﻿SALMOS.
128.
Cuíinarij ɨ maj jɨn huatyáajuꞌun Huatáꞌtyamuaꞌveꞌ muáaj, mu paj tzáahuatyiꞌraꞌaj jimi tyíchaꞌɨj ɨ Tavástaraꞌ pajta juyáaraꞌ jitze ucáamej. 
Aꞌɨ́j paj tyíꞌcuaꞌnyij tyiꞌtɨ́j paj jɨn tyuꞌmuárɨej, puatáꞌtyamuaꞌveꞌsij ajta tyámuaꞌ tyeꞌmej aꞌjimi. 
Ajta aꞌájna aꞌchiꞌtáj joꞌpaj jaꞌchej, aꞌɨ́ɨj pu aꞌyan éenyeꞌej taꞌmej tɨꞌɨj ɨ úuvaj tɨ jéehua tacaꞌ, majta aꞌyóojmuaꞌ, matɨꞌɨj ataráasajraꞌnyij joꞌsiaj tyajáꞌcuaꞌcaa, aꞌyaa mu éenyeꞌej muáꞌjuꞌun tɨꞌɨj ɨ ítyɨꞌrij tɨ jéehua eereꞌnyaxɨj. 
Aꞌyaa pu ɨ Tavástaraꞌ tyámuaꞌ tyeetyátoosij aꞌɨ́jcɨ ɨ tyévij tɨ tzáahuatyiꞌraꞌaj jimi tyíchaꞌɨj. 
¡Cheꞌ ɨ Tavástaraꞌ tyámuaꞌ tyimuaatyátoonyij aꞌájna ɨmuáj a Sión! ¡Pajta jaaséj tɨ tyámuaꞌ tyíꞌeen aꞌɨ́ɨjma jimi ɨ maj Jerusalén jáꞌmaꞌcan aꞌnáj tɨnaꞌaj patɨꞌɨj panaꞌaj áꞌtyeeren pajúurij! 
¡Cheꞌ aꞌyan atyojoꞌréꞌnyej pej pij huoꞌséj aꞌyaaxújmuaꞌ! ¡Cheꞌ tyámuaꞌ tyíꞌeenyeꞌ aꞌɨ́ɨjma jimi ɨ maj Israel jitze ajtyámaꞌcan! 
