﻿ᒫᔪᐦᑣᑦ ᒫᕠᔫ.
26.
ᐄᔥᐱᐦ ᒫᒃ ᑳ ᒌᔥ ᒋᔅᑯᑎᒫᒑᑦ ᒌᓴᔅ, ᒌᐦ ᐄᑖᐤ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ, 
“ᒋᒋᔅᒑᔨᐦᑖᓈᐙᐤ ᓃᔓ ᒌᔑᑳᐤᐦ ᐃᔥᐱᔥ ᐋᒄ ᒑ ᒋᐦᒋᐱᔨᒡ ᒥᔮᔥᑳᒑᐤ ᒥᑯᔖᐎᓐ᙮ ᐋᑯᑖᐦ ᒫᒃ ᐊᓐ ᒫᒀᒡ ᐄᔅᐱᔨᐦᒑ ᒑ ᐱᒋᔅᑎᓈᑭᓅᑦ ᐄᔨᔨᐅᑯᓯᓵᓐ ᒑ ᒌ ᒌᔅᑖᔅᑯᐦᐙᑭᓅᑦ᙮” 
ᐋᒄ ᐊᓂᒌ ᑳ ᓃᑳᓂᔒᒡ ᐊᔨᒥᐦᐋᐅᒋᒫᐅᒡ ᑭᔮᐦ ᐊᓂᒌ ᑳ ᓃᑳᓂᔥᑭᐙᒡ ᐄᔨᔨᐤ ᑳ ᓂᔥᑐᐐᒡ ᐊᓂᑖᐦ ᒫᐅᒡ ᑳ ᓃᑳᓈᔮᔨᐦᑖᑯᔒᔨᒡ ᒋᔖᐊᔨᒥᐦᐋᐅᒋᒫᐤᐦ ᑳᔮᕙᔅᐦ ᐅᒋᔥᒍᒋᒫᐅᑭᒥᑯᔨᒡᐦ᙮ 
ᐋᒄ ᑳ ᐎᔮᔨᐦᑎᐦᒡ ᒌᒧᒡ ᒑ ᐐᐦ ᐅᑎᓈᒡ ᒌᓴᔅᐦ ᑭᔮᐦ ᒑ ᓂᐱᐦᐋᒡ᙮ 
ᒌᐦ ᐄᑖᐅᒡ ᒫᒃ, “ᓂᒧᐃ ᐐ ᒫᒀᒡ ᐆ ᒥᑯᔖᓂᐎᒑ ᒋᑭ ᒌᐦ ᐅᑎᓈᓂᐤ, ᐙᔥ ᓈᓂᑐ ᒋᑭ ᒥᔥᑎᐦ ᒋᔑᐙᔓᐎᒡ ᐄᔨᔨᐅᒡ, ᒋᑭ ᒌᐦ ᐃᓯᓈᑯᓐ ᒋᐦᒋᐙ ᒑ ᒌ ᒥᒋᐱᔨᓈᓂᐎᒡ᙮” 
ᐯᑎᓃᐦᒡ ᒌᐦ ᑖᐤ ᒌᓴᔅ, ᐊᓂᑖᐦ ᓵᐃᒥᓐᐦ ᐐᒋᔨᐦᒡ᙮ ᐆ ᓵᐃᒥᓐᐦ ᐋ ᒫᔮᑎᓃᔨᒡ ᐋᐦᑯᓯᐎᓂᔨᐤ ᐅᓯᑳᐦᒡ ᒌᐦ ᐃᔮᑖᑯᐱᓐ ᐙᔥᑭᒡ᙮ 
ᒫᒀᒡ ᒫᒃ ᒌᓴᔅ ᐋ ᒦᒋᓱᑦ, ᒌᐦ ᐅᐦᒋ ᐲᐦᒑᔨᐤ ᐃᔅᒀᐤᐦ ᐋ ᐹᒋ ᑎᐦᑯᓂᒥᔨᒡ ᓈᔥᒡ ᐋ ᒥᔻᔒᔨᒡ ᐊᓯᓃ ᐱᔻᐱᔅᑯᔮᑭᓐ ᐋ ᐲᐦᒋᔥᑎᓃᔨᒡ ᐊᓂᑎᐦ ᒫᐅᒡ ᑳᐦ ᐋᔨᒥᒋᑖᑯᓃᔨᒡ ᑳ ᒥᔪᒫᑯᓰᔨᒡ ᑳ ᒥᔪᒫᑯᓃᔨᒡ᙮ ᒌᓴᔅ ᒫᒃ ᐅᔥᑎᒀᓃᔨᒡ ᒌᐦ ᑯᑎᐱᓂᒻ ᐅᔮᔨᐤ᙮ 
ᐄᔥᐱᐦ ᒫᒃ ᐊᓂᒌ ᒋᔅᒋᓂᐦᐊᒧᐙᑭᓂᒡ ᐎᔮᐱᒫᒡ ᐅᔮᔨᐤ ᐋ ᐄᔨᐦᑎᔨᒡ, ᒌ ᒋᔑᐙᐦᐄᑯᒡ, ᐋᐦ ᐄᑖᒡ, “ᑖᑆᐦ ᐃᔮᔪᐦᑖᐤ ᐊᓂᔮᔨᐤ ᑳ ᒥᔪᒫᑯᓃᔨᒡ᙮ 
ᒋᐱᐦ ᒌᐦ ᐊᑖᐙᒑᓂᐎᔨᐤ ᐊᓂᔮᔨᐤ ᑳ ᒥᔪᒫᑯᓃᔨᒡ ᐋᒄ ᒫᒃ ᒋᐱᐦ ᒌ ᒥᔮᑭᓂᐎᒡ ᐊᓂᔮᔨᐤ ᔓᐎᔮᓐ ᒥᔥᑎᐦ ᒑ ᐅᔑᐦᐄᒫᑭᓂᐐᑯᐱᓈᓂᐦᐄ ᐊᓂᒌ ᐄᔨᔨᐅᒡ ᑳ ᒋᔅᑎᒫᑎᓰᔨᒡ᙮” 
ᒌᓴᔅ ᒫᒃ ᒌ ᒋᔅᒑᔨᒫᐤ ᑖᓐ ᐋᐦ ᐄᑎᑐᔨᒡ, ᐋᒄ ᑳᐦ ᐄᑖᑦ, “ᒑᒀᔨᐤ ᐙᐦᒋ ᐋᔨᒦᐦᑰᐙᒄ? ᓈᔥᒡ ᒥᔻᔑᔨᐤ ᐊᓂᔮᔨᐤ ᐋ ᒌᐦ ᑐᑎᐙᑦ᙮ 
ᒨᔥ ᒋᑭ ᑖᐅᒡ ᑳ ᒋᔅᑎᒫᑎᓰᔨᒡ ᐅᑎᐦ ᐋᐦ ᑖᔮᒄ, ᓃᔨ ᒫᒃ ᓂᒧᐃ ᒨᔥ ᓂᑭᐅᐦᒋᐦᑖᓐ ᐅᑎᐦ ᐋᐦ ᑖᔮᒄ᙮ 
ᐅᔮᔨᐤ ᑳ ᐄᔑ ᐹᒋ ᑐᑎᐙᑦ ᑳ ᐹᒋ ᑯᑎᐱᓂᐦᒃ ᑳ ᒥᔪᒫᑯᓃᔨᒡ ᐅᑎᐦ ᐋᐦᑖᐅᒡ, ᒧᔮᒻ ᐋ ᐃᔮᔅᑭᐐᐦᑭᐦᒃ ᓂᔮᔨᐤ ᒑ ᓂᐦᐄᑳᑭᓂᐎᔨᒡ ᐋᑯᑖᐦ ᐋ ᐃᓯᓈᑯᓃᔨᒡ ᐅᔮᔨᐤ ᑳᐦ ᑐᑎᐦᒃ᙮ 
ᑖᑆᐦ ᒋᐐᐦᑎᒫᑎᓈᐙᐤ, ᑖᓂᑖᐦ ᒥᒄ ᒑ ᑭᒑᔅᒀᓅᒀ ᐋ ᐙᐐᐦᑖᑭᓂᐎᒡ ᒥᔻᒋᒧᐎᓐ ᒥᓯᐙ ᐋᐦ ᐄᔥᐱᑎᔅᑭᒥᑳᒡ ᐆ ᐊᔅᒌ ᑭᑎ ᐐᐦᑖᑭᓂᐎᔨᐤ ᐅᔮᔨᐤ ᑳᐦ ᑐᑎᐦᒃ ᐋ ᒋᔅᒋᓰᑐᑎᐙᑭᓅᑦ ᐆ ᐃᔅᒀᐤ᙮” 
ᐋᒄ ᐹᔨᒄ ᐊᓂᑎᐦ ᐋ ᓃᔓᔖᐴᒡ ᐊᓂᒌ ᒋᔅᒋᓂᐦᐊᒧᐙᑭᓂᒡ ᒍᑖᔅ ᐃᔅᑳᕆᔨᑦ ᑳ ᐃᔑᓂᐦᑳᓱᑦ ᒌ ᓂᑎᐙᐱᒫᐤ ᐊᓂᔮᔨᐤ ᑳ ᓃᑳᓂᔑᔨᒡ ᐊᔨᒥᐦᐋᐅᒋᒫᐤ᙮ 
ᐋᒄ ᑳᐦ ᐄᑖᑦ, “ᒑᒀᓐ ᒑ ᒥᔮᒄ ᐐᒋᐦᐄᑎᑯᒑ ᒑ ᒌᐦ ᐅᑎᓈᒄ ᒌᓴᔅ᙮” ᓂᔥᑐᒥᑎᓂᐤ ᒫᒃ ᔔᐎᔮᓈᐱᔅᒄ ᒌ ᐙᐱᐦᑎᔨᑰ, ᐋᒄ ᑳ ᒥᔨᑯᑦ᙮ 
ᐋᑯᑖᐦ ᒫᒃ ᐊᓂᑎᐦ ᐅᔅᑭᒡ ᒨᔥ ᑳ ᓈᓂᑐᐙᔨᐦᑎᒸᑦ ᒍᑖᔅ ᑖᓂᑖᐦ ᒑ ᒌ ᓂᐦᐄᐱᔨᒡ ᒑ ᒌ ᒫᒥᔑᒫᑦ ᒌᓴᔅᐦ ᒑ ᒌᐦ ᐅᑎᓂᒫᑭᓂᐎᔨᒡ᙮ 
ᐊᓐ ᒫᒃ ᓃᔥᑎᒻ ᐋ ᒌᔑᑳᒡ ᐋ ᒥᑯᓵᓅᒡ ᒫᒀᒡ ᐋ ᐱᒥᐱᔨᒡ ᐋᐦᐋᑳ ᐅᐦᐱᓱᑦ ᐋᐃᐦᑯᓈᐤ ᑳ ᒌᐦ ᒧᐙᑭᓅᑦ, ᒌᓴᔅ ᒌ ᐹᒋ ᓂᑎᐙᐱᒥᑰ ᐅᒋᔅᒋᓂᐦᐊᒧᐙᑭᓐ, ᐋᒄ ᑳᐦ ᐄᑎᑯᑦ, “ᑖᓂᑖᐦ ᓈᑎᐙᔨᒥᔮᐦᒡ ᒑ ᒌ ᓂᑑᐃᔮᔅᑰᔥᑎᒫᑖᐦᒡ ᒥᔮᔥᑳᒑᐤ ᒥᑯᔖᓐ ᒑ ᒌ ᒦᒋᔨᓐ?” 
ᒌᐦ ᐄᑖᐤ ᒫᒃ, “ᐄᑐᐦᑖᒄ ᐊᓂᑖᐦ ᐃᐦᑖᐎᓂᐦᒡ, ᒑ ᓂᑎᐙᐱᒫᒄ ᐹᔨᒄ ᓈᐹᐤᐦ ᐋᒄ ᒑ ᐄᑖᒄ, ‘ᐊᑯᐄᔮᑦ ᒋᔅᑯᑎᒫᒑᓯᐤ, ᔖᔥ ᐐᐱᒡ ᒋᑭ ᐅᑎᐦᒋᐱᔨᐤ ᒑ ᓂᑭᑎᒫᓐ ᐆ ᐊᔅᒌ᙮ ᐊᓂᑖᐦ ᒌᒋᐦᒡ ᓂᒋᔅᒋᓂᐦᐊᒧᐙᑭᓂᒡ ᓂᑭ ᐹᒋ ᒥᑯᔖᓈᓐ ᐊᓐ ᒥᔮᔥᑳᒑᐤ ᒥᑯᔖᓐ᙮’ ” 
ᐅᒋᔅᒋᓂᐦᐊᒧᐙᑭᓐᐦ ᒫᒃ ᒌᐦ ᑐᑎᒥᔨᐤ ᐊᓂᔮᔨᐤ ᑳᐦ ᐄᑎᔓᒫᑦ, ᑭᔮᐦ ᒌᐦ ᐃᔮᔅᑰᔥᑖᔨᐤ ᐊᓂᔮᔨᐤ ᒥᑯᔖᓂᔨᐤ᙮ 
ᐊᓂᔮᔨᐤ ᒫᒃ ᐙᑖᑯᓰᔨᒡ, ᒌᓴᔅ ᑭᔮᐦ ᐊᓂᔮᔨᐤᐦ ᑳ ᓃᓲᓵᐳᔨᒡ ᐅᒋᔅᒋᓂᐦᐊᒧᐙᑭᓐᐦ ᒌᐦ ᐅᐙᔨᐴᒡ ᒑ ᒌ ᒥᑯᔖᒡ᙮ 
ᒫᒀᒡ ᒫᒃ ᐋ ᒦᒋᓱᒡ, ᒌᓴᔅ ᒌᐦ ᐄᑖᐤ, “ᑖᑆᐦ ᒋᐐᐦᑎᒫᑎᓈᐙᐤ, ᐹᔨᒄ ᐅᑎᐦ ᐋ ᑎᔑᔮᒄ ᓂᑭ ᒫᒥᔑᒥᒄ᙮” 
ᐊᓂᒌ ᒫᒃ ᒋᔅᒋᓂᐦᐊᒧᐙᑭᓂᒡ ᒌ ᒥᓯᒫᔨᐦᑎᒧᒡ ᐊᓂᔮᔨᐤ ᐋᐦ ᐄᔨᔨᒡ ᐋᒄ ᐹᐦᐹᔨᒄ ᑳᐦ ᐄᑖᒡ, “ᑎᐹᔨᐦᒋᒑᔨᓐ, ᓂᒥᔮᐤ ᐐ ᓃᔨ ᑳ ᐄᔑᔨᓐ᙮” 
ᐋᒄ ᒌᓴᔅ ᑳᐦ ᐄᑖᑦ, “ᐊᓐ ᐊᐙᓐ ᒑ ᐹᔨᑯᐦᑖᐙᐦᒑ ᐎᔮᑭᓐ ᐋ ᐊᑯᐦᒋᒥᒋᐦᑦ ᓂᑖᐃᐦᑯᓈᒥᓈᓐ ᐋᐅᒄ ᐊᓐ ᒑ ᒫᒥᔑᒥᑦ᙮ 
ᑭᑎ ᓂᐱᐦᐋᑭᓂᐤ ᐄᔨᔨᐅᑯᓯᓵᓐ ᐊᓂᔮᔨᐤ ᓂᐦᐋᐤ ᑳ ᐄᔑ ᐹᒋ ᒥᓯᓂᐦᐄᑭᓂᐎᔨᒡ ᒋᐦᒋᒥᓯᓂᐦᐄᑭᓂᐦᒡ ᐊᓂᑖᐦ ᐅᑖᐦᒡ᙮ ᒥᒄ ᒫᒃ ᑖᑆᐦ ᑭᑎ ᐋᐦᒀᒡ ᒥᒋᐱᔨᐤ ᐊᓐ ᐊᐙᓐ ᒑ ᒫᒥᔑᒫᑦ ᐄᔨᔨᐅᑯᓯᓵᓐ᙮ ᐊᐅᔅᑖ ᒋᐱᐦ ᒌ ᒥᔻᔑᑯᐱᓐ ᐊᓐ ᐊᐙᓐ ᐋᑳ ᐙᐙᒡ ᐅᐦᒋ ᐄᔨᔨᐎᑯᐱᓈ᙮” 
ᐋᒄ ᒍᑖᔅ ᐊᓐ ᒦᔮᒥᔑᒫᑦ ᒌᓴᔅᐦ ᑳᐦ ᐃᔨᑦ, “ᓂᒧᐃ ᐋ ᐐᐦ ᓃᔨ ᑳ ᐄᔑᔨᓐ, ᒋᔅᑰᑎᒫᒑᓯᐤ” ᐋᒄ ᒌᓴᔅ ᑳᐦ ᐄᑖᑦ, “ᐋᐦᐋ, ᐋᐅᒄ ᐊᓐ ᐙᔥ ᑭᔨᑆ ᐃᔮᔨᓐ᙮” 
ᐊᓂᔮᔨᐤ ᒫᒃ ᐋ ᒦᒋᓱᒡ, ᒌᓴᔅ ᒌᐦ ᐅᑎᓈᐤ ᐋᐃᐦᑯᓈᐤ ᐋᒄ ᑳ ᓂᓈᔅᑯᒫᑦ ᒋᔖᒥᓂᑑ᙮ ᐄᔥᐱᐦ ᒫᒃ ᑳ ᓂᓈᔅᑯᒧᑦ ᐋᒄ ᑳ ᐱᐱᐦᒀᓈᑦ ᐊᓂᔮᔨᐤ ᐋᐃᐦᑯᓈᐤ ᐋᒄ ᑳ ᒥᔮᑦ ᐅᒋᔅᒋᓂᐦᐊᒧᐙᑭᓐᐦ ᐋᐦ ᐄᑖᑦ, “ᐅᑎᓈᐦᒄ ᐆ, ᒧᐙᐦᒄ, ᐋᐅᒄ ᓂᔨᐤ᙮” 
ᐋᒄ ᐊᓂᔮᔨᐤ ᒥᓂᐦᒀᑭᓂᔨᐤ ᑳ ᐅᑎᓂᐦᒃ, ᑳ ᓂᓈᔅᑯᒫᑦ ᒋᔖᒥᓂᑑᐦ, ᐋᒄ ᑳ ᒥᔮᑦ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ ᐋᐦ ᐄᑖᑦ, “ᐅᑎᓂᒥᒄ ᐆ ᒑ ᒌ ᒥᓂᐦᒀᔮᒄ ᒥᓯᐙ ᐋ ᑎᔑᔮᒄ᙮ 
ᐙᔥ ᐋᐅᒄ ᐆ ᓂᒥᐦᒄ ᒑ ᐅᐦᒋ ᐅᔅᒋᐦᑖᑭᓂᐎᒡ ᓂᔅᑯᒥᑐᐎᓐ, ᐋᐅᒄ ᓂᒥᐦᒄ ᒑ ᓰᒋᑭᐎᐦᑖᑭᓂᐎᒡ ᒑ ᒌᐦ ᐅᐦᒋ ᐙᐹᔨᐦᑎᒧᐙᑭᓂᐎᒡ ᒥᐦᒑᑐᐦ ᐄᔨᔨᐅᒡᐦ ᐅᒥᒋᐦᑣᐎᓂᐙᐤᐦ᙮ 
ᒋᐐᐦᑎᒫᑎᓈᐙᐤ ᒫᒃ ᓂᒧᐃ ᒦᓐ ᓂᑭ ᐅᐦᒋ ᒥᓂᐦᒀᓐ ᔔᒥᓈᐳᐃ ᐅᑎᐦ ᐐ ᐹᑎᔥ ᐊᓂᑖᐦ ᓅᐦᑖᐐ ᐅᒋᐦᒋᐅᒋᒫᐎᓂᐦᒡ ᒦᓐ ᒫᒨ ᒥᓂᐦᒀᔨᐦᒀ ᐋ ᐅᔅᑳᑭᒥᒡ᙮” 
ᐄᔥᐱᐦ ᒫᒃ ᑳ ᓂᑭᒧᒡ ᐊᔨᒥᐦᐋᐤ ᓂᑭᒧᐎᓂᔨᐤ ᐋᒄ ᑳ ᐄᑐᐦᑖᒡ ᐊᓂᑖᐦ ᐊᓕᕕᔅ ᑳ ᐃᔑᓂᐦᑳᑖᔨᒡ ᐋ ᐱᔅᒀᐱᔅᑳᔨᒡ᙮ 
ᐋᒄ ᒌᓴᔅ ᑳᐦ ᐄᑖᑦ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ, “ᐆ ᐊᓅᐦᒡ ᒑ ᑎᐱᔅᑳᒡ ᒥᓯᐙ ᐋ ᑎᔑᔮᒄ ᒋᑭ ᓂᑭᓯᓈᐙᐤ, ᐊᓐ ᐅᐦᒋ ᑖᓐ ᒑ ᑐᑖᑯᔮᓐ, ᐙᔥ ᐊᒀᒋᔥᑖᒡ ᐊᓂᑖᐦ ᒋᐦᒋᒥᓯᓂᐦᐄᑭᓂᐦᒡ, ᓂᑭ ᓃᐦᑎᐦᐙᐤ ᐊᓐ ᒫᓂᔥᒑᓂᔑᐐᔨᔨᐤ, ᐋᒄ ᐊᓂᒌ ᒫᓂᔥᒑᓂᔑᒡ ᒑ ᐙᓯᔀᔮᒧᐦᒑᓂᐎᒡ᙮” 
ᐋᒄ ᒌᓴᔅ ᒦᓐ ᑳᐦ ᐋᑎ ᐄᑖᑦ, “ᐄᔥᐱᐦ ᒫᒃ ᒌᐦ ᐎᓂᔥᑳᓂᑯᔮᓈ ᓂᐱᐎᓂᐦᒡ ᐅᐦᒋ ᐊᓂᑖᐦ ᑳᓕᓖᐦᒡ ᓂᑭ ᐄᑐᐦᑖᓐ᙮ ᐋᑯᑖᐦ ᐊᓂᑖᐦ ᒑ ᐊᔑᓂᐙᐦᐄᑎᑯᒡ᙮” 
ᐲᑎᕐ ᒫᒃ ᒌᐦ ᐄᑖᐤ, “ᐋᑎ ᒥᓯᐙ ᐊᐙᓐ ᓂᑭᑎᔅᑳ ᐊᓐ ᒑ ᑐᑖᑭᐎᔨᓐ ᓂᒧᐃ ᐐ ᓃᔨ ᓂᐦᑖ ᒋᑭ ᐅᐦᒋ ᓂᑭᑎᑎᓐ᙮” 
ᒌᓴᔅ ᑳᐦ ᐄᑖᑦ ᐊᓂᔮᔨᐤᐦ ᐲᑎᕐᐦ, “ᑖᑆᐦ ᒋᐐᐦᑎᒫᑎᓐ᙮ ᐊᓅᐦᒡ ᐆ ᒑ ᑎᐱᔅᑳᒡ, ᐐᐱᒡ ᒑ ᒋᔖᐹᔮᒑ ᐋᒸᔮ ᒋᔅᑑᑦ ᓈᐹ ᐹᐦᑭᐦᐋᐦᒀᓐ ᓂᔥᑣᐤ ᒋᑭ ᐃᔨᓐ ᐋᐦᐋᑳ ᒋᔅᒑᔨᒥᔨᓐ᙮” 
ᐲᑎᕐ ᒫᒃ ᒌᐦ ᐄᑖᐤ, “ᐋᑦ ᑭᔮᐦ ᓃᔨ ᐐ ᓂᐱᐦᐄᑭᐎᔮᓈ ᐄᔥᐱᐦ ᓂᐱᐦᐄᑭᐎᓈ, ᓂᒧᐃ ᐊᔮᐱᒡ ᓂᑭ ᐅᐦᒋ ᐃᔨᓐ ᐋᐦᐋᑳ ᒋᔅᒑᔨᒥᑖᓐ᙮” ᐋᒄ ᐊᓂᒌ ᑯᑎᑭᒡ ᒋᔅᒋᓂᐦᐊᒧᐙᑭᓂᒡ ᐋᔪᐎᒄ ᑭᔮᐦ ᐐᔨᐙᐤ ᑳᐦ ᐃᔨᒡ ᐊᓂᔮᔨᐤ ᑳ ᐄᔨᔨᒡ ᐲᑎᕐ᙮ 
ᐋᒄ ᒌᓴᔅ ᑳ ᐐᒑᐙᑦ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ ᐊᓂᑖᐦ ᓂᐦᑖᐅᒋᐦᒋᑭᓐ ᐊᔅᒌᔨᐤ ᑭᑎᓰᒫᓃ ᑳ ᐃᔑᓂᐦᑳᑖᔨᒡ ᐋᑯᑖᐦ ᑳ ᐄᑐᐦᑖᒡ, ᐋᒄ ᑳᐦ ᐄᑖᑦ, “ᐋᑯᑖᐦ ᐅᑎᐦ ᐊᐱᒄ, ᓈᑖᐦ ᓂᑭ ᐄᑐᐦᑖᓐ, ᓂᑭ ᓂᑑᐊᔨᒥᐦᐋᓐ᙮” 
ᐋᒄ ᐊᓂᔮᔨᐤᐦ ᐲᑎᕐ ᑭᔮᐦ ᓃᔓ ᐊᓂᔮᔨᐤᐦ ᓭᐱᑏ ᐅᑯᓯᔨᐤᐦ ᐊᐅᔅᑖᓰᔅ ᓈᑖᐦ ᐱᐦᑳᓐ ᑳ ᐄᑐᐦᑎᐦᐋᑦ᙮ ᓈᔥᒡ ᒫᒃ ᒌ ᒥᓯᒫᔨᐦᑎᒻ ᒌᓴᔅ ᑭᔮᐦ ᓈᔥᒡ ᒌᐦ ᑯᔑᑯᑖᐦᐋᐤ᙮ 
ᐋᒄ ᑳᐦ ᐄᑖᑦ, “ᓈᔥᑖᑆᐦ ᒥᓯᒫᔨᐦᑎᒻ ᓂᑎᐦᒑᐦᒄ, ᒨᔮᒻ ᐊᓂᑎᐦ ᒑ ᐅᐦᒋ ᐴᓂᐱᒫᑎᓰᔮᓐ᙮ ᐋᑯᑖᐦ ᐅᑎᐦ ᑖᒄ ᒥᒄ ᒫᒃ ᐊᑳᐐ ᐐᐦ ᑭᐎᐦᑯᔑᒄ ᐋ ᐋᔓᐙᐱᒥᔮᒄ᙮” 
ᐋᒄ ᐊᓂᑖᐦ ᐄᒑᓯᔅ ᑳ ᐄᑐᐦᑖᑦ ᐐᔨ, ᒌᐦ ᐅᒋᐦᒌᐦᑯᓂᐱᐤ ᒫᒃ, ᑳ ᓂᑐᑎᒫᑦ ᐋᐦ ᐃᔨᑦ, “ᓅᐦᑖ, ᒑ ᒌᐦ ᐃᓯᓈᑯᓂᒀ, ᐹᒋ ᐄᒑᓂᒨᐦ ᐊᓐ ᒥᓂᐦᒀᑭᓐ ᐆ ᑖᓐ ᒑ ᐄᔑ ᐙᐐᓯᒑᔨᐦᑎᒫᓐ, ᒥᒄ ᒫᒃ ᒌᔨ ᒋᑎᐄᑖᔨᐦᑎᒧᐎᓐ ᒋᑭ ᑐᑖᑭᓂᐤ, ᓂᒧᐃ ᓃᔨ ᓂᑎᐄᑖᔨᐦᑎᒧᐎᓐ᙮” 
ᒌ ᐱᓯᑰ ᒫᒃ ᑳ ᒌᔥ ᐊᔨᒥᐦᐋᑦ, ᑳᐤ ᑳ ᓂᑎᐙᐱᒫᑦ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ ᑳ ᐊᓯᓂᐙᐦᐄᑯᑦ, ᐙᑎᐦᑖᑦ ᒫᒃ ᐋᔨᐅᑯᓐ ᐅᔮᔨᐤᐦ ᑳ ᓂᐹᔨᒡ, ᐋᒄ ᑳᐦ ᐄᑖᑦ ᐊᓂᔮᔨᐤ ᐲᑎᕐ, “ᓂᒥ ᐙᐙᒑ ᐹᔨᒀᐤ ᐋ ᒌᓂᒀᓂᐦᑖᑦ ᑰᐦᒌ ᐊᓯᓂᐙᐦᐄᓈᐙᐤ ᐋᐦᐋᑳ ᓂᐹᔮᒄ᙮ 
ᔮᒀᒦᒄ ᑭᔮᐦ ᐊᔨᒥᐦᐋᒄ ᐋᑳ ᒑ ᒌᐦ ᔑᐦᑯᒋᐦᐄᑯᔮᒄ ᑯᒀᒋᐦᐄᐙᐎᓐ᙮ ᐙᔥ ᒋᑎᐦᒑᐦᑯᐙᐦᒡ ᓈᔥᑖᑆᐦ ᑯᐃᔅᒄ ᒋᐐᐦᑎᓈᐙᐤ ᒥᒄ ᒫᒃ ᒋᔮᓯᐙᐦᒡ ᓂᒧᐃ ᒥᑐᓐ ᒋᓵᐱᓰᓈᐙᐤ᙮” 
ᐋᒄ ᒦᓐ ᑳ ᓂᑐᐊᔨᒥᐦᐋᑦ ᒌᓴᔅ ᑳᐦ ᐃᔨᑦ, “ᓅᐦᑖ, ᐋᑳ ᒑ ᒌᐦ ᐄᒑᓂᑭᓅᒀ ᐆ ᒑ ᐄᔑ ᐐᓯᒑᔨᐦᑎᒫᓐ ᐋᐅᒄ ᑭᔨᑆ ᒑ ᐄᔑ ᑐᑎᒫᓐ, ᒌᔨ ᒋᑎᐄᑖᔨᐦᑎᒧᐎᓐ ᒑ ᒌᐦ ᑐᑖᑭᓂᐎᒡ᙮” 
ᒦᓐ ᑳ ᓂᑎᐙᐦᐋᑦ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ, ᒦᓐ ᒫᒀᒡ ᒌ ᓂᐹᔨᐤᐦ, ᐙᔥ ᔖᔥ ᓂᒧᐃ ᐅᐦᒌ ᒌᐦ ᑎᔨᐤ ᐋᑳ ᒑ ᒌ ᓂᐹᔨᒡ᙮ 
ᒌᓴᔅ ᑳ ᓂᑭᑖᑦ, ᒦᓐ ᑳ ᓂᑐᐊᔨᒥᐦᐋᑦ᙮ ᐋᔪᐎᒄ ᐋᒄ ᓂᔥᑣᐤ ᑳ ᐹᔨᑯᐦᑖᑦ ᐊᓂᔮᔨᐤ ᑳ ᐄᔑ ᐊᔨᒥᐦᐋᑦ᙮ 
ᐋᒄ ᒦᓐ ᑳᐤ ᑳ ᓂᑎᐙᐱᒫᑦ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ, ᑳᐦ ᐄᑖᑦ, “ᐋᔥᒄ ᐋ ᒋᓂᐹᓈᐙᐤ? ᐋᔥᒄ ᐋ ᒋᑎᔨᐙᓯᓈᐙᐤ? ᐄᑖᐱᒄ ᒫᐦ, ᔖᔥ ᐅᑎᐦᒋᐱᔨᐤ ᐊᓐ ᐋᐦᒋᓂᒀᓂᐦᑖᑦ ᐲᓯᒧᐦᑳᓐ ᒑ ᒫᒥᔑᒫᑭᓅᑦ ᐄᔨᔨᐅᑯᓯᓵᓐ ᐊᓂᑖᐦ ᐅᒥᒋᐦᑣᐤ ᐋᐦ ᑖᔨᒡ᙮ 
ᐎᓂᔥᑳᒄ, ᒫᒌᑖᐤ ᐋᒄ, ᐙᔥ ᔖᔥ ᑎᑯᔑᓐ ᐊᓐ ᓈᐹᐤ ᒑ ᒫᒥᔑᒥᑦ᙮” 
ᐋᔥᒄ ᒫᒃ ᒫᒀᒡ ᐋ ᐊᔨᒥᑦ ᒌᓴᔅ ᒌᐦ ᐅᐦᒋ ᑎᑯᔑᓂᔨᐤ ᐹᔨᒄ ᐊᓂᔮᔨᐤᐦ ᑳ ᓃᔓᔖᐳᔨᒡ ᐅᒋᔅᒋᓂᐦᐊᒧᐙᑭᓐᐦ ᒍᑖᔅᐦ ᑳ ᐃᔑᓂᐦᑳᓱᔨᒡ᙮ ᒌ ᐹᒋ ᐐᒑᑯᔨᐤ ᐋ ᒫᒨ ᒥᐦᒑᑎᔨᒡ ᐄᔨᔨᐤᐦ ᐋ ᒌ ᐹᒋ ᐄᑎᔑᐦᐅᑯᔨᒡ ᑳ ᓃᑳᓂᔒᒡ ᐊᔨᒥᐦᐋᐅᒋᒫᐤ ᑭᔮᐦ ᐊᓂᔮᔨᐤᐦ ᐄᔨᔨᐤᐦ ᑳ ᓃᑳᓂᔥᑭᐙᔨᒡ᙮ ᒌ ᐹᒋ ᑎᐦᑯᓂᒧᒡ ᒫᒃ ᓂᑐᐱᔫᐦᑯᒫᓐ ᑭᔮᐦ ᐅᑖᒥᐦᐄᑭᓈᐦᑎᒄ᙮ 
ᐊᓐ ᒑ ᒫᒥᔑᒫᑦ ᒌᓴᔅᐦ ᓃᑳᓐ ᒌ ᐐᐦᑎᒧᐙᑖᑯᐱᓐ ᐊᓂᔮᔨᐤ ᑳ ᐐᒑᐅᑯᑦ ᑖᓐ ᒑ ᑎᒃ᙮ ᒌᐦ ᐄᑖᒑ, “ᐊᓐ ᓈᐹᐤ ᒑ ᐅᒑᒥᒃ ᐋᐅᒄ ᐊᓐ ᓈᐹᐤ ᓈᑎᐙᔨᒫᒄ᙮ ᐋᐅᒄ ᐊᓐ ᒑ ᐅᑎᓈᒄ᙮” 
ᒍᑖᔅ ᒫᒃ ᑯᐃᔅᒄ ᒌ ᓈᑖᐤ ᐊᓂᔮᔨᐤ ᒌᓴᔅᐦ, ᐋᒄ ᑳᐦ ᐄᑖᑦ, “ᐙᒋᔮ, ᒋᔅᑯᑎᒫᒑᓯᐤ᙮” ᐋᒄ ᑳ ᐅᒑᒫᑦ᙮ 
ᐋᒄ ᒌᓴᔅ ᑳᐦ ᐄᑖᑦ, “ᓂᐐᒑᐙᑭᓐ, ᑐᑎᐦ ᑭᔨᑆ ᑖᓐ ᑳ ᐐᐦ ᑐᑎᒥᓐ᙮” ᐋᒄ ᐊᓂᒌ ᐄᔨᔨᐅᒡ ᑳ ᑳᐦᒋᔥᑎᓈᒡ ᑭᔮᐦ ᑳ ᐅᑎᓈᒡᐦ ᒌᓴᔅᐦ᙮ 
ᐹᔨᒄ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ ᒌᐦ ᐅᐦᒋ ᔮᔨᔥᑳᐱᔅᒋᐱᑎᒥᔨᐤ ᐅᓂᑐᐱᔫᐦᑯᒫᓂᔨᐤ ᑳ ᒥᓂᐦᑑᑭᔨᔂᑦ ᐊᓂᔮᔨᐤᐦ ᒫᐅᒡ ᑳ ᓃᑳᓈᔮᔨᐦᑖᑯᔒᔨᒡ ᒋᔖᐊᔨᒥᐦᐋᐅᒋᒫᐤᐦ ᐅᑖᐱᒋᐦᐋᑭᓂᔨᐤᐦ᙮ 
ᐋᒄ ᒌᓴᔅ ᑳᐦ ᐄᑖᑦ, “ᐲᐦᑖᐦ ᐊᓐ ᒋᒨᐦᑯᒫᓐ, ᐙᔥ ᒥᓯᐙ ᐊᐙᓐ ᑳᐦ ᐋᐱᒋᐦᑖᑦ ᓂᑐᐱᔫᐦᑯᒫᓂᔨᐤ ᒑ ᒌ ᓂᐱᐦᐋᑦ ᐊᐙᔨᐤᐦ ᐋᔪᐎᒄ ᐅᔮᔨᐤ ᒑ ᐋᐱᑎᓃᔨᒡ ᓂᐱᐦᐋᑭᓅᒑ ᑭᔮᐦ ᐐᔨ᙮ 
ᓂᒧᐃ ᐋ ᒋᒋᔅᒑᔨᐦᑖᓈᐙᐤ ᒑ ᒌ ᓂᑐᑎᒧᐙᐅᒋᐱᓐ ᓅᐦᑖᐐ ᒑ ᒌ ᓈᑎᒨᑦ? ᑏᐙᐦᒡ ᒫᒃ ᒋᐱᐦ ᒌ ᐹᒋ ᐄᑎᔑᐦᐙᐤ ᐊᐅᔅᑖ ᒥᐦᒑᑣᐤ ᒋᔖᒥᑖᐦᑐᒥᑎᓂᐤ ᐋᓐᒋᓐ ᒑ ᒌ ᐹᒋ ᓈᑎᒧᐎᔨᒡ᙮ 
ᒥᒄ ᒫᒃ ᐊᓐ ᑎᔮᓈ, ᑖᓂᑖᐦ ᒑ ᒌᐦ ᐅᐦᒋ ᑎᐱᐹᔨᒡ ᐊᓐ ᑳᐦ ᐄᑎᔥᑖᒡ ᒋᐦᒋᒥᓯᓂᐦᐄᑭᓂᐦᒡ ᐊᓐ ᒑ ᐄᔅᐱᔨᑯᐱᓈ?” 
ᐋᒄ ᒌᓴᔅ ᑳᐦ ᐄᑖᑦ ᐊᓂᔮᔨᐤᐦ ᐋ ᒫᒨ ᒥᐦᒑᑎᔨᒡ ᐄᔨᔨᐤᐦ, “ᒧᔮᒻ ᑖᑆᐦ ᑳᐦ ᐋᐦᒀᑎᓰᑦ ᒋᒧᑎᔅᒃ ᐋᐦ ᑐᑎᐎᔮᒄ ᐋ ᐹᒋ ᓂᑎᐙᐱᒥᔮᒄ ᐋ ᑎᐦᑯᓂᒫᒄ ᓂᑐᐱᔫᐦᑯᒫᓐ ᑭᔮᐦ ᐅᑖᒥᐦᐄᑭᓈᐦᑎᒄ᙮ ᐙᔥ ᔖᔥ ᒋᐱᐦ ᒋᒫᑯᓂᓈᐙᐤ ᐊᓂᑖᐦ ᒋᔖᐊᔨᒥᐦᐋᐅᑭᒥᑯᐦᒡ ᑳ ᒌᐦᑖᔨᐦᒄ ᐋᔑᑯᒻ ᒌᔑᑳᐤᐦ ᐋ ᒋᔅᑯᑎᒫᒑᔮᓐ, ᓂᒧᐃ ᒫᒃ ᓂᐦᑖ ᑰᐦᒋ ᑯᒋᑖᓈᐙᐤ ᒑ ᒌ ᒫᑯᓂᔮᒄ᙮” 
ᒥᒄ ᒫᒃ ᐋᔨᐱᒡ ᒥᓯᐙ ᑎᐱᐱᔨᐤ ᑖᓐ ᑳ ᐄᔑ ᒥᓯᓂᐦᐋᐦᒡ ᐊᓂᑖᐦ ᒋᐦᒋᒥᓯᓂᐦᐄᑭᓂᒡ ᐊᓂᔮᐦᑳ ᐅᒋᔅᒋᐙᐦᐄᒑᓱᒡ᙮ ᐄᔥᐱᐦ ᒫᒃ ᐅᔮᔨᐤ ᑳᐦ ᐄᑖᑦ ᐋᒄ ᒥᓯᐙ ᐅᒋᔅᒋᓂᐦᐊᒧᐙᑭᓐᐦ ᑳ ᐅᔑᒧᔨᒡ ᐋ ᓂᑭᑎᑯᑦ᙮ 
ᐊᓂᒌ ᒫᒃ ᑳ ᐅᑎᓈᒡ ᒌᓴᔅᐦ ᒌᐦ ᐄᑐᐦᑎᐦᐋᐅᒡ ᐊᓂᑖᐦ ᒫᐅᒡ ᑳ ᓃᑳᓈᔮᔨᐦᑖᑯᔒᔨᒡ ᒋᔖᐊᔨᒥᐦᐋᐅᒋᒫᐤᐦ ᑳᔮᕙᔅ ᐋᐦ ᑖᔨᒡ᙮ ᔖᔥ ᒫᒃ ᒌ ᓂᔥᑐᐎᔨᐤ ᐊᓂᔮᔨᐤᐦ ᑳ ᓃᑳᓂᔥᑭᐙᔨᒡ ᒎᐄᔨᔨᐤ ᑭᔮᐦ ᐊᓂᔮᔨᐤ ᐐᔓᐙᐎᓂᔨᐤ ᑳ ᒋᔅᑯᑎᒫᒑᔨᒡ ᐊᓂᑖᐦ ᐊᓂᔮᔨᐤ ᒫᐅᒡ ᑳ ᓃᑳᓈᔮᔨᐦᑖᑯᔒᔨᒡ ᒋᔖᐊᔨᒥᐦᐋᐅᒋᒫᐤᐦ ᐅᐙᔅᑳᐦᐄᑭᓂᒥᔨᒡ᙮ 
ᐲᑎᕐ ᒫᒃ ᐙᐦᔨᐤ ᐊᓂᑖᐦ ᒌᐦ ᐅᐦᒋ ᓅᔔᔥᑯᐙᐤ ᐊᓂᔮᔨᐤ ᑳ ᐅᑎᓈᔨᒡ ᒌᓴᔅᐦ, ᐲᐦᐃᒻ ᑳ ᐅᑎᐦᑎᐦᒡ ᒫᐅᒡ ᑳ ᓃᑳᓈᔮᔨᐦᑖᑯᔒᔨᒡ ᒋᔖᐊᔨᒥᐦᐋᐅᒋᒫᐤᐦ ᐅᐙᔅᑳᐦᐄᑭᓂᒥᔨᐤ᙮ ᐊᓂᑎᐦ ᒫᒃ ᐎᔨᐐᑎᒥᐦᒡ ᐋᑯᑖᐦ ᑳᐦ ᑖᑦ ᐐᔨ ᐲᑎᕐ, ᑳ ᓂᑑᐐᑎᐱᒫᑦ ᐊᓂᔮᔨᐤ ᑳ ᓈᓈᑭᒋᐦᑖᔨᒡ ᐊᓂᑎᐦ ᐋ ᐐᐦ ᐙᐱᐦᑎᐦᒃ ᑖᓐ ᒑ ᐋᔨᐦᑎᓈᓂᐎᔨᒀ᙮ 
ᐊᓂᒌ ᒫᒃ ᑳ ᓃᑳᓂᔒᒡ ᐊᔨᒥᐦᐋᐅᒋᒫᐅᒡ ᑭᔮᐦ ᐊᓂᒌ ᑳ ᓃᑳᓂᔥᑭᐙᒡ ᒎᐄᔨᔨᐤ ᒋᐐᐦ ᓈᓂᑐ ᐅᐦᑎᓂᒧᒡ ᑖᓐ ᒑ ᒌᐦ ᐄᔑ ᓂᓂᑎᔮᒋᒫᒡ ᒌᓴᔅᐦ ᒑ ᒌᐦ ᐅᐦᒋ ᓂᐱᐦᐄᒫᑭᓂᐐᔨᒡ᙮ 
ᒥᒄ ᒫᒃ ᓂᒧᐃ ᐅᐦᒌ ᒥᔅᑭᒸᐅᒡ ᒑᒀᔨᐤ ᐋ ᒌᐦ ᑏᔨᒡ ᐊᓂᑎᐦ ᒑ ᒌᐦ ᐅᐦᒋ ᐱᒋᔅᑎᓱᐙᑎᑯᒡ ᐐᔓᐙᐎᓂᔨᐤ ᒑ ᒌ ᓂᐱᐦᐋᒡ ᒌᓴᔅᐦ, ᐋᑎ ᒥᐦᒑᑐ ᐋ ᒌ ᑎᑯᔑᒡ ᐋ ᓂᓂᑎᔮᒋᒫᒡ᙮ ᒑᒃ ᒫᒃ ᓃᔓ ᓈᐹᐅᒡ ᑳ ᑎᑯᔑᐦᒡ᙮ 
ᐋᒄ ᑳᐦ ᐄᑖᒡ, “ᐆ ᓈᐹᐤ ᒌᓴᔅ ᓂᒌ ᐹᐦᑎᐙᓈᓐ ᐋᐦ ᐃᔨᑦ, ‘ᓂᑭ ᒌ ᓂᔑᐎᓈᒋᑖᐙᓐ ᒋᔖᒥᓂᑑᐦ ᐅᒋᔖᐊᔨᒥᐦᐋᐅᑭᒥᒄ, ᒥᒄ ᒫᒃ ᓂᔥᑐ ᒌᔑᑳᐤ ᐃᔥᐱᔥ ᔖᔥ ᒦᓐ ᓂᑭ ᒌᐦ ᐎᔨᑳᐳᐦᑖᐙᓐ᙮’ ” 
ᐋᒄ ᐊᓐ ᒫᐅᒡ ᑳ ᓃᑳᓈᔮᔨᐦᑖᑯᔑᑦ ᒋᔖᐊᔨᒥᐦᐋᐅᒋᒫᐤ ᑳ ᐱᓯᑯᑦ, ᑳᐦ ᐄᑖᑦ ᐊᓂᔮᔨᐤ ᒌᓴᔅᐦ, “ᑖᓐ ᒫᒃ ᒑ ᒌᐦ ᐃᔨᓐ ᑳ ᐄᑖᒋᒥᑭᐎᔨᓐ?” 
ᒌᓴᔅ ᒫᒃ ᓂᒧᐃ ᐅᐦᒋ ᒋᔅᑑ᙮ ᐋᒄ ᒦᓐ ᑳᐦ ᐄᑎᑯᑦ ᐊᓂᔮᔨᐤ ᒫᐅᒡ ᑳ ᓃᑳᓈᔮᔨᐦᑖᑯᔒᔨᒡ ᒋᔖᐊᔨᒥᐦᐋᐅᒋᒫᐤ, “ᑯᐃᔅᒄ ᒫᐦ ᐹᒋ ᐐᐦᑎᒧᓈᓐ ᐋ ᐹᐦᑖᔅᒃ ᐊᓐ ᐹᒫᑎᓰᑦ ᒋᔖᒥᓂᑑ, ᐋᐤ ᐋ ᒌᔨ ᑖᑆᐦ ᙭, ᒋᔖᒥᓂᑑ ᐅᑯᓯᔅᐦ?” 
ᒌᓴᔅ ᒌᐦ ᐄᑖᐤ, “ᐋᐅᒄ ᐃᔮᔨᓐ᙮ ᒥᒄ ᒫᒃ ᒋᐐᐦᑎᒫᑎᓈᐙᐤ ᒋᑭ ᐙᐱᒫᐙᐤ ᐄᔨᔨᐅᑯᓯᓵᓐ ᐅᓂᐦᐄᐎᓃᔨᐦᒡ ᐄᑖᐦᒑ ᐋ ᐊᐱᑦ ᒋᔖᒥᓂᑑ ᑳ ᓲᐦᑳᑎᓰᔨᒡ ᑭᔮᐦ ᑭᔥᑭᐎᓂᔅᑰᐦᒡ ᒋᐦᒋᒋᔑᑯᐦᒡ ᐋ ᐹᒋᔮᓰᑦ᙮ ᑭᔮᐦ ᒋᑭ ᐙᐱᒫᐙᐤ ᐹᒋ ᑎᑯᔑᒑ ᒋᐦᒋᒌᔑᒄ ᑭᔥᑭᐎᓂᔅᑰᐦᒡ ᐋ ᐅᐦᒋ ᓅᑯᓯᑦ᙮” 
ᐋᒄ ᐊᓐ ᒫᐅᒡ ᑳ ᓃᑳᓈᔮᔨᐦᑖᑯᔑᑦ ᒋᔖᐊᔨᒥᐦᐋᐅᒋᒫᐤ ᑳ ᐲᑯᐱᑎᐦᒃ ᐅᒑᒀᓂᒻ ᐋᐦ ᐃᔨᑦ, “ᐋᔪᐎᒄ ᐋᓐ ᐋᒄ ᒑ ᐃᔥᐱᔥ ᒫᔮᔨᒫᑦ ᒋᔖᒥᓂᑑᐦ᙮ ᓂᒧᐃ ᒌ ᓂᑎᐙᔨᐦᑎᒸᓈᓂᐤ ᐊᑎᑎᐤ ᒑ ᒌ ᑎᐹᒋᒫᑭᓅᑦ᙮ ᐙᔥ ᒌᔮᓂᐤ ᔖᔥ ᒥᑐᓐ ᒋᒌ ᐹᐦᑎᐙᓂᐤ ᑖᓐ ᐋ ᐃᔥᐱᔥ ᒫᔮᔨᒫᑦ᙮ 
ᑖᓐ ᐋᑖᔨᐦᑎᒥᐦᐄᑯᐙᒄ ᑳ ᐄᔑ ᐹᐦᑖᐙᒄ?” ᐋᒄ ᑳᐦ ᐄᑖᒡ, “ᑎᑯᓂᔨᐤ ᑭᔨᑆ ᑖᓐ ᐋ ᐄᔑ ᐎᓂᑐᑎᐦᒃ᙮ ᐄᑖᔨᐦᑖᑯᓂᔨᐤ ᒫᒃ ᒑ ᒌ ᓂᐱᐦᐋᑭᓅᑦ᙮” 
ᒌᐦ ᓯᐦᒀᑖᐅᒡ ᐅᑖᔥᑎᒥᐦᑯᔨᒡ ᐋᔨᐤᐦ ᒌᐦ ᐅᑖᒧᐦᐙᐅᒡ ᑭᔮᐦ ᒌᐦ ᐅᑎᑖᒥᐦᒀᐦᐙᐅᒡ᙮ 
ᒌ ᒫᔮᔨᒫᐅᒡ ᐋᐦ ᐄᑖᒡ, “᙭, ᒋᔅᒋᐙᐦᐄᒑ ᒫᐦ, ᐐᐦᑎᒨᓈᓐ ᒫᐦ ᐱᑯᓅ ᐊᐙᓐ ᑳ ᐅᑖᒥᐦᐆᔅᒃ᙮” 
ᒫᒀᒡ ᒫᒃ ᐋ ᒫᔮᔨᒫᑭᓂᐎᔨᒡ ᒌᓴᔅᐦ, ᐲᑎᕐ ᒌᐦ ᐊᐱᐤ ᐊᓂᑖᐦ ᐋ ᐅᐦᒋ ᐲᐦᒑᓂᐎᔨᒡ ᐎᔨᐐᑎᒥᐦᒡ, ᐹᔨᒄ ᒫᒃ ᐊᓂᔮᔨᐤ ᒋᔖᐊᔨᒥᐦᐋᐅᒋᒫᐤ ᐅᑖᐱᒋᐦᐋᑭᓂᔅᒀᒥᔨᐤ ᒌ ᐹᒋ ᓂᑎᐙᐱᒥᑰ ᑳᐦ ᐄᑎᑯᑦ, “ᑭᔮᐦ ᒌ ᒋᒌ ᐱᐹᐐᒑᐙᐤ ᒌᓴᔅ ᐊᓐ ᓈᐹᐤ ᑳᓕᓖ ᐊᔅᒌᐦᒡ ᑳ ᐅᐦᒌᑦ᙮” 
ᐲᑎᕐ ᒫᒃ ᒌ ᓂᑎᔨᐤ ᐋᐦ ᐃᔨᑦ, ᐋ ᐹᐦᑖᑯᑦ ᒥᓯᐙ ᐊᓂᑎᐦ ᑳᐦ ᑖᔨᒡ, “ᓂᒧᐃ ᓂᒋᔅᒑᔨᐦᑖᓐ ᒑᒀᓐ ᐃᔮᔨᒸᐅᐦᐄᑯᔨᓐ᙮” 
ᐋᒄ ᑳᐦ ᐋᑎ ᐎᔨᐐᑦ ᐊᓂᑎᐦ ᐋ ᐅᐦᒋ ᐲᐦᒑᓂᐎᔨᒡ ᐊᓂᑎᐦ ᐊᓂᔮᔨᐤ ᑳ ᑖᓂᐎᔨᒡ᙮ ᐋᒄ ᒦᓐ ᑯᑎᒃ ᐋᐱᒋᐦᐋᑭᓂᔅᒀᐤ ᑳ ᐙᐱᒥᑯᑦ, ᐋᒄ ᐊᓐ ᐃᔅᒀᔥ ᑳᐦ ᐄᑖᑦ ᐊᓂᔮᔨᐤᐦ ᓈᐹᐤᐦ ᐊᓂᑎᐦ ᑳᐦ ᑖᔨᒡ, “ᐆ ᓈᐹᐤ ᑭᔮᐦ ᐐᔨ ᒌ ᐱᐹᐐᒑᐙᐤ ᒌᓴᔅᐦ, ᓈᓵᕆᑦ ᐃᐦᑖᐎᓂᐦᒡ ᑳ ᐅᐦᒌᔨᒡ᙮” 
ᒦᓐ ᒫᒃ ᒌ ᓂᑎᔨᐤ ᐲᑎᕐ ᐋᐦ ᐃᔨᑦ, “ᓂᑖᑆᓐ ᐋᐦ ᐃᔨᔮᓐ ᓂᒧᐃ ᓂᒋᔅᒑᔨᒫᐤ ᐊᓐ ᓈᐹᐤᐦ᙮” 
ᓈᓈᒑᔒᔥ ᒫᒃ ᐊᓂᒌ ᐄᔨᔨᐅᒡ ᐊᓂᑎᐦ ᑳ ᓈᓃᐱᐎᒡ ᒌ ᐹᒋ ᓂᑎᐙᐱᒫᐅᒡ ᐊᓂᔮᔨᐤᐦ ᐲᑎᕐᐦ ᑳᐦ ᐄᑖᒡ, “ᒥᑐᓐ ᐋ ᒑᔥᑎᓈᐦᐅᔮᐦᒡ ᑭᔮᐦ ᒌᔨ ᐋᑯᑖᐦ ᑳ ᐐᒋᐦᐄᐙᔨᓐ, ᐙᔥ ᐋᐅᒄ ᒧᔮᒻ ᐋᐦ ᐄᑎᐦᑖᑯᓯᔨᓐ ᑭᔮᐦ ᒌᔨ ᐋᐦ ᐊᔨᒥᔨᓐ᙮” 
ᐲᑎᕐ ᒫᒃ ᒌᐦ ᐄᑖᐤ, “ᑖᑆᐦ ᐙᔥ ᐊᓐ, ᓂᒧᐃ ᓂᒋᔅᒑᔨᒫᐤ ᐊᓐ ᓈᐹᐤᐦ᙮ ᐋᑯᔥ ᓂᑭ ᐎᔮᔅᑐᑖᒄ ᒋᔖᒥᓂᑑ ᓂᑎᐐ ᐃᔮᐙᓈ᙮” ᐋᑯᑖᐦ ᒫᒃ ᐊᓂᑎᐦ ᑏᐙᐦᒡ ᑳ ᐅᐦᒋ ᒋᔅᑐᑦ ᓈᐹᐹᐦᑭᐦᐋᐦᒀᓐ᙮ 
ᐋᒄ ᐲᑎᕐ ᑳ ᐅᐦᒋ ᒋᔥᒋᓯᑦ ᑖᓐ ᑳᐦ ᐄᑎᑯᑦ ᒌᓴᔅᐦ, “ᐋᔥᒄ ᐋᒸᔮ ᒋᔅᑑᑦ ᓈᐹᐹᐦᑭᐦᐋᐦᒀᓐ ᓂᔥᑣᐤ ᒋᑭ ᐃᔨᓐ ᐋᐦᐋᑳ ᒋᔅᒑᔨᒥᔨᓐ᙮” ᐋᒄ ᒫᒃ ᑳ ᐎᔨᐐᑦ ᑳ ᓂᑐᒫᑑᑦ, ᓲᐦᒃ ᐋ ᒫᑑᑦ᙮ 
