﻿SALMOS.
34.
David tɨ joꞌtyéyuꞌxacaꞌaj, tɨꞌɨj tyíchee aꞌɨ́jcɨ jimi ɨ Abimélec, ɨ tɨ jimi hueꞌtzij jɨn aꞌyan tyuꞌtóosejratacaꞌ tɨjɨn huatyóotɨmueꞌriꞌ Aꞌnáj tɨnaꞌaj nu tyeꞌtyóotziꞌreꞌej naꞌmej ɨ Tavástaraꞌ, nye tyenyij nu jɨn aꞌnáj tɨnaꞌaj jimi tyiꞌchuíicaj naꞌmej. 
Nyáaj nu áꞌnyatzaahuatyeꞌ ɨ Tavástaraꞌ jimi, ¡xáanamuajriꞌ siajta huatóotyamuaꞌveꞌen, tyétyacaa siaj quee óotzaahuatyeꞌ! 
Tyicheꞌ néijmiꞌi jimi tyuꞌtáchuiicaj tyajta séej tyanaꞌaj aꞌhuatanyúucarityeꞌen aꞌɨ́jcɨ jɨmeꞌ ɨ tɨ vaꞌcán jɨn tyiꞌtyéjvee ɨ tɨ jɨn ántyapuaj ɨ Tavástaraꞌ. 
Tavástaraꞌ nu jimi jaatáhuoj tɨꞌij naatáhuɨɨreꞌen, aꞌɨ́ɨ puꞌij náanamuajriꞌ, ajta jeꞌen nyaj japua huatanyúj aꞌɨ́jcɨ jɨmeꞌ nyej nyáaj tyíꞌtzɨɨnyaꞌcaꞌaj, 
Aꞌɨ́ɨmaj ɨ maj jahuoo ɨ Tavástaraꞌ jimi aꞌɨ́ɨ mu nyéeriꞌisteꞌ séeriaꞌaj muáꞌjuꞌun aꞌɨ́jcɨ jɨmeꞌ ɨ maj jutyamuaꞌveꞌ majta jeꞌen quee aꞌnáj huatóotyeviꞌraꞌastaj. 
Aꞌíi pu huajíjhuacaꞌ ɨ tɨ quee jeꞌej tyéejviicueꞌ, Tavástaraꞌ puꞌij jáanamuajriꞌ ajta néijmiꞌi jɨn japuan huatanyúj ɨ tɨ jɨn jeꞌej tyóomuaꞌajcaa. 
Aꞌɨ́jna ɨ tajapuá tɨ tyíꞌhuɨɨreꞌ ɨ Tavástaraꞌ jimi aꞌɨ́ɨ pu huáꞌchaꞌɨj ajta huaꞌ japua huatányuusij aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj ɨ Tavástaraꞌ. 
Siataꞌaj jaatyéesej, siajta jeꞌen jáamuaꞌreej tɨ néijmiꞌi jɨn tyámuaꞌ een ɨ Tavástaraꞌ. ¡Cheꞌ huatóotyamuaꞌveꞌen aꞌɨ́jna ɨ tyáatɨꞌ tɨ aꞌɨ́j jitze tyíꞌcaꞌnyej! 
Siataꞌaj jaatyátzaahuatyeꞌen ɨ Tavástaraꞌ, néijmiꞌi ɨ maj jimi tyámuaꞌ een, jiꞌnye capu tyiꞌtɨ́j huoꞌtyaꞌɨtziityeꞌej aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj. 
Aꞌɨ́ɨmaj ɨ chíjtyaanyiꞌij aꞌɨ́ɨ mu pueꞌéenyeꞌej muáꞌjuꞌun ɨ maj quee jeꞌej tyéejviicueꞌ, majta jajpuéetzij muáꞌjuꞌun matɨꞌɨj huatatájcun, majta aꞌɨ́ɨmaj ɨ maj jahuoo ɨ Tavástaraꞌ jimi capu aꞌnáj tyiꞌtɨ́j huáꞌɨtziityaꞌaj jaꞌmej. 
Musioꞌváꞌjuꞌ, nyiyóojmuaꞌ, siataꞌaj náanamuaj: aꞌɨ́j nu jáꞌmuamuaꞌtyen siaj sij tzáahuatyiꞌraꞌaj jimi tyíchaꞌɨj ɨ Tavástaraꞌ. 
¿Nyi páaxɨeꞌveꞌ paj jéehua áꞌtyeeviꞌin? ¿Nyi páaxɨeꞌveꞌ paj jaxáahuaj chajca? 
Pataꞌaj jaatapuáꞌcɨtaj tɨꞌij muaꞌ nyanúu quee jeꞌej puaꞌaj tyíꞌxaxaꞌtaꞌan, ajta tɨꞌij muaꞌ tyenyij quee aꞌnáj tyíꞌhueꞌtaj. 
Ajtáraꞌ aꞌɨ́jcɨ jitze ɨ tɨ jeꞌej puaꞌaj een, pajta jeꞌen tyámuaꞌ huárɨnyij, aꞌɨ́j paj huáhuoonyij ɨ tɨ naa muaꞌaxcaj, pajta jeꞌen aꞌɨ́j jitze ucájrutyej. 
Tavástaraꞌ pu huáꞌchaꞌɨj aꞌɨ́ɨjma ɨ tyétyacaa maj tyámuaꞌ een ajta huáꞌnamuaj jeꞌej maj aꞌɨ́ɨmaj tyityeetyényuusij. 
Tavástaraꞌ pu huaꞌajchaꞌɨɨreꞌ aꞌɨ́ɨjma ɨ maj jeꞌej puaꞌaj tyityetyúuchaꞌɨj, aꞌɨ́j pu jɨn huaꞌantyipuaꞌrityeꞌsij mej mij quee cheꞌ huaꞌtamuáꞌreꞌrihuaꞌan ɨ cháanacaj japua. 
Tavástaraꞌ pu janamuaj aꞌɨ́jcɨ ɨ tyáataj tɨ tyámuaꞌ tyiꞌtyúuchaꞌɨj, ajta néijmiꞌi jɨn japuan huatányuusij tyiꞌtɨ́j tɨ jɨn jeꞌej tyóomuaꞌajcaj. 
Tavástaraꞌ pu véjriꞌ séejreꞌ, tɨꞌij huaꞌ japua huatányuunyij aꞌɨ́ɨjma ɨ maj quee jeꞌej tyéejtyoovej ɨ juxɨéjnyuꞌcaa tzajtaꞌ majta meríj yoꞌrɨej ɨ maj jitzán tyiꞌijchóꞌvaꞌcaꞌaj. 
Aꞌɨ́jna ɨ tyáatɨꞌ tɨ tyámuaꞌ tyiꞌtyúuchaꞌɨj jéehua pu tyiꞌtɨ́j jɨn japuéjtzitaren, ajta aꞌɨ́jna ɨ Tavástaraꞌ aꞌɨ́ɨ pu néijmiꞌi jɨn japuan huatányuusij. 
Aꞌɨ́ɨ pu néijmiꞌi ɨ caríiraꞌ chaꞌɨj, camu mij séej antyínaꞌcaj. 
Aꞌɨ́ɨmaj ɨ maj jeꞌej puaꞌaj tyityetyúuchaꞌɨj aꞌɨ́j mu jɨn cuiꞌnyij ɨ maj jɨn jeꞌej puaꞌaj rɨcɨj, majta aꞌɨ́ɨmaj mu japuéjtzitaren ɨ maj jájchaꞌɨɨreꞌ aꞌɨ́jcɨ ɨ tyáataj tɨ tyámuaꞌ tyiꞌtyúuchaꞌɨj. 
Ajta aꞌɨ́jna ɨ Tavástaraꞌ aꞌɨ́ɨ pu huaꞌ japua huatányuusij aꞌɨ́ɨjma ɨ maj jimi tyíꞌhuɨɨreꞌ, ¡camu aꞌyan tyaꞌajpuéjtzij muáꞌjuꞌun aꞌɨ́ɨmaj ɨ maj jitzán tyíꞌcaꞌnyej! 
