﻿នាវ​តឹម​មពើល.
18.
ឞើស​កើយ​នៃ គ៝ប់​ឆៃ​ទូ​ហ្វេ​តោង​ពារ់​អី​ជុរ​ឞើស​កាលើ​ត្រោក​នតុក​កោរាញ​ឞ្រាស​នើម តោង​ពារ់​អី​នៃ​គែស​នាវ​ទើយ​ហោ​ងាន់ ជេសរី​នាវ​ច្រេក​លើប​ពាង់​អាង​លាម​នែស​នតូ​ងាន់។ 
ពាង់​នតែរ​ទុត​នតែស៖ “ប៝ន​បាបីលោន ​អី​ទុត​ក្វ៝ង់​លែៈ​រាល៝ម់​ងាន់​ជេស! ពាង់​លែៈ​រាល៝ម់​ងាន់​ជេស! ប៝ន​អី​អ្យា​លែៈ​ជេង​នតុក​គុ​ផូង​ឞ្រាស​អ្យើស‌ ជេង​នតុក​ឞ្រោៈ​រាឆ៝ង​អាប់​នតីល​ឞ្រាស​បឹ​បើច‌ នទ្រែល​មា​លែៈ​ជេង​រាឆ្វាន់​អាប់​នតីល​ឆ្យុម​នារ​អី​មោ​ក្ល៝ស​អី​បឹ​បើច‌ 
យ៝រ​លាស​ប៝ន​អី​នៃ​លែវ​ទឹង​លែៈ​ឞូនុយ្ស​ទឹង​លែៈ​ឞ្រី​ទាក​ជាន​អ្យើស​ជាន​តឹង​នាវ​ខើស​ក្លែរ នាវ​តឹម​ទ៝ង់​ពាង់‌ តឹម​ឞាន​មា​ឞូ​ញេត​នទ្រាញ់​ព្លៃ​យុងយារ​ប៝ន​ត៝ត់​ញុល។ ផូង​កាដាច់​តា​នែស​នតូ​លែៈ​ជាន​តឹង​ប៝ន​អី​នៃ តឹម​ឞាន​មា​លែៈ​ជាន​នាវ​ខើស​ក្លែរ​ទាទេ​ដ៝ង់។ ជេសរី​ទឹង​លែៈ​ផូង​តាច់​រាគ៝ល់​នទើ​តា​នែស​នតូ​ទឹង​គែស​ទ្រាប់​នទើ​នទ្រ៝ង់​ក្វ៝ង់ យ៝រ​មា​នាវ​គុ​រេស​ទុត​ខ្លៃ​ទុត​អ្វែស​តា​ប៝ន​អ្យា”។ 
ជេសរី​គ៝ប់​តាង់​នតែស​ឞ៝រ់​ជឹត​តាៈ​ឞើស​កាលើ​ត្រោក៖ “អើ​ផូង​ប៝ន​លាន​គ៝ប់​នើម! អ៝ន់​លែវ​ឞាល់​លោស​ហ៝ម់​ឞើស​ប៝ន​អ្យា‌ គៃ​មា​លើយ​អោស​គែស​នាវ​តីស​នទ្រែល​ខាន់​ពាង់‌ ក្លាច​លាស​គែស​នាវ​ជេរ នទ្រែល​ខាន់​ពាង់។ 
យ៝រ​លាស​នាវ​តីស​ខាន់​ពាង់​ទុត​អ៝ក់​តឹម​ឞាន​មា​លែៈ​មពឺម​ត៝ត់​អា​ត្រោក‌ អាបៃ​អ្យា​កោរាញ​ឞ្រាស​កាស​គឹត​មា​នាវ​ខាន់​ពាង់​ជាន​អ្យើស។ 
អ៝ន់​ព្លើង​មា​ខាន់​ពាង់​តឹម​ទី​ដាស​នទើ​ខាន់​ពាង់​លែៈ​ជាន​មា​ឞូ​នើស‌ ព្លើង​មា​ខាន់​ពាង់​ង្វាយ​ជេង​ឞារ នទើ​ខាន់​ពាង់​លែៈ​ជាន​ជេរ​មា​ឞូ ព្លើង​មា​ខាន់​ពាង់​ង្វាយ​ជេង​ឞារ‌ តឹម​ឞាន​មា​អ៝ន់​ខាន់​ពាង់​ញេត​ទូ​កាច៝ក​នទ្រាញ់​ជេង​ឞារ​ឞើស​អី​ខាន់​ពាង់​អ៝ន់​មា​ឞូ។ 
ឞូនុយ្ស​តា​ប៝ន​អ្យា​រានេ​អេង​ឆាក់​ខាន់​ពាង់​នើម គុ​រេស​ទុត​អ្វែស‌ លាស​នទ្រី​អ៝ន់​ខាន់​ពាង់​ទើន​នាវ​រេស​រាញាល់ នអ៝ប់​មា​នាវ​ញុម​រាង៝ត​ហោ​កើត​នៃ​ដ៝ង់។ យ៝រ​លាស​ខាន់​ពាង់​លាស​អេង​តា​នូយ្ស​នហ៝ម់៖ «គ៝ប់​គុ​រេស​តឹម​ឞាន​មា​កាដាច់​ឞូ​អូរ‌ មោ​អោស​ជេង​តឹម​ឞាន​មា​ឞូ​អូរ​នទ្រោ មោ​ដ៝ង់​គែស​នាវ​ញុម​រាង៝ត!» 
លាស​នទ្រី​ទឹង​លែៈ​នាវ​រេស​រាញាល់​តា​ប៝ន​អ្យា​គែស​ទូ​នារ​ទើម‌ ឞូនុយ្ស​តា​ប៝ន​គែស​នាវ​ខឹត គែស​នាវ​ញុម​រាង៝ត គែស​នាវ​ជី​ឆ៝ត់​ជី​ង៝ត‌ ជេសរី​គែស​នាវ​អុញ​ឆា‌ យ៝រ​លាស​កោរាញ​ឞ្រាស​អី​តេៈ​ទោយ្ស​ប៝ន​អ្យា​គែស​នាវ​ទើយ​ងាន់”។ 
ផូង​កាដាច់​តា​នែស​នតូ​អ្យា​អី​លែៈ​តឹង​ជាន​នទើ​បឹ​បើច នាវ​តឹម​ទ៝ង់​ខើស​ក្លែរ​តឹង​កើត​ឞូនុយ្ស​តា​ប៝ន​អី​នៃ នអ៝ប់​មា​លែៈ​គុ​រេស​ទុត​នទ្រ៝ង់​ទុត​រាម់​មអាក​កើត​ខាន់​ពាង់​ដ៝ង់ នោក​ខាន់​ពាង់​ឆៃ​ញហូក​អុញ​ឆា​ប៝ន​អី​នៃ ខាន់​ពាង់​មរា​ញុម​រាង៝ត​ងាន់​រ៝។ 
ទឹង​លែៈ​កាដាច់​អី​នៃ​មរា​គុ​ឞើស​ងាយ ក្លាច​ញឆ៝រ់​នាវ​រេស​រាញាល់​ឞូនុយ្ស​តា​ប៝ន​អី​នៃ ខាន់​ពាង់​លាស៖ “រេស​រាញាល់​ងាន់! រេស​រាញាល់​ងាន់! អើ​ប៝ន​បាបីលោន ​អី​ទុត​ក្វ៝ង់ អី​គែស​នាវ​ទើយ​ក្វ៝ង់‌ យ៝រ​លាស​នាវ​តេៈ​ទោយ្ស​មា​មៃ​តា​ទូ​ម៝ង​ទើម”។ 
ផូង​តាច់​រាគ៝ល់​នទើ​តា​នែស​នតូ​ញុម​នអ៝រ យ៝រ​លាស​មោ​ហោម​គែស​អោស​ឞូនុយ្ស​រាវាត់​ទ្រាប់​នទើ​ខាន់​ពាង់។ 
ទ្រាប់​នទើ​អី​នៃ គែស​មាយ្ស គែស​ព្រាក់ គែស​លុ​ខ្លៃ លុ​ពិច​(លុ​គ្ល៝) គែស​ឞ៝ក​ងលាង​អ្វែស ឞ៝ក​ឆូត ឞ៝ក​ហូល ឞ៝ក​គុរ គែស​អាប់​នតីល​តើម​ឆី​បោ​កាស គែស​អាប់​នតីល​នទើ​ជាន​មា​លា គែស​អាប់​នតីល​នទើ​ជាន​មា​តើម​ឆី​ខ្លៃ នទើ​ជាន​មា​កោង នទើ​ជាន​មា​ល៝យ្ស នទ្រែល​មា​នទើ​ជាន​មា​លុ​អី​អ្វែស‌ 
ងខ៝ប​ឆី​បោ​កាស នអ៝ប់​មា​នទើ​កាស​អេងៗ​មា​តេៈ​ត្រាវ នទើ​បោ​កាស​មា​ឆូ នតាក់​ឆី​បោ​កាស​រាញា​មឹរ  នតាក់​ឆី​បោ​កាស​មា​ឆូ នទ្រាញ់​ព្លៃ​យុងយារ​ប៝ន ទាក​ងី​អោលីវ  រានីស​ឞា​ព្រាង់ ​ទុត​អ្វែស ឞា​ព្រាង់  នទ្រោក ឞែ​ឞ្យាប់ ឆែស រាទែស​ឆែស នអ៝ប់​មា​ឞូនុយ្ស​គៃ​មា​ជាន​ទឹក​ឞូ។ 
ផូង​អី​នៃ​លាស​មា​ឞូនុយ្ស​តា​ប៝ន​បាបីលោន ៖ “ទឹង​លែៈ​ព្លៃ​អី​ខាន់​អៃ​មៃ​អុច​គែស​ហោ​ងាន់ រ៝ស​លែៈ​ផ្យៅ។ ទឹង​លែៈ​នទើ​គែស​នាវ​ខ្លៃ‌ ទឹង​លែៈ​នទើ​មា​ងក្រឹ​រ៝ស​លែៈ​ផ្យៅ‌ មោ​ហោម​អោស​គែស​ឞូនុយ្ស​ជ៝យ​ឆៃ​ជឹត”។ 
ទឹង​លែៈ​ផូង​តាច់​រាគ៝ល់​អី​នៃ អី​ជេង​នទ្រ៝ង់​តាៈ​ឞើស​ប៝ន​អី​នៃ ខាន់​ពាង់​មរា​គុ​ឞើស​ងាយ​ក្លាច​ញឆ៝រ់​ងាន់​មា​នាវ​រេស​រាញាល់​ប៝ន​អី​នៃ ខាន់​ពាង់​លែវ​ឞាល់​ញុម​រាង៝ត 
លាស៖ “រេស​រាញាល់​ងាន់! រេស​រាញាល់​ងាន់! អើ​ផូង​ឞូនុយ្ស​តា​ប៝ន​អី​ទុត​ក្វ៝ង់‌ គែស​ឞ៝ក​ងគូត​អាវ​ញឆ៝ស​ឞ៝ក​អី​ខ្លៃៗ​ងាន់‌ ឞ៝ក​ឆូត ឞ៝ក​គុរ‌ នទ្រែល​មា​ងក្រឹ​ឆាក់​មា​មាយ្ស‌ មា​លុ​ខ្លៃ មា​លុ​ពិច​(លុ​គ្ល៝) 
ទឹង​លែៈ​ទ្រាប់​នទើ​ទុត​អ៝ក់​អ្យា​រ៝ស​ហេង​លែៈ​តា​ទូ​ម៝ង​ទើម!” មពោល​អី​បើក​ទូក​ក្វ៝ង់ មពោល​អី​ញច៝​តា​កាលើ​ទូក​ក្វ៝ង់ នទ្រែល​មា​ទឹង​លែៈ​មពោល​អី​ជាន​ការ​តា​កាលើ​ទូក​ក្វ៝ង់​នៃ​មរា​លែវ​ឞាល់​គុ​ឞើស​ងាយ។ 
នោក​ខាន់​ពាង់​ឆៃ​ញហូក​អុញ​លោស​ឞើស​ប៝ន​នៃ ខាន់​ពាង់​នតែរ​ទ្រើវ៖ “មោ​អោស​វៃ​គែស​ប៝ន​ក្វ៝ង់​រាលាវ​មា​ប៝ន​អី​នៃ!” 
ខាន់​ពាង់​ក្វាក​នែស​មោយ​ឆូយ​តា​ឞោក​ខាន់​ពាង់​នើម គៃ​មា​ញហើ​នាវ​ខាន់​ពាង់​រាង៝ត ញុម​វើល​នអ៝រ​ទុត​ហោ​ងាន់ នអ៝ប់​មា​លាស៖ “រេស​រាញាល់​ងាន់! រេស​រាញាល់​ងាន់​តា​ប៝ន​អី​ទុត​ក្វ៝ង់​អី​នៃ។ តាៈ​ឞើស​ប៝ន​អី​នៃ​ទឹង​លែៈ​ឞូនុយ្ស​អី​គែស​ទូក​ក្វ៝ង់ ជេង​នទ្រ៝ង់​តាៈ​ឞើស​ទ្រាប់​នទើ​អ៝ក់​ប៝ន​នៃ។ តា​ទូ​ម៝ង​ទើម​ប៝ន​នៃ​រ៝ស​ហេង​រាងាត់! 
អើ​ផូង​អី​គុ​តា​កាលើ​ត្រោក​នតុក​កោរាញ​ឞ្រាស​នើម‌ ផូង​ប៝ន​លាន​កោរាញ​ឞ្រាស មពោល​កោរាញ​អ៝ស​ម៝ន នទ្រែល​មា​មពោល​ឞូនុយ្ស​នតើយ្ស​នាវ​ងើយ​កោរាញ​ឞ្រាស អ៝ន់​ខាន់​អៃ​មៃ​រាម់​មអាក​ទោ‌ យ៝រ​មា​កោរាញ​ឞ្រាស​លែៈ​ផាត​ទោយ្ស​អ៝ន់​មា​ខាន់​អៃ​មៃ លែៈ​តេៈ​ទោយ្ស​ជេស​មា​ផូង​ឞូនុយ្ស​តា​ប៝ន​អ្យា”។ 
ឞើស​កើយ​នៃ​គែស​ទូ​ហ្វេ​តោង​ពារ់​អី​ទុត​គែស​នាវ​ទាង់​ពឺ​ទូ​មល៝ម់​លុ​ក្វ៝ង់​អី​ក្វ៝ង់​រាលាវ​មា​មពាល់​ន៝ង់​ងក្លាច់​អា​ទាក​វាច់​ទាក​វារ់ នហ៝​មា​លាស៖ “ប៝ន​បាបីលោន ​អី​ទុត​ក្វ៝ង់‌ ឞូ​មរា​ងគ្រ៝ស​លើយ​លែៈ​ផ្យៅ​កើត​លុ​អី​អ្យា​ដ៝ង់។ ឞូ​ជ៝យ​ប៝ន​អី​នៃ​មោ​ហោម​ឆៃ​ជឹត​អោស។ 
តា​ប៝ន​អី​នៃ​មោ​ហោម​អោស​គែស​ឞូនុយ្ស រ៝ស​រាងាត់​មោ​ហោម​នតែស​ដែ​រែ​ងក្វៃ‌ ឞូ​មោ​ហោម​អោស​តាង់​នាវ​ឞូ​ងក្រេស​គ៝ង​រេង នាវ​ឞូ​មព្រ៝ត់​មព្រើ នាវ​ឞូ​អោស​មឞ្វាត់ នាវ​ឞូ​អោស​នុង​តា​នតុក​ប៝ន​អី​នៃ។ ទឹង​លែៈ​ឞូនុយ្ស​អី​ឞ្លាវ​ជាន​ការ​អាប់​នតីល ឞូ​មោ​ហោម​អោស​ឆៃ​តា​នតុក​ប៝ន​អី​នៃ។ នតែស​ពែស​តា​នតុក​ប៝ន​អី​នៃ‌ ឞូ​មោ​ហោម​តាង់​ដ៝ង់។ 
មោ​ហោម​គែស​អោស អាង​អុញ​ឆាគេង​តា​នតុក​ប៝ន​អី​នៃ‌ នតែស​រាម់​មអាក​មា​អូរ​ឆាយ​មហែ មោ​ហោម​គែស​ដ៝ង់។ ឞូនុយ្ស​តាច់​រាគ៝ល់​នទើ​តា​នតុក​ប៝ន​អី​នៃ​វៃ​ជេង​ឞូនុយ្ស​ទុត​ក្វ៝ង់​តា​នែស​នតូ​អ្យា‌ នាវ​ជាន​នអាង​ប៝ន​អី​នៃ រាលាម់​ទឹង​លែៈ​ឞូនុយ្ស​ទឹង​លែៈ​ឞ្រី​ទាក​លែវ​ជាន​នទើ​អ្យើស។ 
ឞូនុយ្ស​តា​ប៝ន​អី​នៃ​គែស​ទោយ្ស​ងខឹត​ញចាយ​មហាម​ឞូនុយ្ស​នតើយ្ស​នាវ​ងើយ​កោរាញ​ឞ្រាស នអ៝ប់​មា​គែស​ទោយ្ស​ងខឹត​ញចាយ​មហាម​ផូង​ប៝ន​លាន​កោរាញ​ឞ្រាស។ ឞូនុយ្ស​តា​ប៝ន​អី​នៃ​គែស​ទោយ្ស​ងខឹត​ញចាយ​មហាម​ទឹង​លែៈ​ឞូនុយ្ស​អី​ឞូ​ទែ​ងខឹត​លើយ​លាម​នែស​នតូ”។ 
