﻿ᒉᒥᔅ ᐅᒪᓯᓇᐦᐊᒫᒉᐎᓐ.
1.
ᒉᒥᔅ ᓂᔭ, ᒋᔐᒪᓂᑑ ᐁᒄ ᒫᒃ ᐅᑎᐯᔨᐦᒋᑫᐤ ᒌᓴᔅ ᙭ ᐅᑖᐸᒋᐦᐋᑲᓄᐙᐤᐦ᙮ ᒥᓯᐌ ᓂᐙᒋᔦᒫᔫᐦ ᒋᔐᒪᓂᑑ ᐅᑏᓃᒻ ᐸᐦᐲᐌ ᑳ ᐃᐦᑖᔨᒡ ᒥᓯᐌ ᐁ ᐃᔅᐱᒋᔅᑲᒥᑳᔨᒡ ᐅᔫ ᐊᔅᒌᔫ᙮ 
ᓃᒋᔖᓂᑎᒄ, ᒥᔦᔨᐦᑕᒧᒄ ᓇᓈᐦᑰ ᐁ ᐃᔑ ᑲᑴᒋᐦᐄᑯᔦᒄ᙮ 
ᐌᔥ ᒋᒋᔅᒉᔨᐦᑌᓈᐙᐤ ᐁ ᑲᑴᒋᐦᑖᑲᓅᐦᒡ ᒋᑖᐺᐦᑕᒧᐎᓇᐙᐤ ᐁᑯᑦ ᐌᐦᒋ ᐊᔮᔦᒄ ᓰᐲᐌᓰᐎᓐ᙮ 
ᔮᐃᑌᐃ ᒋᑲ ᐐ ᐃᐦᑑᑖᑯᓈᐙᐤ ᓰᐲᐌᓰᐎᓐ ᒥᑐᓐ ᒉᒌ ᔖᐳᔥᑲᒣᒄ ᑖᓐ ᒉ ᐃᔑ ᓇᓇᒋᔥᑲᒧᐌᑴ᙮ ᐁᒄ ᒫᒃ ᒉ ᒥᑐᓀᓯᔦᒄ, ᐁ ᒥᓯᐌᓯᔦᒄ ᒋᑲ ᐃᔑᓈᑯᓯᓈᐙᐤ, ᓇᒧᐃ ᒥᑐᓐ ᒋᑲ ᐅᐦᒋ ᓅᐦᑖᔥᑫᓈᐙᐤ ᑖᓐ ᒋᐹ ᐃᑌᔨᐦᑖᑯᓯᓈᐙᐤ᙮ 
ᐁ ᐃᐦᑖᑴ ᐊᐌᓐ ᐁᑳ ᒋᔅᒉᔨᐦᑕᐦᒃ ᑖᓐ ᓂᐦᐋᐤ ᒉ ᐃᔑᑳᐴᔥᑕᐦᒃ ᒉᒀᔫ ᐁ ᓇᒋᔥᑲᐦᒃ ᒋᔐᒪᓂᑑ ᒋᐹ ᓂᑐᑕᒧᐌᐤ ᑲᒉᐦᑖᐌᔨᐦᑕᒧᐎᓂᔫ᙮ ᒋᑲ ᒦᑰ ᒫᒃ᙮ ᐌᔥ ᒋᔐᒪᓂᑑ ᐌᔫᒡ ᒥᔦᐤ ᒥᓯᐌ ᐊᐌᔫᐦ ᑖᓐ ᐁ ᐃᔑ ᓂᑕᐌᔨᐦᑕᒫᑯᑦ ᒉᒀᔫ᙮ 
ᒥᒄ ᒫᒃ ᐁᑳᐐ ᒋᑲ ᐅᐦᒋ ᐋᓄᐌᐦᑕᒻ ᐊᓐ ᐊᐌᓐ ᑳ ᓂᑐᑕᒫᑦ᙮ ᐌᔥ ᐊᓐ ᐊᐌᓐ ᑳ ᐋᓄᐌᐦᑕᐦᒃ ᒬᐦᒡ ᑭᔅᑲᓐ ᐊᓂᑌ ᓵᑲᐦᐄᑲᓂᐦᒡ ᐁᑯᓐ ᐁ ᐃᔑᓈᑯᓯᑦ, ᒥᒄ ᑖᓂᑌ ᐌᐦᒋᐌᔨᒡ ᐁᑯᑌ ᐁ ᐃᑖᐦᐅᑯᑦ᙮ 
ᓇᒧᐃ ᒌ ᐎᔦᔨᐦᑕᒻ ᐆ ᐊᐌᓐ ᑖᓐ ᓂᐦᐋᐤ ᒉ ᐃᐦᑎᑦ᙮ 
ᐆ ᒫᒃ ᐁ ᐃᔑᓈᑯᓱᐗᓀ ᐁᑳᐐ ᐳᑯᓭᔨᒻ ᒋᔐᒪᓂᑑ ᒉᒌ ᒦᔅᒃ ᒉᒀᔫ᙮ 
ᒌᒋᔖᓅ ᑳ ᒋᔅᑎᒫᑎᓰᑦ ᒋᐹ ᒥᔦᔨᐦᑕᒻ ᒋᔐᒪᓂᑑ ᐁ ᒋᔅᑌᔨᐦᑖᑯᐦᐄᑯᑦ᙮ 
ᐁᒄ ᐊᓐ ᐊᐌᓐ ᑳ ᐌᔫᑎᓰᑦ ᒋᐹ ᒥᔦᔨᐦᑕᒻ ᐁ ᑎᐱᐦᑌᔨᐦᑖᑯᐦᐄᑯᑦ ᒋᔐᒪᓂᑑ᙮ ᐌᔥ ᑲᔦ ᐎᔭ ᑲᑕ ᐃᔅᒀᐸᔨᓂᔫ ᐅᐱᒫᑎᓰᐎᓐ ᒬᐦᒡ ᓂᐦᑖᐅᒋᐦᒋᑲᓐ ᐁ ᐙᐱᑯᓅᐦᒡ ᐁ ᐃᔅᐸᔨᐦᒡ᙮ 
ᐃᔅᑯᑕᒃ ᒋᐦᒋᐌ ᐁ ᐊᑎ ᓵᑳᔥᑐᐌᑦ ᐲᓯᒻ ᐁᑴᑦ ᐃᔥᒀᓴᐦᒃ ᓂᐦᑖᐅᒋᐦᒋᑲᓐᐦ ᐁᒄ ᐱᔮᐦᐸᐦᒋᔥᑎᓂᔨᒀᐤᐦ ᐊᓂᔫᐦ ᐙᐱᑯᓐᐦ᙮ ᐌᓈᑕᐦᒡ ᐊᓐ ᑖᓐ ᑳ ᐃᔑ ᒥᔻᔑᒡ᙮ ᐁᑯᓐ ᒫᒃ ᒬᐦᒡ ᑲᔦ ᐎᔭ ᒉ ᐃᔑᓈᑯᓯᑦ ᐊᓐ ᐊᐌᓐ ᑳ ᒦᓯᑎᓰᑦ, ᑲᑕ ᐴᓂᐱᒫᑎᓯᔫ ᑲᔦ ᐎᔭ, ᒉ ᓇᑲᑕᐦᒃ ᒥᓯᐌ ᐅᑖᐸᑎᓱᐎᓐ᙮ 
ᔕᐌᔨᐦᑖᑯᓲ ᐊᓐ ᐊᐌᓐ ᐁᑳ ᑳ ᔖᑰᒋᐦᐄᑯᑦ ᑖᓐ ᐁ ᐃᔑ ᑲᑴᒋᐦᐋᑲᓅᑦ᙮ ᐌᔥ ᔖᐳᔥᑲᐦᑫ ᑖᓐ ᐁ ᐃᔑ ᑲᑴᒋᐦᐋᑲᓅᑦ ᒋᑲ ᒦᑰ ᒋᔐᒪᓂᑑᐦ ᐁ ᐌᔫᒡ ᒥᔦᔨᐦᑖᑯᓂᔨᒡ ᐱᒫᑎᓰᐎᓂᔫ, ᐊᓂᔫ ᑳ ᐃᑗᔨᒡ ᒉᔥᑎᓈᔥ ᒉ ᒥᔮᔨᒡ ᐊᓂᔫ ᑳ ᓵᒋᐦᐄᑯᑦ᙮ 
ᐊᓐ ᐊᐌᓐ ᑳ ᑲᑴᒋᐦᐋᑲᓅᑦ ᓇᒧᐃ ᒋᐹ ᐅᐦᒋ ᐃᑗᐤ, ᒋᔐᒪᓂᑑ ᓂᐯᒋ ᑲᑴᒋᐦᐄᒄ᙮ ᑖᐹ ᑲᑕ ᒌ ᑲᑴᒋᐦᐄᑰ ᒪᒋᐦᑣᐎᓂᔫ ᒋᔐᒪᓂᑑ ᑲᔦ ᒫᒃ ᓇᒧᐃ ᑲᑴᒋᐦᐁᐤ ᐊᐌᔫᐦ ᒉᒌ ᒪᒋᑑᑕᒥᔨᒡ᙮ 
ᑲᑴᒋᐦᐋᑲᓅ ᐊᐌᓐ ᒉᒌ ᒪᒋᑑᑕᐦᒄ ᐃᔅᑯᑕᒃ ᐯᔅᒉᐱᑎᑯᒡ ᐎᔭ ᑎᐲᐌ ᐅᒪᒋᓂᑐᐌᔨᐦᑕᒧᐎᓐ ᑲᔦ ᐁ ᑲᑴᑌᔨᐦᑕᐦᒃ ᒉᒌ ᒪᒋᑑᑕᐦᒃ᙮ 
ᐃᔅᑯᑕᒃ ᒫᒃ ᓯᔮᑰᒋᐦᐄᑯᑦ ᐁᑳ ᓂᔥᑰᔥᑕᐦᒃ ᐁᒄ ᑖᐺ ᐁ ᐊᑎ ᐃᐦᑑᑕᐦᒃ ᐊᓂᔫ᙮ ᐃᔅᑯᑕᒃ ᒫᒃ ᐁ ᐃᐦᑎᑦ ᐊᓂᔫ ᑖᓐ ᑳ ᐃᔑ ᒪᒋᓂᑐᐌᔨᐦᑕᐦᒃ, ᓂᐳᐎᓂᐦᒡ ᐃᑐᐦᑕᐦᐄᑰ᙮ 
ᓃᒋᔖᓂᑎᒄ ᑳ ᓵᒋᐦᐄᑕᑯᒡ ᓲᐦᒃ ᑯᐃᔅᒄ ᐐ ᐃᔑ ᓂᓯᑐᐦᑕᒧᒄ ᐆ᙮ 
ᒥᓯᐌ ᒦᐌᐎᓐ ᑳ ᒥᔻᔑᒡ ᑲᔦ ᑳ ᒥᑐᓀᓰᒪᑲᐦᒡ ᐊᓂᑌ ᐃᔥᐱᒥᐦᒡ ᐅᐦᒋᐸᔫ, ᐊᓂᑌ ᒋᔐᒪᓂᑑ ᐁ ᐃᐦᑖᑦ᙮ ᐁᐅᑰ ᒋᔐᒪᓂᑑ ᑳ ᐅᔑᐦᑖᑦ ᒥᓯᐌ ᐙᔥᑌᐎᓂᔫ ᐊᓂᑌ ᒌᔑᑯᐦᒡ᙮ ᒨᔥ ᐯᔭᑯᓂᐦᒡ ᐃᑌᔨᐦᑖᑯᓲ, ᓇᒧᐃ ᐃᔑᓈᑯᓲ ᒬᐦᒡ ᐁ ᑕᑳᔥᑌᐦᑎᐦᒡ ᒉᒀᓐ ᐌᐃᐱᔥᒌᔥ ᒥᒄ ᑳᒌ ᓅᑯᐦᒡ᙮ 
ᒋᒌ ᒦᑯᓅ ᐱᒫᑎᓰᐎᓂᔫ ᐊᓂᑦ ᐅᐦᒋ ᐊᓂᔫ ᐅᑕᔨᒧᐎᓐ ᑳ ᑖᐺᒪᑲᓂᔨᒡ ᒋᔮᓅ ᓃᔥᑕᒻ ᒉᒌ ᐐᐦᑯᒋᐦᐄᑕᐦᒄ ᐅᑕᐦ ᐅᔫ ᐊᔅᒌᔫ᙮ 
ᐁᑳᐐ ᐗᓂᒋᔅᒋᓯᒄ ᐆ ᓃᒋᔖᓂᑎᒄ ᑳ ᓵᒋᐦᐄᑕᑯᒡ᙮ ᒥᓯᐌ ᐊᐌᓐ ᓲᐦᒃ ᒨᔥ ᔮᒀᐤ ᒋᐹᐐ ᓂᑐᐦᑕᒻ, ᒋᐹ ᒫᒥᑐᓀᔨᐦᑕᒻ ᑲᔦ ᑖᓐ ᐙ ᐃᑗᑦ ᑲᔦ ᓇᒧᐃ ᑏᐌᐦᒡ ᒋᐹ ᐅᐦᒋ ᒋᔓᐙᓲ᙮ 
ᐁ ᒋᔓᐙᓯᑦ ᐊᐌᓐ ᓇᒧᐃ ᑯᐃᔅᒄ ᒌ ᐃᐦᑑᑕᒻ ᐊᓂᔫ ᑳ ᐃᔑ ᓂᑕᐌᔨᒥᑯᑦ ᒋᔐᒪᓂᑑ ᒉᒌ ᐃᐦᑑᑕᐦᒃ᙮ 
ᐌᐱᓇᒧᒄ ᒥᓯᐌ ᐐᓂᓱᐎᓐ ᑲᔦ ᒥᓯᐌ ᒪᒑᑎᓰᐎᓐ᙮ ᐸᒋᔥᑌᔨᒥᓱᒄ ᒋᔐᒪᓂᑑ ᐁ ᐃᐦᑖᑦ, ᐃᐦᑑᑕᒧᐙᐦᒄ ᐅᑕᔨᒧᐎᓐ ᒋᑌᐦᐄᐙᐦᒡ ᑳ ᐲᐦᑕᐦᐊᐦᒃ ᐊᓂᔫ ᒉᒌ ᐱᒫᒋᐦᐄᑯᐌᒄ᙮ 
ᒥᒄ ᓂᑐᐦᑕᒧᑌ ᒋᔐᒪᓂᑑ ᐅᑕᔨᒧᐎᓐ ᐁᑳ ᒫᒃ ᐃᐦᑑᑕᒧᑌ, ᒋᐎᔦᔑᐦᐄᓱᓐ᙮ ᐃᐦᑑᑕᒻ ᑖᓐ ᐁ ᐃᑕᔥᑌᔨᒡ᙮ 
ᐊᓐ ᐊᐌᓐ ᒥᒄ ᑳ ᓂᑐᐦᑕᒧᐙᑦ ᒋᔐᒪᓂᑑ ᐅᑕᔨᒧᐎᓂᔫ ᐁᑳ ᒫᒃ ᑳ ᐃᐦᑑᑕᐦᒃ ᑖᓐ ᐁ ᐃᑕᔥᑌᔨᒡ ᒬᐦᒡ ᐊᓐ ᐊᐌᓐ ᑳ ᑲᓇᐙᐸᒥᓱᑦ ᐙᐸᒥᓱᓂᐦᒡ ᐃᔑᓈᑯᓲ᙮ 
ᐃᔅᑯᑕᒃ ᑳ ᑲᓇᐙᐸᒥᓱᑦ, ᒋᔅᑐᐦᑌᐤ ᐁᒄ ᑏᐌᐦᒡ ᐌᓂᒋᔅᒋᓯᑦ ᑖᓐ ᐁ ᐃᔑᓈᑯᓯᑦ᙮ 
ᒋᔐᒪᓂᑑ ᐅᐐᔓᐌᐎᓐ ᓈᔥᒡ ᑖᐺ ᒥᔦᔨᐦᑖᑯᓂᔫ ᑲᔦ ᐋᐱᐦᑯᓂᑰᒡ ᐊᐌᓂᒌ᙮ ᐊᓐ ᒫᒃ ᐊᐌᓐ ᔮᒀᐤ ᑳ ᓂᑑ ᒋᔅᒉᔨᐦᑕᐦᒃ ᐅᔫ ᐐᔓᐌᐎᓂᔫ ᐁᑳ ᒫᒃ ᐴᓃᑦ ᐅᔫ ᐁ ᐃᐦᑎᑦ, ᐁᑳ ᐗᓂᒋᔅᒋᓯᑦ ᑖᓐ ᑳ ᐃᔑ ᐯᐦᑕᐦᒃ, ᐃᐦᑑᑕᐦᑫ ᑖᓐ ᐁ ᐃᑕᔥᑌᔨᒡ ᐊᓂᑦ, ᐁᐅᑰ ᒉ ᔕᐌᔨᒥᑯᑦ ᒋᔐᒪᓂᑑ ᒥᓯᐌ ᑖᓐ ᐁ ᐃᐦᑎᑦ᙮ 
ᐊᐌᓐ ᐁ ᐃᑌᔨᒥᓱᑦ ᐁ ᑯᐃᔅᑯᑖᑎᓰᑦ ᒥᒄ ᒫᒃ ᐁᑳ ᒌ ᓈᓈᑲᒋᐦᑖᑦ ᑖᓐ ᐁ ᐃᑗᑦ, ᐎᔦᔑᐦᐄᓲ ᐊᓐ ᐊᐌᓐ᙮ ᓇᒧᐃ ᐎᔦᔥ ᐃᑖᐸᑕᓂᔫ ᐅᑕᔨᒥᐦᐁᐎᓐ᙮ 
ᐊᓐ ᐊᔨᒥᐦᐁᐎᓐ ᑳ ᐃᑌᔨᐦᑕᐦᒃ ᒋᔐᒪᓂᑑ ᑳ ᐅᐦᑖᐐᒫᐅᑦ ᐁ ᑯᐃᔅᑯᓈᑯᓂᔨᒡ ᑲᔦ ᐁ ᐸᔦᐦᒋᓈᑯᓂᔨᒡ ᒫᐤ ᐁ ᐃᔑᓈᑯᐦᒡ, ᐃᐦᑑᑖᑰ ᐊᐌᓐ ᒉᒌ ᒥᔪ ᐐᒋᐦᐋᑦ ᒌᔫᓵᓂᔕ ᐁᒄ ᒫᒃ ᑳ ᐯᔭᑯᔨᑣᐤᐦ ᐃᔅᑴᐤᐦ ᒣᒀᒡ ᐁ ᐋᔨᒧᐦᐅᔨᒡ ᑲᔦ ᒫᒃ ᐃᐦᑑᑖᑰ ᐊᐌᓐ ᐁᑳ ᒥᑐᓐ ᒉᒌ ᐐᓂᐦᐄᑯᔨᒡ ᒪᒑᑎᓰᐎᓂᔫ ᑖᓐ ᐁ ᐃᔑ ᐃᐦᑕᑯᓂᔨᒡ ᐅᑕᐦ ᐊᔅᒌᐦᒡ᙮ 
