﻿ᒉᒥᔅ.
4.
ᑖᓂᑌ ᐌᐦᒋᐸᔨᐦᒡ ᐊᓐ ᐁ ᒪᔑᐦᐄᑐᔦᒄ ᑲᔦ ᐁ ᐊᔮᓯᑌᒥᑐᔦᒄ᙮ ᐲᐦᒡ ᐊᓂᑌ ᐁ ᐃᐦᑖᑦ ᐊᐌᓐ ᒬᐦᒡ ᐁ ᒫᓯᐦᒉᐸᔨᒀᐤᐦ ᐃᔑᓈᑯᓂᔫᐦ ᐊᓂᔫ ᒉᒀᔫ ᑳ ᒧᔥᑌᓀᔨᐦᑕᐦᒃ ᒉᒌ ᓇᓂᐦᐁᔨᐦᑕᒥᐦᐄᑯᑦ᙮ 
ᐁ ᓂᑕᐌᔨᐦᑕᒣᒄ ᒉᒀᓐ ᐁᑳ ᒫᒃ ᒌ ᐊᔮᔦᒄ, ᒉᒃ ᒥᑐᓐ ᒋᐐ ᓂᐸᐦᐋᐙᐤ ᐊᐌᓐ᙮ ᓈᔥᒡ ᐁ ᒧᔥᑌᓀᔨᐦᑕᒣᒄ ᒉᒌ ᐊᔮᔦᒄ ᒉᒀᓐ ᐁᑳ ᒫᒃ ᒌ ᐐᐦᑯᒋᐦᑕᒫᓱᔦᒄ ᐁᑯᑦ ᐌᐦᒋᐸᔨᐦᒡ ᐁ ᒪᔑᐦᐄᑐᔦᒄ ᑲᔦ ᐁ ᐋᓯᑌᒥᑐᔦᒄ᙮ ᓇᒧᐃ ᒫᒃ ᒋᒌ ᐊᔮᓈᐙᐤ ᑖᓐ ᐁ ᐃᔑ ᓂᑕᐌᔨᐦᑕᒣᒄ ᐁᑳ ᓂᑐᑕᒫᔦᒄ᙮ 
ᐁ ᓂᑐᑕᒫᔦᒄ ᓇᒧᐃ ᒋᒥᔅᑫᓈᐙᐤ ᑖᓐ ᑳ ᐃᔑ ᓂᑐᑕᒫᔦᒄ ᐌᔥ ᓇᒧᐃ ᒥᔻᔔ ᒉᒀᓐ ᐌᐦᒋ ᓂᑕᐌᔨᐦᑕᒣᒄ ᐅᔫᐦ ᒉᒀᔫᐦ᙮ ᒋᓂᑕᐌᔨᐦᑌᓈᐙᐤ ᒉᒀᔫᐦ ᒥᒄ ᒋᔭᐙᐤ ᒉᒌ ᓇᓂᐦᐁᔨᐦᑕᒥᐦᐄᓱᔦᒄ ᑖᓐ ᐁ ᐃᔑ ᒪᒋ ᓂᑐᐌᔨᐦᑕᒣᒄ᙮ 
ᑖᐺ ᓂᑕᐐᓐ ᑳ ᐃᐦᑎᔦᒄ᙮ ᓇᒧᐃ ᐋ ᒋᒋᔅᒉᔨᐦᑌᓈᐙᐤ ᐊᐌᓐ ᐁ ᓵᒋᐦᑖᑦ ᑖᓐ ᐁ ᐃᑖᑎᓰᓈᓄᔨᒡ ᐅᑕᐦ ᐊᔅᒌᐦᒡ ᐅᐦᑳᑌᐤ ᒋᔐᒪᓂᑑ᙮ ᐊᓐ ᐊᐌᓐ ᑳ ᓵᒋᐦᑖᑦ ᑖᓐ ᐁ ᐃᑖᑎᓰᓈᓄᔨᒡ ᐅᑕᐦ ᐊᔅᒌᐦᒡ ᐃᐦᑑᑖᓲ ᒉᒌ ᐅᐦᑳᑖᑦ ᒋᔐᒪᓂᑑ᙮ 
ᒋᑎᑌᔨᐦᑌᓈᐙᐤ ᐋ ᐁᑳ ᑖᐺᒪᑲᐦᒡ ᐊᓐ ᒋᔐᒪᓂᑑ ᐅᑕᔨᒧᐎᓂᐦᒡ ᑳ ᐃᑕᔥᑌᒡ, ᐊᓂᔫ ᑳ ᐸᔦᐦᒋᓯᔨᒡ ᐊᐦᒑᐦᑾ ᒋᔐᒪᓂᑑ ᑳ ᒦᑕᐦᒄ ᒉᒌ ᐃᐦᑖᔨᒡ ᐊᓂᑌ ᒋᐱᒫᑎᓰᐎᓈᐦᒡ ᔮᒀᐤ ᒋᓈᓈᑲᒋᐦᐄᑯᓅ ᒥᒄ ᒋᔐᒪᓂᑑ ᐁ ᐃᐦᑖᔨᒡ ᒉᒌ ᐃᔑ ᐱᒫᑎᓯᔫᐦᒄ᙮ ᐊᓐ ᐊᐦᒑᐦᒄ ᐅᐦᑌᔨᐦᑕᒻ ᐁᑳ ᐃᐦᑑᑕᒧᐦᒄ ᑖᓐ ᐁ ᐃᔑ ᓂᑕᐌᔨᒥᑕᐦᒃ ᒋᔐᒪᓂᑑ ᒉᒌ ᐃᐦᑑᑕᒧᐦᒄ᙮ 
ᒥᒄ ᒫᒃ ᒋᔐᒪᓂᑑ ᐁᑎᑑ ᒥᔅᑕᐦᐄ ᒥᔦᐤ ᔕᐌᔨᐦᒋᒉᐎᓂᔫ ᐊᓂᔫ ᐊᐌᔫ ᐎᔭ ᐁ ᐃᐦᑖᑦ ᑳ ᐃᔑ ᐱᒫᑎᓯᔨᒡ᙮ ᐌᔥ ᐃᑕᔥᑌᐤ ᒋᔐᒪᓂᑑ ᐅᑕᔨᒧᐎᓂᐦᒡ, ᒋᔐᒪᓂᑑ ᓂᔥᑰᔥᑐᐌᐤ ᐊᓂᔫᐦ ᑳ ᒋᔅᑌᔨᒥᓱᔨᑣᐤᐦ ᒥᒄ ᒫᒃ ᔕᐌᔨᐦᒋᒉᐎᓂᔫ ᒥᔦᐤ ᐊᓂᔫ ᑳ ᑎᐱᐦᑌᔨᒥᓱᔨᑣᐤᐦ᙮ 
ᐸᒋᔥᑌᔨᒥᑎᓲᔅᑐᐙᐦᒄ ᒋᔐᒪᓂᑑ᙮ ᓂᔥᑰᔥᑐᐙᐦᒄ ᒪᒋᒪᓂᑑ ᐁᒄ ᒫᒃ ᒉ ᐅᓯᒥᑖᒄ᙮ 
ᐯᔓᐙᐸᒫᐦᒄ ᒋᔐᒪᓂᑑ ᐁᒄ ᒫᒃ ᒉ ᐯᔓᐙᐸᒥᑖᒄ ᑲᔦ ᒋᔭᐙᐤ᙮ ᑳᓰᑎᐦᒉᒄ ᒋᔭᐙᐤ ᐅᒪᒋᐦᑣᐅᒡ, ᐁᒄ ᒋᔭᐙᐤ ᑳ ᐊᔨᒥᐦᐁᐦᑳᓱᔦᒄ ᐸᔦᐦᒋᐦᑖᒄ ᒋᑌᐦᐄᐙᐤ᙮ 
ᒥᐦᒌᐌᓯᒄ, ᒪᒉᔨᐦᑕᒧᒄ ᑲᔦ ᒫᑐᒄ᙮ ᒫᑐᒄ ᐃᔥᐱᔥ ᐐ ᒉᒌ ᐹᐦᐱᔦᒄ᙮ ᒥᔑᒣᔨᐦᑕᒧᒄ ᐃᔥᐱᔥ ᐐ ᒉᒌ ᒥᔦᔨᐦᑕᒣᒄ᙮ 
ᑎᐱᐦᑌᔨᒥᑎᓲᔅᑐᐙᐦᒄ ᐅᑎᐯᔨᐦᒋᑫᐤ ᐁᒄ ᒫᒃ ᒉ ᐅᐦᐱᓂᑖᒄ᙮ 
ᓃᒋᔖᓂᑎᒄ ᐁᑳᐐ ᒪᒑᔨᒨᒥᑐᒄ᙮ ᐊᐌᓐ ᐁ ᒪᒑᔨᒨᒫᑦ ᐐᒋᔖᓐ ᒫᒃ ᐁ ᐎᔮᔅᑯᓈᑦ ᐋᑐᐌᔨᐦᑕᒻ ᐐᔓᐌᐎᓂᔫ ᑲᔦ ᒫᒃ ᐎᔮᔅᑯᓇᒻ᙮ ᒌᔥᐱᓐ ᐌᔮᔅᑯᓇᒧᐗᓀ ᐐᔓᐌᐎᓐ ᓇᒧᐃ ᒋᓇᓂᐦᐄᐦᑌᓐ ᑲᔦ ᒫᒃ ᐎᔮᔅᑯᓂᒉᓲ ᒋᑎᑕᐦᐄᓱᓐ᙮ 
ᒥᒄ ᐯᔭᒄ ᐊᐌᓐ ᒌ ᒦᐌᐤ ᐐᔓᐌᐎᓂᔫ᙮ ᐁᐅᒄ ᒫᒃ ᒥᒄ ᒉᒌ ᐎᔮᔅᑯᓂᒉᑦ᙮ ᐎᔭ ᒥᒄ ᒋᑲ ᒌ ᐱᒫᒋᐦᐄᐌᐤ ᑲᔦ ᒫᒃ ᐎᔭ ᒥᒄ ᒋᑲ ᒌ ᐗᓈᒋᐦᐄᐌᐤ᙮ ᐊᐌᓐ ᒫᒃ ᒋᔭ ᒉᒌ ᐗᐎᔮᔅᑯᓇᑦ ᑯᑕᒃ ᐊᐌᓐ᙮ 
ᓂᑐᐦᑕᒧᒄ ᒫ ᒋᔭᐙᐤ ᑳ ᐃᑗᔦᒄ, ᐊᓄᐦᒌᔥ ᒫᒃ ᐙᐸᐦᒉ ᓀᑌ ᐊᓀ ᐃᐦᑖᐎᓐ ᒋᑲ ᐃᑐᐦᑌᓈᓅ᙮ ᐁᑯᑦ ᒉ ᐃᐦᑖᔨᐦᒄ ᐯᔭᒄ ᐱᐳᓐ᙮ ᒋᑲ ᐃᐦᑕᑯᓐ ᒉᒀᓐ ᒉ ᒋᐦᒋᐸᔨᐦᑣᓱᔨᐦᒄ ᒉᒌ ᒥᔅᑕ ᐅᔑᐦᑖᔨᐦᒄ ᔔᓕᔮᐤ᙮ 
ᓇᒧᐃ ᒥᑐᓐ ᒋᒋᔅᒉᔨᐦᑌᓐ ᑖᓐ ᒉ ᐃᔅᐸᔨᐦᒡ ᐙᐸᐦᒉ᙮ ᑖᓐ ᐁ ᐃᔑᓈᑯᐦᒡ ᐱᒫᑎᓰᐎᓐ᙮ ᒬᐦᒡ ᐁ ᑲᔅᑲᐤᐦᒡ ᑳ ᒌ ᐃᔑᓈᑯᐦᒡ ᐁᑯᓐ ᐁ ᐃᔑᓈᑯᐦᒡ᙮ ᒥᒄ ᐌᐃᐱᔥᒌᔥ ᓅᑯᓐ ᐁ ᑲᔅᑲᐤᐦᒡ ᒉᒃ ᒫᒃ ᓇᒧᐃ ᐊᑎ ᐃᐦᑕᑯᓐ᙮ 
ᒸᐤ ᑌᔭᑯᒡ ᒋᐹ ᐃᑗᓐ, ᐃᑌᔨᐦᑕᐦᑫ ᐅᑎᐯᔨᐦᒋᑫᐤ, ᒋᑲ ᐱᒫᑎᓰᓈᓅ᙮ ᒸᐤ ᒫᒃ ᒉ ᐊᑎ ᐊᐃᐦᑏᐦᒄ᙮ 
ᒥᒄ ᒫᒃ ᒋᐦᒋᐌ ᒋᑎᑌᔨᒥᓱᓈᐙᐤ ᑲᔦ ᒋᒪᒥᔻᒋᒥᓱᓈᐙᐤ᙮ ᒫᔮᑕᓐ ᐊᓐ ᐁ ᐃᐦᑎᔦᒄ ᐁ ᒪᒥᔻᒋᒥᓱᔦᒄ᙮ 
ᐊᓐ ᐊᐌᓐ ᑳ ᒋᔅᒉᔨᐦᑕᐦᒃ ᑖᓐ ᒋᐹ ᐃᔑ ᒥᔪᑑᑕᒻ ᐁᑳ ᒫᒃ ᐃᐦᑑᑕᐦᒃ ᒪᒋᑑᑕᒻ ᐊᓐ ᐊᐌᓐ᙮ 
