﻿ᒫᔪᐦᐧᑖᑦ ᒫᕐᒃ.
10.
ᒌᓴᔅ ᒫᒃ ᒌ ᓂᑭᑎᒻ ᐊᓂᑎᐦ ᐋ ᒌ ᑖᑦ, ᐋᒄ ᐊᓂᑖᐦ ᒎᑏᔮ ᐊᔅᒌᐦᒡ ᑳᐦ ᐋᑎ ᐄᑐᐦᑖᑦ ᐊᓂᑖᐦ ᐧᑳᔅᑖᐦ ᐄᑖᐦᒑᑳᒻ ᐧᒑᕐᑎᓐ ᓰᐲᐦᒡ᙮ ᐋᔪᐧᐃᒄ ᐊᔮᐱᒡ ᑳᐦᑐᑖᑯᑦ ᑭᔮᐦ ᐊᓂᑖᐦ ᐊᐧᐋᔨᐤᐦ, ᒌ ᒥᐦᒑᑎᔨᐤ ᐋ ᐹᒋ ᓂᑎᐧᐋᐱᒥᑯᑦ᙮ ᐋᒄ ᑳᐦ ᑐᑎᐧᐋᑦ ᑖᓐ ᑳ ᒌ ᑐᑎᐧᐋᑦ ᒫᓐ ᐊᐧᐋᔨᐤᐦ ᐋ ᓂᑎᐧᐋᐱᒥᑯᑦ, ᒌ ᒋᔅᑯᑎᒧᐧᐋᐤ᙮ 
ᒌ ᑎᑯᔑᓂᔨᐤ ᐹᕆᓰᐦ ᐋ ᒌ ᐧᐄᐦ ᓈᓂᑐ ᑯᐧᑳᒋᐦᐄᑯᑦ ᐋᑳ ᑯᐃᔅᒄ ᒑ ᒌ ᐄᔑ ᐧᐄᐦᑎᐦᒃ ᒑᐧᑳᔨᐤ᙮ ᐅᔮᔨᐤ ᒫᒃ ᒌ ᐄᔑ ᑯᐧᑳᒋᒥᑰ, “ᐧᐄᐦᑎᒨᓈᓐ ᒫᐦ, ᐄᑎᔥᑖᐤ ᐋ ᐧᐄᔓᐧᐋᐧᐃᓂᐦᒡ ᒑ ᓂᐦᐋᔨᒫᑭᓅᑦ ᓈᐹᐤ ᒑ ᒌ ᐧᐋᐱᓈᑦ ᐧᐄᐤᐦ?” 
ᒌᓴᔅ ᒌ ᓂᔥᐧᑳᐅᔑᐦᐋᐤ, ᐅᔮᔨᐤ ᐋ ᐄᔑ ᑯᐧᑳᒋᒫᑦ, “ᑖᓐ ᑳᐦ ᐄᑎᔓᒥᑖᒄ ᒫᒃ ᒧᓱᔅ?” 
ᐋᒄ ᑳ ᔨᔨᒡ, “ᒧᓱᔅ ᒌ ᓂᐦᐋᔨᒫᐤ ᓈᐹᐤ ᒑ ᒌ ᐅᔑᐦᑖᔨᒡ ᐧᐋᐱᓂᑑ ᒥᓯᓂᐦᐄᑭᓂᔨᐤ ᐋᒄ ᒫᒃ ᐃᔮᒄ ᒑ ᒌ ᐧᐋᐱᓈᔨᒡ ᐧᐄᐅᔨᐤ᙮” 
ᐋᒄ ᒌᓴᔅ ᑳᐦ ᐄᑖᑦ, “ᓈᔥᑖᑆᐦ ᒋᓰᐱᐦᑖᓈᐧᐋᐤ ᒋᑖᐦᐄᐧᐋᒡ ᐋᔪᐧᐃᒄ ᐧᐋᐦᒋ ᒥᓯᓂᐦᐋᐦᒃ ᒧᓱᔅ ᐅᔮᔨᐤ ᐄᑎᔓᐧᐋᐧᐃᓂᔨᐤ᙮ 
ᒥᒄ ᒫᒃ ᐅᔅᑭᒡ ᑳ ᐅᔑᐦᑖᑭᓂᐧᐃᒡ ᐆ ᐊᔅᒌ, ᒋᔖᒥᓂᑑ ᑖᐱᔥᑯᓐ ᓈᐹᐤ ᑭᔮᐦ ᐃᔅᐧᑳᐤ ᒌ ᐅᔑᐦᐋᐤ᙮ 
ᐋᔪᐧᐃᒄ ᒫᒃ ᐅᔮᔨᐤ ᒑ ᐅᐦᒋ ᓂᑭᑖᑦ ᓈᐹᐤ ᐅᓃᒋᐦᐄᒄᐦ, ᐧᐄᐤᐦ ᒑ ᒌ ᐧᐄᒋᒫᑦ᙮ 
ᐋᒄ ᒫᒃ ᐋ ᓃᔑᒡ ᐊᓂᔮᔨᐤ ᐧᐄᐤᐦ ᐹᔨᒄ ᒥᔨᐤ ᒑ ᐃᓯᓈᑯᓯᒡ᙮ ᓂᒧᐃ ᒫᒃ ᐋᒄ ᐋ ᓃᔑᒡ ᐃᓯᓈᑯᓯᐧᐃᒡ, ᒥᒄ ᒧᔮᒻ ᐹᔨᒄ ᒥᔨᐤ ᐋᓯᓈᑯᓯᐧᐃᒡ᙮ 
ᐊᓂᔮᔨᐤᐦ ᐊᐧᐋᔨᐤᐦ ᒋᔖᒥᓂᑑ ᑳ ᐹᔨᑯᐦᐋᑦ ᐊᑳᐧᐄ ᐊᐧᐋᓐ ᑭᑎ ᑐᑎᐧᐋᐤ ᒑ ᒌ ᐱᑳᓂᐦᐄᑐᔨᒡ᙮” 
ᐄᔥᐱᐦ ᒫᒃ ᐹᐦᒑᒡ ᐧᐋᔅᑳᐦᐄᑭᓂᔨᐤ ᒌᓴᔅ ᐅᒋᔅᒋᓂᐦᐊᒧᐧᐋᑭᓐ ᒌ ᑯᐧᑳᒋᒥᑰ ᐊᓂᔮᔨᐤ ᑖᓐ ᑳ ᐄᔑ ᐋᔨᐧᒫᐅᐦᐄᑯᑦ᙮ 
ᒌᓴᔅ ᒫᒃ ᒌᐦ ᐄᑖᐤ, “ᐊᓐ ᐊᐧᐋᓐ ᒑ ᐧᐋᐱᓈᐧᑳ ᐧᐄᐤᐦ, ᒦᓐ ᒫᒃ ᒋᒋᐧᐄᐅᒑ, ᑯᑎᒃ ᐃᔅᐧᑳᐤ ᐧᐄᒋᒫᒑ, ᓂᒧᐃ ᑯᐃᔅᒄ ᑐᑎᐧᐋᐤ ᐊᓂᔮᔨᐤ ᓃᔥᑎᒻ ᐃᔅᐧᑳᐤ ᑳ ᐧᐄᒋᒫᑦ, ᐱᓯᐧᑳᑎᓯᐤ ᐅᔮᔨᐤ ᐋᐦ ᑐᑎᐦᒃ᙮ 
ᑭᔮᐦ ᒫᒃ ᐃᔅᐧᑳᐤ ᐧᐋᐱᓈᒑ ᐅᓈᐹᒻ, ᒦᓐ ᒫᒃ ᒋᐦᒋᐅᓈᐹᒥᒑ, ᑯᑎᒃ ᓈᐹᐤ ᐧᐄᒋᒫᒑ, ᓂᒧᐃ ᑯᐃᔅᒄ ᑐᑎᐧᐋᐤ ᐊᓂᔮᔨᐤ ᓃᔥᑎᒻ ᐅᓈᐹᒻ, ᐱᓯᐧᑳᑎᓯᐤ ᐅᔮᔨᐤ ᐋᐦ ᑐᑎᐦᒃ᙮” 
ᒌ ᐹᔓᐧᐋᐅᒡ ᒫᒃ ᐄᔨᔨᐅᒡ ᐊᐧᐋᔑᔥ ᒌᓴᔅᐦ ᐋᐦ ᑖᔨᒡ, ᐋ ᓂᑎᐧᐋᔨᒫᒡ ᒑ ᒌ ᑖᐦᒋᓈᔨᒡ ᒑ ᒌ ᓯᐧᐋᔨᒫᔨᒡ᙮ ᐊᓂᒌ ᒫᒃ ᒋᔅᒋᓂᐦᐊᒧᐧᐋᑭᓂᒡ ᒌ ᒋᔅᑎᐦᐋᒧᐧᐋᐅᒡ ᐊᓂᔮᔨᐤᐦ ᐄᔨᔨᐤᐦ᙮ 
ᐄᔥᐱᐦ ᒌᓴᔅ ᐧᐃᔮᐱᒫᑦ ᐅᔮᔨᐤ ᐋᐦᑎᔨᒡ ᐊᓂᔮᔨᐤ ᒋᔅᒋᓂᐦᐊᒧᐧᐋᑭᓐ ᒌ ᐅᐦᑳᐦᐄᑰ, ᐋᒄ ᑳᐦ ᐄᑖᑦ, “ᐱᒋᔅᑎᓈᐦᑯᒡ ᐊᐧᐋᔑᔑᒡ ᒑ ᒌ ᐹᒋ ᓈᓯᒡ, ᐊᑳᐧᐄ ᐅᐦᒋ ᒋᔅᑎᐦᐋᒫᑯᒡ, ᐧᐋᔥ ᐅᔮᔨᐤ ᑳ ᐄᑖᔨᐦᑖᑯᓯᒡ ᐄᔨᔨᐅᒡ ᒋᔖᒥᓂᑑ ᐅᒋᐦᒋᐅᒋᒫᐧᐃᓃᔨᒡ ᐄᔑ ᑎᐹᔨᐦᑖᑯᓯᐧᐃᒡ᙮ 
ᑖᑆᐦ ᒋᐧᐄᐦᑎᒫᑎᓈᐧᐋᐤ, ᒥᒄ ᐊᓐ ᐊᐧᐋᓐ ᒑᐦ ᐋᑳ ᐄᔥ ᐅᑎᓂᒧᐧᑳ ᒋᔖᒥᓂᑑ ᐆ ᒋᐦᒋᐅᒋᒫᐧᐃᓂᔨᐤ ᒧᔮᒻ ᐊᐱᔅᑎᐧᐋᔑᔑᒡ, ᓂᒧᐃ ᓃᐦᑖ ᑭᑎ ᒌᐲᐦᒑᐤ᙮” 
ᒌ ᐅᐦᐱᓈᐤ ᐹᐦᐹᔨᒄ ᐊᓂᔮᔨᐤ ᐊᐧᐋᔑᔥ ᐋᒄ ᑳᐦ ᐋᑎᑖᐦᑖᑳᑎᐹᓈᑦ ᑭᔮᐦ ᑳ ᒥᔪᑐᑖᐧᐋᑦ᙮ 
ᒫᐧᑳᒡ ᒫᒃ ᐋ ᐱᒧᐦᑖᑦ ᒌᓴᔅ ᒫᔅᑭᓈᐦᒡ, ᓈᐹᐤ ᒌ ᐅᐦᒋ ᐹᐱᐦᑖᔨᐤ ᑳᐦ ᐋᑎᐅᒋᐦᒌᐦᑯᓂᐱᐦᐧᐃᔨᒡ ᐊᓂᑎᐦ ᐋᐦ ᑖᑦ, ᐋᒄ ᑳᐦ ᐄᑎᑯᑦ, “ᒋᔅᑯᑎᒫᒑᓯᐤ, ᑳ ᒥᐧᔮᔨᐦᑖᑯᓯᔨᓐ, ᑖᓐ ᒑᑎᔮᓐ ᒑ ᒌ ᐃᔮᔮᓐ ᑳᒋᒡ ᐱᒫᑎᓰᐧᐃᓐ?” 
ᐋᒄ ᒌᓴᔅ ᑳᐦ ᐄᑖᑦ, “ᒑᐧᑳᓐ ᐧᐋᐦᒋ ᐃᔑᓂᐦᑳᓱᔨᓐ ᑳ ᒥᐧᔮᔨᐦᑖᑯᓯᔨᓐ? ᓂᒧᐃ ᐊᐧᐋᓐ ᑖᐤ ᒥᑐᓐ ᒑ ᒌ ᒥᐧᔮᔨᐦᑖᑯᓯᔨᑦ, ᒥᒄ ᒋᔖᒥᓂᑑ᙮ 
ᒋᒋᔅᒑᔨᐦᑖᓐ ᐅᐦᐄ ᐄᑎᔓᐧᐋᐧᐃᓐ, ᐊᑳᐧᐄ ᓂᐱᐦᐄᐧᐋᐦ, ᐊᑳᐧᐄ ᐱᓯᐧᑳᑎᓰᐦ, ᐊᑳᐧᐄ ᒋᒧᑦᐦ, ᐊᑳᐧᐄ ᓂᑎᐧᐄ ᒥᒄ ᐄᔑ ᐊᑖᒫᔨᒻ ᐊᐧᐋᓐ, ᐊᑳᐧᐄ ᑳᒌᔑᐦᐄᐧᐋᐦ, ᒋᔅᑖᔨᒻᐦ ᑰᐦᑖᐧᐄ ᑭᔮᐦ ᒋᑳᐧᐄ᙮” 
ᐋᒄ ᐊᓐ ᓈᐹᐤ ᑳᐦ ᐄᑖᑦ, “ᒋᔅᑯᑎᒫᒑᓯᐤ, ᑳ ᐹᒋ ᐊᐧᐋᔑᐧᐃᔮᓐ ᔖᔥ ᓂᒌ ᓂᓂᐦᐄᐦᑖᓐ ᐅᐦᐄ ᐄᑎᔓᐧᐋᐧᐃᓐ᙮” 
ᒌᓴᔅ ᒌ ᑭᓂᐧᐋᐱᒫᐤ ᐋ ᓵᒋᐦᐋᑦ, ᐋᒄ ᑳᐦ ᐄᑖᑦ, “ᐹᔨᒄ ᒑᐧᑳᓐ ᒋᓅᐦᑖᓈᓐ᙮ ᒫᒌᐦ ᓂᑑᐊᑖᐧᐋᒑ ᒥᓯᐧᐋ ᑖᓐ ᐋ ᐄᔑ ᐃᔮᔨᓐ, ᐋᒄ ᐊᓐ ᔓᐧᐃᔮᓐ ᑳ ᒋᔅᑎᒫᑎᓰᔨᒡ ᒑ ᒥᔨᐧᑖᐤ, ᐋᒄ ᒫᒃ ᒑ ᐃᔮᔨᓐ ᒦᓯᒋᓯᐧᐃᓐ ᐊᓂᑖᐦ ᒋᐦᒋᒌᔑᑯᐦᒡ᙮ ᒌ ᑐᑎᒥᓈ ᒫᒃ ᐆ, ᐋᒄ ᒑ ᐹᒋ ᓅᔔᔥᑭᐧᐃᔨᓐ᙮” 
ᐊᓐ ᒫᒃ ᓈᐹᐤ ᐄᔥᐱᐦ ᐱᔮᐦᑎᐦᒃ ᐅᔮᔨᐤ ᓈᔥᒡ ᒌ ᐅᐦᒋ ᒥᒑᔨᐦᑎᒨᓈᑯᓲ ᐋᒄ ᑳ ᒋᔅᑐᐦᑖᑦ ᐋ ᒥᒑᔨᐦᑎᐦᒃ ᐧᐋᔥ ᓈᔥᑖᑆᐦ ᒌ ᒥᓯᒋᓰᐤ᙮ 
ᐋᒄ ᒌᓴᔅ ᒥᓯᐧᐋ ᑳᐦ ᐋᑎ ᑭᓂᐧᐋᐱᒫᑦ ᐊᓂᔮᔨᐤ ᐅᒋᔅᒋᓂᐦᐊᒧᐧᐋᑭᓐ, ᐋᒄ ᑳᐦ ᐄᑖᑦ, “ᑖᑆᐦ ᓄᐧᐃᒡ ᑭᑎ ᐋᔨᒥᓂᔨᐤ ᐊᓂᒌ ᑳ ᒦᓯᒋᓰᔨᒡ ᒑ ᒌ ᐲᐦᒑᒡ ᒋᔖᒥᓂᑑ ᐅᒋᐦᒋᐅᒋᒫᐧᐃᓃᔨᒡ᙮” 
ᒌ ᑯᔥᑯᐧᐋᔨᐦᑎᒥᐦᐄᑯᒡ ᐊᓂᒌ ᒋᔅᒋᓂᐦᐊᒧᐧᐋᑭᓂᒡ ᑖᓐ ᑳ ᐄᔑ ᐋᔨᐧᒫᐦᐄᑯᔨᒡ ᒌᓴᔅᐦ, ᒥᒄ ᒫᒃ ᐊᔮᐱᒡ ᒌ ᐋᑎ ᐊᔨᒨ ᒌᓴᔅ ᐋᐦ ᐄᑖᑦ, “ᓂᑎᐧᐋᔒᒥᑐᒄ, ᑖᑆᐦ ᓄᐧᐃᒡ ᐋᔨᒥᓂᔨᐤ ᐊᐧᐋᓐ ᒑ ᒌ ᐲᐦᒑᑦ ᒋᔖᒥᓂᑑ ᐅᒋᐦᒋᐅᒋᒫᐧᐃᓃᔨᒡ᙮ 
ᐊᑎᑎᐤ ᐋᔨᒥᓂᔨᐤ ᐊᐧᐋᓐ ᑳ ᒦᓯᒋᓰᑦ ᒑ ᒌ ᐲᐦᒑᑦ ᒋᔖᒥᓂᑑ ᐅᒋᐦᒋᐅᒋᒫᐧᐃᓃᔨᒡ ᐃᔥᐱᔥ ᐊᓐ ᑳᐱᔅᐧᑳᑭᐦᒃ ᒑ ᒌ ᔖᐳᔥᑭᐦᒃ ᐋ ᐱᑯᓈᔮᐱᔅᑳᔨᒡ ᔖᐳᓂᑭᓂᔨᐤ᙮” 
ᐊᓂᒌ ᒫᒃ ᒋᔅᒋᓂᐦᐊᒧᐧᐋᑭᓂᒡ ᓄᐧᐃᒡ ᒌ ᑯᔥᑯᐧᐋᔨᐦᑎᒥᐦᐄᑯᒡ ᐅᔮᔨᐤ ᐋᐦ ᐄᔨᔨᒡ ᐋᒄ ᑳᐦ ᐃᔨᒡ, “ᐊᐧᐋᓐ ᒫᒃ ᐋᒄ ᒑ ᒌ ᐱᒫᒋᐦᐋᑭᓅᑦ᙮” 
ᒌᓴᔅ ᒫᒃ ᑯᐃᔅᒄ ᒌ ᑭᓂᐧᐋᐱᒫᐤ ᐋᐦ ᐄᑖᑦ, “ᓈᐹᐤ ᓂᒧᐃ ᒋᑭᒌᐦᑐᑎᒻ, ᒋᔖᒥᓂᑑ ᒫᒃ ᐧᐄᔨ ᒌᒃ ᒌ ᑐᑎᒻ᙮ ᓂᒧᐃ ᑎᑯᓂᔨᐤ ᒑᐧᑳᔨᐤ ᒋᔖᒥᓂᑑ ᐋᑳ ᒑ ᒌ ᑐᑎᐦᒃ᙮” 
ᐲᑎᕐ ᒌ ᐅᐦᒋ ᐊᔨᒨ ᐋᐦ ᐄᑖᑦ, “ᑭᓂᐧᐋᐱᐦᑦ ᒫᐦ, ᒥᓯᐧᐋ ᒑᐧᑳᓐ ᓂᒌ ᓂᑭᑖᓈᓐ ᒑ ᒌ ᓅᔔᔥᑳᑖᐦᒡ᙮” 
“ᐋᐦᐋ, ᑖᑆᐦ,” ᒌ ᐄᑎᑰ ᒌᓴᔅᐦ, “ᒋᐧᐄᐦᑎᒫᑎᓈᐧᐋᐤ ᒫᒃ, ᐊᓐ ᐊᐧᐋᓐ ᒑ ᓂᑭᑎᒧᐧᑳ ᐧᐄᒡ, ᑭᔮᐦ ᒫᒃ ᒑ ᓂᑭᑖᐧᑳ ᐧᐄᒋᔖᓐ, ᐧᐄᒋᔖᓂᔅᐧᑳᒻ, ᑭᔮᐦ ᒫᒃ ᐅᑳᐧᐄᐦ, ᐅᐦᑖᐧᐄᐦ, ᑭᔮᐦ ᒫᒃ ᐅᑎᐧᐋᔑᔒᒻ ᑭᔮᐦ ᒫᒃ ᒑ ᓂᑭᑎᒧᐧᑳ ᐅᓂᐦᑖᐅᒋᐦᒋᑭᓐ ᐊᔅᒌ ᓃᔨ ᐅᐦᒋ ᑭᔮᐦ ᒥᐧᔮᒋᒧᐧᐃᓂᔨᐤ ᐅᐦᒋ, 
ᒑᔅᑎᓈᔅ ᐊᑎᑎᐤ ᒥᔥᑏᐦ ᑭᑎ ᐄᔑ ᐃᔮᐤ ᐅᑎᐦ ᐊᔅᒌᐦᒡ ᒫᐧᑳᒡ ᐋᐦ ᑖᑦ᙮ ᐅᔮᔨᐤ ᑎᐦᒑ ᒥᑖᐦᑐᒥᑎᓅᐤ ᐋᔨᐧᐋᒡ ᑭᑎ ᐃᔥᐱᔥ ᒥᔮᑭᓂᐤ ᐊᓂᔮᔨᐤ ᑳ ᐃᔥᐱᔥ ᓂᑭᑎᐦᒃ, ᑭᔮᐦ ᑭᑎ ᒥᔮᑭᓂᐤ ᐧᐋᔅᑳᐦᐄᑭᓐ, ᐊᑎᑎᐤ ᐊᐧᐋᔨᐤᐦ ᒑ ᐧᐄᒋᔖᓂᑦ ᑭᔮᐦ ᒑ ᐧᐄᒋᔖᓂᔅᐧᑳᒥᑦ ᑭᔮᐦ ᒑ ᐅᑳᐧᐄᑦ, ᑭᔮᐦ ᒑ ᐅᑎᐧᐋᔑᔒᒥᑦ ᑭᔮᐦ ᐋᔨᐧᐋᒡ ᐊᔅᒌᔨᐤ᙮ ᒥᒄ ᒫᒃ, ᑭᑎ ᓂᒋᔥᑭᒻ ᐋ ᓂᓈᐦᑳᒋᐦᐋᑭᓅᑦ᙮ ᐋᔨᐤᐦ ᒫᒃ ᑳᒋᒡ ᐱᒫᑎᓰᐧᐃᓂᔨᐤ ᑭᑎ ᐃᔮᐤ ᐊᓂᑖᐦ ᐄᔥ ᓃᔥᑖᒥᐦᒡ᙮ 
ᒥᐦᒑᑐ ᐄᔨᔨᐅᒡ ᓃᑳᓐ ᑳ ᐄᑖᔨᐦᑖᑯᓯᒡ ᐊᓅᐦᒡ ᐅᑖᐦᒡ ᑭᑎ ᐄᔑ ᐱᒋᔅᑎᓈᑭᓂᐧᐃᒡ, ᐋᒄ ᐊᓂᒌ ᐅᑖᐦᒡ ᑳᐦ ᑖᒡ ᐊᓅᐦᒡ ᐧᐄᔨᐧᐋᐤ ᓃᔥᑖᒥᐦᒡ ᑭᑎ ᐄᔑ ᐱᒋᔅᑎᓈᑭᓂᐧᐃᒡ᙮” 
ᒌᓴᔅ ᑭᔮᐦ ᐅᒋᔅᒋᓂᐦᐊᒧᐧᐋᑭᓐ ᒋᕉᓯᓕᒥᐦᒡ ᒌ ᐄᑐᐦᑖᐅᒡ, ᐊᓂᔮᔨᐤ ᒫᒃ ᐋᐦ ᐋᑎ ᐱᒧᐦᑖᒡ ᒌᓴᔅ ᒌ ᐋᑎ ᓃᑳᓂᐦᑖᐤ᙮ ᐊᓂᒌ ᒫᒃ ᒋᔅᒋᓂᐦᐊᒧᐧᐋᑭᓂᒡ ᒌ ᒥᔅᑳᑖᔨᒫᐅᒡ ᒌᓴᔅᐦ ᒋᕉᓯᓕᒥᐦᒡ ᐋ ᐧᐄᐦ ᐄᑐᐦᑖᔨᒡ ᑭᔮᐦ ᐊᓂᒌ ᐊᓂᑖᐦ ᐅᑖᐦᒡ ᑳ ᐹᒋ ᐱᒧᐦᑖᒡ ᒌ ᓵᒋᓯᐧᐃᒡ ᐊᓂᑖᐦ ᒑ ᒌ ᐄᑐᐦᑖᒡ᙮ ᐋᒄ ᒌᓴᔅ ᐱᐦᑳᓐ ᑳ ᐄᑐᐦᑎᐦᐋᑦ ᐅᒋᔅᒋᓂᐦᐊᒧᐧᐋᑭᓐ ᐋᒄ ᑳ ᐧᐋᐧᐄᐦᑎᒧᐧᐋᑦ ᑖᓐ ᒑ ᐄᔅᐱᔨᑦ᙮ 
“ᓂᑎᐦᑎᒧᒄ ᒫᐦ,” ᒌᐦ ᐄᑖᐤ, “ᒋᕉᓯᓕᒥᐦᒡ ᒋᑎᐄᑐᐦᑖᓈᓂᐤ, ᐋᑯᑖᐦ ᐅᑖᐦ ᒑ ᐅᑎᓈᑭᓅᑦ ᐄᔨᔨᐅᑯᓯᓵᓐ ᐊᓂᑖᐦ ᒑ ᒌ ᐄᔑ ᐱᒋᔅᑎᓈᑭᓅᑦ ᒋᔖᐊᔨᒥᐦᐋᐅᒋᒫᐤ ᐋᐦ ᑖᔨᒡ ᑭᔮᐦ ᐧᐄᔓᐧᐋᐧᐃᓂᔨᐤ ᑳ ᒋᔅᑯᑎᒫᒑᔨᒡ ᐋᐦ ᑖᔨᒡ ᒑ ᒌ ᑎᐹᔅᑯᓂᑯᑦ᙮ ᐋᐅᑯᓂᒡ ᐅᒌ ᒑ ᐄᑎᔓᐧᐋᒡ ᒑ ᒌ ᓂᐱᐦᐄᒫᑭᓂᐧᐄᔨᒡ ᑭᔮᐦ ᐊᓂᑖᐦ ᐊᓂᔮᔨᐤ ᐋᐦᐋᑳ ᒎᐤ ᐄᑎᔅᑳᓈᓰᔨᒡ ᐋᐦ ᑖᔨᒡ ᐋᑯᑖᐦ ᒑ ᐄᔑ ᐱᒋᔅᑎᓈᒡ᙮ 
ᐋᐅᑯᓂᒡ ᐅᒌ ᒑ ᒫᔮᔨᒫᒡ ᑭᔮᐦ ᒑ ᓯᐦᐧᑳᑖᒡ, ᑭᔮᐦ ᒑ ᐱᐱᓯᔅᑖᐦᐧᐋᒡ, ᐋᒄ ᒫᒃ ᒑ ᓂᐱᐦᐋᒡ᙮ ᓂᔥᑐ ᒌᔑᑳᐤᐦ ᒫᒃ ᒌ ᐅᑎᐦᒋᐱᔨᔨᒑ ᒦᓐ ᑳᐤ ᒑ ᐧᐃᓂᔥᑳᑦ᙮” 
ᐄᔥᐱᐦ ᐅᔮᔨᐤ ᑳᐦ ᐄᑖᑦ ᒌᓴᔅ, ᒌ ᐹᒋ ᓈᑎᑰ ᒉᒥᔅ ᑭᔮᐦ ᒞᓐ, ᐊᓂᔮᔨᐤ ᓭᐱᑏ ᐅᑯᓯᓯᔨᐤᐦ, ᐋᒄ ᑳᐦ ᐄᑎᑯᑦ, “ᒋᔅᑯᑎᒫᒑᓯᐤ, ᒌ ᓂᑎᐧᐋᔨᒥᑎᓈᓐ ᒑ ᒌᐦ ᑐᑎᒧᔮᐦᒡ ᑖᓐ ᐋ ᐄᔑ ᐱᑯᓵᔨᒥᑖᐦᒡ᙮” 
ᒌ ᐄᑎᑯᒡ ᒌᓴᔅᐦ, “ᒑᐧᑳᓐ ᒫᒃ ᐊᓐ ᓈᑎᐧᐋᔨᐦᑎᒫᒄ ᒑ ᒌ ᑐᑎᒫᑎᑯᒡ?” 
ᑳᐦ ᐄᑖᒡ, “ᐱᒋᔅᑎᓈᓐ ᒫᐦ ᐊᓂᑖᐦ ᑳ ᒋᔅᑖᔨᐦᑖᑯᐦᒡ ᒋᒋᐦᒋᐅᒋᒫᐧᐃᓂᐦᒡ ᑖᔮᐦᒑ ᐄᑑ ᐊᓂᑎᐦ ᐋᐦ ᑖᔨᓐ ᒑ ᒌ ᐊᐱᔮᐦᒡ, ᐹᔨᒄ ᒌ ᓂᐦᐄᐧᐃᓂᐦᒡ ᑭᔮᐦ ᐹᔨᒄ ᐊᓂᑖᐦ ᒌ ᓂᒥᐦᒌᐧᐃᓂᐦᒡ᙮” 
ᒥᒄ ᒫᒃ ᒌᓴᔅᐦ ᒌ ᐄᑎᑰᒡ, “ᓂᒧᐃ ᒋᒋᔅᒑᔨᐦᑖᓈᐧᐋᐤ ᐆ ᒑᐧᑳᓐ ᑳ ᓂᑎᐧᐋᔨᐦᑎᒫᒄ᙮ ᒋᑭ ᒌᐦ ᑎᓈᐧᐋᐤ ᐋ ᒑ ᒌ ᒥᓂᐦᐧᑳᔮᒄ ᑖᓐ ᐋ ᐄᔑ ᑎᑯᐦᒡ ᓂᒥᓂᐦᐧᑳᑭᓂᒡ ᒫᓂᐦᐧᑳᔮᓐ? ᒋᑭ ᒌᐦ ᑎᓈᐧᐋᐤ ᐋ ᒑ ᒌ ᓰᑭᐦᐋᐦᑖᑯᐧᐃᔮᒄ ᒧᔮᒻ ᓃᔨ ᑖᓐ ᒑ ᐄᔑ ᓰᑭᐦᐋᐦᑖᑭᐧᐃᔮᓐ?” 
ᒌ ᐄᑖᐅᒡ ᒫᒃ, “ᓂᑭ ᒌᐦ ᑐᑖᓈᓐ᙮” ᐋᒄ ᒌᓴᔅᐦ ᑳᐦ ᐄᑎᑯᒡ, “ᐊᓐ ᒑ ᐄᔑ ᒥᓂᐦᐧᑳᔮᓐ ᐋᐅᒄ ᑭᔮᐦ ᒌᔨᐧᐋᐤ ᒑ ᐄᔑ ᒥᓂᐦᐧᑳᔮᒄ, ᒋᑭ ᐹᔨᑯᐦᑖᓈᓂᐤ ᐊᓐ ᒥᓂᐦᐧᑳᑭᓐ᙮ ᑭᔮᐦ ᐊᓐ ᓰᑭᐦᐋᐦᑖᒑᐧᐃᓐ ᒑ ᓰᑭᐦᐋᐦᑖᑭᐧᐃᔮᓐ ᐋᐅᒄ ᐊᓐ ᑭᔮᐦ ᒌᔨᐧᐋᐤ ᒑ ᓰᑭᐦᐋᐦᑖᑯᐧᐃᔮᒄ᙮ 
ᒥᒄ ᒫᒃ ᓂᒧᐃ ᓃᔨ ᓂᑭ ᒌᐦ ᐧᐃᔮᔨᒫᐤ ᐊᐧᐋᓐ ᒑ ᐊᐱᑦ ᐊᓂᑖᐦ ᓂᓂᐦᐄᐧᐃᓂᐦᒡ ᑭᔮᐦ ᒫᒃ ᐊᓂᑖᐦ ᓂᓂᒥᐦᒌᐧᐃᓂᐦᒡ, ᐧᐋᔥ ᔖᔥ ᒌ ᐧᐃᔮᔨᒫᑭᓂᐧᐃᒡ ᐄᔨᔨᐅᒡ ᒑ ᐊᐱᐧᐃᒡ ᐊᓂᑖᐦ᙮” 
ᐄᔥᐱᐦ ᒫᒃ ᐊᓂᒌ ᑯᑎᑭᒡ ᒥᑖᐦᑐ ᒋᔅᒋᓂᐦᐊᒧᐧᐋᑭᓂᒡ ᐱᔮᐦᑎᐧᐋᒡ ᐅᔮᔨᐤ ᐋ ᐄᔑ ᑯᐧᑳᒋᐦᒑᒧᔨᒡ ᒉᒥᔅ ᑭᔮᐦ ᒞᓐ, ᒌ ᒋᔑᐧᐋᐦᐄᑯᒡ᙮ 
ᐋᒄ ᒌᓴᔅ ᒥᓯᐧᐋ ᑳ ᓂᑑᒫᑦ ᑳᐦ ᐄᑖᑦ, “ᐊᓂᒌ ᑳ ᐅᒋᒫᐅᒡ ᑳ ᐄᑖᔨᒫᑭᓂᐧᐃᒡ ᓈᔥᒡ ᐧᐄᐦ ᑭᑎᐹᔨᒫᐅᒡ ᐊᓂᔮᔨᐤ ᐄᔨᔨᐤᐦ ᑳ ᓃᑳᓂᔥᑭᐧᐋᒡ᙮ ᐅᒌ ᒫᒃ ᑳ ᐅᒋᒫᐅᒡ ᒥᑐᓐ ᐧᐃᔨᔓᐧᐋᐅᒡ᙮ 
ᒥᒄ ᒫᒃ ᐊᑳᐧᐄ ᒋᑭ ᐅᐦᒋ ᐃᓯᓈᑯᓯᓈᐧᐋᐤ ᒌᔨᐧᐋᐤ᙮ ᐊᓐ ᐊᐧᐋᓐ ᐊᓂᑎᐦ ᐋ ᑎᔑᔮᒄ ᓈᑎᐧᐋᔨᐦᑎᒧᐧᑳ ᒑ ᒌ ᒋᔅᑖᔨᐦᑖᑯᓯᑦ ᐋᑯᔥ ᒋᑭ ᐱᒋᔅᑎᓃᓱᐤ ᒑ ᒌ ᐋᐱᑎᔒᔥᑖᑖᒄ᙮ 
ᐋᒄ ᐊᓐ ᐊᐧᐋᓐ ᑳ ᐧᐄᐦ ᓃᑳᓂᐦᐄᓱᑦ ᐋᐅᒄ ᒥᓯᐧᐋ ᐋ ᑎᔑᔮᒄ ᒑ ᐅᑎᐱᒋᐦᐋᑭᓂᔮᒄ᙮ 
ᒧᔮᒻ ᐄᔨᔨᐅᑯᓯᓵᓐ ᓂᒧᐃ ᐅᐦᒋ ᐹᒋ ᑎᑯᔑᓐ ᒑ ᒌ ᐋᐱᑎᔒᔥᑑᐧᐋᑭᓅᑦ, ᒌ ᑎᑯᔑᓐ ᒑ ᒌ ᐋᐱᑎᔒᔥᑎᐧᐋᑦ ᐄᔨᔨᐤ᙮ ᑭᔮᐦ ᒫᒃ ᒌ ᑎᑯᔑᓐ ᒑ ᒌ ᐱᒋᔅᑎᓂᐦᒃ ᐅᐱᒫᑎᓰᐧᐃᓐ ᒦᔥᑯᒡ ᒥᐦᒑᑐ ᐊᐧᐋᔨᐤᐦ ᒑ ᒌ ᐱᑯᐦᐄᒫᑭᓂᐧᐃᔨᒡ᙮” 
ᒌ ᐅᑎᐦᑎᒧᒡ ᐃᐦᑖᐧᐃᓂᔨᐤ ᒉᕆᐧᑳᐤ ᑳ ᐃᔑᓂᐦᑳᑖᔨᒡ᙮ ᐊᓂᔮᔨᐤ ᒫᒃ ᐋᐦ ᐋᑎ ᐧᐃᔨᐧᐄᒡ ᐊᓂᔮᔨᐤ ᐃᐦᑖᐧᐃᓂᔨᐤ ᒌᓴᔅ ᑭᔮᐦ ᐅᒋᔅᒋᓂᐦᐊᒧᐧᐋᑭᓐ ᑭᔮᐦ ᐋ ᒫᒨ ᒥᐦᒑᑎᔨᒡ ᐄᔨᔨᐤᐦ, ᒌ ᐅᑎᐦᑖᐅᒡ ᓈᐹᐤ ᐊᓂᑖᐦ ᐱᑐᑖᔅᑭᓂᐤ ᐋ ᐊᐱᔨᒡ᙮ ᐆ ᒫᒃ ᓈᐹᐤ ᓂᒧᐃ ᐅᐦᒌ ᐧᐋᐱᐦᑎᒻ ᑭᔮᐦ ᒫᒃ ᒌ ᓂᑑᑎᒫᐤ ᔓᐧᐃᔮᓐ ᐊᓂᑎᐦ ᐊᓂᔮᔨᐤ ᐋ ᐊᐱᑦ᙮ ᐹᕐᑎᒫᔭᔅ ᒌ ᐃᔑᓂᐦᑳᓲ᙮ ᑎᒫᔮᔅ ᒌ ᐃᔑᓂᐦᑳᓱᔨᐤ ᐅᐦᑖᐧᐄᐦ᙮ 
ᐄᔥᐱᐦ ᐱᔮᐦᑎᐦᒃ ᒌᓴᔅᐦ ᐋ ᑎᑯᔑᓃᔨᒡ, ᐊᓂᔮᔨᐤ ᓈᓵᕆᑦ ᑳ ᐅᐦᒌᔨᒡ, ᒌ ᑖᑆᐤ ᐋᐦ ᐃᔨᑦ, “ᒌᓴᔅ, ᒌᔨ ᐊᓂᔮ ᒋᐦᒋᐅᒋᒫᐤᐦ ᑌᕕᑦ ᐋᓂᔅᒑ ᐅᑯᓯᔅᐦ, ᐹᒋ ᒋᔅᑎᒫᒑᔨᒻ᙮” 
ᒥᐦᒑᑐ ᒫᒃ ᐊᐧᐋᔨᐤᐦ ᒌ ᒋᔅᑎᐦᐋᒫᐦᒄ ᐋᐦ ᐄᑎᑯᑦ ᒑᐦ ᐋᑳ ᒋᔅᑐᑦ᙮ ᐋᐦᒡ ᒫᒃ ᐊᑎᑎᐤ ᓲᐦᒃ ᒌ ᑖᑆᐤ ᐋᐦ ᐃᔨᑦ, “ᒌᓴᔅ, ᒌᔨ ᐊᓂᔮ ᒋᐦᒋᐅᒋᒫᐤᐦ ᑌᕕᑦ ᐋᓂᔅᒑ ᐅᑯᓯᔅᐦ, ᐹᒋ ᒋᔅᑎᒫᒑᔨᒻ᙮” 
ᒌᓴᔅ ᒫᒃ ᒌ ᒋᐱᐦᒋᑳᐳ, ᐋᒄ ᑳᐦ ᐄᑖᑦ, “ᓂᑑᒫᐦᒄ᙮” ᐋᒄ ᑳ ᑖᑆᑖᒡ ᐊᓂᔮᔨᐤᐦ ᓈᐹᐤᐦ ᐋᑳ ᑳ ᐧᐋᐱᐦᑎᒥᔨᒡ ᐋᐦ ᐄᑖᒡ, “ᒥᐧᔮᔨᐦᑦ, ᐱᔑᑰᐦ, ᒋᑖᑆᑎᒄ ᐧᐋᔥ ᐊᓐ᙮” 
ᒌ ᒥᓂᐧᐋᐱᓂᒻ ᐊᓂᔮᔨᐤ ᐅᑎᑯᐦᑉ ᐋᒄ ᑳ ᐱᔑᑯᔑᐱᐦᑖᑦ ᑳ ᓂᑎᐧᐋᐱᒫᑦ ᒌᓴᔅᐦ᙮ 
ᐋᒄ ᒌᓴᔅ ᑳᐦ ᐄᑖᑦ ᐅᔮᔨᐤ ᓈᐹᐤ, “ᑖᓐ ᐋ ᐄᔑ ᓂᑎᐧᐋᔨᐦᑎᒥᓐ ᒑ ᒌ ᑐᑎᒫᑖᓐ?” ᐋᒄ ᐊᓐ ᓈᐹᐤ ᑳᐦ ᐄᑖᑦ, “ᒋᔅᑯᑎᒫᒑᓯᐤ, ᒥᔨᐦ ᒑ ᒌ ᐧᐋᐱᐦᑎᒫᓐ᙮” 
ᒌᓴᔅ ᒫᒃ ᒌᐦ ᐄᑖᐤ, “ᒫᒌᐦ, ᒋᑖᑆᔮᔨᐦᑎᒧᐧᐃᓐ ᒋᒦᓂᐧᐋᒋᐦᐄᑯᓐ᙮” ᐊᓐ ᒫᒃ ᓈᐹᐤᐦ ᑏᐧᐋᐦᒡ ᒌ ᐅᐦᒋ ᐧᐋᐱᐦᑎᒻ, ᐋᒄ ᑳ ᓅᔔᔥᑯᐧᐋᑦ ᒌᓴᔅ ᐊᓂᔮᔨᐤᐦ ᐋᐦ ᐋᑎ ᐱᒧᐦᑖᔨᒡ᙮ 
