﻿SALMOS.
46.
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij mej mij cɨꞌsítyeꞌrij jitze jaatáchuiicaj aꞌɨ́ɨmaj ɨ Coré tyíꞌyojmuaꞌ Dios pu taatyáhuɨɨreꞌej ajta aꞌɨ́ɨn puéꞌeen ɨ tyaj jɨn uhuájcaꞌnyej, aꞌaj pu taatyáhuɨɨreꞌej tyatɨꞌɨjtá quee jeꞌej jájtyooveꞌen. 
Aꞌɨ́j tu jɨn quee tyiꞌtzɨ́ɨnyeꞌej táꞌjuꞌun, tyij ajta huatáxɨjtye ɨ cháanacaj, tyij ajta ɨ jɨríj atyojoꞌcájrutyej tyétyeꞌ ɨmuáj ɨ jájritzeꞌ, 
tyij ajta tyájujhuaꞌnasimeꞌen ɨ jájtyij ajta jéehua áꞌxɨreꞌej, tyij ajta tyuꞌtóocaꞌtzɨn ɨ jɨríj aꞌɨ́jcɨ jɨmeꞌ ɨ tɨ huápuɨꞌɨj nyúꞌcamuɨꞌ. 
Aꞌɨ́jna ɨ játyaꞌnaj tɨ muiꞌcaquéj huatámuɨꞌyacaꞌ aꞌɨ́ɨ pu tyámuaꞌviꞌraꞌaj jaatáꞌsij ɨ chájtaꞌnaj Dios tɨ jitze ajtyámaꞌcan, aꞌɨ́jna ɨ chájtaꞌnaj tɨ jéetzeꞌ tyámuaꞌ een tɨ ajta tajapuá jáꞌsejreꞌ. 
Dios pu aꞌáa jéꞌtaꞌ jáꞌsejreꞌ, ajta tyámuaꞌ tyéꞌchaꞌɨj, Dios pu jaatyáhuɨɨreꞌej tɨꞌɨjta ɨ xɨcáj eeréꞌnyej. 
Ɨ maj séej chuéj japua joꞌcháatɨmee mu juꞌɨtziityeꞌ, majta ɨ maj tyíꞌijta mu juvivej, ¡ajta ɨ chuéj pu huatáxɨjtyij tɨꞌɨj ɨ Tavástaraꞌ tyuꞌtáꞌan maj jáanamuaj ɨ nyúucariaꞌraꞌ! 
¡Aꞌɨ́jna ɨ Tavástaraꞌ tɨ néijmiꞌi jɨn antyúumuaꞌreej aꞌɨ́ɨ pu tajamuán yésejreꞌ! ¡Aꞌɨ́jna ɨ Dios raꞌ aꞌɨ́jcɨ ɨ Jacob aꞌɨ́ɨ pu taatyáhuɨɨreꞌej! 
Musioꞌváꞌjuꞌ siataꞌaj tyuꞌséj ɨ tɨ huápuɨꞌɨj naa tyuꞌséꞌrin aꞌɨ́jna ɨ Tavástaraꞌ tɨ tyúꞌtaahuacaꞌ ɨ cháanacaj japua, 
puꞌríj jaꞌantyipuáꞌrij ɨ maj junyoꞌsiꞌtyaꞌcaꞌaj néijmiꞌqueꞌ joꞌtɨj jooꞌástɨmee ɨ cháanacaj, puꞌríj tyuꞌtyáanaꞌxɨj ɨ túꞌnamuaꞌaj, puꞌríj tyiꞌijnáꞌxɨj ɨ tyapúustiꞌij tɨ tyeꞌentyipityíijmee ɨ maj jɨn nyoꞌsii, ¡ajta tyuꞌtyáatɨej ɨ cariáataꞌ ɨ maj jitzán nyoꞌsii! 
“¡Siataꞌaj jaatapuáꞌcɨtaj! ¡Xuꞌhuóomuaꞌtzɨj nyej nyáaj aꞌɨ́ɨn puéꞌeen ɨ Dios! ¡Nyáaj nu huaꞌ japua séejreꞌ néijmiꞌcaa jimi ɨ maj séej chuéj japua joꞌcháatɨmee! ¡Nyáaj nu japuan séejreꞌ néijmiꞌqueꞌ ɨ cháanacaj!” 
¡Aꞌɨ́jna ɨ Tavástaraꞌ tɨ néijmiꞌi jɨn antyúumuaꞌreej aꞌɨ́ɨ pu tajamuán yésejreꞌ! ¡Aꞌɨ́jna ɨ Dios raꞌ aꞌɨ́jcɨ ɨ Jacob aꞌɨ́ɨ pu taatyáhuɨɨreꞌej! 
