﻿SALMOS.
124.
Cuíinarij ɨ maj jɨn huatyáajuꞌun, David tɨ jaꞌaꞌrij Tɨpuaꞌaj ɨ Tavástaraꞌ quee tajamuán yésejriaꞌaj micheꞌ aꞌɨ́ɨmaj jaataxáj ɨ maj Israel jitze ajtyámaꞌcan, 
tɨpuaꞌaj ɨ Tavástaraꞌ quee tajamuán yésejriaꞌaj matɨꞌɨj ɨ tyétyacaa ájhuiixɨj mej mij taatanyoꞌsiꞌtyeꞌen, 
aꞌɨ́ɨ mu néijmiꞌcaa taꞌantyipuáꞌrityeꞌnyijcheꞌen matɨꞌɨj aꞌɨ́ɨmaj tajimí jéehua huatanyínyuꞌcacucaꞌ. 
Aj puꞌij ɨ jájtyij caꞌnyíin jɨn taꞌantɨnyíicheꞌen; játyaꞌnaj pu tajapuá huatamuɨꞌyéenyijcheꞌen. 
¡Ajta ɨ jájtyij tɨ caꞌnyíin jɨn tyájujhuaꞌnaj aꞌɨ́ɨ pu ajta tajapuá huatamuɨꞌyéenyijcheꞌen! 
¡Cheꞌ tyámuaꞌ éenyeꞌej séjreꞌej ɨ Tavástaraꞌ, ɨ tɨ quee tyuꞌtáꞌ mej mij taatyátzaanaxɨꞌɨn ɨ jutaméj jɨmeꞌ! 
Tuꞌríj huatátaꞌuj mej mij quee taavíviꞌ tɨꞌɨj ɨ pínaꞌaj tɨ huatóoꞌuj mej mij quee jáameꞌnyij, aꞌɨ́ɨ pu huatyátzaanyixɨj ɨ maj jɨn jaxɨeꞌvaꞌcaꞌaj maj taavíviꞌ, ityáj tu tyij huatátaꞌuj. 
Aꞌɨ́jna ɨ tɨ taatyáhuɨɨreꞌej Tavástaraꞌ jimi pu joꞌvéꞌyiꞌij, aꞌɨ́jna ɨ tɨ jaatyátaahuacaꞌ ɨ tajapuá tɨ séejreꞌ ajta ɨ cháanacaj. 
