﻿SALMOS.
150.
¡Alelúuyaj! ¡Setyuꞌtatyójtziꞌreꞌ ɨ Dios ɨ tyeyúujraꞌ tzajtaꞌ joꞌtɨj aꞌɨ́ɨn jáꞌsejreꞌ! ¡Setyuꞌtatyójtziꞌreꞌ aꞌájna u tajapuáj joꞌtɨj aꞌɨ́ɨn tyejéꞌijtaj! 
¡Aꞌɨ́j xu jɨn tyaatatyójtziꞌreꞌen jeꞌej tɨ aꞌɨ́ɨn vaꞌcán jɨn tyíꞌmuarɨeꞌ! ¡Aꞌɨ́j xu jɨn tyaatatyójtziꞌreꞌen ɨ tɨ vaꞌcán jɨn séejreꞌ jusén jɨmeꞌ! 
¡Aꞌɨ́j xu jitze tyaatatyójtziꞌreꞌen ɨ aꞌhuáj! ¡Setyuꞌtatyójtziꞌreꞌ aꞌɨ́jcɨ jitze ɨ canárij siajtáhuaꞌaj séecan jitze ɨ canárij tɨ seequéj tyíeꞌen! 
¡Setyuꞌtatyójtziꞌreꞌ setyiꞌnyaꞌaj aꞌɨ́jcɨ jitze setyiꞌcuíinaj ɨ quéetzaj! ¡Setyuꞌtatyójtziꞌreꞌ aꞌɨ́jcɨ jitze ɨ cɨꞌsítyeꞌrij siajta néijmiꞌi aꞌɨ́jcɨ jitze ɨ tɨ tyeꞌejvivin! 
¡Setyuꞌtatyójtziꞌreꞌ aꞌɨ́jcɨ jitze ɨ tyapúustiꞌ tɨ tyiꞌsicɨɨra tɨ tyiꞌtáhuan! ¡Setyuꞌtatyójtziꞌreꞌ aꞌɨ́jcɨ jitze ɨ tyapúustiꞌ tɨ tyiꞌsicɨɨra tɨ tyiꞌtyóovivaaraj! 
¡Micheꞌ néijmiꞌi ɨ maj ucayáatɨyiꞌij tyaatatyójtziꞌreꞌen ɨ Tavástaraꞌ! ¡Alelúuyaj!
