐙᒋᔮᒥᑎᓈᓐ᙮ 
ᓂᐱᑯᓵᔨᒫᐤ ᒋᔖᒥᓂᑑ ᑰᐦᑖᐎᓂᐤ ᑭᔮᐦ ᒌᓴᔅ ᙭ ᒋᑎᐹᔨᐦᒋᒑᓰᒥᓂᐤ ᒑ ᒌ ᒥᔪᑐᑖᑖᑯᒡ ᑭᔮᐦ ᒑ ᒌ ᒥᔨᑖᑯᒡ ᒋᔮᒫᔨᐦᑎᒧᐎᓂᔨᐤ᙮ 
ᒌᓴᔅ ᒥᑐᓐ ᒌ ᐱᒋᔥᑖᔨᒥᓲ ᒑ ᒌ ᐙᐹᔨᐦᑖᒫᑭᐎᔨᐦᒄ ᒋᒥᒋᐦᑣᐎᓂᐤ, ᑭᔮᐦ ᒑ ᒌ ᐱᑯᐦᐄᑎᐦᒄ ᑖᓐ ᐋ ᐄᔑ ᑎᐹᔨᒥᑰᐦᒄ ᒥᒑᑎᓰᐎᓂᔨᐤ ᐊᓅᐦᒡ᙮ ᐋᔪᐎᒄ ᐅᔮᔨᐤ ᑳ ᐄᔑ ᓂᑎᐙᔨᐦᑎᒥᔨᒡ ᑰᐦᑖᐎᓂᐤ ᒋᔖᒥᓂᑑ ᒑ ᒌᐦ ᑎᒃ᙮ 
ᐄᑖᔨᐦᑖᑯᓲ ᒫᒃ ᒋᔖᒥᓂᑑ ᑳᒋᒡ ᒑ ᒌ ᒫᒥᐦᒋᒫᑭᓅᑦ᙮ ᐋᒥᓐ᙮ 
ᑖᑆᐦ ᒋᑯᔥᒀᔨᒥᑎᓈᐙᐤ ᑳ ᐃᔥᐱᔥ ᐐᐱᒡ ᒌ ᐋᑎ ᓂᑭᑖᒄ ᒋᔖᒥᓂᑑ ᐊᓐ ᑳ ᐎᔮᔨᒥᑖᒄ ᙭ ᐅᒥᔪᐦᑳᒑᐎᓃᔨᒡ ᐅᐦᒋ᙮ ᒋᓂᑐᐦᑖᓈᐙᐤ ᑎᔨᑯᒡ ᑯᑎᒡ ᒋᔅᑯᑎᒫᒑᐎᓐ ᐋ ᐄᑖᔨᐦᑎᒫᒄ ᐋᐦᐋᐆᐦᒡ ᒥᔻᒋᒧᐎᓐ, 
ᑖᐹ ᑎᑯᓐ ᑯᑎᒡ ᒥᔻᒋᒧᐎᓐ᙮ ᒥᒄ ᒫᒃ ᑖᐅᒡ ᐄᔨᔨᐅᒡ ᐊᓂᑖᐦ ᐋᐦ ᑖᔮᒄ ᐋ ᒥᑯᔥᑳᑖᔨᐦᑎᒥᐦᐄᑖᑯᒡ, ᐋ ᐐᐦ ᒀᔅᒋᓂᐦᒡ ᐊᓂᔮᔨᐤ ᙭ ᐆ ᒥᔻᒋᒧᐎᓂᔨᐤ᙮ 
ᒥᒄ ᒫᒃ ᓃᔮᓐ ᑭᔮᐦ ᒫᒃ ᐊᓐ ᐋᓐᒋᓐ ᒋᐦᒋᒌᔑᑯᐦᒡ ᑳ ᐅᐦᑐᐦᑖᑦ ᐃᔨᐦᒡ ᐄᔑ ᑳ ᒑᔅᒀᔮᐦᒑ ᒥᔻᒋᒨᐎᓐ ᐊᓐ ᑳ ᐄᔑ ᐹᒋ ᑳ ᒑᔅᒋᒥᑖᐦᒡ ᐊᓂᑖᐦ ᐅᑖᐦᒡ ᐊᑯᔥ ᑳᒋᒡ ᑭᑎ ᒫᑯᐦᐋᑭᓂᐤ ᐊᓐ ᐃᔨᐦᒡ ᒑ ᐄᔑ ᑭᒑᔅᒀᑦ᙮ 
ᔖᔥ ᒋᒌ ᐐᐦᑎᒫᑎᓈᐙᐤ ᐆ, ᒥᒄ ᒫᒃ ᒦᓐ ᒋᑭ ᐐᐦᑎᒫᑎᓈᐙᐤ᙮ ᒥᔔ ᑭᒑᔅᒋᒥᑖᒀ ᐊᐙᓐ ᑯᑎᒋᔨᐤ ᒥᔻᒋᒧᐎᓂᔨᐤ ᐊᓂᔮᔨᐤ ᔖᔥ ᐐᔨ ᑳ ᐹᒋ ᑖᑆᐦᑎᒸᒄ ᐅᑖᐦᒡ ᐋᑯᔥ ᒋᑭ ᒫᑯᐦᐋᑭᓂᐤ᙮ 
ᒥᒄ ᐐᐦ ᑐᑎᐙᐤ ᐊᐙᔨᐤᐦ ᒑ ᒌ ᒥᒥᔻᒋᒥᑯᑦ ᒋᑎᐄᑖᔨᒥᓈᐙᐤ ᐋ? ᓂᒧᐃ᙮ ᑖᐹ ᓈᓂᑎᐙᔨᐦᑖᓐ ᐄᔨᔨᐅᒡ ᒑ ᒌ ᒥᔻᒋᒥᒡ ᒥᒄ ᒋᔖᒥᓂᑑ ᐋᐅᒄ ᓃᔮᓂᑎᐙᔨᐦᑎᒧᒡ ᒑ ᒌ ᒥᔻᒋᒥᑦ᙮ ᑖᐹ ᓈᓂᑎᐙᔨᐦᑖᓐ ᑭᔮᐦ ᒑ ᒌ ᓂᐦᐋᔨᐦᑎᒥᐦᐄᒀ ᐄᔨᔨᐅᒡ, ᐙᔥ ᐊᓐ ᒑ ᐄᔑ ᓂᑎᐙᔨᐦᑎᒧᐙᓈ ᓂᒧᐃ ᓂᐱ ᐅᐦᒋ ᐋᐱᑎᔒᔥᑎᐙᐤ ᙭᙮ 
ᓃᒋᔖᓂᑎᒄ, ᒋᓂᑎᐙᔨᒥᑎᓈᐙᐤ ᒑ ᒌ ᒋᔅᒑᔨᐦᑎᒫᒄ ᐆ ᒥᔻᒋᒧᐎᓐ ᑳ ᐙᐐᐦᑎᒫᓐ ᓂᒧᐃ ᓈᐹᐤ ᐋᐦ ᑖᑦ ᐅᐦᒌᒥᑭᓐ᙮ 
ᓂᒧᐃ ᐐᔨ ᓈᐹᐤ ᐋᐦ ᑖᑦ ᓅᐦᒋ ᐅᐦᑎᓈᓐ᙮ ᓂᒧᐃ ᑭᔮᐦ ᓈᐹᐤ ᓅᐦᒋ ᒋᔅᑯᑎᒫᒄ᙮ ᐐᔨ ᒌᓴᔅ ᙭ ᐙᒌᐦᒡ ᓂᒌ ᒋᔅᒑᔨᐦᑎᒥᐦᐄᒄ ᐅᔮᔨᐤ ᒥᔻᒋᒧᐎᓂᔨᐤ᙮ 
ᒑᔥᑎᓈᔥ ᒋᒌ ᐹᐦᑖᓈᐙᒑ ᑖᓐ ᑳ ᐄᑖᑎᓰᔮᓐ ᐊᓂᑖᐦ ᐅᑖᐦᒡ ᐋᔥᒄ ᒎᐤ ᐅᑎᔨᒥᐦᐋᐎᓂᐙᐤ ᑭᔮᐦ ᐅᑎᔨᐦᑎᐎᓂᐙᐤ ᐋ ᒌ ᓅᔔᔥᑭᒫᓐ᙮ ᓄᐎᒡ ᓂᒌ ᓂᓈᐦᑳᑖᔨᒧᐦᐄᒫᔨᐤ ᒋᔖᒥᓂᑑ ᐅᑎᔨᔨᒻᐦ ᒌᓴᔅᐦ ᑳ ᑖᑆᔮᔨᒫᔨᒡ᙮ ᒥᒄ ᐋ ᐃᔥᐱᔥ ᒌᐦ ᑐᑎᒧᒡ ᓂᒌᐦ ᑐᑎᒸᓐ ᒑ ᒌ ᓂᔑᐎᓈᒋᐦᐄᒥᒡ 
ᐊᐅᔅᑖ ᓃᔨ ᓈᔥᒡ ᓂᒌᐦ ᑐᑖᓐ ᑖᓐ ᑳᐦ ᐄᑎᔓᒥᑯᔮᐦᒡ ᒎᐤ ᐅᑎᔨᒥᐦᐋᐎᓂᐙᐤ ᐃᔥᐱᔥ ᐐ ᒥᐦᒑᑐ ᓃᒋ ᒎᐤ ᐄᔨᔨᐅᒡ ᐋ ᐐᒋ ᐄᔑ ᐱᒫᑎᓰᒥᒀᐤ᙮ ᒥᒄ ᐋ ᐃᔥᐱᔥ ᒌᐦ ᑐᑎᒫᓐ ᓂᒌ ᐐᐦ ᓂᓂᐦᐄᐦᑎᒸᓐ ᐅᒋᔅᑯᑎᒫᒑᐎᓂᐙᐤ ᐊᓂᔮᐦᑳ ᒌ ᐙᐦᑯᒫᑭᓂᐎᒡ᙮ 
ᐊᔮᐱᒡ ᒫᒃ ᓂᒌ ᐅᐙᔮᐱᒥᑯᐦᑖᑯᐱᓐ ᒋᔖᒥᓂᑑ ᐋᒸᔮ ᐅᐦᒋ ᐱᒫᑎᓰᐎᒡ᙮ ᓂᒌ ᐎᔮᔨᒥᑯᐦᑖᑯᐱᓐ ᐐᔨ ᒑ ᒌ ᑎᐹᔨᒥᑦ ᐊᓂᔮᔨᐤ ᐋ ᒌ ᒋᔖᐙᑐᑖᐆᑦ᙮ ᐃᔥᐱᔥ ᑳᓂᐦᐋᔨᐦᑎᒥᐦᐄᑯᑦ 
ᒑ ᒌ ᒋᔅᒑᔨᒥᒡ ᐅᑯᓯᔅᐦ, ᐋᑎ ᒑ ᒌ ᐅᐦᒋ ᑳ ᒑᔅᒋᒥᒡ ᒥᔻᒋᒧᐎᓂᔨᐤ ᐊᓂᔮᔨᐤ ᐋᑳ ᑳ ᒎᐤ ᐄᑎᔅᑳᓈᓰᔨᒡ᙮ ᓂᒧᐃ ᐊᐙᓐ ᓅᐦᒋ ᑯᒀᒋᒫᐤ ᑖᓐ ᒑ ᑑᐎᒡ᙮ 
ᓂᒧᐃ ᑭᔮᐦ ᓅᐦᒋ ᐄᑐᐦᑖᓐ ᒋᕉᓯᓕᒥᐦᒡ ᒑ ᒌ ᓂᑎᐙᐱᒥᒀᐤ ᐊᓂᒌ ᑯᑎᑭᒡ ᐋᑆᔅᑎᓕᒡ, ᐊᓂᒌ ᔖᔥ ᐐᔨᐙᐤ ᑳ ᐅᐙᔮᐱᒫᑭᓂᐎᒡ ᐋᒸᔮ ᓃᔨ ᐅᐦᒋ ᐎᔮᔨᒥᑯᐎᒡ᙮ ᑎᔨᑯᒡ ᑏᐙᐦᒡ ᐊᓂᑖᐦ ᐊᕇᐱᔮ ᑳ ᐃᔑᓂᐦᑳᑖᒡ ᐊᔅᒌ ᓂᒌᐦ ᐄᑐᐦᑖᓐ᙮ ᒑᒃ ᐹᑎᒫ ᑖᒫᔅᑭᔅ ᑳ ᐃᔑᓂᐦᑳᑖᒡ ᐃᐦᑖᐎᓐ ᑳᐤ ᑳ ᐄᑐᐦᑖᔮᓐ᙮ 
ᓂᔥᑐ ᐱᐳᓐ ᐹᑎᒫ ᐋᒄ ᒋᕉᓯᓕᒥᐦᒡ ᑳ ᐄᑐᐦᑖᔮᓐ ᒑ ᒌ ᓂᑑᓂᒋᐦᐄᒃ ᐲᑎᕐ, ᒑ ᒌ ᐋᑎ ᒋᔅᒑᔨᒥᒃ᙮ ᓃᔓ ᑎᐎᔥᑖᐤ ᒫᒃ ᓂᒌ ᐐᒋᒫᐤ᙮ 
ᓂᒧᐃ ᒥᒄ ᓅᐦᒋ ᐙᐱᒫᔨᐤ ᐊᓂᔮᔨᐤ ᑯᑎᒃ ᐋᑆᔅᑎᓪᐦ᙮ ᒥᒄ ᒉᒥᔅ ᒋᑎᐹᔨᐦᒋᒑᓰᒥᓂᐤ ᐐᒋᔖᓐᐦ ᐋᐅᒄ ᐊᓐ ᑳ ᐙᐱᒥᒄ᙮ 
ᒋᔖᒥᓂᑑ ᒋᔅᒑᔨᐦᑎᒻ ᐋ ᑖᑆᐅᒡ ᐅᔮᔨᐤ ᑳ ᐄᑎᓯᓂᐦᐄᒑᐅᒡ᙮ ᓂᒧᐃ ᓂ ᓂᓂᑎᔨᓐ᙮ 
ᐋᒄ ᒫᒃ ᐹᑎᒫ ᐊᓂᑖᐦ ᓯᕆᔮ ᑭᔮᐦ ᓯᓕᓯᔮ ᑳ ᐃᔑᓂᐦᑳᑖᒡ ᐊᔅᒌ ᓂᒌᐦ ᐄᑐᐦᑖᓐ᙮ 
ᐊᓐ ᒫᒃ ᒫᒀᒡ ᐋᔥᒄ ᓂᒧᐃ ᓂᐦᑖ ᓅᐦᒋ ᐙᐱᒥᑯᒡ ᐊᓂᒌ ᐅᒫᒨᐊᔨᒥᐦᐋᐅᒡ ᑳ ᑖᑆᔮᔨᒫᒡ ᙭, ᒎᑏᔮ ᑳ ᐃᔑᓂᐦᑳᑖᔨᒡ ᐊᔅᒌᔨᐤ ᑳᐦ ᑖᒡ᙮ 
ᒥᒄ ᑖᓐ ᑳ ᐄᔑ ᐋᔨᒨᒥᔨᒡ ᑯᑎᒃ ᐊᐙᔨᐤᐦ ᐋᔪᐎᒄ ᒥᒄ ᑳ ᐄᔑ ᒋᔅᒑᔨᒥᒡ᙮ ᒌ ᐹᐦᑎᒨᒡ ᐋᐦ ᐄᓈᓂᐎᔨᒡ, “ᐊᓐ ᑳ ᒌ ᓂᓈᐦᑳᒋᐦᐄᑎᐦᒄ ᐋᐅᒄ ᐱᐹᐙᐐᐦᑎᐦᒃ ᐊᓂᔮᔨᐤ ᑖᑆᔮᔨᐦᑎᒧᐎᓂᔨᐤ ᑳ ᒌ ᐐᐦ ᓂᔑᐎᓈᒋᐦᑖᑦ᙮” 
ᐋᒄ ᒫᒃ ᑳ ᓂᓈᔅᑯᒫᒡ ᒋᔖᒥᓂᑑ ᑖᓐ ᑳᐦ ᑐᑎᒥᔨᒡ ᓂᐱᒫᑎᓰᐎᓃᐦᒡ᙮ 
