﻿SALMOS.
110.
Chuíicarij David tɨ jaꞌaꞌrij Tavástaraꞌ pu aꞌyan tyaatéꞌexaa ɨ nyavástaraꞌ tɨjɨn: “Huayíixɨꞌɨj iiyeꞌej nyamuácaꞌtaꞌ pujmuaꞌ, ꞌasta nyanaꞌaj quee nyáaj huaꞌantyimueꞌtɨn ɨ maj muájchaꞌɨɨre mej mij aꞌáa jaꞌséeriaꞌaj muáꞌraꞌnyij aꞌ ɨ́ɨcaj jityej.” 
Aꞌájna a Sión, aꞌɨ́jna ɨ Tavástaraꞌ pu muaatátuiireꞌsij ɨ itzɨ́j, ɨ tɨ jɨn ámiteereꞌ paj muáaj tyuꞌtaꞌíjtaj. ¡Aꞌyaa pej pij tyihuoꞌtaꞌíjtyeꞌen, aꞌɨ́ɨjma ɨ maj muájchaꞌɨɨreꞌ! 
Aꞌɨ́ɨjma mu aꞌtyéɨtyeristyamuaꞌ muaatátuiireꞌej aꞌɨ́jcɨ xɨcáaraꞌ jitze ɨ paj jitzán tyuꞌtyámueꞌtɨj. Aꞌɨ́jcɨ japua ɨ jɨríj tɨ tyámuaꞌ een, ajta aꞌyájna tɨꞌɨj ɨ tɨ huarɨéenajyiꞌij tɨꞌɨjta huatapuaꞌrej aꞌɨ́j paj jɨn tɨꞌɨj pu panaꞌaj jajajcuareꞌ tɨꞌɨjta ɨ xɨcáj eeréꞌnyej. 
Tavástaraꞌ pu arí tyiꞌtɨ́j jɨn tyaꞌtóoratziiriꞌ, ajta jeꞌen néijmiꞌi jɨn aꞌyan tyaꞌróoꞌastej: “Muáaj paj puaaríj jɨn tyiꞌtyéjvee jusén jɨmeꞌ, aꞌyájna tɨꞌɨj ajta ɨ Melquisedec tɨ jɨn tyiꞌtyávaacaꞌaj.” 
Tavástaraꞌ pu amuácaꞌtaꞌ jáꞌsejreꞌ; aꞌɨ́jcɨ xɨcáaraꞌ tɨ jitzán tyinyúꞌcaj, aꞌɨ́ɨjma pu antyipuáꞌrityeꞌsij ɨ maj rey jɨn tyityetyuꞌuj; 
ajta puéjtzij huoꞌtaꞌsij aꞌɨ́ɨjma ɨ maj séej chuéj japua joꞌcháatɨmee, muɨꞌchítyee puꞌij ajaꞌajsɨɨreꞌej; ¡huaꞌ muꞌuj pu tyaꞌrátaaraxɨꞌɨj néijmiꞌqueꞌ ɨ chuéj japua! 
Aꞌɨ́jcɨ ɨ juyéj jitze, aꞌáa pu jáꞌyeꞌen ɨ áchij jitze, aꞌɨ́ɨ puꞌij ɨ jájtyij caꞌnyíjraꞌaj jaatáꞌsij tɨ jájcuaj. 
