﻿SALMOS.
87.
Chuíicarij ajta cuíinarij aꞌɨ́ɨmaj maj joꞌyúꞌxacaꞌ ɨ yójmuaꞌmuaꞌ aꞌɨ́jcɨ ɨ Coré Aꞌɨ́jna ɨ tɨ jitzán ájtaavijhuacaꞌ ɨ chájtaꞌnaj Dios tɨ jaꞌaꞌrij aꞌɨ́j pu jitze séejreꞌ ɨ jɨríj tɨ naa een. 
Ɨ Tavástaraꞌ pu jaxɨeꞌveꞌ ɨ puéertaj aꞌáa tɨ jɨn tyejeꞌtyánamiꞌ a Sión ajta quee aꞌyan tyiꞌtɨ́j séej ajtáhuaꞌaj aꞌɨ́jcɨ tyíaꞌrij ɨ Jacob. 
Chájtaꞌnaj Dios tɨ jaꞌaꞌrij, jéehua mu tyámuaꞌ naa muéetzij tyíꞌmuaxaj: 
“Huaꞌ tzajtaꞌ ɨ chájtaꞌnaj ɨ maj nyamuaꞌtyej ɨꞌríj nyaj aꞌɨ́j huataxáj ɨ Egipto nyajta ɨ Babilonia, aꞌɨ́jcɨ ɨ Filistea, Tiro nyajta ɨ Etiopía, néijmiꞌi mu aꞌɨ́ɨmaj a jitze eeráanyej.” 
Aꞌyaa mu tyuꞌtaxájtaj aꞌájna chájtaꞌ Sión tɨ tyajaꞌrájtyapuaj tɨjɨn: “Aꞌíjna ajta aꞌáa tɨ séejreꞌ aꞌɨ́j mu jitze eeráanyej ɨ Sión.” Aꞌɨ́jna ɨ tajapuá tɨ ɨmuáj jáꞌsejreꞌ pu aꞌyan tyaataxájtacaꞌ. 
Tavástaraꞌ pu aꞌyan tyéꞌyuꞌxaj ɨ yuꞌxarij jitze aꞌɨ́jcɨ ɨ chájtaꞌnaj tɨ jimi aꞌyan tyiꞌtyéevijtɨj tɨ tyámuaꞌ een aꞌyaa pu tyéꞌyuꞌxaj tɨjɨn: “Aꞌíi pu aꞌɨ́j jitze eerámaꞌcan.” 
Majta ɨ maj tyíꞌchuiicaj majta ɨ maj tyíꞌnyeꞌ aꞌyaa mu tyíꞌxaj tɨjɨn: “Ɨ nye chiꞌij muéetzij pu jitze séejreꞌ.” 
